སྐྱབས་ཀྱི་ཐུགས་རྗེ་དང་རང་གཞན་ཆོས་ལ་བསྐུལ་བའི་མགུར།

སྐྱབས་ཀྱི་ཐུགས་རྗེ་དང་རང་གཞན་ཆོས་ལ་བསྐུལ་བའི་མགུར་བཞུགས།

ན་མོ་གུ་རུ་མཉྫུ་གྷོ་ཥཱ་ཡ། སྐུ་རབ་མཛེས་མཚན་དཔེའི་དཔལ་གྱིས་ སྤྲས། །གསུང་ཆོས་ཕུང་བརྒྱད་ཁྲི་སྒྲོགས་པ་ཅན། །ཐུགས་ཤེས་བྱ་མ་ལུས་མངོན་གཟིགས་པ། །སྐྱབས་ཟླ་མེད་སྟོན་པ་དེ་ལ་འདུད། །མགོན་ཁྱོད་ཀྱིས་དང་པོར་ཐུགས་བསྐྱེད་དེ། །བར་གྲངས་མེད་གསུམ་དུ་ཚོགས་གཉིས་བ སགས། །མཐར་མངོན་པར་རྫོགས་པར་སངས་རྒྱས་ནས། །ཆོས་ཟབ་རྒྱས་འཁོར་ལོ་རྣམ་གསུམ་བསྐོར། །ཐུགས་ཆགས་སྡང་ཉེ་རིང་མི་མངའ་ཡང་། །ཁོང་གདུལ་བྱ་མཆོག་དམན་བར་མ་ལ། །ཐེག་གསུམ་གྱི་ཆོས་ཚུལ་ལེགས་བསྟན་ནས། །ངེས་ལེགས་ཀྱི་བྱང་ཆུབ་གསུམ་ལ་བཀོད། །དུས་གསུམ་གྱི་རྒྱལ་བ་གཞན་དག་གིས། །འདུལ་མ་ནུས་རིང་དུ་སྤངས་པའི་འགྲོ །མགོན་ཁྱོད་ཀྱིས་བརྩེ་ཆེན་ཐབས་མཁས་ ཀྱིས། །འདུལ་མཛད་པ་འདི་ཉིད་ངོ་མཚར་རྨད། །ཞིང་འདི་སོགས་སྟོང་གསུམ་བྱེ་བ་བརྒྱར། །སྐུ་དེ་སྙེད་སྤྲུལ་ཏེ་དགའ་ལྡན་ནས། །འཕོ་སོགས་ཀྱི་བཅུ་གཉིས་མཛད་པའི་ཚུལ། །ཅིག་ཅར་དུ་མིག་འཕྲུལ་ལྟ་བུར་བསྟན། །ཚུལ་དེ་ཉིད་ཕྱོགས་དུས་གཅིག་མིན་པར། །ཕྱོགས་ཀུན་དང་འཇིག་རྟེན་ཇི་སྲིད་བར། །དུས་རྒྱུན་ཆད་མེད་པར་སྟོན་མཛད་པའི། །འཕྲུལ་དེ་ཀོ་གཞན་གྱིས་བསམ་ལས་འདས། ། སྐྱབས་ཁྱོད་ལ་སྐྱེ་འཆི་མི་མངའ་ཡང་། །དུས་ཐ་མའི་གདུལ་བྱ་རྟག་འཛིན་ཅན། ། མི་རྟག་པའི་ཆོས་ལ་བསྐུལ་བའི་ཆེད། །སྐུ་ཞི་བའི་དབྱིངས་སུ་ཞུགས་ཚུལ་ བསྟན། །ད་སྐལ་དམན་བདག་ཅག་མགོན་ཁྱོད་སྐུ། །མངོན་སུམ་དུ་མཇལ་བའི་སྐལ་ཆད་པས། །ལོང་འཁྲིད་དང་བྲལ་བའི་དམུས་ལོང་བཞིན། །ངན་སོང་གི་གཡང་ཁར་བརྡེག་འཆའ་བྱེད། །དེ་ཡིན་ཀྱང་ཐུགས་རྗེའི་གཏེར་ཁྱོད་ཀྱིས། །སྡུག་བསྔལ་ཅན་དམན་པའི་འགྲོ་རྣམས་ལ། །ལྷག་པར་དུ་བརྩེར་དགོངས་རྗེས་འཛིན་པའི། །ཐུགས་བསྐྱེད་ཕྱིར་བདག་ཅག་ག་ལ་འདོར། །དེང་གསང་བདེ་དགྱེས་རྡོར་དུས་འཁོར་དང་། །ཀུན་རིག་སོགས་དཀྱིལ་འཁོར་དུ་མའི་གཙོ། །འདི་ཀུན་ཀྱང་གཞན་མིན་ཁྱོད་ཉིད་དེ། །གཅིག་མ་ཡིན་དུ་མའི་རྣམ་པར་བསྟན། །མགོན་ཁྱོད་ཀྱི་བསྟན་ལ་རྗེས་ཞུགས་ཀྱང་། །སྡོམ་གསུམ་གྱི་སྲུང་བ་ཕྲ་མོ་འགའ། །བཀའ་ཇི་བཞིན་སྒྲུབ་པར་མ་ནུས་པས། །ཉེས་ལྟུང་གི་འདམ་དུ་བྱིང་བར་གྱུར། །དོན་དེ་སླད་ཁྱོད་ཀྱི་བསྟན་པ་ལ། །ཞུགས་བདག་དང་བདག་འདྲའི་སྐྱེས་བུ་རྣམས་། ཁེ་མི་ཐོབ་གྱོང་ཞིག་འབྱུང་སྙམ་ཡང་། །དེ་ཁྱོད་མིན་བདག་ཅག་སྐྱོན་ཉིད་ ལགས། །སྔོན་དུས་སུ་ཁྱོད་ཀྱིས་ཚིགས་བཅད་ཙམ། །བསྟན་མོད་ལས་གྲོལ་བ་མང་མཆིས་ཀྱང་། །ད་འབད་ཀྱང་སྨིན་གྲོལ་ཆེས་དཀའ་བ། །འདི་བདག་ཅག་ཙམ་མིན་དུས་ཀྱི་སྐྱོན། །གང་ལྟར་ཡང་ཁྱོད་ཀྱིས་ལེགས་བསྟན་པའི། །བླང་དོར་དང་འགལ་བའི་ཉེས་ལྟུང་ཀུན། །མགོན་ཁྱོད་ཀྱི་དྲུང་དུ་མཐོལ་བཤགས་ ཀྱིས། །ཉེས་ཚོགས་ཀུན་ཁྱོད་ཀྱིས་སྦྱང་དུ་གསོལ། །སྟོན་ཁྱོད་ཀྱི་རྗེས་འཇུག་ཕྲན་བདག་ཅག །ཐར་འདོད་ཀྱི་སྐྱེས་བུ་ཡིན་ནོ་སྐད། །དྲིན་ཆེ་མོད་གནས་སྐབས་འདོད་དོན་གཞན། །འབྱུང་བདེ་ཡང་ཁྱོན་ཀྱི་དྲིན་དུ་གསལ། །རང་ངོས་ནས་སྲེད་ཞེན་ཆུང་ངེས་ཀྱང་། །གཉེན་ཕྱོགས་དང་ཧ་ཅང་ཉེ་སྐྱོན་དང་། །ཡུལ་ཆོས་ཀྱིས་ཕྲལ་ཕུགས་དགོས་སྙམ་སྟེ། །དངོས་པོ་འགའ་མི་བཟུང་དབང་མེད་གྱུར། །དོན་དེ་ཕྱིར་གཞན་གྱིས་བྱིན་པ་དང་། །བདག་ཉིད་ཀྱི་ལུས་དང་ལོངས་སྤྱོད་དགེ །ཅི་མཆིས་པ་ཀུན་ཀྱང་མགོན་ཁྱོད་སོགས། །མཆོག་གསུམ་ལ་རྟག་ཏུ་གུས་འབུལ་བཞེས། །ཚུལ་དེ་སོགས་མང་དུ་གསོལ་མཆིས་ཀྱང་། །སྙན་མི་བཙོ་མདོར་ན་ཚེ་རབས་ཀུན། །མགོན་ཁྱོད་ཀྱིས་རྗེས་སུ་འཛིན་པ་དང་། །མདོ་སྔགས་ཀྱི་བསྟན་པ་རྒྱས་བྱེད་ཤོག །༈ རྒྱལ་ཀུན་གྱི་མཁྱེན་པའི་ཕུང་པོ་རྣམས། །གཅིག་བསྡུས་ཏེ་གཞོན་ནུའི་ཚུལ་འཛིན་པ། །རྗེ་རྒྱལ་བའི་ཡབ་གྱུར་འཇམ་པའི་དབྱངས། །མི་བདག་གི་སྙིང་གའི་དབུས་སུ་བཞུགས། །མགོན་དེ་ཉིད་སྙིགས་དུས་དམ་པའི་ཆོས། །ཀུན་འཛིན་ཕྱིར་ངུར་སྨྲིག་གར་རོལ་པ། །ཕ་རྒྱལ་བ་གཉིས་པ་བློ་བཟང་གྲགས། །བུ་བདག་གི་སྤྱི་བོར་རྟག་བཞུགས་གསོལ། །རྗེ་ཁྱོད་ཀྱིས་ཐུབ་བསྟན་ཡོངས་རྫོགས་པར། །བཟུང་སྤེལ་བའི་ཚུལ་འདིར་འཛམ་གླིང་གི །རྒྱན་དྲུག་སོགས་འགྲན་པར་མི་སྤྱོད་ན། །མཁས་གཞན་གྱིས་འགྲན་བཟོད་ག་ལ་ནུས། །སྙིགས་དུས་འདིར་རྒྱལ་བ་ཉིད་བྱོན་ཀྱང་། །མགོན་ཁྱོད་ཀྱིས་བསྟན་འགྲོའི་དོན་མཛད་དང་། ། མཚུངས་མཉམ་པའང་འབྱུང་བར་མི་འགྱུར་ན། །ཆེས་ལྷག་པར་འགྱུར་པ་ག་ལ་ཞིག །དཔལ་ཨིནྡྲ་བྷོ་དྷི་ས་ར་ཧ། །ཁོང་ལཱུ་དྲིལ་ཞབས་སོགས་གྲུབ་ཆེན་ དང་། །རྗེ་ཤིང་རྟ་ཆེན་པོ་རྣམ་གཉིས་སོགས། །མཁས་གྲུབ་པའི་ཞལ་མང ་ཁྱོད་ཀྱིས་གཟིགས། །དེར་མ་ཟད་ཡི་དམ་ལྷ་ཚོགས་ཀྱི། །ཞལ་མངོན་གཟིགས་གསུང་གི་སྣང་བ་མཆོག །མངོན་སུམ་དུ་ཐོས་ཀྱིས་ཕྲན་བདག་ཅག །རྨི་ལམ་ལས་མངོན་སུམ་སྐལ་མ་མཆིས། །མགོན་ཁྱོད་ཀྱིས་ལས་འབྲས་ཕྲ་རགས་ཀུན། །ཚུལ་བཞིན་དུ་གཟིགས་ནས་བླང་དོར་མཛད། །ཕྲན་བདག་ཅག་དེ་ལྟར་མ་ནུས་པའི། །ཉེས་པ་ཀུན་ཁྱོད་ཀྱིས་སྦྱང་དུ་གསོལ། །རྗེ་ཁྱོད་ཀྱིས་འཁོར་བའི་ཕུན་ཚོགས་ ཀུན། །དོན་ཆུང་གཟིགས་སྲེད་ཞེན་དང་བྲལ་གྱིས། །འབངས་བདག་ཅག་དེ་ཉིད་དོན་གཉེར་བའི། །ཉེས་པ་ཀུན་ཁྱོན་ཀྱིས་སྦྱང་དུ་གསོལ། །ཕ་ཁྱོད་ཀྱིས་བྱང་ཆུབ་ཐུགས་བསྐྱེད་དེ། །བྱམས་སྙིང་རྗེས་གཞན་དོན་མཛད་ལགས་ཀྱིས། །སྲས་བདག་ཅག་རང་དོན་གཙོར་སྒྲུབ་པའི། །ཉེས་པ་ཀུན་ཁྱོད་ཀྱིས་སྦྱང་དུ་ གསོལ། །རྗེ་ཁྱོད་ཀྱིས་ཕྱིན་དྲུག་བསྡུ་བཞི་དང་། །བསླབ་གསུམ་དང་ཞི་ལྷག་སྒྲུབ་ལགས་ཀྱིས། །ཕྲན་བདག་ཅག་ཉིད་ཀྱི་རྗེས་འབྲང་ནས། །ཚུལ་དེ་ཀུན་སྒྲུབ་པར་བྱིན་གྱིས་རློབས། ཕ་ཁྱོད་ཀྱིས་རྒྱུད་སྡེའི་དོན་རྣམས་དང་། །རིམ་གཉིས་ཀྱི་རྟོགས་པ་མཐར་ཕྱིན་མཛད། །བུ་བདག་ཅག་ཁྱོད་ལྟར་རིམ་གཉིས་ཀྱི། །རྣལ་འབྱོར་ལ་བརྩོན་པར་བྱིན་གྱིས་རློབས། །སྐྱབས་ཁྱོད་ཀྱིས་བསྟན་དང་གདུལ་བྱ་ཡི། །དོན་སྒྲུབ་པའི་མཛད་པ་མཐར་ཕྱིན་གྱིས། །དེ་བདག་ཅག་ཁྱོད་ལྟར་བསྟན་འགྲོ་ཡི། །དོན་ཚུལ་བཞིན་སྒྲུབ་པར་བྱིན་གྱིས་རློབས། །དེ་ལྟར་དུ་རྗེ་བཙུན་ཁྱོད་ཉིད་ཀྱིས། །མདོ་སྔགས་ཀྱི་ཉམས་ལེན་རྒྱ་མཚོ་ཀུན། །རྣམ་དཔྱོད་ཀྱི་ཁྱོར་བས་བཞེས་མཛད་དེ། །བདག་ཅག་ལ་ཆུ་ཐིགས་ཙམ་ཞིག་ལུས། །དེ་ཡིན་ཕྱིར་ཁྱོད་དང་ཕྲན་བདག་ཅག །ཉམས་ལེན་པ་དེ་འབྲས་མཚུངས་དཀའ་སྟེ། །མགོན་ཁྱོད་ཉིད་སྤྲུལ་པའི་སྐྱེས་ཆེན་དང་། །བདག་ཅག་ཀུན་སོ་སྐྱེ་དམན་པ་ལགས། །རྒྱལ་ཀུན་ཀྱི་གདུང་འཚོབ་རྗེ་བཙུན་ཁྱོད། །དུས་ད་ལྟ་དགའ་ལྡན་བཞུགས་གྲགས་པས། །རྗེས་འཇུག་གི་བུ་སློབ་མོས་གུས་ཅན། །བདག་ཅག་ཀྱང་དགའ་ལྡན་གནས་དེར་དྲོངས། །ཕྲན་བདག་གིས་འཕགས་པ་ཡབ་སྲས་ཀྱི། །ལུགས་ཇི་བཞིན་ཟབ་མོའི་གནད་དོན་དག །ཐོས་བསམ་གྱིས་ཐེ་ཚོམ་ཆོད་གྱུར་པ། །ཚུལ་དེ་ཉིད་ཁྱོད་ཀྱི་དྲིན་དུ་བསམ། །རྗེ་ཁྱོད་ཀྱི་གསུང་རབ་ཐམས་ཅད་དང་། །ལམ་རིམ་པ་གཉིས་འདི་མཇལ་ཙམ་གྱི། །མོད་ཉིད་ལས་ མགོན་པོ་ཁྱོད་དྲན་ཅིང་། ། རྩོལ་མེད་ཀྱི་མོས་གུས་རྟག་ཏུ་འབྱུང་། །དོན་དེ་ཕྱིར་བྱང ་ཆུབ་སྙིང་པོའི་བར། །རྗེ་ཁྱོད་ཀྱི་ཞབས་ཟུང་མི་གཏོང་བས། །ཐུགས་བརྩེ་བའི་དབྱངས་ནས་འབྲལ་མེད་ དུ། །གཟུང་མཛོད་ཅིག་རྗེ་བཙུན་བླ་མ་མཁྱེན།། །།༈ བདེ་ལྡན་གྱི་ཞིང་གཙོ་འོད་དཔག་མེད། །མགོན་ཁྱོད་ལ་རྟག་ཏུ་གསོལ་འདེབས་ཀྱིས། །ཕྲན་བདག་ཅག་ཁྱོད་ཀྱི་ཞིང་མཆོག་དེར། །འོངས་འདོད་ཀྱིས་ཐུགས་རྗེའི་ལྕགས་ཀྱུས་དྲོངས། །ཤར་མངོན་དགའི་ཞིང་གི་འདྲེན་པ་ མཆོག །རྗེ་རྒྱལ་བའི་དབང་པོ་མི་འཁྲུགས་པ། །ཁྱོད་ཞིང་དེར་བདག་ཅག་སྐྱེ་འདོད་ཀྱིས། །ཐུགས་བརྩེ་བས་བཟུང་བས་དེར་དྲོངས་ཤིག །དགའ་ལྡན་གྱི་ཞིང་གཙོ་བྱམས་པ་མགོན། །ཁྱོད་ཞབས་ཟུང་སྤྱི་བོར་རྟག་བསྟེན་གྱིས། །བུ་བདག་ཅག་ཤི་འཕོས་གྱུར་མ་ཐག །ཁྱོད་དྲུང་དེར་ངེས་པར་དྲོངས་ཤིག་ཀྱེ། །ཡབ་མཁྱེན་པའི་གཏེར་ཆེན་འཇམ་པའི་དབྱངས། །རྒྱལ་ཀུན་གྱི་དམ་ཆོས་ཁྱོད་བཟུང་ལྟར། །བདག་ཅག་ཀྱང་ཟབ་ཡངས་ཤེས་རབ་ཀྱིས། །རྗེ་རྒྱལ་བའི་དམ་ཆོས་ཀུན་འཛིན་ཤོག །སྐྱབས་ཐུགས་རྗེའི་བདག་ཉིད་སྤྱན་རས་གཟིགས། །མ་འགྲོ་ཀུན་ཁྱོད་ཀྱིས་རྗེས་སུ་བཟུང་། །བྱིས་བདག་ཀྱང་ཁྱོད་བཞིན་འགྲོ་བ་ཡི། །དོན་ཐམས་ཅད་ཚུལ་བཞིན་སྒྲུབ་ནུས་ཤོག །རྗེ་མཐུ་སྟོབས་བདག་པོ་རྡོ་རྗེ་འཛིན། །རྒྱལ་ཀུན་གྱི་གསང་སྔགས་ཁྱོད་བཟུང་ཞིང་། །གདུག་པ་ཅན་མཐའ་དག་འདུལ་མཛད་པའི། །སྤྱོད་དེ་བཞིན་བདག་ཀྱང་འགྱུར་བར་ཤོག །དཔལ་ཤིང་རྟ་ཆེན་པོ་ཀླུ་སྒྲུབ་ཞབས། །ཐུབ་བསྟན་ལ་ཐུབ་དབང་གཉིས་པ་བཞིན། །ངེས་དོན་གྱི་བསྟན་པ་འཛིན་པའི་གཙོ། །བུ་བདག་ཀྱང་ཁྱོད་ལྟར་འགྱུར་བར་ཤོག །རྗེ་རྒྱལ་སྲས་ཐོགས་མེད་སྐུ་མཆེད་ཀྱང་། །ཐུབ་བསྟན་ཉིད་གསལ་མཛད་སྐྱེས་ཆེན་སྟེ། ཕྲན་བདག་ཅག་ཁྱེད་བཞིན་རྒྱལ་ཀུན་གྱི། །དམ་པའི་ཆོས་མ་ལུས་འཛིན་ནུས་ཤོག ཁོང་རིག་པའི་དབང་ཕྱུག་ཆོས་ཀྱི་གྲགས། །སྨྲ་ངན་གྱི་མུ་སྟེགས་ཚར་གཅོད་མཁས། །ཕྲན་བདག་ཀྱང་རིགས་པ་སྨྲ་བ་ཡི། །ཁྱུ་མཆོག་གཙོ་ཁྱོད་བཞིན་འགྱུར་བར་ཤོག །དཔལ་ཨིནྡྲ་བྷོ་དྷི་ས་ར་ཧ། །ལཱུ་དྲིལ་ནག་ལཱ་ལིི་ཏ་སོགས་ནི། །གྲུབ་ཐོབ་ཆེ་དངོས་གྲུབ་མཆོག་བརྙེས་པ། །བདག་ཅག་ཀྱང་ཁྱོད་རྣམས་ལྟར་འགྱུར་ཤོག །ཚུལ་དེ་ལྟར་འདོད་མོད་རང་བདེ་ཙམ། །དོན་གཉེར་བ་དམན་པའི་བསམ་པ་སྟེ། །མ་འགྲོ་བའི་དོན་དུ་བྱ་དཀའ་བའི། །རླབས་ཆེན་གྱི་སྤྱོད་པ་ཀུན་སྒྲུབ་ ཤོག། །།༈ གནས་དགའ་ལྡན་ཆོས་ཀྱི་ཕོ་བྲང་ནས། །རྗེ་རྒྱལ་ཚབ་དམ་པ་མི་ཕམ་མགོན། །ཐུགས་བརྩེ་བའི་དབང་གིས་མྱུར་བྱོན་ནས། །མི་བདག་གི་སྤྱི་བོར་རྟག་བཞུགས་གསོལ། །མགོན་ཁྱོད་ཀྱི་གསུང་རབ་བྱམས་པའི་ཆོས། །སྡེ་ལྡ་རུ་གྲགས་འདི་འཛམ་གླིང་དུ། །དར་གྱུར་ནས་ཐུབ་བསྟན་གསལ་མཛད་པས། །རྒྱལ་ཚབ་ཏུ་གྱུར་པ་དོན་དང་བཅས། ཆེས་ལྷག་ཏུ་རྒྱལ་བའི་ཡུམ་གསུམ་གྱི། །དགོངས་འགྲེལ་མཆོག་མངོན་པར་རྟོགས་པའི་རྒྱན། །འདི་བློ་ལྡན་དོན་གཉེར་ཅན་རྣམས་ལ། །གསུང་རབ་ཀུན་ལྟ་བའི་མིག་ཏུ་གྱུར། །ཚུལ་འདི་ལ་རིང་དུ་སྦྱངས་པའི་མཐུས། །ཕྲན་བདག་གིས་རབ་འབྱམས་གཞུང་མང་དང་། །རྒྱལ་བའི་ཡུམ་ཕ་རོལ་ཕྱིན་པའི་དོན། །ཕྱོགས་ཙམ་ཞིག་མ་ཡིན་ལེགས་པར་ངེས། །དེ་ཡིན་པའི་འབྲས་རྟགས་ཤེར་ཕྱིན་གྱི། །དོན་ཟབ་གསལ་འགྲེལ་བའི་བསྟན་བཅོས་ འགའ། །བྱས་ཟིན་པ་ཕྱོགས་སུ་དར་གྱུར་ཏེ། །ཚུལ་དེ་ཉིད་ཁྱོད་ཀྱི་དྲིན་དུ་ ཤེས། །ཚེ་འདི་ཕྱིའི་དོན་དུ་དབེན་པ་ཞིག །བསྟེན་འདོད་པ་སྔོན་ནས་ཡོད་གྱུར་ཀྱང་། །གྲྭ་ཚང་གཉིས་བཙུགས་པའི་ཐོག་མ་ཡི། །བླ་མ་རུ་བསྐོས་པས་འཆད་ཉན་གྱི། །བྱ་བ་རྣམས་སྒྲུབ་པའི་བྲེལ་པ་དང་། རང་གཞན་གྱི་དོན་དུ་ཆོས་ཚུལ་ གཞན། །འདོན་ཞུགས་ཏེ་ཕྱོགས་དང་ཕྱོགས་འཚམས་སུ། །རྒྱུག་བྱས་པའི་གཡེང་བས་དེ་མ་གྲུབ། དོན་དེ་ཕྱིར་རྣམ་ཐར་མཆོག་དཀའ་ཡང་། །ཐ་སྙད་ཀྱི་རིག་གནས་དུ་མ་དང་། །མདོ་སྔགས་ཀྱི་གཞུང་མང་ལ་སྦྱངས་ཏེ། །འཆད་རྩོམ་གྱི་བྱ་བ་དུ་མ་བྱས། །ངན་སོང་གི་འཇིགས་པས་ཡིད་སྐྲག་སྟེ། །དུས་ཀུན་ཏུ་རང་གཞན་ཐམས་ཅད་ཀྱི། །སྡིག་སྒྲིབ་རྣམས་སྦྱོང་བའི་ཐབས་མང་ལ། །རབ་འབད་པའི་ངལ་བ་རིང་དུ་བསྟེན། །དེ་བྱས་ཀྱང་ཐོག་མེད་ནས་བསགས་པའི། །སྡིག་ལྟུང་གི་ཉེས་པ་གྲངས་མེད་ཕྱིར། །ཀུན་བྱང་ངམ་མ་བྱང་སོམ་ཉི་སྟེ། །གནས་ངན་འགྲོར་མར་སྐྱེའི་གདེངས་མ་རྙེད། །འཁོར་བ་ཀུན་སྡུག་བསྔལ་རང་བཞིན་དང་། །སྙིང་པོ་མཆོག་མེད་པར་ལེགས་རྟོགས་ནས། །ཡིད་འབྱུང་བའི་ཚུལ་ལ་རབ་འབད་ དེ། །ངེས་འབྱུང་གི་བློ་ཉིད་གོམས་པར་བྱས། །དེར་འབད་ཀྱང་ཚེ་འདིར་དགོས་སྙམ་པའི། །དངོས་པོ་འགའ་བཟུང་བའི་སྲེད་ཞེན་གྱིས། །ཐར་འདོད་ཀྱི་བློ་གྲོས་ཟླ་བའི་ངོས། །རི་བོང་གི་མཚན་མས་ཅུང་ཟད་སྤྲས། །བྱམས་སྙིང་རྗེ་ལྷག་བསམ་སེམས་བསྐྱེད་ཀྱི། །དམིགས་རྣམ་ལ་ཚིག་ཙམ་མ་ཡིན་པར། །དུས་རྒྱུན་དུ་གོམས་ཤིང་གཞན་ཀུན་ལ། །ཕན་འདོད་ཀྱི་བསྔོ་སྨོན་ཤུགས་དྲག་བྱས། །དེ་ཡིན་ཀྱང་རང་ཕྱོགས་གཉེན་དག་ལ། །མི་འདོད་བཞིན་དངོས་པོ་སྟེར་བ་དང་། འགྲོ་གཞན་ལ་དེ་ལྟར་མི་ནུས་པའི། །ཉེ་རིང་གིས་གཞན་ཕན་ཅུང་ཟད་ནོངས། །ཀླུ་སྒྲུབ་ཀྱི་ལུགས་ལྟར་བདག་མེད་པའི། །ངེས་དོན་གྱི་ཚུལ་ལ་ཐོས་བསམ་དང་། །ལུང་རིགས་ཀྱིས་ཡང་ཡང་ལེགས་དཔྱད་དེ། །ཟབ་དོན་ལ་ངེས་ཤེས་ལེགས་པར་དྲངས། །དེར་འབད་མོད་ཞི་ལྷག་རྗེས་མཐུན་ལས། །མཐར་ཕྱིན་པའི་བརྟན་པ་མ་ཐོབ་པས། །བྱིང་རྒོད་ཀྱི་བྲན་གྱུར་བསྒོམས་བྱུང་གི །རྟོགས་པ་མཆོག་ནམ་མཁའི་པདྨོར་འགྲན། །ཕྱིན་དྲུག་དང་བསླབ་གསུམ་བསྡུ་བཞི་སོགས། །གཞན་དག་ཀྱང་དངོས་དང་རྗེས་མཐུན་གཉིས། །ཅི་རིགས་སུ་སྒྲུབ་པ་མ་གཏོགས་པར། །ཀུན་མཚན་ཉིད་ཚང་བ་དཀའ་གནས་གྱུར། །རླབས་ཆེན་གྱི་སྤྱོད་ཀུན་སྒྲུབ་དཀའ་ཡང་། །ཁོང་རིགས་གསུམ་མགོན་པོའི་སྤྱོད་པ་བཞིན། །སློབ་འདོད་དེ་གཞན་གྱི་སྡུག་བསྔལ་ཀུན། །རང་ཐོག་ཏུ་ལེན་འདིར་རྒྱུན་ཏུ་འབད། །རང་འདོད་པའི་ཡི་དམ་ལྷ་མང་དང་། །རིམ་གཉིས་ཀྱི་རྣལ་འབྱོར་འགའ་ཞིག་ལ། །རབ་འབད་ཀྱང་བྱིན་རླབས་ཙམ་ཞིག་ལས། །དངོས་གྲུབ་མཆོག་ལྷ་ལམ་དབྱིངས་སུ་ཐལ། ། མདོར་བརྗོད་ན་བདག་ལ་ལུང་རྟོགས་ཀྱི། །ཡོན་ཏན་མཆོག་མེད་ཀྱང་འཆད་རྩོམ་གྱིས། །རྒྱལ་བསྟན་ལ་བྱ་བ་ཅུང་ཟད་བྱས། །ད་ཤི་ཡང་འགྱོད་པ་མེད་དམ་ སྙམ། །འདི་ཀུན་ཀྱང་རང་གི་སྐྱོན་ཡོན་གཉིས། །འདྲེས་མ་རུ་བྱས་ཏེ་དད་ལྡན་ངོར། །རྟོག་དཔྱོད་ཀྱི་ཆེད་དུ་བརྗོད་པ་སྟེ། །གཞན་དག་གིས་མཐོང་ན་མི་ཁྲེལ་ཞུ།། །།༈ སྐྱབས་ཀུན་གྱི་མཁྱེན་བརྩེ་ནུས་པ་རྣམས། །གཅིག་བསྡུས་པ་འཇམ་དབྱངས་སྤྱན་རས་གཟིགས། །དཔལ་ཕྱག་ན་རྡོ་རྗེ་ཞེས་གྲགས་པའི། །རིགས་གསུམ་གྱི་མགོན་པོ་སྤྱི་བོར་བཞུགས། །ཕྲན་བདག་གིས་རང་དགར་སྨྲས་པ་ ལ། །ཡིད་ཆེས་ཀྱི་གནས་སུ་བྱེད་དཀའ་ཡང་། །ཁོང་ཚད་ལྡན་དམ་པའི་གསུང་རབ་ལས། །འབྱུང་འགའ་ཞིག་འདིར་ནི་བརྗོད་པར་བྱ། །ལུས་མི་རྟག་དབུ་བ་བརྡོས་པ་བཞིན། །སྲོག་མི་རྟག་ནམ་མཁའི་གློག་ལྟ་བུ། །དབུགས་མི་རྟག་མཁའ་ཡི་ན་བུན་འདྲ། །སེམས་མི་རྟག་ལྕང་ཁའི་བྱེའུ་བཞིན། །ནོར་མི་རྟག་སྦྲང་རྩི་བསགས་ལྟ་བུ། །གྲོགས་མི་རྟག་ཚོང་འདུས་འགྲོན་པོ་འདྲ། །ནོར་བསགས་པའི་ཐ་མར་འཛད་པ་ཡིན། །གྲོགས་འདུས་པའི་ཐ་མར་འབྲལ་བ་ཡིན། །མཐོར་སོང་བའི་ཐ་མར་རྒུད་པ་ཡིན། །ལར་སྐྱེས་པའི་ཐ་མར་འཆི་བ་ཡིན། །དུས་མ་འོངས་རི་གླིང་ས་གཞི་དང་། །རྒྱ་མཚོ་ཀུན་མེ་ཆུ་རླུང་གསུམ་གྱིས། །འཇིག་འགྱུར་ཞིང་སྣོད་བཅུད་ཀུན་སྟོང་ན། །ཕྲན་ཚེགས་ཀྱི་དངོས་རྣམས་ལྟ་ཅི་སྨོས། །འདུས་བྱས་ཀུན་མི་རྟག་སྐྱེ་འཇིག་ལྡན། །དམྱལ་བ་རུ་ཚ་གྲང་སྡུག་བསྔལ་ཆེ། །ཡི་དྭགས་ན་བཀྲེས་སྐོམ་སྡུག་བསྔལ་མང་། དུད་འགྲོ་ལ་བཀོལ་སྤྱོད་སྡུག་བསྔལ་ཆེ། །མི་རྣམས་ནི་ན་འཆིའི་སྡུག་བསྔལ་མང་། །ལྷ་མ་ཡིན་འཐབ་རྩོད་འཇིགས་པ་ཆེ། །ལྷ་རྣམས་ནི་འཆི་འཕོའི་སྡུག་བསྔལ་ལྡན། །འཁོར་བ་ན་སྡུག་བསྔལ་བརྗོད་མི་ ལང་། །འཆི་བདུད་ནི་ཉི་རྒས་གྲིབ་སོ་བཞིན། །སྐད་ཅིག་ཀྱང་མི་སྡོད་ཚུར་ཚུར་འོང་། །ཤི་གྱུར་ན་གར་སྐྱེའི་གདེངས་མེད་པས། །ཕྱི་མ་རུ་ཕན་པའི་ཆོས་སྒྲུབས་ཤིག །རང་འཇིག་རྟེན་ཕ་རོལ་འགྲོ་བའི་དུས། །སྐྱབས་བླ་མ་དཀོན་མཆོག་གསུམ་པོ་དང་། །གྲོགས་དམ་པའི་ཆོས་རྣམས་མ་གཏོགས་པར། །གཞན་སུས་ཀྱང་ཕན་གྲོགས་འགྱུར་བ་མེད། །དོན་དེ་སླད་བླ་མ་དཀོན་མཆོག་ལ། །དུས་རྟགས་ཏུ་སྙིང་ནས་སྐྱབས་འགྲོ་ཞིང་། །ལས་དཀར་ནག་གཉིས་ལ་བླང་དོར་ གྱི། །ལག་ལེན་ཉིད་ཚུལ་བཞིན་བསྒྲུབ་དགོས་སོ། །ལས་གཉིས་ལ་ཕྱིན་ཅི་ལོག་ཞུགས་ན། །ལས་འབྲས་ཉིད་ཁྱད་དུ་བསད་པའི་ཕྱིར། །རྗེ་སངས་རྒྱས་ཀྱིས་ཀྱང་སྐྱོབ་དཀའ་ན། །གཞན་དག་གིས་སྐྱོབ་པར་ག་ལ་ནུས། །རྒྱུ་གྲོ་ནས་སྲན་སོགས་ས་བོན་ལས། །རང་རང་གི་འབྲས་བུ་མ་ནོར་བར། །འབྱུང་དེ་བཞིན་དཀར་ནག་ལས་གཉིས་ལས། །འབྲས་མ་ནོར་འབྱུང་གི་ནོར་ནས་མིན། །དོན་དེ་ཕྱིར་ལས་འབྲས་གཅེས་གཟུང་ཞིང་། །ཉེས་བྱས་ཀུན་བཤགས་ལ་འབད་པ་དང་། །སླན་ཆད་དུ་མི་བྱེད་དམ་བཅའ་བའི། །སྡོམ་འདོད་པའི་བསམ་པ་དྲག་པོ་བྱ། །ལས་ཉོན་མོངས་རྣམས་ལ་རྐང་ལག་སོགས། །ཡོད་མིན་ཀྱང་ཀུན་རྫོབ་རྟེན་འབྲེལ་གྱིས། །གནས་ངན་འགྲོ་འཁོར་བ་རྣམས་སུ་ནི། །དབང་མེད་དུ་ཅི་དགར་འཁྲིད་པར་བྱེད། །དཀར་ནག་གི་ལས་རྣམས་མཁས་མིན་ཀྱང་། །བདེ་འགྲོ་དང་ངན་འགྲོ་འདི་ཀུན་གྱི། །ལུས་ཕྱི་ནང་བཀོད་པའི་དབྱིབས་སྣ་ཚོགས། །འབྱུང་འདི་ཀོ་རྟེན་འབྲེལ་བསམ་མི་ཁྱབ། །ཚུལ་དེ་བཞིན་འགྲོ་བ་སྤྱི་མཐུན་དང་། །རང་སོ་སོའི་ལས་ཀྱི་མཐུ་ལས་ནི། །སྣོད་བཅུད་ཀྱི་བཀོད་པ་སྤྱི་དང་ནི། །བྱེ་བྲག་གི་ཁྱད་པར་སྣ་ཚོགས་འབྱུང་། །ལས་གཉིས་ལ་ཉེ་རིང་མེད་མོད་ཀྱི། །ཁོང་རྟེན་འབྲེལ་ཟབ་མོའི་རྣམ་འགྱུར་ཉིད། །ཐ་དད་དུ་ངེས་པའི་ཁྱད་པར་ལས། །བདེ་སྡུག་གཉིས་སོ་སོར་ངེས་པ་ཡིན། །འཁོར་འདས་གཉིས་འབྱུང་བའི་རྒྱུ་རྐྱེན་གཙོ། །གཞི་མ་རིག་པ་དང་རིག་པ་སྟེ། །རྒྱུ་མ་རིག་ལས་ནི་འཁོར་བ་དང་། །རིག་ཉིད་ལས་ངེས་ལེགས་ཐར་པ་འབྱུང་། །དོན་དེ་ཕྱིར་མ་རིག་གཙོར་བྱས་པའི། །ཉོན་མོངས་ཕྱོགས་ཡན་ལག་བཅུ་གཉིས་ཀྱིས། །འཁོར་བ་རུ་འཁོར་བའི་འཇུག་རིམ་ ཉིད། །ཤེས་བྱས་ལ་འཁོར་བ་ཟློག་པར་བྱ། །ལྡོག་བྱེད་ཀྱི་ཐབས་ལ་མང་མོད་ཀྱང་། །ཁོང་བདག་མེད་རྟོགས་པའི་ལྟ་བ་ནི། །ཞི་བའི་སྒོ་གཉིས་པ་མེད་པ་ སྟེ། །ཐབས་ཀུན་གྱི་གཙོ་བོར་གྱུར་པ་ལགས། །དེ་ཡིན་ཀྱང་བརྟེན་ནས་བཏགས་པ་ཡི། །ང་ཙམ་ཞིག་འཁོར་དང་གྲོལ་འགྱུར་གྱི། །ལྟོས་མེད་ཀྱི་བདག་ནི་ཡོད་མིན་པས། །རྟག་ཆད་ཀྱི་མཐའ་དང་བྲལ་བར་འདོད། །ངན་སོང་ལས་ཐར་འདོད་མེད་གྱུར་ན། །འཁོར་བ་ལས་ཐར་འདོད་མི་འོང་བས། །ཐོག་མ་རུ་ངན་འགྲོར་ཐར་འདོད་དང་། །མཆོག་གསུམ་ལ་སྐྱབས་འགྲོ་རྒྱུན་ཏུ་བྱ། །ངན་སོང་ལས་ཐར་འདོད་རྣམ་དག་ཞིག །སྐྱེ་འདོད་ན་ངན་འགྲོར་སྡུག་བསྔལ་བའི། །ཁྱད་པར་ཀུན་ལེགས་པར་ཤེས་བྱས་ཏེ། །ཚུལ་དེ་ལས་ཐར་འདོད་སྙིང་ནས་བསྐྱེད། །ངན་སོང་ལས་ཐར་འདོད་སྐྱེས་ཙམ་གྱིས། །ངེས་འབྱུང་དང་ཐར་པ་དོན་གཉེར་བློ། །སྐྱེས་མིན་ཡང་འཁོར་བའི་གནས་སྤྱི་ལས། །ཐར་འདོད་ཞིག་བྱུང་ན་དེ་དག་སྐྱེས། །མ་འགྲོ་བའི་དོན་དུ་སངས་རྒྱས་ཀྱི། །གོ་འཕང་མཆོག་ཐོབ་པར་འདོད་གྱུར་ ན། །བྱམས་སྙིང་རྗེས་དྲངས་པའི་ལྷག་བསམ་དང་། །བྱང་ཆུབ་ཀྱི་སེམས་ཉིད་བསྐྱེད་པར་བྱ། །བྱང་ཆུབ་ཀྱི་སེམས་དེ་མ་སྐྱེས་ན། །མདོ་སྔགས་ཀྱི་ཆོས་ཚུལ་ཉམས་བླངས་ཀྱང་། །ཐེག་ཆེན་གྱི་ཆོས་སུ་མི་འགྱུར་བས། །དོན་དེ་ཕྱིར་འབད་ནས་སེམས་དེ་བསྐྱེད། །སྤྱོད་པ་ལ་སློབ་འདོད་མེད་ན་ནི། །སངས་རྒྱས་ཉིད་ཐོབ་པར་མི་འགྱུར་བས། །རྒྱལ་སྲས་ཀྱི་སྤྱོད་པ་ཕྱིན་དྲུག་དང་། །ལྟ་བ་ལ་ངེས་པར་འབད་པར་བྱ། །སྤྱིར་ཐམས་ཅད་མཁྱེན་པ་ལྟ་ཞོག་གི །ཐར་པ་ཙམ་ངེས་པར་འཐོབ་པ་ལ། །སྟོང་ཉིད་ཀྱི་དོན་རྟོགས་རག་ལས་པས། །ཚུལ་དེ་ཉིད་གནད་ཀྱི་དམ་པོར་བཟུང་། །སྔགས་ཕྱོགས་ནས་ཤཱུནྱ་ཏ་དང་། །སྭ་བྷཱ་ཝ་སོགས་ཀྱིས་སྟོང་ཉིད་དོན། །བསྒོམ་དགོས་པར་ཡང་ཡང་བཤད་པས་ན། །སྔགས་ཕྱོགས་སུ་དེ་ཉིད་ངེས་པར་དགོས། །དོན་དེ་ཕྱིར་སྔགས་ལམ་ཞུགས་པ་ལ། །ཐུན་མོང་བའི་ལམ་ལས་ལྟ་སྤྱོད་ཀྱི། །ཕྱོགས་རེ་ཙམ་མེད་ན་སྔགས་ལམ་དེ། །མ་ནིང་གི་རིགས་སུ་འགྱུར་དུ་དོགས། །ཚུལ་དེ་ལྟར་ཤེས་ནས་མདོ་སྔགས་ཀྱི། །ལམ་གང་ལ་ཞུགས་ཏེ་ཉམས་བླངས་ན། །ཕན་ཆེ་ཡི་གཞན་དུ་ཆོག་བསྒྲིགས་ཙམ། །བྱང་གྱུར་ཀྱང་ཕན་པ་ཆེ་ཐོབ་དཀའ། །དུས་སྙིགས་མའི་སེམས་ཅན་རྒྱུད་རགས་ པས། །ལམ་མཐོན་པོ་སྐྱེ་བ་ཆེ་དཀའ་ཡང་། །དེ་སྐྱེ་བའི་རྒྱུ་ལ་འབད་པ་དང་། ། ཕྱོགས་ཙམ་ཞིག་སྐྱེས་ཀྱང་ལེགས་པ་ཡིན། །དེ་ལྟར་དུ་བརྗོད་ཅིང་གདམས་པ་ ནི། །མི་ངེད་ལ་བབ་འབྲེལ་མི་ཆེ་ཡང་། །ཁོང་སྐྱེས་ཆེན་དམ་པའི་གསུང་ཇི་བཞིན། །བརྗོད་བྱས་ལ་འགལ་བ་མེད་དམ་སྙམ།། །།༈ ན་མོ་གུ་རུ། ཕྱོགས་རྣམས་ན་རྒྱལ་དང་དེ་སྲས། །མང་མཆིས་ཀྱང་དེང་དུས་བདག་ལ། །དམ་ཆོས་ཀྱི་བཀའ་དྲིན་ཆེ་ལྡན། །བཤེས་གཉེན་ཀུན་སྤྱི་བོར་བཞུགས་གསོལ། །སྙིགས་དུས་སུ་གངས་ཅན་མགོན་པོ། །ཐམས་ཅད་མཁྱེན་བློ་བཟང་རྒྱ་མཚོ། །རིས་མེད་ཀྱི་བསྟན་པའི་མངའ་བདག །ཞབས་པད་ཟུང་སྤྱི་བོར་བསྟེན་ནོ། །དུས་གསུམ་གྱི་སངས་རྒྱས་གཅིག་བསྡུས། །རྒྱལ་ཀུན་གྱི་གདུག་ཚོབ་བླ་མ། །པཎ་ཆེན་མཆོག་བློ་བཟང་ཆོས་རྒྱན། །སྤྱི་གཙུག་ཏུ་རྟག་པར་བཞུགས་ཤིག །མགོན་ཁྱོད་ཀྱིས་རྨད་བྱུང་ལེགས་བཤད། །ཕྱོགས་ཀུན་ཏུ་ཁྱབ་ཅིང་གཞན་ལ། །ཕན་ཐོགས་པའི་འཕྲིན་ལས་འདིས་ནི། །རྗེ་རྒྱལ་བའི་མཛད་པ་ཀུན་བསྒྲུབས། །ལར་ཐུབ་པའི་གསུང་རབ་ཀུན་དང་། །ཕ་བློ་བཟང་རྒྱལ་བ་གཉིས་པའི། །མདོ་སྔགས་ཀྱི་བསྟན་པ་མ་ལུས། །མགོན་ཁྱོད་ཀྱིས་ངེས་པར་བཟུང་ལགས། །གསུང་རབ་ཀྱི་གཞུང་ལུགས་མཁའ་ལ། ཁྱོད་ཉིད་ཀྱི་མཁྱེན་པའི་ཉི་ མ། །ཐོགས་མེད་དུ་བགྲོད་པ་མཐོང་ཚེ། །འགྱུར་མེད་ཀྱི་དད་པ་ཆེ་ཐོབ། །མཁས་རློམ་གྱི་ཟླ་བ་མང་ཡང་། །ཆོས་རྣམས་ཀུན་གཟིགས་པའི་མཁས་པ། །ངེས་དོན་གྱི་པཎ་ཆེན་ཁྱོད་ཉིད། །གཞན་དག་ནི་དེ་ཡི་གཟུགས་བརྙན། །རྗེ་ཁྱོད་ཀྱི་མཁྱེན་པའི་ཉི་མས། །མདོ་སྔགས་ཀྱི་བསྟན་པའི་པད་ཚལ། །རྒྱས་པ་དང་ལྷན་ཅིག་གདུལ་བྱའི། །དགེ་ལེགས་ཀྱི་ཆུ་སྐྱེས་བཞད་མཛད། །ཕ་བློ་བཟང་རྒྱལ་བ་གཤེགས་ཤུལ། །མགོན་ཉིད་དང་མཚུངས་པའི་བསྟན་འཛིན། །གཞན་བྱུང་བ་སྔོན་ཆད་མ་མཐོང་། །ད་འབྱུང་ངམ་མི་འབྱུང་ཐེ་ཚོམ། །དོན་དེ་སླད་ཁྱོད་ཉིད་འགྲོ་བའི། །མགོན་སྐྱབས་དང་དཔུང་གཉེན་དམ་པར། །ཡིད་ཆེས་ཀྱི་ངེས་པ་ཐོབ་པས། །ཐུགས་བརྩེ་བའི་དབྱིངས་ནས་དགོངས་ཤིག། །།༈ རྗེ་ཁྱོད་ཀྱི་གསུང་ལས་འདི་ལྟར་འབྱུང་། །དབྱིངས་རིག་པ་དབྱེར་མེད་ལྷ་ཡི་ལམ། །ཞིང་ཀུན་ཁྱབ་མི་འཕྲུལ་ཟློས་གར་མཁན། །ཕ་བདེན་མེད་རྨི་ལམ་ལྟ་བུ་ལ། །བུ་སྒྱུ་མའི་སྐྱེས་བུས་སྙིང་ནས་འདུད། །ཆོས་ཅན་ལ་བལྟས་པས་སྒྱུ་མ་ཙམ། །ཆོས་ཉིད་ལ་བལྟས་པས་ཅང་མ་མཐོང་། །སྒྱུ་མ་དང་སྣང་སྟོང་ཟུང་འབྲེལ་ལ། །ཟུང་འཇུག་འདི་བླ་མའི་དྲིན་གྱིས་རྙེད། །ཨ་ལ་ལ་ཡོད་མེད་མཐའ་དང་བྲལ། །མཐའ་བྲལ་གྱི་དབྱིངས་སུ་མཉམ་པར་གཞོག །ཆོས་ཉིད་ལ་བལྟས་པས་ཆོས་ཅན་བཀྲ། །ཆོས་ཅན་ལ་བལྟས་པས་སྟོང་པར་བྲོས། །སྣང་སྟོང་གཉིས་རེས་འཇོག་མི་བྱེད་པའི། །ཟུང་འཇུག་འདི་བླ་མའི་དྲིན་གྱིས་རྙེད། །དོན་དམ་གྱིས་རྒྱུ་འབྲས་བསླུ་མེད་བསྟན། །ཀུན་རྫོབ་ཀྱིས་དོན་དམ་རང་ཞལ་ཕྱེ། །བདེན་གཉིས་ཀྱི་རང་བཞིན་དབྱེར་མེད་པའི། །ཟུང་འཇུག་འདི་བླ་མའི་དྲིན་གྱིས་རྙེད། །དོན་དམ་གྱི་དབྱིངས་ལ་དཔྱད་པའི་ཚེ། །རྟེན་འབྲེལ་གྱི་མིང་ཡང་མེད་པ་དང་། །སྟོང་པ་དང་རྟེན་འབྲེལ་ཟུང་འཇུག་འདི། །འགལ་མེད་དུ་བླ་མའི་དྲིན་གྱིས་ ཤེས། །འཁོར་འདས་ཀྱི་ཆོས་རྣམས་མ་ལུས་པ། །བདེན་མེད་དུ་ཤེས་པས་བདེན་པ་གོ །བདེན་བརྫུན་གྱི་རང་བཞིན་དབྱེར་མེད་པའི། །ཟུང་འཇུག་འདི་བླ་མའི་དྲིན་གྱིས་རྙེད། །མིང་རྐྱང་གི་ཆོས་རྣམས་བདེན་པས་སྟོང་། །བདེན་སྟོང་དུ་རྒྱུ་འབྲས་རོལ་པར་ཤར། །སྟོང་པ་དང་རྒྱུ་འབྲས་དབྱེར་མེད་ལམ། །ཨེ་མ་ཧོ་བླ་མའི་དྲིན་གྱིས་རྙེད། །ཞེས་འབྱུང་སྟེ་ཚུལ་དེར་བདག་ཅག་ཀྱང་། །འཇུག་སྤྲོ་ཞིང་ཡི་རང་གཞན་ཡང་ནི། །བློ་མ་རིག་སྒྱུ་མའི་འཁྲུལ་འཁོར་འདིའི། །ཡུལ་གདོད་ནས་སྐྱེ་བ་མེད་མཐོང་བས། །ཕྱི་གཟུང་འཛིན་སྤྲོས་པ་དབྱིངས་སུ་ཐིམ། །དཔེ་ཆ བ་རོམ་རྒྱ་མཚོའི་ཀློང་དུ་བཞིན། །ཆོས་ཀུན་གྱི་གནས་ལུགས་གདོད་མའི་ གཤིས། །དོན་དབྱེར་མེད་སྤྲོས་པ་ཀུན་བྲལ་བ། །དཔེས་མཚོན་དུ་མེད་པའི་རང་བཞིན་གྱི། །དབྱིངས་འདི་འདྲའི་རང་ཞལ་བལྟས་པའི་ཚེ། །རྗེ་སངས་རྒྱས་ཆོས་དང་དགེ་འདུན་གྱི། །མཚན་ཙམ་ཡང་དམིགས་སུ་མ་མཆིས་ན། །སེམས་མ་རིག་དྲི་མས་སྦགས་མཐོང་བའི། །གནས་འཁོར་བའི་སྡུག་བསྔལ་ག་ལ་ཡོད། །ཡུལ་འོད་གསལ་ངང་དུ་རིག་པ་ཞུགས། །ཆོས་ཀུན་གྱི་ངོ་བོ་རྗེན་པར་མཐོང་། །སླར་བལྟས་ཀྱང་མཐོང་བའི་ཡུལ་ལས་འདས། །དཔེ་འགག་མེད་ནམ་མཁའི་ཕ་མཐའ་འཚོལ། །ཁྱེད་འཁོར་བས་སྐྲག་པའི་འགྲོ་ཀུན་ཀྱང་། །གཞི་བདེན་སྟོང་ཡངས་པའི་གཟིགས་མོ་མཛོད། །འདི་མཐོང་ན་སྣང་སྲིད་སྐྱེ་བོ་ཀུན། །དགྲ་གཙོ་བོར་གྱུར་ཀྱང་འཇིགས་མི་དགོས། །ལས་དགེ་སྡིག་འབྲས་བུ་མ་དམིགས་ཤིང་། །ལམ་སྤང་གཉེན་དགག་སྒྲུབ་དང་ཡང་བྲལ། །ཡིད་འབད་པས་བསྒྲུབས་པའི་འབྲས་བུས་དབེན། །དབྱིངས་འདི་འདྲ་རྒྱལ་བའི་དགོངས་པ་སྙམ། །ཡང་འཁོར་འདས་ཆོས་ལ་ཕར་བལྟས་པས། །རྐྱེན་འདི་པ་ཙམ་གྱི་རྒྱུ་དང་འབྲས། །ཆེས་ཕྲ་ཞིང་བསླུ་བ་མེད་པར་མཐོང་། །དཔེ་འཆི་མེད་ལམ་ནས་འཇའ་ཚོན་བཞིན། །དབྱིངས་སྤྲོས་བྲལ་གདོད་ནས་དག་པ་དང་། །ལས་རྒྱུ་འབྲས་བསླུ་བ་མེད་པ་ཡི། །ཡུལ་སྣང་སྟོང་རེས་འཇོག་མ་ཡིན་པའི། །དོན་ཟུང་འཇུག་མཐའ་བྲལ་དབུ་མའི་ལམ། ། ལམ་འདི་འདྲ་རྙེད་པ་བླ་མའི་དྲིན། །དྲིན་ཆེའོ་རྒྱལ་བ་གཉིས་པའི་རྗེ། །མ་དྲིན་ཅན་འགྲོ་བ་རྣམས་ཀྱིས་ཀྱང་། །དོན་འདི་འདྲ་རྟོགས་པར་བྱིན་གྱིས་ རློབས། །ཞེས་གསུངས་ཏེ་འཕགས་པ་ཀླུ་སྒྲུབ་ལུགས། །ཇི་བཞིན་དུ་གཟིགས་པའི་ཉམས་མགུར་ཏེ། །ཟབ་དོན་ལ་སྦྱངས་པའི་མཁས་མཆིས་ན། །དོན་དེ་ལྟར་ཤེས་ལ་འབད་པར་མཛོད། །ཚུལ་དེ་སྐད་སྨྲས་འདི་མཁས་གཞན་གྱིས། ། གཟིགས་གྱུར་ན་ཐུགས་ཀྱིས་མི་ཁྲེལ་ཞིང་། །འདིར་འབད་པའི་དགེ་ཀུན་གཞན་དག་ལ། །ཕན་འགྱུར་དང་སངས་རྒྱས་ཐོབ་ཕྱིར་བསྔོ། །ཅེས་པ་འདི་ནི། མདོ་སྔགས་ཀྱི་གཞུང་ལུགས་རབ་འབྱམས་དང་། སྙན་ངག་གི་ཚུལ་ལ་མཁྱེན་པ་རྒྱས་པའི་མོ་ནེ་ནང་ཁྲི་ཟུར་སངས་རྒྱས་དཔལ་བཟང་ཉིད་ཀྱིས་རི་ཁྲོད་ནས། ཁྱོད་ཀྱིས་སྟོན་པ་དང་རྗེ་རིན་པོ་ཆེ་སོགས་དང་སྦྱར་བའི་མགུར་ཞིག་རྩོམ་པར་མཛོད་ཅེས་བསྐུལ་བའི་ཚེ། དེ་ལྟ་བུའི་མགུར་ངེད་ལ་བབ་འབྲེལ་མི་སྣང་ཞེས་བྱས་ཀྱང་སླར་བསྐུལ་བྱུང་བའི་ངོ་བོར་དེ་ལྟ་བུ་ཡིན་ཁུལ་དུ་ཤཱཀྱའི་བཙུན་པ་ཁྲི་ཟུར་བཤད་སྒྲུབ་མིང་ཅན་གྱིས་ཅོ་ནེའི་དགོན་ཉིད་ནས་རང་བློར་གང་ཐོན་དུ་སྦྱར་བའི་ཡི་གེ་པ་ནི་ཏཱ་ཡི་ལ་ལུང་བློ་བཟང་དོན་གྲུབ་བོ། མདྒ་ལཾ།།