དགེ་སློང་རཱ་ག་ཨ་སྱའི་དགུང་ལོ་ལྔ་བཅུ་ནས་ང་དྲུག་བར་གྱི་ཕྱིའི་རྣམ་ཐར་ཁེངས་སྐྱུང་མེད་པའི་དྲང་གཏམ།
༄༅། །ཨ ཀྵི ལཾ ནཱ མ བྲ མ ཎ རཱ ག ཨ སྱ ན ག ན ནྡ སྤ ཉྩ ཤ ཙྪཱ བ ཥཊྚ ཉྩ ཤ ཏཱ ནོ རཱ པྲྀ ཀྵ བི མོ ཀྟ སྟི ཏི སྨ།།
༄༅། །དགེ་སློང་རཱ་ག་ཨ་སྱའི་དགུང་ལོ་ལྔ་བཅུ་ནས་ང་དྲུག་བར་གྱི་ཕྱིའི་རྣམ་ཐར་ཁེངས་སྐྱུང་མེད་པའི་དྲང་གཏམ་ཡོད།།
ས་ཕོ་ཁྱི་ཡི་ལོ་ཆོ་འཕྲུལ་ཟླ་བའི་ཚེས་གཅིག་ནས་ཤིང་ཕོ་འབྲུག་གི་ལོ་མགོ་ཟླའི་ཚེས་ ༢༢ བར་ཕྱོགས་མཚམས་འགྲོ་དོན་ཇི་ལྟར་མཛད་པའི་རྣམ་ཐར་དུམ་བུའོ།།
ན་མོ་གུ་རུ་ལོ་ཀེ་ཤྭ་ར་ཡེ། བླ་མ་ཡི་དམ་དབྱེར་མེད་པའི། །སྤྱན་རས་གཟིགས་ལ་ཕྱག་འཚལ་ལོ། །བན་རྒན་རཱ་ག་ཨ་སྱ་བདག །ཐ་མལ་སོ་སོའི་སྐྱེ་བོ་སྟེ། །རྣམ་ཐར་བྲི་རྒྱུ་མ་མཆིས་ཤིང་། བྲིས་ན་གཞན་གྱི་འཕྱ་སྟེ་འོང་། །འོན་ཀྱང་བླུན་དད་ཆེ་བ་ཡི། །གོ་འཇོའི་བླ་མ་སྨན་བླ་སོགས། །ཕྱོགས་ཀྱི་སློབ་བུ་འགའ་ཞིག་དང་། །རང་གི་ཡོད་ཐང་དབོན་པོ་ནི། །པདྨ་ནམ་མཁས་དོ་དམ་གྱིས། །ཤོག་བུ་འཛིན་བརྡུངས་བྱས་
ནས་ཀྱང་། །རྣམ་ཐར་མཇུག་དེ་བྲི་དགོས་ཞེས། །ནན་གྱིས་བསྐུལ་ཕྱིར་བྲི་བ་ནི། །དེ་ནས་རང་ལོ་ང་གཉིས་པ། །ལོ་ཡི་མགོ་བོ་བྱི་བ་ལོ། །སྤྲེའུ་ཟླ་བ་ནས་བཟུང་སྟེ། །སྒར་པ་བཏེག་སྟེ་སོང་བའི་ཚེ། །ངོམ་ཡུལ་རྣམ་རྒྱལ་དགོན་དུ་བསླེབས། །ངོམ་རྗེ་རྒྱལ་པོས་བསྙེན་བཀུར་བྱས། །གྲུབ་ཆེན་ནམ་མཁའ་རྒྱལ་མཚན་གྱིས། །འདྲ་སྐུ་གསུང་བྱོན་མ་དེ་ལ། །སྙན་དར་བསྒྲོན་ཅིང་སྨོན་ལམ་ཞུས། །དེ་ནས་རག་མང་ཕུ་རུ་ཞིག །ཉམས་སྣང་བུད་མེད་རལ་པ་ཅན། །རྒན་མོ་མིག་ཡ་ཞར་བ་ཅན། །ཕྱག་འཚལ་ནས་ཐུམ་ཕུལ་སྣང་བྱུང་། །ཡུལ་དེའི་གཞི་བདག་
ཡིན་ནམ་སེམས། །གནས་ཆེན་སྤོམ་ནེའི་ཉེ་ལོགས་སུ། །ཚོགས་འཁོར་ཕུལ་ཞིང་སྨོན་ལམ་གདབ། །མི་འགྱུར་རྡོ་རྗེའི་བརྟན་བཞུགས་དང་། །བཀའ་བརྒྱུད་བསྟན་པ་དར་བ་ཡི། །གསོལ་འདེབས་སྨོན་ལམ་གཅིག་བརྩམས་ནས། །ཡུད་ཙམ་འཐུམ་པའི་ཉམས་སྣང་ལ། །རྒྱལ་འགོང་བཙུན་གཟུགས་རོད་ངན་ཞིག །བདག་ལ་མི་དགའི་རྣམ་འགྱུར་གྱིས། །བདག་གིས་བྲིས་པའི་སྨོན་ལམ་དེ། །མི་འགྲུབ་ཟེར་གཏམ་ཁྲེལ་བགད་བྱེད། །ཕྱིས་སུ་དེ་ག་དངོས་སུ་གྱུར། །དེ་ནས་སྐེ་མདར་ཞག་པའི་ནུབ། །གེ་མོར་ཆོས་ར་ཚུགས་མི་ཚུགས། །བསམ་བརྡོ་རྨི་ལམ་ཟ་ཟི་ལ། །མི་འགས་བདག་ལ་ཐལ་མོ་སྦྱར། །བདག་ཉིད་འཕགས་པ་སྤྱན་རས་གཟིགས། །བཅུ་གཅིག་ཞལ་ནི་དངོས་སུ་གྱུར། །སྐུ་ལུས་ངང་དྭངས་ཙི་རེ་བ། །མངོན་སུམ་ལྟ་བུ་ཡིད་ཙམ་བྱུང་། །བྱ་གཡང་མདོ་རུ་ཞག་པའི་ནུབ། །ཉམས་སྣང་བཙུན་གཟུགས་ཆེས་བཟང་བ། །མཛེས་ཤིང་བརྗིད་ཆགས་གུས་ཚུལ་སྟོན། །དཀར་ཕྱོགས་གཞི་བདག་ཡིན་ནམ་སྙམ། །རྒྱུས་མེད་ངོ་མི་ཤེས་པའི་སར། །ཆོས་ར་ཚུགས་པར་དཀའ་སྙམ་ཚེ། །རྨི་ལམ་གཟུགས་མེད་སྒྲ་གྲག་པ། །ཆོས་ར་ཚུགས་ཞེས་ཟེར་བ་
ཐོས། །ཆོས་ར་ཚུགས་ཤིང་ཁྲོམ་ཚོགས་འདུས། །གསར་དུ་སེམས་ངོ་འཕྲོད་པ་དང་། །གེ་མོ་དཔོན་གྱི་བརྒྱ་འབུལ་སོགས། །ཟང་ཟིང་གདུལ་བྱ་འུར་བ་དང་། །དགེ་སྒྲུབ་སྡིག་སྤངས་ཁས་ལེན་མང་། །དེ་ཕྱིར་གེ་མོའི་ཤོག་ཁ་དེས། །དད་པ་ཐོབ་ཅིང་སྦྱིན་བདག་བྱས། །དེ་ནས་མཁར་དམར་མདོ་རུ་ཕྱིན། །ཉམས་དང་རྨི་ལམ་འདྲེས་པའི་སྐབས། །བཀའ་སྲུང་ལྷ་མོ་རྒྱན་ཆ་ཕྱུག །མི་གཞོན་འགའ་ཡི་དབང་ཞུ་ཞེས། །སྐྱེས་པ་རྒས་གཞོན་མང་ཞིག་ལ། །ལྭ་བ་དཀར་པོའི་བྱིན་བརླབས་བྱས། །དཀར་ཕྱོགས་གཞི་བདག་ཡིན་ནམ་སེམས། །ཀོང་པོའི་ནོར་མུ་མཆེད་དོགས་ནས། །ཡི་དམ་ལྷ་ལ་གསོལ་བཏབ་ཚེ། །ཁག་ཁུར་ནོར་མུ་མེད་གསུངས་པས། །གསུངས་ལྟར་རང་ལ་སྐྱོན་མ་བྱུང་། །དེ་རུ་ཁྲོམ་ཚོགས་མང་འདུས་པས། །ཞི་ཁྲོའི་དབང་བསྐུར་འབྲིང་པོ་བཙུགས། །དེ་ནས་རྨི་ལམ་ཟ་ཟི་ལ། །བདག་གི་ཐུལ་པ་འདྲ་ཅིག་གྱོན། །གཞོག་གཡས་མི་འགྱུར་རྡོ་རྗེ་རུམ། ། གཡོན་དུ 
་རྒྱལ་བ་མཆོག་དབྱངས་རུམ། །དེ་ཚེ་སྤྲུལ་སྐུས་འདི་སྐད་གསུངས། །རྒྱལ་བ་མཆོག་དབྱངས་ངེད་གཉིས་ཀ །ཕྱོགས་པ་གཅིག་གཡས་འདིར་ཞོག་དང་ལེགས། །
གསུངས་པས་རྟེན་འབྲེལ་གནད་གཅིག་གོ །དེ་ནས་གཟུགས་མེད་སྒྲ་གྲག་པ། །ཁྱོད་ཀྱི་མིང་ནི་འདི་ཡིན་ཏེ། །ནམ་མཁའ་ཆགས་མེད་ཅེས་བྱའོ། །ཟེར་བས་རང་ཡང་ཡིན་སྙམ་བྱེད། །རྟོག་པ་འདི་ལ་བོགས་ཅུང་ཞིག །འབྱུང་བའི་བརྡ་ནི་ཡིན་པར་གོ །ཕྱིས་སུ་དེ་ག་དངོས་སུ་གྱུར། །བདག་གི་དབང་ལུང་ཆོས་གསུམ་ནི། །བླ་ཕྲན་འགའ་ལ་འཕེལ་ཐུབ་ན། །འགྲོ་དོན་འབྱུང་བའི་དགའ་སྙམ་ཛ། །གཟུགས་མེད་སྒྲ་ཡི་ལུང་བསྟན་པ། །ཁྱོད་ཀྱི་མིང་ཅན་བརྒྱ་ཕྲག་འབྱུང་། །འོང་དོན་ཁྱོད་རང་བྲིས་འདུག་ཟེར། །དེ་དོན་དེ་དུས་མ་གོ་སྟེ། །དུས་ཕྱིས་དབང་ཁྲིད་རི་ཆོས་སོགས། །བརྩམས་ཆོས་མང་དུ་བྱས་པ་དེས། །རང་དང་གཞན་དོན་བྱེད་པ་ཡི། །ཇི་སྲིད་དུས་ཀྱི་མཐའ་བར་དུ། །བླ་མ་བརྒྱ་ཕྲག་འབྱུང་བར་གོ །བླ་ཕྲན་བརྒྱ་ཕྲག་དེ་དག་ཀྱང་། །དབང་ལུང་ཁྲིད་གསུམ་འགྲོ་དོན་ནི། །ཆེན་པོ་འབྱུང་བར་ཡིད་ལ་ཤར། །དེ་དུས་སྐབས་ཤིག་རྨི་ལམ་དུ། །རིག་འཛིན་འཇའ་ཚོན་སྙིང་པོ་དེ། །པཎ་ཞྭ་ཆོས་གོས་རབ་བྱུང་ཆས། །རྟ་མཆོག་སྒ་སྲབ་བརྒྱན་པ་ཆིབས། །ཆུ་བོ་རབ་ཏུ་རྒྱས་པ་ལ། །རྫུ་འཕྲུལ་ཉ་ལྟར་འཕྱོ་བ་མཇལ། །ཕྱོགས་དེར་རྟ་ནད་ནོར་ནད་
ཀྱིས། །འཇིགས་སྐྲག་རབ་ཏུ་ཆེ་འདུག་ཀྱང་། །རང་ལ་སྐྱོན་ནི་མ་བྱུང་ཞིང་། །ས་ཕྱོགས་རབ་ཏུ་གཉན་ས་དེར། །རྟ་ཕྱུགས་རྣམས་ནི་བསྲུང་བའི་ཕྱིར། །གཉེར་པས་རྫས་རྒོད་བདུག་ཟིན་པས། །སྒར་གྱི་དཀྱིལ་དུ་ཐོག་སྐྱེབ་ཤོམ། །སྒར་ལ་ཕོག་ལེ་ཁད་བསམ་ཛ། །མ་ཕོག་འཕྲེད་དུ་འགྲད་པ་ལྟར། །སོང་ནས་ཐང་ཤིང་འགའ་ཞིག་བཅགས། །སྔོན་ནི་སྤྲིན་ནག་འབྲུག་སྒྲ་མེད། །ཉི་འོད་ཆར་པ་ཟམ་ཟིམ་སྐབས། །མགོ་གཡོག་ཐབས་སུ་བྱུང་བའི་ཕྱིར། །ཐོག་དམིགས་ཙམ་ཡང་མ་བཟུང་སྟེ། །བསྐྱེད་རྫོགས་ངང་ལ་གནས་པའི་མཐུས། །དེ་རུ་དབང་ཁྲིད་སྦྲག་མའི་ཚུལ། །ཕྱག་ཆེན་ལྔ་ལྡན་ཁྲིད་ཀྱང་བཙུགས། །དེ་ཚེ་དེ་སྐོར་ཞག་རྣམས་སུ། །ཉིན་མོ་མཁའ་ལ་འཇའ་སྤྲིན་འཁྲིགས། །མཚན་མོ་སྒར་ལ་འཇའ་དཀར་ཟུག །མར་མེ་ལན་གྲངས་འགའ་རེ་འཛིན། །དབང་ཁྲིད་དགེ་བ་ཁས་ལེན་བྱུང་། །དཀར་པོའི་ཕྱོགས་ཀྱི་མི་མ་ཡིན། །དད་ཅིང་འདུན་པའི་རྨི་ལྟས་མཐོང་། །བ་སོགས་ཤོག་ཀས་བརྒྱ་འབུལ་བཀྱག །བནྡེ་བྱེད་པ་འགའ་རེ་བྱུང་། །དེར་འདུས་སྐྱ་སེར་ཐམས་ཅད་ཀྱིས། །ཚད་བཟུང་མེད་པའི་དད་འདུན་བྱས། །དེ་ནས་གདན་
འདྲེན་བྱུང་བའི་ཕྱིར། །སྒར་པ་རྡོལོ་ཤོལ་ནང་དུ་བཏེགས། །དབང་ལུང་འཕེལ་བའི་རྨིས་ལྟས་བྱུང་། །གཟར་ཐུང་ལ་མདར་སྒར་ཞག་ནུབ། །རྟ་ཞིག་འཐིང་ནས་བཞག་དགོས་བྱུང་། །དེ་ལ་དམིགས་པ་ཅུང་ཞིག་གཏད། །ཉིན་གུང་ཉམས་སྣང་ཟ་ཟི་ལ། །རྒན་མོ་མགོ་སེ་གཅེར་བུ་ནི། །མི་བས་སུམ་ལོག་ཆེ་བ་ཅིག །མདུན་དུ་པུས་བཙུགས་ཐལ་མོ་སྦྱར། །ཁྱེད་དང་ནོར་ཕྱུགས་ཐམས་ཅད་ཀྱི། །སྐུ་གླུད་རྟ་དེ་ཡིན་ཏེ་ཟེར། །དེ་ནས་སྐེ་སྟོད་ས་ཡི་ཆར། །ཞི་ཁྲོའི་དབང་ཁྲིད་སྦྲེལ་མ་དང་། །ཉུང་ཆོས་ལྷན་ཅིག་སྐྱེས་སྦྱོར་བཙུགས། །ཁྲོམ་པ་སྟོང་དང་སུམ་བརྒྱ་ལྷག །བླ་ཚངས་བླ་མ་ཁུ་དབོན་ནི། །གླང་ཆེན་དཔལ་སེང་གདུང་རྒྱུད་དེ། །བླ་ཆེན་དགོངས་པ་རབ་གསལ་ནས། །དེང་སང་བར་དུ་རིག་འཛིན་གྱི། །བརྒྱུད་པ་ཚར་དུ་མངར་བ་རྣམས། །མ་གཤིན་ཕུར་གསུམ་བཀའ་བབ་པ། །བླ་མ་གསུམ་དང་སྐུ་སྐྱེར་བཅས། །དགེ་འདུན་མང་མར་བཅས་པ་ལ། །མ་གཤིན་ཕུར་གསུམ་དབང་ལུང་བྱས། །མན་ངག་ངག་ཁྲིད་འགའ་ཡང་ཕུལ། །དེ་ཚང་མནའ་མ་ཞིག་འདུག་པ། །མཁའ་འགྲོ་ཡིན་པར་ཡོངས་སུ་གྲགས། །དེས་ཀྱང་དད་གུས་འབུལ་བ་
དང་། །རྒྱ་གར་ཡུལ་ནས་རྫུ་འཕྲུལ་གྱིས། །ཨ་རུ་ར་ནི་རློན་པ་རྣམས། །གསུམ་བཞི་ཙམ་ཞིག་བླངས་པ་ཡི། །གཅིག་ནི་སྟག་ལུང་པ་ལ་ཕུལ། །གཅིག་ནི་ལྷ་ཁང་ཁྲ་འགྱེར་མའི། །ལྷ་ཆེན་ལ་ནི་ཕུལ་བ་ཡིན། །གཅིག་ནི་ཁྱེད་ལ་འབུལ་ཟེར་ནས། །ཨ་རུ་ར་ནི་སྐམ་པོ་ལ། །བྱ་འུར་སྐྱེས་པ་གཅིག་ཀྱང་ཕུལ། །བདེ་གཤེགས་ཕག་མོ་གྲུ་པ་ཡི། །སློབ་མ་སྨར་ཡེལ་འབྱོར་གསུམ་གྱི། །འབྱོར་ཆོས་སྐུ་ཞེས་པ་ནས་བཟུང་སྟེ། །དེང་སང་བར་དུ་བླ་བརྒྱུད་ཅན། །སྤར་ངེ་བླ་མ་ཁུ་དབོན་གྱིས། །དད་འདུན་བསྙེན་བཀུར་དབང་ལུང་ཞུས། །སློབ་དཔོན་པདྨ་འབྱུང་གནས་ཉིད། །སྤྱི་འབྱམས་གནས་སུ་ཕེབས་པའི་དུས། །ཞོ་རྫིས་ཕུལ་བའི་རྟེན་འབྲེལ་གྱིས། །ཁྱོད་ཀྱི་མི་རབས་མི་རྒྱུད་རྣམས། །སེར་མོ་བ་ཡི་རྩ་བ་འོང་། །གསུངས་ཕྱིར་སེར་རྩ་ཞེས་བྱར་གྲགས། །ལྷ་མཆོག་རྡོ་རྗེ་གཞོན་ནུ་མཇལ། །དཔལ་ལྡན་ལྷ་མོ་བྲན་འཁོར་བ། །རིག་འཛིན་གུ་རུ་བསྙེན་ཆུང་དང་། །མདོ་ཁམས་སྒང་དྲུག་ཐམས་ཅད་དུ། །མཐུ་རྩལ་ཆེ་བའི་གྲགས་པ་ཅན། །སེར་རྩའི་ཉ་འཕེན་ནས་བཟུང་སྟེ། །དེང་སང་བར་དུ་སྔགས་རྒྱུད་ཅན། །སེར་རྩའི་སྔགས་འཆང་ཀུན་འདུས་
ནས། །བརྒྱ་འབུལ་བཀྱགས་ཤིང་དབང་ལུང་ཞུས། །སྒར་ལ་འཇའ་ཡི་ཀ་བ་ནི། །ལན་འགའ་ཟུག་པ་འགའ་རེས་མཐོང་། །ཁྲོམ་པ་ནད་མེད་བདེ་བ་དང་། །སྐྲ་ཕུད་ཕུལ་བའི་བན་ཆུང་མང་། །དགེ་ཚུལ་བཅོ་ལྔ་ཙམ་ཞིག་འགྲུབ། །ཉམས་དང་རྨི་ལམ་མཚམས་ཤེད་དུ། །ལྷ་མོ་ཆས་བཟང་རིན་ཆེན་བརྒྱན། །ལན་གྲངས་མང་དུ་མཐོང་བ་དང་། །གཞི་བདག་ཡིན་ནམ་སྙམ་པ་ཡི། །མི་རིགས་མང་པོས་གུས་འདུད་དང་། །དངུལ་ནི་ཁོ་ནས་བརྒྱན་པ་ཡི། །ན་ཆུང་མཛེས་སྡུག་ཕྱག་འཚལ་མཐོང་། །འོད་གསལ་ཟིན་པའི་ངང་ཉིད་ལ། །ས་ཕྱོགས་རྒྱུས་མེད་ལུང་པ་ན། །ཆུ་དང་མཁར་དང་གྲོང་ཁྱེར་མཐོང་། །ཁྱུང་པོ་རྟ་ཤོད་ཡུལ་ཡིན་སྙམ། །མ་འོངས་ང་ཡི་ཆོས་རྒྱུད་ཀྱིས། །དེ་རུ་འགྲོ་དོན་འབྱུང་ངམ་སེམས། །དངོས་སུ་བཅོས་མིན་སྙིང་རྗེ་སྐྱེས། །སྲོག་རླུང་ཅན་ཞིག་དམིགས་པས་གཟིར། །སྐྱེས་བུ་དང་ནི་སྤྱག་བཙན་གྱིས། །གནོད་པ་ཡིན་པར་ཐོས་ཤིང་མཐོང་། །རེ་ལྔ་བར་དུ་རང་ཉིད་ནི། །འཚོ་བའི་རྟགས་ཤིག་བྱུང་ན་ཡང་། །མི་རྟག་འཆི་བས་ཡིད་སྔངས་པ། །བཅོས་མིན་ཤུགས་འབྱུང་རྒྱུན་དུ་བྲིས། །བརྒྱ་འབུལ་བྱེད་མི་མང་པོ་སོགས། །གདུལ་
བྱ་ཆེ་ཞིང་འགྲོ་དོན་འགྲུབ། །ཞལ་གདམས་སྨོན་ལམ་མང་དུ་བྲིས། །གནས་དེར་ཟླ་གཅིག་ཐོག་པའི་ཚེ། །རྟ་དང་མཛོ་ཕོ་མཛོ་མོ་དང་། །འབྲི་གཡག་ཡན་ཆད་རྐང་བཞི་པ། །དུ་བྱུང་གཉེར་པར་དྲིས་པ་ཡིས། །བདུན་བརྒྱ་ཙམ་ཞིག་བྱུང་ངེས་ཟེར། །དེ་ལྟར་སྒར་པ་བྱས་པ་ཡི། །འབུལ་སྡུད་བསམ་པ་སྙིང་ལ་མེད། །མན་ངག་སྒོ་སྐྱེལ་ཚུལ་དུ་ནི། །དབང་ལུང་ཁྲིད་གསུམ་ཨེ་འཕེལ་བསམ། །འོན་ཀྱང་ཤུགས་ཀྱིས་དཀོར་བྱུང་བ། །བསྔོ་བ་སྨོན་ལམ་བརྒྱ་ཡིས་བཏབ། །ཤི་ཤོག་གསོན་ཤོག་མང་པོ་རྣམས། །བསྔོ་བ་བྱེད་པའི་ཚེ་ཉིད་ནས། །བྱང་ཞུས་དམིགས་པས་འགྲུབ་པ་དང་། །བསྔོ་བ་བྱང་ཞུས་ནམ་བྱེད་ཚེ། །ཉམས་ལེན་ལྷག་པར་གསལ་བ་དེས། །འཁོར་གསུམ་ཡོངས་དག་བསྔོ་བ་བྱས། །ཤེར་ཕྱིན་སྟོང་ཕྲག་ཉེར་ལྔ་པར། །འཁོར་གསུམ་ཡོངས་དག་བསྔོ་བ་ཡི། །ཕན་ཡོན་རྒྱ་ཆེར་གསུངས་ལྟར་ན། །དཀོར་གྱི་སྒྲིབ་པ་མེད་དམ་སྙམ། །འོན་ཀྱང་གང་བྱུང་དཀོར་རྫས་རྣམས། །དཀོན་མཆོག་ཕྱོགས་སུ་ཅི་ཐེང་བྱས། །དེ་ལྟར་བསྔོ་སྨོན་དཀོར་རྫས་སོགས། །བྱ་ཚུལ་རྒྱུན་དུ་དེ་ལྟར་ཡིན། །དེ་ནས་དབྱི་ཤོད་འཛི་ཆུའི་འགྲམས། །རིད་
སྙིད་ཐང་དུ་ཞག་གཉིས་བསྡད། །བླ་ཆེན་སྟོབས་ལྡན་གཅིག་གིས་ནི། །བདག་ལ་ཐུགས་རྩིས་ཆེ་ཟེར་ནས། །བེར་སོགས་བསྐོ་ཇ་གནང་བ་དང་། །མི་ནག་རལ་པ་ཅན་ཞིག་དང་། །མི་གཞོན་འགའ་ཡིས་གུས་འདུད་བྱས། །གུ་རུ་ཞི་དྲག་དབང་བསྐུར་དང་། །ལུང་བྱས་ཕྱག་ནས་འཐོར་བ་རྨིས། །དཀར་ཕྱོགས་ལྷ་འདྲེ་ཡིན་ནམ་སེམས། །དེ་ནས་ཆུ་གར་ལ་རྩ་རུ། །རི་དམར་ཞིག་གི་ཞོལ་དུ་བསྡད། :།ཉིན་གུང་ཉམས་ཀྱི་སྣང་བ་ལ། །དཔོན་རིགས་རལ་པ་ཕྲུག་སྔོན་ཅན། །ང་ཡི་སྔོན་དེར་བྱུང་བསྡད་ནས། །རྐང་པ་ཅུང་ཟད་ན་བ་ཡིན། །བྱིན་རླབས་བཀའ་བསྒོ་དགོས་ཟེར་བས། །བྱིན་བརླབས་ལ་སོགས་བྱས་པ་སྙམ། །ཡུལ་དེའི་གཞི་བདག་ཡིན་ནམ་སེམས། །དེ་ནུབ་སྲོད་ཙམ་ཉམས་རྨིས་ལ། །ཚོང་དཔོན་དྲེལ་ཁྱུ་མང་པོ་ཅན། །ཕ་ཀི་ལམ་ནས་གཤར་སོང་བ། །ཀླུ་བདུད་དགེ་བསྙེན་ཡིན་ནམ་སེམས། །དེ་ནས་ལྡིག་གི་ས་ཆ་རུ། །མི་མགོ་ཐང་དུ་ཞག་གཉིས་བསྡད། །ཉིན་གུང་ཉམས་ཀྱི་སྣང་བ་ལ། །ཇོ་བོ་ཚོགས་བདག་གླང་སྣ་ཡིས། །གནོད་བྱེད་ཁྲུམ་ཁྲུམ་གསོལ་བ་མཐོང་། །དེ་ཡི་ལྷ་བདག་རཱ་ཛ་ཡིས། །ཕྱི་ནང་འཁྲུག་རྩོད་བསླང་འདོད་པའི། །
བསམ་པ་ཐུགས་ལ་རྒྱུ་ཚུལ་མཐོང་། །དེ་ནུབ་ཉམས་དང་རྨི་ལམ་མཚམས། །དཔོན་རིགས་ཆས་བཟང་ཕྲུག་སྔོན་ཅན། །རྟ་ནི་དཀར་པོ་གཡུ་རྔོག་ཆིབས། །འཁོར་ཚོགས་སྐྱ་ཕ་འགའ་དང་བཅས། །གུས་པའི་ཚུལ་གྱིས་མདུན་ནས་སྐོར། །དབང་ཁྲིད་འཛུགས་པའི་ཞུ་བ་ཕུལ། །ཀླུ་བདུད་དགེ་བསྙེན་ཡིན་ནམ་སེམས། །རེ་ཞིག་དུས་ལ་མ་བབ་ཀྱང་། །མ་འོངས་ལྕི་ཡི་ས་ཆ་རུ། །དབང་ཁྲིད་འགྲོ་དོན་འཕེལ་ལམ་སེམས། །དེ་ལྟར་ཚུགས་མ་གསུམ་དུ་ཡང་། །དབང་འབྲེལ་བསྔོ་བ་སྨོན་ལམ་སོགས། །གནས་སྐབས་གདུལ་བྱ་འགྲོ་དོན་འཕེལ། །ཁྲོམ་ཡང་ཉེ་སྐོར་འཕྲལ་དུ་འདུས། །དེ་ནས་ལྕི་སྨད་མངར་གྱི་སར། །རུ་དར་ཐང་གི་ས་རུ་བསྡད། །མི་རྒན་རོད་ངན་རལ་པ་ཅན། །འགའ་རེས་ལན་ཆགས་གླུད་གཏོར་བསྙགས། །དེ་ཕྱིར་གླུད་གཏོར་ལུས་སྦྱིན་བྱས། །གཏོར་འབུལ་རྟེན་འབྲེལ་འགའ་བྱས་པས། །ཐུབ་རྟགས་འདྲ་བའི་རྨིས་ལྟས་དང་། །ཕ་རོལ་དགྲ་ཡི་ཕྲག་དོག་གིས། །ད་ནི་སྐྱོན་མེད་ཟེར་རོ་སྙམ། །ཟེར་བ་ལྟར་དུ་སྐྱོན་མ་བྱུང་། །དེ་ནས་ལྕི་ཞེས་ས་ཆ་རུ། །ཞག་འགའི་བར་དུ་འགྲོ་དོན་འཕེལ། །ཉམས་དང་རྟོགས་པ་འཕེལ་ཀ་
བྱུང་། །ནུབ་གཅིག་གཉིད་པའི་རྨི་ལམ་ན། །རྒྱལ་མཆོག་ཆོས་དབྱིངས་རྡོ་རྗེ་དེ། །སྐུ་ཤ་སྔར་ལས་རྒྱས་པ་ལ། །ན་བཟའི་སྣུམ་བག་ཆག་པ་མནབས། །བླ་ཕྲན་གཅིག་དང་ངེད་གཉིས་ལ། །ས་ཐོབ་ཡིན་པའི་བསྟོད་པ་གསུངས། །ཕྱག་གི་ཐལ་སྦྱར་དགྱེས་ཚུལ་གྱིས། །ཁྱེད་ཀྱི་ས་འདི་ཐོབ་ཅེས་པའི། །གྲངས་ཀ་གསུངས་ཤིང་རྗེ་ཉིད་ཀྱི། །ཕྲིན་ལས་སྒྲུབས་གསུངས་བསྐོལ་ཇ་གནང་། །བདག་ནི་ན་སོ་རྒས་པ་དེས། །ཡུན་རིང་འགྲོ་དོན་མི་འཁྱོང་སྟེ། །ལོ་གསུམ་གསུངས་ལྟར་བསྒྲུབ་ཞུས་རྨིས། །དེ་ཕྱིར་ཀཾ་ཚང་ཆོས་ལུགས་ཀྱི། །བླ་མ་ཆེ་ཕྲ་མང་པོ་དང་། །དགོན་པ་ཆེ་ཆུང་མེད་པ་ཡི། །དགེ་འདུན་པ་ནི་མང་པོ་ལ། །དབང་ལུང་ཁྲིད་སོགས་མང་དུ་འཕེལ། །དེ་ཡི་རྟེན་འབྲེལ་ཡིན་པར་གོ །དེ་ནས་རེ་རྒྱབ་དགོན་གྱི་མདུན། །ཨ་ཡིག་རང་བྱོན་གསལ་བའི་དྲུང་། །ཉམས་དང་རྨི་ལམ་འདྲེས་པའི་མཚམས། །མི་སྐྱ་དྲུག་བདུན་མཇལ་དུ་བྱུང་། །གཙོ་བོ་མི་ཆེན་རལ་པ་ཅན། །རལ་པ་སེ་དང་ཕྲུ་ལེ་བས། །ལག་ཏུ་ཞིམ་ཇ་ཕོར་གང་བཟུང་། །བདག་ལ་མཛུབ་མགོའི་མཆོད་པ་བྱེད། །བཙུན་པ་ཆོས་བཟང་ཅན་གཅིག་གིས། །ཇ་ཞུས་བྱེད་རྒྱུ་ཡིན་ཟེར་ནས། །
གསོལ་ལྕིར་ཁྱེར་ནས་ཐལ་བ་རྨིས། །ཕྱིར་ནུབ་ཁ་ཆར་ཚན་ཆེན་བབ། །མཆོད་པ་བྱེད་མཁན་ནོར་བདག་དང་། །བཙུན་པ་ཆུ་བདག་ཡིན་ནམ་སྙམ། །རེ་བརྒྱ་དགོན་པའི་དགེ་བཤེས་ཤིག །བདག་ལ་དད་འདུན་ཆེ་དོ་བས། །དེ་ཡང་རྨི་ལམ་སྐབས་སུ་མཐོང་། །སྐྱབས་གནས་ཆོས་ཀྱི་དབང་ཕྱུག་གི །གསོལ་དཔོན་བཙུན་པ་ཆས་བཟང་ཞིག །བདག་གི་གསོལ་དཔོན་བྱེད་རྨིས་པས། །ཞིང་སྐྱོང་འཁོར་བའི་རྟགས་སུ་གོ །དེ་ནས་འདམ་འཇོའི་གྲུ་ལས་བུད། །དེ་ནུབ་འཁྲུལ་པའི་རྨི་ལམ་ལ། །ཀརྨའི་ལྷ་ཁང་གཡེར་མོ་ཆེར། །མཚམས་དང་སྒྲུབ་པ་བྱེད་ཤོམ་རྨིས། །རིང་པོར་མི་ཐོག་དེར་ཕྱིན་ནས། །དབང་ལུང་འཕེལ་བའི་བརྡ་རུ་འདུག །མི་སྐྱ་སྐྱ་དང་མྱག་གེ་བ། །བཅུ་ཙམ་དབང་ཞུ་ཟེར་ནས་བྱུང་། །ལྷ་དེ་ཁོང་ཚོས་མི་འདོད་འདུག །འོན་ཀྱང་ངན་བྱས་ཁོང་རྣམས་ལ། །དུར་ཁྲོད་བདག་པོའི་དབང་བསྐུར་བྱས། །ཇག་རྐུན་བཟློག་པའི་རྟགས་སུ་གོ །ནུབ་གཅིག་འགྲོ་དྲུག་སེམས་ཅན་ལ། །རང་དབང་མེད་པའི་སྙིང་རྗེ་སྐྱེས། །འགྲོ་དོན་འགྲུབ་པའི་སྨོན་ལམ་བཏབ། །དེ་ནས་ཉམས་ཀྱི་སྣང་བ་ལ། །གཡོན་དེར་མི་ཆེན་གཅིག་ཀྱང་འདུག །དེ་
རྗེས་གཉིད་པའི་རྨི་ལམ་ན། །མི་སྐྱ་མང་པོ་འགའ་ཞིག་གིས། །བདག་ལ་གུས་འདུད་དབང་ཞུ་བྱུང་། །ཀུན་རིག་དབང་བསྐུར་བྱས་པ་རྨིས། །མི་མ་ཡིན་འགའ་ཡིན་ནམ་སེམས། །དེ་ནས་གྲུབ་ཆེན་ཀརྨ་པས། །དཔལ་ལྡན་ལྷ་མོ་ཞལ་གཟིགས་ཤིང་། །རྩི་ཤིང་ནགས་ཚལ་ཐམས་ཅད་ཀུན། །ལྷ་མོའི་སྐུ་རུ་གཟིགས་པའི་ས། །སྟེང་ཐོག་ཁ་རུ་ཡུད་ཙམ་ཕྱིན། །ལྷ་མོའི་སྔགས་བཟླས་ཀ་བསྟོད་བྱས། །ཐ་སྐར་ཁྲུམས་ཟླའི་ཉེར་དགུ་ལ། །མགོ་བཏུམ་དགུ་གཏོར་བསྔོས་པའི་སྐབས། །གཉིད་པ་མ་ཡིན་ཉམས་སྣང་ལ། །ངག་དབང་བཀྲ་ཤིས་དཔལ་གྲུབ་དེ། །རྒྱང་རིང་ཞིག་ནས་ཞབས་ཐང་ལ། །ཕེབས་ནས་བདག་གི་མདུན་དེ་རུ། །ཕེབས་བྱུང་ལེགས་པར་ཞལ་མཇལ་བས། །སྟག་ལུང་ཞབས་དྲུང་མ་ཡིན་པ། །ཆོས་དབྱིངས་རྡོ་རྗེ་དངོས་སུ་སྣང་། །ཞལ་རས་དཀར་ཞིང་གཞོན་ཤ་ཆགས། །སྔར་དུས་མཇལ་དང་ཁྱད་མེད་པར། །སྐུ་ལ་ཆོས་གོས་ངུར་སྨྲིག་གསོལ། །བཞེངས་ཐབས་དགྲ་བཅོམ་དུལ་བའི་ཚུལ། །མངོན་སུམ་མཇལ་དང་ཁྱད་མེད་པར། །མཇལ་བ་ཡིད་ལ་དགའ་བདེ་རྒྱས། །དད་པའི་གསོས་སུ་གྱུར་པ་བྱུང་། །དེ་ནུབ་ཉལ་བའི་རྨི་ལམ་
ན། །དྲིན་ཆེན་ཆོས་ཀྱི་དབང་ཕྱུག་དེ། །མངོན་སུམ་ལྟ་བུར་གསལ་བར་མཇལ། །སྐུ་ལ་ཟ་འོག་བེར་ཕྱམ་གསོལ། །ཞལ་རས་ལ་སོགས་དངོས་ལྟར་སྣང་། །དེ་ཡི་སྐུ་གཞོག་གཡོན་ངོས་ན། །ང་ཡི་མ་རྒན་ཡིན་སྙམ་པའི། །བུད་མེད་གཅིག་ཀྱང་བཞེངས་ནས་སྣང་། །དེ་ཚེ་མཆོག་གི་སྤྲུལ་སྐུ་ཡི། །ཞབས་གཉིས་ཅུང་ཟད་བསྙུང་ཚུལ་གྱིས། །ང་ལ་ཕུ་སུ་ཐོབ་གསུངས་བཏབ། །ཞབས་ལ་ཕན་པའི་དགོངས་གཏེར་གཅིག །སྤྲུལ་སྐུ་ལ་ནི་ཞུ་ཆོག་ཞུས། །དེ་ལ་ཁོང་གིས་ཞུ་འདོད་གསུངས། །ང་ལ་ཐུགས་རྩིས་དགྱེས་ཚོར་མཛད། །བདག་སེམས་རབ་ཏུ་ཚིམ་པ་རྨིས། །འདི་ནི་རྟེན་འབྲེལ་གནད་འགག་གཅིག །ཡིན་ནམ་སྙམ་པ་ཡིད་ལ་ཤར། །སྐྱེར་པ་ཐང་དུ་ཞག་གཅིག་བསྡད། །ལུས་ཀྱང་རབ་ཏུ་མ་བདེ་བས། །དམིགས་པ་དཀར་འགྱེད་དམར་འགྱེད་བྱས། །དེ་ནས་ཉལ་བའི་རྨི་ལམ་དུ། །དབང་བསྐུར་ཞུ་མཁན་འགའ་བྱུང་བས། །རྗེས་གནང་སུམ་སྦྲེལ་ཞིག་ཀྱང་བྱས། །དབང་ལུང་ཞུ་མཁན་དེ་རྣམས་ཀྱི། །གཟུགས་ནི་གསལ་པོར་མ་མཐོང་ངོ། །ཕྱིར་ནུབ་ལ་ཡང་དེ་བཞིན་དུ། །དབང་ཞུ་ཟེར་བ་འགའ་ཡང་བྱུང་། །སྔར་ཡང་ལན་གཅིག་མཇལ་མྱོང་
སྟེ། །ད་རེས་ཞལ་ལྟ་འོང་བ་ཡིན། །ཟེར་བའི་མཇལ་མི་ཚོ་གཅིག་ལ། །དབང་བསྐུར་ཞིག་ནི་བྱས་པ་ལ། །དབང་ནི་ཞུ་མཁན་དེ་རྣམས་ཀྱི། །གཟུགས་ནི་གསལ་པོར་མི་སྟོན་དོ། །མི་མ་ཡིན་དང་ཀླུ་ཡི་རིགས། །མཐོང་བའི་དུག་ཅན་ཡིན་པའི་ཕྱིར། །ང་ལ་དུག་ནི་ཕོག་དོགས་ནས། །གཟུགས་དེ་མི་སྟོན་དེ་ཡི་དོན། །ཡིན་པ་འདྲ་འོ་བསམ་པ་ཤར། །འབྲེལ་ཐོགས་མི་དང་མི་མིན་ཀུན། །བྱང་ཆུབ་ཐོབ་པའི་བསྔོ་སྨོན་བྱས། །དེ་ནས་འབྲོང་རྫོང་ཞོལ་དུ་བསླེབས། །ཉམས་དང་རྨི་ལམ་མཚམས་ཤེད་དུ། །བཀའ་སྲུང་ལྷ་མོ་ཡིན་ནམ་སྙམ། །བུད་མེད་རྒྱན་གྱིས་བརྒྱན་པ་བདུན། །རང་མདུན་གུས་པའི་ཚུལ་དུ་སྣང་། །མི་སྐྱ་ཤས་ཆེ་ཁྲོམ་པ་ནི། །བཅུ་འམ་ཉི་ཤུ་ཙམ་ཞིག་ནི། །བདག་ལ་གུས་འདུད་མདུན་དུ་འཁོད། །དབང་བསྐུར་ཆོས་བཤད་མང་བྱས་སོ། །དེ་དག་ཡུལ་དེའི་མི་མ་ཡིན། །འགའ་ཞིག་ཡིན་པ་འདྲ་འོ་སྙམ། །སྔར་དུས་གྲོང་ཆོག་བྱེད་པའི་དུས། །ཐང་པོ་ཆེ་ཡི་ལ་ཁ་ནས། །སེར་བ་དྲག་པོ་ཞིག་གིས་བརྡུངས། །མུན་རུབ་ཐང་ཤིང་ཙ་རུ་ཉལ། །རླུང་ཐོག་ལ་སོགས་ཆོ་འཕྲུལ་ཆེ། །ཉམས་དང་རྨི་ལམ་མཚམས་ཤེད་ན། །གཞི་བདག་ཇོ་མོ་རྨེ་
དིལ་དེ། །བུད་མེད་རྒྱུན་ལྡན་ཐང་ཤིང་ཙམ། །མཆེ་བ་ལན་ཕུར་ཙམ་གཅིགས་ནས། །བདག་ལ་འཇིགས་ཚུལ་སྟོན་དུ་བྱུང་། །དེ་ཚེ་བསྐྱེད་རིམ་ངང་ལ་གནས། །ཕྱིས་ཀྱང་ས་དེར་ནམ་ཕྱིན་དུས། །གནམ་ངོ་འཚུབ་ཅིང་མི་དགའ་སྟོན། །ད་ལམ་ཨ་མྱེ་འབྲོང་རྫོང་གི །མདུན་དུ་སྒར་པ་བསྡད་པའི་དུས། །ཇོ་མོ་རྨེ་དིལ་རི་མཐོང་བས། །ང་ནི་གར་སོང་གཞི་བདག་རྣམས། །དགའ་ཞིང་དད་གུས་བྱེད་པ་མང་། །ང་ལ་མི་དགའི་གཞི་བདག་ནི། །ཇོ་མོ་རྨེ་དིལ་འདི་ཡིན་སྨྲས། །དེ་ནུབ་ཉལ་བའི་རྨི་ལམ་དུ། །ཇོ་མོ་རྨེ་དིལ་དེ་ཉིད་ནི། །ཐ་མལ་བུད་མེད་རྒྱུན་ལྡན་གཟུགས། །མདུན་དུ་བྱུང་ནས་ཕྱག་གསུམ་འཚལ། །འོན་ཀྱང་ཕྱག་གསུམ་འཚལ་ཚེ་ཡང་། །སོ་གཅིགས་ཁ་སོ་ཀྲུལ་ཞིང་གདའ། །མོ་ལ་དམིགས་པ་མ་བྱས་ཀྱང་། །སྟོང་ཉིད་སྙིང་རྗེ་ཟུང་འཇུག་གི །ཉམས་ལེན་ཅུང་ཟད་བརྟན་པ་དེས། །མོ་ཡིས་གུས་ཚུལ་བསྟན་ན་ཡང་། །ཐུལ་ཡག་རང་ཞིག་མི་འདུག་སྙམ། །ཀླུ་བདུད་ར་དཀར་གཉན་པོའི་ཞོར། །སྡེ་འཁྲུག་བསླང་རྐྱེན་ལང་བ་ཡི། །ཆུ་འདྲེ་གནས་པའི་རྐང་རབ་སོ། །དབག་ཐུགས་མདའ་ཡི་ཐང་སྣེ་རུ། །སྒར་པ་བརྒྱབས་ནས་འདུག་མ་ཐག །
གསང་སློང་སེམས་ཀྱི་ཟུག་རྔུ་ལྡང་། །དོན་མེད་ཞེ་སྡང་ཁོང་ཁྲོ་སྐྱེས། །ངག་གིས་གྱོང་ཚིག་ཅུང་ཟད་སྨྲས། །སེམས་ནི་གདེང་ནས་མ་བདེ་འཁྲུགས། །ཡི་དམ་མངོན་རྟོགས་འགའ་ཞིག་བཏོན། །དེ་རྗེས་ས་ཆའི་སློང་དུ་རིགས། །རིགས་མ་ཐག་ཏུ་ངོ་བོ་བལྟས། །བལྟས་མ་ཐག་ཏུ་གསལ་སྟོང་ངང་། །རང་སེམས་དང་རྗེན་ལྷང་ངེར་གནས། །བག་དྲོ་བྱིན་ཆགས་རིག་པ་དྭངས། །གཅོད་དམིགས་ལ་སོགས་མ་བྱས་ཀྱང་། །དོན་གྱི་ཚར་སློང་གཉིས་ཀ་དེ། །ཇ་ཡུན་གཅིག་ལ་འགྲིག་པ་བྱུང་། །གསང་གཅོད་སེམས་ཀྱི་རྣམ་རྟོག་ལ། །གཅོད་པའི་མྱོང་བ་ལེགས་པར་སྐྱེས། །དེ་ཚེ་སྔོན་གྱི་ལོ་རྒྱུས་དྲན། །ལོ་ནི་ཉི་ཤུ་ལྷག་ཙམ་གོང་། །བདག་གིས་གྲོང་ཆོག་བྱས་པའི་དུས། །ཡུལ་ཕྱོགས་འདི་རུ་མི་གཅིག་ཤི། །དེ་ཡི་འཕོ་བ་བདག་གིས་བཏབ། །དེ་ནས་གཉིད་པའི་རྨི་ལམ་ན། །སྒར་པའི་མདུན་ཐད་ཆུ་ནང་ནས། །སྡིག་པ་རྭ་ཙ་གཡག་ཙམ་ཞིག །ལངས་ནས་བྱུང་བས་བདག་དང་འཛིངས། །བདག་ཀྱང་གུ་རུ་དྲག་པོ་ཡི། །སྤྲུལ་པའི་ལྕགས་ཀྱི་སྡིག་རྒོད་ནི། །ཁོ་ལས་ཆེ་བ་ཞིག་ཀྱང་བསྒོམས། །བདག་ནི་དེ་ཉིད་དངོས་སུ་གྱུར། །མཚན་རིང་ཁོ་དང་འཛིངས་བ་ཡིས། །
མཇུག་དེར་ཁོ་ཉིད་སྙི་ཉོལ་སོང་། །ད་ནི་ཅུང་ཟད་ཉམས་ཐུབ་སྙམ། །དེ་མ་ཐག་ཏུ་གཉིད་ལས་སད། །ཆུ་དེས་སྔར་ཡང་མི་བདུན་ཁྱེར། །དེ་ཡི་ཆུ་འདྲེ་དེ་ཉིད་ནི། །སྔ་མོ་ཅུང་ཟད་ཐུལ་ལགས་ཀྱང་། །ཐུལ་ཡག་རང་ནི་མེད་པ་ལ། །ད་རེས་ལེགས་པར་ཐུལ་ལམ་སེམས། །དེ་ནུབ་ཉལ་བའི་རྨི་ལམ་དུ། །གླེགས་བམ་ཅུང་ཟད་མ་ཚང་བ། །དང་པོ་དཔེ་ཕྲན་གཅིག་རྙེད་པ། །དེ་ནས་དངུལ་བྲིས་མཐིང་ཤོག་ཅན། །ཆུ་ཡིས་བང་བ་ཞིག་འདུག་པ། །འཆར་ཁའི་རྒྱུད་དང་སྒྲུབ་ཐབས་རྙེད། །དེ་མ་ཐག་ཏུ་མདུན་དེ་ན། །འཆར་ཁའི་ངོ་བོ་ཡིན་པ་ལ། །མཚོ་ཆེན་རྦ་རླབས་འཁྲུགས་པ་མཐོང་། །དེ་ནས་ངང་པ་ཐང་དུ་འོང་། །འདི་སྐབས་དབོན་པོ་རྒྱལ་མཚན་ལ། །ཆོས་ལུགས་གཞན་དུ་འཇུག་དགོས་པའི། །བཀའ་བཀྱོན་བར་ཆད་ཆེན་པོ་བྱུང་། །རྩ་གསུམ་ལྷ་ལ་གསོལ་བ་བཏབ། །དེ་ནས་རིང་པོར་མ་ཐོག་པར། །བར་ཆད་རྐྱེན་ལས་གྲོལ་བར་འགྱུར། །དེ་ནས་ཟླ་བ་འགའ་ཟུང་ཞིག །མཚམས་བསྡམས་དགོངས་འདུས་སྒྲུབ་ཆེན་སོགས། །སྒྲུབ་པ་མང་ཞིག་བྱས་པའི་ཚེ། །གཞུང་དང་མཐུན་པའི་རྟགས་མཚན་འགའ། །བྱུང་བ་མ་བྲིས་བརྗེད་དེ་
སོང་། །དེ་ནས་སྐབས་འགར་དབང་ལུང་དང་། །ཁྲིད་ཆུང་ལ་སོགས་འགྲོ་དོན་འཕེལ། །དེ་ནས་སྒར་བཀྱགས་ཡོར་གྱི་སྟོད། །སྒར་པ་བསྡད་ནུབ་རྨི་ལམ་དུ། །དགེ་བསྙེན་མི་ཡི་ཆ་ལུགས་ཅན། །མང་པོ་མཇལ་དུ་བྱུང་བ་དེ། །སྨན་རིགས་གཞི་བདག་ཡིན་ནམ་སེམས། །ཕྱིར་ནངས་གྲོ་རྫོང་བླ་མ་བྱོན། །དབོན་པོ་གསུམ་གྱིས་དགེ་ཚུལ་ཞུས། །དེ་བརྡ་མི་སྐྱ་གཅིག་བྱུང་ནས། །མདང་ནི་ང་ཡི་རྨི་ལམ་དུ། །གནས་བརྟན་བཅུ་དྲུག་མཇལ་བ་རྨིས། །ཟེར་ནས་རྟེན་འབྲེལ་ལེགས་སམ་སྙམ། །འདི་སྐབས་དུས་ཀྱི་རྩུབ་འགྱུར་ཆེ། །རྩ་གསུམ་ལྷ་ལ་གསོལ་བ་བཏབ། །དེ་ཚེ་འཁྲུལ་པའི་རྨི་ལམ་དུ། །དང་པོ་ཙ་ཀ་ལི་འདྲ་བ། །དེ་ནས་ཙཀ་ལི་མ་ཡིན་པ། །ནམ་མཁའི་འཇའ་ཚོན་ལྟ་བུ་ཡི། །བཅོམ་ལྡན་འཇམ་དཔལ་གཤིན་རྗེའི་གཤེད། །ཕ་རོལ་རྒོལ་འཇོམས་ལྷ་ཚོགས་རྣམས། །ཤིན་ཏུ་གསལ་བར་མཐོང་སྣང་བྱུང་། །དེ་རུ་གསང་བ་འདུས་པ་ཡི། །དབང་ཁྲིད་སྦྲེལ་མ་བཙུགས་པའི་ཚེ། །ཕྱུགས་ནད་ཆེན་པོས་ཀུན་ནས་བསྐོར། །རང་གཞན་ཐམས་ཅད་སྐྲག་པའི་དུས། །ཡི་དམ་ལྷ་ལ་གསོལ་བ་བཏབ། །ཉམས་དང་རྨི་ལམ་འདྲེས་པའི་སྐབས། །མི་དཀར་ཆེ་
ཞིང་བརྗིད་པ་ཞིག །ཨུ་དོགས་ཟེར་བའི་སྣང་བ་བྱུང་། །གསུངས་པ་བཞིན་དུ་སྐྱོན་མ་བྱུང་། །ལྷ་མོ་མཛེས་སྡུག་རྒྱན་གྱིས་བརྒྱན། །ཉམས་ཀྱི་སྐབས་ལ་ཡུད་ཙམ་མཐོང་། །ཉལ་ཁ་སྨོན་ལམ་འགའ་བཏབ་པས། །སྔོན་ཚེ་ཕྱག་ན་རྡོ་རྗེ་ཡིས། །ཕྱོགས་བཅུའི་སངས་རྒྱས་ཐམས་ཅད་ལ། །ཅི་བསམ་འགྲུབ་པའི་གདམས་ངག་ཞུས། །ཁྱེད་རང་སྨོན་ལམ་ཐོབ་ཅིག་དང་། །ཐམས་ཅད་འགྲུབ་པར་འགྱུར་རོ་ཞེས། །གསུངས་པའི་གཏམ་རྒྱུད་སྒྲ་ཞིག་ཐོས། །དེ་རུ་དབང་ཁྲིད་འགྲོ་དོན་འཕེལ། །དགེ་ཚུལ་ཞུ་མི་བཅུ་གཅིག་དང་། སྐྲ་ཕུད་ཕུལ་མི་གཉིས་ཙམ་བྱུང་། །ཡིག་དྲུག་དུང་ཕྱུར་གཉིས་དང་ནི། །བྱེ་བ་བཅུ་བཞི་ཁས་ལེན་བྱུང་། །དེ་ནས་རེ་ཞིག་མཚམས་བསྡམས་ཚེ། །རྒྱལ་གྱི་ཟླ་བའི་ཚེས་བརྒྱད་ནུབ། །རབ་རིབ་འཁྲུལ་པའི་བག་ཆགས་རྨི་ལམ་ལ། །རང་ཉིད་རྡོ་རྗེ་གྲོ་ལོད་བསྒོམས་བྱས་ནས། །ཕོད་ཁ་ལ་སོགས་མངོན་སུམ་ལྟ་བུར་གྱུར། །ཕུར་བུ་ཕྱོགས་བཅུར་འདྲིལ་ཞིང་འཆམས་པ་དང་། །རྒྱལ་དབང་ཆོས་དབྱིངས་རྡོ་རྗེ་དེ་ཉིད་ཀྱིས། །གྲོ་ལོད་ཆ་ལུགས་འདྲ་བའི་སྔགས་ཆས་མཛད། །ཟངས་ཀྱི་མཆོད་ཆ་འདྲ་བ་མང་པོ་དང་། །རྡོ་ཡི་སྤར་
བུ་གཏེར་ནས་བཏོན་པ་ནས། །མྱོང་གྲོལ་དམ་རྫས་ཞིག་ཀྱང་གནང་གྲབས་དང་།།ཤོག་སེར་སཾ་སྐྲྀ་ཏ་ཡི་ཡི་གེ་ཅིག །ཕབ་རྒྱུ་ཡོད་གསུངས་ཕབ་གྲབས་མཛད་པ་དང་། །ཤར་ཕྱོགས་ས་མཐར་འགྲོ་ལ་ཕན་པའི་ཕྱིར། །དངུལ་གྱི་གཏེར་ཁ་ཆེན་པོ་ཕྱེས་ཡོད་གསུངས། །གཞན་ཡང་དེ་སྐོར་ས་ཕྱོགས་འདི་ཉིད་དུ། །རྒྱལ་བ་འོད་མཚན་དབང་པོ་དེ་ཉིད་ཀྱིས། །ཕྲིན་ལས་འབྱུང་བའི་ལྟས་ཀྱང་འགའ་རྨིས་པས། །ཁྲོ་བོ་ལོད་ལ་གསོལ་བ་བཏབ་པའོ། །དེ་ཚེ་རྨི་ལམ་རྒྱལ་བའི་དབང་པོས་གསུངས། །བདེ་བ་ཅན་ནས་བྱོན་པའི་སྐྱེས་བུ་ནི། །བཻ་རོ་ཙཱ་ན་ལ་སོགས་བཞི་དང་ནི། །ལབ་སྒྲོན་མ་གཅིག་ཞྭ་མ་ལ་སོགས་པའི། །སྤྲུལ་པ་དེང་སང་དངོས་སུ་བཞུགས་པ་ཡི། །ཡེ་ཤེས་ཌཱ་ཀིའི་རྣམ་འཕྲུལ་བུད་མེད་གཅིག །ངོས་འཛིན་ཁྲི་འདོན་མཛད་ཚུལ་ཟུར་ཙམ་གསུངས། །དེ་ནས་དེ་སྐོར་རྒྱལ་བའི་དབང་པོ་ཡིས། །བུད་མེད་གཅིག་ལ་ཁྲི་འདོན་མཛད་པ་དང་། །དེ་ལ་རྒྱལ་ཚབ་སྤྲུལ་སྐུ་འཁྲུངས་ཟེར་བའི། །ལོ་རྒྱུས་ཐོས་པ་དེ་དོན་ཡིན་པར་སྣང་། །འདི་སྐབས་ས་ཆའི་སྟོད་སྨད་ནས། །མི་ནད་ཕྱུགས་ནད་མང་དུ་དར། །སྲུང་བའི་དམིགས་རིམ་སྦྱིན་སྲེག་དང་། །ཆོས་སྐྱོང་རྣམས་ལ་བཀའ་
བསྒོ་བྱས། །ཉམས་ཀྱི་སྣང་བར་འདི་སྐད་ཐོས། །ངེད་རྣམས་བསྲུང་བྱ་ཐམས་ཅད་ལ། །ཉིན་རེ་ལན་གཉིས་ལྟ་ཞིང་ཡོད། །ཆོས་སྐྱོང་རྣམས་ཀྱིས་གསུང་སྣང་བྱུང་། །དེ་དུས་དོགས་པ་དེ་ལས་ཐར། །གཏེར་སྟོན་གཉིས་ལ་དགོངས་པ་ཞུས། །མགོན་པོ་སྤྱི་བསྡུས་མདོས་ཆེན་བཅས། །དེ་ཚེ་ཉམས་དང་རྨི་ལམ་མཚམས། །སྔགས་བཙུན་ཐོར་ཅོག་གཟི་བརྗིད་ཅན། །གཅིག་བྱུང་མདོས་ལ་ལྟ་ཞིང་འདུག །བར་ཆད་ཞི་ཞིང་ཅི་བསམ་འགྲུབ། །འགྲུབ་པའི་མཆོག་ཏུ་འགྱུར་རོ་ཞེས། །ཟེར་བའི་སྒྲ་ཞིག་མཁའ་ལ་གྲག །ལྷ་ནི་གང་ཡིན་མི་འབྱེད་པ། །ཕྱག་
གཡོན་མཉམ་བཞག་སྟེང་དུ ་ནི། །བེཌཱུརྱ་ཡི་ནོར་བུ་བསྣམས། །ཕྱག་གཡས་ཐུགས་ཀར་སྐྱབས་སྦྱིན་མཛད། །དེ་འདྲ་ཅི་ཡིན་བསམ་ཙ་ན། །མཉམ་བཞག་སྟེང་ན་བེཟླུར་འཛིན། །དེ་ནས་ཅི་བསམ་འགྲུབ་པའི་བརྡ། །ཕྱག་གཡོན་དོན་གྲུབ་ཕྱག་རྒྱ་མཛད། །དེ་ནས་དོན་ཀུན་འགྲུབ་པའི་བརྡ། །ཟེར་བའི་སྒྲ་ཞིག་གྲག་པ་ཐོས། །མཚམས་ལ་འདུག་གམ་འགྲོ་སྙམ་ཚེ། །སྤྱན་རས་གཟིགས་དབང་སྒྲུབ་པ་ལ། །བཞུགས་པའི་ལྷ་དེ་སྒྲུབ་པ་བས། །བཞེངས་པའི་ལྷ་དེ་སྒྲུབ་ན་དགའ། །བཞེངས་པའི་ལྷ་
དེ་སྒྲུབ་པ་བས། །མཆོད་པའི་ལྷ་དེ་སྒྲུབ་ན་དགའ། །ཟེར་བའི་སྒྲ་ཞིག་གྲག་པ་ཐོས། །བདུད་འདུལ་རྡོ་རྗེས་གསུངས་པ་ལྟར། །རེ་ཞིག་འགྲོ་དོན་ལེགས་སྙམ་ནས། །ལོ་འགའ་འགྲོ་དོན་བྱེད་པ་ཡིན། །གསང་འདུས་བསྙེན་པའི་ཁ་གསོ་སྐབས། །རྨི་ལམ་སྐབས་སུ་བར་སྣང་ལ། །ལོ་རྒན་དྲུག་ཅུ་ཐམ་པ་དེ། །སྣང་ལ་རང་བཞིན་མ་གྲུབ་པར། །འཇའ་ཚོན་ལྟ་བུར་ཤར་བའི་ཚེ། །ཚེ་ཚད་དྲུག་ཅུ་རེ་གཅིག་ཡིན། །སྐུ་མཚམས་བསྡམ་ན་བསྲིང་རྒྱུ་ཡོད། །ཟེར་བའི་སྒྲ་ཞིག་གྲག་པ་ཐོས། །དེ་ཕྱིར་ཚེ་མཚམས་བསྡམས་རྒྱུ་བྱས། །ཞག་བདུན་སྒྲོལ་དཀར་བསྙེན་པའི་ཚེ། །རྨི་ལམ་ལུང་བསྟན་སྒྲ་ཐོས་པ། །མདུན་དུ་སྒྲོལ་མ་དཀར་མོ་ལ། །སྒྲོལ་མ་ཉེར་གཅིག་གིས་བསྐོར་བ། །གསལ་བཏབ་དེ་ལ་སེམས་གཏད་ནས། །འཇིགས་པ་ཀུན་ལས་ཐར་རོ་གསུངས། །དེ་ནས་སྐྱེ་སྟོད་ཕྱོགས་སུ་ཕྱིན། །ཆུ་ཆེན་ཁ་རུ་ཆོས་བཙུགས་ཤོམ། །རྨི་ལམ་ལྷ་མོ་རེ་མ་ཏི། །ནད་རྐྱལ་ཕག་མགོ་གསུམ་ཡོད་པ། །དྲེལ་གྱི་ཕྱི་ཤར་བཏགས་པ་ཞིག །མཐོང་ཞིང་ཕྱིར་ནངས་སྡེ་དེ་ཡིས། །སྤྱི་རིམ་སྦྱིན་སྲེག་དགོས་ཟེར་བས། །ཨ་མཚར་པོ་འཁྲུལ་པའི་རྨི་ལམ་ལ། །ས་ལུང་པ་གཡས་ཕྱོགས་
སྤང་རིའི་རྩེར། །ས་དམའ་གཅིག་ཏུ་བདག་འདུག་པ། །རི་ཆེ་ཆེར་སྐྱེས་ཏེ་མཐོན་པོ་འདྲ། །ཁྲི་མཐོན་པོ་གཅིག་ནི་བརྩེགས་པའི་སྟེང་། །ཉི་མ་དང་ཟླ་བ་གདན་དུ་བཏིང་། །དེ་སྟེང་རཱ་ག་ཨ་སྱ་བདག །ལུས་ཧཱུཾ་ཡིག་སྔོན་པོ་གཅིག་ཏུ་གྱུར། །ས་མཐོན་པོའི་འོག་ནས་གཞུང་ཆུ་འབབ། །བྱང་ནམ་མཁའ་དྭངས་པའི་དཀྱིལ་ཤེད་ནས། །ཉི་མའི་དཀྱིལ་འཁོར་སྔོན་པོ་ཤར། །ལྷོ་ནམ་མཁའ་ཡངས་པའི་བར་སྣང་ལ། །ཚེས་བཅུ་བདུན་ཙམ་གྱི་ཟླ་བ་ཤར། །དོན་ཅི་ཡིན་བརྟག་པར་དཀའ་བར་གདའ། །མི་བདག་གི་འཆི་ལྟས་མ་ཡིན་ནམ། །ས་སྐྱེ་སྟོད་ཆུ་ཆེན་གད་ཐོག་ཏུ། །ལྷ་ཐུགས་རྗེ་ཆེན་པོའི་དབང་ཁྲིད་དུས། །སེམས་འཁྲུལ་པའི་རྨི་ལམ་ཨ་ལ་ལ། །དེ་རུ་ཁྲོམ་ཚོགས་རྒྱས་པ་དང་། །ཡུལ་དེ་ཡི་དཔོན་རིགས་ཁག་ཆེན་ཞིག །བསྙུང་བས་དེ་རུ་འབྱོན་དགོས་ཟེར། །གྲོང་ཆོག་སྤང་ཕྱིར་མི་ཡོང་སྨྲས། །བར་ཚུགས་གཅིག་གི་སོ་ནས་ནི། །ཤིང་ཁྲིའི་སྟེང་དུ་བཏེག་འོང་བས། །ལམ་དུ་དབང་པོ་ཤོར་ཟིན་པས། །དབོན་པོ་བཏང་ནས་བྱིན་བརླབས་བྱས། །སོས་ནས་དྲུང་དུ་ཁྱེར་བྱུང་བས། །ལུས་ཉམས་ཡི་དྭགས་འདྲ་བ་ལ། །རྣམ་ཤེས་མ་འཕོས་ཙམ་དུ་
འདུག །ཞག་འགའ་དབང་དང་བྱིན་བརླབས་བྱས། །རིམ་གྱིས་བདེ་ཞིང་ནད་ལས་གྲོལ། །ཤི་བ་གསོན་པོར་བསླངས་བ་འདྲ། །ཀུན་གྱིས་ངོ་མཚར་ཆེན་པོ་བྱས། །གཞན་ཡང་མི་རྒན་ཤི་ལ་ཁད། །སྒར་འདབས་དེ་རུ་ཤི་བ་ན། །འཕོ་བ་ཨེ་འདེབས་བསམ་ཟེར་ནས། །རོ་ལྟར་གཡག་ལ་བཀལ་ནས་བྱུང་། །དབང་དང་བྱིན་བརླབས་བྱས་པ་ཡིས། །ཞག་འགའ་སོང་ནས་འགྲོ་ཐུབ་ཅིང་། །ཆོས་ར་གྲོལ་ནས་ནད་ལས་ཐར། །བྱིན་རླབས་ཆེའམ་སྙམ་པ་བྱུང་། །གནས་དེར་དབང་ལུང་འགྲོ་དོན་འཕེལ། །ཟང་ཟིང་ལོངས་སྤྱོད་ཆར་ལྟར་བབ། །དེ་ནས་ཁྲོག་ཤོད་མདོ་ཡི་སྟོད། །དབང་ཁྲིད་སྦྲེལ་མ་ཞིག་བཙུགས་པས། །ཁྲོམ་ཚོགས་འདུས་ཤིང་གདུལ་བྱ་འུར། །དེ་དུས་རྟ་གཉིས་རྐུན་མས་ཁྱེར། །ཞག་གཅིག་ཉི་མ་གཉིས་ཀྱི་བར། །རྐུན་མ་འགྲོ་རྒྱུ་མ་རྙེད་ནས། །ནགས་གསེབ་ཡིབས་ནས་འདུག་གོ་སྐད། །ཡོན་བདག་རྣམས་དང་གྲྭ་པ་ཚོ། །སྐྱ་མི་དྲུག་ཅུ་ཨེ་ཟིན་ཙམ། །མཚོན་ཆ་ཁྱེར་ནས་རྗེས་སུ་རྒྱུག །རྐུན་མ་བསད་ན་མི་རུང་སྙམ། །རྐུན་མ་ལ་ཡང་སྲུང་འཁོར་བསྒོམས། །ཟིན་ལ་ཁད་ལ་མ་ཟིན་ནས། །རྐུན་མ་རྟ་དང་བཅས་པ་ཤོར། །གསང་འདུས་དབང་སྒྲུབ་
གཉན་དྲག་པས། །བཀའ་སྲུང་རྣམས་ཀྱིས་ཕྲག་དོག་བྱས། །རྐུན་མ་གཉིས་ནི་འདུག་པ་དེ། །ཡུན་རིང་མི་འགོར་འཆི་བ་དང་། །ཕུང་ཐལ་བྱུང་བའི་རྨིས་བལྟས་མཐོང་། །ལོ་གཅིག་ཙམ་ཡང་མི་འགོར་བའི། །རུ་བ་དེ་ལ་དགྲ་ཕོག་ནས། །མི་བསད་ནོར་ཁྱེར་ཕུང་བ་དང་། །ལ་ལ་གངས་བསྡེབས་འོག་ཏུ་ཤི། །ལྷ་རྟགས་བྱུང་བས་མ་ཕྲག་ཅེས། །ཕྱིས་སུ་སྨྲེ་སྔགས་འདོན་ནོ་སྐད། །ནམ་ལངས་ཞོགས་ཇ་འཐུང་རྗེས་ཡུད་ཙམ་འཐུམ། །ཉམས་དང་རྨི་ལམ་འདྲེས་པའི་འཁྲུལ་སྣང་ལ། །དཔལ་ལྡན་རི་བོ་ཆེ་ཡི་བཀའ་སྲུང་ཆེ། །ལྷ་གཉན་དམག་དཔོན་དབྱི་རྒྱལ་རིན་ཆེན་དེ། །མི་བོ་ཆེ་ཡི་གཟི་བརྗིད་ཆ་ལུགས་ཅན། །འཕྲུག་སྔོན་གཙང་མཐིང་མདོག་ཅན་གསར་པ་གྱོན། །རལ་པ་སྣུམ་བསིལ་སྐུ་རྒྱབ་ཁེབས་པ་ལ། །ཁ་དོག་སྨུག་པོ་གདོང་བཟང་སྣ་བོ་ཆེ། །དེ་འདྲ་མངོན་སུམ་འདྲ་བ་མདུན་དུ་བྱུང་། །གནམ་ཆོས་ལ་སོགས་གསུང་གླེང་མང་དུ་བྱས། །ཡུད་ཙམ་བསམ་བློ་བཏང་བ་འདྲ་ཞིག་བྱས། །གུས་པའི་ཚུལ་གྱིས་མི་དེས་ཁོ་བོ་ལ། །གནས་ལྔ་ས་ལ་གཏུགས་པའི་ཕྱག་གསུམ་འཚལ། །དེ་ནས་མི་སྣང་འཇའ་ལྟར་ཡར་མ་ཐག །ཕྱག་འབུལ་བྱེད་མི་མང་པོ་
འོང་ངོ་ཞེས། །ཟེར་བའི་སྒྲ་ཞིག་བར་སྣང་ཁམས་སུ་གྲག །གཉན་ཆེན་སྡེ་བཞིའི་ཡ་རྒྱལ་དབྱི་རྒྱལ་དེ། །ང་ལ་ཕྱག་ནི་འབུལ་བ་མི་འོས་ཀྱང་། །ཨོ་རྒྱན་བཀའ་བཞིན་བདག་གིས་བསྒྲུབས་པ་དེས། །པད་འབྱུང་དམ་ཚིག་རྩི་བ་ཡིན་ནམ་སེམས། །སྒར་པ་དེ་རུ་གློ་བུར་དུ། །ནད་པ་ཅིག་བྱུང་དམིགས་པས་གཟིར། །ཉམས་སྐབས་བདག་གིས་ཅོག་པུ་ལ། །མི་དཀར་ཁྱི་དཀར་ཞོན་པ་ཅིག །གུས་པས་སྐོར་བ་བྱེད་པར་མཐོང་། །ནད་པ་དེ་ཡང་ནད་ལས་གྲོལ། །བླ་མ་ཡི་དམ་དབྱེར་མེད་པ། །ཨོ་རྒྱན་རྗེ་ལ་གསོལ་བཏབ་པས། །བྱིན་རླབས་ཅུང་ཟད་ཞུགས་སམ་སྙམ། །མངྒ་ལཾ།། ༈ །།འདི་དག་གོ་རིམ་མ་ངེས་ཏེ། །རིམ་པར་ཡི་གེར་མ་འཁོད་པས། །ཕྱིས་སུ་ཐོལ་བྱུང་གང་དྲན་བྲིས། །སྔོན་ཚེ་མཚམས་ལ་འདུག་སྐབས་ཤིག །འཁྲུལ་པའི་རྨི་ལམ་ཉམས་མཚར་བ། །འབྲོང་དང་ཤ་བ་རྐྱང་དང་གསུམ། །འདྲེས་པའི་ཁྱུ་འགའ་འདུག་པ་ལ། །གཅིག་གི་གོང་ནས་གཅིག་ཏུ་མཆོངས། །རེས་མོས་བྱས་ཤིང་བདག་གིས་ཞོན། །བྱང་ཕྱོགས་ངོ་མི་ཤེས་པའི་ས། །ཐག་རིང་འགའ་རུ་ཕྱིན་པ་རྨིས། །སྒོམ་སྡེ་འབྲོང་པ་བེ་རི་རྣམས། །བདག་གི་ཡོན་བདག་
འོང་བར་གོ །གནམ་ལོའི་རྒྱལ་པོ་སྟག་ལོ་ལ། །སྤར་སྟོད་ཕྱོགས་སུ་སྒར་པ་བཏེག །ཆམ་གཤིས་བརྒྱུད་དེར་སོང་བའི་དུས། །བྲག་དཀར་སྒོ་ཡི་དབྱིབས་འདྲ་བ། །དེ་ཡི་མདུན་དུ་ཞག་པའི་ནུབ། །མི་སྔོན་སེང་གེའི་མགོ་བོ་ཅན། །ཆེ་ཆུང་ཐང་ཤིང་ཙམ་པ་ཞིག །གར་སྟབས་བྱེད་ཅིང་བསུ་བའི་ཚུལ། །ཚུར་ལ་བྱུང་བ་གསལ་པོར་མཐོང་། །སྤྱི་འབྱམས་གནས་ཀྱི་བཀའ་སྲུང་བ། །ཀུན་དགའ་གཞོན་ནུའི་སྤྲུལ་པ་ཞིག །བསུ་བ་བྱེད་པ་ཡིན་པར་གོ །བྲག་དེ་གནས་དེའི་ཕྱི་སྒོ་ནི། །ཡིན་པར་འདུག་གོ་སྙམ་པ་བྱུང་། །དེ་ནས་ཡར་ལ་སོང་ཙམ་ན། །གནས་ཆེན་རི་བོ་གར་མཛད་ཅེས། །སེང་གེ་གནམ་མཆོངས་བྲག་དཀར་གྱི། །སེང་གེའི་ཞལ་ནི་ཡིན་ཟེར་བའི། །བྲག་ཕུག་ནང་དུ་ཞག་གཅིག་བསྡད། །འབྲུག་གློག་ཆར་པ་ཆེན་པོ་སོགས། །གནས་བདག་ཀླུ་བདུད་རྟགས་ཀྱང་བྱུང་། །དེ་སྐོར་སོག་འགྲིམ་དོགས་པ་ཆེ། །རྩ་གསུམ་ལྷ་ལ་གསོལ་བཏབ་པས། །ཉེ་ཞོ་མེད་ཅིང་བདེ་བར་བྱུང་། །དེ་ནས་སོག་པོའི་སྡེ་ནང་དུ། །ལྡོམ་བུ་མ་བྱས་སྒར་པ་གཤར། །སོག་མོ་འགའ་ཡིས་མར་ཁྱེར་ནས། །རྗེས་དེད་བྱེད་ཅིང་འབུལ་བའང་བྱུང་། །སོག་
པོ་གཅིག་གིས་བཀའ་བསྒོ་ཞུས། །བོད་ལས་དད་པ་ཆེ་བ་འདྲ། །ཨུར་ཞིང་རྒྱལ་མོས་བསྙེན་བཀུར་བྱས། །དེ་ནས་རྫ་སྟོད་ས་ཡི་ཆ། །སྔོན་ཚེ་རྒྱལ་པོ་ཆེན་པོ་ཞིག །རྟ་དམར་དུང་ཁྲབ་དཀར་པོ་ཅན། །ཁོ་ན་ཡོད་པ་ཁྲི་ཕྲག་ཙམ། །བྱུང་བའི་རྒྱལ་པོ་ཆེན་པོའི་རྒྱུད། །རྫ་སྟོད་རྒྱལ་པོའི་ཁབ་ཏུ་ཕྱིན། །བཀའ་ཁྲིམས་དམ་ཞིང་མངའ་ཐང་ཆེ། །སྡེ་ཡང་དད་འདུན་འབྱོར་པ་ཆེ། །རྒྱལ་པོ་ཆེ་འགྱིང་ང་རྒྱལ་ཆེ། །བླ་ཕྲན་ཕལ་ཆེར་དེར་སོང་ཡང་། །རྒྱལ་པོ་མཇལ་ས་མི་རྙེད་སྐད། །བླ་མ་འབྲིང་ཙམ་དེར་སོང་ན། །རྒྱལ་པོའི་སྒར་དུ་འགྲོ་ས་མེད། །རྒྱལ་པོ་ལམ་དུས་བྱས་ནས་མཇལོ། །བླ་མ་ཆེན་པོ་ཕེབས་ན་ཡང་། །གཟའ་སྐར་བཟང་ལ་མ་ཐུག་བར། །མཇལ་སྤྱད་ལ་སོགས་བྱེད་སྲོལ་མེད། །ཞག་གསུམ་སོང་ནས་ཁོ་བོ་ནི། །འཁོར་བཅས་སྒར་དུ་གདན་དྲངས་ནས། །བཀུར་སྟི་ཕུན་སུམ་ཚོགས་པར་བྱས། །མདུན་བཞག་ཤ་ཐུད་མར་ལ་སོགས། །དེ་ལས་ཆེ་བ་མཐོང་མ་མྱོང་། །སྔར་ནས་བླ་ཆེན་ཕེབས་པའི་དུས། །གསོལ་ཞབས་ཁྲལ་སྡུད་སྲོལ་རེད་པས། །དེ་ལ་ཁོ་བོ་ཡིད་མི་དགའ། །དེ་ནས་དེ་ཡི་ཉེ་ལོགས་སུ། །ཞི་ཁྲོའི་དབང་ཁྲིད་སྦྲེལ་མ་བཙུགས། །རྒྱལ་
སྐོར་གང་ཡོད་ཁྲོམ་དུ་འདུས། །རྒྱལ་པོ་ལྕམ་དྲལ་གཉིས་པོ་ནི། །བླ་ཆེན་ཡོངས་གྲགས་མ་གཏོགས་པ། །གཞན་ལ་དབང་བསྐུར་མི་ཞུ་སྐད། །ཐག་ཀྱང་ཅུང་ཟད་འགྱང་མོད་ཀྱང་། །ཉིན་བཞིན་རྟ་ལ་ཆིབས་ནས་ཀྱང་། །དབང་ནི་ཞུ་བར་རྒྱུན་ཏུ་འབྱོན། །འོན་ཀྱང་རྒྱལ་པོའི་དབང་ཞུ་ཚེ། །ཁྲོམ་གཞན་འབྲོས་ནས་འགྲོ་སྲོལ་འདུག །སྔོན་ཚེ་རྭ་ཛ་ཨ་མོ་གྷ། །སྡིག་སྤྱོད་རྒྱལ་པོ་ཆེན་པོ་སྟེ། །མིང་ཙམ་ཐོས་ཀྱང་སེར་མོ་བ། །ཆེ་ཕྲ་ཀུན་གྱི་བློ་སྙིང་འདར། །དེ་ཡི་བྲན་གཡོག་ཐ་ཤལ་གཅིག །བྱུང་ཡང་བླ་མ་བརྗེ་ཀུན། །འབྲོས་ཁུང་ཚོལ་ཞིང་ཡིབས་དགོས་པར། །དེ་ཡི་རྒྱལ་མོ་སྲས་མོ་རྣམས། །དེ་རུ་འདུག་པས་དབང་ཁྲིད་ཞུས། །བསྙེན་བཀུར་འབུལ་བ་བཟང་པོ་བྱས། །དད་འདུན་ལྷག་པར་ཆེ་འདུག་པས། །དཀོན་མཆོག་ཐུགས་རྗེ་མཚར་རམ་སྙམ། །བློན་པོ་རིག་སྔགས་འཆང་བ་གཅིག །རྟ་མགྲིན་ནག་པོའི་བསྙེན་པ་ཐེམ། །སེར་བ་བསྔགས་ཚེ་བསྐྱེད་རིམ་གྱིས། །ང་རྒྱལ་རྟ་མགྲིན་དངོས་ཡིན་སྙམ། །ཞག་གཅིག་ཡིད་ལ་མ་ཟིན་ནས། །གཞན་གྱིས་བཟུང་དགོས་བྱུང་ངོ་སྐད། །གློ་བ་ན་ནས་སྨན་པས་བོར། །རིམ་གྲོས་ཅེས་ཀྱང་མ་ཕན་ཚེ། །
ཨོ་རྒྱན་རྗེ་ལ་བློ་བཀལ་ནས། །མཚམས་བསྡམས་ཐུགས་སྒྲུབ་བསྐང་བ་ལ། །བརྒྱ་ཚར་ཙམ་ཞིག་སོགས་བྱས་པས། །ཐོ་རངས་ཉམས་ཀྱི་སྣང་བ་ལ། །ཨོ་རྒྱན་དངོས་སུ་སྔས་མགོར་ཕེབས། །སྨན་ནི་ཐུམ་གཅིག་གནང་བ་དེ། །ཕྱིར་ནངས་དངོས་སུ་བཟའ་རྒྱུ་གདའ། །དེ་ཉིད་ཟོས་པས་ནད་ཕན་ཟེར། །དེ་འདྲའི་ནུས་ལྡན་སྔགས་འཆང་དེས། །རྟ་བཟང་སེང་གེ་འདྲ་བ་ཕུལ། །མོས་གུས་མཆིལ་མ་བྱུང་བར་བྱས། །མགར་ཡང་ཞེས་པའི་སྐྱེས་ཕྲན་ཞིག །ཁོ་ལ་ལུང་བསྟན་བྱུང་ཟེར་ནས། །གནས་སྒོ་ཞིག་ཀྱང་ཕྱེ་ཤོམ་བྱས། །རྡོ་བ་ཟན་ལྟར་བཅང་བ་ནི། །རྐང་ཚེ་གང་ཙམ་ཡོད་དོ་སྐད། །ནད་པ་རྣམས་ལ་ཕན་ཐོགས་ཆེ། །པདྨ་གླིང་པའི་རྣམ་འཕྲུལ་ཞིག །ཁོ་ཡིན་སྨྲས་པས་ཐམས་ཅད་དད། །སྦྲ་ཡི་ནང་དུ་གདན་འདྲེན་ཚེ། །ཁོ་ལ་གདན་ཁྲི་བརྩེགས་པ་དར། །སྡེ་དེས་ཁོ་ལ་འབུལ་བ་ཡང་། །རྟ་ནི་བརྒྱ་ཙམ་བྱུང་ངོ་སྐད། །ཀུན་གྱིས་གྲུབ་ཐོབ་ཡིན་པར་བརྩི། །དེས་ཀྱང་སྔོན་ལ་མཇལ་དུ་བྱུང་། །རྟ་བཟང་གསུམ་ཙམ་ཕུལ་བ་དང་། །དབང་ལུང་ཞུ་ཞིང་དད་འདུན་ཆེ། །དེ་ཚེ་རྒྱལ་པོའི་ལྕམ་སྲིང་ནི། །ཐམས་ཅད་མཁྱེན་པའི་དགེ་ཚུལ་མས། །འདི་ཉིད་པད་
གླིང་ཡིན་ནམ་མིན། །བཟང་ངན་ཅི་ཡིན་སྨྲ་དགོས་ཞེས། །མི་ཤེས་སྨྲས་ཀྱང་རྒྱུད་པ་བཙུགས། །འདི་ལ་རྫུ་འཕྲུལ་མངོན་ཤེས་ཡོད། །རིམ་གྲོ་ལ་སོགས་བྱེད་དུ་ཆུག །འཕོ་འདེབས་ལ་སོགས་ཕྱི་མའི་དོན། །ཧ་ཅང་རེ་ལྟོས་བཅའ་དོན་མེད། །ཡུལ་འདིར་གནས་པའི་གཞི་བདག་ནི། །མོ་ཁད་ལྷ་རྩེ་ཐོག་གི་རྫོང་། །ཡེ་རྫུ་བབ་པ་ཡིན་འདུག་སྨྲས། །ཕྱིས་ནས་དེ་དོན་ཀུན་གྱིས་གསལ། །གཞན་ཡང་ལྷ་ཕ་འདྲ་བ་ཞིག །ཀརྨ་པ་ཡི་ལུང་བསྟན་ཡིན། །ཟེར་ཞིང་ཅི་ཡང་སྨྲ་བ་སྣང་། །འདི་ཉིད་ཅི་ཡིན་སྨྲ་དགོས་ཟེར། །མགར་ནག་བཀའ་འཁོར་གིང་ཆེན་བཞིའི། །ཤར་ཕྱོགས་ལྷ་ཡི་གིང་ཆེན་ནི། །ཚངས་པ་དཀར་པོ་བབས་སམ་སྨྲས། །བྱ་བྲལ་ཅི་ཡང་མི་ཤེས་ཤིང་། །སྣ་མེད་སྤྱོད་པ་ངན་པ་ཞིག །ནད་པ་ལ་སོགས་རིམ་གྲོ་ལ། །ཕན་ཐོགས་གདུལ་བྱ་ཆེ་བར་སྣང་། །འདི་ཡང་བཟང་ངན་སྨྲ་དགོས་ཟེར། །འདི་ནི་སྤྱི་འབྱམས་གནས་ཀྱི་བདག །ཀླུ་བདུད་ཟུ་ར་ར་སྐྱེས་དེས། །ཅུང་ཞིག་མགོན་པ་འདྲ་འོ་སྨྲས། །དེ་ཀུན་ཕྱིས་ནས་ཀུན་ལ་གསལ། །བདུད་འདུལ་རྡོ་རྗེའི་གཏེར་ལུང་ལས། །བྱང་ནས་ལྷ་ཕ་ཁྱུ་གཅིག་འབྱུང་། །གསུངས་པའི་དུས་
རྟགས་ཡིན་པར་གོ །རྒྱལ་པོ་དེ་ཚང་བསྲུང་དཀའ་བ། །རྙིང་མ་མཁས་ཤིང་མཐུ་ནུས་ཆེ།།དེ་ཉིད་འདས་པའི་དབོན་པོ་ཞིག །དབང་ལུང་ཞུ་ཞིང་བསྙེན་བཀུར་ཆེ། །ཁོང་ལ་གསོལ་བ་བྱུང་ངམ་ཟེར། །བསྙུང་གཞི་ཐུ་མོ་གཅིག་འདུག་པ། །འདི་ལ་གང་ཕན་བྱེད་དགོས་ཟེར། །གནམ་ཆོས་ལུགས་ཀྱི་བརྟན་བཞུགས་དེ། །བྱས་པས་ཕྱིར་ནངས་ཉིད་ནས་ཕན། །སྔོན་ཚེ་སོག་པོ་ལྷ་བཙུན་གྱིས། །བསྲུང་ཁ་བཟུང་བའི་སྔགས་རྒན་ཞིག །འདུག་པ་དད་འདུན་ཚད་མེད་ཅིང་། །བཀུར་སྟི་ཕུན་སུམ་ཚོགས་པར་བྱས། །དགེ་ལུགས་བླ་མ་འགའ་འདུག་པས། །དག་སྣང་བཀུར་སྟི་ལེགས་པར་བྱས། །དགེ་ལུགས་དགེ་སློང་བགྲེས་པོ་ཞིག །སྔར་ཡང་སེམས་ངོ་བསྲུང་འདོད་ནས། །བླ་མ་འགའ་ལ་ཁྲིད་ཞུས་ཀྱང་། །ཅུང་ཟད་ཙམ་ཡང་འཕྲིགས་མ་ཚུད། །ད་རེས་རྒད་པོ་འཆི་ཁ་འདིར། །ཅི་མཛད་ཁྱེད་ཤེས་བློ་གཏད་བཅས། །ནོར་ཕྱུགས་བཅུ་གཉིས་ཆོས་གཞི་བྱས། །ཅི་ལྟར་བཤད་ཀྱང་གོ་མ་ཐུབ། །མིག་ཀྱང་མི་གསལ་ལོང་ལ་ཁད། །ང་ཡི་སེམས་ངོ་མ་རྟོགས་ཞེས། །སྡུག་ནས་མཆིལ་མ་འཆོར་ཞིང་འདུག །མཐར་ཐུག་རྫོགས་ཆེན་ཐོད་རྒལ་བསྟན། །བལྟས་མ་ཐག་
ཏུ་ནམ་མཁའ་ལ། །རིགས་ལྔའི་སངས་རྒྱས་སྟོང་སྐུ་མཇལ། །དགའ་ཞིང་སྐྱིད་ནས་འཕུར་ལ་ཁད། །དེ་ཚེ་དབོན་མོ་དགེ་ཚུལ་མས། །ཨ་ཨ་དགེ་སློང་བགྲེས་པོ་འདིས། །འཆི་ཁ་རྫུན་ནི་ལབ་སྲིད་དམ། །འཕྲལ་དུ་དེ་འདྲ་མཇལ་སྲིད་དམ། །ཟེར་ཞིང་ངོ་མཚར་ཆེ་འོ་སྐད། །སྡེ་ནང་དེ་ན་ཟླ་གཅིག་ཙམ། །ཐོག་ཚེ་ལོངས་སྤྱོད་ཆར་ལྟར་བབ། །རྟ་ཡང་བརྒྱད་ཅུ་ཙམ་བྱུང་ཟེར། །སླར་ཡང་རྒྱལ་པོའི་སྒར་ཉིད་དུ། །གདན་དྲངས་དབང་ཞུས་འབུལ་བ་བྱས། །དེ་ནས་ཕྱིར་ལམ་སྙིང་ཐང་དུ། །གནས་ཆེན་སྤྱི་འབྱམས་ཞིབ་པར་མཇལ། །རང་བྱོན་ཐམས་ཅད་གསལ་དྲག་པས། །ངེས་ཤེས་དད་པ་དྲག་པོ་སྐྱེས། །སྤྱི་འབྱམས་ཕུག་པའི་སྒྲུབ་གནས་མཆོག །ཉི་མ་ཕུག་ཏུ་ཚོགས་འཁོར་བྱས། །རྟ་རྣམས་རྩ་དུག་ན་ཟིན་པས། །མཚོ་ཁར་ཁྲག་གཏར་ས་གཞི་དམར། །དབའ་ནག་མཚོ་བདག་ཀླུ་བདུད་ནི། །བདུད་པོ་ཁྲུ་ར་ར་སྐྱེས་ཀྱིས། །སློང་དང་ཆོ་འཕྲུལ་ཡིན་ནམ་སེམས། །སྲོད་ལ་མཚོ་ཡི་ནང་ནས་ནི། །འུར་སྒྲ་ཐུག་ཆོམ་ཆེན་པོ་ནི། །མཚོ་འཕྱུར་ཕུག་པ་གང་སྙམ་བྱུང་། །གཉིད་པ་མ་ཡིན་ཉམས་སྣང་ལ། །མཚོ་ཡི་དཀྱིལ་ནས་མི་ཆེན་པོ། །མགོ་ནི་ཉ་
ཡི་མགོ་བོ་ལ། །སྤྱི་གཙུག་མགོ་རས་ཆེན་པོ་གྱོན། །ཆེ་ཆུང་ཕ་རིའི་རི་དང་མཉམ། །ལུས་ནི་ང་ལ་མདུན་བསྟན་ནས། །ཁ་ནི་ལུང་པའི་ཕུ་ན་བལྟ། །འདི་ཉིད་དགེ་བསྙེན་ཡིན་འདུག་སྟེ།།ཁ་ནི་ང་ལ་མི་སྟོན་པ། །ཁ་རླངས་དུག་ནི་ཕོག་དོགས་པའི། །ཕན་སེམས་ཡིན་པར་འདུག་གོ་སྙམ། །ཕྱིར་ནངས་དེ་ལ་ཀ་བསྟོད་བྲིས། །དེ་ཕྱོགས་བཙུན་པ་ཞིག་ལ་བྱིན། །ཆུ་ཆེན་རབ་ཏུ་ཆོད་དཀའ་ཞིང་། །ཁྲག་གཏར་མཚོ་ཁ་དམར་པོར་སོང་། །བར་ཆད་འོང་དོགས་སྐྲག་ན་ཡང་། །དགེ་བསྙེན་དམ་ཚིག་ལྡན་པ་དེས། །གནོད་འཚེ་མ་བྱས་བདེ་བར་ཐལ། །དེ་ཕྱིས་བླ་མ་དཔོན་སློབ་གཉིས། །དེར་བསྡད་ས་རྐོ་རྡོ་རློག་སོགས། །ཅུང་ཟད་བྱས་པའི་ཆོ་འཕྲུལ་གྱིས། །བླ་མ་དཔོན་སློབ་རྟ་དང་བཅས། །མཚོ་ཡིས་རྡུབ་ནས་ཁྱེར་བ་ཐོས། །དེ་དུས་བཅོ་ལྔ་ནུབ་མོ་ལ། །མཚོ་འགྲམ་ཁྲག་གིས་དམར་པོ་བྱས། །དེ་ལ་གནོད་འཚེ་མ་བྱུང་བ། །ཨོ་རྒྱན་ཐུགས་རྗེ་ཡིན་པར་གོ །དེ་ནས་ཆམ་གྱི་ན་བུན་རྫོང་། །ཨོ་རྒྱན་སྒྲུབ་གནས་ཞིབ་པར་མཇལ། །མཚོ་ཁ་རང་དུ་སྒར་རྒྱབ་པས། །ཐོ་རངས་ཉམས་ཀྱི་སྣང་བ་ལ། །ན་བུན་དགེ་བསྙེན་ཆེན་པོ་དེ། །དཔོན་རིགས་ཆས་བཟང་
གཟི་བརྗིད་ཅན། །འཁོར་གསུམ་བཏགས་ཤིང་རྟ་ལ་ཞོན། །ཆུ་ཡི་གཞུང་ནས་ཕྱིར་ལ་བྱོན། །གུས་ཚུལ་དགའ་བའི་གཏམ་སྨྲ་མཐོང་། །གནས་ཁྲིད་པ་ཡི་ལྟར། །དེ་ཡི་གསོལ་ཁ་རྒྱས་པར་བརྩམས། །སྐོར་བ་བཅུ་བཞི་དུང་ཡིན་པར། །ཁག་ཁུར་བདུད་འདུལ་རྡོ་རྗེ་དང་། །མི་འགྱུར་རྡོ་རྗེ་གསུངས་མཐུན་པས། །དཔོན་གྱིས་བསྐོར་བ་བསགས། །རྐང་པ་ན་སྟེ་ཁོ་བོས་ཀྱང་། །དེ་ཡི་སྐོར་བ་བསོགས་པར་བྱས། །དེ་ནས་ཤར་ལུང་བྱ་རྫོང་དུ། །གསང་འདུས་སངས་རྒྱས་སྟོང་དབང་དང་། །དབང་ལུང་མང་དུ་འཕེལ། །ཕྱོགས་དེར་སྔགས་པ་མང་པོ་དང་། །ཡོན་ཏན་ཅན་ཡང་མང་བ་དེས། །ཀུན་གྱིས་དད་འདུན་ཆེ་དྲག་ནས། །བླ་ཆེན་གཞན་འགའ་ཕེབས་པ་ལ། །ལྟ་མཁན་ཙམ་ཡང་མ་བྱུང་བས། །བླ་མ་དེ་ཚོའི་གྲྭ་པ་འགའ། །ཟུག་རྔུ་སྐྱེས་ནས་འབར་རོ་སྐད། །དེ་ཡང་ཟང་ཟིང་ཆར་ལྟར་བབ། །སྡེ་ཤོག་དེས་ཀྱང་བརྒྱ་འབུལ་བཀྱག །རྟ་མགྲིན་གསང་འདུས་དམར་པོ་འདི། །ནུབ་ལ་ཁད་དུ་འདུག་པའི་ཕྱིར། །དེ་རུ་སྔགས་པ་མང་བའི་ཕྱིར། །ཆག་མེད་འདོན་པར་ཁས་ལེན་ན། །དབང་བསྐུར་དེ་མིན་བཀའ་གཉན་
སྨྲས། །བཅུ་གསུམ་ཙམ་གྱིས་ཁས་ལེན་བྱས། །ཕྱིས་ཀྱང་བར་སྒོ་དབོན་པོ་ལ། །དེ་ལྟར་སྨྲས་ནས་ཆག་མེད་དང་། །བསྙེན་སྒྲུབ་ཚན་ཆེན་ཐོན་པར་སྣང་། །གཞན་ཡང་སྔགས་འཆང་མང་པོ་ཡིས། །རྟ་མགྲིན་དམར་པོ་འདོན་པ་བྱུང་། །རྟ་མགྲིན་གསང་འདུས་བསྟན་པ་ལ། །མུན་ནང་སྒྲོན་མེ་བདག་གིས་བལྟམས། །དེ་ནས་རུ་བ་སྒར་དུ་ཕྱིན། །གསང་འདུས་སངས་རྒྱས་སྟོང་དབང་དང་། །དབང་ཁྲིད་སྦྲེལ་མ་ཟླ་གཅིག་བཙུགས། །ལྷོ་པ་སྤྲུལ་སྐུས་ཇ་འདྲེན་བྱུང་། །རྟོགས་ལྡན་གྲོ་ལོད་དུང་ཐོན་པ། །སྔོན་ཚེ་གསལ་ཉམས་ཤིན་ཏུ་བརྟན། །ལོ་ནི་ལྔ་དྲུག་ཙམ་གྱི་བར། །ཉིན་མཚན་ཁོར་ཡུག་འདུ་འབྲལ་མེད། །རྟོགས་པ་མཐོ་བའི་ང་རྒྱལ་ཆེ། །བླ་མ་བཟང་པོ་མང་མཇལ་ཡང་། །ཉམས་དེ་བཤིགས་པར་མ་ཐུབ་ནས། །རྟོགས་པ་མཆོག་ཏུ་རློམ་པ་ཞིག །ལོ་མང་གོང་དུ་བདག་དང་མཇལ། །བདག་ལ་རྟོགས་འབུལ་བྱས་པའི་ཚེ། །ངོ་བསྲུང་ངོ་བསྟོད་མ་བྱས་པར། །གསལ་ཉམས་འདི་ལ་ཁྱེད་ཆགས་ན། །གཟུགས་ཁམས་གནས་རིགས་བཅུ་བདུན་དུ། །གོལ་བའི་ས་ནི་ཡིན་འདུག་ཅེས། །ཉམས་དེ་བཤིགས་པའི་ངོ་སྤྲོད་བྱས། །དེ་ནས་ལོ་མང་མ་མཇལ་བའི། །
དེ་ཉིན་དེ་རུ་ཕེབས་ནས་བྱུང་། །སྔོན་གྱི་གསལ་ཉམས་དེ་ཞིག་ནས། །ངོ་བོ་དེ་ནས་མཐོང་འདུག་སྟེ། །རྟོགས་པ་ཉམས་ལ་ཤོར་བའི་སྐྱོན། །ད་ནི་ཉམས་རྟོགས་མེད་སོང་ཟེར། །སྡུག་བསྔལ་ཆེན་པོ་བྱེད་ཅིང་འདུག །དེ་ལ་ཁོ་བོས་ངོ་སྤྲོད་བྱས། །ཁོང་ལ་ཕན་ཐོགས་ཆེན་པོ་བྱུང་། །རི་དེ་བོན་རི་རེད་པ་དང་། །ཐད་དེར་བསམ་ཡས་ཆོས་སྐྱོང་དེ། །འབབ་ཅིང་སྐུ་ཁོག་ཞུགས་པ་དེས། །རྒྱུན་དུ་རླུང་འཚུབ་ལྡང་བ་སོགས། །དངོས་ཉམས་ཆོ་འཕྲུལ་ཆེ་ན་ཡང་། །ཁྲོམ་ཚོགས་འཇམ་ཞིང་བདེ་བ་དང་། །དབང་ལུང་ཁྲིད་སོགས་འཕེལ་བ་བྱུང་། །རྒྱུ་ནེ་བླ་མ་དཔོན་སློབ་སོགས། །སེར་མོ་བ་ནི་མང་པོ་ལ། །དབང་ལུང་མང་དུ་འཕེལ་བ་བྱུང་། །སོ་རག་གསའ་མགུར་དགེ་འདུན་རྣམས། །སྔ་ཕྱིར་དབང་ལུང་མང་འཕེལ་ཞིང་། །ཅོག་གྲྭའི་དགེ་སློང་ཞིག་འདུག་པ། །ཀར་ལུགས་ཚེ་དཔག་ལྷ་དགུ་དང་། །བེར་ཆེན་སྒྲུབ་པའི་ངག་ཁྲིད་ནི། །སྔོན་ཚེ་བདག་གིས་བྱས་པ་དེ། །བསྙེན་སྒྲུབ་བྱས་པས་རྟགས་ཐོན་ནས། །ངེས་ཤེས་དད་པ་ཐོབ་ནས་གདའ། །བཙུན་པ་སྒོམ་ཆེན་ཞིག་ལ་ཡང་། །ངོ་སྤྱོད་བྱས་པས་ངེས་ཤེས་སྐྱེས། །ལོ་མང་མཚམས་སྒྲུབ་ཁས་
ལེན་བྱས། །ཕྱིས་ཀྱང་མཚམས་སྒྲུབ་མཐར་ཐོན་ཐོས། །གྲུབ་ཆེན་རྨ་སེའི་གདུང་རྒྱུད་ནི། །ཕྱག་རྡོར་བསྙེན་པ་འབུམ་ཐོན་ཞིང་། །གཏེར་སྟོན་བདུད་འདུལ་རྡོ་རྗེ་ཡི། །ལུང་བསྟན་སློབ་མ་ཡིན་གསུངས་པའི། །རྟོགས་ལྡན་གཅིག་ཀྱང་དེར་ཕེབས་ནས། །དབང་ལུང་ཁྲིད་སོགས་ཞུ་བར་བྱས། །མཚམས་ཀྱི་དམ་བཅའ་ཆེ་དྲག་པས། །མཇལ་བར་འདོད་ཀྱང་ལངས་ཐབས་མེད། །རྫོགས་ཆེན་ཐོད་རྒལ་མ་ཐོབ་པས། །ངོ་སྤྲོད་ཡི་གེ་བཀུར་ཟེར་ནས། །ཡི་གེ་བཀུར་བས་ངོ་འཕྲོད་ནས། །ངེས་ཤེས་དད་པ་འཕེལ་ལོ་སྐད། །སྔགས་རྒན་དམ་ཆོས་ཞེས་པ་ཞིག །རྡོ་རྗེ་བྲག་དང་འབྲི་གུང་སོགས། །གྲྭ་ས་མང་པོ་བཅད་པ་དེས། །རྙིང་མར་མཁས་ཤིང་གྲགས་ཆེ་བས། །སྡེ་དགེ་གྲུབ་ཐོབ་པ་ཡིས་ཀྱང་། །ཁོང་ཉིད་གདན་དྲངས་དབང་ལུང་ཞུས། །ཡོན་ཏན་ཆེ་བའི་ང་རྒྱལ་གྱིས། །བླ་མ་སུ་ལའང་མི་མགུ་ཞིང་། །ཆེད་གསོད་སྐུར་འདེབས་བྱེད་ནའང་། །གུས་པས་དབང་ལུང་ཁྲིད་སོགས་ཞུས། །བཀའ་བརྒྱད་དང་ནི་གུར་དྲག་གི །དམིགས་རིམ་འདོན་འགྲིགས་ལ་སོགས་པ། །ནན་གྱིས་ཞུས་ཤིང་ཡི་གེར་བྲིས། །ཕྱག་ལེན་ཞིབ་ཆ་འདི་འདྲ་བ། །སུ་ལའང་མཐོང་
ཐོས་མེད་དོ་ཞེས། །ངེས་ཤེས་ཆེན་པོ་སྐྱེས་པར་གྱུར། །དེ་ནས་གསལ་སྟོང་སྒོམ་ཤུའི་གནས། །མི་གཡེལ་ཤོག་གསུངས་ཡུད་ཙམ་ཕྱིན། །སྤྲུལ་སྐུ་ཆེན་པོའི་ཞལ་ཡང་མཇལ། །གདན་མཐོ་བསྙེན་བཀུར་ཆེན་པོ་གནང་། །དེ་ནས་རང་གི་ཡུལ་དུ་ཕྱིན། །རི་ཁྲོད་ཉིད་དུ་གདན་ཕབ་ནས། །སྒྲུབ་ཆེན་སྒྲུབ་ཕྲན་མང་པོ་དང་། །ཟླ་བ་འགའ་ཞིག་མཚམས་བསྡམས་ནས། །བསྙེན་སྒྲུབ་ཀྱང་ནི་མང་དུ་བྱས། །དེ་དག་ཆུ་མོ་ཕག་གི་ལོར། །འགྲོ་དོན་བྱས་ཚུལ་ཧྲག་བསྡུས་ཡིན། །དེ་སྐོར་ཞིག་ལ་ཆབ་མདོ་ཡི། །ཕྱག་མཛོད་ཆེན་པོ་བསྙུང་ཟེར་ནས། །སྐུ་རིམ་ལ་དམིགས་འབུལ་བ་དང་། །གནང་སྦྱིན་གྱ་ནོམ་པ་ཡང་ཕུལ། །དེ་ནས་ཆུ་མོ་ཡོས་ཀྱི་ལོར། །ནོར་བདག་རྒྱལ་པོའི་མིང་འཆང་བའི། །དཔོན་ཕྲན་གཅིག་གིས་གདན་འདྲེན་བྱས། །ཤོག་ཁ་དེ་རུ་ཁྲིད་ཆུང་བཙུགས། །དཔོན་པོ་བསྙུང་ལ་དབང་བསྐུར་བྱས། །དེ་ཚེ་དེ་ཡི་མིག་མཐོང་སར། །ཆུ་མིག་དྲག་པོ་ཞིག་ཡོད་པ། །ཉམས་དང་རྨི་ལམ་མཚམས་ཤེད་ན། །ཆུ་མིག་དེར་གནས་ཀླུ་དེ་ནི། །བྱུང་བས་གུས་ཤིང་འདུད་པའི་ཚུལ། །གསུང་གླེང་མང་དུ་བྱུང་ན་ཡང་། །ཁ་ནི་བཏུམ་ཞིང་མི་སྟོན་ཏོ། །
འོན་ཀྱང་སྨྲ་ནི་ཤེས་པར་སྣང་། །དེ་ལ་མཚར་སྣང་ཆེན་པོ་སྐྱེས། །ཁ་རླངས་དུག་ནི་ཕོག་དོགས་ནས། །བསམ་བཟང་ཡིན་པའི་བརྡའ་ཡང་བསྟན། །སྲོག་སྙིང་ཕུལ་བའི་སྣང་བ་བྱུང་། །དཔོན་པོའི་ནད་ཀྱང་ཇེ་བདེར་སོང་། །གནས་འགྱུ་འཕྲོད་པ་འགའ་རེ་བྱུང་། །ཟས་ནོར་ལོངས་སྤྱོད་ཆར་ལྟར་བབ། །ཤོག་ཀ་གཅིག་གིས་འབུལ་བ་ལ། །ཀུན་གྱིས་ཨ་ཟེད་ཟེར་བ་བྱུང་། །དེ་སྔོན་ལོ་འགའི་གོང་རོལ་དུ། །དཔོན་དེས་ནུ་བོ་ཤེས་རབ་ཅན། །བཙུན་པ་ཚུལ་ཁྲིམས་འཆལ་བ་ཞིག །འདས་པའི་དགེ་རྩ་མང་འགྲུབ་རྗེས། །ང་ཡི་ནུ་བོ་གར་སྐྱེས་པ། །ཁྱེད་ཀྱིས་ཟུར་ཙམ་གསུངས་ན་ནི། །ནུ་བོ་མ་ཤི་པ་དང་འདྲ། །གལ་ཏེ་དེ་ནི་མ་གསུངས་ན། །ང་ནི་གཉིད་ཀྱང་མི་ཟིན་ཅིང་། །སྡུག་སྨྱོན་ལ་ནི་འགྲོ་ལེ་ཡོད། །ཟེར་བའི་ཡི་གེ་ཁ་ཆ་མང་། །ང་ལ་མངོན་ཤེས་མ་མཆིས་ཀྱང་། །ཡི་དམ་ལྷ་ལ་གསོལ་བཏབ་པས། །ཉམས་དང་རྨི་ལམ་མཚམས་ཤེད་དུ། །བརྡའ་དང་ལུང་བསྟན་བྱུང་བའི་འབྲས། །ཚེ་འདས་དེ་ཉིད་ཚེ་སྔོན་མར། །བཙུན་པ་ཆོས་པ་ལེགས་པོ་སྟེ། །སྒྲོལ་དཀར་བསྙེན་པ་ཚན་ཆེར་ཐོན། །ད་རེས་ཆོས་ཀྱི་ལས་འཕྲོ་ཡོད། །འོན་ཀྱང་བར་ཆད་དབང་དུ་
སོང་། །ད་ནི་རྔར་ཟོ་ཞེས་པའི་སར། །དཔོན་པོ་ཉིད་ཀྱི་ཉེ་འབྲེལ་ནི། །གཅིག་གི་བུ་རུ་སྐྱེ་བར་འགྱུར། །དེས་ཀྱང་སྒྲོལ་དཀར་བསྙེན་ན་བཟང་། །ཚེ་ནི་རིང་ངམ་ཐུང་ཡང་རུང་། །དེ་ནས་འཕོས་པའི་རྗེས་མ་ལ། །སྒྲོལ་མ་དཀར་མོས་རྗེས་བཟུང་ནས། །དག་པའི་ཞིང་དུ་སྐྱེ་འགྱུར་ཞེས། །ཡི་གེ་གཅིག་ནི་བསྐུར་ཚར་རྗེས། །བླ་མ་ཆོས་དབང་ཀུན་བཟང་གིས། །ཡི་གེ་བསྐུར་བ་མ་ལེགས་ཟེར། །ས་དེར་དཔོན་པོའི་ཉེ་དག་ནི། །ཚ་མོ་གཅིག་པུ་དེ་ལས་མེད། །དེ་ནི་ལོ་མང་ཉོག་རྒྱུད་མེད། །རབས་ཆད་ཡིན་རབས་ཀུན་ལ་གྲགས། །རབས་ཆད་མ་ལ་བུ་སྐྱེ་བའི། །ལུང་བསྟན་རང་དམའ་རོང་གིས་ཕབ། །ཟེར་ཞིང་འགྱོད་པ་བྱས་ནའང་། །ཕྱིར་ལོ་དེ་ལ་བུ་སྐྱེས་ནས། །ཁ་དྲག་འགྲོ་འདུག་ཐུབ་ཙམ་ནས། །དཔོན་རྒན་དེ་ཡིས་བྱིས་སྦ་བོས། །བྱིས་པས་སྦྲ་མགོ་མཐོང་ཙམ་ནས། །ང་ཡི་སྦྲ་ཡིན་ཟེར་བ་དང་། །ཁྱིམ་དུ་ཕྱིན་ནས་ཇོ་ཕོམ་ལ། །ཇོ་ཕོམ་འདི་ནི་ངས་བཏབ་སོགས། །ངེས་ཤེས་སྐྱེ་བ་བྱུང་ཚུལ་ནི། །དཔོན་རྒན་རང་གི་ངག་ནས་ཐོས། །དཔོན་རྒན་སྡིག་ལ་རྔམས་པའི་ཕྱིར། །ཆོས་ལ་དད་འདུན་མི་ཆེ་ཡང་། །དེ་ཕྱིར་དད་འདུན་
ཆེ་བ་དང་། །ཅུང་ཟད་ཆོས་ལ་སྣང་བ་འགྱུར། །སེམས་རྒྱུད་སྔར་ལས་འཇམ་པ་བྱུང་། །བར་སྐབས་ས་ཡི་ཁོལ་འདི་ན། །དཔོན་རྒན་ཇག་རྐུན་གཙོ་བོ་སྟེ། །སྐྱེས་བུ་ཆེན་པོ་དངོས་སུ་འཁོར། །དེ་དང་མཉམ་གཏམ་ཡོད་པར་གྲགས། །ལུས་ལ་མཚོན་ཆ་མི་ཟུག་ཅིང་། །ནགས་གསེབ་སྟག་མོ་སྦྲུམ་མ་བཞིན། །ཀུན་ཀྱང་སྐྲག་ཅིང་དོགས་བཅའ་དགོས། །དེ་ལ་ཁྲིད་ཆུང་བཤད་པ་ཡི། །དེ་ཕྱིན་བདག་གི་སློབ་རྒྱུད་ལ། །ཆོས་ཉན་དབང་ཞུ་སོགས་ཀྱང་བྱེད། །སྡིག་སྤྱོད་དེ་འདྲ་སེམས་འགྱུར་བ། །ཡི་དམ་ཐུགས་རྗེ་ཆེན་པོ་ལ། །གསོལ་བ་བཏབ་པའི་བྱིན་རླབས་ཡིན། །དེ་སྐོར་ཞིག་ཏུ་མར་ཐང་གི །དཔོན་རིགས་གྲགས་པ་ཅན་ཞིག་བསྙུང་། །སྨན་དང་རིམ་གྲོས་མ་ཕན་པས། །སྡེ་བ་རིན་ཆེན་བཀའ་ལུང་ལས། །གནས་མདོ་བླ་རྒན་གདན་དྲོངས་གསུངས། །ཁྱེད་ཀྱིས་གྲོང་ཆོག་མི་མཛད་ཀྱང་།། །ཤོག་ཀས་ཁྲིད་ཀྱང་ཞུ་འདོད་ཟེར། །དེ་ནས་དེ་རུ་སྒར་ཆུང་བཏེག །རུ་བའི་ཉེ་ལོག་གུར་ཕུབ་ནས། །ཤོག་ཁ་དེ་ལ་ཁྲིད་ཆུང་བཙུགས། །ཁོ་བོ་སྦྲ་ནང་མི་འགྲོ་བས། །དཔོན་པོ་རབ་ཅིག་བསྙུང་གདའ་བས། །ཉིན་བཞིན་ཚུལ་ལ་དབང་ཞུ་བྱུང་། །དཔོན་པོ་དེ་ཡི་
ཡབ་རྒན་ནི། །མར་ཐང་དཔོན་རིགས་དྲག་རྩལ་ཅན། །གཡུལ་ཆེན་ངོ་རུ་འདས་པ་དེ། །བཙན་རིགས་དྲག་རྩལ་ཅན་དུ་སྐྱེས། །སྔོན་ཚེ་ཁོ་བོ་ཕྱོགས་དེར་ཕྱིན། །དེ་ཚེ་དངོས་སུ་ཤུར་སྒྲ་དང་། །སིལ་ཆོམ་ཆེན་པོའི་ཆོ་འཕྲུལ་བྱུང་། །ཉམས་ཀྱི་སྣང་བར་བཙན་དེ་ཉིད། །དཔོན་རིགས་བཙུན་གཟུགས་ཆེས་བཟང་སྤྲུལ། །རྒྱང་ནས་བདག་ལ་ལྟ་བ་ལས། །ཕྱག་འབུལ་ཡང་ནི་མི་བྱེད་དོ། །རྒྱབ་རེས་འདི་ལ་ཉམས་སྣང་དུ། །བཙན་དེས་སྐད་ཅིག་སྐད་ཅིག་ལ། །སྤྲུལ་བསྒྱུར་སྣ་ཚོགས་བྱེད་པ་ལ། །དྲུང་དུ་བསླེབས་ནས་གཟུགས་མི་སྟོན། །འོན་ཀྱང་གསུང་གླེང་མང་དུ་བྱས། །སྔར་ལོ་དེ་ཚང་དཔོན་ཆུང་ཞིག །འདས་པ་མྱ་ངན་སྨྲེ་སྔགས་ནི། །མི་དང་ཁྱད་པར་མེད་པར་སྣང་། །པད་འབྱུང་ཞལ་རྐྱེན་སྐྱེས་བུ་ཁྱོད། །ད་རིས་ཕེབས་པ་བཀའ་དྲིན་ཆེ། །འདི་ནས་ཚེ་རབས་ཐམས་ཅད་དུ། །རྗེས་སུ་འཛིན་པར་ཞུ་ཟེར་སོགས། །གུས་འདུད་ཆེར་བྱས་མི་སྣང་གྱུར། །གཟུགས་ནི་གསལ་པོར་མི་སྟོན་པ། །དྲུང་དུ་འདུག་ནས་གསུང་གླེང་མཚར། །བཙན་དེས་མི་འགྱུར་རྡོ་རྗེ་ལ། །སྔོན་ཚེ་མཇལ་ཞིང་སྲོག་སྙིང་ཕུལ། །དེ་ཕྱིར་བདག་གིས་གསོལ་མཆོད་
བརྩམས། །ལྷ་བདག་ཁོ་རང་ཚང་ལ་བཏད། །ཁོ་གནས་རི་ལ་གསས་མཁོར་བསྟོད། །དེ་ཕྱིན་དཔོན་ཚང་བདེ་བ་དང་། །ཅི་བྱས་ལམ་སོང་དར་རྒྱས་ཆེ། །དེ་རུ་སེམས་ངོ་འཕྲོད་པ་དང་། །ཐོད་རྒལ་སྒོམ་མཁན་འགའ་རེ་བྱུང་། །སྒར་ཐོག་དེ་དང་ལམ་ཀུན་ཏུ། །འདོད་ཡོན་ལོངས་སྤྱོད་ཆར་ལྟར་བབ། །ཡང་ནི་དཔལ་ལྡན་ཆབ་མདོ་པའི། །དགོན་པའི་བདག་པོ་སྡེ་ཕ་ཞིག །སྲོག་རླུང་དྲག་པོའི་ནད་ཀྱིས་ཐེབས། །མཚོན་ཆ་ཐོགས་ནས་མི་གསོད་ཤོམ། །རེས་འགའ་བརྒྱལ་ནས་འགྲོ་ཤིང་ཡོད། །ལར་གྱི་གྲོང་ཆོག་མི་མཛད་ཀྱང་། །ད་ནི་མི་འབྱོན་ཐབས་མེད་པ། །ཆོས་རྗེ་ཚང་གི་བཀའ་ཡིན་ཟེར། །དེ་ནས་སྒར་པ་བཏེག་སྟེ་སོང་། །ལམ་དུ་གྲོང་ཁྱེར་པ་རྣམས་ཀྱིས། །བཀུར་སྟི་ཕུན་སུམ་ཚོགས་པ་བྱས། །སྡེ་པ་དེ་ཡི་ཕོ་བྲང་ན། །བང་བ་གཅིག་ལ་རྒྱལ་ཁང་བཟོས། །རྒྱལ་པོ་དམ་ཅན་གཉིས་ཀ་ཡི། །གསོལ་ཁ་རྒྱུན་དུ་བྱེད་སྲོལ་སྣང་། །མ་བྱས་ན་ནི་མི་རུང་ཞིང་། །བྱས་ན་འཁོར་གཡོག་ཕལ་ཆེར་ལ། །འཕྲལ་དུ་རྐྱེན་ཁ་དྲག་པོ་ལྡང་། །སྡེ་ཕ་རང་ནི་འདི་ལྟར་བྱུང་། །འདི་ལ་ཕན་ཐབས་དགོས་སོ་སྐད། །སྡེ་པ་ལ་ནི་དབང་བསྐུར་སོགས། །
དམིགས་པ་གཏད་པས་ཇེ་བདེར་ཐལ། །རྒྱལ་པོ་དམ་ཅན་གསོལ་ཁ་སོགས། །འདོན་ལུགས་ནོར་འཁྲུལ་འགའ་འདུག་པས། །བསལ་ནས་གཏད་པས་དེ་ཕྱིན་ནས། །རྩུབ་ཆ་ཆུང་དུ་སོང་ངོ་སྐད། །ཕན་ཐོགས་ཆེ་ཟེར་དེ་ཕྱིན་ནས། །སྡེ་དེས་ཡོན་བདག་རྩ་བ་བྱས། །དེ་ཞོལ་ཁྲོམ་དབང་དབང་ལུང་བྱས། །འདོད་ཡོན་ལོངས་སྤྱོད་ཆར་ལྟར་བབ། །ཆུ་བར་བླ་མས་བསྙེན་བཀུར་གཟབ། །དེ་ནས་ཚུར་ལམ་གྲུལ་ཚ་རུ། །ཞག་གསུམ་ཆོས་འབྲེལ་དབང་འབྲེལ་བྱས། །དེ་རུ་རྒྱ་གར་གྲུབ་ཆེན་པའི། །བླ་མ་དཀར་ཕྱོགས་འཛུགས་མཁན་ཞིག །འདུག་པ་དད་གུས་དབང་ལུང་ཞུས། །རྩ་བའི་བླ་མར་འཛིན་ནོ་ཟེར། །ཁྲོམ་ཚོགས་དཔག་ཏུ་མེད་པ་འདུས། །འདི་རུ་ཞག་བདུན་བཞུགས་དགོས་ཟེར། །དེ་ཚེ་ཉམས་དང་རྨི་ལམ་མཚམས། །དགེ་བསྙེན་གྲུབ་རྒྱལ་བྱང་གྲགས་དེ། །བླ་ཆེན་གཅིག་གི་གཟུགས་སྤྲུལ་ནས། །མཆོད་ཆ་འགའ་ཡིས་གཙོར་བྱས་པའི། །འབུལ་བ་མང་པོ་བདག་ལ་བྱས། །ཕྱག་ནི་འཚལ་བར་མི་བྱེད་ཅིང་། །ཁོ་རང་ཁྲི་ལ་བསྡད་ནས་ཀྱང་། །ངག་གིས་དགའ་ཞིང་དད་གུས་སྨ། །ཁོ་ནི་དད་ཅིང་གུས་ལགས་ཏེ། །ཡུལ་འདིར་
ཡུན་རིང་བཞུགས་ན་ཡང་། །དགའ་ལེ་མེད་ཅེས་གསང་གཏམ་སྨྲ། །དེ་ཕྱིར་དེ་རུ་མ་བསྡད་དེ། །ལུང་བསྟན་དེ་ཡང་བདེན་པའི་གཏམ། །ཕྱིས་སུ་གཞན་གྱི་ངག་ནས་ཐོས། །དེ་ནས་ཡར་ལ་འོང་བའི་ཚེ། །སོག་འགྲིམ་ཕྱིར་ལ་འོང་ཞིང་ཡོད། །ཟེར་བའི་འུར་སྐད་ཆེན་པོ་བྱུང་། །ཆུ་མཁར་ཞེས་བྱར་ཞག་པའི་ནུབ། །ཕྱིར་ནངས་སོག་པོ་འོང་དོགས་ནས། །སྐག་པ་ཡང་ནི་ཆེ་བའི་སྐབས། །གཉིད་པ་མ་ཡིན་ཉམས་སྣང་ལ། །ཡ་ཀི་ལུང་པའི་ཕུ་ཕྱོགས་ནས། །སྐྱེས་བུ་ངོམ་རྒྱལ་མཚོ་བཀྲ་དེ། །མི་དཀར་རྟ་དཀར་དར་དཀར་ཕྱུར། །དུང་ཁྲབ་དུང་རྨོག་འཁོར་གསུམ་ཅན། །ཆེ་ཆུང་གནམ་ས་འབྲེལ་བ་ཞིག །མངོན་སུམ་ལྟ་བུར་གསལ་བར་མཐོང་། །བསུ་བ་བྱེད་པ་ཡིན་པར་གོ །མགོ་ཐོན་བར་ཆད་མེད་པ་བྱུང་། །དེ་སྐབས་ཆུ་འཐག་བཙུགས་པའི་ཕྱིར། །ས་འབེབས་བྱས་ཤིང་རྫིང་ཡང་སྐྱིལ། །སྔགས་བདག་མཁར་ནག་སྨྱོ་ཁ་དང་།། །མི་མགོན་དཀར་པོའི་རྡོ་སྐུ་བྲིས། །དེ་ནས་ཀླུ་ཐོ་བརྩེགས་པའི་ནུབ། །ཁྱེའུ་གཞོན་ནུ་རལ་པ་ཅན། །བཞི་བཅུ་ཙམ་ཞིག་བདག་མདུན་འཚོགས། །ཐལ་སྦྱར་གུས་འདུད་བྱེད་པ་རྨིས། །དངོས་སུ་འབྲུག་གྲག་ཁ་བ་བབ། །ཀླུ་ཐོ་དེ་ཡི་རྩ་བ་
རུ། །སྦྲུལ་གཅིག་གདའ་བ་ཕལ་གྱིས་མཐོང་། །ས་དེ་སྔར་ལས་གཉན་པར་གྱུར། །དེ་སྔོན་བླ་མ་བག་ཡོད་པས། །གདན་འདྲེན་ལན་འགའ་བྱུང་བའི་ཕྱིར། །ཡོས་ལོའི་དབྱར་ལ་དེ་ཕྱོགས་བཏེག །སྲམ་གྱི་ཉི་ཟླ་ཁ་ཞེས་པར། །ཁྲོམ་ཚོགས་འདུས་ཤིང་ཆོས་ར་བཙུགས། །ས་རྒོད་ཤིན་ཏུ་གཉན་པའི་ཕྱིར། །ཉིན་རེ་རྒྱུན་དུ་སེར་བ་བརྒྱབས། །ཁྲོམ་དང་གྲྭ་ཚོགས་ཐམས་ཅད་ཀྱང་། །སེམས་རྒྱུད་འཁྲུགས་ཤིང་རྩུབ་པར་བྱུང་། །དེ་ཚེ་ཉམས་དང་རྨི་ལམ་མཚམས། །རྒྱལ་འགོང་བླ་མ་ཆེན་པོའི་གཟུགས། །པཎ་ཞྭ་དམར་པོ་གྱོན་པ་ཞིག །རྟ་ལ་ཆིབས་ནས་འཁོར་ཚོགས་བཅས། །མདུན་ནས་ཕྱག་འཚལ་གུས་འདུད་བཅས།།མགོ་གཡོག་གནོད་པ་ཡིན་པ་ནི། །རང་གི་སེམས་ཀྱིས་ཤེས་པ་བྱུང་། །ལྟ་བའི་གདེང་བསྐྱེད་བསྐྱེད་རིམ་བསྒོམས། །དེ་དུས་རྩུབ་སློང་རྣམས་ཀྱང་ཞི། །སེར་མོ་བ་ཡང་མང་དུ་བྱུང་། །དབང་ལུང་ཁྲིད་སོགས་ལེགས་པར་ཚར། །ཟང་ཟིང་ལོངས་སྤྱོད་ཆར་ལྟར་བབ། །དེ་ནས་བླ་མ་བག་ཡོད་པས། །གདན་དྲངས་བཀུར་སྟི་ཕུན་ཚོགས་བྱས། །དེ་རུ་ལྷ་མོ་བརྒྱ་རྩ་བླུག །རི་ཕ་དགེ་བཤེས་ཆུང་བས་ཀྱང་། །དེ་བཞིན་
སྤྱན་དྲངས་བསྙེན་བཀུར་བྱས། །དེ་བཞིན་དགེ་བཤེས་ཕུན་ཚོགས་ཀྱིས། །ཤོག་ཁས་ཞག་གསུམ་དབང་སྦྲེལ་བྱས། །དེ་ཕྱོགས་སྔགས་འཆང་འགའ་རེས་ཀྱང་། །རང་རང་འདོད་ཆོས་དབང་ལུང་ཞུས། །བཀུར་སྟི་ཕུན་སུམ་ཚོགས་པར་བྱས། །ས་ཕྱོགས་དེ་ཉིད་རབ་ཏུ་གཉན། །ཀ་རྒྱལ་རྣམ་རྒྱལ་ལྡིག་རྒྱལ་གསུམ། །ཀ་རྣམ་ལྗིག་གསུམ་ཡུལ་ལྷའི་གཙོ། །བཙན་བདུད་ཀླུ་གསུམ་ཡིན་པར་གྲགས། །འབྲུག་གློག་ཆར་དྲག་སེར་ཕྲན་སོགས། །འཇིགས་སུ་རུང་བ་ཡང་ཡང་བྱུང་། །ནུབ་གཅིག་ཉམས་ཀྱི་སྣང་བ་ལ། །རྣམ་རྒྱལ་གསང་བ་ལྷ་རྩེ་དེ། །བདུད་ཕོ་མི་ནག་རྟ་ནག་ཅན། །རེ་བ་ནག་པོའི་གོས་གྱོན་ནས། །མདུན་ནས་ཡར་ལ་འགྲོ་བ་མཐོང་། །ཁོ་བོ་མཇལ་བར་ཡིན་པར་འདུག །མགོ་དེ་རེ་བས་བཏུམ་ནས་གདའ། །དེ་དོན་ཅི་ཡིན་བསམ་ཙ་ན། །ཁོ་ལ་མཐོང་བའི་དུག་ཡོད་པས། །ང་ལ་གནོད་དོགས་ཡིན་པར་འདུག །ཁོང་གསུམ་སྤུ་གྲི་མཆེད་གསུམ་གྱི། །རིགས་ཐོབ་སྤྲུལ་པ་ཡིན་པར་གོ །དེ་ཚེ་ཀ་བསྟོད་གཅིག་བྱས་པས། །དེ་ཕྱོགས་སྔགས་བཙུན་ཕལ་ཆེར་གྱིས། །དེ་ཉིད་འདོན་ཞིང་ཡོད་པར་སྣང་། །དེ་དུས་ཕྱིན་པའི་སྡེ་རྣམས་ཀྱིས། །འགྱུར་མེད་
དད་པ་ཐོབ་པ་དེས། །ཕྱིས་ཀྱང་རིམ་གྱིས་འབུལ་བ་བསྐུར། །དེ་ནས་རྟ་རྣ་དགོན་དུ་བསླེབས། །རྟ་ཕྱུགས་ཤིན་ཏུ་ཚན་ཆེ་བས། །ཆུ་ལ་ཡང་ནི་ཐེབ་དཀའ་བྱུང་། །རྟ་རྣ་དགོན་པའི་བླ་མ་ཡིས། །སྤྱན་དྲངས་བསྙེན་བཀུར་ཕུན་ཚོགས་བྱས། །རྟ་རྣ་སྤྱི་ཕས་བསྙེན་བཀུར་དང་། །ཡེལ་པའི་མདུན་དུ་ཞག་གཅིག་ཉལ། །དེ་ཚེ་སེམས་ཅན་ཐམས་ཅད་ལ། །རང་དབང་མེད་པའི་སྙིང་རྗེ་སྐྱེས། །བདག་དང་སློབ་མ་རྒྱུད་པར་བཅས། །སྐྱེ་བ་འདི་དང་ཚེ་རབས་ཀུན། །གཞན་ལ་གནོད་པ་མི་སྐྱེལ་བའི། །སྨོན་ལམ་ཁ་ཞེ་མེད་པར་བཏབ། །ཉམས་སྣང་ཡེལ་པའི་གཡོན་ཕྱོགས་དེར། །ལྷ་མོ་རྒྱན་མེད་བཞེངས་པར་མཐོང་། །དེ་ནུབ་རང་གི་གྲྭ་སློབ་ལ། །རྐྱེན་ཁ་ཆེ་བའི་རྟགས་ཀྱང་མཐོང་། །ཕྱིས་ཀྱང་དེ་ག་དངོས་སུ་གྱུར། །དེ་ནས་གཟེ་ཡི་གཞུང་བརྒྱུད་ནས། །ཆུ་སྐོར་མདོ་ནས་ངོམ་དུ་བསླེབས། །མགར་ཟངས་སྣ་ཡི་ཕར་ཁར་ཞག །སྔོན་ཚེ་ལོ་ནི་མང་པོའི་གོང་། །ཆར་པ་ཤིན་ཏུ་དཀོན་པའི་དུས། །བདག་གི་ཆར་འབོད་དགོས་བྱུང་དུས། །འབབ་ལ་ཁད་ཀྱིས་འབབ་མ་ཐུབ། །ཡུལ་ལྷ་ཀླུ་དང་བཅས་པ་ཀུན། །བྲུབ་ཁུང་ནང་དུ་བཀུག་བྱས་ནས། །
ཐུན་བྲབ་དྲག་ཏུ་གཟིར་བའི་ཚེ། །རྨི་ལམ་འཁྲུལ་པའི་སྣང་བ་ལ། །ཡུལ་གྱི་དཔོན་རིགས་ཐམས་ཅད་ཁྲོས། །ང་ལ་ཡང་ནི་ཚིག་ངན་བརྗོད། །ང་ལ་བརྡོ་དོན་བྱས་ནས་ཀྱང་། །བན་རྒན་ཤ་ཆེན་མགོ་སེ་ཞིག །འདུག་པའི་སྐེ་དེ་བཅད་ནས་ཐལ། །ཉེས་པ་ཆེ་བསམ་ང་ཡང་སྡུག །ཀོ་ལོང་འཁྲོ་འཕགས་བྱས་པ་རྨིས། །དེ་དུས་གཅོད་པ་ནུས་ལྡན་ཞིག །ཁོ་རང་ཆར་པ་འབོད་འདོད་ནས། །ང་ལ་ཆར་བཀག་དམིགས་པ་བྱས། །དེ་དོན་ཡིན་པར་ཕྱིས་ནས་ཐོས། །དེ་མ་ཐག་ཏུ་གཅོད་པ་དེས། །མགར་ཟངས་དེ་རུ་གཉན་ཐོག་བཅད། །ཀླུ་དང་ས་བདག་འཁྲུག་པའི་ཕྱིར། །ཇག་རྐུན་རྣམས་ཀྱིས་སེམས་བསྒུལ་ནས། །གཅོད་པ་བསད་ཅིང་རྒྱུ་ཀུན་འཕྲོག །དེ་སྔོན་མགར་ནག་བླ་ཤིང་རྩར། །ཆུ་མིག་གཅིག་ནི་འདུག་པ་ལ། །བདག་གིས་ཆར་འབོད་བྱས་པ་ཡང་། །འདོད་བཞིན་མ་བབ་རྟ་གཅིག་ཤི། །དེ་ལྟར་ལན་གཉིས་གཉན་འཁྲེབ་ཤོར། །ཐ་མལ་སྐྱེ་བོ་འགའ་ལ་ཡང་། །མཐོང་སྣང་ཆོ་འཕྲུལ་ཆེན་པོ་དག །བསྟན་པའི་ལོ་རྒྱུས་ཤིན་ཏུ་མང་། །དེ་ཡི་མཚོ་ཁར་སྒར་ཞག་ནུབ། །སྔོན་གྱི་ལོ་རྒྱུས་དེ་ཀུན་དྲན། །དེ་ནས་ལུས་སྦྱིན་དམིགས་པ་བྱས། །དེ་མ་ཐག་ཏུ་མཚོ་
ངུར་ནས། །མཚོ་ནི་འཕྱུར་བ་འདྲ་ཞིག་བྱུང་། །དེ་མ་ཐག་ཏུ་བདག་ཉིད་ཀྱང་། །ཚད་རྒོད་འདྲ་བའི་ནད་ཀྱིས་ཐེབས། །ཕྱིར་ནངས་རབ་ལ་བརྒྱབ་པའི་ཚེ། །ནོར་ཕྱུགས་གསུམ་བཞི་ཆུ་ཡིས་ཤི། །དེ་ཀུན་ཆུ་འགྲམ་བཤས་པ་ཡིས། །བཙོ་ཁྲག་ཐམས་ཅད་ཆུ་རུ་སོང་། །དེ་ནས་གྲྭ་པ་མང་པོ་ཞིག །ཀླུ་ནད་གཡེམ་པའི་ནད་ཀྱིས་ཐེབས། །རང་ཡང་ལུས་སྦྱིན་དམིགས་པ་གཟབ། །བསྐྱེད་རྫོགས་ལྟ་བའི་གདེང་བསྐྱེད་པས། །ཞག་པོ་འགའ་ནི་སོང་བའི་ཚེ། །ཉིན་གཅིག་ཡུད་ཙམ་འཐུམ་པ་ལ། །བཙན་དང་ཀླུ་ནི་འདྲེས་མ་ཡི། །ཁྲོམ་པ་སུམ་བརྒྱ་ཙམ་ཞིག་ལ། །སྐྱབས་འགྲོའི་སྡོམ་པ་གསལ་བར་ཕོག །སྐྱབས་གསུམ་འཛིན་བའི་དགེ་བསྙེན་བྱས། །ལེགས་སོ་ཡི་རང་བསྟན་པ་བསྲུངས། །ཟེར་ནས་ཐམས་ཅད་སྐྱ་མིར་གྱུར། །སྐྱ་མི་སུམ་བརྒྱ་ཨེ་ཡོད་ཙམ། །འུར་དང་ལྡིར་རེ་གཤར་སོང་བ། །རྨི་ལམ་ཡིན་ཀྱང་མངོན་སུམ་འདྲ། །ཡུལ་ཕྱོགས་འདི་ཡི་ཀླུ་རིགས་དང་། །བཙན་རིགས་ཕལ་ཆེར་བླ་རྒན་དེས། །དགེ་བསྙེན་ཡིན་ཞེས་མ་འོངས་དུས། །སློབ་བརྒྱུད་རྣམས་ཀྱིས་སྨྲ་སྲིད་དོ། །སྨྲས་ཀྱང་རྫུན་དུ་མི་འགྱུར་ཙམ། །འོན་ཀྱང་ངས་ནི་སྨྲ་མི་
རུང་། །དེ་སྔོན་ཡོས་ཀྱི་ལོ་ཡིན་སྙམ། །མཁར་དམར་མདོ་ནས་ཕྱིར་བཏེག་སྟེ། །ཚ་བའི་ས་རུ་སླེབས་པའི་ནུབ། །རབ་རིབ་འཁྲུལ་པའི་རྨི་ལམ་དུ། །རང་ཉིད་པདྨ་རྒྱལ་པོ་ནི། །མངོན་རྟོགས་སྔགས་དང་བཅས་པ་ཞིག །སྔར་མི་ཤེས་པ་ཡིད་ལ་གསལ། །བཏོན་ཅིང་བསྒོམས་པས་དངོས་སུ་གྱུར། །བཙུན་པའི་གཟུགས་ཅན་གསུམ་ཙམ་གྱིས། །གུས་པས་བརྒྱ་ཕྱག་གསུམ་ཙམ་འཚལ། །ཉ་ཁྲབ་འདྲ་བའི་གོས་གྱོན་པའི། །ཁྲོམ་ནི་སྟོང་ཕྲག་ཙམ་ཞིག་ལ། །དབང་བརྒྱ་ཕྱེད་གཉིས་ཙམ་ཞིག་བྱས། །ཐོ་རངས་བར་སྣང་སྒྲ་གྲག་པ། །དཔོན་དང་བླ་མས་གང་གསུངས་དགོས། །ཟེར་བའི་ཚིག་ཀྱང་གསལ་བར་བྱུང་། །ཨོ་རྒྱན་ཆེན་པོའི་ཐུགས་རྗེ་ཡིས། །ཡུལ་ཕྱོགས་འདི་ཡི་ལྷ་འདྲེ་ཡིས། །བདག་ལ་ཅུང་ཟད་གུས་པར་གོ །ཕྱིར་ནངས་ནམ་ནི་ལངས་བའི་དུས། །ལས་ཀྱི་ལྷ་མོ་རེ་མ་ཏི། །རྡོ་རྗེ་གཡུ་སྒྲོན་གནས་པའི་ཕྱོགས། །ནམ་མཁའ་སྨུག་ནག་འཇའ་ཚོན་ནི། །སྔོན་ཆད་མཐོང་མ་མྱོང་བ་དངོས་སུ་སྣང་། །སྒོ་མོ་སྒར་གྱི་གཉའ་དྲུང་དུ། །འཇའ་ཚོན་འཐིབ་པ་ལ་ལས་མཐོང་། །ལྷ་མོའི་རྒྱུད་ལས་གསུངས་དང་མཐུན། །ལྷ་མོ་དགྱེས་པའི་རྟགས་སུ་གོ །ཚ་
བ་སྒང་གི་སྒང་སྟོད་ན། །སྐུ་ལྷ་གཉེན་གྱི་ལྷ་ཞོལ་ན། །ལུང་ནས་བསྟན་པའི་གཏེར་གྱི་གནས། །ཅོག་ནེ་བྲག་གི་གཡོན་ཟུར་ན། །ཆབ་ཀྱིས་བསྐོར་བའི་དེ་དཀྱིལ་ན། །ཞག་གཉིས་སྒར་པ་བསྡད་པའི་དུས། །འབྲོང་རྗེ་དཔོན་པོ་མཇལ་དུ་བྱུང་། །དེ་ཚེ་སྣང་སྲིད་ལྷ་འདྲེ་གཡོས། །གཟི་བྱིན་ཆོ་འཕྲུལ་ཆེན་པོ་བྱུང་། །ཉམས་དང་རྨི་ལམ་རྩུབ་སློང་ཆེ། །ལྷ་བསྒོམས་སྔགས་བཟླས་ཞི་མ་ཐུབ། །དེ་ནས་ལྟ་བའི་གདེང་བསྐྱེད་ནས། །མགུར་དབྱངས་བྱས་པས་ཞི་བར་གྱུར། །དེ་སྐབས་ཆུ་ཆེན་གནམ་དུ་འཕྱུར། །ཅི་བྱ་གཏོལ་མེད་གྱུར་པའི་ཚེ།།ལྟ་བའི་གདེང་བསྐྱེད་གསོལ་འདེབས་བྱས། །གནོད་པ་མ་བྱུང་བདེ་བར་ཐར། །དབང་ཁྲིད་ཆོས་སོགས་སྤེལ་བའི་ཕྱིར། །ཚ་བའི་ཡུལ་དུ་འགྲོ་སྙམ་ནས། །ཆོས་ཁྲི་མདོ་རུ་སླེབས་པའི་ནུབ། །བུད་མེད་མཛེས་སྡུག་རྒྱན་ཅན་འགའ། །ཉམས་རྨིས་མཚམས་སུ་མདུན་དུ་བྱུང་། །བརྟན་མའི་བསུ་བ་ཡིན་ནམ་སེམས། །ཚ་བའི་ཡུལ་དུ་སླེབས་པའི་དུས། །རབ་རིབ་འཁྲུལ་པའི་རྨི་ལམ་དུ། །བུད་མེད་མཛེས་ཤིང་ཡིད་འོང་བ། །རིན་ཆེན་དུ་མས་བརྒྱན་པ་ལ། །སྐུ་སྟོད་གཅེར་བུ་ཡོད་པ་ཞིག །ཆགས་པའི་
སྣང་བ་མ་ཡིན་པར། །རང་དང་མཉམ་དུ་འདུག་པ་ལ། །ལུས་ལ་མཐུན་ཚུལ་ལག་གིས་འཕུར། །དེ་བཞིན་བུད་མེད་ཤ་རྒྱས་པ། །གཡུ་བོ་ཆེ་ཡི་རྒྱན་ཅན་ལ། །རང་དང་མཉམ་དུ་འདུག་པ་སྙམ། །དེ་ནས་མཆོག་ལ་གོང་དུ་ཕྱིན། །འབྲུག་སྒྲ་ཆར་དང་ན་བུན་འཇའ། །རྟེན་འབྲེལ་ལེགས་སམ་སྙམ་པ་བྱུང་། །ཞག་གཉིས་ནུབ་པར་ཉམས་དང་ནི། །རྨི་ལམ་འདྲེས་པའི་སྐབས་ཉིད་དུ། །བརྟན་མའི་ཤེལ་གུར་ཐད་དེ་ན། །ཁྲི་ནི་མཐོན་པོ་གཅིག་འདུག་པ། །མང་པོ་འགའ་ཡིས་བར་སྣང་ལ། །བཏེག་ནས་བདག་གི་མདུན་དེ་ཡི། །བར་སྣང་ཁམས་སུ་ཁྱེར་ནས་བྱུང་། །ཁྲི་དེའི་སྟེང་ན་བུད་མེད་ནི། །བཅུ་དྲུག་ལོན་པའི་ན་ཚོད་ཅན། །མཛེས་ཤིང་བལྟ་བས་མི་ངོམ་པ། །དགེ་སློང་མ་ཡི་ཆ་ལུགས་ཅན། །སྟོད་འགག་ཤམ་ཐབས་བེར་ལ་སོགས། །བླ་ཆེན་སྐུ་སྐྱེ་འདྲ་བར་སྣང་། །བརྟན་མ་དངོས་དེ་ཡིན་པར་གོ །དེ་མ་ཐག་ཏུ་འཇའ་ལྟར་ཡལ། །དེ་ཚེ་བདག་གིས་བསམ་པ་ལ། །གཙོ་མོ་དེ་ནི་ཡེ་ཤེས་པ། །ཕལ་པས་མཇལ་རྒྱུ་མེད་པར་གོ །ཆོ་འཕྲུལ་སྣ་ཚོགས་སྟོན་པ་ནི། །འཁོར་གྱི་སྨན་མོ་འབུམ་ཕྲག་སྟེ། །མགུར་དང་མཐོང་བ་འབབ་མཁན་ནི། །ཕོ་ཞིག་བསྒྱུར་ཞེས་
འཁོར་ཅིག་སྟེ། །སྐྱེ་བོ་ཕལ་པའི་རྨི་ལམ་ན། །ཆགས་པ་སྤྱོད་པར་རྨིས་པ་སོགས། །ཀུན་དགའི་མ་ཞེས་བྱ་བ་ཞིག །རྟོགས་ལྡན་ལ་སོགས་ཆོས་པ་ལ། །ཆགས་པ་སྤྱོད་རྨིས་མགོན་པ་ནི། །རྣལ་འབྱོར་གྲོགས་ཞེས་འཁོར་གཅིག་སྟེ། །ལྕགས་ཁའི་བདག་མོ་ལྕགས་བདག་མ། །གནོད་འཚེ་བྱེད་པ་གྲོ་ཁེ་མ། །ནག་གྱོང་མ་དང་སྤྱང་གདོང་མ། །དེ་སོགས་འཁོར་ཚོགས་ཆོ་འཕྲུལ་ཆེ། །གཙོ་མོ་ཉིད་ནི་ཡེ་ཤེས་པ། །སྤྱན་རས་གཟིགས་ཀྱི་ལྕམ་གཅིག་ཅེས། །གྲུབ་ཆེན་རྣམས་ཀྱིས་བསྟོད་ལྟར་ལགས། །དེ་ཕྱིར་གསས་མཁར་ལྷ་ཐོ་བརྩེགས། །བོད་ཁམས་བདེ་བའི་སྨོན་ལམ་བཏབ། །གཉིད་པ་མ་ཡིན་ཉམས་སྣང་ལ། །ཕྱིར་ནངས་འོང་རྒྱུ་འབུལ་བ་རྣམས། །མིག་གིས་མཐོང་སྟེ་མཚར་བ་བྱུང་། །ཕྱོགས་རེས་ཆེ་བར་གྲགས་པ་ཡང་། །གུས་འདུད་འབུལ་བ་ལ་སོགས་བྱས། །དེ་ནས་གངས་ཆེན་འབུམ་ཕྱུགས་ཞོལ། །དབང་ཁྲིད་བདུན་གསུམ་ཙམ་དུ་བཙུགས། །འབྲོང་རྗེ་རྒྱལ་པོའི་བཙུན་མོ་དང་། །སྲས་དང་བློན་འབངས་བཅས་པ་དང་། །རེ་སྒྲིས་ཁག་གསུམ་བླ་མ་དང་། །སེར་མོ་བ་ཡང་མང་པོ་ལ། །དབང་ལུང་ཁྲིད་སོགས་ཤིན་ཏུ་འཕེལ། །བསྙེན་
རྫོགས་གསུམ་དང་བཅས་པ་ནི། །དགེ་སློང་དགེ་ཚུལ་སྒྲུབ་མཁན་ནི། །སུམ་ཅུ་སོ་དགུ་ཙམ་ཞིག་བྱུང་། །སེམས་ངོ་གསར་དུ་མཐོང་བ་དང་། །བོགས་ཐོན་པ་ཡང་མང་ཞིག་བྱུང་། །གྲུབ་མཐའི་ཕྱོགས་རིས་ཆེ་བ་དང་། །སྟོབས་ལྡན་མི་སྣའི་བཙུན་པ་དང་། །སོག་པོ་ཨ་ཙ་ར་ལ་སོགས། །མི་རིགས་མང་པོས་གུས་འདུད་དང་། །བདུད་འདུལ་རྡོ་རྗེའི་སྐུ་ཚབ་པ། །རྡོ་རྗེ་གྲོ་ལོད་གནས་སྒོ་ནི། །ཕྱེ་རུ་བཏང་བ་བླ་མ་དེས། །གུས་འདུད་དབང་འབྲེལ་ལ་སོགས་ཞུས། །ཟླ་བ་གཅིག་གི་འགྲོ་དོན་ལ། །ད་ལམ་ཆེ་འམ་བསམ་པ་བྱུང་། །རྨི་ལམ་སྒྲུབ་ཆེན་དཀྱིལ་འཁོར་དྲུང་། །དུང་དཀར་གཅིག་ནི་འབུད་འདུག་པ། །སྐད་ནི་ཕྲ་ཞིང་སྙན་ལ་རིང་། །མཁའ་ལ་ཉི་མའི་དཀྱིལ་འཁོར་ཤར། །བཙུན་པ་གཅིག་དང་སྐྱ་སེར་འགའ། །གུས་འདུད་ཕྱག་ཀྱང་འཚལ་བ་རྨིས། །དེ་ནས་ཡར་འོང་སྐུ་ལྷའི་དྲུང་། །བཙུན་གཟུགས་ལུས་ཚད་རྩག་གསུམ་ཙམ། །ལུས་པོ་ཧ་ཅང་མི་གསལ་ལ། །སྐེད་པར་ཨོ་རྒྱན་གཏེར་ཕུར་ནི། །རིང་ཐུང་འདོམ་པ་གཉིས་གསུམ་ཙམ། །ཤིན་ཏུ་གསལ་ཞིང་ལེགས་པ་བཅུག །དེ་འདྲ་ཞིག་ནི་མཐོང་སྙམ་པས། །ཨོ་རྒྱན་ཆེན་པོའི་བཀའ་སྡོད་
པ། །སྐུ་ལྷ་ངང་ཡག་ཡིན་ནམ་སྙམ། །དེ་ནས་གད་གཉིས་བར་དུ་ཕྱིན། །སྒར་པ་ཕོག་ཚེ་ཅུང་ཟད་འཐུམ། །བུད་མེད་ལ་སོགས་མང་པོ་འགའ། །གུས་ཤིང་འདུན་པས་མདུན་དུ་འཁོད། །ཤེལ་དཀར་གཅིག་གིས་དབང་བསྐུར་བྱས། །སེམས་ཀྱི་ངོ་སྤྲོད་བྱས་པ་རྨིས། །ཕྱོགས་དེས་གཞི་བདག་ཡིན་ནམ་སྙམ། །བདག་ལ་ནུས་པ་མ་མཆིས་ཀྱང་། །ཨོ་རྒྱན་ཆེན་པོའི་བཀའ་དྲིན་ཡིན། །ཧོམ་གཉིས་བར་དུ་བསྡད་པའི་ནུབ། །རྨི་ལམ་འོད་གསལ་འདྲེས་པའི་སྐབས། །ངོ་མཚར་ལྟད་མོ་ཅི་ཡང་མཐོང་། །བརྟན་མའི་ཕོ་བྲང་ཤེལ་གུར་དེ། །དྲུང་ན་ཡོད་ལྟར་མཐོང་སྙམ་བྱེད། །སྐུ་གཟུགས་གསལ་པོར་མ་མཐོང་ཡང་། །བརྟན་མ་དྲུང་དེར་ཡོད་སྙམ་བྱེད། །དེ་ཚེ་བདག་གིས་འདི་སྐད་སྨྲས། །ཨོ་རྒྱན་པདྨ་འབྱུང་གནས་དེ། །ཚེས་བཅུར་རྒྱུན་དུ་འབྱོན་སྙམ་སྟེ། །ངེད་ཅག་མི་ཡིས་མ་མཇལ་ཀྱང་། །ཁྱེད་ཅག་ལྷ་འདྲེས་ཨེ་མཇལ་སྨྲས། །དེ་ཚེ་བརྟན་མས་ཚིག་འདི་ཟེར། །དོ་གལ་ཆེ་བའི་དུས་རྣམས་སུ། །རྩེ་གཅིག་གསོལ་བ་བཏབ་པ་ན། །ནམ་མཁའ་ལ་ནི་འཇའ་ཤར་ལྟར། །པད་འབྱུང་ནམ་འདོད་མཇལ་རྒྱུ་ཡོད། །གསོལ་བ་ལ་སོགས་མ་བཏབ་
ཅིང་། །མཇལ་དགོས་གལ་ཆེན་མེད་དུས་ནི། །ཚེས་བཅུ་ལ་ཡང་མི་མཇལ་ཟེར། །དེ་ཚེ་ནམ་མཁའི་དབྱིངས་སུ་ནི། །འཇའ་ཚོན་ཤར་བ་ལྟ་བུ་ནི། །ཨོ་རྒྱན་སྤྲུལ་སྐུའི་ཆ་ལུགས་ཅན། །བདག་གིས་ཡུད་ཙམ་མཇལ་སྙམ་བྱེད། །དེ་ནས་མོས་གུས་ཕྱག་ཆེན་གྱི། །དཔེ་ཆ་བདག་གི་ལག་ཏུ་ཕྱིན། །རང་གིས་རང་ལ་ཁྲིད་བཙུགས་སྙམ། །དམིགས་པ་འགའ་རེ་བསྒོམས་པ་རྨིས། །དེ་ནས་བདག་གིས་པད་ཞྭ་གྱོན། །ལུས་ལ་ཐུལ་པ་ཞིག་གྱོན་ཏེ། །འོག་ཏུ་རྟ་བཟང་གཅིག་ཞོན་ནས། །ལག་ཏུ་དུང་དཀར་ཆེན་པོ་གཅིག །འབུད་ཅིང་འབུད་ཅིང་སོང་བ་སོགས། །རེས་འགའ་རྨི་ལམ་རེས་འགའ་ནི། །འོད་གསལ་ཟིན་པ་འདྲེས་མར་བྱུང་། །དེ་ནས་འཛི་ཆུའི་དོ་ཁུག་ནས། །སྐྱེ་འཛི་འདུས་པའི་གཉེན་ས་ནི། །གླང་བུའི་ཤིང་གི་ནགས་ཁྲོད་ནི། །རོ་སྙོམས་དགོངས་དྲིལ་གདམས་ངག་བྲིས། །རྟོགས་ལྡན་ཞིག་ལ་ལུང་བྱས་པས། །སློང་དང་ཆོ་འཕྲུལ་ཡ་མའི་ནད། །སྙིང་སྐང་ཟུག་གཟེར་ཆེ་བའི་དུས། །རོ་སྙོམས་མགུར་གཅིག་བྱས་པ་ནི། །ཡིད་ལ་ཇི་ལྟར་བསྒོམ་ཚུལ་ཡིན། །དེ་ལྟར་བསྒོམས་ཤིང་གཉིད་པ་དང་། །སྐབས་སུ་ཕཊ་སྒྲ་སྒྲོགས་པའི་སྐབས། །མི་འགའི་ཇ་
དར་འབུལ་རྒྱུ་བྱུང་། །དེ་དགོང་དངོས་སུ་འབུལ་བ་རྣམས། །རྨི་ལམ་བྱུང་ལྟར་མི་ཡིས་ཕུལ། །བཙན་དང་རྒྱལ་པོའི་ཆོ་འཕྲུལ་དང་། །དེ་དག་རྣམས་ལ་དབང་བསྐུར་སོགས། །ཞག་གཅིག་དངོས་ཉམས་རྨི་ལམ་གྱིས། །ཚར་སློང་འགྲིགས་པའི་ཡ་མཚན་བྱུང་། །དེ་ནས་རང་གི་ཁྱིམ་དུ་བསླེབས། །དེ་དུས་ཚ་བ་སྒང་ཕྱོགས་སུ། །སོང་བའི་ལོ་རྒྱུས་སྐད་ཆ་རྣམས། །ཕྱིས་སུ་རིམ་བཞིན་ཐོས་པ་ལ། །བརྟན་མའི་གསས་མཁར་བརྩེགས་ཕྱིན་ནས། །ཡུལ་དེར་སད་སེར་མེད་པ་བྱུང་། །དཔོན་ཚང་གིས་ཀྱང་མུས་ཀྱིས་བསྟོད། །དེ་དུས་མི་ངན་ཁྲམ་པ་ཞིག །གསས་མཁར་རློག་ནས་ནང་རྟེན་བཏོན། །ཁོ་རང་བཟའ་ཚོ་ནང་འཁྲུག་བྱུང་། །བུ་ཡིས་ཕ་དེ་བསད་པ་དང་། །གཞན་ཡང་ན་ཚས་བཏུད་ནས་བརླགས། །ཁོ་བོས་བརྩེགས་པའི་གསས་མཁར་དེ། །གནད་ཆེན་ཡོད་པར་ཡོངས་སུ་གྲགས། །དེ་དུས་ཚ་བ་སྒང་ཕྱོགས་སུ། །རྩ་ཁ་མི་སྐྱེ་སྡེ་ཡང་རྒུད། །ཁོ་བོས་སྒྲུབ་ཆེན་བཙུགས་ཕྱི་ནས། །རྫུ་ཁ་སྔར་ལྟར་སྐྱེས་སོ་སྐད། །དཔོན་ཡང་སྔར་དང་མི་འདྲ་བ། །ཅུང་ཞིག་བདེ་ཁ་བྱུང་ངོ་ཐོས། །དེ་དུས་ཁོ་བོས་བསང་བཏང་ཚེ། །བརྟན་མའི་དྲུང་གི་བླ་
རྒན་ནི། །མཚམས་པ་གཅིག་གིས་གཟིགས་སྣང་ལ། །བརྟན་མའི་གཙོ་མོ་རྒྱུན་དང་བཅས། །བར་སྣང་ཁམས་ནས་བསང་གི་སར། །འབྱོན་པ་གཟིགས་པས་བླ་མ་དེ། །ནུས་ལྡན་ཞིག་ནི་ཡིན་འདུག་གསུངས། །དེ་ཕྱིན་དེ་ཕྱོགས་སྐྱ་སེར་ཀུན། །ལྡོག་མེད་དད་པ་ཐོབ་གྱུར་པས། །ཁོ་བོའི་དབོན་པོ་གྲྭ་རེས་སོགས། །ཀུན་ལ་དད་འདུན་བྱེད་དོ་སྐད། །དེ་ནས་ཡོས་ལོ་དགུན་གྱི་དུས། །བདུད་འདུལ་རྡོ་རྗེའི་བཀའ་ལུང་དང་། །གོང་གི་དཔོན་པོའི་བཀའ་ཡིས་བསྐུལ། །དབང་ལུང་ཟབ་ཁྲིད་སྤེལ་བའི་ཕྱིར། །སྨར་ཁམས་ཀེ་རུའི་ཕྱོགས་སུ་ཆས། །མཚོ་དཀར་གནས་ལག་ལྷ་སྟེང་འོག །དམ་ཅན་འགག་ཏུ་གསོལ་ཀ་བཏང་། །མགར་བ་དམར་ནག་གཉིས་ཀའི་སྐུ། །བྲག་ལ་གསལ་བར་འདུག་པ་མཇལ། །ཇེང་ཐང་ཞེས་བྱར་ཞག་པའི་ནུབ། །རྨི་ལམ་ཁྲོམ་ཚོགས་འགའ་བྱུང་བར། །ཆོས་འབྲེལ་དབང་འབྲེལ་བྱེད་སྙམ་ཛ། །ངེད་རྣམས་བླ་མ་མང་པོ་ལ། །དབང་འབྲེལ་མང་པོ་ཐོབ་ཟེར་ནས། །བདག་ལ་མ་ཞུས་བྱེར་སོང་བ། །དཔོན་དེ་མཛེ་ཡིས་ཟིན་ནས་སྣང་། །བདག་ལ་ཧ་ཅང་མ་གུས་ཤིང་། །ཡུལ་དེའི་ཀླུ་ལ་ནད་བྱུང་བས། །ཆར་དཀོན་ཡུལ་རྒུད་དེས་ལེན་
སྙམ། །དེ་ནས་མི་འགྱུར་རྡོ་རྗེ་ཡིས། །གནས་སྒོ་གསར་དུ་ཕྱེས་པ་ཡི། །དཀར་ཡུ་སེར་ཡུའི་དྲུང་ནས་གཤར། །གནས་ཡིག་ལ་སོགས་མ་མཐོང་ཡང་། །མ་གཅིག་ལབ་སྒྲོན་གྱིས་གསུངས་པའི། །གཅོད་ཀྱི་ས་བཅད་གཞུང་ལྟར་ན། །སྒྲོལ་མ་དཀར་སྔོན་གནས་སུ་སེམས། །ཕྱག་དང་མཎྜལ་བརྒྱ་རྩ་ཕུལ། །ཕ་ཝང་གཅིག་ལ་ཞབས་རྗེས་མང་། །སྲིན་པོའི་ཀླད་པས་བྲིས་པ་ཡི། །ཡིག་དྲུག་མཇལ་བས་ཡིད་ཆེས་སྐྱེས། །དེ་ཚེ་ནམ་མཁའ་དྭངས་སྐབས་ལ། །གློ་བུར་སྤྲིན་དཀར་འཇའ་དཀར་གྱིས། །ཨུཏྤལ་ཤིང་ལོ་སྣ་ཚོགས་གཟུགས། །ནམ་མཁའ་གང་བར་བྲིས་པ་འདྲ། །ལྷག་སྣ་ས་ཚུ་བསྡམ་སྐབས་དེར། །ཆུ་སྣ་སྒྲ་བཅས་དཔྱིད་དུས་བཞིན། །མདུན་ནས་བསུ་ལྟར་ལན་གཉིས་བྱུང་། །གནས་གསར་བྱིན་རླབས་མ་ཉམས་ཤིང་། །དམ་ཚིག་གཙང་བའི་རྟགས་སུ་གོ །དེ་ནས་མཛོ་རྫི་མདའ་རུ་ཞག་པའི་ནུབ། །རྒྱལ་འགོང་ཆོ་འཕྲུལ་གནོད་འཚེ་བྱེད་པའི་རྟགས། །བླ་ཆེན་པཎ་ཞྭ་གྱོན་པ་གཅིག་གིས་ནི། །ང་ཡི་ཞྭ་ལ་ངན་སྐྱུགས་བྱུག་པ་རྨིས། །ཕྱིར་ནངས་ས་ཁུག་དྲོ་སར་སྒར་བརྒྱབ་ཀྱང་། །རླུང་འཚུབ་ཆེན་པོའི་གནོད་པ་ཆེར་བྱུང་ཞིང་། །རང་གི་
སློབ་བུ་ཞིག་གི་རྐང་པ་ཆག །རྩ་གསུམ་ལྷ་ལ་རྩེ་གཅིག་གསོལ་བཏབ་པས། །རྐྱེན་ལ་མ་ཁྱེར་རྐང་པ་མྱུར་དུ་འབྲེལ། །དེ་ནས་སྒ་ཉག་ཅེས་བྱར་ཚེར་ལུང་པས། །བྱིན་གྱིས་བརླབས་པའི་གནས་སུ་ཞི་ཁྲོ་ཡི། །དབང་ཁྲིད་སྦྲེལ་མ་རྫོགས་ཆེན་ཉུང་ཁྲིད་བཙུགས། །ལྷ་ཐོག་དགྲ་བླ་ཡེ་བརྫུ་ཞེས་བྱ་དེ། །ནམ་མཁར་གནས་ཚེ་ཡེ་བརྫུ་ཞེས་བྱ་སྟེ། །རི་ལ་གནས་ཚེ་རྡོ་རྗེ་གུར་མགོན་ཡིན། །ས་འོག་གནས་ཚེ་མི་མགོན་དཀར་པོ་ཡིན། །ཟེར་བའི་སྒྲ་ཞིག་ཉམས་རྨིས་མཚམས་སུ་ཐོས། །དཔོན་གྱིས་བསྐུལ་ནས་དེ་ཡི་གསོལ་ཁ་བརྩམས། །གཡག་ནག་མང་པོ་རང་གི་དྲུང་འདུག་དང་། །མི་དཀར་དིལ་མགོ་ཙམ་པ་ཆས་བཟང་ལ། །ཕྲུག་དཀར་དར་གོས་སྔོན་པོའི་གོང་ལག་ཅན། །མགོ་ལ་ཞྭ་ཐོབ་དཀར་པོ་གུར་ཙམ་གྱོན། །རྟ་བཟང་སྨུག་པོ་ཞོན་པའི་བརྗིད་བག་ཅན། །ཉམས་དང་རྨི་ལམ་འདྲེས་པའི་མཚམས་སུ་མཐོང་། །ཡེ་བརྫུའི་ཀ་བསྟོད་ལ་སོགས་འགའ་རེ་བྲིས། །གནམ་ཆོས་འདོན་འགྲིགས་མི་མགོན་དཀར་པོ་ཡི། །འདོན་ཆོག་ཀ་བསྟོད་བྲིས་ནས་གཏོར་མ་ཕུལ། །ཉམས་དང་རྨི་ལམ་འདྲེས་པའི་སྐབས་འགའ་ལ། །ས་གཞི་ཐམས་ཅད་རྒྱ་མཚོར་གྱུར་པ་
མཐོང་། །སྡེ་ཡང་རྒྱུས་མེད་ཁྲོམ་ཡང་ཉུང་བའི་སྐབས། །ཁྲོམ་ཚོགས་ཨ་ཐོ་བ་གཅིག་འདུས་པ་ཡིས། །བདག་གིས་གདན་གྱི་ཐོག་ཏུ་རྡོལ་དྲིལ་དང་། །དབང་ཆས་བཞག་པ་ཁྲོམ་གྱི་སྤྱི་བོའི་ཐད། །བྱ་ལྟར་ལྡིང་ནས་མགོ་ཐོག་འགྲིམ་པ་རྨིས། །ཡུལ་དེའི་ལྷ་འདྲེས་ཅུང་ཟད་དད་གུས་པས། །མི་རྣམས་དད་ཅིང་འགྲོ་དོན་འབྱུང་ངམ་སྙམ། །དེ་ནས་བཟུང་སྟེ་ཁྲོམ་ཚོགས་ཡོད་ཚད་ཚོགས། །ཉམས་དང་རྨི་ལམ་འདྲེས་པའི་མཚམས་ཤེད་ན། །གུ་རུའི་མཚན་ཅན་སྡེ་དཔོན་དེ་ཉིད་ནི། །སྤྲུལ་པའི་ཆོས་རྒྱལ་ཡིན་ཞེས་ལུང་བསྟན་བྱུང་། །དེ་ཕྱིར་བརྟན་བཞུགས་ཚེ་དབང་ལ་སོགས་ཕུལ། །མཆེད་གྲོགས་ཡིན་ལྟར་ཕན་ཚུན་དག་སྣང་འཕེལ། །སྐུ་རིམ་དགོས་ཚུལ་ཞིབ་པར་དཔོན་ལ་ཞུས། །འདི་སྐབས་དཀོན་མཆོག་ཡན་ལག་གིས་མཛད་པའི། །གླེགས་བམ་གཅིག་ནི་མཇལ་རྒྱུ་བྱུང་བ་དེས། །དངོས་སུ་མཇལ་ལྟར་སྒྲོ་འདོག་མ་ལུས་ཆོད། །ད་རེས་འོང་བས་དོན་ཆེན་འགྲུབ་སྙམ་དགའ། །དར་གྱི་ན་བཟའ་མཎྜལ་བརྒྱ་རྩ་ཕུལ། །ཁྲིད་ཕྲུག་ལྷ་ཞལ་མཐོང་བ་གསུམ་བཞི་དང་། །བར་ཆད་མེད་ཅིང་བདུན་གསུམ་ཆོས་མཐར་ཕྱིན། །ས་ཅོར་ན་འདུག་པའི་ནུབ་མོ་ལ། །
ཉམས་དང་རྨི་ལམ་འདྲེས་པའི་མཚམས་ཤེད་ན། །མི་དཀར་པོ་རྟ་དཀར་ཞོན་པ་གཅིག །ལུས་ཕྱིང་དཀར་མགོ་ལ་ཞྭ་དཀར་གྱོན། །མི་བདག་ཉིད་བསུ་རུ་བྱུང་བ་སྙམ། །རྗེ་པདྨ་འབྱུང་གནས་བཀའ་དྲིན་ཅན། །མི་ང་ལ་ནུས་པ་མ་མཆིས་ཀྱང་། །ཀླུ་མི་མགོན་དཀར་པོའི་འཁོར་གཅིག་ནི། །མི་བདག་ལ་བསུ་བ་བྱེད་དམ་སྙམ། །དུས་ཕྱིར་ནངས་ལ་དེར་འོང་ཙམ་ན། །མི་བདག་ལ་རྟོགས་པའི་ཡེ་ཤེས་ནི། །ལོ་སྔ་མའི་ནང་དུ་སྐྱེས་པ་དེ། །འཕྲལ་དེ་རུ་གསལ་ཞིང་ཡིད་ལ་བཀྲ། །ཕྱི་བཟུང་བའི་ཡུལ་སྣང་སྣ་ཚོགས་འདི། །དཔེ་རྒྱ་མཚོར་ཤར་བའི་གཟའ་སྐར་བཞིན། །དེ་སོ་སོར་གསལ་ཡང་ངོ་བོ་གཅིག །དཔེ་ལན་ཚྭ་ཆུ་ལ་ཐིམ་པ་ལྟར། །དེ་ཐམས་ཅད་རོ་གཅིག་སྟོང་པའི་ངང་། །ནང་འཛིན་པའི་དྲན་རིག་གྱ་གྱུ་འདི། །སེམས་སྣ་ཚོགས་འཕྲོ་ཡང་ངོ་བོ་གཅིག །དོན་ལྷན་སྐྱེས་ཡེ་ཤེས་འགྱུར་བ་མེད། །དེ་མངོན་དུ་གྱུར་ཕྱིར་མགུར་དབྱངས་བྱས། །དེ་སྙེམས་མེད་ཐ་མའི་འགྲིམ་འཕྲད་ཀྱང་། །རྐྱེན་ཉེ་ཞོ་མེད་པར་བདེ་བར་ཐར། །ཡང་ནི་བསམ་འགྲུབ་གཞུང་དུ་ཚེས་གཅིག་ནུབ། །རྨི་ལམ་ཡེ་བརྫུ་བཙུན་ཆུང་མཛེས་པར་སྤྲུལ། །དྲུང་དུ་བྱུང་ནས་དགའ་ཚུལ་འཛུམ་
མདངས་བསྟན། །དེ་བཞིན་ཕ་ཀིར་བུ་ཆུང་འཕྲུག་དཀར་ཅན། །དགའ་ཞིང་རྒྱང་ནས་ང་ལ་བལྟ་བ་ནི། །ཀླུ་རྒྱལ་མི་མགོན་དཀར་པོ་ཡིན་ནམ་སེམས། །ནུབ་ཅིག་གཉིད་པའི་རྨི་ལམ་ན། །ཀླུ་སྒྲུབ་སྙིང་པོས་བྱིན་བརླབས་ཤིང་། །རྒྱལ་བའི་རིང་བསྲེལ་ཕུང་པོའི་གཏེར། །བལ་ཡུལ་འཕགས་པ་ཤིང་ཀུན་མཇལ། །ཕྱི་ནི་མཆོད་རྟེན་ཆེན་པོ་ས། །ནང་ནི་གཙུག་ལག་ཁང་ཆེན་པོ། །ཐུབ་དབང་སྐུ་མཆོག་ངོ་མཚར་བ། །མཚུར་ཕུའི་ལྷ་ཆེན་ཚད་ཙམ་པ། །གསེར་མདོག་འོད་དུ་འབར་བ་མཇལ། །དེ་དྲུང་བཙུན་པའི་ཟུགས་ཅན་འགའ། །བདག་ལ་སྡོམ་པ་ཞུ་འདོད་ཟེར། །ཡང་ནི་རྨི་ལམ་མཆོད་རྟེན་དེ། །བྱ་རུང་ཁ་ཤོར་ཡིན་སྙམ་བགྱིད། །དེ་དུས་རང་གི་ཉེ་གནས་ཉམས་སྣང་ལ། །སྐྱ་མི་་མང་པོས་བདག་གི་གཟིམ་གུར་ལ། །སྐོར་བ་བྱེད་པ་མངོན་སུམ་ལྟ་བུར་སྣང་། །བདག་ནི་གུར་ནང་གཅིག་པུར་འདུག་པའི་ཚེ། །རང་དབང་མེད་པར་ཉམས་འབར་བྲོ་འཁྲབ་ཤོར། །ཉམས་རྨི་ལམ་འཁྲུལ་པའི་སྣང་བ་ལ། །རྗེ་དྲིན་ཆེན་ཆོས་ཀྱི་དབང་ཕྱུག་དེ། །སྐུ་དངོས་སུ་གསལ་བར་བཞུགས་པའི་དྲུང་། །མི་བདག་གིས་བྱང་བུ་བཞུ་རྒྱུ་འགའ། །
ཡིད་ཏིང་འཛིན་བྱང་བུ་རྣམ་ཤེས་སྤར། །གཉིད་སད་ཀྱང་ཉམས་དགའ་དད་གུས་འཕེལ། །དུས་དེ་ནས་ཞག་པོ་འགའ་ཙམ་ནས། །གྲོགས་རྡོ་རྗེ་སྤུན་གྱུར་གཅིག་དང་མཇལ། །རྗེ་བླ་མའི་བཀའ་ཤོག་ཕྱག་བྲིས་ལ། །ལྷ་མ་མགོན་ཞལ་ཐང་ཕྱག་བྲིས་མ། །དེ་བདག་ལ་ཕུལ་ཞིང་དད་གུས་བྱས། །རང་ཡིད་ཚིམ་དད་པའི་གསལ་འདེབས་གྱུར། །དེ་རུ་གོ་འཇོའི་བླ་པ་འགས། །གཙོར་བྱས་ཁྲོམ་ཚོགས་ཤིན་ཏུ་ཆེ། །དབང་ལུང་ཁྲིད་སོགས་འགྲོ་དོན་འཕེལ། །གྲྭ་མང་རྣམས་ལ་འཇའ་ཚོན་པའི། །ཆོས་སྐོར་འགའ་ཡི་དབང་ལུང་གྲུབ། །བསམ་གྲུབ་རྒྱལ་མོའི་ཁྲི་སྐོར་གྱི། །སྡེ་རྣམས་འཐོར་བའི་རྩིག་ར་དང་། །བེ་རི་རྒྱལ་པོའི་ཐབ་ཀ་མཐོང་། །འདུས་བྱས་ཐམས་ཅད་མི་རྟག་ཅིང་། །སྙིང་པོ་མེད་པའི་ངོ་སྤྲོད་བྱུང་། །སྐྱོ་བ་སྐྱེས་པས་མགུར་དབྱངས་བྱས། །ཕྱིར་ལམ་རྔ་ཆེན་གཞུང་དུ་ཞག །རྨི་ལམ་འཁྲུལ་པའི་སྣང་བ་ལ། །བེ་རི་རྒྱལ་པོ་དོན་ཡོད་རྒྱལ། །ཁོ་བོའི་དྲུང་དུ་བྱུང་ནས་ཀྱང་། །བྲག་འདིར་གསས་མཁར་བསྟོད་རོགས་གྱིས། །ཟེར་བས་ཁོ་ཡི་བླ་དེ་ནི། །བྲག་དཀར་དེ་ལ་འཁོར་རམ་སྙམ། །གསས་མཁར་བསྟོད་པ་མ་གྲུབ་པས། །ཕྱིར་ཉིན་ཁལ་མ་གཉིས་ཙམ་གོད། །
འབྲུག་ལོ་ཆོ་འཕྲུལ་ཆེན་པོ་ཡི། །ཚེས་དགུར་ཆོས་གྲྭ་ཆེན་པོར་བསླེབས། །སྤྱན་རས་གཟིགས་སྤྲུལ་ཕག་གྲུ་ཡི། །སྐྱེ་རྒྱུད་གྲགས་པའི་སྤྲུལ་སྐུ་ལ། །བརྒྱ་ཕྲག་གསུམ་གྱིས་མཆོད་སྤྲིན་སྤྲོས། །ལུགས་གཉིས་ཐུགས་འདོགས་དཔེ་མེད་གནང་། །གཏེར་ཤོག་ཇོ་བོའི་ཐུགས་སོགས་མཇལ། །ཉམས་ཀྱི་སྣང་བར་དགོན་དེ་ནས། །ཀརྨ་ཆགས་མེད་ཀྱིས་ཐུགས་རྗེས་ཟུང་། །ཟེར་མཁན་གྲགས་པ་རྣ་བས་ཐོས། །དེ་མཐུན་དེ་ཡི་དཔོན་རིགས་འགས། །གུས་འདུད་འབུལ་ཞབས་དབང་ཞུ་མང་། །ཉམས་དང་རྨི་ལམ་འདྲེས་མཚམས་སུ། །རང་གི་སྒྲུབ་གནས་རི་ཁྲོད་ལ། །ཉི་མ་ཤར་ནི་འདུག་པ་མཐོང་། །གནས་སྐབས་བདེ་ལེགས་འབྱུང་ངམ་སེམས། །དེ་དུས་ཀླུ་བདུད་ཕོ་བྲང་ཆེ། །དགེ་བསྙེན་སྒོ་རའི་མཚོ་ཁར་ཞག །བཙུན་ཆུང་ཆོས་བཟང་མཛེས་པ་ཞིག །གུས་ཚུལ་དགའ་ཞིང་དྲུང་འོང་དང་། །རྒྱུན་ལྡན་བུད་མེད་མང་པོ་ཡིས། །ཕྱག་འཚལ་རྩྭ་སྔོ་འབུལ་བ་རྨིས། །ཕྱིར་ནངས་མཚོ་འབུལ་མཚོན་ཙམ་བྱས། །དེ་ནས་ཆོ་འཕྲུལ་ཆེན་པོ་ཡི། །ཉ་དང་གཟས་འཛིན་འཛོམས་པའི་ནུབ། །གོ་བོ་ཁྱུང་ཕུག་གནས་འདབས་སུ། །ཕྱག་དང་མཎྜལ་བསྐང་བ་
རྣམས། །བརྒྱ་རྩ་རེ་དང་ཚོགས་ཆེན་བཤམས། །འཕྲལ་ཕུག་རྟེན་འབྲེལ་བསྒྲིགས་པ་དང་། །བསྙེན་པ་རྣམས་ཀྱི་ཁ་གསོ་བྱས། །བུད་མེད་སྣུམ་བག་ལྡན་པ་ལ། །རལ་པ་ཐོར་ཅོག་བྱས་པ་ཡི། །ཉི་ཤུ་ཙམ་གྱིས་ཕྱག་འཚལ་ཞིང་། །གུས་འདུད་ཕྱག་དབང་ཞུ་བ་རྨིས། །ཕྱིར་ནངས་ལམ་ལ་སྤྲིན་འཇའ་འཁྲིགས། །འགྲབ་རྒྱལ་གནས་མདུན་གཤིན་རྗེ་ཡི། །ཕོ་དང་ཐད་དུ་སྒར་པ་ཞག །ཅུང་ཟད་འཐུམས་པའི་ཉམས་སྣང་ལ། །བཙུན་པ་གཞོན་ནུ་ཆས་བཟང་ནི། །མགོ་ལ་སྤུ་ཤུན་ཞྭ་དཀར་གྱོན། །མདའ་གཞུ་འཁོར་གསུམ་སྐེད་ལ་བསྐོར། །རྟ་ནི་རྐྱང་སྨུག་ཞོན་པ་གཅིག །དྲུང་དུ་བྱུང་ནས་གུས་ཚུལ་བསྟན། །གཤེན་བནྡེ་མ་དེ་ཡིན་ནམ་སེམས། །དེ་ནས་རྨོ་སྨད་ཞག་པའི་ནུབ། །རི་བོ་ཆེ་རུ་འགྲོ་བ་ཡི། །སྟབས་ཀ་འགྲིགས་སམ་མི་འགྲིགས་སོགས། །རྣམ་རྟོག་ཕྲེང་རྗེས་གཉིད་པ་ཡི། །རྨི་ལམ་སྟག་ལུང་ཞབས་དྲུང་དེ། །རང་གི་རྒྱབ་གཞུང་དུ་ཁུར་ཏེ། །གྱེན་རིང་འགའ་ལ་སོང་བ་རྨིས། །དེ་ལ་གོ་བ་འགའ་རེ་བྱུང་། །དེ་ནས་ཉེ་ཞོ་མེད་པ་རུ། །རང་ཁྱིམ་བདེ་བར་སླེབས་པར་གྱུར། །དེ་སྔོན་ཡོས་ཀྱི་ལོ་མགོ་ལ། །མི་འགྱུར་རྡོ་རྗེའི་སྐུ་རིམ་ལ། །མདོས་
བཅས་དབང་ལུང་མང་ཞིག་ཕུལ། །ད་ནི་དགུང་ལོ་བཅུ་དགུར་ཕེབས། །བུ་བློ་ཕ་ལ་དྲི་དུས་མིན། །དེ་སྔོན་ལུགས་གཉིས་བྱ་བ་ཀུན། །ཁོ་བོས་ཐག་བཅད་ལམ་དུ་སོང་། །མདའ་ཡག་ཐོག་ཏུ་གཞུ་ཕབ་པས། །ཨོ་རྒྱན་རྗེ་ལ་གསོལ་ཐོབ་ལ། །སྤྲུལ་སྐུ་ཉིད་ཀྱིས་ཐུགས་ཐག་ཆོད། །ད་ནི་ང་ལ་བློ་མ་དྲི། །ཞེས་ཞུས་ཟླ་བ་གཉིས་གསུམ་ཙམ། །གནས་སྒོ་འགའ་རེ་ཕྱེ་བ་ཡི། །ལུང་བསྟན་ཡང་ཡང་བྱུང་ནས་ནི། །སྨར་ཁམས་ཕྱོགས་སུ་ཆིབས་ཁ་བསྒྱུར། །གདུལ་བྱ་འགྲོ་དོན་རྒྱས་ན་ཡང་། །ཚུར་ལ་ཕེབས་རྒྱུ་མ་བྱུང་སྟེ། །ང་ལ་ཁ་ཉེས་མེད་པའི་ཕྱིར། །བློ་འགྱོད་མེད་པས་ལེགས་པར་བྱུང་། །དེ་ནས་འབྲུག་གི་ལོ་འགོ་ལ། །ཟུར་མང་མཇལ་འདོད་ཆེ་ན་ཡང་། །ཕྱོགས་དེར་ཡམས་ནད་ཆེན་པོ་ཡིས། །མི་མང་ཤི་ཐོས་འགྲོ་དཀའ་ཚེ། །བརྟགས་པ་བྱས་ཚེ་རྨི་ལམ་དུ། །བལྟ་བས་ཆོག་མི་ཤེས་པ་ཡི། །བུད་མེད་རྒྱན་དང་ན་བཟའ་ཕྱུག །འཛུམ་ཞིང་རྒྱང་ནས་འགྲོ་ཚུལ་སྟོན། །རྗེ་བཙུན་འཕགས་མ་སྒྲོལ་མ་ལ། །གསོལ་བ་ཐོབ་ཅིང་སོང་དང་ནི། །སྐྱོན་མེད་ཟེར་བའི་སྒྲ་ཞིག་གྲག །དེ་ནས་འགྲོ་བར་ཐག་བཅད་དུས། ༈ །ཉམས་རྨི་
ལམ་འདྲེས་པའི་སྣང་བ་ལ། །དཔལ་ཡེ་ཤེས་མགོན་པོ་ཕྱག་བཞི་ནི། །ཚེ་སྔར་ནས་སྔགས་རྒྱུན་མ་ཆད་པའི། །ལྷ་བདེ་མཆོག་རྣལ་འབྱོར་གྲངས་མེད་ཕྱིར། །དཔལ་ཡེ་ཤེས་མགོན་པོ་དངོས་བཞུགས་རྟགས། །རྟ་ནག་པོ་གཟི་བརྗིད་འོད་དུ་འབར། །ལུས་ཆེ་ཆུང་འབྲོང་བས་ཆེ་བ་ཞིག །དར་གོས་ཆེན་སྟན་དང་རྒ་སྲབ་བརྒྱན། །མི་ཁོ་བོ་བསུ་ཕྱིར་བྱང་ཕྱོགས་ནས། །གནས་བར་སྣང་ལམ་དུ་མདུར་ཞིང་བྱོན། །མི་ཁོ་བོའི་ཐད་ཀྱི་བར་སྣང་ལ། །དེ་མདུར་སྣ་བསྐྱིལ་ཏེ་ང་ལ་བལྟ། །མགོ་མཐོ་དང་ཡད་ཡུད་འཚེར་བ་མཐོང་། །དེ་ཁོ་བོ་བསུ་རུ་འོང་བར་གོ །དེ་ནས་སྒར་པ་བཏེག་སྟེ་སོང་། །ར་ཁ་མདོ་ཞེས་བྱ་བ་རུ། །ཞག་གསུམ་རྫོགས་ཆེན་མགྱོགས་ཁྲིད་དང་། །དབང་ལུང་ཕྲན་བུ་འཕེལ་བའི་ཚེ། །ཉམས་དང་རྨི་ལམ་འདྲེས་མཚམས་སུ། །སྐྱེས་ཕྲན་བཞི་ཡིས་ཕྱག་འཚལ་ཞིང་། །བུ་ཆུང་ལྟག་ཕུད་ཡོད་པ་གསུམ། །བདག་ལ་དགའ་ཞིང་མཇལ་དུ་བྱུང་། །བུད་མེད་ཤས་ཆེའི་ཁྲོམ་ཚོགས་ནི། །སྟོང་ཕྲག་ཙམ་རེ་ཡང་ཡང་དུ། །གུས་པར་མདུན་དུ་ཐལ་མོ་སྦྱར། །ད་ལོ་བདག་ལ་འོང་རྒྱུ་ཡི། །འབུལ་ནོར་རྣམས་ཀྱང་ཡད་ཡུད་མཐོང་། །དེ་ནས་ཀ་མདར་ཞག་པའི་
ནུབ། །དགོན་པོས་ཇ་འདྲེན་བཀུར་བྱུང་རྗེས། །དཀོར་བདག་འབྲང་ནས་བར་ཆད་ཤོམ། །ཨོ་རྒྱན་དམ་བདར་བྱས་པས་ཞི། །ཟངས་རི་འབར་བ་རྩེ་དགུའི་དྲུང་། །ཞག་ནུབ་རྨི་ལམ་འཁྲུལ་པའི་སྣང་བ་ལ། །ཁྲོམ་ཚོགས་འགའ་རེ་འདུ་ཞིང་གུས་ན་ཡང་། །གྲྭ་པ་འགའ་རེ་གཤིན་ཆག་ཡོད་པ་ཡི། །རྨིས་ལྟས་བྱུང་ཞིང་ཕྱིར་ནངས་ཟུར་མང་དུ། །ད་དུང་ནད་མུ་མ་ཆད་གཏམ་ཐོས་པས། །ཐུགས་དམ་གནད་བསྐུལ་གསོལ་འདེབས་བྱས་པ་ཡིས། །ལམ་ཉེ་ཞོ་མེད་པར་ཟུར་མང་ཕྱིན། །རྗེ་སྤྲུལ་སྐུ་རྣམ་གཉིས་ཞལ་འཛོམ་དང་། །མི་ཁོ་བོ་དུས་བྱས་བཞིན་དུ་འཛོམས། །དེ་རྟེན་འབྲེལ་ལེགས་སྙམ་སྤྲོ་བ་སྐྱེས། །རང་དམ་ཚིག་གཙང་རྟགས་ཡིན་སྙམ་སེམས། །ཐུགས་དགྱེས་ཚུལ་ལུགས་གཉིས་བདག་རྐྱེན་གནང་། །ཉམས་རྨི་ལམ་འཁྲུལ་པའི་སྣང་བ་ལ། །གྲོགས་དགེ་བཤེས་འགས་གུས་ཚུལ་དབང་ཞུ་རྨིས། །དེ་ཕྱིར་ནངས་རེ་གླིང་ཕལ་ཆེར་གྱིས། །དབང་ཆོས་ཀྱི་འབྲེལ་བ་ཞུས་བྱུང་བས། །ལྷ་ཡི་དམ་རབ་འབྱམས་དབང་ལུང་སོགས། །ཞག་དགུ་རུ་དབང་ལུང་རྒྱ་ཆེར་འཕེལ། །སློབ་བུ་པདྨ་མཐར་ཕྱིན་དེ། །རག་ཤུལ་སྡེ་བླར་གྱུར་འདུག་པས། །རྟ་བཅུ་
གཅིག་གཙོར་བྱས་འབུལ་བ་བྱུང་། །འཁོར་འགའ་ཞིག་བསྙེན་རྫོགས་དགེ་ཚུལ་བྱས། །དེ་ནས་དགའ་ལྡན་དུ་བཀྱག་ཁ་ནུབ། །དཔལ་གསང་འདུས་ཀྱི་དབང་བསྐུར་བྱས་པ་རྨིས། །དེར་དགའ་ལྡན་དུ་ཕྱིན་པས་ནང་འཁོར་སོགས། །དཔོན་སློབ་ཀུན་ཞག་བཞིར་དབང་ལུང་འཕེལ། །ཚེས་བཅུ་ཉིན་ཡར་ལ་བཀྱག་པའི་ཉིན། །ཁ་བ་ཡང་མེ་ཏོག་གི་དབྱིབས་ཅན་བབ། །དེ་ནས་ས་གཉན་ཆུ་མིག་དྲུང་། །ཞག་ནུབ་ཉམས་ཀྱི་སྣང་བ་ལ། །བུད་མེད་སྦྲུལ་མགོ་མང་པོ་ཡིས། །གདེངས་ཀ་ཅན་བདག་ལ་སྐྲག་ཅིང་ལྟ། །དེ་ནས་ཨོ་རྒྱན་མཁའ་འགྲོའི་གླིང་། །གཉིས་པ་རུ་གྲགས་པའི་བདུད་རྩི་མཐིལ། །མཇལ་ཕྱིར་འོང་བས་ས་ཐག་རིང་། །རྩྭ་ཤིང་དང་ཆུ་སོགས་དཀོན་པ་སྟེ། །ངལ་དུབ་ཀྱི་སྣང་བ་ཆེན་པོ་བྱུང་། །རྗེ་ནཱ་རོས་ཏཻ་ལོ་བཙལ་བའི་ཚེ། །ངལ་དུབ་ཀྱིས་འོ་བརྒྱལ་ཐོས་པ་དྲན། །ཐག་དེ་ཙམ་རིང་བ་མི་འདུག་སྟེ། །མི་བདག་གིས་སྙན་བརྒྱུད་ཐོབ་འདོད་པའི། །རྟེན་འབྲེལ་གྱི་ཆེ་བ་ཡིན་པར་གོ །གཉན་པོ་ཨ་བོ་གེར་མཛོད་དང་། །ཐག་ཧ་ཅང་མི་རིང་ས་རུ་ཞག།དེར་དམིགས་པ་གཏད་ནས་དཀར་གཏོར་ཕུལ། །མི་བཙུན་གཟུགས་ཤིན་ཏུ་ཆེས་བཟང་ཞིག །མི་
བདག་ལ་ཕྲུག་དམར་འདིང་བ་ཅིག །དར་དམར་པོ་ཁ་གང་མཇལ་དར་ཕུལ། །ཉམས་རྨི་ལམ་བདེན་པ་མ་མཆིས་ཀྱང་། །སྔར་བོན་ལུགས་བསང་ཡིག་མཐོང་བ་ལ། །འདི་བོན་སྐྱོང་བན་གྱི་གཤེད་ཡིན་པ། །བསྟོད་བསྐུལ་ནི་གསལ་པོ་འདུག་ན་ཡང་། །འདི་བན་ལ་ཡང་དད་པ་ཞིག་ཡིན་སྙམ། །དེ་ནས་འབྲུག་ལོ་སྣོན་ཟླ་ཡི། །སྔར་རྩིས་ཡར་ཚེས་བཅུ་གསུམ་ལ། །བདུད་རྩི་མཐིལ་གྱི་གདན་ས་མཛོལ། །སྐྱབས་གནས་དམ་པས་དབང་ལུང་མཛད། །ས་ཚིག་འོང་སྐབས་ཡིན་ན་ཡང་། །གདན་ས་དེ་རུ་བསླེབས་མ་ཐག་འབྲུག་གྲག་ཆར་པ་ཅུང་ཟད་བབ། །རྟེན་འབྲེལ་ཤིན་ཏུ་ལེགས་པར་སེམས། །དཔོན་སློབ་རྣམས་ལ་མགོན་པོ་ཡི། །གདམས་པ་འགའ་རེ་སྤེལ་བར་བྱས། །ཉམས་དགའ་རིག་པ་དང་བ་དང་། །འཇའ་སྤྲིན་འཇའ་འོད་ཟུག་པའང་བྱུང་། །འདོད་ཆོས་དབང་ལུང་དཔེ་ཆ་འཆད། །རེ་ཞིག་བསམ་པ་འགྲུབ་པར་བྱུང་། །དབོན་པོ་གཉིས་ལའང་བསྐོ་ཇ་གནང་། །རྒྱལ་བ་རྒྱ་མཚོའི་སྒྲུབ་སྐོར་གྱི། །གླེགས་བམ་བཞེངས་པར་བྱས་པའི་ཚེ། །རྨི་ལམ་དྲུང་སྐྱིད་རིན་པོ་ཆེས། །རྒྱལ་བ་རྒྱ་མཚོའི་གླེགས་བམ་འདི། །གཉན་པས་གཞན་
ལ་སྟོན་པ་དང་། །སྤེལ་མི་རུང་ཞེས་བཀའ་རྒྱ་དང་། །ཞལ་གདམས་མང་པོ་གསུངས་ན་ཡང་། །ཐམས་ཅད་ཡིད་ལ་མ་ཟིན་ཏོ། །དངོས་སུ་པོ་ཏིའི་དབང་གནང་ངོ། །དེ་ནས་དཔལ་ལྡན་ས་སྐྱ་པའི། །གདན་ས་བར་གཙང་ཡིན་ཞེས་པའི། །གླེ་མདའ་དགོན་པའི་དྲུང་ཉིད་དུ། །སྒར་ཕབ་ཞག་པོ་གསུམ་ཙམ་བསྡད། །དགེ་འདུན་རྣམས་ལ་ལྷ་མོ་དང་། །ཞལ་གྱི་དབང་ལུང་སྦྲེལ་མ་ཕུལ། །ཐན་པ་ཆེན་པོས་ས་ཚིག་ནས། །མུ་གེ་འོང་དོགས་འབྲོག་ཡུལ་གྱི། །མི་ཀུན་མྱ་ངན་ཟུག་རྔུ་ལྡང་། །ཉམས་དང་རྨི་ལམ་འདྲེས་པའི་མཚམས། །རང་གིས་དྲན་ནམ་གཞན་གྱིས་སྨྲས། །གང་ཡིན་མི་འབྱེད་ལུང་བསྟན་ཚིག །ད་ལོ་ལོ་ལེགས་འབྲུ་བཟང་འབྱུང་། །ཁྱེད་རང་ཚང་ལ་མུ་གེ་མེད། །ད་ལམ་མགོ་ཐོན་ལེགས་པོ་འོང་། །ཞེས་པའི་ཚིག་འགའ་ཐོས་སྙམ་བྱེད། །དཔོན་གྱིས་ཆར་ཞུས་བྱས་བྱུང་བས། །གློ་བུར་ཆར་འབེབས་གདམས་པ་དང་། །མཚོ་དང་ཆུ་མིག་འགའ་ལ་བྱིན། །ཉམས་དང་རྨི་ལམ་འདྲེས་སྐབས་སུ། །ཆུ་བོ་འབྲུབ་དང་མཚོ་ཆེན་དང་། །ཀླུ་བདུད་དགེ་བསྙེན་ཆེན་པོ་དེ། །བླ་མ་རྟ་སྔོན་ཞོན་པ་ལ། །མགོ་ལ་གསེར་ཞྭ་ཅོད་པན་ཅན། །དཔོན་གཡོག་
གཉིས་བཅས་བྱུང་བ་དང་། །མཚོ་འགྲམ་དགེ་བཤེས་ཆེན་པོ་ནི། །གོས་ཆེན་སེར་པོའི་བེར་གྱོན་པ། །ལངས་ཏེ་མཚོ་འགྲམ་གདའ་བ་མཐོང་། །ཞག་པོ་གཅིག་ལ་ཆར་ཆེན་བབ། །དེ་ནས་དབའི་མདའ་མཚོ་ནག་ཅེས། །རྒྱམ་གྱི་མཚོ་ནག་རྔ་མ་ནི། །ཡིན་ཟེར་མཚོ་ཁར་སྒར་པ་བརྒྱབས། །མཚོ་དང་ཆུ་མིག་ཆར་འབོད་བྱས། །འབྲུག་སྒྲོག་སེར་ཕྲན་ཆར་ཆེན་བབ། །ཉམས་དང་རྨི་ལམ་འདྲེས་པའི་མཚམས། །དང་པོ་རྣ་བས་ཐོས་པ་ལ། །དེ་ནས་མིག་གི་མཐོང་སྙམ་པའི། །ལོ་རྒྱུས་མཐོང་སྣང་འདི་ལྟར་རོ། །ཟུར་མང་སྐུ་སྐྱེ་འདི་རྣམས་ནི། །སངས་རྒྱས་འོད་དཔག་མེད་པའི་དྲུང་། །འགྲོ་བ་སེམས་ཅན་དོན་གྱི་ཕྱིར། །སྐྱེ་བ་བདུན་རེ་ལན་པ་ཡི། །ཁས་ལེན་མཛད་ནས་བྱོན་པ་ཡིན། །ཟེར་བའི་སྒྲ་ཞིག་རྣ་བས་ཐོས། །ཡང་ནི་ལོ་རྒྱུས་འདི་འདྲ་ཐོས། །ཤིན་ཏུ་སྡིག་ཆེན་མི་གཉིས་ནི། །མནར་མེད་དམྱལ་བར་སྐྱེས་པ་དེ། །འདྲེན་ཕྱིར་བྱང་ཆུབ་སེམས་དཔའ་ཞིག །དམྱལ་བའི་ཡུལ་དུ་བྱོན་པ་ལ། །དམྱལ་བ་གཉའ་མ་ཐམས་ཅད་ལ། །མི་དེ་གར་ཡོད་དྲིས་ཤིང་བྱོན། །ད་རུང་འོག་ཏུ་ཡོད་དོ་ཟེར། །མ་ཟད་དམྱལ་བ་མནར་མེད་དེར། །འབྱོན་
པར་དགོངས་ཡང་ལམ་མ་རྙེད། །སྡིག་ཅན་མི་དེ་འདྲེན་པའི་ཕྱིར། །ཅི་ལྟར་བྱས་ན་ལམ་ཐོད་སྨྲས། །དེ་ཚེ་དམྱལ་སྲུང་ལས་མཁན་གྱིས། །དམྱལ་བའི་ཡུལ་གྱི་ས་འདི་ན། །སུ་དང་གང་གིས་ལུང་མི་འགྲོ། །རྫོགས་པའི་སངས་རྒྱས་བཅོམ་ལྡན་འདས། །དེ་ཡི་ལུང་དང་ལག་རྟགས་ཤིག །ཡོད་ན་ལམ་ཐོད་ལུང་འགྲོ་ཟེར། །དེ་ནས་བྱང་ཆུབ་སེམས་དཔའ་དེས། །ཡར་འོང་སངས་རྒྱས་ལ་ཞུས་ནས། །ལུང་དང་ལག་རྟགས་ཞུ་བསམ་སྐད། །དེ་ནས་རཱ་ག་ཨ་སྱ་བདག །ལུང་པའི་ཕུ་ན་ཡར་བལྟས་པས། །བཅོམ་ལྡན་ཤཱཀྱ་ཐུབ་པ་དེ། །སྐུ་མདོག་འཛམ་བུ་ཆུ་སེར་མདོག །སྐུ་ཚད་འདོམ་པ་བརྒྱད་ཅུ་ཙམ། །མཚུར་ཕུའི་ལྷ་ཆེན་ལས་ཆེ་བ། །སྐུ་གཟུགས་མ་ཡིན་ཐུབ་པ་ཉིད། །དངོས་སུ་བཞུགས་ནས་གདའ་བ་ལ། །འཁོར་དུ་ཉན་ཐོས་དགེ་སློང་ཡང་། །ཐོ་རེ་ལོང་ངེ་བ་གཅིག་འདུག །དེ་འདྲ་མཐོང་བའི་སྣང་བ་བྱུང་། །ཉམས་དང་རྨི་ལམ་འདྲེས་མཚམས་ཏེ། །ཉིན་མོ་གཉིད་ཡུལ་སྐབས་ཡིན་པས། །ཉེ་གནས་ཀྱིས་ནི་གཉིད་དཀྲོགས་པ། །དེ་དག་རྣམས་ཀྱི་ཚིག་དོན་མཇུག །མི་གསལ་ཟླུམ་ཟླུམ་བྱུང་དེ་ལེན། །མཚོ་ཁའི་བྲག་ལ་རང་བྱོན་གྱི། །དགའ་
འཁྱིལ་ལ་སོགས་རྟགས་འདུག་པས། །ཨོ་རྒྱན་ཆེན་པོས་སྦས་པ་ཡི། །གཏེར་ཕྲན་ཞིག་ཀྱང་ཡོད་དམ་སེམས། །རྨི་ལམ་ཉམས་སྣང་འཁྲུལ་སྣང་ལ། །མཆོག་འཛིན་རློམ་པ་མ་མཆིས་ཀྱང་། །ཐུབ་ཆེན་དེ་བཞིན་གཤེགས་པ་ཡི། །ཕྱག་བྲིས་ཡི་གེ་དྲུག་པ་དང་། །རང་བྱོན་སྒྲོལ་མ་བཞུགས་པའི་གནས། །རུ་པ་དབང་ཕྱུག་རྡོ་རྗེ་སོགས། །བཀའ་བརྒྱུད་སྐྱེས་ཆེན་མང་པོ་ཡི། །བྱིན་རླབས་ཞབས་ཀྱིས་བཅགས་པའི་ས། །སེབ་ཅེས་བྱ་བའི་ལུང་པ་ན། །འབྲོང་པ་དཔོན་གྱིས་སྤྱན་འདྲེན་སླེབས། །ཉམས་དང་རྨི་ལམ་མཚམས་ཤེད་ན། །རྟ་ནི་དཀར་པོ་སྒྲ་ཆས་ཅན། །གཉིས་ནི་གུར་གྱི་དྲུང་དུ་བྱུང་། །དེ་མ་ཐག་ཏུ་བཙུན་པ་ནི། །རྒྱལ་པོ་ཆས་བཟང་འཇིགས་པ་ཞིག །བདག་ལ་མཇལ་ཕྱིར་གུར་སྒོར་བྱུང་། །འབྲོང་པ་བན་ཐུང་ཞེས་བྱ་བའི། །འབྲོང་པའི་ལྷ་དེ་ཡིན་ནམ་སྙམ། །དེ་ཡི་གསོལ་ཀ་ཉུང་བསྡུས་བྲིས། །སྔོན་དུ་དབའ་ནག་མཚོ་ཞེས་པར། །རྒྱམ་གྱི་མཚོ་ནག་རྔ་མ་དང་། །མཚོ་དང་ཆུ་མིག་འགའ་རེ་ལ། །ཆར་པ་དྲག་འབོད་རྫས་བཞག་པས། །ཡོན་བདག་རྣམས་ལ་ལོང་སྨྲས་ཀྱང་། །མ་བླངས་ཆུ་ལ་ཤོར་ཟིན་པས། །འབྲུག་ས་གློག་འོད་
ཆར་དྲག་དང་། །ཐོག་འོང་འདྲ་བའི་དངོས་རྟགས་མང་། །དེ་ཕྱིར་རྡོ་ཐི་གངས་དཀར་ལ། །དམ་བརྡར་གསོལ་ཁ་ཉུང་ངུ་བྲིས། །དེ་ནས་མི་གཞོན་རལ་པ་ཅན། །ཆོས་བཟང་དཔོན་རིགས་ཆེན་པོའི་གཟུགས། །བདག་ལ་ཕྱག་འཚལ་མདུན་དུ་བྱུང་། །དབང་རྫས་སྣ་གཅིག་མགོར་བཞག་པས། །དབང་ནི་ཡོངས་རྫོགས་ཐོབ་གྱུར་པས། །ཁོ་དགའ་གར་འཆམ་བྱེད་ཅིང་ནི། །རླུང་ལྟར་སྐད་ཅིག་ཡུད་ཀྱིས་སོང་། །ཆོས་བཟང་བུད་མེད་རྒྱུན་ཆེན་གཉིས། །བདག་ལ་སྐོར་བ་བྱེད་པ་ཡང་། །ཉམས་དང་རྨི་ལམ་མཚམས་སུ་མཐོང་། །དཔལ་ལྡན་ས་སྐྱའི་གདན་ས་ན། །གླེ་མདའ་དགོན་པའི་དགེ་བསྙེན་སོགས། །སྐྱ་སེར་ཁྲོམ་ཚོགས་ཇེ་ཆེར་རྒྱས། །ཞག་དགུར་དབང་ལུང་ཁྲིད་སོགས་འཕེལ། །བན་བོན་སྐྱ་སེར་ཐམས་ཅད་ཀྱིས། །གུས་འདུད་ཆེ་ཞིང་འགྲོ་དོན་འགྲུབ། །དགེ་བ་བསྔོ་སྨོན་རྒྱས་འདེབས་བྱས། །དེ་བས་སྔོན་ཙམ་ཉམས་སྣང་ལ། །ད་ལོ་བདག་ལ་འོང་རྒྱུ་ཡི། །འབུལ་ནོར་རྣམས་ཀྱང་མཐོང་སྙམ་བྱེད། །དེ་ནས་རྫ་ག་གི་ལུང་པ་ན། །རིས་འོད་དཔོན་གྱིས་གདན་འདྲེན་བསླེབས། །སྒར་ཕེབས་ཡུད་ཙམ་འཐུམས་པའི་ཚེ། །བུ་ཆུང་གཞོན་ནུ་མཛེས་པ་
ནི། །མགོ་ཡི་སྐྲ་བཞར་བཙུན་པའི་མགོ །ལུས་ལ་གོས་དཀར་གྱོན་པ་ནི། །བཞི་བཅུ་ཙམ་ཞིག་བདག་གི་མདུན། །གུས་འདུད་ཐལ་མོ་སྦྱར་ཏེ་འདུག །ལྷ་ཐོག་ཡེ་བརྫུ་ཡིན་ནམ་སེམས། །དེ་ཡི་གསོལ་ཀ་རྒྱས་བསྡུས་གཉིས། །བྲིས་ནས་དཔོན་རིགས་འགའ་ལ་བྱིན། །ཡང་ནི་ཉམས་དང་རྨི་ལམ་མཚམས། །གཟུགས་ནི་གསལ་པོར་མི་སྟོན་པའི། །ཟང་ཟིང་ཤིན་ཏུ་མང་ན་ཡང་། །སྐྱབས་གསུམ་འཛིན་པའི་སྡོམ་པ་ཕོག །ལུང་པ་ཤར་གྱུའི་རྫོང་ནང་དེར། །གཞི་བདག་དཀར་ཕྱོགས་མང་བར་གོ །ནད་མུའི་འཇིགས་པ་ཆེ་སྣང་ཡང་། །ཁྲོམ་ཚོགས་རང་འཁོར་བདེ་བར་བྱུང་། །དཔོན་གྱི་སྐུ་རིམ་འགའ་བྱས་པས། །དམ་ཅན་སྐྱེས་བུའི་གསུང་ཡིན་སྙམ། །སྔོན་ཆད་ང་ཡིས་གནོད་བྱས་ཀྱང་། །ད་ཕྱིས་མི་བྱེད་ཟེར་བ་བྱུང་། །དེ་ཕྱིས་དྲག་ལས་མ་བྱས་སོ། །བོད་སོག་སྐྱ་སེར་ཁྲོམ་ཚོགས་འདུས། །ཟང་ཟིང་གདུལ་བྱ་འུར་བ་དང་། །བཅུ་གསུམ་ཞག་ལ་དབང་ལུང་དང་། །ཁྲིད་སོགས་འགྲོ་དོན་ཆེ་བར་བྱུང་། །རྡོ་རྗེ་སྤྱན་གྱུར་བཛྲའི་མཚན། །གཅིག་དང་མཇལ་ཞིང་དག་སྣང་འཕེལ། །དབང་ལུང་འདོད་པ་མ་རྫོགས་ཀྱང་། །ད་ནི་འགྲོ་ཤོམ་གྱིས་ཟེར་
བའི། །ལུང་བསྟན་བྱུང་ཕྱིར་མྱུར་བར་བཀྱག །དེ་ནས་དྲག་སེང་དཔོན་ཚང་གིས། །སྤྱན་དྲངས་དེ་ཡི་སྡེ་དཀྱིལ་ཕྱིན། །ན་ཐང་ཆུ་མིག་མང་པོ་ཅན། །སྒར་མཐའི་ཆབ་ཀྱིས་བསྐོར་བར་བསྡད། །དེ་མ་ཐག་ཏུ་ཉམས་སྣང་ལ། །མི་གཞོན་ཆས་བཟང་མཛེས་པ་སོགས། །ཉི་ཤུ་ཙམ་ཞིག་རང་མདུན་དུ། །ཐལ་མོ་སྦྱར་ཏེ་འདུག་པ་ལ། །བུམ་པའི་དབང་བསྐུར་ལན་འགའ་བྱས། །དེ་ཡང་ཡེ་བརྫུའི་རྟགས་སུ་སེམས། །བུ་ཆུང་གཞོན་ནུ་གོས་སྔོན་ཅན། །འཁོར་གསུམ་བཏགས་པ་ཞིག་གིས་ནི། །བདག་གི་རྟ་ཁ་ཁྲིད་སྙམ་བྱེད། །སྐྱེས་བུའི་ཕྲིན་ལས་སྒྲུབ་བམ་སེམས། །ས་དེ་གཉན་ཆ་ཆེ་འདུག་པས། །ས་འབྲུག་སྡེར་དང་ཆུ་དུར་དང་། །གློག་འོད་འབྲུག་སྒྲ་ཆེ་སོགས་བྱུང་། །དཔོན་ཚང་བོན་པོའི་སྐུ་རིམ་ནི། །བཅའ་བ་དེ་ཡི་རྟགས་མཚན་དང་། །ནད་པ་ལུས་ཉམས་ཞན་པ་ཡང་། །རྣ་བའི་ཡུལ་དུ་ཐོས་པ་བྱུང་། །ཡུལ་དེའི་གཞི་བདག་གདུག་རྩུབ་ཆེ། །སྨར་ཁམས་སྟོད་སྨད་ཐམས་ཅད་དུ། །གང་དུ་སེར་བ་བརྒྱབ་ན་ཡང་། །རྫ་གསེང་སྙི་ཚལ་ལོ་མ་ཕྱིན། །ས་ཕྱོགས་དེ་རུ་བླ་མ་རྣམས། །ཕེབས་ཚེ་ཐོག་འབྲུག་སེར་བ་བརྒྱབས། །ས་སྐྱོན་ལྡང་སོགས་ཆོ་
འཕྲུལ་ཆེ། །ཟེར་བའི་གྲགས་ཆེར་འདུག་ན་ཡང་། །དཀར་གཏོར་ཕུལ་ཞིང་ཨོ་རྒྱན་གྱིས། །སྔོན་གྱི་དམ་ཚིག་དམ་བདར་བྱས། །རྩུབ་ཆ་མེད་ཅིང་བདེ་བར་བྱུང་། །གཞི་བདག་དེ་རྣམས་ཨོ་རྒྱན་གྱི། །དམ་གནས་སྐྱེས་བུ་ཆེན་པོ་ཡི། །བཀའ་ཡི་འཁོར་ཚོགས་ཡིན་ནམ་སེམས། །བོད་ཀྱི་མགར་བ་མཆེད་བརྒྱད་སོགས། །ཤིན་ཏུ་འཇིགས་པ་ཡིན་ནོ་སྐད། །ཞག་བཅུར་དབང་ལུང་ཁྲིད་སོགས་འཕེལ། །ཟང་ཟིང་ལོངས་སྤྱོད་ཆེར་ལྟར་བབ། །དེ་ནས་འཛི་རྒྱལ་ས་བྲོ་ཞེས། །བེ་རི་རྒྱལ་པོའི་བླ་རི་ནི། །མཐོང་བའི་ས་རུ་ཕྱིན་པ་དང་། །གནམ་འཚུབ་གློ་བུར་སེར་ཕྲན་བྱུང་། །བན་བོན་དགྲ་རུ་ཡིན་པར་གོ །དེ་ནས་བྲག་དཀར་མདོ་རུ་བསླེབས། །ཡོན་བདག་འགའ་ལ་དབང་བསྐུར་བྱས། །བུམ་ཆུ་ལེགས་པོ་འཕེལ་བ་དང་། །རྨི་ལམ་ལྟས་བཟང་འགའ་རེ་བྱུང་། །ནམ་ཕྱེད་འབྲུག་སྒྲ་གློག་འོད་དང་། །ཁ་བ་ཆར་པ་ཆེན་པོ་བབ། །ཚེས་གཅིག་ནམ་ལངས་ཉམས་སྣང་ལ། །མི་དམར་ཁ་ཤྭ་རྟ་དམར་ཅན། །མི་སྔོན་གོས་སྔོན་རྟ་སྔོན་ཅན། །མི་ནག་རྟ་ནག་མི་གསལ་ཙམ། །སྒར་གྱི་ནང་དུ་བྱུང་ཙམ་གྱིས། །སྤུ་གྲི་མཆེད་གསུམ་ཡིན་
པར་ཤེས། །འདི་གསུམ་ཅི་ལ་ཡིན་སྙམ་པའི། །འདི་གསུམ་སྔར་ནས་ཡོད་པ་ཡིན། །ཟེར་བའི་སྒྲ་ཞིག་གྲག་པ་བྱུང་། །དེ་དུས་གཏེར་སྟོན་སྤྲུལ་སྐུ་ཡིས། །དགོངས་པ་གཏད་པ་ཡིན་འདུག་པས། །ཚེས་གསུམ་ཉིན་པར་བཀའ་ཤོག་དང་། །གནང་སྦྱིན་གྱ་ནོམ་བཅས་པ་སླེབས། །ལམ་དུ་ཚུགས་གཉིས་བྱས་སོ་སྐད། །རྣམ་ཐར་ཐོས་པས་ཡིད་རབ་ཚིམས། །གནས་སྒོ་ཕྱེས་ཚེ་མེ་ཏོག་ཆར། །སྣ་ཚོགས་འཇའ་ཡིས་ནམ་མཁའ་གང་། །རྡོ་ལ་ཕྱག་མཛུབ་གསུམ་རྗེས་དང་། །གནས་སྒོ་མང་དུ་ཕྱེས་པ་ལ། །ཐམས་ཅད་ཡིད་ཆེས་དད་པ་ཐོབ། །དགུན་སྒང་གཏུམ་མོའི་ཁྲིད་མཛད་པས། །དཔོན་སློབ་རས་རྐྱང་ཆུ་རས་དང་། །འཕོ་ལུང་ཞག་རེ་སྦྱངས་པ་ཡིས། །སྤྱི་བོ་སྐྱང་ཞིང་ཁྲག་འབབ་དང་། །རྡོ་ཡི་བཅུད་ལེན་བྱས་པ་ཡིས། །ལྟོ་ཡི་ཞེན་འཁྲིས་ཆོད་པ་སོགས། །གྲུབ་པའི་མཚན་མ་ངོ་མཚར་བ། །བུམ་སྒྲུབ་བུམ་པར་འབྲུག་སྒྲ་འདྲའི། །སྒྲ་གྲག་ནམ་མཁར་ཞིག་གཉིས་བར། །ཁ་དོག་སྣ་ལྔའི་འཇའ་སྤྲིན་གང་། །བུམ་ཁང་འཇའ་ཡི་ཀ་བ་ཟུགས། །གསང་སྔགས་རྙིང་མའི་དགེ་འདུན་པ། །བརྒྱ་སྟོང་ཙམ་དང་ཁྱད་པར་དུ། །ཀཿཐོག་དྲུང་པ་ལ་སོགས་པའི། །མཁས་
གྲུབ་ཀུན་གྱིས་སྤྱི་བོར་བཀུར། །སྡེ་ཆེན་ཀུན་གྱིས་གུས་པས་བཏུད། །དེ་འདྲའི་གཏམ་སྙན་ཐོས་པ་ཡི། །མི་རྒན་བློ་སེམས་ཚིམས་པར་གྱུར། །ཨོ་རྒྱན་ཆེན་པོའི་བཀའ་དྲིན་ཡིན། །སླར་ཡང་ཨོ་རྒྱན་ཆེན་པོ་མཁྱེན། །དེ་ནས་གོ་ཡི་ལུང་པ་དེར། །སྐྱ་བདུད་ལྷ་འབྲོང་འདྲེས་པ་ལ། །དབང་ཁྲིད་གདམས་ངག་རྒྱ་ཆེར་འཕེལ། །དེ་ནས་གོ་ཆེན་ཞེས་བྱ་རུ། །སྐྱབས་ཆེ་བླ་མས་གདན་དྲངས་ཏེ། །སྐུ་རིམ་དྲག་པོའི་སྦྱིན་སྲེག་དང་། །ལྷ་མོ་བརྒྱ་རྩ་བྱས་པའི་ནུབ། །བླ་མ་ཚང་ན་གནོད་བྱེད་པའི། །དམ་སྲི་ངུར་འཛིན་བྱ་བ་དེས། །ཉམས་རྨིས་མཚམས་སུ་རང་གཟུགས་བསྟན། །ཕྱི་སློང་ཁྲོམ་རྣམས་འཁྲུག་པ་ཤོམ། །ནང་སློང་རང་ཡང་ལུས་མ་བདེ། །གསང་སློང་སེམས་ཀྱང་རབ་ཏུ་འཁྲུག །དེ་ནས་ཏིང་འཛིན་དགོངས་པ་བསྐྱེད། །རྩུབ་འཁྲུགས་ཐམས་ཅད་རབ་ཏུ་ཞི། །སྐྱ་བདུད་ས་གར་བ་ལ་སོགས། །བླ་མ་བཅུ་གསུམ་ཙམ་དང་ནི། །དགེ་འདུན་དྲུག་ཅུ་ཙམ་དང་ནི། །ཁྲོམ་ཚོགས་ཤིན་ཏུ་མང་པོ་ལ། །དབང་ལུང་ཁྲིད་སོགས་འགྲོ་དོན་འགྲུབ། །དང་པོ་དེ་རུ་སླེབ་མ་ཐག །ཡུད་ཙམ་འཐུམ་པའི་ཉམས་སྣང་ལ། །ལྷ་འདྲེ་ཡིན་ནམ་ཁྲོམ་ཚོགས་ལ། །
སྐད་ཅིག་དབང་བསྐུར་བྱས་པ་སྙམ། །དེ་ནས་སྨར་ཁམས་སྒང་སྟོད་དེར། །ཤིན་ཏུ་གཉན་ཆག་ཆེ་བའི་རི། །ཟླ་གངས་གཡུང་དྲུང་ལྷ་རྩེ་ཞེས། །བྲག་རི་དཀར་པོ་མཆོད་རྟེན་དབྱིབས། །སྔོན་དུས་དེ་ལ་རི་དྭགས་པས། །རི་དྭགས་བསད་པས་གངས་རིད་བརྒྱབ། །མི་ནི་གསུམ་ཙམ་བསད་པ་དང་། །སོག་པོའི་གོ་བཏང་རི་དྭགས་བཤོལ། །དེ་ཚེ་མ་སོད་སེར་བས་བྲབ། །དེ་ནས་སོག་པོའི་རྒྱལ་པོ་ཡིས། །མེ་མདའི་ཁྲལ་བསྡུས་རི་ལ་བརྒྱབ། །དེ་མ་ཐག་ཏུ་ཐོག་བརྒྱབ་ནས། །མི་རྟ་ལྔ་ཙམ་བསད་ཟེར་བའི། །རི་ཡི་རྩ་རུ་ཞག་པའི་ནུབ། །བྲག་རི་དེ་ཡི་རྩེ་མོ་ནས། །སྐྱེས་ཕྲན་དར་མ་ཚེས་བཟང་བ། །རལ་པས་སོག་འདབ་ཁེབ་པ་ལ། །ཁོག་སྨད་བྲག་རིའི་ནང་དུ་ནུབ། །ཁོག་སྟོད་བདག་ལ་ལྟ་ཞིང་གུས། །ང་ནི་བོན་པོ་ཡིན་ལགས་ཟེར། །ཐོ་རངས་ནས་ནི་སྔོ་ལྷུག་ལྷུག །སྒྲོ་བ་གང་ནི་ཕུལ་བྱུང་བས། །ཉམས་རྨིས་འདྲེས་པའི་འཁྲུལ་སྣང་ལ། །བྱུང་ཕྱིར་ཕྱིར་ནངས་ཀ་བསྟོད་བྱས། །དེ་ཕྱོགས་མི་ལ་ཕན་ཕྱིར་བྲིས། །སྐུ་མཐུ་ཆེ་བ་མ་ལགས་ཏེ། །ཨོ་རྒྱན་རྗེ་ཡི་བཀའ་དྲིན་ཡིན། །དེ་ནས་སིབ་ཀྱི་ལུང་པར་ཕྱིན། །ཅུང་ཟད་འཐུམ་པའི་ཉམས་རྨིས་
མཚམས། །སྐྱ་མི་ཆས་བཟང་འཁོར་གསུམ་ཅན། །ཆེ་ཆུང་དིལ་མགོ་ཆེ་ཤོས་ཙམ། །ལུང་པ་དེ་ཡི་ཕུ་ངོས་ནས། །བདག་གི་དྲུང་དུ་བྱུང་སྙམ་བྱེད། །ཕུ་ཡི་གཞི་བདག་ཡིན་པ་འདྲ། །དེ་མ་ཐག་ཏུ་འབྲོང་པ་དཔོན། །བཀྲ་ཤིས་དབང་དྲག་དེར་བྱུང་ནས། །སང་ཉིན་འབྱོན་ཞོར་ཕུ་འདི་ན། །ང་ཡི་རི་ཞིག་ཡོད་པ་ལ། །བསང་མཆོད་མཛད་རོགས་ཐུགས་འདོགས་ཟེར། །དེ་ཡི་དོན་དེ་ཡིན་པར་སེམས། །ལྷ་འདྲེ་ཡིད་ཀྱི་མངོན་ཤེས་ཅན། །མི་དང་ལྷ་འདྲེ་ཟུང་འཇུག་སྟེ། །ཕྱི་ནང་དབྱེར་མེད་རྟེན་འབྲེལ་མཚར། །དེ་ནས་ཚུར་འོང་རྫ་ཆུ་ལ། །ཆུ་ཆེ་ཐར་བར་དཀའ་བ་དང་། །སྔོན་དུས་བླ་ཆེན་ཞིག་གིས་ནི། །ཀ་ཆ་གང་དྲག་ཆུ་ལ་ཤོར། །ཐུགས་ཁྲོས་ཆུ་ལ་གཏོར་མ་དང་། །མདོ་སྒྲུབ་བརྒྱབས་པའི་ལོ་རྒྱུས་ཐོས། །རང་ཡང་སྐྲག་ནས་གསོལ་འདེབས་བྱས། །དེ་ནུབ་རྨི་ལམ་འཁྲུལ་སྣང་ལ། །ཁྱིམ་ནི་ཆེན་པོ་ཞིག་གི་ནང་། །མཆེད་གྲོགས་བཙུན་པ་མང་པོ་འཚོགས། །དགའ་བའི་རྣམ་འགྱུར་མང་པོ་བསྟན། །ཁྱིམ་དེའི་ཕྱེད་ཙམ་མཚོ་རུ་སྣང་། །མཁར་ནག་འཁོར་དུ་རྟོགས་པར་གོ །ཕྱིར་ནངས་ཉེས་མེད་བདེ་བར་ཐར། །དེ་ནས་གནས་མདོའི་ལྷ་
ཁང་དུ། །ཞག་དྲུག་མགོན་པོའི་བསྐང་མདོས་བྱས། །ཉི་མའི་དཀྱིལ་འཁོར་གསལ་པོ་ནི། །ལན་གསུམ་ཤར་གྱི་ཕྱོགས་ནས་ཤར། །ཟླ་བའི་དཀྱིལ་འཁོར་ལྷོ་ནས་ཤར། །ཉམས་རྨིས་མཚམས་སུ་དེ་ལྟར་བྱུང་། །དེ་ནས་རི་བོ་ཆེ་ཕྱོགས་སུ། །བཀྱག་ཁ་རང་གི་ཉམས་རྨིས་སུ། །བྱ་རོག་མང་པོས་མདུན་ཁེངས་རྨིས། །མགོན་པོ་དགྱེས་པའི་རྟགས་སུ་གོ །ལམ་དུ་ཞག་ནུབ་རྨི་ལམ་དུ། །རྒྱལ་བའི་དབང་པོ་མཇལ་བའི་ཕྱིར། །སོང་བ་རྨིས་ཕྱིར་ངོ་བོ་ཡང་། །ཆོས་སྐུ་གཅིག་པ་ཡིན་པར་སེམས། །ཞབས་དྲུང་ཉིད་ལ་བརྒྱ་འབུལ་སོགས། །ཁུ་དབོན་མཇལ་ཞིང་འབུལ་བ་བྱས། །གང་ཞུས་དབང་ལུང་གདམས་པ་གནང་། །དེ་ནས་རྟོགས་པ་ཕུལ་བ་ནི། །ན་ནིང་ཕན་ཆད་ཁོ་བོ་ལ། །ཡེངས་སྐབས་བརྗེད་སྐབས་འགའ་རེ་བྱུང་། །དེ་ལ་འགྱོད་པའི་སེམས་གཅིག་བྱུང་། །ད་ནི་བརྗེད་སྐབས་ཡོད་མོད་ཀྱང་། །དེ་ལ་འགྱོད་པའི་སེམས་མི་འབྱུང་། །གཞི་ཡི་ཕྱག་རྒྱ་ཆེན་པོ་ནི། །གོ་བ་སྐམ་པོ་སྔར་ནས་ཡོད། །དེ་ཡི་ཕན་པ་མེད་མོད་ཀྱང་། །གོ་བ་མིན་པར་གདེང་ཉིད་ནས། །ཡེངས་དང་མ་ཡེངས་ཁྱད་མེད་ཅིང་། །འཁྲུལ་དང་མ་འཁྲུལ་ངོ་བོ་གཅིག །གཉིད་
དང་མ་གཉིད་ངོ་བོ་གཅིག །གཉུག་མ་རྒྱུན་ཆད་མེད་པའི་དོན། །ཡེ་ནས་ལྷུན་གྲུབ་རང་བཞིན་ལ། །ངེས་ཤེས་གཏིང་ནས་སྐྱེ་བ་བྱུང་། །འདི་ཉིད་རྟོགས་པ་ཡིན་ལགས་སེམས། །ཡང་ན་ཧམ་པ་ཆེ་བ་ལགས། །ཉམས་ལེན་སྟེང་དུ་བཞག་ཙམ་ན། །གཟུགས་སྒྲ་ལ་སོགས་སྣང་བ་ལ། །ཡིན་མིན་བཟང་ངན་འཛིན་པ་མེད། །གཟུགས་རྣམས་སྣང་སྟོང་སྒྲ་གྲག་སྟོང་། །ཚོགས་བརྒྱད་རྟོགས་པ་མ་འགགས་པར། །ཉམས་ལེན་སྟེང་དུ་མ་ཡེངས་པ། །གང་ཟག་བདག་མེད་ཡིན་ནམ་སེམས། །ཕྱི་རོལ་སྣང་བ་སྣ་ཚོགས་འདི། །རྒྱ་མཚོའི་ནང་དུ་གཟའ་སྐར་བཞིན། །རྣམ་པ་སོ་སོར་གསལ་བ་ལ། །ངོ་བོ་སྟོང་པ་ཉིད་དུ་མཐོང་། །ཆོས་ཀྱི་བདག་མེད་ཡིན་ནམ་སེམས། །དེ་དག་དོན་དང་ལྡན་ལགས་སམ། །རྒྱལ་བའི་ཐུགས་དང་རང་གི་སེམས། །འགྲོ་བ་ཀུན་གྱི་སེམས་རྒྱུད་གསུམ། །རྣམ་པ་སོ་སོར་ཡོད་མོད་ཀྱང་། །ངོ་བོ་དབྱེར་མེད་གཅིག་པར་སེམས། །དེ་ཡང་དོན་དང་ལྡན་ལགས་སམ། །བླ་མ་གཞན་ལ་ཞུས་ལགས་ཀྱང་། །མཛེས་ཆོས་ལེགས་པོ་གསུངས་པ་ལས། །གེགས་སེལ་བོགས་འདོན་གནང་མཁན་དཀོན། །དེང་སང་དྭགས་བརྒྱུད་བསྟན་
པའི་བདག །རྗེ་ཉིད་ལགས་པས་བཀའ་བསྩལ་ཞུ། །སྐྱོན་ལ་ཕྱག་མཛུབ་མ་བཙུགས་པར། །ཡོན་ཏན་སྐྱེ་ཐབས་མི་གདའ་བས། །ང་ཡི་དེ་རྣམས་རྟོགས་པ་དང་། །ཧམ་པ་གང་རེད་དབྱེ་བར་ཞུ། །དེ་དག་ལྷུག་པར་ཞིབ་རྒྱས་ཞུས། །དེ་ཚེ་ཞལ་ནས་བཀའ་བསྩལ་པ། །རྒྱུ་ལས་མ་བྱུང་འབྲས་བུ་དཀའ། །གཞན་གྱིས་དེ་འདྲ་བྱུང་ཟེར་ཡང་། །ངེད་ཀྱིས་བདེན་པར་འཛིན་མི་བྱེད། །འོན་ཀྱང་ཁྱེད་རང་ཡུན་རིང་པོར། །བསྒྲུབས་པ་ཐེམ་ཕྱིར་བདེན་པར་འཛིན། །དེ་དག་དོན་དང་ངེས་པར་ལྡན། །དྭགས་པོ་རྣལ་འབྱོར་ཆོས་དབྱུང་གཉིས། །ཞུས་ལེན་མཛད་པའི་སྐབས་དེར་གསལ། །ངེད་ཀྱང་དེ་ལྟར་ཆགས་འཇོགས་ཡིན། །ཆོས་དང་གང་ཟག་བདག་མེད་གཉིས། །མཚན་ཉིད་པ་ཡི་ལུགས་ལྟར་ན། །དེང་སང་རྟོགས་པའི་རེ་བ་ཅི། །གང་ཟག་བདག་མེད་རྐྱང་པ་ཙམ། །རྟོགས་ནའང་དགྲ་བཅོམ་ཡིན་ཕྱིར་རོ། །འོན་ཀྱང་ངེད་རང་སྒོམ་ཆེན་པས། །གང་ལའང་ཆེད་དུ་འཛིན་པ་མེད། །གཡེལ་ཆུང་འདྲ་བར་གྲོལ་བ་ན། །དེ་ནི་གང་ཟག་བདག་མེད་དོ། །ཐམས་ཅད་སྒྱུ་མ་རྨི་ལམ་ལྟར། །རྟོགས་པ་ཆོས་ཀྱི་བདག་མེད་དོ། །ཞེས་གསུངས་སླར་ཡང་ཞུས་པ་ནི། །
ཡེངས་དང་མ་ཡེངས་མེད་པ་འདི། །ཧམ་པ་ཡིན་ནམ་དོན་དང་ལྡན། །ཞུས་པས་བཀའ་བསྩལ་གནང་བ་ནི། །དེ་ཉིད་དོན་དང་ངེས་པར་ལྡན། །ངེད་ཀྱང་དེ་ལ་ཆགས་བཞག་ཡིན། །འོན་ཀྱང་ཁྱད་པར་མེད་སྙམ་ནས། །ཉལ་ནས་བསྡད་པས་ག་ལ་འོང་། །ཐུགས་དམ་དགེ་སྦྱོར་འབད་དགོས་གསུངས། །འོ་ན་དེ་ཉིད་དོན་ལྡན་ན། །ཁོ་བོ་འཚིངས་ནས་འདུག་ལགས་ཞུས། །དེ་དག་དོན་གྱི་རྩ་བ་སྟེ། །རྒྱས་པར་གསུང་འཕྲོས་གསུང་གླེང་ནི། །ཇ་ཐུག་བཞི་ཙམ་རྒྱུག་ཡུན་ཐོག །བློ་ཁ་ཚིམ་ཞིང་ལུགས་གཉིས་ཀྱི། །བྱ་བ་འགྲུབ་ཅིང་ལེགས་པར་བྱུང་། །དེ་ནས་འོང་ལམ་རྡུལ་ཐང་དུ། །རྒྱབ་ནས་ལྷ་སྦྱིན་འོང་ཞིང་ཡོད། །ཟེར་བའི་སྒྲ་ཞིག་གྲག་པ་དང་། །དེ་ནུབ་བུད་མེད་སྨོན་མ་གཅིག །འདུག་པར་བདག་ཉིད་རྟ་མགྲིན་གྱི། །བསྐྱེད་རིམ་དྲག་སྔགས་ཀྱིས་གཟིར་རྨིས། །ཕར་ལམ་གནས་བཀྲའི་ཐང་མཇུག་ཏུ། །འདྲེ་མོ་གནས་པའི་བྲག་ཕུག་ཏུ། །ཞག་པའི་རྗེས་བསྙག་ཡིན་ནམ་སེམས། །རྟ་གཅིག་ན་བ་བྱིན་བརླབས་ཕན། །དེ་ནས་དོགས་པ་ཀྱང་མེད་པར། །རྟ་གཅིག་མཆོད་ཆ་དཔེ་ཆ་བཅས། །གཡང་ལ་འདྲིལ་ནས་ཆུ་ཆེན་ཁྱེར། །འཕང་སེམས་
འགྱོད་སེམས་མ་བྱུང་བར། །རང་སེམས་ངོ་བོའི་སྟེང་དུ་བཞག །འོན་ཀྱང་རྗེས་སུ་རྒྱུག་པ་ཚོ། །ཆུ་ཡིས་ཁྱེར་དོགས་པད་འབྱུང་དང་། །སྤྱན་གཟིགས་སྒྲོལ་མའི་སྔགས་དམིགས་བྱས། །མཆོད་ཆ་དཔེ་ཆ་བཅས་པ་ལོན། །དཔེ་ཆ་ཐང་ཁ་མ་སྐྱོན་པས། །ཆུ་སྡུག་བྱས་ཀྱང་རུང་ངམ་སེམས། །ཡི་དམ་ཐུགས་རྗེ་མྱུར་བར་གོ །དབང་ཆས་ཆུ་ལ་ནུབ་པ་དེ། །འགྲོ་དོན་ཚོད་གྱིས་ཟེར་བ་གོ །དེ་ནས་གྲྭ་མང་རྣམས་ལ་ཡང་། །རྡོ་རྗེ་ཕྲེང་བ་ཇོག་དཀྱིལ་བདུན། །དབང་བསྐུར་མངོན་རྟོགས་ལུང་བྱས་སྐབས། །བླ་མ་མཚན་ཉིད་ལྡན་པ་ཡིས། །བཀའ་འགྱུར་ཡོངས་སུ་རྫོགས་པ་ཡི། །པོ་ཏིའི་ལུང་དབང་གནང་བ་རྨིས། །རྡོ་རྗེ་གདན་བཞི་བཀའ་གཉན་པས། །སོ་ན་རྐན་སྒང་ཟུག་ཟེར་ཆེ། །ཡ་མའི་ནད་འདི་ཕོག་ནས་ནི། །ལོ་གྲངས་བཅུ་གསུམ་སོང་ན་ཡང་། །གཞི་མེད་ཕན་རྒྱུ་མ་བྱུང་ཞིང་། །རེས་འགའ་བདེ་ཡང་རེས་འགའ་ཐུ། །ཁྱད་པར་དུས་དེ་སློང་དུ་གོ །ལུས་སྦྱིན་བྱས་ལ་ཉམས་ལེན་བསྐྱོངས། །སྔོན་ཚེ་བསྐལ་པ་འདི་སྔོན་ལ། །ཁོ་བོ་བུ་ཆུང་གཅིག་གྱུར་ཚེ། །རི་བོང་ཞིག་གི་འགྲམ་པ་ལ། །རྡོ་བརྒྱབ་རི་བོང་ཡུན་རིང་ན། །དེ་ཡིས་རྐྱེན་བྱས་རི་བོང་གུམ། །
དེ་ཡི་ལས་འབྲས་ཡིན་པར་ནི། །རྨི་ལམ་རྨིས་ཤིང་གསལ་བ་ནི། །རྡོ་ཡི་རྒྱབ་ལུགས་ལ་སོགས་པ། །རྨི་ལམ་ཡུལ་དུ་གསལ་བར་དྲན། །དེ་ཕྱིན་ལྷག་པར་ལས་འབྲས་ལ། །ཡིད་ཆེས་ཆེན་པོ་སྐྱེ་བར་བྱུང་། །བསང་བཏང་ལྷ་མོ་དགའ་སྤྲོ་སོགས། །རྨིས་དང་མཚུངས་པར་རི་ཁྲོད་དུ། །ལྷོ་སྤྲུལ་ཕེབས་ཤིང་མཇལ་སྤྱད་དང་། །ཕན་ཚུན་འདོད་ཆོས་ཕུལ་ཞིང་ཞུས། །འདི་སྐབས་རྡོར་ཕྲེང་དབང་གི་དུས། །མར་མེ་ལན་མང་འཛིན་ན་ཡང་། །རྟེན་གྱི་དོན་ནམ་དབང་གི་དོན། །གང་ཡིན་དབྱེ་གསལ་མེད་པའོ། །དེ་ནས་ཐམ་མཁར་བདུན་གཉིས་ཙམ། །གསང་འདུས་སངས་རྒྱས་སྟོང་དབང་དང་། །ཁྲིད་ཆུང་བཙུགས་ཚེ་ཁྲོམ་ཡང་ཆེ། །བླ་མ་ཕུན་ཚོགས་རྣམ་དཀར་སོགས། །སེར་མོ་བ་ཡང་འགའ་ཞིག་ལ། །སོ་སོར་དབང་ལུང་འདོད་ཆོས་སྤེལ། །དེ་ནས་ངོམ་སྨད་ཕྱོགས་སུ་ཕྱིན། །གིག་ཐུང་ཐང་དུ་དབང་ཁྲིད་བཙུགས། །བར་ཆད་རྟགས་མཚན་འགའ་རེ་མཐོང་། །ལུས་ཚོགས་དམིགས་པ་བརྒྱ་རྩ་བྱུང་། །ཐོ་རངས་རྒྱལ་འགོང་ཞྭ་ཐེབས་ཅན། །དཔོན་གཡོག་སྐྱ་པ་བརྒྱ་ཙམ་ཞིག །བུད་ནས་སོང་བ་གསལ་བ་ནི། །ཉམས་ཀྱི་སྐབས་ལ་མཐོང་བ་
ཡི། །རྒྱུ་ལུས་ན་བ་ཕྲལ་དུ་བདེ། །མ་མགོན་དབང་གཏེར་འཛིན་པའང་བྱུང་། །ཡར་ལམ་དབིག་མདར་ཞག་པའི་ནུབ། །ཉམས་དང་རྨི་ལམ་འདྲེས་པའི་མཚམས། །དབའ་རྒྱལ་ཀ་ཐི་ཞེས་པ་དེ། །སྔགས་ཆོས་སྐྱ་པ་འཁོར་གསུམ་ཅན། །གུས་ཚུལ་གོ་མཚོན་མང་པོ་ཕུལ། །ཞག་གསུམ་ལོངས་སྤྱོད་ཆར་ལྟར་བབ། །དེ་ནས་གནས་མདོ་ནང་དུ་ཕྱིན། །བཀའ་བརྒྱད་སྒྲུབ་ཆེན་དབང་དང་ནི། །སྦྱོང་རྒྱུད་དཀྱིལ་འཁོར་དབང་རྣམས་དང་། །བློ་སྦྱོང་ཁྲིད་རྣམས་ཁྲོམ་ལ་བཙུགས། །ཤོར་ཕུ་བླ་མ་ཁུ་དབོན་དང་། །ཀརྨ་རྒྱ་མཚོ་ཁུ་དབོན་དང་། །ཉ་ཁམས་དགོན་པའི་དགེ་འདུན་སོགས། །སེར་མོ་བ་ཡང་མང་པོ་ལ། །རྗེས་གནང་གཅིག་ཤེས་ཀུན་གྲོལ་དང་། །མངོན་རྟོགས་ནོར་བུའི་ཕྲེང་བ་ནི། །ཡོངས་སུ་རྫོགས་པའི་དབང་དང་ལུང་། །བདེ་མཆོག་ཕག་མོ་མ་མགོན་སོགས། །དབང་ལུང་དཔག་ཏུ་མེད་པ་འགྲུབ། །དེ་ནས་མ་ཎི་ཤར་གྱི་ནི། །རི་བོའི་ཁྲོད་དུ་ཞག་གསུམ་ཚེ། །སྐུ་གསུམ་ངོ་སྤྲོད་ཁྲིད་ཆེན་ལ། །དཔེ་ལྟས་སྤྲོ་བ་འཕེལ་བའི་ཚེ། །ཉམས་དང་རྨི་ལམ་འདྲེས་པའི་མཚམས། །མཉམ་མེད་ཐུབ་པའི་དབང་པོ་དེ། །མི་གསལ་ཡད་ཡུད་ཙམ་ཞིག་མཇལ། །
ཁྲིད་དཔེ་བྱིན་རླབས་ཆེ་བར་གོ །དེ་ལྟར་ས་ཕོ་ཁྱི་ལོ་ཡི། །ཆོ་འཕྲུལ་ཆེན་པོའི་ཚེས་གཅིག་ནས། །ཤིང་འབྲུག་མགོ་ཟླའི་ཉེར་གསུམ་བར། །ལོ་བདུན་བར་དུ་འགྲོ་དོན་བྱས། །རྗེ་འབངས་སོག་པོ་ལྷ་དཔལ་གྱི། །སྐྱེ་མཐར་འབྲི་ཁུང་ཞབས་དྲུང་གི །ངོས་འཛིན་ཁྲི་འདོན་མཛད་པ་དང་། །གནམ་ཆོས་ལུང་བསྟན་མཚུངས་པ་སྟེ། །འབྲི་གུང་གསེར་ཕྲེང་གྲྭར་བཞུགས་དང་། །བདུད་འདུལ་རྡོ་རྗེའི་གཏེར་ལུང་ལས། །ཕྱག་རྡོར་སྤྲུལ་པར་ལུང་བསྟན་པ། །ཟུར་མང་ནང་སོ་དྷམའི་མཚན། །ཁྲི་སྲོང་ལྡེའུ་བཙན་གདུང་གི་རིགས། །གྲུབ་ཆེན་པཀྵིའི་གདུང་རྒྱུད་དེ། །ལུང་དང་ལས་ཀ་མང་པོའི་བདག །ས་གར་བླ་མ་ཆེ་ཆུང་གཉིས། །ཆོས་གྲགས་རྒྱ་མཚོའི་རྒྱལ་ཚབ་དང་། །གྲུབ་ཆེན་སྐྱ་སེར་ནས་བཟུང་སྟེ། །བླ་བརྒྱུད་དཔོན་བརྒྱུད་མ་ཆད་པ། །སྐྱ་ཅེ་བླ་མ་ཁུ་དབོན་བརྒྱད། །འབའ་རོམ་བཀའ་བརྒྱུད་བསྟན་པའི་བདོག །འོག་མིན་ཀརྨའི་གདན་ས་སོགས། །སྔར་ནས་ཐོབ་ཆ་ཆེན་པོ་ཅན། །ཤོར་ཕུ་བླ་མ་ཁུ་དབོན་གཉིས། །སྔར་ནས་བླ་བརྒྱུད་བཟང་པོ་ཡི། །ཀཾ་ཚང་བསྟན་པ་གསལ་བྱེད་ཅིང་། །མཁས་བཙུན་བཟང་གསུམ་འཛོམས་པ་ཡི། །འཇང་
གྲ་བླ་མ་ཁུ་དབོན་གསུམ། །སྤྱན་རས་གཟིགས་དབང་སྤྲུལ་པའི་སྐུ། །གཞོན་ནུ་མཚན་ཅན་ནས་བཟུང་སྟེ། །བླ་བརྒྱུད་མུ་ཏིག་ཕྲེང་འདྲ་བའི། །སྒྲིས་སྣ་བླ་མ་ཁུ་དབོན་བཞི། །རི་པ་བླ་མ་ཁུ་དབོན་བཞི། །ཁོ་བ་བླ་མ་ཁུ་དབོན་གཉིས། །སེ་བོ་བླ་མ་ཁུ་དབོན་གསུམ། །ཝ་པ་སྐུ་སྐྱེ་ཡབ་སྲས་བཞི། །སྟོང་ནག་བླ་མ་སྐུ་སྐྱེ་དང་། །དགེ་བཤེས་དང་བཅས་བླ་མགོ་གསུམ། །དེ་བཞིན་འཇའ་མོ་སྐུ་སྐྱེ་དང་། །ཚེ་ཁྲོམ་པ་ཡི་སྐུ་སྐྱེ་དང་། །དགའ་ཡི་ཕྱོགས་ཀྱི་སྐུ་སྐྱེ་གསུམ། །གཞན་ཡང་སྐུ་སྐྱེའི་མིང་ཐོག་འགའ། །འཁྲུལ་ཞིག་དབོན་པོ་རྣམ་གཉིས་དང་། །ཚ་བཤི་བླ་མ་སྐུ་སྐྱེ་བཅས། །སྟག་ཉིན་བླ་མ་ལ་སོགས་པ། །འབྲུག་ལུགས་བླ་བྲན་རྟོགས་ལྡན་འགའ། །དཀྱིལ་ཚ་བླ་མ་བིས་རུ་བ། །སྡེ་དགེའི་བླ་མ་ཞལ་ངོ་གཅིག །ཤོང་ཐོ་བླ་མ་ལ་སོགས་པ། །ས་ལུགས་བླ་མ་མང་པོ་དང་། །ཤ་གྲྭ་བླ་མ་བཀའ་བཅུ་པ། །ནག་འདུ་དགེ་སློང་ཞེས་བྱ་དང་། །ཚ་ཚ་བླ་མ་ལ་སོགས་པ། །ཆབ་མདོ་ཀ་མདའ་རོ་ཁྲུ་ཕུག །དགོན་དང་རི་ཁྲོད་ལ་སོགས་ནས། །བྱོན་པའི་དགེ་སློང་དགེ་ཚུལ་སོགས། །དགའ་ལྡན་པ་ཡང་ཤིན་ཏུ་མང་། །ཁྱུང་པོའི་ཕྱོགས་ནས་བྱོན་པ་ཡི། །བོན་པོའི་
བླ་མ་གཅིག་ལ་སོགས། །གྲུབ་མཐའ་ཕྱོགས་རིས་མེད་པ་ཡི། །བླ་མ་དབོན་པོ་གདུང་རྒྱུད་སོགས། །རུས་མཐོ་ཐོབ་ཆ་ཆེ་བ་ཡི། །སུ་ལའང་དབུ་ནི་མི་དགུ་བ། །སྐྱོ་བྲག་བླ་མ་དུང་དཀར་བ། །ཚངས་སར་བླ་མ་ཁུ་དབོན་དང་། །རྟེ་ནི་བླ་མ་དགོན་དམར་བ། །སྤར་ངེ་བླ་མ་ཁུ་དབོན་གསུམ། །ཉིན་ཕུག་བླ་མ་ཁུ་དབོན་གསུམ། །རྫོང་མགོ་བླ་མ་ཁུ་དབོན་གསུམ། །རྙི་བ་རབ་འབྱམས་ཁུ་དབོན་གསུམ། །མགོ་ཕ་བླ་མ་ཁུ་དབོན་གཉིས། །ཀུན་ཤེ་རབ་འབྱམས་ལ་སོགས་པ། །རང་བས་ལྷག་ཅིང་གྲྭ་རྒན་པ། །ཡོན་ཏན་རྒྱ་མཚོ་འདྲ་ཀུན་གྱིས། །དབང་ལུང་ཞུ་ཞིང་བཀུར་སྟི་གཟབ། །རིག་འཛིན་འཇའ་ཚོན་སྙིང་པོ་ཡི། །ཐུགས་སྲས་གནས་ཆེན་སྒོ་འབྱེད་པ། །སྟག་ར་སྤྲུལ་སྐུའི་སྐུ་སྐྱེ་དང་། །མཁས་གྲུབ་སངས་རྒྱས་རྡོ་རྗེ་དང་། །བདུད་འདུལ་རྡོ་རྗེའི་གཏེར་ལུང་ལས། །ཉེ་བར་འཁོར་གྱི་སྤྲུལ་པར་གསུངས། །གནས་སྒོ་ཕྱེས་ཤིང་གཏེར་ཁ་དབང་། །པདྨ་བློ་གྲོས་དབོན་པོ་དང་། །རྒྱ་བན་དབོན་པོ་བླ་མ་གཉིས། །མུ་ནེའི་དབོན་པོ་བླ་མ་གཉིས། །ཆོས་ཉིད་རྒྱ་མཚོའི་དབོན་པོ་དང་། །འབྲུག་རྒྱལ་ལ་སོགས་ཀཐོག་གི །དགོན་དང་དགོན་ལག་
ཐམས་ཅད་དང་། །སྤྱིས་པོ་མགོ་དང་ཁོ་ཁྱིམ་སོགས། །གོ་འཇོ་དགོན་དང་རི་ཁྲོད་ནས། །བྱོན་པའི་བླ་མ་མང་པོ་དང་། །མངའ་རིས་ཕྱོགས་ནས་བྱོན་པ་ཡི། །མཁས་གྲུབ་ཨོ་རྒྱན་དཔལ་བཟང་དང་། །འབྲས་མོ་ལྗོངས་ནས་བྱོན་པ་ཡི། །རྟོགས་ལྡན་པདྨ་མཁའ་སྤྱོད་དང་། །བཞག་པ་པདྨ་མཁའ་སྤྱོད་དང་། །འཇང་གི་རྒྱལ་པོའི་དབང་ཞུས་པའི། །རྟོགས་ལྡན་ཁ་བ་དཀར་པོ་དང་། །སྒྲོ་བྲག་བླ་མ་རིག་འཛིན་པ། །ལུང་རིགས་བླ་མ་སྐུ་འབྲིང་བ། །ངེས་འབྱུང་རྒྱུ་ནེ་བླ་མ་དང་། །ཡོན་ཏན་མཁས་དང་ངོ་བོ་བཟང་། །རྟོགས་པ་མཐོ་བ་མང་པོ་ལ། །དབང་ལུང་ཁྲིད་སོགས་གང་བཞེད་ཕུལ། །གཞན་ཡང་སེར་མོ་བ་ཡི་ཚོགས། །དབང་ལུང་ཁྲིད་སོགས་ཞུས་པ་ནི། །སྟོང་ཕྲག་དུ་མ་ཡོད་དམ་སེམས། །བསྙེན་པར་རྫོགས་དང་དགེ་ཚུལ་ཞུས། །དགེ་བསྙེན་ཞུས་ཤིང་སྐྲ་བཅད་པ། །ངེས་པར་བརྒྱ་ཕྲག་ལྷག་གམ་སེམས། །ཆོས་ར་གར་བཙུགས་ཐམས་ཅད་དུ། །སྐྱབས་སྡོམ་བསྙེན་གནས་སྡོམ་པ་དང་། །སྨྱུང་གནས་བྱང་སྡོམ་ཕོག་པའི་ཕྱིར། །ཐ་མལ་སྐྱེ་བོ་མི་ནག་པ། །སངས་རྒྱས་བསྟན་ལ་ཚུད་པ་ནི། །ཁྲི་ཕྲག་དུ་མ་ཡོད་པར་སེམས། །འགྲུ་རྗེ་རྒྱལ་བའི་
ཐོད་དཀར་ནས། །རྒྱལ་རྒྱུད་གདན་ས་མ་འཆུགས་ཤིང་། །རྒྱ་ཧོར་ལུང་དང་ལག་རྟགས་ཅན། །ཆོས་རྒྱལ་རིཙཱའི་མཚན་ཅན་ནི། །མཆེད་ལྔའི་སྲས་དང་དབོན་དང་བཅས། །རྫ་སྟོད་རྒྱལ་པོ་དྲག་རྩལ་ཅན། །ལྕམ་དྲལ་སྲས་དང་བཙུན་མོ་བཅས། །ཤར་གྱི་རྨ་རྒྱལ་སྤོམ་ར་ཡི། །བརྫུས་བུ་འབྲོང་དང་ཟིལ་དཀར་ནས། །རྒྱལ་རྒྱུད་དཔོན་རྒྱུད་མ་ཆད་པ། །འབྲོང་རྗེ་རྒྱལ་པོ་སྲས་དང་བློན། །གཞན་ཡང་འབྲོང་པའི་དཔོན་རིགས་ཀུན། །གླིང་རྗེ་ཆོས་ལ་འཕེན་གྱི་རྒྱུད། །དཔོན་རྒྱུད་མ་ཆད་དྲག་སེང་བ། །སྤྲུལ་པའི་ཆོས་རྒྱལ་གུ་རུའི་མཚན། །ཁུ་དབོན་རྣམས་ཀྱིས་གཙོར་བྱས་པའི། །མདོ་ཁམས་ཤར་གྱི་ཡུལ་ལྗོངས་འདིས། །ཆེ་དགུ་ཀུན་གྱིས་གཙུག་ཏུ་བཀུར། །དབང་ལུང་ཁྲིད་དང་གདམས་པ་ཞུས། །དད་གུས་བཀུར་སྟི་ཕུན་ཚོགས་བྱས། །འོན་ཀྱང་དམན་ས་འཛིན་པ་ལ། །རང་ཆེ་ཨང་དེ་ངས་མ་བྱས། །བེར་དང་གདན་དམར་གསོལ་ཁ་བཀྱག །ཆིབས་བཅས་རྔོག་ཁེབ་ལ་སོགས་པ། །སྒྲུབ་ན་དཀའ་ཚེགས་མི་འདུག་པ། །རུས་སྒོག་ཆེ་བས་འཐོབ་ཡོད་ཀྱང་། །སྣང་ཤེས་འཕྱོར་འདོད་ངས་མ་བྱས། །དཀོར་ཟས་ཆར་ལྟར་བབ་པ་འདི། །ཀུན་
གཞིས་ནུས་པའི་བྱུང་བ་ཡིན། །གཞན་གྱི་ངོ་བསྲུང་དགོས་དོན་མེད། །བསམས་ནས་སེར་སྣས་འཆིང་བས་བསྡམས། །ལམ་ཆོས་ཙམ་ཡང་མི་བསྐུར་ནས། །དད་ལོག་སྐྱེ་བ་ངས་མ་བྱས། །མཁོ་བ་སྦྱིན་དང་སྙན་པར་སྨྲ། །བྱང་ཆུབ་བདེ་བའི་འགྲོ་དོན་སྒོ། །ཡིན་ཕྱིར་འཇིག་རྟེན་མི་ཆོས་བསྟན། །ཤ་ལྷུ་གཟུགས་དྲུད་ཟེར་བའི་དཔེ། །རྙེད་པས་རྙེད་ས་སྡུད་པ་ཡིས། །སེམས་བསྐྱེད་ངན་པ་ངས་མ་འཆང་། །ཇ་མར་ནས་སོགས་བཟའ་བཏུང་རིགས། །ཨོ་རྒྱན་དགོངས་པ་རྫོགས་པ་དང་། །གསང་སྔགས་བསྟན་ལ་ཕན་པའི་ཕྱིར། །སྒྲུབ་ཆེན་རྣམས་སུ་ཅི་འགྲོ་བྱས། །དང་པོ་སྟ་གོན་ཞག་གཅིག་སྟེ། །དངོས་གཞི་ཞག་བདུན་སྔགས་རྒྱུན་ཡང་། །ཉིན་མཚན་འཛབ་དབྱངས་མ་ཆད་པ། །དེ་ལྟར་ཞག་བདུན་ཉི་མ་དགུར། །ས་འདུལ་རྒྱལ་ཐོ་དམ་སྲི་དང་། །ས་འདུལ་ལ་སོགས་འཆམས་དང་བཅས། །མཇུག་ཏུ་སྒྲུབ་དབང་དང་བཅས་པ། །ཕྱག་ལེན་ཤིན་ཏུ་རྒྱས་པ་ཡིས། །དགོངས་འདུས་སྒྲུབ་ཆེན་ལན་གསུམ་དང་། །གསང་འདུས་བུམ་སྒྲུབ་ལན་བཞི་དང་། །ཐུགས་སྒྲུབ་སྒྲུབ་ཆེན་ལན་གཅིག་དང་། །རྒྱལ་བ་རྒྱ་མཚོའི་སྒྲུབ་ཆེན་གཅིག །དེ་དག་ཚེ་ན་ཐུན་པ་
ཡང་། །སུམ་ཅུ་ལྷག་ཙམ་ཡོད་པ་སྟེ། །བར་ཆད་དབང་དུ་མ་ཤོར་ཞིང་། །ངོ་མཚར་སྒྲུབ་པའི་རྟགས་ཀྱང་ཐོན། །དཔོན་སློབ་བཅུ་ཕྲག་ཡན་ཆད་ཀྱིས། །སྒྲུབ་ཕྲན་སྔགས་ཀྱི་འུར་འདོན་ནི། །སྐབས་སུ་སྐབས་སུ་ལན་གྲངས་མང་། །དེ་ཚེ་ཁྲལ་སོད་མ་བྱས་པར། །ཐུན་ཇ་ཚོགས་འཁོར་སོགས་ཀྱང་གཟབ། །རྟ་བཟང་ཇ་ལ་ཡང་ཡང་བཙོངས། །ཁྱེད་ཚང་འདི་ཙམ་ཇ་ཉོ་བ། །ཅི་ཞིག་བྱེད་རྒྱུ་ཡིན་ཞེས་སྐདེ། །བདག་གི་དགེ་བ་རོ་མེད་དེ། །སྒྲུབ་ཆེན་དེ་ཉིད་མཆོག་ཏུ་སེམས། །གོ་མཚོན་ནོར་དང་རྔོག་ཆགས་སོགས། །ས་ཐོབ་སྐྱེས་བུ་འགའ་ཞིག་ལ། །བརྒྱ་འབུལ་ལན་གྲངས་ལྔ་དྲུག་བཀྱག །དགོན་པ་ཆེ་ཕྲ་མང་པོ་ལ། །སྤྱི་འབུལ་མང་ཇ་དགོན་གསོས་སོགས། །སོ་སོར་སྐབས་སུ་གང་བབ་བྱས། །བླ་མ་རྟོགས་ལྡན་མང་པོ་ལ། །འབུལ་བ་གནང་སྦྱིན་གང་འོས་བྱས། །བླ་ཕྲན་དཔོན་རིགས་ལ་སོགས་ལ། །སྐབས་སུ་གང་བབ་བསྐོལ་ཇ་བྱས། །ཆོས་འདོད་འཚོ་བས་དམན་པ་ལ། །ཆོས་བརྒྱགས་ཆད་མཐུད་ཅུང་ཟད་བྱིན། །ཆུད་ཟོས་སོང་བ་འགའ་ཡང་མེད། །ཀློག་འདོན་མདོས་ཆེན་དགུ་གཏོར་དང་། །ཚེས་བཅུ་ལ་སོགས་ཅི་འགྲུབ་
གཟབ། །དཔོན་སློབ་འཁོར་དང་བཅས་པས་ཀྱང་། །རྩ་བཞི་ཆང་ལྔ་ལེགས་པར་བསྲུངས། །བསྐྱེད་རྫོགས་ཉམས་ལེན་སྐྱོང་བདེ་ཡོད། །ཨོ་རྒྱན་ཆེན་པོ་རྡོ་རྗེས་གསུང་། །དཔེར་ན་ཚོང་དཔོན་འབྱོར་ལྡན་ཞིག །འདོད་དགུའི་ཚོང་ཟོག་ཀུན་ཁྱེར་ནས། །རྒྱུ་དབུས་ལྷོ་བྱང་བསྐོར་བའི་ཚེ། །རང་གཞན་ཀུན་ལ་ཕན་པ་ལྟར། །དབང་ལུང་མན་ངག་ཆོས་ཀྱིས་ཕྱུག །སྒར་ཆེན་སྒྲུབ་ཆེན་དབང་གི་ཆས། །ཐམས་ཅད་འཛོམས་ཤིང་ཕྱོགས་ཀུན་འགྲོ། །སོ་སོའི་ཡིད་ལ་གང་འདོད་པའི། །དབང་ལུང་ཁྲིད་དང་གདམས་ངག་རྣམས། །མན་ངག་སྒོ་སྐྱེལ་ཚུལ་དུ་སྤེལ། །ཚོང་དཔོན་ལྟ་བུའི་འགྲོ་དོན་དུ། །ཨོ་རྒྱན་ཆེན་པོའི་གསུངས་ལྟར་དུ། །ཁོ་བོའི་ལག་ཏུ་བླངས་སྙམ་བགྱིད། །དེང་སང་དུས་ངན་སྙིགས་མའི་སྐབས། །དབང་ལུང་དོན་དུ་གཉེར་ནས་ཀྱང་། །ཉིན་གཅིག་ཙམ་ཡང་འགྲོ་མཁན་དཀོན། །དབང་བསྐུར་མ་ཐོབ་སྔགས་འདོན་དང་། །མདོས་ཟློག་བསྐང་གསོ་སྦྱིན་སྲེག་དང་། །རང་གིས་དབང་ལུང་མ་ཐོབ་པར། །གཞན་ལ་དབང་སྐུར་བྱེད་པ་ནི། །སློབ་དཔོན་སློབ་མ་ཤི་མ་ཐག །དམྱལ་བར་འགྲོ་བ་རྒྱུད་ལས་གསུངས། །དེ་དག་རྣམས་ལ་ཕན་
པའི་སེམས། །ཁོ་ན་ཡིད་ལ་འཆང་བ་ལས། །འབུལ་སྡུད་ཡིད་ལ་འཆང་བ་མེད། །སྣོད་མིན་དམ་ཚིག་མི་ལྡན་ལ། །དབང་ལུང་མན་ངག་སྤེལ་བྱས་ཀྱང་། །འཁོར་འདས་མཉམ་ཉིད་ལྟ་བ་རྟོགས། །སྙིང་རྗེ་ཆེན་པོའི་ཀུན་སློང་གཟབ། །དེ་ཕྱིར་གསང་སྒྲོག་ཉེས་པ་མེད། །ཤི་ཤོག་གསོན་ཤོག་མང་པོ་ཞིག །སྤོམ་ཞུས་བྱེད་པ་ཡ་ང་ཡང་། །དང་པོ་བསྔོ་བའི་སྐབས་ཉིད་ནས། །ཏིང་ངེ་འཛིན་གྱི་བྱང་བུ་ཚར། །རྗེས་ནས་ཆོ་ག་གཅིག་མིན་ཀྱང་། །སོ་སོར་དམིགས་པ་ཟིན་པར་བྱས། །རྒྱུན་དུ་མ་ཡིན་རེས་འགའ་དུས། །ཚེ་འདས་རྣམས་ལ་དབང་མེད་དུ། །སྙིང་རྗེ་མཆི་མ་ཆར་ལྟར་བབ། །དེ་ལྟར་བྱང་བུ་བཞུ་ཚེ་ཡང་། །ཤི་ཤོག་གསོན་ཤོག་དམིགས་རིམ་རྣམས། །ཉམས་ལེན་ངང་ནས་གསལ་བར་བྱས། །ཡི་དམ་ལྷ་ཡི་ཐུགས་རྒྱུད་དང་། །སྐྱབས་གནས་བླ་མའི་ཐུགས་རྒྱུད་དང་། །རང་གི་སེམས་དང་ཚེ་འདས་སེམས། །དབྱེར་མེད་དོན་དམ་ཆོས་ཀྱི་སྐུ། །འཁོར་འདས་དབྱེར་མེད་ལྟ་བ་ཡི། །གདེང་ཆེན་བསྐྱེད་ཅིང་ཤོག་བུ་སྦར། །དེ་ནས་རང་ལ་རེ་ལྟོས་ཀྱིས། །འབུལ་ཞབས་ཆེ་ཞིང་བློ་གཏད་ས། །དེ་དག་ཤོག་བུ་བཞུ་ཚར་ཡང་། །
ཟླ་བ་མང་ཞིག་མ་བརྗེད་པར། །ནུབ་རེ་ཐུན་རེ་དམིགས་པ་ཡིས། །རྣམ་ཤེས་དག་པའི་ཞིང་དུ་སྤར། །སྒྲིབ་སྦྱང་སྔགས་ཀྱང་ཅུང་རེ་བཟླས། །བྱང་བུ་བཞུས་ཤིང་བསྔོ་སྨོན་ཚར། །དེ་ཡིས་ཆོག་པར་མ་བྱས་ཏེ། །ཤི་གསོན་འབྲེལ་བ་ཐོབ་ཚད་རྣམས། །ནམ་ཞིག་ཚེ་འཕོས་གྱུར་མ་ཐག །བདེ་ཆེན་ཞིང་དུ་སྐྱེ་བ་ཡི། །བསྔོ་བ་སྨོན་ལམ་རྒྱུན་ལྡན་བྱས། །སྒར་བཀྱག་ཕྱོགས་བཅུར་འགྲོ་བའི་ཚེ། །བདག་མིང་རྣ་བས་ཐོས་པ་དང་། །ཕན་ཚུན་མིག་གིས་མཐོང་བ་དང་། །ཕྱག་དབང་ལ་སོགས་ལག་གིས་རེག །ཟས་ནོར་འབྲེལ་བ་ཐོབ་ཚད་ཀུན། །བདེ་ཆེན་ཞིང་དུ་སྐྱེ་བ་ཡི། །དང་པོར་སེམས་བསྐྱེད་ཟིན་པར་བྱས། །བར་དུ་བསྐྱེད་རིམ་འོད་ཟེར་སྤྲོ། །རྗེས་ནས་བསྔོ་སྨོན་རྒྱ་ཡིས་བཏབ། །དེ་ལྟར་ས་ཕོ་ཁྱི་ཡི་ལོ། །ཆོ་འཕྲུལ་ཆེན་པོའི་ཚེས་གཅིག་ནས། །ཤིང་ཕོ་འབྲུག་གི་མགོ་ཟླ་ཡི། །ཉེར་གཉིས་བར་གྱི་ལོ་བདུན་དུ། །ཚོང་དཔོན་ལྟ་བུའི་འགྲོ་དོན་བྱས། །འདི་ནི་ཕྱི་ཡི་རྣམ་ཐར་ཏེ། །བྲི་བསམ་མེད་ཕྱིར་ཕལ་ཆེར་བརྗེད། །རྨི་ལམ་རྟགས་སོགས་དམ་དུམ་འགའ། །ཤོག་རས་འགའ་ལ་བྲིས་འདུག་ཀྱང་། །ནམ་ཡིན་ལ་སོགས་གོ་རིམ་བརྗེད། །
འདི་དག་བྲིས་ཀྱང་སྙིང་པོ་མེད། །ཤོག་གུ་ཁྲོག་བརླག་རྒྱུ་བ་ཚགས། །འོན་ཀྱང་བླ་མ་ནམ་མཁའ་ཡིས། །བྲི་དགོས་ཟེར་ནས་འདོད་པ་ཆེ། །ཨ་ཉོག་སྙི་ལོ་འདོད་པའི་དཔེ། །ཡུད་ཙམ་ལ་ཡང་སྔ་ཕྱི་བྱེད། །ཁོང་ཡང་ཐུགས་རླུང་ནད་ཡོད་ཕྱིར། །སེམས་མ་དགའ་ན་ནད་ཐུ་དོགས། །དེ་ཕྱིར་རྡོར་ཕྲེང་རྔོག་དཀྱིལ་དང་། །སྦྱོང་རྒྱུད་སྒྲུབ་ཐབས་རྒྱ་མཚོ་སོགས། །རྩོམ་པ་མང་པོའི་སེམས་གཡེངས་ཤིང་། །བུག་སྒོ་ཆོས་བཤད་དབང་བསྐུར་སོགས། །གཡེང་བ་ཤིན་ཏུ་ཆེ་བའི་ཕྱིར། །བསམ་བློ་བཏང་ལོང་མ་བྱུང་བར། །གང་དྲན་ངག་ནས་སྨྲས་པ་སྟེ། །དགེ་སློང་ཀརྨ་དད་པ་ཡིས། །འཕྲལ་དུ་ཡི་གེར་བྲིས་པ་ལ། །མ་མཐོང་མཐོང་ཞེས་བླ་མའི་རྫུན། །བྱི་བ་ལ་ནི་གླང་ཆེན་བཞིན། །བརྫུན་དང་སྙན་ངག་མ་འདྲེས་ཤིང་། །ཉམས་དང་རྨི་ལམ་རྟགས་མཚན་སོགས། །སྦ་འོས་རྣམས་ཀྱང་མ་སྦས་པར། །དཔེར་ན་སྐྱིད་སྡུག་ཁ་དལ་ལྟར། །ཤུགས་འབྱུང་དྲག་པོའི་གཏམ་གྱིས་སྨྲས། །གླེང་གཞི་མེད་པའི་གླེང་མོལ་ལྟར། །རྣམ་ཐར་རྩོམ་རྒྱུ་ཀྱང་མེད་པར། །མང་པོ་རྩོམ་ལ་ཐུགས་མ་ཁྲེལ། །མོ་མ་རྣམས་ཀྱིས་མིག་ལྟོས་ལྟར། །རྨི་ལམ་མང་ལ་ཐུགས་མ་
ཁྲེལ། །རང་དོན་ཐུགས་སུ་མ་ཚུད་པར། །གཞན་དོན་སྒྲུབ་ལ་ཐུགས་མ་ཁྲེལ། །འབུལ་སྡུད་འདོད་པ་མིན་ཟེར་ཞིང་། །གང་བྱུང་བླངས་ལ་ཐུགས་མ་ཁྲེལ། །གསང་སྔགས་དབང་དང་གདམས་ངག་རྣམས། །ཁྲོམ་དུ་བསྒྲགས་ལ་ཐུགས་མ་ཁྲེལ། །དབང་ལུང་གདམས་ངག་མང་པོ་རྣམས། །ཚོང་ཟོག་ཁྱེར་ལ་ཐུགས་མ་ཁྲེལ། །རང་ཉིད་གར་འགྲོ་ཆ་མེད་པར། །ཤི་གསོན་མིང་ཡིག་གྲངས་མེད་པ། །མེ་ལ་སྦར་ལ་ཐུགས་མ་ཁྲེལ། །དཀོར་ཟས་རྒྱ་མཚོ་ཙམ་བསྡུས་པ། །གར་སོང་མེད་ལ་ཐུགས་མ་ཁྲེལ། །གཞན་ཡང་བྲི་ཉེས་རྩོམ་ཉེས་སོགས། །གང་མཆིས་མཁྱེན་ལྡན་རྣམས་ལ་བཤགས། །གལ་ཏེ་འདི་ལ་དགེ་མཆིས་ན། །འདི་ཉིད་མཐོང་ཐོས་དྲན་རིག་ཀུན། །ཚེ་འདིར་ཚེ་བསོད་དཔལ་འབྱོར་རྒྱས། །ཕྱི་མ་བདེ་ཆེན་ཞིང་ཁམས་སུ། །བརྫུས་སྐྱེས་སྤྲུལ་སྐུ་ཐོབ་པར་ཤོག །དེ་སྐད་ལྕག་མོ་ཕག་གི་ལོ། །སྣོན་གྱི་ཟླ་བའི་ཉེར་དགུའི་ཉིན། །རེ་ཞིག་རྫོགས་པར་གྱུར་པ་འདི། །ཕྱི་ཡི་རྣམ་ཐར་གཉིས་པའོ། །མངྒ་ལཾ། །༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།