སྤྲུལ་སྐུ་མི་འགྱུར་རྡོ་རྗེས་གསུངས་པའི་བར་དོའི་རྣམ་ཐར་སླར་ཚིགས་བཅད་དུ་ཕབ་པ་འཁོར་བ་དོང་སྤྲུགས།
༄༅། །སྤྲུལ་སྐུ་མི་འགྱུར་རྡོ་རྗེས་གསུངས་པའི་བར་དོའི་རྣམ་ཐར་སླར་ཚིགས་བཅད་དུ་ཕབ་པ་འཁོར་བ་དོང་སྤྲུགས་ཞེས་བྱ་བ་བཞུགས་སོ།།
༄༅། །ན་མོ་གུ་རུ་ལོ་ཀི་ཤྭ་ར་དྷེ་ཝ་བཛྲ་སཏྭ་སརྦ་ཤན་ཏི་ཀྲོ་ཏ་སིདྡྷི་ཧཱུཾ། འགྲོ་དྲུག་འདྲེན་མཛད་བླ་མ་སྤྱན་རས་གཟིགས། །སྡིག་སྒྲིབ་སྦྱོང་མཛད་རྡོར་སེམས་རིགས་བརྒྱའི་ལྷ། །དེ་ཡི་ཕྲིན་ལས་ཐུགས་རྗེའི་ཉི་འོད་ནི། །གདུལ་བྱའི་ཞིང་དུ་འདྲེན་མཛད་ཤིང་རྟ་ཆེ། །རིག་འཛིན་དབང་དྲག་རྒྱ་མཚོ་དེ་ལ་འདུད། །དེ་ཡི་སྤྲུལ་སྐུ་མི་འགྱུར་རྡོ་རྗེ་ཉིད། །སྐུ་ན་ཕྲ་མོའི་སྐབས་སུ་བར་དོ་ཡི། །རྣམ་ཐོར་དུ་མ་གསུངས་པར་སྣང་ན་ཡང་། །ཕལ་པ་རྣམས་ཀྱིས་ཡིད་བཟུང་མེད་པས་བརྗེད། །དེ་ནས་མྱོས་པོ་ཨ་འགྲུབ་རྒྱལ་ཞེས་པ། །མི་མདའ་བདུན་བརྒྱད་ཙམ་ཞིག་ལག་དམར་བསད། །
༄༅། །མི་རྟ་བཞི་བཅུ་ཙམ་ལ་ཐེ་བ་དང་། །རི་དྭགས་གཅན་གཟན་སྟོང་ལ་ཉེ་བསད་པའི། །དེ་ཡིས་བང་རུམ་ཟས་གོས་གཅིག་གྱུར་པས། །སྐུ་གྲིབ་ཕོག་པས་གསུང་རྒྱུ་མ་བྱུང་བ། །དགུང་ལོ་བཅུ་གཅིག་ལོ་མཇུག་བདག་དང་མཇལ། །ངོས་འཛིན་ཁྲི་འདོན་བྱས་ནས་དབང་ལུང་ཕུལ། །མཚམས་བསྡམས་བསྙེན་སྒྲུབ་མཛད་པས་སྐུ་གྲིབ་སངས། །དབང་དྲག་རྒྱ་མཚོ་ལ་སོགས་རྣམ་ཐར་དང་། །སྐྱེ་བ་མང་དྲན་རྒྱས་པར་གསུངས་པའོ། །ཁྱད་པར་དགུང་ལོ་བཅུ་གཉིས་ངོ་མཐོང་ཙམ། །ཆོ་འཕྲུལ་ཆེན་པོའི་ཚེས་ལྔའི་ནུབ་མོ་ལ། །བར་དོའི་རྣམ་ཐར་གསུངས་པའི་
བརྗེད་ཐོ་ནི། །དོམ་ཡིག་ལྟ་བུར་བྲིས་ནས་བཞག་པ་དེ། །འདི་རུ་གོ་རིམ་ས་བཅད་དང་བཅས་པ། །ཚིགས་སུ་བཅད་དེ་བཀོད་པར་བྱ་བ་ལ། །སྤྱི་དང་བྱེ་བྲག་རྣམ་པ་གཉིས་ཡིན་ཏེ། །དང་པོ་སྤྱི་ཡི་རྣམ་བཞག་བཤད་པ་ནི། །ངེས་པའི་དོན་ལ་དམྱལ་བ་བར་དོ་སོགས། །དངོས་སུ་གྲུབ་པར་ཡོད་པ་མ་ཡིན་ཏེ། །སྡིག་པའི་ལས་ཀྱི་རང་རང་འཁྲུལ་སྣང་ཡིན། །དེ་ལྟར་མིན་ན་གཤིན་རྗེ་རྒྱལ་པོ་དང་། །ལས་མཁན་དེ་དག་དེ་ལས་བརྒྱ་སྟོང་དུ། །ཐུ་བའི་དམྱལ་བ་ཞིག་ཏུ་ཅིས་མ་ལྟུང་། །དོན་ལ་དངོས་སུ་གྲུབ་པ་མེད་ན་ཡང་། །སྒྲིབ་པ་མ་དག་བར་དུ་དངོས་སུ་སྣང་། །དཔེར་ན་མི་ཡི་སྐྱེ་རྒ་ན་འཆི་སོགས། །བདེ་སྡུག་རྣམ་པ་སྣ་ཚོགས་སྣང་འདི་ཡང་། །དོན་ལ་བདེན་པར་གྲུབ་པ་མེད་ན་ཡང་། །འཁྲུལ་པ་མ་ཞིག་བར་དུ་དངོས་སུ་སྣང་། །དེ་བཞིན་དམྱལ་བ་ཡི་དྭགས་བར་དོ་ཡང་། །དེ་རུ་སྐྱེས་པ་ཀུན་ལ་དངོས་སུ་ཡོད། །དཔེར་ན་མི་རྣམས་དགྲ་ཡིས་འཚེ་བ་དང་། །སྐེ་གཅོད་མིག་བྲུ་ཁྲིམས་དང་ཆད་པས་མནར། །དུད་འགྲོ་རྣམས་ནི་བཤའ་བསད་ཁལ་འགེལ་བའི། །སྡུག་བསྔལ་དངོས་སུ་མྱོང་བ་འདི་རྣམས་ནི། །དམ་པའི་དོན་ལ་བདེན་པར་གྲུབ་པ་མེད། །རྨི་ལམ་ལྟ་བུ་
ཡིན་པར་གསུངས་ན་ཡང་། །དམ་པའི་དོན་དེ་མངོན་སུམ་མ་རྟོགས་ཚེ། །གོ་བ་ཙམ་ཞིག་ཡོད་ཀྱང་ཕན་པ་མེད། །དམ་པའི་དོན་དེ་སར་གནས་སེམས་དཔས་རྟོགས། །འཁོར་བའི་སྡུག་བསྔལ་སྣང་ཡང་རང་བཞིན་མེད། །རྨི་ལམ་སྒྱུ་མ་ཙམ་དུ་གཟིགས་པའི་ཕྱིར། །སྐྱེ་རྒ་ན་འཆི་འདི་ལ་མི་སྐྲག་ཕྱིར། །དེ་ལྟར་མ་གཏོགས་འགྲོ་ལ་ཕན་པའི་ཕྱིར། །དག་པའི་ཞིང་ཁམས་རྣམས་སུ་མི་བཞུགས་པར། །སྙིགས་དུས་བསྐལ་པ་རྩུབ་འགྱུར་དུས་འདིར་ཡང་། །སྙིང་རྗེའི་དབང་གིས་བསམ་བཞིན་སྐྱེ་བ་ལེན། །ཐབས་སྟོབས་དུ་མས་འབྲེལ་ཚད་འདྲེན་པ་ཡིན། །དེ་དོན་མ་གོ་རྨོངས་པ་ལ་ལ་ཡིས། །བདེ་བ་ཅན་དུ་དུས་ལོག་བྱུང་ངམ་ཅི། །བླ་མ་འདས་ཚེ་སྐུ་སྐྱེ་བྱུང་ཞེས་འབར། །དེ་དག་ཐུགས་རྗེ་གཞན་ལས་ཆེ་བ་ཡིན། །དེ་ལས་གཞན་པའི་སངས་རྒྱས་བྱང་སེམས་དང་། །རང་རྒྱལ་དགྲ་བཅོམ་དུང་ཕྱུར་གྲངས་འདས་ཀྱང་། །ཞི་བའི་དབྱིངས་སུ་བཞུགས་ཕྱིར་མི་འབྱོན་ནོ། །སྤྲུལ་པ་ཡིན་ཀྱང་འཁོར་བར་ལུས་བླངས་ནས། །ཁྱབ་པ་འདུ་བྱེད་སྡུག་བསྔལ་མེད་མི་སྲིད། །གནས་སྐབས་སྐྱིད་སྡུག་སྣང་བ་གཞན་ལྟར་ཡོད། །སྡུག་བསྔལ་དེ་ཉིད་བསྲན་བཟོད་དཀའ་བའི་
ཕྱིར། །སྙིགས་དུས་སངས་རྒྱས་ བྱང་སེམས་གཞན་མི་འབྱོན། །རིགས་གསུམ་མགོན་པོ ་ལ་སོགས་སེམས་དཔའ་རྣམས། །སྡུག་བསྔལ་དེ་ཉིད་བཟོད་པར་བཞེས་ནས་ཀྱང་། །འགྲོ་ལ་ལྷག་པར་ཐུགས་ནི་བརྩེ་དྲག་པས། །བསམ་བཞིན་སྙིགས་དུས་སྐྱེ་བ་ལེན་པ་སྟེ། །དཔེར་ན་ཚེ་ལོ་བརྒྱ་པ་སྙིགས་མའི་དུས། །སངས་རྒྱས་སྟོང་གིས་མ་བཞེད་བསྒྱུར་བ་དེ། །ཤཱཀ་ཐུབ་སྙིང་རྗེ་ཆེ་བས་བདག་བཟུང་ནས། །བྱོན་པའི་ལོ་རྒྱུས་པད་དཀར་མདོ་ལས་གསུངས། །མདོ་ལུགས་ས་ཐོབ་འཇིགས་པ་ལྔ་དང་བྲལ། །དང་པོའི་ས་ཐོབ་ཡན་ཆད་ངན་སོང་དུ། །ལྟུང་བར་མི་སྲིད་པ་རུ་བཤད་པ་དང་། །རྒྱུ་ལ་དཔྱད་ན་ས་བཅུ་པ་ཡང་ལྟུང་། །ཞེས་པའི་ལུགས་གཉིས་འགལ་བ་ལྟར་སྣང་ཡང་། །ས་ཐོབ་དབང་མེད་གཞན་ལྟར་ལྟུང་མི་སྲིད། །རང་དབང་ཡོད་བཞིན་འགྲོ་ལ་ཕན་པའི་ཕྱིར། །ངན་སོང་དུ་ཡང་སྐྱེ་བ་བཞེས་པ་ཡོད། །སངས་རྒྱས་སྟོང་ཡང་ཐུགས་རྗེ་ཆེན་པོ་ཡི། །ཕྱག་སྟོང་གིས་ནི་སྤྲུལ་པ་ཡིན་པ་དང་། །ཤཱཀ་ཐུབ་གྲངས་མེད་གོང་ནས་སངས་རྒྱས་ཀྱང་། །སླར་ཡང་འགྲོ་ལ་ཕན་ཕྱིར་སེམས་དཔའི་ཚུལ། །དམྱལ་བར་ལྕགས་སྲེག་ཤིང་རྟ་འདྲེན་པ་ཡི། །གྱད་དང་དེ་བཞིན་ཤིག་
དང་རི་བོང་དང་། །ཤིང་རྟ་མོ་དང་ཀླུ་ལ་སོགས་པ་ཡི། །མ་དག་སྐྱེ་བ་མང་དུ་བཞེས་པ་ཡང་། །གཞན་དང་མི་འདྲ་གཞན་ཕན་ཅུང་རེ་ཡོད། །མདོར་ན་སེམས་ཅན་གཅིག་ལ་ཕན་ཐོགས་ན། །བསྐལ་པར་མནར་མེད་བཞུགས་ལ་འཚེར་བ་མེད། །དེ་དག་སེམས་དཔའ་ཆེན་པོའི་རྣམ་ཐར་ཡིན། །ས་ཐོབ་བྱང་ཆུབ་སེམས་དཔའ་ཆེན་པོ་ཡི། །ངན་སོང་ལྟུང་བའི་རྒྱུ་བསགས་མི་སྲིད་དེ། །གལ་ཏེ་བསགས་ན་ས་བཅུ་པ་ཡིན་ཀྱང་། །རྒྱུ་འབྲས་མི་བསླུ་ལས་འབྲས་མྱོང་ཚུལ་སྟོན། །དཔེར་ན་མི་ནག་མདུང་ཐུང་ཅན་བསད་པས། །ཐུབ་པའི་ཞབས་ལ་སེང་ལྡེང་ཚེར་མའི་དཔེ། །རྫུ་འཕྲུལ་ཆེ་མཆོག་འཕགས་པ་མོའུ་འགལ་བུ། །མ་ཡུམ་འདྲེན་ཕྱིར་འོ་བརྒྱལ་ཆེན་པོར་བཅས། །དམྱལ་བར་བྱོན་ཚུན་མོའུ་འགལ་གྱི་མདོ།།རྒྱས་བསྡུས་གཉིས་ལས་རྒྱ་ཆེར་གསུངས་ལ་ལྟོས། །དེ་བཞིན་དབང་དྲག་རྒྱ་མཚོ་དམྱལ་བ་རུ། །བྱོན་པ་དེ་ཡང་དེ་འདྲར་ཤེས་པར་བྱ། །དེ་བཞིན་སྡིག་བློན་ཤ་རྟ་འདྲེན་པའི་ཕྱིར། །ཡེ་ཤེས་མཚོ་རྒྱལ་དངོས་སུ་དམྱལ་བར་བྱོན། །ཞི་ཁྲོའི་དཀྱིལ་འཁོར་ཞལ་ཕྱེས་འབུམ་ཚོ་ལྔ། །དྲངས་ཚུལ་མཚོ་རྒྱལ་རྣམ་ཐར་ནང་དུ་གསལ། །དེ་བཞིན་པཎ་ཆེན་སྨྲ་
ཏིའི་སྐྱེ་བའི་མཐའ། །ཀུ་སུ་ལུ་པ་ཉག་ཕྲུག་ཨ་སྲུང་དང་། །ཤཱཀྱ་ལྷ་དབང་སྟག་བཟའ་རིན་ཆེན་མཚོ། །སེང་གདོང་སྤྲུལ་པ་ཌཱཀི་ཨ་ཁུན་མ། །བསོད་ནམས་དཔལ་འདྲེན་དཔའ་བོ་རིན་ཆེན་དཔལ། །དེ་སོགས་སེམས་དཔའ་སེམས་མའི་སྤྲུལ་པ་རྣམས། །རྒྱུ་འབྲས་ཆོས་སྟོན་འགྲོ་ལ་ཕན་པའི་ཕྱིར། །ཚད་ལྡན་འདས་ལོག་པ་ཡང་མང་དུ་བྱོན། །རང་བྱུང་རྡོ་རྗེ་ལ་སོགས་སྐྱེས་ཆེན་འགའ། །རང་རང་བར་དོའི་རྣམ་ཐར་གསུངས་པའང་ཡོད། །ཡང་དགོན་པ་དང་སཱུརྱ་ཙན་སོགས། །དངོས་ཉམས་རྨི་ལམ་བར་དོའི་གཟིགས་ཚུལ་ཡོད། །དེ་དག་ལ་སོགས་གཞན་ཡང་ཚད་ལྡན་རྣམས། །སེམས་དཔའ་ཆེན་པོའི་མཛད་ཕྲིན་ངོ་མཚར་ཆེ། །དེ་ལྟར་མིན་པའི་དམྱལ་བ་བར་དོ་སོགས། །མཐོང་ངོ་ཟེར་ལ་ཡིད་བརྟན་མ་མཆིས་ཏེ། །ཚེ་འཕོ་བ་རྣམས་ཇི་ལྟར་འགྱུར་བ་ནི། །ཞུས་པའི་མདོ་སྡེ་ཐུབ་པའི་བཀའ་ལས་ནི། །དྲི་ཟ་འཆི་ཁའི་སེམས་ལ་འཇུག་པ་ཡི། །དྲི་ཟ་ཁྱབ་བྱེད་དྲི་ཟ་པི་ཤ་ཙི། །གནོད་སྦྱིན་སྨྲ་འདོད་རིགས་དང་འབྱུང་པོ་ནི། །པི་ར་ཧན་ཏི་ཀུན་ཏུ་རྟོགས་འདོད་སོགས། །ཚེ་འདས་དེ་འདྲའི་ལུས་སུ་སྤྲུལ་ནས་ཀྱང་། །ཉེ་དུ་རྣམས་ལ་འཆི་ཁ་གང་སྨྲས་དང་། །ཆ་ཕྲིན་ལ་སོགས་
གདོན་གྱིས་བསླུ་བར་གསུངས། །འོན་ཀྱང་ཚད་ལྡན་རྣམས་ལ་དེ་འདྲ་བ། །བྱུང་བ་དེ་ཡང་བསླུ་བ་མ་ཡིན་ཏེ། །མོའུ་འགལ་མདོ་བསྡུས་པའི་ནང་ནས་ནི། མ་རྫོགས་གློ་བུར་ཤི་བ་རྣམས། །གཤིན་རྗེའི་རྒྱལ་པོའི་དྲུང་དུ་འགྲོ་ས་མེད། །བར་དོར་བསྒུག་ནས་འདུག་པ་དེ་རྣམས་ཀྱང་། །ཆ་ཕྲིན་བསྐུར་ཚུལ་ཡོད་པ་ཡིན་པས་སོ། །དེ་ཕྱིར་ཆ་ཕྲིན་ལ་སོགས་བསྐུར་ས་དང་། །མཐོང་མི་སྐྱེས་ཆེན་དམ་པ་ཡིན་ན་བདེན། །དེ་མིན་དངོས་སུ་བྱུང་ཡང་ཡིད་ཆེས་མེད། །དཔེར་ན་སྟག་ར་ཀླུ་གོང་ཤི་བའི་དུས། །བོན་པོས་བཀུག་གཞུག་བྱས་པས་དངོས་སུ་བྱུང་། །བུ་དང་ཤི་གསོན་གཏམ་བྱས་རྒྱལ་པོ་དང་། །ཨོ་རྒྱན་ཞལ་ནས་དེ་ནི་ཚེ་འདས་མིན། །རྟགས་མཚན་ང་ཡི་རྡོ་རྗེ་འདི་སྟོན་ལ། །ཁྱོད་ལ་སློབ་དཔོན་པདྨས་དབང་བསྐུར་བའི། །གསང་མཚན་གང་ཡིན་དྲིས་དང་གསལ་ལོ་གསུངས། །དྲིས་པས་དེ་དུས་ཆངས་བུ་ཏིང་ལོ་བྱིན། །རྒྱ་མཚོའི་འགྲམ་དུ་བསྐྲད་པས་ད་མེད་ཟེར། །ཟ་འདྲེ་བསམ་ཡས་བྲག་ཐེལ་ཡིན་པར་རྟོགས། །མཆོག་གི་གྲུབ་ཆེན་གྱིས་མཛད་ངེས་མེད་དེ། །རྗེ་བཙུན་མི་ལས་བྱང་བུ་བཞུ་བའི་དུས། །ཚེ་འདས་བེམ་པོས་ལེགས་སོའི་
ཚིག་སྨྲས་པ། །བུ་སོགས་ཉེ་དུས་དངོས་སུ་ཐོས་པའོ། །རྩ་རླུང་བསྒོམ་པའི་གང་ཟག་ལ་ལ་ཡི། །དམྱལ་བའི་རྩ་མདུད་གྲོལ་ཞིང་ཞིག་པའི་ཚེ། །དངོས་ཉམས་རྨི་ལམ་དམྱལ་བའི་སྣང་བ་འཆར། །དེ་དུས་ཚེ་འདས་འདྲེན་དང་ཆ་ཕྲིན་སོགས། །ཕྱི་ནང་རྟེན་འབྲེལ་གཅིག་པས་དོན་དང་ལྡན། །རྩེ་གཅིག་སྒྲུབ་ལ་བརྩོན་པའི་གང་ཟག་ལ། །དངོས་ཉམས་རྨི་ལམ་དམྱལ་བའི་སྣང་བ་འཆར། །སྒྲུབ་པའི་མཐུ་ཡིས་དམྱལ་བར་སྐྱེ་དགོས་པའི། །ལས་སྒྲིབ་བྱང་ན་དེ་ཡིས་གོ་ཆོད་དེ། །ཕྱིན་ཆད་སྐྱེ་སྒོ་ཆོད་ཕྱིར་དོན་དང་ལྡན། །རྨི་ལམ་འོད་གསལ་འབྱོངས་བའི་གང་ཟག་གིས། །རྨི་ལམ་བཟུང་ནས་ལྷ་ཡུལ་ཞིང་ཁམས་དང་། །དམྱལ་བ་ཡི་དྭགས་སྐྱིད་སྡུག་གཟིགས་པ་ནི། །རྒྱུད་སྡེའི་ཁྲིད་རིམ་དགོངས་པ་ངོ་མཚར་ཆེ། །མི་ལ་མཁའ་སྤྱོད་པ་སོགས་གྲུབ་ཆེན་རྣམས། །དངོས་ཉམས་རྨི་ལམ་དམྱལ་བ་ཡི་དྭགས་ཡུལ། །བྱོན་ནས་ཆོས་གསུངས་འདྲེན་སྟོན་མཛད་པ་ནི། །གསོན་འདྲེན་བྱེད་པ་མཆོག་གི་གྲུབ་རྟགས་སོ། །ལ་ལ་ཡུད་ཙམ་ཤི་འོམ་གཉིད་པ་ལས། །དམྱལ་བ་དང་ནི་བར་དོར་ཕྱིན་པ་དང་། །ཆ་ཕྲིན་བདེན་བདེན་འདྲ་བ་སྣང་ན་ཡང་། །ཆོས་བཞིན་མི་སྤྱོད་སྡིག་པའི་ལས་བྱེད་
ན། །ཕལ་ཆེར་རྫུན་ཡིན་གལ་ཏེ་རྫུན་མིན་ཀྱང་། །ཟ་འདྲེའི་བསླུ་བ་ཡིན་གྱི་ཚེ་འདས་མིན། །སྔར་དུས་ལྷ་སྡིས་ཞེས་བྱའི་ཤི་ལོག་པས། །བཀྲ་ཤིས་སྟོབས་རྒྱལ་དམྱལ་བར་གདའ་ཚུལ་སོགས། །རྫུན་མང་བཤད་ཅིང་ཟང་ཟིང་མང་དུ་བསྡུས། །ཁོང་རང་ཚུལ་ཁྲིམས་འཆལ་སོགས་མི་དགེ་སྤྱོད། །དེ་ཡི་ཀརྨ་བསྟན་འཕེལ་མཇལ་སོང་ཛ། །ངས་ནི་དམྱལ་བ་མཐོང་ནི་མ་མྱོང་སྟེ། །རྣ་བས་ཐོས་པས་སག་ནི་དམ་ཆོས་བསྒྲུབས། །ཉིན་ལ་ཡེངས་དང་མཚན་ལ་གཉིད་མི་ཕོད། །ཁྱོད་ཀྱིས་དམྱལ་བ་མཐོང་བ་བདེན་པ་ན། །དམ་ཆོས་མི་སྒྲུབ་འདུག་ཕོད་སྲིད་དམ་གསུངས། །ཁོས་ཀྱང་སྐུར་པ་བཏབ་པའི་རྣམ་སྨིན་གྱིས། །ཐེག་ནག་གཉན་དང་ལོང་གཟའ་མཉམ་དུ་ཕོག །ཟུག་གཟེར་ཆེ་ཞིང་རྗེ་ངར་རུས་པ་འང་། །ཕྱི་རུ་མཐོང་བར་རུལ་ཞིང་ལོ་སྐོར་ཏེ། །རྫུན་སྨྲས་མགོ་བསྐོར་དྲན་ནས་རྒྱུན་དུ་ངུས། །ཚེ་འཕོས་མནར་མེད་དམྱལ་བར་ཆུ་སྲིན་ལུས། །མགོ་བོ་ལྔ་བརྒྱ་རེ་རེར་ལྕེ་ལྔ་བརྒྱ༈ །རེ་རེར་དཔག་ཚད་ཙམ་ལ་འཇམ་པའི་སྟེང་། །ལྕགས་སྲེག་བླང་དོར་ལྔ་བརྒྱས་དུས་རྒྱུན་དུ། །རྨོ་བར་ཐུབ་པས་མདོ་སྡེ་ལས་གསུངས་ཏེ། །ཅི་ཕྱིར་ཁྲི་སྲོང་སྤྲུལ་པའི་གཏེར་
སྟོན་པ། །བཀྲ་ཤིས་སྟོབས་རྒྱལ་ལ་ནི་སྐུར་པ་བཏབ། །སྦྱིན་བདག་མང་པོ་དད་པ་ལོག་བཅུག་གོ །དེ་ལྟར་བར་དོར་དམྱལ་བ་ལ་སོགས་པ། །མཐོང་ཚུལ་བཤད་པའི་འདས་ལོག་པ་རྣམས་ལ། །བཟང་ངན་བདེན་འཛིན་འབྱེད་དཀའ་གྲངས་མང་ཕྱིར། །འདས་ལོག་རིགས་ལ་མཁས་དང་ཡོན་ཏན་ཅན། །ཀུན་གྱི་མི་གུས་པ་ཡང་དེ་ལྟར་ལགས། །སྤྱིར་འདི་འདྲ་ལ་རྣམ་གྲངས་མང་ཚུལ་རྒྱས་པར་བཤད་པའི་ལེའུ་སྟེ་དང་པོའོ།། །།བྱེ་བྲག་འདི་ལ་ཡིད་ཆེས་ཡོད་ཚུལ་ནི། །ལུང་དང་རིགས་པ་བླ་མའི་གསུང་གསུམ་མོ། །དང་པོ་ལུང་ནི་སྔར་གྱི་གཏེར་རྙིང་སྟེ། །གཏེར་སྟོན་གུ་རུ་ཁྱུང་དྲག་ཅེས་བྱ་བས། །གཙང་གི་རི་བོ་ཆེ་ནས་བཏོན་པའི་ལུང་། །ད་ལྟའི་ཤུད་བུ་དཔའ་སེང་ཁྱོད། །ཟབ་ཆོས་སྙིང་པོ་བསྡུས་པའི་ཆོས་འདི་སྤྱོད། །དེ་ནས་སྐྱེ་བ་འགའ་ཞིག་ཉང་ཆོས་དབང་། །ཞེས་གསུངས་དང་མཐུན་དབང་དྲག་རྒྱ་མཚོ་ནི། །ཉང་ཆོས་ལ་སོགས་ཀཐོག་ཆོས་ཀུན་ལ། །སྐུ་ན་གཞོན་ཚེ་མཁས་མཐར་ཕྱིན་མཛད་ནས། །སྐུ་ཚེ་ཧྲིལ་པོར་ཉམས་ལེན་རྩེ་གཅིག་མཛད། །མི་ཀུན་འདི་ཕ་འོད་ཟེར་བླ་མ་ཡི། །སྐྱེ་བ་ཡིན་ཞེས་བསྟོད་པར་བྱེད་པའི་ཚེ། །ཁོ་བོ་འོད་ཟེར་བླ་མ་
མ་ཡིན་ཏེ། །ཤུད་བུ་དཔལ་སེང་ཆུ་བོ་གྱེན་བཟློག་ཡིན། །ཞེས་གསུངས་སྐྱེས་རབས་བདུན་ཙམ་གསུངས་མཛད་ནས། །མང་དུ་དྲན་ཏེ་དེ་བས་མི་སྨྲ་གསུངས། །དེ་བཞིན་སྤྱི་བོའི་རག་ཤི་གཏེར་སྟོན་དང་། །ཀོང་པོའི་ལྕགས་སྡེ་གྲུབ་ཐོབ་གཏེར་ཡིག་ལས། །དབང་དྲག་རྒྱ་མཚོར་བསྟོད་བསྔགས་ཆེན་པོ་དང་། །དེ་ཡི་སྐུ་གདུང་གླང་ཐང་སྒྲོལ་མ་རུ། །བཞུགས་ན་ཁམས་ཕྱོགས་བདེ་ལེགས་འབྱུང་ཚུལ་སོགས། །གཏེར་ཁ་འགའ་ནས་ལུང་བསྟན་ཡོད་པར་སྣང་། །དེ་བཞིན་རིག་འཛིན་བདུད་འདུལ་རྡོ་རྗེའི་གཏེར། །བསྟན་པ་སྤྱི་ཡི་ལུང་བསྟན་རྒྱས་པ་ནས། །ཤུད་བུ་དཔལ་སེང་སྐྱེ་བ་ནི། །ཀཐོག་ཕྱོགས་ནས་དབང་གི་མིང་ཅན་བྱུང་། །ས་བཅུའི་དབང་ཕྱུག་རྣལ་འབྱོར་ཨེ་མ་ཧོ། །མཐོང་ཐོས་ཐམས་ཅད་རིག་འཛིན་ས་ལ་སྦྱོར། །ཞེས་གསུངས་ལུང་གིས་ཟིན་ཞིང་ལུང་རྒྱབ་ནི། །མདོ་རྒྱུད་ཀུན་ནས་དད་ལྡན་བརྩོན་འགྲུས་ཅན། །ཚེ་འདི་བློས་བཏང་མི་ཚེ་སྒྲུབ་ལ་དྲིལ། །དེ་ཡི་རང་གཞན་དོན་གཉིས་འགྲུབ་གསུངས་ཕྱིར། །ཁོང་གི་རྣམ་ཐར་མདོ་རྒྱུད་ལུང་དང་མཐུན། །དེ་ཕྱིར་རྣ་བས་ཐོས་ཚད་མི་གུས་མེད། །བྱང་ཕྱོགས་རྒྱུད་དུ་བྱུང་བའི་པཎྜི་ཏ། །འཛམ་
དབྱངས་བླ་མ་ཆོས་ཀྱི་སྣང་བ་ཅན། །རྒྱལ་བ་གཉིས་པ་དེ་ཡི་གསུང་ལས་ཀྱང་། །བླ་མ་བཟང་བའི་མཚན་ཉིད་གང་ཞེ་ན། །སློབ་མ་བཟང་ལ་མང་བ་བྱུང་ན་ཡིན། །གསུངས་པ་བཞིན་དུ་དབང་དྲག་རྒྱ་མཚོ་ཡི། །སློབ་མ་མཁས་གྲུབ་ལྡན་པ་དཔག་མེད་དེ། །ཆོས་ཉིད་རྒྱ་མཚོ་ཆོས་སྐྱོང་རྒྱ་མཚོ་དང་། །ཡོན་ཏན་རྒྱ་མཚོ་ཚེ་མཚམས་སྤྲུལ་པའི་སྐུ། །པདྨ་བློ་གྲོས་སྡེ་དགེ་གྲུབ་ཐོབ་པ། །རྩེ་གཅིག་བསྒྲུབས་ཤིང་ཉམས་རྟོགས་ཕུལ་བྱུང་བ། །གྲངས་ལས་འདས་ཏེ་སྙིགས་དུས་རྫོགས་ཆེན་གྱི། །བསྟན་པ་ཉི་མ་ཤར་ལྟར་མཛད་པར་སྣང་། །བསྐལ་བཟང་སངས་རྒྱས་མོས་པའི་རྣམ་པར་འཕྲུལ། །དྲུང་ཆེན་ཚེར་ལུང་ཀུན་དགའ་རྣམ་རྒྱལ་བས། །མ་ཎི་རིལ་བུ་སྒྲུབ་པའི་རུ་རྩི་ལ། །བེ་རི་རྒྱལ་པོའི་ཕྱག་ཏུ་བཞུགས་གསན་ནས། །དབང་དྲག་རྒྱ་མཚོའི་སྐུ་ཤ་སློང་དུ་བཏང་། །ཕྱག་འགགས་ཡན་དེ་སྣང་བའི་བཅད་མཚམས་ནས། །རིང་བསྲེལ་ཡུངས་ཀར་ནང་དུ་མར་བསྒྲེས་ལྟར། །འདུག་པ་དེ་ལ་ཅུང་ཟད་བསྐུར་བ་ཡི། །རིལ་བུ་འཕུར་སྔ་རིལ་ནོག་བསྒྲིལ་བ་ཡི། །གསོལ་དཀར་གང་ཙམ་མདུན་དུ་བཞག་པ་ཡང་། །གནམ་ལ་རེག་པར་འཕུར་ཞིང་ཆར་པ་ལྟར། །ཤིང་གདན་སྟེང་
དུ་འབབ་པ་གསོལ་དཔོན་མཐོང་། །རིལ་བུ་བཀྱེ་དུས་ང་ཡི་རིལ་བུ་འདིར། །དབང་དྲག་རྒྱ་མཚོའི་སྐུ་ཤ་འདྲེས་པའི་ཕྱིར། །གཞན་ལས་བྱིན་རླབས་ཆེ་ཞེས་དྲུང་པས་གསུངས། །དེ་ཡི་རིལ་བུ་འགའ་ཞིག་སྒོ་ང་ལྟར། །ཕྱི་པགས་གཅིག་ལ་ནང་དུ་རིལ་བུ་ནི། །ཏིལ་འབྲུ་ཙམ་ལ་མང་དུ་འཕེལ་བའང་བྱུང་། །དེ་དུས་རིལ་བུ་སྒྲུབ་དུས་ཐག་རིང་དུ། །འཕུར་ནས་ཚན་ཆེན་བསྡུ་རྒྱུ་རྙེད་པའང་ཐོས། །དགེ་སློང་ཞིག་གི་སྐུ་ཤ་ཅུང་ཟད་ཙམ། །རྙེད་པ་རིལ་བུ་བསྒྲིལ་ལ་མ་སྒྲུབ་ཀྱང་། །སངས་རྒྱས་འཕེལ་གདུང་ལྟ་བུར་འཕེལ་བ་མཐོང་། །དབང་དྲག་རྒྱ་མཚོར་ཨོ་རྒྱན་ཆེན་པོ་ཡི། །དངོས་སུ་གནང་བའི་འཕོ་བ་ཟབ་ཁྱད་ཅན། །ཞག་རེ་བསྒོམས་ཀྱང་རྟགས་མཚན་ཐོན་པ་དང་། །བཀའ་འབུམ་ལུང་སོགས་ཁོང་ལས་བརྒྱུད་པའི་ཆོས། །ཁྲ་ལེབ་སྐུ་སྐྱེ་ལ་སོགས་སྐྱེས་ཆེན་ནི། །མང་པོས་ད་ལྟ་འགྲོ་དོན་སྤྱོད་པར་སྣང་། །སྐུ་ཤ་ཐམས་ཅད་ཀཐོག་བླ་མ་རྣམས། །བགོས་ནས་སྐྱེ་བདུན་རིལ་བུའི་རུ་རྩི་མཛད། །གདུང་རུས་མཆོད་རྟེན་བཞེངས་ནས་ཡོད་དོ་སྐད། །དེ་ལྟར་སྐྱེ་བདུན་ཤ་དེ་ཡིན་པ་ན། །དེ་ལ་ངོ་མཚར་ཆེ་བའི་ལུང་འདི་ལྟར། །ཐུགས་རྗེ་ཆེན་པོ་ཡང་སྙིང་
འདུས་རྒྱུད་ལས། །དེ་ནས་སྐྱེ་བདུན་ཤ་སྒྲུབ་བཤད། །དེ་ཉིད་རྟག་སྒྲུབ་འགྲོ་དོན་བྱེད། །བརྟག་པ་སྐྱེ་བདུན་གང་ཡིན་དེས། །མི་ཡི་སྐྱེ་བ་བདུན་པོ་དྲན། །དེ་ཡང་ཆོས་ལྡན་སྐྱེ་བདུན་པའི། །རོ་བླངས་ཤ་རྣམས་ལེགས་སྐམ་སྟེ། །ཞེས་དང་། གྲུབ་ཐོབ་ཤ་ཆེན་རྟག་ཏུ་ངུ་། །སྨན་དང་འབྲས་ཕྱེ་ཕུལ་གང་བསྲེ། །ཞེས་གསུངས་དེ་བཞིན་ཐུགས་རྗེ་ཆེན་པོ་ནི༔ ་་གསང་བ་འདུས་པའི་རྒྱུད་ལས་གསུངས་པ་ནི། །དེ་ནས་བཅོམ་ལྡན་རིགས་བདག་ལ། །འདུས་པའི་འཁོར་གྱིས་ཡང་ཞུས་པས། །རྩོལ་མེད་ངོ་མཚར་མཆོག་གི་རྗེས། །ཟོས་པས་སངས་རྒྱས་ཐོབ་པའི་ཐབས། །བདག་ཅག་འཁོར་ལ་བཀའ་སྩོལ་ཅིག །བཅོམ་ལྡན་འདས་ཀྱིས་བཀའ་སྩལ་པ། །ངོ་མཚར་དེ་ཉིད་བསྒྲུབ་པ་ན། །བྱང་ཆུབ་སེམས་ལྡན་རྣལ་འབྱོར་གྱིས། །འགྲོ་དོན་འཁོར་བ་དོང་སྤྲུགས་ཐབས། །དལ་འབྱོར་ཆོས་ལྡན་མི་ལུས་ནི། །བདུན་ནི་བརྩེགས་མར་བླངས་བ་ཡི། །ངེས་པར་ཡིད་ཆེས་ལྡན་པ་ཡིས། །རོ་བླངས་ཤ་རྣམས་ལེགས་བསྐམས་ཏེ། །ཞེས་དང་། སྐྱེ་བདུན་ཤ་སྐམ་སྲན་ཚད་ལ། །བཟང་དྲུག་གླ་རྩི་ཨ་མྲྀ་ཏ། །གྲུབ་ཐོབ་ཤ་ཆེན་རྟག་ཏུ་ངུ་། །གྲོ་འམ་འབྲས་ཕྱེ་ཕུལ་གང་
སྦྱར། །ཅེས་པ་ནས། རིལ་བུ་སྲན་ཚད་གྲངས་མེད་སྦྱར། །ཞེས་སོགས་རྒྱས་པར་གསུངས་ནས། །རིལ་བུ་སུ་ཡིས་ལྟོར་སོང་བ། །ཚེ་རབས་གང་དང་གར་སྐྱེས་ཀྱང་། །སྤྱན་རིས་གཟིགས་དང་འབྲལ་མི་སྲིད། །བདག་བས་གཞན་གཅེས་འགྲོ་དོན་སྤྱོད། །ཡིག་བདུན་བཟླས་ཤིང་དམ་ཚིག་སྲུང་། །ཐམས་ཅད་འཁོར་བ་དོང་སྤྲུགས་འགྱུར། །ཅེས་དང་ཡང་སྙིང་འདུས་རྒྱུད་ལས། །རིལ་བུ་སུ་ཡིས་ལྟོར་སོང་བ། །ཚེ་རབས་གང་དང་གར་སྐྱེས་ཀྱང་། །སྤྱན་རས་གཟིགས་དང་འབྲལ་མི་སྲིད། །ཅེས་གསུངས་བཞིན་དུ་དབང་དྲག་རྒྱ་མཚོ་དེ། །གྲུབ་ཆེན་སྐྱེ་བདུན་ངེས་པར་དྲན་པའི་ཕྱིར། །ཆོས་ཉིད་རྒྱ་མཚོ་ཆོས་སྐྱོང་རྒྱ་མཚོ་དང་། །ཚེར་ལུང་དྲུང་པ་སྟག་ར་སྐུ་སྐྱེ་དང་། །སྡེ་དགེ་གྲུབ་ཐོབ་ལ་སོགས་མཁས་གྲུབ་རྣམས། །ཞལ་འཆམ་སྐུ་ཤ་བུམ་སྒྲུབ་རུ་རྩི་མཛད། །སྒྲུབ་པ་མ་ཐོན་རང་ག་སྐུ་ཤ་ལ། །རིལ་བུ་བྱས་པས་འཕེལ་གདུང་ལྟར་འཕེལ་ལྟར། །སྤྲུལ་སྐུ་འདི་ཡི་ཤངས་མཚལ་རིལ་བུ་རྣམས། །ཉིད་ཀྱིས་ཕྱག་བསྒྲིལ་མཛད་པ་འགའ་ལ་ཡང་། །སངས་རྒྱས་འཕེལ་གདུང་ལྟ་བུར་ཞིབ་མོ་འཕེལ། །རིག་པས་དཔྱད་ནའང་འབྲེལ་ཚད་དོན་ལྡན་
མིན་ན་མཁས་གྲུབ་ཚད་ལྡན་དེ་རྣམས་ཀྱི། །སྐུ་ཤ་བུམ་སྒྲུབ་རུ་རྩི་ག་ལ་བྱེད། །གལ་ཏེ་བྱས་ཀྱང་འཕུར་སྔ་འཕེལ་བ་སོགས། །མི་འབྱུང་བ་སྟེ་བྱིན་རླབས་རྟེན་ཕལ་པ། །འདྲེས་ན་འགྲུབ་རྟགས་མི་གསལ་གསུངས་ཕྱིར་རོ། །འདས་ཁ་ང་ཡི་གདུང་འདི་མ་བཞུ་བར། །འབུ་ལ་ཟ་ཆུག་འབུ་ནི་ཁྲི་ཕྲག་འོང་། །སྐྱེ་བ་རྒྱབ་ལ་མི་འགྱུར་རྡོ་རྗེའི་དུས། །འབུ་ཀུན་མི་ལུས་ཐོབ་ནས་གྲྭ་པར་འོང་། །གསུངས་ཕྱིར་འབྲེལ་ཚད་དོན་ལྡན་སྐྱེ་བདུན་པ། །ཡིན་པར་ཉིད་ཀྱི་དགོངས་ཤིང་ཞལ་གྱིས་བཞེས། །དེ་ལྟར་ས་བཅུའི་སེམས་དཔའ་ཆེན་པོ་དེ། །འདས་ནས་དམྱལ་བར་ཟངས་ནང་ཕེབས་པ་ཡང་། །འབྲེལ་ཐོགས་སྡིག་ཅན་འདྲེན་ཕྱིར་མ་གཏོགས་པ། །ལས་ངན་དབང་གིས་ལྟུང་བ་ག་ལ་སྲིད། །ཡིག་དྲུག་སྐྱེ་ས་ཨེ་ཡོད་ཟེར་བ་སོགས། །འགྲོ་ལ་ཕན་ཡོན་ཉེས་དམིགས་སྟོན་པའི་ཕྱིར། །ཡིན་གྱིས་དེ་མེད་བཞུགས་དགོས་ག་ལ་ཡིན། །དཔེར་ན་ཐུབ་པ་ཉིད་དང་དགྲ་བཅོམ་ཚོགས། །ལས་ཀྱི་ལྷག་མ་མྱོང་ཚུལ་བསྟན་དང་མཚུངས། །འཇིགས་སྐྲག་འོ་བརྒྱལ་འཁྲུལ་སྣང་བྱུང་ཚུལ་ཡང་། །གཞན་དག་དམ་པའི་ཆོས་ལ་བསྐུལ་ཕྱིར་དུ། །དེ་ལྟར་བྱུང་ཚུལ་བསྟན་པ་ཡིན་མོད་ཀྱི། །ས་
བཅུ་པ་ལ་འཁྲུལ་སྣང་འཇིགས་སྐྲག་བྲལ། །དེས་ན་འོག་ཏུ་འཆད་པའི་དགོངས་པ་རྣམས། །གོ་བར་མཛོད་ལ་བཀའ་ལྟར་ཡིད་ཆེས་བྱོས། །འདི་ཉིད་འཁྲུལ་པ་མེད་ཚུལ་བཤད་པའི་ལེའུ་སྟེ་གཉིས་པའོ།། །།དེ་ནས་འཁྲུལ་ཞིག་དབང་དྲག་རྒྱ་མཚོ་དེ། །སྒྲུབ་གནས་སྐུ་བླ་ཕུག་ཅེས་བྱ་བ་དེར། །ཚེ་དང་སྒྲུབ་པ་མཉམ་པར་མཛད་པ་སྟེ། །སྙིང་ནས་སྒྲུབ་པའི་དམ་བཅའ་ཕུལ་ན་ནི། །རེ་ཟུང་ཙམ་ལ་ཕུག་སྒོ་ཆོས་བཤད་མཛད། །དད་ལྡན་ས་ཐག་རིང་ནས་འོང་བ་ལ། །དར་ཐག་རྒྱུད་ནས་རྗེས་གནང་བྱིན་རླབས་ཙམ། །དེ་མིན་རྩེ་གཅིག་སྒྲུབ་པའི་དམ་བཅའ་མཛད། །རྐང་བཞི་གསེར་དངུལ་མི་ལེན་ཇ་མར་ནས། །གང་བྱུང་རྟོགས་ལྡན་རྣམས་ལ་མཚམས་རྒྱགས་སྤྱད། །དར་རས་གོས་ཆེན་ཕལ་ཆེར་ཇོ་དར་འཛུགས། །དེ་འདྲའི་ངང་ནས་སྐུ་ཚེ་མཐར་ཕྱིན་བཞུགས། །དེ་ཚེ་ཉིད་དང་མཆེད་གྲོགས་ཡིན་པ་ཡི། །ཀཐོག་གདན་ས་བ་སོགས་བླ་མ་ནི། །བསྒྲེས་གཞོན་བཞི་སོགས་འདས་ལུགས་སྤྲུལ་སྐུས་གསུངས། །དེ་ནས་རྗེ་ཉིད་སྐུ་མཚམས་བསྡམས་པ་ནས། གྲྭ་པ་བཞི་ཙམ་ཚེ་ཡི་དུས་བྱས་ཚེ། །གཤིན་རྗེའི་ཕོ་ཉ་མ་རུངས་འཇིགས་པའི་
གཟུགས། །རྔམས་བྱེད་ཆུ་སྲིན་མགོ་ཅན་གསུམ་བྱུང་ནས། །གྲྭ་པ་དེ་རྣམས་རིམ་བཞིན་ཁྲིད་སོང་གཟིགས། །ཀྱེ་མ་ཀྱི་ཧུད་འདུས་བྱས་མི་རྟག་པ། །སྐྱེས་པ་ཙམ་ནས་འཆི་བའི་ཆོས་ཉིད་ཅན། །ཞག་རེ་སོང་བཞིན་འཆི་ལ་ཐག་ཉེ་བ། །དཔེར་ན་གསོད་སར་ཁྲིད་པའི་བཙོན་དང་འདྲ། །འཆི་བདག་གཤིན་རྗེ་ནམ་འོང་ཆ་མ་མཆིས། །བྱུང་ན་སུས་ཀྱང་བཟློག་པའི་ཐབས་མེད་དེ། །ཞུ་ས་གཏམ་ས་རྒྱུ་གཏོང་བྱེད་ས་མེད། །འཐབ་ས་མེད་ཅིང་འབྲོས་པའི་ས་ཡང་མེད། །མགོ་དཔོན་བཙན་པོ་ཡོད་ཀྱང་ཁེབ་ས་མེད། །སྨན་དང་རིམ་གྲོ་བྱིན་རླབས་ནུས་པ་རྡུགས། །བསྒྲུབ་པའི་ལྷ་དང་སྲུང་མས་སྲུང་མི་ཐུབ། །གཉེན་དང་ཉེ་དུ་འཁོར་གཡོག་ཁྲིད་དབང་མེད། །ཟས་ནོར་ལོངས་སྤྱོད་ཡོད་ཀྱང་ཁྱེར་དབང་མེད། །རྟ་དྲེལ་ཁལ་མ་མང་ཡང་ཞོན་དབང་མེད། །རིག་པ་གྲོགས་མེད་གཅིག་པུར་འཁྱམས་པའི་ཚེ། །གར་འགྲོའི་ཆ་མེད་འདི་བྱེད་བློ་སྒོ་མེད། །ཞི་ཁྲོའི་ལྷ་དང་ལས་ཀྱི་གཤིན་རྗེའི་དམག །ཉེས་ཅན་མི་གཅིག་དམག་གིས་བཟུང་བ་བཞིན། །རྒྱོབ་སོད་སྒྲ་དང་འུར་སྒྲ་ཐུག་ཆོམ་ལྡིར། །མུན་ནག་ཐོག་སེར་སྒྲ་འོད་ཟེར་གསུམ་འཁྱུག །དེ་འདྲ་གཅིག་མིན་རིམ་པར་ཀུན་ལ་
འབྱུང་། །དེ་དུས་སྐྱབས་དང་བསྐྱེལ་མ་ལམ་གྱི་རྒྱགས། །དམ་པའི་ཆོས་ཤིག་མ་གཏོགས་མི་གདའ་ན། །འདི་འདྲ་ཐོས་ཤིང་དྲན་པའི་ཕྱི་རབས་རྣམས། །དེ་དུས་མཁོ་བའི་གྲབས་ཤོམ་མ་གཡེལ་གཅིག །ལ་ལ་ན་སོ་གཞོན་ཀྱང་ངེས་པ་མེད། །མངལ་དུ་འཆི་དང་བཙས་མ་ཐག་འཆི་དང་། །དར་ལ་བབ་དང་རྒས་གཞོན་ངེས་པ་མེད། །དཔེར་ན་ཀཿཐོག་བླ་མ་གཞོན་ནུ་གཉིས། །རྗེ་ལས་ཁྲི་མཐོ་རིགས་རུས་ལྡན་པ་དེ། །ཉིད་ལ་དད་གུས་དབང་ལུང་གསན་ན་ཡང་། །རིང་པོར་མ་ཐོག་འདས་ཚུལ་སྤྲུལ་སྐུ་ཡིས། །དྲན་ནས་གསུངས་པ་དེ་དང་མཐུན་པའོ། །ཉམས་ལེན་བཟང་དང་ཐུགས་དམ་སྲུང་ཟློག་གིས། །དུས་ཀྱི་འཆི་བ་བཟློག་པར་མི་འདུག་སྟེ། །དྲང་སྲོང་མངོན་ཤེས་ཐོབ་དང་དགྲ་བཅོམ་པ། །ཚངས་དང་བརྒྱ་བྱིན་འཁོར་ལོས་སྒྱུར་བའི་རྒྱལ། །ཐམས་ཅད་མི་འཆི་པ་ནི་མ་མཆིས་ཏེ། །དཔེར་ན་ཀཿཐོག་བླ་མ་བསྒྲེས་པོ་ནི། །བསྙེན་སྒྲུབ་མཐར་ཕྱིན་ནུས་མཐུ་ལྡན་པ་གཉིས། ་འདས་ཚུལ་སྤྲུལ་སྐུས་དྲན་པ་དེ་དང་མཚུངས། །གཤིན་རྗེའི་ཕོ་ཉ་ནམ་འོང་ཆ་མེད་དེ། །ཆུ་སྲིན་མགོ་ཅན་འཇིགས་རུང་གཤིན་རྗེ་གསུམ། །བྱུང་ནས་གྲྭ་པ་གསུམ་བཞི་ཁྲིད་སོང་
བ། །རིག་འཛིན་དབང་དྲག་རྒྱ་མཚོས་གཟིགས་དང་མཚུངས། །དེ་ནས་སངས་བྱེད་གནང་བྱེད་གྲབས་ཤོམ་ཡང་། །གཤིན་རྗེའི་ཕོ་ཉས་མཐོང་ནས་ཁྲེལ་དགོད་བྱེད། །དེ་ལ་དགོངས་ནས་མདོ་རྒྱུད་མན་ངག་ལས། །མི་རྟག་དྲན་པ་འདུ་ཤེས་ཀུན་གྱི་མཆོག །ཁྲིད་རིམ་ཀུན་གྱི་ཐོག་མར་གསུངས་པའོ། །རིག་འཛིན་དབང་དྲག་རྒྱ་མཚོའི་མཆེད་གྲོགས་དང་གྲྭ་པ་འགའ་ཞིག་མི་རྟག་པའི་ཆོས་ཉིད་མངོན་དུ་གྱུར་ཚུལ་སྤྲུལ་སྐུས་དྲན་པའི་ལེའུ་སྟེ་གསུམ་པའོ།། །།དེ་ནས་རིག་འཛིན་དབང་དྲག་རྒྱ་མཚོ་ཉིད། །སྐུ་ཚེ་སྒྲུབ་པ་མཐར་ཕྱིན་དོན་གཉིས་འགྲུབ། །མྱ་ངན་འདའ་བར་དགོངས་ནས་སྐུ་མཚམས་གྲོལ། །ཁེར་རྐང་འཁྲུགས་ཚུལ་ལ་སོགས་ལུང་བསྟན་མཛད། །སྤྲུལ་སྐུ་ཕྱི་མ་གར་བྱོན་ལུང་བསྟན་ནས། །ངེས་པའི་དོན་ལ་གཟུགས་ཀྱི་སྐུ་བསྡུས་ནས། །དགོངས་པ་ཀུན་བཟང་ཆོས་ཀྱི་དབྱིངས་སུ་ཐིམ། །ས་བཅུའི་སེམས་དཔའ་ཡིན་ཕྱིར་སྤྲུལ་པ་ནི། །བྱེ་བ་ཕྲག་བརྒྱ་གདུལ་བྱའི་སྣང་ངོ་ལ། །གང་ལ་གང་འདུལ་ཚུལ་དུ་སྣང་བར་བཤད། །དྲང་དོན་འགྲོ་ལ་ཕན་ཕྱིར་ཚུལ་བསྟན་པ། །གཤིན་རྗེའི་ཕོ་ཉ་སོལ་བའི་མདོག་ཅན་ལ། །སྐུ་ནི་གྱེན་འབར་ཁྲོ་བོའི་ཆ་བྱད་ཅན། །
གཉིས་ཀྱིས་བླ་མ་གར་ཡོད་ཟེར་ཞིང་བྱུང་། །མཚམས་ཁང་ནང་དུ་ཞུགས་ནས་དབང་མེད་ཁྱེར། །ལུང་པ་ཕར་ལོ་དེ་ནས་བསླེབས་ཙམ་ནས། །ཡར་གཟིགས་རྒྱབ་རིའི་བཀོད་པ་རྣམས་ཀྱང་མཐོང་། །གྲྭ་པ་གཉིས་ཀྱང་གཤིན་རྗེས་ཁྲིད་བྱུང་བ། །དཔོན་སློབ་གསུམ་པོ་གཤིན་རྗེའི་ཕོ་ཉ་ཡི། །ཁྲིད་ནས་སོང་སོང་དམྱལ་བར་སྐྱེ་བའི་སྒོ། །སྦྲ་ནི་ནག་པོ་འདྲ་བ་གཅིག་ཏུ་གཟིགས། །དེ་ཡི་སྒོ་སྲུང་མ་རུངས་ཁྱི་ཡི་གཟུགས། །ལུས་ལ་མཚོན་ཆ་སྣ་ཚོགས་སྐྱེས་པ་འདུག །སྦྲ་ནང་དེ་རུ་ཕེབས་པས་སྦྲ་མིན་པར། །དམྱལ་བའི་འཇིག་རྟེན་ཁམས་སུ་ཕེབས་པར་སྣང་། །ས་དོང་ནག་པོ་མཁར་ནི་དམར་དང་ནག །གླུ་དབྱངས་ལེན་པའི་ཁྲོད་དང་ནག་ངམ་མེ། །དེ་དག་དམྱལ་བའི་སྐྱེ་སྒོ་ཡིན་གསུངས་ལྟར། །སྦྲ་ནག་ལ་སོགས་དམྱལ་བའི་སྐྱེ་སྒོ་དང་། །བྲག་སྐྱིབ་སྡོང་དུམ་དུད་འགྲོའི་སྐྱེ་སྒོ་དང་། །གླིང་བུ་འབུད་པའི་ཁྲོད་ནི་ཡི་དྭགས་སོགས། །སྐྱེ་སྒོ་གང་ཡིན་ད་ལྟ་ཡིད་ངེས་པས། །དེ་རུ་མི་འགྲོ་རུ་ལོག་དྲན་པ་དང་། །དབང་མེད་གཤིན་རྗེས་ཁྲིད་དང་འདེད་པ་ལ། །ཡི་དམ་ཁྲོ་བོའི་བསྐྱེད་རིམ་ལ་སོགས་པ། །བར་དོའི་ཆོས་ལ་ད་ལྟ་གོམས་འདྲིས་ཤིག །མེད་ན་དེ་
དུས་འཁྲུལ་ཚབ་ཆེ་བའི་ཚུལ། །སྤྲུལ་སྐུའི་དྲན་ཚུལ་འདི་ལ་བསམ་གཞིག་ཐོང་། །དབང་དྲག་རྒྱ་མཚོ་འཁྲུལ་པ་མ་ལགས་ཏེ། །མོའུ་འགལ་བུ་དང་ཡེ་ཤེས་མཚོ་རྒྱལ་ལྟར། །སེམས་ཅན་འདྲེན་ཕྱིར་ཐུགས་རྗེ་ཚད་མེད་ཀྱིས། །བསམ་བཞིན་དམྱལ་བའི་གནས་སུ་བྱོན་པའོ། །སྐུ་ཚེའི་འདུ་བྱེད་བཏང་ནས་དམྱལ་བའི་འཇིག་རྟེན་དུ་ཕེབས་པའི་ལེའུ་སྟེ་བཞི་པའོ།། །།དེ་ནས་དམྱལ་བའི་འཇིག་རྟེན་ཁམས་དེ་ན། །རིན་ཆེན་གསེར་གྱི་ཁྲི་ཆེན་འོད་འབར་སྟེང་། །གཤིན་རྗེ་ཆོས་ཀྱི་རྒྱལ་པོ་དེ་ཉིད་ནི། །སྐུ་མདོག་མཐིང་ཀ་ཞལ་བཞི་ཕྱོགས་བཞིར་གཟིགས། །ཞལ་རས་དམར་ཟླུམ་སྤྱན་བསྒྲད་སྡང་མིག་ལྟ། །རྣོ་དཀར་མཆེ་བ་བཞི་བཞི་རབ་ཏུ་གཙིགས། །དབུ་ལ་རིན་ཆེན་འབར་བའི་སྲོག་ཞུ་གསོལ། །ཕྱག་གཡས་རྒྱ་ལུང་དཀྱིལ་དུ་ཡོད་པ་ལ། །སྣེ་གཉིས་རྒྱ་སྟེབ་ཆེན་པོ་བཏགས་པ་འཛིན། །ཕྱག་གཡོན་རྡེའུ་དཀར་ནག་གིས་བཀང་བའི། །སྒྲོ་བ་འདྲ་བའི་སྣོད་གཅིག་འཛིན་པར་སྣང་། །གྲུ་ཁུག་གཡོན་ནས་བེང་གི་དབྱིབས་འདྲ་བའི། །ཁྲམ་ཤིང་ཆེན་པོ་གཅིག་ཀྱང་བཙུགས་ནས་གདའ། །འོག་མའི་ཕྱག་གཉིས་ཉིད་ཀྱི་ཐུགས་ཀ་ན། །རྡོ་རྗེ་མེ་ལྟར་འབར་བའི་ཕྱག་རྒྱ་
མཛད། །སྐུ་སྨད་སྟག་གི་པགས་པའི་ཤམ་ཐབས་མཛད། །ཞབས་གཉིས་རྒྱལ་པོ་རོལ་པའི་སྟབས་ཀྱིས་བཞུགས། །ཕྱག་སོར་ཀུན་ལས་མེ་ལྕེ་དྲག་ཏུ་འབར། །གཟི་བརྗིད་ཆེ་བས་ལྟ་བར་མི་བཟོད་ཅིང་། །བལྟས་ན་རང་གི་ངོ་ཡང་ཚིག་ལ་ཁད། །ཁྲོ་བོ་ཆེན་པོ་འཇིགས་པའི་ཚུལ་དེ་ལ། །བདུད་དང་སྲིན་པོའི་ཆ་ལུགས་འཆང་བ་ཡི། །སྦལ་པའི་མགོ་ཅན་དྲུག་དང་ཕག་མགོ་ཅན། །ལ་སོགས་མགོ་བརྙན་སྣ་ཚོགས་ཡོད་པ་ཡི། །གཤིན་རྗེའི་འཁོར་ཚོགས་སྟོང་ཕྲག་མང་པོས་བསྐོར། །དེ་འདྲ་ཞིག་གིས་མདུན་དུ་བསླེབས་ནས་མཇལ། །དེ་ལྟར་གཟིགས་པའི་ཆོས་རྒྱལ་གཤིན་རྗེ་ཡང་། །ཐེག་པ་ཐུན་མོང་ལུགས་ལ་སོ་སྐྱེ་སྟེ། །ལས་ཀྱི་དབང་གིས་གཤིན་རྗེའི་རྒྱལ་པོར་གྱུར། །ཡ་ཀི་རྫོགས་པའི་སངས་རྒྱས་མན་ཆད་ནས། །འཇག་མའི་སྲིན་བུ་ཡན་གྱི་སྲོག་ལ་དབང་། །འཆི་བ་ཀུན་གྱི་རྗེ་དཔོན་ཁོང་ཡིན་ཏེ། །གསོན་པོ་རྣམས་ཀྱང་ཁྲམ་ལ་ཁོང་གིས་འདེབས། །ཁོང་གིས་ཁྲམ་ལ་བྲིས་ནས་བཟློག་ཏུ་མེད། །འཇིག་རྟེན་སྲིད་པའི་དགེ་སྡིག་ཤན་འབྱེད་ཡིན། །དངོས་དེ་དམྱལ་བའི་འཇིག་རྟེན་ཁམས་དེར་བཞུགས། །སྤྲུལ་པ་འཛམ་གླིང་ལྷོ་ཕྱོགས་དུར་ཁྲོད་ན། །
ལས་ཀྱི་གཤིན་རྗེ་ལྷ་སྲིན་མ་མོའི་ཚོགས། །འཁོར་དུ་བསྐོར་ནས་སྐྱེ་འགྲོའི་སྲོག་དབུགས་སྡུད། །དེ་ཕྱིར་རྒྱ་གར་གྲོང་ཁྱེར་ཆེན་པོ་རྣམས། །ལྷོ་སྒོར་ཤི་བའི་རོ་བསྐྱལ་མ་གཏོགས་པ། །མི་གཞན་རྒྱུ་འགྲུལ་མི་ཕོད་འཛེམ་པ་དང་། །དཀྱིལ་འཁོར་ཀུན་གྱི་ལྷོ་ཕྱོགས་མཐར་གནས་པས། །ཚེ་འདས་རྣམས་ཀྱང་དེ་ཕྱོགས་ཁྲིད་སོང་པས། །ལྷོ་སྒོར་བྱང་བུ་ཕྱིར་ལྡོག་བྱེད་པའི་ཕྱིར། །ལྷོ་སྒོ་ཆོ་ག་ཟེར་བ་དེ་ཡི་དོན། །ཡང་སྤྲུལ་ཙཱ་རི་གཅིག་འཆར་རྒྱུ་ལ་སོགས། །གནས་ཆེན་འགའ་རེ་གཤིན་རྗེ་དེས་བདག་ཕྱིར། །གཏད་དང་ལིངྒ་འཕང་ན་ཁྲམ་ལ་འདེབས། །ཐེབ་པས་ཆོག་པར་གྲགས་པ་དེ་ཡི་དོན། །དེ་ལྟར་ལས་གཤིན་ཆོས་ཀྱི་རྒྱལ་པོ་དེ། །སེམས་ཅན་ཐམས་ཅད་སྲོག་དབུགས་འཕྲོག་བྱེད་པས། །བཅོམ་ལྡན་འཇམ་དཔལ་གཤིན་རྗེའི་གཤེད་པོ་རུ། །སྤྲུལ་ནས་དམ་ལ་བཏགས་པས་སངས་རྒྱས་ཀྱི། །བསྟན་པ་སྲུང་ཞིང་དགེ་སྡིག་ཤན་འབྱེད་པར། །བསྐོས་ཚུལ་འཇམ་དཔལ་ཞི་ཁྲོའི་རྒྱུད་གཞུང་གསལ། །དེ་ལྟར་དམ་བཏགས་དབང་བསྐུར་བྱིན་བརླབས་པས། །ད་ལྟ་ས་བརྒྱུད་ནོན་པའི་སེམས་དཔར་བཤད། །སངས་རྒྱས་བསྟན་པའི་སྲུང་མ་ཆེན་པོ་ཡིན། །དེ་དག་རྣམས་
ཀྱང་ཀུན་རྫོབ་དྲང་དོན་ཙམ། །ངེས་པའི་དོན་ལ་བཅོམ་ལྡན་ཀུན་བཟང་གི །སྤྲུལ་པ་ཉིད་དེ་ཐུབ་དྲུག་ངོ་བོ་གཅིག །དམྱལ་བའི་སེམས་ཅན་རྣམས་ལ་ཆོས་སྟོན་ཀྱང་། །རང་རང་སྒྲིབ་པས་འཇིགས་རུང་གཤིན་རྗེར་མཐོང་། །ཆོས་བཤད་པ་ཡང་རྒྱོབ་སོད་སྒྲ་རུ་ཐོས། །ལས་སྒྲིབ་དག་ནས་རྫོགས་པའི་སངས་རྒྱས་སྐུ། །ཞི་ཚུལ་མཚན་དཔེ་རབ་རྒྱས་ཆོས་འཁོར་བསྐོར། །ལས་མཁན་རྣམས་ཀྱང་སེམས་དཔའ་སེམས་མ་ཉིད། །ལྕགས་སྲེག་ས་གཞི་སྤང་ལྗོངས་སྐྱེད་མོའི་ཚལ། །ལྕགས་སྲེག་ཁང་སྒྲོམ་ཟངས་སོགས་གཞལ་ཡས་ཁང་། །མཐོང་གི་ངན་པ་དེ་དག་མཐོང་བ་མེད། །དབང་དྲག་རྒྱ་མཚོའི་གཟིགས་ཚུལ་འདི་རྣམས་ཀྱང་། །འགྲོ་ལ་རྒྱུ་འབྲས་བླང་དོར་སྟོན་ཕྱིར་ཏེ། །ངེས་པར་སྒྲིབ་པས་བསྒྲིབས་པ་མ་ལགས་སོ། །བཅོམ་ལྡན་འདས་དམྱལ་བའི་ཐུབ་པ་དང་མཇལ་བའི་ལེའུ་སྟེ་ལྔ་པའོ།། །དེ་ནས་རྒྱལ་པོས་གཟིགས་པའི་མ་ཟད་དེར། །ས་བརྩིག་རི་བྲན་འདྲ་བའི་སྒྱེད་པུ་གསུམ། །མེ་དཔུང་འབར་ཏེ་ཟངས་ཆེན་དཔག་ཚད་ཙམ། །མི་ནི་མང་པོས་གང་ནས་འདུག་པའི་ནང་། །གྲུ་པ་སྔོན་མ་ཤི་འགའ་འཕང་ནི་གདའ། །རྗེ་
ཀྱང་རྒྱས་ཆོས་འཁོར་བསྐོར། །ལས་མཐོང་བ་མེད། །དབང་དྲག་རྒྱལ་བའི་ལེའུ་སྟེ་ལྔ་པའོ།། བཙུན་དབང་དྲག་རྒྱ་མཚོ་དེ་ཉིད་ཀྱང་། །ལས་མཁན་གཉིས་རེ་ཞིག་གིས་ཟངས་ནང་འཕངས། །སྟེང་དུ་གཞན་མ་མང་པོ་འཕང་བྱུང་མནན། །ཡར་ལངས་བསམས་ཀྱང་གཞན་ཚོས་སྟེང་ནས་མནན། །ལྕགས་སྲེག་དང་ནི་དབྱིག་པ་ནག་པོ་ཡི། །སྟེང་ནས་བཙུགས་ཤིང་ཚོད་མ་བཞིན་དུ་དཀྲུགས། །གཞན་རྣམས་ངུ་འབོད་ཚག་དང་ཕྱུར་ཕྱུར་བྱེད། །བྱང་ཆུབ་སེམས་དཔའ་དབང་དྲག་རྒྱ་མཚོ་དེ། །མནར་མེད་ཟངས་ཀྱི་ནང་དེར་བཞུགས་ཚེ་ཡང་། །སྟེང་ནས་མནན་ཅིང་དཀྲུགས་པའི་ཚེ་ན་ཡང་། །རྫི་རྒྱུ་མེད་ཅིང་གནོད་རྒྱུ་ཅུང་ཟད་མེད། །མི་བདེའི་ན་ཚ་ཟུག་གཟེར་རྡུལ་ཙམ་མེད། །བསམ་གཏན་བཞི་ལ་བཞུགས་པའི་དགེ་སློང་བཞིན། །འོན་ཀྱང་གཞན་ཚོས་ངུ་འབོད་ཀུ་ཅོ་ཡིས། །རྣ་བ་ཚ་ནས་ཡར་ལང་གྲྭ་པ་གཅིག ། ལག་ཡུ་ནས་བཟུང་ཁྲིད་ནས་ཟངས་རྒྱབ་བྱོན། །བདུད་སྦྲུལ་སྡིག་སྟོབས་བསམ་ལས་འདས་པ་ཡི། །འབྲེལ་ཚད་མནར་མེད་ལྟུང་བའི་ལས་ངན་ཅན། །འགའ་དང་འགའ་ཡི་དཀོར་ཟས་འབྲེལ་པ་ཆེ། །དེ་དག་འདྲེན་ཕྱིར་ཟངས་དུ་ལྟུང་ཚུལ་བསྟན། །འོན་ཀྱང་དེ་ཡི་ལས་འབྲས་མ་བསགས་ཕྱིར། །ཟངས་ནང་བཞུགས་ཚེ་བདེ་ལྡན་སྡུག་བསྔལ་མེད། །ཟངས་དུ་
གནས་པའི་སེམས་ཅན་དེ་རྣམས་ཀྱང་། །ཚེ་ཚད་ཐུང་ངུའི་ཐར་བའི་རྟེན་འབྲེལ་དང་། །འབྲེལ་ཆེའི་གྲྭ་པ་དེ་མ་ཐག་ཏུ་དྲངས། །སེམས་ཅན་གཅིག་ལ་ཕན་ཕྱིར་མནར་མེད་དུ། །སེམས་དཔའ་ཆེ་རྣམས་བསྐལ་པར་བཞུགས་ནུས་པའི། །སེམས་བསྐྱེད་ཡོད་པར་གསུངས་པའང་དེ་ལྟར་ལགས། །རྒྱུ་ལ་དཔྱད་ན་ས་བཅུ་པ་ཡང་ལྟུང་། །ཞེས་གསུངས་དོན་ཡང་འདི་ལྟ་བུ་ལ་དགོངས། །འདི་ལ་བསམ་ན་ལས་འབྲས་ཕྲ་ཞིབ་ལ། །ཁྱད་དུ་གསོད་ཅིང་ལྟ་བ་མཐོ་ཟེར་ཀུན། །བསམ་གཞིག་བཏང་ན་ལེགས་པ་མ་ལགས་སམ། །ཀུན་རྫོབ་ལས་འབྲས་བསླུ་བ་མེད་ཚུལ་བསྟན་པའི་ལེའུ་སྟེ་དྲུག་པའོ།། །།དེ་ནས་ཡར་འོང་རྒྱལ་པོའི་མདུན་དེར་ཕྱིན། །ཆོས་ཀྱི་རྒྱལ་པོས་ཁྱོད་ལ་ཡིག་དྲུག་གཅིག །སྐྱེ་ས་ཨེ་ཡོད་མེད་ན་ལྟོས་ཟེར་བསྡིག །མེད་ལགས་ཞུས་པས་ཨོཾ་གཙིགས་ཞིག་བསྡམས་ནས། །ཁྲམ་ཤིང་དེ་ལ་རི་མོ་གྲུ་བཞི་བྲིས། །མགོ་འགུགས་གཅིག་བྱས་སྦལ་པའི་མགོ་ཅན་དེས། །མཛུབ་མོའི་རི་མོ་གྲུ་བཞིའི་དཀྱིལ་དེ་ལ། །ཏུག་ཏུག་གསུམ་བྱས་ཆོས་ཀྱི་རྒྱལ་པོ་ཡི། །རྡེའུ་དཀར་པོ་མཛུབ་རྩེ་ཙམ་ཞིག་དང་། །ནག་པོ་ཁུ་ཚུར་ཙམ་ཞིག་རྗེ་
བཙུན་གྱི། །ཕྱག་མཐིལ་གཉིས་སུ་བཞག་པ་དེ་མ་ཐག །རྡེལ་ནག་ཇེ་ཆུང་མཐེ་བོང་ཙམ་དུ་སོང་། །རྡེལ་དཀར་ཇེ་ཆེ་ཅོག་པུ་ཙམ་གྱུར་ཀྱང་། །ཕྱག་ལ་མི་ལྗིད་ཁྱོག་པར་འདུག་པ་དང་། །རིན་ཆེན་ཁྲི་ནི་རབ་ཏུ་མཐོ་བའི་སྟེང་། །རིག་འཛིན་དབང་དྲག་རྒྱ་མཚོ་བཞུགས་སུ་གསོལ། །གཤིན་རྗེ་ཆོས་རྒྱལ་ཁྲི་ཡི་ཐོག་ནས་བཞེངས། །ལན་གསུམ་ཕྱག་འཚལ་གུས་ཤིང་འདུད་པར་བྱས། །སྔོན་ཚེ་ཐུབ་དབང་རྗེ་བཙུན་འཇམ་དབྱངས་དང་། །རྫོགས་སངས་རྒྱས་དང་ས་བཅུའི་སེམས་དཔའ་ལ། །ཕྱག་འཚལ་མོད་ཀྱི་དེ་ལས་གཞན་པ་ཡི། །དགྲ་བཅོམ་རང་རྒྱལ་སེམས་དཔའ་ལ་སོགས་དང་། །ཚད་ལྡན་སེམས་དཔའ་འདས་ལོག་ཕལ་རྣམས་ལ། །ཆོས་ཀྱི་རྒྱལ་པོས་ཕྱག་འཚལ་ཟེར་བ་མེད། །དཔེར་ན་ས་བརྒྱད་སེམས་དཔའ་ཐང་ལྷ་ཡིས། །འཇིག་རྟེན་གསུམ་མགོན་ལ་ནི་ཆོས་ཞུས་ཤིང་། །ཕྱག་འཚལ་ཕྱིར་ན་ས་བཅུའི་སེམས་དཔའ་ཡིན། །ཟེར་བའི་ལོ་རྒྱུས་བཞིན་དུ་འདིར་ཡང་ནི། །ས་བཅུའི་སེམས་དཔའ་ཆེན་པོར་ངེས་རྟགས་སོ། །དགེ་སྡིག་བཤགས་རལ་བྱས་པས་ཆོས་ཀྱི་རྒྱལ་པོས་ཕྱག་འཚལ་བའི་ལེའུ་སྟེ་བདུན་པའོ།། །དེ་ནས་རང་ཉིད་ཐར་ཡང་ཟངས་ནང་
ནས། །ངུ་འབོད་སྨྲེ་སྔགས་ཚག་ནི་ཕྱུར་ཕྱུར་བྱེད། །སྙིང་རྗེ་བཟོད་མེད་སེམས་ཀྱིས་ཚུགས་ཐབས་མེད། །གྲྭ་པ་ལ་སོགས་སེམས་ཅན་དེ་རྣམས་ལ། །མིང་ནས་བོས་ནས་གོ་རྒྱུ་མི་སྣང་བས། །ཁྱེད་རྣམས་ཡིག་དྲུག་ཐོན་ཞེས་གསུངས་ན་ཡང་། །དེ་ཉིད་མ་གོ་ལོག་པར་གོ་བ་ཡིས། །མིག་བསྒྲད་ཨཾ་གཙིགས་བསྡམས་ནས་མགོ་གཡུག་བྱེད། །འདི་ཚོས་ཁོ་བོ་ངོ་མ་ཤེས་པའམ། །ཅི་ཡིན་བསྒྱུར་ནི་འོང་ན་ཤ་ཚ་ཞིང་། །བོས་ཀྱང་མི་ཐོས་བསྒུགས་ཀྱང་གཉུག་བུད་དེ། །ཁྲི་ཐོག་དེ་ནས་ལོ་ནི་སུམ་ཅུ་ཙམ། །བསྒུགས་ནི་བསྡད་སྣང་བྱུང་བས་གཉུག་ཀྱང་བུད། །དེ་དུས་རྟ་དམར་ཞོན་པའི་མི་གཅིག་གིས། །རྗེས་སུ་ཁྱི་དམར་གཅིག་ཀྱང་ཁྲིད་བྱུང་བ། །ལས་མཁན་མང་པོའི་ལྕགས་ཐག་མང་པོས་ཁྲིད། །སྐམ་པས་བཏོག་དང་ཐོ་བས་བརྡུངས་ཤིང་བྱུང་། །རྒྱལ་པོའི་མདུན་དུ་སྔངས་སྐྲག་རབ་ཏུ་འདར། །མདའ་གང་མདུང་གང་ཙམ་རེ་འཕར་ཞིང་གདའ། །དེ་ནས་རྒྱ་སྟེབ་གཉིས་སུ་མི་དེ་དང་། །རྗེ་བཙུན་ཉིད་བཞག་བཀྱགས་པས་ཁོ་ལྗིད་ནས། །ཁོ་ཉིད་མར་ལྷུང་རྗེ་བཙུན་གནམ་དུ་ལོག །ཁོ་ཡི་སྟེང་དུ་བྲུལ་ལ་ཁད་བྱུང་བས། །མཉམ་དུ་འཕེན་པར་དོགས་ཀྱང་མ་
འཕང་སྟེ། །མི་དེ་ཟངས་ཀྱི་ནང་དུ་འཕང་སོང་ངོ་། །མི་དེ་དང་ནི་གྲྭ་པ་ལ་སོགས་ལ། །ད་ནི་ཅི་བྱུང་ཡིག་དྲུག་ཐོན་གསུངས་ཛ། །ཚུར་ལ་ཅི་བྱུང་ཟེར་ཞིང་ཨ་གཙིགས་བསྡམས། །དཔེར་ན་དགེ་སློང་ཀོ་ཀ་ལི་ཀ་དེ། །སྐུར་འདེབས་ཉེས་པས་དམྱལ་བར་སོང་བ་ལ། །འདྲེན་ཕྱིར་ཤཱ་རིའི་བུ་དང་མོའུ་འགལ་བུ། །བྱོན་པས་འདི་གཉིས་རྗེས་སུ་འོང་ཉེས་ཞེས། །ཞེ་སྡང་སྐྱེས་ཤིང་ཚིག་ངན་བརྗོད་དང་མཚུངས། །ད་ནི་འུར་སྒྲ་ཚག་ཆོམ་ཆེ་དྲག་པས། །བོས་ཀྱང་འོན་ནས་གོ་རྒྱུ་མེད་དམ་སྙམ། །རྡོ་ལ་ཡིག་དྲུག་བསྔགས་ནས་འཕང་ཙམ་ན། །མེ་ཆེན་ཞི་ནས་དུད་པ་ཕྱུར་རེ་བྱུང་། །དེ་ཚེ་གཤིན་རྗེའི་རྒྱལ་པོ་ལས་མཁན་རྣམས། །ཁྲོས་པས་ཨོཾ་གཙིགས་བསྡམས་ཤིང་སྡང་མིག་བལྟ། །ཅི་བྱེད་རེད་ཟེར་སྟག་གི་མགོ་ཅན་གྱིས། །སྟག་གི་ཁུལ་མོ་རི་ཙམ་ཁྱེར་ནས་བྱུང་། །གཟིག་མགོ་ཅན་གྱི་གཟིག་ཁུལ་རི་ཙམ་ཁྱེར། །འུར་འུར་ཟེར་ཞིང་ཟངས་ཞབས་མེ་ཆེན་སྦྱར། །ནང་ནས་ངུ་འབོད་ཚག་དང་ཕྱུར་རུ་རུ། །རང་དབང་མེད་པར་བཟོད་མེད་སྙིང་རྗེ་སྐྱེས། །ཁྲི་ཐོག་དེ་ནས་ཇོ་དབྱངས་རིང་པོ་འཐེན།། །དེ་མ་ཐག་ཏུ་འུར་སྒྲ་ཚག་སྒྲ་ནི། །འབྲུག་ལས་ཆེ་བ་དང་བཅས་འོད་ཆེན་པོ། །གཅིག་
བྱུང་ཟངས་ནང་གྲྭ་པ་མ་ལུས་པ། །འོད་ཀྱིས་བཏུམས་ནས་རྒྱང་རིང་ག་ཤེད་དུ། །འཕང་སོང་གྲྭ་པ་ཐམས་ཅད་ཐར་སོང་ངོ་། །གར་ཡོད་སྙམ་ཞིང་རྗེས་སུ་རྒྱུག་བྱོན་པས། །ཕ་ཟད་ཅིག་ཏུ་ཡི་དྭགས་ལུས་སུ་གྱུར། །ལྟོ་བ་ཆེ་ཞིང་རྐང་ལག་ཤིན་ཏུ་ཕྲ། །ཁ་ན་མེ་འབར་ལྟོགས་སྐོམ་རང་དབང་མེད། །ཀྱེ་མ་ཁྱེད་རྣམས་ཡར་ཤོག་སྨྲས་པས་བྱུང་། །རྒྱབ་ན་མེ་དཔུང་ཆེན་པོས་འདེད་ཅིང་གདའ། །དྲུང་དུ་བསླེབས་ནས་འདི་ནས་ཡར་སོང་དང་། །སྐྱིད་པོ་ཡོད་ཅེས་གསུངས་ནས་ལམ་བསྟན་པས། །ལམ་ནི་དཀར་པོ་དགུང་ལ་ཟུག་འདྲ་བར། །ཐམས་ཅད་ཡར་ལ་ཐར་ནས་སོང་བར་གཟིགས། །ཀྱེ་མ་ཀྱི་ཧུད་ཨ་ཙ་མ། །སྡོམ་པ་དམ་ཚིག་བླ་མའི་དོན། །བླ་མས་མ་ཐོས་དེས་ཆོག་སྙམ། །ལྐོག་ཏུ་ནག་ཆང་བག་མེད་སྤྱོད། །འདོན་པ་ཆོས་སྤྱོད་སྤྱི་པའི་ཁྲལ། །ཁ་རམ་རྫུན་རམ་མགོ་མཇུག་མེད། །ཁ་ལྕེ་ངག་འཁྱལ་སྨྲ་ལྕེ་བདེ། །དེ་མིན་བསྙེན་པ་གསོལ་འདེབས་སོགས། །ཁ་རུ་འབུ་ཞུགས་དོགས་དང་མཚུངས། །ཟིན་ཐུན་བསྐུལ་ན་ཞེ་སྡང་མཐོང་། །སེམས་བསྐྱེད་ཆགས་སྡང་འདྲེ་རུ་བསྒོམས། །ཁྲིད་རིམ་བཤད་ན་ས་རྡོ་འདྲ། །སློབ་གཉེར་བཅུག་ན་བོང་བུ་
འདྲ། །ཟ་ཆེ་འཐུང་མང་དཀོར་ལ་རྔམ། །འདོད་པ་ཆེ་ཞིང་མགུ་དུས་མེད། །དཀོར་ལ་གཅོད་བྲག་སེམས་རྒྱ་ཡངས། །མཆེད་གྲོགས་རྣམས་ལ་ལྷག་པར་སྡང་། །བླ་མ་སུ་ལའང་དད་གུས་མེད། །ཟབ་ཆོས་གང་ལའང་ཡིད་མི་ཆེས། །རང་རྩིས་ཆེ་ལ་བློ་ཤོ་རྒོད། །དུག་ལྔ་ཧྲག་ཅིང་ང་རྒྱལ་ཆེ། །འཆི་བ་ཡིད་ཀྱི་ཡུལ་ན་མེད། །ལས་འབྲས་བཤད་ན་མི་བདེན་སྙམ་།དག་སྣང་ཆུང་ལ་ལོག་ལྟ་ཆེ། །ཐམས་ཅད་རང་དང་ཁྱད་མེད་རྩི། །རང་གི་གཅར་སའི་བླ་མ་ཡང་། །གཟའ་དཔོན་འདྲ་བར་རྩི་བ་ལས། །སྙིང་ལ་དད་གུས་རྡུལ་ཙམ་མེད། །དེ་འདྲའི་དཀོར་ཟན་མང་པོའི་ཁྱུ། །ཟངས་དམར་ནང་དུ་བཙོས་པ་དང་། །ཡི་དྭགས་ཁ་ལ་མེ་འབར་དུ། །སྐྱེས་པ་དེ་དག་འདྲེན་པ་ལ། །ས་བཅུ་ནོན་པའི་སེམས་དཔས་ཀྱང་། །མཉམ་དུ་ཟངས་ནང་ཕེབས་དགོས་དང་། །བསྒུག་གཉུག་འོ་བརྒྱལ་བྱུང་ཚུལ་འདི། །ཐོས་ནས་དེ་འདྲའི་དཀོར་ཟན་རྣམས། །འཇིགས་སྐྲག་ཡ་ང་མི་སྐྱེའམ། །སྐྱེས་ནས་སྔར་བྱས་འགྱོད་པ་དང་། །ཕྱིན་ཆད་ཆོས་བཞིན་མཛད་པར་རིགས། །གྲྭ་པ་དཀོར་ཟན་དམ་ཚིག་ཉམས་པ་རྣམས་དམྱལ་བ་དང་ཡི་དྭགས་ནས་དྲངས་པའི་ལེའུ་སྟེ་བརྒྱད་པའོ།། །།
དེ་ནས་འགྲོ་ལ་ཐུགས་བརྩེ་བས། །ཕྱིར་བྱོན་ཟངས་དེར་གཟིགས་པ་ན། །ད་རུང་ཟངས་གང་བཙོ་ཞིང་གདའ། །རང་དབང་མེད་པའི་སྙིང་རྗེ་ཡིས། །ཡིག་དྲུག་དབྱངས་རིང་གཅིག་མཛད་པས། །དམྱལ་ཟངས་གང་བའི་སེམས་ཅན་རྣམས། །སྐད་ཅིག་ཉིད་ལ་ཐར་གྱུར་ནས། །རེ་ཞིག་ཟངས་དེ་སྟོང་པར་གྱུར། །མི་དེ་རྣམས་ནི་ལམ་དཀར་པོ། །གཅིག་གིས་རྒྱུད་ལ་ཡར་ཐལ་བས། །དགའ་ཞིང་ཡར་ལ་གཟིགས་ནས་བཞུགས། །དེ་ནས་ཕྱིར་ལ་གཟིགས་ཙམ་ན། །ཟངས་ནང་དེ་ན་སྔོན་བས་ཀྱང་། །མང་བ་ཞིག་ཕྱིན་བཙོ་ཞིང་སྣང་། །ཀྱེ་མ་ད་རུང་འདི་ཙམ་བཙོ། །སྙམ་ནས་སྙིང་རྗེ་དྲག་པོ་ཡིས། །ངུ་འབོད་ཆེན་པོ་གཅིག་ཤོར་བས། །སྤྱན་ཆབ་མང་པོ་ཆར་ལྟར་བབ། །སྤྱན་ཆབ་འབྲུ་མ་རེ་རེ་ལ། །ཨོ་རྒྱན་རྗེ་དང་སྤྱན་རས་གཟིགས། །ལྷ་ཚོགས་མང་པོའི་སྐུར་གྱུར་ཏེ། །དེ་དག་རྣམས་ཀྱིས་འདྲེན་རོགས་མཛད། །ཟངས་གང་སྐྱེ་འགྲོ་ཡར་ལ་ཐར། །ལམ་ནི་དཀར་པོ་གཅིག་ལ་ཐལ། །ཟངས་སུ་བལྟས་པས་ཆུ་ཡང་སྐམ། །གཞན་རྣམས་ཐམས་ཅད་མི་སྣང་ཛ། །སྔ་མ་བྱུང་བའི་རྟ་དམར་ཅན། །དེ་ཉིད་ཡིན་པ་འདྲ་
སྙམ་པའི། །མི་གཅིག་ཟངས་རྐུབ་འབྱར་ནས་གདའ། །ལས་མཁན་རྣམས་ཀྱིས་དབྱུག་པ་ཡིས། །བརྐོག་ཀྱང་བསྐུལ་ཡང་མི་གཏུབ་བོ། །རྡོ་ལ་ཡིག་དྲུག་སྔགས་ནས་འཕངས།། མ་ཎི་དབྱངས་རིང་གཅིག་མཛད་པས། །འདྲེ་ལོག་རེ་རེ་བྱེད་པ་བས། །དེ་ནི་རེ་ཞིག་འདྲེན་མ་ཐུབ། །ཨེ་མ་ས་བཅུའི་སེམས་དཔའ་ཆེ། །རིག་འཛིན་དབང་དྲག་རྒྱ་མཚོ་དེས། །ཡི་གེ་དྲུག་པའི་འཛབ་དབྱངས་ཀྱིས། །དམྱལ་བའི་ཟངས་ཆེན་ལན་གཅིག་སྟོང་། །སེམས་ཅན་ཁམས་ལ་ཟད་པ་མེད། །སླར་ཡང་སྔར་ལས་མང་བར་གཟིགས། །ཚད་མེད་སྙིང་རྗེས་བཤུམ་པ་ལས། །སྤྱན་རས་གཟིགས་དབང་བཤུམ་པ་ལྟར། །སྤྱན་ཆབ་ལྷ་ཚོགས་དཔག་མེད་བྱོན།། །སེམས་ཅན་ཟངས་ཆེན་གང་དེ་དྲངས། །ཤིན་ཏུ་སྡིག་སྟོབས་ཆེ་བ་གཅིག ། རེ་ཞིག་འདྲེན་པར་མ་ཐུབ་སྟེ། །སངས་རྒྱས་རྣམས་ནི་བྱོན་གྱུར་ཀྱང་། །སྐལ་པ་མེད་པས་བཟང་མི་མྱོང་། །དེ་སྐད་བྱམས་པས་གསུངས་དང་མཚུངས། །ཀྱེ་མ་སྡིག་ཆེན་སྙིང་རེ་རྗེ། །འོན་ཀྱང་སྐྱེས་ཆེན་དམ་པ་འདིར། །འབྲེལ་པ་ཐོབ་པས་མ་འོངས་དུས། །འདྲེན་པར་འགྱུར་པས་དེ་ཡང་ནི། །འཁོར་བ་མཐའ་ཅན་ཡིན་པའོ། །སྐྱེས་ཆེན་དམ་པ་འདི་འདྲ་
དང་། །ཆོས་ལ་འབྲེལ་པ་གཏན་མེད་པའི། །དམྱལ་བར་གཏན་ཡུལ་བྱེད་པ་ཡི། །མཐའ་མེད་འགྲོ་རྣམས་སྙིང་རེ་རྗེ། །མནར་མེད་ཟངས་ནང་དུ་བཙོ་བའི་སེམས་ཅན་རྣམས་དྲངས་པའི་ལེའུ་སྟེ་དགུ་པའོ།། ་།དེ་ནས་འདི་སྐབས་སྤྲུལ་སྐུ་ཡིས། །ད་དུང་བཤད་རྒྱུ་ཡོད་ན་ཡང་། །མི་བཤད་མཆི་མ་འཆོར་འོང་གསུངས། །སྐྱོན་མེད་ཤི་ལོག་པ་ཀུན་གྱིས། །ངུ་ཞིང་བཤད་སྲོལ་ཡོད་ཞུས་པས། །འདི་ནི་ཤི་ལོག་མིན་ལེ་གསུངས། །བར་དོའི་རྣམ་ཐར་ལགས་སོ་ཞུས། །དེ་ཡིན་གསུངས་ནས་སྤྱན་གཉིས་ཀྱང་། །སྤྱན་ཆུ་གོར་གོར་མཛད་ཅིང་གསུངས། །དེ་ནས་ཆོས་རྒྱལ་མདུན་དེ་རུ། །གཅོད་པ་དོམ་ར་ཡོད་པ་གཅིག །ཁྲིད་བྱུང་གང་བྱས་ཤོད་དང་གསུངས། །ཁོ་འདར་མདའ་གང་མདུང་གང་འཕར། །ཁོ་ནི་སྐག་སྔངས་ཞུ་མ་ཕོད། །དེ་ཚེ་གཤིན་རྗེའི་རྒྱལ་པོ་དེས། །སྔགས་གཅིག་གསུངས་པས་དེ་མ་ཐག །འཇིགས་བྱེད་སེང་གེའི་མགོ་ཅན་གྱིས། །ལས་ཀྱི་མེ་ལོང་ཆེན་པོ་བསྟན། །གདུག་པ་ཆུ་སྲིན་མགོ་ཅན་གྱིས། །རྡེའུ་དཀར་ནག་མང་དུ་བཀྲམ། །མི་སྲུན་སྤེའུའི་མགོ་ཅན་གྱིས། །དགེ་སྡིག་རྡེའུ་རྒྱ་མར་བཀྱགས། །སེང་གེའི་མགོ་ཅན་སྣ་
གཉེར་ནས། །རྒྱལ་པོ་ལ་ནི་བརྡ་བྱས་པས། །རྒྱལ་པོས་ཨཾ་གཙིགས་ཐམ་ཐམ་བྱེད། །དེ་ནས་སེང་མགོ་ཅན་དེ་ཡིས། །གཅོད་པ་འདི་ཡི་མི་ཤེས་པར། །མི་མགོ་བསྐོར་ནས་གཏོ་ཚོགས་བཅས། །ཡོན་དང་འབུལ་བ་མང་པོ་བླངས། །ཆད་པ་ཐམས་ཅད་དགོས་སོ་ཟེར། །རྒྱལ་པོས་ཁྲམ་ཤིང་རི་མོ་བྲིས། །ཁྲག་མཚོ་དམར་ནག་ལྷོད་དེ་བའི། །ནང་དེར་གཅོད་པ་འཕང་ནི་ཐལ། །སྙིང་རྗེའི་དབང་གིས་ཞི་ཁྲོ་ཡི། །སྙིང་པོ་བྷོ་དྷི་ཙིཏྟ་གསུངས། །དེ་མ་ཐག་ཏུ་འོད་ཟེར་གྱིས། །ཕ་ཟད་གཅིག་ཏུ་འཕང་ནི་ཐལ། །དེ་ཡི་རྗེས་སུ་རྒྱུག་བྱོན་པས། །སྔ་མའི་ལུས་དང་མི་འདྲ་བ། །ལྟོ་བ་ཆེན་པོ་སྒོ་བ་འདྲ། །ལུས་ལ་མེ་ལྕེ་འབར་ཞིང་གདའ། །མགོ་ལ་དོམ་ར་དེ་མི་གདའ། །ཁྱོད་ནི་སུ་ཡིན་གསུངས་པ་ན། །ང་ནི་གཅོད་པ་ཡིན་ཟེར་བས། །མ་རེད་གསུངས་པས་ཡིན་ལགས་ཟེར། །དེ་མ་ཐག་ཏུ་གཤིན་རྗེ་ནི། །སྔོན་པོ་འཇིགས་སུ་རུང་བ་ཡིས། །རལ་གྲིས་ཁོ་ཡི་མགོ་བོ་དང་། །ཁོག་སྟོད་ཁོག་སྨད་བཅད་སོང་ཡང་། །དེ་མ་ཐག་ཏུ་འབྲེལ་བར་གྱུར། །ཡར་སོང་གསུངས་ནས་ལམ་སྣ་བསྟན། །འཇའ་དཀར་གཅིག་གི་རྒྱུད་ལ་སོང་། །ཀྱེ་མ་སྡོམ་མེད་ཡོན་ཏན་མེད། །
མི་ཤེས་བཞིན་དུ་ཟ་འདོད་པས། །མི་མགོ་བསྐོར་ནས་ཟས་ནོར་བསྡུས། །ཡོན་ལ་བྱིན་པའི་སེམས་ཅན་རྣམས། །ཐམས་ཅད་བཤས་ནས་ཤ་ཚིལ་སྤྱོད། །རྫུན་ལ་ཕུག་གཏད་བུད་མེད་གསོས། །ཤིང་གཉན་བཅད་ཅིང་ཁྲག་ཐབས་རྫོགས། །གཟུགས་མེད་དབང་ཆུང་གཞི་བདག་འགའ། །ཤི་རྨས་ཡུལ་བུད་ནད་ཀྱིས་མནར། །དམ་སྲི་བེ་ནག་ཁ་འཛིན་བྱས། །འཕྲལ་དུ་ནུས་པ་ཆེ་ཆེ་འདྲ། །མ་ཅིག་བསྟན་པའི་རྐང་འདྲེན་མཁན། །ཕོ་བདུད་ཐོད་པ་བྷ་ར་དང་། །བདུད་མོ་ལྕོག་ལ་སྒྲོན་གྱི་ལུགས། །གཅོད་ལོག་བྱེད་པའི་དམ་ཉམས་དེ། །བསྐལ་པ་དུ་མར་ཐར་དཀའ་བ། །སྐྱེས་ཆེན་འདི་ལ་འབྲེལ་ཐོགས་པས། །བླ་མེད་ཞི་ཁྲོའི་གསང་སྔགས་མཐུས། །སྐད་ཅིག་ཉིད་ལ་ཐར་བའི་ཚེ། །རྒྱུ་འབྲས་མི་བདེན་ལྟར་གྱུར་པས། །གཤིན་རྗེའི་རྒྱལ་པོ་ལས་མཁན་རྣམས། །ད་རུང་བཏང་རྒྱུ་མི་གདའ་ཞེས། །སེམས་ནད་ཆེན་པོ་བྱེད་ཚུལ་སྟོན། །འདི་འདྲའི་ལོ་རྒྱུས་ཐོས་ཙམ་ན། །དམ་ཉམས་སྡོམ་མེད་ལོག་འཚོ་མཁན། །ཡོད་ན་རྒྱལ་བ་ཞི་ཁྲོ་ཡི། །ཆོས་ལ་འབྲེལ་པ་བཞག་ན་ལེགས། །དག་པར་དཀའ་བའི་ཆག་ཉམས་རྣམས། །ཐམས་ཅད་དེ་ཡིས་དག་གོ་
ཞེས། །ཀུན་ཏུ་བཟང་པོས་གསུངས་པ་དང་། །སྤྲུལ་སྐུས་གཟིགས་ཚུལ་མཐུན་ཕྱིར་རོ། །ཁྲག་མཚོ་ཁོལ་མ་དང་ཡི་དྭགས་ནས་དྲངས་པའི་ལེའུ་སྟེ་བཅུ་པའོ།། ནས་ཆོས་ཀྱི་རྒྱལ་པོའི་དྲུང་། །བོན་པོ་ལྔ་ཙམ་ཕྱིན་ནས་བྱུང་། །བོན་པོ་གཉིས་ནི་ཡར་ལ་སོང་། །གསུམ་དེ་ཟངས་ནང་འཕང་པ་གཟིགས། །གཤེན་རབ་བཀའ་བཞིན་སྒྲུབ་པའི་བོན། །མི་དགེ་བཅུ་སྤང་དགེ་བཅུ་བསྒྲུབས། །སྟོང་ཉིད་སྙིང་རྗེ་ཕྱོགས་ཙམ་རྟོགས། །སྔོན་ཚེ་བན་དེ་ཡེ་ཤེས་སྡེས། །ཆོས་རྒྱལ་གསུང་བཞིན་དམ་ཆོས་བསྒྱུར། །བོན་བློན་རྣམས་ཀྱང་དབང་ཆེ་བས། །དམ་ཆོས་བསྒྱུར་དུ་བཅུག་པའི་ཕྱིར། །བློན་པོའི་ངོ་ལ་བོན་ཡང་བསྒྱུར། །ཐབས་ཀྱིས་བོན་ལ་དམ་ཆོས་བསྲེས། །བཻ་རོ་ཙཱ་ནའི་མཚན་ལ་ཡང་། །གནམ་ལྕགས་ཐོག་རྟ་བྱ་བ་བཏགས། །བོན་པོ་དྲན་པ་ནམ་མཁའ་ཡང་། །ཨོ་རྒྱན་རྗེ་ཡི་རྗེས་སུ་ཞུགས། །བོན་ཆོས་གཉིས་ཀ་བསྲེས་མ་བྱས། །ཤུད་བུ་དཔལ་གྱི་སེང་གེའི་མཚན། །ཤུད་བུ་ར་ཁུག་བྱ་བར་བཏགས། །དེ་བཞིན་ཨོ་རྒྱན་རྗེ་འབངས་རྣམས། །བོན་པོས་མཚན་ཡང་རེ་རེ་གསོལ། །དེ་དུས་ཨོ་རྒྱན་ཆེན་པོ་ཡི། །བོན་པོ་རྣམས་ལ་གནང་
བ་ཡི། །བོན་མིང་བཏགས་པའི་དམ་ཆོས་རྣམས། །གཏེར་དུ་སྦས་ནས་སྨོན་ལམ་བཏབ། །དེ་དག་ཕྱིས་སུ་གཏེར་ཐོན་པ། །ནང་བོན་ཆོས་དང་མཐུན་པ་སྟེ། །དེ་དག་རྗེས་སུ་ཞུགས་པ་རྣམས། །ཡར་ལ་ཐར་བར་གྱུར་པ་ཡང་། །སྤྲུལ་སྐུའི་གཟིགས་དང་མཚུངས་པ་ཡིན། །དེ་འདྲ་མིན་པའི་ཕྱི་བོན་ནི། །གཤེན་རབ་ནུ་བོ་བདུད་ཀྱི་སྤྲུལ། །གཤེན་ཆུང་གོ་བོས་ཕྱི་བོན་བརྩམས། །རྒྱ་གར་པཎ་ཆེན་ཤམ་སྔོན་ཅན། །ཚུལ་ཁྲིམས་འཆལ་ནས་དགེ་འདུན་པས། །ཐལ་དུད་བརྒྱབས་ནས་ཕུད་པའི་ཚེ། །བན་ལ་གནོད་ཕྱིར་ཕྱི་བོན་བརྩམས། །བོད་དུ་གཤེན་དགུར་གླང་དགའ་ཡི། །མཚན་བརྗོད་མ་གཏོགས་བོན་ཆོས་རྣམས། །བཅོས་ཤིང་མིང་བསྒྱུར་བོན་ཆོས་བྱས། །དེ་དག་རྣམས་ཀྱི་རྗེས་འབྲང་བ། །འཇིག་རྟེན་ལྷ་ལ་སྐྱབས་གནས་ཚོལ། །བན་ལ་དུན་རྩེ་ཟེར་ཞིང་བྲུབ། །རྒྱ་གར་ནས་བསྒྱུར་མདོ་རྒྱུད་ལ། །ཨ་ཙ་ར་ཡི་ངན་སྔགས་ཟེར། །དགེ་སྡིག་གཉིས་ལ་བླང་དོར་མེད། །ལས་སུ་ངན་སྔགས་གཏད་སེལ་བསྒྲུབས། །བོན་སྐྱོང་ཟེར་ཞིང་འདྲེ་སྲིན་བསྒྲུབ། །བོན་ལ་དགའ་བའི་ལྷ་འདྲེ་ཡི། །སྡོང་གྲོགས་བྱས་པས་ནུས་མཐུ་ཆེ། །སྙིགས་དུས་མི་དགེ་གང་
བྱུང་བ། །ཁྲི་སྲོང་བོན་བསྣུབས་དོན་ཡིན་ཟེར། །བན་གྱི་འགྲོ་དོན་གང་ཆེ་རྣམས། །ངན་པ་ཡིན་པའི་རྫུན་ལུང་བྲིས། །བན་གྱི་བསྟན་པ་ནུབ་པ་དང་། །ཕྱི་མ་ཞང་ཞུང་ཡུལ་སྐྱེ་བའི། །སྨོན་ལམ་དེ་ལ་བློ་ཕུག་གཏད། །དེ་འདྲའི་ཕྱི་བོན་མུ་སྟེགས་རིགས། །དམྱལ་ཟངས་ནང་ལས་གནས་མེད་པ། །སྤྲུལ་སྐུས་གཟིགས་པ་དེ་དང་མཚུངས། །ཕྱི་བོན་ནང་བོན་གྱི་ཁྱད་པར་གཟིགས་པའི་ལེའུ་སྟེ་བཅུ་གཅིག་པའོ།། །།དེ་ནས་གཤིན་རྗེའི་རྒྱལ་པོའི་དྲུང་། །ཤ་ཙ་སྔོ་བའི་མི་གཅིག་ནི། །ལས་མཁན་རྣམས་ཀྱིས་ཁྲིད་དེ་བྱུང་། །མི་དེ་ཧམ་པ་ང་རྒྱལ་ཆེ། །དམྱལ་བ་ཟེར་བ་ག་ན་ཡོད། །སྟེང་ནི་ནམ་མཁའ་སྟོང་པ་ཡིན། །ཉི་ཟླ་གཟའ་སྐར་སྤྲིན་ལས་མེད། །འོག་ནི་ས་དང་རྡོ་དང་ཡིན། །དམྱལ་བ་བདེན་པར་གྲུབ་པ་མེད། །ཟེར་ཞིང་ཡར་ལ་རྔམ་རྔམ་བྱས། །དེ་མ་ཐག་ཏུ་ལས་མཁན་ཚོས། །ཟངས་རྐུབ་དེ་རུ་ཏིག་ཟེར་འཕངས། །མེ་ཆེན་སྦར་ཞིང་རབ་ཏུ་བཙོ། །དེ་ནས་སེམས་ཅན་དེ་རྣམས་ལ། །ཁྱེད་ཚོ་ཅི་འགྱི་ཡིག་དྲུག་ཐོན། །གསུངས་པས་ཚུར་ལ་ཅི་འགྱ་ཟེར། །མིག་བསྒྲད་ཁ་པོ་མགོ་འགུགས་བྱེད། །མི་ནི་ཤ་རྩ་སྔོ་བ་ཅན། །ཇི་ལྟར་བྱས་ཀྱང་
འདྲེན་མ་ཐུབ། །ཀྱེ་མ་མུ་སྟེགས་ཆད་ལྟའི་རིགས། །མི་ཤི་ཡུ་མེད་ཡིན་ཟེར་ནས། །ཕྱི་མ་མེད་པར་བརྩི་བ་དང་། །ཤཱཀ་ཐུབ་གསུངས་པ་མི་བདེན་ཟེར། །ཆོས་ལ་ལོག་པར་ལྟ་བ་དང་། །དགེ་སྡིག་རྒྱུ་འབྲས་མི་བདེན་ཏེ། །སྐྱིད་སྡུག་བྱེད་པོ་དབང་ཕྱུག་སྟེ། །འཇིག་རྟེན་མྱེས་པོས་བྱས་ཟེར་དང་། །དགེ་སྡིག་རྒྱུ་འབྲས་མ་ཡིན་པར། །ངོ་བོ་ཉིད་ཀྱི་རྒྱུ་ཡིན་ཏེ། །སྲིད་པས་བཞག་པ་ཡིན་ཟེར་བའི། །མུ་སྟེགས་ལོག་པར་ལྟ་བ་དང་། །མུ་སྟེགས་མིན་ཀྱང་ཕྱོགས་མཐུན་པའི། །སྟོང་ཉིད་དངོས་སུ་མ་རྟོགས་པར། །གོ་བ་ཙམ་ལ་གདིང་བཅས་ནས། །ཐམས་ཅད་སྟོང་པ་ཉིད་ཡིན་པས། །ནམ་མཁར་ཆུ་ནི་མི་ཆགས་ལྟར། །དགེ་སྡིག་ཕན་གནོད་མེད་ཟེར་ནས། །རྒྱུ་འབྲས་ཁྱད་དུ་གསོད་པ་རྣམས། །ནམ་ཡང་ཐར་པའི་དུས་མེད་དེ། །སྤྲུལ་སྐུའི་ཐབས་དང་ཐུགས་རྗེ་ཡིས། །ཇི་ལྟར་བྱས་ཀྱང་འདྲེན་ཐབས་རྡུགས། །མུ་སྟེགས་ཆད་ལྟའི་རིགས་འདྲེན་ཐབས་མ་རྙེད་པའི་ལེའུ་སྟེ་བཅུ་གཉིས་པའོ།། །།དེ་ནས་ཆོས་རྒྱལ་དྲུང་དེ་ན། །ཡུན་ཡང་རིང་བར་མ་བཞུགས་ཏེ། །ཐུར་ཁ་གཅིག་ལ་ཡུན་རིང་བྱོན། །ལྕགས་སྲེག་ས་གཞི་དམར་ལམ་མེ། །
མཚལ་གྱིས་བྱུག་པ་ལྟ་བུ་ལ། །རྐང་པ་བཞག་ན་སྲེག་པའི་སར། །མེ་དཔུང་བསམ་མི་ཁྱབ་པའི་ནང་། །མི་ནི་དཔག་མེད་ཚིག་ཅིང་གདའ། །ངོ་ཤེས་མི་ཡང་མང་དུ་གདའ། །ངུ་འབོད་སྨྲེ་སྔགས་ཆེན་པོ་ཡིས། །ས་གཞི་དེ་ཡང་འགུལ་སྙམ་བྱེད། །ཀྱེ་མ་སེམས་ཅན་ཨ་ཙ་མ། །ལས་ཟད་ཁྱེད་ཚོ་ཡིག་དྲུག་ཐོན། །གསུངས་ཀྱང་གོ་རྒྱུ་མི་གདའ་བས། །རང་དབང་མེད་པའི་སྙིང་རྗེ་ཡིས། །རྗེ་ཉིད་མེ་ཡི་ནང་དུ་མཆོངས། །མི་ནི་གཉིས་གསུམ་ཙམ་ཞིག་ལོན། །དེ་ནས་སྙིང་རྗེ་ཆེན་པོ་ཡིས། །རྡོ་ལ་ཡི་གེ་དྲུག་པ་བསྔགས། །མེ་དཔུང་ནང་དེར་འཕང་ཙམ་ན། །མེ་དཔུང་ཞི་ནས་ནག་ཚུབས་སོང་། །ཡུན་རིང་མུན་རུབ་ཅི་མ་མཐོང་། །ཉིད་ཀྱི་དབུ་གཙུག་ནམ་མཁའ་ལ། །སྟོང་སྐུད་ཙམ་གྱི་འོད་དཀར་པོ། །ཁྱུགས་སེ་བ་གཅིག་ཟུག་བྱུང་བས། །ནམ་ལངས་བ་ལྟར་གསལ་བྱུང་བལྟས། །སྔོན་གྱི་མེ་དཔུང་ཆེན་པོ་དེ། །རྗེས་ཡང་མི་སྣང་ཡར་གཟིགས་པས། །འཇའ་ཚོན་དཀར་པོའི་ལམ་རྒྱུད་ལ། །ཐམས་ཅད་ཡར་ལ་ཐར་ཚར་ནས། །མི་གཅིག་རྗེས་ལ་ཡར་སོང་ངོ་། །ཨེ་མ་དམ་ཆོས་རྩ་བ་ནི། །བརྩེ་བ་སྙིང་རྗེ་ཆེན་པོ་མཆོག །བླ་མེད་བྱང་ཆུབ་ས་བོན་ཏེ། །མྱུ་གུ་
བསྐྲུན་པའི་ཆུ་ལུད་དང་། །སྟོན་ཐོག་སྨིན་པའི་འབྲས་བུ་འདྲ། །འཁོར་ལོ་རིན་ཆེན་ཡོད་པ་ན། །རྒྱལ་སྲིད་ཐམས་ཅད་དེ་རུ་འབྱུང་། །དེ་བཞིན་སྙིང་རྗེ་ཆེ་ཡོད་ན། །བྱང་ཆུབ་ཕྱོགས་ཀྱི་ཆོས་ཀུན་འབྱུང་། །སེམས་ཅན་དམིགས་པའི་སྙིང་རྗེ་ནི། །སོ་སྐྱེ་སེམས་དཔའི་ཐུགས་དམ་ལགས། །ཆོས་ལ་དམིགས་པའི་སྙིང་རྗེ་ནི། །སྟོང་ཉིད་རྟོགས་ན་ཤུགས་ལ་འཆར། །དམིགས་པ་མེད་པའི་སྙིང་རྗེ་ནི། །སེམས་དཔའ་ཆེན་པོའི་དགོངས་པ་མཆོག །ཡང་དག་རྫོགས་པའི་སངས་རྒྱས་ལ། །རྣམ་པར་རྟོག་པ་མི་མངའ་ཡང་། །སྙིང་རྗེ་གོམས་པའི་ནུས་མཐུ་ཡིས། །འགྲོ་དོན་འབད་རྩོལ་མེད་པར་འབྱུང་། །དཔེར་ན་ཡིད་བཞིན་ནོར་བུ་འདྲ། །འཛམ་གླིང་མེ་ལས་བདུན་འགྱུར་དུ། །དམྱལ་བའི་མེ་ནི་ཚ་བའི་ནང་། །སྙིང་རྗེའི་དབང་གི་མཆོངས་ནུས་པ། །ཐུགས་རྗེ་ཆེན་པོ་མིན་ནམ་ཅི། །ཚད་མེད་སྙིང་རྗེ་ཆེན་པོ་དང་། །ཡི་གེ་དྲུག་པའི་གསང་སྔགས་ཀྱི། །རབ་འབར་དམྱལ་བའི་མེ་ཆེན་ནི། །བསྐལ་པ་འཇིག་པའི་མེ་ལྟ་བུ། །འུར་སྒྲ་འབྲུག་ལྟར་ལྡིར་བ་དེ། །སྐད་ཅིག་ཉིད་ལ་ཞི་བ་ན། །ངུ་འབོད་ཆེན་པོའི་དམྱལ་ཁམས་ཀྱང་། །འཇའ་ཡལ་ལྟ་བུར་
གྱུར་པ་ཡི། །བྱང་ཆུབ་སེམས་དཔའི་ཕྲིན་ལས་ནི། །ཨེ་མ་ངོ་མཚར་རྨད་དུ་བྱུང་། །འདི་དང་གང་འབྲེལ་བསྐལ་བ་བཟང་། །དམྱལ་བ་ངུ་འབོད་ཆེན་པོའི་གནས་རེ་ཞིག་སྟོང་པར་མཛད་པའི་ལེའུ་སྟེ་བཅུ་གསུམ་པའོ།།་་།།དེ་ནས་ཕྱིར་ལ་བྱོན་པ་ལ། །སྒྱེད་པུ་རི་དང་འདྲ་བ་གསུམ། །དེ་སྟེང་ཟངས་ཆེན་ཁ་སྦྱོར་ཞིག །བཙོ་ཞིང་འདུག་པ་དེ་རུ་ཕེབས། །ལས་ཀྱི་གཤིན་རྗེའི་ཚོགས་རྣམས་ལ། །ཟངས་འདི་ཕྱེས་དང་ལྟ་འདོད་གསུངས། །མི་ལུས་ཆུ་སྲིན་མགོ་ཅན་གྱིས། །ཟངས་དེའི་སྟེང་མ་ཡར་བཀྱགས་པས། །མི་ནི་ཟངས་དེ་གང་བ་སྣང་། །ཡིག་དྲུག་ལ་སོགས་མ་གསུངས་ཀྱང་། །དེ་ལ་གཟིགས་པས་དེ་མ་ཐག །དཔེར་ན་འཇའ་ཚོན་ཡལ་བ་ལྟར། །མི་རྣམས་ཐམས་ཅད་མི་སྣང་སྟེ། །ཟངས་དེ་སྟོང་པ་རེད་ནི་སོང་། །སྟོང་ཉིད་སྙིང་རྗེའི་སྙིང་པོ་ཅན། །དམིགས་པ་མེད་པའི་སྙིང་རྗེ་སྟེ། །སྙིང་རྗེ་བསྒོམ་ཡུལ་སྒོམ་མཁན་མེད། །འཁོར་བ་རང་བཞིན་མེད་པར་གཟིགས། །གང་ཟག་མེད་ཅིང་སྲོག་ཀྱང་མེད། །བདག་ཀྱང་མེད་དེ་བཏགས་པ་ཙམ། །དེ་བཞིན་འགྲོ་བ་རིགས་དྲུག་དང་། །ངན་སོང་མཐོ་རིས་ཞིང་ཁམས་སོགས། །རང་གི་སེམས་ཀྱི་སྣང་ཆ་
ལས། །གཞན་དུ་བདེན་པར་གྲུབ་པ་མེད། །སེམས་ཉིད་གདོད་ནས་སྤྲོས་པ་མེད། །ཡོད་མིན་མེད་མིན་གཉིས་ཀ་མིན། །གཉིས་ཀ་མེད་པའང་མ་ཡིན་ཏེ། །སྨྲ་བསམ་བརྗོད་བྲལ་སྟོང་ཉིད་དོན། །འཕགས་བཞི་བསྐྱེད་ཡུམ་ཕ་རོལ་ཕྱིན། །འདས་པ་མེད་པའི་ཕྱག་རྒྱ་ཆེ། །ཤེས་བྱ་ཀུན་གྱི་རབ་དང་མཆོག །མཐའ་བཞི་བྲལ་བ་དབུ་མའི་ལམ། །སྡུག་བསྔལ་ཐམས་ཅད་ཞི་བའི་སྨན། །ཆོས་ཀུན་དེར་རྫོགས་རྫོགས་པ་ཆེ། །གཞོན་ནུ་བུམ་སྐུ་ཐིག་ལེ་ཅིག །དང་པོའི་སངས་རྒྱས་གདོད་མའི་མགོན། །དེ་ཉིད་མངོན་སུམ་རྟོགས་པའི་ཕྱིར། །གཟུངས་སྔགས་ལ་སོགས་ཐབས་ཀྱི་ཆ། །གཞན་ལ་ལྟོས་པ་མ་མཆིས་པར། །གཟིགས་པ་ཙམ་གྱིས་བསྟིར་མེད་པའི། །དམྱལ་ཟངས་སྟོང་པར་མཛད་པ་དེ། །དམིགས་མེད་སྙིང་རྗེ་མི་ཟེར་རམ། །བསྟེར་མེད་པའི་སེམས་ཅན་དམྱལ་བའི་གནས་རེ་ཞིག་སྟོང་པར་མཛད་པའི་ལེའུ་སྟེ་བཅུ་བཞི་པའོ།།་་་།།དེ་ནས་རྒྱང་རིང་ཕར་བྱོན་པས། །མི་གཞོན་བྱིས་སྦ་འདྲ་བ་ཞིག །ལྕགས་ཐག་བརྒྱ་ཕྲག་མང་པོས་བཏགས། །ཐོ་བ་ཐོགས་པ་མང་པོས་བརྡུང་། །སྐམ་པ་ཐོགས་པ་མང་པོས་བཏོག །རྩི་ཤར་ཀྲ་
རད་ངུ་འབོད་བྱེད། །དེ་འདྲ་གཟིགས་པས་སྙིང་རྗེ་སྐྱེས། །སྒྲིབ་སྦྱོང་གཙོ་བོ་རྡོར་སེམས་ཀྱི། །ཡི་གེ་བརྒྱ་པའི་སྔགས་གསུངས་པས། །ལྕགས་ཐག་ཐམས་ཅད་དུས་གཅིག་ཆད། །འཇའ་ནི་དཀར་པོའི་ལམ་གཅིག་ནི། །གནམ་ལ་ཟུག་པ་འདྲ་གཅིག་སྣང་། །ཡར་ལ་ལམ་དེར་སོང་གསུངས་པས། །ཡ་འོ་ཟེར་ཞིང་ཐར་སོང་ངོ་། །སྒྲིབ་སྦྱང་ཀུན་གྱི་མཆོག་གྱུར་པ། །གསང་སྔགས་ཡི་གེ་འབྲུ་བརྒྱ་པ། །ལྟུང་དང་དྲི་མ་ཐམས་ཅད་ཀུན། །ལན་གཅིག་བརྗོད་པས་དག་པར་གསུངས། །ཁྱད་པར་རིག་འཛིན་ཆེན་པོ་ཉིད། །རྡོར་སེམས་སྤྲུལ་པའི་ཆར་གཏོགས་ཕྱིར། །ལས་ངན་སྡིག་ཆེན་དེ་འདྲ་ཡང་། །ཡིག་བརྒྱ་ལན་གཅིག་གསུངས་པས་དྲངས། །རྡོར་སེམས་རིགས་ལྔའི་ཡིག་བརྒྱ་ནི། །ལན་གཅིག་རྣ་བར་ཐོས་ན་ཡང་། །ཉམས་ཆག་ཐམས་ཅད་བསྐང་བར་གསུངས། །རྡོར་སེམས་ཉེ་སྙིང་ཡི་གེ་དྲུག །འབུམ་ཕྲག་བཅུ་གཉིས་བཟླས་ན་ནི། །དམ་ཚིག་ཉམས་པ་སོར་ཆུད་ནུས། །དེ་ལྟར་རྡོར་སེམས་ཕན་ཡོན་རྣམས། །སྤྲུལ་སྐུས་གཟིགས་དང་མཚུངས་པ་སྟེ། །ཉམས་ཆག་སྡིག་སྒྲིབ་ཆེ་བ་ཀུན། །རྡོར་སེམས་འདི་ལ་ཐུགས་དམ་མཛོད། །ཡི་གེ་བརྒྱ་པ་ལན་གཅིག་གསུངས་
པས་ཉེ་འཁོར་གྱི་དམྱལ་བའི་སེམས་ཅན་དྲངས་པའི་ལེའུ་སྟེ་བཅོ་ལྔ་པའོ།། །།དེ་ནས་ཡར་ནི་བྱོན་སོང་བས། །མི་ནི་དཔག་ཏུ་མེད་པ་སྣང་། །མི་ལུས་ཤ་བའི་མགོ་ཅན་གཉིས། །མི་དེ་རྣམས་ལ་མདའ་བརྒྱབ་བོ། །དགོ་བའི་མགོ་ཅན་དྲུག་ཙམ་གྱིས། །ལྕགས་རྭ་རྣོན་པོས་བརྡུང་ཞིང་གདའ། །ཁྱི་ཡི་མགོ་ཅན་གཉིས་ཀྱིས་ནི། །མི་རྣམས་རྨུགས་ཤིང་འབལ་ཞིང་སྣང་། །གཞན་ཡང་རྣ་བ་ལ་སོགས་པ། །རི་དྭགས་སྣ་ཚོགས་མགོ་བོ་ཅན། །མང་པོས་མཚོན་ཆ་སྣ་ཚོགས་ཐོགས། །མི་རྣམས་ལ་ནི་བརྡེག་ཅིང་གདའ། །དེ་ཚེ་བྱང་ཆུབ་སེམས་དཔའ་ཆེ། །དབང་དྲག་རྒྱ་མཚོ་དེ་ཉིད་ཀྱིས། །སྙིང་རྗེའི་དབང་གི་མ་ཎི་ཡི། །དབྱངས་ནི་རིང་ཞིང་ཆེ་བ་མཛད། །བརྒྱད་བརྒྱ་ཙམ་ཞིག་ཡོད་དམ་སྙམ། །མི་སྐྱ་དེ་དག་ཐམས་ཅད་ཀུན། །དུས་གཅིག་ཉིད་ལ་ཐར་གྱུར་ནས། །ཡར་ལ་ལམ་ནི་དཀར་པོ་ལ། །ཐམས་ཅད་བུད་ནི་ཐལ་བ་གཟིགས། །སེམས་ཅན་གཅིག་གིས་སྲོག་བཅད་ན། །དམྱལ་བ་ཡང་སོས་གནས་སུ་སྐྱེ། །མི་ཡི་ལོ་གཅིག་གང་ཡིན་པ། །རྒྱལ་ཆེན་སྡེ་བཞིའི་ཞག་གཅིག་སྟེ། །དེ་ཡིས་རྩིས་ཀྱི་རང་ལོ་ནི། །ལྔ་བརྒྱ་ཡང་སོས་དམྱལ་
བ་ཡི། །ཚེ་ཡི་ཚད་ནི་ཡིན་པ་ལ། །རི་དྭགས་རྔོན་པ་བརྒྱད་བརྒྱ་ཙམ། །རི་དྭགས་དཔག་མེད་བསད་ན་ཡང་། །ལོག་ལྟ་མེད་པར་དད་གུས་ཀྱིས། །རིག་འཛིན་དབང་དྲག་རྒྱ་མཚོ་ལ། །འབྲེལ་བ་ཅུང་ཟད་ཐོགས་པ་དེས། །ཡི་གེ་དྲུག་པའི་འཛབ་དབྱངས་ཀྱིས། །དུས་གཅིག་ཉིད་ལ་དྲངས་པ་དེ། །སྡིག་པ་ཆུང་བས་མ་ཡིན་ཏེ། །ལོག་ལྟ་མེད་པའི་དད་གུས་ཀྱིས། །བཟང་འབྲེལ་ཆུང་ངུ་གཅིག་བཞག་ཀྱང་། །དེ་ཉིད་དམིགས་མེད་བསྔོ་བ་ཡིས། །རྒྱས་གདབ་དགེ་བ་སྟོབས་ཆེན་འགྱུར། །རྩྭ་སྐམ་ཕུང་པོ་རི་ཙམ་ཡང་། །མེ་སྟག་གཅིག་གིས་བསྲེག་པ་ལྟར། །སྡིག་པ་ཆེན་པོ་ཡོད་ན་ཡང་། །བསམ་པ་དག་ཅིང་མི་དམིགས་པའི། །བསྔོ་བའི་ནུས་པས་སྡིག་པ་འཇོམས། །མདོ་རྒྱུད་རྣམས་ལས་གསུངས་པ་དེ། །སྤྲུལ་སྐུའི་གཟིགས་པ་འདི་དང་མཚུངས། །དེ་ཕྱིར་སྡིག་ཅན་སྐྱེ་བོ་རྣམས། །དད་གུས་བསམ་པ་རྣམ་དག་པས། །ཆོས་ལ་འབྲེལ་པ་བཞག་པ་ན། །ཕན་ཡོན་དེ་ལྟར་ཆེན་པོར་གྱུར། །དམྱལ་བ་ཡང་སོས་ནས་རྔོན་པ་བརྒྱད་བརྒྱ་ཙམ་དུས་གཅིག་ལ་དྲངས་པའི་ལེའུ་སྟེ་བཅུ་དྲུག་པའོ།། །ཤ་ཁྲག་ལུས་ནི་མ་མཆིས་ཀྱང་། །བར་དོའི་ཡིད་ལུས་འོད་ཀྱི་
སྐུ། །རིག་འཛིན་དབང་དྲག་རྒྱ་མཚོ་དེ། །ཡང་ནི་བྱོན་ནས་སོང་སོང་བས། །དུག་ཆུ་ཁོལ་མའི་རྒྱ་མཚོ་ནི། །སྔོ་ནག་མེ་རེ་ལྟར་མི་བཟོད། །དེ་འདྲ་གཅིག་གི་རྩ་རུ་ཕེབས། །སྔགས་པ་གཅིག་དང་རྒན་མོ་གཅིག །གཞན་ཡང་མང་དུ་དེ་ནང་ན། །བཟོད་མེད་སྡུག་བསྔལ་དར་དྲག་པས། །བསྲན་གཟུགས་མེད་པ་མྱོང་ཞིང་གདའ། །ལས་མཁན་རྣམས་ལ་སུ་ཡིན་དྲིས། །བྲང་ང་ཁམས་སུ་འདུག་པའི་དུས། །ཕྲག་དོག་དབང་གིས་བླ་མ་ལ། །དུག་ནི་འདྲེན་དུ་བཅུག་མི་དང་། །བརྔན་པ་ཟ་ནི་འདྲེན་མི་རྣམས། །ཡིན་ནོ་ཟེར་བས་སྙིང་རྗེ་སྐྱེས། །མ་ཎི་ལ་སོགས་སྙིང་པོ་དང་། །གཟུངས་སྔགས་ཟབ་མོ་ཅི་བཏོན་ཀྱང་། །ཕན་པ་མི་གདའ་འདྲེན་མ་ཐུབ། །ཀྱེ་མ་ཀྱི་ཧུད་ཨ་ཙ་མ། །སྙིང་ལ་བདུད་དང་རྒྱལ་འགོང་ཞུགས། །ཕྲག་དོག་ཞེ་སྡང་མེ་ལྟར་འབར། །བསོད་ནམས་ཟད་པས་བསམ་ངན་དྲན། །མཁས་བཙུན་དགེ་བའི་བཤེས་རྣམས་ལ། །ཟས་ངན་དུག་གི་ཚད། །སྟབས་མ་བདེ་ནས་བརྔན་པ་བྱིན། །ནོར་ལ་བལྟས་ནས་འདི་ཕྱི་བརྗེས། །མཚམས་མེད་ལས་ངན་སྡིག་པོ་ཆེ། །བྲང་ང་ཁམས་ན་འདུག་པའི་ཚེ། །ལོ་འགའི་རྒྱགས་དང་
སྐྱིད་བསམ་ཡང་། །མི་ཚེ་དགུན་ཉི་བས་ཀྱང་ཐུང་། །ལས་ཀྱི་གཤིན་རྗེའི་ཁྲམ་ལ་ཐེབ། །བལྟས་པ་ཙམ་ནས་སྙིང་གས་པའི། །མ་རུངས་འཇིགས་པའི་གཤིན་རྗེ་ཡིས། །ཞགས་པས་ཁྲིད་ཅིང་ཐོ་བས་བརྡུང་། །སོད་སོད་རྒྱོབ་རྒྱོབ་ངང་ཉིད་ལ། །བར་དོ་བགྲོད་ལོང་མེད་པ་རུ། །མཚོ་ཡི་ནང་དུ་རྡོ་འཕང་བཞིན། །ཐར་མེད་དུག་ཆུའི་རྒྱ་མཚོར་ལྟུང་། །ཚ་དམྱལ་བརྒྱད་ལ་གཡས་སྐོར་བསྐོར། །གྲངས་དམྱལ་བརྒྱད་ལ་གཡོན་སྐོར་འགྲིམས། །བར་སྐབས་སྤུ་གྲིའི་ལམ་ལ་འགྲོ། །སྐབས་འགའ་རལ་གྲིའི་ནགས་ལ་བགྲོད། །སྐབས་རེ་ཤལ་མ་རི་ལ་འཛེག །རེ་འགའ་ཐལ་ཚན་པུས་ནུབ་འབོག །སྐབས་འགའི་ཆུ་ཚན་རིབ་མེད་རྐྱེལ། །དེ་ནས་དམྱལ་ཁམས་ཤམ་བྷ་ལ། །གོང་གིས་དམྱལ་ཁམས་བཅོ་བརྒྱད་བས། །བདུན་འགྱུར་སྡུག་བསྔལ་ཆེ་བ་ཡི། །དམྱལ་ཁམས་བཅོ་བརྒྱད་སླར་ལ་འགྲིམས། །ནམ་མཁའ་ཇི་སྲིད་ཐར་བ་དཀའ། །དེ་འདྲའི་ལས་ངན་སེམས་ཅན་ལ། །སངས་རྒྱས་བྱང་སེམས་ཐམས་ཅད་ཀྱིས། །དམག་དཔུང་མཛད་ཀྱང་ཐུགས་རྗེ་རྡུགས། །དཔེར་ན་དབང་དྲག་རྒྱ་མཚོས་ཀྱང་། །འདྲེན་མ་ཐུབ་པ་དེ་དང་འདྲ། །རང་གི་གང་བྱས་ལས་
འབྲས་ནི། །རང་ཉིད་མ་གཏོགས་ཁུར་མི་མེད། །ལས་ཀྱི་རྣམ་པར་སྨིན་པ་ནི། །སངས་རྒྱས་སྟོང་གིས་བཟློག་མི་ནུས། །ལོ་རྒྱུས་འདི་དག་བསམ་མཛོད་ལ། །འཆི་བ་སྲོག་ལ་བབ་པའམ། །ལྟོགས་མུག་བཀྲེས་ནས་ཤི་ཐུག་ཀྱང་། །བསམ་ངན་དུག་སྦྱོར་སྤང་བར་མཛོད། །དུག་འདྲེན་མཁན་རྣམས་ཐབས་གང་གིས་ཀྱང་འདྲེན་མ་ཐུབ་པའི་ལེའུ་སྟེ་བཅུ་བདུན་པའོ།། །དེ་ནས་ཕར་ལ་བྱོན་པ་ན། །བྲག་ཆེན་ཆོས་རྩིག་འདྲ་བའི་ཞབས། །བན་གཟུགས་ཨ་མཆོད་གཅིག་མནན་གདའ། །བྲག་དེ་བཀྱགས་བསམ་བཀྱགས་མ་ཐུབ། །དེ་ནས་ཡིག་དྲུག་གསུངས་པ་ཡིས། །བྲག་དེ་བཀྱགས་ཐུབ་མི་དེ་ལོན། །ད་ཁྱོད་ལམ་དཀར་འདི་ལ་སོང་། །གསུངས་ཀྱང་ཡ་ཟེར་འགྲོ་མ་ཉན། །གཟན་མཐུ་འཇུས་ནས་བསྡད་ཡོད་ཛ། །གཤིན་རྗེའི་ལས་མཁན་འཇིགས་རུང་ཞིག །ཨ་མཆོད་ཕྱིར་ལ་འཐེན་པ་ཡིས། །རྗེ་ཉིད་མཉམ་དུ་དྲུད་ལ་ཁད། །འོན་ཀྱང་མ་ཤོར་ཡར་ལ་ལོན། །དེ་ནས་ཁོ་ལ་ལམ་བསྟན་པས། །འཇའ་ཚོན་དཀར་པོའི་ལམ་བརྒྱུད་ནས། །ཨ་མཆོད་ཡར་ལ་ཐར་སོང་ངོ་། །ཨེ་མ་བཅོམ་ལྡན་ཐུབ་པའི་གསུངས། །དམ་ཆོས་དཀོན་
མཆོག་གླེགས་བམ་རྣམས། །བསམ་བཟང་དད་གུས་མོས་པ་ཡིས། །སྒྲ་དག་ལྷག་ཆད་མེད་པ་རུ། །ཀློག་པའི་ཕན་ཡོན་ཚད་མེད་པ། །ཆོས་ནས་གསུངས་པ་ལྟར་ལགས་ཀྱང་། །མི་ཤེས་རྫུན་ཀློག་མི་མགོ་བསྐོར། །ཡིག་རྐང་ཞན་པས་ཚིག་མ་དག །བཀླག་ཐབས་མི་ཤེས་སྔགས་མ་དག །ཁོང་བསྒྱུར་བཟི་ཕུག་གྱང་འགྱེལ་བྱེད། །ཁ་བཙུམ་ཡིད་འདོན་མགོ་བོ་བསྒྲིལ། །ཟས་ལ་འཁོང་ཞིང་ཡོན་ལ་རྩོད། །ཡོན་དུ་གང་བྱུང་སེམས་ཅན་བཤའ། །རོགས་ལ་ཁྲོ་བསྡུར་ཤོག་བུ་བཀྲལ། །གསེར་ཆོས་སྟེང་དུ་སྐྱུག་པ་འདེབས། །འདོན་ཆད་ཡོན་བླངས་ཐོན་བརྫུ་སྨྲ། །ཆོས་ལ་བརྟེན་ནས་སྡིག་པ་བསགས། །དེ་འདྲ་བྱས་པའི་ཨ་མཆོད་དེ། །ཤིན་ཏུ་ཐར་བར་དཀའ་ན་ཡང་། །རིག་འཛིན་དབང་དྲག་རྒྱ་མཚོ་ལ། །འབྲེལ་ཐོབ་དད་གུས་འགྱུར་མེད་ཕྱིར། །ན་བཟར་འཇུས་པ་དེ་ལྟར་ཏེ། །ཡར་ལ་ཐར་བ་ཐུགས་རྗེའི་སྟོབས། །ཀློག་རྫུན་མཁན་དམྱལ་བ་བསྡུས་འཇོམས་ནས་དྲངས་པའི་ལེའུ་སྟེ་བཅོ་བརྒྱད་པའོ།། །།དེ་ནས་ཚུར་ལ་བྱོན་པ་ཡི། །དང་པོ་ཕེབས་པའི་ཟངས་སར་ཕེབས། །མི་ནི་དམར་པོ་ཁྲོ་བོའི་གཟུགས། །མིག་གསུམ་བསྒད་ཅིང་
འཇིགས་སུ་རུང་། །གཟི་བརྗིད་དཔག་ཏུ་མེད་པ་ཡིས། །ལྟ་བར་མི་བཟོད་བལྟས་ནས་ནི། །གཟི་བརྗིད་འོད་ཀྱིས་ཚིག་ལ་ཁད། །དེ་འདྲ་གཅིག་ནི་དེར་བྱུང་ནས། །ད་ཡང་འདྲེན་སྟོན་ཆོག་ནི་ཐལ། །དེ་ཙམ་གྱིས་ཟེར་སྡང་མིག་བལྟས། །ཨཾ་གཙིགས་ཐམ་ཐམ་བྱས་བྱུང་བས། །ད་ནི་འདྲེན་སྟོན་དེ་ཙམ་བྱེད། །དེ་བས་ཕོད་རྒྱུ་མིན་ནམ་དགོངས། །འོན་ཀྱང་དེ་རུ་བཞུགས་ནས་ཀྱང་། །ཟངས་དེ་ལ་ནི་གཟིགས་པ་ཡི། །ཡུད་ཙམ་སྟོང་ཡང་ཡུད་ཙམ་གང་། །རྒྱུན་ཆད་མེད་པར་ཁ་བའམ། །ཆར་པ་འབབ་འབབ་བྱེད་དོ་བས། །འདྲེན་དགོས་བསམ་པ་མེད་ན་ཡང་། །སྙིང་རྗེའི་རང་དབང་མ་བྱུང་ནས། །ལན་རེ་ལ་ནི་ཡིག་དྲུག་གསུངས། །རེས་འགའ་གཟུངས་སྔགས་མང་པོ་གསུངས། །ལན་རེ་མ་ཎིའི་དབྱངས་རིང་འཐེན། །རེས་འགའ་རྡོ་ལ་སྔགས་བཏབ་འཕངས། །དེ་འདྲ་བྱས་པས་དཔག་མེད་པ། །ཐར་ནི་སོང་ཞིང་དེ་ཡི་མུ། །བྱེད་ཅིང་ཡོད་ཛ་མི་དམར་དེ། །བྱུང་ནས་ད་ནི་འདྲེན་སྟོན་དེ། །ཚོད་ཟུང་ཟེར་ཡང་ད་རུང་བསྡད། །ཀྱེ་མ་ཀྱི་ཧུད་ལས་ཀྱི་དབང་། །སྔོན་གྱི་སྨོན་ལམ་ལས་གྲུབ་པའི། །འདོད་ཁམས་འཇིག་རྟེན་འདི་ཡི་སྟེང་། །
གཞན་འཕྲུལ་དབང་བྱེད་ལྷ་གནས་ནས། །དེ་མན་མནར་མེད་ཡན་ཆད་ལ། །དབང་བསྒྱུར་འདོད་པའི་དབང་ཕྱུག་ཅེས། །བདུད་རྒྱལ་སྡིག་ཏོ་ཅན་ཡོད་དེ། །ཁོ་ལ་བུ་ནི་སྟོང་ཕྲག་གཅིག །འཁོར་ནི་བྱེ་བ་བསམ་ཡས་ཏེ། །ཕྱེད་ཙམ་ཐུབ་པས་དམ་ལ་ཐོགས། །སངས་རྒྱས་བསྟན་པ་སྲུང་བའི་ཕྱིར། །དཀར་ཕྱོགས་ཞེས་ནི་བྱ་བར་གྲགས། །ཕྱེད་ཙམ་དམ་ལ་མ་ཐོགས་པས། །ཆོས་བྱེད་རྣམས་ལ་བར་དུ་གཅོད། །སྡིག་ཆེན་རྣམས་ཀྱི་ཁ་རུ་འཛིན། །འདོད་པའི་ཁམས་ཀྱི་འཇིག་རྟེན་གྱི། །སེམས་ཅན་ཐམས་ཅད་ཁོ་ཡི་འཁོར། །ཡིན་ཕྱིར་རེ་རེ་ཐར་ན་ཡང་། །འཁོར་རྣམས་ཉུང་བར་འགྱུར་དོགས་པས། །བུ་གཅིག་ཤི་བའི་མ་བཞིན་སྡུག །སར་གནས་བྱང་ཆུབ་སེམས་དཔའ་རྣམས། །ས་ནས་ས་རུ་འཕར་བ་དང་། །རྫོགས་པའི་བྱང་ཆུབ་ཐོབ་ཁ་རུ། །བདུད་རྒྱལ་ཁོ་ཉིད་དམག་དཔུང་བཅས། །དེར་ལྷགས་བྱང་ཆུབ་བར་ཆད་བརྩམས། །དཔེར་ན་རྒྱལ་བུ་དོན་གྲུབ་ཀྱང་། །ཐོ་རངས་སངས་རྒྱས་ཐོབ་ཀ་རུ། །སྲོད་ལ་བདུད་དམག་བྱུང་དང་མཚུངས། །དེ་བཞིན་དབང་དྲག་རྒྱ་མཚོས་ཀྱང་། །སེམས་ཅན་དཔག་མེད་དྲངས་པ་དེས། །དམྱལ་བའི་འཇིག་རྟེན་སྟོང་
དོགས་ནས། །བདུད་ཀྱི་རྒྱལ་པོ་བློ་མ་བདེ། །སྤྲུལ་པ་ཡང་ཡང་དེར་ལྷགས་ནས། །སེམས་ཅན་འདྲེན་ལ་ཚོད་ཟུང་སྨྲས། །དེ་ལ་སེམས་དཔའི་ཐུགས་བསྔངས་ནས། །འདྲེན་པར་འདོད་པའི་སེམས་བསྐྱེད་ཤོར། །འོན་ཀྱང་སྔོན་གྱི་སེམས་བསྐྱེད་དང་། །སྨོན་ལམ་རྣམ་པར་དག་པའི་མཐུས། །འདྲེན་བསམ་དགོངས་པ་མ་གཏད་ཀྱང་། །སླར་ཡང་སེམས་ཅན་གྲངས་མེད་དྲངས། །དེ་ཚེ་བདུད་རྒྱལ་སྡིག་ཏོ་ཅན། །འདོད་པའི་དབང་ཕྱུག་རབ་ཏུ་ཁྲོས། །བསྡིག་ཅིང་ཆོག་ཐལ་ཟེར་ནས་འཐབ། །དེ་ཚེ་སེམས་དཔའ་ཉིད་ཀྱིས་ཀྱང་། །བྱམས་དང་སྙིང་རྗེའི་མཚོན་བྱེད་པ། །ཆུ་འཇིམ་ཕྱག་ཏུ་བྱུང་བ་བཏབ། །ཁོ་ཡི་ཞེ་སྡང་མེ་དཔུང་། །མི་སྣང་འཇའ་ལྟར་ཡལ་བར་གྱུར། །སེམས་ཅན་དཔག་ཏུ་མེད་པ་དྲངས་པས་བདུད་ཡིད་མ་བདེ་བའི་ལེའུ་སྟེ་བཅུ་དགུ་པའོ།། །དེ་ནས་དམྱལ་བའི་ཐུབ་པའི་དྲུང་། །བླ་མ་ཞྭ་དམར་གྱོན་པ་ཡི། །ཤ་མདོག་ནག་དང་འགྱག་གེ་བ། །བདུན་ནི་དུས་གཅིག་ཕེབས་བྱུང་བ། །འདར་ནས་ཞུ་འགོ་མི་སྣང་ཛ། །ལས་མཁན་སེང་གེའི་མགོ་ཅན་གྱིས། །ལས་ཀྱི་མེ་ལོང་ངོས་ལ་བལྟས། །བླ་མ་འདི་
རྣམས་སྡོམ་པ་མེད། །མི་སྐྱ་ཕལ་པས་ཐུ་བ་ལ། །བླ་མ་བཟང་པོ་ཡིན་པར་བརྫུས། །དཀོར་ནི་མང་པོ་ཟོས་ཟིན་ཟེར། །དམྱལ་ཟངས་ནང་དུ་འཕང་ནི་ཐལ། །ཐབས་དང་ཐུགས་རྗེ་ཅི་བྱས་ཀྱང་། །དེ་རྣམས་འདྲེན་པར་མ་ཐུབ་བོ། །ཀྱེ་མ་ཀྱི་ཧུད་ཨ་ཙ་མ། །སྡོམ་པ་དམ་ཚིག་མི་སྡུན་ཆོས། །སྡིག་ལྟུང་ཉམས་ཆག་ལྐོག་ནོར་གསོག །ཕྲ་ཞིབ་བཙུན་ཚུགས་བཟང་བཟང་འདྲ། །རྔམ་ཆེན་སྡིག་ལ་ཡ་ང་མེད། །མི་ཤི་ཐོས་ནས་ཅི་འབུལ་སྙམ། །མ་ཕུལ་ཐུབ་ན་ཁ་མཆུ་འཛུགས། །རང་གིས་དབང་ལུང་མ་ཐོབ་པར། །དཔེ་འཁྱམས་བཟུང་ནས་རྫུན་དབང་བསྐུར། །རང་གིས་འཕོ་བ་མ་སྦྱངས་དང་། །ཚེ་འདས་སྔས་ན་གྱེར་མོ་གཟབ། །ཕུང་པོ་དུ་མའི་སྔས་ཕྱིན་ཀྱང་། །རང་ལ་འཆི་བ་འོང་སྙམ་མེད། །ཡི་དམ་བསྙེན་སྒྲུབ་མ་ཐེམ་བར། །དབང་བསྐུར་རོ་སྲེག་བྱང་བུ་བཞུ། །ཚེ་འདས་བརྒྱ་སྟོང་ལམ་བསྟན་ཀྱང་། །རང་ཉིད་གར་འགྲོའི་ངེས་ཏིག་མེད། །ནང་ན་ཞེ་སྡང་ཕྲག་དོག་འབར། །ཕྱི་ནི་ཐེར་ཕྲུག་གང་བཟང་གྱོན། །ཅི་ཡོད་ཕུལ་ཀྱང་མགུ་དུས་མེད། །ཁྲོ་ཞིང་ཚིག་ཟུར་འཁོང་ཞིང་འཁྱེར། །ཅུང་ཟད་ཙམ་ལ་མཐུ་བསྡིག་བྱེད། །ཁ་མཆུ་འཐབ་རྩོད་བཀའ་བཀྱོན་
མང་། །ཆོས་བཞིན་སྤྱོད་ལ་ལྷག་པར་སྡང་། །དཀོར་རྫས་ཆར་ལྟར་བབ་ན་ཡང་། །ད་དུང་བྱུང་ན་བསམ་པ་ལས། །ཞུ་དང་མི་ཞུ་སེམས་མི་ཕྲེང་། །དད་པ་ཅན་གྱིས་ནོར་ཕུལ་ན། །ངན་སོང་མི་བཏང་ཁས་ལེན་བྱེད། །རྒྱུས་མེད་མི་ནག་ཕོ་མོའི་དྲུང་། །འོད་གསལ་འཁོར་ཡུག་ཡིན་སྐད་སྨྲ། །རྟོགས་པ་མཐོན་པོ་ཡིན་སྐད་ཀྱི། །ཆང་ལ་རྒྱུ་མེད་སྐྱུགས་པ་སྔས། །བསྔོས་ཤ་དྲངས་ན་ཚོ་ལྗད་གླེང་། །དེ་འདྲའི་བླ་མ་བདུན་པོ་དེ། །རིག་འཛིན་དབང་དྲག་རྒྱ་མཚོས་ཀྱང་། །ཐབས་སྟོབས་གང་གིས་འདྲེན་མ་ཐུབ། །མནར་མེད་ཟངས་དཀར་ནང་དུ་སོང་། །སངས་རྒྱས་སྟོང་གི་བསྟན་གཞུག་བར། །དེ་བས་ཐར་ཐབས་མ་མཆིས་སོ། །སངས་རྒྱས་མོས་པའི་བསྟན་འཇུག་ལ། །ཐར་བ་ཆོས་གོས་གྱོན་པ་ཡི། །བྱིན་རླབས་ཤཱཀ་ཐུབ་སྨོན་ལམ་ཡིན། །ཀྱེ་མ་སྙིགས་དུས་བླ་མའི་མིང་། །སྤྲང་པོ་ཀརྨ་ཆགས་མེད་ཁྱོད། །ལོ་རྒྱུས་འདི་འདྲ་ཐོས་པ་ན། །རང་གིས་སེམས་རྒྱུད་གཞིག་འདྲེལ་ཐོང་། །ད་ལྟ་བཅོས་ཐབས་ཡོད་དུས་འདིར། །རང་གིས་རང་ཉིད་མ་ཕུང་ལ། །ཚེ་ཡི་ལྷག་མ་གང་འདུག་ལ། །དམ་ཆོས་ཚུལ་བཞིན་སྤྱོད་ན་ལེགས། །དེ་ལྟར་
ཚིགས་བཅད་རིང་མོ་དེ། །གཞན་ལ་སྐུར་འདེབས་མ་ཡིན་ཏེ། །རང་གིས་རང་ལ་ཡི་མུག་སྨྲས། །བླ་བརྫུ་བྱེད་ནས་དཀོར་བག་མེད་དུ་སྤྱོད་པ་བདུན་འདྲེན་མ་ཐུབ་པའི་ལེའུ་སྟེ་ཉི་ཤུ་པའོ།། །།དེ་ནས་མང་པོ་འདྲེན་བསམ་བྲལ། །ཆོས་ཀྱི་རྒྱལ་པོའི་དྲུང་དེ་ན། །གྲྭ་པ་གཉིས་དང་ཡོན་བདག་གསུམ། །ཁྲིད་ནས་ཡར་ལ་བྱོན་འོང་བས། །རྒྱབ་ནས་མི་སྐྱ་ཕོ་མོ་ནི། །རྩི་རྩི་གྲངས་མེད་ཉི་ལི་ལི། །ཐམས་ཅད་ཡར་ལ་གཤར་ནི་བྱུང་། །རིག་འཛིན་དབང་དྲག་རྒྱ་མཚོ་དེ། །འབྲེལ་ཚད་དོན་དང་ལྡན་པའི་ཕྱིར། །ཞལ་མཐོང་གསུང་ཐོས་ཆོས་འབྲེལ་དང་། །དབང་དང་བྱིན་རླབས་བཀའ་བསྒོའི་འབྲེལ། །ཟས་ནོར་བསྔོ་སྨོན་བྱང་བུའི་འབྲེལ། །སྐུ་མཚལ་གསང་ཆབ་དབུ་ལོ་དང་། །ན་བཟའ་ལ་སོགས་བདུག་དང་ཟོས། །སྐྱེ་བདུན་ལ་སོགས་དམ་རྫས་འབྲེལ། །སྐུ་ཤ་འདྲེས་པའི་རིལ་བུ་སོགས། །འབྲེལ་པ་ཐོབ་ཚད་སེམས་ཅན་རྣམས། །འདྲེན་པར་ཨོ་རྒྱན་ལུང་བསྟན་ལྟར། །ཐམས་ཅད་མཐོ་རིས་ཐར་པ་ཡི། །ཞིང་དུ་ཐམས་ཅད་དྲངས་བར་མཛད། །བྱང་ཆུབ་སེམས་དཔའ་ཆེན་པོ་ཡི། །སྟོབས་དང་རྫུ་འཕྲུལ་ཨེ་མ་ཧོ། །སྐྱེས་ཆེན་དམ་པ་མཆོག་རྣམས་
ལ། །ཐེ་ཚོམ་ལོག་ལྟ་མེད་པ་ཡིས། །འབྲེལ་པ་སྣ་རེ་ཐོབ་ན་ཡང་། །འདི་འདྲེན་འདི་མི་འདྲེན་པ་ཡི། །བསམ་གཞིག་དབྱེ་གསལ་ག་ལ་དགོས། །མ་གྱུར་སེམས་ཅན་མ་ལུས་པ། །རྫོགས་པའི་སངས་རྒྱས་སར་བཀོད་པའི། །སེམས་བསྐྱེད་སྨོན་ལམ་རྒྱ་ཆེན་པོ། །གྲངས་མེད་བསྐལ་པའི་གོང་ནས་མཛད། །བསྐལ་པ་བྱེ་བ་བརྒྱ་སྟོང་དུ་།བསྐྱེད་རྫོགས་ཕར་ཕྱིན་དྲུག་ལ་སྦྱངས། །བསོད་ནམས་དང་ནི་ཡེ་ཤེས་ཀྱི། །ཚོགས་གཉིས་རྒྱ་མཚོ་ལྟ་བུར་བསགས། །དེ་འདྲའི་དམ་པ་སྐྱེས་ཆེན་རྣམས། །སེམས་ཅན་འདྲེན་ལ་འབད་རྩོལ་མེད། །རྩོལ་མེད་ལྷུན་གྲུབ་འགྲོ་དོན་འབྱུང་། །དཔེར་ན་བདེ་ཆེན་མངོན་དགའ་སོགས། །ཞིང་ཁམས་བཀོད་པ་ཁྱད་འཕགས་དང་། །སངས་རྒྱས་ཡོན་ཏན་ཚད་མེད་རྣམས། །བྱང་ཆུབ་སེམས་ཀྱི་རྒྱུན་བསྔོ་སོགས། །བར་དུ་ཚོགས་གཉིས་བྲེ་ཁ་གང་། །སྨོན་ལམ་དག་པས་ཁ་ལོ་བསྒྱུར། །ད་ལྟ་འབད་རྩོལ་བྲལ་དང་མཚུངས། །འབྲེལ་པ་ཐོགས་ཚད་དྲངས་པའི་ལེའུ་སྟེ་ཉེར་གཅིག་པའོ།། །དེ་ནས་དམྱལ་ཁམས་ཕྱིར་ལུས་ནས། །བར་དོའི་སྐབས་སུ་ཕེབས་ཟིན་པས། །ཚེ་རབས་དུ་མར་རྗེས་བཟུང་
བའི། །དྲིན་ཆེན་ཨོ་རྒྱན་རིན་པོ་ཆེ། །སྐུ་མདོག་དཀར་ལ་དམར་བའི་མདོག །དབུ་ལ་པདྨ་མཐོང་གྲོལ་ཞྭ། །རྩེ་ལ་གསེར་གྱི་རྡོ་རྗེའི་མཚན། །ཁྱུང་གཤོག་གསེར་མདངས་འོད་དུ་འབར། །སྐུ་ལ་ཟ་འོག་བེར་ཆེན་སྟེང་། །ཆོས་གོས་གསེར་གྱི་ཧ་རིས་གསོལ། །རྡོ་རྗེ་བྷན་བུམ་པ་དང་། །ཌ་མ་རུ་དང་དྲིལ་བུ་འཛིན། །ཁ་ཊྭཱྃ་ག་ནི་མེད་པ་ཞིག །ཞབས་གཉིས་བཞེངས་སྟབས་འབྱོན་ཞིང་གདའ། །བླ་མ་དྭགས་ཞུ་སེར་པོ་ཅན། །ཆོས་གོས་དམར་པོ་མནབ་པ་ཞིག །གྲྭ་པའི་ཚུལ་དུ་མཉམ་དུ་འབྱོན། །ཉིད་ཀྱི་བླ་མ་དཔལ་འབར་བ། །ནམ་མཁའ་རྒྱ་མཚོ་ཡིན་ནམ་སེམས། །དད་པས་དེ་གཉིས་དྲུང་དུ་རྒྱུག །དེ་ནས་ཨོ་རྒྱན་རིན་པོ་ཆེ། །ཐེག་པ་ཆེན་པོ་བླ་མེད་ལུགས། །རྫོགས་པ་ཆེན་པོའི་ལུགས་བཞིན་དུ། །སྐྱབས་སུ་འགྲོ་དང་སེམས་བསྐྱེད་དང་། །ཡེ་ཤེས་སྤྲུལ་པའི་དཀྱིལ་འཁོར་དུ། །དབང་བཞི་ཡོངས་སུ་རྫོགས་པ་གནང་། །དམྱལ་ཁམས་བདུད་ཀྱི་བར་ཆད་ཀྱིས། །སེམས་ཅན་ཐམས་ཅད་འདྲེན་པ་ཡི། །སེམས་བསྐྱེད་བསམ་པ་ཉམས་པ་དེ། །སླར་ཡང་གསོ་བར་མཛད་པ་ནི། །ཐུགས་རྗེ་ཆེན་པོ་སྤྱན་རས་གཟིགས། །སེམས་ཅན་ཐམས་ཅད་འདྲེན་པ་
ཡི། །ཐུགས་བསྐྱེད་སྨོན་ལམ་རྒྱ་ཆེན་དེས། །འཁོར་བ་ལན་གསུམ་སྟོང་མཛད་ཀྱང་། །སེམས་ཅན་ཉུང་ངུ་མ་སོང་སྟེ། །དུས་སྙིགས་དུག་ལྔ་ཆེར་སོང་བས། །ཐམས་ཅད་འདྲེན་པའི་སེམས་བསྐྱེད་ཉམས། །དེ་ཚེ་བླ་མ་འོད་དཔག་མེད། །བྱོན་ནས་སེམས་བསྐྱེད་སླར་གསོས་པའི། །ལོ་རྒྱུས་ཉིད་དང་མཚུངས་པའོ། །བར་དོར་ཨོ་རྒྱན་རིན་པོ་ཆེས་སེམས་བསྐྱེད་གསོས་ནས་དབང་བསྐུར་བའི་ལེའུ་སྟེ་ཉེར་གཉིས་པའོ།། ་་་།།དེ་ནས་སྲིད་པ་བར་མ་དོར། །འགྲོ་བ་རིགས་དྲུག་ལ་མི་ཐེ། །གར་འགྲོ་ངེས་མེད་ལམ་རྒྱུས་མེད། །འོད་ལམ་ནག་པོ་དམར་པོ་འགའ། །དེ་རྣམས་ཐུར་དུ་ཟུག་ནས་སྣང་། །འོད་ལམ་དཀར་པོ་སེར་པོ་རྣམས། །གྱེན་ལ་གནམ་དུ་ཟུག་པའང་། །སྔོན་པོ་ལྗང་གུ་ལ་སོགས་པ། །ལམ་སྣེ་དཔག་ཏུ་མེད་པ་སྣང་། །རིགས་དྲུག་སོ་སོའི་འོད་ལམ་གཟིགས། །མི་རུ་སྐྱེ་བའི་འོད་ཀྱི་ལམ། །སྔོན་པོའི་རྒྱུད་ལ་ཚུར་བྱོན་པས། །དཔའ་བོ་ཌཱཀི་སྲུང་མའི་ཚོགས། །ལུས་ནི་སྤུ་སྡུག་བྱ་ཡི་ཚོགས། །ཆེ་ཆུང་རྣམ་པ་དུ་མར་སྤྲུལ། །སྐད་ནི་སྙན་འགྱུར་མི་ཡི་སྐད། །སྙན་པའི་གླུ་དབྱངས་མང་པོ་སྒྲོག །རོལ་མོ་དུ་མ་དང་བཅས་
ནས། །མི་ཡི་ཡུལ་དུ་སྤྱན་དྲངས་སོ། །དཔེར་ན་རང་བྱུང་རྒྱལ་བ་ཡི། །བར་དོའི་རྣམ་ཐར་གསུངས་དང་མཚུངས། །ཅི་ཕྱིར་དཔའ་བོ་ཌཱ་ཀི་ཡིས། །རོལ་མོའི་སྒྲ་དང་སྙན་པའི་དབྱངས། །ཁྱད་པར་འཕགས་པའི་བཀོད་པས་བསུས། །ཡེ་ཤེས་ཆོས་སྐྱོང་སྲུང་མ་ཡིས། །སྤྲུལ་པ་ཡིན་ནམ་སྙམ་པ་ཡིས། །གྲྭ་པ་རྟ་དང་བཅས་པས་བསྐྱལ། །མ་རིག་མུན་པ་སེལ་བའི་ཕྱིར། །ཨོ་རྒྱན་སྤྲུལ་པ་ཡིན་ནམ་སེམས། །ཉི་མའི་དཀྱིལ་འཁོར་མདུན་ནས་བསུས། །བག་ཆགས་སྒྲིབ་པའི་ཆ་ཤས་རྣམས། །ན་བཟའ་མང་པོའི་ཚུལ་དུ་གཟིགས། །སྔ་ཤད་ཕྱི་ཤད་བྱས་པས་ལྗིད། །ཉི་མ་དེ་ལ་བཀལ་བ་ཡི། །གོས་ཁྱེར་གར་སོང་མེད་པར་གཤེགས། །སྤྲུལ་པའི་རྟ་དང་གྲྭ་པའི་ཚུལ། །དེ་ན་ཕར་ལོག་མི་སྣང་སྟེ། །རང་བྱུང་རྒྱལ་བ་མ་ཡུམ་དྲུང་། །བསྐྱལ་ན་འཇིག་རྟེན་མཁའ་འགྲོ་རྣམས། །འཁོར་བའི་འདོད་ཆགས་ཁྲག་གིས་ནི། །རྦ་རླབས་བྱུང་ཟེར་དྲོས་དང་མཚུངས། །དེ་ནས་མངལ་ནི་གདམ་པའི་ཚུལ། །མི་ཡི་སྐྱེ་གནས་བཟང་ངན་ནི། །ཁང་པ་བཟང་ངན་ཚུལ་དུ་མཐོང་། །གསུངས་པའི་དོན་དང་མཐུན་པ་སྟེ། །ཁང་ལེབ་ཆུང་ཆུང་ཞིག་ཏུ་ཕེབས། །ཁྱིམ་དེ་བཙོག་འདུག་མ་
བྱོན་ནོ། །ཁང་པ་ཆེ་བ་གཅིག་ཏུ་ཕེབས། །སྐས་སྒྲོམ་གཅིག་ཏུ་ཚ་ཚ་གསུམ། །དེ་བས་མི་སྣང་དེར་མ་བྱོན། །མཁར་གཅིག་ནང་དུ་བྱོན་པཞུགས་སོ། །གྲུབ་ཆེན་ཆོས་ཀྱི་བླ་མ་ཡི། །སྔགས་འཆང་རང་བྱུང་རྡོ་རྗེ་ཡང་། །ཡེ་ཤེས་རྒྱ་མཚོ་དགྱེས་རྡོར་གྱིས། །གསང་བ་སྐུ་བརྒྱད་དོན་རྟོགས་པས། །སྐྱེ་བ་མེད་ཀྱང་སྐྱེ་ཚུལ་སྟོན། །གནས་པ་མེད་ཀྱང་གནས་ཚུལ་སྟོན། །འགྲོ་འོང་མེད་ཀྱང་འགྲོ་དང་འོང་། །འཆི་བ་མེད་ཀྱང་འཆི་ཚུལ་སྟོན། །གནམ་ས་གཉིས་ལ་དག་སྣང་འབྱུང་། །གསུངས་པའི་དོན་དང་རྗེས་མཐུན་པར། །རིག་འཛིན་དབང་དྲག་རྒྱ་མཚོ་ཡང་། །སྐྱེ་འཆི་གཉིས་ལས་འདས་གྱུར་ཀྱང་། །ཀུན་རྫོབ་འགྲོ་བའི་འཁྲུལ་ངོ་ལ། །སྐྱེ་འཆི་སྒྱུ་མའི་སྤྲུལ་བསྒྱུར་སྟོན། །སྔོན་གྱི་གཏེར་རྙིང་འགའ་ཞིག་ནས། །གཡོ་སྟོད་ཕྱོགས་སམ་ཆབ་མདོ་ཡི། །ཉེ་ལོགས་འཁྲུངས་པར་གསུངས་པ་བཞིན། །དེ་སྐོར་ཞིག་ཏུ་འཁྲུངས་པར་སྣང་། །དེ་ཕྱོགས་འཁྲུངས་པའི་ལོ་རྒྱུས་ཀྱང་། །མི་གཅིག་པ་ནི་འགའ་རེ་ཐོས། །དེ་ནས་ཆབ་མདོའི་ཉེ་ལོགས་ཤིག་ཏུ་སྐུ་སྐྱེ་བ་བཞེས་པའི་ལེའུ་སྟེ་ཉེར་གསུམ་པའོ།། །།དེ་ནས་འཁྲུངས་པའི་ས་དེ་ན། །མགོ་རས་གྱོན་
པ་མང་པོ་གཟིགས། །བཙན་པོ་ཞིག་ཀྱང་ཡོད་པར་སྣང་། །དེ་ཚེ་ཨོ་རྒྱན་རིན་པོ་ཆེ། །སྤྲུལ་སྐུའི་ཆ་ལུགས་རྫོགས་པར་བྱོན། །གཏེར་ལ་དབང་བའི་ལུང་བསྟན་གསུངས། །འདོན་འདོད་བསམ་པ་མ་བྱུང་བས། །འདོན་མིའི་རྟེན་འབྲེལ་མ་འགྲིགས་ན། །བཞུགས་རྒྱུ་མེད་པའི་བརྡའ་ཚིག་གསུངས། །རྟེན་འབྲེལ་ལེགས་པར་མ་འགྲིགས་པས། །སྤྲུལ་པའི་སྐུ་དེ་ཞིང་བརྗེས་སོ། །བཀའ་རྒྱ་ལ་སོགས་ལུང་བྱང་ལས། །ལས་འཕྲོ་སྨོན་ལམ་ལྡན་པ་དང་། །ལུང་བསྟན་བཟང་པོ་ཡོད་ན་ཡང་། །ཆོས་ཟབ་བདུད་ཀྱི་འཕྲང་ཟབ་པས། །རྟེན་འབྲེལ་ལེགས་པོར་མ་འགྲིགས་ན། །རྒྱུ་དེ་བཟང་ཡང་རྐྱེན་ངན་བསྒྱུར། །མེ་ཏོག་སད་ཀྱིས་ཁྱེར་འདྲར་འགྱུར། །གསུངས་པའི་ལུང་དང་མཐུན་པར་གྱུར། །ཀྱེ་མ་འགྲོ་བའི་བསོད་ནམས་དམན། །སྤྲུལ་སྐུ་བར་ཆད་རྐྱེན་གྱིས་གཤེགས། །དུས་ལ་དགོས་པའི་གཏེར་ཁ་རྣམས། །མ་ཐོན་རེ་ཞིག་འགྱངས་བ་དེས། །འཁྲུག་རྩོད་མཐའ་དམག་མུ་གེ་དང་། །མི་ནད་ནོར་ནད་མང་པོ་ཡིས། །བར་སྐབས་འགྲོ་བ་དམྱལ་ཐག་བཅད། །དེ་དོན་ཡིན་པ་ཤེས་མི་མེད། །ཕན་གནོད་རྒྱུ་རྐྱེན་ཤེས་པར་དཀའ། །དུས་གསུམ་སྒྲིབ་པ་མེད་པར་
མཁྱེན། །མངོན་ཤེས་དྲུག་ཅུ་མངའ་བ་ཡི། །ཨོ་རྒྱན་ཆེན་པོས་འགྲོ་འདི་གཟིགས། །ད་ནི་བར་ཆད་རྐྱེན་མེད་པར། །ཟབ་གཏེར་བསྟན་པ་དར་བ་དང་། །འགྲོ་བ་བདེ་ལ་འགོད་པ་རུ། །བྱིན་གྱིས་རློབས་ཤིག་གུ་རུ་རྗེ། །དབང་དྲག་རྒྱ་མཚོའི་སྤྲུལ་སྐུ་གཅིག་འཁྲུངས་པ། སེམས་ཅན་རྣམས་ཀྱི་བསོད་ནམས་ཀྱིས་མ་ཐེག་པར་ཞིང་བརྗེས་ཚུལ་གྱི་ལེའུ་སྟེ་ཉེར་བཞི་པའོ།། ་་་།།དེ་ནས་སྤྲུལ་པའི་སྐུ་དེ་གཤེགས། །དེ་ཚེ་སྤྲུལ་པའི་ཁྲོ་བོ་ལྔ་བྱོན་ཏེ། །ནམ་མཁའི་མདོག་ཅན་སྤྱན་གསུམ་བསྒྲད། །མཆེ་གཙིགས་དབུ་སྐྲ་སྨ་ར་འབར། །སྟག་ཤམ་ཞིང་ལྤགས་དུར་ཁྲོད་ཆས། །དེ་འདྲའི་ཁྲོ་བོ་དེ་རྣམས་ཀྱིས། །གདན་དྲངས་རཀཱ་སྲིན་པོའི་ཡུལ། །རྔ་ཡབ་གླིང་དུ་ཕེབས་པ་ན། །ས་ཆ་རི་བྲག་ཐམས་ཅད་ནི། །དམར་སྐྱ་གློ་བ་རྒྱང་བའི་མདོག །རི་བྲག་དེ་རྣམས་རྩ་བ་ན། །ཨིནྡྲ་ནཱི་ལའི་ཁ་དོག་གི །ལྗོན་ཤིང་མཛེས་པའི་ནགས་ཚལ་འཐུག །སྤང་ལྗོངས་མེ་ཏོག་སྣ་ཚོགས་ཀྱི། །སྐྱེད་མོས་ཚལ་ཆེན་མང་པོར་བཅས། །ཡུལ་གླིང་དེ་འདྲའི་དབུས་ཤེད་ན། །མཐོན་མཐིང་མཚོ་ཆེན་རླབས་ཕྲེང་གཡོ། །དེ་དབུས་ཟངས་མདོག་དཔལ་གྱི་རི། །ཟུར་གསུམ་དམར་གྱི་
གཏོར་མ་འདྲ། །ལོགས་གསུམ་ཅུང་ཙམ་འདིར་ཡོད་པའི། །རྩེ་ལ་གཙུག་ལག་ཁང་ཆེན་དང་། །དེ་འོག་རིན་ཆེན་གཞལ་ཡས་ཁང་། །བདེ་སྐྱིད་ཕུན་ཚོགས་ཉམས་དགའི་དབུས། །བཀོད་ལེགས་རིན་ཆེན་ཁྲི་སྟེང་ནས། །ཨོ་རྒྱན་གུ་རུ་སྤྲུལ་པའི་སྐུ། །སྐུ་མདོག་སྟོན་ཀའི་ཟླ་རྒྱས་འདྲ། །དབུ་ལ་པད་ཞུ་སྒྲོ་དར་བརྒྱན། །སྐུ་ལ་ཟབ་བེར་ཆོས་གོས་གསོལ། །རིག་འཛིན་དུ་མའི་དབུས་ན་བཞུགས། །དེ་མཇལ་གུས་པས་མདུན་ན་བཞུགས། །དེ་ཚེ་ཨོ་རྒྱན་རིན་པོ་ཆེ། །བུམ་པ་ལ་སོགས་མགོར་བཞག་ནས། །དབང་ནི་མང་དུ་གནང་བར་མཛད། །ཕྱག་ཕྲེང་སྟོད་དེ་གུ་རུས་འཛིན། །སྨད་དེ་སྤྲུལ་སྐུར་བགྲང་བཅུག་ནས། །ཐུགས་རྗེ་ཆེན་པོའི་བཟླས་ལུང་གནང་། །བདེ་མཆོག་ལ་སོགས་རྒྱུད་སྡེ་ལས། །རྣལ་འབྱོར་པ་རྣམས་འཕོ་ཚེ་དཔལ། །དཔལ་ལྡན་ཁྲག་འཐུང་ལ་སོགས་པས། །མེ་ཏོག་སྣ་ཚོགས་ལག་ན་ཐོགས། །འཆི་བ་ཞེས་བྱ་རྣམ་རྟོག་སྟེ། །མཁའ་སྤྱོད་གནས་སུ་ཁྲིད་པར་འགྱུར། །ཞེས་གསུངས་དོན་དང་རྗེས་མཐུན་པར། །སྤྲུལ་སྐུ་ཞིང་ནི་གཤེགས་མ་ཐག །ཁྲག་འཐུང་ཁྲོ་བོའི་ཚོགས་ཀྱིས་བསུས། །པདྨ་འོད་ཀྱི་གཞལ་ཡས་སུ། །ཨོ་རྒྱན་ཆེན་པོའི་དྲུང་དུ་
ཕེབས། །གསང་སྔགས་དབང་བསྐུར་མང་པོ་དང་། །ཐུགས་རྗེ་ཆེན་པོའི་སྒོམ་ལུང་གནང་། །ཉམས་རྟོགས་བཟང་བའི་སྒོམ་ཆེན་དང་། །དམ་ཚིག་གཙང་བའི་སྔགས་པ་དང་། །སྡོམ་པ་གཙང་བའི་བནྡེ་དང་། །བློ་ཕུག་ཆོས་ལ་གཏད་པ་ན། །ཚེ་ནི་རིང་ངམ་ཐུང་ན་ཡང་། །ཡི་དམ་དཔའ་བོ་མཁའ་འགྲོ་ཡིས། །བདེ་བ་ཅན་ནམ་དགའ་ལྡན་གནས། །པདྨ་འོད་ཀྱི་གཞལ་ཡས་སོགས། །རང་རང་སྨོན་ལམ་གང་བཏབ་དེར། །བེམ་རིགས་བྲལ་མ་ཐག་ཏུ་ཁྲིད། །དེ་འདྲ་ཤི་ཡང་ཤི་བ་མིན། །ཞིང་ཁམས་གནས་སུ་ཁྲིད་པ་ཡིན། །སངས་རྒྱས་བྱང་སེམས་མཇལ་བ་ཡིན། །དབང་ལུང་གདམས་པ་ཐོབ་པ་ཡིན། །ཆོས་སྒོར་ཞུགས་པའི་ལ་དོན་ལ། །འདི་འདྲ་གཅིག་ལ་བློ་རྩེ་གཏོད། །སྤྲུལ་སྐུ་ཞིང་བརྗེས་པ་རྔ་ཡབ་གླིང་དུ་ཕེབས་ནས་ཨོ་རྒྱན་རིན་པོ་ཆེས་དབང་བསྐུར་བའི་ལེའུ་སྟེ་ཉེར་ལྔ་པའོ།། །དེ་ནས་ཨོ་རྒྱན་རིན་པོ་ཆེ། །སངས་རྒྱས་ཀུན་ལས་ཐུགས་རྗེ་དང་། །ཕྲིན་ལས་མཛད་པ་རྨད་དུ་བྱུང་། །ཡེ་ཤེས་སྤྱན་དང་ལྡན་པ་ཡི། །མི་འགྱུར་རྡོ་རྗེ་བོད་ཡུལ་དུ། །འབྱོན་པའི་དུས་ལ་བབ་པ་དང་། །སྔོན་ཚེ་ཉིད་ཀྱི་ལུང་བསྟན་ལྟར། །
ས་རྟགས་དུས་ཚོད་བོད་ལ་ཚང་། །ཡུལ་དང་རིགས་རུས་ཡབ་དང་ཡུམ། །རྟེན་འབྲེལ་དུས་ལ་བབ་པ་མཁྱེན། །སྤྲུལ་སྐུ་བོད་ཀྱི་དོན་ལ་བརྫང་། །ཁྱོད་ཉིད་སོང་དང་དུས་བབ་ཚེ་།གཅིག་ལ་ཀ་ཆ་རྫས་གཅིག་བསྐུར། །དེ་ལ་ལྟོས་དང་མངོན་ཤེས་འཆར། །དེ་ནས་གཏེར་སྒོ་གནས་སྒོ་སོགས། །མང་པོའི་དབང་བསྐལ་ཡོད་ཚུལ་གསུངས། །སེང་གེ་བྲག་དང་སྤོམ་ནེ་ཡི། །གནས་སྒོ་གཏེར་སྒོ་ལ་སོགས་པ། །ཕྱེ་བའི་ཁས་ལེན་དམ་བཅའ་ཕུལ། །ངོམ་རྒྱལ་གཏེར་སྒོ་གནས་སྒོ་སོགས། །ཕྱེ་མ་རག་ལ་གསལ་ཡོད་ཀྱང་། །ཁྱོད་མིན་གཞན་གྱིས་དབང་སྐལ་མིན། །སེང་གེ་རྫོང་དང་སྤོམ་ནེ་ཚོགས། །རེམ་རེམ་གསུངས་ནས་ཕྱག་མཛུབ་འཇུས། །དེ་ནས་བོད་ཡུལ་ཁ་བའི་ལྗོངས། །མདོ་ཁམས་ངོམ་གྱི་ཡུལ་གྱི་སྟོད། །རོ་ལོའི་མཁར་དུ་ལྷུམས་སུ་ཞུགས། །དེ་ཚོ་ལོ་རྒྱུས་གསུངས་ཚར་སྐབས། །བདག་གི་ཅི་གསུང་ཉམས་ཚོད་ནས། །རྔ་ཡབ་གླིང་ནས་ཁྱེད་བྱོན་ནས། །ཡུམ་གྱི་ལྷུམས་སུ་ཞུགས་པའི་དུས། །ཡབ་ཡུམ་གཉིས་ཀྱི་ཅི་མཛད་དོ། །ཞུས་པས་སྐུ་ན་ཕྲ་ན་ཡང་། །ངོ་ཚ་མཛད་ནས་བྲོས་བྱོན་ནས། །རྗེས་པས་དྲིས་ཀྱང་གསུང་མ་ཉན། །འདི་དག་རྩ་ཚིག་
དངོས་གཞི་ནི། །སྤྲུལ་སྐུ་ཉིད་ཀྱིས་གསུངས་པ་སྟེ། །ཞོར་ལ་དེ་ཡི་འགྲེལ་བ་ཡི། །གོ་དོན་སོ་སོར་ངོ་སྤྲོད་ནི། །བདག་གིས་བྱས་པ་ཤེས་པར་བྱ། །གོ་དོན་འགྲེལ་བ་འདི་མེད་ན། །བློ་གྲོས་ཤེས་རབ་དམན་པ་དང་། །ཐོས་ཆུང་རྟོགས་དཔྱོད་ཆེ་བ་དག །མདོ་རྒྱུད་མན་ངག་བླ་མའི་གསུངས། །མི་མཐུན་འགལ་བ་ལྟ་བུར་མཐོང་། །མ་གོ་བ་ནི་ཡུས་ཆེ་བས། །དད་པ་མི་སྐྱེ་ལོག་ལྟ་འཕེལ། །དེ་བས་གཞུང་དང་འབྲེལ་བ་འདི། །ཉམས་སུ་ཡོད་པས་གོ་བདེ་ཞིང་། །དོན་དམ་གདོད་ནས་རྣམ་དག་དང་། །ཀུན་རྫོབ་རྒྱུ་འབྲས་བསླུ་མེད་གཉིས། །བདེན་གཉིས་ཟུང་འཇུག་གོ་བ་འཆར། །དེ་བཞིན་བསོད་ནམས་ཡེ་ཤེས་ཚོགས། །གཉིས་པོ་ཟུང་དུ་འཇུག་པར་གོ །ལྟ་བ་འཁོར་འདས་དབྱེར་མེད་དང་། །སྤྱོད་པ་རྒྱུ་འབྲས་ཕྲ་ཞིབ་གཉིས། །མི་འགལ་ཟུང་དུ་འཇུག་ཚུལ་ལོ། །དེ་སོགས་གནད་འགག་མང་དུ་ཡོད། །འདི་བྲིས་ཉེས་པ་མཆིས་སྲིད་ན། །པད་འབྱུང་རྗེ་འབངས་ཉེར་ལྔ་དང་། །དམྱལ་བའི་ཐུབ་ཆེན་དྲུང་དུ་བཤགས། །འདི་བྲིས་བསོད་ནམས་གང་ཐོབ་དེས། །སྤྲུལ་སྐུ་མི་འགྱུར་རྡོ་རྗེ་ཉིད། །འགྱུར་མེད་རྟག་བརྟན་རྡོ་རྗེའི་སྐུ། །ལོ་བརྒྱའི་
བར་དུ་ཞབས་བརྟན་ནས། །པད་འབྱུང་བསྟན་པའི་རྒྱན་གྱུར་ཏེ། །ཟབ་གཏེར་ཆོས་ཀྱི་འགྲོ་བ་རྣམས། །ཀུན་བཟང་ས་ལ་འགོད་པར་ཤོག །འདི་ཉིད་མཐོང་ངམ་ཐོས་པ་རྣམས། །སྐྱོ་ཤས་ངེས་འབྱུང་རྒྱུད་བསྐུལ་ནས། །མི་དགེ་བཅུ་སྤང་དགེ་བཅུ་བསྒྲུབས། །སྟོང་ཉིད་ཏིང་འཛིན་རྒྱུད་ལ་སྐྱེ། །རིམ་པ་གཉིས་ལ་བརྟན་ཐོབ་ནས། །རིག་འཛིན་ས་ལ་གནས་པར་ཤོག །ཇོ་མོ་བཀྲ་ཤིས་ཚེ་རིང་སོགས། །བོད་ཁམས་སྐྱོང་བའི་བརྟན་མ་རྣམས། །སློབ་དཔོན་ཆེན་པོའི་སྤྱན་སྔ་རུ། །རྗེས་འཇུག་བསམ་པ་སྒྲུབ་བོ་ཞེས། །ཁས་བླངས་དམ་དུ་བཅས་པ་ལྟར། །རྣམ་ཐར་གོང་འོག་བྲིས་པ་དང་། །སླད་ནས་བྲི་བར་གྱུར་པ་ཀུན། །ཁྱེད་ཅག་རྣམས་ཀྱིས་བསྲུང་བ་དང་། །མི་ནུབ་ཕྱོགས་བཅུར་ཁྱབ་པ་ཡི། །ཕྲིན་ལས་མཛོད་ཅིག་ས་མ་ཡ། །སྤྲུལ་སྐུ་རྔ་ཡབ་གླིང་ནས་འདིར་བྱོན་པའི་ལེའུ་བརྩམས་དོན་དང་བཅས་པ་སྟེ་ཉེར་དྲུག་པའོ། །ཞེས་རྣལ་འབྱོར་པ་རཱ་ག་ཨ་སྱས་བྲིས་པ་མངྒ་ལཾ། །ཡང་གསང་དང་དེ་ཁོ་ན་ཉིད་ཀྱི་རྣམ་ཐར་དག་ནི་ཕྱི་ནང་གསང་བའི་རྣམ་ཐར་རྣམས་ཀྱིས་དངོས་ཤུགས་གང་རུང་གིས་བསྟན་པར་གྱུར་ཏོ།། །།ཚེ་འདིར་
གླེགས་བམ་འདི་ཉིད་བཞེངས་པ་དང་། །འཆང་དང་ཀློག་པའི་དགེ་བའི་མཐུས། །བདག་ཅག་མཆེད་གཉིས་འཁོར་བཅས་དང་། །འཚོ་བ་སྦྱོར་བའི་ཡོན་བདག་རྣམས། བཀྲ་ཤིས་ཚེ་རིང་ཞིང་། །བདེ་སྐྱིད་ཕུན་སུམ་ཚོགས་པ་དང་། །ནམ་ཞིག་འདི་ནས་འཕོས་མ་ཐག །བདེ་བ་ཅན་དུ་སྐྱེ་ཕྱིར་བསྔོ། །ཞེས་པ་༧ ཨ་རཱ་གས་སོ།། །།
༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།། །