ཚེ་སྒྲུབ་གསང་བ་འདུས་པའི་ལྷན་ཐབས་འཆི་བསླུ་ཆི་བདག་ཞགས་གཅོད།
ཚེ་སྒྲུབ་གསང་བ་འདུས་པའི་ལྷན་ཐབས་འཆི་བསླུ་ཆི་བདག་ཞགས་གཅོད་བཞུགས་སོ།།
གུ་རུ་ཨཱ་ཡུ་སིདྡྷི་ཧཱུཾ། འཆི་མེད་ཚེ་ཡི་ལྷ་ལ་ཕྱག་འཚལ་ལོ། །ཚེ་སྒྲུབ་གསང་བ་འདུས་པའི་ལྷན་ཐབས་སུ། །ཨ་ཏི་བཀོད་པ་ཚེ་སྒྲུབ་རྡོར་ཕྲེང་སོགས། །རྫོགས་ཆེན་ཀུན་གྱི་དོན་བསྡུས་འཆི་བསླུ་བྲི། །འབྱུང་བའི་འཁོར་ལོ་དཔེའུ་རིས་ལྟར་བྲི། །ཕྱོགས་བཞི་དབུས་ལྔར་འགོད་ལ་སོ་སོ་ཡི། །ལྷ་མོ་ཐིམ་དམིགས་སོ་སོའི་ཡིག་འབྲུ་རེ། །ལོ་གྲངས་བརྗོད་པས་ཕུས་བཏབ་རྟེན་འབྲེལ་སྙིང་། །བརྗོད་ཅིང་མེ་ཏོག་འཐོར་བས་རབ་གནས་ཏེ། །རང་མདོག་སྐུད་པས་བཅིངས་ལ་ག་འུར་བཅུག །རང་མདུན་གཞི་སྟེང་འདབ་བརྒྱད་ཕྱོགས་ལྟར་བཀོད། །གའུ་དབུས་མའི་མདུན་དུ་མཚམས་བཞི་རུ། །ལྷ་མོ་སོ་སོའི་གཏོར་མ་ལྔ་པོ་བཀོད། །དེ་རྒྱབ་མཆོད་པ་སྣ་བདུན་སྐོར་བཤམ་བྱ། །དེ་ཡི་རྒྱབ་ཏུ་སྣོད་ནི་ཆེན་པོའི་ནང་། །
ཤིང་སྣ་མེ་སྣ་ས་སྣ་ཆུ་སྣ་ལྔ། །སེམས་ཅན་རིགས་མི་གཅིག་པ་མང་པོ་ཡི། །ཁ་ཆུ་ཁ་རླངས་ལ་བསྒྲེས་ཟན་ཆེན་པོས། །ཤིང་ཤུན་ནམ་ནི་སོག་མ་བཅིངས་པ་ལ། །ཟན་གྱིས་བསྣུམས་ཏེ་ངར་མི་གྲུ་གང་བཅའ། །མིག་གཉིས་རཾ་གཉིས་རྣ་བར་ཡཾ་གཉིས་དང་། །ཁ་ལ་བོ་གཅིག་ལྕེ་ལ་ལོ་གཅིག་དང་། །སྙིང་གར་ཨེ་གཅིག་བྲིས་པའི་ཤོག་དྲིལ་བཅུག །བསྲུང་བྱའི་མཆིལ་སྣབ་སྐྲ་སེན་དྲི་མ་དང་། །དྲི་ཆེན་དྲི་ཆུ་འབྲུ་སྣ་རིན་ཆེན་ཕྱེ། །བསྲེས་པའི་ཟན་ལ་ངར་མི་དཀར་སེར་དམར། །ལྗང་གུ་ནག་པོ་ཁྲ་བོ་དྲུག་བྱ་སྟེ། །རང་རང་མདོག་མཚུངས་གཏོར་མའང་མདུན་དུ་བཞག །དྲུག་པོ་ངར་མི་ཆེ་བ་ལ་བསྐོར་ཏེ། །དེ་དག་འཇིམ་པ་ལས་ནི་བཅས་ཀྱང་རུང་། །མགོ་ལ་འདྲེ་བྱ་གང་རྙེད་སྤུ་བཙུགས་ཤིང་། །དར་ཚོན་བལ་ཚོན་རང་མདོག་ལྗང་
བུ་བཙུགས། །ལུས་ལ་དར་རམ་སྣམ་རས་རང་མདོག་བཀོན། །དེ་རྒྱབ་ངར་ཆུང་གཏོར་ཆུང་ཆངས་བུ་རྣམས། །བསྲུང་བྱ་དེ་ཡི་ལོ་གྲངས་བསྐོར་བར་བྱ། །འབྲུ་སྣ་ཟས་ཕུད་བཏབ་ལ་ཆུ་གཙང་བྲན། །ཚེ་ཡི་ལས་བྱང་བསྟོད་པ་ཡན་ཚར་རྗེས། །འདི་ཉིད་འདོན་སྒོམ་སྦྲགས་པས་འཐུས་པ་ཡིན།། ཧཱུྃ། བཅོམ་ལྡན་ཤཱཀྱ་ཐུབ་པའི་བྱིན་རླབས་དང་། །ཐལ་མོ་ཁང་སྟོང་ཨ་དཀར་འོད་ཟེར་གྱིས། །གླུད་གཏོར་ཉེས་སྐྱོན་དྲི་མ་དག་པར་གྱུར། །ཨོཾ་སྭ་བྷ་ཝ་སོགས། ཧཱུྃ་ལས་རིན་ཆེན་སྣོད་མཆོག་རྒྱ་ཆེ་བ། །སྟོང་གསུམ་ཙམ་གྱི་ནང་དུ་ཁཾ་ཡིག་ལས། །ངར་གྱི་མི་ཆེན་ཁོག་སྟོད་གསེར་ལས་གྲུབ། །ཁོག་སྨད་གཡུ་དང་རྐེད་པ་མཆོང་ལས་གྲུབ། །ལག་པ་གསེར་དངུལ་རྐང་པ་ཟངས་དང་ལྕགས། །ཞོ་ཤའི་སྙིང་དང་མུ་ཏིག་ཀླད་པ་དང་། །ལུང་ཏང་མིག་ལ་ཟེར་མོའི་སྒྲོ་ཡི་སྒྲ། །བྱུ་རུའི་ལྗགས་ལ་མགྲོན་བུའི་སོ་བྱས་པ། །ཁམས་དང་སྐྱེ་མཆེད་དབང་པོ་ཡོངས་སུ་རྫོགས། །སྨྲ་མཁས་ལྗག་ལྗག་འགྲོ་མཁས་ལྡེམ་ལྡེམ་བྱེད།་།གཅིག་ལས་བརྒྱ་སྟོང་བྱེ་བ་དུང་ཕྱུར་འཕྲོ། །སྣང་སྲིད་ལྷ་འདྲེ་བགེགས་རིགས་སྤྱན་ལམ་དུ། །མི་བས་གླུད་བཟང་ལྷ་ཡི་བུ་ཕོ་འདྲ། །གླུད་གཏོར་སོ་སོའི་ཡིད་མཐུན་འདོད་ཡོན་ལྔ། །ཟད་མེད་སྟོང་གསུམ་
འཇིག་རྟེན་གང་བར་གྱུར། །བཅོམ་ལྡན་རིན་ཆེན་འབྱུང་ལྡན་བྱིན་རླབས་ཀྱིས། །མཆོག་སྦྱིན་ཕྱག་རྒྱ་ཏཱཾ་སེར་འོད་འཕྲོས་པས། །མགྲོན་རྣམས་ཀུན་ལ་ཟད་མེད་ལོངས་སྤྱོད་གྱུར། །ཨོཾ་ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷཿསརྦ་ཐཱ་ཁཾ་ཨུཏྤ་ཏེ་སྤ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། བཅོམ་ལྡན་སྣང་བ་མཐའ་ཡས་བྱིན་རླབས་ཀྱིས། །པདྨའི་ཕྱག་རྒྱ་ཧྲཱིཿདམར་འོད་ཟེར་འཕྲོས། །གླུད་གཏོར་འཆི་སོས་སྨན་གྱི་བདུད་རྩིར་གྱུར། །ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ། བཅོམ་ལྡན་དོན་ཡོད་གྲུབ་པའི་བྱིན་རླབས་ཀྱིས། །སྐྱབས་སྦྱིན་ཕྱག་རྒྱ་ཧ་ལྗང་འོད་ཟེར་གྱིས། །བསྔོས་པ་ཙམ་གྱིས་མགྲོན་རྣམས་ཚིམ་པར་གྱུར། །ན་མསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སཾ་བྷ་ར་སཾ་བྷ་ར་ཧཱུཾ། བཅོམ་ལྡན་མི་བསྐྱོད་པ་ཡི་བྱིན་རླབས་ཀྱིས། །ས་གནོན་ཕྱག་རྒྱ་ཧཱུཾ་སྔོན་འོད་ཟེར་གྱིས། །འཐབ་རྩོད་ཕམ་རྒྱལ་མེད་པར་ཐོབ་པར་གྱུར། །ཨོཾ་ཛྙཱ་ན་ཨ་ཝ་ལོ་ཀི་ཏེ་ན་མས་མནྟ་སྤ་ར་ཎ་རསྨི་བྷ་ཝ་ས་མ་ཡ་མ་ཧཱ་མ་ཎི་དུ་རུ་དུ་རུ་ཧྲི་དཱ་ཡ་ཛྭ་ལ་ནི་ཧཱུྃ། བཅོམ་ལྡན་རྣམ་པར་སྣང་མཛད་བྱིན་རླབས་ཀྱིས། །བྱང་ཆུབ་ཕྱག་རྒྱ་ཨོ་དཀར་འོད་ཟེར་འཕྲོས། །མགྲོན་རྣམས་
བདག་གི་དབང་དུ་འདུས་པར་གྱུར། །ཨོཾ་ན་མཿས་མནྟ་བུདྡྷཱ་ནཾ་གྲ་ཧེ་ཤཱ་རི་པྲ་བྷཉྫཏི་མ་ཧཱ་ས་མ་ཡ་སྭཱ་ཧཱ། རང་ཉིད་ཚེ་དཔག་གནས་འགྱུར་རྟ་མགྲིན་སྐུ། །རྟ་སྐད་འཚེར་བས་ཁམས་གསུམ་དབང་དུ་སྡུད། །ཁྲོ་ཆས་ཡོངས་རྫོགས་གྲི་གུག་ཐོད་ཁྲག་བསྣམས། །མེ་དཔུང་ཀློང་བཞུགས་དྲེགས་པ་ཟིལ་གནོན་གྱུར། །ཨོཾ་ཧ་ཡ་གྲི་ཝ་ཧཱུྃ་ཕཊ། ཧཱུྃ། སྤྲུལ་པའི་ཡཀྵ་མེ་དབལ་ཚོགས། །ཕྱོགས་ཀྱི་ས་གནས་ཇི་སྙེད་པའི། །འབྱུང་པོ་ཐམས་ཅད་ཁྲིད་ཤོག་ཅེས། །གནོད་སྦྱིན་གྱི་ནི་སྡེ་དཔོན་ཀུན། །ཕྱོགས་བཞི་དག་ཏུ་བཀྱེ་བར་གྱུར། །གང་དག་སངས་རྒྱས་རང་སངས་རྒྱས། །སངས་རྒྱས་རྣམས་ཀྱི་ཉན་ཐོས་དང་། །ཚངས་དབང་དང་ནི་འཇིག་རྟེན་སྐྱོང་། །གནོད་སྦྱིན་སྡེ་དཔོན་དབང་ཕྱུག་དང་། །དེ་བཞིན་གནོད་སྦྱིན་སྟོབས་ཆེན་དང་། །འཕྲོག་མ་བུ་དང་བཅས་པ་དང་། །དེ་དག་མཐུ་དང་གཟི་བརྗིད་ཀྱིས། །ཚེ་དང་སྲོག་ལ་གནོད་བྱེད་ཅིང་། །གནོད་ཅིང་འཚེ་བའི་གདོན་གྱི་ཚོགས། །དེ་དག་རྣམས་ནི་སྐད་ཅིག་གིས། །བཅིངས་པ་ལྔ་ཡིས་བཅིངས་ཤིང་བཀུག །བཀའ་ཉན་གསུང་སྡོད་བྱེད་པར་གྱུར། །ཏྲི་བཛྲ་ཨཾ་ཀུ་ཤ་ཛ༔ ཛཧཱུཾ་བཾ་
ཧོ༔ ཧཱུྃ། སྔོན་ཚེ་ཐུབ་དབང་གསང་བདག་དང་། །རྟ་མགྲིན་པད་འབྱུང་སྤྱན་སྔ་རུ། །ཁས་བླངས་དམ་བཅས་དྲན་མཛོད་ལ། །གླུད་གཏོར་འདི་ནི་ལེན་པར་གྱིས། །རིན་ཆེན་མང་དང་གཟུགས་མཛེས་དང་། །འབྱམས་ཀླས་འཇིགས་ཀུན་བྲལ་བ་ཡི། །དེ་བཞིན་གཤེགས་ལ་ཕྱག་འཚལ་ལོ། །གླུད་གཏོར་འདོད་ཡོན་ཟད་མེད་འདི། །ཚེ་དང་སྲོག་ལ་གནོད་བྱེད་པའི། །གདོན་གྱི་རིགས་གྱུར་ཀུན་ལ་འབུལ། །ཐམས་ཅད་ངོམས་ཤིང་ཚིམ་གྱུར་ཅིག །ཨོཾ་ཨ་ཀཱ་རོ་སོགས་ལན་གསུམ། ཨོཾ་སརྦ་བིགྷཱན་ས་པཱ་རི་ཝཱ་ར་ཨི་དཾ་བ་ལི་ཏ་ཁ་ཁ་ཁཱ་ཧི། བདུན། ཧཱུྃ༔ ཉོན་ཅིག་ལོག་འདྲེན་བགེགས་ཀྱི་ཚོགས༔ བྱང་ཆུབ་སྒྲུབ་ལ་མི་དགའ་ཞིང་༔ ལུས་སེམས་སྦྱོར་བ་ངན་པ་ཡི༔ མི་ལ་གནོད་ཅིང་འཚེ་བྱེད་པ༔ ཚེ་ལ་རྐུ་ཞིང་སྲོག་ལ་འཇབ༔ གཤེད་དང་ལྕག་དང་བླ་ཁྱེར་བྱེད༔ འབྱུང་པོའི་རིགས་ནི་གང་ཡང་རུང་༔ བགེགས་རིགས་སྟོང་ཕྲག་བརྒྱད་ཅུ་དང་༔ བྱིས་པའི་གདོན་ཆེན་བཅོ་ལྔ་དང་༔ ནད་ཡམས་དལ་གྱི་བདག་མོ་སོགས༔ ཚེ་དང་སྲོག་ལ་གནོད་བྱེད་པའི༔ བདུད་སྡེ་དཔུང་དང་བཅས་པ་རྣམས༔ ལན་ཆགས་གླུད་གཏོར་
འདི་ལོངས་ཤིག༔ མཐུ་བོ་ཆེ་ལ་སྟོབས་པོ་ཆེ། གཤིན་རྗེ་གཤིན་རྗེའི་ཕོ་ཉ་དང་། །བདུད་རྣམས་སྡེ་དང་བཅས་པ་རྣམས། །གནོད་སྦྱིན་བྱེ་བའི་གཡོག་འཆང་བ། །གནོད་སྦྱིན་དེ་མིང་འཕྲོག་པོ་ཡིན། །ཤ་རི་ཏ་ནི་སྡེར་བཅས་དང་། །རི་ཡི་བུ་མོ་སྟེར་བཅས་དང་། །རི་ཡི་བུ་མོ་གནོད་སྦྱིན་མོ།།གཟི་བརྗིད་ཆེན་པོ་འཇིགས་པའི་གཟུགས། །འཕྲོག་མ་ཞེས་ཀྱང་གྲགས་པ་དང་། །གདོལ་པ་མོ་དང་གཏུམ་མོ་དང་། །བུ་རྣམས་ལྔ་བརྒྱས་བསྐོར་བ་དག །ལན་ཆགས་གླུད་གཏོར་འདི་ལོངས་ཤིག །མི་རྡུང་ནག་པོ་ཀརྐ་སྟེ།་།པདྨ་དང་ནི་པདྨ་ཅན། །མེ་ཏོག་སོ་དང་ས་ག་དང་། །སྲིན་མོ་བོང་བུའི་རྣ་ཅན་དང་། །ཙན་དན་དང་ནི་ཁྱབ་འཇུག་ལེན། །སེང་གེ་སེར་སྐྱ་དམར་སེར་པོ། །ལན་ཆགས་གླུད་གཏོར་འདི་ལོངས་ཤིག །གླང་པོ་ཀླུ་ཡི་སོ་ཅན་དང་། །རི་བཤེས་དྲག་པོའི་མཆེ་བ་ཅན། །སྲིན་མོ་སོ་བཟང་ཡོད་པ་དང་།ཚངས་པ་ལེན་དང་ཁྱབ་འཇུག་ལེན། །གནོད་སྦྱིན་ཧ་ལ་ཧ་ལ་དང་། །གནོད་སྦྱིན་གནམ་སའི་མཆུ་ཅན་དག །ལན་ཆགས་གླུད་གཏོར་འདི་ལོངས་ཤིག །མདུང་དང་མདའ་གཞུ་ཀུན་ཐོགས་ཤིང་། །མི་རྟ་བ་ལང་རི་
དྭགས་རྣམས། །ཟ་ཞིང་འཚེ་བ་དེ་དག་ནི། །ཕྱོགས་རྣམས་ཀུན་ཏུ་རྒྱུག་ཅིང་འདོང་། །ས་འདི་རབ་ཏུ་གཡོ་བར་བྱེད། །ནགས་ཚལ་རྣམས་ཀྱང་རབ་ཏུ་སྐྱེམས། །རི་རྣམས་ཀུན་ནས་གཡོ་བར་བྱེད། །སྐྱེ་དགུ་འདི་དག་འཚེ་བྱེད་ཅིང་། །ཕན་ཚུན་ནས་ནི་འདུ་བ་དག །ལན་ཆགས་གླུད་གཏོར་འདི་ལོངས་ཤིག །འབྱུང་པོ་གནོད་སྦྱིན་ལུས་པོ་ཆེ། །ལག་པ་བཞི་པ་མ་རུངས་པ། །རྐང་མང་དང་ནི་རྐང་གཅིག་པ། །རྐང་པ་བཞི་པ་རྐང་གཉིས་པ། །རྐང་པ་བསྒྲེང་ལ་སྤྱིའུ་ཚུགས་དང་། །ལན་ཆགས་གླུད་གཏོར་འདི་ལོངས་ཤིག །ལུས་མང་མགོ་བོ་གཅིག་པ་དང་། །ལུས་གཅིག་པ་ལ་མགོ་བཞི་པ། །མིག་མང་པོ་ལ་ལུས་ཕྱེད་དང་། །མིག་གཅིག་ལྟོ་ནི་བཅུ་གཉིས་རྣམས། །ལན་ཆགས་གླུད་གཏོར་འདི་ལོངས་ཤིག །བོང་བུ་རྔ་མོང་གླང་ཆེན་མགོ །ལག་པ་བསྒྲེང་ལ་མགོ་བཏུད་དང་། །མཚོན་ཆའི་སོ་དང་མཚོན་ཆའི་ལག །མཚོན་ཆའི་རྐང་པའི་སྲིན་པོ་རྣམས། །ལན་ཆགས་གླུད་གཏོར་འདི་ལོངས་ཤིག །ཟངས་ཀྱི་སྐུ་དང་ལྕགས་ཀྱི་སོ། །ཟངས་ཀྱི་མིག་དང་ཟངས་ཀྱི་ལག །ཟངས་ཀྱི་ཐོ་བའི་རྐང་རྣམས་དང་། །
ཟངས་ཀྱི་སྣ་དང་ལྕགས་ཀྱི་ཁ། །ལན་ཆགས་གླུད་གཏོར་འདི་ལོངས་ཤིག །རྐང་ལག་ཀུན་ཏུ་འབར་བ་དང་། །མི་ཡི་ལུས་སུ་གནས་པ་རྣམས། །སྐུར་ཞར་ལྔ་བ་གསུམ་ཡོད་པ། །མིག་མི་སྡུག་པ་ཁ་གླལ་བ། །ལན་ཆགས་གླུད་གཏོར་འདི་ལོངས་ཤིག །ཆུ་སྲིན་སྟག་གི་གཟུགས་དང་ནི། །གཟུགས་མི་སྡུག་པ་ཁ་རལ་པོ། །མཆུ་འཕྱངས་པོ་ལ་སོ་ཡོན་པོ། །རབ་ཏུ་གཏུམ་པོ་ཁྲོ་གཉེར་ཅན། །ལན་ཆགས་གླུད་གཏོར་འདི་ལོངས་ཤིག །གསུས་པོ་ཆེ་དང་བུམ་རྣ་བོ། །རྣ་འཕྱངས་པ་དང་རྣ་བ་མེད། །ལག་རིང་དང་ནི་རྣ་བ་རིང་། །སྣ་ཡི་རྩེ་དང་ལག་རྩེ་རིང་། །ལུས་སྐེམ་ལུས་ནི་རིང་བ་དང་། །སྐྲ་རིང་རབ་ཏུ་བརྒྱན་པ་དང་། །རྐང་པ་མིད་པ་ཕྲ་བ་དང་། །དྲི་ང་བ་ལ་བུམ་ལྟོ་བ། །ལན་ཆགས་གླུད་གཏོར་འདི་ལོངས་ཤིག །ཡན་ལག་ཆུ་སྲིན་འདྲ་བ་དང་། །གཏུན་ཤིང་ཐོ་བ་འདྲ་བའི་ལྟོ། །གནམ་ལྟོ་བོ་ལ་རྣ་བོ་ཆེ། །གྱེན་དུ་བརྗེས་དང་སྐྱ་རོལ་དམར། །མགོ་བོ་ཆེ་ལ་གཞུ་མགྲིན་པོ། །སྐེམ་པོ་སྒུར་པོ་བུམ་ལྟོ་བ། །ལན་ཆགས་གླུད་གཏོར་འདི་ལོངས་ཤིག །རི་རབ་རྩེ་མོ་བསྒུལ་ནས་སུ། །མེ་མདག་གི་ནི་ཆར་པ་འབེབས། །
ལྗོན་ཤིང་རི་དང་རྡོ་བ་དང་། །སྤྲིན་གྱི་ཚོགས་ཀྱི་མདོག་འདྲ་བ། །ལན་ཆགས་གླུད་གཏོར་འདི་ལོངས་ཤིག །དུང་དང་རྔ་ཆེན་རྡོ་རྔ་དང་། །གྲུལ་བུམ་རྔ་ཕྲན་རྣམས་ཀྱི་སྒྲ། །འཇིགས་པའི་སྒྲ་ནི་རབ་ཏུ་འབྱིན། །མིང་པོ་ཆེ་ལ་བོང་བུའི་སྒྲ། །ལན་ཆགས་གླུད་གཏོར་འདི་ལོངས་ཤིག །ནག་པོ་སྔོན་པོ་སེར་པོ་དང་། །དམར་སེར་མེ་ལྟར་དམར་བ་དང་། །ཁབ་འདྲའི་སྤུ་དང་རལ་གྲིའི་སྒྲ། །དམར་པོ་ཁྲག་གིས་བསྐུས་པ་རྣམས། །ལན་ཆགས་གླུད་གཏོར་འདི་ལོངས་ཤིག །མི་རོ་དག་ནི་ཁྱེར་ནས་སུ། །ཟ་བཞིན་དུ་ནི་རྣམ་པར་རྒྱུག །སོ་གནོན་ལག་པ་དམར་པོ་དང་། །མཆུ་ནི་ཁྲག་གིས་བསྐུས་པ་དང་། །ལུས་ཕྱེད་དག་ནི་ཟོས་པ་དང་། །མཁལ་མ་སྙིང་དང་ནང་ཁྲོལ་གྱིས། །སྙེམ་པ་ཤིན་ཏུ་བཀང་བ་དག །ལན་ཆགས་གླུད་གཏོར་འདི་ལོངས་ཤིག །བྱིས་པ་དག་ནི་ཟ་བཞིན་དུ། །མེར་མེར་པོ་དང་སྲོག་ཆགས་ཀྱི། །རྐང་ལག་རྣམས་ཀྱི་སྟོབས་ཀྱང་འཕྲོག །ཀེང་རུས་ཀྱིས་ནི་ལུས་ཀྱི་སུ། །སྐྱེ་བོ་མང་པོ་སྐྲག་པར་བྱེད། །ལན་ཆགས་གླུད་གཏོར་འདི་ལོངས་ཤིག །ཁྲག་གིས་རབ་ཏུ་གང་བ་ཡི། །མི་ཡི་པགས་པ་ཐོགས་
ནས་སུ། །མི་བཟད་དུག་གིས་ཀུན་བསྐུས་ཏེ། །ཕྱོགས་ཕྱོགས་དག་ཏུ་རྣམ་པར་རྒྱུག །ལན་ཆགས་གླུད་གཏོར་འདི་ལོངས་ཤིག །གྲོང་ཁྱེར་རྣམས་ཀྱི་སྒོ་དག་དང་། །ཁྱིམ་དང་ཁྱིམ་དུ་རྣམ་པར་འཐོར། །རླུང་དང་མཁྲིས་པ་བད་ཀན་རྣམས། །ཕྱོགས་བཞི་དག་ཏུ་འཁྲུག་པར་བྱེད། །དེ་ལྟར་དེ་ན་རྒྱལ་པོ་ཡི། །གདོན་དང་འཇིགས་པ་ཆེན་པོ་རྣམས། །ལྷག་པ་དེ་དག་ཐམས་ཅད་ཀྱང་། །ལན་ཆགས་གླུད་གཏོར་འདི་ལོངས་ཤིག །ཕོ་བྲང་འཁོར་དུ་རྒྱུ་བ་ཡི། །གནོད་སྦྱིན་མ་རུངས་མདངས་འཕྲོག་པ། །སྙིང་རྗེ་མེད་ཅིང་ཁྲག་འཐུང་བ། །ལུས་ཆེན་འཇིགས་པ་ཆེན་པོ་སྟེ། །ལན་ཆགས་གླུད་གཏོར་འདི་ལོངས་ཤིག །སྟོབས་པོ་ཆེ་ལ་སྒྲ་ཡང་ཆེ། །མགྲིན་བཅུ་པོ་ལ་མིག་སྟོང་པོ།། གདོན་ཆེན་མིག་ནི་དམར་པོ་རྣམས། །འཁོར་ནི་མང་པོ་རྣམས་བཏང་སྟེ། །ལག་ན་མཚོན་ཐོགས་རབ་ཏུ་འཇིགས། །ལན་ཆགས་གླུད་གཏོར་འདི་ལོངས་ཤིག །སྦྲུལ་གྱི་ཞགས་པ་ཐོགས་པ་དང་། །ལག་བཞི་ལག་ན་སྒྲོན་མེ་ཐོགས། །ལག་ན་མཚོན་དང་དབྱིག་པ་ཐོགས། །རྡོ་རྗེ་མདུང་རྩེ་ལག་ཐོགས་པས། །རབ་ཏུ་དྲག་པོའི་དམག་བསྒྲིལ་
ནས། །ཕྱོགས་ཀུན་ཏུ་ནི་རྒྱུག་པར་བྱེད། །ལན་ཆགས་གླུད་གཏོར་འདི་ལོངས་ཤིག །སྡང་བའི་གནས་ན་འཁོད་པ་ཡི། །གསང་བ་པོ་ནི་དེ་ཀུན་ཀྱང་། །མི་ཡི་འཇིག་རྟེན་འདི་དག་ཏུ། །སྐྱེས་པ་བུད་མེད་གཞན་ཡང་འཛིན། །ཤ་ཁྲག་དྲོན་མོར་བཅས་པ་ལ། །རྣམ་པར་འཁྲུགས་ཤིང་འདོད་པའི་གཟུགས། །སེང་གེ་དང་ནི་སྟག་དང་རྟ། །མ་ཧེ་བ་གླང་བོང་བུ་རྟ། །གླང་པོ་ཆེ་ཡི་གཟུགས་འདྲ་དང་། །དོམ་དང་གཟིག་དང་སྤྱང་ཀི་དང་། །ཁྱི་དང་ཝ་དང་རི་དྭགས་དང་། །བྱི་བ་བྱི་ལ་སྤྲེའུའི་གཟུགས། །བསེ་དང་ཕག་དང་སྲེ་མོང་དང་། །ཉ་དང་རུས་སྦལ་དག་གི་གཟུགས། །ལན་ཆགས་གླུད་གཏོར་འདི་ལོངས་ཤིག །ཁ་ཅིག་དག་ནི་སྲམ་གྱི་གཟུགས། །ལྭ་དང་འུག་པ་ཁུ་བྱུག་དང་། །བྱ་རྒོད་ཁྲ་དང་ཉ་མིད་བཅས། །རྨ་བྱ་ངང་པ་ཐི་བ་དང་། །ཁྲུང་ཁྲུང་དང་ནི་བྱ་རྣམས་དང་། །ཁ་ཅིག་བྱ་གག་གཟུགས་རྣམས་སུ། །གནོད་སྦྱིན་རྣམས་ནི་མི་ཡིས་མཐོང་། ལན་ཆགས་གླུད་གཏོར་འདི་ལོངས་ཤིག །འདབ་བཟང་བྱ་ཡི་གཟུགས་ཀྱིས་ཀྱང་། །སྐྱེ་བོ་མང་པོ་སྐྲག་པར་བྱེད། །ཁ་ཅིག་མི་ཡི་མགོ་ཅན་ལ། །ལུས་ནི་བྱ་
གག་བོང་བུ་འདྲ། །ཁ་ཅིག་མཚོན་གྱི་རབ་ཏུ་འཚེ། །ལུས་དང་བྲལ་བ་དག་ཏུ་སྣང་། །ལན་ཆགས་གླུད་གཏོར་འདི་ལོངས་ཤིག །རྣམ་པར་འཁྲུགས་ཤིང་འདོད་ལ་མོས། །རྒྱུ་མའི་ཕྲེང་བས་ཀུན་ཏུ་དཀྲི། །རྩེ་གསུམ་མདུང་གིས་རབ་འདེབས་ཤིང་། །སྲོག་ཆགས་ལ་ནི་གནོད་པར་བྱེད། །མི་བཟད་གདུག་པའི་དབུགས་འབྱིན་ཅིང་། །སྐྱེ་དགུ་འདི་དག་སྐྲག་པར་བྱེད། །ལན་ཆགས་གླུད་གཏོར་འདི་ལོངས་ཤིག །སྲོག་ཆགས་རྒྱུད་ནི་ཇི་སྙེད་པར། །སྣ་ཚོགས་ཀྱི་ནི་གཟུགས་སུ་སྣང་། །ཁ་ཅིག་དག་ནི་རི་ཡང་ཐོགས། །ལ་ལ་རལ་གྲི་འཁོར་ལོ་ཐོགས། །གྲངས་ནི་བརྒྱ་ཕྲག་སྟོང་རྣམས་ཏེ། །དབྱུག་པས་བསྡིགས་ཤིང་ཁ་དྲག་པོ། །ལན་ཆགས་གླུད་གཏོར་འདི་ལོངས་ཤིག །མིག་ཕྱུང་བ་ལ་བཞིན་མི་སྡུག །སྲིན་པོ་སོ་ནི་རྣོ་བ་དང་། །སྣ་དང་རྣ་བ་བཅད་པ་དང་། །ལྕེ་ཆད་གདོང་ནི་གཉེར་མ་ཅན།། །རྐང་ལག་དག་ནི་གཏུབས་པ་དང་། །མགོ་བོ་བཅད་པའི་སྲིན་པོ་རྣམས་། །སྐབས་ནི་རབ་ཏུ་འཚོལ་བར་བྱེད། །ལན་ཆགས་གླུད་གཏོར་འདི་ལོངས་ཤིག །སྡིག་པ་ཅན་རྣམས་གཟི་བྱིན་འཕྲོག །ཡི་དྭགས་ཀྱི་ནི་ལུས་རྣམས་ལ། །རབ་ཏུ་
ཕྲ་བའི་གདོན་རྣམས་དང་། །སྤུ་ཡི་བར་དང་གནད་རྣམས་དང་། །དེ་བཞིན་རྨ་ཡི་ཁ་རྣམས་སུ། །ལྷག་པ་དེ་དག་ཐམས་ཅད་ཀྱང་། །ལན་ཆགས་གླུད་གཏོར་འདི་ལོངས་ཤིག །ཐམས་ཅད་ངོམས་ཤིང་ཚིམས་པར་མཛོད། །དེ་ནས་རྫོགས་ཆེན་རྒྱུད་གཞུང་མང་པོ་ནས། །གསུངས་པའི་ཚིག་རྐང་འདི་ཉིད་བརྗོད། ཁྱེར་ཅིག་ཁྱེར་ཅིག་སྟོབས་ལྡན་རྣམས་། །སྲེད་དང་ཆགས་དང་ཞེན་པ་དང་། །དྲན་དང་བཟུང་དང་བསམ་དང་རེག །ཀློད་དང་གྲོལ་དང་ཞི་བར་མཛོད། །ངར་མི་རེ་ལ་གསུམ་རེ་སྟེ། །ལོ་གྲངས་སུམ་འགྱུར་བརྗོད་པར་བྱ། །ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས། །རྒྱུ་ལས་འགོག་པ་གང་ཡིན་པ། །དགེ་སྦྱོང་ཆེན་པོས་འདི་སྐད་གསུངས། །སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །ལུས་ཀྱི་སྡོམ་པ་ལེགས་པ་ནི། །ངག་གི་སྡོམ་པ་ལེགས་པ་ཡིན། །ཡིད་ཀྱི་སྡོམ་པ་ལེགས་པ་སྟེ། །ཐམས་ཅད་དུ་ནི་སྡོམ་པ་ལེགས། །ཐམས་ཅད་བསྲུང་བའི་དགེ་སློང་དག །སྡུག་བསྔལ་ཀུན་ལས་ངེས་པར་གྲོལ། །
ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །བཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་ཏུ་འབྱུང་། །ངོ་བོ་མེད་ཅིང་གནས་མེད་ཅིང་། །དེ་ལྟར་ཆོས་རྣམས་ཤེས་གྱིས་ལ། །སེམས་ཅན་དོན་ལ་མཉམ་མེད་བྱོས། །འོན་ཀྱང་སྐྱོབ་པའི་སྲས་སུ་སྐྱེས། །རྒྱན་གྱིས་བརྒྱན་པར་བྱས་ཤིང་ཆོས་སྤྱོད་ཅིང་། །དུལ་ཞིང་ཡང་དག་སྡོམ་ལ་ཚངས་པར་སྤྱོད། །འབྱུང་པོ་ཀུན་ལ་ཆད་པ་སྤང་བ་སྟེ། །དགེ་སློང་དགེ་སྦྱོང་དེ་ཡིན་བྲམ་ཟེའང་དེ། །མཚོན་ཆས་མི་འཇིགས་གང་ཡང་མེད། །འཆི་བའི་སྲོག་ལ་ཀུན་ཀྱང་འཛེམ། །འཚོ་བའི་ཟས་ལ་ཀུན་ཀྱང་འདུ། །རང་གི་ལུས་ལ་དཔེ་ལོངས་ལ། །གཞན་ལ་གནོད་པ་མ་བྱེད་ཅིག །དྲི་ཟའི་གདོན་གྱིས་བཏབ་པ་ན། །གླུ་དབྱངས་ལེན་ཅིང་བྲོ་བརྡུང་སྟེ། །རྒྱན་རྣམས་ལ་ནི་དགའ་བར་བགྱིད། །བསྐམ་པ་མ་མཆིས་མང་བར་སྨྲ། །རྒོད་པར་བརྗིད་ཅིང་ཁྲོ་བར་འགྱུར། །སྐེམ་པར་འགྱུར་ལ་མིག་དམར་ཏེ། །རྟག་ཏུ་རིམས་ཀྱིས་འདེབས་པར་བགྱིད། །མིག་ཀྱང་འབྱེད་པར་མི་བགྱིད་དེ། །རྒྱབ་ཀྱིས་ཕྱོགས་ཤིང་ཉལ་བར་བགྱིད། །མཆོད་སྦྱིན་གླུད་གཏོར་འདི་ལོངས་
ལ། །ཕྱིན་ཆད་དེ་ལྟར་མ་བྱེད་ཅིག །གྲུལ་བུམ་གདོན་གྱིས་ཟིན་པ་ན། །ཤིན་ཏུ་སྐོམ་པས་འདེབས་པར་འགྱུར། །གཡེང་བས་བཏབ་ཅིང་ལྟ་བར་འགྱུར། །བཞིན་ཡང་དམར་པོར་དགའ་བར་འགྱུར། །བསྐུམ་ནས་དོགས་སར་ཉལ་བར་འགྱུར། །ཁ་དོག་ངན་ཅིང་ལུས་ཀྱང་སྐེམ། །སྐྲ་དང་སེན་མོ་རིང་བ་སྟེ། །དྲི་མ་ཅན་ལ་དྲི་མི་བདའ། །བརྫུན་དང་རྒྱལ་ཁ་སྨྲ་བར་བགྱིད། །མཆོད་སྦྱིན་གླུད་གཏོར་འདི་ལོངས་ལ། །ཕྱིན་ཆད་དེ་ལྟར་མ་བྱེད་ཅིག །ཀླུ་དང་འདབ་བཟང་གདོན་གྱིས་ནི། །སྐྱིག་བུས་འདེབས་ཤིང་དབུགས་ཀྱང་འབྱིན། །དེ་བཞིན་དབུགས་ཀྱང་གྲང་བར་འགྱུར། །རྡུལ་ཞིང་དབུ་བ་ཁ་ཆུ་འབྱུང་། །ཕྱི་ཕྱིར་གཉིད་ཀྱང་ལོག་པར་འགྱུར། །ཁ་དོག་ལྡན་ཞིང་དཔའ་བ་སྟེ། །དེ་བཞིན་འདར་ཞིང་རྒྱུག་པར་འགྱུར། །སེན་མོ་དག་ཀྱང་སྟོན་པར་བགྱིད། །དོགས་སར་མཆིས་ཤིང་དུ་བར་བགྱིད། །མཆོད་སྦྱིན་གླུད་གཏོར་འདི་ལོངས་ལ། །ཕྱིན་ཆད་དེ་ལྟར་མ་བྱེད་ཅིག །གནོད་སྦྱིན་གདོན་གྱིས་བཏབ་པ་ན། །ཕྱི་ཕྱིར་རྒོད་ཅིང་འཇིགས་པར་འགྱུར། །སྨྲ་བར་བགྱིད་ཅིང་ཁྲོ་བར་འགྱུར། །དེ་ནི་གཉིད་
ཀྱང་ལོག་པར་འགྱུར། །ཡང་ན་ཤིན་ཏུ་བྲོ་འཚལ་འགྱུར། །རྟག་ཏུ་གྱེན་ཏུ་ལྟ་བར་འགྱུར། །སྐུར་མ་དག་ལ་སྙེགས་པར་བགྱིད། །ནུབ་མོ་ཤིན་ཏུ་དགའ་བར་འགྱུར། །རྟག་ཏུ་འདར་ཞིང་སྒྲ་འབྱིན་ཏེ། །མཆོད་སྦྱིན་གླུད་གཏོར་འདི་ལོངས་ལ། །ཕྱིན་ཆད་དེ་ལྟར་མ་བྱེད་ཅིག །གདོན་རིགས་ཁྱེད་རྣམས་འཁྱམས་བགྱིད་ཅིང་། །ཕྱོགས་བཅུ་དག་ཏུ་འཇིགས་པ་བསྐྱེད། །བུད་མེད་དག་དང་སྐྱེས་པ་དང་། །དེ་བཞིན་ཁྱེའུ་བུ་མོ་དང་། །མངལ་ན་གནས་པའང་འཇིགས་པར་བགྱིད། །དུད་འགྲོའི་སྐྱེ་གནས་གཏོགས་པའང་འཚེ་། །སྐར་མ་དག་དང་ཉི་ཟླ་དང་། །གཏུམ་པའི་གཟའ་རྣམས་གནོད་པར་བགྱིད། །མཆོད་སྦྱིན་གླུད་གཏོར་འདི་ལོངས་ལ། །ཕྱིན་ཆད་དེ་འདྲའི་གནོད་མ་བྱེད།། །ལོ་ཏོག་ས་བོན་འབྲས་བུ་དང་། །མེ་ཏོག་སྨན་དང་ཟས་སྐོམ་དང་། །མི་རྣམས་ཀྱི་ནི་དཔལ་འཕྲོག་ཅིང་། །མཐོན་པོ་རྣམས་ཀྱང་དམའ་བར་བགྱིད། །མཆོད་སྦྱིན་གླུད་གཏོར་འདི་ཁྱེར་ལ། །ཕྱིན་ཆད་དབང་ཐང་མ་འཕྲོག་ཅིག །འཇིག་རྟེན་དག་ན་ནོངས་པ་རྣམས། །དམག་དང་འཐབ་མོ་ཤ་གཉེར་དང་། །ཚིག་གི་ཞིག་གམ་གསད་ཕྱེ་དང་། །དེ་ཀུན་འབྱུང་
པོའི་གནོད་པར་གྱུར། །སྦེད་ཅིང་སྟོན་པར་བགྱིད་པ་དང་། །བཟློག་པར་བགྱིད་ཅིང་དགོད་པར་བགྱིད། །མཆོད་སྦྱིན་གླུད་གཏོར་འདི་ལོངས་ལ། །ཕྱིན་ཆད་དེ་ལྟར་སེམས་མ་དཀྲུགས། །འཇིགས་པར་བགྱིད་ཅིང་ལྟ་བར་བགྱིད། །དགྲར་འགྱུར་བ་ཡང་སྟོན་པར་བགྱིད། །སྡིག་པའི་རྨི་ལམ་མཐོང་བར་བགྱིད། །ཉལ་བ་དག་ལ་གནོད་པར་བགྱིད། །སྒོ་ནས་སེ་གོལ་སྒྲ་ཕྱུང་ཞིང་། །མི་སྙན་བརྗོད་དེ་ཟ་བར་བགྱིད། །མཛའ་བོ་གཉེན་བཤེས་གཟུགས་དག་ཏུ། །གདའ་ཞིང་བཀའ་མཆིད་སྨྲ་བར་བགྱིད། །མཆོད་སྦྱིན་གླུད་གཏོར་འདི་ལོངས་ལ། །ཕྱིན་ཆད་དེ་ལྟར་མ་འཚེ་ཞིག །བུ་མོ་སྡུག་གུའི་གཟུགས་དག་ཏུ། །འདོད་ལོགས་སྤྱོད་པ་དགའ་བར་བགྱིད། །ཉི་མ་སྐར་མའི་གཟུགས་དང་ནི། །ཟླ་བའི་གཟུགས་སུ་གདའ་བར་བགྱིད། །མཆོད་སྦྱིན་གླུད་གཏོར་འདི་ལོངས་ལ། །ཕྱིན་ཆད་དེ་ལྟར་ཡིད་མ་འཕྲོག །རླུང་དང་སྐར་མདའ་ལྕེ་གཟུགས་སུ། །ཚེ་ལ་གནོད་པར་དེ་དག་གདའ། །སྐར་མའི་ཚོགས་དང་འདྲ་བ་དང་། །འཇིགས་པར་བྱེད་པའི་ཝ་དང་ཁྱིར། །རྣམ་པར་སྤྲུལ་ནས་ལྗོན་ཤིང་དང་། །མཆོད་
རྟེན་དག་གི་གནས་ན་གདའ། །མཆོད་སྦྱིན་གླུད་གཏོར་འདི་ལོངས་ལ། །ཕྱིན་ཆད་གནས་འདིར་མ་འཚོགས་ཤིག །སྐྱེས་པ་གཞོན་ནུའི་གཟུགས་མཛེས་པ། །འབར་ཞིང་ཤིང་རྟའི་སྒྲ་ཡང་འབྱིན། །གནས་རྣམས་དང་ནི་ཤུལ་དག་ཏུ། །རྣམ་པ་སྣ་ཚོགས་རྗེས་ཀྱང་སྟོན། །མཆོད་སྦྱིན་གླུད་གཏོར་འདི་ལོངས་ལ། །དེ་ལྟར་ཆོ་འཕྲུལ་མ་སྟོན་ཅིག །གྲོང་ཁྱེར་དག་དང་ཁྱིམ་རྣམས་ཀྱི། །སྒོ་ཡང་གནོད་སྦྱིན་དེ་དག་འབྱེད། །སྲོག་དང་ལུས་ཀྱང་བླང་བགྱི་ཤིང་། །ལམ་ངན་ཀུན་ཏུ་སྐོར་བར་བགྱིད། །མཆོད་སྦྱིན་གླུད་གཏོར་འདི་ལོངས་ལ། །ཕྱིན་ཆད་འཁུ་ལྡོག་མ་བྱེད་ཅིག །རྣམ་པ་སྣ་ཚོགས་གཟུགས་དག་དང་། །རྣམ་པ་སྣ་ཚོགས་སྒྲ་རྣམས་དང་། །རྣམ་པ་སྣ་ཚོགས་ནད་རྣམས་ཀྱིས། །ལུས་ལ་ན་བ་གནས་པར་སྟོན། །ནད་རྣམས་ཀུན་གྱི་མཚན་ཉིད་ཀྱང་། །ཕྱིན་ཅི་ལོག་ཏུ་སྟོན་པར་བྱེད། །ཇི་སྙེད་འཇིག་རྟེན་རང་བཞིན་དག །ཐམས་ཅད་ལོག་པར་དེ་དག་སྟོན། །མཆོད་སྦྱིན་གླུད་གཏོར་འདི་ལོངས་ལ། །ཐབས་ཅད་ལོག་པར་མ་སྦྱོར་ཅིག །བདག་གིས་དེ་རིང་ཁྱོད་མཆོད་ཀྱིས། །ཁྱེད་ཅག་མགུ་ཞིང་ཚིམ་པར་གྱིས། །ལན་ཆགས་གླུད་
གཏོར་བྱིན་ནས་ཀྱང་༔ བསྒོ་བའི་བཀའ་ལ་མི་ཉན་ན༔ དབང་ཆེན་ཁྲོས་པའི་ང་རྒྱལ་གྱིས༔ རྟ་སྐད་འཚེར་ཞིང་མཚོན་ཆས་གཏུབས༔ རྡོ་རྗེ་འཛིན་ཡང་འཇིགས་ནུས་ན༔ བགེགས་ཚོགས་རྣམས་ལ་སྨོས་ཅི་དགོས༔ ལུས་ངག་ཐལ་བར་བརླག་ནས་ཀྱང་༔ སྡུག་བསྔལ་ཉམས་སུ་མྱོང་བར་འགྱུར༔ ལེགས་པར་གསུངས་པ་འདི་ཐོས་ནས། །གལ་ཏེ་མྱུར་དུ་མི་བཏང་ན། །ཐམས་ཅད་འབར་བར་འགྱུར་བ་ནི། །མར་དང་ཡུངས་ཀར་མེར་བླུགས་བཞིན། །གནོད་སྦྱིན་ཆད་པས་བསྡིགས་ནས་སུ། །དགེ་ཞིང་བདེ་བ་མི་རྙེད་དེ། །དེ་ཡི་རྩིབ་ལོགས་གཡས་པར་ནི། །འབྲས་ཆེན་ནད་ཀྱང་འབྱུང་བར་འགྱུར། །གནོད་སྦྱིན་ནད་ཀྱིས་བཏབ་པ་ན། །ཤ་བཀྲའི་ནད་ཀྱིས་བཏབ་པར་འགྱུར། །ལྕང་ལོ་ཅན་གྱི་ཕོ་བྲང་དུ། །གཞར་ཡང་འགྲོ་བར་མི་འགྱུར་རོ། །ལུས་ངན་གྲོགས་དང་ལྡན་པ་ཡི། །ཁྱིམ་ཡང་མཐོང་བར་མི་འགྱུར་ཏེ། །འབྱུང་པོ་མང་པོ་འཚོགས་པ་ན། །སྟན་ཡང་ཐོབ་པར་མི་འགྱུར་ཏེ། །གནོད་སྦྱིན་དག་གི་དཀྱིལ་འཁོར་དུ། །ཟས་སྐོམ་དང་ཡང་བྲལ་བར་འགྱུར། །སྟོང་ཆེན་རབ་འབྱམས་མདོ་སྡེ་ལ། །
གནོད་སྦྱིན་གང་དག་མི་ཕྱོགས་པ། །དེ་ལ་རྡོ་རྗེ་འཆང་ཁྲོས་ཏེ། །སྤྱི་བོ་དག་ནི་འགེམ་པར་འགྱུར། །སྤུ་གྲིའི་སོ་ནི་རྩུབ་མོ་ཡིས། །དེ་ཡི་ལྕེ་ནི་གཅོད་པར་འགྱུར། །མཚོན་ཆ་ཤིན་ཏུ་རྣོན་པོ་ཡིས། །དེ་ཡི་སྣ་དང་རྣ་བ་གཅོད། །འཁོར་ལོ་སྤུ་གྲིའི་སོ་འདྲ་བས། །ཀླད་པ་རབ་ཏུ་གཤག་པར་བྱེད། །ཐོ་བ་ལྕགས་ཀྱིས་དཀྲིས་པ་ཡིས། །དེ་ཡི་སྙིང་ཡང་འཇོམས་པར་བྱེད། །རྣག་དང་ཁྲག་ནི་དྲོན་མོ་དག །དེ་ཡི་ཁ་ནས་འཛག་པར་འགྱུར། །རིག་སྔགས་ཞགས་པའི་ཆད་པ་ཡིས། །རྟག་ཏུ་འཁོར་བར་འགྲོ་བ་ནི། །འཁོར་བ་གནོད་སྦྱིན་དཀྱིལ་འཁོར་དུ། །དེ་ཉིད་དུ་ནི་འཁོད་པར་འགྱུར། །དེ་བས་མ་རུངས་གདུག་པའི་ཚོགས༔ སྐད་ཅིག་ཉིད་ལ་ཕྱིར་དེངས་ཤིག༔ དེ་ནས་གླུད་མདོས་ཁ་ཕྱིར་བསྒྱུར། །མདུན་དུ་དཀར་གཏོར་ཆུ་གཙང་བྲན། །ཧཱུྃ་ལས་རིན་ཆེན་སྣོད་དུ་ཁཾ་ཡིག་ལས། །གཏོར་མ་དཀར་གསུམ་མངར་གསུམ་བདུད་རྩིའི་མཚོ། །ཨོཾ་ཨཱཿཧཱུྃ་གིས་ཟག་མེད་བདུད་རྩིར་གྱུར། །ཡུལ་འདིའི་ཆུ་བོ་ཆུ་མདོ་ལ་གནས་པའི། །ཀླུ་ཆེན་ཀླུ་བདུད་ཀླུ་བཙན་མཚོ་སྨན་དང་། །ཀླུ་བྲན་ཀླུ་ཐེའུ་ཀླུ་གཉན་སྔ་མ་རྣམས། །མཆོད་སྦྱིན་དཀར་གསུམ་གཏོར་མ་འདི་བཞེས་ལ། །གླུད་མདོས་ཆུ་ལ་དོར་ལ་ཕྲག་མ་དོག །ང་ཡིས་མ་ཉེས་ཀུན་ཏུ་བཟང་པོ་དང་། །ཨོ་རྒྱན་ཆེན་
པོའི་བཀའ་ཡིན་བཟོད་པར་བཞེས། །ཨོཾ་སརྦ་ནཱ་ག་ནཱ་གི་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ། གཅིག་གིས་སྔོན་དུ་དཀར་གཏོར་ཁྱེར། །དེ་རྗེས་གླུད་གཏོར་དེ་ཁྱེར་ལ། །ཆུ་ཆེན་དག་གི་རྩར་སོང་ལ། །དང་པོ་དཀར་གཏོར་ཆུ་ལ་འཕོང་། །དེ་ནས་གླུད་མདོས་ཆུ་ལ་འཕོང་། །སྣོད་བཤལ་ནས་ཕྱི་མིག་མི་ལྟ་བར་ལོག་ཅེས་བསྒོའོ། །ཡོད་ན་ཐུན་རྫས་ཡམ་ཡུངས་ཀར། མེད་ན་ནས་ལྕག་བྲབ་ཅིང་། ཡོད་ན་གུ་གུལ་བདུག །སུམྦྷ་ནིའི་མཇུག་ཏུ། ཚེ་དང་སྲོག་ལ་བར་དུ་གཅོད་པའི་འབྱུང་པོ་ཐམས་ཅད་ཨུ་ཙ་ཏ་ཡ་ཕཊ༔ ལན་གསུམ་མམ་བདུན་དྲག་ཏུ་བརྗོད། རྔ་རོལ་མོ་དབྱངས་དང་བཅས། ཧཱུྃ༔ ང་ནི་འབར་བ་དབང་གི་སྐུ་ཞེས་པ་ནས་རཾ་ཧཱུྃ་ཕཊ༔ ཅེས་པའི་བར་བརྗོད་དོ། །རྔ་འུར་བརྡུང་དང་སྔགས་དེ་ལན་མང་བརྗོད་ཚེ་སྲུང་འཁོར་བསྒོམ། དེ་ནས་གའུ་མཆོད་གཏོར་བྲན་ལ། ཨོཾ་སྭ་བྷ་ཝ་སོགས། སྟོང་པའི་ངང་ལས་རིན་ཆེན་གཞལ་ཡས་ཁང་། །པདྨ་ཟླ་སྟེང་ལྔ་མཚམས་དབུས་མའི་སྟེང་། །ཨེ་ལས་ནམ་མཁའི་ལྷ་མོ་དབྱིངས་ཕྱུག་སྔོ། །ཕྱག་གཡས་ཆོས་འབྱུང་ཨེ་ཡིས་མཚན་པ་འཛིན། །ཤར་དུ་པཾལས་ཆུ་ཡི་ལྷ་མོ་ནི། །མཱ་ཀི་དཀར་མོ་ཕྱག་ན་ཆུ་བུམ་ཐོགས། །ལྷོ་རུ་ལཾལས་ས་ཡི་ལྷ་མོ་ནི། །སྤྱན་མ་སེར་མོ་གསེར་གྱི་བུམ་པ་ཐོགས། །ནུབ་ཏུ་རོལས་མེ་ཡི་ལྷ་མོ་ནི། །གོས་
དཀར་དམར་མོ་སྒྲོན་ཤིང་མེ་འབར་ཐོགས། །བྱང་དུ་ཡཾ༔ ལས་རླུང་གི་ལྷ་མོ་ནི། །སྒྲོལ་མ་ལྗང་གུ་རླུང་གི་བ་དན་ཕྱར། །ཀུན་ཀྱང་སྒེག་འཛུམ་དར་དང་རཏྣས་བརྒྱན། །རང་རང་མདོག་མཚུངས་འོད་ཕུང་དབུས་ན་བཞུགས། །བར་ཁྱམས་འཁོར་ཡུག་འདོད་ཡོན་མཆོད་པའི་སྤྲིན། །ཀུན་ཏུ་བཟང་པོའི་མཆོད་སྤྲིན་ལྟ་བུར་གྱུར། །ལྷ་ལྔའི་གནས་གསུམ་ཡིག་འབྲུ་གསུམ་པོ་དང་། །རང་རང་ཐུགས་ཀའི་ས་བོན་འོད་ཟེར་གྱིས། །རང་འདྲ་དཔག་མེད་སྤྱན་དྲངས་དབྱེར་མེད་བསྟིམ། །ཧཱུྃ། འོག་མིན་དག་པའི་ཞིང་མཆོག་ལྔ་པོ་ནས། །རིགས་ཀྱི་ཡུམ་ཆེན་ལྔ་པོ་གཤེགས་སུ་གསོལ། །མཁའ་སྤྱོད་ཨོ་རྒྱན་གནས་ཡུལ་དུར་ཁྲོད་ནས། །ཡེ་ཤེས་མཁའ་འགྲོ་སྡེ་ལྔ་གཤེགས་སུ་གསོལ། །སྟོང་གསུམ་མི་མཇེད་འཇིག་རྟེན་ཞིང་ཁམས་ནས། །འབྱུང་བའི་ལྷ་མོ་ལྔ་པོ་གཤེགས་སུ་གསོལ། །སོ་སོའི་ཙཀྲ་འདི་ལ་བརྟན་པར་བཞུགས། །ཨེཡཾརཾཔཾལཾབཛྲ་ས་མཱ་ཛ༔ ཏིཥྛ་ལྷན༔ ། དབང་ལྷ་རིགས་ལྔ་སྤྱན་དྲངས་དབང་བསྐུར་ནས། །སོ་སོའི་བདག་པོ་རིགས་ལྔས་དབུར་བརྒྱན་གྱུར། །ཡུམ་ཆེན་ལྔ་དང་ཡེ་ཤེས་མཁའ་འགྲོ་ལྔ། །དབྱེར་མེད་འབྱུང་བའི་ལྷ་མོ་
ལྔ་པོ་ལ། །ལུས་ངག་ཡིད་གསུམ་གུས་པས་ཕྱག་འཚལ་ལོ། །སྔར་བྱས་སྡིག་པ་ཐམས་ཅད་མཐོལ་ཞིང་བཤགས། །མཆོད་ཡོན་ཞབས་བསིལ་མེ་ཏོག་བདུག་སྤོས་དང་། །མར་མེ་དྲི་ཆབ་ཞལ་ཟས་རོལ་མོ་འབུལ། །འདོད་ཡོན་ལྔ་དང་རྒྱལ་སྲིད་རིན་ཆེན་བདུན། །དངོས་འབྱོར་ཡིད་སྤྲུལ་མཆོད་པ་དཔག་མེད་འབུལ། །བྷཱཝལས་རིན་ཆེན་སྣོད་མཆོག་ཡངས་པའི་ནང་། །གཏོར་མ་ཁ་དོག་དྲི་རོ་ཕུན་སུམ་ཚོགས། །ཧཧོ་ཧྲིདང་ཨོཾ་ཨཱཿཧཱུྃ་རྣམས་ཀྱིས། །ཟག་མེད་ཡེ་ཤེས་བདུད་རྩིར་བྱིན་བརླབ་སྟེ། །འབྱུང་བའི་ལྷ་མོ་ལྔ་ལ་འབུལ་གྱིས་བཞེས། །ཨེག་ག་ན་དེ་ཝི་ཨི་དཾ་བ་ལིཾ་ཏ་ཁ་ཁ་ཁཱ་ཧི༔ ཡཾཝ་ཡ་ཝེ་དེ་ཝི་ཨི༔ རཾཨཀྵེ་དེ་ཝི༴ བཻ་ས་ནེ་དེ་ཝི༴ ལཾབྷ་མི་དེ་ཝཱི༔ དམ་རྫས་བརྒྱན་པའི་གཏོར་མ་རྒྱུ་ཆེན་པོ་འདི་འབྱུང་བའི་ལྷ་མོ་ལྔ་ལ་འབུལ་ལོ། །མཉེས་ཤིང་ཚིམས་ནས་ཕྱི་ས་ཆུ་མེ་རླུང་ནམ་མཁའི་བཅུད་ཐམས་ཅད་བསྡུས་ནས། ནང་གི་ཤ་ཁྲག་དྲོད་་དབུགས་སེམས་ལ་བསྟིམ་དུ་གསོལ། འབྱུང་བ་མི་འཁྲུགས་ཤིང་ནད་མེད་པ་དང་ཚེ་རིང་བར་མཛད་དུ་གསོལ། ཧཱུྃ། དག་པའི་ཞིང་དུ་ཡུམ་ཆེན་ལྔ། །མཁའ་སྤྱོད་གནས་སུ་
མཁའ་འགྲོ་ལྔ། །འཇིག་རྟེན་ཁམས་སུ་འབྱུང་བ་ལྔ། །འཁོར་འདས་ཐམས་ཅད་བསྐྱེད་པའི་ཡུམ། །འབྱུང་བའི་ལྷ་མོ་ལྔ་པོ་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །བཅོལ་བའི་ཕྲིན་ལས་འགྲུབ་པར་མཛོད། །དེ་ནས་རྒྱུད་ཚིག་མཆོད་བསྟོད་ནི། ཧཱུྃ། འབྱུང་བ་བསྐྱེད་པའི་ལྷ་མོ་རྣམས། །བདག་ལ་གསན་ཅིང་དགོངས་སུ་གསོལ། །འབྱུང་བ་ཕྱི་ནང་འཁྲུག་པ་རྣམས། །ཆོ་ག་འདི་ཡིས་མཐུན་པར་ཤོག །དམིགས་པའི་མི་འདི་ད་བསླུའོ། །ནད་གདོན་སྡིག་སྒྲིབ་རྣམ་རྟོག་རྣམས། །ད་ལྟ་ཉིད་དུ་བྱང་ནས་ཀྱང་། །འཆི་བའི་རྐྱེན་རྣམས་བཟློག་ཏུ་གསོལ། །འདོད་ཡོན་མཆོད་པ་རྣམ་པ་ལྔ། །འབྱུང་བ་བསྐྱེད་པའི་ལྷ་ལ་འབུལ། །མཆོད་གཏོར་བཞེས་ལ་དགྱེས་པར་རོལ། །སརྦ་པཱུ་ཛ་ཧོ༔ ལྷ་མོ་ལྔ་པོའི་ཐུགས་ཀ་རུ། །རང་རང་ས་བོན་རང་མདོག་མཐར། །རང་རང་སྔགས་ཕྲེང་གཡོན་དུ་འཁོར། །ནམ་མཁའི་ལྷ་མོའི་ཐུགས་ཀ་ནས། །འོད་ཟེར་མཐིང་གས་ནམ་མཁའ་ཁྱབ། །ནམ་མཁའི་བཅུད་ཀུན་བསྡུས་ནས་ཀྱང་། །བསྲུང་བྱའི་སེམས་དང་ཙཀྲར་ཐིམ། །ཨེ་ལིཾ་ཏེ་ཤྭ་ར་ཏི་སིཾ༔ ཨཱབུདྡྷ་ཌཱ་ཀི་ནཱི་ཧཱུྃ༔ ཨེ་ག་ག་ན་དེ་ཝི་ཧཱུྃ་ཛ༔ ཞེས་དང་
ཨེཿལོ་གྲངས་བརྗོད། རླུང་གི་ལྷ་མོའི་ཐུགས་ཀ་ནས། །འོད་ཟེར་ཕྱོགས་བཅུར་རབ་འཕྲོས་པས། །རླུང་གི་བཅུད་ཀུན་འོད་ལྗང་གུར། །བསྡུས་ནས་བསྲུང་བྱའི་དབུགས་དང་ནི། །རླུང་གི་ཙཀྲར་སིབ་སིབ་ཐིམ། །ཏྭཾབཛྲ་ར་སྟི་སིཾ༔ ས་ཀརྨ་ཊཱ་ཀི་ནཱི་ཧཱུྃ༔ ཡཾཝ་ཡ་ཝེ་དེ་ཝཱི་ཧཱུྃ་ཛ༔ དེ་ནས་ཡཾ་ཞེས་ལོ་གྲངས་བརྗོད། །མེ་ཡི་ལྷ་མོའི་འོད་ཟེར་གྱིས། །མེ་ཡི་བཅུད་ཀུན་འོད་དམར་པོར། །བསྡུས་ནས་བསྲུང་བྱའི་དྲོད་དང་ནི། །མེ་ཡི་ཙཀྲར་ཐིམ་པར་གྱུར། །མྱྀ་རཱ་ག་ར་སྟི་སིཾ༔ ནིཔདྨ་ཊཱ་ཀི་ནཱི་ཧཱུྃ༔ རཾཨཀྵེ་དེ་ཝཱི་ཧཱུྃ་ཛ༔ རཾ་ཞེས་བསྲུང་བྱའི་ལོ་གྲངས་བརྗོད།། ཆུ་ཡི་ལྷ་མོའི་འོད་ཟེར་གྱིས། །ཆུ་བཅུད་ཐམས་ཅད་འོད་དཀར་པོར། །བསྡུས་ནས་བསྲུང་བྱའི་ཁྲག་དང་ནི། །ཆུ་ཡི་ཙཀྲར་ཐིམ་པར་གྱུར། །མཾ་དྷཆུ་ཤྭ་རི་སིཾ༔ ཧ་བཛྲ་དྷ་ཀི་ནཱི་ཧཱུྃ༔ བཻ་ས་ཎི་དེ་ཝཱི་ཧཱུྃ་ཛ༔ བཻཆུ་ཡི་ས་བོན་ལོ་གྲངས་བརྗོད། ས་ཡི་ལྷ་མོའི་འོད་ཟེར་གྱིས། །ས་བཅུད་གསེར་མདོག་འོད་དུ་བསྡུས། །ཤ་དང་ས་ཡི་ཙཀྲར་ཐིམ། །ཨཾཐམོ་ཧ་ར་སྟི་སིཾ༔ རི་རཏྣ་ཊཱ་ཀི་ནི་ཧཱུཾ། ལཾབྷ་མི་དེ་ཝཱི་ཧཱུྃ་ཛ༔ ལཾས་ཡི་ས་བོན་ལོ་གྲངས་བརྗོད། དེ་ནས་གསང་འདུས་ལས་ བྱང་གི །ཧཱུྃ། །
བཅོམ་ལྡན་མགོན་པོ 
་ཚེ་དཔག་མེད༔ ཅེས་སོགས་གཙོ་བོའི་བསྟོད་བསྐུལ་རྗེས། །ཚེ་དཔག་བསྙེན་པ་ཕྲེང་སྐོར་དང་། །ཧཱུྃ་ཤྲཱི་ལ་སོགས་སྔགས་ཚན་ལྔ། །ལོ་གྲངས་ཙམ་རེ་བརྗོད་པའི་རྗེས། །མདའ་དར་ཐོགས་ལ་ཚེ་འགུགས་ནི། ཧཱུྃ། ཤར་གྱི་ཕྱོགས་ནས་ཚེ་འགུགས་ནས། ཧཱུྃ། ཤར་ཕྱོགས་དཀར་མོ་ཤེལ་གྱི་གཞལ་ཡས་ནས༔ ཞེས་སོགས་དང་། ཧཱུྃ། ཁམས་གསུམ་གནས་ནས་ཚེ་འགུགས་མ༔ སོགས། ཛྷ་ན་ཛ་ཛའི་བར་དུ་བརྗོད། དབུས་ཀྱི་གའུ་ལག་ཏུ་ཐོགས།། ཧཱུྃ། ནམ་མཁའི་དབྱིངས་ནས་ཚེ་འགུགས་མ༔ ཞེས་སོགས་མཇུག་ཏུ་ཨེ་ལོ་གྲངས། །བསྲུང་བྱའི་སྙིང་གར་གཏུགས་པ་དང་། །མཇུག་ཏུ་སྔགས་འདི་བརྗོད་པར་བྱ། །ཨེཨ་བྷི་ཥིཉྩ་ཨ་དྷིཥྛ་ན་ཧཱུྃ་སྭཱ་ཧཱཿ བྱང་གི་གའུ་ལག་ཏུ་ཐོགས། ཧཱུྃ། བྱང་གི་ཕྱོགས་ནས་ཞེས་སོགས་མཇུག །རྣ་བར་གཏུག་ཅིང་ཡཾཿལོ་གྲངས། །ཡཾཿཨ་བྷི་ཥིཉྩ་ཨ་དྷིཥྛ་ན་ཧཱུྃ་སྭཱ་ཧྭ༔ ནུབ་ཀྱི་གའུ་ལག་ཏུ་ཐོགས། ཧཱུྃ་ནུབ་ཀྱི་ཕྱོགས་ནས་ཞེས་སོགས་མཐར། །མིག་ལ་གཏུག་ཅིང་རོལོ་གྲངས། །རཾཨ་བྷི་ཥིཉྩ་ཨ་དྷིཥྛན་ཧཱུཾ་སྭཱ་ཧཱཿ ཤར་གྱི་གའུ་ལག་ཏུ་ཐོགས།། ཧཱུྃ། ཤར་གྱི་ཕྱོགས་ནས་ཞེས་སོགས་མཐར། །ཁ་ལ་གཏུག་ཅིང་ཐཾ༔ ལོ་གྲངས། །ཐཾཨ་བྷི་ཥིཉྩ་ཨ་དྷིཥྛ་ན་ཧཱུཾ་སྭ་ཧཱཿ ལྷོ་ཡི་གའུ་ལག་ཏུ་ཐོགས། ཧཱུྃ། ལྷོ་ཡི་ཕྱོགས་ནས་ཞེས་སོགས་
མཐར། །ལྕེ་ལ་གཏུག་ཅིང་ལཾལོ་གྲངས། །ལཾཨ་བྷི་ཥིཉྩ་ཨ་དྷིཥྛན་ཧཱུྃ་སྭཱ་ཧཱ༔ ཏྲ་ཏྲ་ཤག་སོགས་བརྒྱ་རྩ་བརྗོད། །སྙིང་པོ་བརྟན་པར་མི་ནུས་སོགས། །ཐུགས་དམ་ཆེན་པོའི་དུས་ལ་བབ༔ སོགས། གཏོར་དབང་བསྐུར་ན་སྐབས་འདིར་བྱ། །མ་བསྐུར་ན་ཡང་འགལ་བ་མེད། །དེ་ནས་གའུའམ་འཁོར་ལོ་ལྔ། །བསྲུང་བྱའི་སྙིང་གར་བཟུང་བཅུག་ལ། །མེ་ཏོག་འཐོར་ཞིང་འདི་ཉིད་གྱེར།། ཧཱུྃ། དམ་ཚིག་ཆེན་པོའི་དུས་ལ་བབ་སོགས། །དེ་ནས་ཚེ་ཆང་ཡོད་ན་དྲངས། །རྡོ་རྗེ་དང་བཅས་མདའ་དར་གཡབ། །སྐུ་ཡི་སྐུ་སྟེ་ལ་སོགས་བརྗོད། མདའ་དར་དང་ཚེ་གཏོར་ལག་ཏུ་གཏད། །ཨོ་འགྲུབ་པར་གྱུར་ཅིག་ལ་སོགས་ཚིག །ལན་གསུམ་བར་དུ་རྗེས་ཟློས་བྱ། །འཁོར་ལོ་མགུལ་དུ་བཏགས་ན་བཟང་། །རྟག་ཏུ་ས་གཅིག་འདུག་ན་ནི། །གའུ་དང་བཅས་སྔས་ཞབས་སམ། །རྒྱབ་ཡོལ་གྲིབ་ཏུ་བཞག་པས་འཐུས། །འཆི་བསླུ་ལན་གསུམ་བྱེད་པའམ། །ལོ་དུས་འཆི་བསླུ་བྱེད་པ་ལ། །འཁོར་ལོ་དེ་གར་ཆོ་ག་ཝིག །འཆི་བསླུའི་གྲོང་ཆོག་བྱེད་པ་ན། །འཁོར་ལོའི་ཙཀླུ་བྲིས་ཏེ་ཁྱེར། །འཆི་བསླུ་ལན་གཅིག་བྱས་པས་ཀྱང་། །ལོ་གསུམ་འཆི་བ་བཟློག་པར་གསུངས། །འཆི་བསླུ་ལན་གསུམ་བྱས་པས་ན། །དུས་མ་ཡིན་པའི་འཆི་བ་ནི། །མི་བཟློག་མི་སྲིད་ཨོ་རྒྱན་གསུངས། །ནད་པ་མིན་ཀྱང་ཁག་ཆེ་ལ། །ལོ་རེ་ལན་རེ་བྱས་པ་ན། །སྐུ་རིམ་དེ་ལས་ཟབ་པ་ནི། །ཡོད་རེ་ན་ར་ཀན་
ཞེས་གསུངས། །ཀློང་གསལ་སྙིང་ཐིག་ཞི་ཁྲོ་དང་། །ཡང་ཏིག་ཆེ་རྒྱུད་རྡོར་ཕྲེང་དང་། །གཏེར་ཁ་དུ་མ་ནས་གསུངས་པའི། །འཆི་བསླུ་ཀུན་གྱི་དོན་བསྡུས་ཏེ། །དོན་གསལ་ལག་ཏུ་བླངས་བདེར་བཀོད། །ཉེས་འགལ་ཚེ་ཡི་ལྷ་ལ་བཤགས། །དགེ་བས་བསྟན་འཛིན་སྐྱེས་བུ་དང་། །ཆོས་སྤྱོད་ཆོས་སྒོར་ཞུགས་རྣམས་ཀྱི། །དུས་མིན་འཆི་བའི་རྐྱེན་བཟློག་ནས། །དོན་གཉིས་ལྷུན་གྱིས་འགྲུབ་པར་ཤོག །དེ་སྐད་རཱ་ག་ཨ་སྱ་ཡིས། །ལྕགས་མོ་ཁྱི་ལོ་ནག་ཟླ་ཡི། །དམར་པོའི་ཐུན་མཚམས་འགའ་ལ་བསྒྲིགས། །བརྩོན་འགྲུས་ཞེས་བྱས་བརྩོན་པར་བྲིས། །མངྒ་ལཾ། །དགེའོ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།