བཅོམ་ལྡན་འཇམ་དཔལ་ཁྲོ་ཆུ་དུག་གདོང་ལས་སྤྲོས་མེད་ལྟར་བསྙེན་པའི་མན་ངག་ཤིན་ཏུ་གསལ་བར་བཀོད་པ།
བཅོམ་ལྡན་འཇམ་དཔལ་ཁྲོ་ཆུ་དུག་གདོང་ལས་སྤྲོས་མེད་ལྟར་བསྙེན་པའི་མན་ངག་ཤིན་ཏུ་གསལ་བར་བཀོད་པ་བཞུགས་སོ། །
བཅོམ་ལྡན་འཇམ་དཔལ་ཁྲོ་ཆུ་དུག་གདོང་ལ་ཕྱག་འཚལ་ལོ། རྣལ་འབྱོར་སྤྲོས་བཅས་མི་ལྕོགས་པ་དང་། ཡོ་བྱད་མི་འབྱོར་པ། སྤྲོས་པ་ལ་མི་དགའ་བ་རྣམས་ཀྱིས། ཁྲོ་ཆུའི་བསྙེན་པ་སྤྲོས་མེད་ལྟར་བྱ་བ་ནི། གཟའ་སྐར་བཟང་བའམ་རྩུབ་པའི་ཉིན་པར། སྟེགས་བུ་གནས་དང་འཚམས་པའི་སྟེང་དུ་བྲུབ་ཁུང་གཅིག་བཞག །དེ་ལ་མཐར་ཆུང་ཉེར་གཅིག་བཙུགས། དེའི་ནང་དུ་ཤོག་ལིང་ངམ་མ་འབྱོར་ན། ཟན་ལིང་གཅིག་ལ་དུག་ཤིང་ཕུར་པ་སོར་བཞི་བཙུགས་ལ་བཞག ཁ་བཅད་ལ་སྟེང་དུ་ཚ་ཚ་སྟོད་དཀར་པོ། པདྨ་སྨད་ནག་པོ་བྱས་ལ་བཞག །དེའི་
སྟེང་དུ་ལྡིང་ཁྲིའི་ཁར་དུག་སྣ་ཁྲག་སྣ་ཤ་ཁྲག་ཅི་འབྱོར་གྱི་གཏོར་མ་ཁྲམ་རིས་ཅན། དེའི་གཡས་སུ་དཀར་གཏོར་རིན་ཆེན་འབར་བའི་དབྱིབས་ཅན་གཡོན་དུ་རྒྱུན་གཏོར་ཟུར་གསུམ་ཤ་ཡིས་བརྒྱན་པ་དང་། གང་བདེར་སྨན་རཀ་སོགས་མཆོད་པ་ཅི་འབྱོར་བཤམས། རབ་སྔགས་འཁོར་དང་ཕུར་པ་གཉིས། མ་འབྱོར་ཡང་གྲི་ལྕགས་ཀྱི་ཕུར་པ་གྲི་ཁྲག་གིས་ངར་བླུད་པ་མགུལ་དུ་བཏགས། མཚམས་གཅོད་སྔོན་འགྲོ་གཏོར་མ་བཏང་ནས་། སྐྱབས་འགྲོ་ནས་བཟུང་བསྟོད་པའི་བར་དང་། འབྱོར་ན་ནུབ་དང་པོ་དང་ནུབ་ཐ་མ་ལ་ཚོགས་དང་གཏོར་མ་འབུལ་བ་བྱེད། བསྙེན་པ་བྱེད་
ཚུལ་ཐམས་ཅད་རྒྱས་པའི་སྐབས་ལྟར་ཉམས་སུ་ལོངས། །ས་མ་ཡ། རྒྱ་རྒྱ་རྒྱ། ཡང་དེ་ཙམ་མི་འབྱོར་བའི་སྤྲོས་མེད་དོན་གྱི་རྣལ་འབྱོར་རམ། སྤྲོས་བཅས་ལ་འཇུག་ན་མདུན་དུ་སྟེགས་ཀྱི་ཁར་ལྕགས་ལྡེར་རམ་སྣོད་གཙང་མ་གཅིག་ ཏུ་དམར་གཏོར་གཅིག་བྱས་ལ། སྨད་གྲིས་བཅད་ལ། འོག་ལ་གྲུ་གསུམ་བྱས་ལ་ཟན་ལིང་བཅུག དེའི 
་སྟེང་དུ་གཏོར་མ་སྦྱར་ལ་དཀྱིལ་དུ་བཞག གཡས་སུ་མར་གྱི་རིལ་བུ་ཆེན་པོ་གཅིག གཡོན་དུ་གཏོར་མ་ཟུར་གསུམ་ཆེ་བ་གཅིག་བཞག སྔོན་འགྲོ་ནས་བཟུང་སྟེ་རྒྱས་པའི་སྐབས་ལྟར་ཉམས་སུ་ལོངས༔ ས་མ་ཡ། རྒྱ་རྒྱ་རྒྱ། གུ་ཧྱ། ཨྠྀི༔ ཡང་ཤིན་ཏུ་རྨོངས་པའི་གང་ཟག་ཕྱག་ལེན་ལ་རྡུགས་པས་ཀྱང་མི་ཚད། འདོན་ཚད་འདོན་ཆ་འཁྲུགས་པ་དང་། དམིགས་པ་མ་ཟིན་པའི་རིགས་ལ་གཅིག་ཆོག་རྣམས་ཀྱི་གདམས་པ་བསྟན་ཏེ། སྐྱབས་འགྲོ་ནས་བཟུང་སྟེ་བསྟོད་པའི་བར་དེ་ལ། ཁོ་བོས་མཚལ་སེར་བྱས་ནས་ཡོད་པ་འདི་མཚལ་མ་ཁོ་ན་འདོན་། བསྙེན་པ་གཅིག་གིས་ཆོག་པ་ནི། རང་གི་ཐུགས་ཀའི་ཧཱུཾ་སྔགས་ཕྲེང་དང་བཅས་པ་ལས་འོད་ཟེར་འཕྲོས། སངས་རྒྱས་ཐམས་ཅད་མཆོད། སེམས་ཅན་ཐམས་ཅད་ཀྱི་སྡིག་
སྒྲིབ་སྦྱངས། གནོད་བྱེད་གདུག་པ་ཅན་ཐམས་ཅད་ཚར་བཅད། སངས་རྒྱས་ཐམས་ཅད་ཀྱི་བྱིན་རླབས་དང་སེམས་ཅན་ཐམས་ཅད་ཀྱི་བསོད་ནམས། ལྷ་སྲིན་དྲེགས་པ་ཅན་ཐམས་ཅད་ཀྱི་མཐུ་སྟོབས་ཐམས་ཅད་འོད་ཟེར་གྱི་རྣམ་པས་རང་ལ་ཐིམ་པར་བསམས་ལ་བསྙེན་པ་བྱའོ།། །སྲུང་བ་གཅིག་གིས་ཆོག་པ་ནི། དུག་རྫས་རྡོ་རྗེའི་བསྲུང་བ་ཁོ་ན་བསྒོམ༔ ཟློག་པ་གཅིག་གིས་ཆོག་པ་ནི། རི་རབ་ཐལ་ཕུང་ཁོ་ན་བསྒོམ། བསད་པ་གཅིག་གིས་ཆོག་པ་ནི། སྙན་བརྒྱུད་སྨད་ཕུར་ཁོ་ན་བསྒོམ། སྔགས་བཟླས་པས་ཆོག་པའོ། །ས་མ་ཡ༔ རྒྱ་རྒྱ་རྒྱ༔ ཡང་དབང་པོ་ཡ་རབ་ཤིན་ཏུ་སྤྲོས་མེད་དོན་གྱི་རྣལ་འབྱོར་པས། སྤྲོས་བཅས་ཅི་ཡང་མི་འཚལ་ཞིང་། གཞུང་བསྲང་བ་ཡང་མི་དགོས་ཏེ། སེམས་ཉིད་སྟོང་གསལ་ནམ་མཁའ་ལྟ་བུ་ལ། །སྐད་ཅིག་དྲན་རྫོགས་འཇའ་ཚོན་ཤར་བ་ལྟར། བསྙེན་པ་ཅི་ནུས་འབད་བཅོམ་ལྡན་ཁྲོ་ཆུ་དུག་གདོང་གི་སྲུང་འཁོར་དང་བཅས་པ་ཝལ་གྱིས་གསལ་བཏབ་ནས། སྤྱན་འདྲེན་བྱ་རྒྱུ་མེད་པ་དང་། སེམས་ཡེ་ཤེས་སེམས་དཔའ་རང་ལུས་དམ་ཚིག་སེམས་དཔར་ཤེས། གྲག་སྟོང་བྲག་ཆ་ལྟ་བུ་ཅི་ནུས་འབད། བློས་བྱས་དབུ་
ཞབས་ན་བསྡུ་བའི་རྣམ་རྟོག་ཕྲེང་བ་མི་དགོས་ཏེ། རང་སེམས་བསྐྱེད་རིམ་དེའི་ངོ་བོར་ལྷན་གྱིས་བཞག །ཧྲིག་གེར་བལྟའོ།། འདིའི་མན་ངག་འགའ་ཞིག་ནང་། འདི་རླུང་སྒྲུབ་ཡིན་པས་གཏོར་མ་མེད་ཀྱང་ཆོག་གསུངས་པ་ལྟར། བཟའ་བཏུང་བདུད་རྩིར་བསམས་ལ་བདག་བསྐྱེད་ལ་མཆོད། དེ་ནས་རྒྱུན་གཏོར་གྱིས་མཆོད་ལ། རྡེབ་ཆོག་དང་བསད་དམིགས་སྐབས་སུ་དགྲ་བོའི་ཤ་ཁྲག་ལས་ཀྱི་གཤིན་རྗེ་རྣམས་ལ་སྟེར་བས་དམིགས་པས་ཐུན་གྱི་གོ་ཆོད། དགྲ་བོ་ཁོ་རང་གི་ལིངྒ་དེ་ཁང་པ་བྲུབ་ཁུང་། རང་གི་སྐུ་སྨད་ཕུར་པར་བསྒོམས་པས་ཕུར་པ། ལག་པ་མཚོན་ཆ་དང་འཁོར་ལོ་དང་དམིགས་པས་ཐུན་རྫས་ཏེ། སྤྲོས་པ་ཅི་ཡང་མི་དགོས་སོ། །སྔགས་དང་དམིགས་པ་ཁོ་ནས་འགྲུབ་བོ། །ཞེས་སྤྲོས་མེད་ཤིན་ཏུ་སྤྲོས་མེད་རྣལ་འབྱོར་ཆེན་པོའི་ཚུལ་དུ་བསྙེན་པའི་ཐབས། ཀརྨ་ཨ་རཱ་གས་བཀོད་པའོ། །འདི་ལ་ཉེས་པ་ཅི་མཆིས་འཇམ་དཔལ་དབྱངས་ལ་བཤགས། དགེ་བས་འགྲོ་བ་ཐམས་ཅད་འཇམ་དབྱངས་འགྲུབ་པར་ཤོག །ས་མ་ཡ༔ རྒྱ་རྒྱ་རྒྱ༔ ཤམཐགཏཙཎྜགག་གོ ཨེ་མ་རྒྱལ་བས་གསུངས་པའི་ཆོས་རྣམས་ཀུན། །གང་ཟག་དབང་པོ་རིམ་པ་བཞིན། །རྒྱས་
དང་བསྡུས་དང་ཤིན་ཏུ་བསྡུས། །སྤྲོས་བཅས་སྤྲོས་མེད་གསུངས་པ་རྣམས། །ཕལ་གྱིས་དབྱེ་བ་ཤེས་པར་དཀའ། །དབྱེ་བའི་ཡལ་ག་མང་པོ་ཡང་། །སྡོང་པོ་དེ་ལ་འདུས་པ་ལྟར། །ཤིན་ཏུ་ཟབ་ཅིང་མ་ཚང་མེད། །འདི་ལྟར་བསྙེན་པ་བྱེད་པ་རྣམས། །ག་ཡིག་རྒྱས་པའི་ནང་དུ་ལྟོས། །གྲངས་ལ་ངེས་པ་མེད་པ་ཡིན། །རྟགས་ཐོན་པ་ནི་གནད་ཆེའོ། །གང་ཟག་འགའ་ཞིག་ཁམས་དབང་གིས། །ཞེས་ཀྱང་རྟགས་མེད་རིགས་ཡིན་ན། །གྲངས་ཀྱི་བསྙེན་པ་བྱེ་བའོ། །བདུན་འབུམ་བཞི་འབུམ་ཐེམ་པར་བྱ། །དེས་ཀྱང་ལས་ཚོགས་འགྲུབ་པ་ཡིན། །ལས་རུང་བསྙེན་པ་ཞེས་བྱའོ། །སྤྲོས་མེད་དོན་གྱི་རྣལ་འབྱོར་རམ། །ཡང་ན་རྨོངས་པའི་གང་ཟག་ལ། །སྤྲོས་མེད་སྐོར་རྣམས་གསེར་ལས་འཕང་། །ས་མ་ཡ། རྒྱ་རྒྱ་རྒྱ། ཞེས་པ་ཨ་རཱ་གས་སོ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།