ཡི་དམ་རབ་འབྱམས་ཀྱི་དབང་བསྐུར་བའི་ལོ་རྒྱུས།
ཡི་དམ་རབ་འབྱམས་ཀྱི་དབང་བསྐུར་བའི་ལོ་རྒྱུས་བཞུགས་སོ།།
འོ་ན་ད་ལམ་ཁྱེད་རྣམས་ལ་ཡི་དམ་རབ་འབྱམས་ཀྱི་དབང་བསྐུར་བ་ལ་ལོ་རྒྱུས་ཟུར་ཙམ་ཞུ་ན། རང་རེ་ཐོབ་པར་དཀའ་བའི་དལ་འབྱོར་གྱི་མི་ལུས་རིན་པོ་ཆེ་འདི་ཐོབ་ཀྱང་མི་རྟག་མྱུར་དུ་འཆི་ བར 
་འགྱུར་ཞིང་། ཤི་ནས་ལས་ཀྱི་དབང་གིས་རིགས་དྲུག་གར་སྐྱེ་ངེས་པ་མེད། །ངན་སོང་གསུམ་དུ་སྐྱེས་ནས་སྡུག་བསྔལ་བཟོད་གླགས་མེད་པ་ཡོད་ཅིང་། མཐོ་རིས་སུ་སྐྱེས་ཀྱང་མི་རྟག་སྡུག་བསྔལ་དུ་འགྱུར། རིགས་དྲུག་དེ་དག་གཅིག་ནས་གཅིག་ཏུ་འཁོར་ཞིང་མཐའ་མེད་པས་འཁོར་བ་སྡུག་བསྔལ་གྱི་རྒྱ་མཚོ་འཇིགས་སུ་རུང་བ་ཡིན། སྡུག་བསྔལ་དེ་ལས་ཐར་བའི་
ཐབས་བཅོམ་ལྡན་འདས་ཀྱིས་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གསུངས་པ་ཐམས་ཅད་ཐེག་པ་ཆེ་ཆུང་གཉིས་སུ་འདུས། ཐེག་པ་དམན་པས་ནི་རང་དོན་ཞི་བདེ་ཙམ་མ་གཏོགས་འབྲས་བུ་རྫོགས་པའི་སངས་རྒྱས་མི་འགྲུབ་པས་ཐེག་པ་ཆེན་པོར་འཇུག་པ་གལ་ཆེ། ཐེག་པ་ཆེན་པོ་དེ་ལ་ཡང་རྒྱུ་དང་འབྲས་བུའི་ཐེག་པ་གཉིས་ལས། རྒྱུ་མཚན་ཉིད་ཀྱི་ཐེག་པས་ནི་བསྐལ་པ་གྲངས་མེད་གསུམ་གྱི་
བར ་དུ་འབྲས་བུ་རྫོགས་པའི་སངས་རྒྱས་མི་ཐོབ་པས། ལམ་ཐག་རིང་ཞིང་དཀའ་ཚེགས་ཆེ། འབྲས་བུ་གསང་སྔགས་ཀྱི་ཐེག་པ་ལ་རྒྱུད་སྡེ་བཞི་ལས། བྱ་སྤྱོད་རྒྱུད་ཀྱིས་
སྐྱེ་བ་དྲུག་ཅུ་དང་། རྣལ་འབྱོར་རྒྱུད་ཀྱིས་སྐྱེ་བ་བཅུ་དྲུག་དང་། བླ་མེད་རྒྱུད་ཀྱིས་བརྩོན་འགྲུས་ཆུང་ན་སྐྱེ་བ་བདུན། འབྲིང་གསུམ། རབ་ཚེ་གཅིག་ལ་འབྲས་བུ་སངས་རྒྱས་ཐོབ་པར་གསུངས་པས་ལམ་ཐག་ཉེ་ཞིང་དཀའ་ཚེགས་ཆུང་བ་ཡིན། དེ་ལ་སྟོན་པ་རྡོ་རྗེ་འཆང་བཅོམ་ལྡན་འདས་ཀྱིས་རྡོ་རྗེ་འཆང་དང་ཧེ་རུ་ཀ་སྣ་ཚོགས་པའི་སྐུར་བཞེངས་ནས་བྱང་ཆུབ་སེམས་དཔའ་དང་དཔའ་བོ་ཌཱཀི་རྣམས་ལ་བླ་མེད་ཀྱི་རྒྱུད་སྡེ་དཔག་ཏུ་མེད་པ་གསུངས། རྣམ་པར་སྣང་མཛད་ལ་སོགས་པ་ལོངས་སྤྱོད་རྫོགས་པའི་སྐུར་བཞེངས་ནས་རྣལ་འབྱོར་རྒྱུད་རྣམས་གསུངས། མཆོག་གི་སྤྲུལ་སྐུ་ཉིད་ཀྱིས་གནས་མ་ངེས་ཤིང་འཁོར་མ་ངེས་པ་ལ་བྱ་སྤྱོད་ཀྱི་རྒྱུད་སྡེ་གསུངས་པ་རྣམས་གསང་བའི་བདག་པོས་བཀའི་བསྡུ་བ་མཛད་དེ། འགའ་ཞིག་གྲུབ་ཆེན་རྣམས་ལ་སྙན་བརྒྱུད་དུ་གནང་བའང་ཡོད། འགའ་ཞིག་གླེགས་བམ་གྱི་ཆར་བབ་པ་ནས་བྱུང་། འགའ་ཞིག་ཀླུ་སྒྲུབ་སོགས་ཀྱིས་གཏེར་ནས་བཏོན་པའང་ཡོད་དེ་། རྒྱུད་སྡེ་དེ་དག་ལ་བརྟེན་ནས་གྲུབ་ཆེན་སོ་སོའི་མཛད་པའི་སྒྲུབ་ཐབས་དང་རྗེས་གནང་མཐའ་ཡས་པ་ཡོད་པ་རྒྱ་གར་གྱི་ཡུལ་སོ་སོར་འཐོར་ནས་ཡོད་ཅིང་ཕྱོགས་གཅིག་ཏུ་
བསྒྲིགས་པ་ནི་མེད་པ་ལ། པཎྜི་ཏ་ཆེན་པོ་ཨ་བྱཱ་ཀ་རས་ཡུལ་དུས་སོ་སོ་ལ་སློབ་དཔོན་སོ་སོ་ལས་གསན་པའི་སྒྲུབ་ཐབས་རྣམས་ཕྱོགས་གཅིག་ཏུ་བསྒྲིགས་ཆོག་པར་ཡི་དམ་རྡོ་རྗེ་རྣལ་འབྱོར་མས་དངོས་སུ་གནང་བ་ཐོབ་ནས་སྒྲིག་པ་སྒྲུབ་ཐབས་རྒྱ་མཚོར་གྲགས་པ་དང་། ཡང་བླ་མ་རྡོ་རྗེ་གདན་པ་ཞེས་ཀྱང་བྱ། པཎྜི་ཏ་བྷུདྡྷ་ཀཱིརྟི་ཞེས་ཀྱང་བྱ། རྡོ་རྗེ་གདན་ཆུང་བ་ཞེས་ཀྱང་བྱ་བ་དེས་ཀྱང་ཡུལ་དུས་སོ་སོར་སློབ་དཔོན་སོ་སོ་ལས་གསན་པའི་སྒྲུབ་ཐབས་རྣམས་ཕྱོགས་གཅིག་ཏུ་བསྒྲིགས་ཆོག་པར་རྒྱ་གར་རྡོ་རྗེ་གདན་གྱི་རྟེན་མ་ཧཱ་བོ་དྷི་ཞེས་ཀྱང་བྱ། བྱང་ཆུབ་ཆེན་པོ་ཞེས་ཀྱང་བྱ་བའི་ཐུབ་དབང་ཉིད་དང་བྱིན་རླབས་མཉམ་པར་གྲགས་པའི་སྐུ་དེས་གནང་བ་ཐོབ་ནས་ཕྱོགས་གཅིག་ཏུ་བསྒྲིགས་པའི་སྒྲུབ་ཐབས་བརྒྱ་རྩ་འདི་གཉིས་ཉི་མ་དང་ཟླ་བ་ལྟར་ཡོངས་སུ་གྲགས་ནས་འགྲོ་དོན་རྒྱ་ཆེན་པོ་མཚོ་ལྟ་བུར་བྱུང་། དེ་ལ་སྒྲུབ་ཐབས་རྒྱ་མཚོ་རྒྱས་པ་ཡར་ལུང་ལོ་ཙཱ་བ་གྲགས་པ་རྒྱལ་མཚན་གྱིས་བསྒྱུར་བ་འདི་ལ་སྒྲུབ་ཐབས་ཉིས་བརྒྱ་དང་ཉི་ཤུ་རྩ་བཞི། དེའི་སྟེང་དུ་ལས་ཚོགས་སོགས་ཡིག་སྣ་བརྩིས་པས་སྤྱིར་བསྡོམས་ཉིས་བརྒྱ་དང་བཞི་བཅུ་ཞེ་གཅིག །དེའི་སྒྲུབ་ཐབས་
དབང་དང་བཅས་པ་འདིར་ཚང་བ་ཡིན། སྒྲུབ་ཐབས་རྒྱ་མཚོ་འབྲིང་པོ་ལ་ཡིག་སྣ་ཕྱེད་དང་ཉིས་བརྒྱ་ཡོད་འདི་པ་ཚབ་ལོཙྪ་བས་བསྒྱུར་བ་ལ་ཡི་གེ་ཙམ་མིན་པར་རྗེས་གནང་དང་ལུང་གི་རྒྱུན་མ་འཕེལ་ བར ་འདུག །བསྡུས་པ་ནི་རྡོ་རྗེ་གདན་ཆུང་བས་བསྒྲིགས་པའི་སྒྲུབ་ཐབས་བརྒྱ་རྩ་ཡིན་ཏེ་བ་རི་ལོཙྪ་བས་བསྒྱུར་བས་བ་རི་བརྒྱ་རྩར་གྲགས། དེ་གཉིས་ཕལ་ཆེར་ལྷ་གྲངས་དང་སྒྲུབ་ཐབས་མཚུངས་པར་ཡོད། བོད་ཀྱི་མཁས་གྲུབ་རྣམས་ཀྱིས་ཕྱོགས་གཅིག་ཏུ་བསྡོམས་པར་མཛད་པ་ལས་སྒྲུབ་ཐབས་རྒྱ་མཚོའི་ནང་དུ་མི་བཞུགས་པ། རྡོ་རྗེ་ཆོས་དམར་པོ་ཕག་མོ་དམར་མོ་གཙོ་རྐྱང་། ཐུགས་རྗེ་ཆེན་པོ་ཡིད་བཞིན་ནོར་བུ་ལྷ་བཞིའི་སྐོར། དོན་ཞགས་སེར་པོ་ལྷ་ལྔས་བསྐོར་བ་སྟེ་བཞི་བསྣན་དགོས་ཞེས་བླ་མ་འགའ་ཞིག་གིས་གསུངས་ཀྱང་། ཞྭ་ལུ་ལོཙཱ་བ་ཆེན་པོ་ཆོས་སྐྱོང་བཟང་པོས་སྒྲུབ་ཐབས་རྒྱ་མཚོ་དང་བརྒྱུ་རྩ་གཉིས་ཀ་ཕྱོགས་གཅིག་ཏུ་བསྡོམས་ནས། བྱང་ངམ་རིང་གི་གཙུག་ལག་ཁང་ཆེན་པོར་བསྒྲིགས་པ་ལ། རྗེ་བཙུན་གྲགས་པ་རྒྱལ་མཚན་གྱིས་བསྒྲིགས་པའི་སྒྲུབ་ཐབ་རྒྱ་མཚོའི་ཐེམ་ཡིག་ལས་རྡོ་རྗེ་ཆོས་དང་ཕག་མོ་གཙོ་རྐྱང་གཉིས་ལས་གཞན་མི་སྣང་བས་འདིར་
དེའི་ལུགས་སུ་མཛད་གསུངས་པར་སྣང་ཡང་། དེའི་ནང་ནས་ཐུགས་རྗེ་ཆེན་པོ་སྒྱུ་འཕྲུལ་དྲྭ་བ་དང་། སྒྲོལ་མ་འཇིགས་པ་བརྒྱད་སྐྱོབ་སོགས་སོ་སོའི་དབང་མི་སྣང་བས་སྒྱུ་འཕྲུལ་དྲྭ་བ་ནི་སྒྲུབ་ཐབས་ཡིག་ཆ་གཞན་སྣང་བ་ལྟར་བྲིས། འཇིགས་པ་བརྒྱད་སྐྱོབ་གཅིག་ཏུ་དྲིལ་བ་ཞིག་སྣང་ཡང་འཇིགས་པ་བརྒྱད་སྐྱོབ་སོ་སོའི་སྒྲུབ་ཐབས་མི་སྣང་བས་སི་ཏུ་ཆོས་ཀྱི་གོ་ཆས་སྒྲིག་པ་ལས་འདུག་པ་ལྟར་བྲིས། དེ་ལ་གྲུབ་མཐའ་སོ་སོའི་དགེ་བའི་བཤེས་གཉེན་རྣམས་ཀྱིས་ལྷ་རིགས་མཐུན་མང་པོ་རྗེས་གནང་གཅིག་ཏུ་བསྡུས་ནས་བསྐུར་སྲོལ་སྔར་ནས་ཕྱག་ལེན་ལ་ཡོད་དེ། དེ་ཡང་ས་ལུགས་ལ་ནི་ཡིག་སྣ་གཉིས་བརྒྱ་དང་བཞི་བཅུ་ཞེ་གཅིག་།སྒྲུབ་ཐབས་ཉེར་བཞི་ནི་རིགས་མཐུན་རྗེས་གནང་དགོས་པའི་གྲངས། ཐུབ་པ་གཙོར་གྱུར་ཉེར་དྲུག་སྟེ། །འཇམ་དབྱངས་མི་གཡོ་ཉི་ཤུ་བདུན། །སྒྲོལ་མཛད་མ་ཡི་ཉི་ཤུ་གཅིག །ཙུན་ལ་སོགས་ཉི་ཤུ་དྲུག །ལས་གྲུབ་པའང་ཉེར་དྲུག་སྟེ། །རྟ་མགྲིན་ལ་སོགས་ཉི་ཤུ་གཅིག །བརྒྱ་དང་ཞེ་བདུན་རྗེས་གནང་གྲངས། །ཐོག་མའི་དམ་ཚིག་གསུམ་བཀོད་གཉིས། །སྤྱན་རས་གཟིགས་དང་འཇམ་དབྱངས་ལ། །
གཉིས་གཉིས་སྒྲོལ་མ་གཉིས་སུ་ངེས། །འོད་ཟེར་ཅན་དང་རི་ཁྲོད་མ། །རེ་རེ་ཀུ་རུ་ཀུལླེའི་བཞི། །ནོར་རྒྱུན་ཕག་མོ་རེ་རེ་སྟེ། །ཛཾ་ལྷའི་ཆུ་སྦྱིན་དང་བཅས་པ། །བཅོ་བརྒྱད་ལུང་ཡང་བྱ་དགོས་ཏེ། །ཞེས་གསུངས་ཀྱང་སི་ཏུ་ཆོས་ཀྱི་གོ་ཆས་ནི་བརྒྱ་དང་བརྒྱད་ཀྱི་ནང་དུ་ཚང་ བར ་ཡང་མཛད་དེ། འདིར་ནི་རྗེ་དྲུག་པ་ཆོས་ཀྱི་དབང་ཕྱུག་གིས་ཕྱག་སྲོལ་ལ་བརྒྱ་དང་བཅུ་དྲུག་ལ་ཚང་ བར ་མཛད་པའི་སྟེང་དུ་སྒྲོལ་མ་འཇིགས་པ་བརྒྱད་སྐྱོབ་ནས་གལ་ཆེ་བ་བཞི་བསྣན་པས་དབང་སྣ་བརྒྱ་དང་ཉི་ཤུར་ཡོངས་སུ་རྫོགས་པ་ཡིན། ས་ལུགས་པས་ནི་བརྒྱ་དང་ཞེ་བདུན་མཛད་པར་སྣང་ངོ་། །ཡང་མཚན་ཉིད་པའི་དགེ་བའི་བཤེས་གཉེན་ཤེས་རབ་ཆེ་བ་རྣམ་སྒྲུབ་ཐབས་ཀྱིས་ལུང་དོན་དུ་མི་གཉེར་ཞིང་དབང་ཉིད་ཁོ་ན་དོན་དུ་གཉེར་བ་དང་། ཡིག་ཆ་ཉུང་ བར ་འདོད་ནས་ཞི་བ་དང་ཁྲོ་བོའི་རྒྱན་ཆ་ལུགས་སོགས་ཤེས་རབ་ཀྱི་རྩལ་གྱིས་འཕྲལ་དུ་བློ་ནས་བརྗོད་པས་སྔགས་དང་སྐུ་མདོག་ཕྱག་མཚན་བརྗེད་ཐོ་ཙམ་ལས་མེད་པ་མཚན་ཉིད་ལུགས་ཀྱི་དབང་དཔེ་ཡིན་ཞེས་མཁས་གྲུབ་ལུང་རིགས་ཉི་མས་གསུངས་པ་ལྟར། རྗེ་དོན་ལྡན་ཞབས་ཀྱིས་མཛད་པ་དང་མི་ཕམ་པདྨ་དཀར་པོའི་མཛད་
པ་སོགས་འདུག་སྟེ། ཤེས་རབ་ཆུང་བ་རྣམས་ཀྱིས་བློ་ཐོག་ནས་བརྗོད་ཤེས་པར་ཡང་དཀའ་བ་དང་སྒྲུབ་ཐབས་རྣམས་ཀྱི་དབང་ཐོབ་ཀྱང་ལུང་མ་ཐོབ་པའི་སྐྱོན་དུ་སྣང་། སྔོན་གྱི་དགེ་བཤེས་རྣམས་ཀྱིས་ཕྱག་ལེན་ལ་ལྷ་རིགས་མཐུན་པ་རྣམས་ཀྱིས་གཞུང་ཚན་པ་དུ་ཡོད་ཀྱི་ལུང་བྱས་ནས་དེ་རྣམས་ཀྱི་དབང་གཅིག་ཏུ་བསྡུས་ཏེ་རེ་རེ་བསྐུར། དེ་ལྟར་མུ་དག་བྱེད་སྲོལ་ཡོད་པར་སྣང་སྟེ་སྒྲུབ་ཐབས་རྒྱ་གཞུང་ཡོངས་རྫོགས་ཀྱི་གླེགས་བམ་པོད་ཁ་ཤིན་ཏུ་ཆེ་ཞིང་མཐོ་ བར ་ཡོད་པས་དེ་རྫོགས་པར་དཀའ་བ་དང་། གླེགས་བམ་དེ་ཤིན་ཏུ་དཀོན་པས་རྙེད་ཀྱང་དཀའ་ བར ་སྣང་། དེ་ལ་ཞྭ་ལུ་ལོཙྪབ་ཆེན་པོ་ཆོས་སྐྱོང་བཟང་པོ་སོགས་ལོ་པཎ་རྣམས་ཀྱིས་བསྒྱུར་བ་དེ་དག་ཐམས་ཅད་ཀྱི་རྒྱ་སྐད་བོད་སྐད་འགྱུར་བྱང་མཆོད་བརྗོད་སྒྲུབ་པའི་སྟ་གོན་གྱི་རིམ་པ། བསྙེན་པའི་དུས་རྟགས་དང་གྲངས་ཚད་སྒྲུབ་པའི་ཕན་ཡོན་ལ་སོགས་ཅུང་ཟད་མཛད། མཛད་བྱང་དང་ལོ་པཎ་གྱིས་འགྱུར་བྱང་དེ་རྣམས་གལ་ཆུང་ བར ་དགོངས་ནས་ཕར་བསལ། ལྷ་རིགས་མཐུན་རྣམས་ཀྱི་མངོན་རྟོགས་ཝོར་ལོག་ཡོད་པ་ཡང་བསལ། སྒྲུབ་ཐབས་ཀྱི་རྣམ་གྲངས་དང་འདྲ་མིན་ཅུང་ཟད་ཡོད་པ་
གསལ་ བར ་བཀོད་དེ་མཁས་མང་འདུས་པ་རྒྱ་མཚོའི་དབུས་བྱང་ངམ་རིང་གི་གཙུག་ལག་ཁང་དུ་བསྒྲིགས་པ་འདི་ཐོབ་པས་སྒྲུབ་ཐབས་རྒྱ་མཚོ་བརྒྱ་རྩ་གཉིས་ཀའི་དབང་ལུང་ཡོངས་སུ་རྫོགས་པ་ཐོབ་པར་འགྱུར་བས། བྱ་སླ་ལ་ཚེགས་ཆུང་ཞིང་དོན་ཆེ་བ་མཁས་པའི་ཁྱད་ཆོས་བླ་ན་མེད་པ་ལགས་སོ། །ཡང་འདི་ཡི་ནང་ནས་ལྷ་འཐོར་བུ་བ་རེ་ཟུང་གི་མངོན་རྟོགས་དགེ་བའི་བཤེས་གཉེན་རྣམས་ཀྱིས་རྒྱས་པར་བཀོད་པ་ཡོད་ན་ནི་ཧ་ཅང་མང་གྲགས་པས་བློར་འཛིན་ཡང་དཀའ། འདི་དག་མངོན་རྟོགས་རན་པ་རེ་ཡོད་པ་འདི་ནི་རྒྱ་གཞུང་གི་ཚིག་སླད་མེད་ཡིན་པར་འདུག་པས་བྱིན་རླབས་ཀྱང་ཤིན་ཏུ་ཆེ་བ་ཡིན། དེ་ལ་དང་པོ་སློབ་དཔོན་གྱི་བྱ་བ་དབང་སྒྲུབ་ནི་རྒྱ་གཞུང་རྣམས་ནས་ཇི་ལྟར་བྱུང་བ་ལྟར་སློབ་དཔོན་མཁས་པ་རྣམས་ཀྱིས་ཕྱག་ལེན་ཇི་ལྟ་བ་ལོ་ཆེན་ཆོས་སྐྱོང་བཟང་པོའི་མཛད་པ་ལྟར་ཡིན་ལ། རྒྱས་པར་འདོད་ན་བདག་མདུན་བུམ་གསུམ་སོ་སོར་སྒྲུབ་ཅིང་མཆོད་བསྟོད་གཏོར་བསྔོས་སོགས་གཅིག་ཤེས་ཀུན་ཁྲོལ་ལྟར་བྱའོ། །དེ་ལས་བསྡུས་ཙམ་འདོད་ན་བདག་བསྐྱེད་རྡོ་རྗེ་འཆང་བསྒོམས་ནས་དབང་བསྐུར་རྒྱས་གདབ་བྱས་ཏེ། མདུན་བུམ་དུས་གཅིག་བྱས་ནས་དབང་
བསྐུར་ཆོག །དེ་རིང་དབང་དུ་བསྐུར་ཀྱང་བདག་བསྐྱེད་ཝིག་མི་དགོས་པ་སི་ཏུ་ཆོས་ཀྱི་གོ་ཆ་སོགས་མཁས་པ་འགའ་ཞིག་གིས་བཞེད་ཀྱང་དགེ་བཤེས་སོགས་མང་ཞིག་ལ་སྒྲུབ་ཐབས་འདིའི་དབང་ལུང་མྱུར་དུ་རྫོགས་དགོས་ན་དེ་ནོངས་རང་གི་རྩ་བའི་ཡི་དམ་གང་ཡིན་གྱི་བདག་བསྐྱེད་སྔོན་དུ་སོང་བས་སྐད་ཅིག་ལ་ལྷ་སོ་སོར་གནས་འགྱུར། མངོན་རྟོགས་རྣམས་ཀྱི་ལུང་བྱེད་ཞོར་མཚན་ཉིད་ཐམས་ཅད་ཡོངས་སུ་རྫོགས་པའི་རྣམ་རྒྱལ་བུམ་པ་དབུས་དང་མདུན་གྱི་མཎྜལ་ཞེས་མངོན་རྟོགས་རྣམས་བཏོན་རྗེས། གནས་གསུམ་བྱིན་རླབས་ཡེ་ཤེས་སྤྱན་དྲངས་དབང་བསྐུར་རྒྱས་གདབ་མཆོད་བསྟོད་རྣམས་ངག་གིས་ཉུང་ངུའམ་ཡིད་ཀྱིས་བསྒོམ་ཞིང་མང་མ་ལ་སྔགས་འུར་འདོན་རེ་བྱེད་འཇུག །དེ་ནས་དབང་བསྐུར་ནས་མདུན་བུམ་ཡང་གནས་འགྱུར་གྱི་ཚུལ་དུ་སླར་ཡང་མངོན་རྟོགས་རྒྱབ་མ་འདོན།། དེ་ལྟ་བུའི་ཚེ་དཀོན་མཆོག་གསུམ་ལ་བདག་སྐྱབས་སོགས་འདོན། བདུན་རྣམ་དག་ཀྱང་ད་ནངས་ལན་གསུམ་སོང་ནས་དེ་རིང་དབང་དུ་བསྐུར་ཀྱང་མི་དགོས་པ་དང་། རྗེས་ཆོག་ཀྱང་དོ་དགོང་གཅིག་བསྡུ་བ་སློབ་དཔོན་མཁས་པ་རྣམས་ཀྱིས་ཕྱག་ལེན་རྒྱུན་ལྡན་ཡིན་ཅིང་
པཎྜི་ཏ་ཨ་བྱཱ་ཀ་ར་ཉིད་ཀྱིས་བཞེད་པ་ནི་སྐད་ཅིག་དྲན་རྫོགས་སུ་བདག་མདུན་བུམ་གསུམ་སོ་སོར་དུས་གཅིག་ལ་བསྐྱེད་ནས་བཟླས་པ་ཅི་འགྲུབ་བྱས་ཏེ་དབང་བསྐུར་ཆོག་པར་གསུངས་ཏེ། ཐ་མལ་མི་ནག་པ་སོགས་ལ་དབང་སྒྲུབ་བྱེད་ལོང་མེད་པར་བསྐུར་དགོས་བྱུང་ན་དེ་ལ་བཀག་པ་ནི་མེད་ཀྱིས་གཞན་ལ་དབང་རྒྱུན་འཕེལ་རེ་ཡོད་པ་ལ་ནི་དེ་ལྟར་མི་བྱའོ། །འོན་ཀྱང་གྲུབ་མཐའ་གཞན་གྱི་བླ་མ་ཕལ་ཆེ་བས་ད་ནངས་རང་གི་རྩ་བའི་ཡི་དམ་གྱི་བདག་བསྐྱེད་སྔོན་དུ་སོང་བས་དེ་ཉིད་སྐད་ཅིག་གནས་འགྱུར་བྱས་ཏེ་སློབ་མ་ལ་དབང་གང་ལེན་པའི་ཡུལ་གསལ་བཏབ་པས། དེས་མདུན་བསྐྱེད་ཀྱི་གོ་བཅད་ནས་རྗེས་གནང་མི་བསྒྲུབ་པར་བསྐུར་མཁན་ཤིན་ཏུ་མང་ བར ་འདུག་ཀྱང་རང་ལུགས་ཕྱག་ལེན་གྱི་རྒྱུན་ལ་ནི་དེ་ལྟ་བུ་མེད་དོ། །བདག་བསྐྱེད་གནས་འགྱུར་རྡོ་རྗེ་འཆང་དུ་བསྒོམས་ནས་མདུན་བསྐྱེད་ཀྱི་ཞོར་ལ་བུམ་པའི་ནང་དུ་པད་ཟླའི་སྟེང་དུ་ས་བོན་ལ་སྔགས་ཕྲེང་གིས་བསྐོར་ བར ་དམིགས་ནས་སྔགས་ཕྲེང་ལས་བདུད་རྩི་བབས་པས་བུམ་པ་གང་ བར ་བསམས་ལ་བཟླས་པ་བྱ། སྔགས་ཕྲེང་ལས་བདུད་རྩི་བབས་པོས་བུམ་པ་ཁེངས་པོར་བསྒོམས་ནས་དབང་བསྐུར་བ་ནི་སི་
ཏུ་ཆོས་ཀྱི་གོ་ཆས་གསུངས་ཏེ། དེ་ནི་བ་རི་ལུགས་ཀྱི་ཕྱག་ལེན་བསྡུས་པ་ཞིག་ཡིན་པར་སྣང་། ལས་བུམ་ཡང་བདུད་རྩི་འཁྱིལ་པ་སོགས་ད་ནངས་གཅིག་བསྒོམས་པ་དེས་ཆོག་ལ། རྗེས་གནང་རེ་རེ་ཞིང་ལས་བུམ་སྒྲུབ་མི་དགོས་པ་དང་ཉུང་ན་ཆབ་དང་མེ་ཏོག་བཀྱེ། མང་ན་མེ་ལོང་ངོས་ནས་ཁྲུས་གསོལ། མཆོད་གཡོག་པ་ལངས་ནས་མཎྜལ་ཕུལ་བས་ཆོག་པ་ཕྱག་ལེན་ཡིན། དབང་བསྐུར་ལུགས་ཀྱང་བུམ་དབང་རྗེས་ནས་བསྐུར་བ་འདི་སི་ཏུ་ཆོས་ཀྱི་གོ་ཆས་མཛད། དེ་བ་རི་ལོཙྪ་བའི་ཕྱག་ལེན་ཡིན་པར་སྣང་། བྱིན་འབེབས་རྗེས་ནས་བུམ་དབང་བསྐུར་བ་འདི། ཆགས་ལོཙྩ་བ་ཆོས་སྐྱོང་བཟང་པོའི་མཛད་པ་སྟེ། སྒྲུབ་ཐབས་རྒྱ་མཚོ་བརྒྱ་རྩ་གཉིས་ཀའི་ཕྱག་ལེན་རྙིང་པ་ཡིན་པར་ཡེ་ཤེས་པ་འབེབས་བསྟིམས་དང་སྔགས་ཀྱི་རྗེས་ཟློས། ཐུགས་ཏིང་ངེ་འཛིན་གསུམ་ལ་རོལ་མོ་དང་མེ་ཏོག་འཐོར་བ་ཙམ་ལས་དབང་རྫས་ཅི་ཡང་མེད་པ་དཀོན་མཆོག་ཡན་ལག་གིས་མཛད་པའི་བསྡུས་པ་འདི། ས་ལུགས་ཀྱི་ཕྱག་ལེན་རྒྱུན་ལྡན་ཡིན་པར་འདུག །དགེ་བཤེས་ཆེན་པོ་རྣམས་ལ་འདི་རང་དར་སྲོལ་ཆེ་ བར ་ཡོད་འདུག་ཀྱང་ཕལ་པ་
རྣམས་ཡིད་མི་ཚིམ་པར་འདུག་པས་གཅིག་ཤེས་ཀུན་གྲོལ་བསྡུས་པ་ལྟར་ལས་གཏོར་དབང་བསྡུས་པས་ཁ་སབ་པ་བུམ་པ་དང་གཏོར་མ་གཉིས་འགྲིམ་པ་འདི་ལེགས་ཏེ་དེ་ལྟར་བྱའོ། །ཡང་སི་ཏུ་ཆོས་ཀྱི་གོ་ཆས་བསྒྲིགས་པའི་བ་རི་ལོཙྪ་ལུགས་འདི་ལ་དབང་ཡོངས་རྫོགས་ལ་གཏོར་མ་འགྲིམ་རྒྱུ་ནི་མེད་ཀྱང་ཐ་མལ་པ་རྣམས་ཡིད་ཚིམ་པའི་ཕྱིར་དུ། སྐུ་གསུང་ཐུགས་ཀྱི་རྗེས་གནང་དང་གསུམ་ཀ་ལ་གཏོར་མ་འགྲིམ་པ་བླ་མ་གྲོང་ཆོག་པ་ཕལ་ཆེར་གྱི་ཕྱག་ལེན་ལ་འདུག་སྟེ། དེ་ནི་མཁྱེན་ལྡན་རྣམས་ཀྱིས་གཟིགས་ན་འབྲེལ་མི་ཆགས་པ་འདྲ་ཞིག་འབྱུང་སྟེ། སྒྲུབ་ཐབས་རྒྱ་མཚོ་བརྒྱ་རྩ་གཉིས་ཀའི་རྒྱ་གཞུང་ནས་གཏོར་དབང་མ་བཤད་པའི་ཕྱིར་རོ། །དབང་རྫས་བུམ་པ་ཡོད་ན་ནི་ལེགས་ཏེ། དེ་མེད་ན་བུམ་བསྐྱེད་དགོས་པ་མེད་པར་འགྱུར་བ་དང་། བུམ་དབང་ནི་རྒྱུད་སྡེ་བཞི་ཀ་ནས་དབང་གི་གཙོ་བོར་གསུངས་པའི་ཕྱིར། བུམ་དབང་ཅན་འདི་ཐོབ་ནས་རྗེས་གནང་ཆ་ཚང་ཡིན་པས། གཏོར་དབང་མེད་ཀྱང་དབང་ཚང་མ་ཡིན་པར་ཤེས་པར་བྱའོ། །འོན་ཀྱང་རྗེ་དབང་ཕྱུག་རྡོ་རྗེས་རྗེས་གནང་ཐམས་ཅད་ལ་གཏོར་དབང་སབ་ཆོག་པར་གསུངས་པས་སྐུ་གསུང་ཐུགས་ཀྱི་རྗེས་
གནང་གི་རྒྱབ་ནས་གཏོར་དབང་སབ་པ་འདི་ལེགས། དེ་ལས་ཅུང་ཟད་ཉུང་ བར ་འདོད་ན། ཐུགས་ཀྱི་རྗེས་གནང་ལ་མདུན་བསྐྱེད་གཏོར་མ་དང་དབྱེར་མེད་པ་སློབ་མ་ལ་ཐིམ་པར་བསྒོམས་ནས་གཏོར་མ་མགོར་བཞག་ཀྱང་ཆོག་སྟེ། རྗེ་ཆོས་ཀྱི་དབང་ཕྱུག་གིས་མཛད་པའི་རྗེས་གནང་ཉག་གཅིག་ཀུན་ཁྱབ་དང་གཞན་ཡང་མང་པོ་ལ་དེ་ལྟར་འབྱུང་ངོ་། །ཡང་ས་ལུགས་ཀྱི་ཕྱག་ལེན་བསྡུས་པ་དེ་ལ་ཡང་བཟླས་ལུང་སྐབས་སུ་མེ་ཏོག་མགོར་བཞག་པ་ཙམ་གྲུབ་ན་ལེགས་ཀྱི། མང་ན་མེ་ཏོག་གཏོར་བ་ཙམ་གྱིས་ཆོག་པས། དབང་རྫས་ཅི་ཡང་འགྲིམ་མི་དགོས་པ་དེ་ནི་སྔགས་ཀྱི་རིག་གཏད་པ་སྟེ། རིག་གཏད་ཀྱི་རྗེས་གནང་ཞེས་བྱ་བ་ཡིན་ནོ། །དེ་ལྟར་རྗེས་གནང་རྒྱས་བསྡུས་གང་ཐོབ་ཀྱང་དབང་རྒྱུན་ངེས་པར་ཐོབ་པ་ཡིན་པས། རྗེས་གནང་གཞན་ལ་བསྐུར་ཚེ་རྒྱས་བསྡུས་གང་འདོད་བསྐུར་ཆོག་པ་གསར་མའི་ཕྱག་ལེན་ཡིན་ལ། གཏེར་མ་རྣམས་ལ་ནི་དབང་རྒྱས་པ་ཐོབ་ཀྱང་འབྲིང་དང་བསྡུས་པ་བསྐུར་མི་རུང་ན། བསྡུས་པ་ཐོབ་པས་རྒྱས་འབྲིང་སོགས་བསྐུར་ག་ལ་རུང་སྟེ། གང་ཐོབ་པ་དེ་ལས་གཞན་རིགས་འགྲེས་བྱེད་པའི་སྲོལ་མེད་དོ། །དེ་ཅིའི་
ཕྱིར་ཞེ་ན་ཨོ་རྒྱན་གྱི་བཀའ་ལ་བཅོས་སླད་མི་རུང་ བར ་གསུངས་པའི་དོན་ནོ། །འོ་ན་གསར་མ་ལ་དེ་རུང་བའི་དོན་ཅི་ཡིན་ཞེ་ན། རྒྱ་གཞུང་གཅིག་ལ་ཡང་གྲུབ་མཐའ་སོ་སོའི་བླ་མ་རྣམས་ཀྱིས། རྒྱས་བསྡུས་སྣ་ཚོགས་པ་མཛད་པ་ཡིན་གྱི། རྒྱ་གཞུང་དེ་རང་འདོན་ཅིང་རྒྱ་གཞུང་དེ་རང་གི་དབང་བསྐུར་མཁན་ནི་གཅིག་ཀྱང་མེད་པའི་ཕྱིར་ཏེ། དེའི་དོན་ནི་རྒྱ་གཞུང་ཁ་མི་གསལ་ཞིང་ཕྱག་ལེན་མི་བདེ་བའི་ཕྱིར་ཡིན་གསུངས། དེ་ལ་དབང་འདི་དག་དབང་བཞི་ཡོངས་རྫོགས་དང་དབང་རྒྱས་པ་ནི་མ་ཡིན་རྗེས་གནང་ཙམ་ཡིན་ལ། རྗེས་གནང་ཟེར་བའི་དོན་ནི་ལུས་ལྷ་དེ་ཉིད་བསྒོམ་དུ་རུང་ བར ་རྗེས་སུ་གནང་། ངག་གིས་སྔགས་དེ་ཉིད་བཟླ་ཆོག་པར་རྗེས་སུ་གནང་། སེམས་ལྷ་དེ་ཉིད་བསྒོམས་ནས་ཞི་ལྷག་གི་ཏིང་ངེ་འཛིན་བསྒོམ་རུང་ བར ་རྗེས་སུ་གནང་། རྗེས་གནང་གསུམ་པོ་ཐོབ་ནས་དེ་ལྟར་ཉམས་སུ་བླངས་ན། སོ་སོའི་སྒྲུབ་ཐབས་ནས་བྱུང་བའི་ཕན་ཡོན་རྣམས་འབྱུང་ཞིང་། རྗེས་གནང་མ་ཐོབ་པར་བསྒྲུབས་ན་རིག་སྔགས་ལོག་པར་བསྒྲུབས་པ་སྟེ། ཆོས་ལ་བརྟེན་པའི་སྡིག་པ་ཆེན་པོ་འབྱུང་ བར ་བཤད། དེ་ལ་དཀྱིལ་འཁོར་གྱི་དབང་དང་དབང་བཞི་ཡོངས་
རྫོགས་སོགས་ནི། དམ་ཚིག་བསྲུང་ བར ་དཀའ་ཞིང་བསྐྱེད་རིམ་གྱི་ལྷ་བསྒོམ་པ་ཡང་སྦྱང་གཞི་སྦྱོང་བྱེད་འཕྲོད་དཀའ་བས། རྫོགས་རིམ་རྩ་རླུང་སོགས་ཀྱང་གེགས་དང་གོལ་ས་ཚེ། དེ་དག་ཅི་བཞིན་ཉམས་སུ་ལེན་མཁན་ཡང་ཤིན་ཏུ་དཀོན། དེ་བས་ལྷ་བསྒོམས་ཤིང་སྔགས་བཟླ་བ་ཙམ་ནི་བྱེད་མཁན་ཤིན་ཏུ་མང་། གེགས་སྐྱོན་ཆུང་ཞིང་ཆོས་ལམ་དུ་འགྲོ་བས་འགྲོ་དོན་ཤིན་ཏུ་ཆེ་བ་ཡིན། དེ་ལ་ལོཙཱ་བ་ཆོས་སྐྱོང་བཟང་པོའི་བསྒྲིགས་པའི་རྗེས་གནང་འདི་རྒྱ་གཞུང་གི་ཕྱག་ལེན་མ་འཚུགས་པ་ཡིན་པས་ཁུངས་བཙུན་ཞིང་། སི་ཏུ་ཆོས་ཀྱི་གོ་ཆས་བསྒྲིགས་པ་འདི། བ་རི་ལུགས་ཀྱི་ཕྱག་ལེན་རྒྱས་པ་སྟེ་གྲགས་ཆེ། རྗེ་དཀོན་མཆོག་ཡན་ལག་གིས་མཛད་པ་འདི། བ་རི་ལུགས་ཀྱི་ཕྱག་ལེན་བསྡུས་པ་སྟེ། མགྱོགས་དགོས་ན་ཚར་སྐྱོན། རྗེ་དབང་ཕྱུག་རྡོ་རྗེའི་མཛད་པ་འདི། ཁྲོམ་དབང་སོགས་ལ་མང་ཉུང་འཚམས་ཤིང་བྱིན་རླབས་ཆེ། འདི་བཞི་ཀའི་དབང་ལུང་གི་རྒྱུན་ངེས་པར་ཐོབ་པས། སྐབས་སུ་གང་བབ་བྱ་ཆོག་ཅིང་། འདི་དག་གང་ཟག་ཕལ་པས་རྩོམ་པ་མ་ཡིན་པར། ཚད་ལྡན་གྱི་གཞུང་ས་གནས་ཀྱི་སེམས་དཔའ་ཆེན་པོ་
རྣམས་ཀྱིས་བསྒྲིགས་པ་ཡིན་པས་ཡིད་ཆེས་པར་བྱའོ། །མདུན་བསྐྱེད་ཀྱི་རྟེན་ཡང་། རྡུལ་ཚོན་དང་ཚོམ་བུ་བཀོད་པའང་། ཉིན་རེ་ལ་དབང་དུ་བྱེད་ཀྱི་གྲངས་སོ་སོར་བཀོད་པའམ། གནས་འགྱུར་བྱེད་ན་གཅིག་གིས་ཀྱང་ཆོག་པ་ཡིན། ལྷ་ཡི་གོ་རིམ་ཡང་སྔོན་གྱི་དགེ་བའི་བཤེས་གཉེན་རྣམས་ཀྱིས་རྒྱུད་སྡེའི་གོ་རིམ་མ་ཕྱེས་པ་དང་། ཇོ་བོ་རྗེའི་ཞལ་ནས། བོད་གཙང་སྦྲ་ཆུང་བས་བྱ་སྤྱོད་ཀྱི་རྒྱུད་མི་འགྲུབ། རྣམ་རྟོག་ཆེ་བས་བླ་མེད་མི་འགྲུབ། རྣལ་འབྱོར་རྒྱུད་འདིས་ཕན་པར་འདུག་གསུངས་པའི་ཕྱིར། བྱ་རྒྱུད་ལ་ཡང་བྱ་རྒྱུད་རང་རྐང་ལྟར་ཉམས་སུ་ལེན་པ་དང་། བྱ་རྒྱུད་སྤྱོད་རྒྱུད་ལྟར་ཉམས་སུ་ལེན་ཚུལ་དང་། བྱ་རྒྱུད་རྣལ་འབྱོར་རྒྱུད་ལྟར་ཉམས་སུ་ལེན་པ་དང་། བྱ་རྒྱུད་བླ་མེད་རྒྱུད་ལྟར་ཉམས་སུ་ལེན་པ་དང་བཞི་ཡོད་པས། འདི་ཕལ་ཆེར་བྱ་རྒྱུད་མང་ན་ཡང་། རྒྱུད་སྡེ་ཡི་དབྱེ་བ་མི་འབྱེད་པར་རྣལ་འབྱོར་རྒྱུད་ལྟར་ཉམས་སུ་ལེན་པ་ཡིན་ནོ། །རྒྱུད་སྡེའི་དབྱེ་བ་མི་འབྱེད་པ་ཡང་དེའི་དོན་ཡིན། གོ་རིམ་ལ་ཡང་མི་འདྲ་བ་དུ་མ་འདུག་ཀྱང་བསྟན་པའི་བདག་པོ་ཤཱཀྱ་ཐུབ་པ་ཉིད་ཐོག་མར་བྱེད་པ་ནི་འབྲེལ་ཆགས་པ་ཡིན་ནོ། །དེ་ལ་བདག་རྭ་
ག་ཨ་སྱས་དབང་རྒྱུན་ཇི་ལྟར་ཐོབ་པའི་ཚུལ་ནི། སྔོན་ས་སྐྱ་རྩེ་དྲུང་པའི་བླ་མ་འབུལ་སྡུད་པ་ཞིག་ལ། ལོཙྪ་བ་ཆོས་སྐྱོང་བཟང་པོས་བསྒྲིགས་པ་འདི་ཡོངས་རྫོགས་ཀརྨ་དོན་ཡོད་ཀྱིས་ཐོབ་པར་འདུག་སྟེ། དེ་ལ་ལྷ་གྲངས་ཉིས་བརྒྱ་ལྔ་བཅུ་པོ་ལྷ་རིགས་བསྡུས་པ་མཛད་པར། མངོན་རྟོགས་ཀྱི་ཚེ་བདག་མདུན་དྲན་རྫོགས་སུ་བསྒོམས་ནས། བུམ་པ་སོགས་ཀྱིས་དབང་བསྐུར་བ་རེ་མཛད་སྐད། ཁོང་ལ་དེ་ལྟར་ཁོ་བོ་གཞོན་ནུའི་དུས་སུ་ཚར་གཅིག་ཐོབ། དེ་ནས་ཁོ་བོ་ལོ་ཉི་ཤུ་རྩ་དྲུག་རྩ་བདུན་ཙམ་གྱི་དུས་སུ། །དབང་བསྒྲུབས་མ་བྱས་པ་དེས་ཡིད་མ་ཚིམས་ནས། ས་སྐྱ་པའི་བླ་མ་དེ་རྩེ་དྲུང་གཞུང་གི་འབུལ་སྡུད་པ་རེད་པས། སྔགས་ཀྱི་ཡོན་ཏན་ཆེ་བ་དང་བསྐྱེད་རིམ་གསལ་པོ་ཡོད་པས་དྲན་རྫོགས་དེས་ཆོག་མོད་ཀྱི། ཁོ་བོ་དེས་ཅུང་ཟད་ཡིད་མ་ཚིམས་པས། དབང་བསྒྲུབས་བྱས་པ་ཞིག་གནང་དགོས་ཞུས། ངེད་རང་སློབ་དཔོན་གཉིས་མཉམ་དུ་དབང་སྒྲུབ་བཟླས་པ་དང་བཅས་པ་བྱས་ནས། ལྷ་གྲངས་ཕྱེད་སུམ་བརྒྱ་པོ་ཡི་དབང་ཡོངས་སུ་རྫོགས་པར་ཞུས། དེའི་བརྒྱུད་རིམ་ཁོང་གིས་བྲི་རྒྱུ་མ་བྱུང་འདུག་པས། དེ་ལ་ཅུང་ཞིག་ཡིད་
མ་ཚིམ་པ་ལ། རང་གི་མཆེད་གྲོགས་རྡོ་རྗེའི་སྤྱན་དུ་གྱུར་པ། རབ་འབྱམས་སྡེ་སྣོད་འཛིན་པ་ཆེན་པོ་ཀརྨ་བྷི་ཤྭ་བྷ་དབུས་གཙང་དུ་ཕེབས། རྙིང་མའི་དབང་ལུང་འགའ་རེ་ཁོང་གིས་གསན་ཞིང་འདུག་པ་ལོ་གཅིག་མཉམ་དུ་བཞུགས་ནས་ཕུལ། ཁོང་གིས་སྔར་གཙང་དཔེ་ནཱམ་དུ་རྗེ་མཆོག་གིས་སྤྲུལ་སྐུའི་གྲྭ་ཚང་ལ་གནང་དུས་ཐོབ་འདུག་པ་ཁོ་དགེ་བཤེས་ཆེན་པོ་ཡིན་ཀྱང་སྔགས་ལ་གོམས་འདྲིས་ཆུང་བས། དབང་བསྒྲུབས་མཉམ་དུ་བྱས་ཤིང་། ཁོང་གི་དེ་དུས་ཀྱི་ཐོབ་ཡིག་འདུག་པ་ལ་བལྟས་ཤིང་། རྗེས་གནང་བརྒྱ་དང་བཅོ་ལྔ་པོ་ཚང་ བར ་ཞུས། ཐོབ་ཡིག་ལ་ཐུགས་རྗེ་ཆེན་པོ་སྒྱུ་འཕྲུལ་དྲྭ་བ་ཟེར་བ་འདུག་ཀྱང་། ཡིག་ཆ་འདི་ལ་མི་འདུག་པས་ཕྱིས་ཤོར་ཕུ་བླ་རྒན་ཀརྨ་རབ་གསལ་བདག་ལ་རྙིང་མའི་དབང་ལུང་གསན་དུ་ཕེབས་པས། ཁོང་ལ་ཆོས་ཀྱི་གོ་ཆས་བསྒྲིགས་པའི་བ་རི་བརྒྱ་རྩ་འདུག་པའི་ནང་ནས་སྒྱུ་འཕྲུལ་དྲྭ་བ་དང་། སྒྲོལ་མ་འཇིགས་པ་བརྒྱད་སྐྱོབ་དང་རྗེས་གནང་ལྔ་པོ་ཞུས། གཞན་ཡང་འབྲུག་པའི་བླ་མ་ཚུལ་ཁྲིམས་རིན་ཆེན་གྱིས། བདག་ལས་ཞི་ཁྲོའི་དབང་ལུང་གསན་སྐབས། པདྨ་དཀར་པོས་མཛད་པ་ནས་ཛི་སེར་ལྷ་བཅོ་བརྒྱད་པ། ནོར་
རྒྱུན་མ་ཀུ་རུ་ཀུལླེ་གསུམ་གྱི་རྗེས་གནང་ཞུས། དྲུང་པ་སྒྲུབ་བརྒྱུད་བསྟན་པ་རྣམ་རྒྱལ་ལ་མངོན་རྟོགས་ནོར་བུའི་ཕྲེང་བ་ནས་སྒྲུབ་ཐབས་རྒྱ་མཚོའི་ལྷ་ཕལ་ཆེར་གྱི་མངོན་རྟོགས་རྒྱས་པར་སྣང་བའི་ལུང་དང་གཤེད་དམར་སོགས་རྗེས་གནང་འགའ་ཞིག་ཐོབ། དེ་ལྟར་སྒྲུབ་ཐབས་རྒྱ་མཚོའི་སྐོར་འདིའི་དབང་ལུང་ལ་སྤོམ་ཡོར་དུ་མ་བཞག་པར་ཐོབ་ངེས་བྱས། ཐོབ་ལོ་ཙམ་དུ་མ་བཞག་པར་འཇམ་དབྱངས་དཀར་པོ། སྒྲོལ་དཀར། གསུང་རྡོ་རྗེ་འོད་དཔག་མེད། སྒྲོལ་མ་སྣ་ཚོགས་ཡུམ། ལོ་མ་ཅན་སེར་མོ་ཕྱག་དྲུག་མ། ཀུ་རུ་ཀུལླེ། འོད་ཟེར་ཅན་ཕྱག་གཉིས་མ། དེ་སོགས་སྒྲུབ་ཐབས་ནང་དུ་བཞུགས་པའི་ལྷ་གྲངས་བརྒྱད་དགུ་ཙམ་གྱི་བསྙེན་པ་ཡང་རྟགས་ཐོན་པར་བྱས། བླ་མ་དགེ་བཤེས་བཙུན་པ་སོགས་མང་ཙམ་ཞིག་ལ་འདིའི་དབང་ཚང་མ་ལན་བཞི་བཙུགས་ཤིང་འཐོར་བུ་བསྐུར་བ་ནི་གྲངས་ལས་འདས། དེས་ན་བདག་ལས་བརྒྱུད་པའི་དབང་ལུང་ཐོབ་པ་རྣམས་ཀྱིས་ཡིད་ཆེས་པར་བྱ་ བར ་རིགས་སོ། །དེ་ལྟར་བཤེས་གཉེན་མང་ཞིག་ལས་ཐོབ་ཀྱང་ཡོངས་རྫོགས་ཐོབ་པའི་བརྒྱུད་པའི་གཙོ་བོ་ནི། བཅོམ་ལྡན་འདས་རྡོ་རྗེ་འཆང་
ཆེན། གསང་བདག་ཕྱག་ན་རྡོ་རྗེ། རྡོ་རྗེ་རྣལ་འབྱོར་མ། པཎྜི་ཏ་ཨ་བྱཱ་ཀ་ར། པཎྜི་ཏ་འདྲེན་པའི་ཞབས། པཎྜི་ཏ་གོ་ཏ་མ་ཤི། པཎྜི་ཏ་ཀཱིརྟི། ལོཙྪ་བ་ཀིརྟི་དྷུ་ཛ། སློབ་དཔོན་རིན་ཆེན་འབྱུང་ལྡན། བླ་མ་རིན་པོ་ཆེ་གུང་པ། སློབ་དཔོན་བསོད་ནམས་འཕེལ། སློབ་དཔོན་ཚུལ་ཁྲིམས་རྒྱལ་མཚན། བླ་མ་ཀུན་དགའ་རིན་ཆེན། མཁན་ཆེན་བསོད་ནམས་མཆོག་གྲུབ། བླ་མ་དགེ་འདུན་རྒྱལ་མཚན། བླ་མ་བྱམས་པ། གྲུབ་ཆེན་ཀཱིརྟི་ཤྲཱི། སི་ཏུ་ཆོས་ཀྱི་གོ་ཆ། རྗེ་དབང་ཕྱུག་རྡོ་རྗེ། གར་དབང་ཆོས་ཀྱི་དབང་ཕྱུག །སྡེ་སྣོད་འཛིན་པ་བྷི་ཤྭ་དྷ། བདག་རཱ་ག་ཨ་སྱའོ། །དེ་ནི་སྒྲུབ་ཐབས་རྒྱ་མཚོའི་བརྒྱུད་རིམ་ཡིན་ལ། བ་རི་བརྒྱ་རྩའི་བརྒྱུད་པ་ནི། རྡོ་རྗེ་འཆང་། ཕྱག་ན་རྡོ་རྗེ། རྡོ་རྗེ་རྣལ་འབྱོར་མ། པཎྜི་ཏ་འཇིགས་མེད་སྦས་པ། པཎྜི་ཏ་བུདྡྷ་ཀཱིརྟི། བ་རི་ལོཙྪ་བ་རིན་ཆེན་གྲགས། ས་ཆེན་ཀུན་དགའ་སྙིང་པོ། བསོད་ནམས་རྩེ་མོ། གྲགས་པ་རྒྱལ་མཚན། ས་སྐྱ་པཎྜི་ཏ། འགྲོ་མགོན་ཆོས་རྒྱལ་འཕགས་པ། བསོད་ནམས་དབང་ཕྱུག །རིན་ཆེན་དཔལ། བྱང་ཆུབ་གཞོན་ནུ། མཁན་ཆེན་བྱང་ཆེན། ཡེ་
ཤེས་རྒྱལ་མཚན། ངོར་པ་རྡོ་རྗེ་འཆང་ཀུན་དགའ་བཟང་པོ། དཀོན་མཆོག་རྒྱལ་མཚན། དཀོན་མཆོག་བློ་གྲོས། སངས་རྒྱས་རིན་ཆེན། ཕྱོགས་ལས་རྣམ་རྒྱལ། མཚུངས་མེད་མི་བསྐྱོད་རྡོ་རྗེ། དེ་ནས་རྗེ་དཀོན་མཆོག་ཡན་ལག་དང་ཡོངས་འཛིན་རྣམ་རྒྱལ་གྲགས་པ་གཉིས་ཀ་ལ་གནང་། དེ་གཉིས་ལས་རྗེ་དབང་ཕྱུག་རྡོ་རྗེས་%གསན། དེ་ནས་གར་དབང་ཆོས་ཀྱི་དབང་ཕྱུག །ཀརྨ་བྷི་ཤྭ་དྷ། བདག་རཱ་ག་ཨ་སྱའོ། །དེ་ལ་སྤྱན་རས་གཟིགས་སྒྱུ་འཕྲུལ་དྲྭ་བ་དང་། སྒྲོལ་མ་འཇིགས་པ་བརྒྱད་སྐྱོབ་བསྡུས་པ་ནི་གཞན་སྔོན་མ་ལྟར་ལས། སི་ཏུ་ཆོས་ཀྱི་གོ་ཆ་ནས། རྗེ་དབང་ཕྱུག་རྡོ་རྗེ། སི་ཏུ་ཆོས་ཀྱི་རྒྱལ་མཚན། ཀརྨ་སྙན་གྲགས་བཟང་པོ། ཀརྨ་རབ་གསལ། །བདག་ཀརྨ་ཨ་རཱ་ག་ལའོ། །དེ་ལ་འདིའི་དབང་ཡོངས་རྫོགས་བཙུགས་དུས་བླ་མ་བརྒྱུད་རིམ་གོང་དུ་བཤད་པ་འདིས་ཆོག་གི །གཏོར་མ་མགོར་བཞག་པའི་སྐབས་སུ་བརྒྱུད་པའི་མཚན་བརྗོད་སྲོལ་ནི་མེད། འཐོར་བུའི་རྗེས་གནང་རེ་རེ་ཙམ་རྒྱས་པར་བསྐུར་ན་གཏོར་དབང་གི་སྐབས་སུ་བརྒྱུད་པ་རྒྱས་པར་བརྗོད་པས་དེ་ཡང་དགེ་བཤེས་གསར་བུའི་བརྒྱུད་པ་
སོ་སོའི་མཚན་ཟིན་པར་དཀའ་ཞིང་། ཟིན་ཀྱང་དེ་དག་གི་ བར ་སྐབས་སུ་སོ་སོའི་སྐྱེ་བོའི་དགེ་བའི་བཤེས་གཉེན་འགའ་ཞིག་བཞུགས་པས་དེ་དག་གི་མཚན་བརྗོད་ཀྱང་བྱིན་རླབས་ཆེན་པོ་མི་འབྱུང་བས། རྒྱུད་སྡེ་བཞི་ཀའི་བཀའ་ཏེ་ལོ་པ་ལ་བབ་པར་བཤད་ཅིང་རྒྱུད་སྡེ་བཞི་ཀའི་དབང་དོན་གྱི་ཡེ་ཤེས་ནི་ཕྱག་རྒྱ་ཆེན་པོ་ཡིན་པས། རྡོ་རྗེ་འཆང་ཏེ་ལོ་ནཱ་རོ་ནས་རྟོགས་པ་དོན་རྒྱུད་ཟུང་འཇུག་བརྒྱུད་རིམ་ད་ལྟའི་ཡབ་སྲས་ཞལ་བཞུགས་པའི་ བར ་གྱི་མཚན་ནས་བརྗོད་པས་བྱིན་རླབས་ཆེ། སངས་རྒྱས་ཕྲེང་བ་ བར ་མ་ཆད་པ་དྲན་ཆོག་འབྲེལ་པ་ཐོབ་ཆོག་ཡིན་པས་སོ་སོའི་རྣམ་ཐར་དང་ལུང་བསྟན་རྣམས་ལས་གསལ་ལོ། །འོན་ཀྱང་སེར་མོ་བ་ལ་སོགས་འགའ་ཞིག་གིས་དེ་ལ་ཐེ་ཚོམ་སྐྱེ་ བར ་དོགས་ནས་སྒྲུབ་ཐབས་རྒྱ་མཚོའི་གྲུ་ནས་ཡིན་ན་ཡར་ལུང་ལོཙཱ་བ་གྲགས་པ་རྒྱལ་མཚན་གྱི་ བར ། སྒྲུབ་ཐབས་བརྒྱ་རྩའི་གྲ་ཡིན་ན་བ་རི་ལོཙྪ་བ་རིན་ཆེན་གྲགས་པའི་ བར ་བརྗོད་ནས་ལ་སོགས་པ་བརྒྱུད་པའི་བླ་མ་རྣམས་དང་། ཡི་དམ་རྗེ་མོའི་ལྷ་ཚོགས་ཞེས་སོགས་འདོད་གསོལ་གང་དགོས་བྱས་རྗེས་སྔགས་ཐུང་ཡིན་ན་ཚར་གསུམ། སྔགས་རིང་ཡིན་ན་ཚར་གཅིག་གི་མཇུག་ཀཱ་ཡ་ཝཱཀྐ་ཙིཏྟ་
བྷ་ལི་ཏ་ཨ་བྷི་ཥིཉྩ་མཱི། ཞེས་བརྗོད་པ་ཕྱག་ལེན་ཡིན་ནོ། །དེ་ཡང་དབང་མ་ཐོབ་པའི་ཉེས་དམིགས་དང་ཐོབ་པའི་ཕན་ཡོན་མཐའ་ཡས་པ་བརྗོད་ཀྱིས་མི་ལང་གིས་མདོར་བསྡུ་ན་འདི་ལྟར་སྐུ་གསུང་ཐུགས་ཀྱི་རྗེས་གནང་ཐོབ་པས་ལུས་ངག་ཡིད་གསུམ་གྱི་སྒྲིབ་པ་དག་ཅིང་ བར ་ཆད་ཞི། ལུས་ངག་ཡིད་གསུམ་ལ་སྐུ་གསུང་ཐུགས་རྡོ་རྗེའི་ས་བོན་ཐེབས། མ་འོངས་པ་ན་སངས་རྒྱས་སྐུ་གསུམ་གྱི་གོ་འཕང་ཐོབ་པ་ནི་འདིའི་ཕན་ཡོན་ཡིན་ལ་དེ་ལྟར་བརྒྱུད་རིམ་དང་ཕྱག་ལེན་ལ་ཐེ་ཚོམ་གྱི་དྲི་མ་མེད་པའི་ཡི་དམ་རབ་འབྱམས་ཀྱི་རྗེས་གནང་ཞུ་བའི་ཕྱིར་མཎྜལ་ཕུལ། ཞེས་པ་འདིའི་དབང་ཡོངས་རྫོགས་བཙུགས་པའི་ཐོག་མར། དེར་དགེ་བཤེས་ཡོན་ཏན་ཅན་འདྲ་ཡོད་ན་ཐེ་ཚོམ་བསལ་བའི་ཕྱིར་དང་། དབང་སྒྲུབ་རྒྱས་བསྡུས་དང་། དབང་རྒྱས་བསྡུས་རྣམས་ལ་རང་ཡང་གོ་བ་ལེགས་པར་འཆར་བས་ཐེ་ཚོམ་མེད་ཅིང་རང་བྱན་ཚུད་པའི་གནད་ཡོད་དོ། །བཀའ་གདམས་ལྷ་བཞི་ཡང་དོན་ལ་འདིའི་ནང་ན་ཚང་ནས་ཡོད་པས་དོན་ལ་དེས་འཐུས་ཀྱང་། ལྷ་བཞིའི་ནང་གི་སྤྱན་རས་གཟིགས་འགྲོ་འདུལ་གཙོ་འཁོར་གསུམ་གྱི་དབང་པཎ་ཆེན་ལུང་རིགས་ཉི་
མའི་དྲུང་ནས་ཐོབ་པའི་བརྒྱུད་པ་ནི། པཎ་ཆེན་རཀྴི་ཏ། གསེར་གླིང་པ། ཇོ་བོ་རྗེ། འབྲོམ་སྟོན་པ། བྱ་ཡུལ་བ། རྒྱ་ལྕག་རི་གོང་ཀ་བ། དྭགས་པོ་རིན་པོ་ཆེ་ནས་། དོན་བརྒྱུད་ལྟར་ལས་གྲུབ་ཆེན་པཀི་ནས་གཉེན་རས། རང་བྱུང་བ་ནས་ཆོས་ཀྱི་དབང་ཕྱུག་གི་ བར ། དེ་ལས་ལུང་རིགས་ཉི་མས་གསན། ཡང་དབང་ཕྱུག་རྡོ་རྗེ་ནས་གྲགས་པ་དོན་གྲུབ། སི་ཏུ་ཆོས་ཀྱི་རྒྱལ་མཚན། ལུང་རིགས་ཉི་མ། དེས་བདག་རཱ་ག་ཨ་སྱ་ལའོ། །ཞེས་སྒྲུབ་ཐབས་ཚང་མ་བཙུགས་ན་དབུ་འཛུགས་ལ་ལོ་རྒྱུས་དེ་བཤད། དེ་ནས་རིམ་པར་ལྷ་ཚན་པ་རེ་རེ་ལ་ལོ་རྒྱུས་ཚན་པ་རེ་བཤད་པར་བྱ་སྟེ་དང་པོར་ཐུབ་པའི་ལོ་རྒྱུས་ནས་བཟུང་སྟེ་རིམ་པར་སྐབས་སུ་གང་བབས་བཤད་པར་བྱའོ།། ༈ །།བཅོམ་ལྡན་འདས་བསྟན་པའི་བདག་པོ་མཉམ་མེད་ཤཱཀྱའི་རྒྱལ་པོའི་དབང་བཤད་བཞུགས་སོ། །འོ་ན་ད་ལམ་ཁྱེད་རང་རྣམས་ལ་བཅོམ་ལྡན་འདས་བསྟན་པའི་བདག་པོའི་དབང་བསྐུར་བ་ཡིན་ཏེ། བདག་ཅག་གི་སྟོན་པ་བཅོམ་ལྡན་འདས་ཤཱཀྱ་ཐུབ་པ་འདི་ནི་ངེས་པའི་དོན་ལ་བསྐལ་པ་གྲངས་མེད་པའི་སྔོན་རོལ་ནས་སངས་རྒྱས་པར་ཡིན་ཏེ། དེའི་ས་མཚམས་སུས་ཀྱང་བཟུང་དུ་མེད་པས་དང་པོའི་
སངས་རྒྱས་ཞེས་ཀྱང་བྱ། འོན་ཀྱང་སེམས་ཅན་གྱི་དོན་ལ་སླར་ཡང་སེམས་བསྐྱེད་པའི་ཚུལ་དང་། བསྐལ་ཆེན་གྲངས་མེད་གསུམ་དུ་ཚོགས་གཉིས་བསགས་་གཉིས་སྦྱང་བའི་ཚུལ་དང་། མཐར་འོག་མིན་དུ་ལོངས་སྤྱོད་རྫོགས་པའི་སྐུར་སངས་རྒྱས་པ་དང་། འཛམ་བུ་གླིང་དུ་མཛད་པ་བཅུ་གཉིས་སྟོན་པར་མཛད་དེ་འཇིག་རྟེན་གྱི་ཁམས་མཐའ་ཡས་པ་རྣམས་སུ་ད་ལྟ་ཡང་དེ་ལྟ་བུའི་ཚུལ་སྟོན་བཞིན་པ་དང་། མ་འོངས་པ་ན་ཡང་ནམ་མཁའ་ཇི་སྲིད་དེ་ལྟ་བུའི་མཛད་པ་སྟོན་ནས་སེམས་ཅན་གྱི་དོན་མཛད་པ་ཡིན་ཏེ། དེ་དག་གི་ལོ་རྒྱུས་ཕྱོགས་རེ་ཙམ་བཤད་པས། ཐེག་པ་ཆེ་ཆུང་དང་རྒྱུད་སྡེ་སོ་སོ་ནས། དང་པོ་སེམས་བསྐྱེད་ཚུལ་དང་། བར ་དུ་ས་ལམ་བསྒྲོད་ཚུལ་དང་། ཐ་མ་སངས་རྒྱས་ཚུལ་མི་འདྲ་བ་རེ་རེ་བཤད་པ་ཡོད་ཅིང་། དེ་དག་ཀྱང་གོ་རིམ་དང་སྔ་ཕྱི་ཡོད་པ་ལྟར་སྣང་ཡང་། ངེས་པའི་དོན་ལ་གོ་རིམ་དང་སྔ་ཕྱི་ཡི་ཁྱད་པར་ཡང་བཟུང་དཀའ་སྟེ་། སྐད་ཅིག་རེ་རེ་ལ་ཡང་དེ་ཐམས་ཅད་སྟོན་པའི་རྫུ་འཕྲུལ་ལ་མངའ་བརྙེས་པའོ། །འོན་ཀྱང་མི་མཇེད་འཇིག་རྟེན་གྱི་ཁམས་འདིར་མཛད་པ་བསྟན་ཚུལ་ནི། སྔོན་སངས་
རྒྱས་རིན་ཆེན་སྙིང་པོའི་དྲུང་དུ་ཐུབ་པ་ཉིད་བྲམ་ཟེ་རྒྱ་མཚོའི་རྡུལ་ཞེས་བྱ་ བར ་གྱུར་ནས་འཁོར་བྲམ་ཟེ་སྟོང་ཕྲག་མང་པོ་དང་རྒྱལ་པོ་དང་རྒྱལ་པོའི་སྲས་སྟོང་དང་བཅས་པ་བྱང་ཆུབ་ཀྱི་ལམ་ལ་བཀོད་དེ། དེའི་ཚེ་སངས་རྒྱས་རིན་ཆེན་སྙིང་པོའི་དྲུང་དུ་འཁོར་རྣམས་ཀྱིས་བྱང་ཆུབ་མཆོག་ཏུ་སེམས་བསྐྱེད་པའི་ཚེ། དེ་ཐམས་ཅད་ཀྱིས་དུས་བཟང་དུས་དང་ཞིང་ཁམས་རྣམ་པར་དག་པར་སྐྱེ་ བར ་སྨོན་ལམ་བཏབ་པས། བྲམ་ཟེ་རྒྱལ་པོ་རྒྱ་མཚོའི་རྡུལ་དེ་ཉིད་ཀྱིས་དུས་ངན་པ་དང་སེམས་ཅན་ཚེ་ཐུང་བ་རྣམས་ལ་སྙིང་རྗེ་ཆེན་པོ་སྐྱེས་ཏེ། དུས་སྙིགས་ཚེམའི་སེམས་ཅན་མ་དག་པར་སངས་རྒྱས་པའི་སྨོམ་ལམ་བཏབ་པས། དེར་ཕྱོགས་བཅུའི་སངས་རྒྱས་ཐམས་ཅད་ཀྱིས་ལེགས་སོ་གསུངས་ནས་མངོན་པར་བསྟོད་དེ། མ་འོངས་པ་ན་ཞིང་ཁམས་མ་དག་པར་དུས་སྙིགས་མ་ལྔའི་ཚེ། །སངས་རྒྱས་ཤཱཀྱ་ཐུབ་པ་ཞེས་བྱ་ བར ་ལུང་བསྟན་པ་ནི་སྟོན་པ་འདི་ཉིད་ཡིན་པས་སངས་རྒྱས་གཞན་ལས་ཐུགས་རྗེ་ཆེ་བ་ཡིན། སངས་རྒྱས་གཞན་གྱི་བསྟན་པ་ལ། གསང་སྔགས་ཞེས་བྱ་བ་ཀུན་གྱིས་ཐོས་པ་མེད་ཅིང་རེ་རེ་ཙམ་ལ་གཅིག་བརྒྱུད་ཡིན། ཐུབ་པའི་བསྟན་པ་ལ་གསང་སྔགས་ཀུན་གྱི་སྤྱོད་དུ་ཡོད་
པས་སངས་རྒྱས་གཞན་ལས་བཀའ་དྲིན་ཆེ། དེའི་ཚེ་འབྲོམ་སྟོན་པས་ཀྱང་། སངས་རྒྱས་ཀྱི་ནང་ནས་ཤཱཀྱ་ཐུབ་པ་བདམས་པ་ཡིན། སངས་རྒྱས་འདི་ལ་ཕྱག་གཅིག་མེ་ཏོག་གཅིག་ཙམ་མཆོད་ན་ཡང་། མཐར་བླ་ན་མེད་པའི་བྱང་ཆུབ་ཐོབ་པ་དང་བསྟན་པ་འདི་ལ་རབ་ཏུ་བྱུང་བ་ཐམས་ཅད་ནི་མི་དགེ་མཚམས་མེད་ཇི་ལྟར་སྤྱད་ཀྱང་བསྐལ་བཟང་གི་སངས་རྒྱས་ཐ་མ་མོས་པའི་བསྟན་པ་ལ་ཐམས་ཅད་འབྲས་བུ་ཐོབ་སྟེ་འཁོར་ བར ་གཅིག་ཀྱང་མི་ལུས་པ་ཐུབ་པའི་སྨོན་ལམ་ཡིན་པས་འགྲོ་དོན་ཡང་ཤིན་ཏུ་ཆེ་བ་ཡིན། འདི་ཡི་མཚན་སྔགས་ཀྱི་གཟུངས་ལན་གཅིག་བརྗོད་པས་ཀྱང་བསྐལ་པ་བརྒྱད་ཁྲིའི་སྡིག་པ་བྱང་ བར ་བཤད་ན་འདིའི་དབང་ཐོབ་ན་ཕན་ཡོན་རྒྱ་ཆེན་པོ་དང་ལྡན་པ་སྨོས་ཅི་དགོས་ཏེ། དེ་ལ་ཡང་རྒྱུད་སྡེ་བཞི་ཀ་ནས་བསྟན་པའི་བདག་པོ་ཡིན་པར་གསུངས་མོད་ཀྱི་འདི་བྱ་རྒྱུད་ཡིན། དེ་ལ་ཡང་དེ་བཞིན་གཤེགས་པའི་རིགས་དང་རྡོ་རྗེའི་རིགས་དང་པདྨའི་རིགས་ཏེ་རིགས་ཀྱི་གཙོ་བོ་གསུམ་དང་། ནོར་བུའི་རིགས་དང་གླང་པོ་ཆེའི་རིགས་དང་འཇིག་རྟེན་པའི་རིགས་ཏེ་འཁོར་གསུམ་དང་དྲུག་ལས་འདི་དེ་བཞིན་གཤེགས་པའི་རིགས་ཡིན། དེ་
ལ་ཡང་རིགས་ཀྱི་གཙོ་བོ་དང་རིགས་ཀྱི་བདག་པོ་དང་རིགས་ཀྱི་ཡུམ་དང་རིགས་ཀྱི་གཙུག་ཏོར་དང་རིགས་ཀྱི་ཁྲོ་བོ་ཁྲོ་མོ་དང་རིགས་ཀྱི་ཕོ་ཉ་དང་རིགས་སུ་བསྡུས་པའི་བྱང་ཆུབ་སེམས་དཔའ་དང་གནས་གཙང་མའི་ལྷ་ལ་སོགས་པའི་རྒྱུད་སྡེ་བརྒྱད་ཡོད་པ་ལས་འདི་རིགས་ཀྱི་གཙོ་བོ་ཡིན་ལ། དེ་ལ་ཡང་རྩ་རྒྱུད་དང་འཕྲོས་པའི་རྒྱུད་གཉིས་ཡོད་པ་ལས་འདི་རྩ་རྒྱུད་དམ་ཚིག་གསུམ་བཀོད་པའི་རྒྱལ་པོ་ཡིན་ལ་འདི་ཁ་ཅིག་གིས་སྤྱོད་རྒྱུད་དུ་འདོད་ཀྱང་སློབ་དཔོན་ཨ་བྱཱ་ཀ་རས་བྱ་རྒྱུད་དུ་བཞེད་པ་ལྟར་ཡིན། འདིའི་སྒྲུབ་ཐབས་རྒྱས་པ་གཙོ་འཁོར་ལྔ་གཟུངས་རིང་དང་བཅས་པ། འབྲིང་བ་གཙོ་འཁོར་གསུམ་དང་རིགས་གསུམ། སྒྲུབ་ཐབས་བཞིའི་ལུང་བྱ་ཞིང་དབང་གཅིག་ཏུ་བསྡུས་པ་རྗེ་ཆོས་ཀྱི་དབང་ཕྱུག་གིས་ཕྱག་ལེན་ལྟར་བསྐུར་བ་ཡིན་པས་མཎྜལ་ཕུལ། ཞེས་པ་རཱ་ག་ཨ་སྱས་སོ།། ༈ །།ཐུགས་རྗེ་ཆེན་པོ་སྤྱན་རས་གཟིགས་ཀྱི་ལོ་རྒྱུས་དབང་བཤད་བཞུགས་སོ།། ༈ འོ་ན་ད་ལམ་ཁྱེད་རང་རྣམས་ལ་ཐུགས་རྗེ་ཆེན་པོ་འཕགས་པ་སྤྱན་རས་གཟིགས་ཀྱི་དབང་བསྐུར་བ་ཡིན་ཏེ། དེ་ལ་ཆོས་སྐུའི་སྤྱན་རས་གཟིགས་ནི་འཁོར་འདས་ཐམས་ཅད་ཁྱབ་པར་བཞུགས། ལོངས་སྐུའི་
སྤྱན་རས་གཟིགས་ནི་འོག་མིན་འཐུག་པོ་བཀོད་པའི་ཞིང་ཁམས་ན་རྣམ་སྣང་གངས་ཅན་མཚོ་ཞེས་བྱ་བ་སྐུ་ལུས་བསམ་ལས་འདས་པ་གཅིག་ཏུ་སྤྲུལ་ནས་དེའི་བ་སྤུའི་བུ་ག་རེ་རེ་ཡང་འཇིག་རྟེན་གྱི་ཁམས་རེ་རེ། ཕྱག་ལྷུང་བཟེད་ཀྱི་ནང་སྤོས་ཆུའི་རྒྱ་མཚོ་དེའི་ནང་ན་མེ་ཏོག་པདྨ་ཉི་ཤུ་རྩ་ལྔ་བརྩེགས་མར་སྐྱེས་པའི་སྟེང་ན་ཡང་འཇིག་རྟེན་གྱི་ཁམས་དཔག་ཏུ་མེད་པ་ཡོད་དེ། འཇིག་རྟེན་འདི་ཡང་མེ་ཏོག་བཅུ་གསུམ་པའི་ཟེའུ་འབྲུ་གཅིག་གི་སྟེང་ན་ཡོད་དོ། ལོངས་སྐུའི་སྤྱན་རས་གཟིགས་དེས་ས་བཅུའི་བྱང་ཆུབ་སེམས་དཔའ་རྣམས་ལ་བླ་ན་མེད་པའི་ཆོས་བསྟན་ཏོ། །སྤྲུལ་སྐུའི་སྤྱན་རས་གཟིགས་དེས་སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ཀྱི་གྲངས་དང་མཉམ་པ་ན་སངས་རྒྱས་སྟོང་རྩ་གཉིས་སུ་སྤྲུལ་ནས་སེམས་ཅན་གྱི་དོན་མཛད་པ་དང་། སྟོང་གསུམ་གྱི་སྟོང་ཆེན་པོ་བཀོད་པ་ བར ་མའི་འབྱུང་བ་ཆེན་པོ་བཞིའི་རྡུལ་ཕྲ་རབ་དང་མཉམ་པའི་མཛད་གཉིས་སུ་སྤྲུལ་ནས་སེམས་ཅན་གྱི་དོན་མཛད་པ་དང་། འཛམ་གླིང་བྱེ་བ་ཕྲག་བརྒྱ་ན་ཤཱཀྱ་ཐུབ་པ་བྱེ་བ་ཕྲག་བརྒྱ། ཐུགས་རྗེ་ཆེན་པོ་བྱེ་བ་ཕྲག་བརྒྱ། པདྨ་འབྱུང་གནས་
བྱེ་བ་ཕྲག་བརྒྱ། སྲོང་བཙན་སྒམ་པོ་བྱེ་བ་ཕྲག་བརྒྱ། ཀརྨ་པ་བྱེ་བ་ཕྲག་བརྒྱར་སྤྲུལ་ནས་སེམས་ཅན་གྱི་དོན་མཛད་དོ། །དེ་ལྟར་སྤྲུལ་པ་དཔག་ཏུ་མེད་པ་འགྱེད་ཀྱང་། སྐུའི་ངོ་བོ་ནི་བདེ་བ་ཅན་གྱི་ཞིང་ན་སངས་རྒྱས་སྣང་བ་མཐའ་ཡས་ཀྱི་དྲུང་དུ་ཉེ་གནས་ཀྱི་ཚུལ་དུ་བཞུགས་ཤིང་། སྤྲུལ་པའི་གཙོ་བོ་ནི་ལྷོ་ཕྱོགས་པོ་ཊ་ལ་ཡི་རྩེར་རིན་པོ་ཆེའི་གཞལ་ཡས་ཁང་ན་བཞུགས་ནས། མཁའ་འགྲོ་དང་ལྷ་ཀླུ་དྲི་ཟ་རྣམས་ལ་ཆོས་སྟོན་ཅིང་། བསྐལ་པ་འདི་མ་སྟོང་གི་ བར ་དུ་བཞུགས་ཏེ། ཞལ་བྱང་དུ་རྒྱུ་ནས་བོད་ཁ་བ་ཅན་དུ་དུས་རྟག་ཏུ་ཐུགས་རྗེའི་སྤྱན་གྱིས་གཟིགས་སོ། །དེའི་ཡང་སྤྲུལ་ནི་ནམ་མཁའི་མཐའ་དང་མཉམ་པའི་སེམས་ཅན་རེ་རེའི་དྲུང་དུ་ཡང་སྤྲུལ་པ་རེ་རེ་བཞུགས་ནས་གང་ལ་གང་འདུལ་གྱིས་འགྲོ་བའི་ཟོདོན་མཛད་དོ། །དེ་ལྟ་བུའི་སྤྱན་རས་གཟིགས་ཀྱི་ཡོན་ཏན་འདི་སུའི་རྣ་ལམ་དུ་ཐོས་ན་ཡང་། མཚམས་མེད་པ་ལྔ་ལ་སོགས་པའི་སྡིག་པ་དག་པར་འགྱུར་ཞེས། ཆུ་ཀླུང་སྣ་ཚོགས་པའི་མདོ་ལས་གསུངས་སོ། །སྤྱན་རས་གཟིགས་ཀྱི་མཚན་ཡིད་ལ་དྲན་པས་ཀྱང་བདེ་བ་ཅན་དུ་སྐྱེ་ བར ། ཟ་མ་ཏོག་བཀོད་པའི་མདོ་ལས་གསུངས་སོ། །སངས་རྒྱས་སྣང་
བ་མཐའ་ཡས་ཀྱི་མདུན་དུ། བོད་ཁ་བ་ཅན་གྱི་སེམས་ཅན་རྣམས་སྤྱན་རས་གཟིགས་ཀྱི་འདུལ་ཞིང་། འབྲེལ་ཆེ་བ་རྣམས་བདེ་བ་ཅན་གྱི་ཞིང་ཁམས་སུ་ཁྲིད་ནས་འོང་བའི་དམ་བཅའ་མཛད་པ་དང་། སྟོན་པ་ཤཱཀྱ་ཐུབ་པ་མྱ་ངན་ལས་འདའ་ཁར། བོད་ཁ་བ་ཅན་ངའི་ཞབས་ཀྱིས་མ་བཅགས་པས། བྱང་ཆུབ་སེམས་དཔའ་སྤྱན་རས་གཟིགས་ཁྱོད་ཀྱིས་ཐུལ་ཞིག་གསུངས་ནས། ཞལ་ཆེམས་གནང་བའི་གནད་ཀྱིས་ངེད་རང་བོད་ཀྱི་ལྷ་སྐལ་མ་འཚུགས་པ་ཡིན་ཅིང་སྤྱན་རས་གཟིགས་ཀྱི་མཚན་ཡིད་ལ་དྲན་ཅིང་ཐེ་ཚོམ་མེད་པར་གསོལ་བ་བཏབ་ན། མེ་དང་ཆུ་དང་གཅན་གཟན་དང་ཆོམ་རྐུན་དང་དགྲ་དང་རྒྱལ་པོའི་འཇིགས་པ་དང་། སྟག་དང་སེང་གེ་དང་སྦྲུལ་དང་རོ་ལངས་དང་བྱེད་དང་ཤ་ཟ་དང་དབུལ་ཕོངས་ལ་སོགས་པའི་འཇིགས་པ་ཐམས་ཅད་ལས་ཐར་བ་དང་། དུག་དང་མཚོན་དང་རིམས་དང་མུ་གེའི་གནོད་པས་མི་ཚུགས་ཤིང་། ཚེ་འཕོས་ཀྱང་ངན་སོང་དང་མི་ཁོམ་པར་ནམ་ཡང་མི་ལྟུང་། བདེ་བ་ཅན་སོགས་དག་པའི་ཞིང་དུ་སྐྱེ་ བར ་གསུངས། དེ་ལ་རྒྱུད་སྡེ་བཞི་ཀ་ནས་སྤྱན་རས་གཟིགས་ཀྱི་དཀྱིལ་འཁོར་སྒྲུབ་ཐབས་གསུངས་མོད་ཀྱི་
འདིའི་སྒྲུབ་ཐབས་ཕལ་ཆེར་ནི་བྱ་རྒྱུད་ཤས་ཆེ་བས། བྱ་རྒྱུད་པདྨའི་རིགས་ཀྱི་བདག་པོ་ནི་སྤྱན་རས་གཟིགས་ཡིན་ལ། དེའི་རྩ་རྒྱུད་པདྨའི་དྲྭ་བ་ནས་ཕྱོགས་བཅུའི་སྤྱན་རས་གཟིགས་བཅུ་སོགས་གསུངས། བཤད་རྒྱུད་དོན་ཡོད་ཞགས་པ་ནས་དོན་ཞགས་རིགས་མང་དུ་གསུངས། གཞན་ཡང་ལྷ་སོ་སོ་འདི་དག་གི་གཟུངས་དང་རྒྱུད་མང་དུ་བཞུགས། དེ་དག་གི་དོན་སྒྲུབ་ཐབས་འདི་ཡང་མང་དུ་བཞུགས་པ་ལས། དཔེར་ན་ལྷ་འགྲོ་འདུལ་ཕྱག་བཞི་པ་དང་། སྔགས་ཡི་གེ་དྲུག་པ་ཡིན་པའི་སྒྲུབ་ཐབས་ལྔའི་ལུང་བྱས་ནས། དབང་གཅིག་ཏུ་བསྡུ་བ་ཕྱག་ལེན་ཡིན་པ་ལྟར་སྒྲུབ་ཐབས་ལྔ་ཡི་ལུང་བྱས་ནས་དབང་གཞན་རྣམས་ལ་ཡང་དེ་དང་མཚུངས་པ་ཡིན་ཏེ་དེ་ལྟར་བྱས་པས་དབང་ལུང་ཐམས་ཅད་ཡོངས་སུ་རྫོགས་པར་འགྱུར་བའང་ཡིན་ནོ། །དེ་ལྟར་ཐུགས་རྗེ་ཆེན་པོའི་རིགས་རྣམས་ཀྱི་དབང་རིམ་པར་ཞུ་བའི་ཕྱིར་མཎྜལ་ཕུལ། ཞེས་པའང་རིན་པོ་ཆེ་ཨ་རཱ་གས་སྦྱར་བའོ།། ༈ །།པདྨ་གར་གྱི་དབང་ཕྱུག་གི་ལོ་རྒྱུས་དབང་བཤད་བཞུགས་སོ།། ༈ འོ་ན་ད་ལམ་ཁྱེད་རང་རྣམས་ལ་པདྨ་གར་གྱི་དབང་ཕྱུག་གི་དབང་བསྐུར་བ་ཡིན་ཏེ། འཇིག་རྟེན་དབང་ཕྱུག་གི་རྟོགས་བརྗོད་ལས་འདི་
ཡི་ཕན་ཡོན་མཐའ་ཡས་པ་གསུངས་ཏེ་ལྷ་འདི་བྷོ་པའི་ཕན་ཡོན་ནི། དེ་ལྟར་གང་སྒོམ་པ་དང་ལྡན་ཞིང་ཏིང་ངེ་འཛིན་ལེགས་པར་གོམས་པར་བྱེད་ན་དངོས་གྲུབ་བརྟན་པོར་འགྱུར་རོ། །དེའི་སངས་རྒྱས་ཉིད་དང་འདོད་པའི་ལོངས་སྤྱོད་ཐམས་ཅད་སྟེར། སངས་རྒྱས་ཕ་རོལ་ཕྱིན་འགྲུབ་ཅིང་། །གཟུངས་དང་ས་ཡང་དེ་བཞིན་ནོ། །འཇིག་རྟེན་ཀུན་གྱི་བདེ་སྟོན་ནི། །སོ་སོར་རང་ཉིད་རྗེས་སུ་བསྒྲུབ། །སངས་རྒྱས་ཉིད་དང་བྱང་སེམས་ཉིད། །རང་རྒྱལ་ཉིད་དང་དེ་བཞིན་ནོ། །ཡིད་འོང་སངས་རྒྱས་གོ་འཕང་ན། །དཔྱད་མི་དགོས་པར་འགྲུབ་པར་འགྱུར། །ཞེས་དང་། སྔགས་བཟླས་པའི་ཕན་ཡོན་ནི། ཨོཾ་ཧྲིཔདྨ་ནིར་ཏེ་ཤྭ་ར་ཧཱུྃ། རྩ་བའི་སྔགས་འདི་བརྒྱ་རྩ་བརྒྱད་བཟླས་ཉིན་མོ་དང་ནུབ་མོ་བྱས་པའི་སྡིག་པ་ཉམས་པར་འགྱུར་རོ། །ཡང་ན་ལྔ་བརྒྱ་བཟླས་བརྗོད་བྱས་ན། ནད་ཐམས་ཅད་ལས་གྲོལ་ བར ་འགྱུར་རོ། །ཡང་ན་སྟོང་བཟླས་བརྗོད་བྱས་ན་དུས་མ་ཡིན་པར་འཆི་བ་མེད་པར་འགྱུར་རོ། །ཞེས་སོགས་ཕན་ཡོན་བསམ་ལས་འདས་པར་གསུངས་སོ། །དེ་ལྟ་བུའི་དབང་ཞུ་བའི་ཕྱིར་མཎྜལ་ཕུལ།། ༈ །
འཇམ་དབྱངས་རིགས་རྣམས་ཀྱི་ལོ་རྒྱུས། འོ་ན་ད་ལམ་ཁྱེད་རྣམས་ལ་རྗེ་བཙུན་འཇམ་དཔལ་དབྱངས་ཀྱི་དབང་རྣམས་བསྐུར་བ་ལ། ཐོག་མར་ལྷའི་ལོ་རྒྱུས་ནི། སྔོན་བསྐལ་པ་གྲངས་མེད་པའི་ཡང་སྔོན་རོལ་དུ། སངས་རྒྱས་འབྲུག་སྒྲ་དབྱངས་ཀྱི་རྒྱལ་པོའི་དྲུང་དུ། རྗེ་བཙུན་འཇམ་དཔལ་རྒྱལ་པོར་གྱུར་པར་ཚད་མེད་བསྙེན་བཀུར་དགུ་སྨོན་ལམ་བཏབ་ནས། བསྐལ་པ་གྲངས་མེད་དཔག་ཏུ་མེད་པར་སེམས་ཅན་རྣམས་སངས་རྒྱས་ཀྱི་ས་ལ་བཀོད་དེ། བསྐལ་པ་མང་པོའི་སྔོན་དུ་སངས་རྒྱས་ཀྱི་སར་མངོན་མཛད་ཀྱང་། ཐུགས་རྗེའི་དབང་ཚོགིས་ད་རུང་བྱང་ཆུབ་སེམས་དཔའི་ཚུལ་དུ་བཞུགས་ནས་སེམས་ཅན་གྱི་དོན་དུ་བསྐལ་པ་དཔག་ཏུ་མེད་པ་མཛད་ནས། མ་འོངས་པ་ན་ཞིང་ཁམས་ཡོངས་སུ་དག་པར་རྡུལ་མེད་པར་ཡང་དག་འཕགས་ཞེས་བྱ་བའི་ཞིང་དུ་སངས་རྒྱས་ཀུན་ཏུ་གཟིགས་པ་ཞེས་བྱ་ བར ་འགྱུར་ཏེ། སངས་རྒྱས་ཀྱི་སྤྱན་གྱིས་ཕྱོགས་བཅུར་གཟིགས་པ་ན། སངས་རྒྱས་གྲངས་མེད་ཚད་མེད་པ་དག་རང་གིས་བྱང་ཆུབ་ལ་མ་བཀོད་པ་འགའ་ཡང་མེད་པར་གྱུར་ཏེ། སངས་རྒྱས་དེའི་མཚན་ད་ལྟ་ཐོས་ན། །མི་འགྱུར་བ་ལ་ཞུགས་པའམ་མོས་པ་ཆུང་བ་མ་གཏོགས།
མངོན་པར་རྫོགས་པར་སངས་རྒྱས་པར་འགྱུར་ བར ་ལུང་བསྟན་ཏེ། འདི་ཡི་ཞིང་བཀོད་ཐོས་སམ་མཐོང་ངམ། སྟོན་ཏམ་བྲིས་སམ། འཇམ་དཔལ་གྱི་རྗེས་སུ་སློབ་པའི་བློ་སྐད་ཅིག་སྐྱེས་པའི་བསོད་ནམས། ཞིང་ཐམས་ཅད་ནོར་བུས་བཀང་སྟེ་སངས་རྒྱས་ལ་ཕུལ་བ་བས་ཀྱང་ཆེ་ བར ་འདུག་གསུངས་སོ། །ཞིང་དེ་ནི་ནོར་བུ་སྣ་ཚོགས་ལས་གྲུབ་ཅིང་རིན་ཆེན་སྣ་ཚོགས་ཀྱིས་བརྒྱན་པ། མི་དགེ་བ་དང་སྡུག་བསྔལ་བ་དང། རྒས་པ་ན་འཆི་མི་སྡུག་པའི་མིང་ཡང་མེད་དེ། ཅི་འདོད་པ་བསམ་མ་ཐག་ནས་ཆར་བཞིན་དུ་འབེབས་པའོ། །ད་ལྟར་འཇམ་དཔལ་ལ་དད་ཅིང་ཡི་དམ་བྱས་ན་ཞིང་ཁམས་དེར་སྐྱེས་ནས་འབྲས་བུ་ཐོབ་པ། འཇམ་དཔལ་ཞིང་བཀོད་ཀྱི་མདོ་དང་། པདྨ་དཀར་པོ་སོགས་ལས་རྒྱ་ཆེར་གསུངས་སོ། །དེ་ལྟར་འཇམ་དབྱངས་འདི་རྒྱུད་སྡེ་བཞི་ཀ་ནས་བཤད། ཆོས་དབྱིངས་གསུང་དབང་སོགས་ཕོ་རྒྱུད་དང་། བུང་བས་མྱོས་པ་སོགས་མོ་རྒྱུད་འགའ་ཞིག་དང་། འཇམ་རྡོར་སྔགས་ཐུང་ཅན་ཕ་རྒྱུད་དང་། མཚན་ཡང་དག་པར་བརྗོད་པ་སོགས་གཉིས་མེད་རྒྱུད་དུ་གཏོགས་པའང་ཡོད་མོད་ཀྱིས། ཕལ་ཆེར་བྱ་རྒྱུད་ཤས་ཆེ་
བས། འཇམ་དཔལ་འདི་བྱ་རྒྱུད་དེ་བཞིན་གཤེགས་པའི་རིགས་ཀྱི་བདག་པོ་ཡིན་ཏེ། འཇམ་དཔལ་རྩ་རྒྱུད་ནི་རྩ་བའི་རྒྱུད་ཡིན་ལ། འཕྲོས་པའི་རྒྱུད་ནི་དཔའ་བོ་གཅིག་སྒྲུབ་སོགས་ཡིན་འདི་འགྲུབ་ཀྱང་སླ་བ་དང་། ཆོས་སྐྱོང་ཐམས་ཅད་ཀྱི་གཙོ་བོ་ཡིན་པ་དང་། ཕན་ཡོན་ཡང་བསམ་ལས་འདས་ཏེ། འཇམ་དཔལ་རྩ་རྒྱུད་ལས། དུས་ཀྱི་ཐ་མ་དག་ལ་ནི། །སྔགས་རྣམས་འགྲུབ་པར་ངེས་པར་ཡིན། །དེ་ཉིད་ཀྱིས་ན་ཐུབ་དབང་གིས། །གཞོན་ནུ་ཡོངས་སུ་བཏགས་པ་ཡིན། །ཤེས་རབ་ཆེན་པོ་འཇམ་པའི་དབྱངས། །བྱིས་པ་གཞོན་ནུའི་གཟུགས་དང་ལྡན། །འཇིག་རྟེན་འདི་ན་རྒྱུན་དུ་རྒྱུ། །སེམས་ཅན་རྗེས་སུ་བཟུང་ བར ་མཛོད། །དེ་ཡི་དུས་སུ་འགྲུབ་པ་ནི། །འཇམ་པའི་དབྱངས་སུ་རབ་ཏུ་མཐོང་། །ཞེས་གསུངས། མགོན་པོ་ཡོན་ཏན་གྱི་མགྲོན་ཞེས་པ་བསྟན་སྲུང་ཆོས་སྐྱོང་ཐམས་ཅད་ཀྱི་གཙོ་བོ་ཡང་འཇམ་དཔལ་འདི་ཡིན་ཏེ། འཇམ་དཔལ་རྩ་རྒྱུད་ལས། ཐུབ་དབང་ཡོངས་སུ་མྱ་ངན་འདས། །དམ་པའི་ཆོས་ནི་བསྲུང་བའི་ཕྱིར། །དེ་ཚེ་རྟག་ཏུ་སྲུང་བ་ནི། །འཇམ་པའི་དབྱངས་སུ་གྱུར་པ་ཡིན། །ཞེས་གསུངས། འཇམ་དཔལ་ཞིང་
གི་བཀོད་པའི་རྒྱུད་མང་ལས། སངས་རྒྱས་བྱེ་བ་ཁྲག་ཁྲིག་འབུམ་ཕྲག་གི་མཚན་བརྗོད་པ་བས་ནི། གང་འཇམ་དཔལ་གཞོན་ནུར་གྱུར་པའི་མིང་གཅིག་བརྗོད་ན་བསོད་ནམས་ཆེས་མང་དུ་བསྐྱེད་པར་གསུངས་ན། འདི་ཡི་དབང་ཐོབ་ན་ཕན་ཡོན་བསམ་ལས་འདས་པ་ནི་སྨོས་ཅི་དགོས། འདི་ལ་རིགས་མང་དུ་ཡོད་པའི་དབང་རྣམས་རིམ་པ་བཞིན་དུ་ཞུ་བའི་ཕྱིར་མཎྜལ་ཕུལ།། ༈ །།ཆོས་དབྱིངས་གསུང་གི་དབང་ཕྱུག་གི་ལོ་རྒྱུས་བཞུགས་སོ། །འོ་ན་ད་ལམ་ཁྱེད་རྣམས་ཀྱི་དབང་ཞུ་བ་ལ་ཡིད་ཆེས་པའི་དད་པ་བསྐྱེད་པ་གལ་ཆེ། དད་པ་བསྐྱེད་པ་ལ་ཕན་ཡོན་ཤེས་དགོས་ཏེ་རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་ཆེན་པོ་ལས། དགའ་རབ་དབང་ཕྱུག་ལ་མྱོས་བྱེད་ཀྱི་རིག་སྔགས་ཡོད་པས་འདོད་ཁམས་ཀྱི་ལྷ་རྣམས་མྱོས་པ་དང་མེ་ཏོག་གི་ཚལ་དང་འདོད་ཡོན་སྣ་ཚོགས་སྤྲུལ་ནས་རང་ཉིད་ཀྱང་ལོངས་སྤྱོད་ཅིང་གཞན་ལ་སྦྱིན་ནོ། །དབང་ཕྱུག་ཆེན་པོ་ལ་ཡིད་མགྱོགས་བྱ་བའི་སྔགས་ཡོད་པས་སྟོང་གསུམ་ཁམས་ཀྱི་སེམས་ཅན་རྣམས་ཀྱིས་དགོས་པ་བསྒྲུབས། ལོངས་སྤྱོད་སྣ་ཚོགས་སྤྲུལ་ནས་གཙང་མའི་རིས་ཀྱི་ལྷའི་བུ་རྣམས་ལ་སྦྱིན་ཅིང་། རང་
ཉིད་ཀྱང་ལོངས་སྤྱོད་དོ། །མིག་འཕྲུལ་གྱིས་སྔགས་ཀྱིས་གཟུགས་རྣམ་པ་སྣ་ཚོགས་སྟོན་པ་དང་། ལྷ་མ་ཡིན་གྱིས་སྔགས་ཀྱིས་སྒྱུ་མ་རྣམས་བསྟན་ཏོ། །གསང་སྔགས་དག་གིས་དུག་དང་རིམས་མེད་པར་བྱེད་པ་དང་། མ་མོ་ཞེས་བྱ་བ་ལྷ་མོ་རྣམས་ཀྱིས་སྔགས་ཀྱིས་སེམས་ཅན་རྣམས་ལ་ནད་འགོ་བ་བཏང་བ་དང་། སྔགས་ཀྱི་ནུས་པས་མེའི་ཚ་བ་མེད་པར་བྱས་ནས་གྲང་ བར ་བྱེད་ནུས་པ་འདི་རྣམས་རྗེས་སུ་དཔག་ནས། གསང་སྔགས་ཀྱི་ནུས་པ་ལ་ཡིད་ཆེས་ཤིང་དད་པར་བྱའོ། །གསང་སྔགས་ཀྱི་མཐུ་ནི་གསང་སྔགས་ལས་བྱུང་བ་མ་ཡིན་ན། རྫ་ས་ལ་འཇུག་པ་ཡང་མ་ཡིན། སྦྱོར་བ་ལས་ཀྱང་མ་ཡིན་མོད་ཀྱང་གསང་སྔགས་ཀྱི་བྱིན་རླབས་ནི། ཆོས་ཉིད་ལས་འབྱུང་སྟེ་རྟེན་འབྲེལ་ཟབ་མོ་ལས་གྲུབ་བོ་ཞེས་༈ བཅོམ་ལྡན་འདས་ཀྱིས་ཞལ་ནས་གསུངས་སོ། །དེ་ལ་ད་ལམ་ཆོས་དབྱིངས་གསུང་གི་དབང་ཕྱུག་གི་དབང་འདི་ནི་རྣལ་འབྱོར་རྒྱུད་དུ་བཞེད་པ་མང་། དེ་ལྟ་བུའི་དབང་ཟབ་མོ་ཞུ་བའི་ཕྱིར་མཎྜལ་ཕུལ།། ༈ །།གསུང་རྡོ་རྗེ་འོད་དཔག་མེད་ཀྱི་དབང་བསྐུར་བའི་ལོ་རྒྱུས་བཞུགས་སོ། །འོ་ན་ད་ལམ་ཁྱེད་རང་རྣམས་ལ་ངག་གི་དབང་ཕྱུག་གསུང་རྡོ་རྗེ་འོད་དཔག་
མེད་ཀྱི་དབང་བསྐུར་བ་ཡིན་ཏེ། སངས་རྒྱས་འོད་དཔག་མེད་དེའི་མཚན་ཐོས་པས་སྐྱེ་བ་ཐམས་ཅད་དུ་ཚངས་པར་སྤྱོད་པར་འགྱུར་བ་དང་། སྐྱེ་བ་ཐམས་ཅད་དུ་རིགས་བཟང་པོའི་རིགས་སུ་སྐྱེ་བ་དང་། འཇིག་རྟེན་གྱི་ཁམས་རྡུལ་ཕྲ་རབ་ཀྱི་གྲངས་དང་མཉམ་པ་བཤིག་སྟེ་རྡུལ་ཕྲ་རབ་ཏུ་བྱ་བའི་གྲངས་དང་མཉམ་པའི། འཇིག་རྟེན་གྱི་ཁམས་ཐམས་ཅད་རིན་པོ་ཆེས་བཀང་སྟེ་སྦྱིན་པ་བཏང་བ་ལས་ནི། འོད་དཔག་མེད་པའི་མཚན་དང་དེའི་ཞིང་ཁམས་བདེ་བ་ཅན་གྱི་ཡོན་ཏན་ཐོས་ནས་དགའ་སྟེ་ཐལ་མོ་སྦྱར་ན་བསོད་ནམས་ཤིན་ཏུ་ཆེ་ བར ་གསུངས་སོ། །འོད་དཔག་མེད་པའི་མཚན་ཐོས་ནས་ཐ་ན་ལན་གཅིག་ཏུ་བསམ་པ་ཐག་པ་ནས་དད་པ་སྐྱེས་ན་དེ་རྫོགས་པའི་བྱང་ཆུབ་ལས་ཕྱིར་མི་ལྡོག་གོ །ཞེས་གསུངས་སོ། །དེས་ན་འདི་ཡི་དབང་ཐོབ་ན་ཕན་ཡོན་སྨོས་ཅི་དགོས། དེ་ལྟ་བུའི་སངས་རྒྱས་འོད་དཔག་མེད་པ་འདིའི་མཚན་གསུང་རྡོ་རྗེ་འཇམ་དབྱངས་དམར་པོ་ཞེས་ཀྱང་བྱ་སྟེ། འདི་ཆོས་དབྱིངས་གསུང་དབང་གི་རིགས་གཅིག་ཡིན་པས་རྣལ་འབྱོར་རྒྱུད་དུ་བཞེད་པ་དང་གཉིས་མེད་རྒྱུད་དུ་བཞེད་པའང་ཡོད་དེ་གང་ལྟར་ཡང་དབང་སྒྲུབ་ལུགས་དང་
བསྐུར་ལུགས་རྣལ་འབྱོར་རྒྱུད་ལྟར་ཡིན། དེ་ལྟར་སངས་རྒྱས་འོད་དཔག་མེད་ཀྱི་དབང་ཞུ་བའི་ཕྱིར་མཎྜལ་ཕུལ།། ༈ །།རྒྱལ་བ་བྱམས་པ་མགོན་པོའི་དབང་བཤད་བཞུགས་སོ། །འོ་ན་ད་ལམ་རྒྱལ་བ་བྱམས་པའི་དབང་བསྐུར་བ་ལ་ལོ་རྒྱུས་ནི། སྔོན་བསྐལ་པ་དཔག་ཏུ་མེད་པའི་གོང་རོལ་ནས་སངས་རྒྱས་རིན་ཆེན་གདུགས་ཞེས་བྱ་བའི་ཞབས་དྲུང་དུ། དགེ་སློང་བློ་གྲོས་བརྟན་པ་ཞེས་བྱ་བ་ཞིག་བྱུང་བ་དེས་སྲོག་ཆགས་བརྒྱ་རེ་བསླབས་པའི་གཞི་ལྔ་ལ་མ་བཀོད་ཀྱི་ བར ་དུ་ཟས་མི་གསོལ་ བར ་དམ་བཅས་ནས། དེ་ལྟ་བུའི་ཚུལ་གྱིས་ལོ་བརྒྱད་ཁྲི་བཞི་སྟོང་གི་ བར ་དུ་སེམས་ཅན་དཔག་ཏུ་མེད་པ་བསླབ་པའི་གཞི་ལྔ་ལ་བཀོད། དེ་བཞིན་དུ་བྱང་ཆུབ་ཀྱི་སེམས་བསྐྱེད་དུ་བཅུག །རང་རང་གི་བསྐལ་པ་ལྟར་ཐེག་པ་གསུམ་ལ་བཀོད། ཏིང་ངེ་འཛིན་ལ་བཀོད། བྱམས་པའི་ཏིང་ངེ་འཛིན་ལ་བཀོད། དགེ་སློང་དེ་བསོད་སྙོམས་ལ་རྒྱུ་བའི་ཚེ་ཡང་བྱམས་པའི་ཏིང་ངེ་འཛིན་བསྒོམས་པས། ས་བླའི་ལྷ་ནས་གནས་གཙང་མའི་རིས་ཀྱི་ལྷ་ཐམས་ཅད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི་བྱམས་པར་འགྱུར་ཏེ། འདི་གྲོང་ཁྱེར་དུ་གཤེགས་པའི་ཚེ་ཡང་བྱམས་
པའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་པའི་སྒྲ་གྲག །སངས་རྒྱས་རིན་ཆེན་གདུགས་ཀྱིས་ཁྱོད་ནི་སྐྱེ་བ་ཐམས་ཅད་དུ་བྱང་ཆུབ་སེམས་དཔའ་བྱམས་པ་ཞེས་བྱ་ བར ་འགྱུར་ཞིང་། སངས་རྒྱས་པའི་ཚེ་ཡང་མིང་དེ་ཉིད་དུ་འགྱུར་རོ་ཞེས་ལུང་བསྟན་ཏོ། །དེ་ནས་བྱང་ཆུབ་སེམས་དཔའ་དེ་ཤཱཀྱ་ཐུབ་པའི་དྲུང་དུ་དགེ་སློང་མ་ཕམ་པ་ཞེས་བྱ་ བར ་གྱུར་པའི་ཚེ། ཐུབ་པས་འདི་ནི་བྱང་ཆུབ་སེམས་དཔའ་བྱམས་པ་ཡིན་གསུངས་པའི་ཚེ་དགེ་སློང་གཞན་དག་གིས་འདི་ལ་ཡོན་ཏན་གྱི་རྣམ་པ་ཅི་ཡང་མ་མཐོང་ན་སངས་རྒྱས་ལྔ་པར་ཇི་ལྟར་འགྱུར་སྙམ་པས། དེ་བཅོམ་ལྡན་འདས་ཀྱིས་མཁྱེན་ནས་བྱམས་པ་ལུང་བསྟན་པའི་མདོ་གསུངས་པ། དགེ་སློང་འདི་ལོ་བཅུ་གཉིས་ནས་ཚེ་འཕོས་ཏེ། དགའ་ལྡན་ལྷའི་གནས་རིན་པོ་ཆེའི་གཞལ་ཡས་ཁང་ནས་སེང་ཁྲི་པད་ཟླའི་སྟེང་དུ་སྐྱིལ་མོ་ཀྲུང་གིས་བཞུགས་ཤིང་། འཛམ་བུ་ཆུ་བོའི་གསེར་གྱི་མདོག་སྐུ་ཚད་དཔག་ཚད་བཅུ་དྲུག་པ་མཚན་དང་དཔེ་བྱད་རྫོགས་ཤིང་ཐོར་ཚུགས་དང་ལྡན་པ། རིན་པོ་ཆེ་སྣ་ལྔའི་དབུ་རྒྱན་གྱི་ནང་ན་ཡང་། སྤྲུལ་པའི་སངས་རྒྱས་སྟོང་ཕྲག་ཁྲི་འཁོར་དང་བཅས་ཏེ་གནས། སྨིན་མཚམས་ཀྱི་
འོད་ཟེར་དཀར་པོ་ལས་མཚན་དཔེའི་བརྒྱན་པ་ལྷའི་བུ་བརྒྱད་ཁྲི་བཞི་སྟོང་པདྨའི་གདན་ལ་བཞུགས་ནས་ཉིན་མཚན་རྟག་ཏུ་ཕྱིར་མི་ལྡོག་པའི་ཆོས་སྟོན་ནས། ལྷའི་བུ་རྣམས་ཕྱིར་མི་ལྡོག་པའི་ས་ལ་བཀོད་དོ། །དེར་དགའ་ལྡན་གྱི་ལྷའི་བཀོད་པ་དང་། ལྷ་རྣམས་ཀྱིས་མཆོད་པ་བྱེད་ཚུལ་རྒྱ་ཆེར་གསུངས་སོ། །དེ་ལ་ཐུབ་པ་མྱ་ངན་ལས་འདས་པ་ནས་འཛམ་བུ་གླིང་པའི་ལོ་བྱེ་བ་ལྔ་བཅུ་རྩ་དྲུག་ལོན་ནས། འཛམ་བུའི་གླིང་འདི་བདེ་སྐྱིད་ཕུན་སུམ་ཚོགས་པ་རྒྱ་ཡང་ད་ལྟ་ལས་ཆེ་བ་ཞིག་འབྱུང་སྟེ། དེའི་ཚེ་བྱམས་པ་འཛམ་བུའི་གླིང་དུ་བྲམ་ཟེའི་རིགས་སུ་སྐྱེ་བ་བཞེས་ནས་སངས་རྒྱས་ཏེ་རྒྱལ་བ་བྱམས་པ་ཞེས་བྱ་ བར ་འགྱུར། དེའི་ཚེ་ད་ལྟ་དཀོན་མཆོག་གསུམ་ལ་འབྲེལ་པ་བཞག་པ་རྣམས་བྱམས་པའི་འདུས་པ་གསུམ་ལས་རིམ་པར་གྲོལ། ད་ལྟ་བྱམས་པའི་གཟུངས་དང་སྔགས་བཟླས་པ་རྣམས་ནི། དེ་དུས་བྱམས་པས་ཚོལ་ཞིང་བྱང་ཆུབ་ཏུ་ལུང་བསྟན་ཏོ། །གཞན་ཡང་བྱམས་པའི་མཚན་ཐོས་ནས་གུས་པས་ཕྱག་འཚལ་ན་སེ་གོལ་ཏོག་ཙམ་དགའ་ལྡན་དུ་སྐྱེ། བྱམས་པའི་མཚན་ཐོས་ཙམ་ཚེའི་དུས་བྱས་པའི་འོག་ཏུ་མུན་པའི་ཁམས་སུ་མི་ལྟུང་། མཐའ་འཁོབ་ཀྱིས་ཡུལ་
དང་ལོག་པར་ལྟ་བ་དང་མི་དགེ་བ་ཐམས་ཅད་སྤྱོད་པར་མི་སྐྱེ། སྐྱེ་བ་ཐམས་ཅད་དུ་དྲང་པོར་ལྟ། འཁོར་ཕུན་སུམ་ཚོགས་པ་དང་དཀོན་མཆོག་གསུམ་མི་སྨོད་པར་སྐྱེའོ། །གང་ལ་ལ་ཞིག་གིས་སྐད་ཅིག་ཙམ་བྱམས་པའི་མཚན་ནས་བརྗོད་པའི་མི་དག་ནི་བསྐལ་པ་སྟོང་གཉིས་བརྒྱའི་སྐྱེ་ཤི་ལས་གྲོལ་ཞིང་སྡིག་པ་བྱང་ བར ་འགྱུར་རོ། །བྱམས་པའི་མཚན་ཐོས་ནས་ཐལ་མོ་སྦྱར་བའི་མི་དག་ནི་བསྐལ་པ་ལྔ་བཅུའི་སྐྱེ་འཆི་ལས་གྲོལ་ནས་ཐར་ཞིང་སྡིག་པ་བྱང་ བར ་འགྱུར་རོ། །གང་ལ་ལས་བྱམས་པ་ལ་གུས་པས་ཕྱག་འཚལ་བས་བསྐལ་པ་བྱེ་བ་བརྒྱ་ཡི་སྐྱེ་ཤི་ལས་གྲོལ་ནས་ཐར་ཞིང་སྡིག་པ་བྱང་ བར ་འགྱུར་རོ། །ཞེས་གསུངས། བྱམས་པ་འདི་ཉེ་བའི་སྲས་བརྒྱད་ཀྱི་གྲ་ཡིན་པར་རྒྱུད་སྡེ་མཐོ་དམན་ཀུན་ནས་གསུངས། བྱམས་པའི་གཟུངས་ནི་བྱ་རྒྱུད་ཡིན་ལ་སྐུ་མདོག་ཕྱག་མཚན་འདི་སྒྱུ་འཕྲུལ་དྲ་བ་ནས་གསུངས་པས་རྣལ་འབྱོར་རྒྱུད་དོ། །དེ་ལྟ་བུའི་དབང་ཞུ་བའི་ཕྱིར་མཎྜལ་ཕུལ།། ༈ །།སྒྲོན་དཀར་ཕྱག་དྲུག་ལོ་རྒྱུས་བཞུགས་སོ། །འོ་ན་ད་ལམ་ཁྱེད་རྣམས་ལ་རྗེ་བཙུན་མ་འཕགས་མའི་དབང་བསྐུར་བ་ཡིན་ཏེ་སྒྲོལ་མ་དཀར་མོའི་ཕན་ཡོན་ནི།
སྒྲོལ་མ་ལས་སྣ་ཚོགས་འབྱུང་བའི་རྒྱུད་ལས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེའི་ཕན་ཡོན་ནི་མཚམས་མེད་པ་ལྔ་དང་དེ་དང་ཉེ་བ་ལྔ་དང་སྡང་བ་དང་རྨི་ལམ་ངན་པ་ཐམས་ཅད་ཞི་ བར ་འགྱུར་རོ། །འཇམ་དཔལ་དེའི་ཕན་ཡོན་ནི་ངན་སོང་གསུམ་གྱི་སྡུག་བསྔལ་ཀྱང་ཞི་ བར ་འགྱུར་རོ། །མི་ཁོམ་པ་བརྒྱད་དུ་ནམ་ཡང་སྐྱེ་ བར ་མི་འགྱུར་རོ། །འཇམ་དཔལ་དེའི་ཕན་ཡོན་ནི། ཚེ་རབས་དྲན་པ་དང་། དབང་པོ་གསལ་དང་། ཡིད་གཞུངས་པར་འགྱུར་རོ། །བཟོ་ཡི་གནས་ཐམས་ཅད་ལ་མཁས་པར་འགྱུར་རོ། །སྟོབས་དང་མདངས་དང་གཟི་བརྗིད་ཕུན་སུམ་ཚོགས་པར་འགྱུར་རོ། །འཇིག་རྟེན་སྐྱོང་བ་ཐམས་ཅད་ཀྱིས་སྲུང་བ་དང་། སྐྱོབ་པ་དང་། སྦེད་པ་དང་། ཕན་པར་བྱེད་དོ། །གང་དུ་ཕྱིན་པ་ཐམས་ཅད་བཀྲ་ཤིས་པར་འགྱུར་རོ། །ཞེས་གསུངས་སོ། །ད་ལམ་སྒྲུབ་ཐབས་རྒྱ་མཚོ་དང་བརྒྱ་རྩ་སོགས་ནས་འབྱུང་བའི་སྒྲོལ་མ་དཀར་མོ་ཕྱག་དྲུག་མའི་དབང་བསྐུར་བ་ཡིན་ཏེ། སྒྲོལ་དཀར་ཕལ་ཆེར་བྱ་རྒྱུད་དུ་འདོད་ཀྱང་། འདི་སྒྲོལ་མ་ཉེར་གཅིག་ནང་གི་དཀར་མོ་ཟླ་མདངས་སྒྲོལ་མ་དང་དོན་གཅིག་པས་རྣལ་འབྱོར་རྒྱུད་དུ་
བཞེད་པ་དང་མ་རྒྱུད་དུ་བཞེད་པ་ཡང་མང་ངོ་། །དེ་ལྟ་བུའི་དབང་ཞུ་བའི་ཕྱིར་མཎྜལ་ཕུལ།། ༈ །།དུས་འཁོར་ལོ་རྒྱུས་བཞུགས་སོ། །འོ་ན་ད་ལམ་ཁྱེད་རྣམས་ལ་རྒྱུད་སྡེ་བཞིའི་རྩེ་མོ་རྒྱལ་མཚན་གྱི་ཏོག་ལྟར་དུ་མཐོ་བ། གཉིས་མེད་དུས་ཀྱི་འཁོར་ལོའི་རྒྱུད་ཀྱི་དབང་བསྐུར་བ་ཡིན་ཏེ། བཅོམ་ལྡན་འདས་མྱ་ངན་ལས་འདས་ཁར་དཔལ་ལྡན་འབྲས་སྤུང་གི་མཆོད་རྟེན་དུ། ཤམྦྷ་ལའི་རྒྱལ་པོ་ཟླ་བ་བཟང་པོ་འཁོར་དང་བཅས་པ་ལ་གསུངས། དེ་ནས་ཤམྦྷ་ལའི་ཡུལ་དུ་དར་བ་ལ། གྲུབ་ཆེན་ཙི་ལུ་པཎྜི་ཏ་དང་མཁའ་འགྲོ་བཞིས་ཁྲིད་ནས་ཤམྦྷ་ལར་རྫུ་འཕྲུལ་གྱིས་བྱོན་ཏེ། དབང་ལུང་གདམས་ངག་ཞུས། རྒྱུད་ཉུང་ངུ་རྒྱ་གར་དུ་སྤྱན་དྲངས། གྲུབ་ཆེན་རྣམས་ཀྱིས་སྒྲུབ་ཐབས་མཛད་པའི་ནང་ནས། སྒྲོལ་མ་སྣ་ཚོགས་ཡུམ་གྱི་སྒྲུབ་ཐབས་དང་། མཚན་ཡང་དག་པར་བརྗོད་པའི་འཇམ་དབྱངས་དཀར་པོ་ཕྱག་གཉིས་པ། ཐུགས་རྗེ་ཆེན་པོ་སྒྱུ་འཕྲུལ་དྲྭ་བ་དེ་རྣམས་དུས་འཁོར་གྱི་རྒྱུད་དང་འབྲེལ་པ་ཡིན། མཁས་པ་འགའ་ཞིག་གིས་ཆོས་དབྱིངས་གསུང་དབང་ཡང་དུས་འཁོར་གྱི་རྒྱུད་དང་འབྲེལ་ བར ་ཡང་བཞེད་དེ། འདི་དག་གི་དབང་ཐོབ་
ནས་དེ་དག་གི་བསྐྱེད་རྫོགས་རྩེ་གཅིག་ཏུ་ཉམས་སུ་བླངས་ན་རབ་ཟླ་བ་དྲུག །འབྲིང་ལོ་བཅུ་གཉིས། ཐ་ན་ཡང་ཚེ་གཅིག་ལ་སངས་རྒྱས། ཉམས་སུ་མ་བླངས་ན་ཡང་སྐྱེ་བ་བདུན་ལས་མི་འགྱང་ བར ་སངས་རྒྱས་པར་བཤད། དེ་ལྟ་བུའི་དབང་ཞུ་བའི་ཕྱིར་མཎྜལ་ཕུལ།། ༈ །།རྗེ་བཙུན་འཕགས་མ་སྒྲོལ་མ་སྤྱི་ཡི་དབང་བཤད་བཞུགས་སོ། །འོ་ན་ད་ལམ་ཁྱེད་རྣམས་ལ་རྗེ་བཙུན་མ་འཕགས་མ་སྒྲོལ་མའི་དབང་བསྐུར་བ་ཡིན་ཏེ། དེའི་ལོ་རྒྱུས་ཟུར་ཙམ་ཞུ་ན། སྒྲོལ་མ་འདིའི་ངོ་བོ་ནི་སངས་རྒྱས་སྣང་བ་མཐའ་ཡས་ཀྱི་སྤྱན་གཡོན་པ་ནས་སྤྲུལ་པ་ཡིན་ཏེ། སངས་རྒྱས་སྣང་བ་མཐའ་ཡས་ཀྱི་ཐུགས་ཀྱི་སྤྲུལ་པ་གསལ་བ་ཐབས་ཀྱི་ཆ་ལས་སྤྱན་རས་གཟིགས་དང་སྟོང་པ་ཤེས་རབ་ཀྱི་ཆ་ལས་སྒྲོལ་མར་སྤྲུལ་པ་ཡིན་ཏེ། རྒྱ་གར་གྱི་པཎྜི་ཏ་འབུམ་ཕྲག་གིས་མགྲིན་གཅིག་ཏུ་བསྟོད་པ་ལས། སངས་རྒྱས་སྣང་བ་མཐའ་ཡས་ཀྱིས། །འགྲོ་བའི་དོན་དུ་སྤྲུལ་པའི་སྐུ། །སྒྲོལ་མ་ཞེས་བྱའི་མཚན་གྲགས་མ། །ཐུགས་རྗེ་ཅན་ལ་ཕྱག་འཚལ་ལོ། །ཞེས་གསུངས་སོ། །སྤྲུལ་པ་ཉེར་གཅིག །ཇི་ལྟར་འཁྲུངས་ཚུལ་ནི། འཕགས་པ་སྤྱན་རིས་གཟིགས་ཀྱིས་སེམས་ཅན་
གཅིག་ཀྱང་མ་ལུས་པར་སྒྲོལ་བའི་དམ་བཅའ་ཆེན་པོ་མཛད་ནས། བསྐལ་པ་དཔག་ཏུ་མེད་པར་སེམས་ཅན་ཐམས་ཅད་ཀྱི་དོན་མཛད་ནས་ད་ཅི་འོང་ བར ་དགོངས་ནས་བལྟས་པས་སེམས་ཅན་ལ་མང་བའམ་ཉུང་ བར ་མ་མཐོང་ནས་ཐུགས་མུག་སྟེ་སྤྱན་ཆབ་བསིལ་བས་སྤྱན་ཆབ་གཉིས་ལས་མེ་ཏོག་པདྨ་གཉིས་བྱུང་སྟེ། དེ་ཁ་བྱེ་བའི་ནང་ནས་སྒྲོལ་མ་དང་། ཁྲོ་གཉེར་མ་གཉིས་བྱུང་སྟེ་གསུང་བསྒྲུགས་པའི་ཐོག་མར། སྲིད་ན་སུ་ཞིག་འཇིགས་པས་འཇིགས་གྱུར་པ། །དེ་ཀུན་ངས་སྐྱོབ་མ་འཇིགས་མ་འཇིགས་ཤིག །ཅེས་དམ་བཅས་ནས་འཕགས་པ་སྤྱན་རས་གཟིགས་ཁྱེད་ཐུགས་མུག་པར་མ་མཛད་དང་ངེད་གཉིས་ཀྱིས་འགྲོ་དོན་གྱི་གྲོགས་བྱེད་དེ་སེམས་ཅན་དཔག་ཏུ་མེད་པའི་དོན་བྱའོ། །ཞེས་གསུངས་པས། དེའི་ཚེ་སངས་རྒྱས་རྣམ་པར་སྣང་མཛད་ཀྱི་ཕྱག་འཚལ་ཉི་ཤུ་རྩ་གཅིག་གིས་བསྟོད་པ་མཛད་ཅིང་། སྒྲོལ་མ་མངོན་པར་འབྱུང་བའི་རྒྱུད་ལས་གསུངས་སོ། །དེ་ནས་སྒྲོལ་མ་དཀར་སྔོན་གཉིས་དང་སྒྲོལ་མ་ཉི་ཤུ་རྩ་གཅིག་དང་སྒྲོལ་མ་བརྒྱ་རྩ་དང་། མདོར་ན་སྤྱན་རས་གཟིགས་ཀྱིས་སྤྲུལ་པ་ཇི་ཙམ་མཛད་པའི་གྲངས་དང་མཉམ་པའི་སྒྲོལ་མའི་
སྤྲུལ་པ་ཡང་དེ་ཉིད་གཅིག་མཛད་ནས་ཕྲིན་ལས་ཀྱི་གྲོགས་མཛད། སེམས་ཅན་ཇི་སྙེད་པའི་གྲངས་དང་མཉམ་པའི་གང་ལ་གང་འདུལ་དུ་སྤྲུལ་ནས་སེམས་ཅན་གྱི་དོན་མཛད་པ་དང་། སློབ་དཔོན་རྟ་དབྱངས་ཀྱིས་སྒྲོལ་མ་ལ་བསྟོད་པ་ལས། འགྲོ་དོན་སྤྲུལ་མཛད་སྒྲོལ་མ་ཁྱོད་ཀྱི་སྐུ། །ཚངས་པ་ཁྱབ་འཇུག་དབང་ཕྱུག་ལ་སོགས་དང་། །དྲག་པོ་ཞི་བ་ཨུ་མ་ལ་སོགས་དང་། །བསྐུལ་བྱེད་ལུ་གུ་རྒྱུད་དང་ཁྲོ་གཉེར་ཅན། །མཱ་མ་ཀཱི་དང་སྒྲོལ་མ་གོས་དཀར་མོ། །འགྲོ་བ་གང་ལ་གང་འདུལ་དེར་སྟོན་པ། །ཞེས་གསུངས་པས་སྒྲོལ་མའི་རིགས་ཐམས་ཅད་ཐུགས་རྒྱུད་གཅིག་པ་ཡིན་ཏེ། འཇམ་དཔལ་རྩ་རྒྱུད་ལས། རིགས་པའི་རྒྱལ་པོ་རྫུ་འཕྲུལ་ཆེ། །དེ་ནི་སྒྲོལ་མ་ཞེས་ཀྱང་བསྟན། །བུད་མེད་གཟུགས་འཆང་ལྷ་མོ་ནི། །འགྲོ་བ་ཀུན་ཏུ་རྣམ་པར་རྒྱུ། །སྙིང་རྗེའི་བརླན་པའི་སེམས་ཀྱིས་ནི། །སེམས་ཅན་རྣམས་ལ་ཕན་དོན་དུ། །མི་མཇེད་འཇིག་རྟེན་ཁམས་གནས་ནས། །བུད་མེད་མིང་གིས་འཇུག་པར་བྱེད། །ས་བཅུ་ལ་ནི་རབ་གནས་ཐོབ། །བྱང་ཆུབ་སེམས་མ་རྫུ་འཕྲུལ་ཆེ། །སེམས་ཅན་རྣམས་ནི་འདུལ་བྱེད་པ། །ལྷ་མོ་སྒྲོལ་མ་ཞེས་སུ་བསྟན། །
འདི་ནི་འབད་མེད་འགྲུབ་པ་སྟེ། །སྲུང་དང་སྐྱོབ་དང་སྦེད་པར་བྱེད། །ལོངས་སྤྱོད་དབང་ཕྱུག་འཕེལ་བྱེད་པ། །འདིས་ནི་ལྷ་མོ་བསྒྲུབ་པར་བྱ། །བྱང་ཆུབ་ཚོགས་ཀྱི་ཆེད་དུ་ནི། །སྐྱེས་པ་ཉིད་ནི་བརྩམ་པར་བྱ། །སྙིང་རྗེས་བརླན་པའི་ལུས་ཅན་ལ། །དེ་ཚེ་ལྷ་མོ་རྗེས་འབྲང་བ། །སྔགས་ཀྱི་གཟུགས་ཀྱིས་སེམས་ཅན་ལ། །བྱང་ཆུབ་ཚོགས་ཀྱིས་བྱ་ཕྱིར་རོ། །རེ་བ་ཐམས་ཅད་དགའ་རྒྱས་ཕྱིར། །ཤར་གྱི་ཕྱོགས་སུ་གནས་པ་ཡིན། །བདག་ཉིད་རྣམ་པ་སྟོང་དང་ནི། །རྣམ་པ་མང་པོར་བྱས་ནས་ཀྱང་། །རྒྱ་མཚོ་བཞི་ཡི་མཐར་ཐུག་པ། །ས་རྣམས་ཀུན་ཏུ་རྣམ་པར་རྒྱུ། །ཞེས་དང་། དེ་ལྟར་སྤྲུལ་པ་མང་ཡང་སྐུ་དངོས་ནི་པོ་ཊ་ལ་ན་བཞུགས་ཏེ། རྒྱ་གར་ལྷོ་ཕྱོགས་ཀྱི་གྲོང་ཁྱེར་ཟད་པའི་ས་ལྔ་ན་སྔར་ཆོས་རྒྱལ་རྣམས་ཀྱིས་མི་རབས་དུ་མར་བཞེངས་པའི་གཙུག་ལག་ཁང་དཔག་ཏུ་མེད་པ་ཡོད། དེའི་ཕ་རོལ་ན་སེང་ལྡེང་གི་ནགས་ཚལ་འཐུགས་པོར་ཚེར་མ་མཐོ་རེ་ཙམ་སྐྱེས་པའི་གསེབ་ན་གླང་ཆེན་དང་སྤྲེའུ་མགོ་གསུམ་པ་དང་། སྟག་དང་སེང་གེ་དང་དུག་སྤྲུལ་རྣམས་གནས་པས་མི་རྒྱུ་ བར ་མི་ནུས་པ་ཡོད། དེ་ཡི་ཕ་རོལ་ན་རི་པོ་ཊ་ལ་
ཙནྡན་གྱི་ནགས་ཚལ་དང་མེ་ཏོག་སྣ་ཚོགས་ཀྱིས་བརྒྱན་པ་འཇའི་གུར་ཕུབ་ཅིང་མེ་ཏོག་གི་ཆར་འབེབས་པ། བྱ་མ་སར་ཞེས་པས་སྒྲོལ་མའི་སྔགས་འདོན་ཤེས་པ་སོགས་བྱ་རིགས་མང་པོས་སྐད་སྙན་པར་སྒྲོག་པ་ཡོད། རེ་དེའི་རྩེ་ན་འཕགས་པ་སྤྱན་རས་གཟིགས་བཞུགས་ཤིང་། རི་དེའི་རྩ་བ་ན་རིན་པོ་ཆེའི་གཞལ་ཡས་ཁང་ན་རྗེ་བཙུན་སྒྲོལ་མ་ལ་གྲུབ་པའི་ལྷ་མོ་དཔག་ཏུ་མེད་པས་བསྐོར་ཏེ་བཞུགས་ཏེ་ཆོས་བསྟན་ཏོ། །སྒྲོལ་མ་འདིའི་དབང་དང་བྱིན་རླབས་ཐོབ་ན་ནད་ཐམས་ཅད་ཀྱང་ཞི་སྟེ། སློབ་དཔོན་ཙནྡྲ་གོ་མས། ཕྱག་འཚལ་བྱིན་རླབས་སྨན་གྱུར་ནས། །འབྱུང་བ་འཁྲུག་དང་གདོན་གྱིས་བསྐྱེད་པ་ཡིས། །སྲོག་འཕྲོག་ནད་ཀྱི་བྱེ་བྲག་མ་ལུས་པ། །ཁྱོད་ལ་གསོལ་བཏབ་འདུལ་བ་སེལ་མཛད་མ། །ཞེས་གསུངས་སོ། །དཔལ་སཾ་བྷུ་ཊི་ལས། སྒྲོལ་མ་འཁོར་བ་ལས་སྒྲོལ་མ། །དེ་ལྟར་སྒོམ་པ་ཙམ་གྱིས་ནི། །བསྒྲུབ་པོ་སངས་རྒྱས་ཐོབ་པར་འགྱུར། །དངོས་གྲུབ་གཞན་ལྟ་སྨོས་ཅི་དགོས། །ཞེས་གསུངས་པས་ཐུགས་རྗེ་མྱུར་ཞིང་བྱིན་རླབས་ཆེ་བ། རྗེ་བཙུན་སྒྲོལ་མའི་རིགས་རྣམས་ཀྱི་དབང་རིམ་པར་ཞུ་བའི་ཕྱིར་མཎྜལ་ཕུལ།།
སྒྲོལ་མ་འཇིགས་པ་བརྒྱད་སྐྱོབ་ཀྱི་དབང་བཤད་བཞུགས་སོ། །འོ་ན་ད་ལམ་ཁྱེད་རང་རྣམས་ལ་སྒྲོལ་མ་འཇིགས་པ་བརྒྱད་སྐྱོབ་ཀྱི་དབང་བསྐུར་བ་ཡིན་ཏེ། འཇམ་དཔལ་རྩ་རྒྱུད་ལས། བྱང་ཆུབ་སེམས་མ་རྫུ་འཕྲུལ་ཆེ། །སེམས་ཅན་རྣམས་ནི་འདུལ་བྱེད་པ། །ལྷ་མོ་སྒྲོལ་མ་ཞེས་སུ་བསྟན། །འདི་ནི་འབད་མེད་འགྲུབ་པ་སྟེ། །སྲུང་དང་སྐྱོབ་དང་སྦེད་པར་བྱེད། །ལོངས་སྤྱོད་དབང་ཕྱུག་འཕེལ་བྱེད་པ། །འདིས་ནི་ལྷ་མོ་སྒྲུབ་པར་བྱེད། །བྱང་ཆུབ་མཆོག་གི་ཆེད་དུ་ནི། །།སྐྱེས་པ་ཉིད་ནས་བརྩམ་པར་བྱ། །སྙིང་རྗེས་བརླན་པའི་ལུས་ཅན་ལ། །དེ་ཚེ་ལྷ་མོ་རྗེས་སུ་འབྲང་། །སྔགས་ཀྱི་གཟུགས་ཀྱིས་སེམས་ཅན་ལ། །བྱང་ཆུབ་མཆོག་ནི་བྱ་ཕྱིར་རོ། །ཞེས་དང་། ཁ་ཆེའི་སློབ་དཔོན་ཐམས་ཅད་མཁྱེན་པའི་བཤེས་གཉེན་ཞེས་བྱ་བ་མི་བདུན་བརྒྱས་བསྐོར་ནས་ཙནྡན་གྱི་མེར་སྲེག་པའི་ཚེ། ཉིད་ཀྱི་ཡི་དམ་གྱི་ལྷ་རྗེ་བཙུན་སྒྲོལ་མ་ལ་སྨྲེ་སྔགས་ཀྱིས་ཚིགས་སུ་བཅད་དེ་བསྟོད་པས། སྐད་ཅིག་ཡུད་ཙམ་ཉིད་ལ་འཕགས་མའི་ཕྱག་བརྐྱང་པ་ལ་ཆར་གྱི་རྒྱུན་གཉའ་ཤིང་ཙམ་བབ་སྟེ། མཚོ་ནང་གི་པདྨ་ལྟར་གྱུར་ཏོ། །ཡང་སྔོན་མི་ཞིག་གིས་མཚན་མོ་དོན་
གཉེར་འགྲོ་བ་ལ་ལམ་དུ་དགྲ་དང་འཕྲད་དེ་ཤིན་ཏུ་སྐྲག་ཅིང་འཇིགས་ནས་བསྔངས་ཏེ། སྒྲོལ་མ་དྲན་ཙམ་ནས་དགྲ་ཐམས་ཅད་བྲན་བཞིན་དབང་དུ་འདུས་སོ། །མི་གཅིག་ནགས་གསེབ་ཏུ་སོང་བས་གླང་ཆེན་ཁྲོས་ནས་མཆེ་བས་དམ་དུ་བཟུང་བས་ངུ་འབོད་ཀྱིས་སྒྲོལ་མ་ལ་བོས་པས། དེ་མ་ཐག་གླང་ཆེན་གྱི་འཇིགས་པ་ཞི་བ་དང་། མི་ཞིག་ཁྱིམ་དུ་ཉལ་ནས་གཉིད་པ་ལ་དགྲ་བོས་ཁྱིམ་ལ་མེ་བརྒྱབས་པས། སྐག་ཅིང་བསྔངས་ནས་སྒྲོལ་མ་ལ་བོས་པས། དེ་མ་ཐག་ཆར་ཆེན་པོས་མེ་ཞི། སྔོན་མི་ཞིག་པདྨ་འཚོང་དུ་ཕྱིན་ནས་ནགས་གསེབ་ཏུ་སོང་ནས་ཤིང་གི་ཡལ་ག་ལ་བཟུང་བས་ཤིང་རྩ་ནས་སྦྲུལ་ནག་ཁྲོས་པས་བཟུང་བ། སྒྲོལ་མ་དྲན་ཙམ་ནས་སྦྲུལ་གྱི་གདུག་པ་ཞི། སྔོན་ཚོང་དཔོན་ནོར་ལྡན་དོན་གཉེར་ལམ་དུ་འགྲོ་བ་ན་མི་རྒོད་དང་འཕྲད་ནས་སྐྲག་སྟེ། སྒྲོལ་མ་དྲན་པས་དགྲ་རྣམས་བྲན་བཞིན་དུ་དབང་དུ་འདུས་སོ། །མི་ཞིག་རྒྱལ་པོའི་མཛོད་དུ་རྐུན་མ་ལ་སོང་ནས་བཟུང་བས་བཙོན་ཁང་ནང་དུ་ལྕགས་སུ་བཅུག་པས། སྒྲོལ་མ་དྲན་ཙམ་གྱིས་བཅིངས་པའི་སྡུག་བསྔལ་དང་བྲལ་ལོ། །དགེ་བཤེས་ཙནྡྲ་གོ་མ་རྒྱ་མཚོར་ཞུགས་པས་གྲུ་ཞིག་པས། སྒྲོལ་མ་
ལ་ཐལ་མོ་སྦྱར་ནས་བསྟོད་པས། ཞལ་བསྟན་ནས་ཆུ་ནང་དུ་གླིང་ཆགས། རྒྱལ་པོ་གཅིག་ནུབ་མོ་འཆག་ཁང་དུ་བྱོན་པ་བགེགས་གདུག་པས་བཟུང་ནས་སྐྲག་ཅིང་བསྔངས་བས་སྒྲོལ་མ་དྲན་པས་འབྱུང་པོའི་འཇིགས་པ་དང་བྲལ་ལོ། །དེ་ལྟར་སྤྱིར་སྒྲོལ་མས་འཇིགས་པ་ཐམས་ཅད་སྐྱོབ་པར་བཤད་ལ། ཁྱད་པར་སྒྲོལ་མ་འཇིགས་པ་བརྒྱད་སྐྱོབ་ཀྱི་རྒྱུད་གཅིག་ཀྱང་འབྱུང་། དེའི་སྒྲུབ་ཐབས་བརྒྱད་ཡོད་པའི་ནང་ནས། བཞིའི་ལུགས་བྱེད་ཅིང་གལ་ཆེ་བ་བཞིའི་དབང་རིམ་པར་ཞུ་བའི་ཕྱིར་མཎྜལ་ཕུལ།། ༈ །ལྷ་མོ་བསྐུལ་བྱེད་མའི་དབང་བཤད་བཞུགས་སོ། །འོ་ན་ད་ལམ་ཁྱེད་རྣམས་ལ་ལྷ་མོ་བསྐུལ་བྱེད་མའི་དབང་བསྐུར་བ་ཡིན་ཏེ། འདི་ནི་རྣམ་པར་སྣང་མཛད་ཀྱི་ཡུམ་ལྷ་མོ་སངས་རྒྱས་སྤྱན་མ་ཡིན་པས། སངས་རྒྱས་བྱང་སེམས་མཐུ་སྟོབས་ཅན་རྣམས་ཀྱི་སྤྲུལ་པ་ཡིན་ཏེ། སེམས་ཅན་མཐའ་ཡས་པའི་དོན་མཛད་ཅིང་སངས་རྒྱས་ཀྱི་བསྟན་པ་སྲུང་ བར ་གསུངས་ཏེ་སངས་རྒྱས་བྱང་སེམས་ཐམས་ཅད་ཀྱི་ཐུགས་རྗེའི་སེམས་ཅན་གྱི་དོན་ལ་བསྐུལ་བ་དང་། སེམས་ཅན་རྣམས་དམ་པའི་ཆོས་ལ་བསྐུལ་བ་དང་། ཉན་ཐོས་དང་རང་སངས་རྒྱས་རྣམས་བྱང་
ཆུབ་ཀྱི་ལམ་ལ་བསྐུལ་བས་ན་བསྐུལ་བྱེད་མ་ཞེས་བྱ་སྟེ། འདི་ནི་དུས་གསུམ་སངས་རྒྱས་ཐམས་ཅད་ཀྱིས་གསུངས་སོ། །ཁྱད་པར་དུ་བཅོམ་ལྡན་འདས་ཤཱཀྱ་ཐུབ་པ་ལ་གཞན་འཕྲུལ་དབང་བྱེད་ཀྱི་ལྷའི་གནས་ན་བཞུགས་པའི་ཚེ། ཕྱག་ན་རྡོ་རྗེས་སེམས་ཅན་དུག་གསུམ་གྱི་ནད་ཀྱིས་ཉེན་པ་ལ་བསྐྱབ་པའི་ཐབས་ཞུས་པས། བཅོམ་ལྡན་འདས་ཀྱིས་ལྷ་མོ་བསྐུལ་བྱེད་མའི་རིག་སྔགས་འདི་གསུངས་མ་ཐག་ཏུ། སངས་རྒྱས་ཀྱི་ཞིང་ཐམས་ཅད་རབ་ཏུ་གཡོས། བདུད་ཐམས་ཅད་བརྒྱལ་ཞིང་ཚིག་ནས་ཆོ་ངེས་འདེབས། བྱང་ཆུབ་སེམས་དཔའ་རྣམས་ཀྱང་ཏིང་ངེ་འཛིན་ལས་གཡོས། ས་འོག་གིས་ལྷ་མ་ཡིན་དང་ཀླུའི་བུ་མོ་དང་གསང་བ་པོ་རྣམས་ཀྱང་འཁྲུགས་ནས། ཐམས་ཅད་ཀྱིས་རྣམ་པར་སྣང་མཛད་རྗེས་སུ་དྲན་པར་གྱུར་ཏོ། །དེར་བཅོམ་ལྡན་འདས་ཀྱིས་ལྷ་མོ་བསྐུལ་བྱེད་མའི་དངོས་གྲུབ་གསང་བའི་རྒྱུད་ལེའུ་གསུམ་པ་དང་། བསྐུལ་བྱེད་མའི་རྟོགས་པ་གསུངས་ཤིང་། གཞན་ཡང་ཟ་མ་ཏོག་གི་མདོ་དང་རྒྱུད་སྡེ་མང་པོ་ནས་ཀྱང་ལྷ་མོ་འདི་གསུངས་སོ། །དེ་ཡང་འདིའི་ཕན་ཡོན་རྟོགས་པ་ལས། རིམས་དང་གཟེར་ཐབས་སོ་དང་མིག །སྐེད་པ་ན་བའི་ད་
རྒན་དང་། །ལུས་ཅན་རྣམས་ཀྱི་ནད་རྣམས་ནི། །ལུས་ལས་འབྱུང་བ་སྣ་ཚོགས་ཀྱང་། །གསང་སྔགས་མཐུ་ཆེན་དྲན་པ་ཡིས། །དེ་དག་ཐམས་ཅད་བྱང་ བར ་འགྱུར། །གང་དག་འདི་ལ་ཆེར་དད་པ། །དེ་ནི་ངན་འགྲོ་རྩེད་ནས་འབྱིན། །སྦོས་བྱེད་སྐྱ་སྦབ་ནད་ལ་སོགས། །རྟག་པར་རབ་ཏུ་འཇིགས་པར་བྱེད། །གཟེར་ཐེབས་ནད་ནི་མི་བཟོད་དང་། །རྐང་པ་འབམ་པར་གྱུར་པ་དང་། །སྙིང་ནད་དང་ནི་མཁྲིས་པའི་ནད། །དེ་དག་ཐམས་ཅད་འབྱུང་མི་འགྱུར། །མདོར་ན་ལྷ་རྣམས་ཐམས་ཅད་ནི། །འདི་བཟླས་པས་ནི་དབང་དུ་འགྱུར། །ཀུན་གྱིས་ཅི་བགྱི་ཟེར་ཞིང་སྤྱོད། །ཅེས་དང་། ནད་ཐམས་ཅད་ཞི་བའི་མཆོག་ཏུ་གསུངས་ཤིང་། སྔགས་འདི་ཡིད་ལ་བཞག་ནས་སྤྱད་ན། བགེགས་དང་དགྲ་དང་སྡང་བ་དང་། གླན་ཀ་ཚོལ་བ་དང་རྐུན་མ་སོགས་འཇིགས་པ་ཀུན་ལས་གྲོལ། འདིས་མ་ཐོབ་པ་ཐོབ་བོ། །མི་ཆོམ་པ་ཆོམ། མ་རྒྱལ་བ་ལས་རྒྱལ། །སངས་རྒྱས་ཀྱི་གོ་འཕང་ཡང་མྱུར་དུ་ཐོབ། འདི་དྲན་པ་ཙམ་གྱིས་སྲིན་པོ་དང་འབྱུང་པོ་དང་ཤ་ཟའི་གདོན་རྣམས་མི་འབྱུང་ངོ་། །གཟའ་དང་ལྷ་ཀླུ་གནོད་སྦྱིན་གྲུལ་བུམ་ལུས་སྲུལ་
པོ། སྨྱོ་བྱེད་བརྗེད་བྱེད་དང་། གདོན་དྲག་པོ་ཐམས་ཅད་འདི་ཡིས་མིང་ཐོས་པ་ཙམ་གྱིས་ཕྱོགས་བཅུར་བྲོས། ལྷ་མོ་འདིའི་གཟི་བརྗིད་ནི་ས་བཅུའི་སེམས་དཔའ་རྣམས་ཀྱིས་བཟོད་པར་མི་ནུས་ན་གཞན་ལྟ་ཅི་སྨོས། འདི་བསྒྲུབས་ན་ལྷ་ཀླུ་ཐམས་ཅད་དགའ་ནས་སྲུང་བ་དང་སྔགས་པའི་ཉེས་པ་ཐམས་ཅད་རྦད་པར་བྱེད་དོ། །ཚེ་རབས་བྱེ་ བར ་བསགས་པའི་སྡིག་པ་ཡང་བྱང་ཞིང་དག །ཡེ་ཤེས་དང་འཇིག་རྟེན་གྱི་ལྷ་རྣམས་ཀྱང་དབང་དུ་འགྱུར་རོ། །གསང་སྔགས་བཟླས་པ་ཙམ་གྱིས་དངོས་གྲུབ་མྱུར་དུ་ཐོབ་ཅིང་ཉིན་མཚན་རྟག་པར་ཙུནྡ་མདུན་དུ་དྲན་པར་བྱས་ན། ཟླ་བ་ཕྱེད་དམ་ཞག་བདུན་ནམ་ཞག་གཅིག་གིས་ལྷ་ཐམས་ཅད་འཇིགས་ཤིང་སྐྲག་པར་འཁྲུག་ནས། ལྷ་རྣམས་དེར་འོང་ནས་འཇིགས་པ་མེད་པའི་དངོས་གྲུབ་སྟེར་རོ། །ཡེ་ཤེས་དང་འཇིག་རྟེན་པའི་ལྷ་ཐམས་ཅད་ཀྱིས་རང་རང་གི་ལུས་བསྟན་ཅིང་མཆོག་ཐུན་མོང་གི་དངོས་གྲུབ་ཐམས་ཅད་སྦྱིན་པར་བྱེད་དོ། །ཞེས་བཅོམ་ལྡན་འདས་ཀྱིས་གསུངས་སོ། །ལྷ་མོ་འདི་ཟ་མ་ཏོག་ནས་བཤད་པ་ནི། བྱ་རྒྱུད་དེ་བཞིན་གཤེགས་པའི་རིགས་ཀྱི་ཡུམ་ཡིན་ལ། འདི་ཡི་རྒྱུད་དང་རྟོགས་པ་ནི་སྒྲོལ་མ་དང་
ཕྱོགས་མཐུན་པས་རྣལ་འབྱོར་རྒྱུད་དང་མ་རྒྱུད་དུ་བཞེད་པ་ཡང་ཡོད་དོ། །དེ་ལྟ་བུའི་དབང་ཞུ་བའི་ཕྱིར་མཎྜལ་ཕུལ།། ༈ །།ལྷ་མོ་འོད་ཟེར་ཅན་གྱི་དབང་བཤད་བཞུགས་སོ། །འོ་ན་ད་ལམ་ཁྱེད་རྣམས་ལ་དབང་བསྐུར་བའི་ཐོག་མར་ལོ་རྒྱུས་ཅུང་ཟད་ཞུ་ན། ལྷ་འདི་ཡི་ངོ་བོ་ནི་ཞི་བ་ལྟར་ན་ལྷ་མོ་འོད་ཟེར་ཅན། དྲག་པོ་ལྟར་ན་གཤིན་རྗེའི་གཤེད་ཀྱི་ཡུམ་རྡོ་རྗེ་རོ་ལངས་མ། ཆོས་སྐྱོང་ལྟར་བཞེངས་པ་ལྷ་མོ་རང་བྱུང་མ། དེ་རྣམས་ངོ་བོ་གཅིག་ཡིན་པར་བཤད། འདིའི་གཟུངས་དང་རྟོགས་པ་སོགས་ནི་བྱ་རྒྱུད་ཡིན་ལ། རྡོ་རྗེ་གུར་གྱི་རྒྱུད་ནས་གསུངས་པ་དང་། ལྷ་མོ་དངོས་གྲུབ་བསྟན་གཟིགས་ཀྱི་རྒྱུད་ལས་གསུངས་པ་ནི་བླ་མེད་ཡིན། བཅོམ་ལྡན་འདས་རྒྱལ་བྱེད་ཀྱི་ཚལ་ན་བཞུགས་པའི་གེ་སློང་རྣམས་ལ་བཀའ་སྩལ་པ། ལྷ་མོ་འོད་ཟེར་ཅན་ཞེས་བྱ་བ། མཐུ་དང་རྫུ་འཕྲུལ་དཔག་ཏུ་མེད་པ་གཅིག་ཡོད་དེ། དེའི་མིང་ཤེས་པ་དེ་ཡང་བཟུང་བ་དང་བཅིངས་ཨ༔ པ་དང་ཆད་པས་གཅོད་པ་དང་། མགོ་བྲེག་པ་དང་མེར་བསྲེག་ཏུ་མེད་དགྲའི་དབང་དུ་མི་འགྲོ་གསུངས། ལྷ་མོ་དངོས་གྲུབ་བསྟན་གཟིགས་རྒྱུད་ཕྱི་མ་ལས། རྟེན་འབྲེལ་ནུས་
པས་ཉིན་མཚན་སྐབས་རྣམས་ལ། །བཀྲ་ཤིས་དཔལ་ལྡན་དུད་འགྲོ་སྐྱོབ་པའི་ལྷ། །ཡི་གེ་བཅུ་གཅིག་གསང་སྔགས་བསྟན་པ་དགེ །མྱ་ངན་འདས་པའི་ལམ་དུ་བསྒྲོད་པ་ལ། ། བར ་དུ་གཅོད་པ་དངོས་གྲུབ་འཕྲོག་པའི་བདུད། །འཁོར་བའི་རྒྱབ་རྟེན་ལམ་ལྷ་མ་རི་རྩེ། །འཇིགས་ལས་སྒྲོལ་མཛད་ཆོས་ཀྱི་དབྱིངས་སུ་བསྐྱེལ། །མཆོག་དང་ཐུན་མོང་དུས་འདིར་སྟེར་མཛད་མ། །ཆོམ་རྐུན་ཟློག་བྱེད་མ་ལ་སྐྱབས་སུ་སོང་། །ཞེས་དང་། རྡོ་རྗེ་གུར་ལས། རྐུན་མ་མེད་བྱེད་འོད་ཟེར་ཅན། །ཞེས་དང་། འདིའི་གཟུངས་ལས། །མཆོག་གི་སྙིང་པོ་འདིས་ངེས་པར་མཆོག་འགྲུབ་པར་འགྱུར་རོ། །རིམས་ནད་ཐམས་ཅད་མེད་པར་བྱེད་དོ། །ནད་ཐམས་ཅད་མེད་པར་བྱེད་དོ། །བཟླས་པ་དང་སྦྱིན་སྲེག་གིས་ཀྱང་འོད་ཟེར་ཅན་གྱིས་ནོར་འཕེལ་ བར ་བྱེད་དོ། །འདི་བསྒོམས་ཤིང་ཕྱག་རྒྱ་བཅིངས་ནས་སྔགས་རིང་འདི་བཟླས་ན་དགྲ་ཡི་ནང་དུ་སོང་ན་ཡང་བཟུང་བ་དང་བཅིངས་བ་དང་ཆད་པ་བཅད་པ་དང་། མགོ་བྲེག་པ་དང་མེའི་བསྲེག་ཏུ་མེད་ཅིང་དགྲའི་དབང་དུ་མི་འགྲོའོ། །ཞེས་གསུངས་སོ། །དེ་ལ་རྒྱ་གར་གྱི་ཡུལ་དུ་བ་གླང་འཚོ་བའི་རྫི་བོ་གཅིག་གིས་འོད་ཟེར་
ཅན་བསྒྲུབས་པས་ཞལ་མཇལ་ནས་དངོས་གྲུབ་ཅི་འདོད་གསུངས་སོ། །ང་རྒྱལ་པོ་འདོད་ཞུས་པས། འོ་ན་ལྷོ་ཕྱོགས་སུ་སོངས་ཤིག་གསུངས་ནས་མི་སྣང་ བར ་གྱུར་ཏོ། །དེ་ནས་རྒྱ་གར་ལྷོ་ཕྱོགས་རྒྱང་རིང་དུ་སོང་བས་གྲོང་ཁྱེར་ཆེན་པོ་ཞིག་ན་རྒན་མོ་ཞིག་ངུ་ཞིང་བྲང་རྡུང་བ་དང་འཕྲད། ཁྱོད་ལ་ཅི་བྱུང་དྲིས་པས་སང་ཉིན་ངའི་བུ་ལ་རྒྱལ་པོའི་རེས་མོས་བབ། ངེད་ཚོའི་རྒྱལ་པོ་ལ་བགེགས་ཞུགས་ནས་རྒྱལ་པོ་ཐམས་ཅད་ཤི། བློན་པོ་སོགས་དྲག་རིམ་བསྐོས་ཚད་ཤི། རྒྱལ་པོ་མེད་ན་ནི་ཁྲིམས་ཞིག་པས་བདག་མེད་པས། དུད་ཐམས་ཅད་ལ་རྒྱལ་པོའི་རེས་མོས་བབ་པས་ཞག་གཅིག་ལས་སྡོད་ལོང་མེད་པར་རྒྱལ་པོ་འཆི་བ་ཡིན་ཟེར། འོ་ན་ཁྱོད་ཀྱི་བུ་ཚབ་ལ་ང་འགྲོ་ཆོག་གམ་བྱས་པས། རྒན་མོ་དགའ་ནས་དེ་ཆོག་ཟེར་ཏེ་བཟའ་ལྟུང་ལེགས་པོ་བྱས་ཏེ་བཏང་བས། བློན་པོ་རྣམས་ཀྱིས་ཁྲུས་གསོལ། རིན་པོ་ཆེའི་པྲོག་ཞུ་དང་བེར་བཀོན་ནས་ཁྲི་ལ་བཞག །བློན་པོ་རྣམས་ཀྱིས་ཕྱག་འཚལ་ཞིང་བསྙེན་བཀུར་ཆེན་པོ་བྱས་སོ། །དེར་ཁོང་གིས་འོད་ཟེར་ཅན་གྱི་སྒོམ་བཟླས་བྱེད་ཅིང་བཞུགས་པས། ནམ་ཕྱེད་ཙམ་ན་རྒྱལ་པོའི་བཙུན་མོ་དེ་ལྟ་བས་
ཆོག་མི་ཤེས་པ་རྒྱན་སྣ་ཚོགས་ཀྱིས་བརྒྱན་ནས་བྱུང་ངོ་། །དེར་ཁོང་གིས་འདི་བཙུན་མོ་ཡིན་ཤས་ཆུང་སྙམ་ནས། འོད་ཟེར་ཅན་གྱི་སྔགས་དང་ཏིང་ངེ་འཛིན་གྱིས་གཟིར་བས། བཙུན་མོ་དེ་དུག་སྦྲུལ་གཅིག་ཏུ་གྱུར་ནས་སོང་། ཁོང་སྐྲག་ནས་ལྷ་ལ་གསོལ་བ་བཏབ་པས། འོད་ཟེར་ཅན་ནམ་མཁར་བྱོན་ནས་ཞལ་གཡོན་ཕག་གི་ཞལ་དེས་དུག་སྦྲུལ་གསོལ་ནས་བཏུལ། ཕྱིར་ནངས་བློན་པོ་རྣམས་ཀྱིས་རྒྱལ་པོའི་གདུང་གདན་འདྲེན་ལ་རོལ་མོ་དང་ཆབ་གཅིག་བྱུང་། ངེད་ཀྱི་རྒྱལ་པོར་ཞིག་རེའི་ཚེ་ལས་མེད་པ་ལ་ཁྱེད་མ་འདས་པ་ངོ་མཚར་ཆེ་ཟེར་ནས་ཕྱག་འཚལ་ལོ། །འདིར་སྔར་རྒྱལ་པོའི་བཙུན་མོ་ཞིག་ཀླུ་བདུད་དུ་སྐྱེས་ནས་རྒྱལ་པོ་རྣམས་ཀྱི་སྲོག་བཅད་པར་འདུག་པ་ངས་བཏུལ་ཡོད། ད་སུ་བསྡད་ཀྱང་སྐྱོན་མེད་ང་འགྲོ་གསུངས་པས་འདིར་སྡོད་མཁན་སུ་ཡང་མེད་ཁྱེད་བཞུགས་དགོས་ཟེར་ནས་རྒྱལ་པོ་བྱས་པས། མངའ་ཐང་ཡང་ཇེ་ཆེར་སོང་ནས་རྒྱ་གར་ཕལ་ཆེར་ལ་དབང་བསྐུར། སངས་རྒྱས་ཀྱི་བསྟན་པ་དར་རྒྱས་སུ་མཛད་པས་ཆོས་རྒྱལ་དྷརྨ་པ་ལ་ཞེས་བྱ། དེའི་རྒྱལ་རྒྱུད་རྒྱལ་རབས་བདུན་ལ་རྒྱལ་པོ་བྱུང་བས་པཱ་ལ་བདུན་རྒྱུད་ཟེར། དེའི་དོན་གྱིས་རྒྱ་གར་
གྱི་རྒྱལ་པོ་ཕལ་ཆེར་གྱིས་ལྷ་འདི་ལ་ཡི་དམ་མཛད་པས། འདི་ཡི་སྒྲུབ་ཐབས་ཤིན་ཏུ་མང་བས་དེ་རྣམས་ཀྱིས་དབང་རིམ་པ་བཞིན་དུ་བསྐུར་བ་ཡིན། དེ་ལ་མགྲོན་པོ་དང་གནས་སྐོར་སོགས་ཐག་རིང་དུ་འགྲོ་མཁན་རྣམས་ཀྱིས་འདི་ཡི་དབང་ཐོབ་ན།། མགོ་ཐོན་པ་དང་། དགྲ་དང་ཁ་མཆུ་མང་བ་རྣམས་ཀྱིས་འདི་ཡི་དབང་ཐོབ་ན་ཤིན་ཏུ་ཕན་པ་ཡིན་པས་དེ་ལྟ་བུའི་དབང་ཞུ་བའི་ཕྱིར་མཎྜལ་ཕུལ།། ༈ །།འཕགས་མ་ལོ་མ་གྱོན་མའི་དབང་བཤད་བཞུགས་སོ། །འོ་ན་ད་ལམ་ཁྱེད་རྣམས་ལ་ལོ་མ་གྱོན་མའི་དབང་བསྐུར་བའི་ཐོག་མར་ལོ་རྒྱུས་ནི། སྔོན་གྱི་དུས་རི་རབ་ཀྱི་རྩེར་རིན་པོ་ཆེའི་གཞལ་ཡས་ཁང་ན་རིགས་ལྔའི་སངས་རྒྱས་དཔག་ཏུ་མེད་པ་འདུས་ནས་བྱང་ཆུབ་སེམས་དཔའ་སྨོན་ལམ་གྱི་ཏིང་ངེ་འཛིན་མི་གཡོ་ བར ་སྣང་བ་ལ་དབང་བསྐུར་ནས་ཆེར་གཟིགས་པས་ཁྲོ་བོའི་རྒྱལ་པོ་རྣམ་པར་སྣང་མཛད་དུ་སྐུ་མདོག་ལྗང་གུ་དབུ་བཅུ་ཕྱག་སྟོང་ཞབས་སུམ་ཅུ་སོ་གཉིས་དང་ལྡན་པར་གྱུར་ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ནམ་མཁའ་ཞབས་ཀྱིས་མནན་འོད་ཟེར་བཀྱེ་སྟེ་འཇིག་རྟེན་གྱི་ཁམས་དག་པར་བྱས། དེ་ནས་སྤྲུལ་པ་བསྡུ་སྟེ་
བདག་ནི་སྡུག་པའི་གཟུགས་སུ་གྱུར་ནས་བསྟན་པ་བསྲུང་ཞིང་སེམས་ཅན་གྱི་དོན་བྱེད་པར་སྨོན་ལམ་བཏབ། དེ་མ་ཐག་ཏུ་དཔལ་ལྡན་ལྷ་མོ་དཔོན་གཡོག་གི་སྐུར་གྱུར་ནས་འཇིག་རྟེན་གྱི་ཁམས་སུ་རྒྱུའོ། །དེར་ལྷའི་བུ་ལ་ལ་ནི་འཇིགས་ཤིག་བསྔངས། ལ་ལས་ལྟ་ཞིང་དགོད། ལ་ལས་ལྟ་ བར ་མི་ནུས། ལ་ལས་སྐྱབས་སུ་འགྲོའོ། །དེར་སྤྱན་རས་གཟིགས་ཀྱིས་འདི་ལ་མ་འཇིགས་མ་གཤེ་ བར ་སྐྱབས་དང་གླིང་དུ་ཤེས་ཏེ་མཆོད་ཅིག་བསྟོད་ཅིག་གསུངས་པས། ལྷ་རྣམས་དང་སྡེ་བརྒྱད་རྣམས་ཀྱིས་བསྟོད་པ་རྒྱ་ཆེར་མཛད་པས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་གནས་རིན་པོ་ཆེའི་བརྒྱན་པ་ལྟ་བུར་གྱུར། དེ་ནས་ལྷ་མོ་ཉིད་ཏིང་ངེ་འཛིན་ལ་བཞུགས་ནས་ལྷ་མོ་ཉིད་ཀྱིས་ཞིང་ཁམས་རྣམ་པར་དག་ཚུལ་དང་། མ་འོངས་པའི་སངས་རྒྱས་དཔལ་ལྡན་ནོར་བུ་རིན་པོ་ཆེ་ལས་བྱུང་བ་ཉིད་ཡིན་པར་གསུངས། འགྲོ་བ་རིགས་དྲུག་གི་གནས་སུ་བྱོན་ནས་ཆོས་བསྟན་པས་རིགས་དྲུག་གི་སེམས་ཅན་རྣམས་དྲངས། གདུག་པ་ཅན་རྣམས་དམ་ལ་བཏགས་པས། དམྱལ་བ་སྟོང་མཛད་མ། ཡི་དྭགས་ཚིམ་མཛད་མ། དུད་འགྲོའི་ལྷ་མོ་གཡང་ཤམ་མ་
ཞེས་གྲགས། དེ་ནས་རི་རབ་ཀྱི་སྟེང་ཡོངས་འདུས་ཤིང་དུ་བྱོན་པས་ཕྱག་ན་རྡོ་རྗེས་སངས་རྒྱས་ཐམས་ཅད་ཀྱི་བསྟན་འཛིན་མ་ལ་མཆོད་ཅིག་བསྟོད་ཅིག་གསུངས་་པས། ལྷ་མ་སྲིན་སྡེ་བརྒྱད་ཐམས་ཅད་ཀྱིས་བསྟོད་པ་བྱས་སོ། །ཕྱག་ན་རྡོ་རྗེས་ལྷ་མོ་འདི་ལ་བསྟོད་པ་ནི་ང་ལ་བསྟོད་པ་ཡིན་ནོ། །སངས་རྒྱས་ཐམས་ཅད་ལ་བསྟོད་པ་ཡིན་ནོ། །ལྷ་མོས་ཀྱང་མི་དེ་སྲུང་ བར ་བྱེད་དོ། །སྐྱོབ་པར་བྱེད་དོ། །ཅི་འདོད་པའི་དངོས་གྲུབ་སྟེར་རོ། །ཞེས་གསུངས་སོ། །བྱང་ཆུབ་སེམས་དཔའ་ཀླུ་དུང་གི་མཛེར་པ་ཅན་ལ་ཁྱུང་གིས་འཚེ་བས་ལྷ་མོས་ཁྱུང་བཏུལ་ནས་ཀླུ་བསྐྱབས་པས་ལྷ་མོ་དུང་སྐྱོང་མ་ཞེས་གྲགས། དེ་ནས་རི་ཁྲོད་མདངས་དགའ་བ་ན་ཤིང་རི་ཁྲོད་ཅེས་བྱ་བའི་ལོ་མ་གྱོན་ནས། འཕགས་པ་མི་ཕམ་པའི་གཟུངས་བཟླས་པས། ལྷ་མོ་རི་ཁྲོད་ལོ་མ་ཅན་པཎ་ཤ་ཝ་རི་ཞེས་གྲགས་སོ། །འདི་ཡི་གཟུངས་ནི་བྱ་རྒྱུད་པདྨའི་རིགས་ཀྱི་ཁྲོ་མོ་ཡིན། སྒྱུ་འཕྲུལ་དྲྭ་བ་སོགས་རྣལ་འབྱོར་རྒྱུད་དང་། སཾ་བྷུ་ཊི་དང་དངོས་གྲུབ་བསྟན་གཟིགས་སོགས་བླ་མེད་ནས་ཀྱང་གསུངས། དེ་ལ་དཔལ་སམྦུ་ཊི་ལས། གདུག་རྩུབ་ཐམས་ཅད་ཞི་བ་དང་། །ནད་
རྣམས་ཐམས་ཅད་འཕྲོག་བྱེད་པ། །པཎ་ཤ་ཝ་རི་ཞེས་བྱ། །རྣལ་འབྱོར་ཅན་གྱིས་བསྒོམ་པར་བྱ། །བཅོམ་ལྡན་རྡོ་རྗེ་འཛིན་པས་གསུངས། །ཞེས་སོ། །རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བ་ལས། དེ་ནས་བཅོམ་ལྡན་འདས་ཀྱིས་ནད་ཐམས་ཅད་ལས་རྣམ་པར་རྒྱལ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་བཞུགས་ནས། མྱ་ངན་ཆེན་པོ་ཉེ་ བར ་ཞི་ བར ་བྱེད་པའི་རིག་སྔགས་རི་ཁྲོད་ཀྱི་ཤིང་ལོ་ཅན་འདི་གསུངས་སོ། །ཨོཾ་པི་ཤ་ཙི་པཎ་ཤ་ཝ་རི་སརྦ་མ་རི་པྲ་ཤ་མ་ཎ་ཧཱུྃ་ཕཊ། དེ་ནས་རིག་སྔགས་ཆེར་གསུངས་པས། །སངས་རྒྱས་ཞིང་རྣམས་རབ་ཏུ་གཡོས། །གནོད་བྱེད་ནད་འགོ་སྲིན་པོ་དང་། །སྡང་བ་རྣམས་ཀྱི་སྙིང་ཡང་ཟག །ཅེས་དང་། དེ་ནས་དེ་འདྲ་རྣལ་འབྱོར་གྱིས་བསྒོམས་ན། །མི་ངེས་ཐམས་ཅད་ཞི་ བར ་འགྱུར། ནད་ཐམས་ཅད་ཞི་ བར ་བྱེད་པའི་ཡེ་ཤེས་ཀྱི་རྡོ་རྗེ་འབར་བ་ཞེས་བྱ་བའི་ཏིང་ངེ་འཛིན་ཏོ། །ཞེས་དང་། དངོས་གྲུབ་བསྟན་གཟིགས་ལས། བྱང་ཆུབ་སེམས་དཔའ་མི་གཡོ་བའི་ཏིང་ངེ་འཛིན་གྱི། སྨོམ་ལམ་གྱི་རྣམ་པར་འཕྲུལ་པ་བསྟན་པའི་ཕྱིར། བཀྲ་ཤིས་པའི་ལྷ་མོའི་གསང་སྔགས་བཅུ་གཅིག་པ་འདི་བྱིན་གྱིས་བརླབས་
སོ། །ཨོཾ་པཎ་ཤ་ཝ་རི་པི་ཤ་ཙི་སྭཱ་ཧཱ། བཀྲ་ཤིས་ཀུན་གྱི་བདག་མོ་སྟེ། །ལུས་ཅན་ཀུན་གྱི་སྐྱབས་སུ་འགྱུར། །སྲིད་པ་མ་སྟོང་ བར ་དུ་ནི། །འཇིག་རྟེན་ཀུན་ལ་ བར ་ཆད་མེད། །ཕན་པར་མཛད་པའི་བརྩོན་འགྲུས་ཅན། །འདི་དག་ཡོངས་སུ་བསྟན་པར་བྱེད་པ་གང་དག་ལུས་དང་ངག་དང་ཡིད་རྣམ་པར་དག་པར་འགྱུར། བྱང་ བར ་འགྱུར་དག་པར་འགྱུར། ཡུལ་བདེ་ བར ་འགྱུར། གནོད་པ་ཐམས་ཅད་ཡང་དག་པར་སྦྱང་ བར ་འགྱུར་རོ། །ཞེས་གསུངས་སོ། །དེ་ལྟར་རྒྱུད་སྡེ་ཐམས་ཅད་ནས་ཡམས་ནད་རིམས་ནད་ཞི་བའི་མཆོག་ཏུ་གསུངས་པའི་ཕྱིར། ཁྲོམ་སོགས་འདུ་བ་ལ་ཡང་། ཐོག་མར་འདིའི་དབང་བསྐུར་སྲོལ་ཡོད། འདི་ལ་ཡང་རིགས་མང་དུ་ཡོད་ཅིང་། སྒྲུབ་ཐབས་ཀྱི་གཞུང་ལ་ཡང་སེར་མོ་ཞལ་གསུམ་ཕྱག་དྲུག་དང་། ཞལ་གསུམ་ཕྱག་བཞི་པ་གཉིས་ཡོད་པ་ཡང་གཅིག་ཏུ་བསྡུས། ལྗང་མོ་དང་སེར་མོའི་དབང་གཉིས་སོ་སོར་བསྐུར་བ་རྗེ་ཆོས་ཀྱི་དབང་ཕྱུག་གི་ཕྱག་ལེན་ཡིན་པས། དེ་ལྟར་ལོ་མ་གྱོན་མའི་དབང་ཞུ་བའི་ཕྱིར་མཎྜལ་ཕུལ།། ༈ །ཤེར་ཕྱིན་སྤྱིའི་དབང་བཤད་མདོར་བསྡུས་བཞུགས་སོ། །འོ་ན་ད་
ལམ་ཁྱེད་རང་རྣམས་ལ་ཤེར་ཕྱིན་མའི་དབང་བསྐུར་བའི་ཐོག་མར་ལོ་རྒྱུས་ཅུང་ཟད་ཞུ་ན། བཅོམ་ལྡན་འདས་ཀྱི་བྱ་རྒོད་ཕུང་པོའི་རི་བོར་བཀའ་ བར ་པ་མཚན་ཉིད་མེད་པའི་ཆོས་ཀྱི་འཁོར་ལོ་བསྐོར་ཏེ་ཤེར་ཕྱིན་རྒྱས་པ་བྱེ་བ་ཕྲག་བརྒྱ་པ་ནི་ད་ལྟ་དྲི་ཟའི་ཡུལ་དུ་བཞུགས། མི་ཡུལ་དུ་བཞུགས་པ་རྒྱས་པ་སྟོང་ཕྲག་བརྒྱ་པ་དང་། འབྲིང་པོ་སྟོང་ཕྲག་ཉི་ཤུ་རྩ་ལྔ་པ་དང་། བསྡུས་པ་བརྒྱད་སྟོང་པ་སོགས་ཤེར་ཕྱིན་ཡུམ་སྲས་བཅུ་བདུན་རྣམས་ནི་མདོ་ཡིན་ལ། དེ་དག་གི་གཟུངས་འབུམ་ནས་འབྱུང་བ་དང་ཤེས་རབ་སྙིང་པོ་སོགས་ནི་བྱ་རྒྱུད་ཀྱི་ཕྱོགས་སུ་རྟོགས། དེ་ལ་ཆོས་སྐུ་ཡུམ་ཆེན་མོ་ནི་སྟོང་པ་ཉིད་ཡིན་ཏེ། ཉན་ཐོས་དགྲ་བཅོམ་པ་དང་རང་སངས་རྒྱས་དང་། བྱང་ཆུབ་སེམས་དཔའ་དང་རྫོགས་པའི་སངས་རྒྱས་རྣམས་དེ་ལས་འཁྲུངས་པས་འཕགས་པ་བཞི་བསྐྱེད་པར་བྱེད་པའི་ཡུམ་ཞེས་བྱ། དེ་ལ་གཟུགས་ཁ་དོག་དངོས་པོ་མེད་ཀྱང་ཕྱོགས་བཅུའི་སངས་རྒྱས་ཐམས་ཅད་ཀྱིས་སེམས་ཅན་ཚོགས་བསགས་པའི་རྟེན་དུ་གཟུགས་ཀྱི་སྐུར་འབྱོན་པར་གསོལ་བ་བཏབ། འོག་མིན་གྱི་གནས་སུ་རིན་པོ་ཆེའི་གཞལ་ཡས་ཁང་གི་དབུས་སུ་སེང་གེ་ཆེན་པོ་བརྒྱད་ཀྱིས་བཏེག་པའི་
ཁྲི་ལ། ཡུམ་ཆེན་མོ་གསེར་མདོག་ཅན་ཞལ་ཕྱག་གི་རྣམ་པར་བཞེངས་ཏེ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་ནས་བཞུགས་སོ། །དེ་ལ་རྣལ་འབྱོར་རྒྱུད་ལས་འཕྲོས་པའི་རྒྱུད་དཔལ་མཆོག་གི་རྒྱུད་ཀྱི་དུམ་བུ་དང་པོ་ཤེས་རབ་ཀྱི་ཕ་རོལ་ཏུ་ཕྱིན་པ་རྒྱུད་ཀྱི་དུམ་བུ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ཚུལ་བརྒྱ་ལྔ་བཅུ་པ་དང་། ཤེར་ཕྱིན་སྒོ་ཉི་ཤུ་ལྔ་པ་རྣམས་རྣལ་འབྱོར་རྒྱུད་ཡིན། ཤེར་ཕྱིན་དཀར་མོ་རྡོ་རྗེ་གུར་གྱི་རྒྱུད་ལས་བཤད་པ་ནི་བླ་མེད་ཡིན་ཏེ། གསང་སྔགས་རྣམ་པ་ལམ་དུ་བྱེད་པས་ཤེར་ཕྱིན་སྐུར་བསྒོམས་ཤིང་སྔགས་བཟླས་པས་ཤེར་ཕྱིན་ཉམས་སུ་ལེན་པའི་ཕན་ཡོན། མདོ་འབུམ་ཉེར་ལྔ་སོགས་ནས་མཐའ་ཡས་པར་གསུངས་པས་བརྗོད་པར་མི་ལོང་། མདོར་བསྡུ་ན་རྡོ་རྗེ་གུར་ལས། ཤེར་ཕྱིན་དཀར་མོ་སྔགས་རིང་དང་བཅས་པ་གསུངས་ནས། ཤེས་རབ་ཀྱི་ཕ་རོལ་ཏུ་ཕྱིན་མ་བྱང་ཆུབ་པ་གང་བསྒོམས་པ་ཙམ་གྱིས་རྒོལ་བ་ཐམས་ཅད་སྤོབས་པ་མེད་པར་འགྱུར་རོ། །ཟླ་བ་དྲུག་བསླབ་རྣལ་འབྱོར་གྱིས། །ཤེས་རབ་ཕ་རོལ་ཕྱིན་མར་འགྱུར། །ཉིན་ཞག་བདུན་དུ་རབ་སྦྱོར་བས། །བསྟན་ཆོས་
ཐམས་ཅད་རྣམ་པར་ཤེས། །བཟླས་པ་འབུམ་དུ་རབ་སྦྱོར་བས། །ཉི་མ་རེ་རེར་ཚིགས་བཅད་བརྒྱ། །རབ་ཏུ་འབད་པ་མེད་པར་བྱེད། །ཚིགས་བཅད་བརྒྱ་ནི་ཁ་ཐོན་ཟིན། བྱ་རོག་མ་ལངས་ཙམ་ན་མ་བསླང་བའི་རྩབ་མོ་ལ་སྔགས་འདི་ལན་བདུན་མངོན་པར་བཟླས་ནས་ཟླ་བ་དྲུག་ཏུ་གང་འཐུང་བ་དེ་ཤེས་རབ་ཆེ་ བར ་འགྱུར་རོ། །སངས་རྒྱས་ཐམས་ཅད་བསྒོམས་བྱས་པ། །ངེས་པར་བྱང་ཆུབ་མ་ཐོབ་ཀྱང་། །དེ་ཡིས་འཁོར་ལོས་སྒྱུར་བའི་གནས། །དེར་ནི་སྐྱེ་ཞིང་སྐྱེ་ བར ་འགྱུར། །ཡང་ན་ས་ཡི་བདག་པོར་འགྱུར། །དག་པའི་གནས་སུ་ངེས་པར་འགྲོ། །བློ་ལྡན་དགའ་ལྡན་གནས་སུ་སྐྱེ། །ནམ་མཁའི་གྲོང་ཁྱེར་བདེ་བ་དག །ཚེ་འདི་ཉིད་ལ་འགྲུབ་པ་གང་། །དེ་ལ་སངས་རྒྱས་སྨོས་ཀྱི་དགོས། །ཁམས་གསུམ་ནང་ན་ཆེ་བ་སྟེ། །ཤི་དང་དགའ་བའི་ཁྱད་པར་མེད། །རྒྱལ་བྱིན་ཚངས་པ་དེ་བཞིན་གྲགས། །ཁྱབ་འཇུག་དང་ནི་མེ་དང་རླུང་་། །འདོད་པའི་ལྷ་དང་ཐོད་པ་འཛིན། །འདི་དག་དེ་ཡི་བྲན་དུ་འགྱུར། །ལྷ་ཀླུ་དེ་བཞིན་གནོད་སྦྱིན་དང་། །དྲི་ཟ་དང་ནི་ལྷ་མིན་མི། །མི་འམ་ཅི་དང་མཁའ་ལ་སྤྱོད། །དེ་ཀུན་འཁོར་དུ་ཐེ་
ཚོམ་མེད། །འདི་ནི་རབ་བྱུང་བཅོམ་ལྡན་འདས། །ཆོས་ཀྱི་འཁོར་ལོ་སྐོར་ བར ་བྱེད། །འཁྲུངས་པ་དང་ནི་བྱང་ཆུབ་དང་། །དེ་བཞིན་ལྷ་ཡུལ་གཤེགས་པར་མཛད། །ཁབ་ནས་བྱུང་བའང་བྱེད་པ་དང་། །དཀའ་ཐུབ་རྣམ་པར་འཛིན་པར་གང་། །སྐྱེ་བ་ཡོངས་སུ་བཟུང་བ་དང་། །མྱ་ངན་འདས་པ་ཡང་སྟོན་མཛད། །འཇིག་རྟེན་འདུལ་ བར ་རབ་བརྙེས་ནས། །དེ་ནི་དུ་མའི་གཟུགས་སུ་བྱེད། །སེམས་ཅན་དྲང་ཕྱིར་སངས་རྒྱས་ནི། །སངས་རྒྱས་གར་གྱིས་གར་མཛད་དེ། །རི་བོང་ས་རུ་སེང་གེ་དང་། །གླང་པོ་ཆེ་རྣམས་རི་ལ་ཡང་། །སྙིང་རྗེའི་ཕན་པའི་སེམས་ཀྱིས་སུ། །ཕྱག་རྒྱའི་དངོས་གྲུབ་སྐྱེ་བ་ལེན། །ཞེས་གསུངས། དེ་ལྟར་ཐུན་མོང་གི་དངོས་གྲུབ་ཤེས་རབ་ཆེ་བ་ནས་བཟུང་སྟེ་མཆོག་གི་དངོས་གྲུབ་སངས་རྒྱས་ཀྱི་མཛད་པ་ཕྲིན་ལས་ཀྱི་ བར ་ཐོབ་པར་གསུངས་སོ། །དེ་ལ་འདིར་ཤེར་ཕྱིན་གྱི་སྒྲུབ་ཐབས་མང་དུ་འབྱུང་བའི་དབང་རྣམས་རིམ་པར་ཞུ་བའི་ཕྱིར་མཎྜལ་ཕུལ།། ༈ །།ལྷ་མོ་དབྱངས་ཅན་མའི་དབང་བཤད་བཞུགས་སོ། །འོ་ན་ད་ལམ་ཁྱེད་རྣམས་ལ་ལྷ་མོ་དབྱངས་ཅན་མའི་དབང་བསྐུར་བ་ལ་ལོ་རྒྱུས་ཟུར་ཙམ་ཞུ་
ན། རྒྱ་གར་གྱི་སློབ་དཔོན་མཚོ་སྐྱེས་ཀྱི་ཞལ་ནས། ཕྱི་ལྟར་དབྱངས་ཅན་མ་ནང་ལྟར་རྡོ་རྗེ་ཕག་མོ་གསང་བ་ལྟར་ལྷ་མོ་དུད་སོལ་མ་རྣམས་ངོ་བོ་གཅིག་པར་གསུངས། རྗེ་བཙུན་འཇམ་དབྱངས་ཀྱི་ཡུམ་ཡིན་པས་ཡེ་ཤེས་ཀྱི་ལྷ་མོ་མཆོག་ཏུ་གྱུར་ཅིང་གསེར་འོད་ལས་ཀྱང་དཀོན་མཆོག་གསུམ་ཀའི་ངོ་བོར་བཤད། དཀྱིལ་འཁོར་ཐམས་ཅད་ཀྱི་སྒེག་སོགས་ལྷ་མོ་བརྒྱད་ཀྱི་ནང་ནས་ལཱ་སྱ་དཀོར་མོ་དེ་ཡིན་ཀྱང་། རྣམ་པ་འཇིག་རྟེན་པའི་ཚུལ་གྱིས་རྒྱ་གར་ཆུ་བོ་གངྒཱ་ལ་གནས་པས་གངྒཱའི་ལྷ་མོ་སྟེ་གནོད་སྦྱིན་ཡང་དག་ཤེས་ཀྱི་ཡུམ་ཡིན་པས་ནོར་ལྷ་མོ་བརྒྱད་ཀྱི་གྲ་གཅིག་ཡིན། འདི་བསྒྲུབས་ན་སྒྲ་དང་སྙན་ངག་ལ་སོགས་རིག་པའི་གནས་ཐམས་ཅད་ལ་མཁས་པ་ཡིན་པས། རྒྱ་གར་དུ་ཕྱི་པ་དང་ནང་པའི་པཎྜི་ཏ་ཕལ་ཆེར་གྱིས་ཡི་དམ་མཛད། བོད་དུ་བོ་དོང་ཕྱོགས་ལས་རྣམ་རྒྱལ་གྱིས་ཞག་བདུན་སྒྲུབ་པས་ཞལ་གཟིགས་ནས་བརྩམ་ཆོས་བཀའ་འགྱུར་གཉིས་གསུམ་གྱི་སྡོམ་ཙམ་མཛད་སྐད། འདི་དྲག་མོར་སྒྲུབ་པ་ན་དམག་ཟོར་མ་ཡིན་པས་མངོན་རྒྱུག་ཏུ་འཁོར་ནས་བོ་དོང་ཨ་ཕྱི་ཞེས་གྲགས། རྒྱ་གར་ལྷོ་ཕྱོགས་རྒྱ་མཚོའི་འགྲམ་དུ་དབྱངས་ཅན་མའི་བླ་མཚོ་ཞིག་ཡོད། དེའི་
ཆུའི་རི་མོ་ལ་ཡང་དབྱངས་གསལ་བྱེད་ཀྱི་ཡི་གེ་འཆར་ཞིང་ཆུ་སྒྲ་ཐམས་ཅད་ཀྱང་དབྱངས་གསལ་བྱེད་ཀྱི་སྒྲ་གྲག་པ་ཞིག་ཡོད། དེར་སྐེད་པ་མན་ཆད་མཚོ་ནང་དུ་འདུག་ནས་ཞག་བདུན་གཉིད་མ་ལོག་པར་དབྱངས་ཅན་མ་བསྒྲུབས་ན། ཞལ་གཟིགས་པ་ཡིན་སྐད། དུས་ཕྱིས་པཎྜི་ཏ་དབྱངས་ཅན་དགའ་བ་ཞེས་བྱ་བས་སྒྲ་ཡི་མཐའ་མ་ཆོད་ནས་མཚོ་ནང་དེར་དབྱངས་ཅན་མ་བསྒྲུབས་པས་ཞལ་གཟིགས། སྔར་གྱི་སྒྲ་ཡི་བསྟན་བཅོས་རྣམས་རྡོ་རྗེ་གདན་དུ་མེ་སྒྲ་བྱུང་དུས་ཚིག་ནས་མ་ཚང་བ་ཡིན་པར་འདུག །དབྱངས་ཅན་མའི་ཞལ་ནས་གསུངས་པ་ཡི་གེར་བྲིས་ཏེ་ཚང་ བར ་བྱས། པཎྜི་ཏ་དེ་བོད་དུ་ཕེབས་ནས་རྗེ་བཙུན་ཏ་ར་གྷ་རུ་དང་ལོ་ཆེན་སངས་རྒྱས་དཔལ་བཟང་སོགས་ཀྱིས་བསྒྱུར་ནས་ཡར་ཐང་མར་ཐང་སོགས་སུ་དར་བ་འདི་ཡིན། ལྷ་མོ་འདིའི་བསྙེན་སྒྲུབ་བྱས་ན། ཤེས་རབ་བློ་ཁ་རལ་ནས་ཀྱང་། །ཐོས་འཛིན་ཐམས་ཅད་མཁྱེན་པར་འགྱུར། །ཞེས་གསུངས་པའི་ཕྱིར་ཡོན་ཏན་སློབ་པར་འདོད་པ་རྣམས་ཀྱིས་བསྙེན་སྒྲུབ་བྱས་ན་ཤིན་ཏུ་ཕན་ཡོན་ཆེ། ཁྱད་པར་དུ་གཟུགས་བཟང་བ་དང་དབྱངས་སྙན་པ་དང་ཟིན་ཐུན་ལོབ་སྐྱེན་པ་དང་སྒྲ་དང་
སྙན་ངག་དང་རྩོམ་མཁས་པ་དང་། བགྲོ་གླེང་གིས་ཚེ་རྩོད་པ་ལས་རྒྱལ་བ་དང་ཤུགས་ཀྱིས་རིག་པའི་གནས་རྣམས་ལ་མཁས་པར་འགྱུར་བའི་ཕྱིར། རྒྱ་གར་དུ་ཡང་བྲམ་ཟེ་རྣམས་དང་མུ་སྟེགས་རྣམས་དང་། ནང་པའི་པཎྜི་ཏ་སོགས་འདི་ལ་ཐུགས་དམ་བྱེད་མཁན་ཤིན་ཏུ་མང་བ་ཡིན་སྐད། འདིའི་གཟུངས་ནི་བྱ་རྒྱུད་པདྨ་རིགས་ཀྱི་ཕོ་ཉ་མོ་ཡིན། གཤིན་རྗེའི་གཤེད་ཀྱི་རྒྱུད་ནས་བཤད་པ་ནི་བླ་མེད་ཡིན། པི་ཝང་དབྱངས་ཅན་མ་འདི་ནི་ཕྱི་ནང་ཐུན་མོང་ཡིན་པར་འདུག་གོ །དེ་རྣམས་ཀྱི་དབང་ཞུ་བའི་ཕྱིར་མཎྜལ་ཕུལ།། ༈ ། །།ལྷ་མོ་ཀུ་རུ་ཀུལླེའི་དབང་བཤད་བཞུགས་སོ། །འོ་ན་ད་ལམ་ཁྱེད་རྣམས་ལ་དབང་བསྐུར་བའི་ཐོག་མར་ལོ་རྒྱུས་ཟུར་ཙམ་ཞུ་ན། རྒྱ་གར་སྐད་དུ་ཀུ་རུ་ཀུལླེ། བོད་སྐད་དུ་རིག་བྱེད་མ་ཞེས་ཀྱང་བྱ། སྒྲོལ་མའི་རིགས་ཡིན་པས་དབང་བྱེད་སྒྲོལ་མ་ཞེས་ཀྱང་བྱ། སྒྲོལ་མ་ཉི་ཤུ་རྩ་གཅིག་གི་དཀྱིལ་འཁོར་གྱི་གཙོ་མོ་ཡང་ཡིན། འདི་དགྱེས་རྡོར་གྱི་རྒྱུད་ནས་བཤད་པའི་བླ་མེད་དང་། སྒྲོལ་མ་མངོན་རྟོགས་འབྱུང་དང་། ཀུ་རུ་ཀུལླེའི་རྟོགས་པ་རྣམས་ནི་རྣལ་འབྱོར་ཆེན་པོའི་རྒྱུད་དུ་བཞེད། སྔོན་གྱི་དུས་ན་སྒྲོལ་མ་འབྱུང་བ་རྣལ་འབྱོར་རྒྱ་
མཚོའི་གཞུང་ནང་། རྟོགས་པ་བྱུང་ཡང་ནུབ་ནས་སྒྲོལ་མ་འབྱུང་བའི་ཏིང་ངེ་འཛིན་ཞེས་བྱ་བའི་རྒྱུད་ཀྱི་གཙོ་བོ་འབྱུང་བ་ཡང་ནུབ་སྟེ། དེ་ནས་ཀུ་རུ་ཀུལླེའི་རྟོགས་པ་འདི་ནི་རྒྱུད་རྒྱས་པ་རྣམས་ནས་བསྡུས་ཏེ་འཇིག་རྟེན་དབང་ཕྱུག་གིས་གསུངས་པ་ཡིན། གཞོན་ནུ་སྒྲ་གཅན་འཛིན་ལྷུང་བཟེད་བཀྲུ་ཕྱིར་རྫིང་བུ་རིང་མོར་ཞུགས་པ་ན། གྲགས་འཛིན་མའི་བུས་དགེ་སློང་དཀར་པོ་དང་འཁྲུལ་ཏེ་རྫིང་དྲངས་པས་སྒྲ་གཅན་འཛིན་གྱིས་སྔགས་འདི་བཟླས་པས་ཉེ་ཞོ་མེད་པར་ཐར་བ་དང་། བཅོམ་ལྡན་འདས་ཀྱིས་བསྟན་པ་བསྲུང་བའི་ཕྱིར་ནག་པོ་ཆེན་པོ་ལ་ཉིད་ཀྱིས་ཆངས་བུའི་གསོས་པའི་སྲིན་མོ་འཕྲོག་མ་བྱིན་ཀྱང་ནག་པོའི་བརྩི་ བར ་མ་བྱས་སོ། །མོ་ཡིད་མུག་པ་ལ་ཀུ་རུ་ཀུལླེ་འདི་གསུངས་པས་བསྐལ་པ་བཟང་པོར་གྱུར་ཏེ། ནག་པོ་དབང་དུ་འདུས་སོ། །ཤིན་ཏུ་བཟང་བའི་བུ་སྣར་མ་བྱ་བ་གཟུགས་བཟང་སྟོབས་དང་ལྡན་ཡང་བློ་རྟུལ་བ་ལ་འདི་གསུངས་པས་བསྟན་བཅོས་དང་བཟོའི་གནས་ཐམས་ཅད་ལ་མཁས་སོ། །གསང་སྔགས་ལྡན་པ་བཅོམ་ལྡན་འདས་མ་གང་ཞིག་སྒོམ་བྱེད་པ། །དེ་ནི་སྣ་ཚོགས་གཏེར་དང་གསེར་དང་དངུལ་དང་རྣ་ཆ་དང་། །
གོས་ལ་སོགས་པའི་ནོར་རྣམས་ཆེད་དུ་གང་བསམ་པ། །སེམས་ཀྱིས་ཐམས་ཅད་མ་ལུས་ལོངས་སྤྱོད་བྱེད། །རྒྱལ་པོའི་ལས་ནི་རྒྱལ་སྲིད་དབང་པོ་ཡི། །ཡུལ་འདས་པ་ཡིས་ཤིང་ལས་འབྲས་བུ་དང་། །ཀླུ་དང་ཆུ་ཀླུང་རྒྱ་མཚོ་རྣམ་པར་འགུགས། །སྔགས་དང་ལྡན་པས་འཐུང་ཞིང་ཟོས་པ་སྔགས་ཀྱིས་དག་པར་བྱེད། །ཅེས་དང་། ཡང་འདིའི་རྟོགས་པ་ལས། གསང་སྔགས་འདི་དང་རྟོགས་པ་འདི་ཙནྡན་གྱི་དཀྱིལ་འཁོར་བྱེད་ན་ཀློག་པར་བྱེད་པ་དེའི་ལུས་ལ་དུག་གིས་གནོད་པ་མི་འབྱུང་། དུག་གིས་འཆི་ བར ་མི་འགྱུར། ཤུ་བས་འཇིགས་པ་མི་འབྱུང་། གཡེམ་པས་འཇིགས་པ་མི་འབྱུང་། མཛེ་ནད་ཀྱིས་འཇིགས་པ་མི་འབྱུང་། ནད་ཀྱིས་འཇིགས་པ་མི་འབྱུང་། ཀླུས་འཇིགས་པ་མི་འབྱུང་། སྦྲུལ་གྱིས་འཇིགས་པ་མི་འབྱུང་། སྟག་དང་གཅན་གཟན་གྱིས་འཇིགས་པ་མི་འབྱུང་། མཚོན་གྱིས་འཇིགས་པ་མི་འབྱུང་། དགྲས་འཇིགས་པ་མི་འབྱུང་། དབུལ་བས་འཇིགས་པ་མི་འབྱུང་་། དུས་མ་ཡིན་པར་འཆི་ བར ་འབྱུང་བ་མི་འགྱུར་རོ། །བརྟག་གཉིས་ལས། ཀུ་རུ་ཀུལླེའི་གསུངས་ནས། འདི་ནི་བསྒོམས་པ་ཙམ་གྱིས་ནི། །འཇིག་རྟེན་གསུམ་པོ་
དབང་དུ་བྱེད། །འབུམ་ཕྲག་གཅིག་གིས་རྒྱལ་པོ་རྣམས། །ཁྲི་ཡིས་འཇིག་རྟེན་ཕལ་པ་ཉིད། །བྱེ་བ་ཕྲག་དང་གནོད་སྦྱིན་སོགས། །འབུམ་ཕྲག་བདུན་གྱིས་ལྷ་མ་ཡིན། །འབུམ་ཕྲག་གཉིས་ཀྱིས་ལྷ་རྣམས་དང་། །བརྒྱ་ཕྲག་གཅིག་གིས་སྔགས་པ་ཉིད། །ཅེས་སོ། །རྒྱུད་དེ་དག་ལ་བརྟེན་པའི་སྒྲུབ་ཐབས་ནི། རྒྱ་གར་གྱི་ཡུལ་དུ་རྒྱལ་པོ་ཞིག་རྐྱེན་ཞིག་གིས་བསྐུལ་ནས་བཅོམ་ལྡན་འདས་མའི་སྤྲུལ་པ་མཁའ་འགྲོ་མ་སྨུག་མོ་ཞིག་དང་མཇལ། དེའི་དབང་བསྐུར་སྒྲུབ་ཐབས་གནང་བས། གྲུབ་པ་ཐོབ་ནས་རྒྱ་ཀླུ་གར་གྱི་གྲུབ་ཆེན་ལྷན་ཅིག་སྐྱེས་པའི་རོལ་པ་ཞེས་གྲགས། དེས་སྒྲུབ་ཐབས་མཛད་པ་ནས་བཟུང་སྟེ་རྒྱ་གར་དུ་དར། བ་རི་ལོཙྪ་བས་བོད་དུ་བསྒྱུར་ཏེ་ས་སྐྱའི་གསེར་ཆོས་བཅུ་གསུམ་ལས། བཀའ་རྒྱ་ཅན་ལྷ་དམར་པོ་རྣམ་གསུམ། དེའི་ནང་ནས་མཆོག་གི་དངོས་གྲུབ་དབང་དུ་བྱེད་པ་ལྷ་མོ་ཀུ་རུ་ཀུལླེ་ཞེས་བྱ་བ་ཟབ་ཆོས་བླ་ན་མེད་པར་བྱེད་པ་ཡིན། འདི་ལ་ཡང་སྒྲུབ་ཐབས་མི་འདྲ་བ་མང་ཞིག་ཡོད་པའི་དབང་རིམ་པ་བཞིན་དུ་ཞུ་བའི་ཕྱིར་མཎྜལ་ཕུལ།། །།སོ་སོར་འབྲང་མ་སོགས་ལྷ་མོ་ལྔའི་དབང་བཤད་བཞུགས་སོ། །འོ་ན་ད་
ལམ་ཁྱེད་རྣམས་ལ་སོ་སོར་འབྲང་མ་ཆེན་མོའི་དབང་བསྐུར་བ་ཡིན་ཏེ། དེ་ལ་ལོ་རྒྱུས་ནི། བཅོམ་ལྡན་འདས་ཤཱཀྱ་ཐུབ་པ་རྡོ་རྗེ་ལྷུན་པོའི་ཟོམ་ན་འཁོར་དཔག་ཏུ་མེད་པ་དང་ཐབས་ཅིག་ཏུ་བཞུགས་པའི་ཚེ། མཛོད་སྤུ་ལས་འོད་ཟེར་ཆེན་པོ་རབ་ཏུ་སྐྱེས་ཏེ་བཀའ་སྩལ་པ། ཉེས་པ་ཀུན་དང་གནོད་པ་ཀུན། །རབ་འཇོམས་སོ་སོར་འབྲང་མ་ཡི། །གཟུངས་འདི་རབ་ཏུ་བཤད་པར་བྱ། །འདི་ནི་ཐོབ་པ་ཙམ་གྱིས་ཀྱང་། །སྡིག་པ་ཀུན་ནི་ཟད་པར་འགྱུར། །སེམས་ཅན་ཀུན་ལ་བདེ་བ་སྦྱིན། །ནད་དོ་ཅོག་ལས་གྲོལ་ བར ་བྱེད། །ཐུབ་པ་ཡིས་ནི་འདི་སྐད་གསུངས། །རྨི་ལམ་ངན་དང་མཚན་མ་ངན། །གང་ཡང་ནད་འགོས་མི་ཟད་རྣམས། །ནད་ཀྱིས་བཏབ་དང་ནད་ཆེན་གྱིས། །གང་དག་ཟིན་ནས་ཁྲག་སྐྱུག་དང་། །གཞན་ཡང་རྣམ་པ་མང་པོའི་ནད། །འབྲས་དང་ཤུ་བ་སྐེམ་པ་དང་། །གང་ཡང་གནོད་པ་མི་བཟད་པས། །མི་ཡི་སྐྱེ་དགུ་ཟིན་པ་དག །མི་རྣམས་མ་རུངས་བྱ་བའི་ཕྱིར། །མཆོག་ཏུ་མི་ཟད་གནོད་བྱེད་རྣམས། །སྲུང་བ་སྟོབས་ཆེན་ག་ལ་ བར ། །དེ་དག་ཐམས་ཅད་མི་འབྱུང་ངོ་། །འདི་ཡི་བསྲུངས་བ་བྱས་ནས་ནི། །
བཅིངས་བ་དག་ཀྱང་གྲོལ་ བར ་འགྱུར། །ཞེས་དང་། བསྐྲད་པ་ཙམ་དང་རྡོ་རྗེས་བརྒྱབས་པ་ཙམ་གྱིས་དུས་མ་ཡིན་པར་འཆི་བ་དང་ནད་ཆེན་པོ་ལས་ཡོངས་སུ་ཐར་ བར ་འགྱུར་རོ། །དེའི་ནད་ཐམས་ཅད་ཀྱང་རབ་ཏུ་ཞི་ བར ་འགྱུར་རོ། །རྒྱུན་རིང་དུ་ན་བ་ལས་བྱབ་པ་ཙམ་གྱིས་རབ་ཏུ་ཞི་ བར ་འགྱུར་རོ། །ཞེས་དང་། ཕྱི་མའི་ཚེ་ཕྱི་མའི་དུས་ན་སེམས་ཅན་ཚེ་ཐུང་བ་རྣམས་དང་། བསོད་ནམས་ཆུང་བ་རྣམས་དང་། ལོངས་སྤྱོད་ཆུང་བ་རྣམས་ལ་ཕན་པར་བལྟའོ། །ཞེས་གསུངས་ཤིང་། རྡོ་རྗེ་གུར་ལས་ཀྱང་། །གཞོན་ནུ་ཡལ་བའི་བུད་མེད་ལ། །སོ་སོར་འབྲང་མ་རྟག་དྲན་བྱ། །ཞེས་གསུངས། བྱིས་སྦ་སྲུང་ཞིང་སྐྱོང་བའི་མཆོག་ཀྱང་ཡིན་ནོ། །དེ་ལྟར་སོ་སོར་འབྲང་མ་དང་། སྟོང་ཆེན་རབ་འཇོམས་དང་། རྨ་བྱ་ཆེན་མོ་དང་། བསིལ་བའི་ཚལ་མ་དང་། གསང་སྔགས་རྗེས་འཛིན་ཏེ་ལྷ་མོ་ལྔ་པོ་སོ་སོའི་ཕན་ཡོན་དང་ལོ་རྒྱུས་གཟུངས་གྲྭ་ལྔ་ནས་བཤད་པ་ཕལ་ཆེར་གྱིས་ཐུགས་ལ་མངའ་བ་ལྟར་ཡིན་ནོ། །དེ་ལྟར་ལྷ་མོ་ལྔའི་དབང་རིམ་པར་ཞུ་བའི་ཕྱིར་མཎྜལ་ཕུལ།། ༈ །།གཙུག་ཏོར་རྣམ་པར་རྒྱལ་མ་སོགས་གཙུག་ཏོར་རིགས་ཐམས་ཅད་ཀྱི་
དབང་བཤད་བཞུགས་སོ། །འོ་ན་ད་ལམ་ཁྱེད་རྣམས་ལ་གཙུག་ཏོར་རྣམ་པར་རྒྱལ་མའི་དབང་བསྐུར་བ་ཡིན་ཏེ། བཅོམ་ལྡན་འདས་ཤཱཀྱ་ཐུབ་པ་ཆོས་བཟང་ལྷའི་འདུན་ས་ན་བཞུགས་པའི་ཚེ། ལྷའི་བུ་ཤིན་ཏུ་བརྟན་པ་ཞེས་བྱ་བ། ལྷའི་ལོངས་སྤྱོད་ཆེན་པོ་དང་། ལྷའི་བུའི་ཚོགས་ཀྱིས་བསྐོར་ནས་རྩེ་དགའ་སྤྱོད་པ་ལས། མཚན་མོ་སྒྲ་ཞིག་ཐོས་ནས་ལྷའི་བུ་ཁྱོད་ཞག་བདུན་ནས་འཆི་སྟེ། འཛམ་བུའི་གླིང་དུ་འགྲོ་བ་བདུན་དུ་སྐྱེས་ནས་དམྱལ་ བར ་སྐྱེ། དེ་ནས་མིར་སྐྱེས་ན་ཡང་དམུས་ལོང་དབུལ་པོར་སྐྱེ་ཟེར་བ་ཐོས་པས། ལྷའི་བུ་སྐྲག་ཅིང་བསྔངས་ནས་བརྒྱ་བྱིན་ལ་ཇི་ལྟར་བྱ་ཞུས་སོ། །དེར་བརྒྱ་བྱིན་གྱིས་མངོན་པར་ཤེས་པས་བལྟས་པས། ལྷའི་བུ་དེ་ཤི་ནས་ཁྱི་དང་ཝ་དང་སྤྲེའུ་དང་སྦྲུལ་དང་བྱ་རྒོད་དང་གྲྭ་ཏ་སྟེ། བདུན་དུ་སྐྱེ་ བར ་མཐོང་ནས། མྱུར་དུ་བརྒྱ་བྱིན་གྱིས་མཆོད་པའི་ཚོགས་ཆེན་པོ་ཁྱེར་ནས་བཅོམ་ལྡན་འདས་ལ་མཆོད་ཅིང་ཕྱག་འཚལ་ནས་ཞུས་པས། དེ་མ་ཐག་བཅོམ་ལྡན་འདས་ཀྱི་གཙུག་ཏོར་ནས་འོད་ཟེར་ཆེན་པོ་བྱུང་སྟེ། འཇིག་རྟེན་ཐམས་ཅད་གསལ་ བར ་བྱས་ནས། སླར་བཅོམ་ལྡན་འདས་ཀྱི་ཞལ་དུ་ནུབ་སྟེ་གཙུག་ཏོར་རྣམ་པར་རྒྱལ་མ་
ངན་སོང་ཐམས་ཅད་ཡོངས་སུ་སྦྱོང་བ་འདི་གསུངས་སོ། །དེའི་ཚེ་གཤིན་རྗེ་ཆོས་ཀྱི་རྒྱལ་པོ་ཡང་དེར་བྱུང་ནས་བཅོམ་ལྡན་འདས་ལ་མཆོད་ཅིང་ཕྱག་འཚལ་ནས་གཙུག་ཏོར་རྣམ་པར་རྒྱལ་མ་འདི་འཆང་བའི་སེམས་ཅན་དེ་དག །བདག་གིས་སྲུང་ཞིང་སྐྱབས་ལ། དམྱལ་བ་ཐམས་ཅད་ལས་ཟློག་པར་བགྱིའོ། །ཞེས་ཁས་བླངས་སོ། །དེ་ནས་རྣམ་པར་རྒྱལ་མ་འདི་བརྒྱ་བྱིན་གྱིས་ལྷའི་བུ་ཤིན་ཏུ་བསྟན་པ་ལ་བཤད། དེས་ཉིན་ཞག་དྲུག་ཏུ་འདི་ཉམས་སུ་བླངས་བས། ཚེ་རིང་ བར ་གྱུར་ཅིང་ངན་སོང་གི་སྐྱེ་སྒོ་ཐམས་ཅད་ཆོད་ནས་ཕུན་སུམ་ཚོགས་པར་གྱུར་ཏེ། ལྷ་ཡི་བུ་དེ་འཁོར་དང་བཅས་ཏེ་བཅོམ་ལྡན་འདས་ཀྱི་དྲུང་དུ་སོང་ནས་ཆེད་དུ་བརྗོད་ཅིང་མཆོད་པ་ཆེན་པོ་བྱས་ཏེ། བཅོམ་ལྡན་འདས་ཀྱིས་བྱང་ཆུབ་ཏུ་ལུང་བསྟན་ཏོ། །གཙུག་ཏོར་རྣམ་པར་རྒྱལ་མ་འདི་ནི་སངས་རྒྱས་གངྒཱའི་ཀླུང་འབུམ་ཕྲག་བརྒྱད་ཅུ་རྩ་བཞིའི་གསུངས་ཤིང་བྱིན་གྱིས་བརླབས་པར་ཡིན་པར་གསུངས་ཤིང་། སེམས་ཅན་ཚེ་ཐུང་བ་དང་། བསོད་ནམས་ཆུང་བ་དང་སྐྱེ་གནས་ངན་པར་སྐྱེ་ བར ་རྣམས་ལ་ཕན་པའི་ཆེད་དུ། འཛམ་བུའི་གླིང་དུ་བཞག་པ་ཡིན་པར་
གསུངས། བརྗོད་མ་ཐག་ཚེ་ཟད་པའི་འཆི་བའི་ཚེ་ཕྱིར་ནུར་ བར ་འགྱུར། སངས་རྒྱས་ཐམས་ཅད་ཀྱིས་གཟིགས་ཤིང་རྒྱུན་དུ་སྲུང་བ་དང་། སྐྱབས་པར་བྱེད་པ་དང་། ངན་སོང་གསུམ་གྱི་གནས་སྟོང་ཞིང་ཞིག་པར་འགྱུར་བ་དང་། སངས་རྒྱས་ཀྱི་སྒོ་ཞིང་ཁམས་ཐམས་ཅད་ཀྱི་ཞིང་སྒོ་ཕྱེ་ བར ་འགྱུར། སྡིག་པ་དང་སྒྲིབ་པ་ཐམས་ཅད་དག་པར་གསུངས། །དུད་འགྲོའི་རྣ་ལམ་དུ་བསྒྲགས་ན་ཡང་དེ་ཕྱིན་ཆད་ངན་འགྲོར་མི་སྐྱེ། ནད་པ་སྨན་པས་བོར་ན་ཡང་ནད་ལས་ཐར། ངན་འགྲོའི་སྐྱེ་བ་རྒྱུན་ཆད་ཤི་ནས་བདེ་བ་ཅན་དུ་སྐྱེའོ། །སྐྱེ་བ་ཐམས་ཅད་ལ་པདྨ་ལས་སྐྱེ་ཞིང་སྐྱེ་བ་དྲན་པར་འགྱུར། རྣམ་པར་རྒྱལ་མ་འདིའི་གཟུངས་ལན་གཅིག་ཐོས་མ་ཐག་བསྐལ་པ་སྟོང་དུ་བསགས་པའི་སྡིག་པ་བྱང་བ་དང་། ངན་སོང་གསུམ་དང་། ལྷ་མ་ཡིན་དང་། གནོད་སྦྱིན་དང་སྲིན་པོ་འབྱུང་པོ་ཤ་ཟ་ལུས་སྲུལ་པོ་དང་། བརྗེད་བྱེད་དང་སྦལ་སྦྲུལ་དང་ཁྱི་དང་གཅན་གཟན་འབུ་སྲིན་རྣམས་སུ་མི་སྐྱེ། རྒྱལ་རིགས་དང་བྲམ་ཟེ་དང་ཚོང་དཔོན་ཆེན་པོའི་རིགས་སུ་སྐྱེ་ཞིང་སངས་རྒྱས་རྣམས་དང་མཇལ་ བར ་འགྱུར་རོ་གསུངས་ན། འདིའི་དབང་ཐོབ་ན་ཕན་ཡོན་རྒྱ་ཆེན་པོ་ཐོབ་ཅིང་ཚེའི་ བར ་
ཆད་སེལ་བ་ནི་ལྟ་སྨོས་ཀྱང་ཅི་དགོས། འདི་བྱ་རྒྱུད་ཡིན་ཅིང་བྱ་རྒྱུད་ཀྱི་རིགས་ཀྱི་གཙུག་ཏོར་གྱི་རིགས་ལས་འཕྲོས་པའི་རྒྱུད་ཡིན། དེ་ལྟར་གཙུག་ཏོར་གྱི་རིགས་ཀྱི་དབང་ཞུ་བའི་ཕྱིར་མཎྜལ་ཕུལ།། ༈ །།ལྷ་མོ་ནོར་རྒྱུན་མའི་དབང་བཤད་བཞུགས་སོ། །འོ་ན་ཁྱེད་རྣམས་ལ་ལྷ་མོ་ནོར་རྒྱུན་མའི་དབང་བསྐུར་བ་ཡིན་ཏེ་ཤཱཀྱ་ཐུབ་པ་ཡུལ་ཀེའུ་བི་ཚེར་མ་ཅན་གྱི་ནགས་ན་བཞུགས་པའི་ཚེ། ཡུལ་དེའི་ཁྱིམ་བདག་ཟླ་བ་བཟང་པོ་ཞེས་བྱ་བ་དབུལ་ཞིང་བཟའ་མི་མང་བ་ཞིག་གིས་བཅོམ་ལྡན་འདས་ལ་ཕྱག་འཚལ་ཞིང་སྐོར་བ་འབུམ་ཐེར་བྱས་ནས། དབུལ་བའི་སྡུག་བསྔལ་དང་ནད་སེལ་བའི་ཐབས་ཞུས་པས་ནོར་རྒྱུན་མ་འདི་བཀའ་བསྩལ་པས། ཁྱིམ་བདག་ཟླ་བ་བཟང་པོའི་ཁྱིམ་དེ་སྐད་ཅིག་ལ་ནོར་དང་འབྲུ་སྣ་ཚོགས་ཀྱིས་གང་ བར ་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། འདིའི་བྱིན་རླབས་ཀྱིས་གནོད་སྦྱིན་དང་སྲིན་པོ་དང་ཤ་ཟ་སོགས་གདོན་གྱི་རིགས་ཐམས་ཅད་ཀྱིས་གནོད་པར་མི་བྱེད། འདི་ཐོས་པ་ཙམ་གྱིས་ཀྱང་བདེ་བ་དང་ལོ་ལེགས་པར་གསུངས་སོ། །འདི་ཡི་མཐུས་མུ་གེ་དང་ནད་དང་འཆི་བ་འབྱུང་ བར ་མི་འགྱུར། འདི་ནི་སེམས་
ཅན་དབུལ་པོ་དང་ནད་མང་བ་དང་དགྲ་མང་བ་རྣམས་ལ་ཕན་པའི་ཕྱིར་སངས་རྒྱས་ཐམས་ཅད་ཀྱིས་གསུངས་སོ། །ནོར་རྒྱུན་མའི་སྒྲུབ་ཐབས་ལས། འདི་ཡི་དམ་དུ་བྱས་ན་ནོར་དང་འབྲུ་དང་ལོ་ཐོག་བང་མཛོད་དང་རིགས་རྒྱུད་རྐང་འགྲོས་མ་ཧེ་རྟ་ཕྱུགས་ཐམས་ཅད་འཕེལ། དུས་ཁྱད་པར་ཅན་ནམ་རྒྱུན་དུ་མཆོད་ན་ནོར་ཐམས་ཅད་འཕེལ། གཏོར་མའི་བཀའ་བསྒོ་བྱས་ན་དགྲ་དང་ཆོམ་རྐུན་གྱིས་མི་ཚུགས་ནོར་དང་ལོངས་སྤྱོད་རྒྱན་དང་ལྡན་ནོ། །གསོལ་བ་བཏབ་ན་ནོར་ཕྱུགས་འབྱུང་། རིན་པོ་ཆེའི་ཆར་མངོན་སུམ་དུ་འབབ་པ་ཡོད་སྐད་ཅེས་གསུངས་སོ། །དེ་ལྟར་བསོད་ནམས་མངའ་ཐང་འཕེལ་ཞིང་ནད་ཐམས་ཅད་ཞི་བ་ལ་མཆོག་ཏུ་བསྔགས་པ་འདི་བྱ་རྒྱུད་དེ་བཞིན་གཤེགས་པའི་རིགས་ཀྱི་གནས་གཙང་མའི་རིགས་ཡིན་པར་བཤད། དེ་ལྟ་བུའི་དབང་ཞུ་བའི་ཕྱིར་མཎྜལ་ཕུལ།། ༈ །།ཛི་ནག་གི་དབང་བཤད་བཞུགས་སོ། །འོ་ན་ད་ལམ་ཁྱེད་རྣམས་ལ་ཁྲོ་ཞིང་སྒེག་པའི་ཛམྦྷ་ལ་ནག་པོའི་དབང་བསྐུར་བ་ཡིན་ཏེ། འདི་ཡི་ངོ་བོ་ནི་བཅོམ་ལྡན་འདས་རྡོ་རྗེ་སེམས་དཔའི་སྤྲུལ་པ་ཡིན་ཏེ། བྱང་ཕྱོགས་ལྕང་ལོ་ཅན་དུ་རྒྱལ་པོ་རྣམ་ཐོས་སྲས་དང་། ཀླུའི་རྒྱལ་པོ་
དགའ་བོས་བུ་མོའི་སྲས་སུ་འཁྲུངས། མ་ཀླུ་མོ་ཡིན་པས་སྤྲུལ་མཇུག་བྱུང་བ་ལ། ཡབ་མ་བརྙེས་པས་སྦྲུལ་མཇུག་ནང་དུ་རྔུབ་པས་གསོས་པ་འཁྱིལ་བའོ། །ཡབ་དང་ཡུམ་གྱིས་ལྷ་དང་ཀླུའི་ནོར་བུ་རིན་པོ་ཆེ་ཐམས་ཅད་བྱིན་པས་ཀླུ་དང་རྣམ་སྲས་གཉིས་ཀའི་དངོས་གྲུབ་འདི་ལ་ཡོད་པར་བཤད། །འདིའི་རྒྱུད་དངོས་གྲུབ་ཁྲོས་ཆེན་ཞེས་བྱ་བ་བློ་ནི་བླ་མེད་ཕ་རྒྱུད་ཡིན་ཅིང་དེ་ལ་བརྟེན་ནས་རྡོ་རྗེ་གདན་པས་མཛད་པའི་སྒྲུབ་ཐབས་ནི་འདི་ཡིན། པཎྜི་ཏས་བསྒྲུབས་པས་ཞག་རེ་ལ་ཡང་ལོངས་སྤྱོད་གནས་ཁང་ཁེངས་པ་བྱུང་བ་ཉིན་རེ་བཞིན་དགེ་འདུན་ལ་གཏོང་བ་ཡིན་སྐད། འདི་ཡི་སྒྲུབ་སྐོར་རྒྱས་པ་འགོས་ལོཙྪ་བས་བསྒྱུར་བ་དང་པཎ་ཆེན་ཤཱཀྱ་ཤྲཱི་ནས་བརྒྱུད་པ་དང་གཏེར་ཁ་རྣམས་ནས་ཀྱང་རྒྱ་ཆེར་འབྱུང་སྟེ་དེ་དག་གིས་ཉམས་ལེན་རྒྱུན་ཁྱེར་ནི་ཛ་ནག་གིས་ཆུ་གཏོར་བཏང་བ་འདི་གར་འཐུས། ཛཾ་ནག་སྲོག་གཟུངས་ཀྱི་དོན་བསྡུས་ཀྱང་ཆུ་གཏོར་ནང་གི་སྔགས་རིང་ཐུང་གཉིས་ལ་འདུས་པས་སྒྲ་ཐོས་པ་ཙམ་གྱིས་ལོངས་སྤྱོད་དང་ལྡན་པར་འགྱུར་རོ། །ལན་གཅིག་བཀླགས་པའམ་བསྒྲུབས་པ་ཙམ་གྱིས་སྐྱེ་བ་ལྔ་བརྒྱ་ལ་དབུལ་བའི་སྡུག་བསྔལ་ལས་ཐར་བ་འགྱུར་
རོ། །ཞེས་གསུངས་ན་འདིའི་དབང་ཐོབ་ན་ཕན་ཡོན་ལྟ་ཅི་སྨོས་ཏེ་དེ་ལྟ་བུའི་དབང་ཞུ་བའི་ཕྱིར་མཎྜལ་ཕུལ།། ༈ །།ཛཾ་སེར་ལོ་རྒྱུས་བཞུགས་སོ། །འོ་ན་ཛམྦྷ་ལ་སེར་པོ་འདི་ནི་ངོ་བོ་སངས་རྒྱས་ཐམས་ཅད་ཀྱི་སྦྱིན་པའི་ཕ་རོལ་ཏུ་ཕྱིན་པའི་རང་གཟུགས་ཡིན་པས། བསྐལ་པ་དཔག་ཏུ་མེད་པའི་སྔོན་རོལ་ནས་ཡོད་པས། བཅོམ་ལྡན་འདས་ཤཱཀྱ་ཐུབ་པ་ཡང་དང་པོ་ཤིང་ཐུན་དབུལ་པོ་གཅིག་ཏུ་སྐྱེས་པ་ན་འདི་བསྒྲུབས་པས་རྒྱལ་པོར་གྱུར་ཏེ་ལོངས་སྤྱོད་ཆེན་པོར་བྱུང་། དེ་སྦྱིན་པར་བཏང་བས་ས་དང་པོ་ཐོབ། དེ་བཞིན་སངས་རྒྱས་ཐམས་ཅད་ཀྱང་འདི་ལ་བརྟེན་ནས་ས་དང་པོ་ཐོབ། དེ་ནས་སངས་རྒྱས་པ་ཡིན་པས་སངས་རྒྱས་ཐམས་ཅད་ཀྱིས་ཡབ་ཡིན་པར་གསུངས་སོ། །བསྟན་པ་འདི་ལ་ནི་རྒྱལ་པོ་རྣམ་ཐོས་སྲས་ལ་སྲས་སྟོང་ཡོད་པའི་མཆོག་གསུམ་གྱི་གཅིག་ཡིན། འདི་བྱ་རྒྱུད་ནོར་བུའི་རིགས་ཡིན་པར་བཤད། གཞན་བླ་མེད་རྡོ་རྗེ་གུར་གྱི་རྒྱུད་དང་རྒྱུད་སྡེ་མཐའ་དག་ནས་ཀྱང་བཤད་སྒྲུབ་ཐབས་ཀྱང་རྒྱས་བསྡུས་མང་དུ་བྱུང་སྟེ་ཛོ་སེར་ཆུ་སྦྱིན་འདི་ལ་དོན་འདུས་ཕན་ཡོན་ཛམྦྷ་ལའི་རྒྱུད་གནོད་གནས་དབང་པོའི་རྟོགས་བརྗོད་ལས། བཅོམ་ལྡན་འདས་
ཀྱིས་བཀའ་སྩལ་པ། དགེ་བའི་རྩ་བ་མ་བསགས་པའི་རྣ་བའི་ཁུང་བུར་ཐོས་ཤིང་གྲག་པར་མི་འགྱུར་རོ། །གཞན་ཡང་དགེ་བའི་རྩ་བ་མ་བསགས་པའི་སེམས་ཅན་རྣམས་ཀྱིས་ཉན་པ་དང་བྲི་བ་དང་། ཀློག་པ་ཙམ་ཡང་ནུས་པར་མི་འགྱུར་རོ། །སེམས་ཅན་གང་གིས་སྙིང་པོ་འདི་འཛིན་པ་ངའི་རྗེས་སུ་བཟུང་ བར ་འགྱུར་ཞིང་ཕྱིར་མི་ལྡོག་པར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །ངན་འགྲོར་སྐྱེ་ བར ་མི་འགྱུར་རོ། །མཐོང་བ་ཙམ་གྱིས་ནད་འབྱུང་ བར ་མི་འགྱུར་རོ། །དབུལ་པོ་དང་ཡིད་མི་བདེ་བ་དང་ལུས་ཀྱི་ཟུག་རྔུ་འབྱུང་ བར ་མི་འགྱུར་རོ། །སེམས་ཅན་ཐམས་ཅད་ཀྱིས་བསམ་པ་ཡོངས་སུ་རྫོགས་པར་བྱེད་པར་འགྱུར་རོ། །མཁས་པ་རྣམས་ཀྱིས་མཆོད་པའི་གནས་སུ་འགྱུར་རོ། །ལྷ་ཐམས་ཅད་དང་ཀླུ་དང་གནོད་སྦྱིན་རྣམས་འདུས་པས་ཀྱང་སྔགས་འདི་འཛིན་པའི་ཡོན་ཏན་དང་ཕན་ཡོན་རྟོགས་པར་མི་ནུས་སོ། །ཞེས་དང་། གནོད་ནས་རྒྱལ་ བར ་བརྗོད་པའོ། །མདོར་ན་འདི་ལས་གཞན་པ་ཡི། །དེ་བཞིན་གཤེགས་པ་ཐ་དད་པའི། །དེ་བཞིན་གཤེགས་པ་གཞན་མེད་
དོ། །འདི་འཛིན་པས་དེ་བཞིན་གཤེགས་པ་ལ་མཆོད་པའི་གནས་ཡོངས་སུ་བྱས་པར་འགྱུར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་རྟག་ཏུ་བྱིན་གྱིས་རླབས་པའོ། །ཕ་རོལ་ཏུ་ཕྱིན་པའི་སྟོབས་དང་ས་ཐོབ་པར་འགྱུར་རོ། །ཞེས་གསུངས་པས་དེ་ལྟ་བུའི་དབང་ཞུ་བའི་ཕྱིར་མཎྜལ་ཕུལ།། ༈ །།ཁྲོ་བོ་མི་གཡོ་བའི་ལོ་རྒྱུས་བཞུགས་སོ། །འོ་ན་ད་ལམ་ཁྱེད་རྣམས་ལ་ཁྲོ་བོ་མི་གཡོ་བའི་དབང་བསྐུར་བ་ཡིན་ཏེ། བཅོམ་ལྡན་འདས་སུམ་ཅུ་རྩ་གསུམ་གྱི་ཁང་པ་བརྩེགས་པ་ན་བྱང་ཆུབ་སེམས་དཔའ་དཔག་ཏུ་མེད་པས་བསྐོར་ནས་བཞུགས་པའི་ཚེ་བྱང་ཆུབ་སེམས་དཔའ་བྱམས་པས། འཛམ་བུ་གླིང་གི་ལྷ་ཀླུ་གནོད་སྦྱིན་ཤ་ཟ་མ་རུངས་པ་རྣམས་ཀྱིས་མི་ནད་ཕྱུགས་ནད་ཡམས་ནད་དུས་མ་ཡིན་པར་འཆི་ བར ་བྱེད་ན་དེ་དག་ཞི་ བར ་མཛད་དུ་གསོལ་ཞེས་ཞུས་པས། བཅོམ་ལྡན་འདས་ཀྱི་སྐུ་ཡི་བ་སྤུའི་བུ་གའི་ཁུང་ནས་མེ་ལྕེ་རབ་ཏུ་འབར་བས་ཁམས་གསུམ་པོ་རབ་ཏུ་འབར་ཞིང་ཞབས་ཀྱི་པུས་མོ་ས་ལ་བརྡབས་པས། ཁྲོ་བོ་མི་གཡོ་བའི་སྤྲུལ་པ་ཁྲོ་བོ་དཔག་ཏུ་མེད་པ་དང་བཅས་པ་བྱུང་ནས། ནམ་མཁའ་ལ་བཞུགས་ནས་ལྷ་ཀླུ་
གནོད་སྦྱིན་རྣམས་རབ་ཏུ་སྐྲག་པར་བྱེད་ཅིང་འཇིག་རྟེན་སྐྱོང་བ་ཐམས་ཅད་དབང་དུ་སྡུད་ཅིང་ཤ་ཟ་དང་སྲིན་པོ་སོགས་མ་རུངས་པ་ཐམས་ཅད་འཇོམས་པར་གྱུར་ཏོ། །དེ་ནས་ཡང་དེའི་ཚེ་ཐུབ་པ་ཆེན་པོས་བདུད་ཐམས་ཅད་ཟིལ་གྱིས་གནོན་པའི་ཏིང་ངེ་འཛིན་ལ་བཞུགས་ནས། ཨོཾ་ཨཱཿཿཧཱུྃ་གསུངས་པས་དཔལ་མགོན་བདུན་ཅུ་དང་ལྷ་མ་སྲིན་སྡེ་བརྒྱད་ཐམས་ཅད་སྐད་ཅིག་ལ་དེར་འདུས་སོ། །དེའི་ཚེ་བདུད་ཐམས་ཅད་དེར་ལྷགས་ནས་བྱང་ཆུབ་ཆེན་པོ་ལ་ བར ་དུ་གཅོད་པར་བརྩམས་སོ། །དེའི་འཁོར་རྣམས་ཀྱིས་བཅོམ་ལྡན་འདས་ལ་བདུད་ཞི་ བར ་མཛད་དུ་གསོལ་ཞེས་ཞུས་པས། བཅོམ་ལྡན་འདས་ཀྱིས་བདུད་ལས་རྒྱལ་བའི་ཏིང་ངེ་འཛིན་ལ་བཞུགས་ནས་ཧཱུཾ་ཧཱུཾ་ཧཱུཾ་ཞེས་གསུངས་མ་ཐག་ཏུ་ཉིད་ཀྱི་མདུན་དུ་ཁྲོ་བོ་ཆེན་པོ་མི་གཡོ་བ་སྐུ་མདོག་མཐིང་ནག་ཞལ་ཕྱག་སྟོང་ཕྲག་སྟོང་དང་ལྡན་པ་མཚོན་ཆ་སྣ་ཚོགས་ཐོགས་པ་བྱུང་ནས་བཅོམ་ལྡན་འདས་ཀྱིས་ཁྲོ་བོ་དེ་ལ་བཀའ་བསྒོས་པ། ཁྲོ་བོ་མི་གཡོ་བ་ཁྱོད་ཀྱིས་བདུད་ཐམས་ཅད་སོད་ཅིག་ཆིངས་ཤིག་ཟོ་ཞིག་འཐུང་ཞིག །ཧཱུྃ་ཧཱུྃ་ཕཊ་སོགས་གསུངས་པས། ཁྲོ་བོའི་རྒྱལ་པོ་ཁྲོས་ནས་ཧཱུཾ་ཞེས་ཞལ་གསུམ་ཕྱག་དྲུག་
པར་བྱས་ནས་ཀླུ་ཚོགས་ཐམས་ཅད་ཟོས། །ཕཊ་ཅེས་ཞལ་བཞི་ཕྱག་བརྒྱད་པར་བྱས་ནས་ལྷ་མ་ཡིན་ཐམས་ཅད་མེད་པར་བྱས་སོ། །ཞལ་གཅིག་ཕྱག་གཉིས་པར་བྱས་ནས་ལྷ་ཡི་གདོན་ཚོགས་ཐམས་ཅད་བཅོམ་པར་བྱས་ནས་ཚོགས་ཀྱི་བདག་པོ་གདན་དུ་བྱས་སོ། །གཞོན་ནུའི་ཆ་ལུགས་སུ་བྱས་ནས་པུས་མོ་གཡས་པ་ས་ལ་བཙུགས་ནས་ལྷ་ཡི་བུའི་བདུད་མེད་པར་བྱས་སོ། །གཡོན་པ་ས་ལ་བཙུགས་ནས་བྷི་ན་ཡ་ཀ་མེད་པར་བྱས་སོ། །ༀ་ཙཎྜ་མ་ཧཱ་རོ་ཥ་ན་ཧཱུྃ་ཕཊ༔ གཟུངས་སྔགས་འདི་ནི་སྔགས་ཀྱི་རྒྱལ་པོ་སྟེ་ལན་གཅིག་བརྗོད་པས་འཛམ་བུ་གླིང་གི་ལྷ་ཀླུ་དང་གནོད་སྦྱིན་ལ་སོགས་པ་ཀུན་ཞི་ བར ་འགྱུར་རོ། །རིམས་ཉིན་གཅིག་པ་དང་། ཟླ་བ་གཅིག་པ་དང་། སྡང་དུབ་པ་དང་། རྟགས་པའི་རིམས་དང་། ཡུད་ཙམ་པ་ལས་ཐར་རོ། །འབྲུམ་བུ་དང་། ལྷ་གོར་དང་། ཤུ་བ་དང་། མེ་དབལ་དང་གཡེམ་པ་དག་ཞི་ བར ་འགྱུར་རོ། །ལན་གཅིག་བརྗོད་པས་ཀྱང་མཚམས་མེད་པ་ལ་སོགས་པའི་སྡིག་པ་ཀུན་ཞི་ བར ་འགྱུར་རོ། །འཕགས་པ་མི་གཡོ་བ་སྟོབས་དཔག་ཏུ་མེད་པ་རྟུལ་ཕོད་པའི་རྟོགས་པ་ལས། སེམས་ཅན་ཞི་བས་འདུལ་དཀའ་དང་། །
བགེགས་ཆེན་དང་ནི་ལོག་པར་འདྲེན། །དེ་རྣམས་འདུལ་ བར ་བྱ་བའི་ཕྱིར། །རྫོགས་སངས་རྒྱས་ཀྱིས་རྟག་ཏུ་སྤྲུལ། །མཚན་ནི་མི་གཡོ་ཞེས་གྲགས་པ། །ཁྲོ་བོ་འཕགས་པ་སྟོབས་པོ་ཆེ། །མི་གཡོ་ཞེས་བྱའི་ས་ཐོབ་པས། །མི་གཡོ་དེ་ཡང་འདི་ཡི་མཚན། །བདུད་རྣམས་ཀུན་གྱིས་མི་གཡོ་བས། །བརྟན་པའི་ཡེ་ཤེས་དྲིན་ཆེན་བཟང་། །སངས་རྒྱས་ཀུན་གྱིས་བྱིན་གྱིས་བརླབས། །ཆོས་ཀྱི་དབྱིངས་སུ་རབ་གཞོལ་བས། །རྟག་ཏུ་ཚེ་རིང་ནད་མེད་མཆོག །དངོས་གྲུབ་མྱུར་དུ་སྩོལ་མཛད་པ། །རྟག་ཏུ་བགེགས་རྣམས་གསོད་བྱེད་ཅིང་། །དེ་བཞིན་བདུད་རྣམས་རབ་ཏུ་འཇོམས། །སེམས་ཅན་རྣམས་ནི་བདེ་བའི་ཕྱིར། །རྟོགས་པ་འདི་ནི་རབ་ཏུ་བཤད། །རིམས་དང་སོ་། མིག་གཟེར་ཟུག་དང། །སྐེད་པ་རྩིབ་ལོགས་ལུས་ལས་བྱུང་། །རྣམ་པ་སྣ་ཚོགས་ཀུན་འབྱུང་བ། །ས་སྟེང་ལུས་ཅན་ནད་རྣམས་ནི། །གསང་སྔགས་དྲན་པ་ཙམ་ཉིད་ཀྱིས། །དེ་དག་ཐམས་ཅད་ཟད་པར་འགྱུར། །སེམས་ཅན་ཁམས་ནི་ཐམས་ཅད་ཀྱིས། །བསྟན་པ་གང་ཡིན་བསྲུང་ བར ་མཛད། །ཁྲོ་བོའི་རྒྱལ་པོ་བློ་དང་ལྡན། །སྔགས་པས་མ་
བསྒྲུབས་པར་ཡང་འགྲུབ། །ཁྲོ་བོའི་རྒྱལ་པོའི་བྱིན་རླབས་ཀྱིས། །འདོད་པ་མ་ལུས་འགྲུབ་པར་འགྱུར། །འདི་ནི་དེ་བཞིན་གཤེགས་པའི་རིགས་ཀྱི་ཁྲོ་བོ་ཡིན་ལ་བྱ་སྤྱོད་དུ་བཞེད་པ་མང་ཡང་སྤྱོད་རྒྱུད་དུ་ཞལ་འཆམ་པ་ཡིན། དེ་ལྟ་བུའི་དབང་ཟབ་མོ་ཞུ་བའི་ཕྱིར་མཎྜལ་ཕུལ།། ༈ །ཕྱག་རྡོར་འབྱུང་པོ་འདུལ་བྱེད་ཀྱི་དབང་བཤད་བཞུགས་སོ། །འོ་ན་ད་ལམ་ཁྱེད་རྣམས་ལ་བཅོམ་ལྡན་འདས་འབྱུང་པོ་འདུལ་བྱེད་ཀྱི་དབང་བསྐུར་བ་ཡིན་ཏེ། བཅོམ་ལྡན་འདས་རྡོ་རྗེ་འཆང་ཆེན་པོ་ལ་ལྷ་དབང་ཕྱུག་ཆེན་པོའི་རྒྱུད་འདི་གསུངས་པར་ཞུས་པ་ལ། རྡོ་རྗེ་འཆང་ཆེན་པོའི་འབྱུང་པོ་འདུལ་བྱེད་ཀྱི་རིག་སྔགས་འདི་གསུངས་པ་ཙམ་གྱིས་སྐུའི་བ་སྤུའི་བུ་ག་ནས་རྡོ་རྗེ་འབར་བ་དུ་མ་བྱུང་བས་འབྱུང་པོ་འབྱུང་མོ་ཐམས་ཅད་ཀྱི་ལུས་བསྐམས་ཤིང་། ཚངས་པ་དང་ཁྱབ་འཇུག་དང་བརྒྱ་བྱིན་རྣམས་བསད་པར་གྱུར་ཏོ། །དེ་ལ་ངོ་མཚར་དུ་གྱུར་ནས་སངས་རྒྱས་ཐམས་ཅད་ཀྱིས་ལེགས་སོ། །མ་འོངས་པའི་དུས་ན་འབྱུང་པོ་ཚར་གཅོད་པར་བྱེད་པ་ལེགས་སོ་གསུངས་པས། རྡོ་རྗེ་འཆང་གི་ཤངས་ནས་སོས་པར་བྱེད་པའི་རླུང་ཕྱུང་བས་འབྱུང་པོ་ཐམས་ཅད་སོས་ནས་ལངས་ཏེ་སྐག་ཅིང་རབ་ཏུ་
འདར་ནས། བཅོམ་ལྡན་འདས་ལ་བསྐྱབ་ཏུ་གསོལ་ལོ། །ཁྱད་པར་དུ་འབྱུང་པོ་གཞན་གྱིས་མི་ཐུབ་པ་འཁོར་དང་བཅས་པས་བཅོམ་ལྡན་འདས་ལ་སྐྱབས་སུ་སོང་ནས་སྲོག་སྙིང་ཕུལ་ལོ། །དེར་བཅོམ་ལྡན་འདས་ཀྱིས་བཀའ་བསྩལ་པ། གཞན་གྱིས་མི་ཐུབ་པ་ཁྱོད་ཀྱིས་རིག་སྔགས་འདི་འདོན་པའི་བྲན་གྱིས་ལ་རིན་པོ་ཆེ་སྣ་ཚོགས་དང་བློ་ཟས་དང་གོས་དང་ཡོ་བྱེད་ཐམས་ཅད་ཀྱིས་བསྙེན་བཀུར་གྱིས་ཤིག །དགྲ་དང་རྒྱལ་པོ་དང་གཅན་གཟན་གྱིས་འཇིགས་པ་ཐམས་ཅད་ཟློག་ཅིག །ལེ་ལོ་ཅན་དང་ཚུལ་ཁྲིམས་འཆལ་པ་དང་སྡིག་པ་བྱེད་པ་དང་རྫུན་སྨྲ་བ་རྣམས་ལ་ཡང་ངེས་པར་དངོས་གྲུབ་བྱིན་ཅིག །གལ་ཏེ་དངོས་གྲུབ་མི་སྦྱིན་ན་འབྱུང་པོ་དང་ལྷ་ཀླུ་སྡེ་བརྒྱད་རྣམས་ཀྱིས་མགོ་བོ་རྡོ་རྗེས་འགེམས་ནས་དམྱལ་བ་ཆེན་པོ་བརྒྱད་དུ་ལྟུང་ བར ་བྱེད་དོ། །ཞེས་གསུངས་སོ། །ལྷའི་བུ་དེ་དང་གནོད་སྦྱིན་ཐམས་ཅད་སྐྲག་ནས་སྐྱབས་ཞུས་ཏེ་འདི་འདོན་པའི་བྲན་བྱེད་ཅིང་རིན་།པོ་ཆེའི་སྣ་ཚོགས་ཀྱིས་བསྙེན་བཀུར་བྱེད་པར་ཁས་བླངས། གལ་ཏེ་མ་བྱས་ནས་ཁྲོ་བོའི་རྡོ་རྗེས་སྤྱི་བོ་བཀས་ནས་དམྱལ་བ་ཆེན་པོར་སྐྱེ་ བར ་དམོད་བོར། དཔལ་རྡོ་རྗེ་འཆང་གི་
མཚན་འདི་བརྗོད་པ་ཙམ་གྱིས་འབྱུང་པོ་དང་འབྱུང་མོ་ཐམས་ཅད་མངག་གཞུག་པར་འགྱུར། ཞེས་གསུངས་སོ། །འབྱུང་པོ་གཞན་གྱིས་མི་ཐུབ་པ་འདི་བཟླས་པ་ཙམ་གྱིས་འཇིག་རྟེན་པའི་དངོས་གྲུབ་འགྲུབ་པར་བྱ་ཞིང་། གལ་ཏེ་མ་འགྲུབ་ན་འབྱུང་པོའི་རིགས་རྒྱུད་བརླགས་ནས་ཁྲོ་བོའི་རྡོ་རྗེས་མགོ་བཀས་ཏེ་དམྱལ་བ་ཆེན་པོར་སྐྱེ་བའི་དམོད་བོར་རོ། དཀྱིལ་འཁོར་འདི་ནི་མཐོང་བ་ཙམ་གྱིས་ཀྱང་ཁམས་གསུམ་པའི་རྒྱལ་སྲིད་ཐོབ་ཅིང་འདིའི་རྡོ་རྗེའི་བཟླས་པ་ཙམ་གྱིས་རྡོ་རྗེ་འཆང་དང་མཚུངས་པར་འགྱུར་རོ། །གལ་ཏེ་མ་འགྲུབ་ན་ཡང་གླིང་བཞི་པའི་འཁོར་ལོས་སྒྱུར་བའི་རྒྱལ་པོར་འགྱུར་རོ། །དཔལ་རྡོ་རྗེ་འཆང་ཁྲོ་བོའི་རྒྱལ་པོ་བཟླས་པ་ཙམ་གྱིས་འབྱུང་པོ་ཐམས་ཅད་བྲན་དུ་འགྱུར་རོ། །གལ་ཏེ་སྔགས་པ་ཁྲོས་ན་ཁྲོས་པ་ཙམ་གྱིས་འཇིག་རྟེན་པའི་ལྷ་ཐམས་ཅད་དུམ་བུ་བརྒྱར་ཞིག་པར་འགྱུར་རོ། །ཀླུ་དང་གནོད་སྦྱིན་ཐམས་ཅད་མཐོང་བ་ཙམ་གྱིས་གསོད་ཅིང་འཇིག་རྟེན་པའི་ལྷ་ཐམས་་ཅད་ཧཱུྃ་གི་སྒྲ་ཙམ་གྱིས་བྲོས་པར་བྱེད་དོ། །དངོས་གྲུབ་ཐམས་ཅད་འགྲུབ་པར་བྱེད་པ་སློབ་དཔོན་རྣམས་ལ་ཕན་པའི་དོན་དུ་ཇི་ལྟར་གསུངས་པའི་མན་ངག་བཞུགས་པའི་ཐབས་དེ་
བརྟེན་པར་བྱ་བ་མ་ཡིན་པའི་ལེ་ལོ་ཅན་དང་། སྡིག་པ་བྱེད་པ་དང་། རྫུན་སྨྲ་བ་དང་། ཚུལ་འཆོས་པ་ཅན་དང་། དབུལ་པོ་དང་། ནད་ཀྱིས་གདུང་བ་དང་། ཚེ་ཐུང་བ་དང་། སེམས་མི་བརྟེན་པའི་མི་རྣམས་ཀྱང་སྤྱང་ བར ་མི་བྱ་སྟེ། གལ་ཏེ་ལོངས་སྤྱོད་དང་ནོར་དང་གྲགས་པ་འདོད་ན་ཡང་སྐད་ཅིག་གིས་ཕུན་སུམ་ཚོགས་པར་སྟེར་རོ། །གསང་སྔགས་འདི་ནི་བཀླགས་པས་འགྲུབ་པར་བྱེད་ཅིང་ཤིན་ཏུ་བརྩོན་འགྲུས་དམན་པ་རྣམས་ལ་ཡང་ཅི་ལྟར་བདེ་བ་ལྟར་སེམས་ཅན་ཐམས་ཅད་ལ་བདེ་བ་རབ་ཏུ་སྦྱིན་ཅིང་ཡི་གེ་བཞི་པོ་ཆེར་གསང་བ་དངོས་གྲུབ་ཐམས་ཅད་སྟེར་ བར ་བྱེད་པ་ཀླག་པ་ཙམ་གྱིས་མངོན་པར་འགྲུབ་པར་བྱེད་པ་སྟེ། འདི་ལ་ཐེ་ཚོམ་མི་བྱའོ་ཞེས་གསུངས་སོ། །འདི་ནི་རྒྱུད་སྡེ་བཞིའི་ནང་ནས་སྤྱོད་རྒྱུད་དུ་བཞེད། དེ་ལྟ་བུའི་དབང་ཟབ་མོ་ཞུ་བའི་ཕྱིར་མཎྜལ་ཕུལ།། ༈ །།དཔལ་ཁྲོ་བོ་རྟ་མགྲིན་གྱི་དབང་བཤད་བཞུགས་སོ། །འོ་ན་ད་ལམ་ཁྱེད་རྣམས་ལ་དཔལ་ཁྲོ་བོ་ཆེན་པོ་རྟ་མཆོག་ཧེ་རུ་ཀ་ཡི་དབང་བསྐུར་བ་ཡིན་ལ། དེའི་ལོ་རྒྱུས་ནི་བཅོམ་ལྡན་འདས་བདེ་བ་ཆེན་པོ་འོག་མིན་གྱི་གནས་ན་བཞུགས་པའི་ཚེ། དྲག་བྱེད་སྣ་
ཚོགས་སུ་སྤྲུལ་ཞེས་བྱ་བ་མ་རུངས་བ་ཞིག་སེམས་ཅན་ཐམས་ཅད་ལ་གནོད་པར་བྱེད་པས་དཔལ་རྟ་མཆོག་རོལ་པའི་དཀྱིལ་འཁོར་སྤྲུལ་ཏེ། དེ་བཏུལ་ནས་རྟ་མགྲིན་པདྨ་དབང་ཕྱུག་གི་དཀྱིལ་འཁོར་ཆེན་པོ་རྒྱས་པའི་རྒྱུད་གསུངས། དེས་བདུད་ཀྱི་རྒྱལ་པོ་མྱ་ངན་སྐྱེས་ནས་དུག་ལྔ་རབ་ཏུ་འབར་ཏེ་ཁྲོས་ནས་རང་རང་གི་དྲག་སྔགས་བརྗོད་ཅིང་འཇིག་རྟེན་གསུམ་འཁྲུག་པར་བྱེད། མི་ནད་དང་མུ་གེ་དང་འཁྲུག་པ་དང་མཚོན་ཆའི་ཆར་དང་། ལོ་ཏོག་ཐམས་ཅད་འཇོམས། འབྱུང་པོ་ཐམས་ཅད་འཇིགས་གཟུགས་དང་ཉེས་པ་སྣ་ཚོགས་རྒྱུན་མི་འཆད་པར་བཏང་། ས་གཞི་ཐམས་ཅད་མེ་རུ་འབར་བ་དང་། ཆུས་གང་བ་དང་། དུག་དང་དབྱིག་དུག་ལ་སོགས་པའི་ནད་ནི་རླུང་ལྟར་འཚུབ། མཐོ་རིས་དང་ཐར་པའི་ལམ་ནི་གཅོད། མི་རྣམས་ཀྱི་སེམས་ནི་བསྒྱུར། འགྲོ་དྲུག་སྡུག་བསྔལ་ལ་བཀོད་དོ། །དེར་བཅོམ་ལྡན་འདས་ཀྱི་ཐུགས་ཀ་ནས་ཁྲོ་བོ་རྟ་མགྲིན་གྱི་དཀྱིལ་འཁོར་ཆེན་པོར་སྤྲུལ་ནས་། ཐམས་ཅད་བཏུལ་ཏེ་དམ་ལ་བཏགས། རྟ་མགྲིན་རྟེའུ་སྤྲུལ་ཏེ་བདུད་ཀྱི་ཁོག་པར་ཞུགས་ཏེ་བསྒྲལ། ཁོའི་སེམས་དམ་ལ་བཏགས་དབང་བསྐུར་ཏེ་བསྟན་སྲུང་མ་ཧཱ་ཀཱ་ལ་
ཞེས་བྱ་ བར ་གྱུར་ཏེ་སངས་རྒྱས་སྟོང་གི་བསྟན་པ་བསྲུང་ཞིང་མཐར་འོག་ཕྱོགས་ཀྱི་འཇིག་རྟེན་གྱི་ཁམས་སུ་སངས་རྒྱས་ཐལ་བའི་དབང་པོར་སངས་རྒྱས་པར་ལུང་བསྟན། རྟ་མཆོག་རོལ་པའི་རྒྱུད་རྒྱས་པ་ལེའུ་འབུམ། འབྲིང་པོ་ལ་ཤོ་ལོ་ཀ་འབུམ། བསྡུས་པ་ལ་ལེའུ་བརྒྱ་རྩ་བརྒྱད་མཛད། རྟ་མགྲིན་དྲག་སྔགས་སྤུ་གྲིའི་རྒྱུད་སྟོང་ཕྲག་ལྔ་པ་རྔོག་མ་ལེ་བརྒན་སོགས་པདྨ་གསུང་གི་རྒྱུད་བཅུ་གཉིས་གསུངས། ཕྱིས་སྤྲུལ་སྐུ་ཤཱཀྱ་ཐུབ་པས་རྟ་མགྲིན་གྱི་རྟོགས་པ་བདུན་བརྒྱ་པ་སོགས་མང་དུ་གསུངས་སོ། །དེའི་རྒྱུད་རྣམས་མཆོད་རྟེན་བདེ་བྱེད་བརྩིགས་པ་སོགས་སུ་གཏེར་དུ་སྦས་པས་ལྷ་འདྲེ་དང་མཁའ་འགྲོ་མ་རྣམས་མཆོད་པ་བྱེད་པ་ལ། ཕྱིས་འཕགས་པ་ཀླུ་སྒྲུབ་ཀྱིས་གཏེར་ནས་སྤྱན་དྲངས་སོ། །ཕན་ཡོན་དགོས་པ་ནི། རྟ་མཆོག་རོལ་པ་ཁྲོ་བོ་རྣམས་འདུལ་བའི་རྒྱུད་ཆེན་པོ་ལས། དབང་མཆོག་ཁྲོ་བོ་རྟ་མགྲིན་དང་། །རྒྱུད་རྒྱལ་རིན་ཆེན་ཕུང་པོ་ལ། །གང་ཞིག་མཐོང་ཙམ་མོས་པ་དེ། །དེ་ནི་ནད་སོགས་འཇིགས་ལས་གྲོལ། །གང་ཞིག་ཡི་དམ་ལྷར་བཟུང་བ། །དེ་ནི་སྐྱེ་བ་བདུན་བརྒྱ་རུ། །དམྱལ་བ་ལ་སོགས་སྤངས་བ་སྟེ། །
རྒྱུན་དུ་ལུས་སེམས་ལྷར་འཆང་ཞིང་། །ཞིང་ཁམས་དག་པའི་ས་ལ་རོལ། །ཡི་གེ་རེ་རེ་འབུམ་བཟླས་ན། །ཚེ་འདིར་ཉིད་ལ་ཞལ་མཐོང་འགྱུར། །གཏོར་མ་ཤས་ཅིག་བྱིན་པ་ཡང་། །འཇིག་རྟེན་པ་ལ་དབང་ བར ་འགྱུར། །སྔགས་ཙམ་བརྗོད་པ་བྱས་ན་ཡང་། །དེ་ལ་ལྷ་སྲིན་འཚེ་བ་སྤངས། །རྟ་མགྲིན་དྲེགས་པ་དབང་སྡུད་ཀྱི་རྒྱུད་ལས། འབྲས་བུ་ཐུན་མོང་གྲུབ་ཆེན་བརྒྱད། །མཆོག་ལ་རིག་འཛིན་རྣམ་བཞི་དང་། །སྐུ་གསུམ་སྐུ་བཞི་སྐུ་ལྔ་སོགས། །ཕྱག་རྒྱ་ཆེན་པོ་མཆོག་འགྲུབ་བོ། །ཞེས་དང་། རྟ་མགྲིན་ཡང་གསང་ཁྲོས་པའི་རྒྱུད་ལས། ནམ་ཞིག་དུས་ཀྱི་ཐ་མ་ལ། །གསང་སྔགས་ནང་དགྲས་རྔོད་གཏོང་བྱེད། །དེ་ཚེ་ཟབ་པའི་ཁྱད་འདོན་ན། །ནད་དང་གདོན་དང་སྲུང་བ་དང་། །ཕྲིན་ལས་དམིགས་པ་གང་བྱེད་ཀྱང་། །རང་ཉིད་རྟ་མགྲིན་སྐུར་གསལ་ན།། །སུས་ཀྱང་ཚུགས་པར་མི་འགྱུར་ཏེ། །སྟོང་པའི་གོ་ཆ་བླ་ན་མེད། །འདི་ནི་སྲུང་བའི་རྒྱལ་པོ་ཡིན། །ཞེས་དང་། ཨོ་རྒྱན་རིན་པོ་ཆེའི་ཞལ་ནས། དབང་རྫོགས་སྐྱེས་བུ་སུ་དང་སུས། །མཐས་ཀྱང་སྲིད་པ་ བར ་དོ་ན། །བདེ་ཆེན་འབར་བའི་གཞལ་ཡས་སུ། །ཡི་དམ་ལྷ་ཡིས་
ཁྲིད་པར་འགྱུར། །ཅེས་དང་། དམ་ཆོས་པདྨ་དཀར་པོ་ཤིན་ཏུ་རྒྱས་པའི་མདོ་སྡེའི་རྒྱལ་པོ་དང་། རྟ་མགྲིན་རྣམ་པར་བཀོད་པའི་མདོ་ལས། བཅོམ་ལྡན་འདས་ཀྱིས་བྱང་ཆུབ་སེམས་དཔའ་དཔལ་རྟ་མགྲིན་ལ་བཀའ་བསྩལ་པ། འཇིག་རྟེན་ཆགས་ལུགས་ཐམས་ཅད་རྒྱས་པར་གསུངས་ནས། རྡོ་རྗེ་དེ་དང་ཆུ་ཆེན་པོ་དེ་དང་རླུང་ཆེན་པོ་དེ་རྣམས་ཀྱི་ནང་ན་ཡང་སེམས་ཅན་མཐའ་ཡས་ཤིང་བསམ་གྱིས་མི་ཁྱབ་པ་ཞིག་ཡོད། དེ་དག་གིས་ཁྱོད་ཀྱི་མིང་ཐོས་སམ་བརྗོད་ན་སེམས་ཅན་དེ་དག་བླ་ན་མེད་པའི་བྱང་ཆུབ་དུ་འགྲུབ་སྟེ་ས་ཐོབ་ཀྱི་བྱང་ཆུབ་སེམས་དཔའ་ཞེས་བྱའོ། །གནམ་ས་འདི་གཉིས་ བར ་ན་ཡང་སེམས་ཅན་དཔག་ཏུ་མེད་པ་ཞིག་ཡོད་དེ། ཕྱོགས་མཚམས་ཐམས་ཅད་ན་གནས་པའི་སེམས་ཅན་ཐམས་ཅད་ཀྱིས་ཁྱོད་ཀྱི་མིང་འདི་ཐོས་སམ་རིགས་པ་འདི་བརྗོད་ན་མངོན་པར་ཤེས་པ་སྣ་ཚོགས་པས་སེམས་ཅན་གྱི་དོན་བྱེད་ཅིང་། ནམ་མཁའ་ལ་འགྲོ་བ་དང་ས་ལ་འཛུལ་བ་དང་། མཚན་མ་སྣ་ཚོགས་ཀྱིས་སེམས་ཅན་གྱི་དོན་བྱེད་ཅིང་། རྣལ་འབྱོར་ཆེན་པོའི་ཐེག་པ་ཅིག་གི་ལམ་འགྲུབ་བོ། །ཞེས་གསུངས་སོ། །འདི་ནི་རྒྱུད་སྡེ་བཞི་ཀ་
ནས་གསུངས་ཏེ་རྟ་མགྲིན་གྱི་རྟོགས་པ་བདུན་བརྒྱ་པ་ནས་གསུངས་པ་འདི་ནི་བྱ་རྒྱུད་པདྨའི་རིགས་སུ་ངེས། དེ་ལྟར་རྟ་མགྲིན་གྱི་རིགས་འགའ་ཞིག་གི་དབང་ཞུ་བའི་ཕྱིར་མཎྜལ་། ཕུལ།། ༈ །།ཁྲོ་བོ་ཁམས་གསུམ་རྣམ་རྒྱལ་གྱི་དབང་བཤད་བཞུགས། འོ་ན་ད་ལམ་ཁྱེད་རང་རྣམས་ལ་ཁྲོ་བོ་ཁམས་གསུམ་རྣམ་རྒྱལ་གྱི་དབང་བསྐུར་བ་ཡིན་ཏེ། དེ་ཡི་ལོ་རྒྱུས་ནི་རྣལ་འབྱོར་རྒྱུད་ཀྱི་བཤད་རྒྱུད་རྡོ་རྗེ་རྩེ་མོ་ནས་གསུངས་པ་ཟུར་ཙམ་བཤད་ན། རི་རབ་ཀྱི་རྩེ་མོ་ནོར་བུའི་གཞལ་ཡས་ཁང་ན་ཐུབ་པ་རྣམ་པར་སྣང་མཛད་འཁོར་དང་བཅས་པ་བཞུགས་པའི་ཚེ་སྟོང་གསུམ་གྱི་བདག་པོ་དབང་ཕྱུག་ཆེན་པོ་ལ་ལྷ་ཐམས་ཅད་ཀྱིས་ཕྱག་འཚལ་ཞིང་། དེས་ལོག་པའི་ལམ་བསྟན་པ་ལ་ཐམས་ཅད་ཞུགས་སོ། །དེར་སངས་རྒྱས་ཐམས་ཅད་ཀྱིས་གསོལ་བ་བཏབ་པས། དེ་ནས་ཕྱག་ན་རྡོ་རྗེ་འཇིག་རྟེན་གསུམ་རྒྱལ་གྱི་སྐུར་བཞེངས་ནས་ཧཱུྃ་བཞིའི་སྔགས་གསུངས་པས་ཁྲོ་བོའི་ཚོགས་དཔག་ཏུ་མེད་པ་སྤྲོས་ནས་དབང་ཕྱུག་གི་དམག་ཚོགས་རྣམས་དང་སྟོབས་འགྲན་ཏེ། གདུག་པ་ཅན་རྣམས་ཁ་སྦུབ་ཏུ་འགྱེལ། དབང་ཕྱུག་ལ་སོགས་པ་མགོ་སྟེང་ལྡོག་སྟེ་གཡོ་འགུལ་མེད་པར་ཤི་བ་ལྟར་གྱུར་
ཏོ། །བཅོམ་ལྡན་འདས་ཀྱིས་དེ་བསད་པར་མ་བྱེད་གསུངས་པས་སོས་པའི་སྔགས་གསུངས་པ་ན་ཐམས་ཅད་སྡུག་བསྔལ་དང་བྲལ་ནས་སོས། ཐམས་ཅད་བཅོམ་ལྡན་འདས་ལ་སྐྱབས་ཞུས་ཀྱང་དབང་ཕྱུག་ནི་ཤི་ཡང་སླ་ཡི་སྐྱབས་མི་ཞུ་ཟེར། །དེ་ནས་ཞབས་འོག་ཏུ་མནན་ཅིང་གཟིར་བས་དབང་ཕྱུག་ཤི་སྟེ་འོག་ཕྱོགས་སངས་རྒྱས་ཀྱི་ཞིང་དུ་ཐལ་བའི་དབང་ཕྱུག་སྒྲ་དབྱངས་ཞེས་བྱ་ བར ་སངས་རྒྱས། འཇིག་རྟེན་སྐྱོང་བ་རྣམས་རྒྱལ་པོ་ཤིའོ་ཟེར་མྱ་ངན་ཆེ་བས། རྣམ་ཤེས་ཀྱི་དུམ་བུ་གཅིག་ལུས་པོར་ཞུགས་ནས་ལང་སྟེ། ཕྱག་རྡོར་གྱིས་བྲན་བྱེད་ཅིང་འཇིག་རྟེན་སྐྱོང་བ་རྣམས་ཀྱིས་རྒྱལ་པོ་བྱེད་དོ། །དེ་ནས་ཕྱག་རྡོར་ཁྲོ་བོ་ཁམས་གསུམ་རྣམ་རྒྱལ་དེས། སེམས་ཅན་ལ་གནོད་པའི་ནད་དང་གདོན་དང་རིམས་ཐམས་ཅད་བཀུག་སྟེ་དམ་ལ་བཏགས། ཕྱག་རྡོར་གྱིས་སྔགས་དང་ཕྱག་རྒྱས་སྲུང་བ་རྣམས་ལ་གནོད་པར་མི་བྱེད་པར་ཁས་བླངས། དེས་ན་འདི་ཡི་དབང་ཐོབ་ན་ནད་གདོན་རིམས་སོགས་ཐམས་ཅད་ཞི་བ་ཡིན། དེ་ལྟར་ཁྲོ་བོ་ཁམས་གསུམ་རྣམ་རྒྱལ་གྱི་དབང་ཞུ་བའི་ཕྱིར་མཎྜལ་ཕུལ།། ༈ །།ཁྲོ་བོ་ཧཱུྃ་མཛད་ཀྱི་ལོ་རྒྱུས་བཞུགས་སོ།། ༈ །
དེ་ཡང་སྔོན་གྱི་དུས་འོག་མིན་རྣམ་སྣང་གི་ཐུགས་ཀ་ནས་རྡོ་རྗེ་སེམས་དཔའ་སྤྲུལ་ནས་ཕྱག་ན་རྡོ་རྗེ་ལ་བཀའ་བསྒོས་པས། ཕྱག་ན་རྡོ་རྗེ་ཁྲོ་བོ་ཧཱུྃ་མཛད་དུ་སྤྲུལ་ནས་འཇིག་རྟེན་གྱི་། དྲེགས་པ་ཅན་ཐམས་ཅད་བཀུག་སྟེ་བཀའ་བསྒོས་ཀྱང་མ་ཉན་ཧཱུྃ་མཛད་ཀྱིས་སྒྲ་བསྒྲགས་པས་ཐམས་ཅད་འགྱེལ་ཏེ་དེ་ནས་བཀའ་ལ་ཉན་པར་གྱུར་ནས་དམ་ལ་བཏགས། དབང་བསྐུར་ཀྱང་དབང་ཕྱུག་ཆེན་པོ་བཀའ་ལ་མ་ཉན་པས་དབང་ཕྱུག་དང་གཡུལ་ཆེན་པོ་བསྐྱེས་ཏེ་དབང་ཕྱུག་ཞབས་འོག་ཏུ་མནན། རེ་ཞིག་དབང་ཕྱུག་བསད་དོ། །དེ་ནས་རྣམ་པར་སྣང་མཛད་ཀྱིས་འདི་བསད་པར་མ་བྱེད་གསུངས་པས་ཧཱུྃ་མཛད་ཀྱིས་སོས་པའི་སྔགས་གསུངས་པས་དབང་ཕྱུག་སོས། ཕྱག་རྡོར་གྱི་བཀའ་ལ་ཉན་པར་ཁས་བླངས། དབང་ཕྱུག་ཀྱང་མ་འོངས་པ་ན་ཐལ་བ་དབང་ཕྱུག་ཏུ་སངས་རྒྱས་པར་ལུང་བསྟན་ཏོ། །དེ་ལྟར་དབང་ཕྱུག་ཆེན་པོ་ལ་སོགས་པ་འཇིག་རྟེན་སྐྱོང་བ་ཐམས་ཅད་འདུལ་ བར ་བྱེད་པ་ཁྲོ་བོ་ཧཱུྃ་མཛད་ཀྱི་དབང་ཞུ་བའི་ཕྱིར་མཎྜལ་ཕུལ།། ༈ །།ཁྲོ་བོ་སྟོབས་པོ་ཆེའི་ལོ་རྒྱུས་བཞུགས་སོ།། ༈ འོ་ན་ད་ལམ་ཁྱེད་རྣམས་ལ་ཁྲོ་བོ་སྟོབས་པོ་ཆེ་ཡི་དབང་བསྐུར་བ་ཡིན་ཏེ་བཅོམ་ལྡན་
འདས་ཀྱིས་བཀའ་སྩལ་པ། རིག་སྔགས་ཀྱི་རྒྱལ་པོ་སྟོབས་པོ་ཆེ་ཞེས་བྱ་བའི་མདོ་སྡེ་འདི་ནི་སེམས་ཅན་དམྱལ་བ་དང་དུད་འགྲོ་དང་ཡི་དྭགས་དང་གཤིན་རྗེའི་འཇིག་རྟེན་གྱི་སྡུག་བསྔལ་ལས་ཐར་ བར ་བྱེད་དོ། །དེས་བསྐལ་པ་སྟོང་ཕྲག་ཉི་ཤུར་ལྷའི་རྒྱལ་པོ་བྱེད་པར་འགྱུར་རོ། །བསྐལ་པ་མཐའ་ཡས་པར་གླིང་བཞི་ལ་དབང་བའི་འཁོར་ལོས་སྒྱུར་བའི་རྒྱལ་པོར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཇོག་པར་བྱེད་དོ། །སྟོབས་པོ་ཆེ་ཞེས་བྱ་བ་ནི་དེ་བཞིན་གཤེགས་པའོ། །སྟོབས་པོ་ཆེ་ཞེས་བྱ་བ་ནི་ལག་ན་རྡོ་རྗེའོ། །སྟོབས་པོ་ཆེ་ཞེས་བྱ་བ་ནི་ཆོས་ཀྱི་ཕུང་པོའོ། །འདིའི་དབང་བསྐུར་ན་བཀྲ་མི་ཤིས་པ་ཐམས་ཅད་ལས་གྲོལ་ བར ་འགྱུར་རོ། །ཞེས་གསུངས་སོ། །འདི་ནི་བྱ་རྒྱུད་པདྨའི་རིགས་ཀྱི་ཕོ་ཉའི་རིགས་ཡིན་པར་བཤད། འདིའི་དབང་ཐོབ་ན་ཐན་དང་ལྟས་ངན་གྱི་རིགས་མཐོང་བའམ་བྱུང་བ་དང་མོ་དང་རྨིས་ལྟས་ངན་པ་སོགས་བཀྲ་མི་ཤིས་པ་ཐམས་ཅད་ཞི་ བར ་བཤད་པས། དེ་ལྟ་བུའི་དབང་ཞུ་བའི་ཕྱིར་མཎྜལ་ཕུལ། ༈ འཇམ་དཔལ་གཤིན་རྗེ་གཤེད་ཀྱི་དབང་བཤད་བཞུགས་སོ།། ༈ འོ་ན་ད་ལམ་ཁྱེད་
རྣམས་ལ་འཇམ་དཔལ་གཤིན་རྗེ་གཤེད་ཀྱི་སྐོར་འགའ་ཞིག་གི་དབང་བྱེད་པ་ལ་ལོ་རྒྱུས་ཅུང་ཟད་ཞུ་ན། གཤིན་རྗེ་གཤེད་དམར་ནག་གི་རྒྱུད་གཉིས་ཀའི་ཚིག་མཐུན་པར་གཏམ་རྒྱུད་ཀྱི་ལེའུ་ལས། བཅོམ་ལྡན་འདས་ཐུབ་པ་ཆེན་པོ་མངོན་པར་བྱང་ཆུབ་པའི་དུས་སུ་བྱང་ཆུབ་ལ་ བར ་དུ་གཅོད་པའི་ཕྱིར་འཇིགས་སུ་རུང་བའི་བདུད་ཀྱི་དཔུང་ཆེན་པོ་མངོན་པར་ལྷགས་པའི་ཚེ་བཅོམ་ལྡན་འདས་བདུད་ལས་རྒྱལ་བའི་ཏིང་ངེ་འཛིན་ལ་བཞུགས་ནས་སྐུ་གསུང་ཐུགས་ལས་གཤིན་རྗེ་གཤེད་ཀྱིས་ཁྲོ་བོ་རྣམས་ཕྱུང་སྟེ་ཕྱག་ན་རྡོ་རྗེ་ལ་ཕྱག་ན་རྡོ་རྗེ་ཁྱེད་འདི་ལྟ་བུའི་གཤིན་རྗེའི་གཤེད་དུ་སྤྲུལ། ཁྲོ་བོའི་གཟུགས་སུ་བསྒྱུར་ལ། བདུད་དང་གནོད་སྦྱིན་ལྷ་མ་ཡིན་དང་ལྷ་སྲིན་རྣམས་ཆོམས་ཤིག །ཆིངས་ཤིག །བཏུལ་ཞིག །སྲེག་ཅིང་འཇིགས་པ་དང་སོད་ཅིག་ཅེས་གསུངས་སོ། །དེ་ལྟར་ཕྱག་ན་རྡོ་རྗེ་གཤིན་རྗེའི་གཤེད་ཀྱི་སྐུར་སྤྲུལ་ནས་བདུད་བཏུལ། ཁྲོ་བོ་འདི་གཞན་ལས་གཟི་བརྗིད་ཆེ་སྟེ། ཁྲོ་བོའི་ནང་ནས་གཤིན་རྗེའི་གཤེད། །དེ་མཐོང་ནས་ནི་ཁྲོ་བོ་གཞན། །ཐམས་ཅད་ཀུན་ཀྱང་ལག་ཆ་འཆོར། །ཞེས་གསུངས་སོ། །ཁྲི་ཡི་སྔགས་ཀྱིས་འབྱུང་པོ་རྣམས། །མཁའ་འགྲོ་མ་
རྣམས་སྟོང་གིས་ཏེ། །གཤིན་རྗེའི་གཤེད་པོ་རབ་སྦྱོར་བས། །ཡི་དྭགས་རྣམས་ནི་གཞོམ་ཞིང་བསད། །རྣལ་འབྱོར་བདག་ཉིད་འབུམ་བཟླས་ན། །ལས་ཀུན་དེ་ཡིས་བྱེད་པར་འགྱུར། །བྱེ་བ་བཟླས་ན་དངོས་གྲུབ་སྟེར། །བྱེ་བ་ལྔ་ཡིས་སྨོས་ཅི་དགོས། །གསང་སྔགས་འབུམ་ཕྲག་གཅིག་བཟླས་ནས། །བདག་ལ་སྒྲུབ་པ་བྱེད་པ་དང་། །རབ་ཏུ་སྤྱོད་པར་འགྱུར་བ་ཡིན། །འཛམ་བུའི་གླིང་ན་འཚོ་བ་ཡི། །དངོས་གྲུབ་རབ་ཏུ་སྟེར་ བར ་བྱེད། །རྒྱུད་རྒྱལ་རྒྱུད་ཀྱི་མཆོག་གྱུར་པ། །སྔགས་དང་བསམ་གཏན་བརྗོད་ཉུང་བས། །ཀློག་པ་ཙམ་གྱིས་འགྲུབ་པར་འགྱུར། །གང་སྡིག་ལས་ལ་དགའ་བ་དང། །དད་པ་དམན་པས་འགྲུབ་མི་འགྱུར། །གང་ཡང་སྡིག་པ་བྱེད་པ་ཡང་། །སླབ་པར་འཛིན་པར་བྱེད་ན་ནི། །འབད་མེད་དངོས་གྲུབ་ཉིད་འགྱུར་བས། །འགྲུབ་པ་འདི་ལ་ཐེ་ཚོམ་མེད། །ཅེས་དང་། སྔགས་སོགས་གསུངས་ནས། ལྷ་མོ་གསང་སྔགས་རྙེད་དཀའ་འདི། །བདག་གིས་ངོ་མ་ཆོག་པར་བཤད། །འདི་ཡི་སྔགས་ཀྱིས་མཐུ་སྟོབས་ཀྱིས། །བདག་གིས་སངས་རྒྱས་ཉིད་འགྲུབ་སྟེ། །འཇིག་རྟེན་གསུམ་གྱིས་
དབང་ཕྱུག་འགྲོ། །གསང་སྔགས་བརྩོན་པར་སྦྱངས་བྱས་ནས། །སྡེ་དང་བཅས་པ་ བར ་སྣང་ལ། །འགྲོ་འགྱུར་འདི་ནི་ཐེ་ཚོམ་མེད། །རྔ་བོ་ཆེ་ཡི་སྒྲ་བྱའོ། །གང་དང་གང་དུ་སྒྲ་ཐོས་པ། །ཕ་རོལ་སྡེ་ནི་རབ་བྲོས་པ། །རྣམ་པ་རྣམས་ནི་གསལ་ བར ་བྱེད། །ཅེས་དང་། གཤིན་རྗེའི་གཤེད་གདོང་དྲུག་སོགས་ནི་འཇམ་དཔལ་རྩ་རྒྱུད་ནས་ཀྱང་བཤད་པས་བྱ་རྒྱུད་ཀྱང་ཡོད་པ་གཤིན་རྗེ་གཤེད་དམར་འཇིགས་གསུམ་དགྲ་ནག་གདོང་དྲུག་སོགས་ཕལ་ཆེ་བ་གསང་སྔགས་བླ་ན་མེད་པའི་རྒྱུད་སྡེ་ཡིན་ཏེ་དེ་ལ་ཡང་རིགས་གསུམ་ལས་ཕ་རྒྱུད་ཡིན་ནོ། །སྒྲུབ་ཐབས་འདི་ཡི་གཞུང་ལ་གཤིན་རྗེ་གཤེད་ཀྱི་རིགས་མང་ཞིག་བྱུང་བ་རྣམས་ཀྱི་དབང་ཞུ་བའི་ཕྱིར་མཎྜལ་ཕུལ།། ༈ །།གཤིན་རྗེ་དགྲ་ནག་གི་དབང་བཤད་བཞུགས་སོ།། ༈ འོ་ན་ད་ལམ་ཁྱེད་རྣམས་ལ་གཤིན་རྗེའི་གཤེད་དགྲ་ནག་གི་དབང་བསྐུར་བ་ཡིན་ཏེ་དེ་ཡང་དགྲ་ནག་འཁོར་ལོ་ལས་ཐམས་ཅད་འགྲུབ་པའི་རྒྱུད་ཆེན་པོ་ལས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་སྐུ་གསུང་ཐུགས་རྡོ་རྗེ་བཙུན་མོའི་བྷ་ག་ལ་ཞུགས་ཏེ་གཏི་མུག་རྡོ་རྗེ་ལ་སོགས་པའི་སེམས་དཔའ་དང་མེ་ཏོག་མ་ལ་སོགས་པའི་སེམས་མའི་
ཚོགས་དཔག་ཏུ་མེད་པས་བསྐོར་ནས་བཞུགས་པའི་ཚེ། ལྷ་མོ་བེ་ཏ་ལི་སྟན་ལས་ལངས་ཏེ་ཐལ་མོ་སྦྱར་ནས་བཅོམ་ལྡན་འདས་ད་ལྟ་འདི་ན་གདུག་པ་ཅན་རྣམས་ཀྱིས་སེམས་ཅན་ལ་འཚེ་བ་དང་མ་འོངས་པ་ན་ཡང་ཐེག་པ་ཆེན་པོ་དང་སེམས་ཅན་ལ་འཚེ་ བར ་བྱེད་པ་འབྱུང་ན་དེ་ཇི་ལྟར་ཚར་གཅོད་པར་བགྱི་ཞེས་ཞུས་པས། བཅོམ་ལྡན་འདས་བགེགས་ཐམས་ཅད་འཇོམས་པའི་ཏིང་ངེ་འཛིན་ལ་བཞུགས་ནས་ཧཱུྃཞེས་བྱ་བའི་སྙིང་པོ་འདི་གསུང་མ་ཐག་ཏུ་བཅོམ་ལྡན་འདས་ཉིད་ཞལ་དྲུག་ཕྱག་དྲུག་ཞབས་དྲུག་པར་གྱུར་ནས་ཨོཾ་ཧྲཱིཿཥྚི་སོགས་སྔགས་འདི་བཞད་པ་དང་བཅས་པས་གསུངས་ཤིང་མ་ཧེའི་སྟེང་ན་ལས་ཀྱི་གཤིན་རྗེ་ཕོ་ཉ་མནན་ཏེ་བཞུགས་སོ། །ལྷ་དང་ལྷ་མ་ཡིན་དང་བདུད་ཐམས་ཅད་སྐྲག་ཅིང་འདར་ནས་བཀའ་ཉན་ཅིང་འདུད་ཚངས་པ་དང་དབང་པོ་ལ་སོགས་ཐམས་ཅད་ཀྱིས་ཕྱག་འཚལ་ཞིང་འདུད་པར་གྱུར་ཏོ། །དེ་ནས་དུས་དེ་ཉིད་དུ་གཤིན་རྗེའི་གཤེད་གདོང་དྲུག་འདིའི་རྒྱུད་རྣམས་གསུངས་སོ། །གཞན་ཡང་འཇམ་དཔལ་རྩ་བའི་རྒྱུད་ལས་ཀྱང་འབྱུང་སྟེ་འཇམ་དཔལ་གཞོན་ནུར་གྱུར་པའི་ཁྲོ་བོ་ཆེན་པོ་གཤིན་རྗེའི་གཤེད་ཅེས་བྱ་བ་ཡིན་ཏེ་གཤིན་རྗེའི་
རྒྱལ་པོ་ཡང་འཇོམས་པ་དང་འགུགས་པར་བྱེད་པ་ཡིན་ན་སེམས་ཅན་གཞན་ལྟ་སྨོས་ཀྱང་ཅི་དགོས་ཞེས་གསུངས་སོ། །དེ་ལ་འདི་ནི་གཙོ་ཆེར་བྱ་རྒྱུད་ཡིན་ཀྱང་རྡོ་རྗེ་གདན་པ་ཆེ་ཆུང་ལྷགི་བྱ་རྒྱུད་རྣལ་འབྱོར་རྒྱུད་ལྟར་ཉམས་སུ་ལེན་ཐབས་ཀྱིས་དབང་དུ་མཛད་ཅིང་། སྒྲུབ་ཐབས་རྒྱ་མཚོ་དང་བརྒྱ་རྩ་གཉིས་ཀ་དང་གཅིག་ཤེས་ཀུན་གྲོལ་སོགས་ནས་ཀྱང་འབྱུང་བའི་དབང་ཟབ་མོ་འདི་ཐོབ་ན་གཤིན་རྗེའི་ཕོ་ཉ་དང་། དུས་མ་ཡིན་པར་འཆི་བ་དང་། དགྲ་སྐག་དུར་མིག་ཏུ་ཚུད་པ་ཐམས་ཅད་ཞི་བ་ཡིན། འདི་ནི་བྱ་སྤྱོད་ནས་གསུངས་པ་མང་ན་ཡང་། གཤེད་སྐོར་རྣམས་ཕལ་ཆེར་བླ་མེད་ཕ་རྒྱུད་དུ་བཞེད་པའང་མང་། གང་ལྟར་ཡང་གཤིན་རྗེ་དགྲ་རྒྱུད་ནག་པོ་ཞེས་རྒྱུད་སྡེ་ཆེན་པོ་ཡིན་པས་དེའི་དབང་ཞུ་བའི་ཕྱིར་མཎྜལ་ཕུལ།། ༈ །།འཁོར་ལོ་བདེ་མཆོག་གི་དབང་བཤད་བཞུགས་སོ།། ༈ འོ་ན་ད་ལམ་ཁྱེད་རྣམས་ལ་འཁོར་ལོ་བདེ་མཆོག་གི་རྒྱུད་དང་འབྲེལ་བའི་དབང་འགའ་ཞིག་བསྐུར་བ་ཡིན་ཏེ་བདེ་མཆོག་འདི་ཡི་ངོ་བོ་ནི་དང་པོའི་སངས་རྒྱས་ཀུན་ཏུ་བཟང་པོ་ཉིད་ཡིན། ཆེ་མཆོག་ཡང་ཐུགས་རྒྱུད་གཅིག་པའི་ཕྱིར་འདི་ཡི་བསྟོད་པ་ལས། ཀུན་བཟང་ཧེ་རུ་ཀ་ལ་
ཕྱག་འཚལ་བསྟོད། །ཅེས་གསུངས་སོ། །ཡུམ་རྡོ་རྗེ་ཕག་མོ་ནི་ཀུན་ཏུ་བཟང་མོ་དང་ཡུམ་ཆེན་མོ་གཟུགས་ཀྱི་སྐུར་བཞེངས་པ་ཡིན་ཏེ། རྡོ་རྗེ་ཕག་མོ་བདེ་མཆོག་ཡབ་ཡུམ། །ཞེས་གསུངས་སོ། །འདིའི་རྒྱུད་ནི་ཐོག་མ་མེད་པའི་དུས་ནས་སངས་རྒྱས་ཐམས་ཅད་ཀྱིས་གསུངས་ཤིང་སེམས་ཅན་བསོད་ནམས་ཀྱི་དབང་གིས་རེས་འགའ་ནུབ་ཅིང་རེས་འགའ་དར་རོ། །འདིའི་རྒྱུད་མཐའ་ཡས་པ་ཡོད་པར་བཤད་ཀྱང་ད་ལྟ་བོད་ཡུལ་འདིར་བཞུགས་པ་རྩ་རྒྱུད་ཉུང་ངུ་དང་བཤད་རྒྱུད་ལ་ཨ་བྷི་དྷ་ན། སྡོམ་པ་འབྱུང་བ། ཧེ་རུ་ཀ་མངོན་འབྱུང་། ཕག་མོ་མངོན་འབྱུང་སོགས་ཡིན། དེ་དག་ཕལ་ཆེར་ཨོ་རྒྱན་གྱི་ཡུལ་དུ་བཞུགས་པ་གྲུབ་ཆེན་རྣམས་ཀྱིས་དབང་ཐོབ་ནས་རིམ་པར་སྤྱན་དྲངས་ནས་སྒྲུབ་ཐབས་མང་དུ་མཛད་པའི་ནང་ནས་ཧེ་རུ་ཀ་གཙོ་རྐྱང་ཕག་མོ་དོན་གྲུབ་མ་ཕག་མོ་ལྷ་ལྔ་མགོན་པོ་ཕྱག་བཞི་པ་སོགས་བདེ་མཆོག་གི་རྒྱུད་ནས་བྱུང་བ་འདི་རྣམས་ཀྱི་དབང་ཐོབ་ནས་ཉམས་སུ་བླངས་ན་རབ་ཚེ་འདིར་སངས་རྒྱས། འབྲིང་ བར ་དོ་ནས་དཔའ་བོ་མཁའ་འགྲོས་མཁའ་སྤྱོད་དུ་གདན་འདྲེན། ཐ་མ་ཡང་སྐྱེ་བ་རྒྱབ་རེས་འཁོར་ལོས་སྒྱུར་བའི་རྒྱལ་པོ་
ཐོབ་པར་གསུངས་པས་དེ་ལྟ་བུའི་དབང་ཞུ་བའི་ཕྱིར་མཎྜལ་ཕུལ།། ༈ ཀྱེའི་རྡོ་རྗེའི་དབང་བཤད་བཞུགས་སོ།། ༈ འོ་ན་ད་ལམ་ཁྱེད་རྣམས་ལ་དཔལ་ཀྱེའི་རྡོ་རྗེའི་རྒྱུད་ལས་བྱུང་བའི་དབང་འགའ་ཞིག་བསྐུར་བ་ཡིན་ཏེ། འདི་ཡི་ངོ་བོ་ནི་ཐུགས་མཆོག་བཛྲ་ཧེ་རུ་ཀ་དང་གཅིག་པས་རྙིང་མའི་ཡང་དག་དང་གསར་མའི་དགྱེས་རྡོར་རྣམས་དོན་གཅིག་པར་གསུངས། བཅོམ་ལྡན་འདས་ཀྱིས་རྡོ་རྗེ་བཙུན་མོའི་བྷ་ག་དང་མ་ག་ཏ་དང་གཞན་འཕྲུལ་དབང་བྱེད་དང་འོག་མིན་དུ་ལོངས་སྤྱོད་རྫོགས་པའི་སྐུའི་གསུངས་པའི་དགྱེས་རྡོར་གྱི་རྒྱུད་མཐའ་ཡས་པ་ཡོད་པར་གསུངས་ཀྱང་། ད་ལྟ་བོད་དུ་འགྱུར་ཞིང་ཀུན་གྱིས་གཙོ་བོར་འཛིན་རྒྱུ་རྩ་རྒྱུད་བརྟག་པ་གཉིས་དང་། བཤད་རྒྱུད་རྡོ་རྗེ་གུར་དང་། ཆ་མཐུན་གྱི་རྒྱུད་སམྦུ་ཊི་རྣམས་ནས་གསུངས་པའི་དགྱེས་རྡོར་གཙོ་རྐྱང་དང་བདག་མེད་མ་དང་ཤེར་ཕྱིན་དཀར་མོ་རྣམས་མི་བསྐྱོད་པའི་རིགས་ཡིན། ཀུ་རུ་ཀུལླེ་འོད་དཔག་མེད་ཀྱི་རིགས་ཡིན། རྡོ་རྗེ་སྒོན་མ་རིན་འབྱུང་གི་རིགས་ཡིན། རྒྱུད་གུར་ཕྱག་གཉིས་པ་འདི་ནི་རྣམ་སྣང་གི་རིགས་སུ་རྟོགས། འདི་ལྟ་བུའི་དབང་ཐོབ་ནས་ཉམས་སུ་བླངས་ན་ཚེ་གཅིག་གིས་སངས་རྒྱས་
འགྲུབ། ཉམས་སུ་མ་བླངས་ན་ཡང་དམ་ཚིག་མ་ཉམས་ན་སྐྱེ་བ་བདུན་ནས་སངས་རྒྱས་པར་བཤད་པས་དེ་ལྟ་བུའི་དབང་ཞུ་བའི་ཕྱིར་མཎྜལ་ཕུལ། ཞེས་པ་འདི་ནི་རྒྱུད་འབུམ་ཚང་མ་ལ་ལན་གཉིས་གསུམ་ཙམ་བལྟས་པ་དང་། བུ་སྟོན་གྱིས་མཛད་པའི་རྒྱུད་སྡེའི་རྣམ་བཤད་རྒྱས་པ་དང་། རྗེ་བཙུན་རྩེ་མོས་མཛད་པའི་རྒྱུད་སྡེ་སྤྱིའི་རྣམ་བཞག་དང་། ངོ་ཁྲོ་རབ་འབྱམས་པས་མཛད་པའི་རྒྱུད་སྡེ་སྤྱིའི་རྣམ་བཤད་དང་། སློབ་དཔོན་རྣམས་ཀྱིས་གསུང་རྒྱུན་བསྟུན་ཏེ་དགེ་སློང་རཱ་ག་ཨ་སྱས་སྦྱར་བའི་ཡི་གེ་པ་ནི་དགེ་སློང་བརྩོན་འགྲུས་སོ། །ལྷ་སོ་སོའི་རྒྱུད་སྡེ་ངོས་འཛིན་ལ། ལ་ལ་མི་འཐད་པ་འདྲ་བ་བྱུང་སྲིད་ཀྱང་སྔོན་གྱི་མཁས་པ་རྣམས་ཀྱིས་བཞེད་པ་ལ་ཡང་མི་འདྲ་བ་མང་དུ་འདུག་པས་དེ་དག་གང་རུང་རེ་རེའི་ལུགས་སུ་བྱས་པ་ཡིན་པས་འགལ་ བར ་མི་སེམས། འོན་ཀྱང་འགལ་འཁྲུལ་ཉེས་པའི་ཆ་མཆིས་ན། མཁྱེན་ལྡན་རྣམས་ལ་བཤགས་ཤིང་། འདི་བྲིས་དགེ་བས་འདིའི་དབང་རྒྱུན་དང་ལུང་རྒྱུན་དང་དཔེ་རྒྱུན་ཡུན་རིང་འཕེལ་ཞིང་རྒྱས་ནས། འབྲེལ་པ་ཐོགས་ཚད་བདེ་བ་ཅན་དུ་སྐྱེ་བའི་ལམ་མཆོག་དམ་པར་གྱུར་ཅིག། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།