རྒྱུན་གྱི་གཏོར་བསྔོས་བསྡུས་པ་རྩ་གསུམ་ལྷ་ཚོགས་དགྱེས་པའི་མཆོད་སྤྲིན།
རྒྱུན་གྱི་གཏོར་བསྔོས་བསྡུས་པ་རྩ་གསུམ་ལྷ་ཚོགས་དགྱེས་པའི་མཆོད་སྤྲིན་ཞེས་བྱ་བ་བཞུགས་པའི་དབུ་ཕྱོགས།།
ན་མོ་གུ་རུ། རྒྱུན་གྱི་གཏོར་བསྔོས་བསྡུས་པ་བྱ་བ་ནི། །དབུས་སུ་བླ་མ་གཏོར་མ་ཟླུམ་པོ་གཅིག །གཡས་སུ་ཆོས་སྐྱོང་གཏོར་མ་ཟུར་གསུམ་པ། །གཉིས་པོ་ཤས་བརྒྱན་གཡོན་དུ་དཀར་གཏོར་གཅིག །བསྡུ་ན་ཤ་མེད་གཏོར་མ་ཟླུམ་པོ་གཅིག །རྩེ་ནི་བླ་མ་སྐེད་ནི་ཡི་དམ་དང་། །རྩ་བ་ཆོས་སྐྱོང་ཡུལ་ལྷར་བསྔོ་ཡང་རུང་། །འདོན་སྒོམ་སྦྲགས་ལ་དམིགས་པས་རྒྱས་བཏབ་བོ། །ཧཱུྃ། རང་ཉིད་སྐད་ཅིག་ཡི་དམ་ལྷར་གསལ་བའི། །ཐུགས་ལས་རཾ་ཡཾ་ཁཾ་གསུམ་འཕྲོས་པ་ལས། །མི་གཙང་དྲི་མའི་ཚོགས་ཀུན་བསྲེགས་གཏོར་བཀྲུས། །རླུང་མེ་ཐོད་སྐྱེད་སྟེང་དུ་ཀ་པཱ་ལ། །སྟོང་གསུམ་མཉམ་པའི་ནང་དུ་གཏོར་མའི་རྫས། །ཤ་ལྔ་
བདུད་རྩི་ལྔ་དང་ཡེ་ཤེས་ལྔ། །ཞུ་ཞིང་ཁོལ་བས་ཟག་མེད་བདུད་རྩི་གྱུར། །རིན་ཆེན་སྣོད་དུ་དཀར་གསུམ་གཏོར་མ་ནི། །རོ་བརྒྱ་ནུས་པ་སྟོང་དང་ལྡན་པ་རྣམས། །ཧ་ཧོ་ཧྲཱི༔དང་ཨོཾ་ཨཱཿཧཱུྃ་རྣམས་ཀྱིས། །ཟག་མེད་འདོད་ཡོན་ལྡན་པར་བྱིན་གྱིས་རློབས། །རང་གི་ཐུགས་ཀའི་ས་བོན་འོད་ཟེར་གྱིས། །མགྲོན་རྣམས་ཐམས་ཅད་སྐད་ཅིག་སྤྱན་དྲངས་ནས། །ས་དང་བར་སྣང་ཐམས་ཅད་གང་བར་གྱུར། །ཕེཾ་ཕེཾ་པེ། རང་ལས་སྤྲོས་པའི་མཆོད་པའི་ལྷ་མོ་ནི། །གྲངས་མེད་བྷན་རིན་ཆེན་སྐྱོགས་བསྣམས་ནས། །མགྲོན་རྣམས་ཐམས་ཅད་སོ་སོར་མཆོད་
པས་མཉེས། །ཀུན་བཟང་ཡབ་ཡུམ་དྲུག་པ་རྡོ་རྗེ་འཆང་། །ཡུམ་ཆེན་ཤེས་རབ་ཕ་རོལ་ཕྱིན་མ་སོགས། །ཆོས་སྐུ་སངས་རྒྱས་ཐམས་ཅད་མཆོད་པར་བགྱི། །རིགས་ལྔ་ཡབ་ཡུམ་རྒྱལ་བ་རྒྱ་མཚོ་དང་། །བསྐལ་བཟང་སངས་རྒྱས་སྟོང་ལ་མཆོད་པ་འབུལ། །ཤཱཀ་ཐུབ་ཐུབ་དྲུག་གནས་བརྟན་བཅུ་དྲུག་དང་། །གྲུབ་ཆེན་བརྒྱད་ཅུ་རྗེ་འབངས་ཉི་ཤུ་ལྔ། །མར་མི་དྭགས་གསུམ་བཀའ་བརྒྱུད་ཡ་བཞི་ དང་། །འབྲི་སྟག་ཚལ 
་གསུམ་བརྒྱུད་པར་བཅས་ལ་འདུད། །འཇམ་དབྱངས་བདུན་རྒྱུད་སེང་གེ་དགུ་ཚར་དང་། །ཀརྨ་བཅུ་གསུམ་ཞྭ་དམར་ཉི་ཤུ་གཅིག །ཇོ་བོ་ཁུ་རྔོག་འབྲོམ་དང་རྒྱལ་སྲས་གསུམ། །གཏེར་སྟོན་བརྒྱ་དང་རྗེ་བཙུན་ཆགས་མེད་སོགས། །དྲིན་ཆེན་བླ་མ་ཐམས་ཅད་མཆོད་པར་བགྱི། །སྨན་ལྷ་མཆེད་བརྒྱད་རིགས་གསུམ་མགོན་པོ་དང་། །ལྷ་མོ་ལྔ་པོར་བྱ་རྒྱུད་ལྷ་ཚོགས་མཆོད། །འབྱུང་འདུལ་གོས་སྔོན་ཅན་སོགས་སྤྱོད་རྒྱུད་དང་། །རྡོར་དབྱིངས་སྦྱོང་རྒྱུད་སྒྲོལ་མ་ཉེར་གཅིག་དང་། །འཇམ་དཔལ་ལ་སོགས་རྣལ་འབྱོར་ལྷ་ཚོགས་མཆོད། །བདེ་དགྱེས་གསང་གསུམ་འཇིགས་བྱེད་དགྲ་ནག་དང་། །གཤེད་དམར་དུས་འཁོར་མ་ཧཱ་མཱ་ཡ་
དང་། །ཕག་ཁྲོས་སེང་གསུམ་བླ་མེད་ལྷ་ཚོགས་མཆོད། །བཀའ་དགོངས་ཕུར་གསུམ་གུ་རུ་ཞི་དྲག་དང་། །དམ་པ་རིགས་བརྒྱ་ཡང་དག་མ་གཤིན་ཚོགས། །སྨེ་བརྩེགས་ལོའི་པཱ་ལ་གདུགས་དཀར་མོ། །གསང་སྔགས་རྙིང་མའི་ལྷ་ཚོགས་མཆོད་པར་བགྱི། །ཚེ་བདག་ཁྲོ་ཀིང་འཆར་ཁ་ཀླུ་སྲིན་དང་། །རྟ་མགྲིན་དམར་ནག་དྲེགས་འདུལ་ཁྲོ་བོ་བཅུ། །སྔ་འགྱུར་གཏེར་མའི་ལྷ་ཚོགས་ཐམས་ཅད་མཆོད། །པེར་ཆེན་གུར་དང་ཕྱག་བཞི་ཕྱག་དྲུག་པ། །མ་ནིང་ཏྲཀཱད་ཞིང་སྐྱོང་ཞལ་བཞི་པ། །དེ་སོགས་ཕོ་རྒྱུད་མགོན་པོ་ཀུན་ལ་འབུལ། །དུད་སོལ་མ་དང་རང་བྱུང་རྒྱལ་མོ་དང་། །རེ་ཏི་མཆེད་གསུམ་དམག་ཟོར་རལ་གཅིག་སོགས། །མོ་རྒྱུད་ལྷ་མོ་ཀུན་ལ་མཆོད་པ་འབུལ། །རྣམ་སྲས་རིགས་དགུ་ཛཾ་ལྷ་རིགས་ལྔ་དང་། །ཚོགས་བདག་ཚེ་རིང་མཆེད་ལྔ་དུར་ཁྲོད་བདག །ནོར་ལྷ་རྟ་ལྷས་བྷ་ལིང་འདི་བཞེས་ཤིག །དཔལ་མགོན་བདུན་ཅུ་ཞིང་སྐྱོང་ཉི་ཤུ་གཅིག །མཁའ་འགྲོ་སོ་གཉིས་དྲེགས་པ་ཉི་ཤུ་བཅུ། །དྲེགས་པ་བཅོ་བརྒྱད་དགེ་བསྙེན་ཉི་ཤུ་གཅིག །གཟའ་བདུད་རྡོར་ལེགས་ཤན་པ་ངེ་ནེ་མ། །དམ་ཅན་རྒྱ་མཚོ་ཀུན་གྱིས་མཆོད་
གཏོར་བཞེས། །བརྟན་མ་བཅུ་གཉིས་མགུར་ལྷ་བཅུ་གསུམ་དང་། །དོན་གསལ་ལྷ་བཙན་ཐང་ལྷ་བདུད་བཙན་ཀླུ། །ཁྱད་པར་ཡུལ་འདིའི་གཞི་བདག་གནས་བདག་སོགས། །སོ་སོར་དཀར་དམར་གང་དགྱེས་སོ་སོར་འབུལ། །དམ་རྫས་བརྒྱན་པའི་མཆོད་གཏོར་འདི་བཞེས་ལ། །ཚེ་རིང་ནད་མེད་ལོངས་སྤྱོད་མངའ་ཐང་འཕེལ། །བར་ཆད་ཀུན་ཞི་བསམ་དོན་གྲུབ་པར་མཛོད། །ཨོཾ་གུ་རུ་དྷེ་ཝ་ཌཱཀྐི་ནཱི་སརྦ་དྷརྨཱ་པཱ་ལ་ལོ་ཀ་པཱ་ལ་ཨི་དཾ་བ་ལིང་ཏ་ཁ་ཁ་ཁཱ་ཧི། ༀ་བཛྲ་ཨརྒྱུ་སོགས་ནས་ཤརྡ་པྲ་ཏཱིཙྪ་སྭཱ་ཧཱ། ཡེ་ཤེས་འཇིག་རྟེན་མགྲོན་རིགས་ཀུན་ལ་བསྟོད། །རྒྱུ་ཆུང་ཕུད་ཉམས་ལ་སོགས་ཉེས་བྱས་བཤགས། །མགྲོན་རྣམས་རང་རང་གནས་སུ་བདེ་བར་གཤེགས། །དགེ་བས་བླ་མེད་བྱང་ཆུབ་མྱུར་ཐོབ་ཤོག །ཅེས་ཨ་མཆོད་ལྷ་ལུས་བསྐུལ་བ་བཞིན། ༧ རཱ་ག་ཨ་སྱས་སྦྱར་བའོ། །མངྒ་ལཾ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།། །།