ཟབ་གནད་སྙིང་ལྟ་བུའི་གནམ་ཆོས་དགོངས་གཏེར་སྦྲག་པའི་གཏེར་མགོན་གཙོ་འཁོར་དྲིལ་སྒྲུབ།
ཟབ་གནད་སྙིང་ལྟ་བུའི་གནམ་ཆོས་དགོངས་གཏེར་སྦྲག་པའི་གཏེར་མགོན་གཙོ་འཁོར་དྲིལ་སྒྲུབ་བཞུགས་སོ༔
ཤྲཱི་མ་ཧཱ་ཀཱ་ལ་ན་མོ༔ བདག་བསྐྱེད་ལ་བརྟེན་ནས་མཆོག་ཏུ་བསྒྲུབ་པ་ལ་ཅི་ཡང་མི་དགོས༔ མདུན་བསྐྱེད་ལ་བརྟེན་ནས་ཐུན་མོང་གི་ཕྲིན་ལས་བསྒྲུབ་པ་ལ་མཆོད་གཏོར་ཅི་འཛོམ༔ དྲག་པོའི་ལས་ལ་དམར་གཏོར་གཅིག་བཤམ་མོ༔ སྔོན་དུ་ཡི་དམ་སོང་ན་སྐྱབས་སེམས་སོགས་མི་དགོས༔ མ་སོང་བར་འདི་རང་ཡི་དམ་བྱེད་ན་སྐྱབས་སེམས་བསྡུས་པ་གནམ་ཆོས་ལྟར་བྱས་ལ་དྲན་རྫོགས་རང་ཉིད་གཏེར་མགོན་སྔོ༔ སྔོ་ཞིང་སྔོ་ལ་རབ་ཏུ་ནག༔ ཕྱག་བཞི་གཡས་གཉིས་ཙིཏྟ་གྲི༔ གཡོན་གཉིས་བྷནྡྲ་ཁ་ཊྭཱཾ་འཛིན༔ ཞབས་གཉིས་སེམས་དཔའི་སྐྱིལ་ཀྲུང་བཞུགས༔ ཡུམ་སྔོན་གྲི་ཐོད་འཛིན་པས་འཁྱུད༔ ཨོཾ་མ་ཧཱ་ཀཱ་ལ་ཨེ་ཀ་ཛཱ་ཊི་
ཧཱུྃ་ཕཊ༔ ཅེས་པ་བསྙེན་ཚེ་ཡབ་ཀྱི་ཐུགས་ཀར་གསེར་གྱི་གའུ་ཚུར་ཟེད་པ༔ ཡུམ་གྱི་ཐུགས་ཀར་དངུལ་གྱི་གའུ་ཁ་ཕར་ཟེད་པ༔ གའུ་ཕྱིར་ཐུགས་ཀྱི་ནང་དུ་དུང་གི་ཕོག་གུ༔ ཡབ་སྔགས་གཡས་སུ་དྲག་ཏུ་འཁོར་བ༔ ཡུམ་གྱི་ག་འུ་ནང་དུ་ཡུམ་སྔགས་ གཡོན་དུ 
་དྲག་ཏུ་འཁོར་བ༔ ཡུམ་སྔགས་གཟི་བརྗིད་ཆེར་འབར་བར་བསྒོམ༔ དེ་ལ་སེམས་གནས་པ་ཞི་གནས་དང་བསྐྱེད་རིམ༔ དེའི་རྒྱབ་ཐུགས་ནང་དུ་གའུའི་ཕོག་གུ་གཡུའི་ཕོག་གུ༔ གའུ་ཕྱིའི་ཐོག་གུའི་ནང་དུ་ཧཱུཾ་སྔོན་གའུ་ཕྱི་ཕོག་གུའི་ནང་དུ་བྱོ༔སྔོ་སྐྱ༔ གའུ་གཉིས་ཁ་དམ་དུ་སྦྱར་བའི་ཡབ་ཀྱི་གའུ་ནང་དུ་ཡབ་ཀྱི་སྔགས་འཁོར་བས་གསེར་ག་ལས་གསེར་ཕྱེ་བབས་པས་ཡུམ་སྔགས་ལ་ཐིམ་པས་དེ་ལྟར་སྒོམ་མཁན་གྱི་སེམས་ལ་བལྟས་པས་གཟུགས་ཁ་དོག་དངོས་པོ་མ་གྲུབ་པར་སྟོང་པ་
ཉིད་དུ་ལྷག་གིས་མཐོང་བས་ལྷག་མཐོང་༔ སྟོང་པ་དེའི་གཤིས་མ་ཤོར་བའི་ངང་ནས་ནམ་མཁའ་ལ་འཇའ་ཤར་བ་ལྟར་རང་ལུས་ཡབ་ཡུམ་གྱི་སྐུ་འཇའ་ཚོན་ལྟར་གསལ་བ་ཟུང་འཇུག༔ དེ་ལྟར་སྐུ་དུར་ཁྲོད་ཀྱི་ཆས་བརྒྱད་ཀྱིས་བརྒྱན་ཅིང་ཡེ་ཤེས་ཀྱི་མེ་འབར་བ༔ རེས་ནམ་མཁའ་ཁེངས་པ༔ རེས་ཡུངས་འབྲུ་ཙམ༔ རེས་མང་པོ༔ རེས་རང་གཅིག་པུ་སྣ་ཚོགས་སུ་བསྒྱུར་བ་སྐུ༔ དེའི་ངང་ལས་སྔགས་གྲག་སྟོང་བྲག་ཆ་ལྟར་རང་བཞིན་མེད་པར་བཟླ་བར་གསུང་༔ དེས་མཚོན་ནས་སྣང་སྲིད་སྣོད་བཅུད་ཐམས་ཅད་རྣམ་པ་སོ་སོར་གསལ་ཡང་༔ ངོ་བོ་སྟོང་ཉིད་རང་སེམས་དང་དབྱེར་མེད་དུ་འདྲེས་པ་ཐུགས༔ དེ་དངོས་སུ་རྟོགས་ན་སངས་རྒྱས་ཀྱི་དགོངས་པ༔ སྟོང་པ་དེའི་ངང་ལས་རིག་པའི་རྩལ་ལས་ལས་མགོན་ཡབ་ཡུམ་ཤར་བས༔ མ་རྟོགས་འཁྲུལ་པའི་ཞིང་བཅུ་ཚར་བཅད་དེ་རྣམ་ཤེས་ཆོས་ཀྱི་དབྱིངས་སུ་བསྟིམ་པ་ཕྲིན་ལས་ཏེ༔ རྒྱུད་ལས༔ ལུས་ནི་གསལ་སྟོང་ང་ཡི་སྐུ༔ ངག་ནི་གྲག་སྟོང་ང་ཡི་གསུང་༔ སེམས་ནི་རིག་སྟོང་ང་ཡི་ཐུགས༔ ངོ་བོ་མཐོང་ན་འཁོར་བ་མེད༔ རང་བཞིན་མཐོང་ན་སངས་རྒྱས་ཡིན༔ ཐུགས་རྗེ་དྲག་པོའི་ཕྲིན་ལས་ཀྱིས༔ ཞིང་བཅུ་ཐར་པའི་ལམ་ལ་བཀོད༔ ཅེས་གསུངས་སོ༔ དེ་ནས་མདུན་བསྐྱེད་ནི་གཏོར་མ་བྲན་ལ༔ མདུན་དུ་དུར་ཁྲོད་ཆེན་པོའི་དབུས་པད་ཉི་རོའི་གདན་གསུམ་གྱི་དབུས་སུ༔ ཧཱུྃ་ལས་མ་ཧཱ་ཀཱ་ལ་ཁྲོས་པའི་ཆ་བྱད༔ ཕྱག་བཞི་ཕྱག་དང་པོ་གཉིས་གྲི་གུག་ཐོད་ཁྲག༔ འོག་མ་གཉིས་ཁ་
ཊཱཾ་ཙིཏྟ་འཛིན་པ་བྱ་རོག་ལ་བཅིབས་པ༔ གཡས་སུ་ཏྲིལས་བྱ་རོག་གདོང་ནག་པོ་གྲི་ཐོད་བསྣམས་ཤིང་རྡོ་རྗེའི་གཤོག་པས་ཐོགས་མེད་གློག་ལྟར་འཕྱོ་བ༔ གཡོན་ཏུ་བྷྱོཿལས་རྩ་འཇིབས་དམར་མོ་རལ་གྲི་ཁ་ཊྭཱཾ་མདའ་གཞུ་དགྲ་མགོ་འཛིན་ཅིང་༔ ལས་ཀྱི་རླུང་ནག་ཆིབས་ནས་ཕྱོགས་བཅུར་རྒྱུག་པ༔ འཁོར་དཔག་ཏུ་མེད་པ་རླུང་ལྟར་འཚུབ་པའི་གནས་གསུམ་ཡི་གེ་གསུམ་དང་ས་བོན་གསུམ་ལས་འོད་འཕྲོས་པས་ཡེ་ཤེས་པ་སྤྱན་དྲངས༔ ཧཱུྃ༔ ཡུལ་གྱི་མིང་ནི་རྒྱ་གར་རྡོ་རྗེ་གདན༔ དུར་ཁྲོད་མིང་ནི་རབ་འཇིགས་བསིལ་བའི་ཚལ༔ བསྐལ་པ་མེ་དཔུང་འབར་བའི་ཀློང་དཀྱིལ་ནས༔ ཡེ་ཤེས་མགོན་པོ་ཡབ་ཡུམ་འཁོར་དང་བཅས༔ ལས་ཀྱི་མགོན་པོ་འཇིགས་བྱེད་བྱ་རོག་གདོང་། དཔལ་ལྡན་ལྷ་མོ་དམར་མོ་རྩ་འཇིབས་མ༔ ཤ་ཟ་མཁའ་འགྲོ་ལྷ་སྲིན་འཁོར་དང་བཅས༔ བསྟན་པ་བསྲུང་བའི་སླད་དུ་སྤྱན་འདྲེན་གྱིས༔ སྔོན་གྱི་ཁས་བླངས་དམ་བཅས་བརྩེར་་དགོངས་ལ༔ གཙུག་ལག་ཁང་དང་དུར་ཁྲོད་གནས་སོགས་ནས༔ མ་ཐོགས་མྱུར་དུ་གནས་འདིར་གཤེགས་སུ་གསོལ༔ མ་ཧཱ་ཀཱ་ལ་ཙ་ཏུར་ཧསྟ༔ ཁ་ཁ་མུ་ཁ་དེ་ཝི་རུ་པི་ནི༔
ཨེ་ཨ་རལླི་ཧྲིཾ་ཧྲིཾ༔ ཨ་ཀར་ཡ༔ ས་མ་ཡ་ཛཿppཧཱུྃ༔ སངས་རྒྱས་བསྟན་པ་བསྲུང་བའི་མཐུ་རྩལ་ཅན༔ དཔལ་ལྡན་མ་ཧཱ་ཀཱ་ལ་འཁོར་དང་བཅས༔ བདུད་དང་བར་ཆད་མ་ལུས་འདུལ་བ་དང་༔ གདུག་པའི་དགྲ་བགེགས་མ་ལུས་བསྒྲལ་བའི་ཕྱིར༔ དྲག་པོའི་གཞལ་ཡས་དཀྱིལ་འཁོར་ཆེན་པོ་འདིར༔ གཉིས་མེད་བརྟན་པར་བཞུགས་ལ་ཕྲིན་ལས་མཛོད༔ ས་མ་ཡ་ཨ་ཝེ་ཤ་ཡ་ཏིཥྛཤ་ཡ་ཧཱུྃ་ཨཱ༔ ཧཱུྃ༔ ཡེ་ཤེས་མགོན་པོ་ཡབ་ཡུམ་རྡོ་རྗེ་ནག་པོ་ཆེ༔ གཏོར་ལེན་མཁའ་འགྲོ་གིང་གི་ཚོགས་དང་བཅས༔ དམ་ཅན་སྲུང་མ་མ་ལུས་འཁོར་བཅས་ལ༔ ཡོན་ཆབ་མེ་ཏོག་བདུག་སྤོས་མར་མེ་དྲི༔ བཤོས་དང་སྒྲ་སྙན་ལ་སོགས་མཆོད་པ་འབུལ༔ ནས་འབྲས་གྲོ་དང་ཏིལ་དང་སྲན་ཆེན་དང་༔ དཀར་གསུམ་མངར་གསུམ་བརྒྱན་པའི་གཏོར་མ་འབུལ༔ ཤ་ལྔ་བདུད་རྩི་ལྔ་ཡི་ཞལ་ཟས་ཚོགས༔ ཤ་ཁྲག་དམར་གྱིས་བརྒྱན་པའི་གཏོར་མ་འབུལ༔ བདུད་རྩི་སྨན་དང་རཀྟ་དམར་གྱི་མཚོ༔ བཤོས་བུ་སྐྱེམས་ཕུད་རང་རང་མཐུན་རྫས་འབུལ༔ རང་རང་མཐུན་པའི་མཆོད་རྫས་འདི་བཞེས་ལ༔ ཕྲིན་ལས་རྣམ་བཞི་མ་ལུས་འགྲུབ་པར་མཛོད༔ མ་ཧཱ་ཀཱ་ལ་ཙ་
དུར་ཧསྟ༔ ཁ་ཁ་མུ་ཁ༔ དེ་ཝི་རུ་པ་ནི༔ ས་པཱ་རི་ཝཱ་ར་སརྦ་པཱཙྪ་ཧོ༔ བ་ལིཾ་ཏ་ཁཱ་ཧི༔ མ་ཧཱ་རཀྟ་ཨ་མྲྀ་ཏ་ཁཱ་ཧི༔ མ་ཧཱ་མཾ་ས་ཙིཏྟ་ཀིཾ་ནི་རི་ཏི་ཁཱ་ཧི། ཧཱུྃ༔ ཆོས་དབྱིངས་སྐྱེ་མེད་ངང་ལས་མ་གཡོས་ཀྱང་༔ ཐབས་ཀྱིས་གདུག་པ་མ་ལུས་འདུལ་བའི་ཕྱིར༔ དྲག་པོའི་འཇིགས་བྱེད་ཆེན་པོའི་སྐུར་སྟོན་པ༔ དཔལ་ལྡན་མགོན་པོ་ཡབ་ཡུམ་ཕྱག་འཚལ་བསྟོད༔ སྔོན་ཚེ་ཁྲག་འཐུང་ཆེན་པོའི་སྤྱན་སྔ་རུ༔ སངས་རྒྱས་བསྟན་པ་བསྲུང་བར་ཁས་བླངས་ནས༔ སྲིན་པོའི་གཟུགས་འཆང་གདུག་པ་ཀུན་འདུལ་བ༔ ལས་མཁན་ནག་པོ་ཆེ་ལ་ཕྱག་འཚལ་བསྟོད༔ ནག་པོ་ལས་མཛད་མཁའ་འགྲོ་ཀུན་གྱི་གཙོ༔ སྲིན་མོའི་གཟུགས་ཀྱིས་དགྲ་ལ་དུག་ནད་འབེབས༔ ཤ་ཟ་ཁྲག་འཐུང་གཏུམ་མོ་རབ་འབར་མ༔ དམར་མོ་རྩ་འཇིབས་ཁྱོད་ལ་ཕྱག་འཚལ་བསྟོད༔ འཇིག་རྟེན་ལས་ལ་གྲུབ་པའི་དྲེགས་པ་ཅན༔ རང་སྔགས་དམོད་པ་དྲག་པོའི་མཚོན་ཆ་ཡིས༔ ཞིང་བཅུའི་སྲོག་དབུགས་ཕྲལ་བའི་མཐུ་བོ་ཆེ༔ ལས་བྱེད་དྲག་པོའི་ཚོགས་ལ་ཕྱག་འཚལ་བསྟོད༔ དེ་ནས་ལྷ་གསུམ་གྱི་ཐུགས་ཀར་ཉི་མའི་སྟེང་དུ་ས་བོན་ལ་སྔགས་ཀྱིས་བསྐོར་བ༔ རང་གི་ཐུགས་ཀའི་
འོད་ཟེར་གྱིས་བསྐུལ་བས་འཁོར་གཉིས་ལས་རང་འདྲ་བའི་སྤྲུལ་པ་དཔག་ཏུ་མེད་པ་འཕྲོས༔ ལས་མགོན་སྤྲུལ་པ་བར་སྣང་ལ་འཕུར་འཇོལ་སྣ་ཚོགས༔ ལྷ་མོའི་སྤྲུལ་པ་རྣམས་རླུང་ལ་ཞོན་ནས་འཇིག་རྟེན་ཁྱབ་སྟེ༔ བགེགས་ཐམས་ཅད་རྒྱ་མཚོའི་ཕར་མཐར་བསྐྱོད༔ དགྲ་བོ་བསྒྲལ་ནས་ལྷག་མེད་དུ་ཟ་བར་དམིགས་ལ༔ ཨོཾ་མ་ཧཱ་ཀཱ་ལ་གུ་ཎ་ཧྲི་ད་ཧཱུྃ་ཧཱུྃ་ཧཱུྃ་ཛ་ཛ་ཛ་ཕཊ་ཕཊ་ཕཊ༔ ཅེས་དང་། ཏྲི་ཁ་ཁོ་མུ་ཁ་དུ་བྷྱོ༔ ཅེས་དང་། ༀ་མ་ཧཱ་ཀཱ་ལི་དེ་ཝི་རུ་པི་ནི་ཧཱུཾ་ཧཱུཾ་ཕཊ༔ གཙོ་བོ་ལ་བརྒྱའམ་སྟོང་༔ འཁོར་རེ་ལ་བརྒྱ་རེ་སོགས་སྐབས་དང་བསྟུན་ལ་བཟླས་སོ༔ དེ་ནས་དམར་གཏོར་བཤམས་པ་ལ་བཀུག་གཞུག་སྤྱི་ལྟར་བྱས་ལ༔ སྔགས་གསུམ་སོ་སོའི་མཇུག་ཏུ་སརྦ་དུཏྟཾ་ཤ་ཏྲོ་དགྲ་བགེགས་སྲོག་ལ་མཱ་ར་ཡ་རྦད༔ ཅེས་སྐབས་དང་བསྟུན་ལ་བཟླ་སྟེ༔ དེ་ནས་སླར་བྲན་ལ་ཧཱུྃ༔ ཡུལ་གྱི་མིང་ནི་རྒྱ་གར་ཡུལ༔ རྡོ་རྗེ་གདན་གྱི་ཤར་ཕྱོགས་ནས༔ གཙུག་ལག་ཁང་ཆེན་ནཱ་ལེན་དྲར༔ བསྟན་སྲུང་དཔལ་ལྡན་ནག་པོ་ཆེ༔ དཔལ་ལྡན་ཁྲག་འཐུང་སྤྲུལ་པའི་སྐུ༔ ཆོས་སྐྱོང་མགོན་པོ་མཐུ་བོ་ཆེ༔ བཀའ་སྲུང་ཆེན་པོ་དམ་ཚིག་ཅན༔ སྐུ་མདོག་མཐིང་ནག་འབར་བ་ལ༔ ཞལ་གཅིག་ཕྱག་བཞི་འཇིགས་པའི་གཟུགས༔ དབུ་སྐྲ་ཁམ་ནག་གྱེན་དུ་བརྗེས༔ སྦྲུལ་དང་ཐོད་ཕྲེང་འབར་བས་བཅིངས༔ ཞལ་
ནི་འཇིགས་པའི་ཁྲོ་གཉེར་ཅན༔ བདུད་དཔུང་མ་ལུས་འདུལ་བར་མཛད༔ སྤྱན་གསུམ་དམར་ལ་འཁྲུགས་པ་ཡིས༔ སྡང་མིག་ཕྱོགས་བཅུར་ཀུན་ཏུ་བལྟ༔ ཤངས་ནས་དྲག་པོའི་འཐོར་རླུང་འབུད༔ སྨ་ར་ཨག་ཚོམ་སྨིན་མ་སེར༔ ཞལ་གདངས་ཧ་ཧ་ཧཱུྃ་ཕཊ་སྒྲོག༔ མཆེ་གཙིགས་ལྗགས་འདྲིལ་རྐན་སྒྲ་རྡེབ༔ གཡས་ཀྱི་དང་པོས་གྲི་གུག་འཛིན༔ འོག་མས་དགྲ་སྙིང་སྲོག་རྩ་བཅད༔ ཕྱག་གཡོན་ཐོད་པར་སྙིང་ཁྲག་འཐུང་༔ འོག་མས་ཁ་ཊྭཱཾ་དུག་གསུམ་འཇོམས༔ ཐུང་ལ་སྦོམ་ཞིང་གེལ་བའི་གཟུགས༔ སྐུ་ལ་མི་མགོའི་ཕྲེང་བས་བརྒྱན༔ ཡན་ལག་སྦྲུལ་གྱི་ཆུན་པོས་བཅིང་སྐུ་སྨད་སྟག་གི་པགས་པས་དཀྲིས༔ ཞབས་གཉིས་བརྡབས་པས་དགྲ་བགེགས་འདུལ༔ ཉི་ཟླ་པདྨ་རོ་གདན་༼ལྡེབ་གཅིག་ཆད༽གཡས་པའི་གྲི་གུག་དམར་པོ་ཡིས༔ དགྲ་སྲོག་དམར་པོ་ཆོད་ལ་ཤོག༔ 
གཡོན་པས་བྷན་ཁྲག་ཐོགས་ལ༔ དགྲ་བགེགས་སྙིང་ཁྲག་ཞལ་དུ ་གསོལ༔ སྡེར་མོ་ལྕགས་ཀྱུ་ལྟ་བུ་ཡིས༔ གློ་སྙིང་ནང་ཁྲོལ་ཕྱུང་ལ་ཤོག༔ སྤྲུལ་པ་བྱ་རོག་མང་པོའི་ཚོགས༔ དང་རུས་དགྲ་བགེགས་ཤ་ལ་ཆུམ༔ མཆུ་སྡེར་དགྲ་བགེགས་
སྙིང་ལ་ཆུམ༔ ཕོ་ཉ་དགྲ་བགེགས་བླ་ལ་ཁྱེར༔ ཤ་ཟ་སྲིན་པོ་མཐུ་སྟོབས་ཅན༔ དགྲ་བགེགས་རྩ་ཁྲག་ཁོང་ནས་ཕྱུངས༔ ནག་པོ་འཁོར་བཅས་དགྲ་ལ་ཡ༔ བཅོལ་བའི་ཕྲིན་ལས་འགྲུབ་པར་མཛོད༔ ཧོ༔ དཔལ་ལྡན་མགོན་པོ་ནག་པོ་ཡི༔ ལས་བྱེད་མ་མོ་མཐུ་མོ་ཆེ༔ དུར་ཁྲོད་བསིལ་བའི་ཚལ་ཆེན་ནས༔ དམར་མོ་རྩ་འཇིབས་སྐུ་བསྐྱོད་ཅིག༔ ཞལ་གཅིག་ཕྱག་བཞི་སྐུ་མདོག་དམར༔ རལ་པ་ཁམ་ནག་མུན་ལྟར་གཏིབས༔ སྤྱན་གསུམ་དམར་པོ་ཁྲག་ཏུ་འཁྱིལ༔ གཡས་པས་རལ་གྲི་ཁ་ཊ་སྟེ༔ གཡོན་པས་མདའ་གཞུ་དགྲ་མགོ་འཛིན༔ ཆིབས་སུ་རླུང་ནག་འཚུབ་མ་བཅིབས༔ འཁོར་དུ ་ཤ་ཟ་མཁའ་འགྲོས་བསྐོར༔ བདུད་དང་སྲིན་པོ་ལས་ལ་འགྱེད༔ རྟག་ཏུ་གསོད་དང་གཅོད་ལ་བརྩོན༔ ཁྱོད་ཀྱི་ཐུགས་དམ་རྒྱུད་བསྐུལ་གྱི༔ དམར་གྱི་གཏོར་མ་འདི་ལོངས་ལ༔ དགྲ་བགེགས་བླ་ཚེ་ལོངས་ལ་ཤོག༔ ཐུན་ཁྲག་འཕངས་ལ་ནད་ཡམས་ཐོངས༔ བཅོལ་བའི་ཕྲིན་ལས་འགྲུབ་པར་མཛོད༔ ཧོ༔ གཞན་ཡང་མགོན་པོའི་བཀའ་འཁོར་ནས༔ ནག་པོའི་དམག་ཚོགས་ཉེ་རེ་རེ༔ མ་མོའི་ཟོར་འཕེན་ཤ་ར་ར༔ ཤ་ཟ་ཁྲག་འཐུང་
སྤུངས་སེ་སྤུང་༔ གནོད་སྦྱིན་སྲོག་གཅོད་རོ་ལོ་ལོ༔ བདུད་ཕོ་ཁྲམ་ཐོགས་ཉེ་རེ་རེ༔ དྲག་པོའི་ཕོ་ཉ་ཤ་ར་ར༔ བྱ་རོག་ནག་པོ་ཐིབས་སེ་ཐིབ༔ མཐུན་པའི་དམ་རྫ་ས་འདི་བཞེས་ལ༔ གནོད་ཅིང་འཚེ་བའི་དགྲ་བགེགས་འདི༔ ཕུང་གསུམ་གཡབ་ཀྱིས་ཐོབ་ལ་ཤོག༔ བདུན་རྒྱུད་རྩད་ནས་ཆོད་ལ་ཤོག༔ ཨོཾ་མ་ཧཱ་ཀཱ་ལ་གུ་ཎ་ཧྲི་ད་ཧཱུྃ་ཧཱུྃ་ཧཱུྃ་ཛ་ཛ་ཛ་ཕཊ་ཕཊ་ཕཊ༔ ཏྲི་ཁ་ཁ་མུ་ཁ་བྷྱོ༔ ཨོཾ་མ་ཧཱ་ཀཱ་ལི་དེ་ཝི་རུ་པི་ནི་ཧཱུྃ་བྷོ་ཕཊ༔ སརྦ་དུཥཱན་ཤ་ཧཱུྃ་དགྲ་བགེགས་སྲོག་ལ་མཱ་ར་ཡ་རྦད༔ ཧོཿ དཔལ་ལྡན་ཡེ་ཤེས་མགོན་པོ་ཡབ་ཡུམ་གྱི་ལས་མཁན༔ མ་ཧཱ་ཀཱ་ལ་ལེགས་ལྡན་ནག་པོ༔ ཁྲག་འཐུང་གི་རྒྱལ་པོ་ལས་མགོན་ཆེན་པོ༔ འཇིགས་བྱེད་བྱ་རོག་གདོང་ཅན༔ མ་མོ་ཆུ་འཇིབས་དམར་མོ༔ བསྟན་པའི་བཀའ་སྲུང་༔ རྣལ་འབྱོར་ཡོངས་ཀྱི་དགྲ་བླ༔ རིག་འཛིན་ཡོངས་ཀྱི་སྲོག་ཤིང་༔ དམ་ཉམས་ཀུན་གྱི་སྲོག་གཅོད༔ བདུད་འདུལོ་རྣམས་ཀྱི་དབང་ཕྱུག༔ གཙུག་ལག་ཁང་གི་སྲུང་མ༔ དུར་ཁྲོད་ཀུན་གྱི་ཞིང་སྐྱོང་༔ གསང་སྔགས་བཀའི་སྲུང་མ༔ ལེགས་ཉེས་ཀུན་གྱི་སྟངས་འཛིན༔ ནག་པོ་སྟོང་གི་ཚོགས་ཀྱིས་བསྐོར་
བ༔ ཤ་ཟ་འབུམ་གྱི་ཚོགས་ཀྱིས་བསྐོར་བ༔ མ་མོ་བྱེ་བའི་ཚོགས་ཀྱིས་བསྐོར་བ༔ གནོད་སྦྱིན་ཁྲིའི་ཚོགས་ཀྱིས་བསྐོར་བ༔ བདུད་པོ་ཉི་ཁྲིའི་ཚོགས་ཀྱིས་བསྐོར་བ༔ ཁྲབ་ཆེན་བྱེ་བ་འབུམ་གྱི་ཚོགས་ཀྱིས་བསྐོར་བ༔ དྲེགས་པ་ལས་བྱེད་ཚོགས་ཀྱིས་བསྐོར་བ༔ དཔལ་མགོན་པོ་འཁོར་དང་བཅས་པ་ཁྱེད་རྣམས་ལ༔ སྤྱིར་སངས་རྒྱས་བསྟན་པའི་སྤྱི་དགྲ༔ རྣལ་འབྱོར་པ་བདག་གི་སྒོས་དགྲ༔ ད་ལྟ་ཐད་དུ་བསྡོངས་ནས་དོ་བསྡོ་ཕོད་བཙུགས་འགྲས་ཚོལ་བ༔ ཕྱི་དགྲ་ཡིད་ལ་འཆང་ནས་བསམ་ངན་དུག་སྦྱོར་ཤོམ་པ༔ བྱད་ཁ་ཕུར་ཁ་སྟོན་པ༔ གཏད་མནན་སེལ་ནག་བྱེད་པ༔ བར་ཆད་བྱེད་པའི་བདུད་དང་དམ་སྲི༔ གནོད་ཅིང་འཚེ་བའི་གདོན་དང་འབྱུང་པོ༔ ལྟས་ངན་ཆོ་འཕྲུལ་མི་ཁ་སྨྲ་མཆུ་གཏོང་བ་ཐམས་ཅད་ཟས་སྐལ་དུ་གཏད་ཀྱིས༔ དམ་ཉམས་འདི་རྣམས་ཀྱི་ཤ་ཟོ༔ ཁྲག་འཐུང་༔ སྙིང་ཕྱུངས༔ སྲོག་ཆོད༔ དབུགས་ལོངས༔ ལས་ཀྱི་མཐའ་བསྡུས༔ ལོ་དང་ཟླ་བར་མ་བཞག༔ ཞག་དང་ཟ་མར་མྱུར་དུ་སྒྲོལ་བའི་ཕྲིན་ལས་མཛོད་ཅིག༔ གནོད་བྱེད་དགྲ་བགེགས་མཱ་ར་ཡ་ཧཱུྃ་ཕཊ༔ གཏོར་མ་བཏེག་ལ༔ བྷྱོ༔ མགོན་པོའི་ཆད་
པ་དགྲ་ལ་ཟློག༔ མ་མོའི་རྒྱུ་གཟེར་དགྲ་ལ་ཟློག༔ གཟའ་ཡི་ཅར་ཕོག་དགྲ་ལ་ཟློག༔ རྒྱལ་པོའི་སྨྱོ་འབོག་དགྲ་ལ་ཟློག༔ གཤིན་རྗེའི་ཞགས་པ་དགྲ་ལ་ཟློག༔ བཙན་གྱི་ཕོ་གླང་དགྲ་ལ་ཟློག༔ བདུད་ཀྱི་ཁྲམ་ཁ་དགྲ་ལ་ཟློག༔ ཀླུ་ཡི་མཛེ་ནད་དགྲ་ལ་ཟློག༔ མཐུན་པའི་དམ་རྫས་འདི་བཞེས་ལ༔ བར་ཆད་རྐྱེན་ངན་ཐམས་ཅད་ཟློག༔ དུས་ལ་བབ་བོ་ས་མ་ཡཱ༔ ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ༔ ཨོཾ་མ་ཧཱ་ཀཱ་ལ་གུ་ཎ་ཧྲི་ད་ཧཱུྃ༔ ཡ་མ་རཀྵ་ཟློག་ཟློག༔ ཡ་མ་རཀྵ་ཟློག་ཟློག༔ ཀཱི་ལི་ཡ་དུན་ཏིང་ཟློག་ཟློག༔ ཡ་མ་རཀྵ་ཟློག་ཟློག༔ ཙན་དྷ་རཀྵ་ཟློག་ཟློག༔ ནཱ་ག་རཀྵ་ཟློག་ཟློག༔ ཕུ་ཕུ་ཏྲི་ཏྲི་ཟློག་ཟློག༔ དྷེ་ཝ་རུ་ཏྲི་ཟློག་ཟློག༔ ཙ་དུར་པྲ་མ་ཟློག་ཟློག༔ ནཱ་ཐ་ར་ཟློག་ཟློག༔ མ་ཧཱ་རཀ་དུ་ཟློག་ཟློག༔ ཧཱིཏྲ་རཀྵ་ཟློག་ཟློག༔ བུདྡྷ་པ་རི་ཁྲམ་ཁ་ཐམས་ཅད་ཟློག་ཟློག༔ བུདྡྷ་པ་རི་ཁྲམ་ཁ་ཐམས་ཅད་ཟློག་ཟློག༔ ཅེས་གཏོར་མ་ཕྱིར་ཕུལ་བས་མདུན་གྱི་ལྷ་གསུམ་བྱ་རོག་ལ་ཆིབས་པས་འཕུར༔ ལས་མགོན་གཤོག་པ་གཡབ༔ ལྷ་མོའི་རླུང་ནག་བཅིབས་ཏེ༔ འཁོར་རྣམས་རླུང་ལྟར་འཚུབ་ཅིང་༔ སྤྲིན་ནག་འབྲུག་སྒྲ་ཐོག་སེར་གློག་དང་བཅས་ཏེ་དགྲ་བགེགས་གང་དུ་ཡོད་པ་
ཐམས་ཅད་ཁྱེར་ནས་བསིལ་ཚལ་དུ་སོང་སྟེ༔ ཤ་ཟ་ཐམས་ཅད་ཀྱིས་ཟས་སུ་ཟོས་པར་དམིགས༔ བདག་བསྐྱེད་ཡབ་ཡུམ་སྐུའི་འོད་ཟེར་ལས་གྲུབ་པའི་གནམ་ལྕགས་ཀྱི་འཁོར་ལོ་རྩིབས་བཅུ་པའི་ལྟེ་བ་ཡངས་ཤིང་རྒྱ་ཆེ་བའི་དབུས་སུ་རང་ཉིད་མགོན་པོ་ཡབ་ཡུམ༔ མཐར་བསྲུང་བྱ་ཐམས་ཅད་ཚུད་པ༔ རྩིབས་རྩེ་བཅུལ་ལས་མགོན་བརུ༔ དེ་རྒྱབ་རྡོ་རྗེའི་གུར་ཡེ་ཤེས་ཀྱི་མེ་འབར་བ༔ ལྟེ་བ་མི་འགུལ་བར་རྩིབས་བཅུ་རྣོ་ངར་དང་ལྡན་པ་ གཡོན་དུ ་དྲག་ཏུ་འཁོར་བས་གནོད་བྱེད་ཐམས་ཅད་ཆུད་ཆུད་གཅོད་ཅིང་མེ་དཔུང་གིས་བསྲེགས་པར་བསྒོམས་ལ༔ ཨོཾ་ཤྲཱི་མ་ཧཱ་ཀཱ་ལ་ཧེ་རུ་ཀཾ་ཧཱུྃ་ཧཱུྃ་ཕཊ༔ བཛྲ་ཊཱཀི་ནི་ཛཱ་ལ་སཾ་བྷ་ར་སྭཱ་ཧཱ༔ པ་ར་ཙཀྲ་ཧཱུྃཏེ་བེ་རོ་ཙ་ན༔ མ་ཧཱ་ཀཱ་ལ་གུ་ཎ་ཧྲི་ད་ཧཱུྃ་ཕཊ༔ སརྦ་ཨ་པ་ན་ཡེ་སྭཱ་ཧཱ༔ ཞེས་གལ་དང་བསྟུན་ལ་བཟླས་པ༔ ལྷན་ཅིག་ནང་རྒྱས་བྱུང་ཡང་ཁྱེར་རོ༔ དགེ་བ་འདི་ཡིས་མྱུར་དུ་བདག༔ ཅེས་སོགས་བསྔོ་བ་བྱ་ཞིང་ཉམས་ལེན་གསལ་སྟོང་གི་ངང་ནས་སྤྱོད་ལམ་བྱའོ༔ བདག་བསྐྱེད་བསྡུ་རིམ་སོགས་ཆེད་དུ་བྱ་མི་དགོས་སོ༔ དེ་ལྟར་རྒྱུན་བསྙེན་ནམ་རྒྱུན་ཁྱེར་རོ༔ དགོས་པའི་དོན་ཡོད་ན་མ་གཏོགས་གཏོར་འབུལ་ཡང་རྒྱུན་དུ་མི་དགོས་ཏེ༔ ཕུག་གཏོར་གསོ་བྲན་ཙམ་བྱས་ལ༔ བདག་མདུན་གཉིས་ཁོ་ན་བྱ་ཞིང་༔ མདུན་བསྐྱེད་ལྷ་གསུམ་རྟེན་ལ་ཐིམ་པའམ༔ མེད་ན་ཕུག་གཏོར་རྩེ་དེར་བཞུགས་པར་བསམ་པས་ཆོག་གོ༔ འདི་སྔོན་གྱི་ཉང་ལུགས་ལས་ཟབ་པའི་རྒྱུ་མཚན༔ བརྒྱུད་པ་ཉེ་བ་དམ་སེལ་
གྱིས་མ་ཆོད་པ་དང་༔ འཁོར་ལ་གཟུགས་རྒྱལ་པོ་སོགས་མེད་པས་འཁུ་ལྡོག་ཆུང་བ་དང་གཉིས༔ མགོན་པོ་འདི་ལ་འཁོར་དཔག་ཏུ་མེད་ཀྱང་འཁོར་གྱི་གཙོ་བོ་ལས་མགོན་ཡིན་པ་དང་༔ དེ་ཡི་ཡང་ལས་ཐམས་ཅད་རྩ་འཇིབས་མས་སྒྲུབ་པའི་རྒྱུད་རྣམས་ནས་བཤད་པས༔ འཁོར་བསྡུ་ལེགས་པ་དང་གསུམ༔ གཙོ་བོ་བྱ་རོག་ཆིབས་ཤིང་འཕུར་ཞིང་རླུང་ཆིབས་པས་ལས་མྱུར་བ་དང་བཞི༔ ལས་མགོན་ས་བོན་ཏྲིཤུས་པས་ཤིན་ཏུ་རྣོ་བར་མན་ངག་ཐམས་ཅད་དུ་བཤད་པ་ལྔ༔ ཡབ་ཡུམ་ཐམས་ཅད་ཆ་ཚང་དུ་ཡོད་པས་བཀྲ་ཤིས༔ བཟློག་པས་མི་ཚུགས་པར་བཤད་པ་དང་དྲུག༔ སྔགས་གུ་ཎ་ཅན་འདི་ས་བསོད་ནམས་ལོངས་སྤྱོད་འཕེལ་ཆེ་བར་རྒྱུད་རྣམས་ནས་གསུངས་པ་དང་བདུན༔ བདག་བསྐྱེད་རྫོགས་རིམ་དྲན་རྫོགས་ཉམས་ལེན་བསྲེས་པས་མཆོག་ཐུན་འགྲུབ་པ་དང་བརྒྱད༔ སྤྲོས་མེད་ལུགས་གཙོ་ཆེ་བས་བྱ་སླ་བ་དང་དགུ༔ ལས་མགོན་སྔགས་འདི་འཇིག་རྟེན་གྱི་བདུད་བྱ་རོག་གདོང་དུ་སྣང་བས་ལྟས་དངོས་སུ་སྟོན་པ་དང་བཅུའོ༔ ཞེས་རཱ་ག་ཨ་སྱས་བསྒྲིགས་པ་ལ་ཉེས་འགལ་བཤགས་ཤིང་དགེ་བས་ཨོ་རྒྱན་ཆེན་པོའི་བསྟན་པ་དར་རྒྱས་སུ་གྱུར་ཅིག་མངྒ་ལཾ། །༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།