དཔལ་ཡེ་ཤེས་ཀྱི་མགོན་པོ་བེར་ནག་ཅན་ཡབ་ཡུམ་གྱི་ལས་བཞིའི་སྦྱིན་སྲེག་ཡེ་ཤེས་རབ་འབར།
དཔལ་ཡེ་ཤེས་ཀྱི་མགོན་པོ་བེར་ནག་ཅན་ཡབ་ཡུམ་གྱི་ལས་བཞིའི་སྦྱིན་སྲེག་ཡེ་ཤེས་རབ་འབར་ཞེས་བྱ་བ་བཞུགས་སོ།།
ན་མོ་གུ་རུ་མ་ཧཱ་ཀཱ་ལ་ཡེ། བླ་མ་མགོན་པོ་དབྱེར་མེད་ཀརྨ་པ། །ཆོས་ཀྱི་དབང་ཕྱུག་ཞབས་ལ་ཕྱག་འཚལ་ནས། །གསར་བུ་རྣམས་ལ་ཕན་པར་བྱ་བའི་ཕྱིར། །མ་མགོན་འཁོར་བཅས་བཀའ་གནང་བྱིན་གྱིས་རློབས། །ས་རྒོད་ས་ཆོག་རྒྱས་པར་མ་གྲུབ་ཅིང་། །ལྟོ་འཕྱེ་ལ་སོགས་བརྩི་ཚུལ་ཤེས་དཀའ་བས། །སྦྱིན་སྲེག་བླུགས་ས་དེ་རུ་ས་མི་བརྐོ། །རྡོ་ལེབ་བསྒྲིགས་སམ་ཤི་ང་ལོ་བཀོད་པའི་སྟེང་། །གཞན་ནས་ས་ཉོབ་བླང་བླུགས་ལེགས་པར་བཅགས། །སྤྲོ་ན་ས་ཆོག་རྒྱས་པ་གཞན་ལྟར་བྱ། བསྡུ་ན་དེ་སྟེང་དཀར་གཏོར་གཉིས་བཤམས་ཏེ། །རང་ཉིད་དྲན་རྫོགས་མགོན་པོ་གསལ་བསྒོམས་ནས། །འདི་ཉིད་འདོན་བསྒོམ་བྱས་པས་འཐུས་པ་ཡིན། ཧཱུྃ།
རང་ཉིད་ཡེ་ཤེས་མགོན་པོ་ཡི། །ཕྱག་གཡས་ས་ལ་བརྡབ་པ་ཡིས། །ས་ཡང་རྣམ་པ་དྲུག་ཏུ་གཡོས། །ས་ཡི་ལྷ་མོ་གསེར་གྱི་མདོག །ཐལ་སྦྱར་བར་ན་བུམ་པ་འཛིན། །དར་དང་རིན་ཆེན་རྒྱན་གྱིས་མཛེས། །སྐུ་ཕྱེད་ས་ཡི་ནང་ནས་ཐོན། །ས་བདག་ཚོགས་ཀྱིས་བསྐོར་བར་གསལ། །ཨོཾ། ཚུར་བྱོན་ཚུར་བྱོན་ས་ཡི་ནི། །ལྷ་མོ་ཆེན་མོ་འཇིག་རྟེན་ཡུམ། །འདིར་གནས་ས་བདག་ཚོགས་དང་བཅས། །དཀྱིལ་འཁོར་བསྒྲུབ་ཕྱིར་འདིར་གཤེགས་ལ། །ས་གླུད་མཆོད་གཏོར་འདི་བཞེས་ཤིག །ཨོཾ་པྲི་ཐི་དེ་ཝི་བྷུ་མི་པཱ་ཏི་ས་པ་རི་ཝཱ་ར་
ཨརྒྷཾ་སོགས། ཨ་ཀཱ་རོ་སོགས། ཨོ་པྲི་ཐི་དེ་ཝི་བྷུ་མི་པཱ་ཏི་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི༔ དཀྱིལ་འཁོར་དོན་དུ་ས་འདི་ནི། །བདག་ཞུ་ཁྱེད་ཀྱིས་བསྩལ་དུ་གསོལ། །གནས་འདི་དོར་ནས་ཕྱིར་བཟུར་ཞུ། །ས་བདག་ས་ཡི་ལྷ་མོ་རྣམས། །དགའ་བའི་ཡིད་ཀྱིས་ཐལ་སྦྱར་ཏེ། །ས་འདི་གནང་གིས་ཅི་བདེར་སྤྱོད། །ཞེས་གསུངས་ས་བདག་རྣམས་ནི་བྱེར། །ལྷ་མོ་ས་དེར་ཐིམ་གྱུར་པས། །ས་ཡང་གསེར་གྱི་ཕུང་པོར་གྱུར། །རིན་ཆེན་སྣོད་དུ་ཐིག་ཚོན་རྣམས། །ཨོཾ་ཧཱུཾ་ཏྲ་ཧཱུྃཨཱརྣམས་ལས། །མ་མགོན་རིགས་ལྔའི་སྐུར་གྱུར་པས། འོད་ཞུ་ཐིག་ཚོན་སོ་སོར་གྱུར། །ཨོཾ་བཛྲ་ས་མ་ཡ་སུ་ཏྲ་མ་ཏི་ཀྲ་མ་ཧཱུྃ། ཨོཾ་བཛྲ་ཙི་ཀྲ་ས་མ་ཡ་ཧཱུཾ། དེ་ནས་ལས་བཞི་ཁྱད་མེད་པར། །ཐིག་ཆེན་བརྒྱད་པོ་བཏབ་བྱས་ནས། །ཐབ་ཀྱི་རྒྱུར་ནི་ཁྲུ་གང་ཚད། །དེ་རྒྱབ་སོར་བཞི་ཐབ་ཀྱི་མཆུ། །ཁ་ཁྱེར་ཁ་བད་ཁ་འཕྱང་ནི། །བསྡུས་པ་འདི་ལ་མི་དགོས་གསུངས། །ཀུན་ཀྱང་དབུས་སུ་པད་འདབ་བརྒྱད། །ཞི་བའི་དབུས་སུ་ཁ་ཁྱེར་ལས། །རྡོ་རྗེ་དཀར་པོ་བྲི་བར་བྱ། །ཕྱི་རོལ་མཚམས་བཞིའི་ཐད་དུ་ནི། །ཟླ་ཕྱེད་རྡོ་རྗེ་རྩེ་ཕྱིར་བསྟན། །རྒྱས་པའི་དབུས་སུ་ཁ་ཁྱེར་དང་། །ཕྱི་ཡི་མཚམས་བཞིར་ནོར་བུ་བྲི། །དབང་གི་དབུས་སུ་ཁ་ཁྱེར་དང་། །མཚམས་བཞིར་པདྨའི་ལྕགས་ཀྱུ་
བྲི། །དྲག་པོའི་དབུས་སུ་རྡོ་རྗེ་ནི། །ནག་པོ་ཁ་གདེངས་བྲི་བར་བྱ། །ཁ་ཁྱེར་ལ་ནི་རལ་གྲི་སྟེ། །ཕྱི་རོལ་མེ་རི་འབར་བའོ། །ཐབ་ཀྱི་རྒྱ་དང་ཁ་ཁྱེར་མདོག །ལས་བཞི་སོ་སོའི་མདོག་ཡིན་ཏེ། །།བར་མཚམས་མཛེས་པའི་ཚོན་གྱིས་བཅད། །འདབ་བརྒྱད་སྣ་ཚོགས་པདྨ་ཡིན། །ཐབ་ཀྱི་དབྱིབས་སུ་ཤིང་ཡང་བརྩེགས། །དབུས་སུ་ལས་མཐུན་མདའ་དར་བཙུགས། །ལྔ་སེར་མཁའ་འགྲོ་རྒྱུ་ལྡོག་ལ། །གདོང་མི་གཏུག་པར་སློབ་དཔོན་འདུག ། ཞི་བ་རྒྱས་པ་གཉིས་པོ་ལ། །བསྲེག་རྫས་གཡས་ལ་མཆོད་རྫས་གཡོན། །དབང་དང་དྲག་པོར་གོ་ལྡོག་བཤམས། །གཞི་དང་རྒྱན་དང་རྒྱན་གོས་སོགས། །བརྡ་ཙམ་ལས་དང་མཐུན་པར་བསྒྲུབ། །ཞི་བ་སུར་དཀར་གླང་མ་སྟེ། །རྒྱས་པར་འོམ་བུ་སུར་ཤིང་རུང་། །དབང་ལའང་སེ་རུ་བ་ཤིང་མཆོག །དྲག་པོར་ཚེར་མ་ཅན་གང་རུང་། །རིང་ཐུང་ཐབ་ཀྱི་ཕྱེད་ཚད་དེ། །ཞི་བ་འདབ་བརྒྱད་འོ་མས་སྦག །རྒྱས་པ་འདབ་བཞི་མར་ཁུས་སྦག །དབང་ལ་འདབ་ལྔ་ཇ་་རྒོད་སོགས། །དྲག་པོ་འདབ་གསུམ་ཁྲག་གིས་སྦག །དེ་དག་རྩ་རྩེ་གཉིས་ཀ་བསྒྲེ། །བཤམས་དུས་འབུལ་དུས་ཁྱད་པར་མེད། །དང་པོ་ཡམ་ཤིང་མར་ཁུ་སྟེ། །དེ་ནས་གཙོ་བོ་གང་ཡིན་རྣམས། །དེ་ནས་གོ་རིམ་ངེས་པ་མེད། །མཇུག་ནི་ཀུ་ཤ་ཡིན་པས་རྫོགས། །མཆོད་རྫས་མཆོད་པ་སྣ་བདུན་དང་། །མེ་ལྷའི་གཏོར་མ་ཆེ་ཆུང་གཉིས། །ཞི་བའི་གཏོར་མ་ཟླུམ་པོ་པད་འདབ་བསྐོར། །རྒྱས་པ་ཟུར་བཞི་དབང་ནི་ཟུར་གཉིས་ཏེ། །དྲག་པོ་ཟུར་གསུམ་རྣམས་ལ་
མར་རྒྱན་གཟབ། །དཀར་དམར་རྒྱན་ལྡན་འབུལ་གཏོར་གཅིག་ཀྱང་བཤམས། །ཞི་བར་ཏིལ་ནག་ཡུངས་ཀར་གྲོ་གཙོ་ཆེ། །རྒྱས་པར་འབྲས་དང་སོ་བ་དུར་བ་གཙོ། །དབང་ལ་ཟས་མཆོག་མེ་ཏོག་ཤིང་ཐོག་དེར། །དྲག་པོར་ལིངྒ་ཤ་དུམ་སྦྲག་པ་དང་། །ཡུངས་ཀར་གཙོ་ཆེན་གཞན་རྣམས་གང་འཛོམ་ཆོག །ཁྱད་པར་དྲག་པོར་ཤོག་ལིང་སྤྱི་མཚམས་བྲི། །ཟན་ལིང་པར་མ་ཤ་དུམ་ཁྲག་ཐིགས་ཕྲག །བརྒྱ་རྩ་ལྷག་ཙམ་ངེས་པར་དགོས་པ་སྟེ། །གལ་ཏེ་ཟན་ལིང་པར་མ་མ་གྲུབ་ན། །ཟན་ལིང་ཆེ་བ་གཅིག་བྱས་བསྒྲལ་ལས་རྗེས། །དུམ་བུ་བརྒྱ་ལྷག་གཏུབས་ནས་ཤ་དུམ་སྦག །བདག་བསྐྱེད་མགོན་པོའི་སྲུང་འཁོར་བསྒོམ་པའི་རྗེས། །མགོན་པོའི་གཞུང་ལྟར་གསེར་སྐྱེམས་གཏོར་བྱས་ནས། །བཀུག་གཞུག་ཕུར་འདེབས་བསྒྲལ་ལས་ལས་འགྲིགས་ལྟར། །ཤོག་ལིང་གཏུབ་ལ་ཟན་ལིང་རེ་དང་སྦྲག །ཞི་རྒྱས་དབང་གསུམ་ལ་ནི་དེ་མི་དགོས། །ཐབ་དང་མཆོད་རྫས་བསྲེག་རྫས་ཀུ་ཤ་བྲན། །སྟོང་པའི་ངང་ལས་ཧཱུཾ་དང་ཨ་ཡིག་ལས། །བྱུང་བའི་རྡོར་སེམས་ཡབ་ཡུམ་འོད་ཞུ་བའི། །རྡོར་དྲིལ་ལག་མཐིལ་ཟླ་ཉིའི་གདན་ལ་འཁོད། །པད་ཀོར་དང་བཅས་བླངས་ཏེ་གསོལ་ཞིང་འཁྲོལ། །ཨོཾ་བཛྲ་སཏྭ་ཧཱུྃ་མྲྀ་དྷ་ཆུ་ཤྭ་རི་ཧཱུཾ། དེ་ནས་བཟུང་སྟེ་རྡོར་དྲི་ལ་འབྲལ་མི་རུང་། །སུམྦྷ་ནི་བརྗོད་བགེགས་བསྐྲད་སྲུང་འཁོར་བསྒོམ། །དིཏྟོན་ཊ་བྷེ༔ སྭ་བྷ་ཝའི་རྗེས། མགོན་པོའི་གཞུང་གི་བསྐང་བའི་བྱིན་རླབས་དེས། །མཆོད་རྫས་
བསྲེག་རྫས་གཉིས་ཀ་བྱིན་རླབས་ཏེ། །རྡོར་དྲིལ་དང་བཅས་དགང་བླུགས་སྦྱར་བྱས་ནས། །བསྲེག་རྫས་རྣམས་ལ་རེག་ཅིང་སྔགས་རྣམས་བརྗོད། །ཨོཾ་ཨཱཧཱུཾ། ཨོ་ཋ་ཌཱ་ཋ་ཌ་ཎ་ཥ་ཥཱ། ཨོ་ཨཱ་ཧཱ། །རྫས་རྣམས་བཀྲུས་པར་བསམ། ཡམ་ཤིང་ལ་རེག །ཨོ་བི་སྭ་ཧཱ། མར་ཁུ་ལ་རེག་།ཨོ་ཨ་སྭཱ་ཧཱ། འབྲུ་ཀུན་ལ་རེག །ཨོ་ཛཾ་སྭཱ་ཧཱ། རྫས་ཀུན་ལ་རེག །ཨོ་ཀུ་རུ་ཀུ་རུ་སྭཱ་ཧཱ། ཀུ་ཤ་ཆེན་པོ་པད་ཀོར་དང་བཅས་བླངས། ཨོ། ཀུ་ཤ་འདི་ནི་གཙང་ཞིང་དགེ །ཚངས་པ་ལྷ་རྣམས་དག་བྱེད་ཅིང་། །དཀོན་མཆོག་གསུམ་པོ་མཉེས་བྱེད་པ། །ས་ལ་སྐྱེས་པ་འདབ་མའི་སྙིང་། །བདག་གི་བགེགས་རྣམས་ཐམས་ཅད་ནི། །ཞི་ཞིང་བདེ་ལེགས་མཛད་དུ་གསོལ། །ཨོཾ་བཛྲ་སཏཱ་ཨཱཿ ཐབ་ཀྱི་དབུས་སུ་ཀུ་ཤ་རྒྱ་གྲམ་ནི། །རྩེ་མོ་ལས་ཀྱི་ཕྱོགས་སུ་བསྟན་ཏེ་བཞག །ཆུན་པོ་བརྒྱད་ནི་ཐབ་ཀྱི་ཁ་ཁྱེར་ཐད། །གཡས་བསྐོར་རྩ་བ་རྩེ་མོས་ནོན་པར་བཀོད། །དེ་ནས་བསང་སྦྱངས་མགོན་པོའི་གཞུང་ལྟར་བྱས། །སྟོང་པའི་ངང་ལས་ཧཱུྃ་ལས་ཐབ་ཁུང་ནི། །བྲིས་པ་ལྟ་བུའི་མཚན་ཉིད་ཡོངས་རྫོགས་དབུས། །པདྨ་ར་སྐྱེས་གདན་ལ་རཾ་ཡིག་ལས། །མེ་ལྷ་ལས་ཀྱི་མདོག་ཅན་ཞལ་གཅིག་པ། །ཕྱག་བཞི་སྤྱན་གསུམ་རལ་པའི་ཐོར་ཚུགས་ཅན། །གཡས་གཉིས་དབྱུག་
པ་མི་འཇིགས་ཕྱག་རྒྱ་དང་། །གཡོན་གཉིས་ཕྲེང་བ་དང་ནི་རིལ་བ་འཛིན། །མེ་ལྕེ་སྟོང་གི་དཀྲིས་ཤིང་འོད་འབར་བའི། །གནས་གསུམ་འབྲུ་གསུམ་ཐུགས་ཀར་རཾ་ཡིག་གསལ། །ཞི་བར་དགེ་སྦྱོང་ཁྱེའུ་གཙང་མའམ། །རྒྱས་པར་ཕྱུག་པོ་དབང་ལ་གཞོན་ནུ་མ། །དྲག་པོར་ལག་དམེ་ཅན་གྱི་མེ་རུ་སྦྱར། །དེ་ཉིད་སློབ་དཔོན་ཉིད་ཀྱི་ཕྱག་ཏུ་ཕུལ། ཧཱུྃ། དང་པོ་མེ་བྱུང་གང་ནས་བྱུང་། །སྔོན་ཚེ་བསྐལ་པའི་དང་པོ་ལ། །བཅོམ་ལྡན་མ་མགོན་རིགས་ལྔ་ཡི། །ཐུགས་ཀའི་འོད་ཀྱི་གོང་བུ་ནས། །ཡི་གེ་རཾ་གྱི་འཕྲོ་འདུ་ལས། །ཡེ་ཤེས་ལྔ་ཡི་མེ་བྱུང་ནས། །དུག་ལྔའི་ཕུང་པོ་གཏན་ནས་བརླག །ཡེ་ཤེས་ལྔ་རུ་ལྷུན་གྱིས་གྲུབ། །དོ་ནུབ་གཞལ་ཡས་ཕོ་བྲང་འདིར། །ཉོན་མོངས་དུག་ལྔའི་ཡམ་ཤིང་ལ། །ཡེ་ཤེས་ལྔ་ཡི་མེ་སྦར་བས། །ཕྲིན་ལས་གང་བརྩམ་འགྲུབ་གྱུར་ཅིག །ཨོ་ཛཱ་ལ་ཛཱ་ལ་ཧཱུཾ། ཐབ་ཀྱི་ཤར་ལྷོ་མཚམས་ནས་སྦྱར། །དེ་ནས་བུད་ཤིང་ཅུང་ཟད་ཐོགས། །ཧཱུྃ། མ་བདུན་སྲིང་བཞི་འབར་མ་དགུ། །དུར་ཁྲོད་ཆེན་པོའི་གནས་བརྒྱུད་ནས། །ལས་དང་མཐུན་པའི་ཤིང་ཐུས་ལ། །ཕོ་བྲང་དཀྱིལ་འཁོར་དམ་པ་འདིར། །འདོད་པའི་དངོས་གྲུབ་ཐོབ་པའི་ཕྱིར། །ལས་ཀྱི་མེ་ནི་སྦར་
བར་མཛོད། །རླུང་གཡབ་མ་ཡིས་རླུང་གཡོབ་ཅིག །ཨོཾ་ཨཱཧཱུཾ། དེ་ནས་མདའ་དར་ལག་ཏུ་ཐོགས་ཏེ་གཡབ། ཧཱུྃ། ཡེ་ཤེས་ལྔ་ཡི་མེ་ཕུང་འབར་བ་ནི། །དུར་ཁྲོད་མེ་ཡི་མཆོད་པ་མ་རྫོགས་བར། །ཕྱོགས་མཚམས་སྟེང་འོག་ཐམས་ཅད་དུ། །མེ་ལྕེ་མ་མཆེད་མ་འཕྲོ་ཅིག །གལ་ཏེ་མཆེད་ཅིང་འཕྲོས་གྱུར་ན། །།ལྷ་འདྲེ་གཞི་བདག་ཚིག་དོག་ཡོད། །དེ་ཕྱིར་མེ་མགོ་དར་གྱིས་མནན། །མེ་ལྕེ་མ་འཕྲོ་མ་མཆེད་ཅིག །ཨོ་རཾ་ནན་ཤཱནྟཾ་ཀུ་རུ་ཡེ་སྭཱ་ཧཱ། ཐབ་དབུས་མེ་ལྷ་དམ་ཚིག་པའི། །ཐུགས་ལས་འོད་ཟེར་འཕྲོས་པ་ཡིས། །ཤར་ལྷོ་ཕྱོགས་ནས་མེ་ཡི་ལྷ། །དྲང་སྲོང་ཚོགས་བཅས་སྤྱན་དྲངས་གྱུར། །ལག་པ་མི་འཇིགས་ཕྱག་རྒྱ་ཡི། །མཐེ་བོང་སྲིན་ལག་བཅས་གཡོབ་ཅིང་། །རྣ་བ་གཡོན་ནས་གཡས་ངོས་ཁྱེར། །གཡོན་པས་དྲིལ་བུ་བསིལ་བཞིན་དུ། །ཨོ། ཚུར་སྤྱོན་ཚུར་སྤྱོན་འབྱུང་པོ་ཆེ། །ལྷ་ཡི་དྲང་སྲོང་གཉིས་སྐྱེས་མཆོག །བསྲེག་བླུགས་ཞལ་ཟས་བཞེས་སླད་དུ། །འདིར་ནི་ཡང་དག་བརྙེས་པར་མཛོད། །ཨོ་ཊ་ཀི་ཧཱུྃ་ཛཿ ཧཱུཾ། གཟི་བརྗིད་འབར་བ་མེ་ཡི་ལྷ། །འདོད་པ་ཐམས་ཅད་རབ་བསྒྲུབ་པ། །ཐུགས་རྗེས་སེམས་ཅན་དོན་གྱི་ཕྱིར། །
འབར་བའི་གནས་འདིར་བཞུགས་སུ་གསོལ། །ས་མ་ཡ་ཏིཥྛ་ལྷན། ཐབ་ཀྱི་ཁ་ཁྱེར་ཀུ་ཤའི་གདན། །ཡེ་ཤེས་མེ་ལྷ་འཁོད་པ་ལ། །བྱོན་སྐྱེམས་མཆོད་ཡོན་འབུལ་བར་བགྱི་། །ཨོཾ་ཨཀྵེ་ཡེ་ས་པཱ་རི་ཝཱ་ར་ཨརྒྷཾ་་པྲིཀྵ་ནི། པཱདྷཾ་པྲ་ཏིཙྪ་སྭཱ་ཧཱ། རྡོ་རྗེ་དང་བཅས་ལག་གཡས་ཀྱི་མཐེབ་མོས་འཛུབ་ཆུང་མནན་ལ་ཕྱར། ཧཱུཾ། རྡོ་རྗེ་འདི་ནི་རྡོ་རྗེ་ཆེ། །སངས་རྒྱས་ཀུན་གྱི་བྱིན་གྱིས་བརླབས། །དམ་ཚིག་འདི་ལས་འདས་ན་ནི། །རིགས་རྣམས་མྱུར་དུ་ཐལ་བར་བྱེད། །ཨོཾ་ཧ་ན་ས་མ་ཡ་ཧཱུྃ་ཕཊ། མེ་ལྷ་ཡེ་ཤེས་པ་དང་ནི། །དམ་ཚིག་མེ་ལྷ་དབྱེར་མེད་གྱུར། །ཛཿཧཱུྃ་བཾ་ཧོ༔ སླར་ཡང་ཐུགས་ཀའི་འོད་ཟེར་གྱིས། །དབང་ལྷ་རིགས་ལྔ་སྤྱན་དྲངས་ཏེ། །དབང་བསྐུར་སྐུ་གང་དྲི་མ་དག །ཆུ་ལྷ་ཡར་ལུད་ལས་མཐུན་པའི། །རིགས་ཀྱི་བདག་པོས་དབུ་བརྒྱན་གྱུར། །ཨོཾ་ཨཀྵེ་ས་པཱ་རི་ཝཱ་ར་ཨརྒུ་ནས་ཤཔྟ་པྲ་ཏིཙྪསྭཱ་ཧཱ། ཨོཾ། གཟི་བརྗིད་འབར་བ་མེ་ཡི་ལྷ། །འབར་བཅས་སྐུ་ཡི་རྒྱན་གྱིས་བརྒྱན། །རྔམ་པའི་བྱིན་ཅན་ལས་ལ་བརྩོན། །བསྲེག་བླུགས་འབུལ་ལོ་ལས་ཀུན་སྒྲུབས། །ཚངས་པ་འཇིག་རྟེན་མགོན་གྱི་སྲས། །ཞི་ལ་སོགས་པའི་ལྷ་དཔལ་ཏེ། །
ཇི་ལྟར་འདོད་པའི་ལྷ་དཔལ་ཏེ། །ཇི་ལྟར་འདོད་པའི་དོན་འགྲུབ་པའི། །གཟི་བརྗིད་རྒྱལ་པོར་ཕྱག་འཚལ་བསྟོད། །དགང་བླུགས་ཁ་ལ་རཾ་ཡིག་དང་། །མེ་ལྷ་ཅུང་ཞིག་ཞལ་གདངས་བའི། །ལྗགས་ལ་རཾ་ཡིག་གིས་མཚན་པའི། །བསྲེག་རྫས་བདུད་རྩི་བཞེས་པར་གྱུར། །ལག་གཉིས་རྡོར་དྲིལ་དང་བཅས་ཁུ་ཚུར་གྱིས། །མཛུབ་མོ་གཉིས་བརྐྱང་དགང་གཟར་བླུགས་གཟར་བཟུང་། །བླུགས་གཟར་གྱིས་ནི་མར་ཁུ་གསུམ་མམ་བདུན། །དགང་གཟར་ནང་དུ་བླུགས་ཤིང་སྔགས་འདི་བརྗོད། །ཨོཾ་ཨཀྵེ་ཡེ་སྭཱ་ཧཱ། ཞི་སོགས་གསུམ་ལ་གྲུ་མོ་པུས་མོ་ལས། །ཕྱིར་མི་འདའ་ཞིང་དྲག་པོར་འདའ་བྱས་ལ། །ཞི་སོགས་གསུམ་ལ་ཐབ་སྟེང་གཡས་བསྐོར་གསུམ། །དྲག་པོ་ལ་ནི་གཡོན་བསྐོར་གསུམ་བྱ་ཞིང་། ན་མཿས་མནྟ་བུདྡྷཱ་ནཾ། ཨོ། ཨཀྵེ་ཡེ་ཧ་བྱ་ཀ་བྱ་ཝ་ཧ་ན་ཡེ་ཨ་དུ་བྱ་སྭཱ་ཧཱ། མར་ཁུ་ཐབ་ཏུ་གསུམ་མམ་བདུན་འབུལ་ཏེ། །མེ་ལྕེ་འཇམ་ཞིང་དཀར་སེར་སྔོ་དང་དམར། །དྲི་ཞིམ་མེ་སྒྲ་སྙན་པ་བཟང་བ་སྟེ། །སྒྲ་མི་སྙན་དང་མི་སྡུག་ཚག་པ་དང་། །མེ་ལྕེ་དུད་པས་རང་ཕྱོགས་བདུག་ན་ངན། །དྲག་པོ་ལ་ནི་ངན་པ་རྣམས་ཀྱང་ལེགས། །དེ་ནས་བསྲེག་རྫས་ཐམས་ཅད་རིམ་པ་ལྟར། །མཐེབ་སྲིན་ནམ་ནི་གུང་མཐེབ་སྦྱར་ནས་འབུལ། །ཡམ་ཤིང་ཀུ་ཤ་འོད་ཀྱི་དཀྱིལ་འཁོར་ལ། །རམ་རྩི་ལ་སོགས་རྫས་རྣམས་ཕྱག་ཏུ་སྟེ། །བཟའ་བཏུང་རྫས་རྣམས་
ཞལ་དུ་ཕུལ་བར་བསྒོམ། །ཨོཾ། ཨགེ་དེ་ཝ་ས་པཱ་རི་ཝཱ་ར༔ མེ་ལྷའི་སྔགས་དེ་རྫ་ས་སྔགས་མགོ་ལ་སྦྱར། །ཡམ་ཤིང་བྱང་ཆུབ་ཤིང་བསམ་རྩེ་གྱེན་བསྟན། །ཨོ་བྷྱོ་དྷི་བྲྀཀཱ་ཡེ་སྭཱ་ཧཱ། གཟི་བརྗིད་ཕུན་སུམ་ཚོགས་པ་ལ༔ ཞི་བ་ལ། བར་དུ་གཅོད་པ་ཤཱནྟིཾ་ཀུ་རུ་ཡེ་སྭཱ་ཧཱ། རྒྱས་པ་ལ། པུཎྚི་ཀུ་རུ་ཨོ། དབང་ལ། པ་ཤཾ་ཀུ་རུ་ཧོ༔ དྲག་པོ་ལ། བར་དུ་གཅོད་པའི་དགྲ་བགེགས་མཱ་ར་ཡ་ཕཊ༔ དེ་ལྟར་ཚིག་གིས་བསྒྱུར་སོ་རིག་པས་དཔག །མར་ཁུ་ལ། ཨོཾ་ཨཀྵེ་ཡེ་སྭཱ་ཧཱ། འབྱོར་པ་ཕུན་སུམ་ཚོགས་པ་ལ༔ ཏིལ་ནག་ལ། ཨོ། སརྦ་པཱ་པཾ་ད་ཧ་ན་བཛྲ་ཡེ་སྭཱ་ཧཱ། ཞི་བ་ལ། སྡིག་པ་དང་སྒྲིབ་པ༴ རྒྱས་པ་དང་དབང་ལ། དགེ་བ་ཕུན་སུམ་ཚོགས་པ༴ ཡུངས་ཀར་ལ། ཨོཾ་སརྦ་ཨརྦ་སིདྡྷི་ཡེ་སྭཱ་ཧཱ། བགེགས་ཐམས་ཅད༴ རྒྱས་པ་དང་དབང་ལ། བགེགས་མེད་པ་ཕུན་སུམ་ཚོགས་པ་ལ༴ གྲོ་ལ། ཨོཾ་བཛྲ་གྷསྨ་རི་སྭཱ་ཧཱ། ཞི་བ་ལ། ནད་ཐམས་ཅད༴ རྒྱས་དབང་དྲག་པོ་གསུམ་ལ། ནད་མེད་པ་ཕུན་སུམ་ཚོགས་པ༔ སྲན་མ་ལ། ཨོཾ་བཛྲ་མ་ཧཱ་བ་ལ་ཡེ་སྭཱ་ཧཱ། སྟོབས་ཕུན་སུམ་ཚོགས་པ་ལ༔ ཞི་དྲག་གཉིས་ལ། བར་དུ་གཅོད་པ༴ དུར་བའི་མྱུ་གུའི་རྩ་བ་ལ། ཨོ་བཛྲ་ཨ་ཡུ་ཥེ་སྭཱ་ཧཱ། ཚེ་ཕུན་སུམ་ཚོགས་པ་ལ༔ ཞི་དྲག་
གཉིས་ལ། བར་དུ་གཅོད་པ༴ འབྲས་ལ། ཨོཾ་བཛྲ་པུཥྛ་ཡ་སྭཱ་ཧཱ། བསོད་ནམས་ཕུན་སུམ་ཚོགས་པ་ལ༔ བིལ་བ་སྟར་རྒ་ཛ་ཏི་ཕ་ལ་རྣམས། །མ་རྙེད་ཤུག་ཐོག་གམ་ནི་སིལ་འབྲུ་སེ་ཐོག་ལ། །ཨོཾ་བཛྲ་ཤྲཱི་ཝ་ཡེ་སྭཱ་ཧཱ། ཡང་ན་རྒུན་འབྲུམ་ལ་སོགས་ཤིང་ཐོག་ལ། ཨོཾ་ཨ་པ་མ་དྷི་ཕ་ལ་ཡ་སྭཱ་ཧཱ། ཡང་ན་སེ་འབྲུའམ་ནི་སྐྱེར་འབྲུ་ལ། ཨོ་ཏི་པ་ལ་ཡ་སྭཱ་ཧཱ། དེ་གསུམ་གང་རུང་གིས་ཀྱང་ཆོག་པ་སྟེ། །རིགས་རྒྱུད་ཕུན་སུམ་ཚོགས་པ་ལ༔ ཞི་དྲག་གཉིས་ལ། བར་དུ་གཅོད་པ༔ ཞོ་འོ་ཐུད་སོགས་དཀར་གསུམ་གང་འབྱོར་ལ། །ཨོཾ་བཛྲ་མ་ལེ་པུཥཱ་ཡ་སྭཱ་ཧཱ། ཤེས་རབ་ཕུན་སུམ་ཚོགས་པ་ལ༔ ཞི་དྲག་གཉིས་ལ། བར་དུ་གཅོད་པ༴ སོ་བ་ལ། ཨོ། བཛྲ་བི་ཛ་ཡེ་སྭཱ་ཧཱ། ནོར་དང་འབྲུ་ཕུན་སུམ་ཚོགས་པ་ལ༴ ཞི་དྲག་གཉིས་ལ། བར་དུ་གཅོད་པ༔ ཞོ་ཡིས་སྦྲུས་པའི་སྐྱ་ཚུ་ཟས་སྣ་བཏབ། །རིལ་བུའམ་ཕྱེ་མ་ལ་ནི་ཟས་མཆོག་ཟེར། །ཨོཾ་སརྦ་སཾ་བྷ་དེ་སྭ་ཧཱ། བདེ་བ་ཕུན་སུམ་ཚོགས་པ་ལ༴ ཞི་དྲག་གཉིས་ལ། བར་དུ་གཅོད་པ༴ མེ་ཏོག་ལས་བཞི་གང་ཡིན་ཁ་དོག་ཅན། །མེད་ན་ནས་ལ་ཚོན་གྱིས་ཁ་དོག་བསྒྱུར། །ཨོཾ་བཛྲ་པུཥཱ་སྭཱ་ཧཱ། ཁ་དོག་དང་གཟི་བརྗིད་ཕུན་སུམ་ཚོགས་པ་ལ༔ ཞི་དྲག་གཉིས་ལ། བར་དུ་གཅོད་པ༴ དྲི་དང་སོ་རྩི་དང་ཞེས་
བུར་ཆུ་སྟེ། །མ་རྙེད་ཇ་དང་སྤོས་ཆུའི་རུང་བ་ཡིན། ཨོ་ཏཾ་བུ་ལ་ཡ་སྭཱ་ཧཱ། བཀྲ་ཤིས་ཕུན་སུམ་ཚོགས་པ་ལ༴ ཞི་དྲག་གཉིས་ལ། བར་དུ་གཅོད་པ༴ ནས་ལ་ཆུས་སྦག་སྨན་སྣ་བཏབ་བྱས་ནས། ཨོ་ཨོ་ཥ་དྷི་སྭཱ་ཧཱ། ནད་མེད་པ་ཕུན་སུམ་ཚོགས་པ་ལ༔ ཞི་དྲག་གཉིས་ལ། བར་དུ་གཅོད་པ༔ དར་རས་ཕྲུག་རས་ཤིང་བུའི་རྩེར་སྦྱར་ནས། ཨོཾ་བཛྲ་ཝསྡུ་ཡེ་སྭཱ་ཧཱ། རྒྱན་དང་གོས་ཕུན་སུམ་ཚོགས་པ་ལ་ཞི་དྲག་གཉིས་ལ། བར་དུ་གཅོད་པ༴ ནས་ལ། ཨོ་བཛྲ་མ་ཧཱ་བེ་ག་ཡེ་སྭཱ་ཧཱ། ཤུགས་ཕུན་སུམ་ཚོགས་པ་ལ༔ ཞི་དྲག་གཉིས་ལ། བར་དུ་གཅོད་པ༴ དེ་དག་མིན་པའི་འབྲུ་དང་བཟའ་བཏུང་རིགས། ཨོཾ་ཨཱཧཱུཾ། གིས་ཕུལ་ནས་ལས་བཞི་སོ་སོའི་འདོད་གསོལ་སྔགས་བཅས་སྤྱི་མཚམས་སྦྱར། ཀུ་ཤ་ལ། ཨོཾ་ཨ་པྲ་ཏི་ཧ་ཏ་བཛྲ་ཡེ་སྭཱ་ཧཱ། བསྲུང་བ་ཕུན་སུམ་ཚོགས་པ་ལ༴ ཞི་དྲག་གཉིས་ལ། བར་དུ་གཅོད་པ༴ དེ་ལྟར་ཡམ་ཤིང་མར་ཁུ་ཀུན་ལ་དགོས། །ཞི་བར་ཏིལ་དང་ཡུངས་ཀར་གཙོ་བོ་སྟེ། །གཞན་རྣམས་གང་འབྱོར་ཆོག་ཅིང་མེད་ཀྱང་རུང་། །ཚེ་རིང་དུར་བ་བསོད་ནམས་འདོད་ན་འབྲས། །དེ་སོགས་བསྲེག་རྫས་རེ་རེའི་ལས་ཚོགས་ཏེ། །ཡིན་ཕྱིར་གང་འདོད་དེ་ནི་མང་བར་བྱ། །དྲག་པོ་ཡིན་ན་མར་ཁུའི་རྗེས་ཉིད་དུ། །བསྲེག་རྫས་གཙོ་བོ་ལིངྒ་ཤ་ཁྲག་བསྲེ། །ཤོག་ལིང་དུམ་བུ་ཟན་ལིང་ཤ་དུམ་གསུམ། །ཁྲག་ཆུ་བསྲེས་
པ་ཅུང་ཟད་བྲན་ལ་ཕུལ། །དགང་གཟར་རམ་ནི་ཧོམ་གཟར་ནང་བཞག་ཕུལ། །ཡང་ན་ལག་པ་དག་པར་བཀྲུས་བྱས་ནས། །དགང་གཟར་མི་འགྲིགས་སློབ་དཔོན་ལག་པས་འཕངས། །རང་ཉིད་ཡི་དམ་ཕྱག་གིས་དགྲ་བགེགས་དངོས། །མེ་ལྷའི་ཞལ་དུ་རྐང་མཐིལ་སྐྱ་ལྷག་ལྷག །འཕངས་བར་བསྒོམ་པ་དྲག་ལས་ཆེན་པོར་བཤད། །རྩ་སྔགས་ཤམ་བུར་སྔགས་འདི་བཏགས་པས་འབུལ། །གནོད་བྱེད་ཆ་་མཱ་ར་ཡ་ཛྭ་ལ་རཾ་ཁཱ་ཧི་ཁཱ་ཧི། །དེ་ལྟར་མེ་ལྷར་ཡམ་ཤིང་མར་ཁུ་དང་། །བསྲེག་རྫས་གཙོ་བོ་ཉེར་གཅིག་ཙམ་རེ་འབུལ། །བསྲེག་རྫས་གཞན་རྣམས་གསུམ་རེ་ཙམ་གྱིས་ཆོག །དེ་ནས་མཆོད་པ་སྣ་བདུན་རེ་རེ་བཞིན། །ལག་ཏུ་བཟུང་ཞིང་སྔགས་ཀྱིས་ཐབ་ཏུ་མཆོད། །འཇིག་རྟེན་ཁམས་ནི་དཔག་མེད་ན། །ཞེས་སོགས། རབ་འབྱམས་རྒྱ་མཚོ་དཔག་མེད་ན། སོགས་ནས། བདག་གིས་གུས་པས་བཤམས་པ་འདི། །མེ་ལྷ་དྲང་སྲོང་ཚོགས་ལ་འབུལ། །བཞེས་ནས་ལས་འདི་འགྲུབ་པར་མཛོད། །ཨོཾ་ཨཀྵེ་དེ་ཝ་ས་པཱ་རི་ཝཱ་ར་ཨབྷཾ་སོགས་ནས། ཤཔྟའི་བར་དུ་འགྲེས། ཟན་ཀོང་ལྷ་བཤོས་སོགས་འབུལ་ཞིང་། ཤལྟའི་མཚམས་འཛིན་མེ་ཏོག་འབུལ། །སྐབས་སུ་རོལ་མོ་འུར་བརྡུང་བྱ། །མེད་ན་ཌ་དྲིལ་དྲག་ཏུ་འཁྲོལ། །སྐབས་འདིར་མདའ་དར་གཡུག་བྱ་ཞིང་། །འདོད་གསོལ་འོག་ནས་འབྱུང་ལྟར་རོ། །ཧཱུྃ། ཚངས་པ་འཇིག་རྟེན་མགོན་
གྱི་སྲས། །མེ་ལྷའི་རྒྱལ་པོ་དྲང་སྲོང་མཆོག །འབྱུང་བ་ལ་ཡང་བསྐྱབ་པའི་ཕྱིར། །ཐུགས་རྗེའི་དབང་གིས་སྐུ་སྤྲུལ་པའི། །རིག་སྔགས་གྲུབ་པའི་དྲང་སྲོང་མཆོག །ཕྲིན་ལས་བསྒྲུབ་པའི་མངའ་བདག་ཆེ། །བསྐལ་པའི་མེ་ལྟར་གཟི་བརྗིད་འབར། །མངོན་ཤེས་རྫུ་འཕྲུལ་ཞབས་དང་ལྡན། །ཐབ་ཀྱི་ཐེག་མཆོག་ར་སྐྱེས་ཆིབས། །བསྒང་ཕྲེང་འཛིན་ཅིང་རིག་སྔགས་གསུང་། །བདུད་རྩི་བཅུད་དང་གྷནྡྷེ་བསྣམས། །ཆོས་ཀྱི་བདུད་རྩི་ཡོངས་ལ་བསིལ། །ཉེས་པའི་སྐྱོན་བྲལ་ཚངས་པར་སྤྱོད། །འཇིག་རྟེན་གནས་ཀྱང་མྱ་ངན་བྲལ། །ཞི་བ་བརྙེས་ཀྱང་ཐུགས་རྗེ་ཆེ། །དེ་ལ་བསྟོད་དེ་ཕྱག་ཀྱང་འཚལ། །འདོད་པའི་ཕྲིན་ལས་སྒྲུབ་པ་དང་། །དངོས་གྲུབ་མ་ལུས་སྩོལ་བར་མཛོད། །དྲང་སྲོང་ཆེན་པོ་མེ་ལྷ་ཡི། །སྔོན་གྱི་དམ་བཅའ་མནའ་བོར་བ། །ལྷ་རྣམས་ཞལ་ནི་མེ་ཡིན་ཏེ། །སྦྱིན་སྲེག་དེ་ནི་མེ་ལ་གནས། །མེ་ལྷ་ཁྱེད་ཉིད་མེ་དཔུང་དང་། །གཉིས་སུ་མེད་པར་བཞུགས་མཛོད་ལ། །བསྲེག་རྫས་མཆོད་པ་འདི་རྣམས་ཀུན། །མ་མགོན་ལྕམ་དྲལ་འཁོར་བཅས་ཀྱི། །ཞལ་དུ་བསྟབས་པའི་ལས་མཛོད་ཅིག །ཞི་བའི་སྦྱིན་སྲེག་ཡིན་ན་ནི། །མེ་
ལྷའི་ཐུགས་ཀར་འོད་ཀྱི་གུར་ཆེན་ནང་། །ཁཾ་ལས་བྲག་སྟེང་སོགས། རྒྱས་པའི་སྦྱིན་སྲེག་ཡིན་ན་ནི། །མེ་ལྷའི་ལྟོ་བ་ཡངས་ཤིང་རྒྱ་ཆེ་བ། ཁཾ་ལས་བྲག་སྟེང་སོགས། །དེ་ལྟར་ཞི་རྒྱས་གཉིས་ཀ་ཁྱད་མེད་པར། །མེ་ལྷའི་ཐུགས་ལས་སྤྲུལ་པའི་མེ་ཡི་ལྷ། །ཡིད་ལས་སྐྱེས་པ་རང་འདྲ་ཅིག་བྱོན་ནས། །ལྷ་རྣམས་མཆོད་པའི་ཕྱག་ཚང་མཛད་པར་གྱུར། །དབང་དྲག་གཉིས་ལ་མར་ཁུའི་སྔགས་ཉིད་ཀྱིས། །མར་ཁུ་དགོང་བླུགས་གསུམ་ནི་ཐབ་ཏུ་འབུལ། །མེ་ལྷ་འཁོར་བཅས་འོད་དུ་ཞུ་གྱུར་པས། །འབར་བའི་རྣམ་པར་གྱུར་ནས་མེ་དཔུང་དབུས། ཁཾ་ལས་བྲག་སྟེང་ཞེས་པ་ནས་བཟུང་སྟེ། །སྤྱན་འདྲེན་བཞུགས་གསོལ་དབང་བསྐུར་ཕྱག་འཚལ་ནས། །མཚལ་མ་གཞུང་ལྟར་འདོན་པར་བྱས་པའི་རྗེས། །མཆོད་པ་བྱིན་རླབས་བྱས་རུང་མ་བྱས་ཆོག །སྐབས་གསུམ་མ་ཡི་མཇུག་ཏུ་སྔགས་ཀྱིས་ཕྱེ། །མཎྜལ་སྟེང་གི་ནས་འབྲུ་མཆོད་པའམ། །མེད་ན་འབྲུ་འམ་མེ་ཏོག་ཆུང་ཞིག་མཆོད། ཁྲག་གི་རྒྱ་མཚོ་ཞེས་པའི་ཚིག་མཇུག་ཏུ། །ཤི་མན་སོགས་སྔགས་ནི་གྱེར་བའི་ཚེ། །མཆོད་པ་སྣ་བདུན་ལག་གིས་བླང་ཞིང་འབུལ། །དྲག་པོ་ཡིན་ན་ཁྲག་གི་ཡོན་ཆབ་ཐོགས། །ཞི་དྲག་ལས་དང་མཐུན་པའི་མཆོད་པ་སྟེ། །ཁྲག་ནི་མེ་རུ་མི་བླུག་ཐབ་མདུན་འབུལ། །སྦྱིན་སྲེག་སྐབས་འདིར་ཚོགས་ནི་མི་དགོས་སོ། །གཏོར་མ་བྱིན་རླབས་འདི་རུ་མི་བྱ་ཞིང་། །ཧཱུྃ།
ལྷ་ཆེན་དཔལ་འབར་ཞེས་པ་ནས་བཟུང་སྟེ། །བཞེས་སུ་གསོལ་ཞེས་བྱ་བའི་ཚིག་མཚམས་དེར། བསྲེག་རྫས་ཐམས་ཅད་འབུལ་བར་བྱ་བ་སྟེ། །ཨོཾ་ཤྲཱི་མ་ཧཱ་ཀཱ་ལ་ཡཀྵ་བེ་ཏཱ་ལི་ཧཱུྃ་ཛཿ དེ་ནས་གོང་ལྟར་རྫས་སྔགས་འདོད་གསོལ་བྱ། །གཙོ་བོ་ཡབ་ཡུམ་ལ་ནི་བརྒྱ་འབུལ་ཏེ། རྩ་སྔགས་དེ་ལ། ས་པཱ་རི་ཝཱ་ར་སྦྱར་བས་འཁོར་དང་བཅས་པ་ལ་བརྒྱད་རེ་སྟེ། ཡམ་ཤིང་མར་ཁུ་བསྲེག་རྫས་གཙོ་བོ་རྣམས་སོ། །གཞན་རྣམས་གཙོ་བོ་ཡབ་ཡུམ་བདུན་ཉེར་གཅིག །འཁོར་རྣམས་གསུམ་རེ་ཙམ་གྱིས་ཆོག་པ་ཡིན། །དེ་ལྟར་བསྲེག་རྫས་རེ་རེའི་མཚམས་མཚམས་སུ། །མེ་དར་དེ་ཉིད་གཡུག་ཅིང་དབྱངས་དང་བཅས། །ལས་བཞི་སོ་སོའི་འདོད་གསོལ་འདི་ཉིད་གྱེར། །ཞི་བ་ལ། ནད་གདོན་སྡིག་སྒྲིབ་བག་ཆགས་ངན། །སྡང་དགྲ་གནོད་བྱེད་གདུག་པའི་དབལ། །རྣོ་བའི་མཚོན་དང་སྦྱོར་བའི་དུག །སྟོང་ཕྲག་བརྒྱད་ཅུའི་བགེགས་ཀུན་དང་། །བཞི་བརྒྱ་རྩ་བཞིའི་ནད་རྣམས་དང་། །རྨིས་ལྟས་མཚན་ངན་ཐམས་ཅད་ཀུན། །མྱུར་བ་ཉིད་དུ་ཞི་གྱུར་ཅིག །ཨོ་ཤཱནཾ་ཀུ་རུ་ཡེ་སྭཱ་ཧཱ། རྒྱས་པ་ལ། ཚེ་དང་བསོད་ནམས་སྙན་གྲགས་སྟོབས། །འཁོར་དང་བུ་སློབ་ཕྲིན་ལས་བཅས། །མངའ་ཐང་ལོངས་སྤྱོད་ཡོན་ཏན་ཀུན། །མྱུར་བ་ཉིད་དུ་རྒྱས་གྱུར་ཅིག །བྷྱོ་པུཊྚི་ཀུ་རུ་ཡེ་སྭཱ་ཧཱ། དབང་ལ། རྒྱལ་
བའི་ཐུགས་རྗེ་བྱིན་རླབས་དང་། །འགྲོ་བའི་སྟོབས་དང་དཔལ་འབྱོར་བཅས། །སྐྱེ་འགྲོ་མཐོང་ཐོས་དྲན་རེག་སོགས། །ཁམས་གསུམ་དབང་དུ་འདུས་གྱུར་ཅིག །ཧིཔ་ཤཾ་ཀུ་རུ་ཡེ་སྭཱ་ཧཱ། དྲག་པོ་ལ། བདག་ཅག་རྣམས་ལ་གནོད་པའི་བགེགས། །དམ་སྲི་འབྱུང་པོ་མ་རུངས་པ། །བསྟན་དགྲ་སྒོས་དགྲ་ལ་སོགས་པ། །ཞིང་བཅུ་ལྡན་རྣམས་བརླག་གྱུར་ཅིག །ཧཱུཾ་མཱ་ར་ཡ་ཕཊ། དྲག་པོའི་སྐབས་སུ་ཕཊ་སྒྲ་དྲག་པོར་བཅས། །མདའ་དར་ནག་པོ་ས་ལ་གདབ་པར་བྱ། །དེ་ནས་རིན་ཆེན་ཨིནྡྲ་ནཱི་ལའི་མདོག །ཛ་གད་ཁཱ་ཧིའི་སྔགས་དེ་དགང་བླུགས་ཀྱིས། །བདུད་རྩི་བདུན་ནམ་ཉེར་གཅིག་ཐབ་ཏུ་འབུལ། །དེ་བཞིན་རཀྟ་ཁྲག་གི་རྒྱ་མཚོར་འཇུག །རལྟ་སི་པ་ཏོ་ཡི་སྔགས་དེ་ཡིན། །རཀྟ་བདུན་ནམ་ཉེར་གཅིག་འབུལ་བ་ནི། །ཐབ་ཏུ་མི་བླུགས་ཐབ་ཀྱི་འགྲམ་དུ་བླུགས། །དེ་ནས་དམར་གཏོར་ཆེ་བ་མར་ཁུས་བྲན། །ཡཾ་ལས་རླུང་སོགས་གཏོར་མ་བྱིན་རླབས་བྱ། །གཞོང་པ་རྣམ་དག་ཟླ་གམ་སོགས་ཀྱི་མཇུག །གཏོར་སྔགས་མཐའ་དག་བཏོན་པར་བྱས་པའི་རྗེས། །མ་མགོན་ལྕམ་དྲལ་འཁོར་བཅས་ཀྱིས། །མཆོད་སྦྱིན་གཏོར་མ་འདི་བཞེས་ལ། །ཞེས་པ་ནས། ཡིད་ལ་འདོད་པ་ཀུན་འགྲུབ་མཛོད། །ཚིག་མཇུག་དེར། ཡོན་བདག་ཐམས་ཅད་ཀྱིས། རྗེས་ཟློས་ལན་
གསུམ་བྱེད་དུ་བཅུག །གཏོར་མའི་རྩེ་མོ་ཐབ་ཏུ་འབུལ་བར་བྱ། །དེ་ནས་གང་དྲིན་མ་དང་སྤྲིན་གཟུགས་མ། །དྲེགས་བྱེད་ཀུན་ལ་བདག་བསྟོད་དོ། །སླར་ཡང་དམར་གཏོར་བཤམས་ནས་བྲན་བྱས་ལ། །ཞི་རྒྱས་དབང་གསུམ་སྦྱིན་སྲེག་ཡིན་ན་ནི། །བྱང་ཕྱོགས་དུར་ཁྲོད་ཡེ་ཤེས་དབྱིངས་མ་འདོན། །དེ་ཉིད་མེ་ཡི་ནང་དུ་ཕུལ་བྱས་ཏེ། །དྲག་པོ་ཡིན་ན་འདས་དང་མ་བྱོན་འདོན། །དེ་ནས་གཏོར་མ་ལག་ཏུ་བཟུང་བྱས་ཏེ། །བཞེས་འབོད་གི་མ་ཧཱ་ཀཱ་ལ་ཞེས་པ་ནས། །དམ་ཉམས་ཡིད་ལ་མནག་པ་ཞེས་པའི་རྗེས། །བདག་དང་རྒྱུ་སྦྱོར་ཡོན་བདག་བསྲུང་བྱ་ལ། །གནོད་ཅིང་འཚེ་བའི་ནད་གདོན་བྱེད་ཁ་བགེགས། །ཁྲ་འདྲེ་ཤི་གཤེད་གོད་འདྲེ་ཆུང་སྲི་སོགས། །གང་དགོས་མིང་རྣམས་དེ་རུ་བརྗོད་བྱས་ལ། །བཞེས་བཅག་གཏོར་མ་མེར་འཕང་དར་ནག་གཡབ། །དེ་མིན་དམོད་པ་མང་མ་བརྗོད་མི་དགོས། །མ་མགོན་སྦྱིན་སྲེག་དངོས་གཞི་དེས་རྫོགས་ཏེ། །ཞོར་ལ་འཁོར་ལྔ་གཞན་རྣམས་མཆོད་འདོད་ན། །ཞི་བར་སྔགས་བདག་རྒྱས་པར་རྣམ་སྲས་དང་། །དབང་ལ་དམ་ཅན་དྲག་པོར་བདུད་སྲིན་སྦྱར། །ཡང་ན་ལས་བཞིའི་སྦྱིན་སྲེག་བཞི་ཀ་ལ། །ལྔ་ཀ་སྦྱར་ཡང་མི་འགལ་རུང་བ་སྟེ། །སྔགས་བདག་མཆོད་རྟེན་སྔོན་པོའི་རྒྱུད་ཆེན་ལས། །ལས་བཞིའི་སྦྱིན་སྲེག་ལ་བརྟེན་ཆར་འབེབས་དང་། །དྲག་པོའི་སྦྱིན་སྲེག་དགྲ་བསྒྲལ་སེར་འབེབས་དང་། །རྣམ་སྲས་ནོར་བུ་འབྱུང་བའི་རྒྱུད་ཆེན་ལས། །རྣམ་སྲས་བདག་པོ་ཀླུ་
བརྒྱད་བསྐོར་བ་ཡི། །སྦྱིན་སྲེག་ལ་བརྟེན་དགྲ་བོ་བསྒྲལ་ཐབས་གསུངས། །དེ་ཕྱིར་རུང་ངམ་མི་རུང་ཐེ་ཚོམ་སྤོངས། །མེ་ལྷ་མ་མགོན་ནས་བཟུང་གཙོ་བོ་ཀུན། །ཚིག་བསྒྱུར་མི་དགོས་གཞུང་ལྟར་མངོན་རྟོགས་བསྒོམ། །།བསྲེག་རྫས་འབུལ་བའི་དུས་ལ་བབ་ཙ་ན། །ཞི་བའི་དུས་སུ་ཐམས་ཅད་སྐུ་མདོག་དཀར། །རྒྱས་པ་སེར་པོ་དབང་ལ་དམར་པོ་དང་། །དྲག་པོ་ནག་པོར་བསྒོམ་པ་ཀུན་གྱི་སྲོལ། །ཡང་ན་སྐུ་མདོག་མི་བསྒྱུར་འོད་ཟེར་སྤྲོ། །འོད་ཟེར་དཀར་པོས་ནད་གདོན་སྡིག་སྒྲིབ་བསལ། །གསེར་མདོག་འོད་ཀྱི་ཚེ་དང་བསོད་ནམས་རྒྱས། །གློག་ཞགས་ལྟ་བུས་འདོད་རྒུ་དབང་དུ་བསྡུ། །འོད་ཟེར་མཐིང་ནག་ཚ་ཞིང་རྩུབ་པ་ཡིས། །དགྲ་བགེགས་བྱ་སྒྲོ་མེར་བསྲེགས་ལྟ་བུ་བསྒོམ། །འཁོར་ལྔ་སྦྱར་ན་མངོན་རྟོགས་མི་འདོན་པར། །རང་གི་ཐུགས་ལས་འོད་ཟེར་འཕྲོས་པ་ཡིས། །ལྷ་དེ་སྤྱན་འདྲེན་མ་མགོན་དཀྱིལ་འཁོར་ཕྱི། །རྡོ་ར་དུར་ཁྲོད་ནང་གི་ཁྱམས་དེ་རུ། །བཞུགས་པར་དམིགས་ལ་སྤྱན་འདྲེན་བཞུགས་གསོལ་དང་། །ཕྱག་འཚལ་མཆོད་པ་རང་རང་གཏོར་ཆོག་ལྟར། །ཨརྒྷཾ་་ལ་སོགས་སྔགས་དང་ཕྱག་རྒྱས་ཆོག །གཏོར་མ་བྱིན་རླབས་སོ་སོའི་གཏོར་མ་འབུལ། །རང་རང་གཞུང་ནས་འབྱུང་ལྟར་བསྟོད་པ་བྱ། །རྗེས་ཆོག་སོ་སོར་མི་དགོས་སྤྱི་དེས་ཆོག །དྲག་པོའི་སྦྱིན་སྲེག་ཡིན་ན་སྐབས་འདི་རུ། །སྦྲང་མ་སྐམ་པོ་ཅུང་ཟད་སླར་ངར་བརྔོས། །ཞིབ་པར་བཏགས་པའི་ཕྱེ་མ་མང་ཞིག་འཚག །གྲོ་ནས་ཤིན་ཏུ་ཁྱོག་པའི་ཕྱེ་ཞིབ་རུང་། །རང་གི་མདུན་ངོས་ཕྱོགས་
ཀྱི་གཙང་ས་དེར། །ནད་པའམ་ནི་གདོན་ཆེན་མི་དེ་ཡིས། །སྤུ་མེད་གོས་གྱོན་ཐབ་ཀྱི་ཉེ་བར་བཞག །ཐབ་ལ་ཤིང་ཞིབ་བསྣན་ལ་མེ་ཆེན་སྦར། །མ་མགོན་སྐུ་ལས་མེ་ཆེན་མཆེད་པ་ཡིས། །དེ་ཡི་ནད་གདོན་གཞོབ་ཐུལ་བསྲེགས་པར་བསྒོམ། །རང་ཉིད་ལག་ཏུ་སྤང་ཕྱེ་སྤར་གང་བཟུང་། །ཤཱ་ས་ན་ནི་སྐད་ཆེར་བརྗོད་པ་དང་། །ཕཊཤར་དང་བཅས་མེ་ལྕེའི་རྐེད་པ་ནས། །སྦྱང་ཕྱེ་ཁོ་ལ་བརྒྱབས་པས་མེ་ཞགས་འགྲོ། །རྒྱོབ་ས་མང་པོ་ཡོད་ན་རིམ་བཞིན་བྱ། །ཁྱིམ་དང་རྟ་ནོར་སོགས་ཀྱི་བགེགས་བསྐྲད་ན། །མ་མགོན་སྐུ་ལས་སྤྲུལ་པའི་མ་མགོན་ཚོགས། །མེ་དཔུང་རྟ་ལ་ཆིབས་པ་གྲངས་མེད་འཕྲོས། །གདོན་ཀུན་ཚིག་ཅིང་རྒྱ་མཚོའི་མཐར་བྲོས་བསྒོམ། །སླ་ང་སྦུབས་ཅན་ཡུ་བ་རིང་པོ་ནང་། །སྦྱིན་སྲེག་མེ་བཅས་ཤིང་གི་མེ་སྤར་ཁྱེར། །རྣམ་རྟོག་གང་ཡོད་དེར་སོང་མེ་ཞགས་བརྒྱབ། །མེ་དེ་མི་གཏོར་སྦྱིན་སྲེག་ཐབ་ཏུ་བླུགས། །གདོན་ཆེན་ལ་སོགས་གལ་ཆེན་མེད་ན་ནི། །དྲག་པོའི་སྦྱིན་སྲེག་སྤྱི་ལ་འདི་མི་དགོས། །ཞི་རྒྱས་དབང་གསུམ་སྦྱིན་སྲེག་ཡིན་ན་ནི། །དེ་ནས་དངོས་གྲུབ་ལེན་ཆོག་གཞུང་ལྟར་འདོན། །གང་ཡིན་དེ་ཡི་དངོས་གྲུབ་ཐོབ་པར་བསྒོམ། །དྲག་པོར་དངོས་གྲུབ་ལེན་ཆོག་མི་བྱའོ། །དེ་ནས་རྒྱས་པར་མཆོད་པ་བྱིན་རླབས་དང་། །ཁྲག་གི་རྒྱ་མཚོ་སོགས་ཀྱིས་མཆོད་བྱས་ཏེ། །བསྡུ་ན་སྔགས་མཆོད་ཙམ་ཞིག་བྱས་པའི་རྗེས། །མ་མགོན་གཉིས་ཀྱི་རྩ་སྔགས་བཅུ་གསུམ་མར། །ས་པཱ་རི་ཝཱ་ར་ཞེས་སྦྱར་བའི་མཇུག །བསྲེག་རྫས་སོ་སོའི་སྔགས་ནི་སྦྱར་བཞིན་དུ། །
གྲངས་ནི་མི་བཟུང་ཅུང་ཟད་མ་གཏོགས་འབུལ། །ཊཀྐི་བྱེ་བ་སོགས་ཀྱིས་བསྟོད་པ་དང་། །མ་འབྱོར་པ་དང་ཉམས་སོགས་བཤགས་པ་དང་། །རང་གི་སྙིང་ཁར་ཐིམ་པར་གྱུར། ཨོཾ་ཨཱཿཧཱུྃ། །མར་ཁུ་ཅུང་ཟད་ཐབ་ཏུ་འབུལ་བྱས་ལ། །མེ་ལྷ་འབར་བའི་ཀློང་ནས་བཞེངས་པར་གྱུར། །ཨོཾ་ཨགེ་དེ་ཝ་ས་པཱ་རི་ཝཱ་ར། དེ་ལ་ཨནྡྷཾ་སོགས་བཏགས་མཆོད་ལྷག་འབུལ། །འབྲུ་སྔགས་སོ་སོར་བཏགས་ལ་ལྷག་མེད་འབུལ། །མེ་ལྷའི་གཏོར་མ་མར་ཁུས་བྲན་བྱས་ལ། །ཐབ་ཀྱི་གཡོན་ན་ཡོན་བདག་དེས་བཀྱག་ནས། །ཨ་ཀཱ་རོ་ཡིས་བྱིན་གྱིས་བརླབས་བྱས་ཏེ། །ཨངྒེ་དེ་ཝ་ས་པཱ་རི་ཝཱ་ར་ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། མེ་སྟེ་བསྲེགས་བྱ་ཟ་བའི་ལྷ། ནས། མཆོད་ཅིང་བསྟོད་དེ་ཕྱག་ཀྱང་འཚལ། །མཆོད་སྦྱིན་གཏོར་མ་འདི་བཞེས་ལ། ནས། ཡིད་ལ་འདོད་པ་ཀུན་འགྲུབ་མཛོད། །འདོད་གསོལ་ཀུན་གྱིས་རྗེས་ཟློས་བཅུག །གཏོར་མའི་ཕུད་ནི་མེ་ནང་མཆོད། །དྲག་པོ་ཡིན་ན་ལྷག་མེད་འབུལ། །འཇིག་རྟེན་དབང་ཕྱུག་ཚངས་དབང་མགོན་གྱི་སྲས། །མེ་ལྷའི་རྒྱལ་པོ་ཊཀྐིའི་དབང་བསྐུར་བས། །ཤེས་རབ་མཆོག་གི་ཉོན་མོངས་ཐམས་ཅད་སྲེག །འཛིན་བྱེད་མེ་ལྷ་ཉིད་ལ་རྣམ་པར་འདུད། །ཨོཾ། མ་འབྱོར་པ་དང་ཉམས་པ་སོགས་ནས། དེ་ཀུན་དྲང་
སྲོང་བཟོད་པར་མཛོད། །འདི་རུ་ཡིག་བརྒྱ་ཚར་གཅིག་བཟླས། །བདག་གི་དོན་དང་གཞན་གྱི་དོན། །བྱིན་ཟ་ཁྱོད་ཀྱིས་སྒྲུབ་ཀྱི་གཤེགས། །ཇི་བཞིན་དུས་སུ་སླར་བྱོན་ཏེ། །བདག་གི་དངོས་གྲུབ་ཐམས་ཅད་སྒྲུབས། །ཨོ་ཨཧྥེ་དེ་ཝ་ས་པཱ་རི་ཝ་ར་བཛྲ་མུཿ ཡེ་ཤེས་མེ་ལྷ་ཤར་ལྷོར་གཤེགས། །དམ་ཚིག་མེ་ལྷ་འབར་བ་ཡི། །རྣམ་པར་མི་དམིགས་པར་གྱུར་ཏེ། །སྤྱན་དྲངས་ཕྱག་རྒྱ་ཕྱིར་བསྐྱེད་བྱ། །འདི་སྐབས་ཐོག་མར་མེ་ལ་ཕུ་སུས་བྱས་པས་སོ་ནད་ཕན་ཞེས་ཟེར། མཆོད་སྦྱིན་གནས་འདིར་གང་ལྷགས་ནས། །བྷ་ཏ་གཙཱའི་བར་དུ་བརྗོད། །ཞི་རྒྱས་དབང་གསུམ་བློ།བཀྲ་ཤིས་བརྗོད། །དྲག་པོ་ལ་ནི་མི་བརྗོད་དོ། །བགེགས་རིགས་སྟོང་ཕྲག་བརྒྱད་ཅུ་ཞི་སོགས་བྱ། །དེ་ནས་དབྱངས་གསལ་རྟེན་འབྲེལ་སྙིང་པོ་བརྗོད། །དེ་བར་དགང་གཟར་ཁ་ནི་སྦྱར་བཞག་ཅིང་། །རྡོར་དྲིལ་མི་འབྲལ་ངག་བཅད་དམ་པར་བྱ། །ཞི་བའི་སྦྱིན་སྲེག་ཡིན་ན་བསྲུང་སྐུད་མདུད། །སྔགས་ནི་མ་མགོན་རྩ་སྔགས་མཇུག་ཏུ་ནི། །འཆང་བ་པོ་ལ་རཀྵ་བཏགས་པས་སྔགས། །ལྷ་ནི་མ་གཤེགས་གོང་དུ་སྦྱིན་སྲེག་སྟེ། །མེ་ཁར་ལན་གསུམ་གཡུགས་ནས་ཚགས་བྱས་ཏེ། །གཏོར་མ་བཀྱགས་ནས་འདོད་གསོལ་བྱེད་པའི་སྐབས། །རང་རང་བསྲུང་བྱ་རྣམས་ལ་བཏགས་པ་ན། །སྦྱིན་སྲེག་ལ་བརྟེན་བསྲུང་བའི་ལས་ཚོགས་ཟབ། །ཞི་བས་སྒྲིབ་སྦྱང་ཐལ་བ་ཆུ་རུ་དོར། །ཆུ་
འཐུང་སེམས་ཅན་སྡིག་སྒྲིབ་དག་པར་བཤད། །རིམ་གྲོལ་ཞི་བའི་ཐལ་བ་ཞིང་བཙའ་སེར། །ར་ལུག་གོད་ཁ་མང་བའི་སླས་དང་ནི། །ནད་པའི་མལ་སའི་འོག་ཏུ་སྦ་བར་བཤད། །རྒྱས་པའི་ཐལ་བ་མཛོད་ཕུག་ནོར་སླས་བཏབ། །དབང་གི་ཐལ་བ་ཆ་གཅིག་ཁྱིམ་དེར་བཞག །ཆ་གཅིག་ཀུན་གྱིས་འཐུང་བའི་ཆུ་ལ་བླུགས། །དྲག་པོའི་སྦྱིན་སྲེག་རིམ་གྲོ་ཡིན་ན་ནི། །མ་ཎིའི་འོག་གམ་རྒྱ་གྲམ་ལམ་དུ་བླུགས། །འབྱུང་པོ་ཕྲན་བུ་ཐལ་བས་འཆིང་གསུངས་པས། །ཞོ་ཆང་ལད་པའི་འོག་ཏུ་བླུགས་ན་ཐུབ། །མངོན་རྟོགས་ཆེན་པོ་ལ་སོགས་རྒྱས་པ་ནི། །འདི་ལ་བསྲེས་ན་མི་རུང་མེད་ན་ཡང་། །ཤིང་གིས་མི་འཁྱོལ་རྫོགས་དུས་མེད་པ་འབྱུང་། །མཚལ་མ་བསྲེས་འདི་ཁོ་བོས་ཡང་ཡང་བླུགས། །མང་ཉུང་རན་ཅིང་བདེ་བ་མྱོང་བས་གྲུབ། །ཐབ་ནི་སོར་བརྒྱད་ནས་བཟུང་ཁྲུ་སྟོང་བར། །རུང་བ་སྡོམ་པ་འབྱུང་བའི་རྒྱུད་ནས་གསུངས། །དེ་ཕྱིར་ལས་ནི་བཞི་ཀ་ཁྲུ་རེ་སྟེ། །སྟབས་བདེ་སློབ་དཔོན་ཕྱག་ལེན་ལ་ཡང་ཡོད་། །ཐབ་དབུས་དཀྱིལ་འཁོར་བྲི་དང་ལྷ་ཚོམ་སོགས། །མི་དགོས་པར་ནི་མཁས་པ་མང་པོས་གསུངས། །ཐབ་ནི་མི་བརྩེགས་མི་བྲི་སྟེགས་བུས་སྟེང་། །ཐབ་དབྱིབས་ཤིང་བརྩེགས་ཆོག་པའི་ལུགས་ཀྱང་ཡོད། །དེ་ཕྱིར་ཐབ་དང་ཐབ་ཐིག་ལ་སོགས་པ། །ཧ་ཐང་དཀའ་གནད་མི་དགོས་ཅི་བྱུང་ཆོག །དོ་གལ་ཆེ་བ་རྫས་དང་ཏིང་འཛིན་ཡིན། །དང་པོ་ལྷ་ཡི་སྔགས་ནི་གཅིག་བརྗོད་རྗེས། །བསྲེག་རྫས་སྔགས་ནི་ཁོ་ན་བརྒྱ་བརྗོད་ན། །མཇུག་ཏུ་འདོད་གསོལ་ཤམ་
བུ་གཅིག་བརྗོད་པས། །གྲངས་ཀུན་ཞེས་བྱ་རྣམ་པར་མ་དག་སྟེ། །དེ་ཡང་རོ་སྲེག་མཁན་པོ་ཕལ་གྱིས་བྱེད། །ལྷ་སྔགས་འབྲུ་སྔགས་ཤམ་བུ་གསུམ་སྦྲེལ་ན། །གཅིག་ཏུ་བརྩི་བ་གྲངས་ནི་རྣམ་པར་དག །རྡོ་རྗེ་གུར་ལས་སྦྱིན་སྲེག་མ་བྱས་སྐྱོན། །གང་གིས་སྦྱིན་སྲེག་མ་བྱས་ན། །འཇིག་རྟེན་འདི་འམ་གཞན་དག་ཏུ། །དེ་ལ་མཆོག་གི་དངོས་གྲུབ་མེད། །ཅེས་གསུངས་པཎ་ཆེན་ཨ་བྷ་ཡས། །སྦྱིན་སྲེག་དང་བྲལ་ལས་རྣམས་ལ། །ཡང་དག་དངོས་གྲུབ་མི་འབྱུང་སྟེ། །ཞེས་གསུངས་སྦྱིན་སྲེག་ཕན་ཡོན་ནི། །ཡང་དག་སྦྱོང་བའི་རྒྱུད་ཆེན་ལས། །སྦྱིན་སྲེག་གིས་ནི་ལྷ་རྣམས་ཚིམས། །ཚིམས་ནས་དངོས་གྲུབ་རབ་ཏུ་སྩོལ། །གང་ཞིག་སྔགས་ཀྱི་ལྷག་ཆད་དག །སྦྱིན་སྲེག་གིས་ཞི་དོན་ཀུན་འགྲུབ། །ཅེས་གསུངས་བརྟགས་པ་བཅུ་པ་ལས། །མེ་ནི་ལྷ་ཡི་ཞལ་དུ་བརྗོད། །སྦྱིན་སྲེག་ལྷ་རྣམ་ཚིམ་བྱེད་དེ། །ཚིམས་པ་ལས་ནི་དངོས་གྲུབ་སྩོལ། །སྔགས་ནི་ལྷག་གང་མ་ཚང་གང་། །ཐམས་ཅད་སྦྱིན་སྲེག་དག་གིས་བསྐང་། །དེ་ལ་སྐུ་གསུམ་མཆོག་སྐྱེས་པས། །སྦྱིན་སྲེག་གིས་ནི་བསྔགས་པ་བརྗོད། །རྩ་རྒྱུད་པདྨའི་དྲྭ་བ་ལས། །སྦྱིན་སྲེག་གིས་ནི་ལྷ་མཉེས་ཤིང་། །སྔགས་སྒྲུབ་སྔགས་ཀྱི་ལས་རྣམས་འགྲུབ། །དྲང་སྲོང་ཚོགས་རྣམས་ཐམས་ཅད་དང་། །དྲི་ཟའི་ཚོགས་རྣམས་ཐམས་ཅད་དང་། །འབྱུང་པོའི་ཚོགས་རྣམས་ཐམས་ཅད་པ། །སྦྱིན་སྲེག་གིས་ནི་རབ་དགའ་བས། །རྣལ་འབྱོར་གྲོགས་མཛད་བསྲུང་བ་དང་། །སྐྱོབ་ཕྱིར་ཚེ་རིང་དཔལ་འཕེལ་ཞིང་། །ནད་མེད་
ལོངས་སྤྱོད་འགྲུབ་པ་དང་། །བསམ་པ་ཡིད་བཞིན་འགྲུབ་པར་འགྱུར། །ཅེས་གསུངས་བཟང་པོ་ཡོངས་བཟུང་ལས། །མ་དྲན་པ་དང་མ་ནུས་པ། །ཆོ་ག་མ་ཚང་གྱུར་པ་རྣམས། །སྦྱིན་སྲེག་གིས་ནི་རྫོགས་པར་བྱེད། །ཅེས་གསུངས་ཆོས་སྐྱོང་གཏེར་རྒྱུད་ལས། ། བཅོམ་ལྡན་འདས་ཀྱིས་བཀའ་སྩལ་པ 
། །གང་དག་གནོད་པ་ཞི་བ་དང་། །སྡིག་དང་སྒྲིབ་པ་དག་འདོད་ན། །ཞི་བའི་སྦྱིན་སྲེག་བྱ་བའོ། །ཚེ་དང་བསོད་ནམས་རྒྱས་པ་དང་། དཔལ་འབྱོར་ཐམས་ཅད་རྒྱས་འདོད་པས། །རྒྱས་པའི་སྦྱིན་སྲེག་རྒྱས་པར་བྱ། །འཇིག་རྟེན་འདས་དང་འཇིག་རྟེན་པ། །རྒྱལ་པོ་བུ་ལ་སོགས་པ་དང་། །དབང་དུ་འདུ་བར་འདོད་པ་ཡིས། །དབང་གི་སྦྱིན་སྲེག་རྫོགས་པར་བྱ། །དགྲ་བགེགས་གདུག་པ་མ་ལུས་པ། །དྲག་པོའི་ལས་ཀྱིས་བསྒྲལ་བའི་ཕྱིར། །དྲག་པོའི་སྦྱིན་སྲེག་རྫོགས་པར་བྱ། །ཞེས་གསུངས་བསྲེག་རྫས་སོ་སོའི་དོན། །བདེ་མཆོག་སྡོམ་པ་འབྱུང་བ་ལས། །དེ་ནས་གཞན་ཡང་སྦྱིན་སྲེག་གི །ཡན་ལག་ཀུན་འབྱུང་འབྲས་རབ་བཤད། །ས་དང་ས་གཞི་ཞིང་རྒྱས་པའི། །ཐབ་ཀྱིས་ཡན་ལག་ཡོན་བདག་རྒྱས། །མར་གྱིས་འབྱོར་པ་ཐམས་ཅད་བྱེད། །ཡམ་ཤིང་གཟི་བརྗིད་རྣམ་པར་འཕེལ་བའོ། །བུད་ཤིང་ལྷག་པར་དཔའ་བར་བྱེད། །ཀུ་ཤས་ཐམས་ཅད་སྲུང་བར་བྱེད། །ཡུངས་ཀར་པོས་ནི་ཞི་བ་བྱེད། །འབྲས་ཀྱིས་རྒྱས་པར་བྱེད་པར་བཤད། །ཏིལ་གྱིས་སྡིག་པ་འཇོམས་པར་རེག་པར་བྱེད། །སོ་བས་ནོར་དང་འབྲུ་རྣམས་འགུགས། །མ་ཤས་སྟོབས་ནི་
ཆེན་པོ་བྱེད། །ནས་ཀྱིས་རླུང་གི་ཤུགས་རབ་སྟེར། །དུར་བས་ཚེ་ནི་འཕེལ་བར་བྱེད། །གྲོ་ཡིས་ནད་ནི་འཇོམས་པར་བྱེད། །འོ་མས་སྦྲང་རྩི་ཤེས་རབ་འཕེལ། །ལག་ལེན་གྱིས་ནི་བདེ་ཀུན་སྟེར། །རང་འདོད་ལྷས་ནི་གྲོལ་བ་རྩོལ། །ལྷག་མ་ལས་ཀྱི་རྗེས་མཐུན་པར། །ཞི་སོགས་ལས་བྱ་ཤེས་པར་བྱ། །ཞེས་གསུངས་རྒྱ་གཞུང་འགའ་ཞིག་ལས། །ཤིང་ཏོག་ཕུན་ཚོགས་བུ་རྒྱུད་འཕེལ། །མེ་ཏོག་ཁ་དོག་གཟི་བརྗིད་འཕེལ། །དྲི་དང་སོ་རྩིས་བཀྲ་ཤིས་བྱེད། །ཅེས་གསུངས་དོན་ལ་ཡིད་ཆེས་བྱ། །ཨེ་མ། ལས་བཞིའི་ཆོ་ག་རྒྱས་པར་མཁྱེན་འདོད་ན། །མི་བསྐྱོད་ཞབས་དང་དབང་ཕྱུག་རྡོ་རྗེ་ཡི། །མཛད་པའི་རྒྱས་པ་རྣམས་ལྟར་ཉམས་སུ་ལོངས། །གསར་རྙིང་སྤྱི་ཡི་ལས་བཞིའི་སྦྱིན་སྲེག་ནི། །དཔེའུ་རིས་བཅས་བདག་གིས་ལོགས་སུ་བཀོད། །འདི་ནི་གསར་བུའི་ལག་ཏུ་བླངས་བདེར་བྱས། །བྲམ་ཟེ་མཆོད་སྦྱིན་རིག་པ་འདི་ཉིད་ལས། །ཁོ་བོ་མི་འཚེར་གོམས་འདྲིས་ཆེ་དྲག་པས། །འདི་ལ་འགའ་འཁྲུལ་ཉེས་པ་མེད་སྙམ་ཡང་། །མཆི་ས་ན་བླ་མ་ལྷ་དང་ཌཀྐིར་བཤགས། །དགེ་བས་འབྲེལ་ཐོགས་ཀུན་གྱི་འགལ་རྐྱེན་སྲེག །མཐུན་རྐྱེན་བཀྲ་ཤིས་དཔལ་དུ་འབར་གྱུར་ནས། །སྒྲུབ་བརྒྱུད་བསྟན་པ་མེ་ལྟར་འབར་བར་ཤོག །ཅེས་པ་བདུད་མོ་ཀརྨ་དར་རྒྱས་པས། །བསྐུལ་ཕྱིར་སྔགས་རྒན་རཱ་ག་ཨ་སྱ་ཡིས། །ལྕགས་ཕག་རྒྱལ་ཟླའི་ཉི་ཤུ་བདུན་བརྒྱད་ཉིན། །ངག་ནས་སྨྲས་བཞིན་འབྲི་བའི་ཡི་གེ་པ། །དགེ་སློང་ཀ་ལའི་མིང་ཅན་དེ་ཡིས་བྲིས། །མངྒ་ལཾ། །