མཆོད་རྟེན་ནག་པོ་གདུག་པ་ཀུན་འདུལ་ཅ་ཏི།
མཆོད་རྟེན་ནག་པོ་གདུག་པ་ཀུན་འདུལ་ཅ་ཏི་ཞེས་བྱ་བ་བཞུགས་སོ།
རྒྱ་གར་སྐད་དུ། པྲཛཱ་ཏ་སུ་ཧ། བོད་སྐད་དུ། མཆོད་རྟེན་ནག་པོ་བརྩེགས་པའི་ཆོ་ག་ལགས་སོ། །དཀོན་མཆོག་གསུམ་ལ་ཕྱག་འཚལ་ལོ། །མཆོད་རྟེན་ནག་པོ་བརྩེགས་པའི་ཆོ་ག་འདི་ལ། ཡུལ་དུ་ཐན་ལྟས་ཆེན་པོ་རྒྱུག་གམ། འཁྲུག་པ་ཆེན་པོ་བྱུང་ངམ། བྱད་ཀྱིས་སྡིགས་སམ། མུ་གེ་གདུག་དཀའ་བྱས་སམ། ནད་ཡམས་འབྱུང་ངམ། བྱ་ཐན་ལ་སོགས་ཐན་ལྟས་སྣ་ཚོགས་མཐོང་ངམ། མཁར་ཁང་རྨིས་སམ། ལྷ་འདྲེའི་འགྲིམ་སྲང་དོད་དམ། བདུད་བགེགས་ཀྱི་བྱ་ཁྲི་བཅག་གམ། གདུག་རྩུབ་བསྒྱུར་བ་དང་། བྱད་ཆེན་པོ་ཟློག་པ་དང་། མི་ནད་ཕྱུགས་ནད་བཅད་པ་དང་། ས་ངན་གྱི་གདུག་པ་ཟློག་པ་དང་། གོད་ཁ་ཆེན་པོ་བཅད་པའི་ཕྱིར། སྔགས་པ་ལྷ་བསྙེན་སོང་
བ་ཡིས། མཆོད་རྟེན་ནག་པོ་བརྩེག་པར་བྱ། ལས་ལ་བརྩམ་པའི་ལིངྒ་བྲི་བ་ནི། ཁྱི་ར་ཕག་གསུམ་གྱི་ཁྲག་དང་རོ་སོལ་ཕྱེ་མ་བཏབ་པའི་སྣག་ཚ་ཡིས། སྲི་ཅན་བླ་ནི་ཁྱི་དང་ཕག །ཆུང་སྲི་བླ་ནི་རྒང་རྩེ་དང་ཏེ་ལོ། ཐེའུ་བླ་ནི་ར་ཕག །ཕུལ་འདྲེའི་བླ་ནི་བོང་དྲེལ། ལོ་ཉེས་བླ་ནི་གཟེ་དང་ཡུག་པོ་བྲི། གོད་འདྲེའི་བླ་ནི་བྱ་རོག །མི་ལིའི་བླ་ནི་སྐྱ་ག་དང་རི་བོང་། རྨེ་འདྲེའི་བླ་ནི་སྤྲེལ་དམར། ཤི་གཤེད་བླ་ནི་སྲིན་པོ་ཕག་ཞོན། ཆུ་ཀླུ་གདོན། སྲིའི་བླ་ནི་སྡོམ་སྡིག །བཙོག་ནལ་བླ་ནི་བྱ་མ་བྱི་ལུ། བུ་སྲིན་འདྲེ་ནི་ར་དང་གྲུམ་པ། བྲན་གྱི་བླ་ནི་ར་ཚག་དང་རྨིག་པ་བྲི། ༈ སྟག་རུས་བཅུ་གསུམ་བསྐོར། ཐུབ་ཚད་སྤྲེའུ་གྲུམ་པ་སྟོབས་ཆེན་དང་། རླུང་དགུའི་ར་དང་། ཕྲ་བའི་རྨིག་པ་དགུ། མི་ལ་ཕོ་ལྟེ་དགུ། དེ་རྣམས་ཚོན་
སྐུད་སྣ་ལྔས་རྒྱ་གྲམ་དུ་བཅིངས། རྫ་མ་གསར་པ་བྲུབ་ཁུང་ནག་པོའི་ནང་དུ་བཅུག །ས་ཕྱེའི་དུག་དང་རྡོ་ཕྱེའི་དུག །ལྕགས་ཕྱེ་ཟངས་ཕྱེ་ཡུངས་དཀར་ནག །གྲོག་ཚང་བསྲེས་པའི་ཐུན་རྫས་དང་། དྲག་པོའི་གཏོར་མ་ཁྲག་གིས་བྱུག་པ་ཚགས་སུ་བཙལ། ༈ བདག་ཉིད་དྲག་པོ་ཁྲོ་བོར་བསྒོམ། །ལྕགས་ཀྱུའི་ཕྱག་རྒྱ་བཅས་ནས་ནི། །གནོད་བྱེད་བཀུགས་ནས་གཟུགས་ལ་བསྟིམ། །གོང་གི་ཐུན་རྫས་རྣམས་ཀྱིས་བྲབ། །ཟངས་ལྕགས་སེང་ལྡེང་ཕུར་པས་གདབ། ཐར་མེད་མུན་ཁུང་བུག་པར་བསྟིམ། ༈ །རབ་ནི་མཚན་རྟགས་མ་བྱུང་བར་དུ་བསྒྲུབ། །འབྲིང་ནི་ཞག་གསུམ་བར་དུ་བསྒྲུབ། །ཐ་མ་ཞག་གཅིག་འགུགས་འདྲེན་བྱ། །དེ་ནས་སཙྪ་ནག་པོ་བརྒྱ་རྩའམ་ཡང་ན་ཉེར་གཅིག་བྱས་པའི་ནང་དུ་བཅུག་པ་དེ་རབ། མ་འབྱོར་ན་རེ་བས་དྲིལ་ལ་སྐུད་པ་དཀར་ནག་གིས་བཅིངས། ༈་ས་སྤྲིན་པོའི་འཇིམ་པ་ལ། རྔ་མོང་གཅིག་གི་གཟུགས་བྱས་ལ། སྦྱང་མ་རམ་པ་ཡོས་སྙིགས་བྲ་སྲན་ལ་སོགས་འབྲུ་ནག །ཟོ་ཤེ་རྐྱལ་ཤེ་སྐྱེད་དྲེག་སླང་དྲེག་གོ་རྒུམ་ཤ་ཤུན་གོ་རོག་ཐོལ་སུལ་གཟེན་ཡུག་པོ་ཆག་དགུ་ཞིག་བཅུ་དེ་རྣམས་རེ་སྒྱེ་ནང་དུ་ཡས་བྱས་ལ་བཀལོ། སམ་ནག་གི་སྲོག་ཤིང་དམར་པོ་བྱས་ལ་ཤིང་པ་ཟུར་གསུམ་དུ་བཞག་ལ། ཏྲི་ཝཾ་རཾ་གྱི་སྔགས་བྲིས་པ་དེ་རྣམས་ཚགས་བྱའོ། ༈ །དེ་ནས་མཆོད་རྟེན་བཞེངས་པའི་ས་དཔྱད་ནི། ལུང་གསུམ་མདོའམ་སྒང་གསུམ་གྱི་སྣའམ། ལྷ་འདྲེའི་འགྲིམ་སྲོང་ངམ། ཐང་ངན་པའི་ཐ་མ། ལུང་པ་ངན་པའི་ཁ། ས་ངན་པའི་རྟེན་ཕུར། ས་དགྲ་ཅན་གྱི་
གཉའ་གནོན་དུ་བཞེངས་ཏེ། དེར་ཡོན་བདག་ཀུན་འགྲོ་ལ་ལྷ་གཞི་བཏིང་། ཚོམ་བུ་ལྷ་གྲངས་དང་མཉམ་པ་བཀོད། མཆོད་རྫས་རྣམས་བཤམས། ཞི་བའི་ལྷ་ལ་རྣམ་ལྔ། ཡི་དམ་ལ་དམར་གཏོར། ཕྱི་རིགས་སྲུང་མ་ལ་དཀར་གཏོར་རྣམས་ལ་བསྔོ། རང་གི་ཡི་དམ་དང་ཆོས་སྐྱོང་ལ་དམར་གཏོར་འབུལ། བསྟོད་བསྐུལ་བྱ། བཀའ་བསྒོ་བདེན་པ་བརྡར། དེ་ནས་ས་བདག་དང་ས་ཡི་ལྷ་མོ་ལ་དཀར་གཏོར་འབུལ། ས་ས་སོ་སོར་བྱེར་ཞིག་བྱས་ལ་བཀའ་བསྒོ། དེ་རྣམས་ཚར་ནས་ཁྲོ་བོའི་གར་དང་སྟངས་སྟབས་བྱས་ལ་རང་གི་ཐུ་བ་གཡོན་པ་ལན་གསུམ་བརྡབ་ལ། ས་དེ་ཁ་དྲུག་ཏུ་གས་པར་བསམ་དོང་བྲུས་ལ་དེའི་ནང་དུ་གཤིན་རྗེའི་གྲོང་ཆེར་ཡོད་པར་བསམས་ལ། དམར་གཏོར་གཅིག་བཤམས་ལ། གཤིན་རྗེ་རྣམས་དགྲ་བགེགས་གཏད་པའི་གཉེར་ཟས་ལ་དམར་གཏོར་དེ་ཕུལ་བར་བསྒོམ་མོ། །དོང་བྲུ་གསུམ་བྲིས་པའི་ནང་དམར་གཏོར་དེ་བཅུག་གོ །དེའི་སྟེང་དུ་རྫ་མ་གཟུགས་བྱང་དང་ཡས་རྫས་རྣམས་བཞག་གོ །དེའི་སྟེང་དུ་རྔ་མོའི་གཟུགས་ཡས་བཀལ་བ་དེ་བཞག །ཁ་བྱང་དུ་བསྟན། དེའི་སྟེང་དུ་ཐོད་དགུ་རུས་བཅུ་བཀྲམ། གོ་ཐལ་གྱིས་བཀབ་སོལ་ཕྱེ་བཏབ། སྔགས་པ་བདུད་ཀྱི་ཆས་སུ་ཞུགས་ནས་བཞེངས་ཏེ་འགུགས་གཞུག་བྱས་ལ་འདི་སྐད་དོ།། ཀྱི། དེ་རིང་བདག་དང་ཡོན་གྱི་བདག་པོ་ལ། །ཕ་མྱེས་རྒན་རབས་ཆེ་ཆུང་ཚུན་ཆད་དང་། །བུ་ཚ་འདི་ལ་ཐུག་པ་ཡན་ཆད་ལ། །སྲིད་པའི་འདྲེ་དང་གཙུག་
ལག་གདོན། །མི་རབས་འཕེལ་དུ་མི་སྟེར་བའི། །རྨང་འདྲེ་དང་ནི་གདོན་བགེགས་རྣམས། །མཆོད་རྟེན་ནག་པོ་འདི་ཡི་ཞབས་སུ་བཅུག །བདག་ལ་ཤག་རོགས་མཛའ་འདྲེ་རྣམས། །མཆོད་རྟེན་ནག་པོ་འདི་ཡི་ཞབས་སུ་བཅུག །སྣ་འདྲེ་རྙིང་པ་ད་འདྲེ་སོ་མ་རྣམས། །མཆོད་རྟེན་ནག་པོ་འདི་ཡི་ཞབས་སུ་བཅུག །ཁྱིམ་མཚེས་དགོས་འདྲེ་ཉེ་བའི་བྱུར་འདྲེ་ཡང་། །མཆོད་རྟེན་ནག་པོ་འདི་ཡི་ཞབས་སུ་བཅུག །མེ་རྨུགས་དེ་ནི་ནལ་གསུམ་ཡང་། །མཆོད་རྟེན་ནག་པོ་འདི་ཡི་ཞབས་སུ་བཅུག །སྔ་ཐན་དེ་ནི་མཚིལ་གསུམ་ཡང་། །མཆོད་རྟེན་ནག་པོ་འདི་ཡི་ཞབས་སུ་བཅུག །གོད་འདྲེ་དེ་ནི་གོད་སྲི་ཡང་། །མཆོད་རྟེན་ནག་པོ་འདི་ཡི་ཞབས་སུ་བཅུག །ཆུང་འདྲེ་དེ་ནི་ཆུང་སྲི་ཡང་། །མཆོད་རྟེན་ནག་པོ་འདི་ཡི་ཞབས་སུ་བཅུག །སྨྱོ་འདྲེ་དེ་ནི་སྨྱོ་བྱེད་ཡང་། །མཆོད་རྟེན་ནག་པོ་འདི་ཡི་ཞབས་སུ་བཅུག །མི་ལ་དེ་ནི་མཚིལ་འདྲེ་ཡང་། །མཆོད་རྟེན་ནག་པོ་འདི་ཡི་ཞབས་སུ་བཅུག །ས་འདྲེ་དེ་ནི་ས་སྲི་ཡང་། །མཆོད་རྟེན་ནག་པོ་འདི་ཡི་ཞབས་སུ་བཅུག །ཅེས་པས་ལིངྒ་ལ་འདྲེ་གདོན་རྣམས་བསྟིམས། དེའི་འདྲེ་གདོན་རྣམས་མིང་ཙམ་ཡོད་དེ་གནོད་མི་ནུས་སོ། །
གནོད་པའི་མིང་ཡང་མེད། ༈ དེ་སྟེང་མ་ཧཱ་བ་ལའི་སྐུ་གཟུགས་སྒྲུབ། དེ་སྟེང་རོ་ཡམ་ལ་རོ་སོལ་གྱིས་རྡོ་རྗེ་རྒྱ་གྲམ་བྲིས་ལ་དོང་ཁ་བཅད། དེ་སྟེང་རི་རབ་བང་རིམ་གསུམ་བྲིས་ལ་འདི་སྐད་དོ།། ཀྱཻ། རི་རབ་ཁྲི་འཕང་གཅིག་གི་ཞབས་སུ་ནི། །མི་རབས་གཅིག་གི་འདྲེ་བགེགས་དང་། །སྐྱེས་པའི་ཚེ་དང་དཔལ་ལ་གནོད་པ་རྣམས། །མཆོད་རྟེན་ནག་པོ་འདི་ཡི་ཞབས་སུ་བཅུག །རི་རབ་ཁྲི་འཕང་གཉིས་ཀྱི་ཞབས་སུ་ནི། །མི་རབ་གཉིས་ཀྱི་འདྲེ་བགེགས་དང་། །བུད་མེད་ཚེ་དང་དཔལ་ལ་གནོད་པ་རྣམས། །མཆོད་རྟེན་ནག་པོ་འདི་ཡི་ཞབས་སུ་བཅུག །རི་རབ་ཁྲི་འཕང་གསུམ་གྱི་ཞབས་སུ་ནི། །མི་རབས་གསུམ་གྱི་འདྲེ་བགེགས་དང་། །བུ་ཚའི་ཚེ་དང་དཔལ་ལ་གནོད་པ་རྣམས། །མཆོད་རྟེན་ནག་པོ་འདི་ཡི་ཞབས་སུ་བཅུག །ཨ་ནན། ཡང་ནན། རཾ་ནན། ཁོ་ནན། ས་འདྲེ་ས་སྲི་ནན། དེ་ལྟར་བྱས་རྡོག་པས་ལན་དགུ་མནན། དེ་ནས་མཆོད་རྟེན་བཞེངས་ཏེ། འདྲེ་ལིང་གི་སྟེང་དུ་མཆོད་རྟེན་ནག་པོ་བཞེངས་ལ། དང་པོ་ནས་སྲོག་ཤིང་ཚགས་ཏེ། ཐོག་སེར་ཟློག་པ་དང་། ནད་ཡམས་ཟློག་པ། འཚེར་རྩུབ ་བསྒྱུར་བ་ལ་དབྱར་པས་བྱེད། གོད་འདྲེ་མནན་པ་དང་སྦྱིན་སྲེག་བྱེད་ན་གླང་མས་བྱེད། ཆུང་སྲི་བཏུལ་བ་དང་ས་ངན་བཏུལ་བ་ལ་སམ་ནག་གིས་བྱེད།
རྟིང་པ་ཟུར་གསུམ་བྱ། ལོགས་གསུམ་ལ་སྔགས་འདི་བྲི། ཏྲི་ཝཾ་རཾ་གནོད་བྱེད་མཱ་ར་ཡ་ཁུག་ཛ་རཾ་རཾ། ཞེས་བྲི་རི་རབ་ཀྱི་ལྟེ་བར་བཙུགས། རྩེ་ལ་རྡོ་རྗེ་རྩེ་ལྔ་བྱ། དེ་ལ་རིགས་ལྔའི་ས་བོན་བྲི། ཨོཾ་ཧཱུྃ་ཏྲཱཾ་ཧྲིཿདེའི་འོག་ཏུ་རི་བོ་དགུ་རིམ་བྲི། །དེ་ལ་རེ་བའི་བ་དན་བཏགས། ༈ དེ་ནས་མཆོད་རྟེན་བཞེངས་པ་ལ། །ཚད་ནི་ཆེ་འབྲིང་ཆུང་གསུམ་སྟེ། །གྲུ་བཞི་བདེ་ལ་འཇམ་པ་སྟེ། །ཐིག་ནི་གྲུ་བཞི་ཤྭ་ལྟར་བཅད། །ཆེ་བའི་ཚད་ནི་ལོགས་བཞི་འདོམ་བཞི་བྱེད། །འབྲིང་བའི་ཚད་ནི་འདོམ་ཕྱེད་བཞི། །ཆུང་བའི་ཚད་ནི་མདའ་གང་བཞི། །དབུས་སུ་གྲུ་གསུམ་མཐོ་གང་བསྐོར། །འཕང་གི་སྲོག་ཤིང་ཚད་ཀྱང་དེ་ལྟར་བྱ། ༈ །དེ་ནས་ས་ཡི་འཇིམ་སྤྱིན་ལ། དང་པོ་གྲུ་བཞི་བརྩེགས། དེ་ནས་བང་རིམ་ལྔ། དེ་ནས་སྲོག་ཤིང་བཙུགས། དེའི་རྩ་བར་སཱཙྪ་ནག་པོ་གཅིག་བཅུག །རྣམ་སྣང་སྐུ་མདོག་ནག་པོར་བསྒོམ། དེ་ནས་བུམ་པ་ཏོག་དང་ལྡན་པར་བྱ། རེ་བའི་བ་དན་བཏགས། མཆོད་རྟེན་སོལ་ཆུས་བྱུགས་ལ། ༈ །ཤཱཀ་ཐུབ་སྐུ་མདོག་ནག་པོར་བསྒོམ། །དེ་ནས་བསྐྱེད་རིམ་བརྟན་པ་ནི། །ཕྱོགས་བཞི་མཚམས་བརྒྱད་སྟེང་འོག་གི །དགྲ་འདྲེ་གནོད་བྱེད་གདོན་བགེགས་རྣམས། །མཆོད་རྟེན་འདི་ཡི་ཞབས་སུ་ཚུད་པར་བསམ། །འབྱུང་བ་ལྔ་ཡིས་ནན་གྱིས་མནན་པར་བསམ། །མཆོད་རྟེན་དེ་ཡི་ཤར་ཕྱོགས་སུ་རྒྱལ་པོ་ཡུལ་འཁོར་སྲུང་།
ལྷོ་ཕྱོགས་སུ་འཕགས་སྐྱེས་པོ། ནུབ་ཕྱོགས་སུ་སྤྱན་མི་བཟང་། བྱང་ཕྱོགས་སུ་རྣམ་ཐོས་སྲས། ཟུར་བཞི་ལ་ཕྱོགས་སྐྱོང་བཅུ། རི་མོ་དགུ་ལ་ཡན་ཁམས་དགུ་། བ་དན་ལ་རླུང་ལྷ་ནག་པོ། རྩེ་མོ་རྡོ་རྗེ་རྩེ་ལྔ་ལ་རིགས་ལྔའི་སངས་རྒྱས་བསམ། མཆོད་རྟེན་ལྷ་དང་བཅས་པ་ལས་འོད་ཟེར་སྣ་ཚོགས་འཕྲོས་པས་གནོད་བྱེད་ཐམས་ཅད་ཟིལ་གྱིས་གནོན། སྣང་སྲིད་ལྷ་འདྲེའི་གདུག་སེམས་རྣམས། །མི་ནུས་རང་སར་ཞི་བར་བསམ། །མི་ནད་ཕྱུགས་ནད་རྒྱུན་ཆད་ནས། །ཆར་ཆུ་དུས་སུ་བབ་ལོ་འབྲས་རྟག་ཏུ་སྨིན་པར་བསམ། །དེར་འབྲུ་ཟན་སྣ་དགུའི་གཏོར་མ། །འཕགས་པ་མཉེས་པའི་གཏོར་མ་འབུལ། །ལྷ་འདྲེ་མཉེས་པའི་གཏོར་མ་བཏང་། །རིགས་དྲུག་རྣམས་ལ་ལན་ཆགས་འཇལ། །དེ་ན་སྔགས་འཆང་གིས་སྣང་སྲིད་ལྷ་འདྲེ་ལ་སྲིད་པའི་མཆོད་རྟེན་ནག་པོའི་རྒྱུད་འདུལ་ཞིང་བཤད་དེ། ཀྱཻ། སྲིད་པའི་མཆོད་རྟེན་ནག་པོ་འདི། །སྔོན་དང་པོ་ཇི་ལྟར་དུས་སྲིད་ན། །རྒྱ་གར་ཡུལ་གྱི་ཤར་ཕྱོགས་སུ། །སྐྱེད་མོས་ཚལ་ཞེས་བྱ་བ་ནས། །རྒྱལ་བུ་དོན་གྲུབ་ཀྱིས་མཆོད་རྟེན་བཞེངས་པས། རྒྱལ་སྲིད་རྣམས་དབང་དུ་སྡུས། སྲས་དང་བཙུན་མོ་སྤང་ནས་དཀར་པོ་དགེ་བ་མཛད། དེ་ནས་
དགུང་ལོ་སུམ་ཅུ་ལོན་ནས་སུ། རྒྱ་གར་རྡོ་རྗེ་གདན་གྱི་ཤར་ཕྱོགས་སུ། ཆུ་བོ་ནེ་རཉྫནའི་འགྲམ་དུ། བདུད་འདུལ་བའི་མཆོད་རྟེན་བརྩེགས། རྒྱ་གར་ཡུལ་གྱི་ལྷོ་ཕྱོགས་སུ། རྒྱལ་མོ་མངའ་སྐྱེས་དགའ་བའི་ཡུལ་དུ། གླང་པོ་ཆེ་བརྩེགས་པའི་མཆོད་རྟེན་བརྩེགས། རྒྱ་གར་ཡུལ་གྱི་ནུབ་ཕྱོགས་ནས། ཝཱ་ར་ཎཱ་སཱིར་སེང་ལྡེང་བརྩེགས་པའི་མཆོད་རྟེན་བརྩེགས། རྒྱ་གར་ཡུལ་གྱི་བྱང་ཕྱོགས་སུ། །སྲིན་པོ་འདུལ་བའི་མཆོད་རྟེན་བརྩེགས། དེ་ནས་རྒྱལ་པོ་མྱ་ངན་ལས་འདས་པའི་མཆོད་རྟེན་བརྩེགས། རྒྱ་གར་ཡུལ་དུ་སངས་རྒྱས་བཅོམ་ལྡན་འདས་མྱ་ངན་ལས་འདས་པའི་མཆོད་རྟེན་བརྩེགས། །རྒྱ་གར་ཡུལ་གྱི་རྔམ་མཆོག་ཏུ་དར་མ་ཨ་ཤྭ་ཀའི་མཆོད་རྟེན་བརྩེགས། མཆོད་རྟེན་དཔལ་དབང་ཕྱུག་ནི་བེ་དཀར་ཐུབ་པའི་དོན་དུ་མཆོད་རྟེན་བརྩེགས། ནཱ་ག་རྫུ་ན་གཉིས་ཀྱིས་རྒྱ་མཚོའི་འགྲམ་དུ་ཀླུ་འདུལ་གྱི་མཆོད་རྟེན་བརྩེགས། རི་གསུམ་གྱི་རྩེ་མོ་ལ་མཆོད་རྟེན་བརྒྱ་རྩ་བཞེངས་པས་མཆོད་རྟེན་བརྩེགས། བགེགས་ཀྱི་སོ་ཕ་དང་བྱ་ར་བ་བཏུལ། ལུང་གསུམ་གྱི་མདོར་བརྩེགས་པས། འདྲེ་གདོན་གྱི་ཉུལ་ལམ་དང་འཇབ་པའི་དུར་ལམ་བཅད། རེ་བའི་བ་
དན་བར་སྣང་དུ་ཕྱུར་བས། འདྲེ་གདོན་གྱི་གབ་སྐུང་བཏབ། དེའི་ཡོན་ཏན་གྱི་རྒྱལ་པོ་ཨ་ཤྭ་ཡང་ལོ་བརྒྱ་ལོན་ནས་ཕུང་པོ་མ་བཞག་པར་སངས་རྒྱས་སོ། །འོག་གི་འཁོར་འབངས་རྣམས་ནད་སོས། ཆར་ཆུ་བབས་ནས་ལོ་ཏོག་སྨིན། རྒྱལ་བུ་མངའ་ཐང་ཆེ། ཕོ་བྲང་བྱིན་ཆེ། སྔོན་ཡང་མཆོད་རྟེན་བརྩེགས་པས་འདྲེ་གདོན་དེ་ལྟར་ཐུལ། ༈ དེ་རིང་བདག་དང་རྒྱུ་སྦྱོར་ཡོན་བདག་གིས། །མཆོད་རྟེན་ནག་པོ་འདི་བརྩེགས་པས། །བདག་ཅག་སྔགས་མཁན་རྒྱལ་པོ་ཡིས། །སྔགས་དང་ཕྱག་རྒྱས་དབང་བསྐུར་ནས། །ཏིང་ངེ་འཛིན་གྱིས་བྱིན་གྱིས་བརླབས། །རི་རབ་ཆེན་པོར་མངའ་ཡང་གསོལ། །སྲིད་པའི་འདྲེ་དང་གཙུག་ལག་གདོན། །བགེགས་རིགས་གདུག་རྩུབ་སྟོན་པ་རྣམས། །རི་རབ་ཆེན་པོའི་ཞབས་སུ་བཅུག །ཤར་བདུད་ཤར་བཙན་ཤར་གྱི་གདོན་བགེགས་རྣམས། །ཤར་གྱི་ཁྲི་འཕང་ཞབས་སུ་བཅུག །ལྷོ་བདུད་ལྷོ་བཙན་ལྷོ་ཡི་གདོན་བགེགས་རྣམས། །ལྷོ་ཡི་ཁྲི་འཕང་ཞབས་སུ་བཅུག །ནུབ་བདུད་ནུབ་བཙན་ནུབ་ཀྱི་གདོན་བགེགས་རྣམས། །ནུབ་ཀྱི་ཁྲི་འཕང་ཞབས་སུ་བཅུག །བྱང་བདུད་བྱང་
བཙན་བྱང་གི་གདོན་བགེགས་རྣམས། །བྱང་གི་ཁྲི་འཕང་ཞབས་སུ་བཅུག །མཚམས་བཞིའི་གཤེད་བཞིའི་གདོན་བགེགས་རྣམས། །མཚམས་བཞིའི་ཁྲི་འཕང་ཞབས་སུ་བཅུག །འོག་གི་ས་འདྲེ་ས་སྲི་ས་སྒོ་བྱེ་བ་ཡང་། །བགེགས་ལིང་གཟུགས་བཟང་འདི་ཡིས་བཙང་། །རི་རབ་ཆེན་པོའི་བརྗིད་ཀྱིས་མནན། །མཆོད་རྟེན་ནག་པོའི་ཞབས་སུ་བཙུད། །སྔོན་ཡང་འདྲེ་གདོན་དེ་ལྟར་འདུལ། །སྔོན་གྱི་དཔེ་ཡག་བཟང་སྲོལ་དུ། །ད་ཡང་འདྲེ་གདོན་དེ་ལྟར་འདུལ། །རང་གནས་རང་གི་གནས་སུ་དེངས། །སྔོན་བཅོམ་ལྡན་ཕྱག་ན་རྡོ་རྗེ་ཡིས། །རི་གསུམ་འདུས་པའི་སྣ་དང་ལུང་གསུམ་འདུས་པའི་མདོར། །རི་རབ་དེ་ལ་དཔེ་བླང་པའི། །གདུག་པ་འདུལ་བའི་མཆོད་རྟེན་བརྩེགས། །དེ་རིང་བདག་དང་ཡོན་བདག་གི །མཆོད་རྟེན་བརྩེགས་པའི་གཞི་བཟུང་ངོ། །དེ་ནས་བདག་ཉིད་པདྨ་འབྱུང་གནས་སམ་ཕྱག་རྡོར་གང་རུང་དུ་བསྒོམས་ལ། གསེར་སྐྱེམས་བཏང་ལ་ལས་བཅོལ་བྱ། སྲུང་འཁོར་བསྒོམ་པར་བྱ། །ཀྱེ། དང་པོ་མཆོད་རྟེན་ནག་པོ་གར་སྲིད་ན། །དང་པོ་འབྱུང་བ་རིམས་སུ་ཆགས། །དེ་སྟེང་རི་རབ་ལྷུན་པོ་བརྩེགས། །སྟོང་གསུམ་རབ་འབྲིང་གསུམ་དུ་སྲིད། །དེ་ཡི་
གཟུགས་ཀྱི་དང་པོ་ལ། །བདེ་བར་གཤེགས་པ་རིགས་ལྔ་སྲིད། །དེ་འོག་ཡན་ཁམས་དགུ་རུ་སྲིད། །དེ་འོག་ཕྱོགས་སྐྱོང་བཅུ་རུ་སྲིད། །ཐ་མར་ལྷ་སྲིན་སྡེ་བརྒྱད་སྲིད། །རི་རབ་ཞབས་སུ་རྒྱ་མཚོ་སྲིད། །ཆུ་སྲིན་མ་ཧཱ་ཀ་ར་སྟེང་ན་ཉལ། །ཆུ་སྲིན་རྒྱལ་པོའི་གྲེ་ཁུང་དུ། །འདྲེ་སྲིན་མང་པོའི་ཚང་ནི་བཅས། །དེས་མི་ལ་གདུག་པ་སྣ་དགུ་སྲིད། །ཆུ་སྲིན་རྒྱལ་པོ་གདུག་པ་ཆེ། །ལྷ་འདྲེ་ཀུན་གྱི་ནང་དབྱེན་བྱེད། །བརྐྱང་བསྐུམ་བྱེད་ཅིང་གདུག་རྩུབ་བྱེད། །སྐྱི་མདངས་ཡོ་ནས་དགུན་འབུད་བཏང་། །གདུག་པ་སྣ་ཚོགས་མི་ལ་བཏང་། །།འཛམ་གླིང་ཁ་ཞབས་ལོག་ལ་ཁད། །ལན་རེ་འདྲེ་ལོག་བྱེད་པའི་དུས། །དགུང་དང་མཚོ་ཡང་ཁ་ཞབས་འགུལ། །ལན་རེ་ངར་སྐད་བྱེད་པའི་དུས། །གནམ་ལྕགས་ཐོག་སེར་འབེབས་པར་བྱེད། །སྐར་མདའ་བཏང་ཞིང་སྡང་བར་བྱེད། །ཕྱོགས་སྐྱོང་བཅུ་ཡིས་འབོད་འགྲོས་བྱེད། །འཛམ་བུ་གླིང་གི་མི་རྣམས་འཁྲུག །འཛམ་གླིང་མི་ལ་འདུག་ཡུལ་མེད། །འཛམ་གླིང་མི་རྣམས་སྡུག་ཆེ་བས། །དེ་ལ་མགོན་སྐྱབས་ཞུ་བ་ནི། །སྲིད་པ་ཀུན་ལ་དྲིས་པ་ལ། །རི་རབ་རི་ཡི་རྩེ་མོ་ནས། །
སངས་རྒྱས་ཤཱཀྱ་ཐུབ་པ་བཞུགས། །དེ་ཐབས་མཁས་ཐུགས་རྗེ་ཆེ་བ་ཡི། །སེམས་ཅན་ཀུན་ལ་མགོན་སྐྱབས་མཛད། །དེ་ལ་མགོན་སྐྱབས་ཞུ་བ་གྱིས། །དེ་ནས་འཛམ་གླིང་མི་རྣམས་ཀྱིས། །ཤཱཀྱ་ཐུབ་པར་ཞུ་བ་བགྱིས། །དེ་ཚེ་རི་རབ་རྩེ་མོ་ནས། །སངས་རྒྱས་ཤཱཀྱ་ཐུབ་པ་བཞེངས། །རི་རབ་རྩེ་ནས་གཟིགས་པ་ཡིས། །རྒྱ་མཚོ་འཁྱིལ་པའི་གཏིང་རུམ་དུ། །ལྷ་སྲིན་གདུག་པ་བྱེད་པ་མཐོང་། །ཉི་མ་ཚ་བ་བདུན་བདུན་བྱུང་། །མེ་ཏོག་རྩི་ཤིང་ལོ་ཏོག་སྐམ། །དེ་ཚེ་སྟོན་པ་བཅོམ་ལྡན་འདས། །གླིང་བཞིའི་མི་ལ་ཐུགས་རྗེས་གཟིགས། །འགྲོ་བ་སེམས་ཅན་དོན་ཡང་མཛད། །ཐབས་མཁས་ཐུགས་རྗེ་ཆེ་བ་དེས། །གསེར་གྱི་རྡོ་རྗེ་འཕངས་བ་ཡིས། །ཆུ་སྲིན་གདུག་པའི་ཁར་གཅིག་བརྒྱབ། །ཙནྡན་ཤིང་གཅིག་ཁང་པར་ཐལ། །གསེར་གྱི་རྡོ་རྗེ་རྩེ་དགུ་དེས། །ཆུ་སྲིན་གདུག་པའི་མིག་ཀྱང་བཅར། །མིག་ནས་བདུད་རྩི་ཆར་བབས་པས། །ལོ་ཏོག་རྩི་བཅུད་ཐམས་ཅད་དང་། །འབྲས་དྲུག་ཐན་པས་གདུང་བ་སོས། །སེམས་ཅན་ཀུན་གྱི་གསོས་སུ་གྱུར། །དེ་ཡང་ཐུབ་པའི་ཐུགས་རྗེ་ལགས། །དེ་ཚེ་ཆུ་སྲིན་ཁང་པ་ནས། །
ཤིང་གཅིག་སྐྱེས་པ་ཁ་རུ་བྱུང་། །དེ་ནས་དཔག་བསམ་ལྗོན་ཤིང་ཡིན། །གནོད་སྦྱིན་གདུག་པ་དྲག་པོ་དང་། །ས་འོག་འདྲེ་སྲིན་ལངས་བ་ཡིས། །མི་ལ་གདུག་པ་སྣ་ཚོགས་སྟོན། །དེ་ནས་བཅོམ་ལྡན་འདས་ལ་ཞུ་བ་གསོལ། །བཅོམ་ལྡན་འདས་ཀྱིས་ཐུགས་རྗེས་གཟིགས། །ཕྱག་ན་རྡོ་རྗེའི་བཀའ་ཉན་པ། །ཤཱཀྱ་ཐུབ་པའི་འཁོར་ལ་ཞུས། །དེ་ལ་བཀའ་ཚིག་བསྒོས་པ་ནི། །འཛམ་གླིང་མི་རྣམས་ཉོན་རེ་མོངས། །ཆུ་སྲིན་གདུག་པས་ཉན་པ་ལ། །ཕྱག་ན་རྡོ་རྗེའི་མགོན་སྐྱོབས་མཛད། །རི་རབ་ལྷུན་པོར་ཁྱེད་བཞུགས་ལ། །ཆུ་སྲིན་གདུག་པའི་མགོ་བོ་མནན། །གདུག་རྩུབ་ཞེ་སྡང་ཅི་བྱས་པ། །རི་རབ་ལྷུན་པོའི་ཞབས་སུ་མནན། །ཆུ་སྲིན་ཁ་སྦུབ་ཁ་རུ་མནན། །ཡུལ་འདྲེ་ཡུལ་སྲི་མང་པོ་ཀུན། །རི་རབ་ཆེན་པོའི་བརྗིད་ཀྱིས་མནན། །རི་རབ་བང་རིམ་གསུམ་པ་ལ། །མཆོད་རྟེན་བང་རིམ་ལྔ་བྱས་ཏེ། །རི་རབ་གླིང་བཞི་དབུས་དང་ལྔ། །མཆོད་རྟེན་ལྔ་ཡི་ཁ་བད་བྱས། །དཔག་བསམ་ཤིང་གི་སྡོང་པོ་ལ། །མཆོད་རྟེན་དེ་ཡི་སྲོག་ཤིང་བྱས། །རི་རབ་དེ་ལ་མཆོད་རྟེན་འགྱིང་། །གསེར་རི་བདུན་དང་རོལ་མཚོ་
བདུན། །རི་རབ་དེ་ཡི་ཞབས་སུ་གནས། །དེ་སྐད་ཅེས་ནི་བཀའ་སྩལ་ནས། །བཅོམ་ལྡན་ཕྱག་ན་རྡོ་རྗེ་ཡིས། །ཤཱཀྱ་ཐུབ་པའི་བཀའ་ལ་ཉན། །རི་རབ་རི་རྒྱལ་ལྷུན་པོ་ཡང་། །མཆོད་རྟེན་ཆེན་པོར་བྱིན་གྱིས་བརླབས། །དེས་འདྲེ་སྲིན་གདུག་བྱེད་མགོ་ཡང་མནན། །ཅིས་ཀྱང་མི་ཐུབ་རྡོ་རྗེ་རྒྱ་གྲམ་གྱིས། །ཆུ་སྲིན་གདུག་བྱེད་མིག་དང་རྣ་བ་བཙང་། །མིག་གིས་བལྟས་ཀྱང་མི་རིག་དང་། །རྣ་བས་ཉན་ཀྱང་མི་ཐོས་པར། །འདྲེ་དང་གདོན་གྱི་གཉའ་ཡང་མནན། །གནོད་བྱེད་གདོན་བགེགས་མཱ་ར་ཡ། །རི་རབ་ཆེན་པོའི་བརྗིད་ཀྱིས་མནན། །ཤར་ནས་དྲི་ཟའི་འདྲེ་ལང་བ། །རྒྱལ་པོ་ཡུལ་འཁོར་སྲུང་གིས་བསྲུང་དུ་གསོལ། །ལྷོ་ནས་གཤིན་རྗེ་འདྲེ་ལང་བ། །རྒྱལ་པོ་འཕགས་སྐྱེས་པོ་ཡིས་བསྲུང་དུ་གསོལ། །ནུབ་ནས་ཀླུ་ཡི་འདྲེ་ལང་བ། །རྒྱལ་པོ་སྤྱན་མི་བཟང་གིས་བསྲུང་དུ་གསོལ། །བྱང་ནས་གནོད་སྦྱིན་འདྲེ་ལང་བ། །རྒྱལ་པོ་ཆེན་པོ་རྣམ་ཐོས་སྲས་ཀྱིས་བསྲུང་དུ་གསོལ། །མཚམས་བཞིའི་གདོན་དང་བགེགས་ཀྱི་སྡང་བ་ན། །ཕྱོགས་སྐྱོང་བཅུ་ཡིས་བསྲུང་དུ་གསོལ། །སྟེང་ནས་ཟེར་ཁམས་འདྲེ་ལང་བ། །འབྱུང་བ་ལྔ་
ཡིས་བསྲུང་དུ་གསོལ། །རི་རབ་མཆོད་རྟེན་བརྗིད་ཆེ་དང་། །དཀྱིལ་འཁོར་ལྷ་ཚོགས་རྣམས་ཀྱིས་ནི། །བདག་ཅག་ཡོན་བདག་བསྲུང་དུ་གསོལ། །དེ་ནས་གཡས་སྐོར་ཉེར་གཅིག །གཡོན་བསྐོར་ནང་འཕྲོད་བྱས་ལ། །བྱེ་མ་སྤང་རམ་གང་འཕྲོད་གཏོར། ཀྱི། དང་པོ་ཅི་ཡང་མེད་པ་ལ། །དེ་ལ་ཡེར་ཡོད་ཅུང་ཙམ་སྲིད། །དེ་ལ་འཇིག་རྟེན་ཆོས་རྒྱལ་སྲིད། །རྒྱལ་པོ་དགའ་བྱེད་ཅེས་བྱ་སྲིད། །དེ་ཡི་བུ་ལ་སེང་གེ་ཟ་འགྲམ་སྲིད། །དེ་ཡི་བུ་ལ་རྒྱལ་པོ་ཟས་གཙང་སྲིད། །ཡུམ་སྒྱུ་མ་ལྷ་མཛེས་མ་ལ། །སྲས་རྒྱལ་བུ་དོན་གྲུབ་སྲིད། །དེ་ཡི་རྫུ་འཕྲུལ་སྣ་ཚོགས་ཀྱིས། །ཚེ་རབས་སྔ་ཕྱི་འབྱུང་བར་ཤེས། །དུགེ་བ་བྱས་པའི་ཡོན་ཏན་གྱིས། །མཐོ་རིས་གནས་སུ་སྐྱེ་བར་ཤེས། །སྡིག་པ་བྱས་པའི་ཉེས་པ་ཡིས། །ངན་སོང་གནས་སུ་འགྲོ་བར་ཤེས། །དེ་ལ་འགྲན་ཟླ་མེད་པ་ལ། །བདུད་ཤཱཀ་རིགས་ཀྱི་འགྲན་ཟླ་བྱས། །དེ་ནས་མཐུ་རྩལ་ཆེན་པོ་བསྟན། །ཤཱཀྱ་ཐུབ་པས་སེམས་ཅན་རྣམས། །བསྟན་པ་བདེ་སྐྱིད་དགོངས་པ་སྤེལ། །སྐྱེ་རྒ་ན་འཆིའི་བདུད་ཀྱང་བཏུལ། །དགེ་བ་སྣ་ཚོགས་ཉམས་སུ་བླང་། །འགྲོ་བ་སེམས་ཅན་དོན་ཡང་མཛད། །
སེམས་ཅན་ཀུན་གྱི་ཕ་མ་བྱས། །བྱོལ་སོང་མི་སྐད་གོ་བར་བྱས། །འབོད་ན་ཚུར་ལ་འོང་བ་དང་། །གཤེད་ན་ཕར་ལ་འགྲོ་བ་དང་། །གཞན་གྱི་མཐུ་རྩལ་མ་ལགས་ཏེ། རྒྱལ་བུ་ཀུན་ཤེས་མཐུ་ཡིས་བྱས། །ཉ་ནི་ཆུ་ལ་རྐྱལ་བ་བཞིན། །དེ་དག་ཀུན་གྱི་བར་སྐབས་སུ། །རྒྱལ་པོ་དགའ་བྱེད་རྒྱལ་པོ་སྲིད། །།སྦལ་ལྕོང་རྣམས་ལ་མེར་བྱེད་བསམ། །མི་ལུས་ཐུབ་པར་མི་འགྱུར་ཡང་། །སྡེར་མོ་མི་ཡི་རྐང་ལག་འཐོག །མི་ཡི་ལུས་དང་མཉམ་པར་བྱས། །དགེ་བའི་རྩ་བ་འབད་པའི་ཕྱིར། །ལུས་ནི་མི་མར་བཏང་བར་བྱས། །ཙན་དན་སྡོང་པོའི་ནགས་ཁྲོད་ནས། །སྟག་མོ་མ་སྨད་རྟོགས་ལ་ཐུག །ཤ་ཁྲག་ཟ་བཙུག་སྦྱིན་པ་བཏང་། །དེ་ཡང་བཟོད་པའི་སེམས་བསྐྱེད་པས། །ལུས་ལ་ལྕགས་འཛེར་སྟོང་ཡང་བཀོད། །དམུས་ལོང་རྣམས་ཀྱི་མིག་ཀྱང་ཕྱེས། །ཞ་གྲུམ་རྣམས་ཀྱི་རྐང་ལག་བཏང་། །ནད་པ་རྣམས་ཀྱི་སྨན་ཡང་གསོས། །སེམས་ཅན་ཀུན་ལ་འོ་བྱམས་པས། །དེ་ཡི་དགེ་བའི་རྩ་བ་ཡིས། །མར་མེ་མཛད་ཀྱི་ཞལ་ཡང་མཐོང་། །མེ་ཏོག་ཨུཏྤལ་སྔོན་པོ་བདུན། །མར་མེ་མཛད་ལ་མཆོད་པ་ཕུལ། །མར་མེ་མཛད་ཀྱི་ཐུགས་རྗེ་ཡིས། །
ཤཱཀྱ་ཐུབ་པར་ལུང་ཡང་བསྟན། །ཆོས་རྣམས་སྤྱོད་པའི་དབང་ཡང་བསྐུར། །བདུད་རྣམས་བཏུལ་བའི་མཐུ་ཡང་བྱིན། །སྐྱེ་བ་གཅིག་གི་ཐོབ་པའི་མི། །ལྷ་ཡི་རྒྱལ་པོར་གྱུར་པའི་དུས། །དམ་པ་ཏོག་གི་མཚན་ཡང་གསོལ། །ཟས་གཙང་རྒྱལ་པོ་ཡབ་ཏུ་གཟིགས། །སྒྱུ་མ་ལྷ་མཛེས་ཡུམ་ལ་གཟིགས། །སྐྱེ་རྒ་ན་འཆི་ཐར་བྱེད་པ། །ནི་རཉྫརའི་ཆུ་འགྲམ་དུ། །དགུང་ལོ་དྲུག་ལ་དཀའ་ཐུབ་མཛད། །བྱང་ཆུབ་མཆོག་གི་ཤིང་དྲུང་དུ། །ལྷ་ཡི་བུ་ཡི་བདུད་རྣམས་བཏུལ། །ཤཱཀྱ་ཐུབ་པར་མཚན་ཡང་གསོལ། །ཆོས་ཀྱི་རྒྱལ་པོ་ཆེན་པོར་གྱུར། །འགྲོ་བ་འདྲེན་པའི་ཐབས་ལ་མཁས། །ཆོས་རྣམས་བཤད་པའི་སྟོན་པ་མཛད། །ཉན་ཐོས་ཐམས་ཅད་སློབ་མར་བྱས། །ཟུང་བཞི་ཡ་བརྒྱད་ཞལ་འབྲེལ་མཛད། །དེ་ནས་ཤཱཀྱ་ཐུབ་པ་དེས། །ཝཱ་ར་ཎཱ་སཱིར་ཆོས་འཁོར་བསྐོར། །བྱ་རྒོད་ཕུང་པོའི་རི་ལ་ལྡིང་། །འགྲོ་བའི་དོན་རྣམས་མཐར་ཕྱིན་ནས། །གྲོང་ཆེར་རྩྭ་མཆོག་དྲུང་ཚལ་དུ། །ཡོངས་སུ་མྱ་ངན་འདས་པ་བསྟན། །དུས་ངན་ཐ་མ་དེ་ལས་བྱུང་། །ཟུང་བཞི་ཡ་བརྒྱད་ཞལ་འབྲེལ་བྱས། །ཉན་ཐོས་མཆོག་བརྒྱད་འདུས་པ་ཡིས། །
རྒྱ་ཆེའི་ཆོས་ལ་བདུན་ཚིག་བྱས། །ཕན་བསོད་ཆེ་བ་དགེ་རྩ་བྱས། །ཐུབ་པ་མྱ་ངན་འདས་པ་ལ། །ལྷ་ཡི་ཁམས་ནས་ལྷ་རྣམས་འདུས། །མི་ཡི་ཁམས་ནས་མི་རྣམས་འདུས། །ཀླུ་ཡི་ཁམས་ནས་ཀླུ་རྣམས་འདུས། །རྒྱ་གར་ཡུལ་ནས་བྲམ་ཟེ་འདུས། །སྲིན་པོའི་ཡུལ་ནས་སྲིན་པོ་འདུས། །གནོད་སྦྱིན་ཡུལ་ནས་གནོད་སྦྱིན་འདུས། །ཤཱཀྱ་ཐུབ་པའི་སྐུ་གདུང་དེ། །ལྷས་ནི་ལྷ་ཡི་ཡུལ་དུ་ཁྱེར་དགོས་ཟེར། །ལྷ་མིན་ལྷ་མིན་ཡུལ་དུ་ཁྱེར་དགོས་ཟེར། །མིས་ཀྱང་མི་ཡི་ཡུལ་དུ་ཁྱེར་དགོས་ཟེར། །ཀླུས་ཀྱང་ཀླུ་ཡི་ཡུལ་དུ་ཁྱེར་དགོས་ཟེར། །སྲིན་པོས་སྲིན་པོའི་ཡུལ་དུ་ཁྱེར་དགོས་ཟེར། །གནོད་སྦྱིན་གནོད་སྦྱིན་ཡུལ་དུ་ཁྱེར་དགོས་ཟེར། །བྱོལ་སོང་བྱོལ་སོང་ཡུལ་དུ་ཁྱེར་དགོས་ཟེར། །ཡི་དྭགས་ཡི་དྭགས་ཡུལ་དུ་ཁྱེར་དགོས་ཟེར། །དམྱལ་བས་དམྱལ་བ་ཡུལ་དུ་ཁྱེར་དགོས་ཟེར། །དེ་རྣམས་གང་ལ་མ་བསྐུར་ནས། །ཤ་རུ་ར་ཡི་ཞུགས་ལ་བཞག །ཡེ་ཤེས་འབར་བའི་མེ་ལ་བསྲེགས། །ཤ་རུ་ར་ཡི་རུས་པ་དེ། །སྐུ་གདུང་རིང་བསྲེལ་དག་ཏུ་གྱུར། །རྒྱ་གར་ཡུལ་གྱི་བྲེ་ལ་འཇལ། །བྲེ་འོ་ཆེ་ཡི་ཁལ་ནི་བཅུ་བཞི་བྱུང་། །དེ་དག་ཆ་ནི་ལྔ་རུ་
བསྒོས། །ཆ་གཅིག་ལྷ་ཡི་གདན་དྲངས་ནས། །ལྷ་ཡི་ཡུལ་དུ་མཆོད་རྟེན་བརྩེགས། །ལྷ་རྣམས་ཀུན་གྱི་མཆོད་གནས་བྱས། །ཆ་གཅིག་མི་ཡི་ཡུལ་དུ་གདན་དྲངས་ནས། །མི་ཡི་ཡུལ་དུ་མཆོད་གནས་བྱས། །ཆ་གཅིག་ཀླུ་ཡི་ཡུལ་དུ་གདན་དྲངས་ནས། །ཀླུ་ཡི་ཡུལ་དུ་མཆོད་རྟེན་བརྩེགས། །ཀླུ་རྣམས་ཀུན་གྱི་མཆོད་གནས་བྱས། །ཆ་གཅིག་རྒྱ་གར་ཡུལ་དུ་གདན་དྲངས་ནས། །རྒྱ་གར་ཡུལ་དུ་མཆོད་རྟེན་བརྩེགས། །རྒྱ་གར་མི་རྣམས་མཆོད་གནས་བྱས། །ཆ་གཅིག་བྲམ་ཟེའི་ཡུལ་དུ་གདན་དྲངས་ནས། །བྲམ་ཟེ་རྣམས་ཀྱི་མཆོད་རྟེན་བརྩེགས། །འདྲེ་སྲིན་རྣམས་ཀྱི་བསྐལ་པ་བཅད། །སྐུ་གདུང་རིང་བསྲེལ་མ་ཐོབ་པས། །འདྲེ་སྲིན་གདོན་བགེགས་ཐུགས་ཁྲོས་ནས། །མི་ལ་གདུག་པ་སྣ་ཚོགས་བཏང་། །ཁྲོ་ཆུ་ཁོལ་མའི་མདའ་ཡང་འཕངས། །མི་ནད་ཕྱུགས་ནད་སྣ་ཚོགས་འབྱུང་། །སྲིན་ཡུལ་ལང་ཀ་པུ་རི་ནས། །སྲིན་པོ་མང་བརྒྱ་ཉུང་བཅུ་ཡང་། །རོ་ཡི་གཞོབ་དང་གསུར་ལ་ལངས། །སྲིན་པོ་ཤ་ཟ་མང་པོ་ཡིས། །འཛམ་གླིང་མི་ལ་གདུག་པ་བཏང་། །དེ་ནས་ཉན་ཐོས་མཆོག་བརྒྱད་ཀྱིས། །དགེ་སློང་གཞོན་ནུ་བྱ་བ་
དེ། །འདྲེ་སྲིན་ཡུལ་ཁམས་བརྟག་ཏུ་བཏང་། །སྲིན་ཡུལ་ལང་ཀ་པུ་རི་དེ། །དབྱིབས་དང་ཁ་དོག་ཅི་ལྟར་འདྲ། །དེ་ན་གནས་པའི་སྲིན་པོ་ཀུན། །གོས་སུ་ཅི་གྱོན་ཟས་སུ་ཅི་ཟ་རྣམས། །དགེ་སློང་གཞོན་ནུས་བརྟག་པ་ལ། །སྲིན་ཡུལ་ལང་ཀ་པུ་རི་དེ། །མདོག་ནི་ནག་ལ་ཟླ་གམ་འདྲ། །སོལ་ཕྱེ་བཏབ་པའི་རི་བོ་འདྲ། །ཟས་སུ་ཤ་དང་ཁྲག་ལ་དགའ། །གོས་སུ་རེ་བ་ནག་པོ་གྱོན། །དེ་སྐད་ཅེས་ནི་གསུངས་པ་དང་། །དེ་ཚེ་ཉན་ཐོས་མཆོག་བརྒྱད་ཀྱིས། །བྲམ་ཟེ་བི་ན་ཡ་ག་བསྙག །བྲམ་ཟེའི་ཆོས་གོས་ནག་པོ་གྱོན། །ཡུངས་དཀར་ཕོ་ཉ་ཕྱོར་བཅུར་བཏང་། །།སྐུ་གདུང་བསྲེག་པའི་ཐལ་བ་དང་། །སོལ་བ་དང་ནི་ངན་སྙིགས་དང་། །ས་ཚིག་རྡོ་ཚིག་ཕྱེ་ཕྱེ་དང་། །འཁོར་ར་ཡུག་ཡུག་བསྡུས་ནས་ནི། །ལང་ཀ་པུ་རའི་མདོག་འདྲ་བའི། །མཆོད་རྟེན་ནག་པོ་བཞེངས་སུ་གསོལ། །མདོག་ནི་ནག་ལ་ཁྲོས་པ་འདྲ། །ལྷ་འདྲེ་འཇིགས་པའི་རི་བོ་བརྩེགས། །སྲིན་པོ་སྔགས་པའི་ཁྲི་འཕང་ཅན། །གདོན་བགེགས་བརྒྱལ་བའི་འོད་ཟེར་ཅན། །དེ་ལ་མིང་དང་མཚན་བཏགས་པ། །གདུག་པ་འདུལ་བའི་མཆོད་རྟེན་ལགས། །སམ་ནག་ཚེར་
མ་གདུག་པ་ཅན། །དྲག་པོའི་ཤིང་ལ་སྲོག་ཤིང་བྱས། །འདྲེ་སྲིན་མང་པོའི་བླ་ཡང་བྲིས། །ལང་ཀ་པུ་རའི་གཉའ་གནོན་བྱས། །འཛམ་བུ་གླིང་གི་མི་རྣམས་ཀྱིས། །གྲོ་ག་ཤ་ཤུན་སྟག་སྡེབ་ལ། །སོལ་ཕྱེ་ནག་པོའི་སྣག་ཚ་དང་། །ཕག་རའི་ཁྲག་གིས་འདྲེ་ལིང་བྲིས། །ལིང་ག་གཟུགས་ཅན་བྲིས་ནས་ནི། །དཀར་ནག་སྐུད་པས་དམ་དུ་བཅིང་། །ཤེལ་ཚིགས་རམ་པ་རུག་པ་དང་། །ཟན་དྲུག་དང་ནི་ཡོས་སྙིགས་དང་། །ཙ་སྦྲུལ་ཐོད་དགུ་རུས་བཅུ་དང་། །འདྲེ་སྲིན་གདོན་བགེགས་གནོད་བྱེད་རྣམས། །བཀར་དང་བྲབ་པའི་ཡས་སྟགས་རྣམས། །མཆོད་རྟེན་ནག་པོའི་ཞབས་སུ་བཅུག །མི་དང་ཕྱུགས་ཀྱི་གླུད་དུ་བཏང་། །ཡོན་གྱི་བདག་པོས་བསྐོར་བ་བྱས། །ཡོན་མཆོད་ཀུན་གྱིས་གཡས་སྐོར་བྱེད་ཅིང་ནས་འབྲུ་གཏོར། མཆོད་པ་འབུལ། མཆོད་ཡོན་འབུལ་ལ་གཉེར་ཡང་བསྐོས། །ཆོས་སྐུ་ཆེན་པོར་མངའ་ཡང་གསོལ། །དེ་ཡི་ནུས་པ་ཡོན་ཏན་གྱིས། །མི་ནད་ཕྱུགས་ནད་ཆད་པ་དང་། །བཀྲ་ཤིས་ཕུན་སུམ་ཚོགས་པར་བྱ། །དབང་སྐུར་བྱེད་ཅིང་སྨོན་ལམ་བཏབ། །བདག་དང་ཡོན་བདག་འཁོར་བཅས་ཀྱི། །བསྐོར་བ་བྱས་ལ་རབ་གནས་བྱ། །ཡེ་དྷརྨཱས་རབ་གནས་
བྱ། འདིར་ཐུབ་པ་ནག་པོ་བསྒོམ། དེ་ནས་མཆོད་རྟེན་ལ་སྨོན་ལམ་བཏབ་ལ་སྐོར་བ་བྱེད་ཅིང་འདི་སྐད་བརྗོད། དབང་བསྐུར། ན་མོ། དཀོན་མཆོག་གསུམ་ལ་ཕྱག་འཚལ་ལོ། །སྔོན་བཅོམ་ལྡན་འདས་ཤཱཀྱ་ཐུབ་པའི་སྐུ་ལས་སྤྲུལ་ཏེ། བདུད་བཏུལ་བའི་མཆོད་རྟེན་འདི་བརྩེགས་དྲང་སྲོང་མངོན་ཤེས་པ་བྱ་བ་དེས། རི་བོ་ཏ་ལའི་རྩེར་མཆོད་རྟེན་བཞེངས་ཏེ། དེའི་བཅོམ་ལྡན་འདས་མངོན་པར་རྫོགས་པར་སངས་རྒྱས་པ་ལྟར། དེ་རིང་བདག་དང་ཡོན་བདག་རྣམས། ཡང་བཀྲ་ཤིས་ཕུན་སུམ་ཚོགས་པར་གྱུར་ཅིག །སྔོན་དྲང་སྲོང་བདེ་མགོན་གྱི་ཆུ་བོ་ནེ་རཉྫརའི་དྲུང་དུ་ཀླུ་འདུལ་བའི་མཆོད་རྟེན་བརྩེགས་པས། ཆུ་བོ་ནེ་རཉྫན་སྐམ་པ་ཡང་འབྲུབ། རི་བོ་ཏ་ལ་ཉིལ་བ་ཡང་རངས། བཅོམ་ལྡན་འདས་མངོན་པར་རྫོགས་པར་སངས་༈ རྒྱས་པ་ལྟར། བདག་དང་ཡོན་བདག་རྣམས་འཚོ་མཛད་ཀྱི་གསོས་ལ་ཚེ་རིང་བར་གྱུར་ཅིག །སྔོན་ཡང་རྒྱལ་པོ་དྲག་ལྡན་བྱ་བས་རྒྱ་མཚོ་ནི་སྐམ། ས་གཞི་ནི་གས། རྒྱལ་བརྒྱུད་ནི་ཆད་དུ་ཉེ་བར། མཆོད་རྟེན་བརྩེགས་པའི་ཡོན་ཏན་གྱིས་རྒྱལ་པོ་འཁོར་བཅས་འཁོར་འདབ་རྒྱས་པ་ལྟར། དེ་རིང་བདག་དང་ཡོན་བདག་ཡང་འཁོར་འདབ་འཕེལ་ལ་
རྒྱས་པར་གྱུར་ཅིག །སྔོན་རྒྱལ་པོ་དགའ་བྱེད་ཀྱིས་རི་གསུམ་གྱི་གོང་དུ་མཆོད་རྟེན་བརྩེགས་པས། འདྲེ་གདོན་གྱི་སོ་བ་དང་བྱ་ར་བ་ཆད་པ་ལྟར། དེ་རིང་བདག་དང་ཡོན་བདག་གིས་དགྲ་རྐུན་མེདི་ནས་བཙན་ས་ཟིན་པར་གྱུར་ཅིག །།ལུང་གསུམ་གྱི་མདོ་ན་མཆོད་རྟེན་བརྩེགས་པས། བགེགས་ཀྱི་འགྲིམ་སྲང་བཅད་པ་ལྟར། དེ་རིང་བདག་དང་ཡོན་བདག་གིས་ཇག་ཤོད་དང་སྐྲག་སྔངས་མེད་པར་གྱུར་ཅིག །རི་ལུང་མང་པོ་འདུས་པའི་སར་མཆོད་རྟེན་བརྩེགས་པས་བགེགས་ཀྱི་འགྲིམ་སྲང་བཅད་པ་ལྟར། དེ་རིང་བདག་དང་ཡོན་བདག་གི་བགེགས་རིགས་ཐམས་ཅད་ཞི་བར་གྱུར་ཅིག །ས་དགྲ་ཅན་གྱི་སར་བརྩེགས་པས། ས་བཟང་བར་བྱས་པས་མི་ཡི་ཁམས་རྣམས་བདེ་བར་ལྟར་དེ་རིང་བདག་དང་ཡོན་བདག་བདེ་བར་གྱུར་ཅིག །འཁོར་རྣམས་བདེ་བར་གྱུར་ཅིག །སྔོན་ཡང་ས་ངན་པ་བཏུལ་བ་དང་། ས་བདག་གདུག་རྩུབ་ཅན་དང་། ས་འདྲེ་ས་སྲི་འགྲིམ་ལམ་དུ་མཆོད་རྟེན་བརྩེགས་པས་ས་འདྲེ་ས་སྲི་མནན་པ་དང་འདྲེ་སྲིན་གྱི་འགྲུལ་ལམ་བཅད་པ་ལྟར། དེ་རིང་བདག་དང་ཡོན་བདག་གི་མཆོད་རྟེན་ནག་པོ་འདི་གར་བརྩེགས་ཀྱང་།
ཡོན་བདག་བཀྲ་ཤིས་ཤིང་རིགས་རྒྱུད་འཕེལ་བར་ཤོག །ཅེས་བརྗོད། ཨོཾ་ཛི་ན་ཛིཀ །ལཾ་ཏེ་ཤྭ་ར་ཏི་སིཾ། སྲ་རཏྣ་དྷིཀ །མཾམོ་ཧ་ར་ཏི། ཨོཾ་ཨཱཿ་རོ་ལིཀ །པྱོ་ར་ག་ཏི། །ཧཔྲཛྙཱ་དྷིཀ །ཏཾ་བཛྲ་ར་ཏི། ཙ་ཏི་ཤྭ་རི་མུན་བཟློག།བརྒྱའམ་གང་ཚར་བཟླ་ཞིང་། ཡོན་མཆོད་ཀུན་གྱིས་མེ་ཏོག་འཐོར་ལ་གཡས་སྐོར་བྱེད་ཅིང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བསྲུང་བའི་གུར་དུ་གྱུར་པར་བསམ། བསྲུང་བའི་རྒྱལ་པོ་ལ་གསོལ་བ་བཏབ། དེ་ནས་གཡོན་བསྐོར་བྱས་ལ། ཡོན་བདག་གི་ནད་གདོན་བུད་ནས་པུ་རི་དེ་ལ་ཐིམ་པར་བསམ། ལུས་ཤེལ་སྒོང་གསལ་ལ་དག་པ་ལྟར་དུ་བསྒོམ། དུར་སྒོ་དང་ས་སྒོ་བཅད་པའི་གཉེར་གཏད་དོ། ༈ །དེ་ནས་ལྷག་མ་བྱེད་བརྟན་མ་སྐྱོང་། བཀྲ་ཤིས་བརྗོད། ཡེ་ཤེས་པ་གཤེགས། དམ་ཚིག་པ་ཅ་ཏི་ལ་བསྡུས། ཅ་ཏི་རྣམ་སྣང་དངོས་སུ་དམིགས། །བསྔོ་བ་སྨོན་ལམ་རྒྱས་པར་བྱ། དེ་ནས་མི་དམིགས་པའི་ངང་ལ་རྒྱས་གདབ་བོ། ༈ །ད་ནི་མཆོད་རྟེན་གྱི་ལྷ་བསྐྱེད། སྤྱན་དྲངས། བརྟན་གཞུག་ཕྱག་འཚལ་མཆོད་བསྟོད། འདོད་པའི་དོན་ལ་གསོལ་བ་བཏབ་པ་ནི། ཧཱུྃ། མི་གནས་དམིགས་མེད་ཆོས་སྐུ་དག་པ་ལ། །གཟུགས་སྐུ་མཚན་མའི་ཕྱག་རྒྱ་སྐུར་སྟོན་པ། །རང་བྱུང་བདུད་འདུལ་མཆོད་རྟེན་ནག་པོའི་སྐུ། །ཉོན་མོངས་
དབང་གིས་བཞེངས་བཞུགས་མི་མངའ་ཡང་། །ཐུགས་རྗེ་སྤྲུལ་སྐུའི་འགྲོ་བའི་དོན་མཛད་ཕྱིར། །རང་བྱུང་མཆོད་རྟེན་ཆེན་པོར་གཤེགས་སུ་གསོལ། །ཨོཾ་མ་ཧཱ་ཅ་ཏི་ས་མ་ཡ་ཛཧཱུྃ། ཧཱུྃ། ཆོས་སྐུ་རྣམ་དག་ཡེ་ནས་མཁའ་ལྟར་དག །ལོངས་སྤྱོད་རྫོགས་སྐུ་ཉི་ཟླའི་འོད་གསལ་ཞིང་། །ཅི་ཡང་སྤྲུལ་སྐུ་ཐུགས་རྗེའི་འོད་ཟེར་འཕྲོ། །རང་བྱུང་ལྷུན་གྲུབ་མཆོད་རྟེན་ནག་པོའི་སྐུ། །ཐུགས་རྗེ་ཐབས་ཀྱིས་འགྲོ་བའི་དོན་མཛད་པ། །གྲུ་གསུམ་མཐིང་ནག་གདན་ལ་བཞུགས་སུ་གསོལ། །ཨོཾ་མ་ཧཱ་ཅ་ཏི་ས་མ་ཡ་ཧཱུཾ། ཧཱུྃ་སྐུ་གསུང་ཐུགས་ལས་སྤྲུལ་པའི་སྐུ་གདུང་གཙོ། །ཡོན་ཏན་བྱིན་རླབས་ཆེན་པོ་རྨད་བྱུང་གཙོ། །ཕྱི་ནང་ལྷ་སྲིན་སྡེ་བརྒྱད་བདུད་འདུལ་གཙོ། །མཆོད་རྟེན་ནག་པོའི་སྐུ་ལ་ཕྱག་འཚལ་བསྟོད། །ཨོཾ་མ་ཧཱ་ཅ་ཏི་སརྦ་ན་མོ། ཧཱུྃ། རང་བྱུང་གདོད་ནས་དག་པའི་རིང་བསྲེལ་གཙོ། །བདག་དང་མཐའ་ཡས་སེམས་ཅན་ཐམས་ཅད་ཀྱི། །མ་རིག་ཉོན་མོངས་འཁྲུལ་པའི་རྣམ་རྟོག་གི །མི་དགེ་སྡིག་པའི་ལས་རྣམས་ཅི་མཆིས་པ། །བདེ་གཤེགས་རིང་བསྲེལ་སྤྱན་སྔར་མཐོལ་ལོ་བཤགས། །ཨོཾ་ཧཱ་ཅ་ཏི་ས་མ་ཡ་སྭཱ་ཧཱ། ཧཱུྃ།
མ་རིག་མུན་སེལ་སྣང་གསལ་སྒྲོན་མེ་འདི། །བདེ་གཤེགས་རིང་བསྲེལ་སྐུ་ལ་མཆོད་པ་འབུལ། །ཨོཾ་མ་ཧཱ་ཅ་ཏི་ཨཱཿ་ལོ་ཀེ་ས་མ་ཡ་སྭཱ་ཧཱ། ཧཱུྃ། རྣམ་དག་དྲི་མ་མེད་པའི་ཁྲུས་ཆབ་འདི། །བདེ་གཤེགས་རིང་བསྲེལ་སྐུ་ལ་མཆོད་པ་འབུལ། །ཨོཾ་མ་ཧཱ་ཅ་ཏི་ཨགྷི་ས་མ་ཡ་སྭཱ་ཧཱ། ཧཱུཾ། དྲི་ཞིམ་ངད་དང་ལྡན་པའི་སྤོས་མཆོག་འདི། །བདེ་གཤེགས་རིང་བསྲེལ་སྐུ་ལ་མཆོད་པ་འབུལ། །ཨོཾ་མ་ཧཱ་ཅ་ཏི་དྷ་པེ་ས་མ་ཡ་སྭཱ་ཧཱ། ཧཱུྃ། འབྱུང་ལྔར་སྐྱེས་པའི་ལྷ་རྫས་མེ་ཏོག་འདི། །བདེ་གཤེགས་རིང་བསྲེལ་སྐུ་ལ་མཆོད་པ་འབུལ། །ཨོཾ་མ་ཧཱ་ཅ་ཏི་པུལླེ་ས་མ་ཡ་སྭཱ་ཧཱ། ཧཱུཾ། དྲི་ཞིམ་རྣམ་པར་དག་པའི་བྱུག་ཚོགས་འདི། །བདེ་གཤེགས་རིང་བསྲེལ་སྐུ་ལ་མཆོད་པ་འབུལ། །ཨོཾ་མ་ཧཱ་ཅ་ཏི་གནེ་ས་མ་ཡ་སྭཱ་ཧཱ། ཧཱུཾ། རོ་མཆོག་བཅུད་དང་ལྡན་པའི་ཞལ་ཟས་འདི། །བདེ་གཤེགས་རིང་བསྲེལ་སྐུ་ལ་མཆོད་པ་འབུལ། །ཨོཾ་མ་ཧཱ་ཅ་ཏི་ནེ་ཝིདྱ་ས་མ་ཡ་སྭཱ་ཧཱ། །ཧཱུྃ། སྟོང་ཉིད་སྒྲ་དབྱངས་སྒྲ་སྙན་རོལ་མོ་འདི། །བདེ་གཤེགས་རིང་བསྲེལ་སྐུ་ལ་མཆོད་པ་འབུལ། །ཨོཾ་མ་ཧཱ་ཅ་ཏི་ཤཐཱ་ས་མ་ཡ་སྭཱ་ཧཱ། ཧཱུྃ། རྣམ་དག་རྟོགས་གྲོལ་ཆོས་ཀྱི་དབྱིངས་ཉིད་
སྐུ། །ཐམས་ཅད་རྒྱན་ལྡན་ལོངས་སྤྱོད་རྫོགས་པའི་སྐུ། །ཐབས་ཤེས་མཚན་མའི་ཕྱག་རྒྱ་ཅི་ཡང་སྟོན། །འགྲོ་དོན་མཐར་ཕྱིན་སྐུ་གདུང་ལྷུན་གྱིས་གྲུབ། །རིགས་ལྔ་རྫོགས་པའི་བང་རིམ་ལྔ་བརྩེགས་ལ། །ཆོས་ཉིད་དབྱིངས་ཀྱི་བུམ་པ་ཏོག་བཅས་ལྡན། །ཚད་མེད་བཞི་ལྡན་ཟུར་བཞི་ཟ་ར་བརྩེགས། །བུམ་པ་དཔལ་བེའུ་ནམ་མཁའ་ལྟ་བུ་ལ། །ཏོག་དང་པན་བཙུགས་གདུགས་ཀྱིས་མཚན། །སིལ་སྙན་དྲིལ་བུ་མེ་ལོང་རྒྱུན་དང་ལྡན། །མ་སྐྱེས་མི་འགགས་ཆོས་སྐུ་རྣམ་པར་དག །ཕྱི་ནང་སྣོད་བཅུད་ལོངས་སྤྱོད་རྫོགས་པའི་སྐུ། །གཟུགས་སྐུ་རྣམ་གཉིས་ཐུགས་རྗེས་དོན་མཛད་པ། །མི་འགྱུར་མི་གཡོ་འགྱུར་མེད་ཆོས་ཀྱི་སྐུ། །མི་སྐྱེས་མི་འགགས་འགྱུར་མེད་ཆོས་ཀྱི་གསུང་། །མི་གནས་མི་རྟོག་འཁྲུལ་མེད་ཆོས་ཀྱི་ཐུགས། །ཕྱི་ནང་སྣོད་བཅུད་སྟོང་པ་ཉིད་དུ་ཤེས། །སྟོང་ལ་རང་བཞིན་མེ་ལོང་ལྟ་བུ་ཤེས། །ཐམས་ཅད་མཉམ་པ་ཉིད་དུ་ཡེ་ནས་ཤེས། །གཉིས་མེད་དོན་ལ་བབ་པ་ཡེ་ནས་ཤེས། །དབྱིངས་དང་ཡེ་ཤེས་གཉིས་སུ་མེད་པའི་སྐུ། །སྐུ་གདུང་རིང་བསྲེལ་མཆོད་རྟེན་ནག་པོའི་སྐུ། །ཐབས་ཤེས་གཉིས་མེད་འབྲེལ་བའི་
འགྲོ་དོན་མཛད། །ཅ་ཏི་ནག་པོའི་ལྷ་སྲིན་གདུག་པ་འདུལ། །སངས་རྒྱས་ཆོས་དང་དགེ་འདུན་དཀོན་མཆོག་འདྲེན། །རིགས་ལྔ་རིགས་གསུམ་བདེ་གཤེགས་མཆོད་པའི་རྟེན། །སྐུ་གདུང་མཆོད་རྟེན་སྐུ་ལ་ཕྱག་འཚལ་བསྟོད། །དམ་ཚིག་ཉམས་པའི་ས་བོན་ལྟ་ལོག་གི །ལུས་ངག་ཡིད་གསུམ་དྲན་པའི་དབང་པོ་རྣམས། །ལྷ་སྲིན་སྡེ་བརྒྱད་གདུག་པའི་དམོད་པ་ཀུན། །།བདེ་གཤེགས་མཆོད་རྟེན་སྐུ་གདུང་མཐུ་སྟོབས་ཀྱིས། །སྐུ་ཡི་བདེན་པས་ཐམས་ཅད་བསལ་དུ་གསོལ། །གསུང་གི་བདེན་པས་ཐམས་ཅད་བསལ་དུ་ལྕེགསོལ། །ཐུགས་ཀྱི་བདེན་པས་ཐམས་ཅད་བསྒྱུར་དུ་གསོལ། །ཨོཾ་ལཾ་ནན། ཧཱུཾ་ལཾ་ནན། གསོལ་བ་བཏབ་པ་དང་རབ་གནས་ཀྱི་ཆོ་ག་ལགས་སོ། །རྫོགས་སོ།། །།ད་ནི་ཆུང་སྲི་བཏུལ་བ་ལ་འདི་སྐད་བྱའོ། །ལིངྒ་དོང་དུ་སྦས་པ་ལ་འདྲེ་གདོན་རྣམས་བསྟིམ། དམིགས་པ་གསལ་བ་དང་། ཡི་དམ་ལྷ་ཡི་ང་རྒྱལ་གྱིས་འགུགས་གཞུགས་བྱས་ལ་འདི་སྐད་དོ། །སྔོན་ཨོཾ་ད་ཀ་ར་ཡི་སྲིན་མོ་ལ། །མ་བདུད་རྒྱལ་མོར་སྤྲུལ། །དེ་ལ་བུ་མོ་ལྔ་སྲིད་པ། །གོར་མོ་ཁྲི་བཙུན་ཐང་ལོ་གསེར་མིག་དང་། །བརྡ་ལྷ་བཙུན་མོ་རྐང་ལྷ་དེ་མོ་དང་། །བྱང་སྨན་སྐྱི་འཐིང་རྡོ་རྗེ་ཏིང་ལོ་སྨན། །དེ་ལྔས་
སྤྲུལ་པ་ཆེ་རུ་སྤྲུལ་ཙམ་ན། །གཡག་ཟན་སྨད་དགུར་སྤྲུལ། །འབྲིང་དུས་སྤྲུལ་ཙམ་ན། །བུད་མེད་ནག་མོ་རལ་པ་ཅན། །ལག་ན་སྦྲུལ་ནག་ཞགས་པ་ཐོགས། །དུར་ཕག་ཁྲ་བོ་རོལ་དུ་ཁྲིད། །དུར་བྱ་ནག་པོ་ཀླད་ན་ལྡིང་། །དེ་ནས་ཆུང་ངུར་སྤྲུལ་ཙ་ན། །སྲེ་མོ་ཕག་དང་རྨང་ཚེ་དང་། །ཤ་ཁྱི་སྤྲུལ་པ་བདག་པོ་སྟེ། །དེ་ཡི་མི་ལ་དབུལ་འདྲེ་གོད་འདྲེ་དང་། །ནད་འདྲེ་དང་ནི་ཡམས་འདྲེ་དང་། །ཆུང་སྲི་དང་ནི་རྨོངས་འདྲེ་བྱས། །དེ་ལ་གླུད་དང་ཡས་འབུལ་བ། །བྱིའུ་ཚང་འཁྱིལ་པའི་ནང་དུ་ནི། །གླུད་ཟན་ངར་མི་བཅུག །ཚེ་བུ་རྙིང་པ་བཀོན། །ཤ་དགུ་ཟན་དགུ་དང་། །གླུད་ཟན་ཆངས་བུ་དང་། །སྲེ་མོ་འོལ་ལྕམ་དང་། །རྫ་བྲ་སྣ་དམར་དང་། །རྨང་ཚེ་གསེར་མིག་དང་། །ཁྱིའུ་ཕེ་གུ་དང་། །སྲིན་འབུ་དུང་ལྷག་དང་། །འགལ་བ་འཆང་གང་དང་། །འཛར་བུ་ཐེམ་གསུམ་དང་། །མདའ་ཆུང་གཞུ་ཆུང་དང་། །དུག་བམ་ནག་པོ་དང་། །འབྲུ་ཟན་སྣ་དགུ་དང་། །ཆུང་ཡས་སྣ་ཚོགས་ཀྱིས། །ཆུང་སྲི་གདོན་ཆེན་བཅོ་ལྔ་བཀར། །ཆུང་སྲི་སྤུན་དགུ་ལ། །འགྲོ་བའི་རྔན་པ་སྦྱིན། །བྱེད་པའི་རྫོང་བཏབ་
བོ། །གཞན་སྤང་རིགས་རྣམས་ལ་རྫོང་བཏབ་བོ། །སྲིན་པོ་ཐང་ང་མགོ་དགུ་དང་། །ས་འདྲེ་རྒྱལ་པོ་སྲས་བཅས་དང་། །འཁོན་འདྲེ་ནག་མོ་དང་། །རྨང་འདྲེ་རོག་པོ་དང་། །རྨུགས་འདྲེ་ཐུ་ལམ་དང་། །ནལ་འདྲེ་སྦག་པ་དང་། །ཐབ་འདྲེ་ནག་པོ་དང་། །རྨུག་འདྲེ་བྱིང་བ་དང་། །མཚེལ་འདྲེ་མཁུན་བུ་དང་། །དགུ་བཅུ་བྱུང་། དེ་རྣམས་ཀྱི་ནད་དང་ཆུང་སྲི་བྱེད། །དབུལ་འདྲེ་དང་གོད་འདྲེ་བྱེད། །ཆུང་སྲི་དང་རྨོངས་འདྲེ་བྱེད། །དེ་ལ་གླུད་དང་ཡས་འབུལ་ལོ། །སོ་དོག་རྨང་རས་དང་། །སྤྲེའུ་དང་བྱ་མ་བྱིའུ། །རྨེ་ཤིང་སྐྱེར་པ་དང་། །ཁྲ་དང་བ་གྷར་དང་། །རུལ་ཕོའི་ཐོད་པ་དང་། །ཁྱི་ཐོད་ཕག་ཐོད་དང་། །ར་ཡི་སླ་གཞི་དང་། ཆག་དགུ་ཞིག་བཅུ་དང་། །གནམ་ལ་འཕུར་དགུ་དང་། །ས་ལ་འཛུལ་བའི་སྲོབ་རིས་དང་། །ཡས་སྟགས་སྣ་ཚོགས་ཀྱིས། །འདྲེ་གདོན་ཆུང་སྲི་སྤུན་དགུ་རྣམས་ལ། །འགྲོ་བའི་བརྔན་དུ་སྦྱིན། །བྱེ་བའི་རྫོང་བཏབ་བོ། །ཞེས་བརྗོད་ལ་རྡོ་རྗེ་རྒྱ་གྲམ་གྱིས་དོང་ཁ་བཅད། ཀྱཻ། རི་རབ་ཁྲི་འཕང་གཅིག་གི་ཞབས་སུ་མན་ཆད་གཞུང་ལྟར་གྱེར་རོ། །ཅ་ཏི་འདི་ཡིག་རྙིང་བཞི་ཙམ་བལྟས་པས་ཡིག་རྙིང་པ་གཅིག་དང་གཞན་
གསུམ་དང་བཞི་ཀ་མཐུན་པར་འདུག་པ་དེ་ལ་སོར་བཞག་བྱས། ཆུ་སྲིན་བཏུལ་བ་གོང་དུ་འདུག་ན་ཟུར་དུ་བླངས་གཞན་ཡི་གེ་མང་དུ་མཐོང་བ་ལ་བརྟེན་ནས་འཁྲུལ་པ་ཆེར་མི་འདུག་ཀྱང་། ལ་ལར་ཅུང་ཟད་འཁྲུལ་འདུག་པ་དེ་ཡིག་རྙིང་དག་པ་ལ་བརྟེན་ནས་ཁོ་བོས་བྲིས། དེ་ཡང་ཡི་གེ་འགྲིགས་རིམ་ལྟར་དུ་དབང་བསྐུར་ཡན་ཆེད་དུ་ལག་ལེན་མཁས་ཆོས་མ་བྱེད་པར་རིམ་བཞིན་འདོན་པར་བྱོས་ཤིག །དབང་བསྐུར་གྱི་གོང་དུ་མངའ་གསོལ་བརྟན་བཞུགས་དེ་སྦྱར་ན་འཐུས་སྙམ་མོ། །དེ་ནས་དབང་བསྐུར་སྨོན་ལམ་བཏབ་ཡོད་ལེགས་པར་སྙམ། དེ་སློབ་དཔོན་གྱི་ངག་ཁྲིད་དང་རང་གི་གོམས་འདྲིས་དང་། རིག་པའི་མདའ་ལ་བཏུན་པ་ཡིན་ནོ། །རང་གཞུང་གི་ས་བཅད་ལས། །དབང་བསྐུར་མངའ་གསོལ་སྨོན་ལམ་བཏབ། །ཅེས་གསུངས་པ་དང་ཆ་མཐུན་པར་ཡོད། དེ་ཡང་མི་ལེགས་སྙམ་ན་ལེགས་པར་རྟོགས་ན་རང་རང་གི་གང་དགའ་སྤྱོད་པར་གྱིས་ཤིག །སྔགས་ནག་ཕ་ཇོ་རྣམས་ཀྱི་སྤྱོད་ཡུལ་གྱིས། །ཁོ་བོ་རཱ་ག་ཨ་མྱས་བྲིས་པའོ། །འདི་བྲིས་དགེ་བས་དགྲ་གདོན་བགེགས་ཚོགས་ཀུན། །ཐར་མེད་བཙོན་རར་ཚུད་ནས་སྐྱེ་འགྲོ་ཀུན། །ཐམས་ཅད་བདེ་གར་སྤྱོད་པའི་བཀྲ་ཤིས་ཤོག །སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།