བསྟན་སྲུང་སྒེར་གྱི་ལྷ་དང་། མདོ་ཁམས་ཡུལ་ལྷའི་རྒྱུན་བསང་དང་། འབྲུ་རིགས་གཉན་པོའི་ལྷ་བསང་།
བསྟན་སྲུང་སྒེར་གྱི་ལྷ་དང་། མདོ་ཁམས་ཡུལ་ལྷའི་རྒྱུན་བསང་དང་། འབྲུ་རིགས་གཉན་པོའི་ལྷ་བསང་བཞུགས་སོ།།
ཀྱཻ། བསང་གི་རྒྱུད་བྱུང་གང་ནས་བྱུང་། །སྔོན་ཆེ་འདས་དུས་བསྐལ་པ་ལ། །རྒྱལ་པོ་ཆོས་ཀྱི་དབང་ཕྱུག་གིས། །བདེ་གཤེགས་ཆོས་ཀྱི་འོད་ཟེར་ནི། །འཁོར་དང་བཅས་པ་སྤྱན་དྲངས་ཏེ། །སིལ་སྙན་རོལ་མོའི་སྒྲ་ཕྱུང་ནས། །སྤོས་ཀྱི་རིལ་བུ་གཅིག་བསྲེགས་ནས། །བདེ་གཤེགས་འཁོར་དང་བཅས་པ་ཡིས། །འཛམ་གླིང་སྤོས་ཀྱི་སྤྲིན་ཕུང་གིས། །ཞག་བདུན་བར་དུ་ཁེབས་པར་གྱུར། །རྒྱལ་པོ་བསོད་ནམས་ཚོགས་ཆེན་རྫོགས། །དེ་ནས་བསང་བྱུང་གང་ནས་བྱུང་། །སློབ་དཔོན་འཕགས་པ་ཀླུ་སྒྲུབ་ཀྱིས། །འཛམ་གླིང་སྤྱི་བསང་བསྡུས་
པ་བརྩམས། །རྡོ་རྗེ་གདན་ལ་སོགས་པ་ཡི། །གཙུག་ལག་བརྒྱ་དང་རྩ་བརྒྱད་འགྲུབ། །དེ་ནས་ནག་པོ་རྒྱ་ཡི་ཡུལ། །བློན་པོ་མགར་གྱིས་བསང་མཆོད་བརྩམས། །རྒྱ་ནག་ས་བདག་དཀོར་བདག་མཉེས། །ཇོ་མོ་རྒྱ་བཟའ་བོད་དུ་ལོན། །དེ་ནས་སྐུ་རྒྱལ་བོད་ཀྱི་ཡུལ། །སློབ་དཔོན་པདྨ་འབྱུང་གནས་ཀྱིས། །ཞི་བརྔན་བསང་གསུམ་ཆོ་ག་མཛད། །དཔལ་གྱི་བསམ་ཡས་གཙོར་བྱས་པའི། །གཙུག་ལག་ཁང་ཆེན་བརྒྱ་རྩ་འགྲུབ། །དེ་ནས་རང་བྱུང་རྒྱལ་བ་ཡིས། །འཛམ་གླིང་སྤྱི་བསང་རྒྱས་པ་བརྩམས། །སོག་གི་ཚུ་ལ་ལྕགས་ཟམ་
བཙུགས། །དགེ་བསྙེན་ཆེན་པོ་དམ་ལ་ཐོག །སྔོན་བྱུང་སྲིད་པ་དེ་བཞིན་དུ། །ད་ལྟ་བདག་ཅག་འཁོར་བཅས་ཀྱིས། །བཟང་ཤིང་སྣ་ཚོགས་དུད་པ་དང་། །སྣ་ཚོགས་ཟས་སྐོམ་ཕུད་རྣམས་བསྲེགས། །རཾ་ཡཾ་ཁཾ་གིས་མི་གཙང་སྦྱངས། །དྷཾ་ལས་ དུ་བའི་ལྷ་མོ་སྔོ། །ཕྱག་གཡས་ཁྲུས་བུམ་ཉམས་གྲིབ་བཀྲུ། །གཡོན 
་པས་སྨན་གཞོང་སྤོས་སྤྲིན་སྤྲོ། །སྤོས་ཀྱི་འཁྲི་ཤིང་སྟོང་གསུམ་ཁྱབ། །དུད་པའི་ཆ་ཤས་རེ་རེ་ལ། །བཀྲ་ཤིས་རྫས་རྟགས་རིན་ཆེན་བདུན། །འདོད་ཡོན་སྣ་ཚོགས་ཆར་ལྟར་འབེབས། །བཛྲ་པུཉྫས་བྱིན་གྱིས་བརླབས། །འདི་འདྲའི་ཡ་མཚན་བསང་མཆོད་འདིས། །རྡོ་རྗེ་འཆང་ཆེན་ལ་སོགས་པའི། །ཕྱོགས་དུས་རྒྱལ་བ་སྲས་བཅས་བསང་། །དར་མ་དབང་ཕྱུག་ཏི་ཤི་སོགས། །འབམ་རོམ་བཀའ་བརྒྱུད་ཐམས་ཅད་བསང་། །ཏྲེ་ཧོ་ཆོས་ཀྱི་རྒྱལ་མཚན་སོགས། །ཡབ་མྱེས་བརྒྱུད་པའི་བླ་མ་བསང་། །བཅོམ་ལྡན་བདེ་མཆོག་ཡབ་ཡུམ་སོགས། །བཀའ་བབས་བརྒྱད་པའི་ཡི་དམ་བསང་། །བྱ་རོག་གདོང་ཅན་གཙོ་འཁོར་སོགས། །བཀའ་བབས་བརྒྱུད་པའི་ཆོས་སྐྱོང་བསང་། །དེ་རྣམས་བསང་བའི་བྱིན་རླབས་ཀྱིས། །ལུས་
ངག་ཡིད་གསུམ་བསྲུང་བ་དང་། །བླ་མེད་མཆོག་གི་དངོས་གྲུབ་སྩོལ། །ཀྱཻ། སུམ་ཅུ་རྩ་གསུམ་ལྷ་གནས་ནས། །ལྷ་ཆེན་ཚོགས་ཀྱི་བདག་པོ་ནི། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱིས་བསང་། །བདུད་རྩི་ཇ་ཆང་ཕུད་ཀྱིས་མཆོད། །སྐུ་ཡི་ཚོགས་བདག་དཀར་པོ་བསང་། །དགྲ་བགེགས་གནོད་པ་ཞི་བར་མཛོད། །གསུང་གི་ཚོགས་བདག་དམར་པོ་བསང་། །ཁམས་གསུམ་དབང་དུ་འདུ་བར་མཛོད། །ཐུགས་ཀྱི་ཚོགས་བདག་སྔོན་པོ་བསང་། །ཕ་རོལ་དམག་ཚོགས་གཡུལ་ངོ་ཟློག །ཡོན་ཏན་ཚོགས་བདག་སེར་པོ་བསང་། །ལོངས་སྤྱོད་མངའ་ཐང་རྒྱས་པར་མཛོད། །ཕྲིན་ལས་ཚོགས་བདག་མཐིང་ནག་བསང་། །གནོད་བྱེད་དགྲ་བགེགས་རྡུལ་དུ་རློགས། །ཡེ་ཤེས་ལས་ལ་གྲུབ་པ་ཡི། །ཚོགས་བདག་གླང་སྣ་སྤེལ་ཐོད་ལ། །བསང་དང་མཆོད་པ་རྒྱ་ཆེན་འབུལ། །རིགས་ཀྱི་བུ་ལ་རྒྱུད་ཀྱི་ལྷ། འཁོར་བ་སྲིད་པའི་ལུགས་ཡིན་པས། །ལུས་མེད་རྡོ་རྗེའི་བཀའ་བཞིན་དུ། །ལྷ་དང་མི་རུ་མི་འབྲལ་བར། །རྟག་ཏུ་སྲུང་སྐྱོབ་སྡོང་གྲོགས་མཛོད། །བཅོལ་བའི་ཕྲིན་ལས་མ་
གཡེལ་ཅིག །ཀྱཻ། མི་མཆོག་རྒྱལ་བུ་མཐིང་གེ་དང་། །འཇོང་ལ་འཕྲུལ་ལ་སོགས་པ་ཡི། །དབུ་ནག་བོད་ཀྱི་ཕ་མཚུན་བསང་། །འགྲུ་རྗེ་རྒྱལ་བ་ཐོད་དཀར་སོགས། །རྭ་ཅོ་ཅན་ལ་བཅོ་བརྒྱད་ནས། །ཡབ་དང་ཁུ་བོ་ཡན་ཆོད་ཀྱི། །འབྲུ་རིགས་ཕ་མཚུན་གཉན་པོ་རྣམས། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱིས་བསང་། །ཇ་ཆང་ཟས་སྣའི་ཕུད་ཀྱིས་མཆོད། །དགྲ་དང་བུ་སྲིང་ཤག་རོགས་ཀྱི། །ཡུལ་དུ་མ་འབྲོས་མ་འཁྱམས་པར། །བུ་དང་ཚ་བོའི་ཁ་འཛིན་མཛོད། །མི་འཕེན་རྟ་ཧྲག་དངོས་གྲུབ་སྩོལ། །ཕ་མཚུན་མི་ལ་མ་འཁོང་བར། །བཅོལ་བའི་ཕྲིན་ལས་འགྲུབ་པར་མཛོད། །ཀྱཻ། ཨ་ལྕགས་འབྲུ་ཡི་དགྲ་ལྷ་ནི། །འགྲུ་མོ་ཁྲོ་ཁྲོ་ཞེས་སུ་གྲགས། །བྱ་ཁྲ་གནམ་ལྕགས་མཆུ་སྡེར་ཅན།། །གོང་ཁ་འགྲིམ་ཞིང་དགྲ་ལྷ་ཉུལ། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱིས་བསང་། །ཇ་ཆང་ཟས་སྐོམ་ཕུད་ཀྱིས་མཆོད། །འགྲུ་དར་རྒྱས་ཅན་གྱི་དགྲ་ལྷ་ཁྱོད། །དགྲ་བླ་མི་དང་མ་འབྲལ་བར། །གཉེན་རྒན་དྷེ་ཝའི་བཀའ་བཞིན་ཏུ། །འབྲུ་རིགས་དབོན་སྲས་ཁ་
འཛིན་དང་། །དཔའ་གཡེར་ཐོབ་པའི་ཁ་འཛིན་མཛོད། །ཀྱཻ། མདོ་ཁམས་ཟལ་མོ་སྒང་གི་ཡུལ། །ཟངས་རི་འབར་བ་རྩེ་དགུ་ནས། །སྲིད་པའི་བཙན་རིགས་ཡོངས་ཀྱི་རྗེ། །སྐུ་རྒྱལ་ཤེ་ནེ་འཁོར་དང་བཅས། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱིས་མཆོད། །ཇ་ཆང་ཟས་སྣའི་ཕུད་ཀྱིས་zམཆོད། །ཕྱི་ལྟར་ཡམ་ཤུད་བཙན་གྱི་རྗེ། །ནང་ལྟར་རྣམ་སྲས་ནོར་གྱི་ལྷ། །གསང་བ་གཟའ་རྒོད་མིག་དམར་རྗེ། །ཤན་པ་དམར་ནག་གཏེར་སྲུང་མཆོག །བཙན་གྱི་མགོན་པོ་བེག་རྩེ་ཅན། །བཙན་གདོང་དམར་པོ་དྲེགས་པའི་གཙོ། །བཙན་མགོན་བྱ་རོག་གདོང་ཅན་ཏེ། །སྐྱེས་བུ་དབང་གི་མདོག་ཁ་ཅན། །ཡུམ་ནི་སྲིན་མོ་གདོང་དམར་མ། །བཙན་ལ་རོལ་པའི་སྨན་གཅིག་མ། །ཡབ་ཡུམ་འཁོར་དང་བཅས་པ་ལ། །བསང་དང་མཆོད་པ་རྒྱ་ཆེན་འབུལ། །བདག་ཅག་ཡོན་མཆོད་འཁོར་བཅས་ལ། །རྨ་གཡང་ནམ་མཁའི་ཆར་བཞིན་ཕོབ། །སྲུང་སྐྱོབ་ཁ་འཛིན་སྡོང་གྲོགས་མཛོད། །འཛད་མེད་གཏེར་གྱི་དངོས་གྲུབ་སྩོལ། །ཕ་རོལ་དགྲ་དཔུང་རྡུལ་དུ་རློགས། །པདྨའི་བཀའ་
བཞིན་ཕྲིན་ལས་མཛོད། །ཀྱཻ། ཤར་ཕྱོགས་གངས་རི་རྩེ་རྒྱལ་ན། །འོད་ཀྱི་གུར་ཁྱིམ་འཇའ་ཚོན་ནང་། །རིན་ཆེན་སྣ་ལྔའི་ཁྲི་སྟེང་ན། །སྐུ་རྒྱལ་ཕུ་བོ་ཆེ་བ་སྟེ། །རྨ་རྒྱལ་སྤོམ་ར་ཡུལ་ལྷའི་གཙོ། །ཐུགས་ཀར་ནོར་བུ་འོད་ཟེར་འབར། །ཡ་མཚན་དུང་མི་དུང་རྟ་ཆིབས། །དུང་རྨོག་དུང་ཁྲབ་ལྡེམ་ཕོ་ཅན། །ཕྱག་ན་མདུང་དར་ནོར་བུ་བསྣམས། །རྨ་རིགས་སུམ་བརྒྱ་དྲུག་ཅུ་དང་། །སྲིང་ལྕམ་བཞི་བཅུ་རྩ་ལྔ་དང་། །རྨ་སྨན་འབུམ་དང་བཅས་པ་རྣམས། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་བསང་། །ཇ་ཆང་ཟས་སྐོམ་ཕུད་ཀྱིས་མཆོད། །བདག་ཅག་ཡོན་མཆོད་འཁོར་བཅས་ལ། །རྨ་གཡང་ནམ་མཁའི་ཆར་བཞིན་ཕོབ། །རིགས་རྒྱུད་བཙན་དར་ཆེ་བ་དང། །དཔུང་ཆེན་དངོས་གྲུབ་བདག་ལ་སྩོལ། །ཀྱཻ། གཟེ་རྒྱལ་གངས་རི་རྩེ་གསུམ་ནས། །སྐུ་རྒྱལ་ནུ་བོ་ཆུང་བ་སྟེ། །སྨོན་སྐྱེས་གངས་ཞུར་མཆེད་གསུམ་པོ། །ཆེ་བ་ཀླུ་རྗེ་འོད་འབར་དང་། །འབྲིང་བ་གནམ་ལྷ་བྱང་ཆུབ་དང་། །ཆུང་བ་རྡོ་རྗེ་དཔལ་བརྩེགས་དང་། །སྲིང་མོ་ལྷ་ལྕམ་གློག་མ་འཕྲུལ། །ཤར་གྱི་དབྱི་རྒྱལ་ར་རོག་དང་། །ལྷོ་
ཡི་སྤེན་ནེ་རི་བཀྲ་དང་། །ནུབ་ཀྱི་སྐུ་རྒྱལ་མོ་ནོམ་དང་། །བྱང་གི་ལྕི་རྒྱལ་ནེ་བྲོ་དང་། །ཀླུ་རྒྱལ་དྲག་པོ་བདུད་འདུལ་དང་། །རྐྱང་གི་བཙན་རྒོད་དམར་པོ་དང། །གཡུ་མཚོ་ཆེ་ཆུང་བུད་མེད་གཉིས། །སྣ་ཁྲིད་འཁྱིལ་པ་སྤུན་བདུན་དང་། །ཕོ་ཉ་དགུ་ཁྲི་ཕག་སྟག་དང་། །བཙན་རྒོད་ཧལ་པ་རྟ་མགོ་དང་། །རི་རྒོད་དབྲག་ནག་སོ་ཕྱིར་དང་། །ལྕམ་གཅིག་ར་དུག་མཚོ་སྨན་དང་། །ཇོ་བོ་ངང་མཛངས་མཚེར་མགོ་དང་། །ཕྱག་ཚང་མོན་པ་ནག་པོ་དང་། །ཁྱུང་སེང་སྟག་སྤྱང་ལྷ་གཡག་འབུམ། །དཀར་ཕྱོགས་ལྷ་དམག་འབུམ་དང་བཅས། །ཕོ་ཉ་བྱེ་བ་འབུམ་ཕྲག་རྣམས། །འཁོར་བཅས་འདིར་གཤེགས་བསང་མཆོད་བཞེས། །གཡུ་ཤུག་ཕྱེ་མར་དུད་པས་བསང་། །ཇ་ཆང་ཟས་སྐོམ་ཕུད་ཀྱིས་མཆོད། །བདག་ཅག་ཡོན་མཆོད་འཁོར་བཅས་ལ། །ཚེ་རིང་བཀྲ་ཤིས་སྙན་གྲགས་རྒྱས། །བཙན་ཞིང་འཕེལ་ཁ་ཆེ་བར་མཛོད། །ཀྱཻ། ལྕི་སྟོད་གསང་གི་ལུང་སྐེད་ནས། །རི་དབང་ཇོ་བོ་སྐྱེད་རྒྱལ་ནི། །བཙན་ལ་འོད་འབར་ཞེས་སུ་གྲགས། །མི་དཀར་རྟ་དཀར་འཕུར་ཤེས་ཆིབས། །ཤེལ་ཁྲབ་ཤེལ་རྨོག་སྐུ་ལ་གསོལ། །
སྟག་རལ་གཟིག་ཤུབས་སྐྱེད་ལ་བསྐོར། །ཕྱག་གཡས་གནམ་ལྕགས་རལ་གྲི་ཕྱར། །གཡོན་པས་མདུང་དར་དཀར་པོ་འཛིན། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་བསང་། །ཇ་ཆང་ཟས་སྐོམ་ཕུད་ཀྱིས་མཆོད། །བདག་ཅག་ཡོན་མཆོད་འཁོར་བཅས་ལ། །ནད་རིགས་ཐམས་ཅད་ཞི་བ་དང་། །སྐུ་ཚེ་འཕེལ་ཞིང་རྒྱས་པ་དང་། །སྣང་སྲིད་དབང་དུ་འདུ་བ་དང་། །གནོད་བྱེད་དགྲ་བགེགས་ཚར་གཅོད་མཛོད། །ཀྱཻ། །གསང་སྨད་ཟངས་བྲག་བརྩེགས་པ་ནས། །ལྷ་བཙན་གསང་རྒྱལ་རྟ་བྲོ་ནི། །སྐུ་མདོག་དམར་པོ་དཔའ་བརྗིད་ཅན། །སྐུ་སྟོད་ལྷ་ཡི་ཆ་ལུགས་ལ། །སྟོད་གཡོགས་དཀར་པོ་ཕུ་དུང་ཅན། །གཡས་གཡོན་མདུང་དང་རུ་མཚོན་དཀར། །སྐུ་སྨད་བཙན་གཟུགས་ན་བཟའ་དམར། །རྫུ་འཕྲུལ་བཙན་རྟ་དམར་པོ་ཆིབས། །ལྷ་དང་ཀླུ་ཡི་བུ་མོ་གཉིས། །གཡས་གཡོན་ཆིབས་ཀྱི་ཡོབ་ཆེན་འཐེན། །བཙན་གྱི་བུ་མོ་བདུན་གྱིས་ནི། །རྒྱང་གླུ་ལེན་ཞིང་ཆིབས་ཁ་འཁྲིད། །གཉན་གྱི་བུ་མོ་ལྗང་མོ་བདུན། །གླུ་ལེན་བྲོ་བརྡུང་ཕྱི་ནས་འབྲངས། །སྔོན་ན་ཟངས་ཀྱི་འཕར་བ་རྒྱུག །བྱ་དམར་
ཀླད་ན་ཀྱི་ལི་ལི། །ཁྱི་དམར་ཕྱི་ན་བྲེངས་སེ་བྲེང་། །གསང་རྒྱལ་རྟ་བྲོ་འཁོར་དང་བཅས། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་བསང་། །ཇ་ཆང་ཟས་སྐོམ་ཕུད་ཀྱིས་མཆོད། །བདག་ཅག་ཡོན་མཆོད་འཁོར་བཅས་ལ། །ཁ་འཛིན་མཛོད་སྡོང་གྲོགས་མ་གཡེལ་ཅིག །ཀྱཻ། ལྕི་དང་དཔལ་གྱི་ཆུ་རྒྱུད་ནས། །དབང་བསྒྱུར་ཀླུ་ཡི་རྒྱལ་པོ་ནི། །སྨྱོ་ཁ་རྡོ་རྗེ་རྒྱལ་པོ་ཡི། །བཀའ་སྡོད་བར་བློན་ཆེན་པོ་ནི། །དགེ་བསྙེན་འབོ་རང་ཞེས་སུ་གྲགས། །རང་གཟུགས་མི་ནག་སྦྲུལ་ཞགས་ཅན། །ཕྱག་གཉིས་སྦྲུལ་ཞགས་ནད་རྐྱལ་འཛིན། །ཆིབས་སུ་སྦལ་པ་གྲོ་མོ་ཆིབས། །བདུད་ཀྱི་དེད་དཔོན་མཛད་ཙ་ན། །མི་ནག་རྟ་ནག་དར་ནག་ཕྱར། །ཀླུ་ཡི་དེད་དཔོན་མཛད་ཙ་ན། །བཙུན་གཟུགས་ཞྭ་སེར་རྟ་ནག་ཅན། །གཉན་གྱི་དད་དཔོན་མཛད་ཙ་ན། །ཉ་ཡི་མགོ་ཅན་ཉ་དཀར་ཆིབས། །ཡུམ་ནི་སེར་མོ་མཛེས་མའི་གཟུགས། །ནོར་བུ་བེ་ཅོན་པདྨ་འཛིན། །བློན་པོ་མི་དཀར་སྦལ་སྦྲུལ་འཛིན། །དཔྲལ་བར་ཟླ་བའི་གཟུགས་ཀྱིས་བརྒྱན། །མི་བརྫུ་དགུ་བརྫུ་སྟོབས་པོ་ཆེ། །
འབོ་རང་ཡབ་ཡུམ་བློན་འཁོར་བཅས། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་བསང་། །ཀླུ་སྨན་དཀར་གསུམ་མཆོད་པ་བཞེས། །ཐུགས་དང་འགལ་བ་མཐོལ་ལོ་བཤགས། །བདག་ཅག་ཡོན་མཆོད་འཁོར་བཅས་ལ། །གནོད་པའི་དགྲ་བགེགས་ཞི་བ་དང་། །དགྲ་བགེགས་དབང་སྡུད་ཟིལ་གནོན་སོགས། །དགྲ་ཡི་དགྲ་རྣམས་འཕེལ་བ་དང་། །གནོད་བྱེད་དགྲ་བོ་བརླག་པར་མཛོད། །ཀྱཻ། རྫ་ཡི་ཆུ་རྒྱུད་ཕལ་ཆེར་ན། །དབང་བྱེད་ན་བུན་དགེ་བསྙེན་ནི། །སྐུ་སྟོད་གཅེར་བུ་ལྷ་ཡི་ལུས། །སྦྲུལ་དཀར་གསུམ་གྱི་གདེངས་ཀ་ཅན། །སྐུ་སྨད་མི་ལུས་སྦྲུལ་ཤུན་དཀྲིས། །རྟ་དཀར་སྤྲུལ་གྱི་ལྟོ་བ་ཅན། །རྔ་མ་སྦྲུལ་ལས་བྱས་པ་ཆིབས། །ཕྱག་གཉིས་ལྕགས་ཀྱུ་སྦྲུལ་ཞགས་འཛིན། །མཆན་གཡོན་ཁཊཾ་དར་དཀར་ཕྱར། །འདིར་གཤེགས་བསང་དང་མཆོད་པ་དང་། །གཡུ་ཤུག་ཕྱེ་མར་གསུར་གྱི་བསང་། །ཀླུ་སྨན་དཀར་གསུམ་མཆོད་པ་འབུལ། །ཀླུ་ནད་ཐམས་ཅད་ཞི་བ་དང་། །བཀྲ་ཤིས་བདེ་ལེགས་རྒྱས་པར་མཛོད། །ཀྱཻ། ཤར་ལུང་སྟོན་རྒྱལ་དཀར་པོ་ནི། །མི་དཀར་དངུལ་ཁྲབ་དངུལ་
རྨོག་ཅན། །ཕྱག་ན་དར་མདུང་དཀར་པོ་འཛིན། །སྟག་རལ་གཟིག་ཤུབས་སྐྱེད་ལ་སྐོར། །ཡ་ཚ་སྐར་ཕྲན་གློག་ལྟར་འཁྱུག །ཆིབས་སུ་གྲ་བོ་གཡུ་རྔོག་ཆིབས། །དེ་སོགས་ཆབ་ཤར་གཞི་བདག་རྣམས། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་བསང་། །ཇ་ཆང་ཟས་སྐོམ་ཕུད་ཀྱིས་མཆོད། །ཁ་འཛིན་སྡོང་གྲོགས་མཐུན་རྐྱེན་སྒྲུབས། །ཀྱཻ། ཙཱ་རི་ཏྲ་ཡི་རྡོ་བའི་ཕུག །མཚོ་དཀར་དབུ་རུ་སྙིང་ཚལ་དང་། །ཤམ་པོའི་མགུལ་དང་དུར་ཁྲོད་གནས། །ཁ་རག་གངས་མདུན་ཚ་བ་སྒང་། །དབ་ལུང་མ་ཕམ་གཡུ་མཚོ་སོགས། །ཡུལ་གླིང་དགུ་ལ་དབང་བསྒྱུར་བའི། །སྤྱན་རས་གཟིགས་ཀྱི་ལྕམ་གཅིག་མ། །བོད་སྐྱོང་ལྷན་ཅིག་སྐྱེས་མ་སྟེ། །བརྟན་མའི་གཙོ་མོ་གཡུ་སྒྲོན་མ། །ཞི་མཛད་དཀར་མོ་འོད་ལྡན་མ། །དྲག་མོར་བཞེངས་ཚེ་སྤྱང་ཞོན་མ། །ཆོས་སྐྱོང་ལས་ཀྱི་རེ་མ་ཏི། །བོད་སྐྱོང་དགྲ་ལྷའི་རྒྱལ་མོར་གྲགས། །སྨན་རིགས་ཀུན་གྱི་གཙོ་མོ་ཁྱོད། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་བསང་། །འབྲུ་སྣ་ཟས་ཕུད་མཆོད་པ་
འབུལ། །འགལ་རྐྱེན་ཐམས་ཅད་ཞི་བ་དང་། །ཅི་བསམ་ཡིད་བཞིན་འགྲུབ་པར་མཛོད། །ཀྱཻ། རྟ་རྣ་ཡེལ་ཕུག་སྐུ་འབུམ་རྩར། །ཁྲོ་བོ་དབུ་དགུ་འབུམ་རྫོང་དང་། །ནམ་རྔུ་མི་གཡེལ་ལ་སོགས་པའི། །ཞིང་སྐྱོང་བཀའ་སྲུང་གནས་བདག་ཀུན། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་བསང་། །ཇ་ཆང་ཟས་སྣའི་ཕུད་ཀྱིས་མཆོད། །མི་ནད་ཕྱུགས་ནད་ཞི་བ་དང་། །སངས་རྒྱས་བསྟན་པ་དར་བར་མཛོད། །ཀྱཻ། གཞན་ཡང་མངའ་རིས་རྒྱལ་ཁམས་འདིར། །གནས་པའི་གཞི་བདག་གཉན་པོ་ནི། །སྨུག་པོ་ལྷ་རྩེ་བདུད་རྫོང་མཆེད། །རིང་མཚོ་མཆོག་སྦྱིན་སྡོམ་རྒྱལ་དང་། །སྐྱོ་ཁྱམས་དཀར་པོ་བཙུན་བློན་འབངས། །དཔའ་རྒྱལ་ཚ་ར་འཁོར་དང་བཅས། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་བསང་། །ཇ་ཆང་འོ་ཞོའི་ཕུད་ཀྱིས་མཆོད། །མི་ནད་ཕྱུགས་ནད་ཞི་བ་དང་། །ཁ་འཛིན་སྡོང་གྲོགས་མ་གཡེལ་སྒྲུབས། །ཡེ་རྒྱལ་རྨོག་དཀར་ཡབ་ཡུམ་མཆེད། །ཚ་རྒྱལ་ཐོག་རི་ཙུར་རྟག་རྩེ། །དཔའ་རྒྱལ་རིན་ཆེན་སྤུངས་པ་དང་། །སྤམ་རྒྱལ་སྤོམ་རྒྱལ་ངོམ་
རྒྱལ་དང་། །རྫ་རྒྱལ་འབྲི་བྱེད་གཉན་པོ་དང་། །གཏམ་རྒྱལ་ངང་པའི་སང་སིང་དང་། །ནེ་རུ་གཡུ་མཚོ་སྔོན་མོ་དང། །རྩུབ་ཀྱི་ཀླུ་སྨན་དཀར་མོ་དང་། །ཆམ་ཕུ་དུང་རྣ་སྤོ་ཉིན་རྔ། །རག་ལོ་ཁ་ཤྭ་ལ་སོགས་པའི། །ལྷ་ཀླུ་གནོད་སྦྱིན་དྲི་ཟ་དང་། །བདུད་བཙན་སྨན་དང་མ་སངས་རིགས། །བྲག་སྲིན་མཚུན་དང་དགྲ་ལྷའི་ཚོགས། །ས་བདག་གཉན་དང་ཐེའུ་རང་སོགས། །ཡིད་ཀྱི་གཟུགས་ཅན་ཐམས་ཅད་ཀུན། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་བསང་། །ཇ་ཆང་འོ་ཞོའི་ཕུད་ཀྱིས་མཆོད། །མི་ནད་ཕྱུགས་ནད་ཞི་བ་དང་། །ཅི་བསམ་དོན་རྣམས་འགྲུབ་པར་མཛོད། །ཀྱཻ། སྣང་སྲིད་ལྷ་འདྲེ་ཁྱེད་རྣམས་ལ། །བསང་དང་མཆོད་པ་འདི་ཕུལ་བས། །ཐམས་ཅད་མཉེས་ཤིང་ཚིམ་གྱུར་ཅིག །ན་བ་ཡོད་ན་སོས་གྱུར་ཅིག །རྒུད་པ་ཡོད་ན་དར་གྱུར་ཅིག །མཐུ་སྟོབས་གཟི་བརྗིད་ལྡན་གྱུར་ཅིག །བདག་ཅག་ཡོན་མཆོད་འཁོར་བཅས་ཀྱིས། །ཕ་མྱེས་རིང་ནས་ད་ལྟའི་བར། །ཐུགས་དང་འགལ་བ་གང་བྱུང་བཤགས། །ཕོག་ཐུག་འགྲམ་འཁྲུག་ཞི་གྱུར་ཅིག །ཁྱེད་ཅག་ཡུལ་
ཕྱོགས་འདིར་གནས་ལྷ། བདག་ཅག་ཡུལ་འདིར་གནས་པའི་མི། །མིས་ཀྱང་ལྷ་ལ་དུས་སུ་མཆོད། །ལྷས་ཀྱང་མི་ལ་ཁ་འཛིན་མཛོད། །མངའ་རིས་ཡངས་པའི་རྒྱལ་ཁམས་འདིར། །བཙའ་སད་སེར་བ་མ་གཏོང་ཞིག །མི་ནད་ཕྱུགས་ནད་ཐམས་ཅད་ཟློག །ཕ་རོལ་དགྲ་ཇག་གནོད་པ་ཟློག །ཕྱི་ནང་འཁྲུག་རྩོད་མེད་པར་མཛོད། །སངས་རྒྱས་བསྟན་པ་དར་བ་དང་། །བསྟན་འཛིན་དབུ་འཕང་མཐོ་བ་དང་། །ལོ་ལེགས་རྐང་བཞི་འཕེལ་རྒྱས་མཛོད། །ཁྱད་པར་བདག་ཅག་ཡོན་མཆོད་རྣམས། །ནད་མེད་ཚེ་རིང་མངའ་ཐང་འཕེལ། །ཆོས་མཐུན་བསམ་པ་འགྲུབ་པར་མཛོད། །དམག་ལ་འགྲོ་ན་དཔུང་རོགས་དང་། །ཇག་ལ་འགྲོ་ན་ཇག་དཔོན་མཛོད། །བུ་རྟ་འཚོས་ལ་སྡང་དགྲ་ཐུལ། །དགྲ་ནོར་སྣ་དགུ་གནང་དུ་ལོངས། །མགྲོན་ལ་འགྲོ་ན་མགྲོན་དཔོན་དང་། །ཚོང་ལ་འགྲོ་ན་ཚོང་དཔོན་མཛོད། །ལམ་དགྲ་ཟློག་ལ་རྒྱལ་ཁ་ཟུངས། །ལ་ཆུ་འཕྲང་གསུམ་འཇིགས་ལས་སྐྱོབས། །གཞི་བྱེས་ཀུན་ཏུ་བཀྲ་ཤིས་མཛོད། །ཁྱད་པར་སྤྱན་སྤྲུལ་སར་གནས་པའི། །སེམས་དཔའ་མི་ཡི་དབང་པོ་ནི། །སྲས་དང་བཙུན་མོ་འཁོར་བཅས་དང་། །
ཁྱད་པར་བདག་ཅག་བསྲུང་བྱར་བཅས། །ཁ་འཛིན་སྡོང་གྲོགས་མ་གཡེལ་བར། །བསྙུང་མེད་སྐུ་ཚེ་བརྟན་པ་དང་། །ཆོས་སྲིད་བརྟན་པ་རབ་འཕེལ་ནས། །ཆུ་དྲུག་གདོང་ལྷ་མ་ལུས་པ། །རང་དབང་མེད་པར་དབང་བསྡུས་ཏེ། །རྒྱལ་བསྟན་ཤཱཀྱ་ཐུབ་པ་དང་། །པད་འབྱུང་བསྟན་པའི་སྙིང་པོ་ནི། །ཡུན་རིང་དར་ཞིང་རྒྱས་པར་མཛོད། །སློབ་དཔོན་པདྨ་འབྱུང་གནས་ཀྱིས། །ཇི་ལྟར་བཀའ་བསྒོའི་དམ་བཅས་རྣམས། །དུས་འདིར་མ་བསྙེལ་དྲན་མཛོད་ལ། །མ་ཐོགས་བཅོལ་བའི་ལས་འདི་བསྒྲུབ། །འཇིག་རྟེན་མཐུ་ཆེན་ཁྱེད་རྣམས་ལ། །མཐུ་རྩལ་ཅི་འདུག་ད་ལྟའོ། །རྟགས་དང་མཚན་མ་དངོས་སུ་སྟོན། །མཐུ་རྩལ་སྐྱེད་ལ་སྐུ་ཤུགས་ཕྱུངས། །གལ་ཏེ་ལས་འདི་མ་བསྒྲུབ་ན། །ཁྱེད་རྣམས་མཐུ་རྩལ་མི་བདེན་ཞེས། །འཇིག་རྟེན་ཀུན་གྱིས་ཕྱ་ཁ་གཏོང་། །དེ་བས་སྨྲ་བབ་ཅང་ཡོད་དམ། །ཨོ་རྒྱན་ཆེན་པོའི་དམ་ལ་བཏགས། །དམ་འགལ་གནམ་ལྕགས་སྡིག་པ་ཡིས། །སྙིང་ཁྲག་འཇིབས་ནས་དམྱལ་བར་ལྟུང་། །གལ་ཏེ་ལས་འདི་མྱུར་བསྒྲུབ་ནི། །གཏང་རག་མཆོད་པ་ཡང་ཡང་འབུལ། །འཇིག་རྟེན་
ཀུན་གྱིས་ཁྱེད་ཅག་བསྟོད། །པདྨའི་དམ་ཚིག་ལེགས་བསྲུང་མཐུས། །ཁྱེད་ཅག་ཚེ་རིང་གཟི་བརྗིད་འཕེལ། །མ་འོངས་བླ་མེད་བྱང་ཆུབ་ཐོབ། །དེ་ལྟར་སྐྱོན་ཡོན་ཤེས་མཛོད་ལ། །བདག་ཅག་ཡོན་མཆོད་ཁ་འཛིན་མཛོད། །རྐང་བཞི་ཕྱུགས་དང་བང་མཛོད་འབྲུ། །རྨ་གཡང་དངོས་གྲུབ་ཐམས་ཅད་ཀུན། །ཁུ་ཡེ་ཕྱྭ་དང་གཡང་དུ་ལེན། །ཕུན་སུམ་ཚོགས་པའི་བཀྲ་ཤིས་ཤོག །ཅེས་མི་དབང་རིན་ཆེན་རྣམ་རྒྱལ་གྱིས་བསྐུལ་བ་ལྟར། རིག་སྔགས་འཆང་བའི་རྣལ་འབྱོར་པ་རཱ་ག་ཨ་སྱས་ལྕི་སྟོད་ལྷ་ཡི་ལུང་པར་བྲིས་པ་བཀྲ་ཤིས་པར་གྱུར་ཅིག །དགེའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།