ས་བདག་སྟོང་གསུམ་འཁྲུགས་པ་ཡོ་བཅོས་སྣང་སྲིད་འཁྲུགས་པ་སྤྱི་བཅོས་དོན་བསྡུས་པ།
ས་བདག་སྟོང་གསུམ་འཁྲུགས་པ་ཡོ་བཅོས་སྣང་སྲིད་འཁྲུགས་པ་སྤྱི་བཅོས་དོན་བསྡུས་པ་མཁས་གྲུབ་རཱ་ག་ཨ་སྱས་བཞག་པ་མ་ཧཱ་བ་ལའོ།།
འཕགས་པ་འཇམ་པའི་དབྱངས་དང་ཀོང་རྩེ་བྱང་ཆུབ་སེམས་དཔའ་ལ་ཕྱག་འཚལ་ལོ། །འགྲོ་བ་རྣམས་ལ་ཕན་གདགས་ཕྱིར། །གཙུག་ལག་འབྱུང་བའི་ཆོ་ག་ལས། །ཉེ་བར་མཁོ་བ་འདི་ཁོ་ནའོ། །དེ་ཡང་དགོས་ཆེད་ནི་སྣང་སྲིད་སྤྱི་བཅོས་ལས་བཤད་པ་ནི་འདིར་མ་བཤད་དོ། །བཀྲ་ཤིས་པ་ལ་མཎྜལ་གྲུ་བཞི་པ། སྤང་ལེབ་ཤིང་ལ་ཞ་ལ་བྱས་པའི་སྟེང་། །སྤོས་དང་ཀླུ་སྨན་འོ་ཆབ་ཆག་ཆག་གདབ། ཀྱཻ། བདུད་རྩི་སྨན་དང་དྲི་ཞིམ་སྤོས། །ཤིང་མངར་ཀ་ར་བུ་རམ་དང་། །གསེར་དངུལ་རིན་ཆེན་མེ་ཏོག་དང་། །ས་བདག་ཀླུ་གཉན་བཅོས་པའི་ཕྱིར། །གཞལ་ཡས་དཀྱིལ་འཁོར་དམ་པ་འདིར། །འོ་མ་སྨན་གྱིས་ཆག་ཆག་
གདབ། །ཐིག་རྐྱལ་དུ་ཚོན་དཀར་དམར་བསྲེས་ལ། ཀྱཻ། ཤར་ཕྱོགས་ཤིང་ཁམས་རྒྱལ་པོའི་གནས། །ཐིག་ཆ་དཀར་པོས་ཐིག་གདབ་བོ། །ལྷོ་ཕྱོགས་མེ་ཁམས་རྒྱལ་པོའི་གནས། །ཐིག་ཆ་སྔོན་པོས་ཐིག་གདབ་བོ། །ནུབ་ཕྱོགས་ལྕགས་ཁམས་རྒྱལ་པོའི་གནས། །ཐིག་ཆ་དམར་པོས་ཐིག་གདབ་བོ། །བྱང་ཕྱོགས་ཆུ་ཁམས་རྒྱལ་པོའི་གནས། །ཐིག་ཆ་ལྗང་གུས་ཐིག་གདབ་བོ། །དབུས་ཕྱོགས་ས་ཁམས་རྒྱལ་པོའི་གནས། །ཐིག་ཆ་ནག་པོས་ཐིག་གདབ་བོ། །ལྷ་ཀླུ་གཉན་དང་ས་བདག་གཏོད། །གཟའ་དང་རྒྱུ་སྐར་ལ་སོགས་ཀྱི། །གནས་དང་
ཡུལ་དུ་ཐིག་གདབ་བོ། །རྒྱལ་ཆེན་བཞི་དང་ཕྱོགས་སྐྱོང་བཅུ། །ལྷ་སྲིན་སྡེ་བརྒྱད་ཐམས་ཅད་ཀྱི། །ཐིག་ཆ་སྣ་ཚོགས་ཐིག་གདབ་བོ། །གནས་དང་ཡུལ་དུ་ཐིག་གདབ་བོ། ཞེས་ཀྱ་ཀྱོག་མེད་པར་གདབ་བོ། །ད་ནི་ཡང་དག་བཤད་བྱ་བ། །འབྲུ་སྣའི་ཕྱེའམ་ས་ཁམས་ལ། །རིན་ཆེན་བརྡར་བ་གང་རུང་ལ། །དབུས་སུ་ལེའུ་ཚེ་ཟླུམ་སྐོར་ལ། །དེ་དབུས་མཚོ་རིས་བྱ་བའི་སྟེང་། །རུས་སྦལ་གན་རྐྱལ་མགོ་ལྷོར་བསྟན། །དེ་སྟེང་རི་རབ་བང་རིམ་བཞི། །སྟེང་དུ་གཙོ་བོའི་འདྲ་འབག་ནི། །ས་བདག་སྟོང་ཁྱབ་ཆེན་པོ་ནི། །གསེར་མདོག་མི་གདོང་རྩ་བའི་ཞལ། །གཡས་ཞལ་སྟག་ལ་དབུ་རྒྱན་སྦྲུལ། །གཡོན་ཞལ་ཕག་ལ་དབུ་རྒྱན་བྱ། །ལྗང་དམར་ནག་པོ་དཀར་པོ་བྱ། །སྦྲུལ་མགོ་བཅུ་དྲུག་གདེངས་ཀ་ལ། །རིན་པོ་ཆེ་ཡི་ཕྲོག་ཞུ་ཡོད། །ཕྱག་བཞི་དང་པོ་ཐལ་མོ་སྦྱར། །གཡས་འོག་འཁོར་ལོ་རྩིབས་བརྒྱད་ཕྱར། །གཡོན་འོག་རི་རབ་ཐུགས་ཀར་གནས། །སྦྲུལ་མཇུག་སེར་པོ་རུས་སྦལ་གདན། །གཡས་སུ་ཐེ་སེ་བྱ་མགོ་དཀར། །གཡོན་དེར་ཙང་ཀུན་སྤྲེའུ་མགོ་དམར། །མདུན་དུ་ས་ལྷ་བུམ་པ་སེར། །རྒྱབ་ཏུ་ཤྲཱི་བྷ་དྲ་ཀླུ་གཟུགས་སེར། །ཤར་ལྷོར་ས་འཛིན་ལག་པ་སེར། །ལྷོ་ནུབ་སྲིད་པ་ཕྱག་བརྙན་དཀར། །ནུབ་བྱང་ཧོང་ཕན་ཆུ་སྲིན་མཐིང་། །བྱང་ཤར་འཇིགས་བྱེད་དྲེད་ཀྱི་མགོ །དུད་མདོག་རུས་སྦལ་གདན་ལའོ། །དེ་རྒྱབ་མུ་ཁྱུད་ལིང་ཚེ་བརྒྱད། །ཤིང་ཁམས་རྒྱལ་པོ་ལྗང་གུ་ཤར། །མེ་ཁམས་དམར་ལ་ལྕགས་
ཁམས་དཀར། །ཆུ་ཁམས་ནག་པོ་ས་ཁམས་སེར། །སྐུ་མདོག་ཕྱག་མཚན་སྐུ་བསྟོད་ལྟར། །ཕྱོགས་མཚམས་བརྒྱད་དུ་དགོད་པར་བྱ། །དེ་རྒྱབ་ལིང་ཚེ་བརྒྱད་པོ་ལ། །ཤིང་སོགས་འབྱུང་བའི་ལྷ་མོ་དགོད། །རི་དབང་རླུང་ས་གནམ་དབང་རྣམས། །རང་རང་གནས་སུ་བཀོད་པའོ། །དེ་རྒྱབ་འབྱུང་ལྔའི་མདོག་ཆ་བརྒྱད། །སྤར་བརྒྱད་ཕྱོགས་མཚམས་བརྒྱད་དུ་བཀོད། །གཡས་སུ་སྨེ་བ་གཡོན་དུ་ནོར། །མདུན་དུ་ལོ་སྐོར་རང་རང་མདོག །མཚམས་སུ་སྒོ་བཞི་སྲུང་བཞི་ནི། །སྟག་དང་གཡག་ལུག་བྱ་རུས་སྦལ། །མི་ལུས་བྱ་གཤོག་སྦྲུལ་མཇུག་གོ །དེ་རྒྱབ་པད་དཀར་ལྷ་བརྒྱད་དང་། །དེ་རྒྱབ་པད་སྔོན་ཀླུ་བརྒྱད་དོ། །དེ་རྒྱབ་པད་སེར་གཉན་ཆེན་བརྒྱད། །དེ་རྒྱབ་པད་༈ དམར་བརྒྱད་ལ་གཟའ་ཆེན་བརྒྱད། །དེ་རྒྱབ་སྣ་ཚོགས་པདྨ་སུམ་ཅུ་ལྔ། །རྒྱུ་སྐར་ཉེར་བརྒྱད་གནམ་ཁྱི་བཅས་པ་བཀོད། །དེ་རྒྱབ་ལིང་ཚེ་བཅུ་ལ་ཕྱོགས་སྐྱོང་བཅུ། །དེ་རྒྱབ་གྲུ་བཞི་སྒོ་བཞི་རྟ་བབས་རྫོགས། །རྒྱལ་ཆེན་སྡེ་བཞི་སྒོ་སྲུང་ཚུལ་དུ་བཀོད། །མཚམས་སུ་གཏོད་དང་སྡེ་བརྒྱད་བཤོས་བུ་བཀོད། །གཏོར་མ་ལྷ་བཤོས་བརྒྱད་དང་དཀར་གཏོར་བརྒྱད། །རིལ་བུ་བརྒྱད་དང་པད་སྡོང་འབྲང་རྒྱས་བརྒྱད། །གཏོར་མ་ཟུར་གསུམ་མཁར་ཐབས་ཞལ་དཀར་ཆངས་བུ་བརྒྱད། །ཕོཏང་མོ་ཏང་ཟུར་གསུམ་ཏིང་ལོ་བརྒྱད། །མཐའ་ལ་བྱ་གཅན་རི་དྭགས་གཡུང་ཆུ་གནས། །གོ་ཆ་མཚོན་ཆ་ཕོ་ཆས་མོ་ཆས་དགོད། །དེ་རྒྱབ་ཐང་ཤིང་ཤུག་པ་གསེར་ཤིང་དང་། །ལྕང་མ་ཤུག་པ་འོམ་བུ་སིལ་ཤིང་
དང་། །སྟག་པ་བརྒྱད་ནི་ཆ་བརྒྱད་བཙུགས་པར་བྱ། །དབྱར་པ་ཉ་བྲིད་སྤེན་མ་ཚར་བུ་དང་། །གང་འཛོམ་བལ་དང་དར་གྱིས་བརྒྱན་པ་བཙུགས། །ཕྱོགས་བཞི་མདའ་དར་བཞི་དང་པན་རྒྱལ་མཚན། །མེ་ལོང་དྲི་དང་ཤོག་པན་ཡོལ་བ་བཤམས། །རྩེ་ལ་སྣང་སྲིད་གཟུགས་ཀྱི་ཙཀླུ་བཙུགས། །འདི་ཙམ་རག་བསྡུས་ས་བདག་མཆོད་པ་ཚང་། །གླུད་ནི་མི་གཟུགས་མི་ཀླུད་ནོར་གླུད་བླུགས། །ཚྭ་སྒོག་གཡེར་མ་ལ་སོགས་ཡས་བསག་གོ །དེ་སྟེང་གདན་ཁྲི་བཅའ་སྟེང་བུམ་པ་དགོད། །བྱང་ཤར་མཚམས་སུ་ལས་བུམ་བཀོད་བྱས་ཏེ། །མདུན་དུ་སྟེགས་སམ་སྣམ་ཤར་གཙང་མའི་སྟེང་། །ཕྱེ་མར་འབྲུ་སྣ་མན་དང་འོ་མ་ཇ། །སྦྱང་བུར་ཆུ་བསྲེས་ཞོ་དང་རྒུན་འབྲུམ་དང་། །གྲོ་མ་མོན་བུ་ཆུར་བ་ཁུར་བ་དང་། །ཤིང་ཐོག་རྩི་ཐོག་ཡོས་ཁྲ་གསེར་སྐྱེམས་བཤམས། །དེས་ནི་མཆོད་བཤམས་རིམ་པ་མདོར་བསྡུས་སོ། །དེ་ནས་ཤིང་རྩིའི་ལོ་རྒྱུས་ཟུར་ཙམ་སྨྲ། ཀྱཻ། དེ་རིང་སྲིད་པའི་གནམ་གང་ལ། །ས་བདག་ཀླུ་གཉན་ཁྱེད་རྣམས་ལ། །ཤིང་རྩི་རྒྱན་ཆེན་འདི་འབུལ་བའི། །ཕོ་བྲང་དཀྱིལ་འཁོར་འདི་ལ་བཞུགས་སུ་གསོལ། །ཤིང་རྩི་སྣ་དགུ་འདི་ལ་བརྟན་པར་བཞུགས། །ཙནྡན་ཕོ་ལྷའི་བླ་ཤིང་དང་། །སུར་དཀར་མཚུན་གྱི་བླ་ཤིང་དང་། །སྤེན་མ་ཀླུ་ཡི་བླ་ཤིང་ཡིན། །སྐུ་ཤིང་འདི་ལ་བརྟན་པར་བཞུགས། །སྦ་དཀར་ལྷ་ཡི་བླ་ཤིང་དང་། །སྟག་པ་
གཉན་གྱི་བླ་ཤིང་དང། །དབྱར་པ་ས་བདག་བླ་ཤིང་ཡིན། །སྐུ་ཤིང་འདི་ལ་བརྟན་པར་བཞུགས། །ཚར་བུ་གཏོད་ཀྱི་བླ་ཤིང་དང་། །འོམ་བུ་ཀླུ་ཡི་བླ་ཤིང་དང་། །འབོ་དཀར་མི་ཡི་བླ་ཤིང་ཡིན། །སྐུ་ཤིང་འདི་ལ་བརྟན་པར་བཞུགས། །ཉ་བྲིད་ཡུལ་སའི་བླ་ཤིང་དང་། །ལྕང་མ་འདྲེ་གདོན་ཐུབ་པའི་བླ་ཤིང་དང་། །ཚེར་ཉ་མོ་སྨན་བླ་ཤིང་ཡིན། །སྐུ་ཤིང་འདི་ལ་བརྟན་པར་བཞུགས། །ཤུག་པ་དགྲ་བླའི་བླ་ཤིང་དང་། །སྨྱུག་མ་མཚུན་གྱི་བླ་ཤིང་ཡིན། །སྐུ་ཤིང་འདི་ལ་བརྟན་པར་བཞུགས། །དེ་ལྟར་བདུད་རྩིའི་ཤིང་རྩི་དག །ཆག་དང་གྲུམ་དུ་མ་སོང་བ། །བལ་ཚོན་སྣ་དགུས་བརྒྱན་པ་འདི། །ས་བདག་ཀླུ་གཉན་གཏོད་འཁོར་བཅས། །ཤིང་རྩི་འདི་ལ་བརྟན་པར་བཞུགས། །བདག་དང་ཡོན་བདག་འགྲས་པ་བསྡུམ། །ས་བདག་ནད་རྣམས་ཤིང་རྩིས་བསལ་དུ་གསོལ། །དམེ་རྨུགས་ནལ་གསུམ་མི་ལ་མ་འབེབས་ཤིག །བཀྲ་ཤིས་བདེ་ལེགས་དངོས་གྲུབ་བསྩལ་དུ་གསོལ། །ཡར་ཡམས་ཡར་བཀྱག་མར་ཡམས་མ་ར་སྒྱུར། །ཡོན་བདག་གཏོད་ཀྱི་སྤར་ཁ་གཡོར། །རྣལ་འབྱོར་བདག་ལ་དངོས་གྲུབ་སྩོལ། །དེ་
ནས་མར་ཤིང་ལ་ནི་འདི་སྐད་དོ། ཀྱཻ། དེ་རིང་སྲིད་པའི་གནམ་གང་ལ། །སྲིད་པའི་འདྲེ་དགུ་མ་ར་བཀར། །ཤིང་ནག་རུས་དགུའི་བླ་ཤིང་དབྱེ། །སུར་ནག་འདྲེ་དགུའི་བླ་ཤིང་ཡིན། །སྟག་མ་ནལ་གྱི་བླ་ཤིང་ཡིན། །སྐྱེར་ནག་དམེ་ཡི་བླ་ཤིང་ཡིན། །དེ་རིང་སྲིད་པའི་འདྲེ་དགུ་མ་ར་བཀར། །ལྷ་ས་འདི་ལ་མ་འགྲིམ་ཞིག །གླང་མ་རབས་ཆད་བླ་ཤིང་ཡིན། །སྨྲ་ག་གྲི་བོའི་བླ་ཤིང་ཡིན། །ཐར་ནུ་ཐེའུ་རང་བླ་ཤིང་ཡིན། །དེ་རིང་སྲིད་པའི་འདྲེ་དགུ་མ་ར་བཀར། །ལྷ་ས་འདི་ལ་མ་འགྲིམ་ཞིག །ཚེར་ནག་ཡམས་ཀྱི་བླ་ཤིང་ཡིན། །བེ་ཤིང་ཐབ་ཀྱི་བླ་ཤིང་ཡིན། །སྐྲ་བ་མདུན་གྱི་བླ་ཤིང་ཡིན། །དེ་རིང་སྲིད་པའི་འདྲེ་དགུ་མ་ར་བཀར། །ལྷ་ས་འདི་ལ་མ་འགྲིམ་ཞིག །དབྱི་མོང་དུར་སྲིའི་བླ་ཤིང་ཡིན། །ཐང་ཕྲོམ་འདྲེ་ཡི་བླ་ཤིང་ཡིན། །དེ་རིང་སྲིད་པའི་འདྲེ་དགུ་མ་ར་བཀར། །ལྷ་ས་འདི་ལ་མ་འགྲིམ་ཞིག །ར་དུག་བདུད་ཀྱི་བླ་ཤིང་ཡིན། །ཁྱི་ཚེར་བཙན་གྱི་བླ་ཤིང་ཡིན། །དེ་རིང་སྲིད་པའི་འདྲེ་དགུ་མ་ར་བཀར། །ལྷ་ས་འདི་ལ་མ་འགྲིམ་ཞིག །དེ་ལྟར་ཤིང་ནག་རུས་དགུ་ཆོ་དགུ་འདིས། །འདྲེ་སྲིན་བྱུར་གསུམ་མ་ར་བཀར། །མི་
ལ་བསེ་རག་མ་ར་བཀར། །གོད་འདྲེ་གོད་སྲི་མ་ར་བཀར། །དགྲ་འདྲེ་གདོན་གསུམ་མ་ར་བཀར། །མི་ཁ་གླེང་གཞི་མ་ར་བཀར། །དམེ་རྨུགས་ནལ་གསུམ་མ་ར་བཀར། །ཞེས་པ་མར་ཤིང་གང་འཛོམ་བཙུགས། ༈ །དེ་ནས་ཞི་བསང་རྒྱས་པར་བཏང་། ད་ནི་དངོས་གཞི་བདག་བསྐྱེད་ནི། །སྭ་བྷཱ་ཝས་སྦྱངས། སྟོང་པའི་ངང་ལས་པཾ་ལས་པདྨ་དང་། །ཨཱཋལས་ཟླ་བ་རཾ་ལས་ཉི་མའི་སྟེང་། །ཧཱུྃ་མཐིང་གཅིག་གྱུར་དེ་ལས་འོད་ཟེར་འཕྲོས། །འཕགས་མཆོད་སེམས་ཅན་ཐམས་ཅད་སྡིག་སྒྲིབ་སྦྱངས། །ཚུར་འདུས་ཧཱུྃ་ཐིམ་ཡོངས་སུ་གྱུར་པ་ལས། །ཕྱག་ན་རྡོ་རྗེ་ཁམས་གསུམ་རྣམ་པར་རྒྱལ། །སྐུ་མདོག་སྔོན་པོ་གཟི་བརྗིད་ཉི་འབུམ་འབར། །ཁྲོ་བོའི་གཟུགས་ལ་སྦྲུལ་སྟག་རིན་ཆེན་བརྒྱན། །རྡོ་རྗེ་ཕྱར་ཞིང་སྡིགས་མཛུབ་དྲིལ་བུ་བསྣམས། །སྤྱན་གསུམ་དམར་ཟླུམ་ཞལ་གདངས་མཆེ་བཞི་གཙིགས། །ཞབས་གཉིས་བརྐྱང་བསྐུམ་ས་བདག་རུས་སྦལ་མནན། །སངས་རྒྱས་ཀུན་གྱི་ཐུགས་དང་དབྱེར་མེད་གྱུར། །གནས་གསུམ་འབྲུ་གསུམ་དག་ལས་འོད་ཟེར་འཕྲོས། །དུས་གསུམ་སངས་རྒྱས་ཀུན་གྱི་ཐུགས་ཀ་དང་། །ལྕང་ལོ་ཅན་ནས་སྤྱན་དྲངས་གཉིས་
མེད་བསྟིམ། །ཛཿཧཱུྃ་བཾ་ཧོཿ དབང་ལྷ་སྤྱན་དྲངས་དབང་བསྐུར་ལུས་སྒྲིབ་དག །བུམ་ཆུ་ཡར་ལུད་མི་བསྐྱོད་དབུ་རྒྱན་གྱུར། །ཐུགས་ལས་མཆོད་ལྷ་སྤྲོས་ཏེ་བདག་བསྐྱེད་མཆོད། །ཨོཾ་བཛྲ་པཱ་ཎི་ཨརྒྷཾ་པཱུ་ཛ་ཧོ། ནས་ཤཔྟའི་བར་གྱིས་མཆོད། ཧཱུྃ། གསང་བདག་ཕྱག་ན་རྡོ་རྗེ་ནི། །སྐུ་མདོག་མཐིང་ནག་རལ་པ་བརྗེས། །དུར་ཁྲོད་ཆས་དང་རིན་ཆེན་བརྒྱན། །གདུལ་ཀའི་ཚོགས་འཇོམས་རྡོ་རྗེ་འཛིན། །ཞབས་གཉིས་བརྐྱང་བསྐུམ་འགྱིང་བག་ཅན། །བདེ་གཤེགས་ཐུགས་ཀྱི་གསང་བ་འཛིན། །མཐུ་སྟོབས་བདག་ལ་ཕྱག་འཚལ་བསྟོད། །ཐུགས་ཀར་ཧཱུྃ་མཐར་སྔགས་ལས་འོད་ཟེར་འཕྲོས། །སྣང་སྲིད་དབང་སྡུས་གདུག་པ་ཚར་བཅད་བསམ། །ཨོཾ་བཛྲ་པཱ་ཎི་ཧཱུྃ་ཧཱུྃ་ཕཊ། །ཞེས་པ་བརྒྱ་སྟོང་ཅི་འགྲུབ་བཟླསཨཧཱུྃ་སོགས་དང་། ལྕང་ལོ་ཅན་གྱི་གནས་སོགས་ཀྱིས་བསྟོད།་་་མཆན། དེ་ནས་ས་བདག་བུམ་ཆོག་ནི། །བུམ་པ་ཚད་ལྡན་ཀླུ་སྨན་བཏབ། །ཨ་མྲྀ་ཏས་བསངས། སྭ་བྷ་ཝས་སྦྱངས། སྟོང་པའི་ངང་ལས་ཧཱུྃ་ལས་རིན་ཆེན་བུམ། །དཔག་བསམ་ཁ་རྒྱན་དར་ཟབ་མགུལ་ཆིངས་སྤྲས། །དེ་དབུས་ལྷ་ཡི་གཞལ་ཡས་མཚན་ཉིད་རྫོགས། །པདྨ་འདབ་བརྒྱད་དབུས་སུ་དྷཱི༔ཡིག་སེར། །
འོད་འཕྲོས་དོན་གཉིས་བྱས་ནས་ཚུར་འདུས་པས། །འཕགས་པ་འཇམ་དཔལ་གུར་གུམ་ལྟ་བུའི་མདོག །རལ་གྲི་ཨུཏྤལ་སྟེང་དུ་པོ་ཏི་བསྣམས། །ཟུར་ཕུད་ལྔ་ལྡན་རིན་ཆེན་རྒྱན་གྱིས་བརྒྱན། །སྤྱི་བོར་ཨོཾ་ལས་རྣམ་སྣང་ཆོས་འཆད་དཀར། །མདུན་དུ་མི་བསྐྱོད་ས་གནོན་མཉམ་བཞག་སྔོ། །གཡས་སུ་རིན་འབྱུང་མཆོག་སྦྱིན་མཉམ་བཞག་སེར་། །རྒྱབ་ཏུ་སྣང་བ་མཐའ་ཡས་མཉམ་བཞག་དམར། །གཡོན་དུ་དོན་གྲུབ་སྐྱབས་སྦྱིན་མཉམ་བཞག་ལྗང་། །མཚམས་བཞིར་ཡུམ་བཞི་རིགས་མཐུན་ཕྱག་རྒྱ་ཅན། །དེ་དག་རང་རང་ཐུགས་ཀར་ས་བོན་དྷཱིཿ །ཨོཾ་ཧཱུྃ་ཧཱུྃ་ཧཱུྃཨཱ༔ ཚྭ་ཚྭ་ཚྭ་ཛྭ་ཏྭཾ། འོད་འཕྲོས་ཡེ་ཤེས་སྤྱན་དྲངས་རྒྱས་གདབ་གྱུར། །དེ་ལས་འོད་འཕྲོས་སེམས་ཅན་དུག་ལྔ་སྦྱངས། །ཚུར་འདུས་སངས་རྒྱས་བྱང་སེམས་བྱིན་རླབས་བཀུག །བུམ་ལྷར་ཐིམ་པས་བདུད་རྩིའི་ཆུ་རྒྱུན་བབས། །བུམ་པ་ཁེངས་ཏེ་བདུད་རྩིའི་རྣམ་པར་གྱུར། །ཨོཾ་ཝ་གི་ཤྭ་རི་ཧཱུྃ། ཨོཾ་བེ་རོ་ཙ་ན་ཨོྃ། ཨོཾ་བཛྲ་ཨཀྟ་བྱཱ་ཧཱུྃ། ཨོཾ་རཏྣ་སཾ་བྷ་ཝ་ཧཱུྃ། ཨོཾ་ཨ་མི་དྷེ་ཝ་ཧྲཱིཿ ཨོཾ་ཨ་མོ་གྷ་སིདྡྷི་ཨཱ༔ ཨོཾ་ཚུ་ལཾ་མཾ་པཾ་ཏཱཾ་སྭཱ་ཧཱ། ཅི་འགྲུབ་བཟླས་པའི་མཐར། ཨརྒྷཾ་སོགས་ཀྱིས་
མཆོད། གཞོན་ནུའི་སྐུ་ལུས་འཆང་བ་པོ། །ཡེ་ཤེས་སྒྲོན་མེས་རབ་ཏུ་གསལ། །འཇིག་རྟེན་གསུམ་གྱི་མུན་སེལ་བ། །འཇམ་པའི་དབྱངས་ལ་ཕྱག་འཚལ་བསྟོད། །ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པའི། །རིགས་ལྔ་བདེ་བར་གཤེགས་ལ་ཕྱག་འཚལ་བསྟོད། །ཅེས་བསྟོད། བུམ་ལྷ་འོད་ཞུ་བུམ་ཆུ་ཡན་ལག་བརྒྱད། །ལྡན་པས་མྱང་རེག་སྡིག་སྒྲིབ་དག་པར་བསམ། །དེ་ནི་རྣམ་རྒྱལ་བུམ་ཆོག་མདོར་བསྡུས་སོ། །ལས་བུམ་ནི། སྭ་བྷ་ཝས་སྦྱངས། སྟོང་པའི་ངང་ལས་པཾ་ལས་པདྨ་དང་། །ཟླ་བར་ཧཱུྃ་ཡིག་སྣ་ཚོགས་རྡོ་རྗེར་གྱུར། །འཕྲོ་འདུས་ཡོངས་གྱུར་ཁྲོ་རྒྱལ་བདུད་རྩི་འཁྱིལ། །གཡས་གཡོན་སྣ་ཚོགས་རྡོ་རྗེ་སྡིགས་མཛུབ་ཅན། །ཁྲོ་བོའི་ཆས་རྫོགས་དེ་མདུན་པད་ཟླར་བྷཾ། །འོད་ཞུ་ལྷ་མོ་དྲི་མེད་སྐུ་མདོག་དཀར། །ཞི་བའི་ཉམས་ལྡན་སྣ་ཚོགས་རིན་ཆེན་བརྒྱན། །ཕྱག་ན་བདུད་རྩིས་གང་བའི་བུམ་པ་བསྣམས། །འོད་འཕྲོས་ཡེ་ཤེས་སྤྱན་དྲངས་གཉིས་མེད་བསྟིམ། །དབང་བསྐུར་རྒྱས་གདབ་དོན་གྲུབ་དབུ་རྒྱན་གྱུར། །ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་
ཧཱུྃ་ཕཊ། ཨོཾ་ན་མསརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲི་ཡེ་ཧཱུྃ། ཨོཾ་ཨ་མྲྀ་ཏེ་ཧཱུྃ་ཕཊ། ཅི་འགྲུབ་དང་། ཨརྒྷཾ་སོགས་ཀྱིས་མཆོད། ཧཱུྃ། ཤེས་རབ་དབང་ཕྱུག་ཁྲོ་བོ་ནི། །ལྗང་ནག་སྣ་ཚོགས་རྡོ་རྗེ་བསྣམས། །བགེགས་ཀྱི་ཚོགས་རྣམས་འཇོམས་མཛད་པ། །བགེགས་དགྲ་ཁྱོད་ལ་ཕྱག་འཚལ་བསྟོད། །ཧཱུྃ། ཉོན་མོངས་རྣམ་དག་ཡེ་ཤེས་སྐུ། །བདུད་རྩིའི་བུམ་པ་ལེགས་འཛིན་ཅིང་། །ཉོན་མོངས་དྲི་མ་འཁྲུ་མཛད་མ། །དྲི་མེད་མ་ལ་ཕྱག་འཚལ་བསྟོད། །བུམ་ལྷ་འོད་ཞུ་ཡན་ལག་སྟོང་ལྡན་ཆུས། །སྣང་སྲིད་ནད་དང་གནོད་སེམས་ཞི་བྱེད་བསམ། །དེ་ནི་ལས་བུམ་ཆོ་གའོ། ༈ །དེ་ནས་མདུན་བསྐྱེད་ནི། ཆབ་ཀྱིས་བྲན་ལ། ཨོཾ་སྭ་བྷ་ཝ་སོགས་ལན་གསུམ་བརྗོད། མི་གཙང་མ་དག་སྣང་བ་སྟོང་པར་གྱུར། སྟོང་པའི་ངང་ལས་གཏོར་གཞི་ཡཾ་ལས་རླུང་གི་དཀྱིལ་འཁོར། དེའི་སྟེང་རཾ་ལས་མེའི་དཀྱིལ་འཁོར། དེ་སྟེང་ཁཾ་ལས་ཆུའི་དཀྱིལ་འཁོར། དེ་སྟེང་ལཾ་ལས་གསེར་གྱི་ས་གཞི། དེ་སྟེང་སུ་ལས་རི་རབ་གླིང་བཞི་གླིང་ཕྲན་བརྒྱད་དུ་གྱུར། དེ་སྟེང་ཧཱུྃ་ལས་གཞལ་ཡས་ཁང་གྲུ་བཞི་སྒོ་བཞི་རྒྱན་རྟ་བབས་དང་བཅས་པར་གྱུར། དེའི་དབུས་སུ་གཡུའི་ན་བུན། ཁྲུས་
ཀྱི་རྫིང་བུ། གསེར་གྱི་བྲག །མེ་ཏོག་གི་ཚལ། དཔག་བསམ་ལྗོན་ཤིང་། རྩི་ཤིང་ལོ་འདབ་མེ་ཏོག་འབྲས་བུ་དང་ལྡན་པ་རྣམས་ཀྱིས་བསྐོར་བའོ། །དེའི་དབུས་སུ་མ་ཧཱ་གསེར་གྱི་རུས་སྦལ་གན་རྐྱལ་དུ་འདུག་པ་མགོ་ལྷོར་བསྟན་པ། དེའི་སྟེང་དུ་རིའི་རྒྱལ་པོ་རི་རབ་མཆོད་རྟེན་བརྒྱད་ཚང་བ། དེ་སྟེང་པདྨ་དང་ཟླ་ཉིའི་གདན་ལ། རང་གི་ཐུགས་ཀ་ནས་དྷིསེར་པོ་འཕྲོས་པ་ལས། ཡི་གེ་དྷིཡོངས་སུ་གྱུར་པ་ལས། ས་བདག་དབང་ཆེན་སྐུ་མདོག་སེར་པོ་སྟོད་མི་གཟུགས་མཇུག་མ་སྦྲུལ་དུ་འཁྱིལ་པ། རྩ་ཞལ་མི་གདོང་སེར་པོ། ྋགཡས་སྟག་གདོང་ལྗང་གུ། གཡོན་ཕག་གདོང་ནག་པོ། གཡས་ཀྱི་གོང་དུ་སྦྲུལ་གདོང་དམར་པོ། གཡོན་གྱི་གོང་དུ་སྤྲེལ་གདོང་དཀར་པོ། འབྱུང་བ་ལྔའི་རང་བཞིན་ཉོན་མོངས་པ་ལྔའི་བདག་ཉིད་ཅན། དབུ་རྒྱན་སྦྲུལ་མགོ་བཅུ་དྲུག་པ། དབུའི་ཐོར་གཙུག་ལ་ནོར་བུ་རིན་པོ་ཆེས་སྤྲས་པ། ཕྱག་དང་པོ་གཉིས་ཐུགས་ཀར་ཐལ་མོ་སྦྱར་བ། གཡས་ཀྱི་འོག་མས་འཁོར་ལོ་རྩིབས་བརྒྱད་བསྣམས་པ། གཡོན་གྱི་འོག་མ་ནི་རི་རབ་བསྣམས་པ། དར་དང་རིན་པོ་ཆེས་བརྒྱན་པ། རུས་སྦལ་སེར་པོའི་གདན་ལ་བཞུགས་
པའོ། །མདུན་དུ་ལྷ་མོ་བརྟན་མ་སེར་མོ་བུམ་པ་འཛིན་པ། རྒྱབ་ཏུ་ཤྲཱི་བྷ་དྲ་སྦྲུལ་གདེངས་ཅན་སེར་པོ་ཐལ་མོ་སྦྱར་བ། གཡས་སུ་ཐེ་སེ་དཀར་པོ་བྱ་མགོ་ཅན་་རལ་གྲི་འཛིན་པ། གཡོན་དུ་ཙང་ཀུན་སྤྲེའུ་གདོང་དམར་པོ་རལ་གྲི་འཛིན་པ། ཤར་ལྷོར་སྲས་ས་འཛིན་ལག་པ་སེར་པོ་ནོར་བུ་དང་ལྗོན་ཤིང་འཛིན་པ། ལྷོ་ནུབ་སྲིད་པ་ཕྱག་བརྙན་དཀར་ལྗང་ཞལ་ཟས་འཛིན་པ། ནུབ་བྱང་ཧང་ཕན་མཐིང་ནག་ཆུ་སྲིན་མགོ་ཅན་ཁྲམ་ཤིང་དང་ཞགས་པ་འཛིན་པ། བྱང་ཤར་འཇིགས་བྱེད་དྲེད་མགོ་དུད་ཁ་གཟིག་གི་རྒྱལ་མཚན་འཛིན་པ། མ་ཧཱ་རུས་སྦལ་གྱི་གདན་ལ་བཞུགས་པའོ། །དེའི་ཕྱི་རིམ་ལེའུ་ཚེ་བརྒྱད་ལ་ཤར་ཤིང་ཁམས་རྒྱལ་པོ་ལྗང་གུ་ལྗོན་ཤིང་འཛིན་པ། ལྷོ་མེ་ཁམས་རྒྱལ་པོ་དམར་པོ་མེ་ལོང་འཛིན་པ། ནུབ་ལྕགས་ཁམས་རྒྱལ་པོ་དཀར་པོ་རལ་གྲི་འཛིན་པ། བྱང་ཆུ་ཁམས་རྒྱལ་པོ་ལྗང་གུ་སྦྲུལ་ཞགས་འཛིན་པ། མཚམས་བཞིར་རྒྱལ་ཕྲན་བཞི་སེར་པོ་མཆོད་རྟེན་འཛིན་པ། འབྱུང་བ་དང་མཐུན་པའི་བེར་དང་སྦྲུལ་གྱི་སྐེ་རགས་བྱས་པའོ། །དེའི་ཕྱི་རིམ་ལེའུ་ཚེ་བརྒྱད་ལ་ཤར་དུ་ཤིང་གི་ལྷ་མོ་ལྗང་གུ་སྨན་སྡོང་འཛིན་པ། ལྷོ་
ཕྱོགས་མེའི་ལྷ་མོ་དམར་མོ་ནོར་བུ་འཛིན་པ། ནུབ་ཕྱོགས་ལྕགས་ཀྱི་ལྷ་མོ་དཀར་མོ་སྙེ་མ་འཛིན་པ། བྱང་དུ་ཆུའི་ལྷ་མོ་ནག་མོ་བུམ་པ་བསྣམས་པ། མཚམས་བཞིར་སའི་ལྷ་མོ་བརྟན་བྱེད་མ། སྲ་བྱེད་མ། འཛིན་བྱེད་མ། ལྡན་བྱེད་མ་བཞི་སེར་མོ་བུམ་པ་འཛིན་པ། དེ་ཐམས་ཅད་དར་དང་རིན་པོ་ཆེས་བརྒྱན་པའོ། །དེའི་ཕྱི་རིམ་དུ་ལེའུ་ཚེ་བརྒྱད་ལ་སྤར་ཁ་བརྒྱད་ནི་ནུབ་བྱང་དུ་ཁེན་གནམ་སེར་པོ་འགྱིང་དཀར་བསྣམས་པ། བྱང་དུ་ཁམ་ཆུ་ནག་པོ་ཆུ་རྐྱལ་འཛིན་པ། བྱང་ཤར་གིན་རི་སེར་པོ་མཆོད་རྟེན་འཛིན་པ། ཤར་དུ་ཟིན་ཤིང་ལྗང་གུ་ཤིང་ལོ་འཛིན་པ། ཤར་ལྷོར་ཟོན་རླུང་སེར་པོ་རླུང་ཞགས་འཛིན་པ། ལྷོར་ལི་མེ་དམར་མོ་མེ་སྒྲོན་འཛིན་པ། ལྷོ་ནུབ་ཁོན་ས་སེར་པོ་རི་རབ་དང་ཕྲེང་བ་འཛིན་པ། ནུབ་ཏུ་དྭ་ལྕགས་དཀར་པོ་རལ་གྲི་འཛིན་པ་དར་དང་རིན་པོ་ཆེས་བརྒྱན་པའོ། །དེ་རྒྱབ་ཀྱི་མདུན་དུ་ཤར་ན་སྟག་ཡོས་གཉིས་ལྗང་གུ་བཞི་ལྗང་སྟེ་ཤིང་ལོ་བསྣམས་པ། ཆུའི་གཞལ་ཡས་ཁང་ལ་གནས་པ། ལྷོ་ན་རྟ་སྦྲུལ་གཉིས་དགུ་དམར་དམར་པོ་མེ་སྒྲོན་བསྣམས་པ་ཤིང་གི་གཞལ་ཡས་ཁང་ལ་གནས་པ། ནུབ་ན་སྤྲེའུ་དང་བྱ་དཀར་པོ་བདུན་
དམར་རལ་གྲི་བསྣམས་པ་སའི་གཞལ་ཡས་ཁང་ལ་གནས་པ། བྱང་ན་ཕག་དང་བྱི་བ་ནག་པོ་ཆུ་རྐྱལ་བསྣམས་པ་ལྕགས་ཀྱི་གཞལ་ཡས་ཁང་ལ་གནས་པ། །གཅིག་དཀར་གཉིས་ནག་སྟ་རེ་དང་ཐོ་བ་ཐོགས་པའོ། །ཤར་ལྷོར་འབྲུག་དང་སུམ་མཐིང་གཉིས། ལྷོ་ནུབ་ལུག་དང་ལྔ་སེར། ནུབ་བྱང་ཁྱི་དང་དྲུག་དཀར། བྱང་ཤར་གླང་དང་བརྒྱད་དཀར་སའི་དཀྱིལ་འཁོར་བསྣམས་པའོ། །དེ་རེ་རེ་ལས་ལྔ་ལྔ་རུ་སྤྲུལ་ཏེ་ཡོད་པར་བསམ། དེའི་ཕྱིར་ཤར་སྟག་སྐྱེ། ལྷོ་གཡུ་འབྲུག །ནུབ་བྱ་དམར། བྱང་རུས་སྦལ་སེར་པོ་རྣམས་སྟོད་མི་ལུས་བྱ་གཤོག་ཅན། ཐལ་མོ་ཐུགས་ཀར་སྦྱར་བ་སྦྲུལ་མཇུག་ཅན་ནོ། །དེ་རྒྱབ་པད་དཀར་འདབ་མ་བརྒྱད་ལ་ལྷ་ཆེན་བརྒྱུད་རིན་པོ་ཆེའི་རྒྱན་བཀྲ་བ། ཕྱག་མཚན་སྣ་ཚོགས་བསྣམས་པའོ། །དེ་རྒྱབ་པད་སྔོན་འདབ་བརྒྱད་ལ་ཀླུ་ཆེན་བརྒྱད་སྦྲུལ་གྱི་གདེངས་ཀ་ཅན་པདྨའི་གདན་ལ་བཞུགས་པའོ། །དེ་རྒྱབ་པད་སེར་འདབ་བརྒྱད་ལ་གཉན་ཆེན་བརྒྱད། དེ་རྒྱབ་པདྨ་དམར་པོ་འདབ་བརྒྱད་ལ་གཟའ་ཆེན་བརྒྱད། དེ་རྒྱབ་སྣ་ཚོགས་པདྨ་ལ་རྒྱུ་སྐར་ཉེར་བརྒྱད། གནམ་ཁྱི་སྤུན་བདུན། དེ་རྒྱབ་ལེའུ་ཚེ་བཅུ་ལ་
ཕྱོགས་སྐྱོང་བཅུ། དེ་རྒྱབ་སྒོ་བཞི་ལ་རྒྱལ་པོ་ཆེན་པོ་སྡེ་བཞི་རྒྱན་ཆ་ལུགས་དང་ལྡན་པའོ། །དེ་རྒྱབ་མུ་ཁྱུད་ལ་ཐེ་སེ་རྒྱལ་པོ་ལ་སོགས་ལོ་ལ་འཁོར་བ། གྲོལ་བུམ་ལྷ་ལྔ་ལ་སོགས་ཟླ་བའི་ས་བདག །གསེར་མཛོད་སེར་པོ་ལ་སོགས་ཞག་གི་ས་བདག །གཡུ་མཛོད་སྔོན་པོ་ལ་སོགས་དུས་ཚོད་ཀྱི་ས་བདག །དུང་ལུག་བུ་མོང་ལ་སོགས་གཏོད་ཀྱི་སྡེ་ཚོགས༔ གཞན་ཡང་ལྷ་སྲིན་སྡེ་བརྒྱད། འགྲོ་བ་རིགས་དྲུག་དང་བཅས་པ་རི་རབ་གླིང་བཞི་གླིང་ཕྲན་ལྷོ་འཛམ་བུ་གླིང་དང་། ས་ཕྱོགས་འདིར་གནས་ཡུལ་ལྷ་གཞི་བདག་དང་བཅས་པས་བསྐོར་བར་གྱུར། དེ་རྣམས་ཀྱི་ནམ་མཁར་པད་ཟླའི་གདན་ལ་ཤཱཀྱ་ཐུབ་པ། སྤྱན་རས་གཟིགས། འཇམ་དཔལ། བྱ་ཁྱུང་། ཕྱག་ན་རྡོ་རྗེ། པདྨ་འབྱུང་གནས་རྣམས་སྤྲིན་ཕུང་འཁྲིགས་པ་ལྟར་སྣང་སྲིད་བདག་པོའི་གཉའ་ནོན་གྱི་ཚུལ་དུ་བསྒོམ། དེ་རྣམས་ཀྱི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་དང་སུ་ཏྲཿ རང་རང་གི་མིང་ཡིག་ལས་འོད་འཕྲོས་པས་སོ་སོ་རང་རང་གི་གནས་ནས་དད་པ་དང་། སྔོན་གྱི་དམ་ཚིག་དབང་གིས་བྱོན་ནས་བྲིས་སྐུའམ་བཞེངས་སྐུའམ་མདུན་བསྐྱེད་ལ་ཐིམ་མཆན། བསྐྱེད་པ་
ལ་ཐིམ་པར་གྱུར། ཨོཾ་མ་ཧཱ་དེ་ཝ་ལོ་ཀ་པཱ་ལ་བྷུ་མི་པ་ཏི་བཛྲ་ས་མཱ་ཡ་ཛ༔ དེ་ནས་ལོ་རྒྱུས་བཤད་པ་ནི། ཀྱཻ། རྒྱལ་བ་ཡིད་བཞིན་བདེན་པའི་ཚིག་ལ་ཉོན། །སངས་རྒྱས་ཞལ་མཐོང་བདེན་པའི་ཚིག་ལ་ཉོན། །རྗེས་སུ་འབྲང་ཞིང་ཀུན་དུ་དགའ་བ་ཡིས། །ས་འཛིན་ས་བདག་རྒྱལ་པོ་ཆེན་པོ་རྣམས། །རིན་ཆེན་གཏེར་ཆེན་འབྱུང་བའི་གཏོར་མ་འདི། །ནད་སོས་ལུས་ཀྱི་སྒྲིབ་པ་ཐམས་ཅད་བྱང་། །མནོལ་ཆགས་སེམས་ཀྱི་སྒྲིབ་པ་མ་ལུས་དག །གཏི་མུག་འཐིབས་པའི་མུན་པ་བསལ་ཞིང་དྭངས། །བྱང་ཆུབ་ལསེམས་ལྡན་རྒྱལ་ཁམས་ཐམས་ཅད་སྐྱོང་། །འཛམ་གླིང་སྤྱི་ཡི་ས་ཕྱོགས་འདི་དག་ལ། །མཐུན་རྐྱེན་བྱིན་རླབས་དགེ་བའི་སྡོང་གྲོགས་མཛོད། །དཀར་པོའི་མཆོད་པ་གསོལ་ལ་གནས་འདིར་བྱོན། །ནམ་མཁའི་ཕྱོགས་ཀུན་ཐོགས་པ་མེད་པར་རྒྱུ། །ཡེ་ཤེས་ཐུགས་རྗེ་གསལ་བ་ཙམ་གྱིས་ནི། །ཅི་འདོད་ཅི་གསོལ་ཡིད་བཞིན་ཅི་ཡང་གནང་། །སྐྱབས་་འདོད་སྐྱབས་གསོལ་ཡོན་ཏན་ཀུན་ལ་སྐྱོབས། །ཉེས་འཛིན་དུས་སུ་བསྙེན་སྒྲུབ་བྱེད་པ་ཀུན། །ཤེས་རབ་བདེན་པའི་ཚིག་འཛིན་སྨོས་པར་མཛོད། །ཅི་འགྱུར་ཅི་སྨོས་ཅི་ཡང་
སྨོས། །གར་འགྱུར་གར་སྟོན་གར་ཡང་སྟོན། །རི་རབ་ལྷུན་པོ་རི་རབ་ལྷུན་པོ་འབར། །རྒྱ་མཚོ་མཆིང་ནམ་རྒྱ་མཚོ་ཀུན་ཏུ་འབར། །ཀུན་ལ་དབང་བྱེད་ས་བདག་ས་ལ་དབང་ཆེན་འབར། །ས་ཡི་ལྷ་མོ་བརྟན་མ་བཀྲ་ཤིས་འབར། །རིན་ཆེན་མཐུ་མངའ་ཀུན་ལ་མངའ་མཛད་པའི། །ས་བདག་དབང་ཆེན་འཁོར་དང་བཅས་པ་ལ། །ཕྱག་འཚལ་བསྙེན་བཀུར་མཆོད་པ་དམ་པ་འབུལ། །སྔོན་དུས་སྲིད་པའི་ཆོས་རྣམས་ཀུན། །གང་ཡང་མེད་པའི་སྔོན་རོལ་དུ། །བྱེད་པ་ཡུལ་གྱི་བདག་པོ་ཡིས། །བྱ་བའི་ཆོས་ལ་ཡུལ་དུ་བཟུང་། །དེ་ལ་སེམས་ཅན་གཉིས་སྲིད་དེ། །སྐེམ་ལ་རིད་པའི་ཡན་ལག་ཅན། །ཁ་དོག་སེར་པོ་གསེར་ལྟ་བུ། །འགྲོ་ན་འབུར་ཞིང་འགྲོ་བ་དེ། །ཡན་ལག་སྦལ་པ་ལྟ་བུར་གནས། །དེ་ལ་མཚན་དུ་གྲགས་པ་ནི། །བྱེད་པ་གསེར་གྱི་རུས་སྦལ་དང་། །བྱ་བ་གསེར་གྱི་རུས་སྦལ་དག །མིང་དུ་གྲགས་ཏེ་ཕོ་མོ་གཉིས། །མཉམ་དུ་སྦྱོར་བའི་སྤྱོད་པ་ལས། །དེ་ཡི་རྡུལ་དང་རླངས་པ་ལས། །གཟའ་དང་སྐར་མའི་ཚོགས་རྣམས་དང་། །ལོ་དང་ཟླ་བའི་ས་བདག་དང་། །ཞག་དང་དུས་ཚོད་ལྷ་རྣམས་སྲིད། །དེ་ལ་འབྱུང་བ་ལྔ་མཆིས་ཏེ། །
ནམ་མཁའ་རླུང་སོགས་འབྱུང་བ་གྲུབ། །དེ་ལ་སྤར་སྨེ་ལོ་ཚོགས་སྲིད། །དེ་ལ་སྣང་སྲིད་ལྷ་འདྲེ་སྲིད། །དེ་ལྟར་སྲིད་པའི་དུས་ཚོད་དུ། །མི་དང་ས་བདག་ཀུན་འགྲས་ཏེ། །ལེགས་པར་བྱས་ཀྱང་ཉེས་པར་སོང་། ཀྱཻ། སྔོན་ཚེ་རྒྱ་ཡུལ་གྲམ་ལམ་དུ། །རྒྱལ་པོ་གྱིང་ཤིང་ནག་པོ་དང་། །རྒྱལ་པོ་ཏི་ཏྲི་འོད་བཟང་གིས། །ས་བདག་གཉན་ལ་ཐུབ་ཆོད་བྱས། །སེམས་ཅན་ལུས་ཅན་མང་དུ་བསད། །དུར་ས་གཉན་གྱི་ཁ་ལ་བཏབ། །བག་མ་གནམ་ཁྱིའི་ཁ་རུ་བླངས། །ཕ་རོ་ཧལ་ཁྱིའི་ཁ་ལ་སྦས། །ཁང་རྙིང་ས་སྒོའི་ཐོག་ཏུ་བཏིངས། །སྟེང་སྒོ་གནམ་སྒོའི་ཕྱོགས་སུ་བསྟན། །མཁར་ལས་གནམ་སྒོའི་ཕྱོགས་སུ་བྱས། །ཕྱོགས་གཙང་དགྲ་བདུད་ཐོག་ཏུ་ཕྱིན། །མཛེ་ཤུའི་ལས་རྣམས་ཁད་ཀྱིས་བྱས། །སྐྱས་ནག་རི་སློ་ཁྱིམ་དུ་བཙུད། །བསྲུངས་བར་བྱས་པས་སྲུང་མ་ཤེས། །བཟློག་པར་བྱས་པས་ཟློག་མ་ཤེས། །གསོ་བར་བྱས་པས་གསོ་མ་ཤེས། །མདོར་ན་ཉེས་པ་བཅོས་མ་ཤེས། །འགྲམས་འཁྲུགས་ཐམས་ཅད་བཟླུམ་མ་ཤེས། །འཁོར་འདས་ཐམས་ཅད་དབྱེ་མ་ཤེས། །དེ་ལྟར་གྱུར་པའི་ཉེས་སྐྱོན་གྱིས། །རྒྱལ་པོའི་མི་
རབས་ཆད་ལ་ཐུག །ནོར་ཕྱུགས་སྣ་ནས་འཆར་ལ་ཁད། །འབྲས་དྲུག་ལོ་ཐོག་སྐམ་ལ་ཁད། །ཕ་སྐག་བུ་ལ་ཟ་བར་འགྱུར། །མི་སྐག་ནོར་ལ་ཟ་བར་འགྱུར། །མོ་སྐག་ཕོ་ལ་ཟ་བར་འགྱུར། །ཕོ་སྐག་མོ་ལ་ཟ་བར་འགྱུར། །རྗེ་སྐག་བྲན་ལ་ཟ་བར་འགྱུར། །བྲན་སྐག་རྗེ་ལ་ཟ་བར་འགྱུར། །ཉིན་དཀར་མོ་དང་ལྟས་ཀྱང་ངན། །མཚན་མོ་རྨི་ལམ་ལྟས་ཀྱང་སྡུག །སྐྱེ་འགྲོ་སྡུག་བསྔལ་ནད་ཀྱིས་ཟིན། །ཤ་རུས་སྐམ་ཞིང་སླ་བ་ཁོལ། །ཆུ་རྒྱུས་འཁུམ་ལ་རྩ་ཡང་སྐམ། །ཤ་ཡང་རུལ་ལ་པགས་པ་རལ། །དེ་ཚེ་འཕགས་པ་འཇམ་དཔལ་གྱིས། །འགྲོ་བ་སེམས་ཅན་བསྐྱང་སླད་དུ། །གྷོ་བུ་དེ་ཤན་གནས་མཆོག་ཏུ། །བྱམས་པ་ཆེན་པོའི་ཏིང་འཛིན་གྱིས། །སྐུ་ལས་འོད་ཟེར་སྣ་ཚོགས་བཀྱེས། །ས་བདག་མི་དང་འཁོན་འགྲས་བསྡུམས། །ལྗགས་ཀྱི་མཆིལ་མའི་ཐིགས་པ་ཡི། །རྐྱེན་ལས་གྲུབ་པའི་སྦལ་པ་བསྟན། །དེ་ཡི་རང་བཞིན་གྲུབ་པ་ན། །སྐྱེ་འགྲོ་རྣམས་ལ་ཕན་གདགས་ཕྱིར། །འགྱུར་རྩིས་སུམ་བརྒྱ་དྲུག་ཅུ་བཤད། །དེ་རུ་འདུས་པའི་འཁོར་རྣམས་ལ། །འགྲས་པ་ཐམས་ཅད་བསྡུམ་པ་དང་། །གནོད་པ་ཐམས་ཅད་
བསྒྱུར་བའི་ཕྱིར། །འཕགས་པ་འཇམ་དཔལ་ཐུགས་རྗེ་ཡིས། །མི་དང་ས་བདག་འཁོན་འགྲས་བསྡུམས། །དེ་ནས་རྒྱལ་བློན་འཁོར་བཅས་ལ། །བཀྲ་ཤིས་ཕུན་སུམ་ཚོགས་པ་བྱུང་། །སྔོན་གྱི་སྲིད་པ་དེ་བཞིན་དུ། །དེ་རིང་རྒྱུ་སྦྱོར་ཡོན་བདག་གི །མི་ནོར་དབང་ཐང་བསྐྱེད་པའི་ཕྱིར། །བདག་ཉིད་ཀོང་ཙེ་འཕྲུལ་རྒྱལ་གྱིས། །ཡོན་བདག་བསམ་པ་འགྲུབ་པའི་ཕྱིར། །འབྱུང་བ་ལས་ཀྱི་ཁོད་སྙོམས་ཏེ། །སྲིད་པ་ལས་ཀྱི་གཞུང་སྦྱོར་ནས། །སྤར་ཁ་བརྒྱད་དང་སྨེ་བའི་ལྷ། །ལོ་སྐོར་དྲུག་ཅུ་ཐེམ་པ་དང་། །གཟའ་སྐར་ལོ་འཁོར་ས་བདག་དང་། །གཞན་ཡང་ས་བདག་ཀླུ་གཉན་དང་། །ཡུལ་ལྷ་གཞི་བདག་འཁོར་བཅས་ཀུན། །རྫུན་ཚིག་བསླུ་བ་མ་ལགས་ཀྱི། །བདེགཤེགས་རྒྱལ་བའི་བཀའ་ལ་ཉོན། ཀྱཻ། སངས་རྒྱས་རྐང་གཉིས་གཙོ་སྟེ་བདེན་པའི་མཆོག །དམ་ཆོས་འདོད་ཆགས་བྲལ་ཏེ་བདེན་པའི་མཆོག །དགེ་འདུན་འདུས་པའི་གཙོ་སྟེ་བདེན་པའི་མཆོག །བདེན་པའི་མཆོག་ནི་དཀོན་མཆོག་གསུམ་གྱི་བཀའ། །དཀོན་མཆོག་བདེན་པའི་ཐུགས་རྗེ་བྱིན་རླབས་ཀྱིས། །སོ་སོར་མཁོ་བའི་ཡོ་བྱད་མ་ལུས་
པ། །ཇི་ལྟར་བཤམས་དང་སྤྲུལ་པར་འབྱུང་གྱུར་ཅིག །དེ་ནས་སྤྱན་འདྲེན་པ་ནི། བསང་དུད་ཆེར་སྦར་མཆོད་པས་མཆོད། །རྔ་དུང་དྲིལ་བུ་སིལ་སྙན་གཤང་། །སྤོས་དུད་བཏང་ལ་དཀར་ཆབ་མཆོད། །གོས་དཀར་གྱོན་ལ་གྱེར་སྒོམ་སྤྲུགས། །བདག་ཉིད་གསང་བའི་བདག་པོའི་ཐུགས་ཀ་ནས་འོད་ཟེར་ལྕགས་ཀྱུའི་དབྱིབས་ཅན་དཔག་ཏུ་མེད་པ་འཕྲོས། ཡ་ཀའི་ལྷ་གནས་ཐམས་ཅད་དང་རི་རབ་སྟེང་ཤོད་དབང་ཆེན་གསེར་གྱི་ས་གཞི། གླིང་བཞི་གླིང་ཕྲན་བརྒྱད་དང་བཅུ་གཉིས། རྒྱ་མཚོ་ཆེན་པོའི་ཁ་ཞབས་ནི་གནས་པའི་ས་བདག་ཀླུ་གཉན་རྣམས། བདག་ཉིད་ཕྱག་ན་རྡོ་རྗེའི་ཐུགས་ཀའི་བྱམས་པའི་འོད་ཟེར་གྱིས་བསྐུལ་ནས་མདུན་དུ་བཀའ་ཉན་གསུང་སྡོད་དུ་བྱོན་ནས་འཁོད་པར་བསམས་ལ། གྱེར་དབྱངས་སྙན་པོས་འདི་སྐད་སྤྱན་འདྲེན་ནོ། ཀྱཻ། ཀོང་ཙེ་འཕྲུལ་གྱི་རྒྱལ་པོ་ལ་ཕྱག་འཚལ་ལོ། །དེ་རིང་གདུགས་གང་བཟང་པོ་ལ། །ནང་མི་འདི་ཡི་དོན་ཆེད་དུ། །འཁྲུགས་པ་སྤྱི་བཅོས་བྱ་བའི་ཕྱིར། །སྣང་སྲིད་ལྷ་ཀླུ་ས་བདག་རྣམས། །གནས་འདིར་སྤྱན་འདྲེན་མཆོད་ཕྱིར་གཤེགས། ནམ་མཁའ་གསལ་བའི་ཞིང་ཁམས་ནས། །སྟོང་པ་འཁོར་ལོའི་དཀྱིལ་འཁོར་འདིར། །སྟོན་པ་ཤཱཀ་ཐུབ་འཁོར་དང་བཅས། །རིགས་གསུམ་ མགོན་པོ་བྱང 
་སེམས་འཁོར། །
འགྲོ་བའི་དོན་དུ་སྤྱན་འདྲེན་ན། །སྣང་སྲིད་གདུག་པ་ཞི་ཕྱིར་གཤེགས། ཀྱཻ། ཚངས་པ་ལ་སོགས་ལྷ་ཆེན་བརྒྱད། །ལྷ་ཡི་འཁྲུག་པ་བསྡུམ་པ་དང་། །ལྷ་ཡི་གདུག་རྩུབ་ཞི་བའི་ཕྱིར། །གནས་འདིར་སྤྱན་འདྲེན་གཤེགས་སུ་གསོལ། །གནམ་ལ་མངའ་མཛད་ནམ་མཁའི་ལྷ། །བར་སྣང་མངའ་མཛད་འོད་གསལ་ལྷ། །ས་ལ་མངའ་མཛད་ས་ཡི་ལྷ། །གནམ་ས་བར་སྣང་འཁྲུགས་པ་བསྡུམ་ཕྱིར་གཤེགས། །རྒྱ་མཚོ་ཆུ་ཡི་ཀློང་དཀྱིལ་ནས། །ཆུ་ལ་མངའ་མཛད་ཀླུ་ཆེན་བརྒྱད། །ཀླུ་མོ་བརྒྱད་དང་ཀླུ་རིགས་འཁོར། །ཀླུ་དང་འཁོན་འགྲས་བསྡུམ་པའི་ཕྱིར། །གནས་འདིར་སྤྱན་འདྲེན་མཆོད་ཕྱིར་གཤེགས། །བར་སྣང་ཁམས་ལ་བཞུགས་པ་ཡི། །གཟའ་ཆེན་བརྒྱད་དང་ཉི་ཟླའི་ལྷ། །གཟའ་ཡི་འཁྲུགས་པ་སེལ་བ་དང་། །གཟའ་དང་འགྲས་པ་བསྡུམ་པའི་ཕྱིར། །གནས་འདིར་སྤྱན་འདྲེན་མཆོད་ཕྱིར་གཤེགས། །སྨིན་དྲུག་ལ་སོགས་ཤར་སྐར་བདུན། །མཆོད་པའི་གནས་འདིར་གཤེགས་སུ་གསོལ། །མཆུ་ལ་སོགས་ཏེ་ལྷོ་སྐར་བདུན། །མཆོད་པའི་གནས་འདིར་གཤེགས་སུ་གསོལ། །ལྷ་མཚམས་ལ་སོགས་ནུབ་
སྐར་བདུན། །མཆོད་པའི་གནས་འདིར་གཤེགས་སུ་གསོལ། །མོན་གྲེ་ལ་སོགས་བྱང་སྐར་བདུན། །མཆོད་པའི་གནས་འདིར་གཤེགས་སུ་གསོལ། །སྐར་མའི་འཁྲུགས་པ་བསྡུམ་པ་དང་། །དལ་ཁ་ལྟས་ངན་བསྒྱུར་ཕྱིར་གཤེགས། ཀྱཻ། གནམ་ཁྱི་ལྷ་མོ་སྤུན་བདུན་དང་། །ཕོ་ཉ་གནམ་ཁྱི་འཁོར་དང་བཅས། །གནམ་ཁྱི་འཁྲུགས་པ་བསྡུམ་པའི་ཕྱིར། །མཆོད་པའི་གནས་འདིར་གཤེགས་སུ་གསོལ། །ཤིང་ལ་མངའ་མཛད་གཉན་རིགས་རྣམས། །ཡོན་བདག་དོན་དུ་སྤྱན་འདྲེན་ན། །ཞི་བའི་སེམས་དང་ལྡན་ཏེ་བྱོན། །གཉན་ཆེན་བཞི་དང་གནམ་སའི་གཉན། །རྡོ་ཆུ་ཤིང་བྲག་ལ་ལམ་གྱི། །གཉན་རིགས་མ་ལུས་གནས་འདིར་བྱོན། ཀྱཻ། དེ་རིང་སྲིད་པའི་ས་བདག་རྣམས། །ཡོན་བདག་དད་པའི་དོན་ཆེད་དུ། །སྲིད་པའི་གཏོ་ལ་སྤྱན་འདྲེན་ནོ། །གནས་དང་རྟེན་ལ་གཤེགས་སུ་གསོལ། །གླིང་བཞི་དབུས་དང་ལྔ་ལ་མངའ་མཛད་པའི། །ས་བདག་རྒྱལ་པོ་རྒྱལ་མོ་རྣམས། །ས་བདག་འཁྲུགས་པ་སེལ་སླད་དུ། །འཁོར་དང་བཅས་པ་གཤེགས་སུ་གསོལ། །ས་ཡི་ལྷ་མོ་བརྟན་མ་དང་། །ས་བདག་ཙང་ཀུན་ཁྱབ་པ་གཉིས། །
ས་བདག་རྣམས་ཀྱི་གྲོལ་ཕུགས་ཏེ། །འབྱུང་བ་ལྔ་ལ་མངའ་ཡང་མཛད། །ནམ་ཟླ་དུས་བཞི་ཁ་ལོ་སྒྱུར། །ཡོན་བདག་དོན་དུ་སྤྱན་འདྲེན་ན། །མཆོད་པའི་གནས་འདིར་གཤེགས་སུ་གསོལ། །ས་བདག་གདུག་རྩུབ་ཞི་བར་མཛོད། །ཡབ་ཡུམ་དེ་གཉིས་སྤྲུལ་པ་ལས། །ཕྱོགས་བཞིར་མངའ་མཛད་ས་བདག་ནི། །འཁྲུགས་པ་བཅོས་ཕྱིར་སྤྱན་འདྲེན་ན། །གདུག་རྩུབ་ཞི་ཕྱིར་གཤེགས་སུ་གསོལ། །ཤར་ཕྱོགས་ཤིང་ཁམས་འཁོར་དང་བཅས། །འཁྲུགས་པ་བཅོས་ཕྱིར་གཤེགས་སུ་གསོལ། །ལྷོ་ཕྱོགས་མེ་ཁམས་འཁོར་དང་བཅས། །འཁྲུགས་པ་བཅོས་ཕྱིར་གཤེགས་སུ་གསོལ། །ནུབ་ཕྱོགས་ལྕགས་ཁམས་འཁོར་དང་བཅས། །འཁྲུགས་པ་བཅོས་ཕྱིར་གཤེགས་སུ་གསོལ་། །བྱང་ཕྱོགས་ཆུ་ཁམས་འཁོར་དང་བཅས། །འཁྲུགས་པ་བཅོས་ཕྱིར་གཤེགས་སུ་གསོལ། །དབུས་ཕྱོགས་ས་ཁམས་འཁོར་དང་བཅས། །འཁྲུགས་པ་བཅོས་ཕྱིར་༈ གཤེགས་སུ་གསོལ། །ཉི་མ་ཤར་ཕྱོགས་ཤིང་གི་ཁམས། །འབྱུང་བ་ཤིང་བསྐལ་དྲུག་ཁྲི་དྲུག་འབུམ་ནས། །ས་བདག་མི་ལུས་སྟག་གི་དབུ། །བཙུན་མོ་མི་ལུས་ཡོས་བུའི་
དབུ། །སྙིང་དཀར་འཁྲུགས་པ་བཅོས་སླད་དུ། །ས་བདག་རྒྱལ་པོ་རྒྱལ་མོ་ཡང་། །མཆོད་པའི་གནས་འདིར་གཤེགས་སུ་གསོལ། །ཉི་མ་ལྷོ་ཕྱོགས་མེ་ཡི་ཁམས། །མེ་བསྐལ་དྲུག་ཁྲི་དྲུག་འབུམ་ནས། །ས་བདག་མི་ལུས་རྟ་ཡི་དབུ། །བཙུན་མོ་མི་ལུས་སྦྲུལ་གྱི་དབུ། །མེ་ཡི་འཁྲུགས་པ་བཅོས་སླད་དུ། །ས་བདག་རྒྱལ་པོ་རྒྱལ་མོ་ཡང་། །མཆོད་པའི་གནས་འདིར་གཤེགས་སུ་གསོལ། །ཉི་མ་ནུབ་ཕྱོགས་ལྕགས་ཀྱི་ཁམས། །ལྕགས་བསྐལ་དྲུག་ཁྲི་དྲུག་འབུམ་ནས། །ས་བདག་མི་ལུས་སྤྲེའུའི་དབུ། །བཙུན་མོ་མི་ལུས་བྱ་ཡི་དབུ། །སྙིང་ནག་འཁྲུགས་པ་བཅོས་སླད་དུ། །ས་བདག་རྒྱལ་པོ་རྒྱལ་མོ་ཡང་། །མཆོད་པའི་གནས་འདིར་གཤེགས་སུ་གསོལ། །ཉི་མ་བྱང་ཕྱོགས་ཆུ་ཡི་ཁམས། །ཆུ་བསྐལ་དྲུག་ཁྲི་དྲུག་འབུམ་ནས། །ས་བདག་མི་ལུས་བྱི་བའི་དབུ། །བཙུན་མོ་མི་ལུས་ཕག་གི་དབུ། །ཆུ་ཡི་འཁྲུགས་པ་བཅོས་སླད་དུ། །ས་བདག་རྒྱལ་པོ་རྒྱལ་མོ་ཡང་། །མཆོད་པའི་གནས་འདིར་གཤེགས་སུ་གསོལ། །ཉི་མ་དབུས་ཕྱོགས་ཕ་ཀི་ནི། །ས་བསྐལ་དྲུག་ཁྲི་དྲུག་འབུམ་ནས། །གཤེད་ནི་ཁྱི་འབྲུག་གླང་ལུག་བཞི། །གཤེད་བཞིའི་
འཁྲུགས་པ་བཅོས་སླད་དུ། །མཆོད་པའི་གནས་འདིར་གཤེགས་སུ་གསོལ། ཀྱཻ། ཤར་ཕྱོགས་ཤིང་ཁམས་འཁོར་དང་བཅས། །ཤར་ལྷོ་ཟོན་ཁམས་འཁོར་དང་བཅས། །ལྷོ་ཕྱོགས་ལི་ཁམས་འཁོར་དང་བཅས། །ལྷོ་ནུབ་ཁོན་ཁམས་འཁོར་དང་བཅས། །ནུབ་ཕྱོགས་དྭ་ཁམས་འཁོར་དང་བཅས། །ནུབ་བྱང་ཁེན་ཁམས་འཁོར་དང་བཅས། །བྱང་ཕྱོགས་ཆུ་ཁམས་འཁོར་དང་བཅས། །བྱང་ཤར་གིན་ཁམས་འཁོར་དང་བཅས། །སྤར་ཁམས་འཁྲུགས་པ་བཅོས་པ་དང་། །འཁོན་འགྲས་ཐམས་ཅད་བསྡུམ་པའི་ཕྱིར། །མཆོད་པའི་གནས་འདིར་གཤེགས་སུ་གསོལ། །ལོ་ལྷའི་ས་བདག་བཅུ་གཉིས་ཡང་། །ལོ་ལྷའི་འཁྲུགས་པ་བཅོས་སླད་དུ། །མཆོད་པའི་གནས་འདིར་གཤེགས་སུ་གསོལ། །སྨེ་བ་གླིང་དགུ་འཁོར་དང་བཅས། །སྨེ་བའི་འཁྲུགས་པ་བཅོས་སླད་དུ། །མཆོད་པའི་གནས་འདིར་གཤེགས་སུ་གསོལ། །འབྱུང་བ་ལྔ་ཡི་ལྷ་ལྔ་ཡང་། །འབྱུང་ལྔའི་འཁྲུགས་པ་བཅོས་སླད་དུ། །མཆོད་པའི་གནས་འདིར་གཤེགས་སུ་གསོལ། ཀྱཻ། རྡོ་ལ་གནས་པའི་གཏོད་རིགས་རྣམས། །གཏོད་དང་འགྲས་པ་
བཅོས་སླད་དུ། །མཆོད་པའི་གནས་འདིར་གཤེགས་སུ་གསོལ། །བྱམས་པའི་སེམས་ཀྱིས་གཤེགས་སུ་གསོལ། །གཏོད་ཀྱི་འཁྲུགས་པ་སེལ་བར་མཛོད། །ཕྱོགས་སྐྱོང་བཅུ་པོ་འཁོར་དང་བཅས། །འཁྲུགས་པ་བཅོས་པའི་དོན་སླད་དུ། །མཆོད་པའི་གནས་འདིར་གཤེགས་སུ་གསོལ། །རྒྱལ་ཆེན་སྡེ་བཞི་འཁོར་དང་བཅས། །དྲི་ཟ་གཤིན་རྗེ་ཀླུ་གནོད་སྦྱིན། །ནད་དང་འཁྲུགས་པ་ཆོ་འཕྲུལ་བཟློག་པའི་ཕྱིར། །མཆོད་པའི་གནས་འདིར་གཤེགས་སུ་གསོལ། །ལྷ་སྲིན་སྡེ་བརྒྱད་འཁོར་དང་བཅས། །སྡེ་བརྒྱད་འཁྲུགས་པ་བཅོས་སླད་དུ། །མཆོད་པའི་གནས་འདིར་གཤེགས་སུ་གསོལ། །གཞན་ཡང་འགྲོ་བ་རིགས་དྲུག་དང་། །སྐྱེ་གནས་བཞི་དང་ལམ་རྒྱུད་ལྔ། །བུ་ལོན་ལན་ཆགས་འཇལ་ཕྱིར་བྱོན། །སྣང་སྲིད་མངའ་བདག་ཁྱེད་རྣམས་ནི། །ཞེ་སྡང་གདུག་པའི་སེམས་དང་མ་བྱོན་ཅིག །ང་རྒྱལ་ཁྲོ་གཏུམ་དག་དང་མ་བྱོན་ཅིག །འདོད་ཆགས་ཚ་བའི་དབལ་དང་མ་བྱོན་ཅིག །གཏི་མུག་མུན་པའི་བློ་དང་མ་བྱོན་ཅིག །ཕྲག་དོག་རུ་ངའི་ཡིད་དང་མ་བྱོན་ཅིག །ཞི་བ་བྱམས་པའི་སེམས་དང་ལྡན་ཏེ་བྱོན། །བརྩེ་སེམས་གདུང་བའི་སེམས་
དང་བཅས་ཏེ་བྱོན། །འདོད་ཡོན་མཆོད་པ་འདི་ལ་དགོངས་ཏེ་བྱོན། །རྒྱལ་བ་འཕགས་པའི་བཀའ་ལ་ཉན་ཏེ་བྱོན། །གཏོ་མཁན་བདེན་ཚིག་འདི་ལ་ཉན་ཏེ་བྱོན། །ནད་དང་གནོད་སེམས་མ་ལུས་སྦྱང་ཕྱིར་བྱོན། །སྣ་སྲིད་གདུག་སེམས་མ་ལུས་ཞི་ཕྱིར་བྱོན། །ཨོཾ་མ་ཧཱ་དེ་ཝ་པྲི་ཐི་དེ་ཝི་ལོ་ཀ་པཱ་ལ་ས་པ་རི་ཝཱ་ར་བཛྲ་ས་མཱ་ཡ་ཛ་ཛ༔ ཛཿཧཱུྃ་བཾ་ཧོཿ དེ་ནས་གདན་ལ་བཞུགས་པ་ནི། ཀྱཻ། སྣང་སྲིད་མངའ་བདག་ཐམས་ཅད་ཀུན། །ཡོན་བདག་འདི་ཡི་དོན་ཆེད་དུ། །མཛེས་པ་པད་མའི་དཀྱིལ་འཁོར་ལ། །དགྱེས་ཤིང་བརྟན་པར་བཞུགས་སུ་གསོལ། །ལྷ་ཆེན་བརྒྱད་པོ་འཁོར་དང་བཅས། །མཛེས་པ་པདྨའི་གདན་ལ་བཞུགས་སུ་གསོལ། །ཀླུ་ཆེན་བརྒྱད་པོ་འཁོར་དང་བཅས། །རྒྱ་མཚོའི་གདན་ལ་བཞུགས་སུ་གསོལ། །གཟའ་ཆེན་བརྒྱད་པོ་འཁོར་དང་བཅས། གཙང་མ་མེ་ཏོག་གདན་ལ་བཞུགས་སུ་གསོལ། །རྒྱུ་སྐར་ཉེར་བརྒྱད་འཁོར་དང་བཅས། །རླུང་དང་བུ་ཡུག་གདན་ལ་བཞུགས་སུ་གསོལ། །གནམ་ཁྱི་ལྷ་མོ་འཁོར་དང་བཅས། །རིན་ཆེན་སྣ་ལྔའི་གདན་ལ་བཞུགས་སུ་གསོལ། །གཉན་རིགས་འཁོར་དང་བཅས་པ་
རྣམས། །ཤིང་ལོ་མཛེས་པའི་གདན་ལ་བཞུགས་སུ་གསོལ། །ས་བདག་རྒྱལ་པོ་རྒྱལ་མོ་ཡང་། །རི་རབ་གླིང་བཞིའི་གདན་ལ་བཞུགས་སུ་གསོལ། །རྡོ་བདག་གཏོད་རིགས་འཁོར་བཅས་རྣམས། །ཕ་ཝང་རིན་ཆེན་གདན་ལ་བཞུགས་སུ་གསོལ། །ཕྱོགས་སྐྱོང་བཅུ་པོ་འཁོར་བཅས་རྣམས། །འཁོར་ལོ་སེང་གེའི་གདན་ལ་བཞུགས་སུ་གསོལ། །རྒྱལ་པོ་ཆེན་པོ་སྡེ་བཞི་ཡང་། །གྲུ་ཆད་བཞི་ལ་བཞུགས་སུ་གསོལ། །དཔལ་མགོན་ལྷ་སྲིན་སྡེ་བརྒྱད་ཚོགས། །དཔལ་མགོན་ལོ་ཟླ་ཞག་དུས་ལྷ། །རང་རང་འོས་པའི་གདན་ལ་སྡོད། །བྱང་ཆུབ་སེམས་དང་ལྡན་ཏེ་སྡོད། །དྷེ་ཝ་ལོ་ཀ་ས་མཱ་ཡ་ལྷན་འདུ། །དེ་ནས་ཡིད་ཀྱིས་མཆོད་པ་འབུལ། ཀྱཻ། སྣང་སྲིད་མངའ་བདག་མ་ལུས་རྣམས། །ཡིད་འོང་མཉམ་པའི་གདན་ལ་བཞུགས། །བདག་དང་ཡོན་བདག་དད་པ་ཡི། །མཆོད་པས་དགྱེས་པ་བསྐྱེད་པའི་ཕྱིར། །མར་མེ་མེ་ཏོག་དྲི་ཞིམ་སྤོས། །སྨན་དང་རིན་ཆེན་ལྷ་བཤོས་དང་། །ཤེལ་ཚིགས་བྱ་སྤུ་སྤ་རྒྱལ་དང་། །དར་ཟབ་སྟག་གཟིག་དཀོར་ནོར་དང་། །འདོད་ཡོན་ལོངས་སྤྱོད་བསམ་མི་ཁྱབ། །སྣང་སྲིད་ནོར་རྫ་ས་དམིགས་བྱས་ནས།
དད་གུས་ལྡན་པས་འབུལ་ལགས་ན། །ཞལ་གྱིས་དགྱེས་པའི་འཛུམ་ཕྱུང་ལ། །བརྩེ་བར་དགོངས་ཏེ་བཞེས་སུ་གསོལ། །མཉེས་རབ་མཆོག་དང་ལྡན་གྱུར་ཅིག །གདུག་རྩུབ་ཐམས་ཅད་ཞི་བར་མཛོད། །བདག་ལ་མཐུ་དང་སྡོང་གྲོགས་མཛོད། །ཀོང་ཙེ་བདེན་པའི་བཀའ་ལ་ཉོན། །དགྱེས་པར་མཛོད་ལ་འཁྲུགས་པ་བཅོས། །མི་གྲངས་སྤེལ་ལ་ཕྱུགས་རྩི་ཁྲོལ། །ལྷ་ཡི་དལ་ཁ་ཡམས་ཁ་ཟློག །ཀླུ་ཡི་གདུག་རྩུབ་ཞི་བར་མཛོད། །གཉན་གྱི་དལ་ཁ་བསྒྱུར་དུ་གསོལ། །ས་བདག་གདུག་པ་ཞི་བར་མཛོད་། །གཏོད་ཀྱི་འཁྲུགས་པ་བསལ་དུ་གསོལ། །མི་ནད་ཕྱུགས་ནད་ཞི་བར་མཛོད། །རྐྱེན་བགེགས་བར་ཆད་བཟློག་ཏུ་གསོལ། །དེ་ནས་མེ་ཏོག་བཟུང་ལ་ཕྱག་འཚལ་བ་ནི། ཀྱཻ། དེ་རིང་བདག་དང་ཡོན་བདག་གིས། །ལྷ་ཆེན་བརྒྱད་དང་ཀླུ་ཆེན་བརྒྱད། །གཟའ་དང་རྒྱུ་སྐར་གནམ་ཁྱི་དང་། །གཉན་དང་ས་བདག་གཏོད་ལ་སོགས། །དཔལ་མགོན་ལྷ་སྒྲོསྲིན་སྡེ་བརྒྱད་དང་། །རྒྱལ་ཆེན་བཞི་དང་ཕྱོགས་སྐྱོང་བཅུ། །འཁྲུགས་པ་བཟླུམ་ཞིང་ཞི་བའི་ཕྱིར། །ཀོང་ཙེ་བདེན་པའི་བཀའ་བཞིན་དུ། །བདག་ཅག་དད་པས་ཕྱག་འཚལ་
ལོ། །ལྷ་ཡི་འཁྲུགས་སྡང་བསལ་བའི་ཕྱིར། །ལྷ་ཆེན་བརྒྱད་པོ་འཁོར་བཅས་ལ། །ཡོན་བདག་དད་པས་ཕྱག་འཚལ་ལོ། །གཟའ་སྐར་འཁྲུགས་པ་བསལ་སླད་དུ། །གཟའ་བརྒྱད་རྒྱུ་སྐར་ཉེར་བརྒྱད་ལ། །ཡོན་བདག་དད་པས་ཕྱག་འཚལ་ལོ། །ཀླུ་ཡི་འཁྲུགས་ནད་བསལ་སླད་དུ། །ཀླུ་ཆེན་བརྒྱད་པོ་འཁོར་བཅས་ལ། །ཡོན་བདག་དད་པས་ཕྱག་འཚལ་ལོ། །སྟོང་གྲི་ལན་ཆགས་སྦྱང་བའི་ཕྱིར། །གཉན་གྱི་སྡེ་ཚོགས་ཐམས་ཅད་ལ། །ཡོན་བདག་དད་པས་ཕྱག་འཚལ་ལོ། །ས་གཞི་དབྱིངས་ལ་གནས་པ་ཡི། །ས་བདག་རྒྱལ་པོ་འཁོར་དང་བཅས། །ས་བདག་འཁྲུགས་པ་བཅོས་པ་དང་། །ཡར་ཡམས་མར་ཡམས་བཟློག་པའི་ཕྱིར། །ཡོན་བདག་དད་པས་ཕྱག་འཚལ་ལོ། །སྙིང་འགྲམས་སྙིང་འཁྲུགས་ཞི་བའི་ཕྱིར། །ཤིང་ཁམས་རྒྱལ་པོ་འཁོར་བཅས་ལ། །ཡོན་བདག་དད་པས་ཕྱག་འཚལ་ལོ། །མེ་ཁམས་འགྲམས་འཁྲུགས་གཉན་ནད་བསལ། །མེ་ཁམས་རྒྱལ་པོ་འཁོར་བཅས་ལ། །ཡོན་བདག་དད་པས་ཕྱག་འཚལ་ལོ། །སྙིང་ནག་འགྲམས་འཁྲུགས་བསལ་སླད་དུ། །ལྕགས་ཁམས་རྒྱལ་པོ་འཁོར་བཅས་ལ། །ཡོན་
བདག་དད་པས་ཕྱག་འཚལ་ལོ། །ཆུ་ཁམས་འགྲམས་འཁྲུགས་ཀླུ་ནད་སོལ། །ཆུ་ཁམས་རྒྱལ་པོ་འཁོར་བཅས་ལ། །ཡོན་བདག་དད་པས་ཕྱག་འཚལ་ལོ། །གཤེད་བཞིའི་འཁྲུགས་པ་དལ་ཁ་བསྒྱུར། །མཚམས་བཞི་ས་ཁམས་རྒྱལ་པོ་ལ། །ཡོན་བདག་དད་པས་ཕྱག་འཚལ་ལོ། །སྤར་ཁའི་འཁྲུགས་པ་བསལ་བའི་ཕྱིར། །སྤར་ཁ་བརྒྱད་ཀྱི་ལྷ་བརྒྱད་ལ། །ཡོན་བདག་དད་པས་ཕྱག་འཚལ་ལོ། །འབྱུང་ལྔའི་འཁྲུགས་པ་བཅོས་པའི་ཕྱིར། །འབྱུང་བ་ལྔ་ཡི་ལྷ་ལྔ་ལ། །ཡོན་བདག་དད་པས་ཕྱག་འཚལ་ལོ། །ལོ་ལྷ་བཅུ་གཉིས་མཆོད་པའི་ཕྱིར། །ལོ་ལྷ་བཅུ་གཉིས་འཁོར་བཅས་ལ། །ཡོན་བདག་དད་པས་ཕྱག་འཚལ་ལོ། །གཏོད་ཀྱི་འཁྲུགས་པ་བསལ་སླད་དུ། །རྡོ་ལ་གནས་པའི་ས་གཏོད་རིགས་ལ། །ཡོན་བདག་དད་པས་ཕྱག་འཚལ་ལོ། །ཕྱོགས་སྐྱོང་གདུག་པ་བསལ་བའི་ཕྱིར། །འཇིག་རྟེན་ཕྱོགས་སྐྱོང་བཅུ་པོ་ལ། །ཡོན་བདག་དད་པས་ཕྱག་འཚལ་ལོ། །དཔལ་མགོན་མཉེས་པར་བྱ་བའི་ཕྱིར། །གཙང་རིགས་དཔལ་མགོན་བདུན་ཅུ་ལ། །ཡོན་བདག་དད་པས་ཕྱག་འཚལ་ལོ། །ཕྱོགས་བཞིའི་དལ་ཡམས་བཟློག་པའི་
ཕྱིར། །རྒྱལ་པོ་ཆེན་པོ་སྡེ་བཞི་ལ། །ཡོན་བདག་དད་པས་ཕྱག་འཚལ་ལོ། །སྣང་སྲིད་མངའ་བདག་མ་ལུས་རྣམས། །འཁྲུགས་པ་བཅོས་ལ་ཡོ་བ་བསྲངས། །གདུག་རྩུབ་ཞི་བར་བྱ་བའི་ཕྱིར། །རྡུལ་དང་མཉམ་པའི་ལུས་སྤྲུལ་ཏེ། །ཕྱག་འཚལ་མཆོད་འབུལ་གུས་པས་བསྟོད། །དེ་ཝ་པྲི་ཐི་དེ་ཝི་ལོ་ཀ་པཱ་ལ་ན་མོ་ཧཱུྃ། ཨ་ཏི་པཱུ་ཧོ། དེ་ནས་ཕྱག་འཚལ་ལ་བཤགས་པ་བྱ་བ་ནི། ཀྱཻ། དེ་རིང་བདག་དང་ཡོན་བདག་གིས། །སྣང་སྲིད་མངའ་བདག་ཐམས་ཅད་དང་། །ལྷ་ཀླུ་གཟའ་སྐར་གཉན་དང་གཏོད། །ས་བདག་རྒྱལ་བློན་སྤར་སྨེ་རྣམས། །དགའ་མཆོག་དཀྱིལ་འཁོར་དམ་པ་ནས། །བདག་ལ་གསན་ཅིང་དགོངས་སུ་གསོལ། །རྒྱུ་སྦྱོར་ཡོན་གྱི་བདག་པོ་ཡིས། །མ་རིག་དབང་དུ་དུག་གསུམ་དང་། །མ་གོ་མ་རྟོགས་མ་ཤེས་པ། །དེ་དག་ལ་སོགས་ཉེས་སྐྱོན་རྣམས། །ཀླུ་དང་ས་བདག་ཐུགས་དང་འགལ་བ་མཐོལ་ལོ་བཤགས། །དུག་ལྔའི་དབང་གིས་ལྷ་ཀླུ་ཐུགས་དང་ནི། །འགལ་བར་གྱུར་པ་མཐོལ་ལོ་བཤགས། །ཐབ་གཞོབ་འཁོན་ནལ་ཉི་ནག་བསང་བྱས་པས། །ལྷ་ཆེན་བརྒྱད་ཀྱི་ཐུགས་དང་འགལ་བ་མཐོལ་ལོ་བཤགས། །བདག་
དང་རྒྱུ་སྦྱོར་ཡོན་བདག་གིས། །ཤིང་གཉན་བཅད་པས་གཉན་དང་འགྲས། །གཉན་གྱི་དབུ་སྐྲ་བྲེག་པ་མཐོལ་ལོ་བཤགས། །ཆུ་བཅུས་ཆུ་དྲངས་ཀླུ་དང་འགྲས། །ཀླུ་ཡི་ཁྲག་རྣམས་སྐམ་པ་མཐོལ་ལོ་བཤགས། །ཕ་ཝང་སློག་པས་གཏོད་རུས་ཆགས། །གཏོད་དང་འགྲས་པ་མཐོལ་ལོ་བཤགས། །དུར་བཏབ་མི་འདོད་པ་ལ་བཏབ་པ་དང་། །རོ་བསྲེག་མི་འདོད་པ་ལ་སྲེག་པ་དང་། །བག་བསུ་མི་འདོད་པ་ལ་བསུས་པ་དང་། །བུ་བཙའ་མི་འདོད་པ་ལ་བཙས་པ་དང་། །དེ་ལ་སོགས་པ་མི་འདོད་པ་རྣམས་ཀྱང་། །མཐོལ་བཤགས་ཕུལ་བའི་ཉེས་སྒྲིབ་བྱང་བར་མཛོད། །གཞན་ཡང་མཐོལ་བཤགས་ཕུལ་བ་ནི། །ཆུ་བཅུས་ཡུར་ཆུ་དྲངས་པ་དང་། །མནན་གཏད་བྱས་དང་རྒྱ་མཚོར་དུག་གཡོས་དང་། །ཉ་སྦལ་བསད་དང་ཀླུ་ཡི་དཀོར་ནོར་ལ། །རྐྱལ་ཁ་བྱས་པ་མཐོལ་ལོ་བཤགས། །ཀླུ་ཚང་ཞིང་རྨོས་ཡས་གླུད་ཀླུ་གནས་བོར། །ཀླུ་ཡི་དཀོར་བརླག་ཀླུ་གནས་ས་མཁར་དང་། །སྦྲ་ཕུབ་ལྷ་ཁང་མཆོད་རྟེན་བརྩེགས་པ་དང་། །རི་ལ་དུར་བཏབ་འཐབ་འཁོན་སྐྱོན་བྱས་དང་། །རྒྱལ་བ་ཀླུ་རིགས་རྣམས་ལ་མཐོལ་ལོ་བཤགས། །
འཁྲུགས་པ་ཞི་ནས་འཁོན་སྐྱོན་བསལ་དུ་གསོལ། །འགྲས་བསྡུམ་ཡོ་བ་བསྲང་ལ་ཆད་པ་མཐུད། །ཀླུ་ཡི་འཁྲུགས་པ་ཞི་ནས་གདུག་རྩུབ་དྭངས་བར་མཛོད། །གཞན་ཡང་མཐོལ་བཤགས་ཕུལ་བ་ནི། །ཁ་ལེ་སྟོང་འབྱམས་ལོ་མ་ཡལ་ག་བྲེགས། །གཉན་ལ་དོ་བསྡོས་འགྲས་བཙལ་རི་དྭགས་བསད། །གཉན་གྱི་དཀོར་རློམ་གཉན་གྱི་སྐུ་ལ་བསྡོས། །ཐབ་དང་གཞོབ་ཀྱིས་ཐུགས་རྨུགས་སམ། །མ་རིག་དབང་གིས་ཐུགས་དཀྲུགས་པ། །གཉན་གྱི་ཐུགས་འཁྲུགས་པ་མཐོལ་ལོ་བཤགས། །བཙོག་ནལ་མནོལ་གྱིས་གཉན་གྱི་མགུལ་ཚེའགགས་པ། །སྤྱན་ལོང་སྙན་འོན་ཐུགས་རྨུགས་མཐོལ་ལོ་བཤགས། །ཉེས་པ་བྱང་ནས་འཁྲུགས་པ་ཞི་བར་མཛོད། །མ་མཁས་མ་རིག་ལས་དབང་གིས། །ཤིང་གཉན་བཅད་པས་གཉན་ལུས་སྐམ། །ཉི་ཟླའི་གཉན་ལ་དོ་བསྡོས་པས། །གཉན་ལ་འགྲས་པ་བཙལ་བ་མཐོལ་ལོ་བཤགས། །སྤྲིན་གཉན་སྐར་གཉན་དཀོར་འཕྲོག་རློམ། །ཤིང་གཉན་བཅད་དམ་རྩྭ་གཉན་བྲེགས། །རི་གཉན་མཁར་བརྩེགས་སྤང་གཉན་དྲས། །ཆུ་གཉན་ཡུལ་དྲངས་རྡོ་གཉན་གཟུ་བས་རློག །དེ་སོགས་གཉན་དང་འགྲས་པ་མཐོལ་ལོ་
བཤགས། །ཉེས་སྐྱོན་བྱང་དག་ཚངས་པའི་དངོས་གྲུབ་སྩོལ། །གཉན་ནད་ཐམས་ཅད་ཞི་བར་མཛོད། །འགྲས་པ་བསྡོམ་ལ་ཡོ་བ་བསྲངས། །གཉན་ཆེན་ཡབ་ཡུམ་འཁོར་བཅས་ཀྱིས། །བདག་དང་རྒྱུ་སྦྱོར་ཡོན་བདག་ལ། །གཉན་གྱི་གདུག་རྩུབ་མ་གཏོང་ཞིག །ཡོན་བདག་འདི་ཡི་གཉན་རྣམས་བཅོས། །བསོད་ནམས་སྤེལ་ལ་
མགོན་སྐྱབས་མཛོད། །སྡིག་པའི་སྐྱོན་རྣམས་བྱང་བར་གྱིས། །གཉན་པོ ་ཡབ་ཡུམ་འཁོར་བཅས་རྣམས། །གདུག་པའི་སེམས་དང་བྲལ་ནས་ནི། །ཞི་བ་བྱམས་པའི་སེམས་དང་ལྡན་གྱུར་ཅིག ཀྱཻ། ས་བདག་ཡབ་ཡུམ་འཁོར་དང་བཅས། །བདག་ལ་གསན་ཅིང་དགོངས་སུ་གསོལ། །ཀོང་ཙེ་བདེན་པའི་སྒྲུང་བཤད་ན། །ཚིག་སྨྱུང་བདེན་པ་འདི་ལ་ཉོན། །བདག་དང་རྒྱུ་སྦྱོར་ཡོན་བདག་གིས། །གནོང་འགྱོད་བཤགས་པས་འཚལ་བ་ནི། །སྐྱེ་བ་དཔག་ཏུ་མེད་པ་ནས། །ད་ལྟའི་དུས་འདི་ཕན་ཆད་དུ། །ས་བདག་རྒྱལ་བློན་འཁོར་བཅས་སྤྱན་སྔ་རུ། །མི་བཞེད་པ་ཡི་ལས་བྱས་པ། །ས་བདག་རྒྱལ་པོའི་ས་བཀྲལ་བ། །རོ་བག་གཤིན་ཆགས་བག་སྣ་དང་། །སྐྱས་སྣ་བུ་བཙས་ཞིང་རྨོས་དང་། །
ཤིད་དང་དུར་བཏབ་དམག་ཇག་ཀུན། །མི་བཞེད་པ་རྣམས་མཐོལ་ལོ་བཤགས། །གཙང་ཀུན་ཕྱོགས་སུ་དམག་ཇག་དྲ་མ་དྲངས། །ས་བདག་ཁྱབ་པར་དུར་བཏབ་དང་། །རུས་སྦལ་རྒྱལ་པོའི་སྟེང་དུ་ཞིང་རྨོས་པ། །གནམ་ཁྱི་ནག་པོའི་སྣ་ལ་རོ་བསྲེགས་པ། །གཤེད་བཞིའི་སྟེང་དུ་སྐྱས་མགོ་བཀྱགས། །ཧོང་ཕན་སྟེང་དུ་བག་མ་བླངས། །བེའུའི་སྣ་ལ་བུ་བཙས་དང་། །ཧལ་ཁྱིའི་ཁ་ལ་རོ་སྦས་སོགས། །དེ་ལྟར་བྱས་པ་མཐོལ་ལོ་བཤགས། །བཟོད་པར་གསོལ་ལོ་དགྱེས་གྱུར་ཅིག །སྙིང་དཀར་སྟེང་དུ་བཤས་བྱས་དང་། །སྙིང་ནག་སྟེང་དུ་མནའ་ཟོས་པ། །དེ་དག་ཐམས་ཅད་མཐོལ་ལོ་བཤགས། །གཉན་ལ་དྲག་པ་ཐལ་བ་ཀླུ་ལ་དམེ་མནོལ་བྱས། །ཀླུ་གཉན་འཁྲུགས་པ་མཐོལ་ལོ་བཤགས། །ཁྱི་འབྲུག་གླང་ལུག་སྐྱས་དང་བག་མ་བསུས། །ཁྱིམ་ཕུག་དམག་དང་རྟ་རྒྱུག་བྱས། །གཤེད་བཞི་འཁྲུགས་པ་མཐོལ་ལོ་བཤགས། །གདུག་རྩུབ་ཐམས་ཅད་ཞི་གྱུར་ཅིག །འགྲས་པ་བསྡུམ་ལ་ཡོ་བ་བསྲངས། །ཡང་བདག་དང་རྒྱུ་སྦྱོར་ཡོན་བདག་གིས། །གཟའ་དང་རྒྱུ་སྐར་ཐམས་ཅད་ལ། །ཐུགས་དང་འགལ་བ་མཐོལ་ལོ་བཤགས། །གཟའ་ཟླ་
བ་ལ་རྟ་བོང་ཕྱིར་བཏང་ངམ། །པ་ཝ་སངས་ལ་བང་མཛོད་བཤིག །རཱ་ཧུ་ལ་ལ་སྔགས་བྱེད་ཁུར། །མིག་དམར་བོན་ལ་རྐྱལ་ཀ་བྱས། །ཉི་མར་རི་སློ་ཁྱིམ་དུ་བླངས། །སྤེན་པ་ལ་ནི་མནའ་ཟོས་སམ། །ལག་པ་ལ་ནི་སྐྱས་ནག་བསུས། །ཕུར་བུ་བན་དེའི་དཀོར་ལ་རློམ། །གཟའ་བརྒྱད་འཁྲུགས་པ་མཐོལ་ལོ་བཤགས། །འཁྲུགས་པ་ཞིའོ་གདུག་རྩུབ་མེད་པར་མཛོད། །འགྲས་པ་བསྡུམ་ལ་ཡོ་བ་བསྲངས། །གཟའ་བདུད་མི་ལ་མ་འབེབས་ཤིག །ཕྱག་བརྙན་ནོར་ལ་མ་འགྱེད་ཅིག །གཟའ་ཡི་གདུག་པ་བསལ་དུ་གསོལ། །དལ་སྣ་ཡམས་སྣ་མ་འདྲེན་ཅིག །ཐོག་སེར་བཙའ་སད་སྣ་མ་འདྲེན། །ནང་མིའི་བསོད་ནམས་འཕེལ་བར་གྱིས། །གདུག་པའི་སེམས་དང་བྲལ་ནས་ནི། །ཞི་བའི་སེམས་དང་ལྡན་པར་མཛོད། །བདག་དང་རྒྱུ་སྦྱོར་ཡོན་བདག་གིས། །རྒྱུ་སྐར་ཉི་ཤུ་རྩ་བརྒྱད་ལ། །ཤིད་མི་འདོད་པ་ལ་ཤིད་བྱས་པས་བསྡད་པ་དང་། །དུར་བཏབ་ཉེས་པས་འགྲམས་པ་དང་། །རོ་བསྲེགས་མི་འདོར་རོ་དུད་ཀྱིས་ལྷ་མནོལ་བ་དང་། །སྐྱས་མི་འདོད་པ་ལ་སྐྱེས་སྣ་ས་བདག་ལ་ཕོག །གཏོ་སིལ་མི་འདོད་གཏོ་སིལ་
བསྒྲེན་དུ་སོང་། །ཡར་བཅོས་མ་སིལ་བྱས་པས་ལམ་མ་རྙེད། །དམག་དྲངས་མི་འདོད་པ་ལ་དྲངས་པ་དང་། །བག་མ་བསུ་བསྐྱལ་མི་འདོད་པ་ལ་བསུ་བསྐྱལ་བྱས། །བག་སྣ་སྐར་མ་ལ་ཕོག་གྱོད་བྱུང་ངམ། །བུ་བཙས་མི་འདོད་པ་ལ་བཙས་པས་ལྷ་མནོལ་ལམ། །ཤན་དམར་མི་འདོད་པ་ལ་བྱས་པས་འཁྲུགས་པ་ལངས་པ་དང་། །ཁྱིམ་ཕུབ་མི་འདོད་པ་ཕུབ་པས་ཁྱིམ་ལྷ་འཕངས། །ཀློག་འདོན་མི་བཞེད་པ་ལ་བྱས་པས་ལྷ་ཡི་བཀའ་ཆད་འབེབས་པ་དང་། །དེ་ལ་སོགས་པ་ལས་ཐབས་མི་བཞེད་པ་མཐོལ་ལོ་བཤགས། །འགྲས་པ་བསྡུམ་མོ་འཁྲུགས་པ་བཅོས། །ཡོན་འདི་འབུལ་ལོ་གདུག་རྩུབ་སོལ། །ལོ་ཟླ་ཞག་དུས་ལ་དབང་ལྷ། །ལས་ཐབས་མི་མཐུན་མཐོལ་ལོ་བཤགས། །ཕྱོགས་སྐྱོང་དཔལ་མགོན་སྡེ་བརྒྱད་སོགས། །སོ་སོའི་སྤྱན་སྔར་མི་བཞེད་པའི། །འགལ་འཁྲུལ་འགྲམ་འཁྲུགས་མཐོལ་ལོ་བཤགས། །གདུག་པའི་སེམས་དང་བྲལ་ནས་ནི། །བྱམས་པའི་སེམས་དང་ལྡན་གྱུར་ཅིག །ཡང་སྟག་གི་ཟླ་བར་མཁར་བརྡུང་དང་། །ཡོས་ཟླར་བུ་སྲིན་རྒྱུ་འོང་དང་། །འབྲུག་ཟླར་ཁང་སྦྲ་ཕུབ་པ་དང་། །སྦྲུལ་ཟླར་སྦྱད་པ་བཙུགས་པ་
དང་། །རྟ་ཟླར་ཡུལ་གསར་བཟུང་བ་དང་། །ལུག་ཟླར་མ་ཕྱིའི་དུར་བཏབ་བམ། །སྤྲེལ་ཟླར་དམེ་སྟོང་འཇལ་བ་དང་། །བྱ་ཟླར་བྲན་ལ་ཁྱིམ་ཕུབ་བམ། །ཁྱི་ཟླར་སྐྱས་ནག་བསུས་པ་དང་། །ཕག་ཟླར་བུ་ལ་ཁྱིམ་ཕུབ་བམ། །བྱི་ཟླར་བུ་མོ་ཕྱིར་བཏང་དང་། །གླང་ཟླར་རྨོས་གླང་བཤས་པ་སོགས། །ཟླ་བདག་རྣམས་ལ་དེ་ལྟར་བྱས་པ་མ་མཆིས་སོ། །གལ་ཏེ་དེ་ལྟར་མཆིས་ན་མཐོལ་ལོ་བཤགས། །ཡང་ཤིང་གི་ཉི་མར་ཤིང་གཉན་བཅད། །མེ་ཉིར་ཡུགས་ས་བག་མ་བླངས། །ས་ཡི་ཉི་མར་ཞིང་རྨོས་སམ། །ལྕགས་ཀྱི་ཉི་མར་བཀའ་ལུང་དྲངས། །ཆུ་ཡི་ཉི་མར་ཆུ་དྲངས་སམ། །རྡོ་གཉན་རློག་གམ་ཐབ་ཟངས་ཕོག །དེ་ལ་སོགས་པ་མཐོལ་ལོ་བཤགས། །སྣང་སྲིད་ལྷ་ཀླུ་གཟའ་སྐར་དང་། །ས་བདག་གཏོད་དང་གཉན་རྣམས་ལ། །ཉེས་སྐྱོན་འགལ་འཁྲུལ་བཤགས་པ་ནི། །བདག་དང་རྒྱུ་སྦྱོར་ཡོན་བདག་གིས། །མ་རིག་འཁྲུལ་པའི་ལས་དབང་གིས། །ལྷ་ཡི་ཐུགས་དང་འགལ་བའམ། །ཀླུ་ཡི་དཀོར་ལ་རློམ་པ་དང་། །གཉན་ལ་དམེ་མནོལ་བྱས་པའམ། །གཏོད་ལ་འཁོན་ཐབས་བྱས་པའམ། །ས་བདག་གི་དཀོར་
ནོར་འཕྲོག་པའམ། །གཟའ་དང་སྐར་མ་ལ་དུག་ཤོར་བ། །དཀྱིལ་འཁོར་འདི་ལ་བཞུགས་པ་ཡི། །སྣང་སྲིད་མངའ་བདག་ཐམས་ཅད་ལ། །ནོངས་པ་ཐམས་ཅད་མཐོལ་ལོ་བཤགས། །ཉེས་པ་བྱང་ནས་ཚངས་པའི་དངོས་གྲུབ་སྩོལ། །འཁྲུགས་པ་བཅོས་ལ་ཡོ་བ་བསྲངས། །ཆད་པ་མཐུད་ལ་གས་པ་སྦྱོར། །མ་ཡོ་མ་སྡང་མ་མཐུར་མ་ཁྲོ་ཞིག །གདུག་རྩུབ་ཐམས་ཅད་ཞི་བར་མཛོད། །ཚངས་པའི་དངོས་གྲུབ་བསྩལ་དུ་གསོལ། །ཡང་འབྲུག་གི་ཉི་མ་ལ་བུད་མེད་བྲོས་པ་ཁྱིམ་དུ་སྦས། །སྟག་གི་ཉི་མ་ལ་གད་པ་བང་རིམ་བཅད་པས་གཉན་དང་འགྲས། །ཡོས་ཀྱི་ཉི་མ་ལ་མནའ་བྱས་ཕོ་ལྷ་འཕངས། །འབྲུག་གི་ཉི་མ་ལ་བོན་པོ་འདྲེ་ཅན་ཁྱིམ་ཕྱིན་ཐེའུ་རང་ལ་ཆགས། །སྦྲུལ་གྱི་ཉི་མ་ལ་བུ་སྲིང་བཏང་བས་གཉན་དང་འགྲས། །རྟ་ཡི་ཉི་མ་ལ་རྟ་བཏང་རྟ་གཡང་ཉམས། །ལུག་གི་ཉི་མ་ལ་བུ་སྲིང་གི་སྐྱེས་བསུས་སམ། །སྤྲེལ་གྱི་ཉི་མར་དམེ་བྱས་སམ། །བྱ་ཉིར་དམེ་ཕོ་ལྷ་གྲལ་བཏང་། །ཁྱི་ཉིར་བྲན་ཕོ་མོར་ཉོས་སམ། །ཕག་གི་ཉི་མར་ཕག་བསད་དམ། །བྱི་བའི་ཉི་མར་སྦྲ་དྲུབ་བམ། །གླང་གི་ཉི་མར་ཤིད་བྱས་སམ། །དེ་འདྲའི་འགྲམ་
འཁྲུགས་མཆིས་གྱུར་ན། །སྣང་སྲིད་མངའ་བདག་ལྷ་ཀླུ་དང་། །ས་བདག་ཡུལ་ས་གཉན་པོ་དང་། །ཕྱོགས་སྐྱོང་བཅུ་དང་རྒྱལ་ཆེན་བཞི། །དཔལ་མགོན་ལྷ་སྲིན་སྡེ་བརྒྱད་ལ། །མཐོལ་ལོ་བཤགས་སོ་བཟོད་པར་གསོལ། །ཉེས་པ་བྱང་དག་ཚངས་པའི་དངོས་གྲུབ་སྩོལ། །དེ་ནས་ལས་བུམ་སྤོས་ཆུའའམ་འོ་མས་མེ་ལོང་ངོས་ཁྲུས་བྱས་ཏེ། ཀྱཻ། ནམ་མཁའ་ཡངས་པའི་མཐོང་གསེབ་ནས། །ཐུགས་རྗེའི་སྤྲིན་དཔུང་མཁའ་ལ་འདུས། །བྱིན་རླབས་ཆར་པ་ཤུགས་ལས་བྱུང་། །ས་གཞི་སེམས་ཅན་ཉོན་མོངས་དག་ཅིང་གཙང་། །དེ་འདྲའི་མཚན་གྱི་ཁྲུས་ཆབ་འདི། །སྣང་སྲིད་ས་བདག་ལྷ་ཀླུ་ལ། །དག་ཅིང་གཙང་མའི་ཁྲུས་ཆབ་གསོལ། །བག་ཆགས་དྲི་མ་དག་གྱུར་ཅིག །བག་ཆགས་དྲི་མ་དག་ནས་ཀྱང་། །ཤེལ་སྒོང་བཞིན་དུ་དག་གྱུར་ཅིག །ས་བདག་ལྷ་ཀླུ་དག་པ་ལྟར། །ཡོན་བདག་རྣམ་རྟོག་བྱང་གྱུར་ཅིག །གནམ་ཆབ་ས་ཆབ་བར་ཆབ་དང་། །སྤོས་དང་སྨན་དང་འོ་མ་དང་། །གཡུ་འབྲུག་ཁ་ཆུ་སེངྒེའི་འོ་མ་དང་། །བ་གླང་ཁ་ཆུ་རྒྱ་མཚོའི་ཁ་ཞག་དང་། །གསེར་གཡུ་དུང་གི་སྙིང་པོ་དང་། །དག་པའི་ཁྲུས་ཆབ་འདི་རྣམས་ནི། །
ཡིད་འོང་བཀྲ་ཤིས་ཞལ་བུ་གཏམས། །ཀོང་ཙེ་རྒྱལ་པོ་གཏོ་མཁན་གྱིས། །ས་བདག་ལྷ་ཀླུ་རྣམས་ལ་ཁྲུས་གསོལ་ལོ། །བག་ཆགས་དྲི་མ་དག་གྱུར་ཅིག །མཚན་མའི་རྣམ་རྟོག་བྱང་གྱུར་ཅིག །ལྷ་ཆེན་བརྒྱད་པོ་འཁོར་བཅས་ལ། །བདུད་རྩི་སྨན་ཆབ་འདི་གསོལ་ལོ། །ལྷ་ཡི་བག་ཆགས་དག་པར་ཤོག །ཀླུ་ཆེན་བརྒྱད་པོ་ཡབ་ཡུམ་འཁོར། །བདུད་རྩི་སྨན་ཆབ་འདི་གསོལ་ལོ། །ཀླུ་ཡི་བླུན་རྨོངས་དག་པར་ཤོག །གཟའ་དང་རྒྱུ་སྐར་ཐམས་ཅད་ལ། །བདུད་རྩི་སྨན་ཆབ་འདི་གསོལ་ལོ། །གཟའ་སྐར་གདུག་རྩུབ་དག་པར་ཤོག །ཉི་མའི་ལྷ་དང་ཟླ་བའི་ལྷ། །བདུད་རྩི་སྨན་ཆབ་འདི་གསོལ་ལོ། །ཉི་ཟླའི་འགྲམས་འཁྲུགས་དག་པར་ཤོག །གནམ་ས་བར་སྣང་ལྷ་རྣམས་ལ། །བདུད་རྩི་སྨན་ཆབ་འདི་གསོལ་ལོ། །གནམ་ས་བར་སྣང་འཁྲུགས་པ་དག་པར་ཤོག །ཤིང་ལ་གནས་པའི་གཉན་རིགས་ལ། །བདུད་རྩི་སྨན་ཆབ་འདི་གསོལ་ལོ། །གཉན་གྱི་དབང་པོ་ཉམས་པ་དག་པར་ཤོག །ས་གཞིར་གནས་པའི་ས་བདག་ལ། །བདུད་རྩི་སྨན་ཆབ་འདི་གསོལ་ལོ། །ས་བདག་དམེ་མནོལ་དག་པར་ཤོག །ཤར་ཤིང་ཁམས་རྒྱལ་པོ་འཁོར་
བཅས་ལ། །བདུད་རྩི་སྨན་ཆབ་འདི་གསོལ་ལོ། །སྙིང་དཀར་འགྲམས་འཁྲུགས་དག་པར་ཤོག །ལྷོ་མེ་ཁམས་རྒྱལ་པོ་འཁོར་བཅས་ལ། །བདུད་རྩི་སྨན་ཆབ་འདི་གསོལ་ལོ། །ས་བདག་དམེ་མནོལ་དག་པར་ཤོག །ནུབ་ལྕགས་ཁམས་རྒྱལ་པོ་འཁོར་བཅས་ལ། །བདུད་རྩི་སྨན་ཆབ་འདི་གསོལ་ལོ། །སྙིང་ནག་འགྲམས་མི་འཁྲུགས་དག་པར་ཤོག །བྱང་ཆུ་ཁམས་རྒྱལ་པོ་འཁོར་བཅས་ལ། །བདུད་རྩི་སྨན་ཆབ་འདི་གསོལ་ལོ། །དམུ་ཆུའི་ནད་རྣམས་དག་པར་ཤོག །མཚམས་བཞིར་བཞུགས་པའི་ས་བདག་ལ། །བདུད་རྩི་སྨན་ཆབ་འདི་གསོལ་ལོ། །གཤེད་བཞིའི་འཁྲུགས་ནད་དག་པར་ཤོག །ས་བདག་ཀླུ་གཉན་གཏོད་འཁོར་བཅས། །ཡུལ་ས་ལྕམ་དྲལ་གཙང་མའི་ལྷ་། །བདུད་རྩི་སྨན་ཆབ་འདི་གསོལ་ལོ། །མི་གཙང་འཁོན་འགྲས་དག་པར་ཤོག །གནམ་གྱི་ལྷ་དྲུག་བྱ་ཁྱུང་དཀར། །བདུད་རྩི་སྨན་ཆབ་འདི་གསོལ་ལོ། །དཔལ་མགོན་སྡེ་བརྒྱད་རྒྱལ་ཆེན་བཞིར། །བདུད་རྩི་སྨན་ཆབ་འདི་གསོལ་ལོ། །བག་ཆགས་སྡིག་སྒྲིབ་དག་གྱུར་ཅིག །སྡོང་གྲོགས་མགོན་སྐྱབས་མཛད་དུ་གསོལ། །བར་ཆད་རྐྱེན་རྣམས་
བྱང་བར་མཛོད། །རྒྱུ་སྦྱོར་ཡོན་བདག་འཁོར་བཅས་ལ། །ཀླུ་དང་ས་བདག་གཉན་གྱི་ནད། །གཏོད་དང་སྡེ་བརྒྱད་གདོན་གྱི་རིགས། །གློ་བུར་ཡེ་འདྲོག་ཞི་བ་དང་། །ནད་རིགས་ཐམས་ཅད་བྱང་བར་མཛོད། །བག་ཆགས་དྲི་མ་དག་གྱུར་ཅིག །དང་པོ་མེ་ལོང་ངོས་ལ་དཀྱིལ་འཁོར་ཁྲུས་བྱ། དེ་ནས་ཁྲུས་ཆུ་དེས་ཡོན་བདག་ལ་ཁྲུས་བྱའོ།། ༈ དེ་ནས་སྤྱི་བསྡུས་སུ་བཅོས་པ་ནི། མཆོད་པ་རྒྱ་ཆེར་བྱས་ལ། ཀྱཻ། སྣང་སྲིད་མངའ་བདག་ཁྱེད་རྣམས་ལ། །བདག་དང་ཡོན་བདག་དོན་ཆེད་དུ། །ཀོང་ཙེ་གཏོ་མཁན་དད་པ་ཡིས། །འཁྲུགས་པ་བཅོས་པའི་དོན་ཆེད་དུ། །རྫས་དང་ཡོ་བྱད་འབུལ་བ་ནི། །གནམ་ལ་ཁྲི་དཀར་ས་ལ་སྟོང་ནག་དང་། །རིན་ཆེན་སྣ་དགུ་དར་ཟབ་སྟག་གཟིག་དང་། །དར་ཚོན་བལ་ཚོན་བཟང་ཤིང་སྣ་ཚོགས་དང་། །འདབ་ཆགས་གཅན་གཟན་རི་དྭགས་གཡུང་དྭགས་དང་། །སྐྱེས་བུ་ན་ཆུང་རྫས་དང་ཡོ་བྱད་རྣམས། །སྣང་སྲིད་མངའ་བདག་ཁྱེད་རྣམས་ལ། །བྱིན་གྱིས་བརླབས་ནས་འབུལ་ལགས་ན། །བརྩེ་བར་དགོངས་ལ་བཞེས་སུ་གསོལ། །འཁྲུགས་པ་སོལ་ལ་གདུག་པ་ཟློག །མི་ལ་བདུད་དུ་མ་འབེབས་ཤིག །ཕྱུགས་ལ་གོད་དུ་མ་བརྫུ་ཞིག །
བཙའ་སད་སེར་གསུམ་མ་བཏང་ཞིག ཀྱཻ། ནམ་མཁའ་སྟོང་པའི་དབྱིངས་དཀྱིལ་ནས། །ལྷ་ཆེན་བརྒྱད་པོ་ལ་སོགས་ཏེ། །ལྷ་ཡི་སྡེ་ཚོགས་ཐམས་ཅད་ལ། །མཆོད་པའི་ཡོ་བྱད་འབུལ་བ་ནི། །གཡུ་འབྲུག་སྔོན་མོ་བྱ་ཁྱུང་དཀར་པོ་དང་། །དུང་གི་སེངྒེ་བ་གླང་སྨུག་པོ་དང་། །སྒང་ཐང་སྔོན་པོ་མཚལ་སྟག་དམར་པོ་དང་། །རིན་ཆེན་སྣ་ལྔ་དཀར་མངར་རྩི་སྨན་དང་། །སྟོང་ཚེ་སྟོང་ཕྲེང་ཕན་གདུགས་རྒྱལ་མཚན་དང་། །འབྲང་རྒྱས་ཞལ་དཀར་ངར་མི་རྒྱལ་པོ་དང་། །ལྷ་རྟ་སྙན་དཀར་ལྷ་གཡག་དཀར་པོ་དང་། །ལྷ་ལུག་དམར་རྩ་གླང་དམར་ཟིལ་དམར་དང་། །ཁྱིམ་བྱ་དམར་པོ་བྱ་ཕོ་ཤོག་ཚིལ་དང་། །ཚན་ཆབ་མར་མེ་ལྷ་བཤོས་དང་། །སྤོས་དང་མེ་ཏོག་རྩི་སྨན་དང་། །མཆོད་པའི་ཡོ་བྱད་བསམ་མི་ཁྱབ། །ལྷ་ཡི་སྡེ་ཚོགས་ཐམས་ཅད་ལ། །འཁྲུགས་པ་སེལ་བའི་དོན་ཆེད་དུ། །བདག་ཅག་དད་པས་འབུལ་ལགས་ན། །བརྩེ་བར་དགོངས་ལ་བཞེས་སུ་གསོལ། །འཁྲུགས་པ་གདུག་རྩུབ་བསྒྱུར་དུ་གསོལ། །གནམ་ནས་ཐོག་སེར་མ་འབེབས་ཤིག །མི་ལ་ན་ཚ་མ་བཏང་ཞིག །ཕྱུགས་ལ་གོད་ཡམས་མ་བཏང་ཞིག །འབྲུ་ཟན་
ལོ་ཐོག་ཐམས་ཅད་ལ། །བཙའ་སད་སེར་གསུམ་མ་བཏང་ཞིག །གདུག་པའི་ཆོ་འཕྲུལ་མ་བྱེད་ཅིག །ལྷ་དང་འགྲས་པ་ཡོད་ན་སྡུམས། ཀྱཻ། གནམ་གྱི་ལྷ་དང་ས་ཡི་ལྷ། །ཉི་མའི་ལྷ་དང་ཟླ་བའི་ལྷ། །ལྷ་ཡི་སྡེ་ལ་གཏོགས་པ་ལ། །འཁྲུགས་པ་བསལ་བའི་དོན་ཆེད་དུ། །ཡོ་བྱད་སྣ་ཚོགས་འབུལ་བ་ནི། །གསེར་གྱི་སྐྱེས་བུ་གཡུ་ཡི་ན་ཆུང་དང་། །འབྲས་ཀྱི་གཡག་ལུག་ར་སྐྱེས་དང་། །རྟ་དཀར་གླང་དཀར་དར་ཚོན་བལ་ཚོན་དང་། །མཆོད་རྫས་སྣ་ཚོགས་བསམ་མི་ཁྱབ། །ཁྱེད་ལ་མཆོད་པ་འདི་འབུལ་བས། །གནམ་སའི་འཁྲུགས་པ་བསལ་དུ་གསོལ། །ཉི་ཟླའི་འཁྲུགས་པ་ཞི་བར་གྱིས། །དལ་ཡམས་ནད་ཁ་བསྒྱུར་དུ་གསོལ། །འོད་ཟེར་ངན་པ་བསྒྱུར་དུ་གསོལ། །གནམ་ས་འཁྲུགས་པ་ཡོན་གྱིས་བཅོས། །ཉི་ཟླའི་འཁྲུགས་པ་བད་ཀྱིས་བཅོས། །འཁྲུགས་པ་སོལ་ལ་འགྲས་པ་སྡུམས། །བར་སྣང་སྟོང་པའི་དབྱིངས་སུ་བཅོས། །གནམ་ས་ཉི་ཟླ་མ་འཁྲུགས་ཤིག ཀྱཻ། བར་སྣང་ཁམས་ལ་རྒྱུ་བ་ཡི། །གཟའ་དང་རྒྱུ་སྐར་ཐམས་ཅད་ལ། །གཟའ་སྐར་འཁྲུགས་པ་བསལ་བའི་ཕྱིར། །མཆོད་ཡོན་སྣ་ཚོགས་འབུལ་བ་ནི། །
གཟའ་ར་གཟའ་ལུག་མཆོད་པ་དང་། །འབྲུ་སྣ་དར་ཚོན་བལ་ཚོན་དང་། །རིན་ཆེན་གསེར་རྒོད་གཡུ་རྒོད་དང་། །ཚན་ཆབ་མར་མེ་ལྷ་བཤོས་དང་། །སྤོས་དང་མེ་ཏོག་འབྲང་རྒྱས་དང་། །གཞན་ཡང་མཆོད་རྫས་སྣ་ཚོགས་འདི། །ཡོན་བདག་དད་པས་འབུལ་ལགས་ན། །ཐུགས་དམ་དབང་གིས་བཞེས་སུ་གསོལ། །འཁྲུགས་པ་བཅོས་ལ་གདུག་པ་སོལ། །གཟའ་ཆེན་དལ་བུ་མ་འབེབས་ཤིག །རྒྱུ་སྐར་ཟེར་དུ་མ་ལྷུང་ཞིག་།གཟའ་སྐར་འཁྲུགས་པ་ཡོན་གྱིས་བཅོས། །འགྲས་པ་སྡུམས་ལ་ཡོ་བ་སྲོངས། །མ་ཐུར་མ་བསྔངས་མ་ཁྲོ་ཞིག །གཟའ་ཆེན་གནམ་ཁྱི་དབུས་སུ་བཅོས། །རྒྱུ་སྐར་དགུང་ཚིགས་གཞུང་དུ་བཅོས། །གཟའ་སྐར་གདུག་རྩུབ་བསལ་དུ་གསོལ། །བདག་དང་ཡོན་གྱི་བདག་པོ་ཡི། །མི་གྲངས་ཁྲོལ་ལ་ཕྱུགས་རྩི་སྤེལ། །ཚེ་དང་དབང་ཐང་བསྐྱེད་དུ་གསོལ། །གཟའ་དང་སྐར་མ་ཡོན་གྱིས་བཅོས། ཀྱཻ། གནམ་ཁྱི་ལྷ་མོ་སྤུན་བདུན་དང་། །ཕོ་ཉ་གནམ་ཁྱི་འཁོར་དང་བཅས། །མཆོད་ཡོན་དམ་པ་འབུལ་བ་ནི། །ར་བདུན་ལུག་བདུན་མེ་ལོང་བདུན། །ཆུ་ཡི་བུམ་པ་འོ་མའི་རྫིང་བུ་བདུན། །
མདའ་དར་རལ་གྲི་མདུང་དར་རྣམས། །ཁྱེད་ལ་བསྟོད་དེ་མཆོད་པ་འབུལ། །གདུག་པའི་ཕྱག་བརྙན་མ་འགྱེད་ཅིག །ལྷ་མོའི་ཆོ་འཕྲུལ་མ་བཏང་ཞིག །གནམ་ཁྱིའི་གདུག་པ་མ་བཏང་ཞིག །ནད་དང་གློ་བུར་མ་བཏང་ཞིག །རྐྱེན་དང་བར་ཆད་བཟློག་ཏུ་གསོལ། །མཐུན་པའི་དངོས་གྲུབ་བསྩལ་དུ་གསོལ། །བདག་ལ་སྩོལ་ཞེས་པའང་སྣང་། མཆན། ཀྱཻ། རྒྱ་མཚོ་ཆུ་ལ་གནས་པ་ཡི། །ཀླུ་ཆེན་བརྒྱད་པོ་འཁོར་བཅས་ལ། །མཆོད་ཡོན་སྣ་ཚོགས་འབུལ་བ་ནི། །ཀླུ་ཡི་དཀོར་ནོར་བསམ་མི་ཁྱབ། །རྩི་སྨན་བདུད་རྩིའི་འོ་མ་དང་། །ཀ་ར་བུ་རམ་ཤིང་མངར་དང་། །དཀར་གསུམ་མངར་གསུམ་ཀླུ་སྨན་སོགས། །སྟོང་ཚེ་སྟོང་ཕྲེང་ཕན་དང་བཅས། །ཚན་ཆབ་མར་མེ་ལྷ་བཤོས་དང་། །སྤོས་དང་མེ་ཏོག་འབྲང་རྒྱས་དང་། །ཉ་དུང་སྦྲུལ་དང་སྦལ་པ་དང་། །མཆོད་ཡོན་བྱེ་བྲག་མང་པོ་འདི། །བདག་ཅག་དད་པས་འདི་འབུལ་བས། །ཞེ་སྡང་གདུག་པའི་སེམས་བོར་ལ། །ཞི་བ་བྱམས་པས་བཞེས་སུ་གསོལ། །འཁྲུགས་པ་བཅོས་ལ་ཀླུ་ནད་སོལ། །བདག་དང་ཡོན་གྱི་བདག་པོ་ལ། །ཀླུ་ཡི་འཁྲུགས་པ་མ་བྱེད་ཅིག །ཀླུ་བདུད་གདུག་པ་ཞི་བར་གྱིས། །
ཆུ་བདུད་ཆུ་བཙན་བསྒྱུར་དུ་གསོལ། །ཀླུ་དང་འགྲས་པ་ཡོན་གྱིས་བསྡུམ། །མི་ལ་ཡེ་འབྲོག་མ་བཏང་ཞིག །ནོར་ལ་གོད་ཡམས་མ་བཏང་ཞིག །དལ་ཡམས་ནད་ཁ་བསྒྱུར་དུ་གསོལ། །ཀླུ་ཆེན་བརྒྱད་པོ་འཁོར་བཅས་རྣམས། །རྒྱ་མཚོ་ཆེན་པོའི་གནས་སུ་བཅོས། །བདག་དང་རྒྱུ་སྦྱོར་ཡོན་བདག་ལ། །ཀླུ་ཡི་དངོས་གྲུབ་བསྩལ་དུ་གསོལ། ཀྱཻ། ཤིང་ལ་གནས་པའི་གཉན་རིགས་རྣམས། །བདག་དང་ཡོན་བདག་འཁྲུགས་པ་བསལ་སླད་དུ། །མཆོད་ཡོན་དམ་རྫས་འབུལ་བ་ནི། །བྱ་རྒོད་ཐང་དཀར་ཁྲུང་ཁྲུང་དཀར་མོ་དང་། །ཁུ་བྱུག་སྔོན་མོ་བྱ་ཕོ་ཚལ་བུ་དང་། །ཐི་བ་རྒྱ་བོ་ཅོ་ག་གྲོ་མོ་དང་། །གཉན་རྟ་གཉན་ལུག་གཉན་གཡག་དང་། །དར་ཟབ་གསེར་གཡུ་རིན་པོ་ཆེ། །ཤེལ་ཚིགས་བྱ་སྤུ་དར་ཚོན་བལ་ཚོན་དང་། །སྟག་པ་ཤུག་པ་སུར་དཀར་དང་། །སྦ་དང་སྙུག་མ་མེ་ལོང་དང་། །གསེར་དང་དུང་དཀར་གཟི་མཆོང་རྣམས། །མཆོད་ཡོན་རྣམ་པ་སྣ་ཚོགས་འདི། །དད་པའི་སེམས་ཀྱིས་འབུལ་ལགས་ན། །ཞི་བ་བྱམས་པའི་སེམས་ཀྱིས་བཞེས་སུ་གསོལ། །གཉན་གྱི་འཁྲུགས་པ་ཡོན་གྱིས་བཅོས། །
བདག་ཅག་ཡོན་མཆོད་འཁོར་བཅས་ལ། །གཉན་གྱི་དལ་ཡམས་མ་བཏང་ཞིག །གཉན་གྱི་འཁྲུགས་པ་མ་བྱེད་ཅིག །འགྲས་པ་སྡུམས་ལ་ཡོ་བ་སྲོངས། །རང་རང་བདེ་བའི་གནས་སུ་བཅོས། །མི་གྲངས་སྤེལ་ལ་ཕྱུགས་རྩི་ཁྲོལ། །གཉན་གྱི་སྡེ་རིགས་མ་འཁྲུགས་ཤིག ཀྱཻ། ས་ལ་མངའ་མཛད་ས་བདག་འཁོར་དང་བཅས། །མཆོད་པས་མཉེས་པར་བྱ་བའི་ཕྱིར། །དཀོར་ནོར་མང་པོ་འབུལ་བ་ནི། །བྱ་ཁྱུང་ལ་སོགས་འདབ་ཆགས་དང་། །སེངྒེ་ལ་སོགས་གཅན་གཟན་དང་། །གླང་པོ་ལ་སོགས་དུད་འགྲོ་དང་། །རི་དྭགས་གཡུང་དྭགས་དགོས་པའི་ནོར། །གསེར་རྒོད་གཡུ་རྒོད་རིན་ཆེན་དང་། །ཤ་ཕུད་ཆང་ཕུད་མཆོད་པ་དང་། །མདའ་མདུང་རལ་གྲི་མཚོན་ཆ་དང་། །ཕན་གདུགས་བླ་བྲེ་རྒྱལ་མཚན་དང་། །དར་དཔྱངས་ཡོལ་བ་ཤམ་དཀྲིས་དང་། །དཀྱིལ་འཁོར་བུམ་པ་མཆོད་རྟེན་དང་། །དར་དང་ཟ་འོག་བཟང་ཤིང་སྣ་ཚོགས་དང་། །རྒྱ་ཚྭ་ལན་ཚྭ་ཤིང་ཚྭ་ཁ་རུ་ཚྭ། །མེ་ལོང་སྟོང་ཚེ་འཁོར་ལོ་དང་། །ཤེལ་ཚིགས་བྱ་སྤུ་རྩི་སྨན་དང་། །རྫས་དང་དཀོར་ནོར་མང་པོ་རྣམས། ཡོན་བདག་དོན་དུ་འབུལ་ལགས་ན། །ཐུགས་རྗེས་
དགོངས་ལ་བཞེས་སུ་གསོལ། །ས་བདག་འཁྲུགས་པ་བསལ་དུ་གསོལ། །མི་ལ་བདུད་དུ་མ་འབེབས་ཤིག །ཕྱུགས་ལ་གོད་དུ་མ་བརྫུ་ཞིག །ས་བདག་འཁྲུགས་པ་ཞི་བར་མཛོད། །ཤར་ཤིང་ཁམས་རྒྱལ་པོ་འཁོར་དང་བཅས། །ས་བདག་དཔྱིད་ལ་མངའ་མཛད་པ། །ཁྱེད་ལ་མཆོད་ཡོན་སྣ་ཚོགས་འབུལ། །གདུང་མ་མ་ཆོག་ཀ་ཚེ་བ་མ་འགྱེལ་ཅིག །འཁྲུགས་པ་བཅོས་སོ་འགྲས་པ་སྡུམས། །ལྷོ་མེ་ཁམས་རྒྱལ་པོ་འཁོར་དང་བཅས། །ས་བདག་དབྱར་ལ་མངའ་མཛད་པ། །ཁྱེད་ལ་མཆོད་ཡོན་སྣ་ཚོགས་འབུལ། །གདུང་མ་མ་ཆག་ཀ་བ་མ་འགྱེལ་ཅིག །འཁྲུགས་པ་བཅོས་སོ་འགྲས་པ་སྡུམས། །ནུབ་ལྕགས་ཁམས་རྒྱལ་པོ་འཁོར་དང་བཅས། །ས་བདག་སྟོན་ལ་མངའ་མཛད་པ། །ཁྱེད་ལ་མཆོད་ཡོན་སྣ་ཚོགས་འབུལ། །གདུང་མ་མ་ཆག་ཀ་བ་མ་འགྱེལ་ཅིག །རིགས་རྒྱུད་དབང་ཐང་དར་བར་མཛོད། །འཁྲུགས་པ་བཅོས་སོ་འགྲས་པ་སྡུམས། །བྱང་ཆུ་ཁམས་རྒྱལ་པོ་འཁོར་དང་བཅས། །ས་བདག་དགུན་ལ་མངའ་མཛད་པ། །ཁྱེད་ལ་མཆོད་ཡོན་སྣ་ཚོགས་འབུལ། །གདུང་མ་མ་ཆག་ཀ་བ་མ་འགྱེལ་ཅིག །འཁྲུགས་པ་
བཅོས་སོ་འགྲས་པ་སྡུམས། །དབུས་ཀྱི་ས་བདག་རྒྱལ་ཆེན་བཞི། །མཆོད་ཡོན་དམ་པ་འདི་འབུལ་བས། །བརྩེ་བར་དགོངས་ལ་བཞེས་སུ་གསོལ། །དམུ་དག་ཟུངས་ལ་ཕྲུ་གཡང་སྐྱོབས། །གནམ་གྱི་གདུང་མ་མ་ཆག་ཅིག །ས་ཡི་ཀ་བ་མ་བུད་ཅིག །ས་བདག་འཁྲུགས་པ་ཡོན་གྱིས་བཅོས། །འཁྲུགས་པ་བཅོས་སོ་འགྲས་པ་སྡུམས། ཀྱཻ། ཡང་ཅིག་ས་བདག་རྒྱལ་བློན་ལ། །མཆོད་པའི་བྱེ་བྲག་མང་པོ་ནི། །རིན་ཆེན་སྣ་ལྔ་སྟོང་ཚེ་སྟོད་ཕྲེང་དང་། །འབྲུ་ཟན་སྣ་ཚོགས་བྱོལ་སོང་སྣ་ཚོགས་དང་། །དཀྱིལ་འཁོར་གཙང་ཡངས་ལྷ་མདའ་སྟོང་དཀར་དང་། །པགས་བུ་དཀར་འཁྱིལ་དཀོར་ཆ་སྣ་ཚོགས་དང་། །མཆོད་པའི་བྱེ་བྲག་དཔག་མེད་མང་པོ་ཡིས། །ས་བདག་རྫོགས་པ་ཆེན་པོ་འཁོར་བཅས་ལ། །ཡོན་བདག་དད་པས་གདུང་བའི་སེམས་ཕྱུང་ནས། །བསམ་པ་དག་པས་མཆོད་ཡོན་བསྔོས་པ་བཞེས། །དབང་ཆེན་ཁྱེད་ཀྱི་མཐུ་དང་དགོངས་པ་ཡིས། །བདག་ལ་ཐུགས་རྗེས་དངོས་གྲུབ་བསྩལ་དུ་གསོལ། །འཁྲུགས་པ་སོལ་ལ་གདུག་པ་ཆིངས། །འགྲས་པ་སྡུམས་ལ་ཡོ་བ་སྲོངས་། དབང་ཆེན་ས་བདག་རྒྱལ་པོ་ལ། །དེ་རིང་བདག་
གིས་མཆོད་པ་འབུལ། །ལོ་རྒྱལ་པོའི་ལྷ་ལ་མཆོད་པ་འབུལ། །ཟླ་བ་བློན་པོའི་ལྷ་ལ་མཆོད་པ་འབུལ། །ཞག་དམག་མིའི་ལྷ་ལ་མཆོད་པ་འབུལ། །དུས་ཚོད་མཚོན་ཆའི་ལྷ་ལ་མཆོད་པ་འབུལ། །ལོ་ཟླ་ཞག་དང་དུས་ཚོད་ཀྱི། །ས་བདག་དབང་ཆེན་འཁོར་བཅས་ཀྱི། །འཁྲུགས་པ་སོལ་ལ་གདུག་པ་ཆིངས། །ས་བདག་གཉན་པོ་པ་ཁྱེད་རྣམས་ལ། །གསེར་གྱི་འཁོར་ལོ་བརྒྱད་ཁྲི་བཞི་སྟོང་འབུལ། །གསེར་གྱི་སེང་གེ་བརྒྱད་ཁྲི་བཞི་སྟོང་འབུལ། །གསེར་གྱི་བན་གླང་བརྒྱད་ཁྲི་བཞི་སྟོང་འབུལ། །གསེར་གྱི་ཤིང་རྟ་བརྒྱད་ཁྲི་བཞི་སྟོང་འབུལ། །གསེར་གྱི་ལྗོན་ཤིང་བརྒྱད་ཁྲི་བཞི་སྟོང་འབུལ། །འབྲུ་བཅུད་ལྡན་པ་བརྒྱད་ཁྲི་བཞི་སྟོང་འབུལ། །ལོ་རྒྱལ་པོས་འཁྲུགས་པ་མ་བྱེད་ཅིག །ཟླ་བ་བློན་པོས་འཁྲུགས་པ་མ་བྱེད་ཅིག །ཞག་དམག་མིའི་འཁྲུགས་པ་མ་བྱེད་ཅིག །དུས་ཚོད་མཚོན་ཆས་འཁྲུགས་པ་མ་བྱེད་ཅིག །མི་ལ་ན་ཚ་མ་བཏང་ཞིག །ཕྱུགས་ལ་གོད་ཡམས་མ་བཏང་ཞིག །ཞིང་ལ་བཙའ་སད་སེར་གསུམ་མ་བཏང་ཞིག །ཡོན་དང་བད་ཀྱིས་ཁྱེད་རྣམས་བཅོས། །གནམ་གྱི་གདུང་མ་ཆག་ཅིག །ས་ཡི་ཀ་བ་མ་བུད་ཅིག །
མི་ནོར་ཀ་བ་འགྱེལ་བར་སྤོངས། །འཁྲུགས་པ་བཅོས་ལ་འགྲས་པ་སྡུམས། །ཆད་པ་མཐུད་ལ་གས་པ་སྦྱོར། །རྩི་དང་སྨན་གྱི་འགྲས་པ་བསྡུམ། །ཡོན་དང་བད་འབུལ་འཁྲུགས་པ་བཅོས། ཀྱཻ། །ཉི་མ་ཤར་ཕྱོགས་ཤིང་གི་ཁམས། །ཟིན་ཁམས་རྒྱལ་པོ་འཁོར་བཅས་ལ། །ཡོ་བྱད་སྣ་ཚོགས་འབུལ་བ་ནི། །ར་དཀར་ལུག་དཀར་བོང་དྲེལ་ཤ་རྣ་དང་། །སྦ་སྨྱུག་མདའ་དར་ཐང་ཤིང་རེ་རལ་དང་། །ཁྲེ་དང་མཆིན་པ་ལ་སོགས་ཏེ། །དེ་དག་མཆོད་པ་འབུལ་ལོ་བཞེས་སུ་གསོལ། །སྙིང་དཀར་འཁྲུགས་པ་བསལ་དུ་གསོལ། །གཉན་དང་ཤིང་གྲིབ་བསལ་དུ་གསོལ། །ས་བདག་འཁྲུགས་པ་ཞི་བར་མཛོད། །ཟིན་ཁམས་ཉི་མ་ཤར་དུ་བཅོས། །ས་བདག་སྙིང་དཀར་ཤར་དུ་བཅོས། །ཟོན་ཁམས་རྒྱལ་པོ་འཁོར་བཅས་ལ། །རྔ་མོང་རྔ་བྲན་རྨ་བྱ་ཟབ་ཆེན་དང་། །ཤེལ་ཚིགས་བྱ་སྤུ་ངར་མི་དང་། །མཛོ་དང་སྨྱུག་མ་གཟི་ཐུལ་དང་། །གསོ་མ་མཚེར་པ་ཏིལ་ཅང་ཏིལ། །ནམ་མཁའ་ཤིང་རིས་སྣ་ཚོགས་རྣམས། །ཤར་ལྷོ་ཟོན་ཁམས་རྣམས་ལ་འབུལ། །ཟོན་གྱི་འཁྲུགས་པ་བསལ་དུ་གསོལ། །ཡམས་གྲི་བཟེད་བཙན་བསྒྱུར་དུ་གསོལ། །
སྨྱོ་འབོག་ནད་ཡམས་བསྒྱུར་དུ་གསོལ། །གོད་ཡམས་གདུག་པ་བསྒྱུར་དུ་གསོལ། །གཤེད་ཀྱི་གདུག་པ་བསྒྱུར་དུ་གསོལ། །ཟོན་ཁམས་ཤར་ལྷོ་མཚམས་སུ་བཅོས། །འཁྲུགས་པ་བཅོས་ལ་འགྲས་པ་བསྡུམ། །ལྷོ་ཕྱོགས་ལི་ཁམས་རྒྱལ་པོ་ལ། །རྒོད་མ་དམར་ཞུར་བྱ་ཕོ་མཚལ་བུ་དང་། །གཡུ་དང་ཞྭ་ཕྱིང་སྟོད་གོས་མཛོ་མོ་གྲོ། །ཚེར་མོ་དམར་རྩ་དར་དམར་རྟ་དམར་པོ། །སྙིང་དང་མིག་འབྲས་དར་ཚོན་བལ་ཚོན་འབུལ། །ལི་མེ་ཁམས་རྒྱལ་པོ་ལྷོ་རུ་བཅོས། །ལི་ཡི་འཁྲུགས་པ་བསལ་དུ་གསོལ། །གཉན་གྱི་འཁྲུགས་པ་ཞི་བར་མཛོད། །གཉན་གྱི་ནད་སྣ་མ་འདྲེན་ཅིག །འཁྲུགས་པ་བཅོས་ལ་གདུག་པ་སོལ། །ལྷོ་ནུབ་ཁོན་ཁམས་རྒྱལ་པོ་ལ། །བ་སེར་ལུག་མོ་མགོ་སེར་དང་། །སྦ་དང་འོམ་བུ་གོ་ཟུ་ཟར་མ་དང་། །དར་སེར་མཚེར་པ་ངར་མི་འབྲང་རྒྱས་དང་། །ཡོ་བྱད་སྣ་ཚོགས་ཚང་བ་འདི། །བདག་ཅག་དད་པས་འབུལ་ལགས་ན། །ཁོན་རྒྱུས་ཁམས་རྒྱལ་པོས་བཞེས་སུ་གསོལ། །མ་ཡམས་འཁྲུགས་པ་ཞི་བར་མཛོད་། །ས་སྒོ་དུར་སྒོ་གྱོད་སྒོ་ཚོངས། །གཤེད་ཀྱི་འཁྲུགས་པ་བསལ་དུ་གསོལ། །ཁོན་གྱི་གདུག་
རྩུབ་བསྒྱུར་དུ་གསོལ། །ཁོན་མ་ལྷོ་ནུབ་མཚམས་སུ་བཅོས། །འཁྲུགས་པ་བཅོས་ལ་གདུག་པ་སོལ། །ནུབ་ཕྱོགས་དྭ་ཁམས་རྒྱལ་པོ་ལ། །གཡག་རོག་ར་རོག་བྱ་ཕོ་རོག །ལུག་ནག་སྤྱི་དཀར་ཤིང་སྟག་པ། །ཙི་ཙི་ཁྲབ་དང་གློ་བ་དུམ། །སྙིང་སྣ་ཚོགས་དང་དར་དཀར་པན། །དྭ་ལྕགས་ཁམས་འཁོར་དང་བཅས་ལ་འབུལ། །བརྩེ་བར་དགོངས་ལ་བཞེས་སུ་གསོལ། །སྙིང་ནག་འཁྲུགས་པ་བསལ་དུ་གསོལ། །གྲི་བདུད་གྲི་བཙན་བསྒྱུར་དུ་གསོལ། །མཚོན་གྱི་བསྐལ་པ་བཟློག་ཏུ་གསོལ། །སྙིང་ནག་གདུག་པ་ཞི་བར་མཛོད་། །ས་བདག་སྙིང་ནག་འཁོར་བཅས་རྣམས། །ཉི་མ་ནུབ་ཀྱི་ཕྱོགས་སུ་བཅོས། །འཁྲུགས་པ་སོལ་ལ་གདུག་པ་ཟློག །ནུབ་བྱང་ཁེན་ཁམས་འཁོར་བཅས་ལ། །རྟ་རྒན་གླང་རྒན་མཛོ་རྒན་དང་་། །ཐུག་རྒན་བྱ་རྒན་ཤིང་རྒན་དང་། །ཁྲབ་རྒན་ར་རྒན་སྟག་རྒན་དང་། །ཁྱི་རྒན་སྲན་མ་བོན་པོའི་གོས། །མཚེར་པ་གཡི་སྤྱང་མཆོད་པའི་ཡོ་བྱད་རྣམས། །བདག་ཅག་དད་པས་འབུལ་ལགས་ན། །བརྩེ་བར་དགོངས་ལ་བཞེས་སུ་གསོལ། །ཁེན་པ་ནུབ་བྱང་མཚམས་སུ་བཅོས། །གནམ་ལྷ་དཀར་པོ་མ་འཁྲུགས་
ཤིག །ཡར་བདུད་ཡར་བཙན་བསྒྱུར་དུ་གསོལ། །ཐོག་དང་སེར་བའི་སྣ་མ་འདྲེན། །བདུད་དང་གཤེད་དུ་མ་བརྫུ་ཞིག །འཁྲུགས་པ་བསལ་ལོ་གདུག་རྩུབ་སོལ། །བྱང་ཆུ་ཁམས་རྒྱལ་པོ་འཁོར་བཅས་ལ། །མཛོ་སྔོན་གླང་སྔོན་ལུག་ནག་དང་། །བ་ཟལ་ཕག་ནག་ཤིང་སྤེན་མ། །ཤམ་གོས་རྫ་ཟངས་ནག་པོ་དང་། །ཡུངས་ཀར་ཡུངས་ནག་མཁལ་མ་དང་། །དར་ནག་པན་དང་དཀོར་ནོར་དེ་རྣམས་ཀྱིས། །ཆུ་ཁམས་འཁོར་དང་བཅས་ལ་འབུལ། །བྱམས་པའི་སེམས་ཀྱིས་བཞེས་སུ་གསོལ། །ཀླུ་ཡི་འཁྲུགས་པ་ཞི་གྱུར་ཅིག །ཆུ་བདུད་ཆུ་གྲི་བསྒྱུར་དུ་གསོལ། །ཆུ་བཙན་ཁ་ཡོག་བསྒྱུར་དུ་གསོལ། །ཆུ་ཁམས་ཉི་མ་བྱང་དུ་བཅོས། །འཁྲུགས་པ་བསལ་ལོ་གདུག་རྩུབ་བསྒྱུར། །བྱང་ཤར་གིན་ཁམས་རྒྱལ་པོ་ལ། །གླང་སེར་ལུག་ཐོང་སྟོད་སེར་དང་། །མཚེར་པ་མཆོད་རྟེན་རྒྱ་དར་སེར་པོའི་པན། །ཤིང་སེ་བ་ངུར་སྨིག་སྤྲེའུའི་འབྲུ། །བདག་ཅག་དད་པས་འབུལ་ལགས་ན། །བྱམས་པའི་སེམས་ཀྱིས་བཞེས་སུ་གསོལ། །གིན་རི་བྱང་ཤར་མཚམས་སུ་བཅོས། །ས་བདག་འཁྲུགས་པ་བསལ་དུ་གསོལ། །ནད་ཡམས་
གདུག་པ་མ་བཏང་ཞིག །ས་སྒོ་གཤེད་སྒོ་དུར་སྒོ་ཆོད། །བརྒྱལ་ནད་སྨྱོ་འབོག་བསལ་དུ་གསོལ། །འཁྲུགས་པ་བཅོས་ལ་གདུག་པ་སོལ། ཀྱཻ། ལོ་སྐོར་བཅུ་གཉིས་མངའ་མཛད་པ། །ལོ་ལྷ་རྒྱལ་པོ་བཅུ་གཉིས་ལ། །མཆོད་པའི་ཡོ་བྱད་འདི་འབུལ་ལོ། །ལོ་ལྷའི་འཁྲུགས་པ་བསལ་དུ་གསོལ། །ལོ་ལྷ་མི་མཐུན་པ་རྣམས་བསྒྱུར་དུ་གསོལ། །སྨེ་བ་དགུ་ཡི་ས་བདག་ལ། །མཆོད་པའི་ཡོ་བྱད་འདི་འབུལ་ལོ། །སྨེ་བའི་ཆད་མལ་བསལ་དུ་གསོལ། །སྨེ་བའི་དགྲ་གཤེད་དགུ་མིག་སྒྱུར། །སྨེ་བ་མི་མཐུན་པ་རྣམས་བསྒྱུར་དུ་གསོལ། །འབྱུང་བ་ལྔ་ཡི་ལྷ་ལྔ་ལ། །མཆོད་པའི་ཡོ་བྱད་འདི་འབུལ་ལོ། །བརྩེ་བར་དགོངས་ལ་བཞེས་སུ་གསོལ། །འབྱུང་ལྔའི་འཁྲུགས་པ་དྭངས་བར་གྱིས། །འཁྲུགས་པ་སོལ་ལ་གདུག་པ་ཆིངས། །དུས་བཞིའི་རྒྱལ་པོ་སྡེ་བཞི་ལ། །རྫ་ས་དང་ཡོ་བྱད་འདི་འབུལ་ལོ། །དུས་བཞིའི་འཁྲུགས་པ་བསལ་དུ་གསོལ། ཀྱཻ། རིན་ཆེན་རྡོ་བྲག་ཕ་བོང་གདན་སྟེང་ན། །གཏོད་ཆེན་རིགས་བཞི་སྡེ་བཞི་དང་། །གཏི་མུག་གླང་སྙིང་ལ་སོགས་ཏེ། །གཏོད་ཀྱི་སྡེ་ཚོགས་ཐམས་ཅད་ལ། །མཆོད་ཡོན་སྣ་ཚོགས་འབུལ་བ་ནི། །
གསེར་རྒོད་གཡུ་རྒོད་ལྷ་བཤོས་དང་། །འབྲང་རྒྱས་པན་གདུགས་རྒྱལ་མཚན་དང་། །སྟོང་ཚེ་ཤིང་རིས་བཟང་ཤིང་དང་། །དར་ཚོན་བལ་ཚོན་ཤེལ་ཚིགས་བྱ་སྤུ་དང་། །རྫས་དང་རྐང་འགྲོས་བསམ་མི་ཁྱབ། །གཏོད་རིགས་རྣམས་ལ་འབུལ་ལགས་ན། །བརྩེ་བར་དགོངས་ལ་བཞེས་སུ་གསོལ། །གཏོད་ཀྱི་འཁྲུགས་པ་དྭངས་བར་གྱིས། །གདུག་པའི་སེམས་དང་བྲལ་ནས་ནི། །བྱམས་པའི་སེམས་དང་ལྡན་གྱུར་ཅིག །གཏོད་ཀྱི་འཁྲུགས་པ་ཡོན་གྱིས་བཅོས། །འགྲས་པ་སྡུམས་ལ་ཡོ་བ་སྲོངས། །ཆད་པ་མཐུད་ལ་རྩི་སྨན་གསོལ། །མཐུ་དང་སྡོང་གྲོགས་མཛད་དུ་གསོལ། ཀྱཻ། རྒྱལ་ཆེན་བཞི་དང་ཕྱོགས་སྐྱོང་བཅུ། །དཔལ་མགོན་སྡེ་བརྒྱད་ལྷ་སྲིན་ཚོགས། །གདོན་བགེགས་འབྱུང་པོ་ལ་སོགས་ཏེ། །སྡེ་བརྒྱད་ལན་ཆགས་བདག་པོ་དང་། །སྣང་སྲིད་མངའ་བདག་ཐམས་ཅད་ལ། །མཆོད་པའི་བྱེ་བྲག་མང་པོ་ནི། །འདབ་ཆགས་གཅན་གཟན་དུད་འགྲོ་དང་། །རི་དྭགས་གཡུང་དྭགས་མི་ནོར་དང་། །རིན་ཆེན་བཟང་ཤིང་འབྲུ་སྣ་དང་། །ངར་མི་དར་ཚོན་བལ་ཚོན་དང་། །ནམ་མཁའ་རྒྱང་བུ་ཤེལ་ཚིགས་དང་། །
ཤ་ཁྲག་གཏོར་མ་མང་པོ་དང་། །ཡོ་བྱད་སྣ་ཚོགས་བསམ་མི་ཁྱབ། །སྣང་སྲིད་ནོར་གྱིས་གང་བར་བྱས། །དད་པའི་སེམས་ཀྱིས་འབུལ་ལགས་ན། །བརྩེ་བར་དགོངས་ལ་བཞེས་སུ་གསོལ། །འཁྲུགས་པ་བཅོས་ལ་གདུག་པ་སོལ། །སྣང་སྲིད་མངའ་བདག་ཁྱེད་རྣམས་ཀྱིས། །མཆོད་ཡོན་དམ་པ་འདི་བཞེས་ལ། །མི་ལ་བདུད་དུ་མ་འབེབས་ཤིག །ཕྱུགས་ལ་གོད་དུ་མ་བརྫུ་ཞིག །དགྲ་སྣ་ཡམས་སྣ་མ་འདྲེན་ཞིག །དགྲ་གཤེད་ནད་ཡམས་བསྒྱུར་དུ་གསོལ། །ཡེ་འབྲོག་གློ་བུར་བཟློག་ཏུ་གསོལ། །རྐྱེན་དང་བར་ཆད་བསྒྱུར་དུ་གསོལ། །ལན་ཆགས་ཉེས་སྒྲིབ་བྱང་བར་མཛོད། །ཐན་དང་ལྟས་ངན་བསྒྱུར་དུ་གསོལ། །བདག་དང་ཡོན་གྱི་བདག་པོ་ཡི། །མི་གྲངས་སྤེལ་ལ་ཕྱུགས་རྩི་ཁྲོལ། །དམུ་ཐག་ཟུངས་ལ་ཕྲུ་གཡང་སྐྱོབས། །རྒན་ཚེ་སྲིངས་ལ་གཞོན་དཔལ་སྐྱེད། །མཐུ་དང་སྟོང་གྲོགས་མཛད་དུ་གསོལ། །མངའ་བདག་འཁྲུགས་པ་ཡོན་གྱིས་བཅོས། །མི་གྲངས་ཀ་བ་ཚུགས་པར་ཤོག །ནོར་གྱི་གདུང་མ་ཆག་ན་མཐུད། །གཡང་གི་བྲེ་ཕུལ་སྟོང་ན་ཁོང་། །དུར་གྱི་ཐེམ་བུ་ཤད་ན་ཚོངས། །ཚེ་ཡི་རྨུ་ཐག་ཆད་ན་མཐུད། །ཡོ་བ་
བཅོས་ལ་འགྲས་པ་སྡུམས། །འཁྲུགས་པ་བཅོས་ལ་མནོལ་བ་སངས། །སྙིང་རྗེའི་མགྲོན་དང་རིགས་དྲུག་ལ། །འདོད་པའི་ཡས་སྟགས་འདི་བསྔོས་པས། །སྡུག་བསྔལ་ཀུན་ལས་ཐར་ནས་ནི། །བླ་མེད་འབྲས་བུ་ཐོབ་གྱུར་ཅིག །བཀྲ་ཤིས་བདེ་ལེགས་འབྱུང་བར་ཤོག །དེ་ནི་སྤྱི་བཅོས་སོ། །འདི་ནས་ཉང་གི་བསང་བདུད་རྩི་སྤྲིན་སྤུང་སྦྱར། དེ་ནས་སྙིང་དཀར་ནག །སྤར་ཁ་ཡོ་བཅོས། ལོ་སྐོར་བཅོས་པ། དགུ་མིག །ཀ་བ་ཡོ་བཅོས། གཟའ་ཀླུའི་བཅོས་པ། ས་བདག་སྙིང་གཏེར་དུར་ཁ་རྒྱས་འདེབས། སྙིང་བཅོས། ས་གཡང་རིན་ཆེན་སྤར་ཁེབས། སྣང་བརྒྱད་སོགས་གོང་དུ་བཤད་པ་ལྟར་འདིར་བྱའོ། །དེ་ནས་བསྙེན་སྔགས་ནི། གཙོ་བོའི་ཐུགས་ཀར་དྷིསེར་པོ་ལ་སྔགས་ཀྱིས་བསྐོར་བར་བསམ། གཞན་གྱི་ཐུགས་ཀར་འབྱུང་ལྔའི་ས་བོན་ལ་སྔགས་ཀྱིས་བསྐོར་བར་བསམ། དེ་ལས་འོད་ཟེར་སེར་པོ་འཕྲོས་པས་འཁོར་རྣམས་བསྐུལ། གཙོ་བོ་ལ་འདུད་ཅིང་བཀའ་ཉན་པར་བསམ། ཡང་གསང་བདག་གི་ཐུགས་ཀའི་སྔགས་ལས་འོད་ཟེར་འཕྲོས། དབང་ཆེན།་་་ཁོ་ལ་ཕོག །དེས་ཁོ་བསྐུལ། ཁོས་འཁོར་རྣམས་བསྐུལ་ནས་དངོས་གྲུབ་ཐམས་ཅད་བྱིན་པར་བསམ། ཁོའི་སྙིང་གའི་སྔགས་འཕྲེང་ལྟེ་གོང་ནས་ཐོན། །
རང་གི་ལྟེ་གོང་དུ་ཞུགས། ཞལ་ནས་ཐོན། ཁོའི་ཁར་ཞུགས་པར་བསམ། ཨོཾ་བཛྲ་པཱ་ཎི་ཧཱུྃ་ཕཊ། མ་ཧཱ་དེ་ཝ་ལོ་ཀ་པཱ་ལ་ས་པ་རི་ཝཱ་ར་མ་མ་སིདྡྷི་སིདྡྷི་པུཊྚི་ཀུ་རུ་སྭཱ་ཧཱ། ཞེས་གང་། འགྲུབ་བཟླས། ཡང་བདག་གི་ཐུགས་ཀའི་སྔགས་ལས་འོད་ཟེར་དཀར་པོ་དཔག་ཏུ་མེད་པ་འཕྲོས། ཁོང་རྣམས་ལ་ཕོག་པས་ནད་དང་སྡུག་བསྔལ་འཁྲུགས་པ་འགྲམས་པ་ཐམས་ཅད་ཞི་ནས་དགའ་བདེར་གྱུར། བྱམས་པ་སྙིང་རྗེ་ཆེར་བསྐྱེད། གཟི་བརྗིད་དང་ལྡན་པར་བསམས་ལ། སྔགས་འདི་བརྒྱ་རྩ་བརྒྱད་བགྲངས་ཤིང་། ཨོཾ་བཛྲ་པཱ་ཎི་ཧཱུྃ་ཧཱུྃ་ཕཊ༔ མ་ཧཱ་དེ་ཝ་སིདྡྷི་ནན་སྭཱ་ཧཱ༔ ཏདྱ་ཐཱ། ཙི་ལི་ཙི་ལི་མི་ལི་མི་ལི་ཀུ་རུ་ཀུ་རུ་དོན་དུ་དོན་དུ་བྷ་རི་ཤ་ནན་སྭཱ་ཧཱ། སྣང་སྲིད་སྤྱི་རྒྱུད་ལས་གསུངས། མ་མ་རཾ་རཾ་སྭཱ་ཧཱ། མ་མ་ཡཾ་སྭཱ་ཧཱ། མ་མ་ཀ་ར་ཀ་ར་སྭཱ་ཧཱ། མ་མ་ལཾ་ལཾ་སྭཱ་ཧཱ། མ་མ་ཁཾ་ཁཾ་སྭཱ་ཧཱ། མ་མ་ཤཾ་ཤཾ་སྭཱ་ཧཱ། མ་མ་ཐཾ་ཐཾ་སྭཱ་ཧཱ། མ་མ་སྔོ་ཏ་སྔོ་ཏ་སྭཱ་ཧཱ། འབྱུང་བ་སྤྱི་རྒྱུད་ལས་གསུངས། ན་མོ་རཏྣ་ཏྲ་ཡཱ་ཡ། ན་མ་ས་མནྟ་དེ་ཝ་རཱ་ཛཱ་ཡ། ཏདྱ་ཐཱ། ཨོཾ་ཨ་ཀ་ནི་ནི་ཀ་ནི་ཨ་བྷི་ལ་མནྟལ་མ་ཡེ་སརྦ་མཾ་ག་ལཾ་ས་དྷ་ན་མན་ན་སྭཱ་ཧཱ། སྣང་བརྒྱད་རྒྱ་གར་མ་ནས་གསུངས། འདི་ཚོ་གལ་ཆེ་ན་སྟོང་ཕྲག་ཙམ་དུ་བཟླའོ། །གཞན་ཡང་ཉེས་པ་
ཀུན་སེལ། དག་པ་གསེར་ཐིག་སྙིང་པོ། སྣང་བརྒྱད་རྒྱ་ནག་མ་རྣམས་ཀྱང་ཀློག་གོ། ༈ དེ་ནས་མཆོད་པ་རྒྱ་ཆེར་བྱས་ལ། ཨོཾ་མ་ཧཱ་དེ་ཝ་ཧྲི་ཤྲཱི་དེ་ཝི་ལོ་ཀ་པཱ་ལ་ས་པ་རི་ཝཱ་ར་ཨཧཱུྃ་པྲ་ཏིཙྪ་ཡེ་སྭཱ་ཧཱ། ནས་ཤཔྟའི་བར་རོ། །ཨོཾ་ཨཱཿཧཱུྃ་གསུམ། ཨ་ཀཱ་རོ་གསུམ། གོང་ལྟར་བ་ལིནྟ་པཱུ་ཛ་ཁཱ་ཧི། དེ་ནས་རྟགས་དང་མཐུན་པར་སྐུ་བསྟོད་ནི། ཨོཾ། དབུས་ཕྱོགས་སྟོང་གི་འཇིག་རྟེན་རྒྱུན། །མཛེས་པ་པདྨའི་གདན་སྟེང་ན། །ལྷ་ཡི་རྒྱལ་པོ་ཚངས་པ་དཀར། །ཕྱག་ན་རྫུ་འཕྲུལ་ཆག་ཤིང་བསྣམས། །དབུ་ལ་རིན་ཆེན་ཐོར་ཚུགས་ཅན། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ལྷ་རྒྱལ་སངས་པོ་འབུམ་ཁྲི་ནི། །སྐུ་ལ་སེང་གེའི་གཡང་གཞི་མནབས། །ཕྱག་ན་འོད་ཀྱི་རྒྱལ་མཚན་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ལྷ་ཡི་རྒྱལ་པོ་བརྒྱ་བྱིན་དཀར། །སྐུ་ལ་བྱ་རྒྱལ་ཁྱུང་སླག་གསོལ། །ཕྱག་ན་གསེར་གྱི་མེ་ཏོག་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ལྷ་#ཆེན་ཁྲི་རྒྱལ་ཁུག་པ་དཀར། །སྐུ་ལ་བྱ་རྒོད་ཐུལ་པ་གསོལ། །ཕྱག་ན་སྣང་གསལ་མར་མེ་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ཡབ་བླ་བདལ་དྲུག་ལྷ་
ཡི་རྗེ། །སྐུ་མདོག་དཀར་པོ་རྒྱན་དང་ཆས། །ཕྱག་ན་བ་དན་དཀར་པོ་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ཚོགས་ཀྱི་བདག་པོ་ལྷ་ཡི་གཙོ། །སྐུ་ལ་སྤྲིན་གྱི་ན་བཟའ་གསོལ། །ཕྱག་ན་རླུང་གི་འཁོར་ལོ་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །གཞོན་ནུ་དབང་ཕྱུག་ལྷ་ཡི་མགོན། །སྐུ་ལ་ཉི་ཟླའི་ན་བཟའ་གསོལ། །ཕྱག་ན་གསེར་གྱི་འཁོར་ལོ་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ལྷ་ཡི་རྒྱལ་པོ་ནམ་མཁའ་དཔལ། །སྐུ་ལ་འཇའ་ཚོན་སླག་པ་མནབས། །ཕྱག་ན་སྤྲིན་གྱི་རྒྱལ་མཚན་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ལྷ་ཆེན་བརྒྱད་ཀྱི་ཡུམ་བརྒྱད་ནི། །ནམ་མཁའི་ལྷ་མོ་མདངས་གསལ་མ། །ཕྱག་ན་མཛེས་པའི་པདྨ་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ལྷ་ཡི་འཁྲུགས་པ་ཞི་བར་མཛོད། །ཨོཾ། གནམ་ལ་མངའ་མཛད་འཕྲུལ་གྱི་རྗེ། །སྐུ་མདོག་སྔོན་པོ་གཡུ་ཡི་མདོག །ཕྱག་ན་ནམ་མཁའི་བ་དན་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ས་ལ་མངའ་མཛད་ས་ཡི་ལྷ། །སྐུ་མདོག་སེར་ལ་འོད་ཟེར་
འབར། །ཕྱག་ན་དཔག་བསམ་ལྗོན་ཤིང་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །བར་སྣང་འོད་གསལ་ལྷ་ཡི་རྒྱལ། །སྐུ་མདོག་རིན་ཆེན་སྣ་ལྔ་འབར། །ཕྱག་ན་འཇའ་ཚོན་སྣ་ལྔ་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །གནམ་ས་བར་སྣང་འཁྲུགས་པ་ཞི་བར་མཛོད། །ཨོཾ། དཀྱིལ་འཁོར་དེ་ཡི་ཕྱི་རིམ་ན། །རྒྱ་མཚོ་ཆུ་ཡི་ཀློང་དཀྱིལ་ན། །པདྨ་འདབ་བརྒྱད་གདན་སྟེང་ན། །ཀླུ་རྒྱལ་ཝ་རུ་སྐུ་མདོག་སེར། །ཀླུ་སྦྲུལ་དབུ་རྒྱན་མེ་ཏོག་བསྣམས། །ཀླུ་ཡི་ལྕམ་མོ་འོད་ལྡན་མ། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །གཙུག་ན་རིན་ཆེན་སྐུ་མདོག་དཀར། །ཕྱག་ན་རིན་ཆེན་སྨྱུ་གུ་བསྣམས། །དབུ་ལ་རིན་ཆེན་འོད་ཟེར་འཕྲོ། །ཀླུ་མོ་དཀར་མོ་མདངས་ལྡན་མ། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། ཀླུ་རྒྱལ་དགའ་བོ་སྐུ་མདོག་དམར། །ཕྱག་ན་གསལ་བྱེད་མར་མེ་བསྣམས། །དབུ་ལ་རིན་ཆེན་ཤེལ་གྱིས་བརྒྱན། །ཀླུ་མོ་དཀར་མོ་འོད་འཕྲོ་མ། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ཀླུ་རྒྱལ་དུང་སྐྱོང་སྐུ་མདོག་ལྗང་། །ཕྱག་ན་རིན་ཆེན་ཕྲེང་
བ་བསྣམས། །དབུ་ལ་དུང་སྦྲུལ་དཀར་པོས་བརྒྱན། །ཀླུ་མོ་ལྗང་གུ་འོད་ཟེར་འཕྲོ། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ཀླུ་རྒྱལ་མ་དྲོས་སྐུ་མདོག་སྔོ། །ཕྱག་ན་གསེར་གྱི་འཁོར་ལོ་བསྣམས། །དབུ་ལ་རིན་ཆེན་མེ་ཏོག་བརྒྱན། །ཀླུ་མོ་སྔོན་མོ་འོད་ཟེར་འཕྲོ། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ཀླུ་རྒྱལ་འོད་འབར་སྐུ་མདོག་མཐིང། །ཕྱག་ན་རིན་ཆེན་མེ་ལོང་བསྣམས། །དབུ་ལ་འོད་ཀྱི་འཁོར་ལོས་བརྒྱན། །ཀླུ་མོ་སྔོན་མོ་གཡུ་མདངས་མ། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ཀླུ་རྒྱལ་འགྱིང་བཙན་སྐུ་མདོག་དཀར། །ཕྱག་ན་རིན་ཆེན་གདུགས་ཁང་བསྣམས། །དབུ་ལ་མཛེས་པའི་པདྨས་བརྒྱན། །ཀླུ་མོ་རིང་ནམ་འཕྲུལ་མོ་ཆེ། །དེ་ལ་ཕྱག་འཚལ་སྐུ་་བསྟོད་མཆོད་པ་འབུལ། །ཀླུ་རྒྱལ་པདྨ་སྐུ་མདོག་ལྗང་། །དབུ་ལ་གཡུ་ཡི་ཅོད་པན་ཅན། །སྐུ་ལ་རླུང་གི་ན་བཟའ་མནབས། །ཕྱག་ན་བ་དན་ཁྲ་བོ་བསྣམས། །ཀླུ་མོ་གསལ་བྱེད་འོད་འབར་མ། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ཀླུ་ཡི་འཁྲུགས་པ་བསལ་བར་མཛོད་། །ཨོཾ། དཀྱིལ་འཁོར་དེ་ཡི་ཕྱི་རིམ་ན། །རིན་ཆེན་
མཛེས་པའི་གདན་སྟེང་ན། །པདྨ་འདབ་བརྒྱད་མཛེས་པ་ན། །ཤར་ཕྱོགས་གཟའ་ཆེན་ཕུར་བུ་དཀར། །སྐུ་ལ་ཆོས་གོས་ན་བཟའ་གསོལ། །ཕྱག་ན་པོ་ཏི་ཕུར་བུ་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །བྱང་ཤར་གཟའ་ཆེན་སྤེན་པ་སེར། །ཕྱག་ན་གདུག་པའི་ཞགས་པ་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །བྱང་ཕྱོགས་གཟའ་ཆེན་ལག་པ་སྔོ། །ཕྱག་ན་ཆུ་ཡི་འཁོར་ལོ་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ནུབ་བྱང་གཟའ་ཆེན་ཟླ་བ་དཀར། །ཕྱག་ན་ལྷ་ཆ་རྔ་གཤང་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ནུབ་ཕྱོགས་གཟའ་ཆེན་པ་སངས་དམར། །ཕྱག་ན་ལྕགས་ཀྱི་འཁོར་ལོ་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ལྷོ་ནུབ་གཟའ་ཆེན་རཱ་ཧུ་ལ། །སྐུ་མདོག་གསེར་གྱི་སྙིང་པོ་འདྲ། །ཕྱག་ན་རྡོ་རྗེ་རྩེ་ལྔ་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། ལྷོ་ཕྱོགས་གཟའ་ཆེན་མིག་དམར་དམར། །ཕྱག་ན་མེ་ཡི་བ་དན་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ཤར་ལྷོ་གཟའ་ཆེན་ཉི་མ་
དཀར་སྔོ་ལ། །ཕྱག་ན་འོད་ཀྱི་འཁོར་ལོ་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །གཟའ་ཡི་འཁྲུགས་པ་ཞི་བར་མཛོད། །ཨོཾ། དཀྱིལ་འཁོར་དེ་ཡི་ཕྱི་རིམ་ན། །པདྨ་འདབ་བརྒྱད་གདན་སྟེང་ན། །སྨིན་དྲུག་ལ་སོགས་ཤར་སྐར་དྲུག །ལྗང་ཁུ་ཤིང་ཐོག་ནོར་བུ་ཐོགས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །མཆུ་ལ་སོགས་པ་ལྷོ་སྐར་དྲུག །དམར་མོ་མེ་སྒྲོན་ཞགས་པ་འཛིན། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ལྷ་མཚམས་ལ་སོགས་ནུབ་སྐར་དྲུག །དཀར་མོ་པདྨ་དུང་ཆོས་འཛིན། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །མོན་བྲེ་ལ་སོགས་བྱང་སྐར་དྲུག །སྔོན་པོ་རྣོ་མཚོན་བུམ་པ་འཛིན། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །སྐག་དང་ས་ག་བྱི་བཞིན་བྲ་ཉེ་བཞི། །སྐུ་མདོག་སེར་མོ་ནོར་བུ་འཛིན། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ས་བདག་འཁྲུགས་པ་ཞི་བར་མཛོད། །གནམ་ཁྱི་ལྷ་མོ་སྤུན་བདུན་ནི། །སྐུ་མདོག་རིན་ཆེན་སྣ་ཚོགས་བཀྲ། །ཕྱག་ན་མེ་ཏོག་རལ་གྲི་བསྣམས། །ཕོ་ཉ་གནམ་ཁྱི་འཁོར་དང་བཅས། །དེ་ལ་ཕྱག་འཚལ་སྐུ་བསྟོད་དམ་བསམ་
མཆོད་པ་འབུལ། །གནམ་ཁྱིའི་འཁྲུགས་པ་ཞི་བར་མཛོད། །ཨོཾ། དཀྱིལ་འཁོར་དེ་ཡི་ཕྱི་རིམ་ན། །དཔག་བསམ་ཤིང་གི་བསིལ་གྲིབ་ན། །ཤར་གཉན་མཐོ་བ་ཁྲི་སངས་དཀར། །ཕྱག་ན་གཉན་དར་དམར་པོ་བསྣམས། །སྐུ་ལ་བསེ་ཁྲབ་ཤོལ་མོ་མནབས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ལྷོ་གཉན་སྔོ་བ་གཡུ་རྩེ་སྔོ། །སྐུ་ལ་གཡུ་ཁྲབ་སྔོན་པོ་གསོལ། །ཕྱག་ན་གཉན་ཤིང་སྟག་པ་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ནུབ་གཉན་སོལ་དྲུག་ལྕགས་རྩེ་དཀར་། །སྐུ་ལ་བསེ་ཁྲབ་ཤོལ་མོ་མནབས། །ཕྱག་ན་བསེ་ཡི་མེ་ཏོག་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །བྱང་གཉན་གྱིང་ཐང་མཚལ་རྩེ་ནག །སྐུ་ལ་ཟངས་ཁྲབ་དམར་པོ་གསོལ། །ཕྱག་ན་བེ་དཀར་ཐོ་བ་ཐོགས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །གཉན་གྱི་འཁྲུགས་པ་ཞི་བར་མཛོད། །ཨོཾ། དཀྱིལ་འཁོར་དེ་ཡི་ཕྱི་རིམ་ན། །རིན་ཆེན་འབར་བའི་གདན་སྟེང་ན། །གཏོད་ཀྱི་སྡེ་ཚོགས་ཐམས་ཅད་ནི། །སྐུ་མདོག་ཕྱག་མཚན་རྒྱན་དང་ལྡན། །དེ་ལ་ཕྱག་འཚལ་སྐུ་བསྟོད་མཆོད་
པ་འབུལ། །གཏོད་ཀྱི་འཁྲུགས་པ་ཞི་བར་མཛོད། །ཨོཾ། དཀྱིལ་འཁོར་དེ་ཡི་ཕྱི་རིམ་ན། །རི་རབ་ལྷུན་པོའི་ཕྱོགས་བཞིའི་དབུས། །ས་བདག་ཁྱབ་པ་ལ་སོགས་པའི། །ས་བདག་རྒྱལ་པོ་ཆེན་པོ་བཞི། །ཕྱག་མཚན་དཔག་བསམ་ལྗོན་ཤིང་བསྣམས། །སྐུ་མདོག་གསེར་གྱི་ཁ་དོག་ལ། །རིན་ཆེན་སྣ་ལྔའི་རྒྱན་གྱིས་བརྒྱན། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ས་བདག་འཁྲུགས་པ་ཞི་བར་མཛོད། །མཚམས་བཞིར་ས་བདག་གཤེད་བཞི་ནི། །སྐུ་མདོག་འཇའ་ཚོན་སྣ་ལྔའི་མདོག །ཕྱག་ན་མཛེས་པའི་ཆག་ཤིང་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། གཤེད་བཞིའི་འཁྲུགས་པ་ཞི་བར་མཛོད། །ཨོཾ། དཀྱིལ་འཁོར་དེ་ཡི་ཕྱི་རིམ་ན། །ཕྱོགས་བཞི་མཚམས་བརྒྱད་པདྨའི་གདན། །ལི་ཁམས་རྒྱལ་པོ་སྐུ་མདོག་དམར། །ཕྱག་ན་མེ་ཡི་བ་དན་བསྣམས། །སྐུ་ལ་མེ་ཡི་ན་བཟའ་གསོལ། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ལི་མེ་ཡི་འཁྲུགས་པ་ཞི་བར་མཛོད། །ཁོན་མ་བུམ་པ་ཕྲེང་བ་སེར། །སྐུ་ལ་ཆོས་གོས་ན་བཟའ་གསོལ། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ཁོན་ས་ཡི་འཁྲུགས་
པ་ཞི་བར་མཛོད། །དྭ་ལྕགས་ལྕགས་ཀྱི་གྲི་ཤད་དཀར། །སྐུ་ལ་ལྕགས་ཀྱི་ན་བཟའ་གསོལ། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །དུ་ལྕགས་ཀྱི་འཁྲུགས་པ་ཞི་བར་མཛོད། །ཁེན་གནམ་འགྱིང་དཀར་ན་བཟའ་སེར། །གནམ་ཁྱི་བདུད་བཙན་ཕོ་ཉར་འགྱེད། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ཁེན་གནམ་འཁྲུགས་པ་ཞི་བར་མཛོད། །ཁཾ་ཆུ་ཆུ་ཡི་བུམ་པ་ནག །ཆུ་དར་ནག་པོའི་ན་བཟའ་གསོལ། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ཁམ་གྱི་འཁྲུགས་པ་ཞི་བར་འམཛོད། །གིན་རི་མཆོད་རྟེན་པོ་ཏི་སེར། །ཆོས་གོས་ངུར་སྨིག་སྐུ་ལ་གསོལ། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །གིན་རིའི་འཁྲུགས་པ་ཞི་བར་མཛོད། །ཟིན་ཤིང་གཉན་ཤིང་སྟག་པ་ལྗང་། །སྐུ་ལ་ཤིང་གི་ན་བཟའ་གསོལ། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ཟིན་ཤིང་འཁྲུགས་པ་ཞི་བར་མཛོད། །ཟོན་མ་རླུང་གི་བུ་ཡུག་ལྗང་། །སྐུ་ལ་ཟ་འོག་ཐུལ་པ་མནབས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ཟོན་གྱི་འཁྲུགས་པ་ཞི་བར་མཛོད། །སྨེ་བ་དགུ་པོ་འཁོར་དང་བཅས། །རང་རང་
གནས་པའི་ལྷ་དང་བཅས། །སྐུ་མདོག་ཕྱག་མཚན་སྣ་ཚོགས་ལྡན། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །སྨེ་བའི་འཁྲུགས་པ་ཞི་བར་མཛོད། །ཤར་ཕྱོགས་ས་བདག་སྟག་ཡོས་གཉིས། །ལྗང་གུ་མུ་ལེ་གྲོམ་ཤིང་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །སྟག་ཡོས་འཁྲུགས་པ་བསལ་དུ་གསོལ། །ལྷོ་ཕྱོགས་ས་བདག་རྟ་སྦྲུལ་གཉིས། །དམར་མོ་མེ་ཡི་རུ་མཚོན་འཛིན། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །རྟ་སྦྲུལ་འཁྲུགས་པ་བསལ་དུ་གསོལ། །ནུབ་ཕྱོགས་ས་བདག་བྱ་སྤྲེལ་གཉིས། །དཀར་པོ་ལྕགས་ཀྱི་རལ་གྲི་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །བྱ་སྤྲེལ་འཁྲུགས་པ་བསལ་དུ་གསོལ། །བྱང་ཕྱོགས་ས་བདག་བྱི་ཕག་གཉིས། །ནག་པོ་ཆུ་ཡི་རྐྱལ་པ་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །བྱི་ཕག་འཁྲུགས་པ་བསལ་དུ་གསོལ། །མཚམས་བཞིར་ས་བདག་ཁྱི་འབྲུག་གླང་ལུག་བཞི། །སྐུ་མདོག་སེར་ལ་འོད་ཟེར་འབར། །ཕྱག་མཚན་འཁོར་ལོ་རི་བོ་མཆོད་རྟེན་བསྣམས། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ཁྱི་འབྲུག་གླང་ལུག་འཁྲུགས་པ་བསལ་དུ་
གསོལ། །འབྱུང་བ་ལྔ་ལ་མངའ་མཛད་འབྱུང་བའི་ལྷ། །སྐུ་མདོག་ཁ་དོག་རྒྱན་དང་ལྡན། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །འབྱུང་བ་ལྔ་ཡི་འཁྲུགས་པ་བསལ་དུ་གསོལ། །ནམ་ཟླ་དུས་བཞིའི་ལྷ་བཞི་ནི། །སྐུ་མདོག་ཁ་དོག་རྒྱན་དང་ལྡན། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ནམ་ཟླ་དུས་བཞིའི་འཁྲུགས་པ་བསལ་དུ་གསོལ། །ཕྱོགས་སྐྱོང་བཅུ་པོ་འཁོར་དང་བཅས། །སྐུ་མདོག་སྤྲུལ་པ་སོ་སོར་གསལ། །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ཕྱོགས་སྐྱོང་བཅུ་ཡི་འཁྲུགས་པ་བསལ་དུ་གསོལ། །ཕྱོགས་བཞིའི་རྒྱལ་པོ་སྡེ་བཞི་ནི། །སྐུ་མདོག་དཀར་དམར་ལྗང་གུའི་མདོག །དེ་ལ་ཕྱག་འཚལ་སྐུ་བསྟོད་མཆོད་པ་འབུལ། །ཕྱོགས་བཞིའི་འཁྲུགས་པ་བསལ་དུ་གསོལ། །ལྷ་སྲིན་གན་ཁམས་སྡེ་བརྒྱད་པོ། །ཁྱོད་ལ་བསྟོད་དེ་མཆོད་པ་འབུལ། །གདུག་རྩུབ་འཁྲུགས་པ་ཐམས་ཅད་བསལ་དུ་གསོལ། །རིགས་དྲུག་སྙིང་རྗེའི་མགྲོན་རྣམས་ལ། །སྦྱིན་བཏང་སྡུག་བསྔལ་ཞི་གྱུར་ཅིག །ཅེས་བསྟོད་དོ། །པདྨ་ལྟ་བུའི་གཏོར་མ་གཅིག་འབུལ་ལོ། །ཞག་གྲངས་ཡིན་ན་འདི་ནས་བཞག །དེ་ནས་སྒོ་དབྱེ་བ་ནི།
ལྡེ་མིག་གིས་ཕྱེ་སྟངས་བྱས་ལ། ཀྱཻ། ཤར་ཕྱོགས་ཡེ་ཤེས་གསེར་གྱི་སྒོ། །སྒོ་བ་རྣམས་ཀྱིས་སྒོ་ཕྱེས་ཤིག །གཏི་མུག་མུན་པའི་སྒོ་ཆོད་ཅིག །ཡེ་ཤེས་དངོས་གྲུབ་སྒོ་ཕྱེས་ཤིག །ལྷོ་ཕྱོགས་ཞི་བ་གཡུ་ཡི་སྒོ། །སྒོ་བ་རྣམས་ཀྱིས་སྒོ་ཕྱིས་ཤིག །ང་རྒྱལ་གདུག་པའི་སྒོ་ཆོད་ཅིག །ཞི་བ་དངོས་གྲུབ་སྒོ་ཕྱེས་ཤིག །ནུབ་ཕྱོགས་སྦྱིན་པ་ཟངས་ཀྱི་སྒོ། །སྒོ་བ་རྣམས་ཀྱིས་སྒོ་ཕྱེས་ཤིག །འདོད་ཆགས་གདུག་པའི་སྒོ་ཆོད་ཅིག །སྦྱིན་པ་དངོས་གྲུབ་སྒོ་ཕྱེས་ཤིག །བྱང་ཕྱོགས་བྱམས་པ་ལྕགས་ཀྱི་སྒོ། །སྒོ་བ་རྣམས་ཀྱིས་སྒོ་ཕྱེས་ཤིག །ཕྲག་དོག་གདུག་པའི་སྒོ་ཆོད་ཅིག །ཡངས་པ་དངོས་གྲུབ་སྒོ་ཕྱེས་ཤིག །དུས་བཞི་བདག་པོས་སྒོ་ཕྱེས་ཤིག །དུས་བཞིའི་འཁྲུགས་པའི་སྒོ་ཆོད་ཅིག །མཐུན་པའི་དངོས་གྲུབ་སྒོ་ཕྱེས་ཤིག ཀྱཻ། ཤར་ཕྱོགས་ས་བདག་ཐེ་སེ་དང་། །ལྷོ་ཕྱོགས་ས་བདག་ཙང་ཀུན་དང་། །ནུབ་ཕྱོགས་ས་བདག་ཧོང་ཕན་དང་། །བྱང་ཕྱོགས་ས་བདག་བིལ་འབྱིན་བཞི། །པདྨ་སྣ་ཚོགས་གདན་ལ་བཞུགས། །བཙུན་མོ་སྲས་དང་བློན་པོ་དང་། །ཕོ་ཉ་མངག་གཞུག་འཁོར་བཅས་རྣམས། །ཐབས་ཤེས་རྫུ་འཕྲུལ་ལྡེ་མིག་གིས། །རྩ་
དཀར་འཕེལ་གཡང་སྒོ་ཡར་ཕྱེས། །རྨོངས་འདྲེ་རྩ་ནག་སྒོ་ཆོད་ཅིག །ཅེས་པས་སྒོ་ཕྱེས། དེ་ནས་བུམ་ཁྲུས་བྱ་བ་ནི། བུམ་པ་ལག་ཏུ་ཐོགས་ཏེ། ཨོཾ། ཡེ་ཤེས་རྣམ་པར་དག་པའི་ཆུ་བོ་དང་། །དུག་ལྔ་འཇོམས་པ་བདུད་རྩིའི་ཆུ་བོ་དང་། །སྣང་སྲིད་དག་པར་བྱེད་པའི་སྤོས་ཆུ་གསུམ། །གཙང་ཡང་རིན་ཆེན་བུམ་པའི་ནང་དུ་བསྩལ། །ཏིང་འཛིན་སྔགས་དང་ཕྱག་རྒྱས་དབང་བསྐུར་ནས། །ཏིང་འཛིན་དགོངས་བརྒྱུད་དག་པར་བྱིན་གྱིས་བརླབས། །སྣང་སྲིད་ཁམས་གསུམ་ཁྲུས་གསོལ་བས། །བག་ཆགས་དྲི་མ་དག་གྱུར་ཅིག །བག་ཆགས་དྲི་མ་དག་ནས་ཀྱང་། །ཤེལ་སྒོང་བཞིན་དུ་གསལ་གྱུར་ཅིག །སྣང་སྲིད་བདག་པོ་ཁྱེད་རྣམས་ལ། །དག་པའི་ཁྲུས་ཆབ་འདི་གསོལ་བའི། །མཚན་མའི་རྣམ་རྟོག་དག་གྱུར་ཅིག །ཡོན་བདག་རྣམས་ལ་ཁྲུས་གསོལ་བའི། །དུག་ལྔའི་བག་ཆགས་དག་གྱུར་ཅིག །ཉི་ཟླ་བཞིན་དུ་གསལ་བར་ཤོག །གཞལ་ཡས་ཁང་ལ་ཁྲུས་གསོལ་བས། །ལྷ་ཡི་གཞལ་ཡས་ཁང་ལས་གྲུབ་པར་ཤོག །ཡོ་བྱད་རྫས་ལ་ཁྲུས་གསོལ་བས། །བག་ཆགས་དྲི་མ་དག་ནས་ཀྱང་། །ལྷ་དང་ལྷ་མོའི་ངང་དུ་ལྡན་གྱུར་ཅིག །
ཁཾ་ས་ལེ་སེང་ངེ་ཡེ་སྭཱ་ཧཱ། དེ་ནས་བཀྲ་ཤིས་བརྗོད་པ་ནི། མེ་ཏོག་གཏོར་ལ། ཨོཾ། སྣང་སྲིད་མངའ་བདག་མ་ལུས་རྣམས། །ཡོན་བདག་འདི་ཡི་དོན་ཆེད་དུ། །བདག་ལ་གསན་ཅིང་དགོངས་སུ་གསོལ། །ཡོན་བདག་དད་ཅིང་གུས་པ་དང་། །ཀོང་ཙེ་བདེན་པའི་བྱིན་རླབས་དང་། །སྔགས་འཆང་བདག་གིས་བྱིན་བརླབས་ནས། །སྣང་སྲིད་མངའ་བདག་ཁྱེད་རྣམས་ལ། །མཆོད་པ་རྒྱ་མཚོ་འདི་དག་ནི། །རང་རང་འདོད་པའི་ཡོན་ཏན་དང་། །བདག་གིས་འདོད་ཡོན་བྱིན་བརླབས་ནས། །བདག་ཅག་དད་པས་འབུལ་ལགས་ན། །ཚེམཉེས་རབ་མཆོག་དང་ལྡན་གྱུར་ཅིག །མཉེས་རབ་མཆོག་དང་ལྡན་ནས་ཀྱང་། །བདག་དང་ཡོན་གྱི་བདག་པོ་ལ། །བཀྲ་ཤིས་བདེ་ལེགས་ཕུན་སུམ་ཚོགས་པར་ཤོག །ནམ་མཁའི་ཁམས་ན་བཞུགས་པ་ཡི། །ཚངས་པ་བརྒྱ་བྱིན་ལ་སོགས་ཏེ། །ལྷ་ཆེན་བརྒྱད་པོ་འཁོར་དང་བཅས། །ཡབ་ཡུམ་ལྕམ་དྲལ་བཀྲ་ཤིས་པ། །ཡོན་བདག་བཀྲ་ཤིས་ཐོབ་པར་ཤོག །གནམ་གྱི་མངའ་བདག་མ་ལུས་ཁྱུང་གི་མགོ །ཡུམ་ནི་ལྷ་མོ་མདངས་ལྡན་མ། །ཡབ་ཡུམ་ལྕམ་དྲལ་བཀྲ་ཤིས་པ། །ཡོན་བདག་བཀྲ་ཤིས་ཐོབ་པར་ཤོག །ས་
ལ་མངའ་མཛད་གླང་ཆེན་མགོ །ཡུམ་ཡང་ས་བདག་རྒྱལ་མོ་ལགས། །ཡབ་ཡུམ་ལྕམ་དྲལ་བཀྲ་ཤིས་པ། །ཡོན་བདག་བཀྲ་ཤིས་ཐོབ་པར་ཤོག །ཉི་ཟླ་དྲོ་གསལ་འོད་ཟེར་ཅན། །དྲོ་གསལ་ཚེ་རིང་བཀྲ་ཤིས་པ། །ཡོན་བདག་བཀྲ་ཤིས་ཐོབ་པར་ཤོག །དཀྱིལ་འཁོར་དེ་ཡི་ཕྱི་རིམ་ན། །རྒྱ་མཚོ་ཆུ་ཡི་གཞལ་ཡས་ན། །གཙུག་ན་རིན་ཆེན་ལ་སོགས་ཀླུ་ཆེན་བརྒྱད། །ཡུམ་ཡང་ཀླུ་ཡི་ལྕམ་མོ་བརྒྱད། །ཡབ་ཡུམ་ལྕམ་དྲལ་བཀྲ་ཤིས་པ། །ཡོན་བདག་བཀྲ་ཤིས་ཐོབ་པར་ཤོག །དཀྱིལ་འཁོར་དེ་ཡི་ཕྱི་རིམ་ན། །པདྨ་འདབ་བརྒྱད་གདན་སྟེང་ན། །གཟའ་བརྒྱད་ཡབ་ཡུམ་འཁོར་དང་བཅས། །མཁའ་ལ་ཤུགས་འགྲོའི་བཀྲ་ཤིས་པ། །ཡོན་བདག་བཀྲ་ཤིས་ཐོབ་པར་ཤོག །སྨིན་དྲུག་ལ་སོགས་ཤར་སྐར་བདུན། །ཤར་གྱི་ཕྱོགས་ནས་བཀྲ་ཤིས་པ། །ཡོན་བདག་བཀྲ་ཤིས་ཐོབ་པར་ཤོག །མཆུ་ལ་སོགས་ཏེ་ལྷོ་སྐར་བདུན། །ལྷོ་ཡི་ཕྱོགས་ནས་བཀྲ་ཤིས་པ། །ཡོན་བདག་བཀྲ་ཤིས་ཐོབ་པར་ཤོག །ལྷ་མཚམས་ལ་སོགས་ནུབ་སྐར་བདུན། །ནུབ་ཀྱི་ཕྱོགས་ནས་བཀྲ་ཤིས་པ། །ཡོན་བདག་བཀྲ་ཤིས་ཐོབ་པར་ཤོག །མོན་གྲུ་
ལ་སོགས་བྱང་སྐར་བདུན། །བྱང་གི་ཕྱོགས་ནས་བཀྲ་ཤིས་པ། །ཡོན་བདག་བཀྲ་ཤིས་ཐོབ་པར་ཤོག །དཀྱིལ་འཁོར་དེ་ཡི་ཕྱི་རིམ་ན། །རང་བཞིན་བདེ་བའི་དཀྱིལ་འཁོར་ནས། །ལྷ་མོ་སྤུན་བདུན་གནམ་ཁྱི་འཁོར་དང་བཅས། །བར་སྣང་ཁམས་ནས་བཀྲ་ཤིས་པ། །ཡོན་བདག་བཀྲ་ཤིས་ཐོབ་པར་ཤོག །དཀྱིལ་འཁོར་དེ་ཡི་ཕྱི་རིམ་ན། །དཔག་བསམ་ཤིང་ལ་གནས་བཅས་ནས། །གཉན་གྱི་སྡེ་རིགས་བསམ་མི་ཁྱབ། །ཡུམ་ཡང་སྐྱེད་པའི་ཆུ་འཁྲུལ་མ། །ཡབ་ཡུམ་བཀྲ་ཤིས་གང་ལགས་པ། །ཡོན་བདག་བཀྲ་ཤིས་ཐོབ་པར་ཤོག །དཀྱིལ་འཁོར་དེ་ཡི་ཕྱི་རིམ་ན། །ཤར་གྱི་ཕྱོགས་ནས་བཀྲ་ཤིས་པ། །ས་བདག་སྟག་དང་ཡོས་བུ་གཉིས། །ཡབ་ཡུམ་ལྕམ་དྲལ་བཀྲ་ཤིས་པ། །ཡོན་བདག་བཀྲ་ཤིས་ཐོབ་པར་ཤོག །ལྷོ་ཡི་ཕྱོགས་ནས་བཀྲ་ཤིས་པ། །ས་བདག་རྟ་དང་སྦྲུལ་གྱི་མགོ །ཡབ་ཡུམ་ལྕམ་དྲལ་བཀྲ་ཤིས་པ། །ཡོན་བདག་བཀྲ་ཤིས་ཐོབ་པར་ཤོག །ནུབ་ཀྱི་ཕྱོགས་ནས་བཀྲ་ཤིས་པ། །ས་བདག་སྤྲེལ་དང་བྱ་ཡི་མགོ །ཡབ་ཡུམ་ལྕམ་དྲལ་བཀྲ་ཤིས་པ། །ཡོན་བདག་བཀྲ་ཤིས་ཐོབ་པར་ཤོག །བྱང་གི་ཕྱོགས་ནས་
བཀྲ་ཤིས་པ། །ས་བདག་ཕག་དང་བྱི་བའི་མགོ །ཡབ་ཡུམ་ལྕམ་དྲལ་བཀྲ་ཤིས་པ། །ཡོན་བདག་བཀྲ་ཤིས་ཐོབ་པར་ཤོག་།ཤར་ལྷོ་མཚམས་ནས་བཀྲ་ཤིས་པ། །གསེར་འབྲུག་གདན་ལའང་མཛེས་བྱས་མ། །གཉན་གྱི་རྒྱལ་པོའི་བཀྲ་ཤིས་པ། །ཡོན་བདག་བཀྲ་ཤིས་ཐོབ་པར་ཤོག །ལྷོ་ནུབ་མཚམས་ནས་བཀྲ་ཤིས་པ། །གསེར་ལུག་གདན་ལ་གསེར་རི་འདྲ། །གཟའ་གསལ་འོད་གསལ་བཀྲ་ཤིས་པ། །ཡོན་བདག་བཀྲ་ཤིས་ཐོབ་པར་ཤོག །ནུབ་བྱང་མཚམས་ནས་བཀྲ་ཤིས་པ། །གསེར་ཁྱིའི་གདན་ལ་གདུག་པ་སེལ། །གླིང་བཞི་གྲགས་ཆེན་བཀྲ་ཤིས་པ། །ཡོན་བདག་བཀྲ་ཤིས་ཐོབ་པར་ཤོག །བྱང་ཤར་མཚམས་ནས་བཀྲ་ཤིས་པ། །གསེར་གླང་གདན་ལ་ཐུབ་ཆེན་གྱིས། །བདུད་རྣམས་འདུལ་བའི་བཀྲ་ཤིས་པ། །ཡོན་བདག་བཀྲ་ཤིས་ཐོབ་པར་ཤོག །དཀྱིལ་འཁོར་དེ་ཡི་ཕྱི་རིམ་ན། །འབྱུང་བ་ལྔ་ཡི་ལྷ་རྣམས་ནི། །འབྱུང་བ་ལྔ་ཡི་བཀྲ་ཤིས་པ། །ཡོན་བདག་བཀྲ་ཤིས་ཐོབ་པར་ཤོག །གཏོད་ཀྱི་སྡེ་ཚོགས་ཐམས་ཅད་ཀྱི། །བཀྲ་ཤིས་དངོས་གྲུབ་གང་ཡོད་པ། །ཡོན་བདག་བཀྲ་ཤིས་ཐོབ་པར་ཤོག །
རྒྱལ་པོ་ཆེན་པོ་སྡེ་བཞི་ཡི། །ཉི་མ་ཕྱོགས་བཞིའི་བཀྲ་ཤིས་པ། །ཡོན་བདག་བཀྲ་ཤིས་ཐོབ་པར་ཤོག །ཕྱོགས་སྐྱོང་བཅུ་པོ་འཁོར་དང་བཅས། །ལོངས་སྤྱོད་ལྡན་ཏེ་བཀྲ་ཤིས་པ། །ཡོན་བདག་བཀྲ་ཤིས་ཐོབ་པར་ཤོག །ལྷ་ཆེན་བརྒྱད་དང་ལྷ་མོ་བརྒྱད། །འཁོར་དང་ལོངས་སྤྱོད་དར་བ་ལྟར། །ཡོན་བདག་བཀྲ་ཤིས་ཐོབ་པར་ཤོག །གནམ་ས་ཡབ་ཡུམ་རྒྱ་ཆེ་ལྟར། །ཡོན་བདག་དབུ་འཕང་མཐོ་བར་ཤོག །ཉི་ཟླ་ཚེ་རིང་འོད་གསལ་ལྟར། །ཡོན་བདག་བདེ་སྐྱིད་ལྡན་པར་ཤོག །གཟའ་སྐར་འཕེལ་སྐྱིད་ལྡན་པ་ལྟར། །ཡོན་བདག་མི་གྲངས་འཕེལ་བར་ཤོག །ཀླུ་ཆེན་བརྒྱད་དང་ཀླུ་མོ་བརྒྱད། །སྐྱིད་འཕེལ་ལོངས་སྤྱོད་ལྡན་པ་ལྟར། །ཡོན་བདག་ལོངས་སྤྱོད་ལྡན་པར་ཤོག །གཉན་དང་ས་བདག་གཏོད་ལ་སོགས། །བཙན་ཕྱུག་འཕན་རག་ལྡན་པ་ལྟར། །བདག་དང་རྒྱུ་སྦྱོར་ཡོན་བདག་རྣམས། །བཙན་ཕྱུག་དར་གསུམ་འཛོམ་པ་དང་། །ཅི་བསམ་ལྷུན་གྱིས་འགྲུབ་པར་ཤོག །དེ་ནས་གདན་ལ་བསྐྱོད་པ་ནི་རོལ་མོ་བསྒྲགས་ལ། ཀྱཻ། སྣང་སྲིད་མངའ་བདག་མ་ལུས་རྣམས། །ལྷ་ཀླུ་གཉན་དང་གཟའ་རྒྱུ་སྐར། །ཉི་ཟླ་ས་བདག་གཏོད་
དང་ནི། །སྤར་ཁ་སྨེ་བ་ལོ་བཅུ་གཉིས། །དཔལ་མགོན་བདུན་ཅུ་རྒྱལ་ཆེན་བཞི། །ཕྱོགས་སྐྱོང་གདོན་རིགས་འཁོར་དང་བཅས། །སྣང་སྲིད་བདག་པོ་མ་ལུས་རྣམས། །སྤྱན་འདྲེན་བཞུགས་གསོལ་དགྱེས་པ་སྐྱེད། །ནོངས་པ་བཤགས་ནས་སྐུ་ཁྲུས་གསོལ། །མཆོད་འབུལ་ཡོ་བསྲང་འགྲས་པ་བསྡུམ། །སྐུ་བསྟོད་ཕྱག་འཚལ་བཀྲ་ཤིས་བརྗོད། །རྒྱུ་སྦྱོར་ཡོན་བདག་འཁོར་བཅས་ལ། །མི་ཕྱུགས་ན་ཚ་སྡུག་བསྔལ་བསལ། །མི་བདེ་བ་རྣམས་བདེ་བར་བྱས། །མི་མཐུན་པ་རྣམས་མཐུན་པར་བྱས། །འཁྲུགས་པ་ཐམས་ཅད་ཞི་བར་བྱས། །སྣང་སྲིད་བདག་པོ་ཁྱེད་རྣམས་ལ། །རྫས་དང་ཡོ་བྱད་འདི་རྣམས་ནི། །དགའ་དང་དད་པས་འབུལ་ལགས་ན། །ཐུགས་རྗེས་དགོངས་ལ་བཞེས་སུ་གསོལ། །ཡོན་བདག་མི་ཕྱུགས་འཕེལ་བར་གྱིས། །དལ་ཁ་ཡམས་ཁ་བསྒྱུར་དུ་གསོལ། །མི་ནད་ཕྱུགས་ནད་ཞི་བར་མཛོད། །འཁྲུགས་པ་སོལ་ལ་གདུག་པ་སྒྱུར། །རྐྱེན་ངན་བར་ཆད་བསྒྱུར་དུ་གསོལ། །དེ་ནས་གཤེགས་སུ་གསོལ་བ་ནི། ཀྱཻ། ད་ནི་སྐྱོད་ཅིག་གནས་སུ་སྐྱོད། །གདུག་པའི་སེམས་དང་བྲལ་ནས་ནི། །ཞི་བ་བྱམས་
པའི་སེམས་དང་ལྡན་མཛོད་ཅིག ཀྱཻ། ཚངས་པ་བརྒྱ་བྱིན་ལྷ་ཡི་ཚོགས། །ལྷ་གནས་པདྨའི་གདན་ལ་གཤེགས། །ལྷ་ཡི་གདུག་ཟེར་མ་བཏང་ཞིག །ཉི་མ་ཟླ་བ་སྒྲོན་གསལ་གཉིས། །འོད་ཟེར་སྤྲུལ་པའི་མཁར་དུ་གཤེགས། །ཉི་ཟླའི་འཁྲུགས་པ་ཞི་བར་མཛོད། །གནམ་ས་བར་སྣང་དབང་བསྒྱུར་ལྷ། །གནམ་ས་བར་སྣང་འཁོར་ལོའི་ཁྲི་ལ་གཤེགས། །གཙུག་ན་རིན་ཆེན་ལ་སོགས་ཀླུ་ཆེན་བརྒྱད། །རྒྱ་མཚོ་ཆེན་པོའི་གནས་སུ་གཤེགས། །ཀླུ་ནད་གདུག་པ་མ་བཏང་ཞིག །མིག་དམར་ལ་སོགས་གཟའ་ཆེན་བརྒྱད་། །གཟའ་ཡི་གདུག་གཟེར་སླར་བསྡུས་ལ། །བར་སྣང་འཇའ་ཚོན་མཁར་དུ་གཤེགས། །རྒྱུ་སྐར་ཉི་ཤུ་རྩ་བརྒྱད་ཀྱང་། །སྐར་མའི་འཁྲུགས་པ་གདུག་རྩུབ་བསྡུས། །རླུང་གི་འཁོར་ལོའི་གདན་ལ་གཤེགས། །གནམ་ཁྱི་ལྷ་མོ་སྤུན་བདུན་དང་། །ཕོ་ཉ་གནམ་ཁྱི་བཅས་པ་རྣམས། །དངུལ་གྱི་འཁོར་ལོའི་གདན་ལ་གཤེགས། །ཤར་ཤིང་ལ་མངའ་མཛད་ས་བདག་ཀྱང་། །སྟག་ཡོས་འཁྲུགས་པ་བསལ་བ་དང་། །ལོ་ལྷ་གཉན་པོ་བཅོས་པ་དང་། །ཤར་ཕྱོགས་ཤིང་གི་གདན་ལ་སྐྱོད། །སྙིང་དཀར་འཁྲུགས་པ་
བསལ་དུ་གསོལ། །ཤིང་ཁམས་འཁྲུགས་པ་ཡོན་གྱིས་བཅོས། །ལྷོ་མེ་ལ་མངའ་མཛད་ས་བདག་ཀྱང་། །རྟ་སྦྲུལ་འཁྲུགས་པ་བསལ་བ་དང་། །ལོ་ལྷ་གཉན་པོ་བཅོས་པ་དང་། །ལྷོ་ཕྱོགས་མེ་ཡི་གདན་ལ་སྐྱོད། །མེ་ཡི་འཁྲུགས་པ་བསལ་དུ་གསོལ། །གཉན་གྱི་གདུག་རྩུབ་བསྒྱུར་དུ་གསོལ། །མེ་ཁམས་འཁྲུགས་པ་ཡོན་གྱིས་བཅོས། །ནུབ་ལྕགས་ལ་མངའ་མཛད་ས་བདག་ཀྱང་། །བྱ་སྤྲེལ་འཁྲུགས་པ་བསལ་བ་དང་། །ལོ་ལྷ་གཉན་པོ་བཅོས་པ་དང་། །ནུབ་ཕྱོགས་ལྕགས་ཀྱི་གདན་ལ་སྐྱོད། །སྙིང་ནག་འཁྲུགས་པ་བསལ་དུ་གསོལ། །སྙིང་གི་འགྲམས་འཁྲུགས་ཞི་བར་མཛོད། །ལྕགས་ཁམས་འཁྲུགས་པ་ཡོན་གྱིས་བཅོས། །བྱང་ཆུ་ལ་མངའ་མཛད་ས་བདག་ཀྱང་། །བྱི་ཕག་འཁྲུགས་པ་བསལ་བ་དང་། །ལོ་ལྷ་གཉན་པོ་བཅོས་པ་དང་། །བྱང་ཕྱོགས་རྒྱ་མཚོའི་གདན་ལ་སྐྱོད། །ཆུ་ཡི་འཁྲུགས་པ་བསལ་དུ་གསོལ། །ཆུ་བདུད་ཆུ་བཙན་བསྒྱུར་དུ་གསོལ། །ཆུ་ཁམས་འཁྲུགས་པ་ཡོན་གྱིས་བཅོས། །མཚམས་བཞིའི་ས་བདག་གཤེད་བཞི་ཡང་། །ས་ཁམས་ས་བདག་མཆོད་པའི་ཕྱིར། །གཤེད་བཞི་འགྲམས་
འཁྲུགས་བཅོས་ཕྱིར་དང་། །མཚམས་བཞི་ས་ཡི་གདན་ལ་བསྐྱོད། །གཤེད་བཞི་འཁྲུགས་པ་ཡོན་གྱིས་བཅོས། །མི་ལུས་འབྲུག་གི་མགོ་བོ་ཅན། །གནམ་ཁྱིའི་འཁྲུགས་པ་བསལ་བའི་ཕྱིར། །ཉི་མ་ཤར་ལྷོ་མཚམས་སུ་གཤེགས། །དངུལ་གྱི་འཁོར་ལོའི་གདན་ལ་བསྐྱོད། །གནམ་ཁྱིའི་འཁྲུགས་པ་བསལ་དུ་གསོལ། །གཤེད་ཀྱི་གདུག་རྩུབ་བསྒྱུར་དུ་གསོལ། །གནམ་སྒོ་བྱེ་བ་བཅད་དུ་གསོལ། །མི་ལུས་ལུག་གི་མགོ་བོ་ཅན། །མ་ཡམས་གདུག་པ་བསལ་བའི་ཕྱིར། །ཉི་མ་ལྷོ་ནུབ་མཚམས་སུ་གཤེགས། །གསེར་གྱི་འཁོར་ལོའི་གདན་ལ་བསྐྱོད། །མ་ཡམས་འཁྲུགས་པ་བསལ་དུ་གསོལ། །གཤེད་ཀྱི་གདུག་རྩུབ་བསྒྱུར་དུ་གསོལ། །ས་སྒོ་བྱེ་བ་བཅད་དུ་གསོལ། །མི་ལུས་ཁྱི་ཡི་མགོ་བོ་ཅན་། །གནམ་ལྷའི་གདུག་པ་བསལ་བའི་ཕྱིར། །ཉི་མ་ནུབ་བྱང་མཚམས་སུ་གཤེགས། །ལྕགས་ཀྱི་འཁོར་ལོའི་གདན་ལ་བསྐྱོད། །གནམ་ལྷའི་འཁྲུགས་པ་བསལ་དུ་གསོལ། །ཐོག་དང་སེར་བ་བཅད་དུ་གསོལ། །གནམ་ཐེལ་ཆོ་འཕྲུལ་བཟློག་ཏུ་གསོལ། །མི་ལུས་གླང་གི་མགོ་བོ་ཅན། །གཤེད་ཀྱི་འཁྲུགས་པ་བསལ་བའི་ཕྱིར། །ཉི་མ་
བྱང་ཤར་མཚམས་སུ་གཤེགས། །ཟངས་ཀྱི་འཁོར་ལོའི་གདན་ལ་བསྐྱོད། །གཤེད་ཀྱི་གདུག་པ་བསལ་དུ་གསོལ། །དུར་གྱི་གདུག་པ་བཅིང་དུ་གསོལ། ས་སྒོ་དུར་སྒོ་བྱེ་བ་བསྒྱུར། །དཔལ་མགོན་སྡེ་བརྒྱད་ཕྱོགས་སྐྱོང་དང་། །རིགས་དྲུག་གཡན་ཁམས་ཇི་སྙེད་རྣམས། །མཆོད་ཡོན་སྣ་ཚོགས་འདི་བཞེས་ལ། །འགྲས་པ་ཐམས་ཅད་བསྡུམ་པའི་ཕྱིར། །རང་རང་གནས་སུ་བདེ་བར་བསྐྱོད། །དགའ་མགུ་ཡི་རང་ལྡན་གྱུར་ཅིག །གདུག་པའི་སེམས་དང་བྲལ་ནས་ཀྱང་། །ཞི་བ་བྱང་ཆུབ་སེམས་དང་ལྡན་གྱུར་ཅིག །ས་བདག་རྒྱལ་པོ་སྡེ་ལྔ་དང་། །དུས་བཞིའི་རྒྱལ་མོ་ཡུམ་ཆེན་ལྔ། །འཁོར་དང་ཡང་འཁོར་བཅས་པ་རྣམས། །ས་བདག་གདུག་པ་བསལ་བ་དང་། །འཁྲུགས་པ་བཅོས་པའི་དོན་ཆེད་དུ། །ས་བདག་རྒྱལ་པོ་གདན་བསྐྱོད་འཚལ། །ཞེས་གདན་ལས་བསྐྱོད་དོ། །བདག་ཉིད་གསང་བདག་གི་ཐུགས་ཀ་ནས་འོད་ཟེར་མདུན་བསྐྱེད་ལ་ཕོག །མཐའ་ནས་འཁོར་རྣམས་གཅིག་ལ་གཅིག་ཐིམ་གཙོ་བོ་ལ་བསྡུས། གཙོ་བོ་འོད་དུ་ཞུ་ས་བོན་ལ་ཐིམ། ས་བོན་ལས་འོད་ཟེར་དཀར་པོ་འཕྲོས་བདག་དང་ཡོན་བདག་ལ་ཕོག་པས་བྱིན་རླབས་དངོས་གྲུབ་ཐམས་ཅད་ཐོབ། ནད་དང་
གནོད་སེམས་ཐམས་ཅད་བྲལ་བར་བསམ། ས་བོན་ཡང་བདག་ལ་ཐིམ། འོད་དུ་ཞུ་ཐུགས་ཀའི་ཧཱུྃ་ལ་ཐིམ། །ཧཱུྃ་འོད་དུ་ཞུ་སྟོང་པར་བཞག་གོ །དེ་ནས་རྡུལ་ཚོན་དར་དཀར་གྱིས་བསྡུས་ལ། ཀྱཻ། ནམ་མཁའ་དབྱིངས་ནི་ཡེ་ནས་མི་འགྱུར་ཏེ། །ས་ཆུ་མེ་རླུང་མི་རྟག་སྐད་ཅིག་མ། །ཆོས་ཉིད་དབྱིངས་ནི་ཡེ་ནས་མི་འགྱུར་ཏེ། །ཚིག་དང་ཡི་གེ་མི་རྟག་སྐད་ཅིག་མ། །བྱང་ཆུབ་སེམས་ནི་ཡེ་ནས་མི་འགྱུར་ཏེ། །སྒྱུ་མའི་ཕུང་པོ་མི་རྟག་སྐད་ཅིག་མ། །དབྱིངས་ཀྱི་དཀྱིལ་འཁོར་ཡེ་ནས་མི་འགྱུར་ཏེ། །རྡུལ་ཚོན་དཀྱིལ་འཁོར་མི་རྟག་སྐད་ཅིག་མ། །ད་ནི་བསྐྱོད་ཅིག་རྡུལ་ཚོན་གནས་སུ་བསྐྱོད། ཀྱཻ། རྡུལ་ཚོན་དཀར་པོ་བྲིས་པ་ཡང་། །ནམ་མཁའ་ཚོན་ཏེ་ལྷ་ཡི་གནས། །ལྷ་གནས་གདན་དུ་དམིགས་པ་ཡང་། །མི་འགྱུར་ནམ་མཁའི་གནས་སུ་བསྐྱོད། །རྡུལ་ཚོན་སྔོན་པོ་བྲིས་པ་ཡང་། །ཆུ་ལས་གྲུབ་སྟེ་ཀླུ་ཡི་གནས། །ཀླུ་གནས་གདན་དུ་དམིགས་པ་ཡང་། །མི་འགྱུར་རྒྱ་མཚོའི་གནས་སུ་བསྐྱོད། །རྡུལ་ཚོན་དམར་པོ་བྲིས་པ་ཡང་། །མེ་ལས་གྲུབ་སྟེ་གཟའ་ཡི་གནས། །གཟའ་གནས་གདན་དུ་དམིགས་པ་ཡང་། །མི་འགྱུར་རླུང་གི་གནས་སུ་བསྐྱོད། །རྡུལ་ཚོན་སེར་པོ་
བྲིས་པ་ཡང་། །ས་ལས་གྲུབ་སྟེ་ས་བདག་གནས་། །ས་བདག་གདན་དུ་དམིགས་པ་ཡང་། །མི་འགྱུར་ས་གཞིའི་གནས་སུ་བསྐྱོད། །རྡུལ་ཚོན་རིམ་པ་སྣ་ཚོགས་ཀྱང་། །སྣང་སྲིད་མངའ་བདག་ཁྱེད་རྣམས་ཀྱིས། །རང་རང་མཐུན་པའི་གནས་སུ་བསྐྱོད། །སྟོང་པའི་མཁའ་ལ་འགྱུར་ལྡོག་མེད། །འགྱུར་ལྡོག་མེད་པའི་ངང་ལ་བསྐྱོད། །བསྐྱོད་པའི་རྗེས་ཤུལ་དཀར་བར་མཛོད། །སྟོང་ཉིད་འགྱུར་མེད་ཀློང་དུ་བཞག །བཀྲ་ཤིས་བདེ་ལེགས་ཕུན་ཚོགས་མཛོད། །ཅེས་བསྐྱོད་དེ་ཆུ་ལ་བཏབ། སྟོང་ཉིད་ངང་ལ་སྣང་སྲིད་ཀུན་གྱི་གནོད་སེམས་ཞི་ནས། རྒྱལ་པོ་ལ་ཉེས་ཤོར་བ་བཤགས་སྦྱང་ཐོན་པ་བཞིན་བློ་ཐག་ཆོད་པ་ཞིག་སེམས་ལ་བྱའོ། །སྣང་སྲིད་འཁྲུགས་པ་ཡོ་བཅོས་དོན་བསྡུས་པ། ཡི་གེར་ཉུང་ངུར་པདྨ་མཐའ་བྲལ་གྱིས་བསྐུལ་བ་ལ་བརྟེན་ནས། རཱ་ག་ཨ་སྱས་བསྒྲིགས་པ་ཉེས་འགལ་མཆིས་ན་འཇམ་དཔལ་ཉིད་ལ་བཤགས། འགྲོ་ཀུན་དུས་ངན་གྱིས་འགྲམས་འཁྲུགས་ལས་སེམས་ཅན་ཐམས་ཅད་ཐར་བའི་རྒྱུར་གྱུར་ཅིག། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།