ཤོག་ལྷེབ་ ༡༧ ནས་ ༡༠༤ བར།
༈ །།ན་མོ་ལོ་ཀེ་ཤྭ་ར་ཡེ། བདེ་བ་ཅན་གྱི་ཞིང་ཁམས་ན། །ཆོས་སྐུ་སྣང་བ་མཐའ་ཡས་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །པོ་ཊ་ལ་ཡི་གནས་མཆོག་ན། །ལོངས་སྐུ་ཐུགས་རྗེ་ཆེན་པོ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །ཟངས་མདོག་དཔལ་རིའི་རྩེ་མོ་ན། །སྤྲུལ་སྐུ་པདྨ་འབྱུང་གནས་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །ཨོ་རྒྱན་སྤྲུལ་པའི་གཙུག་ལག་ན། །མ་གཅིག་གྲུབ་པའི་རྒྱལ་མོ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལཾ། །ཤིང་སྤང་གསེར་གྱི་མཎྜལ་ན། །ཏེ་པུ་གསང་སྔགས་སྡོང་པོ་ལ། །མོས་གུས་དྲག་པོས་
གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །ལྕང་ལོ་ཅན་གྱི་གནས་མཆོག་ན། །རས་ཆུང་རྡོ་རྗེ་གྲགས་པ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །རྩ་རླུང་བདེ་དྲོད་གཞལ་ཡས་ན། །བླ་མ་ཟངས་རི་རས་པ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །འོག་མིན་ཀརྨའི་གནས་མཆོག་ན། །འགྲོ་མགོན་སངས་རྒྱས་རས་ཆེན་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །སྟེང་ཕྱོགས་དགའ་ལྡན་ལྷ་ཡུལ་ན། །རྒྱལ་སྲས་སྤོམ་བྲག་ཆེན་པོ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་
སྩོལ། །སྣང་སྲིད་ཟིལ་གནོན་ཕོ་བྲང་ན། །གྲུབ་ཆེན་ཀརྨ་པཀཱི་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །གཉེན་རས་སང་གྷ་ལཀྵ་དང་། །སེམས་དཔའ་རང་བྱུང་རྡོ་རྗེ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །མཁས་བཙུན་རིན་ཆེན་རྒྱལ་མཚན་དང་། །ཡ་མཁས་གྲུབ་མངྒ་ཀེ་ཏུ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །རྗེ་བཙུན་རིཏྣ་བྷ་དྲ་དང་། །སྤྲུལ་སྐུ་མཐོང་བ་དོན་ལྡན་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །བྱང་སེམས་དཔལ་འབྱོར་དོན་གྲུབ་དང་། །རྒྱལ་དབང་ཆོས་གྲགས་རྒྱ་མཚོ་ལ། །མོས་གུས་དྲག་པོས་གསོལ་བ་
འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །གྲུབ་ཆེན་མཉན་པ་རས་ཆེན་དང་། །ཀུན་མཁྱེན་མི་བསྐྱོད་རྡོ་རྗེ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །གར་དབང་དཀོན་མཆོག་ཡན་ལག་དང་། །རྗེ་བཙུན་དབང་ཕྱུག་རྡོ་རྗེ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །སྒར་ཆེན་ཆོས་ཀྱི་ཕོ་བྲང་ན། །དྲིན་ཆེན་ཆོས་ཀྱི་དབང་ཕྱུག་ལ། །མོས་གུས་དྲག་པོས་གསོལ་བ་འདེབས། ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །དཔལ་ལྡན་རྩ་བའི་བླ་མ་མཆོག །ལུང་རིགས་བསྟན་པའི་ཉི་མ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །རང་
ལུས་སྣང་སྟོང་གཟུགས་ཀྱི་སྐུ། །ཡི་དམ་རྒྱལ་བ་རྒྱ་མཚོ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །ན་ཚ་བདེ་སྟོང་ཆོས་ཀྱི་སྐུ། །མཁའ་འགྲོ་གསང་བ་ཡེ་ཤེས་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །རྐྱེན་ངན་རིག་སྟོང་ཆོས་ཀྱི་སྐུ། །མགོན་པོ་བར་ཆད་ཀུན་སེལ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །ཚེ་རབས་བསྐལ་པ་གྲངས་མེད་ནས། །ཆང་དང་ཕབས་ཀྱི་རྫས་སྦྱོར་དང་། །ཐུགས་ཀྱི་དམ་ཚིག་ཉམས་པ་སོགས། །བརྒྱལ་ཞིང་འབོག་པའི་ལས་སྒྲིབ་རྣམས། །གང་བསགས་ཐམས་ཅད་མཐོལ་ཤིང་བཤགས། །ཕྱིན་ཆད་བགྱིད་པར་མ་གྱུར་ཅིག །དབང་བཅུའི་མངའ་བདག་སྤྱན་རས་གཟིགས། །མི་དགེའི་ལས་སྒྲིབ་བསལ་ནས་ཀྱང་། །དགེ་བའི་འབྲས་
བུས་གསོལ་བཏབ་ནས། །བརྒྱལ་ཞིང་འབོག་པའི་ནད་གདོན་རྣམས། །ཞི་ཞིང་མེད་པར་མཛད་དུ་གསོལ། །ལུས་སེམས་བདེ་བར་བྱིན་གྱིས་རློབས། །ཞེས་པ་འདི་རང་གི་ཉེ་གནས་དོན་གྲུབ་ལ་བརྒྱལ་ནད་དྲག་པོ་ཞིག་བྱུང་ནས་ཞག་རེ་རེ་ལ་ཡང་ལན་བཅུ་གཉིས་ཙམ་བརྒྱལ་ནས་འགྲོ་བ་གཅིག་བྱུང་ནས་ཐབས་གང་གིས་ཀྱང་མ་ཕན། འདི་སྔོན་ལས་ཀྱི་འབྲས་བུ་ཅི་ཡིན་ནམ་སྙམ་ནས་ནམ་སྲོད་ཙམ་ལ་གསོལ་འདེབས་འདི་བྱུང་རྒྱལ་དུ་སྨྲས་ནས། ཐུགས་རྗེ་ཆེན་པོའི་ནད་པ་བྱིན་རླབས་ཀྱི་དམིགས་པ་གནད་དུ་བསྣུན་པས། ཕྱིར་ནངས་ཅུང་ཟད་ཙམ་བདེ་བ་བྱུང་ངོ་། །ཞེས་པ་རཱ་ག་ཨ་སྱས་སོ།། ༈ །།ན་མོ་ཤྲཱི་ཙཀྲ་སཾ་ཝ་ར་ཡེ། ཟངས་མདོག་དཔལ་རིའི་རྩེ་མོ་ནས། །སྣང་སྲིད་ཟིལ་གནོན་སྤྲུལ་པའི་སྐུ། །ཨོ་རྒྱན་པདྨ་འབྱུང་གནས་ལ། །གསོལ་བ་འདེབས་སོ་བྱིན་གྱིས་རློབས། །སྣང་སྲིད་དབང་གི་དངོས་གྲུབ་སྩོལ། །བདེ་ཆེན་འབར་བའི་དཀྱིལ་འཁོར་ན། །དབང་མཆོག་པདྨ་ཧེ་རུ་ཀ །བཅོམ་ལྡན་བདེ་མཆོག་འཁོར་ལོ་ལ། །གསོལ་བ་འདེབས་སོ་བྱིན་གྱིས་རློབས། །སྣང་སྲིད་དབང་གི་དངོས་གྲུབ་སྩོལ། །ཨོ་རྒྱན་སྤྲུལ་པའི་གཞལ་ཡས་ན། །དབང་གི་རང་བཞིན་ཌཱཀི་མ། །
ཡུམ་མཆོག་རྡོ་རྗེ་ཕག་མོ་ལ། །གསོལ་བ་འདེབས་སོ་བྱིན་གྱིས་རློབས། །སྣང་སྲིད་དབང་གི་དངོས་གྲུབ་སྩོལ། །ཉི་ཤུ་རྩ་བཞིའི་གནས་མཆོག་ན། །ཐོགས་མེད་རྫུ་འཕྲུལ་སྟོབས་དང་ལྡན། །རིགས་བཞིའི་དཔའ་བོ་མཁའ་འགྲོ་ལ། །གསོལ་བ་འདེབས་སོ་བྱིན་གྱིས་རློབས། །སྣང་སྲིད་དབང་གི་དངོས་གྲུབ་སྩོལ། །ཁྱེད་ལ་གསོལ་བ་བཏབ་པའི་མཐུས། །ཁམས་གསུམ་དབང་དུ་སྡུད་པ་དང་། །སྲིད་གསུམ་ཟིལ་གྱིས་གནོན་པ་དང་། །བསམ་པ་ཡིད་བཞིན་འགྲུབ་པར་མཛོད། །སྣང་སྲིད་དབང་གི་དངོས་གྲུབ་སྩོལ། །ཞེས་པ་འདི་རྒྱལ་ཟླའི་ཚེས་བཅུའི་ནུབ་མོ་དགོས་པ་ཅུང་ཟད་ལ་བརྟེན་ནས་བདེ་མཆོག་དམར་པོ་ལ་གསོལ་བ་འདི་བཏབ་པས། དོན་དེ་འགྲུབ་པའི་ལྟས་གསལ་བར་མཐོང་ཞིང་ཐོག་ཏུ་བབ་པའོ། །ཀརྨ་ཨ་རཱ་གས་སོ།། །།ན་མོ་དྷི་པཾ་ཀ་ར་ཨུ་པ་སི་ཀ་ཡེ། བདེ་བ་ཅན་ན་རྒྱལ་བ་ཚེ་དཔག་མེད། །འཕགས་པའི་ཡུལ་ན་པཎ་ཆེན་ཨ་ཏི་ཤ །དགའ་ལྡན་གནས་ན་ནམ་མཁའ་དྲི་མེད་ཅེས། །གངས་རིའི་ཁྲོད་འདིར་ཞྭ་དམར་ཅོད་པན་ཅན། །ཆོས་ཀྱི་དབང་ཕྱུག་ཞབས་ལ་གསོལ་བ་འདེབས། །རི་བོ་ཏ་ལའི་རྩེ་
ན་སྤྱན་རས་གཟིགས། །དབུས་རུ་བྱང་ན་འབྲོམ་སྟོན་རྒྱལ་བའི་མཚན། །ཕུ་ཆུང་བ་དང་སྐྱེར་སྒང་བ་ལ་སོགས། །གང་འདུལ་སྤྲུལ་པ་ཕྱོགས་བཅུར་འགྱེད་མཛད་ཅིང་། །དེང་སང་ཞིང་འདིར་སྤྲུལ་པའི་སྐུ་སྟོན་པ། །ཆོས་དབྱིངས་རྡོ་རྗེའི་ཞབས་ལ་གསོལ་བ་འདེབས། །ཤེས་རབ་རྣམ་གཉིས་རྒྱལ་མཚན་རྣམ་གསུམ་སོགས། །བརྒྱུད་པའི་བླ་མ་ཐུགས་རྗེ་ཆེ་རྣམས་དང་། །བཀའ་གདམས་ལྷ་བཞི་ཡུམ་ཆེན་རྡོ་རྗེ་འཆང་། །བྱམས་པ་ཀླུ་སྒྲུབ་ལ་སོགས་བྱང་ཆུབ་ཀྱི། །ཐིག་ལེ་བཅུ་དྲུག་ལྷ་ལ་གསོལ་བ་འདེབས། །སྐྱབས་གནས་དམ་པ་དཀོན་མཆོག་རིན་ཆེན་གསུམ། །ཡི་དམ་གདམས་པ་བཀའ་གདམས་ལྷ་མཆོག་བཞི། །དམ་ཆོས་གདམས་པ་སྡེ་སྣོད་རིན་ཆེན་གསུམ། །རྒྱལ་བ་རྒྱ་མཚོའི་གདམས་ཁ་མ་ནོར་བའི། །ཆོས་བདུན་པོ་དེ་ལ་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །བདག་དང་བདག་གི་བརྒྱུད་པར་བཅས་པ་རྣམས། །ཁེ་ལས་ཉེན་ཆེའི་ཆོས་ཀྱིས་མི་བསླུ་བར། །ཉན་ཆུང་ཁེ་ཆེའི་དམ་ཆོས་སྡེ་སྣོད་གསུམ། །ཚུལ་བཞིན་ཉམས་སུ་ལོན་པར་བྱིན་གྱིས་རློབས། །སྙིང་རྗེ་མེད་ཅིང་ཁྲོ་གཏུམ་ཀོ་ལོང་ཅན། །
འཇིག་རྟེན་ལྷ་ལ་སྐྱབས་སུ་མི་འགྲོ་བར། །ཐུགས་རྗེ་གཡེལ་མེད་འགྲོ་ལ་རྟག་ཏུ་གཟིགས། །འཕྲལ་བདེ་ཕུགས་སུ་སྐྱོབ་པའི་ལྷ་ཚོགས་བཞི། །འབྲལ་མེད་སྐྱབས་སུ་འཛིན་པར་བྱིན་གྱིས་རློབས། །རབ་འབྱམས་མདོ་རྒྱུད་ཀུན་ཏུ་གསུངས་པའི་ལྷ། །ལྷ་རེ་སྔགས་རེ་སྤང་བླང་མི་བྱེད་པར། །ཐམས་ཅད་ཐིག་ལེའི་དཀྱིལ་འཁོར་གཅིག་བསྡུས་ནས། །རྗེས་དྲན་ལྔ་དང་ལྡན་པར་ཉམས་ལེན་པའི། །བཀའ་གདམས་བྱིན་རླབས་འཇུག་པར་བྱིན་གྱིས་རློབས། །བརྟན་མ་བཅུ་གཉིས་དཀར་པོ་བརྒྱད་ཅུ་སོགས། །སྲུང་མ་རྣམས་ཀྱིས་རྟག་ཏུ་གྲོགས་མཛད་ཅིང་། །རྣམ་ཐར་གཙང་མ་བསླབ་པ་གསུམ་ལྡན་པའི། །བདག་གི་བུ་སློབ་དཔག་མེད་རབ་འཕེལ་ནས། །རྒྱལ་བའི་བསྟན་པ་ཉིན་མོར་བྱེད་པ་ཡི། །དངོས་གྲུབ་མཆོག་དེ་བདག་ལ་བསྩལ་དུ་གསོལ། །ཞེས་ཐིག་ལེ་བཅུ་དྲུག་གི་སྒྲུབ་པ་ཚར་བའི་ཉིན་མོ་རྗེ་བླ་མའི་དུས་མཆོད་ལ་དམིགས་ནས་སྨྲས་སོ།། །།ན་མོ་གུ་རུ་བྷྱཿ ཐོག་མའི་མགོན་པོ་ཀུན་བཟང་རྡོ་རྗེ་འཆང་། །རང་བཞིན་ལྷུན་གྲུབ་ངོ་བོ་ཉིད་ཀྱི་སྐུ། །སྨྲ་བསམ་བརྗོད་བྲལ་ཤེས་རབ་ཕ་རོལ་ཕྱིན། །བླ་མ་
ཆོས་ཀྱི་སྐུ་ལ་གསོལ་བ་འདེབས། །ངེས་པ་ལྔ་ལྡན་འདྲེན་པ་འོད་དཔག་མེད། །རིགས་ལྔ་ཚེ་ཡི་བདག་པོ་བཅོམ་ལྡན་འདས། །རྒྱལ་བ་རྒྱ་མཚོ་གསང་འདུས་ཐུགས་རྗེའི་ལྷ། །བླ་མ་ལོངས་སྤྱོད་རྫོགས་ལ་གསོལ་བ་འདེབས། །མི་མཇེད་འཛམ་གླིང་བྱེ་བ་ཕྲག་བརྒྱ་ན། །མདོ་སྔགས་བསྟན་པ་ཟུང་དུ་འཇུག་པའི་ཕྱིར། །ཤཱཀ་ཐུབ་པད་འབྱུང་བྱེ་བ་ཕྲག་བརྒྱར་སྤྲུལ། །བླ་མ་སྤྲུལ་པའི་སྐུ་ལ་གསོལ་བ་འདེབས། །རྒྱལ་བའི་བསྐྱེད་ཡུམ་འཕགས་མ་སྒྲོལ་མ་ཉིད། །གང་འདུལ་སྐུར་སྟོན་མ་གཅིག་མཚོ་རྒྱལ་མ། །མནྡ་ར་བ་ཤཱཀྱ་དེ་བློམ་སོགས། །ཡེ་ཤེས་མཁའ་འགྲོའི་ཚོགས་ལ་གསོལ་བ་འདེབས། །མཁན་པོ་བྱང་ཆུབ་སེམས་དཔའ་ཞི་བ་འཚོ། །བི་མ་མི་ཏྲ་ནཱ་ག་རྫུ་ན་དང་། །ཧཱུཾ་ཆེན་ཀ་ར་བཱ་སུ་དྷ་ར་སོགས། །རྒྱ་བལ་རིག་འཛིན་རྣམས་ལ་གསོལ་བ་འདེབས། །མངའ་བདག་ཡབ་སྲས་ཉང་བན་ཏིང་འཛིན་བཟང་། །སྐ་ཅོག་ཞང་དང་རྗེ་འབངས་ཉི་ཤུ་ལྔ། །དམར་གཡོ་གཙང་གསུམ་དགོངས་པ་རབ་གསལ་སོགས། །བོད་ཀྱི་རིག་འཛིན་རྣམས་ལ་གསོལ་བ་འདེབས། །ཟབ་གཏེར་བདག་པོ་ཆོས་རྒྱལ་རཏྣ་གླིང་། །ཉང་དང་ཆོས་དབང་འཇའ་ཚོན་
སྙིང་པོ་དང་། །དྲི་མེད་སྡེ་ལྔ་གླིང་པ་བརྒྱད་ལ་སོགས། །གཏེར་སྟོན་སྤྲུལ་སྐུ་རྣམས་ལ་གསོལ་བ་འདེབས། །རྒྱལ་བ་རང་བྱུང་མཚོ་སྐྱེས་རྡོ་རྗེའི་ཞབས། །ཀུན་མཁྱེན་འབྲུག་ཆེན་ཀུན་དགའ་དཔལ་འབྱོར་དང་། །སྤྲུལ་པའི་ཆོས་རྒྱལ་ཀུན་དགའི་མཚན་ཅན་སོགས། །ཆོས་བདག་སྐྱེས་མཆོག་རྣམས་ལ་གསོལ་བ་འདེབས། །དབང་ཆེན་སྤྲུལ་པ་རྒྱལ་སྲས་ཚེ་དབང་གྲགས། །སྒྲུབ་བརྒྱུད་བསྟན་པའི་རྒྱལ་མཚན་ངག་དབང་གྲགས། །ཀུན་དགའ་གྲགས་པ་ཀུན་དགའ་བསྟན་འཛིན་སོགས། །གདུང་རྒྱུད་དྲི་མེད་་རྣམས་ལ་གསོལ་བ་འདེབས། །ལུང་ནས་བསྟན་པའི་སྐྱེས་བུ་ཤཱཀྱའི་མཚན། །ཨོ་རྒྱན་བསྟན་པའི་གསལ་བྱེད་མཁར་པའི་དྲུང་། །པདྨའི་མཚན་དང་མདྨ་དོན་ཡོད་མཚན། །ལས་ཆེན་སློབ་བརྒྱུད་རྣམས་ལ་གསོལ་བ་འདེབས། །རཏྣ་དབོན་སྲས་ཆོས་ཀྱི་མཛོད་འཛིན་པ། །གཏེར་སྟོན་ཆེན་པོ་ལས་འཕྲོ་གླིང་པ་དང་། །འཇིག་རྟེན་མགོན་པོ་སངས་རྒྱས་ཕུན་ཚོགས་སོགས། །ཉེ་བརྒྱུད་བླ་མ་རྣམས་ལ་གསོལ་བ་འདེབས། །སྐྱོན་ཡོན་གཉིས་ལྡན་སོ་སྐྱེའི་སློབ་དཔོན་ཡང་། །རྒྱལ་བ་ཀུན་བས་བཀའ་དྲིན་ཁྱད་པར་འཕགས། །ཡི་
དམ་དངོས་སུ་མོས་ན་དངོས་གྲུབ་མྱུར། །རྩ་བའི་བླ་མའི་ཞབས་ལ་གསོལ་བ་འདེབས། །སློབ་མས་མཆོད་དམ་དབང་བསྐུར་བྱེད་པའི་ཚེ། །དད་ལྡན་རྗེས་སུ་བཟུང་ཕྱིར་སངས་ལྟརྒྱས་རྣམས། །དེ་ཚེ་སློབ་དཔོན་ལུས་ལ་ཞུགས་པར་གསུངས། །ཤིན་ཏུ་ཉེ་བརྒྱུད་དེ་ལ་གསོལ་བ་འདེབས། །སྙིགས་དུས་གཏེར་ལ་མོས་པའི་སྐལ་ལྡན་རྣམས། །དེང་སང་གུ་རུའི་ཞལ་མཐོང་སྨོན་ལམ་བཏབ། །ཐམས་ཅད་ལས་ཅན་ཡིན་ཞེས་མཚོ་རྒྱལ་གསུངས། །མཆེད་གྲོགས་ཆོས་མཛད་རྣམས་ལ་གསོལ་བ་འདེབས། །གདོད་ནས་ལྷན་སྐྱེས་རང་སེམས་པདྨ་འབྱུང་། །རང་ཞལ་བལྟས་པས་སྒྲོ་འདོགས་ནང་ནས་ཆོད། །རྒྱུན་དུ་མཇལ་ན་ཚེ་གཅིག་སངས་རྒྱས་འགྲུབ། །རབ་ཏུ་ཉེ་བརྒྱུད་དེ་ལ་གསོལ་བ་འདེབས། །རང་ལུས་ཡང་གསང་དྲག་པོ་ཐོད་ཕྲེང་རྩལ། །སྙིང་དབུས་ཞི་བའི་ལྷ་ཚོགས་བཞི་བཅུ་གཉིས། །དུང་ཁང་ནང་ན་ཁྲག་འཐུང་ལྔ་བཅུ་བརྒྱད། །ཡི་དམ་ལྷ་ཚོགས་རྣམས་ལ་གསོལ་བ་འདེབས་། །མ་རིག་བདག་འཛིན་རུ་ཏྲ་དུར་ཁྲོད་བདག །རིག་པའི་ཡེ་ཤེས་ཆེ་མཆོག་ཧེ་རུ་ཀ །གཉིས་མེད་མ་ནིང་ཆོས་སྐྱོང་ཡོངས་ཀྱི་རྗེ། །བླ་མགོན་དབྱེར་མེད་དེ་ལ་
གསོལ་བ་འདེབས། །རྟོག་ཚོགས་འཁྲུལ་པའི་རང་གཟུགས་དྲེགས་པའི་ཚོགས། །རྒྱལ་བས་བཀའ་བསྒོས་རྣལ་འབྱོར་བུ་བཞིན་སྐྱོངས། །བསྟན་པའི་བཀའ་སྲུང་བཀའ་ཡི་བྱ་ར་བ། །དམ་ཅན་རྒྱ་མཚོའི་ཚོགས་ལ་གསོལ་བ་འདེབས། །དེ་ལྟར་པད་འབྱུང་བརྒྱུད་པར་བཅས་རྣམས་ལ། །ཁ་ཙམ་མིན་པར་སྙིང་ནས་གསོལ་བཏབ་པས། །སེམས་མེད་ནོར་བུས་དགོས་འདོད་སྩོལ་བ་ལྟར། །བྱིན་རླབས་ཤུགས་ཀྱིས་འབྱུང་བར་བྱིན་གྱིས་རློབས། །སྔོན་ཚེ་བསོད་ནམས་དཔག་མེད་བསགས་པའི་མཐུས། །ད་རེས་མི་ལུས་རིན་ཆེན་ཐོབ་དུས་འདིར། །རིན་ཆེན་གླིང་ནས་སྟོང་ལོག་མི་བྱེད་པར། །དལ་འབྱོར་སྙིང་པོ་ལོན་པར་བྱིན་གྱིས་རློབས། །སང་དང་ཕྱི་མ་གང་སྔ་མི་ཤེས་པས། །རྟག་ཏུ་འཆི་བ་དྲན་པའི་བརྩོན་འགྲུས་ཀྱིས། །འཆི་ཁ་བྲང་ལག་འཐབ་མོ་མི་འཆོར་བར། །བློ་བདེ་ཁོང་དུ་ཆུད་པར་བྱིན་གྱིས་རློབས། །ལས་འབྲས་བསླུ་བ་མེད་པའི་དོན་མཐོང་ནས། །ཤེས་བཞིན་ངན་སོང་གཡང་ལ་མི་འཆོར་བར། །སྡོམ་གསུམ་དྲི་མ་སྤང་བའི་སྙིང་རུས་ཀྱིས། །གཏན་བདེའི་བཙན་ས་ཟིན་པར་བྱིན་གྱིས་རློབས། །སྔོན་ཚེ་
གང་ནས་འོང་ཡང་མི་ཤེས་ཤིང་། །ཕྱི་མ་གར་སྐྱེ་ད་ལྟའི་ལས་ལ་རག །རིགས་དྲུག་གང་དུ་སྐྱེས་ཀྱང་སྡུག་བསྔལ་ཆེ། །སྐྱོ་བ་གཏིང་ནས་སྐྱེ་བར་བྱིན་གྱིས་རློབས། །བཙན་ཕྱུག་སྟོབས་འབྱོར་ཆེ་ཡང་རྟག་མི་ཐུབ། །ཚེ་འདིའི་བདེ་སྐྱིད་བསྒྲུབ་ཀྱང་འགྲུབ་པར་དཀའ། །འགྲུབ་ཀྱང་ཡུན་རིང་མི་གནས་མྱུར་དུ་འཇིག །དགོས་མེད་རྒྱུད་ལ་སྐྱེ་བར་བྱིན་གྱིས་རློབས། །ཕུང་པོ་ལྔ་པོ་དྲག་པོ་རིགས་ལྔ་དང་། །ཁམས་ལྔ་རྒྱལ་བའི་ཡུམ་ཆེན་མཁའ་འགྲོ་ལྔ། །འཁོར་ལོ་ལྔ་པོ་གོ་ཆའི་ལྷ་ཚོགས་ལྔ། །དབང་དྲག་པདྨ་འགྲུབ་པར་བྱིན་གྱིས་རློབས། །སྣོད་བཅུད་གདོད་ནས་ལྷ་དང་གཞལ་ཡས་ཁང་། །འབྱུང་འཇུག་རླུང་དང་སྒྲ་སྐད་སྔགས་ཀྱི་ཚིག །དྲན་རྟོགས་དུག་ལྔ་རང་གྲོལ་ཡེ་ཤེས་ལྔ། །ཡིན་ན་ཡིན་བཞིན་རྟོགས་པར་བྱིན་གྱིས་རློབས། །ཚེ་འདིར་ཚེ་རིང་ནད་མེད་དཔལ་འབྱོར་རྒྱས། །སྒྲུབ་ལ་བར་ཆད་ནམ་ཡང་མི་འབྱུང་ཞིང་། །ཆོས་བཞིན་སྤྱོད་པའི་གྲོགས་དང་ལྷན་ཅིག་ཏུ་།སྒྲུབ་པ་མཐའ་རུ་ཕྱིན་པར་བྱིན་གྱིས་རློབས། །ནམ་ཞིག་འདི་ནས་མི་གནས་འཕོ་བའི་ཚེ། །ཆགས་ཞེན་འཇིགས་སྐྲག་བསམ་པ་ཀུན་སྤངས་ནས། །མ་བཅོས་སོ་མའི་
ངང་དུ་བཞག་པ་ཡི། །འོད་གསལ་མ་བུ་འདྲེས་པར་བྱིན་གྱིས་རློབས། །འཆི་བ་ཆོས་ཀྱི་སྐུ་རུ་སངས་རྒྱས་ནས། །སླར་ཡང་བར་དོ་ལོངས་སྤྱོད་རྫོགས་པའི་སྐུ་། །མཚན་དཔེའི་རྒྱན་དང་ལྡན་པའི་ཡི་དམ་ལྷ། །དག་པའི་སྒྱུ་ལུས་འཆར་བར་བྱིན་གྱིས་རློབས། །ཡི་དམ་ལྷ་དང་དཔའ་བོ་མཁའ་འགྲོའི་ཚོགས། །སྣ་ཚོགས་མཆོད་པས་བདག་གི་མདུན་བསུ་ཞིང་། །ཨོ་རྒྱན་སྣང་བ་མཐའ་ཡས་ཞབས་དྲུང་དུ། །བརྫུས་སྐྱེས་སྤྲུལ་སྐུ་ཐོབ་པར་བྱིན་གྱིས་རློབས། །ཐུགས་རྗེའི་མངའ་བདག་པདྨ་འབྱུང་གནས་ལ། །ཡིད་གཉིས་ཐེ་ཚོམ་མེད་པར་གསོལ་བ་འདེབས། །ཆོས་དང་མཐུན་པའི་འདོད་དོན་མ་ལུས་པ། །འབད་མེད་ལྷུན་གྱིས་གྲུབ་པར་བྱིན་གྱིས་རློབས། །ཞེས་པ་འདི་ཀརྨ་ཡང་དག་གིས་བླ་མ་བརྒྱུད་པའི་གསོལ་འདེབས་ཚིག་མ་མང་ཞིག་དགོས་ཟེར་ནས། ཀརྨ་རཱ་གས་ཐུན་མཚམས་གཅིག་ལ་བྲིས་པའོ།།་ཨེ་མ་ཧོ། རྒྱལ་བའི་དབང་པོ་འོད་སྟོང་རབ་འབར་ཡང་། །བསྟན་པའི་སྙིགས་མ་མེ་ཤེལ་སྐྱོན་ལྡན་ཞིང་། །གདུལ་བྱའི་སྤྲོ་བ་ལོག་ལྟའི་རླན་གྱིས་བངས། །བྱིན་རླབས་བྱིན་ཟ་རྒྱས་པར་དཀའ་འམ་སྙམ། །རྒྱལ་དབང་ཐུགས་
རྗེའི་ཆུ་འཛིན་རབ་འཁྲིགས་ཀྱང་། །གསོལ་འདེབས་དབྱར་སྐྱེས་མགྲིན་རྔ་མི་སྒྲོག་ཅིང་། །ལོག་ལྟའི་རླུང་དམར་རབ་ཏུ་སྦྱད་ལུགས་ཀྱིས། །བྱིན་རླབས་བསིལ་རྒྱུན་ནམ་ཞིག་ལྟའབབ་ན་ཨང་། །རྒྱལ་བསྟན་མཚན་མོའི་མགོན་པོ་ཤར་ན་ཡང་། །ངེས་འབྱུང་བཟང་པོའི་སྤྲིན་དཀར་འཛུམ་མེད་པར། །ཚུལ་མིན་སྤྱོད་པའི་ཆར་མུན་འཁྲིགས་ལུགས་ཀྱིས། །ཐར་བའི་ལམ་བཟང་ནམ་ཞིག་རྙེད་ན་ཨང་། །སེམས་བསྐྱེད་པད་སྡོང་ལོ་འདབ་གཡུར་ཟ་ཡང་། །གཞན་ཕན་བསམ་པའི་ཉི་འོད་མི་མཐོང་ཞིང་། །གནོད་བསམ་མི་སྲུན་ཀིང་ཀང་འབེབས་ལུགས་ཀྱིས། །རབ་དགའི་འདབ་སྟོང་ནམ་ཞིག་བཞད་ན་ཨང་། །དབང་བཞི་དཔག་བསམ་ལོ་འདབ་ཁྱོན་ཡངས་ཀྱང་། །བསྐྱེད་རྫོགས་བུང་བའི་གཉེར་གྱུར་མ་མཐོང་ཞིང་། །མི་བརྩོན་འཆར་བའི་སྟ་ཐོགས་མང་ལུགས་ཀྱིས། །དངོས་གྲུབ་འབྲས་བུ་ནམ་ཞིག་སྨིན་ན་ཨང་། །ཟབ་ཆོས་སྒོམ་རྒྱུར་སྙིང་པོ་མང་ན་ཡང་། །བརྩོན་འགྲུས་ཀ་ཤིའི་རས་ཀྱིས་མི་ཕྱི་ཤིང་། །བསྒྲུབ་པའི་རྒྱལ་མཚན་སྲོག་ཤིང་ཆགས་ལུགས་ཀྱིས། །དགོས་འདོད་རེ་བ་ནམ་ཞིག་བསྐང་ན་ཨང་། །སྨྲ་མང་ཉམས་ལེན་བྲལ་བའི་ནེ་
ཚོ་བཞིན། །དམ་ཆོས་སྨྲས་ཀྱང་རང་རྒྱུད་གྱོང་པོ་རང་། །བྱ་བྲལ་ང་ནི་རང་ལ་རང་མ་མགུ། །ད་ནི་རང་གིས་རང་ལ་གྲོས་ཤིག་ཐོབ། །ཅེས་རང་གཞན་འགའ་ལ་བསམས་པས་ཅུང་མ་མགུ་ཞིང་། ཁྱད་པར་དྲུང་རམ་པ་སྟོབས་ཆེན་གྱིས་རྒྱལ་བའི་དབང་པོ་ལ་མ་དད་ནས་ངག་འཁྱལ་འགའ་སྨྲས་ཟེར་བ་དྲན་ནས་སྨྲས་པའོ། །མངྒ་ལཾ།། ༈ །།སྔགས་འཆང་རྣལ་འབྱོར་ཚེ་དབང་བཀྲ་ཤིས་ཀྱི། །སྒྱུ་ལུས་ཡུན་རིང་ནད་ཀྱིས་མནར་ན་ཡང་། ཚེ་ལ་བདུད་ཀྱི་བར་ཆད་མ་བྱུང་ཞིང་། །ཟུག་གཟེར་ཆུང་ཞིང་དགེ་སྦྱོར་འཕེལ་བ་ལེགས། །ཁྱེད་ཀྱང་བསྙུང་གཞི་ཤིན་ཏུ་ལྕི་བ་དང་། །ང་ཡང་མཚམས་ཀྱི་བཅད་རྒྱ་དམ་པའི་ཕྱིར། །ད་ནས་རང་གཉིས་ཅི་འཕྲད་མི་ཤེས་པས། །དངོས་སུ་འཕྲད་འདྲའི་སྙིང་གཏམ་ཚིག་གསུམ་བཤད། །མི་ལུས་རིན་ཆེན་ཐོབ་པ་ཤིན་ཏུ་དཀའ། །སངས་རྒྱས་བསྟན་དང་མཇལ་བ་དེ་བས་དཀའ། །བསྐྱེད་རྫོགས་ཉམས་ལེན་ཤེས་པ་ད་རེས་ཙམ། །སྡུག་སྐད་ཤི་སྨོན་སྨེ་སྔགས་རྒྱང་སྟེ་སྒྱུར། །ཞག་རེ་མ་ཤི་ན་ཡང་དགེ་སྦྱོར་འཕེལ། །སྡིག་སྡུག་དཀའ་ལས་མང་པོས་བསྒྲུབས་པའི་ཟས། །ཤ་ཆང་ཇ་སོགས་ཞིམ་དགུ་ཟོས་ན་ཡང་། །ཞག་གཅིག་
སོང་ནས་མི་གཙང་རྫས་སུ་འགྱུར། །ཞིམ་མངར་ཟས་ཀྱི་སྲེད་པ་རྒྱང་སྟེ་སྒྱུར། །གང་བྱུང་གྱི་ན་ཙམ་ལ་ཆོག་ཤེས་མཛོད། །ཁ་བསྡུས་ཚེ་ཕུད་གྲོང་ཆོག་འདྲེ་རྡུང་ཡང་། །མི་ཚེར་བསྒྲུབ་ཀྱང་ཇེ་ལྟོགས་བརྒྱགས་དུས་མེད། །རང་གི་ཐུགས་དམ་དགེ་སྦྱོར་སད་ལ་འཆོར། །རྙེད་ཚོལ་གྲོང་ཆོག་རློམ་སེམས་རྒྱང་སྟེ་སྒྱུར། །རྐྱེན་ངན་གྲོགས་ཤར་སོམས་ལ་དགེ་སྦྱོར་གྱིས། །སྤྱིར་དུ་འགྲོ་བའི་ཚེ་སྲོག་མི་རྟག་ཅིང་། །སྒོས་སུ་དེང་སང་བཞི་བཅུ་ཁ་རལ་ཡིན། །ད་ནི་ཚེ་མཇུག་དགུན་ཉི་ལས་ཀྱང་ཐུང་། །ཚེ་འདིར་མི་ཕྱིད་དགོས་པ་རྒྱང་སྟེ་སྐྱར། །ཚེ་མཇུག་ཅི་གདའ་དགེ་སྦྱོར་ཉིད་ལ་དྲིལ། །དུས་མིན་འཆི་བ་སུས་ཀྱང་བཟློག་མི་ཐུབ། །ཐབས་ནི་ཇི་ལྟར་བྱས་ཀྱང་བཤོལ་ཐབས་མེད། །ན་དོགས་འཆི་དོགས་ནད་ལ་ཨེ་ཕན་གྱིས། །སྲུང་ཟློག་ཐུགས་དམ་མང་པོ་རྒྱང་སྟེ་སྐྱུར། །ཐུགས་དམ་ཅི་བྱེད་ཕྱི་མའི་དོན་དུ་དྲིལ། །སྤུན་ཟླ་བཟའ་ཚང་ཡུལ་མི་ཁྱིམ་མཚེས་ཀུན། །ཚོང་དུས་ཆེན་པོའི་ཁྲོམ་པ་ཅི་བཞིན་དུ། །ཡུན་རིང་མི་གནས་མྱུར་དུ་སོ་སོར་འགྲོ། །ཆགས་སྡང་འགྲན་སེམས་བསམ་པ་རྒྱང་སྟེ་སྒྱུར། །ཀུན་ལ་ཕན་སེམས་བསམ་པ་བཟང་དུ་
སྒོམས། །ནད་ཀྱིས་ཟུག་གཟེར་ཉམ་ཐག་ཆེ་ན་ཡང་། །ཚེ་ཚད་མ་རྫོགས་འཕོ་བ་བྱས་གྱུར་ན། །ལུས་ལྷ་བསད་པའི་ཉེས་པས་དམྱལ་བར་ལྟུང་། །སྡུག་ནས་འཕོ་བ་བསྒོམ་པ་རྒྱང་སྟེ་སྒྱུར། །འདི་བས་དམྱལ་བའི་སྡུག་བསྔལ་ཆེ་ལུགས་སོམས། །ཆོས་རྒྱལ་ཆེན་པོ་ཁྲི་སྲོང་ལྡེའུ་བཙན་དང་། །འབྲོམ་དང་ཕག་གྲུ་འཇིག་རྟེན་གསུམ་མགོན་སོགས། །མཛེ་ནད་དྲག་པོས་ཡུན་རིང་མནར་ལུགས་སོམས། །ང་སྡུག་བསམ་པའི་སྡུག་ཡུས་རྒྱང་སྟེ་སྒྱུར། །སྔོན་གྱི་ལས་སྒྲིབ་འཛད་པའི་དགའ་བ་སྒོམས། །བདེ་སྔག་ལེགས་ཉེས་བྱ་བ་ཅི་བྱུང་ཡང་། །ནབ་མོའི་རྨི་ལམ་བཟང་ངན་རྨིས་པ་ལྟར། །རིང་པོར་མི་ཐོགས་མྱུར་དུ་ཡལ་ནས་འགྲོ། །རེ་དོགས་སེམས་ཁྲལ་མང་པོ་རྒྱུང་སྟེ་སྒྱུར། །ཅི་འོང་དཀོན་མཆོག་མཁྱེན་ལ་བློ་སྙིང་ཁོལ། །ལུས་ཀྱི་ན་ཚ་ཟུག་གཟེར་བྱུང་བའི་དུས། །ཨ་ན་བསམ་མཁན་སེམས་ལ་ཅེར་རེ་ལྟོས། །དངོས་པོ་མེད་པར་སྟོང་པར་ལྷང་ངེ་འཆར། །བསྒོམ་གོ་མི་ཆོད་དོགས་པ་རྒྱང་སྟེ་སྒྱུར། །མ་བཅོས་ཡེངས་མེད་ངང་ལ་ལྷན་ནེ་ཞོག །ན་བསམ་སེམས་དེ་དང་པོ་གང་ནས་བྱུང་། །ཐ་མ་གར་འགྲོ་ད་ལྟ་གར་གནས་
ལྟོས་། །སྐྱེ་འགག་གནས་གསུམ་བྲལ་བའི་ཆོས་སྐུ་ཡིན། །ནད་འདི་ཨེ་ཕན་བསམ་པ་རྒྱང་སྟེ་སྒྱུར། །ན་བ་དེ་ཉིད་བསྒོམ་གྱི་མཐིལ་པོར་བསྒྱུར། །འགྲོ་བ་རིགས་དྲུག་སྡུག་བསྔལ་ཐམས་ཅད་དང་། །ཁྱད་པར་འགྲོ་བའི་ནད་རིགས་ཐམས་ཅད་ཀུན། །རང་གི་ན་ས་དེ་ལ་ཧྲིལ་གྱིས་བསྟིམ། །ནད་འདི་ཕན་ན་དགའ་བསམ་རྒྱང་སྟེ་སྒྱུར། །འགྲོ་ཀུན་བདེ་དང་ལྡན་པའི་སྨོན་ལམ་ཐོབ། །འདི་དང་ཕྱི་མའི་སྡུག་བསྔལ་ཐམས་ཅད་ནི། །ཚེ་སྔོན་བསགས་པའི་སྡིག་པའི་འབྲས་བུ་ཡིན། །སྡིག་པ་ཆུང་ངུ་ལ་ཡང་དུག་བཞིན་འཛེམ། །ཁ་བཤད་ལག་ལེན་འཛོལ་བ་རྒྱང་སྟེ་སྒྱུར། །སྒྲིབ་སྦྱོང་རྡོར་སེམས་སྒོམ་བཟླས་རྒྱུན་དུ་གྱིས། །དེ་ལྟར་བདག་གིས་སྨྲས་པའི་ཚིག་འདི་རྣམས། །དེ་ཚེ་སྐྱིད་དུས་ཟླ་བོ་ཡིན་ནོ་ཞེས། །ཚིག་དོན་རང་གི་སེམས་ལ་མི་ཕབ་པར། །ཀོ་ལོང་སྡུག་ཡུས་བྱེད་པ་རྒྱུང་སྟེ་སྒྱུར། །འདི་དོན་ཉམས་སུ་ལེན་ལ་བརྩོན་འགྲུས་གྱིས། །ནམ་ཞིག་འཆི་བདག་དབང་ཆེན་ཁོ་བྱུང་ན། །ལུས་དང་ཉེ་འབྲེལ་ཞིང་ཁང་ནོར་རྫས་རྣམས། །བློ་ཡིས་བླངས་ནས་དཀོན་མཆོག་གསུམ་ལ་ཕུལ། །སེམས་ཐོགས་ཆགས་ཞེན་འཁྲི་བ་རྒྱང་སྟེ་སྒྱུར། །
ཆགས་ཞེན་མེད་པར་ཉམས་ལེན་ངང་དུ་སྡོད། །སྤྱི་བོར་ཨོ་རྒྱན་སྣང་བ་མཐའ་ཡས་ལ། །ཁ་ཙམ་མིན་པར་སྙིང་ནས་གསོལ་བ་ཐོབ། །འདི་དུས་འཕོ་བ་ཟླུ། བསྒོམ་ཡང་ཕན་ཡོན་ཆེ། །བརྩེ་སེམས་ཁ་ཆེམས་ཁ་དལ་རྒྱང་སྟེ་སྐུར། །ཉམས་ལེན་ངང་དུ་རིག་པ་རྩེ་གཅིག་བསྒྲིམས། །འབྱུང་བཞིའི་ཐིམ་རིམ་དཀར་ལམ་དམར་ལམ་ཆ་སོགས། །འཁྲུལ་སྣང་འཇིགས་སྐྲག་སྣང་བ་ཅི་བྱུང་ཡང་། །མ་ཡེངས་སྐྲག་མཁན་སེམས་ལ་རེ་རེ་ལྟོས། །དེ་ལས་གཞན་པའི་ཚབ་ཚུབ་རྒྱང་སྟེ་སྒྱུར། །གང་ཤར་བཟོ་མེད་ངང་དུ་འཆི་རུ་ཆུག །གཞི་ཡི་འོད་གསལ་ནམ་མཁའ་གཡའ་དག་བཞིན། །ཚུར་ལ་འཆར་དུས་དེ་ཉིད་ངོས་བཟུང་ལ། །དེ་ཡི་ངང་ལ་མ་བཅོས་ཀློད་ལ་ཞོག །སྟོང་པ་ཉིད་ལ་སྐྲག་སྣང་རྒྱང་སྟེ་སྒྱུར། །དེ་ནི་འཆི་བ་ཆོས་ཀྱི་སྐུ་ཞེས་བྱ། །དེ་ཉིད་ངོས་ཟིན་རྟགས་སུ་ཚེ་འདས་ཀྱི། །ཕུང་པོ་ཤ་བཀྲག་ཡུན་རིང་མི་ཡལ་ཞིང་། །ཕྱི་རྟགས་ནམ་མཁའ་དྭངས་ཤིང་།གསལ་བ་ཡིན། །འདི་དུས་ཉེ་དུའི་ངུ་སྐད་རྒྱང་སྟེ་སྒྱུར། །ཕུང་པོ་ཐུག་རེག་མེད་པའི་ཉ་ར་བཟོབ། །དེ་ནས་བར་དོའི་ཡིད་ལུས་ཤར་བྱུང་ན། །རང་ལུས་ཡི་དམ་གང་ཡིན་
བསྐྱེད་རིམ་ནི། །སྣང་ལ་རང་བཞིན་མེད་པའི་འཇའ་ལྟར་བསྒོམས། །ཞི་ཁྲོའི་ལྷ་ལ་འཇིགས་སྐྲག་རྒྱང་སྟེ་སྐྱུར། །དེ་ནས་བར་དོ་ལོངས་སྐུར་སྣང་བ་ཡིན། །དེ་རྟགས་ནམ་མཁར་འཇའ་འོད་འབྱུང་བ་དང་། །སྐུ་གཟུགས་རིང་བསྲེལ་ཡིག་འབྲུ་ལ་སོགས་པ། །མང་པོའམ་ནི་སྣ་གཅིག་ངེས་པར་འབྱུང་། །གཉེན་འདུན་རྣམས་ཀྱང་མྱ་ངན་རྒྱང་སྟེ་སྐྱར། །བར་དོར་གྲོལ་ལ་སྡུག་བསྔལ་ག་ལ་དགོས། །སྐྱེ་བར་སླ་ཞིང་ཡོན་ཏན་དཔག་མེད་པ། །ནུབ་ཕྱོགས་བདེ་བ་ཅན་གྱི་ཞིང་ཁམས་སུ། །ཐེ་ཚོམ་མེད་པར་འགྲོ་བའི་འདུན་པ་བསྒོམས། །སྐྱེའམ་མི་སྐྱེའི་ཐེ་ཚོམ་རྒྱང་སྟེ་སྒྱུར། །དེ་ནི་སྐྱེ་བ་སྤྲུལ་སྐུ་ཐོབ་པར་འགྱུར། །དེ་ཉིད་ད་ལྟ་ནས་ཀྱང་འདུན་པ་སྦྱོངས། །དེ་རུ་སྐྱེ་བའི་སྨོན་ལམ་རྒྱུན་པར་ཐོབ། །དགེ་བ་གང་བྱེད་དེ་ཡི་དོན་དུ་བསྔོས། །བདག་འདྲ་མི་སྐྱེ་བསམ་པ་རྒྱང་སྟེ་སྒྱུར། །སྨོན་ལམ་གང་བཏབ་མྱུར་དུ་འགྲུབ་པ་ཡིན། །རྒྱང་སྐྱུར་ཉེས་གསུམ་ལྡན་པའི་སྙིང་གཏམ་འདི། །སྙིང་ནས་ཕན་སེམས་བསམ་པ་བཟང་པོས་བྲིས། །ཁ་བཤད་ཁྲམ་པའི་གླུ་དང་འདྲ་སྙམ་པའི། །རྩིས་མེད་ལོག་ལྟའི་བསམ་ངན་རྒྱང་སྟེ་སྐྱར། །སྙིང་གཏམ་སྙིང་གི་
ཐིག་ལེར་ཉམས་སུ་ལོངས། །ཞེས་པ་འདི་སྔགས་འཆང་ཚེ་དབང་བཀྲ་ཤིས་ནད་དྲག་པོས་ཡུན་རིང་མནར་བ་ལས། ནད་གཞི་ཆེར་མ་ཕན་ཡང་ཟུག་གཟེར་ཆུང་ཞིང་བསྙེན་པ་མང་དུ་འགྲུབ། ད་ཐུགས་དམ་གང་དགའ་འཕོ་བའི་བསྐྱེད་ཆོག་གཅིག་ཀྱང་བྲིས་བསྐུར་ཟེར་བས། ཨ་རཱ་གས་ཐུན་མཚམས་གཅིག་ལ་བྲིས་ནས་ཕུལ་བའོ།། ༈ །།ན་མོ་དཀོན་མཆོག་གསུམ་ལ་ཕྱག་འཚལ་ལོ། །ཕྱོགས་དུས་རྒྱལ་བའི་ཐུགས་བསྐྱེད་སྨོན་ལམ་སོགས། །འཁོར་འདས་དུས་གསུམ་དགེ་ལ་ཡི་རང་ངོ་། །དེ་ལྟར་རྗེས་སུ་ཡི་རང་དགེ་བ་དང་། །ཆུ་བོ་དབྱིངས་ཁྱབ་འགྲོ་དོན་འདི་བྱས་མཐུས། །འདི་ནས་བཟུང་སྟེ་ཇི་སྲིད་བསྐལ་པའི་བར། །ཆུ་བོས་གར་ཁྱབ་ཡིག་དྲུག་ཁྱབ་པར་ཤོག །བསྐལ་པའི་བར་དུ་ཆུ་དེ་སུས་འཐུང་དང་། །མཐོང་དང་ཐོས་དང་ཆུ་སྒྲ་ཐོས་པ་དང་། །ཆུ་དེ་རྒྱ་མཚོར་སོང་ཞིང་གར་ཁྱབ་དང་། །དེ་ལས་རླངས་པ་སྤྲིན་དང་ན་བུན་དང་། །དེ་ལས་ཁ་ཆར་བབས་པས་གར་ཁྱབ་ཀྱི། །འབུ་སྲིན་ཡན་ཆད་སྲོག་ཆགས་ཐམས་ཅད་དང་། །ཆུ་ལ་གནས་པའི་ཀླུ་དང་ཆུ་གནས་སོགས། །ཐམས་ཅད་ངན་སོང་འཁོར་བ་དོང་སྤྲུགས་ཤོག །དེ་དག་ལས་ཉོན་
སྒྲིབ་པ་དག་པར་ཤོག །ངན་སོང་གསུམ་གྱི་སྐྱེ་སྒོ་ཆོད་པར་ཤོག །ཐུགས་རྗེ་ཆེན་པོས་བྱིན་གྱིས་བརླབས་པའི་ཞིང་། །མཐོ་རིས་གནས་སུ་ཆོས་ལྡན་ལུས་ཐོབ་སྟེ། །སྐྱེ་བ་ལྔ་ནས་བདེ་བ་ཅན་ཉིད་དུ། །པདྨའི་སྦུབས་ལས་རྫུས་ཏེ་སྐྱེ་བར་ཤོག །འོད་དཔག་མེད་མགོན་མཆོད་པས་མཉེས་བྱེད་ཅིང་། །བྱང་ཆུབ་སྤྱོད་པ་རྒྱ་ཆེན་སྤྱོད་བྱས་ནས། །བླ་མེད་རྫོགས་པའི་སངས་རྒྱས་ཐོབ་པར་ཤོག །རྣལ་འབྱོར་བདག་ཀྱང་ཚོགས་གཉིས་མྱུར་རྫོགས་ནས། །ཚེ་འདིར་ཐུགས་རྗེ་ཆེན་པོ་འགྲུབ་པར་ཤོག །བདག་ཅག་འཁོར་བཅས་ཚེ་དང་རིགས་རྒྱུད་དང་། །བདག་དང་ཐུགས་རྗེ་ཆེན་པོའི་ཕྲིན་ལས་ནི། །ཆུ་བོའི་རྒྱུན་ལྟར་རིང་ཞིང་རྒྱས་པར་ཤོག །ཆོས་ཉིད་གདོད་ནས་རྣམ་པར་དག་པ་དང་། །ཆོས་ཅན་ཀུན་རྫོབ་བསླུ་བ་མེད་པ་དང་། །རྒྱལ་བ་སྲས་དང་བཅས་པའི་ཐུགས་རྗེའི་མཐུས། །སྨོན་ལམ་དེ་དག་གེགས་མེད་འགྲུབ་པར་ཤོག །ཅེས་ཆུ་བོ་དབྱིངས་ཁྱབ་ཀྱི་སྒྲུབ་པ་ཞག་བཅོ་ལྔ་ཚར་བའི་ཉིན་པར་བགྱིས་པའོ།། ༈ ན་མོ་གུ་རུ། རྒྱལ་བ་ཀུན་གྱི་ངོ་བོ་པདྨ་འབྱུང་། །དེ་ཡི་རྣམ་འཕྲུལ་ཆོས་ཀྱི་དབང་ཕྱུག་ལ། །ཁ་ཙམ་མིན་པར་སྙིང་
ནས་གསོལ་བ་འདེབས། །རྗེས་འཇུག་བུ་ཡི་སྐྱིད་སྡུག་ཁྱེད་རང་ཤེས། །དམ་བཅའ་མཐའ་རུ་ཕྱིན་པར་བྱིན་གྱིས་རློབས། །དལ་འབྱོར་རྙེད་དཀའ་འཆི་བ་མི་རྟག་པ། །ལས་འབྲས་འཁོར་བའི་ཉེས་དམིགས་བསྒོམ་པ་བཞི། །བུ་ཁྱོད་ལེགས་པར་གོ་བ་ངོ་མཚར་ཆེ། །ཐོབ་དཀའི་དལ་འབྱོར་ཐོབ་པ་མང་ལགས་ཀྱང་། །གཏན་ཕུང་འདུན་མ་བསྒྲུབ་པ་ཤིན་ཏུ་མང་། །ཕལ་ཆེར་རིན་ཆེན་གླིང་ནས་སྟོང་ལོག་བྱེད། །བུ་ཁྱོད་གཏན་བདེ་བསྒྲུབ་པ་ངོ་མཚར་ཆེ། །ཚེ་ལ་ལོངས་མེད་ནམ་འཆི་ཆ་མེད་ཀྱང་། །གཏན་དུ་སྡོད་ཆོས་བྱེད་མཁན་ཤིན་ཏུ་མང་། །ཕལ་ཆེར་འཆི་བར་ཤེས་ཀྱང་ངན་སོང་བསྒྲུབ། །བུ་ཁྱོད་འཆི་བ་དྲན་པ་ངོ་མཚར་ཆེ། །དཀར་ནག་ལས་འབྲས་བསླུ་བ་མེད་ལགས་ཀྱང་། །རང་ཉིད་ངན་འགྲོར་འཕེན་མཁན་ཤིན་ཏུ་མང་། །ཕལ་ཆེར་རང་གཞན་ངན་འགྲོར་ཁུ་དེད་བྱེད། །བུ་ཁྱོད་སྡིག་སྤང་དགེ་སྒྲུབ་ངོ་མཚར་ཆེ། །འཁོར་བའི་གནས་ན་བདེ་བ་མེད་ལགས་ཀྱང་། །བདེ་བར་རེ་ནས་སྡིག་པ་བསྒྲུབ་མཁན་མང་། །ཕལ་ཆེར་འཇིག་རྟེན་ཆོས་བརྒྱད་དབང་དུ་འགྲོ། །བུ་ཁྱོད་ཚེ་འདི་བློས་བཏང་ངོ་མཚར་ཆེ། །ལུས་
ལ་སེར་གོས་གྱོན་པ་མང་ལགས་ཀྱང་། །ངེས་འབྱུང་བསམ་པ་སྐྱེས་པ་ཤིན་ཏུ་དཀོན། །ཕལ་ཆེར་བག་མེད་འཆལ་པའི་དབང་དུ་འགྲོ། །བུ་ཁྱོད་ངེས་འབྱུང་སྐྱེས་པ་ངོ་མཚར་ཆེ། །ཁྲིད་དང་གདམས་ངག་ཞུས་པ་མང་ལགས་ཀྱང་། །ཆོས་དྲེད་གོ་ཡུལ་ལུས་པ་ཤིན་ཏུ་མང་། །ཕལ་ཆེར་འཛིན་ཆགས་སེར་སྣ་སྔར་ལས་ཐུ། །བུ་ཁྱོད་ཚེ་འདི་བློས་བཏང་ངོ་མཚར་ཆེ། །བླ་མའི་དྲུང་དུ་སྡོད་པ་མང་ལགས་ཀྱང་། །ཡོན་ཏན་མི་མཐོང་སྐྱོན་ལ་རྟོག་པ་མང་། །ཕལ་ཆེར་བླ་མའི་ཞབས་འདྲེན་བྱེད་པ་མང་། །བུ་ཁྱོད་མོས་གུས་སྐྱེས་པ་ངོ་མཚར་ཆེ། །སེམས་ངོ་སྤྲུག་སྤྲུག་ཤེས་པ་མང་ལགས་ཀྱང་། །བསྒོམ་སྐྱེ་བདག་པོ་མེད་པ་ཤིན་ཏུ་མང་། །ཕལ་ཆེར་བསྒོམ་ཆེན་ཆགས་འཛིན་གཞན་བས་ཆེ། །བུ་ཁྱོད་ཞེན་པ་ལྡོག་པ་ངོ་མཚར་ཆེ། །རྟོགས་པ་མཐོན་པོར་རློམ་པ་མང་ལགས་ཀྱང་། །འཛིན་ཆགས་འཁྲུལ་པ་སྔར་ལས་ཆེ་བ་མང་། །ཕལ་ཆེར་ཚེ་འདི་ཁོ་ན་ཁོང་དུ་བཅུག །བུ་ཁྱོད་ཚེ་འདི་བློས་བཏང་ངོ་མཚར་ཆེ། །བྱ་བཏང་ཡིན་ནོ་ཟེར་བ་མང་ལགས་ཀྱང་། །སེམས་ལ་གང་དུས་མེད་པའི་བྱ་བཏང་མང་། །ཕལ་ཆེར་རྒྱལ་ཁམས་ཉུག་ཅིང་ལོག་འཚོ་བསྒྲུབ། །
བུ་ཁྱོད་དགོས་མེད་བསྒོམ་པ་ངོ་མཚར་ཆེ། །རང་གཞན་གཉིས་ཕུང་མཚོན་ཆས་བྱེད་ལགས་ཀྱང་། །སྲོག་འདས་གཅེས་པར་འཛིན་པའི་སྐྱེས་ཕྲན་མང་། །ཕལ་ཆེར་འཆི་ལ་ཐུག་ཀྱང་གཏོར་མི་ཕོད། །བུ་ཁྱོད་མདའ་གཞུ་བཅག་པ་ངོ་མཚར་ཆེ། །འགའ་ཞིག་ལྷམ་གོས་ཙམ་ཞིག་ཤེས་ལགས་ཀྱང་། །ཉུང་ངུ་མཁོ་ཟེར་སྟེར་མི་འགྱང་པ་མང་། །དགོས་འདོད་སོར་སོའི་རྩེ་ནས་འཁྲུངས་བཞིན་དུ། །བུ་ཁྱོད་མགར་ཆ་ཕུལ་བ་ངོ་མཚར་ཆེ། །ཚེ་མ་ཕྱིད་ཀྱི་བྱ་བཏང་མང་ལགས་ཀྱང་། །ཆོས་མེད་སྤྲང་འཁྱམས་བྱེད་པ་ཤིན་ཏུ་མང་། །ཕལ་ཆེར་བསྟན་པའི་བླ་བཙོང་རང་མཚང་སྟོན། །བུ་ཁྱོད་སྐྱིད་དུས་དམ་ཆོས་དྲན་པ་ངོ་མཚར་ཆེ། །འོད་གསལ་འཁོར་ཡུག་ཡོད་ཟེར་མང་ལགས་ཀྱང་། །སྤྱོད་པ་སྔར་ལས་ཐུ་བ་ཤིན་ཏུ་མང་། །ཕལ་ཆེར་དུག་ལྔ་ཆགས་འཛིན་སྔར་བས་ཆེ། །བུ་ཁྱོད་བྱ་བཏང་ནུས་པ་ངོ་མཚར་ཆེ། །མཉམ་མེད་དྭགས་པོས་ཆོས་བཞིའི་དངཔོ་དང་། །ཕྱག་རྒྱ་ཆེན་པོའི་བསྒོམ་གྱི་རྐང་པ་དང་། །བཀའ་གདམས་ལུགས་ཀྱི་ལམ་རིམ་གཉིས་པ་རྣམས། །བུ་ཁྱོད་རྒྱུད་ལ་སྐྱེས་པ་ངོ་མཚར་ཆེ། །གེགས་སེལ་བོགས་འདོན་
ལ་སོགས་གང་དགོས་པ། །རིམ་གྱིས་ཉམས་དང་བསྟུན་ཏེ་བདག་གིས་བྱ། །སྤྲང་པོ་བདག་ལ་ཡོན་ཏན་མི་བདོག་ཀྱང་། །བུ་ཁྱོད་འབྲལ་མི་ཕོད་པ་ངོ་མཚར་ཆེ། །ཁོ་བོ་བླ་མའི་མཚན་ཉིད་མི་ལྡན་ཀྱང་། །བདག་ལ་བརྒྱུད་པ་བཟང་པོའི་གདམས་ངག་མང་། །ཕལ་ཆེར་རང་གིས་ཅུང་ཟད་ཉམས་སུ་བླངས། །བུ་ཁྱོད་དོན་གཉིས་འགྲུབ་པ་ངོ་མཚར་ཆེ། །ངོ་མཚར་བཅོ་བརྒྱད་ལྡན་པའི་དབྱངས་ཆུང་འདི། །འཇིག་རྟེན་བྱ་བ་བཏང་བའི་བྱ་དགའ་ཡིན། །བཀའ་བརྒྱུད་གོང་མའི་རྣམ་ཐར་འབྱོང་བར་ཤོག །བུ་ཁྱོད་བསྟན་ལ་ཕན་པ་ངོ་མཚར་ཆེ། །ཞེས་པ་བལ་པོ་སྤྲུལ་སྐུ་པདྨ་རིག་འཛིན་གྱིས་ཚེ་འདིའི་བྱ་བ་བློས་བཏང་ནས་བསྒྲུབ་པ་རྩེ་གཅིག་གི་དམ་བཅའ་ཕུལ་དུས་སྨྲས་པའོ།། ༈ །།ན་མོ་གུ་རུ། བླ་མ་གཅིག་ཆོག་ཞྭ་དམར་གསེར་མདངས་ལ། །དམ་ཆོས་གཅིག་ཆོག་ཕྱག་རྒྱ་ཆེན་པོ་ཞུ། །ཉམས་ལེན་གཅིག་ཆོག་གསོལ་བ་བཏབ་པའི་མཐུས། །རྟོགས་པ་གཅིག་ཆོག་རང་སེམས་རང་ངོ་ཤེས། །གང་ཤར་ངང་དུ་བཟོ་བཅོས་མེད་པ་ཡི། །རྩ་ཡི་ནང་ནས་ཨ་ཝ་དྷུ་ཏི་ཡིན། །རླུང་གི་ནང་ནས་ཡེ་ཤེས་མཆོག་གི་རླུང་། །ཐིག་ལེའི་ནང་ནས་མི་ཤིགས་ཐིག་ལེར་
སྣང་། །ལས་ཉོན་སྒྲིབ་པ་སྲེག་པས་གཏུམ་མོ་ཡིན། །དངོས་པོའི་བདེན་ཞེན་བཟློག་པས་སྒྱུ་ལུས་ཡིན། །མ་རིག་མུན་པ་སེལ་བས་འོད་གསལ་ཡིན། །རྨི་ལམ་དུས་སུའང་བསྒོམས་པས་རྨི་ལམ་ཡིན། །འཆི་དུས་འོད་གསལ་ཟིན་པས་འཕོ་བ་ཡིན། །བར་དོར་ཉམས་ལེན་ཟིན་པས་བར་དོ་ཡིན། །གང་ཤར་དེ་ལ་བསྲེ་བས་བསྲེ་བ་ཡིན། །ཆོས་བརྒྱད་སེམས་སུ་སྙོམས་པས་རོ་སྙོམས་ཡིན། །རིགས་ལྔའི་ནང་ནས་ཟུང་འཇུག་རིམ་པ་ཡིན། །དུག་ལྔ་རང་སར་ཞི་བས་ཞི་བྱེད་ཡིན། །སྦྱོར་དྲུག་ནང་ནས་ཐོག་མར་དགེ་བ་ཡིན། །ཀླུ་སྒྲུབ་ལུགས་ཀྱི་དབུ་མ་ཆེན་པོ་ཡིན། །ཐོགས་མེད་ལུགས་ཀྱི་ཕ་རོལ་ཕྱིན་པ་ཡིན། །ས་ར་ཧ་ཡི་ལུགས་ཀྱི་ཕྱག་ཆེན་ཡིན། །དགའ་རབ་རྡོ་རྗེའི་ལུགས་ཀྱི་རྫོགས་ཆེན་ཡིན། །མ་གཅིག་ལུགས་ཀྱི་བདུད་ཀྱི་གཅོད་ཡུལ་ཡིན། །བཀའ་བརྒྱུད་ལུགས་ཀྱི་བླ་མའི་བྱིན་རླབས་ཡིན། །ས་སྐྱའི་ལུགས་ཀྱི་དབང་བཞིའི་ཡེ་ཤེས་ཡིན། །མཚན་ཉིད་ལུགས་ཀྱི་གང་ཟག་བདག་མེད་ཡིན། །ཨ་ལ་ལ་ཧོ་བླ་མའི་བྱིན་རླབས་ལ། །ཨ་ལ་ལ་ཧོ་ཡི་དམ་དངོས་གྲུབ་ལ། །སྟོན་པས་གསུངས་པའི་ཆོས་ཕུང་བརྒྱད་ཁྲི
རྣམས། །མཉམ་བཞག་ཐུན་གཅིག་ཁོང་དུ་ཚང་བར་རྟོགས། །དུག་གསུམ་འདུལ་བའི་གཉེན་པོ་སྡེ་སྣོད་གསུམ། །དུག་གསུམ་རང་ཞལ་ལྟ་བའི་ནང་དུ་ཚང་། །ཆོས་རྣམས་ཐམས་ཅད་སེམས་སུ་ཐག་ཆོད་པས། །ད་ནི་སྤྲང་པོ་ཤི་ཡང་འགྱོད་པ་མེད། །ཅེས་ཉམས་སྔར་དང་མི་འདྲ་བ་གཅིག་ཤར་ནས་སྨྲས་སོ།། ༈ །།ན་མོ་གུ་རུ། །བསྐྱེད་རིམ་ལྷ་ཡི་དཀྱིལ་འཁོར་དང་། །སྣང་བ་སྐུ་ཡི་འཁྱེར་སོ་གཉིས། །ལུས་གནད་རྩ་ཡི་སྟོང་ར་གསུམ། །གནད་ཀྱི་འབབ་ས་གཅིག་ཏུ་གོ །ཐ་མལ་ཞེན་པ་བཟློག་ནས་ཀྱང་། །སྤྲུལ་སྐུ་འགྲུབ་པའི་ཐབས་སུ་གདའ། །བསྙེན་སྒྲུབ་སྔགས་ཀྱི་བཟླས་པ་དང་། །གྲག་པ་གསུང་གི་འཁྱེར་སོ་གཉིས། །སྲོག་རྩོལ་རླུང་ལ་སྦྱངས་བ་གསུམ། །དོན་གྱི་འབབ་ས་གཅིག་ཏུ་གོ། །ངག་སྒྲིབ་ལས་རླུང་སྦྱངས་ནས་ཀྱང་། །ལོངས་སྐུ་འགྲུབ་པའི་ཐབས་སུ་གདའ། །ཕྱག་རྫོགས་དབུ་གསུམ་བསྒོམ་པ་དང་། །དྲན་རྟོགས་ཐུགས་ཀྱི་འཁྱེར་སོ་གཉིས། །གཏུམ་མོ་བདེ་སྟོང་བསྒོམ་པ་གསུམ། །དོན་གྱི་འབབ་ས་གཅིག་ཏུ་གོ། །རང་སེམས་རང་ངོ་ཤེས་ནས་ཀྱང་། །ཆོས་སྐུ་འགྲུབ་པའི་ཐབས་སུ་གདའ། །
གོ་བ་གསུམ་དང་གདའ་བ་གསུམ། །ཉམས་ལ་ཤར་ནས་བྱུང་རྒྱལ་སྨྲས། །མངྒ་ལཾ།། ༈ །།ན་མོ་གུ་རུ། བླ་མ་སངས་རྒྱས་ཡིན་ཟེར་ཞིང་། །བརྒྱུད་པ་ཉེ་རིང་བསྒྲུང་བ་འདི། །མོས་གུས་ཅན་ལ་ངོ་རེ་ཚ། །འགྲོ་དྲུག་ཕ་མ་ཡིན་ཟེར་ཞིང་། །ཉེ་རིང་ཆགས་སྡང་བྱེད་པ་འདི། །བྱམས་སེམས་ཅན་ལ་ངོ་རེ་ཚ། །སྣང་སྲིད་ཡི་དམ་ཡིན་ཟེར་ཞིང། །འདྲེ་གདོན་བརྡུང་གཏག་བྱེད་པ་འདི། །དག་སྣང་ཅན་ལ་ངོ་རེ་ཚ། །རང་སེམས་ཆོས་སྐུ་ཡིན་ཟེར་ཞིང་། །དུག་ལྔ་ཡན་པར་ཤོར་བ་འདི། །ཉམས་ལེན་ཅན་ལ་ངོ་རེ་ཚ། །གང་ཤར་བཟོ་མེད་ཡིན་ཟེར་ཞིང་། །དམིགས་གཏད་སེམས་འཛིན་བསྒོམ་པ་འདི། །རྟོགས་པ་ཅན་ལ་ངོ་རེ་ཚ། །ཚེ་འདི་བློ་ཡིས་བཏང་ཟེར་ཞིང་། །གདུལ་བྱ་ཅི་འོང་བྱེད་པ་འདི། །ཆོག་ཤེས་ཅན་ལ་ངོ་རེ་ཚ། །རྩེ་གཅིག་སྒྲུབ་པ་བྱེད་ཟེར་ཞིང་། །གཉིད་རྨུགས་ལེ་ལོར་ཤོར་བ་འདི། །བརྩོན་འགྲུས་ཅན་ལ་ངོ་རེ་ཚ། །ཆོས་པ་བཟང་པོ་ཡིན་ཟེར་ཞིང་། །རྟོགས་པའི་གདེང་དང་མི་ལྡན་ན། །འཆི་དུས་སྐག་ན་ངོ་རེ་ཚ། །ངོ་ཚ་བའི་ཚ་ལུགས་བརྒྱད་པོ་འདི། །རང་གིས་རང་
ལ་སྨྲས་པ་ཡིན། །གཞན་ལ་ཕོག་ན་བཟོད་པར་གསོལ། །ཞེས་པ་འདི་སེམས་རླུང་བྱུང་བ་ཞིག་གིས་ངོ་ཚ་ཟེར་ནས་ཡིབས་ནས་སྡོད་འདུག་ཟེར་བ་ཐོས་ནས་བྱུང་རྒྱལ་དུ་སྨྲས་སོ།། ༈ ན་མོ་ལོ་ཀེ་ཤྭ་ར་ཡེ། ངེད་བན་བརྒྱ་ནང་གི་བོན་གཅིག་པོ། །ཁྱེད་བན་བོན་རྒྱལ་མཚན་ཚུར་གསོན་དང་། །རྩིས་བན་བོན་རྩིས་མགོ་མ་མཐུན་ཞེས། །གཏམ་ངག་འཁྱལ་གྱིས་ཁྱེད་སེམས་འཁྲུགས་ཞེས་ཐོས། །དོན་ཉམས་ལེན་གྱི་གནད་འགགས་མཐུན་པ་ན། །ཚིག་ཐ་སྙད་ལ་མ་མཐུན་འགལ་ཡང་བཟོད། །ལུས་དལ་འབྱོར་ཡིད་བཞིན་ནོར་བུ་འདི། །དཔེ་ལོ་བརྒྱ་ནང་གི་ཐོག་གཅིག་ཡིན། །འདི་རྙེད་པར་དཀའ་ཞེས་བན་བོན་མཐུན། །དགྲ་འཆི་བདག་གཤིན་རྗེ་དབང་ཆེན་འདི། །དུས་ནམ་འོང་ཆ་མེད་ངེས་་པར་འོང་། །འདི་བཟློག་ཐབས་མེད་ཅིང་བན་བོན་མཐུན། །རང་གར་སྐྱེ་ལས་འབྲས་དབང་ཆེ་སྟེ། །དཔེ་ས་བོན་གང་བཏབ་སྨིན་པ་བཞིན། །འདི་བསླུ་བ་མེད་ཅེས་བན་བོན་མཐུན། །གནས་ངན་སོང་གསུམ་གྱི་སྡུག་བསྔལ་འདི། །ཚིག་རྣ་བས་གོ་ཡང་མཆི་མ་འཆོར། །འདི་བཟོད་ཐབས་མེད་ཅིང་བན་བོན་མཐུན། །ལྷ་གཤེན་རབ་གཤེན་ལྷ་འོད་
དཀར་གཅིག །ཡུལ་བོད་ཡུལ་གྱི་གཤེན་སྒོམ་རེ་ཐུལ་གསུམ། །མགོན་སྤྱན་རས་གཟིགས་ཀྱི་སྤྲུལ་པར་གསུངས། །དོན་དེས་ན་བན་བོན་ལྷ་རུ་མཐུན། །ཆོས་བན་ལུགས་དང་བོན་ལུགས་ཁྱད་མེད་པར། །སེམས་རང་རྒྱུད་འདུལ་བའི་གདམས་ངག་དགོས། །གནས་རང་གི་སྤྱི་གཙུག་ནམ་མཁའ་ལ། །ལྷ་ཐུབ་གཤེན་གཅིག་དང་དབྱེར་མེད་པའི། །རང་གི་དད་པ་གང་ཡོད་བླ་མ་དེ། །དཔལ་ཐུགས་རྗེ་ཆེན་པོའི་རྣམ་པར་བསྒོམ། །ཞིང་ཕྱོགས་བཅུའི་རྒྱལ་བ་སྲས་བཅས་རྣམས། །སྐུ་འོད་ཟེར་ཚུལ་དུ་དེ་ལ་བསྟིམ། །ལུས་ལོངས་སྤྱོད་མཆོད་པ་སྤྲུལ་ཏེ་ཕུལ། །ད་ཅི་མཛད་ཁྱེད་ཤེས་ཀྱི་བློ་སྙིང་བཀལ། །ཁ་ཚིག་ཙམ་མིན་པར་གསོལ་བ་བཏབ། །སྐུ་འོད་དུ་ཞུ་ནས་རང་ལ་བསྟིམ། །ད་དེ་ནས་རང་གི་སེམས་ཉིད་ལ། །རང་མ་ཡེངས་ས་ལེ་ཧྲིག་གེ་ལྟ། །སེམས་དབྱིབས་དང་ཁ་དོག་མ་གྲུབ་པའི། །སེམས་ངོ་བོ་སྟོང་པར་འདུག་པ་དེ། །སེམས་བོན་སྐུ་ཀུན་ཏུ་བཟང་པོ་ཡིན། །སེམས་རང་བཞིན་གསལ་བར་སྣང་བ་དེ། །སེམས་ལོང་སྐུ་གཤེན་ལྷ་འོད་དཀར་ཡིན། །སེམས་འགག་མེད་ཅིར་ཡང་འཕྲོ་བ་དེ། །སེམས་
སྤྲུལ་སྐུ་གཤེན་རབ་མི་པོ་ཡིན། །བོན་སྐུ་གསུམ་གྱི་རང་ཞལ་ལྟ་འདོད་ན། །སེམས་མ་ཡེངས་དྲན་པའི་རྒྱང་སོ་ཚུགས། །དེ་ལན་གཅིག་མ་ཡིན་རྒྱུན་དུ་བསྐྱོངས། །དོན་དེ་ལ་ཐིག་ལེ་ཉག་ཅིག་ཟེར། །ངེད་བན་གྱི་ཕྱག་རྒྱ་ཆེན་པོ་ཟེར། །ཁོང་ལ་ལས་རྫོགས་པ་ཆེན་པོ་ཟེར། །ཁོང་ལ་ལས་དབུ་མ་ཆེན་པོ་ཟེར། །ཁོང་ལ་ལས་ཕ་རོལ་ཕྱིན་པ་ཟེར། །ཁོང་ལ་ལས་སྡུག་བསྔལ་སྙེམ་བྱེད་ཟེར། །དོན་མིང་བཏགས་མང་ཡང་རང་སེམས་ཡིན། །སེམས་རང་ངོ་ལྟ་བས་ལྟ་བ་ཡིན། །དེ་རྒྱུན་དུ་བསྒོམས་ན་བསྒོམ་པ་ཡིན། །དེ་རྒྱུན་ཆད་མེད་ན་སྤྱོད་པ་ཡིན། །དེ་མངོན་དུ་གྱུར་ན་འབྲས་བུ་ཡིན། །དོན་ཉམས་སུ་ལོངས་དང་ཟབ་ཆོས་ཡིན། །ཚིག་འདི་རྣམས་ཚང་བར་བློ་ལ་ཟུངས། །དོན་ཡང་ནས་ཡང་དུ་གཞིག་འགྲེལ་ཐོངས། །ཁྱེད་བོན་པོའི་ཐུགས་དེ་ལྟར་ཞོག །ཅེས་པ་འདི་བླ་མ་ཕྲིན་ལས་ཀྱིས་སྨྲ་མ་མཁས་པ་ཅིག་ལ་བརྟེན་ནས་བོན་པོ་རྒྱལ་མཚན་ཡུས་ཆེ་བར་སྣང་ཟེར་བས། །ཀརྨ་ཨ་རཱ་གས་མཚམས་ཁུང་ནས་མགྱོགས་པར་བྲིས་པའོ།། །།བྱང་ཆུབ་ལམ་གྱི་གེགས་སེལ་མདོར་བསྡུས་པར་བཞུགས་པའི་དབུའོ། །ན་མོ་ལོ་ཀེ་ཤྭ་ར་ཡེ། བླ་མ་ཡི་དམ་དབྱེར་མེད་པའི། །
སྤྱན་རས་གཟིགས་ལ་གསོལ་བ་འདེབས། །ཉམས་རྟོགས་སྐྱེ་བར་བྱིན་གྱིས་རློབས། །རེ་ས་གཞན་མེད་ཐུགས་རྗེས་གཟིགས། །གནས་པོ་ཚེ་དབང་འབུམ་ཞེས་པས། །གེགས་སེལ་བསྐུར་ཞེས་གསུངས་པའི་ལན། །གསར་རྙིང་མདོ་རྒྱུད་བསྟན་བཅོས་ཀུན། །གེགས་སེལ་ཁོ་ན་མ་ལགས་སམ། །དལ་འབྱོར་མི་ལུས་ཐོབ་ན་ཡང་། །དམ་པའི་ཆོས་ལ་བློ་མི་འགྲོ། །དུག་གསུམ་མི་དགེ་ཅི་ནུས་འབག །སྨྱོན་པ་ཆུ་ལ་མཆོངས་བ་འདྲ། །ངན་སོང་གཏན་ཡུལ་བྱེད་པའི་གེགས། །གེགས་འདིས་བསླུས་པ་ཤིན་ཏུ་མང་། །དེ་ལ་གེགས་སེལ་གདམས་ངག་ནི། །ཡིད་བཞིན་ནོར་བུ་རིན་ཆེན་ལས། །མི་ལུས་རྙེད་པར་དཀའ་ཚུལ་བསམ། །ད་རེས་ཆོས་ཤིག་མ་ནུས་ན། །རིན་ཆེན་གླིང་ནས་སྟོང་ལོག་དེས། །སྙིང་མེ་།་མདོ་མེད་ཡིན་པར་སོམས། །ཚེ་འདིའི་དགྲ་གཉེན་སྐྱིད་སྡུག་སོགས། །གལ་ཆེ་བསྲན་ཚུགས་མི་གདའ་ཡང་། །རྨི་ལམ་ཙམ་ཞིག་ཡིན་པར་སོམས། །དགེ་སྡིག་གཉིས་པོ་མ་གཏོགས་པ། །དགྲ་དང་གཉེན་དང་ལོངས་སྤྱོད་ནོར། །དར་རྒུད་གཏམ་གྱི་བཟང་ངན་སོགས། །གཅིག་ཀྱང་རྗེས་སུ་མི་འབྲང་
བར། །རང་ཉིད་གཅིག་པུར་འགྲོ་བ་སོམས། །སྔོན་ཚེ་བསྐལ་པ་དུ་མ་ནས། །སངས་རྒྱས་གྲངས་མེད་བྱོན་གྱུར་ཀྱང་། །བྱང་བསྟན་ཕུག་པར་ཉི་མ་བཞིན། །རང་ལ་ཕན་པར་མ་གྱུར་ན། །འཁོར་བར་འཁྱམས་ལ་སྐྱོ་བ་སྐྱེས། །ད་རེས་བསྟན་དང་བླ་མ་མཇལ། །དབང་ཁྲིད་གདམས་ངག་ཐོབ་དུས་འདིར། །ལམ་སྣ་ཟིན་ཙམ་མ་བྱས་ན། །འཁོར་བ་མཐའ་མེད་ཡིན་པར་སོམས། །དེ་ལྟར་ཡང་ཡང་བསམ་བྱས་པས། །བློ་སེམས་ཆོས་ལ་ཤུགས་ཀྱིས་ཚུད། །ལམ་སྣ་ཟིན་པའི་བོགས་སྐྱེད་འོང་། །དེ་ལྟར་ཆོས་ལ་བློ་སོང་ཡང་། །དམན་རྣམས་ཟས་གོས་འཚོལ་ཕྱིར་གཡེངས། །འབྲིང་རྣམས་སོ་ནམ་འཚོ་སྐྱོང་བྲེལ། །མི་ཆེན་དགྲ་འདུལ་གཉེན་སྐྱོང་གཡེངས། །ད་རེས་གལ་ཆེན་འདི་བསྒྲུབས་ནས། །རྗེས་སོར་ཁོམ་དུས་ཆོས་བྱེད་བསམ། །བྱ་བཞག་ཆུ་ཡི་གཉེར་མ་འདྲ། །གཅིག་རྒྱབ་གཅིག་འབྱུང་དལ་དུས་མེད། །བྱེད་བསམ་ངང་ལ་མི་ཚེ་ཟད། །ཆོས་འདོད་ཉམས་ལེན་ཤེས་ན་ཡང་། །འགྲུབ་དུས་མེད་པའི་གེགས་སེལ་ཡིན། །དེ་ལ་མི་རྟག་འཆི་བ་བསྒོམ། །ཤི་བའི་མི་ཚོ་རྩིས་གྲངས་ཐོངས། །རང་ལས་གཞོན་པ་དེ་ཙམ་
ཤི། །རྒས་གཞོན་ངེས་པ་མི་གདའ་ན། །རྒྱལ་པོ་བློན་པོ་མི་ཆེན་རྣམས། །སྨན་དང་རིམ་གྲོས་མ་ཕན་འདས། །འཆི་བ་བཟློག་ཐབས་མི་གདའ་ན། །སྙིགས་མ་ལྔ་ཡི་དུས་ཚོད་འདིར། །ཚེ་ཐུང་ནད་མང་བར་ཆད་རྒོད། །གློ་བུར་བར་ཆད་ཤི་བ་མང་། །སང་ཕོད་ཕྱི་མ་གང་སྔ་ཨང་། །ཟླ་བ་རྒྱབ་མ་ཚེས་ཕྱི་མ། །གང་སྔ་ཐག་ཆོད་ང་ལ་མེད། །དེ་ཕྱིར་བྱ་བ་གཞན་རྣམས་ལས། །དམ་ཆོས་ཉམས་ལེན་གལ་ཆེར་བྱ། །ཚེ་འདི་བློས་བཏང་མ་ནུས་ཀྱང་། །དམ་ཆོས་ཉམས་ལེན་གཙོ་བོ་ལ། །ཚེ་འདི་ཞོར་ལ་བསྒྲུབ་ཙམ་མཛོད། །དེ་བྱས་འཕྲལ་དུ་ཤི་ན་ཡང་། །འགྱོད་མེད་བློ་བདེའི་བོགས་སྐྱེད་འོང་། །རྒྱུ་འབྲས་དམ་ཆོས་མ་ཐོས་པས། །ཕན་ཡོན་ཉེས་དམིགས་ཤེས་གྱུར་ནས། །སྡིག་སྤོང་དགེ་སྒྲུབ་མི་བྱེད་པ། །བསམ་མེད་བྱིས་པ་མེར་མཆོངས་འདྲ། །ཕན་ཡོན་ཉེས་དམིགས་ཤེས་བཞིན་དུ། །སྡིག་ལ་མི་འཛེམ་འཆོལ་ཉོག་སྤྱོད། །ཤེས་བཞིན་བཙན་དུག་ཟ་བ་འདྲ། །དེ་འདྲ་བཤགས་ཀྱང་དག་པར་དཀའ། །མནར་མེད་དམྱལ་བར་སྲེག་པའི་གེགས། །དེ་ལ་མདོ་སྡེ་མཛངས་བླུན་སོགས། །རྒྱུ་འབྲས་ཆོས་ལ་
ཡིད་ཆེས་བསྐྱེད། །ཕ་མ་མཉམ་པའི་བུ་ལ་ཡང་། །ཚེ་ཡི་རིང་ཐུང་སྐྱིད་དང་སྡུག །མི་མཉམ་ལས་འབྲས་སོ་སོའི་རྟགས། །མི་ལུས་ཐོབ་པ་འདྲ་འདྲ་ལ། །དབང་སྟོབས་མངའ་ཐང་ཆེ་དང་ཆུང་། །མི་མཉམ་ལས་འབྲས་བལྟས་པས་གསལ། །སྐྱེ་བ་འདི་དང་ཚེ་རབས་ཀུན། །ཕན་ངེས་གཉེན་ནི་དགེ་བའི་ཆོས། །གནོད་ངེས་དགྲ་ནི་མི་དགེའི་སྡིག །དེ་ཕྱིར་སྡིག་སྤོངས་དགེ་ལ་འབད། །ངན་སོང་སྤོང་བའི་བོགས་སྐྱེད་འབྱུང་། །དེ་ལྟར་སྡིག་སྤོང་དགེ་སྒྲུབ་ཀྱང་། །ཕྱི་མ་ལྷ་དང་མི་རྣམས་ཀྱི། །བདེ་སྐྱིད་འདོད་ཕྱིར་ཡིན་ན་ནི། །སྐྱེ་བ་བརྒྱ་སྟོང་ཁྲི་འབུམ་དུ། །འདོད་བཞིན་བདེ་སྐྱིད་འབྱུང་ན་ཡང་། །དེ་ནས་དགེ་རྩ་དེ་ཟད་ནས། །སླར་ཡང་ངན་སོང་མཐའ་མེད་འཁྱམས། །ཐར་པ་མི་ཐོབ་གེགས་ཆེན་ཡིན། །སྔར་ཡང་གེགས་འདིས་བསླུས་པས་ལེན། །འཇིག་རྟེན་འདི་ཡི་བདེ་སྐྱིད་མཆོག །ཚངས་དང་བརྒྱ་བྱིན་འཁོར་ལོས་སྒྱུར། །དེ་ཡང་ནམ་ཞིག་ལྟུང་དགོས་ན། །འཁོར་བར་སྙིང་པོ་ག་ལ་ཡོད། །འཕྲལ་དུ་གནས་སྐབས་བདེ་སྐྱིད་ཀྱང་། །དུག་དང་འདྲེས་པའི་ཟས་ཞིམ་ལྟར། །ཕུགས་སུ་ཕན་ལས་གནོད་ཆེས་སོམས། །དེ་
ཕྱིར་སྡིག་སྤངས་དགེ་བསྒྲུབས་འབྲས། །འཁོར་བའི་བདེ་སྐྱིད་འདོད་པ་སྤོངས། །བཙོན་དོང་ནང་གི་བཙོན་བཞིན་དུ། །སྐྱེ་རྒ་ན་འཆི་བྱེ་བ་དུང་། །འདི་ལ་སྐྲག་ནས་འཁོར་བ་ན། །ནམ་ཐར་བསམ་པ་ཡིད་ལ་ཆོངས། །ཐར་པ་ཐོབ་པའི་བོགས་སྐྱེད་འབྱུང་། །དེ་ལྟར་ཐར་པ་སྒྲུབ་པ་ཡང་། །སྙིང་རྗེ་སེམས་བསྐྱེད་མི་ལྡན་པར། །རང་དོན་ཁོ་ན་ལ་དམིགས་ནས། །ཉན་རང་དགྲ་བཅོམ་ཐོབ་ནས་ཀྱང་། །འཁོར་བའི་སྡུག་བསྔལ་སྤངས་ལགས་ཀྱང་། །རྫོགས་པའི་སངས་རྒྱས་མི་ཐོབ་པས། །ཐེག་ཆེན་ལམ་གོལ་གེགས་ཆེན་ཡིན། །དེ་ལ་བྱམས་དང་སྙིང་རྗེ་བསྐྱེད། །རང་གི་ཕ་མ་མ་བྱས་པའི། །སེམས་ཅན་གཅིག་ཀྱང་ཡོད་མ་ཡིན། །དེ་དག་ཐམས་ཅད་འཁོར་བ་ཡི། །སྡུག་བསྔལ་རྒྱ་མཚོར་བྱིངས་བཞིན་དུ། །རང་ཉིད་ཐར་ཡང་དགོས་པ་ཆུང་། །དེ་ཡང་གནས་སྐབས་ལྷ་མི་ཡི། །བདེ་བར་བཀོད་ཀྱང་སླར་ལ་ལྟུང་། །དེ་བས་སེམས་ཅན་ཐམས་ཅད་ཀུན། །བླ་མེད་རྫོགས་པའི་སངས་རྒྱས་སར། །བདག་ཉིད་ཁོ་ནས་དགོད་པའི་ཕྱིར། །ཉམས་ལེན་དགེ་སྦྱོར་འབད་སྙམ་པའི། །བློ་སྟོབས་བསྐྱེད་ལ་སེམས་བསྐྱེད་
སྒོམས། །ཐུབ་པས་གཞན་དོན་མཛད་པ་དང་། །བྱིས་པས་རང་དོན་བྱས་པ་གཉིས། །གང་དེ་ཁེ་གདའ་གནད་དེ་སོམས། །དགེ་སྦྱོར་དགེ་རྩ་ཆེ་ཕྲ་ཀུན། །འགྲོ་ཀུན་སངས་རྒྱས་ཐོབ་ཕྱིར་བསྔོ། །ཅི་བྱས་བྱང་ཆུབ་ལམ་དུ་འགྲོ། །མཐར་འཚང་རྒྱ་བའི་བོགས་ཆེན་འབྱུང་། །དེ་ལྟར་སེམས་བསྐྱེད་ཆོས་བྱས་ཀྱང་། །བླ་མ་བཀའ་བརྒྱུད་རྣམ་ཐར་དང་། །ཕན་ཡོན་ཞིང་ཁམས་བཀོད་པ་དང་། །ངན་སོང་སྡུག་བསྔལ་ཡོད་ལུགས་དང་། །ཕན་ཡོན་ཉེས་དམིགས་ཅི་ཐོས་ཀྱང་། །བཤད་ཚོད་ཡིན་སྙམ་ངེས་ཤེས་མེད། །དཀོན་མཆོག་བྱིན་རླབས་རྒྱང་རིང་ཞིང་། །ཆོས་བྱས་ཕན་ཡོན་ཆུང་བའི་གེགས། །ཉི་ཟླ་ཐང་ལ་ལྟུང་ཡང་སྲིད། །རླུང་ནི་ཞགས་པས་ཟིན་ཡང་སྲིད། །སངས་རྒྱས་བཀའ་ལ་རྫུན་མི་སྲིད། །སྙམ་ནས་ངེས་ཤེས་དྲག་པོ་བསྐྱེད། །འདི་དང་ཕྱི་མ་བར་དོ་རུ། །ཅི་མཛད་དཀོན་མཆོག་ཁྱེད་ཤེས་སམ། །གཟུངས་སྔགས་ལ་སོགས་ཕན་ཡོན་རྣམས། །ད་ལྟ་གསུངས་ལྟར་མ་བྱུང་བ། །རང་གི་རྣམ་སྨིན་སྒྲིབ་པས་བསྒྲིབས། །ལས་ཀྱི་རྣམ་སྨིན་མ་གཏོགས་གསུངས། །དེ་དོན་གོ་བས་ལོག་ལྟ་སྤོངས། །དཀོན་མཆོག་གསུམ་གྱི་བྱིན་
རླབས་འཇུག །ཕན་ཡོན་འབྱུང་བའི་བོགས་འབྱུང་ངོ་། །དེ་ལྟར་སེམས་བསྐྱེད་ཆོས་སྤྱོད་ཀྱང་། །བསྐལ་པ་གྲངས་མེད་གསུམ་གྱི་བར། །རྫོགས་པའི་སངས་རྒྱས་མི་ཐོབ་གེགས། །རང་ལུས་ལྷ་རུ་མ་ཤེས་ནས། །ཐ་མལ་རང་རྒྱུད་བཟུང་བས་ལེན། །ཕུང་པོ་ཁམས་དང་སྐྱེ་མཆེད་རྣམས། །ཡེ་ནས་ལྷ་ཡི་དཀྱིལ་འཁོར་དུ། །གསར་རྙིང་བླ་མེད་རྒྱུད་ཀུན་མཐུན། །དེ་ཕྱིར་རང་ལུས་སྤྱན་རས་གཟིགས། །གར་འདུག་གནས་དེ་གཞལ་ཡས་ཁང་། །སུ་འགྲོགས་དཔའ་བོ་མཁའ་འགྲོའི་འཁོར། །གདན་ནི་པདྨ་ཟླ་བ་སྟེ། །གོས་རྣམས་ལྷ་ཡི་ན་བཟའ་བརྒྱན། །ཟས་རྣམས་ཚོགས་འཁོར་བདུད་རྩིར་བསྒོམ། །ཚེ་འདིའམ་ནི་བར་དོ་དང་། །སྐྱེ་བ་བདུན་ལས་མི་ཐོགས་པར། །སངས་རྒྱས་ཐོབ་པའི་བོགས་འབྱུང་ངོ་། །དེ་ལྟར་མོས་པ་ཙམ་བྱས་ཀྱང་། །དོན་ལ་ཡིན་རྒྱུ་མེད་བསམ་ནས། །ངེས་ཤེས་སྐྱེ་བར་མི་ནུས་པས། །བྱིན་རླབས་རྟགས་མཚན་མི་འབྱུང་གེགས། །རང་ཉིད་ཡི་དམ་ལྷ་ཡིན་པའི། །ངེས་ཤེས་ཨུ་ཚུགས་འདྲ་བ་བསྒོམ། །རྟགས་མཚན་གསལ་བའི་བོགས་འབྱུང་ངོ་། །ལྷ་རྟགས་དངོས་ཉམས་རྨི་ལམ་དུ། །
ཞལ་མཐོང་ལུང་བསྟན་དག་སྣང་ལ། །མཆོག་ཡིན་སྙམ་ནས་རློམ་སེམས་ཆེ། །རང་མཐོང་རང་རྩིས་ཆེར་སྐྱེས་ནས། །མཆོག་གི་དངོས་གྲུབ་འགག་པའི་གེགས། །མེ་བུས་རྟགས་ལ་དུ་བའི་དཔེ། །རྟགས་མཚན་དེ་ཙམ་ལོས་འོང་ཡིན། །སྙམ་དུ་རློམ་སེམས་མི་བསྐྱེད་པར། །ངེས་ཤེས་བསྐྱེད་ལ་བསྙེན་སྒྲུབ་བྱ། །ལམ་དུ་འགྲོ་བའི་བོགས་འབྱུང་ངོ། །སྔགས་བཟླས་བསྐྱེད་རིམ་གསལ་ན་ཡང་། །གདོས་བཅས་ལྡེར་སྐུ་འདྲར་བསྒོམས་པས། །ལྷ་དེ་འདྲ་བའི་འབྱུང་པོའི་རིགས། །ཡང་ན་གཟུགས་ཀྱི་ཁམས་ཀྱི་ལྷ། །སྐྱེ་ཞིང་སངས་རྒྱས་མི་ཐོབ་གེགས། །ལྷ་སྐུ་གསལ་ཡང་ངོ་བོ་སྟོང་། །སྣང་སྟོང་འཇའ་ཚོན་བཞིན་དུ་བསྒོམ། །ལུས་འདི་བོར་ནས་བར་དོ་རུ། །ལོངས་སྤྱོད་རྫོགས་སྐུའི་ཞིང་ཁམས་སུ། །སྐྱེས་ནས་བྱང་ཆུབ་མཆོག་ཐོབ་བོ། །དེ་ནི་བོགས་འདོན་ཆེན་པོའོ། ༈ །ཁྲིད་ཞུས་གནས་འགྱུ་སྐྱོང་ཤེས་ནས། །ཡུན་རིང་མ་སྒྱུར་བསྲུངས་ན་ཡང་། དང་པོ་འབྲོས་དེད་དེ་ག་ལས། །ཅི་ཡང་ཡར་སྐྱེད་མེད་པའི་གེགས། །མོས་གུས་དད་པ་ཆུང་བས་ལེན། །རང་གི་དྲིན་ཐོབ་བླ་མ་དེ། །སངས་རྒྱས་སེམས་ཅན་སུ་ཡིན་འདྲ། །
རང་སེམས་ངོ་བོ་སྤྲད་པ་དེ། །སངས་རྒྱས་ཀུན་བས་བཀའ་དྲིན་ཆེ། །རྡོ་རྗེ་འཆང་དང་ཀུན་ཏུ་བཟང་། །སངས་རྒྱས་ཀུན་གྱི་ཆོས་སྐུ་དང་། །བླ་མ་དབྱེར་མེད་མོས་གུས་བསྐྱེད། །བླ་མ་སངས་རྒྱས་ཆོས་སྐུ་དེ། །རྡོ་རྗེ་འཆང་ངམ་སྣང་མཐའ་ཡས། །ཆོས་སྐུའི་སངས་རྒྱས་གཅིག་ཏུ་བསྒོམ། །དཀོན་མཆོག་བླ་མ་ཡི་དམ་ལྷ། །ཀུན་འདུས་བསྒོམས་ལ་གསོལ་བ་བཏབ། །གདུང་ཤུགས་མཆི་མ་དབྱུང་བར་བྱ། །བླ་མ་འོད་ཞུ་རང་ལ་བསྟིམ། །དེ་འདྲ་ཐུན་གསུམ་ཐུན་བཞི་སོགས། །འབད་ན་དབྱར་ཁའི་སྤང་བཞིན་དུ། །ཉམས་རྟོགས་རང་རྡོལ་ཁོག་ནས་འཆར། །ཅི་ཡང་འཆར་བའི་བོགས་འབྱུང་ངོ། །དེ་ལྟར་ཉམས་ལེན་བསྐྱངས་ཙམ་ན། །རིག་པ་འཕྲོ་རྒོད་རྩུབ་ཅིང་རྒྱུག །སྐྱོངས་རྒྱུ་མི་རྙེད་ཡི་མུག་སྐྱེ། །ནན་གྱིས་བསྐྱངས་ན་བློ་མི་བདེ། །རྒན་མོས་ཕྱུགས་ལུག་འཚོས་པ་འདྲ། །དེ་ལ་རྒོད་པའི་གེགས་ཤེས་བྱ། །གནས་འགྱུ་གདམས་ག་བྱས་པས་ལེན། །འཁྱིལ་བའི་ཆུ་དང་རྦ་རླབས་ཆུ། །ཆུ་ཡིན་པ་ལ་བཟང་ངན་མེད། །གནས་པའི་སེམས་དང་འགྱུ་བའི་སེམས། །སེམས་ཉིད་ཡིན་ལ་ཁྱད་པར་མེད། །སེམས་ཉིད་ཡེ་
ནས་ཆོས་ཀྱི་སྐུ། །དེ་ལ་བཅོས་བསླད་བྱས་ན་ཞེན། །གནས་འདོད་མ་ཆེ་འགྱུ་དོགས་སྤོངས། །མ་ཡེངས་ཙམ་ལ་ལྷོད་ནས་སྐྱོངས། །གསལ་ཚེ་སྐྱུར་ལ་ཡང་ཡང་བསྒོམ། །བློ་བདེ་སྐྱོང་སླའི་བོགས་ཤིག་འབྱུང་། །དེ་ལྟར་བསྐྱངས་པས་རེས་འགའ་ཞིག །བལྟས་ཀྱང་གསལ་དང་ངེས་ཤེས་མེད། །གནམ་ངོ་རྨུགས་ལྟར་ཐིབ་བེ་བ། །ཧྲིག་ཧྲིག་བྱས་ནས་བལྟས་ན་ཡང་། །རྣམ་རྟོག་འདི་ཡིན་ངོས་བཟུང་རུ། །མེད་པའི་བན་བུན་ཕྲ་ཞིབ་སྣང་། །ཡི་མུག་སྐྱོང་ཡང་མི་འདོད་པ། །བྱིང་བའི་སྐྱོན་དེ་གེགས་ཤིག་ཡིན། །དེ་ལ་ལྟ་སྟངས་ནམ་མཁར་གཏད། །སེམས་དང་ནམ་མཁའ་སྔོ་བསངས་བསྲེ། །ལུས་སེམས་བསྒྲིམས་ལ་ལུས་གནད་བསྲང་། །གསལ་དང་རྗེན་པའི་བོགས་ཤིག་འབྱུང་། །ཏིང་འཛིན་གེགས་ལ་རྣམ་མང་ཡང་། །བྱིང་རྒོད་གཉིས་ལ་ཕལ་ཆེར་འདུས། །དེ་ལ་གེགས་སེལ་མང་ན་ཡང་། །དོན་ལ་བསྒྲིམ་ལྷོད་གཉིས་ཡིན་ཏེ། །རྒོད་ན་ལྷོད་ལ་བྱིང་ན་སྒྲིམས། །ལ་ཆེན་གང་ཤར་ངོ་བོ་ལ། །གང་བྱུང་དེས་ཆོག་སྐྱོང་བ་མཆོག །བཟང་བཟང་པོ་གཅིག་མ་འདོད་ལ། །ངན་ངན་འདྲ་ཡང་མི་སྐྱུར་བར། །ཡུགས་སས་དྭ་ཕྲུག་
སྐྱོང་བ་འདྲ། །རྒྱུན་བསྲིང་བ་ནི་གནད་ཡིན་ནོ། །ལམ་མུས་ཕོག་པའི་གེགས་སེལ་ཡིན། །དེ་ལྟར་རྒྱུན་གཅིག་བསྲིང་ནུས་ན། །བདེ་གསལ་མི་རྟོག་ཉམས་བཟང་འཆར། །ལུས་བདེ་སེམས་བདེ་སེམས་རྩ་སྐྱིད། །ང་ལས་སྐྱིད་པ་མེད་དོ་སྙམ། །འགྱུ་བ་ཉུང་ཞིང་མེ་རེ་གནས། །སྤྱོད་ལམ་ཕལ་ཆེར་འབྲལ་བ་མེད། །འོད་གསལ་འཁོར་ཡུག་ཡིན་ནམ་སྙམ། །ཉོན་མོངས་དུག་ལྔའི་མགོ་ཡང་ནོན། །འཇིག་རྟེན་བྱ་བས་དགོས་པ་མེད། །གཅིག་པུར་བྲག་ཕུག་འགྲིམ་ན་བསམ། །མཚན་མོ་རྨི་ལམ་ཕལ་ཆེར་ཟིན། །ཉམས་ལེན་འདི་དང་མ་བྲལ་ན། །འདི་ཕྱིའི་དོན་ཆེན་འགྲུབ་བོ་སྙམ། །དེ་ལ་ངེས་ཤེས་མཆོག་འཛིན་གྱིས། །ངང་ལ་ཚེ་ཡི་དུས་བྱས་ནས། །ཉམས་ལེན་ཆེ་ཆུང་རིམ་པ་ཡིས། །རྒྱལ་ཆེན་རིགས་བཞིའི་ལྷ་རྣམས་དང་། །སུམ་ཅུ་རྩ་གསུམ་འཐབ་བྲལ་དང་། །དགའ་ལྡན་འཕྲུལ་དགའ་གཞན་འཕྲུལ་གྱི། །ལྷ་ཡི་གནས་སུ་སྐྱེ་བ་ལེན། །བདེ་སྐྱིད་ལོངས་སྤྱོད་དཔག་མེད་ཀྱང་། །བྱང་ཆུབ་མི་ཐོབ་གེགས་ཡིན་ནོ། །དེ་ལ་བདེ་ཉམས་ཅི་སྐྱེས་ཀྱང་། །དེ་ལ་ཆགས་ཞེན་མཆོག་འཛིན་སྤང་། །བདེ་བ་དེ་
ཡི་ངོ་བོ་ལ། །ཧྲིག་གེ་བལྟས་པས་བདེ་བ་དང་། །སྟོང་པ་དབྱེར་མེད་ཟུང་དུ་འཇུག །བདེ་སྟོང་ཕྱག་རྒྱ་ཆེན་པོ་འཆར། །གོལ་ས་གཅོད་པའི་བོགས་འདོན་ཡིན། །དེ་ཉིད་བསྐྱངས་པས་དེ་མི་རྟག །རང་སེམས་གསལ་སྟོང་རྗེན་པར་འཆར། །སྤྲིན་ཐག་ཆད་པའི་ནམ་མཁའ་ལྟར། །ལྷང་ངེ་རྗེན་ནེ་ས་ལེ་བ། །དྲན་པས་ཟིན་ནམ་དེ་ཡི་ངང་། །ཐེ་ཚོམ་མེད་པའི་ངེས་ཤེས་སྐྱེ། །འདི་ལས་ལྷག་པའི་ཉམས་རྟོགས་ནི། །གྲུབ་ཐོབ་རྣམས་ལའང་མེད་དམ་སེམས། །གཉིད་དང་རྨི་ལམ་མཚམས་ཤེད་ནས། །ཉི་ཟེར་ཟླ་ཐིག་མེ་རུ་ནི། །འདྲ་བའི་འོད་ཅིག་རྐྱེན་བྱས་ནས། །ཉམས་ལེན་ཉིན་པར་བཞིན་དུ་ཟིན། །གཉིད་བཞིན་ཁང་པའི་ནང་དང་ནི། །ས་ཐག་རིང་དང་ལ་གྲིབ་ཀྱིས། །ཅི་གདའ་ཅི་བྱེད་རེས་འགའ་མཐོང་། །སུ་ཡིས་ཟེར་ཡང་ང་ཡི་འདི། །རྟོགས་པ་མཆོག་གྱུར་ཡིན་ནོ་སེམས། །དེ་ལ་ཆགས་ཞེན་ཆེན་པོ་དང་། །ངེས་ཤེས་བརྟན་པོས་ཚེ་འཕོས་ན། །ཚངས་རིས་ཚངས་པ་མདུན་ན་འདོན། །དགེ་ཆུང་ཚད་མེད་དགེ་ལ་སོགས། །ཉམས་ལེན་དེ་ཡི་ཆེ་ཆུང་གིས། །གཟུགས་ཁམས་གནས་རིགས་བཅུ་བདུན་གྱི། །ལྷ་ཡི་གནས་
སུ་སྐྱེས་གྱུར་ནས། །རིན་པོ་ཆེ་ཡི་གཞལ་ཡས་སུ། །མཚན་དཔེ་ལྡན་པའི་ལུས་ཐོབ་ནས། །རེ་ཞིག་ལོ་གྲངས་དཔག་མེད་དུ། །བདེ་སྐྱིད་སངས་རྒྱས་ཞིང་འདྲ་ཡང་། །སླར་ཡང་ངན་སོང་ལྟུང་བའི་གེགས། །དེ་ལྟར་གསལ་ཉམས་ཆེ་དྲགས་པས། །ཟག་བཅས་མངོན་ཤེས་ཤར་འདྲ་ཡང་། །དེ་ལ་མཆོག་འཛིན་ང་རྒྱལ་སྤོངས། །གསལ་བ་དེ་ཡི་ངོ་བོ་ལ། །བལྟས་པས་ངོ་བོ་སྟོང་པར་རྟོགས། །གསལ་སྟོང་དབྱེར་མེད་གཅིག་ཏུ་འདྲེས། །གསལ་སྟོང་ཕྱག་རྒྱ་ཆེན་པོར་འཆར། །བླ་མེད་མཆོག་ཐོབ་བོགས་འདོན་ཡིན། །དེ་ལ་བསྐྱངས་པས་ནམ་ཞིག་ན། །བདེ་ཉམས་གསལ་ཉམས་གཉིས་ཀ་མེད། །ཐམས་ཅད་སྟོང་པ་ཉིད་དུ་མཐོང་། །ལུས་ཀྱང་དངོས་སུ་མེད་དམ་སྙམ། །ཕྱི་ནང་སྣོད་བཅུད་འཁོར་འདས་ཀུན། །ཐམས་ཅད་སྟོང་པ་ནམ་མཁའ་འདྲ། །སྙམ་པའི་རྟོགས་པ་སྐྱེས་ཙམ་ན། །ཐམས་ཅད་སྟོང་པ་ཉིད་དུ་གདའ། །དགེ་སྡིག་ཕན་གནོད་ག་ལ་ཡོད། །སྙམ་ནས་སྡིག་ལ་མི་འཛེམ་ཞིང་། །དགེ་བ་སྒྲུབ་པར་མི་བྱེད་ན། །སྟོང་ལྟ་ཧད་པོ་བདུད་ཀྱི་ལས། །སྟོང་པ་ཉིད་ལ་བལྟ་ཉེས་པས། །ཤེས་རབ་དམན་རྣམས་ཕུང་
གསུངས་ལྟར། །མནར་མེད་གནས་སུ་ལྟུང་བའི་གེགས། །རྟོགས་པ་ཇི་ཙམ་མཐོ་ན་ཡང་། །རྒྱུ་འབྲས་ལག་ལེན་ཞིབ་པར་རྩི། །དཔེར་ན་ནམ་མཁའ་སྟོང་པ་ལ། །བརླན་དང་ཚ་གྲང་རྟེན་འབྲེལ་གྱིས། །འཇའ་དང་སྤྲིན་དང་ཆར་པ་དང་། །ཐོག་དང་སེར་བ་འོང་བ་ལྟར། །ཆོས་ཀུན་སྟོང་པ་ཉིད་ཡིན་ཀྱང་། །རྒྱུ་འབྲས་རྟེན་འབྲེལ་མི་བསླུ་བས། །རིགས་དྲུག་སྐྱིད་སྡུག་སྣ་ཚོགས་འབྱུང་། །ཤེས་རབ་སྟོང་ཉིད་བསྒོམས་པ་ཡིས། །འཁོར་བ་སྤངས་ནས་ཆོས་སྐུ་ཐོབ། །ཚོགས་བསགས་སྙིང་རྗེ་བསྒོམས་པ་ཡིས། །ལོངས་སྐུ་སྤྲུལ་སྐུ་ཐོབ་པ་སྟེ། །ཤེས་རབ་སྟོང་ཉིད་ཐབས་ནི་ཚོགས། །ཚོགས་གཉིས་ཟུང་འཇུག་ཉམས་སུ་བླངས། །སྐུ་གཉིས་ཐོབ་པའི་བོགས་འདོན་ཆེ། །དེ་ལྟར་ཚོགས་གཉིས་འབད་པའི་ཚེ། །ཐམས་ཅད་སེམས་རེད་བསམ་པ་དང་། །སེམས་ནི་ནམ་མཁའ་དང་འདྲ་བསམ། །སེམས་ནི་ཡོད་མེད་གཉིས་ཀ་མིན། །ཡོད་མིན་མེད་མིན་རེད་བསམ་དང་། །སེམས་ནི་ཅི་ཡང་མི་གདའ་བསམ། །དེ་འདྲ་རེས་འགའ་སྐྱེས་ཀྱང་བཟོད། །དེ་འདྲ་ཡིན་ལ་ཁད་ཡོད་ཀྱང་། །དེ་འདྲ་ཡིན་ནོ་བསམ་པ་ཡི། །ངེས་ཤེས་
འཛིན་པ་དམ་པོའི་ངང་། །གལ་ཏེ་ཚེ་འདི་འཕོས་ན་ནི། །གཟུགས་མེད་སྐྱེ་མཆེད་མུ་བཞིར་གོལ། །བསྐལ་པ་ཁྲི་ཕྲག་བརྒྱད་ཀྱི་བར། །བཟང་ངན་ལུས་ནི་ལེན་རྒྱུ་མེད། །དྲན་མེད་བརྒྱལ་བ་འདྲ་ཞིག་འབྱུང་། །སླར་ཡང་ལུས་ལེན་འཁོར་བར་འཁྱམས། །དེ་འདྲའི་ངེས་ཤེས་བརྟན་པོ་ནི། །སྐྱེས་པ་ཕྱི་རོལ་མུ་སྟེགས་ལུགས། །ཆོས་སྐུ་ཐོབ་པར་འདོད་པ་རེ། །དེ་འདྲའི་རྟོགས་པ་སྐྱེས་ནའང་། །ཐམས་ཅད་སེམས་རེད་བསམ་མཁན་སོགས། །འཛིན་པ་དེ་དག་རང་ལ་ལྟོས། །འཛིན་པ་དེ་དག་རང་སར་དག །སྟོང་ཉིད་ཕྱག་རྒྱ་ཆེན་པོར་འཆར། །དེ་ནི་བོགས་འདོན་ཡང་དག་གོ །དེ་ལྟར་བདེ་གསལ་མི་རྟོག་ཉམས། །བྱིང་རྒོད་ལ་སོགས་དེ་རྣམས་ལ། །གོ་རིམ་ངེས་པ་མེད་་པ་སྟེ། །སྔ་འཆར་ཕྱི་འཆར་ཅི་ཡང་འབྱུང་། །འཆར་ཝིག་སྐོར་རྫོགས་མང་དུ་འོང་། །ཡུན་ཡང་ལོ་མང་ཟླ་གྲངས་དང་། །ཞག་འགའ་དང་ནི་ཡུད་རེ་ཙམ། །ངེས་མེད་མི་ཡི་རིགས་ཡིན་ནོ། །མི་འཆར་བ་ནི་མི་འབྱུང་སྟེ། །སྐས་ཐེམ་བཞིན་དུ་བརྒྱུད་དགོས་སོ། །རེས་འགའ་འདོད་ཆགས་ཞེ་སྡང་དང་། །ཕྲག་དོག་སེར་སྣ་སྔར་ལས་ཆེ། །ཚིག་
རྩུབ་རྒྱུད་གྱོང་མི་རྣམས་ཀྱང་། །སྒོམ་ཆེན་ཟེར་ཞིང་མཚང་ནས་འབྲུ། །རྩུབ་ཉམས་སྡིག་སྒྲིབ་སློང་བའི་གེགས། །བླ་མ་རྗེ་ལ་གསོལ་བ་བཏབ། །ལུས་སེམས་ལྷོད་དེ་ཀློད་ལ་བསྐྱང་། །དེ་ཉིད་ཤིན་དུ་བོགས་ཆེའོ། །མཚང་འབྲུ་ཚིག་ངན་ལ་སོགས་པ། །ཆེད་དུ་དེ་ལ་དམིགས་གཏད་བྱས། །ངོ་བོ་བལྟས་པས་སྟོང་པར་རྟོགས། །དེ་ལྟར་ཆུང་ས་ནས་བརྩམས་ཏེ། །གནད་ཆེན་ལ་ཡང་རིམ་པས་བསླབ། །རྣམ་རྟོག་ངན་པ་གང་སྐྱེས་ལ། །དང་པོ་རྗེས་སླེབ་བྱ་བ་གཅེས། །དེ་ནས་སྐྱེས་ཐོག་འབུར་འཇོམས་དང་། །དེ་ནས་རང་གྲོལ་ཆུ་རླབས་ལྟར། །རང་སེམས་འདུལ་བ་འདུལ་བའི་མཆོག །ཉོན་མོངས་འཇོམས་པའི་བོགས་འདོན་ཡིན། །ཉོན་མོངས་རྣམ་རྟོག་དགྲ་ཡིན་པས། །ངོ་བོ་བསྐྱངས་པས་འཇོམས་སྙམ་ན། །གཉེན་པོར་ཤོར་བའི་གེགས་ཡིན་ཏེ། །གསང་སྔགས་དོན་དང་མི་མཐུན་གེགས། །ཉོན་མོངས་དང་ནི་རྣམ་རྟོག་ཀུན། །ཡེ་ནས་ཡེ་ཤེས་ཆེན་པོ་སྟེ། །མ་རྟོགས་འཁོར་བར་འཁྱམས་པ་ཡིན། །ཉོན་མོངས་སྤངས་བའི་ཕ་རོལ་ན། །ཡེ་ཤེས་རྩལ་དུ་མ་མཆིས་ཀྱང་། །དེ་རྗེས་འབྲང་ན་འཁོར་བར་འཁྱམས། །སྤངས་
ནས་བསམ་པ་བསྒྱུར་ཐུབ་ཀྱང་། །ཐེག་དམན་ཡིན་གྱི་ཕྱག་རྫོགས་མིན། །ཉོན་མོངས་རྣམ་རྟོག་དགེ་མི་དགེ །གང་ཤར་ཁྱད་མེད་རང་ངོ་བལྟ། །བཟོ་བཅོས་མེད་པར་དེ་གར་ཀློད། །ཆུ་རླབས་ཆུ་རུ་གྲོལ་བ་དང་། །ཉོན་མོངས་ཡེ་ཤེས་ཆེན་པོར་འཆར། །གང་ཤར་སྤང་བླང་མ་དགོས་པར། །བསྒོམ་དུ་འཆར་བའི་བོགས་འདོན་ཡིན། །མངོན་རྟོགས་ལ་སོགས་བསྒོམ་པའི་དུས། །སྭ་བྷཱ་ཝ་སོགས་སྔགས་བརྗོད་ནས། །སྟོང་པ་ཉིད་དུ་གྱུར་བརྗོད་དུས། །ཅི་ཡང་མེད་པའི་སྟོང་པ་ཉིད། །ནམ་མཁའ་ལྟ་བུར་གྱུར་བསྒོམ་པ། །སྟོང་ཉིད་དངོས་སུ་མི་རྟོགས་པར། །བློ་བཟོ་རྒྱས་འདེབས་ཤོར་བའི་གེགས། །བློ་ཡིས་སྟོང་པ་མི་བཟོ་བར། །རང་སེམས་སྟོང་པའི་ངོ་བོ་བལྟ། །མངོན་སུམ་རྟོགས་པའི་བོགས་འདོན་ཡིན། །མདོ་རྒྱུད་གྲུབ་ཐོབ་གསུང་མང་པོ། །མཐོང་བས་ཆོས་ཀུན་སྟོང་པ་ཉིད། །ནམ་མཁའ་ལྟ་བུ་ཡིན་རྒྱུ་རེད། །བསམ་པའི་གོ་བ་སྐམ་པོ་ལ། །ངེས་ཤེས་སྐྱེས་ནས་སྟོང་སྐད་འདོན། །དབུལ་པོས་ཕྱུག་པོའི་ལོ་རྒྱུས་རྣམས། །གོ་ཡང་ཕན་པ་མེད་དང་འདྲ། །དེ་ཕྱིར་གོ་བ་ཆེ་ན་ཡང་། །རྟོགས་པ་
མཐོ་བར་མི་རློམ་པར། །རང་སེམས་སྟེང་དུ་རྡོ་རུས་གཏུགས། །ཉམས་སུ་མྱོང་བའི་བོགས་འདོན་ཡིན། །དེ་ལྟར་བྱིང་རྒོད་སྐྱོན་གཉིས་བསལ། །བདེ་དང་གསལ་དང་མི་རྟོག་པའི་། །ཉམས་བཟང་རྣམས་ལ་མ་ཆགས་ཤིང་། །སེམས་སློང་རྩུབ་འཁྲུགས་མགོ་ནོན་ནས། །ཤོར་ས་གསུམ་དེར་མ་ཤོར་བ། །རྒྱུན་བསྲིངས་ཉམས་སུ་ལེན་ནུས་ན། །ནམ་ཞིག་བསོད་ནམས་དགེ་སྦྱོར་མཐུས། །བླ་མའི་བྱིན་རླབས་སེམས་ལ་ཞུགས། །ལྟ་རྒྱུ་ལྟ་མཁན་གཅིག་ཏུ་འདྲེས། །འདི་བསྒོམ་གཏད་སོ་གཅིག་ཀྱང་མེད། །འདི་ཡིན་འདི་མིན་འཛིན་པ་ཞིག །བདེ་གསལ་མི་རྟོག་ཉམས་བཟང་པོ། །ལེགས་ལེགས་འདྲ་ཚོ་ཤུན་པར་བུད། །ང་ཡི་བསྒོམ་དེ་བོར་རམ་ཅི། །འདི་བསྒོམ་གཏད་སོ་མི་འདུག་པས། །བསྒོམ་མེད་ཨམ་དེ་ཨེ་ཡིན་ཨང་། །འདི་ཆ་དེ་ཆ་མེད་པ་འདི། །གོལ་ས་གཅིག་ནི་ཨེ་ཡིན་ནམ། །སྙམ་ནས་རང་ལ་ཡིད་མི་ཆེས། །ཐ་མལ་ཤེས་པ་རྗེན་པར་བུད། །རང་སེམས་ངོ་བོ་མཐོང་བ་དེ། །ཕྱག་རྒྱ་ཆེན་པོའི་སྣེ་ཁེ་ཡིན། །ནམ་དྲན་དུས་སུ་དེ་ཉིད་ལ། །འཕེལ་འགྲིབ་ཆེན་པོ་མེད་ན་ཡང་། །བརྗེད་སྐབས་ཡེངས་སྐབས་
འཁྲུལ་པར་འཆོར། །དྲན་རྫིས་ཡང་ཡང་གསལ་འདེབས་གཅེས། །འདི་ནས་རྟོགས་ལྡན་མིང་བཏགས་རུང་། །རྣམ་གཡེང་གནས་དང་གཅིག་པུ་གཉིས། །ཨེ་མཉམ་བོགས་སུ་ཅི་ཐོན་ལྟ། །བོགས་འདོན་བླ་མའི་གསོལ་འདེབས་དང་། །སྤྲོས་བཅས་དགེ་སྦྱོར་ཉུང་བཅུག་ལ། །ངོ་བོ་ཉིད་ལ་ཨུ་ཚུགས་བསྐྱེད། །སྤྱོད་ལམ་རྣམས་དང་ཨེ་འདྲེས་ཚད། །འདི་ནས་འདྲེས་ན་འདྲེས་ངེས་ཡིན། །བསྒོམ་རྒྱུ་ཅི་ཡང་མི་གདའ་བས། །སྒྱུར་ནས་བཞག་པས་འཐུས་གདའ་བསམ། །སྤྲོས་བྲལ་མེད་པའི་སྟོང་རྗེས་ཁྱེར། །འཁྲུལ་པར་འབྱམས་པའི་གེགས་ཤིག་ཡིན། །དྲན་པས་ཡང་ཡང་གསལ་འདེབས་བྱ། །དྲན་ན་སྒོམ་ཡིན་དྲན་པས་ཆོག །མ་དྲན་ཐ་མལ་འཁྲུལ་པ་རང་། །ཡང་ཡང་དྲན་པས་བོགས་སུ་ཆེ། །རང་སེམས་སྟེང་དུ་བཞག་པའི་ཚེ། །གཟུགས་སྒྲ་དྲི་རོ་ལ་སོགས་པ། །མཐོང་ཐོས་ཚོར་བ་མ་འགགས་ཀྱང་། །ཡིན་མིན་བླང་དོར་འཛིན་པ་མེད། །ནང་དུ་འདི་བསྒོམ་གཏད་སོ་མེད། །མ་བཅོས་རྗེན་པ་ས་ལེ་བ། །གང་ཟག་བདག་མེད་ཅེས་བྱ་སྟེ། །ཉམས་ལེན་བཟང་པོ་ཡིན་མོད་ཀྱང་། །ཆོས་ཀྱི་བདག་མེད་མ་
གཏོགས་པ། །ད་རུང་སྟོང་ཉིད་ཕྱེད་པོ་ཡིན། །ཕྱི་རོལ་རི་དང་ཁང་ཁྱིམ་དང་། །སྐྱེས་པ་བུད་མེད་ལ་སོགས་པ། །རིག་པ་གཏད་ནས་བསྒོམས་ཙམ་ན། །འདི་ཡན་གཟུགས་དང་འདི་ཚུན་སེམས། །ཕྱེ་རྒྱུ་མེད་པར་དབྱེར་མེད་དུ། །ཉམས་ལེན་དེ་དང་ངོ་བོ་གཅིག །དེ་བཞིན་སྣང་སྲིད་འཁོར་འདས་ཀུན། །རང་གི་སེམས་དང་དབྱེར་མེད་ཅིང་། །རང་སེམས་ཡེ་ནས་སྟོང་པ་ཉིད། །སྟོང་དང་མི་སྟོང་འཛིན་པ་བྲལ། །ཕྱི་རོལ་ཡུལ་སྣང་སྣ་ཚོགས་པ། །ཆུ་ནང་ཟླ་བའི་གཟུགས་བརྙན་ལྟར། །གསལ་ཡང་ངོ་བོ་སྟོང་པར་མཐོང་། །དེ་ཡང་བསྲེ་སོགས་མི་དགོས་པར། །རང་ཤར་རྒྱུན་དུ་བྱུང་བ་ན། །ཉམས་ཀྱི་རོ་གཅིག་ཅེས་བྱ་སྟེ། །ཆོས་ཀྱི་བདག་མེད་རྟོགས་པ་ཡིན། །དེ་ནས་སྟོང་ཉིད་ཆ་ཚང་ངོ་། །སྣང་སྲིད་འཁོར་འདས་ཆོས་ཀུན་ལ། །ཐམས་ཅད་སྟོང་ཉིད་རྩི་ཡིས་ཟིན། །གང་བྱས་ཅི་བྱས་སྒྲིབ་མི་ནུས། །སྙམ་ཞིང་སྤྱོད་པ་རྩིང་ཤོར་ན། །མི་རྒྱུ་གྱོང་ཞིང་རྩབ་རྩུབ་མང་། །སྐབས་སུ་ཡེངས་སྐབས་བརྗེད་སྐབས་ཆེ། །འཇིག་རྟེན་བྱ་བ་རུ་ང་ཆེ། །རོ་གཅིག་འདྲེས་པའི་རྦ་ལ་གཡེངས། །ལན་གཅིག་ངན་སོང་ལྟུང་དོགས་གེགས། །
དེ་ལ་སྤྱོད་པ་ཞིབ་ཏུ་བྱ། །ད་རུང་གསོལ་བ་དྲག་ཏུ་གདབ། །འདི་སྐབས་གཉན་ས་འགའ་རེ་འགྲིམ། །ཆོ་འཕྲུལ་སེམས་དང་བསྲེ་ཞིང་བསྒོམ། །སྙིང་རྗེས་སེམས་བསྐྱེད་དྲག་ཏུ་བསྒོམ། །དུས་གསུམ་རྒྱལ་བའི་ཐུགས་རྒྱུད་དང་། །འགྲོ་དྲུག་སེམས་ཅན་སེམས་རྒྱུད་གཉིས། །དབྱེར་མེད་ངོ་བོ་གཅིག་ཏུ་རྟོགས། །སེམས་དང་ནམ་མཁའ་ཆོས་ཀྱི་དབྱིངས། །དབྱེར་མེད་ཆེ་ཆུང་མེད་པར་རྟོགས། །སྣོད་བཅུད་འཁོར་འདས་ཐམས་ཅད་ཀུན། །ལན་ཚྭ་ཆུ་རུ་ཐིམ་པ་ལྟར། །རང་སེམས་ངང་དུ་དབྱེར་མེད་འདྲེས། །ད་རུང་བརྗེད་སྐབས་ཡེངས་སྐབས་ཡོད། །ཡེངས་དང་མ་ཡེངས་བརྗེད་མ་བརྗེད། །དབྱེར་མེད་བཟང་ངན་མེད་པ་རུ། །ངོ་བོ་འགྱུར་མེད་ཀློང་དུ་རྟོགས། །དེ་ག་ཙམ་ཞིག་བྱུང་བ་ན། །མི་ལུས་ཐོབ་པ་དོན་དང་ལྡན། །ནམ་ཞིག་འཆི་བའི་དུས་ན་ཡང་། །བདེ་བ་ཅན་ནམ་རྔ་ཡབ་གླིང་། །སྨོན་ལམ་རྩེ་གཅིག་གར་བཏབ་དེར། །འགྲོ་ལ་ཐེ་ཚོམ་མི་དགོས་པས། །དེ་ཙམ་ཨེ་འོང་བརྩོན་འགྲུས་མཛོད། །གཞན་ཡང་བོགས་འདོན་གེགས་སེལ་ནི། །རྟོགས་པའི་གདེང་ཡང་ཐོབ་དཀའ་བས། །ནམ་འཆི་མི་ཤེས་ཤི་
བའི་ཚེ། །བར་དོ་མི་ཆོད་པ་ཡི་གེགས། །འཇིགས་རུང་གེགས་ཆེན་དེ་སེལ་ཐབས། །རྒྱུད་སྡེ་འབུམ་ཕྲག་དྲུག་ཅུའི་དོན། །དགའ་རབ་ཤྲཱི་སེང་པདྨ་འབྱུང་། །བི་མ་མི་ཏྲ་ལ་སོགས་པ། །རིག་འཛིན་རྗེ་འབངས་ཐུགས་ཀྱི་བཅུད། །བསྒོམ་ནི་མི་དགོས་བལྟས་པས་གྲོལ། །རྫོགས་ཆེན་ཐོད་རྒལ་ཉམས་སུ་ལོངས། །འཇའ་ཚོན་ཐིག་ལེ་ཐིག་ཕྲན་།དང་། །རང་སེམས་ངོ་བོ་བསྲེས་ལ་ལྟོས། །གསལ་སྟོང་དབྱེར་མེད་མངོན་སུམ་མཐོང་། །གལ་ཏེ་སེམས་ངོ་མི་ཤེས་ཀྱང་། །དེ་ལ་བལྟས་པས་བར་དོ་ཆོད། །འདི་ལས་ཟབ་དང་སླ་བ་མེད། །ཐེག་པ་དགུ་ཡི་ཡང་རྩེ་ཡིན། །འཇའ་ཚོན་ཐིག་ལེ་ཐིག་ཕྲན་རྣམས། །དངོས་སུ་གསལ་པོར་ཡིད་ཆེས་མཐོང་། །རྩེ་གཅིག་བསྒོམ་དང་ངོ་མཉམ་སྟེ། །ཆོས་ཉིད་མངོན་སུམ་མཐོང་བ་ཡིན། །འོད་ལྔ་ཡེ་ཤེས་ལྔ་ཡི་འོད། །འོད་སྐོར་དབྱིངས་ཀྱི་སྒྲོན་མ་སྟེ། །ཐིག་ཕྲན་རིག་པ་ལུ་གུ་རྒྱུད། །དེ་དག་ཇེ་ཆེ་ཇེ་ཆེར་འཕེལ། །ཉམས་ལེན་གོང་དུ་འཕེལ་བ་ཡིན། །སྤྲོས་བྲལ་བསྒོམ་དང་ངོ་མཉམ་པའི། །ཐིག་ལེའི་ནང་ནས་ལྷ་སྐུ་མཇལ། །བར་དོར་ཞི་ཁྲོའི་ལྷ་འཆར་ཚེ། །ངོས་ཟིན་དག་པའི་ཞིང་དུ་སྐྱེ། །
ད་ལྟ་ཞི་ཁྲོའི་ལྷ་ཡོངས་རྫོགས། །ཤར་ནས་བར་དོ་བགྲོད་མི་དགོས། །ཕྱི་དབུགས་ཆད་པའི་དེ་མ་ཐག །ནམ་མཁའི་དཀྱིལ་ནས་འོད་ཀྱི་ལམ། །མིག་གི་དཀྱིལ་དུ་ཟུག་ནས་འོང་། །དེ་ཡི་རྒྱུད་ནས་རྣམ་ཤེས་འཕོ། །རྡོ་རྗེ་སེམས་དཔའི་ཐུགས་ཀར་ཐིམ། །རྫོགས་ཆེན་ཉེ་ལམ་ངོ་མཚར་ཆེ། །དེ་ལས་ཟབ་དང་སླ་བའི་ཆོས། །འཇིག་རྟེན་གང་དུའང་མེད་པར་གསུངས། །ཨོ་རྒྱན་པད་མའི་ཟབ་ཁྱད་ཡིན། །རྒྱུན་དུ་དགེ་སྦྱོར་གང་བྱེད་ཀྱང་། །སེམས་ཅན་ཀུན་གྱི་དོན་གྱི་ཕྱིར། །འདི་ནས་ཚེ་འཕོས་གྱུར་མ་ཐག །བདེ་བ་ཅན་གྱི་ཞིང་ཁམས་སུ། །སྐྱེ་བའི་བསྔོ་བ་སྨོན་ལམ་མཛོད། །སྐྱེའམ་མི་སྐྱེའི་ཐེ་ཚོམ་སྤོངས། །སྐྱེ་བར་ཐེ་ཚོམ་མི་དགོས་དང་། །འོད་དཔག་མེད་པའི་སྨོན་ལམ་སྟོབས། །ཡིན་པས་བློ་གཏད་དེ་ལ་མཛོད། །དེ་ལྟར་གེགས་སེལ་བོགས་འདོན་རྣམས། །འཕྲལ་དུ་ཡིད་ལ་གང་ཤར་ཙམ། །ཆོ་འཕྲུལ་ཟླ་བའི་གནམ་སྟོང་གི །ཉི་ཤར་ནས་བཟུང་དགོང་ཆེན་བར། །རྫོགས་པར་བྲིས་པའི་དགེ་བ་འདིས། །གནས་པོའི་ཉམས་རྟོགས་འཕེལ་བ་དང་། །འདི་ཉིད་སུ་ཡིས་མཐོང་ཐོས་རྣམས། །བྱང་ཆུབ་
བསྒྲུབ་ལ་གེགས་མེད་ཅིང་། །ཉམས་རྟོགས་དབྱར་གྱི་ཆུ་བོ་བཞིན། །རབ་ཏུ་འཕེལ་ཞིང་རྒྱས་ནས་ཀྱང་། །ཚེ་གཅིག་ལུས་གཅིག་འདི་ཉིད་ལ། །ཕྱག་རྒྱ་ཆེན་པོ་འགྲུབ་པར་ཤོག །དེ་སྐད་རཱ་ག་ཨ་སྱས་སྨྲས། །མངྒ་ལཾ།། ༈ ན་མོ་མ་ཧཱ་ཀཱ་ལ་ཡེ། ཕྱོགས་བཅུའི་རྒྱལ་བ་སྲས་བཅས་ཀྱིས། །ཕྲིན་ལས་དྲག་པོའི་སྐུར་བཞེངས་ནས། །གདུལ་དཀའ་འགྲོ་བ་འདུལ་མཛད་པ། །ཡེ་ཤེས་མགོན་པོ་བེར་ནག་ཅན། །ལེགས་ལྡན་མ་ནིང་ཕྱག་བཞི་པ། །སེང་གེའི་གདོང་ཅན་ལ་སོགས་པའི། །ཕོ་རྒྱུད་མགོན་པོ་ཐམས་ཅད་དང་། །མོ་རྒྱུད་ལྷ་མོ་ཐམས་ཅད་ལ། །གསོལ་བ་འདེབས་སོ་ཐུགས་རྗེས་གཟིགས། །དིང་སང་སྙིགས་མ་ལྔ་བརྒྱའི་དུས། །སངས་རྒྱས་བསྟན་པ་དར་བ་དང་། །བསྟན་འཛིན་དབུ་འཕང་མཐོ་བ་དང་། །བདག་དང་སློབ་མ་བརྒྱུད་པར་བཅས། །བར་ཆད་བདུད་ཀྱི་གཡུལ་ལས་རྒྱལ། །བསླབ་གསུམ་རྒྱན་གྱིས་རབ་མཛེས་ཤིང་། །བསྐྱེད་རྫོགས་གཉིས་ལ་བརྟན་ཐོབ་ནས། །ཚེ་གཅིག་སངས་རྒྱས་འགྲུབ་པར་མཛོད། །ཁྱད་པར་ལུང་བསྟན་འདི་ཉིད་ཀྱིས། །བསྟན་པ་དང་ནི་འགྲོ་བའི་དོན། །
རླབས་ཆེན་འགྲུབ་པའི་ཕྲིན་ལས་མཛོད། །ཁྱེད་རྣམས་ཐུགས་དམ་ཞལ་བཞེས་དང་། །བདག་གི་འདོད་དོན་གཅིག་པའི་ཕྱིར། །རིགས་མི་མཐུན་ཀྱང་དམ་།ཚིག་གཅིག །དེ་ཕྱིར་མ་གཡེལ་ཕྲིན་ལས་མཛོད། །ཅེས་པ་མགོན་པོ་སྤྱི་བསྡུས་ཀྱི་མདོས་ཆེན། གཏེར་སྟོན་གཉིས་ལ་དགོངས་པ་ཞུས་ནས་བཅས་དུས་ཉམས་རྨི་ལམ་གྱི་མཚམས་སུ། སྔགས་བཙུན་ཐོར་ཅོག་ཅན་གཟི་བརྗིད་ཅན་ཅིག་བྱུང་བ་མདོས་ལ་ལྟ་ཞིང་འདུག །བར་ཆད་ཞི་ཞིང་ཅི་བསམ་འགྲུབ་པའི་མཆོག་ཏུ་འགྱུར། །ཟེར་བའི་སྒྲ་ཞིག་གྲག །ལྷ་གང་ཡིན་མི་འབྱེད་པ་ཕྱག་གཡོན་བཻཌཱུརྱ་ཧྲིལ་པོ་བསྣམས་པ་ཞིག་མཇལ། འདི་ཅི་ཡིན་བསམས་པས། ཕྱག་གཡོན་མཉམ་བཞག་གི་སྟེང་ན་བཻཌཱུརྱ་འཛིན་པས་ཅི་བསམ་འགྲུབ། ཕྱག་གཡས་དོན་ཡོད་གྲུབ་པའི་ཕྱག་རྒྱ་མཛད་པས་དོན་འགྲུབ་བོ། །ཞེས་པའི་སྒྲ་ཞིག་གྲག་པ་ཐོས་པ་ལ་བརྟེན་ནས་བྲིས་པའོ།། །༈ །།ན་མོ་ལོ་ཀེ་ཤྭ་ར་ཡེ། འགྲོ་བ་འདུལ་མཛད་ཐུགས་རྗེ་ཅན། །སྤྱན་རས་གཟིགས་ལ་གསོལ་བ་འདེབས། །བདག་གིས་ཐོབ་དཀའི་མི་ལུས་ཐོབ། །མཇལ་དཀའི་མཁས་གྲུབ་མང་དུ་བསྟེན། །ཐོབ་དཀའི་དབང་ལུང་རྒྱ་མཚོ་ཐོབ། །རྟོགས་དཀའི་རང་སེམས་ཆོས་སྐུར་རྟོགས། །ད་ནི་ལོ་ནི་འགའ་ཟུང་ཙམ། །དམ་པའི་ཆོས་སྦྱིན་
བྱེད་ན་བསམ། །མཆོག་དམན་བར་མའི་འགྲོ་བ་ལ། །བསྔོ་སྨོན་འབྲེལ་པ་འཇོག་ན་བསམ། །བདག་གི་ལྷག་བསམ་རྣམ་དག་ལ། །བར་ཆད་མེད་ཅིང་དོན་འགྲུབ་པར། །ཐུགས་རྗེ་ཆེན་པོས་བྱིན་གྱིས་རློབས། །ཨོ་རྒྱན་རྗེ་ཡིས་བར་ཆད་སོལ། །བཀའ་སྲུང་ཀུན་གྱིས་ཕྲིན་ལས་སྒྲུབས། །ལྷ་སྲིན་ཀུན་གྱིས་སྡོང་གྲོགས་མཛོད། །བདག་ལ་རང་འདོད་ཁོང་སྐྲུན་མེད། །དཀའ་ལས་ངལ་དུབ་ཁྱད་བསད་ནས། །བསྟན་དང་འགྲོ་བའི་དོན་ཁོ་ན། །ཡིན་མིན་ཡེ་ཤེས་སྤྱན་གྱིས་གཟིགས། །གལ་ཏེ་བསམ་སྦྱོར་རྣམ་དག་བློན་།ཁྱེད་བཞེད་འགྲོ་དོན་འདི་ལགས་པས། །བསམ་པ་འགྲུབ་པར་ཐུགས་རྗེས་ཟུངས། །ཐུགས་རྗེས་ཐུགས་དམ་དུས་ལ་བབ། །ཅེས་མགྲོན་པོ་ཞིག་ལ་འགྲོ་བའི་ཉམས་དུས། །ཉམས་རྨི་ལམ་མཚམས་སུ། སྤྱན་རས་གཟིགས་བཞུགས་པ་བསྒྲུབ་པ་བས། བཞེངས་པ་བསྒྲུབ་པ་དགའ། བཞེངས་པ་བསྒྲུབ་པ་བས། མཆོངས་པ་བསྒྲུབ་པ་དགའ། ཞེས་པའི་སྒྲ་ཞིག་གྲགས་པས། དེ་བསྒྲུབ་པ་བས་རེ་ཞིག་མགྲོན་པོ་དགའ་ཞེས། བདུད་འདུལ་རྡོ་རྗེས་གསུངས་པ་དེ་བདེན་པའི་བརྡར་གོ་ནས་སྨྲས་སོ།། །།ན་མོ་རྒྱ་གྷི་ཝ་ཡེ། དབང་ཆེན་ཁྲོ་བོ་རྟ་མགྲིན་ལ། །གསོལ་བ་
འདེབས་སོ་བར་ཆད་སོལ། །བླ་མ་ཀརྨ་དོན་གྲུབ་ལ། །བསྒོམ་སྐྱོན་ཡིད་ཡུལ་མ་བདེ་ན། །གེགས་སེལ་གདམས་པ་འདི་ལྟར་བསྒོམ། །རང་ཉིད་ཐ་མལ་ལུས་པོ་ཡི། །རྐང་པ་གཉིས་ཀྱི་བོལ་གོང་ནང་། །ཡི་གེ་རཾ་ཡིག་དམར་པོ་རེ། །དེ་ལས་མེ་འབར་རང་གི་ལུས། །ནད་གདོན་ཤ་ཁྲག་ལུས་པོ་བཅས། །ཐམས་ཅད་ཡེ་ཤེས་མེ་ཡིས་ཚིག །རང་ལུས་མེ་ཕུང་ཆེན་པོར་གྱུར། །མེ་ལྕེ་འབར་བའི་སྔགས་སྒྲ་ནི། །རྟ་མགྲིན་སྔགས་དེའི་སྒྲ་སྐད་ནི། །འུར་འུར་འབྲུག་བཞིན་གྲག་པར་བསྒོམ། །རྟ་མགྲིན་སྔགས་ལ་སྟོང་ཕྲག་ཙམ། །ལུས་སེམས་མ་བདེ་བར་དུ་བཟླས། །དེ་ནི་དགོང་ཀའམ་ནུབ་མོ་བྱ། །ནངས་སྔ་ལ་སོགས་སྔ་དྲོ་ལ། །རང་གི་སྙིང་ནི་སྟོང་པའི་དཀྱིལ། །གཟབ་ཀྱི་ཡི་གེ་ཐཾ་དཀར་པོ། །དངུལ་གྱིས་བྲིས་པ་ལྟ་བུ་བསྒོམ། །དེ་ལས་བདུད་རྩི་དཀར་པོའི་རྒྱུན། །འོ་མ་ལྟ་བུར་བབ་པ་ཡིས། །སྙིང་ནི་ལྡེམས་སེ་གང་བར་སྒོམས། །དེ་ཚེ་སྔགས་ནི་ཡིག་དྲུག་བཟླས། །སྐབས་སུ་ལུས་སེམས་བག་ཀློད་ལ། །སེམས་ནི་བདེ་བའི་ངོ་བོར་ལྟ། །གེགས་སེལ་རཱ་ག་ཨ་སྱས་བྲིས་པ་ཨི་ཐི་རྒྱ་རྒྱའོ།།
ན་མོ་མ་ཧཱ་མུ་དྲ་ཡེ། དྲག་ལུས་རྟོགས་འབུལ་བྱས་པའི་ལེན། །དངོས་སུ་སྨྲས་པ་མ་གསལ་ན། །ཡི་གེ་བྲིས་པ་འདི་ལ་ལྟོས། །རང་སེམས་ཡེ་ནས་ཆོས་ཀྱི་སྐུ། །ཕྱག་རྒྱ་ཆེན་པོ་ཡེ་ནས་གནས། །དེ་ལ་བཅོས་པས་ཡག་རྒྱུ་མེད། །ཡག་འདོད་བཅོས་ན་ཞན་པའི་རྒྱུ། །ངན་དོགས་གཟབ་ན་ངན་པའི་རྒྱུ། །མ་བཅོས་བཞག་པས་ཕྱག་རྒྱ་ཆེ། །རང་ངོ་ཤེས་པ་དེ་གས་ཆོག །མ་ཡེངས་དྲན་རྫི་ཉམས་ལེན་རང་། །ཡང་ཡང་གསལ་འདེབས་མན་ངག་ཟབ། །ལུས་སེམས་བདེ་ཞིང་ཀྱི་ལེ་གནས། །བཟང་པོ་ཡིན་སྙམ་ཞེ་བ་དགའ། །གསལ་དང་སེང་ངེ་རྗེན་ནེ་བ། །ལྟ་མི་ལྟ་རྒྱུ་ཡོད་པ་འདྲ། །ཐམས་ཅད་སྟོང་པ་ཕྱམ་མེ་བ། །སྣོད་བཅུད་འཁོར་འདས་སྟོང་པ་འདྲ། །ཡག་ཡག་འདྲ་བ་ཐམས་ཅད་ཀུན། །འཇའ་དང་འདྲ་སྟེ་ཡག་རྒྱུ་ཡིན། །ཚབ་བེ་ཚུབ་བེ་རླུང་འཚུབ་འདྲ། །རིག་པ་འཕྲོ་རྒོད་གར་ཡང་རྒྱུག །རྩུབ་ཉམས་ཡིན་ཏེ་ངན་རྒྱུ་མེད། །བལྟས་ཀྱང་མི་གསལ་མགོ་བོ་འཐིབ། །ཅི་འདྲ་དྲན་པའི་ངོས་བཟུང་མེད། །རླངས་པ་བཞིན་དུ་འགྱུ་བ་ནི། །ཕྲའུ་འོང་བ་རིག་པའི་སྙིགས། །དེ་དག་ལ་སོགས་ཅི་ཡང་ཤར། །གང་ཤར་ངོ་
བོ་བལྟས་པས་ཆོག །མ་ཡེངས་དྲན་རྫི་གཅིག་པོས་ཆོག །ཧ་ཅང་བསྒྲིམ་ཡང་མི་དགོས་ཏེ། །ཡང་ཡང་དྲན་རྫི་གསལ་འདེབས་བྱ། །གནས་དང་འཕྲོ་ལ་ཁྱད་པར་མེད། །མ་ཡེངས་ངོ་བོ་མཐོང་བས་ཆོག །རང་ཞི་རང་གྲོལ་ད་མི་དགོས། །བལྟས་པས་ཧྲིག་གེ་མཐོང་མི་དགོས། །མཐོང་དང་མ་མཐོང་ཁྱད་པར་མེད། །མ་ཡེངས་དྲན་རྫི་དེ་གས་ཆོག །མཐོང་དང་མ་མཐོང་གདམ་ག་དང་། །གནས་དང་མི་གནས་གདམ་ག་དང་། །གསལ་དང་མི་གསལ་གདམ་ག་སོགས། །བཟང་ངན་གདམ་ག་དགའ་སྡུག་དེ། །མ་བཅོས་མ་ཡིན་བཅོས་པ་ཡིན། །བཟང་ངན་གང་ཤར་ཁྱད་མེད་པར། །མ་ཡེངས་དྲན་རྫི་ཉམས་ལེན་ཡིན། །དོན་ལ་ཡེངས་དང་མ་ཡེངས་མེད། །འོན་ཀྱང་སྒོམ་མེད་མ་རྟོགས་པར། །མ་ཡེངས་དྲན་པའི་གསལ་འདེབས་འདི། །ཡང་ཡང་བྱེད་པ་ཉམས་ལེན་ཡིན། །རང་སེམས་ཕྱག་རྒྱ་ཆེན་པོ་ཉིད། །ཡིན་པས་བཟོ་བཅོས་མི་དགོས་པར། །རང་ག་གཞག་པས་བློ་ཚིམ་པ། །རྟོགས་པར་ལྡན་ཞེས་མིང་དུ་བཏགས། །དེ་ཡིས་བློ་ཁ་མ་ཚིམ་པར། །ཐེ་ཚོམ་སྐྱེ་འམ་བཟང་པོ་འདོད། །རྟོགས་པ་ཉམས་
སུ་ཤོར་བ་སྟེ། །གསེར་ལས་ར་གན་གདམ་པ་འདྲ། །དེ་ཕྱིར་ད་ལྟ་ལུས་སེམས་ཀློད། །གང་ཤར་སྤང་བླང་མ་བྱེད་པར། །མ་ཡེངས་དྲན་པས་གསལ་འདེབས་མཛོད། ལྟརང་གི་སེམས་ཉིད་འདི་ལས་གཞན། །ཉམས་སུ་ལེན་རྒྱུ་ཡོད་སྐད་ནི། །མདོ་རྒྱུད་མན་ངག་བླ་མའི་གསུངས། །གང་ནས་ཀྱང་ནི་མ་གསུངས་པས། །ད་ནི་ཐེ་ཚོམ་ཡིད་གཉིས་སྤོངས། །ད་རུང་ཡིད་ཆེས་མ་སྐྱེས་ན། །མི་ལ་མཁའ་སྤྱོད་པ་སོགས་ཀྱི། །གསུང་མགུར་རྣམས་ལ་ལྟ་རྟོགས་གྱིས། །རང་ཕོར་ངོས་ལེན་ཟེར་བ་ཡིས། །ཐམས་ཅད་གོ་བར་མི་འགྱུར་ཏེ། །རང་གི་ཉམས་དང་བསྟུན་པའི་གསུངས། །ཚིག་རེ་འབྱུང་བ་ཙིར་གྱིས་ཟུངས། །འོན་ཀྱང་སང་ཕོད་ཙམ་གྱི་བར། །ལུས་སེམས་ཀློད་ནས་ལྟ་བར་མཛོད། །མ་ཡེངས་དྲན་རྫི་གཅིག་པོས་ཆོག །ཧྲིག་ཧྲིག་གསལ་བའི་འདོད་པ་སྐྱུར། །གནས་པ་ཆེ་བར་དགའ་མ་བྱེད། །འགྱུ་བ་མང་བར་སྐྱོན་མ་ལྟ། །མི་གསལ་འདི་མཐོང་མེད་ཀྱང་བཟོད། །མ་ཡེངས་དྲན་རྫི་ཁོ་ན་ལ། །ཡང་ཡང་གསལ་འདེབས་བྱ་བ་གཅེས། །བར་སྐབས་བརྗེད་ཅིང་ཡེངས་ན་ཡང་། །སྐྱོན་མེད་དེ་ལ་འགྱོད་པ་སྤང་། །ནམ་ཡེངས་
ནམ་བརྗེད་རྗེས་མ་མཐུད། །ནམ་དྲན་ལྟོས་ལ་ཀློད་དེ་ཞོག །དེ་སྐད་དབྱི་འདམ་ཁ་རུ་སྨྲས། །བྷ་ཝནྟུ།། ༈ །།ན་མོ་ཨརྱ་པ་ལོ་ཡེ། སྤྱན་རས་གཟིགས་ལ་སྐྱབས་སུ་མཆི། །སྤྱན་རས་གཟིགས་ལ་གསོལ་བ་འདེབས། །སྤྱན་རས་གཟིགས་ཀྱིས་བྱིན་གྱིས་རློབས། །སྤྱན་རས་གཟིགས་ཀྱི་རྣལ་འབྱོར་བདག །བྱང་ཆུབ་མཆོག་ཏུ་སེམས་བསྐྱེད་ནས། །སྤྱན་རས་གཟིགས་ཀྱི་ཕྲིན་ལས་བསྒྲུབ། །འགྲོ་ལ་དམ་ཆོས་སྟོན་དང་གཅིག །དབང་ལུང་གདམས་པ་སྤེལ་དང་གཉིས། །སྤྱན་རས་སྨྲོགཟིགས་ཀྱི་སྤྲུལ་པ་རུ། །འཇིག་རྟེན་ཀུན་ལ་གྲགས་པ་ཡི། །འཕགས་པ་རྒྱལ་བ་རྒྱ་མཚོ་ཡི། །བཀའ་ལུང་ཆགས་ཕྱི་བསྒྲུབ་དང་གསུམ། །དཀོན་མཆོག་དབུ་འཕང་བསྟོད་དང་བཞི། །ཕྱི་ནང་འཁྲུག་རྩོད་ཞི་དང་ལྔ། །ཡུལ་ཕྱོགས་བདེ་བར་གནས་དང་དྲུག །སྦྱིན་བདག་བསོད་ནམས་ཚོགས་རྫོགས་ཤིང་། །བསྔོ་སྨོན་འབྲེལ་པ་འཇོག་དང་བདུན། །རོ་སྙོམས་ལྡོམ་བུ་བྱེད་དང་བརྒྱད། །རྡོ་རྗེ་སྤུན་འགའ་མཇལ་དང་དགུ། །ཚེ་མཇུག་མཚམས་སྒྲུབ་ཐོན་ཐབས་བཅུ། །གནམ་ཆོས་དབང་ལུང་སྤེལ་དང་བཅུ་
གཅིག །བདུད་འདུལ་ས་གཏེར་སྤེལ་དང་བཅུ་གཉིས། །བཀའ་བརྒྱུད་དབང་ལུང་སྤེལ་དང་བཅུ་གསུམ། །བྱ་བ་བཅུ་གསུམ་བསྒྲུབ་པའི་ཕྱིར། །ཁོ་བོ་སྨར་ཁམས་སྒང་དུ་འགྲོ། །འགྲོ་དྲུག་སེམས་ཅན་མ་ལུས་ལ། །རྫོགས་བྱང་ས་བོན་བཏབ་ནས་ཀྱང་། །བྱང་ཆུབ་མྱུ་གུ་བསྐྲུན་བྱས་ཏེ། །བདེ་ཆེན་དག་པའི་ཞིང་སྐྱེས་ན། །ས་བཅུ་པོ་ལ་རབ་གནས་པ། །སྤྱན་རས་གཟིགས་ཀྱི་ཐུགས་དམ་ལགས། །བདག་གི་སེམས་བསྐྱེད་དེ་ལགས་པས། །མཆོག་དམན་ཆེ་དང་ཐུགས་དམ་གཅིག །དེ་ཕྱིར་བདག་ལ་བྱིན་གྱིས་རློབས། །ཐུགས་རྗེས་འཇིག་རྟེན་དབང་དུ་སྡུས། །སྙིགས་དུས་ལྷ་སྲིན་འདུལ་བ་དང་། །ཨ་ཏིའི་བསྟན་པ་འཕེལ་བ་ནི། །ཨོ་རྒྱན་ཆེན་པོའི་ཐུགས་དམ་ལགས། །བདག་གི་སེམས་བསྐྱེད་དེ་ལགས་པས། །ནུས་མཐུའི་རྩལ་ཤུགས་བདག་ལ་སྩོལ། །ལྷ་འདྲེ་མི་གསུམ་ཟིལ་གྱིས་གནོན། །གསང་སྔགས་ཚུལ་བཞིན་སྤེལ་དང་བསྒྲུབ། །དེ་ལ་སྲུང་སྐྱོབ་ཕྲིན་ལས་སྒྲུབས། །དམ་ཅན་ཀུན་གྱི་དམ་ཚིག་ལགས། །བདག་གི་ཐུགས་དམ་དེ་ལགས་པས། །ཆོས་སྐྱོང་ཀུན་གྱིས་བདག་དོན་སྒྲུབས། །ཁྱད་པར་འཇམ་དཔལ་སྤྲུལ་
པ་ཡི། །ཀླུ་རྒྱལ་མི་མགོན་དཀར་པོ་ཁྱོད། །ཨོ་རྒྱན་སྤྱན་སྔར་ཁས་བླངས་པའི། །དམ་ཚིག་དེ་ལས་མ་འདའ་བར། །ཨོ་རྒྱན་རྗེས་འཇུག་རྣལ་འབྱོར་ལ། །ལོངས་སྤྱོད་དངོས་གྲུབ་ཆར་ལྟར་ཕོབ། །གཞན་ཡང་སྨར་ཁམས་གཞི་བདག་ཚོགས། །ཨོ་རྒྱན་དམ་ཚིག་དྲན་མཛོད་ལ། །སྔགས་འཆང་བདག་གི་ཕྲིན་ལས་སྒྲུབས། །ཞེས་སྒར་བཏེག་ཉིན་སྨྲས་སོ།། ༈ །།ཉམས་མགུར་གསོལ་འདེབས་སོགས་དུམ་གཅིག་བཞུགས་སོ། ༈ །ན་མོ་པྲ་ཝ་ཀ་ར་ཨ་ཡུཛྙཱ་ན་སིདྡྷི་ཧཱུྃ། མངོན་ཤེས་དྲུག་ལྡན་ཆོས་སྐུ་སྣང་མཐའ་ཡས། །ཡེ་ཤེས་སྤྱན་གྱིས་དུས་འདིར་གཟིགས་སུ་གསོལ། །ཁྱེད་སྔོན་འཇིག་རྟེན་དབང་ཕྱུག་རྒྱལ་པོ་དང་། །བདེ་གཤེགས་རིན་ཆེན་སྙིང་པོའི་སྤྱན་སྔ་རུ། །ཐུགས་བསྐྱེད་སྨོན་ལམ་དྲན་མཛད་དུས་འདིར་དགོངས། །ནམ་ཞིག་ཁྱེད་ཀྱིས་བྱང་ཆུབ་ཐོབ་པའི་ཚེ། །ཁྱེད་མཚན་འཛིན་པས་དུས་མིན་འཆི་བ་ཟློག །ཚེ་ལོ་སྟོང་ཕྲག་ཐུབ་པར་འགྱུར་བ་ཡི། །སྨོན་ལམ་ཐུགས་བསྐྱེད་དེང་འདིར་དུས་ལ་བབ། །བདག་དང་མི་འགྱུར་རྡོ་རྗེ་འཁོར་བཅས་ཀྱིས། །ཁྱེད་མཚན་འཛིན་ཞིང་ཁྱེད་ལ་གསོལ་འདེབས་
ན། །དུས་མིན་ཚེ་ཡི་བར་ཆད་ཞི་བ་དང་། །ཚེ་དང་བསོད་ནམས་ཡེ་ཤེས་འཕེལ་མཛད་གསོལ། །ལོངས་སྐུ་ཐུགས་རྗེ་ཆེན་པོ་སྤྱན་རས་གཟིགས། །ཁྱེད་མཚན་བརྗོད་ཅིང་ཁྱེད་ལ་བོས་པ་ན། །དགྲ་དང་རྒྱལ་པོ་ཆོམ་རྐུན་མེ་ཆུ་སོགས། །འཇིགས་པ་ཐམས་ཅད་སྐྱོབ་པར་འགྱུར་རོ་ཞེས། །པདྨ་དཀར་པོའི་མདོ་ལས་གསུངས་པས་ན། །བདག་དང་མི་འགྱུར་རྡོ་རྗེ་འཁོར་བཅས་རྣམས། །ཁྱེད་མཆོད་ཁྱེད་བསྟོད་ཁྱེད་ལ་གསོལ་འདེབས་ན། །འཇིགས་པ་ཀུན་ལས་སྐྱོབ་པར་མཛད་དུ་གསོལ། །སྤྲུལ་སྐུ་པདྨ་འབྱུང་གནས་དགོངས་སུ་གསོལ། །སྙིགས་མ་ལྔ་དུས་ཁྱེད་ལ་གསོལ་བཏབ་ན། །ཐུགས་རྗེ་བྱིན་རླབས་གློག་བས་མྱུར་བ་དང་། །འཇིགས་པ་ཀུན་སྐྱོབ་བསམ་པ་འགྲུབ་གསུངས་ན། །བདག་དང་མི་འགྱུར་རྡོ་རྗེ་འཁོར་དང་བཅས། །ཁྱེད་ལ་རྩེ་གཅིག་བློ་གཏད་ལིང་སྐྱུར་ན། །ཐུགས་རྗེས་ད་གཟིགས་བྱིན་རླབས་དངོས་གྲུབ་སྩོལ། །མ་ནིང་ལ་སོགས་དམ་ཅན་རྒྱ་མཚོའི་ཚོགས། །སྔོན་ཚེ་པདྨ་འབྱུང་གནས་སྤྱན་སྔ་རུ། །མ་འོངས་རྗེས་འཇུག་སྐྱོང་བར་ཁས་བླངས་ཤིང་། །དམ་བཅས་དམ་ཚིག་ཆེན་པོའི་དུས་ལ་བབ། །པད་འབྱུང་རྗེས་
འཇུག་མི་འགྱུར་རྡོ་རྗེ་དང་། །བདག་ཅག་འཁོར་བཅས་སྲུང་སྐྱོབ་མེལ་ཚེ་མཛོད། །དུས་ངན་དུས་འདིར་མི་གཟིགས་མི་སྐྱོབ་ན། །ཁྱེད་རྣམས་ཐུགས་དམ་དམ་བཅས་ཅི་ཞིག་བྱ། །ད་ནི་དུས་ལ་བབ་བོ་ས་མ་ཡ། །ཞེས་པ་ཆུ་ཡོས་ལོ་སྤྲེའུ་ཟླའི་ཡར་ཚེས་བཅུའི་སྔ་དྲོ་གནས་ཆེན་སྤོམ་ནེ་བྲག་གི་མདུན་དུ་ཚེས་བཅུ་བྱས་དུས་བྲིས་ཏེ། ཚེ་དཔག་མེད་ཀྱི་གནས་ཡིག་གསུངས་པ་ཐུགས་བདེན་པར་འདུག་སྟེ། དེ་ནུབ་གནས་ལ་མཎྜལ་དང་དམིགས་པ་གཏད་པས་བདག་རང་གི་ཚེ་ཚད་རིང་པོར་བསྲིང་བའི་རྨི་ལམ་ཅིག་ཀྱང་བྱུང་ངོ་།། ༈ །།ན་མོ་མ་ཧཱ་ཀ་རུ་ཎི་ཀ་ཡེ། འགྲོ་དྲུག་འདྲེན་མཛད་སྤྱན་རས་གཟིགས། །དཔལ་ལྡན་བླ་མར་ཐ་མི་དད། །གསོལ་བ་འདེབས་སོ་ཐུགས་རྗེས་གཟིགས། །མི་རྟག་འཆི་བའི་ཆོས་ཉིད་དེ། །རང་གིས་ཐོས་ཤིང་གཞན་ལ་བཤད། །འོན་ཀྱང་ངེས་པ་མ་རྙེད་ཟིན། །ད་ནི་དངོས་སུ་ངོ་འཕྲོད་བྱུང་། །ད་ལམ་ཞག་སྐོར་འདི་ལ་ཡང་། །མི་གཞོན་གསུམ་ཙམ་གློ་བུར་གུམ། །ཚེ་ལ་ངེས་པ་མེད་པ་དེ། །ངེས་པ་སྙིང་ནས་སྐྱེས་ཏེ་བྱུང་། །དགེ་ཚུལ་པདྨ་ཐུགས་རྗེ་དེ། །བྱིན་རླབས་དབང་བསྐུར་སྨན་དཔྱད་ཀྱིས། །མ་ཕན་ཞག་གཅིག་ནད་
ཀྱིས་གུམ། །འཆི་བདག་གཤིན་རྗེའི་ཕོ་ཉ་དེ། །བཟློག་ཐབས་མེད་པའི་ངེས་ཤེས་སྐྱེས། །དགེ་ཚུལ་ཁོ་ཡི་ཁ་ཆེམས་ལ། །སྡོམ་པའི་མཐའ་ཡང་ཐུབ་པར་དཀའ། །ང་ནི་ཤི་ཡང་མི་སྡུག་སྐད། །དམ་ཆོས་འདུལ་བའི་གཞུང་ལུགས་ལས། །ཚུལ་ཁྲིམས་དག་པའི་ཕན་ཡོན་བཅུ། །འཆི་ཁ་འགྱོད་པ་མེད་པ་དང་། །ཤི་ནས་བདེ་འགྲོ་མཐོ་རིས་སུ། །སྐྱེ་བར་གསུངས་པ་དངོས་སུ་གྱུར། །མངོན་པར་ཤེས་པ་མི་ལྡན་ཡང་། །དུ་བ་ལས་ནི་མེ་ཤེས་དང་། །ཆུ་སྐྱར་ལས་ནི་ཆུ་ཤེས་ལྟར། །རྗེས་དཔག་ཚད་མས་ཤེས་པ་ཡིན། །ང་ཡི་གྲྭ་པ་བཙུན་པ་རྣམས། །འདི་ལྟར་ད་ལྟ་ཤི་ན་ཡང་། །སྡོམ་པ་དམ་ཚིག་སྐྱོན་མེད་པར། །འགྱོད་པ་མེད་པ་གལ་ཆེའོ། །དམ་ཆོས་འདུལ་བའི་སྡེ་སྣོད་ལས། །ཚུལ་ཁྲིམས་འཆལ་བའི་ཉེས་དམིགས་བཅུ། །འཆི་ཁ་འགྱོད་པར་འགྱུར་བ་དང་། །ངན་སོང་ལྟུང་སྙམ་སྐྲག་པ་དང་། །ཤི་བའི་འོག་ཏུ་ངན་སོང་དང་། །ངན་འགྲོ་ལོག་པར་ལྟུང་གསུངས་པས། །འཆི་ཁ་འགྱོད་པ་མེད་གལ་ཆེ། །ནམ་འཆི་ངེས་མེད་ཐུགས་རྗེ་བཞིན། །བཟློག་ཐབས་མེད་པ་ཐུགས་རྗེ་བཞིན། །དེ་འདྲའི་དུས་ཤིག་བྱུང་བ་ན། །འགྱོད་
པ་མེད་པ་ཐུགས་རྗེ་བཞིན། །རྩ་བཞི་ཆང་ལྔ་གཙང་ཁྲིག་གེ །ཤི་ནས་བདེ་འགྲོ་མཐོ་རིས་སུ། །འགྲོ་བར་ངེས་པ་ཐུབ་པའི་བཀའ། །གཞོན་ནུར་ཤི་བ་སྙིང་རྗེ་ཡང་། །བརྒྱད་ཅུ་ལོན་དང་གཞོན་ནུ་གཉིས། །འཆི་བའི་སྡུག་བསྔལ་འདྲ་བར་གསུངས། །དེ་ཕྱིར་སེམས་ནད་དགོས་རྒྱུ་མེད། །འོན་ཀྱང་བླ་མ་དོན་གྲུབ་ཀྱིས། །ཐུགས་གནད་དགེ་རྩ་གང་འགྲུབ་ནི། །སྤུན་ཡ་ཤི་བ་ལྟར་བྱས་པ། །གཞུངས་བཟང་ཡ་རབ་སྤྱོད་པར་སྣང་། །ད་ནི་སེམས་ནད་མི་བྱེད་པར། །བསྔོ་བ་སྨོན་ལམ་ལམ་སྟོན་དང་། །ནམ་དྲན་རང་སེམས་ཚེ་འདས་གཉིས། །དབྱེར་མེད་བསྲེ་ཞིང་ངོ་བོ་ལྟ། །ཁོ་ཡི་སེམས་དང་ང་ཡི་སེམས། །ངོ་བོ་སྟོང་པ་ཁྱད་པར་མེད། །རང་བཞིན་གསལ་བའི་ངང་དུ་གཅིག་རྣམ་པ་འགག་མེད་ངང་དུ་འདྲ། །གསོན་པོ་དང་ནི་གཤིན་པོ་ཁོང་། །རྣམ་པ་སོ་སོར་སྣང་ན་ཡང་། །ངོ་བོ་དབྱེར་མེད་རོ་གཅིག་འདྲེས། །རྒྱུ་འབྲས་རྟེན་འབྲེལ་བསླུ་མེད་པས། །བསྔོ་བ་སྨོན་ལམ་རྟེན་འབྲེལ་གྱིས། །རྟ་ཁ་སྲབ་ཀྱིས་བསྒྱུར་བ་བཞིན། །བདེ་ཆེན་དག་པའི་ཞིང་ཁམས་སུ། །མེ་ཏོག་པདྨའི་ཟེའུ་འབྲུ་ལ། །མཚན་དང་
དཔེ་བྱད་ལྡན་པའི་ལུས། །ཐོབ་ནས་བཅོམ་ལྡན་འོད་དཔག་མེད། །ཞལ་ལྟ་ཆོས་ཉན་བདེ་སྐྱིད་ལྡན། །བཀྲེས་སྐོམ་ནད་དང་སྡུག་བསྔལ་མེད། །ཕྱིར་མི་ལྡོག་པའི་ས་ཐོབ་པ། །འོད་དཔག་མེད་ཀྱི་སྨོན་ལམ་ཡིན། །དགེ་ཚུལ་གཙང་མ་བློ་སེམས་ནི། །ཆོས་ལ་གཏོད་བཞིན་ཤི་བ་ན། །མྱ་ངན་བྱེད་དོན་མི་གདའོ། །བླ་མ་དོན་གྲུབ་ལ་སོགས་པ། ཉེ་དུ་དང་ནི་མཆེད་གྲོགས་ཀུན། །དེ་ལྟར་དགོངས་ལ་མྱ་ངན་སྐྱུར། །ཞེས་པ་ཚེ་འདས་དེ་དྲན་ཅིང་རང་གཞན་ཀུན་སྨྲེ་སྔགས་ཤོར་དུས་བྲིས།། ༈ །།མ་ཧཱ་ཀ་རུ་ཎི་ཀ་ཡེ། །སྐྱབས་གནས་བླ་མར་ཐ་མི་དད། །བདག་གིས་བློ་གཏད་ལིངས་སྐྱུར་བས། །ཐུགས་རྗེ་བྱིན་རླབས་ལོས་འོང་ཡིན། །སློབ་བུ་བརྩོན་འགྲུས་ཞེས་བྱ་བ། །ཐག་རིང་ཡུལ་དུ་འཁྱམ་པ་ལས། །བྱང་ཆུབ་སེམས་དཔའི་སྦྱིན་བདག་རྙེད། །དགེ་འདུན་གཉིས་བརྒྱ་ལྷག་ཙམ་ལ། །ཟླ་བ་ཧྲིལ་པོར་བུམ་སྒྲུབ་ཚུགས། །སྒྲུབ་ཆེན་ཕྱག་ལེན་མང་དུ་སྤེལ། །བར་ཆད་མེད་པར་རྟགས་མཚན་ཐོན། །རིལ་བུ་འཕེལ་ཞིང་འཇའ་ཚོན་འཁྲུགས། །དམ་ཚིག་གཙང་རྟགས་དངོས་སུ་བསྟན། །དགེ་བཤེས་མཁས་རྣམས་ཐུགས་དགྱེས་
ཤིང་། །གཏམ་སྙན་མཚམས་ཀྱི་ལྟས་དང་བཅས། །བྱུང་ནས་བློ་སེམས་སྤྲོ་བར་བྱུང་། །ཐུགས་རྗེ་ཆེན་པོ་སྤྱན་རས་གཟིགས། །སླར་ཡང་ཐུགས་རྗེའི་བྱིན་རླབས་བྱུང་། །ད་ཡང་ཐུགས་རྗེའི་སྤྱན་རྒྱང་བསྲིང་། །དམ་ལྡན་ཀརྨ་བརྩོན་འགྲུས་དང་། །དེ་ལ་འབྲེལ་ཐོགས་འགྲོ་བ་རྣམས། །ཚེ་འདིར་བར་ཆད་རྐྱེན་ཞི་ཞིང་། །བསོད་ནམས་ཆོས་བསོད་འཕེལ་བ་དང་། །ཕྱི་མ་བདེ་ཆེན་ཞིང་བགྲོད་ནས། །སྤྱན་རས་གཟིགས་ཀྱིས་རྗེས་འཛིན་ཤོག །ཕྱིར་ནངས་སྐེ་ཆུ་འགྲམ་དུ་བྲིས།། ༈ །།ན་མོ་མ་ཧཱ་མུ་དྲ་ཡེ། དྲོད་གཤེར་འཛོམ་པ་དབྱར་ཁའི་དུས་དང་གཅིག །བདེ་ཞིང་ཡངས་པའི་བྱང་ཐང་འདི་དང་གཉིས། །རྩྭ་སྔོ་རྩི་ཐོག་ཕུན་སུམ་ཚོགས་དང་གསུམ། །རྟ་ཕྱུགས་རྣམས་ལ་ཕན་པའི་རྒྱན་དུ་གདའ། །དལ་འབྱོར་མི་ལུས་ཐོབ་པའི་དུས་དང་གཅིག །སྡོམ་པ་རིམ་གྱིས་ནོད་པའི་ཐང་དང་གཉིས། །ཐོས་བསམ་བསྒོམ་པའི་རྩྭ་སྔོ་ལེགས་དང་གསུམ། །འདི་ཕྱི་གཉིས་ཀར་ཕན་པའི་རྒྱན་དུ་གདའ། །སློབ་དཔོན་མཁས་པ་གཞོན་དུས་བསྟེན་དང་གཅིག །དབང་ལུང་གདམས་པའི་བྱང་ཐང་ཡངས་དང་གཉིས། །ཉམས་
དང་རྟོགས་པའི་རྩི་ཐོག་ཕྱུག་དང་གསུམ། །རང་གཞན་གཉིས་ཀར་ཕན་པའི་རྒྱན་དུ་གདའ། །ན་སོ་དར་བབ་ལུས་སེམས་བདེ་དུས་གཅིག །ཁྲིད་རིམ་མང་པོའི་བྱང་ཐང་ཡངས་དང་གཉིས། །སྒྲུབ་པ་སྙིང་རུས་རྩི་ཐོག་ཕུན་ཚོགས་གསུམ། །བློ་བདེ་ཁོང་དུ་ཆུད་པའི་རྒྱན་དུ་གདའ། །དབང་བཞི་ཡོངས་རྫོགས་ཐོབ་པའི་དུས་དང་གཅིག །བསྐྱེད་རྫོགས་ཟབ་མོའི་བྱང་ཐང་ཡང་དང་གཉིས། །བསྒྲུབས་པའི་རྟགས་མཚན་རྩྭ་ཁ་ལེགས་དང་གསུམ། །ཕྲིན་ལས་རྣམ་བཞི་འགྲུབ་པའི་རྒྱན་དུ་གདའ། །དབང་ལུང་གདམས་པས་ཕྱུག་དུས་འདི་དང་གཅིག །སེམས་བསྐྱེད་རྒྱ་ཆེན་བྱང་ཐང་ཡངས་དང་གཉིས། །སྐྱ་སེར་ཕལ་ཆེར་དད་འདུན་ཆེ་དང་གསུམ། །བསྟན་དང་འགྲོ་ལ་ཕན་པའི་རྒྱན་དུ་གདའ། །སྡོམ་པ་གསུམ་ལྡན་བླ་མིང་ཐོགས་དུས་གཅིག །བསྔོ་བྱང་འབྲེལ་པའི་བྱང་ཐང་ཡངས་དང་གཉིས། །འཁོར་གསུམ་དག་པའི་དགེ་རྩ་ལེགས་དང་གསུམ། །ཟང་ཟིང་ཆུད་མི་ཟ་བའི་རྒྱན་དུ་གདའ། །ཁྲིད་སྟོན་ཆོས་འཆད་མཁན་དུ་གྱུར་དུས་གཅིག །གནས་ལུགས་རང་ངོ་རྗེན་པར་མཐོང་དང་གཉིས། །སྣང་སེམས་དབྱེར་མེད་རྩྭ་ཁ་ལེགས་དང་གསུམ། །གོ་
རྟོགས་འོང་འདོད་རྣམས་ཀྱི་རྒྱན་དུ་གདའ། །ནམ་འཆི་ཆ་མེད་དུས་ཚོད་འདི་དང་གཅིག །ཤི་ཡང་འགྱོད་མེད་དམ་ཚིག་གཙང་དང་གཉིས། །གར་འགྲོའི་ཞིང་ཁམས་ཀྲིག་ཀྲིག་ཡོད་དང་གསུམ། །ཆོས་པའི་མིང་ཐོགས་རྣམས་ཀྱི་རྒྱན་དུ་གདའ། །རྒྱན་དགུ་ཚང་བའི་དབྱངས་ཆུང་འདི་ཉིད་ནི། །བྱང་ཐང་བདེ་ཞིང་རྩྭ་ཁ་ལེགས་པའི་སར། །སྒར་པ་སླེབ་དུས་ཉམས་ལ་ཤར་ནས་བྲིས། །ཉམས་མཚར་ཡིན་ཀྱང་དོན་ནི་འགའ་མཆིས་སོ།། ༈ །།ན་མོ་གུ་རུ་ཨར་མེ་ཏྲི་ཡེ། དེང་སང་སྙིགས་མ་ལྔ་ཡི་དུས། །མི་རྣམས་ཁ་ལ་གནོད་སྦྱིན་ཞུགས། །བསྟོད་འོས་རྒྱལ་བ་རྣམས་ལ་གཤེ། །སྨད་འོས་བདུད་རིགས་རྣམས་ལ་བསྟོད། །ཁ་ལྕེ་སྡེ་དབྱེན་འཁྲུག་རྩོད་བསླང་། །རྫུན་དང་ཕྲ་མ་རླུང་ལྟར་འཚུབ། །བདེན་པ་མི་འགྲིམ་བརྫུན་པ་འགྲིམ། །འདི་ལྟར་ངེས་པ་མེད་པའི་དུས། །ས་རྣམས་ཐམས་ཅད་བྲག་ཆ་ལྟར། །འཛིན་པ་མེད་ན་བདེ་བ་ཐོབ། །བདག་འདྲ་སྤྲང་པོ་ཉམ་ཆུང་ལ། །ཤར་ཕྱོགས་སྤུང་རི་ནང་སོ་སོགས། །མཁས་གྲུབ་ལྡན་པ་ལ་ལ་ཡིས། །སྤྱན་རས་གཟིགས་ཀྱི་སྤྲུལ་པ་ཞེས། །ཐལ་མོ་
སྦྱར་ཞིང་ཁྲོམ་ལ་གསུངས། །ལ་ལས་བདག་གི་དབང་དང་ལུང་། །ཕ་ལ་ཞུས་པས་ཁུངས་མི་བཙུན། །ཆོས་འབྱུང་ལ་སོགས་རྩོམ་མང་པོ། །རྒྱལ་བ་ཡབ་སྲས་མ་གཏོགས་པའི། །བྱེད་པ་མི་འཐད་ཟེར་ནས་གཤེ། །རང་གི་རྩ་བའི་སློབ་བུ་འགའ། །ཆོ་ག་ཕྱག་ལེན་གཞན་ལུགས་བསྲེ། །རང་དྲན་སྣ་ཚོགས་བྱེད་ཅེས་ཐོས། །ཐོས་ཚེ་སེམས་ལ་ཟུག་རྔུ་མེ། །བྲག་ཅ་ཐོས་པ་འདྲ་ན་ཡང་། །རྗེས་ཤེས་དེ་དོན་བརྟགས་བྱས་པས། །སེམས་ལ་འཆར་སྒོ་འདི་ལྟར་རོ། །ཀྱེ་མ་སྤྲང་རྒན་བདག་ལྟ་བུ། །ད་ནི་འཆི་བ་ཤིན་ཏུ་ཉེ་། །བསྟོད་འོས་བསྟོད་ན་ཆོས་ཡིན་ཀྱང་། །བདག་ལ་ཡོན་ཏན་ཅི་ཡང་མེད། །བདག་འདྲ་སྤྲུལ་པར་མཐོང་བ་ཡང་། །ཁོང་རང་དག་སྣང་འབྱངས་པའི་རྟགས། །ཡོན་ཏན་མེད་ལ་བསྟོད་བྱས་ཀྱང་། །ར་གན་གསེར་དུ་བསྟོད་དང་མཚུངས། །བདག་ཉིད་ཤི་བའི་འོག་རོལ་དུ། །བསྟོད་པ་གསོལ་འདེབས་ཅི་བྱས་ཀྱང་། །བདག་ལ་ཕན་རྒྱུ་རྡུལ་ཙམ་མེད། །དེ་ཕྱིར་བསྟོད་པས་དགའ་རྒྱུ་མེད། །ཡོན་ཏན་ལྡན་པ་སྨད་ན་ཡང་། །དེ་ཉིད་ངན་པར་མི་འགྱུར་བས། །གསེར་འདི་ར་གན་ཡིན་སྨྲས་ཀྱང་། །མཁས་པ་ཀུན་
གྱིས་གོང་ཆེན་སྦྱིན། །བདག་ནི་ཤི་བའི་འོག་རོལ་དང་། །སྨད་པ་བྱས་ཀྱང་གནོད་རྒྱུ་མེད། །དེ་ཕྱིར་བསྟོད་སྨད་རོ་སྙོམས་སོ། །ངེས་པའི་དོན་ལ་བསྟོད་སྨད་ཀྱི། །སྒྲ་ཡི་ངོ་བོ་ལ་བལྟས་པས། །གཉིས་ཀ་ཁྱད་མེད་ངོ་བོ་སྟོང་། །གྲགས་སྟོང་ཕྱག་རྒྱ་ཆེན་པོ་ཉིད། །དེ་ཕྱིར་རོ་སྙོམས་དགའ་སྡུག་བྲལ། །སྒོམ་ཆེན་མིང་བཏགས་ཁྲིད་སྟོན་མཁན། །བདག་གམ་བདག་འདྲ་གཞན་ཡང་རུང་། །བསྟོད་པས་ཧ་ཅང་དགའ་དྲགས་ནས། །གནང་སྦྱིན་བྱེད་དམ་བློ་སྙིང་གཏད། །གཤེ་སྐུར་ཐོས་པས་ཞེ་སྡང་སྐྱེས། །འཐབ་ཅིང་རྩོད་དམ་ངན་ཤག་འདེབས། །དམིགས་ངན་ལ་སོགས་མཐུ་བསྡིག་བྱེད། །རང་རྒྱུད་མ་གྲོལ་རང་རྟགས་ཉིད། །རྟོགས་པ་ཇི་བཞིན་མ་སྐྱེས་ཏེ། །ཁ་ཏ་རྩོད་པ་གདིང་བཅས་རྟགས། །དེས་ན་རྟོགས་པའི་ཚོད་འཛིན་དང་། །བོགས་འདོན་གདམས་པ་ཟབ་མོ་ནི། །རང་ལ་བསྟོད་ཅིང་སྙན་པའི་ཚིག །མི་སྙན་གཤེ་སྐུར་འདེབས་པ་རྣམས། །ཐོབ་པ་ལམ་ཁྱེར་གདམས་པ་དེ། །ཟབ་ཆོས་སྙིང་པོ་ཡིན་པར་སེམས། །ཁྱད་པར་གཤེ་ཞིང་སྐུར་འདེབས་མཁན། །གྲག་སྟོང་ཕྱག་རྒྱ་ཆེན་པོ་ཡི། །བོགས་
འདོན་འཆད་པའི་བཤེས་གཉེན་དུ། །ད་ནི་ཁོ་བོས་དག་སྣང་སྦྱངས། །རྐེ་ཆུ་འགྲམ་གྱི་ཅོག་སྒར་དུ། །རང་གིས་རང་ལ་སྨྲས་པ་ཡིན།། ༈ །།ན་མོ་མ་ཧཱ་མུ་ཏྲ་ཡེ། ཅི་ཡང་མ་གྲུབ་ནམ་མཁའ་སྟོང་པ་ལས། །གང་ནས་མ་བྱུང་སྤྲིན་ཚོགས་གློ་བུར་བྱུང་། །སྣ་ཚོགས་ཆར་དང་བུ་ཡུག་ངེས་མེད་འབེབས། །ཅི་ཡང་མ་གྲུབ་ནམ་མཁའ་སྟོང་པ་ལས། །གང་ནས་མ་བྱུང་འཁོར་འདས་སྣ་ཚོགས་བྱུང་། །སྣ་ཚོགས་སྣང་བ་བདེ་སྡུག་ངེས་མེད་འཆར། །ཅིར་ཡང་མ་གྲུབ་སེམས་ཉིད་སྟོང་པ་ལ། །གང་ནས་མ་བྱུང་རྣམ་རྟོག་སྣ་ཚོགས་བྱུང་། །སྣ་ཚོགས་དགེ་དང་མི་དགེའི་ལས་རྣམས་བསགས། །ཅིར་ཡང་མ་གྲུབ་རྟོག་པ་སྟོང་པ་ལས། །གང་ནས་མ་བྱུང་ཉམས་སྣང་སྣ་ཚོགས་བྱུང་། །སྣ་ཚོགས་ཉམས་དབྱངས་ཆལ་ཆོལ་ཅི་ཡང་སྨྲ། །ནམ་མཁའ་སྟོང་པར་ཅིར་ཡང་མ་གྲུབ་པ། །རང་སེམས་ངོ་བོ་སྟོང་པའི་དཔེ་རུ་གདའ། །ནམ་མཁའི་དབྱིངས་ལས་སྤྲིན་གྱི་འདུ་འཚོགས་འདིར། །རང་སེམས་རྣམ་རྟོག་སྣ་ཚོགས་དཔེ་རུ་གདའ། །སྤྲིན་ལས་ཆར་དང་སེར་བ་ཁུ་འཕངས་འདི། །རྣམ་རྟོག་རྗེས་འབྲང་དགེ་སྡིག་དཔེ་རུ་གདའ། །སྤྲིན་རྣམས་
ཡལ་ནས་མཁའ་ལ་ཐིམ་པ་འདི། །རྣམ་རྟོག་ཤར་གྲོལ་ཀློང་ཐིམ་དཔེ་རུ་གདའ། །སྤྲིན་དང་ན་བུན་ཁུ་རླངས་ཅི་ཤར་ཡང་། །ནམ་མཁའི་ངོ་བོ་འགྱུར་བ་མེད་པ་འདི། །སེམས་ཉིད་ངོ་བོ་འགྱུར་མེད་དཔེ་རུ་གདའ། །ནམ་མཁའ་བར་སྣང་འཇའ་ཚོན་བཀྲ་བ་འདི། །བསྐྱེད་རིམ་སྒྱུ་མ་ལྷ་སྐུའི་དཔེ་རུ་གདའ། །ནམ་མཁའ་འཇའ་ཚོན་དབྱེར་མེད་ཟུང་འཇུག་འདི། །བསྐྱེད་རྫོགས་ཟུང་དུ་འཇུག་པའི་དཔེ་རུ་གདའ། །ནམ་མཁའ་སྟོང་པ་ཅིར་ཡང་མ་གྲུབ་པ། །ཆོས་ཉིད་དོན་དམ་བདེན་པའི་དཔེ་རུ་གདའ། །སྤྲིན་དང་ཆར་རྒྱུན་འཇའ་ཚོན་སྣ་ཚོགས་འདི། །ཆོས་ཅན་ཀུན་རྫོབ་བདེན་པའི་དཔེ་རུ་གདའ། །ནམ་མཁའ་སྟོང་པའི་ནང་ནས་ཆར་དང་སྤྲིན། །ཀུན་རྫོབ་དོན་དམ་ཟུང་འཇུག་དཔེ་རུ་གདའ། །དེ་སྐད་རྐེ་སྟོད་ནགས་འདས་ཐང་དུ་སྨྲས།། ༈ །།ན་མོ་དྷ་ན་ཡེ། ཡིད་བཞིན་ནོར་བུ་རིན་ཆེན་ལྟར། །སེམས་ཅན་བསམ་པ་སྐོང་བྱེད་ཅིང་། །ལྷ་མི་རྒུད་པ་སེལ་མཛད་པའི། །མགོན་པོ་ཁྱེད་ལ་ཕྱག་འཚལ་བསྟོད། །འདས་པའི་སངས་རྒྱས་རིན་ཆེན་མང་། །ད་ལྟ་སངས་རྒྱས་རྣམ་པར་མཛད། །མ་འོངས་
སངས་རྒྱས་རིན་ཆེན་གདུགས། །དུས་གསུམ་སངས་རྒྱས་ཁྱོད་ཕྱག་འཚལ། །ལྷ་མིན་ཕམ་མཛད་ལུས་ངན་པོ། །ལྷ་གནས་སྲུང་མཛད་གནས་སྲུང་སྟེ། །ལྕང་ལོ་ཅན་གྱི་ཕོ་བྲང་བདག །གསང་བདག་བཀའ་སྡོད་ཁྱོད་ལ་བསྟོད། །སངས་རྒྱས་སྟོང་གི་སྦྱིན་བདག་སྟེ། །ཁྱད་པར་ཤཱཀྱའི་བསྟན་པ་བསྲུང་། །མདོ་རྒྱུད་ཀུན་ནས་རབ་བསྔགས་པ། །ས་བརྒྱད་ལ་གནས་ཁྱོད་ལ་བསྟོད། །སྲས་ནི་ཨརྱ་ཛམ་བྷ་ལ། །ཡབ་ནི་དབང་ཕྱུག་ཆེན་པོ་སྟེ། །ཡུམ་ནི་ལྷ་མོ་དཔལ་ཆེན་མོ། །ཡབ་ཡུམ་སྲས་དང་བཅས་ལ་བསྟོད། །ནང་བློན་ནོར་ལྷ་མཆེད་བརྒྱད་དེ། །ཕྱི་བློན་ཀླུ་ཆེན་བརྒྱད་པོ་དང་། །འཁོར་ནི་གནོད་སྦྱིན་བྱེ་བ་འབུམ། །སྡེ་བོ་ཆེ་ལ་བསྟོད་པར་བགྱི། །ཁྱེད་ཀྱི་ཐུགས་དམ་དམ་ཚིག་ནི། །ལྷ་མི་བདེ་སྐྱིད་རྒྱས་པ་དང་། །སངས་རྒྱས་བསྟན་པ་རྒྱས་པ་ལགས། །བསྟན་སྲུང་ཆེན་པོ་ཁྱོད་ལ་འདུད། །རྣལ་འབྱོར་བདག་གིས་སེམས་བསྐྱེད་ཀྱང་། །འགྲོ་ཀུན་བདེ་སྐྱིད་ལྡན་པ་དང་། །སངས་རྒྱས་བསྟན་པ་དར་འདོད་པའི། །འུ་ཅག་དམ་ཚིག་གཅིག་ལགས་སོ། །བདག་དང་བརྒྱུད་པར་བཅས་པ་ཡི། །མངའ་ཐང་བསོད་ནམས་རྒྱས་པ་ཡི། །
གཉེར་ཁ་མགོན་པོ་ཁྱོད་ལ་གཏད། །བསམ་པ་ཡིད་བཞིན་འགྲུབ་པར་མཛོད། །ཅེས་པ་ད་ལམ་གདུལ་བྱ་འདི་ཙམ་སོང་ཟེར་བའི་ལུང་བསྟན་དང་གདུལ་བྱ་འོང་རྒྱུ་རྣམས་རྨི་ལམ་དུ་མཐོང་བ་འདྲ་ཞིག་བྱུང་བས་བྲིས་སོ།། ༈ །།ན་མོ་དྷེ་ཝཱི་ཀཱ་ལཱི་ཡེ། ཕྱི་ལྟར་ལྷ་མོ་དབྱངས་ཅན་མ། །ནང་ལྟར་རྡོ་རྗེ་ཕག་མོ་སྟེ། །གསང་བར་དཔལ་ལྡན་དུད་སོལ་མ། །སྔགས་ཀྱི་སྲུང་མ་རེ་མ་ཏི། །སྐུ་ལུས་གཅིག་ལ་སྤྲུལ་པ་སྟོང་། །དོན་དམ་འཕགས་མ་སྒྲོལ་མ་ཉིད། །སྤྲུལ་པ་བརྒྱ་སྟོང་གྲངས་མེད་པ། །ཆུ་བོ་བཞི་ཡི་མཐར་ཐུག་པ། །འཛམ་གླིང་ཁྱབ་པར་ཀུན་ཏུ་རྒྱུ། །བྱང་ཆུབ་སེམས་ལྡན་རྣལ་འབྱོར་མ། །ལུས་དང་གྲིབ་བཞིན་རྗེས་སུ་འབྲང་། །མ་དང་སྲིང་མོ་མཛའ་བ་མོ། །བྲན་མོའི་ཚུལ་དུ་ཕྲིན་ལས་བསྒྲུབ། །ཡེ་ཤེས་ལས་དང་འཇིག་རྟེན་ཚུལ། །ལྷ་མོ་འཁོར་དང་བཅས་ལ་བསྟོད། །ཐུགས་དང་འགལ་བ་གང་གྱུར་བཤགས། །སྐྱེ་བ་མང་པོའི་གོང་རོལ་ན། །ལྷ་མོ་ཁྱེད་དང་དམ་ཚིག་ཅིག །བདག་དང་བརྒྱུད་པར་བཅས་པ་ལ། །མ་ལྟར་བྱམས་པའི་ཐུགས་ཀྱིས་སྐྱོབས། །སྲིང་ལྟར་གདུང་བའི་ཐུགས་ཀྱིས་དགོངས། །
གྲོགས་ལྟར་འབྲལ་བ་མེད་པ་དང་། །བྲན་ལྟར་ཅི་བསམ་ཡིད་བཞིན་སྒྲུབས། །བདག་ཅག་མི་ནོར་འཁོར་བཅས་ལ། །ཡམས་ནད་རིམས་ནད་མེད་པ་ཡི། །གཉེར་ཁ་མ་གཅིག་ཁྱོད་ཀྱིས་མཛོད། །ཅེས་པ་ལྷ་མོ་རྒྱན་བཟང་ཞིང་ལེགས་ཀྱང་། ནད་རིམས་གྱི་རྟགས་ཤིག་བྱུང་བས་བྲིས་སོ།། ༈ །ན་མོ་ལོ་ཀེ་ཤྭ་ར་ཡེ། དལ་འབྱོར་མི་ལུས་ཐོབ་པའི་ལས། །དུས་མིན་འཆི་བ་མི་འབྱུང་བར། །ཚེ་དཔག་མེད་པས་བྱིན་གྱིས་རློབས། །རང་གཞན་དོན་ཆེན་འགྲུབ་པར་ཤོག །དམ་པའི་ཆོས་སྒོར་ཞུགས་པའི་ཆུས། །སྡོམ་པ་ཆག་ཉམས་མེད་པ་རུ། །ཤཱཀྱ་ཐུབ་པས་བྱིན་གྱིས་རློབས། །བསྟན་པ་རྒྱ་ཆེན་འཕེལ་བར་ཤོག །དབང་གཅིག་རྫོགས་པར་ཐོབ་པའི་ཆུས། །དམ་ཚིག་ཆག་ཉམས་མེད་པ་རུ། །རྡོ་རྗེ་འཆང་གིས་བྱིན་གྱིས་རློབས། །རྒྱ་ཆེན་རྒྱུད་སྡེའི་དོན་རྟོགས་ཤོག །བདེ་སྐྱིད་འགྲོ་དོན་བྱེད་པའི་ཆུས། །འབྲེལ་ཚད་དོན་དང་ལྡན་པ་རུ། །ཐུགས་རྗེ་ཆེན་པོས་བྱིན་གྱིས་རློབས། །བདེ་ཆེན་ཞིང་དུ་ཁྲིད་པར་ཤོག །དུས་ངན་སྙིགས་མར་སྐྱེས་པའི་ཆུས། །འཇིགས་པ་ཀུན་ལས་ཐར་བ་རུ། །རྗེ་བཙུན་སྒྲོལ་མས་བྱིན་གྱིས་རློབས། །
འཇིགས་ཆེན་བཅུ་དྲུག་མེད་པར་ཤོག །ཆུས་ཆེན་སྟེང་གི་ཆོས་རའི་ཆུས། །བར་ཆད་མེད་ཅིང་དོན་འགྲུབ་པར། །རྩ་བ་གསུམ་གྱིས་བྱིན་གྱིས་རློབས། །འགྲོ་དོན་རྒྱ་ཆེན་འགྲུབ་པར་ཤོག །ཅེས་སྤྲེའུ་ཟླའི་བཅུ་གཉིས་ལ་སྐེ་སྟོད་ཆུས་ཆེན་སྟེང་དུ་སྒར་པ་བརྒྱབ་ཉིན་བྲིས་སོ།། ༈ །།ན་མོ་གུ་རུ་དྷེ་ཝ་ཌཱཀི་ནཱི་སིདྡྷི་ཧཱུྃ། གཏེར་ཆོས་ཀུན་གྱི་བསྟན་པའི་བདག །སངས་རྒྱས་སྣང་བ་མཐའ་ཡས་ཁྱེད། །ཀུན་མཁྱེན་སངས་རྒྱས་སྤྱན་མངའ་བ། །ཉིན་མཚན་དུས་དྲུག་སེམས་ཅན་ཁམས། །ཐམས་ཅད་སོ་སོར་གཟིགས་ལགས་ན། །ཁྱེད་ཀྱི་བསླུ་མེད་རྡོ་རྗེའི་གསུངས། །རྩ་རྒྱུད་པད་སྡོང་བརྩེགས་པ་ལས། །དེ་ནས་ཉི་མའི་ཟེར་ཐག་ལྟར། །སྣང་ཡུལ་བྱ་བྱེད་གནས་སྐབས་འགར། །འཕྲོས་པའི་ཕྲེང་བ་རེ་རེ་ཙམ། །མཐའ་ནས་མཐའ་རུ་བྱུང་བར་འགྱུར། །གསུངས་པའི་ཕྲེང་བ་ལུང་བསྟན་པར། །མི་འགྱུར་རྡོ་རྗེ་མ་ལགས་སམ། །ད་ནི་སངས་རྒྱས་སྤྱན་གྱིས་གཟིགས། །ས་གཏེར་ཐོན་པར་བྱིན་གྱིས་རློབས། །ཐུགས་རྗེ་ཆེན་པོ་སྤྱན་རས་གཟིགས། །དུས་ངན་སྙིགས་མའི་སེམས་ཅན་དང་། །ཁྱད་པར་བོད་ཀྱི་སེམས་ཅན་
ལ། །ཁྱེད་ཀྱི་ཐུགས་རྗེས་རྟག་གཟིགས་ཤིང་། །ཁྱེད་ཀྱིས་བསྟན་པ་དར་གསུངས་ནས། །དེང་སང་གསང་སྔགས་ཆོས་རྣམས་འཆལ། །དར་ལ་མ་སྨིན་རྟགས་ཐོན་ཉུང་། ཚེ་ཐུང་ནད་མང་འཁྲུག་རྩོད་དར། །བོད་ཁམས་སྐྱབས་མེད་ཉམ་ཐག་དུས། །ཟབ་གཏེར་ཆོས་ཀྱིས་སྐྱབས་བྱེད་ཅིང་། །འབྲས་བུ་འགྲུབ་པར་མྱུར་ཐོབ་ཕྱིར། །མི་འགྱུར་རྡོ་རྗེས་ས་ཡི་གཏེར། །མྱུར་དུ་ཐོན་པར་ཐུགས་རྗེས་ཟུངས། །ལྔ་བརྒྱ་ཐ་མ་ཡང་མཐའ་དུས། །ཐུབ་པའི་བསྟན་པ་རྟགས་ཙམ་དུ། །ཀུན་བཟང་ཐུགས་ཀྱི་བསྟན་པའི་དུས། །དམ་ཆོས་རྫོགས་པ་ཆེན་པོ་དང་། །པད་འབྱུང་བསྟན་པ་དར་གསུངས་ན། །ད་ནི་དུས་བབ་ཐུགས་རྗེས་གཟིགས། །ཁྱད་པར་ཨོ་རྒྱན་ཕྲིན་ལས་པ། །ལུང་ཟིན་མི་འགྱུར་རྡོ་རྗེ་ཡི། །ས་གཏེར་འདོན་པའི་དུས་རྟགས་དང་། །ས་རྟགས་གནམ་རྟགས་ཐམས་ཅད་རྫོགས། །སྔོན་གྱི་སྨོན་ལམ་ལུང་བསྟན་རྣམས། །ད་ནི་མ་བསླ་རྟགས་སྟོན་ཅིག །ཁྲག་དཀར་སེང་གེའི་གནམ་རྫོང་གི །ས་གཏེར་ད་ལྟ་འདི་ཉིད་དུ། །ཐོན་པར་མཛོད་ཅིག་ས་མ་ཡ། །མ་གཅིག་ཡེ་ཤེས་མཚོ་རྒྱལ་ཁྱེད། །ཕྱི་རན་གཏེར་ལ་སྤྱོད་པ་རྣམས། །
ཁྱེད་ཀྱིས་བར་ཆད་སེལ་བ་དང་། །ལུང་བསྟན་ཁ་བྱང་སྤྲོད་པ་དེ། །ཁྱེད་ཀྱི་དམ་ཚིག་མ་ལགས་སམ། །མི་འགྱུར་རྡོ་རྗེའི་བར་ཆད་སོལ། །ད་ནི་ཁ་བྱང་ཕྱག་ཏུ་སྤྲོད། །སྔོན་གྱི་ཐུགས་དམ་དུས་ལ་བབ། །ཁ་བྱང་དུས་ལས་ཡོལ་བ་དང་། །ས་གཏེར་དུས་ལས་ཡོལ་བ་ན། །གུ་རུའི་ལུང་བསྟན་རྫུན་དུ་འགྱུར། །མ་གཅིག་ཁྱོད་ཀྱི་ཐུགས་དམ་ཉམས། །གཏེར་སྟོན་སྤྲུལ་སྐུ་བར་ཆད་ཁྱེར། །གཏེར་སྦས་དོན་མེད་ས་ནང་རུལ། །རྒྱལ་ཁམས་ཀུན་གྱིས་འཕྱ་ཞིང་གཤེ། །གཤེ་སྐུར་བྱེད་མཁན་མནར་མེད་ལྟུང་། །ཆོས་བྱེད་གསང་སྔགས་ཆོས་ཀྱིས་ཕོངས། །ནད་མུག་མཚོན་གྱིས་མི་ཐོག་འབུད། །སངས་རྒྱས་བསྟན་པ་མུན་གླིང་ནུབ། །བོད་ཁམས་མཐའ་དམག་དཔུང་གིས་འཇོམས། །གཙུག་ལག་ཆོས་འཁོར་ས་ཕུང་འགྱུར། །ལས་ཅན་ཐམས་ཅད་དུས་མིན་འཆི། །དེ་ལ་མ་ཐུག་ཐུགས་རྗེས་གཟིགས། །སྣང་བ་མཐའ་ཡས་དུས་ལ་བབ། །ཐུགས་རྗེ་ཆེན་པོའི་དུས་ལ་བབ། །པདྨ་འབྱུང་གནས་དུས་ལ་བབ། །ཡེ་ཤེས་མཚོ་རྒྱལ་དུས་ལ་བབ། །ལུང་ཟིན་མི་འགྱུར་རྡོ་རྗེ་ཡིས། །ས་གཏེར་མྱུར་དུ་ད་ཐོན་མཛོད། །
དུས་ལ་བབ་བོ་ཐུགས་རྗེས་གཟིགས། །མ་ནིང་སྡེ་ལྔ་མ་མགོན་ཚོགས། །ཊཱཀི་སྡེ་ལྔ་ལ་སོགས་པ། །ཡེ་ཤེས་མཚོ་རྒྱལ་གཏེར་སྲུང་རྣམས། །ཨོ་རྒྱན་བྱེ་བ་ཕྲག་བརྒྱ་ཡི། བཀའ་ཡི་སྲུང་མ་ཐམས་ཅད་ཀུན། །ད་ནི་ཐུགས་དམ་དུས་ལ་བབ། །མི་འགྱུར་རྡོ་རྗེའི་བར་ཆད་སོལ། །ས་གཏེར་མྱུར་དུ་ཐོན་པར་མཛོད། །དྲེགས་པ་བཅོ་བརྒྱད་མཁའ་རི་དང་། །སྡེ་དཔོན་སུམ་ཅུ་བརྟན་སྐྱོང་སོགས། །བོད་ཁམས་གཏེར་སྲུང་ཐམས་ཅད་ཀུན། །བཅོལ་བ་མི་སྟེར་དམ་ཉམས་སམ། །ཕ་ནོར་བུ་ལ་ད་སྤྲོད་ཅིག །སེང་གེ་བྲག་སོགས་གཏེར་ཁ་རྣམས། །ད་ནི་མི་འགྱུར་རྡོ་རྗེ་ལ། །མྱུར་དུ་སྤྱོད་པར་མ་བྱས་ན། །ཨོ་རྒྱན་ཆེན་པོའི་དམ་ལས་འགལ། །དེས་ན་དམ་ལས་མ་འདའ་བར། །ད་ལྟ་ཉིད་དུ་ས་གཏེར་གཏོད། །བཅོལ་བའི་ཕྲིན་ལས་འགྲུབ་པར་མཛོད། །ཅེས་པ་ཆུ་ཡོས་ཀྱི་ལོ་སྤྲེའུ་ཟླའི་ཚེས་བཅུ་ལ་རྨི་ལམ་དུ་སྤྲུལ་སྐུ་དང་མཇལ། མར་མེ་ཡང་འཛིན་འདུག་པ་ཕྱིར་ནངས་བཅོ་ལྔའི་སྔ་དྲོ་ལ་རྟེན་འབྲེལ་བསྒྲིགས་ཏེ་བྲིས་སོ།། །།ན་མོ་དྷེ་ཝི་ཀཱ་ལི་ཡེ། སངས་རྒྱས་ཀུན་བས་བསྒྲེས་པའི་ཀུན་བཟང་ཡུམ། །སྲིད་པ་ཀུན་གྱི་སྐྱེད་བྱེད་སྲིད་རྒྱལ་མ། །
ཡེ་ནས་རྫོགས་སངས་རྒྱས་ཀྱང་འཇིག་རྟེན་ཚུལ། །ལྷ་ཀླུ་གནོད་སྦྱིན་ཀུན་གྱི་བུ་མོ་སྟེ། །ཡེ་ཤེས་ཁྲོ་བོ་ཀུན་དང་མཉམ་སྦྱོར་མ། །འཇིག་རྟེན་ལྷ་འདྲེ་ཀུན་གྱི་དགྱེས་སྡེ་མོ། །སྐྱེ་བ་རྣམ་བཞི་ཟ་བའི་ཁ་མོ་ཆེ། །མི་ཕྱུགས་ཁྲམ་ལ་འདེབས་པའི་བདུད་མོ་ཆེ། །སྲོག་གཅོད་དབུགས་ལ་དགའ་བའི་གཤིན་རྗེ་མོ། །མ་མོ་མཁའ་འགྲོ་ཀུན་གྱི་ཡང་རྗེ་བོ། །ཕྱི་ནང་དཀྱིལ་འཁོར་ཀུན་གྱི་མཐའ་སྐྱོང་མ། །ཕུད་རྣམས་སྡུད་ཅིང་ལྷག་མ་ལེན་པ་མོ། །དམ་ལྡན་རྣལ་འབྱོར་ཀུན་གྱི་ཚེ་འཛིན་མ། །དམ་ཉམས་མནའ་ཟན་ཀུན་གྱི་སྲོག་གཅོད་མ། །རླུང་ནག་འཚུབ་པ་སྲིད་པའི་རླུང་ཕྱུར་མ། །འགྲོ་དྲུག་འདྲེན་མཛད་ཡེ་ཤེས་མཁའ་འགྲོ་མ། །ལེགས་ཉེས་སྟངས་འཛིན་སྲིད་པའི་བྱ་རི་མ། །ཉིན་མཚན་དུས་དྲུག་རྒྱུག་པའི་རྐང་ཡང་མ། །སུམ་མདོ་རི་རྩེ་འགྲིམས་པའི་ལྷ་འདྲེ་མ། །དུར་ཁྲོད་ཀུན་དུ་རྒྱུག་པའི་ཤ་ཟ་མ། །དུས་གསུམ་སངས་རྒྱས་ཀུན་གྱི་བསྟན་སྲུང་མ། །ཡེ་ཤེས་མགོན་པོ་ཀུན་གྱི་ཡུམ་གཅིག་མ། །གཙུག་ལག་ཆོས་འཁོར་ཀུན་གྱི་དཀོར་བདག་མ། །ལྷ་སྲིན་དྲེགས་པ་ཀུན་གྱི་དམག་དཔོན་མ། །ནད་རིམས་དལ་ཡམས་འབེབས་
པའི་ནད་བདག་མ། །ལྟས་ངན་ཆོ་འཕྲུལ་གཏོང་བའི་ཐན་བདག་མ། །ཟས་ནོར་ལོངས་སྤྱོད་འཕེལ་བའི་གཡང་བདག་མ། །བཀྲ་ཤིས་བདེ་ལེགས་སྩོལ་བའི་དཔལ་འབར་མ། །ཁྲོས་ན་སྲིད་སྒྲ་བརླག་པའི་མཐུ་མོ་ཆེ། །དགའ་ན་བདེ་སྐྱིད་ཆར་འབེབས་དགའ་བ་མོ། །བཅོལ་ན་ཕྲིན་ལས་ཀུན་འགྲུབ་ནོར་བུ་མ། །མཆོད་ན་ཚོགས་གཉིས་རྫོགས་པའི་མཆོད་སྡོང་མ། །ས་བརྒྱད་སེམས་མ་རེ་མ་ཏི་ལ་བསྟོད། །ལྷ་མོ་ཁྱེད་ལ་བསྟོད་པའི་བསོད་ནམས་ཀྱིས། །བདག་དང་བདག་ལ་འབྲེལ་ཐོགས་འགྲོ་བ་ཀུན། །བྱང་ཆུབ་བསྒྲུབ་ལ་བར་ཆད་མེད་པ་དང་། །ཚེ་གཅིག་སངས་རྒྱས་འགྲུབ་པའི་དངོས་གྲུབ་སྩོལ། །བདག་ནི་གར་གནས་གར་སོང་ས་ཕྱོགས་དེར། །མི་ནད་ཕྱུགས་ནད་ཐམས་ཅད་རྒྱུན་ཆད་ཅིང་། །བདེ་ལེགས་བཀྲ་ཤིས་འཕེལ་བར་མཛད་དུ་གསོལ། །ཞེས་པ་རྐེ་སྟོད་ཆུས་ཆེན་ཁ་རུ་ཆོས་ར་བྱེད་ཤོམ་པའི་ཚེ། རྨི་ལམ་ དུ་སྒར་གྱི་གཡོན 
་ཕྱོགས་དེར་ལྷ་མོ་རེ་མ་ཏི། ནད་ཀྱི་རྐྱལ་པ་ཕག་གི་ལོགས་གིས་མགོ་གསུམ་ཡོད་པ་གཅིག་དྲེའུ་ཀྱི་ཕྱི་ཤ་ལ་བཏགས་ཏེ་བྱུང་བ་ཅིག་མཐོང་སྙམ་བྱེད། ཕྱིར་ཉིན་ལྷ་འབུམ་གྱིས་སྡེ་ལ་ཕན་པའི་ཡམས་བཟློག་ཅིག་བཅའ་དགོས་ཟེར་བས། སྦྱིན་སྲེག་བརྒྱ་རྩ་བྱས་དུས་བྲིས་པ་ཡིན་ནོ།། །།