ལྷ་གཅིག་སྔགས་གཅིག་ཡི་དམ་ཀུན་འགྲུབ་ཕྱིར། ཁ༽ །རྒྱུད་སྡེ་སྤྱི་སྒྲུབ་རྒྱལ་བ་རྒྱ་མཚོ་ཡོད།
༼ཁ༽ ༈ རི་ཆོས་མཚམས་ཀྱི་ཞལ་གདམས་གཅིག་བརྒྱུད་ཨུ་པ་ཚེས་ཀྱི་གྲངས་ཀ་ལས། ལྷ་གཅིག་སྔགས་གཅིག་ཡི་དམ་ཀུན་འགྲུབ་ཕྱིར། རྒྱུད་སྡེ་སྤྱི་སྒྲུབ་རྒྱལ་བ་རྒྱ་མཚོའི་ཉམས་ལེན་གཅིག་དྲིལ་སྙིང་གཏམ་དུ་གདམས་པ་མདོ་རྒྱུད་མན་ངག་ཀུན་གྱི་བཅུད་བསྡུས་རང་གི་ཉམས་མྱོང་དང་སྦྱར་ཏེ་གདམས་པ་ཡོད། ༈ །ན་མོ་གུ་རུ་ལོ་ཀི་ཤྭ་ར་ཡེ། བླ་མ་ཡི་དམ་དབྱེར་མེད་གཅིག་དྲིལ་བ། །རྒྱལ་བ་རྒྱ་མཚོའི་ཐུགས་རྗེས་འདིར་གཟིགས་ཤིག །བདག་གིས་འདི་བསམ་བདག་ལ་མོས་རྣམས་ཀྱང་། །འདི་ལྟར་སོམས་ལ་འདི་ལྟར་ཉམས་སུ་ལོང་། །ཐོག་མེད་དུས་ནས་རང་ངོ་མ་ཤེས་འཁྲུལ། །ལས་ངན་བསགས་པས་མཐའ་མེད་འཁོར་བར་འཁྱམས། །སྔོན་བྱོན་སངས་རྒྱས་གྲངས་མེད་བྱོན་གྱུར་ཀྱང་། །རང་ལ་མ་ཕན་བྱང་ལྟའི་བྲག་ཕུག་བཞིན། །སྐྱེ་རྒ་ན་འཆི་ཆུ་ཡི་གཉེར་མ་བཞིན། །ཐར་དུས་མེད་པའི་ཉེས་ཆེན་ལྕགས་བླུགས་བཞིན། །བར་སྐབས་འགའ་ལ་བསོད་ནམས་ཚོགས་བསགས་ཀྱང་། །བསྔོ་བ་མ་ཤེས་འབྲས་
བུ་སྨིན་ནས་ཟད། །ངན་སོང་གསུམ་དུ་གཏན་གྱི་ཕ་ཡུལ་བྱས། །འདི་ལ་སྐྱོ་བ་གཏིང་ནས་མི་སྐྱེ་བར། །བདག་གི་སེམས་འདི་བདུད་རྒན་སུ་ཡིས་བསླུས། །སྔོན་ཚེ་ཚུལ་ཁྲིམས་གཙང་མ་བསྲུང་བའི་འབྲས། །ད་རེས་མི་ལུས་གཙང་མ་ཐོབ་ན་ཡང་། །དུས་ངན་སྙིགས་མར་ཐུག་པས་བར་ཆད་རྒོད། །ཚེ་ཐུང་ནད་མང་ཕྱི་ནང་འཚེ་བ་མང་། །འདི་ལ་རྩེ་གཅིག་ཉམས་ལེན་མི་བྱེད་པར། །ཚེ་འདིའི་བྱ་བའི་ཆེད་དུ་གཡེངས་བ་འདི། །བདག་ལུས་དམུ་གབ་འདྲ་བ་ཞིག་གིས་བཀབ། །ཕུ་ཤི་མདའ་ཤི་གཞོན་ཤི་འདི་ཙམ་མཐོང་། །རང་ལ་ནམ་འཆི་ངེས་ཏིག་མེད་བཞིན་དུ། །ད་རུང་ཤོམ་ར་མང་པོ་འདིང་བ་འདི། །བདག་གི་སྙིང་ལ་རྒྱལ་འགོང་སུ་ཞུགས་ན། །དེ་རིང་ནད་ཕོག་དོ་དགོང་དབུགས་སོང་ན། །རང་ལ་མི་འཇིགས་གདེང་ནི་ཅི་འདྲ་ཡོད། །ཆ་མེད་ཡུལ་དུ་རྒྱུས་མེད་ལག་སྟོང་འགྲོ། །དེ་དུས་ལམ་མཁན་རྒྱགས་ཕྱེ་འཚགས་ཡོད་དམ། །གར་འགྲོའི་གཏད་སོ་ངེས་ཏིག་ཅང་ཡོད་དམ། །ལས་ཀྱི་གྲངས་མཁན་གཤིན་རྗེའི་ཁྲིམས་ར་ན། །ངོ་གནོང་མེད་པའི་སྤྱོད་པ་ཨེ་བྱས་སོམས། །ལས་ཀྱི་རྣམ་སྨིན་སུས་ཀྱང་མི་བཟློག་
ན། །ལྟུང་བ་ཕྲ་མོ་རེས་ཀྱང་ངན་སོང་དུ། །ལྟུང་བར་གསུངས་ན་སྡིག་གཞན་སྨོས་ཅི་དགོས། །ངན་སོང་སྡུག་བསྔལ་བྲིས་པ་མཐོང་བའམ། །རྣ་བས་ཐོས་ཀྱང་ཡི་མུག་ག་ཆད་ན། །ཐོག་ཏུ་ཕྱིན་ན་བསྲན་བཟོད་ཇི་ལྟར་ནུས། །འདི་ལ་བསམ་ཞིང་ལས་འབྲས་མ་འཛེམ་པར། །བདག་གི་སེམས་འདི་སྨྱོ་ཚབས་མི་ཆེའམ། །གྲངས་མེད་སྔོན་ནས་གྲངས་མེད་ལུས་བླངས་པས། །སེམས་ཅན་གཅིག་གིས་རང་གི་མ་བྱས་པའི། །གྲངས་ནི་བརྩིས་ཀྱང་མི་ཐེབས་མཐའ་ཡས་ན། །དགྲ་ལ་མནར་སེམས་སྙིང་ཁོང་ཚུན་ལ་འཆང་། །དྲེད་པོ་ཁྲེལ་མེད་འགའ་ལ་ཡི་རེ་མུག །ཉེ་དུ་མཐུན་གྲོགས་ཚོང་དུས་མགྲོན་པོ་བཞིན། །མྱུར་དུ་བྲལ་ཞིང་ཕྱིན་ཆད་མི་མཐོང་བས། །འཁོར་བའི་ཆོས་ཉིད་སུས་ཀྱང་བཟློག་མེད་ན། །མཛའ་བཤེས་གདུང་སེམས་ཤི་བའི་མྱ་ངན་དང་། །གསོན་ཚེ་འཛིང་རྩོད་ང་ཁྱོད་སྨྲ་མཆུ་འདི། །འགོང་པོ་སུ་ཞིག་ཡིད་སེམས་དཀྲུགས་པ་ཨང་། །དེང་སང་མར་མེ་འཆི་ཁ་གསལ་བ་ལྟར། །ཤཱཀ་ཐུབ་བསྟན་པ་ནུབ་ཁ་གསལ་བའི་དུས། །དགེ་བའི་བཤེས་གཉེན་ཟླ་སྐར་བཀྲ་བ་བཞིན། །བཙུན་པ་དགེ་འདུན་མེ་ཏོག་གླིང་རྒྱས་འདྲ། །ཐམས་
ཅད་བཅོམ་ལྡན་ཐུབ་པའི་རྗེས་འཇུག་སྟེ། །ཀུན་ལ་དག་སྣང་མོས་གུས་མི་སྐྱེ་བར། །རང་སྐྱོན་དུག་ཕུང་འདྲ་ཚོ་ཁོང་དུ་སྦས། །གཞན་སྐྱོན་རྟ་རྔ་ཙམ་ལ་མཛུབ་མོ་བཙུགས། །ཅལ་སྒྲོག་རྗེས་རྒྱུག་འབར་ཤས་ལས་ངན་བསགས། །བདག་གི་སྙིང་ལ་མུ་སྟེགས་སུ་ཞུགས་ན། །རིག་པའི་གནས་དང་ཡོན་ཏན་ཕྲ་མོ་རེའི། །མཐའ་རྒྱ་བཅད་ན་ནམ་མཁའ་འདོམ་མཇལ་འདྲ། །སྔོན་གྱི་པཎ་གྲུབ་མང་པོས་མཐའ་མ་ཆོད། །ཚེ་ཐུང་ཤེས་རབ་རྨོངས་ཤིང་ལེ་ལོ་ཅན། །བདག་འདྲས་ཡོན་ཏན་མཐའ་རྒྱ་བཅད་པ་ན། །ཕྱེ་མ་ལེབ་ཀྱིས་ནམ་མཁའི་མཐའ་ཚོལ་བཞིན། །ཧམ་པ་ཆེན་པོའི་མི་ང་མཚར་བ་ལ། །ཧ་ཅང་མཐའ་རྒྱ་ཆོད་པ་མ་བྱུང་ན། །ཅི་ཡང་ཧ་ཁོག་གོ་བ་དགོས་པ་ན། །བློ་མང་ཤེས་པ་མང་ཡང་རྒྱུ་སྐར་བཞིན། །རང་གཞན་སུ་ལ་ཡང་མི་ཕན་དགེ་སྦྱོར་ཆག །དེ་བས་གནད་ཀྱི་མན་ངག་ཉམས་བླངས་ན། །འཆི་ཁ་མི་འགྱོད་ཙམ་ཞིག་འོང་བར་ངེས། །གསར་མའི་ཆོས་ལུགས་མཁས་པའི་ཡང་རྩེ་མཆོག །ལོ་ཙཱར་གྲགས་ཀྱང་དོན་ལ་པཎྜི་ཏ། །ལོ་ཆེན་རིན་བཟང་གཟིམ་ཁང་བརྩེགས་བཞི་ལ། །རྒྱུད་སྡེ་བཞི་པོ་སོ་སོའི་དཀྱིལ་འཁོར་
བཞེངས། །ཞག་རེ་ཐུན་བཞིར་སོ་སོར་ཉམས་ལེན་མཛད། །དེ་ཚེ་ལྔ་བརྒྱའི་གཙུག་རྒྱན་ཇོ་བོ་རྗེ། །མ་མཉེས་ལོ་ཙཱ་བ་ཁྱེད་རུལ་འདུག་གསུངས་། །ཐམས་ཅད་གཅིག་ཏུ་དྲིལ་ནས་གདམས་པ་གནང་། །ཉམས་སུ་བླངས་བས་འཇའ་ལུས་མཁའ་སྤྱོད་གཤེགས། །ཐམས་ཅད་ཀུན་གཟིགས་ཨོ་རྒྱན་རིན་པོ་ཆེས། །རྒྱལ་བ་གཅིག་འགྲུབ་ཐམས་ཅད་འགྲུབ་པར་གསུངས། །ཐུབ་པའི་དབང་པོས་འཇིག་རྟེན་མཐའ་ཡས་ན། །མི་འདྲའི་མདོ་སྡེ་དཔག་མེད་གསུངས་པ་རྣམས། །ཚིག་ནི་ཐ་དད་དོན་ནི་གཅིག་པ་སྟེ། །ཚིག་གཅིག་དོན་རྟོགས་ཐམས་ཅད་རྟོགས་པར་གསུངས། །ཆོས་པའི་ཡང་རྩེ་ཁ་རག་སྒོམ་ཆུང་གིས། །ཚེ་ལ་ལོང་མེད་ཚིག་ལ་ཟད་པ་མེད། །དེ་བས་དམ་པའི་གདམས་ངག་ཉམས་ལོངས་གསུངས། །དེ་ཕྱིར་མདོ་སྔགས་བཀའ་གཏེར་ཐམས་ཅད་དང་། །གཞུང་དང་མན་ངག་སྙན་བརྒྱུད་རྟོགས་ཆོས་སོགས། །ཐམས་ཅད་གཅིག་ཏུ་དྲིལ་ནས་ཉམས་ལེན་འདོད། །དེ་ཡང་ལྟ་སྒོམ་སྤྱོད་འབྲས་བཞི་རུ་འདུས། །ལྟ་བ་གཅིག་དྲིལ་ཀ་དག་ཀུན་བཟང་ཀློང་། །བསྒོམ་པ་ལྔ་ལྡན་གཅིག་དྲིལ་བསྒོམ་པའི་མཆོག །སྤྱོད་པ་སྡོམ་གསུམ་གཅིག་དྲིལ་
བཀའ་བརྒྱུད་སྲོལ། །འབྲས་བུ་མཆོག་ཐུན་གཅིག་དྲིལ་འདིར་སྨིན་བྱ། །དང་པོ་ལྟ་བའི་གནས་ལུགས་མ་རྟོགས་ན། །ཆོས་ལ་བརྩོན་ཡང་འཁོར་བ་ལས་མི་འཕགས། །ཐོས་བསམ་བྱས་པའི་དཔེ་རྒྱུད་བལྟས་པའམ། །བླ་མའི་གསུང་ལ་གོ་བ་ཆེན་པོ་ཤར། །ཆོས་ཀུན་ཡེ་ནས་སྟོང་ཞིང་ཆོས་ཀྱི་དབྱིངས། །ཡོད་མེད་རྟག་ཆད་ཕྱོགས་ལྷུང་མཐའ་དང་བྲལ། །ནམ་མཁའ་རྣམ་པར་དག་པའི་དཀྱིལ་ལྟ་བུ། །ཡིན་པར་འདུག་སྙམ་ངེས་ཤེས་སྐྱེས་པ་དེ། །ཤེས་བྱའི་གཤིས་ལ་ཤོར་བའི་ལྟ་བ་དེ། །དེ་ཡིས་འཁོར་བའི་རྩ་བ་གཅོད་མི་ནུས། །གོ་བ་ལྷན་པོ་འདྲ་སྟེ་འགོག་རྒྱུ་ཡིན། །ཉོན་མོངས་རྣམ་རྟོག་མགོ་ཡང་དེས་མི་ནོན། །སྣོད་བཅུད་རང་ཐིམ་རང་ཡང་ཧཱུྃ་ལ་ཐིམ། །ཧཱུྃ་ཡང་གྱེན་རྫོགས་ཡལ་ནས་སྟོང་པ་ཉིད། །ནམ་མཁའ་ལྟ་བུ་སྟོང་ཉིད་བསྒོམ་པ་དང་། །སྭ་བྷའི་ལ་སོགས་སྔགས་ཀྱིས་སྦྱངས་བ་ཡིས། །ཐམས་ཅད་མི་དམིགས་ནམ་མཁའ་ལྟར་བསམ་ལ། །སྟོང་པར་བསམ་མཁན་དེ་ཡང་རྣམ་རྟོག་སྟེ། །རྣམ་རྟོག་མ་རིག་འཁོར་བའི་རྩ་བ་ཡིན། །དེ་ནི་མདོ་རྒྱུད་མན་ངག་ཡིག་ཆ་ལས། །ཐམས་ཅད་སྟོང་པ་ཉིད་དུ་གསུངས་པ་
དང་། །དགེ་སྡིག་རྒྱུ་འབྲས་མ་གྲུབ་སྟོང་ཉིད་དུ། །གསུངས་པའི་གོ་བ་ཙམ་ལ་གདེང་བཅས་ནས། །རྒྱུ་འབྲས་ཁྱད་གསོད་སྡོམ་པ་དམ་ཚིག་འཆལ། །ཐམས་ཅད་སྟོང་ཉིད་ཡིན་ཟེར་ཆོས་གཏམ་མཐོ། །ནག་པོ་ཁ་འབྱམས་བདུད་ཀྱི་ལྟ་བ་དེ། །ལོ་རྒྱུས་རུ་ཊའི་སྐྱེ་རྒྱུད་གསལ་ལྟར་ཏེ། །སྟོང་པ་ཉིད་ལ་ལྟ་ཉེས་ཕུང་བའི་རྒྱུ། །འཁོར་བའི་རྩ་བ་གཅོད་པའི་སྟ་རེ་ནི། །སྟོང་ཉིད་ཡིན་པས་དེ་ཉིད་ཉམས་བླངས་ནས། །དུག་ལྔ་འཁོར་བའི་རྩ་བ་གཅོད་སྙམ་ན། །སྤང་གཉེན་སོ་སོར་འཛིན་པས་དོན་མ་གོ །གཉེན་པོར་ཤོར་ཞེས་ཕྱག་རྫོགས་ལམ་དང་འགལ། །རྣམ་རྟོག་མ་རིག་འཁོར་བའི་རྩ་བ་དེས། །རྣམ་རྟོག་མེད་པ་རྟོག་མེད་ཡེ་ཤེས་ནི། །བསྒོམ་པར་འདོད་ཀྱང་རྒྱ་ནག་ཧྭ་ཤང་གི །ལྟ་བ་ཡིན་པས་དེ་ཡི་གནད་ཤེས་བྱ། །རྣམ་རྟོག་ཡེ་ཤེས་ཆོས་སྐུ་ཡིན་པའི་ཕྱིར། །རིག་དང་མ་རིག་དྲན་དང་མ་དྲན་མེད། །ངོ་བོ་ཆོས་སྐུ་ཉིད་དུ་འདུག་སྙམ་ནས། །གོ་བ་ཙམ་ལ་ངེས་ཤེས་གདེང་བཅས་ན། །གང་དགར་ཉལ་ཞིང་བག་མེད་སྤྱོད་པ་ནི། །ལྟ་བའི་ཕྱོགས་སུ་སྤྱོད་པ་ཤོར་བ་སྟེ། །རྐྱལ་མཁན་མཁས་པ་ཆུ་ལ་རྒྱུག་མཐོང་ནས། །རྐྱལ་མི་ཤེས་པ་ཆུ་ལ་
མཆོང་དང་འདྲ། །ཐོས་རྒྱ་ཆེ་ཞིང་གོ་བ་བཟང་ན་ཡང་། །ལྟ་བ་དངོས་སུ་རྟོགས་པ་མི་འོང་བས། །བསྒོམས་པའི་སྟོབས་ཀྱིས་ནང་ནས་འཆར་བར་དགོས།་་་འདི་ལ་གནད་འགག་ཆེན་པོ་ཐུག་འདུག །བརྩོན་འགྲུས་རྒྱ་མཚོ་བདག་འདྲ་བ་ལ་རྟོགས་པ་ནང་ནས་འཆར་བར་བྱིན་གྱིས་བརླབ་ཏུ་གསོལ། ཞེས་ཞུས་མཆན། །དེ་ཡང་ཉམས་དང་རྟོགས་པ་ནོར་དོགས་མཆིས། །ས་ལེ་སེང་ངེ་ནམ་མཁའ་གཡའ་དག་བཞིན། །གཟུགས་དང་ཁ་དོག་མེད་དེ་ལྟ་རྒྱུ་ཡོད། །འདི་འདྲ་བརྗོད་མི་ཤེས་ཀྱང་མྱོང་རྒྱུ་ཡོད། །ངེས་ཤེས་འཛིན་པ་རིང་ཡིད་ཆེས་པ་ཡོད། །བརྟན་པོ་ཉིན་མཚན་ཕལ་ཆེར་འགྱུར་བ་མེད། །མེ་རེ་ཁྱིལ་ལེར་ལུས་སེམས་བདེ་བས་ཁྱབ། །སེམས་རྩ་སྐྱིད་ཅིང་ཉོན་མོངས་མགོ་བོ་ནོན། །བྱ་བ་ཐེང་ཞིང་ཆགས་ཞེན་རང་སར་ཞི། །སྣོད་བཅུད་ཕྱི་ནང་ཐམས་ཅད་སྟོང་པར་མཐོང་། །རི་བྲག་བརྩིགས་པར་ཐོགས་པ་མེད་སྙམ་བྱེད། །ཐམས་ཅད་སྟོང་པ་ཉིད་དུ་ས་ལེར་མཐོང་། །འོན་ཀྱང་སྟོང་པ་རེད་སྙམ་འཛིན་པ་ནི། །ཕྲའུ་ཡོད་ཀྱང་མི་རྟག་འགྱུར་ལྡོག་ཆེ། །དེ་ཚོ་ཉམས་ཡིན་རྟོགས་པ་མ་ཐོན་པས། །ལྟ་བ་ཡིན་པར་རྟོགས་པ་མ་ཐོབ་པས། །ལྟ་བ་ཡིན་པར་རློམས་ན་
གོལ་ས་མང་། །གོལ་སའི་ལྟ་བ་ཉམས་ཀྱི་ལྟ་བ་སོགས། །ལྟ་བར་འཛིན་པ་ར་གན་གསེར་དུ་རློམ། །མོས་གུས་རྟ་བཟང་བརྩོན་འགྲུས་ལྕག་གིས་བྲབ། །ཚོགས་བསགས་། སྒྲིབ་སྦྱང་སྒྲ་ཆ་ལེགས་བསྡམས་ནས། །བླ་མ་ཡི་དམ་ཐུགས་རྗེ་ཞུགས་པའི་དུས། །ནམ་ཞིག་ལྟ་བ་ནང་ནས་འཆར་བ་ཡིན། །བལྟ་བྱ་ལྟ་བྱེད་གཅིག་འདྲེས་ལྟ་རྒྱུ་མེད། །ཡིན་མིན་ཡོད་མེད་བདེན་བརྫུན་འཛིན་པ་གཏོར། །ཕྱི་ནང་སྣོད་བཅུད་ཐམས་ཅད་གཅིག་ཏུ་འདྲེས། །སངས་རྒྱས་སེམས་ཅན་བདག་གཞན་གཅིག་ཏུ་འདྲེས། །ཡེངས་དང་མ་ཡེངས་བསྒོམ་དང་མ་བསྒོམས་མེད། །བྱར་མེད་བརྗོད་མེད་བརྗོད་པ་ཀུན་གྱི་གཞི། །གེགས་དང་གོལ་སར་ལྟུང་བའི་ཡ་ང་ཞི། །འཐོབ་བྱ་ཐོབ་བྱེད་འབྲས་བུ་རང་ལས་རྙེད། །མདོ་རྒྱུད་མན་ངག་ཆོས་གཏེར་ཁོང་ནས་བརྡོལ། །མ་རྟོགས་སྨིག་སྒྱུ་ལྟ་བུའི་འགྲོ་བ་ལ། །བཅོས་མིན་ཤུགས་འབྱུང་སྙིང་རྗེ་སྐབས་སུ་ལྡང་། །ཉོན་མོངས་དུག་ལྔའི་རྣམ་རྟོག་ཕྲ་རགས་ཀུན། །སོ་མ་ཉམས་པར་ཡེ་ཤེས་ཆོས་སྐུར་འཆར། །གོ་བ་ཉམས་སྣང་མིན་པར་མངོན་སུམ་དུ། །དེ་ལྟར་རྟོགས་ན་ལྟ་བ་རྟོགས་པ་ལགས། །དེ་འདྲ་རྟོགས་པའི་ཐབས་
ནི་བསྒོམ་པ་སྟེ། །བྱང་ཆུབ་སེམས་ཀྱི་ཀུན་སློང་མ་ལེགས་ན། །སྒོམ་སྒྲུབ་བརྩོན་ཡང་ཐེག་དམན་ཉན་ཐོས་ལམ། །ཐུན་གྱི་ཐོག་མར་སེམས་ཅན་ཐམས་ཅད་ཀུན། །བླ་མེད་རྫོགས་པའི་སངས་རྒྱས་ཐོབ་པའི་ཕྱིར། །བདག་གིས་འདི་ཉིད་ཉམས་སུ་ལེན་སྙམ་པའི། །སེམས་བསྐྱེད་བཟང་པོ་ཁ་ཙམ་མིན་པ་གཅེས། །རང་ལུས་ཡི་དམ་ལྷ་རུ་མ་བསྒོམས་ན། །མི་ཆེར་བསྒོམས་ཀྱང་ལམ་གྱི་བགྲོད་ཐག་རིང་། །སྦྱང་གཞི་སྦྱོང་བྱེད་ཕྱོགས་ཙམ་མ་ཤེས་ན། །ལྷ་སྐུ་གསལ་ཡང་གྱ་ནོམ་ལྷར་ཞེན་ཞེས། །རྒྱུད་ནས་གསུངས་པའི་བླ་མེད་བསྐྱེད་རིམ་མིན། །སྣོད་ཀྱི་འཇིག་རྟེན་རང་ལུས་ཆགས་པའི་རིམ། །སྦྱང་ཕྱིར་གཞལ་ཡས་ཁང་ནི་བསྐྱེད་པ་དང་། །བཅུད་ཀྱི་སེམས་ཅན་ཕུང་ཁམས་སྐྱེ་མཆེད་རྣམས། །སྦྱང་ཕྱིར་ཡི་དམ་ལྷ་སྐུ་བསྒོམ་པ་ཡིན། །དེ་ཡང་གསར་རྙིང་བླ་མེད་ཡི་དམ་ལྷ། །ཐམས་ཅད་འདྲ་ཡང་ཀུན་འདུས་ཀུན་ལས་ལྷག །སངས་རྒྱས་ཀུན་གྱི་སྤྲུལ་གཞི་མཐར་ཐུག་པ། །རྒྱལ་བ་ཀུན་འདུས་རྒྱ་མཚོ་སྤྱན་རས་གཟིགས། །ལྷ་གཅིག་དེ་བསྒོམ་ཐམས་ཅད་ཀུན་འདུས་ཏེ། །ལོངས་སྐུ་རྣམ་པར་སྣང་མཛད་གངས་ཆེན་མཚོ། །དེ་
ཡི་སྤྲུལ་པའི་ཆ་གཅིག་ཡིན་པར་གསུངས། །སྐལ་བཟང་སངས་རྒྱས་སྟོང་རྩ་བྱེ་བ་བརྒྱ། །པོ་ཊ་ལར་བཞུགས་སེམས་དཔའི་སྤྱན་རིས་གཟིགས། །བྱེ་བ་ཕྲག་བརྒྱ་དེ་བཞིན་རྔ་ཡབ་གླིང་། །པདྨ་འབྱུང་གནས་བྱེ་བ་ཕྲག་བརྒྱ་ཡང་། །ཐུགས་རྗེ་ཆེན་པོའི་སྤྲུལ་པའི་ཆ་ཤས་རེ། །བདེ་དགྱེས་གསང་གསུམ་དུས་འཁོར་གདན་བཞི་སོགས། །རྒྱུད་སྡེ་ཆེན་པོའི་དཀྱིལ་འཁོར་ཐམས་ཅད་ནི། །ཤཱཀ་ཐུབ་ལོངས་སྐུའི་སྒྲུབ་ཐབས་རེ་རེ་སྟེ། །ཤཱཀ་ཐུབ་སངས་རྒྱས་སྟོང་རྩར་བཅས་པ་ཡང་། །སྤྱན་རས་གཟིགས་ཀྱི་སྤྲུལ་པ་ཆ་ཤས་རེ། །དེ་ཡི་སྒྲུབ་ཐབས་རྒྱུད་སྡེ་སོ་སོ་ནས། །དཔག་མེད་གསུངས་ཀྱང་བླ་མེད་རྒྱུད་སྡེ་མཆོག །དེ་ལའང་གསུམ་ལས་གཉིས་མེད་རྒྱུད་ཡིན་པས། །ལམ་ཐག་ཉེ་ཞིང་དཀའ་ཚེགས་མེད་པ་དང་། །གསར་རྙིང་གཏེར་གསུམ་ཞལ་འཆམ་རྩོད་པ་བྲལ། །ཐ་སྙེད་མཁས་པ་སུས་ཀྱང་བཀག་པ་མེད། །བབས་བྱིན་རླབས་སོ་མ་ཉམས། །དམ་ཚིག་སེལ་མེད་བརྒྱུད་པ་རིང་ཐུང་མེད། །རྒྱལ་བ་རྒྱ་མཚོ་ལྷ་དགུ་ལྷ་ལྔ་གཉིས། །འདི་ལས་ཁུངས་བཙུན་འདི་ལས་ཟབ་པའི་ཆོས། །
ས་སྟེང་འདི་ན་མི་རྙེད་བདག་གིས་སེམས། །ཕུང་པོ་ལྔ་པོ་སྦྱང་ཕྱིར་ཡབ་ལྔ་དང་། །ཁམས་ལྔ་སྦྱང་ཕྱིར་དེ་ཡི་ཡུམ་ལྔ་པོ། །སྐྱེ་གནས་བཞི་པོ་སྦྱང་ཕྱིར་ཌཱཀི། །དབང་པོ་ལྔ་སྦྱང་མཆོད་པའི་ལྷ་མོ་ལྔ། །འབྱུང་བ་ལྔ་དང་དུག་ལྔ་ཕུང་པོ་ལྔ། །སྦྱང་ཕྱིར་ལྷ་ལྔ་ལྷ་དགུ་ཤེས་པར་བྱ། །དེ་ཡང་མིན་ལ་ཡིན་པར་བསྒོམ་པ་མིན། །དངུལ་རྡོ་དངུལ་ཡིན་བཞུས་ན་དངུལ་འོང་ལྟར། །རང་ལུས་ལྷ་ཡིན་བསྒོམས་ན་ལྷར་འགྱུར་བ། །དེ་དོན་ཤེས་ན་བླ་མེད་བསྐྱེད་རིམ་ཡིན། །དེ་ཕྱིར་ལྷ་དགུ་ལྷ་ལྔ་གང་འདོད་པ། །ཆོ་ག་བཞིན་དུ་སོ་སོར་དམིགས་པ་གསལ། །མཐར་ནི་སྟོང་པར་བསྡུ་བའི་བར་མཚམས་ཤིག །བསྐལ་པ་ཆེན་པོ་ཆགས་ནས་མ་ཞིག་བར། །ཚོགས་བསགས་སྒྲིབ་སྦྱང་བྱས་དང་བསོད་ནམས་མཉམ། །མདོ་ལས་སྔགས་ལམ་ཐག་ཉེ་དེ་ཡི་གནད། །སྦྱང་གཞི་ངག་ལས་སྦྱོང་བྱེད་སྔགས་དང་རླུང་། །སྦྱང་འབྲས་གསུང་གི་རྡོ་རྗེ་ཐོབ་པའི་ཐབས། །གསང་སྔགས་རིག་སྔགས་གཟུངས་སྔགས་མཐའ་ཡས་ཀྱང་། །ཕན་ཡོན་ཡིག་དྲུག་འདྲ་བ་གཞན་མ་མཆིས། །གངས་རིའི་ཁྲོད་དང་ཁྱད་པར་བར་ལམ་འདིར། །ཡི་གེ་དྲུག་པའི་
བཀའ་བབས་ལུང་བསྟན་གསལ། །སྙིགས་མ་ལྔ་བརྒྱའི་ཐ་མའི་དུས་ངན་དུས། །ལྷ་འདི་སྔགས་འདི་ཐུགས་རྗེ་བྱིན་རླབས་མྱུར། །ཇེ་དར་འོང་བ་ལུང་བསྟན་ཀུན་ན་ཡོད། །ཨོ་རྒྱན་ཇོ་བོ་རྗེ་དང་སྲོང་བཙན་སྒམ། །ལབ་སྒྲོན་ཀུན་གྱིས་ཞལ་གདམས་ཞལ་ཆེམས་མཐུན། །དེ་ཕྱིར་ཡིག་དྲུག་སྔགས་ཀྱི་ནོར་བུ་ལགས། །སངས་རྒྱས་ཀུན་གྱི་ཐུགས་རྗེ་བྱིན་རླབས་ཀུན། །སྔགས་དང་ཡིག་འབྲུའི་གཟུགས་སུ་སྣང་བའོ། །དེ་ལས་ཀྱང་ནི་ཡིག་བཅུ་ཟབ་གནད་ཆེ། །སངས་རྒྱས་ཀུན་གྱི་སྐུ་གསུང་ཐུགས་གསུམ་གྱི། །སྙིང་པོ་འདུས་པ་ཨོཾ་ཨཱཿཧཱུྃ་གསུམ་སྟེ། །གསར་རྙིང་རྒྱུད་སྡེ་ཀུན་ནས་རྒྱ་ཆེར་བསྔགས། །ཧཱི༔ཡིག་ཐུགས་རྗེ་ཆེན་པོའི་ཐུགས་སྲོག་སྟེ། །འབྲུ་དྲུག་རིགས་དྲུག་སྐྱེ་སྒོ་གཅོད་པའོ། །ཐུགས་ཀར་ཧྲིམཐར་ཡིག་བཅུ་འཁོར་བ་ལས། །བདག་བསྐྱེད་ཡབ་རྣམས་ཀྱི་ཐུགས་ཀར་ཟླ་བའི་སྟེང་དུ་ས་བོན་ཧཱི༔ཡིག་དམར་པོ་འགྲེང་ཐབས་སུ་གནས་པའི་མཐར། ཡིག་བཅུ་སྔགས་ཀྱི་ངོ་ཕྱི་ལ་བསྟན་པ་གཡས་སུ་ཀྱི་ལི་ལི་འཁོར་བ། ཡུམ་རྣམས་ཀྱི་ཐུགས་ཀར་ཧཱུྃཡིག་གི་མཐར་ཡུམ་སྔགས་ངོ་ནང་དུ་བསྟན་པ་ གཡོན་དུ 
་འཁོར་བ། རིགས་བཞིའི་ཌཱཀི་ཐུགས་ཀར་ཧ་རི་ནི་ས་བསྒོམ་པ་ནི་སྒྲུབ་ཐབས་གཞུང་ཆེན་ནས་བྱུང་བའོ། ལྷ་ལྔ་ལས་རྒྱས་པར་སྒྲུབ་ཐབས་གཞུང་ལས་
གཙོ་བོའི་ཐུགས་ཀར་ཧི༔ཡིག་དམར་པོའི་མཐར་ཡིག་བཅུ་དང་། རྟ་མགྲིན་པདྨ་འབྱུང་གནས་ཕག་མོ་ཆོས་སྐྱོང་རྣམས་ཀྱི་ཐུགས་ཀར་རང་རང་གི་ས་བོན་དང་། དེའི་མཐར་རང་རང་གི་སྔགས་འཁོར་ལུགས་སོགས་ཞིབ་པར་ཡོད་པ་མཆན། །འོད་འཕྲོས་སྣོད་ཀྱི་འཇིག་རྟེན་བདེ་ཆེན་ཞིང་། །རིགས་དྲུག་སེམས་ཅན་སྤྱན་རས་གཟིགས་དབང་སྐུ། །སྒྲ་རྣམས་ཡི་གེ་དྲུག་གམ་བཅུ་ཡི་སྒྲ། །དམིགས་པ་ཆ་གསལ་ན་སྐད་ཅིག་དུང་མང་འགྲུབ། །སངས་རྒྱས་སེམས་ཅན་གཉིས་ཀྱི་ཁྱད་པར་ཡང་། །སྣང་བ་དག་དང་མ་དག་ཁོ་ན་ལགས། །དེ་ཕྱིར་སྣོད་བཅུད་དག་པ་རབ་འབྱམས་བསྒོམ། །ཁྱད་པར་ཟབ་གནད་བསྲེ་བ་སྐོར་གསུམ་ལས། །རྒྱ་བོད་གྲུབ་ཐོབ་ནམ་མཁའི་ཁམས་གང་བ། །རང་གི་ཐུགས་ཀའི་སྔགས་ཕྲེང་འོད་ཟེར་དེས། །མཆོད་པས་སྐུ་གསུང་ཐུགས་ནི་བདེ་བས་མཉེས། །ཐམས་ཅད་ཐུགས་རྗེ་ཆེན་པོའི་སྐུར་གྱུར་ནས། །ཆར་བཞིན་བབས་ནས་རང་ལ་སིབ་སིབ་ཐིམ། །བྱིན་རླབས་རྟོགས་པའི་ཡེ་ཤེས་འབར་བསམ་ཞིང་། སྔགས་བཟླས་འབད་པ་སྔགས་དང་བསྲེ་བ་སྟེ། །སྔགས་ནི་ཡིད་འདོན་རླུང་ནི་ཕྱིར་འབུད་དུས། །འོད་ཟེར་སྤྲོ་ཞིང་མཆོད་པ་ཕུལ་བ་དང་། །ཚུར་རྡུབ་མཉམ་དུ་
རང་ལ་བསྟིམ་པ་དང་། །རླུང་དགངས་ཚེ་ན་ངོ་བོ་ཉིད་ལ་བལྟ། །དེ་ནི་རླུང་དང་བསྲེ་བའི་མན་ངག་གོ །དེ་བཞིན་ཨོ་རྒྱན་སྐུ་ལྔ་མཚན་བརྒྱད་དང་། །རྗེ་འབངས་ཉེར་ལྔ་གྲུབ་ཆེན་བརྒྱད་ཅུ་བཞི། །མར་མི་དྭགས་སོགས་བཀའ་བརྒྱུད་བླ་མ་རྣམས། །སྤྱིའམ་གང་མོས་རེ་རེ་བསྲེ་བ་ནི། །བླ་སྒྲུབ་ཀུན་ལས་ཁྱད་འཕགས་ཨེ་མ་ཧོ། །ཉམས་རྟོགས་སྐྱེ་དང་བོགས་འདོན་འདི་རང་ཟབ། །དེ་བཞིན་བདེ་དགྱེས་གསང་གསུམ་དུས་འཁོར་དང་། །གདན་བཞི་ཐོད་པ་མཱ་ཡ་གཤེད་དམར་ནག །བཀའ་དགོངས་ཕུར་གསུམ་ཞི་ཁྲོ་ཡང་དག་དང་། །ཞི་དྲག་རྟ་མགྲིན་ཕྱག་རྡོར་ལ་སོགས་བསྲེ། །རྒྱུད་སྡེ་བཞི་ཡི་སྤྱི་སྒྲུབ་ཅེས་བྱ་བ། །གྲུབ་པའི་རྒྱལ་མོས་གསུངས་པའི་མན་ངག་སྟེ། །གྲུབ་ཆེན་པཀིས་རྒྱ་ཆེར་བཀྲོལ་བའོ། །དེ་བཞིན་སྡིག་སྒྲིབ་སྦྱོང་ལ་རྡོ་རྗེ་སེམས། །ལས་སྒྲིབ་རྒྱུན་གཅོད་རྒྱལ་བ་མི་འཁྲུགས་པ། །ངན་སོང་སྒོ་གཅོད་ཀུན་རིག་རྣམ་སྣང་མཛད། །འཇིགས་པ་སྐྱོབ་ལ་སྒྲོལ་མ་ཉི་ཤུ་གཅིག །ཚེ་བསྲིང་ཚེ་དཔག་མེད་དང་སྒྲོལ་མ་དཀར། །ནད་སེལ་སྨན་ལྷ་མཆེད་བརྒྱད་ལོ་མ་ཅན། །ཕོ་གདོན་གུ་དྲག་མོ་གདོན་མི་གཡོ་བ། །ཀླུ་ལ་ཁྱུང་དང་ནཱ་
ག་རཀྵ་སྟེ། །བསོད་ནམས་སྤེལ་འདོད་ཛམ་ལྷ་ནོར་རྒྱུན་མ། །རླུང་ནི་བླ་མ་ཡི་དམ་བསྲེ་བ་གཅེས། །ལྷ་གཅིག་སྔགས་གཅིག་ཀུན་འགྲུབ་ཨེ་མ་ཧོ། །རླུང་ནི་མཁའ་འགྲོ་ཆོས་སྐྱོང་བསྲེ་བ་ཡང་། །ཕག་ཁྲོས་སེང་གསུམ་བེར་དང་ཕྱག་བཞི་དྲུག །གུར་དང་མ་ནིང་ལྷ་མོ་དཔོན་གཡོག་སོགས། །ཡེ་ཤེས་ལྷ་རྣམས་ཐམས་ཅད་རིགས་འགྲེས་སོ། །རླུང་ནི་རིགས་དྲུག་སེམས་ཅན་བསྲེ་བ་ཡང་། །མ་རྒན་འགྲོ་ལ་སྙིང་རྗེ་ཚད་མེད་བསྒོམ། །རླུང་ངམ་སྔགས་ཀྱི་འོད་ཟེར་ཕར་འཕྲོས་ཚེ། །རང་གི་བསོད་ནམས་དགེ་ཚོགས་འགྲོ་ལ་བསྟིམ། །ཐམས་ཅད་བདེ་བ་ཚད་བཟུང་མེད་པར་བསྒོམ། །བདེ་བའི་རྒྱུ་ནི་དགེ་བཅུ་སྤྱད་པར་གྱུར། །འོད་ཟེར་བསྡུ་ཞིང་རླུང་ནི་ཚུར་རྔུབ་དུས། །འགྲོ་བའི་སྡིག་སྒྲིབ་སྡུག་བསྔལ་མ་ལུས་པ། །སིབ་སེ་བསྡུས་ནས་རང་ལ་ཐིམ་པ་ཡིས། །དཔེར་ན་མེ་དཔུང་ལ་ནི་ཤིང་བསྣན་ལྟར། །རང་ཉིད་ཐུགས་རྗེ་ཆེན་པོ་གཟི་བརྗིད་འབར། །ཁོང་དུ་གནས་ཚེ་སྟོང་ཉིད་ངོ་བོ་སྐྱོང་། །ཐུབ་པས་གཞན་དོན་མཛད་པས་རྫོགས་སངས་རྒྱས། །བྱིས་པས་རང་དོན་བྱས་པས་འཁོར་བར་འཁྱམས། །སངས་རྒྱས་
ཐོབ་པའི་ཐབས་ལ་འདི་ལས་ཟབ། །པཎ་ཆེན་དྷི་པཾ་ཀ་རས་མ་རྙེད་གསུངས། །གདོན་དང་ལྷ་འདྲེའི་བྱད་ཁ་ལ་སོགས་ལ། །གང་ཡིན་དེ་ལ་ཕུར་ཚུགས་འདི་བསྒོམས་པས། །གནོད་པ་ཞི་ཞིང་དམ་ལ་ཐོགས་ངེས་ཏེ། །བྱང་ཆུབ་སེམས་ཀྱི་འཇམ་གཅོད་གཅོད་ཀྱི་མཆོག །འཆད་ཁ་བ་དང་སྐྱོབ་པའི་མཛེ་བཅོས་ཡིན། །དེ་ལྟར་བསྐྱེད་པའི་རིམ་པ་བསྒོམ་པ་དེ། །གཤེགས་གསོལ་བསྡུ་ཆོག་ངེས་པར་མི་དགོས་ཏེ།་་་བདག་བསྐྱེད་ལ་ཡེ་ཤེས་སེམས་དཔའ་བསྟིམ་པ་དེ་མཚན། །བྱང་ཆུབ་མ་ཐོབ་བར་དུ་མི་གཤེགས་བར། །ཕྱག་རྒྱ་སྒོ་བཅད་བར་དུ་བསྒྲུབ་པ་ཞེས། །བླ་མེད་ཨ་ཏི་ཡོ་གའི་ཁྱད་ཆོས་ལགས། །མཐའ་ནས་དབུས་ཡལ་ལོ་སོགས་བསྒོམ་པ་ནི། །དྲང་དོན་ལས་ནི་དང་པོའི་བསྒོམ་བྱ་སྟེ། །སྒོམ་མཁན་སེམས་ལ་བལྟས་པས་སྟོང་ཉིད་དུ། །མངོན་སུམ་མཐོང་བ་དེ་ཉིད་སྟོང་ཉིད་དངོས། །དེ་ཡང་གོམས་ནས་མཁའ་ལ་འཇའ་ཤར་བཞིན། །བསྐྱེད་རིམ་སེམས་ངོ་མི་འགལ་ཟུང་འཇུག་ཏུ། །བསྒོམ་པ་དེ་ཉིད་བསྐྱེད་རྫོགས་ཟུང་འཇུག་སྟེ། །ལུས་ནི་སྣང་སྟོང་ཐུགས་རྗེ་ཆེན་པོའི་སྐུ། །ངག་ནི་གྲག་སྟོང་ཡིག་དྲུག་ཆུ་བོའི་རྒྱུན། །སེམས་ནི་བདེ་སྟོང་མ་བཅོས་
ལྷུག་པ་སྟེ། །དེ་གསུམ་རྒྱུན་གྱི་ཉམས་ལེན་དངོས་གཞིའོ། །ཁྱད་པར་སེམས་ཀྱི་ངོ་བོ་སྐྱོང་བའི་གནད། །རྟོགས་པ་བཟང་པོ་སྐྱེ་འདོད་རེ་བ་དང་། །གེགས་དང་གོལ་ས་ལ་སོགས་དོགས་པ་དང་། །བདེ་འདོད་གསལ་འདོད་སྟོང་རྗེན་འདོད་པ་དང་། །བྱིང་དང་རྨུག་དང་འཕྲོ་རྒོད་མི་འདོད་སོགས། །རེ་དོགས་དགའ་སྡུག་གང་བྱུང་བཅོས་པ་ཡིན། །མ་བཅོས་ཞོག་ཅེས་བླ་མས་མ་གསུང་ངམ། །བླང་དོར་མེད་པ་གལ་ཆེན་མ་གསུང་ངམ། །དགག་སྒྲུབ་སྤང་བླང་བྲལ་བར་མ་གསུང་ངམ། །བློ་ཡིས་མ་རིག་%ཞོག་ཅིག་མ་གསུང་ངམ། །རང་གར་ཅོག་གེ་ཞོག་ཅིག་མ་གསུང་ངམ། །ཐ་མལ་ཁྲེག་གེར་ཞོག་ཅིག་མ་གསུང་ངམ། །ཆུ་དང་རླབས་གཉིས་ཆུ་རུ་མི་གཅིག་གམ། །སྤྲིན་དང་ཁུ་རླངས་འཇའ་ཚོན་སྣ་ཚོགས་པ། །ནམ་མཁའ་ལས་བྱུང་ནམ་མཁའ་ཉིད་ལ་ཐིམ། །ནམ་མཁའ་ལས་གཞན་དེ་དག་ཡོད་དམ་ཅི། །སེམས་ལས་བྱུང་བའི་རྟོགས་ཚོགས་ཇི་སྙེད་པ། །སེམས་ལས་བྱུང་ཞིང་སེམས་ཀྱི་ཀློང་དུ་ཐིམ། །སེམས་ལས་གཞན་པའི་རྟོགས་ཚོགས་ཡོད་དམ་ཅི། །སེམས་ཉིད་ཡེ་ནས་ཆོས་སྐུ་རྗེན་པ་རུ། །མདོ་རྒྱུད་ཀུན་ལས་
གསུངས་པ་མ་ཐོས་སམ། །མ་བཅོས་བཞག་པ་དེ་ནི་ཆོས་སྐུ་སྟེ། །བཅོས་མའི་ལམ་གྱིས་འཕགས་ལམ་མི་འཐོབ་ཅེས། །རྒྱལ་བས་ཡང་ཡང་གསུངས་པ་མ་ཐོས་ནས། །ཧ་རེ་ལོང་ངེ་ཧར་སྐྱོན་མ་ཆེས་སམ། །དེ་ལྟར་ཡིན་སྙམ་སྐྱུར་བས་ག་ལ་ཆོག །མ་བརྗེད་དྲན་པ་གསལ་འདེབས་ཡང་ཡང་གཅེས། །དེ་ལ་འདི་བསྒོམ་གཏད་སོ་མེད་པ་གཅེས། །ངེས་ཤེས་འཛིན་པ་ནང་ནས་ཞིག་པ་གཅེས། །དེ་ལ་བོགས་འདོན་གདམས་ངག་རྣམ་པ་བཞི། །མོས་གུས་སྒོ་ནས་གེགས་སེལ་བོགས་འདོན་པ། །ཉམས་རྟོགས་མ་སྐྱེས་སྐྱེ་དང་སྐྱེས་པ་ལ། །བོགས་ཐོན་གེགས་སེལ་བརྟན་པ་ཐོབ་པ་ཡི། །མན་ངག་གཅིག་ཆོག་དཀར་པོ་གཅིག་ཐུབ་ནི། །བླ་མའི་རྣལ་འབྱོར་གསར་རྙིང་ཀུན་ནས་གསུངས། །ནཱ་རོ་རྒོད་ཚངས་གཉིས་པོས་རྩལ་དུ་བཏོན། །བཀའ་བརྒྱུད་ཀུན་གྱི་ཉམས་ལེན་མཐིལ་པོ་ལགས། །དག་སྣང་སྦྱོང་དང་གསོལ་བ་འདེབས་ཡུལ་གཉིས། །གཅིག་པར་མི་སེམས་གནས་སྐབས་སོ་སོ་ལགས། །དག་སྣང་ཆོས་མཛད་ཡོངས་ལ་སྦྱང་བར་བྱ། །ཡོན་ཏན་སུ་ལ་འདུག་ཀྱང་བླང་བར་བྱ། །གསོལ་བ་འཆུགས་མེད་དམ་པ་རྗེ་ལ་བཏབ། །བཀའ་དྲིན་ཆེ་
བའི་སོ་སྐྱེ་བླ་མ་ཡང་། །གཙོ་བོ་དེ་དང་ངོ་བོ་དབྱེར་མེད་བསམ། །བླ་མ་མི་ཡི་གཟུགས་སུ་མི་བསྒོམ་པར། །སངས་རྒྱས་བྱང་སེམས་སྐུ་རུ་བསྒོམ་པར་བྱ། །ཁྱི་སོར་རིང་བསྲེལ་ཟེར་བའི་ངག་རྒྱུན་བཞིན། །བླུན་དད་ཁོ་ནས་ཉམས་རྟོགས་སྐྱེ་བར་དཀའ། །རྐོས་ཕོར་རི་མོ་གང་ཡོད་ཚ་ཚར་དོད། །མཚུངས་མེད་བླ་མ་མ་མཇལ་མ་ཐོབ་ཀྱང་། །དྭགས་པོ་དུས་མཁྱེན་རྒོད་ཚངས་པ་ལ་སོགས། །དེ་ལས་བརྒྱུད་པའི་ལུང་རྒྱུན་ཐོབ་ཕྱིས་ནས། །དེ་དག་གང་འོས་རྩ་བའི་བླ་མར་རུ། །བཟུང་ནས་གསོལ་བ་ཐོབ་དང་བྱིན་རླབས་འཇུག །ཉམས་རྟོགས་སྐྱེ་བར་སོ་སོས་ཞལ་གྱིས་བཞེས། །དེ་ཡང་རང་གི་རྩ་བའི་བླ་མ་དང་། །ཐ་དད་མི་བསྒོམ་དབྱེར་མེད་བསྒོམས་ན་མྱུར། །བླ་མའི་རྣལ་འབྱོར་ལོགས་སུ་བསྒོམ་མི་དགོས། །ལྷ་དགུ་བསྒོམ་ཆེ་རིགས་བདག་འོད་དཔག་མེད། །རྩ་བརྒྱུད་བླ་མ་ཀུན་འདུས་ངོ་བོར་བསྒོམ། །ལྷ་ལྔ་བསྒོམ་དུས་རྩ་བའི་བླ་མ་དང། །ཨོ་རྒྱན་དབྱེར་མེད་བརྒྱུད་པའི་བླ་མ་དང་། །རྒྱ་བོད་གྲུབ་ཆེན་ཐམས་ཅད་འཁོར་དུ་བསྒོམ། །གསོལ་འདེབས་ཡིག་དྲུག་ཉིད་ཀྱི་ཆོག་པ་ཡིན། །སྤྲུལ་པའི་རྒྱལ་པོའི་
ཞལ་གདམས་ཡིན་མོད་ཀྱི། །གསོལ་འདེབས་གང་རུང་མོས་གུས་དྲག་པོ་ཡིས། །རྒྱང་འབོད་བྱས་ན་འཕྲལ་དུ་བོགས་འོང་སྣང་། །ཐེ་ཚོམ་སོམ་ཉི་བྱུང་དུསུ་སྤྱི་བོ་ཡི། །བླ་མ་ཉིད་ལ་དད་གུས་གདུང་ཤུགས་ཀྱིས། །རྩེ་གཅིག་གསོལ་བ་བཏབ་རྗེས་ངོ་བོ་སྐྱོང་། །གང་ཤར་དེ་ལ་གེགས་སྐྱོན་ཡོད་མི་སྲིད། །མོས་གུས་ཕྱག་ཆེན་དགོངས་པ་དེ་ཉིད་དོ། །བདེ་བའི་སྒོ་ནས་བོགས་འདོན་ཐབས་ལམ་ནི། །རང་ཉིད་ཐུགས་རྗེ་ཆེན་པོར་གསལ་བ་ཡི། །རྩ་གསུམ་འཁོར་ལོ་ལྔ་པོ་གསལ་བཏབ་ནས། །སྤྱི་མགྲིན་སྙིང་ལྟེ་གསང་བའི་རྩ་མདུད་དབུས། །ཨོཾ་ཨཱཧཱུྃ་ཧཱུྃ་ཨཱདཀར་དམར་མཐིང་སེར་ལྗང་། །གཏི་མུག་འདོད་ཆགས་ཞེ་སྡང་ང་རྒྱལ་དང་། །ཕྲག་དོག་ལྔ་ཡི་ངོ་བོར་བསྒོམ་པར་བྱ། །འབུད་པ་དགུ་ཕྲུག་གིས་ནི་རླུང་རོ་འབུད། །རྔུབ་པ་དང་མཉམ་སེམས་ཅན་ཐམས་ཅད་ཀྱི། །དུག་ལྔའི་ལས་སྒྲིབ་ཡིག་འབྲུ་ལྔ་ལ་བསྟིམས། །འདོམས་བར་དབུ་མའི་མར་སྣེ་རཾ་ཡིག་ལས། །མེ་འབར་དུག་ལྔའི་ས་བོན་འབྲུ་ལྔ་བསྲེགས། །ཐུགས་རྗེ་ཆེན་པོ་དཀར་དམར་མཐིང་སེར་ལྗང་། །ལྔ་རུ་གནས་འགྱུར་རྩ་འདབ་སོ་སོ་ལ། །གཙོ་བོའི་མདོག་ཅན་ཌཀྐི་རྩ་གྲངས་
བསྐྱེད། །སླར་ཡང་རླུང་བཟུང་མེ་འབར་ལུས་ཀུན་ཁེངས། །ཚངས་བུག་ཧཾ་དཀར་མགོ་ཐུར་བསྟན་པ་ལས། །བདུད་རྩི་བྱང་སེམས་བབས་པས་འཁོར་ལོ་བཞིའི། །རྩ་རྣམས་གང་བས་བདེ་ཆེན་ཉམས་འབར་བསམ། །འཁོར་ལོ་བཞི་ལ་དགའ་བཞི་ཉམས་མྱོང་ནས། །གསང་བའི་སྦུ་གུ་ཧཱུྃ་ཡིག་དམར་པོས་བཀག །ལྔ་སྦྱངས་དྲུག་སྐོར་སོ་བདུན་མ་ལ་སོགས། །འཁྲུལ་འཁོར་ཐུབ་ན་དངོས་སུ་དྲོད་སྐྱེ་ཞིང་། །དེ་ནས་བདེ་ཉམས་དེ་ནས་མི་རྟོག་འཆར། །དང་པོ་འཁྲུལ་འཁོར་རླུང་གིས་ལུས་དུབ་དུས། །མི་སྒྱུར་སྙིང་རུས་བྱེད་པ་གེགས་སེལ་ཡིན། །དེ་ནས་དྲོད་འབར་བདེ་བ་རྒྱས་པའི་དུས། །ངོ་བོ་བལྟས་ལ་བདེ་སྟོང་དབྱེར་མེད་བསྲེས། །ཐིག་ལེ་མ་ཉམས་སྲོག་ལྟར་བསྲུང་བ་གནད། །དེ་ནས་མི་རྟོག་སྒོ་ནས་བོགས་འདོན་པ། །ཉལ་དུས་སེང་གེ་ཉལ་སྟབས་བྱས་ལ་ཉལ། །བསྡུ་རིམ་ནང་ལྟར་སྣོད་བཅུད་རང་ལ་བསྡུ། །དེ་ཡང་ཧྲིདང་ཐིག་ལེ་ན་དཱར་བསྡུ། །དེ་ནས་མི་དམིགས་ཉམས་ལེན་ངང་ལ་ཉལ། །གཉིད་དུ་སོང་ནས་རྨི་ལམ་མ་རྨིས་བར། །རྣམ་ཤེས་དབུ་མར་ཡུད་ཙམ་ཚུད་པའི་དུས། །སེམས་ངོ་ཟིན་ཞིང་དེ་ཡི་
ངང་གནས་ན། །དེ་ལ་འོད་གསལ་ཟིན་པ་བྱ་བའོ། །མ་གཉིད་བར་དུ་སེམས་ངོ་མ་ཡེངས་ཤིང་། །གཉིད་ནས་ཟིན་དང་མ་ཟིན་མི་འབྱེད་ཀྱང་། །རྨི་ལམ་ཟིན་མེད་ཕྱིར་ནངས་སད་མ་ཐག །སེམས་ངོའི་སྟེང་དེར་རྗེན་ནེ་འདུག་པ་དང་། །ཕྱིར་ནངས་ཁམས་བདེ་རིག་པ་དྭངས་བ་ན། །འཐུག་པོའི་འོད་གསལ་ཟིན་པ་ཡིན་ཞེས་བྱ། །གཉིད་མ་ཐག་ཏུ་གཉིད་པ་ཡིན་ཤེས་ཤིང་། །རྨི་ལམ་མེད་པར་སེམས་ངོའི་ངང་གནས་ན། །དེ་ནི་སྲབ་མོའི་འོད་གསལ་གོ་བར་སླ། །གཉིད་མ་ཐག་ཏུ་མིག་གི་ཐད་སོ་ནས། །འོད་དང་སྒྲོན་མེ་བཏེག་པ་འདྲ་སྣང་ཞིང་། །དེ་ཡིས་རྐྱེན་བྱས་སེམས་ངོའི་ངང་གནས་ན། །དེ་ནི་ཉམས་ཀྱི་འོད་གསལ་དེ་བས་དམན། །རྨི་ལམ་རྨིས་ན་ཉིན་མོའི་བག་ཆགས་ཀྱིས། །སེམས་ངོ་སྐྱོང་བས་ཉིན་བས་གསལ་བ་དང་། །རྨི་ལམ་རྨི་ལམ་ཡིན་པར་ངོ་ཤེས་ཤིང་། །དེ་ནས་བསྒོམ་པ་རྨི་ལམ་འོད་གསལ་ལོ། །དེ་དག་མ་ཟད་དབང་དུ་ཟིན་པ་དང་། །དམ་དུམ་ཟིན་སོགས་མ་ངེས་ཅི་ཡང་འབྱུང་། །འདི་ནི་མི་རྟོག་སྒོ་ནས་བོགས་འདོན་ཡིན། །འདི་ལ་གོམས་ན་འཆི་དུས་འོད་གསལ་ཟིན། །བར་དོ་མི་བགྲོད་ཡར་གྱི་ཟང་ཐལ་ཡིན། །དེ་
ནས་གསལ་བའི་ངང་ནས་བོགས་འདོན་པ། །ཐེག་དགུའི་ཡང་རྩེ་ཨ་ཏི་ཡོ་གའི་ཆོས། །རྒྱལ་བ་རྒྱ་མཚོ་ལྷ་ལྔ་དང་འབྲེལ་བ། །རྫོགས་ཆེན་ཐོད་རྒལ་གདམས་པ་ཉམས་ལེན་གཅེས། །སྙིང་དབུས་དྭངས་མ་ལྔ་ལྡན་འོད་ལྔའི་ཀློང་། །རིགས་ལྔ་ལ་སོགས་ཞི་བའི་ལྷ་ཚོགས་རྣམས། །དངོས་སུ་བཞུགས་པ་ཡེ་ཤེས་ལྔ་ཡི་འོད། །ཡེ་ཤེས་རྩ་ཡི་ལམ་ནས་མིག་ལ་གསལ། །ཙཀྱུས་སུརླའི་ཟེར་ལ་ཟིམ་བུས་བལྟས། །འཇའ་ཚོན་ཐིག་ལེ་ཐིག་ཕྲན་ལུ་གུ་རྒྱུད། །འཆར་བའི་ཟེར་གཉིས་ལ་ནི་རྒྱུན་དུ་བལྟ། །བཀྲག་མདངས་དེ་ལ་སེམས་གནས་མི་འཕྲོ་བ། །དེ་ཡི་ངོ་བོ་བལྟས་པས་སྟོང་པ་ཉིད། །གསལ་སྟོང་ཟུང་འཇུག་མིག་གིས་མངོན་སུམ་མཐོང་། །ཇེ་ཆེར་འཕེལ་བ་ཉམས་ལེན་གོང་འཕེལ་ཟེར། །བར་དོར་སྒྲ་འོད་ཟེར་གསུམ་ངོས་ཟིན་ནས། །ལོངས་སྐུའི་ཞིང་དུ་སྐྱེ་བར་རྒྱལ་བས་གསུངས། །སྐུ་གཟུགས་རེ་རེའམ་སྣ་ཚོགས་དུ་མ་འཆར། །རིག་པ་ཚད་ཕེབ་བར་དོ་བགྲོད་མི་དགོས། །ཕྱི་དབུགས་ཆད་ཚེ་འོད་ཟེར་སྦུ་གུ་ནས། །རིག་པ་རྡོར་སེམས་ལ་ཐིམ་སངས་རྒྱས་གསུངས། །ཡི་དྭགས་རྣམས་ནི་ཟས་ལ་དགྲར་མཐོང་
ལྟར། །ལོག་ལྟ་ཐོ་སྙད་མཁན་འགས་གཤེ་ན་ཡང་། །འབུམ་ཕྲག་དྲུག་ཅུ་རྩ་བཞིའི་རྒྱུད་ཀྱི་དོན། །བསྒོམ་མི་དགོས་པར་བལྟས་པས་སངས་རྒྱས་ཐབས། །ཐེག་དགུའི་ཡང་རྩེ་འདི་ལ་བརྩོན་འགྲུས་བསྐྱེད། །འདི་ཉིད་ཉམས་སུ་ལེན་པའི་ཚེ། ཐོག་མར་བླ་མ་མཚན་ཉིད་དང་ལྡན་པ་ལ། རྫོགས་ཆེན་དང་འབྲེལ་བའི་དབང་དང་རྫོགས་ཆེན་གྱི་ཁྲིད་ཐོབ་པ་ཤིན་ཏུ་གལ་ཆེ། དེ་ནས་ཉམས་སུ་ལེན་ཚེ་འཇའ་འོད་དང་ལྷ་སྐུ་ལ་སོགས་ཅི་མཐོང་ཡང་གཞན་ལ་བཤད་དུ་མི་རུང་། གལ་ཏེ་བཤད་ན་འདིའི་བཀའ་སྲུང་མ་གཟའ་དམ་གསུམ་ཡིན་པས་འཁུ་ལྡོག་འོང་བར་ཤེས་པས། གཞན་ལ་མི་བཤད་པ་ནི་ཆོས་འདིའི་དམ་ཚིག་ཡིན་གསུངས། །མཆན། །དེ་ཡིས་བསྒོམ་བྱའི་ཉམས་ལེན་ཕར་ཆེར་སོང་། །དེ་ནས་རྒྱུད་སྡེ་རྣམས་ནས་སྤྱོད་པ་ནི། །ཀུན་བཟང་བྷུ་སུ་ཀུ་དང་བརྟུལ་ཞུགས་སྤྱོད། །ཕྱོགས་ལས་རྣམ་རྒྱལ་ལ་སོགས་མང་གསུངས་ཀྱང་། །སྤྱོད་པ་དུས་དང་མ་འབྲེལ་གཡང་ས་ཆེ། །ཀུན་ཏུ་བཟང་པོའི་སྤྱོད་པ་གཡང་ས་མེད། །དེ་ཕྱིར་བཀའ་བརྒྱུད་ཀུན་གྱི་ལམ་འདི་བསྙག །ལུས་ཀྱི་སྤྱོད་ལམ་འདུལ་ཁྲིམས་གཙོ་བོར་བྱ། །སེམས་ཀྱི་ཀུན་བསལང་བྱང་སེམས་སེམས་བསྐྱེད་གཟབ། །ཉམས་ལེན་གཙོ་བོར་བསྐྱེད་རྫོགས་ཟབ་ལམ་བསྒོམ། །ལག་ལེན་གཙོ་བོ་
སྡིག་སྤང་དགེ་བ་བསྒྲུབ། །གནས་ཀྱི་གཙོ་བོར་རི་ཁྲོད་དགོན་པ་བསྟེན། །བག་ཡོད་གཙོ་བོར་ནག་ཆང་དུག་ལྟར་འཛེམ། །ཆགས་ཕྱི་གཙོ་བོར་བསྟན་པའི་རྐང་མི་འདྲེན། །འགྲོ་དོན་གཙོ་བོ་བྱམས་དང་སྙིང་རྗེ་བསྒོམ། །རྐྱེན་ཟློག་གཙོ་བོ་མཆོད་གཏོར་བསྐང་གསོར་འབད། །ཞེན་ལོག་གཙོ་བོ་བསྟན་དང་བླ་མ་དང་། །གྲྭ་རིས་ལ་སོགས་འདུ་ཕྱིར་མ་གཏོགས་པ། །རང་གི་སྒེས་ནོར་ཕུག་སྲིས་བསམ་པ་སྤང་། །དག་སྣང་གཙོ་བོ་ཕྲག་དོག་འགྲན་སེམས་དང་། །དོན་མ་གོ་བའི་ཅལ་སྒྲོག་གཤེ་སྐུར་སྤང་། །བཟོད་པའི་གཙོ་བོ་ཐུབ་པར་རྔན་ཆེན་དང་། །མི་ཐུབ་དགྲ་ལ་མནར་སེམས་འཆང་བ་སྤང་། །གཞན་ཕན་གཙོ་བོ་རང་ལ་རེ་བ་རྣམས། །འདི་ཕྱིར་གང་ཕན་སྐབས་སུ་གང་བབ་བྱ། །རྙེད་པས་རྙེད་ཚོལ་ལོག་འཚོའི་ཁེ་གྲགས་དང་། །བསྡུ་བའི་དངོས་པོ་བཞི་ཡི་འགྲོ་དོན་གཉིས། །བྱེད་ལུགས་འདྲ་ཡང་བསམ་པའི་ཁྱད་པར་སྟེ། །བསམ་པའི་འཁྱེར་ཕྱོགས་སེམས་བསྐྱེད་གནད་ཤེས་ན། །བྱང་ཆུབ་བསྒྲུབ་པའི་ཐབས་ནི་ཞོར་ལ་མཆིས། །གནད་མ་ཤེས་ན་སྡུག་བསྲན་ཨུ་ཚུགས་ནི། །རབ་ཏུ་ཆེ་ཡང་ས་ཆོད་ཆུང་བ་ལགས། །
རང་གི་ལུས་དང་ལོངས་སྤྱོད་དགེ་རྩར་བཅས། །འགྲོ་བ་མ་ལུས་སངས་རྒྱས་ཐོབ་པའི་ཕྱིར། །བླ་མ་ཡི་དམ་རྣམས་ལ་ཡང་ཡང་ཕུལ། །རང་ལ་བདག་བཟུང་སྤུ་ཙམ་མེད་པར་བྱ། །ཟ་འཐུང་འགྲོ་འཆག་བྱ་བ་ཐམས་ཅད་ཀུན། །དཀོན་མཆོག་མཆོད་དང་འགྲོ་བའི་དོན་ཕྱིར་ལས། །རང་གི་དོན་དུ་བྱས་པ་མེད་པར་བྱ། །རང་ལུས་ཡི་དམ་ལྷ་ཡི་དཀྱིལ་འཁོར་གསལ། །ཟ་འཐུང་ཚོགས་འཁོར་སྦྱིན་སྲེག་མཆོད་པ་སྟེ། །གོས་རྒྱན་གདན་སོགས་ལྷ་ཡི་རྒྱན་དང་ལྡན། །ལང་དང་འགྲོ་བ་སེམས་ཅན་དོན་ཕྱིར་བསམ། །ཁང་པ་གཞལ་ཡས་གདན་ནི་པད་ཟླར་བཞུགས། །འགྲོ་ཚེ་གཡས་ངོས་པདྨའི་སྡོང་པོ་ནི། །ཁ་ལྔར་དགྱེས་པ་ལྷ་ལྔའི་ལྷ་ཚོགས་བཞུགས། །དེ་ལ་བསྐོར་བའི་མོས་པ་བྱས་ལ་འགྲོ། །དབང་བསྐུར་ཆོས་བཤད་ལ་སོགས་བྱེད་ན་ཡང་། །ཟང་ཟིང་སྡུད་པའི་བསམ་པ་གདིང་ནས་སྐྱུར། །བཤད་དང་ཐོས་པའི་ཕན་ཡོན་ཁོ་ནར་དམིགས། །དད་གུས་བསྟོད་ར་གཤེ་སྐུར་འབར་ཤ་རྣམས། །གང་ཐོབ་ངོ་བོ་བལྟས་ལ་ཀློང་དུ་སྒྱུར། །ཚུལ་ཁྲིམས་གཙང་དང་ཉམས་ལེན་བཟང་བ་དང་། །ཡོན་ཏན་མཁས་དང་ནུས་པ་ཐོན་པ་སོགས། །རང་ལ་
རང་མགུ་ཁེངས་སེམས་ནམ་སྐྱེས་ཚེ། །ཐམས་ཅད་བརྗེད་པའི་ཕུང་འདྲེ་དེ་ཡིན་པས། །སྔོན་གྱི་པཎ་གྲུབ་རྣམས་ཀྱི་རྣམ་ཐར་ལས། །བལྟས་ན་དེ་རྣམས་མཁས་དང་གྲུབ་པ་ཡི། །ཡོན་ཏན་དུང་ཕྱུར་ཕྲག་བརྒྱའི་ཆ་ཤས་ཀྱི། །ཆ་ཤས་ཙམ་ཡང་རང་ལ་མ་མཆིས་ན། །རང་ལ་ང་རྒྱལ་སྐྱེ་རྒྱུའི་ཡོན་ཏན་ཅི། །དགེ་མའི་མཚན་བརྗོད་དཔེ་ལས་བརྒྱ་འགྱུར་ལོད། །འབུ་སྲིན་རྣམས་ཀྱི་ནང་ནས་ལ་ལ་ནི། །གཞན་ལས་རྭ་ཅོ་རིང་བ་འགའ་རེ་སྣང་། །དེ་ཡིས་ཁོ་ལ་འཚོང་རྒྱུ་ཡོད་དམ་ཅི། །སྙམ་དུ་རང་གི་རང་ལ་རང་མཚང་འབྲུ། །གཞན་སྐྱོན་མི་བརྟག་རང་སྐྱོན་ཡང་ཡང་བརྟགས། །གཞན་སྐྱོན་འདུག་ཀྱང་རང་ལ་འགོས་དོགས་མེད། །རང་གི་སྐྱོན་གྱིས་རང་ཉིད་རྟག་ཏུ་ཕུང་། །རང་རེ་ཆོས་སྒོ་འདི་རུ་ཞུགས་ཕྱི་ནས། །བསྲུང་རྒྱུ་སྡོམ་པ་དམ་ཚིག་གཉིས་ལས་མེད། །བྱ་རྒྱུ་ཚོགས་བསགས་སྒྲིབ་སྦྱང་གཉིས་ལས་མེད། །མཚོ་རྒྱུ་རང་སེམས་གླང་པོ་འདི་ཁོ་ན། །དམིགས་རྒྱུ་བླ་མེད་བྱང་ཆུབ་རིན་པོ་ཆེ། །འདོད་རྒྱུ་འབྲེལ་ཚད་དོན་དང་ལྡན་པ་ཞིག །ཡིན་པར་ངེས་པས་སྡིག་པ་སྦྱང་བའི་ཐབས། །ཕྱག་དང་བསྐོར་བ་ཚ་ཚ་ལྟུང་བཤགས་
སོགས། །རྡོར་སེམས་སྒོམ་བཟླས་ལ་སོགས་སྐབས་སུ་འབོད། །སྒྲུབ་ཆེན་ཚོགས་བརྒྱ་མར་མེ་སྐུ་གསུང་རྟེན། །བསོད་ནམས་བསགས་པའི་ཐབས་མཆོག་མཎྜལ་སོགས། །འབྱོར་པ་དང་བསྟུན་ཚོགས་བསགས་ཐབས་ལ་འབད། །འབྱོར་པ་མེད་ཀྱང་ཆུ་གཏོར་ལུས་སྦྱིན་སོགས། །ཚོགས་བསགས་སྒྲིབ་སྦྱང་གང་འཐད་སྐབས་དང་སྦྱར། །ཉམས་ལེན་ཤོར་ན་རེ་ཞིག་ཉམས་ལེན་གདམས། །དེ་ནས་རེས་འཇོག་བྱས་ལ་ཐུན་སྐབས་འབད། །དེ་ཡང་དེ་ལྟར་དགེ་སྦྱོར་གང་འབད་ཀྱང་། །ཉམས་ལེན་རྩི་དང་མ་བྲལ་ཟུང་འཇུག་ན། །ཐམས་ཅད་ཟག་མེད་ཚོགས་སུ་འགྱུར་བའི་ཕྱིར། །བླ་མེད་བྱང་ཆུབ་ལམ་དུ་འགྱུར་ངེས་ཏེ། །སྟོང་ཉིད་རྩི་དང་བྲལ་བའི་དམིགས་པ་ཅན། །ཟག་བཅས་འཁོར་བའི་བདེ་སྐྱིད་ཙམ་གྱི་རྒྱུ། །དེ་ལྟར་ཚོགས་གཉིས་ཟུང་འཇུག་བསགས་པ་དེ། །བསྔོ་བ་ཟབ་མོའི་རྒྱ་ཡིས་མ་ཐེབས་ན། །འཕེལ་བར་མི་འགྱུར་ཉམ་པར་སླ་བ་དང་། །ཟད་པར་འགྱུར་བས་བྱང་ཆུབ་ཐོབ་མི་འགྱུར། །བསྔོ་བྱ་བསྔོ་བྱེད་བསྔོ་ཡུལ་རྣམ་པ་གསུམ། །དངོས་པོར་དམིགས་ན་དུག་ཅན་ཕན་ཡོན་ཆུང་། །ཉམས་ལེན་སྟོང་ཉིད་ཉམས་དང་མ་བྲལ་
བར། །བསྔོ་བ་འཁོར་གསུམ་ཡོངས་དག་བསྔོ་བའོ། །དེ་ཡང་གོ་མ་ལོག་པ་གནད་དུ་ཆེ། །སངས་རྒྱས་ཐམས་ཅད་ཡོན་ཏན་ཡེ་ཤེས་མཉམ། །འོན་ཀྱང་སྐུ་ཚེ་བསྟན་པ་འཁོར་ཞིང་ཁམས། །མི་མཉམ་མི་འདྲ་སྣ་ཚོགས་འབྱུང་བ་ཡང་། །སྔོན་ཚེ་ཐུགས་བསྐྱེད་སྨོན་ལམ་ཁྱད་པར་ལགས། །ལྷ་ཀླུ་གནོད་སྦྱིན་བདུད་དང་གཞི་བདག་སོགས། །མཐུ་སྟོབས་ལོངས་སྤྱོད་རྫུ་འཕྲུལ་དཔག་མེད་ཅིང་། །ཕན་གནོད་བྱ་བ་སྣ་ཚོགས་བྱེད་པ་ཡང་། །རྒྱུ་ནི་སྔོན་གྱི་བསོད་ནམས་ཚོགས་ཡིན་ཏེ། །བསྔོ་སྨོན་གོ་མ་ལོག་པ་བཏབ་བཞིན་འགྲུབ། །དེ་དོན་གནད་འགག་རང་གིས་གོ་བའི་ཕྱིར། །གོ་མ་ལོག་ཅིང་རྒྱ་མ་ཆུང་བ་ཡིས། །བསྔོ་བ་སྨོན་ལམ་ཐུན་མཇུག་ཀུན་ཏུ་བྱ། །ཡེངས་ཤིང་བསྔོ་སྨོན་བྱས་པས་འགྲུབ་པ་མིན། །མ་ཡེངས་རྩེ་གཅིག་འདུན་པ་དྲག་པོ་ཡིས། །ཕྱོགས་བཅུའི་རྒྱལ་ཀུན་ཡིད་ཀྱི་དཔང་པོར་དམིགས། །ཉམས་ལེན་སྟོང་ཉིད་རྩི་དང་མ་བྲལ་བར། །བསྡུ་རིམ་མཇུག་ནས་འབྱུང་བ་ལྟ་བུ་ཡི། །ཐེག་པ་ཆེན་པོའི་བསྔོ་བ་སྨོན་ལམ་བྱ། །ལར་ནི་སང་ཉིན་འགྲོ་ངེས་མགྲོན་པོ་ལྟར། །རང་གི་ཐུགས་དམ་དགེ་སྦྱོར་གང་
མོས་པ། །ཕྱི་བཞག་མི་བྱེད་འཕྲལ་དུ་གང་འགྲུབ་བྱ། །ལོང་སྐབས་བྱུང་ན་མོས་ཀྱིས་མང་བྱེད་པའི། །མ་བྱུང་དོ་དགོང་རང་ལ་ཤི་ན་ཡང་། །ཕྱི་བཤོལ་མེད་པར་ཅི་ནུས་དགེ་སྦྱོར་འབད། །ཐོས་བསམ་བསྒོམ་དང་བསྐྱེད་རྫོགས་དོན་ཤེས་པས། །སྤྱོད་པ་ཅི་ཡང་མི་ལྟོ་སེམས་བྱུང་ན། །རིགས་ལྡན་མཁའ་འགྲོ་ལྷ་ལྕམ་པདྨ་གསལ། །ཨོ་རྒྱན་ལ་སོགས་པཎ་གྲུབ་བརྒྱ་རྩ་མཇལ། །དབང་ལུང་ཁྲིད་ཐོབ་སྨོན་ལམ་རྣམ་དག་ཀྱང་། །སྔོན་གྱི་འཆལ་བའི་ལས་སྒྲིབ་ལྷག་མ་དེས། །ལུས་ངན་འགའ་བླང་པདྨ་ལས་འབྲེལ་རྩལ། །མཚོན་མ་ཟུག་ཀྱང་གསང་གནས་རྡོ་བ་ཡིས། །བརྡུངས་ནས་འདས་པའི་ལོ་རྒྱུས་དྲན་པར་བྱ། །གོ་ཞིང་རྟོགས་པའི་ཉམས་རྟོགས་ཅུང་ཟད་བྱིང་། །ཚེ་འདི་གལ་ཆེ་བ་དྲེད་སྙམ་བྱུང་འདུག་ན། །ཤི་བ་མཐོང་ཐོས་དཔེ་དང་རང་ལ་སྐབས། །དེ་འདྲ་མི་འོང་གདེང་ཚོད་གང་ཡིན་བརྟགས། །བྱིན་རླབས་ནུས་པས་འཆི་བ་བཟློག་སེམས་ན། །སྐྱེས་ཆེན་དམ་པ་མང་པོ་གློ་བུར་དུ། །གཤེགས་པ་འདི་ནི་བསམ་ཞིང་ཡ་ང་སྐྱེ། །སྨན་དང་རིམ་གྲོས་འཆི་བ་བཟློག་པ་ན། །རྒྱལ་པོ་སྡེ་དཔོན་འདི་རྣམས་ཅི་ལ་འདིའ། །ད་ལྟ་ཤི་ན་
ཅི་འོང་གར་འགྲོ་བསམ། །དེ་གཉིས་གེགས་སེལ་བོགས་འདོན་གཙོ་བོ་ཡིན། །དེ་ལྟར་ལྟ་བ་མ་ནོར་གནས་ལུགས་རྟོགས། །བསྒོམ་པ་མ་འཁྲུལ་བསྐྱེད་རྫོགས་ཟུང་དུ་འཇུག །སྤྱོད་པ་མ་འཆོལ་བླང་དོར་གཟབ་བྱས་ན། །འབྲས་བུ་མཆོག་དང་ཐུན་མོང་དངོས་གྲུབ་གཉིས། །དང་པོ་སྔ་ལྟས་དེ་ནས་རིམ་བཞིན་ཐོབ། །དེ་ཡང་འདི་དང་ཕྱི་མ་བར་དོ་འོ། །སྔ་ལྟས་དངོས་ཉམས་རྨི་ལམ་རྟགས་འབྱུང་བ། །དབང་པོ་རབ་འབྲིང་ཐ་མའི་ཁྱད་པར་དུ། །རྒྱུད་དང་སྒྲུབ་ཐབས་ཀུན་ནས་གསུངས་ལགས་ཀྱང་།ལ་ལས་དངོས་ཉམས་རྨི་ལམ་རྟགས་ལ་སོགས། །འཕྱ་བཞད་བྱེད་པ་ཉམས་སུ་མ་བླངས་རྟགས། །ཉམས་སུ་བླངས་ན་རྟོགས་མེད་ག་ལ་སྲིད། །མེ་བུས་དུ་བ་ཆུ་བསྐོལ་རླངས་པའི་དཔེ། །རྟགས་མི་ཤེས་ན་ས་མཚམས་མི་ཟིན་སྐྱོན། །རྟགས་བཟང་བཟང་རློམ་ཆེ་ན་བར་ཆད་བདུད། །རྟགས་ངན་སྐྱིད་ལུག་སྐྱུར་ན་བར་ཆད་ཉུང་། །ཕལ་ཆེར་དབང་པོ་ཐ་མ་སོ་སྐྱེ་ཡི། །རྟགས་རྣམས་རྨི་ལམ་ཆ་འཇོག་མ་གསུངས་ཏེ། །ལུས་ལས་རྣག་ཁྲག་མི་གཙང་ཐོན་པ་དང་། །བཤལ་དང་སྐྱུགས་དང་ཁྲུས་བྱས་གོས་དཀར་
གྱོན། །འཕུར་དང་ནམ་ལངས་ཉི་ཟླ་ཤར་བ་རྣམས། །སྡིག་སྒྲིབ་དག་པའི་རྟགས་སུ་གསུངས་པ་ཡིན། །གངས་རིའི་རྩེར་ཕྱིན་དུང་བུས་རོལ་མོ་སྒྲོག །ཤེལ་དང་བུམ་པ་ཕྱག་མཚན་རྙེད་པ་དང་། །མེ་ཏོག་གླིང་རྒྱས་གླེགས་བམ་རྙེད་པ་སོགས། །རྟོགས་པ་སྐྱེ་ཡང་དམ་ཆོས་འགྲུབ་པའི་རྟགས། །དར་ཕྱར་ཁྲིར་འདུག་ཁྲོམ་ལ་ཆོས་འཆད་དང་། །ཁང་བཟང་ནང་གནས་ལོ་ལེགས་འབྲུ་རྣམས་ཕུལ། །ཆང་དང་བདུད་རྩི་འོ་ཞོ་ཕུལ་ལམ་འཐུང་། །ཆོས་གཏེར་ནོར་གཏེར་རིན་ཆེན་སྣ་ཚོགས་རྙེད། །གོས་བཟང་གྱོན་རྨིས་བསོད་ནམས་འཕེལ་བའོ། །རང་གི་བླ་མ་སྔོན་གྱི་གྲུབ་ཐོབ་ཚོགས། །ཡི་དམ་མཁའ་འགྲོ་ཆོས་སྐྱོང་སྣ་ཚོགས་དང་། །ཞལ་མཇལ་ཆོས་གསུངས་དབང་བསྐུར་བརྡ་ཆོས་སྟོན། །སྔགས་སྒྲ་གྲག་དང་བར་སྣང་ཡིག་འབྲུ་ཤར། །འཇའ་དང་འོད་འཁྱུགས་དྲི་བཟང་རོལ་མོ་སྒྲོག །ལེགས་ཉེས་ཅི་འོང་བརྡ་དང་ཚིག་གིས་སྟོན། །མར་མེ་ཡོན་ཆབ་གཏོར་མ་་འཛིན་པ་དང་། །གཏོར་མ་ཞུ་དང་བདུད་རྩི་ཁོལ་ལམ་འཕྱུར། །ཉམས་དགའ་བག་དྲོ་བྱིན་འཐིབས་རིག་པ་དྭངས། །དད་པའི་གདུང་ཤུགས་ཉམས་འབར་སྣང་བ་འུར། །
དབང་མེད་བྲོ་འཁྲབ་ཉམས་དབྱངས་ཐོགས་མེད་ཤོར། །འཁྲུལ་པ་ཞིག་སྙམ་གང་ལའང་རྩིས་གདབ་མེད། །ཕྱི་ཡི་སྣང་བ་གཏན་མེད་སྒྱུ་མར་ཤར། །ནང་གི་རིག་པ་བཟོ་མེད་ལྷུག་པར་ཞིག །ལྷ་འདྲེས་གུས་འདུད་གཟུགས་སྟོན་དངོས་གྲུབ་སྟེར། །དེ་སོགས་རྟགས་བཟང་དངོས་གྲུབ་འབྱུང་བའི་ལྟས། །སྒྲུབ་པ་ཉམས་ལེན་མེད་དུས་ཚི་བདེ་བ་ལ། །ཆོས་སྒྲུབ་ཉམས་ལེན་དགེ་སྦྱོར་བརྩོན་བྱས་པས། །ནད་མང་སྨྲ་མཆུ་ཟེར་ཟློས་གོད་ཁ་ལྡང་། །རྨི་ལམ་ཉི་ཟླ་ནུབ་དང་མུན་རུབ་པ། །གོས་ནག་གྱོན་དང་ཐུར་སོང་ལྕགས་སུ་བཅུག །མི་གཙང་འདམ་བྱིང་ཁྱི་དང་གཅན་གཟན་དེད། །རྦབ་དང་ཐོག་སེར་མདའ་རྡོའི་ཆར་པ་འབབ། །བུད་མེད་ངུ་དང་བྲང་བརྡུང་རྒྱན་ཆ་བཏགས། །དེ་སོགས་མི་དགེའི་ཆོ་འཕྲུལ་ལྟས་བྱུང་ཡང་། །ཆོས་དང་སྒྲུབ་ལ་ལོག་ལྟ་མི་བྱ་སྟེ། །སྣོད་བཀྲུས་ན་ནི་དྲི་ཁུ་ལྡང་བ་ལྟར། །ལས་སྒྲིབ་དག་པའི་རྟགས་སུ་ངོས་ཟིན་བྱ། །དམ་ཚིག་ཉམས་ཆག་བསྐང་ཕྱིར་བདག་འཇུག་གམ། །ཏིང་འཛིན་དབང་བླང་བསྐང་བཤགས་ཡིག་བརྒྱུར་འབད། །ཕྱག་དང་ལྟུང་བཤགས་ཚ་ཚ་ཆུ་གཏོར་དང་། །སྲུང་ཟློག་
དམིགས་རིམ་དག་ལ་འབད་པར་བྱ། །བཟང་རྟགས་ངེས་ཅན་གསལ་བར་བྱུང་ན་ཡང་། །དེ་ལ་མཆོག་འཛིན་དགའ་བྲོད་ཨ་འཐས་ན། །མཆོག་གི་དངོས་གྲུབ་ཐུན་མོང་ཙམ་དུ་གོལ། །ཐུན་མོང་དངོས་གྲུབ་ཕྱིར་འགྱང་དགའ་བྲོད་བདུད། །སྒྲུབ་པ་བྱས་ཚོད་རྟགས་ལ་ཆུང་ངུ་ཙམ། །དེ་ལ་ཡ་མཚན་སྐྱེ་རྒྱུ་ཅི་ཞིག་ཡོད། །མེ་བུས་དུ་བ་འབྱུང་བས་ཡ་ཅི་མཚན། །སྙམ་དུ་མཆོག་འཛིན་རབ་དུ་སྤང་བཞིན་དུ། །དངོས་གྲུབ་བླངས་ཆོག་བྱའམ་ཏིང་འཛིན་གྱི། །དབང་དང་དངོས་གྲུབ་བླངས་བའི་དམིགས་པ་བྱ། །རྟགས་བཟང་བྱུང་ཡང་ཕྱིར་ནངས་སྙིང་མི་དགའ། །བག་མི་དྲོ་ན་བདུད་ཀྱི་བསླུ་བ་ཡིན། །རྟགས་མཚན་ངན་ཡང་སྙིང་དགའ་རིག་པ་དྭངས། །ངན་རྟགས་བཟང་པོར་སྟོན་པ་ཞེས་བྱ་ལེགས། །དེ་འདྲ་བྱུང་བ་གང་ཡིན་མི་འབྱེད་ན། །ཐམས་ཅད་སྒྱུ་མ་བདེན་མེད་རྨི་ལམ་འདྲ། །སྙམ་བྱས་སྟོང་ཉིད་ལྟ་བའི་ངང་ལ་བཞག །དེ་ཡི་བར་ཆད་ཐམས་ཅད་དངོས་གྲུབ་འགྱུར། །དེ་ནས་ནད་གདོན་དགྲ་དང་སྨྲ་མཆུ་ལ། །གཏན་ནས་འཇིག་རྟེན་བྱ་བ་བ་བློས་ཐེང་ཞིང་། །སྒྲུབ་པ་ཉམས་ལེན་རྟོགས་པའི་བོགས་བྱུང་ན། །དེ་ཡི་ས་ལྟས་ངན་
གཡང་དུ་ཁུག་པ་ཡིན། །རང་ལ་ཉམས་རྟོགས་ཐོས་བསམ་བསྒོམས་པ་ཡི། །ཡོན་ཏན་ཆེན་པོ་མེད་བཞིན་གདུལ་བྱ་འུར། །ཀུན་གྱིས་དད་གུས་འབུལ་ཞབས་དཀོར་བསོད་ཆེ། །རང་ཡང་ང་རྒྱལ་ཁེངས་སེམས་སྤོབས་པ་སྐྱེ། །མཐོ་ལ་འགྲན་སེམས་དམའ་ལ་ཕྲག་དོག་སྐྱེ། །ཆུང་ལ་བརྙས་བཅོས་དད་གུས་དག་སྣང་འགྲིབ། །འུར་སྒྲོབ་རྣམ་གཡེང་ཇེ་ཆེ་ཉམས་ལེན་འགྲིབ། །དུག་ལྔ་ཇེ་རྒྱས་བྱུང་ན་ལྷ་བུའི་བདུད། །རང་སྣང་འགྱུར་དང་གཞན་སྣང་འགྱུར་བ་མཉམ། །རང་འདོད་འཁྲི་བ་མེད་ཅིང་ཕན་སེམས་ཆེ། །ཉམས་རྟོགས་འཕེལ་རྒྱས་ངེས་འབྱུང་སྐྱོ་ཤས་ཆེ། །རང་ཉིད་དམན་ལ་དག་སྣང་ཕྱོགས་མེད་འབྱོངས། །ཉིན་མོ་མི་འདུ་ནང་ནུབ་ཟས་ནོར་འདུ། །འདོད་པ་མེད་བཞིན་ལོངས་སྤྱོད་ཆར་ལྟར་འབེབས། །བག་ཀྱང་ཆགས་ཞེན་འཁྲི་བ་སྦར་བཅང་མེད། །ཉམས་རྟོགས་མི་འགྲིབ་འཕེལ་ཞིང་གཞན་ལ་ཕན། །དེ་ནི་ཐུན་མོང་དངོས་གྲུབ་ཡིན་པར་ས། །དོན་མེད་སྐྱེས་པ་བུད་མེད་ལ་ལ་ཞིག །རང་ཉིད་མཇལ་ནས་དབང་མེད་དད་པ་སྐྱེ། །འདི་ཕྱི་བར་གསུམ་ཅི་མཛད་ཁྱེད་ཤེས་ཟེར། །སྐུ་བཅད་ཆོས་སྒོར་ཞུགས་
ནས་སློབ་མར་གྱུར། །དབང་ལུང་ཁྲིད་དང་གདམས་པ་མང་དུ་བྱིན། །དང་པོ་ཉམས་སྐྱེས་དེ་ནས་ཨག་སར་ཡལ། །རང་གི་སྙིང་རྗེ་ཕན་སེམས་ཤ་ཚ་བཅས། །དད་པ་དྲེད་ནས་མཉམ་འགྲོགས་རོགས་པར་མཐོང་། །བུད་མེད་ཡིན་ན་མཐུན་ཆེ་སྡོམ་པ་འཆོར། །སྐྱེས་པ་ཡིན་ན་རྗེས་ནས་དགྲ་རུ་ལྡང་། །དམ་ཚིག་མི་རྩི་བརྟག་རྐུ་གཤེ་ལོག་འགེབ། །དེ་དག་དམ་སྲིའི་བསླུ་བ་ཡིན་པར་ངེས། །བཙུན་མ་དད་མདུན་ཆེ་ཡང་རྒྱང་དུ་བསྲིང་། །སྐྱེས་པ་མཛའ་མཐར་འཁོན་ཐབས་གཉིས་ཀ་སྤངས། །འཁྲིབ་ཉམས་ཆེ་ན་ཐབས་ཀྱིས་སྤངས་བ་ལེགས། །དེ་ནས་ཟང་ཟིང་གདུལ་བྱ་འུར་ན་ཡང་། །འཛིན་ཆགས་ཞེན་འཁྲི་མི་བྱ་ཆོས་ཀྱི་ཕྱོགས། །གང་ཐེང་བྱ་ཞིང་ང་རྒྱལ་རློམ་སེམས་སྤང་། །དེ་བྱས་མཆོག་ལ་མི་སྒྲིབ་ཉེས་པ་མེད། །ཚེ་དང་བསོད་ནམས་དཔལ་འབྱོར་ལོངས་སྤྱོད་དང་། །འཁོར་དང་གདུལ་བྱ་སྙན་གྲགས་ལོངས་སྤྱོད་སོགས། །ལོ་ལེགས་ཕུབ་མ་ཞོར་ལ་འོང་བ་ལྟར། །མཆོག་གི་ཞོར་ལ་ཐུན་མོང་དངོས་གྲུབ་འབྱུང་། །མཆོག་འཛིན་རློམ་སེམས་ང་རྒྱལ་ཁེངས་སེམས་སྐྱེས། །མཆོག་ལ་བསྒྲིབས་པས་ཙན་དན་སོལ་བ་བྱས། །དེ་ཕྱིར་ང་
རྒྱལ་ཁེངས་པ་རྩ་ནས་དོར། །ནད་གདོན་ཞི་ནུས་དགྲ་བགེགས་འདུལ་ནུས་དང་། །ཕྲིན་ལས་བཞི་པོ་གང་ཙམ་འགྲུབ་ན་ཡང་། །རང་ལ་ནུས་མཐུ་ཡོད་ནས་ག་ལ་ཡིན། །ལྷ་དང་བླ་མའི་ཐུགས་རྗེ་ཡིན་སྙམ་ནས། །སླར་ཡང་གཏང་རག་མཆོད་གཏོར་ཚོགས་འཁོར་གཟབ། །དེ་ཡིས་ཇེ་ཆེ་རྣོ་ཞིང་མཆོག་མི་སྒྲིབ། །ཁྱད་པར་ཡར་མར་ཚེས་བཅུ་ཉ་མཚམས་བརྒྱད། །ཉེར་དགུ་ལ་སོགས་དུས་གཉེན་བྱུང་དུས་ལ། །ཅི་འབྱོར་མཆོད་གཏོར་གཟབ་ན་ཅི་བསམ་འགྲུབ། །ལུས་སེམས་བྲལ་མ་ཐག་ཏུ་དཔའ་བོ་དང་་།ཊཱཀྐི་རྣམས་ཀྱིས་མཆོད་སྤྲིན་རྒྱ་མཚོར་བཅས། །དག་པའི་ཞིང་ངམ་སྨོན་ལམ་གར་བཏབ་རུང་། །བསུ་བར་བྱེད་ཅིང་རྒྱུད་སྡེའི་དགོངས་པའོ། །དེ་དག་ཐུན་མོང་དངོས་གྲུབ་འབྱུང་ཚུལ་ལོ། །ཐུན་མོང་གྲུབ་ཆེན་བརྒྱད་སོགས་ཀུན་གྱི་སྐབས། །དེ་ནས་མཆོག་གི་དངོས་གྲུབ་ནི། །ནམ་མཁའ་ལ་ནི་འཇའ་ཚོན་བཞིན། །སྟོང་ཉིད་ལྟ་བའི་ངང་ཉིད་ལས། །རང་ལུས་ཡི་དམ་ལྷ་རུ་གསལ། །དེ་ལ་གསལ་སྣང་བརྟན་པ་ན། །བར་དོའི་ཡིད་ལུས་དེ་ཉིད་ནི། །དེ་ལྟར་སྣང་སྟོང་ལྷ་ཡི་སྐུ། །དངོས་སུ་གྱུར་ནས་ཞིང་
ཁམས་བགྲོད། །ཕྱག་རྒྱ་ཆེན་པོའི་རིག་འཛིན་ཡིན། །གདུང་དང་རིང་བསྲེལ་སྐུ་གཟུགས་སམ། །འཇའ་འོད་ལ་སོགས་རྟགས་ཤིག་འབྱུང་། །ཟུང་འཇུག་དེ་ལྟར་མི་གསལ་ཞིང། །ངོ་བོ་རྗེན་པར་རྟོགས་པ་དེ། །རྒྱུན་དུ་མ་ཡེངས་སྐྱོང་ནུས་ན། །ཕྱི་དབུགས་ཆད་ཅིང་ནང་དབུགས་གནས། །གཞི་ཡི་འོད་གསལ་ཤར་བའི་ཚེ། །ཆུ་ཉིད་ལ་ནི་ཆུ་བཞག་ལྟར། །ཉམས་ལེན་ཟིན་ནས་དེ་ཐོག་ཏུ། །ཞག་བདུན་ལ་སོགས་གནས་ན་ནི། །འཆི་བ་ཆོས་སྐུར་སངས་རྒྱས་ཏེ། །བར་དོའི་སྣང་བ་དེ་ལ་མེད། །ཡར་གྱི་ཟང་ཐལ་ཡིན་པར་གསུངས། །རྟགས་ནི་ཤ་བཀྲག་ཡུན་རིང་གསལ། །ཨཱདང་ཧཱུྃ་འབྱོན་ནམ་མཁའ་དྭངས། །དེ་གཉིས་བརྟན་པོ་མེད་ན་ཡང་། །ཐོད་རྒལ་ངེས་ཤེས་བརྟན་པོ་ཡི། །ཆོས་ཉིད་བར་དོར་ཞི་ཁྲོའི་ལྷ། །ངོས་ཟིན་དག་པའི་ཞིང་དུ་སྐྱེ། །དེ་ལའང་འཇའ་འོད་གདུང་སོགས་འབྱུང་། །གལ་ཏེ་དེ་ཚོ་མ་ཟིན་ནས། །སྲིད་པ་བར་དོར་འཁྱམས་སྲིད་ན། །རང་ཉིད་ཤི་བར་ཡིན་ཤེས་ནས། །ཅི་བྱ་གཏོལ་མེད་བྱུང་རྩ་ན། །ཡི་དམ་ཐུགས་རྗེ་ཆེན་པོའི་མཐུས། ཚེ་འདིར་ཡི་དམ་རྒྱལ་བ་རྒྱ་མཚོ་ལ་ཡི་དམ་བྱས་ནའོ། མཆན། །བྱང་ཆུབ་
སེམས་དཔའ་བརྒྱད་བྱོན་ནས། །ཁྱོད་ཀྱི་ལྷ་ནི་སྤྱན་རས་གཟིགས། །ཡི་གེ་དྲུག་པ་ཁྱོད་ཀྱིས་བཟླས། །ཁྱོད་ཀྱི་ཞིང་ཁམས་བདེ་བ་ཅན། །འགྲོ་བའི་ལམ་ནི་འདི་འོ་ཞེས། །ལུང་སྟོན་ངང་པའི་རྒྱལ་པོའམ། །རླུང་གི་ཤུགས་ལྟར་མགྱོགས་པ་ཡི། །བདེ་བ་ཅན་གྱི་ཞིང་དུ་འགྲོ། །འོད་དཔག་མེད་པའི་ཞལ་མཐོང་སྟེ། །ཡིད་ལ་དགའ་བདེ་ཚད་མེད་སྐྱེས། །དེ་ཡིས་རྐྱེན་བྱས་མེ་ཏོག་ནི། །པདྨའི་སྦུབས་སུ་སྐྱེ་འོ་ཞེས། །ཟ་མ་ཏོག་སོགས་མདོ་རྒྱུད་ནི། །དུ་མར་གསུང་ལ་དཔང་པོ་བྱས། །དེ་ཡི་གནད་ཀྱི་མན་ངག་ལ། །དེང་ནས་དགེ་རྩ་གང་བསགས་ཀུན། །དེ་རུ་སྐྱེ་བའི་རྒྱུ་རུ་བསྔོ། །དེ་ནས་དེ་རུ་སྐྱེ་ངེས་པའི། །འོད་དཔག་མེད་ཀྱི་སྨོན་ལམ་མཐུས། །མཚམས་མེད་བྱས་དང་དམ་ཆོས་སྤངས། །མ་གཏོགས་སྨོན་ལམ་གང་བཏབ་འགྲུབ། །མི་འགྲུབ་དོགས་པའི་ཐེ་ཚོམ་གྱིས། །ཉེས་པས་མེ་ཏོག་པདྨའི་ཁ། །ལོ་ནི་ལྔ་བརྒྱར་མི་བྱེ་བས། །ནང་དུ་བདེ་སྐྱིད་ལྡན་ན་ཡང་། །སངས་རྒྱས་མ་མཇལ་སྡུག་བསྔལ་ཡོད། །དེ་ཕྱིར་ཐེ་ཚོམ་མེད་པ་གཅེས། །དེ་ན་སྐྱེས་པས་ཅི་དགའ་ན། །སྡུག་བསྔལ་བྱ་བའི་མིང་མི་གྲགས། །
རྟག་ཏུ་བདེ་སྐྱིད་ཕུན་སུམ་ཚོགས། །རྟག་ཏུ་སངས་རྒྱས་ཞབས་འབྲིང་བྱེད། །འདིར་བསགས་སྡིག་སྒྲིབ་ལྷག་མ་ཀུན། །དེ་རུ་དམ་ཆོས་བསྒྲུབས་པས་སྦྱོངས། །ནམ་ཡང་འཁོར་བར་མི་ལྟུང་སྟེ། །ནད་མེད་ཚེ་ལོ་གྲངས་མེད་ཐུབ། །དེ་ནས་འཕོས་ནས་རྫོགས་སངས་རྒྱས། །རྫོགས་པའི་སངས་རྒྱས་ཐོབ་པ་ལ། །ལམ་ཐག་ཉེ་ལ་བར་ཆད་མེད། །གཞན་དོན་མི་འབྱུང་མ་ཡིན་ཏེ། །ས་བཅུ་ཐོབ་ནས་ཕྱོགས་བཅུ་རུ། །སྤྲུལ་པ་བྱེ་བ་ཕྲག་བརྒྱ་ཡིས། །འགྲོ་དོན་དཔག་མེད་དེ་ནས་འབྱུང་། །མི་འཁྲུགས་སྨན་བླ་བྱམས་པ་མགོན། །པད་འབྱུང་ཕྱག་རྡོར་ལ་སོགས་པའི། །ཞིང་ཁམས་རྫུ་འཕྲུལ་གྱིས་བགྲོད་ཅིང་། །ཞལ་ལྟ་ཆོས་སྟོན་དེ་ཉིད་རང་། །བདེ་བ་ཅན་དུ་འཁོར་བར་འོང་། །དེ་སོགས་ཞིང་གི་ཡོན་ཏན་རྣམས། །འོད་མདོ་བདེ་ཆེན་ཞིང་བཀོད་དང་། །པད་དཀར་ལ་སོགས་བལྟས་པས་གསལ། །དེ་རུ་སྐྱེས་པའི་ལྷ་དང་སྔགས། །རྒྱལ་བ་རྒྱ་མཚོ་ཡིན་ཤེས་བྱ། །འདི་འདྲའི་གནད་ཟབ་མན་ངག་འདི། །མདོ་རྒྱུད་བསྟན་བཅོས་དུ་མ་ལ། །ཐོས་བསམ་བྱས་པའི་འབྲས་བུ་དེ། །རྒྱ་མཚོ་ནང་གི་ནོར་བུ་བཞིན། །ཁོ་བོས་རྙེད་
པས་བསྐལ་པ་བཟང་། །བདག་ལ་རེ་ལྟོས་བཅས་ཚད་ཀུན། །ལྷ་འདི་སྔགས་འདི་ཞིང་ཁམས་འདི། །འདི་ལ་སྙིང་ནོར་མིག་འབྲས་མཛོད། །ལྟ་སྒོམ་སྤྱོད་འབྲས་བཞི་པོ་འདི། །ཧ་ཀྱང་མཐོན་པོ་བཤད་ཤེས་ཀྱང་། །རང་གི་ཉམས་སུ་མི་ལོན་པས། །གཞན་ལ་བཤད་ཀྱང་ངོ་ཚའི་རྒྱུ། །རང་ཉམས་བསྟུན་པའི་ཞལ་གདམས་། འདི། །འཆུག་མེད་འདི་བཞིན་ཉམས་བླངས་ན། །རང་དོན་མཆོག་ཐུན་དངོས་གྲུབ་འབྱུང་། །གཞན་དོན་འབྲེལ་ཚད་དོན་དང་ལྡན། །བདག་གི་ཕོ་ཚོད་མ་ལགས་ཏེ། །མདོ་རྒྱུད་མན་ངག་བླ་མའི་གསུངས། །ཀུན་གྱི་བཅུད་བསྡུས་མན་ངག་ཡིན། །ཁ་ནག་ཡིག་ནག་སྤྱད་པ་ཡི། །འོལ་ཚོད་གོ་བ་སྐམ་པོ་མིན། །རང་ལ་ཉམས་མྱོང་བག་ཙམ་ཡོད། །བཀའ་ཆད་ལུང་སྡུམ་རས་ཆོད་མིན། །དབང་ལུང་མན་ངག་བརྒྱུད་པར་ལྡན། །རྒྱུད་ལས་མ་གསུང་མན་ངག་མིན། །པདྨ་ཟབ་དང་རྒྱལ་པོའི་རྒྱུད། །རྒྱ་གཞུང་མེད་པའི་རྒྱུད་ཀྱང་མིན། །རྡོ་རྗེ་སྙིང་པོ་ཛ་ལེན་དྷ། །སེམས་དཔའི་གྲུབ་ཆེན་རྒྱ་གཞུང་གསལ། །མན་ངག་མེད་པའི་རྒྱུད་ཀྱང་མིན། །གྲུབ་རྒྱལ་པད་འབྱུང་མན་ངག་མང་། །
བཀའ་མ་ལོ་ཙཱ་གསུམ་གྱིས་བསྒྱུར། །གཏེར་མ་གཏེར་སྟོན་གསུམ་གྱིས་སྟོན། །སྙན་བརྒྱུད་ཡི་དམ་ལྷ་ཡིས་གསུངས། །བརྒྱུད་པ་སེལ་མེད་སངས་རྒྱས་གསུངས། །བྱིན་རླབས་མ་ཉམས་དུས་འདིར་ཆེ། །བླ་མ་ཡི་དམ་དབྱེར་མེད་གཅིག །ལྷ་ཀུན་དཀྱིལ་འཁོར་གཅིག་ལ་རྫོགས། །འདི་འདྲའི་དམ་ཆོས་ཡིད་བཞིན་ནོར། །ཉམས་སུ་ལོངས་ཤིག་སྐལ་ལྡན་རྣམས། །དགེ་བཤེས་་་རང་ལོ་ཉེར་བདུན། བརྩོན་འགྲུས་རྒྱ་མཚོ་བས། །ཞལ་གདམས་བྲིས་ཟེར་ཤོག་བུ་འདི། །ཡོས་ལོའི་དབྱར་ནས་གཏད་མོད་ཀྱིས། །རྣམ་གཡེངས་འབྱམས་པས་ལོང་མ་བྱུང་། །འབྲུག་ལོ་ནག་ཟླའི་ཡར་ངོ་ལ། །མཚམས་བསྡམས་སྒྲུབ་ལ་བརྩོན་པ་ཡི། །ཐུན་སྐབས་གཉིས་ལ་རྫོགས་པར་བྲིས། །ཟབ་ཆོས་གནད་འགག་ཀུན་འདུས་པས། །ཉམས་ལེན་བརྩོན་པར་མ་གཏོགས་པ། །ཀུན་ལ་བསྟན་པར་མི་རུང་སྟེ། །གསང་སྒྲོག་ཉེས་པ་ཆེ་བ་དང་། །ཆོས་བདག་ཊཱཀྐིའི་ཀོ་ལོང་སྡོམ། །འཕྲལ་དུ་གང་དྲན་བྲིས་མོད་ཀྱང་། །ཟབ་ཆོས་སྙིང་པོ་འདུས་སོ་སྙམ། །འདི་བྲིས་དགེ་བས་འདི་ཉིད་ལ། །རྩེ་གཅིག་ཉམས་སུ་སུས་བླངས་པར། །ཐུགས་རྗེ་ཆེན་པོར་འགྲུབ་
པར་ཤོག །དེ་སྐད་སྨྲ་བ་རཱ་གའི་མིང་། །སརྦ་མངྒ་ལཾ།། །།