བཅུ་ཚན་བརྒྱད་པ། འགྲོན་མང་རྐུན་མ་སོགས་ཀྱི་སྡེ་ཚན།
འདུལ་བ་རྣམ་པར་འབྱེད་པ། བམ་པོ་དྲུག་བཅུ་རྩ་གསུམ་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དྲུག་སྡེ་དག་རང་གི་ལག་གིས་ས་རྐོ་བར་བྱེད། རྐོར་འཇུད་པར་བྱེད། རྣང་སྒལ་སྤྱུར་བར་བྱེད། སྤྱུར་དུ་འཇུད་པར་བྱེད། ཡུར་བ་འདྲེན་པར་བྱེད། འདྲེན་དུ་འཇུད་པར་བྱེད་ནས། གཞན་མུ་སྟེགས་ཅན་དག་ཤེས་ལྡན་དག་ཤཱཀྱའི་བུའི་དགེ་སྦྱོང་འདི་དག་རང་གི་ལག་གིས་ས་རྐོ་བར་བྱེད། རྐོར་འཇུད་པར་བྱེད། རྣང་སྒལ་སྤྱུར་བར་བྱེད། སྤྱུར་དུ་འཇུད་པར་བྱེད། ཡུར་བ་འདྲེན་པར་བྱེད། འདྲེན་དུ་འཇུད་པར་བྱེད་དེ། བྲམ་ཟེ་དང་ཁྱིམ་བདག་དག་ཀྱང་རང་གི་ལག་གིས་ས་རྐོ་བར་བྱེད། རྐོར་འཇུད་པར་བྱེད། རྣང་སྒལ་སྤྱུར་བར་བྱེད། སྤྱུར་དུ་འཇུད་པར་བྱེད། ཡུར་བ་འདྲེན་པར་བྱེད། འདྲེན་དུ་འཇུད་པར་བྱེད་ན། ཤེས་ལྡན་དག་ཤཱཀྱའི་བུའི་དགེ་སྦྱོང་འདི་དག་དང་། བྲམ་ཟེ་དང་། ཁྱིམ་བདག་དག་ལ་
བྱེ་བྲག་ནི་ཅི་ཡོད། བསམ་པ་ནི་ཅི་ཡོད། ཐ་དད་དུ་བྱ་བ་ནི་ཅི་ཡོད། སུ་ཞིག་དགེ་སྦྱོང་མགོ་རེག་འདི་དག་ལ་བསོད་སྙོམས་སྦྱིན་པ་དང་བྱ་བར་སེམས་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱེད་རང་གི་ལག་གིས་ས་རྐོ་བར་བྱེད། རྐོར་འཇུད་པར་བྱེད། རྣང་སྒལ་སྤྱུར་བར་བྱེད། སྤྱུར་དུ་འཇུད་པར་བྱེད། ཡུར་བ་འདྲེན་པར་བྱེད། འདྲེན་དུ་འཇུད་པར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་རང་གི་ལག་གིས་ས་རྐོའམ། རྐོར་འཇུད་ན་ལྟུང་བྱེད་དོ། །ཡང་དགེ་སློང་གང་
ཞེས་བྱ་བ་ནི་དྲུག་སྡེའམ། གཞན་ཡང་དེ་ལྟ་བུ་གང་ཡིན་པའོ། །རང་གི་ལག་གིས་ཞེས་བྱ་བ་ནི་ལག་ནས་ལག་པས་སོ། །ས་ཞེས་བྱ་བ་ནི་ས་གཉིས་ཏེ། རང་བཞིན་ཅན་དང་། རང་བཞིན་ཅན་མ་ཡིན་པའོ། །རང་བཞིན་ཅན་ཞེས་བྱ་བ་ནི་ཆར་ཆུ་ཞོད་ན་ཟླ་བ་གསུམ་གྱིས་ས་འཐས་པར་གྱུར་པའོ། །ཆར་ཆུ་མ་ཞོད་ན་ཟླ་བ་དྲུག་གིས་ས་འཐས་པར་གྱུར་པའོ། །རང་བཞིན་ཅན་མ་ཡིན་པ་ནི་དེ་ལས་གཞན་པའོ། །རྐོའམ་ཞེས་བྱ་བ་ནི་བདག་ཉིད་ཀྱིས་སོ། །རྐོར་འཇུད་ན་ཞེས་བྱ་བ་ནི་གཞན་ནོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་ས་རྐོ་ན་རང་བཞིན་ཅན་རྐོ་ན་ལྟུང་བྱེད་དུ་འགྱུར་ལ། རང་བཞིན་ཅན་མ་ཡིན་པ་རྐོ་ན་ཉེས་བྱས་སུ་འགྱུར་རོ། །དགེ་སློང་ས་ཞག་འགོགས་ན་སྲ་བ་འགོགས་པ་ན་ལྟུང་བྱེད་དུ་འགྱུར་ལ། གྲུགས་པ་འགོགས་ན་ཉེས་བྱས་སུ་འགྱུར་རོ། །དགེ་སློང་ས་ལ་ཕུར་པ་འདེབས་ན་ལྟུང་བྱེད་དུ་འགྱུར་ལ། ས་ལས་ཕུར་པ་འབྱིན་ན་ཉེས་བྱས་སུ་འགྱུར་རོ། །དགེ་སློང་ས་ལ་རི་མོ་འདྲེན་ན་ཉེས་བྱས་སུ་འགྱུར་རོ། །ཤོད་དགོད་པའི་བསམ་པ་ལ་ནི་ལྟུང་བ་མེད་དོ། །དགེ་སློང་ས་དང་འབྱར་བའི་ལྕི་བ་འགོགས་ན་ཉེས་བྱས་སུ་འགྱུར་ལ། ལྕི་བ་འབའ་ཞིག་འགོགས་པ་ལ་ནི་ལྟུང་བ་མེད་དོ། །དགེ་སློང་ངོགས་རྟིབ་པར་བྱེད་ན་སྲ་བ་རྟིབ་པར་བྱེད་ན་ལྟུང་བྱེད་དུ་འགྱུར་ལ། གྲུགས་པ་རྟིབ་པར་བྱེད་ན་ཉེས་བྱས་སུ་འགྱུར་རོ། །དགེ་སློང་འདམ་སྐྱོད་པར་བྱེད་ན་ཉེས་བྱས་སུ་འགྱུར་རོ། །དགེ་སློང་འདམ་དང་འབྲེལ་བའི་ཕྲུ་བ་དང་། བུམ་པ་དང་། རིལ་བ་འདེགས་པར་བྱེད་ན་ཉེས་བྱས་སུ་འགྱུར་རོ། །དགེ་སློང་རྩིག་པ་འཇིག་པར་བྱེད་ན་སྲ་བ་འཇིག་པར་བྱེད་ན་ལྟུང་བྱེད་དུ་འགྱུར་ལ། གྲུགས་པ་འཇིག་པར་བྱེད་ན་ཉེས་བྱས་སུ་འགྱུར་རོ། །དགེ་སློང་རྩིག་པའི་སྐྱོང་ནུལ་འགོགས་པར་བྱེད་ན་སྲ་བ་
འགོགས་པར་བྱེད་ན་ལྟུང་བྱེད་དུ་འགྱུར་ལ། གྲུགས་པ་འགོགས་པར་བྱེད་ན་ཉེས་བྱས་སུ་འགྱུར་རོ། །དགེ་སློང་རྩིག་པ་ལ་ཕུར་པ་འདེབས་ན་ལྟུང་བྱེད་དུ་འགྱུར་ལ། རྩིག་པ་ལས་ཕུར་པ་འབྱིན་ན་ཉེས་བྱས་སུ་འགྱུར་རོ། །དགེ་སློང་རྩིག་པ་དང་འབྱར་བའི་ལྕི་བ་འགོགས་པར་བྱེད་ན་ཉེས་བྱས་སུ་འགྱུར་རོ། །དགེ་སློང་རྩིག་པ་ལ་རི་མོ་འདྲེན་པར་བྱེད་ན་ཉེས་བྱས་སུ་འགྱུར་རོ། །ཤོད་དགོད་པའི་བསམ་པ་ལ་ནི་ལྟུང་བ་མེད་དོ། །དགེ་སློང་རྩིག་པ་ལས་ཚྭ་རྒོ་འབྲུལ་བར་བྱེད་ན་ཉེས་བྱས་སུ་འགྱུར་རོ། །དགེ་སློང་རྡོ་བ་ཅན་གྱི་ས་རྐོ་བར་བྱེད་ན། གལ་ཏེ་ས་ཆེས་མང་ལ་རྡོ་བ་ཆེས་ཆུང་ན་ལྟུང་བྱེད་དུ་འགྱུར་རོ། །གལ་ཏེ་རྡོ་བ་ཆེས་མང་ལ་ས་ཆེས་ཉུང་ན་ཉེས་བྱས་སུ་འགྱུར་རོ། །རྡོ་བ་འབའ་ཞིག་སྐྱོད་པར་བྱེད་པ་ལ་ནི་ལྟུང་བ་མེད་དོ། །དགེ་སློང་བྱེ་མ་ཅན་གྱི་ས་རྐོ་བར་བྱེད་ན། གལ་ཏེ་ས་ཆེས་མང་ལ་བྱེ་མ་ཆེས་ཉུང་ན་ལྟུང་བྱེད་དུ་འགྱུར་རོ། །གལ་ཏེ་བྱེ་མ་ཆེས་མང་ལ་ས་ཆེས་ཉུང་ན་ཉེས་བྱས་སུ་འགྱུར་རོ། །བྱེ་མ་འབའ་ཞིག་རྐོ་བ་ལ་ནི་ལྟུང་བ་མེད་དོ། །དགེ་སློང་ལག་གི་བླས་རྒྱུ་སྐར་གྱི་སྦྱོར་བས་རུང་བར་བྱེད་པ་མེད་ན་ཐུར་མ་སོར་བཞི་ཙམ་ས་ལ་འཛུགས་པ་ལ་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ས་རྐོ་བའི་ལྟུང་བྱེད་དེ་བདུན་བཅུ་རྩ་གསུམ་པ་རྫོགས་སོ།། །།སངས་རྒྱས་བཅོམ་ལྡན་འདས་ཤཱཀྱ་རྣམས་ཀྱི་ནང་དུ་ལྗོངས་རྒྱུ་ཞིང་གཤེགས་པ་ན་སེར་སྐྱའི་གནས་སུ་བྱོན་ནས་སེར་སྐྱའི་གནས་ན་ནྱ་གྲོ་དྷའི་ཀུན་དགའ་ར་བ་ན་བཞུགས་སོ། །ཤཱཀྱ་མིང་ཆེན་གྱིས་བཅོམ་ལྡན་འདས་ཤཱཀྱ་རྣམས་ཀྱི་ནང་དུ་ལྗོངས་རྒྱུ་ཞིང་གཤེགས་པ་ན་སེར་སྐྱའི་གནས་སུ་བྱོན་ནས་སེར་སྐྱའི་གནས་ན་ནྱ་གྲོ་དྷའི་ཀུན་དགའ་ར་བ་ན་བཞུགས་ཞེས་ཐོས་སོ། །ཐོས་ནས་ཀྱང་དེ་འདི་སྙམ་དུ་སེམས་ཏེ། བདག་གིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལན་མང་དུ་གདུགས་ཚོད་ལ་ཁྱིམ་གཞན་དུ་སྤྱན་དྲངས་ཏེ་བཤོས་གསོལ་ན། ལན་འགའ་ཡང་ཡོ་བྱད་ཐམས་ཅད་ཀྱིས་སྤྱན་མ་དྲངས་ཀྱིས་བདག་གིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ཟླ་བ་བཞིར་ཡོ་བྱད་ཐམས་
ཅད་ཀྱིས་སྤྱན་དྲང་ངོ་སྙམ་མོ། །དེ་ནས་ཤཱཀྱ་མིང་ཆེན་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་ཤཱཀྱ་མིང་ཆེན་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་ཤཱཀྱ་མིང་ཆེན་སྟན་ལས་ལངས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་དགུང་ཟླ་བཞིར་བདག་གི་ན་བཟའ་དང་། བསོད་སྙོམས་དང་། གནས་མལ་དང་། བསྙུང་བའི་རྐྱེན་དང་། སྨན་གྱི་ཡོ་བྱད་དག་བཞེས་པར་ཅི་གནང་། བཅོམ་ལྡན་འདས་ཀྱིས་ཤཱཀྱ་མིང་ཆེན་ལ་ཅང་མི་གསུང་བས་གནང་ངོ་། །དེ་ནས་ཤཱཀྱ་མིང་ཆེན་གྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ནས་དེས་བསྙུང་བའི་རུང་བའི་ཁང་པ་རྩིག་ཏུ་བཅུག་ཅིང་། བསྙུང་བའི་སྨན་ཡང་འཇོག་ཏུ་བཅུག །བདེ་བའི་སྨན་དུས་སུ་རུང་བ་དང་། ཐུན་ཚོད་དུ་རུང་བ་དང་། ཞག་བདུན་པ་དང་། འཚོ་བའི་བར་དུ་བཅང་བ་དང་། རྩ་བའི་སྨན་དང་། སྡོང་བུའི་སྨན་དང་། ལོ་མའི་སྨན་དང་། མེ་ཏོག་གི་སྨན་དང་། འབྲས་བུའི་སྨན་དག་ཀྱང་འཇོག་ཏུ་བཅུག། ཞུན་མར་བསྐོལ་བ་དང་མ་བསྐོལ་བ་དག་ཀྱང་འཇོག་ཏུ་བཅུག །འབྲུ་མར་བསྐོལ་བ་དང་མ་བསྐོལ་བ་དག་ཀྱང་འཇོག་ཏུ་བཅུག །བ་དག་དང་། མ་ཧེ་མོ་དག་དང་། ར་བཞོན་དག་ཀྱང་འཇོག་ཏུ་བཅུག །ཡོ་བྱད་ཐམས་ཅད་ཀྱང་འཇོག་ཏུ་བཅུག །སྨན་པ་དང་སྙུན་གཡོག་དག་ཀྱང་འཇོག་ཏུ་བཅུག་སྟེ། དགེ་སློང་དག་ལ་ཡང་ཡོ་བྱད་
ཐམས་ཅད་ཀྱིས་བསྟབས་སོ། །དྲུག་སྡེ་དག་གིས་སྨྲས་པ། དགའ་བོ་ཉེ་དགའ་བཅའ་བ་དང་བཟའ་བ་འདི་ལྟ་བུ་རྙེད་ཀྱིས་ཐབས་ཤིག་བྱའོ་ཞེས་དེ་དག་གིས་སྨན་པ་ལ་དྲིས་པ། བཞིན་བཟངས་ཁོ་བོ་ཅག་ལ་ནད་ཅི་ཡོད་པ་ཇེ་ལྟོས་ཤིག །སྨན་པས་བསམས་པ། འདི་དག་ནི་དགེ་སྦྱོང་ཧྲལ་པོ་དག་ཡིན་པས་ཟ་འདོད་ཀྱིས་འདི་དག་དང་མཐུན་པར་སྨྲ་བར་བྱའོ་སྙམ་ནས་དེས་དེ་དག་ལ་སྨྲས་པ། འཕགས་པ་དག་ཁྱེད་ཅག་ནི་ཤུལ་གྱིས་དུབ་པ་དག་ལགས་པས་ཇེ་སྐུར་སྣུམ་བག་གསོལ་ལ་དེའི་འོག་ཏུ་བསྐ་བ་གསོལ་ཅིག །དེ་དག་གིས་སྨྲས་པ། དགའ་བོ་ཉེ་དགའ་འདི་ནི་སྨན་པ་ཆེན་པོ་ནད་དང་། ནད་ཀྱི་གཞི་དང་། ཁམས་ལ་མཁས་པ་རྒྱལ་པོ་ལ་མཁོ་བ་ཡིན་ཏེ། གལ་ཏེ་བདག་ཅག་ཐམས་ཅད་ཀྱིས་དུས་གཅིག་ཏུ་དེ་ལྟར་བྱ་བར་བརྩམས་ན་མྱུར་དུ་ཟིན་པར་འགྱུར་གྱིས་ཇེ་དང་པོར་གཉིས་ཀྱིས་སྣུམ་བག་བསྟེན་ཅིང་བཞིས་ནད་གཡོག་བྱའོ། །དེའི་འོག་ཏུ་ཡང་གཉིས་ཀྱིས་སྣུམ་བག་བསྟེན་ཅིང་བཞིས་ནད་གཡོག་བྱའོ། །དེའི་འོག་ཏུ་ཡང་གཉིས་ཀྱིས་སྣུམ་བག་བསྟེན་ཅིང་བཞིས་ནད་གཡོག་བྱའོ། །དེ་ལྟར་བྱའོ་ཞེས་དེ་དག་ལས་གཉིས་ཀྱིས་སྣུམ་བག་བསྟེན་པར་བརྩམས་ཤིང་བཞིས་ནད་གཡོག་བྱེད་པ་ན་ཅི་ཙམ་ན་ཟླ་བ་གཅིག་འདས་སོ། །དེའི་འོག་ཏུ་གཞན་གཉིས་ཀྱིས་སྣུམ་བག་བསྟེན་པར་བརྩམས་ཤིང་བཞིས་ནད་གཡོག་བྱེད་པ་ན་ཟླ་བ་གཉིས་པ་འདས་སོ། །དེའི་འོག་ཏུ་ཡང་གཞན་གཉིས་ཀྱིས་སྣུམ་བག་བསྟེན་པར་བརྩམས་ཤིང་བཞིས་ནད་གཡོག་བྱེད་པ་ན་ཟླ་བ་གསུམ་པ་འདས་སོ། །ཟླ་བ་བཞི་པ་ལ་ཐམས་ཅད་འདུས་ཏེ་བཟའ་བར་བརྩམས་ནས་ཟླ་བ་བཞི་འདས་པ་དང་ཤཱཀྱ་མིང་ཆེན་གྱིས་བཅོམ་ལྡན་འདས་གཤེགས་སྟོན་ལ་སྤྱན་དྲངས་པ་དང་ཉེ་དགའས་ཕྱག་ཚང་ལ་ཕྲིན་སྤྲིང་སྟེ། བཞིན་བཟངས་དེང་ཁོ་བོ་ལ་ཁུ་ཤ་དང་། ཁུ་བ་དང་། ཤ་ཚོད་དག་གྱིས་ཤིག་ཅེས་སྤྲིང་ངོ་། །ཕྱག་ཚང་གིས་སྨྲས་པ། འཕགས་པ་དགུང་ཟླ་བཞི་འདས་ཏེ་ཤཱཀྱ་མིང་ཆེན་གྱིས་བཅོམ་ལྡན་འདས་གཤེགས་སྟོན་ལ་སྤྱན་དྲངས་ན། ཁྱེད་ཀྱི་བྱ་བ་ད་དུང་ཡང་མ་རྫོགས་སམ། ཉེ་དགའས་སྨྲས་པ། བཀྲེན་པ་ཤཱཀྱ་མིང་ཆེན་ཁ་ཤིན་ཏུ་ཆེན་པོས་སངས་རྒྱས་ལ་སོགས་པ་
དགེ་སློང་གི་དགེ་འདུན་ཟླ་བ་བཞིར་ཡོ་བྱད་ཐམས་ཅད་ཀྱིས་སྤྱན་འདྲེན་ན། གལ་ཏེ་སྤྱན་དྲང་བ་འདི་ལྟ་བུས་སངས་རྒྱས་ལ་སོགས་པ་དགེ་སློང་གི་དགེ་འདུན་སྤྱན་དྲང་དུ་རུང་ན་ནི་ཉེ་དགའས་ཀྱང་སངས་རྒྱས་ལ་སོགས་པ་དགེ་སློང་གི་དགེ་འདུན་ཇི་སྲིད་འཚོའི་བར་དུ་སྤྱན་འདྲེན་པར་སྤྲོའོ། །དེས་སྨྲས་པ། ཁྱེད་ཅག་ཟླ་བ་བཞིར་ཤ་དང་ཁུ་བ་ཤ་སྟག་ཟོས་པར་གྱུར་ཀྱང་འོན་ཀྱང་ཁྱེད་ཅག་སྨོད་པར་བྱེད་ན། གནས་བརྟན་གནས་བརྟན་གང་དག་གིས་ཟླ་བ་བཞིར་ཨ་རུ་ར་འབྲུམ་གཅིག་ཀྱང་མ་གསོལ་བ་དེ་དག་ནི་ཤིན་ཏུ་དཀའ་བ་བྱེད་པ་ཡིན་ནོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཧ་ཅང་སློང་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་གིས་ཧ་ཅང་བསླང་བར་མི་བྱའོ། །དགེ་སློང་དག་སྔོན་བྱུང་བ་འདས་པའི་དུས་ན་གྲོང་མེད་པའི་དགོན་པའི་གནས་ཤིག་ན་དྲང་སྲོང་ཞིག་འདུག་སྟེ། དེའི་བསྟི་གནས་དེ་མེ་ཏོག་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པ། ཉེན་ཀོར་ཕུན་སུམ་ཚོགས་པ་ཡིན་ནོ། །དེའི་བསྟི་གནས་དེ་དང་ཧ་ཅང་མི་རིང་བ་ན་རྫིང་ཆེན་པོ་ཞིག་ཡོད་པ་དེ་ན་ཀླུ་གཞོན་ནུ་ཞིག་འདུག་གོ །གང་གི་ཚེ་དྲང་སྲོང་དེ་སྐྱིལ་མོ་ཀྲུང་གིས་འདུག་པ་དེའི་ཚེ་ན་ཀླུ་གཞོན་ནུ་དེ་རྫིང་ཆེན་པོ་དེ་ནས་བྱུང་ནས་ལུས་ཀྱིས་དྲང་སྲོང་དེའི་ལུས་ལ་ལན་བདུན་དཀྲིས་ཏེ་སྟེང་དུ་གདེངས་ཀ་ཆེན་པོ་བྱས་ཏེ་འདུག་གོ །གང་གི་ཚེ་དྲང་སྲོང་དེ་ལངས་པར་གྱུར་པ་དེའི་ཚེ་ན་ཀླུ་གཞོན་ནུ་དེས་དྲང་སྲོང་དེའི་ལུས་ལ་ལུས་ཀྱིས་བཀྲོལ་ནས་དཔུང་རྒྱན་དང་། རྣ་ཆ་གདུབ་འཁོར་དང་། ཕྲེང་བ་རྒྱུ་སྣ་ཚོགས་ཀྱི་རྒྱན་དང་། བྱུག་པས་བརྒྱན་པར་གྱུར་ཏེ་ཐལ་མོ་སྦྱར་ནས་མདུན་དུ་འདུག་སྟེ། དྲང་སྲོང་དེ་ལ་ཡོ་བྱད་ཐམས་ཅད་ཀྱིས་སྟོབས་པར་བྱེད་དོ། །དྲང་སྲོང་དེ་ཀླུ་གཞོན་ནུ་དེའི་ལུས་ཀྱི་རེག་པས་སྐྱ་བོ་བསེང་བསེང་པོར་གྱུར་ཅིང་རིད་པ་དང་། ཉམ་ཆུང་བ་དང་། རྐེ་བ་དང་། ལུས་མ་ཐོབ་པར་གྱུར་ཏོ། །དུས་གཞན་ཞིག་ན་དྲང་སྲོང་གཞན་ཞིག་ལྗོངས་རྒྱུ་ཞིང་འགྲོ་བ་ན་དྲང་སྲོང་དེའི་བསྟི་གནས་སུ་ཕྱིན་ནས་དེས་དྲང་སྲོང་དེ་ལ་སྨྲས་པ། ཀྱེ་
དྲང་སྲོང་ཁྱོད་ཀྱི་བསྟི་གནས་འདི་མེ་ཏོག་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པ། ཉེན་ཀོར་ཕུན་སུམ་ཚོགས་པ་ཡིན་ན་ཁྱོད་ཅིའི་ཕྱིར་སྐྱ་བོ་བསེང་བསེང་པོར་གྱུར་ཅིང་རིད་པ་དང་། ཉམ་ཆུང་བ་དང་། རྐེ་བ་དང་། ལུས་མ་ཐོབ་པར་གྱུར། དེས་སྨྲས་པ། དེ་དེ་བཞིན་ཏེ། ཁོ་བོའི་བསྟི་གནས་འདི་མེ་ཏོག་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པ། ཉེན་ཀོར་ཕུན་སུམ་ཚོགས་པ་ཡིན་མོད་ཀྱི། འོན་ཀྱང་འདི་ན་ཉེས་དམིགས་ཀྱང་ཡོད་དོ། །འདི་ན་ཉེས་དམིགས་ཅི་ཡོད། །དེས་སྨྲས་པ། རྫིང་ཆེན་པོ་འདི་ན་ཀླུ་གཞོན་ནུ་ཞིག་འདུག་སྟེ། གང་གི་ཚེ་ཁོ་བོ་སྐྱིལ་མོ་ཀྲུང་གིས་འདུག་པ་དེའི་ཚེ་ན་ཀླུ་གཞོན་ནུ་དེ་རྫིང་ཆེན་པོ་དེ་ནས་བྱུང་ནས་ལུས་ཀྱིས་ཁོ་བོའི་ལུས་ལ་ལན་བདུན་དཀྲིས་ཏེ་སྟེང་དུ་གདེངས་ཀ་ཆེན་པོ་བྱས་ཏེ་འདུག་གོ །གང་གི་ཚེ་ཁོ་བོ་ལངས་པར་གྱུར་པ་དེའི་ཚེ་ན་དེས་ཁོ་བོའི་ལུས་ལ་ལུས་ཀྱིས་བཀྲོལ་ནས་དཔུང་རྒྱན་དང་། རྣ་ཆ་གདུབ་འཁོར་དང་། ཕྲེང་བ་རྒྱུ་སྣ་ཚོགས་ཀྱི་རྒྱན་དང་། བྱུག་པས་བརྒྱན་པར་གྱུར་ཏེ། ཐལ་མོ་སྦྱར་ནས་མདུན་དུ་འདུག་སྟེ་ཁོ་བོ་ལ་ཡོ་བྱད་ཐམས་ཅད་ཀྱིས་སྟོབས་པར་བྱེད་དེ། དེའི་ལུས་ཀྱི་རེག་པས་ཁོ་བོ་སྐྱ་བོ་བསེང་བསེང་པོར་གྱུར་ཅིང་རིད་པ་དང་། ཉམ་ཆུང་བ་དང་། རྐེ་བ་དང་། ལུས་མ་ཐོབ་པར་གྱུར་ཏོ། །དེས་སྨྲས་པ། ཁྱོད་ཀླུ་གཞོན་ནུ་དེ་ཕྱིན་ཅད་འོང་བར་མི་འགྱུར་བར་འདོད་དམ། དེས་སྨྲས་པ། འདོད་དོ། །དེས་སྨྲས་པ། གང་གི་ཚེ་ཀླུ་གཞོན་ནུ་དེ་ཁྱོད་ལ་ཡོ་བྱད་ཐམས་ཅད་ཀྱིས་སྟོབས་པར་བྱེད་པ་དེའི་ཚེ་ན་དེའི་མགོ་ལ་ནོར་བུ་འདུག་པ་དེ་སློངས་ཤིག་དང་ཀླུ་རྣམས་ནི་སེར་སྣ་ཅན་ཡིན་པས་མི་སྟེར་བས་ཕྱིན་ཅད་འོང་བར་མི་འགྱུར་རོ། །དུས་གཞན་ཞིག་ན་དྲང་སྲོང་དེ་སྐྱིལ་མོ་ཀྲུང་གིས་འདུག་པ་དེའི་ཚེ་ན་ཀླུ་གཞོན་ནུ་དེ་དེ་བཞིན་དུ་རྫིང་ཆེན་པོ་དེ་ནས་བྱུང་ནས་ལུས་ཀྱིས་དྲང་སྲོང་དེའི་ལུས་ལ་ལན་བདུན་དཀྲིས་ཏེ་སྟེང་དུ་གདེངས་ཀ་ཆེན་པོ་བྱས་ཏེ་འདུག་གོ །གང་གི་ཚེ་དྲང་སྲོང་དེ་ལངས་པར་གྱུར་པ་དེའི་ཚེ་ན་ཀླུ་གཞོན་ནུ་དེས་དྲང་སྲོང་དེའི་ལུས་ལ་ལུས་ཀྱིས་བཀྲོལ་ནས་དཔུང་རྒྱན་དང་། རྣ་ཆ་གདུབ་འཁོར་དང་། ཕྲེང་བ་རྒྱུ་སྣ་ཚོགས་ཀྱི་རྒྱན་དང་བྱུག་པས་བརྒྱན་པར་གྱུར་ཏེ་ཐལ་མོ་སྦྱར་ནས་མདུན་དུ་འདུག་སྟེ་དྲང་སྲོང་དེ་
ལ་ཡོ་བྱད་ཐམས་ཅད་ཀྱིས་སྟོབས་པར་བྱེད་པ་ན་དྲང་སྲོང་དེས་དེ་ལ་སྨྲས་པ། ཀླུ་གཞོན་ནུ་ཁྱོད་ཀྱི་མགོ་ལ་འདུག་པའི་ནོར་བུ་གང་ཡིན་པ་དེ་ཁོ་བོ་ལ་བྱིན་ཅིག །དེས་སྨྲས་པ། ཕ་མ་དག་ལ་དྲི་བར་བྱའོ། །དྲང་སྲོང་གིས་སྨྲས་པ། དེ་ལྟར་གྱིས་ཤིག །ཀླུ་གཞོན་ནུ་དེས་ཕ་མ་གཉིས་ལ་དྲིས་པ། ཡབ་ཡུམ་གཉིས་དྲང་སྲོང་བདག་གི་ནོར་བུ་སློང་ན་དེ་ལ་སྩལ་བར་བགྱིའམ། དེ་གཉིས་ཀྱིས་སྨྲས་པ། ནོར་བུ་འདིའི་མཐུས་བདག་ཅག་གིས་ཟས་དང་། སྐོམ་དང་། སྤོས་དང་། ཕྲེང་བ་རྒྱུ་དང་། རྒྱན་དག་རྙེད་པ་ཡིན་གྱིས་མ་སྦྱིན་ཅིག །དེ་ནས་ཀླུ་གཞོན་ནུ་དེ་རྫིང་དེ་ནས་བྱུང་སྟེ་དྲང་སྲོང་དེའི་མདུན་དུ་འདུག་པ་དང་དྲང་སྲོང་དེས་དེ་ལ་སྨྲས་པ། ཀླུ་གཞོན་ནུ་ཁྱོད་ཀྱི་མགོ་ལ་འདུག་པའི་ནོར་བུ་གང་ཡིན་པ་དེ་ཁོ་བོ་ལ་བྱིན་ཅིག། དེ་ནས་ཀླུ་གཞོན་ནུ་དེས་ཚིགས་སུ་བཅད་པ་དག་སྨྲས་པ། བཟའ་དང་བཏུང་དང་དེ་བཞིན་བགོ་བ་དག །ནོར་བུ་འདི་ཡི་མཐུ་ལས་འགྲུབ་འགྱུར་བས། །དེ་ཕྱིར་ཁྱོད་ལ་ནོར་བུ་འདི་མི་སྦྱིན། །ཧ་ཅང་སློང་བས་ཞེ་སྡང་གནས་སུ་གྱུར། །ཧ་ཅང་སློང་བས་བདག་ལ་སྡིགས་བྱེད་པ། །རལ་གྲི་རྣོ་དང་འབྲུ་མར་བདར་བ་བཞིན། །གལ་ཏེ་ཁྱོད་གནས་ཕྱིན་ཆད་བདག་འོང་ན། །བདག་གི་ཀླད་པར་རྡོ་བས་སྣུན་གྱིས་ཤིག །ཅེས་སྨྲས་ཏེ་མི་སྣང་བའི་ལམ་ན་འདུག་གོ །དགེ་སློང་དག་རེ་ཞིག་དུད་འགྲོའི་སྐྱེ་གནས་སུ་སྐྱེས་པའི་སྲོག་ཆགས་དེ་དག་ཀྱང་ཧ་ཅང་བསླངས་ པ་ན་མི་སྣང་བའི་ལམ་ན་འཁོད་ན་མི་དག་ལྟ་སྨོས་ཀྱང་ཅི་དགོས 
། དེ་ལྟ་བས་ན་དགེ་སློང་གིས་ཧ་ཅང་བསླང་བར་མི་བྱའོ། །དགེ་སློང་དག་གཞན་ཡང་སྔོན་བྱུང་བ་འདས་པའི་དུས་ན་གྲོང་མེད་པའི་དགོན་པའི་གནས་ཤིག་ན་དྲང་སྲོང་ཞིག་འདུག་སྟེ། དེའི་བསྟི་གནས་དེ་མེ་ཏོག་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པ། ཉེན་ཀོར་ཕུན་སུམ་ཚོགས་པ་ཡིན་ནོ། །དེ་ན་བྱ་མང་པོ་དག་གནས་པ་དེ་དག་དེར་སྒྲ་འབྱིན་ཏེ། བསམ་གཏན་དག་གི་ཚེར་མ་ནི་སྒྲ་ཡིན་པས་དྲང་སྲོང་དེས་བྱ་མང་པོ་དག་གི་སྒྲ་དེས་སེམས་རྩེ་གཅིག་པ་ཉིད་མ་ཐོབ་བོ། །དེ་ནས་དྲང་སྲོང་གཞན་ཞིག་ལྗོངས་རྒྱུ་ཞིང་འགྲོ་བ་ན་དྲང་སྲོང་དེའི་བསྟི་གནས་སུ་ཕྱིན་ནས་དེས་དྲང་སྲོང་དེ་ལ་སྨྲས་པ། ཀྱེ་དྲང་སྲོང་ཁྱོད་
ཀྱི་བསྟི་གནས་འདི་ནི་མེ་ཏོག་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པ། ཉེན་ཀོར་ཕུན་སུམ་ཚོགས་པ་བཟང་བ་ཡིན་ན་ཁྱོད་ཀྱིས་འདིར་སེམས་རྩེ་གཅིག་པ་ཉིད་ཐོབ་བམ། དེས་སྨྲས་པ། དེ་དེ་བཞིན་ཏེ། ཁོ་བོའི་བསྟི་གནས་འདི་མེ་ཏོག་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པ། ཉེན་ཀོར་ཕུན་སུམ་ཚོགས་པ་བཟང་བ་ཡིན་ན་འོན་ཀྱང་འདི་ན་ཉེས་དམིགས་ཀྱང་ཡོད་དོ། །དེས་སྨྲས་པ། འདི་ན་ཉེས་དམིགས་ཅི་ཡོད། དེས་སྨྲས་པ། འདི་ན་བྱ་མང་པོ་དག་གནས་པ་དེ་དག་འདིར་སྒྲ་འབྱིན་པར་བྱེད་དེ། བསམ་གཏན་དག་གི་ཚེར་མ་ནི་སྒྲ་ཡིན་པས་བདག་གིས་བྱ་མང་པོ་དག་གི་སྒྲ་དེས་སེམས་རྩེ་གཅིག་པ་ཉིད་མ་ཐོབ་བོ། །དེས་སྨྲས་པ། ཁྱོད་བྱ་དེ་དག་ཕྱིན་ཅད་འདིར་མི་འོང་བར་འདོད་དམ། དེས་སྨྲས་པ། འདོད་དོ། །དེས་སྨྲས་པ། ཚེས་ཉི་ཤུ་དགུའི་མཚན་མོ་རྩྭའི་མེ་སྒྲོན་སྤོར་ལ་ཤིང་ལྗོན་པ་དག་གི་དྲུང་དུ་སོང་སྟེ་འདི་སྐད་ཅེས། སྒོ་ང་དག་བཟའོ། །ཕྲུ་གུ་དག་བཟའོ་ཞེས་སྨྲོས་ཤིག་དང་ཕྱིན་ཆད་འོང་བར་མི་འགྱུར་རོ། །དེས་དེ་ལྟར་བྱ་བར་བརྩམས་པ་དང་། བྱ་དེ་དག་གིས་བསམས་པ། དྲང་སྲོང་འདི་སྨྱོས་པར་གྱུར་ཏམ་ཅི་སྙམ་ནས། བྱ་དེ་དག་གིས་ཕྲུ་གུ་དག་འདབ་མ་སྐྱེས་པར་གྱུར་པ་དང་དེ་དག་དོང་སྟེ། ཕྱིན་ཆད་མི་འོང་ཞིང་ཇི་ཙམ་ན་མཐར་གྱིས་ཐམས་ཅད་མི་སྣང་བའི་ལམ་ན་འཁོད་དོ། །དགེ་སློང་དག་རེ་ཞིག་དུད་འགྲོའི་སྐྱེ་གནས་སུ་སྐྱེས་པའི་སྲོག་ཆགས་དེ་དག་ཀྱང་ཧ་ཅང་བསླངས་
པ་ན་མི་སྣང་བའི་ལམ་ན་འཁོད་ན་མི་རྣམས་ལྟ་སྨོས་ཀྱང་ཅི་དགོས ། དེ་ལྟ་བས་ན་དགེ་སློང་གིས་ཧ་ཅང་བསླང་བར་མི་བྱའོ། །ཧ་ཅང་སློང་ན་འགལ་ཚབས་ཅན་དུ་འགྱུར་རོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་རྨས་པ། ཉེ་དགའ་ཁྱོད་ཟླ་བ་བཞིར་མགྲོན་དུ་བོས་པ་བདག་གིར་བྱས་ནས་དེ་ལས་ལྷག་པར་བདག་གིར་བྱེད་པ་བདེན་ནམ། བཙུན་
པ་མང་ངོ་། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ། །དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །དེ་ནས་བཅོམ་ལྡན་འདས་སེར་སྐྱའི་གནས་སུ་ཅི་དགྱེས་པར་བཞུགས་ནས་རྒྱལ་པོའི་ཁབ་ག་ལ་བ་དེ་ལོགས་སུ་ལྗོངས་རྒྱུ་ཞིང་གཤེགས་ཏེ། མཐར་གྱིས་རྒྱུ་ཞིང་གཤེགས་པ་ན་རྒྱལ་པོའི་ཁབ་ཏུ་བྱོན་ནས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་ཤཱཀྱ་རྣམས་ཀྱི་ནང་དུ་ལྗོངས་རྒྱུ་ཞིང་གཤེགས་པ་ན་རྒྱལ་པོའི་ཁབ་ཏུ་བྱོན་ནས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་ཞེས་ཐོས་སོ། །ཐོས་ནས་ཀྱང་དེ་འདི་སྙམ་དུ་སེམས་ཏེ། ཤཱཀྱ་མིང་ཆེན་གྱིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ཟླ་བ་བཞིར་ཡོ་བྱད་ཐམས་ཅད་ཀྱིས་སྤྱན་དྲངས་ཏེ། བདག་གིས་ཀྱང་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལན་མང་དུ་གདུགས་ཚོད་ལ་ཁྱིམ་གཞན་དུ་སྤྱན་དྲངས་ཏེ་བཤོས་གསོལ་ན། ལན་འགའ་ཡང་ཡོ་བྱད་ཐམས་ཅད་ཀྱིས་སྤྱན་མ་དྲངས་ཀྱིས་བདག་གིས་ཀྱང་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ཟླ་བ་བཞིར་ཡོ་བྱད་ཐམས་ཅད་ཀྱིས་སྤྱན་དྲང་ངོ་སྙམ་མོ། །དེ་ནས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་
འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་སྟན་ལས་ལངས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་དགུང་ཟླ་བཞིར་བདག་གི་ན་བཟའ་དང་། བསོད་སྙོམས་དང་། གནས་མལ་དང་། བསྙུང་བའི་རྐྱེན་དང་། སྨན་གྱི་ཡོ་བྱད་དག་བཞེས་པར་ཅི་གནང་། བཅོམ་ལྡན་འདས་ཀྱིས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་ཅང་མི་གསུང་བས་གནང་ངོ་། །དེ་ནས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ནས་དེས་བསྙུང་བའི་རུང་བའི་ཁང་པ་རྩིག་ཏུ་བཅུག་ཅིང་བསྙུང་བའི་སྨན་ཡང་འཇོག་ཏུ་བཅུག །བདེ་བའི་སྨན་དུས་སུ་རུང་བ་དང་། ཐུན་ཚོད་དུ་རུང་བ་དང་། ཞག་བདུན་པ་དང་། འཚོའི་བར་དུ་བཅང་བ་དང་། རྩ་བའི་སྨན་དང་། སྡོང་བུའི་སྨན་དང་། ལོ་མའི་སྨན་དང་། མེ་ཏོག་གི་སྨན་དང་། འབྲས་བུའི་སྨན་དག་ཀྱང་འཇོག་ཏུ་བཅུག །ཞུན་མར་བསྐོལ་བ་དང་མ་བསྐོལ་བ་དག་ཀྱང་འཇོག་ཏུ་བཅུག །འབྲུ་མར་བསྐོལ་བ་དང་མ་བསྐོལ་བ་དག་ཀྱང་འཇོག་ཏུ་བཅུག །བ་དག་དང་། མ་ཧེ་མོ་དག་དང་། ར་བཞོན་དག་ཀྱང་འཇོག་ཏུ་བཅུག །ཡོ་བྱད་ཐམས་ཅད་ཀྱང་འཇོག་ཏུ་བཅུག །
སྨན་པ་དང་། སྙུན་གཡོག་དག་ཀྱང་འཇོག་ཏུ་བཅུག་གོ །ཚེ་དང་ལྡན་པ་པི་ལིན་དའི་བུའི་སྲིང་མོའི་ཁྱོས་བཅོམ་ལྡན་འདས་ཤཱཀྱ་རྣམས་ཀྱི་ནང་དུ་ལྗོངས་རྒྱུ་ཞིང་གཤེགས་པ་ན་རྒྱལ་པོའི་ཁབ་ཏུ་བྱོན་ནས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་ཞེས་ཐོས་སོ། །ཐོས་ནས་ཀྱང་འདི་སྙམ་དུ་སེམས་ཏེ། ཤཱཀྱ་མིང་ཆེན་གྱིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ཟླ་བ་བཞིར་ཡོ་བྱད་ཐམས་ཅད་ཀྱིས་སྤྱན་དྲངས་ཏེ། བདག་གིས་ཀྱང་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལན་མང་དུ་གདུགས་ཚོད་ལ་ཁྱིམ་གཞན་དུ་སྤྱན་དྲངས་ཏེ་བཤོས་གསོལ་ན། ལན་འགའ་ཡང་ཡོ་བྱད་ཐམས་ཅད་ཀྱིས་སྤྱན་མ་དྲངས་ཀྱིས་བདག་གིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ཟླ་བ་བཞིར་ཡོ་བྱད་ཐམས་ཅད་ཀྱིས་སྤྱན་དྲང་ངོ་སྙམ་མོ། །དེ་ནས་བྲམ་ཟེ་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་བྲམ་ཟེ་དེ་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་བྲམ་ཟེ་དེ་སྟན་ལས་ལངས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་དགུང་ཟླ་བཞིར་བདག་གི་ན་བཟའ་དང་། བསོད་སྙོམས་དང་། གནས་མལ་དང་། བསྙུང་བའི་རྐྱེན་དང་། སྨན་གྱི་ཡོ་བྱད་དག་བཞེས་པར་ཅི་གནང་། བྲམ་ཟེ་དེའི་དང་པོར་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་སྤྱན་དྲངས་སོ། །བྲམ་ཟེ་དེས་བསམས་པ། འཕགས་པ་པི་ལིན་དའི་བུ་བདག་གི་ཉེ་དུ་ཡིན་པས་དེ་
སྤྱན་དྲངས་ན་གནང་བར་འགྱུར་གྲང་སྙམ་ནས། དེ་ཚེ་དང་ལྡན་པ་པི་ལིན་དའི་བུ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་པི་ལིན་དའི་བུའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་ཚེ་དང་ལྡན་པ་པི་ལིན་དའི་བུ་བྲམ་ཟེ་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཇུད་པར་བྱེད། ཡང་དག་པར་གཟེངས་སྟོད་པར་བྱེད། ཡང་དག་པར་རབ་ཏུ་དགའ་བར་བྱེད་དོ། །རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་ནས་ཅང་མི་སྨྲའོ། །དེ་ནས་བྲམ་ཟེ་དེ་སྟན་ལས་ལངས་ཏེ་ཚེ་དང་ལྡན་པ་པི་ལིན་དའི་བུ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་ཚེ་དང་ལྡན་པ་པི་ལིན་དའི་བུ་ལ་འདི་སྐད་ཅེས་སྨྲས་སོ། །འཕགས་པས་དགུང་ཟླ་བཞིར་བདག་གི་ན་བཟའ་དང་། བསོད་སྙོམས་དང་། གནས་མལ་དང་། བསྙུང་བའི་རྐྱེན་དང་། སྨན་གྱི་ཡོ་བྱད་དག་བཞེས་པར་ཅི་གནང་། ཚེ་དང་ལྡན་པ་པི་ལིན་དའི་བུས་སྨྲས་པ། བཅོམ་ལྡན་འདས་ལ་ཞུའོ། །དེ་ནས་ཚེ་དང་ལྡན་པ་པི་ལིན་དའི་བུ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་གི་མག་པ་བདག་ག་ལ་བ་དེར་མཆིས་ནས་དེ་བདག་ལ་འཕགས་པས་དགུང་ཟླ་བཞིར་བདག་གི་ན་བཟའ་དང་། བསོད་སྙོམས་དང་། གནས་མལ་དང་། བསྙུང་བའི་རྐྱེན་དང་། སྨན་གྱི་ཡོ་བྱད་དག་བཞེས་པར་ཅི་གནང་ཞེས་མཆི་ན། དེ་ལ་མཆིད་ཀྱིས་འཚལ་ལམ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་སོ་སོར་མགྲོན་དུ་བོས་པ་མ་གཏོགས་ཏེ། དགེ་སློང་གིས་སོ་སོར་མགྲོན་དུ་བོས་པ་བདག་གིར་བྱའོ། །དགེ་སློང་གཞན་དག་ཕྱིས་ལྷགས་པ་དེ་དག་གིས་བསམས་པ། བདག་ཅག་རྒྱལ་པོས་མགྲོན་དུ་མ་བོས་ཀྱིས་བསོད་སྙོམས་ལ་འཇུག་པར་བྱའོ་སྙམ་དུ་རིག་ནས་དེ་དག་བསོད་སྙོམས་ལ་ཞུགས་པ་དང་། མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་
པོ་སྟེང་གི་ཁང་བཟངས་ཀྱི་གཞིར་གཏོགས་པ་ན་འདུག་པས་དེ་དག་བསོད་སྙོམས་ལ་རྒྱུ་བ་མཐོང་ནས་དེས་བློན་པོ་རྣམས་ལ་སྨྲས་པ། ཤེས་ལྡན་དག་ཅིའི་ཕྱིར་འཕགས་པ་འདི་དག་བསོད་སྙོམས་ལ་ཞུགས། དེ་དག་གིས་སྨྲས་པ། ལྷ་འདི་དག་སླད་ཀྱིས་མཆིས་པས་འདི་དག་གི་གློ་བ་ལ་དགེ་སློང་གང་དག་བཅོམ་ལྡན་འདས་དང་ཐབས་ཅིག་ལྷགས་པ་དེ་དག་རྒྱལ་པོས་མགྲོན་དུ་བོས་ཀྱིས། བདག་ཅག་ཕྱིས་ལྷགས་པ་དག་རྒྱལ་པོས་མགྲོན་དུ་མ་བོས་སོ་སྙམ་དུ་རིག་ནས་བསོད་སྙོམས་ལ་ཞུགས་སོ། །རྒྱལ་པོས་སྨྲས་པ། དེ་ལྟ་བས་ན་འཕགས་པ་དག་ཡང་དང་ཡང་མགྲོན་དུ་བོད་དོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཡང་དང་ཡང་མགྲོན་དུ་བོས་པ་མ་གཏོགས་ཏེ། དགེ་སློང་གིས་ཡང་དང་ཡང་མགྲོན་དུ་བོས་པ་བདག་གིར་བྱའོ། །དགེ་སློང་དག་གིས་བསམས་པ། རྒྱལ་པོ་གཟུགས་ཅན་སྙིང་པོ་ནི་བྱ་བ་མང་བ་དང་། བྱེད་པ་མང་བ་ཡིན་ལ། བདག་ཅག་ནི་བྱ་བ་ཉུང་བ་དང་། བྱེད་པ་ཉུང་བ་ཡིན་གྱིས་བདག་ཅག་བསོད་སྙོམས་ལ་འཇུག་པར་བྱའོ་སྙམ་དུ་རིག་ནས་དེ་དག་བསོད་སྙོམས་ལ་ཞུགས་པ་དང་། མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་སྟེང་གི་ཁང་བཟངས་ཀྱི་གཞིར་གཏོགས་པ་ན་འདུག་པས། དེ་དག་བསོད་སྙོམས་ལ་རྒྱུ་བ་མཐོང་ནས་དེས་བློན་པོ་རྣམས་ལ་སྨྲས་པ། ཤེས་ལྡན་དག་ཅིའི་ཕྱིར་འཕགས་པ་འདི་དག་བསོད་སྙོམས་ལ་ཞུགས། དེ་དག་གིས་སྐབས་དེ་རྒྱས་པར་བརྗོད་པ་དང་། རྒྱལ་པོས་སྨྲས་པ། དེ་ལྟ་བས་ན་འཕགས་པ་དག་དུས་ཀྱིས་མགྲོན་དུ་བོད་དོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དུས་ཀྱིས་མགྲོན་དུ་བོས་པ་མ་གཏོགས་ཏེ། དགེ་སློང་གིས་དུས་ཀྱིས་མགྲོན་དུ་བོས་པ་བདག་གིར་བྱའོ། །རྒྱལ་པོ་གཟུགས་ཅན་སྙིང་པོས་བཅོམ་ལྡན་འདས་གཤེགས་སྟོན་ལ་སྤྱན་དྲངས་ནས་ཕྱི་དེ་ཉིན་པར་དགེ་སློང་རབ་ཏུ་མང་པོ་དག་བསོད་སྙོམས་ལ་ཞུགས་པ་དང་། མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་སྟེང་
གི་ཁང་བཟངས་ཀྱི་གཞིར་གཏོགས་པ་ན་འདུག་པས་དེ་དག་བསོད་སྙོམས་ལ་རྒྱུ་བ་མཐོང་ནས། དེས་བློན་པོ་རྣམས་ལ་སྨྲས་པ། ཤེས་ལྡན་དག་ཅིའི་ཕྱིར་འཕགས་པ་འདི་དག་བསོད་སྙོམས་ལ་ཞུགས། དེ་དག་གིས་སྐབས་དེ་རྒྱས་པར་བརྗོད་པ་དང་། རྒྱལ་པོས་སྨྲས་པ། དེ་ལྟ་བས་ན་འཕགས་པ་དག་རྟག་ཏུ་མགྲོན་དུ་བོད་དོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྟག་ཏུ་མགྲོན་དུ་བོས་པ་མ་གཏོགས་ཏེ། དགེ་སློང་གིས་རྟག་ཏུ་མགྲོན་དུ་བོས་པ་བདག་གིར་བྱའོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང་། བསླབ་པ་ལ་གུས་པ་དང་། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་མཐུན་པ་དང་། དེའི་ཤས་ཆེ་བ་དང་། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ། །དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ། །སོ་སོར་མགྲོན་དུ་བོས་པ་དང་། ཡང་དང་ཡང་མགྲོན་དུ་བོས་པ་དང་། དུས་ཀྱིས་མགྲོན་དུ་བོས་པ་དང་། རྟག་ཏུ་མགྲོན་དུ་བོས་པ་ནི་མ་གཏོགས་ཏེ། དེ་ལ་དེ་ནི་དུས་ཡིན་ནོ། །དགེ་སློང་གིས་ཞེས་བྱ་བ་ནི་ཆོས་འདི་པས་སོ། །ཟླ་བ་བཞིར་ཞེས་བྱ་བ་ནི་ཟླ་བ་བཞི་ཚུན་ཆད་དུའོ། །མགྲོན་དུ་བོས་པ་ཞེས་བྱ་བ་ནི་བསྟབས་པའོ། །བདག་གིར་བྱའོ་ཞེས་བྱ་བ་ནི་ཁས་བླང་བར་བྱ་བའོ། །དེ་ལས་ལྷག་པར་བདག་གིར་བྱེད་ན་ཞེས་བྱ་བ་ནི་དེ་ལས་འདས་པར་རོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་
པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །སོ་སོར་མགྲོན་དུ་བོས་པ་ཞེས་བྱ་བ་ནི་འདི་ལྟ་སྟེ། དགེ་སློང་སོ་སོར་ཐ་དད་པར་མགྲོན་དུ་བོས་པའོ། །ཡང་དང་ཡང་མགྲོན་དུ་བོས་པ་ཞེས་བྱ་བ་ནི་འདི་ལྟ་སྟེ། དགེ་སློང་ཡང་དང་ཡང་མགྲོན་དུ་བོས་པའོ། །དུས་ཀྱིས་མགྲོན་དུ་བོས་པ་ཞེས་བྱ་བ་ནི་འདི་ལྟ་སྟེ། དགེ་སློང་ནན་གྱིས་མགྲོན་དུ་བོས་པའོ། །རྟག་ཏུ་མགྲོན་དུ་བོས་པ་ཞེས་བྱ་བ་ནི་འདི་ལྟ་སྟེ། དགེ་སློང་གཏན་དུ་མགྲོན་དུ་བོས་པའོ། །མ་གཏོགས་ཏེ་ཞེས་བྱ་བ་ནི་བཞག་སྟེའོ། །དེ་ལ་དེ་ནི་དུས་ཡིན་ནོ་ཞེས་བྱ་བ་ནི་དེ་ལ་དེ་ནི་རྗེས་སུ་མཐུན་པའི་ཆོས་ཡིན་པའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་ཟླ་བ་བཞིར་མགྲོན་དུ་བོས་པ་ལས་ལྷག་པར་བདག་གིར་བྱེད་ན། ཐམས་ཅད་དུ་ལྟུང་བྱེད་དུ་འགྱུར་རོ། །དགེ་སློང་གིས་ངན་པ་ལ་མགྲོན་དུ་བོས་པ་ན་བསོད་པ་སློང་ན་དེ་སློང་བ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་རོ། །དགེ་སློང་གིས་བསོད་པ་ལ་མགྲོན་དུ་བོས་པ་ན་ངན་པ་སློང་ན་དེ་སློང་བ་ལ་ཉེས་བྱས་སུ་འགྱུར་ལ། ཟ་བ་ལ་ཡང་ཉེས་བྱས་ཉིད་དུ་འགྱུར་རོ། །དགེ་སློང་བསོད་སྙོམས་ལ་ཞུགས་པ་ན་བུད་མེད་ཀྱི་ཡུལ་ཟས་ཁྱེར་ཏེ་འོང་ན་དགེ་སློང་གིས་སྲིང་མོ་ཆོག་གོ །མི་འདོད་དོ་ཞེས་བརྗོད་པར་བྱ་སྟེ། གལ་ཏེ་བུད་མེད་ཀྱི་ཡུལ་ན་རེ་འཕགས་པ་ཅི་ཞིག་བཞེད་ཅེས་ཟེར་ན་བསྟབས་པ་བརྗོད་པར་བྱ་སྟེ། གང་འདོད་པ་དེ་བསླང་བར་བྱའོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །མགྲོན་དུ་གཉེར་བ་ལས་རིང་དུ་འདུག་པའི་ལྟུང་བྱེད་དེ་བདུན་བཅུ་རྩ་བཞི་པ་རྫོགས་སོ།། །།སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །གང་གི་ཚེ་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་ཐུན་མོང་འཆའ་བར་མཛད་པ་དེའི་ཚེ་ན་གཉི་གའི་དགེ་འདུན་སྡུད་པར་མཛད་པས་འདི་ཡང་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་ཐུན་མོང་བཅའ་བ་མཛད་པ་ཡིན་ན་འདི་ལ་གཉི་གའི་དགེ་འདུན་བསྡུ་བ་མ་མཛད་པས་དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་
བོ་སོང་ལ་དགེ་སློང་རྣམས་ལ་དགེ་སློང་ཞིག་དགེ་སློང་མ་རྣམས་ཀྱི་ནང་དུ་ཐོང་ལ་འདི་སྐད་ཅེས། སྲིང་མོ་དག་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་ཐུན་མོང་འདི་ལྟར་བཅའ་བ་མཛད་དེ། དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ། །དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ། །སོ་སོར་མགྲོན་དུ་བོས་པ་དང་། ཡང་དང་ཡང་མགྲོན་དུ་བོས་པ་དང་། དུས་ཀྱིས་མགྲོན་དུ་བོས་པ་དང་། རྟག་ཏུ་མགྲོན་དུ་བོས་པ་ནི་མ་གཏོགས་ཏེ། དེ་ལ་དེ་ནི་དུས་ཡིན་ནོ་ཞེས་བཅའ་བ་མཛད་ཀྱིས་ཁྱེད་ཀྱིས་བསླབ་པ་འདི་ལ་བསླབ་པར་བྱའོ་ཞེས་བསྒོ་ཤིག་ཅེས་གྱིས་ཤིག །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཚེ་དང་ལྡན་པ་ལམ་པ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ལམ་པ་ལ་བསྒོ་བ། ཚེ་དང་ལྡན་པ་ལམ་པ་ཁྱོད་བཞུད་ལ་དགེ་སློང་མ་རྣམས་ལ་སྲིང་མོ་དག་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་ཐུན་མོང་འདི་ལྟར་བཅའ་བ་མཛད་དེ། དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ། །དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ། །སོ་སོར་མགྲོན་དུ་བོས་པ་དང་། ཡང་དང་ཡང་མགྲོན་དུ་བོས་པ་དང་། དུས་ཀྱིས་མགྲོན་དུ་བོས་པ་དང་། རྟག་ཏུ་མགྲོན་དུ་བོས་པ་ནི་མ་གཏོགས་ཏེ། དེ་ལ་དེ་ནི་དུས་ཡིན་ནོ་ཞེས་བཅའ་བ་མཛད་ཀྱིས་ཁྱེད་ཀྱིས་བསླབ་པ་འདི་ལ་བསླབ་པར་བྱའོ་ཞེས་བསྒོ་ཤིག །ཚེ་དང་ལྡན་པ་ལམ་པས་བཙུན་པ་ཀུན་དགའ་བོ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོ་ལས་མཉན་ནས་དགེ་སློང་མའི་དབྱར་ཁང་ག་ལ་བ་དེར་སོང་བ་དང་། ཇི་ཙམ་ན་དྲུག་སྡེ་དག་གིས་དེ་མཐོང་ནས་དེ་དག་གིས་དྲིས་པ། ཚེ་དང་ལྡན་པ་ལམ་པ་ཁྱོད་གར་འགྲོ། ཚེ་དང་ལྡན་པ་ལམ་པས་བསམས་པ། འདི་དག་གིས་ཀྱང་མ་ཐོས་པ་འདྲས་འདི་དག་ལ་ཡང་བརྗོད་པར་བྱའོ་སྙམ་ནས་དེས་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་ཐུན་མོང་འདི་ལྟར་བཅའ་བ་མཛད་དེ། དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ། །དེ་ལས་ལྷག་པར་
བདག་གིར་བྱེད་ན་ལྟུང་བྱེད་དོ། །སོ་སོར་མགྲོན་དུ་བོས་པ་དང་། ཡང་དང་ཡང་མགྲོན་དུ་བོས་པ་དང་། དུས་ཀྱིས་མགྲོན་དུ་བོས་པ་དང་། རྟག་ཏུ་མགྲོན་དུ་བོས་པ་ནི་མ་གཏོགས་ཏེ། དེ་ལ་དེ་ནི་དུས་ཡིན་ནོ་ཞེས་བཅའ་བ་མཛད་ཀྱིས་ཁྱེད་ཀྱིས་ཀྱང་བསླབ་པ་འདི་ལ་བསླབ་པར་བྱའོ། །དེ་དག་གིས་སྨྲས་པ། བདག་ཅག་དགེ་སློང་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་རྣམས་ལ་འདྲིའི་བར་དུ་བྱིས་པ། རྨོངས་པ། མི་གསལ་བ། མི་མཁས་པ། ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་དེ་དག་གིས་བྱིས་པ་དང་། རྨོངས་པ་དང་། མི་གསལ་བ་དང་། མི་མཁས་པ་ཞེས་བྱ་བ་དག་གིས་ཁུར་བསླང་ངོ་། །ཚེ་དང་ལྡན་པ་ལམ་པ་དེ་ནས་སོང་སྟེ་འགྲོ་བ་ན་དགེ་སློང་མ་བཅུ་གཉིས་སྡེ་དག་གིས་མཐོང་ནས་དེ་དག་གིས་དེ་ལ་སྨྲས་པ། བཙུན་པ་ལམ་པ་གར་བཞུད། དེས་སྨྲས་པ། སྲིང་མོ་དག་ཤེས་པར་གྱིས་ཤིག །བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་ཐུན་མོང་འདི་ལྟར་བཅའ་བ་མཛད་དེ། དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ། །དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ། །སོ་སོར་མགྲོན་དུ་བོས་པ་དང་། ཡང་དང་ཡང་མགྲོན་དུ་བོས་པ་དང་། དུས་ཀྱིས་མགྲོན་དུ་བོས་པ་དང་། རྟག་ཏུ་མགྲོན་དུ་བོས་པ་ནི་མ་གཏོགས་ཏེ། དེ་ལ་དེ་ནི་དུས་ཡིན་ནོ་ཞེས་བཅའ་བ་མཛད་ཀྱིས་ཁྱེད་ཀྱིས་ཀྱང་བསླབ་པ་འདི་ལ་བསླབ་པར་བྱའོ། །དེ་དག་གིས་སྨྲས་པ། བདག་ཅག་དགེ་སློང་མ་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་རྣམས་ལ་འདྲིའི་བར་དུ་བྱིས་པ། རྨོངས་པ། མི་གསལ་བ། མི་མཁས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་བྱིས་པ་དང་། རྨོངས་པ་དང་། མི་གསལ་བ་དང་། མི་མཁས་པ་ཞེས་བྱ་བ་དག་གིས་ཁུར་བསླང་སྟེ་དོང་ངོ་། །ཚེ་དང་ལྡན་པ་ལམ་པས་བསམས་པ། བདག་ལ་གནས་ངན་ལེན་ཀུན་དུ་སྤྱོད་པ་འདི་དག་ལ་བརྗོད་པས་ཅི་བྱ། ད་ནི་སོང་ལ་སྐྱེ་དགུའི་བདག་མོ་ཆེན་མོ་གཽ་ཏ་མཱི་མ་གཏོགས་པ་གཞན་འགའ་ལ་ཡང་བརྗོད་པར་མི་བྱའོ་སྙམ་ནས་དེ་སྐྱེ་དགུའི་བདག་མོ་ཆེན་མོ་གཽ་ཏ་མཱི་ག་ལ་བ་དེར་སོང་སྟེ་ཕྱིན་ནས་སྐྱེ་དགུའི་བདག་མོ་
ཆེན་མོ་གཽ་ཏ་མཱི་ལ་འདི་སྐད་ཅེས་སྨྲས་སོ། །གཽ་ཏ་མཱི་ཤེས་པར་གྱིས་ཤིག། བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་ཐུན་མོང་འདི་ལྟར་བཅའ་བ་མཛད་དེ། དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ། །དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ། །སོ་སོར་མགྲོན་དུ་བོས་པ་དང་། ཡང་དང་ཡང་མགྲོན་དུ་བོས་པ་དང་། དུས་ཀྱིས་མགྲོན་དུ་བོས་པ་དང་། རྟག་ཏུ་མགྲོན་དུ་བོས་པ་ནི་མ་གཏོགས་ཏེ། དེ་ལ་དེ་ནི་དུས་ཡིན་ནོ་ཞེས་བཅའ་བ་མཛད་ཀྱིས་ཁྱེད་ཀྱིས་བསླབ་པ་འདི་ལ་བསླབ་པར་བྱའོ། །སྐྱེ་དགུའི་བདག་མོ་ཆེན་མོས་སྨྲས་པ། བཙུན་པ་ལམ་པ་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དེ། དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ། །དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ། །སོ་སོར་མགྲོན་དུ་བོས་པ་དང་། ཡང་དང་ཡང་མགྲོན་དུ་བོས་པ་དང་། དུས་ཀྱིས་མགྲོན་དུ་བོས་པ་དང་། རྟག་ཏུ་མགྲོན་དུ་བོས་པ་ནི་མ་གཏོགས་ཏེ། དེ་ལ་དེ་ནི་དུས་ཡིན་ནོ་ཞེས་བཅའ་བ་མཛད་པ་གང་ལགས་པ་དེ་བདག་མགོ་དང་། ངག་དང་། ཡིད་ཀྱིས་ཀྱང་ནོད་དོ། །བཙུན་པ་ལམ་པ་འདི་ལྟ་སྟེ། དཔེར་བགྱི་ན་རྒྱལ་རིགས་ཀྱི་ཕྱུགས་ཅུང་དག་གམ། བྲམ་ཟེའི་ཕྱུགས་ཅུང་དག་གམ། རྗེའུ་རིགས་ཀྱི་ཕྱུགས་ཅུང་དག་གམ། དམངས་རིགས་ཀྱི་ཕྱུགས་ཅུང་ལེགས་པར་ཁྲུས་བགྱིས་པ། བྱུག་པས་ལེགས་པར་བྱུགས་པ། སྐྲ་དང་སེན་མོ་ལེགས་པར་བཅོས་པ། རད་པ་དཀར་པོ་འཚལ་བ་དག་གིས་ཨུད་པ་ལའི་ཕྲེང་བའམ། ཙམ་པ་ཀའི་ཕྲེང་བའམ། བར་ཤི་ཀའི་ཕྲེང་བའམ། ཨ་ཏི་མུག་ཏ་ཀའི་ཕྲེང་བ་འགའ་ཞིག་སྩལ་བར་གྱུར་ན་དེ་ཡིད་དགའ་བས་སུག་པ་གཉིས་ཀྱིས་བླངས་ཏེ་ཡན་ལག་གི་དམ་པ་མགོ་ལ་གདགས་པར་བགྱི་བ་དེ་བཞིན་དུ། བཙུན་པ་ལམ་པ་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དེ། དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ། །དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ། །སོ་སོར་མགྲོན་དུ་བོས་པ་དང་། ཡང་དང་ཡང་མགྲོན་དུ་བོས་པ་དང་། དུས་
ཀྱིས་མགྲོན་དུ་བོས་པ་དང་། རྟག་ཏུ་མགྲོན་དུ་བོས་པ་ནི་མ་གཏོགས་ཏེ། དེ་ལ་དེ་ནི་དུས་ཡིན་ནོ་ཞེས་བཅའ་བ་མཛད་པ་གང་ལགས་པ་དེ་ཡང་བདག་མགོ་དང་། ངག་དང་། ཡིད་ཀྱིས་ཀྱང་ནོད་དོ། །ཚེ་དང་ལྡན་པ་ལམ་པས་བསྒོ་སྟེ་ཕྱིར་འོངས་པ་དང་། ཚེ་དང་ལྡན་པ་ཀུན་དགའ་བོས་དེ་མཐོང་ནས་དྲིས་པ། ཚེ་དང་ལྡན་པ་ལམ་པ་ཁྱོད་ཀྱིས་དགེ་སློང་མ་རྣམས་ལ་བསྒོའམ། དེས་སྨྲས་པ། བསྒོ་སྟེ། འདི་ལྟར་བྱིས་པ་དང་། རྨོངས་པ་དང་། མི་གསལ་བ་དང་། མི་མཁས་པ་ཞེས་བྱ་བ་དག་གིས་ཁུར་བསླང་ངོ་། །སུས། དྲུག་སྡེ་དག་གིས་སོ། །ཅིའི་ཕྱིར། དེས་སྐབས་དེ་རྒྱས་པར་བརྗོད་པ་དང་། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་རྣམས་ཀྱིས་ཚེ་དང་ལྡན་པ་དག་ཁྱེད་ཀྱིས་བསླབ་པ་འདི་ལ་བསླབ་པར་བྱའོ་ཞེས་བསྒོ་བ་ན་དེ་དག་ལ་འདི་སྐད་ཅེས་བདག་ཅག་དགེ་སློང་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་རྣམས་ལ་འདྲིའི་བར་དུ་བྱིས་པ། རྨོངས་པ། མི་གསལ་བ། མི་མཁས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱེད་དགེ་སློང་རྣམས་ཀྱིས་ཚེ་དང་ལྡན་པ་དག་ཁྱེད་ཀྱིས་བསླབ་པ་འདི་ལ་བསླབ་པར་བྱའོ་ཞེས་བསྒོ་བ་ན་དེ་དག་ལ་འདི་སྐད་ཅེས། བདག་ཅག་དགེ་སློང་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་རྣམས་ལ་འདྲིའི་བར་དུ་བྱིས་པ། རྨོངས་པ། མི་གསལ་བ། མི་མཁས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་
ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་རྣམས་ཀྱིས་ཚེ་དང་ལྡན་པ་ཁྱོད་ཀྱིས་བསླབ་པ་འདི་ལ་བསླབ་པར་བྱའོ་ཞེས་བསྒོ་བ་ན་དེ་དག་ལ་འདི་སྐད་ཅེས། བདག་དགེ་སློང་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་རྣམས་ལ་འདྲིའི་བར་དུ་བྱིས་པ། རྨོངས་པ། མི་གསལ་བ། མི་མཁས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ན་ལྟུང་བྱེད་དོ། །དགེ་སློང་ཀུན་ཤེས་པར་འདོད་པས་ཀྱང་བསླབ་པ་དེ་ལ་བསླབ་པར་བྱའོ། །དགེ་སློང་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་རྣམས་ལ་ཡང་དྲི་བར་བྱ་སྟེ། དེ་ལ་དེ་ནི་ཆོ་ག་ཡིན་ནོ། །ཡང་དགེ་སློང་གང་ཞེས་བྱ་བ་ནི་དྲུག་སྡེའམ། གཞན་ཡང་དེ་ལྟ་བུ་གང་ཡིན་པའོ། །དགེ་སློང་རྣམས་ཀྱིས་ཞེས་བྱ་བ་ནི་ཆོས་འདི་པ་རྣམས་ཀྱིས་སོ། །ཚེ་དང་ལྡན་པ་ཁྱོད་ཀྱིས་བསླབ་པ་འདི་ལ་བསླབ་པར་བྱའོ་ཞེས་བསྒོ་བ་ན་ཞེས་བྱ་བ་ནི་བསླབ་པ་གང་ཡིན་པ་དེ་ལའོ། །དེ་དག་ལ་ཞེས་བྱ་བ་ནི་དགེ་སློང་དེ་དག་ལའོ། །འདི་སྐད་ཅེས་ཞེས་བྱ་བ་ནི་འདི་སྐད་ཅེས་ཟེར་ནའོ། །དགེ་སློང་མདོ་སྡེ་འཛིན་པ་ཞེས་བྱ་བ་ནི་མདོ་སྡེ་མཐའ་དག་འཛིན་པ་གང་དག་ཡིན་པ་རྣམས་སོ། །འདུལ་བ་འཛིན་པ་ཞེས་བྱ་བ་ནི་འདུལ་བ་མཐའ་དག་འཛིན་པ་གང་དག་ཡིན་པ་རྣམས་སོ། །མ་མོ་འཛིན་པ་རྣམས་ལ་འདྲིའི་བར་དུ་ཞེས་བྱ་བ་ནི་མ་མོ་མཐའ་དག་འཛིན་པ་གང་དག་ཡིན་པ་རྣམས་ལའོ། །བྱིས་པ་ཞེས་བྱ་བ་ལ། བྱིས་པ་ཞེས་བྱ་བ་ནི་ཉེས་པར་བསམ་པ་སེམས་པ་དང་། ཉེས་པར་སྨྲ་བ་རྗོད་པ་དང་། ཉེས་པར་བྱ་བའི་ལས་བྱེད་པའོ། །རྨོངས་པ་ཞེས་བྱ་བ་ལ། རྨོངས་པ་ཞེས་བྱ་བ་ནི་མདོ་སྡེ་འཛིན་པ་མ་ཡིན་པ་
དང་། འདུལ་བ་འཛིན་པ་མ་ཡིན་པ་དང་། མ་མོ་འཛིན་པ་མ་ཡིན་པའོ། །མི་གསལ་བ་ཞེས་བྱ་བ་ལ། མི་གསལ་བ་ཞེས་བྱ་བ་ནི་མདོ་སྡེ་ལ་མི་གསལ་བ་དང་། འདུལ་བ་ལ་མི་གསལ་བ་དང་། མ་མོ་ལ་མི་གསལ་བའོ། །མི་མཁས་པ་ཞེས་བྱ་བ་ལ། མི་མཁས་པ་ཞེས་བྱ་བ་ནི་མདོ་སྡེ་ལ་མི་མཁས་པ་དང་། འདུལ་བ་ལ་མི་མཁས་པ་དང་། མ་མོ་ལ་མི་མཁས་པའོ། །ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ན་ཞེས་བྱ་བ་ནི་དེ་སྐད་ཅེས་ཟེར་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དགེ་སློང་ཀུན་ཤེས་པར་འདོད་པས་ཀྱང་བསླབ་པ་དེ་ལ་བསླབ་པར་བྱའོ། །དགེ་སློང་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་རྣམས་ལ་ཡང་དྲི་བར་བྱ་སྟེ། དེ་ལ་དེ་ནི་ཆོ་ག་ཡིན་ནོ་ཞེས་བྱ་བ་ནི་དེ་ལ་དེ་ནི་རྗེས་སུ་མཐུན་པའི་ཆོས་ཡིན་པའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་དགེ་སློང་རྣམས་ཀྱིས་ཚེ་དང་ལྡན་པ་ཁྱོད་ཀྱིས་བསླབ་པ་འདི་ལ་བསླབ་པར་བྱའོ། །ཞེས་བསྒོ་བ་ན་དེ་དག་ལ་འདི་སྐད་ཅེས། བདག་དགེ་སློང་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་རྣམས་ལ་འདྲིའི་བར་དུ་བྱིས་པ། རྨོངས་པ། མི་གསལ་བ། མི་མཁས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ན་ཐམས་ཅད་ལྟུང་བྱེད་དུ་འགྱུར་རོ། །བྱིས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ན་ལྟུང་བྱེད་དུ་འགྱུར་རོ། །རྨོངས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ན་ལྟུང་བྱེད་དུ་འགྱུར་རོ། །མི་གསལ་བ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ན་ལྟུང་བྱེད་དུ་འགྱུར་རོ། །མི་མཁས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ན་ལྟུང་བྱེད་དུ་འགྱུར་རོ། །ཡང་དག་པ་ཁོ་ནར་བྱིས་པ་དང་། རྨོངས་པ་དང་། མི་གསལ་བ་དང་། མི་མཁས་པ་ཡིན་ན་ལྟུང་བ་
མེད་དོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བསླབ་པ་ལ་ཉེ་བར་འཇོག་པ་སྤང་བའི་ལྟུང་བྱེད་དེ་བདུན་བཅུ་རྩ་ལྔ་པ་རྫོགས་སོ། ། ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཚེ་དང་ལྡན་པ་འཆར་ཀས་ནི་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱས། ཚེ་དང་ལྡན་པ་འདུན་པ་ནི་ཀཽ་ཤཱམྦཱིར་སོང་སྟེ་སྙིང་ལས་ཆུང་ངུར་འདུག །འགྲོ་མགྱོགས་དང་། ནབ་སོ་གཉིས་ནི་དུས་ལ་བབ། དགའ་བོ་དང་ཉེ་དགའ་གཉིས་ནི་དགེ་འདུན་གྱི་ནང་ན་འདུག་པ་དེའི་ཚེ་ན་བཅུ་བདུན་སྡེའི་ཚོགས་དག་གདུག་ཅིང་ཕ་རོལ་གནོན་པ་དང་། མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པར་གྱུར་ནས་དེ་དག་གིས་སྨྲས་པ། ཚེ་དང་ལྡན་པ་དག་བདག་ཅག་ཡུན་རིང་པོ་ནས་དྲུག་སྡེ་དག་གིས་ཐོ་བཙམས་ཏེ། ཇི་ལྟར་དགའ་བོ་དང་ཉེ་དགའ་གཉིས་ཀྱིས་ཐོ་བཙམས་པ་ལྟར་ཡང་གཞན་གྱིས་མ་བཙམས་ལ། ཇི་ལྟར་ཉེ་དགའས་ཐོ་བཙམས་པ་ལྟར་ཡང་དགའ་བོས་མ་བཙམས་ཀྱིས་དེ་གནས་ནས་དབྱུང་བའི་ལས་བྱའོ། །དེ་དག་གིས་སྨྲས་པ། འདིའི་ཕུ་བོ་རྩོད་པ་ལ་མཁས་པ་ཡིན་གྱིས་ཚུར་ཤེག །ཇེ་གྲོས་བྱའོ་ཞེས་དེ་དག་དཔོང་སའི་ཁང་པར་ཞུགས་ཏེ་སྒོ་བཅད་ནས་གྲོས་བྱ་བར་བརྩམས་པ་དང་། ཉེ་དགའ་སྐར་ཁུང་ན་ཉན་ཅིང་དེས་དེ་དག་བསྡིགས་ཏེ། ཀྱེ་མ་བཅུ་བདུན་སྡེ་དག་ཅིའི་གྲོས་བྱེད། ཁོ་བོའི་ཚངས་པ་མཚུངས་པར་སྤྱོད་པ་ཁ་ཅིག་ནི་ཡོངས་སུ་མྱ་ངན་ལས་འདས། ཁ་ཅིག་ནི་སྙིང་ལས་ཆུང་ངུ་ཁོ་ནར་འདུག །ཁ་ཅིག་ནི་དུས་ལ་བབ་པས་ད་འདི་གནས་ནས་དབྱུང་བའི་ལས་བྱའོ་སྙམ་དུ་སེམས་སམ་ཅི། ཁྱེད་ཀྱིས་ད་ཁོ་བོ་ཅག་ཟིལ་གྱིས་མནན་ཏེ་འཁོད་སྙམ་མམ། ཁོ་བོ་ཅག་གིས་ཀྱང་ཁྱེད་ལ་མཚམས་ཆེན་པོ་གཅད་པར་བྱའོ། །ཁྱེད་ཀྱིས། གླང་པོའི་ཐག་པ་ཉི་མ་དང་། །རླུང་གིས་ཡོངས་སུ་བསྐམས་གྱུར་ཅིང་། །གླང་པོའི་གཉའ་ནས་ལྷུང་གྱུར་ཀྱང་། །ལུག་ནི་ལྔ་བརྒྱས་དྲང་བར་བྱ། །ཞེས་བྱ་བ་མ་ཐོས་སམ་ཞེས་བསྡིགས་པ་དང་། དེ་དག་གིས་བསམས་པ། འདིས་བདག་ཅག་གྲོས་
བྱེད་པ་འཕྲིགས་ཀྱིས་གཞན་དུ་འདོང་ངོ་ཞེས་དེ་དག་མེ་ཁང་དུ་ཞུགས་ཏེ་གྲོས་བྱ་བར་བརྩམས་པ་དང་། ཉེ་དགའ་ཡང་དེར་འཇབ་ཅིང་འོངས་ཏེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ། །དེ་དག་སྟེང་ཁང་དུ་འཁོད་དེ་གྲོས་བྱ་བར་བརྩམས་པ་དང་། ཉེ་དགའ་བར་ཁང་དུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ། །དེ་དག་བར་ཁང་དུ་འཁོད་དེ་གྲོས་བྱ་བར་བརྩམས་པ་དང་། ཉེ་དགའ་འོག་ཁང་དུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ། །དེ་དག་གནས་ཁང་དུ་འཁོད་དེ་གྲོས་བྱ་བར་བརྩམས་པ་དང་། ཉེ་དགའ་ཁྱམས་སུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ། །དེ་དག་ཁྱམས་སུ་འཁོད་དེ་གྲོས་བྱ་བར་བརྩམས་པ་དང་། ཉེ་དགའ་གནས་ཁང་དུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ། །དེ་དག་སྒོ་ཁང་དུ་འཁོད་དེ་གྲོས་བྱ་བར་བརྩམས་པ་དང་། ཉེ་དགའ་བང་རིམ་དུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ། །དེ་དག་བང་རིམ་དུ་འཁོད་དེ་གྲོས་བྱ་བར་བརྩམས་པ་དང་། ཉེ་དགའ་སྒོ་ཁང་དུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ། །དེ་དག་འཆག་སར་འཁོད་དེ་གྲོས་བྱ་བར་བརྩམས་པ་དང་། ཉེ་དགའ་སྤན་སྤུན་དག་གི་ནང་དུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ། །དེ་དག་སྤན་སྤུན་དག་གི་ནང་དུ་འཁོད་དེ་གྲོས་བྱ་བར་བརྩམས་པ་དང་། ཉེ་དགའ་འཆག་སར་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ། །དེ་དག་དགོན་པར་འཁོད་དེ་གྲོས་བྱ་བར་བརྩམས་པ་དང་། ཉེ་དགའ་ཚང་ཚིང་དག་གི་ནང་དུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ། །དེ་དག་ཚང་ཚིང་དག་གི་ནང་དུ་འཁོད་དེ་གྲོས་བྱ་བར་བརྩམས་པ་དང་། ཉེ་དགའ་དགོན་པར་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ། །དེ་དག་ལམ་ནས་འདོང་ཞིང་གྲོས་བྱ་བར་བརྩམས་པ་དང་། ཉེ་དགའ་ཕྱི་བཞིན་སོང་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་ནས་དེ་དག་གིས་སྨྲས་པ། ཚེ་དང་ལྡན་པ་དག་བདག་ཅག་གིས་འདི་གནས་ནས་དབྱུང་བའི་ལས་བྱ་བར་མི་ནུས་ཀྱིས་འདི་ལ་བཟོད་པ་གསོལ་བར་བྱའོ་ཞེས་དེ་དག་གིས་དེ་ལ་སྨྲས་པ། བཙུན་པ་ཉེ་དགའ་བདག་ཅག་ལ་བཟོད་པར་མཛོད་ཅིག །ཉེ་
དགའས་སྨྲས་པ། བཟོད་པར་བྱའོ། །དེ་དག་གིས་དེ་ལ་དྲིས་པ། ཁྱོད་ཀྱིས་ཁོ་བོ་ཅག་གྲོས་བྱེད་པ་ཇི་ལྟར་ཤེས། ཉེ་དགའས་སྨྲས་པ། གང་གི་ཚེ་ཁྱེད་ཅག་དཔོང་སའི་ཁང་པར་ཞུགས་ཏེ་གྲོས་བྱེད་པ་དེའི་ཚེ་ན་ཁོ་བོས་སྐར་ཁུང་ནས་མཉན་ཏོ། །གང་གི་ཚེ་ཁྱེད་ཅག་མེ་ཁང་དུ་ཞུགས་ཏེ་གྲོས་བྱེད་པ་དེའི་ཚེ་ན་ཁོ་བོས་བཞབས་ཏེ་མཉན་ཏོ། །གང་གི་ཚེ་ཁྱེད་ཅག་སྟེང་ཁང་དུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་བར་ཁང་དུ་འདུག་སྟེ་མཉན་ཏོ། །གང་གི་ཚེ་ཁྱེད་ཅག་བར་ཁང་དུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་འོག་ཁང་དུ་འདུག་སྟེ་མཉན་ཏོ། །གང་གི་ཚེ་ཁྱེད་ཅག་གནས་ཁང་དུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་ཁྱམས་སུ་འདུག་སྟེ་མཉན་ཏོ། །གང་གི་ཚེ་ཁྱེད་ཅག་ཁྱམས་སུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་གནས་ཁང་དུ་འདུག་སྟེ་མཉན་ཏོ། །གང་གི་ཚེ་ཁྱེད་ཅག་སྒོ་ཁང་དུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་བང་རིམ་དུ་འདུག་སྟེ་མཉན་ཏོ། །གང་གི་ཚེ་ཁྱེད་ཅག་བང་རིམ་དུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་སྒོ་ཁང་དུ་འདུག་སྟེ་མཉན་ཏོ། །གང་གི་ཚེ་ཁྱེད་ཅག་འཆག་སར་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་སྤན་སྤུན་དག་གི་ནང་དུ་འདུག་སྟེ་མཉན་ཏོ། །གང་གི་ཚེ་ཁྱེད་ཅག་སྤན་སྤུན་དག་གི་ནང་དུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་འཆག་སར་འདུག་སྟེ་མཉན་ཏོ། །གང་གི་ཚེ་ཁྱེད་ཅག་དགོན་པར་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་ཚང་ཚིང་དག་གི་ནང་དུ་འདུག་སྟེ་མཉན་ཏོ། །གང་གི་ཚེ་ཁྱེད་ཅག་ཚང་ཚིང་དག་གི་ནང་དུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་དགོན་པར་འདུག་སྟེ་མཉན་ཏོ། །གང་གི་ཚེ་ཁྱེད་ཅག་ལམ་ནས་འདོང་ཞིང་གྲོས་བྱེད་པ་དེའི་ཚེ་ན་ཁོ་བོས་ཕྱི་བཞིན་སོང་སྟེ་མཉན་ཏོ། །དེ་དག་གིས་སྨྲས་པ། ཁྱོད་ཉན་རྣས་འདུག་ཏུ་རུང་ངམ། ཉེ་དགའས་སྨྲས་པ། གལ་ཏེ་ཁོ་བོ་ཁྱེད་ཅག་གྲོས་བྱེད་པའི་ཚེ་ཉན་རྣས་འདུག་པར་མ་གྱུར་དུ་ཟིན་ན་ཁྱེད་ཅག་གིས་ཁོ་བོ་གནས་ནས་དབྱུང་བའི་ལས་བྱས་པར་གྱུར་ཏོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་རྣམས་འཐབ་པར་གྱུར། མཚང་འདྲུ་བར་གྱུར། མི་མཐུན་པར་གྱུར། རྩོད་པར་གྱུར་ཅིང་འཁོད་པ་ལ་དགེ་སློང་འདི་དག་ཇི་སྐད་ཟེར་བ་དེ་བདག་གིས་མཉན་ཏེ། དེ་ལྟ་དེ་ལྟར་རྗེས་སུ་ཐ་སྙད་གདགས་པར་བྱའོ་སྙམ་པ་དེ་ཉིད་རྐྱེན་དུ་བྱས་
ཏེ་ཅང་མི་སྨྲ་བར་ཉན་རྣས་འདུག་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཤཱཀྱའི་བུ་ཉེ་དགའ་ལ་རྨས་པ། ཉེ་དགའ་ཁྱོད་དགེ་སློང་རྣམས་འཐབ་པར་གྱུར། མཚང་འདྲུ་བར་གྱུར། མི་མཐུན་པར་གྱུར། རྩོད་པར་གྱུར་ཅིང་འཁོད་པ་ལ་དགེ་སློང་འདི་དག་ཇི་སྐད་ཟེར་བ་དེ་བདག་གིས་མཉན་ཏེ་དེ་ལྟ་དེ་ལྟར་རྗེས་སུ་ཐ་སྙད་གདགས་པར་བྱའོ་སྙམ་པ་དེ་ཉིད་རྐྱེན་དུ་བྱས་ཏེ་ཅང་མི་སྨྲ་བར་ཉན་རྣས་འདུག་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་རྣམས་འཐབ་པར་གྱུར། མཚང་འདྲུ་བར་གྱུར། མི་མཐུན་པར་གྱུར། རྩོད་པར་གྱུར་ཅིང་འཁོད་པ་ལ་དགེ་སློང་འདི་དག་ཇི་སྐད་ཟེར་བ་དེ་བདག་གིས་མཉན་ཏེ་དེ་ལྟ་དེ་ལྟར་རྗེས་སུ་ཐ་སྙད་གདགས་པར་བྱའོ་སྙམ་པ་དེ་ཉིད་རྐྱེན་དུ་བྱས་ཏེ་ཅང་མི་སྨྲ་བར་ཉན་རྣས་འདུག་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་ཉེ་དགའ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་སློང་རྣམས་ཞེས་བྱ་བ་ནི་ཆོས་འདི་པ་རྣམས་སོ། །འཐབ་པར་གྱུར། མཚང་འདྲུ་བར་གྱུར། མི་མཐུན་པར་གྱུར། རྩོད་པར་གྱུར་ཅིང་འཁོད་པ་ལ་
ཞེས་བྱ་བ་ནི་ཕྱོགས་དང་གཞན་གྱི་ཕྱོགས་སུ་རྣམ་པར་གནས་པ་ལའོ། །དགེ་སློང་འདི་དག་ཇི་སྐད་ཟེར་བ་དེ་བདག་གིས་མཉན་ཏེ་དེ་ལྟ་དེ་ལྟར་རྗེས་སུ་ཐ་སྙད་གདགས་པར་བྱའོ་སྙམ་པ་ཞེས་བྱ་བ་ནི་དེ་ལྟ་བུའི་བསམ་པས་གཉེན་པོས་དེ་ལྟ་དེ་ལྟར་ཕ་རོལ་གནན་པར་བྱའོ་སྙམ་པའོ། །དེ་ཉིད་རྐྱེན་དུ་བྱས་ཏེ་ཞེས་བྱ་བ་ནི་གཞན་མ་ཡིན་པའོ། །ཅང་མི་སྨྲ་བར་ཉན་རྣས་འདུག་ན་ཞེས་བྱ་བ་ནི་ཅང་མི་སྨྲ་བར་རྣ་གཏོད་པས་འདུག་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་དག་སྟེང་ཁང་ན་གྲོས་བྱེད་ཅིང་དགེ་སློང་ཡང་འཛེག་ན་དགེ་སློང་དེས་རྟིང་སྒྲའམ། སེ་གོལ་གྱི་སྒྲའམ། མགུལ་བསལ་བའི་སྒྲ་བྱའོ། །རྟིང་སྒྲའམ། སེ་གོལ་གྱི་སྒྲའམ། མགུལ་བསལ་བའི་སྒྲ་མི་བྱེད་ན་ཇི་སྲིད་དུ་སྒྲ་ཐོས་ཤིང་དོན་མ་གོའི་བར་དུ་དགེ་སློང་ལ་ཉེས་བྱས་སུ་འགྱུར་ལ། སྒྲའི་དོན་གོ་ན་ལྟུང་བྱེད་དུ་འགྱུར་རོ། །དགེ་སློང་དག་བར་ཁང་དང་། འོག་ཁང་དང་། གནས་ཁང་དང་། ཁྱམས་དང་། སྒོ་ཁང་དང་། བང་རིམ་དང་། འཆག་ས་དང་། དགོན་པ་དང་། ལམ་ནས་འགྲོ་ཞིང་གྲོས་བྱེད་ལ། དགེ་སློང་ཡང་ཕྱི་བཞིན་འགྲོ་ན་དགེ་སློང་དེས་རྟིང་སྒྲའམ། སེ་གོལ་གྱི་སྒྲའམ། མགུལ་བསལ་བའི་སྒྲ་བྱའོ། །རྟིང་སྒྲའམ། སེ་གོལ་གྱི་སྒྲའམ། མགུལ་བསལ་བའི་སྒྲ་མི་བྱེད་ན་ཇི་སྲིད་དུ་སྒྲ་ཐོས་ལ་དོན་མ་གོའི་བར་དུ་དགེ་སློང་ལ་ཉེས་བྱས་སུ་འགྱུར་ལ། སྒྲའི་དོན་གོ་ན་ལྟུང་བྱེད་དུ་འགྱུར་རོ། །ནང་དང་བཅས་པ་མ་ཡིན་པ་དང་། གྱ་ཚོམ་དུ་འཇུག་པ་དང་། མཉན་ནས་ཉེ་བར་ཞི་བར་བྱའོ་སྙམ་པ་ལ་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ཉན་རྣ་ལས་གྱུར་པའི་ལྟུང་བྱེད་དེ་བདུན་བཅུ་རྩ་དྲུག་པ་རྫོགས་སོ།། །།འདུལ་བ་རྣམ་པར་འབྱེད་པ། བམ་པོ་དྲུག་ཅུ་
རྩ་བཞི་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཚེ་དང་ལྡན་པ་འཆར་ཀས་ནི་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱས། ཚེ་དང་ལྡན་པ་འདུན་པ་ནི་ཀཽ་ཤཱམྦཱིར་སོང་སྟེ་སྙིང་ལས་ཆུང་ངུར་འདུག །འགྲོ་མགྱོགས་དང་། ནབ་སོ་གཉིས་ནི་དུས་ལ་བབ། དགའ་བོ་དང་ཉེ་དགའ་གཉིས་ནི་དགེ་འདུན་གྱི་ནང་ན་འདུག་པ་དེའི་ཚེ་ན་བཅུ་བདུན་སྡེའི་ཚོགས་དག་གདུག་ཅིང་ཕ་རོལ་གནོན་པ་དང་། མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པར་གྱུར་ནས་དེ་དག་གིས་སྨྲས་པ། ཚེ་དང་ལྡན་པ་དག་བདག་ཅག་ཡུན་རིང་པོ་ནས་དྲུག་སྡེ་དག་གིས་ཐོ་བཙམས་ཏེ། ཇི་ལྟར་དགའ་བོ་དང་ཉེ་དགའ་གཉིས་ཀྱིས་ཐོ་བཙམས་པ་ལྟར་ཡང་གཞན་གྱིས་མ་བཙམས་ལ། ཇི་ལྟར་ཉེ་དགའས་ཐོ་བཙམས་པ་ལྟར་ཡང་དགའ་བོས་མ་བཙམས་ཀྱིས་དེ་གནས་ནས་དབྱུང་བའི་ལས་བྱའོ། །དེ་ན་ཁ་ཅིག་གིས་སྨྲས་པ། འདིའི་ཕུ་བོ་དགའ་བོ་རྩོད་པ་ལ་མཁས་པ་ཡིན་པས་བདག་ཅག་གིས་འདི་གནས་ནས་དབྱུང་བའི་ལས་བྱ་བར་མི་ནུས་སོ། །ཁ་ཅིག་གིས་སྨྲས་པ། གཅིག་སྨྲ་བ་ན་གཉིས་ཀྱིས་མཉན་པར་མི་བྱ་བར་ཚོགས་སྨྲ་ན་ཚོགས་ནི་རྒྱལ་པོ་དང་འདྲ་བས་གལ་ཏེ་དེ་ཅུང་ཟད་སྨྲ་བར་གྱུར་ན་དེའི་ཚེ་གནས་ནས་དབྱུང་བའི་ལས་བྱའོ་ཞེས་དེ་དག་གིས་གནས་མལ་བཤམས་ནས། གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ན། གླེང་བ་པོ་རྒན་པའི་མཐའ་ལོགས་སུ་འདུག་སྟེ་སྨྲས་པ། བཙུན་པ་ཉེ་དགའ་ཁྱོད་ཀྱིས་བཅུ་བདུན་སྡེའི་ཚོགས་དག་གི་ལྟོ་དྲལ་ཏེ་རྒྱུ་མ་དག་གིས་རྒྱལ་བྱེད་ཀྱི་ཚལ་བསྐོར་བར་བྱའོ་ཞེས་བྱ་བ་དེ་ལྟ་བུའི་ཚིག་སྨྲས་པ་གང་ཡིན་པ་དེ་དྲན་ནམ། ཉེ་དགའས་སྨྲས་པ། ཚེ་དང་ལྡན་པ་དག་དེ་ནི་དོན་འདས་པ་ཡིན་ན་རྨ་སོས་པ་གླེངས་ཏེ་ཅི་བྱ། དེ་དག་གིས་སྨྲས་པ། བཅོམ་ལྡན་འདས་ནི་འདས་པའི་དོན་ཁོ་ན་ལ་བརྟེན་ཏེ་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་མཛད་དོ། །དགའ་བོས་ཕྱིར་བཟློག་པར་བརྩམས་པ་དང་། དེ་དག་གིས་སྨྲས་པ། གང་གཅིག་
ཕྱིར་ཟློག་པར་བྱེད་པ་དེ་ཡང་གནས་ནས་དབྱུང་བའི་ལས་བྱའོ། །དགའ་བོས་བསམས་པ། འདི་དག་གི་བྱེད་སྟངས་ལས་ན་བདག་ལ་ཡང་གནས་ནས་འབྱིན་པའི་ལས་བྱེད་པར་འགྱུར་ན་མ་ལེགས་པར་འགྱུར་རོ་སྙམ་ནས། དེ་དགུན་གྱི་དུས་ལ་བབ་པས་ལ་བ་ཞིག་གྱོན་ཏེ་དེས་ལ་བ་དེ་རྩིག་དྲུང་དུ་བསླང་སྟེ་བཞག་ནས་ཅང་མི་སྨྲ་བར་སྟན་ལས་ལངས་ཏེ་སོང་ངོ་། །དེ་དག་གིས་སྨྲས་པ། ཚེ་དང་ལྡན་པ་དག་འདོད་པ་སྨྲོས་ཤིག་ཅེས་དེ་དག་གིས་གྱ་ཚོམ་དུ་ཉེ་དགའ་གནས་ནས་དབྱུང་བའི་ལས་བྱས་སོ། །དེ་གནས་ནས་དབྱུང་བའི་ལས་བྱས་པ་ན་ངུ་ཞིང་ཕུ་བོའི་གན་དུ་སོང་བ་དང་། དགའ་བོས་སྨྲས་པ། ཉེ་དགའ་ཅིའི་ཕྱིར་ངུ་། ལྷུང་བཟེད་ནག་པོ་ཅན་དག་གིས་བདག་གནས་ནས་དབྱུང་བའི་ལས་བྱས་སོ། །དགའ་བོས་སྨྲས་པ། གང་དག་གིས་ཁོ་བོའི་ནུ་བོ་གནས་ནས་དབྱུང་བའི་ལས་བྱས་པ་དེ་དག་གྲོང་དང་། གྲོང་ཁྱེར་དང་། ཁམས་གསུམ་ནས་གནས་ནས་ཕྱུང་བར་གྱུར་ཅིག །འོན་ཀྱང་གནས་ནས་དབྱུང་བའི་ལས་བྱས་པ་དག་ལ་གྲོང་དང་། གྲོང་ཁྱེར་མེད་དམ་ཅི། སྡོད་ལ་ཕྱིས་བཟོད་པ་གསོལ་ཅིག །འདི་ལྟར་དེ་དག་གིས་མི་མཐུན་པ་ཁོ་ནར་ལས་བྱས་སོ། །སུ་ཞིག་དེར་མ་འོངས། དགའ་བོས་སྨྲས་པ། ཁོ་བོའོ། །བདག་གིས་དེ་ན་རྒན་པའི་མཐའ་ལོགས་ན་སློབ་དཔོན་གྱི་སྒྲ་ཐོས་སོ། །དགའ་བོས་སྨྲས་པ། གང་གི་ཚེ་དེ་དག་ན་རེ་གང་གཅིག་ཕྱིར་ཟློག་པར་བྱེད་པ་དེ་ཡང་གནས་ནས་དབྱུང་བའི་ལས་བྱའོ་ཞེས་ཟེར་བ་དེའི་ཚེ་ན་ཁོ་བོས་བསམས་པ། འདི་དག་གི་བྱེད་སྟངས་ལས་ན་བདག་ལ་ཡང་གནས་ནས་འབྱིན་པའི་ལས་བྱེད་པར་འགྱུར་ན་མ་ལེགས་པར་འགྱུར་རོ་སྙམ་ནས། ཁོ་བོ་དགུན་གྱི་དུས་ལ་བབ་པས་ལ་བ་ཞིག་གྱོན་ཏེ་ཁོ་བོས་ལ་བ་དེ་རྩིག་དྲུང་དུ་བསླང་སྟེ་བཞག་ནས་ཅང་མི་སྨྲ་བར་སྟན་ལས་ལངས་ཏེ་སོང་ངོ་། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་འདུན་གྱི་ཆོས་དང་ལྡན་པའི་གཏམ་རྣམ་པར་གཏན་ལ་འབེབས་པ་བྱུང་བ་ན་ཅང་མི་སྨྲ་བར་སྟན་ལས་ལངས་ཏེ་འགྲོ་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །
དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཤཱཀྱའི་བུ་དགའ་བོ་ལ་རྨས་པ། དགའ་བོ་ཁྱོད་དགེ་འདུན་གྱི་ཆོས་དང་ལྡན་པའི་གཏམ་རྣམ་པར་གཏན་ལ་འབེབས་པ་བྱུང་བ་ན་ཅང་མི་སྨྲ་བར་སྟན་ལས་ལངས་ཏེ་འགྲོ་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་འདུན་གྱི་ཆོས་དང་ལྡན་པའི་གཏམ་རྣམ་པར་གཏན་ལ་འབེབས་པ་བྱུང་བ་ན་ཅང་མི་སྨྲ་བར་སྟན་ལས་ལངས་ཏེ་འགྲོ་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །དགེ་སློང་ནད་ངན་ཅན་དག་འཁོད་པ་དེ་དག་གིས་ཡུན་རིང་དུ་འདུག་པར་མི་ནུས་པ་ན་དགེ་སློང་ནད་གཡོག་དག་གིས་ཀྱང་ནད་པ་དག་གི་བྱ་བ་ཉམས་པར་བྱེད། དགེ་སློང་ཞལ་ཏ་བྱེད་པ་དག་གིས་ཀྱང་དགེ་འདུན་གྱི་བྱ་བ་ཉམས་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་འདུག་པ་ལ་སྨྲས་ཏེ་འགྲོ་བར་བྱའོ། །བཅོམ་ལྡན་འདས་ཀྱིས་དགེ་སློང་འདུག་པ་ལ་སྨྲས་ཏེ་འགྲོ་བར་བྱའོ་ཞེས་བཀའ་སྩལ་ནས་དགེ་སློང་ཞིག་གིས་ཁྱིམ་གཞན་དུ་ལྷུང་བཟེད་དང་ཆོས་གོས་བཞག་ནས་ཇི་ཙམ་ན་དེར་མེ་ཤོར་ནས་དགེ་སློང་དེས་དེར་འགྲོ་བར་བརྩམས་ཏེ་དེ་
ལམ་གྱི་ཕྱེད་དུ་ཕྱིན་པ་དང་། བདག་གིས་དགེ་སློང་འདུག་པ་ལ་མ་སྨྲས་སོ་སྙམ་པའི་དྲན་པ་སྐྱེས་ནས་དེ་ཕྱིར་ལོག་སྟེ་ཇི་སྲིད་དུ་དགེ་སློང་འདུག་པ་ལ་སྨྲ་བར་བྱེད་པ་དེ་སྲིད་དུ་དེའི་ལྷུང་བཟེད་དང་ཆོས་གོས་ཚིག་ནས་དེ་དེར་སོང་བ་དང་ཁྱིམ་བདག་གིས་སྨྲས་པ། འཕགས་པ་ཁྱོད་ཅིའི་སླད་དུ་འཕྱིས་ཏེ་བྱོན། དེས་ན་ཁྱོད་ཀྱི་ལྷུང་བཟེད་དང་ཆོས་གོས་ཚིག་གི། གལ་ཏེ་ཁྱོད་མྱུར་དུ་བྱོན་པར་གྱུར་ན་ཁྱོད་ཀྱི་ལྷུང་བཟེད་དང་ཆོས་གོས་ཚིག་པར་མི་འགྱུར་རོ་ཞེས་ཟེར་ཞིང་དགེ་སློང་དེ་ཡང་ཕོངས་པར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དེ་འདྲ་བའི་རྐྱེན་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང་། བསླབ་པ་ལ་གུས་པ་དང་། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་མཐུན་པ་དང་། དེའི་ཤས་ཆེ་བ་དང་། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་འདུན་གྱི་ཆོས་དང་ལྡན་པའི་གཏམ་རྣམ་པར་གཏན་ལ་འབེབས་པ་བྱུང་བ་ན་ཅང་མི་སྨྲ་བར་སྟན་ལས་ལངས་ཏེ་འགྲོ་ཞིང་དགེ་སློང་འདུག་པ་ལ་མི་སྨྲ་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་དགའ་བོའམ། གཞན་ཡང་དེ་ལྟ་བུ་གང་ཡིན་པའོ། །དགེ་འདུན་གྱི་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིའོ། །ཆོས་དང་ལྡན་པའི་གཏམ་རྣམ་པར་གཏན་ལ་འབེབས་པ་བྱུང་བ་ན་ཞེས་བྱ་བ་ནི་གསོལ་བ་དང་། གསོལ་བ་དང་གཉིས་དང་། གསོལ་བ་དང་བཞིའི་ལས་བྱུང་བ་ནའོ། །ཅང་མི་སྨྲ་བར་སྟན་ལས་ལངས་ཏེ་འགྲོ་ཞིང་ཞེས་བྱ་བ་ནི་ཐོས་པའི་ཉེན་ཀོར་ལས་འདས་ཏེ་འགྲོ་ཞིང་ངོ་། །དགེ་སློང་འདུག་པ་ལ་མི་སྨྲ་ན་ཞེས་བྱ་བ་ནི་དེ་ན་དགེ་སློང་གང་འདུག་པ་ལའོ། །དེ་འདྲ་བའི་རྐྱེན་མ་གཏོགས་ཏེ་ཞེས་བྱ་བ་ནི་དེ་འདྲ་བའི་རྐྱེན་བཞག་
སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ་དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་ཇི་ཙམ་ཅུང་ཟད་དགེ་འདུན་གྱི་ཆོས་དང་ལྡན་པའི་གཏམ་རྣམ་པར་གཏན་ལ་འབེབས་པ་བྱུང་བ་ན་ཅང་མི་སྨྲ་བར་སྟན་ལས་ལངས་ཏེ་འགྲོ་ཞིང་དགེ་སློང་འདུག་པ་ལ་མི་སྨྲ་ན་ཇི་སྲིད་ཐོས་པའི་ཉེན་ཀོར་ལས་མ་འདས་ཀྱི་བར་དུ་ཉེས་བྱས་སུ་འགྱུར་ལ། ཐོས་པའི་ཉེན་ཀོར་ལས་འདས་ན་ལྟུང་བྱེད་དུ་འགྱུར་རོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །མི་སྨྲ་བར་འགྲོ་བའི་ལྟུང་བྱེད་དེ་བདུན་བཅུ་རྩ་བདུན་པ་རྫོགས་སོ།། །།སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །དེའི་ཚེ་ན་གླང་ཆེན་ལྷས་ཀྱི་བདག་པོའི་བུ་ནག་པ་དགེ་སློང་རབ་ཏུ་མང་པོ་དག་འདི་ལྟ་སྟེ། འདི་ནི་ཆོས་སོ། །འདི་ནི་འདུལ་བའོ། །འདི་ནི་སྟོན་པའི་བསྟན་པའོ་ཞེས་རྩོད་པ་ཉེ་བར་ཞི་བར་བྱ་བ་འགའ་ཞིག་གི་ཕྱིར་དཔོང་སའི་ཁང་པར་འདུག་ཅིང་མཐུན་པར་གྱུར་པ་ན་གཅིག་པུས་དགེ་འདུན་ཟློག་པར་བྱེད། གཅིག་པུས་དགེ་འདུན་མི་མཐུན་པར་བྱེད་ཅིང་། རྩོད་པ་བཟུང་སྟེ་རྩོད་ཅིང་འདུག་ལ་གཏམ་གྱི་མཇུག་སྡོད་པར་མི་བྱེད། གུས་པར་མི་བྱེད། རྗེ་ས་མི་བྱེད་ཅིང་ཕྱིར་སྨྲ་བར་བྱའོ་སྙམ་དུ་སེམས་ནས་དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་རབ་ཏུ་མང་པོ་དག་འདི་ལྟ་སྟེ། འདི་ནི་ཆོས་སོ། །འདི་ནི་འདུལ་བའོ། །འདི་ནི་སྟོན་པའི་བསྟན་པའོ་ཞེས་རྩོད་པ་ཉེ་བར་ཞི་བར་བྱ་བ་འགའ་ཞིག་གི་ཕྱིར་དཔོང་སའི་ཁང་པར་འདུག་ཅིང་མཐུན་པར་གྱུར་པ་ན་གཅིག་པུས་དགེ་འདུན་ཟློག་པར་བྱེད། གཅིག་པུས་དགེ་འདུན་མི་མཐུན་པར་བྱེད་ཅིང་། རྩོད་པ་བཟུང་སྟེ་རྩོད་ཅིང་འདུག་ལ་གཏམ་གྱི་མཇུག་སྡོད་པར་མི་བྱེད། གུས་པར་མི་བྱེད། རྗེ་ས་མི་བྱེད་ཅིང་ཕྱིར་སྨྲ་བར་བྱའོ་སྙམ་དུ་སེམས་ཞེས་སྨོད་
པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་གླང་ཆེན་ལྷས་ཀྱི་བདག་པོའི་བུ་ནག་པ་ལ་རྨས་པ། དགེ་སློང་ཁྱོད་དགེ་སློང་རབ་ཏུ་མང་པོ་དག་འདི་ལྟ་སྟེ། འདི་ནི་ཆོས་སོ། །འདི་ནི་འདུལ་བའོ། །འདི་ནི་སྟོན་པའི་བསྟན་པའོ་ཞེས་རྩོད་པ་ཉེ་བར་ཞི་བར་བྱ་བ་འགའ་ཞིག་གི་ཕྱིར་དཔོང་སའི་ཁང་པར་འདུག་ཅིང་མཐུན་པར་གྱུར་པ་ན་གཅིག་པུས་དགེ་འདུན་ཟློག་པར་བྱེད། གཅིག་པུས་དགེ་འདུན་མི་མཐུན་པར་བྱེད་ཅིང་རྩོད་པ་བཟུང་སྟེ་རྩོད་ཅིང་འདུག་ལ་གཏམ་གྱི་མཇུག་སྡོད་པར་མི་བྱེད། གུས་པར་མི་བྱེད། རྗེ་ས་མི་བྱེད་ཅིང་། ཕྱིར་སྨྲ་བར་བྱའོ་སྙམ་དུ་སེམས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། གུས་པར་མི་བྱེད་ན་ལྟུང་བྱེད་དོ། །གུས་པར་མི་བྱེད་ན་ཞེས་བྱ་བ་ནི་གཉིས་ཀ་ལ་གུས་པར་མི་བྱེད་ན་སྟེ། དགེ་འདུན་ལ་དང་། གང་ཟག་ལའོ། །དེ་ལ་དགེ་འདུན་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་དང་། དགེ་འདུན་གྱི་ཐ་སྙད་པའོ། །གང་ཟག་ནི་མཁན་པོ་དང་། སློབ་དཔོན་དག་གོ །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་།
ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་དགེ་འདུན་གྱིས་འདུག་ཤིག་ཅེས་བསྒོ་བ་ན་མི་འདུག་ན་ལྟུང་བྱེད་དུ་འགྱུར་རོ། །མ་འདུག་ཤིག་ཅེས་བསྒོ་བ་ན་འདུག་ན་ལྟུང་བྱེད་དུ་འགྱུར་རོ། །སོང་ཤིག་ཅེས་བསྒོ་བ་ན་མི་འགྲོ་ན་ལྟུང་བྱེད་དུ་འགྱུར་རོ། །མ་འགྲོ་ཤིག་ཅེས་བསྒོ་བ་ན་འགྲོ་ན་ལྟུང་བྱེད་དུ་འགྱུར་རོ། །གནས་མལ་ལོང་ཤིག་ཅེས་བསྒོ་བ་ན་མི་ལེན་ན་ལྟུང་བྱེད་དུ་འགྱུར་རོ། །གནས་མལ་མ་ལེན་ཅིག་ཅེས་བསྒོ་བ་ན་ལེན་ན་ལྟུང་བྱེད་དུ་འགྱུར་རོ། །གཙུག་ལག་ཁང་ལོང་ཤིག་ཅེས་བསྒོ་བ་ན་མི་ལེན་ན་ལྟུང་བྱེད་དུ་འགྱུར་རོ། །གཙུག་ལག་ཁང་མ་ལེན་ཅིག་ཅེས་བསྒོ་བ་ན་ལེན་ན་ལྟུང་བྱེད་དུ་འགྱུར་རོ། །སྨྲོས་ཤིག་ཅེས་བསྒོ་བ་ན་མི་སྨྲ་ན་ལྟུང་བྱེད་དུ་འགྱུར་རོ། །མ་སྨྲ་ཤིག་ཅེས་བསྒོ་བ་ན་སྨྲ་ན་ལྟུང་བྱེད་དུ་འགྱུར་རོ། །ཆོས་དང་ལྡན་པར་ཤད་ཀྱིས་སྦྱང་བ་སྦྱིན་པར་བྱེད་ན་ལྟུང་བ་མེད་དོ། །དགེ་འདུན་གྱི་ཐ་སྙད་པས་བསྒོ་བ་ལ་ཡང་དེ་བཞིན་དུ་སྦྱར་རོ། །དགེ་སློང་མཁན་པོས་འདུག་ཤིག་ཅེས་བསྒོ་བ་ན་མི་འདུག་ན་ཉེས་བྱས་སུ་འགྱུར་རོ། །མ་འདུག་ཤིག་ཅེས་བསྒོ་བ་ན་འདུག་ན་ཉེས་བྱས་སུ་འགྱུར་རོ། །སོང་ཤིག་ཅེས་བསྒོ་བ་ན་མི་འགྲོ་ན་ཉེས་བྱས་སུ་འགྱུར་རོ། །མ་འགྲོ་ཤིག་ཅེས་བསྒོ་བ་ན་འགྲོ་ན་ཉེས་བྱས་སུ་འགྱུར་རོ། །གནས་མལ་ལོང་ཤིག་ཅེས་བསྒོ་བ་ན་མི་ལེན་ན་ཉེས་བྱས་སུ་འགྱུར་རོ། །གནས་མལ་མ་ལེན་ཅིག་ཅེས་བསྒོ་བ་ན་ལེན་ན་ཉེས་བྱས་སུ་འགྱུར་རོ། །གཙུག་ལག་ཁང་ལོང་ཤིག་ཅེས་བསྒོ་བ་ན་མི་ལེན་ན་ཉེས་བྱས་སུ་འགྱུར་རོ། །གཙུག་ལག་ཁང་མ་ལེན་ཅིག་ཅེས་བསྒོ་བ་ན་ལེན་ན་ཉེས་བྱས་སུ་འགྱུར་རོ། །སྨྲོས་ཤིག་ཅེས་བསྒོ་བ་ན་མི་སྨྲ་ན་ཉེས་བྱས་སུ་འགྱུར་རོ། །མ་སྨྲ་ཤིག་ཅེས་བསྒོ་བ་ན་སྨྲ་ན་ཉེས་བྱས་སུ་འགྱུར་རོ། །ཆོས་དང་ལྡན་པར་ཤད་ཀྱིས་སྦྱང་བ་སྦྱིན་པར་བྱེད་ན་ལྟུང་བ་མེད་དོ། །སློབ་དཔོན་རྣམས་ཀྱིས་བསྒོ་བ་ལ་ཡང་དེ་བཞིན་དུ་སྦྱར་རོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །མ་གུས་པའི་ཚུལ་གྱི་ལྟུང་བྱེད་དེ་བདུན་བཅུ་
རྩ་བརྒྱད་པ་རྫོགས་སོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཆུ་སྲིན་བྱིས་པ་གསོད་ཀྱི་རི་ལ་ཁྱིམ་བདག་རྟོགས་ལྡན་ཞེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ལ་བུ་མོ་གཟུགས་བཟང་བ། བལྟ་ན་སྡུག་པ། མཛེས་པ་ཞིག་བཙས་ནས་དེ་བསྲིངས་ཤིང་བསྐྱེད་དེ་ཆེན་མོར་གྱུར་ཏོ། །ཁྱིམ་བདག་དེས་བསམས་པ། བདག་གིས་བུ་མོ་འདི་གཟུགས་ཀྱི་ཕྱིར་ཡང་མི་སྦྱིན། བཟོའི་ཕྱིར་ཡང་མི་སྦྱིན་གྱི་བདག་དང་རིགས་དང་། ནོར་གྱིས་འདྲ་བའམ། ལྷག་པ་གང་ཡིན་པ་ལ་བདག་གིས་བུ་མོ་འདི་སྦྱིན་ནོ་སྙམ་མོ། །དེས་མཉན་ཡོད་ན་ཁྱིམ་བདག་མགོན་མེད་ཟས་སྦྱིན་ཞེས་བྱ་བ་ཕྱུག་པ་ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་པ་དེ་བདག་དང་རིགས་དང་། ནོར་གྱིས་མཉམ་ཞིང་ནོར་གྱི་རྣམ་པས་ཆེས་ལྷག་པ་ཡིན་ནོ་ཞེས་ཐོས་ནས་དེས་བུ་མོ་དེ་མཉན་ཡོད་དུ་ཁྱིམ་བདག་མགོན་མེད་ཟས་སྦྱིན་གྱི་བུ་ལ་བྱིན་ནོ། །ཁྱིམ་བདག་མགོན་མེད་ཟས་སྦྱིན་གྱིས་ཀྱང་དཔལ་གྱི་འབྱོར་པས་བུའི་ཆུང་མར་བླངས་སོ། །ཁྱིམ་བདག་རྟོགས་ལྡན་ཡང་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པའི་ཆུང་མ་ལ་སེམས་ཅན་ཞུགས་པར་གྱུར་ནས་དེ་ལ་གང་གི་ཉིན་མོ་སེམས་ཅན་ཞུགས་པར་གྱུར་པ་དེ་ཉིད་ཀྱི་ཉིན་མོ་ཁྱིམ་བདག་རྟོགས་ལྡན་ལ་གནོད་པ་བརྒྱ་དག་བྱུང་བར་གྱུར་ཏོ། །མངལ་ན་གནས་པ་དེ་ཇི་ལྟ་ཇི་ལྟར་སྐྱེས་པར་གྱུར་པ་དེ་ལྟ་དེ་ལྟར་ཁྱིམ་བདག་རྟོགས་ལྡན་ལ་ཡང་དང་ཡང་དུ་རྒྱ་ཆེར་གནོད་པ་བརྒྱ་དག་བྱུང་བར་གྱུར་ཏོ། །ཁྱིམ་བདག་རྟོགས་ལྡན་གྱིས་བསམས་པ། བདག་སྐྱེད་མོས་ཚལ་དུ་སོང་སྟེ་འདུག་གོ་སྙམ་ནས། དེས་ཞོ་ཤས་འཚོ་བ་དག་ལ་བསྒོ་བ། ཤེས་ལྡན་དག་གལ་ཏེ་ཁོ་བོ་ལ་གནོད་པ་ཆེན་པོ་ཞིག་བྱུང་བར་གྱུར་ན་སྦྲོན་ཅིག །
ཇི་སྟེ་མ་བྱུང་ན་མ་སྦྲོན་ཅིག་ཅེས་བསྒོ་ནས་དེ་སྐྱེད་མོས་ཚལ་དུ་སོང་སྟེ་འདུག་གོ །དེ་ནས་དུས་གཞན་ཞིག་ན་དེའི་ཆུང་མ་བཙས་པ་ལས་ཁྱེའུ་ཞིག་བྱུང་ནས་དེ་གང་གི་ཉི་མ་ལ་བྱུང་བ་དེ་ཉིད་ཀྱི་ཉིན་མོ་ཁྱིམ་བདག་རྟོགས་ལྡན་ལ་གནོད་པ་སྟོང་དག་བྱུང་བར་གྱུར་ཏོ། །དེ་ནས་མི་ཞིག་རིངས་པ་རིངས་པར་ཁྱིམ་བདག་རྟོགས་ལྡན་ག་ལ་བ་དེར་སོང་བ་དང་། ཁྱིམ་བདག་རྟོགས་ལྡན་གྱིས་མི་དེ་ཐག་རིང་པོ་ཁོ་ན་ནས་རིངས་པ་རིངས་པར་འོང་བ་མཐོང་ནས་དེས་བསམས་པ། བདག་ལ་གནོད་པ་ཆེན་པོ་ཞིག་བྱུང་བར་གྱུར་གོར་མ་ཆག་སྙམ་ནས་དེས་མི་དེ་ལ་སྨྲས་པ། ཀྭའི་ནང་རྗེ་ཅིའི་ཕྱིར་འདི་ལྟར་རིངས་པ་རིངས་པར་འོང་། མི་དེས་སྨྲས་པ། ཁྱོད་ཀྱི་སྲས་བལྟམ་གྱིས་དགྱེས་པ་སྐྱེད་ཅིག །རྟོགས་ལྡན་གྱིས་སྨྲས་པ། ཀྭའི་ནང་རྗེ་ཁོ་བོའི་བུས་གནོད་པ་བརྒྱ་ཕྲག་མང་པོ་བསྐྱེད་མོད་ཀྱི་འོན་ཀྱང་བུ་འོངས་པ་ལེགས་སོ། །དེའི་ཉེ་དུ་དག་འདུས་ཤིང་ལྷགས་ནས་ཁྱེའུ་འདིའི་མིང་ཅིར་གདགས་སྙམ་ནས་དེ་དག་འདི་སྙམ་དུ་སེམས་ཏེ། ཁྱེའུ་འདི་ལ་ཕས་འོངས་པ་ལེགས་སོ་ཞེས་བྱ་བའི་ཚིག་བརྗོད་པས་ཁྱེའུ་འདིའི་མིང་ལེགས་འོངས་ཞེས་གདགས་སོ་ཞེས་དེའི་མིང་ལེགས་འོངས་ཞེས་བྱ་བར་བཏགས་སོ། །ལེགས་འོངས་ཇི་ལྟ་ཇི་ལྟར་སྐྱེས་པར་གྱུར་པ་དེ་ལྟ་དེ་ལྟར་ཁྱིམ་བདག་རྟོགས་ལྡན་གྱི་ཁྱིམ་ན་ནོར་དང་། འབྲུ་དང་། དབྱིག་དང་། གསེར་དང་། བྲན་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་དག་ཡོངས་སུ་ཟད་པར་གྱུར་ཏོ། །དེ་ནས་དུས་གཞན་ཞིག་ན་ཁྱིམ་བདག་རྟོགས་ལྡན་ཡང་དུས་ལ་བབ་ཅིང་དེའི་ཆུང་མ་ཡང་དུས་ལ་བབ། དེའི་ཁྱིམ་ཡང་མེས་ཚིག །བང་མཛོད་ཀྱི་རྣམ་པ་དང་། ཞིང་གི་རྣམ་པ་དང་། ནོར་གྱི་རྣམ་པ་དང་། འབྲུའི་རྣམ་པ་ཐམས་ཅད་ཀྱང་མེས་ཚིག་གོ །གྲོང་པའི་མི་གང་དག་ཟོང་ཐོགས་ཏེ་ཡུལ་གཞན་དུ་དོང་བ་དག་ཀྱང་དེ་ན་ཁ་ཅིག་ནི་རྒྱ་མཚོ་ཆེན་པོར་གྲུ་བོ་ཆེ་ཞིག་པར་གྱུར། ཁ་ཅིག་ནི་ཟོང་ཟོང་མ་ཡིན་པར་གྱུར། ཁ་ཅིག་ནི་དེ་ཉིད་དུ་ཚུལ་མ་ཡིན་པས་སྡུག་བསྔལ་བར་གྱུར། ཁ་ཅིག་ནི་དེ་ཉིད་དུ་འཁོད་དེ་ཚིག་ཀྱང་མི་སྟེར་རོ། །ཉེ་དུ་དག་ཀྱང་ཁ་ཅིག་ནི་དུས་ལ་བབ། ཁ་ཅིག་ནི་བྲོས། ཁ་ཅིག་ནི་དེ་ཉིད་ན་འཁོད་དེ་ཚིག་ཀྱང་མི་སྟེར་རོ། །བྲན་དང་། བྲན་མོ་དང་། ལས་བྱེད་པ་དང་། ཞོ་ཤས་
འཚོ་བ་དག་ཀྱང་ཁ་ཅིག་ནི་དུས་ལ་བབ། ཁ་ཅིག་ནི་བྲོས། ཁ་ཅིག་ནི་དེ་ཉིད་ན་འཁོད་དེ་ཚིག་ཀྱང་མི་སྟེར་རོ། །ཁྱིམ་བདག་རྟོགས་ལྡན་གྱི་སྔོན་གྱི་བྲན་མོ་རྒན་མོ་གཅིག་པུ་ཞིག་ལེགས་འོངས་ཀྱི་བསྙེན་བཀུར་བྱེད་ཅིང་འདུག་པ་དེས་ལེགས་འོངས་ཁྱེའུའི་གྲྭར་ཡི་གེ་དང་ཡིག་འབྲུ་སློབ་ཏུ་ཕུལ་ལོ། །རྒན་མོ་དེས་བསམས་པ། ཁྱིམ་བདག་རྟོགས་ལྡན་གྱི་ཁྱིམ་ནོར་དུ་མ་དང་ལྡན་པ་ཡོངས་སུ་ཟད་ཅིང་མཐར་ཐུག་པར་གྱུར་ན་གང་གི་བསོད་ནམས་མེད་པས་དེ་ལྟར་གྱུར་པ་ཅི་བདག་གིའམ་འོན་ཏེ་ལེགས་འོངས་ཀྱི་བསོད་ནམས་མེད་པས་དེ་ལྟར་གྱུར་པ་བལྟའོ་སྙམ་ནས་ཇི་ཙམ་ན་དེས་ལེགས་འོངས་ཀྱི་མིང་གིས་ཕྲུ་རྟོག་བཙུགས་པ་དང་དེ་ཆུད་ཟོས་པར་གྱུར་ཅིང་། བདག་གི་མིང་གིས་ཕྲུ་རྟོག་བཙུགས་པ་དང་དེ་ཚོས་པར་གྱུར་ནས་དེས་བསམས་པ། འདི་ནི་སེམས་ཅན་སྐལ་ཆད་ཅིག་ཡིན་པས་འདིའི་ལེ་ལན་གྱིས་ཁྱིམ་བདག་རྟོགས་ལྡན་གྱི་ཁྱིམ་ནོར་དུ་མ་དང་ལྡན་པ་ཚུལ་མ་ཡིན་པས་ཆུད་ཟོས་པར་གྱུར་པས་བདག་ཀྱང་འདིའི་ལེ་ལན་གྱིས་ཚུལ་མ་ཡིན་པས་སྡུག་བསྔལ་བར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་གོར་མ་ཆག་ན་འདི་ལ་ཇི་ལྟར་བྱ་སྙམ་ནས་དེས་བསམས་པ། འབྲོས་སོ་སྙམ་ནས་རྒན་མོ་དེས་ཀྱང་དེ་ན་གཅེས་པ་ཅུང་ཟད་ཅི་ཡོད་པ་དེ་དག་ཁྱེར་ཏེ་བྲོས་སོ། །ཁྱིམ་སྟོང་པ་དེར་ཁྱི་དག་ཞུགས་ནས་ཟས་ཟོས་ཏེ་འཐབ་པར་བརྩམས་པ་དང་། མི་གཡོན་ཅན་ཞིག་ཕྱོགས་དེ་ནས་འགྲོ་བ་དེས་ཁྱིམ་དེ་ནས་ཁྱི་དག་འཐབ་པའི་སྒྲ་ཐོས་ནས་དེས་བསམས་པ། ཁྱིམ་བདག་རྟོགས་ལྡན་གྱི་ཁྱིམ་སྟོང་པར་གྱུར་ཏམ་ཅི་ན་འདི་ལྟར་འདི་ན་ཁྱི་དག་འཐབ་ཅིང་འཁོད། བདག་གིས་ཇེ་བལྟའོ་སྙམ་ནས་དེ་དེར་ཞུགས་པ་དང་། ཇི་ཙམ་ན་ཁྱི་རྐུན་ཕལ་པོ་ཆེ་དག་འཐབ་ཅིང་འདུག་གི་མི་ནི་འགའ་ཡང་མེད་དེ་སྟོང་པར་མཐོང་ནས་དེས་དེ་ནས་ལྷག་རོལ་གྱི་ལྷག་མ་ཅུང་ཟད་ཅི་ཡོད་པ་དེ་དག་ཁྱེར་ཏེ་སོང་ངོ་། །དེའི་འོག་ཏུ་ལེགས་འོངས་ཟན་བཟའོ་སྙམ་ནས་ཁྱེའུའི་གྲྭ་ནས་འོངས་ཏེ་དེ་དེར་ཞུགས་པ་དང་། ཇི་ཙམ་ན་སྟོང་པར་མཐོང་ནས་དེས་མ་མ་མ་མ་ཞེས་བོས་ན་འགའ་ཡང་ལན་འདེབས་པ་མེད་ནས་དེ་དང་ཧ་ཅང་ཐག་མི་རིང་བ་ན་ཉེ་དུའི་ཁྱིམ་ཞིག་ཡོད་པ་དེར་ཞུགས་པ་དང་། ཇི་ཙམ་ན་དེར་ཡང་ཁྱིམ་མི་དག་འཐབ་མོ་བྱུང་
བར་གྱུར་ཏོ། །གང་གི་ཚེ་དེ་དག་འཐབ་མོ་ཞི་བར་གྱུར་པ་དེའི་ཚེ་ན་གཅིག་ལ་གཅིག་སྨྲས་པ། ཤེས་ལྡན་དག་བདག་གིས་སྔན་ཆད་ཁྱོད་མཐོང་ན་སྙིང་དུ་སྡུག་ན་དེང་བདག་གིས་ཁྱོད་མཐོང་ན་ཁྱོད་བསད་དོ་སྙམ་དུ་སེམས་སོ། །གཞན་དག་ཀྱང་གཅིག་ལ་གཅིག་དེ་སྐད་ཟེར་ནས་དེ་དག་གིས་བསམས་པ། འདིར་གཞན་འགའ་ཞིག་མ་འོངས་སམ་བལྟའོ་སྙམ་ནས་དེ་དག་གིས་བལྟས་ན་ཇི་ཙམ་ན་ལེགས་འོངས་དེར་འོངས་པ་མཐོང་ནས་དེ་དག་གིས་སྨྲས་པ། ཤེས་ལྡན་དག་འདི་ནི་ལེགས་འོངས་མ་ཡིན་གྱི་ཉེས་འོངས་ཡིན་ཏེ། འདིའི་ལེ་ལན་གྱིས་བདག་ཅག་འཐབ་མོ་བྱུང་བར་གྱུར་ཏོ་ཞེས་དེ་དག་གིས་བསྐྲད་དེ་དེ་གཞན་དུ་སོང་བ་དང་། དེར་ཡང་དེ་དག་དེ་བཞིན་དུ་གྱུར་ནས་དེ་དག་གིས་ཀྱང་དེ་སྐད་སྨྲས་ཏེ་དེ་བསྐྲད་དེ་བཏང་ངོ་། །དེ་མུ་ལྟོ་བ་དག་གི་ནང་དུ་ཞུགས་པ་དང་། ཇི་ཙམ་ན་མུ་ལྟོ་བ་དེ་དག་ཀྱང་ལག་པ་སྟོང་པ་དང་། སྤྲང་ཕོར་སྟོང་པར་གྱུར་ཏེ་ཕྱིར་ལྷགས་ནས་དེ་དག་གིས་སྨྲས་པ། ཤེས་ལྡན་དག་བདག་ཅག་སྔོན་ཆད་གང་དུ་ཞུགས་པ་དེར་ལག་པ་གང་བ་དང་། སྤྲང་ཕོར་གང་བར་གྱུར་ཏེ་ཕྱིར་འོང་ན། དེང་བདག་ཅག་ལག་པ་སྟོང་པ་དང་། སྤྲང་ཕོར་སྟོང་པར་གྱུར་ཏེ་ཕྱིར་ལྷགས་པ་འདི་ལ་རྒྱུ་ཅི་ཡོད། དེ་དག་གིས་སྨྲས་པ། བདག་ཅག་གི་ནང་དུ་སེམས་ཅན་སྐལ་ཆད་འགའ་ཞིག་ཞུགས་པས་དེས་ན་བདག་ཅག་ལག་པ་སྟོང་པ་དང་། སྤྲང་ཕོར་སྟོང་པར་གྱུར་ཏེ་ཕྱིར་ལྷགས་སོ། །ཡང་དེ་དག་གིས་སྨྲས་པ། བརྟག་པར་བྱས་བདག་ཅག་ཁ་གཉིས་སུ་བཅད་དེ་འཇུག་པར་བྱའོ་ཞེས་དེ་དག་གིས་ཁ་གཉིས་སུ་བཅད་དེ་ཞུགས་པ་དང་། གང་དག་གི་ནང་དུ་ལེགས་འོངས་ཞུགས་པ་དེ་དག་ལག་པ་སྟོང་པ་དང་། སྤྲང་ཕོར་སྟོང་པར་གྱུར་ཏེ་ལྷགས་སོ། །དེ་དག་གིས་ཀྱང་ཁ་གཉིས་སུ་བཅད་དེ་ཞུགས་པ་དང་། གང་དག་གི་ནང་དུ་ལེགས་འོངས་ཞུགས་པ་དེ་དག་ལག་པ་སྟོང་པ་དང་། སྤྲང་ཕོར་སྟོང་པར་གྱུར་ཏེ་ལྷགས་སོ། །དེ་དག་གིས་ཀྱང་ཡང་ཁ་གཉིས་སུ་བཅད་དེ་ཞུགས་པ་དང་། ཡང་དེ་ལྟར་གྱུར་ཏོ། །དེ་དག་གིས་ཀྱང་ཡང་དང་ཡང་དུ་ཁ་གཉིས་སུ་བཅད་དེ་ཞུགས་པ་དང་། དེ་ལྟ་དེ་ལྟར་གྱུར་ནས་ཇི་ཙམ་ན་ལེགས་འོངས་དང་མུ་ལྟོ་བ་གཞན་ཅིག་དང་གཉིས་ལྷན་ཅིག་ཞུགས་པ་
ཡང་སོ་སོར་བྱེ་བ་དང་ལེགས་འོངས་ནི་ལག་པ་སྟོང་པ་དང་། སྤྲང་ཕོར་སྟོང་པར་གྱུར་ཏེ་འོངས་ལ་གཞན་ཐམས་ཅད་ལག་པ་གང་བ་དང་། སྤྲང་ཕོར་གང་བར་གྱུར་ཏེ་འོངས་ནས་དེ་དག་གིས་སྨྲས་པ། སེམས་ཅན་སྐལ་ཆད་འདི་བདག་ཅག་གི་ནང་དུ་ཞུགས་པས་དེས་ན་བདག་ཅག་ལག་པ་སྟོང་པ་དང་། སྤྲང་ཕོར་སྟོང་པར་གྱུར་ཏེ་ལྷགས་སོ་ཞེས་དེ་དག་གིས་ལེགས་འོངས་ཤིན་ཏུ་བརྡེགས་ཏེ་བསྐྲད་དོ། །མཉན་ཡོད་ན་ཁྱིམ་བདག་རྟོགས་ལྡན་གྱི་ཆུང་པོ་གྲོགས་ཁྱིམ་བདག་ཅིག་འདུག་པ་དེ་ཟོང་ཐོགས་ཏེ་ཆུ་སྲིན་བྱིས་པ་གསོད་ཀྱི་རིར་ཕྱིན་ནས་ཁྱིམ་བདག་དེས་ལེགས་འོངས་ལག་ན་སྤྲང་ཕོར་ཐོགས་ཏེ། སྲང་དུ་སོང་བ་མཐོང་ནས་དེས་བཞིན་གཟུགས་ལས་དེ་ངོ་ཤེས་ནས་དེས་དེ་ལ་སྨྲས་པ། བུ་ཁྱོད་ཁྱིམ་བདག་རྟོགས་ལྡན་གྱི་བུ་མ་ཡིན་ནམ། ལེགས་འོངས་ཀྱིས་སྨྲས་པ་ཡིན་ནོ། །དེས་སྨྲས་པ། ཁྱོད་ཀྱི་ཕ་མ་གཉིས་གར་སོང་། ལེགས་འོངས་ཀྱིས་སྨྲས་པ། དུས་ལ་བབ་བོ། །དེས་སྨྲས་པ། དེའི་ཁྱིམ་དང་། བང་མཛོད་ཀྱི་རྣམ་པ་དང་། ཞིང་གི་རྣམ་པ་དང་། ནོར་གྱི་རྣམ་པ་དང་། འབྲུའི་རྣམ་པ་དག་ག་རེ། ལེགས་འོངས་ཀྱིས་སྨྲས་པ། ཐམས་ཅད་མེས་ཚིག་གོ །དེས་སྨྲས་པ། གྲོང་པའི་མི་གང་དག་ཟོང་ཐོགས་ཏེ་ཡུལ་གཞན་དུ་དོང་བ་དག་གར་དོང་། ལེགས་འོངས་ཀྱིས་སྨྲས་པ། ཁ་ཅིག་ནི་རྒྱ་མཚོ་ཆེན་པོར་གྲུ་བོ་ཆེ་ཞིག་པར་གྱུར། ཁ་ཅིག་ནི་ཟོང་ཟོང་མ་ཡིན་པར་གྱུར། ཁ་ཅིག་ནི་དེ་ཉིད་དུ་ཚུལ་མ་ཡིན་པས་སྡུག་བསྔལ་བར་གྱུར། ཁ་ཅིག་ནི་དེ་ཉིད་དུ་འཁོད་དེ་ཚིག་ཀྱང་མི་སྟེར་རོ། །དེས་སྨྲས་པ། ཉེ་དུ་དག་གར་དོང་། ལེགས་འོངས་ཀྱིས་སྨྲས་པ། ཁ་ཅིག་ནི་དུས་ལ་བབ། ཁ་ཅིག་ནི་བྲོས། ཁ་ཅིག་ནི་དེ་ཉིད་ན་འཁོད་དེ་ཚིག་ཀྱང་མི་སྟེར་རོ། །དེས་སྨྲས་པ། བྲན་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་དག་གར་དོང་། ལེགས་འོངས་ཀྱིས་སྨྲས་པ། ཁ་ཅིག་ནི་དུས་ལ་བབ། ཁ་ཅིག་ནི་བྲོས། ཁ་ཅིག་ནི་དེ་ཉིད་ན་འཁོད་དེ་ཚིག་ཀྱང་མི་སྟེར་རོ། །ཁྱིམ་བདག་དེས་དེ་ཐོས་ནས་མཆི་མས་བརྣངས་ཏེ་འདུག་ནས་དེས་སྨྲས་པ། བུ་ཁོ་བོ་དང་ལྷན་ཅིག་མཉན་ཡོད་དུ་འདོང་ངོ་། །ལེགས་འོངས་ཀྱིས་སྨྲས་པ།
ཕ་བདག་དེར་སོང་ན་ཅིར་འགྱུར། དེས་སྨྲས་པ། བུ་དེ་ན་ཁྱིམ་བདག་མགོན་མེད་ཟས་སྦྱིན་འདུག་པ་དེའི་བུས་ཁྱོད་ཀྱི་སྲིང་མོ་ཆུང་མར་བླངས་པས་ཁྱོད་དེར་སོང་ན་སྲིང་མོ་དེ་ཁྱོད་ལ་མཁོ་བ་སྟོབས་པར་འགྱུར་རོ། །ལེགས་འོངས་ཀྱིས་སྨྲས་པ། ཕ་འགྲོའོ། །ཁྱིམ་བདག་དེས་ལེགས་འོངས་ལ་ཀཱ་པ་ཤ་ཎ་གཉིས་བྱིན་ཏེ་སྨྲས་པ། བུ་ཁོ་བོ་ཟོང་སྒྱུར་གྱི་བར་དུ་ཁྱོད་རེ་ཞིག་འདི་གཉིས་ཟ་ཞིང་སྡོད་ཅིག། ལེགས་འོངས་ཀྱིས་ཀཱ་པ་ཤ་ཎ་དེ་གཉིས་གོས་ཀྱི་གྲྭར་ཕུར་ཏེ་བཞག་པ་དང་། དེས་ལས་ཀྱི་རྣམ་པར་སྨིན་པས་དེ་གཉིས་ཀྱང་བརྗེད་པར་གྱུར་ཏོ། །ཁྱིམ་བདག་དེས་ཟོང་བསྒྱུར་ཏེ་རིན་བླངས་ནས་ལེགས་འོངས་ཁྲིད་དེ་འཕགས་པ་དང་། ལེགས་འོངས་ཀྱང་དེ་དང་ལྷན་ཅིག་འཕགས་སོ། །ཇི་ཙམ་ན་དོན་མཐུན་དེ་དག་འཐབ་པར་བརྩམས་ཤིང་གླང་དག་ཀྱང་འཐབ་པར་བརྩམས་ནས་དེ་དག་གིས་སྨྲས་པ། ཤེས་ལྡན་དག་བདག་ཅག་སྔན་ཅད་གཅིག་གིས་གཅིག་མཐོང་ན་སྙིང་དུ་སྡུག་ན་དེང་བདག་ཅག་གཅིག་གིས་གཅིག་མཐོང་ན་འཐབ་པར་བརྩམས་ཤིང་གླང་དག་ཀྱང་གཅིག་གིས་གཅིག་མཐོང་ན་འཐབ་པར་རྩོམ་པ་ལས་ན། མ་ལ་འདིར་ཉེས་འོངས་དེ་མ་འོངས་སམ་ཞེས་བལྟས་པ་དང་། ཇི་ཙམ་ན་དེ་དག་གིས་ལེགས་འོངས་དེར་འོངས་པ་མཐོང་ནས་དེ་དག་གིས་སྨྲས་པ། ཤེས་ལྡན་དག་འདི་ནི་ལེགས་འོངས་མ་ཡིན་གྱི་ཉེས་འོངས་ཡིན་ཏེ། འདིའི་ལེ་ལན་གྱིས་བདག་ཅག་འཐབ་པར་བརྩམས་ཤིང་། གླང་དག་ཀྱང་འཐབ་པར་རྩོམ་མོ་ཞེས་དེ་དག་གིས་དེ་བསྐྲད་པར་བརྩམས་པ་དང་། ཁྱིམ་བདག་དེས་སྨྲས་པ། ཤེས་ལྡན་དག་འདི་ནི་ཁོ་བོའི་ཆུང་པོ་གྲོགས་ཀྱི་བུ་ཡིན་གྱིས་འདི་མ་བསྐྲད་ཅིག །དེ་དག་གིས་སྨྲས་པ། ཁྱིམ་བདག་ཁྱོད་ནི་དོན་མཐུན་ལ་དབང་བ་ཡིན་མོད་ཀྱི། བདག་ཅག་འདི་དང་ལྷན་ཅིག་འགྲོ་མི་ཕོད་དེ། གལ་ཏེ་འདི་འགྲོ་ན་བདག་ཅག་མི་འགྲོའོ། །ཁྱིམ་བདག་དེས་ལེགས་འོངས་ལ་སྨྲས་པ། བུ་ཁྱོད་ཕྱི་བཞིན་འབྲང་ཞིང་ཤོག་ཤིག་དང་། ཁོ་བོས་ཁྱོད་ཀྱི་ཕྱིར་ཟན་གཞག་པར་བྱའོ། །ལེགས་འོངས་ཕྱི་བཞིན་འབྲང་ཞིང་འོང་བ་ན་ཁྱིམ་བདག་དེས་ཀྱང་དེའི་དོན་དུ་ཟན་འཇོག་པར་བྱེད་ཅིང་ཁ་ཅིག་ནི་ས་གཞི་ལ་སས་གཡོགས་ཏེ་འཇོག་པར་བྱེད། ཁ་ཅིག་ནི་ཤིང་
ལྗོན་པའི་ཡལ་ག་དག་ལ་ལོ་མ་དག་གིས་གཡོགས་ཏེ་འཇོག་པར་བྱེད་དོ། །དེའི་ཟན་གང་དག་ས་གཞི་ལ་སས་གཡོགས་ཏེ་བཞག་པ་དེ་དག་ནི་ཝ་དག་གིས་ཟོས། གང་དག་ཤིང་ལྗོན་པའི་ཡལ་ག་དག་ལ་ལོ་མ་དག་གིས་གཡོགས་ཏེ་བཞག་པ་དེ་དག་ནི་བྱ་དག་དང་སྤྲེའུ་དག་གིས་ཟོས་ནས་ལེགས་འོངས་ཀྱིས་ཅུང་ཟད་ནི་ཐོབ། ཕལ་ཆེར་མི་ཐོབ་ནས་དེ་ཤིན་ཏུ་ཉམ་ང་བས་འཚོ་ཞིང་འགྲོའོ། །སྲིད་པ་ཐ་མ་པའི་སེམས་ཅན་ཟག་པ་ཟད་པ་མ་ཐོབ་པར་བར་མ་དོར་རྒྱུན་ཆད་ཅིང་དུས་བྱེད་པར་འགྱུར་བ་ནི་གནས་མ་ཡིན་སྐབས་མ་ཡིན་ཏེ། དེ་ནི་གནས་མེད་པས་ལེགས་འོངས་མཐར་གྱིས་མཉན་ཡོད་དུ་ཕྱིན་ནས། མཉན་ཡོད་ཀྱི་ཕྱི་རོལ་ཁྲོན་པའི་ཁ་ན་ངལ་སོ་ཞིང་འདུག་གོ །ལེགས་འོངས་ཀྱི་སྲིང་མོ་ཁྱིམ་བདག་མགོན་མེད་ཟས་སྦྱིན་གྱི་མནའ་མ་བྱེད་པ་དེའི་བུ་མོ་མངག་གཞུག་མ་ཆུ་བུམ་ཐོགས་ཏེ་ཁྲོན་པ་དེའི་དྲུང་དུ་ཆུ་ཆུར་སོང་བ་དང་། དེས་ལེགས་འོངས་བཞིན་གཟུགས་ལས་ངོ་ཤེས་ནས་དེས་དེ་ལ་སྨྲས་པ། ཇོ་ཅོ་ཁྱོད་ཆུ་སྲིན་བྱིས་པ་གསོད་ཀྱི་རི་པ་ཁྱིམ་བདག་རྟོགས་ལྡན་གྱི་བུ་ལེགས་འོངས་མ་ལགས་སམ། སྲིང་མོ་ཡིན་ནོ། །ཇོ་ཅོ་ཁྱོད་ཀྱི་ཡབ་ཡུམ་གཉིས་གར་བཞུད། དུས་ལ་བབ་བོ། །དེའི་ཁྱིམ་དང་། བང་མཛོད་ཀྱི་རྣམ་པ་དང་། ཞིང་གི་རྣམ་པ་དང་། ནོར་གྱི་རྣམ་པ་དང་། འབྲུའི་རྣམ་པ་དག་གར་མཆིས། ཐམས་ཅད་མེས་ཚིག་གོ །གྲོང་པའི་མི་གང་དག་ཟོང་ཐོགས་ཏེ་ཡུལ་གཞན་དུ་མཆིས་པ་དག་གར་མཆིས། ཁ་ཅིག་ནི་རྒྱ་མཚོ་ཆེན་པོར་གྲུ་བོ་ཆེ་ཞིག་པར་གྱུར། ཁ་ཅིག་ནི་ཟོང་ཟོང་མ་ཡིན་པར་གྱུར། ཁ་ཅིག་ནི་དེ་ཉིད་དུ་ཚུལ་མ་ཡིན་པས་སྡུག་བསྔལ་བར་གྱུར། ཁ་ཅིག་ནི་དེ་ཉིད་དུ་འཁོད་དེ་ཚིག་ཀྱང་མི་སྟེར་རོ། །ཉེ་དུ་དག་གར་མཆིས། ཁ་ཅིག་ནི་དུས་ལ་བབ། ཁ་ཅིག་ནི་བྲོས། ཁ་ཅིག་ནི་དེ་ཉིད་ན་འཁོད་དེ་ཚིག་ཀྱང་མི་སྟེར་རོ། །བྲན་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་དག་གར་མཆིས། ཁ་ཅིག་ནི་དུས་ལ་བབ། ཁ་ཅིག་ནི་བྲོས། ཁ་ཅིག་ནི་དེ་ཉིད་ན་འཁོད་དེ་ཚིག་ཀྱང་མི་སྟེར་རོ། །བུ་མོ་དེས་དེ་ཐོས་ནས་དེ་མཆི་མས་བརྣངས་ཏེ་འདུག་ནས་དེས་ལེགས་འོངས་ལ་སྨྲས་པ། ཇོ་བོ་བདག་གིས་ཁྱོད་ཀྱི་ལྕམ་མོ་ལ་སྦྲན་གྱི་བར་
དུ་རེ་ཞིག་འདི་ཉིད་ན་གཞེས་ཤིག་ཅེས་སྨྲས་ཏེ་བུ་མོ་དེ་སོང་ནས་ཇོ་མོ་ལ་སྨྲས་པ། ཇོ་མོ་ཁྱོད་ཀྱི་དྲལ་པོ་བྱོན་ནོ། །དེས་སྨྲས་པ། ཟོང་ཇི་ལྟ་བུས་བྱོན། བུ་མོས་སྨྲས་པ། ཇོ་མོ་ཁར་བ་དང་། རལ་རུལ་དང་། སྤྲང་ཕོར་གྱིས་བྱོན་ནོ། །དེས་བུ་མོ་དེའི་ལག་ཏུ་གོས་དག་དང་། ཀཱ་པ་ཤ་ཎ་དག་བསྐུར་ནས་སྨྲས་པ། ཇོ་ཅོ་ལ་འདི་སྐད་ཅེས་སྔ་མ་འདི་ཙམ་ཇེ་གསོལ་ཞིང་མནོབས་ཤིག་དང་སླད་ཀྱིས་གལ་ཏེ་དབོན་པོ་དག་དང་། དབོན་མོ་དག་དང་མཇལ་བར་གྱུར་ན་དེ་དག་ཀཱ་པ་ཤ་ཎ་ཇི་སྙེད་ཅིག་འབུལ་བར་འགྱུར་བས་ཁྱོད་ཉེ་དུ་དག་གིས་གློ་བས་བས་པར་མི་འགྱུར་རོ་ཞེས་གྱིས་ཤིག །བུ་མོ་དེ་དེར་སོང་སྟེ་ལེགས་འོངས་ལ་གོས་དག་དང་། ཀཱ་པ་ཤ་ཎ་དག་ཕུལ་ནས་སྨྲས་པ། ཇོ་ཅོ་ལྕམ་གྱི་མཆིད་ནས་སྔ་མ་འདི་ཙམ་ཇེ་གསོལ་ཞིང་མནོབས་ཤིག་དང་སླད་ཀྱིས་གལ་ཏེ་དབོན་པོ་དག་དང་། དབོན་མོ་དག་དང་མཇལ་བར་གྱུར་ན། དེ་དག་ཀཱ་པ་ཤ་ཎ་ཇི་སྙེད་ཅིག་འབུལ་བར་འགྱུར་བས་ཁྱོད་ཉེ་དུ་དག་གིས་གློ་བས་བས་པར་མི་འགྱུར་རོ་ཞེས་མཆིའོ་ཞེས་སྨྲས་ཏེ་སོང་ངོ་། །ལེགས་འོངས་ཀྱིས་བསམས་པ། ཁྱིམ་བདག་མགོན་མེད་ཟས་སྦྱིན་ནི་ཉེ་དུའི་འཁོར་རྒྱ་ཆེ་བ་ཡིན་ལ། བདག་ཀྱང་སྔོན་ཉེ་དུའི་འཁོར་རྒྱ་ཆེ་བ་ཡིན་པས་ད་དེར་སོང་ན་དེ་དག་བདག་ལ་གཏམ་འདྲི་བས་རིང་དུ་ཐོགས་པར་འགྱུར་ཞིང་དེས་བདག་ལྟོགས་ཏེ་འཆི་བར་འགྱུར་གྱིས་ཇེ་གཡར་སུས་བཟའ་ཞིང་འགྲངས་ནས་དེར་སོང་སྟེ། ཉེ་དུའི་ཚོགས་དག་ལ་བདེ་བར་སོ་སོར་ཀུན་དགའ་བར་བྱའོ་སྙམ་ནས་དེ་ཆང་པའི་ཁྱིམ་དུ་སོང་སྟེ། དེས་ཇི་ཙམ་གྱིས་ར་རོ་བར་འགྱུར་བ་དེ་ཙམ་གྱི་ཆང་སར་པ་འཐུངས་ནས་དེ་ར་རོ་སྟེ་སྐྱེད་མོས་ཚལ་དུ་སོང་ནས་ཉལ་ལོ། །མཉན་ཡོད་ན་སྐྱེད་མོས་ཚལ་འཇོམས་པའི་མི་དག་སྐྱེད་མོས་ཚལ་ཉུག་པར་བྱེད་ཅིང་། དེ་དག་གིས་གལ་ཏེ་མི་གཉིད་ལོག་པ་མཐོང་ན་དེ་རྐང་པས་སྒུལ་བར་བྱེད་ཅིང་གལ་ཏེ་སད་ན་ནི་དེ་ལ་འདི་སྐད་ཅེས། ཀྱེ་ནང་རྗེ་ཁྱོད་ཀྱིས་མཉན་ཡོད་ན་སྐྱེད་མོས་ཚལ་འཇོམས་པའི་མི་དག་སྐྱེད་མོས་ཚལ་ཉུག་པར་བྱེད་ཅིང་དེ་དག་མི་གཉིད་ལོག་པ་འཇོམས་པར་བྱེད་དོ་ཞེས་མ་ཐོས་སམ། ལོངས་ལ་སོང་ཤིག་ཅེས་ཟེར་རོ། །གལ་ཏེ་མ་སད་ན་ནི་བཅོམ་སྟེ་འདོང་བར་བྱེད་པས་སྐྱེད་མོས་ཚལ་འཇོམས་པའི་མི་དེ་དག་དེར་ལྷགས་ཏེ་ལེགས་
འོངས་ཉལ་བ་མཐོང་ནས་དེ་དག་གིས་དེ་རྐང་པས་བསྒུལ་ན་མ་སད་ནས་ཇི་ཙམ་ན་དེ་དག་གིས་དེ་བཅོམ་སྟེ་དོང་ངོ་། །ཇི་ཙམ་ན་ལེགས་འོངས་སད་པ་དང་བདག་ཉིད་བཅོམ་པར་མཐོང་ནས་དེས་རལ་རུལ་དེ་དག་ཉིད་གྱོན་ཏེ་འདུག་གོ །དེའི་སྲིང་མོས་བསམས་པ། ཅིའི་ཕྱིར་བདག་གི་མིང་པོ་དེ་ཡུན་རིང་དུ་ཐོགས་སྙམ་ནས་དེས་བུ་མོ་མངག་གཞུག་མ་མངགས་ཏེ་ལྟར་བཏང་བ་དང་དེ་དེར་སོང་སྟེ་བལྟས་ན་ཇི་ཙམ་ན་བཅོམ་པར་མཐོང་ནས། བུ་མོ་དེ་སོང་སྟེ་ཇོ་མོ་ལ་སྨྲས་པ། ཇོ་མོ་ཇོ་ཅོ་བཅོམ་སྟེ་སྔོན་གྱི་ཆ་ལུགས་ཉིད་ཀྱིས་བཞུགས་སོ། །སྲིང་མོས་བསམས་པ། དེ་ནི་སེམས་ཅན་སྐལ་ཆད་ཅིག་ཡིན་པས་དེའི་ལེ་ལན་གྱིས་ཁྱིམ་བདག་རྟོགས་ལྡན་གྱི་ཁྱིམ་ནོར་དུ་མ་དང་ལྡན་པ་ཚུལ་མ་ཡིན་པས་ཆུད་ཟོས་པར་གྱུར་པས་ད་གལ་ཏེ་བདག་གིས་དེ་འདིར་བཅུག་པར་གྱུར་ན་བདག་གི་གྱོས་པོའི་ཁྱིམ་ཡང་དེའི་ལེ་ལན་གྱིས་ཚུལ་མ་ཡིན་པས་སྡུག་བསྔལ་བར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ་སྙམ་ནས་དེས་དེ་ཡལ་བར་བོར་རོ། །ལེགས་འོངས་ཀྱིས་ཀྱང་ལས་ཀྱི་སྒྲིབ་པས་དེ་བརྗེད་ནས་དེ་མུ་ལྟོ་བ་དག་གི་ནང་དུ་ཞུགས་པ་དང་། ཇི་ཙམ་ན་མུ་ལྟོ་བ་དེ་དག་ཀྱང་ལག་པ་སྟོང་པ་དང་། སྤྲང་ཕོར་སྟོང་པར་གྱུར་ཏེ་ཕྱིར་ལྷགས་ནས་དེ་དག་གིས་སྨྲས་པ། ཤེས་ལྡན་དག་བདག་ཅག་སྔོན་ཅད་གར་ཞུགས་པ་དེར་ལག་པ་གང་བ་དང་། སྤྲང་ཕོར་གང་བར་གྱུར་ཏེ་ཕྱིར་འོང་ན་དེང་བདག་ཅག་ལག་པ་སྟོང་པ་དང་། སྤྲང་ཕོར་སྟོང་པར་གྱུར་ཏེ་ཕྱིར་ལྷགས་པ་འདི་ལ་རྒྱུ་ཅི་ཡོད། དེ་དག་གིས་སྨྲས་པ། བདག་ཅག་གི་ནང་དུ་སེམས་ཅན་སྐལ་ཆད་འགའ་ཞིག་ཞུགས་པས་དེས་ན་བདག་ཅག་ལག་པ་སྟོང་པ་དང་། སྤྲང་ཕོར་སྟོང་པར་གྱུར་ཏེ་ཕྱིར་ལྷགས་སོ། །ཡང་དེ་དག་གིས་སྨྲས་པ། བརྟག་པར་བྱས་བདག་ཅག་ཁ་གཉིས་སུ་བཅད་དེ་འཇུག་པར་བྱའོ་ཞེས་དེ་དག་གིས་ཁ་གཉིས་སུ་བཅད་དེ་ཞུགས་པ་དང་། གང་དག་གི་ནང་དུ་ལེགས་འོངས་ཞུགས་པ་དེ་དག་ལག་པ་སྟོང་པ་དང་། སྤྲང་ཕོར་སྟོང་
པར་གྱུར་ཏེ་ལྷགས་སོ། །དེ་དག་གིས་ཀྱང་ཁ་གཉིས་སུ་བཅད་དེ་ཞུགས་པ་དང་། གང་དག་གི་ནང་དུ་ལེགས་འོངས་ཞུགས་པ་དེ་དག་ལག་པ་སྟོང་པ་དང་། སྤྲང་ཕོར་སྟོང་པར་གྱུར་ཏེ་ལྷགས་སོ། །དེ་དག་གིས་ཀྱང་ཡང་ཁ་གཉིས་སུ་བཅད་དེ་ཞུགས་པ་དང་ཡང་དེ་ལྟར་གྱུར་ཏོ། །དེ་དག་གིས་ཀྱང་ཡང་དང་ཡང་དུ་ཁ་གཉིས་སུ་བཅད་དེ་ཞུགས་པ་དང་། དེ་ལྟ་དེ་ལྟར་གྱུར་ནས་ཇི་ཙམ་ན་ལེགས་འོངས་དང་མུ་ལྟོ་བ་གཞན་ཅིག་དང་གཉིས་ལྷན་ཅིག་ཞུགས་པ་ཡང་སོ་སོར་བྱེ་བ་དང་། ལེགས་འོངས་ནི་ལག་པ་སྟོང་པ་དང་། སྤྲང་ཕོར་སྟོང་པར་གྱུར་ཏེ་འོངས་ལ། གཞན་ཐམས་ཅད་ལག་པ་གང་བ་དང་། སྤྲང་ཕོར་གང་བར་གྱུར་ཏེ་འོངས་ནས་དེ་དག་གིས་སྨྲས་པ། སེམས་ཅན་སྐལ་ཆད་འདི་བདག་ཅག་གི་ནང་དུ་ཞུགས་པས་དེས་ན་བདག་ཅག་ལག་པ་སྟོང་པ་དང་། སྤྲང་ཕོར་སྟོང་པར་གྱུར་ཏེ་ལྷགས་སོ་ཞེས་དེ་དག་གིས་ལེགས་འོངས་ཤིན་ཏུ་བརྡེགས་ཏེ་སྤྲང་ཕོར་གྱིས་དེའི་ཀླད་པ་བཅོམ་ནས་ཉེས་འོངས་ཁྱོད་ཕར་སོང་ཤིག་ཅེས་སྨྲས་ཏེ་བསྐྲད་དོ། །ཁྱིམ་བདག་མགོན་མེད་ཟས་སྦྱིན་གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ནས། དེས་ཞོ་ཤས་འཚོ་བ་དག་ལ་བསྒོ་བ། ཤེས་ལྡན་དག་ཇི་སྲིད་དུ་སངས་རྒྱས་ལ་སོགས་པ་དགེ་སློང་གི་དགེ་འདུན་གྱིས་གདུགས་ཚོད་མ་གསོལ་གྱི་བར་དུ་མུ་ལྟོ་བ་འགའ་ཡང་འཇུག་ཏུ་མ་གཞུག་ཤིག །དེ་དག་ལ་ཕྱིས་སྦྱིན་པར་བྱའོ། །དེ་ན་མུ་ལྟོ་བས་འཇུག་པར་བརྩམས་པ་ན་སྒོ་བས་དེ་དག་ཕྱིར་བཟློག་པ་དང་། དེ་དག་གིས་སྨྲས་པ། ཀྱེ་ནང་རྗེ་ཁོ་བོ་ཅག་གི་མིང་གིས་ཁྱིམ་བདག་བཟང་བྱིན་གྱི་མིང་མགོན་མེད་ཟས་སྦྱིན་ཞེས་བྱ་བར་གྲགས་པ་ཡིན་ན་ཅིའི་ཕྱིར་ཁྱོད་ཁོ་བོ་ཅག་ཕྱིར་ཟློག་པར་བྱེད། ཡང་དེ་དག་གིས་སྨྲས་པ། ཤེས་ལྡན་དག་བདག་ཅག་གི་ནང་དུ་ཡང་ཉེས་འོངས་དེ་ཞུགས་པར་མ་གྱུར་ཏམ་ལྟོས་ཤིག་ཅེས་དེ་དག་གིས་བལྟས་པ་དང་། ཇི་ཙམ་ན་དེ་དག་གིས་ལེགས་འོངས་དེར་ཞུགས་པ་མཐོང་ནས་དེ་དག་གིས་སྨྲས་པ། ཉེས་འོངས་དེ་འདི་ཡིན་ནོ་ཞེས་དེ་དག་གིས་ལེགས་འོངས་ཤིན་ཏུ་བརྡེགས་ཏེ་སྤྲང་ཕོར་གྱིས་དེའི་ཀླད་པ་བཅོམ་ནས་དེ་དག་གིས་ལག་པ་དང་། རྐང་པ་དག་ནས་བཟུང་སྟེ་ཁྲིད་ནས་ཕྱག་དར་གྱི་ཕུང་པོའི་སྟེང་དུ་བཞག་སྟེ་ཉེས་འོངས་ཁྱོད་འདིར་འདུག་ཤིག་ཅེས་སྨྲས་པ་དང་། ལེགས་འོངས་ཕྱག་དར་གྱི་ཕུང་པོ་དེའི་སྟེང་ན་ངུ་ཞིང་འདུག་གོ། །
དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ་ལྷུང་བཟེད་དང་ཆོས་གོས་བསྣམས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ཏེ་ཁྱིམ་བདག་མགོན་མེད་ཟས་སྦྱིན་གྱི་གནས་ས་ག་ལ་བ་དེ་ལོགས་སུ་གཤེགས་པ་དང་། བཅོམ་ལྡན་འདས་ཀྱིས་ལེགས་འོངས་ཕྱག་དར་གྱི་ཕུང་པོའི་སྟེང་ན་ཀླད་པ་ཞོམ་ནས་ཁྲག་འཛག་ཅིང་ངུ་ཞིང་འདུག་པ་གཟིགས་སོ། །གཟིགས་ནས་ཀྱང་དགེ་སློང་རྣམས་ལ་བཀའ་སྩལ་པ། དགེ་སློང་དག་འདི་ལྟར་སྲིད་པ་ཐ་མ་པའི་སེམས་ཅན་ཡང་གནས་སྐབས་འདི་ལྟ་བུར་གྱུར་པས་སྲིད་པ་དག་གིས་ངོམས་པར་བྱ་ཞིང་སྲིད་པའི་ཡོ་བྱད་དག་གིས་ཀྱང་ངོམས་པར་བྱའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་ལེགས་འོངས་ལ་ལྷུང་བཟེད་ཀྱི་ལྷག་མ་གཞག་པར་བྱའོ། །དེ་ནས་བཅོམ་ལྡན་འདས་ཁྱིམ་བདག་མགོན་མེད་ཟས་སྦྱིན་གྱི་གནས་ས་ག་ལ་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །དེ་ནས་ཁྱིམ་བདག་མགོན་མེད་ཟས་སྦྱིན་གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་བཅའ་བ་དང་། བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད། སྟོབས་པར་བྱེད་དོ། །རྣམ་གྲངས་དུ་མར་བཅའ་བ་དང་། བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས་བཅོམ་ལྡན་འདས་གདུགས་ཚོད་གསོལ་ཅིང་ཕྱག་བཅབས་ལྷུང་བཟེད་བཞག་པར་རིག་ནས་སྟན་ཆེས་དམའ་བ་ཞིག་བླངས་ཏེ་བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འདུག་གོ །ཚེ་དང་ལྡན་པ་ཀུན་དགའ་བོས་ལེགས་འོངས་ལ་ལྷུང་བཟེད་ཀྱི་ལྷག་མ་གཞག་པ་བརྗེད་དོ། །སངས་རྒྱས་བཅོམ་ལྡན་འདས་རྣམས་ནི་བསྙེལ་བ་མི་མངའ་བའི་ཆོས་ཉིད་ཅན་ཡིན་པས་བཅོམ་ལྡན་འདས་ཀྱིས་ལེགས་འོངས་ལ་ལྷུང་བཟེད་ཀྱི་ལྷག་མ་གཞག་པ་མཛད་དོ། །དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྷུང་བཟེད་ཀྱི་ཕམ་ཕབས་བླང་བར་བརྩམས་པ་དང་། ཇི་ཙམ་ན་ཚེ་དང་ལྡན་པ་ཀུན་དགའ་བོས་བཅོམ་
ལྡན་འདས་ཀྱིས་བདག་ལ་ལེགས་འོངས་ལ་ལྷུང་བཟེད་ཀྱི་ལྷག་མ་ཞོག་ཤིག་ཅེས་བཀའ་སྩལ་པ། བརྗེད་པ་དྲན་ནས་དེས་ངུ་བར་བརྩམས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཅིའི་ཕྱིར་ངུ་། བཙུན་པ་བདག་གིས་ལེགས་འོངས་ལ་ལྷུང་བཟེད་ཀྱི་ལྷག་མ་གཞག་པ་བསྐྱུད་དེ་བདག་གིས་བཅོམ་ལྡན་འདས་ཀྱི་བཀའ་བཅག་གོ །ཀུན་དགའ་བོ་ཁྱོད་ཀྱིས་ངའི་བཀའ་བཅག་པ་མ་ཡིན་གྱིས་འདི་ལྟར་ལེགས་འོངས་ཉིད་ཀྱི་ལས་ཀྱི་སྒྲིབ་པས་ཁྱོད་ཀྱིས་དེ་ལ་ལྷུང་བཟེད་ཀྱི་ལྷག་མ་གཞག་པ་བརྗེད་པར་གྱུར་ཏོ། །ཀུན་དགའ་བོ་ཁྱོད་སོང་ལ་ལེགས་འོངས་བོས་ཤིག །དེ་སོང་སྟེ་ལེགས་འོངས་ལེགས་འོངས་ཞེས་བོས་པ་དང་། དུ་མ་དག་གིས་ཨང་ཞེས་ལན་བཏབ་ཅིང་དེ་དག་གིས་བསམས་པ། དེང་བཅོམ་ལྡན་འདས་འཇིག་རྟེན་གསུམ་གྱི་བླ་མས་གང་ལ་དགོངས་སྙམ་མོ། །ཚེ་དང་ལྡན་པ་ཀུན་དགའ་བོ་ཕྱིར་ལོག་སྟེ་གསོལ་པ། བཙུན་པ་བདག་གིས་ལེགས་འོངས་ལེགས་འོངས་ཞེས་བོས་ན། དུ་མ་དག་གིས་ཨང་ཞེས་ལན་བཏབ་ན་གང་མཆི་བར་བགྱི། ཀུན་དགའ་བོ་སོང་ལ་འདི་སྐད་ཅེས། ཆུ་སྲིན་བྱིས་པ་གསོད་ཀྱི་རི་པ་ཁྱིམ་བདག་རྟོགས་ལྡན་གྱི་བུ། ལེགས་འོངས་གང་ཡིན་པ་དེ་ཚུར་ཤོག་ཅེས་བོས་ཤིག །ཚེ་དང་ལྡན་པ་ཀུན་དགའ་བོ་སོང་སྟེ་དེ་སྐད་བོས་པ་དང་། ལེགས་འོངས་ཀྱིས་བདག་གི་མིང་དྲན་ནས་དེས་ཚིགས་སུ་བཅད་པ་དག་སྨྲས་པ། ལེགས་འོངས་སྒྲ་འདི་བསྐྱུད་གྱུར་ན། །ག་ལས་འདིར་ནི་མཆིས་པར་གྱུར། །ངེས་པར་མ་ལེགས་ཟད་གྱུར་ཅིང་། །ལེགས་པར་བྱུང་བར་གྱུར་ཡང་དག །གང་དག་ཁྱོད་ལ་སྐྱབས་མཆིས་པ། །དེ་དག་མགོན་ནི་ཀུན་མཁྱེན་ལགས། །གང་དག་ཁྱོད་ཀྱི་གསུང་དགའ་དང་། །འཕགས་པ་དེ་དག་ལེགས་འོངས་ལགས། །བདག་ནི་སྐལ་དང་བྲལ་བ་སྟེ། །རྩ་ལག་ཀུན་གྱིས་སྤངས་གྱུར་ཅིང་། །བརྩེ་གནས་དྲག་པོའི་གནས་ཐོབ་པ། །མྱ་ངན་ཟུག་རྔུས་གཟིར་བ་ལགས། །ཚེ་དང་ལྡན་པ་ཀུན་དགའ་བོས་དེ་ཁྲིད་དེ་ཞུགས་ནས་གསོལ་པ། བཙུན་པ་ལེགས་འོངས་དེ་འདི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བུ་ཁྱོད་བཅོམ་ལྡན་འདས་
ཀྱི་ལྷུང་བཟེད་ཀྱི་ཕམ་ཕབས་ཟའམ། བཅོམ་ལྡན་འདས་འཚལ་ལོ། །བཅོམ་ལྡན་འདས་ཀྱིས་དེ་ལ་ལྷུང་བཟེད་ཀྱི་ཕམ་ཕབས་སྩལ་བ་དང་། ཇི་ཙམ་ན་དེས་ཉུང་ངུར་མཐོང་ནས་དེས་བསམས་པ། བདག་ལ་བཅོམ་ལྡན་འདས་འཇིག་རྟེན་གསུམ་གྱི་བླ་མས་བརྒྱ་ལམ་ན་དགོངས་སུ་ཟིན་ཀྱང་ལྷུང་བཟེད་ཀྱི་ཕམ་ཕབས་ཆུང་ངུ་ཞིག་བཞག་གོ་སྙམ་མོ། །བཅོམ་ལྡན་འདས་ཀྱིས་དེའི་སེམས་ཐུགས་ཀྱིས་མཁྱེན་ནས་བཀའ་སྩལ་པ། བུ་ལེགས་འོངས་གལ་ཏེ་ཁྱོད་རི་རབ་ཙམ་གྱི་ཁམ་དག་དང་། རྒྱ་མཚོ་ཆེན་པོ་ཙམ་གྱི་ལྟོས་ཟ་བར་བྱེད་ན་ཡང་ཇི་སྲིད་དུ་ཁྱོད་ཚིམ་པར་མ་གྱུར་པ་དེ་སྲིད་དུ་དེ་བཞིན་གཤེགས་པའི་ལྷུང་བཟེད་ཀྱི་ཕམ་ཕབས་ཟད་པར་མི་འགྱུར་རོ། །དེས་བཅོམ་ལྡན་འདས་ཀྱི་ལྷུང་བཟེད་ཀྱི་ཕམ་ཕབས་ཟོས་པ་དང་། དེ་ཚིམ་པར་གྱུར་ནས་དེས་བཅོམ་ལྡན་འདས་ཀྱི་ཞལ་དུ་བལྟ་བར་བརྩམས་པ་དང་། བཅོམ་ལྡན་འདས་ཀྱིས་བཀའ་སྩལ་པ། བུ་ལེགས་འོངས་ཚིམ་མམ། བཅོམ་ལྡན་འདས་ཚིམ་མོ། །ཁམ་ཐ་མ་ལོང་ཤིག་དང་མི་སྣང་བར་འགྱུར་རོ། །དེས་དེ་བླངས་ནས་མི་སྣང་བར་གྱུར་ཏོ། །ཁྱིམ་བདག་མགོན་མེད་ཟས་སྦྱིན་གྱིས་གསོལ་པ། བཅོམ་ལྡན་འདས་འདི་སུ་ལགས། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་ཆུ་སྲིན་བྱིས་པ་གསོད་ཀྱི་རི་པ་ཁྱིམ་བདག་རྟོགས་ལྡན་གྱི་བུ་ཡིན་ནོ། །བཅོམ་ལྡན་འདས་འོ་ན་བདག་གི་ཆུང་པོ་གྲོགས་ཀྱི་བུ་ལགས་སོ། །ཁྱིམ་བདག་དེ་ཡིན་ནོ། །དེ་ནས་བཅོམ་ལྡན་འདས་ཀྱིས་ཡོན་བཤད་པ་མཛད་ནས་གདན་ལས་བཞེངས་ཏེ་གཤེགས་པ་དང་། སྲིད་པ་ཐ་མ་པའི་སེམས་ཅན་དེ་བཅོམ་ལྡན་འདས་ཀྱི་སླད་བཞིན་སླད་བཞིན་རྗེས་སུ་འབྲང་ཞིང་སོང་ནས་བཅོམ་ལྡན་འདས་གཙུག་ལག་ཁང་དུ་གཤེགས་ཏེ་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་པ་དང་། ལེགས་འོངས་ཀྱང་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །བཅོམ་ལྡན་འདས་ཀྱིས་དེའི་ལས་སྦྱང་བར་བྱའོ་སྙམ་དུ་དགོངས་ནས། དེ་ནས་བཅོམ་ལྡན་འདས་ཀྱིས་ལེགས་འོངས་ལ་བཀའ་སྩལ་པ། ལེགས་འོངས་
ཁྱོད་ལ་ཀཱ་པ་ཤ་ཎ་དག་ཡོད་དམ། བཅོམ་ལྡན་འདས་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། བུ་གོས་ཀྱི་གྲར་ལྟོས་ཤིག །དེས་བལྟས་པ་དང་། ཇི་ཙམ་ན་ཀཱ་པ་ཤ་ཎ་གཉིས་ཡོད་པ་མཐོང་ནས་དེས་གསོལ་པ། བཅོམ་ལྡན་འདས་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། བུ་སོང་ལ་ཀུན་དགའ་ར་བ་པ་རྒྱལ་བུ་དུམ་པའི་གན་ནས་ཨུཏྤལ་སྔོན་པོ་དག་ཁྱེར་ཏེ་ཤོག་ཤིག། དེས་བཅོམ་ལྡན་འདས་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཀུན་དགའ་ར་བ་པ་རྒྱལ་བུ་དུམ་པ་ག་ལ་བ་དེར་སོང་བ་དང་། རྒྱལ་བུ་དུམ་པས་དེ་ཐག་རིང་པོ་ཁོ་ན་ནས་འོང་བ་མཐོང་ནས་དེས་བསམས་པ། ཉེས་འོངས་འདི་ག་ཤེད་ནས་འདིར་འོངས་པས་བདག་ལ་གནོད་པ་འབྱུང་བར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ་སྙམ་ནས། དེས་སྨྲས་པ། ཉེས་འོངས་ཀུན་དགའི་ར་བར་མ་འཇུག་ཤིག །ལེགས་འོངས་ཀྱིས་ཚིགས་སུ་བཅད་པ་སྨྲས་པ། བདག་ནི་ཨུཏྤལ་མི་སྒྲུབ་སྟེ། །པད་མ་བདག་ལ་ དགོས་པ ་མེད། །ཁོ་བོ་ཀུན་མཁྱེན་གྲགས་ལྡན་པ། །ཐུབ་པའི་དབང་པོའི་ཕོ་ཉ་ཡིན། །དུམ་པས་ཚིགས་སུ་བཅད་པ་སྨྲས་པ། གལ་ཏེ་ཐུབ་པ་ཞི་བདག་ཉིད། །ལྷ་མི་རྣམས་ཀྱི་མཆོད་གནས་ཀྱི། །མཆོད་པའི་གནས་ཀྱིས་ཆེས་མཆོད་པའི། །ཕོ་ཉ་ལགས་ན་ཚུར་གཤེགས་སྤྱོན། །དུམ་པས་སྨྲས་པ། ཁྱོད་སངས་རྒྱས་ཀྱི་ཕོ་ཉ་ཡིན་ནམ། ལེགས་འོངས་ཀྱིས་སྨྲས་པ། ཁོ་བོ་སངས་རྒྱས་ཀྱི་ཕོ་ཉ་ཡིན་ནོ། །དོན་ཅིའི་ཕྱིར་འོངས། ཨུཏྤལ་དག་གི་ཕྱིར་འོངས་སོ། །སོང་ལ་ཇི་སྙེད་འདོད་པ་དེ་སྙེད་ཁྱེར་ཏེ་སོང་ཤིག། ལེགས་འོངས་ཀྱིས་ཨུཏྤལ་སྔོན་པོ་དག་གི་ཁུར་ཁྱེར་ཏེ་བཅོམ་ལྡན་འདས་ཀྱི་སྤྱན་སྔར་སོང་བ་དང་། བཅོམ་ལྡན་འདས་ཀྱིས་བཀའ་སྩལ་པ། ལེགས་འོངས་དགེ་སློང་རྣམས་ལ་བྲིམས་ཤིག། ལེགས་འོངས་ཀྱིས་དགེ་སློང་རྣམས་ལ་ཨུཏྤལ་སྔོན་པོ་དག་བྲིམ་པར་བརྩམ་པ་དང་། དགེ་སློང་དག་མི་ལེན་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དྲི་ཞིམ་པོ་ཐམས་ཅད་ནི་མིག་ལ་ཕན་ཞིང་འདིའི་ལས་སྦྱང་བར་ཡང་བྱས་ལོང་ཤིག །དགེ་སློང་རྣམས་ཀྱིས་
མེ་ཏོག་དེ་དག་བླངས་སོ། །ལེགས་འོངས་ཀྱི་སྔོན་ཟད་པར་སྔོན་པོའི་སྐྱེ་མཆེད་བསྐྱེད་པས་དེ་རྒན་པའི་མཐའ་ལོགས་ན་འདུག་པས་དགེ་སློང་རྣམས་ཀྱི་ལག་ན་ཨུཏྤལ་སྔོན་པོ་དག་ཐོགས་པ་དེ་དག་མཐོང་ངོ་། །མཐོང་ནས་ཀྱང་ཟད་པར་སྔོན་པོའི་སྐྱེ་མཆེད་མངོན་དུ་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། ལེགས་འོངས་ཁྱོད་ཅིའི་ཕྱིར་རབ་ཏུ་མི་འབྱུང་། བཅོམ་ལྡན་འདས་བདག་རབ་ཏུ་འབྱུང་ངོ་། །བཅོམ་ལྡན་འདས་ཀྱིས་དེ་རབ་ཏུ་ཕྱུང་། རྫོགས་པར་བསྙེན་པར་མཛད་ནས་བཅོམ་ལྡན་འདས་ཀྱིས་དེ་ལ་གདམས་ངག་སྩལ་ཏོ། །དེ་དེ་ལྟར་རབ་ཏུ་བྱུང་ནས་གཅིག་པུ་དབེན་པར་བག་ཡོད་པ་རྟུན་པ་དང་ལྡན་པ་བདག་ཉིད་བཏང་བར་གནས་པ་ན་རིགས་ཀྱི་བུ་དག་གང་གི་ཕྱིར་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ། ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང་དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ་རིག་པས་སྒོ་ངའི་སྦུབས་དྲལ་བར་གྱུར་ཅིང་། རིག་པ་དང་། མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་འདོད་པའི་རྙེད་པ་དང་བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །དེ་ནས་ཚེ་དང་ལྡན་པ་ལེགས་འོངས་ཀྱིས་དགྲ་བཅོམ་པ་ཉིད་ཐོབ་ནས་རྣམ་པར་གྲོལ་བའི་དགའ་བ་དང་བདེ་བ་ཉམས་སུ་མྱོང་བ་ན། དེའི་ཚེ་ཚིགས་སུ་བཅད་པ་དག་སྨྲས་པ། དཔའ་བོ་དེ་ཉིད་གཟིགས་པ་ཡིས། །ཐབས་ཀྱི་ཞགས་པས་བདག་བཅིངས་ཏེ། །གླང་ཆེན་རྒས་པ་འདམ་ཕྱུང་ལྟར། །ཐུགས་རྗེས་སྡུག་
བསྔལ་འདམ་ནས་ཕྱུང་། །བདག་ནི་སྔན་ཅད་ལེགས་འོངས་གྱུར། །དེ་ཡི་འོག་ཏུ་ཉེས་འོངས་ལགས། །ད་ནི་ཐུབ་དབང་ཁྱོད་གསུང་གིས། །གསལ་བར་ལེགས་འོངས་ཉིད་དུ་གྱུར། །ཀུན་མཁྱེན་ལྕགས་འདྲ་བདག་གིས་ནི། །ཁྱོད་ཀྱི་གསུང་མཆོག་ཐོས་གྱུར་ནས། །ད་ནི་གསེར་དང་འདྲ་བ་ཡི། །ཟག་པ་མེད་པའི་ལུས་ཀྱང་ཐོབ། །རིན་ཆེན་ལ་སོགས་འཐོབ་པ་དང་། །མཐོ་རིས་ཐར་པ་འཚལ་བ་ཡིས། །རྟག་ཏུ་ཕན་པ་བཞེད་པ་ཡི། །དགེ་བཤེས་བསྟེན་པར་བགྱི་བ་བཟང་།། །།འདུལ་བ་རྣམ་པར་འབྱེད་པ། བམ་པོ་དྲུག་བཅུ་རྩ་ལྔ་པ། གང་གི་ཚེ་ཚེ་དང་ལྡན་པ་ལེགས་འོངས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དེའི་ཚེ་ན་གཞན་མུ་སྟེགས་ཅན་དག་ཤེས་ལྡན་དག །དགེ་སྦྱོང་གཽ་ཏ་མ་ན་རེ་ངའི་བསྟན་པ་ནི་ཀུན་དུ་མཛེས་པ་ཡིན་ནོ་ཞེས་ཟེར་ན་འདི་ལྟར་ཉེས་འོངས་ལ་སོགས་པ་མུ་ལྟོ་བ་དག་ཀྱང་རབ་ཏུ་འབྱིན་པར་བྱེད་ན། དེའི་བསྟན་པ་ཇི་ལྟར་ཀུན་དུ་མཛེས་པ་ཡིན་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་ནས། བཅོམ་ལྡན་འདས་ཀྱིས་དགོངས་པ། ཉན་ཐོས་ཆེན་པོ་རི་རབ་ལྟ་བུ་ལ་སྐྱེ་བོ་ཕལ་པོ་ཆེའི་ཚོགས་དག་སྨས་པ་སྐྱེད་པར་བྱེད་པས་འདིའི་ཡོན་ཏན་བསྒྲག་པར་བྱ་ན་གང་དུ་བྱ། གང་དུ་སྐྱེས་ཤིང་གང་དུ་རྡིབ་པ་དེ་ཉིད་དུ་བྱའོ་སྙམ་དུ་དགོངས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་དེ་བཞིན་གཤེགས་པ་ངན་སྤོང་གི་བུ་དག་ཏུ་ལྗོངས་རྒྱུར་གཤེགས་ཀྱིས་ཁྱེད་ཅག་ལས་གང་དེ་བཞིན་གཤེགས་པ་དང་ཐབས་ཅིག་ངན་སྤོང་གི་བུ་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་དག་ལོང་ཤིག་ཅེས་སྒོ་ཤིག །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དགེ་སློང་རྣམས་ལ་ཚེ་དང་ལྡན་པ་དག་བཅོམ་ལྡན་འདས་ངན་སྤོང་གི་བུ་དག་ཏུ་ལྗོངས་རྒྱུར་གཤེགས་ཀྱིས་ཁྱེད་ཅག་ལས་གང་བཅོམ་ལྡན་འདས་དང་ཐབས་ཅིག་ཏུ་ངན་སྤོང་གི་བུ་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་དག་ལོང་ཤིག་ཅེས་བསྒོའོ། །དེ་ནས་བཅོམ་ལྡན་
འདས་དུལ་བ། འཁོར་དུལ་བ་དང་ལྡན་པ། ཞི་བ། འཁོར་ཞི་བ་དང་ལྡན་པ། གྲོལ་བ། འཁོར་གྲོལ་བ་དང་ལྡན་པ། དབུགས་ཕྱིན་པ། འཁོར་དབུགས་ཕྱིན་པ་དང་ལྡན་པ། ཐུལ་བ། འཁོར་ཐུལ་བ་དང་ལྡན་པ། དགྲ་བཅོམ་པ། འཁོར་དགྲ་བཅོམ་པ་དང་ལྡན་པ། འདོད་ཆགས་དང་བྲལ་བ། འཁོར་འདོད་ཆགས་དང་བྲལ་བ་དང་ལྡན་པ། མཛེས་པ། འཁོར་མཛེས་པ་དང་ལྡན་པ། ཁྱུ་མཆོག་ལྟར་བ་ལང་གི་ཚོགས་ཀྱིས་ཡོངས་སུ་བསྐོར་བ། གླང་པོ་ཆེ་ལྟར་གླང་པོ་ཆེའི་ཕྲུ་གུའི་ཚོགས་ཀྱིས་ཡོངས་སུ་བསྐོར་བ། སེང་གེ་ལྟར་མཆེ་བ་ཅན་གྱི་ཚོགས་ཀྱིས་ཡོངས་སུ་བསྐོར་བ། ངང་པའི་རྒྱལ་པོ་ལྟར་ངང་པའི་ཚོགས་ཀྱིས་ཡོངས་སུ་བསྐོར་བ། ནམ་མཁའ་ལྡིང་ལྟར་བྱའི་ཚོགས་ཀྱིས་ཡོངས་སུ་བསྐོར་བ། བྲམ་ཟེ་ལྟར་སློབ་མའི་ཚོགས་ཀྱིས་ཡོངས་སུ་བསྐོར་བ། སྨན་པ་མཁས་པ་ལྟར་ནད་པའི་ཚོགས་ཀྱིས་ཡོངས་སུ་བསྐོར་བ། དཔའ་བོ་ལྟར་རུ་པའི་ཚོགས་ཀྱིས་ཡོངས་སུ་བསྐོར་བ། ས་མཁན་ལྟར་ལམ་དུ་ཞུགས་པའི་ཚོགས་ཀྱིས་ཡོངས་སུ་བསྐོར་བ། དེད་དཔོན་ལྟར་ཚོང་པའི་ཚོགས་ཀྱིས་ཡོངས་སུ་བསྐོར་བ། ཚོང་དཔོན་ལྟར་འཁོར་གྱི་ཚོགས་ཀྱིས་ཡོངས་སུ་བསྐོར་བ། མཁར་གྱི་རྒྱལ་པོ་ལྟར་བློན་པོའི་ཚོགས་ཀྱིས་ཡོངས་སུ་བསྐོར་བ། འཁོར་ལོས་སྒྱུར་བ་ལྟར་བུ་སྟོང་གི་ཚོགས་ཀྱིས་ཡོངས་སུ་བསྐོར་བ། ཟླ་བ་ལྟར་རྒྱུ་སྐར་གྱི་ཚོགས་ཀྱིས་ཡོངས་སུ་བསྐོར་བ། ཉི་མ་ལྟར་འོད་ཟེར་སྟོང་གི་ཚོགས་ཀྱིས་ཡོངས་སུ་བསྐོར་བ། ཡུལ་འཁོར་སྲུང་ལྟར་དྲི་ཟའི་ཚོགས་ཀྱིས་ཡོངས་སུ་བསྐོར་བ། འཕགས་སྐྱེས་པོ་ལྟར་གྲུལ་བུམ་གྱི་ཚོགས་ཀྱིས་ཡོངས་སུ་བསྐོར་བ། མིག་མི་བཟང་ལྟར་ཀླུའི་ཚོགས་ཀྱིས་ཡོངས་སུ་བསྐོར་བ། ནོར་སྦྱིན་ལྟར་གནོད་སྦྱིན་གྱི་ཚོགས་ཀྱིས་ཡོངས་སུ་བསྐོར་བ། ཐགས་ཟངས་རིས་ལྟར་ལྷ་མ་ཡིན་གྱི་ཚོགས་ཀྱིས་ཡོངས་སུ་བསྐོར་བ། བརྒྱ་བྱིན་ལྟར་སུམ་བཅུ་རྩ་གསུམ་པའི་ཚོགས་ཀྱིས་ཡོངས་སུ་བསྐོར་བ། ཚངས་པ་ལྟར་ཚངས་རིས་ཀྱི་ཚོགས་ཀྱིས་ཡོངས་སུ་བསྐོར་བ། དབང་པོ་རྣམས་ཀྱིས་ཤིན་ཏུ་དུལ་བ། སྤྱོད་ལམ་དང་སྤྱོད་པ་མ་འཁྲུགས་པ།
ཆུ་གཏེར་ལྟར་ཏིང་ངེ་བ། སྤྲིན་ལྟར་ཆུ་དང་བཅས་པ། གླང་པོ་ཆེའི་རྒྱལ་པོ་ལྟར་དྲེགས་པ་དང་བྲལ་བ། སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ལེགས་པར་བརྒྱན་པ། དཔེ་བྱད་བཟང་པོ་བརྒྱད་བཅུས་སྐུ་རྣམ་པར་མཛེས་པ། འོད་འདོམ་གང་གིས་སྐུ་བརྒྱན་པ། ཉི་མ་སྟོང་བས་ལྷག་པའི་འོད་དང་ལྡན་པ། རིན་པོ་ཆེའི་རི་བོ་འགྲོ་བ་ལྟར་ཀུན་དུ་བཟང་བ། སྟོབས་བཅུ་དང་། མི་འཇིགས་པ་བཞི་དང་། མ་འདྲེས་པའི་དྲན་པ་ཉེ་བར་གཞག་པ་གསུམ་དང་། ཐུགས་རྗེ་ཆེན་པོ་དང་ལྡན་པ། ཀུན་ཤེས་ཀཽཎྜི་ནྱ་དང་། རྟ་ཐུལ་དང་། བཟང་ལྡན་དང་། རླངས་པ་དང་། མིང་ཆེན་དང་། གྲགས་པ་དང་། གང་པོ་དང་། དྲི་མེད་དང་། བ་ལང་བདག་དང་། ལག་བཟངས་ལ་སོགས་པ་ཉན་ཐོས་ཆེན་པོ་དེ་དག་དང་། གཞན་ཡང་དགེ་སློང་གི་དགེ་འདུན་མང་པོས་ཡོངས་སུ་བསྐོར་ཅིང་མདུན་དུ་བདར་ཏེ་ངན་སྤོང་གི་བུ་དག་ཏུ་ཆུ་སྲིན་བྱིས་པ་གསོད་ཀྱི་རི་ག་ལ་བ་དེ་ལོགས་སུ་ལྗོངས་རྒྱུ་ཞིང་གཤེགས་པ་ན། ཆུ་སྲིན་བྱིས་པ་གསོད་ཀྱི་རིར་བྱོན་ནས་ཆུ་སྲིན་བྱིས་པ་གསོད་ཀྱི་རི་ལ་འཇིགས་རུང་གི་ཚལ་རི་དགས་ཀྱི་ནགས་ན་བཞུགས་སོ། །ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་གིས་བཅོམ་ལྡན་འདས་ངན་སྤོང་གི་བུ་དག་ཏུ་ལྗོངས་རྒྱུ་ཞིང་གཤེགས་པ་ན། ཆུ་སྲིན་བྱིས་པ་གསོད་ཀྱི་རིར་བྱོན་ནས། ཆུ་སྲིན་བྱིས་པ་གསོད་ཀྱི་རི་ལ་འཇིགས་རུང་གི་ཚལ་རི་དགས་ཀྱི་ནགས་ན་བཞུགས་ཞེས་ཐོས་སོ། །ཐོས་ནས་ཀྱང་ཚོགས་ནས་ཚོགས་སུ། བྱིངས་ནས་བྱིངས་སུ་འདུས་ཤིང་ལྷགས་ཏེ་ཆུ་སྲིན་བྱིས་པ་གསོད་ཀྱི་རི་ནས་བྱུང་སྟེ། བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་བཅོམ་ལྡན་འདས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་
པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་སྟན་ལས་ལངས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་སང་བདག་ཅག་གི་སྡུམ་པར་གདུགས་ཚོད་གསོལ་བར་ཅི་གནང་། བཅོམ་ལྡན་འདས་ཀྱིས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ལ་ཅང་མི་གསུང་བས་གནང་ངོ་། །དེ་ནས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ཀྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་དོང་ངོ་། །དེ་ནས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ཀྱིས་དེ་ཉིད་ཀྱི་མཚན་མོ་བཅའ་བ་དང་བཟའ་བ་གཙང་ཞིང་བསོད་པ་དག་སྟ་གོན་བྱས་ནས་ནང་པར་སྔར་ལངས་ཏེ་གདན་བཤམས་ཤིང་ཆུ་ར་བཞག་ནས། བཅོམ་ལྡན་འདས་ལ་སྤྱན་འདྲེན་གྱིས། བཙུན་པ་གདུགས་ཚོད་གཡར་དགོངས་འཚལ་ན་བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་སྤྱན་དྲངས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ། ལྷུང་བཟེད་དང་ཆོས་གོས་བསྣམས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ནས། ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ཀྱི་བཀད་ས་ག་ལ་བ་དེར་གཤེགས་ཏེ་བྱོན་ནས། དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །དེ་ནས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ཀྱིས་བཅོམ་ལྡན་འདས་དང་། དགེ་སློང་གི་དགེ་འདུན་བདེ་བར་བཞུགས་པར་རིག་ནས། བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད། སྟོབས་པར་བྱེད་དོ། །རྣམ་
གྲངས་དུ་མར་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས། བཅོམ་ལྡན་འདས་གདུགས་ཚོད་གསོལ་ཞིང་ཕྱག་བཅབས། ལྷུང་བཟེད་བཞག་པར་རིག་ནས་སྟན་ཆེས་དམའ་བ་དག་བླངས་ཏེ། བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འཁོད་དོ། །འཁོད་ནས་བཅོམ་ལྡན་འདས་ལ་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ཀྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་ཀླུ་གདུག་པ་དང་། གནོད་སྦྱིན་གདུག་པ་སོག་མ་མེད་དང་། འབྲོག་གནས་ལ་སོགས་པ་དེ་དང་དེ་དག་ཀྱང་བཏུལ་ན། བཙུན་པ་ཀླུ་ཨ་མྲའི་ཆུ་ངོགས་པ་འདི་ཡུན་རིང་པོ་ནས་བདག་ཅག་ཁོན་མ་མཆིས་པ་རྣམས་ལ་ཁོན་དུ་འཛིན། མི་འགྲན་པ་རྣམས་ལ་འགྲན་ཚོལ། མི་འཁུ་བ་རྣམས་ལ་འཁུ་བར་བགྱིད་ཅིང་ལོ་ཐོག་འཁྲུངས་སོ་འཚལ་མ་རུང་བར་བགྱིད་ན། ཀྱེ་མ་བཅོམ་ལྡན་འདས་ཀྱིས་རྗེས་སུ་ཐུགས་བརྩེ་བའི་སླད་དུ་ཀླུ་ཨ་མྲའི་ཆུ་ངོགས་པ་འདི་གདུལ་དུ་གསོལ། བཅོམ་ལྡན་འདས་ཀྱིས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ལ་ཅང་མི་གསུང་བས་གནང་ངོ་། །དེ་ནས་བཅོམ་ལྡན་འདས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །དེ་ནས་བཅོམ་ལྡན་འདས་གཙུག་ལག་ཁང་ག་ལ་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་ཁྱེད་ཅག་ལས་གང་ཀླུ་ཨ་མྲའི་ཆུ་ངོགས་པ་
འདུལ་བར་སྤྲོ་བ་དེས་ཚུལ་ཤིང་ལོང་ཤིག་ཅེས་བསྒོ་ལ་དགེ་འདུན་ལ་ཚུལ་ཤིང་བྲིམས་ཤིག །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས། དགེ་སློང་རྣམས་ལ་ཁྱེད་ཅག་ལས་གང་ཀླུ་ཨ་མྲའི་ཆུ་ངོགས་པ་འདུལ་བར་སྤྲོ་བ་དེས་ཚུལ་ཤིང་ལོང་ཤིག་ཅེས་བསྒོ་སྟེ་དགེ་འདུན་ལ་ཚུལ་ཤིང་བྲིམ་པར་བརྩམས་པ་དང་། བཅོམ་ལྡན་འདས་ཀྱིས་ཚུལ་ཤིང་མ་བཞེས་ནས་དགེ་སློང་གནས་བརྟན་གནས་བརྟན་དག་གིས་བསམས་པ། བཅོམ་ལྡན་འདས་ཀྱིས་ཅིའི་སླད་དུ་ཚུལ་ཤིང་མ་བཞེས་སྙམ་དུ་བསམས་ན། ཚེ་དང་ལྡན་པ་ལེགས་འོངས་ཀྱི་ཡོན་ཏན་བསྒྲག་པར་བཞེད་པར་རིག་ནས་དེ་དག་གིས་ཀྱང་ཚུལ་ཤིང་མ་བླངས་སོ། །ཚེ་དང་ལྡན་པ་ལེགས་འོངས་ཀྱིས་བསམས་པ། བཅོམ་ལྡན་འདས་དང་། དགེ་སློང་གནས་བརྟན་གནས་བརྟན་དག་གིས་ཅིའི་སླད་དུ་ཚུལ་ཤིང་མ་བཞེས་སྙམ་དུ་བསམས་ན། བདག་གི་ཡོན་ཏན་བསྒྲག་པར་བཞེད་པར་རིག་ནས་སྟོན་པའི་ཐུགས་ལ་དགོངས་པ་ཡོངས་སུ་རྫོགས་པར་བྱའོ་སྙམ་ནས། དེས་སྟན་ཕྱེད་ལས་འཕགས་ཏེ་གླང་པོ་ཆེའི་སྣ་ལྟ་བུའི་ལག་པ་བརྐྱང་ནས་ཚུལ་ཤིང་བླངས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དགེ་སློང་གནས་བརྟན་གང་གིས་ཚུལ་ཤིང་བླངས། བཙུན་པ་ཚེ་དང་ལྡན་པ་ལེགས་འོངས་ཀྱིས་བླངས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་སོང་ལ་དགེ་སློང་ལེགས་འོངས་ལ་འདི་སྐད་ཅེས། དེ་ནི་ཀླུ་གདུག་པ་ཡིན་གྱིས་ཁྱོད་ཀྱིས་ལུས་ཀྱི་དབང་པོ་བསྲུང་བར་བྱའོ་ཞེས་གྱིས་ཤིག །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས། ཚེ་དང་ལྡན་པ་ལེགས་འོངས་ལ་སྨྲས་པ། ཚེ་དང་ལྡན་པ་ལེགས་འོངས། བཅོམ་ལྡན་འདས་ཀྱིས་བཀའ་སྩལ་པ། དེ་ནི་ཀླུ་གདུག་པ་ཡིན་གྱིས་ཁྱོད་ཀྱིས་ལུས་ཀྱི་དབང་པོ་བསྲུང་བར་བྱའོ་ཞེས་བྱུང་ངོ་། །ཚེ་དང་ལྡན་པ་ལེགས་འོངས་ཀྱིས་སྨྲས་པ། བཙུན་པ་ཀུན་དགའ་བོ་སྟོན་པའི་བཀའ་མཉན་པས་བཀའ་
བཞིན་འཚལ། གཞན་དུ་ན་ཀླུ་ཨ་མྲའི་ཆུ་ངོགས་པ་ལྟ་བུ་ཤ་སྟག་གིས་འཛམ་བུའི་གླིང་འདི་ལྟ་སྟེ། དཔེར་ན་བུ་རམ་ཤིང་གི་ཚལ་ལམ། འདམ་བུའི་ཚལ་ལམ། འོད་མའི་ཚལ་བཞིན་དུ་གང་བར་གྱུར་ཀྱང་དེ་དག་གིས་བདག་གི་སྤུའི་རྩེ་མོ་ཙམ་ཡང་གཡོ་བར་མི་ནུས་ན་ལུས་ཀྱི་དབང་པོ་འགག་པར་ལྟ་ག་ལ་ནུས་ཏེ། འདི་ལྟར་བདག་གིས་བཅོམ་ལྡན་འདས་ཀྱི་སྤྱན་སྔར་རྫུ་འཕྲུལ་གྱི་རྐང་པ་བཞི་པོ་དག་ཀུན་དུ་བསྟེན་ཅིང་གོམས་པར་བྱས། ལན་མང་དུ་བྱས་པའི་ཕྱིར་རོ། །དེ་ནས་ཚེ་དང་ལྡན་པ་ལེགས་འོངས་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་ཆུ་སྲིན་བྱིས་པ་གསོད་ཀྱི་རིར་བསོད་སྙོམས་ལ་ཞུགས་སོ། །ཆུ་སྲིན་བྱིས་པ་གསོད་ཀྱི་རིར་བསོད་སྙོམས་བརྒྱུས་ནས་ཀླུ་ཨ་མྲའི་ཆུ་ངོགས་པའི་གནས་ག་ལ་བ་དེར་སོང་བ་དང་། ཀླུ་ཨ་མྲའི་ཆུ་ངོགས་པས་ཚེ་དང་ལྡན་པ་ལེགས་འོངས་ཐག་རིང་པོ་ཁོ་ན་ནས་འོང་བ་མཐོང་ངོ་། །མཐོང་ནས་ཀྱང་དེས་བསམས་པ། དགེ་སྦྱོང་འདིས་བདག་ཤི་བར་གཏམ་ཐོས་སམ། ཅི་ན་བདག་གི་གནས་སུ་འོང་། རེ་ཞིག་འདི་ནི་གློ་བུར་བ་ཡིན་གྱིས་འོང་དུ་ཆུག་ཤིག་སྙམ་མོ། །དེ་ནས་ཚེ་དང་ལྡན་པ་ལེགས་འོངས་ཀྱིས་ཆུ་ཚགས་དང་ལྷུང་བཟེད་མཐའ་གཅིག་ཏུ་བཞག་སྟེ། སྣམ་སྦྱར་སྤྲུགས་ནས་རྐང་པ་གཉིས་བཀྲུས་ཤིང་ལག་པ་གཉིས་བསྙལ་ཏེ་ཆུ་བཙགས་ནས་ལོ་མ་ལྷགས་པ་དག་བླངས་ཏེ་འདུག་ནས་ཟས་ཀྱི་བྱ་བ་བྱ་བར་བརྩམས་སོ། །དེ་ནས་ཚེ་དང་ལྡན་པ་ལེགས་འོངས་ཀྱིས་ཟས་ཀྱི་བྱ་བ་བྱས་ནས་བསམས་པ། ཀླུ་གདུག་པ་ནི་འཁྲུག་པར་མ་བྱས་ན་དུལ་བའི་གནས་སུ་མི་རུང་བས་འདི་ནི་ཀླུ་གདུག་པ་ཡིན་པས་འཁྲུག་པར་བྱའོ་སྙམ་ནས་དེས་ལྷུང་བཟེད་བཀྲུས་ཏེ་ལྷུང་བཟེད་ཀྱི་ཁྲུད་མའི་ཆུ་དེ་དེའི་རྫིང་དེར་བླུགས་པ་དང་། ཀླུ་ཨ་མྲའི་ཆུ་ངོགས་པ་དེ་འཁྲུགས་ནས་དེས་བསམས་པ། བདག་གིས་དགེ་སྦྱོང་འདི་འོང་བ་དང་ཟ་བ་ཡང་ཡལ་བར་བོར་ན་བདག་ལ་བརྙས་ཏེ་བདག་གི་གནས་སུ་ཁྲུད་མའི་ཆུ་ལྡུགས་པར་བྱེད་པས་དགེ་སྦྱོང་འདི་ནི་ཉེ་བར་མ་ཞི་བ་ཞིག་ཡིན་ནོ་སྙམ་ནས། དེ་ཁྲོས་ཏེ་སྟེང་གི་ནམ་མཁའ་ལ་མངོན་པར་འཕགས་ནས་
འབྲུག་སྒྲ་ཆེན་པོ་ཕྱུང་སྟེ། ཚེ་དང་ལྡན་པ་ལེགས་འོངས་ཀྱི་སྟེང་དུ་རྡོ་རྗེ་རྩེ་གཅིག་པ་དང་། འཁོར་ལོ་དང་། མདའ་བོ་ཆེ་དང་། མཚོན་རྩེ་གཅིག་པ་ལ་སོགས་པ་མཚོན་ཆ་སྣ་ཚོགས་དབབ་པར་བརྩམས་པ་དང་། ཚེ་དང་ལྡན་པ་ལེགས་འོངས་བྱམས་པའི་ཏིང་ངེ་འཛིན་ལ་ཞུགས་པས་མཚོན་ཆ་དེ་དག་ལྷའི་མེ་ཏོག་ཨུཏྤལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དག་ཏུ་གྱུར་ཏེ། ཚེ་དང་ལྡན་པ་ལེགས་འོངས་ཀྱི་ལུས་ལ་འབབ་བོ། །ཀླུ་ཨ་མྲའི་ཆུ་ངོགས་པས་མེ་མདག་གི་ཆར་དབབ་པར་བརྩམས་པ་དང་། ཚེ་དང་ལྡན་པ་ལེགས་འོངས་བྱམས་པའི་ཏིང་ངེ་འཛིན་ལ་ཞུགས་པས་མེ་མདག་དེ་དག་ལྷའི་མེ་ཏོག་མན་ད་ར་ཀ་ནི་དག་ཏུ་གྱུར་ཏེ། ཚེ་དང་ལྡན་པ་ལེགས་འོངས་ཀྱི་ལུས་ལ་འབབ་བོ། །ཀླུ་ཨ་མྲའི་ཆུ་ངོགས་པས་ཕྱག་དར་གྱི་ཆར་དབབ་པར་བརྩམས་པ་དང་། ཚེ་དང་ལྡན་པ་ལེགས་འོངས་བྱམས་པའི་ཏིང་ངེ་འཛིན་ལ་ཞུགས་པས་ཕྱག་དར་དེ་དག་ལྷའི་ཨ་ག་རུའི་ཕྱེ་མ་དག་དང་། ཙན་དན་གྱི་ཕྱེ་མ་དག་དང་། རྒྱ་སྤོས་ཀྱི་ཕྱེ་མ་དག་དང་། ཏ་མ་ལའི་ལོ་མའི་ཕྱེ་མ་དག་ཏུ་གྱུར་ཏེ། ཚེ་དང་ལྡན་པ་ལེགས་འོངས་ཀྱི་ལུས་ལ་འབབ་བོ། །ཀླུ་ཨ་མྲའི་ཆུ་ངོགས་པས་ཁྲོ་བའི་མཐུས་དུ་བ་གཏུལ་བ་དང་། ཚེ་དང་ལྡན་པ་ལེགས་འོངས་ཀྱིས་ཀྱང་རྫུ་འཕྲུལ་གྱི་མཐུས་དུ་བ་གཏུལ་ཏོ། །ཀླུ་ཨ་མྲའི་ཆུ་ངོགས་པས་ཁྲོ་བའི་མཐུས་མེ་སྦར་བ་དང་། ཚེ་དང་ལྡན་པ་ལེགས་འོངས་མེའི་ཁམས་ལ་སྙོམས་པར་ཞུགས་སོ། །དེ་ན་ཀླུ་ཨ་མྲའི་ཆུ་ངོགས་པའི་ཁྲོ་བའི་མཐུ་དང་། ཚེ་དང་ལྡན་པ་ལེགས་འོངས་ཀྱི་རྫུ་འཕྲུལ་གྱི་མཐུས་སྣང་བ་ཆེན་པོ་བྱུང་བར་གྱུར་ནས། ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ཀྱིས་སྨྲས་པ། ཤེས་ལྡན་དག་འདི་ནི་བཅོམ་ལྡན་འདས་ཀླུ་ཨ་མྲའི་ཆུ་ངོགས་པ་འདུལ་བར་མཛད་པ་ཡིན་ནོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ངའི་ཉན་ཐོས་ཀྱི་དགེ་སློང་ཡང་དང་ཡང་དུ་མེའི་ཁམས་ལ་སྙོམས་པར་འཇུག་པ་རྣམས་ཀྱི་ནང་ན་འདི་ལྟ་སྟེ། དགེ་སློང་ལེགས་འོངས་འདི་མཆོག་ཡིན་ནོ། །གང་གི་ཚེ་ཀླུ་ཨ་མྲའི་ཆུ་ངོགས་པ་མཚོན་
ཐམས་ཅད་ཟད་པར་གྱུར་པ་དེའི་ཚེ་ན་དེས་འབྲོས་པར་བརྩམས་པ་དང་། ཚེ་དང་ལྡན་པ་ལེགས་འོངས་ཀྱིས་ཀུན་དུ་མེ་མངོན་པར་སྤྲུལ་ནས། ཀླུ་ཨ་མྲའི་ཆུ་ངོགས་པས་ཚེ་དང་ལྡན་པ་ལེགས་འོངས་ཀྱི་རྐང་པའི་དྲུང་འབའ་ཞིག་ཞི་བར་མཐོང་བ་མ་གཏོགས་པར་ཐམས་ཅད་ཀུན་དུ་འབར། རབ་ཏུ་འབར། ཀུན་དུ་རབ་ཏུ་འབར་ཞིང་མེ་ལྕེ་གཅིག་ཏུ་གྱུར་པར་མཐོང་ནས་དེ་ཚེ་དང་ལྡན་པ་ལེགས་འོངས་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་ལེགས་འོངས་ལ་འདི་སྐད་ཅེས་སྨྲས་སོ། །བཙུན་པ་ལེགས་འོངས་ཅིའི་སླད་དུ་བདག་ལ་ཐོ་འཚམ་པར་མཛད། རྒ་བའི་ཆོས་ཅན་ཁོ་བོ་ཁྱོད་ལ་ཐོ་འཚམ་པ་མ་ཡིན་གྱི། ཁྱོད་ཁོ་བོ་ལ་ཐོ་འཚམ་སྟེ། གལ་ཏེ་ཁོ་བོས་ཡོན་ཏན་གྱི་ཚོགས་འདི་ལྟ་བུ་ཐོབ་པར་མ་གྱུར་དུ་ཟིན་ན་ཁྱོད་ཀྱིས་དེང་ཁོ་བོ་མིང་ལས་ལྷག་མ་མ་ལུས་པར་བྱེད་པར་འགྱུར་རོ། །དེས་སྨྲས་པ། བཙུན་པ་ལེགས་འོངས་བདག་གིས་ཅི་བགྱི་བ་བཀའ་སྩལ་དུ་གསོལ། བཞིན་བཟངས་ཚུར་ཤོག། བཅོམ་ལྡན་འདས་ཀྱི་སྤྱན་སྔར་སོང་ལ་སྐྱབས་སུ་འགྲོ་བ་དང་། བསླབ་པའི་གཞི་དག་ལོང་ཤིག །དེ་ནས་ཚེ་དང་ལྡན་པ་ལེགས་འོངས་ཀྱིས་ཀླུ་ཨ་མྲའི་ཆུ་ངོགས་པ་ལྷུང་བཟེད་དུ་བཅུག་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ལེགས་འོངས་ཀྱིས་འདི་སྐད་ཅེས་གསོལ་ཏོ། །བཙུན་པ་ཀླུ་ཨ་མྲའི་ཆུ་ངོགས་པ་དེ་འདི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བཞིན་བཟངས་ཁྱོད་རེ་ཞིག་སྔོན་གྱི་ཉེས་པར་སྤྱད་པས། ད་ལྟར་དུད་འགྲོའི་སྐྱེ་གནས་ངན་པར་སྐྱེས་ཤིང་། དྲག་ཤུལ་ཅན་ལག་པ་དམར་བ། སྣུན་པ་དང་རབ་ཏུ་སྣུན་པ་ལ་ཞུགས་པ། གཞན་གྱི་སྲོག་འཕྲོག་པ། གཞན་གྱི་སྲོག་གཅོད་དུ་འཇུད་པ། གཞན་གྱི་སྲོག་གཅོད་པས་འཚོ་བར་བྱེད་པ་ཡིན་པས། ཁྱོད་འདི་ནས་ཤི་འཕོས་པའི་འགྲོ་བ་ནི་ཅིར་འགྱུར། སྐྱེ་བ་ནི་ཅིར་འགྱུར། ཚེ་ཕྱི་མ་ནི་ཅིར་འགྱུར། བཅོམ་ལྡན་འདས་བདག་གིས་ཇི་ལྟར་བགྱི་བ་བཀའ་སྩལ་དུ་གསོལ།
བཞིན་བཟངས་ཁྱོད་ཚུར་ཤོག་ལ་ངའི་སྤྱན་སྔར་སྐྱབས་སུ་འགྲོ་བ་དང་། བསླབ་པའི་གཞི་དག་ལོང་ལ་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ལ་མི་འཇིགས་པ་བྱིན་ཅིག །བཙུན་པ་བདག་བཅོམ་ལྡན་འདས་ཀྱི་སྤྱན་སྔར་སྐྱབས་སུ་མཆི་བ་དང་། བསླབ་པའི་གཞི་དག་ལེན་ཅིང་། དེང་སླན་ཅད་ནས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ལ་མི་འཇིགས་པ་སྩོལ་ཏོ། །དེ་ནས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་བྱ་མོ་ལབ་མང་པོ་ཐོགས་ནས། བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་བཅོམ་ལྡན་འདས་ལ་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ཀྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་ཀླུ་ཨ་མྲའི་ཆུ་ངོགས་པ་བཏུལ་ཏམ། བཅོམ་ལྡན་འདས་ཀྱིས་བཀའ་སྩལ་པ། ངས་ཀླུ་ཨ་མྲའི་ཆུ་ངོགས་པ་མ་བཏུལ་ཏེ་དགེ་སློང་ལེགས་འོངས་ཀྱིས་ཀླུ་ཨ་མྲའི་ཆུ་ངོགས་པ་བཏུལ་ཏོ། །བཙུན་པ་ལེགས་འོངས་གང་གིས་ཆུ་སྲིན་བྱིས་པ་གསོད་ཀྱི་རི་པ་ཁྱིམ་བདག་རྟོགས་ལྡན་གྱི་བུ་ལེགས་འོངས་ཀྱིས་སོ། །དེ་ན་ཁ་ཅིག་གིས་སྨྲས་པ། བདག་ཅག་གི་ཕུ་ནུ་བོའི་བུ་ཡིན་ནོ། །ཁ་ཅིག་གིས་སྨྲས་པ། བདག་ཅག་གི་ཚ་བོ་ཡིན་ནོ། །ཁ་ཅིག་གིས་སྨྲས་པ། བདག་ཅག་གི་ཞང་པོ་ཡིན་ནོ། །ཁ་ཅིག་གིས་སྨྲས་པ། བདག་ཅག་གི་ཆུང་པོ་གྲོགས་ཀྱི་བུ་ཡིན་ནོ་ཞེས་དེ་དག་གིས་དེ་ལ་བྱ་མོ་ལབ་མང་པོ་ཕུལ་ལོ། །དེ་ནས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་བྱས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་བཙུན་པ་ལེགས་འོངས་ལས་བརྟེན་ཏེ་དགུང་བདུན་དུ་བདག་ཅག་གི་མཆོད་པའི་དབང་དུ་བགྱིས་པའི་གདུགས་ཚོད་གསོལ་བར་ཅི་གནང་། བཅོམ་ལྡན་འདས་ཀྱིས་ཆུ་སྲིན་
བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ལ་ཅང་མི་གསུང་བས་གནང་ངོ་། །དེ་ནས་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ཀྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་དོང་ངོ་། །ཆུ་སྲིན་བྱིས་པ་གསོད་ཀྱི་རི་ལ་ཁྱིམ་བདག་རྟོགས་ལྡན་གྱི་ཆུང་པོ་གྲོགས་བྲམ་ཟེ་སྦྲུལ་ཁས་སྡིགས་པ་ཞིག་འདུག་པ་དེ་ཀླུ་ཨ་མྲའི་ཆུ་ངོགས་པའི་འཇིགས་པས་བྲོས་ཏེ་མཉན་ཡོད་དུ་སོང་བ་དེ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་གླང་པོ་ཆེའི་ཆང་པའི་བླར་བསྐོས་ཏེ་བཞག་གོ །དེ་བྱ་བ་ཞིག་གི་ཕྱིར་ཆུ་སྲིན་བྱིས་པ་གསོད་ཀྱི་རིར་ཕྱིན་པ་དང་། དེས་ཇི་ལྟར་ཁྱིམ་བདག་རྟོགས་ལྡན་གྱི་བུ་བཙུན་པ་ལེགས་འོངས་ཀྱིས་ཀླུ་ཨ་མྲའི་ཆུ་ངོགས་པ་བཏུལ་བ་ཐོས་སོ། །ཐོས་ནས་ཀྱང་ཚེ་དང་ལྡན་པ་ལེགས་འོངས་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ལེགས་འོངས་ཀྱི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་ཚེ་དང་ལྡན་པ་ལེགས་འོངས་ལ་བྲམ་ཟེ་དེས་འདི་སྐད་ཅེས་སྨྲས་སོ། །བཙུན་པ་ལེགས་འོངས་ཀྱིས་སང་བདག་གི་སྡུམ་པར་གདུགས་ཚོད་གསོལ་བར་ཅི་གནང་། བྲམ་ཟེ་ཆུ་སྲིན་བྱིས་པ་གསོད་ཀྱི་རི་པའི་བྲམ་ཟེ་དང་ཁྱིམ་བདག་རྣམས་ཀྱིས་ཁོ་བོ་ལས་བརྟེན་ནས་སངས་རྒྱས་ལ་སོགས་པ་དགེ་སློང་གི་དགེ་འདུན་ཞག་བདུན་དུ་མཆོད་པའི་དབང་དུ་བྱས་པའི་གདུགས་ཚོད་ལ་སྤྱན་དྲངས་ཀྱིས་མི་འཚལ་ལོ། །བྲམ་ཟེས་སྨྲས་པ། གལ་ཏེ་ཁྱོད་ཀྱིས་ད་མི་གནང་ན། གང་གི་ཚེ་ཁྱོད་མཉན་ཡོད་དུ་བྱོན་པར་གྱུར་པ་དེའི་ཚེ་ན་ཁྱོད་ཀྱིས་དང་པོ་ཁོ་ནར་བདག་གི་བསོད་སྙོམས་གསོལ་པ་མཛོད་ཅིག །ཚེ་དང་ལྡན་པ་ལེགས་འོངས་ཀྱིས་དེ་ལྟར་བྱའོ་ཞེས་སྨྲས་ནས་དེ་ལངས་ཏེ་སོང་ངོ་། །དེ་ནས་བཅོམ་ལྡན་འདས་ཆུ་སྲིན་བྱིས་པ་གསོད་ཀྱི་རིར་ཅི་དགྱེས་པར་བཞུགས་ནས། མཉན་ཡོད་ག་ལ་བ་དེ་ལོགས་སུ་ལྗོངས་རྒྱུ་ཞིང་གཤེགས་ཏེ། མཐར་གྱིས་རྒྱུ་ཞིང་གཤེགས་པ་ན་མཉན་ཡོད་དུ་བྱོན་ནས། མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཁྱིམ་བདག་
མགོན་མེད་ཟས་སྦྱིན་གྱིས་བཅོམ་ལྡན་འདས་ངན་སྤོང་གི་བུ་དག་ཏུ་ལྗོངས་རྒྱུ་ཞིང་གཤེགས་པ་ན་མཉན་ཡོད་དུ་བྱོན་ནས། མཉན་ཡོད་ན་རྒྱལ་བྱེད་ཀྱི་ཚལ་བདག་གི་ཀུན་དགའ་ར་བ་ན་བཞུགས་ཞེས་ཐོས་སོ། །ཐོས་ནས་ཀྱང་མཉན་ཡོད་ནས་བྱུང་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས། བཅོམ་ལྡན་འདས་ཁྱིམ་བདག་མགོན་མེད་ཟས་སྦྱིན་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་ཁྱིམ་བདག་མགོན་མེད་ཟས་སྦྱིན་སྟན་ལས་ལངས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་སང་བདག་གི་སྡུམ་པར་གདུགས་ཚོད་གསོལ་བར་ཅི་གནང་། བཅོམ་ལྡན་འདས་ཀྱིས་ཁྱིམ་བདག་མགོན་མེད་ཟས་སྦྱིན་ལ་ཅང་མི་གསུང་བས་གནང་ངོ་། །དེ་ནས་ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །བྲམ་ཟེ་སྦྲུལ་ཁས་སྡིགས་པ་དེས་བཅོམ་ལྡན་འདས་ངན་སྤོང་གི་བུ་དག་ཏུ་ལྗོངས་རྒྱུ་ཞིང་གཤེགས་པ་ན་མཉན་ཡོད་དུ་བྱོན་ནས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཞེས་ཐོས་སོ། །ཐོས་ནས་ཀྱང་ཚེ་དང་ལྡན་པ་ལེགས་འོངས་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་ལེགས་འོངས་ཀྱི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་ཚེ་དང་ལྡན་པ་ལེགས་འོངས་བྲམ་ཟེ་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་
བྱེད། ཡང་དག་པར་འཛིན་དུ་འཇུད་པར་བྱེད། ཡང་དག་པར་གཟེངས་སྟོད་པར་བྱེད། ཡང་དག་པར་རབ་ཏུ་དགའ་བར་བྱེད་དོ། །རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་ནས་ཅང་མི་སྨྲའོ། །དེ་ནས་བྲམ་ཟེ་དེ་སྟན་ལས་ལངས་ཏེ་ཚེ་དང་ལྡན་པ་ལེགས་འོངས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། ཚེ་དང་ལྡན་པ་ལེགས་འོངས་ལ་འདི་སྐད་ཅེས་སྨྲས་སོ། །བཙུན་པ་ལེགས་འོངས་ཀྱིས་སང་བདག་གི་སྡུམ་པར་གདུགས་ཚོད་གསོལ་བར་ཅི་གནང་། བྲམ་ཟེ་བཅོམ་ལྡན་འདས་ལ་ཞུའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ལེགས་འོངས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བྲམ་ཟེ་དེ་བདག་གི་གན་དུ་མཆིས་ཏེ་བདག་སང་སྡུམ་པ་གཞན་དུ་འཚལ་མ་ལ་གཡར་འདྲེན་ན་མཆིད་ཀྱིས་འཚལ་ལམ། བཅོམ་ལྡན་འདས་ཀྱིས་བཀའ་སྩལ་པ། སྔར་མགྲོན་དུ་བོས་པས་བདག་གིར་བྱའོ། །ཚེ་དང་ལྡན་པ་ལེགས་འོངས་ཀྱིས་བྲམ་ཟེ་དེ་ལ་ཅང་མི་སྨྲ་བས་དང་དུ་བླངས་སོ། །དེ་ནས་བྲམ་ཟེ་དེས་ཚེ་དང་ལྡན་པ་ལེགས་འོངས་ཀྱིས་ཅང་མི་སྨྲ་བར་དང་དུ་བླངས་པར་རིག་ནས། ཚེ་དང་ལྡན་པ་ལེགས་འོངས་ཀྱི་རྐང་པ་གཉིས་ལ་མགོ་བོས་ཕྱག་འཚལ་ཏེ་ཚེ་དང་ལྡན་པ་ལེགས་འོངས་ཀྱི་དྲུང་ནས་སོང་ངོ་། །དེ་ནས་ཁྱིམ་བདག་མགོན་མེད་ཟས་སྦྱིན་གྱིས། དེ་ཉིད་ཀྱི་མཚན་མོ་བཅའ་བ་དང་བཟའ་བ་གཙང་ཞིང་བསོད་པ་དག་སྟ་གོན་བྱེད་དུ་བཅུག་ནས། ནང་པར་སྔར་ལངས་ཏེ་གདན་བཤམས་ཤིང་ཆུ་ར་བཞག་ནས། བཅོམ་ལྡན་འདས་ལ་སྤྱན་འདྲེན་གྱིས་བཙུན་པ་གདུགས་ཚོད་གཡར་དགོངས་འཚལ་ན། བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་སྤྱན་དྲངས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ། ལྷུང་བཟེད་དང་ཆོས་གོས་བསྣམས་ཏེ་དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་། དགེ་སློང་གི་དགེ་འདུན་གྱིས་མདུན་དུ་བདར་ནས། ཁྱིམ་བདག་མགོན་མེད་ཟས་སྦྱིན་གྱི་བཀད་ས་ག་ལ་བ་དེར་གཤེགས་ཏེ་བྱོན་ནས། དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་
བཞུགས་སོ། །བྲམ་ཟེ་དེས་ཀྱང་ཚེ་དང་ལྡན་པ་ལེགས་འོངས་ཀྱི་ཁ་ཟས་བསོད་པ་སྟ་གོན་བྱས་སོ། །དེ་ནས་ཚེ་དང་ལྡན་པ་ལེགས་འོངས་ཀྱང་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ནས། བྲམ་ཟེ་དེའི་བཀད་ས་ག་ལ་བ་དེར་སོང་སྟེ་ཕྱིན་ནས་སྟན་བཤམས་པ་ཉིད་ལ་འདུག་གོ །དེ་ནས་བྲམ་ཟེ་དེས་ཚེ་དང་ལྡན་པ་ལེགས་འོངས་བདེ་བར་འདུག་པར་རིག་ནས། ཚེ་དང་ལྡན་པ་ལེགས་འོངས་ཁ་ཟས་བསོད་པས་ཚིམ་པར་བྱས་སོ། །བྲམ་ཟེ་དེས་བསམས་པ། བཙུན་པ་ལེགས་འོངས་ཀྱིས་ཁ་ཟས་བསོད་པ་ཟོས་པས་འཇུ་བར་མི་ནུས་སོ་སྙམ་དུ་རིག་ནས། ཚེ་དང་ལྡན་པ་ལེགས་འོངས་ལ་འདི་སྐད་ཅེས་སྨྲས་སོ། །བཙུན་པ་ལེགས་འོངས་སང་ནན་གསོལ་ལམ། དེས་སྨྲས་པ། འཐུང་ངོ་། །བྲམ་ཟེ་དེས་གླང་པོ་ཆེའི་ཆང་གི་ནང་དུ་མཛུབ་མོ་བཅུག་སྟེ་སྐོམ་གྱི་ནང་དུ་ཀྲོག་ཀྲོག་དཀྲུགས་ཏེ། ཚེ་དང་ལྡན་པ་ལེགས་འོངས་ལ་ཕུལ་ལོ། །དགྲ་བཅོམ་པ་དག་ནི་མ་བསམས་པར་ཤེས་པ་དང་མཐོང་བ་མི་འཇུག་པས། ཚེ་དང་ལྡན་པ་ལེགས་འོངས་ཀྱིས་དེ་འཐུངས་ཏེ། ཡོན་བཤད་པ་བྱས་ནས་སྟན་ལས་ལངས་ཏེ་སོང་ངོ་། །དེ་མཉན་ཡོད་ཀྱི་སྲང་རེ་ལྡེས་གཡོགས་པ་ལས་ཐལ་ནས་ཉི་མའི་འོད་ཟེར་དག་གིས་ལུས་ལ་ཕོག་པ་དང་། ར་རོ་ནས་དེ་ཆང་གིས་མྱོས་པའི་ཤུགས་ཀྱིས་ས་ལ་སྒྱེལ་ཏོ། །སངས་རྒྱས་བཅོམ་ལྡན་འདས་རྣམས་ནི་བསྙེལ་བ་མི་མངའ་བའི་ཆོས་ཉིད་ཅན་ཡིན་པས་བཅོམ་ལྡན་འདས་ཀྱིས་དེར་ལོ་མ་མ་ཡིན་པའི་སྤྱིལ་བུ་ཞིག་སྤྲུལ་པ་མཛད་དེ་བཀབ་བོ། །དེ་ནས་ཁྱིམ་བདག་མགོན་མེད་ཟས་སྦྱིན་གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད་སྟོབས་པར་བྱེད་དོ། །རྣམ་གྲངས་དུ་མར་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས། བཅོམ་ལྡན་འདས་གདུགས་ཚོད་གསོལ་ཅིང་ཕྱག་བཅབས་ལྷུང་བཟེད་བཞག་པར་རིག་ནས། སྟན་ཆེས་དམའ་བ་ཞིག་བླངས་ཏེ། བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་
འདུག་གོ། །དེ་ནས་བཅོམ་ལྡན་འདས་ཁྱིམ་བདག་མགོན་མེད་ཟས་སྦྱིན་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཡོན་བཤད་པ་མཛད་དེ། གདན་ལས་བཞེངས་ཏེ་གཤེགས་ནས་ཕྱོགས་དེར་བྱོན་ཏོ། །དེ་ནས་བཅོམ་ལྡན་འདས་ཀྱིས་རྫུ་འཕྲུལ་མངོན་པར་འདུ་མཛད་པ་དེ་བཏུལ་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་འདི་ནི་གང་གིས་ཀླུ་ཨ་མྲའི་ཆུ་ངོགས་པ་བཏུལ་བའི་དགེ་སློང་ལེགས་འོངས་ཞེས་བྱ་བ་དེ་ཡིན་ན། དགེ་སློང་དག་ཇི་སྙམ་དུ་སེམས། དགེ་སློང་ལེགས་འོངས་འདིས་ད་ལྟར་སྦྲུལ་ཕྲུག་ཀྱང་ཐུལ་བར་ནུས་སམ། བཙུན་པ་རྔོ་མི་ཐོག་གོ །དགེ་སློང་དག་དེ་ལྟར་ན་ཉེས་དམིགས་འདི་དང་གཞན་དག་ཀྱང་མྱོས་པར་འགྱུར་བ་འཐུང་བ་ལས་འབྱུང་བས་དགེ་སློང་དག་ང་ལ་སྟོན་པའོ་ཞེས་ཟེར་བ་དག་གིས་མྱོས་པར་འགྱུར་བ་ཐ་ན་རྩྭའི་རྩེ་མོས་ཀྱང་བཏུང་བར་མི་བྱ་ཞིང་བླུད་པར་ཡང་མི་བྱའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ལེགས་འོངས་སད་པར་མཛད་ནས་བཀའ་སྩལ་པ། ལེགས་འོངས་ཅིའི་ཕྱིར་འདི་ལྟར་གྱུར། བཅོམ་ལྡན་འདས་མ་བསམས་སོ། །བདེ་བར་གཤེགས་པ་མ་བསམས་སོ། །དེ་ནས་བཅོམ་ལྡན་འདས་གཙུག་ལག་ཁང་དུ་གཤེགས་ཏེ་བྱོན་ནས། དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ་འཐུང་ན་ལྟུང་བྱེད་དོ། །འབྲུའི་
ཆང་ཞེས་བྱ་བ་ནི་ཆན་གྱི་བཏུང་བ་དང་། ཕྱེའི་བཏུང་བ་དང་། ཕབས་ཀྱི་བཏུང་བའོ། །བཅོས་པའི་ཆང་ཞེས་བྱ་བ་ནི་རྩ་བའི་བཏུང་བ་དང་། སྡོང་བུའི་བཏུང་བ་དང་། འདབ་མའི་བཏུང་བ་དང་། མེ་ཏོག་གི་བཏུང་བ་དང་། འབྲས་བུའི་བཏུང་བའོ། །དེ་གཉི་ག་བསྲེས་པ་ནི་འབྲུའི་ཆང་དང་བཅོས་པའི་ཆང་ཞེས་བྱ་བའོ། །དེ་འཐུང་ན་ཞེས་བྱ་བ་ནི་མགུལ་དུ་མིད་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མྱོས་པར་འགྱུར་བའི་ཁ་དོག་དང་ལྡན་པ་དང་། མྱོས་པར་འགྱུར་བའི་དྲི་དང་ལྡན་པ་དང་། མྱོས་པར་འགྱུར་བའི་རོ་དང་ལྡན་པ་དང་། མྱོས་པར་འགྱུར་བའི་མྱང་བ་དང་ལྡན་པ་འཐུང་ན། འཐུངས་ནས་མྱོས་པར་འགྱུར་ན་ལྟུང་བྱེད་དུ་འགྱུར་ལ། འཐུངས་ནས་མྱོས་པར་མི་འགྱུར་ན་ཉེས་བྱས་སུ་འགྱུར་རོ། །དགེ་སློང་མྱོས་པར་འགྱུར་བའི་ཁ་དོག་དང་ལྡན་པ་དང་། མྱོས་པར་འགྱུར་བའི་དྲི་དང་ལྡན་པ་དང་། མྱོས་པར་འགྱུར་བའི་རོ་དང་ལྡན་པ་འཐུང་ན། འཐུངས་ནས་མྱོས་པར་འགྱུར་ན་ལྟུང་བྱེད་དུ་འགྱུར་ལ། འཐུངས་ནས་མྱོས་པར་མི་འགྱུར་ན་ཉེས་བྱས་སུ་འགྱུར་རོ། །དགེ་སློང་མྱོས་པར་འགྱུར་བའི་ཁ་དོག་དང་ལྡན་པ་དང་། མྱོས་པར་འགྱུར་བའི་དྲི་དང་ལྡན་པ་འཐུང་ན། འཐུངས་ནས་མྱོས་པར་འགྱུར་ན་ལྟུང་བྱེད་དུ་འགྱུར་ལ། འཐུངས་ནས་མྱོས་པར་མི་འགྱུར་ན་ཉེས་བྱས་སུ་འགྱུར་རོ། །མྱོས་པར་འགྱུར་བའི་ཁ་དོག་འབའ་ཞིག་མ་འདྲེས་པ་དང་ལྡན་པ་འཐུང་བ་ལ་ནི་ལྟུང་བ་མེད་དེ་དེ་ཡང་ཚྭ་ཉིད་དུ་གྱུར་པའོ། །དགེ་སློང་འབྲུའི་ཆང་འཐུང་ན་ལྟུང་བྱེད་དུ་འགྱུར་རོ། །བཅོས་པའི་ཆང་འཐུང་ན་ལྟུང་བྱེད་དུ་འགྱུར་རོ། །འབྲུའི་ཆང་དང་བཅོས་པའི་ཆང་འཐུང་ན་ལྟུང་བྱེད་དུ་འགྱུར་རོ། །དགེ་སློང་འབྲུའི་ཆང་གི་ནུ་རྩི་འཐུང་ན་ལྟུང་བྱེད་དུ་འགྱུར་རོ། །དགེ་སློང་སྦང་མ་ཟ་ན་ལྟུང་བྱེད་དུ་འགྱུར་རོ། །
དགེ་སློང་ཚིགས་མ་ཟ་ན་ལྟུང་བྱེད་དུ་འགྱུར་རོ། །དགེ་སློང་ཕབས་ཀྱི་ཆང་བུ་ཟ་ན་ཉེས་བྱས་སུ་འགྱུར་རོ། །དགེ་སློང་མེ་ཏོག་དང་འབྲས་བུ་མྱོས་པར་འགྱུར་བ་དག་ཟ་ན་ཉེས་བྱས་སུ་འགྱུར་རོ། །བསྐོལ་བ་འཐུང་བ་དང་། ཁའི་ནད་ཡོད་པ་ལ་སྨན་པའི་ལུང་གིས་ཁུར་བར་སྲེལ་བ་དང་། ལུས་དག་སྐུད་པ་ལ་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ལེགས་འོངས་ཀྱིས་ལས་ཅི་བགྱིས་ན་ལས་དེའི་རྣམ་པར་སྨིན་པས་ཕྱུག་པ། ནོར་མང་ལ་ལོངས་སྤྱོད་ཆེ་བའི་ཁྱིམ་དུ་སྐྱེས། ལས་ཅི་བགྱིས་ན་ལས་དེའི་རྣམ་པར་སྨིན་པས་མུ་ལྟོ་བ་རྣམས་ཀྱི་ནང་དུ་ཞུགས་ཤིང་། ཉེས་འོངས་ཞེས་བགྱི་བའི་མིང་དུ་གྱུར། ལས་ཅི་བགྱིས་ན་ལས་དེའི་རྣམ་པར་སྨིན་པས་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བགྱིས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རིགས་ཀྱི་བུ་ལེགས་འོངས་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་ལེགས་འོངས་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་འདས་པའི་དུས་ན་རི་བྲགས་ཤིག་ན་ཁྱིམ་བདག་ཕྱུག་པ། ནོར་མང་
བ། ལོངས་སྤྱོད་ཆེ་བ་ཞིག་འདུག་པ་དེ་འཁོར་དང་བཅས་ཏེ་སྐྱེད་མོས་ཚལ་གྱི་སར་བྱུང་ངོ་། །སངས་རྒྱས་རྣམས་འབྱུང་བ་མེད་པའི་ཚེ་རང་སངས་རྒྱས་དམན་པ་དང་། བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ་། །རང་སངས་རྒྱས་ན་བ་ཞིག་རི་བྲགས་དེར་བསོད་སྙོམས་ལ་ཞུགས་པ་དང་། ཁྱིམ་བདག་དེས་རང་སངས་རྒྱས་དེ་ཐག་རིང་པོ་ཁོ་ན་ནས་མཐོང་ནས། དེས་ཞོ་ཤས་འཚོ་བ་རྣམས་ལ་བསྒོ་བ། ཤེས་ལྡན་དག་རབ་ཏུ་བྱུང་བ་འདི་སྐྲོད་ཅིག །དེ་དག་ལས་འགའ་ཡང་རང་སངས་རྒྱས་དེ་སྐྲོད་པར་སྤྲོ་བ་མེད་ནས། ཁྱིམ་བདག་དེས་སྤྱོས་ཏེ་སྟན་ལས་ལངས་ནས་རང་ཉིད་ཀྱིས་རང་སངས་རྒྱས་དེའི་གཉའ་བ་ནས་བཟུང་སྟེ་བསྐྲད་ནས་སྨྲས་པ། ཉེས་འོངས་མུ་ལྟོ་བ་རྣམས་ཀྱི་ནང་དུ་ཞུགས་ཤིག་ཅེས་ཕུལ་བ་དང་། དེ་ཕྱག་དར་གྱི་ཕུང་པོའི་ནང་དུ་སྒྱེལ་ཏོ། །རང་སངས་རྒྱས་བདག་ཉིད་ཆེན་པོ་དེས་བསམས་པ། ཁྱིམ་བདག་ཉོན་མོངས་པ་འདི་ཧ་ཅང་སྨས་པ་དང་། ཉམས་པར་གྱུར་ན་མི་རུང་གིས་འདི་ལ་ལག་ནས་དྲང་བ་སྦྱིན་ནོ་སྙམ་ནས། དེས་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས་ཁྱིམ་བདག་དེ་ཤིང་ལྗོན་པ་རྩ་བ་ནས་བཅད་པ་བཞིན་དུ་རང་སངས་རྒྱས་དེའི་རྐང་པ་གཉིས་ཀྱི་དྲུང་དུ་འགྱེལ་ནས་སྨྲས་པ། ཡོན་གནས་ཡང་དག་པར་གྱུར་པ་མར་གཤེགས་སུ་གསོལ། མར་གཤེགས་སུ་གསོལ། ཉོན་མོངས་པའི་འདམ་དུ་བྱིང་བ་བདག་གི་སུག་པ་ནས་དྲང་བ་སྩལ་དུ་གསོལ། རང་སངས་རྒྱས་དེ་ཁྱིམ་བདག་དེ་ལ་རྗེས་སུ་སྙིང་བརྩེ་བའི་ཕྱིར་སྟེང་གི་ནམ་མཁའ་ལས་ཤོད་དུ་བབས་སོ། །ཁྱིམ་བདག་དེས་དེ་ལ་མཆོད་པ་བྱས་ནས་རྐང་པ་གཉིས་ལ་མགོ་བོས་ཕྱག་འཚལ་ཏེ། སྨོན་ལམ་འདི་སྐད་ཅེས། བདག་ཡོན་གནས་ཡང་དག་པར་གྱུར་པ་འདི་ལྟ་བུ་ལ་གནོད་པ་བྱས་པ་གང་ཡིན་པའི་
ལས་དེའི་ཆ་དང་མཐུན་པར་མི་འགྱུར་བར་མཆོད་པ་བྱས་པ་གང་ཡིན་པའི་དགེ་བའི་རྩ་བ་འདིས་བདག་ཕྱུག་པ། ནོར་མང་བ། ལོངས་སྤྱོད་ཆེ་བའི་ཁྱིམ་དུ་སྐྱེ་ཞིང་། འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཅིང་ཐུགས་བྱུང་བར་མི་བྱེད་པའི་ཡོན་ཏན་གྱི་རྣམ་པ་དེ་ལྟ་བུ་ཐོབ་པར་གྱུར་ཅིག་ཅེས་སྨོན་ལམ་བཏབ་བོ། །དགེ་སློང་དག་དེ་ལ་དེའི་ཚེ་དེའི་དུས་ན་ཁྱིམ་བདག་གང་ཡིན་པ་དེ་ནི་ལེགས་འོངས་འདི་ཡིན་ཏེ། འདིས་རང་སངས་རྒྱས་དེ་ལ་མཆོད་པ་བྱས་ནས་སྨོན་ལམ་བཏབ་པ་གང་ཡིན་པའི་ལས་དེའི་རྣམ་པར་སྨིན་པས་ནི་ད་ལྟར་ཕྱུག་ལ་ནོར་མང་བ། ལོངས་སྤྱོད་ཆེ་བའི་ཁྱིམ་དུ་སྐྱེས་སོ། །གནོད་པ་བྱས་པ་དང་ཉེས་འོངས་ཞེས་བརྗོད་པ་གང་ཡིན་པའི་ལས་དེའི་རྣམ་པར་སྨིན་པས་ནི་བསྐལ་པར་སེམས་ཅན་དམྱལ་བ་ཆེན་པོ་མནར་མེད་པར་གདུངས་ནས་ལས་དེ་ཉིད་ཀྱི་ལྷག་མས་ཚེ་རབས་ལྔ་བརྒྱར་མུ་ལྟོ་བ་ཉིད་ཀྱིས་འཕྱན་པར་གྱུར་ཅིང་ཉེས་འོངས་ཞེས་བྱ་བར་གྱུར་ཏེ། ད་ལྟར་གྱི་བར་དུ་ཡང་མུ་ལྟོ་བ་རྣམས་ཀྱི་ནང་དུ་ཞུགས་ཤིང་། ཉེས་འོངས་ཞེས་བྱ་བའི་མིང་དུ་གྱུར་ཏོ། །བདག་ཡོན་གནས་ཡང་དག་པར་གྱུར་པ་འདི་ལྟ་བུ་ལ་གནོད་པ་བྱས་པ་གང་ཡིན་པའི་ལས་དེའི་ཆ་དང་མཐུན་པར་མི་འགྱུར་བར་འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཅིང་། ཐུགས་བྱུང་བར་མི་བྱེད་པའི་ཡོན་ཏན་གྱི་རྣམ་པ་དེ་ལྟ་བུ་ཐོབ་པར་གྱུར་ཅིག་ཅེས་སྨོན་ལམ་བཏབ་པ་གང་ཡིན་པའི་ལས་དེའི་རྣམ་པར་སྨིན་པས་ནི་ངའི་བསྟན་པ་ལ་རབ་ཏུ་བྱུང་ནས། ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱས་ཤིང་། འདིས་རང་སངས་རྒྱས་བྱེ་བ་ཕྲག་འབུམ་བས་ཆེས་ཁྱད་པར་དུ་འཕགས་པའི་སྟོན་པ་ང་མཉེས་པར་བྱས་ཤིང་ཐུགས་བྱུང་བར་མ་བྱས་སོ། །བཙུན་པ་ཚེ་དང་ལྡན་པ་ལེགས་འོངས་ཀྱིས་ལས་ཅི་བགྱིས་ན། ལས་དེའི་རྣམ་པར་སྨིན་པས་བཅོམ་ལྡན་འདས་ཀྱིས་ཡང་དང་ཡང་དུ་མེའི་ཁམས་ལ་སྙོམས་པར་འཇུག་པ་རྣམས་ཀྱི་མཆོག་ཏུ་བསྟན། དེ་ཡང་སྨོན་ལམ་གྱི་དབང་གིས་ཏེ། གང་དུ་སྨོན་ལམ་བཏབ་ཅེ་ན། དགེ་སློང་དག་སྔོན་བྱུང་བ་འདས་པའི་དུས་ན་བསྐལ་པ་ཆེན་པོ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་
སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འོད་སྲུང་འཇིག་རྟེན་དུ་བྱུང་སྟེ། དེ་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་བརྟེན་ཅིང་བཞུགས་སོ། །དེའི་བསྟན་པ་ལ་འདི་རབ་ཏུ་བྱུང་ནས་དགེ་སློང་གང་གིས་དེ་རབ་ཏུ་ཕྱུང་བའི་དགེ་སློང་དེ་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་ཡང་དང་ཡང་དུ་མེའི་ཁམས་ལ་སྙོམས་པར་འཇུག་པ་རྣམས་ཀྱི་མཆོག་ཏུ་བསྟན་ཏོ། །དེ་ན་འདིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་ནས། དེའི་འོག་ཏུ་འཆི་བའི་ཚེ་སྨོན་ལམ་འདི་སྐད་ཅེས། བདག་གིས་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཡོན་གནས་བླ་ན་མེད་པ་འོད་སྲུང་ལ་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་སྟེ། བདག་གིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་པའི་དགེ་བའི་རྩ་བ་འདིས་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་སྐྱེ་དགུའི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པའི་བསྟན་པ་ལ་བདག་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱེད་ཅིང་། ཇི་ལྟར་མཁན་པོ་འདི་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་ཡང་དང་ཡང་དུ་མེའི་ཁམས་ལ་སྙོམས་པར་འཇུག་པ་རྣམས་ཀྱི་མཆོག་ཏུ་བསྟན་པ་དེ་བཞིན་དུ། བདག་ཀྱང་བཅོམ་ལྡན་འདས་ཤཱཀྱ་
ཐུབ་པ། ཤཱཀྱའི་སེང་གེ། ཤཱཀྱའི་རྒྱལ་པོའི་གཙོ་བོ་དེས་ཡང་དང་ཡང་དུ་མེའི་ཁམས་ལ་སྙོམས་པར་འཇུག་པ་རྣམས་ཀྱི་མཆོག་ཏུ་བསྟན་པར་གྱུར་ཅིག་ཅེས་སྨོན་ལམ་གདབ་པར་བརྩམས་པས་སྨོན་ལམ་དེའི་དབང་གིས་ད་ལྟར་དེ་བཞིན་གཤེགས་པས་ཡང་དང་ཡང་དུ་མེའི་ཁམས་ལ་སྙོམས་པར་འཇུག་པ་རྣམས་ཀྱི་མཆོག་ཏུ་བསྟན་ཏོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་སྤངས་ཏེ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །མྱོས་པར་འགྱུར་བ་འཐུང་བའི་ལྟུང་བྱེད་དེ་བདུན་བཅུ་རྩ་དགུ་པ་རྫོགས་སྷོ།། །།བར་སྡོམ་ལ། ཞི་བ་རལ་པ་ནོར་བུ་དང་། །སྨན་པ་དགེ་འདུན་ལྟོ་དང་སྐས། །ཟ་དང་ཉེས་གྱུར་གཏུམ་མོ་དང་། །གཞོན་ནུ་ལྷུང་བཟེད་སྟོབས་རྣམས་སོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །རི་བྲགས་ཤིག་ན་བྲམ་ཟེ་ཞིག་འདུག་པ་དེས་མཉན་ཡོད་པའི་བུ་མོ་ཞིག་བག་མར་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ལ་བུ་མོ་ཞིག་བྱུང་ནས་དེ་བསྲིངས་ཤིང་བསྐྱེད་དེ་ཆེན་མོར་གྱུར་ཏོ། །བྲམ་ཟེ་དེ་ལ་རེ་ཞིག་མཉན་ཡོད་དུ་བྱ་བ་ཞིག་བྱུང་ནས་དེས་ཤིང་རྟ་བཅས་ཏེ་འཕགས་པ་དང་། བུ་མོ་དེས་མཐོང་ནས་དེས་སྨྲས་པ། ཡབ་གར་བཞུད། བྲམ་ཟེས་སྨྲས་པ། བུ་མོ་མཉན་ཡོད་དུའོ། །བུ་མོས་སྨྲས་པ། ཡབ་བདག་ཀྱང་མཆིའོ། །བྲམ་ཟེས་སྨྲས་པ། བུ་མོ་ཁྱོད་ད་མཆོག་ཐོབ་པ་ཡིན་པས་ཁྱོད་ཀྱི་ལག་པའམ་རྐང་པ་ལ་འགའ་ཞིག་གིས་རེག་པར་གྱུར་ན། བདག་ཅག་ལ་མི་སྙན་པར་འགྱུར་གྱིས་ཁྱོད་འདི་ཉིད་ན་འདུག་ཤིག། བུ་མོ་དེས་ངུ་བར་བརྩམས་པ་དང་། བྲམ་ཟེ་མོས་སྨྲས་པ། བུ་མོ་ཅིའི་ཕྱིར་ངུ་། བུ་མོས་སྨྲས་པ། ཡབ་
མཉན་ཡོད་དུ་བཞུད་ན། བདག་དེར་ཁྲིད་པར་མི་བཞེད་དོ། །བྲམ་ཟེ་མོས་སྨྲས་པ། རྗེའི་སྲས་བུ་མོ་ཡང་ཁྲིད་ཅིག་དང་ཉེ་དུ་དག་མཐོང་བར་འགྱུར་རོ། །བྲམ་ཟེས་སྨྲས་པ། བུ་མོ་ད་མཆོག་ཐོབ་པར་འགྱུར་བས་འདིའི་ལག་པའམ། རྐང་པ་ལ་འགའ་ཞིག་གིས་རེག་པར་གྱུར་ན་བདག་ཅག་ལ་མི་སྙན་པར་འགྱུར་གྱིས་འདི་ཉིད་དུ་ཞོག་ཤིག །བྲམ་ཟེ་མོས་སྨྲས་པ། རྗེའི་སྲས་དང་ཐབས་ཅིག་མཆིས་ན་ལེགས་པར་སྦས་པ་དང་། ལེགས་པར་བསྲུངས་པར་འགྱུར་རོ། །བྲམ་ཟེ་དེས་བུ་མོ་དེ་ཤིང་རྟར་བཅུག་སྟེ་འཕགས་པ་དང་། བུ་མོ་དེ་ལྟད་མོའི་རང་བཞིན་ཅན་ཡིན་པས་ཕ་ལ་དྲིས་པ། ཡབ་འདི་སུའི་ཀུན་དགའ་ར་བ་ལགས། འདི་སུའི་རྫིང་བུ་ལགས། འདི་སུའི་ལྷ་ཁང་ལགས། འདི་སུའི་སྐྱེད་མོས་ཚལ་ལགས། འདི་སུའི་ཁྲོན་པ་ལགས། འདི་སུའི་གཙུག་ལག་ཁང་ལགས། བྲམ་ཟེས་སྨྲས་པ། བུ་མོ་འདི་ནི་ཤཱཀྱའི་བུའི་དགེ་སྦྱོང་རྣམས་ཀྱི་བསྟི་གནས་ཡིན་ནོ། །བུ་མོས་སྨྲས་པ། ཡབ་ལྟར་མཆིའོ། །བྲམ་ཟེས་སྨྲས་པ། བུ་མོ་བསྟི་གནས་འདི་ན་རིགས་སྣ་ཚོགས་དང་། རུས་སྣ་ཚོགས་ལས་རབ་ཏུ་བྱུང་བ་དག་འཁོད་པས་ཁྱོད་ཀྱི་ལག་པའམ་རྐང་པ་ལ་འགའ་ཞིག་གིས་རེག་པར་གྱུར་ན་བདག་ཅག་ལ་མི་སྙན་པར་འགྱུར་གྱིས། ཚུར་ཤོག་འདོང་ངོ་ཞེས་དེ་འཕགས་པ་དང་། ཇི་ཙམ་ན་གྲོང་བར་དེ་ཉིད་ནས་བྲམ་ཟེ་དང་ཁྱིམ་བདག་གི་ཆུང་མ་རབ་ཏུ་མང་པོ་གཙུག་ལག་ཁང་ལྟ་འདོད་པ་དག་མཉན་ཡོད་ཀྱི་ཕྱི་རོལ་དུ་བྱུང་བ་དེ་དག་གིས་བྲམ་ཟེ་དེ་མཐོང་ནས་དེ་དག་གིས་སྨྲས་པ། སྣམ་ཟུངས་བྱོན་པ་ལེགས་སོ། །བྱོན་པ་ལེགས་སོ། །ཁྱོད་ཡུན་རིང་མོ་རིང་མོ་ཞིག་གིས་གར་བཞུད། བྲམ་ཟེས་སྨྲས་པ། ཁོ་བོ་ཁྱོད་ཅག་ཉིད་ལྟར་འོངས་ན་ཁྱོད་ཅག་གར་འདོང་། རྒྱལ་བྱེད་ཀྱི་ཚལ་དུ་གཙུག་ལག་ཁང་ལྟར་མཆིའོ། །སྲུ་ཅག་ཚ་མོ་འདི་ཡང་ཁྲིད་དེ་དེང་ལ། འདི་ལ་ཡང་གཙུག་ལག་ཁང་སྟོན་ཅིག །བུ་མོ་དེ་ཡང་དེ་དག་དང་ལྷན་ཅིག་རྒྱལ་བྱེད་ཀྱི་ཚལ་དུ་སོང་ངོ་། །དྲུག་སྡེ་དག་གི་ཀུན་དུ་སྤྱོད་པ་ནི་འདིར་བདག་ཅག་གིས་བྲམ་ཟེ་དང་ཁྱིམ་བདག་འོངས་ཤིང་ལྷགས་པ་རྣམས་ལ་ཡང་ཆོས་བསྟན་པར་བྱ། རྒོལ་བ་
དག་ཀྱང་ཚར་གཅད་པར་བྱ། རང་གི་གྲགས་པ་ཡང་བསྒྲགས་པར་བྱའོ་སྙམ་པས་དྲུག་སྡེ་དག་ལས་གང་ཡང་རུང་བས་རྒྱལ་བྱེད་ཀྱི་ཚལ་གྱི་སྒོ་སྟོང་པར་མི་འཇོག་པས། ཚེ་དང་ལྡན་པ་འཆར་ཀ་ནང་པར་སྔར་ལངས་ཏེ་སོ་ཤིང་བོར་ནས་སྣམ་སྦྱར་དམར་སེར་གྱོན་ཏེ། རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིང་འདུག་གོ །དྲུག་སྡེ་དག་གིས་གྲོང་ཁྱེར་ཆེན་པོ་དྲུག་པོ་དག་ན་འཁོད་པའི་མི་རྣམས་འདི་ལྟ་སྟེ། རིགས་ལས་སམ། རུས་ལས་སམ། རྒྱུད་ལས་སམ། མིང་ལས་སམ། གཟུགས་ལས་སམ། བཟོ་ལས་སམ། འཚོ་བ་ལས་མི་ཤེས་པའམ། མ་མཐོང་བའམ། མ་ཐོས་པའམ། མ་རིག་པའམ། རྣམ་པར་མི་ཤེས་པ་འགའ་ཡང་མེད་པས་ཚེ་དང་ལྡན་པ་འཆར་ཀས་བྲམ་ཟེ་དང་ཁྱིམ་བདག་གི་ཆུང་མ་རབ་ཏུ་མང་པོ་དེ་དག་ཐག་རིང་པོ་ཁོ་ན་ནས་མཐོང་སྟེ། མཐོང་ནས་ཀྱང་འདི་སྐད་ཅེས་སྨྲས་སོ། །ཆེ་གེ་མོའི་མ། ཆེ་གེ་མོའི་ཆུང་མ། ཆེ་གེ་མོའི་མནའ་མ། ཆེ་གེ་མོའི་བུ་མོ། ཆེ་གེ་མོའི་སྲིང་མོ་འོངས་པ་ལེགས་སོ། །འོངས་པ་ལེགས་སོ། །ཁྱེད་ཅག་ཅིའི་ཕྱིར་ཡུན་རིང་མོ་རིང་མོ་ནས་ཟླ་བ་ལྟར་རྒྱུ་བར་བྱེད། དེ་དག་གིས་སྨྲས་པ། བཙུན་པ་འཆར་ཀ་བཅོམ་ལྡན་འདས་ཀྱིས་མི་ཁོམ་པ་བརྒྱད་ནི་གང་ཟག་གི་ཚངས་པར་སྤྱད་པའི་དུས་མ་ལགས་སོ་ཞེས་ལེགས་པར་གསུངས་ན། བདག་ཅག་ནི་འདི་ལྟ་སྟེ། ཁྱིམ་གྱི་འདུ་འཛི་དང་ལྡན་པས་མི་ཁོམ་པ་དགུ་པ་ལགས་སོ། །འཆར་ཀས་སྨྲས་པ། སྲིང་མོ་དག་ཁྱེད་ཀྱིས་འགའ་ཞིག་གིས་འདི་སྐད་ཅེས། དུག་ཅན་ལ་སོགས་རྒྱལ་པོ་ཡིས། །བྱ་བ་དག་ནི་མ་བྱས་པར། །དེ་དག་ཉིད་དང་བྱ་བ་རྣམས། །ཞིག་པ་ཉིད་དུ་གྱུར་པ་ཡིན། །བྱ་བ་དེ་དག་ཉིད་ཀྱང་ནི། །ཡོངས་སུ་རྫོགས་པར་མ་གྱུར་པར། །འཇིག་རྟེན་དགྲ་བོ་འཆི་བདག་དེ། །འོང་བ་ཉིད་དུ་འགྱུར་བ་ཡིན། །ཞེས་སྨྲས་པ་མ་ཐོས་སམ། དེ་དག་གིས་སྨྲས་པ། བཙུན་པ་འཆར་ཀ་དེའི་སླད་དུ་བདག་ཅག་སྐྱེད་མོས་ཚལ་དུ་མཆིས་ཏེ་རྒྱལ་བྱེད་ཀྱི་ཚལ་དུ་འཇུག་པ་དང་། གཙུག་ལག་ཁང་བལྟ་བ་དང་། བཅོམ་ལྡན་འདས་དང་དགེ་སློང་གནས་བརྟན་གནས་བརྟན་རྣམས་ཀྱི་ཞབས་ལ་ཕྱག་འཚལ་བའི་སླད་དུ་མཆིས་པ་ལགས་སོ། །
འཆར་ཀས་སྨྲས་པ། སྲིང་མོ་དག་གལ་ཏེ་ཁྱེད་ཅག་དེའི་ཕྱིར་འོངས་ན། བཅོམ་ལྡན་འདས་ཀྱིས་ཀྱང་སྙིང་པོ་མེད་པའི་ལུས་ལས་སྙིང་པོ་བླང་བར་བྱའོ་ཞེས་གསུངས་པས་ལེགས་སོ་ལེགས་སོ། །སྲིང་མོ་དག་དེ་ནི་མཇལ་གྱིས་འདི་ལྟར་ལྟད་མོ་ཇི་ལྟར་བལྟ་བ་དྲི་བར་བྱའོ། །སྲིང་མོ་དག་ཁྱེད་ཅག་གང་དུ་འཇུག་པར་བྱེད། བཙུན་པ་འཆར་ཀ་བདག་ཅག་ཀུན་དགའི་ར་བར་འཇུག་ཅིང་གཙུག་ལག་ཁང་བལྟ་བར་འཚལ་ལོ། །སྲིང་མོ་དག་བཅོམ་ལྡན་འདས་ཀྱིས། མཁས་པ་གང་ཞིག་རབ་ཏུ་སེམས་དད་པས། །སངས་རྒྱས་མཆོད་རྟེན་དག་ལ་གོམ་འདོར་ན། །འཛམ་བུ་ཆུ་བོ་གསེར་གྱི་སྲང་ཚད་ནི། །སྟོང་ཕྲག་བརྒྱ་ཡང་དེ་དང་མཉམ་པ་མིན། །ཞེས་གསུངས་པས་དེ་ཡང་ལེགས་སོ། །སྲིང་མོ་དག་ཁྱེད་ཀྱིས་གང་ཁྱེད་ཅག་ལ་གཙུག་ལག་ཁང་སྟོན་པར་བྱེད་པའི་དགེ་སློང་འགའ་ཞིག་བཙལ་ཏམ། འཕགས་པ་ཅི་བདག་ཅག་སྒྲོན་མ་སུག་པ་ན་ཐོགས་བཞིན་དུ་ཞུགས་གཞན་དུ་འཚོལ་ལམ། བཙུན་པ་འཆར་ཀ་སྤངས་ཏེ་དགེ་སློང་གཞན་ག་ལ་ཚོལ། ཁྱོད་པས་གཞན་ཁྱད་པར་དུ་འཕགས་པ་སུ་ཞིག་མཆིས་ཀྱིས་ཁྱོད་ཉིད་ཀྱིས་བསྟན་དུ་གསོལ། དེ་ནས་ཚེ་དང་ལྡན་པ་འཆར་ཀ་འདི་སྙམ་དུ་སེམས་ཏེ། གལ་ཏེ་འདི་དག་གཙུག་ལག་ཁང་བསྟན་པར་བྱ་ན་ནི་བདག་གི་དགེ་བའི་ཕྱོགས་ཡོངས་སུ་ཉམས་པར་ཡང་འགྱུར། གལ་ཏེ་བསྟན་པར་མི་བྱ་ན་ནི་ཚིག་པའི་བསོད་སྙོམས་ཀྱང་སྟེར་བར་མི་འགྱུར་ལ། བཅོམ་ལྡན་འདས་ཀྱིས་ཀྱང་མ་དད་པ་རྣམས་དད་པ་ཕུན་སུམ་ཚོགས་པ་ཡང་དག་པར་འཛིན་དུ་གཞུག་པར་བྱ། གདུལ་བར་བྱ། གཟུང་བར་བྱ། རབ་ཏུ་དགོད་པར་བྱའོ་ཞེས་གསུངས་པས། དེའི་ཕྱིར་འདི་དག་དགེ་བ་ལ་ངེས་པར་སྦྱར་བར་བྱས། རྣམ་པ་ཐམས་ཅད་དུ་བསྟན་པར་བྱའོ་སྙམ་དུ་རིག་ནས་དེས་མེ་ཏོག་དང་། བདུག་སྤོས་ལ་སོགས་པ་མཆོད་པ་སྣ་ཚོགས་ཐོགས་ཏེ་པོག་ཕོར་ལག་ཏུ་བླངས་ནས་གོ་རིམས་ཇི་ལྟ་བ་བཞིན་དུ་བསྟན་པར་བརྩམས་ཏེ། སྲིང་མོ་དག་འདི་ནི་བཅོམ་ལྡན་འདས་ཀྱི་དྲི་གཙང་ཁང་སྟེ། གང་དུ་བཅོམ་ལྡན་འདས་ཉིན་ལན་གསུམ་མཚན་ལན་གསུམ་སངས་རྒྱས་ཀྱི་སྤྱན་གྱིས་འཇིག་རྟེན་ལ་རྣམ་པར་གཟིགས་ནས་གང་ནི་
ཉམས་པར་གྱུར། གང་ནི་འཕེལ་བར་གྱུར། གང་ནི་གནོད་པར་གྱུར། གང་ནི་ཉམ་ང་བར་གྱུར། གང་ནི་མི་བདེ་བར་གྱུར། གང་ནི་གནོད་པ་དང་ཉམ་ང་བ་དང་མི་བདེ་བར་གྱུར། གང་ནི་ངན་སོང་ལ་གཞོལ། གང་ནི་ངན་སོང་ལ་འབབ། གང་ནི་ངན་སོང་ལ་བབ། གང་ནི་ངན་སོང་གི་འདམ་ནས་བསླང་སྟེ་མཐོ་རིས་དང་། ཐར་པ་དང་འབྲས་བུ་ལ་གཞག་པར་བྱ། འདོད་པའི་འདམ་དུ་བྱིང་བ་གང་གི་ལག་ནས་ནི་དྲང་བར་བྱ། འཕགས་པའི་ནོར་གྱི་དབྱིག་དང་བྲལ་བ་གང་ནི་འཕགས་པའི་ནོར་གྱི་དབང་ཕྱུག་ལ་གཞག་པར་བྱ། གང་གི་སངས་རྒྱས་འབྱུང་བས་བརྒྱན་པའི་འཇིག་རྟེན་ནི་འབྲས་བུ་དང་བཅས་པར་བྱ། གང་གི་དགེ་བའི་རྩ་བ་དག་མ་བསྐྱེད་པ་ནི་བསྐྱེད་པར་བྱ། དགེ་བའི་རྩ་བ་དག་བསྐྱེད་པ་གང་ནི་ཡོངས་སུ་སྨིན་པར་བྱ། ཡོངས་སུ་སྨིན་པ་གང་ནི་རྣམ་པར་གྲོལ་བར་བྱ་ཞེས་མཁྱེན་པ་དང་གཟིགས་པ་འཇུག་ཅིང་འདི་ལྟར། ཆུ་སྲིན་གནས་ཀྱི་དུག་ཅན་པ། །དུས་ལས་འདའ་བར་འགྱུར་སྲིད་ཀྱི། །སངས་རྒྱས་གདུལ་ལ་བྱམས་པ་ནི། །དུས་ལས་འདའ་བར་མི་འགྱུར་རོ། །ཇི་ལྟར་མ་ནི་བུ་སྡུག་གཅིག་པུ་ལ། །རྟོག་ཅིང་དེ་སྲོག་སྲུང་བར་བྱེད་པ་ལྟར། །དེ་བཞིན་གཤེགས་པའང་གདུལ་བའི་སྐྱེ་བོ་ལ། །རྟོག་པར་མཛད་ཅིང་དེ་སྲོག་སྲུང་བར་མཛད། །ཀུན་མཁྱེན་རྒྱུད་ལ་མངའ་བའི་ཐུགས་རྗེ་ཡི། །བཞོན་མ་གདུལ་བའི་བེའུ་ཚོལ་མི་སྐྱོ་སྟེ། །སྲིད་དང་ངན་འགྲོས་ཉམས་ལ་བྱམས་པ་ནི། །རབ་ཉམས་བེའུ་ལ་བྱམས་པའི་བ་བཞིན་ནོ། །ཞེས་བྱ་བ་འཇུག་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོབས་བཅུའི་སྟོབས་དང་ལྡན་པ། མི་འཇིགས་པ་བཞིས་བསྙེངས་པ་མི་མངའ་བ། ཁྱུ་མཆོག་རླབས་པོ་ཆེའི་གནས་སུ་དམ་འཆའ་བ། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོག་པ་གང་ཡིན་པ་དེའི་ཡིན་གྱིས་འདིའི་ཞབས་ལ་ཕྱག་དག་འཚོལ་ཅིག །འདི་ནི་ཚེ་དང་ལྡན་པ་ཀུན་ཤེས་ཀཽཎྜི་ནྱའི་གཙུག་ལག་ཁང་སྟེ། བཅོམ་ལྡན་འདས་ཀྱིས་འཇིག་རྟེན་མི་ཤེས་པའི་མུན་པ་དང་། འདྲེན་པ་མེད་པ་དང་། ཡོངས་སུ་འདྲེན་པ་མེད་པ་ན་དེའི་དང་པོར་ཡེ་ཤེས་
ཀྱི་མིག་སྨན་གྱི་ཐུར་མས་གང་གི་ཆོས་ཀྱི་མིག་རྣམ་པར་སྦྱངས་པ་བཅོམ་ལྡན་འདས་ཀྱིས་གནས་བརྟན་རྣམས་དང་། རྒྱལ་ཚབ་ལྟ་བུ་རྣམས་དང་། ཡུན་རིང་པོ་ནས་རབ་ཏུ་བྱུང་བ་རྣམས་དང་། ཚངས་པར་སྤྱོད་པ་མངོན་པར་སྤྱོད་པ་རྣམས་དང་། སྣམ་སྦྱར་གྱི་རྒྱལ་མཚན་ཐོགས་པ་རྣམས་ཀྱི་མཆོག་ཏུ་ལུང་བསྟན་པ་གང་ཡིན་པ་གང་གི་རྒྱུད་ལ་དེའི་དང་པོར་བཅོམ་ལྡན་འདས་ཀྱིས་འཇིག་རྟེན་དུ་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་མཐུན་པར་བསྐོར་མི་ནུས་པ་ཆོས་དང་ལྡན་པའི་ཆོས་ཀྱི་འཁོར་ལོ་སྐྱེ་བོ་མང་པོའི་དོན་དང་། སྐྱེ་བོ་མང་པོ་ལ་ཕན་པ་དང་། བདེ་བ་དང་། འཇིག་རྟེན་ལ་རྗེས་སུ་ཐུགས་བརྩེ་བ་དང་། ལྷ་དང་མི་རྣམས་ཀྱི་དོན་དང་། ཕན་པ་དང་བདེ་བའི་ཕྱིར་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་བསྐོར་བ་དེའི་ཡིན་གྱིས། འདིར་ཡང་ཞབས་ལ་ཕྱག་དག་འཚོལ་ཅིག །འདི་ནི་ཚེ་དང་ལྡན་པ་འོད་སྲུང་ཆེན་པོའི་གཙུག་ལག་ཁང་སྟེ། བྲམ་ཟེ་ཤིང་སཱ་ལ་ཆེན་པོ་ལྟ་བུ་རྨོན་པ་དོར་སྟོང་དུ་གཅིག་གིས་མ་ཆོག་པ་སྤངས་ཏེ་རབ་ཏུ་བྱུང་བ། དབྱིག་བྱེ་བ་ཕྲག་དྲུག་བཅུ་དང་ལྡན་པ། གསེར་གྱི་ནས་བང་ཆུང་བརྒྱད་བཅུ་བདོག་པ། བྲན་གྱི་གྲོང་བཅྭ་བརྒྱད་བདོག་པ། སྦྱོར་བའི་གྲོང་བཅུ་དྲུག་བདོག་པ། སེར་སྐྱ་བཟང་མོ་ལུས་གསེར་བས་ལྷག་པ་དང་ལྡན་པ་མཆིལ་མའི་ཐལ་བ་སྨིན་པ་ལྟར་སྤངས་ཏེ། མཚན་མོའི་ཐུན་ཐ་མ་ལ་རས་སྦྱར་མའི་སྣམ་སྦྱར་རིན་ཐང་འབུམ་རི་བ་ཐོགས་ཏེ་འཇིག་རྟེན་ན་དགྲ་བཅོམ་པ་གང་དག་བཞུགས་པ་དེ་དག་གི་ཕྱིར་རབ་ཏུ་བྱུང་བ། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་བསྐྱེད་པའི་ཕྱིར་ནགས་ན་བརྟེན་པ་གང་ཡིན་པ། གང་མཐོང་ན་སྤོས་ཀྱི་གླང་པོ་ཆེ་དག་ཀྱང་རྒྱགས་པ་དང་བྲལ་བར་འགྱུར་བ། གང་གིས་བུ་མངས་ཀྱི་མཆོད་རྟེན་དུ་སྟོན་པར་ཁས་བླངས་ནས་དགེ་སློང་གི་སྡོམ་པ་ཐོབ་པ། བཅོམ་ལྡན་འདས་ཀྱིས་ཀྱང་དགེ་སློང་དག་ངའི་ཉན་ཐོས་ཀྱི་དགེ་སློང་འདོད་པ་ཆུང་བ། ཆོག་ཤེས་པ། སྦྱངས་པའི་ཡོན་ཏན་སྨྲ་བ་རྣམས་ཀྱི་ནང་ན་མཆོག་ནི་འདི་ཡིན་ཏེ། འདི་ལྟ་སྟེ། དགེ་སློང་འོད་སྲུང་
ཆེན་པོའོ་ཞེས་གསུངས་ཤིང་བཅོམ་ལྡན་འདས་ཀྱིས་རྗེས་སུ་བསྔགས་པ་གང་ཡིན་པ་དེའི་ཡིན་གྱིས་འདིར་ཡང་ཞབས་ལ་ཕྱག་དག་འཚོལ་ཅིག། འདི་ནི་ཚེ་དང་ལྡན་པ་ཤཱ་རིའི་བུའི་གཙུག་ལག་ཁང་སྟེ། མཆོག་ཐོབ་པའི་བུ་གང་ཡིན་པ། གང་ལོ་བརྒྱད་གཉིས་སུ་དབང་པོའི་བརྡ་སྤྲོད་པ་བཀླགས་པ། རྒོལ་བ་ཐམས་ཅད་ཚར་བཅད་པ། བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས། བཅོམ་ལྡན་འདས་ཀྱིས་ཤེས་རབ་ཆེན་པོ་རྣམས་དང་། སྤོབས་པ་ཆེན་པོ་རྣམས་ཀྱི་མཆོག་ཏུ་བསྟན་པ་གང་ཡིན་པ། བཅོམ་ལྡན་འདས་ཀྱིས་འཇིག་རྟེན་ཐམས་ཅད་གང་གི་ཆ་བཅུ་དྲུག་པར་བཞག་ཅིང་། བཅོམ་ལྡན་འདས་ཀྱིས། དེ་བཞིན་གཤེགས་པ་མ་གཏོགས་པར། །འཇིག་རྟེན་ཀུན་གྱི་ཤེས་རབ་གང་། །ཤཱ་རིའི་བུ་ཡི་ཤེས་རབ་ཀྱི། །བཅུ་དྲུག་ཆར་ཡང་མི་ཆོག་གོ །གལ་ཏེ་ལྷར་བཅས་འཇིག་རྟེན་འདི། །ཤཱ་རིའི་བུ་དང་མཉམ་གྱུར་པས། །དེ་བཞིན་གཤེགས་པའི་ཤེས་རབ་ཀྱི། །བཅུ་དྲུག་ཆར་ཡང་མི་ཆོག་གོ །ཞེས་གསུངས་པ་གང་ཡིན་པ་དེའི་ཡིན་གྱིས་འདིར་ཡང་ཞབས་ལ་ཕྱག་དག་འཚོལ་ཅིག། འདི་ནི་ཚེ་དང་ལྡན་པ་མཽད་གལ་གྱི་བུ་ཆེན་པོའི་གཙུག་ལག་ཁང་སྟེ། མདུན་ན་འདོན་གྱི་བུ་ཅོད་པན་མེད་པའི་རྒྱལ་སྲིད་སྤངས་ཏེ་རབ་ཏུ་བྱུང་བ་གང་ཡིན་པ་གང་གིས་ལྷའི་དབང་པོ་བརྒྱ་བྱིན་གྱི་ཁང་བཟངས་རྣམ་པར་རྒྱལ་བྱེད་རྐང་པ་གཡས་པའི་མཐེ་བོས་ལན་གསུམ་དུ་བསྒུལ། ཀུན་དུ་བསྒུལ། ཀུན་དུ་རབ་ཏུ་བསྒུལ་བ་གང་གི་རྫུ་འཕྲུལ་གྱིས་བཅོམ་ལྡན་འདས་འཇིག་རྟེན་གྱི་ཁམས་འོད་ཟེར་ཅན་དུ་ཉིན་མཚན་བདུན་གྱིས་གཤེགས་པ། བཅོམ་ལྡན་འདས་ཀྱིས་རྫུ་འཕྲུལ་ཆེན་པོ་རྣམས་དང་། མཐུ་ཆེན་པོ་རྣམས་ཀྱི་མཆོག་ཏུ་བསྟན་པ་གང་ཡིན་པ་དེའི་ཡིན་གྱིས་འདིར་ཡང་ཞབས་ལ་ཕྱག་དག་འཚོལ་ཅིག །འདི་ནི་ཚེ་དང་ལྡན་པ་མ་འགགས་པའི་གཙུག་ལག་ཁང་སྟེ། མི་སྐལ་བ་བཟང་པོ་ལས་རབ་ཏུ་བྱུང་བ་གང་ཡིན་པ་བཅོམ་ལྡན་འདས་ཀྱི་ཡབ་ཀྱི་མཆེད་ཀྱི་སྲས་གང་གི་མིང་ཡང་དག་པར་བསྒྲགས་པས། ཚོང་པ་དག་རྒྱ་མཚོ་ཆེན་པོ་ནས་བཞོན་པའི་སྣོད་ལེགས་པར་གྲུབ་ཅིང་འོང་བར་
འགྱུར་བ་བཅོམ་ལྡན་འདས་ཀྱིས་ལྷའི་མིག་ཅན་རྣམས་ཀྱི་མཆོག་ཏུ་བསྟན་པ་གང་ཡིན་པ་དེའི་ཡིན་གྱིས་འདིར་ཡང་ཞབས་ལ་ཕྱག་དག་འཚོལ་ཅིག། འདི་ནི་ཚེ་དང་ལྡན་པ་ཀུན་དགའ་བོའི་གཙུག་ལག་ཁང་སྟེ། ཡུན་རིང་པོ་ནས་བཅོམ་ལྡན་འདས་ཀྱི་བསྙེན་བཀུར་བ་གང་ཡིན་པ་སངས་རྒྱས་བཅོམ་ལྡན་འདས་ཀྱི་ཞབས་འབྲིང་ན་ཉེ་བར་སྤྱོད་པ། སྟོན་པས་ཡང་དག་པར་བསྔགས་པ། ཚངས་པ་མཚུངས་པར་སྤྱོད་པ། མཁས་པ་རྣམས་ཀྱིས་ཡང་དག་པར་བཀུར་བ་གང་ཡིན་པ་བཅོམ་ལྡན་འདས་ཀྱི་ཡབ་ཀྱི་མཆེད་ཀྱི་སྲས་ལས་རབ་ཏུ་བྱུང་བ་བཅོམ་ལྡན་འདས་ཀྱིས་མང་དུ་ཐོས་པ་རྣམས་དང་། ཐོས་པ་འཛིན་པ་རྣམས་དང་། ཐོས་པ་བསགས་པ་རྣམས་ཀྱི་མཆོག་ཏུ་བསྟན་པ་གང་ཡིན་པ་དེའི་ཡིན་གྱིས་འདིར་ཡང་ཞབས་ལ་ཕྱག་དག་འཚོལ་ཅིག །འདི་ནི་ཚེ་དང་ལྡན་པ་མཛེས་དགའི་གཙུག་ལག་ཁང་སྟེ། བཅོམ་ལྡན་འདས་ཀྱི་གཅུང་པོ་སྲུའི་སྲས་ལས་རབ་ཏུ་བྱུང་བ་གལ་ཏེ་རབ་ཏུ་མ་བྱུང་ན་སྟོབས་ཀྱི་འཁོར་ལོས་སྒྱུར་བའི་རྒྱལ་པོར་འགྱུར་བ། བཅོམ་ལྡན་འདས་ཀྱིས་དབང་པོ་དག་གི་སྒོ་བསྡམས་པ་རྣམས་ཀྱི་མཆོག་ཏུ་བསྟན་པ་གང་ཡིན་པ་དེའི་ཡིན་གྱིས་འདིར་ཡང་ཞབས་ལ་ཕྱག་དག་འཚོལ་ཅིག །འདི་ནི་ཚེ་དང་ལྡན་པ་སྒྲ་ཅན་ཟིན་གྱི་གཙུག་ལག་ཁང་སྟེ། བཅོམ་ལྡན་འདས་ཀྱི་སྲས་ལས་རབ་ཏུ་བྱུང་བ། གལ་ཏེ་རབ་ཏུ་མ་བྱུང་ན་མཐུ་དང་ལྡན་པའི་རྒྱལ་པོར་འགྱུར་བ་གང་ཡིན་པ་གང་རབ་ཏུ་བྱུང་ན་རྒྱལ་པོ་མང་པོས་བཀུར་གྱི་རྒྱུད་གཅིག་ནས་གཅིག་ཏུ་རྒྱུད་པ་ཡང་དག་པར་རྒྱུན་ཆད་པ། བཅོམ་ལྡན་འདས་ཀྱིས་བསླབ་པ་འདོད་པ་རྣམས་དང་། བསླབ་པ་ལ་གུས་པ་རྣམས་དང་། བསླབ་པ་ལ་ཡོ་བྱད་བསྙུངས་པ་ཐོབ་པ་རྣམས་ཀྱི་མཆོག་ཏུ་བསྟན་པ་གང་ཡིན་པ་དེའི་ཡིན་གྱིས་འདིར་ཡང་ཞབས་ལ་ཕྱག་དག་འཚོལ་ཅིག །འདི་ནི་ཚེ་དང་ལྡན་པ་དགའ་བོའི་གཙུག་ལག་ཁང་ངོ་། །འདི་ནི་ཉེ་དགའིའོ། །འདི་ནི་འདུན་པའིའོ། །འདི་ནི་འགྲོ་མགྱོགས་ཀྱིའོ། །འདི་ནི་ནབ་སོའིའོ། །འདི་ནི་ཁོ་བོའི་གཙུག་ལག་ཁང་ངོ་། །ཅི་འདི་ཡང་ལྟ་བར་བྱེད་དམ། འཕགས་པ་ཅི་བདག་ཅག་གིས་གཙུག་ལག་ཁང་ཐམས་ཅད་
བལྟས་ནས། གདོད་འཕགས་པ་འཆར་ཀའི་གཙུག་ལག་ཁང་བལྟ་བར་མི་བགྱིའམ། བདག་ཅག་གིས་འཕགས་པ་འཆར་ཀའི་གཙུག་ལག་ཁང་འདི་ད་ཤིན་ཏུ་བལྟ་བར་བགྱིའོ། །སྲིང་མོ་དག་དེ་བཞིན་གྱིས་ཤིག །ཚེ་དང་ལྡན་པ་འཆར་ཀ་དེ་འདོད་ཆགས་སྤྱད་པ་ཡིན་པས་དེའི་གཙུག་ལག་ཁང་ནས་ས་གཞི་མོན་སྲན་གྲེའུའི་ཕྱེ་མས་བསྐུས་པ་དང་། རྩིག་པ་བཀྲ་ཞིང་ཉེ་བར་བཀྲ་བ་དང་། མལ་སྟན་བེའུ་ཕྲུག་གི་སྙིང་པོ་ཅན་བཤམས་པ་དང་། བུམ་པ་བཏུང་བས་བཀང་བ་བཅུ་སྣོད་དང་བཅས་པ་བཞག་པ་དང་། སྐོན་པའི་ནང་ན་བཅའ་བ་སྣ་ཚོགས་ཀྱིས་གང་བ་དག་ཡོད་དོ། །ཚེ་དང་ལྡན་པ་འཆར་ཀས་བྲམ་ཟེ་དང་ཁྱིམ་བདག་གི་ཆུང་མ་རབ་ཏུ་མང་པོ་རང་གི་གཙུག་ལག་ཁང་དུ་འོངས་པ་རྣམས་ལ་སྨྲས་པ། སྲིང་མོ་དག་ཅི་ཇེ་ཁྱེའུ་སུས་བྱའམ། འོན་ཏེ་བཏུང་བ་འཐུང་། འཕགས་པ་ཅི་ཆུ་ཀླུང་ཟློག་ཕྱོགས་སུ་འབབ་བམ། བདག་ཅག་གིས་འཕགས་པ་ལ་གསོལ་བར་བགྱི་བ་གང་ལགས་པ་དེ་ཉིད་འཕགས་པས་བདག་ཅག་ལ་སྩོལ་ཏམ། འདི་ལྟར་བདག་ཅག་ལ་གང་དཀོན་པ་དེ་སྩོལ་ཅིག །སྲིང་མོ་དག་ཁྱེད་ཅག་ལ་ཅི་ཞིག་དཀོན། འཕགས་པ་ཆོས་མཉན་པའོ། །སྲིང་མོ་དག་བཅོམ་ལྡན་འདས་ཀྱིས་གནས་དྲུག་པོ་དག་འཇིག་རྟེན་དུ་བྱུང་བ་ནི་ངོ་མཚར་རྨད་དུ་བྱུང་བ་ཡིན་ཏེ། དྲུག་པོ་དེ་དག་གང་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དང་། དེ་བཞིན་གཤེགས་པས་གསུངས་པའི་ཆོས་འདུལ་བ་དང་། མི་ཉིད་དང་། དབུས་པའི་གནས་སུ་སྐྱེ་བ་དང་། དབང་པོ་མ་ཚང་བ་མེད་པ་དང་། དགེ་བའི་ཆོས་ལ་འདུན་པའོ་ཞེས་ལེགས་པར་གསུངས་པས་དེའི་ཕྱིར་ཁྱེད་ཅག་དགེ་བའི་ཆོས་ལ་འདུན་པ་སྐྱེས་པ་འདི་ནི་སངས་རྒྱས་འབྱུང་བ་དང་འདྲ་སྟེ། ལེགས་སོ་ལེགས་སོ། །སྲིང་མོ་དག་འཁོད་ཅིག་དང་ཁོ་བོས་ཁྱེད་ལ་ཆོས་བསྟན་པར་བྱའོ། །དེ་དག་གིས་དེའི་རྐང་པ་གཉིས་ལ་ཕྱག་འཚལ་ཏེ་ཆོས་མཉན་པའི་ཕྱིར་མདུན་དུ་འཁོད་པ་དང་། དེས་དེ་དག་ལ་ཆོས་བསྟན་པར་བརྩམས་སོ།། །།འདུལ་བ་རྣམ་པར་འབྱེད་པ། བམ་པོ་དྲུག་བཅུ་རྩ་དྲུག་པ། བུ་
མོ་དེ་ཡང་ལྟད་མོའི་རང་བཞིན་ཅན་ཡིན་པས་རི་མོ་ལྟ་ཞིང་གཞན་དུ་སོང་ངོ་། །དེ་དག་གིས་ཀྱང་ཆོས་མཉན་ནས། ཚེ་དང་ལྡན་པ་འཆར་ཀའི་རྐང་པ་གཉིས་ལ་ཕྱག་འཚལ་ཏེ་གཙུག་ལག་ཁང་ནས་བྱུང་ངོ་། །བུ་མོ་དེས་གཞན་དག་བྱུང་བ་མ་ཚོར་ནས་སྒོ་ཁང་དེ་ཉིད་ན་རི་མོ་ལྟ་ཞིང་འདུག་གོ །ཚེ་དང་ལྡན་པ་འཆར་ཀས་དེ་དག་བསྐྱལ་ནས་གཙུག་ལག་ཁང་དུ་འཇུག་པར་བརྩམས་པ་དང་། དེས་བུ་མོ་དེ་སྒོ་ཁང་ན་འདུག་པ་མཐོང་ནས་དེས་དེ་ལ་སྨྲས་པ། བུ་མོ་ཁྱོད་མ་སོང་ངམ། དེས་འཛུམ་ཕྱུང་བ་དང་འཆར་ཀས་དེ་ལ་འོ་བྱས་ཏེ་ཡན་ལག་དང་ཉིང་ལག་དག་མནམས། ཀུན་དུ་མནམས་སོ། །བུ་མོ་དེ་ངུ་ཞིང་ཕྱིར་བྱུང་ནས་ཕའི་གན་དུ་སོང་སྟེ་སྨྲས་པ། ཡབ་བདག་དགེ་སྦྱོང་འཆར་ཀས་གཞོན་ནུ་མ་དང་བྲལ་བར་བགྱིས་སོ། །བྲམ་ཟེ་དེས་བསམས་པ། གལ་ཏེ་ད་ཅུང་ཟད་སྨྲར་ནི་བདག་གཅིག་པུ་ཡིན་ལ། འདི་དག་ནི་མང་བས་བདག་ལ་གནོད་པ་བྱེད་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་གྱིས། གང་དུ་གྲོགས་རྙེད་པར་གྱུར་པ་ན་ར་མདའ་བ་བཟློག་པར་བྱའོ་སྙམ་མོ། །རྒྱལ་བྱེད་ཀྱི་ཚལ་དང་མཉན་ཡོད་ཀྱི་བར་ན་གནས་ཀྱི་ཤིང་ལྗོན་པ་ཞིག་ཡོད་པ་དེའི་དྲུང་ན་བྲམ་ཟེ་ཞིག་བྲམ་ཟེའི་ཁྱེའུ་ལྔ་བརྒྱ་ཙམ་བྲམ་ཟེའི་གསང་ཚིག་ཀློག་ཏུ་འཇུག་ཅིང་འདུག་ནས། བྲམ་ཟེ་དེས་དེ་དག་ལ་སྨྲས་པ། ཤེས་ལྡན་དག་དགེ་སྦྱོང་འཆར་ཀས་ཁོ་བོའི་བུ་མོ་གཞོན་ནུ་མ་དང་བྲལ་བར་བྱས་ཀྱིས། ཁྱེད་ཅག་ཁོ་བོའི་ཚངས་པ་མཚུངས་པར་སྤྱོད་པ་ཡིན་གྱིས་གྲོགས་གྱིས་ཤིག། བྲམ་ཟེ་དག་ནི་ཡོངས་སུ་མི་རྟོག་པ་ཡིན་པས་དེ་དག་དབྱུག་པ་དག་ཐོགས་ཏེ་དེར་དོང་ངོ་། །ཚེ་དང་ལྡན་པ་འཆར་ཀ་རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིང་འདུག་པ་དེ་དེ་དག་གིས་བཟུང་ཞིང་བཀྲི་བར་བརྩམས་པ་དང་། དེ་དག་གིས་དེ་བསྒུལ་བར་ཡང་མ་ནུས་སོ། །བཅོམ་ལྡན་འདས་ཀྱིས་གདུལ་བའི་དུས་མཁྱེན་ནས་དེའི་སྟོབས་དབྲི་བར་མཛད་པ་དང་། དེ་དག་གིས་ཚེ་དང་ལྡན་པ་འཆར་ཀ་ཕར་དྲངས་ཚུར་དྲངས་ཏེ་ཁྲིད་དོ། །ཚེ་དང་ལྡན་པ་འཆར་ཀས་བསམས་པ། བཅོམ་ལྡན་འདས་ཀྱིས་བདག་གནོད་པ་དང་། ཉམ་ང་བ་དང་། མི་
བདེ་བ་བྱུང་བ་ལ་མི་དགོངས་སམ་སྙམ་པ་དང་། བཅོམ་ལྡན་འདས་ཀྱིས་དགོངས་པ་འདི་ལ་གདམས་པའི་ཐ་མ་ནི་འདི་ཡིན་པས་ཁྲིད་ཀྱང་བླའོ་སྙམ་དུ་དགོངས་སོ། །དེ་ནས་བཅོམ་ལྡན་འདས་ཀྱིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་སྟེང་གི་ཁང་བཟངས་ཀྱི་གཞིར་གཏོགས་པ་ན་གཉིད་ལོག་ཅིང་འདུག་པ་སེ་གོལ་གྱི་སྒྲས་སད་པར་མཛད་ནས་བཀའ་སྩལ་པ། རྒྱལ་པོ་ཆེན་པོ་ཁྱོད་ཀྱིས་གྱ་ཚོམ་དུ་མི་བྱ་བར་ལེགས་པར་བརྟག་པར་བྱའོ་ཞེས་གོ་བར་མཛད་དོ། །བཅོམ་ལྡན་འདས་ཀྱིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་སྟེང་གི་ཁང་བཟངས་ཀྱི་གཞིར་གཏོགས་པ་ན་གཉིད་ལོག་ཅིང་འདུག་པ་ལན་གཉིས་ལན་གསུམ་དུ་སེ་གོལ་གྱི་སྒྲས་སད་པར་མཛད་ནས་བཀའ་སྩལ་པ། རྒྱལ་པོ་ཆེན་པོ་ཁྱོད་ཀྱིས་གྱ་ཚོམ་དུ་མི་བྱ་བར་ལེགས་པར་བརྟག་པར་བྱའོ་ཞེས་གོ་བར་མཛད་དོ། །བྲམ་ཟེ་དེ་དག་གིས་ཀྱང་ཚེ་དང་ལྡན་པ་འཆར་ཀ་རྒྱལ་པོའི་ཕོ་བྲང་གི་སྒོར་ཁྲིད་དོ། །དེ་ནས་རྒྱལ་པོའི་ཕོ་བྲང་གི་སྒོ་ན་སྐྱེ་བོ་ཕལ་པོ་ཆེའི་ཚོགས་དག་བྲམ་ཟེ་རྣམས་ཀྱིས་དགེ་སྦྱོང་འཆར་ཀ་བཟུང་སྟེ་རྒྱལ་པོའི་སྒོར་ཁྲིད་དེ་འོངས་སོ་ཞེས་སྒྲ་མཐོན་པོ་དང་། སྒྲ་ཆེན་པོ་འབྱིན་ཏོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་སྟེང་གི་ཁང་བཟངས་ཀྱི་གཞིར་གཏོགས་པ་ན་གཉིད་ལོག་པ་སྐྱེ་བོ་ཕལ་པོ་ཆེའི་སྒྲ་དེས་སད་ནས། དེས་ཞོ་ཤས་འཚོ་བ་དག་ལ་སྨྲས་པ། ཤེས་ལྡན་དག་ཅིའི་ཕྱིར་སྐྱེ་བོ་ཕལ་པོ་ཆེའི་ཚོགས་འདི་དག་སྒྲ་མཐོན་པོ་དང་། སྒྲ་ཆེན་པོ་འབྱིན་པར་བྱེད། དེ་དག་གིས་སྨྲས་པ། ལྷ་བཙུན་པ་འཆར་ཀ་དང་། བྲམ་ཟེའི་བུ་མོ་ཞིག་དང་། བྲམ་ཟེ་ཞིག་དང་། བྲམ་ཟེའི་ཁྱེའུ་ལྔ་བརྒྱ་ཙམ་རྒྱལ་པོའི་ཕོ་བྲང་གི་ཆབ་སྒོ་ན་བླག་ཅོར་མཆི་ཞིང་མཆིས་སོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བསམས་པ། བཅོམ་ལྡན་འདས་ཀྱིས་འདི་ལས་དགོངས་ནས་བདག་ལ་རྒྱལ་པོ་ཆེན་པོ་ཁྱོད་ཀྱིས་གྱ་ཚོམ་དུ་མི་བྱ་བར་ལེགས་པར་བརྟག་པར་བྱའོ་ཞེས་བཀའ་སྩལ་ཏོ་སྙམ་དུ་རིག་གོ །མཉན་ཡོད་ན་ཆོས་ཉིད་ཀྱིས་གང་གི་ཚེ་རྩོད་པ་ཆེན་པོ་བྱུང་བ་དེའི་ཚེ་ན་རྔ་བོ་ཆེ་རྡུང་ཞིང་དུང་སྒྲིལ་མ་ཡང་འབུད་པར་བྱེད་པས་རྒྱལ་པོ་གསལ་རྒྱལ་གྱིས་ཞོ་ཤས་འཚོ་བ་དག་ལ་བསྒོ་བ། ཤེས་ལྡན་དག་
རྔ་བོ་ཆེ་ཡང་རྡུངས་ཤིག །དུང་སྒྲིལ་མ་ཡང་བུས་ཤིག །དེ་དག་གིས་རྔ་བོ་ཆེ་བརྡུངས་ཤིང་དུང་སྒྲིལ་མ་བུས་པ་དང་། རྒྱལ་པོ་དང་བཅས་པའི་འཁོར་འདུས་པར་གྱུར་ཏོ། །རྒྱལ་པོས་སྨྲས་པ། བྲམ་ཟེ་དེ་དང་བཙུན་པ་འཆར་ཀ་ནང་དུ་ཐོང་ཤིག །དེ་གཉིས་ནང་དུ་འོངས་པ་དང་། རྒྱལ་པོས་བྲམ་ཟེ་དེ་ལ་སྨྲས་པ། བྲམ་ཟེ་ཁྱེད་ཅི་ཟེར། ལྷ་དགེ་སྦྱོང་འཆར་ཀས་བདག་གི་བུ་མོ་གཞོན་ནུ་མ་དང་བྲལ་བར་བགྱིས་སོ། །རྒྱལ་པོས་སྨྲས་པ། བཙུན་པ་འཆར་ཀ་བྲམ་ཟེ་འདི་དེ་སྐད་མཆི་ན་ཁྱོད་ཅི་གསུང་། ལྷ་བདག་གིས་དེ་ལ་སྡིག་པའི་ལས་མ་བགྱིས་སོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་འདི་ཇི་ལྟར་དཔྱད་པར་བྱ། བློན་པོ་རྣམས་ཀྱིས་སྨྲས་པ། ལྷ་བཅོམ་ལྡན་འདས་ཀྱིས་ཁྱོད་ཉིད་སྤོབས་པ་ཅན་རྣམས་ཀྱི་མཆོག་ཏུ་བསྟན་པ་ལགས་པས་ལྷ་ཉིད་ཀྱི་ཞལ་མཆུ་འདི་དགུམ་དུ་གསོལ། རྒྱལ་པོས་སྨྲས་པ། ཤེས་ལྡན་དག་འདི་ལ་ཇི་ལྟར་ཤེས་པར་བྱ། མིག་གི་རྣམ་པར་ཤེས་པས་ནི་གཟུགས་དག་མཐོང་མོད། བཙུན་མོའི་འཁོར་གྱིས་ནི་བུ་མོ་བརྟག་མོད། བུ་མོ་དེ་བཙུན་མོའི་འཁོར་གྱི་ནང་དུ་ཐོང་ལ་རྟོག་ཏུ་ཆུག་ཤིག །དེ་དག་གིས་བུ་མོ་དེ་བཙུན་མོའི་འཁོར་གྱི་ནང་དུ་བཏང་བ་དང་། བཙུན་མོ་ཕྲེང་ལྡན་མས་བུ་མོ་དེ་པང་བར་བསྙལ་ཏེ་སྨྲས་པ། བུ་མོ་བདེན་པར་སྨྲོས་ཤིག །གལ་ཏེ་ཁྱོད་བཙུན་པ་འཆར་ཀས་གཞོན་ནུ་མ་དང་བྲལ་བར་བྱས་ན་ཡང་དེ་ནི་བྲམ་ཟེ་མདུན་ན་འདོན་གྱི་བུ་ལས་རབ་ཏུ་བྱུང་བ་ཡིན་པས། ཁྱོད་ཀྱི་ཁྱིམ་ཐབ་ཀྱི་ཐབ་རིར་འབབ་པར་འགྱུར་རོ། །འོན་ཏེ་ཁྱོད་ཕྱུགས་ཅུང་མ་སྨྲས་པ་ཚུལ་ཁྲིམས་དང་ལྡན་པ་ཡིན་ན་ནི་དགེ་སློང་ལ་ཡང་དག་པ་མ་ཡིན་པས་སྐུར་ན་སེམས་ཅན་དམྱལ་བ་ཆེན་པོར་འགྲོ་བར་འགྱུར་རོ། །བུ་མོ་དེས་སྨྲས་པ། ཇོ་མོ་བདག་དེས་གཞོན་ནུ་མ་དང་བྲལ་བར་མ་བགྱིས་ཏེ། འདི་ལྟར་དེས་འོ་བགྱིས་ཤིང་ཡན་ལག་དང་ཉིང་ལག་དག་མནམས། ཀུན་དུ་མནམས་སོ། །བཙུན་མོ་ཕྲེང་ལྡན་མས་སྨྲས་པ། བུ་མོ་ཁྱོད་ཀྱིས་དོན་དེ་ཙམ་ཞིག་ལ་རྒྱལ་པོ་དང་བཅས་པའི་འཁོར་ཀུན་དུ་དཀྲུགས་སོ། །ཅི་ཕ་དག་ཀྱང་བུ་མོ་དག་ལ་འོ་བྱེད་ཅིང་ཡན་ལག་དང་ཉིང་ལག་དག་ལ་
ནམ། ཀུན་དུ་མི་ནམ་མམ། དེ་ནས་བུད་མེད་རྒན་མོ་རྣམས་ཀྱིས་བུ་མོ་དེ་བརྟགས་ན་ཇི་ཙམ་ན་ཕྱུགས་ཆུང་མ་ཉམས་པར་གྱུར་ནས། དེ་དག་གིས་རྒྱལ་པོ་ལ་སྨྲས་པ། ལྷ་བུ་མོ་འདི་ཕྱུགས་ཆུང་མ་ཉམས་སོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་འདི་ལ་གང་ཡུས། བློན་པོ་རྣམས་ཀྱིས་སྨྲས་པ། ལྷ་བཙུན་པ་འཆར་ཀ་ཡུས་སོ། །རྒྱལ་པོས་སྨྲས་པ། ཤེས་ལྡན་དག་དེང་ལ་བྲམ་ཟེ་འདི་རྒྱ་སྐྱེགས་ཀྱི་ཁང་པར་ཆུག་ལ་མེས་སྲེགས་ཤིག །བུ་མོ་དེ་ཡང་རྟེའུ་དམུ་རྒོད་ཀྱི་རྐང་པ་གཉིས་ལ་ཐོགས་ཤིག །བྲམ་ཟེའི་ཁྱེའུ་ལྔ་བརྒྱ་པོ་དེ་དག་ཀྱང་ལག་པ་དང་རྐང་པ་དག་ཆོད་ཅིག །ཚེ་དང་ལྡན་པ་འཆར་ཀས་སྨྲས་པ། ལྷ་དེ་གལ་ཏེ་བདག་ལས་བརྟེན་ཏེ་སེམས་ཅན་དེ་སྙེད་ཅིག་ཆབ་སྩལ་བར་གྱུར་ན། དོན་གྱིས་ལྷས་བདག་བཅོམ་ལྡན་འདས་ཀྱི་བསྟན་པ་ལས་ཕྱུང་ལགས་སོ། །རྒྱལ་པོས་སྨྲས་པ། ཤེས་ལྡན་དག་འོ་ན་དེང་ལ་བྲམ་ཟེའི་ཁྱེའུ་ལྔ་བརྒྱ་པོ་དེ་དག་ཐོང་ལ། བྲམ་ཟེ་འདི་ནི་རྒྱ་སྐྱེགས་ཀྱི་ཁང་པར་ཆུག་ལ་མེས་སྲེགས་ཤིག །བུ་མོ་དེ་ཡང་རྟེའུ་དམུ་རྒོད་ཀྱི་རྐང་པ་གཉིས་ལ་ཐོགས་ཤིག །ཚེ་དང་ལྡན་པ་འཆར་ཀས་སྨྲས་པ། ལྷ་གལ་ཏེ་བདག་ལས་བརྟེན་ཏེ་ཐ་ན་གྲོག་མ་ཕྲ་མོ་འགའ་ཞིག་ལ་གནོད་པར་གྱུར་ན་ཡང་། དོན་གྱིས་ལྷས་བདག་བཅོམ་ལྡན་འདས་ཀྱི་བསྟན་པ་ལས་ཕྱུང་བ་ཁོ་ན་ལགས་སོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་བཅོམ་ལྡན་འདས་ཀྱི་ཉན་ཐོས་འདོད་ཆགས་དང་མ་བྲལ་ན་ཡང་སོ་སོར་རྟོག་པའི་སྟོབས་ལ་ལྟོས། གལ་ཏེ་བྲམ་ཟེ་དག་གིས་བཙུན་པ་འཆར་ཀ་ཐུབ་པར་གྱུར་ན་ནི་རྡོ་གཅིག་གིས་ཀྱང་བསད་པར་འགྱུར་རོ། །ཤེས་ལྡན་དག་དེང་ལ་ཐམས་ཅད་ཁྱེ་ཤིག །དེ་དག་བཀྱེ་ནས་གྱེས། རྔ་བརྡུངས་ཤིང་ཡོལ་བས་བཅད་པ་དང་། སྐྱེ་བོ་ཕལ་པོ་ཆེའི་ཚོགས་དག་སོ་སོར་གྱེས་སོ། །རྒྱལ་པོ་དང་། བཙུན་མོ་ཕྲེང་ལྡན་མ་དང་། ཚེ་དང་ལྡན་པ་འཆར་ཀ་གསུམ་འདུག་པ་ན། རྒྱལ་པོས་བཙུན་མོ་ཕྲེང་ལྡན་མ་ལ་སྨྲས་པ། ཕྲེང་ལྡན་མ། བཙུན་པ་འཆར་ཀས་ཇི་ལྟ་བུའི་ཕུན་ཕུན་བྱས་པས་རྒྱལ་པོ་དང་བཅས་པའི་འཁོར་ཀུན་དུ་དཀྲུགས་པ་ལ་ལྟོས། བཙུན་
མོ་ཕྲེང་ལྡན་མས་ཚེ་དང་ལྡན་པ་འཆར་ཀ་ལ་སྨྲས་པ། བཙུན་པ་འཆར་ཀ་ཁྱོད་པས་སླད་ཀྱིས་རབ་ཏུ་བྱུང་བ་དགེ་སློང་མ་ཨུཏྤ་ལའི་མདོག་དང་། དགེ་ཚུལ་མ་སྐུལ་བྱེད་དང་། དགེ་ཚུལ་མ་ཙི་རི་ཀ་དང་། གཞན་ཡང་མང་པོ་གང་ལགས་པ་དེ་དག་ཐམས་ཅད་ཀྱིས་ཉོན་མོངས་པ་ཐམས་ཅད་སྤངས་པས། དགྲ་བཅོམ་པ་ཉིད་མངོན་དུ་བགྱིས་ན། ཁྱོད་ཀྱིས་ནི་རྒྱལ་པོ་དང་བཅས་པའི་འཁོར་གྱི་ནང་དུ་མི་མཛེས་པ་འདི་ལྟ་བུ་བགྱིས་པར་གྱུར་ཀྱང་། ད་དུང་སྐྱོ་བ་མི་མངའ་འམ། ཚེ་དང་ལྡན་པ་འཆར་ཀས་སྨྲས་པ། ཕྲེང་ལྡན་མ། ད་ཕྱིན་ཆད་འཁོར་བར་འཁོར་བ་ན་ཉོན་མོངས་པ་དེ་ལྟ་བུ་དག་ཀུན་དུ་སྤྱོད་པར་མི་འགྱུར་བ་དེ་ལྟར་བྱའོ་ཞེས་སྨྲས་ནས་དེ་སྟན་ལས་ལངས་ཏེ་སོང་ངོ་། །དེ་ངོ་ཚ་བས་བཅོམ་ལྡན་འདས་དང་ཕྲད་པར་མ་ནུས་ནས། ཚེ་དང་ལྡན་པ་ཤཱ་རིའི་བུ་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །མཁན་པོ་ཇི་ལྟར་བདག་འཁོར་བར་འཁོར་བ་ན། ཉོན་མོངས་པ་དེ་ལྟ་བུ་དག་ཀུན་དུ་སྤྱོད་པར་མི་འགྱུར་བ་དེ་ལྟར་བདག་ལ་ཆོས་བསྟན་དུ་གསོལ། ཚེ་དང་ལྡན་པ་ཤཱ་རིའི་བུས་བསམས་པ། ལྟུང་བ་ལྷག་མ་མེད་པ་བྱུང་བར་མ་གྱུར་ཏམ་སྙམ་ན། ཇི་ཙམ་ན་དེས་ལྷག་མ་ཡོད་པར་མཐོང་ནས། དེས་དེ་བཤགས་པར་བྱ་བའི་ལྟུང་བ་གང་དག་ཡིན་པ་དེ་དག་ཀྱང་འཆགས་སུ་བཅུག །བསྡམ་པར་བྱ་བའི་ལྟུང་བ་གང་དག་ཡིན་པ་དེ་དག་ཀྱང་སྡོམ་དུ་བཅུག་ནས། དེས་དེ་ལ་འདི་དང་འདི་ལྟར་ཡིད་ལ་གྱིས་ལ་བག་ཡོད་པས་སྒྲུབས་ཤིག་ཅེས་གདམས་ངག་བྱིན་ནོ། །དེ་ནས་ཚེ་དང་ལྡན་པ་འཆར་ཀ་གཅིག་པུ་དབེན་པ་བག་ཡོད་པ། རྟུན་པ་དང་ལྡན་པ། བདག་ཉིད་བཏང་བར་གནས་པ་ན་རིགས་ཀྱི་བུ་དག་གང་གི་ཕྱིར་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ། ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང་། དགྲ་བཅོམ་
པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ་རིག་པས་སྒོ་ངའི་སྦུབས་དྲལ་བར་གྱུར་ཅིང་། རིག་པ་དང་མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་འདོད་པའི་རྙེད་པ་དང་། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །དེ་ནས་ཚེ་དང་ལྡན་པ་འཆར་ཀ་དགྲ་བཅོམ་པ་ཉིད་ཐོབ་ཅིང་རྣམ་པར་གྲོལ་བའི་དགའ་བ་དང་བདེ་བ་ཉམས་སུ་མྱོང་བ་ན་འདི་སྙམ་དུ་སེམས་ཏེ། བཅོམ་ལྡན་འདས་ནི་བདག་ལ་ཕན་པ་མཛད་པ། བདེ་བར་གཤེགས་པ་ནི་བདག་ལ་ལེགས་པར་མཛད་པ་སྟེ། འདི་ལྟར་བཅོམ་ལྡན་འདས་དེ་ནི་བདག་གི་སྡུག་བསྔལ་གྱི་ཆོས་མང་པོ་དག་སེལ་བར་མཛད་པ། བཅོམ་ལྡན་འདས་དེ་ནི་བདག་གི་བདེ་བའི་ཆོས་མང་པོ་དག་སྒྲུབ་པར་མཛད་པ། བཅོམ་ལྡན་འདས་དེ་ནི་བདག་གི་སྡིག་པ་མི་དགེ་བའི་ཆོས་རྣམ་པ་དུ་མ་དག་སེལ་བར་མཛད་པ། བཅོམ་ལྡན་འདས་དེ་ནི་བདག་གི་དགེ་བའི་ཆོས་རྣམ་པ་དུ་མ་དག་སྒྲུབ་པར་མཛད་པ་ལགས་ན། བདག་གིས་ཅི་ཞིག་བྱས་ན་དེས་བདག་གིས་བཅོམ་ལྡན་འདས་ལ་ལན་བྱས་པ་དང་། ཉེ་བར་བྱས་པ་དང་། རབ་ཏུ་བྱས་པར་འགྱུར་སྙམ་ནས། དེས་ཡང་བསམས་པ། སངས་རྒྱས་བཅོམ་ལྡན་འདས་རྣམས་ནི་དཀའ་བ་མཛད་པ་བརྒྱ་སྟོང་དུ་མ་དག་གིས་བསྐལ་པ་གྲངས་མེད་པ་གསུམ་གྱིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་མཁྱེན་པ་ཐུགས་སུ་ཆུད་པ་གང་ཡིན་པ་དེ་དག་ཐམས་ཅད་ནི་སེམས་ཅན་ལ་ཕན་པའི་ཕྱིར་ཡིན་པས། བདག་གིས་ཀྱང་སེམས་ཅན་ལ་ཕན་པ་བྱའོ་སྙམ་མོ། །དེས་བསམས་པ། བཅོམ་ལྡན་འདས་ཀྱིས་ཁྱིམ་པ་དད་པར་བྱེད་པ་རྣམས་ཀྱི་མཆོག་ཏུ་བསྟན་པ་འགའ་ཡོད་དམ་སྙམ་ན། དེས་ཇི་ཙམ་ན་མེད་པར་མཐོང་ངོ་། །སུ་ལ་ལྟོས་སྙམ་ན་བདག་ཉིད་ལ་ལྟོས་པར་མཐོང་ནས་ལེགས་ཀྱིས་བདག་གིས་སྟོན་པའི་ཐུགས་ལ་དགོངས་པ་ཡོངས་
སུ་རྫོགས་པར་བྱའོ་སྙམ་མོ། །གང་གདུལ་བའི་དུས་ཡིན་སྙམ་ན། མཉན་ཡོད་ན་བྲམ་ཟེ་ཞི་བ་ལ་དད་པ། ཞི་བ་ལ་བསྙེན་བཀུར་བྱེད་པ་ཞིག་འདུག་ནས། ཚེ་དང་ལྡན་པ་འཆར་ཀས་བསམས་པ། བྲམ་ཟེ་དེ་གདུལ་བའི་དུས་ཡིན་ནོ་སྙམ་ནས་དེ་དེའི་གན་དུ་སོང་བ་དང་། བྲམ་ཟེ་དེས་ཀྱང་ཞི་བ་ལ་བསྙེན་བཀུར་བྱས་ནས། ཀྱེ་བྲམ་ཟེ་བྲམ་ཟེ་ཞེས་བྲམ་ཟེ་ཚོལ་བར་བྱེད་དོ། །ཚེ་དང་ལྡན་པ་འཆར་ཀས་སྨྲས་པ། ཁོ་བོ་བྲམ་ཟེ་ཡིན་ནོ། །དེས་སྨྲས་པ། བྲམ་ཟེ་ནི་ཐོར་ཚུགས་ཅན་ཡིན་གྱི་ཁྱོད་ནི་དགེ་སྦྱོང་མགོ་རེག་ཡིན་ནོ། །ཚེ་དང་ལྡན་པ་འཆར་ཀས་སྨྲས་པ། འདི་ལྟར་ཁོ་བོ་བྲམ་ཟེ་ཡིན་ཞིང་། ཁོ་བོའི་སྟོན་པ་ཡང་བྲམ་ཟེའི་མཆོག་ཡིན་ན་ཁྱོད་ཞི་བ་འདི་ལ་མངོན་པར་དད་དམ། དེས་སྨྲས་པ། མངོན་པར་དད་དོ། །ཚེ་དང་ལྡན་པ་འཆར་ཀས་སྨྲས་པ། ཀྭའི་ཞི་བ་སྨྲོས་ཤིག །ཇི་ལྟར་ཁོ་བོ་བྲམ་ཟེ་ཡིན་ཞིང་ཁོ་བོའི་སྟོན་པ་ཡང་བྲམ་ཟེའི་མཆོག་ཡིན་ནམ། ཞི་བས་སྨྲས་པ། འཕགས་པ་འཆར་ཀ་དེ་དེ་བཞིན་ཏེ། ཁྱོད་ནི་བྲམ་ཟེ་ལགས་ཤིང་ཁྱོད་ཀྱི་སྟོན་པ་ཡང་བྲམ་ཟེའི་མཆོག་ལགས་སོ། །བྲམ་ཟེ་དེས་བསམས་པ། བདག་གིས་ཡུན་རིང་པོ་ནས་ཞི་བ་ལ་བསྙེན་བཀུར་བྱས་ན། འདིས་ལན་འགའ་རྨི་ལམ་དུ་ཡང་མ་བསྟན་ན། བཙུན་པ་འཆར་ཀས་སྨྲས་ན་ཚིག་སྨྲ་བར་བྱེད་པས། ཀྱེ་མ་བཙུན་པ་འཆར་ཀ་ནི་རྫུ་འཕྲུལ་ཆེ་བ། མཐུ་ཆེ་བ་ཡིན་ནོ་སྙམ་ནས་དེས་སྨྲས་པ། བཙུན་པ་འཆར་ཀ་ཅིའི་སླད་དུ་བྱོན། ཁྱོད་ཉིད་གདུལ་བའི་དོན་དུའོ། །བཙུན་པ་འཆར་ཀ་དེའི་སླད་དུ་འདི་ཉིད་དུ་བཞུགས་ཏེ་ཞལ་ཟས་ཀྱི་བྱ་བ་མཛོད་ཅིག །ཚེ་དང་ལྡན་པ་འཆར་ཀ་དེ་ཉིད་དུ་འདུག་སྟེ། ཟས་ཀྱི་བྱ་བ་བྱས་པ་དང་། བྲམ་ཟེ་དེ་ཆུང་མ་དང་བཅས་པ་ཚེ་དང་ལྡན་པ་འཆར་ཀའི་མདུན་དུ་ཆོས་མཉན་པའི་ཕྱིར་འདུག་ནས། ཚེ་དང་ལྡན་པ་འཆར་ཀས་དེའི་བསམ་པ་དང་། བག་ལ་ཉལ་དང་། ཁམས་དང་རང་བཞིན་ཁོང་དུ་ཆུད་ནས་འདི་ལྟར་བྲམ་ཟེ་དེ་ཆུང་མ་དང་བཅས་པས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་
བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས་བཙུན་པ་འཆར་ཀས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་། མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་། ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག །འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། །དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །བཙུན་པ་འཆར་ཀས་ཇི་སྲིད་འཚོའི་བར་དུ་བདག་གི་བསོད་སྙོམས་དང་། ན་བཟའ་དང་། གནས་མལ་དང་། བསྙུང་བའི་རྐྱེན་དང་། སྨན་གྱི་ཡོ་བྱད་དག་བཞེས་པར་ཅི་གནང་། ཚེ་དང་ལྡན་པ་འཆར་ཀས་སྨྲས་པ། རབ་ཏུ་བྱུང་བ་ནི་གཞན་ལ་ཕན་པས་རྗེས་སུ་འཛིན་པ་ལ་ཞུགས་པ་ཡིན་པས། བྲམ་ཟེ་གཞན་དག་ལ་ཡང་ཕན་ པ་བྱ་དགོས ་སོ་ཞེས་སྨྲས་ཏེ་དང་དུ་མ་བླངས་སོ། །དེ་ནས་ཚེ་དང་ལྡན་པ་འཆར་ཀས་མཉན་ཡོད་དུ་བྲམ་ཟེའི་ཁྱིམ་དང་པོ་གཉི་ག་ནས་བཏུལ་ཅིང་བཞག་གོ །ཚེ་དང་ལྡན་པ་འཆར་ཀས་བསམས་པ། གང་གདུལ་བའི་དུས་ཡིན་སྙམ་ན། མཉན་ཡོད་ན་བྲམ་ཟེ་ཞི་བ་ལ་དད་པ། ཞི་བ་ལ་
བསྙེན་བཀུར་བྱེད་པ་ཞིག་འདུག་ནས། ཚེ་དང་ལྡན་པ་འཆར་ཀས་བསམས་པ། བྲམ་ཟེ་དེ་གདུལ་བའི་དུས་ཡིན་ནོ་སྙམ་ནས་དེ་དེའི་གན་དུ་སོང་བ་དང་། བྲམ་ཟེ་དེས་ཀྱང་ཞི་བ་ལ་བསྙེན་བཀུར་བྱས་ནས། ཀྱེ་བྲམ་ཟེ་བྲམ་ཟེ་ཞེས་བྲམ་ཟེ་ཚོལ་བར་བྱེད་དོ། །ཚེ་དང་ལྡན་པ་འཆར་ཀས་སྨྲས་པ། ཁོ་བོ་བྲམ་ཟེ་ཡིན་ནོ། །དེས་སྨྲས་པ། མགོ་རེག་འདི་ལྟ་བུ་བྲམ་ཟེ་ག་ལ་ཡིན། ཚེ་དང་ལྡན་པ་འཆར་ཀས་སྨྲས་པ། བྲམ་ཟེ་ཇི་ལྟ་བུ་ཡིན། དེས་སྨྲས་པ། བྲམ་ཟེ་ནི་རལ་པ་ཅན་ཡིན་ནོ། །ཚེ་དང་ལྡན་པ་འཆར་ཀས་རལ་པ་ཅན་དུ་སྤྲུལ་པ་དང་། ཇི་ཙམ་ན་བྲམ་ཟེ་དེ་ངོ་མཚར་སྐྱེས་ནས། དེས་སྨྲས་པ། བཙུན་པ་འཆར་ཀ་ཅིའི་སླད་དུ་བྱོན། ཁྱོད་ཉིད་གདུལ་བའི་དོན་དུའོ། །བཙུན་པ་འཆར་ཀ་དེའི་སླད་དུ་འདི་ཉིད་དུ་བཞུགས་ཏེ་ཞལ་ཟས་ཀྱི་བྱ་བ་མཛོད་ཅིག །ཚེ་དང་ལྡན་པ་འཆར་ཀ་དེར་འདུག་སྟེ་ཟས་ཀྱི་བྱ་བ་བྱས་པ་དང་། བྲམ་ཟེ་དེ་ཆུང་མ་དང་བཅས་པ་ཚེ་དང་ལྡན་པ་འཆར་ཀའི་མདུན་དུ་ཆོས་མཉན་པའི་ཕྱིར་འདུག་ནས། ཚེ་དང་ལྡན་པ་འཆར་ཀས་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཁོང་དུ་ཆུད་ནས་འདི་ལྟར། བྲམ་ཟེ་དེ་ཆུང་མ་དང་བཅས་པས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས། བཙུན་པ་འཆར་ཀས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་
དམྱལ་བ་དང་། དུད་འགྲོ་དང་། ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག །འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་འཆར་ཀ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །བཙུན་པ་འཆར་ཀས་ཇི་སྲིད་འཚོའི་བར་དུ་བདག་གི་བསོད་སྙོམས་དང་། ན་བཟའ་དང་། གནས་མལ་དང་། བསྙུང་བའི་རྐྱེན་དང་། སྨན་གྱི་ཡོ་བྱད་དག་བཞེས་པར་ཅི་གནང་། ཚེ་དང་ལྡན་པ་འཆར་ཀས་སྨྲས་པ། རབ་ཏུ་བྱུང་བ་ནི་གཞན་ལ་ཕན་པས་རྗེས་སུ་འཛིན་པ་ལ་ཞུགས་པ་ཡིན་པས། བྲམ་ཟེ་གཞན་དག་ལ་ཡང་ཕན་ པ་བྱ་དགོས ་སོ་ཞེས་སྨྲས་ཏེ་དང་དུ་མ་བླངས་སོ། །དེ་ན་ཚེ་དང་ལྡན་པ་འཆར་ཀས་མཉན་ཡོད་དུ་བྲམ་ཟེའི་ཁྱིམ་གཉིས་པ་གཉི་ག་ནས་བཏུལ་ཅིང་བཞག་གོ །ཚེ་དང་ལྡན་པ་འཆར་ཀས་བསམས་པ། གང་གདུལ་བའི་དུས་ཡིན་སྙམ་ན། མཉན་ཡོད་ན་བྲམ་ཟེ་སེར་སྣ་ཅན་ཞིག་འདུག་པ་དེའི་ཆུང་མ་ནོར་བུ་ལ་དགའ་ནས། ཚེ་དང་ལྡན་པ་འཆར་ཀས་བསམས་པ། བྲམ་ཟེ་དེ་གདུལ་བའི་དུས་ཡིན་ནོ་སྙམ་ནས། ཚེ་དང་ལྡན་པ་འཆར་ཀ་ནོར་བུ་མཁན་གྱི་ཆ་ལུགས་སུ་བྱས་ཏེ་དེའི་ཁྱིམ་དུ་སོང་ནས། ནོར་བུ་སུ་ཉོ་ནོར་བུ་སུ་ཉོ་ཞེས་བྱས་པ་དང་། བྲམ་ཟེ་མོ་དེས་ཐོས་ནས་དེས་སྨྲས་པ། ནོར་བུ་དག་རིན་ཇི་ཙམ་དུ་འཚོང་། ཚེ་དང་ལྡན་པ་འཆར་ཀས་སྨྲས་པ། ནོར་བུ་འདི་དག་རིན་ཆེ་མོད་ཀྱི། འོན་ཀྱང་རིན་ཆུང་ངུའི་ཕྱིར་སྦྱིན་ནོ་ཞེས་ཚེ་དང་ལྡན་པ་འཆར་ཀས་ནོར་བུ་མཁན་གྱི་ཆ་ལུགས་མི་སྣང་བར་བྱས་ཏེ། རང་གི་ཆ་ལུགས་ཀྱིས་འདུག་པ་དང་། བྲམ་ཟེ་དེ་ངོ་མཚར་སྐྱེས་ནས་དེས་སྨྲས་པ། བཙུན་པ་འཆར་ཀ་ཅིའི་སླད་
དུ་འདིར་བྱོན། ཁྱོད་ཉིད་གདུལ་བའི་དོན་དུའོ། །བཙུན་པ་འཆར་ཀ་དེའི་སླད་དུ་འདི་ཉིད་དུ་བཞུགས་ཏེ་ཞལ་ཟས་ཀྱི་བྱ་བ་མཛོད་ཅིག །ཚེ་དང་ལྡན་པ་འཆར་ཀས་དེར་འདུག་སྟེ་ཟས་ཀྱི་བྱ་བ་བྱས་པ་དང་། བྲམ་ཟེ་དེ་ཆུང་མ་དང་བཅས་པ་ཚེ་དང་ལྡན་པ་འཆར་ཀའི་མདུན་དུ་ཆོས་མཉན་པའི་ཕྱིར་འདུག་ནས། ཚེ་དང་ལྡན་པ་འཆར་ཀས་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཁོང་དུ་ཆུད་ནས། འདི་ལྟར་བྲམ་ཟེ་དེ་ཆུང་མ་དང་བཅས་པས། སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས། བཙུན་པ་འཆར་ཀས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་། མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་། ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག །འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་
མཆིའོ། །བཙུན་པ་འཆར་ཀས་ཇི་སྲིད་འཚོའི་བར་དུ་བདག་གི་བསོད་སྙོམས་དང་། ན་བཟའ་དང་། གནས་མལ་དང་། བསྙུང་བའི་རྐྱེན་དང་། སྨན་གྱི་ཡོ་བྱད་དག་བཞེས་པར་ཅི་གནང་། ཚེ་དང་ལྡན་པ་འཆར་ཀས་སྨྲས་པ། རབ་ཏུ་བྱུང་བ་ནི་གཞན་ལ་ཕན་པས་རྗེས་སུ་འཛིན་པ་ལ་ཞུགས་པ་ཡིན་པས། བྲམ་ཟེ་གཞན་དག་ལ་ཡང་ཕན་ པ་བྱ་དགོས ་སོ་ཞེས་སྨྲས་ཏེ་དང་དུ་མ་བླངས་སོ། །དེ་ན་ཚེ་དང་ལྡན་པ་འཆར་ཀས་མཉན་ཡོད་དུ་བྲམ་ཟེའི་ཁྱིམ་གསུམ་པ་གཉི་ག་ནས་བཏུལ་ཅིང་བཞག་གོ །ཚེ་དང་ལྡན་པ་འཆར་ཀས་བསམས་པ། གང་གདུལ་བའི་དུས་ཡིན་སྙམ་ན། མཉན་ཡོད་ན་བྲམ་ཟེ་ནད་པ་ཞིག་འདུག་པ། དེ་སྨན་པ་དག་གིས་སྨན་ཁ་བ་དང་། ཚ་བ་དང་། བསྐ་བ་དག་གིས་ཡིད་བྱུང་ནས། དེས་སྒོ་བ་ལ་ཁྱོད་ཀྱིས་སྨན་པ་འགའ་ཡང་ནང་དུ་མ་བཏང་ཤིག་ཅེས་བསྒོ་ནས། ཚེ་དང་ལྡན་པ་འཆར་ཀས་བསམས་པ། བྲམ་ཟེ་དེ་གདུལ་བའི་དུས་ཡིན་ནོ་སྙམ་ནས། ཚེ་དང་ལྡན་པ་འཆར་ཀ་སྨན་པའི་ཆ་ལུགས་སུ་བྱས་ཏེ། བྲམ་ཟེ་དེའི་ཁྱིམ་སྒོར་སྨན་པ་འོངས་སོ་ཞེས་བྱས་ཏེ་བསྡད་པ་དང་། སྒོ་བས་སྨྲས་པ། ཁོ་བོ་ལ་བྲམ་ཟེས་ཁྱོད་ཀྱིས་སྨན་པ་འགའ་ཡང་ནང་དུ་མ་བཏང་ཤིག་ཅེས་བསྒོ་སྟེ། ཁོ་བོ་དེ་ཉིད་ཀྱི་ཕྱིར་བཞག་གོ །ཚེ་དང་ལྡན་པ་འཆར་ཀས་སྨྲས་པ། ཁྱོད་སོང་ལ་བྲམ་ཟེ་ལ་སྨན་པ་འོངས་ཏེ་དེ་ན་རེ་སྨན་ཡང་མི་སྦྱིན། བྱ་དགའ་ཡང་མི་སློང་བར་གསང་སྔགས་དག་གིས་སོས་པར་བྱའོ་ཞེས་ཟེར་རོ་ཞེས་བྱོས་ཤིག །སྒོ་བ་སོང་སྟེ་བྲམ་ཟེ་དེ་ལ་དེ་སྐད་རྒྱས་པར་བརྗོད་པ་དང་། དེས་སྨྲས་པ། ནང་དུ་ཐོང་ཤིག །ཚེ་དང་ལྡན་པ་འཆར་ཀ་ནང་དུ་ཞུགས་ནས། དེས་གསང་སྔགས་དག་གིས་དེ་སོས་པར་བྱས་ནས། ཚེ་དང་ལྡན་པ་འཆར་ཀས་སྨན་པའི་ཆ་ལུགས་མི་སྣང་བར་བྱས་ཏེ། རང་གི་ཆ་ལུགས་ཀྱིས་འདུག་པ་དང་། བྲམ་ཟེ་དེ་ངོ་མཚར་སྐྱེས་ནས་དེས་སྨྲས་པ། བཙུན་པ་འཆར་ཀ་ཅིའི་སླད་དུ་འདིར་བྱོན། ཁྱོད་ཉིད་གདུལ་བའི་དོན་དུའོ། །བཙུན་པ་འཆར་ཀ་དེའི་སླད་དུ་འདི་ཉིད་དུ་བཞུགས་ཏེ་ཞལ་ཟས་ཀྱི་བྱ་བ་མཛོད་ཅིག །ཚེ་དང་ལྡན་པ་འཆར་ཀ་དེར་འདུག་སྟེ་ཟས་ཀྱི་བྱ་བ་བྱས་པ་དང་། བྲམ་
ཟེ་དེ་ཆུང་མ་དང་བཅས་པ་ཚེ་དང་ལྡན་པ་འཆར་ཀའི་མདུན་དུ་ཆོས་མཉན་པའི་ཕྱིར་འདུག་ནས། ཚེ་དང་ལྡན་པ་འཆར་ཀས་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཁོང་དུ་ཆུད་ནས། འདི་ལྟར་བྲམ་ཟེ་དེ་ཆུང་མ་དང་བཅས་པས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས། བཙུན་པ་འཆར་ཀས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་། ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག །འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །བཙུན་པ་འཆར་ཀས་ཇི་སྲིད་འཚོའི་བར་དུ་བདག་གི་བསོད་སྙོམས་དང་། ན་བཟའ་དང་། གནས་མལ་དང་། བསྙུང་བའི་རྐྱེན་དང་། སྨན་གྱི་ཡོ་བྱད་དག་བཞེས་པར་ཅི་གནང་། ཚེ་དང་ལྡན་པ་འཆར་ཀས་སྨྲས་པ།
རབ་ཏུ་བྱུང་བ་ནི་གཞན་ལ་ཕན་པས་རྗེས་སུ་འཛིན་པ་ལ་ཞུགས་པ་ཡིན་པས། བྲམ་ཟེ་གཞན་དག་ལ་ཡང་ཕན་ པ་བྱ་དགོས ་སོ་ཞེས་སྨྲས་ཏེ་དང་དུ་མ་བླངས་སོ། །དེ་ན་ཚེ་དང་ལྡན་པ་འཆར་ཀས་མཉན་ཡོད་དུ་བྲམ་ཟེའི་ཁྱིམ་བཞི་པ་གཉི་ག་ནས་བཏུལ་ཅིང་བཞག་གོ །ཚེ་དང་ལྡན་པ་འཆར་ཀས་བསམས་པ། གང་གདུལ་བའི་དུས་ཡིན་སྙམ་ན། མཉན་ཡོད་ན་བྲམ་ཟེ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། སེར་སྣ་ཅན་མིག་ཕྲ་བ། བྱ་རོག་ལ་ཡང་གཏོར་མ་མི་སྟེར་བ། ཡོ་བྱད་ཀུན་དུ་འཛིན་པ་ཞིག་འདུག་པ་དེ་སྒོ་དྲུང་ན་བྲམ་ཟེའི་ཁྱེའུ་ལྔ་བརྒྱ་ཙམ་བྲམ་ཟེའི་གསང་ཚིག་དག་ཀློག་ཏུ་འཇུད་ནས། ཚེ་དང་ལྡན་པ་འཆར་ཀས་བསམས་པ། བྲམ་ཟེ་དེ་གདུལ་བའི་དུས་ཡིན་ནོ་སྙམ་ནས། ཚེ་དང་ལྡན་པ་འཆར་ཀས་གདུལ་བ་ལ་ལྟོས་པས། ཡང་དང་ཡང་དུ་དེར་བསོད་སྙོམས་ལ་ཞུགས་ན། དེས་དེར་ལན་འགའ་ཡང་བསོད་སྙོམས་མ་ཐོབ་ནས། དེ་དེ་ནས་ཕྱིར་བྱུང་བ་བྲམ་ཟེ་དེས་མཐོང་ནས། དེས་སྨྲས་པ། ཀྱེ་དགེ་སྦྱོང་ཁྱོད་ཡང་དང་ཡང་དུ་དེར་འཇུག་ན་རྙེད་པ་ཅུང་ཟད་ཡོད་དམ། ཚེ་དང་ལྡན་པ་འཆར་ཀས་དེའི་དད་པའི་ནོར་ལས་བསམས་ཏེ་སྨྲས་པ། བྲམ་ཟེ་ཁྱོད་ཉིད་ལ་ཡང་མེད་ན་ཅི་ཞིག་སྦྱིན་པར་བྱེད། བྲམ་ཟེ་དེས་སྤྱོས་ཏེ་སྨྲས་པ། དགེ་སྦྱོང་ཁྱོད་ཁྱིམ་མི་དང་བཅས་པ་ཐམས་ཅད་ལ་སྦྱིན་པར་བྱའོ། །ཚེ་དང་ལྡན་པ་འཆར་ཀས་ཐབས་ཡིན་ནོ་ཞེས་སྨྲས་ཏེ་སོང་ངོ་། །དེ་ན་བྲམ་ཟེའི་ཁྱེའུ་དགེ་སློང་གི་རྒྱུས་ཤེས་པ་ཞིག་གིས་བྲམ་ཟེ་དེ་ལ་སྨྲས་པ། མཁན་པོས་དེ་དག་གི་ཐབས་ཡིན་ནོ་ཞེས་བགྱི་བ་དེའི་དོན་ཅི་ལགས་མཁྱེན་ཏམ། དེས་སྨྲས་པ། མི་ཤེས་སོ། །སྐོལ་གྱིས་དང་དུ་བླང་ངོ་ཞེས་སྨྲས་པ་གང་ལགས་པ་དེའི་དོན་ནི་དེ་དག་གི་ཐབས་ཡིན་ནོ་ཞེས་སྨྲས་པ་དེ་ལགས་སོ། །དེས་ཡང་སྨྲས་པ། མཁན་པོས་དེ་དག་གི་ཁྱིམ་མི་དང་བཅས་པ་ཐམས་ཅད་ཅེས་བགྱི་བ་དེའི་དོན་ཅི་ལགས་མཁྱེན་ཏམ། དེས་སྨྲས་པ། མི་ཤེས་སོ། །དེ་དག་གི་ཁྱིམ་མི་དང་བཅས་པ་ཐམས་ཅད་ཅེས་བགྱི་བ་ནི། རྒྱལ་རིགས་དགེ་སྦྱོང་གཽ་ཏ་མ་འཁོར་སྟོང་ཉིས་བརྒྱ་ལྔ་
བཅུ་དང་བཅས་པ་ལགས་ཏེ། དེ་ལྟར་ན་མཁན་པོས་དོན་གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་སྤྱན་དྲངས་པར་གྱུར་ཏོ། །བྲམ་ཟེ་དེས་སྨྲས་པ། ཁོ་བོས་བྲམ་ཟེ་རིག་བྱེད་གསུམ་དང་ལྡན་པ་དག་མ་མཐོང་ངམ། ཅི་ན་གང་གི་ཕྱིར། དགེ་སྦྱོང་མགོ་རེག་དག་ལ་སྦྱིན་པར་བྱེད། དེས་སྨྲས་པ། དགེ་སྦྱོང་དེས་དེང་མཁན་པོའི་མཚན་གྱིས་སངས་རྒྱས་ལ་སོགས་པ། དགེ་སློང་གི་དགེ་འདུན་སང་མཁན་པོའི་སྡུམ་པར་སྤྱན་འདྲེན་པར་བགྱིད་དོ། །བྲམ་ཟེས་སྨྲས་པ། ཅིའི་ཕྱིར་དེ་དེ་ལྟར་བྱེད། དེས་སྨྲས་པ། མཁན་པོ་གལ་ཏེ་བདག་ལ་ཐུགས་མི་ཆེས་ན། བྲམ་ཟེའི་ཁྱེའུ་ཞིག་རྟོག་ཏུ་གཏང་དུ་གསོལ། དེས་བྲམ་ཟེའི་ཁྱེའུ་ཞིག་རྟོག་ཏུ་བཏང་བ་དང་། ཇི་ཙམ་ན་ཚེ་དང་ལྡན་པ་འཆར་ཀས་སངས་རྒྱས་ལ་སོགས་པ་དགེ་སློང་གི་དགེ་འདུན་ཚོགས་པ་ན། རྒན་པའི་མཐའ་ལོགས་སུ་འདུག་སྟེ། བྲམ་ཟེ་ཆེ་གེ་མོ་ཞིག་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་འདྲེན་ནོ་ཞེས། བྲམ་ཟེ་དེའི་མིང་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་སྤྱན་དྲངས་པ་དེས་ཐོས་སོ། །བྲམ་ཟེའི་ཁྱེའུ་དེས་དེ་ཐོས་ནས་ཕྱིར་འོངས་ཏེ། བྲམ་ཟེ་དེ་ལ་སྨྲས་པ། མཁན་པོ་དེ་བཞིན་ཏེ། བཙུན་པ་འཆར་ཀས་མཁན་པོའི་མཚན་གྱིས་སངས་རྒྱས་ལ་སོགས་པ། དགེ་སློང་གི་དགེ་འདུན་སང་མཁན་པོའི་སྡུམ་པར་སྤྱན་དྲངས་ཀྱིས། ཞལ་ཟས་སྟ་གོན་བགྱིད་དུ་སྩོལ་ཅིག །དེས་སྨྲས་པ། ཁོ་བོས་བྲམ་ཟེ་རིག་བྱེད་གསུམ་དང་ལྡན་པ་དག་མ་མཐོང་ངམ་ཅི་ན། གང་གི་ཕྱིར་དགེ་སྦྱོང་མགོ་རེག་དག་ལ་སྦྱིན་པར་བྱེད། དེ་དག་ཁྱིམ་བདག་མགོན་མེད་ཟས་སྦྱིན་གྱི་ཁྱིམ་དུ་ཟ་བར་འགྱུར་གྲང་། ཇི་ཙམ་དེ་ནང་པར་ལངས་པ་དང་། དགེ་སློང་ཆུའི་གཙང་སྦྱོར་དག་བྲམ་ཟེ་དེའི་ཁྱིམ་དུ་ལྷགས་ཏེ་སྨྲས་པ། བྲམ་ཟེ་ཆུ་གང་དུ་གཞག་པར་བྱ། བྲམ་ཟེ་དེས་སྨྲས་པ། ཁྱིམ་བདག་མགོན་མེད་ཟས་སྦྱིན་གྱི་སྡུམ་པར་རོ། །དེ་བཞིན་དུ་བཤོས་ཀྱི་གཙང་སྦྱོར་དག་ལྷགས་ཏེ་སྨྲས་པ། བྲམ་ཟེ་
ཞལ་ཟས་གང་དུ་བརྟག་པར་བྱ། བྲམ་ཟེ་དེས་སྨྲས་པ། ཁྱིམ་བདག་མགོན་མེད་ཟས་སྦྱིན་གྱི་སྡུམ་པར་རོ། །བཅོམ་ལྡན་འདས་ཀྱིས་གང་གི་ངོར་མགྲོན་དུ་བོས་པ་དེས། དུས་སྔར་འགྲོ་བར་བྱ་ཞིང་མ་ཟིན་པ་དག་ཟིན་པར་བྱའོ་ཞེས་བཀའ་སྩལ་པས། ཚེ་དང་ལྡན་པ་འཆར་ཀ་ནང་པར་སྔར་ལངས་ཏེ་འཕགས་པ་དང་། ཁྱིམ་བདག་མགོན་མེད་ཟས་སྦྱིན་གྱིས་ལམ་ཀར་དེ་མཐོང་ནས་སྨྲས་པ། བཙུན་པ་འཆར་ཀ་གར་བཞུད། དེས་སྨྲས་པ། བྲམ་ཟེ་ཞིག་གིས་བདག་ལས་བརྟེན་ཏེ། སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་པས་དེར་འགྲོའོ། །ཁྱིམ་བདག་གིས་སྨྲས་པ། བྲམ་ཟེ་དེ་ནི་མ་དད་པ་ལགས་ཀྱིས། སངས་རྒྱས་ལ་སོགས་པ་དགེ་སློང་གི་དགེ་འདུན་གྱི་གདུགས་ཚོད་བཅད་པར་གྱུར་ན་མི་རུང་གིས་བདག་ཀྱང་མཆིའོ། །དེ་གཉིས་དེར་དོང་བ་དང་། ཇི་ཙམ་ན་བྲམ་ཟེ་དེ་སྙིང་ལས་ཆུང་ངུར་འདུག་ནས། ཁྱིམ་བདག་མགོན་མེད་ཟས་སྦྱིན་གྱིས་དེ་ལ་སྨྲས་པ། བྲམ་ཟེ་ཁྱོད་ཀྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ན། ཅིའི་ཕྱིར་སྙིང་ལས་ཆུང་ངུར་འདུག །ཞལ་ཟས་སྟ་གོན་བྱེད་ན་ཅི་ཉེས། བྲམ་ཟེ་དེས་སྨྲས་པ། ཁོ་བོས་བྲམ་ཟེ་རིག་བྱེད་གསུམ་དང་ལྡན་པ་དག་མ་མཐོང་ངམ་ཅི་ན། དགེ་སྦྱོང་མགོ་རེག་དག་ལ་སྦྱིན་པར་བྱེད། ཁྱོད་བདག་གི་ཁྱིམ་དུ་ཟན་ཟོ་ཞིག །ཁྱིམ་བདག་གིས་སྨྲས་པ། བྲམ་ཟེ་ཅི་ཁོ་བོ་ལ་འབྱོར་པ་མེད་སྙམ་མམ། ཁོ་བོས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་ཇི་སྲིད་འཚོའི་བར་དུ་བསོད་སྙོམས་དང་། ན་བཟའ་དང་། གནས་མལ་དང་། བསྙུང་བའི་རྐྱེན་དང་། སྨན་གྱི་ཡོ་བྱད་དག་གིས་བསྙེན་བཀུར་བྱེད་པར་ཡང་སྤྲོ་མོད་ཀྱི། འོན་ཀྱང་ཁོ་བོ་ཁྱོད་ལ་ཕན་གདགས་པའི་ཕྱིར་སྨྲས། ཁྱེད་སྙིང་ལས་ཆུང་ངུར་མ་འདུག་པར་ཞལ་ཟས་སྟ་གོན་གྱིས་ཤིག །འདི་ལྟར་སངས་རྒྱས་ལ་སོགས་པ་དགེ་སློང་གི་དགེ་འདུན་ནི་ཀོ་ས་ལར་བྱུང་བའི་རྒྱལ་པོ་གསལ་རྒྱལ་དང་། བཙུན་མོ་ཕྲེང་ལྡན་མ་
དང་། རྒྱལ་རིགས་དབྱར་ཚུལ་མ་དང་། བླ་མཁྱེན་དྲང་སྲོང་བྱིན་དང་། རྙིང་པ་དང་། ཁོ་བོ་དང་། གཞན་ཡང་བྲམ་ཟེ་དང་། ཁྱིམ་བདག་རྒྱ་ཆེ་དགུ་དག་གིས་བཀུར་སྟིར་བྱས། བླ་མར་བྱས། རི་མོར་བྱས། མཆོད་པར་བྱས་པ་ཡིན་པས་གལ་ཏེ་ཁྱོད་ལ་བརྟེན་ནས། སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་བཅད་པར་གྱུར་ན། ཁྱོད་ལ་རྒྱལ་པོ་གདོན་མི་ཟ་བར་གནོད་པ་བྱེད་པར་འགྱུར་ཞིང་། ཁྱོད་ཕྱག་སྦལ་དུ་བཅུག་པས་འཆི་ དགོས་པར་འགྱུར་བ་གང་ཡིན་པ ་དེ་ལྟ་བུའི་གནས་ཀྱང་ཡོད་པར་འགྱུར་རོ། །བྲམ་ཟེ་དེ་སྐྲག་སྟེ་བསམས་པ། དེ་ལྟར་འགྱུར་རོ་སྙམ་ནས་དེས་སྨྲས་པ། ཁྱིམ་བདག་བདག་གིས་ཞལ་ཟས་སྟ་གོན་མ་བྱས་ན་ད་ཇི་ལྟར་བྱ། ཁྱིམ་བདག་གིས་སྨྲས་པ། བྲམ་ཟེ་མཉན་ཡོད་ན་གང་ཉོ་བས་མི་རྙེད་པའི་རྫས་དེ་ལྟ་བུ་མེད་ཀྱིས། ཀཱ་པ་ཤ་ཎ་དག་འོན་ཅིག་དང་ཁོ་བོས་ཞལ་ཟས་སྟ་གོན་བྱའོ། །བྲམ་ཟེས་སྨྲས་པ། ཁྱིམ་བདག་ཀཱ་པ་ཤ་ཎ་ཇི་སྙེད་དག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་གྱི་གདུགས་ཚོད་འབྱོར་པར་འགྱུར། ཁྱིམ་བདག་གིས་སྨྲས་པ། ཀཱ་པ་ཤ་ཎ་ལྔ་བརྒྱས་སོ། །བྲམ་ཟེ་དེས་ཁྱིམ་བདག་ལ་ཀཱ་པ་ཤ་ཎ་ལྔ་བརྒྱ་ཕུལ་ནས། ཁྱིམ་བདག་མགོན་མེད་ཟས་སྦྱིན་གྱིས་དེ་དག་གི་སྟེང་དུ་ཀཱ་པ་ཤ་ཎ་གཞན་དག་གིས་ཀྱང་བསྣན་ཏེ་ཞལ་ཟས་སྟ་གོན་བྱས་སོ། །བྲམ་ཟེ་དེས་སྨྲས་པ། ཁྱིམ་བདག་བདག་ལ་བསྩང་སྡེར་དག་ཀྱང་མི་བདོག་གོ །ཁྱིམ་བདག་མགོན་མེད་ཟས་སྦྱིན་གྱིས་སྨྲས་པ། བྲམ་ཟེ་ཁྱོད་བསྩང་སྡེར་དག་གིས་མ་འཚེར་པར་སྙིང་ལས་ཆུང་ངུར་འདུག་ཤིག་དང་། དེ་དག་དྲང་སྲོང་གི་སྣོད་དང་བཅས་ཏེ་གཤེགས་པར་འགྱུར་རོ། །དེ་ནས་སངས་རྒྱས་ལ་སོགས་པ་དགེ་སློང་གི་དགེ་འདུན་གཤེགས་ཏེ་བཞུགས་ནས། དགེ་སློང་རྣམས་ཀྱིས་ལྷུང་བཟེད་དག་བྱི་དོར་བྱས་པ་བྲམ་ཟེ་དེས་མཐོང་ནས། དེས་བསམས་ པ། རེ་ཞིག་སྣོད་དག་ཀྱང་བདག་གིས་བྱི་དོར་བྱ་མི་དགོས ་སོ་སྙམ་ནས་དེ་མངོན་པར་དད་པར་གྱུར་ཏེ། ཚེ་དང་ལྡན་པ་འཆར་ཀ་ལ་སྨྲས་
པ། བཙུན་པ་འཆར་ཀ་ཁྱོད་བདག་གི་དགེ་བའི་བཤེས་གཉེན་ལགས་ཀྱིས། ཁྱོད་ཀྱིས་ཀྱང་བྲིམ་པ་མཛོད་ལ་སླད་ཀྱིས་བཤོས་གསོལ་ཅིག །སངས་རྒྱས་ལ་སོགས་པ་དགེ་སློང་གི་དགེ་འདུན་གསོལ་ནས། བཅོམ་ལྡན་འདས་ཀྱིས་ཡོན་བཤད་པ་མཛད་དེ་གདན་ལས་བཞེངས་ཏེ་གཤེགས་སོ། །དེ་ནས་བྲམ་ཟེ་དེས་སྨྲས་པ། བཙུན་པ་འཆར་ཀ་ད་ཁྱོད་བཞུགས་ཏེ་ཞལ་ཟས་ཀྱི་བྱ་བ་མཛོད་ཅིག། དེ་འདུག་པ་དང་། བྲམ་ཟེ་དེས་ཟས་བྲིམས་ཏེ་དེས་ཟས་ཀྱི་བྱ་བ་བྱས་པ་དང་། བྲམ་ཟེ་དེ་ཆུང་མ་དང་བཅས་པ་ཚེ་དང་ལྡན་པ་འཆར་ཀའི་མདུན་དུ་ཆོས་མཉན་པའི་ཕྱིར་འདུག་ནས། ཚེ་དང་ལྡན་པ་འཆར་ཀས་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཁོང་དུ་ཆུད་ནས། འདི་ལྟར་བྲམ་ཟེ་དེ་ཆུང་མ་དང་བཅས་པས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས། བཙུན་པ་འཆར་ཀས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ནB ཀྱང་མ་བགྱིས། བྱམས་པ་དང་། མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་། ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག །འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་
བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །བཙུན་པ་འཆར་ཀས་ཇི་སྲིད་འཚོའི་བར་དུ་བདག་གི་བསོད་སྙོམས་དང་། ན་བཟའ་དང་། གནས་མལ་དང་། བསྙུང་བའི་རྐྱེན་དང་། སྨན་གྱི་ཡོ་བྱད་དག་བཞེས་པར་ཅི་གནང་། ཚེ་དང་ལྡན་པ་འཆར་ཀས་སྨྲས་པ། རབ་ཏུ་བྱུང་བ་ནི་གཞན་ལ་ཕན་པས་རྗེས་སུ་འཛིན་པ་ལ་ཞུགས་པ་ཡིན་པས། བྲམ་ཟེ་གཞན་དག་ལ་ཡང་ཕན་ པ་བྱ་དགོས ་སོ་ཞེས་སྨྲས་ཏེ་དང་དུ་མ་བླངས་སོ། །དེ་ན་ཚེ་དང་ལྡན་པ་འཆར་ཀས་མཉན་ཡོད་དུ་བྲམ་ཟེའི་ཁྱིམ་ལྔ་པ་གཉི་ག་ནས་བཏུལ་ཅིང་བཞག་གོ །ཚེ་དང་ལྡན་པ་འཆར་ཀས་བསམས་པ། གང་གདུལ་བའི་དུས་ཡིན་སྙམ་ན། མཉན་ཡོད་ན་བྲམ་ཟེ་ཞིག་འདུག་པ་དེའི་ཆུང་མ་གཟུགས་བཟང་བ། བལྟ་ན་སྡུག་པ་མཛེས་པ་ཡིན་ནས། དེ་དེ་ལ་ཤིན་ཏུ་ལྷག་པར་ཆགས་པས་ཁྱིམ་དུ་འགའ་ཡང་འཇུག་ཏུ་མི་སྟེར་ནས། ཚེ་དང་ལྡན་པ་འཆར་ཀས་བསམས་པ། བྲམ་ཟེ་དེ་གདུལ་བའི་དུས་ཡིན་ནོ་སྙམ་ནས། དེ་བྲམ་ཟེ་དེའི་ཁྱིམ་དུ་སོང་བ་དང་། ཇི་ཙམ་ན་བྲམ་ཟེ་དེ་གཅིན་གཅི་ཞིང་འདུག་པས་ཚེ་དང་ལྡན་པ་འཆར་ཀ་མཐོང་ནས་དེས་སྨྲས་པ། དགེ་སྦྱོང་མ་འཇུག་པར་སྡོད་ཅིག །ཚེ་དང་ལྡན་པ་འཆར་ཀས་འདི་ལྟར་བྲམ་ཟེའི་གཅིན་གྱི་རྒྱུན་མི་འཆད་པ་དེ་ལྟར་བྱིན་གྱིས་བརླབས་ནས། ཚེ་དང་ལྡན་པ་འཆར་ཀ་ནང་དུ་ཞུགས་ཏེ་བྲམ་ཟེ་དེའི་ཆུང་མ་དེ་ཡང་འདི་ལྟར་དེའི་ལྟོ་ན་ནང་གྲོལ་གང་དག་ཡོད་པ་དེ་དག་ཐམས་ཅད་ཕྱི་རོལ་ནས་སྣང་བ་དེ་ལྟར་བྱིན་གྱིས་བརླབས་ནས། ཚེ་དང་ལྡན་པ་འཆར་ཀ་ཕྱིར་བྱུང་བ་དང་། བྲམ་ཟེ་དེས་སྨྲས་པ། བཙུན་པ་འཆར་ཀ་ཁྱོད་ཀྱིས་བདག་གི་མཆིས་འབྲང་གཟིགས་སམ། དེས་སྨྲས་པ། མཐོང་ངོ་། །ཅི་འདྲ་ཁྱོད་ཀྱིས་ཇི་ལྟར་མཐོང་བར་གྱུར་པ་དེ་འདྲའོ། །དེ་ཞུགས་ཏེ་བལྟས་ན་དེ་ལྟར་མི་སྡུག་པར་
མཐོང་ནས་དེས་དེ་ལ་སྨྲས་པ། བྲམ་ཟེ་མོ་ཁྱོད་ཀྱིས་བཙུན་པ་འཆར་ཀ་ལ་ཅུང་ཞིག་མ་སྨྲས་སམ། དེས་སྨྲས་པ། ཅུང་ཟད་ཀྱང་མ་སྨྲས་ཏེ། འདི་ལྟར་དེས་བདག་སྤྱོས་ཏེ་དམོད་མོ་བགྱིས་ཀྱིས་བཞུད་ལ་དེ་ལ་བཟོད་པ་གསོལ་ཅིག །དེ་སོང་སྟེ་སྨྲས་པ། བཙུན་པ་འཆར་ཀ་བདག་གི་མཆིས་འབྲང་ལ་བཟོད་པ་མཛད་དུ་གསོལ། ཚེ་དང་ལྡན་པ་འཆར་ཀས་སྨྲས་པ། བཟོད་པར་བྱའོ། །དེས་དེ་སྔོན་ཇི་ལྟ་བ་བཞིན་དུ་གྱུར་པ་དང་། བྲམ་ཟེ་དེ་དད་པར་གྱུར་ནས་དེས་སྨྲས་པ། བཙུན་པ་འཆར་ཀ་ཅིའི་སླད་དུ་བྱོན། ཁྱོད་ཉིད་གདུལ་བའི་དོན་དུའོ། །བཙུན་པ་འཆར་ཀ་དེའི་སླད་དུ་འདི་ཉིད་དུ་བཞུགས་ཏེ་ཞལ་ཟས་ཀྱི་བྱ་བ་མཛོད་ཅིག། ཚེ་དང་ལྡན་པ་འཆར་ཀ་དེར་འདུག་སྟེ་ཟས་ཀྱི་བྱ་བ་བྱས་པ་དང་། བྲམ་ཟེ་དེ་ཆུང་མ་དང་བཅས་པ་ཚེ་དང་ལྡན་པ་འཆར་ཀའི་མདུན་དུ་ཆོས་མཉན་པའི་ཕྱིར་འདུག་ནས། ཚེ་དང་ལྡན་པ་འཆར་ཀས་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཁོང་དུ་ཆུད་ནས། འདི་ལྟར་བྲམ་ཟེ་དེ་ཆུང་མ་དང་བཅས་པས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས། བཙུན་པ་འཆར་ཀས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་། ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་
ཀྱི་ནང་དུ་ནི་བཞག །འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །བཙུན་པ་འཆར་ཀས་ཇི་སྲིད་འཚོའི་བར་དུ་བདག་གི་བསོད་སྙོམས་དང་། ན་བཟའ་དང་། གནས་མལ་དང་། བསྙུང་བའི་རྐྱེན་དང་། སྨན་གྱི་ཡོ་བྱད་དག་བཞེས་པར་ཅི་གནང་། ཚེ་དང་ལྡན་པ་འཆར་ཀས་སྨྲས་པ། རབ་ཏུ་བྱུང་བ་ནི་གཞན་ལ་ཕན་པས་རྗེས་སུ་འཛིན་པ་ལ་ཞུགས་པ་ཡིན་པས། བྲམ་ཟེ་གཞན་དག་ལ་ཡང་ཕན་ པ་བྱ་དགོས ་སོ་ཞེས་སྨྲས་ཏེ་དང་དུ་མ་བླངས་སོ། །དེ་ན་ཚེ་དང་ལྡན་པ་འཆར་ཀས་མཉན་ཡོད་དུ་བྲམ་ཟེའི་ཁྱིམ་དྲུག་པ་གཉི་ག་ནས་བཏུལ་ཅིང་བཞག་གོ །ཚེ་དང་ལྡན་པ་འཆར་ཀས་བསམས་པ། གང་གདུལ་བའི་དུས་ཡིན་སྙམ་ན། མཉན་ཡོད་ན་བྲམ་ཟེ་ཞིག་འདུག་པ་དེའི་ཆུང་མ་གཟུགས་བཟང་བ། བལྟ་ན་སྡུག་པ། མཛེས་པ་ཡིན་ཏེ། བྲམ་ཟེ་དེ་མེ་ཏོག་དང་། ཡམ་སྲེག་ཤིང་གི་ཕྱིར་ཕྱི་རོལ་དུ་བྱུང་བ་དང་། ཚེ་དང་ལྡན་པ་འཆར་ཀས་བསམས་པ། བྲམ་ཟེ་དེ་གདུལ་བའི་དུས་ཡིན་ནོ་སྙམ་ནས། དེ་བྲམ་ཟེའི་ཁྱིམ་དུ་སོང་བ་དང་། དེའི་ཆུང་མ་དེས་ཚེ་དང་ལྡན་པ་འཆར་ཀ་སྒོ་ཁང་དུ་མཐོང་ནས། དེ་ནང་དུ་ཞུགས་པ་དང་། ཚེ་དང་ལྡན་པ་འཆར་ཀ་ཡང་ཁྱིམ་གྱི་ནང་དུ་ཞུགས་སོ། །དེ་གནས་ཁང་དུ་ཞུགས་པ་དང་། ཚེ་དང་ལྡན་པ་འཆར་ཀ་ཡང་དེའི་ཕྱི་བཞིན་གནས་ཁང་དུ་ཞུགས་སོ། །དེ་གནས་ཁང་ནས་ཕྱིར་བྱུང་སྟེ་སྐས་ལས་ཁང་སྟེང་དུ་འཛེག་པར་བརྩམས་པ་དང་། ཚེ་དང་ལྡན་པ་འཆར་ཀས་ཀྱང་དེའི་ཕྱི་བཞིན་སྐས་ལས་ཁང་སྟེང་དུ་འཛེག་པར་བརྩམས་སོ། །དེས་སྐས་ཕུལ་བ་དང་།
ཚེ་དང་ལྡན་པ་འཆར་ཀ་ས་ལ་སྒྱེལ་ནས་དེ་འགོག་པ་ལ་སྙོམས་པར་ཞུགས་པ་དང་། དེས་བསམས་པ། མ་ཤིའམ་སྙམ་ནས་དེ་བབས་ཏེ་བསླང་བར་བརྩམས་ན་འགུལ་བར་ཡང་མ་ནུས་སོ། །བྲམ་ཟེ་འོངས་ནས་དྲིས་པ། འདི་ཅི་ཡིན། བྲམ་ཟེ་མོས་རྒྱས་པར་བརྗོད་པ་དང་། དེས་སྨྲས་པ། ཁྱོད་ཀྱིས་འདི་དེ་ལྟར་ཕུལ་བ་ནི་མ་ལེགས་པ་བྱས་ཏེ། འདི་ནི་བྲམ་ཟེ་མདུན་ན་འདོན་གྱི་བུ་ལས་རབ་ཏུ་བྱུང་བ། རྒྱལ་པོ་གསལ་རྒྱལ་གྱི་ཆུང་པོ་གྲོགས། བཙུན་མོ་ཕྲེང་ལྡན་མའི་སློབ་དཔོན་ཡིན་ཏེ། འདི་དག་གིས་རྒྱལ་པོ་ལས་གཞོན་ནུའི་ཡོངས་སུ་སྤང་བ་ཐོབ་པས་བདག་ཅག་རྒྱལ་པོས་ཕྱག་སྦལ་དུ་བཅུག་པས་འཆི་བར་བྱ་ དགོས་པ ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ། །བྲམ་ཟེ་མོས་ཚེ་དང་ལྡན་པ་འཆར་ཀའི་རྐང་པ་གཉིས་ལ་གཏུགས་ཏེ། འཕགས་པ་ཁྱོད་ཀྱིས་མི་མཁྱེན་པ་དང་། མི་གཟིགས་པ་དང་། མི་རིག་པ་དང་། རྣམ་པར་མི་མཁྱེན་པ་ཅི་ཡང་མ་མཆིས་ཀྱིས་བཟོད་པར་གསོལ་ཞེས་བཟོད་པ་གསོལ་བ་དང་། ཚེ་དང་ལྡན་པ་འཆར་ཀ་ལངས་ཏེ་སྨྲས་པ། བཟོད་པར་བྱའོ། །བྲམ་ཟེ་དེ་ངོ་མཚར་སྐྱེས་ནས་དེས་སྨྲས་པ། བཙུན་པ་འཆར་ཀ་ཅིའི་སླད་དུ་བྱོན། ཁྱོད་ཉིད་གདུལ་བའི་དོན་དུའོ། །བཙུན་པ་འཆར་ཀ་དེའི་སླད་དུ་འདི་ཉིད་དུ་བཞུགས་ཏེ་ཞལ་ཟས་ཀྱི་བྱ་བ་མཛོད་ཅིག །ཚེ་དང་ལྡན་པ་འཆར་ཀས་དེར་འདུག་སྟེ་ཟས་ཀྱི་བྱ་བ་བྱས་པ་དང་། བྲམ་ཟེ་དེ་ཆུང་མ་དང་བཅས་པ་ཚེ་དང་ལྡན་པ་འཆར་ཀའི་མདུན་དུ་ཆོས་མཉན་པའི་ཕྱིར་འདུག་ནས་ཚེ་དང་ལྡན་པ་འཆར་ཀས་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཁོང་དུ་ཆུད་ནས་འདི་ལྟར་བྲམ་ཟེ་དེ་ཆུང་མ་དང་བཅས་པས་སྟན་དེ་ཉིད་ལ་འདུག་བཞིན་དུ། འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས། བཙུན་པ་འཆར་ཀས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་
ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་། མཛའ་བཤེས་དང་རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག །འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །བཙུན་པ་འཆར་ཀས་ཇི་སྲིད་འཚོའི་བར་དུ་བདག་གི་བསོད་སྙོམས་དང་། ན་བཟའ་དང་། གནས་མལ་དང་། བསྙུང་བའི་རྐྱེན་དང་། སྨན་གྱི་ཡོ་བྱད་དག་བཞེས་པར་ཅི་གནང་། ཚེ་དང་ལྡན་པ་འཆར་ཀས་སྨྲས་པ། རབ་ཏུ་བྱུང་བ་ནི་གཞན་ལ་ཕན་པས་རྗེས་སུ་འཛིན་པ་ལ་ཞུགས་པ་ཡིན་པས། བྲམ་ཟེ་གཞན་དག་ལ་ཡང་ཕན་ པ་བྱ་དགོས ་སོ་ཞེས་སྨྲས་ཏེ། དང་དུ་མ་བླངས་སོ། །དེ་ནས་ཚེ་དང་ལྡན་པ་འཆར་ཀས་མཉན་ཡོད་དུ་བྲམ་ཟེའི་ཁྱིམ་བདུན་པ་གཉི་ག་ནས་བཏུལ་ཅིང་བཞག་གོ །ཚེ་དང་ལྡན་པ་འཆར་ཀས་བསམས་པ། གང་གདུལ་བའི་དུས་ཡིན་སྙམ་ན། མཉན་ཡོད་ན་བྲམ་ཟེ་ཞིག་འདུག་པ་དེའི་ཆུང་མ་གཟུགས་བཟང་བ། བལྟ་ན་སྡུག་པ། མཛེས་པ་ཡིན་ཏེ། བྲམ་ཟེ་དེ་མེ་ཏོག་དང་ཡམ་སྲེག་ཤིང་གི་ཕྱིར་ཕྱི་རོལ་དུ་བྱུང་བ་དང་། ཚེ་དང་ལྡན་པ་འཆར་ཀས་བསམས་པ། བྲམ་ཟེ་དེ་གདུལ་བའི་དུས་ཡིན་ནོ་སྙམ་ནས། དེ་བྲམ་ཟེ་དེའི་ཁྱིམ་དུ་སོང་བ་དང་། བྲམ་ཟེ་མོ་དེ་གཟུགས་ཀྱི་རྒྱགས་པ་དང་། ལང་ཚོའི་
རྒྱགས་པ་དང་། རིགས་ཀྱི་རྒྱགས་པ་དང་། དབང་ཕྱུག་གི་རྒྱགས་པས་རྒྱགས་ནས་ཚིག་ཀྱང་མི་སྟེར་རོ། །ཚེ་དང་ལྡན་པ་འཆར་ཀས་དེའི་སྔོན་གྱི་ལས་ཟད་པ་ལས་བསམས་ནས་ཚིགས་སུ་བཅད་པ་སྨྲས་པ། སྲིང་མོ་རྙིང་པ་ཟད་བྱེད་ཅིང་། །སར་པ་ཆུང་ཟད་སྐྱེད་མི་བྱེད། །བག་མེད་བརྒྱན་པ་མཐོང་ནས་ནི། །མཆི་མས་བརྣངས་པའི་བཞིན་གྱིས་ངུ་། །ཞེས་སྨྲས་ཏེ་སོང་ངོ་། །བྲམ་ཟེ་མོ་དེ་འདིས་བདག་སྤྱོས་སོ་ཞེས་གཤེ་ཞིང་དེས་གོས་དྲི་མ་ཅན་གྱོན་ཏེ་ཁྲི་ཞིགས་པའི་སྟེང་དུ་ཉལ་ཏེ་འདུག་གོ །བྲམ་ཟེ་དེ་འོངས་པ་དང་། དེས་དེ་མཐོང་ནས་སྨྲས་པ། བྲམ་ཟེ་མོ་འདི་ཅི་ཉེས། བྲམ་ཟེ་མོས་གཤེས་ཏེ་སྨྲས་པ། གལ་ཏེ་ཁྱོད་ལ་གང་སྒོ་ན་འགྲེང་བའི་མི་གཅིག་ལ་ཡང་བཟའ་བ་དང་། བགོ་བ་སྦྱིན་པའི་འབྱོར་པ་མེད་ན་ཁྱོད་ལ་ཁྱིམ་མི་མོ་བླངས་པས་ཅི་བྱ། དགེ་སྦྱོང་འཆར་ཀ་གང་ཡིན་པ་དེས་ཁོ་མོ་སྤྱོས་སོ། །བྲམ་ཟེས་སྨྲས་པ། བཟང་མོ་དེ་ནི་བྲམ་ཟེ་མདུན་ན་འདོན་གྱི་བུ་ལས་རབ་ཏུ་བྱུང་བ་ཡིན་གྱིས་དེ་ལ་བཟོད་པར་གྱིས་ཤིག །བྲམ་ཟེ་མོས་སྨྲས་པ། གལ་ཏེ་དེ་གསོན་ན་ཁོ་མོ་མི་གསོན་ནོ། །བྲམ་ཟེས་སྨྲས་པ། བཟང་མོ་དེ་ནི་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་ཆུང་པོ་གྲོགས། བཙུན་མོ་ཕྲེང་ལྡན་མའི་སློབ་དཔོན་ཡིན་ཏེ། དེ་དག་གིས་རྒྱལ་པོ་ལས་གཞོན་ནུའི་ཡོངས་སུ་སྤང་བ་ཐོབ་པས། གལ་ཏེ་བདག་གིས་དེ་ལ་སྡུག་བསྔལ་ཅུང་ཟད་བསྐྱེད་པར་གྱུར་ན། བདག་ཅག་རྒྱལ་པོས་ཕྱག་སྦལ་དུ་བཅུག་པས་འཆི་བར་བྱ་ དགོས་པ ་གང་ཡིན་པ་དེ་ལྟ་བུའི་གནས་ཡོད་པར་འགྱུར་གྱིས་བཟོད་པར་གྱིས་ཤིག །བྲམ་ཟེ་མོས་སྨྲས་པ། བྲམ་ཟེ་མང་དུ་སྨྲས་ཏེ་ཅི་རུང་། གལ་ཏེ་དེ་གསོན་ན་ཁོ་མོ་མི་གསོན་ནོ། །འདོད་པ་སྟེན་པས་ནི་སྡིག་པའི་ལས་མི་བྱ་བ་ཅི་ཡང་མེད་པས་བྲམ་ཟེ་དེ་རལ་གྲི་མཆན་དུ་བཅུག་སྟེ་འཕགས་པ་དང་། ཚེ་དང་ལྡན་པ་འཆར་ཀས་ཐག་རིང་པོ་ཁོ་ན་ནས་དེ་མཐོང་ན། དེ་སེམས་ཇི་ལྟ་བུས་འོང་སྙམ་ན། ཇི་ཙམ་ན་གསོད་པའི་སེམས་ཀྱིས་འོང་བར་མཐོང་ནས། ཚེ་དང་ལྡན་པ་འཆར་ཀས་ལོ་མ་མ་ཡིན་པའི་སྤྱིལ་བུ་མངོན་པར་སྤྲུལ་ནས་དེར་ཞུགས་ཏེ་འདུག་གོ །བྲམ་ཟེ་དེས་སྨྲས་པ། བཙུན་པ་འཆར་ཀ་སྒོ་ཕྱེ་ཤིག །ཚེ་
དང་ལྡན་པ་འཆར་ཀས་སྨྲས་པ། ཁྱོད་སྐྱེས་བཟང་པོས་འོངས་པར་གྱུར་ན། ཁོ་བོས་ཅིའི་ཕྱིར་སྒོ་མི་དབྱེ། རལ་གྲི་བོར་ཅིག །བྲམ་ཟེས་བསམས་པ། བགགས་ཏེ་གསད་དོ་སྙམ་ནས་དེས་རལ་གྲི་བོར་རོ། །ཚེ་དང་ལྡན་པ་འཆར་ཀས་སྨྲས་པ། སྡིག་པའི་སེམས་དེ་ཡང་བོར་ཅིག །བྲམ་ཟེ་དེས་བསམས་པ། འདི་ནི་བདག་ཉིད་ཆེན་པོ་ཞིག་སྟེ། བདག་གི་སེམས་ཀྱང་ཤེས་སོ་སྙམ་ནས་དེ་མངོན་པར་དད་པར་གྱུར་པ་དང་། ཚེ་དང་ལྡན་པ་འཆར་ཀས་རྫུ་འཕྲུལ་མངོན་པར་འདུ་བྱ་བ་དེ་ཕྱིར་བསྡུས་ནས་དེ་བཞིན་དུ་འདུག་གོ །བྲམ་ཟེ་དེས་ཚེ་དང་ལྡན་པ་འཆར་ཀའི་རྐང་པ་གཉིས་ལ་ཕྱག་འཚལ་ཏེ་ཆོས་མཉན་པའི་ཕྱིར་མདུན་དུ་འདུག་པ་དང་། ཚེ་དང་ལྡན་པ་འཆར་ཀས་དེའི་བསམ་པ་དང་། བག་ལ་ཉལ་དང་། ཁམས་དང་རང་བཞིན་ཁོང་དུ་ཆུད་ནས། འདི་ལྟར་བྲམ་ཟེ་དེས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས་བཙུན་པ་འཆར་ཀས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་། མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་། ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག །འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་
པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །དེ་ནས་བྲམ་ཟེ་དེས་སྨྲས་པ། བཙུན་པ་འཆར་ཀ་ཁྱོད་བདག་གི་སྡུམ་པར་བྱོན་ཏམ། སོན་ཏོ། །བཙུན་པ་འཆར་ཀས་བདག་གི་བྲམ་ཟེ་མོ་ལ་ཇི་སྐད་བཀའ་སྩལ། ཚེ་དང་ལྡན་པ་འཆར་ཀས་སྨྲས་པ། ཁོ་བོས་དེ་ལ་འདི་སྐད་ཅེས། སྲིང་མོ་རྙིང་པ་ཟད་བྱེད་ཅིང་། །སར་པ་ཅུང་ཟད་སྐྱེད་མི་བྱེད། །བག་མེད་བརྒྱན་པ་མཐོང་ནས་ནི། །མཆི་མས་བརྣངས་པའི་བཞིན་གྱིས་ངུ་། །ཞེས་སྨྲས་སོ། །བཙུན་པ་ཚིགས་སུ་བཅད་པ་དེའི་དོན་ཅི་ལགས། བྲམ་ཟེ་སྔོན་བྱུང་བ་འདས་པའི་དུས་ན་རི་བྲགས་ཤིག་ཏུ་དུས་སྟོན་བྱུང་ནས། དེ་ན་ཁྱིམ་བདག་གི་ཆུང་མ་རབ་ཏུ་མང་པོ་དག་རང་གི་རྒྱན་དག་གིས་བརྒྱན་ཏེ་སྐྱེད་མོས་ཚལ་གྱི་སར་དོང་བ་དེ་དག་གྲོང་སྤྲང་མོ་ཞིག་གིས་མཐོང་ནས། དེ་བདག་ཉིད་རྒུད་པའི་མྱ་ངན་བྱེད་དོ། །སངས་རྒྱས་རྣམས་འབྱུང་བ་མེད་པའི་ཚེ་རང་སངས་རྒྱས་དམན་པ་དང་། བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ་། །རང་སངས་རྒྱས་ཞིག་དེ་ལ་ཕན་གདགས་པའི་ཕྱིར་ཕྱོགས་དེར་སོང་བ་དང་། དེའི་ལུས་མཛེས་པ་དང་། སེམས་མཛེས་པ་གྲོང་སྤྲང་མོ་དེས་མཐོང་ནས་དེས་སྤྲང་ཟན་ཅུང་ཟད་ཅིག་རྙེད་པ་དང་། དེས་བསམས་པ། བདག་གིས་སྦྱིན་གནས་འདི་ལྟ་བུ་ལ་མཆོད་པ་མ་བྱས་པས་དེས་ན་གནས་སྐབས་འདི་ལྟ་བུར་གྱུར་གོར་མ་ཆག་གིས། གལ་ཏེ་བཅོམ་ལྡན་འདས་འདི་བདག་ལས་བསོད་སྙོམས་ཅུང་ཟད་ལེན་པར་འགྱུར་ན་བདག་གིས་འདི་ལ་དབུལ་བར་བྱའོ་སྙམ་མོ། །རང་སངས་རྒྱས་དེས་དེ་ལ་སྙིང་བརྩེ་བའི་ཕྱིར་ལྷུང་བཟེད་བཟེད་པ་དང་། དེས་དེ་ལ་ཕུལ་ལོ། །རང་སངས་རྒྱས་དེ་དེ་ལ་སྙིང་བརྩེ་བས་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་འབར་བ་དང་། གསལ་བ་དང་། ཆར་འབེབས་
པ་དང་། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས་དེ་ཤིང་ལྗོན་པ་རྩ་བ་ནས་བཅད་པ་བཞིན་དུ་རང་སངས་རྒྱས་དེའི་རྐང་པ་གཉིས་ཀྱི་དྲུང་དུ་འགྱེལ་ནས། དེས་སྨོན་ལམ་འདི་སྐད་ཅེས་བདག་ལས་འདིའི་རྣམ་པར་སྨིན་པས་ནམ་ཡང་སྡུག་བསྔལ་བར་མ་གྱུར་ཅིག་ཅེས་བཏབ་བོ། །བྲམ་ཟེ་དེའི་ཚེ་དེའི་དུས་ན་གྲོང་སྤྲང་མོ་གང་ཡིན་པ་དེ་ནི་ཁྱོད་ཀྱི་ཆུང་མ་དེ་ཡིན་ཏེ། དེས་རང་སངས་རྒྱས་ལ་མཆོད་པ་བྱས་པའི་ལས་དེའི་རྣམ་པར་སྨིན་པས་ད་ལྟར་འདི་ལྟ་བུར་སྐྱེས་ཏེ་ཁོ་བོས་དེའི་ལས་ཀྱི་རྣམ་པར་སྨིན་པ་དེ་ཟད་པ་ལས་བསམས་ནས་འདི་སྐད་ཅེས། སྲིང་མོ་རྙིང་པ་ཟད་བྱེད་ཅིང་། །སར་པ་ཅུང་ཟད་སྐྱེད་མི་བྱེད། །བག་མེད་བརྒྱན་པ་མཐོང་ནས་ནི། །མཆི་མས་བརྣངས་པའི་བཞིན་གྱིས་ངུ་། །ཞེས་སྨྲས་སོ། །བཙུན་པ་འཆར་ཀས་དོན་གྱིས་ན་བདག་གི་མཆིས་འབྲང་ལ་བསྐུལ་བ་མཛད་དོ། །བཙུན་པ་འཆར་ཀས་སང་བདག་གི་སྡུམ་པར་གདུགས་ཚོད་གསོལ་བར་ཅི་གནང་། ཚེ་དང་ལྡན་པ་འཆར་ཀས་བྲམ་ཟེ་དེ་ལ་ཅང་མི་སྨྲ་བས་དང་དུ་བླངས་སོ། །དེ་ནས་བྲམ་ཟེ་དེས་ཚེ་དང་ལྡན་པ་འཆར་ཀས་ཅང་མི་སྨྲ་བས་དང་དུ་བླངས་པར་རིག་ནས་སོང་ངོ་། །བྲམ་ཟེ་མོ་དེ་ཡང་འགྱོད་པ་སྐྱེས་ཏེ་བདག་གིས་བྲམ་ཟེ་འཆར་ཀ་སོད་ཅིག་ཅེས་མངགས་པ་ནི་མ་ལེགས་པ་བྱས་ཏེ་བྲམ་ཟེ་དེས་བཙུན་པ་འཆར་ཀ་བསད་པར་མ་གྱུར་ཏམ་སྙམ་མོ། །བྲམ་ཟེ་དེ་འོངས་པ་དང་ཆུང་མས་སྨྲས་པ། རྗེའི་སྲས་ཁྱོད་ཀྱིས་བཙུན་པ་འཆར་ཀ་མ་བཀྲོངས་སམ། བྲམ་ཟེས་སྨྲས་པ། དེ་ནི་བདག་ཉིད་ཆེན་པོ་ཡིན་པས་སུ་ཞིག་གིས་བཀྲོངས་པར་ནུས། ཆུང་མས་སྨྲས་པ། འོ་ན་ཁྱོད་ཀྱིས་དེ་སྤྱན་མ་དྲངས་སམ། བྲམ་ཟེས་སྨྲས་པ། ཁོ་བོས་སང་ཁྱིམ་གཞན་དུ་གདུགས་ཚོད་ལ་སྤྱན་དྲངས་ཀྱིས་ཞལ་ཟས་སྟ་གོན་གྱིས་ཤིག །བྲམ་ཟེ་མོ་དེས་ཞལ་ཟས་གྲང་ཆ་གང་དག་ཡིན་པ་དེ་དག་ནི་དེ་ཉིད་ཀྱི་ཉིན་མོ་སྟ་གོན་བྱས། དྲོད་བག་གང་དག་ཡིན་པ་དེ་དག་ནི་ཕྱི་དེ་ཉིན་པར་སྟ་གོན་བྱས་སོ། །ཚེ་དང་ལྡན་པ་འཆར་ཀ་ཡང་ཕྱི་དེ་ཉིན་པར་སྔ་དྲོ་ཤམ་ཐབས་བགོས། ཆོས་གོས་དང་ལྷུང་བཟེད་ཐོགས་ཏེ་བྲམ་ཟེ་དེའི་ཁྱིམ་ག་ལ་བ་དེར་སོང་ནས་ཕྱིན་པ་དང་།
སྟན་བཤམས་པ་ཉིད་ལ་འདུག་གོ །དེ་ནས་བྲམ་ཟེ་དེ་ཆུང་མ་དང་བཅས་པས་ཚེ་དང་ལྡན་པ་འཆར་ཀ་བདེ་བར་འདུག་པར་རིག་ནས་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད། སྟོབས་པར་བྱེད་དོ། །རྣམ་གྲངས་དུ་མར་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས། ཚེ་དང་ལྡན་པ་འཆར་ཀ་ཟན་ཟོས་ཤིང་། ལག་པ་བསྙལ་ལྷུང་བཟེད་བཞག་པར་རིག་ནས་སྟན་ཆེས་དམའ་བ་ཞིག་བླངས་ཏེ། ཚེ་དང་ལྡན་པ་འཆར་ཀའི་མདུན་དུ་ཆོས་མཉན་པའི་ཕྱིར་འདུག་པ་དང་། ཚེ་དང་ལྡན་པ་འཆར་ཀས་བྲམ་ཟེ་མོ་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཁོང་དུ་ཆུད་ནས་འདི་ལྟར་བྲམ་ཟེ་མོ་དེས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས། བཙུན་པ་འཆར་ཀས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག །འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་། ཆོས་དང་། དགེ་སློང་
གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་མར་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །བཙུན་པ་འཆར་ཀས་ཇི་སྲིད་འཚོའི་བར་དུ་བདག་གི་བསོད་སྙོམས་དང་། ན་བཟའ་དང་། གནས་མལ་དང་། བསྙུང་བའི་རྐྱེན་དང་། སྨན་གྱི་ཡོ་བྱད་དག་བཞེས་པར་ཅི་གནང་། ཚེ་དང་ལྡན་པ་འཆར་ཀས་སྨྲས་པ། རབ་ཏུ་བྱུང་བ་ནི་གཞན་ལ་ཕན་པས་རྗེས་སུ་འཛིན་པ་ལ་ཞུགས་པ་ཡིན་པས་བྲམ་ཟེ་གཞན་དག་ལ་ཡང་ཕན་ པ་བྱ་དགོས ་སོ་ཞེས་སྨྲས་ཏེ་དང་དུ་མ་བླངས་སོ། །དེ་ན་ཚེ་དང་ལྡན་པ་འཆར་ཀས་མཉན་ཡོད་དུ་བྲམ་ཟེའི་ཁྱིམ་བརྒྱད་པ་གཉི་ག་ནས་བཏུལ་ཅིང་བཞག་གོ །ཚེ་དང་ལྡན་པ་འཆར་ཀས་བསམས་པ། གང་གདུལ་བའི་དུས་ཡིན་སྙམ་ན། མཉན་ཡོད་ན་བྲམ་ཟེ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། སེར་སྣ་ཅན་མིག་ཕྲ་བ། བྱ་རོག་ལ་ཡང་གཏོར་མ་མི་སྟེར་བ། ཡོ་བྱད་ཀུན་དུ་འཛིན་པ་ཞིག་འདུག་པ་དེས་རི་བྲགས་ཤིག་ཏུ་ཞིང་བླས་ཀྱི་མཐའ་རྨོར་བཅུག་ནས། དེས་བང་བ་དག་རྒྱས་བཏབ་སྟེ་ཆུང་མ་ལ་ལྟོ་རྒྱགས་ཙམ་བྱིན་ནས་རི་བྲགས་དེར་སོང་སྟེ་རང་གིས་ཞལ་ཏ་བྱས་ནས་ཞིང་བླས་ཀྱི་མཐའ་དག་བྱེད་དུ་འཇུད་དོ། །ཚེ་དང་ལྡན་པ་འཆར་ཀས་བསམས་པ། བྲམ་ཟེ་དེ་གདུལ་བའི་དུས་ཡིན་ནོ་སྙམ་ནས། དེས་བསོད་སྙོམས་བརྒྱུས་ཏེ། བྲམ་ཟེ་དེའི་ཁྱིམ་དུ་སོང་ནས་དེས་སྨྲས་པ། བྲམ་ཟེ་མོ་ལྷུང་བཟེད་ཀྱི་ཆུ་བསླང་ངོ་། །དེས་དེ་ལ་འབྲས་ཆན་ཕུལ་བ་དང་། ཕྲུ་བ་དེ་དེ་བཞིན་དུ་གང་བར་འདུག་གོ །བྲམ་ཟེ་མོས་སྨྲས་པ། འཕགས་པ་བདག་གི་ཁྱིམ་ཐབ་སེར་སྣ་ཅན། མིག་ཕྲ་བ། བྱ་རོག་ལ་ཡང་གཏོར་མ་མི་སྟེར་བ། ཡོ་བྱད་ཀུན་དུ་འཛིན་པ་ལགས་ཀྱིས་སླན་ཆད་མ་བྱོན་ཅིག། ཚེ་དང་ལྡན་པ་འཆར་ཀས་སྨྲས་པ། ཐབས་ཡིན་གྱིས་སང་ཁོ་བོ་བདག་ཉིད་དང་གཉིས་འོང་ངོ་། །ཚེ་དང་ལྡན་པ་འཆར་ཀ་ཕྱི་དེ་ཉིན་པར་བདག་ཉིད་དང་གཉིས་དེར་སོང་བ་དང་། དེས་དེ་ལ་དེ་བཞིན་དུ་འབྲས་ཆན་ཕུལ་ལོ། །དེ་བཞིན་དུ་བདག་ཉིད་དང་དྲུག་བཅུའི་བར་དུ་ཉིན་རེ་ལན་རེ་སོང་སྟེ་བྲམ་
ཟེའི་ཁྱིམ་དེར་བསོད་སྙོམས་ཟོས་པ་དང་། ངོས་ཀྱི་སྡུམ་ཚེས་དག་ཤེས་ལྡན་དག་ལྟོས་ཤིག །བྲམ་ཟེ་དེས་ལག་པས་བཅལ་བ་བརྒྱ་དག་གིས་ལོངས་སྤྱོད་དག་བསྒྲུབས་ན། དེ་དག་བྲམ་ཟེ་མོ་དེས་ཤཱཀྱའི་བུའི་དགེ་སྦྱོང་དག་དང་ལྷན་ཅིག་ཟ་བར་བྱེད་དོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་དོ། །བྲམ་ཟེའི་ཁྱེའུ་ཞིག་བྱ་བ་འགའ་ཞིག་ལ་མཉན་ཡོད་ནས་རི་བྲགས་དེར་སོང་བ་དང་། བྲམ་ཟེ་དེས་བྲམ་ཟེའི་ཁྱེའུ་དེ་ཐག་རིང་པོ་ཁོ་ན་ནས་མཐོང་ནས་དེས་བྲམ་ཟེའི་ཁྱེའུ་དེ་ལ་དྲིས་པ། བྲམ་ཟེའི་ཁྱེའུ་ཁྱོད་ག་ལས་འདིར་འོངས། དེས་སྨྲས་པ། མཉན་ཡོད་ནས་སོ། །ཁྱོད་ཀྱིས་ཁོ་བོའི་ཁྱིམ་གྱི་གཏམ་ཐོས་སམ། ཐོས་ཏེ། མཉན་ཡོད་ན་ཁྱིམ་བདག་མགོན་མེད་ཟས་སྦྱིན་གྱི་ཁྱིམ་ནི་ཤཱཀྱའི་བུའི་དགེ་སྦྱོང་དག་གི་ཁྱིམ་དང་པོ་ལགས་སོ། །མཁན་པོའི་ཁྱིམ་ནི་ཤཱཀྱའི་བུའི་དགེ་སྦྱོང་དག་གི་ཁྱིམ་གཉིས་པ་ལགས་ཏེ། ཤཱཀྱའི་བུའི་དགེ་སྦྱོང་དྲུག་བཅུ་ཉིན་རེ་ལན་རེ་མཆིས་ཏེ་བསོད་སྙོམས་འཚལ་ལོ། །བྲམ་ཟེ་དེས་བསམས་པ། འདིས་ཁོ་བོ་སེར་སྣ་ཅན་ལ་ཐོ་འཚམ་པར་བྱེད་ཀྱིས་གཞན་ལ་ཡང་དྲི་བར་བྱའོ་སྙམ་ནས། དེ་ལམ་གར་སོང་སྟེ་བསྡད་པ་དང་། ཇི་ཙམ་ན་བྲམ་ཟེའི་ཁྱེའུ་གཞན་ཞིག་བྱ་བ་འགའ་ཞིག་ལ་མཉན་ཡོད་ནས་རི་བྲགས་དེར་སོང་བ་དང་། བྲམ་ཟེ་དེས་བྲམ་ཟེའི་ཁྱེའུ་དེ་ཐག་རིང་པོ་ཁོ་ན་ནས་མཐོང་ནས། དེས་བྲམ་ཟེའི་ཁྱེའུ་དེ་ལ་དྲིས་པ། བྲམ་ཟེའི་ཁྱེའུ་ཁྱོད་ག་ལས་འདིར་འོངས། དེས་སྨྲས་པ། མཉན་ཡོད་ནས་སོ། །ཁྱོད་ཀྱིས་ཁོ་བོའི་ཁྱིམ་གྱི་གཏམ་ཐོས་སམ། ཐོས་ཏེ། མཉན་ཡོད་ན་ཁྱིམ་བདག་མགོན་མེད་ཟས་སྦྱིན་གྱི་ཁྱིམ་ནི་ཤཱཀྱའི་བུའི་དགེ་སྦྱོང་དག་གི་ཁྱིམ་དང་པོ་ལགས་སོ། །མཁན་པོའི་ཁྱིམ་ནི་ཤཱཀྱའི་བུའི་དགེ་སྦྱོང་དག་གི་ཁྱིམ་གཉིས་པ་ལགས་ཏེ། ཤཱཀྱའི་བུའི་དགེ་སྦྱོང་དྲུག་བཅུ་ཉིན་རེ་ལན་རེ་མཆིས་ཏེ། བསོད་སྙོམས་འཚལ་ལོ། །བྲམ་ཟེ་དེས་བསམས་པ། དེ་དང་འདི་མཐུན་པས་དེ་ལྟར་གྱུར་གྱིས་བྲམ་ཟེ་མོ་དེས་ལོངས་སྤྱོད་དག་ཟོས་པར་གྱུར་ན་མི་རུང་གིས་འགྲོའོ་སྙམ་མོ། །དེ་ནས་བྲམ་ཟེ་དེ་ཕྱིར་འོངས་ཏེ་བྲམ་ཟེ་མོ་དེ་ལ་སྨྲས་པ། བྲམ་ཟེ་མོ་ངན་པ་ཁོ་བོས་ལག་པས་གཞལ་བ་བརྒྱ་
དག་གིས་ལོངས་སྤྱོད་དག་བསྒྲུབས་ན། ཁྱོད་དེ་དག་ཤཱཀྱའི་བུའི་དགེ་སྦྱོང་དག་དང་ལྷན་ཅིག་ཟ་བར་བྱེད་དམ། ཁྱོད་ཀྱིས་བྲམ་ཟེ་རིག་བྱེད་གསུམ་དང་ལྡན་པ་དག་མ་མཐོང་ངམ་ཅི་ན། དགེ་སྦྱོང་མགོ་རེག་དེ་དག་ལ་སྦྱིན་པར་བྱེད་ཅེས་དེས་དེ་བརྡེག་པར་བརྩམས་པ་དང་། དེས་སྨྲས་པ། བྲམ་ཟེ་ཁྱོད་ཀྱིས་ཁོ་མོ་ལ་གཏད་པའི་བང་བ་དག་ཁོ་མོས་རྒྱ་ཉམས་པར་བྱས་སམ། ཅི་ཇེ་སོ་སོར་རྟོགས་ཤིག །བྲམ་ཟེ་དེས་བང་བ་དག་སོ་སོར་བརྟགས་པ་དང་། ཇི་ཙམ་ན་དེ་བཞིན་དུ་རྒྱ་མ་ཉམས་པར་འདུག་པ་དག་མཐོང་ནས། དེས་ཆུང་མ་ལ་སྨྲས་པ། ཁྱོད་ཀྱིས་ཟས་དེ་སྙེད་ག་ལས་རྙེད། དེས་སྨྲས་པ། བདག་གི་ཕྲུ་བ་འདིར་འབྲས་ཆན་དང་། སྲན་ཚོད་བཙོས་ན་འབྲས་ཆན་དེས་དགེ་སློང་དྲུག་བཅུ་དང་བདག་ཀྱང་འགྲངས་པར་གྱུར་ཏོ། །བྲམ་ཟེ་དེས་སྨྲས་པ། ཅིའི་ཕྱིར་དེ་ལྟར་གྱུར། དེས་སྨྲས་པ། བདག་གིས་ཁྱོད་ཀྱི་མངོན་སུམ་དུ་འགྱུར་བར་བྱའོ་ཞེས་དེས་ཕྱི་དེ་ཉིན་པར་ཚེ་དང་ལྡན་པ་འཆར་ཀ་བདག་ཉིད་དང་དྲུག་བཅུ་དེར་འོངས་པ་ལ་དེ་བཞིན་དུ་བསོད་སྙོམས་ཕུལ་ནས་དེས་སྨྲས་པ། བྲམ་ཟེ་ཁྱོད་ཀྱིས་མཐོང་ངམ། བྲམ་ཟེ་དེ་མངོན་པར་དད་པར་གྱུར་ནས། དེས་སྨྲས་པ། བཙུན་པ་འཆར་ཀས་སང་བདག་གི་སྡུམ་པར་གདུགས་ཚོད་གསོལ་བར་ཅི་གནང་། ཚེ་དང་ལྡན་པ་འཆར་ཀས་སྨྲས་པ། བྲམ་ཟེ་ཅི་འདི་འདྲ་བས་སམ། འོན་ཏེ་ཟས་ཡང་དག་པས་མགྲོན་དུ་འབོད། བཤོས་ཡང་དག་པས་སྤྱན་འདྲེན་ཏོ། །ཚེ་དང་ལྡན་པ་འཆར་ཀས་བྲམ་ཟེ་དེ་ལ་ཅང་མི་སྨྲ་བས་དང་དུ་བླངས་ཏེ་སོང་ངོ་། །དེ་ནས་བྲམ་ཟེ་དེས་ཚེ་དང་ལྡན་པ་འཆར་ཀས་ཅང་མི་སྨྲ་བར་དང་དུ་བླངས་པར་རིག་ནས། དེ་ཉིད་ཀྱི་མཚན་མོ་བཅའ་བ་དང་བཟའ་བ་གཙང་ཞིང་བསོད་པ་དག་སྟ་གོན་བྱས་སོ། །ཚེ་དང་ལྡན་པ་འཆར་ཀ་ཡང་ཕྱི་དེ་ཉིན་པར་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ། བྲམ་ཟེའི་ཁྱིམ་ག་ལ་བ་དེར་སོང་སྟེ་ཕྱིན་ནས་སྟན་བཤམས་པ་ཉིད་ལ་འདུག་གོ །དེ་ནས་བྲམ་ཟེ་དེས་ཚེ་དང་ལྡན་པ་འཆར་ཀ་བདེ་བར་འདུག་པར་རིག་ནས་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད། སྟོབས་པར་བྱེད་དོ། །རྣམ་གྲངས་དུ་མར་བཅའ་བ་དང་
བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས། ཚེ་དང་ལྡན་པ་འཆར་ཀ་ཟན་ཟོས་ཤིང་ལག་པ་བསྙལ་ལྷུང་བཟེད་བཞག་པར་རིག་ནས། སྟན་ཆེས་དམའ་བ་ཞིག་བླངས་ཏེ་ཚེ་དང་ལྡན་པ་འཆར་ཀའི་མདུན་དུ་ཆོས་མཉན་པའི་ཕྱིར་འདུག་གོ །ཚེ་དང་ལྡན་པ་འཆར་ཀས་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཁོང་དུ་ཆུད་ནས་འདི་ལྟར་བྲམ་ཟེ་དེ་ཆུང་མ་དང་བཅས་པས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས་བཙུན་པ་འཆར་ཀས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང་རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་། ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག །འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །བཙུན་པ་འཆར་ཀས་ཇི་སྲིད་འཚོའི་བར་དུ་བདག་གི་བསོད་སྙོམས་དང་། ན་བཟའ་དང་། གནས་
མལ་དང་། བསྙུང་བའི་རྐྱེན་དང་། སྨན་གྱི་ཡོ་བྱད་དག་བཞེས་པར་ཅི་གནང་། ཚེ་དང་ལྡན་པ་འཆར་ཀས་སྨྲས་པ། རབ་ཏུ་བྱུང་བ་ནི་གཞན་ལ་ཕན་པས་རྗེས་སུ་འཛིན་པ་ལ་ཞུགས་པ་ཡིན་པས་བྲམ་ཟེ་གཞན་དག་ལ་ཡང་ཕན་ པ་བྱ་དགོས ་སོ་ཞེས་སྨྲས་ཏེ་དང་དུ་མ་བླངས་སོ། །དེ་ན་ཚེ་དང་ལྡན་པ་འཆར་ཀས་མཉན་ཡོད་དུ་བྲམ་ཟེའི་ཁྱིམ་དགུ་པ་གཉི་ག་ནས་བཏུལ་ཅིང་བཞག་གོ །། །འདུལ་བ་རྣམ་པར་འབྱེད་པ། བམ་པོ་དྲུག་བཅུ་རྩ་བདུན་པ། ཚེ་དང་ལྡན་པ་འཆར་ཀས་བསམས་པ། གང་གདུལ་བའི་དུས་ཡིན་སྙམ་ན། མཉན་ཡོད་ན་བྲམ་ཟེ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ལ་བུ་ཞིག་བྱུང་ནས་དེ་བསྲིངས་ཤིང་བསྐྱེད་དེ་ཆེན་པོར་གྱུར་ཏོ། །དེའི་ཆུང་མ་དེ་གཏུམ་པ། བརླང་བ། རྩུབ་པ། རྒྱ་བ། གཤེ་བ། སྤྱོ་བ་ཞིག་ཡིན་པས་རྟག་ཏུ་ངོས་ཀྱི་སྡུམ་ཚེས་དག་དང་ལྷན་ཅིག་འཐབ་ཀྲོལ་བྱེད་ནས། དེའི་མིང་གཏུམ་མོ་གཏུམ་མོ་ཞེས་བྱ་བར་གྱུར་ཏོ། །དུས་གཞན་ཞིག་ན་མཉན་ཡོད་དུ་དུས་སྟོན་བྱུང་ནས་བྲམ་ཟེ་དེས་བུ་ལ་སྨྲས་པ། བུ་ཁྱོད་ཀྱི་མ་འདི་གཏུམ་པས་གཞན་དག་དང་ལྷན་ཅིག་འཐབ་ཀྲོལ་བྱེད་པས། བདག་ཅག་ཁྲི་མོན་དུ་བཅུག་པས་འཆི་བར་བྱ་ དགོས་པ ་གང་ཡིན་པ་དེ་ལྟ་བུའི་གནས་ཡོད་པར་འགྱུར་གྱིས། རེ་ཞིག་དུས་སྟོན་ཐལ་གྱི་བར་དུ་རི་བྲགས་གཞན་དུ་འདོང་ཞིང་འཁོད་ལ། དེའི་འོག་ཏུ་ཕྱིར་འོང་བར་བྱས། ཁྱོད་སོང་ལ་མ་ལ་དྲིས་ཤིག །བུ་དེས་མ་ལ་སྨྲས་པ། ཡུམ་བདག་བགྱི་བ་ཆུང་ཞིག་གི་སླད་དུ་རི་བྲགས་ག་གེ་མོ་ཞིག་ཏུ་མཆིའོ། །གཏུམ་མོས་སྨྲས་པ། གང་དུ་ཁོ་མོའི་དང་པོའི་གོས་སོང་བ་དེར་སོང་ཤིག །བྲམ་ཟེས་ཀྱང་སྨྲས་པ། ཁོ་བོ་ཡང་འགྲོའོ། །གཏུམ་མོས་སྨྲས་པ། གང་ནས་ཡང་ཕྱིར་མི་འོང་བ་དེར་སོང་ཤིག །དེ་གཉིས་དོང་བ་དང་། གཏུམ་མོས་བུ་མོ་མངག་གཞུག་མ་ལ་སྨྲས་པ། བུ་མོ་ཁུར་སླང་ཚུགས་ཤིག་དང་། ཇེ་སྣོག་ཟན་བྱའོ། །དེས་ཁུར་སླང་བཙུགས་ཏེ་ཁུར་བ་དག་བྱ་བར་བརྩམས་པ་དང་། ཚེ་དང་ལྡན་པ་འཆར་ཀས་བསམས་པ། གཏུམ་མོ་དེ་གདུལ་བའི་དུས་ཡིན་ནོ་སྙམ་ནས་
དེ་སྔ་དྲོ་ཤམ་ཐབས་བགོས། །ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས། དེ་མཐར་གྱིས་བསོད་སྙོམས་ལ་རྒྱུ་བ་ན་གཏུམ་མོའི་ཁྱིམ་དུ་འཇུག་པར་བརྩམས་པ་དང་། དེ་འཇུག་པ་གཏུམ་མོས་མཐོང་ནས་དེས་བུ་མོ་མངག་གཞུག་མ་ལ་སྨྲས་པ། བུ་མོ་དགེ་སྦྱོང་འདི་སྐྲོད་ཅིག། དེས་བསྐྲད་པ་དང་། ཚེ་དང་ལྡན་པ་འཆར་ཀ་ཆེས་དང་པོར་ནང་དུ་ཞུགས་ཤིང་བུ་མོ་མངག་གཞུག་མ་ཕྱིས་ཞུགས་སོ། །དེ་གཏུམ་མོས་ཡང་མཐོང་ནས་དེས་བུ་མོ་མངག་གཞུག་མ་ལ་སྨྲས་པ། བུ་མོ་ཁྱོད་ཀྱིས་དགེ་སྦྱོང་འདི་མ་བསྐྲད་དམ། དེས་སྨྲས་པ། བསྐྲད་དོ། །འོ་ན་འདི་ག་ལས་ཞུགས། ཡང་སྐྲོད་ལ་སྒོ་ཆོད་ཅིག །དེས་དེ་བསྐྲད་དེ་སྒོ་བཅད་ནས་ཞུགས་པ་དང་། ཚེ་དང་ལྡན་པ་འཆར་ཀ་ཆེས་དང་པོར་ཞུགས་སོ། །དེ་གཏུམ་མོས་ཡང་མཐོང་ནས་དེས་བུ་མོ་མངག་གཞུག་མ་ལ་སྨྲས་པ། བུ་མོ་ཁྱོད་ཀྱིས་དགེ་སྦྱོང་འདི་བསྐྲད་དེ་སྒོ་མ་བཅད་དམ། དེས་སྨྲས་པ། བསྐྲད་དེ་སྒོ་བཅད་དོ། །འོ་ན་འདི་གང་ནས་ཞུགས། དེ་ནས་གཏུམ་མོས་སྨྲས་པ། དགེ་སྦྱོང་ཅི་སློང་། ཚེ་དང་ལྡན་པ་འཆར་ཀས་སྨྲས་པ། ཁུར་བའོ། །གཏུམ་མོས་སྨྲས་པ། ཁྱོད་བུ་ཐུ་བོར་གྱུར་ཏེ་འོངས་ན་ཁྱོད་ལ་ཁུར་བ་ཅིའི་ཕྱིར་མི་སྦྱིན། ཚེ་དང་ལྡན་པ་འཆར་ཀས་བུ་ཐུ་བོར་སྤྲུལ་ཏེ་འོངས་པ་དང་། གཏུམ་མོས་སྨྲས་པ། གལ་ཏེ་ལག་པ་དང་རྐང་པ་དག་སེར་པོར་བྱས་ཀྱང་ཁྱོད་ལ་ཁུར་བ་མི་སྦྱིན་ནོ། །ཚེ་དང་ལྡན་པ་འཆར་ཀས་ལག་པ་དང་རྐང་པ་དག་སེར་པོར་སྤྲུལ་པ་དང་། གཏུམ་མོས་སྨྲས་པ། གལ་ཏེ་མིག་གཉིས་ཁར་ཕོར་ལྟ་བུར་ལྟ་ན་ཡང་ཁྱོད་ལ་ཁུར་བ་མི་སྦྱིན་ནོ། །ཚེ་དང་ལྡན་པ་འཆར་ཀས་མིག་གཉིས་ཁར་ཕོར་ལྟ་བུར་སྤྲུལ་པ་དང་། གཏུམ་མོས་སྨྲས་པ། གལ་ཏེ་ནམ་མཁའ་ལ་དྲིལ་བུ་བཞིན་དུ་ཁྲ་ལ་ལ་འཁྲོལ་ཞིང་འདུག་ན་ཡང་ཁྱོད་ལ་ཁུར་བ་མི་སྦྱིན་ནོ། །ཚེ་དང་ལྡན་པ་འཆར་ཀས་ནམ་མཁའ་ལ་དྲིལ་བུ་བཞིན་དུ་ཁྲ་ལ་ལ་འཁྲོལ་ཞིང་འདུག་པ་དང་། གཏུམ་མོས་སྨྲས་པ། གལ་ཏེ་ཁྱོད་ཕྱེད་ཕྱེད་དུ་དུམ་བུ་གཉིས་སུ་གས་ཀྱང་ཁྱོད་ལ་ཁུར་བ་མི་སྦྱིན་ནོ། །ཚེ་དང་ལྡན་པ་འཆར་ཀས་བདག་ཉིད་ཕྱེད་ཕྱེད་དུ་དུམ་བུ་གཉིས་སུ་གས་པར་སྤྲུལ་ཏེ་ས་ལ་སྒྱེལ་བ་
དང་། བུ་མོ་མངག་གཞུག་མས་སྨྲས་པ། ཇོ་མོ་ཁྱོད་ཀྱིས་གདུང་བར་བགྱིད་པ་མང་པོ་དག་བསྒྲུབས་པ་དེ་དག་གི་ནང་ན་འདི་ནི་ཆེས་གདུང་བར་བགྱིད་པ་ལགས་ཏེ། དགེ་སྦྱོང་འདི་ནི་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་ཆུང་པོ་གྲོགས། བཙུན་མོ་ཕྲེང་ལྡན་མའི་སློབ་དཔོན་ལགས་པས། བདག་ནི་ཤིན་ཏུ་ཐག་རིང་པོར་མཆིས་ཀྱང་བྲན་མོ་ཉིད་དུ་བས་ཀྱི། ཇོ་མོས་ནི་གསེར་གྱི་ཆུ་བུམ་གྱིས་རྒྱལ་པོའི་ཕོ་བྲང་དུ་ཆབ་བཅུ་འཚལ་བར་འགྱུར་རོ། །གཏུམ་མོ་སྐྲག་སྟེ་བསམས་པ། དེ་ལྟར་འགྱུར་རོ་སྙམ་ནས་དེས་སྨྲས་པ། བུ་མོ་དོང་རྐོས་ཤིག་དང་སྦའོ་ཞེས། དེས་དོང་རྐོས་ཏེ་སྦ་བར་བརྩམས་པ་དང་། ཚེ་དང་ལྡན་པ་འཆར་ཀ་འགོག་པ་ལ་སྙོམས་པར་ཞུགས་ནས་དེས་བསྒུལ་བར་ཡང་མ་ནུས་སོ། །དེ་ནས་གཏུམ་མོས་ཚེ་དང་ལྡན་པ་འཆར་ཀའི་རྐང་པ་གཉིས་ལ་གཏུགས་ཏེ་སྨྲས་པ། འཕགས་པ་ཁྱོད་ཀྱིས་མི་མཁྱེན་པ་དང་མ་གཟིགས་པ་དང་། མ་རིག་པ་དང་། རྣམ་པར་མི་མཁྱེན་པ་ཅི་ཡང་མ་མཆིས་ཀྱིས། བདག་ལ་བཟོད་པ་མཛོད་ཅིག་དང་ཁྱོད་ལ་ཁུར་བ་གསོལ་ལོ། །ཚེ་དང་ལྡན་པ་འཆར་ཀ་ལངས་ཏེ་ཆ་ལུགས་ཐ་མལ་པ་བསྟན་པ་དང་། གཏུམ་མོས་བསམས་པ། འདི་ལ་ཁུར་བ་སྦྱིན་ནོ་ཞེས་ཁས་བླངས་ན། ཁུར་བ་འདི་དག་ནི་ཧ་ཅང་ཆེ་ཆེས་པས་ཕངས་ཀྱིས། འདིའི་ཕྱིར་ཁུར་བ་ཆུང་ངུ་གཞན་ཞིག་བྱའོ་སྙམ་ནས། དེས་ཁུར་བ་ཆུང་ངུ་ཞིག་སྲེག་པར་བརྩམས་པ་དང་། ཁུར་བ་དེས་ཁུར་བསླང་ཐམས་ཅད་ཡོག་པར་གྱུར་ནས། གཏུམ་མོས་བསམས་པ། བདག་གིས་ཁུར་བ་འདི་མི་སྦྱིན་པར་ཁུར་བ་སྔ་མ་ལས་གཅིག་སྦྱིན་ནོ་སྙམ་ནས། དེས་ཁུར་བ་གཅིག་དྲང་བར་བརྩམས་པ་དང་། ཇི་ཙམ་ན་ཁུར་བ་ཐམས་ཅད་འོངས་ནས། གཏུམ་མོས་སྨྲས་པ། ཅི་འཕགས་པ་ཁུར་བ་ཐམས་ཅད་བཞེད་དམ། ཚེ་དང་ལྡན་པ་འཆར་ཀས་སྨྲས་པ། འདོད་དོ། །གཏུམ་མོས་སྨྲས་པ། བཞེས་སུ་གསོལ། ཚེ་དང་ལྡན་པ་འཆར་ཀས་སྨྲས་པ། སྲིང་མོ་གལ་ཏེ་ཡོངས་སུ་བཏང་ན། ཁྱིམ་བདག་མགོན་མེད་ཟས་སྦྱིན་གྱིས། དེང་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་
གཞན་དུ་གདུགས་ཚོད་ལ་སྤྱན་དྲངས་ཀྱིས། དེར་དོང་ལ་རང་གི་ལག་ནས་བྲིམས་ཤིག །གཏུམ་མོས་སྨྲས་པ། འཕགས་པ་དག་གཏུམ་མོ་ཞེས་ཐམས་ཅད་དུ་རིག་པས། བདག་དེར་འཇུག་ཏུ་ག་ལ་ཆུད། ཚེ་དང་ལྡན་པ་འཆར་ཀས་སྨྲས་པ། སྲིང་མོ་ཁོ་བོས་ཁྱོད་འཇུག་ཏུ་གཞུག་གོ །དེ་ནས་གཏུམ་མོས་ཁུར་བ་དེ་དག་ཐོགས་ཏེ། ཁྱིམ་བདག་མགོན་མེད་ཟས་སྦྱིན་གྱི་ཁྱིམ་དུ་འཇུག་པར་བརྩམས་པ་དང་། སྒོ་བས་སྨྲས་པ། གཏུམ་མོ་དོན་ཅིའི་ཕྱིར་འདིར་འོངས། མ་འཇུག་ཤིག །ཚེ་དང་ལྡན་པ་འཆར་ཀས་སྨྲས་པ། བཞིན་བཟངས་འཇུག་ཏུ་ཆུག་ཤིག །སྒོ་བས་གཏུམ་མོ་ནང་དུ་བཏང་བ་དང་། དེས་སངས་རྒྱས་ལ་སོགས་པ་དགེ་སློང་གི་དགེ་འདུན་མང་པོ་མཐོང་ནས། ཁུར་བ་དེ་དག་གཏུབ་པར་བརྩམས་པ་དང་། ཚེ་དང་ལྡན་པ་འཆར་ཀས་སྨྲས་པ། མ་གཏུབ་པར་རངས་པར་བྲིམས་ཤིག །གཏུམ་མོས་སྨྲས་པ། ཁྱེད་པར་མི་འགྱུར་རོ། །ཚེ་དང་ལྡན་པ་འཆར་ཀས་སྨྲས་པ། བྲིམས་ཤིག་དང་ཁྱེད་པར་འགྱུར་རོ་ཞེས་དེས་འདི་ལྟར་སངས་རྒྱས་ལ་སོགས་པ་དགེ་སློང་གི་དགེ་འདུན་ཐམས་ཅད་ལ་ཁྱེད་པའི་ཕྱི་ན་ལྷག་ཀྱང་བྱུང་བ་དེ་ལྟར་བྱིན་གྱིས་བརླབས་སོ། །གཏུམ་མོས་སངས་རྒྱས་ལ་སོགས་པ་དགེ་སློང་གི་དགེ་འདུན་ཐམས་ཅད་ལ་ཁུར་བས་ཁྱེད་པར་བྲིམས་ཏེ་གསོལ་ནས། བཅོམ་ལྡན་འདས་ཀྱིས་ཡོན་བཤད་པ་མཛད་ནས་གདན་ལས་བཞེངས་ཏེ་གཤེགས་སོ། །གཏུམ་མོས་སྨྲས་པ། བཙུན་པ་འཆར་ཀ་ཁྱོད་བདག་གི་དགེ་བའི་བཤེས་གཉེན་ལགས་ཀྱིས་ཚུར་གཤེགས། བདག་གི་སྡུམ་པར་བཞུད་ལ་ཁྱོད་དེར་གདུགས་ཚོད་གསོལ་ཅིག། ཚེ་དང་ལྡན་པ་འཆར་ཀ་གཏུམ་མོའི་ཁྱིམ་དུ་སོང་བ་དང་། གཏུམ་མོས་ཚེ་དང་ལྡན་པ་འཆར་ཀ་ལ་ཟན་བྱིན་ནས་གཏུམ་མོ་ཚེ་དང་ལྡན་པ་འཆར་ཀའི་མདུན་དུ་ཆོས་མཉན་པའི་ཕྱིར་འདུག་པ་དང་། ཚེ་དང་ལྡན་པ་འཆར་ཀས་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཁོང་དུ་ཆུད་ནས། འདི་ལྟར་གཏུམ་མོས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་
བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས། བཙུན་པ་འཆར་ཀས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་། མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་། ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག །འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་མར་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །དེ་ནས་ཚེ་དང་ལྡན་པ་འཆར་ཀས་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་ནས་སྟན་ལས་ལངས་ཏེ་སོང་ངོ་། །དེ་ནས་གཏུམ་མོས་རང་གི་ཁྱིམ་ཕྱག་དར་ལེགས་པར་བྱས། ཆག་ཆག་ལེགས་པར་བཏབ། བྱུག་པས་ལེགས་པར་བྱུགས་ཏེ་མེ་ཏོག་དག་དགྲམ་པར་བྱས་ནས། སྤྱོད་ལམ་ཞི་བས་འདུག་གོ །བྲམ་ཟེ་དེ་ཡང་དུས་སྟོན་ཐལ་ནས་ཕྱིར་འོངས་ཏེ་སྐྱེད་མོས་ཚལ་དུ་བསྡད་ནས། དེས་བུ་ལ་
སྨྲས་པ། བུ་ཁྱོད་སོང་ལ་ཁྱོད་ཀྱི་མ་ཁྲི་མོན་གང་དུ་བཅུག་ཅིང་འདུག་པ་ལྟོས་ཤིག་དང་དབྱུང་བར་བྱའོ། །བུ་དེ་ཁྱིམ་དུ་སོང་བ་དང་གཏུམ་མོས་ཐག་རིང་མོ་ཁོ་ན་ནས་བུ་མཐོང་ནས། དེས་སྨྲས་པ། བུ་འོངས་པ་ལེགས་སོ་འོངས་པ་ལེགས་སོ། །ཚུར་ཤོག་ངལ་སོས་ཤིག །ཁྱོད་ཀྱི་ཕ་དེ་འོངས་སམ། བུས་སྨྲས་པ། མཆིས་ཏེ། སྐྱེད་མོས་ཚལ་ན་སྡོད་ཅིང་མཆིས་སོ། །བུ་དེ་ཟན་ཟོས་ནས་ཕའི་གན་དུ་སོང་བ་དང་། ཕས་དྲིས་པ། བུ་ཁྱིམ་བདེའམ། བུས་སྨྲས་པ། ཡབ་ཡུམ་གྱི་སྤྱོད་ལམ་དེ་ལྟ་བུ་ནི་སྔོན་ལན་འགའ་ཡང་མ་མཐོང་སྟེ། འདི་ལྟར་སྤྱོད་ལམ་ཞི་བས་མཆིས་སོ། །བྲམ་ཟེ་དེ་ཁྱིམ་དུ་ཞུགས་པ་དང་གཏུམ་མོས་ཐག་རིང་པོ་ཁོ་ན་ནས་མཐོང་ནས། དེས་སྨྲས་པ། རྗེའི་སྲས་བྱོན་པ་ལེགས་སོ་བྱོན་པ་ལེགས་སོ། །བཞུགས་སུ་གསོལ། དེ་འདུག་ནས་བསམས་པ། བྱེ་བྲག་འདི་ལྟ་བུ་ནི་སྔོན་མ་བྱུང་ཅི་ལས་གྱུར་སྙམ་ནས། དེས་ཚིགས་སུ་བཅད་པ་སྨྲས་པ། འདི་ལྟར་སྔོན་དང་མི་འདྲ་བར། །ལོག་པ་ཉིད་དུ་ཁྱོད་སྣང་ན། །ཁྱོད་ནི་སྨྱོ་བྱེད་ལྡན་གྱུར་ཏམ། །འོན་ཏེ་མྱོས་པར་གྱུར་ཏམ་ཅི། །གཏུམ་མོས་ཚིགས་སུ་བཅད་པ་སྨྲས་པ། ཇོ་བོ་བདག་ནི་སྨྱོས་པ་མིན། །མྱོས་པར་གྱུར་པའང་མ་ལགས་ཏེ། །བདག་གིས་སངས་རྒྱས་བསྟན་པ་ལ། །འཕགས་པའི་བདེན་པ་མཐོང་བར་བགྱིས། །རྗེའི་སྲས་བདག་ལ་འཕགས་པ་འཆར་ཀས་འདི་ལྟར་བདག་སླན་ཆད་འཁོར་བ་ན་འཁོར་བའི་ཚེ་ཉོན་མོངས་པ་དེ་ལྟ་བུ་དག་ཀུན་དུ་སྤྱོད་པར་མི་འགྱུར་བ་དེ་ལྟར་ཆོས་བསྟན་པ་མཛད་དོ། །བྲམ་ཟེ་དེ་ངོ་མཚར་སྐྱེས་ཏེ་བསམས་པ། བདག་གིས་བརྡེག་པ་དང་། བཅིང་བ་དང་། སྨད་པས་དུལ་བར་མ་ནུས་པ་གང་ཡིན་པ་དེ། བཙུན་པ་འཆར་ཀས་ཆོས་བསྟན་པས་བཏུལ་བས། གང་གི་ཕྱིར་ཆོས་བསྟན་པས་འདི་བཏུལ་བ་ནི་འཕགས་པ་འཆར་ཀས་བདག་ལ་ཕན་པ་མང་དུ་མཛད་དོ། །འཕགས་པ་འཆར་ཀས་བདག་ལ་ལེགས་པ་མང་དུ་མཛད་ཀྱིས། བདག་སོང་ལ་འཕགས་པ་འཆར་ཀ་སང་ཁྱིམ་གཞན་དུ་གདུགས་ཚོད་ལ་སྤྱན་དྲང་ངོ་སྙམ་ནས། དེ་ཚེ་དང་ལྡན་པ་འཆར་ཀ་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་
པ་འཆར་ཀའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས། ཚེ་དང་ལྡན་པ་འཆར་ཀས་བྲམ་ཟེ་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཇུད་པར་བྱེད། ཡང་དག་པར་གཟེངས་སྟོད་པར་བྱེད། ཡང་དག་པར་རབ་ཏུ་དགའ་བར་བྱེད་དོ། །རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་སྨྲའོ། །དེ་ནས་བྲམ་ཟེ་དེ་སྟན་ལས་ལངས་ཏེ། ཚེ་དང་ལྡན་པ་འཆར་ཀ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། ཚེ་དང་ལྡན་པ་འཆར་ཀ་ལ་འདི་སྐད་ཅེས་སྨྲས་སོ། །བཙུན་པ་འཆར་ཀས་སང་བདག་གི་སྡུམ་པར་གདུགས་ཚོད་གསོལ་བར་ཅི་གནང་། ཚེ་དང་ལྡན་པ་འཆར་ཀས་བྲམ་ཟེ་དེ་ལ་ཅང་མི་སྨྲ་བས་དང་དུ་བླངས་སོ། །དེ་ནས་བྲམ་ཟེ་དེས་ཚེ་དང་ལྡན་པ་འཆར་ཀས་ཅང་མི་སྨྲ་བས་དང་དུ་བླངས་པར་རིག་ནས། ཚེ་དང་ལྡན་པ་འཆར་ཀའི་རྐང་པ་གཉིས་ལ་མགོ་བོས་ཕྱག་འཚལ་ཏེ་སོང་ངོ་། །དེ་ནས་བྲམ་ཟེ་དེས་དེ་ཉིད་ཀྱི་མཚན་མོ་བཅའ་བ་དང་བཟའ་བ་གཙང་ཞིང་བསོད་པ་དག་སྟ་གོན་བྱས་སོ། །ཚེ་དང་ལྡན་པ་འཆར་ཀའང་ཕྱི་དེ་ཉིན་པར་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ། བྲམ་ཟེ་དེའི་ཁྱིམ་ག་ལ་བ་དེར་སོང་སྟེ་ཕྱིན་ནས་སྟན་བཤམས་པ་ཉིད་ལ་འདུག་གོ །དེ་ནས་བྲམ་ཟེ་དེས་ཚེ་དང་ལྡན་པ་འཆར་ཀ་བདེ་བར་འདུག་པར་རིག་ནས། བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད། སྟོབས་པར་བྱེད་དོ། །རྣམ་གྲངས་དུ་མར་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས། ཚེ་དང་ལྡན་པ་འཆར་ཀ་ཟན་ཟོས་ཤིང་། ལག་པ་བསྙལ་ལྷུང་བཟེད་བཞག་པར་རིག་ནས་སྟན་ཆེས་དམའ་བ་ཞིག་བླངས་ཏེ། ཚེ་དང་ལྡན་པ་འཆར་ཀའི་མདུན་དུ་ཆོས་མཉན་པའི་ཕྱིར་འདུག་གོ །ཚེ་དང་ལྡན་པ་འཆར་ཀས་དེའི་བསམ་པ་དང་། བག་ལ་ཉལ་དང་། ཁམས་
དང་། རང་བཞིན་ཁོང་དུ་ཆུད་ནས་འདི་ལྟར་བྲམ་ཟེ་དེས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེས་བདེན་པ་མཐོང་ནས་སྨྲས་པ། བཙུན་པ་བདག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས། བཙུན་པ་འཆར་ཀས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་། ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག། འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །བཙུན་པ་འཆར་ཀས་ཇི་སྲིད་འཚོའི་བར་དུ་བདག་གི་བསོད་སྙོམས་དང་། ན་བཟའ་དང་། གནས་མལ་དང་། བསྙུང་བའི་རྐྱེན་དང་། སྨན་གྱི་ཡོ་བྱད་དག་བཞེས་པར་ཅི་གནང་། ཚེ་དང་ལྡན་པ་འཆར་ཀས་སྨྲས་པ། རབ་ཏུ་བྱུང་བ་ནི་གཞན་ལ་ཕན་པས་རྗེས་སུ་འཛིན་པ་ལ་ཞུགས་པ་ཡིན་པས། བྲམ་ཟེ་གཞན་དག་ལ་ཡང་ཕན་ པ་བྱ་དགོས ་སོ་ཞེས་སྨྲས་ཏེ་དང་དུ་མ་བླངས་སོ། །བྲམ་
ཟེ་དེས་སྨྲས་པ། གལ་ཏེ་བཙུན་པ་འཆར་ཀས་དང་དུ་མི་བཞེས་ན། བདག་གིས་དྲང་སྲོང་གི་གདན་བཤམ་པར་བགྱི་ཡིས། བཙུན་པ་འཆར་ཀ་གཤེགས་ཏེ་ལོངས་སྤྱད་པར་གསོལ། ཚེ་དང་ལྡན་པ་འཆར་ཀས་བྲམ་ཟེ་དེ་ལ་ཅང་མི་སྨྲ་བས་དང་དུ་བླངས་སོ། །ཚེ་དང་ལྡན་པ་འཆར་ཀས་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་ནས་སྟན་ལས་ལངས་ཏེ་སོང་ངོ་། །དེ་ན་ཚེ་དང་ལྡན་པ་འཆར་ཀས་མཉན་ཡོད་དུ་བྲམ་ཟེའི་ཁྱིམ་བཅུ་པ་གཉི་ག་ནས་བཏུལ་ཅིང་བཞག་གོ །ཚེ་དང་ལྡན་པ་འཆར་ཀས་བསམས་པ། གང་གདུལ་བའི་དུས་ཡིན་སྙམ་ན། མཉན་ཡོད་ན་བྲམ་ཟེ་གཞོན་ནུ་དགའ་འདུན་ལྔ་བརྒྱ་ཙམ་ཆུང་མ་དང་བཅས་པ་དག་བཅའ་བ་དང་། བཟའ་བ་དང་། དྲི་དང་། ཕྲེང་བ་རྒྱུ་མང་པོ་ཐོགས་ཏེ། རྩེ་བའི་ཕྱིར་སྐྱེད་མོས་ཚལ་གྱི་སར་བྱུང་བ་དང་། ཚེ་དང་ལྡན་པ་འཆར་ཀས་བསམས་པ། འདི་དག་གདུལ་བའི་དུས་ཡིན་ནོ་སྙམ་ནས། དེ་དེ་དག་གི་གན་དུ་སོང་བ་དང་། དེ་དག་གིས་སྨྲས་པ། བཙུན་པ་འཆར་ཀ་ཁྱོད་བྲམ་ཟེ་མདུན་ན་འདོན་གྱི་བུ་ཡིན་ན། ཅིའི་ཕྱིར་ཤཱཀྱའི་བུའི་དགེ་སྦྱོང་འདི་དག་ཐམས་ཅད་ཟ་བ་དག་གི་ནང་དུ་རབ་ཏུ་བྱུང་། ཚེ་དང་ལྡན་པ་འཆར་ཀས་འདི་ལྟར། དེ་དག་གི་ཕྲེང་བ་གང་དག་ཡིན་པ་དེ་དག་ནི་ཀུན་དོང་གི་ཕྲེང་བར་གྱུར། ཁུར་བ་གང་དག་ཡིན་པ་དེ་དག་ནི་བ་ལང་གི་ཀོ་བར་གྱུར། ཤ་གང་དག་ཡིན་པ་དེ་དག་ནི་བ་ལང་གི་ཤར་གྱུར། བཏུང་བ་གང་དག་ཡིན་པ་དེ་དག་ནི་ཆང་དུ་གྱུར་པ་དེ་ལྟར་བྱིན་གྱིས་བརླབས་ནས། ཚེ་དང་ལྡན་པ་འཆར་ཀས་དེ་དག་ལ་ལྷུང་བཟེད་བསྟན་ཏེ་སྨྲས་པ། ཤེས་ལྡན་དག་ལྟོས་ཤིག །ཁོ་བོའི་ལྷུང་བཟེད་ན་ཀུན་དོང་དང་། བ་ལང་གི་ཀོ་བ་དང་། བ་ལང་གི་ཤ་དང་། ཆང་ཡོད་སྙམ་མམ། ཅི་ཁྱེད་ཅག་ནི་མགོ་ལ་ཡང་ཀུན་དོང་གི་ཕྲེང་བ་ཐོགས། ཟས་སུ་ཡང་བ་ལང་གི་ཀོ་བ་དང་། བ་ལང་གི་ཤ་ཟ། བཏུང་བར་ཡང་ཆང་འཐུང་བས་ཁྱེད་ཅག་ཐམས་ཅད་ཟ་བ་ཡིན་ནོ། །དེ་དག་གིས་
གཅིག་ལ་གཅིག་བལྟས་ན་ཇི་ཙམ་ན་བདག་ཅག་ཐམས་ཅད་ཀྱི་མགོ་ལ་ཀུན་དོང་གི་ཕྲེང་བ་ཐོགས་པ་དང་། །ཁུར་བ་ཐམས་ཅད་བ་ལང་གི་ཀོ་བར་གྱུར་པ་དང་། ཤ་ཐམས་ཅད་བ་ལང་གི་ཤར་གྱུར་པ་དང་། བཏུང་བ་ཐམས་ཅད་ཆང་དུ་གྱུར་པར་མཐོང་ནས། དེ་དག་གིས་སྨྲས་པ། འཕགས་པ་འཆར་ཀ་ཁྱོད་ཀྱིས་བདག་ཅག་ལ་དམོད་པ་བོར་གྱིས། བདག་ཅག་ལ་བཟོད་པ་མཛད་དུ་གསོལ། ཚེ་དང་ལྡན་པ་འཆར་ཀས་སྨྲས་པ། བཟོད་པར་བྱའོ། །དེ་ནས་དེ་དག་སྔ་མ་ཁོ་བཞིན་དུ་གྱུར་པ་དང་། དེ་དག་ངོ་མཚར་སྐྱེས་ནས་དེ་དག་གིས་སྨྲས་པ། བཙུན་པ་འཆར་ཀ་ཅིའི་སླད་དུ་བྱོན། ཁྱོད་ཅག་ཉིད་གདུལ་བའི་དོན་དུ་འོངས་ཀྱིས། འཁོད་ཅིག་དང་ཆོས་བསྟན་པར་བྱའོ། །དེ་དག་ཚེ་དང་ལྡན་པ་འཆར་ཀའི་མདུན་དུ་ཆོས་མཉན་པའི་ཕྱིར་འཁོད་པ་དང་། ཚེ་དང་ལྡན་པ་འཆར་ཀས་དེ་དག་ཆུང་མ་དང་བཅས་པའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཁོང་དུ་ཆུད་ནས་འདི་ལྟར། བྲམ་ཟེ་དེ་དག་ཆུང་མ་དང་བཅས་པས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་མངོན་དུ་བྱས་པ་དེ་ལྟར་ཆོས་བསྟན་ཏོ། །དེ་དག་གིས་བདེན་པ་མཐོང་ནས་སྨྲས་པ། བཙུན་པ་བདག་ཅག་གིས་དགེ་བའི་བཤེས་གཉེན་བཙུན་པ་འཆར་ཀ་ལ་བརྟེན་ནས། བཙུན་པ་འཆར་ཀས་བདག་ཅག་ལ་གང་མཛད་པ་འདི་ལྟ་བུ་ནི་བདག་ཅག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་རྣམས་ཀྱིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་། མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་། ཡི་དགས་དག་ནས་ནི་
རྐང་པ་ཕྱུང་། ལྷ་དང་མིའི་ནང་དུ་ནི་བཞག །འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ཅག་ནི་མངོན་པར་ཞུགས་པ་ལགས་སོ། །བཙུན་པ་བདག་ཅག་ནི་མངོན་པར་ཞུགས་པ་ལགས་ཏེ། བཙུན་པ་བདག་ཅག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་ཅག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །བཙུན་པ་འཆར་ཀས་ཇི་སྲིད་འཚོའི་བར་དུ་བདག་ཅག་གི་བསོད་སྙོམས་དང་། ན་བཟའ་དང་། གནས་མལ་དང་། བསྙུང་བའི་རྐྱེན་དང་། སྨན་གྱི་ཡོ་བྱད་དག་བཞེས་པར་ཅི་གནང་། ཚེ་དང་ལྡན་པ་འཆར་ཀས་སྨྲས་པ། རབ་ཏུ་བྱུང་བ་ནི་གཞན་ལ་ཕན་པས་རྗེས་སུ་འཛིན་པ་ལ་ཞུགས་པ་ཡིན་པས། བྲམ་ཟེ་གཞན་དག་ལ་ཡང་ཕན་ པ་བྱ་དགོས ་སོ་ཞེས་སྨྲས་ཏེ་དང་དུ་མ་བླངས་སོ། །བྲམ་ཟེ་དེ་དག་གིས་སྨྲས་པ། གལ་ཏེ་བཙུན་པ་འཆར་ཀས་དང་དུ་མི་བཞེས་ན། བདག་ཅག་གིས་དྲང་སྲོང་གི་གདན་བཤམ་པར་བགྱིས། བཙུན་པ་འཆར་ཀ་གཤེགས་ཏེ་ལོངས་སྤྱད་པར་གསོལ། ཚེ་དང་ལྡན་པ་འཆར་ཀས་བྲམ་ཟེ་དེ་དག་ལ་ཅང་མི་སྨྲ་བས་དང་དུ་བླངས་སོ། །དེ་ནས་ཚེ་དང་ལྡན་པ་འཆར་ཀས་དེ་དག་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་ནས་སྟན་ལས་ལངས་ཏེ་སོང་ངོ་། །དེ་ན་ཚེ་དང་ལྡན་པ་འཆར་ཀས་མཉན་ཡོད་དུ་བྲམ་ཟེའི་ཁྱིམ་ལྔ་བརྒྱ་ལྷག་ཙམ་གཉི་ག་ནས་བཏུལ་ཞིང་བཞག་གོ །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ངའི་ཉན་ཐོས་ཀྱི་དགེ་སློང་ཁྱིམ་དད་པར་བྱེད་པ་རྣམས་ཀྱི་ནང་ན་མཆོག་ནི་འདི་ལྟ་སྟེ། དགེ་སློང་འཆར་ཀ་ནག་པོ་འདི་ཡིན་ནོ། །ཚེ་
དང་ལྡན་པ་འཆར་ཀས་བསམས་པ། གང་གདུལ་བའི་དུས་ཡིན་སྙམ་ན། མཉན་ཡོད་ན་བྲམ་ཟེ་ཞིག་གསང་སྔགས་དག་གིས་མི་མ་ཡིན་པ་དབང་དུ་བྱས་ནས། ཤིང་རྟ་བཅས་ཏེ་འདྲེན་དུ་འཇུད་པར་བྱེད་ནས། ཚེ་དང་ལྡན་པ་འཆར་ཀས་བསམས་པ། བྲམ་ཟེ་དེ་གདུལ་བའི་དུས་ཡིན་ནོ་སྙམ་ནས། ཚེ་དང་ལྡན་པ་འཆར་ཀ་བྲམ་ཟེ་དེ་གདུལ་བའི་ཕྱིར་འཕགས་པ་དང་། ཇི་ཙམ་ན། བྲམ་ཟེ་དེ་གསང་སྔགས་དག་གིས་མི་མ་ཡིན་པ་དབང་དུ་བྱས་ནས། ཤིང་རྟ་བཅས་ཏེ་འདྲེན་དུ་བཅུག་ནས་མཉན་ཡོད་ཀྱི་ཕྱི་རོལ་དུ་སོང་བ་ན། བྲམ་ཟེ་དེ་ཤིང་རྟ་ལས་བབས་ནས་གཅིན་གཅི་བར་བརྩམས་པ་དང་། ཚེ་དང་ལྡན་པ་འཆར་ཀས་འདི་ལྟར་བྲམ་ཟེ་དེའི་གཅིན་རྒྱུན་མི་འཆད་པ་དེ་ལྟར་བྱིན་གྱིས་བརླབས་ནས། ཚེ་དང་ལྡན་པ་འཆར་ཀས་གསང་སྔགས་ཀྱི་ཕུར་བུ་ཕྱུང་བ་དང་། མི་མ་ཡིན་པ་དེ་བྲོས་ཏེ་སོང་ངོ་། །ཇི་ཙམ་ན། བྲམ་ཟེ་དེ་ལངས་པ་དང་མི་མ་ཡིན་པ་བྲོས་པར་མཐོང་ནས། དེས་སྨྲས་པ། སུས་ཁོ་བོའི་མི་མ་ཡིན་པའི་ཕུར་བུ་ཕྱུང་། ཚེ་དང་ལྡན་པ་འཆར་ཀས་སྨྲས་པ། ཁོ་བོས་སོ། །ཅིའི་ཕྱིར་ཁྱོད་བྲམ་ཟེར་གྱུར་ནས་མི་མ་ཡིན་པ་སྤྱོད་དམ། དེས་སྨྲས་པ། སུ་ཞིག་བདག་གི་བསྙེན་བཀུར་བྱེད་པར་འགྱུར། ཚེ་དང་ལྡན་པ་འཆར་ཀས་དེ་ལ་ལྷུང་བཟེད་བསྟན་ནས་སྨྲས་པ། འདི་ཁྱོད་ཀྱི་བསྙེན་བཀུར་བྱེད་པར་འགྱུར་རོ། །དེས་སྨྲས་པ། འདིས་ཅི་འགྲུབ་པར་འགྱུར། ཚེ་དང་ལྡན་པ་འཆར་ཀས་སྨྲས་པ། གང་སེམས་པ་དང་། གང་འདོད་པ་དེ་དག་ཐམས་ཅད་འགྲུབ་པར་འགྱུར་རོ། །ཇི་ཙམ་ན། བྲམ་ཟེ་དེ་གང་སེམས་པ་དང་། གང་འདོད་པ་དེ་དག་ཐམས་ཅད་ལྷུང་བཟེད་དེ་ལས་གྲུབ་པར་གྱུར་པ་དང་། བྲམ་ཟེ་དེ་ངོ་མཚར་སྐྱེས་ཏེ་དེས་སྨྲས་པ། བཙུན་པ་འཆར་ཀ་ཅིའི་སླད་དུ་འདི་ལྟར་འགྱུར། ཚེ་དང་ལྡན་པ་འཆར་ཀས་སྨྲས་པ། ཁོ་བོས་ལྷུང་བཟེད་ཀྱི་རིག་པ་ཤེས་སོ། །དེས་སྨྲས་པ། བཙུན་པ་འཆར་ཀ་ལྷུང་བཟེད་ཀྱི་རིག་པ་དེ་བདག་ལ་སྩོལ་ཅིག །ཚེ་དང་ལྡན་པ་འཆར་ཀས་ཚིགས་སུ་བཅད་པ་སྨྲས་པ། རིག་
པ་སུ་ལའང་སྦྱིན་མི་བྱ། །རིག་དང་བཅས་ཏེ་འཆི་བར་བྱ། །རིག་པ་རིག་དང་གུས་པ་དང་། །ནོར་གྱི་ཕྱིར་ནི་སྦྱིན་པར་བྱ། །བྲམ་ཟེས་སྨྲས་པ། བདག་ཁྱོད་ལ་གུས་པར་བགྱིད་དོ། །ཚེ་དང་ལྡན་པ་འཆར་ཀས་སྨྲས་པ། ཁོ་བོ་ཁྱིམ་པ་ལས་བསྙེན་བཀུར་བདག་གིར་མི་བྱེད་ཀྱི། ཁོ་བོ་ནི་རབ་ཏུ་བྱུང་བ་ལས་བསྙེན་བཀུར་བདག་གིར་བྱེད་དོ། །དེས་སྨྲས་པ། བདག་རབ་ཏུ་འབྱུང་ངོ་། །ཚེ་དང་ལྡན་པ་འཆར་ཀས་སྨྲས་པ། རབ་ཏུ་ཕྱུང་ཤིག་ཅེས་དེས་དེ་རབ་ཏུ་ཕྱུང་། རྫོགས་པར་བསྙེན་པར་བྱས་ཏེ་གདམས་ངག་བྱིན་ནོ། །དེ་དེ་ལྟར་རབ་ཏུ་བྱུང་ནས་གཅིག་པུ་དབེན་པ་བག་ཡོད་པ། བརྟུན་པ་དང་ལྡན་པ་བདག་ཉིད་བཏང་བར་གནས་སོ། །གཅིག་པུ་དབེན་པ་བག་ཡོད་པ། བརྟུན་པ་དང་ལྡན་པ་བདག་ཉིད་བཏང་བར་གནས་པ་ན། རིགས་ཀྱི་བུ་དག་གང་གི་ཕྱིར་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས། ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ། ཚངས་པར་སྤྱོད་པའི་མཐའ་བླ་ན་མེད་པ། དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང་། དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུར་རིག་པས་སྒོ་ངའི་སྦུབས་དྲལ་བར་གྱུར་ཅིང་། རིག་པ་དང་། མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་འདོད་པའི་རྙེད་པ་དང་། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །ཚེ་དང་ལྡན་པ་འཆར་ཀས་བསམས་པ། གང་གདུལ་བའི་དུས་ཡིན་སྙམ་ན། ཡུལ་མིའི་གྱད་གཅིག་གིས་ཡུལ་དག་ཏུ་གྱད་རྣམས་བརྡབས་ནས་མཉན་ཡོད་དུ་འོངས་ཏེ། མཉན་
ཡོད་ན་སྒོ་ཁར་རྐང་པ་བརྐྱང་སྟེ་འདུག་ཅིང་། དེ་གང་ལ་ལ་འོང་བ་དེ་ལ་འདི་སྐད་ཅེས། ཡང་ན་ནི་ཁོ་བོ་ལ་སྟོབས་རྒོལ་ཅིག། ཡང་ན་ནི་ཁོ་བོའི་རླིག་བར་དུ་སོང་ཤིག་ཅེས་ཟེར་རོ། །དེ་ན་སྐྱེ་བོ་ཕལ་པོ་ཆེའི་ཚོགས་འདུ་བ་དག་ལས། འགའ་ཡང་དེ་ལ་སྟོབས་ཀྱང་མི་རྒོལ། དེའི་རླིག་བར་དུ་ཡང་མི་འགྲོའོ། །ཚེ་དང་ལྡན་པ་འཆར་ཀས་བསམས་པ། གྱད་དེ་གདུལ་བའི་དུས་ཡིན་ནོ་སྙམ་ནས། ཚེ་དང་ལྡན་པ་འཆར་ཀ་ཕྱོགས་དེར་སོང་སྟེ་སྨྲས་པ། འདི་སུ་ཞིག་ཡིན། སྐྱེ་བོ་ཕལ་པོ་ཆེའི་ཚོགས་ཀྱིས་སྨྲས་པ། གྱད་འདིའི་མཆིད་ནས་འདི་སྐད་ཅེས། ཡང་ན་ནི་ཁོ་བོ་ལ་སྟོབས་རྒོལ་ཅིག། ཡང་ན་ནི་ཁོ་བོའི་རླིག་བར་དུ་སོང་ཤིག་ཅེས་མཆིའོ། །ཚེ་དང་ལྡན་པ་འཆར་ཀས་དེ་ལ་སྨྲས་པ། ཅི་ཇེ་ཁོ་བོ་དང་ལྷན་ཅིག་སྟོབས་བྱའམ། འོན་ཏེ་ཁོ་བོས་བརྡབས་པའི་གྱད་གསུམ་པོ་གང་དག་ཡིན་པ་དེ་དག་དང་ལྷན་ཅིག་སྟོབས་འགྱེད། དེས་སྨྲས་པ། ཁྱོད་ཀྱིས་བརྡབས་པའི་གྱད་གསུམ་པོ་གང་དག་ཡིན་པ་དེ་དག་དང་ལྷན་ཅིག་སྟོབས་བྱའོ། །ཚེ་དང་ལྡན་པ་འཆར་ཀས་སྨྲས་པ། ཁོ་བོས་འདོད་ཆགས་ཀྱི་གྱད་བརྡབས། ཞེ་སྡང་གི་གྱད་བརྡབས། གཏི་མུག་གི་གྱད་བརྡབས་ཀྱིས། ཁྱོད་དེ་དག་དང་ལྷན་ཅིག་སྟོབས་ཁྱེ་ཤིག་ཅེས། ཚེ་དང་ལྡན་པ་འཆར་ཀས་དེ་བཏུལ་ནས་དེས་དེ་རབ་ཏུ་ཕྱུང་། རྫོགས་པར་བསྙེན་པར་བྱས་ཏེ་གདམས་ངག་བྱིན་ནོ། །དེ་དེ་ལྟར་རབ་ཏུ་བྱུང་ནས་གཅིག་པུ་དབེན་པ་བག་ཡོད་པ། བརྟུན་པ་དང་ལྡན་པ་བདག་ཉིད་བཏང་བར་གནས་སོ། །གཅིག་པུ་དབེན་པ་བག་ཡོད་པ། བརྟུན་པ་དང་ལྡན་པ་བདག་ཉིད་བཏང་བར་གནས་པ་ན། རིགས་ཀྱི་བུ་དག་གང་གི་ཕྱིར་སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་དག་བགོས་ནས། ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ། ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས། བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་
ཞེས་གོ་བར་བྱེད་ཅིང་། དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ་རིག་པས་སྒོ་ངའི་སྦུབས་དྲལ་བར་གྱུར་ཅིང་། རིག་པ་དང་། མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་འདོད་པའི་རྙེད་པ་དང་། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་། ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །གཏུམ་མོ་དེས་བུའི་ཆུང་མ་བླངས་ནས། དུས་གཞན་ཞིག་ན་གཏུམ་མོ་ཡང་དུས་ལ་བབ། དེའི་ཁྱིམ་ཐབ་ཀྱང་དུས་ལ་བབ་བོ། །གཏུམ་མོའི་བུ་དེ་ཁ་ཏོན་གྱི་ཞོར་ལ་ཡུལ་གཞན་དུ་སོང་ངོ་། །གཏུམ་མོའི་མནའ་མ་དེ་གོས་དང་ཟས་བཟང་ཞིང་ཞིམ་པ་ལ་ལོངས་སྤྱོད་སྤྱོད་པས། ཉོན་མོངས་པ་དག་གིས་གདུངས་པར་གྱུར་ནས། དེས་བུ་མོ་མངག་གཞུག་མ་ལ་སྨྲས་པ། བུ་མོ་སོང་ལ་སྐྱེས་པ་ལུས་བརྟན་པ། མཁྲང་བ། དམ་པ་འགའ་ཅི་སྣང་ཚོལ་ཅིག་དང་དེ་དང་ལྷན་ཅིག་དགའ་མགུར་སྤྱད་པར་བྱའོ། །བུ་མོ་མངག་གཞུག་མས་སྨྲས་པ། ཇོ་མོ་ཁྱོད་ཀྱི་གྱོས་པོ་དང་སྒྱུག་མོ་གཉིས་ནི་བདེན་པ་མཐོང་བ་ལགས་ན། ཁྱོད་དྲང་སྲོང་གི་ཁྱིམ་འདི་ལྟ་བུར་བྱོན་ན་ཉེས་པར་སྤྱོད་པ་དེ་ལྟ་བུ་ཇི་ལྟར་བགྱིར་རུང་། དྲང་སྲོང་གི་ཁྱིམ་གྱི་མི་སྙན་པ་སྐྱེད་པར་མཛད་དམ་ཅི། དེས་སྨྲས་པ། ཀྭའི་ཁྱོད་ལ་བསམ་པ་དེས་ཅི་བྱ། ཇེ་སོང་ལ་ཁྲིད་དེ་ཤོག་ཤིག། གལ་ཏེ་ཁྲིད་དེ་མ་འོངས་ན་ཁྱོད་ལ་མཚམས་ཆེན་པོ་གཅད་པར་བྱའོ། །བུ་མོས་བསམས་པ། བུ་ཟན་མའི་བུ་མོ་འདིས་དྲང་སྲོང་གི་ཁྱིམ་བཙོག་གིས་དགང་བར་ཆད་དེ། བདག་ལ་དཀའ་བ་མེད་ཀྱིས་དགུག་གོ་སྙམ་ནས། དེ་སྲང་དུ་སོང་བ་དང་། དེས་དེ་ན་ཆོམ་རྐུན་པའི་དམག་དཔོན་ལུས་བརྟན་པ། མཁྲང་བ་དམ་པ་ཞིག་མཐོང་ནས། དེས་དེ་ལ་སྨྲས་པ། ཀྱེ་བཙུན་པོ་ཁྱོད་ཁོ་མོའི་ཇོ་མོ་དང་ལྷན་ཅིག་དགའ་
མགུར་སྤྱོད་ཕོད་དམ། དེས་སྨྲས་པ། ཕོད་དོ། །དེས་དེ་ཁྲིད་དེ་ཇོ་མོ་དང་སྤྲད་ནས། དེ་དེ་དང་ལྷན་ཅིག་དགའ་མགུར་སྤྱོད་པར་བྱེད་དོ། །ཚེ་དང་ལྡན་པ་འཆར་ཀ་དེར་དུས་དང་དུས་སུ་འགྲོ་བས་དེ་མཐོང་ནས། ཚེ་དང་ལྡན་པ་འཆར་ཀས་བསམས་པ། བུད་མེད་ཀྱི་ཡུལ་འདི་ནི་འདོད་ཆགས་སྤྱོད་པ་ཞིག་ཡིན་ནོ་སྙམ་ནས། དེས་དེ་ལ་འདོད་ཆགས་ཀྱི་བསྔགས་པ་མ་ཡིན་པ་བརྗོད་དོ། །དེས་བསམས་པ། འཕགས་པ་འཆར་ཀ་ནི་གཞན་གྱི་སེམས་ཤེས་པ་ལ་མཁས་པ་ཡིན་པས་དེས་བདག་འཕྲིགས་ཀྱིས། གལ་ཏེ་དེ་མ་བསད་ན་དེས་བདག་གི་ཁྱིམ་ཐབ་ལ་བྱས་ཤིང་། དེ་བདག་ལ་གནོད་པ་བྱེད་པར་འགྱུར་དུ་འོང་གིས། བདག་གིས་དེ་བསད་དོ་སྙམ་ནས། དེས་ཆོམ་རྐུན་པའི་དམག་དཔོན་ལ་སྨྲས་པ། འཕགས་པ་འཆར་ཀ་ནི་གཞན་གྱི་སེམས་ཤེས་པ་ལ་མཁས་པ་ཡིན་པས། དེས་བདག་ཅག་འཕྲིགས་ཀྱིས། གལ་ཏེ་དེ་མ་བསད་ན་བདག་གི་ཁྱིམ་ཐབ་ལ་བྱས་ཤིང་། དེ་བདག་ཅག་ལ་གནོད་པ་བྱེད་པར་འགྱུར་དུ་འོང་གིས། ཁྱོད་ཀྱིས་དེ་སོད་ཅིག །ཆོམ་རྐུན་པའི་དམག་དཔོན་གྱིས་སྨྲས་པ། ཁོ་བོ་དེ་མི་གསོད་དེ། དེ་ནི་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་ནི་ཆུང་པོ་གྲོགས། བཙུན་མོ་ཕྲེང་ལྡན་མའི་ནི་སློབ་དཔོན་ཡིན་གྱིས། ཁོ་བོས་དེ་བསད་པར་གྱུར་ན་ཁོ་བོ་རྒྱལ་པོས་རྒྱ་སྐྱེགས་ཀྱི་ཁང་པར་བཅུག་སྟེ། བསྲེགས་པས་འཆི་བར་བྱ་ དགོས་པ ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ། །དེས་སྨྲས་པ། གལ་ཏེ་ཁྱོད་དེ་གསོད་ན་དེ་ལྟ་ན་ལེགས། གལ་ཏེ་མི་གསོད་ན་ཁྱོད་ཕྱིན་ཆད་ཁོ་མོའི་ཁྱིམ་དུ་འཇུག་པར་མི་བྱའོ། །འདོད་པ་སྟེན་པ་དག་གིས་ནི་སྡིག་པའི་ཆོས་མི་བྱ་བ་ཅི་ཡང་མེད་པས་ཆོམ་རྐུན་པའི་དམག་དཔོན་དེས་སྨྲས་པ། གལ་ཏེ་དེ་གཞན་གྱི་སེམས་ཤེས་པ་ལ་མཁས་པ་ཡིན་ན་ཁོ་བོས་ཇི་ལྟར་གསད་པར་བྱ། དེས་སྨྲས་པ། ཐབས་ཀྱི་རྣམ་པ་ཞིག་བྱའོ་ཞེས་དེས་དུས་མ་ཡིན་པར་ཚེ་དང་ལྡན་པ་འཆར་ཀའི་གན་དུ་མངག་པ་བཏང་སྟེ། བཙུན་པ་འཆར་ཀ་བདག་བྲོ་འཚལ་བར་གྱུར་ན་ཁྱོད་ཀྱིས་བདག་གཟིགས་པར་ཅི་གནང་ཞེས་སྤྲིང་ངོ་། །དགྲ་
བཅོམ་པ་དག་ནི་མ་བསམས་པར་ཤེས་པ་དང་མཐོང་བ་མི་འཇུག་པས། ཚེ་དང་ལྡན་པ་འཆར་ཀ་ཡང་དུས་མ་ཡིན་པར་ཞུགས་ཏེ། དེ་ལ་ཆོས་བསྟན་པ་བྱས་ནས་དེ་ཕྱིར་འབྱུང་བར་བརྩམས་པ་དང་། དེས་སྨྲས་པ། འཕགས་པ་བདག་ཁྱོད་མཐོང་ན་གློ་བ་དགའ་བས་ཡུད་ཙམ་ཞིག་བཞུགས་སུ་གསོལ་ཞེས། དེས་ཚེ་དང་ལྡན་པ་འཆར་ཀ་ཇི་སྲིད་ཀྱིས་ཤིན་ཏུ་ནམ་སྲོས་པར་གྱུར་པ་དེ་སྲིད་དུ་བཟུང་ནས། ཆོམ་རྐུན་པའི་དམག་དཔོན་ཡང་རལ་གྲི་ཤུབས་ནས་ཕྱུང་སྟེ་སྒོ་ན་སྡོད་དོ། །དེ་ནས་ཚེ་དང་ལྡན་པ་འཆར་ཀ་ཕྱིར་བྱུང་བ་དང་། ཆོམ་རྐུན་པའི་དམག་དཔོན་སྙིང་རྗེ་མེད་པའི་སེམས་དང་ལྡན་པ། འཇིག་རྟེན་ཕ་རོལ་བཏང་བ་དེས་ཚེ་དང་ལྡན་པ་འཆར་ཀའི་མགོ་དྲུང་བ་ནས་བཅད་དེ་ས་ལ་བསྒྱེལ་ཏོ། །དེ་འཕགས་པ་གསོད་ཅིང་འདུག་པ་བུད་མེད་རྒན་མོ་ཞིག་གིས་མཐོང་ནས། དེས་སྨྲས་པ། གཟུ་ལུམས་བྱེད་པ་འདི་སུ་ཞིག་ཡིན། ཆོམ་རྐུན་པའི་དམག་དཔོན་གྱིས་སྨྲས་པ། སུ་ལ་ཡང་མ་ཟེར་ཅིག །ཁོ་བོས་ཁྱོད་ཀྱང་འདིའི་གནས་སྐབས་ལྟ་བུར་བྱས་པར་གྱུར་ཏ་རེ། དེ་སྐྲག་ནས་འཕྲལ་དུ་སྨྲ་མ་ཕོད་དེ། བདག་ཉིད་ཆེན་པོ་འདིའི་རྗེས་གཅོད་པ་འགའ་ཞིག་ཕྱིས་འོང་གྲང་སྙམ་ནས། དེ་ཉིད་ན་ཅང་མི་སྨྲ་བར་འདུག་གོ །སྙིང་རྗེ་མེད་པའི་སེམས་དང་ལྡན་པ་འཇིག་རྟེན་ཕ་རོལ་བཏང་བ་དེ་གཉིས་ཀྱིས་ཚེ་དང་ལྡན་པ་འཆར་ཀའི་ལུས་དེ་ཕྱག་དར་གྱི་ཕུང་པོ་ཞིག་ཏུ་སྦས་ཏེ་བཞག་གོ །དེའི་ཉིན་མོ་གསོ་སྦྱོང་གི་ཞལ་ཏ་བ་རྒན་པའི་མཐའ་ལོགས་སུ་འདུག་སྟེ་སྨྲས་པ། འགའ་ཞིག་གིས་བཙུན་པ་འཆར་ཀའི་འདུན་པ་བླངས་སམ། བཙུན་པ་འཆར་ཀ་མེད་དོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱིམ་དད་པར་བྱེད་པ་རྣམས་ཀྱི་མཆོག་དེ་བསད་ཀྱིས། ཆོས་གོས་དག་ལོང་ཤིག་དང་དེའི་ལུས་ལ་མཆོད་པ་བྱའོ། །བཅོམ་ལྡན་འདས་འཕགས་པ་དང་ཇི་ཙམ་ན་མཉན་ཡོད་ཀྱི་སྒོ་ཆོད་ནས། བཅོམ་ལྡན་འདས་ཀྱིས་གསེར་གྱི་འོད་ལྟ་བུའི་འོད་བཏང་བ་མཛད་པ་དང་། དེས་མཉན་ཡོད་ཐམས་ཅད་གསེར་བཙོ་མའི་འོད་ལྟ་བུས་སྣང་བར་གྱུར་ཏོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བསམས་པ། ཅིའི་
ཕྱིར་མཉན་ཡོད་ཐམས་ཅད་གསེར་བཙོ་མའི་འོད་ལྟ་བུས་སྣང་བར་གྱུར་སྙམ་ནས། དེས་ཡང་བསམས་པ། བཅོམ་ལྡན་འདས་གཤེགས་པར་བཞེད་གོར་མ་ཆག་སྙམ་ནས། དེ་བཙུན་མོའི་འཁོར་དང་བཅས་པས་མཉན་ཡོད་ཀྱི་ལྡེ་མིག་ཁྱེར་ཏེ། སྒོ་ཕྱེ་བ་དང་བཅོམ་ལྡན་འདས་མཉན་ཡོད་དུ་གཤེགས་སོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བསམས་པ། ཅིའི་ཕྱིར་བཅོམ་ལྡན་འདས་དུས་མ་ཡིན་པར་མཉན་ཡོད་དུ་གཤེགས་སྙམ་ན། སངས་རྒྱས་བཅོམ་ལྡན་འདས་རྣམས་ནི་བསྙེན་པར་དཀའ་བ་དང་། བཟོད་པར་དཀའ་བ་ཡིན་པས་དེས་སངས་རྒྱས་བཅོམ་ལྡན་འདས་ལ་ཞུ་བར་མ་ནུས་སོ། །བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་མདུན་དུ་གཤེགས་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་བཙུན་མོའི་འཁོར་དང་བཅས་པ་བཅོམ་ལྡན་འདས་ཀྱི་སླད་བཞིན་སླད་བཞིན་དུ་རྗེས་སུ་འབྲང་ཞིང་སོང་བ་དང་། ཇི་ཙམ་ན། ཕྱག་དར་གྱི་ཕུང་པོའི་ཕྱོགས་དེར་བྱོན་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱིམ་པ་དད་པར་བྱེད་པ་རྣམས་ཀྱི་མཆོག་དེ་འདིར་སྦས་ཀྱིས་ཕྱུང་ཤིག། དེ་ཕྱུང་བ་དང་དེ་ན་གང་དག་ཚེ་དང་ལྡན་པ་འཆར་ཀ་ལ་བརྟེན་ནས། འཕགས་པའི་བདེན་པ་དག་མཐོང་བ་དེ་དག་གིས་གསོལ་པ། འདི་བདག་ཅག་གི་དགེ་བའི་བཤེས་གཉེན་ལགས་ན། བཅོམ་ལྡན་འདས་ཀྱིས་བདག་ཅག་འདིའི་ལུས་ལ་མཆོད་པ་བགྱིད་པར་ཅི་གནང་། བཅོམ་ལྡན་འདས་ཀྱིས་མ་གནང་ངོ་། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་གསོལ་པ། འདི་བདག་གི་ཆུང་པོ་གྲོགས་ལགས་ན། བཅོམ་ལྡན་འདས་ཀྱིས་བདག་འདིའི་ལུས་ལ་མཆོད་པ་བགྱིད་པར་ཅི་གནང་། བཅོམ་ལྡན་འདས་ཀྱིས་མ་གནང་ངོ་། །བཙུན་མོ་ཕྲེང་ལྡན་མས་གསོལ་པ། འདི་བདག་གི་སློབ་དཔོན་ལགས་ན། བཅོམ་ལྡན་འདས་ཀྱིས་བདག་འདིའི་ལུས་ལ་མཆོད་པ་བགྱིད་པར་ཅི་གནང་། བཅོམ་ལྡན་འདས་ཀྱིས་གནང་ངོ་། །དེ་ནས་བཙུན་མོ་ཕྲེང་ལྡན་མས། ཚེ་དང་ལྡན་པ་འཆར་ཀའི་ལུས་དེ་ས་དཀར་གྱིས་དྲིལ་ཕྱི་བྱེད་དུ་བཅུག་ནས། སྤོས་ཆུས་
འཁྲུར་བཅུག་སྟེ། རས་ཁ་དོག་སྣ་ཚོགས་དག་གིས་ཁྱོགས་སྤྱི་ལ་བརྒྱན་ནས། དེར་བཅུག་སྟེ་བཞག་གོ །དེ་ནས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་མདུན་དུ་གཤེགས་ནས། རྒྱལ་པོ་བཙུན་མོའི་འཁོར་དང་བཅས་པ་དེའི་ཕྱི་བཞིན་ཕྱི་བཞིན་དུ་རྗེས་སུ་འབྲང་ཞིང་སོང་སྟེ། ས་ཕྱོགས་གོ་སྐབས་ཡངས་པ་ཞིག་ཏུ་བཞག་ནས། བཙུན་མོ་ཕྲེང་ལྡན་མས་སྤོས་ཀྱི་ཤིང་ཐམས་ཅད་ཀྱིས་ཕུང་པོར་བཅེར་ཏེ་བསྲེགས་ནས། ཕུང་པོ་དེ་འོ་མས་ཞི་བར་བྱས་ཏེ། རུས་པ་དེ་དག་གསེར་གྱི་བུམ་པར་བཅུག་ནས་ལམ་པོ་ཆེའི་བཞི་མདོར་ལུས་ཀྱི་མཆོད་རྟེན་རྩིག་ཏུ་བཅུག་སྟེ། གདུགས་དང་། རྒྱལ་མཚན་དང་། བ་དན་བསྒྲེང་ཞིང་། དྲི་དང་། ཕྲེང་བ་རྒྱུ་དང་། བདུག་སྤོས་དང་། ཕྱེ་མ་དང་། སིལ་སྙན་དག་གིས་མཆོད་པ་བྱས། རྐང་པ་གཉིས་ལ་ཕྱག་འཚལ་ནས། བཅོམ་ལྡན་འདས་ཀྱིས་ཡོན་བཤད་པ་མཛད་དེ་གཤེགས་སོ། །དེ་ནས་བཅོམ་ལྡན་འདས་གཙུག་ལག་ཁང་དུ་བྱོན་ནས། དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཉེས་དམིགས་འདི་དང་གཞན་དག་ཀྱང་། དགེ་སློང་དག་དུས་མ་ཡིན་པར་གྲོང་དུ་འཇུག་པ་ལས་གྱུར་པས། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས། འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དུས་མ་ཡིན་པར་གྲོང་དུ་འཇུག་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །དགེ་སློང་ནད་ངན་ཅན་དག་འཁོད་པ་དག་གིས་ཡུན་རིང་དུ་འདུག་པར་མི་ནུས་པ་ནས། དགེ་སློང་ནད་གཡོག་དག་གིས་ཀྱང་ནད་པ་དག་གི་བྱ་བ་ཉམས་པར་བྱེད། དགེ་སློང་ཞལ་ཏ་བྱེད་པ་དག་གིས་ཀྱང་དགེ་འདུན་གྱི་བྱ་བ་ཉམས་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་
འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་འདུག་པ་ལ་སྨྲས་ཏེ་འགྲོ་བར་བྱའོ། །བཅོམ་ལྡན་འདས་ཀྱིས་དགེ་སློང་འདུག་པ་ལ་སྨྲ་བར་བྱའོ་ཞེས་བཀའ་སྩལ་ནས། དགེ་སློང་ཞིག་གིས་ཁྱིམ་གཞན་དུ་ལྷུང་བཟེད་དང་ཆོས་གོས་བཞག་ནས། ཇི་ཙམ་ན་དེར་མེ་ཤོར་ནས་དགེ་སློང་དེས་དེར་འགྲོ་བར་བརྩམས་ཏེ། དེ་ལམ་གྱི་ཕྱེད་དུ་སོན་པ་དང་། བདག་གིས་དགེ་སློང་འདུག་པ་ལ་མ་སྨྲས་སོ་སྙམ་པའི་དྲན་པ་སྐྱེས་ནས་དེ་ཕྱིར་ལོག་སྟེ། ཇི་སྲིད་དུ་དགེ་སློང་འདུག་པ་ལ་སྨྲ་བར་བྱེད་པ་དེ་སྲིད་དུ་དེའི་ལྷུང་བཟེད་དང་ཆོས་གོས་ཚིག་ནས་དེས་དེར་སོང་བ་དང་། ཁྱིམ་བདག་གིས་སྨྲས་པ། འཕགས་པ་ཁྱོད་ཅིའི་སླད་དུ་ཁྱོད་འཕྱིས་ཏེ་བྱོན། དེས་ན་ཁྱོད་ཀྱི་ལྷུང་བཟེད་དང་ཆོས་གོས་ཚིག་གི། གལ་ཏེ་ཁྱོད་མྱུར་དུ་བྱོན་པར་གྱུར་ན་ཁྱོད་ཀྱི་ལྷུང་བཟེད་དང་ཆོས་གོས་ཚིག་པར་མི་འགྱུར་རོ་ཞེས་ཟེར་ཞིང་། དགེ་སློང་དེ་ཡང་ཕོངས་པར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དེ་འདྲ་བའི་རྐྱེན་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང་། བསླབ་པ་ལ་གུས་པ་དང་། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་མཐུན་པ་དང་། དེའི་ཤས་ཆེ་བ་དང་། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དུས་མ་ཡིན་པར་གྲོང་དུ་འཇུག་ཅིང་དགེ་སློང་འདུག་པ་ལ་མི་སྨྲ་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཆོས་འདི་པའམ། གཞན་ཡང་དེ་ལྟ་བུ་གང་ཡིན་པའོ། །དུས་མ་ཡིན་པར་ཞེས་བྱ་བ་ནི་དུས་མ་ཡིན་པ་གཉིས་སུ་སྟེ། སྐྱ་རེངས་མ་ཤར་བ་དང་ཕྱེད་ཡོལ་བར་རོ། །གྲོང་དུ་ཞེས་བྱ་བ་ནི་གང་ན་སྲང་དང་། བཞི་མདོ་དང་། སུམ་མདོ་དག་ཡོད་པར་རོ། །འཇུག་ཅིང་ཞེས་བྱ་བ་ནི་འགྲོ་
ཞིང་ངོ་། །དགེ་སློང་འདུག་པ་ལ་མི་སྨྲ་ན་ཞེས་བྱ་བ་ནི་དེ་ན་དགེ་སློང་གང་འདུག་པ་ལའོ། །དེ་འདྲ་བའི་རྐྱེན་མ་གཏོགས་ཏེ་ཞེས་བྱ་བ་ནི་དེ་འདྲ་བའི་རྐྱེན་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་དུས་མ་ཡིན་པ་ལ་དུས་མ་ཡིན་པར་འདུ་ཤེས་པས་གྲོང་དུ་འཇུག་ན་ལྟུང་བྱེད་དུ་འགྱུར་རོ། །དུས་མ་ཡིན་པ་ལ་ཡིད་གཉིས་ཟ་བས་གྲོང་དུ་འཇུག་ན་ལྟུང་བྱེད་དུ་འགྱུར་རོ། །དུས་ལ་དུས་མ་ཡིན་པར་འདུ་ཤེས་པས། གྲོང་དུ་འཇུག་ན་ཉེས་བྱས་སུ་འགྱུར་རོ། །དུས་ལ་ཡིད་གཉིས་ཟ་བས་གྲོང་དུ་འཇུག་ན་ཉེས་བྱས་སུ་འགྱུར་རོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བཙུན་མོ་ཕྲེང་ལྡན་མས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་སྨྲས་པ། ལྷས་དགེ་སློང་རྣམས་ལ་ནི་གཞོན་ནུའི་ཡོངས་སུ་སྤང་བ་སྩལ། དགེ་སློང་མ་རྣམས་ལ་ནི་བཙུན་མོའི་འཁོར་གྱི་ཡོངས་སུ་སྤང་བ་སྩལ་ཅིང་། འཕགས་པ་འཆར་ཀ་ལྷའི་ནི་ཆུང་པོ་གྲོགས་ལགས། བདག་གི་ནི་སློབ་དཔོན་ལགས་ཏེ། དགེ་སློང་རབ་ཏུ་གྲགས་པ་དེ་ལྟ་བུ་ཡང་བཙན་ཐོང་དུ་བཀུམ་ན་དགེ་སློང་རབ་ཏུ་མ་གྲགས་པ་གཞན་དག་ལ་བཀའ་མཆིད་ཀྱང་སུ་རྨེད་པར་འགྱུར། ལྷས་འཕགས་པ་འཆར་ཀ་དེ་སུས་འགུམས་སུ་སྩལ་བ་དང་སུས་བཀུམ་པ་བཀས་རྨ་བར་ཅི་གནང་། ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་ཞོ་ཤས་འཚོ་བ་དག་ལ་བསྒོ་བ། ཤེས་ལྡན་དག་དེང་ལ་འཕགས་པ་འཆར་ཀ་དེ་སུས་གསོད་དུ་བཅུག་པ་དང་། སུས་བསད་པ་སྨྲོས་ཤིག །དེ་དག་དེ་རྨེད་ཅིང་ཕྱོགས་དེར་དོང་བ་དང་། དེ་དག་གིས་དེ་ན་བུད་མེད་རྒན་མོ་དེ་མཐོང་ཞིང་། དེས་ནི་དེ་དག་མ་མཐོང་བ་ན། བུད་མེད་རྒན་མོ་དེས་བྱུང་རྒྱལ་དུ་སྨྲས་པ། ཕྱོགས་
འདིར་ཁྱིམ་དད་པར་བྱེད་པ་རྣམས་ཀྱི་མཆོག་དེ་སྦས་པ་ནི་དེ་དང་དེ་དག་གིས་བསད་དོ། །དེ་དག་གིས་དེ་ཐོས་ནས་སྨྲས་པ། རྒན་མོ་ཅི་ཟེར། རྒན་མོ་དེས་སྨྲས་པ། ཅང་མི་ཟེར་རོ། །དེ་དག་གིས་དེ་བཟུང་སྟེ་བསྡིགས་ནས། དེ་སུས་བསད་སྨྲོས་ཤིག་ཅེས་བྱས་པ་དང་། དེས་སྨྲས་པ། བྲམ་ཟེའི་བུ་མོ་འདིས་གསོད་དུ་བཅུག་གོ །ཆོམ་རྐུན་པའི་དམག་དཔོན་འདིས་བསད་དོ། །དེ་དག་གིས་ཀྱང་བསྡིགས་ཏེ། ཅི་དེ་གཉིས་ཁོ་ནར་ཟད་དམ་ཞེས་རྨས་པ་དང་། དེས་སྨྲས་པ། གཞན་ཡང་གཡོན་ཅན་ལྔ་བརྒྱ་ཡོད་དོ། །རྒྱལ་པོའི་མི་དེ་དག་གིས་བྲམ་ཟེའི་བུ་མོ་དེ་དང་། ཆོམ་རྐུན་པའི་དམག་དཔོན་དེ་དང་། གཡོན་ཅན་ལྔ་བརྒྱ་པོ་དེ་དག་བཟུང་སྟེ་རྒྱལ་པོ་ལ་ཕུལ་ནས་སྨྲས་པ། ལྷ་འཕགས་པ་འཆར་ཀ་ནི་བྲམ་ཟེའི་བུ་མོ་འདིས་འགུམས་སུ་སྩལ་ཏེ། ཆོམ་རྐུན་པའི་དམག་དཔོན་འདིས་བཀུམ་མོ། །གཡོན་ཅན་ལྔ་བརྒྱ་པོ་འདི་དག་གི་དམག་དཔོན་ནི་འདི་ལགས་སོ། །རྒྱལ་པོས་སྨྲས་པ། ཤེས་ལྡན་དག་དེང་ལ་བྲམ་ཟེའི་བུ་མོ་འདི་རྟེའུ་དམུ་རྒོད་ཀྱི་རྐང་པ་གཉིས་ལ་ཐོགས་ཤིག །ཆོམ་རྐུན་པའི་དམག་དཔོན་འདི་ནི་རྒྱ་སྐྱེགས་ཀྱི་ཁང་པར་ཆུག་ལ་སྲེགས་ཤིག །གཡོན་ཅན་ལྔ་བརྒྱ་པོ་འདི་དག་ནི་ལག་པ་དང་རྐང་པ་དག་ཆོད་ཅིག །དེ་དག་གིས་བྲམ་ཟེའི་བུ་མོ་དེ་ནི་རྟེའུ་དམུ་རྒོད་ཀྱི་རྐང་པ་གཉིས་ལ་བཏགས་སོ། །ཆོམ་རྐུན་པའི་དམག་དཔོན་དེ་ནི་རྒྱ་སྐྱེགས་ཀྱི་ཁང་པར་བཅུག་སྟེ་བསྲེགས་སོ། །གཡོན་ཅན་ལྔ་བརྒྱ་པོ་དེ་དག་ནི་ལག་པ་དང་རྐང་པ་དག་བཅད་དོ། །དགེ་སློང་རྣམས་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་འཆར་ཀས་ལས་ཅི་བགྱིས་ན། ལས་དེའི་རྣམ་པར་སྨིན་པས་སྡང་བ་མ་མཆིས་པ་དང་། གནོད་པ་མ་བགྱིས་བཞིན་དུ་དེ་གཉིས་ཀྱིས་བཀུམ་པར་གྱུར་ཅིང་། དེ་གཉིས་ཀྱང་བཀུམ་པར་གྱུར། གཡོན་ཅན་ལྔ་བརྒྱ་པོ་དག་ཀྱང་ལག་པ་དང་རྐང་པ་དག་བཀུམ་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་དག་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་
བསྒྱུར་བ། འོད་པ་བཞིན་དུ་ཉེ་བར་གནས་པ་གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས། དེ་དག་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་འདས་པའི་དུས་ན་བཱ་རཱ་ཎ་སཱི་ན་རྒྱལ་པོ་ཚངས་བྱིན་ཞེས་བྱ་བས་རྒྱལ་སྲིད་བྱེད་དུ་བཅུག་པའི་ཚེ་ཉམ་ང་བ་དང་བཅས་པའི་དུས་བྱུང་བ་ན་མུ་སྟེགས་ཅན་དག་གིས་ལོ་བཅུ་གཉིས་སུ་ཐན་པ་འབྱུང་ངོ་ཞེས་ལུང་བསྟན་ནས། རྒྱལ་པོ་ཚངས་བྱིན་གྱིས་དྲིལ་བསྒྲག་པ་བྱེད་དུ་བཅུག་སྟེ། གང་ལ་ལོ་བཅུ་གཉིས་ཀྱི་ཟན་ཡོད་པ་དེ་ནི་འདུག་ཤིག །གང་ལ་མེད་པ་དེ་ནི་སོང་ཤིག་ཅེས་བསྒོའོ། །དེའི་མདུན་ན་འདོན་དེ་བྲམ་ཟེའི་ཁྱེའུ་ལྔ་བརྒྱ་ཙམ་བྲམ་ཟེའི་གསང་ཚིག་ཀློག་ཏུ་འཇུད་པ་དེ་ལ་བྲམ་ཟེའི་ཁྱེའུ་དེ་དག་གིས་སྨྲས་པ། མཁན་པོ་བདག་ཅག་ལ་ལོ་བཅུ་གཉིས་ཀྱི་འཚལ་མ་མ་མཆིས་ཀྱིས་བདག་ཅག་མཆིའོ། །དེས་སྨྲས་པ། བུ་དག་འཁོད་ཅིག་དང་ཁོ་བོས་ཁྱེད་ལ་མཁོ་བ་བསྟབས་པར་བྱའོ། །རྒྱལ་པོ་ཚངས་བྱིན་གྱི་རྨི་ལམ་ན་བདག་གི་རྒྱུ་མ་དག་གིས་གྲོང་ཁྱེར་ཐམས་ཅད་དཀྲིས་པར་མཐོང་ངོ་། །མཐོང་ནས་ཀྱང་དེ་གཞི་འདིས་བདག་རྒྱལ་སྲིད་ལས་ཉམས་པའམ། ཚེའི་བར་ཆད་འབྱུང་བའམ། གཅིག་ཏུ་མི་འགྱུར་གྲང་སྙམ་དུ་འཇིགས་པ་སྐྱེས་པར་གྱུར་ནས། དེས་རྨི་ལམ་དེ་མདུན་ན་འདོན་དེ་ལ་བཟླས་པ་དང་། མདུན་ན་འདོན་དེས་བསམས་པ། ལྷས་རྨི་ལམ་བཟང་པོ་ཞིག་གཟིགས་མོད་ཀྱི། འོན་ཀྱང་བྲམ་ཟེའི་ཁྱེའུ་དག་གི་རྙེད་པའི་བར་ཆད་དུ་གྱུར་ན་མི་རུང་གིས། ངན་པར་བསྙད་པར་བྱའོ་སྙམ་ནས།
དེས་རྒྱལ་པོ་ལ་སྨྲས་པ། ལྷས་རྨི་ལམ་ངན་པ་ཞིག་གཟིགས་པས། གཞི་འདིས་རྒྱལ་སྲིད་ལས་ཉམས་པའམ། སྐུ་ཚེའི་བར་ཆད་འབྱུང་བའམ་གཅིག་ཏུ་འགྱུར་རོ། །རྒྱལ་པོས་སྨྲས་པ། འདི་ལ་ཅི་ཞིག་བྱ། དེས་སྨྲས་པ། ལྷ་བ་ལང་གི་མཆོད་སྦྱིན་སྩལ་བར་བགྱིའོ། །རྒྱལ་པོས་སྨྲས་པ། དེ་ལྟར་བྱའོ། །དེས་བ་ལང་སྟོང་ཕྲག་དུ་མ་དག་བསོགས་པ་དང་། རྒྱལ་པོ་ཕྱིར་བྱུང་ནས་རྒྱལ་པོས་བ་ལང་དེ་དག་མཐོང་བ་དང་། བ་ལང་དེ་དག་གིས་བ་ལང་གི་འུ་སྒྲ་ཆེན་པོ་བྱུང་ངོ་། །རྒྱལ་པོས་དེ་དག་མཐོང་ཞིང་ཐོས་ནས། དེ་སྙིང་རྗེ་སྐྱེས་ཏེ་མདུན་ན་འདོན་ལ་སྨྲས་པ། འདི་དག་ཐམས་ཅད་གསད་པར་བྱའམ། མདུན་ན་འདོན་གྱིས་བསམས་པ། རྒྱལ་པོ་འདི་དག་ཐམས་ཅད་བསད་པར་མི་འདོད་དོ་སྙམ་ནས། དེས་སྨྲས་པ། ལྷ་ཐམས་ཅད་དགུམ་པར་མི་བགྱིའོ། །དེའི་ཚེ་ན་རྔ་བྲན་ཞིག་རྔ་བྲན་མོ་ཞིག་ལ་རྒྱབ་རྒལ་བྱེད་ནས་མདུན་ན་འདོན་གྱིས་སྨྲས་པ། ལྷ་རྔ་བྲན་དང་རྔ་བྲན་མོ་འདི་གཉིས་དགུམ་པར་བགྱིའོ། །བྲམ་ཟེའི་ཁྱེའུ་དེ་དག་གིས་ཀྱང་ལག་པ་བརྐྱང་སྟེ། འདི་གཉིས་ལགས་སོ་ཞེས་བསྟན་ནས། དེ་གཉིས་བཤས་པ་ན་སེམས་གཡོས་པ། བདག་ཅག་གཉིས་སྡང་བ་མེད་པ་དང་། གནོད་པ་མ་བྱས་བཞིན་དུ་བསད་པ་གང་ཡིན་པ་དེ་ཐམས་ཅད་ནི་མདུན་ན་འདོན་འདི་དང་། བྲམ་ཟེའི་བུ་ལྔ་བརྒྱ་པོ་འདི་དག་གི་ལེ་ལན་ཡིན་གྱིས། བདག་ཅག་གཉིས་གང་དང་གང་དུ་སྐྱེས་པ་ན། བདག་ཅག་གཉིས་ཀྱིས་མདུན་ན་འདོན་འདི་སྡང་བ་མེད་པ་དང་། གནོད་པ་མ་བྱས་བཞིན་དུ་གསོད་པ་དང་། བྲམ་ཟེའི་ཁྱེའུ་ལྔ་བརྒྱ་པོ་འདི་དག་ཀྱང་ལག་པ་དང་རྐང་པ་དག་གཅོད་དུ་འཇུད་པར་གྱུར་ཅིག་ཅེས་སྙམ་དུ་དམ་བཅས་སོ། །དགེ་སློང་དག་དེའི་ཚེ་དེའི་དུས་ན་རྒྱལ་པོ་ཚངས་བྱིན་གང་ཡིན་པ་དེ་ནི་ད་ལྟར་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ཡིན་ནོ། །དེའི་ཚེ་དེའི་དུས་ན་རྒྱལ་པོ་ཚངས་བྱིན་གྱི་བཙུན་མོ་གང་ཡིན་པ་དེ་ནི་ད་ལྟར་བཙུན་མོ་ཕྲེང་ལྡན་མ་ཡིན་ནོ། །དེའི་ཚེ་དེའི་དུས་ན་མདུན་ན་འདོན་གང་ཡིན་པ་དེ་ནི་ད་ལྟར་དགེ་སློང་འཆར་ཀ་ཡིན་ནོ། །དེའི་ཚེ་དེའི་དུས་ན་བྲམ་ཟེའི་ཁྱེའུ་ལྔ་བརྒྱ་པོ་གང་དག་ཡིན་
པ་དེ་དག་ནི་ད་ལྟར་གཡོན་ཅན་ལྔ་བརྒྱ་པོ་དག་ཡིན་ནོ། །དེའི་ཚེ་དེའི་དུས་ན་རྔ་བྲན་གང་ཡིན་པ་དེ་ནི་ད་ལྟར་ཆོམ་རྐུན་པའི་དམག་དཔོན་ཡིན་ནོ། །དེའི་ཚེ་དེའི་དུས་ན་རྔ་བྲན་མོ་གང་ཡིན་པ་དེ་ནི་ད་ལྟར་བྲམ་ཟེའི་བུ་མོ་ཡིན་ཏེ། མདུན་ན་འདོན་དེ་དང་བྲམ་ཟེའི་ཁྱེའུ་ལྔ་བརྒྱ་པོ་དེ་དག་གིས་རྔ་བྲན་དང་རྔ་བྲན་མོ་དེ་གཉིས་སྡང་བ་མེད་པ་དང་། གནོད་པ་མ་བྱས་བཞིན་དུ་གསོད་དུ་བཅུག་པའི་ལས་དེའི་རྣམ་པར་སྨིན་པས་ད་ལྟར་ཡང་ཆོམ་རྐུན་པའི་དམག་དཔོན་འདི་དང་། བྲམ་ཟེའི་བུ་མོ་འདི་གཉིས་ཀྱིས་འཆར་ཀ་དང་། གཡོན་ཅན་ལྔ་བརྒྱ་པོ་དག་སྡང་བ་མེད་པ་དང་། གནོད་པ་མ་བྱས་བཞིན་དུ་གསོད་དུ་བཅུག་གོ །བཙུན་པ་ཚེ་དང་ལྡན་པ་འཆར་ཀས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་ཕྱུག་པ། ནོར་མང་བ། ལོངས་སྤྱོད་ཆེ་བའི་ཁྱིམ་དུ་སྐྱེས། ལས་ཅི་བགྱིས་ན་དེས་བཅོམ་ལྡན་འདས་ཀྱི་སྤྱན་སྔར་རབ་ཏུ་བྱུང་ནས། ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བགྱིས། ལས་ཅི་ཞིག་བགྱིས་ན་དེས་དགྲ་བཅོམ་པ་ཉིད་ཐོབ་ཀྱང་མཚོན་གྱིས་ཡོངས་སུ་མྱ་ངན་ལས་འདས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རིགས་ཀྱི་བུ་འཆར་ཀ་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས། འཆར་ཀ་ཉིད་ཀྱིས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་འདས་པའི་དུས་ན་སངས་རྒྱས་རྣམས་འབྱུང་བ་མེད་པའི་ཚེ། རང་སངས་
རྒྱས་དམན་པ་དང་བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་འཇིག་རྟེན་དུ་བྱུང་ངོ་། །ཇི་ཙམ་ན་རི་བྲགས་ཤིག་ན་རྔོན་པ་ཞིག་འདུག་སྟེ། རི་བྲགས་དེ་དང་ཧ་ཅང་མི་རིང་བ་ཞིག་ན་རི་དགས་དང་བྱ་མང་པོ་དག་གི་རྟེན་དུ་གྱུར་པ་མཚེའུ་ཞིག་ཡོད་པ་དེར་རྔོན་པ་དེ་ཉི་མ་རེ་རེ་ཞིང་རི་དགས་དང་། བྱ་མང་པོ་དག་དྲུངས་དབྱུང་བའི་ཕྱིར་དང་། ཉམས་པར་བྱ་བའི་ཕྱིར་དང་། ཚུལ་མ་ཡིན་པས་སྡུག་བསྔལ་བར་བྱ་བའི་ཕྱིར་རྔོན་སྤྱད་དང་། རྙི་དང་རྙོང་མང་པོ་དག་འཛུགས་པར་བྱེད་དོ། །དེའི་རྔོན་སྤྱད་དང་། རྙི་དང་རྙོང་དེ་དག་ཀྱང་དོན་ཡོད་པ་ཡིན་ནོ། །ཇི་ཙམ་དུས་གཞན་ཞིག་ན་རང་སངས་རྒྱས་ཤིག་ལྗོངས་རྒྱུ་ཞིང་སོང་བ་ན་རི་བྲགས་དེར་ཕྱིན་ནས། ལྷའི་གནས་ཤིག་ཏུ་མཚན་མོ་གནས་པར་ཁས་བླངས་ནས། དེ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་རི་བྲགས་དེར་བསོད་སྙོམས་ལ་ཞུགས་སོ། །དེར་བསོད་སྙོམས་བརྒྱུས་ནས་བསམས་པ། ལྷའི་གནས་འདི་ཉིན་མོ་རྒྱུན་ལུགས་མང་བ་ཡིན་གྱིས། རི་བྲགས་ཀྱི་ཕྱི་རོལ་གྱི་གནས་ཞི་བ་ཞིག་ཏུ་བསོད་སྙོམས་བཟའོ་སྙམ་ནས། དེ་རི་བྲགས་ནས་བྱུང་སྟེ། འདི་ནི་ཞི་བའོ་འདི་ནི་ཞི་བའོ་ཞེས་མཚེའུ་དེ་ག་ལ་བ་དེར་སོང་སྟེ་ཕྱིན་ནས། ལྷུང་བཟེད་དང་ཆུ་ཚགས་མཐའ་གཅིག་ཏུ་བཞག་སྟེ། རྐང་པ་གཉིས་བཀྲུས་ནས་ལག་པ་གཉིས་བསྙལ་ཏེ་ཆུ་བཙགས་ནས། ལོ་མ་ལྷགས་པ་དག་བླངས་ཏེ་འདུག་ནས་ཟས་ཀྱི་བྱ་བ་བྱས་ཏེ་ལག་པ་གཉིས་བསྙལ་ནས། ཁ་བཀྲུས་ཏེ་ལྷུང་བཟེད་དང་ཆུ་ཚགས་གནས་ཇི་ལྟ་བ་བཞིན་དུ་བཞག་ནས། རྐང་པ་གཉིས་བཀྲུས་ཏེ་ཤིང་དྲུང་ཞིག་ཏུ་བརྟེན་ནས། བྲང་འགྲོའི་རྒྱལ་པོ་ཉལ་བའི་ལུས་བསྐྱིལ་བ་ལྟར་སྐྱིལ་མོ་ཀྲུང་བཅས་ཏེ་སྤྱོད་ལམ་ཞི་བར་འདུག་པ་དང་། དེའི་ཉིན་མོ་མིའི་དྲིས་རི་དགས་གཅིག་ཀྱང་མ་ཟིན་ཏོ། །དེ་ནས་རྔོན་པ་དེ་ནང་པར་སྔར་ལངས་ཏེ། མཚེའུ་དེ་ག་ལ་བ་དེར་སོང་ནས་དེས་རྔོན་སྤྱད་དང་། རྙི་དང་། རྙོང་དེ་དག་བྱུལ་བར་བརྩམས་པ་དང་། རི་དགས་གཅིག་ཀྱང་མ་མཐོང་ནས། དེ་འདི་སྙམ་དུ་སེམས་ཏེ།
བདག་གི་རྔོན་སྤྱད་དང་། རྙི་དང་། རྙོང་འདི་དག་དོན་ཡོད་པ་ཡིན་ན། གང་གི་ཕྱིར་དེར་རི་དགས་གཅིག་ཀྱང་མ་ཟིན་པ་འདིའི་རྒྱུ་གང་ཡིན་སྙམ་ནས། དེས་མཚེའུ་དེའི་ཐན་ཀོར་བྱུལ་བར་བརྩམས་པ་དང་། མིའི་རྗེས་མཐོང་ནས་དེ་རྗེས་དེའི་ཕྱི་བཞིན་དུ་སོང་བ་དང་། རང་སངས་རྒྱས་སྤྱོད་ལམ་ཞི་བས་འདུག་པ་དེ་མཐོང་ནས་དེས་བསམས་པ། རབ་ཏུ་བྱུང་བ་སེམས་ཞི་བ་འདི་དག་གནས་འདི་ལྟ་བུ་དག་ཏུ་མངོན་པར་དགའ་བར་བྱེད་པས། གལ་ཏེ་བདག་གིས་འདིའི་སྲོག་བཅད་པར་མ་བྱས་ན། འདི་དག་གིས་ངེས་པར་བདག་གི་འཚོ་བ་གཅོད་པར་བྱེད་ཀྱིས། རྣམ་པ་ཐམས་ཅད་དུ་འདི་གསད་པར་བྱའོ་སྙམ་ནས། སྙིང་རྗེ་མེད་པའི་སེམས་དང་ལྡན་པ་འཇིག་རྟེན་ཕ་རོལ་བཏང་བ་དེས་མདའ་དུག་ཅན་གྱིས་གཞུ་རྔའི་དབྱིབས་འདྲ་བར་རྣ་དྲུང་དུ་ཐུག་པར་བཀང་སྟེ་རང་སངས་རྒྱས་དེའི་གནད་དུ་བསྣུན་ཏོ། །རང་སངས་རྒྱས་བདག་ཉིད་ཆེན་པོ་དེས་བསམས་པ། རྔོན་པ་ཉོན་མོངས་པ་འདི་ཧ་ཅང་སྨས་པ་དང་ཉམས་པར་གྱུར་ན་མི་རུང་གིས། ད་འདི་ལ་ལག་ནས་དྲང་བ་ཞིག་བྱའོ་སྙམ་ནས། དེས་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས། རྔོན་པ་དེ་ཤིང་ལྗོན་པ་རྩ་བ་ནས་བཅད་པ་བཞིན་དུ་རང་སངས་རྒྱས་དེའི་རྐང་པ་གཉིས་ཀྱི་དྲུང་དུ་འགྱེལ་ནས་སྨྲས་པ། ཡོན་གནས་ཡང་དག་པར་གྱུར་པ་མར་གཤེགས་སུ་གསོལ། མར་གཤེགས་སུ་གསོལ། ཉོན་མོངས་པའི་འདམ་དུ་བྱིང་བ་བདག་གི་སུག་པ་ནས་དྲང་བ་སྩལ་དུ་གསོལ། རང་སངས་རྒྱས་དེ་རྔོན་པ་དེ་ལ་རྗེས་སུ་སྙིང་བརྩེ་བའི་ཕྱིར། སྟེང་གི་ནམ་མཁའ་ལས་ཤོད་དུ་བབས་སོ། །དེ་ནས་རྔོན་པ་དེས་ཟུག་རྔུ་མེད་པར་བྱས་ཏེ། རྨ་ལྷན་གྱིས་གླན་ནས་སྨྲས་པ། འཕགས་པ་སྡུམ་པར་གཤེགས་སུ་གསོལ། གལ་ཏེ་འདིར་གསེར་གྱི་ལྷན་པས་གླན་པར་མཛད་ན། དེ་ཡང་བདག་གིས་སྦྱར་བར་བགྱིའོ། །རང་སངས་རྒྱས་ཀྱིས་
བསམས་པ། བདག་གིས་རྣག་གི་ལུས་འདིས་ཐོབ་པར་བྱ་བ་གང་ཡིན་པ་ཐོབ་ཟིན་པས། དེའི་ཕྱིར་ད་ནི་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་འཇུག་པར་བྱའོ་སྙམ་ནས། དེ་རྔོན་པ་དེ་ཉིད་ཀྱི་མདུན་དུ་ཡང་ནམ་མཁའི་དཀྱིལ་དུ་འཕགས་ཏེ། ཆོ་འཕྲུལ་རྣམ་པ་སྣ་ཚོགས་དག་རྣམ་པར་བསྟན་ནས། ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །རྔོན་པ་དེ་ནོར་དང་ལྡན་པ་ཡིན་པས། དེས་སྤོས་ཀྱི་ཤིང་ཐམས་ཅད་ཀྱིས་ཕུང་པོར་བཅེར་ཏེ་བསྲེགས་ནས། ཕུང་པོ་དེ་འོ་མས་ཞི་བར་བྱས་ཏེ། རུས་པ་དེ་དག་གསེར་གྱི་བུམ་པར་བཅུག་ནས། ལམ་པོ་ཆེའི་བཞི་མདོར་ལུས་ཀྱི་མཆོད་རྟེན་རྩིག་ཏུ་བཅུག་སྟེ། གདུགས་དང་། རྒྱལ་མཚན་དང་། བ་དན་དག་བསྒྲེང་ཞིང་། དྲི་དང་། ཕྲེང་བ་རྒྱུ་དང་། བདུག་སྤོས་དང་། ཕྱེ་མ་དང་། སིལ་སྙན་དག་གིས་མཆོད་པ་བྱས་ནས། རྐང་པ་གཉིས་ལ་ཕྱག་འཚལ་ཏེ་སྨོན་ལམ་འདི་སྐད་ཅེས། བདག་ཡོན་གནས་ཡང་དག་པར་གྱུར་པ་འདི་ལྟ་བུ་ལ་གནོད་པ་བྱས་པ་གང་ཡིན་པའི་ལས་དེའི་ཆ་དང་མཐུན་པར་མ་གྱུར་པར་མཆོད་པ་བྱས་པ་གང་ཡིན་པའི་དགེ་བའི་རྩ་བ་འདིས། བདག་ཕྱུག་པ། ནོར་མང་བ། ལོངས་སྤྱོད་ཆེ་བའི་ཁྱིམ་དུ་སྐྱེ་བར་གྱུར་ཅིག་ཅེས་བཏབ་བོ། །དགེ་སློང་དག་དེ་ལ་དེའི་ཚེ་དེའི་དུས་ན། རྔོན་པ་གང་ཡིན་པ་དེ་ནི་འཆར་ཀ་འདི་ཡིན་ཏེ། དེས་རང་སངས་རྒྱས་ཀྱི་གནད་དུ་མདའ་དུག་ཅན་གྱིས་བསྣུན་པ་གང་ཡིན་པའི་ལས་དེའི་རྣམ་པར་སྨིན་པས། བསྐལ་པར་སེམས་ཅན་དམྱལ་བ་ཆེན་པོ་མནར་མེད་པར་གདུངས་ནས། ལས་དེ་ཉིད་ཀྱི་ལྷག་མས་ཚེ་རབས་ལྔ་བརྒྱར་མཚེའུ་འགྲམ་དེ་ཉིད་དུ་རི་དགས་སུ་སྐྱེས་ཤིང་། མཚོན་གྱིས་དུས་ལ་བབ་སྟེ། ད་ལྟར་གྱི་བར་དུ་ཡང་དགྲ་བཅོམ་པ་ཐོབ་ཀྱང་དེ་མཚོན་གྱིས་ཡོངས་སུ་མྱ་ངན་ལས་འདས་སོ། །མཆོད་པ་བྱས་ནས་སྨོན་ལམ་བཏབ་པ་གང་ཡིན་པ་དེས་ནི་ད་ལྟར་ཕྱུག་པ། ནོར་མང་བ། ལོངས་སྤྱོད་ཆེ་བའི་ཁྱིམ་དུ་སྐྱེས་སོ། །བཙུན་པ་ཚེ་དང་ལྡན་པ་འཆར་ཀས་ལས་ཅི་བགྱིས་ན། ལས་དེའི་རྣམ་པར་སྨིན་པས་
འདི་དུས་ལ་བབ་པའི་ལུས་ཕྱག་དར་གྱི་ཕུང་པོར་སྦས་པ་དང་། འདིས་སྟོན་པ་མཉེས་པར་བགྱིས་ཤིང་། ཐུགས་བྱུང་བར་མ་བགྱིས་པ་དང་། འདི་དུས་ལ་བབ་པའི་ལུས་ལ་སྟོན་པ་ཉན་ཐོས་ཀྱི་དགེ་འདུན་དང་བཅས་པ་དང་། རྒྱལ་པོའི་བཙུན་མོ་འཁོར་དང་བཅས་པས། ལུས་ཀྱི་མཆོད་པ་བགྱིས་པ་དེ་ལྟ་བུའི་ཡོན་ཏན་གྱི་ཚོགས་ཐོབ་པར་གྱུར། དགེ་སློང་དག་འཆར་ཀ་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས། འཆར་ཀ་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི། ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་། མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་འདས་པའི་དུས་ན་སངས་རྒྱས་རྣམས་འབྱུང་བ་མེད་པའི་ཚེ། རང་སངས་རྒྱས་དམན་པ་དང་། བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ་། །གངས་ཀྱི་སུལ་ཞིག་ན་རང་སངས་རྒྱས་ལྔ་བརྒྱ་གནས་ཏེ། དེ་ན་རང་སངས་རྒྱས་གཅིག་ཅིག་ན་བར་གྱུར་ནས་གཞན་དག་གིས་དེ་ལ་སྨྲས་པ། ཁྱོད་བཞུད་ལ་སྨན་པ་ལ་རྨོས་ཏེ་ཆོ་ག་མཛོད་ཅིག །དེ་རི་བྲགས་གཞན་ཞིག་ཏུ་སོང་ནས་མཚན་མོ་རྫ་མཁན་གྱི་ར་བ་ཞིག་ཏུ་གནས་པར་ཁས་བླངས་པ་དང་། དེ་མཚན་མོ་ན་བར་གྱུར་ནས་དུས་ལ་བབ་བོ། །རྫ་མཁན་དེས་དེ་མཐོང་ནས་དེས་བསམས་པ། རབ་ཏུ་བྱུང་བ་འདི་རྫ་སོ་བཏང་བ་དང་། མ་
བཏང་བ་དག་གི་ནང་དུ་དུས་ལ་བབ་པས་འཇིག་རྟེན་ནི་གཙང་སྦྲ་འདོད་པ་ཡིན་པས། གལ་ཏེ་སྐྱེ་བོ་དག་གིས་ཚོར་བར་གྱུར་ན་འགའ་ཡང་སྣོད་ཉོ་བར་མི་འགྱུར་རོ་སྙམ་ནས། དེས་རང་སངས་རྒྱས་ཀྱི་ལུས་དེ་ཕྱག་དར་གྱི་ཕུང་པོ་ཞིག་ཏུ་སྦས་ཏེ་བཞག་གོ །རང་སངས་རྒྱས་གཞན་དག་གིས་བསམས་པ། བདག་ཅག་གི་ཚངས་པ་མཚུངས་པར་སྤྱོད་པ་དེ་གར་སོང་སྙམ་ནས་བལྟས་པ་དང་། ཇི་ཙམ་ན་ཡོངས་སུ་མྱ་ངན་ལས་འདས་པར་མཐོང་ནས་དེ་དག་གིས་དེ་ཉིད་ནས་སྤོས་ཀྱི་ཤིང་དག་སྟེང་གི་ནམ་མཁའ་ལས་ཁྱེར་ཏེ་འོངས་ནས་རྫ་མཁན་གྱི་ར་བར་བབས་པ་དང་། རྫ་མཁན་གྱིས་དེ་དག་མཐོང་ནས། དེས་སྨྲས་པ། འཕགས་པ་དག་གར་གཤེགས། དེ་དག་གིས་སྨྲས་པ། ཚངས་པ་མཚུངས་པར་སྤྱོད་པ་ལ་མཆོད་པ་བྱེད་དུའོ། །རྫ་མཁན་གྱིས་སྨྲས་པ། འདིས་ཀྱང་ཁྱོད་ཀྱི་ཡོན་ཏན་གྱི་ཚོགས་ལྟ་བུ་དག་ཐོབ་བམ། དེ་དག་གིས་སྨྲས་པ། ཐོབ་བོ། །རྫ་མཁན་གྱིས་སྨྲས་པ། བདག་གིས་འདི་ལ་བཀུར་སྟི་མ་ལགས་པ་བགྱིས་པས། ད་བཀུར་སྟི་བགྱི་བའི་བར་དུ་ཡུད་ཙམ་ཞིག་གཞེས་སུ་གསོལ། དེ་སོང་སྟེ་རྒྱལ་པོ་ལ་སྨྲས་པ། ལྷ་བདག་གི་ར་བར་རབ་ཏུ་བྱུང་བ་བརྟུལ་ཞུགས་གྲུབ་པ་ཞིག་དུས་ལ་བབ་ཀྱིས། ལྷས་དེ་ལ་བཀུར་སྟི་མཛད་དུ་གསོལ། རྒྱལ་པོ་བཙུན་མོའི་འཁོར་དང་བཅས་པ་ཕྱིར་བྱུང་ནས། དེས་རང་སངས་རྒྱས་ཀྱི་ལུས་དེ་སྤོས་ཀྱི་ཤིང་ཐམས་ཅད་ཀྱིས་ཕུང་པོར་བཅེར་ཏེ་བསྲེགས་ནས་ཕུང་པོ་དེ་འོ་མས་ཞི་བར་བྱས་ཏེ་རུས་པ་དེ་དག་གསེར་གྱི་བུམ་པར་བཅུག་ནས་ལམ་པོ་ཆེའི་བཞི་མདོར་ལུས་ཀྱི་མཆོད་རྟེན་རྩིག་ཏུ་བཅུག་སྟེ། གདུགས་དང་། རྒྱལ་མཚན་དང་། བ་དན་བསྒྲེང་ཞིང་། དྲི་དང་། ཕྲེང་བ་རྒྱུ་དང་། བདུག་སྤོས་དང་། ཕྱེ་མ་དང་། སིལ་སྙན་དག་གིས་མཆོད་པ་བྱས་སོ། །རྫ་མཁན་དེས་རྐང་པ་གཉིས་ལ་ཕྱག་འཚལ་ཏེ་སྨོན་ལམ་འདི་སྐད་ཅེས། བདག་ཡོན་གནས་ཡང་དག་པར་གྱུར་པ་འདི་ལྟ་བུ་ལ་གནོད་པ་བྱས་པ་གང་ཡིན་པའི་ལས་དེའི་ཆ་དང་མཐུན་པར་མ་གྱུར་པར་མཆོད་པ་བྱས་པ་གང་ཡིན་པའི་དགེ་བའི་རྩ་བ་འདིས། བདག་འདི་བས་ཆེས་ཁྱད་པར་དུ་འཕགས་
པའི་སྟོན་པ་མཉེས་པར་བྱེད་ཅིང་ཐུགས་བྱུང་བར་བྱེད་པར་མི་འགྱུར་བ་དང་། བདག་དུས་ལ་བབ་པའི་ལུས་ལ་ཡང་སྟོན་པ་ཉན་ཐོས་ཀྱི་དགེ་འདུན་དང་བཅས་པ་དང་། རྒྱལ་པོའི་བཙུན་མོའི་འཁོར་དང་བཅས་པ་མཆོད་པ་མཛད་པར་གྱུར་ཅིག་ཅེས་བཏབ་བོ། །དགེ་སློང་དག་དེའི་ཚེ་དེའི་དུས་ན་རྫ་མཁན་གང་ཡིན་པ་དེ་ནི་ད་ལྟར་དགེ་སློང་འཆར་ཀ་འདི་ཡིན་ཏེ། འདིས་དེའི་ཚེ་རང་སངས་རྒྱས་དེ་དུས་ལ་བབ་པའི་ལུས་དེ་ཕྱག་དར་གྱི་ཕུང་པོར་སྦས་པའི་ལས་དེའི་རྣམ་པར་སྨིན་པས་ནི་ད་ལྟར་འདི་དུས་ལ་བབ་པའི་ལུས་ཕྱག་དར་གྱི་ཕུང་པོར་སྦས་སོ། །འདིས་དེའི་ཚེ་རང་སངས་རྒྱས་ཀྱི་ལུས་དེ་ལ་མཆོད་པ་བྱས་ཏེ་སྨོན་ལམ་དེ་སྐད་བཏབ་པའི་ལས་དེའི་རྣམ་པར་སྨིན་པས་ནི་ད་ལྟར་འདིས་རང་སངས་རྒྱས་བྱེ་བ་ཕྲག་འབུམ་པས་ཆེས་ཁྱད་པར་དུ་འཕགས་པའི་སྟོན་པ་ང་མཉེས་པར་བྱས་ཤིང་ཐུགས་བྱུང་བར་མ་བྱས་ཏེ། འདི་དུས་ལ་བབ་པའི་ལུས་ལ་སྟོན་པ་ཉན་ཐོས་ཀྱི་དགེ་འདུན་དང་བཅས་པ་དང་། རྒྱལ་པོའི་བཙུན་མོ་འཁོར་དང་བཅས་པས་ལུས་ཀྱི་མཆོད་པ་བྱས་པར་གྱུར་ཏོ། །བཙུན་པ་ཚེ་དང་ལྡན་པ་འཆར་ཀས་ལས་ཅི་བགྱིས་ན་ལས་དེའི་རྣམ་པར་སྨིན་པས་བཅོམ་ལྡན་འདས་ཀྱིས་ཁྱིམ་དད་པར་བགྱིད་པ་རྣམས་ཀྱི་མཆོག་ཏུ་བསྟན་དེ་ནི་སྨོན་ལམ་གྱི་དབང་གིས་ཏེ། གང་དུ་སྨོན་ལམ་བཏབ་ཅེ་ན། དགེ་སློང་དག་སྔོན་བྱུང་བ་འདས་པའི་དུས་ན་བསྐལ་པ་ཆེན་པོ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན། སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འོད་སྲུང་འཇིག་རྟེན་དུ་བྱུང་སྟེ། དེ་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་བརྟེན་ཅིང་བཞུགས་སོ། །དེའི་བསྟན་པ་ལ་འདི་རབ་ཏུ་བྱུང་ནས་དགེ་སློང་གང་གིས་དེ་རབ་ཏུ་ཕྱུང་བའི་དགེ་སློང་དེ་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་ཁྱིམ་དད་པར་བྱེད་པ་རྣམས་ཀྱི་མཆོག་ཏུ་བསྟན་ཏོ། །དེ་ན་འདིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་
འགའ་ཡང་མ་ཐོབ་ནས་དེའི་འོག་ཏུ་འཆི་བའི་ཚེ་སྨོན་ལམ་འདི་སྐད་ཅེས། བདག་གིས་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཡོན་གནས་བླ་ན་མེད་པ་འོད་སྲུང་ལ་ཚེ་ཇི་སྲིད་པར་ཚངས་པར་སྤྱོད་པ་སྤྱད་ཀྱང་ཡོན་ཏན་འགའ་ཡང་མ་ཐོབ་སྟེ། བདག་གིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་པའི་དགེ་བའི་རྩ་བ་འདིས་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་སྐྱེ་དགུའི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པ་དེའི་བསྟན་པ་ལ་བདག་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱེད་ཅིང་། ཇི་ལྟར་མཁན་པོ་འདི་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་ཁྱིམ་དད་པར་བྱེད་པ་རྣམས་ཀྱི་མཆོག་ཏུ་བསྟན་པ་དེ་བཞིན་དུ་བདག་ཀྱང་བཅོམ་ལྡན་འདས་ཤཱཀྱ་ཐུབ་པ། ཤཱཀྱའི་སེང་གེ། ཤཱཀྱའི་རྒྱལ་པོའི་གཙོ་བོ་དེས་ཁྱིམ་དད་པར་བྱེད་པ་རྣམས་ཀྱི་མཆོག་ཏུ་བསྟན་པར་གྱུར་ཅིག་ཅེས་གདབ་པར་བརྩམས་པས། སྨོན་ལམ་དེའི་དབང་གིས་ད་ལྟར་དེ་བཞིན་གཤེགས་པས་ཁྱིམ་དད་པར་བྱེད་པ་རྣམས་ཀྱི་མཆོག་ཏུ་བསྟན་ཏོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་གནག་པ་ཡིན་ལ། གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་། འདྲེན་མ་རྣམས་སྤངས་ཏེ་ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །དུས་མ་ཡིན་པར་འགྲོ་བའི་ལྟུང་བྱེད་དེ་བརྒྱད་བཅུ་པ་རྫོགས་སྷོ།། །།