ཕྲ་མོའི་སྒོ་ལྔ་པ། ལུས་ཀྱི་སྡེ་ཚན།
བསྡུས་པའི་སྡོམ་ནི། ལུས་དང་གླེང་བ་སངས་རྒྱས་དང་། །སྤང་བ་དག་དང་ང་འདས་དང་། །མཚམས་ལས་ཕྱི་རོལ་དགེ་སློང་རྣམས། །དུས་སྟོན་རྒྱུ་བར་བཅས་པའོ། །སྡོམ་ནི། རོ་ནི་བསྲེག་པར་བྱ་བ་དང་། །ཤཱ་རིའི་བུ་ཡི་མཆོད་རྟེན་དང་། །དེར་ནི་དུས་སྟོན་བྱ་བ་དང་། །དུང་དང་ཉ་ཕྱིས་ཚོང་པའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་གནས་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་ཅེས་བྱ་བ་ནས། བུ་ཕོ་ཞིག་བཙས་ཏེ་དེ་བཙས་པའི་བཙས་སྟོན་ཞག་བདུན་གསུམ་ཉི་ཤུ་གཅིག་ཏུ་རྒྱ་ཆེར་བྱས་ནས་རིགས་དང་མཐུན་པའི་མིང་བཏགས་ཏེ་བསྲིངས་བསྐྱེད་ནས་ཆེན་པོར་གྱུར་ཏོ་ཞེས་བྱ་བའི་བར་སྔ་མ་བཞིན་ནོ། །ཇི་ཙམ་དུས་གཞན་ཞིག་ན་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་། དེའི་ཁམས་མ་མཉམ་ནས་ན་བར་གྱུར་ཏེ། དེ་རྩ་བ་དང་། སྡོང་བུ་དང་། མེ་ཏོག་དང་། འབྲས་བུའི་སྨན་དག་གིས་རིམ་གྲོ་བྱས་ན་མ་ཕན་ཏེ་དུས་ལས་འདས་སོ། །དེ་དགེ་སློང་དག་གིས་ལྷུང་བཟེད་དང་བཅས། ཆོས་གོས་དང་བཅས་པར་ལམ་དང་ཉེ་བ་ཞིག་ཏུ་བོར་རོ། །ཇི་ཙམ་ན་ལམ་དེ་ནས་བྲམ་ཟེ་དང་ཁྱིམ་བདག་འགྲོ་བ་དེ་དག་གིས་དེ་མཐོང་སྟེ། དེ་ན་ཁ་ཅིག་གིས་སྨྲས་པ། ཤེས་ལྡན་དག་ཤཱཀྱའི་བུ་ཞིག་དུས་ལས་འདས་སོ། །གཞན་དག་གིས་སྨྲས་པ། ཚུར་ཤེག་བལྟ་བར་བྱའོ། །དེ་དག་གིས་མཐོང་ནས་ངོ་ཤེས་ཏེ་དེ་དག་གིས་སྨྲས་པ། ཤེས་ལྡན་དག་འདི་ནི་ཁྱིམ་བདག་ཆེ་གེ་མོའི་བུ་ཡིན་ཏེ། དགེ་སྦྱོང་ཤཱཀྱའི་བུ་པ་མགོན་མེད་པ་རྣམས་ཀྱི་ནང་དུ་རབ་ཏུ་བྱུང་བས་གནས་སྐབས་འདི་འདྲ་བར་གྱུར་ཏོ། །འདི་དག་གི་ནང་དུ་རབ་ཏུ་བྱུང་བར་མ་གྱུར་ན་དེ་ཉེ་དུ་དག་གིས་འདི་རིམ་གྲོ་བྱས་པར་འགྱུར་བ་ཞིག །སྐབས་དེ་བཅོམ་ལྡན་འདས་ལ་དགེ་སློང་དག་གིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་
པ། དགེ་སློང་དག་དེ་ལྟ་བས་ན་གནང་གིས་དགེ་སློང་ཤི་བའི་རིམ་གྲོ་བྱའོ། །བཅོམ་ལྡན་འདས་ཀྱིས་དགེ་སློང་ཤི་བའི་རིམ་གྲོ་བྱའོ་ཞེས་གསུངས་པ་དང་། དགེ་སློང་དག་ཇི་ལྟར་རིམ་གྲོ་བྱ་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། བསྲེག་པར་བྱའོ། །བཅོམ་ལྡན་འདས་ཀྱིས་བསྲེག་པར་བྱའོ་ཞེས་གསུངས་པ་དང་། བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་བཅོམ་ལྡན་འདས་ཀྱིས་ལུས་འདི་ལ་སྲིན་བུའི་རིགས་བརྒྱད་ཁྲི་ཡོད་དོ་ཞེས་གང་གསུངས་པ་དེ་དག་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ཉེ་བ་འཁོར་དེ་སྐྱེས་མ་ཐག་ཏུ་དེ་དག་ཀྱང་སྐྱེ་ལ། ཤི་བའི་ཚེ་དེ་དག་ཀྱང་འཆི་མོད་ཀྱི་འོན་ཀྱང་རྨའི་སྒོ་རྣམས་སུ་བརྟགས་ཏེ་བསྲེག་པར་བྱའོ། །བཅོམ་ལྡན་འདས་ཀྱིས་བསྲེག་པར་བྱའོ་ཞེས་གསུངས་པ་དང་། ཤིང་མ་འབྱོར་ནས་སྐབས་དེ་བཅོམ་ལྡན་འདས་ལ་དགེ་སློང་དག་གིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཆུ་ཀླུང་དག་ཏུ་དོར་བར་བྱའོ། །ཆུ་ཀླུང་མེད་ནས་བཅོམ་ལྡན་འདས་ཀྱིས་བཀའ་སྩལ་པ། ས་བརྐོས་ཏེ་གཞུག་པར་བྱའོ། །དབྱར་ཁ་ས་ཡང་འཐས་ལ་ཤིང་ཡང་སྲོག་ཆགས་ཅན་དུ་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། ཐིབས་པོའི་ཕྱོགས་སུ་མགོ་བྱང་ཕྱོགས་སུ་བསྟན་ཏེ་སྔས་སུ་རྩྭའི་བམ་པོ་བཞག་ལ་གློ་གཡས་པས་བསྙལ་ཏེ་རྩྭའམ་ལོ་མའི་ཚོགས་ཀྱིས་གཡོགས་ལ་ཡོན་བསྔོ་ཞིང་རྒྱུན་ཆགས་གསུམ་གྱི་ཆོས་མཉན་པ་བྱིན་ནས་འདོང་བར་བྱའོ། །དགེ་སློང་དག་དེ་བཞིན་དུ་དོང་བ་དང་། བྲམ་ཟེ་དང་ཁྱིམ་བདག་དག་ཤཱཀྱའི་བུའི་དགེ་སྦྱོང་རྣམས་ནི་རོ་བསྐྱལ་ནས་ཁྲུས་མི་བྱེད་པར་དེ་བཞིན་འདོང་སྟེ་གཙང་སྦྲ་མེད་དོ། །ཞེས་འཕྱ་བར་བྱེད་ནས། སྐབས་དེ་བཅོམ་ལྡན་འདས་ལ་དགེ་སློང་དག་གིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་དུ་འདོང་བར་མི་བྱའི་འོན་ཀྱང་ཁྲུས་བྱའོ། །དེ་དག་ཐམས་ཅད་བཀྲུ་བར་བརྩམས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཐམས་ཅད་ཁྲུས་མི་
བྱའི་གང་དག་རེག་པ་དེ་དག་གིས་གོས་དང་བཅས་ཏེ་བཀྲུ་བར་བྱའོ། །གཞན་དག་གིས་ནི་རྐང་ལག་ཉི་ཚེ་བཀྲུ་བར་བྱའོ། །དེ་དག་མཆོད་རྟེན་ལ་ཕྱག་མི་འཚལ་ནས། བཅོམ་ལྡན་འདས་ཀྱིས་བཀའ་སྩལ་པ། མཆོད་རྟེན་ལ་ཕྱག་འཚལ་བར་བྱའོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་བྱ་ཀ་ལན་ད་ཀ་གནས་པ་ན་བཞུགས་སོ། །ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་གཉིས་ཀྱི་ཀུན་ཏུ་སྤྱོད་པ་ནི་དུས་དུས་སུ་སེམས་ཅན་དམྱལ་བར་ཡང་རྒྱུ་ཞིང་འདོང་། དུད་འགྲོར་ཡང་འདོང་། ཡི་དགས་དག་ཏུ་ཡང་འདོང་། ལྷའི་ནང་དུ་ཡང་འདོང་། མི་དག་ཏུ་ཡང་རྒྱུ་ཞིང་འདོང་ངོ་། །དེ་གཉིས་དུས་གཞན་ཞིག་ན་དམྱལ་བར་རྒྱུ་ཞིང་འདོང་བ་ལས་མནར་མེད་པའི་དམྱལ་བ་ཆེན་པོར་སོན་པ་དང་། དེར་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་སྨྲས་པ། ཚེ་དང་ལྡན་པ་མཽད་གལ་གྱི་བུ་དམྱལ་བ་པའི་སེམས་ཅན་རྣམས་ངལ་སོས་པར་གྱིས་ཤིག །ཚེ་དང་ལྡན་པ་མཽད་གལ་གྱི་བུས་ཚེ་དང་ལྡན་པ་ཤཱ་རིའི་བུ་དེ་བཞིན་དུ་བགྱིའོ་ཞེས་ཚེ་དང་ལྡན་པ་ཤཱ་རིའི་བུའི་ལྟར་མཉན་ཏེ། ནམ་མཁའ་ལ་འཕགས་ནས་ཆར་ཤིང་རྟའི་སྲོག་ཤིང་ཙམ་གྱི་རྒྱུན་དབབ་པར་བརྩམས་པ་དང་། ཆུ་དེ་མནར་མེད་པའི་མེ་ལྕེའི་འོད་ཀྱིས་བར་དུ་བསྐམས་པར་གྱུར་ཏོ། ། ཚེ་དང་ལྡན་པ་ཤཱ་རིའི་བུས་སྨྲས་པ། ཚེ་དང་ལྡན་པ་མཽད་གལ་གྱི་བུ་ཆེན་པོ་གཞེས་ཤིག་དང་། བདག་གིས་ངལ་སོས་པར་བགྱིའོ། །དེས་སྨྲས་པ། ལེགས་ཀྱིས་དེ་བཞིན་དུ་ངལ་སོས་པར་མཛོད་ཅིག་ཅེས་སྨྲས་ཏེ། ཚེ་དང་ལྡན་པ་མཽད་གལ་གྱི་བུ་ཆེན་པོས་བསྡད་པ་དང་། ཚེ་དང་ལྡན་པ་ཤཱ་རིའི་བུས་ཏིང་ངེ་འཛིན་མོས་པ་ཅན་ཞེས་བྱ་བ་ལ་སྙོམས་པར་ཞུགས་ནས་དེས་མནར་མེད་པ་ཆེན་པོ་དེ་བསིལ་བར་བྱས་ཏེ། མནར་མེད་པའི་སེམས་ཅན་རྣམས་ཀྱི་སྡུག་བསྔལ་རྒྱུན་བཅད་དོ། །དེ་ནས་དེ་གཉིས་ཀྱིས་རྫོགས་བྱེད་ཆོས་ལོག་པར་སྟོན་པས་ལུས་ཆེན་པོར་གྱུར་ཅིང་དེའི་ལྕེ་ལ་ཡང་གཤོལ་ལྔ་བརྒྱས་རྨེད་པ་མཐོང་བ་དང་། དེས་སྨྲས་པ། འཕགས་པ་ཤཱ་རིའི་བུ་དང་། མཽད་གལ་གྱི་བུ་
གལ་ཏེ་འཛམ་བུའི་གླིང་དུ་གཤེགས་ན་ཚངས་པ་མཚུངས་པར་སྤྱོད་པ་རྣམས་ལ་བདག་གི་མཆིད་ནས། ངས་ཆོས་ལོག་པར་བསྟན་པས་སྐྱེ་བོའི་ཚོགས་མང་པོ་བསླུས་ཏེ། ང་ལས་ཡང་དག་པར་བླངས་ཤིང་ཀུན་ཏུ་སྤྱད་པ་དེས་ལྕེ་ལ་གཤོལ་ལྔ་བརྒྱས་རྨེད་ཅིང་ཁྱེད་ཀྱིས་ཇི་ལྟ་ཇི་ལྟར་ངའི་མཆོད་རྟེན་ལ་རྗེད་པ་བྱས་པ་དེ་ལྟ་དེ་ལྟར་ང་ལ་སྡུག་བསྔལ་ཆེས་མི་བཟད་པར་གྱུར་གྱིས་ཕྱིན་ཅད་མ་བྱེད་པར་ཐོང་ཤིག་ཅེས་མཆིའོ་ཞེས་གསུངས་ཤིག །ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་དག་གིས་རྫོགས་བྱེད་ལ་ཅང་མི་སྨྲ་བས་ཁས་བླངས་སོ། །ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་མནར་མེད་པ་ནས་མི་སྣང་བར་གྱུར་ཏེ། རྒྱལ་པོའི་ཁབ་ཏུ་དོང་ངོ་། །དེ་གཉིས་རྒྱལ་པོའི་ཁབ་ཏུ་ཕྱིན་པ་དང་། ཀུན་ཏུ་རྒྱུ་དབྱུག་ཐོགས་སྤྱི་ཕུད་ཅན་དག་ཅིག་ཕྱིར་བྱུང་ནས་དེ་དག་ཁ་ཅིག་གིས་སྨྲས་པ། ཤེས་ལྡན་དག་ཤཱཀྱའི་བུའི་དགེ་སྦྱོང་འདི་དག་བརྡེག་གོ །ཁ་ཅིག་གིས་སྨྲས་པ། དེ་བཞིན་ཁོ་ནར་བརྡེགས་ན་མ་ལེགས་ཏེ་ཀླན་ཀ་བཙལ་ནས་བརྡེག་པར་བྱའོ། །དེ་དག་གིས་སྨྲས་པ། དེ་བཞིན་དུ་བྱའོ། །ཚེ་དང་ལྡན་པ་ཤཱ་རིའི་བུ་སྔར་སོང་བ་དང་། དེ་དག་གིས་དེ་ལ་སྨྲས་པ། འཕགས་པ་ཤཱ་རིའི་བུ་ཀུན་ཏུ་འཚོ་བ་དག་ལ་དགེ་སྦྱོང་ཡོད་དམ། དེས་ཚིགས་སུ་བཅད་དེ་སྨྲས་པ། ཀུན་ཏུ་འཚོ་ལ་དགེ་སྦྱོང་མེད། །ཤཱཀྱ་རྣམས་ཀྱི་ནང་ན་ཡོད། །དགྲ་བཅོམ་དག་ལ་ཆགས་ལྡན་མེད། །བུས་པ་སོ་སོའི་སྐྱེ་བོའང་མེད། །དེ་དག་གིས་ཚིགས་སུ་བཅད་པ་དེའི་དོན་ཁོང་དུ་མ་ཆུད་ནས་དེ་དག་གིས་སྨྲས་པ། ཤེས་ལྡན་དག་འདི་ནི་བདག་ཅག་གི་བསྔགས་པ་སྨྲས་ཀྱིས་སུ་ཅི་ཡང་མ་སྨྲ་བར་འགྲོར་ཆུག་ཤིག་ཅེས་བྱས་ཏེ་དེ་སོང་ངོ་། །ཚེ་དང་ལྡན་པ་མཽད་གལ་གྱི་བུ་ཕྱི་བཞིན་དུ་འོང་བ་སྔོན་གྱི་ལས་ཀྱི་རྣམ་པར་སྨིན་པ་ཉེ་བར་གནས་པས་དལ་ནས་དལ་ནས་འོང་བ་དེ་དག་གིས་མཐོང་ནས། འཕགས་པ་མཽད་གལ་གྱི་བུ་ཀུན་ཏུ་འཚོ་བ་དག་ལ་དགེ་སྦྱོང་ཡོད་དམ། དེས་སྨྲས་པ། ཤེས་ལྡན་དག་ཀུན་ཏུ་འཚོ་བ་དག་ལ་དགེ་སྦྱོང་ག་ལ་ཡོད་
དེ། བཅོམ་ལྡན་འདས་ཀྱིས་ཀྱང་འདི་ལ་དགེ་སྦྱོང་དང་པོ་ཡོད། འདི་ལ་གཉིས་པ་ཡོད། འདི་ལ་གསུམ་པ་ཡོད། འདི་ལ་བཞི་པ་ཡོད་ཀྱི་འདི་ལས་ཕྱི་རོལ་པ་ལ་ནི་དགེ་སྦྱོང་དང་བྲམ་ཟེ་མེད་དེ་ཕ་རོལ་རབ་ཏུ་སྨྲ་བ་རྣམས་ནི་དགེ་སྦྱོང་དང་བྲམ་ཟེས་སྟོང་ངོ་། །དེ་ལྟ་བས་ན་འདིར་འཁོར་གྱི་ནང་དུ་སེང་གེའི་སྒྲ་ཡང་དག་པར་བསྒྲགས་སོ། །ཞེས་གསུངས་སོ། །གཞན་ཡང་ཁྱེད་ཀྱི་སྟོན་པ་དེ་མནར་མེད་པ་ཆེན་པོར་སྐྱེས་ཏེ། ཆོས་ལོག་པར་བསྟན་པས་ལུས་ཆེན་པོར་གྱུར་ཅིང་ལྕེ་ལ་གཤོལ་ལྔ་བརྒྱས་རྨེད་དོ། །དེས་ང་ལ་ཐན་བཏང་བ་བདག་གི་ཚངས་པ་མཚུངས་པར་སྤྱོད་པ་རྣམས་ལ་ངས་ཆོས་ལོག་པར་བསྟན་པས་སྐྱེ་བོའི་ཚོགས་མང་པོ་བསླུས་ཏེ། ང་ལས་ཡང་དག་པར་བླངས་ཤིང་ཀུན་ཏུ་སྤྱད་པ་དེས་ལྕེ་ལ་གཤོལ་ལྔ་བརྒྱས་རྨེད་ཅིང་ཁྱེད་ཀྱིས་ཇི་ལྟ་ཇི་ལྟར་ངའི་མཆོད་རྟེན་ལ་རྗེད་པར་བྱས་པ་དེ་ལྟ་དེ་ལྟར་ང་ལ་སྡུག་བསྔལ་ཆེས་མི་བཟད་པར་གྱུར་ཏོ། །ཞེས་གསུངས་ཤིག་ཅེས་ཟེར་རོ། །དེ་དག་རྔམ་ནས་སྨྲས་པ། ཤེས་ལྡན་དག་མགོ་རེག་ངན་པ་བདག་ཅག་ལ་ཁ་ཟེར་བར་མ་ཟད། བདག་ཅག་གི་སྟོན་པ་ལ་ཡང་མི་སྙན་པ་ཟེར་ན་ཇི་ལྟར་བསྒྲུབ་པར་བྱ། དེ་ན་ཁ་ཅིག་གིས་སྨྲས་པ། འདི་ལ་བསྒྲུབ་ཏུ་ཅི་ཡོད། འདི་ཏེ་པོར་གཏལ་དུ་ཟད་མོད། གཞན་དག་གིས་སྨྲས་པ། སྔར་ཡང་བདག་ཅག་གིས་སྨྲས་པ་ཡིན་ཏེ། དེ་དེ་བཞིན་དུ་བརྡེག་གིས་ཚུར། ཁྱེད་ན་རེ་ཀླན་ཀ་བཙལ་ནས་བརྡེག་གོ་ཞེས་ཟེར་བ་དེ་ནི་ད་བདག་ཅག་དང་བདག་ཅག་གི་སྟོན་པ་ལ་ཁ་བྱས་པས་དོན་གྱིས་གྲུབ་པོ་ཞེས་དེ་དག་གིས་དེའི་ཡན་ལག་དང་ཉིང་ལག་འདམ་བུ་བཞིན་བཅོམ་ནས་དོང་ངོ་། །ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་མཽད་གལ་གྱི་བུ་ཅི་ཐོགས་སྙམ་བསམ་ནས། དེས་ཕྱིར་ལོག་སྟེ་བལྟས་ན་ཇི་ཙམ་ན་ཡན་ལག་དང་ཉིང་ལག་འདམ་བུ་བཞིན་དུ་བཅོམ་ནས་ས་ལ་འགྱེལ་བ་མཐོང་སྟེ། དེས་སྨྲས་པ། ཚེ་དང་ལྡན་པ་མཽད་གལ་གྱི་བུ་འདི་ཅི་ཉེས། དེས་སྨྲས་པ། ཚེ་དང་ལྡན་པ་ཤཱ་རིའི་བུ་ལས་སུ་ཟད་མོད་གཞན་ཅི་ཞིག་ཡིན་པར་འགྱུར། ཚེ་དང་ལྡན་པ་ཤཱ་རིའི་བུས་སྨྲས་པ། ཚེ་དང་ལྡན་པ་མཽད་གལ་གྱི་
བུ་ཁྱོད་བཅོམ་ལྡན་འདས་ཀྱིས་རྫུ་འཕྲུལ་ཅན་གྱི་མཆོག་ཏུ་མ་བསྟན་ཏམ། དེ་ཇི་ལྟར་གྱུར། དེས་སྨྲས་པ། ཚེ་དང་ལྡན་པ་ཤཱ་རིའི་བུ་བདག་ལས་ཀྱིས་ནོན་པས་རྫུ་ཞེས་བྱ་བ་ཡང་མི་དྲན་ན་རྫུ་འཕྲུལ་ལྟ་སྨོས་ཀྱང་ཅི་དགོས། དེ་ནས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་མཽད་གལ་གྱི་བུ་བྱིས་པ་ཆུང་ངུ་བཞིན་དུ་བླ་གོས་ཀྱི་ནང་དུ་བཅུག་ནས་གཙུག་ལག་ཁང་དུ་ཁྱེར་བ་དང་། དགེ་སློང་དག་གིས་དེ་ལྟ་བུའི་མི་སྡུག་པ་མཐོང་ནས་སྔངས་ཏེ་འདུས་ནས་ཚེ་དང་ལྡན་པ་ཤཱ་རིའི་བུ་ལ་དྲིས་པ། འདི་ཅི་ཞིག །དེས་སྨྲས་པ། ཚེ་དང་ལྡན་པ་མཽད་གལ་གྱི་བུ་ཀུན་ཏུ་རྒྱུ་དབྱུག་ཐོགས་སྤྱི་ཕུད་ཅན་རྣམས་ཀྱིས་འདི་ལྟ་བུར་བྱས་མོད་ཅེས་སྨྲས་ཏེ། དེས་དེ་དལ་གྱིས་ས་ལ་བསྙལ་ལོ། །དགེ་སློང་དག་གིས་སྨྲས་པ། ཚེ་དང་ལྡན་པ་ཤཱ་རིའི་བུ་འདི་བཅོམ་ལྡན་འདས་ཀྱིས་རྫུ་འཕྲུལ་ཅན་གྱི་མཆོག་ཏུ་བསྟན་པ་མ་ཡིན་ནམ། དེས་སྨྲས་པ། བསྟན་ན་ཚེ་དང་ལྡན་པ་དག་ལས་རྣམས་ཀྱི་མཐུ་ལ་ལྟོས། གང་གིས་ལྷ་རྣམས་ཀྱི་དབང་པོ་རྒྱ་བརྒྱ་བྱིན་གྱི་ཁང་བཟངས་རྣམ་པར་རྒྱལ་བྱེད་རྐང་པ་གཡས་པའི་མཐེ་བོས་བསྒུལ། རབ་ཏུ་བསྒུལ། ཀུན་ཏུ་རབ་ཏུ་བསྒུལ་ཏེ། བཅོམ་ལྡན་འདས་ཀྱིས་རྫུ་འཕྲུལ་ཆེ་བ་དང་མཐུ་ཆེ་བ་རྣམས་ཀྱི་མཆོག་ཏུ་བསྟན་པ་དེང་ལས་ཀྱིས་ནོན་ནས་རྫུ་ཞེས་བྱ་བ་མི་དྲན་ན་རྫུ་འཕྲུལ་ལྟ་སྨོས་ཀྱང་ཅི་དགོས། དེ་ན་དགེ་སློང་གང་དག་འཕགས་པའི་ལམ་མ་སྐྱེས་པ་དེ་དག་མི་དགའ་ཞིང་ཤིན་ཏུ་སྐྱོ་ནས་དགོན་པ་དང་། ནགས་ཁྲོད་དང་། བས་མཐའི་གནས་མལ་དག་ཏུ་གནས་ནས་ཡིད་ལ་བྱེད་པ་བསྐྱེད་པར་བརྩམས་སོ། །རྒྱལ་པོའི་ཁབ་ཀྱི་གྲོང་ཁྱེར་ཀུན་དུ་ཀུན་དུ་རྒྱུ་དབྱུག་ཐོགས་སྤྱི་ཕུད་ཅན་རྣམས་ཀྱིས། འཕགས་པ་མཽད་གལ་གྱི་བུ་ཆེན་པོ་བརྡེགས་ཏེ་ཡན་ལག་དང་ཉིང་ལག་འདམ་བུ་བཞིན་དུ་བཅོམ་ནས། འཕགས་པ་ཤཱ་རིའི་བུས་བུ་ཆུང་ངུ་བཞིན་དུ་བླ་གོས་ཀྱི་ནང་དུ་བཅུག་སྟེ་འོད་མའི་ཚལ་དུ་ཁྱེར་ནས་སྲོག་གི་ལྷག་མ་ཅུང་ཟད་ཅིག་ལུས་དེ་རིང་པོ་མི་ཐོགས་པར་དུས་བྱེད་པར་འགྱུར་རོ། །ཞེས་བྱ་བའི་སྒྲ་དེ་གྲགས་ནས་སྲོག་ཆགས་བརྒྱ་སྟོང་དུ་མ་འོད་མའི་ཚལ་དུ་འདུས་པ་དང་། རྒྱལ་པོ་མ་
སྐྱེས་དགྲའི་བློན་པོ་དག་གིས་ལྷ་འཕགས་པ་མཽད་གལ་གྱི་བུ་ཆེན་པོ་ཀུན་དུ་རྒྱུ་དབྱུག་ཐོགས་སྤྱི་ཕུད་ཅན་རྣམས་ཀྱིས་བརྡེགས་ཏེ་ཡན་ལག་དང་ཉིང་ལག་འདམ་བུ་བཞིན་དུ་བཅོམ་ནས། འཕགས་པ་ཤཱ་རིའི་བུས་དེ་བུས་པ་ཆུང་ངུ་བཞིན་དུ་བླ་གོས་ཀྱི་ནང་དུ་བཅུག་སྟེ། འོད་མའི་ཚལ་དུ་འཚལ་ཏེ་མཆིས་ན། སྲོག་གི་ལྷག་མ་ཅུང་ཟད་ཅིག་ལུས་ཏེ་རིང་པོ་མི་ཐོགས་པར་དུས་བགྱིད་པར་འགྱུར་རོ། །ཞེས་སྦྲན་པ་དང་། དེས་ཐོས་ནས་ཁྲོས་དེ་དེ་རྣམས་ལ་སྨྲས་པ། ཤེས་ལྡན་དག་ཀུན་དུ་རྒྱུ་དབྱུག་ཐོགས་སྤྱི་ཕུད་ཅན་རྣམས་ཚོལ་ཅིག་ཅེས་སྨྲས་ནས། དེ་བཙུན་མོའི་འཁོར་དང་། གཞོན་ནུ་དང་། ཕོ་བྲང་འཁོར་གྱི་མི་དག་དང་ལྷན་ཅིག་འོད་མའི་ཚལ་དུ་སོང་ངོ་། །དེ་ནས་སྐྱེ་བོའི་ཚོགས་མང་པོས་རྒྱལ་པོ་མཐོང་ནས་ལམ་ཕྱེ་བ་དང་། དེ་མིག་མཆི་མས་གང་ཞིང་སྙིང་རྗེ་རྗེ་སྐད་དུ་མི་དགའ་བའི་ཚིག་གིས་དལ་གྱིས་དྲིས་པ། འཕགས་པ་མཽད་གལ་གྱི་བུ་ཆེན་པོ་འདི་ཅི་ཞིག །དེས་སྨྲས་པ། རྒྱལ་པོ་ཆེན་པོ་ལས་སུ་བས་མོད། གཞན་ནི་ཅི་ཞིག་ཏུ་འགྱུར། འཕགས་པ་ཁྱོད་བཅོམ་ལྡན་འདས་ཀྱིས་རྫུ་འཕྲུལ་ཅན་གྱི་མཆོག་ཏུ་བསྟན་པ་མ་ཡིན་ནམ། རྒྱལ་པོ་ཆེན་པོ་དེ་དེ་བཞིན་ཏེ་བསྟན་མོད་ཀྱིས་ལས་ཀྱིས་ནོན་པས་འོན་ཀྱང་རྫུ་ཞེས་བྱ་བ་ཡང་མི་དྲན་ན་རྫུ་འཕྲུལ་ལྟ་སྨོས་ཀྱང་ཅི་དགོས། བཅོམ་ལྡན་འདས་ནི་གཉིས་སུ་མི་གསུང་བ་སྟེ། བཅོམ་ལྡན་འདས་ཀྱིས་འདི་སྐད་དུ། བསྐལ་པ་བརྒྱ་ཕྲག་རྣམས་སུ་ཡང་། །ལས་རྣམས་ཆུད་ཟར་མི་འགྱུར་ཏེ། །ཚོགས་ཤིང་དུས་ལ་བབ་པ་ན། །ལུས་ཅན་རྣམས་ལ་འབྲས་བུར་སྨིན། །ཅེས་གསུངས་པ་དེ་ཉེ་བར་གནས་པར་གྱུར་ཏོ་ཞེས་བྱས་པ་དང་། རྒྱལ་པོས་གོས་ཀྱི་མཐའ་མས་མཆི་མ་ཕྱིས་ཏེ་སྨན་པ་ཐམས་ཅད་བཀུག་ནས་བསྒོ་བ། ཤེས་ལྡན་དག་གལ་ཏེ་འཕགས་པ་མཽད་གལ་གྱི་བུ་ཆེན་པོ་ཞག་བདུན་ན་སོས་པར་མ་བྱས་ན་ཁྱེད་ཀྱི་དབང་ཐང་གཅད་པར་བྱའོ། །ཞེས་བསྒོ་སྟེ་བློན་པོ་དག་ལ་ཡང་གཏད་ནས་སོང་ངོ་། །ཀུན་དུ་རྒྱུ་དབྱུག་ཐོགས་སྤྱི་ཕུད་ཅན་རྣམས་ཀྱང་ཐོས་ནས་བྲོས་སོ། །སྨན་པ་རྣམས་ཀྱིས་ཕན་ཚུན་གྲོས་བྱ་བར་བརྩམས་པ། ཤེས་ལྡན་
དག་རྒྱལ་པོས་ནི་དེ་སྐད་བཀའ་སྩལ་ན་འདི་ལ་ཇི་ལྟར་བསྒྲུབ་པར་བྱ། འཕགས་པ་མཽད་གལ་གྱི་བུ་ཆེན་པོ་ནི་བགྲེས་ལ། དེའི་ཡན་ལག་དང་ཉིང་ལག་ཐམས་ཅད་འདམ་བུ་བཞིན་དུ་བཅོམ་པས་དེ་ཇི་ལྟར་གསོ་བར་ནུས། ཡེ་དེ་ཉིད་མཐུ་ཆེ་བ་རྫུ་འཕྲུལ་ཆེ་བ་ཡིན་པས་དེ་ཉིད་ལ་སྐྱབས་སུ་འདོང་ངོ་། །ཁ་ཅིག་གིས་སྨྲས་པ། ལེགས་ཀྱིས་དེ་བཞིན་དུ་བྱའོ་ཞེས་དེ་དག་ཐམས་ཅད་འདུས་ནས་ཚེ་དང་ལྡན་པ་མཽད་གལ་གྱི་བུ་ཆེན་པོའི་ཐད་དུ་སོང་སྟེ་རྐང་པ་གཉིས་ལ་ཕྱག་བྱས་ནས། སྨྲས་པ། འཕགས་པ་བདག་ཅག་ལ་ལྷས་འདི་སྐད་དུ་འཕགས་པ་མཽད་གལ་གྱི་བུ་ཆེན་པོ་ཞག་བདུན་ན་མ་སོས་ན་ཁྱེད་ཀྱི་དབང་ཐང་གཅད་དོ་ཞེས་བཀའ་སྩལ་ན། ཁྱོད་ནི་བགྲེས་པས་སྔོན་བཞིན་དུ་བགྱི་བར་བདག་ཅག་གིས་རྔོ་མི་ཐོག་སྟེ། ཁྱོད་ཉིད་རྫུ་འཕྲུལ་ཆེ་ཞིང་མཐུ་ཆེ་བས་ཇི་ལྟར་བདག་ཅག་གི་དབང་ཐང་གཅད་པར་མི་འགྱུར་བ་དེ་ལྟར་མཛད་དུ་གསོལ། དེས་སྨྲས་པ། ཤེས་ལྡན་དག་གལ་ཏེ་དེ་ལྟ་ན་དེང་ལ། རྒྱལ་པོ་མ་སྐྱེས་དགྲ་ལ་འཕགས་པ་མཽད་གལ་གྱི་བུ་ཆེན་པོ་བདག་ཉིད་ཞག་བདུན་ན་རྒྱལ་པོའི་ཁབ་ཏུ་བསོད་སྙོམས་ལ་འཇུག་གོ་ཞེས་གྱིས་ཤིག །དེ་དག་རབ་ཏུ་དགའ་ནས་དེའི་རྐང་པ་གཉིས་ལ་ཕྱག་བྱས་ནས་རྒྱལ་པོ་མ་སྐྱེས་དགྲའི་ཐད་དུ་སོང་ནས་རྐང་པ་གཉིས་ལ་གཏུགས་ཏེ་སྨྲས་པ་ལྷ་འཕགས་པ་མཽད་གལ་གྱི་བུ་ཆེན་པོ་བདག་ཉིད་དགུང་བདུན་ན་རྒྱལ་པོའི་ཁབ་ཏུ་བསོད་སྙོམས་ལ་འཇུག་གོ །རྒྱལ་པོ་རབ་ཏུ་དགའ་ནས་སྨྲས་པ། ཤེས་ལྡན་དག་གལ་ཏེ་དེ་ལྟ་ན་ལེགས་སོ། ། ཇི་ཙམ་ན་ཞག་བདུན་ལོན་པ་དང་། འཕགས་པ་མཽད་གལ་གྱི་བུ་ཆེན་པོ་རང་ཉིད་ཀྱི་རྫུ་འཕྲུལ་གྱིས་མི་བདེ་བ་དེ་མེད་པར་བྱས་ཏེ་རྒྱལ་པོའི་ཁབ་ཏུ་བསོད་སྙོམས་ལ་ཞུགས་སོ། ། དགྲ་བཅོམ་པ་རྣམས་ཀྱི་ཡེ་ཤེས་མཐོང་བ་ནི་བསམ་པས་འཇུག་པས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་མཽད་གལ་གྱི་བུ་ཆེན་པོ་རབ་ཏུ་ན་ན་ཅིའི་ཕྱིར་བདག་ཉིད་རྒྱལ་པོའི་ཁབ་ཏུ་བསོད་སྙོམས་ལ་ཞུགས་ཤེས་བསམ་པ་ལ་ཞུགས་ན་ཡོངས་སུ་མྱ་ངན་ལས་འདའ་འདོད་པར་མཐོང་ངོ་། ། དེ་དེ་དང་མཛའ་བའི་བག་ཆགས་ཀྱིས་
རྒྱུད་བསྒོས་པས་དེ་ཉིད་ཀྱི་ཉིན་པར་ནས་ན་བར་གྱུར་ཏེ། དེས་བསམ་པ། ཚེ་དང་ལྡན་པ་མཽད་གལ་གྱི་བུ་ཆེན་པོ་ཡོངས་སུ་མྱ་ངན་ལས་འདའ་ན་བདག་ཅི་སྟེ་འདུག །བདག་ཆེས་སྔར་མྱ་ངན་ལས་འདའ་བར་བྱའོ་སྙམ་དུ་བསམས་ཏེ། རྒྱལ་པོའི་ཁབ་ནས་གྲོང་ན་ལ་དར་སོང་སྟེ། དེ་ནས་ཚེ་དང་ལྡན་པ་ཤཱ་རིའི་བུ་ཡུལ་མ་ག་དྷཱའི་གྲོང་ཁྱེར་ན་ལ་ད་ན་རིམ་གྲོ་པ་དགེ་སྦྱོང་གི་ཆེད་སྐུལ་བྱེད་དང་། ནད་ཚབས་ཆེན་པོས་མི་བདེ་ཞིང་སྡུག་བསྔལ་ཏེ་འདུག་གོ །དེ་ནས་ཚེ་དང་ལྡན་པ་ཤཱ་རིའི་བུ་ནད་དེ་ཉིད་ཀྱིས་ཡོངས་སུ་མྱ་ངན་ལས་འདས་པ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོ་ཡང་གྲོང་ཁྱེར་ཤིང་ཐགས་ཅན་དུ་སོང་ནས། དེའི་ཕྱི་དྲོ་ཡོངས་སུ་མྱ་ངན་ལས་འདས་སོ། །གང་གི་ཚེ་ཚེ་དང་ལྡན་པ་ཤཱ་རིའི་བུ་ཡོངས་སུ་མྱ་ངན་ལས་འདས་པ་དེའི་ཚེ། དགེ་སློང་ཕལ་ཆེར་དབང་དང་ལྡན་པ་ཤ་སྟག་ལ་བརྒྱད་ཁྲི་ཡོངས་སུ་མྱ་ངན་ལས་འདས་སོ། །གང་གི་ཚེ་ཚེ་དང་ལྡན་པ་མཽད་གལ་གྱི་བུ་ཆེན་པོ་ཡོངས་སུ་མྱ་ངན་ལས་འདས་པ་དེའི་ཚེ། ཡང་དགེ་སློང་ཕལ་ཆེར་དབང་དང་ལྡན་པ་ཤ་སྟག་ལ་བདུན་ཁྲི་བདུན་སྟོང་ཡོངས་སུ་མྱ་ངན་ལས་འདས་སོ། །དེ་ནས་དགེ་སྦྱོང་གི་ཆེད་སྐུལ་བྱེད་ཀྱིས་ཚེ་དང་ལྡན་པ་ཤཱ་རིའི་བུའི་རིང་བསྲེལ་ལ་ལུས་ཀྱིས་མཆོད་པ་བྱས་ཏེ། རིང་བསྲེལ་དང་། ལྷུང་བཟེད་དང་། ཆོས་གོས་དག་ཁྱེར་ནས། རྒྱལ་པོའི་ཁབ་ག་ལ་བ་དེར་རྒྱུ་ཞིང་སོང་སྟེ་རིམ་གྱིས་རྒྱུ་ཞིང་སོང་བ་ན་རྒྱལ་པོའི་ཁབ་ཏུ་ཕྱིན་ཏོ། །དགེ་སྦྱོང་གི་ཆེད་སྐུལ་བྱེད་ལྷུང་བཟེད་དང་ཆོས་གོས་ཆམ་དུ་ཕབ་ནས། རྐང་པ་གཉིས་བཀྲུས་ཏེ། ཚེ་དང་ལྡན་པ་ཀུན་དགའ་བོ་གང་ན་བ་དེར་སོང་སྟེ་ཕྱིན་པ་དང་། ཚེ་དང་ལྡན་པ་ཀུན་དགའ་བོའི་རྐང་པ་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་དགེ་སྦྱོང་གི་ཆེད་སྐུལ་བྱེད་ཀྱིས། ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །བཙུན་པ་ཀུན་དགའ་བོས་མཁྱེན་པར་མཛོད་ཅིག །བདག་གི་མཁན་པོ་བཙུན་པ་ཤཱ་རིའི་བུ་ནི་ཡོངས་སུ་མྱ་ངན་ལས་འདས་ཏེ། དེའི་རིང་བསྲེལ་དང་། ལྷུང་བཟེད་དང་། ཆོས་གོས་ཀྱང་
འདི་ལགས་སོ། །དེ་ནས་ཚེ་དང་ལྡན་པ་ཀུན་དགའ་བོས། དགེ་སྦྱོང་གི་ཆེད་སྐུལ་བྱེད་ཁྲིད་དེ། བཅོམ་ལྡན་འདས་གང་ན་བ་དེར་སོང་ནས་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས། ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་དགེ་སྦྱོང་གི་ཆེད་སྐུལ་བྱེད་ཀྱིས་འདི་བདག་གང་ན་བ་དེར་མཆིས་ཏེ། མཆིས་ནས་བདག་ལ་འདི་སྐད་དུ། བཙུན་པ་ཀུན་དགའ་བོས་མཁྱེན་པར་མཛོད་ཅིག །བདག་གི་མཁན་པོ་བཙུན་པ་ཤཱ་རིའི་བུ་ཡོངས་སུ་མྱ་ངན་ལས་འདས་ཏེ། དེའི་རིང་བསྲེལ་དང་། ལྷུང་བཟེད་དང་། ཆོས་གོས་ཀྱང་འདི་ལགས་སོ། །ཞེས་མཆིས་ནས། བཙུན་པ་བདག་གི་ལུས་གདུང་བར་གྱུར་ཅིང་ཕྱོགས་ཀྱང་བསླང་། ཆོས་ཤེས་པ་རྣམས་ཀྱང་བསྐྱུད་པར་གྱུར་ཏོ།། །།འདུལ་བ་ཕྲན་ཚེགས་ཀྱི་གཞི། བམ་པོ་ཉི་ཤུ་གཅིག་པ། ཀུན་དགའ་བོ་ཅི་དགེ་སློང་ཤཱ་རིའི་བུས་ཚུལ་ཁྲིམས་ཀྱི་ཕུང་པོ་ཁྱེར་ཏེ་ཡོངས་སུ་མྱ་ངན་ལས་འདས་སམ། བཙུན་པ་མ་ལགས་སོ། །ཏིང་ངེ་འཛིན་གྱི་ཕུང་པོ་དང་། ཤེས་རབ་ཀྱི་ཕུང་པོ་དང་། རྣམ་པར་གྲོལ་བའི་ཕུང་པོ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་ཁྱེར་ཏེ་ཡོངས་སུ་མྱ་ངན་ལས་འདས་སམ། བཙུན་པ་མ་ལགས་སོ། །གང་ཡང་ངས་ཉིད་ཀྱི་མངོན་པར་ཤེས་པས་མངོན་པར་རྫོགས་པར་སངས་རྒྱས་ཏེ་བཤད་པའི་ཆོས་འདི་ལྟ་སྟེ། དྲན་པ་ཉེ་བར་གཞག་པ་བཞི་དང་། ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་པ་དག་ཁྱེར་ཏེ་ཡོངས་སུ་མྱ་ངན་ལས་འདས་སམ། བཙུན་པ་མ་ལགས་ཏེ། བཙུན་པ་ཚེ་དང་ལྡན་པ་ཤཱ་རིའི་བུས་ཚུལ་ཁྲིམས་ཀྱི་ཕུང་པོ་འཚལ་ཏེ། ཡོངས་སུ་མྱ་ངན་ལས་འདས་པ་མ་ལགས། ཏིང་ངེ་འཛིན་གྱི་ཕུང་པོ་ཡང་མ་ལགས། ཤེས་རབ་ཀྱི་ཕུང་པོ་ཡང་མ་ལགས། རྣམ་པར་གྲོལ་བའི་ཕུང་པོ་ཡང་
མ་ལགས། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་འཚལ་ཏེ་མྱ་ངན་ལས་འདས་པ་ཡང་མ་ལགས། གང་ཡང་བཅོམ་ལྡན་འདས་ཀྱིས་ཉིད་ཀྱི་མངོན་པར་ཤེས་པས་མངོན་པར་རྫོགས་པར་སངས་རྒྱས་ཏེ། བཤད་པའི་ཆོས་འདི་ལྟ་སྟེ། དྲན་པ་ཉེ་བར་གཞག་པ་བཞི་དང་། ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་པ་དག་འཚལ་ཏེ་ཡོངས་སུ་མྱ་ངན་ལས་འདས་པ་ཡང་མ་ལགས་མོད་ཀྱི་འོན་ཀྱང་། ཚེ་དང་ལྡན་པ་ཤཱ་རིའི་བུ་ནི་ཚུལ་ཁྲིམས་དང་ལྡན་པ། མང་དུ་ཐོས་པ། ཆོག་ཤེས་པ། འདོད་པ་ཆུང་བ་རབ་ཏུ་དབེན་པ། བརྩོན་འགྲུས་བརྩམས་པ། དྲན་པ་ཉེ་བར་གནས་པ། མཉམ་པར་གཞག་པ། ཤེས་རབ་ཅན། ཤེས་རབ་མྱུར་བ། ཤེས་རབ་མགྱོགས་པ། ཤེས་རབ་རྣོ་བ། ངེས་པར་འབྱུང་བའི་ཤེས་རབ་ཅན། ངེས་པར་འབྱེད་པའི་ཤེས་རབ་ཅན། ཤེས་རབ་ཆེ་བ། ཤེས་རབ་ཡངས་པ། ཤེས་རབ་ཟབ་པ། ཤེས་རབ་མཉམ་པ་མེད་པ། ཤེས་རབ་རིན་པོ་ཆེ་དང་ལྡན་པ། ཡང་དག་པར་སྟོན་པར་བགྱིད་པ། ཡང་དག་པར་ལེན་དུ་འཇུག་པར་བགྱིད་པ། ཡང་དག་པར་གཟེངས་སྟོད་པར་བགྱིད་པ། ཡང་དག་པར་རབ་ཏུ་དགའ་བར་བགྱིད་པ། ཡང་དག་པར་སྟོན་པ་དང་། ཡང་དག་པར་ལེན་དུ་འཇུག་པ་དང་། ཡང་དག་པར་གཟེངས་སྟོད་པ་དང་། ཡང་དག་པར་རབ་ཏུ་དགའ་བའི་བསྔགས་པ་བརྗོད་པ། འཁོར་བཞི་ལ་ཆོས་སྟོན་པ་ན་དུབ་པ་མ་མཆིས་པ་སྟེ། བདག་ཚེ་དང་ལྡན་པ་ཤཱ་རིའི་བུའི་ཆོས་དང་། ཆོས་ཀྱི་ལོངས་སྤྱོད་གང་དག་ལགས་པ་དེ་དག་རྗེས་སུ་དྲན་ན། ཚེ་དང་ལྡན་པ་ཤཱ་རིའི་བུའི་ཡོངས་སུ་མྱ་ངན་ལས་འདས་པ་དེའི་སླད་དུ་དབྱར་ངན་དང་། སྨྲེ་སྔགས་འདོན་ཏོ། །ཀུན་དགའ་བོ་ཁྱོད་མྱ་ངན་མ་བྱེད། བློང་བར་མ་བྱེད། སྨྲེ་སྔགས་འདོན་པར་མ་བྱེད་ཅིག །གང་སྐྱེས་པ་དང་། བྱུང་བ་དང་། བྱས་པ་དང་། འདུས་བྱས་པ་དང་། བསམས་པ་དང་། རྟེན་ཅིང་འབྲེལ་བར་བྱུང་བ་དེ་ནི་
འཇིག་པའི་ཆོས་ཅན་ཏེ། དེ་དང་ལྡན་པ་ལ་འཇིག་པར་མི་འགྱུར་བ་དེ་ག་ལ་ཡོད་དེ་དེ་ནི་གནས་མེད་དོ། །ཀུན་དགའ་བོ་ངས་སྔ་ནས་ཁྱོད་ལ་འདོད་པ་དང་། སྡུག་པ་དང་། དགའ་བ་དང་། ཡིད་དུ་འོང་བ་ཐམས་ཅད་ནི་འགྱེས་པ་དང་། མེད་པ་དང་། བྲལ་བ་དང་། མི་ལྡན་པར་འགྱུར་བར་མ་བསྟན་ཏམ། ཀུན་དགའ་བོ་དཔེར་ན་ལྗོན་ཤིང་ཆེན་པོ་རྩ་བ་དང་བཅས། སྙིང་པོ་དང་བཅས། སྡོང་པོ་དང་། ལོ་མ་དང་། འདབ་མ་དང་། མེ་ཏོག་དང་། འབྲས་བུ་དག་དང་ལྡན་པའི་འདབ་མ་གང་ཆེས་མཐོ་བ་དེ་དང་པོར་ལྟུང་ངོ་། །རིན་པོ་ཆེའི་རི་ཆེན་པོའི་རྩེ་མོ་གང་ཆེས་མཐོ་བ་དག་ཀྱང་དང་པོར་རྙིལ་ལོ། །དེ་བཞིན་དུ་སངས་རྒྱས་ལ་སོགས་པ་དགེ་སློང་གི་དགེ་འདུན་བཞུགས་པའི་ནང་ན་དགེ་སློང་ཤཱ་རིའི་བུ་ཡོངས་སུ་མྱ་ངན་ལས་འདས་ཏེ། དགེ་སློང་ཤཱ་རིའི་བུ་ཕྱོགས་གང་ན་གནས་པའི་ཕྱོགས་དེར་ང་ཐུགས་ཁྲལ་ཆུང་ངུར་བཞུགས་སོ། །འདི་ལྟ་སྟེ། དགེ་སློང་ཤཱ་རིའི་བུ་གང་ན་གནས་པའི་ཕྱོགས་དེ་ངས་སྟོང་པ་མ་ཡིན་པར་མཐོང་ངོ་། །དེ་ལྟ་བས་ན་ཀུན་དགའ་བོ་ཁྱོད་མྱ་ངན་མ་བྱེད། བློང་བར་མ་བྱེད། སྨྲེ་སྔགས་འདོན་པར་མ་བྱེད་ཅིག །གང་སྐྱེས་པ་དང་། བྱུང་བ་དང་། བྱས་པ་དང་། འདུས་བྱས་པ་དང་། བསམས་པ་དང་། རྟེན་ཅིང་འབྲེལ་པར་བྱུང་བ་དེ་ནི་འཇིག་པའི་ཆོས་ཅན་ཏེ། དེ་དང་ལྡན་པ་ལ་འཇིག་པར་མི་འགྱུར་བ་དེ་ག་ལ་ཡོད་དེ་དེ་ནི་གནས་མེད་དོ། །ཀུན་དགའ་བོ་ངས་སྔ་ནས་ཁྱོད་ལ་འདོད་པ་དང་། སྡུག་པ་དང་། དགའ་བ་དང་། ཡིད་དུ་འོང་བ་ཐམས་ཅད་ནི་འགྱེས་པ་དང་། མེད་པ་དང་། འབྲལ་བ་དང་། མི་ལྡན་པར་འགྱུར་བར་མ་བསྟན་ཏམ། ཀུན་དགའ་བོ་དེ་ལྟ་བས་ན་ད་ལྟ་ངའམ། ང་འདས་ཀྱང་རུང་བདག་ཉིད་གླིང་དང་། བདག་ཉིད་སྐྱབས་དང་། ཆོས་གླིང་དང་། ཆོས་སྐྱབས་དང་། གླིང་གཞན་མ་ཡིན་པ་དང་། སྐྱབས་གཞན་མ་ཡིན་པར་གནས་པར་བྱའོ། །དེ་ཅིའི་ཕྱིར་ཞེ་ན། ཀུན་དགའ་བོ་ད་ལྟར་རམ། ང་འདས་ཀྱང་རུང་གང་དག་བདག་ཉིད་གླིང་དང་། བདག་ཉིད་སྐྱབས་དང་། ཆོས་གླིང་དང་། ཆོས་སྐྱབས་དང་། གླིང་གཞན་མ་ཡིན་པ་
དང་། སྐྱབས་གཞན་མ་ཡིན་པ་ལ་གནས་པ་དེ་དག་ནི་འདི་ལྟ་སྟེ། ངའི་དགེ་སློང་བསླབ་པ་འདོད་པ་རྣམས་ཀྱི་མཆོག་ཏུ་འགྱུར་རོ། །ཇི་ལྟར་དགེ་སློང་བདག་ཉིད་གླིང་དང་། བདག་ཉིད་སྐྱབས་དང་། ཆོས་གླིང་དང་། ཆོས་སྐྱབས་དང་། གླིང་གཞན་མ་ཡིན་པ་དང་། སྐྱབས་གཞན་མ་ཡིན་པར་གནས་པ་ཡིན་ཞེ་ན། འདི་ན་དགེ་སློང་ནང་གི་ལུས་ལ་ལུས་ཀྱི་རྗེས་སུ་ལྟ་ཞིང་འཇིག་རྟེན་ལ་བརྣབ་སེམས་དང་། ཡིད་མི་བདེ་བ་བརྟུལ་ནས་རྟུན་པ་དང་། ཤེས་བཞིན་དང་། དྲན་པ་དང་ལྡན་པར་གནས་ཤིང་ཕྱིའི་ལུས་དང་། ཕྱི་ནང་གི་ལུས་དང་། ནང་གི་ཚོར་བ་དང་། ཕྱིའི་ཚོར་བ་དང་། ཕྱི་དང་ནང་གི་ཚོར་བ་དག་དང་། ནང་གི་སེམས་དང་། ཕྱིའི་སེམས་དང་། ཕྱི་དང་ནང་གི་སེམས་དང་། ནང་གི་ཆོས་དང་། ཕྱིའི་ཆོས་དང་། ཕྱི་དང་ནང་གི་ཆོས་དག་ལ་ཆོས་ཀྱི་རྗེས་སུ་ལྟ་ཞིང་འཇིག་རྟེན་ལ་བརྣབ་སེམས་དང་། ཡིད་མི་བདེ་བ་བརྟུལ་ནས་རྟུན་པ་དང་། ཤེས་བཞིན་དང་། དྲན་པ་དང་ལྡན་པར་གནས་པ་ཡིན་ཏེ། ཀུན་དགའ་བོ་དེ་ལྟར་ན་དགེ་སློང་བདག་ཉིད་གླིང་དང་། བདག་ཉིད་སྐྱབས་དང་། ཆོས་གླིང་དང་། ཆོས་སྐྱབས་དང་། གླིང་གཞན་མ་ཡིན་པ་དང་། སྐྱབས་གཞན་མ་ཡིན་པར་གནས་པ་ཡིན་ནོ། །དེ་ནས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དེ་རྗེས་སུ་ཡི་རངས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །རྒྱལ་པོའི་ཁབ་ན་གནས་པའི་སྐྱེ་བོའི་ཚོགས་ཀྱིས་ཇི་ལྟར་ཀུན་ཏུ་རྒྱུ་དབྱུག་ཐོགས་སྤྱི་ཕུད་ཅན་རྣམས་ཀྱིས་འཕགས་པ་མཽད་གལ་གྱི་བུ་ཆེན་པོའི་ཡན་ལག་དང་ཉིང་ལག་དག་འདམ་བུ་བཞིན་དུ་བཅོམ་པས། འཕགས་པ་ཤཱ་རིའི་བུ་རྒྱུད་དེ་དང་མཛའ་བའི་བག་ཆགས་ཀྱིས་བསྒོས་པ་ཡང་གྲོང་ན་ལ་དར་སོང་སྟེ། སྔ་དྲོ་ཡོངས་སུ་མྱ་ངན་ལས་འདས་ཚེ་དང་ལྡན་པ་མཽད་གལ་གྱི་བུ་ཆེན་པོ་ཡང་གྲོང་ཤིང་ཐགས་ཅན་དུ་སོང་སྟེ་ཡོངས་སུ་མྱ་ངན་ལས་འདས་པ་ཐོས་སོ། །བར་སྐབས་དེར་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པར་མཛད་པ།
སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་མཽད་གལ་གྱི་བུ་ཆེན་པོས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་ཀུན་ཏུ་རྒྱུ་དབྱུག་ཐོགས་སྤྱི་ཕུད་ཅན་རྣམས་ཀྱིས་འདིའི་ཡན་ལག་དང་། ཉིང་ལག་འདམ་བུ་བཞིན་དུ་བཅོམ་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་མཽད་གལ་གྱི་བུ་འདི་ཉིད་ཀྱིས་ལས་བྱས་ཤིང་བསགས་པ། ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་ཞེས་བྱ་བ་ནས། ལུས་ཅན་རྣམས་ལ་འབྲས་བུར་སྨིན་ཅེས་བྱ་བའི་བར་སྔ་མ་བཞིན་ནོ། །དགེ་སློང་དག་སྔོན་བྱུང་བ་རི་འོར་ཞིག་ན་བྲམ་ཟེ་ཞིག་གནས་པ་དེས་རིགས་མཉམ་པ་ལས་ཆུང་མ་བླངས་དེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་དུས་གཞན་ཞིག་ན་ཆུང་མ་ལ་སེམས་ཅན་ཞུགས་པར་གྱུར་ཏོ། །དེ་ཟླ་བ་བརྒྱད་དམ་དགུ་འདས་ནས་ཁྱེའུ་ཞིག་བཙས་ཏེ་ཞག་བདུན་གསུམ་ཉི་ཤུ་གཅིག་ཏུ་དེ་བཙས་པའི་བཙས་སྟོན་རྒྱས་པར་བྱས་ནས་མིང་བཏགས་ཏེ་བསྐྱེད་བསྲིངས་ནས་ཆེན་པོར་གྱུར་ཏོ། །ཕས་དེའི་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་ཅིང་དེ་ལ་ཡང་རབ་ཏུ་ཆགས་སོ། །དེ་ལ་དེའི་མས་རྟག་ཏུ་ཚིག་ཡིད་དུ་མི་འོང་བ་ངན་པར་སྨྲ་བ་དག་གིས་སྤྱོས་པ་དང་། དེས་ཁྱོ་ལ་བཟླས་ནས་དེས་དེ་ཅི་ནས་ཀྱང་མ་ལ་ཤིན་ཏུ་བྱམས་པ་མེད་པ་དང་། དེའི་བྱ་དགུ་ལ་ཕྱི་ལང་བྱེད་པ་དེ་ལྟ་དེ་ལྟར་བསླུས་སོ། །དེས་སྨྲས་པ། ཁྱོད་གང་གི་ཕྱིར་དེ་ལ་ཤིན་ཏུ་ཆགས་པས་ང་ལ་ཕྱིར་ལང་བྱེད་དམ། དེ་ངོ་ཚ་ནས་ཅང་མི་ཟེར་བར་འདུག་པ་དང་། དེའི་ཆུང་མས་བསམས་པ། རེ་ཞིག་ཁ་དུག་ཅན་འདི་ལང་ཚོ་ཡལ་ཡང་རང་གི་ཁྱོ་ལ་ཆགས་པ་ཅུང་ཟད་ཀྱང་མི་གཏོང་ཞིང་བདག་གི་ཁྱོ་ལ་གཤེ་བར་བྱེད་དོ་སྙམ་དུ་རིག་ནས་དེ་གླགས་ཚོལ་བར་ཞུགས་སོ། །ཇི་ཙམ་ན་དུས་གཞན་ཞིག་ན་དེའི་མ་སྐར་མ་དང་སྦྱར་ཏེ་ཁྲུས་བྱས་ནས་དྲི་དང་མེ་ཏོག་དག་
གིས་ལུས་བརྒྱན་ཏེ་ཉི་མ་མ་ནུབ་པ་ཁོ་ནར་དེས་ཁྱིམ་མི་དག་མ་བརྟགས་པར་ཁྱོ་དང་ལྷན་ཅིག་གསང་བ་སྤྱོད་དོ། །དེ་ནས་མནའ་མ་དེས་ཁྱོ་དེ་ཁྲིད་ནས་ཅི་ནས་ཀྱང་ཕྱོགས་དེར་སོན་པ་དེ་ལྟར་བྱས་པ་དང་། ཇི་ཙམ་ན་ཕ་དང་མ་གཉིས་གསང་བ་སྤྱོད་པ་མཐོང་ནས། དེས་བསམས་པ། ཁ་དུག་ཅན་འདི། བདག་ལ་ནི་ཁྱོད་བུད་མེད་ལ་ཤིན་ཏུ་ཆགས་སོ། །ཞེས་གཤེ་བར་བྱེད་ན་འདི་ད་རུང་ཡང་ཞི་བ་མེད་དེ། ཁྱིམ་མི་དག་ལ་ཡང་མི་རྟོག་པར་ཉི་མ་མ་ནུབ་པ་ཉིད་དུ་གསང་བ་སྤྱོད་དོ། །སྙམ་དུ་བསམས་ནས་ཁྲོས་ཏེ། གང་ཞིག་འདི་གཉིས་ཀྱི་ཡན་ལག་དང་ཉིང་ལག་འདམ་བུ་བཞིན་བཅོམ་པ་དེ་འགའ་མེད་དམ་ཞེས་ངག་གི་ལས་རྩུབ་མོ་སྨྲས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ན་བྲམ་ཟེའི་ཁྱེའུར་གྱུར་པ་གང་ཡིན་པ་དེ་ནི། དགེ་སློང་མཽད་གལ་གྱི་བུ་འདི་ཉིད་ཡིན་ཏེ། གང་འདིས་སེམས་འཁྲུགས་ཏེ། ཕ་དང་མ་ལ་ངག་གི་ལས་རྩུབ་མོ་སྨྲས་པ་དེའི་ལས་ཀྱི་རྣམ་པར་སྨིན་པས་ཚེ་རབས་ལྔ་བརྒྱར་འདིའི་ཡན་ལག་དང་ཉིང་ལག་འདམ་བུ་བཞིན་དུ་བཅོམ་སྟེ། ད་ལྟར་སྲིད་པ་ཐ་མ། གནས་ཐ་མ། ལུས་ཐ་མ། བདག་ཉིད་ཐ་མ་ཐོབ་སྟེ། རྫུ་འཕྲུལ་ཅན་གྱི་ནང་ན་མཆོག་ཏུ་བསྟན་པའི་བར་དུ་ཡང་ཡན་ལག་དང་ཉིང་ལག་འདམ་བུ་བཞིན་དུ་བཅོམ་པར་གྱུར་ཏོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་གནག །གཅིག་ཏུ་དཀར་བ་རྣམས་ཀྱི་ཡང་གཅིག་དུ་དཀར། འདྲེན་མ་རྣམས་ཀྱི་ཡང་འདྲེན་མའོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་དང་། འདྲེན་མ་རྣམས་སྤངས་ནས། ལས་གཅིག་ཏུ་དཀར་བ་དག་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཡང་སངས་རྒྱས་བཅོམ་ལྡན་འདས་ལ་དགེ་སློང་རྣམས་ཀྱིས་ཞུས་པ། བཙུན་པ་ཀུན་ཏུ་རྒྱུ་དབྱུག་ཐོགས་སྤྱི་ཕུད་ཅན་རྣམས་ཀྱིས་ཚེ་དང་ལྡན་པ་ཤཱ་རིའི་བུ་ནི་བཏང་། ཚེ་དང་ལྡན་པ་མཽད་གལ་གྱི་
བུ་ཆེན་པོ་ནི་བརྡེགས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་འབའ་ཞིག་མ་ཡིན་གྱི། འདས་པའི་དུས་ན་ཡང་ཇི་ལྟར་ཤཱ་རིའི་བུ་ནི་བཏང་ལ། མཽད་གལ་གྱི་བུ་ནི་བརྡེགས་པ་དེ་ཉོན་ཅིག །དགེ་སློང་དག་སྔོན་བྱུང་བ་རིའི་འོར་ཞིག་ན་ཁྱེའུ་དང་། བུ་མོ་དག་ཅིག་རྩེ་བ་དེ་དག་གིས་བྲམ་ཟེའི་ཁྱེའུ་གཉིས་ཤིག་མཐོང་ནས་དེ་དག་གིས་སྨྲས་པ། བྲམ་ཟེའི་ཁྱེའུ་ཕ་བི་དག་བརྡེག་གོ །ཡང་སྨྲས་པ། རེ་ཞིག་མི་བརྡེག་པར་ཇེ་དྲི་བ་ཞིག་དྲིས་ལ། གལ་ཏེ་སེམས་མགུ་བར་བྱས་ན་ནི་མི་བརྡེག་ཇི་སྟེ་མ་ཡིན་ན་ནི་བརྡེག་གོ །དེ་དག་གིས་བྲམ་ཟེའི་ཁྱེའུ་གཅིག་ལ་དྲིས་པ་དུས་གང་དུ་གྲང་། དེས་བསམས་པ། ཇི་ལྟ་བུའི་སེམས་ཀྱིས་འདི་དག་བདག་ལ་འདྲི་སྙམ་ན་དེས་གོར་མ་ཆག་པར་འདི་དག་བརྡེག་པར་འདོད་པར་ཤེས་ནས། དེས་ཚིགས་སུ་བཅད་དེ་སྨྲས་པ། གྲང་ངམ་གལ་ཏེ་དྲོ་ཡང་རུང་། །གང་གི་ཚེ་ན་རླུང་ལངས་པ། །རླུང་གིས་བཏབ་ན་གྲང་བ་སྟེ། །རླུང་མེད་པ་ཡི་གྲང་བ་མེད། །དེ་དེ་དག་གིས་བཏང་ནས། ཅིག་ཤོས་ལ་དྲིས་པ་དང་། དེས་སྨྲས་པ་དགུན་དྲང་མོད་ཅེས་བྱས་པ་དང་། དེ་དེ་དག་གིས་བརྡེགས་སོ། །དགེ་སློང་དག་ཇི་སྙམ་དུ་སེམས། བཏང་བ་གང་ཡིན་པ་དེ་ནི་ཤཱ་རིའི་བུ་འདི་ཉིད་ཡིན་ནོ། །བརྡེགས་པ་གང་ཡིན་པ་དེ་ནི་མཽད་གལ་གྱི་བུ་འདི་ཉིད་ཡིན་ཏེ། དེའི་ཚེ་ཡང་ཤཱ་རིའི་བུ་ནི་བཏང་ལ། མཽད་གལ་གྱི་བུ་ནི་བརྡེགས་སོ། །ད་ལྟར་ཡང་ཤཱ་རིའི་བུ་ནི་བཏང་ལ། མཽད་གལ་གྱི་བུ་ནི་བརྡེགས་སོ། །ཡང་ཇི་ལྟར་ཤཱ་རིའི་བུ་ནི་བཏང་ལ། མཽད་གལ་གྱི་བུ་ནི་བརྡེགས་པ་དེ་ཉོན་ཅིག །དགེ་སློང་དག་སྔོན་བྱུང་བ་ཆུ་ཀླུང་བསྐམས་པའི་ཤོལ་ཅིག་ན་ཁྱེའུ་དང་བུ་མོ་དག་ཅིག་རྩེ་བ་དེ་དག་གིས་ཤིང་ཤལ་མ་ལའི་མེ་ཏོག་ཆུའི་རྒྱུན་གྱིས་ཁྱེར་བ་ཞིག་དང་། བྲམ་ཟེའི་ཁྱེའུ་གཉིས་ཤིག་འོང་བ་མཐོང་ནས་ཞེས་བྱ་བ་ནས། དེ་དག་གིས་བྲམ་ཟེའི་ཁྱེའུ་གཅིག་ལ་དྲིས་པ། ཆུས་ཁྱེར་བ་འདི་ཅི་ཞིག །དེས་བསམས་པ། ཅི་འདྲ་བའི་སེམས་ཀྱིས་འདི་དག་བདག་ལ་འདྲི་སྙམ་ན། གོར་མ་ཆག་པར་བརྡེག་འདོད་པར་ཞེས་བྱ་བའི་བར་སྔ་མ་བཞིན་ནོ། །དེས་
ཀྱང་ཚིགས་སུ་བཅད་དེ་སྨྲས་པ། སྟོབས་དང་ལྡན་པས་ཚར་བཅད་པ། །ངེས་པར་འབྱུང་བའི་ཚོལ་བ་ཡིས། །ཤལ་མ་ལི་ཞེས་མི་བསམ་སྟེ། །སྐམ་གྱི་པད་མ་བཞིན་པར་བསམ། །དེ་དེ་དག་གིས་བཏང་ནས། ཅིག་ཤོས་ལ་དྲིས་པ་དང་། དེས་སྨྲས་པ། མ་མཐོང་ངམ། ཤིང་ཤལ་མ་ལིའི་མེ་ཏོག་ཡིན་མོད་ཅེས་བྱས་པ་དང་། དེ་དེ་དག་གིས་བརྡེགས་སོ། །དགེ་སློང་དག་ཅི་སྙམ་དུ་སེམས་ཞེས་བྱ་བ་རྒྱས་པར་སྔ་མ་བཞིན་ནོ། །དེ་ནས་བཅོམ་ལྡན་འདས་རྒྱལ་པོའི་ཁབ་ན་ཇི་ཙམ་དགྱེས་པར་བཞུགས་ནས་མཉན་ཡོད་གང་ན་བ་དེར་རྒྱུ་ཞིང་གཤེགས་སོ། །རྒྱུ་ཞིང་གཤེགས་པ་དང་། རིམ་གྱིས་མཉན་ཡོད་དུ་བྱོན་ཏེ་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཁྱིམ་བདག་མགོན་མེད་ཟས་སྦྱིན་གྱིས་འཕགས་པ་ཤཱ་རིའི་བུ་ཡོངས་སུ་མྱ་ངན་ལས་འདས་ཏེ། དེའི་རིང་བསྲེལ་འཕགས་པ་ཀུན་དགའ་བོའི་ལག་ན་ཡོད་དོ་ཞེས་ཐོས་སོ། །ཐོས་ནས་ཀྱང་ཚེ་དང་ལྡན་པ་ཀུན་དགའ་བོ་གང་ན་བ་དེར་སོང་སྟེ་ཕྱིན་ནས། ཚེ་དང་ལྡན་པ་ཀུན་དགའ་བོའི་རྐང་པ་གཉིས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འདུག་གོ། ། ཕྱོགས་གཅིག་ཏུ་འདུག་ནས་ཁྱིམ་བདག་མགོན་མེད་ཟས་སྦྱིན་གྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །འཕགས་པ་ཀུན་དགའ་བོ་མཁྱེན་པར་མཛོད་ཅིག །འཕགས་པ་ཤཱ་རིའི་བུ་ནི་བདག་གི་ཡུན་རིང་པོ་ནས་སྡུག་པ་དང་། ཡིད་དུ་འོང་བ་དང་། བླ་མ་དང་། དྲན་པར་བགྱིད་པ་ལགས་ན། དེ་ཡོངས་སུ་མྱ་ངན་ལས་འདས་ཏེ། དེའི་རིང་བསྲེལ་ཁྱོད་ཀྱི་ཕྱག་ན་མངའ་བ་དེ་དག་བདག་ལ་སྩོལ་ཅིག་དང་། དེའི་རིང་བསྲེལ་ལ་རིང་བསྲེལ་གྱི་མཆོད་པ་བགྱིའོ། །དེས་སྨྲས་པ། ཁྱིམ་བདག་དེ་ནི་བདག་གི་ཡང་ཡུན་རིང་པོ་ནས་སྡུག་པ་དང་། ཡིད་དུ་འོང་བ་དང་། བླ་མ་དང་དྲན་པར་བྱ་བ་ཡིན་པས་བདག་ཉིད་དེའི་རིང་བསྲེལ་ལ་རིང་བསྲེལ་གྱི་མཆོད་པ་བྱེད་དོ། །དེ་ནས་ཁྱིམ་བདག་མགོན་མེད་ཟས་སྦྱིན་གྱིས། བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་
ཕྱག་འཚལ་ཏེ། ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས། ཁྱིམ་བདག་མགོན་མེད་ཟས་སྦྱིན་གྱིས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་མཁྱེན་པར་མཛད་དུ་གསོལ། འཕགས་པ་ཤཱ་རིའི་བུ་ནི། བདག་གི་ཡུན་རིང་པོ་ནས་སྡུག་པ་དང་། ཡིད་དུ་འོང་བ་དང་། བླ་མ་དང་། དྲན་པར་བགྱི་བ་ལགས་ཏེ། དེའི་རིང་བསྲེལ་འཕགས་པ་ཀུན་དགའ་བོའི་སུག་པ་ན་མཆིས་པ། བཅོམ་ལྡན་འདས་ཀྱིས་བདག་ལ་སྩོལ་དུ་སྩལ་བར་གསོལ། བདག་དེའི་རིང་བསྲེལ་ལ་རིང་བསྲེལ་གྱི་མཆོད་པ་འཚལ་ལོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ཕོ་ཉས་བཀུག་ནས་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་དགེ་སློང་ཤཱ་རིའི་བུའི་རིང་བསྲེལ་རྣམས་ཁྱིམ་བདག་མགོན་མེད་ཟས་སྦྱིན་ལ་བྱིན་ལ། དེ་མཆོད་པ་བྱེད་དུ་ཆུག་ཤིག །བྲམ་ཟེ་དང་། ཁྱིམ་བདག་རྣམས་ནི་དོན་འདིས་ན་དད་པ་ཅན་ཡིན་ནོ། །ཀུན་དགའ་བོ་གཞན་ཡང་འདི་ཙམ་གྱིས་ན། ཁྱོད་ཀྱིས་ངའི་བསྟན་པ་ལ་ཕན་པ་བྱས་པའམ། ལན་ལོན་པ་མ་ཡིན་ནོ། །དེ་ལྟ་བས་ན་ཁྱོད་ཀྱིས་རབ་ཏུ་ཕྱུང་ཤིག །བསྙེན་པར་རྫོགས་པར་གྱིས་ཤིག །གནས་བྱིན་ཅིག །དགེ་སྦྱོང་གི་ཆེད་ཉེ་བར་ཞོག་ཤིག །དེ་དག་ལ་ཡང་ཇི་ལྟར་ཐོན་པ་བཞིན་འདོན་དུ་ཆུག་ཤིག །འཛིན་དུ་ཆུག་ཤིག །སློབས་ཤིག་དང་འདི་ཙམ་གྱིས་ན། ཁྱོད་ཀྱིས་ངའི་བསྟན་པ་ལ་ཕན་བཏགས་པ་དང་། ལན་ལོན་པ་ཡིན་ནོ། །དེ་ནས་ཚེ་དང་ལྡན་པ་ཀུན་དགའ་བོས་སྟོན་པའི་བཀས་ཁྱིམ་བདག་མགོན་མེད་ཟས་སྦྱིན་ལ། ཚེ་དང་ལྡན་པ་ཤཱ་རིའི་བུའི་རིང་བསྲེལ་དག་བྱིན་ཏེ། འདི་ལྟར་བཅོམ་ལྡན་འདས་སྔོན་བྱང་ཆུབ་སེམས་དཔར་གྱུར་པ་ན། ལན་འགའ་ཡང་ཡབ་ཡུམ་དང་། མཁན་པོ་དང་། སློབ་དཔོན་དང་། གཞན་བླ་མའི་གནས་ལྟ་བུ་དག་གི་ཚིག་མ་བཅག་པས་སོ། །དེ་ནས་ཁྱིམ་བདག་མགོན་མེད་ཟས་སྦྱིན་གྱིས། ཚེ་དང་ལྡན་པ་ཤཱ་རིའི་བུའི་རིང་བསྲེལ་དག་ཁྱེར་ནས། རང་གི་ཁྱིམ་ག་ལ་བ་དེར་སོང་སྟེ་ཕྱིན་ནས། དེ་དག་ཁྱིམ་གྱི་
མཆོག་གི་ནང་དུ་མཐོན་པོ་ཞིག་ཏུ་བཞག་ནས་ནང་མི་དང་བཅས། མཛའ་བོ་དང་། ཉེ་དུ་དང་། ཕུ་ནུ་དང་བཅས་ཏེ། མར་མེ་དང་། བདུག་པ་དང་། མེ་ཏོག་དང་། དྲི་དང་། ཕྲེང་བ་དང་། བྱུག་པ་རྣམས་ཀྱིས་མཆོད་པ་བྱ་བར་བརྩམས་སོ། །མཉན་ཡོད་ན་གནས་པའི་སྐྱེ་བོའི་ཚོགས་ཀྱིས་ཇི་ལྟར་འཕགས་པ་ཤཱ་རིའི་བུ་ཡུལ་མ་ག་དྷཱའི་གྲོང་ན་ལ་དར་ཡོངས་སུ་མྱ་ངན་ལས་འདས་པ་དེའི་རིང་བསྲེལ་དག་འཕགས་པ་ཀུན་དགའ་བོས་བླངས་ནས། ཁྱིམ་བདག་མགོན་མེད་ཟས་སྦྱིན་ལ་བྱིན་ཏེ། དེས་དེ་དག་ཁྱིམ་དུ་བཞག་ནས་ནང་མི་དང་བཅས། མཛའ་བོ་དང་། གཉེན་དང་། ཕུ་ནུ་དང་བཅས་ཏེ། མར་མེ་དང་། བདུག་པ་དང་། མེ་ཏོག་དང་། དྲི་དང་། ཕྲེང་བ་དང་། བྱུག་པ་དག་གིས་མཆོད་པ་ཐོས་སོ། །དེ་བཞིན་དུ་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས་ཀྱང་ཐོས་ནས། བཙུན་མོ་ཕྲེང་ལྡན་མ་དང་། རྒྱལ་རིགས་དབྱར་ཚུལ་མ་དང་། དྲང་སྲོང་བྱིན་དང་། རྙིང་པ་དག་དང་། རི་དགས་འཛིན་གྱི་མ་ས་ག་དང་། གཞན་ཡང་དད་པ་ཅན་མང་པོ་དག་དང་། ལྷན་ཅིག་དེ་དག་ཐམས་ཅད་མཆོད་པའི་ཡོ་བྱད་དག་ཁྱེར་ཏེ། ཁྱིམ་བདག་མགོན་མེད་ཟས་སྦྱིན་གྱི་ཁྱིམ་དུ་དོང་ནས། དེ་རྣམས་ཀྱིས་མཆོད་པའི་ཡོ་བྱད་དག་གིས་མཆོད་པར་བརྩམས་པ་ལས་དེར་ཁ་ཅིག་གིས་ཡོན་ཏན་གྱི་ཚོགས་དག་ཐོབ་བོ། །ཇི་ཙམ་དུས་གཞན་ཞིག་ན་ཁྱིམ་བདག་མགོན་མེད་ཟས་སྦྱིན་རི་འོར་ཞིག་ཏུ་བྱ་བ་ཅུང་ཟད་ཞིག་བྱུང་ནས་དེས་དེར་སྒོ་བཅད་ནས་སོང་ངོ་། །སྐྱེ་བོ་ཕལ་པོ་ཆེ་དག་དེ་བཞིན་དུ་འོངས་པ་དང་། ཇི་ཙམ་ན་སྒོ་བཅད་པ་མཐོང་ནས་ཁྱིམ་བདག་མགོན་མེད་ཟས་སྦྱིན་གྱིས་སྒོ་བཅད་དེ་སོང་བས་དེས་བདག་ཅག་གི་བསོད་ནམས་ཀྱི་བར་ཆད་བྱས་སོ། །ཞེས་དེ་དག་འཕྱ་བར་བྱེད། གཞོགས་འཕྱས་བྱེད། སྨོད་པར་བྱེད་དོ། །དེ་ནས་ཁྱིམ་བདག་མགོན་མེད་ཟས་སྦྱིན་རི་འོར་དེ་ནས་འོངས་པ་དང་། དེའི་ནང་མིས་སྨྲས་པ། ཁྱིམ་བདག་སྐྱེ་བོའི་ཚོགས་ཆེན་པོ་མཆོད་པའི་ཡོ་བྱད་ཐོགས་ཏེ་འོངས་པ་ལས་སྒོ་བཅད་པ་མཐོང་ནས། དེས་བདག་ཅག་གི་བསོད་ནམས་ཀྱི་བར་ཆད་བྱས་སོ། །ཞེས་འཕྱ་བར་བྱེད། གཞོགས་འཕྱས་བྱེད།
སྨོད་པར་བྱེད་དོ། །དེ་འདི་སྙམ་དུ་འདི་ཉིད་བདག་གིས་བྱ་བ་ཡིན་ནོ་སྙམ་དུ་ཤེས་ནས། བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་འཕགས་པ་ཤཱ་རིའི་བུ་ལ་རབ་ཏུ་དད་པའི་སྐྱེ་བོའི་ཚོགས་ཆེན་པོ་མཆོད་པའི་ཡོ་བྱད་དག་ཐོགས་ཏེ། བདག་གི་སྡུམ་པར་མཆིས་པ་ལས་བདག་བགྱི་བ་ཅུང་ཟད་ཅིག་གི་སླད་དུ་ཆབ་སྒོ་བཀུམ་ནས་གཞན་དུ་མཆིས་པ་དང། དེ་དག་ཁྱིམ་བདག་མགོན་མེད་ཟས་སྦྱིན་གྱིས་སྒོ་བཅད་དེ་སོང་བས། བདག་ཅག་གི་བསོད་ནམས་ཀྱི་བར་ཆད་བྱས་སོ་ཞེས་འཕྱ་བར་བགྱིད། གཞོགས་འཕྱས་བགྱིད་སྨོད་པར་བགྱིད་དོ། །དེའི་སླད་དུ་གལ་ཏེ་བཅོམ་ལྡན་འདས་ཀྱིས་གནང་ན་བདག་གིས། འཕགས་པ་ཤཱ་རིའི་བུའི་མཆོད་རྟེན་ཕྱོགས་སྣང་ཡལ་ཅན་ཞིག་ཏུ་བགྱིས་ལ། དེར་སྐྱེ་བོའི་ཚོགས་ཆེན་པོ་བག་ཡངས་སུ་མཆོད་པ་བགྱིད་དུ་སྩལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་དེ་ལྟ་བས་ན་གནང་གིས་བྱོས་ཤིག །བཅོམ་ལྡན་འདས་ཀྱིས་གནང་གིས་བྱོས་ཤིག་ཅེས་བཀའ་སྩལ་པ་དང་། དེས་ཇི་ལྟ་བུར་བྱ་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། རིམ་གྱིས་བང་རིམ་བཞི་བྱས་ལ་དེ་ནས་བུམ་རྟེན་བྱའོ། །དེ་ནས་བུམ་པ་དང་བྲེ་དང་སྲོག་ཤིང་དང་། གདུགས་གཅིག་དང་། གཉིས་དང་། གསུམ་དང་། བཞི་བྱ་བ་བྱས་ནས་བཅུ་གསུམ་གྱི་བར་དུ་བྱ་ཞིང་ཆར་ཁབ་དག་གཞག་པར་བྱའོ། །བཅོམ་ལྡན་འདས་ཀྱིས་མཆོད་རྟེན་དེ་ལྟ་བུ་བྱའོ་ཞེས་གསུངས་པ་དང་། དེས་ཅི་འཕགས་པ་ཤཱ་རིའི་བུ་འབའ་ཞིག་ལ་མཆོད་རྟེན་རྣམ་པ་དེ་ལྟ་བུའམ། འོན་ཏེ་འཕགས་པ་ཐམས་ཅད་ལ་བྱ་བ་མི་ཤེས་ནས། སྐབས་དེ་བཅོམ་ལྡན་འདས་ལ་དགེ་སློང་དག་གིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་རེ་ཞིག་དེ་བཞིན་གཤེགས་པའི་མཆོད་རྟེན་ནི་རྣམ་པ་ཐམས་ཅད་རྫོགས་པར་བྱའོ། །རང་སངས་རྒྱས་ཀྱི་ཆར་ཁབ་མི་གཞག་པར་བྱའོ། །དགྲ་བཅོམ་པའི་ནི་གདུགས་
བཞིའོ། །ཕྱིར་མི་འོང་བའི་ནི་གསུམ་མོ། །ཕྱིར་འོང་བའི་ནི་གཉིས་སོ། །རྒྱུན་དུ་ཞུགས་པའི་ནི་གཅིག་གོ །སོ་སོའི་སྐྱེ་བོ་དགེ་བ་རྣམས་ཀྱི་མཆོད་རྟེན་ནི་བྱི་བོར་བྱའོ། །བཅོམ་ལྡན་འདས་ཀྱིས་འཕགས་པ་རྣམས་ཀྱི་མཆོད་རྟེན་ནི་རྣམ་པ་འདིས་སོ། །སོ་སོའི་སྐྱེ་བོ་རྣམས་ཀྱི་ནི་འདིས་སོ་ཞེས་བཀའ་སྩལ་པ་དང་། དེས་གང་གི་གནས་གང་དུ་བྱ་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། ཇི་ལྟར་དེ་བཞིན་གཤེགས་པ་བཞུགས་པ་ན། ཤཱ་རིའི་བུ་དང་། མཽད་གལ་གྱི་བུ་དག་འདུག་པ་དེ་བཞིན་དུ་ཡོངས་སུ་མྱ་ངན་ལས་འདས་པའི་མཆོད་རྟེན་ཡང་བྱའོ། །གཞན་ཡང་གནས་བརྟན་གནས་བརྟན་རྣམས་ཀྱི་མཆོད་རྟེན་ནི་རྒན་རིམས་བཞིན་སྦྲེང་བར་བྱའོ། །སོ་སོའི་སྐྱེ་བོ་དགེ་བ་རྣམས་ཀྱི་ནི་དགེ་འདུན་གྱི་ཀུན་དགའ་ར་བའི་ཕྱི་རོལ་དུ་བྱའོ། །ཁྱིམ་བདག་མགོན་མེད་ཟས་སྦྱིན་གྱིས་གསོལ་པ། གལ་ཏེ་བཅོམ་ལྡན་འདས་ཀྱིས་གནང་ན། བདག་གིས་འཕགས་པ་ཤཱ་རིའི་བུའི་མཆོད་རྟེན་གྱི་དུས་སྟོན་དག་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་གྱིས་ཤིག །ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས་ཇི་ལྟར། ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ལ་འཕགས་པ་ཤཱ་རིའི་བུའི་མཆོད་རྟེན་གྱི་དུས་སྟོན་གཟུགས་པར་གསོལ་བ་ལས། བཅོམ་ལྡན་འདས་ཀྱིས་འཛུགས་པར་གནང་བ་ཐོས་ནས། མ་ལ་བདག་གིས་ཀྱང་དེའི་གྲོགས་བྱའོ་སྙམ་ནས། དེས་འདི་ལྟར་དྲིལ་བསྒྲགས་ནས། ཤེས་ལྡན་མཉན་ཡོད་ན་གནས་པའི་གྲོང་ཁྱེར་པ་རྣམས་དང་། ཡུལ་གཞན་ནས་ལྷགས་པའི་སྐྱེ་བོའི་ཚོགས་དག་ཉོན་ཅིག །འཕགས་པ་ཤཱ་རིའི་བུའི་མཆོད་རྟེན་གྱི་དུས་སྟོན་ལ་བབ་པའི་ཚེ་ཟོང་ཐོགས་ནས་འོངས་པ་གང་ཡིན་པ་དེ་ལ་ཤོ་གམ་ཡང་མེད་ལ་གཅན་ཀྱང་མེད། གྲུ་བཙས་ཀྱང་མེད་ཀྱིས་དེ་བག་ཡངས་སུ་འདིར་ཤོག་ཤིག །བར་སྐབས་དེར་རྒྱ་མཚོ་ཆེན་པོ་ནས་ཚོང་པ་ལྔ་བརྒྱ་ཞིག་གྲུ་བོ་ཆེའི་ནོར་གྲུབ་སྟེ། མཉན་ཡོད་དུ་ཕྱིན་པ་དེ་དག་གིས་ཇི་ལྟར་རྒྱལ་པོས་མཉན་ཡོད་དུ་དྲིལ་བསྒྲགས་ཏེ། འདི་སྐད་དུ་གང་ཞིག་འཕགས་པ་ཤཱ་རིའི་བུའི་མཆོད་རྟེན་གྱི་དུས་སྟོན་ལ་བབ་པའི་ཚེ་ཟོང་ཐོགས་ཏེ་འོང་བ་དེ་ལ་ཤོ་གམ་ཡང་མེད་ལ་
གཅན་ཡང་མེད། གྲུ་བཙས་ཀྱང་མེད་ཀྱིས་དེ་བག་ཡངས་སུ་འདིར་ཤོག་ཤིག །ཅེས་བསྒོ་བ་ཐོས་ནས་རེ་ཞིག་རྒྱལ་པོ་འདི་རང་གི་བསོད་ནམས་ཀྱི་འབྲས་བུ་ལ་གནས་ཀྱང་བསོད་ནམས་དག་གིས་ངོམས་མི་ཤེས་ཏེ། སྦྱིན་པ་དག་སྦྱིན། བསོད་ནམས་དག་བྱེད་ན་བདག་གིས་ཅིའི་ཕྱིར་སྦྱིན་པ་དག་མི་སྦྱིན། བསོད་ནམས་དག་མི་བྱ་སྙམ་ནས། དེ་དག་ཡིད་རབ་ཏུ་དང་བ་སྐྱེས་ཏེ། དུས་སྟོན་དེའི་དུས་སུ་དུང་དང་། ནོར་བུ་དང་མུ་ཏིག་ལ་སོགས་པ་ཕུལ་བ་དང་། དགེ་སློང་དག་གིས་ཇི་ལྟར་བསྒྲུབ་པ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། པུད་དུད་གང་ཡིན་པ་དེ་དག་ནི་ཤིང་འཛམ་བུའི་གྲིབ་མ་ན་བཞུགས་པའི་སྐུ་གཟུགས་ལ་དབུལ་བར་བྱའོ། །གཞན་ཡང་ཆུང་ཤས་ཤིག་ནི་ཤཱ་རིའི་བུའི་མཆོད་རྟེན་དེའི་བཅོས་ལེགས་བྱ་བར་བཞག་ལ་ལྷག་མ་ནི་དགེ་འདུན་ཚོགས་པས་བགོ་བར་བྱའོ། །དེ་དེ་བཞིན་གཤེགས་པའི་མཆོད་རྟེན་གྱི་མ་ཡིན་གྱི། ཤཱ་རིའི་བུའི་མཆོད་རྟེན་གྱི་ཡིན་ཏེ། དེ་ལྟ་བས་ན་འགྱོད་པར་མི་བྱའོ།། །།སྡོམ་ནི། གླེང་དང་དྲན་པ་ཉིད་དང་ནི། །སྐབས་དབྱེ་བ་དང་སྨྲ་མི་བྱ། །ལུང་འབོགས་པ་དང་གསོ་སྦྱོང་དང་། །དགག་དབྱེ་འཇོག་པར་བྱེད་པ་འོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་དྲུག་སྡེ་དག་གིས་ཉེས་པར་མཐོང་བ་དང་། ཉེས་པར་ཐོས་ པ་དང་། ཉེས་པར་དོགས 
་པས་དགེ་སློང་དག་ལ་གླེངས་སོ། །དགེ་སློང་དག་ལ་ཉེས་པར་མཐོང་བ་དང་། ཉེས་པར་ཐོས་པ་དང་། ཉེས་པར་
དོགས་པས་གླེངས་པ ་ན་དེ་དག་བག་ཚ་བཞིན་དུ་གནས་སོ། །དེ་དག་བག་ཚ་བཞིན་དུ་གནས་པས་རིད་པ་དང་། སྐེམ་པ་དང་། རྙིས་པ་དང་། ལུས་ལས་སུ་མ་རུང་བར་གྱུར་ཏེ་ལུང་སྟོན་པ་དང་། ཀློག་པ་དང་། ཁ་ཏོན་དང་། རྣལ་འབྱོར་དང་། ནང་གི་ཚུལ་བཞིན་ཡིད་ལ་བྱེད་པ་དག་ཤོར་ནས་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་བྱུང་བ་ནི་དགེ་སློང་དག་དགེ་སློང་ལ་ཉེས་པར་མཐོང་བ་དང་། ཉེས་པར་ཐོས་ པ་དང་། ཉེས་པར་དོགས ་པས་གླེང་བ་ལས་གྱུར་གྱིས་དེ་ལྟ་བས་ན་དགེ་སློང་གིས་དགེ་སློང་ལ་ཉེས་པར་
མཐོང་བ་དང་། ཉེས་པར་ཐོས་ པ་དང་། ཉེས་པར་དོགས ་པས་གླེང་བར་མི་བྱའོ། །དགེ་སློང་གིས་ཉེས་པར་མཐོང་བ་དང་། ཉེས་པར་ཐོས་ པ་དང་། ཉེས་པར་དོགས ་པས་དགེ་སློང་ལ་གླེང་བར་བྱེད་ན་འགལ་ཚབས་ཅན་དུ་འགྱུར་རོ། །གླེང་བར་བྱེད་པ་ཇི་ལྟ་བར་དྲན་པར་བྱེད་པ་དང་། སྐབས་འབྱེད་པར་བྱེད་པ་དང་། མི་སྨྲ་བར་བྱེད་པ་དང་། ལུང་འབོགས་པར་བྱེད་པ་དང་། གསོ་སྦྱོང་འཇོག་པར་བྱེད་པ་དང་། དགག་དབྱེ་འཇོག་པར་བྱེད་པ་ཡང་དེ་དང་འདྲ་སྟེ། སྡོམ་གྱི་ཚིགས་སུ་བཅད་པ་ཐམས་ཅད་སྔ་མ་བཞིན་དུ་བརྗོད་པར་བྱའོ།། །།སྡོམ་ནི། སངས་རྒྱས་མཚན་ནས་སྨོས་པ་དང་། །ཚེ་དང་ལྡན་པ་ཀུན་མི་སྤྱད། །འཕྲལ་ཐབས་ཅན་ལ་མ་དད་དང་། །འདུལ་བ་མདོར་ནི་བསྡུས་པའོ། །སངས་རྒྱས་བཅོམ་ལྡན་འདས་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་ལྔ་པོ་དག་ལ་བཀའ་སྩལ་པ། དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་འདི་ནི་སྡུག་བསྔལ་འཕགས་པའི་བདེན་པའོ་ཞེས་ཚུལ་བཞིན་ཡིད་ལ་བྱས་པ་ན་མིག་སྐྱེས་སོ། །ཤེས་པ་དང་རིག་པ་དང་། བློ་དང་། རྟོགས་པ་སྐྱེས་སོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་འདི་ནི་སྡུག་བསྔལ་ཀུན་འབྱུང་བའོ། །འདི་ནི་སྡུག་བསྔལ་འགོག་པའོ། །འདི་ནི་སྡུག་བསྔལ་འགོག་པར་འགྱུར་བ་འཕགས་པའི་ལམ་མོ། །ཞེས་ཚུལ་བཞིན་དུ་ཡིད་ལ་བྱས་པ་ན་མིག་སྐྱེས་སོ། །ཤེས་པ་དང་རིག་པ་དང་། བློ་དང་། རྟོགས་པ་སྐྱེས་སོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འཕགས་པའི་བདེན་པ་དེ་མངོན་པར་ཤེས་པས་ཡོངས་སུ་ཤེས་པར་བྱའོ། །ཞེས་ཚུལ་བཞིན་ཡིད་ལ་བྱས་པ་ན་མིག་སྐྱེས་སོ། །ཤེས་པ་དང་རིག་པ་དང་། བློ་དང་། རྟོགས་པ་སྐྱེས་སོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་སྡུག་བསྔལ་ཀུན་འབྱུང་བ་འཕགས་པའི་བདེན་པ་དེ་མངོན་པར་ཤེས་པས་སྤང་བར་བྱའོ་ཞེས་ཚུལ་བཞིན་ཡིད་ལ་བྱས་པ་ན་མིག་སྐྱེས་སོ། །ཤེས་པ་དང་རིག་པ་དང་བློ་དང་། རྟོགས་པ་སྐྱེས་སོ། །
དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འགོག་པ་འཕགས་པའི་བདེན་པ་དེ་མངོན་པར་ཤེས་པས་མངོན་སུམ་དུ་བྱའོ་ཞེས་ཚུལ་བཞིན་དུ་ཡིད་ལ་བྱས་པ་ན་མིག་སྐྱེས་སོ། །ཤེས་པ་དང་རིག་པ་དང་བློ་དང་། རྟོགས་པ་སྐྱེས་སོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འགོག་པར་འགྱུར་བའི་ལམ་འཕགས་པའི་བདེན་པ་དེ་བསྒོམ་པར་བྱའོ། །ཞེས་ཚུལ་བཞིན་ཡིད་ལ་བྱས་པ་ན་མིག་སྐྱེས་སོ། །ཤེས་པ་དང་རིག་པ་དང་བློ་དང་རྟོགས་པ་སྐྱེས་སོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འཕགས་པའི་བདེན་པ་དེ་མངོན་པར་ཤེས་པས་ཡོངས་སུ་ཤེས་སོ། །ཞེས་ཚུལ་བཞིན་ཡིད་ལ་བྱས་པ་ན་མིག་སྐྱེས་སོ། །ཤེས་པ་དང་རིག་པ་དང་བློ་དང་རྟོགས་པ་སྐྱེས་སོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་སྡུག་བསྔལ་ཀུན་འབྱུང་བ་འཕགས་པའི་བདེན་པ་དེ་མངོན་པར་ཤེས་པས་སྤངས་སོ་ཞེས་ཚུལ་བཞིན་ཡིད་ལ་བྱས་པ་ན་མིག་སྐྱེས་སོ། །ཤེས་པ་དང་རིག་པ་དང་བློ་དང་རྟོགས་པ་སྐྱེས་སོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འགོག་པ་འཕགས་པའི་བདེན་པ་དེ་མངོན་པར་ཤེས་པས་མངོན་སུམ་དུ་བྱས་སོ། །ཞེས་ཚུལ་བཞིན་ཡིད་ལ་བྱས་པ་ན་མིག་སྐྱེས་སོ། །ཤེས་པ་དང་རིག་པ་དང་བློ་དང་རྟོགས་པ་སྐྱེས་སོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འགོག་པར་འགྱུར་བ་འཕགས་པའི་ལམ་དེ་མངོན་པར་ཤེས་པས་བསྒོམས་སོ། །ཞེས་ཚུལ་བཞིན་ཡིད་ལ་བྱས་པ་ན་མིག་སྐྱེས་སོ། །ཤེས་པ་དང་རིག་པ་དང་བློ་དང་རྟོགས་པ་སྐྱེས་སོ། །དགེ་སློང་དག་གང་ལ་ཇི་སྲིད་དུ་འཕགས་པའི་བདེན་པ་བཞི་པོ་འདི་དག་ལ་དེ་ལྟར་ལན་གསུམ་དུ་བཟླས་ཏེ་རྣམ་པ་བཅུ་གཉིས་པའི་མིག་སྐྱེས་པར་མ་གྱུར། ཤེས་པ་མ་ཡིན། རིག་པ་མ་ཡིན། བློ་མ་ཡིན། རྟོགས་པ་མ་སྐྱེས་པ་དེ་སྲིད་དུ་ང་འཇིག་རྟེན་ལྷ་དང་བཅས། བདུད་དང་བཅས། ཚངས་པ་དང་བཅས། དགེ་སྦྱོང་དང་བྲམ་ཟེའི་སྐྱེ་དགུ་དང་བཅས། ལྷ་དང་མི་དང་
བཅས་པ་འདི་ལས་གྲོལ་བ་དང་། ངེས་པར་བྱུང་བ་དང་། བྲལ་བ་དང་། རབ་ཏུ་གྲོལ་བ་དང་། ཕྱིན་ཅི་ལོག་དང་བྲལ་བའི་སེམས་ཀྱིས་མང་དུ་གནས་པར་མ་གྱུར་པ་དེ་སྲིད་དུ་ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ་སྙམ་དུ་ཤེས་པར་མ་གྱུར་གྱི་དགེ་སློང་དག་གང་ནས་བཟུང་སྟེ། ང་ལ་འཕགས་པའི་བདེན་པ་བཞི་པོ་འདི་དག་ལ་དེ་ལྟར་ལན་གསུམ་དུ་བཟླས་ཏེ་རྣམ་པ་བཅུ་གཉིས་པའི་མིག་སྐྱེས། ཤེས་པ་དང་རིག་པ་དང་བློ་དང་རྟོགས་པ་སྐྱེས་པ་དེ་ནས་བཟུང་སྟེ། ང་འཇིག་རྟེན་ལྷ་དང་བཅས་བདུད་དང་བཅས་ཚངས་པ་དང་བཅས། དགེ་སྦྱོང་དང་བྲམ་ཟེའི་སྐྱེ་དགུ་དང་བཅས། ལྷ་དང་མི་དང་བཅས་པ་འདི་ལས་གྲོལ་བ་དང་། ངེས་པར་བྱུང་བ་དང་། རབ་ཏུ་གྲོལ་བ་དང་། ཕྱིན་ཅི་ལོག་དང་བྲལ་བའི་སེམས་ཀྱིས་མང་དུ་གནས་པར་གྱུར། དེ་ནས་བཟུང་སྟེ་ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ་སྙམ་དུ་ཤེས་པར་གྱུར་ཏོ། །ཆོས་ཀྱི་རྣམ་གྲངས་འདི་བཤད་པ་ན་ཚེ་དང་ལྡན་པ་ཀཽཎྜི་ནྱ་དང་། ལྷ་བརྒྱད་ཁྲི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀཽཎྜི་ནྱ་ལ་བཀའ་སྩལ་པ། ཀཽཎྜི་ནྱ་ཁྱོད་ཀྱིས་ཆོས་ཀུན་ཤེས་སམ། བཅོམ་ལྡན་འདས་ཀུན་འཚལ་ཏོ། །ཀཽཎྜི་ནྱ་ཁྱོད་ཀྱིས་ཆོས་ཀུན་ཤེས་སམ། བདེ་བར་གཤེགས་པ་ཀུན་འཚལ་ཏོ། །ཚེ་དང་ལྡན་པ་ཀཽཎྜི་ནྱ་ཆོས་ཀུན་ཤེས་པ་དེའི་ཕྱིར་ཚེ་དང་ལྡན་པ་ཀཽཎྜི་ནྱའི་མིང་ཀུན་ཤེས་ཀཽཎྜི་ནྱ་ཞེས་བྱ་བར་ཆགས་སོ། །ཚེ་དང་ལྡན་པ་ཀཽཎྜི་ནྱ་ཆོས་ཀུན་ཤེས་པ་ན་ས་བླ་པའི་གནོད་སྦྱིན་རྣམས་ཀྱིས་སྒྲ་ཕྱུང་ཞིང་དབྱངས་རྗེས་སུ་བསྒྲགས་པ། གྲོགས་པོ་དག་བཅོམ་ལྡན་འདས་ཀྱིས་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་ཐུགས་བརྩེ་བ་དང་། ལྷ་དང་མི་རྣམས་ཀྱི་དོན་དང་། ཕན་པ་དང་། བདེ་བར་མཛད་པའི་སླད་དུ་འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པ་གང་གིས་ཀྱང་ཆོས་དང་མཐུན་པར་མ་བསྐོར་བའི་ཆོས་ཀྱི་འཁོར་ལོ་ཆོས་དང་མཐུན་པ་ལན་གསུམ་དུ་བཟླས་ཏེ་རྣམ་པ་བཅུ་གཉིས་པ་འདི་ཡུལ་བཱ་རཱ་ཎ་སཱི་
དྲང་སྲོང་སྨྲ་བ་རི་དགས་ཀྱི་ནགས་སུ་བསྐོར་བས་ལྷའི་རིས་དག་ནི་མངོན་པར་འཕེལ་བར་འགྱུར། ལྷ་མ་ཡིན་གྱི་རིས་དག་ནི་ཡོངས་སུ་ཉམས་པར་འགྱུར་རོ། །ས་བླ་པའི་གནོད་སྦྱིན་རྣམས་ཀྱི་སྒྲ་བར་སྣང་ལ་སྤྱོད་པའི་གནོད་སྦྱིན་རྣམས་དང་། རྒྱལ་ཆེན་བཞིའི་ལྷ་རྣམས་དང་། སུམ་བཅུ་རྩ་གསུམ་པ་རྣམས་དང་། འཐབ་བྲལ་བ་རྣམས་དང་། དགའ་ལྡན་པ་རྣམས་དང་། འཕྲུལ་དགའ་བ་རྣམས་དང་། གཞན་འཕྲུལ་དབང་བྱེད་ཀྱི་ལྷ་རྣམས་ཀྱིས་ཐོས་ནས་སྐད་ཅིག་དེ་དང་། ཐང་ཅིག་དེ་དང་། ཡུད་ཙམ་དེ་དང་། སྐད་ཅིག་དང་། ཐང་ཅིག་དང་ཡུད་ཙམ་དེ་ལ་ཚངས་པའི་འཇིག་རྟེན་གྱི་བར་དུ་སྒྲ་གྲགས་པར་གྱུར་ཏེ། ཚངས་རིས་པའི་ལྷ་རྣམས་ཀྱི་སྒྲ་ཕྱུང་ཞིང་དབྱངས་རྗེས་སུ་བསྒྲགས་པ། གྲོགས་པོ་དག་བཅོམ་ལྡན་འདས་ཀྱིས་ལྷ་དང་མི་རྣམས་ཀྱི་ཞེས་བྱ་བ་ནས། འདི་ཡུལ་བཱ་རཱ་ཎ་སཱི་དྲང་སྲོང་སྨྲ་བ་རི་དགས་ཀྱི་ནགས་སུ་བསྐོར་བས་ལྷའི་རིས་དག་ནི་མངོན་པར་འཕེལ་བར་འགྱུར། ལྷ་མ་ཡིན་གྱི་རིས་དག་ནི་ཡོངས་སུ་ཉམས་པར་འགྱུར་རོ་ཞེས་བྱ་བའི་བར་སྔ་མ་བཞིན་ནོ། །བཅོམ་ལྡན་འདས་ཀྱིས་ཡུལ་བཱ་རཱ་ཎ་སཱི་དྲང་སྲོང་སྨྲ་བ་རི་དགས་ཀྱི་ནགས་སུ་ཆོས་ཀྱི་འཁོར་ལོ་ཆོས་དང་མཐུན་པ་ལན་གསུམ་གྱི་བར་དུ་བཟླས་ཏེ་རྣམ་པ་བཅུ་གཉིས་པ་བསྐོར་ཏེ། དེའི་ཕྱིར་ཆོས་ཀྱི་རྣམ་གྲངས་འདི་ཆོས་ཀྱི་འཁོར་ལོ་བསྐོར་བ་ཞེས་བྱའོ། །གང་གི་ཚེ་བཅོམ་ལྡན་འདས་ཀྱིས་དགེ་སློང་ལྔ་པོ་དག་གི་རྒྱུད་ལ་ཆོས་ཀྱི་འཁོར་ལོ་བསྐོར་ཏེ། དེ་དག་བསྙེན་པར་རྫོགས་པ་དགེ་སློང་གི་དངོས་པོར་གྱུར་པ་དེའི་ཚེ་དེ་དག་དེ་བཞིན་གཤེགས་པ་ལ་ཤིན་ཏུ་མཚན་ནས་སྨོས་པ་དང་། གདུང་ནས་སྨོས་པ་དང་། ཚེ་དང་ལྡན་པ་ཞེས་སྨོས་པ་ཀུན་ཏུ་སྤྱོད་ནས་བཅོམ་ལྡན་འདས་ཀྱིས་དེ་དག་ལ་བཀའ་སྩལ་པ། དགེ་སློང་དག་ཁྱེད་དེ་བཞིན་གཤེགས་པ་ལ་ཤིན་ཏུ་མཚན་ནས་སྨོས་པ་དང་། གདུང་ནས་སྨོས་པ་དང་། ཚེ་དང་ལྡན་པ་ཞེས་སྨོས་པ་ཀུན་ཏུ་མ་སྤྱོད་ཅིག །དགེ་སློང་དག་དེ་ཅིའི་ཕྱིར་ཞེ་ན། གང་ཞིག་དེ་བཞིན་གཤེགས་པ་ལ་ཤིན་ཏུ་མཚན་ནས་སྨོས་པ་དང་། གདུང་ནས་སྨོས་པ་དང་། ཚེ་དང་ལྡན་པ་ཞེས་སྨོས་པ་ཀུན་ཏུ་སྤྱོད་པ་དེ་ནི་སྐྱེས་བུ་གཏི་མུག་དེ་ལ་ཡུན་རིང་པོར་གནོད་པ་དང་། ཕན་པ་མ་ཡིན་པ་དང་སྡུག་བསྔལ་བར་འགྱུར་རོ། ། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་བྱུང་བ་ནི་དགེ་སློང་དག་དེ་བཞིན་གཤེགས་པ་ལ་མཚན་ནས་སྨོས་པ་དང་། གདུང་ནས་སྨོས་པ་དང་། ཚེ་དང་ལྡན་པ་ཞེས་སྨོས་པ་ཀུན་ཏུ་སྤྱོད་པ་ལས་གྱུར་གྱིས། དེའི་ཕྱིར་དགེ་སློང་གིས་དེ་བཞིན་གཤེགས་པ་ལ་མཚན་ནས་སྨོས་པ་དང་། གདུང་ནས་སྨོས་པ་དང་། ཚེ་དང་ལྡན་པ་ཞེས་སྨོས་པ་ཀུན་ཏུ་སྤྱད་པར་མི་བྱའོ་སྙམ་དུ་དགོངས་ནས་དགེ་སློང་ལྔ་པོ་དག་ལ་བཀའ་སྩལ་པ། དགེ་སློང་དག་དེ་ལྟ་བས་ན་དགེ་སློང་གིས་དེ་བཞིན་གཤེགས་པ་ལ་མཚན་ནས་སྨོས་པ་དང་། གདུང་ནས་སྨོས་པ་དང་། ཚེ་དང་ལྡན་པ་ཞེས་སྨོས་པ་ཀུན་དུ་སྤྱད་པར་མི་བྱ་སྟེ། ཀུན་ཏུ་སྤྱོད་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་དེ་བཞིན་གཤེགས་པ་ལ་མཚན་ནས་སྨོས་པ་དང་། གདུང་ནས་སྨོས་པ་དང་། ཚེ་དང་ལྡན་པ་ཞེས་སྨོས་པ་ཀུན་ཏུ་སྤྱད་པར་མི་བྱ་སྟེ། ཀུན་ཏུ་སྤྱོད་ན་འགལ་ཚབས་ཅན་དུ་འགྱུར་རོ་ཞེས་བཀའ་སྩལ་པ་དང་། དགེ་སློང་གཞོན་
ནུ་གཞོན་ནུ་དག་དགེ་སློང་རྒན་པ་རྒན་པ་དག་ལ་མིང་ནས་སྨོས་པ་དང་། རུས་ནས་སྨོས་པ་དང་། ཚེ་དང་ལྡན་པ་ཞེས་སྨོས་པ་ཀུན་ཏུ་སྤྱོད་ནས་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གཞོན་ནུས་དགེ་སློང་ཆེས་རྒན་པ་ལ་མིང་ནས་སྨོས་པ་དང་། རུས་ནས་སྨོས་པ་ཀུན་ཏུ་སྤྱད་པར་མི་བྱའོ། །འོན་ཀྱང་ཚེ་དང་ལྡན་པ་ཞེས་བོད་པའམ། བཙུན་པ་ཞེས་བོད་པ་གཉིས་ཀུན་ཏུ་སྤྱད་པར་བྱའོ། །དགེ་སློང་གཞོན་ནུས་དགེ་སློང་ཆེས་རྒན་པ་ལ་མིང་ནས་སྨོས་སམ། རུས་ནས་སྨོས་པ་ཀུན་ཏུ་སྤྱོད་ན་འགལ་ཚབས་ཅན་དུ་འགྱུར་རོ། །གླེང་གཞི་ནི་མཉན་ཡོད་ནའོ། །མཉན་ཡོད་ན་དགེ་སློང་འཕྲལ་ཐབས་ཅན་དང་། དགེ་སློང་མ་གསོད་མོ་ཇི་ལྟ་ཇི་ལྟར་སྐྱེ་བོའི་ཚོགས་མང་པོ་མི་དད་པར་འགྱུར་བ་དེ་ལྟ་དེ་ལྟར་ཁྱིམ་དག་ཏུ་རྒྱུ་བ་བྱེད་ཅེས་བྱ་བ་རྒྱས་པར་རྣམ་པར་འབྱེད་པ་ལས་ཇི་སྐད་འབྱུང་བ་བཞིན་ནོ། །སངས་རྒྱས་བཅོམ་ལྡན་འདས་ཀུ་ཤའི་གྲོང་ཁྱེར་ན་གྱད་ཀྱི་ཉེན་འཁོར་ཤིང་སཱ་ལ་ཟུང་གི་ཚལ་ན་བཞུགས་སོ། །དེ་ནས་བཅོམ་ལྡན་འདས་ཡོངས་སུ་མྱ་ངན་ལས་འདའ་བའི་དུས་ཀྱི་ཚེ་དེ་ན་དགེ་སློང་རྣམས་ལ་བཀའ་སྩལ་པ། དགེ་སློང་དག་ངས་འདུལ་བ་རྒྱས་པར་བསྟན་ན། མདོར་བསྡུས་ཏེ་ཡང་མ་བསྟན་པས་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་བཤད་དོ། །དགེ་སློང་དག་ཁྱེད་ཀྱིས་ངས་སྔོན་གནང་བ་ཡང་མེད། བཀག་པ་ཡང་མེད་པ་གང་ཡིན་པ་དེ་ཡང་གལ་ཏེ་མི་རུང་བ་སྟེན་ཅིང་རུང་བ་དང་མི་མཐུན་ན་རུང་བ་མ་ཡིན་པའི་ཕྱིར་སྤྱད་པར་མི་བྱའོ། །གལ་ཏེ་རུང་བ་སྟེན་ཅིང་མི་རུང་བ་དང་མི་མཐུན་ན་རུང་བ་ཡིན་པའི་ཕྱིར་སྤྱད་པར་བྱ་སྟེ་འདི་ལ་འགྱོད་པར་མི་བྱའོ།། །།སྡོམ་ནི། སྤངས་པ་དག་ནི་བགེད་པ་དང་། །སྦྲང་མ་རྣམས་ཀྱི་སྐྱབས་དང་ནི། །སྤྱད་ཚགས་དང་ནི་གྱོ་མོ་དང་། །སྲ་བརྐྱང་གདིང་དང་མང་པོའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་ཞིག་ལ་ཆོས་གོས་ཀྱི་སྤང་བ་བྱུང་ནས། དེས་དེ་རྒན་པའི་མཐའ་ལོགས་སུ་འདུག་སྟེ་དགེ་འདུན་ལ་སྤངས་སོ། །དགེ་སྐོས་ཀྱིས་བསམས་པ། འདི་ནི་དགེ་འདུན་གྱི་རྙེད་པ་གྲུབ་པ་ཡིན་ཏེ་སྤེལ་ནས་བགོ་བར་བྱའོ་སྙམ་ནས། དེས་
དེ་སྤེལ་ནས་དགེ་འདུན་ལ་བྲིམས་པ་དང། དགེ་སློང་དེ་ཕོངས་པར་གྱུར་ཏོ། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་དགོངས་པ་ཉེས་དམིགས་གང་ཅུང་ཟང་བྱུང་བ་ནི་དགེ་སློང་དག་སྤང་བ་དགེ་འདུན་ལ་སྤངས་པ་ལས་གྱུར་གྱིས། དེའི་ཕྱིར་དགེ་སློང་གིས་དགེ་འདུན་ལ་སྤང་བར་མི་བྱའོ་སྙམ་དུ་དགོངས་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དགེ་སློང་ཞིག་གིས་སྤང་བ་དགེ་འདུན་ལ་སྤངས་པ་དང་། དེ་དགེ་སྐོས་ཀྱིས་སྤེལ་ཏེ་བགོས་ཀྱིས། དེ་ལྟ་བས་ན་དགེ་སློང་གིས་སྤང་བ་དགེ་འདུན་ལ་སྤང་བར་མི་བྱའི། འོན་ཀྱང་གང་ཟག་ལ་སྤང་བར་བྱའོ། །གལ་ཏེ་མི་ཤེས་པས་སྤངས་ན་ཡང་དགེ་འདུན་གྱིས་བགོ་བར་མི་བྱའོ། །དགེ་སློང་གིས་སྤང་བ་དགེ་འདུན་ལ་སྤངས་སམ། དགེ་འདུན་གྱིས་བགོས་ན་གཉི་ག་ལ་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གི་སྤང་བ་དགེ་འདུན་ལ་སྤང་བར་མི་བྱའི། འོན་ཀྱང་གང་ཟག་ལ་སྤང་བར་བྱའོ་ཞེས་བཀའ་སྩལ་པ་དང་། དགེ་སློང་གཞན་ཞིག་ལ་ཆོས་གོས་ཀྱི་སྤང་བ་བྱུང་སྟེ། དེས་དགེ་སློང་མི་ཤེས་པ་ཞིག་ལ་སྤངས་པ་དང་། དེས་བླངས་ནས་ཅང་མི་ཟེར་བར་འདུག་གོ །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གཞན་གྱིས་བརྡ་སྤྲད་པར་བྱ་སྟེ། གལ་ཏེ་བྱིན་ན་ལེགས། ཅི་སྟེ་མི་སྟེར་ན་མཐུས་ཕྲོགས་ལ་བྱིན་གྱིས་བརླབ་པར་བྱའོ། །རུང་བར་བྱ་བའི་ཕྱིར་སྤངས་པ་ཡིན་པས་སྤངས་པ་གཏན་བཀུར་བར་མི་བྱའི་འོན་ཀྱང་སྤངས་པ་སླར་སྦྱིན་པར་བྱའོ། །གླེང་གཞི་ནི་ཡངས་པ་ཅན་ནའོ། །དབྱར་གྱི་དུས་སུ་དགེ་སློང་དག་སྦྲང་བུ་མཆུ་རིངས་ཀྱིས་ཟོས་ཏེ། དེ་དག་གཡའ་སྟེ་སེན་མོས་ལུས་ཀུན་ཕྲུགས་པ་དང་། བར་བར་དུ་ཁྲག་གི་ཐིགས་པ་དང་ཐོར་བུ་དག་བྱུང་བར་སྣང་ངོ་། །དེ་ལྟར་ལུས་མི་སྡུག་པ་དེ་དག་བྲམ་ཟེ་དང་ཁྱིམ་བདག་རྣམས་ཀྱིས་མཐོང་ནས། དེ་དག་གིས་སྨྲས་པ། འཕགས་པ་ཁྱེད་ཅི་ཞིག་གིས་ལུས་ཀྱི་གནས་སྐབས་འདི་ལྟ་བུར་གྱུར། དེ་དག་གིས་ཇི་ལྟར་གྱུར་པ་བསྙད་པ་དང་། དེ་དག་གིས་སྨྲས་པ། འཕགས་པ་ཁྱེད་སྦྲང་
སྐྱབས་མི་འཆང་ངམ། བཞིན་བཟངས་བཅོམ་ལྡན་འདས་ཀྱིས་མ་གནང་ན་ཇི་ལྟར་བཅང་། འཕགས་པ་ཁྱེད་ཀྱི་སྟོན་པ་ནི་ཐུགས་རྗེ་ཅན་ཡིན་པས་གནང་བར་འགྱུར་རོ། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་གནང་གིས་དགེ་སློང་དག་གིས་སྦྲང་སྐྱབས་བཅང་བར་བྱའོ། །བཅོམ་ལྡན་འདས་ཀྱིས་དགེ་སློང་གིས་སྦྲང་སྐྱབས་བཅང་བར་བྱའོ་ཞེས་བཀའ་སྩལ་ན། དགེ་སློང་གིས་ཅི་འདྲ་བ་བཅང་བར་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། རས་སྲིད་དུ་ཁྲུ་བཞི་ཞེང་དུ་ཁྲུ་དོ་པ་དེ་ཤིང་ལ་བརྒྱངས་ལ་སྟེང་ནས་དགབ་པར་བྱ་ཞིང་རས་ཁྲུ་བཅུ་གཉིས་པས་ངོས་ཁོར་ཡུག་ཏུ་བསྐོར་བར་བྱའོ། །དགེ་སློང་དག་གིས་རས་དེ་མ་ལུས་པར་བྱས་པ་དང་། གློ་ནས་སྦྲང་བུ་མཆུ་རིངས་དག་འཇུག་ནས། བཅོམ་ལྡན་འདས་ཀྱིས་བཀའ་སྩལ་པ། རས་ལྷག་མ་དང་བཅས་པ་བཅང་བར་བྱ་ཞིང་དེས་གློ་ནས་དཀྲི་བར་བྱའོ། །དགེ་སློང་དག་གིས་སྦྲང་སྐྱབས་བྱས་ནས་རས་དེ་ཕྱོགས་གཅིག་ནས་བཏེག་སྟེ་འཛུལ་བ་དང་། བཅོམ་ལྡན་འདས་ཀྱིས་བཀའ་སྩལ་པ། སྒོ་གདོད་པར་བྱའོ། །དགེ་སློང་དག་གིས་སྒོ་ཐད་ཀར་བཏོད་པ་དང་། བཅོམ་ལྡན་འདས་ཀྱིས་བཀའ་སྩལ་པ། བསྣོལ་མར་བྱའོ། །ཚ་ནས་བཅོམ་ལྡན་འདས་ཀྱིས་བཀའ་སྩལ་པ། དེ་ཉིད་དུ་བསིལ་ཡབ་གཞག་པར་བྱའོ། །འོག་ནས་སྦྲང་མ་མཆུ་རིངས་དག་འཇུག་ནས། བཅོམ་ལྡན་འདས་ཀྱིས་བཀའ་སྩལ་པ། གནས་མལ་གྱིས་དགབ་པར་བྱ་ཞིང་རྣམ་པ་གང་དང་གང་གིས་སྦྲང་བུ་མཆུ་རིངས་ཟ་བ་དེ་ཐམས་ཅད་རུང་བ་བྱའོ། །གླེང་གཞི་ནི་མཉན་ཡོད་ནའོ། །བཅོམ་ལྡན་འདས་ཀྱིས་ཆུ་བཙག་པར་བྱའོ་ཞེས་བཀའ་སྩལ་པ་དང་། དགེ་སློང་དག་ལག་པས་ཆུ་ཚགས་འཛིན་པས་དེ་དག་ངལ་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། ཤིང་ལ་བཏགས་ཏེ་བཙག་པར་བྱའོ། །དགེ་སློང་དག་གིས་ཤིང་ལ་བཏགས་ཏེ་བཙགས་ན་འོན་ཀྱང་ངལ་ནས། བཅོམ་ལྡན་འདས་ཀྱིས་བཀའ་སྩལ་པ། དབྱུག་གུ་གསུམ་བཅང་བར་བྱའོ། །དགེ་སློང་དག་གིས་དབྱུག་གུ་གསུམ་ལ་བཏགས་ན་འདུག་ཏུ་མ་བཏུབ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་ཕུག་ལ་སྲད་
བུའམ། གཟེར་བུས་སྦྲེལ་ལ་ཆུ་ཚགས་གདགས་པར་བྱའོ། །དགེ་སློང་དག་གིས་ཆུ་ཚགས་བཏགས་ནས་ཆུ་བླུགས་པ་དང་། ཕྱེད་ས་ལ་བོ་ནས། བཅོམ་ལྡན་འདས་ཀྱིས་བཀའ་སྩལ་པ། ཅི་ནས་ས་ལ་མི་འབོ་བར་དྲན་པ་ཉེ་བར་གཞག་སྟེ་བླུག་པར་བྱའོ། །དགེ་སློང་དག་གིས་བུམ་པ་ཞབས་རྟེན་མེད་པར་བཞག་པས་དེ་འདྲིལ་ནས། བཅོམ་ལྡན་འདས་ཀྱིས་བཀའ་སྩལ་པ། ཞབས་རྟེན་གཞུག་པར་བྱའོ། །དགེ་སློང་གཞན་དག་གཅིག་གིས་ཆུ་བླང་བར་བརྩམས་པ་དང་། དེ་ཆུ་ཚགས་སུ་མ་ཚགས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། གཅལ་གཞུག་པར་བྱའོ། །དགེ་སློང་དག་གིས་ཅི་ཞིག་གཞུག་པ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། བྱེ་མའམ། བ་ལང་གི་ལྕི་བའོ། །འོན་ཀྱང་མ་ཚགས་ནས། བཅོམ་ལྡན་འདས་ཀྱིས་བཀའ་སྩལ་པ། ཚགས་རྟེན་སྣོད་བཅང་བར་བྱའོ། །བཅོམ་ལྡན་འདས་ཀྱིས་ཚགས་རྟེན་སྣོད་བཅང་བར་བྱའོ་ཞེས་བཀའ་སྩལ་པ་དང་། དགེ་སློང་དག་གིས་ཇི་ལྟ་བུ་བཅང་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། ཚགས་རྟེན་སྣོད་ནི་གཉིས་ཏེ། ཟངས་ལས་བྱས་པ་དང་། ས་ལས་བྱས་པའོ། །དགེ་སློང་དག་གིས་ཚགས་རྟེན་སྣོད་ལག་པས་བཟུང་བ་དང་། དེ་དག་ངལ་ནས་བཅོམ་ལྡན་འདས་ཀྱིས་བཀའ་སྩལ་པ། ཟངས་ལས་བྱས་པ་གང་ཡིན་པ་དེ་ནི་ཕུག་ལ་ལྕགས་ཐག་འཇམ་པོས་དབྱུག་གུ་གསུམ་ལ་གདགས་པར་བྱའོ། །ས་ལས་བྱས་པ་གང་ཡིན་པ་དེ་ནི་ཕུག་ལ་ཐ་གུས་གདགས་པར་བྱའོ། །ཆུ་ཚགས་གཞན་དག་ཆུ་མ་ཕྱིན་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་གིས་གློར་ཡང་དང་ཡང་དུ་བརྡབ་པར་བྱའོ། །དགེ་སློང་དག་ཆུ་རྟོག་པ་ན་བུམ་པ་མ་གང་བ་ལ་བརྟགས་པས་སྲོག་ཆགས་དག་མ་རྟོགས་ནས། བཅོམ་ལྡན་འདས་ཀྱིས་བཀའ་སྩལ་པ། བུམ་པ་ལེགས་པར་བཀང་ལ་ཇི་སྲིད་དུ་ཆུ་མི་གཡོ་བ་དེ་སྲིད་དུ་གཞག་པར་བྱ་ཞིང་། དེ་ནས་བརྟག་པར་བྱའོ། །བུམ་པ་བཀང་བ་དང་། སྟེང་དུ་རྡུལ་ཞུགས་པ་དགེ་སློང་དག་གིས་དེ་མ་བསལ་བས་སྲོག་ཆགས་དག་མ་རྟོགས་ནས། བཅོམ་
ལྡན་འདས་ཀྱིས་བཀའ་སྩལ་པ། རྡུལ་བསལ་ནས་བརྟག་པར་བྱའོ། །དགེ་སློང་དག་གིས་སྲོག་ཆགས་མཛུབ་མོའི་རྩེ་མོས་བསྟན་པས་དེ་དག་འགུལ་ཏེ་མིག་གིས་མ་སོད་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཤིང་བུའི་རྩེ་མོའམ། རྩྭའི་རྩེ་མོའམ་ཕྲ་མོ་གཞན་གང་ཡང་རུང་བས་བསྟན་པར་བྱའོ། །དགེ་སློང་དག་གིས་ཆུ་ཚགས་ཉིད་ནས་ཆུ་ཁྲོན་པར་ཕོ་བ་དང་། སྲོག་ཆགས་དག་རྡབ་སྣུན་པས་གནོད་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། བསལ་ཚགས་བསྲེལ་བར་བྱའོ། །དགེ་སློང་དག་གིས་བཀང་སྟེ་བཏང་ན་ཕྱིར་གང་བཞིན་དུ་འོང་བ་གང་ཡིན་པ་དེ་ལྟ་བུ་བསྲེལ་ནས། བཅོམ་ལྡན་འདས་ཀྱིས་བཀའ་སྩལ་པ། བཀང་སྟེ་བཏང་ན་ཕྱིར་སྟོང་པར་འོང་བ་ཅི་འདྲ་བ་དེ་འདྲ་བ་བསྲེལ་བར་བྱའོ། །གཞན་དག་གཅིག་གིས་བསལ་ཚགས་མ་འབྱོར་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་གིས་ནི་ཆུ་ཚགས་ཐེ་གུས་བཏགས་ལ་ཅི་ནས་བཀང་སྟེ་བཏང་ན་ཕྱིར་སྟོང་པར་འོང་བ་དེ་ལྟར་གཏང་བར་བྱའོ། །དགེ་སློང་དག་གིས་ཆུ་ཕོ་ནས་ཆུ་ཚགས་བཤལ་བར་མི་བྱེད་འཁྲུ་བར་མི་བྱེད། འཚིར་བར་མི་བྱེད། སྐེམས་པར་མི་བྱེད། ལྟེབ་པར་མི་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། ཆུ་ཚགས་ཀྱིས་ཆུ་ཕོ་ནས་དེ་བཤལ་བར་བྱ། བཀྲུ་བར་བྱ། བཙིར་བར་བྱ། བསྐམ་པར་བྱ། བལྟབ་པར་བྱའོ། །དགེ་སློང་དག་དགེ་འདུན་གྱི་ཆུ་ཡང་ཆུ་ཚགས་ཀྱིས་ཚག་པར་བྱེད་པ་དང་། དགེ་སློང་གི་དགེ་འདུན་ཕལ་ཆེས་བས་སྐྱོ་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་དགེ་སློང་གི་དགེ་འདུན་ཕལ་ཆེ་བར་གྱུར་ན་ཆུ་ཚགས་མང་པོ་བཅང་བའམ། ཡང་ན་བུམ་ཚགས་གཅེའུ་ཅན་བཅང་བར་བྱའོ། །བཅོམ་ལྡན་འདས་ཀྱིས་བུམ་ཚགས་གཅེའུ་ཅན་གྱིས་བཙག་པར་བྱའོ་ཞེས་བཀའ་སྩལ་པ་དང་། དགེ་སློང་དག་གིས་བུམ་ཚགས་གཅེའུ་ཅན་ཇི་ལྟ་བུ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། ས་འམ་ཟངས་ལས་བུམ་པའི་དབྱིབས་ལྟ་བུ་བྱ་ཞིང་དེ་ལ་པད་མའི་སྙིང་པོ་ལྟ་བུའི་བུ་ག་དག་གདོད་པར་བྱའོ། །དེ་དག་བསྡུ་བའི་ཕྱིར་དེ་དག་གི་སྟེང་དུ་བུ་ག་ཆེན་པོ་གཅིག་གདོད་དོ། །དེ་དག་ཉིད་བསྡུ་བའི་ཕྱིར་གཅེའུ་གཞུག་པར་བྱའོ། །དེ་ནས་སྟེང་རས་ཀྱིས་གཡོགས་ལ་ཆུ་བཙག་པར་བྱ་ཞིང་རས་དེ་ཡང་བཤལ་བར་བྱ། བཀྲུ་བར་བྱ། བསྐམ་པར་
བྱའོ།། །།འདུལ་བ་ཕྲན་ཚེགས་ཀྱི་གཞི། བམ་པོ་ཉི་ཤུ་གཉིས་པ། དགེ་སློང་དག་གིས་ཤིག་དང་། རྩྭ་ཤིག་དང་། སྲོག་ཆགས་གཞན་དག་གཡང་ས་ནས་བོར་བ་དང་། དེ་དག་དྲན་པ་ཉམས་ཤིང་གནོད་པར་གྱུར་ཏོ། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། སྲོག་ཆགས་ཐམས་ཅད་གཡང་ས་ནས་དོར་བར་མི་བྱའོ། །དེ་དག་གིས་གར་བབ་བབ་ཏུ་བོར་བ་དང་། བཅོམ་ལྡན་འདས་ཀྱིས་བཀའ་སྩལ་པ། གར་བབ་བབ་ཏུ་བོར་བར་མི་བྱའི། ཤིག་ནི་ར་དེའི་ནང་དུ་གཞུག་པར་བྱ། དེ་མ་རྙེད་ན་ཀ་བའི་སེར་ཀའམ། རྩིག་པའི་བུ་གར་ཆུག་ཤིག །རྩྭ་ཤིག་ནི་ནེའུ་གསིང་སྔོན་པོའི་ས་ཕྱོགས་སུ་གཞག་པར་བྱའོ། །དེ་མ་རྙེད་ན་བསིལ་བའི་ཕྱོགས་སུའོ། །སྲོག་ཆགས་གཞན་ཡང་རང་རང་གི་གནས་སུ་གཏང་བར་བྱའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་ཆབ་བཙགས་པ་མ་བརྟགས་པ་འཚལ་དུ་རུང་ལགས་སམ། ཉེ་བ་འཁོར་མིག་གིས་མ་བརྟགས་ན་མི་རུང་ངོ་། །བཙུན་པ་ཆབ་བཙགས་པ་བརྟགས་པ་འཚལ་དུ་རུང་ལགས་སམ། ཉེ་བ་འཁོར་མིག་གིས་བརྟགས་པའི་ཕྱིར་རུང་ངོ་། །གླེང་གཞི་ནི་མཉན་ཡོད་ནའོ། །བཅོམ་ལྡན་འདས་ཀྱིས་དབྱར་གནས་པར་ཁས་བླངས་པའི་དགེ་འདུན་གྱིས་སྲ་བརྐྱང་གདིང་བར་བྱའོ་ཞེས་བཀའ་སྩལ་པ། ཀོ་ས་ལའི་རྒྱལ་པོ་གསལ་རྒྱལ་གྱིས་ཐོས་ནས་དེས་དགེ་འདུན་ལ་སྲ་བརྐྱང་ཕུལ་ལོ། །དེ་བཞིན་དུ་བཙུན་མོ་ཕྲེང་ལྡན་མ་དང་། རྒྱལ་རིགས་དབྱར་ཚུལ་མ་དང་། ཁྱིམ་བདག་མགོན་མེད་ཟས་སྦྱིན་དང་། དྲང་སྲོང་བྱིན་དང་། རྙིང་པ་དག་དང་། ཕྱ་མཁན་དག་དང་། གཞན་མང་པོ་དག་གིས་སྲ་བརྐྱང་ཕུལ་བ་དང་། དགེ་སློང་དག་གིས་སྲ་བརྐྱང་གཅིག་ཅིག་བྱིན་གྱིས་བརླབས་ནས་ལྷག་མ་གཞན་དེ་དག་ཉིད་ལ་སླར་བསྐུར་བར་བརྩམས་པ་དང་། དེ་དག་གིས་འཕགས་པ་འདི་དག་ནི་བདག་ཅག་གིས་དགེ་འདུན་ལ་ཕུལ་བ་ལགས་པས་བདག་ཅག་སླར་ཇི་ལྟར་འཚལ།
སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེའི་ཕྱིར་གནང་གིས་བླང་བར་བྱ་ཞིང་བླངས་ནས་ཀྱང་གཏན་པ་འདིང་བའི་དགེ་སློང་མང་པོ་བསྐོ་བར་བྱའོ། །ཇི་ལྟར་སྔར་བསྐོས་པ་དེ་ལས་ཕྱིས་གཅིག་གདིང་བར་བྱའོ། །ལྷག་མ་རྣམས་ནི་གཞག་པར་བྱ་ཞིང་། དེ་ནི་དབྱར་གནས་པར་ཁས་བླངས་པའི་དགེ་འདུན་གྱི་བགོ་བའི་རྙེད་པ་ཡིན་པས་དབྱར་གནས་པར་ཁས་བླངས་པའི་དགེ་འདུན་ཚོགས་པས་ཅི་དགར་བགོ་བར་བྱ་སྟེ་འདི་ལ་འགྱོད་པར་མི་བྱའོ།། །།སྡོམ་ནི། ང་འདས་པ་ལ་སྦྱིན་མེད་དང་། །གང་གིས་བསྔོས་པ་ཤི་བ་དང་། །གང་ལ་གཏད་པ་ཤི་བ་དང་། །བབས་པ་དང་ནི་འགྱོད་པའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་གནས་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད་དགའ་བར་བྱེད། དགའ་མགུར་སྤྱོད་པར་བྱེད་པ་ལས་རིམ་གྱིས་བུ་གསུམ་བྱུང་ངོ་། །དེ་རྣམས་ཀྱི་ཐ་ཆུངས་གང་ཡིན་པ་དེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ངོ་། །དེ་དུས་གཞན་ཞིག་ན་ལྗོངས་རྒྱུ་ཞིང་སོང་ངོ་། །ལྗོངས་རྒྱུ་ཞིང་སོང་བ་ན་དེའི་ཕ་ནད་ཀྱིས་ཐེབས་ནས་དེ་རྩ་བ་དང་། སྡོང་བུ་དང་། ལོ་མ་དང་། མེ་ཏོག་དང་། འབྲས་བུའི་སྨན་རྣམས་ཀྱིས་རིམ་གྲོ་བྱས་ཀྱང་དེའི་ནད་དེ་ཞི་བར་མ་གྱུར་ཏེ། གང་གི་ཚེ་དེ་ཤི་ལ་ཐུག་པའི་ཚོར་བ་བྱུང་སྟེ། རིང་པོ་མི་ཐོགས་པར་འཆི་བའི་དུས་བྱེད་པར་འགྱུར་བ་དེའི་ཚེ་དེས་མཛའ་བོ་དང་། གཉེན་དང་ཕུ་ནུ་བོ་དང་། ཁྱིམ་ཚེས་རྣམས་བསྡུས་ནས་བུ་དེ་གཉིས་ལ་སྨྲས་པ། བུ་ངའི་ཁྱིམ་ན་ཅུང་ཟད་ཅི་ཡོད་པ་དེ་ཐམས་ཅད་ཁྱེར་ཏེ་ཤོག་ཤིག །དེ་དག་གིས་ཀྱང་དེའི་ཚིག་མཉན་ཏེ་ཐམས་ཅད་ཁྱེར་ཏེ་འོངས་པ་དང་། དེས་མཛའ་བོ་དང་། གཉེན་དང་། ཕུ་ནུ་དེ་དག་དང་། ཁྱིམ་ཚེས་ཀྱི་མི་དེ་ལ་སྨྲས་པ། ཤེས་ལྡན་དག་གསོན་ཅིག །
བདག་གི་བུ་གསུམ་ཡོད་པ་ལས་ཕུ་བོ་གཉིས་ནི་འདི་དག་ཡིན། ཐ་ཆུངས་གང་ཡིན་པ་དེ་ནི་དགེ་སྦྱོང་ཤཱཀྱའི་ནང་དུ་རབ་ཏུ་བྱུང་ངོ་། །དེའི་ཕྱིར་བདག་གི་ཁྱིམ་ན་ནོར་གང་ཅུང་ཟད་ཅི་ཡོད་པ་དེ་ཐམས་ཅད་དེ་རྣམས་མཉམ་པར་བགོས་ཤིག་ཅེས་སྨྲས་ནས། བསགས་པ་ཀུན་གྱི་མཐའ་ཟད་ཅིང་། །མཐོན་པོའི་མཐའ་ནི་རྙིལ་བར་འགྱུར། །འདུ་བའི་མཐའ་ནི་འབྲལ་བ་སྟེ། །གསོན་པོའི་མཐའ་ནི་འཆི་བ་ཡིན། །ཞེས་བྱ་བས་དུས་ཀྱི་ཆོས་དང་ལྡན་པར་གྱུར་ཏེ། དེ་ཁྱོགས་གོས་སྔོན་པོ་དང་། དམར་པོ་དང་། སེར་པོ་དང་། དཀར་པོ་དག་གིས་བརྒྱན་ཏེ་དུར་ཁྲོད་དུ་ཁྱེར་ནས་བསྲེགས་སོ། །དེའི་བུ་དེ་དག་གིས་དེའི་ཤིད་བཏང་བ་དང་མྱ་ངན་བསང་བ་བྱས་ཏེ་འདུག་གོ །དེའི་བུ་དེས་བདག་གི་ཕ་དེ་ཤིའོ་ཞེས་ཐོས་ནས། དེ་འདི་སྙམ་དུ་བདག་སོང་ལ་མ་ཡར་མོ་དེ་དང་། ཕུ་བོ་དེ་དག་ལ་ཆོས་བཤད་དེ་མྱ་ངན་བསང་བར་བྱའོ་སྙམ་དུ་བསམས་ནས་དེ་ཇི་སྲིད་འདོད་པར་ལྗོངས་ན་འདུག་ནས་ལྷུང་བཟེད་དང་། ཆོས་གོས་ཁྱེར་ཏེ། མཉན་ཡོད་གང་ན་བ་དེར་རྒྱུ་ཞིང་སོང་ནས། རིམ་གྱིས་རྒྱུ་ཞིང་སོང་བ་ལས་མཉན་ཡོད་དུ་ཕྱིན་ཏོ། །དེས་ཆོས་གོས་དང་ལྷུང་བཟེད་རྒྱལ་བྱེད་ཀྱི་ཚལ་དུ་བཞག་སྟེ་ལམ་གྱིས་དུབ་པ་ངལ་བསོ་ནས་རང་གི་ཁྱིམ་དུ་སོང་ངོ་། །ནང་མི་རྣམས་ཀྱིས་དེ་མཐོང་ནས་ངུས་སོ། །ངུ་བ་དེ་ཐོས་ནས་ཁྱིམ་ཚེས་རྣམས་འདུས་ཏེ། ལ་ལ་ནི་སྐད་ཕྱུང་སྟེ་ངུ་། ལ་ལ་ནི་མིག་མཆི་མས་གང་བར་གྱུར་ཏོ། །དེ་སོ་སོའི་སྐྱེ་བོ་ཡིན་པས་སྐྱེ་བོའི་ཚོགས་ཆེན་པོ་སྨྲེ་ཞིང་འདུག་པ་ཐོས་ནས་ད་ཡང་མིག་མཆི་མས་གང་ཞིང་འདུག་པ་དང་། དེ་ལ་ཁྱིམ་ཚེས་ཀྱི་བུད་མེད་གཅིག་གིས་སྨྲས་པ། བུ་མྱ་ངན་མ་བྱེད་ཅིག །ཁྱོད་ཀྱི་ཕ་དེ་བསོད་ནམས་བྱས་པས་ལྷ་ཡུལ་དུ་སོང་ངོ་། །ཁྱོད་ལ་ཡང་ཕས་མཛའ་བོ་དང་། གཉེན་དང་། ཕུ་ནུ་བོ་དང་། ཁྱིམ་ཚེས་རྣམས་བསྡུས་ཏེ་ནོར་གྱི་སུམ་ཆ་གཅིག་ཀྱང་བྱིན་ནོ། །དེས་བསམས་པ་བཅོམ་ལྡན་འདས་ཀྱིས་ང་འདས་ནས་འདི་ལ་བྱིན་ཅིག་ཅེས་ཟེར་བ་ནི་མེད་པ་ཡིན་ནོ་ཞེས་གསུངས་པ་གང་ཡིན་པ་དེ་ནི་འདི་ལྟ་བུ་ཡིན་ནོ་སྙམ་དུ་རིག་ནས་ང་དེའི་ཕྱིར་མྱ་ངན་བྱེད་པ་ནི་
མ་ཡིན་གྱི་ངའི་ཕ་དེ་དཀའ་བ་བྱེད་བྱེད་པས་དབང་མེད་པར་མཆི་མ་བྱུང་ངོ་། །བཅོམ་ལྡན་འདས་ཀྱིས་ཀྱང་ཕ་མ་ནི་བུ་ལ་དཀའ་བ་བྱེད་དེ། སྙོད་པ་དང་། གསོ་བ་དང་། བསྐྱེད་པ་དང་། འཛམ་བུའི་གླིང་སྣ་ཚོགས་སྟོན་པ་ཡིན་ཏེ། བུའི་ཕྲག་པ་གཅིག་གིས་ཕ་བླངས་ཤིང་། ཅིག་ཤོས་ཀྱིས་མ་བླངས་ཏེ་ལོ་བརྒྱ་ཚང་བར་བཀུར་བ་བྱས་པའམ། ས་ཆེན་པོ་འདི་ལ་ནོར་བུ་དང་། མུ་ཏིག་དང་། བཻ་ཌཱུརྱ་དང་། མན་ཤེལ་དང་། བྱུ་རུ་དང་། དངུལ་དང་། གསེར་དང་། རྡོའི་སྙིང་པོ་དང་། སྤུག་དང་། པད་མ་རཱ་ག་དང་། གཡས་སུ་འཁྱིལ་པ་དེ་ལྟ་བུའི་དབང་ཕྱུག་གི་བདག་པོར་བཞག་ཀྱང་འདི་ཙམ་གྱིས་ན་བུས་ཕ་དང་མ་ལ་ཕན་ཐོགས་པའམ་ལན་ལོན་པར་མི་འགྱུར་གྱི། གང་ཞིག་གིས་ཕ་མ་དེ་དག་མ་དད་པ་ལས་དད་པ་ཕུན་སུམ་ཚོགས་པ་ཡང་དག་པར་ལེན་དུ་འཇུག །གཟེངས་སྟོད་པར་བྱེད། འདུལ་བར་བྱེད། འཇོག་པར་བྱེད། རབ་ཏུ་འཇོག་པར་བྱེད་ཅིང་། ཚུལ་ཁྲིམས་འཆལ་བ་ཚུལ་ཁྲིམས་ཕུན་སུམ་ཚོགས་པ་དང་། འཇུངས་པ་གཏོང་བ་ཕུན་སུམ་ཚོགས་པ་དང་། ཤེས་རབ་འཆལ་པ་ཤེས་རབ་ཕུན་སུམ་ཚོགས་པ་ཡང་དག་པར་ལེན་ཏུ་འཇུག །གཟེངས་སྟོད་པར་བྱེད། འདུལ་བར་བྱེད། འཇོག་པར་བྱེད། རབ་ཏུ་འཇོག་པར་བྱེད་ན་དེ་ཙམ་གྱིས་ན་བུས་ཕ་མ་ལ་ཕན་བཏགས་པ་དང་ལན་བླན་པར་འགྱུར་རོ་ཞེས་གསུངས་སོ། །ཡང་བཅོམ་ལྡན་འདས་ཀྱིས་ང་འདས་ནས་དེ་ལ་བྱིན་ཅིག་ཅེས་ཟེར་བ་ནི་སྦྱིན་པ་མ་ཡིན་ནོ་ཞེས་བཀག་གོ ། བུད་མེད་དེ་ཅང་མི་ཟེར་བར་འདུག་གོ །སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ངས་ནི་ཁྱིམ་པ་ལས་དགོངས་ཏེ་གསུངས་པ་མ་ཡིན་གྱི། འོན་ཀྱང་རབ་ཏུ་བྱུང་བ་ལས་དགོངས་པ་ཡིན་ནོ། །ཁྱིམ་བདག་ནི་ཆགས་པ་དང་བཅས་བཞིན་དུ་འཆི་བར་འགྱུར་ལ། རབ་ཏུ་བྱུང་བ་ནི་མ་ཡིན་ནོ། །དེ་ལྟ་བས་ན་དེའི་ཕྱིར་ཁྱིམ་པ་འདི་སྙམ་དུ་ང་འདས་ནས་འདི་ལ་སྦྱིན་ནོ་སྙམ་དུ་སེམས་པ་ནི་བྱིན་པ་ཡིན་གྱི། རབ་ཏུ་བྱུང་བ་ནི་མ་ཡིན་
པས་བླང་བར་བྱ་ཞིང་བླངས་ནས་ཀྱང་ཇི་ལྟར་འདོད་པ་བཞིན་དུ་ལོངས་སྤྱོད་དུ་ཡོངས་སུ་སྤྱད་པར་བྱའོ། །གླེང་གཞི་ནི་མཉན་ཡོད་ནའོ། །དགེ་སློང་ཞིག་གིས་དགེ་སློང་ཞིག་ལ་ཆོས་གོས་དག་བསྔོས་སོ། །དེས་དེ་དག་བསྔོས་ནས་དུས་ལས་འདས་པ་དང་། དགེ་སློང་དེ་དག་གིས་དེ་ཁྱེར་ནས་སྲེག་ཏུ་སོང་ངོ་། །དེའི་བར་དུ་དགེ་སློང་དེས་དེའི་གནས་ཁང་ནས་དེའི་ཆོས་གོས་དེ་དག་བླངས་ཏེ་རང་གི་གནས་ཁང་དུ་བཞག་གོ །དེ་ནས་དགེ་སློང་དེ་དག་གིས་དེའི་རིམ་གྲོ་བྱས་ནས་གཙུག་ལག་ཁང་དུ་ལོག་པ་དང་། དགེ་སྐོས་ཀྱིས་དེའི་གནས་ཁང་དུ་བརྟགས་ན། ཇི་ཙམ་ན་ལྷུང་བཟེད་དང་ཆོས་གོས་གསུམ་དང་། ཆུ་ཚགས་མཐོང་ནས། དེས་རྒན་པའི་མཐར་ཁྱེར་བ་དང་། དེ་ལ་དགེ་སློང་དེ་དག་གིས་སྨྲས་པ། ཚེ་དང་ལྡན་པ་ཁྱོད་ཀྱིས་དེའི་ཆོས་གོས་གསུམ་པོ་འདི་ཁྱེར་ཏེ་འོངས་སམ། དེ་ལ་ཆོས་གོས་རུང་བར་བྱས་པ་གཞན་ཡང་མང་དུ་ཡོད་ན་དེ་དག་ཁྱེར་ཏེ་ཤོག་ཤིག །དེས་སྨྲས་པ། དེའི་གནས་ཁང་ན་ནི་འདིར་ཟད་ཀྱི་གཞན་ཅུང་ཟད་ཀྱང་མེད་དོ། །དགེ་སློང་དག་གིས་སྨྲས་པ། ཚེ་དང་ལྡན་པ་དེའི་སྨོས་འདྲིན་དགེ་སློང་ཆེ་གེ་མོ་ཞེས་བྱ་བ་དེ་ལ་དྲིས་ཤིག །དེས་དེ་ལ་དྲིས་པ་དང་སྨྲས་པ། བདག་གིས་ཁྱེར་ཏེ། དེས་བདག་ལ་བསྔོས་སོ། །སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རུང་བར་བྱ་བའི་ཕྱིར་ངས་བསྔོ་བར་གནང་སྟེ། གང་གིས་དེ་དག་ཁྱེར་བ་དེ་ལ་འདི་སྐད་ཅེས་གྱིས་ཤིག །ཤི་བའི་ཡོ་བྱད་ཀྱི་རྙེད་པ་དེ་དག་དགེ་འདུན་ལ་ཕུལ་ལ་རང་གི་སྐལ་བས་ཆོག་པར་གྱིས་ཤིག་ཅེས་སྒོས་ཤིག །གླེང་གཞི་ནི་མཉན་ཡོད་ནའོ། །དགེ་སློང་གཞན་ཞིག་གིས་དགེ་སློང་ཞིག་ལ་ཆོས་གོས་དག་བསྔོས་པ་དང་། གང་ལ་བསྔོས་པ་དེ་དུས་ལས་འདས་སོ། །དེ་དགེ་སློང་རྣམས་ཀྱིས་དུར་ཁྲོད་དུ་ཁྱེར་ནས་བསྲེགས་ཏེ་སླར་འོངས་ནས་དེའི་ཆོས་གོས་དེ་དག་རྒན་པའི་མཐར་ཁྱེར་བ་དང་དེ་ལ་དགེ་སློང་དག་གིས་སྨྲས་པ། ཚེ་དང་ལྡན་པ་འདི་དག་སུའི་ཡིན། དེས་སྨྲས་པ། འདི་དག་ནི་བདག་གི་ལགས་མོད་ཀྱི་འོན་ཀྱང་
བདག་གིས་དེ་ལ་བསྔོས་སོ། །དགེ་སློང་དག་གིས་དེ་ཇི་ལྟར་བསྒྲུབ་པ་མི་ཤེས་ནས། སྐབས་དེ་དགེ་སློང་དག་གིས་བཅོམ་ལྡན་འདས་ལ་རྒྱས་པར་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རུང་བར་བྱ་བའི་ཕྱིར་ངས་བསྔོ་བར་གནང་མོད་ཀྱི་འོན་ཀྱང་གང་གིས་བསྔོས་པ་དེ་ཉིད་ཀྱི་ཡིན་ནོ། །གླེང་གཞི་ནི་མཉན་ཡོད་ནའོ། །དགེ་སློང་གཞན་ཞིག་གིས་དགེ་སློང་ཞིག་ལ་ཆོས་གོས་དག་བསྔོས་པ་དང་། གང་ལ་བསྔོས་པ་དེ་བབས་ནས། དེས་བསམས་པ། བདག་ལ་དགེ་སློང་དེས་ཆོས་གོས་དག་བསྔོས་པས་བདག་བབས་མོད་ཀྱི་འོན་ཀྱང་དེ་དག་བདག་དབང་གིས་ལེན་དུ་འགྲོའོ་སྙམ་ནས། དེ་དགེ་སློང་དེའི་དྲུང་དུ་སོང་སྟེ། དེས་སྨྲས་པ། འཕགས་པ་ཁྱོད་ཀྱིས་ཆོས་གོས་དག་བདག་ལ་བསྔོས་ན་དེ་དག་བདག་ལ་སྩོལ་ཅིག །སྐབས་དེ་དགེ་སློང་དག་ལ་བརྗོད་པ་དང་། དེ་དག་གིས་ཇི་ལྟར་བསྒྲུབ་པ་མི་ཤེས་ནས། སྐབས་དེ་དགེ་སློང་དག་གིས་བཅོམ་ལྡན་འདས་ལ་རྒྱས་པར་གསོལ་པ་དང་། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་བྱུང་བ་ནི་དགེ་སློང་གང་ཁོ་ན་ལ་ཡིད་བརྟན་ཏེ་ཆོས་གོས་དག་བཏམས་པ་དེ་ཁོ་ནའི་མདུན་དུ་བསྔོ་བ་ལས་གྱུར་གྱིས་དེའི་ཕྱིར་དགེ་སློང་གིས་གང་ལ་ཡིད་བརྟན་ཏེ་ཆོས་གོས་དག་བཏམས་པ་དེ་ཁོ་ནའི་མདུན་དུ་བསྔོ་བར་མི་བྱའོ་སྙམ་དུ་དགོངས་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་དགེ་སློང་གིས་ཡིད་བརྟན་ཅིང་ཆོས་གོས་བཏམས་པ་དེ་ཉིད་ཀྱི་མདུན་དུ་ཆོས་གོས་བསྔོ་བར་མི་བྱའི། དེའི་མངོན་སུམ་དུ་བསྔོ་བར་མ་བྱས་ན་ཉེས་དམིགས་དེར་མི་འགྱུར་རོ། །གླེང་གཞི་ནི་མཉན་ཡོད་ནའོ། །དགེ་སློང་གཞན་ཞིག་གིས་དགེ་སློང་ཞིག་ལ་ཆོས་གོས་དག་བསྔོས་ཏེ། གང་ལ་བསྔོས་པ་དེ་ཐབ་ཁྲོལ་ཅན་ཞིག་སྟེ། རྟག་ཏུ་དགེ་སློང་དག་དང་ལྷན་ཅིག་ཐབ་ཁྲོལ་བྱེད་པ་ལས་དེ་གཞན་ཞིག་དང་ཐབ་མོ་བྱས་ནས་འགྲོ་བར་ཆས་པ་དང་། གང་གིས་དེ་ལ་ཆོས་གོས་དག་བསྔོས་པ་དེས་དེ་མི་བཏང་བར་བརྩམས་ཏེ། ཚེ་དང་ལྡན་པ་མ་འགྲོ་ཤིག་ཅེས་དེས་དེ་བཟུང་བ་དང་།
འདུག་ཏུ་མ་བཏུབ་བོ། །དེས་ཡང་དང་ཡང་དུ་བཟློག་པ་དང་། དེ་ལ་དགེ་སློང་ཞིག་གིས་སྨྲས་པ། ཚེ་དང་ལྡན་པ་འདི་ནི་ཐབ་ཁྲོལ་ཅན་ཞིག་སྟེ་རྟག་ཏུ་དགེ་སློང་རྣམས་ལ་མི་བདེ་བར་བྱེད་པ་ཡིན་གྱིས་ཐོང་ཤིག། དེས་སྨྲས་པ། གཞན་གྱི་ཕྱིར་འདི་མི་གཏོང་བ་མ་ཡིན་གྱི། ང་ཉིད་ཀྱི་ཆོས་གོས་དག་འདི་ལ་བསྔོས་པས་འདི་འཛིན་ཏོ། །སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་ཡིད་བརྟན་པའི་དགེ་སློང་རྒྱ་མཚོའི་ཕ་རོལ་ན་འདུག་པ་ཞིག་ཡིན་ན་དེ་ལ་ཡང་ཡིད་བརྟན་ཏེ། བསྔོ་བ་བྱས་ནས་གཟུང་བར་བྱས་ཏེ། འདི་ལ་འགྱོད་པར་མི་བྱའོ། །བཅོམ་ལྡན་འདས་ཀྱིས་གལ་ཏེ་ཡིད་བརྟན་པའི་དགེ་སློང་རྒྱ་མཚོའི་ཕ་རོལ་ན་འདུག་པ་ཞིག་ཡིན་ན་དེ་ལ་ཡང་ཆོས་གོས་དག་བསྔོ་བར་བྱའོ་ཞེས་བཀའ་སྩལ་པ་དང་། དགེ་སློང་གཞན་ཞིག་གིས་དགེ་སློང་ཡུལ་ཤིན་ཏུ་ཐག་རིང་པོ་ན་འདུག་པ་ཞིག་ལ་ཆོས་གོས་བསྔོས་ཏེ། དེ་དུས་ལས་འདས་པར་གྱུར་པ་དང་། དགེ་སློང་དེས་དགེ་སློང་དེ་ཇི་ལྟར་དུས་ལས་འདས་པར་གྱུར་པའི་རིང་ཞིག་ལོན་ནས་ཐོས་པ་དང་། དགེ་སློང་དེ་འགྱོད་པ་སྐྱེས་སོ། །སྐབས་དེ་དགེ་སློང་དག་ལ་སྨྲས་པ་དང་། དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། གང་གི་ཚེ་ཐོས་པ་དེའི་ཚེ་གཞན་ལ་བསྔོ་བར་བྱ་སྟེ། འདི་ལ་འགྱོད་པར་མི་བྱའོ།། །།སྡོམ་ནི། མཚམས་ཀྱི་ཕྱི་རོལ་འདུག་པ་ཡིས། །དད་པ་མི་དབུལ་སྦྱིན་མི་བྱ། །གཅིག་ལ་གཅིག་ནི་མི་བྱ་དང་། །གསོ་སྦྱོང་དང་ནི་དགག་དབྱེའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་དྲུག་སྡེ་དག་མཚམས་ཀྱི་ཕྱི་རོལ་ན་གནས་ཀྱང་དད་པ་འབུལ་བའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། མཚམས་ཀྱི་ཕྱི་རོལ་ན་གནས་
པས་དད་པ་དབུལ་བར་མི་བྱའོ། །བཅོམ་ལྡན་འདས་ཀྱིས་མཚམས་ཀྱི་ཕྱི་རོལ་ན་གནས་པས་དད་པ་དབུལ་བར་མི་བྱའོ་ཞེས་བཀའ་སྩལ་པ་དང་། དགེ་སློང་གཞན་དག་ཅིག་མཚམས་ཀྱི་ཕྱི་རོལ་དུ་སོང་ངོ་། །དེ་དག་ཆས་པ་དང་། དགེ་འདུན་གྱི་བྱ་བ་ཞིག་བྱུང་ནས་དྲུག་སྡེ་རྣམས་ཀྱིས་དེ་དག་ལས་དད་པ་བླངས་སོ། །སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། མཚམས་ཀྱི་ཕྱི་རོལ་དུ་སོང་བ་ལས་དད་པ་བླང་བར་མི་བྱའོ། ། བཅོམ་ལྡན་འདས་ཀྱིས་མཚམས་ཀྱི་ཕྱི་རོལ་ན་གནས་པས་དད་པ་དབུལ་བར་མི་བྱ། མཚམས་ཀྱི་ཕྱི་རོལ་དུ་སོང་བ་ལས་དད་པ་བླང་བར་ཡང་མི་བྱའོ་ཞེས་བཀའ་སྩལ་པ་དང་། དྲུག་སྡེ་རྣམས་མཚམས་ཀྱི་ཕྱི་རོལ་ན་གནས་བཞིན་དུ་གཅིག་ལ་གཅིག་དད་པ་སྦྱིན་པར་བྱེད་དེ། དགའ་བོས་ནི་ཉེས་དགའ་ལ། ཉེ་དགའས་ཀྱང་དགའ་བོ་ལ། འདུན་པས་ནི་འཆར་ཀ་ལ། འཆར་ཀས་ཀྱང་འདུན་པ་ལ། འགྲོ་མགྱོགས་ཀྱིས་ནི་ནབ་སོ་ལ། ནབ་སོས་ཀྱང་འགྲོ་མགྱོགས་ལ་དད་པ་བྱིན་པ་དང་། སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་གཅིག་ལ་གཅིག་དད་པ་སྦྱིན་པར་མི་བྱ་སྟེ། བྱིན་ན་འགལ་ཚབས་ཅན་དུ་འགྱུར་རོ། །གླེང་གཞི་ནི་མཉན་ཡོད་ནའོ། །བཅོམ་ལྡན་འདས་ཀྱིས་ཟླ་བ་ཕྱེད་ཕྱེད་ཅིང་གསོ་སྦྱོང་གི་ཚེ་སོ་སོར་ཐར་པའི་མདོ་གདོན་པ་ཐོན་ཅིག་ཅེས་བཀའ་སྩལ་པ་དང་། དྲུག་སྡེ་དག་མཚམས་ཀྱི་ཕྱི་རོལ་ན་གནས་ཤིང་གསོ་སྦྱོང་ལ་འདུན་པ་དང་། ཡོངས་སུ་དག་པ་འབུལ་ལོ། །སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། མཚམས་ཀྱི་ཕྱི་རོལ་ན་གནས་པས་གསོ་སྦྱོང་ལ་འདུན་པ་དང་། ཡོངས་སུ་དག་པ་དབུལ་བར་མི་བྱའོ། །བཅོམ་ལྡན་འདས་ཀྱིས་མཚམས་ཀྱི་ཕྱི་རོལ་ན་གནས་པས་གསོ་སྦྱོང་ལ་འདུན་པ་དང་། ཡོངས་སུ་དག་པ་དབུལ་བར་མི་བྱའོ་ཞེས་བཀའ་སྩལ་པ་དང་། དགེ་སློང་གཞན་དག་གཅིག་མཚམས་ཀྱི་ཕྱི་རོལ་དུ་སོང་ངོ་། ། དེ་དག་ཆས་པ་དང་། དགེ་འདུན་གསོ་སྦྱོང་བྱ་བར་བཞེད་ནས་འདུས་པ་དང་། དྲུག་སྡེ་རྣམས་ཀྱིས་དེ་དག་ལས་
འདུན་པ་དང་། ཡོངས་སུ་དག་པ་བླངས་སོ། །སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། མཚམས་ཀྱི་ཕྱི་རོལ་དུ་སོང་བ་ལས་འདུན་པ་དང་། ཡོངས་སུ་དག་པ་བླང་བར་མི་བྱའོ། །བཅོམ་ལྡན་འདས་ཀྱིས་མཚམས་ཀྱི་ཕྱི་རོལ་ན་གནས་པས་དད་པ་དང་། ཡོངས་སུ་དག་པ་དབུལ་བར་མི་བྱ། མཚམས་ཀྱི་ཕྱི་རོལ་དུ་སོང་བ་ལས་དད་པ་དང་། ཡོངས་སུ་དག་པ་བླང་བར་ཡང་མི་བྱའོ་ཞེས་བཀའ་སྩལ་པ་དང་། དྲུག་སྡེ་དག་མཚམས་ཀྱི་ཕྱི་རོལ་ན་གནས་བཞིན་དུ་གཅིག་ལ་གཅིག་དད་པ་སྦྱིན་པར་བྱེད་དེ། དགའ་བོས་ནི་ཉེ་དགའ་ལ། ཉེ་དགའས་ཀྱང་དགའ་བོ་ལ། འདུན་པས་ནི་འཆར་ཀ་ལ། འཆར་ཀས་ཀྱང་འདུན་པ་ལ། འགྲོ་མགྱོགས་ཀྱིས་ནི་ནབ་སོ་ལ། ནབ་སོས་ཀྱང་འགྲོ་མགྱོགས་ལ་དད་པ་བྱིན་པའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་གཅིག་ལ་གཅིག་གསོ་སྦྱོང་གི་དད་པ་དང་། ཡོངས་སུ་དག་པ་སྦྱིན་པར་མི་བྱའོ། །དགེ་སློང་གིས་གཅིག་ལ་གཅིག་གསོ་སྦྱོང་གི་དད་པ་དང་། ཡོངས་སུ་དག་པ་སྦྱིན་ན་འགལ་ཚབས་ཅན་དུ་འགྱུར་རོ། །གླེང་གཞི་ནི་མཉན་ཡོད་ནའོ། །བཅོམ་ལྡན་འདས་ཀྱིས་དབྱར་གནས་པར་ཁས་བླངས་པའི་དགེ་སློང་གིས་གནས་གསུམ་པོ་མཐོང་བ་དང་། ཐོས་ པ་དང་། དོགས ་པས་དགག་དབྱེ་བྱའོ་ཞེས་བཀའ་སྩལ་པ་དང་། དྲུག་སྡེ་དག་མཚམས་ཀྱི་ཕྱི་རོལ་ན་གནས་ཤིང་དགག་དབྱེའི་དད་པ་དང་། ཡོངས་སུ་དག་པ་འབུལ་བ་རྒྱས་པར་ཐམས་ཅད་གསོ་སྦྱོང་བཞིན་ནོ།། །།སྡོམ་ནི། དགེ་སློང་བགྲང་བར་བྱ་བ་དང་། །ཚུལ་ཤིང་དག་དང་གང་འདོད་དང་། །སྟན་གཅིག་ཁྱིམ་ན་གནས་པ་དང་། །དགེ་ཚུལ་གསར་བུ་མི་འདུག་པའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་བྲམ་ཟེ་ཞིག་འདུག་པ་དེ་བྱ་བ་ཅུང་ཟད་ཅིག་ལ་ཕྱིར་བྱུང་ནས་རྒྱལ་བྱེད་ཀྱི་ཚལ་དུ་སོང་བ་དང་། དེ་རེ་ཞིག་འདི་ན་དགེ་སློང་དུ་ཞིག་གནས་དྲིའོ་སྙམ་པའི་འདོད་པ་
སྐྱེས་ནས། དེས་དགེ་སློང་རྣམས་ལ་དྲིས་པ། འཕགས་པ་དག་འདི་ན་དགེ་སློང་དུ་ཞིག་གནས། དེ་དག་གིས་སྨྲས་པ། བྲམ་ཟེ་མ་ཤེས་སོ། །བྲམ་ཟེས་སྨྲས་པ། ཡུལ་ཀོ་ས་ལའི་རྒྱལ་པོ་གསལ་རྒྱལ་གྱི་ཁྲོམ་གྱི་རུའི་གྲངས་ཀྱང་ཤེས་ན་ཁྱེད་ཀྱིས་དགེ་སློང་དག་མི་ཤེས་པ་ལྟ། དེ་དག་ཅང་མི་སྨྲ་བར་འདུག་པ་དང་། བྲམ་ཟེ་དེ་སོང་ངོ་། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བགྲང་བར་བྱའོ། །བཅོམ་ལྡན་འདས་ཀྱིས་དགེ་སློང་དག་བགྲང་བར་བྱའོ་ཞེས་བཀའ་སྩལ་པ་དང་། དགེ་སློང་དག་གིས་གཅིག་ཅེས་བྱ་བ་ལ་སོགས་པས་བགྲངས་བ་དང་། ཕྱིས་བརྗེད་ནས་བཅོམ་ལྡན་འདས་ཀྱིས་བཀའ་སྩལ་པ། གཅིག་ཅེས་བྱ་བ་ལ་སོགས་པས་བགྲང་བར་མི་བྱའོ། །དགེ་སློང་དག་གིས་སོར་མོས་འཛུགས་ཤིང་བགྲངས་ན་འོན་ཀྱང་བརྗེད་ནས། བཅོམ་ལྡན་འདས་ཀྱིས་བཀའ་སྩལ་པ། སོར་མོས་གཟུགས་ཤིང་བགྲང་བར་མི་བྱའོ། །བཅོམ་ལྡན་འདས་ཀྱིས་དགེ་སློང་དག་གིས་གཅིག་ཅེས་བྱ་བ་ལ་སོགས་པས་བགྲང་བར་མི་བྱ། སོར་མོས་བཙུགས་ཤིང་བགྲང་བར་མི་བྱའོ་ཞེས་བཀའ་སྩལ་པ་དང་། དགེ་སློང་དག་གིས་ཇི་ལྟར་བགྲང་བ་མ་ཤེས་སོ། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཚུལ་ཤིང་བྲིམ་པར་བྱ་ཞིང་བྲིམས་ནས་བགྲང་བར་བྱ། བགྲངས་ནས་དགེ་འདུན་ལ་དགེ་སློང་འདི་སྙེད་དོ་ཞེས་བརྗོད་པར་བྱའོ། །བཅོམ་ལྡན་འདས་ཀྱིས་ཚུལ་ཤིང་བྲིམ་པར་བྱའོ་ཞེས་བཀའ་སྩལ་པ་དང་། དགེ་སློང་དག་གིས་ཉི་མའམ་ཟླ་བའམ། ལོ་གང་ལ་བྲིམ་པ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། དབྱར་ཉེ་བར་གཏོང་བའི་ཚེ་ཚུལ་ཤིང་བྲིམ་པར་བྱའོ། །བཅོམ་ལྡན་འདས་ཀྱིས་དགེ་སློང་དག་བགྲང་བར་བྱའོ་ཞེས་བཀའ་སྩལ་པ་དང་། མཉན་ཡོད་ན་ཁྱིམ་བདག་ཅིག་གནས་པ་དེ་དུས་དུས་སུ་རྒྱལ་བྱེད་ཀྱི་ཚལ་དུ་ཉེ་བར་འོངས་ཏེ། དེས་དེ་ན་དགེ་སློང་དག་བསམ་གཏན་དང་། འདོན་པ་དང་། ཡིད་ལ་བྱེད་པའི་རྣལ་
འབྱོར་ལ་བརྩོན་པ་མཐོང་ནས། དེ་དེ་དག་གི་སྤྱོད་ལམ་དང་། སྤྱོད་པ་དང་། སྒྲུབ་པ་དེས་མངོན་པར་དད་དེ། དེས་བསམས་པ། རེ་ཞིག་འདི་ན་དགེ་སློང་ཇི་སྙེད་ཅིག་ཡོད་པ་དྲིས་ལ་ཕྱིས་སྤྱན་དྲངས་ཏེ་བཤོས་གསོལ་ལོ་སྙམ་ནས། དེས་དགེ་སློང་རྣམས་ལ་དྲིས་པ། འཕགས་པ། དགེ་སློང་ཇི་སྙེད་ཅིག་བཞུགས། དགེ་སློང་དག་གིས་སྨྲས་པ། འདི་སྙེད་ཅིག་གོ །དེས་རྐང་པ་ལ་ཕྱག་འཚལ་ཏེ་སོང་ནས་རང་གི་ཁྱིམ་དུ་ཕྱིན་ཏེ་ནང་མི་ལ་སྨྲས་པ། སོང་ཁོ་བོས་སངས་རྒྱས་ལ་སོགས་པ་དགེ་སློང་གི་དགེ་འདུན་བཤོས་གསོལ་གྱིས་ཁྱེད་ཀྱིས་དགེ་སློང་འདི་སྙེད་ཅིག་གི་བཤོས་སྦྱོར་ཅིག །དེ་དག་གིས་སྨྲས་པ། རྗེའི་སྲས་ལེགས་ཏེ་དེ་བཞིན་དུ་བགྱིའོ་ཞེས་དེ་དག་གིས་ཧྭགས་དང་། བུ་རམ་དང་། ཤ་ཀ་ར་ལ་སོགས་པ་སྟ་གོན་བྱ་བར་བརྩམས་སོ། །ཁྱིམ་བདག་དེ་ཡང་མཛའ་བོ་དང་། ཉེ་དུ་དང་། ཕུ་ནུ་རྣམས་སྦྲན་ནས་བཤམས་ཟིན་པའི་དུས་སུ་དེ་དག་དང་ལྷན་ཅིག་རྒྱལ་བྱེད་ཀྱི་ཚལ་དུ་སོང་སྟེ། རྒན་པའི་མཐའ་ནས་རྐང་པ་ལ་ཕྱག་བྱས་ནས། དགེ་སྐོས་ལ་སྨྲས་པ། འཕགས་པ་ཁྱིམ་བདག་ཆེ་གེ་མོ་ཞིག་སང་སངས་རྒྱས་ལ་སོགས་པ་དགེ་སློང་གི་དགེ་འདུན་སྡུམ་པར་གདུགས་ཚོད་ལ་སྤྱན་འདྲེན་ཏོ། །ཞེས་དེ་སྐད་གསུངས་ཤིག །དགེ་སྐོས་ཀྱིས་སྨྲས་པ་དང་། དགེ་སློང་གི་དགེ་འདུན་གྱིས་གནང་ནས་དེ་རྐང་པ་ལ་ཕྱག་འཚལ་ཏེ་སོང་ངོ་། །དགེ་སློང་གཞན་དག་ཅིག་ཀྱང་ལྗོངས་རྒྱུ་བ་རྒྱུ་ཞིང་མཉན་ཡོད་དུ་ཕྱིན་ཏོ། །དེ་ནས་ཁྱིམ་བདག་དེ་དེ་ཉིད་ཀྱི་ནུབ་མོ་བཟའ་བ་དང་བཅའ་བ་གཙང་ཞིང་བསོད་པ་སྟ་གོན་བྱས་ནས། ནང་པར་སྔར་ལངས་ཏེ་གདན་བཤམས་ཆུ་ར་བཞག་ནས། བཅོམ་ལྡན་འདས་ལ་ཕོ་ཉ་ལས་བཙུན་པ་གདུགས་ཚོད་བཤམས་ལགས་ན། བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་གདུགས་ཚོད་གདས་པར་གསོལ་ཏོ། །དགེ་སློང་རྣམས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་ཁྱིམ་བདག་དེའི་ཁྱིམ་དུ་དོང་ངོ་། །བཅོམ་ལྡན་འདས་ནི་གཙུག་ལག་ཁང་ན་བཞུགས་ཤིང་གདུགས་ཚོད་དེར་དྲངས་སོ། །
སངས་རྒྱས་བཅོམ་ལྡན་འདས་རྣམས་ནི་རྒྱུ་ལྔས་གཙུག་ལག་ཁང་ན་བཞུགས་ཤིང་གདུགས་ཚོད་འདྲེན་ཏེ། ལྔ་གང་ཞེ་ན། ནང་དུ་ཡང་དག་འཇོག་པར་བཞེད་པ་ཡིན། ལྷ་རྣམས་ལ་ཆོས་སྟོན་པར་བཞེད་པ་ཡིན། གནས་མལ་ལ་གཟིགས་པར་བཞེད་པ་ཡིན། ནད་པ་ལ་གཟིགས་པར་བཞེད་པ་ཡིན། ཉན་ཐོས་རྣམས་འདུལ་བ་ལ་བསླབ་པའི་གཞི་བཅའ་བར་བཞེད་པ་ཡིན་ནོ། །དོན་འདི་ལ་ནི་བཅོམ་ལྡན་འདས་ཉན་ཐོས་རྣམས་འདུལ་བ་ལ་བསླབ་པའི་གཞི་བཅའ་བར་བཞེད་ནས་གཙུག་ལག་ཁང་ན་བཞུགས་ཤིང་དེར་གདུགས་ཚོད་དྲངས་སོ། །ཁྱིམ་བདག་དེས་དགེ་སློང་གི་དགེ་འདུན་གྱི་ཚད་བཞིན་སྟན་བཤམས། ཟན་སྟ་གོན་བྱས་པ་ལས་ཇི་ཙམ་ན་དགེ་སློང་རབ་ཏུ་མང་བར་མཐོང་ནས་དེས་སྨྲས་པ། འཕགས་པ་བདག་གིས་ཁྱེད་ཀྱིས་དགེ་སློང་ཇི་སྙེད་ཡོད་པ་བསྟན་པ་དེ་སྙེད་ཀྱི་དགེ་སློང་གི་གདན་བཤམས། བཤོས་སྟ་གོན་བྱས་ན་དགེ་སློང་མང་དུ་བྱོན་ཏོ། །དགེ་སློང་རྣམས་ཀྱིས་སྨྲས་པ། ཁྱིམ་བདག་དགེ་སློང་གློ་བུར་པ་དག་ལྷགས་ཀྱིས་རབ་ཏུ་དགའ་བ་སྐྱེད་ཅིག །དེས་སྨྲས་པ། འཕགས་པ་ཀྱེ་མ་ཁྱེད་ཀྱིས་དགེ་སློང་གཞན་དག་ཀྱང་འོངས་སོ་ཞེས་བགྱིས་དང་། བདག་གིས་བཤོས་ཀྱང་མང་དུ་སྟ་གོན་བགྱིས། གདན་ཡང་མང་དུ་བཤམས་པ་ཞིག །དགེ་སློང་དག་སྤོབས་པ་མེད་ནས་ཅང་མི་སྨྲ་བར་འདུག་གོ །དེ་ན་ཁ་ཅིག་ཐ་མ་མ་སྨྱུངས་ཙམ་དུ་གྱུར་ཏེ། དེ་དག་ལ་དགེ་སློང་རྣམས་གཤེ་བཞིན་དུ་ཁམ་ཟིན་ཙམ་ཟ་བར་གྱུར་ཏོ། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སྐོས་ཀྱི་དགེ་སློང་གློ་བུར་བ་འདི་སྙེད་ཅིག་ལྷགས་སོ་ཞེས་དགེ་སློང་གློ་བུར་པ་རྣམས་ཤེས་པར་བྱས་ནས་ཁྱིམ་བདག་ལ་སྦྲན་པར་བྱའོ། །དགེ་སློང་གཞན་དག་གཅིག་ཟན་གྱི་ཐད་ཀ་ཁོ་ནར་འོངས་ནས་བཅོམ་ལྡན་འདས་ཀྱིས་བཀའ་སྩལ་པ། དེ་དག་ཀྱང་སྦྲན་པར་བྱའོ། །དགེ་སློང་གཞན་དག་གཅིག་སྔར་བོས་པ་ལས་གུད་དུ་སོང་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་ཀྱང་སྦྲན་པར་བྱའོ། །གཞན་ཡང་ངས་
དགེ་འདུན་གྱི་གནས་བརྟན་གྱི་དགེ་སློང་གི་ཀུན་ཏུ་སྤྱད་པའི་ཆོས་བཅའ་བར་བྱ་སྟེ། དགེ་འདུན་གྱི་གནས་བརྟན་གྱིས་དགེ་སློང་གི་དགེ་འདུན་བལྟ་བར་བྱ་ཞིང་། གལ་ཏེ་དགེ་སློང་ནི་མང་ཟན་ནི་ཉུང་ན། སྦྱིན་བདག་ལ་བཞིན་བཟངས་ཟན་ནི་ཉུང་། དགེ་སློང་ནི་མང་གིས་སྙོམས་པར་རིམས་ཤིག་ཅེས་བརྗོད་པར་བྱའོ། །འོན་ཏེ་ཟན་ནི་མང་དགེ་སློང་ནི་ཉུང་ན་དེས་བཞིན་བཟངས་ཟན་ནི་མང་གིས་ཅི་འབྱོར་པ་བཞིན་རིམས་ཤིག་ཅེས་བརྗོད་པར་བྱའོ། །དགེ་འདུན་གྱི་གནས་བརྟན་གྱི་དགེ་སློང་གིས་ཀུན་ཏུ་སྤྱད་པའི་ཆོས་ཇི་ལྟར་བཅས་པ་རྣམས་ཡང་དག་པར་བླངས་ཏེ་མི་འཇུག་ན་འགལ་ཚབས་ཅན་དུ་འགྱུར་རོ། །གླེང་གཞི་ནི་མཉན་ཡོད་ནའོ། །དེ་ནས་ཚེ་དང་ལྡན་པ་འཆར་ཀ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ཀྱི་ཕྱིར་ཞུགས་སོ། །མཉན་ཡོད་དུ་བསོད་སྙོམས་ལ་བརྒྱུས་ནས། བཙུན་མོ་ཕྲེང་ལྡན་མ་ག་ལ་བ་དེར་སོང་སྟེ་ཕྱིན་ནས་བཙུན་མོ་ཕྲེང་ལྡན་མ་ལ་ཆོས་བསྟན་པར་བརྩམས་སོ། །དེས་དེ་ལ་ཆོས་སྟོན་པ་ན་རི་དགས་འཛིན་གྱི་མ་ས་ག་དགེ་སློང་གི་དགེ་འདུན་གྱི་ན་བའི་སྨན་ཁྱེར་ནས་གླུ་དང་རོལ་མོའི་སྒྲ་དང་། རྒྱལ་བྱེད་ཀྱི་ཚལ་དུ་ཆས་པ་བཙུན་མོ་ཕྲེང་ལྡན་མས་ཐོས་ནས་དེས་སྨྲས་པ། འཕགས་པ་གླུ་དང་རོལ་མོའི་སྒྲ་གྲགས་པ་འོ་ནི་སུའི་ལགས། དེས་སྨྲས་པ། བཙུན་མོ་རི་དགས་འཛིན་གྱི་མ་ས་ག་དགེ་སློང་གི་དགེ་འདུན་གྱི་ན་བའི་སྨན་ཁྱེར་ནས་འགྲོ་སྟེ། སྒྲ་འོ་ནི་དེའི་ཡིན་ནོ། །དེས་སྨྲས་པ། འཕགས་པ་གལ་ཏེ་དེ་ལྟ་ན་བཙུན་མོ་ཕྲེང་ལྡན་གྱིས་དགེ་སློང་གི་དགེ་འདུན་ལ་ན་བའི་སྨན་གྱིས་བསྟབས་སོ་ཞེས་བདག་གི་མིང་གིས་དགེ་སློང་གི་དགེ་འདུན་ལ་བརྗོད་པའི་རིགས་སོ། །དེས་སྨྲས་པ། བཙུན་མོ་ལེགས་ཏེ། བཅོམ་ལྡན་འདས་ཀྱིས་ཀྱང་གང་ཞིག་ནད་པ་ལ་རིམ་གྲོ་བྱེད་པ་དེ་ནི་ང་ལ་རིམ་གྲོ་བྱེད་པ་ཡིན་ནོ་ཞེས་གསུངས་པས། ཁྱོད་ཀྱིས་མིང་གིས་དགེ་སློང་གི་དགེ་འདུན་ལ་བསྟབ་པར་བྱའོ་ཞེས་སྨྲས་ནས། བཙུན་མོ་ཕྲེང་ལྡན་མ་ལ་ནད་མེད་པར་གྱུར་ཅིག་ཅེས་བྱས་ཏེ་སྟན་ལས་ལངས་ནས་སོང་ངོ་། །དེ་ནས་གཙུག་ལག་ཁང་
དུ་སོང་སྟེ། རྒན་པའི་མཐར་འདུག་ནས་སྨྲས་པ། བཙུན་མོ་ཕྲེང་ལྡན་མས་དགེ་སློང་གི་དགེ་འདུན་ལ་ན་བའི་སྨན་གྱིས་བསྟབས་ཀྱིས། གང་ཞིག་སྨན་གང་འདོད་པ་དེ་སོང་ལ་སློངས་ཤིག །དགེ་སྐོས་ཀྱིས་བསྒོ་བ་དང་། དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་འཆར་ཀ་བཅོམ་ལྡན་འདས་ཀྱིས་རྒྱལ་པོའི་ཕོ་བྲང་དུ་འགྲོ་བ་ལ་ཉེས་དམིགས་བཅུ་ཡོད་དོ་ཞེས་མ་གསུངས་སམ། དེ་ཇི་ལྟར་བདག་ཅག་གིས་སྨན་གྱི་ཕྱིར་བསླབ་པ་ལས་འདའ་བར་བྱ། དེ་སྤོབས་པ་མེད་ནས་ཅང་མི་ཟེར་བར་འདུག་སྟེ། དགེ་སློང་འགའ་ཡང་ཕྲེང་ལྡན་མ་ལས་སྨན་མི་སློང་ངོ་། །ཇི་ཙམ་ན་ཚེ་དང་ལྡན་པ་འཆར་ཀ་ཡང་བཙུན་མོ་ཕྲེང་ལྡན་མའི་དེར་སོང་བ་དང་། དེས་སྨྲས་པ། འཕགས་པ་ཁྱོད་ཀྱིས་བདག་གི་མིང་གིས་དགེ་སློང་གི་དགེ་འདུན་ལ་ན་བའི་སྨན་གྱིས་མ་བསྟབས་སམ། བཙུན་མོ་བསྟབས་སོ། །འཕགས་པ་གལ་ཏེ་དེ་ལྟ་ན་ཅིའི་སླད་དུ་དགེ་སློང་དག་མི་བྱོན། བཙུན་མོ་བཅོམ་ལྡན་འདས་ཀྱིས་རྒྱལ་པོའི་ཕོ་བྲང་དུ་འགྲོ་བ་ལ་ཉེས་དམིགས་བཅུ་ཡོད་དོ་ཞེས་མ་གསུངས་སམ། དགེ་སློང་དག་འདིར་ཇི་ལྟར་འོང་། འཕགས་པ་གལ་ཏེ་དེ་ལྟ་ན་བདག་གིས་འདི་ལ་ཇི་ལྟར་བསྒྲུབ་པར་བགྱི། བཙུན་མོ་ཚོང་དུས་པའི་ཚོང་པའི་ལག་ཏུ་ཀཱར་ཥཱ་པ་ཎ་དག་གཏད་ན། དགེ་སློང་གང་ཞིག་གང་འདོད་པ་དེ་དེ་ལས་དེ་སློང་གྲང་། དེས་སྨྲས་པ། འཕགས་པ་ལེགས་ཏེ་དེ་ལྟར་བགྱིའོ་ཞེས་ཚོང་འདུས་པའི་ཚོང་པའི་ལག་ཏུ་ཀཱར་ཥཱ་པ་ཎ་དག་གཏད་ནས་སྨྲས་པ། འཕགས་པ་དག་རྒྱལ་པོའི་ཕོ་བྲང་དུ་མི་འོང་གིས་དགེ་སློང་གང་ཞིག་གང་འདོད་པ་དེ་ལ་དེ་བྱིན་ཅིག །ཚོང་པས་རྒྱལ་མོའི་བཀས་ཀཱར་ཥཱ་པ་ཎ་དག་བླངས་ཏེ་བཞག་པ་དང་། དགེ་སློང་རྣམས་ཀྱིས་ལྷ་མོ་ཕྲེང་ལྡན་མས་སྤོས་འཚོང་ཆེ་གེ་མོ་ཞིག་ལ་ཀཱར་ཥཱ་པ་ཎ་དག་གཏད་དེ། དགེ་སློང་གང་ཞིག་གང་འདོད་པ་དེ་ཁྱོད་ཀྱིས་སྦྱིན་པར་བྱའོ་ཞེས་བསྒོ་བ་ཐོས་ནས་སོང་ལ་བསླང་ངོ་སྙམ་མོ། །དེ་ན་དགེ་སློང་ཁ་ཅིག་ནི་སོང་ནས་སྨྲས་པ། བཞིན་བཟངས་ཁོ་བོ་ཅག་ལ་ཁུར་སྐམ་དང་། ཁུར་བ་དང་། ཤ་ཁུ་དག་བྱོས་ལ་བྱིན་ཅིག །ཁ་ཅིག་གིས་སྨྲས་པ། ཁོ་བོ་ཅག་ལ་ཁུར་བ་དང་ཤ་སྐམ་བྱིན་ཅིག །ཁ་ཅིག་གིས་སྨྲས་པ། ཁོ་བོ་ཅག་ལ་ཤ་ཁུ་ཁྲོལ་བུ་དང་། ཚོག་པ་བྱིན་ཅིག །དེ་
དེ་དག་གིས་གཙེས་པ་དང་། སྨྲས་པ། འཕགས་པ་བདག་ནི་ཁུར་མཁན་ཡང་མ་ལགས་ཤ་གཡོས་མཁན་ཡང་མ་ལགས་པས། དབྱིག་འདི་སྣོམས་ཏེ་བཞུད་ལ་གང་ཞིག་གང་བཞེད་པ་དེས་དེ་བགྱིད་དུ་སྩོལ་ཅིག །དེ་དག་གིས་སྨྲས་པ། བཞིན་བཟངས་བཅོམ་ལྡན་འདས་ཀྱིས་དབྱིག་མ་གནང་ངོ་། །དེས་སྨྲས་པ། འཕགས་པ་བདག་ནི་སྤོས་འཚོང་སྟེ་ཚོང་འདུས་ཀྱིས་འཚོ་བ་ལགས་ན། དེ་ལྟ་ན་བདག་གི་འཚོ་བ་འཆད་པར་འགྱུར་རོ། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། སྦྱིན་བདག་ལ་ཡིད་བརྟན་ཏེ་ཀཱར་ཥཱ་པ་ཎ་དག་བླངས་ནས་ཅི་འདོད་པར་ཡོངས་སུ་སྤྱད་པར་བྱ་སྟེ། འདི་ལ་འགྱོད་པར་མི་བྱའོ། །གླེང་གཞི་ནི་མཉན་ཡོད་ནའོ། །དྲུག་སྡེ་རྣམས་ཁྱིམ་པ་དག་དང་ལྷན་ཅིག་སྟན་གཅིག་ལ་འདུག་པ་བྲམ་ཟེ་དང་། ཁྱིམ་བདག་དད་པ་ཅན་དག་གིས་མཐོང་ནས་འཕྱ་བར་བྱེད་ཅིང་། འཕགས་པ་ཁྱེད་རབ་ཏུ་བྱུང་བ་ཚངས་པར་སྤྱོད་པ་ཡིན་ན། ཇི་ལྟར་འདོད་པའི་ལོངས་སྤྱོད་སྤྱོད་པ་འདི་དག་དང་ལྷན་ཅིག་སྟན་གཅིག་ལ་འདུག་ཅེས་བྱས་པ་དང་། དེ་དག་ཅང་མི་ཟེར་བར་འདུག་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བྲམ་ཟེ་དང་། ཁྱིམ་བདག་དད་པ་ཅན་དག་འཕྱ་བ་ནི་ཐོག་ཏུ་བབ་བོ། །དེ་ལྟ་བས་ན་དགེ་སློང་དག་གིས་ཁྱིམ་པ་དག་དང་ལྷན་ཅིག་སྟན་གཅིག་ལ་འདུག་པར་མི་བྱ་སྟེ། འདུག་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་ཁྱིམ་པ་དག་དང་ལྷན་ཅིག་སྟན་གཅིག་ལ་འདུག་པར་མི་བྱའོ་ཞེས་བཀའ་སྩལ་པ་དང་། དགེ་ཚུལ་དག་དང་ལྷན་ཅིག་སྟན་གཅིག་ལ་འདུག་པ་དགེ་བསྙེན་དག་གིས་མཐོང་ནས་སྨྲས་པ། འཕགས་པ་ཁྱེད་ནི་བསྙེན་པར་རྫོགས་པ་ལགས་ན། ཇི་ལྟར་དགེ་ཚུལ་དག་དང་ལྷན་ཅིག་སྟན་གཅིག་ལ་བཞུགས་དེ་དག་གིས་སྨྲས་པ། ཚེ་དང་ལྡན་པ་དག་འདི་དག་ནི་ཁྱིམ་པ་མ་ཡིན་ཏེ། འདི་དག་དགེ་སྦྱོང་ཡིན་ན་འདི་ལ་འགལ་བ་ཅི་ཞིག་ཡོད། དེ་དག་ཅང་མི་སྨྲ་བར་འདུག་པའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་
སྩལ་པ། བསྙེན་པར་མ་རྫོགས་པ་དང་ལྷན་ཅིག་སྟན་གཅིག་ལ་འདུག་པར་མི་བྱའོ། །བཅོམ་ལྡན་འདས་ཀྱིས་བསྙེན་པར་མ་རྫོགས་པ་དང་ལྷན་ཅིག་སྟན་གཅིག་ལ་འདུག་པར་མི་བྱའོ་ཞེས་བཀའ་སྩལ་པ་དང་། དགེ་སློང་རྒན་པ་རྒན་པ་དག་གསར་བུ་གསར་བུ་དག་དང་ལྷན་ཅིག་སྟན་གཅིག་ལ་འདུག་པས་གསར་བུ་རྣམས་རྒན་པ་རྣམས་ལ་མ་གུས་པར་བྱེད་པའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། རྒན་པ་དང་གསར་བུ་ལྷན་ཅིག་སྟན་གཅིག་ལ་འདུག་པར་མི་བྱའི། འོན་ཀྱང་བར་ན་ལོ་གསུམ་ཞུགས་པ་དང་ལྷན་ཅིག་སྟན་གཅིག་ལ་འདུག་པར་བྱ་སྟེ། ལོར་མ་ལོན་པ་དང་། ལོ་གསུམ་ལོན་པ་ཡང་ལྷན་ཅིག་འདུག་པར་བྱ་ཞིང་། ལོ་གཅིག་ལོན་པ་དང་། ལོ་བཞི་ལོན་པ་ནས་དེ་བཞིན་དུ་ལོ་དགུ་ལོན་པ་དང་། ལོ་བཅུ་གཉིས་ལོན་པའི་བར་ཡང་ལྷན་ཅིག་འདུག་པར་བྱའོ། །བཅོམ་ལྡན་འདས་ཀྱིས་བར་ན་ལོ་གསུམ་ཞུགས་པ་དང་ལྷན་ཅིག་འདུག་པར་བྱ་སྟེ། ལོར་མ་ལོན་པ་དང་། ལོ་གསུམ་ལོན་པ་ཡང་ལྷན་ཅིག་འདུག་པར་བྱ་ཞིང་། ལོ་གཅིག་ལོན་པ་དང་། ལོ་བཞི་ལོན་པ་ནས་དེ་བཞིན་དུ་ལོ་དགུ་ལོན་པ་དང་། ལོ་བཅུ་གཉིས་ལོན་པའི་བར་ཡང་ལྷན་ཅིག་འདུག་པར་བྱའོ་ཞེས་བཀའ་སྩལ་ཏེ། བཅོམ་ལྡན་འདས་ཀྱིས་བར་ན་ལོ་གསུམ་ཞུགས་པ་དང་ལྷན་ཅིག་འདུག་པར་བྱའོ་ཞེས་བཀའ་སྩལ་པ་དང་། དགེ་སློང་དག་ཁྱིམ་གྱི་ནང་དུ་ཡང་བར་ན་ལོ་གསུམ་ཞུགས་པ་དང་ལྷན་ཅིག་འདུག་པར་མི་བྱེད་པས་དེས་སྟན་དག་མ་འབྱོར་ནས། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་གྱི་ནང་དུ་ནི་སློབ་དཔོན་དང་མཁན་པོ་དག་དང་ཡང་ལྷན་ཅིག་འདུག་པར་བྱ་སྟེ་འདི་ལ་འགྱོད་པར་མི་བྱའོ།། །།སྡོམ་ནི། དགེ་ཚུལ་ཁྲིའུ་གཡོགས་མི་སྦྱིན་དང་། །དགེ་ཚུལ་ཁ་དྲང་མི་བྱ་དང་། །མནའ་དང་སྐུགས་འཛུགས་མི་བྱ་དང་། །སྟག་གི་གོད་མ་མི་བཟའ་བའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ཀྱིས་ཆོས་ཉན་པའི་སྟན་བཤམ་པར་བྱའོ་ཞེས་བཀའ་སྩལ་པ་དང་། དགེ་ཚུལ་དག་ཀྱང་ཁྲིའུ་གཡོགས་མ་
ཅན་ལ་འདུག་ནས་ཆོས་ཉན་པར་བྱེད་དེ། དེ་དག་གཉིད་ལོག་ནས་དེ་ཉིད་དུ་བཤང་གཅི་ཤོར་ཏེ་ཁྲིའུ་གཡོགས་མ་ཅན་དག་མ་རུང་བར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་ཚུལ་ལ་ཁྲིའུ་གཡོགས་མ་ཅན་སྦྱིན་པར་མི་བྱའོ། །བཅོམ་ལྡན་འདས་ཀྱིས་དགེ་ཚུལ་ལ་ཁྲིའུ་གཡོགས་མ་ཅན་སྦྱིན་པར་མི་བྱའོ་ཞེས་བཀའ་སྩལ་པ་དང་། ཚེ་དང་ལྡན་པ་ཤཱ་རིའི་བུའི་དགེ་ཚུལ་སྐུལ་བྱེད་ཅེས་བྱ་བ་དེ་ཆོས་ཉན་དུ་སོང་བ་དང་། དེ་ལ་དགེ་སློང་དག་གིས་ཁྲིའུ་རྐྱང་པ་ཞིག་བྱིན་པ་དང་། དེས་སྨྲས་པ། ཚེ་དང་ལྡན་པ་དག་ཅིའི་ཕྱིར་བདག་ལ་ཁྲིའུ་རྐྱང་པ་སྦྱིན། དེ་དག་གིས་སྨྲས་པ། བཅོམ་ལྡན་འདས་ཀྱིས་དགེ་ཚུལ་རྣམས་ལ་ཁྲིའུ་གཡོགས་མ་ཅན་བཀག་གོ །དེས་སྨྲས་པ། ཚེ་དང་ལྡན་པ་དག་ཅི་ཁོ་བོ་ཡང་ཉེས་དམིགས་དེ་བྱེད་དམ། སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་ཚུལ་གང་དག་དྲན་པ་ཉེ་བར་འཇོག་པ་དེ་དག་ལ། ཁྲིའུ་གཡོགས་མ་ཅན་སྦྱིན་པར་བྱའི། གཞན་དག་ལ་ནི་མ་ཡིན་ནོ། །གླེང་གཞི་ནི་མཉན་ཡོད་ནའོ། །དགེ་སློང་ཞིག་ལ་དགེ་ཚུལ་ཞིག་ཡོད་པ་དེ་ལ་དེས་ནན་ཏུར་བྱས་པ་དང་། དེ་རྒྱལ་བྱེད་ཀྱི་ཚལ་གྱི་སྒོ་ན་ངུ་ཞིང་འདུག་གོ །དྲུག་སྡེ་ལས་གང་ཡང་རུང་བ་ཞིག་གིས་རྒྱལ་བྱེད་ཀྱི་ཚལ་གྱི་སྒོ་མི་སྟོང་པ་ཡིན་པས་ཚེ་དང་ལྡན་པ་ཉེ་དགའ་སྒོ་ན་འདུག་པ་དེས་དེ་མཐོང་ནས་དེས་སྨྲས་པ། དགེ་ཚུལ་ཅིའི་ཕྱིར་ངུ་། དེས་སྨྲས་པ། བཙུན་པ་ཉེ་དགའ་བདག་མཁན་པོས་ནན་ཏུར་བྱས་སོ། །བུ་ཚུར་ངས་ཁྱོད་ཀྱི་ལྷུང་བཟེད་དང་། ཆོས་གོས་དང་། དྲ་བ་དང་། ཕོར་བུ་དང་། སྐ་རགས་དང་། ཁྱོད་གང་དང་གང་གིས་ཕོངས་པ་དེ་དང་དེས་མི་ཕོངས་པར་བྱའོ་ཞེས་དེས་གནས་ཁང་དུ་ཁྲིད་དོ། །བཅོམ་ལྡན་འདས་ཀྱིས་ནན་ཏུར་བྱས་ནས་ཡལ་བར་དོར་བར་མི་བྱའོ། །འོན་ཀྱང་སླར་དགུག་པར་བྱའོ་ཞེས་བཀའ་སྩལ་པས། དགེ་སློང་དེས་དགེ་སྦྱོང་དེ་ལ་དགེ་སློང་ཞིག་མངགས་ནས་དེས་དེ་ལ་སྨྲས་པ་དང་། དེས་སྨྲས་པ། ཁོ་བོ་ལ་མཁན་པོ་ཅི་དགོས། ཉེ་དགའས་ཁོ་བོའི་
ཡོ་བྱད་ཐམས་ཅད་སྦྱར་བས་མི་འགྲོའོ། །དགེ་སློང་དེ་འཕྱ་བར་བྱེད། གཞོགས་ཕྱས་བྱེད། སྨོད་པར་བྱེད་དེ། བདག་གིས་རབ་ཏུ་ཕྱུང་བ་ཉེ་དགའས་ཁ་ཕྱུང་ངོ་ཞེས་ཟེར་བའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་གཞན་གྱིས་དགེ་ཚུལ་ཁ་དྲང་བར་མི་བྱ་སྟེ་ཁ་འདྲེན་ན་དབྱེན་དང་ཉེ་བའི་ཉེས་པ་སྦོམ་པོར་འགྱུར་རོ། །གླེང་གཞི་ནི་མཉན་ཡོད་ནའོ། །དྲུག་སྡེ་རྣམས་གང་དང་གང་དུ་དགོས་པར་མནའ་འདོར་བར་བྱེད་དེ། སངས་རྒྱས་ལ་མནའ་འདོར། ཆོས་དང་དགེ་འདུན་ལ་མནའ་འདོར། སློབ་དཔོན་དང་མཁན་པོ་ལ་མནའ་འདོར་བ་དང་། བྲམ་ཟེ་དང་ཁྱིམ་བདག་དད་པ་ཅན་རྣམས་ཀྱིས་སྨྲས་པ། སློབ་དཔོན་དག་བདག་ཅག་ཁྱིམ་པ་ལགས་ཀྱང་། སྟོན་པ་ལ་མནའ་འདོར་བར་མི་བགྱིད་ན། ཁྱེད་རབ་ཏུ་བྱུང་བ་ལགས་ན་ཇི་ལྟར་སྟོན་པ་ལ་མནའ་འདོར་འདི་ནི་འཚམ་པ་མ་ལེགས་སོ་ཞེས་བྱས་པ་དང་། དེ་དག་ཅང་མི་ཟེར་བར་འདུག་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བྲམ་ཟེ་དང་ཁྱིམ་བདག་དད་པ་ཅན་རྣམས་འཕྱ་བ་ནི་ཐོག་ཏུ་བབ་པོ། །རབ་ཏུ་བྱུང་བ་ནི་བདེན་པའི་བསམ་པ་ཅན་ཡིན་ཏེ། དེ་ལྟ་བས་ན་དགེ་སློང་གིས་མནའ་འདོར་བར་མི་བྱའོ། །དགེ་སློང་མནའ་འདོར་ན་འགལ་ཚབས་ཅན་དུ་འགྱུར་རོ། །གླེང་གཞི་ནི་མཉན་ཡོད་ནའོ། །དྲུག་སྡེ་དག་གང་དང་གང་དུ་དགོས་པར་ལྷུང་བཟེད་དང་། ཆོས་གོས་དང་། དྲ་བ་དང་། ཕོར་བུ་དང་། སྐ་རགས་དང་། གཞན་ཡང་དགེ་སྦྱོང་གི་ཡོ་བྱད་གང་ཡང་རུང་བ་དག་སྐུགས་སུ་འཛུགས་པར་བྱེད་པ་བྲམ་ཟེ་དང་ཁྱིམ་བདག་རྣམས་ཀྱིས་མཐོང་ནས་འཕྱ་བར་བྱེད་ཅིང་འཕགས་པ་ཁྱེད་ཅི་ཁྱིམ་པ་དག་བཞིན་དུ་ལྷུང་བཟེད་ལ་སོགས་པ་ཡོ་བྱད་སྐུགས་སུ་འཛུགས་སམ། དེ་ནི་འཚམ་པ་མ་ཡིན་ནོ། །དེ་དག་གིས་སྨྲས་པ། སྒོག་སྐྱ་ཟོས་སམ། ཆང་འཐུངས་སམ། འདི་ལ་མི་འཚམ་པ་ཅི་ཞིག་ཡོད། དེ་དག་ཅང་མི་ཟེར་བར་འདུག་པའི་སྐབས་དེ་དགེ་སློང་རྣམས་ཀྱིས་
བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བྲམ་ཟེ་དང་ཁྱིམ་བདག་རྣམས་འཕྱ་བ་ནི་ཐོག་ཏུ་བབ་པོ། །དེ་ལྟ་བས་ན་དགེ་སློང་གིས་སྐུགས་གཟུགས་པར་མི་བྱ་སྟེ། དགེ་སློང་སྐུགས་འཛུགས་ན་འགལ་ཚབས་ཅན་དུ་འགྱུར་རོ། །གླེང་གཞི་ནི་མཉན་ཡོད་ནའོ། དྲུག་སྡེ་རྣམས་ཀྱི་ཀུན་ཏུ་སྤྱོད་པ་ནི་ནང་པར་སྔར་ལངས་ནས་ཁང་ཐོག་ཏུ་འཛེགས་ཏེ་ཕྱོགས་བཞིར་བལྟ་ཞིང་དེ་དག་གང་ན་དུ་བ་འཐུལ་བའམ། བྱ་རྒོད་ལྡིང་བ་སྣང་བ་དེར་མྱུར་དུ་གོམ་པ་བསླང་སྟེ་འགྲོ་བར་བྱེད་དོ། །ཇི་ཙམ་དུས་གཞན་ཞིག་ན་ཉེ་དགའ་ནང་པར་སྔར་ཁང་ཐོག་ཏུ་འཛེགས་ཏེ་བལྟ་བར་བརྩམས་ན། དེས་བྱ་རྒོད་ལྡིང་བ་མཐོང་ནས་དེ་རིངས་པ་རིངས་པར་སོང་བ་དང་། ཇི་ཙམ་ན་སྟག་གིས་ནགས་ཐིབས་པོའི་ས་ཕྱོགས་ཞིག་ཏུ་གོད་མ་ཞིག་སྦས་པ་མཐོང་ནས་དེ་དགའ་སྟེ། དེ་ཁྱེར་ནས་རྒྱལ་བྱེད་ཀྱི་ཚལ་དུ་སོང་བ་དང་། སྟག་དྲི་སྣོམ་ཞིང་ཕྱི་བཞིན་འབྲངས་ནས་རྒྱལ་བྱེད་ཀྱི་ཚལ་གྱི་སྒོ་ན་སྒྲ་འབྱིན་པར་བྱེད་དོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་ཡིན་པས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་རྨས་པ། སྟག་འོ་ནི་ཅི་སྟེ་སྐད་འབྱིན། དེས་གསོལ་པ། བཙུན་པ་དེས་གོད་མ་སྦས་པ་དེ་བཙུན་པ་ཉེ་དགའས་འཚལ་ཏེ་མཆིས་པའི་སླད་དུའོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དགེ་སློང་སྟག་གི་གོད་མ་ཟའམ། བཙུན་པ་འཚལ་ལགས་སོ། །ཀུན་དགའ་བོ་རི་དགས་ཀྱི་རྒྱལ་པོ་སེང་གེ་ནི་རི་དགས་བཟང་པོ་བཟང་པོ་དག་བསད་ནས་ཤ་བཟང་པོ་དག་ཟོས་ཤིང་ཁྲག་བཟང་པོ་དག་འཐུངས་ནས་བོར་ཏེ་འགྲོའི། སྟག་ནི་གོད་མ་སྦེད་པར་བྱེད་པས་དེ་ལྟ་བས་ན་དགེ་སློང་གིས་སྟག་གི་གོད་མ་བཟའ་བར་མི་བྱ་སྟེ། ཟ་ན་འགལ་ཚབས་ཅན་དུ་འགྱུར་རོ། །དགེ་སློང་དག་གཞན་ཡང་ངས་དགེ་འདུན་གྱི་གནས་བརྟན་གྱི་ཀུན་དུ་སྤྱད་པའི་ཆོས་བཅའ་བར་བྱ་སྟེ། དགེ་འདུན་གྱི་གནས་བརྟན་གྱི་དགེ་སློང་གིས་ཤ་འདྲིམ་པའི་ཚེ་འདི་ཅིའི་ཤ་སྟག་གི་གོད་མ་མ་ཡིན་ནམ་ཞེས་དྲི་བར་བྱའོ། །མ་དྲིས་པར་ལེན་ན་འགལ་ཚབས་ཅན་
དུ་འགྱུར་རོ།། །།སྡོམ་ནི། ཚུལ་ཤིང་རྣམས་ནི་བྲིམས་པ་ན། །སྤུན་གཉིས་དག་ནི་གབ་པ་དང་། །ལ་བ་བསྒྱུར་བར་བྱ་བ་དང་། ། དེ་ལྟ་བུ་ལ་སོགས་པ་འོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །རི་འོར་ཞིག་ན་གཙུག་ལག་ཁང་ཞིག་ཡོད་དེ། ཇི་ཙམ་དུས་གཞན་ཞིག་ན་དགའ་བོ་དང་། ཉེ་དགའ་ལྗོངས་རྒྱུ་ཞིང་དོང་བ་ལས་རི་འོར་དེར་ཕྱིན་ཏོ། །དེ་དག་དེར་ཕྱིན་པ་ན་དགེ་འདུན་ལ་ཡང་རྙེད་པ་ཞིག་གྲུབ་ན་དེ་དག་གནས་ངན་ལེན་ཀུན་ཏུ་སྤྱོད་པ་ཡིན་པས་དགེ་སློང་གང་གིས་ཀྱང་མ་བཅར་བ་དང་། ཉེ་དགའ་བོས་དགའ་བོ་ལ་སྨྲས་པ། སློབ་དཔོན་ལྷུང་བཟེད་ནག་པོ་ཅན་འདི་དག་ཁེངས་པ་ང་རྒྱལ་ཅན་དག་ཅིག་པས་གཙེས་ཚུལ་སྤྱོན། གབ་སྟེ་བཞུགས་ལ་འདི་དག་རྙེད་པ་ཇི་ལྟར་འགེད་པ་གཟིགས་སོ། །དེས་སྨྲས་པ། ལེགས་ཏེ་དེ་བཞིན་བྱའོ་ཞེས་དེ་དག་གབ་སྟེ་འདུག་པ་དང་། དགེ་འདུན་གྱིས་རྙེད་པ་དེ་བགོས་སོ། །གང་གི་ཚེ་རྙེད་པ་བགོས་ཟིན་པ་དེའི་ཚེ་དེ་དག་འོངས་ནས་སྨྲས་པ་ཚེ་དང་ལྡན་པ་དག་དགེ་འདུན་གྱི་རྙེད་པ་གྲུབ་པ་བགོའོ། །དགེ་སློང་རྣམས་ཀྱིས་སྨྲས་པ། ཁྱེད་ག་ལས་ད་གཟོད་འདིར་འོངས་ཀྱི། རྙེད་པ་དེ་འདྲིམ་པའི་ཚེ་མ་ཡིན། དེ་དག་གིས་སྨྲས་པ། ཅི་ཁྱེད་བགོད་རྒྱུ་ཞིག་ཡིན་ནམ། བགོས་པར་མི་ཆུད་ཀྱི་བགོ་ཉེས་ཏེ། ཅི་ཁྱོད་ཀྱིས་གོ་བར་བྱས་ནས་བགོས་སམ། སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་ལ་དེང་དགེ་འདུན་གྱི་རྙེད་པ་འདྲིམ་ན། དགེ་སློང་གང་ཡང་གང་དུ་ཡང་མ་འགྲོ་ཤིག་ཅེས་གོ་བར་བྱས་ནས་རྙེད་པ་བྲིམ་པར་བྱའོ། །དགེ་སློང་རྣམས་ཀྱིས་རྙེད་པ་དེ་སླར་བསྡུས་སོ། །བསྡུས་ནས་དགེ་འདུན་ལ་དགེ་འདུན་གྱི་རྙེད་པ་འདྲིམ་ན། དགེ་སློང་གང་ཡང་གང་དུ་ཡང་མ་འགྲོ་ཤིག་ཅེས་བསྒོ་ནས། དེ་དག་གིས་བགོ་བར་བརྩམས་པ་དང་། དགའ་བོ་དང་ཉེ་དགའ་དེ་བཞིན་དུ་གབ་སྟེ་འདུག་གོ།། །།འདུལ་བ་ཕྲན་ཚེགས་ཀྱི་གཞི། བམ་པོ་ཉི་ཤུ་གསུམ་པ། གང་གི་ཚེ་དགེ་འདུན་གྱིས་རྙེད་པ་དེ་བགོས་
ཟིན་པ་དེའི་ཚེ་དེ་དག་ཡང་འོངས་ནས་སྨྲས་པ། ཚེ་དང་ལྡན་པ་དག་ཚུར་རྙེད་པ་དེ་བགོའོ། །དགེ་སློང་དག་གིས་སྨྲས་པ། ཁྱེད་གང་ནས་ད་གཟོད་འདིར་འོངས་ཀྱི་རྙེད་པ་དེ་དགེ་འདུན་ལ་གོ་བར་བྱས་ནས་འདྲིམ་པའི་ཚེ་ནི་མ་ཡིན། དེ་དག་གིས་སྨྲས་པ། གལ་ཏེ་ཁྱེད་ཀྱིས་གོ་བར་བྱས་ཀྱང་བགོས་པར་མི་ཆུད་ཀྱི་བགོ་ཉེས་ཏེ། ཅི་ཁྱོད་ཀྱིས་གོ་བར་བྱས་ནས་གཎྜཱི་བརྡུངས་སམ། སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། གོ་བར་བྱས་ནས་གཎྜཱི་བརྡུངས་ཏེ་དགེ་འདུན་ལ་རྙེད་པ་དེ་བྲིམ་པར་བྱའོ། ། དགེ་སློང་རྣམས་ཀྱིས་ཡང་རྙེད་པ་དེ་སླར་བསྡུས་སོ། །བསྡུས་ནས་དེ་བཞིན་དུ་གོ་བར་བྱས་ཏེ། གཎྜཱི་བརྡུངས་ནས་བགོ་བར་བརྩམས་པ་དང་། དེ་དག་དེ་ཁོ་ན་བཞིན་དུ་གབ་སྟེ་འདུག་གོ །གང་གི་ཚེ་རྙེད་པ་དེ་བགོས་ཟིན་པ་དེའི་ཚེ་ཡང་འོངས་ཏེ་དེ་ཁོ་ན་བཞིན་དུ་སྨྲས་པ་དང་། དགེ་སློང་རྣམས་ཀྱིས་སྨྲས་པ། དགེ་འདུན་ལ་ཡང་གོ་བར་བྱས། གཎྜཱི་ཡང་བརྡུངས་ནས་ཁྱེད་ག་ལས་ད་གཟོད་འདིར་འོངས། དེ་དག་གིས་སྨྲས་པ། ཁྱོད་ཀྱིས་གོ་བར་ཡང་བྱས། གཎྜཱི་ཡང་བརྡུངས་ཀྱང་ཅི་ག་ཁྱེད་ཀྱིས་ཚུལ་ཤིང་བྲིམས་སམ། བགོས་པར་མི་ཆུད་ཀྱི་བགོ་ཉེས་སོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། གོ་བར་བྱས་ཏེ་གཎྜཱི་བརྡུངས་ནས་ཚུལ་ཤིང་བྲིམ་པར་བྱའོ། །དགེ་སློང་རྣམས་ཀྱིས་ཡང་རྙེད་པ་དེ་བསྡུས་སོ། །བསྡུས་ནས་གོ་བར་བྱས། གཎྜཱི་བརྡུངས། ཚུལ་ཤིང་བྲིམས་ཏེ་བགོ་བར་བརྩམས་པ་དང་། དེ་དག་དེ་ཁོ་ན་བཞིན་དུ་གབ་སྟེ་འདུག་གོ །གང་གི་ཚེ་རྙེད་པ་དེ་བགོས་ཟིན་པ་དེའི་ཚེ་དེ་དག་འོངས་ནས་དེ་ཁོ་ན་བཞིན་དུ་སྨྲས་པ་དང་། དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཁྱེད་ཀྱིས་དགེ་འདུན་ལ་དེ་ལྟར་ཅོ་དྲིའམ། དགེ་འདུན་ལ་གོ་བར་བྱས། གཎྜཱི་བརྡུངས་ཚུལ་ཤིང་བྲིམས་ན་ཁྱེད་ག་ལས་ད་གཟོད་འདིར་ཕྱིན། དེ་དག་གིས་སྨྲས་པ། ཚེ་དང་ལྡན་པ་དག་རྙེད་པ་ལྟ་ཕར་ཞོག །གལ་ཏེ་དེ་ལྟ་ན་ཁོ་
བོ་ཅག་གིས་དགེ་འདུན་ཇི་ལྟར་ཅོ་དྲིས་པ་སྨྲོས་ཤིག །གལ་ཏེ་ཁྱོད་ཀྱིས་དགེ་འདུན་ལ་གོ་བར་བྱས། གཎྜཱི་བརྡུངས། ཚུལ་ཤིང་བྲིམས་ན་དེ་ཅི་ཁྱེད་ཀྱིས་ཁོ་བོ་ཅག་གི་བགོ་སྐལ་བསྟན་ཏམ། དེར་ཟད། རྙེད་པ་མེད་ཀྱང་བླ་འགྲོའོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་ལ་གོ་བར་བྱས། གཎྜཱི་བརྡུངས། ཚུལ་ཤིང་བྲིམས་ནས་གང་ཞིག་མི་སྣང་བ་དེའི་བགོ་སྐལ་བསྟན་ནས་བགོ་བར་བྱའོ། །བགོས་ཟིན་ཏེ་འོང་བ་གང་ཡིན་པ་དེ་ལ་ནི་རྙེད་པ་སྦྱིན་པར་མི་བྱ་སྟེ། གལ་ཏེ་དེ་ལྟར་བགོས་ན་ལེགས་པར་བགོས་པ་ཡིན་པས་འདི་ལ་འགྱོད་པར་མི་བགྱིའོ། །དགེ་སློང་གིས་ཆེད་དུ་བསམས་ཏེ་དེ་ལྟར་དགེ་འདུན་ལ་ཅོ་དྲི་བར་ཡང་མི་བྱའོ། །དགེ་སློང་ཆེད་དུ་བསམས་ཏེ་དགེ་འདུན་ལ་ཅོ་འདྲི་བར་བྱེད་ན་འགལ་ཚབས་ཅན་དུ་འགྱུར་རོ། །གླེང་གཞི་ནི་མཉན་ཡོད་ནའོ། །གང་གི་ཚེ་ཁྱིམ་བདག་མགོན་མེད་ཟས་སྦྱིན་གྱིས་རྒྱལ་བྱེད་ཀྱི་ཚལ་ཕྱོགས་བཞིའི་དགེ་སློང་གི་དགེ་འདུན་ལ་ཕུལ་ནས་ཚོན་རྩིའི་ཁྱད་པར་རྣམ་པ་སྣ་ཚོགས་ཀྱིས་ཕྱི་ནང་བཅས་ཏེ་རི་མོ་བྲིས་པ་དེའི་ཚེ་མཉན་ཡོད་ན་གནས་པའི་སྐྱེ་བོའི་ཚོགས་ཀྱིས་ཇི་ལྟར་ཁྱིམ་བདག་མགོན་མེད་ཟས་སྦྱིན་གྱིས་རྒྱལ་བྱེད་ཀྱི་ཚལ་ཚོན་རྩིའི་ཁྱད་པར་རྣམ་པ་སྣ་ཚོགས་ཀྱིས་ཕྱི་ནང་བཅས་ཏེ་རི་མོ་བྲིས་ནས་མཆོག་ཏུ་ཕུན་སུམ་ཚོགས་པར་བྱས་པ་ཐོས་ཏེ། དེའི་ཚེ་སྲོག་ཆགས་བརྒྱ་སྟོང་ཕྲག་དུ་མ་རྒྱལ་བྱེད་ཀྱི་ཚལ་བལྟ་བའི་ཕྱིར་ཉེ་བར་སོང་ངོ་། །ཡང་དེའི་ཚེ་མཉན་ཡོད་ན་བྲམ་ཟེ་ཞིག་གནས་པ་དེ་ལ་རྒྱལ་པོ་དང་། བློན་པོ་དང་། གྲོང་མི་རྣམས་བྲམ་ཟེ་འདི་མཛེས་སོ་ཞེས་མངོན་པར་དད་དེ་དེས་རྒྱལ་པོའི་ཕོ་བྲང་ནས་ཆེན་པོ་ལ་འོས་པའི་ལ་བ་ཞིག་ཐོབ་བོ། །དེས་དེ་བགོས་ནས་རྒྱལ་བྱེད་ཀྱི་ཚལ་དུ་ལྟད་མོ་ལྟར་སོང་བ་དང་། དེ་མཐོང་མ་ཐག་ཁོ་ནར་དད་པ་ཆེན་པོ་སྐྱེས་ནས་དེས་ལ་བ་དེ་ཕྱོགས་བཞིའི་དགེ་སློང་གི་དགེ་འདུན་ལ་ཕུལ་ལོ། །བཅོམ་ལྡན་འདས་ཀྱིས་གོས་ཀྱི་རྙེད་པ་བྱུང་ན་ཐ་ན་མེ་མར་གྱི་སྙིང་པོའི་རྒྱུ་ཙམ་དུ་ཡང་མཉམ་
པར་བགོའོ་ཞེས་གསུངས་པས། དགེ་སློང་རྣམས་ཀྱིས་དེ་ཚལ་བུ་ཚལ་བུར་བྱས་ནས་མཉམ་པར་བགོས་སོ། ། བྲམ་ཟེ་དེས་བསམས་པ། ལ་བ་དེ་ཆེན་པོ་ལ་འོས་པ་ཞིག་པས་བདག་གིས་འཕགས་པ་རྣམས་ལ་ཀཱར་ཥཱ་པ་ཎ་དག་ཕུལ་ལ་སླར་བླང་ངོ་སྙམ་སྟེ་དེ་ནང་པར་སྔར་ལངས་ནས་རྒྱལ་བྱེད་ཀྱི་ཚལ་དུ་སོང་བ་དང་། རྒྱལ་བྱེད་ཀྱི་ཚལ་གྱི་སྒོ་ན་དགེ་སློང་མང་པོ་དག་ཅིག་འདུག་གོ །དེས་སྨྲས་པ། འཕགས་པ་དག་ཕྱག་འཚལ་ལོ། །བྲམ་ཟེ་ཆེན་པོ་ནད་མེད་ཅིག། འཕགས་པ་ལ་ལ་བ་ཕུལ་བ་དེ་ཁྱེད་ཀྱིས་ཅིར་བགྱིས། དགེ་སློང་རྣམས་ཀྱིས་སྨྲས་པ། བྲམ་ཟེ་ཆེན་པོ་རྗེས་སུ་ཡི་རང་བར་གྱིས་ཤིག །ཁོ་བོ་ཅག་གིས་མཉམ་པར་བགོས་སོ། །གཅིག་གིས་སྨྲས་པ། བདག་གིས་ནི་བགོ་སྐལ་ཞྭ་ལ་གླན་ནོ། །གཞན་ཞིག་གིས་སྨྲས་པ། བདག་གིས་ནི་ལྷམ་ཡུ་ཐུང་ལ་གླན་ནོ། །གཞན་ཞིག་གིས་སྨྲས་པ། བདག་གིས་ནི་སྟོད་ཀོར་ལ་གླན་ནོ། །གཞན་ཞིག་གིས་སྨྲས་པ། བདག་གིས་ནི་ལྷུང་བཟེད་ཕྱི་བར་བྱས་སོ། དེས་སྨྲས་པ། འཕགས་པ་ལ་བ་དེ་ཆེན་པོ་ལ་འོས་པ་ཞིག་ན་ཀྱེ་མ་ཁྱེད་ཀྱིས་དེ་ཀཱར་ཥཱ་པ་ཎ་དག་ཏུ་བསྒྱུར་ལ་ཀཱར་ཥཱ་པ་ཎ་དག་བགོ་འདད་ཅིག་ཅེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བྲམ་ཟེ་དེ་ཟེར་བ་བདེན་ཏེ། དེ་ལྟ་བས་ན་དགེ་འདུན་ལ་གོས་ཀྱི་རྙེད་པ་དེ་ལྟ་བུ་གྲུབ་པ་གང་ཡིན་པ་དེ་ཀཱར་ཥཱ་པ་ཎ་དག་ཏུ་བསྒྱུར་ལ། ཀཱར་ཥཱ་པ་ཎ་དག་བགོ་བར་བྱའོ།། །།སྡོམ་ནི། རུང་བ་མ་ཡིན་ལྔ་དག་གི། །ལྷམ་ནི་དགག་པ་མཛད་པ་དང་། ། དོམ་ལྤགས་ཀྱི་ནི་ལྷམ་དག་དང་། །དེ་ཡི་སྟེང་གི་རིམ་པའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་རྣམས་ཀྱིས་སྨྲས་པ། དགའ་བོ་ཉེ་དགའ་བོ་བདག་ཅག་གིས་མཉན་ཡོད་དུ་སྐྱེ་བོ་མང་པོ་ཐམས་ཅད་ལ་མ་ལུས་པར་བཟའ་བའི་རིམ་བསླངས་ན། རྒྱལ་པོའི་གླང་པོ་ཆེ་འདུལ་བ་དེ་དག་གིས་
བདག་ཅག་ལ་ཅུང་ཟད་ཀྱང་མ་བྱིན་གྱིས་ཚུར་ཤོག་འདོང་ཅུང་ཟད་ཅིག་བསླང་ངོ་། །དེ་ན་ཁ་ཅིག་གིས་སྨྲས་པ། ལེགས་ཏེ་དེ་ལྟར་བྱ་མོད་ཀྱི། འོན་ཀྱང་ཐབས་ཤིག་བཤམ་པར་བྱའོ། །ཅི་ཞིག་བྱ། སེང་གེའི་པགས་པ་ལས་ལྷམ་བྱས་ལ་དེ་བགོས་ཏེ་རྫི་ཀར་འདུག་ནས་གླང་པོ་ཆེ་རྣམས་བསྐྲོག་པར་བྱའོ། །གཞན་དག་གིས་སྨྲས་པ། རེ་ཞིག་དེ་བཞིན་དུ་བསླངས་ལ་གལ་ཏེ་མ་སྟེར་ན་ཕྱིས་དེ་ལྟར་བྱའོ་ཞེས་དེ་རྣམས་ནང་པར་སྔར་ལངས་ཏེ་དེ་དག་གི་དྲུང་དུ་སོང་ནས་སྨྲས་པ། བཞིན་བཟངས་དག་གཏུམ་པོ་ཁྱོད་ཀྱིས་ཁོ་བོ་ཅག་ལ་ཟས་ཀྱི་རིན་མི་སྦྱིན་ནམ། དེ་དག་གིས་སྨྲས་པ། འཕགས་པ་ཁྱེད་ལ་ཁོ་བོ་ཅག་ཅི་རག་ལུས་ན་གང་གི་ཕྱིར་ཁོ་བོ་ཅག་གིས་ཟས་ཀྱི་རིན་སྦྱིན། དྲུག་སྡེ་རྣམས་ཀྱིས་འཇལ་ཏོ་ཞེས་བྱས་ནས་སོང་ངོ་། །དེ་དག་གིས་སྔར་གྲོས་བྱས་པ་བཞིན་སེང་གེའི་པགས་པ་ལས་ལྷམ་བྱས་ནས་བགོས་ཏེ་དེ་དག་གླང་པོ་ཆེ་རྣམས་རྒྱུ་བའི་རྫི་ཀར་དོང་སྟེ་འདུག་པ་དང་། གླང་པོ་ཆེ་རྣམས་ཀྱིས་སེང་གེའི་དྲི་ཚོར་ཏེ་བྲེད་ནས་གཅིན་རྟུག་སྟོར་ཏེ་འབྲོས་པར་བརྩམས་སོ། །གླང་པོ་ཆེ་འདུལ་བ་རྣམས་ཀྱིས་ལྕགས་ཀྱུ་དག་གིས་ཞོ་ཤ་ཡོད་མེད་ཀྱིས་བཟུང་ན་མ་ཐུབ་པ་དང་། དྲུག་སྡེ་རྣམས་ཀྱིས་སྨྲས་པ། ཚེ་དང་ལྡན་པ་དག་མ་གཏང་ཤིག་མ་གཏང་ཤིག །དེ་དག་གིས་སྨྲས་པ། འཕགས་པ་མི་ཐུབ་ན་ཇི་ལྟར་མི་གཏང་། དྲུག་སྡེ་རྣམས་ཀྱིས་སྨྲས་པ། ཁོ་བོ་ཅག་གིས་གླན་ནམ། འཕགས་པ་དེ་ལྟར་གནང་ན་སྨན་ཆེའོ། །ཚེ་དང་ལྡན་པ་དག་གལ་ཏེ་བཟའ་བའི་རིན་སྟེར་བར་དམ་འཆའ་ན་གླན་ནོ། །འཕགས་པ་དབུལ་ལོ། །བདེན་གྲང་ཞེས་བྱས་ནས་དེ་དག་རྫི་ཕྱོགས་མ་ཡིན་པར་དོང་སྟེ་འདུག་པ་དང་། སེང་གེའི་དྲི་མི་མནམ་པར་གླང་པོ་ཆེ་རྣམས་སྡོད་དོ། །གླང་པོ་ཆེ་འདུལ་བ་རྣམས་ཀྱིས་སྨྲས་པ། འཕགས་པ་ཅི་ཁྱོད་རིག་སྔགས་མཁྱེན་ཏམ། བཞིན་བཟངས་ཁོ་བོ་ཅག་གིས་རིག་སྔགས་མི་ཤེས་སོ། །འཕགས་པ་གལ་ཏེ་དེ་ལྟ་ན་ཁྱེད་ཀྱིས་ཇི་ལྟར་བཟློག །དེ་རྣམས་ཀྱིས་ཇི་ལྟར་གྱུར་པ་བསྙད་པ་དང་། དེ་དག་གིས་སྨྲས་པ། ཁྱེད་ཀྱིས་གནོད་པ་འདི་ལྟ་བུ་
ཡང་བྱས་པ་ལྟ། གལ་ཏེ་རྒྱལ་པོའི་གླང་པོ་ཆེ་དམ་པ་ཡན་ལག་མཆོག་ཅན་འདི་ལྟ་བུ་དག་ནགས་ཀྱི་ནང་དུ་ཤོར་བར་གྱུར་ན། ཁྱེད་ཀྱིས་རྒྱལ་པོ་ལ་དགུ་བྱས་པར་མ་གྱུར་ཏམ། དེ་དག་འཛུམ་དམུལ་ནས་ཅང་མི་ཟེར་བར་འདུག་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་བྱུང་བ་ནི་དགེ་སློང་དག་སེང་གེའི་པགས་པའི་ལྷམ་གྱོན་པ་ལས་གྱུར་གྱིས། དེའི་ཕྱིར་དགེ་སློང་གིས་སེང་གེའི་པགས་པའི་ལྷམ་བཅང་བར་མི་བྱའོ་སྙམ་དུ་དགོངས་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་དགེ་སློང་གིས་སེང་གེའི་པགས་པའི་ལྷམ་བཅང་བར་མི་བྱ་སྟེ། དགེ་སློང་སེང་གེའི་པགས་པའི་ལྷམ་འཆང་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་སེང་གེའི་པགས་པའི་ལྷམ་བཅང་བར་མི་བྱའོ་ཞེས་བཀའ་སྩལ་པ་དང་། དྲུག་སྡེ་རྣམས་ཀྱིས་སྟག་ལྤགས་ཀྱི་ལྷམ་བཅང་བར་བརྩམས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་སེན་མོ་དང་། མཆེ་བའི་སྟོབས་ཅན་ལྔ་པོ་གླང་པོ་ཅང་ཤེས་དང་། རྟ་ཅང་ཤེས་དང་། སེང་གེ་དང་། སྟག་དང་། གུང་གི་པགས་པའི་ལྷམ་བཅང་བར་མི་བྱའོ། །བཅོམ་ལྡན་འདས་ཀྱིས་སེན་མོ་དང་མཆེ་བའི་སྟོབས་ཅན་ལྔའི་པགས་པའི་ལྷམ་བཅང་བར་མི་བྱའོ་ཞེས་བཀའ་སྩལ་པ་དང་། ཚེ་དང་ལྡན་པ་ཉེ་བ་འཁོར་གྱིས་བཅོམ་ལྡན་འདས་ལ་ཞུས་པ་བཙུན་པ་སེན་མོ་དང་མཆེ་བའི་སྟོབས་ཅན་གཞན་དག་ཀྱང་མཆིས་ན། ཅི་ལགས་དེ་དག་གི་པགས་པའི་ལྷམ་ཡང་བཅང་བར་མི་བགྱི་ལགས་སམ། ཉེ་བ་འཁོར་དེ་དག་གི་པགས་པའི་ལྷམ་ཡང་བཅང་བར་མི་བྱ་སྟེ། འཆང་ན་འགལ་ཚབས་ཅན་དུ་འགྱུར་རོ། །གླེང་གཞི་ནི་མཉན་ཡོད་ནའོ། །མཉན་ཡོད་ན་དགེ་སློང་ཞིག་གཞང་འབྲུམ་གྱི་ནད་ཀྱིས་ཐེབས་པ་དེ་སྨན་པའི་དྲུང་དུ་སོང་ནས་བཞིན་བཟངས་བདག་གཞང་འབྲུམ་གྱིས་ཐེབས་ན་སྨན་སྟོན་ཅིག་དེས་སྨྲས་པ། འཕགས་པ་དོམ་ལྤགས་
ཀྱི་ལྷམ་མནོབས་ཤིག་དང་ཁྱོད་སོས་པར་འགྱུར་རོ། །དེས་སྨྲས་པ། བཅོམ་ལྡན་འདས་ཀྱིས་མ་གནང་ངོ་། །འཕགས་པ་ཁྱོད་ཀྱི་སྟོན་པ་ནི་ཐུགས་རྗེ་ཅན་ཡིན་པས་གནང་བར་འགྱུར་རོ་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་གནང་གིས་དགེ་སློང་གཞང་འབྲུམ་གྱི་ནད་ཀྱིས་ཐེབས་པས་དོམ་ལྤགས་ཀྱི་ལྷམ་བཅང་བར་བྱའོ། །བཅོམ་ལྡན་འདས་ཀྱིས་དགེ་སློང་གཞང་འབྲུམ་གྱི་ནད་ཀྱིས་ཐེབས་པས་དོམ་ལྤགས་ཀྱི་ལྷམ་བཅང་བར་བྱའོ་ཞེས་བཀའ་སྩལ་པ་དང་། རིམ་པ་མང་པོ་མ་རྙེད་ནས། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་རིམ་པ་མང་པོར་མ་རྙེད་ན་སྟེང་རིམ་ཅིག་སྤུན་པག་ཏུ་གླན་པར་བྱའོ།། །།འདུལ་བ་ཕྲན་ཚེགས་ཀྱི་གཞི་ལས་སྒོ་ལྔ་པ་རྫོགས་སྷོ།། །།