ཕམ་པ་འཆད་པ།
རྒྱ་གར་སྐད་དུ། བི་ན་ཡ་ཨུཏྟ་ར་གྲནྠ། བོད་སྐད་དུ། འདུལ་བ་གཞུང་བླ་མ། བམ་པོ་དང་པོ། ཐམས་ཅད་མཁྱེན་པ་ལ་ཕྱག་འཚལ་ལོ། །སྡོམ་ལ། དུད་འགྲོ་གསུམ་དང་ལམ་གསུམ་དང་། །བུད་མེད་གཤེགས་དང་གཅོད་པ་དང་། །འཛིན་པ་དང་ནི་བལྟབ་པ་དང་། །སོ་དང་མོ་རེག་ཕག་མོ་ཡིན། །སངས་རྒྱས་བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་ཚེ་དང་ལྡན་པ་ཉེ་བར་འཁོར་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ཚེ་དང་ལྡན་པ་ཉེ་བར་འཁོར་གྱིས་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ། བཅོམ་ལྡན་འདས་ཀྱིས་ཡང་དགེ་སློང་གང་དགེ་སློང་རྣམས་དང་ལྷན་ཅིག་བསླབ་པ་མཚུངས་པར་ཞུགས་པས་བསླབ་པ་མ་ཕུལ། བསླབ་པ་ཉམས་པར་མ་བྱས་པར་མི་ཚངས་པར་སྤྱོད་པ། འཁྲིག་པ་ལས་བྱུང་བའི་ཆོས་བསྟེན་ན། ཐ་ན་དུད་
འགྲོའི་སྐྱེ་གནས་སུ་གཏོགས་པ་དང་ལྷན་ཅིག་ཀྱང་རུང་སྟེ། དགེ་སློང་དེ་ཡང་ཕམ་པར་གྱུར་པ་ཡིན་གྱི། གནས་པར་མི་བྱའོ། །ཞེས་གསུངས་པ་གང་ལགས་པ། བཙུན་པ། རེ་ཞིག་དགེ་སློང་གིས་མིའི་བུད་མེད་གསང་སྔགས་དང་། སྨན་དག་གིས་དུད་འགྲོའི་སྐྱེ་གནས་པར་བསྒྱུར་ཏེ་དེ་དང་ལྷན་ཅིག་མི་ཚངས་པར་སྤྱོད་པ་འཁྲིག་པ་ལས་བྱུང་བའི་ཆོས་བསྟེན་ན་ཅིར་འགྱུར་ལགས། མཐར་འགྱུར་རོ། །བཙུན་པ་རེ་ཞིག་དགེ་སློང་གིས་གསང་སྔགས་དང་། སྨན་དག་གིས་ བདག་ཉིད་དུད་འགྲོའི་སྐྱེ་གནས་པར་བསྒྱུར་ཏེ། མིའི་བུད་མེད་དང་ལྷན་ཅིག་མི་ཚངས་པར་སྤྱོད་པ 
་འཁྲིག་པ་ལས་བྱུང་བའི་ཆོས་བསྟེན་ན། ཅིར་འགྱུར་ལགས། གལ་ཏེ་འཁྲིག་པ་ལས་བྱུང་བའི་ཆོས་དང་ལྡན་པ་བྱར་མི་རུང་བར་དགེ་སློང་དུ་འདུ་ཤེས་ཡོད་ལ། དེ་ཡང་བྱེད་ན་མཐར་འགྱུར་རོ། །གལ་ཏེ་དགེ་སློང་དུ་འདུ་ཤེས་མེད་ན་ཉེས་པ་སྦོམ་པོར་འགྱུར་རོ། །བཙུན་
པ། རེ་ཞིག་དགེ་སློང་གཉིས་ཤིག་གིས་མི་བུད་མེད་དང་བདག ་ཉིད་གསང་སྔགས་དང་། སྨན་དག་གིས་དུད་འགྲོའི་སྐྱེ་གནས་པར་བསྒྱུར་ཏེ། ལྷན་ཅིག་གམ། ཕན་ཚུན་མི་ཚངས་པར་སྤྱོད་པ། འཁྲིག་པ་ལས་བྱུང་བའི་ཆོས་བསྟེན་ན། ཅིར་འགྱུར་ལགས། གལ་ཏེ་འཁྲིག་པ་ལས་བྱུང་བ་དང་ལྡན་པ་བྱར་མི་རུང་བར་དགེ་སློང་དུ་འདུ་ཤེས་ཡོད་ལ། དེ་ཡང་བྱེད་ན་ནི། མཐར་འགྱུར་རོ། །གལ་ཏེ་དགེ་སློང་དུ་འདུ་ཤེས་མེད་ན། ཉེས་པ་སྦོམ་པོར་འགྱུར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བར་འཁོར་གྱིས་ཞུས་པ། བཙུན་པ། བཅོམ་ལྡན་འདས་ཀྱིས་བཅུག་མ་ཐག་ཏུ་མཐར་འགྱུར་རོ།། ཞེས་གསུངས་པ་གང་ལགས་པ། ཇི་ཙམ་གྱིས་ན། ཁའི་ལམ་དུ་བཅུག་པ་ཞེས་བགྱི། ཉེ་བར་འཁོར། སོ་ལས་ནོར་བུ་འདའ་བར་བྱེད་པ་
ཙམ་གྱིས་སོ། །ཇི་ཙམ་གྱིས་ན། བཤང་བའི་ལམ་དུ་བཅུག་པ་ཞེས་བགྱི། ཇི་ཙམ་དུ་བུ་གའི་སྦུབས་ལས་ནོར་བུ་འདའ་བར་བྱེད་པ་ཙམ་གྱིས་སོ། །ཇི་ཙམ་གྱིས་ན། གཅི་བའི་ལམ་དུ་བཅུག་པ་ཞེས་བགྱི། པགས་པའི་རིམ་པ་ལས་ནོར་བུ་འདའ་བར་བྱེད་པ་ཙམ་གྱིས་སོ། །བཙུན་པ། བུད་མེད་ཕྱེད་ཚལ་དུ་གཤེགས་པར་གྱུར་ལ། འདིའི་རྨའི་སྒོ་གསུམ་ཡང་ཉམས་པར་གྱུར་ལ། དགེ་སློང་གིས་ཚལ་བ་དང་ཚལ་བ་སྦྱར་ནས་མི་ཚངས་པར་སྤྱོད་པ། འཁྲིག་པ་ལས་བྱུང་བའི་ཆོས་སྤྱད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་བུད་མེད་རྐེད་པ་བཅད་པར་གྱུར་ལ། འདི་ནི། རྨའི་སྒོ་གསུམ་ལས་རྨའི་སྒོ་གང་ཡང་རུང་བ་ཞིག་མ། ཉམས་པར་གྱུར་བ་དེ་ལ་ཡང་དགེ་སློང་གིས་མི་ཚངས་པར་སྤྱོད་པ། འཁྲིག་པ་ལས་བྱུང་བའི་ཆོས་བསྟེན་ན། ཅིར་འགྱུར་ལགས། མཐར་འགྱུར་རོ། །བཙུན་པ། རེ་ཞིག་དགེ་སློང་གིས་བུད་མེད་མགོ་བཅད་པ་དང་ལྷན་ཅིག་མི་ཚངས་པར་སྤྱོད་པ། འཁྲིག་པ་ལས་བྱུང་བའི་ཆོས་བསྟེན་ན་ཅིར་འགྱུར་ལགས། གལ་ཏེ་བཤང་བའི་ལམ་མམ། གཅི་བའི་ལམ་དུ་བསྟེན་ན། མཐར་འགྱུར་རོ། །ཅི་སྟེ་ཁའི་ལམ་མམ། སྦུབས་སམ། ཕྲག་པའི་གསབ་གསེབ་ཏུ་སོ་སོར་བསྟེན་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། བཅོམ་ལྡན་འདས་ཀྱིས་མི་མ་ཡིན་པ་མོ་དང་ལྷན་ཅིག་མི་ཚངས་པར་སྤྱོད་པ། འཁྲིག་པ་ལས་བྱུང་བའི་ཆོས་བསྟེན་ན། མཐར་འགྱུར་རོ། །ཞེས་གསུངས་པ་གང་ལགས། མི་མ་ལགས་པ་མོ་ཇི་ལྟ་བུ་ཞིག་ལགས། ཡན་ལག་ཐམས་ཅད་ཀྱིས་གཟུང་དུ་ཆོག་པ་གང་ཡིན་པ་སྟེ། དེ་བཞིན་དུ་དུད་འགྲོའི་སྐྱེ་གནས་སུ་གཏོགས་པ་རྣམས་ལ་ཡང་བརྗོད་པར་བྱའོ། །བཙུན་པ། རེ་ཞིག་བལྟ་བ་སྟེ་བཅུག་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་སོའི་ཕྱི་རོལ་མཆུའི་ནང་དུ་མི་ཚངས་པར་སྤྱོད་པ། འཁྲིག་པ་ལས་བྱུང་བའི་ཆོས་བསྟེན་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་བཤང་བའི་ལམ་མམ། གཅི་བའི་ལམ་མམ། ཁའི་ལམ་གང་ཡང་རུང་བར་མ་རེག་པར་བཅུག་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་ཕག་མོའི་རོ་བསྲེགས་པ་སྤུ་མ་མཆིས་པ་ལ་མི་ཚངས་པར་སྤྱོད་པ། འཁྲིག་པ་ལས་བྱུང་བའི་ཆོས་བསྟེན་ན། ཅིར་འགྱུར་ལགས། ཉེས་པ་སྦོམ་པོར་འགྱུར་ཏེ། དེ་བཞིན་དུ་དུད་འགྲོའི་སྐྱེ་གནས་སུ་གཏོགས་པ་ཐམས་ཅད་ལ་ཡང་བརྗོད་པར་བྱའོ། །སྡོམ་ལ། གཞན་གྱི་ཡན་ལག་སྐྱེས་དང་ནི། །སྤྱིལ་ཁང་གཉིས་དང་མཚན་གཉིས་
དང་། །ཉམས་པ་གཉིས་དང་བར་ཆད་བཅས། །དྲུག་ཚན་དང་ནི་བཞི་ཚན་ནོ། །བཙུན་པ། རེ་ཞིག་དགེ་སློང་གིས། གཞན་གྱི་ཡན་ལག་སྐྱེས་སུ་འཛུད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གཅིག་སྤྱིལ་བུར་ཞུགས་པ་ལ་མི་ཚངས་པར་སྤྱོད་པའི་རྐྱེན་གྱིས་མཐར་འགྱུར་བ་ལྟ་མཆིས་ལགས་སམ། ཉེ་བར་འཁོར། འགྱུར་བ་ཡོད་དེ། དཔེར་ན། ནར་བ་པོ་དང་། རྒྱབ་མཉེན་ལྟ་བུའོ། །བཙུན་པ། རེ་ཞིག་དགེ་སློང་སྦྲང་ཁང་དུ་ཞུགས་པ་དེའི་སླད་རོལ་ན་བུད་མེད་གཅིག་མཆིས་པར་གྱུར་པ་ལ། དེས་ནང་ནས་ལོག་པར་སྤྱད་ན། ཅིར་འགྱུར་ལགས། མཐར་འགྱུར་རོ། །བཙུན་པ། རེ་ཞིག་དགེ་སློང་མི་ཚངས་པར་སྤྱོད་པ་ལ་ཞུགས་པ་དེའི་མཚན་གྱུར་ཏེ། དགེ་སློང་མར་རེད་ནས་མི་ཚངས་པར་སྤྱོད་པ་བགྱིད་ན། ཅིར་འགྱུར་ལགས། མཐར་འགྱུར་རོ། །བཙུན་པ། རེ་ཞིག་དགེ་སློང་མ་མི་ཚངས་པར་སྤྱོད་པ་ལ་ཞུགས་པ་དེའི་མཚན་གྱུར་ཏེ་དགེ་སློང་དུ་རེད་ནས་མི་ཚངས་པར་སྤྱོད་པ་བགྱིད་ན། ཅིར་འགྱུར་ལགས། མཐར་འགྱུར་རོ། །བཙུན་པ། བཅོམ་ལྡན་འདས་ཀྱིས་མིའི་བུད་མེད་གསོན་པོར་ཉམས་པ་ཞེས་གསུངས་པ་གང་ལགས་པ། ཇི་ཙམ་གྱིས་ན། མིའི་བུད་མེད་གསོན་པོར་ཉམས་པ་ཞེས་བགྱི། ཉེ་བར་འཁོར། ཇི་ཙམ་དུ་ཅུང་ཟད་ཟིན་པའམ། ཟིན་པའམ། སྐྲངས་པའམ། རུལ་བའམ། མྱགས་བའམ། སྲོག་ཆགས་དག་གིས་ཟོས་པར་གྱུར་པ་དེ་ཙམ་གྱིས་ན། མིའི་བུད་མེད་གསོན་པོར་ཉམས་པ་ཞེས་བརྗོད་དོ། །ཇི་ཙམ་གྱིས་ན། མིའི་བུད་མེད་གསོན་པོར་མ་ཉམས་པ་ཞེས་བགྱི། ཉེ་བར་འཁོར། ཇི་ཙམ་དུ་ངོས་གཉིས་མཉམ་ཞིང་ཉམས་པ་སྟེ། དེ་བཞིན་དུ་ཤི་བ་དང་། མི་མ་ཡིན་པ་མོ་དང་། དུད་འགྲོའི་སྐྱེ་གནས་སུ་གཏོགས་པ་དང་། སྐྱེས་པ་དང་། མ་ནིང་དང་། མ་ནིང་མོ་རྣམས་ལ་ཡང་བརྗོད་པར་བྱའོ།། བཙུན་པ། བཅོམ་ལྡན་འདས་ཀྱིས་བར་ཆད་དང་བཅས་པར་བཅུག་ན། མཐར་འགྱུར་རོ། །ཞེས་གསུངས་པ་གང་ལགས་པ། བཙུན་པ། རེ་ཞིག་དགེ་སློང་གིས་གོས་རྔམས་སྟུག་པོའམ། ཕྱིང་པས་དཀྲིས་ཏེ་བཅུག་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །གལ་ཏེ་སེང་རས་སམ། དར་ལའམ། གོས་སྲབ་མོས་དཀྲིས་ཏེ་བཅུག་ན། ཅིར་འགྱུར་ལགས། མཐར་འགྱུར་རོ། །བཙུན་པ། རེ་ཞིག་དགེ་སློང་གིས་ལམ་ལ་ལམ་དུ་འདུ་ཤེས་ཏེ་བཅུག་ན། ཅིར་འགྱུར་ལགས། མཐར་འགྱུར་
རོ། །ལམ་ལ་ལམ་མ་ལགས་པར་འདུ་ཤེས་ཏེ་བཅུག་ན། ཅིར་འགྱུར་ལགས། མཐར་འགྱུར་རོ། །ལམ་ལ་ཐེ་ཚོམ་འཚལ་ཏེ་བཅུག་ན། ཅིར་འགྱུར་ལགས། མཐར་འགྱུར་རོ། །ལམ་མ་ལགས་པ་ལམ་མ་ལགས་པར་འདུ་ཤེས་ཏེ་བཅུག་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །ལམ་མ་ལགས་པ་ལ་ལམ་དུ་འདུ་ཤེས་ཏེ་བཅུག་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །ལམ་མ་ལགས་པ་ལ་ཐེ་ཚོམ་འཚལ་ཏེ་བཅུག་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་བར་ཆད་དང་བཅས་པ་ལ་བར་ཆད་དང་བཅས་པར་འདུ་ཤེས་ཏེ་བཅུག་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བར་ཆད་དང་བཅས་པ་ལ་བར་ཆད་མ་མཆིས་པར་འདུ་ཤེས་ཏེ་བཅུག་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བར་ཆད་མ་མཆིས་པ་ལ་བར་ཆད་དང་བཅས་པར་འདུ་ཤེས་ཏེ་བཅུག་ན། ཅིར་འགྱུར་ལགས། མཐར་འགྱུར་རོ། །བར་ཆད་མ་མཆིས་པ་ལ་བར་ཆད་མ་མཆིས་པར་འདུ་ཤེས་ཏེ་བཅུག་ན། ཅིར་འགྱུར་ལགས། མཐར་འགྱུར་རོ། །བཙུན་པ། དགེ་སློང་གིས་མིའི་བུད་མེད་དང་ལྷན་ཅིག་མི་ཚངས་པར་སྤྱད་ན། མཐར་མི་འགྱུར་བ་ལྟ་མཆིས་སམ། ཡོད་དེ། སྔར་ལྟུང་བ་བྱུང་བ་དང་། རྐུ་ཐབས་སུ་གནས་པ་དང་། དང་པོ་མི་མཐུན་པ་ཅན་དང་། མ་ནིང་དང་། དགེ་སློང་མ་སུན་ཕྱུང་བས་མི་ཚངས་པར་སྤྱད་པ་ནི། ཉེས་བྱས་སུ་འགྱུར་རོ། །ཇི་ལྟར་དགེ་སློང་ལ་མི་ཚངས་པར་སྤྱད་པའི་རྐྱེན་གྱིས་མཐར་འགྱུར་བ་དེ་བཞིན་དུ་བསླབ་པ་བྱིན་པ་དང་། དགེ་སློང་མ་ལ་ཡང་མཐར་འགྱུར་རོ། །དགེ་སློབ་མ་དང་། དགེ་ཚུལ་དང་། དགེ་ཚུལ་མ་ལ་ནི། ཉེས་བྱས་སོ། །སྡོམ་ལ། བརྒྱད་བཅུའི་ཚོགས་དང་རྒྱན་རྡོ་དང་། །རིན་ཐང་མ་བརྩིས་མཚན་དང་ནི། །བསྙེན་པར་རྫོགས་པ་བདུན་ཚན་བྱས། །ཤོ་གམ་ལ་ནི་བཅུ་གཉིས་སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བར་འཁོར་གྱིས་ཞུས་པ། བཙུན་པ། བཅོམ་ལྡན་འདས་ཀྱིས་ཡང་དགེ་སློང་གང་གཞན་དག་གི་གྲོང་ན་འདུག་པའམ། དགོན་པ་ན་འདུག་པ་མ་བྱིན་པ་རྐུ་བའི་གྲངས་སུ་གཏོགས་པ་བླངས་ན།ཇི་ཙམ་མ་བྱིན་པར་བླངས་པས། དེ་རྒྱལ་པོའམ། བློན་པོ་ཆེན་པོས་བཟུང་ནས་དེ་ལ་འདི་སྐད་ཅེས། ཨེ་མ་ཀྱེ་ཁྱོད་ནི་རྐུན་མའོ། །བྱིས་པའོ། །བླུན་
པོའོ། །རྐུ་བའོ། །ཞེས་ཟེར་ཞིང་གསོད་དམ། འཆིང་ངམ། སྤྱུག་ཀྱང་རུང་སྟེ། དགེ་སློང་མ་བྱིན་པ་ལེན་པ་དེ་ལྟ་བུ་ལེན་པ་དེ་ཡང་ཕམ་པར་གྱུར་བ་ཡིན་གྱི། གནས་པར་མི་བྱའོ། །ཞེས་གསུངས་པ་གང་ལགས་པ། བཙུན་པ། དགེ་སློང་གིས་བརྒྱད་བཅུ་པའི་ཚོགས་གཉི་གར་བདག་ཉིད་གཏོགས་པར་བགྲངས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་བའི་ཉེས་བྱས་སུ་འགྱུར་རོ། །དེའི་སྐལ་པའི་ཆོས་དང་མཐུན་པ་གང་ལགས། དང་པོ་ལས་སོ། །གལ་ཏེ་བླངས་ནས་བསྙོན་ན། ཅིར་འགྱུར་ལགས། ཤེས་བཞིན་དུ་བརྫུན་དུ་སྨྲས་པས་ལྟུང་བྱེད་དུ་འགྱུར་རོ། །གང་གི་ཚེ་གྲུབ་པ་དེའི་ཚེ་ནི། རིན་ཐང་བརྩི་བར་བྱའོ། །བཙུན་པ། རེ་ཞིག་མི་རྣམས་ཀྱིས་རྒྱན་རྡོ་བཀོད་པར་གྱུར་ལ། དེ་ནས་དགེ་སློང་གིས་བརྐུ་སེམས་ཀྱིས་རྒྱན་རྡོ་རིན་ཆེན་པོ་ཞིག་།རྔམས་ཆུང་ངུའི་གནས་ནས་གནས་གཞན་དུ་སྦེད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །གལ་ཏེ་རྐུ་སེམས་ཀྱིས་རྒྱན་རྡོ་རིན་པོ་ཆེ་ཆུང་ངུ་ཞིག་རྔམས་ཆེན་པོའི་གནས་ནས་གཞན་དུ་སྦེད་ན། ཅིར་འགྱུར་ལགས། མཐར་འགྱུར་རོ། །བཙུན་པ། དགེ་སློང་གིས་རིན་ཐང་མ་མཆིས་པའི་དངོས་པོ་ཞིག་བརྐུས་ན། ཅིར་འགྱུར་ལགས། མཐར་འགྱུར་རོ། །རིན་ཐང་མེད་པའི་དངོས་པོ་གང་ཞེ་ན། གང་ཞིག་རིན་ཆེ་ཆེས་པ་ཉིད་ཀྱིས་རིན་ཐང་གདབ་པར་མི་ནུས་པའོ། །གང་ཞིག་ཆུང་ཆེས་བ་ཉིད་ཀྱིས་རིན་ཐང་གདབ་པའི་རིན་མི་ཆོག་པ་དེ་ཡང་རིན་ཐང་མེད་པ་ཡིན་ནོ། །དེ་བརྐུས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་དངོས་པོ་ཞིག་རིན་མ་བརྩིས་པར་བརྐུས་ན། ཅིར་འགྱུར་ལགས། གལ་ཏེ་དངོས་པོ་ཡོངས་སུ་ཚང་ན། མཐར་འགྱུར་རོ། །ཅི་སྟེ་མ་ཚང་ན། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་བརྐུ་བར་སྦྱོར་བར་བགྱིས་པ་ལས། དེའི་མཚན་གྱུར་ཏེ་དགེ་སློང་མར་རེད་ནས་བརྐུས་ན། ཅིར་འགྱུར་ལགས། མཐར་འགྱུར་རོ། །བཙུན་པ། རེ་ཞིག་དགེ་སློང་མས་བརྐུ་བར་སྦྱོར་བར་བགྱིས་པ་ལས། དེའི་མཚན་གྱུར་ཏེ་དགེ་སློང་དུ་རེད་ནས་བརྐུས་ན་ཅིར་འགྱུར་ལགས། མཐར་འགྱུར་རོ། །བཙུན་པ། རེ་ཞིག་བསྙེན་པར་མ་རྫོགས་པས་བརྐུ་བར་སྦྱོར་བ་བགྱིས་ལ། བསྙེན་པར་མ་རྫོགས་པར་བརྐུས་ན་ཅིར་འགྱུར་
ལགས། ཉེས་བྱས་སོ། །བསྙེན་པར་མ་རྫོགས་པར་བརྐུ་བར་སྦྱོར་བར་བགྱིས་ལ། བསྙེན་པར་རྫོགས་ཀར་བརྐུས་ན། ཅིར་འགྱུར་ལགས། ཉེས་བྱས་སོ། །བསྙེན་པར་མ་རྫོགས་པས་བརྐུ་བར་སྦྱོར་བ་བགྱིས་ལ། བསྙེན་པར་རྫོགས་ཏེ་བརྐུས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བསྙེན་པར་རྫོགས་ཀར་བརྐུ་བར་སྦྱོར་བ་བགྱིས་ལ། བསྙེན་པར་རྫོགས་ཀར་བརྐུས་ན། ཅིར་འགྱུར་ལགས། ཉེས་བྱས་སོ། །བསྙེན་པར་རྫོགས་ཀར་བརྐུ་བར་སྦྱོར་བ་བགྱིས་ལ། བསྙེན་པར་རྫོགས་ཏེ་བརྐུས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བསྙེན་པར་རྫོགས་ཏེ་བརྐུ་བར་སྦྱོར་བར་བགྱིས་ལ། བསྙེན་པར་རྫོགས་ཏེ་བརྐུས་ན། ཅིར་འགྱུར་ལགས། མཐར་འགྱུར་རོ། །བསྙེན་པར་རྫོགས་ཏེ་བརྐུ་བར་སྦྱོར་བར་བགྱིས་ལ། བསྙེན་པར་མ་རྫོགས་པར་བརྐུས་ན། ཅིར་འགྱུར་ལགས། ཉེས་བྱས་སོ། །བཙུན་པ། རེ་ཞིག་དགེ་སློང་གིས་ཤོ་གམ་ནམ་མཁའ་ལས་བཟླས་ན། ཅིར་འགྱུར་ལགས། དངོས་པོ་ཇི་ལྟ་བ་བཞིན་ནོ། །ཅི་སྟེ་རྫུ་འཕྲུལ་གྱིས་བཟླས་ན། ཉེས་པ་མེད་དོ། །བཙུན་པ། རེ་ཞིག་དགེ་སློང་གིས་ཤུལ་མ་ལགས་པ་ནས་ཤོ་གམ་བཟླས་ན། ཅིར་འགྱུར་ལགས། གལ་ཏེ་དེ་རྣམས་ཀྱི་ས་ལས་འདས་ན། མཐར་འགྱུར་རོ། །ས་ལས་མ་འདས་ན་ནི། ཉེས་པ་སྦོམ་པོར་འགྱུར་རོ། །བཙུན་པ་རེ་ཞིག་དགེ་སློང་གིས་ཤོ་གམ་བཅད་པའི་རྫས་ཀྱི་དངོས་པོ་གཡར་དུ་སྩལ་ཏེ་བཟླས་ན། ཅིར་འགྱུར་ལགས། མཐར་འགྱུར་རོ། །ཚེམ་བུའི་གསེབ་ཏུ་སྩལ་ཏེ་བཟླས་ན། ཅིར་འགྱུར་ལགས། མཐར་འགྱུར་རོ། །བཙུན་པ། རེ་ཞིག་དགེ་སློང་གིས་ཚོང་པ་རྣམས་ལ་འདི་སྐད་དུ་ཚུར་ཤོག་།འདོང་ཞེས་སྨྲས་ན། ཅིར་འགྱུར་ལགས། ཉེས་བྱས་སོ། །བཙུན་པ། རེ་ཞིག་དགེ་སློང་གིས་ཚོང་པ་རྣམས་ལ་ཐབས་ཀྱིས་སྨྲས་ན། ཅིར་འགྱུར་ལགས། ཉེས་བྱས་སོ། །བཙུན་པ་རེ་ཞིག་ཚོང་པ་རྣམས་ཀྱི་ཤོ་གམ་དུ་གཏོགས་པའི་རྫས་ཤོ་གམ་གྱི་སར་མ་ཕྱིན་པར་ཚོང་པས་དགེ་སློང་ལ་འདི་སྐད་ཅེས། འཕགས་པ། ཤོ་གམ་གྱི་གནས་ལས་ཟློས་ལ་སྩོལ་ཅིག་།ཅེས་བགྱིས་པ་ལས། དེ་དགེ་སློང་གིས་བཟླས་ན། ཅིར་འགྱུར་ལགས། ཉེས་བྱས་སོ། །བཙུན་པ། རེ་ཞིག་ཚོང་པ་རྣམས་ཀྱི་ཤོ་གམ་གྱི་རྫས་རྣམས་ཤོ་གམ་གྱི་གནས་སུ་མ་ཕྱིན་པར་དགེ་སློང་ལ་འདི་སྐད་ཅེས། འཕགས་པ། ཤོ་གམ་གྱི་གནས་ནས་ཟློས་ལ་སྩོལ་ཅིག་དང་། དེར་ཤོ་གམ་ཅི་མཆིས་པ་དེའི་ཕྱེད་ཁྱོད་ལ་འབུལ་ལོ། །ཞེས་བགྱིས་པ་ལས། དེ་དགེ་སློང་གིས་བཟླས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་
རོ། །བཙུན་པ། རེ་ཞིག་ཚོང་པ་རྣམས་ཀྱི་ཤོ་གམ་དུ་གཏོགས་པའི་རྫས་ཤོ་གམ་གྱི་གནས་སུ་མ་ཕྱིན་པར་ཚོང་པས་དགེ་སློང་ལ་འདི་སྐད་ཅེས། འཕགས་པས་ཤོ་གམ་གྱི་གནས་ལས་ཟློས་ལ་སྩོལ་ཅིག་དང་། དེར་ཤོ་གམ་ཅི་མཆིས་པ་ཁྱོད་ལ་འབུལ་ལོ། །ཞེས་བགྱིས་པ་ལས། དེ་དགེ་སློང་གིས་བཟླས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་ཚོང་པ་རྣམས་ཀྱི་ཤོ་གམ་གྱི་རྫས་ཤོ་གམ་གྱི་གནས་སུ་མ་ཕྱིན་པར་དགེ་སློང་གིས་ལམ་གཞན་ཞིག་བསྟན་ན། ཅིར་འགྱུར་ལགས། ཉེས་བྱས་སོ། །བཙུན་པ། རེ་ཞིག་ཚོང་པ་རྣམས་ཀྱི་ཤོ་གམ་དུ་གཏོགས་པའི་རྫས་ཤོ་གམ་གྱི་གནས་སུ་ཕྱིན་པ་ལས། ཚོང་པས་དགེ་སློང་ལ་འདི་སྐད་ཅེས། འཕགས་པས་ཤོ་གམ་གྱི་གནས་ལས་ཟློས་ལ་སྩོལ་ཅིག་།ཅེས་བགྱིས་པ་ལས། དེ་དགེ་སློང་གིས་བཟླས་ན། ཅིར་འགྱུར་ལགས། ཤོ་གམ་གྱི་རིན་ཐང་བརྩི་བར་བྱའོ། །བཙུན་པ། རེ་ཞིག་ཚོང་པ་རྣམས་ཀྱི་ཤོ་གམ་དུ་གཏོགས་པའི་རྗེས་ཤོ་གམ་གྱི་གནས་སུ་ཕྱིན་པ་ལས། ཚོང་པས་དགེ་སློང་ལ་འདི་སྐད་ཅེས། འཕགས་པས་ཤོ་གམ་གྱི་གནས་ལས་ཟློས་ལ་སྩོལ་ཅིག་དང་། ཤོ་གམ་ཅི་མཆིས་པ་དེའི་ཕྱེད་ཁྱོད་ལ་འབུལ་ལོ། །ཞེས་བགྱིས་པ་ལས། དེ་དགེ་སློང་གིས་བཟླས་ན། ཅིར་འགྱུར་ལགས། ཤོ་གམ་གྱི་རིན་ཐང་བརྩི་བར་བྱའོ། །བཙུན་པ། རེ་ཞིག་ཚོང་པ་རྣམས་ཀྱི་ཤོ་གམ་དུ་གཏོགས་པའི་རྫས་ཤོ་གམ་གྱི་གནས་སུ་ཕྱིན་པ་ལས་ཚོང་པས། དགེ་སློང་ལ་འདི་སྐད་ཅེས། འཕགས་པས་ཤོ་གམ་གྱི་གནས་ནས་ཟློས་ལ་སྩོལ་ཅིག་དང་། ཤོ་གམ་ཅི་མཆིས་པ་རིལ་གྱིས་ཁྱོད་ལ་འབུལ་ལོ། །ཞེས་བགྱིས་པ་ལས། དེ་དགེ་སློང་གིས་བཟླས་ན། ཅིར་འགྱུར་ལགས། ཤོ་གམ་གྱི་རིན་ཐང་བརྩི་བར་བྱའོ། །སྡོམ་ལ། ཆོས་གོས་གདང་ལ་བཞི་དག་དང་། རྐུ་དང་ན་ན་ཀ་གསུམ་དང་། །སྦྱོར་བ་གསུམ་དང་ཡིང་གཉིས་དང་། །གླིང་རྣམས་གཞན་ཕྱིར་མི་མ་ཡིན། །བཙུན་པ། རེ་ཞིག་དགེ་སློང་གིས་རྐུ་སེམས་ཀྱིས་ཆོས་གོས་ཀྱི་གདང་གི་ཡ་ཐོག་འགུམས་ཤིང་། རང་གི་བའི་འདུ་ཤེས་ཀྱིས་མ་ཐོག་བརྐུས་ན། ཅིར་འགྱུར་ལགས། སྔ་མ་ལ་ཉེས་པ་སྦོམ་པོར་འགྱུར་རོ། །ཕྱི་མ་ལ་ནི། ལྟུང་བ་མེད་དོ། །བཙུན་པ། རེ་ཞིག་དགེ་སློང་གིས་རང་གི་བའི་འདུ་ཤེས་ཀྱིས་ཆོས་གོས་ཀྱི་གདང་གི་ཡ་ཐོག་འགུམས་ཤིང་། རྐུ་སེམས་ཀྱིས་མ་ཐོག་འགུམས་ན། ཅིར་འགྱུར་ལགས། ཕྱི་
མ་ལ་ཉེས་པ་སྦོམ་པོར་འགྱུར་རོ། །དང་པོ་ལ་ནི། ལྟུང་བ་མེད་དོ། །བཙུན་པ། རེ་ཞིག་དགེ་སློང་གིས་ཆོས་གོས་ཀྱི་གདང་རྐུ་སེམས་ཀྱིས་རྐུ་བ་ན། ཆོས་གོས་ཀྱི་གདང་དེ་ལ་ཆོས་གོས་དག་གཟར་བཞིན་དུ་དེས་ཆོས་གོས་ཀྱི་གདང་དང་བཅས་ཏེ་འཚལ་ན། ཅིར་འགྱུར་ལགས། ཆོས་གོས་ཀྱི་གདང་གི་རིང་ཐང་བརྩི་བར་བྱའོ། །བཙུན་པ། རེ་ཞིག་ཆོས་གོས་ཀྱི་གདང་ལ་ཆོས་གོས་དག་གཟར་ཏེ་མཆིས་པ་ལས། དེ་དག་དགེ་སློང་བཞིའམ། དེ་བས་མང་བ་ཞིག་གིས་བརྐུས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །གལ་ཏེ་སོ་སོར་བགོས་པ་ལས། དེ་རེ་རེས་མ་ཤ་ཀ་ལྔ་ཐོབ་ན་ནི། མཐར་འགྱུར་རོ། །བཙུན་པ། རྐུ་བ་ལ་དུ་ཞིག་མ་ཆིས་ལགས། ཉེ་བར་འཁོར། དྲུག་ཡོད་དེ། དེ་མི་སྟེར་བར་རྐུ་བ་དང་། མཐུས་རྐུ་བ་དང་། ཕྱིར་སྦྱིན་པ་རྐུ་བ་དང་། གཏམས་པ་རྐུ་བ་དང་། ཡོངས་སུ་བརྟགས་པ་རྐུ་བ་དང་། ཆོས་རྐུ་བའོ། །བཙུན་པ། བཅོམ་ལྡན་འདས་ཀྱིས་རྐུ་བ་དྲུག་ཏུ་གསུངས་པ་གང་དག་ལགས་པ་འདི་དག་ལས། གང་གིས་མཐར་འགྱུར་ལགས། ཉེ་བར་འཁོར་ཆོས་རྐུ་བ་མ་གཏོགས་པ་ལྷག་མ་རྣམས་ཀྱིས་མཐར་འགྱུར་རོ། །བཙུན་པ། བཅོམ་ལྡན་འདས་ཀྱིས་མ་ཤ་ཀ་ལྔ་བརྐུས་ན། མཐར་འགྱུར་རོ། །ཞེས་གསུངས་པ་གང་ལགས་པ། བཙུན་པ། གལ་ཏེ་དགེ་སློང་གིས་མ་ཤ་ཀ་གསུམ་བརྐུས་ན། མཐར་འགྱུར་བ་ལྟ་མཆིས་སམ། ཡོད་དེ། ཉེ་བར་འཁོར། གལ་ཏེ་མ་ཤ་ཀ་གསུམ་གྱིས་ཀརྴ་པ་ཎ་ཁུགས་པར་འགྱུར་ནའོ། །བཙུན་པ། གལ་ཏེ་དགེ་སློང་གིས་མ་ཤ་ཀ་ལྔ་བརྐུས་ཀྱང་མཐར་མི་འགྱུར་བ་ལྟ་མཆིས་སམ། ཡོད་དེ། གལ་ཏེ་མ་ཤ་ཀ་བཅུའམ། མ་ཤ་ཀ་བཅུ་ལྷག་པས་ཀརྴ་པ་ཎ་ཁུགས་ནའོ། །བཙུན་པ། བཅོམ་ལྡན་འདས་ཀྱིས་མ་ཤ་ཀ་ལྔ་བརྐུས་པས་མཐར་འགྱུར་རོ། །ཞེས་གསུངས་པ་གང་ལགས་པ། ན་ན་ཀ་ཇི་ལྟ་བུའི་མ་ཤ་ཀ་ལྔ་བརྐུས་ན། མཐར་འགྱུར་ལགས། མ་ཤ་ཀ་ཉི་ཤུས་ན་ན་ཀ་ཁུགས་པའིའོ། །མ་ཤ་ཀ་ཇི་ལྟ་བུ་ལགས་ཀ་ཀ་ནི། བཞི་ཁུགས་པས་སོ། །ཀརྴ་པ་ཎ་ཇི་ལྟ་བུ་ལགས། རྒྱལ་པོ་རྨ་བྱ་པས་བྱས་པའོ། །བཙུན་པ། བཅོམ་ལྡན་འདས་ཀྱིས་མ་ཤ་ཀ་ལྔ་བརྐུས་ན། མཐར་འགྱུར་རོ། །ཞེས་གསུངས་པ་གང་ལགས་པ། བཙུན་པ། གལ་ཏེ་དགེ་སློང་གིས་ཀརྴ་པ་ཎ་སྟོང་བརྐུས་ཀྱང་མཐར་མི་འགྱུར་བ་ལྟ་མཆིས་སམ། ཡོད་དེ། གལ་ཏེ་བོར་བར་འདུ་ཤེས་ཏེ་བརྐུས་ནའོ། །
བཙུན་པ། བཅོམ་ལྡན་འདས་ཀྱིས་མ་ཤ་ཀ་ལྔ་བརྐུས་ན། མཐར་འགྱུར་རོ། །ཞེས་གསུངས་པ་གང་ལགས་པ། གལ་ཏེ་བཙུན་པ། དགེ་སློང་གིས་མ་ཤ་ཀ་ལྔ་བརྐུས་ཀྱང་མཐར་མི་འགྱུར་བ་ལྟ་མཆིས་སམ། ཡོད་དེ། གལ་ཏེ་རེ་རེ་ནས་སམ། གཉིས་གཉིས་ནས་སམ། གསུམ་གསུམ་ནས་སམ། བཞི་བཞི་ནས་བརྐུའི། ནམ་ཡང་ལྔ་མ་ཡིན་ནོ། །བཙུན་པ། རེ་ཞིག་དགེ་སློང་གིས་ཡོ་བྱད་ཆེན་པོ་ཞིག་བདག་གི་བའི་འདུ་ཤེས་ཀྱིས་བླངས་ལ་རྐུ་སེམས་ཀྱིས་སྦེད་ན། ཅིར་འགྱུར་ལགས། མཐར་འགྱུར་རོ། །གལ་ཏེ་དེ་བཙུན་པ་རྐུ་སེམས་ཀྱིས་བླངས་ལ། བདག་གི་བའི་འདུ་ཤེས་ཀྱིས་སྦེད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་ཅི་འདི་དེའི་ཡིན་ནམ། འདི་དེའི་མ་ཡིན། དེ་འདི་ཡིན་ནམ། དེ་འདི་མ་ཡིན་སྙམ་སོམ་ཉི་དང་། ཐེ་ཚོམ་འཚལ་བཞིན་དུ་དེ་ཡང་བརྐུས་ན། ཅིར་འགྱུར་ལགས། མཐར་འགྱུར་རོ། །བཙུན་པ། རེ་ཞིག་དགེ་སློང་གིས་ནུབ་ཀྱི་བ་ལང་སྤྱོད་ཀྱི་གླིང་དུ་མ་སྩལ་བར་བརྐུས་ན། ཅིར་འགྱུར་ལགས། གལ་ཏེ་དེ་དག་གི་ལྟར་བརྩིས་ཏེ་མ་ཤ་ཀ་ལྔ་བརྐུས་ན། མཐར་འགྱུར་རོ། །བཙུན་པ། ཤར་གྱི་ལུས་འཕགས་གླིང་དུ་མ་སྩལ་བར་བརྐུས་ན། ཅིར་འགྱུར་ལགས། གལ་ཏེ་དེ་དག་གི་ལྟ་བར་བརྩིས་ཏེ་མ་ཤ་ཀ་ལྔ་བརྐུས་ན། མཐར་འགྱུར་རོ། །བཙུན་པ། བྱང་གི་སྒྲ་མི་སྙན་གྱི་གླིང་དུམ་སྩལ་བར་བརྐུས་ན། ཅིར་འགྱུར་ལགས། ཉེ་བར་འཁོར། དེ་ན་ནི། མ་བྱིན་པར་ལེན་པ་མེད་དེ། གལ་ཏེ་རྐུ་སེམས་བསྐྱེད་ན་ནི། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་མ་སྨྲས་པར་གཞན་གྱི་དོན་དུ་བརྐུས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་མིའི་མ་ལགས་པ་ལ་མིའི་མ་ལགས་པར་འདུ་ཤེས་ཏེ་མ་སྩལ་བར་བརྐུས་ན། ཅིར་འགྱུར་ལགས། ཉེས་བྱས་སོ། །མིའི་མ་ལགས་པ་ལ་མི་ཡིར་འདུ་ཤེས་ཏེ་མ་སྩལ་བར་བརྐུས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མིའི་ལ་མིའི་མ་ལགས་པར་འདུ་ཤེས་ཏེ་མ་སྩལ་པར་བརྐུས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མིའི་ལ་མི་ཡིར་འདུ་ཤེས་ཏེ་མ་སྩལ་བར་བརྐུས་ན། ཅིར་འགྱུར་ལགས། མཐར་འགྱུར་རོ།། །།སྡོམ་ལ། མཆོད་རྟེན་སྐུ་གདུང་གླེགས་བམ་དང་། །དགེ་འདུན་མང་བསྡོས་བརྒྱུད་པ་དང་། །འདུ་ཤེས་གཉིས་དང་དེ་བཞིན་གནས། །མི་དབང་ཁྱིམ་ནི་ཐ་མ་
ཡིན། །བཙུན་པ། རེ་ཞིག་དགེ་སློང་གིས་མཆོད་རྟེན་དང་། མཆོད་རྟེན་གྱི་གནས་ལས་རྒྱན་བརྐུས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་སྟོན་པའི་སྐུ་གདུང་དག་བརྐུས་ན། ཅིར་འགྱུར་ལགས། མཐར་འགྱུར་རོ། །ཅི་སྟེ་འདི་ནི། བདག་གི་སྟོན་པ་སྟེ། བདག་གིས་ཀྱང་འདི་ལ་བཀུར་སྟི་བྱའོ། །སྙམ་ནས་མཆོད་པའི་ཕྱིར་བརྐུས་ན། ཉེས་བྱས་སུ་འགྱུར་རོ། །བཙུན་པ། རེ་ཞིག་དགེ་སློང་གིས་གླེགས་བམ་བརྐུས་ན། ཅིར་འགྱུར་ལགས། གླེགས་བམ་གྱི་རིན་ཐང་བརྩི་བར་བྱའོ། །བཙུན་པ། རེ་ཞིག་དགེ་སློང་གིས་ཕྱོགས་བཞིའི་དགེ་འདུན་གྱི་མ་སྩལ་བར་བརྐུས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་གང་ཟག་མང་པོའི་མ་སྩལ་པར་བརྐུས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །གལ་ཏེ་རྒྱུད་རེ་རེ་ལས་མ་ཤ་ལྔ་བྱུང་ན། མཐར་འགྱུར་རོ། །བཙུན་པ། རེ་ཞིག་དགེ་སློང་གིས་ཡོངས་སུ་བརྟགས་པ་མ་སྩལ་བར་བརྐུས་ན། ཅིར་འགྱུར་ལགས། ཉེས་བྱས་སོ། །བཙུན་པ། རེ་ཞིག་དགེ་སློང་དག་གིས་མང་པོ་ཞིག་བརྒྱུད་དེ་མ་སྩལ་པར་བརྐུས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །གལ་ཏེ་སོ་སོར་བགོས་ན། ཇི་སྙེད་བདག་གིར་བྱས་པ་དེ་སྙེད་ཀྱི་རིན་ཐང་བརྩི་བར་བྱའོ། །བཙུན་པ། རེ་ཞིག་དགེ་སློང་གིས་གཞན་གྱིར་འདུ་ཤེས་ཏེ་མ་སྩལ་པར་བརྐུས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་ཡོངས་སུ་བཟུང་བ་ལ་ཡོངས་སུ་བཟུང་བར་འདུ་ཤེས་ཏེ་མ་སྩལ་བར་བརྐུས་ན། ཅིར་འགྱུར་ལགས། མཐར་འགྱུར་རོ། །ཡོངས་སུ་བཟུང་བ་ལ་ཡོངས་སུ་མ་བཟུང་བར་འདུ་ཤེས་ཏེ་མ་སྩལ་བར་བརྐུས་ན། ཅིར་འགྱུར་ལགས། ལྟུང་བ་མེད་དོ། །ཡོངས་སུ་མ་བཟུང་བ་ལ་ཡོངས་སུ་བཟུང་བར་འདུ་ཤེས་ཏེ་མ་སྩལ་བར་བརྐུས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །ཡོངས་སུ་མ་བཟུང་བ་ལ་ཡོངས་སུ་མ་བཟུང་བར་འདུ་ཤེས་ཏེ་མ་སྩལ་བར་བརྐུས་ན། ཅིར་འགྱུར་ལགས། ཉེས་པ་མེད་དོ། །བཙུན་པ། བཅོམ་ལྡན་འདས་ཀྱིས་ཡོ་བྱད་ཆེན་པོ་ཞིག་གནས་ནས་བསྐྱོད་ན། མཐར་འགྱུར་རོ། །ཞེས་གསུངས་པ་གང་ལགས་པ། བཙུན་པ། དགེ་སློང་གིས་ཡོ་བྱད་ཆེན་པོ་ཞིག་གནས་ནས་བསྐྱོད་ཀྱང་། མཐར་མི་འགྱུར་བ་ལྟ་མཆིས་སམ།
ཡོད་དེ་གནས་ཁང་དུ་བཞག་པར་འགྱུར་པའི་གནས་དེ་བརྐུས་ནའོ། །བཙུན་པ། རེ་ཞིག་དགེ་སློང་གིས་རྙེད་པ་མི་དབང་བར་འདི་བདག་དབང་ངོ་། །ཞེས་དེ་སྐད་སྨྲས་ན། ཅིར་འགྱུར་ལགས། དེ་ཤེས་བཞིན་དུ་རྫུན་སྨྲས་པས་ལྟུང་བྱེད་དོ། །གལ་ཏེ་རྐུ་སེམས་ཉེ་བར་གནས་པར་གྱུར་ན། ཉེས་པ་སྦོམ་པོར་འགྱུར་བའི་ཉེས་བྱས་སུ་འགྱུར་ཏེ། གྲུབ་ན་ནི། རིན་ཐང་བརྩི་བར་བྱའོ། །བཙུན་པ། དགེ་སློང་གཅིག་པུ་ཞིག་ཁང་པར་ཞུགས་པ་ལ་མ་སྩལ་བར་ལེན་པའི་རྐྱེན་གྱིས་མཐར་འགྱུར་བ་མཆིས་ལགས་སམ། ཡོད་དེ། གལ་ཏེ་རྐུ་བར་སྦྱོར་བ་བྱས་ནས་ཞུགས་སམ། ཞུགས་ནས་སྦྱོར་བ་བྱེད་ནའོ། །བཙུན་པ། དགེ་སློང་གི་ཡོ་བྱད་ཆེན་པོ་ཞིག་མ་སྩལ་བར་བླངས་ཀྱང་མཐར་མི་འབྱུང་བལྟ་མཆིས་ལགས་སམ། ཡོད་དེ། སྔར་ལྟུང་བ་བྱུང་བ་དང་། རྐུ་ཐབས་སུ་གནས་པ་དང་། དང་པོ་མི་མཐུན་པ་དང་། མ་ནིང་དང་། དགེ་སློང་མ་སུན་ཕྱུང་བ་ལ་ནི། ཉེས་བྱས་སུ་འགྱུར་རོ། །ཇི་ལྟར་དགེ་སློང་ལ་མ་བྱིན་པར་བླངས་པའི་རྐྱེན་གྱིས་མཐར་འགྱུར་བ་དེ་བཞིན་དུ་བསླབ་པ་བྱིན་པ་དང་། དགེ་སློང་མ་ལ་ཡང་མཐར་འགྱུར་རོ། །དགེ་སློབ་མ་དང་། དགེ་ཚུལ་དང་། དགེ་ཚུལ་མ་ལ་ནི། ཉེས་བྱས་སོ།། །།སྡོམ་ལ། དུད་འགྲོ་གསུམ་དང་ལས་སྲིད་དང་། །སྲིད་པ་མ་ལ་བཞི་ཚན་དང་། མངལ་གཉིས་དང་ནི་གསོ་བ་དང་། འདུ་ཤེས་ལ་ནི་བཞི་ཚན་ནོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་པར་འཁོར་གྱིས་ཞུས་པ། བཙུན་པ། བཅོམ་ལྡན་འདས་ཀྱིས་ཡང་དགེ་སློང་གང་མིའམ། མིར་ཆགས་པ་ལ་བསམ་བཞིན་དུ་རང་གིས་ལག་བསྟར་ཏེ་སྲོག་བཅད་དམ། དེ་ལ་མཚོན་འདེབས་སམ། དེ་ལ་མཚོན་ཐོགས་པ་གཉེར་ཏམ། དེ་འཆིར་བཅུག་གམ། དེ་འཆི་བའི་བསྔགས་པ་བརྗོད་ཀྱང་རུང་སྟེ། དེ་ལ་འདི་སྐད་ཅེས། ཀྱེ་མི་ཁྱོད་འཚོ་བ་མི་གཙང་བ་ངན་པ་འདིས་ཅི་ཞིག་བྱ། ཀྱེ་མི་ཁྱོད་གསོན་པ་བས་ཤི་བླའོ། །ཞེས་ཟེར་ཞིང་དེ་ལྟར་སེམས་ཀྱི་འདོད་པ་དང་། སེམས་ཀྱི་ཀུན་ཏུ་རྟོག་པ་དག་གིས་རྣམ་གྲངས་དུ་མས་དེ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་དེ། དེ་ཡང་བརྩོན་པ་དེ་ལྟ་བུས་དུས་བྱས་ན། དགེ་སློང་དེ་ཡང་ཕས་ཕམ་པར་གྱུར་པ་ཡིན་གྱི། གནས་
པར་མི་བྱའོ་ཞེས་གསུངས་པ་གང་ལགས་པ། བཙུན་པ་རེ་ཞིག་དགེ་སློང་གིས་གསང་སྔགས་དང་། སྨན་དག་གིས་མི་དུད་འགྲོའི་སྐྱེ་གནས་པར་བསྒྱུར་ཏེ་སྲོག་དང་ཕྲལ་ན། ཅིར་འགྱུར་ལགས། མཐར་འགྱུར་རོ། །བཙུན་པ། རེ་ཞིག་དགེ་སློང་གིས་གསང་སྔགས་དང་། སྨན་དག་གིས་བདག་ཉིད་དུད་འགྲོའི་སྐྱེ་གནས་པར་བསྒྱུར་ཏེ་མི་སྲོག་དང་ཕྲལ་ན། ཅིར་འགྱུར་ལགས། གལ་ཏེ་མི་གསད་པར་བྱར་མི་རུང་བར་དགེ་སློང་དུ་འདུ་ཤེས་ཡོད་ན། དེ་ཡང་བྱེད་ན། མཐར་འགྱུར་རོ། །གལ་ཏེ་དགེ་སློང་དུ་འདུ་ཤེས་མེད་ན། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་ཕ་དང་མ་སྲོག་དང་ཕྲལ་ཡང་མཐར་མི་འགྱུར་ལ། མཚམས་མ་མཆིས་པ་ཉིད་ཀྱི་ཁ་ན་མ་ཐོ་བས་ཀྱང་རེག་པར་མི་འགྱུར་བ་ལྟ་མཆིས་ལགས་སམ། ཡོད་དེ། གང་གི་ཕ་དང་། མ་དུད་འགྲོའི་སྐྱེ་གནས་པར་གྱུར་པའོ། །བཙུན་པ། དགེ་སློང་གིས་ཕ་བཀུམ་ཡང་མཐར་མི་འགྱུར་ལ། མཚམས་མ་མཆིས་པ་ཉིད་ཀྱི་ཁ་ན་མ་ཐོ་བས་ཀྱང་རེག་པར་མི་འགྱུར་བ་ལྟ་མཆིས་ལགས་སམ། ཡོད་དེ། ཟག་པ་དང་བཅས་པའི་ལས་ཀྱི་སྲིད་པ་བསད་ནའོ། །ཉེ་བར་འཁོར། ཟག་པ་དང་བཅས་པའི་ལས་ཀྱི་སྲིད་པ་ནི། མངོན་པར་སྒྲུབ་པའི་དོན་གྱིས་ཕ་ཞེས་བྱའོ། །བཙུན་པ། རེ་ཞིག་དགེ་སློང་གིས་མ་བཀུམ་ཡང་མཐར་མི་འགྱུར་ལ། མཚམས་མ་མཆིས་པ་ཉིད་ཀྱི་ཁ་ན་མ་ཐོ་བས་ཀྱང་རེག་པར་མི་འགྱུར་བ་ལྟ་མཆིས་ལགས་སམ། ཡོད་དེ། གལ་ཏེ་སྲིད་པ་བསད་ནའོ། །ཉེ་བར་འཁོར། སྲིད་པ་ནི། སྐྱེད་པའི་དོན་གྱིས་མ་ཞེས་བྱའོ། །བཙུན་པ། རེ་ཞིག་དགེ་སློང་གིས་མ་དགུམ་པར་འཚལ་ལ་བུད་མེད་གཞན་ཞིག་བཀུམ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་བུད་མེད་གཞན་ཞིག་དགུམ་པར་འཚལ་ལ་མ་བཀུམ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་མ་འགུམ་པར་སྦྱོར་བ་བགྱིས་ལ་བུད་མེད་གཞན་ཞིག་སྲོག་དང་ཕྲལ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་བུད་མེད་གཞན་ཞིག་དགུམ་པར་སྦྱོར་བ་བགྱིས་ལམ་སྲོག་དང་ཕྲལ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་མིའི་
བུད་མེད་ཀྱི་མངལ་ན་དུད་འགྲོའི་སྐྱེ་གནས་པར་སྐྱེས་པ་བཀུམ་ན། ཅིར་འགྱུར་ལགས། ལྟུང་བྱེད་དུ་འགྱུར་རོ། །བཙུན་པ། རེ་ཞིག་དུད་འགྲོའི་སྐྱེ་གནས་སུ་སྐྱེས་པ་མོའི་མངལ་དུ་མིའི་བུ་བཀུམ་ན། ཅིར་འགྱུར་ལགས། མཐར་འགྱུར་རོ། །བཙུན་པ། རེ་ཞིག་མ་ནི། སྐྱེད་པ་ལགས་ལ། གཞན་གྱིས་གསོ་བར་བགྱིད་ལགས་ན། གང་ཞིག་སྲོག་དང་ཕྲལ་ན། མཐར་ཡང་འགྱུར་ལ། མཚམས་མ་མཆིས་པ་ཉིད་ཀྱི་ཁ་ན་མ་ཐོ་བས་ཀྱང་རེག་པར་འགྱུར་ལགས། གང་གིས་བསྐྱེད་པའོ། །བཙུན་པ། རེ་ཞིག་དགེ་སློང་གིས་མི་ལ་མི་ལགས་པར་འདུ་ཤེས་པས་བཀུམ་ན། ཅིར་འགྱུར་ལགས། མཐར་འགྱུར་རོ། །མི་ལ་མི་མ་ལགས་པར་འདུ་ཤེས་པས་བཀུམ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མིར་འདུ་ཤེས་པས་བཀུམ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མི་མ་ལགས་པར་འདུ་ཤེས་པས་བཀུམ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ།། །།སྡོམ་ལ། ཡིད་གཉིས་དང་ནི་བདག་ཉིད་དང་། །དགྲ་བཅོམ་པ་ཡང་ཉིད་ལ་བཞིན། །རྐུན་པོ་གཉིས་དང་འདུ་ཤེས་གཞན། །བདུན་ཚན་དང་ནི་ཁང་པའོ། །བཙུན་པ། རེ་ཞིག་དགེ་སློང་གིས། དེ་འདི་ཡིན་ནམ་དེ་མ་ཡིན་སྙམ་དུ་སོམ་ཉི་དང་ཐེ་ཚོམ་འཚལ་བཞིན་དུ་དེ་ཡང་སྲོག་དང་ཕྲལ་ན། ཅིར་འགྱུར་ལགས། མཐར་འགྱུར་རོ། །བཙུན་པ། རེ་ཞིག་དགེ་སློང་གིས་བདག་ཉིད་སྲོག་དང་ཕྲལ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་ཕ་དང་མ་དགུམ་པར་སྦྱོར་བ་བགྱིས་པ་ལས། བདག་ཉིད་བཀུམ་ན། ཅིར་འགྱུར་ལགས། གལ་ཏེ་ཕ་མ་སྔར་དུས་བྱས་ན། མཐར་འགྱུར་ཏེ། མཚམས་མེད་པའི་ཁ་ན་མ་ཐོ་བས་ཀྱང་རེག་པར་འགྱུར་རོ། །འོན་ཏེ་དེ་སྔར་དུས་བྱས་ན། ཉེས་པ་སྦོམ་པོར་འགྱུར་རོ། །མཚམས་མེད་པའི་ཁ་ན་མ་ཐོ་བས་རེག་པར་ནི། མི་འགྱུར་རོ། །བཙུན་པ། རེ་ཞིག་དགེ་སློང་གིས་དགྲ་བཅོམ་པ་དགུམ་པར་འཚལ་ལ་སོ་སོའི་སྐྱེ་བོ་བཀུམ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་སོ་སོའི་སྐྱེ་བོ་དགུམ་པར་འཚལ་ལ། དགྲ་བཅོམ་པ་བཀུམ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་ཏེ། མཚམས་མེད་པའི་
ཁ་ན་མ་ཐོ་བས་རེག་པར་ནི་མི་འགྱུར་རོ། །བཙུན་པ། རེ་ཞིག་དགེ་སློང་གིས་དགྲ་བཅོམ་པ་དགུམ་པར་སྦྱོར་བ་བགྱིས་ལ། སློབ་པ་སྲོག་དང་ཕྲལ་ན། ཅིར་འགྱུར་ལགས། མཐར་འགྱུར་ཏེ། མཚམས་མེད་པ་དང་ཉེ་བའི་ཁ་ན་མ་ཐོ་བས་ཀྱང་རེག་པར་འགྱུར་རོ། །བཙུན་པ། རེ་ཞིག་དགེ་སློང་གིས་སོ་སོའི་སྐྱེ་བོ་དགུམ་པར་སྦྱོར་བ་བགྱིས་ལ། དགྲ་བཅོམ་པ་ཞིག་སྲོག་དང་ཕྲལ་ན། ཅིར་འགྱུར་ལགས། མཐར་འགྱུར་ཏེ། མཚམས་མེད་པའི་ཁ་ན་མ་ཐོ་བས་ཀྱང་རེག་པར་འགྱུར། བཙུན་པ། རེ་ཞིག་རྐུན་པོ་ཞིག་དགུམ་པར་ཁྲིད་པ་ལས་བྲོས་ཏེ། དེ་གྲོང་མི་འམ། རྒྱལ་པོའི་མི་དག་གིས་རྗེས་བཞིན་དུ་བསྙེགས་པར་གྱུར་ལ། ཤུལ་གྱི་མདུན་རོལ་ནས་དགེ་སློང་ཞིག་མཆི་བ་དེ་ལ་དེ་དག་གིས་ཁྱོད་ཀྱིས་རྐུན་པོ་ཞིག་བྲོས་པ་མཐོང་ངམ་ཞེས་དྲིས་པ་དང་། དགེ་སློང་དེ་ལ་ཡང་རྐུན་པོ་དགུམ་པའི་སེམས་ཉེ་བར་གནས་པར་གྱུར་ནས་དེ་ཡང་དེ་དག་ལ་བསྟན་ཏེ་སྲོག་དང་ཕྲལ་ན། ཅིར་འགྱུར་ལགས། མཐར་འགྱུར་རོ། །བཙུན་པ། རེ་ཞིག་རྐུན་པོ་ཞིག་དགུམ་པར་ཁྲིད་པ་ལས་བྲོས་ཏེ། དེ་གྲོང་མིའམ། རྒྱལ་པོའི་མི་དག་གིས་རྗེས་བཞིན་རྗེས་བཞིན་དུ་བསྙེགས་པར་གྱུར་ལ། ཤུལ་གྱི་མདུན་རོལ་ནས་དགེ་སློང་ཞིག་མཆི་བ་དེ་ལ་དེ་དག་གིས་ཁྱོད་ཀྱིས་རྐུན་པོ་ཞིག་བྲོས་པ་མཐོང་ངམ་ཞེས་དྲིས་པ་དང་། དགེ་སློང་དེ་ལ་ཡང་རྐུན་པོ་དགུམ་པའི་སེམས་ཉེ་བར་གནས་པར་མ་གྱུར་པར་དེ་དེ་དག་ལ་བསྟན་ཏེ་དེ་སྲོག་དང་ཕྲལ་ན། ཅིར་འགྱུར་ལགས། ཉེས་བྱས་སོ། །བཙུན་པ། རེ་ཞིག་མི་གཉིས་ལས་གཞན་དགུམ་པར་བགྱིས་པ་ལས་གཞན་བཀུམ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་བསྙེན་པར་རྫོགས་པར་དགུམ་པར་སྦྱོར་བ་བགྱིས་ལ། བསྙེན་པར་མ་རྫོགས་པར་བཀུམ་ན་ཅིར་འགྱུར་ལགས་ཉེས་བྱས་སོ། །བསྙེན་པར་མ་རྫོགས་པར་དགུམ་པར་སྦྱོར་བ་བགྱིས་ལ། བསྙེན་པར་རྫོགས་ཀར་བཀུམ་ན། ཅིར་འགྱུར་ལགས་ཉེས་བྱས་སོ། །བསྙེན་པར་མ་རྫོགས་པར་དགུམ་པར་སྦྱོར་བ་བགྱིས་ལ། བསྙེན་པར་རྫོགས་ཏེ་བཀུམ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བསྙེན་པར་རྫོགས་ཀར་དགུམ་པར་སྦྱོར་བ་བགྱིས་ལ། བསྙེན་པར་རྫོགས་ཀར་བཀུམ་ན། ཅིར་འགྱུར་ལགས།
ཉེས་བྱས་སོ། །བསྙེན་པར་རྫོགས་ཀར་དགུམ་པར་སྦྱོར་བ་བགྱིས་ལ། བསྙེན་པར་རྫོགས་ཏེ་བཀུམ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བསྙེན་པར་རྫོགས་ཏེ་དགུམ་པར་སྦྱོར་བ་བགྱིས་ལ། བསྙེན་པར་རྫོགས་ཏེ་བཀུམ་ན། ཅིར་འགྱུར་ལགས། མཐར་འགྱུར་རོ། །བསྙེན་པར་རྫོགས་ཏེ་དགུམ་པར་སྦྱོར་བ་བགྱིས་ལ། བསྙེན་པར་མ་རྫོགས་པར་བཀུམ་ན། ཅིར་འགྱུར་ལགས། ཉེས་བྱས་སོ། །བཙུན་པ། དགེ་སློང་གཅིག་པུ་ཁང་པའི་ནང་དུ་ཞུགས་པ་ལ་སྲོག་དང་ཕྲལ་བའི་རྐྱེན་གྱིས་མཐར་འགྱུར་བ་ལྟ་མཆིས་ལགས་སམ། ཡོད་དེ། ཉེ་བར་འཁོར། འདི་ལྟར་དགེ་སློང་གིས་གསད་པར་སྦྱོར་བ་བྱས་ལ། ཁང་པའི་ནང་དུ་ཞུགས་སམ་ཁང་པའི་ནང་དུ་ཞུགས་ནས་གསོད་པར་སྦྱོར་བ་བྱེད་ནའོ། །བཙུན་པ། དགེ་སློང་གིས་མི་ལགས་པར་འདུ་ཤེས་ཏེ་དགུམ་སེམས་ཀྱིས་སྲོག་དང་ཕྲལ་ཡང་མཐར་མི་འགྱུར་བ་ལྟ་མཆིས་ལགས་སམ། ཡོད་དེ། སྔར་ལྟུང་བ་བྱུང་བ་དང་། རྐུ་ཐབས་སུ་གནས་པ་དང་། དང་པོ་མི་མཐུན་པ་དང་། མ་ནིང་དང་། དགེ་སློང་མ་སུན་ཕྱུང་བ་ལ་ནི། ཉེས་བྱས་སུ་འགྱུར་རོ། །ཇི་ལྟར་དགེ་སློང་ལ་སྲོག་དང་ཕྲལ་བའི་རྐྱེན་གྱིས་མཐར་འགྱུར་བ་དེ་བཞིན་དུ་བསླབ་པ་བྱིན་པ་དང་། དགེ་སློང་མ་ལ་མཐར་འགྱུར་རོ། །དགེ་སློབ་མ་དང་། དགེ་ཚུལ་དང་། དགེ་ཚུལ་མ་ལ་ནི། ཉེས་བྱས་སོ།། །།སྡོམ་ལ། སངས་རྒྱས་སྟོན་པ་རྣམ་པར་གཟིགས། མི་སློབ་སློབ་དང་ཅི་ཡང་དང་། །ཉམས་དང་གྲོལ་དང་འཇིགས་པ་དང་། །སྐྱེ་དང་ཐོབ་དང་འདྲ་བའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བར་འཁོར་གྱིས་ཞུས་པ། བཙུན་པ། བཅོམ་ལྡན་འདས་ཀྱིས་ཡང་དགེ་སློང་གང་མངོན་པར་མི་ཤེས་ཤིང་ཡོངས་སུ་མི་ཤེས་པར་མིའི་ཆོས་བླ་མ་མཐའ་དང་། འཕགས་པ་དང་། ཁྱད་པར་ཐོབ་པ་དང་། ཤེས་པ་དང་། མཐོང་བ་དང་། རེག་པར་གནས་པ་མེད་ཅིང་མི་བདོག་བཞིན་དུ་འདི་ཤེས་སོ། །འདི་མཐོང་ངོ་། །ཞེས་དེ་ལྟ་བུར་ཁས་འཆེས་བ་ལས། དེ་ལྟུང་བ་བྱུང་བ་རྣམ་པར་དག་པར་འདོད་ནས་དུས་གཞན་ཞིག་ན་དྲིས་ཀྱང་རུང་མ་དྲིས་ཀྱང་རུང་། འདི་སྐད་ཅེས། ཚེ་དང་ལྡན་པ་དག་།བདག་གིས་ནི་མི་ཤེས་པར་ཤེས་སོ། །
ཞེས་སྨྲས། མ་མཐོང་བར་མཐོང་ངོ་། །ཞེས་སྨྲས་ཏེ། གསོབ་གསོག་བརྫུན་དུ་སྨྲས་སོ། །ཞེས་ཟེར་ན་མངོན་པའི་ང་རྒྱལ་མ་གཏོགས་ཏེ། དགེ་སློང་དེ་ཡང་ཕས་ཕམ་པར་གྱུར་པ་ཡིན་གྱི། གནས་པར་མི་བྱའོ། །ཞེས་གསུངས་པ་གང་ལགས་པ། བཙུན་པ། རེ་ཞིག་དགེ་སློང་འདི་སྐད་ཅེས། བདག་ནི་སངས་རྒྱས་ཡིན་ནོ། །ཞེས་མཆི་ན་ཅིར་འགྱུར་ལགས། གལ་ཏེ་སྡིག་པ་མི་དགེ་བའི་ཆོས་རྣམས་ཁོང་དུ་ཆུད་པ་ཉིད་དམ། བརྡ་སྤྲོད་པ་ཉིད་ལ་བསམ་ནས་ལུང་སྟོན་ན་ཉེས་པ་སྦོམ་པོར་འགྱུར་རོ། །འོན་ཏེ་མེད་པ་སངས་རྒྱས་བྱེད་པའི་ཆོས་རྣམས་སུ་ལུང་སྟོན་ན་མཐར་འགྱུར་རོ། །བཙུན་པ། རེ་ཞིག་དགེ་སློང་འདི་སྐད་ཅེས། བདག་ནི་སྟོན་པ་ཡིན་ནོ། །ཞེས་མཆི་ན་ཅིར་འགྱུར་ལགས། གལ་ཏེ་འདི་སྙམ་དུ་གདམས་ངག་སྟོན་པ་དང་། རྗེས་སུ་སྟོན་པ་དང་། ཆོས་སྟོན་པའོ། །སྙམ་དུ་བསམ་ནས་སྨྲས་ན་ཉེས་པ་སྦོམ་པོར་འགྱུར་རོ། །འོན་ཏེ་སྟོན་པའི་ཆོས་རྣམས་སུ་ལུང་སྟོན་ན་མཐར་འགྱུར་རོ། །བཙུན་པ། རེ་ཞིག་དགེ་སློང་འདི་སྐད་ཅེས། བདག་ནི་བཅོམ་ལྡན་འདས་རྣམ་པར་གཟིགས་དང་། གཙུག་ཏོར་ཅན་དང་། འཁོར་བ་འཇིག་དང་། ཐམས་ཅད་སྐྱོབ་དང་། གསེར་ཐུབ་དང་། འོད་སྲུང་གི་ཉན་ཐོས་སོ། །ཞེས་མཆི་ན་ཅིར་འགྱུར་ལགས། གལ་ཏེ་སྔོན་གྱི་གནས་སུ་ལུང་སྟོན་ན་མཐར་འགྱུར་རོ། །འོན་ཏེ་དེས་འདི་སྙམ་དུ་དེ་ནས་བཟུང་སྟེ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་སྐྱབས་སུ་སོང་ངོ་། །དེ་ནས་བཟུང་སྟེ་ཡང་དག་པར་རྫོགས་པའི་སངས་རྒྱས་ཐམས་ཅད་ལ་སྐྱབས་སུ་སོང་ངོ་། །སྙམ་དུ་བསམ་ནས་སྨྲས་ན་ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་འདི་སྐད་ཅེས། བདག་ནི་མི་སློབ་པའོ། །ཞེས་མཆི་ན་ཅིར་འགྱུར་ལགས། གལ་ཏེ་ཉོན་མོངས་པ་སྤངས་པར་ལུང་སྟོན་ན་མཐར་འགྱུར་རོ། །འོན་ཏེ་དེས་འདི་སྙམ་དུ། བདག་ནི་བཟོ་ཅི་ཡང་མི་སློབ་བོ། །སྙམ་དུ་བསམ་ནས་སྨྲས་ན་ཉེས་པ་སྦོམ་པོར་འགྱུར་རོ། བཙུན་པ། རེ་ཞིག་དགེ་སློང་གིས་འདི་སྐད་ཅེས། བདག་ནི་སློབ་པའོ། །ཞེས་མཆི་ན་ཅིར་འགྱུར་ལགས། གལ་ཏེ་སློབ་པར་སྤྱོད་པར་ལུང་སྟོན་ན་མཐར་འགྱུར་རོ། །འོན་ཏེ་དེས་འདི་སྙམ་དུ་སྤྱོད་པ་ལ་སློབ་བོ། །སྙམ་དུ་བསམ་ནས་སྨྲས་ན་ཉེས་པ་སྦོམ་པོར་འགྱུར་རོ། །བཙུན་པ།
རེ་ཞིག་དགེ་སློང་འདི་སྐད་ཅེས། བདག་ལ་ནི་ཅི་ཡང་མེད་དོ། །ཞེས་མཆིས་ན། ཅིར་འགྱུར་ལགས། གལ་ཏེ་ཅི་ཡང་སྤངས་སོ། །ཞེས་ལུང་སྟོན་ན། མཐར་འགྱུར་རོ། །འོན་ཏེ་དེས་འདི་སྙམ་དུ་བདག་ལ་ནི། ལྷུང་བཟེད་དང་། ཆོས་གོས་དང་། དགེ་སྦྱོང་གི་འཚོ་བའི་ཡོ་བྱད་གང་ཡང་རུང་བ་ཞིག་མེད་དོ། །སྙམ་དུ་བསམ་ནས་སྨྲས་ན། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་འདི་སྐད་ཅེས། བདག་ཉིད་ནི། ཉམས་པའོ། །ཞེས་མཆི་ན། ཅིར་འགྱུར་ལགས། གལ་ཏེ་འདི་སྙམ་དུ་བདག་ནི། དགེ་སྦྱོང་གི་ཚུལ་གྱི་འབྲས་བུ་དག་ལས་སོ། །ཞེས་ཟེར་ན། མཐར་འགྱུར་རོ། །འོན་ཏེ་ལུང་ལས་ཉམས་པ་ལས་བསམ་སྟེ་སྨྲས་ན། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་འདི་སྐད་ཅེས། བདག་ནི། གྲོལ་བའོ། །ཞེས་མཆི་ན། ཅིར་འགྱུར་ལགས། གལ་ཏེ་འདི་སྐད་ཅེས། བདག་ནི། ཀུན་ཏུ་སྦྱོར་བ་དང་། འཆིང་བ་དང་། བག་ལ་ཉལ་བ་དང་། ཉེ་བའི་ཉོན་མོངས་པ་དང་། ཀུན་ནས་དཀྲིས་པ་རྣམས་ལས་གྲོལ་ལོ། །ཞེས་ཟེར་ན། མཐར་འགྱུར་རོ། །འོན་ཏེ་འདི་སྙམ་དུ་ཀུན་ཏུ་སྦྱོར་བ་དང་། འཆིང་བ་དང་། བག་ལ་ཉལ་དང་། ཉེ་བའི་ཉོན་མོངས་པ་དང་། ཀུན་ནས་དཀྲིས་པ་གང་དག་ཟད་པ་དང་། འགག་པ་དང་། བྲལ་བ་དང་། རྣམ་པར་གྱུར་པ་དེ་དག་ལས་བདག་གྲོལ་ལོ། །སྙམ་དུ་བསམ་ནས་སྨྲས་ན། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་འདི་སྐད་ཅེས། བདག་ལ་འཇིགས་པ་མེད ་དོ། །ཞེས་མཆི་ན། ཅིར་འགྱུར་ལགས། གལ་ཏེ་འཇིགས་པ་སྤངས་པར་ལུང་སྟོན་ན། མཐར་འགྱུར་རོ། འོན་ཏེ་འཇིག་རྟེན་པ་ལས་བསམ་ནས་བདག་ནི། ཅི་ལ་ཡང་མི་འཇིགས་སོ། ཞེས་ཟེར་ན། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་འདི་སྐད་ཅེས། འདི་ནི། བདག་གི་སྐྱེ་བའི་ཐ་མ་ཡིན་ནོ། །ཞེས་མཆི་ན། ཅིར་འགྱུར་ལགས། གལ་ཏེ་ཟད་པར་འདུ་ཤེས་པར་ལུང་སྟོན་ན། མཐར་འགྱུར་རོ། འོན་ཏེ་གང་གི་སྐྱེ་བའི་ཐ་མ་འདི་ཡིན་པའི་སྐྱེ་བ་དེ་ནི། ཟད་པ། འགག་པ། བྲལ་བ། རྣམ་པར་གྱུར་པ་ཡིན་ནོ། །སྙམ་དུ་བསམ་ནས་སྨྲས་ན། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་འདི་སྐད་ཅེས། བདག་གིས་ཐོབ་བོ། །ཞེས་མཆི་ན། ཅིར་འགྱུར་
ལགས། གལ་ཏེ་འདི་སྐད་ཅེས། དགེ་སྦྱོང་གི་ཚུལ་གྱི་འབྲས་བུ་དག་གོ །ཞེས་ཟེར་ན། མཐར་འགྱུར་རོ། །འོན་ཏེ་འཇིག་རྟེན་པའི་དངོས་པོ་ཡིན་པར་ལུང་སྟོན་ན། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་འདི་སྐད་ཅེས། ཀྱེ་མ་ཁྱོད་ཁོ་བོ་ཅི་འདྲ་བ་དེ་འདྲ་བར་གྱུར་ཀྱང་ཅི་མ་རུང་། དེ་ལྟར་ན། ཡུ་བུ་རྒྱུན་དུ་ཞུགས་པ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པར་གྱུར་ན། ཁོ་བོ་ནི། རྒྱུན་ཏུ་ཞུགས་པ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་ཡང་མ་ཡིན་ནོ། །ཞེས་མཆི་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །སྡོམ་ལ། མ་སྨིན་ཐོབ་དང་བདག་འདྲི་དང་། །སྤངས་པ་དང་ནི་འབྲས་བུ་གཉིས། །འདུ་ཤེས་དང་བཞི་ཐོབ་བྱ་དང་། །འཇིག་རྟེན་པའི་ཚུལ་ཐ་མའོ། །བཙུན་པ། རེ་ཞིག་དགེ་སློང་ཞིག་ལ། ཚེ་དང་ལྡན་པ། ཅི་ཟག་པ་ཟད་པ་ཡིན་ནམ་ཞེས་དྲིས་ལ། དེས་ཀྱང་ཤིང་ཐོག་མ་སྨིན་པ་དག་བཅངས་པར་གྱུར་ཏེ། དེས་འདི་སྐད་ཅེས། ཡིན་ནོ། །ཞེས་བགྱི་ན། ཅིར་འགྱུར་ལགས་ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་འདི་སྐད་ཅེས། བདག་ནི། རྒྱུན་དུ་ཞུགས་པའི་འབྲས་བུ་དང་། ལན་གཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། མཆོག་གི་འབྲས་བུ་ཐོབ་བོ། །ཞེས་མཆི་ན། ཅིར་འགྱུར་ལགས། མཐར་འགྱུར་རོ། །བཙུན་པ། རེ་ཞིག་དགེ་སློང་བདག་ཉིད་ཀྱིས་དྲིས་ལ་འདི་སྐད་ཅེས། ང་དགྲ་བཅོམ་པ་ཡིན་ནོ། །ཞེས་ཟེར་བ་འདི་སུས་དྲིས་ཞེས་མཆི་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་ལ་ཁྱིམ་བདག་ཅིག་གིས་ཁྱོད་ཀྱིས་འབྲས་བུ་ཐོབ་བམ་ཞེས་དྲིས་པ་དང་། དེས་ཀྱང་ལོ་མ་དང་། མེ་ཏོག་དང་། འབྲས་བུ་མ་སྨིན་པ་དག་བཅངས་པར་གྱུར་ཏེ། དེས་འདི་སྐད་ཅེས་ཡིན་ཞེས་བགྱིས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་འདི་སྐད་ཅེས། བདག་ནི། ཡོངས་སུ་ཉམས་པའོ། །ཞེས་མཆི་ན། ཅིར་འགྱུར་ལགས། གལ་ཏེ་ཐོབ་པ་ལས་ཡོངས་སུ་ཉམས་པར་ལུང་སྟོན་ན། མཐར་འགྱུར་རོ། །འོན་ཏེ་མ་ཐོབ་པ་ལས་ཡོངས་སུ་ཉམས་པར་ལུང་སྟོན་ན། ཉེས་པ་སྦོམ་པོར་འགྱུར་རོ། །བཙུན་པ་རེ་
ཞིག་དགེ་སློང་གིས་རྒྱུན་དུ་ཞུགས་པའི་འབྲས་བུར་བསྟན་ཏོ། །སྙམ་པ་ལས། ལན་གཅིག་ཕྱིར་འོང་བའི་འབྲས་བུ་ར་ལུང་སྟོན་པར་བགྱིད། ལན་གཅིག་ཕྱིར་འོང་པའི་འབྲས་བུར་ལུང་བསྟན་ཏོ། །སྙམ་པ་ལས། ཕྱིར་མི་འོང་བའི་འབྲས་བུར་ལུང་སྟོན་པར་བགྱིད། ཕྱིར་མི་འོང་བའི་འབྲས་བུར་ལུང་བསྟན་ཏོ། །སྙམ་པ་ལས། དགྲ་བཅོམ་པའི་འབྲས་བུར་ལུང་སྟོན་པར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་ལ་འདི་སྐད་ཅེས། རྒྱུ་རི་ཞེས་བྱ་བ་ལ་རྒྱུན་དུ་ཞུགས་པའི་འབྲས་བུའོ། །བྱ་སྐྱིབས་ཀྱི་ངོས་ལ་ལན་གཅིག་ཕྱིར་འོང་བའི་འབྲས་བུའོ། །བྱ་རྒོད་ཀྱི་ཕུང་པོ་ལ་ཕྱིར་མི་འོང་བའི་འབྲས་བུའོ། །འོད་མའི་ཚལ་དུ་མཆོག་གི་འབྲས་བུ་དགྲ་བཅོམ་པའོ། །ཞེས་མཆི་ན། ཅིར་འགྱུར་ལགས། གལ་ཏེ་འདི་སྙམ་དུ་དེར་བདག་ལ་བསྟན་པ་བཏོན། ཁ་ཏོན་བྱས་ཏེ་བདག་གིས་སྙོམས་ལས་མ་བྱས་སོ། །སྙམ་དུ་བསམ་ནས་སྨྲ་ན། ཉེས་པ་སྦོམ་པོར་འགྱུར་རོ། །འོན་ཏེ་དགེ་སྦྱོང་གི་འབྲས་བུ་རྣམས་སུ་ལུང་སྟོན་ན། མཐར་འགྱུར་རོ། །བཙུན་པ། རེ་ཞིག་དགེ་སློང་གིས་མི་མ་ལགས་པ་ལ་མི་མ་ལགས་པར་འདུ་ཤེས་ཏེ་མིའི་ཆོས་བླ་མར་གྱུར་པར་ལུང་སྟོན་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མིར་འདུ་ཤེས་ཏེ་མིའི་ཆོས་བླ་མར་གྱུར་པར་ལུང་སྟོན་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་ལ་མི་མ་ལགས་པར་འདུ་ཤེས་ཏེ་མིའི་ཆོས་བླ་མར་གྱུར་པར་ལུང་སྟོན་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་ལ་མིར་འདུ་ཤེས་ཏེ་མིའི་ཆོས་བླ་མར་གྱུར་པ་ལུང་སྟོན་ན། ཅིར་འགྱུར་ལགས། མཐར་འགྱུར་རོ། །བཙུན་པ། རེ་ཞིག་དགེ་སློང་འདི་སྐད་ཅེས། ཉན་ཐོས་ཀྱིས་ཐོབ་པར་བྱ་བ་གང་ཡིན་པ་དེ་བདག་གིས་ཐོབ་བོ། །ཞེས་མཆི་ན། ཅིར་འགྱུར་ལགས། གལ་ཏེ་ལུང་ཆུབ་པར་བྱ་བ་ལས་བསམ་སྟེ་སྨྲས་ན། ཉེས་པ་སྦོམ་པོར་འགྱུར་རོ། །འོན་ཏེ་ཉན་ཐོས་ཀྱི་ཆོས་རྣམས་སུ་ལུང་སྟོན་ན། མཐར་འགྱུར་རོ། །བཙུན་པ། རེ་ཞིག་དགེ་སློང་འདི་སྐད་ཅེས། བདག་དེ་རིང་འཇིག་རྟེན་གྱི་བསམ་གཏན་ལ་སྙོམས་པར་ཞུགས་ཏེ་དགོངས་ཀར་ཡང་མ་ཞུགས། དེ་ཕན་ཆད་ཀྱང་མ་ཞུགས་སོ། །ཞེས་མཆི་ན་ཅིར་འགྱུར་ལགས། ཉེས་
པ་སྦོམ་པོར་འགྱུར་རོ། །བཙུན་པ་རེ་ཞིག་དགེ་སློང་འདི་སྐད་ཅེས། ཚུར་འབྲས་བུ་དག་ལུང་བསྟན་ཏོ། །ཞེས་མཆི་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ།། །།འདུལ་བ་གཞུང་བླ་མ། བམ་པོ་གཉིས་པ། སྡོམ་ལ། ཕོ་ཉ་ཡི་གེ་ལག་བརྡ་དང་། །གཞན་ལ་སྙད་འདོགས་བརྒྱུད་པ་དང་། །སྨྱོན་པ་དང་ནི་སེམས་འཁྲུགས་དང་། །ཚོར་བས་ཉེན་འོན་གླེན་པའོ། །བཙུན་པ། རེ་ཞིག་དགེ་སློང་གིས་ཕོ་ཉ་ལས་མིའི་ཆོས་བླ་མར་གྱུར་པ་བརྗོད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དེ་བཞིན་དུ་ཡི་གེ་དང་། གཞན་ལ་སྙད་འདོགས་པ་དང་། བརྒྱུད་དེ་མིའི་ཆོས་བླ་མར་གྱུར་པ་བརྗོད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་སྨྱོན་པའི་དྲུང་དུ་མིའི་ཆོས་བླ་མར་གྱུར་པ་བརྗོད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དེ་བཞིན་དུ་སེམས་འཁྲུགས་ལ་དང་། ཚོར་བས་ཉེན་པ་དང་། འོན་པ་དང་།གླེན་པ་ལ་མིའི་ཆོས་བླ་མར་གྱུར་པ་བརྗོད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །སྡོམ་ལ། གཉིད་ལོག་ར་རོ་རབ་མྱོས་དང་། །སྙོམས་ཞུགས་འགྲོ་བ་མ་ཡིན་ཉིད། །སྐད་དང་ལུས་དང་དབེན་སྔགས་དང་། །གཞན་ལས་གཞན་གྱི་ཐ་མའོ། །བཙུན་པ། རེ་ཞིག་དགེ་སློང་གིས་གཉིད་ཀྱིས་ལོག་པའི་དྲུང་དུ་མིའི་ཆོས་བླ་མར་གྱུར་པ་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དེ་བཞིན་དུ་ར་རོ་བ་དང་། རབ་ཏུ་མྱོས་པ་དང་། སྙོམས་པར་ཞུགས་པ་དང་། འགྲོ་བ་གཞན་དུ་གནས་པའི་དྲུང་དུ་མིའི་ཆོས་བླ་མར་གྱུར་པ་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དབུས་ཀྱི་དགེ་སློང་གིས་མཐའ་འཁོབ་པའི་སྐད་དུ་དབུས་པའི་དྲུང་དུ་མིའི་ཆོས་བླ་མར་གྱུར་པ་སྨྲས་ལ། ཡུལ་དབུས་པས་ཀྱང་མཐའ་འཁོབ་པའི་སྐད་དེ་མ་འཚལ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མཐའ་འཁོབ་པས་དབུས་པའི་སྐད་དུ་མཐའ་འཁོབ་པའི་དྲུང་དུ་མིའི་ཆོས་བླ་མར་གྱུར་པ་སྨྲས་ལ། མཐའ་འཁོབ་པས་ཀྱང་ཡུལ་དབུས་པའི་སྐད་དེ་མ་འཚལ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མཐའ་འཁོབ་པས་
མཐའ་འཁོབ་པའི་སྐད་དུ་དབུས་པའི་དྲུང་དུ་མིའི་ཆོས་བླ་མར་གྱུར་པ་སྨྲས་ལ། ཡུལ་དབུས་པས་ཀྱང་མཐའ་འཁོབ་པའི་སྐད་དེ་མ་འཚལ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དབུས་པས་དབུས་པའི་སྐད་དུ་མཐའ་འཁོབ་པའི་དྲུང་དུ་མིའི་ཆོས་བླ་མར་གྱུར་པ་སྨྲས་ལ། མཐའ་འཁོབ་པས་ཀྱང་ཡུལ་དབུས་པའི་སྐད་དེ་མ་འཚལ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་ལུས་ཀྱི་རྣམ་པར་རིག་བྱེད་ཀྱིས་མིའི་ཆོས་བླ་མར་གྱུར་པ་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་དབེན་པར་དབེན་པའི་འདུ་ཤེས་ཀྱིས་མིའི་ཆོས་བླ་མར་གྱུར་པ་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དབེན་པར་མི་དབེན་པའི་འདུ་ཤེས་ཀྱིས་མིའི་ཆོས་བླ་མར་གྱུར་པ་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་དབེན་པར་དབེན་པའི་འདུ་ཤེས་ཀྱིས་མིའི་ཆོས་བླ་མར་གྱུར་པ་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་དབེན་པར་མི་དབེན་པའི་འདུ་ཤེས་ཀྱིས་མིའི་ཆོས་བླ་མར་གྱུར་པ་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་གསང་སྔགས་སམ། སྨན་དག་གིས་བདག་ཉིད་མི་གདའ་བར་བགྱིས་ནས་མིའི་ཆོས་བླ་མར་གྱུར་པ་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་གཞན་ལས་མིའི་ཆོས་བླ་མར་གྱུར་པ་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གི་གཞན་དག་གི་སླད་དུ་མིའི་ཆོས་བླ་མར་གྱུར་པ་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་མིའི་ཆོས་བླ་མར་གྱུར་པ་སྨྲས་ཀྱང་མཐར་མི་འགྱུར་བ་ལྟ་མཆིས་ལགས་སམ། ཡོད་དེ། སྔར་ལྟུང་བ་བྱུང་བ་དང་། རྐུ་ཐབས་སུ་གནས་པ་དང་། དང་པོ་མི་མཐུན་པ་ཅན་དང་། མ་ནིང་དང་། དགེ་སློབ་མ་དང་། དགེ་སློང་མ་སུན་ཕྱུང་བ་ལ་ནི། ཉེས་བྱས་སུ་འགྱུར་རོ། །ཇི་ལྟར་དགེ་སློང་གིས་བརྫུན་དུ་སྨྲས་པའི་རྐྱེན་གྱིས་མཐར་འགྱུར་བ་དེ་བཞིན་དུ་བསླབ་པ་བྱིན་པ་དང་། དགེ་སློང་མ་ལ་ཡང་མཐར་འགྱུར་རོ། །དགེ་སློབ་མ་དང་། དགེ་ཚུལ་དང་། དགེ་ཚུལ་མ་ལ་ནི། ཉེས་བྱས་སོ། །ཉེ་བར་འཁོར་གྱིས་ཞུས་པ་ཁ་ཆེ་བ་ལས། ཕམ་པ་སྦྱར་བ་རྫོགས་སོ།། །།