ལྔ་པ། ཡུལ་འཁོར་སྲུང་གི་སྔོན་གྱི་ཚུལ་གྱི་ལེའུ།
དེ་ནས་འཁོར་དེ་ལས་བྱང་ཆུབ་སེམས་དཔའ་ཁ་ཅིག་འདི་སྙམ་དུ་སེམས་ཏེ། གསང་བ་པའི་བདག་པོ་འདིས་གེ་བའི་རྩ་བ་གང་དུ་བསྐྱེད་། སངས་རྒྱས་བཅོམ་ལྡན་འདས་ཇི་སྙེད་ཅིག་ལ་འདིས་བསྙེན་བཀུར་བྱས་། འདིས་སྨོན་ལམ་ཅི་འདྲ་བ་ཞིག་བཏབ་ན་གང་གི་ཕྱིར་འདི་འདྲ་བའི་སྤོབས་པ་དང་ལྡན་པར་གྱུར་སྙམ་མོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་དག་གི་སེམས་ཀྱི་རྟོག་པ་ཐུག་ཀྱིས་མཁྱེན་ནས་བྱང་ཆུབ་སེམས་དཔའ་ནི་བློ་གྲོས་ལ་བཀའ་སྩལ་པ། ཞི་བའི་བློ་གྲོས་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པའི་ཡང་ཆེས་གྲངས་མེད་པ། རྒྱ་ཆེན་པོ་ཚད་མེད་པ་བསམ་གྱིས་མི་ཁྱབ་པ། དཔག་ཏུ་མེད་པར་གྱུར་པ་དེའི་ཚེ་དེའི་དུས་ན་བསྐལ་པ་མཛེས་པར་སྣང་བ་ཞེས་བྱ་བ་ལ་འཇིག་རྟེན་གྱི་ཁམས་རྣམ་པར་བརྒྱན་པ་ཞེས་བྱ་བ་དང་། དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་པའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཡོན་ཏན་མཐའ་ཡས་རིན་ཆེན་སྣ་ཚོགས་བཀོད་པའི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་ངོ་། །ཞི་བའི་བློ་གྲོས་འཇིག་རྟེན་གྱི་ཁམས་རྣམ་པར་བརྒྱན་པ་དེ་ཡང་འབྱོར་པ། རྒྱས་པ། བདེ་བ། ལོ་ལེགས་པ། ཉམས་དགའ་བ་། ལྷ་དང་མི་མང་པོས་བ། ལག་མཐིལ་ལྟར་མཉམ་པར་གྱུར་པ་། གསེག་མ་དང་གྱོ་མོ་མེད་དང་། རྩྭ་དག་དེར་སྐྱེས་པ་ཡང་འཇམ་པ་གོས་ཀ་ཙ་ལིན་དི་ཀ་ལྟར་རེག་ན་བདེ་བ། རྨ་བྱའི་མགྲིན་པ་ལྟར་སྔོ་ཞིང་གཡུང་དྲུང་འཁྱིལ་པར་གཡས་སུ་འཁྱིལ་པ། ཁ་དོག་དང་ལྡན་པ་། དྲི་དང་ལྡན་པ། ཡིད་དུ་འོང་བ། གོམ་པ་བོར་ན་སོར་བཞི་མཐུར་དུ་དམའ་བ། རྐང་པ་བཏེག་ན་སོར་བཞི་གྱེན་དུ་མཐོ་བ། ཧ་ཅང་ཡང་མི་གྲང་། ཧ་ཅང་ཡང་མི་ཚ་བའི་ཆུང་ཆུང་དུ་བསིལ་བ། འདོད་པ་དང་འཐུན་པར་ལྡང་བའོ། །ས་ཆེན་པོ་དེ་ཡང་བཻ་དཱུ་ཪྻ་སྔོན་པོས་བརྒྱན་པའོ། །སེམས་ཅན་དེ་རྣམས་ཀྱང་རྣམ་པ་བཟང་ཞིང་མཁས་པ་དང་ལྡན་པར་གྱུར་ཏེ། འདོད་ཆགས་དང་། ཞེ་སྡང་དང་། གཏི་མུག་ཆུང་བ་། ཉོན་མོངས་པ་ཐམས་ཅད་ཆུང་བ། ལེགས་པར་བཤད་པའི་དོན་ཀུན་ཤེས་པར་བྱེད་ནུས་པའི་མཐུ་དང་ལྡན་པ་ཤ་སྟག་གོ །བཅོམ་ལྡན་འདས་ཡོན་ཏན་མཐའ་ཡས་རིན་ཆེན་སྣ་ཚོགས་བཀོད་པའི་རྒྱལ་པོ་དེ་བཞིན་གཤེགས་པ་དེའི་ཉོན་ཐོས་ཀྱི་དགེ་སློང་གི་དགེ་འདུན་ནི་ཁྲག་ཁྲིག་ཕྲག་བཅུ་གཉིས་ཡོད་དོ། །བྱང་ཆུབ་སེམས་དཔའི་དགེ་འདུན་ནི་བྱེ་བ་ཕྲག་སུམ་བཅུ་རྩ་གཉིས་ཡོད་དོ། དེའུ་སྐུ་ཚེའི་ཚད་ནི་ལོ་བྱེ་བ་ཕྲག་སུམ་བཅུ་རྩ་དྲུག་ཐོབ་བོ། །མི་རྣམས་ཀྱང་དུས་མ་ཡིན་པར་གློ་བུར་དུ་འཆི་བ་མེད་དོ། །ཞི་བའི་བློ་གྲོས་དེའི་ཚེ་དེའི་དུས་ན་རྣམ་པར་བརྒྱན་པའི་འཇིག་རྟེན་ཀྱི་ཁམས་དེ་ན། མཛེས་པར་སྣང་བ་ཞེས་བྱ་བ་གླིང་བཞི་པའི་འཇིག་རྟེན་བར་མ་རབ་ཏུ་འབྱོར་པ། རྒྱས་པ། བདེ་བ་རབ་ཏུ་ལོ་ལེགས་པ། ཡངས་ཤིང་ཐ་གྲུ་ཆེ་བ་བྱུང་སྟེ། གླིང་བཞི་པ་རེ་རེ་ཡང་དཔག་ཚད་བརྒྱད་ཁྱི་བཞི་སྟོང་བརྒྱད་ཁྲི་བཞི་སྟོང་པར་གྱུར་ཏོ། །དེར་གྲོང་ཁྱེར་ཆེན་པོ་ཡང་བར་བར་ན་དཔག་ཚད་གཅིག་
ཡོད་པ། གྲོང་དང་། ཚོང་འདུས་དང་། རི་ཁྲོད་སྟོང་གིས་བསྐོར་བ་བྱུང་ངོ་། ཞི་བའི་བློ་གྲོས་གླིང་བཞི་པ་མཛེས་པར་སྣང་བ་དེའི་དབུས་ན་ཕོ་བྲང་གྲོང་ཁྱེར་རྣམ་པར་དག་པ་ཅན་ཞེས་བྱ་བ་ཡངས་ཤིང་རྒྱ་ཆེ་བ། བྱང་དང་ལྷོར་ནི་དཔག་ཚད་དྲུག་བཅུ་རྩ་བཞི། ཤར་དང་ནུབ་ཏུ་ནི་དཔག་ཚད་བཞི་བཅུ་རྩ་གཉིས་ཡོད་པ། བསྐྱེད་མོས་ཚལ་ཁྲིས་རབ་ཏུ་བརྒྱན་པ། གྲོང་དང་། ཚོང་འདུས་དང་། རི་ཁྲོད་ཁྲིས་ཀུན་ནས་བསྐོར་བ་ཡོད་དོ། །ཞི་བའི་བློ་གྲོས་རྒྱལ་པོའི་ཕོ་བྲང་རྣམ་པར་དག་པ་ཅན་ཞེས་བྱ་བ་དེར་འཁོར་ལོས་སྒྱུར་བའི་རྒྱལ་པོ་ཡུལ་འཁོར་སྲུང་ཞེས་བྱ་བ་རིན་པོ་ཆེ་སྣ་བདུན་དང་ལྡན་པ། གླིང་བཞི་ལ་དབང་བ། སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། དགེ་བའི་རྩ་བ་བསྐྱེད་པ། བསོད་ནམས་ཀྱི་གཟི་བརྗིད་ཀྱིས་གཟི་དང་ལྡན་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཞིག་བྱུང་ངོ་། །ཞི་བའི་བློ་གྲོས་རྒྱལ་པོ་ཡུལ་འཁོར་སྲུང་གི་གྲོང་ཁྱེར་གྱི་དབུས་ན་ཁང་པ་རྒྱ་ཆེ་ཞིང་ཡངས་པ་ཆུ་ཞེང་དུ་དཔག་ཚད་བཅུ་དྲུག་ཡོད་པ་རིན་པོ་ཆེ་སྣ་བདུན་གྱི་ར་བ་རིམ་བདུན་དང་། རྟ་བབས་དང་། དྲིལ་བུ 
་གཡེར་ཀའི་དྲ་བ་རིམ་བདུན་གྱིས་ཀུན་ནས་བསྐོར་བ་བརྩིགས་སོ། །ར་བའི་ནང་ན་བསྐྱེད་མོས་ཚལ་ཆེན་པོ་བཞི་བྱས་ཏེ། འདི་ལྟ་སྟེ། མེ་ཏོག་སྣ་ཚོགས་ཞེས་བྱ་བའི་བསྐྱེད་མོས་ཚལ་ཆེན་པོ་དང་། ཡོན་ཏན་གྱིས་མངོན་པར་དགའ་བ་ཞེས་བྱ་བ་དང་། རྨ་བྱས་མངོན་པར་དགའ་བ་ཞེས་བྱ་བ་དང་། དུས་ཀྱི་བདེ་བ་ཞེས་བྱ་བའོ། །རྫིང་ཁྱོན་དཔག་ཚད་ཕྱེད་པ་རིན་པོ་ཆེའི་ཁ་ཁྱེར་གྱིས་བསྐོར་བ་འཛམ་བུ་ཆུ་བོའི་གསེར་གྱི་གླེགས་མའི་འབབ་སྟེགས་ཅན། གསེར་གྱི་བྱེ་མ་བདལ་བ། ཡན་ལག་བརྒྱད་དང་ལྡན་པའི་ཆུས་གང་བ། རིན་པོ་ཆེའི་པདྨས་ཀུན་ནས་ཁེབས་པ། ངང་བ་དང་། ཆུ་སྐྱར་དང་། བྱ་གར་དང་། དུར་པ་དག་སྒྲ་འབྱིན་པ་བཞི་བྱས་ཏེ། འདི་ལྟ་སྟེ་དགའ་བ་ཞེས་བྱ་བ་དང་། དགའ་མཆོག་ཅེས་བྱ་བ་དང་། སྤོས་མཆོག་ཅེས་བྱ་བ་དང་། ཆུ་རྒྱུན་རྗེས་སུ་འབབ་པ་ཞེས་བྱའོ། ཞི་བའི་བློ་གྲོས་རྒྱལ་པོ་ཡུལ་འཁོར་སྲུང་གི་བཙུན་མོའི་འཁོར་བདུན་འབུམ་ཡོད་དེ་ཐམས་ཅད་ཀྱང་མཚན་དང་ལྡན་པའི་ན་ཆུང་བུད་མེད་རིན་པོ་ཆེའི་ཡོངས་
སྤྱོད་དང་འདྲ་བ་ཤ་སྟག་གོ །དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་རབ་ཏུ་ཞུགས་པར་གྱུར་པ་དག་གོ །དེ་ལ་བུ་སྟོང་དུ་ཚང་བ་ཡོད་དེ། དཔའ་བ། རཏལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པ། སྐྱེས་བུ་ཆེན་པོའི་མཚན་ཉི་ཤུ་རྩ་བརྒྱད་ཀྱིས་བརྒྱན་པ། ལྷག་པའི་བསམ་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་པ་ཤ་སྟག་གོ །ཞི་བའི་བློ་གྲོས་དེའི་ཚེ་དེའི་དུས་ན་བཅོམ་ལྡན་འདས་ཡོན་ཏན་མཐའ་ཡས་རིན་ཆེན་སྣ་ཚོགས་བཀོད་པའི་རྒྱལ་པོ་དེ་བཞིན་གཤེགས་པ་དེ་རྣམ་པར་དག་པ་དང་ལྡན་པའི་རྒྱལ་པོའི་ཕོ་བྲང་འཁོར་དུ་རྟེན་ཅིང་བཞུགས་ཏེ། རྒྱལ་པོ་དང་། རྒྱལ་པོའི་བློན་པོ་ཆེན་པོ་དང་། བྲམ་ཟེ་དང་། ཁྱིམ་བདག་དང་གྲོང་རྡལ་བ་དང་། ཡུལ་འཁོར་གྱི་མིས་སྟི་སྟང་བྱས་། བླ་མར་བྱས། རི་མོར་བྱས། མཆོད་པ་བྱས་སོ། །ཞི་བའི་བློ་གྲོས་རྒྱལ་པོ་ཆེན་པོ་ཡུལ་འཁོར་སྲུང་གིས་བཅོམ་ལྡན་འདས་ཡོན་ཏན་མཐའ་ཡས་རིན་ཆེན་སྣ་ཚོགས་བཀོད་པའི་རྒྱལ་པོ་དེ་བཞིན་གཤེགས་པ་དེ་ལ་དགེ་སློང་གི་དགེ་འདུན་དང་ཐམས་གཅིག་ཏུ་ལོ་བྱེ་བ་ཚང་བར་ཡིད་དུ་འོང་བའི་བཟའ་བ་དང་། བཏུང་བ་དང་། ན་བཟང་དང་། གཙུག་ལག་ཁང་དང་། འཆག་སའི་ལོངས་སྤྱོད་ཀྱིས་བསྙེན་བཀུར་བྱས་ཏེ། དགེ་སློང་རེ་རེ་ལ་ཡང་རིམ་གྲོ་བྱ་བ་དང་སྤྱོད་པའི་ཕྱིར་གཡོག་གསུམ་གསུམ་ཕུལ་ལོ། །ཞི་བའི་བློ་གྲོས་རྒྱལ་བུ་གཞོན་ནུ་དེ་དག་ཀྱང་དེ་བཞིན་གཤེགས་པ་ལ་སྟི་སྟང་བྱ་བ་དང་། མཆོད་པ་བྱ་བར་མོས་པ་དང་། ཆོས་མཉམ་པ་དོན་དུ་གཉེར་བས་བག་ཡོད་པར་གྱུར་ཏེ། འདོད་པའི་ཡོན་ཏན་དོན་དུ་མི་གཉེར་རོ། །དེ་བག་བག་ཡོད་ཅིང་དམ་པའི་ཆོས་ཉན་པ་དང་། སེམས་ཀྱིས་ངེས་པར་སེམས་པས་རིང་པོ་མ་ལེན་པར་མངོན་པར་ཤེས་པ་ལྔ་བསྐྱེད་པར་གྱུར་ཏོ། །དེ་དག་བསྐྱེད་ནས་སྟེང་གི་བར་སྣང་ལས་ངང་པའི་རྒྱལ་པོ་བཞིན་དུ་བསྐྱེད་མོས་ཚལ་ནས་བསྐྱེད་མོས་ཚལ་དང་། གྲོང་ཁྱེར་ནས་གྲོང་ཁྱེར་དང་། ཚོང་འདུས་ནས་ཚོངས་འདུས་དང་། གླིང་བཞི་པའི་འཇིག་རྟེན་གྱི་ཁམས་ཅད་དུ་མཐར་གྱིས་རྒྱུ་ཞིང་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་འབྱུང་བ་བརྒྱ་ལམ་རྙེད་པར་འགྱུར་། མིར་སྐྱེ་བ་ཡང་
ཤིན་དུ་དཀའ་བ་རྙེད་། གྲོགས་པོ་གང་དག་དད་དང་ཆོས་མཉན་པ། འདི་འདྲ་བསྐལ་པ་བརྒྱར་ཡང་རྙེད་པར་དཀའ་། མི་དབང་རྒྱལ་པོ་དེ་ནི་ད་བྱུང་སྟེ། རབ་ཏུ་ཞི་བར་འགྲོ་བའི་ཆོས་སྟོན་གྱིས། བདེ་བར་གཤེགས་པ་དེ་ཡི་དྲུང་དུ་དེང་། ཆོས་ཐོས་ནས་ནི་བདེ་འགྲོར་འགྲོ་བར་གྱིས། ཆོས་ཐོས་བས་ནི་ངན་འགྲོ་རྣམ་པར་སྤོང་། ཆོས་ཐོས་པས་ནི་བཟང་འགྲོར་འགྲོ་བར་འགྱུར། ཆོས་ཐོས་པས་ནི་ཉོན་མོངས་རྣམས་ཀྱང་ཞི། བསིལ་བའི་དངོས་པོ་དམ་པ་ཐོབ་པར་འགྱུར། དེ་དག་ཚིགས་བཅད་འདི་དག་རབ་བརྗོད་པས། ས་འདི་རྣམ་པ་དྲུག་ཏུ་རབ་ཏུ་གཡོས། ལྷ་རྣམས་ཨ་ལ་ལ་ཞེས་ལན་བརྒྱ་སྨྲ། ལྷ་ཡི་མེ་ཏོག་ཡིད་འོང་ཆར་དུ་བབ། སྟོན་པ་བལྟ་ཕྱིར་གང་དག་བསྐུལ་བ་རྣམས། ནང་གཉིས་མཆོག་གི་ཞབས་ལ་ཕྱག་འཚལ་ནས། དེ་དག་ཐལ་སྦྱར་གུས་བཅས་འཁོད་གྱུར་པ། དེ་དག་བགྲང་བས་དཔག་པར་མི་ནུས་སོ། །རྒྱལ་བས་དེ་དག་རྣམས་ཀྱི་བསམ་མཁྱེན་ནས། དེ་དང་འཐུན་པའི་ཆོས་ནི་རབ་ཏུ་བཤད། བདེ་བར་གཤེགས་ལས་ཆོས་ཐོས་བྱེ་བ་ཕྲག །སུམ་བཅུ་རྩ་དྲུག་བྱང་ཆུབ་མཆོག་ལ་ཞུགས། བྱེ་བ་བརྒྱ་ཕྲག་སུམ་ཚང་མི་ཉུང་བ། དེ་དག་ཆོས་མཆོག་མིག་ནི་རྣམ་པར་དག །སྲིད་པར་གུན་དུ་ཡིད་བྱུང་སེམས་གྱུར་ནས། དེ་དག་དེར་ནི་བསྟན་འདིར་རབ་ཏུ་བྱུང་། གཞན་ཡང་བྱེ་བ་ཁྲག་ཁྲིག་དེ་ཉིད་དུ། བསླབ་བ་བཟུང་ཞིང་དེ་བཞིན་གསོ་སྦྱོང་བླངས་། སྟོན་ལ་མཆོད་པ་བྱས ཤིང་ཆོས་མཉན་ནས། དེ་དག་སླར་ཡང་རང་གི་གནས་སུ་དོང་། ཞི་བའི་བློ་གྲོས་དེ་ལྟར་རྒྱལ་བུ་གཞོན་ནུ་དེ་དག་གིས་ཕ་ཡུལ་འཁོར་སྲུང་ལ་མཆོད་པའི་ལས་ཀྱི་ཕྱིར་ལྷའི་ཙན་དན་སྦྲུལ་གྱི་སྙིང་པོའི་ཁང་པ་བརྩེགས་པ་རྒྱ་ཆེ་ཞིང་ཡངས་པ། བཀོད་པས་ལེགས་པར་བརྒྱན་པ། བ་གམ་དང་། རྣམ་པར་རྒྱལ་བའི་བ་དན་དང་། རྟ་བབས་དང་། ཁ་ཁྱེར་གྱིས་བསྐོར་བ་ཞིག་བྱས་ཏེ་འཛམ་བུ་གླིང་རིལ་གྱིས་ཀྱང་ཙན་དན་སྦྲུལ་གྱི་སྙིང་པོ་སྤང་ཕྱེད་ཀྱི་རིན་དུ་མི་ཆོག་པ་དེ་ལྟ་བུའི་ཙན་དན་སྦྲུལ་གྱི་སྙིང་པོའི་ཁང་པ་བརྩེགས་པ་རྒྱ་ཆེ་ཞིང་ཡངས་པ། ཆུ་ཞེང་དུ་དཔག་ཚད་བཅུ་ཡོད་པ། རྣམ་པར་བཀྲ་བ། བལྟ་ན་སྡུག་པ། ཀ་བ་བཞི་ཟུག་པ། ཆ་མཉམ་པ་། ཤིན་དུ་རྣམ་པར་ཕྱེ་བ་ཞིག་བྱས་པར་གྱུར་ཏོ། །
དེ་ན་རྒྱལ་པོ་ཡུལ་འཁོར་སྲུང་དེ་ནམ་བཅོམ་ལྡན་འདས་དེ་ལ་བལྟ་བ་དང་། ཕྱག་བྱ་བ་དང་། མཆོད་པ་བྱ་བ་དང་། བསྙེན་བཀུར་བྱ་བ་དང་། ཆོས་མཉན་པའི་ཕྱིར་འགྲོ་བར་འདོད་པ་དེའི་ཚེ་ཕ་རྒྱལ་པོ་ཡུལ་འཁོར་སྲུང་དང་། རྒྱལ་བུ་གཞོན་ནུ་དེ་རྣམས་དང་། བཙུན་མོའི་འཁོར་དང་། གཡོག་དང་བཅས་པ་དང་། གཉེན་གྱི་འཁོར་དང་བཅས་ཏེ་ཁང་པ་བརྩེགས་པ་དེར་ཞུགས་ནས་པདྨ་བཀོད་པའི་སེང་གེའི་ཁྲི་ལ་འདུག་སྟེ། བླ་མར་བྱ་བ་ཆེན་པོ་དང་། སྟི་སྟང་དང་། རི་མོར་བྱ་བ་དང། མེ་ཏོག་དང་། ཕྲེང་བ་དང་། སྤོས་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། བ་དན་དང་། རྣམ་པར་རྒྱལ་བའི་བ་དན་དང་། སིལ་སྙན་དང་། ཕེག་རྡོབ་པ་དང་། རོལ་མོའི་སྒྲ་དབྱངས་ལེན་པའི་མཆོད་པ་དམ་པ་དང་ཆས་ནས་ཁང་པ་བརྩེགས་པ་དེ་རིན་པོ་ཚེའི་དྲ་བས་རབ་ཏུ་གཡོགས་ཏེ་ཐམས་ཅད་དང་ལྷན་ཅིག་ཏུ་འདུས་ནས་ཁང་པ་བརྩེགས་བ་དེ་སྦྲུལ་ཏེ། སྟེང་གི་ནམ་མཁའ་བར་སྣང་ལ་ངང་པའི་རྒྱལ་པོ་ལྟར་ཐོགས་པ་མེད་པར་བཅོམ་ལྡན་འདས་ཡོན་ཏན་མཐའ་ཡས་རིན་ཆེན་སྣ་ཚོགས་བཀོད་པའི་རྒྱལ་པོ་དེ་བཞིན་གཤེགས་པ་ག་ལ་བ་དེར་དོད་ནས་ཕྱིན་པ་དང་ཁང་པ་བརྩེགས་པ་དེ་ས་ལ་བཞག་སྟེ། བཅོམ་ལྡན་འདས་དེའི་ཞབས་གཉིས་ལ་མགོ་བོས་ཕྱག་འཚལ་ནས་དགེ་སློང་གི་དགེ་འདུན་ལ་ཡང་ཕྱག་འཚལ་ཏེ། ལན་བདུན་བསྐོར་བ་བྱས་ནས་ཕྱོགས་གཅིག་ཏུ་འཁོད་དེ། རྒྱལ་པོ་ཡུལ་འཁོར་སྲུང་གི་བཙུན་མོའི་འཁོར་དང་། གཉེན་གྱི་འཁོར་ཀྱང་ཁང་པ་བརྩེགས་པ་དེ་ལས་བབས་ནས་བཅོམ་ལྡན་འདས་དེའི་ཞབས་གཉིས་དང་། དགེ་སློང་གི་དགེ་འདུན་ལ་མགོ་བོས་ཕྱག་འཚལ་ཏེ་ལན་བདུན་བསྐོར་བ་བྱས་ནས་ཆོས་མ་ཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་བཙུན་མོའི་འཁོར་དང་། གཉེན་གྱི་འཁོར་དུ་བཅས་ཏེ་འདུག་གོ །བམ་པོ་གསུམ་པ། དེ་ནས་བཅོམ་ལྡན་འདས་དེ་བཞིན་གཤེགས་པ་ཡོན་ཏན་མཐའ་ཡས་རིན་ཆེན་སྣ་ཚོགས་བཀོད་པའི་རྒྱལ་པོས་རྒྱལ་པོ་ཡུལ་འཁོར་སྲུང་ཆོས་མཉན་པའི་ཕྱིར་འོངས་པར་མཁྱེན་ནས་ཆོས་ཀྱི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་
བཅུག །ཡང་དག་པར་གཟེངས་སྟོད། ཡང་དག་པར་དགའ་བར་མཛད་དོ། །དེ་ལ་བཅོམ་ལྡན་འདས་དེའི་ཆོས་ཀྱི་གཏམ་ནི་འདི་ཡིན་ཏེ། རྒྱལ་པོ་ཆེན་པོ་ཆོས་བཞི་པོ་འདི་དག་ནི་ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ཡོངས་སུ་མི་ཉམས་ཤིང་ཁྱད་པར་དུ་འགྲོ་བར་འགྱུར་བའོ། །བཞི་གང་ཞེ་ན། རྒྱལ་པོ་ཆེན་པོ་དང་པ་ནི་ཡོངས་སུ་མི་ཉམས་ཤིང་ཁྱད་པར་དུ་འགྲོ་བར་འགྱུར་བའོ། །དད་པ་དེ་གང་ཞེ་ན། དད་པ་གང་གིས་འཕགས་པའི་དྲུང་དུ་ཉེ་བར་འགྲོ་བ་དང་བྱ་བ་མ་ཡིན་པ་མི་བྱེད་པའོ་། །རྒྱལ་པོ་ཆེན་པོ་གུས་པ་ནི་ཁྱད་པར་དུ་འགྲོ་བར་འགྱུར་བ་སྟེ། གུས་པ་གང་གིས་འཕགས་པ་རྣམས་ཀྱི་ལེགས་པར་བཤད་པ་རྣམས་གུས་པར་ཉན་པ་དང་། རྣ་བླགས་ཏེ་ཆོས་ཉན་པའོ། །རྒྱལ་པོ་ཆེན་པོ་ང་རྒྱལ་མེད་པ་ནི་ཁྱད་པར་དུ་འགྲོ་བར་འགྱུར་བ་སྟེ། ང་རྒྱལ་མེད་པ་གང་གིས་འཕགས་པ་རྣམས་ལ་མངོན་པར་འདུད་པ་དང་། རབ་ཏུ་འདུད་པ་དང་། ཕྱག་འཚལ་བའོ། །རྒྱལ་པོ་ཆེན་པོ་བརྩོན་འགྲུས་ནི་ཁྱད་པར་དུ་འགྲོ་བར་འགྱུར་བ་སྟེ་བརྩོན་འགྲུས་གང་གིས་ལུས་ཡང་བ་དང་། སེམས་ཡང་བ་འཐོབ་པ་དང་། བྱ་བ་ཐམས་ཅད་ཀྱང་ཉམས་འོག་ཏུ་ཆུང་པར་བྱེད་པ་སྟེ། རྒྱལ་པོ་ཆེན་པོ་ཆོས་བཞི་པོ་དེ་དག་ནི་ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ཡོངས་སུ་མི་ཉམས་ཤིང་ཁྱད་པར་དུ་འགྲོ་བར་འགྱུར་བའོ། །རྒྱལ་པོ་ཆེན་པོ་ཆོས་བཞི་པོ་འདི་དག་ནི་ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་འགྱོད་པ་མེད་པ་དང་། བག་ཡོད་པ་ཡོངས་སུ་རྫོགས་པར་འགྱུར་བའོ། །བཞི་གང་ཞེ་ན། དབང་པོ་སྡོམ་པ་དང་། འདོད་པ་རྣམས་ལ་སྐྱོན་དུ་ལྟ་བ་དང་། ཡོངས་སུ་འཛིན་པ་ཐམས་ཅད་ལ་མི་རྟག་པའི་འདུ་ཤེས་དང་། ཆོས་ལ་ངེས་པར་སེམས་པ་ནི་སྲོག་གི་དབང་པོའི་དམ་པ་སྟེ། །རྒྱལ་པོ་ཆེན་པོ་ཆོས་བཞི་པོ་དེ་དག་ནི་ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་འགྱོད་པ་མེད་པ་དང་། བག་ཡོད་པ་ཡོངས་སུ་རྫོགས་པར་འགྱུར་བའོ། །རྒྱལ་པོ་ཆེན་པོ་ཆོས་བཞི་དང་ལྡན་ན་རྒྱལ་པོ་ལ་ཆོས་ཀྱི་རྒྱལ་པོ་ཞེས་བྱ་སྟེ། བཞི་གང་ཞེ་ན། བྱང་ཆུབ་ཀྱི་སེམས་རྗེས་སུ་མི་གཏོང་བ་དང་། གཞན་དག་ཀྱང་བྱང་ཆུབ་ལ་ཡང་དག་པར་འཛུད་པ་དང་།
དགེ་བའི་རྩ་བ་ཐམས་ཅད་བྱང་ཆུབ་ཏུ་སྔོ་བ་དང་། སངས་རྒྱས་ཀྱི་ཆེ་བ་ཉིད་མཐོང་ངམ་ཐོས་ན་སངས་རྒྱས་ཀྱིས་ཆེ་བ་ཉིད་ལ་མོས་པ་མ་གཏོགས་པར་ལྷ་དང་། མི་དང་། ཉན་ཐོས་དང་། རང་སངས་རྒྱས་ཐམས་ཅད་ཀྱི་ཚེ་བ་ཉིད་ལ་མངོན་པར་དགའ་བ་མ་ཡིན་པ་སྟེ། རྒྱལ་པོ་ཆེན་པོ་ཆོས་བཞི་པོ་དེ་དག་དང་ལྡན་ན་རྒྱལ་པོ་ལ་ཆོས་ཀྱི་རྒྱལ་པོ་ཞེ་བྱའོ། །རྒྱལ་པོ་ཆེན་པོ་དེ་ལྟ་བས་ན་ཁྱོད་རྟག་པར་བག་ཡོད་པར་བྱ་བ་དང་། དད་པ་དད་དང་བ་མང་བ་དང་། ཆོས་དོན་དུ་གཉེར་བ་དང་། ཆོས་ཀྱི་ཀུན་དགའ་ལ་དགའ་བ་དང་མོས་པར་བྱའོ། །ཁྱོད་ཆོས་ཡོངས་སུ་བརྩལ་བ་ལ་བརྩོན་བ་དང་། ཆོས་འདོད་པར་བྱའི་ཡུལ་ལ་ཆགས་པར་མི་བྱའོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་འདོད་པ་རྣམས་ལ་ཆོག་པ་མེད་པའི་ཕྱིར་ཏེ། གང་དག་འཕགས་པའི་ཤེས་རབ་ཀྱིས་ངོམས་པ་དེ་དག་ནི་ངོམས་པའོ། །རྒྱལ་པོ་ཆེན་པོ་མི་རྣམས་ཀྱི་སྲོག་ནི་ཐུང་བ་ཚེའི་ཚད་ཀྱང་ཐུང་བ་སྟེ། ཚེ་རབས་འཕོ་བར་འགྲོ་བ་ཡིན་གྱིས་ཁྱོད་འཇིག་རྟེན་ཕ་རོལ་ལ་ལ་འཇིགས་པར་བལྟ་བར་བྱའོ། །རྒྱལ་པོ་ཆེན་པོ་ཁྱོད་ཀྱིས་གང་དེ་བཞིན་གཤེགས་པ་ལ་མཆོད་པ་དང་། རིམ་གྲོ་བྱས་པའི་དགེ་བའི་རྩ་བ་དེ་ཁྱོད་ཀྱིས་ཡོངས་སུ་བསྔོ་བ་བཞིས་ཡོངས་སུ་བསྔོ་བར་བྱའོ། །བཞི་གང་ཞེ་ན། ལོངས་སྤྱོད་མི་ཟད་པ་དང་། ཆོས་མི་ཟད་པ་དང་། སྤོབས་པ་མི་ཟད་པ་དང་། ཡེ་ཤེས་མི་ཟད་པ་སྟེ་བཞི་པོ་དེ་དག་གོ །གཞན་ཡང་བཞི་སྟེ། བཞི་གང་ཞེ་ན། ཚུལ་ཁྲིམས་ཀྱི་ཚོགས་ཀྱིས་ལུས་ཡོངས་སུ་དག་པ་དང་། ཐོས་པའི་ཚོགས་ཀྱིས་དག་ཡོངས་སུ་དག་པ་དང་། ཤེས་རབ་ཀྱི་ཚོགས་ཀྱིས་སེམས་ཡོངས་སུ་དག་པ་དང་། ཡེ་ཤེས་ཀྱི་ཚོགས་ཀྱིས་ཤེས་རབ་ཡོགས་སུ་དག་པ་སྟེ་བཞི་པོ་དེ་དག་གོ །གཞན་ཡང་བཞི་སྟེ། །བཞི་གང་ཞེ་ན། སེམས་ཅན་ཡོངས་སུ་སྨིན་པར་བྱེད་པས་ཐབས་ཡོངས་སུ་རྫོགས་པ་དང་། བདུད་ཚར་གཅོད་པས་ཤེས་རབ་ཡོངས་སུ་རྫོགས་པ་དང་། ཇི་སྐད་སྨྲས་པ་དེ་བཞིན་བྱེད་པས་སྨོན་ལམ་ཡོངས་སུ་རྫོགས་པ་དང་། སངས་རྒྱས་མཐོང་བ་དང་ཕྲད་པས་སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པའོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཡུལ་འཁོར་སྲུང་ལ་
ཆོས་ཀྱི་གཏམ་དེས་ཡང་དག་པར་བསྟན། ཡང་དག་པར་འཛིན་དུ་བཅུག། ཡང་དག་པར་གཟེངས་སྟོད། ཡང་དག་པར་དགའ་བར་མཛད་པས་ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ནས་དགའ་བ་དང་། ཡིད་བདེ་བ་སྐྱེས་ཏེ། རིན་ཐང་མེད་པའི་མུ་ཏིག་གི་ངོ་ཤལ་གྱིས་དེ་བཞིན་གཤེགས་པ་ལ་མཆོད་པ་བྱས་སོ། །ཡོངས་སུ་ལོངས་སྤྱད་པར་བྱ་བའི་ཕྱིར་རྒྱལ་སྲིད་ཐམས་ཅད་ཀྱང་བཅོམ་ལྡན་འདས་དེ་ལ་ཕུལ་ལོ། །ཇི་སྲིད་འཚོའི་བར་དུ་ལྔ་པ་ཚངས་པར་སྤྱོད་པ་དང། བསླབ་བའི་གཞི་རྣམས་མནོས་སོ། །བཙུན་མོའི་འཁོར་དེ་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །ལྔ་པ་ཚངས་པར་སྤྱོད་པ་དང་། བསླབ་པའི་གཞི་རྣམས་ཀྱང་མནོས་སོ། །རྒྱལ་པོའི་བཙུན་མོའི་འཁོར་ཀྱང་བཅོམ་ལྡན་འདས་ལས་ཆོས་ཀྱི་གཏམ་ཐོས་ནས་ཚིམ་ཞིང་མགུ་ལ་ཡིད་རངས་ཏེ། རབ་ཏུ་དགའ་ནས་དགའ་བ་དང་། ཡིད་བདེ་བ་སྐྱེས་ཏེ། གོས་དང་རྒྱན་ཅི་ཐོགས་པ་རྣམས་བཅོམ་ལྡན་འདས་ཀྱི་སྐུ་ལ་མངོན་པར་གསོལ་བར་གྱུར་ཏོ། །མངོན་བར་གསོལ་ནས་ཀྱང་ཇི་སྲིད་འཚོའི་བར་དུ་ལྔ་པ་ཚངས་པར་སྤྱོད་པ་དང་བསླབ་པའི་གཞི་རྣམས་མནོས་སོ། །ཞི་བའི་བློ་གྲོས་དེ་ལྟར་རྒྱལ་པོ་ཡུལ་འཁོར་སྲུང་ཆོས་ཀྱི་རྙེད་པ་ཕུན་སུམ་ཚོགས་པས་རྙེད་པ་ཆེན་པོ་དང་ལྡན་ནས་བཙུན་མོའི་འཁོར་དང་བཅས། གཉེན་གྱི་འཁོར་དང་བཅས་ཤིང་འཁོར་དང་བཅས་ཏེ། བཅོམ་ལྡན་འདས་དེའི་ཞབས་གཉིས་དང་། དགེ་སློང་གི་དགེ་འདུན་གྱི་རྐང་པ་ལ་མགོ་བོས་ཕྱག་འཚལ་ནས་ལན་གསུམ་བསྐོར་བ་བྱས་ཏེ་སྟེང་གི་བར་སྣང་གི་ནམ་མཁའ་ལས་ཁང་པ་བརྩེགས་པ་དེ་ཉིད་ནས་རྒྱལ་པོའི་ཕོ་བྲང་རྣམ་པར་དག་པ་ཅན་དུ་སླར་འཁོར་ནས་རང་གི་ཁྱིམ་དུ་ཕྱིན་ཏོ། །ཞི་བའི་བློ་གྲོས་དེ་ནས་རྒྱལ་པོ་ཡུལ་འཁོར་སྲུང་དུས་གཞན་ཞིག་ན་ཟླ་བ་ཉ་བའི་ཚེ་མེ་ཏོག་སྣ་ཚོགས་ཞེས་བྱ་བའི་བསྐྱེད་མོས་ཚལ་གྱིས་ས་བཟང་པོ་བལྟ་བའི་ཕྱིར་སོང་ནས་དེ་བསྐྱེད་མོས་ཚལ་ཆེན་པོ་དེ་ན་གནས་ཤིང་སིལ་སྙན་དང་། ཕེག་རྡོབ་པ་དང་། རོལ་མོའི་སྒྲ་རབ་ཏུ་ལེན་པ་དང་། རྩེ་བའི་དམ་པས་རྩེ་དགའ་ཞིང་དགའ་མགུར་སྤྱོད་དོ། །ཆུང་མ་དམ་པ་མ་སྨད་པ་ཞེས་བྱ་བ་དང་། དཔེ་
མེད་མ་ཞེས་བྱ་བ་དེ་གཉིས་རྫིང་དགའ་བ་ཞེས་བྱ་བར་ཁྲུས་བྱས་ཏེ་སྤོས་ཆུས་གོས་བརླན་ནས་སེང་གེའི་ཁྲི་པདྨའི་འབྱུང་གནས་བཟང་པོ་ལ་འདུག་གོ །དེ་གཉིས་དེར་འདུག་པའི་བང་པ་ནས་རྒྱལ་བུ་གཞོན་ནུ་གཟུགས་བཟང་པ། མཛེས་པ། བལྟ་ན་སྡུག་པ། ཁ་དོག་བཟང་པོ་རྒྱས་པ། མཆོག་དང་ལྡན་པ་གཉིས་དཀྱིལ་མོ་དཀྲུང་བཅས་པར་རྫུས་ཏེ་བྱུང་ང་ོ། །དེ་ནས་སྐད་ཅིག་དེ་ཉིད་ལ་སྟེང་གི་བར་སྣང་ལས་ལྷ་རྣམས་ཀྱིས་ཀྱེ་མ་ཁྱེའུ་འདི་ནི་ཆོས་སེམས་པའོ། །ཀྱེ་མ་ཁྱེའུ་འདི་ནི་ཆོས་ཀྱི་བློ་གྲོས་སོ་ཞེ་སྒྲ་བྱུང་ངོ་། །ཞི་བའི་བློ་གྲོས་དེ་ལྟར་འཇིག་རྟེན་དུ་ཁྱེའུ་དེ་གཉིས་ཆོས་སེམས་པ་དང་། ཆོས་ཀྱི་བློ་གྲོས་ཞེས་བྱ་བའི་མིང་དུ་གྱུར་ཏོ། །དེ་ལ་ཁྱེའུ་ཆོས་སེམས་པ་ནི་བཙུན་མོ་མ་སྨད་པའི་པང་པ་ནས་བྱུང་ངོ་། །ཆོས་ཀྱི་བློ་གྲོས་ནི་བཙུན་མོ་དཔེ་མེད་པའི་པང་པ་ནས་བྱུང་ངོ་། །ཁྱེའུ་དེ་གཉིས་བྱུང་མ་ཐག་ཏུ་ཀྱིལ་མོ་དང་ཀྲུང་མ་ཉམས་པར་གཉིས་ཀས་ཚེགས་སུ་བཅད་པ་འདི་དག་སྨྲས་སོ། །གང་དག་བྱང་ཆུབ་ཏུ་ནི་སེམས་སྐྱེད་ཅིང་། འཇིག་རྟེན་མགོན་པོ་ཡུལ་དུ་བྱུང་བ་ལ། རབ་ཏུ་དང་བའི་སེམས་ཀྱིས་ཕྱག་འཚལ་བ། དེ་དག་རྙེད་པ་རབ་རྙེད་གྲོགས་པོ་དག །གང་ཞིག་བྱང་ཆུབ་སེམས་ནི་མ་བརྗེད་པ། དེ་ནི་སྲིད་པའི་རྒྱ་མཚོའི་གཏིང་དུ་ཕྱིན། འཁོར་བའི་འཁོར་ལོ་ལས་ནི་ཡིད་ཀྱང་ལོག་སེམས་ཅན་རྒྱ་ཆེན་རྣམས་ཀྱིས་ལེགས་པར་གཟུང་། སྟེང་གི་ཕྱོགས་ན་ཡན་ལག་མ་སྨད་པ། འདྲེན་པ་མཚན་ནི་དུས་དཔོག་རྒྱལ་པོ་སྟེ། དེ་ནས་བདག་ཅག་ཆོས་དོན་གཉེར་བ་དང་། འཇིག་མགོན་ཡོན་ཏན་འབྱུང་གནས་བལྟ་ཕྱིར་མཆིས། ཁྱེའུ་དེ་གཉིས་ཀྱིས་སྐྱིལ་མོ་དཀྲུང་བཤིག་ནས། དེ་ཡི་ཚེ་ནམ་ཡི་པང་ནས་བབས། ཡུལ་འཁོར་སྲུང་པོ་ག་ལར་དེ་གཉིས་དོང་། རྐང་པར་ཕྱག་ཚལ་ཐལ་མོ་སྦྱར་ཏེ་འདུག །ཡབ་ཅིག་བདག་ཅག་མཆི་བ་གསན་དུ་གསོལ། །བསྐལ་པ་བྱེ་བར་ཆོས་རྙེད་རབ་ཏུ་དཀའ། དེ་རྙེད་ནས་ནི་བྱང་ཆུབ་མ་ཐོབ་པར། མཁས་པ་དག་ནི་གཞར་ཡང་མི་གཏོང་ངོ་། །སངས་རྒྱས་འབྱུང་བ་རྟག་ཏུ་རབ་རྙེད་དཀའ། ཕ་མ་དག་ནི་ཆོས་ལ་གནས་པ་དང་། དལ་བ་འབྱོར་དང་ཆོས་འདོང་གྲོགས་པོ་དང་། འཐུན་པར་གནས་དང་བསྟན་ལ་དད་རབ་དཀོན། །
འདུན་དང་བརྩོན་འགྲུས་དེ་བཞིན་བག་ཡོད་པ་དང་། རབ་ཏུ་བྱུང་ཐོབ་རྟག་ཏུ་ཤེས་བཞིན་ཅན། ཕན་བའི་དངོས་དང་མཉེན་དང་མ་ཁེངས་དང་། ངོ་ཚ་ཁྲེལ་ཡོད་ཐོས་དང་ཚུལ་ཁྲིམས་བཟང་། ཞི་དུལ་སྲོག་ཆགས་རྣམས་ལ་སྙིང་རྗེ་བྱམས། ཟབ་མོའི་ཆོས་ལ་ཆོས་ཀྱི་བཟོད་ལྡན་དང་། བརྩོན་འགྲུས་མཐུ་དང་སེམས་ནི་མ་ཞུམ་དང་། བསྡུ་བས་སེམས་ཅན་ཡོངས་སུ་སྨིན་བྱེད་དང་། སེམས་ལས་རུང་ཞིང་དབེན་པར་གནས་པ་དང་། ལུས་དང་དེ་བཞིན་སྲོག་ལ་མི་ལྟ་དང་། མགོ་དང་གོས་ལ་འབར་ལྟར་ཆོས་སེམས་པ། དེ་དག་སངས་རྒྱས་ཡོན་ཏན་དེ་འདྲ་འཐོབ། བདག་ཅག་ཆོས་མཆོག་གང་དག་རབ་བརྗོད་པ། ཆོས་མཆོག་དེ་དག་ཡབ་ཅིག་རབ་རྙེད་དཀའ། ཆོས་རྣམས་དེ་དག་དོན་དུ་བདག་ཅག་ལྷགས། ང་ནི་རྒྱལ་བའི་དྲུང་དུ་བཞུད་པར་བགྱི། །དཀར་པོའི་ཆོས་རྣམས་ཀྱིས་ནི་ཡོངས་ཟིན་ཅིང་། སྐད་ཅིག་གིས་ནི་མངོན་ཤེས་ལྔ་ཐོབ་པ། རྗེས་སུ་དྲན་པ་སྒོམ་ཞིང་ཡེ་ཤེས་ཅན། བྱང་ཆུབ་སེམས་དཔའ་མཁས་པ་དེ་གཉིས་དོང་། རྒྱལ་པོ་བུ་དང་བཅས་ཤིང་བུད་མེད་བཅས། བྱང་ཆུབ་སེམས་དཔའ་མངོན་ཤེས་ཐོབ་མཁས་གཉིས། སྟོན་པ་ཡོན་ཏན་རྒྱལ་མཆོག་ག་ལ་བར། ནམ་མཁའ་ལས་ནི་དེར་ཡང་མངོན་དུ་དོང་། དེ་བཞིན་གཤེགས་པའི་ཞབས་ལ་ཕྱག་འཚལ་ཏེ། ཐམས་ཅད་འདུས་ནས་གུས་དང་བཅས་པར་གནས། དེ་ནས་རྒྱལ་སྲས་ཆོས་ཀྱི་བློ་གྲོས་སྨྲས། བྱང་ཆུབ་ལམ་དེ་བདག་ཅག་བཤད་དུ་གསོལ། །རྒྱལ་བས་དེ་དག་རྣམས་ཀྱི་བསམ་མཁྱེན་ནས། ཟབ་མོའི་ཆོས་ཀྱི་གཏམ་ནི་རབ་གསུང་བ། ཆོས་རྣམས་འདི་དག་བརྟེན་ནས་བྱུང་བ་སྟེ། བདག་པོ་མེད་ཅིང་བྱེད་པ་པོ་དང་བྲལ། ནམ་ཡང་སྟོང་ཞིང་ཕྱི་རོལ་རྒྱུ་བ་མེད་། ཆོས་རྣམས་འདི་དག་གསོག་དང་། གསོབ་ཡིན་ཏེ། ལྟ་དང་བྱ་བ་དག་ཅིང་ཡོ་བ་མེད། ནམ་མཁའ་ལྟ་བུར་རྟག་ཏུ་གཟུང་དུ་མེད། བདེ་བར་གཤེགས་པས་ཆོས་གཏམ་རྣམ་དག་པ། རྣམ་པ་མང་པོ་དེ་དག་རྣམས་ལ་བཤད། བྱེ་བ་ཕྲག་སུམ་ཁྲག་ཁྲིག་བདུན་བཅུ་དྲུག་། མི་སྐྱེ་བཟོད་པ་རྗེས་སུ་ཐོབ་པར་གྱུར། ཞི་བའི་བློ་གྲོས་དེ་ལྟར་བཅོམ་ལྡན་འདས་དེ་ལ་རྒྱལ་པོ་ཡུལ་
འཁོར་སྲུང་གིས་ཞག་བདུན་གྱི་བར་དུ་མཆོད་པ་བྱས་ནས་བཙུན་མོའི་འཁོར་དང་བཅས། གཉེན་གྱི་འཁོར་དང་བཅས་ཏེ་སྐད་ཅིག་ཐང་ཅིག་ཡུད་ཙམ་དེ་ལ་རང་གི་ཁྱིམ་དུ་སླར་ཕྱིན་ཏོ། །ཞི་བའི་བློ་གྲོས་དེ་ནས་རྒྱལ་པོ་ཡུལ་འཁོར་སྲུང་གཅིག་པུ་དབེན་པར་སོང་སྟེ། བཀོད་པ་ཆེན་པོའི་ཁང་པ་བརྩེགས་བར་སེང་གེའི་ཁྲི་པདྨའི་འབྱུང་གནས་བཟང་པོ་ལ་འདུག་ནས་ནང་དུ་ཡང་དག་པར་བཞག་ཅིང་འདི་སྙམ་དུ་སེམས་ཏེ། བདག་གི་གཞོན་ནུ་འདི་དག་ཐམས་ཅད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་པ་ཤ་སྟག་ན། གཞོན་ནུ་འདི་དག་ཐམས་ཅད་ཀྱི་ནང་ན་གང་ཐོག་མར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་བདག་གིས་བརྟག་གོ་སྙམ་མོ། །དེ་ནས་རྒྱལ་པོ་ཡུལ་འཁོར་སྲུང་གིས་དེའི་མོད་ལ་རིན་པོ་ཆེ་སྣ་བདུན་གྱི་བུམ་པ་བྱེད་དུ་བཅུག་སྟེ། བྱི་དོར་ལེགས་པར་བྱས་ཤིང་ལེགས་པར་ཟིན་པར་བྱས་ནས་གཞོན་ནུ་དེ་དག་ཐམས་ཅད་ཀྱི་མིང་བྲིས་ཏེ་བུམ་པ་དེའི་ནང་དུ་བཅུག་ནས་རིན་པོ་ཆེ་སྣ་བདུན་གྱི་པདྨ་སྣ་ཚོགས་བལྟ་ན་སྡུག་པ་བྱས་ནས་པད་མ་དེའི་སྟེང་དུ་བུམ་པ་དེ་བཞག་སྟེ། ཞག་བདུན་དུ་ལྷའི་མཆོད་པ་མེ་ཏོག་ཐམས་ཅད་དང་། སྤོས་ཐམས་ཅད་དང་། ཕྱེ་མ་ཐམས་ཅད་དང་། བདུག་པ་ཐམས་དང་། བྱུག་པ་ཐམས་ཅད་དང་། རོལ་མོའི་སིལ་སྙན་ཐམས་ཅད་ཀྱིས་མཆོད་དོ། །མིང་དེ་དག་མཆོད་པའི་ཚེ་ན་ལྷའི་བུ་ཁྲི་མཆོད་པའི་ཁས་ཀྱི་ཕྱིར་བརྩོན་བར་གྱུར་ཏོ། ཞག་བདུན་དུ་མཆོད་པ་བྱས་ནས་བཙུན་མོའི་འཁོར་དང་། དེའི་བུ་སྟོང་དང་། གཞོན་ནུ་དེ་གཉིས་ཀྱི་མདུན་དུ་ཐམས་ཅད་གསེར་ལས་བྱས་པའི་ཁྲིའུ་བཟང་པོའི་སྟེང་དུ་བྱས་པ་དེ་བཞག་ནས་ནང་གི་མིས་བུམ་པ་དེའི་ནང་ནས་མིང་དེ་རྣམས་ཕྱུང་ངོ་། ཞི་བའི་བློ་གྲོས་དེའི་ཚེ་ཐམས་ཅད་ཀྱི་ཐོགས་མར་རྒྱལ་བུ་གཞོན་ནུ་རྣམ་པར་དག་པའི་བློ་གྲོས་ཞེས་བྱ་བ་དེའི་མིང་བྱུང་བར་གྱུར་ཏོ། །མིང་དེ་བྱུང་མ་ཐག་ཏུ་སྐད་ཅིག་དེ་ཉིད་ལས་ཆེན་པོ་འདི་རྣམ་པ་དྲུག་ཏུ་གཡོས་སོ། །བཙུམ་མོའི་འཁོར་ཐམས་ཅད་ཀྱི་པང་ན་སིལ་སྙན་ཡོད་པ་དེ་དག་ཀྱང་མ་དཀྲོལ་པར་བྱེ་བ་ཕྲག་དུ་མའི་སྒྲ་བྱུང་ངོ་། །ཞི་བའི་བློ་གྲོས་འདི་ཇི་སྙམ་དུ་སེམས།
ཞི་བའི་བློ་གྲོས་དེའི་ཚེ་དེའི་དུས་ན་ཐམས་ཅད་ཀྱི་ཐོག་མར་མིང་བྱུང་བ་རྒྱལ་བུ་གཞོན་ནུ་རྣམ་པར་དག་པའི་བློ་གྲོས་ཞེས་བྱ་བར་གྱུར་པ་དེ་གཞན་ཡིན་པར་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་འཁོར་བ་འཇིག་དེ་དེའི་ཚེ་དེའི་དུས་ན་རྒྱལ་བུ་གཞོན་ནུ་རྣམ་པར་དག་པའི་བློ་གྲོས་ཞེས་བྱ་བར་གྱུར་ཏོ། །དེའི་འོག་ཏུ་རྒྱལ་བུ་གཞོན་ནུ་རྣམ་པར་རྒྱལ་བའི་སྡེ་ཞེས་བྱ་བ་དེའི་མིང་བྱུང་སྟེ། བཅོམ་ལྡན་འདས་གསེར་ཐུབ་དེ་དེའི་ཚེ་དེའི་དུས་ན་རྒྱལ་བུ་གཞོན་ནུ་རྣམ་པར་རྒྱལ་བའི་སྡེ་ཞེས་བྱ་བར་གྱུར་ཏོ། །དེའི་འོག་ཏུ་རྒྱལ་བུ་གཞོན་ནུ་དབང་པོ་ཞི་བ་ཞེས་བྱ་བ་དེའི་མིང་བྱུང་སྟེ། བཅོམ་ལྡན་འདས་འོད་སྲུང་དེ་དེའི་ཚེ་དུས་ན་རྒྱལ་བུ་གཞོན་ནུ་དབང་པོ་ཞི་བ་ཞེས་བྱ་བར་གྱུར་ཏོ། །དེའི་འོག་ཏུ་རྒྱལ་བུ་གཞོན་ནུ་དོན་ཐམས་ཅད་གྲུབ་པ་ཞེས་བྱ་བ་དེའི་མིང་བྱུང་ངོ་། །དེ་ནི་ང་ཡིན་ཏེ་དེའི་ཚེ་དེའི་དུས་ན་རྒྱལ་བུ་གཞོན་ནུ་དོན་ཐམས་ཅད་གྲུབ་བ་ཞེས་བྱ་བར་གྱུར་ཏོ། །དེའི་འོག་ཏུ་རྒྱལ་བུ་གཞོན་ནུ་སྐ་རགས་ཅན་ཞེས་བྱ་བའི་མིང་བྱུང་བར་གྱུར་ཏེ། དེ་ནི་བྱམས་པ་ཞེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་མཆོག་གི་བློ་གྲོས་ཞེས་བྱ་བ་དེའི་མིང་བྱུང་སྟེ། དེ་ནི་སེང་གེ་ཞེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་གློག་གི་ལྷ་ཞེས་བྱ་བ་དེའི་མིང་བྱུང་སྟེ། དེ་ནི་ཏོག་ཅེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་བཟང་པོའི་རྒྱལ་པོ་ཞེས་བྱ་བའི་མིང་བྱུང་སྟེ། དེ་ནི་མེ་ཏོག་དམ་པ་ཞེས་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་འོད་ཀྱི་དཔལ་ཞེས་བྱ་བའི་མིང་བྱུང་སྟེ། དེ་ནི་མེ་ཏོག་ཅེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་རྣམ་པར་སྣང་བའི་པདྨ་ཞེས་བྱ་བའི་མིང་བྱུང་སྟེ། དེ་ནི་སྐར་མ་རྒྱལ་ཞེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་དྲི་མ་མེད་པའི་འོད་ཅེས་བྱ་བའི་མིང་བྱུང་སྟེ། དེ་ནི་སྤྱན་ལེགས་པ་ཞེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་རྡུལ་མེད་ཅེས་བྱ་བའི་མིང་བྱུང་སྟེ། དེ་ནི་ལག་བཟངས་ཞེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་
རྒྱལ་བུ་གཞོན་ནུ་བློ་གྲོས་རྒྱལ་པོ་ཞེས་བྱ་བའི་མིང་བྱུང་སྟེ། དེ་ནི་འོད་ཅེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་དགེ་བ་བཀོད་པའི་རྒྱལ་པོ་ཞེས་བྱ་བའི་མིང་བྱུང་སྟེ། དེ་ནི་སྐར་མ་ལ་དགའ་བ་ཞེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་ཕྱོགས་འབྱོར་པ་ཞེས་བྱ་བའི་མིང་བྱུང་སྟེ། དེ་ནི་མངོན་འཕགས་གཤེགས་པ་ཞེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་རྣམ་པར་དག་པ་བཀོད་པའི་རྒྱལ་པོ་ཞེས་བྱ་བའི་མིང་བྱུང་སྟེ། དེ་ནི་ཡོན་ཏན་གྱི་མཆོག་མངའ་བ་ཞེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་དཔལ་སྦས་ཞེས་བྱ་བའི་མིང་བྱུང་སྟེ། དེ་ནི་ནོར་དཔལ་ཞེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་ལུས་ཤིན་དུ་རྣམ་པར་འབྱེད་པ་ཞེས་བྱ་བའི་མིང་བྱུང་སྟེ། དེ་ནི་ཡེ་ཤེས་འབྱུང་གནས་ཞེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་དྲག་ཤུལ་ཅན་ཞེས་བྱ་བའི་མིང་བྱུང་སྟེ། དེ་ནི་རིན་པོའི་ཚེ་འབྱུང་གནས་ཞེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་རིན་ཆེན་གྲགས་པ་ཞེས་བྱ་བའི་མིང་བྱུང་སྟེ། དེ་ནི་ཀུན་དུ་སྣང་བཞེས་བྱ་བའི་དེ་བཞིན་གཤེགས་པར་འགྱུར་རོ། །དེ་བཞིན་དུ་རྒྱ་ཆེར་བྱ་སྟེ།ཞི་བའི་བློ་གྲོས་དེ་ལྟར་བུ་སྟོང་ཡོད་པ་དེའི་ནད་ནས་གཅིག་བཞག་སྟེ། རྒྱལ་བུ་གཞོན་ནུ་ཅོན་པན་བརྒྱན་པ་ཞེས་བྱ་བའི་མིང་གི་བར་དུ་འབྱུང་ངོ་། །དེ་ནི་ཡོན་ཏན་མཐའ་ཡས་གྲགས་པ་ཞེས་བྱ་བའི་དེ་བཞིན་གཤེགས་པར་འགྱུར་རོ། །ཞི་བའི་བློ་གྲོས་དེའི་ཚེ་རྒྱལ་བུ་གཞོན་ནུ་ཐམས་ཅད་ཀྱི་ཐ་མཚུངས་བློ་གྲོས་མཐའ་ཡས་ཞེས་བྱ་བའི་མིང་བྱུང་བར་གྱར་པ་དང་སྣག་གི་གཉེན་མཚམས་ཐམས་ཅད་དང་སྤུན་རྣམས་ན་རེ། གང་གི་ཚེ་བདག་ཅན་ཐམས་ཅད་ཀྱིས་སེམས་ཅན་ཐམས་ཅད་ཡོངས་སུ་སྨིན་པར་བྱས་ཤིང་སངས་རྒྱས་ཀྱི་བྱ་བ་ཐམས་ཅད་བྱས་པ་དེའི་འོག་ཏུ་ཁྱོད་ཀྱིས་ཅི་ཞིག་བྱར་ཡོད་ཅེས་དཔྱས་པ་དང་། བློ་གྲོས་མཐའ་ཡས་ཀྱིས་སྨྲས་པ། སངས་རྒྱས་ཆོས་རྣམས་འདི་དག་ནམ་མཁའ་མཚུངས་ཤིང་འདྲ། བདག་གི་ཡིད་ལ་སེམས་ཅན་ཟད་པ་མེད་སྙམ་བགྱིད་
ཚུལ་ཁྲིམས་ཀྱིས་ནི་བདག་གི་སྨོན་ལམ་འདི་དག་འགྱུར། བདག་གི་སྨོན་ལམ་ཅི་འདྲ་ཐམས་ཅད་འདི་དག་གོས་ན་ཅིག་ཁྱེད་ཀྱི་ཚེ་ཚད་ཇི་ཙམ་བདག་སྡོམས་པ་དང་། ཚོགས་ཀྱི་རྒྱལ་པོ་ཇི་སྙེད་དེ་དག་ཏུ་ཀུན་བསྡོམས་པ། ཐམས་ཅད་བསྡོམས་པ་དེ་སྙེད་བདག་གི་ཚེར་འགྱུར་ཏེ། བདག་གི་དགེ་སློད་ཚོགས་ཀྱང་དེ་ཀུན་མ་ལུས་སྙེད། དེ་ཡིས་ཚིགས་སུ་བཅད་པ་དེ་ནི་སྨྲས་མ་ཐག །དེའི་ཚེ་ན་ལེགས་ཤེས་ལྷ་ཡིས་སྒྲ་བྱུང་སྟེ། སེམས་ཅན་དག་པ་ཁྱོད་ཀྱིས་བསམ་པ་རྫོགས་གྱུར་ཅིག །ཁྱོད་ཀྱིས་ཇི་ལྟར་བསམས་བཞིན་སེམས་ཅན་དོན་མཛད་ཅིག །ཞི་བའི་བློ་གྲོས་དེ་ལྟར་རྒྱལ་བུ་གཞོན་ནུ་ཐམས་ཅད་ཀྱི་ཐ་ཆུངས་སུ་གྱུར་པ་བློ་གྲོས་མཐའ་ཡས་ཞེས་བྱ་བ་དེ་ནི་བསྐལ་པ་བཟང་པོ་འདི་ལ་དེ་བཞིན་གཤེགས་པ་ཐམ་པ་མོས་པ་ཞེས་བྱ་བར་འགྱུར་ཏེ། ཞི་བའི་བློ་གྲོས་བསྐལ་པ་བཟང་པོའི་དེ་བཞིན་གཤེགས་པ་དེ་དག་ཐམས་ཅད་ཀྱི་ཚེའི་ཚད་ཇི་ཙམ་པ་དང་།ཉན་ཐོས་ཀྱི་དགེ་འདུན་ཇི་སྙེད་པར་འགྱུར་བ་དེས་བཞིན་གཤེགས་པ་མོས་པ་དེའི་ཚེའི་ཚད་ཀྱང་དེ་སྲིད་དུ་འགྱུར། ཉན་ཐོས་ཀྱི་དགེ་འདུན་ཡང་དེ་སྙེད་དུ་འགྱུར་རོ། །བདག་དེ་ལྟར་མོས་བས་ན་དེའི་ཕྱིར་མོས་པ་ཞེས་བྱའོ། །ཞི་བའི་བློ་གྲོས་འདི་ལྟར་སངས་རྒྱས་སྟོང་དུ་གཅིག་གིས་མ་ཚང་བ་དག་སངས་རྒྱས་ཀྱི་མཛད་པ་ཇི་སྙེད་མཛད་པ་དེ་སྙེད་དེ་བཞིན་གཤེགས་པ་མོས་པར་བྱེད་པར་འགྱུར་བས་ཐམས་ཅད་མཁས་པའི་ཚུལ་ཁྲིམས་ཕུན་སུམ་ཚོགས་པའི་རྒྱུ་འཐུན་པ། སྨོན་ལམ་ཡོངས་སུ་རྫོགས་པའི་ཁྱད་པར་ལ་ལྟོས། ཞི་བའི་བློ་གྲོས་དེ་ནས་གཞོན་ནུ་སྟོང་པོ་དེ་དག་གིས་བྱང་ཆུབ་སེམས་དཔའ་གཞོན་ནུ་ཆོས་སེམས་པ་དང་། ཆོས་ཀྱི་བློ་གྲོས་དང་དེ་གཉིས་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱེད་གཉིས་ཀྱིས་སྨོན་ལམ་ཇི་ལྟ་བུ་ཞིག་ཏམ། ཆོས་སེམས་པས་སྨྲས་པ། གྲོགས་པོ་དག་བདག་ནི་ཁྱེད་ཐམས་ཅད་ཀྱི་ལག་ན་རྡོ་རྗེར་གྱུར་ཏེ། ནང་ན་སྤྱོད་ཅིང་དེ་བཞིན་གཤེགས་པའི་གསང་བ་ཐམས་ཅད་ལས་ཕྱི་རོལ་དུ་མ་གྱུར་ལ་ཕྱི་ནང་གི་སངས་རྒྱས་ཀྱི་ཆོས་ཐམས་ཅད་ཉན་པ་དང་། མོས་པ་དང་། རྟོགས་པ་དེ་ལྟར་བདག་སྨོན་ལམ་འདེབས་སོ། །ཆོས་ཀྱི་བློ་གྲོས་ཀྱིས་སྨྲས་པ། སྣག་
གི་གཉེན་མཚམས་དག་བདག་ནི་ཁྱེད་རྣམས་ཐམས་ཅད་ཀྱིས་བྱང་ཆུབ་ན་ཐོབ་པ་ན་ཆོས་ཀྱི་འཁོར་ལོ་བསྐོར་བར་བསྐུལ་ཏེ། བདག་གིས་བསྐུལ་བས་ཁྱེད་ཐམས་ཅད་ཆོས་ཀྱི་འཁོར་ལོ་སྐོར་བར་གྱུར་ཅིག་ཅེས་སྨོན་ལམ་འདི་ལྟར་འདེབས་སོ། །ཞི་བའི་བློ་གྲོས་དེ་གཉིས་ཀྱང་སྨོན་ལམ་ཇི་ལྟར་བཏབ་པ་བཞིན་དུ་བཅོམ་ལྡན་འདས་དེས་ལུང་བསྟན་པར་གྱུར་ཏོ། །ཞི་བའི་བློ་གྲོས་དེའི་ཚེ་དེའི་དུས་ན་འཁོར་ལོས་སྒྱུར་བའི་རྒྱལ་པོ་ཡུལ་འཁོར་སྲུང་ཞེས་བྱ་བར་གྱུར་བ་དེ་ཁྱོད་ཀྱིས་གཞན་ཡིན་པ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བཅོམ་ལྡན་འདས་མར་མེ་མཛད་དེ་དེའི་ཚེ་དེའི་དུས་ན་འཁོར་ལོས་སྒྱུར་བའི་རྒྱལ་པོ་ཡུལ་འཁོར་སྲུང་ཞེས་བྱ་བར་གྱུར་ཏོ། །དེའི་བུ་གཞོན་ནུ་སྟོང་ཡོད་པ་དེ་དག་ནི་བསྐལ་པ་བཟང་པོའི་དེ་བཞིན་གཤེགས་པ་ཤ་སྟག་གོ །དེ་བཞིན་གཤེགས་པ་འཁོར་བ་འཇིགས་ནས་བཟུང་སྟེ། དེ་བཞིན་གཤེགས་པ་མོས་པ་ཞེས་བྱ་བའི་བར་དག་དེའི་ཚེ་དེའི་དུས་ན་རྒྱལ་བུ་གཞོན་ནུར་གྱུར་ཏོ། །ཞི་བའི་བློ་གྲོས་བཙུན་མོ་མ་སྙད་པ་ཞེས་བྱ་བའི་བང་བ་ནས་རྫུས་ཏེ་བྱུང་བ་ཁྱེའུ་ཆོས་སེམས་པ་ཞེས་བྱ་བར་གྱུར་པ་དེ་ནི་གསང་བ་པའི་བདག་པོ་ལག་ན་རྡོ་རྗེ་འདི་ཡིན་ཏེ། དེའི་ཚེ་དེའི་དུས་ན་ཁྱེའུ་ཆོས་སེམས་དཔའ་ཞེས་བྱ་བར་འགྱུར་ཏོ། །ཞི་བའི་བློ་གྲོས་བཙུན་མོ་དཔེ་མེད་མ་ཞེས་བྱ་བའི་བང་བ་ནས་རྫུས་བྱུང་བ་ཁྱེའུ་ཆོས་ཀྱི་བློ་གྲོས་ཞེས་བྱ་བ་དེ་ནི་ཚངས་པ་གཙུག་བུད་ཅན་འདི་ཡིན་ཏེ། དེའི་ཚེ་དེའི་དུས་ན་ཁྱེའུ་ཆོས་ཀྱི་བློ་གྲོས་ཞེས་བྱ་བར་འགྱུར་ཏོ། །ཞི་བའི་བློ་གྲོས་རྒྱལ་པོ་ཡུལ་འཁོར་སྲུང་གི་བཙུན་མོའི་འཁོར་དུ་གྱུར་པ་གང་ཡིན་པ་དེ་དག་ནི་འཁོར་འདིར་འདུས་པའི་བྱང་ཆུབ་སེམས་དཔའ་རྣམས་ཡིན་ནོ། །རྒྱལ་བུ་གཞོན་ནུ་དེ་རྣམས་ཀྱིས་སེམས་ཅན་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་པ། ཐེག་པ་ཆེན་པོ་ལ་ཡང་དག་པར་ཞུགས་པ་དེ་དག་ཐམས་ཅད་ན་བསྐལ་པ་བཟང་པོ་འདི་ཉིད་ལ་མཐར་ཀྱིས་ལུང་བསྟན་པ་ཐོབ་པར་འགྱུར་རོ། །ཞི་བའི་བློ་གྲོས་འདི་ལྟ་ལྟར་སྐྱེས་བུ་དམ་པ་དེ་དག་གི་བསམ་པ་ཐམས་ཅད་འབྱོར་པས། དགེ་བའི་རྩ་བའི་རྒྱུ་ལས་བྱུང་བའི་སེམས་བསྐྱེད་པ་ཆུད་མི་ཟ་བ་རྟེན་ཅིང་འགྲེལ་བར་འབྱུང་བའི་མི་འགལ་པ་ལ་ལྟོས། ཡུལ་འཁོར་སྲུང་གི་སྔོན་གྱི་ཚུལ་གྱི་ལེའུ་སྟེ་ལྔ་པའོ། །