འཕགས་པ་རྒྱན་སྟུག་པོ་བཀོད་པའི་མདོ་ལས། དང་པོ། སྟུག་པོ་རིས་ཀྱི་ཡེ་ཤེས་ཀྱི་རྒྱན་ལས་བྱུང་ཞེས་བའི་ལེའུ།
རྒྱ་གར་སྐད་དུ། ཨཱརྱ་གྷ་ན་བྱཱུ་ཧ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་རྒྱན་སྟུག་པོ་བཀོད་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་ཆོས་ཐམས་ཅད་ལ་མངའ་སྒྱུར་བ་འདོད་པ་ནས། གཟུགས་དང་། གཟུགས་མེད་པ་དང་། འདུ་ཤེས་མེད་པའི་སེམས་ཅན་རྣམས་ལས་འདས་ཏེ། སངས་རྒྱས་ཀྱི་ཞིང་སྟུག་པོ་ན་སྟོབས་མངའ་བ་རྣམས་དང་། རྫུ་འཕྲུལ་གྱི་རྐང་པ་རྣམས་ཀྱིས་རྣམ་པར་འཕྲུལ་ཞིང་རྗེས་སུ་སྤྱོད་པ། བྱང་ཆུབ་སེམས་དཔའ་སེམས་དཔའ་ཆེན་པོ་རྣལ་འབྱོར་དམ་པའི་རྣལ་འབྱོར་ཅན་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་མུར་འདུག་བྱེད་པ་ཐམས་ཅད་ཀྱི་གཞུང་རྣམ་པར་འཇོམས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཆོས་
ཐམས་ཅད་ཀྱི་རྣམ་པར་དགོད་པ་ཡང་དག་པ་ཇི་ལྟ་བ་བཞིན་དུ་སྟོན་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་པོ་བརྙེས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་འཕྲུལ་པའི་རྒྱལ་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་གྲོལ་བའི་ཟླ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཤུགས་འཛིན་དང་། དེ་དག་ལ་སོགས་པ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་བྱེ་བ་སྙེད་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་ཁམས་གསུམ་པའི་ཡུལ་ལས་ཡོངས་སུ་འདས་པ། སེམས་དང་། ཡིད་དང་། རྣམ་པར་ཤེས་པ་དང་། ཀུན་གཞིའི་སྤྱོད་ཡུལ་ལས་ཡོངས་སུ་འདས་པ། ཡེ་ཤེས་དང་ཡིད་ཀྱི་ལུས་སུ་གནས་གྱུར་པ། སྒྱུ་མ་ལྟ་བུ་དང་། དཔའ་བར་འགྲོ་བ་དང་། ཆོས་ཀྱི་སྤྲིན་གྱི་ས་དང་། ཏིང་ངེ་འཛིན་དང་ལྡན་པ། སངས་རྒྱས་དུ་མའི་ཕྱག་གི་དབང་བསྐུར་བས་དབང་བསྐུར་བ། ཁམས་གསུམ་པའི་ཡུལ་ལས་ཤིན་ཏུ་འདས་པའི་གཞལ་མེད་ཁང་གི་པད་མོ་ཆེན་པོ་ལ་འཁོད་པ་རྣམས་དང་ཐབས་ཅིག་ཏུ་བཞུགས་ཏེ། དེ་ན་མུར་འདུག་དང་། ཉན་ཐོས་དང་། རང་སངས་རྒྱས་ཐམས་ཅད་ཀྱི་རྒྱུ་བ་མེད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཐོང་བའི་ཆོས་ལ་བདེ་བར་སྤྱད་པ་བདག་གི་སོ་སོ་རང་གི་འཕགས་པའི་ཡེ་ཤེས་ཀྱིས་མཁྱེན་པའི་སྤྱོད་ཡུལ་བཙུན་པར་དབྱངས་
འབྱིན་པ་སྣ་ཚོགས་ཀྱི་གཟུགས་དུ་མ་སྟོན་པའི་ཏིང་ངེ་འཛིན་ལས་བཞེངས་སོ། །བཞེངས་ནས་ཀྱང་ཕོ་བྲང་འཇའ་དང་གློག་གི་འོད་ཅན་རྒྱན་དང་། ལྷབ་ལྷུབ་དུ་མས་བརྒྱན་པ་ནས་མངོན་པར་བྱུང་སྟེ། ཟླ་བ་དྲི་མ་མེད་པའི་སྙིང་པོ་ཞེས་བྱ་བའི་ཁང་སྟེངས་སུ་གཤེགས་སོ། །གཤེགས་ནས་ཀྱང་སྟུག་པོའི་རིས་ཀྱི་རྒྱན་སེང་གེའི་གདན་དམ་པ་ལ་བྱང་ཆུབ་སེམས་དཔའ་དང་ཐབས་ཅིག་ཏུ་བཞུགས་སོ། །བཞུགས་ནས་ཀྱང་བཅོམ་ལྡན་འདས་ཀྱིས་ཕྱོགས་བཞིར་གཟིགས་ཏེ་གཙུག་གི་རིན་ཆེན་འོད་ཀྱི་རྒྱན་ཅེས་བྱ་བའི་འོད་ཟེར་གྱི་ཚོགས་ཆེན་པོ་འོད་ཟེར་སྟོང་ཕྲག་བརྒྱའི་འཁོར་ཅན་སྨིན་མཚམས་ནས་ཕྱུང་སྟེ། འོད་ཟེར་གྱི་ཚོགས་དེ་བྱུང་བས་སངས་རྒྱས་ཀྱི་ཞིང་གི་རྒྱན་ཐམས་ཅད་སངས་རྒྱས་ཀྱི་རྒྱན་གཅིག་དང་འདྲ་བར་ཡོངས་སུ་སྣང་བར་གྱུར་ཏོ། །མཆོག་ཏུ་ཕྲ་བའི་རྡུལ་གྱི་ཕྲ་བ་ཉིད་དུ་སངས་རྒྱས་ཀྱི་ཞིང་ཐམས་ཅད་ཀྱི་རང་བཞིན་ཕྲ་བ་ཉིད་ཀྱང་ཡོངས་སུ་སྣང་ངོ་། །སངས་རྒྱས་ཀྱི་ཞིང་སྟུག་པོ་ཡང་སངས་རྒྱས་ཀྱི་ཞིང་གཞན་གྱི་རང་བཞིན་རྡུལ་གྱི་ཕྲ་བ་ཉིད་ལས་འདས་ཏེ་གནས་སོ། །སངས་རྒྱས་ཀྱི་ཞིང་སྟུག་པོ་ནི་འོད་དང་། གཟའ་དང་། ཟླ་བ་སྤངས་པ་སྟེ། འདུས་མ་བྱས་ཀྱི་རང་བཞིན་ཉིད་ཀྱིས་ཤིན་ཏུ་ཕྲ་བའི་རྡུལ་གྱི་ཕྲ་བ་ཉིད་དུ་མི་སྣང་གི། གཞན་དུ་མྱ་ངན་ལས་འདས་པ་དང་། ནམ་མཁའ་དང་མ་བརྟགས་པར་འགོག་པ་ལྟ་བུར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་། སངས་རྒྱས་བཅོམ་ལྡན་འདས་རྣམས་དང་། སངས་རྒྱས་ཀྱི་ཞིང་གཞན་དག་ན་སྤྱོད་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་གཟིགས་སོ། །དེ་ནས་བཅོམ་ལྡན་འདས་ཀྱིས་སངས་རྒྱས་ཀྱི་ཞིང་གི་རྒྱན་དང་། སངས་རྒྱས་དང་བྱང་ཆུབ་སེམས་དཔའི་མཐུ་ཕྱུང་བ་དེ་དག་གཟིགས་ནས་སངས་རྒྱས་ཀྱི་སྤྱན་གྱིས་ཕྱོགས་བཅུར་བྱང་ཆུབ་སེམས་དཔའི་འཁོར་དང་བཅས་པ་ལ་གཟིགས་ནས་བྱང་ཆུབ་སེམས་དཔའ་སངས་རྒྱས་ཀྱི་ཆོས་ཐམས་ཅད་རྣམ་པར་དགོད་པ་ཡང་དག་པ་ཇི་ལྟ་བ་བཞིན་དུ་སྟོན་པ་ལ་བཀའ་སྩལ་པ། རྣམ་པར་དགོད་པ་ཡང་དག་པ་ཇི་ལྟ་བ་བཞིན་དུ་སྟོན་པ་སྟུག་པོའི་རྒྱན་ཞེས་བྱ་
བའི་སངས་རྒྱས་ཀྱི་ཞིང་འདི་ན་འདོད་པ་དང་། གཟུགས་དང་། གཟུགས་མེད་པ་དང་། འདུ་ཤེས་མེད་པའི་སེམས་ཅན་དུ་གཏོགས་པའི་གཟུགས་སྲེད་པ་དང་། མ་རིག་པ་དང་། ཏིང་ངེ་འཛིན་གྱི་འབྲས་བུ་ཡེ་ཤེས་ཀྱི་མེས་རྣམ་པར་བསྲེགས་ཏེ་གནས་གྱུར་པའི་ཕྱིར་ཡེ་ཤེས་ཀྱི་ཏིང་ངེ་འཛིན་དང་། ཡིད་བཞིན་གྱི་ལུས་སྟོབས་དང་། མངོན་པར་ཤེས་པ་དང་། རྫུ་འཕྲུལ་གྱི་རྐང་པ་དང་། དབང་གིས་བརྒྱན་པ། གསེང་མེད་པ། རིང་དུ་གནས་པ། ཟླ་བ་དང་། ཉི་མ་དང་། ནོར་བུ་དང་། གློག་དང་། འཇའ་དང་། བྱི་རུ་དང་། བ་བླ་དང་། ལྡོང་རོས་དང་། མཚལ་དང་། མགོ་ནག་གི་འབྲུ་དང་། ཀིང་ཤུ་ཀ་དང་། ཨིན་དྲ་གོ་པ་དང་། གསེར་དང་། ཙམ་པ་ཀ་དང་། པད་མོ་དང་། དུང་དང་། རྨ་བྱའི་མགུལ་དང་། མདོངས་བུ་མེ་ལོང་གི་ནང་ན་འདུག་པའི་གཟུགས་བརྙན་ལྟ་བུ་ཐོབ་ནས་ས་དང་སར་ཟག་པ་མེད་པས་སྦྱངས་པའི་རྒྱུ་ཏིང་ངེ་འཛིན་ལ་དབང་སྒྱུར་བའི་ཕྱིར་སྨོན་ལམ་གྱི་མཐར་ཕྱིན་པ་བཅུའི་བསྔོ་བས་ལུས་ཐོབ་པའི་ཁྱད་པར་ཅན་དག་སངས་རྒྱས་ཀྱི་ཞིང་སྟུག་པོར་འོང་ངོ་། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཆོས་ཐམས་ཅད་རྣམ་པར་དགོད་པ་ཡང་དག་པ་ཇི་ལྟ་བ་བཞིན་དུ་སྟོན་པ་སྟན་ལས་ལངས་ཏེ། བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱོགས་གཅིག་ཅིག་བཅོམ་ལྡན་འདས་ཀྱིས་བདག་ལ་ཞུ་བ་ཞུས་པ་ལུང་བསྟན་པའི་སླད་དུ་སྐབས་དབྱེ་བར་གནང་ན་བདག་གིས་ཞུའོ། །བཅོམ་ལྡན་འདས་ཀྱིས་བཀའ་སྩལ་པ། རྣམ་པར་དགོད་པ་ཡང་དག་པ་ཇི་ལྟ་བ་བཞིན་དུ་སྟོན་པ་ཁྱོད་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་དྲིས་ཤིག་དང་། ངས་ཅི་དང་ཅི་འདོད་པ་དེ་དང་དེའི་དྲི་བ་དྲིས་པ་ལུང་བསྟན་པས་སེམས་མགུ་བར་བྱས། ཁྱོད་ཀྱིས་ཇི་ལྟར་བཟོད་པ་དེ་ལྟར་
སྨྲོས་ཤིག །དེ་ནས་སངས་རྒྱས་ཀྱི་ཆོས་ཐམས་ཅད་རྣམ་པར་དགོད་པ་ཇི་ལྟ་བ་བཞིན་དུ་སྟོན་པའི་བྱང་ཆུབ་སེམས་དཔའ་སེམས་དཔའ་ཆེན་པོ། བཅོམ་ལྡན་འདས་ཀྱིས་སྐབས་ཕྱེ་བ་དང་། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སངས་རྒྱས་ཀྱི་ཞིང་སྟུག་པོ་འབའ་ཞིག་འདོད་པ་དང་། གཟུགས་དང་། གཟུགས་མེད་པ་དང་། འདུ་ཤེས་མེད་པའི་སེམས་ཅན་ལས་འདས་ཏེ། གནས་སམ། སངས་རྒྱས་ཀྱི་ཞིང་གཞན་དག་ཀྱང་དེ་བཞིན་ནམ་ཅི་ལགས། རིགས་ཀྱི་བུ་སངས་རྒྱས་ཀྱི་ཞིང་སྟུག་པོ་འབའ་ཞིག་འདོད་པ་དང་། གཟུགས་དང་། གཟུགས་མེད་པ་དང་། འདུ་ཤེས་མེད་པའི་སེམས་ཅན་ལས་འདས་ཏེ་གནས་པ་མ་ཡིན་གྱི་སངས་རྒྱས་ཀྱི་ཞིང་གཞན་དག་ཀྱང་ཡོད་དོ། །རིགས་ཀྱི་བུ་འདི་ནས་ཕ་རོལ་ཤིན་ཏུ་འང་ཕ་རོལ་སངས་རྒྱས་ཀྱི་ཞིང་བྱེ་བ་སྟོང་ཕྲག་བརྒྱ་འདས་པའི་སྟེང་གི་ཕྱོགས་ཆ་ན་ཚངས་པའི་དབྱངས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཞིང་དང་། དེ་བཞིན་དུ་སཱ་ལའི་དབང་པོའི་རྒྱལ་པོ་དེ་བཞིན་གཤེགས་པ་དང་། སྐར་མའི་རྒྱལ་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་སངས་རྒྱས་ཀྱི་ཞིང་དང་། དེ་བཞིན་དུ་སངས་རྒྱས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཕ་རོལ་ཤིན་ཏུའང་ཕ་རོལ་ཏུ་འདས་པ་ན། སངས་རྒྱས་ཀྱི་ཞིང་བྱེ་བ་སྟོང་ཕྲག་བརྒྱ་མང་པོ་བྱང་ཆུབ་སེམས་དཔའི་འཁོར་གྱི་ཚོགས་ཀྱིས་བརྒྱན་པ་ཤིན་ཏུ་ཡངས་ཤིང་ཆེ་བ་དག་ཡོད་དེ། སངས་རྒྱས་བཅོམ་ལྡན་འདས་དེ་དག་ཀྱང་འཁོར་གྱི་ཚོགས་དེ་དང་དེ་དག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་བདག་གི་སོ་སོ་རང་གི་འཕགས་པའི་ཡེ་ཤེས་ཀྱི་རྟོགས་པའི་སྤྱོད་ཡུལ་གྱི་གཏམ་དང་། མཐོང་བའི་ཆོས་ལ་བདེ་བར་གནས་པའི་ཆོས་ཚིག་དང་རྣམ་པར་རྟོག་པའི་སྤྱོད་ཡུལ་དང་། ཡི་གེ་དང་བྲལ་བ་དེ་བཞིན་ཉིད་དང་། ཡང་དག་པའི་མཐའ་དང་། མྱ་ངན་ལས་འདས་པ་ཐོབ་པར་བྱེད་
པ་ཕྱི་མའི་མཐའི་མུར་གཏུགས་པར་སྟོན། དེ་ནི་རྣམ་པར་བཀོད་པ་ཡང་དག་པ་ཇི་ལྟ་བ་བཞིན་དུ་སྟོན་ཏེ། དེ་ནི་གང་རྣམ་པར་དགོད་པ་ཡང་དག་པ་ཇི་ལྟ་བ་བཞིན་དུ་སྟོན་པ་ཁྱོད་ཀྱིས་འདིའི་ཕ་རོལ་ན་འཇིག་རྟེན་གཞན་དང་སངས་རྒྱས་དག་ཡོད་དམ་ཞེས་སྨྲས་པ་དེའི་ལན་དུ་ངས་འདི་སྨྲས་སོ། །རྣམ་པར་དགོད་པ་ཡང་དག་པ་ཇི་ལྟ་བ་བཞིན་དུ་སྟོན་པ་ཁྱོད་འབའ་ཞིག་སངས་རྒྱས་ཀྱི་ཞིང་གི་རྒྱན་དང་བྱང་ཆུབ་སེམས་དཔའ་ལ་ལྟད་མོ་བལྟ་བར་འདོད་པའི་ཕྱིར་དེ་བཞིན་གཤེགས་པ་ལ་དྲི་བར་སེམས་པར་མ་ཟད་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་ཤུགས་འཛིན་འདི་ཡང་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཞིང་གི་རྒྱན་དང་། སངས་རྒྱས་ཀྱི་སྒྲའི་དབྱངས་ཀྱི་དཀྱིལ་འཁོར་དང་སྤྱི་གཙུག་ཚད་མེད་པ་ལ་ལྟད་མོ་བལྟ་བར་འདོད་པའི་ཕྱིར་སངས་རྒྱས་ཀྱི་ཞིང་བྱེ་བ་སྟོང་ཕྲག་བརྒྱར་སོང་ནས་སངས་རྒྱས་ཀྱི་ཞིང་ཆུ་བོ་གང་གཱའི་བྱེ་མ་སྙེད་དུ་རྫུ་འཕྲུལ་གྱི་མཆོག་གིས་གྱེན་དུ་སོང་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཤུགས་འཛིན་འདིས་དེ་བཞིན་གཤེགས་པ་གཅིག་ཙམ་གྱི་སངས་རྒྱས་ཀྱི་ཞིང་གི་རྒྱན་ཏམ། སངས་རྒྱས་ཀྱི་གསུང་གི་དབྱངས་ཀྱི་དཀྱིལ་འཁོར་རམ། སྤྱི་གཙུག་ཚད་མེད་པ་ཡང་མ་མཐོང་སྟེ། དེས་མ་མཐོང་བ་དང་། ངོ་མཚར་དུ་གྱུར་ནས་སངས་རྒྱས་ཀྱི་གསུང་གི་དབྱངས་ཀྱི་དཀྱིལ་འཁོར་དང་། སྤྱི་གཙུག་པ་ལྟར་ཚད་མེད་པ་བསམ་གྱིས་མི་ཁྱབ་པ། ཡང་དག་པར་རྗེས་སུ་དྲན་ཞིང་མི་མཇེད་ཀྱི་འཇིག་རྟེན་གྱི་ཁམས་འདི་ཉིད་དུ་ཕྱིན་ནས་མཉན་དུ་ཡོད་པར་སངས་རྒྱས་བཅོམ་ལྡན་འདས་ཀྱི་སྤྱན་སྔར་འདུག་སྟེ། ཉེས་པ་ལ་ཉེས་པར་བཤགས་ནས་སངས་རྒྱས་རྣམས་ནམ་མཁའ་དང་མཉམ་པར་ཤེས་ཏེ་མངོན་པར་བསྟོད་ནས། བདག་གི་སོ་སོ་རང་གི་འཕགས་པའི་ཡེ་ཤེས་ཀྱིས་རྟོགས་པའི་སྤྱོད་ཡུལ་ལ་མངོན་པར་མོས་ཤིང་སངས་རྒྱས་ཀྱི་ཞིང་སྟུག་པོ་ཉིད་དུ་སོང་སྟེ་གནས་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ས་དང་སའི་མཚན་ཉིད་ལ་མཁས་པ་
ཕྲ་བ་དང་དམིགས་སུ་ཕེབས་པ་དང་། རྣམ་པར་གདོན་མི་ཟ་བའི་གཏམ་ཟློས་པ་སྟན་ལས་ལངས་ཏེ་བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་གང་ན་བ་དེར་ཐལ་མོ་སྦྱར་བས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱོགས་གཅིག་ཅིག་བཅོམ་ལྡན་འདས་ཀྱིས་བདག་ལ་ཞུ་བ་ཞུས་པ་ལུང་བསྟན་པའི་སླད་དུ་སྐབས་དབྱེ་བར་གནང་ན་བདག་གིས་ཞུའོ། །བཅོམ་ལྡན་འདས་ཀྱིས་བཀའ་སྩལ་པ། རྡོ་རྗེའི་སྙིང་པོ་ཁྱོད་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་དྲིས་ཤིག་དང་། ངས་ཅི་དང་ཅི་འདོད་པ་དེ་དང་དེའི་དྲི་བ་དྲིས་པ་ལུང་བསྟན་པས་སེམས་མགུ་བར་བྱས་ཁྱོད་ཀྱིས་ཇི་ལྟར་བཟོད་པ་དེ་ལྟར་སྨྲོས་ཤིག །དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ལ་བཅོམ་ལྡན་འདས་ཀྱིས་སྐབས་ཕྱེ་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སངས་རྒྱས་སངས་རྒྱས་ཞེས་བགྱི་བ་དང་། འཚང་རྒྱ་བར་བགྱི་བ་ཞེས་བྱ་བའི་དོན་ཅི་ལགས། བཅོམ་ལྡན་འདས་དོན་དམ་པ་འཕགས་པའི་ཡུལ་ཆོས་ཉིད་ཀྱི་སངས་རྒྱས་ཀྱི་རིགས་སྟོན་པ་འདས་པ་དང་། མ་འོངས་པ་དང་། ད་ལྟར་བྱུང་བའི་སྤྱོད་པའི་ས་ལ་སྤྱོད་པ་དང་། གཟུགས་དང་། མཚན་ཉིད་དང་། ཡང་དག་པར་བསྡུ་བའི་ལྟ་བར་ལྟུང་བ་རྣམས་དང་མུར་འདུག་གཞན་གྱི་སྨྲ་བ་ལ་མངོན་པར་ཆགས་པའི་བློའི་སྤྱོད་ཡུལ་ལ་སྤྱོད་པ་རྣམས་དང་། རྡུལ་དང་། གཅེས་པ་དང་། དབང་པོ་དང་། ཕྱོགས་དང་། དུས་དང་། ནམ་མཁའ་དང་། བདག་དང་། ཡིད་དང་། དབང་པོ་དང་། དོན་ཉེ་བར་འདུ་བའི་ལྟ་བར་ལྟུང་བ་རྣམས་ཀྱི་བློ་རྣམ་པར་བཟློག་པའི་སླད་དུ་བཤད་དུ་གསོལ། བདེ་བར་གཤེགས་པ་བསྟན་དུ་གསོལ། མ་རིག་པ་དང་། སྲེད་པ་དང་། ལས་དང་། མིག་དང་། གཟུགས་དང་། སྣང་བ་དང་། དེ་ལས་སྐྱེ་བའི་ཡིད་ལ་བྱེད་པ་དང་། གསུམ་འདུ་བའི་རྣམ་པར་རྟོག་པའི་
ཤེས་པ་ཅན་དང་། རྒྱུ་དང་། དེ་མ་ཐག་པ་དང་། དབང་དང་། དམིགས་པའི་རྐྱེན་ལས་བྱུང་བའི་རྣམ་པར་ཤེས་པ་ལ་ཆགས་པར་སྤྱོད་པ་དང་། ཡོད་པ་དང་། མེད་པར་སྨྲ་བའི་རྟོགས་པ་ཅན་དང་། ཆོས་འདི་བའི་ཕུང་པོ་དང་། གང་ཟག་སྟོང་པ་ཉིད་དུ་ལྟ་བར་ལྟུང་བ་རྣམས་ཀྱི་ཡང་བློ་རྣམ་པར་བཟློག་པའི་སླད་དུ་བཅོམ་ལྡན་འདས་བསྟན་དུ་གསོལ། ཆོས་ཀྱི་དབང་པོ་ཐོས་པར་འགྱུར་གྱིས་བདེ་བར་གཤེགས་པ་བསྟན་དུ་གསོལ། རྣམ་ཤེས་ལྔ་ཡི་རྒྱུ་ལ་སོགས། །མངའ་བདག་དམ་པ་མ་གཏོགས་པར། །སངས་རྒྱས་བློ་དང་ཤེས་བྱ་དང་། །ཇི་ལྟར་གང་གིས་འཚང་རྒྱ་ཞིང་། །ཤེས་བྱ་རྣམ་པ་ལྔ་པོ་རྣམས། །ཐུགས་སུ་ཆུད་པ་སངས་རྒྱས་ཏེ། །ཆོས་རྣམས་ཐམས་ཅད་མཁྱེན་པས་ན། །མྱ་ངན་འདའ་དང་མཉམ་གཤེགས་པ། །བཅོམ་ལྡན་འདས་ཀྱིས་བཀའ་སྩལ་པ། །དགེའོ་དགེའོ་རྡོ་རྗེའི་སྙིང་པོ་ས་བཅུ་ལ་དབང་བ། རྣམ་པར་རྟོག་པའི་སྤྱོད་ཡུལ་ལས་འདས་པ། མཁས་པ་ཆོས་ཉིད་ཀྱི་སངས་རྒྱས་ཀྱི་རིགས་གྲགས་པར་བྱེད་པ་དགེའོ། །རྣལ་འབྱོར་དམ་པ་ལ་དབང་བ། སངས་རྒྱས་དང་འཚང་རྒྱ་བར་ཡོངས་སུ་དྲི་བ་འདི་ལ་ནི་ཁྱོད་འབའ་ཞིག་ལྟད་མོ་བྱུང་བ་མ་ཡིན་གྱི། སྒྱུ་མ་བྱེད་པ་བཟང་པོ་དང་། རྒྱལ་བའི་བུ་གཞན་དག་ཀྱང་དོན་འདི་ལ་ལྟད་མོ་བྱུང་ཞིང་སངས་རྒྱས་ཀྱི་དངོས་པོ་འདྲི་སྟེ། དེ་བཞིན་གཤེགས་པ་ཞེས་བྱ་བའི་ཚིག་གི་དོན་འདི་ཅི་ཞིག །ཅི་གཟུགས་དེ་བཞིན་གཤེགས་པའམ། འོན་ཏེ་གཟུགས་ལས་གཞན་ཞིག་དེ་བཞིན་གཤེགས་པའམ། དེ་བཞིན་དུ་ཕུང་པོ་དང་། ཁམས་དང་། སྐྱེ་མཆེད་ཀྱི་འདུ་བྱེད་ལས་ཀྱང་སྟེ། ནང་དང་ཕྱིའི་མཉམ་པ་ཉིད་ཀྱང་མི་མཐོང་ཞིང་བྱས་པའི་རྒྱུ་དང་འཇིག་པའི་ཆོས་ཅན་གྱི་ཕྱིར་ཕུང་པོ་རྣམས་ལ་དེ་བཞིན་གཤེགས་པ་མེད་དེ། རྡུལ་ཕྲ་མོ་མེད་པ་ཐུགས་སུ་ཆུད་པའི་ཕྱིར་ཤེས་རབ་དང་། ཡེ་ཤེས་དང་། ཏིང་ངེ་འཛིན་གྱི་སྤྱོད་ཡུལ་ཏེ། མཉམ་པར་བཞག་པའི་ཐུགས་ཀྱིས་ཡང་དག་པར་རྗེས་སུ་མ་གཟིགས་ཤིང་ཕུང་པོ་རྣམས་སྐྱེས་པའི་ཕྱིར་དེ་བཞིན་གཤེགས་པའི་ཆོས་ཀྱི་སྐུ་ཡིན་པས་ན་རྟག་པ་ཉིད་དོ་སྙམ་མོ། །ཀྱེ་
རྒྱལ་བའི་བུ་ཆོས་ཀྱི་དབྱིངས་ཀྱི་ཤིན་ཏུ་ཕྱེ་བ་ལ་མཁས་པ་དེ་དགེའོ། །ཀྱེ་རྒྱལ་བའི་བུ་དེ་བས་ན་དགེ་བར་ཤིན་ཏུ་ཉོན་ཏེ་ཡིད་ལ་གྱིས་ཤིག་དང་ངས་ཁྱོད་ལ་བཤད་དོ། །བཅོམ་ལྡན་འདས་དགེའོ་ཞེས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་བཅོམ་ལྡན་འདས་ལས་ཕྱིར་ཉན་ཏོ། །བཅོམ་ལྡན་འདས་ཀྱིས་དེ་ལ་བཀའ་སྩལ་པ། རིགས་ཀྱི་བུ་རྡོ་རྗེ་ལྟ་བུའི་སྙིང་པོ་ཏིང་ངེ་འཛིན་ལ་དབང་བ་རྡོ་རྗེའི་སྙིང་པོ་ཕུང་པོ་རྣམས་ནི་དེ་བཞིན་གཤེགས་པ་མ་ཡིན། ཕུང་པོ་ལས་གཞན་ན་ཡང་མེད་དེ། ཕུང་པོ་ལ་གནས་པ་ཡང་མ་ཡིན། ཕུང་པོ་ཡང་གནས་མ་ཡིན། སྐྱེ་བ་དང་འཇིག་པ་ཡང་གནས་མ་ཡིན། ཤེས་པར་བྱ་བ་ཡང་མ་ཡིན། ཤེས་པ་ཡང་མ་ཡིན། དོན་ཀྱང་མ་ཡིན། དབང་པོ་རྣམས་ཀྱང་མ་ཡིན་ནོ། །དེ་ཅིའི་ཕྱིར་ཞེ་ན། ཕུང་པོ་དང་། ཁམས་དང་། སྐྱེ་མཆེད་དང་། ཡུལ་རྣམས་ནི་མནོ་བསམ་མེད་པའི་ཕྱིར་ཏེ། དེ་བཞིན་གཤེགས་པ་ནི་འདི་རྣམས་ལས་ནང་ངམ་ཕྱིར་ཡང་མི་བལྟའོ། །གཟུགས་ནི་སྐྱེད་པ་མེད་ཅིང་སེམས་མེད་པ་སྟེ། འབྱུང་བ་མེད་པའི་ཆོས་ཅན། མཐར་འཇིག་པ། རྩྭ་དང་། ཤིང་དང་། བོང་རྡོ་དང་འདྲ་བ། ཤིན་ཏུ་ཕྲ་བའི་རྡུལ་གྱི་ཚོགས་དབུ་བ་དང་འདྲ་བའོ། །ཚོར་བ་ནི་གཉིས་ཚོགས་པ་ལས་ཆུའི་ཆུ་བུར་དང་འདྲ་བར་སྐྱེའོ། །འདུ་ཤེས་ནི་བུམ་པ་དང་། སྣམ་བུ་དང་། ཅོད་པན་ལ་སོགས་པའི་རྒྱུ་ལས་བྱུང་བ་སྟེ། དེ་ཡང་གཉིས་ལས་སྐྱེས་པའི་སྨིག་རྒྱུ་དང་འདྲ་བ་སྟེ། དཔེར་ན་དཔྱིད་ཀྱིས་མངོན་པར་གདུངས་པའི་ས་ལ་ཉི་མའི་འོད་ཟེར་བབ་པ་གྱེན་དུ་ལངས་པ་རྣམས་ཆུའི་རླབས་ལྟ་བུར་རླབ་ཅིང་རི་དགས་དང་བྱ་སྐོམ་གྱིས་ཉེན་ཅིང་ཆུ་ཚོལ་བ་རྣམས་ལ་ཆུར་རྨོངས་པར་བྱ་བས་རྨོངས་པར་བྱེད་དོ། །དེ་བཞིན་དུ་འདུ་ཤེས་ཀྱང་དེའི་བདག་ཉིད་མ་ཡིན་པ། དེའི་བདག་ཉིད་མ་ཡིན་པའི་གཟུགས་སུ་འཇུག་པ། ཡང་དག་པ་མ་ཡིན་པར་ཡོངས་སུ་བརྟགས་པ་ལས་སྐྱེས་པ། དཔྱོད་པ་རྣམས་ཀྱིས་བརྗོད་པ་ལས་ལོགས་ཤིག་ཏུ་མི་དམིགས་པ། བོང་བུའི་རྭ་དང་། མོ་གཤམ་གྱི་བུ་བརྗོད་པ་ལྟར་མིང་ཙམ་དུ་ཟད་པ་སྟེ། རྨི་ལམ་གྱི་གཟུགས་བརྗོད་པ་ལྟར་བལྟའོ། །
དཔེར་ན་རྨི་ལམ་ན་གཟུགས་ཀྱི་འདུ་ཤེས་མཐོང་བས་སད་པའི་ཚེ་གཟུགས་ལ་སོགས་པ་དང་། བུད་མེད་བཟང་མོ་ཡང་དམིགས་སུ་མེད་དོ། །དེ་བཞིན་དུ་མི་ཤེས་པས་ལོག་པ་ན་བུད་མེད་དང་སྐྱེས་པ་ལ་སོགས་པ་མཐོང་བ་ཡང་མངོན་པར་སངས་རྒྱས་ན་མི་དམིགས་སོ། །འདུ་བྱེད་རྣམས་ནི་ཆུ་ཤིང་གི་སྙིང་པོ་ལྟ་བུ་སྟེ་བཙལ་ན། ལུས་དང་ངག་དང་ཡིད་ལས་བྱུང་བ་གཟུགས་མེད་པ་རྣམས་རྣལ་འབྱོར་ཅན་གྱི་དཔྱོད་པ་པ་རྣམས་ཀྱིས་མི་རྙེད་དོ། །རྣམ་པར་ཤེས་པ་ནི་སྒྱུ་མ་ལྟ་བུ་དེའི་ བདག་ཉིད་མེད་པ 
་སྟེ། སྒྱུ་མ་བྱེད་པའམ། དེའི་སློབ་མས་ནན་ཏན་དུ་རྩྭ་དང་ཤིང་དང་བོང་རྡོ་ཙམ་ལ་བརྟེན་ཏེ་གཟུགས་ཀྱི་ཡན་ལག་དུ་མ་ལས་མངོན་པར་བསྒྲུབས་པའི་སྒྱུ་མའི་གཟུགས་གླང་པོ་དང་། རྟ་དང་། ཤིང་རྟ་དང་། མི་དང་། རྒྱན་མ་བཏགས་པའི་གཟུགས་ཀྱི་ཕྱོགས་གཅིག་ངོ་མཚར་དུ་བསྟན་པ་ལྟ་བུ་དང་། གཞན་ཡང་མཁས་པ་རྣམས་ལ་མ་ཡིན་གྱི་བུས་པའི་འགྲོ་བ་རྣམས་ལ་འདྲིད་པ་དེ་བཞིན་དུ་རྣམ་པར་ཤེས་པ་ཡང་རྣམ་པ་གཞན་དུ་འདུག་ལ། རྣམ་པ་གཞན་དུ་ཤིན་ཏུ་བརྟགས་ཤིང་ཤིན་ཏུ་རྟོག་སྟེ་དེ་ཡང་བདག་ཉིད་ཀྱིས་བདག་ལ་འཛིན་པ་གཉིས་སུ་ཤེས་ནས། སྒྱུ་མས་མངོན་པར་གྲུབ་པའི་གཟུགས་གཅིག་པོའི་ངོ་མཚར་དང་འདྲ་བར་ཕྱིར་ལྡོག་གོ །དེ་བཞིན་གཤེགས་པ་ནི་རྟག་པ་བརྟན་པ་ཐེར་ཟུག་མི་འཇིག་པ་སྟེ། སངས་རྒྱས་རྗེས་སུ་དྲན་པ་སྒོམ་པའི་རྣལ་འབྱོར་ཅན་རྣམས་ཀྱི་ཡུལ་ཡིན་ཏེ། དེ་བཞིན་གཤེགས་པའི་སྙིང་པོ་ཞེས་བསྒྲགས་པ་མྱ་ངན་ལས་འདས་པའི་དབྱིངས་དང་། ནམ་མཁའ་ལྟ་བུར་མི་འཇིག་པ་སྟེ། མྱ་ངན་ལས་འདས་པའི་སྒྲ་ཆོས་ཀྱི་དབྱིངས་ཀྱི་ཚིག་གིས་འདས་པ་དང་། བྱུང་བ་དང་། འབྱུང་བའི་སངས་རྒྱས་བཅོམ་ལྡན་འདས་རྣམས་ཀྱིས་བསྟན་ཏེ། འདི་ལྟར་དེ་བཞིན་གཤེགས་པ་རྣམས་བྱུང་ཡང་རུང་། མ་བྱུང་ཡང་རུང་། ཆོས་རྣམས་ཀྱི་ཆོས་ཉིད་ཆོས་ཀྱི་གནས་ཉིད་དང་། ཆོས་ཀྱི་དབྱིངས་དང་། ཆོས་སྐྱོན་མེད་པ་གཉིས་པོ་འདི་ནི་དེ་བཞིན་གནས་པའོ། །རྡོ་རྗེའི་སྙིང་པོ་སྐྱོན་མེད་པ་ཞེས་བྱ་བ་ནི་ཡང་འབྱུང་བའི་ཉེས་པ་ཐམས་ཅད་དང་བྲལ་བའོ། །རྡོ་རྗེའི་སྙིང་པོ་སྐྱོན་མེད་པ་ནི་ཉེས་པ་
ཐམས་ཅད་དང་བྲལ་བར་མ་ཟད་ཀྱི་ཏིང་ངེ་འཛིན་ལ་ཡང་འཇུག་གོ །སྐྱོན་མེད་པར་འདའ་བ་ནི་བྱང་ཆུབ་སེམས་དཔས་སྤང་བར་བྱ་སྟེ། དེ་ཅིའི་ཕྱིར་ཞེ་ན། འདི་ལྟར་ཏིང་ངེ་འཛིན་གྱི་སྒོ་དེ་ཉིད་དུ་མོས་ཏེ། སེམས་ཅན་ལ་ལྟ་བ་མེད་པར་གྱུར་ཅིང་ཡང་དག་པའི་མཐའ་མངོན་དུ་བྱས་ནས་ལྕགས་བསྲེགས་པའི་མེ་དང་འདྲ་བར་མྱ་ངན་ལས་འདའ་བར་གྱུར་ཏེ། དེ་སེམས་ཅན་གྱི་དགོས་པ་ལ་བརྩོན་འགྲུས་བཏང་ཞིང་སྙིང་རྗེ་ཆེན་པོ་དང་། ཕ་རོལ་ཏུ་ཕྱིན་པ་རྣམས་དང་བྲལ་བས་སངས་རྒྱས་ཀྱི་གདུང་རྣམ་པར་ཆད་པར་བྱེད་ཅིང་ཉན་ཐོས་དང་རང་སངས་རྒྱས་མུར་འདུག་བྱེད་པའི་ལམ་དུ་འགྲོ་སྟེ། ཏིང་ངེ་འཛིན་གྱི་འདམ་དུ་གླང་པོ་ཆེ་ཆེན་པོ་འདྲ་བར་རྣམ་པར་ཐོགས་ཏེ། རྣམ་པར་ཤེས་པའི་ཡུལ་རབ་ཏུ་ཞུམ་པས་སངས་རྒྱས་ཀྱི་ཆོས་ཀྱི་སྐྱེ་མཆེད་ཐམས་ཅད་ཀྱིས་ཀུན་ནས་མི་གནས་ཤིང་རྫོགས་པར་མི་བྱེད་པར་འགྱུར་བའི་ཕྱིར་མངོན་དུ་མི་བྱ་ཞིང་། མ་རེག་པ་དང་། ཉེ་བར་མི་བསྒྲུབ་པར་གནས་པར་བྱའོ། །དེ་ལྟར་སངས་རྒྱས་ཀྱི་ཆོས་ཀྱི་སྐུའི་རྗེས་སུ་ཞུགས་ཏེ་སངས་རྒྱས་ཀྱི་ཆེ་བ་ཉིད་ཤེས་པས་ཆོས་ཀྱི་འཁོར་ལོ་བསྐོར་བའི་སངས་རྒྱས་རྣམ་པ་སྣ་ཚོགས་ཀྱི་ཚུལ་གྱི་ཡུལ་ལ་ཉེ་བར་སྤྱོད་པ། སྤྲུལ་པའི་ཡུལ་ཅན། དེ་བཞིན་གཤེགས་པ་རྣམས་ཀྱིས་ཏིང་ངེ་འཛིན་ལས་བསླང་བའི་སྦྱོར་བ། ས་བརྒྱད་པ་ལས་འདས་པ། ཆོས་ཀྱི་སྤྲིན་གྱི་ས་ལ་ཤེས་པར་རབ་ཏུ་བྱས་པ། སངས་རྒྱས་ཀྱི་ཆེ་བ་ཉིད་མྱོང་ནས་དེ་བཞིན་གཤེགས་པ་བདག་གི་སོ་སོ་རང་གིས་རིག་པ་འཕགས་པའི་ཡེ་ཤེས་ཀྱིས་རྟོགས་པའི་སྤྱོད་ཡུལ་གྱི་སར་ཞུགས་ཏེ་ཐམས་ཅད་དུ་འགྲོ་བ་མ་གཡོས་པའི་ཏིང་ངེ་འཛིན་སྤྱོད་པ། ལྷུན་གྱིས་གྲུབ་པ། རྟག་པ། ཐེར་ཟུག་པ། བརྟན་པ་སངས་རྒྱས་ཀྱི་ཞིང་སྟུག་པོ་ན་གནས་པར་འགྱུར་ཏེ། རྡོ་རྗེའི་དབང་པོ་ས་ལ་དབང་བ་རྣམས་ལ་འཕྲུལ་པའི་འཇུག་པ་སྟོན་པར་འགྱུར་ཏེ། གནས་གྱུར་པ། ཡིད་བཞིན་གྱི་ཡེ་ཤེས་དང་ཏིང་ངེ་འཛིན་ཅན། སྟོབས་དང་། མངོན་པར་ཤེས་པ་དང་། རྫུ་འཕྲུལ་གྱི་རྐང་པ་དང་། དབང་ལ་སྤྱོད་པ། ངང་པའི་རྒྱལ་པོ་དང་འདྲ་བར་མ་ཞུགས་པའི་ཆུའི་ཟླ་བ་ལྟ་
བུར་འགྲོ་སྟེ། བལྟ་བའི་དོན་ཡོད་པ། མིའི་བདག་པོ་ཐམས་ཅད་ཀྱི་ཚོགས་ཀྱི་འཁོར་དུ་སེམས་ཅན་རྣམས་ཀྱི་བསམ་པ་ཇི་ལྟ་བུར་འདོད་པའི་གཟུགས་དག་གིས་སངས་རྒྱས་ཀྱི་ཞིང་སྟུག་པོ་བསྟན་པའི་ཕྱིར་སེམས་ཅན་གྱི་བསམ་པ་བཞིན་དུ་འཇུག་པར་འགྱུར་རོ། །འདོད་པའི་ཁམས་ཀྱི་དབང་པོ་ཐམས་ཅད་དང་། དབང་སྒྱུར་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ནོར་བུ་རིན་པོ་ཆེའི་སྙིང་པོ་ལ་སོགས་པའི་གནས་དག་ཏུ་བདེ་བ་རྣམས་མྱང་བར་བྱས་ཏེ་སའི་རིམ་པ་རྣམས་བསྟན་ནས་ཞིང་ནས་ཞིང་དུ་ཕུན་སུམ་བདེ་བ་རྣམས་རབ་ཏུ་སྟོན་ཅིང་ཕྱི་མའི་མཐར་ཐུག་པར་བསྐུ་བ་གྲུབ་པའི་སྔགས་འཆང་ལྟར་མི་སྣང་ཞིང་ཁང་ཁྱིམ་གྱི་ལྷ་ལྟར་དེ་ན་གནས་བཞིན་དུ་མི་སྣང་བའི་གཟུགས་སུ་ཁྱིམ་ན་འདུག་པ་ལྟར་དེ་དག་སྤྲུལ་པའི་འོད་ཟེར་དང་། འཕྲུལ་པས་སྤྲུལ་པ་ལ་སྤྱོད་ཅིང་འགྲོའོ། །སོང་ནས་ཀྱང་དེ་བཞིན་གཤེགས་པའི་སྤྲུལ་པའི་སྐུ་ནུབ་སྟེ། དེ་བཞིན་གཤེགས་པའི་སྐུ་ལ་ཞེན་ནས་གནས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །དབང་པོ་ཕུང་པོ་སྤྲུལ་ཡིན་ཏེ། །སྲིད་དང་མ་རིག་ལས་ཀྱང་ཡིན། །བག་ཆགས་ཀྱིས་བཅིངས་མི་བཟད་པ། །ཡུལ་དང་དབང་པོའི་རྒྱུ་ལས་བྱུང་། །རྣམ་དཔྱོད་ཚོགས་ནི་འདོད་ཆགས་རྣམས། །ཞགས་པ་སེམས་སྤྱོད་དེ་ཡིན་ནོ། །ཁྲོ་བ་མེ་ལྕེ་མཉམ་པ་སྟེ། །ཞེ་སྡང་དུག་གི་དངོས་པོ་ཡིན། །ཐུབ་སྤྱོད་རྣལ་འབྱོར་བཟང་ཅན་གྱིས། །འདི་དག་རྟག་ཏུ་རྣམ་གཞིགས་ཏེ། །ཕུང་པོ་རྣམས་ནི་དོར་བའི་ཕྱིར། །རྣལ་འབྱོར་ཅན་གྱིས་རྣལ་འབྱོར་སྤྱོད། །གཟུགས་ནི་འབྱུང་བའི་ཚོགས་ཡིན་ཏེ། །ཕུང་པོ་ལྷག་མ་གཟུགས་མེད་པ། །ཇི་བཞིན་བར་སྣང་རི་མོ་དང་། །གྲིབ་ལ་སྡོང་དུམ་ལ་སོགས་མེད། །མཁའ་ལ་རླུང་གཟུགས་མི་སྣང་དང་། །བྱ་ཡི་རྗེས་རྣམས་ཇི་བཞིན་ནི། །མཁས་པས་སོ་སོ་རང་རིག་པ། །ཡང་དག་ཉིད་དང་ཡང་དག་མཐའ། །ཚིག་གི་སྤྱོད་ཡུལ་འདས་པ་ནི། །སངས་རྒྱས་དངོས་པོ་མི་སྣང་སྟེ། །སངས་རྒྱས་སྒྲས་ནི་མྱ་ངན་འདས། །མྱ་ངན་འདས་ཀྱང་སངས་རྒྱས་ཏེ། །རྣམ་
རྟོག་རྟོག་དང་བྲལ་བས་ན། །དེ་ནི་བསྟན་དུ་མི་ནུས་པའོ། །རྒྱུ་དང་འབྲས་བུ་མེད་པ་སྟེ། །ཡོད་དང་མེད་ཀྱིས་རྣམ་པར་སྤངས། །རྡོ་བ་ཕྱེ་མར་བཏགས་པ་ལ། །གསེར་ནི་ཡོད་པར་མི་སྣང་སྟེ། །སྦྱང་བའི་ལས་ཀྱི་ཁྱད་པར་གྱིས། །གསེར་ནི་སྣང་བར་འགྱུར་བ་ཡིན། །གཟུགས་རྣམས་རྡུལ་དུ་རྣམ་གཞིགས་ཏེ། །མཁས་པས་ཕུང་པོ་ལྷག་མ་དང་། །ཁམས་དང་སྐྱེ་མཆེད་ཚོགས་རྣམས་དང་། །རྣམ་པར་ཤེས་དང་དབང་པོ་དག །གཅིག་དང་ཐ་དད་དངོས་པོ་ཡང་། །རྡུལ་ཕྲན་རྣམ་པར་རབ་སྦྱངས་ན། །དངོས་པོར་སངས་རྒྱས་ཡོད་པ་མིན། །སངས་རྒྱས་མེད་པའང་མ་ཡིན་ཏེ། །རྣལ་འབྱོར་ཅན་རྣམས་སངས་རྒྱས་མཐོང་། །མཚན་རབ་སུམ་ཅུ་རྩ་གཉིས་ཅན། །གང་ན་སྡུག་བསྔལ་དེ་ན་བདེ། །དེ་ཉིད་ལ་ནི་སྣང་བ་ཡིན། །སངས་རྒྱས་མེད་ཅེས་མི་བྱ་སྟེ། །སངས་རྒྱས་མཉམ་པར་བཞག་པ་ཡོད། །རྒྱུ་ཡི་སངས་རྒྱས་དགེ་བ་ཅན། །རྩ་བ་མཁས་པ་ཉིད་ཀྱང་སྟེ། །འཇིག་རྟེན་ཀུན་གྱི་རྒྱལ་བ་དང་། །ཡང་དག་རྫོགས་པའི་སངས་རྒྱས་དང་། །འདི་དག་སངས་རྒྱས་ལྔར་གསུངས་སོ། །སྤྲུལ་པའི་རྒྱལ་བ་ལྷག་མ་རྣམས། །དེ་བཞིན་གཤེགས་པའི་སྙིང་པོ་ཡོད། །མཚན་རབ་སུམ་ཅུ་རྩ་གཉིས་ཅན། །དེ་བས་སངས་རྒྱས་ཡོད་པ་སྟེ། །རྣལ་འབྱོར་ཅན་གྱི་ཐུབ་པས་མཐོང་། །ཁམས་རྣམས་གསུམ་པོ་འདས་པ་དང་། །རྣམ་པ་དུ་མར་སངས་རྒྱས་ཞིང་། །དེ་བཞིན་གཤེགས་ཀྱི་ལྷ་རྫས་ཞིང་། །རྒྱལ་སྲས་བཟང་པོས་ཀུན་ཏུ་གང་། །དེ་ན་ཐུབ་ཆེན་སངས་རྒྱས་བཞུགས། །མཚན་གྱིས་ཀུན་ནས་ཡོངས་སུ་རྒྱས། །རྣལ་འབྱོར་རྣལ་ལ་མཉམ་པར་བཞག །ཆོས་དང་བཅས་སུ་རྣམ་པར་མཛེས། །དེ་བཞིན་ཕན་ཚུན་བསམ་གཏན་མཛད། །ཤེས་རབ་མ་ཤེས་ཤེས་བྱེད་ལ། །སྟུག་པོ་དེ་ན་རྣམ་པར་སྤྱོད། །སྟུག་པོ་དེ་ཡི་སེམས་ཅན་སུ། །སངས་རྒྱས་གཟུགས་ཅན་དེ་དག་ཀུན། །སྐད་ཅིག་འཇིག་པར་ཤིན་ཏུ་འདས། །ཏིང་ངེ་འཛིན་ལ་རྟག་ཏུ་མོས། །དགའ་ལྡན་ནས་བབས་འཕྲུལ་པ་གང་། །རྟོག་པ་ཅན་རྣམས་ཀུན་གྱིས་མཐོང་། །སྟུག་པོ་ནས་གཤེགས་
གླང་པོ་སྟེ། །སངས་རྒྱས་གཟུགས་ནི་སྟུག་ན་བཞུགས། །སྣ་ཚོགས་རྣམ་མང་གཟུགས་ཚུལ་ཏེ། །སེམས་ཅན་བསམ་བཞིན་ཞུགས་པ་ཡིས། །དེ་བཞིན་གཤེགས་པ་མཉམ་གཞག་པ། །ཆུ་ཡི་ཟླ་བ་བཞིན་དུ་སྣང་། །སྣ་ཚོགས་གཟུགས་ཀྱི་ནོར་བུ་ནི། །ཚོན་གྱི་འབྱོར་ལས་རྣམ་པར་མཛེས། །དེ་བཞིན་སངས་རྒྱས་སྟུག་ཞིང་ན། །མཉམ་པར་བཞག་པས་རྣམ་པར་མཛེས། །ཐམས་ཅད་ཆོས་ལ་གཟུགས་བརྙན་ལྟར། །གཅིག་དང་ཐ་དད་སྤངས་པར་ཏེ། །དགོས་པ་ཀུན་ལ་འཇུག་པ་ནི། །སྐྱེས་བུ་དམ་པ་ཐམས་ཅད་མཁྱེན། །རྡུལ་ལས་མ་ཡིན་དུས་ལས་མིན། །དབང་པོ་ལས་མིན་གཅེས་ལས་མིན། །རྐྱེན་གྱིས་མ་ཡིན་འཇིག་རྟེན་དང་། །སངས་རྒྱས་ལྡན་པར་རྣམ་མཛེས་པ། །རྒྱུ་ཡི་ཚུལ་དུ་སངས་རྒྱས་ནི། །འབྲས་བུ་རྣམས་ལ་རྣམ་པར་མཛེས། །འཇིག་རྟེན་སྐུ་ལ་འཁོད་བྱ་སྟེ། །རྒྱ་མཚོ་རི་དང་ཤིང་དག་དང་། །དེ་ལ་འགྲོ་བ་སྣ་ཚོགས་བཅས། །མཉམ་པར་བཞག་པས་ཤིན་ཏུ་དགྱེས། །བྱ་བ་ཐམས་ཅད་ཕྱི་ནང་དུ། །གཟའ་ཟླ་ལ་སོགས་མཛེས་པའི་རྣམས། །ཕྱིར་ཡང་ཕྱག་གི་མཐིལ་བཀོད་དེ། །ཡུངས་འབྲུར་འགྲོ་བ་ཀུན་འཛུད་པ། །སངས་རྒྱས་ཐུབ་པའི་རྣལ་འབྱོར་མངའ། །ཐུབ་ཆེན་ཐུབ་པའི་དམ་པའོ། །འཇིག་རྟེན་རྣམས་ལ་བྱེད་པ་མེད། །སངས་རྒྱས་འཕྲུལ་གྱིས་སྤྲུལ་པ་སྟེ། །འབྱུང་བ་གསུམ་པོ་འདི་དག་ཀུན། །སངས་རྒྱས་འོད་ཀྱིས་རྣམ་པར་སྤྲུལ། །རབ་རིབ་མི་ཤེས་མྱོས་མདོངས་པའི། །རྟོག་པ་ཅན་རྣམས་འཕྱན་
པ་ཡིན། །བདག་དང་བདག་མེད ་ལྟ་བའི་རྣམས། །ཡོད་དང་མེད་པའི་སྨྲ་བས་བཅོམ། །འོན་ཏམ་ཐམས་ཅད་འཇིག་ པ་དང་། །ཅུང་ཟད་འཇིག་པས་སྨྲ་བ་རྣམས། །འདི་ལ་མེད་དམ་ཅུང་ཟད་དམ། །བདག ་དང་བདག་མེད་ག་ལ་ཡོད། །སངས་རྒྱས་སྣ་ཚོགས་འབྱུང་ཀུན་ན། །རྣལ་འབྱོར་མཁན་པོ་རྣམ་པར་མཛེས། །དྲི་ཟའི་གྲོང་ལ་བྱ་བ་རྣམས། །ཇི་ལྟར་སྣང་བ་འཇིག་རྟེན་ན། །རྨི་ལམ་རྣམ་པ་སྣ་ཚོགས་གཟུགས། །རི་དགས་རྣམས་ལ་སྨིག་རྒྱུ་
བཞིན། །དེ་བཞིན་འཇིག་རྟེན་སྣ་ཚོགས་དག །གདེག་ལ་སོགས་པའི་ལས་རྣམས་ཀྱང་། །རླུང་ལྡན་སོགས་པའི་ཐག་པ་བཞིན། །སངས་རྒྱས་རྣལ་འབྱོར་མཁྱེན་པའི་མཆོག །མི་ལ་འཁྲུལ་འཁོར་སྐོར་བ་སྟེ། །རྒྱ་མཚོའི་སྐྱ་བ་འཛིན་པ་འདྲ། །སྟུག་པོའི་རིས་ཀྱི་ཡེ་ཤེས་ཀྱི་རྒྱན་ལས་བྱུང་ཞེས་བྱ་བའི་ལེའུ་སྟེ་དང་པོའོ།། །།