བཅུ་གཅིག་པ། མཆོད་རྟེན་བསྟན་པའི་ལེའུ།
བམ་པོ་བརྒྱད་པ། དེ་ནས་བཅོམ་ལྡན་འདས་ཀྱི་སྤྱན་སྔར་ས་ཕྱོགས་དེའི་འཁོར་གྱི་དབུས་ནས་རིན་པོ་ཆེ་སྣ་བདུན་གྱི་མཆོད་རྟེན་བྱུང་སྟེ། འཕང་དུ་ནི་དཔག་ཚད་ལྔ་བརྒྱ། ཁོར་ཡུག་ཏུ་ནི་དེ་དང་འཚམ་པ་བཀྲ་བ་བལྟ་ན་སྡུག་པ་མེ་ཏོག་བཀྲམ་པའི་སྟེགས་བུ་ལྔ་སྟོང་གིས་ལེགས་པ་བརྒྱན་པ་རྟ་བབས་སྟོང་ཕྲག་མང་པོས་བརྒྱན་པ། ལྷའི་བ་དན་དང་རྣམ་པར་རྒྱལ་བའི་བ་དན་སྟོང་གིས་བརྒྱན་པ་རིན་པོ་ཆེའི་
ཕྲེང་བ་སྟོང་དཔྱངས་པ་དར་དང་དྲིལ་བུ་སྟོང་རབ་ཏུ་དཔྱངས་པ་མངོན་པར་བྱུང་ནས་ནམ་མཁའ་བར་སྣང་ལ་གནས་ཏེ་ཏ་མ་ལའི་འདབ་མ་དང་ཙན་དན་གྱི་དྲི་རབ་ཏུ་བྱུང་བས་དྲི་དེས་ཐམས་ཅད་དང་ལྡན་པའི་འཇིག་རྟེན་གྱི་ཁམས་འདི་ཁྱབ་པར་གྱུར་ཏོ། །དེ་ཡི་གདུགས་ཀྱི་ཕྲེང་བ་རྒྱལ་ཆེན་བཞིའི་རིས་ཀྱི་ལྷའི་ཁང་པའི་བར་དུ་འཕགས་པར་གྱུར་ཏོ། །རིན་པོ་ཆེ་སྣ་བདུན་ལས་བྱས་པ་འདི་ལྟ་སྟེ། གསེར་དང་། དངུལ་དང་། བཻ་དཱུཪྱ་དང་། སྤུག་དང་། རྡོའི་སྙིང་པོ་དང་། མུ་ཏིག་དམར་པོ་དང་། ཀེ་ཀེ་རུའོ། །མཆོད་རྟེན་དེ་ལ་སུམ་ཅུ་རྩ་གསུམ་རིས་ཀྱི་ལྷའི་བུ་རྣམས་ལྷའི་མེ་ཏོག་མན་དཱ་ར་བ་དང་མན་དཱ་ར་བ་ཆེན་པོས་རིན་པོ་ཆེའི་མཆོད་རྟེན་དེ་ལ་འཐོར་རོ། །མངོན་པར་རབ་ཏུ་འཐོར་རོ། །རིན་པོ་ཆེའི་མཆོད་རྟེན་དེ་ལས་་འདི་འདྲ་བའི་སྒྲ་བྱུང་སྟེ། དེ་བཞིན་གཤེགས་པ་རྣམས་ལ་ནི་སེམས་པ་མེད་དོ། །རྟོགས་པ་མེད་དོ། །སྤྱོད་ལམ་ཐམས་ཅད་ཀྱང་བསྟན་ཏོ། །དེ་བཞིན་གཤེགས་པ་རྣམས་ནི་ཕུང་པོ་དང་། ཁམས་དང་། སྐྱེ་མཆེད་ལས་རབ་ཏུ་ཕྱེ་བ་མ་ཡིན་ནོ། །ལས་དང་ཉོན་མོངས་པ་དང་ཕ་མ་དང་། འབྱུང་བ་ཆེན་པོ་ལས་འབྱུང་བ་མ་ཡིན་གྱི། ཤ་དང་ཁྲག་དང་ཆུ་བ་ལས་རྣམ་པར་འབྲེལ་པ་མ་ཡིན་ནོ། །དབུགས་ནང་དུ་རྒྱུ་བ་དང་། ཕྱི་རོལ་ཏུ་རྒྱུ་བ་དང་། སྲོག་དང་ཉེ་བར་འབྲེལ་པ་མ་ཡིན་ནོ། །དེ་བཞིན་གཤེགས་པ་རྣམས་ནི་ནམ་མཁའ་དང་མཚུངས་ཏེ། རྟག་པ་མ་ཡིན་མི་རྟག་པ་ཡང་མ་ཡིན་ནོ། །འོན་ཀྱང་དེ་བཞིན་གཤེགས་པ་རིན་ཆེན་མང་བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོར་ཡོངས་སུ་མྱ་ངན་ལས་འདས་པ། རྟོག་པ་དང་རྣམ་པར་རྟོག་པ་ཐམས་ཅད་བྲལ་བ། སེམས་ཅན་རྣམས་ཀྱི་དོན་གྱི་ཕྱིར། སྔོན་གྱི་སྨོན་ལམ་གྱི་དབང་གིས་ཆོས་ཉན་པའི་ཕྱིར་དང་། སེམས་ཅན་ཡོངས་སུ་སྨིན་པར་བྱ་བའི་ཕྱིར་མཐོང་སྟེ། དེ་བཞིན་གཤེགས་པའི་སྐུ་ལ་ནི་ཅུང་ཟད་ཀྱང་རྟོག་པ་མེད་དོ། །དེ་བཞིན་གཤེགས་པ་རྣམས་ནི་ཡི་གེ་འབྲུ་གཅིག་ཀྱང་མ་གསུངས་སོ། །ཇི་ལྟར་འདུས་པའི་སེམས་ཅན་རྣམས་ཁམས་སོ་སོ་བ་དང་། མོས་པ་སོ་སོ་བ་རྣམས་ཆོས་ཀྱི་གཏམ་དེ་བཞིན་གཤེགས་པ་ལ་ཉན་ཏོ། །གང་དེ་བཞིན་གཤེགས་
པ་དེ་ནི་དེ་བཞིན་ཉིད་གང་དེ་བཞིན་ཉིད་དེ་ནི་ཡང་དག་པའི་མཐའ། ཡང་དག་པའི་མཐའ་དེ་ནི་ཆོས་ཀྱི་དབྱིངས། གང་དེ་བཞིན་ཉིད་དང་ཡང་དག་པའི་མཐའ་དང་། ཆོས་ཀྱི་དབྱིངས་དེ་ནི་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་སོ། །དེ་ལྟར་ཡོངས་སུ་དག་པའི་དེ་བཞིན་གཤེགས་པ་རྣམས་གང་གི་ཚེ་གཤེགས་པ་དང་། མཐོང་བ་དང་སྨྲས་པ་ནི། སྔོན་གྱི་སྨོན་ལམ་གྱི་དབང་གིས་བསམ་པ་ཡོངས་སུ་དག་པའི་སེམས་ཅན་རྣམས་ལ། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་ཐབས་མཁས་པ་ཆེན་པོ་བསྟན་ཏོ། །ཡང་རིན་པོ་ཆེའི་མཆོད་རྟེན་དེ་ལས་སྒྲ་འདི་གཉིས་བྱུང་ངོ་། །བཅོམ་ལྡན་འདས་ཤཱཀྱ་ཐུབ་པ་ཁྱོད་ཀྱིས་དམ་པའི་ཆོས་པད་མ་དཀར་པོ་ཞེས་བྱ་བའི་ཆོས་ཀྱི་རྣམ་གྲངས་འདི་ལེགས་པར་གསུངས་པ་ལེགས་སོ་ལེགས་སོ། །བཅོམ་ལྡན་འདས་དེ་དེ་ལྟའོ། །བདེ་བར་གཤེགས་པ་དེ་དེ་ལྟའོ། །ཞེས་བྱ་བའི་སྒྲ་འདི་འདྲ་བ་བྱུང་ངོ་། །དེ་ནས་འཁོར་བཞི་པོ་དེ་དག་གིས་རིན་པོ་ཆེའི་མཆོད་རྟེན་ཆེན་པོ་ནམ་མཁའ་བར་སྣང་ལ་འདུག་པ་དེ་མཐོང་ནས། དགའ་བ་སྐྱེས་ཤིང་མགུ་བ་དང་རངས་པ་དང་མཆོག་ཏུ་དགའ་བར་གྱུར་ཏེ། དེའི་ཚེ་སྟན་ལས་ལངས་ནས་ཐལ་མོ་སྦྱར་ཏེ་འཁོད་དོ། །དེ་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་ཆེན་པོ་ཞེས་བྱ་བས། ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ངོ་མཚར་དུ་འཛིན་པར་གྱུར་པར་རིག་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རིན་པོ་ཆེའི་མཆོད་རྟེན་ཆེན་པོ་འདི་ལྟ་བུ་འདི་བྱུང་བའི་རྒྱུ་གང་ལགས་རྐྱེན་གང་ལགས། བཅོམ་ལྡན་འདས་རིན་པོ་ཆེའི་མཆོད་རྟེན་ཆེན་པོ་འདི་ལས་འདི་ལྟ་བུའི་སྒྲ་འབྱིན་པ་སུ་ལགས། དེ་སྐད་ཅེས་གསོལ་པ་དང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་ཆེན་པོ་ལ་འདི་སྐད་ཅེས་བཀའ་སྩལ་ཏོ། །སྤོབས་པ་ཆེན་པོ་རིན་པོ་ཆེའི་མཆོད་རྟེན་ཆེན་པོ་འདིའི་ནང་ན་དེ་བཞིན་གཤེགས་པའི་སྐུ་གཅིག་ཏུ་འདུས་པ་ཞུགས་སོ། །འདི་ནི་དེའི་མཆོད་རྟེན་ཏེ། དེས་སྒྲ་འདི་ཕྱུང་ངོ་། །སྤོབས་པ་ཆེན་པོ་ཤར་ཕྱོགས་སུ་འཇིག་རྟེན་གྱི་ཁམས་སྟོང་ཕྲག་གྲངས་མེད་
པ་འདས་པ་ན། འཇིག་རྟེན་གྱི་ཁམས་རིན་པོ་ཆེ་རྣམ་པར་དག་པ་ཞེས་བྱ་བ་ཡོད་དེ། དེར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་ཞེས་བྱ་བ་བྱུང་སྟེ། བཅོམ་ལྡན་འདས་དེས་སྨོན་ལམ་འདི་སྐད་དུ། ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། ཇི་སྲིད་དུ་ངས་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་བྱང་ཆུབ་སེམས་དཔའ་རྣམས་ལ་གདམས་པ་འདི་མ་ཐོས་པ་དེ་སྲིད་དུ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ངེས་པར་འབྱུང་བར་མི་བྱའི། གང་གི་ཚེ་ངས་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཐོས་པ་དེའི་འོག་ཏུ། ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་གྲུབ་པར་གྱུར་ཅིག་ཅེས་སྨོན་ལམ་བཏབ་པོ། །སྤོབས་པ་ཆེན་པོ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེས་ཡོངས་སུ་མྱ་ངན་ལས་འདའ་བའི་དུས་ཀྱི་ཚེ། ལྷ་དང་བཅས་པའི་འཇིག་རྟེན་གྱི་མདུན་དུ་འདི་སྐད་ཅེས་དགེ་སློང་དག་ང་ཡོངས་སུ་མྱ་ངན་ལས་འདས་ནས། དེ་བཞིན་གཤེགས་པའི་ལུས་གཟུགས་ཀྱི་རིན་པོ་ཆེའི་མཆོད་རྟེན་ཆེན་པོ་གཅིག་བྱོས་ཤིག །མཆོད་རྟེན་ལྷག་མ་རྣམས་ནི་ང་ཡི་ཕྱིར་གྱིས་ཤིག་ཅེས་མོས་པར་བྱས་སོ། །སྤོབས་པ་ཆེན་པོ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེས། ང་ཡི་མཆོད་རྟེན་འདི་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན། སངས་རྒྱས་ཀྱི་ཞིང་གང་དང་གང་དུ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཡང་དག་པར་རབ་ཏུ་སྟོན་པ་དེ་དང་དེ་དག་ཏུ། ངའི་ལུས་གཟུགས་ཀྱི་མཆོད་རྟེན་འདི་མངོན་པར་བྱུང་སྟེ། སངས་རྒྱས་བཅོམ་ལྡན་འདས་དེ་དང་དེ་དག་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་འཆད་པ་ན། འཁོར་གྱི་དཀྱིལ་འཁོར་གྱི་སྟེང་གི་ནམ་མཁའ་ལ་འདུག་ནས། སངས་རྒྱས་བཅོམ་ལྡན་འདས་དེ་དང་དེ་དག་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་སྟོན་པ་ལ་ངའི་ལུས་གཟུགས་ཀྱིས་ལེགས་སོ། །ཞེས་བྱ་བ་སྦྱིན་ནོ་ཞེས་དེ་ལྟར་
བྱིན་གྱིས་བརླབས་སོ། །སྤོབས་པ་ཆེན་པོ་དེའི་ཕྱིར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེའི་སྐུ་གདུང་གི་མཆོད་རྟེན་འདི། འཇིག་རྟེན་གྱི་ཁམས་མི་མཇེད་འདིར་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ངས་བཤད་པ་ན། འཁོར་གྱི་དཀྱིལ་འཁོར་འདིའི་དབུས་ནས་མངོན་པར་བྱུང་སྟེ། སྟེང་གི་ནམ་མཁའ་བར་སྣང་ལ་འདུག་ནས་ལེགས་སོ་ཞེས་བྱ་བ་བྱིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་བཅོམ་ལྡན་འདས་ཀྱི་མཐུས་དེ་བཞིན་གཤེགས་པའི་སྐུ་འདི་བལྟའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་ཆེན་པོ་ལ་འདི་སྐད་ཅེས་བཀའ་སྩལ་ཏོ། །སྤོབས་པ་ཆེན་པོ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེའི་སྨོན་ལམ་ལྕི་བར་གྱུར་ཏོ། །དེའི་སྨོན་ལམ་ནི་འདི་ལྟ་སྟེ། གང་གི་ཚེ་སངས་རྒྱས་ཀྱི་ཞིང་གཞན་དག་ཏུ་སངས་རྒྱས་བཅོམ་ལྡན་འདས་རྣམས་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་འཆད་པ་དེའི་ཚེ། ང་ཡི་ལུས་གཟུགས་ཀྱི་མཆོད་རྟེན་འདི་དམ་པའི་ཆོས་པད་མ་དཀར་པོ་འདི་མཉན་པའི་ཕྱིར་དེ་བཞིན་གཤེགས་པ་རྣམས་ཀྱི་གན་དུ་འགྲོ་བར་གྱུར་ཅིག །གང་གི་ཚེ་ཡང་སངས་རྒྱས་བཅོམ་ལྡན་འདས་དེ་དག་འཁོར་བཞི་ལ་ང་ཡི་ལུས་གཟུགས་ཕྱེ་སྟེ་བསྟན་པར་འདོད་པར་གྱུར་ན། དེ་ནས་དེ་བཞིན་གཤེགས་པ་དེ་དག་གིས་ཕྱོགས་བཅུའི་སངས་རྒྱས་ཀྱི་ཞིང་སོ་སོ་ན་དེ་བཞིན་གཤེགས་པའི་སྐུ་ལུས་སྤྲུལ་པ་མིང་ཐ་དད་པ་གང་དག་སངས་རྒྱས་ཀྱི་ཞིང་དེ་དང་དེ་དག་ན་ཆོས་སྟོན་པ་དེ་དག་ཐམས་ཅད་སོགས་ལ་དེའི་འོག་ཏུ། དེ་བཞིན་གཤེགས་པའི་སྐུ་ལུས་སྤྲུལ་པ་དེ་དག་དང་ལྷན་ཅིག་ཏུ་ང་ཡི་ལུས་གཟུགས་ཀྱི་མཆོད་རྟེན་འདི་ཕྱེ་སྟེ་འཁོར་བཞི་ལ་བསྟན་པར་བྱའོ། །ཞེས་སྨོན་ལམ་བཏབ་བོ། །སྤོབས་པ་ཆེན་པོ་དེའི་ཕྱིར་ངས་དེ་བཞིན་གཤེགས་པའི་གཟུགས་སྤྲུལ་པ་མང་པོ་གང་དག་ཕྱོགས་བཅུའི་སངས་རྒྱས་
ཀྱི་ཞིང་འཇིག་རྟེན་གྱི་ཁམས་གཞན་དང་གཞན་སྟོང་དག་ན་སེམས་ཅན་རྣམས་ལ་ཆོས་སྟོན་པ་དེ་དག་ཐམས་ཅད་འདིར་བསྡུ་བར་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པའི་སྐུ། དེ་བཞིན་གཤེགས་པས་སྤྲུལ་པ་དེ་དག་ཐམས་ཅད་ལ་བདག་ཅག་གིས་ཕྱག་བགྱིའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཞལ་གྱི་མཛོད་སྤུ་ནས་འོད་ཟེར་བཏང་སྟེ། འོད་ཟེར་བཏང་མ་ཐག་ཏུ་ཤར་ཕྱོགས་ཀྱི་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་གང་གཱའི་ཀླུང་ལྔ་བཅུའི་བྱེ་མ་སྙེད་དག་ན། སངས་རྒྱས་བཅོམ་ལྡན་འདས་གང་དག་བཞུགས་པ་དེ་དག་ཐམས་ཅད་སྣང་ངོ་། །སངས་རྒྱས་ཀྱི་ཞིང་དེ་དག་ནི་ཤེལ་གྱི་གཞི་ལ་རིན་པོ་ཆེའི་ཤིང་ལྗོན་པས་བརྒྱན་པ། རས་བཅོས་བུ་དང་དར་གྱི་ལྡ་ལྡིས་ལེགས་པར་བརྒྱན་པ་བྱང་ཆུབ་སེམས་དཔའ་བརྒྱ་སྟོང་མང་པོས་ཡོངས་སུ་གང་བ། བླ་རེ་བྲེས་པ་རིན་པོ་ཆེ་སྣ་བདུན་དང་གསེར་གྱི་དྲ་བས་གཡོགས་པར་སྣང་ངོ་། །དེ་དག་ན་སངས་རྒྱས་བཅོམ་ལྡན་འདས་དེ་དག་དབྱངས་སྙན་ཅིང་འཇམ་པས་སེམས་ཅན་རྣམས་ལ་ཆོས་སྟོན་པར་སྣང་ངོ་། །སངས་རྒྱས་ཀྱི་ཞིང་དེ་དག་བྱང་ཆུབ་སེམས་དཔའ་བརྒྱ་སྟོང་གིས་ཡོངས་སུ་གང་བར་སྣང་ངོ་། །དེ་བཞིན་དུ་ཤར་ལྷོའི་ཕྱོགས་དང་། དེ་བཞིན་དུ་ལྷོའི་ཕྱོགས་དང་། དེ་བཞིན་དུ་ལྷོ་ནུབ་ཀྱི་ཕྱོགས་དང་། དེ་བཞིན་དུ་ནུབ་ཀྱི་ཕྱོགས་དང་། དེ་བཞིན་དུ་ནུབ་བྱང་གི་ཕྱོགས་དང་། དེ་བཞིན་དུ་བྱང་གི་ཕྱོགས་དང་། དེ་བཞིན་དུ་བྱང་ཤར་གྱི་ཕྱོགས་དང་། དེ་བཞིན་དུ་སྟེང་གི་ཕྱོགས་དང་། དེ་བཞིན་དུ་འོག་གི་ཕྱོགས་ཏེ། ཕྱོགས་བཅུ་ཐམས་ཅད་ཀྱི་ཕྱོགས་རེ་རེ་ན་ཡང་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་གང་གཱའི་ཀླུང་གི་བྱེ་མ་སྙེད་དག་ན་སངས་རྒྱས་བཅོམ་ལྡན་འདས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་གང་གཱའི་ཀླུང་གི་བྱེ་མ་སྙེད་གང་དག་བཞུགས་པ་དེ་དག་ཐམས་ཅད་སྣང་ངོ་། །དེ་ནས་ཕྱོགས་བཅུའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་རང་རང་གི་བྱང་ཆུབ་སེམས་དཔའི་ཚོགས་ལ་བཀའ་སྩལ་པ། རིགས་
ཀྱི་བུ་དག་ངེད་ནི་དེ་བཞིན་གཤེགས་པ་རིན་ཆེན་མང་གི་སྐུ་གདུང་གི་མཆོད་རྟེན་ལ་ཕྱག་བྱ་བའི་ཕྱིར། འཇིག་རྟེན་གྱི་ཁམས་མི་མཇེད་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་གན་དུ་འདོང་ངོ་། །དེ་ནས་སངས་རྒྱས་བཅོམ་ལྡན་འདས་དེ་དག་བདག་བདག་གི་ཞབས་འབྲིང་བ་དང་ལྷན་ཅིག་ཏུ་བདག་དང་གཉིས་སམ་བདག་དང་གསུམ་འཇིག་རྟེན་གྱི་ཁམས་མི་མཇེད་འདིར་གཤེགས་སོ། །འདི་ལྟར་དེའི་ཚེ་ཐམས་ཅད་དང་ལྡན་པའི་འཇིག་རྟེན་གྱི་ཁམས་མི་མཇེད་འདི་རིན་པོ་ཆེའི་ཤིང་ལྗོན་པས་རབ་ཏུ་བརྒྱན་པར་གྱུར་ཏོ། །བཻ་དཱུཪྱའི་གཞི་ལ་རིན་པོ་ཆེ་སྣ་བདུན་དང་གསེར་གྱི་དྲ་བ་བྲེས་པ། རིན་པོ་ཆེ་ཆེན་པོའི་སྤོས་དང་བདུག་པས་བདུག་པ། མེ་ཏོག་མན་དཱ་ར་བ་དང་མན་དཱ་ར་བ་ཆེན་པོས་ཀུན་ཏུ་བཀྲམ་པ། དྲིལ་བུ་གཡེར་ཀའི་དྲ་བས་བརྒྱན་པ། གསེར་གྱི་སྐུད་པས་མིག་མངས་རིས་སུ་བྲིས་པར་གྱུར་ཏེ། གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་ཀྱང་མེད་པར་གྱུར། རི་ནག་པོ་ཡང་མེད་པར་གྱུར། རི་བཏང་བཟུང་དང་བཏང་བཟུང་ཆེན་པོ་ཡང་མེད་པར་གྱུར། རི་ཁོར་ཡུག་དང་ཁོར་ཡུག་ཆེན་པོ་ཡང་མེད་པར་གྱུར། རིའི་རྒྱལ་པོ་རི་རབ་ཀྱང་མེད་པར་གྱུར། རི་ཆེན་པོ་དང་རི་གཞན་ཡང་མེད་པར་གྱུར། རྒྱ་མཚོ་ཆེན་པོ་ཡང་མེད་པར་གྱུར། །འབབ་ཆུ་དང་འབབ་ཆུ་ཆེན་པོ་ཡང་མེད་པར་ཡོངས་སུ་གནས་པར་གྱུར་ཏོ། །ལྷ་དང་མི་དང་ལྷ་མ་ཡིན་གྱི་ཚོགས་ཀྱང་མེད་པར་གྱུར། སེམས་ཅན་དམྱལ་བ་དང་དུད་འགྲོའི་སྐྱེ་གནས་དང་གཤིན་རྗེའི་འཇིག་རྟེན་ཡང་མེད་པར་གྱུར་ཏོ། །འདི་ལྟར་དེའི་ཚེ་འཇིག་རྟེན་གྱི་ཁམས་མི་མཇེད་འདིར་འགྲོ་བ་དྲུག་ཏུ་སྐྱེས་པའི་སེམས་ཅན་དེ་དག་ཐམས་ཅད་ཀུན་འཇིག་རྟེན་གྱི་ཁམས་གཞན་དག་ཏུ་བཀོད་པར་གྱུར་ཏོ། །གང་དག་འཁོར་དེར་འདུས་པ་དེ་དག་ནི་མ་གཏོགས་སོ། །དེ་ནས་སངས་རྒྱས་བཅོམ་ལྡན་འདས་དེ་དག་ཞབས་འབྲིང་བ་དང་གཉིས་སམ་ཞབས་འབྲིང་བ་དང་གསུམ་འཇིག་རྟེན་གྱི་ཁམས་མི་མཇེད་འདིར་གཤེགས་སོ། །དེ་བཞིན་གཤེགས་པ་གཤེགས་ཤིང་བྱོན་པ་དེ་དག་རིན་པོ་ཆེའི་ཤིང་ལྗོན་
པའི་དྲུང་ན་གནས་ཤིང་བཞུགས་ཏེ། རིན་པོ་ཆེའི་ཤིང་ལྗོན་པ་རེ་རེའི་འཕང་ཡང་དཔག་ཚད་ལྔ་བརྒྱ་པར་གྱུར་ཏེ། ཡལ་ག་དང་། ལོ་མ་དང་། འདབ་མ་དང་། སྦོམས་ནི་རི་བཞིན། མེ་ཏོག་དང་འབྲས་བུས་ནི་རབ་ཏུ་བརྒྱན་པ་སྟེ། རིན་པོ་ཆེའི་ཤིང་ལྗོན་པ་རེ་རེའི་དྲུང་ན་ཡང་སེང་གེའི་ཁྲི་འཕང་དུ་དཔག་ཚད་ལྔ་བརྒྱ་པ། རིན་པོ་ཆེ་ཆེན་པོས་བརྒྱན་པ་བཤམས་པ་དེ་ལ་དེ་བཞིན་གཤེགས་པ་སྐྱིལ་མོ་ཀྲུང་བཅས་ཏེ་བཞུགས་པར་གྱུར་ཏོ། །རྣམ་གྲངས་འདིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་ན་རིན་པོ་ཆེའི་ཤིང་ལྗོན་པ་ཐམས་ཅད་ཀྱི་དྲུང་ན། དེ་བཞིན་གཤེགས་པ་རྣམས་སྐྱིལ་མོ་ཀྲུང་བཅས་ཏེ་བཞུགས་པར་གྱུར་ཏོ། །དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད། དེ་བཞིན་གཤེགས་པས་རབ་ཏུ་གང་བར་གྱུར་ཀྱང་། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པའི་སྐུ་སྤྲུལ་པ་ཕྱོགས་གཅིག་ནས་ཀྱང་ཐམས་ཅད་ཚོགས་པ་ནི་མ་ཡིན་ནོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་དེ་བཞིན་གཤེགས་པའི་སྐུ་གཤེགས་ཤིང་བྱོན་པ་དེ་དག་གི་གོ་མངོན་པར་སྤྲུལ་ཏེ་ཕྱོགས་བཅུ་ཐམས་ཅད་དུ། སངས་རྒྱས་ཀྱི་ཞིང་། བྱེ་བ་སྟོང་ཕྲག་ཉི་ཤུ་ཐམས་ཅད་བཻ་དཱུཪྱ་ལས་ནི་བྱས། རིན་པོ་ཆེ་སྣ་བདུན་དང་གསེར་གྱི་དྲ་བ་ནི་བྲེས་དྲིལ་བུ་གཡེར་ཀའི་དྲ་བས་ནི་བརྒྱན། མེ་ཏོག་མན་དཱ་ར་བ་དང་མན་དཱ་ར་བ་ཆེན་པོ་ནི་ཀུན་ཏུ་བཀྲམ། ལྷའི་བླ་རེ་ནི་བྲེས། ལྷའི་མེ་ཏོག་གི་ཕྲེང་བ་ནི་དཔྱངས། ལྷའི་སྤོས་དང་བདུག་པས་ནི་བདུགས་ཏེ། སངས་རྒྱས་ཀྱི་ཞིང་བྱེ་བ་སྟོང་ཕྲག་ཉི་ཤུ་པོ་དེ་དག་ཐམས་ཅད་ན་གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་ཀྱང་མེད། རི་ནག་པོ་ཡང་མེད། རི་བཏང་བཟུང་དང་། བཏང་བཟུང་ཆེན་པོ་ཡང་མེད། རི་ཁོར་ཡུག་དང་། ཁོར་ཡུག་ཆེན་པོ་ཡང་མེད། རིའི་རྒྱལ་པོ་རི་རབ་ཀྱང་མེད། རི་ཆེན་པོ་དང་རི་གཞན་ཡང་མེད། རྒྱ་མཚོ་ཆེན་པོ་ཡང་
མེད་པར་གྱུར་ཅིང་། འབབ་ཆུ་དང་། འབབ་ཆུ་ཆེན་པོ་ཡང་མེད་པར་ཡོངས་སུ་གཞག་གོ ། ལྷ་དང་མི་དང་ལྷ་མ་ཡིན་གྱི་ཚོགས་ཀྱང་མེད་པར་གྱུར། སེམས་ཅན་དམྱལ་བ་དང་དུད་འགྲོའི་སྐྱེ་གནས་དང་གཤིན་རྗེའི་འཇིག་རྟེན་ཡང་མེད་པར་གྱུར་ཏེ། སངས་རྒྱས་ཀྱི་ཞིང་དེ་ཐམས་ཅད་སངས་རྒྱས་ཀྱི་ཞིང་གཅིག་དང་མཚུངས་ཤིང་ཕྱོགས་གཅིག་དང་འདྲ་བར་ཡོངས་སུ་གནས་པར་གྱུར་ཏེ། མཉམ་ཞིང་ཉམས་དགའ་ལ། རིན་པོ་ཆེ་སྣ་བདུན་གྱི་ཤིང་ལྗོན་པ་དག་གིས་བརྒྱན་པར་གྱུར་ཏེ། ཤིང་ལྗོན་པ་དེ་དག་འཕང་དུ་ནི་དཔག་ཚད་ལྔ་བརྒྱ་པ་སྦོམས་སུ་ནི་རི་བཞིན། ཡལ་ག་དང་། ལོ་མ་དང་། མེ་ཏོག་དང་། འབྲས་བུ་དང་ནི་ལྡན་ནོ། །རིན་པོ་ཆེའི་ཤིང་ལྗོན་པ་ཐམས་ཅད་ཀྱི་དྲུང་ན། སེང་གེའི་ཁྲི་ཁོར་ཡུག་ཏུ་ནི་དཔག་ཚད་ལྔ་བརྒྱ་པ། ལྷའི་རིན་པོ་ཆེ་ལས་བྱས་པ། བཀྲ་བ་བལྟ་ན་སྡུག་པ། བཤམས་པར་གྱུར་ཏེ། དེ་བཞིན་གཤེགས་པ་གཤེགས་ཤིང་བྱོན་པ་རྣམས། ཤིང་དྲུང་དེ་དག་ན་སེང་གེའི་ཁྲི་དག་ལ་སྐྱིལ་མོ་ཀྲུང་བཅས་ཏེ་བཞུགས་སོ། །རྣམ་གྲངས་འདིས་གཞན་ཡང་ཕྱོགས་རེ་རེར་ཡང་འཇིག་རྟེན་གྱི་ཁམས་བྱེ་བ་སྟོང་ཕྲག་ཉི་ཤུ་དེ་བཞིན་གཤེགས་པ་ཤཱཀྱ་ཐུབ་པས་ཡོངས་སུ་གང་བར་མཛད་དོ། །དེ་བཞིན་གཤེགས་པ་བྱོན་ཅིང་གཤེགས་པ་དེ་དག་གི་གོ་དབྱེ་བའི་ཕྱིར། གཞན་ཡང་ཕྱོགས་རེ་རེར་ཡང་འཇིག་རྟེན་གྱི་ཁམས་བྱེ་བ་སྟོང་ཕྲག་ཉི་ཤུར་གྲོང་དང་གྲོང་ཁྱེར་དང་གྲོང་རྡལ་དང་ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་ཀྱང་མེད་པར་གྱུར། རི་ནག་པོ་ཡང་མེད་པར་གྱུར་རི་བཏང་བཟུང་དང་བཏང་བཟུང་ཆེན་པོ་ཡང་མེད་པར་གྱུར། རི་ཁོར་ཡུག་དང་རི་ཁོར་ཡུག་ཆེན་པོ་ཡང་མེད་པར་གྱུར། རིའི་རྒྱལ་པོ་རི་རབ་ཀྱང་མེད་པར་གྱུར། རི་ཆེན་པོ་གཞན་ཡང་མེད་པར་གྱུར་རྒྱ་མཚོ་ཆེན་པོ་ཡང་མེད་པར་གྱུར་འབབ་ཆུ་དང་འབབ་ཆུ་ཆེན་པོ་ཡང་མེད་པར་ཡོངས་སུ་གཞག་གོ ། ལྷ་དང་མི་དང་ལྷ་མ་ཡིན་གྱི་ཚོགས་ཀྱང་མེད་པར་གྱུར། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་ཡང་མེད་པར་གྱུར་ཏེ། སེམས་ཅན་དེ་དག་ཐམས་
ཅད་འཇིག་རྟེན་གྱི་ཁམས་གཞན་དག་ཏུ་བཀོད་དོ། །སངས་རྒྱས་ཀྱི་ཞིང་དེ་དག་ནི་བཻ་དཱུཪྱ་ལས་གྲུབ་པ་རིན་པོ་ཆེ་སྣ་བདུན་དང་གསེར་གྱི་དྲ་བས་བྲེས་པ། དྲིལ་བུ་གཡེར་ཀའི་དྲ་བས་བརྒྱན་པ། མེ་ཏོག་མན་དཱ་ར་བ་དང་མན་དཱ་ར་བ་ཆེན་པོས་ཀུན་ཏུ་བཀྲམ་པ། ལྷའི་བླ་རེ་བྲེས་པ། ལྷའི་མེ་ཏོག་གི་ཕྲེང་བ་མངོན་པར་དཔྱངས་པ། ལྷའི་སྤོས་དང་བདུག་པས་བདུགས་པ། རིན་པོ་ཆེའི་ཤིང་ལྗོན་པས་མཛེས་པར་བྱས་པ་སྟེ། རིན་པོ་ཆེའི་ཤིང་ལྗོན་པ་དེ་དག་ཐམས་ཅད་ཀྱི་ཚད་ཀྱང་དཔག་ཚད་ལྔ་བརྒྱ་པའོ། །སེང་གེའི་ཁྲི་དཔག་ཚད་ལྔ་བརྒྱ་པ་དེ་དག་ཀྱང་མངོན་པར་སྤྲུལ་ཏེ། རིན་པོ་ཆེའི་ཤིང་ལྗོན་པའི་དྲུང་དག་ན། སོ་སོའི་སེང་གེའི་ཁྲི་ལ་དེ་བཞིན་གཤེགས་པ་དེ་དག་སྐྱིལ་མོ་ཀྲུང་བཅས་ཏེ་བཞུགས་སོ། །ཡང་དེའི་ཚེ། བཅོམ་ལྡན་འདས་ཤཱཀྱ་ཐུབ་པས་སྤྲུལ་པའི་དེ་བཞིན་གཤེགས་པ། གང་དག་ཤར་ཕྱོགས་ན། སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཕྲག་གང་གཱའི་ཀླུང་གི་བྱེ་མ་སྙེད་དག་ན་ཆོས་སྟོན་པ་དེ་དག་ཐམས་ཅད་གཤེགས་སོ། །དེ་བཞིན་དུ་ཕྱོགས་བཅུ་ནས་གཤེགས་ཤིང་བྱོན་པ་དེ་དག་ནི་ཕྱོགས་བརྒྱད་ན་བཞུགས་པར་གྱུར་ཏོ། །དེའི་ཚེ་ཕྱོགས་བརྒྱད་ནས་གཤེགས་པའི་དེ་བཞིན་གཤེགས་པ་དེ་དག་གི་ཕྱོགས་རེ་རེར་ཡང་འཇིག་རྟེན་གྱི་ཁམས་བྱེ་བ་ཕྲག་སུམ་ཅུ་ཀུན་ཏུ་ནོན་པར་གྱུར་ཏོ། །དེ་ནས་དེ་བཞིན་གཤེགས་པ་དེ་དག་རང་རང་གི་སེང་གེའི་ཁྲི་ལ་བཞུགས་ནས། རང་རང་གི་ཞབས་འབྲིང་བ་དག་བཅོམ་ལྡན་འདས་ཤཱཀྱ་ཐུབ་པའི་ཐད་དུ་བཀྱེ་སྟེ། རིན་པོ་ཆེའི་མེ་ཏོག་གི་ཕུར་མ་བསྐུར་ནས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་ཁྱེད་རྒྱལ་པོའི་ཁབ་ཀྱི་བྱ་རྒོད་ཀྱི་ཕུང་པོའི་རི་ལ་སོང་སྟེ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ལ་ཕྱག་འཚོལ་ལ། ངའི་ཚིག་གིས་བྱང་ཆུབ་སེམས་དཔའི་ཚོགས་དང་། ཉན་ཐོས་ཀྱི་ཚོགས་དང་བཅས་པ་ལ། གནོད་པ་ཉུང་ངམ། སྙུན་ཉུང་ངམ། སྟོབས་དང་ལྡན་ནམ། བདེ་བར་རེག་པ་ལ་གནས་སམ་
ཞེས་དྲིས་ལ། རིན་པོ་ཆེའི་ཕུང་པོ་འདིས་གཏོར་ཏེ་འདི་སྐད་ཅེས། བཅོམ་ལྡན་འདས་ཀྱིས་དེ་བཞིན་གཤེགས་པ་རིན་པོ་ཆེའི་མཆོད་རྟེན་ཆེན་པོ་འདི་དབྱེ་བར་དད་པ་དབུལ་ལོ། །ཞེས་གསོལ་ཅིང་། དེ་ལྟར་དེ་བཞིན་གཤེགས་པ་དེ་དག་ཐམས་ཅད་ཀྱིས་རང་རང་གི་ཞབས་འབྲིང་བ་བཀྱེའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་དེའི་དུས་ན། བདག་གིས་སྤྲུལ་པ་མ་ལུས་པར་ཚོགས་པར་མཁྱེན། སོ་སོར་སེང་གེའི་ཁྲི་དག་ལ་བཞུགས་པར་མཁྱེན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གི་ཞབས་འབྲིང་བ་ལྷགས་པར་མཁྱེན་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་དད་པ་ཕུལ་བར་མཁྱེན་ནས། དེའི་ཚེ་རང་གི་ཆོས་ཀྱི་གདན་ལས་བཞེངས་ཏེ་ནམ་མཁའ་བར་སྣང་ལ་བཞུགས་སོ། །འཁོར་བཞི་པོ་དེ་དག་ཐམས་ཅད་ཀྱང་སྟན་ལས་ལངས་ནས། ཐལ་མོ་སྦྱར་ཏེ་བཅོམ་ལྡན་འདས་ལ་ལྟ་ཞིང་འཁོད་དོ། །དེ་ནས་བཅོམ་ལྡན་འདས་ཀྱིས་རིན་པོ་ཆེའི་མཆོད་རྟེན་ཆེན་པོ་ནམ་མཁའ་ལ་འདུག་པ་དེ། ཕྱག་གཡས་པའི་སོར་མོས་དབུས་ནས་ཕྱེའོ། ཕྱེ་ནས་ལོགས་གཉིས་སོ་སོར་གདངས་སོ། །འདི་ལྟ་སྟེ་དཔེར་ན། གྲོང་ཁྱེར་ཆེན་པོའི་སྒོ་འཕར་ཆེན་པོ་བཅད་པའི་གཏན་པ་ཕྱུང་ནས། སོ་སོར་དབྱེ་བ་དེ་བཞིན་དུ། བཅོམ་ལྡན་འདས་ཀྱིས་རིན་པོ་ཆེའི་མཆོད་རྟེན་ཆེན་པོ་དེ་ཕྱག་གཡས་པའི་སོར་མོས་དབུས་ནས་ཕྱེ་སྟེ། ས་ལེར་མཛད་དོ། །དེ་བཞིན་གཤེགས་པའི་རིན་པོ་ཆེའི་མཆོད་རྟེན་ཆེན་པོ་དེ་ཕྱེ་མ་ཐག་ཏུ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་སེང་གེའི་ཁྲི་ལ་བཞུགས་ཏེ། སྐྱིལ་མོ་ཀྲུང་བཅས་ནས་སྐུ་ཀུན་བསྐམས་ཤིང་སྐུ་མ་གཡོས་པར། ཇི་ལྟར་ཏིང་ངེ་འཛིན་ལ་སྙོམས་པར་ཞུགས་པ་དེ་བཞིན་དུ་སྣང་སྟེ། འདི་སྐད་ཅེས་བཅོམ་ལྡན་འདས་ཤཱཀྱ་ཐུབ་པ་ཁྱོད་ཀྱིས། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ལེགས་པར་བཤད་པ་ལེགས་སོ་ལེགས་སོ། །བཅོམ་ལྡན་འདས་ཤཱཀྱ་ཐུབ་པ་ཁྱོད་ཀྱིས་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་བཤད་པ་ཡང་ལེགས་སོ། །བཅོམ་ལྡན་འདས་དམ་པའི་ཆོས་པད་མ་དཀར་
པོའི་ཆོས་ཀྱི་རྣམ་གྲངས་འདི་ཉན་པའི་ཕྱིར། ཁོ་བོ་འདིར་འོངས་སོ་ཞེས་གསུང་ངོ་། །དེ་ནས་འཁོར་བཞི་པོ་དེ་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་ནས། ཡོངས་སུ་མྱ་ངན་ལས་འདས་པ་དེ་སྐད་གསུངས་པ་ཐོས་ནས། ངོ་མཚར་དང་རྨད་དུ་གྱུར་ཏེ། དེའི་ཚེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ལྷ་དང་། མིའི་རིན་པོ་ཆེའི་ཕུང་པོས་མངོན་པར་གཏོར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་གིས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་སེང་གེའི་ཁྲི་དེའི་ཕྱེད་བདར་ཏེ། རིན་པོ་ཆེའི་མཆོད་རྟེན་ཆེན་པོ་དེའི་ནང་ནས། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་འདིར་བཞུགས་ཞེས་དེ་སྐད་གསུང་ངོ་། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་གདན་དེའི་ཕྱེད་ལ་བཞུགས་སོ། །དེ་བཞིན་གཤེགས་པ་དེ་དང་ལྷན་ཅིག་ཏུ་དེ་བཞིན་གཤེགས་པ་གཉི་ག་རིན་པོ་ཆེའི་མཆོད་རྟེན་ཆེན་པོ་དེའི་དབུས་ན། སེང་གེའི་ཁྲི་ལ་བཞུགས་ནས། ནམ་མཁའ་བར་སྣང་ལ་གནས་པར་སྣང་ངོ་། །དེ་ནས་འཁོར་བཞི་པོ་དེ་དག་འདི་སྙམ་དུ་བདག་ཅག་དེ་བཞིན་གཤེགས་པ་འདི་དག་དང་ཐག་རིང་ན་བདག་ཅག་ཀྱང་དེ་བཞིན་གཤེགས་པའི་མཐུས། ནམ་མཁའ་ལ་འཕགས་པར་བྱའོ་
སྙམ་དུ་སེམས་སོ། །དེ་ནས་བཅོམ་ལྡན་འདས་ཀྱིས་འཁོར་བཞི་པོ་དེ་དག་གི་སེམས་ཀྱི་རྟོག་པ་ཐུགས་ཀྱིས་ཐུགས་སུ་ཆུད་ནས། དེའི་དུས་ན་རྫུ་འཕྲུལ་གྱི་སྟོབས་ཀྱིས་འཁོར་བཞི་པོ་དེ་དག་ནམ་མཁའ་བར་སྣང་ལ་བཀོད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་དེའི་ཚེ་འཁོར་བཞི་པོ་དེ་དག་ལ་བཀའ་སྩལ་པ། དགེ་སློང་དག་ཁྱེད་ཀྱི་ནང་ན་འཇིག་རྟེན་གྱི་ཁམས་མི་མཇེད་འདིར། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཡང་དག་པར་འཆད་པར་སྤྲོ་བ་སུ་ཡོད། དེ་བཞིན་གཤེགས་པ་མངོན་སུམ་དུ་བཞུགས་ཏེ། དེའི་དུས་འདིའོ། །དེའི་ཚེ་འདིའོ། །དགེ་སློང་དག་དེ་བཞིན་གཤེགས་པ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་བཞག་སྟེ། ཡོངས་སུ་མྱ་ངན་ལས་འདའ་བར་འདོད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །དགེ་སློང་གང་དག་འདྲེན་པ་དྲང་སྲོང་ཆེ། །མྱ་ངན་འདས་འདི་རིན་ཆེན་མཆོད་རྟེན་འདིར། །བཞུགས་ནས་ཆོས་འདི་གསན་ཅིང་གཤེགས་མཛད་ན། །ཆོས་ཀྱི་ཆེད་དུ་བརྩོན་འགྲུས་སུ་མི་སྐྱེད། །མྱ་ངན་ཡོངས་འདས་བསྐལ་པ་བྱེ་བ་མང་། །འོན་ཀྱང་ད་དུང་དེ་ནི་ཆོས་གསན་ཏེ། །ཆོས་ཀྱི་ཆེད་དུ་དེ་དང་དེར་ཡང་གཤེགས། །འདི་འདྲའི་ཆོས་འདི་ཤིན་ཏུ་རྙེད་པར་དཀའ། །རྣམ་པར་འདྲེན་པ་འདི་ཡི་སྨོན་ལམ་ནི། །སྲིད་པ་སྔ་མ་དག་ལ་བསྙེན་གྱུར་པས། །མྱ་ངན་འདས་ཀྱང་འཇིག་རྟེན་འདི་ཀུན་ན། ཕྱོགས་བཅུ་ཐམས་ཅད་དུ་ཡང་ཡོངས་སུ་རྒྱུ། །བྱེ་བ་སྟོང་ཕྲག་གང་གཱའི་བྱེ་མ་སྙེད། །འདི་དག་ཐམས་ཅད་ང་ཡི་ལུས་ཡིན་ཏེ། །མགོན་པོ་མྱ་ངན་འདས་པ་འདི་ལྟ་དང་། །ཆོས་ཀྱི་བྱ་བ་བྱ་ཕྱིར་དེ་དག་ལྷགས། །ཅི་ནས་ཆོས་ཚུལ་ཡུན་རིང་གནས་འགྱུར་བར། །ཐམས་ཅད་དམ་པའི་ཆོས་འདི་བསྲུང་བའི་ཕྱིར། །ཉན་ཐོས་དེ་བཞིན་མི་དང་ལྷ་ཀུན་དང་། །སོ་སོ་རང་རང་གི་ནི་ཞིང་བོར་ཏེ། །སངས་རྒྱས་འདི་དག་བཞུགས་པར་བྱ་བའི་ཕྱིར། །ངས་ནི་རྫུ་འཕྲུལ་སྟོབས་ཀྱིས་འདི་ལྟ་བུར། །འཇིག་
རྟེན་ཁམས་མང་སྟོང་ཕྲག་བྱེ་བ་ནས། །སེམས་ཅན་ཐམས་ཅད་སྤོས་ཤིང་ཡོངས་དག་བྱས། །ཆོས་ཀྱི་ཚུལ་འདི་ཇི་ལྟར་བསྟན་བྱ་ཞེས། །དེ་ལྟ་བུར་ནི་ང་ཡང་ཤིན་ཏུ་བརྩོན། །ཤིང་དབང་དྲུང་ན་སངས་རྒྱས་ཚད་མེད་པ། །ཇི་ལྟར་པད་མའི་ཕུང་པོ་བཞིན་དུ་བཞུགས། །བྱེ་བ་ཕྲག་ནི་མི་ཉུང་ཤིང་དྲུང་ན། །སེང་གེའི་ཁྲི་ལ་འདྲེན་པ་བཞུགས་པ་ནི། །རབ་ཏུ་མཛེས་པར་རྟག་ཏུ་དེར་བཞུགས་ཏེ། །མུན་ནག་ཆེན་པོའི་ནང་ན་མེ་བཞིན་ནོ། །འཇིག་རྟེན་རྣམ་འདྲེན་རྣམས་ཀྱི་ཡིད་འོང་དྲི། །ཕྱོགས་བཅུ་རྣམས་སུ་རབ་ཏུ་ལྡང་བ་དེ། །སེམས་ཅན་འདི་དག་ཀུན་དང་འདྲེས་པར་གྱུར། །རླུང་རྣམས་འདིར་ནི་རྟག་པར་ལངས་པ་བཞིན། །ང་ནི་མྱ་ངན་འདས་ནས་གང་། །ཆོས་ཀྱི་རྣམ་གྲངས་འདི་འཛིན་པ། །འཇིག་རྟེན་མགོན་པོའི་སྤྱན་སྔ་འདིར། །ཚིག་གི་མྱུར་དུ་སྨྲ་བར་གྱིས། །སངས་རྒྱས་མྱ་ངན་ཡོངས་འདས་པ། །ཐུབ་པ་རིན་ཆེན་མང་པོ་ཡང་། །འདི་ལ་སྤྲོ་བར་སུ་བྱེད་པ། །དེ་ཡི་སེང་གེའི་སྒྲ་གསན་ཏོ། །གཉིས་པ་ང་དང་འདྲེན་པ་བྱེ་བ་ཕྲག །མང་པོ་གང་དག་ལྷགས་པ་འདི་དག་ཀྱང། །གང་རྣམས་ཆོས་འདི་བཤད་པར་སྤྲོ་བ་ཡི། །རྒྱལ་བའི་སྲས་ཀྱི་བརྩོན་པ་ཉན་པར་བྱེད། །འདི་ལྟ་བུ་ཡི་ཆོས་འདི་མཉན་པའི་ཕྱིར། །ཕྱོགས་དང་ཕྱོགས་མཚམས་རྟག་ཏུ་སུ་འགྲོ་བ། །དེས་ནི་ང་དང་རིན་ཆེན་མང་བ་ཡི། །རྒྱལ་བ་རང་བྱུང་རྟག་ཏུ་མཆོད་པ་ཡིན། །མདོ་སྡེ་རབ་ཏུ་བསྟན་པས་འཇིག་རྟེན་མགོན། །གང་འདི་ལྷགས་པར་གྱུར་ཅིང་གང་དག་གིས། །ས་འདི་བཀྲ་མཛེས་བྱས་པ་དེ་ཀུན་ལ། །མཆོད་པ་རྒྱ་ཆེ་མི་ཆུང་བྱས་པར་འགྱུར། །མཆོད་རྟེན་ནང་བཞུགས་བཅོམ་ལྡན་འདས་འདི་དང་། ང་ཡང་སྟན་གྱི་སྟེང་ན་འདུག་པ་དང་། །ཞིང་བརྒྱ་དུ་མ་དག་ནས་གང་ལྷགས་པ། །འཇིག་རྟེན་མགོན་གཞན་མང་པོ་འདི་མཐོང་བ། །སེམས་ཅན་ཀུན་ལ་སྙིང་བརྩེའི་ཕྱིར། །རིགས་ཀྱི་བུ་དག་ཁྱེད་ཅག་སོམས། །ཤིན་ཏུ་བྱ་དཀའ་གནས་འདི་ལ། །རྣམ་པར་འདྲེན་པས་སྤྲོ་བར་མཛད། །མདོ་སྡེ་སྟོང་ཕྲག་
མང་པོ་དག །གང་གཱའི་བྱེ་མ་ཇི་བཞིན་པ། །དེ་དག་གང་ཞིག་སྟོན་བྱེད་པ། །དེ་ནི་དཀའ་བ་མ་ཡིན་ནོ། །གང་གི་ལག་གིས་རི་རབ་རི། །ཆང་པར་བླངས་པར་བྱས་ནས་སུ། །ཞིང་རྣམས་བྱེ་བར་ འཕེན 
་བྱེད་པ། །དེ་ནི་དཀའ་བ་མ་ཡིན་ནོ། །གང་གིས་སྟོང་གསུམ་འདི་དག་ཀྱང་། །རྐང་པའི་མཐེ་བོས་བསྐྱོད་ནས་སུ། །ཞིང་རྣམས་བྱེ་བར་
འཕེན ་པ་ཡང་། །དེ་ནི་དཀའ་བ་མ་ཡིན་ནོ། །མི་གང་སྲིད་པའི་རྩེར་གནས་ནས། །མདོ་སྡེ་གཞན་དག་སྟོང་རྣམས་ཀྱི། །ཆོས་འདི་རབ་ཏུ་འཆད་པ་ཡང་། །དེ་ནི་དཀའ་བ་མ་ཡིན་ནོ། །འཇིག་རྟེན་དབང་པོ་མྱ་ངན་འདས། །ཕྱི་དུས་ཤིན་ཏུ་མི་བཟད་ལ། །གང་ཞིག་མདོ་སྡེ་འདི་འཛིན་ཏམ། །འཆད་པ་དེ་ནི་ཤིན་ཏུ་དཀའ། །གང་ཞིག་ནམ་མཁའི་ཁམས་ཀུན་ཡང་། །ཆང་པ་གཅིག་གི་ནང་བཅུག་ཅིང་། །རབ་ཏུ་བཅུག་སྟེ་འགྲོ་བ་ནི། །དེ་ནི་དཀའ་བ་མ་ཡིན་ནོ། །ང་ནི་མྱ་ངན་འདས་པའི་ཚེ། །གང་ཞིག་མདོ་སྡེ་འདི་འདྲ་བ། །ཕྱི་དུས་ཡི་གེར་འདྲིར་འཇུག་པ། དེ་ནི་ཤིན་ཏུ་དཀའ་བ་ཡིན། །གང་ཞིག་ས་ཡི་ཁམས་རྣམས་ཀུན། །སེན་མོའི་རྩེ་མོར་འཇུག་བྱེད་ལ། །རབ་ཏུ་བཅུག་ནས་འགྲོ་བྱེད་ཅིང་། །ཚངས་པའི་འཇིག་རྟེན་འཛེག་བྱེད་པ། །འཇིག་རྟེན་ཀུན་གྱི་མདུན་དུ་འདིར། །དེ་ལྟར་དཀའ་བ་བྱས་པ་ཡང་། །དེས་ནི་དཀའ་བ་བྱས་མ་ཡིན། །བརྩོན་འགྲུས་དག་ཀྱང་དེ་ཙམ་མིན། །ང་ནི་མྱ་ངན་འདས་པའི་ཚེ། །ཕྱི་མའི་དུས་ན་མདོ་སྡེ་འདི། །སུ་ཞིག་སྨྲ་བར་བྱེད་པ་དེ། །དེ་བས་ཤིན་ཏུ་དཀའ་བར་བྱེད། །བསྐལ་པས་བསྲེག་པར་མི་གང་ཞིག །རྩྭ་ཡི་ཁུར་བུ་ཐོགས་ནས་སུ། །ཚིག་བཞིན་དུ་ནི་དབུས་འགྲོ་བ། །འཇིག་རྟེན་ན་ནི་དེ་མི་དཀའ། །ང་ནི་མྱ་ངན་འདས་པའི་ཚེ། །གང་གིས་མདོ་འདི་བཟུང་ནས་ཀྱང་། །སེམས་ཅན་གཅིག་ལའང་ཐོས་བྱེད་པ། །དེ་བས་ཤིན་ཏུ་དཀའ་བ་ཡིན། །ཆོས་ཀྱི་ཕུང་པོ་སྟོང་ཕྲག་ནི། །བརྒྱད་ཅུ་རྩ་བཞི་འཛིན་བྱེད་ཅིང་། །ལུང་བཅས་ཇི་སྐད་གསུངས་པ་བཞིན། །སྲོག་ཆགས་བྱེ་
བ་རྣམས་ལ་འཆད། །དེ་ཚེ་གང་ཞིག་དགེ་སློང་རྣམས། །འདུལ་བྱེད་ང་ཡི་ཉན་ཐོས་རྣམས། །མངོན་པར་ཤེས་ལ་བཀོད་པ་ཡང་། །དེ་ནི་དཀའ་བ་མ་ཡིན་ནོ། །གང་ཞིག་མདོ་འདི་འཛིན་པའམ། །དད་དམ་མོས་པར་བྱེད་པ་འམ། །ཡང་དང་ཡང་དུ་འཆད་བྱེད་པ། །འདི་ནི་དེ་བས་ཤིན་ཏུ་དཀའ། །སྟོང་ཕྲག་བྱེ་བ་མང་པོ་རྣམས། །གང་གཱའི་བྱེ་མ་ཇི་བཞིན་པ། །མངོན་ཤེས་དྲུག་ལྡན་སྐལ་ཆེན་དང་། །དགྲ་བཅོམ་ཉིད་ལ་དགོད་པ་བས། །ང་ནི་མྱ་ངན་འདས་འོག་ཏུ། །གང་ཞིག་མདོ་མཆོག་འདི་འཛིན་པ། །མི་མཆོག་དེ་ནི་དེ་བས་ཀྱང་། །ཤིན་ཏུ་ལས་མང་བྱེད་པ་ཡིན། །སངས་རྒྱས་ཡེ་ཤེས་ཆེད་ཀྱི་ཕྱིར། །འཇིག་རྟེན་ཁམས་ནི་སྟོང་རྣམས་སུ། །ང་ཡིས་ཤིན་ཏུ་ཆོས་མང་བཤད། །ད་དུང་དུ་ཡང་ང་འཆད་དོ། །འདི་ནི་མདོ་སྡེ་ཐམས་ཅད་ལས། །མདོ་སྡེ་དམ་པ་མཆོག་ཅེས་བྱ། །མདོ་སྡེ་འདི་ནི་སུ་འཛིན་པ། །དེ་ནི་རྒྱལ་བའི་སྐུ་འཛིན་ཏོ། །རིགས་ཀྱི་བུ་དག་ཕྱི་དུས་ན། །ཁྱེད་ཅག་རྣམས་ལས་གང་སུ་ཞིག །མདོ་སྡེ་འཛིན་པར་སྤྲོ་བ་ཁྱེད། །དེ་བཞིན་གཤེགས་པའི་སྤྱན་སྔར་སྨྲོས། །ཤིན་ཏུ་གཟུང་དཀའ་མདོ་འདི་ནི། །གང་ཞིག་ཡུད་ཙམ་འཛིན་པ་ཡང་། །འཇིག་རྟེན་མགོན་ལ་རྣམ་ཀུན་ཏུ། །དཀའ་བ་ཆེན་པོ་བྱས་པར་གྱུར། །འཇིག་རྟེན་མགོན་གྱིས་ཐམས་ཅད་དུ། །དེ་ནི་ཤིན་ཏུ་བསྔགས་པ་ཡིན། །ཤིན་ཏུ་དཔའ་ཞིང་ནུས་པ་སྟེ། །བྱང་ཆུབ་ཏུ་ནི་མངོན་ཤེས་མྱུར། །མདོ་སྡེ་འདི་ནི་སུ་འཛིན་པ། །གཅེས་པ་ཁྱེར་བ་དེ་ཡིན་ཏེ། །འཇིག་རྟེན་མགོན་གྱི་ཐུགས་ཀྱི་སྲས། །དུལ་བའི་ས་ཡང་རྗེས་སུ་ཐོབ། །མི་གཙོ་མྱ་ངན་འདས་པ་ན། །མདོ་སྡེ་འདི་ནི་རབ་སྟོན་པ། །ལྷ་དང་མིར་བཅས་འཇིག་རྟེན་ན། །དེ་ནི་མིག་ཏུ་གྱུར་པ་ཡིན། །གང་ཞིག་ཕྱི་མའི་དུས་ཀྱི་ཚེ། །མདོ་སྡེ་འདི་ནི་ཡུད་ཙམ་ཞིག །འཆད་པ་བྱེད་པ་མཁས་པ་དེ། །སེམས་ཅན་ཀུན་གྱི་ཕྱག་བྱའི་འོས། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའི་
ཚོགས་མ་ལུས་པ་དང་། ལྷ་དང་ལྷ་མ་ཡིན་དུ་བཅས་པའི་འཇིག་རྟེན་ལ་བོས་ཏེ། འདི་སྐད་ཅེས་བཀའ་སྩལ་ཏོ། །དགེ་སློང་དག་སྔོན་བྱུང་བ་འདས་པའི་དུས་ན། བསྐལ་པ་ཚད་མེད་གྲངས་མེད་པར་ངས་དམ་པའི་ཆོས་པད་མ་དཀར་པོའི་མདོ་ཡོངས་སུ་བཙལ་ཏེ། སྐྱོ་མ་མྱོང་ལ་ངལ་བ་མེད་པར་གྱུར་ཏོ། །སྔོན་བསྐལ་པ་དུ་མ་ལ་བསྐལ་པ་བརྒྱ་སྟོང་ཕྲག་དུ་མར་ང་རྒྱལ་པོར་གྱུར་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་ནས་ངའི་སེམས་ལྡོག་པར་མ་གྱུར་ཏོ། །ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱ་བའི་ཕྱིར་བརྩོན་པར་གྱུར་ནས། སྦྱིན་པ་ཚད་མེད་པ་རབ་ཏུ་བྱིན་ཏེ། གསེར་དང་། ནོར་བུ་དང་། མུ་ཏིག་དང་། བཻ་དཱུཪྱ་དང་། དུང་དང་། མན་ཤེལ་དང་། བྱི་རུ་དང་། ས་ལེ་སྦྲམ་དང་། དངུལ་དང་། རྡོའི་སྙིང་པོ་དང་། སྤུག་དང་། མུ་ཏིག་དམར་པོ་དང་། གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དང་། ཆུང་མ་དང་། བུ་ཕོ་དང་། བུ་མོ་དང་། བྲན་ཕོ་དང་། བྲན་མོ་དང་། གླང་པོ་ཆེ་དང་། རྟ་དང་། ཤིང་རྟ་དང་། བདག་གི་ལུས་ཀྱི་བར་དུ་ཡོངས་སུ་བཏང་སྟེ། ལག་པ་དང་། རྐང་པ་དང་། མགོ་དང་། ཡན་ལག་དང་། ཉིང་ལག་ཐམས་ཅད་དང་། སྲོག་སྦྱིན་པ་པོར་གྱུར་ནས། ང་ནམ་དུ་ཡང་ཀུན་འཛིན་པའི་སེམས་མ་སྐྱེས་སོ། །དེའི་ཚེ་འཇིག་རྟེན་འདི་ཚེ་རིང་པོར་གྱུར་ཏེ། ལོ་བརྒྱ་སྟོང་དུ་མར་འཚོའོ། །དེའི་ཚེ་ངས་ཆོས་ཀྱི་ཕྱིར་རྒྱལ་པོ་བྱས་ཀྱི། ཡུལ་འཁོར་གྱི་ཕྱིར་ནི་མ་ཡིན་ཏེ། བུ་ཐུ་བོ་དབང་བསྐུར་ནས། ང་ཕྱོགས་བཞིར་ཆོས་ཀྱི་མཆོག་ཚོལ་བ་ལ་བརྩོན་པར་གྱུར་ཏོ། །ངས་དྲིལ་བུ་བརྡུངས་ཏེ། འདི་སྐད་ཅེས། ང་ལ་སུས་ཆོས་ཀྱི་མཆོག་རབ་ཏུ་བྱིན་པ་དང་། དོན་རྣམ་པར་བཤད་པ་དེའི་བྲན་ངས་བྱའོ་ཞེས་གྲགས་པར་བྱས་སོ། །དེ་ནས་དེའི་ཚེ་དྲང་སྲོང་ཞིག་ཡོད་པ་ང་ལ་འདི་སྐད་ཅེས། རྒྱལ་པོ་ཆེན་པོ་དམ་པའི་ཆོས་པད་མ་དཀར་པོ་ཞེས་བྱ་བའི་མདོ་མཆོག་གི་ཆོས་བསྟན་པ་ཡོད་དེ།
བྲན་དུ་ཁས་ལེན་ན་ཆོས་དེ་ཁོ་བོས་ཁྱོད་ཀྱིས་ཐོས་པར་བྱའོ་ཞེས་ཟེར་བ་དང་། ངས་དྲང་སྲོང་དེའི་ཚིག་དེ་ཐོས་ནས། དགའ་མགུ་རངས་ཡིད་རབ་ཏུ་དགའ་སྟེ། དྲང་སྲོང་དེ་ག་ལ་བ་དེར་བསྙེན་ནས། འདི་སྐད་ཅེས། བྲན་གྱི་ལས་ཅི་བྱེད་པ་དེ་བྱའོ་ཞེས་སྨྲས་ཏེ། དེ་ལྟར་ང་དྲང་སྲོང་དེའི་བྲན་དུ་ཁས་བླངས་ནས། རྩྭ་དང་། ཤིང་དང་། ཆུ་དང་། རྩ་བ་དང་། རྡོག་གུ་དང་། འབྲས་བུ་ལ་སོགས་པ་ལེན་པའི་ལས་བྱས་ཏེ། ངས་སྒོ་བསྲུང་བ་ཡན་ཆད་བྱས་སོ། །ཉིན་པར་རྣམ་པ་དེ་ལྟ་བུའི་ལས་བྱས་ནས། མཚན་མོ་མལ་ཁྲིའི་རྐང་པ་ཡང་བཟུང་ངོ་། །འོན་ཀྱང་ངའི་ལུས་ངལ་བར་གྱུར་པ་ཡང་མེད། སེམས་ངལ་བར་གྱུར་པ་ཡང་མེད་དེ། ལས་དེ་ལྟར་བྱས་པས་ལོ་སྟོང་ཚང་བར་འདས་སོ། །དེ་ནས་བཅོམ་ལྡན་འདས་ཀྱིས། དེའི་ཚེ་དོན་འདི་ཡོངས་སུ་བསྟན་པའི་ཕྱིར་ཚིགས་སུ་བཅད་པ་འདི་དག་བཀའ་སྩལ་ཏོ། །བསྐལ་པ་འདས་པ་ཡང་དག་རྗེས་དྲན་ཏེ། །ངས་སྔོན་ཆོས་ཕྱིར་ཆོས་རྒྱལ་གྱུར་པ་ན། །ཆོས་ཀྱི་ཕྱིར་ནི་ང་ཡིས་རྒྱལ་པོ་བྱས། །འདོད་ཕྱིར་མ་ཡིན་ཆོས་མཆོག་དོན་དུའོ། །གང་ཞིག་ཆོས་སྨྲ་དེ་ཡི་བྲན་བྱ་ཞེས། །ངས་ནི་ཕྱོགས་བཞིར་དེ་སྐད་བསྒྲགས་པར་བྱས། །དེ་ཡི་ཚེ་ན་དྲང་སྲོང་མཁས་ཡོད་པ། །དམ་པ་ཆོས་ཞེས་བྱ་བ་མདོ་སྡེ་སྨྲ། །དེ་ནི་ང་ལ་གལ་ཏེ་ཆོས་འདོད་ན། །བྲན་དུ་ཁས་ལོང་དེ་ནས་ཆོས་བཤད་ཟེར། །ཚིག་དེ་ཐོས་ནས་ང་ནི་རབ་ཏུ་དགའ། །དེ་ན་བྲན་གྱིས་བྱ་བའི་ལས་དེ་བྱས། །དམ་པའི་ཆོས་ཕྱིར་བྲན་ནི་བྱེད་པ་ན། །ལུས་དང་སེམས་ལ་ངལ་བས་མ་རེག་གོ ། དེ་ཚེ་ང་ནི་སེམས་ཅན་ཕྱིར་སྨོན་གྱི། །བདག་གི་ཕྱིར་མིན་འདོད་ཕྱིར་མ་ཡིན་ཏེ། །ལས་གཞན་མེད་པར་ཕྱོགས་བཅུ་རྣམས་སུ་རྒྱུ། །བསྐལ་པ་སྟོང་དུ་རྫོགས་པར་མི་སྐྱོ་བར། །ཆོས་ཞེས་བྱ་བ་མདོ་སྡེ་སྙེད་ཀྱི་བར། །རྒྱལ་པོ་དེས་ནི་དེ་སྙེད་བརྩོན་འགྲུས་བརྩམས། །དགེ་སློང་དག་འདི་ཇི་སྙམ་དུ་སེམས། དེའི་ཚེ་དེའི་དུས་ན། རྒྱལ་
པོར་གྱུར་པ་དེ་གཞན་ཞིག་ཡིན་སྙམ་དུ་འཛིན་ན། དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེའི་ཚེ་དེའི་དུས་ན། རྒྱལ་པོར་གྱུར་པ་དེ་ནི་ང་ཡིན་ནོ། །དགེ་སློང་དག་དེའི་ཚེ་དེའི་དུས་ན། དྲང་སྲོང་དུ་གྱུར་པ་དེ་གཞན་ཡིན་སྙམ་དུ་འཛིན་ན། དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དགེ་སློང་དག་ལྷས་བྱིན་འདི་དེའི་ཚེ། དེའི་དུས་ན་དྲང་སྲོང་དུ་གྱུར་ཏེ། དགེ་སློང་དག་ལྷས་བྱིན་ཡང་ངའི་དགེ་བའི་བཤེས་གཉེན་ནོ། །ལྷས་བྱིན་ལ་བརྟེན་ཏེ། ངས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱས་སོ། །བྱམས་པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་དང་། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་དང་། འོད་འདོམ་གང་བ་དང་། མདོག་གསེར་གྱི་ཁ་དོག་དང་། སྟོབས་བཅུ་དང་། མི་འཇིགས་པ་བཞི་དང་། བསྡུ་བའི་དངོས་པོ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང་། རྫུ་འཕྲུལ་གྱི་སྟོབས་ཆེན་པོ་དང་། ཕྱོགས་བཅུའི་སེམས་ཅན་བསྒྲལ་བ་དེ་ཐམས་ཅད་ཀྱང་ལྷས་བྱིན་ལ་བརྟེན་ཏེ་རྫོགས་པར་བྱས་སོ། །དགེ་སློང་དག་ཁྱེད་མོས་པར་བྱའོ། །ཁོང་དུ་ཆུད་པར་བྱའོ། །དགེ་སློང་དག་ལྷས་བྱིན་འདི་མ་འོངས་པའི་དུས་བསྐལ་པ་ཚད་མེད་གྲངས་མེད་པ་ན། འཇིག་རྟེན་གྱི་ཁམས་ལྷའི་ཐེམ་སྐས་ཞེས་བྱ་བར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལྷའི་རྒྱལ་པོ་ཞེས་བྱ་བར་འགྱུར་རོ། །དགེ་སློང་དག་དེ་བཞིན་གཤེགས་པ་ལྷའི་རྒྱལ་པོ་དེའི་ཚེའི་ཚད་ནི་བར་གྱི་བསྐལ་པ་ཉི་ཤུར་འགྱུར་རོ། །ཆོས་ཀྱང་རྒྱས་པར་སྟོན་པར་འགྱུར་རོ། །སེམས་ཅན་གང་གཱའི་ཀླུང་གི་བྱེ་མ་སྙེད་དག་ནི་ཉོན་མོངས་པ་ཐམས་ཅད་སྤངས་ནས། དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་རོ། །སེམས་ཅན་དུ་མ་ནི་རང་བྱང་ཆུབ་ཏུ་སེམས་བསྐྱེད་པར་འགྱུར་རོ། །སེམས་ཅན་གང་གཱའི་ཀླུང་གི་བྱེ་མ་སྙེད་དག་ནི་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་སེམས་བསྐྱེད་པར་འགྱུར་ཞིང་ཕྱིར་མི་ལྡོག་པའི་བཟོད་པ་ཡང་ཐོབ་པར་འགྱུར་རོ། །དགེ་སློང་དག་དེ་བཞིན་གཤེགས་པ་ལྷའི་རྒྱལ་པོ་ཡོངས་སུ་མྱ་ངན་ལས་འདས་ནས། དམ་པའི་ཆོས་བར་གྱི་བསྐལ་པ་ཉི་ཤུར་གནས་སོ། །དེའི་སྐུ་གདུང་གི་རིང་བསྲེལ་ནི་འགྱེས་པར་མི་འགྱུར་ཞིང་དེའི་སྐུ་གདུང་གཅིག་ཏུ་འདུས་པར་འགྱུར་ཏེ། རིན་པོ་ཆེ་སྣ་བདུན་གྱི་མཆོད་རྟེན་དུ་བཅུག་ནས། མཆོད་རྟེན་དེ་ཡང་འཕང་དུ་ནི་དཔག་ཚད་དྲུག་ཅུ། རྒྱར་ནི་དཔག་ཚད་བཞི་བཅུ་པར་འགྱུར་རོ། ། དེ་ལ་མི་དང་ལྷ་ཐམས་ཅད་ཀྱིས་སྤོས་དང་། བདུག་པ་དང་། མེ་ཏོག་དང་། ཕྲེང་བ་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། ལྷའི་བ་དན་ལ་སོགས་པས་མཆོད་པ་བྱེད་པར་འགྱུར་རོ། །ཚིགས་སུ་བཅད་པའི་དབྱངས་ཀྱིས་བསྟོད་པར་འགྱུར་རོ། །གང་དག་མཆོད་རྟེན་དེ་ལ་སྐོར་བ་བྱེད་པ་འམ། འདུད་པ་དེ་དག་ཀྱང་ལ་ལ་ནི་འབྲས་བུའི་མཆོག་དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་རོ། །ལ་ལ་ནི་རང་བྱང་ཆུབ་ཐོབ་པར་འགྱུར་རོ། །ལྷ་དང་མི་བསམ་གྱིས་མི་ཁྱབ་དཔག་ཏུ་མེད་པ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ་ཕྱིར་མི་ལྡོག་པར་འགྱུར་རོ། །དེ་ནས་ཡང་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་མ་འོངས་པའི་དུས་ན། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་དམ་པའི་ཆོས་པད་མ་དཀར་པོའི་མདོའི་ལེའུ་འདི་ཉན་པ་དང་། ཐོས་ནས་སོམ་ཉི་མི་ཟ་བ་དང་། རྣམ་པར་དག་པའི་སེམས་ཀྱིས་མོས་པ་དེ་དག་གིས་ངན་འགྲོ་གསུམ་གྱི་སྒོ་བཅད་པར་འགྱུར་ཏེ། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དུ་སྐྱེ་བར་མི་འགྱུར་རོ། །ཕྱོགས་བཅུའི་སངས་རྒྱས་ཀྱི་ཞིང་དུ་སྐྱེས་ན་ཡང་ཚེ་རབས་ཚེ་རབས་སུ་མདོ་སྡེ་འདི་ཐོས་པར་འགྱུར་རོ། །ལྷ་དང་མིའི་འཇིག་རྟེན་དུ་སྐྱེས་ན་ཡང་དེས་གནས་ཁྱད་པར་ཅན་ཐོབ་པར་འགྱུར་རོ། །སངས་རྒྱས་ཀྱི་ཞིང་གང་དུ་སྐྱེ་བ་དེར་ཡང་དེ་བཞིན་
གཤེགས་པའི་སྤྱན་སྔར་རིན་པོ་ཆེ་སྣ་བདུན་གྱི་པད་མའི་ནང་ནས་བརྫུས་ཏེ་སྐྱེ་བར་འགྱུར་རོ། །དེ་ནས་དེའི་ཚེ་འོག་གི་ཕྱོགས་ནས་དེ་བཞིན་གཤེགས་པ་རིན་ཆེན་མང་གི་སངས་རྒྱས་ཀྱི་ཞིང་ནས། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་བརྩེགས་ཞེས་བྱ་བ་འོངས་པ་དེས། དེ་བཞིན་གཤེགས་པ་རིན་ཆེན་མང་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཉིད་ཀྱི་སངས་རྒྱས་ཀྱི་ཞིང་དུ་གཤེགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས། བྱང་ཆུབ་སེམས་དཔའ་ཤེས་རབ་བརྩེགས་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། ཡུད་ཙམ་ཞིག་སྡོད་ཅིག །ང་ཡི་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་དང་། ཆོས་རྣམ་པར་གཏན་ལ་དབབ་པ་འགའ་ཞིག་གྱིས་ལ། ཕྱིས་བདག་གི་སངས་རྒྱས་ཀྱི་ཞིང་དུ་སོང་ཤིག །དེ་ནས་དེའི་ཚེ་འཇམ་དཔལ་གཞོན་ནུར་གྱུར་པ་པད་མ་འདབ་མ་སྟོང་ཡོད་པ། ཚད་ཤིང་རྟའི་འཕང་ལོ་ཙམ་ལ་འདུག་སྟེ། བྱང་ཆུབ་སེམས་དཔའ་དུ་མས་ཡོངས་སུ་བསྐོར་ནས། རྒྱལ་མཚོའི་ནང་ནས་ཀླུའི་རྒྱལ་པོ་རྒྱ་མཚོའི་ཁང་པ་ནས་སྟེང་གི་ནམ་མཁའ་ལ་འཕགས་ཏེ། ནམ་མཁའ་ལས་བྱ་རྒོད་ཀྱི་ཕུང་པོའི་རི་ལ་བཅོམ་ལྡན་འདས་ཀྱི་གན་དུ་སོང་ངོ་། །དེ་ནས་འཇམ་དཔལ་གཞོན་ནུར་གྱུར་པ་པད་མ་ལས་བབས་ཏེ། བཅོམ་ལྡན་འདས་ཤཱཀྱ་ཐུབ་པ་དང་དེ་བཞིན་གཤེགས་པ་རིན་ཆེན་མང་གི་ཞབས་ལ་མགོ་བོས་ཕྱག་འཚལ་ནས། བྱང་ཆུབ་སེམས་དཔའ་ཤེས་རབ་བརྩེགས་ག་ལ་བ་དེར་སོང་སྟེ་ཕྱིན་ནས་བྱང་ཆུབ་སེམས་དཔའ་ཤེས་རབ་བརྩེགས་དང་མངོན་སུམ་དུ་ཀུན་དགའ་ཞིང་ཡང་དག་པར་མགུ་བའི་གཏམ་རྣམ་པ་མང་པོ་བྱས་ཏེ་ཕྱོགས་གཅིག་ཏུ་འདུག་གོ ། དེ་ནས་བྱང་ཆུབ་སེམས་དཔའ་ཤེས་རབ་བརྩེགས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་རྒྱ་མཚོར་ཞུགས་ཏེ། སེམས་ཅན་གྱི་ཁམས་ཇི་སྙེད་ཅིག་བཏུལ། འཇམ་དཔལ་གྱིས་སྨྲས་པ། ཇི་ཙམ་དུ་ཚིག་གིས་
བརྗོད་མི་ནུས་ཤིང་སེམས་ཀྱིས་བསམ་མི་ནུས་པ་དེ་སྙེད་དུ། ཚད་མེད་གྲངས་མེད་པའི་སེམས་ཅན་དུ་མ་དག་བཏུལ་ལོ། །རིགས་ཀྱི་བུ་སྐད་ཅིག་སྡོད་ཅིག་དང་སྔ་ལྟས་ཀྱི་བར་དུ་མཐོང་བར་འགྱུར་རོ། །འཇམ་དཔལ་གཞོན་ནུར་གྱུར་པས་དེ་སྐད་ཅེས་སྨྲས་མ་ཐག་ཏུ་དེའི་ཚེ་པད་མ་སྟོང་ཕྲག་དུ་མ་རྒྱ་མཚོའི་ནང་ནས་སྟེང་གི་ནམ་མཁའ་ལ་བྱུང་སྟེ། པད་མ་དེ་དག་ལ་བྱང་ཆུབ་སེམས་དཔའ་སྟོང་ཕྲག་དུ་མ་འཁོད་དོ། །དེ་ནས་བྱང་ཆུབ་སེམས་དཔའ་དེ་དག་ནམ་མཁའ་ལས། བྱ་རྒོད་ཀྱི་ཕུང་པོའི་རི་ག་ལ་བ་དེར་ལྷགས་ཏེ་སྟེང་གི་ནམ་མཁའ་ལ་འཁོད་པར་སྣང་ངོ་། །དེ་དག་ཐམས་ཅད་ཀྱང་འཇམ་དཔལ་གཞོན་ནུར་གྱུར་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བཏུལ་བ་ཤ་སྟག་གོ ། དེ་ནས་བྱང་ཆུབ་སེམས་དཔའ་གང་དག་སྔོན་ཐེག་པ་ཆེན་པོ་ལ་ཡང་དག་པར་ཞུགས་པར་གྱུར་པ་དེ་དག་ནི་ཐེག་པ་ཆེན་པོའི་ཡོན་ཏན་དང་ཕ་རོལ་ཏུ་ཕྱིན་པ་དྲུག་པོ་དག་གི་བསྔགས་པ་བརྗོད་དོ། །གང་དག་སྔོན་ཉན་ཐོས་བྱེད་བྱེད་པའི་བྱང་ཆུབ་སེམས་དཔའ་དེ་དག་ནི་ཉན་ཐོས་ཀྱི་ཐེག་པ་ཉིད་རྗོད་དེ། དེ་དག་ཐམས་ཅད་ཀྱང་ཆོས་ཐམས་ཅད་སྟོང་པ་ཉིད་དང་། ཐེག་པ་ཆེན་པོའི་ཡོན་ཏན་ཡང་ཡང་དག་པར་ཤེས་པ་ཤ་སྟག་གོ ། དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་ཤེས་རབ་བརྩེགས་ལ་འདི་སྐད་ཅེས་སྨྲས་སོ། །རིགས་ཀྱི་བུ་འདི་དག་ཐམས་ཅད་ནི་ཁོ་བོས་རྒྱ་མཚོར་ཞུགས་ནས། སེམས་དུལ་བར་བྱས་པ་ཡིན་ཏེ་དེ་དག་ཀྱང་འདི་ན་སྣང་ངོ། །དེ་ནས་བྱང་ཆུབ་སེམས་དཔའ་ཤེས་རབ་བརྩེགས་ཀྱིས་འཇམ་དཔལ་གཞོན་ནུར་གྱུར་པ་ལ་ཚིགས་སུ་བཅད་པའི་དབྱངས་ཀྱིས་ཡོངས་སུ་དྲིས་པ། བཟང་པོ་ཆེན་པོ་ཤེས་རབ་དཔེར་བརྗོད་པ། །ཁྱོད་ཀྱིས་སེམས་ཅན་གྲངས་མེད་དེང་བཏུལ་བ། །མི་ཡི་ལྷ་ཁྱོད་ལ་ནི་དེ་འདྲི་ཡིས། །འདི་ནི་སུ་ཡི་མཐུ་ལགས་དེ་གསུངས་ཤིག །བྱང་ཆུབ་ལམ་བསྟན་པ་ཡི་མདོ་གང་དང་། །ཆོས་ནི་གང་ཞིག་ཁྱོད་ཀྱིས་རབ་བསྟན་ན། །དེ་ཐོས་འདི་དག་བྱང་ཆུབ་སེམས་སྐྱེས་ཤིང་། །ཐམས་ཅད་མཁྱེན་ཉིད་དེས་ཏེ་གཏིང་ཡང་རྙེད། །འཇམ་དཔལ་གྱིས་སྨྲས་པ། རྒྱ་མཚོའི་ནང་དུ་དམ་པའི་ཆོས་པད་མ་དཀར་པོའི་མདོ་བཤད་དེ། གཞན་མ་ཡིན་ནོ། །ཤེས་རབ་བརྩེགས་ཀྱིས་སྨྲས་པ།
མདོ་འདི་ཟབ་ཅིང་ཕྲ་ལ་མཐོང་བར་དཀའ་སྟེ་མདོ་སྡེ་འདི་དང་མཚུངས་པའི་མདོ་སྡེ་གཞན་གང་ཡང་མེད་ན། སེམས་ཅན་གང་ལ་ལ་མདོ་སྡེ་དཀོན་མཆོག་འདི་ཁོང་དུ་ཆུད་པའམ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྗོགས་པར་འཚང་རྒྱ་བར་ནུས་པ་ཡོད་དམ། འཇམ་དཔལ་གྱིས་སྨྲས་པ། རིགས་ཀྱི་བུ་ཡོད་དེ་ཀླུའི་རྒྱལ་པོ་རྒྱ་མཚོའི་བུ་མོ་སྐྱེས་ནས་ལོ་བརྒྱད་ལོན་པ་ཤེས་རབ་ཆེ་བ་དབང་པོ་རྣོ་བ་ཡེ་ཤེས་སྔོན་དུ་འགྲོ་བའི་ལུས་དང་ངག་དང་ཡིད་ཀྱི་ལས་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་བཤད་པའི་ཚིག་འབྲུ་དང་དོན་འཛིན་པའི་གཟུངས་ཐོབ་པ་ཆོས་ཐམས་ཅད་དང། སེམས་ཅན་ཐམས་ཅད་ལ་མཉམ་པར་གཞག་པའི་ཏིང་ངེ་འཛིན་སྟོང་སྐད་ཅིག་གཅིག་གིས་ཐོབ་པ། བྱང་ཆུབ་ཀྱི་སེམས་ལས་ཕྱིར་མི་ལྡོག་པ། སྨོན་ལམ་རྒྱ་ཆེ་བ་སེམས་ཅན་ཐམས་ཅད་ལ་བདག་དང་འདྲ་བར་ཕངས་པར་སེམས་པ་དང་ལྡན་པ། ཡོན་ཏན་བསྐྱེད་པར་ནུས་ཤིང་དེ་དག་ལས་ཡོངས་སུ་མི་ཉམས་པ། བཞིན་འཛུམ་པ་ཁ་དོག་རྒྱས་པ་མཆོག་དང་ལྡན་པ་བྱམས་པའི་སེམས་དང་ལྡན་པ་སྙིང་རྗེའི་ཚིག་སྨྲ་བ་དེ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ནུས་སོ། །ཤེས་རབ་བརྩེགས་ཀྱིས་སྨྲས་པ། ཁོ་བོས་མཐོང་བ་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་བྱང་ཆུབ་ཀྱི་ཕྱིར་འབད་ཅིང་བྱང་ཆུབ་སེམས་དཔར་གྱུར་པ་ན་བསོད་ནམས་དུ་མ་མཛད་དེ། བསྐལ་པ་སྟོང་ཕྲག་དུ་མར་ནམ་ཡང་བརྩོན་འགྲུས་མ་ཉམས་སོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ། ཐ་ན་ཡུངས་ཀར་ཙམ་གྱི་ཕྱོགས་གང་དུ་ཡང་སེམས་ཅན་གྱི་ཕྱིར་སྐུ་མ་བོར་བ་ཅུང་ཟད་ཀྱང་མེད་དེ། ཕྱིས་བྱང་ཆུབ་མངོན་པར་རྫོགས་པར་སངས་རྒྱས་ནས། དེས་ཡུད་ཙམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ནུས་ཞེས་བྱ་བ་དེ་ལ་སུ་ཞིག་ཡིད་ཆེས། དེ་ནས་དེའི་ཚེ་ཀླུའི་རྒྱལ་པོ་རྒྱ་མཚོའི་བུ་མོ་མདུན་ན་འདུག་པར་སྣང་སྟེ། དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། ཕྱོགས་གཅིག་ཏུ་འདུག་ནས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །བསོད་ནམས་བསོད་ནམས་ཤིན་ཏུ་ཟབ། །ཕྱོགས་རྣམས་ཀུན་ཏུ་ཁྱབ་པ་ལགས། །
སུམ་ཅུ་རྩ་གཉིས་མཚན་རྣམས་ཀྱིས། །ཕྲ་བའི་སྐུ་ནི་ལེགས་པར་བརྒྱན། །དཔེ་བྱད་བཟང་པོ་རྣམས་དང་ལྡན། །སེམས་ཅན་ཀུན་གྱིས་ཕྱག་ཀྱང་བགྱིས། །སེམས་ཅན་ཐམས་ཅད་འདུ་བ་ནི། །དཔེར་ན་གྲོང་བར་འདྲ་བ་ལགས། །བདག་ནི་འདོད་བཞིན་བྱང་ཆུབ་སྟེ། །དེ་བཞིན་གཤེགས་པ་བདག་གི་དཔང་། །སྡུག་བསྔལ་རྣམས་ལས་གྲོལ་བའི་ཆོས། །རྒྱ་ཆེར་རབ་ཏུ་བསྟན་པར་བགྱི། །དེ་ནས་དེའི་ཚེ་ཚེ་དང་ལྡན་པ་ཤཱ་རིའི་བུས། །ཀླུའི་རྒྱལ་པོ་རྒྱ་མཚོའི་བུ་མོ་ལ་འདི་སྐད་ཅེས་སྨྲས་སོ། །ཆེ་ཞེ་ཁྱོད་ཕྱིར་མི་ལྡོག་པར་བྱང་ཆུབ་ཏུ་སེམས་སྐྱེས་ཤིང་ཤེས་རབ་དཔག་ཏུ་མེད་པ་ཡོད་དུ་ཟད་དེ་ཡང་དག་པར་རྫོགས་པའི་སངས་རྒྱས་ཉིད་ནི་རྙེད་པར་དཀའོ། །ཆེ་ཞེ་བུད་མེད་བརྩོན་འགྲུས་མི་འདོར་ཞིང་བསྐལ་པ་སྟོང་ཕྲག་དུ་མར་བསོད་ནམས་དག་བྱེད་ལ། ཕ་རོལ་ཏུ་ཕྱིན་པ་དྲུག་པོ་དག་ཡོངས་སུ་རྫོགས་པར་བྱེད་ཀྱང་ད་དུང་སངས་རྒྱས་ཉིད་མི་ཐོབ་པ་ཡོད་དེ། དེ་ཅིའི་ཕྱིར་ཞེ་ན། བུད་མེད་ཀྱིས་ད་དུང་གནས་ལྔ་མ་ཐོབ་པའི་ཕྱིར་ཏེ། ལྔ་གང་ཞེ་ན། དང་པོ་ཚངས་པའི་གནས་དང་། གཉིས་པ་བརྒྱ་བྱིན་གྱི་གནས་དང་། གསུམ་པ་རྒྱལ་ཆེན་བཞིའི་གནས་དང་། བཞི་པ་འཁོར་ལོས་སྒྱུར་བའི་གནས་དང་། ལྔ་པ་ཕྱིར་མི་ལྡོག་པའི་བྱང་ཆུབ་སེམས་དཔའི་གནས་སོ། །དེ་ནས་དེའི་ཚེ་ཀླུའི་རྒྱལ་པོ་རྒྱ་མཚོའི་བུ་མོ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་མ་ལུས་པའི་རིན་དུ་ཆོག་པའི་ནོར་བུ་གཅིག་ཡོད་པ་དེ། ཀླུའི་རྒྱལ་པོའི་བུ་མོ་དེས་བཅོམ་ལྡན་འདས་ལ་ཕུལ་ནས། བཅོམ་ལྡན་འདས་ཀྱིས་ཀྱང་ཐུགས་བརྩེ་བའི་ཕྱིར་དེ་བཞེས་སོ། །དེ་ནས་ཀླུའི་རྒྱལ་པོ་རྒྱ་མཚོའི་བུ་མོས། བྱང་ཆུབ་སེམས་དཔའ་ཤེས་རབ་བརྩེགས་དང་གནས་བརྟན་ཤཱ་རིའི་བུ་ལ་འདི་སྐད་ཅེས་སྨྲས་སོ། །གང་བདག་གིས་བཅོམ་ལྡན་འདས་ལ་ནོར་བུ་ཕུལ་བ་དེ། བཅོམ་ལྡན་འདས་ཀྱིས་མྱུར་དུ་བཞེས་སམ། འོན་ཏེ་མ་བཞེས་གནས་བརྟན་གྱིས་སྨྲས་པ། ཁྱོད་ཀྱིས་ཀྱང་མྱུར་དུ་ཕུལ་ལོ། །བཅོམ་ལྡན་འདས་ཀྱིས་ཀྱང་མྱུར་དུ་བཞེས་སོ། །ཀླུའི་རྒྱལ་པོ་རྒྱ་མཚོའི་བུ་མོས་སྨྲས་པ། བཙུན་པ་ཤཱ་རིའི་བུ་གལ་ཏེ་བདག་གི་རྫུ་འཕྲུལ་ཆེ་བར་གྱུར་ན། དེ་བས་ཀྱང་ཆེས་
མྱུར་དུ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ་ནོར་བུ་འདི་བཞེས་པ་ནི་དེ་ལྟ་མ་ཡིན་ནོ། །དེ་ནས་དེའི་ཚེ་འཇིག་རྟེན་ཐམས་ཅད་དང་གནས་བརྟན་ཤཱ་རིའི་བུའི་མངོན་སུམ་དུ་ཀླུའི་རྒྱལ་པོ་རྒྱ་མཚོའི་བུ་མོའི་བུད་མེད་ཀྱི་དབང་པོ་མི་སྣང་བར་གྱུར་ཏེ་སྐྱེས་པའི་དབང་པོ་བྱུང་ནས། བདག་ཉིད་བྱང་ཆུབ་སེམས་དཔར་གྱུར་པར་ཡང་དག་པར་བསྟན་ཏེ་དེའི་ཚེ་ལྷོ་ཕྱོགས་སུ་སོང་ངོ་། །དེ་ནས་ལྷོ་ཕྱོགས་སུ་འཇིག་རྟེན་གྱི་ཁམས་དྲི་མ་མེད་ཅེས་བྱ་བ་དེར། རིན་པོ་ཆེ་སྣ་བདུན་གྱི་ཤིང་དྲུང་དུ་འདུག་ནས་བདག་ཉིད་མངོན་པར་རྫོགས་པར་སངས་རྒྱས་པར་ཀུན་ཏུ་བསྟན་ཏེ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་དཔེ་བྱད་བཟང་པོ་ཐམས་ཅད་དང་ལྡན་པའི་གཟུགས་ཀྱི་ལུས་ཀྱི་འོད་ཀྱིས་ཕྱོགས་བཅུར་ཁྱབ་པར་བྱས་ཏེ་ཆོས་སྟོན་པར་བྱེད་དོ། །གང་དག་འཇིག་རྟེན་གྱི་ཁམས་མི་མཇེད་ན་འཁོད་པའི་སེམས་ཅན་དེ་དག་ཐམས་ཅད་ཀྱིས་ཀྱང་། དེ་བཞིན་གཤེགས་པ་དེ་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དེ་དག་ཐམས་ཅད་ཀྱིས་ཕྱག་བྱས་ཤིང་དེ་དག་ལ་ཆོས་སྟོན་པར་མཛད་པར་མཐོང་ངོ་། །སེམས་ཅན་གང་དག་དེ་བཞིན་གཤེགས་པ་དེས་ཆོས་བསྟན་པ་ཉན་པ་དེ་དག་ཐམས་ཅད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །འཇིག་རྟེན་གྱི་ཁམས་དྲི་མ་མེད་པ་དེ་དག་དང་། འཇིག་རྟེན་གྱི་ཁམས་མི་མཇེད་འདི་ཡང་རྣམ་པ་དྲུག་ཏུ་གཡོས་སོ། ། བཅོམ་ལྡན་འདས། ཤཱཀྱ་ཐུབ་པའི་འཁོར་གྱི་དཀྱིལ་འཁོར་ལས་ཀྱང་སྲོག་ཆགས་སུམ་སྟོང་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །སྲོག་ཆགས་སུམ་སྟོང་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཐོབ་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ། ཤེས་རབ་བརྩེགས་དང་གནས་བརྟན་ཤཱ་རིའི་བུ་ཅང་མི་སྨྲ་བར་གྱུར་ཏོ། །དམ་པའི་ཆོས་པད་མ་དཀར་པོ་ལས། མཆོད་རྟེན་བསྟན་པའི་ལེའུ་ཞེས་བྱ་བ་སྟེ་བཅུ་གཅིག་པའོ།། །།