འཕགས་པ་ཁྱེའུ་བཞིའི་ཏིང་ངེ་འཛིན་ཅེས་བྱ་བ་ཐེག་པ་ཆེན་པོའི་མདོ།
རྒྱ་གར་སྐད་དུ། ཨཱཪྱ་ཙ་ཏུར་ད་ར་ཀ་ས་མཱ་དྷི་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཁྱེའུ་བཞིའི་ཏིང་ངེ་འཛིན་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡོངས་སུ་མྱ་ངན་ལས་འདའ་བ་དེ་ཉིད་ཀྱི་དུས་ཀྱི་ཚེ་ཀུ་ཤའི་གྲོང་ཁྱེར་ན་གྱད་རྣམས་དང་ཉེ་བ་ན་ཡོད་པ་ཤིང་སཱ་ལ་ཟུང་གི་ཚལ་ན་ཤིང་སཱ་ལ་ཟུང་གི་བར་ན་བཞུགས་སོ། །དེ་ནས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་སྤྱན་སྔར་ཐལ་མོ་སྦྱར་ཏེ་བཅོམ་ལྡན་འདས་ལ་མིག་མི་འཛུམས་པར་རྟོག་ཅིང་འདུག་གོ །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། གོའུ་ཏ་མའི་བུ་ཁྱོད་ཅིའི་ཕྱིར་དེ་བཞིན་གཤེགས་པ་ལ་མིག་མི་འཛུམས་པར་རྟོག་པར་བྱེད། དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་མདང་བདག་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བའི་སྔ་ལྟས་གཡར་ལམ་འཇིགས་པ་ཆེན་པོ་འཇིགས་སུ་རུང་བ་སྤུ་ཟིང་ཞེས་བགྱིད་པ་ཞིག་རྨིས་ལགས་ཏེ། བཅོམ་ལྡན་འདས་བདག་གཡར་ལམ་དེ་རྨིས་ནས་བཅོམ་ལྡན་འདས་ཤིན་ཏུ་མྱུར་བར་ཡོངས་སུ་མྱ་ངན་ལས་འདའ་བར་མི་འགྱུར་ལགས་གྲང་སྙམ་ནས་དེའི་སླད་དུ་སྡུག་བསྔལ་ཞིང་ཡིད་མི་བདེ་བ་དང་། མྱ་ངན་གྱི་ཟུག་རྔུས་གཟིར་བར་གྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། གོའུ་ཏ་མའི་བུ་ཁྱོད་ཀྱི་རྨི་ལམ་ན་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བའི་སྔ་ལྟས་འཇིགས་པ་ཇི་ལྟ་བུ་ཞིག་རྨིས། དེ་ནས་བཅོམ་ལྡན་འདས་ཀྱིས་དེའི་ཚེ་ཚེ་དང་ལྡན་པ་ཀུན་དགའ་བོ་ལ་ཚིགས་སུ་བཅད་དེ་བཀའ་
སྩལ་པ། སཱ་ལའི་ཚལ་ཁྲོད་འདི་ཉིད་དུ། །འཇིག་རྟེན་མགོན་པོའི་ལྟས་སུ་ནི། །ཁྱོད་ཀྱིས་རྨི་ལམ་ཅི་རྨིས་པ། །དྲིས་པ་དེ་ནི་ང་ལ་སྨྲོས། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་ཚིགས་སུ་བཅད་དེ་གསོལ་པ། མདང་སུམ་བདག་གི་གཡར་ལམ་ན། །འཇིགས་སུ་རུང་ཞིང་དངངས་བགྱིད་ལ། །སྤུ་ཟིང་བགྱིད་པ་རྨིས་གྱུར་པ། །དེ་ནི་མི་མཆོག་གསན་དུ་གསོལ། །འཇིག་རྟེན་ཁམས་འདིར་ལྗོན་པའི་ཤིང་། །རྟག་ཏུ་མེ་ཏོག་འབྲས་བུ་དག །རྣམ་པ་ཀུན་གྱི་མཆོག་ལྡན་པ། །ཡིད་ནི་དགའ་བར་བགྱིད་པ་འཁྲུངས། །འཇིག་རྟེན་ཁམས་སུ་ལྗོན་མཆོག་དེ། །གྲིབ་མ་བསིལ་བས་སེམས་ཅན་རྣམས། །རབ་ཏུ་དགའ་བགྱིད་བྲོ་ནད་དང་། །མྱ་ངན་དག་ཀྱང་སེལ་བར་བགྱིད། །ཡོན་ཏན་མཐའ་ཡས་ཕུན་ཚོགས་ཤིང་། །སྲིད་རྩེའི་བར་དུ་མཐོ་བར་འཕགས། །དེ་མཐོང་བས་ནི་མིག་དག་ཅིང་། །ཐོས་པས་རྣ་བ་རྣམ་དག་འགྱུར། །དེ་ལས་རབ་འཇམ་དོན་ལྡན་ཞིང་། །ཤིན་ཏུ་རིགས་ཤིང་ཆོས་ལྡན་ལ། །སེམས་ཅན་ཀུན་ལ་བདེ་སྐྱིད་པའི། །སྒྲ་སྐད་དག་ཀྱང་ངེས་པར་འབྱུང་། །དེ་ལས་གང་གཱའི་བྱེ་སྙེད་ཀྱི། །འོད་ཟེར་དག་ནི་འབྱུང་འགྱུར་ཞིང་། །དེ་དག་སྙེད་ཀྱི་ཞིང་རྣམས་ཀྱང་། །ལྗོན་ཤིང་ཆེན་པོས་བསལ་བར་བགྱིད། །ཕྱོགས་བཅུའི་འཇིག་རྟེན་ཁམས་ཀྱི་མི། །མཐའ་ཡས་དཔག་ཏུ་མ་མཆིས་པ། །གང་དག་འོད་ཀྱིས་རེག་གྱུར་པ། །སེམས་ཅན་རྣམས་ཀྱི་དོན་ཀྱང་བགྱིད། །ཕྱོགས་བཅུའི་འཇིག་རྟེན་ཁམས་སུ་ནི། །དེ་ལས་དྲི་ངད་འབྱུང་བར་འགྱུར། །གང་དག་དེ་ཡི་དྲི་སྣོམ་པ། །དེ་དག་ངན་འགྲོར་མཆི་མི་འགྱུར། །དེ་དག་དམྱལ་བར་མི་མཆི་ཞིང་། །དུད་འགྲོའི་སྐྱེ་གནས་སྡིག་ཅན་དང་། །ཡི་དགས་ལྷ་མིན་རིས་མི་མཆི། །དེ་དག་བཟང་འགྲོར་མཆི་བར་འགྱུར། །སེམས་ཅན་ཀུན་ལ་བདེ་སྐྱེད་པ། །དེ་འདྲའི་ལྗོན་ཤིང་ཆེན་པོ་དེ། །གྱད་ཀྱི་དོག་སར་ཆག་ནས་ནི། །སཱ་ལའི་ཚལ་གྱི་གསེབ་ཏུ་སྒྱེལ། །ལྗོན་མཆོག་ཆག་པ་མཐོང་གྱུར་ནས། །དེ་ནས་སྲོག་ཆགས་སྟོང་ཕྲག་ནི། །བསམ་ཡས་དཔག་ཏུ་མ་མཆིས་པ། །ཆོ་ངེས་འདེབས་ཤིང་སྨྲེ་སྔགས་འདོན། །དེ་ཚེ་སྒྲ་དེ་མི་གྲག་ཅིང་། །དྲི་ཡང་བདའ་བར་མ་གྱུར་
ལ། །གདེག་པའི་རྔོ་ཡང་མ་ཐོགས་ནས། །དེ་མ་ཐག་ཏུ་བདག་ཀྱང་བརྒྱལ། །དེ་ལྟར་འཇིགས་སུ་རུང་བ་དང་། །སྤུ་ཡང་ཟིང་ཞེས་བགྱིད་པ་ཡི། །གཡར་ལམ་མདང་སུམ་རྨིས་པ་དེ། ། སྤྱན་དང་ལྡན་པ་བདག་ལ་གསུངས། །དེ་ནས་གནས་གཙང་མའི་རིས་ཀྱི་ལྷའི་བུ་རྣམས་དང་། མི་མཇེད་ཀྱི་བདག་པོ་ཚངས་པ་དང་། བདུད་ཀྱི་བུ་དེད་དཔོན་དང་། ལྷའི་དབང་པོ་བརྒྱ་བྱིན་དང་། རྒྱལ་པོ་ཆེན་པོ་བཞི་པོ་དག་སོ་སོ་ན་གནས་པས་བཅོམ་ལྡན་འདས་ཡོངས་སུ་མྱ་ངན་ལས་འདའ་བའི་སྔ་ལྟས་མཐོང་ནས་རང་རང་གི་འཁོར་ལྷའི་བུ་ཁྲག་ཁྲིག་ཕྲག་བརྒྱད་ཅུ་བརྒྱད་ཅུ་ལྷག་ཙམ་གྱིས་ཡོངས་སུ་བསྐོར་ཅིང་མདུན་དུ་བདར་ནས་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། སྒྲ་སྐད་འཐུན་པར་ཉམ་ཐག་པའི་ང་རོས་ངུ་ཞིང་མྱ་ངན་བྱེད་ལ་སྨྲེ་སྔགས་འདོན་བཞིན་དུ་དེའི་ཚེ་ཚེ་དང་ལྡན་པ་ཀུན་དགའ་བོ་ལ་ཚིགས་སུ་བཅད་པ་འདི་དག་སྨྲས་སོ། །ཀྱེ་མའོ་སྡུག་བསྔལ་མི་བཟད་ཆེ། །སཱ་ལའི་ཚལ་ཁྲོད་དགའ་བར་ནི། །དེ་རིང་མགོན་པོ་མྱ་ངན་འདའ། །ཀུན་དགའ་ཁྱོད་ཀྱིས་མི་ཤེས་སམ། །གང་ཞིག་སྣང་མེད་རྣམས་ཀྱི་སྒྲོན། །སྐྱབས་དང་དཔུང་གཉེན་གང་ཡིན་པ། །དེ་ནི་ཞི་བ་ལེན་མེད་པར། །དེ་རིང་མྱ་ངན་འདའ་བར་འགྱུར། །དེ་ནས་བཅོམ་ལྡན་འདས་ཀྱིས་དེའི་ཚེ་ཚེ་དང་ལྡན་པ་ཀུན་དགའ་བོ་དང་ཐམས་ཅད་དང་ལྡན་པའི་ལྷའི་འཁོར་དེ་དག་ལ་ཚིགས་སུ་བཅད་དེ་བཀའ་སྩལ་པ། ཇི་ལྟར་མཐོང་བ་གཞན་མིན་ཏེ། །དེ་རིང་སཱ་ལའི་ཚལ་ཁྲོད་དུ། །ང་ནི་མྱ་ངན་འདའ་འགྱུར་གྱིས། །མྱ་ངན་མ་བྱེད་བརྟན་པར་གྱིས། །ཁ་དོག་ལྡན་ཞིང་བསམ་ཡས་ལ། །འོད་དང་དྲི་བསུང་ཕུན་ཚོགས་པའི། །ལྗོན་ཤིང་ལྗོན་པ་ཆེན་པོ་དེ། །སཱ་ལའི་ཚལ་ཁྲོད་ཆག་གྱུར་པ། །ལྗོན་ཤིང་ཅི་འདྲར་སྟོན་པ་ནི། །དེ་རིང་སཱ་ལའི་ཚལ་ཁྲོད་དུ། །ཇི་ལྟར་མེ་ལ་ཆུས་བཏབ་བཞིན། །ལེན་མེད་མྱ་ངན་འདའ་བར་འགྱུར། །ཤེས་རབ་རྫུ་འཕྲུལ་མཐར་ཕྱིན་པ། །ཉེ་རྒྱལ་པང་ནས་སྐྱེས་དག་བཞིན། །མི་མཆོག་ང་ཡང་འདའ་འགྱུར་བར། །ཀུན་དགའ་ཁྱོད་ཀྱིས་མི་ཤེས་སམ། །འདུས་བྱས་ཐམས་ཅད་མི་རྟག་སྟེ། །སྐྱེ་ཞིང་འཇིག་པའི་ཆོས་ཅན་ཡིན། །
སྟོན་པས་དེ་དག་རབ་མཁྱེན་ནས། །དགེ་སློང་རྣམས་ལ་དེ་ཡང་བཤད། །ཀུན་དགའ་ཚུར་ཤོག་ཁྱོད་སོང་ལ། །ང་ཡི་ཉན་ཐོས་རྣམས་ལ་སྨྲོས། །ལྷ་ཡི་མིག་གི་མཐར་ཕྱིན་པ། །གནས་བརྟན་ཆེན་པོ་མ་འགགས་དང་། །གནས་བརྟན་ཆེན་པོ་ཀ་ཏྱའི་བུ། །གནས་བརྟན་གང་པོ་རབ་འབྱོར་དང་། །གསུས་པོ་ཆེ་ནི་ཆེན་པོ་དང་། །བ་ལང་བདག་དང་དགའ་བྱེད་དང་། །གྲོ་ཞིན་དོན་ཡོད་རྒྱལ་པོ་དང་། །ཆོས་གོས་ངན་པ་འཆང་བ་དང་། །དགའ་བོ་དང་ནི་སྒྲ་གཅན་བཟང་། །ང་ཡི་ཉན་ཐོས་གཞན་རྣམས་དང་། །སློབ་དང་མི་སློབ་གནས་བརྟན་དང་། །གཞན་ཡང་སོ་སོའི་སྐྱེ་བོ་དག །ང་ནི་མྱ་ངན་འདའ་འགྱུར་གྱིས། །ཐམས་ཅད་ཤིན་ཏུ་མྱུར་བར་སྦྲོན། །སློབ་དང་སོ་སོའི་སྐྱེ་བོ་ཡིས། །མ་མཐོང་སྡུག་བསྔལ་སྐྱེ་འགྱུར་བས། །མྱ་ངན་འདས་པའི་འོག་ཏུ་ནི། །མྱ་ངན་ཟུག་རྔུས་གཟིར་མི་བྱ། །མྱ་ངན་མ་བྱེད་འདུ་བྱེད་རྣམས། །མི་རྟག་རྨི་ལམ་ལྟ་བུ་ཞེས། །ཇི་ལྟར་ཆོས་ཀྱི་ཆོས་ཉིད་ཀྱིས། །དེ་དག་རྣམས་ནི་དབུགས་དབྱུང་བྱ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་སླར་ཚིགས་སུ་བཅད་དེ་གསོལ་པ། མགོན་པོ་སངས་རྒྱས་མྱ་ངན་ལས། །འདའ་བར་འགྱུར་བར་ཐོས་ནས་བདག །ཕྱོགས་སླད་བདག་ནི་ལུས་རྨ་ཞིང་། །བདག་ནི་གཡར་ངན་ཤིན་ཏུ་ཆེ། །ལུས་ཉམས་བདེ་བ་མ་མཆིས་ཤིང་། །སེམས་ཉམས་བདེ་བའང་མ་མཆིས་ལ། །ཆགས་བྲལ་ཉམས་བདེའང་མ་མཆིས་ན། །སྤྱན་ལྡན་བདག་ནི་ཇི་ལྟར་མཆི། །བདག་གི་སྐྱབས་དང་དཔུང་གཉེན་དང་། །འཇིག་རྟེན་རྣམ་འདྲེན་གང་ལགས་པ། །དེང་མཐོང་སླད་ཀྱིས་མི་མཐོང་ཞེས། །གནས་བརྟན་རྣམས་ལ་ཇི་སྐད་བགྱི། །མྱ་ངན་གྱུར་ཅིང་སྡུག་བསྔལ་བས། །ཇི་ལྟར་མྱ་ངན་བརྗོད་པར་བགྱི། །བདག་ཅག་རྣམས་ཀྱི་འཇིགས་ཆེན་འདི། །གནས་བརྟན་དེ་དག་ཇི་ལྟར་ཉན། །གང་དག་སློབ་དང་སྐྱེ་བོ་ཡི། །དགེ་སློང་མྱ་ངན་ཟུག་རྔུ་ཡིས། །ཀུན་ནས་ཟུག་པ་ཇི་ལྟར་གནས། །མི་མཆོག་བསྐལ་པར་བཞུགས་སུ་གསོལ། །འཁོར་བཞིའི་ནང་དུ་མཆིས་ནས་ནི། །སྟོན་པ་མྱ་ངན་འདའ་འགྱུར་ཞེས། །ཇི་ལྟར་བརྗོད་བགྱི་མི་ཡི་མཆོག །ཐུབ་
ཆེན་བསྐལ་པར་བཞུགས་སུ་གསོལ། །སྒྲོན་མ་ཆེན་པོའི་འཇིག་རྟེན་དུ། །ཤིན་ཏུ་མྱུར་བར་ནུབ་འགྱུར་ཏེ། །འཇིག་རྟེན་འདི་དག་རབ་མྱུར་བར། །ལྡོངས་པ་ཉིད་དུ་འགྱུར་ལགས་སོ། །མི་མཆོག་བདག་ནི་གཡར་ངན་འདི། །དགེ་སློང་རྣམས་ལ་སྨྲར་མི་སྤྲོ། །གང་ལ་གཡར་ངན་མ་མཆིས་པ། །གཞན་ཞིག་མངག་པར་བཀའ་སྩལ་གསོལ། །བཅོམ་ལྡན་འདས་ཀྱིས་བཀའ་སྩལ་པ། གོའུ་ཏ་མའི་བུ་འདུ་བྱེད་ཐམས་ཅད་མི་རྟག་པ་ཡིན་གྱིས་མྱ་ངན་མ་བྱེད་པར་ཐོང་ཅིག །དེ་ནས་བཅོམ་ལྡན་འདས་ཀྱིས་དེའི་ཚེ་ཚེ་དང་ལྡན་པ་ཀུན་དགའ་བོ་ལ་ཕྱིར་ཚིགས་སུ་བཅད་དེ་བཀའ་སྩལ་པ། བྱེ་བ་མཐའ་ཡས་ལྷ་རྣམས་ཀྱིས། །དེ་རིང་སངས་རྒྱས་འདའ་ཐོས་ནས། །གཞལ་མེད་ཁང་དག་སྤངས་ནས་ནི། །མྱ་ངན་བྱེད་ཅིང་སྨྲེ་སྔགས་འདོན། །ང་འདས་ཕྱི་ན་དགེ་སློང་དག །མ་མཐོང་མྱ་ངན་བྱེད་མ་གཞུག །འདི་ནི་རིམ་གྲོ་བྱེད་པའི་ལས། །སོང་ལ་དགེ་སློང་རྣམས་ཀྱང་སྦྲོན། །དེའི་ཚེ་ཚེ་དང་ལྡན་པ་མ་འགགས་པ་རི་རབ་ཀྱི་སྤོ་ལ་སུམ་ཅུ་རྩ་གསུམ་པའི་ལྷ་རྣམས་ལ་ཆོས་སྟོན་ཅིང་འདུག་གོ །ཚེ་དང་ལྡན་པ་མ་འགགས་པས་ལྷའི་མིག་རྣམ་པར་དག་པ་མི་ལས་ཤིན་ཏུ་འདས་པས་ལྷའི་བུ་དབང་ཆེ་བ་དབང་ཆེ་བར་གྲགས་པ་རྣམས་རང་རང་གི་གཞལ་མེད་ཁང་དག་ནས་མི་སྣང་བར་གྱུར་པ་མཐོང་ཞིང་ལྷ་རྣམས་ཀྱི་སྨྲེ་སྔགས་འདོན་པའི་སྒྲ་ཆེན་པོ་དག་ཀྱང་ཐོས་རང་གི་འཁོར་རྣམས་ཀྱང་སྲབས་པར་མཐོང་ངོ་། །དེ་ནས་ཚེ་དང་ལྡན་པ་མ་འགགས་པས་དེའི་ཚེ་བསམས་ཏེ་ལྷའི་མིག་གིས་ལྷའི་བུ་འཁོར་དང་བཅས་པ་དེ་དག་ཡི་ཆད་ཅིང་རང་རང་གི་འདོད་པའི་དགའ་བ་དག་སྤངས་ཏེ་རིངས་པ་རིངས་པར་གང་དུ་དོང་ཞིང་འདོང་བར་བྱེད་ཅེས་འཇིག་རྟེན་ལ་རྣམ་པར་བལྟས་སོ། །དེ་ནས་ཚེ་དང་ལྡན་པ་མ་འགགས་པས་རིའི་རྒྱལ་པོ་རི་རབ་ཀྱི་རྩེ་མོ་ལས་དཔག་ཚད་བརྒྱ་ཙམ་དག་ཆད་པ་དང་། རིའི་རྒྱལ་པོ་རི་རབ་ཀྱི་རྩེ་མོ་ལས་དཔག་ཚད་ཉིས་བརྒྱ་ཙམ་དང་། རྩེ་མོ་ལས་དཔག་ཚད་སུམ་བརྒྱ་ཙམ་དང་། རྩེ་མོ་ལས་དཔག་ཚད་བཞི་བརྒྱ་ཙམ་དག་ཆད་པ་དང་། རྩེ་མོ་ལས་དཔག་ཚད་ལྔ་བརྒྱ་ཙམ་དག་ཆད་ཅིང་ཆད་ཅིང་རྒྱ་མཚོ་ཆེན་པོའི་ནང་དུ་ལྷུང་བ་དག་ཀྱང་མཐོང་སྟེ་སེམས་ཅན་འགའ་ཙམ་ལ་ཡང་གནོད་པའམ། རྣམ་པར་འཚེ་བར་མི་བྱེད་ན་སྲོག་གི་བར་ཆད་བྱེད་པར་འགྱུར་བ་ལྟ་སྨོས་ཀྱང་ཅི་དགོས། འདི་
ལྟར་རི་རབ་ཀྱི་རྩེ་མོ་དེ་དག་ཀྱང་གང་དག་རིའི་རྒྱལ་པོ་རི་རབ་ལ་རྟེན་ཅིང་གནས་པའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དེ་དག་གིས་བཅོམ་ལྡན་འདས་ཡོངས་སུ་མྱ་ངན་ལས་འདའ་བ་ཐོས་ནས་མྱ་ངན་གྱི་ཟུག་རྔུས་གཟིར་ཅིང་བཅོམ་ལྡན་འདས་ཤཱཀྱ་ཐུབ་པ། ཤཱཀྱའི་བདག་པོའི་རྒྱལ་པོ་བསྐལ་པ་བྱེ་བ་གྲངས་མེད་པ་ནས་ཡང་དག་པར་བསྒྲུབས་པ། དགེ་བའི་རྩ་བ་ཤིན་ཏུ་ཡོངས་སུ་དག་པ་དང་ལྡན་པ་དེ་དེ་རིང་གྱད་རྣམས་དང་ཉེ་བ་ན་ཡོད་པ་ཤིང་སཱ་ལ་ཟུང་གི་དྲུང་དུ་ལེན་པ་མེད་པར་ཡོངས་སུ་མྱ་ངན་ལས་འདའ་བར་འགྱུར་ཏེ། དེང་ནི་ལྷ་དང་བཅས་པའི་འཇིག་རྟེན་གྱི་མིག་ཟུམ་པར་འགྱུར་རོ་ཞེས་དེ་དག་ཀུ་ཤའི་གྲོང་ཁྱེར་ལོགས་སུ་མངོན་པར་ཕྱོགས་ཏེ། རིངས་པ་རིངས་པར་བརྟད་ཅིང་དོང་བ་དག་གིས་རིའི་རྒྱལ་པོ་རི་རབ་ཀྱི་རྩེ་མོ་དེ་དག་ཀུན་ཏུ་རབ་ཏུ་བསྒུལ་ཅིང་ཀུན་དུ་རབ་ཏུ་བསྐྱོད་དེ་རིངས་པ་རིངས་པར་བརྟད་པ་དེ་དག་གིས་རིའི་རྒྱལ་པོ་རི་རབ་དང་། རྒྱ་མཚོ་ཆེན་པོ་ཡང་གཡོས་ཤིང་འཁྲུགས་པར་གྱུར་ཏེ་དེའི་ཕྱིར་རིའི་རྒྱལ་པོ་རི་རབ་ཀྱི་རྩེ་མོ་དེ་དག་རྒྱ་མཚོ་ཆེན་པོའི་ནང་དུ་ལྷུང་བར་གྱུར་ཏོ། །དེ་ནས་ཚེ་དང་ལྡན་པ་མ་འགགས་པ་རི་རབ་ཀྱི་སྤོ་ལ་འདུག་པས་དེའི་ཚེ་སྒྲ་སྐད་ཆེན་པོ་ཕྱུང་སྟེ་ཚིགས་སུ་བཅད་པ་འདི་དག་སྨྲས་སོ། །འཇིག་རྟེན་རྣམས་ཀྱི་དེད་དཔོན་གང་ཡིན་པ། །གང་གིས་འཇིག་རྟེན་བདེ་བ་སྩོལ་མཛད་ཅིང་། །སེམས་ཅན་རྣམས་ཀྱི་སྦྱིན་གནས་གང་ཡིན་པ། །ཐུབ་པ་དེ་ནི་དེ་རིང་མྱ་ངན་འདའ། །ཡེ་ཤེས་འབྱུང་གནས་རབ་རིབ་མུན་བཅོམ་ཞིང་། །འཇིག་རྟེན་སྲོག་ཆགས་རྣམས་ཀྱི་ཕ་དང་མ། །དེ་བཞིན་སྐྱབས་དང་དཔུང་གཉེན་གང་ཡིན་པ། །ཐུབ་པ་དེ་ནི་དེ་རིང་མྱ་ངན་འདའ། །ཟུག་རྔུ་འབྱིན་མཛད་སྡིག་མེད་ཉོན་མོངས་མེད། །གསོ་མཛད་དམ་པ་སྨན་པ་ཆེན་པོ་སྟེ། །མི་དགེའི་ཟུག་རྔུ་འབྱིན་མཆོག་གང་ཡིན་པ། །ཐུབ་པ་དེ་ནི་དེ་རིང་མྱ་ངན་འདའ། །གང་ཞིག་སེམས་ཅན་ཆགས་དང་སྡང་བས་བཅོམ། །རྨོངས་པས་ཟིལ་ནོན་རྒ་དང་འཆི་ལ་ཆགས། །འགགས་འགལ་ལམ་ལོག་ཞུགས་པ་གཟིགས་ནས་ནི། །འཇིག་རྟེན་ཐུགས་རྗེ་བསྐྱེད་ནས་ཆོས་སྟོན་ཅིང་། །གང་ཞིག་བདུད་སྡེ་རབ་གཏུམ་དྲག་པོའི་གཟུགས། །སྣ་ཚོགས་གཟུགས་ཅན་མཚོན་སྲ་རྡོ་རྗེ་ཐོགས། །ཁ་ཅིག་འཇིགས་པ་
དུ་མ་རྣམ་སྟོན་ཅིང་། །གཞན་དག་སྣ་ཚོགས་བྲག་ཐོགས་འཁོད་གྱུར་པ། །དེ་འདྲར་རྣམ་མང་དྲག་པོའི་གཟུགས་ཅན་གྱི། །སྡེ་དག་གཟིགས་ཀྱང་མི་གཡོ་མི་འགུལ་བ། །བདུད་ཀྱི་སྡེ་བཅོམ་འཇིག་རྟེན་མགོན་པོ་དེ། །སཱ་ལའི་ཚལ་དུ་དེ་རིང་མྱ་ངན་འདའ། །གང་གིས་ཕྱག་གཡས་རབ་ཏུ་བརྐྱང་མཛད་དེ། །རི་རབ་རྩེ་འདི་གྲོང་བཅས་གཡོ་མཛད་ཅིང་། །ཆོས་ཀུན་མངའ་བརྙེས་རྣམ་འདྲེན་དྲང་སྲོང་དེ། །སཱ་ལའི་ཚལ་དུ་མྱ་ངན་འདའ་བར་འགྱུར། །གང་གིས་བརྡབས་པ་ཕྱོགས་བཅུར་བསམ་ཡས་པའི། །སྒྲ་བསྒྲགས་མཁྱེན་པའི་ཕ་རོལ་བྱོན་གྱུར་པ། །སྟོན་པ་སེམས་ཅན་རྣམས་ཀྱི་སྙིང་པོ་དེ། །སཱ་ལའི་ཚལ་དུ་དེ་རིང་མྱ་ངན་འདའ། །གང་གིས་སྟོབས་ལྡན་སྡེར་བཅས་སྐྲག་མཛད་ཅིང་། །མི་གཡོ་མྱ་ངན་མེད་པ་འདུས་མ་བྱས་པ་བརྙེས། །སྲོག་ཆགས་རྣམས་ལ་ཕན་ཕྱིར་འཁོར་ལོ་བསྐོར་མཛད་ཅིང་། །ཐུབ་པས་བདེན་པ་བཞི་དག་རབ་ཏུ་བསྟན། །གང་ཞིག་ཆོ་འཕྲུལ་བསམ་གྱིས་མི་ཁྱབ་སྟེ། །སྐྲ་རྩེའི་ཁྱོན་ལ་ཞིང་རྣམས་བཀོད་མཛད་ཅིང་། །སྐུ་ལ་སྐུ་ཡི་འདུ་ཤེས་མི་མངའ་བ། །མགོན་པོ་དེ་ནི་དེ་རིང་མྱ་ངན་འདའ། །སྟོན་པ་གྱད་ཀྱི་ཡུལ་དུ་གཤེགས་ནས་ནི། །ཉེ་ན་ཡོད་པའི་ཚལ་ཁྲོད་ཞུགས་གྱུར་ཏེ། །བསམ་གཏན་ཞི་ལ་བདག་ཉིད་མཉམ་བཞག་ནས། །ཤིང་ཟད་མེ་ལྟར་མྱ་ངན་འདའ་བར་འགྱུར། །ཚེ་དང་ལྡན་པ་མ་འགགས་པས་ཚིགས་སུ་བཅད་པ་དེ་དག་སྨྲས་མ་ཐག་ཏུ་དེ་ནས་དེའི་ཚེ་སངས་རྒྱས་ཀྱི་མཐུས་འཛམ་བུའི་གླིང་ན་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ཇི་སྙེད་པ་རྣམས་ལས་གནས་བརྟན་འོད་སྲུང་ཆེན་པོ་འཁོར་དང་བཅས་པ་མ་གཏོགས་པ་དང་། གཞན་ཡང་དགེ་སློང་ཉིས་བརྒྱ་རྩ་བཞི་མ་གཏོགས་པ་དེ་ལས་གཞན་པའི་འཁོར་བཞི་པོ་བཅོམ་ལྡན་འདས་ཀྱི་ཞབས་ལ་ཕྱག་འཚལ་བ་རྣམས་བཅོམ་ལྡན་འདས་ལ་བལྟ་བའི་ཐ་མར་གྱུར་པ་ནི་འདི་ཡིན་ནོ་ཞེས་གྱད་རྣམས་ཀྱི་ཉེ་བ་ན་ཡོད་པ་ཤིང་སཱ་ལ་ཟུང་གི་ཚལ་ག་ལ་བ་དེར་དོང་ངོ་། །ཚེ་དང་ལྡན་པ་མ་འགགས་པས་ཚིགས་སུ་བཅད་པ་དེ་དག་སྨྲས་མ་ཐག་ཏུ་དེ་ནས་དེའི་ཚེ་གཞན་ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་མངོན་པར་ཤེས་པ་མངོན་པར་ཤེས་པའི་ལྷ་དང་། ལྷའི་བུ་མོ་དང་། ཀླུ་དང་། ཀླུ་རྒན་ཕོ་དང་། ཀླུའི་བུ་མོ་དང་། གནོད་སྦྱིན་དང་། གནོད་སྦྱིན་གཞོན་
ནུ་དང་། གནོད་སྦྱིན་གྱི་བུ་མོ་དང་། ཤ་ཟ་དང་། ཤ་ཟ་རྒན་པོ་དང་། ཤ་ཟ་གཞོན་ནུ་དང་། ཤ་ཟ་གཞོན་ནུ་མ་ཇི་སྙེད་པ་རྣམས་དང་། འགྲོ་བ་རྣམས་ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དང་། སྐར་མ་ཇི་སྙེད་པ་དེ་དག་ཐམས་ཅད་མིག་མཆི་མས་གང་སྟེ་མྱ་ངན་བྱེད་ཅིང་སྨྲེ་སྔགས་འདོན་ལ་ངུད་མོས་འདེབས་ཤིང་ཡང་དང་ཡང་དུ་སྨྲེ་སྟེ། སྡུག་བསྔལ་ཞིང་ཡིད་མི་བདེ་ལ་མྱ་ངན་གྱི་ཟུག་རྔུས་གཟིར་བས་ལག་པ་གནམ་དུ་བསྒྲེང་སྟེ། ངུད་མོས་འདེབས་པར་བྱེད་དོ། །ཡང་ཁ་ཅིག་ནི་ལག་པ་སྦྲེལ་ཅིང་ངུའོ། །ཁ་ཅིག་ནི་ཕན་ཚུན་མགོ་སྤྲད་དེ་གཅིག་གི་གདོང་དུ་གཅིག་ལྟ་ཞིང་ངུའོ། །ཁ་ཅིག་ནི་ཁ་གདངས་ཏེ་ཉམ་ཐག་པའི་ང་རོ་འབྱིན་ཅིང་སྨྲེ་སྔགས་འདོན་ལ་དབང་པོ་ཉམས་ཤིང་བཞིན་གྱི་དཀྱིལ་འཁོར་མོག་མོག་པོར་གྱུར་ཏེ་རྐང་ལག་སྒྱུར་ཞིང་ངུའོ། །ཡང་དེ་ན་ཁ་ཅིག་ནི་གཅིག་ལ་གཅིག་ལྟ་ཞིང་ངུའོ། །ཁ་ཅིག་ནི་ཀླད་པ་རྡེབས་པར་བྱེད་དོ། །ཁ་ཅིག་ནི་ལག་པ་གཉིས་ཀྱིས་མགོ་ལ་རྡེབས་ཤིང་ལུས་རབ་ཏུ་སྙོན་སྨོངས་པར་བྱེད་དོ། །ཁ་ཅིག་ནི་མིག་སྒྱུར་ཞིང་ངུད་མོས་འདེབས་ལ་རྐང་མཐིལ་བསྲེགས་པ་བཞིན་དུ་སྒྱིད་པ་འདར་ལ་ཆོ་ངེས་འདེབས་ཤིང་སྨྲེ་སྔགས་འདོན་ཏོ། །ཁ་ཅིག་ནི་ཨེ་མའོ་སངས་རྒྱས། ཨེ་མའོ་སངས་རྒྱས་ཞེས་སྨྲེ་སྔགས་འདོན་ཅིང་གདོང་མཆི་མས་གང་ལ་སྡུག་བསྔལ་ཞིང་ཉམ་ཐག་སྟེ། ལག་མཐིལ་གྱིས་མིག་ཉེད་ཅིང་ཆོ་ངེས་འདེབས་ལ་མྱ་ངན་བྱེད་ཅིང་མྱ་ངན་གྱི་ཟུག་རྔུས་གཟིར་བས་བཞིན་གྱི་དཀྱིལ་འཁོར་ལ་འདྲད་ཅིང་མྱ་ངན་བྱེད་སྨྲེ་སྔགས་འདོན་ཏོ། །སྲོག་ཆགས་བྱེ་བ་ཕྲག་མང་པོ་གཞན་དག་ནི་མཆི་མས་བརྣངས་བཞིན་དུ་མཆི་མ་ཀློག་ཅིང་སྒྲ་ཆེན་པོ་འབྱིན་ཏོ། །ཁ་ཅིག་ནི་ཐལ་མོ་སྦྱར་ཏེ་མཆི་མ་ཀློག་ཅིང་སྨྲེ་སྔགས་འདོན་ཏོ། །ཁ་ཅིག་ནི་མྱ་ངན་གྱི་མེས་གདུངས་ནས་ལག་པ་གཡས་པས་མགོ་བོ་ལ་འཛིན་ཅིང་སྨྲེ་སྔགས་འདོན་ཏོ། །དེ་བཞིན་ དུ་གཞན་དག་ཀྱང་ལུས་ཡོངས་སུ་རྨྱ་ནས་ལག་པ་གཡོན 
་པས་མགོ་བོ་ལ་འཛིན་ཅིང་སྨྲེ་སྔགས་འདོན་ཏོ། །ཁ་ཅིག་ནི་ལག་པ་རྡེབས་ལ་བཞིན་གྱི་དཀྱིལ་འཁོར་གྱི་མདོག་ཉམས་ཤིང་སྔོན་པོར་གྱུར་ལ། མྱ་ངན་གྱིས་ཉམ་ཐག་ཅིང་
སྨྲེ་སྔགས་འདོན་ཏོ། །དེ་ནས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་འཁོར་དང་བཅས་པ་དེ་དག་མྱ་ངན་བྱེད་ཅིང་སྨྲེ་སྔགས་འདོན་བཞིན་དུ་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་སྤྱན་སྔར་ཤིང་བཅད་དེ་འགྱེལ་བ་བཞིན་དུ་ས་ལ་སྒྱེལ་ནས་ཁ་ཅིག་ནི་བཅོམ་ལྡན་འདས་ཀྱི་ཞབས་གཉིས་ལ་འདུད་དོ། །ཁ་ཅིག་ནི་གདུང་བའི་སྒྲ་ཆེན་པོ་འབྱིན་ཏོ། །ཁ་ཅིག་ནི་གདུང་བའི་སྒྲ་འབྱིན་ཅིང་ས་ལ་འགྲེའོ། །ཁ་ཅིག་ནི་བཅོམ་ལྡན་འདས་ཀྱི་སྤྱན་སྔར་འཁོད་ནས་ལག་པ་གནམ་དུ་བསྒྲེངས་ཏེ། ཨེ་མའོ་སངས་རྒྱས། ཨེ་མའོ་སངས་རྒྱས། ཨེ་མའོ་མགོན་པོ། ཨེ་མའོ་ཐུགས་རྗེ་ཅན་སེམས་ཅན་ཐམས་ཅད་ལ་ཐུགས་བརྩེ་ཞིང་སྐྱོབ་པར་མཛད་པ། ཨེ་མའོ་འཇིག་རྟེན་གསུམ་གྱི་སྐྱབས་དང་དཔུང་གཉེན་སེམས་ཅན་ཐམས་ཅད་ལ་མིག་སྩོལ་བར་མཛད་པ། ཨེ་མའོ་རྟེན་མེད་པ་རྣམས་ཀྱི་རྟེན་མཛད་པ། འཇིག་རྟེན་སྟོངས་པར་འགྱུར་རོ། །སེམས་ཅན་ཐམས་ཅད་ལྡོངས་པར་འགྱུར་རོ། །སངས་རྒྱས་དཀོན་མཆོག་མེད་པར་འགྱུར་རོ། །ཞེས་སྨྲེ་སྔགས་འདོན་ཅིང་དེ་དག་ཕན་ཚུན་ལག་པ་སྦྲེལ་ཏེ་སྙིང་རྗེ་རྗེ་སྐད་དུ་མ་ཤི་བའི་སྨྲེ་སྔགས་ལྟ་བུས་སྨྲེ་སྔགས་འདོན་ཏོ། །ཕ་ཤི་བ་དང་། ཕུ་ནུ་ཤི་བ་དང་། བུ་ཤི་བའི་སྨྲེ་སྔགས་ལྟ་བུས་སྨྲེ་སྔགས་འདོན་ཅིང་། ཨེ་མའོ་མགོན་པོ། ཨེ་མའོ་དགེ་བའི་བཤེས་གཉེན། ཨེ་མའོ་སྙན་ཅིང་འཇམ་པ་གསུང་བ། ཨེ་མའོ་སེང་གེ་དང་། གླང་པོ་ཆེ་དང་། ཁྱུ་མཆོག་གི་སྟོབས་ཅན། ཨེ་མའོ་བདུད་རྩིའི་གོ་འཕང་སྟོན་པ་ཞེས་རྣམ་པ་སྣ་ཚོགས་མང་པོར་སྨྲེ་སྔགས་འདོན་ཏོ། །ཁ་ཅིག་ནི་བར་སྣང་ལ་སོང་སྟེ་བདག་ཉིད་བརྡབས་ནས་དེ་དག་ས་ལ་ལྷུང་བ་དང་། ས་ལ་འགྲེ་ལྡོག་ཅིང་སྙིང་ཐག་པ་ནས་སྙིང་རྗེ་བར་སྨྲེ་ཞིང་སྨྲེ་སྔགས་འདོན་ཏོ། །དེ་ནས་ཚེ་དང་ལྡན་པ་ཀུན་དགའ་བོ་བརྒྱལ་ནས་ཤིང་བཅད་དེ་འགྱེལ་བ་བཞིན་དུ་ས་ལ་འགྱེལ་ཏོ། །དེས་ཡང་འདུ་ཤེས་ཕྱིར་རྙེད་ནས་བཅོམ་ལྡན་འདས་ཀྱི་སྤྱན་སྔར་ལག་པ་གཉིས་ས་ལ་བཙུགས་ཏེ་བཅོམ་ལྡན་འདས་ཀྱི་ཞལ་དུ་ལྟ་ཞིང་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །སེམས་ཅན་ཤིན་ཏུ་སྡུག་བསྔལ་ལ། །ངུ་ཞིང་སྨྲེ་སྔགས་འདོན་བགྱིད་
ལ། །མྱ་ངན་ཟུག་རྔུས་གཟིར་མཐོང་ནས། །བདག་གི་གཡར་ངན་སླར་ཞིང་སྐྱེ། །ཇི་ལྟར་དགོན་པའི་ཤུལ་ཞིག་ཏུ། །འདྲོན་པ་ཆོམ་པོས་བཅོམ་གྱུར་ཅིང་། །ཞུགས་ཀྱི་ཕུང་པོ་ཆེན་པོ་ཡང་། །མདུན་ན་མཆིས་པ་མཐོང་བ་ན། །ཀུན་ནས་ཞུགས་པར་མཐོང་ནས་ནི། །དེ་དག་འཇིགས་པ་ལྷར་སྐྱེས་ཤིང་། །ཕྱོགས་རྒྱུག་དེ་དག་སྐྱབས་མ་མཆིས། །ཀུན་ནས་དཔུང་གཉེན་མ་མཆིས་ལྟར། །དེ་བཞིན་སེམས་ཅན་མང་པོ་རྣམས། །སངས་རྒྱས་མྱ་ངན་འདའ་ཐོས་ནས། །སྐྱབས་མ་མཆིས་ཤིང་སྡུག་བསྔལ་ལ། །མྱ་ངན་ཟུག་རྔུས་གཟིར་བར་མཐོང་། །གང་དག་གཙོ་བོ་འདས་གྱུར་ན། །ཇི་ལྟར་སངས་རྒྱས་བལྟ་བར་བགྱི། །གཞན་དག་མྱ་ངན་འདའ་འགྱུར་ལ། །བཅོམ་ལྡན་བསྐལ་པར་བཞུགས་སུ་གསོལ། །ཞུགས་འབར་མེ་ལྕེ་ལྡན་གྱུར་པ། །རྒྱུ་ཟད་རབ་ཏུ་ཞི་བ་ལྟར། །གྱད་ཀྱི་ཡུལ་དུ་རྫོགས་སངས་རྒྱས། །མྱ་ངན་འདའ་བ་ཇི་ལྟར་བལྟ། །སངས་རྒྱས་འོད་མའི་ཚལ་ཁྲོད་དུ། །དེ་རིང་སླན་ཆད་མི་མཐོང་ཞིང་། །འདྲེན་པ་རྒྱལ་བྱེད་ཚལ་དུ་ནི། །ཆོས་སྟོན་པ་ཡང་མི་མཐོང་ངོ་། །མི་མཆོག་དེ་ནི་འདས་གྱུར་ཅེས། །ལིད་ཙ་བཱི་ཡི་གྲོང་ཁྱེར་མཆོག །ཡངས་པ་ཅན་དུ་ཞུགས་ནས་ནི། །ལིད་ཙ་བཱི་ལ་ཇི་ལྟར་བརྗོད། །གང་ཟག་གཙོ་བོ་འདས་གྱུར་ཅེས། །ཤཱཀྱ་རྣམས་ཀྱི་གྲོང་ཁྱེར་མཆོག །སེར་སྐྱའི་གནས་སུ་མཆིས་ནས་ནི། །ཀུན་མི་དགའ་བ་ཇི་ལྟར་བརྗོད། །ཐུབ་ཆེན་དེ་ནི་རབ་ཞི་ཞེས། །མ་ག་དྷཱ་བ་རྣམས་དང་ནི། །མ་སྐྱེས་དགྲ་ཡི་གྲོང་མཆོག་ཏུ། །ཇི་ལྟར་ཚིག་ཏུ་བརྗོད་པར་བགྱི། །ཤཱཀྱ་སེང་གེ་འདས་གྱུར་ཅེས། །སྲོག་ཆགས་སྟོང་ཕྲག་མང་པོ་དག །ཆོ་ངེས་ཡང་དང་ཡང་འདེབས་ན། །བདག་གིས་ཇི་ལྟར་ལན་ཡང་གདབ། །ཤཱཀྱ་སེང་གེ་འདས་གྱུར་ན། །དགེ་སློང་དགེ་སློང་མ་དག་དང་། །ཁྱིམ་པ་རྣམས་ཀྱང་བདག་གིས་ནི། །ཇི་ལྟར་དགའ་བགྱི་མི་ཡི་མཆོག །སྐྱེས་མཆོག་བདག་ལ་གནས་བརྟན་རྣམས། །ཀུན་དགའ་མི་མཆོག་སྦྱིན་པའི་གནས། །རྫོགས་པའི་སངས་རྒྱས་གར་གཤེགས་ཞེས། །འདྲི་ན་ཇི་སྐད་བརྗོད་པར་བགྱི། །ཐུབ་པ་ལྷ་ཀླུས་དྲིས་པ་ན། །བསམ་གཏན་ཆེན་པོ་སྙོམས་ཞུགས་སམ། །འོན་ཏེ་
འཆག་ཏུ་གཤེགས་སོ་ཞེས། །མི་འཇིགས་པར་ནི་ཇི་ལྟར་བརྗོད། །བདག་གིས་ཡང་དང་ཡང་དུ་ནི། །སུ་ཡི་སེང་གེའི་གཟིམས་ཁྲི་བཤམས། །དཔའ་བོ་བདག་གིས་སླན་ཆད་ནི། །སུ་ཡི་སེང་གེའི་ཁྲི་ཡང་བཤམས། །འཁོར་རྣམས་ལ་ནི་སེང་གེ་ལྟར། །བསྙེངས་པ་མི་མངའ་སྒྲོགས་མཛད་པ། །གོ་འཕང་ཟབ་མོ་བལྟ་དཀའི་ཆོས། །བདག་གིས་སུ་ལ་མཉན་པར་བགྱི། །གང་ཟག་གཙོ་བོ་འདས་གྱུར་ན། །སུ་ཡི་ཞབས་ལ་ཆབ་འབུལ་ཞིང་། །གང་གི་ན་བཟའ་ཆོས་གོས་གཟུང་། །སུ་ཡི་ལྷུང་བཟེད་གཟུང་བར་བགྱི། །མི་མཆོག་དགེ་འདུན་དབུས་སུ་ནི། །སུ་ཞིག་བདག་གི་བསྔགས་པ་བརྗོད། །ཀུན་དགའ་ཐོས་པ་རྒྱ་མཚོ་ཞེས། །སླན་ཆད་བདག་ལ་སུ་ཞིག་མཆི། །མཁྱེན་པ་སྤོབས་པ་མཐའ་ཡས་པ། །གསུང་འཇམ་ཡིད་དགའ་མཛད་པ་དང་། མཆོག་ཏུ་དགའ་བ་སྐྱེད་མཛད་པ། །སུ་ལ་མངོན་སུམ་མཉན་པར་བགྱི། །རྒྱལ་སྲས་ཐོས་པ་འཛིན་པ་ཡིས། །དེ་ལྟར་སྨྲེ་སྔགས་ཀུན་བཏོན་ནས། །ཐུབ་པ་ཆེན་པོའི་ཞབས་དྲུང་དུ། །བརྒྱལ་ནས་ས་ལ་སྒྱེལ་བར་གྱུར། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། གོའུ་ཏ་མའི་བུ་ངས་དང་པོ་ཉིད་ནས་ཁྱོད་ལ་ཀུན་དགའ་བོ་སྡུག་པ་དང་ཡིད་དུ་འོང་བ་ཐམས་ཅད་ལ་རྟག་པ་དང་ལྡན་པ་མེད་དོ་ཞེས་དོན་དེ་མ་བསྟན་ཏམ། གོའུ་ཏ་མའི་བུ་འདུ་བྱེད་ཐམས་ཅད་ནི་རྨི་ལམ་ལྟ་བུ་དང་། སྒྱུ་མ་ལྟ་བུ་དང་། སྨིག་རྒྱུ་ལྟ་བུ་དང་། ཟིལ་བའི་ཐིགས་པ་ལྟ་བུ་དང་། སླུ་བར་བྱེད་པ་ཡིན་ཏེ། འདུ་བྱེད་ཐམས་ཅད་མི་རྟག་པ་ཡིན་གྱིས་གོའུ་ཏ་མའི་བུ་ཅི་རུང་མྱ་ངན་མ་བྱེད་ཅིག་སྨྲེ་སྔགས་མ་འདོན་ཅིག །གོའུ་ཏ་མའི་བུ་དེ་བཞིན་གཤེགས་པ་དོ་མོད་ནམ་གྱི་ཐུན་ཐ་མ་ལ་མཐའ་ལས་འདས་པའི་ཡོངས་སུ་མྱ་ངན་ལས་འདའ་བ་དང་། བཏགས་པ་ཡང་དག་པར་འཇོམས་པའི་ཡོངས་སུ་མྱ་ངན་ལས་འདའ་བ་དང་། མི་མཉམ་པ་དང་མཉམ་པའི་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདའ་བར་འགྱུར་གྱིས། གོའུ་ཏ་མའི་བུ་ཁྱོད་སོང་ལ་ཤིང་སཱ་ལ་ཟུང་གི་བར་དུ་དེ་བཞིན་གཤེགས་པའི་སེང་གེའི་གཟིམས་ཁྲི་དབུ་ནི་ཤར་ཕྱོགས། ཞལ་ནི་བྱང་ཕྱོགས། རྒྱབ་ནི་ལྷོ་ཕྱོགས་སུ་བསྟན་ལ། གློ་
གཡས་ཕྱོགས་ཀྱིས་དབབ་ཏུ་རུང་བ་ཤོམས་ཤིག །དེ་ནས་ཚེ་དང་ལྡན་པ་ཀུན་དགའ་བོས་དེའི་ཚེ་ངུ་ཞིང་མྱ་ངན་བྱེད་ལ་སྨྲེ་སྔགས་འདོན་ཅིང་མཆི་མས་བརྣངས་ལ་ངུ་ཞིང་གདོང་ལ་མཆི་མ་འཛག་བཞིན་དུ་ཤིང་སཱ་ལ་ཟུང་གི་བར་དུ་བཅོམ་ལྡན་འདས་ཀྱི་སེང་གེའི་གཟིམས་ཁྲི་བཤམས་སོ། །དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་སེང་གེའི་གཟིམས་ཁྲི་བཤམས་ནས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །ཐུབ་ཆེན་སེང་གེའི་གཟིམས་ཁྲི་ནི། །བཤམས་པའི་ཐ་མ་དེང་ལགས་ཏེ། །མི་མཆོག་སེང་གེའི་གཟིམས་ཁྲི་ནི། །སླན་ཆད་བཤམ་དུ་མ་མཆིས་སོ། །མི་མཆོག་མྱ་ངན་འདས་གྱུར་ཅིང་། །འཇིག་རྟེན་མགོན་པོ་འདས་པ་ན། །སཱ་ལ་མཛེས་ཚལ་སྟོང་པ་ཡི། །ཁྲོད་འདིར་བདག་གིས་ཇི་ལྟར་བལྟ། །གང་ཞིག་སཱ་ལའི་ལྗོན་ཚལ་ན། །ཡུན་རིང་གཉུག་མར་གནས་པའི་ལྷ། །དེས་ནི་རྣམ་འདྲེན་མ་མཐོང་ན། །སླན་ཆད་ཇི་ལྟར་གནས་པར་འགྱུར། །ཀྱེ་མའོ་འདུ་བྱེད་མི་རྟག་སྟེ། །སྒྱུ་མ་རྨི་ལམ་ལྟ་བུ་ལགས། །འདི་འདྲའི་སྟོན་པ་དཔའ་བོ་ཡང་། །འདི་ཉིད་དུ་ནི་འདའ་བར་འགྱུར། །དེ་ནས་ཚེ་དང་ལྡན་པ་མ་འགགས་པས་ཚེ་དང་ལྡན་པ་ཀུན་དགའ་བོ་ལ་ཚིགས་སུ་བཅད་དེ་སྨྲས་པ། འདུས་བྱས་ཐམས་ཅད་མི་རྟག་ཅེས། །སངས་རྒྱས་ཀྱིས་ནི་སྔོན་ཡང་གསུངས། །གང་ལ་རང་དབང་ཡོད་མིན་པ། །དེ་ལ་སྨྲེ་སྔགས་བཏོན་མི་ཕན། །སྨྲེ་སྔགས་ཡང་དང་ཡང་བཏོན་ཅིང་། །ངུད་མོས་བཏབ་པ་ཙམ་གྱིས་ནི། །དོན་འདི་ཐོབ་པར་མི་སླ་ཡིས། །མཁས་པ་མྱ་ངན་མ་བྱེད་ཅིག །དེ་སྐད་ཅེས་སྨྲས་པ་དང་། ཚེ་དང་ལྡན་པ་ཀུན་དགའ་བོས་ཚེ་དང་ལྡན་པ་མ་འགགས་པ་ལ་ཚིགས་སུ་བཅད་དེ་སྨྲས་པ། མི་མཆོག་མྱ་ངན་འདའ་འགྱུར་བ། །ཁྱོད་ལའང་མྱ་ངན་ཡོད་ཡིན་ན། །མ་འགགས་འཇིགས་པ་མེད་པར་ནི། །ཅི་ཡི་ཕྱིར་ན་དེ་སྐད་སྨྲ། །མ་འགགས་པས་སྨྲས་པ། སེམས་ཅན་ཉམ་ཐག་སྡུག་བསྔལ་ཞིང་། །མྱ་ངན་གདུངས་པ་མཐོང་ནས་ནི། །བདག་གི་མིག་ཀྱང་ཆུས་གང་ཞིང་། །མཆི་མ་འཁྲུག་ཅེས་བྱེད་པའང་ཡོད། །སེམས་ཅན་ཇི་སྙེད་ངུ་བ་རྣམས། །ལྷ་ཡི་མིག་གིས་མཐོང་བ་ན། །བདག་ཀྱང་དེ་དག་དོན་
གྱི་ཕྱིར། །ཤིན་ཏུ་ངུ་ཡང་བྲོ་མོད་ཀྱི། །འོན་ཀྱང་སྨྲེ་སྔགས་བཏོན་པས་ནི། །ཕན་པ་འགའ་ཡང་མི་རྙེད་པས། །དེ་ཕྱིར་ཁྱོད་ལ་ཀུན་དགའ་བོ། །ཆོས་སོམས་མྱ་ངན་མ་བྱེད་ཟེར། །དེ་ནས་བཅོམ་ལྡན་འདས་གདན་ལས་བཞེངས་ཏེ་ལྷ་དང་། མི་དང་། ཀླུ་དང་། གནོད་སྦྱིན་དང་། དྲི་ཟ་དང་། མིའམ་ཅི་དང་། ལྟོ་འཕྱེ་ཆེན་པོ་དང་། ལྷ་མ་ཡིན་དང་། ནམ་མཁའ་ལྡིང་བྱེ་བ་འབུམ་ཕྲག་དུ་མས་ཡོངས་སུ་བསྐོར་ཅིང་མདུན་དུ་བདར་ནས། ཤིང་སཱ་ལ་ཟུང་གི་བར་ག་ལ་བ་དེར་གཤེགས་ཏེ་བྱོན་ནས་སེང་གེའི་གཟིམས་ཁྲི་ལ་སྐུའི་གློ་གཡས་པ་ཕབ་སྟེ་གཟིམས་སོ། །བཅོམ་ལྡན་འདས་སེང་གེའི་གཟིམས་ཁྲི་ལ་གཟིམས་མ་ཐག་ཏུ་ལྷ་རྣམས་ཀྱིས་བར་སྣང་ལས་ལྷའི་མེ་ཏོག་སྣ་ཚོགས་ཀྱི་ཆར་དག་མངོན་པར་རབ་ཏུ་ཕབ་ཅིང་། ལྷའི་ཕྱེ་མ་མང་པོ་དག་གིས་ཀྱང་གཏོར། ལྷའི་སིལ་སྙན་བརྒྱ་སྟོང་དག་ཀྱང་རབ་ཏུ་གསིལ་ཏོ། །མི་རྣམས་ཀྱིས་ཀྱང་བཅོམ་ལྡན་འདས་དེ་བཞིན་གཤེགས་པ་ལ་བལྟ་བའི་ཐ་མར་གྱུར་པ་ནི་འདི་ཡིན་ནོ་ཞེས་མི་ཡུལ་གྱི་མེ་ཏོག་དང་། ཕྱེ་མ་དང་། སྤོས་དང་། བྱུག་པ་དང་། རོལ་མོའི་སྒྲ་དག་གིས་བཅོམ་ལྡན་འདས་ལ་མཆོད་པ་བྱས་སོ། །བཅོམ་ལྡན་འདས་ཤིང་སཱ་ལ་ཟུང་གི་བར་དུ་སེང་གེའི་གཟིམས་ཁྲི་ལ་སྐུའི་གློ་གཡས་པས་ཕབ་སྟེ་གཟིམས་མ་ཐག་ཏུ་དེ་ནས་སྐད་ཅིག་དེ་དང་ཐང་ཅིག་དེ་དང་ཡུད་ཙམ་དེ་ལ་ཤར་ཕྱོགས་ལོགས་སུ་སངས་རྒྱས་ཀྱི་ཞིང་བྱེ་བ་འབུམ་ཕྲག་བཅུ་འདས་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་སྒྲའི་དབང་ཕྱུག་ཅེས་བྱ་བའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་རིན་ཆེན་དབྱངས་ཅན་ཞེས་བྱ་བ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དོན་ལེགས་པར་སེམས་པ་ཞེས་བྱ་བ་ཤི་འཕོས་ནས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲའི་པང་པར་བུ་ཉིད་དུ་རྫུས་ཏེ་སྐྱེས་སོ། །དེ་སྐྱེས་མ་ཐག་ཏུ་ཆེད་དུ་བརྗོད་པ་འདི་ཆེད་དུ་བརྗོད་དོ། །སེང་གེ་སྒྲ་ཡི་སྤྱན་སྔ་ནས། །གང་གི་དོན་ཕྱིར་བདག་འོངས་པ། །ཤཱཀྱ་སེང་གེ་མི་ཡི་མཆོག །རྫོགས་སངས་རྒྱས་པ་བཞུགས་སམ་ཅི། །དེ་ནས་ལྷ་ཞིག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་དོན་ལེགས་པར་སེམས་
པ་ལ་ཚིགས་སུ་བཅད་དེ་སྨྲས་པ། གསུང་བར་མཛད་པ་མི་དབང་པོ། །སྐྱོབ་པ་ཤཱཀྱ་སེང་གེ་དེ། །དེ་རིང་སཱ་ལའི་བར་དུ་ནི། །ལན་མེད་མྱ་ངན་འདའ་བར་འགྱུར། །དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དོན་ལེགས་པར་སེམས་པས་ལྷ་དེ་ལ་ཕྱིར་ཚིགས་སུ་བཅད་དེ་སྨྲས་པ། ཤཱཀྱ་སེང་གེ་དེ་ཡི་ཆོས། །མཆོག་ཏུ་མཐོང་དཀའ་མཉན་པའི་ཕྱིར། །བྱེ་བ་བརྒྱ་སྟོང་ཕྲག་བཅུ་ཡི། །སངས་རྒྱས་ཞིང་ནས་བདག་འདིར་འོངས། །དེ་ནི་སཱ་ལའི་བར་དུ་དེང་། །མྱ་ངན་འདའ་བར་འགྱུར་ན་གོ །ཁོ་བོ་སངས་རྒྱས་ཞིང་འདིར་ནི། །འོངས་པ་འབྲས་བུ་མེད་པར་འགྱུར། །ཁོ་བོ་དེ་རིང་འདིར་འོངས་ནས། །ཐུབ་པ་དེ་ཡང་འདའ་འགྱུར་བས། །ལྷ་དང་བཅས་པའི་འཇིག་རྟེན་གྱིས། །མྱ་ངན་བྱ་བར་ཁོ་བོས་བྱས། །ཁོ་བོ་འོངས་པས་སངས་རྒྱས་ནི། །མི་མཐོང་དོན་མེད་འགྱུར་མི་བྱ། །སེམས་བསྐྱེད་ཙམ་ཡང་མི་བསྡད་ཅིང་། །སངས་རྒྱས་སྤྱན་སྔར་འགྲོ་བར་བྱ། །དེས་ནི་འཇམ་ཞིང་དེས་པ་དང་། །དགའ་བ་བརྗོད་པའི་ཚིག་གིས་ནི། །དེ་ཉིད་དུ་ནི་མ་ག་དྷཱའི། །བདག་པོ་རྒྱལ་ལ་འདི་སྐད་སྨྲས། །རྒྱལ་པོ་ཁྱོད་ནི་བདག་ལ་གསོན། །སྐྱེས་བུ་དམ་པ་དཀོན་པས་ན། །བག་མ་མཆིས་པ་མ་མཛད་པར། །དེ་བཞིན་གཤེགས་པའི་སྤྱན་སྔར་བཞུད། །བསྐལ་པ་སྟོང་ཕྲག་བྱེ་བ་ལ། །རྒྱལ་བ་ལན་འགའ་འབྱུང་འགྱུར་ཞིང་། །ཚོགས་པ་འདི་ནི་རྙེད་པ་ལ། །མཁས་པ་སྐྱོ་བར་མ་མཛད་ཅིག །འདི་ནི་མི་མཁས་བྱིས་པ་སྙམ། །གང་ཕྱིར་རྒྱལ་ཆེན་ཁྱོད་དགོངས་པ། །རྒྱལ་ཆེན་བྱིས་པ་བདག་མ་ལགས། །མི་དབང་ཁྱོད་ནི་བྱིས་པ་ལགས། །འདོད་པའི་དབང་དུ་སོང་ནས་ནི། །གང་གིས་ངན་འགྲོར་འགྲོ་བ་ཡི། །མཚམས་མེད་པ་ནི་ཁྱོད་ཀྱིས་མཛད། །དེ་ནི་བྱིས་པའི་བྱིས་པ་ཉིད། །ཁྱོད་ཀྱིས་སྡིག་པའི་ལས་མཛད་པ། །མཚམས་མེད་འཇིགས་པ་ཆེན་པོ་ལགས། །དེ་ཡིས་ཁྱོད་ནི་མནར་མེད་པ། །མི་བཟད་འཇིགས་པ་ཆེན་པོར་ལྟུང་། །སངས་རྒྱས་ལ་ནི་སེམས་དད་མཛོད། །དེས་ནི་ཐར་པ་འཐོབ་འགྱུར་ཞིང་། །མི་དབང་དེ་ནས་རྐྱེན་རྣམས་ཀྱིས། །ཁྱོད་ཀྱིས་རྫོགས་པའི་བྱང་ཆུབ་འཐོབ། །ཁྱོད་ཀྱིས་སྡིག་པའི་གྲོགས་བསྟེན་པ། །ལྷ་
སྦྱིན་གནོད་བྱེད་ཆེན་པོ་ལགས། །དེ་ཡི་རྗེས་སུ་ཕྱོགས་ནས་ནི། །ཁྱོད་ཀྱིས་ཡབ་ནི་བཀྲོངས་པར་གྱུར། །ཁྱོད་ཀྱི་ཡབ་ནི་ཆོས་སྤྱོད་པ། །སངས་རྒྱས་ཐུགས་ལས་སྐྱེས་པའི་སྲས། །ཁྱོད་ཀྱིས་ང་རྒྱལ་དེ་ཡིས་ནི། །མཁས་པ་པོ་ནི་བསད་པར་གྱུར། །རྫོགས་སངས་མྱ་ངན་མ་འདས་པར། །ཁྱོད་ཀྱིས་གཟིགས་པར་མི་བགྱི་འམ། །དེ་ཡི་སྐུ་གདུང་རྣམས་ལ་ཡང་། །མཆོད་པ་རྒྱ་ཆེན་དག་ཀྱང་མཛོད། །བདག་ནི་ཞིང་འདིར་མཆིས་པ་ཡང་། །འདོད་པའི་ཡོན་ཏན་ཕྱིར་མ་ལགས། །བདག་ནི་སངས་རྒྱས་བལྟར་མཆིས་ཀྱིས། །རྒྱལ་པོ་ཆེན་པོ་བཟོད་པར་མཛོད། །ཤཱཀྱ་སེང་གེ་དྲང་སྲོང་ཆེ། །དེ་ནི་དེ་རིང་འདའ་འགྱུར་ཞེས། །སངས་རྒྱས་སེང་གེའི་སྒྲ་དེ་ཡི། །སྤྱན་སྔ་ནས་ནི་བདག་གིས་ཐོས། །དེ་ལ་བལྟ་བའི་ཆེད་དུ་བདག །ཞིང་འདིར་མཆིས་པར་གྱུར་པ་ལགས། །རྒྱལ་རིགས་ཉེ་དུའི་ཚོགས་ཀུན་དང་། །ལྷན་ཅིག་འགྲོགས་ཏེ་མཆི་བར་བགྱི། །དེ་ནས་རྒྱལ་པོ་མ་སྐྱེས་དགྲས་ཁྱེའུ་དེ་ལ་ཚིགས་སུ་བཅད་དེ་སྨྲས་པ། འདི་ནས་གྱད་ཡུལ་ལམ་རིང་མ་སྨད་པ། །རྐང་པས་བགྲོད་པར་མི་ནུས་ཤིང་རྟས་སོང་། །ཁྱེའུ་ཁྱོད་དོ་མོད་སྡོད་པར་གྱིས་ཤིག་དང་། །དཔུང་ཆེན་རྣམས་ཀྱིས་བདེ་བར་འདོང་བར་བྱ། །དེ་ནས་ཁྱེའུ་དེས་རྒྱལ་པོ་མ་སྐྱེས་དགྲ་ལ་ཚིགས་སུ་བཅད་དེ་སྨྲས་པ། མི་དབང་ཁྱོད་ལྟར་བདག་ལ་ལེ་ལོ་མེད། །བསམ་ཡས་རྫུ་འཕྲུལ་སྟོབས་ནི་བདག་ལ་ཡོད། །བདག་ནི་འདོད་ན་ཤར་ཕྱོགས་ཞིང་རྣམས་ནི། །དུ་མ་དག་ཏུའང་ཐོགས་མེད་འགྲོ་འགྱུར་ཞིང་། །བདག་ནི་གང་ནས་འོངས་པའི་འཇིག་རྟེན་ཁམས། །དེ་ཡི་བར་ན་སངས་རྒྱས་ཞིང་མང་གང་། །དེ་ཡང་མཐའ་ཡས་མང་པོ་ཚད་མེད་པས། །གྱད་ཡུལ་ལྟ་ཞིག་ཇི་ལྟར་གྱུར་ཀྱང་རུང་། །དེ་ནས་ཁྱེའུ་དེ་རྒྱལ་པོ་མ་སྐྱེས་དགྲའི་པང་པ་ནས་བབས་ནས་རྐང་པས་རྒྱལ་པོའི་ཁབ་ཀྱི་གྲོང་ཁྱེར་ནས་བྱུང་སྟེ་ཚིགས་སུ་བཅད་པ་འདི་དག་སྨྲས་སོ། །གང་ཞིག་སྡིག་མེད་ཉོན་མོངས་ཡོད་མིན་ཞིང་། །སྟོབས་ཆེན་གསུང་མཆོག་མི་དབང་ལྟ་འདོད་པ། །དེ་ནི་ཁོ་བོའི་ཕྱི་བཞིན་དེང་ཤོག་དང་། །ཤཱཀ་ཐུབ་མྱ་ངན་མ་འདས་དེ་མཐོང་འགྱུར། །ཁྱེའུ་དེ་རྒྱལ་པོའི་ཁབ་ཀྱི་གྲོང་ཁྱེར་ནས་བྱུང་མ་ཐག་ཏུ་དེ་ནས་སྐད་ཅིག་དེ་དང་
ཐང་ཅིག་དེ་དང་། ཡུད་ཙམ་དེ་ལ་ལྷ་དང་མིར་བཅས་པའི་སྐྱེ་དགུ་ལས་སྲོག་ཆགས་བདུན་ཁྲི་ཉིས་སྟོང་འདུས་པར་གྱུར་ནས། ཁྱེའུ་དེ་བཅོམ་ལྡན་འདས་ཀྱི་ཞབས་ལ་ཕྱག་འཚལ་བའི་ལྷ་བྱེ་བ་ཁྲག་ཁྲིག་ཕྲག་འབུམ་གྱིས་ཡོངས་སུ་བསྐོར་ཅིང་མདུན་དུ་བདར་ནས་བཅོམ་ལྡན་འདས་ག་ལ་བ་དེར་སོང་ངོ་། །བཅོམ་ལྡན་འདས་སེང་གེའི་གཟིམས་ཁྲི་ལ་སྐུའི་གློ་གཡས་པས་ཕབ་སྟེ་གཟིམས་མ་ཐག་ཏུ་དེ་ནས་སྐད་ཅིག་དེ་དང་། ཐང་ཅིག་དེ་དང་། ཡུད་ཙམ་དེ་ལ་ལྷོ་ཕྱོགས་ལོགས་སུ་སངས་རྒྱས་ཀྱི་ཞིང་བྱེ་བ་འབུམ་ཕྲག་ལྔ་འདས་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལྟ་མཛེས་རིན་ཆེན་བརྩེགས་ཞེས་བྱ་བའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་རིན་པོ་ཆེ་བཀོད་པ་ཞེས་བྱ་བ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་ཞི་བར་འཇུག་ཅེས་བྱ་བ་ཤི་འཕོས་ནས་སངས་རྒྱས་ཀྱི་ཞིང་འདིའི་འཛམ་བུའི་གླིང་འདི་ཉིད་དུ་མཉན་ཡོད་ཀྱི་གྲོང་ཁྱེར་ཆེན་པོར་ཚོང་དཔོན་སེང་གེ་ལྟ་བུ་ཞེས་བྱ་བའི་ཁྱིམ་དུ་སྐྱེས་སོ། །དེ་སྐྱེས་མ་ཐག་ཏུ་ཆེད་དུ་བརྗོད་པ་འདི་སྐད་ཆེད་དུ་བརྗོད་དོ། །གང་ཕྱིར་བསྐལ་པ་བྱེ་སྙེད་དུ། །གང་གིས་ཕྱག་ཀྱང་ཡང་ཡང་གཏུབས། །སྤྱན་དང་རང་གི་ཤ་དག་དང་། །དེ་བཞིན་དབུ་ཡང་བཏང་མཛད་ཅིང་། །སངས་རྒྱས་ཉིད་ནི་བཞེད་པ་ཡིས། །བསྐལ་པ་སྟོང་ཕྲག་བྱེ་བར་ཡང་། །བཙུན་མོ་སྲས་དང་སྲས་མོ་དང་། །བདོག་པ་ཐམས་ཅད་ཡང་ཡང་བཏང་། །སེམས་ཅན་རྣམས་ནི་དགྲོལ་བའི་ཕྱིར། །བསྐལ་པ་བྱེ་བ་བརྒྱ་མང་དུ། །སྦྱིན་པ་རྒྱ་ཆེན་བཏང་གྱུར་པའི། །སྤྱན་དང་ལྡན་པ་བཞུགས་སམ་ཅི། །དེ་ནས་ཚོང་དཔོན་སེང་གེ་ལྟ་བུས་ཁྱེའུ་དེ་ལ་ཚིགས་སུ་བཅད་དེ་སྨྲས་པ། གང་ཕྱིར་སྐྱེས་མ་ཐག་ཏུ་ཡང་། །ཚིག་མཆོག་རྗོད་པར་བྱེད་པ་ཁྱོད། །ལྷ་འམ་འོན་ཏེ་ཀླུ་ཞིག་གམ། །གནོད་སྦྱིན་ཡིན་ནམ་སྲིན་པོ་ཡིན། །ཉེ་དུའི་ཚོགས་ནི་སྐྲག་གྱུར་ཅིང་། །འཇིགས་པས་ཕྱོགས་སུ་རྣམ་པར་རྒྱུག །ཁོ་བོ་སངས་རྒྱས་སྒྲ་ཡིས་ནི། །གཞན་དུ་འབྲོས་པར་མི་བྱེད་ཁྱེའུ། །དེ་ནས་ཁྱེའུ་དེས་ཚོང་དཔོན་དེ་ལ་ཚིགས་སུ་བཅད་དེ་སྨྲས་པ། ཁོ་བོ་ལྷ་མིན་ཀླུ་ཡང་མིན། །གནོད་སྦྱིན་མ་ཡིན་སྲིན་པོའང་མིན། །
འཇིག་རྟེན་ཐུན་མོང་ཡིན་པའི་ཕྱིར། །ཅི་འདྲ་ཚོང་དཔོན་མི་ཤེས་སམ། །ཁོ་བོ་ལྷ་ཀླུ་གནོད་སྦྱིན་དང་། །མི་འམ་ཅི་དང་ལྟོ་འཕྱེ་ཆེ། །ལྷ་ཡི་ལྷ་ཞེས་བརྟན་པ་ནི། །ཁྱུ་མཆོག་བཞིན་དུ་དམ་ཡང་འཆའ། །དེ་ནས་ཚོང་དཔོན་སེང་གེ་ལྟ་བུས་ཁྱེའུ་དེ་ལ་ཚིགས་སུ་བཅད་དེ་སྨྲས་པ། མཁས་པ་ཁྱོད་ཀྱིས་བསྒྲགས་པ་ཡི། །དེ་འདྲའི་ཚིག་ནི་ཐོས་གྱུར་ནས། །ཐེ་ཚོམ་ལྷག་པར་སྐྱེས་གྱུར་ཅིང་། །ཁོ་བོ་ལྷག་པར་བསྔགས་སོ་ཁྱེའུ། །ཇི་ལྟར་ཁྱོད་ནི་ལྷ་དང་ཀླུ། །ཇི་ལྟར་གནོད་སྦྱིན་མི་འམ་ཅི། །ཇི་ལྟར་ལྷ་ཡི་ལྷ་ཡིན་པ། །དེ་ནི་ཁྱེའུ་ཁྱོད་ང་ལ་སྨྲོས། །དེ་ནས་ཁྱེའུ་དེས་ཚོང་དཔོན་སེང་གེ་ལྟ་བུ་ལ་ཚིགས་སུ་བཅད་དེ་སྨྲས་པ། ལྷོ་ཡི་ཕྱོགས་ཆ་ལོགས་ན་ནི། །གསུང་བར་མཛད་པའི་བདག་པོ་ནི། །ལྟ་མཛེས་རིན་ཆེན་བརྩེགས་བཞུགས་པ། །དེ་ནས་ཁོ་བོ་འདིར་འོངས་ཏེ། །ཁོ་བོ་ལན་བརྒྱར་བརྒྱ་བྱིན་དང་། །དབང་སྒྱུར་དུ་ཡང་ཁོ་བོ་གྱུར། །ཁོ་བོ་ལན་བརྒྱར་ཚངས་པ་དང་། །དེ་བཞིན་འཁོར་ལོས་སྒྱུར་བར་གྱུར། །ཁོ་བོས་ཡུན་རིང་བརྗོད་བྱ་ན། །བསྐལ་པའམ་བསྐལ་པ་བྱེ་བར་ཡང་། །ཟད་པར་འགྱུར་བ་ཡོད་མིན་ཏེ། །མཁས་པ་ཁོ་བོ་འགྲོ་དགོས་སོ། །ཚོང་དཔོན་འོན་ཀྱང་རེ་ཞིག་རྗེས་སུ་བསྟན་པ་འདི་ལ་ཁྱོད་ཀྱིས་ཀུན་ཏུ་བསྟེན་པར་བྱ། ངེས་པར་བསྟེན་པར་བྱ། གོམས་པར་བྱ་ཞིང་ལན་མང་དུ་བྱའོ། །ཚོང་དཔོན་རྗེས་སུ་བསྟན་པ་དེ་ཡང་གང་ཞེ་ན། ཚོང་དཔོན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལྟ་མཛེས་རིན་ཆེན་བརྩེགས་དེས་འདི་སྐད་ཅེས། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་གསུམ་དང་ལྡན་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་ཅིང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་གསུངས་པ་སྟེ། གསུམ་གང་ཞེ་ན། འདི་ལྟ་སྟེ། སེམས་མཐའ་ཡས་པའི་རྗེས་སུ་འཇུག་པ་དང་། ཡེ་ཤེས་ཟབ་མོའི་རྗེས་སུ་འཇུག་པ་དང་། སྙིང་པོ་དང་ལྡན་པའི་ཏིང་ངེ་འཛིན་ལ་རྗེས་སུ་སྒོམ་པ་སྟེ། ཚོང་དཔོན་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་གསུམ་པོ་དེ་དག་དང་ལྡན་ན་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ལས་ཕྱིར་མི་ལྡོག་ཅིང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ནས་ཁྱེའུ་དེས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཡེ་ཤེས་ཟབ་མོ་རྟོགས་དཀའ་དེ་ལ་ནི། །གང་དག་རྒྱུ་དང་རྒྱུ་མེད་ཀུན་མཁྱེན་པའི། །སངས་རྒྱས་གྲགས་ཆེན་རྣམ་དག་མ་གཏོགས་པ། །ལྷར་བཅས་སྐྱེ་དགུ་འདི་དག་སོམ་ཉི་བྱེད། །བྱང་ཆུབ་གནས་མིན་གང་ཡིན་དེ་མེད་དེ། །ཡང་དག་ཡེ་ཤེས་གང་ལའང་ཆགས་པ་མེད། །ཆགས་པ་རྣམ་སྤངས་ཟུག་རྔུ་བྲལ་གྱུར་པའི། །ཡེ་ཤེས་རྣམ་པར་བསྒོམས་ན་སངས་རྒྱས་འགྱུར། །མཐའ་ཡས་སེམས་ལ་སེམས་ཡོད་མ་ཡིན་པར། །སེམས་ལ་འཇུག་པ་རབ་ཏུ་ཞི་བར་གསུངས། །སེམས་འདི་ཐམས་ཅད་དག་ལས་ལོག་གྱུར་པའི། །རྗེས་སུ་རབ་ཏུ་འཇུག་པས་སེམས་ཞེས་བྱ། གཅད་ཅིང་གཅག་རུང་གང་ཡིན་དེ་མི་སྲ། །བདེ་གཤེགས་གསུངས་པའི་ཆོས་རྣམས་མི་ཕྱེད་ཅིང་། །དངོས་པོ་ཐམས་ཅད་ནམ་མཁའི་དངོས་འདྲ་བའི། །ཏིང་འཛིན་འདི་ནི་རྡོ་རྗེའི་རང་བཞིན་ཡིན། །གང་གིས་དེ་འདྲར་རང་བཞིན་སྟོང་ཤེས་ནས། །དངོས་པོ་ཀུན་ལ་མི་གནས་སྒོམ་བྱེད་པ། །དེ་ནི་ཉོན་མོངས་དྲ་བ་ཀུན་སྤངས་ཤིང་། །སྲིད་པའི་འདོད་ཆགས་བཅོམ་པའི་སངས་རྒྱས་འགྱུར། །ཐམས་ཅད་ཤེས་ཀྱང་རྣམ་ཤེས་ཡོད་མིན་ཞིང་། །ཐམས་ཅད་སྒོམ་ཡང་རྣམ་སྒོམ་ཡོད་མིན་ལ། །ཐམས་ཅད་རྟོགས་ཀྱང་རྟོགས་པ་ཡོད་མིན་ཞིང་། །ཐམས་ཅད་བརྗོད་ཀྱང་གང་ལའང་མི་གནས་ལ། །ཟབ་ཆོས་ཆོས་ཀྱི་འདུ་ཤེས་ཡོད་མིན་ཞིང་། །སེམས་ཅན་འགྲོལ་ཡང་སེམས་ཅན་འདུ་ཤེས་མེད། །ཞི་དབེན་ཞི་བའི་འདུ་ཤེས་ཡོད་མིན་ཞིང་། །བྱང་ཆུབ་རྟོགས་ཀྱང་བྱང་ཆུབ་འདུ་ཤེས་མེད། །དཔའ་བརྟུལ་ལྟ་བའི་ཟུག་རྔུ་སྤངས་པ་དེ། །བསྟེན་དཀའ་འགྲོ་བ་ཀུན་ལས་འདས་གྱུར་ཅིང་། །སེམས་ཅན་ཀུན་གྱི་འཆི་འཕོ་འགྲོ་དང་ཀུན། །རབ་ཏུ་ཤེས་ཤིང་རབ་བྱུང་སངས་རྒྱས་འགྱུར། །ཁྱེའུ་དེས་ཚིགས་སུ་བཅད་པ་དེ་དག་སྨྲས་མ་ཐག་ཏུ་དེ་ནས་སྐད་ཅིག་དེ་དང་ཐང་ཅིག་དེ་དང་། ཡུད་ཙམ་དེ་ལ་ཚོང་དཔོན་སེང་གེ་ལྟ་བུ་རང་གི་
འཁོར་གྱིས་ཡོངས་སུ་བསྐོར་བ་དང་། སྲོག་ཆགས་ཉིས་སྟོང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ཅིང་སེམས་ཡོངས་སུ་བསྔོས་ནས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ལྷ་བྱེ་བ་ཕྲག་བརྒྱད་ཀྱིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཉིད་དུ་ངེས་པར་གྱུར་ཏོ། །སྲོག་ཆགས་ཁྲག་ཁྲིག་འབུམ་ཕྲག་བཞི་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ །དེ་ནས་ཁྱེའུ་དེས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཤཱཀྱ་སེང་གེའི་སྤྱན་སྔ་འདིར། །ཁོ་བོ་འོངས་པ་དེ་དོན་ཡིན། །སྲོག་ཆགས་ཁྲག་ཁྲིག་འཁོར་བ་ཡི། །འཇིགས་པ་ཆེ་ལས་ཐར་གྱུར་ཅིང་། །སྲོག་ཆགས་བྱེ་བ་མང་པོ་རྣམས། །བླ་ན་མེད་པའི་བྱང་ཆུབ་ཏུ། །སེམས་བསྐྱེད་པ་ཡང་སྐྱེས་གྱུར་ཏེ། །བཟོད་པ་ལ་ཡང་རབ་ཏུ་བཀོད། །བདག་གི་ཕ་མ་ཕུ་ནུ་དང་། །ཉེ་དུ་རྣམས་ཀྱང་བཟོད་ལ་གནས། །བྱེ་བ་ཕྲག་བརྒྱད་ལྷ་རྣམས་ནི། །ཐམས་ཅད་བྱང་ཆུབ་རབ་ཏུ་ཞུགས། །དཔག་མེད་བསམ་གྱིས་མི་ཁྱབ་པའི། །ནོར་གྱི་ཕུང་པོ་ཆེ་རྙེད་པས། །བདག་ནི་སངས་རྒྱས་ཆོས་རྣམས་ཀྱིས། །དབུལ་བ་ཐག་རིང་ཟད་པར་གྱུར། །དེ་ནས་ཁྱེའུ་རབ་ཏུ་ཞི་བར་གནས་ཀྱིས་ཕ་མ་དང་ཕུ་ནུ་དང་། ཉེ་དུའི་ཚོགས་རྣམས་བོས་ཏེ་ཕ་མ་དང་། ཕུ་ནུ་དང་། ཉེ་དུ་དང་། རྩ་ལག་གི་སྐྱེ་བོ་རྣམས་དང་ལྷན་ཅིག་ཏུ་བཅོམ་ལྡན་འདས་ཀྱི་ཞབས་ལ་ཕྱག་འཚལ་བའི་སྲོག་ཆགས་འབུམ་ཕྲག་མང་པོས་ཡོངས་སུ་བསྐོར་ཅིང་མདུན་དུ་བདར་ཏེ། མཉན་ཡོད་ཀྱི་གྲོང་ཁྱེར་ཆེན་པོ་ནས་བྱུང་ནས་གྱད་རྣམས་དང་ཉེ་བ་ན་ཡོད་པ་ཤིང་སཱ་ལ་ཟུང་གི་ཚལ་ག་ལ་བ་དེར་དོང་ངོ་། །བཅོམ་ལྡན་འདས་སེང་གེའི་གཟིམས་ཁྲི་ལ་སྐུའི་གློ་གཡས་པས་ཕབ་སྟེ་གཟིམས་མ་ཐག་ཏུ་དེ་ནས་གཞན་ཡང་སྐད་ཅིག་དེ་དང་། ཐང་ཅིག་དེ་དང་། ཡུད་ཙམ་དེ་ལ་ནུབ་ཕྱོགས་ལོགས་སུ་སངས་རྒྱས་ཀྱི་ཞིང་བྱེ་བ་འབུམ་ཕྲག་བརྒྱད་འདས་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགའ་བའི་དབང་ཕྱུག་ཅེས་བྱ་བའི་སངས་རྒྱས་ཀྱི་ཞིང་
ན་འཇིག་རྟེན་གྱི་ཁམས་དགའ་སྤུ་ཞེས་བྱ་བ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་དམིགས་མེད་ཅེས་བྱ་བ་ཤི་འཕོས་ནས་སངས་རྒྱས་ཀྱི་ཞིང་འདིའི་འཛམ་བུའི་གླིང་འདི་ཉིད་དུ་བཱ་རཱ་ཎ་སཱིའི་གྲོང་ཁྱེར་ཆེན་པོར་ཚོང་དཔོན་མེ་ཏོག་བཟང་པོ་ཞེས་བྱ་བའི་ཁྱིམ་དུ་སྐྱེས་སོ། །དེ་ནས་ཁྱེའུ་དེ་སྐྱེས་མ་ཐག་ཏུ་དེའི་ཚེ་ཆེད་དུ་བརྗོད་པ་འདི་ཆེད་དུ་བརྗོད་དོ། །བདག་མེད་མི་གཡོའི་ཆོས་སྟོན་པ། །རྣམ་པར་འདྲེན་པ་སངས་རྒྱས་ནི། །སཱ་ལའི་ལྗོན་ཤིང་ཚལ་ཁྲོད་དུ། །དེ་རིང་མྱ་ངན་འདའ་བར་འགྱུར། །ཆོས་རྣམས་འདི་དག་དམིགས་མེད་ན། །མི་མཁས་དམིགས་པར་བྱེད་པ་དག །དེ་དག་སྡུག་བསྔལ་མི་གྲོལ་ཞིང་། །དེ་དག་རྣམས་ཀྱི་སྡུག་བསྔལ་འཕེལ། །ཆོས་རྣམས་ཐམས་ཅད་གནས་མིན་ཏེ། །དེ་དག་རྣམས་ཀྱི་གནས་ཀྱང་མེད། །ཟད་པ་དང་ནི་མ་ཟད་པ། །ཐམས་ཅད་འདི་ལ་རྙེད་མི་འགྱུར། །སྟོང་པ་ནམ་ཡང་མི་འཇིག་ཅིང་། །སྟོང་པ་རྣམ་པར་འཇིག་པའང་མེད། །དེ་ལ་རྐྱེན་ཀྱང་ཡོད་མིན་ཞིང་། །རྐྱེན་མེད་པ་ཡང་དེ་ལ་མེད། །གང་གིས་ཞི་བ་མཐོང་དཀའ་ཞིང་། །ཟབ་མོའི་ཆོས་འདི་བསྟན་མཛད་པ། །ཤཱཀྱ་སེང་གེ་མི་ཡི་མཆོག །རྫོགས་པའི་སངས་རྒྱས་བཞུགས་སམ་ཅི། །སེང་གེ་ཆེན་པོ་གླང་པོ་ཆེ། །ཚངས་པར་གྱུར་ཅིང་ཟག་པ་མེད། །མིག་ཏུ་གྱུར་པ་དེ་རིང་ནི། །སཱ་ལའི་བར་དུ་འདའ་བར་འགྱུར། །དགེ་སློང་དགེ་འདུན་མདུན་དག་ན། །ཟླ་བ་ཉ་བ་འདྲ་བར་ནི། །ཡུན་རིང་ཆོས་རྣམས་སྟོན་མཛད་པ། །ཕྱིན་ཆད་མཐོང་བར་མི་འགྱུར་རོ། །ལྷུན་པོའི་སྒང་ན་ནོར་ལྷ་ལྟར། །དགེ་སློང་ཚོགས་ལ་རྣམ་མཛེས་པ། །ལེགས་པར་གསུང་པ་མགོན་པོ་ནི། །ཕྱིན་ཆད་གྲོང་ཁྱེར་གཤེགས་མི་འགྱུར། །ལྷ་མིའི་མདུན་ན་སྐྱོབ་པ་ཡི། །བླ་མེད་ཆོས་ཀྱི་ང་རོ་དང་། །དགའ་བར་མཛད་པའི་གསུང་དབྱངས་ཏེ། །ཕྱིན་ཆད་ཐོས་པར་མི་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་དམིགས་མེད་ཀྱིས་ཚིགས་སུ་བཅད་པ་དེ་དག་སྨྲས་མ་ཐག་ཏུ་དེ་ནས་དེའི་ཚེ་བཱ་རཱ་ཎ་སཱིའི་གྲོང་ཁྱེར་ཆེན་པོའི་སྲོག་ཆགས་འབུམ་ཐམ་པས་ཚིག་འདི་སྐད་ཅེས་སྨྲས་སོ། །གང་གི་ཕྱིར་ཁྱེའུ་འདི་སྐྱེས་མ་
ཐག་ཏུ་དེ་ལྟར་སྔོན་གྱི་གནས་ཀྱི་ཚེ་རབས་དེ་དང་དེ་དག་རྗེས་སུ་དྲན་ཞིང་། འདིའི་ཤེས་པ་དང་མི་འཇིགས་པའི་སྟོབས་བསྐྱེད་པ་དེས་ཚིག་འབྲུ་སྣ་ཚོགས་ཀྱིས་ཚིགས་སུ་བཅད་པ་དེ་ལྟ་བུ་དག་རྗོད་པར་བྱེད་པའི་ཤེས་རབ་ཀྱི་སྤོབས་པ་དང་། ཤེས་རབ་ཀྱི་མི་འཇིགས་པ་དང་ཤེས་རབ་ཀྱི་ཁྱད་པར་ནི་ངོ་མཚར་ཏེ། བདག་ཅག་གིས་ཀྱང་དེ་ལྟ་བུའི་ཤེས་རབ་ཡང་དག་པར་བསྒྲུབ་པའི་ཕྱིར་ངེས་པར་འབད་པར་བྱའོ་ཞེས་སྨྲས་སོ། །དེ་ནས་ཁྱེའུ་དེས་སྐྱེ་བོ་ཕལ་པོ་ཆེ་དེ་དག་འདི་ལྟ་སྟེ། མཐའ་ཡས་མུ་མེད་པ་དང་། སྣང་བ་མེད་པ་དང་། དམིགས་པ་མེད་པ་དང་། སྐྱེ་བ་མེད་པ་ལ་བཟོད་པའི་ཕྱིར་མི་ལྡོག་པ་དང་། ཐུན་མོང་མ་ཡིན་པ་དང་། མི་མཉམ་པ་དང་མཉམ་པ་ལ་བཀོད་པ་དང་། དེ་དག་གིས་འདི་སྐད་ཅེས་སྨྲས་སོ། །བདག་ཅག་ཐམས་ཅད་ཀྱང་ཚོགས་པར་བྱས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱའོ། །དེས་དེ་དག་ལ་འདི་སྐད་ཅེས་སྨྲས་སོ། །ཁྱེད་ཅག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ཟིན་གྱིས་ཁྱེད་ཅག་ཚུར་ཤོག་དང་། ད་བདག་ཅག་ཐམས་ཅད་ཚོགས་པར་བྱས་ལ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བའི་ཕྱིར་འགྲོགས་ཏེ་འདོང་ངོ་། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དམིགས་མེད་སྲོག་ཆགས་ཉིས་འབུམ་གྱིས་ཡོངས་སུ་བསྐོར་ཅིང་མདུན་དུ་བདར་ནས། བཅོམ་ལྡན་འདས་ཀྱིས་ཞབས་ལ་ཕྱག་འཚལ་བའི་ཕྱིར་བཱ་རཱ་ཎ་སཱིའི་གྲོང་ཁྱེར་ནས་བྱུང་སྟེ་བཅོམ་ལྡན་འདས་ག་ལ་བ་དེར་དོང་ངོ་། །བཅོམ་ལྡན་འདས་སེང་གེའི་གཟིམས་ཁྲི་ལ་སྐུའི་གློ་གཡས་པས་ཕབ་སྟེ། གཟིམས་མ་ཐག་ཏུ་དེ་ནས་སྐད་ཅིག་དེ་དང་། ཐང་ཅིག་དེ་དང་། ཡུད་ཙམ་དེ་ལ་བྱང་ཕྱོགས་ལོགས་སུ་སངས་རྒྱས་ཀྱི་ཞིང་བྱེ་བ་འབུམ་ཕྲག་དྲུག་ཅུ་རྩ་བཞི་འདས་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱང་ཆུབ་ཡན་ལག་གནས་ཞེས་བྱ་བའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་མེ་ཏོག་ཅན་ཞེས་བྱ་བ་ནས། བྱང་ཆུབ་སེམས་དཔའ་སེམས་དཔའ་
ཆེན་པོ་མངོན་པར་ཤེས་པའི་མེ་ཏོག་ཀུན་ཏུ་རྒྱས་པ་ཐོབ་པ་ཞེས་བྱ་བ་ཤི་འཕོས་ནས་སངས་རྒྱས་ཀྱི་ཞིང་འདིའི་འཛམ་བུའི་གླིང་འདི་ཉིད་དུ་ཡངས་པ་ཅན་གྱི་གྲོང་ཁྱེར་ཆེན་པོར་དམག་དཔོན་སེང་གེ་ཞེས་བྱ་བའི་ཁྱིམ་དུ་སྐྱེས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་མངོན་པར་ཤེས་པའི་མེ་ཏོག་ཀུན་ཏུ་རྒྱས་པ་ཐོབ་པ་དེ་སྐྱེས་མ་ཐག་ཏུ་ཆེད་དུ་བརྗོད་པ་འདི་སྐད་དུ་བརྗོད་དོ། །གང་གིས་སེམས་ཅན་བྱེ་མང་རྣམས། །ཉོན་མོངས་གྱུར་པ་ཐར་མཛད་ཅིང་། །ཤཱཀྱའི་རིགས་རྣམས་དགའ་མཛད་པ། །རྫོགས་པའི་སངས་རྒྱས་བཞུགས་སམ་ཅི། །བརྩོན་པས་ཕ་རོལ་གཤེགས་གྱུར་ཅིང་། །ཡེ་ཤེས་འཕྲིན་ལས་མཉམ་བཞག་ལ། །མཁྱེན་པ་རྒྱ་མཚོ་མཐའ་ཡས་པ། །རྫོགས་པའི་སངས་རྒྱས་བཞུགས་སམ་ཅི། །ཞི་བའི་ཐུགས་མངའ་བཟོད་པ་བརྙེས། །ཟུག་རྔུ་འབྱིན་མཛད་དེ་བཞིན་གཤེགས། །སེམས་ཅན་རྣམས་ལ་ཆོས་སྟོན་ཀྱང་། །ཆོས་དེ་རློམ་པར་མི་མཛད་པ། །རྫོགས་པའི་སངས་རྒྱས་བཞུགས་སམ་ཅི། །འཇིག་རྟེན་གསུམ་ན་མི་གནས་ཀྱང་། །གང་གིས་འདོད་ཁམས་གཟུགས་ཁམས་དང་། །གཟུགས་མེད་ཁམས་ནི་མ་ལུས་པར། །མཁྱེན་པས་གཞལ་བར་མཛད་གྱུར་པ། །སྤྱན་དང་ལྡན་པ་བཞུགས་སམ་ཅི། །དེ་ནས་དེ་བཞིན་གཤེགས་པ་བྱང་ཆུབ་ཡན་ལག་གནས་ཞེས་བྱ་བས་སྐུ་ལྷའི་ཆ་བྱད་དུ་མངོན་པར་སྤྲུལ་ནས་ཁྱེའུ་དེ་ལ་ཚིགས་སུ་བཅད་དེ་བཀའ་སྩལ་པ། རྫོགས་པའི་སངས་རྒྱས་བསྐལ་པའམ། །དེ་བས་ལྷག་པར་བཞུགས་འགྱུར་བས། །ཕྱིས་ཀྱང་རྫོགས་སངས་མཐོང་འགྱུར་གྱིས། །འདོད་པས་དགའ་བར་གྱིས་ཤིག་ཁྱེའུ། །འདི་ནི་རྒྱལ་ཆེན་ཁྱིམ་ཡིན་གྱིས། །འདོད་པའི་དགའ་མཆོག་སྤྱོད་བྱོས་ལ། །སད་ནས་པི་ཝང་རྔ་ཆེན་དང་། །རྫ་རྔ་རྣམས་དང་འཁར་སིལ་རྡོབས། །དེ་ནས་ཁྱེའུ་དེས་དེ་བཞིན་གཤེགས་པ་ཡིན་པ་ཁོ་ནར་ཤེས་མོད་ཀྱི་ལྷ་ཡིན་པར་འདུ་ཤེས་པའི་སེམས་ཅན་གཞན་དག་གི་དགེ་བའི་རྩ་བ་ཡང་དག་པར་བསྐྱེད་པའི་ཕྱིར་ཚིགས་སུ་བཅད་པ་སྨྲས་པ། སེམས་ཅན་གང་དག་འདོད་དབང་སོང་། །དེ་དག་བྱིས་པ་རྨོངས་པ་ཡིན། །དེ་དག་གིས་ནི་རྫོགས་སངས་དང་། །སངས་རྒྱས་བསྟན་པ་མི་ཤེས་སོ། །འདོད་རྣམས་སྙིང་པོ་མེད་པས་ན། །འདོད་པའི་ལོངས་སྤྱོད་བདག་མི་འདོད། །འདོད་པ་སྤུ་གྲིའི་སོ་འདྲ་བས། །འདོད་པ་དེ་ལ་སུ་ཡིད་རྟོན། །
ཁྱི་དང་ཕག་དང་ཝ་དག་དང་། །བ་ལང་བོང་བུ་དྲེའུ་རྟ་དག །དེ་དག་འདོད་པ་སྟེན་བྱེད་ཀྱི། །སངས་རྒྱས་མི་མཛད་ཉན་ཐོས་མིན། །ཞར་བ་ཐེང་བོ་ལོང་བ་དང་། །གླེན་པ་སྒུར་པོ་མིའུ་ཐུང་རྣམས། །དེ་དག་འདོད་པ་སྟེན་བྱེད་ཀྱི། །སངས་རྒྱས་མི་མཛད་ཉན་ཐོས་མིན། །སྦྲང་བུ་སྦུར་བ་ཕྱེ་ལེབ་དང་། དེ་བཞིན་རྨ་བྱ་ཁུ་བྱུག་རྣམས། །དེ་དག་འདོད་ལ་སྟེན་བྱེད་པས། །ཁོ་བོ་ཁྱད་པར་མེད་པར་འགྱུར། །ཇི་ལྟར་མེ་ཡི་ཀླུབས་ཀྱིས་ནི། །འཛམ་བུའི་གླིང་འདི་གང་གྱུར་ན། །ལོང་བ་དེར་ནི་ལྟུང་བ་ལྟར། །རྒྱལ་བ་འདོད་པར་དེ་བཞིན་ནོ། །འདོད་པ་མི་རྟག་སྡུག་བསྔལ་བས། །སུ་ཞིག་འདོད་པ་སྟེན་པར་བྱེད། །གང་དག་འདོད་པའི་རྗེས་འབྲང་བས། །དེ་དག་དེ་ཡི་ཆོས་མི་ཤེས། །ཁོ་བོ་འདོད་པ་མི་གཉེར་བར། །སངས་རྒྱས་ཀྱིས་ནི་ཁོ་བོ་མཁྱེན། །ལྷར་གྱུར་བདག་ལ་འདྲི་བ་འདི། །སངས་རྒྱས་ཡིན་པར་ཁོ་བོས་ཤེས། །བདག་གིས་སངས་རྒྱས་སྐྱོབ་པ་ནི། །ལྷུན་པོའི་རྒྱལ་ལས་འདི་སྐད་ཅེས། །མཚན་མོའི་ཐུན་གྱི་ཐ་མ་ལ། །སངས་རྒྱས་འདའ་བར་འགྱུར་ཞེས་ཐོས། །ཀུན་སྦྱོར་ཟད་པའི་དྲང་སྲོང་ལ། །གང་དག་ལྟ་བར་འདོད་པ་དག །ཀྱེ་མ་སྟོན་པ་འདས་གྱུར་གྱིས། །ཚུར་ཤོག་སངས་རྒྱས་བལྟ་ཕྱིར་འདོང་། །སྐྱོབ་པ་ཤཱཀྱ་སེང་གེ་ནི། །མྱ་ངན་འདའ་བར་འགྱུར་བའི་ཚེ། །གང་གིས་མཐོང་ཞིང་ཐོས་གྱུར་པས། །དགེ་བ་མང་པོ་བྱེད་འགྱུར་ལྟར། །དེས་ནི་བསྐལ་པ་བྱེ་སྟོང་དུ། །དགེ་བ་བྱས་པ་མ་ཡིན་ཞེས། །བྱང་ཆུབ་ཡན་ལག་གནས་མཛད་པ། །བདེ་གཤེགས་མི་མཆོག་དེ་སྐད་གསུངས། །གང་དག་སྟོན་ལ་དགའ་བ་ཡི། །ལྷ་དང་གནོད་སྦྱིན་མི་རྣམས་དག །གྲགས་ཆེན་རྫོགས་པའི་སངས་རྒྱས་ལ། །བལྟ་ཕྱིར་མྱུར་དུ་ཚུར་ཤོག་ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་མངོན་པར་ཤེས་པའི་མེ་ཏོག་ཀུན་ཏུ་རྒྱས་པ་ཐོབ་པ། བཅོམ་ལྡན་འདས་ཀྱི་ཞབས་ལ་ཕྱག་འཚལ་བའི་སྲོག་ཆགས་འབུམ་ཕྲག་དུ་མས་ཡོངས་སུ་བསྐོར་ཅིང་། མདུན་དུ་བདར་ཏེ། ཡངས་པ་ཅན་གྱི་གྲོང་ཁྱེར་ཆེན་པོ་ནས་བྱུང་ནས། བཅོམ་ལྡན་འདས་ག་ལ་བ་དེར་དོང་ངོ།། །།
བམ་པོ་གཉིས་པ། བཅོམ་ལྡན་འདས་སེང་གེའི་གཟིམས་ཁྲི་ལ་སྐུའི་གློ་གཡས་པས་ཕབ་སྟེ་གཟིམས་མ་ཐག་ཏུ་དེ་ནས་ཁྱེའུ་བཞི་པོ་མཉམ་ཞིང་མི་མཉམ་པ་མེད་ལ། སྐྲའི་རྩེ་མོའི་ཆ་ཤས་ཙམ་ཡང་ལྷག་ཆད་མེད་པའི་ཆོས་དང་ལྡན་པ་དེ་དག་ཕྱོགས་བཞི་ནས་བཅོམ་ལྡན་འདས་ལ་ཐལ་མོ་སྦྱོར་ཞིང་ཕྱག་འཚལ་བའི་སྐྱེ་བོ་ཕལ་པོ་ཆེས་ཡོངས་སུ་བསྐོར་ཅིང་མདུན་དུ་བདར་ཏེ་བཅོམ་ལྡན་འདས་ག་ལ་བ་དེར་དོང་ངོ་། ། ཁྱེའུ་བཞི་པོ་དེ་དག་བཅོམ་ལྡན་འདས་ཀྱི་སྤྱན་སྔར་དོང་བའི་ཚེ་གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་གི་སྲོག་ཆགས་འབུམ་ཕྲག་མང་པོ་རྣམས་སེམས་རབ་ཏུ་དང་ཞིང་ཡིད་བསྡུས་ནས་ཐལ་མོ་སྦྱར་ཏེ་ཐམས་ཅད་ཀྱིས་ཕྱག་བྱས་སོ། །དེ་དག་དོང་བའི་ཚེ་ཕྱོགས་བཞིར་དཔག་ཚད་གཅིག་ཙམ་གྱི་ཁོ་ར་ཁོར་ཡུག་ཏུ་མེ་ཏོག་གི་ཆར་དག་མངོན་པར་རབ་ཏུ་བབ་པོ། །དེ་དག་དོང་བའི་ཚེ་ལྷ་རྣམས་ཀྱིས་ལྷའི་སིལ་སྙན་བརྒྱ་སྟོང་དག་མངོན་པར་རབ་ཏུ་གསིལ་ཅིང་ལྷའི་གླུ་དབྱངས་ཀྱི་སྒྲ་དག་ཀྱང་ཕྱུང་ངོ་། །དེའི་ཚེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཕྱོགས་བཞིར་སེང་གེའི་གཟིམས་ཁྲི་བཤམས་པ་བཞི་ཡང་བྱུང་བར་གྱུར་ཏོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་ཚིགས་སུ་བཅད་དེ་གསོལ་པ། ཐམས་ཅད་མཁྱེན་པའི་ཕྱོགས་བཞི་ན། །སེང་གེའི་གཟིམས་ཁྲི་འཐུན་པ་དང་། །རྣམ་པར་མཛེས་པ་འདི་འདྲ་བ། །གང་གི་རྒྱུ་ལགས་བཅོམ་ལྡན་འདས། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། ། ཀུན་དགའ་བོ་ཁྱོད་ཀྱིས་ཕྱོགས་བཞི་ནས་འོང་བའི་ཁྱེའུ་བཞིན་རས་ཟླ་བའི་དཀྱིལ་འཁོར་འདྲ་ཞིང་ཉི་མའི་འོད་ཟེར་ལས་ཡང་དག་པར་འདས་པའི་འོད་ཀྱིས་གླིང་བཞི་ཟིལ་གྱིས་གནོན་པ། གཟུགས་དང་། གཟི་བརྗིད་ཀྱི་འོད་གསལ་བ། ཤེས་རབ་ཀྱི་སྣང་བ་ཐོབ་པ། བརྩོན་འགྲུས་ཐོབ་པ། ཡེ་ཤེས་ཟབ་མོ་རྗེས་སུ་རྟོགས་པ། དཔལ་དང་ལྡན་པ། བློ་དང་ལྡན་པ། སྤྱོད་པ་དང་ལྡན་པ། ངོ་ཚ་ཤེས་པ་དང་ལྡན་པ། ཁྲེལ་ཡོད་པ་དང་ལྡན་པ། རྟོགས་པ་དང་ལྡན་པ། བློ་གྲོས་དང་ལྡན་པ། དྲན་པ་དང་ལྡན་པ། བརྟན་པ་དང་ལྡན་པ། ཤེས་རབ་དང་ལྡན་པ། དགེ་བའི་
རྣམ་གྲངས་ཀྱི་ཚིག་སྟོན་པ་ལ་མཁས་པ། སངས་རྒྱས་བརྒྱ་ཕྲག་དུ་མ་ལ་དགེ་བའི་རྩ་བ་དག་བསྐྱེད་པ་སངས་རྒྱས་ཀྱི་ཞིང་གཞན་དང་གཞན་དག་གི་སངས་རྒྱས་བཅོམ་ལྡན་འདས་ཀྱི་སྤྱན་སྔ་ནས་དོ་མོད་ནམ་གྱི་ཐུན་ཐ་མ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ང་གྱད་རྣམས་དང་ཉེ་བ་ན་ཡོད་པ་ཤིང་སཱ་ལ་ཟུང་གི་བར་དུ་མཐའ་ལས་འདས་པའི་ཡོངས་སུ་མྱ་ངན་ལས་འདའ་བ་དང་། བསམ་གྱིས་མི་ཁྱབ་པའི་ཡོངས་སུ་མྱ་ངན་ལས་འདའ་བ་དང་། འཇིག་རྟེན་ཐམས་ཅད་དང་མི་འདྲ་བའི་ཡོངས་སུ་མྱ་ངན་ལས་འདའ་བ་དང་། འཇིག་རྟེན་ཐམས་ཅད་ཟིལ་གྱིས་གནོན་པའི་ཡོངས་སུ་མྱ་ངན་ལས་འདའ་བ་དང་། འཇིག་རྟེན་ཐམས་ཅད་ལ་ཕན་པ་དང་བདེ་བའི་ཡོངས་སུ་མྱ་ངན་ལས་འདའ་བ་དང་། འཇིག་རྟེན་ཐམས་ཅད་ཀྱིས་རྣམ་པར་ཤེས་པར་དཀའ་བའི་ཡོངས་སུ་མྱ་ངན་ལས་འདའ་བ་དང་། འཇིག་རྟེན་ཐམས་ཅད་ཀྱི་བཏགས་པ་ཡང་དག་པར་འཇོམས་པའི་ཡོངས་སུ་མྱ་ངན་ལས་འདའ་བས་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བར་འགྱུར་རོ། །ཞེས་ང་ཡོངས་སུ་མྱ་ངན་ལས་འདའ་བ་ཐོས་ནས་འཇིག་རྟེན་གྱི་ཁམས་འདིར་སྐྱེས་ཏེ། ཕྱོགས་བཞི་ཀུན་ནས་འདུག་ཅིང་ངའི་ཡོན་ཏན་བསྔགས་པ་ཡོངས་སུ་བརྗོད་པའི་ཆོས་བསྟན་པ་ཉན་པར་འགྱུར་བ་བཞི་པོ་འདི་དག་མཐོང་ངམ། ཀུན་དགའ་བོ་དེ་ལ་གང་ཤར་ཕྱོགས་ནས་འོངས་པའི་ཁྱེའུ་ཁ་དོག་དང་ལྡན་པ། གཟི་བརྗིད་དང་ལྡན་པ། གཟུགས་དང་ལྡན་པ། འོད་འབར་བས་གསལ་བ། དཔལ་འབར་བ། སྲོག་ཆགས་འབུམ་ཕྲག་མང་པོས་ཡོངས་སུ་བསྐོར་ཅིང་ལྷ་འབུམ་གྱིས་རབ་ཏུ་མཆོད་ལ། ལྷའི་མེ་ཏོག་གི་ཆར་འབབ་པ་ཉམས་སུ་མྱོང་ཞིང་དེ་བཞིན་གཤེགས་པའི་སྤྱན་སྔར་འོང་བའི་ཁྱེའུ་འདི་ནི་ཀུན་དགའ་བོ་སྔོན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་སྒྲ་དབང་ཕྱུག་གི་སངས་རྒྱས་ཀྱི་ཞིང་ན་སྟོང་གི་འཇིག་རྟེན་ལ་དབང་སྒྱུར་ཞིང་ལྷ་དང་མིས་ལེགས་པར་མཆོད་པའི་འཁོར་ལོས་སྒྱུར་བའི་རྒྱལ་པོར་གྱུར་ཏེ། དེ་རྒྱལ་པོ་བྱེད་པ་ན་འདོད་པ་ན་སྤྱོད་པའི་ལྷ་དང་མི་རྣམས་ལ་ཆོས་སྟོན་ཅིང་ཆོས་ཡང་དག་པར་བགྲོ་བ་ཡང་བྱས་སོ། །སྲོག་ཆགས་འབུམ་ཕྲག་མང་པོ་དག་ལ་ཆོས་སྟོན་པ་ན་དགེ་བའི་རྩ་བ་དག་ཡོངས་སུ་སྨིན་པར་བྱེད་ཅིང་མངོན་
པར་ཤེས་པ་དག་ལ་མཁས་པ་དང་། ཆོས་ཀྱི་ཚུལ་རྟོགས་པར་ཁོང་དུ་ཆུད་ཅིང་འཕགས་པ་མཐའ་ཡས་པ། རྒྱུན་མི་འཆད་པ། སྣ་ཚོགས་པ། འཇིགས་པ་མེད་པ། དོན་དང་ལྡན་པའི་སྤོབས་པ་དང་ལྡན་ལ། ཆོས་ཤེས་པ་ལ་མཁས་ཤིང་ཡེ་ཤེས་ཀྱི་ཕ་རོལ་ཏུ་ཕྱིན་པར་གྱུར་ནས་ལོ་བྱེ་བ་ཕྲག་བཅྭ་བརྒྱད་དུ་ཆད་པ་མེད་པ་དང་། མཚོན་ཆ་མེད་པ་དང་། སེམས་ཅན་ཐམས་ཅད་ལ་རྣམ་པར་ཐོ་འཚམ་པ་དོན་དུ་མི་གཉེར་བར་ཆོས་ཀྱི་རྒྱལ་པོ་བྱས་སོ། །དེ་ཡང་འདོད་པའི་ཕྱིར་མ་ཡིན་ཞིང་རྒྱལ་སྲིད་ལ་གདུ་བའི་ཕྱིར་མ་ཡིན་གྱི། སེམས་ཅན་ཐམས་ཅད་ལ་ཕན་གདགས་པ་དང་ཡོངས་སུ་ཐར་བར་བྱ་བ་དང་། དུལ་བར་བྱ་བ་དང་། གདུལ་བར་བྱ་བ་དང་། དུལ་བ་དང་། གདུལ་བར་བྱ་བའི་ཕྱིར་རྒྱལ་པོ་བྱས་ཏེ། དེས་ལོ་བྱེ་བ་ཕྲག་བཅྭ་བརྒྱད་ཀྱིས་སྲོག་ཆགས་ཁྲག་ཁྲིག་ཕྲག་བཅྭ་བརྒྱད་བྱང་ཆུབ་ལ་རབ་ཏུ་བཀོད་ཅིང་ཕྱིར་མི་ལྡོག་པ་ལ་རབ་ཏུ་བཀོད་དོ། །བྱང་ཆུབ་སེམས་དཔའི་ཆོས་རྣམས་དང་ལྡན་པ་དང་། སེམས་དང་པོ་བསྐྱེད་པའི་རིགས་ཀྱི་བུ་དེ་དག་ཐམས་ཅད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པ་ལས་ཕྱིར་མི་ལྡོག་པ་ཉིད་ལ་རབ་ཏུ་བཀོད་དོ། །དེ་དུས་གཞན་ཞིག་ན་སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་དག་བགོས་ནས་ཁྱིམ་ནས་ཁྱིམ་མེད་པར་ལེགས་པར་ཁོ་ནར་རབ་ཏུ་བྱུང་ངོ་། །དེ་ལྟར་རབ་ཏུ་བྱུང་ནས་ཀྱང་ལོ་བྱེ་བ་ཕྲག་བརྒྱད་ཅུ་རྩ་གཅིག་ཏུ་ཚངས་པར་སྤྱད་པ་སྤྱོད་པ་ན་འདུག་སྟེ་མལ་དུ་ཉལ་བར་ཡང་མི་བྱེད་ན། རྨུགས་པ་དང་གཉིད་ལ་འཇུག་པ་ལྟ་སྨོས་ཀྱང་ཅི་དགོས། དེས་སྔོན་ལོ་བྱེ་བ་ཕྲག་བརྒྱད་ཅུ་རྩ་གཅིག་ཏུ་ནམ་ཡང་འདོད་པའི་རྣམ་པར་རྟོག་པའམ། གནོད་སེམས་ཀྱི་རྣམ་པར་རྟོག་པའམ། རྣམ་པར་འཚེ་བའི་རྣམ་པར་རྟོག་པ་མ་བསྐྱེད་དོ། །དེའི་བར་དུ་སྔོན་ནམ་ཡང་སྡུག་པར་འདུ་ཤེས་པའམ། མི་སྡུག་པར་འདུ་ཤེས་པའམ། གཙུག་ལག་ཁང་དུ་འདུ་ཤེས་པའམ། གཙུག་ལག་ཁང་མ་ཡིན་པར་འདུ་ཤེས་པ་མེད་ཅིང་། མི་དགེ་བ་ཡིད་ལ་བྱེད་པའི་འདུ་ཤེས་གཞན་འགའ་ཡང་མ་བསྐྱེད་པར་ཆོས་གཉིས་ལ་གནས་པར་གྱུར་ཏེ། གཉིས་གང་ཞེ་ན། མིག་མངོན་པར་སྒྲུབ་པ་མེད་པའི་ཚུལ་གྱིས་ཤའི་མིག་མངོན་པར་སྒྲུབ་པ་དང་། དེ་ལ་ཡང་མངོན་པར་ཞེན་པ་མེད་པའི་ཚུལ་གྱིས་ཆོས་ཀྱི་ཕུང་པོའི་དེ་ཁོ་ན་རྗེས་སུ་རྟོགས་པའོ། །
གཞན་ཡང་ལོ་བྱེ་བ་ཕྲག་བརྒྱད་ཅུ་རྩ་གཅིག་ཏུ་ནམ་ཡང་སར་འདུ་ཤེས་པའམ། ཆུར་འདུ་ཤེས་པའམ། མེར་འདུ་ཤེས་པའམ། རླུང་དུ་འདུ་ཤེས་པའམ། ནམ་མཁར་འདུ་ཤེས་པའམ། རྣམ་པར་ཤེས་པར་འདུ་ཤེས་པའམ། བུད་མེད་དུ་འདུ་ཤེས་པའམ། སྐྱེས་པར་འདུ་ཤེས་པའམ། བཀྲེས་པར་འདུ་ཤེས་པའམ། སྐོམ་པར་འདུ་ཤེས་པའམ། གྲོང་དུ་འདུ་ཤེས་པའམ། དགོན་པར་འདུ་ཤེས་པའམ། གྲོང་ཁྱེར་དུ་འདུ་ཤེས་པའམ། གྲོང་རྡལ་དུ་འདུ་ཤེས་པའམ། མི་འཐུན་པར་འདུ་ཤེས་པའམ། མི་འཐུན་པ་མེད་པར་འདུ་ཤེས་པའམ། དབེན་པར་འདུ་ཤེས་པའམ། བསམ་གཏན་དུ་འདུ་ཤེས་པའམ། བདག་ཏུ་འདུ་ཤེས་པའམ། གཞན་དུ་འདུ་ཤེས་པའམ། གཟུགས་སུ་འདུ་ཤེས་པའམ། གཟུགས་མེད་པར་འདུ་ཤེས་པའམ། མཐར་འདུ་ཤེས་པའམ། དབུས་སུ་འདུ་ཤེས་པའམ། སྐྱེ་བར་འདུ་ཤེས་པའམ། འགག་པར་འདུ་ཤེས་པའམ། ཉུང་ངུར་འདུ་ཤེས་པའམ། མང་པོར་འདུ་ཤེས་པའི་འདུ་ཤེས་གཞན་དག་ཀྱང་མ་བསྐྱེད་དེ། བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་མ་གཏོགས་པར་རྣམ་པར་རྟོག་པ་དང་ལྡན་པའི་འདུ་ཤེས་དེ་དག་དང་གཞན་དག་ཀྱང་ཀུན་ཏུ་མི་འབྱུང་བར་གྱུར་ཏོ། །གང་དེའི་བར་དུ་བྱང་ཆུབ་སེམས་དཔའ་དེས་སྲོག་ཆགས་ཁྲག་ཁྲིག་ཕྲག་བརྒྱད་ཅུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་པ་དེ་དག་ཐམས་ཅད་ནི་སེམས་དང་པོ་བསྐྱེད་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་གྱུར་ཏེ། དེ་དག་ཐམས་ཅད་ཀྱང་སངས་རྒྱས་ཀྱི་ཞིང་གཞན་དང་གཞན་དག་ན་བཞུགས་པའི་སངས་རྒྱས་བཅོམ་ལྡན་འདས་རྣམས་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བའི་ཕྱིར་སྐད་ཅིག་འདི་ཉིད་མ་ཐལ་བར་འཇིག་རྟེན་གྱི་ཁམས་དེ་དང་། སངས་རྒྱས་ཀྱི་ཞིང་དེ་ནས་གཉིས་ལྷན་ཅིག་མི་འགྲོགས་པར་འཕགས་ཏེ་དོང་ངོ་། །སངས་རྒྱས་ཀྱི་ཞིང་དེ་དག་ཐམས་ཅད་ན་བཞུགས་པའི་སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱང་འདི་ལྟ་སྟེ། དཔེར་ན་ད་ལྟར་དེ་བཞིན་གཤེགས་པ་ང་བཞིན་དུ་ཤཱཀྱ་ཐུབ་པ་ཞེས་བྱ་བར་མཚན་འཐུན་པ་ཤ་སྟག་སྟེ། ཐམས་ཅད་ཀྱང་སྙིགས་མ་ལྔ་དང་ལྡན་པའི་འཇིག་རྟེན་དུ་བྱུང་བ་ཤ་སྟག་ཡིན་ནོ། །སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱང་སྐད་ཅིག་དང་། ཐང་ཅིག་དང་། ཡུད་ཙམ་
འདི་ཉིད་ལ་ཡོངས་སུ་མྱ་ངན་ལས་འདའ་བ་ཆེན་པོ་ལ་མངོན་པར་ཕྱོགས་ཤིང་སེང་གེའི་གཟིམས་ཁྲི་ལ་སྐུའི་གློ་གཡས་པས་ཕབ་སྟེ་གཟིམས་པར་གྱུར་ཏོ། །སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱང་དོ་མོད་ནམ་གྱི་ཐུན་ཐ་མ་ལ་གྱད་རྣམས་དང་ཉེ་བ་ན་ཡོད་པ་ཤིང་སཱ་ལ་ཟུང་གི་བར་ཤ་སྟག་ཏུ་ཐམས་ཅད་ཡོངས་སུ་མྱ་ངན་ལས་འདའ་བར་འགྱུར་རོ། །ཀུན་དགའ་བོ་ངས་ཤའི་སྤྱན་ཐོགས་པ་མེད་པས་གང་དུ་ཉན་ཐོས་དང་རང་སངས་རྒྱས་ཐམས་ཅད་ཀྱིས་མི་རྟོགས་ཤིང་ཡུལ་མ་ཡིན་ལ་གཏིང་མི་རྟོགས་པ་དེ་དག་དང་། གཞན་ཡང་ཚད་མེད་པ་དག་རབ་ཏུ་མཁྱེན་ཏོ། །ཀུན་དགའ་བོ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་གིས་ཆོས་ཀྱི་རྣམ་གྲངས་འདི་ཐོས་ནས་སངས་རྒྱས་ཀྱི་ཡེ་ཤེས་ཐོབ་པར་བྱ་བ་དང་། ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་བྱ་བའི་ཕྱིར་ངའི་ཤའི་སྤྱན་གྱི་ཐམས་ཅད་མཁྱེན་པ་ལ་དད་པའི་སེམས་སྐྱེད་པར་བྱེད་པ་དང་། ཐ་ན་ལྷག་པའི་བསམ་པས་སེམས་སྐྱེད་པ་གཅིག་ཙམ་སྐྱེད་པར་བྱེད་ན་དེ་དང་ལྡན་པའི་རྒྱུད་ཀྱིས་སེམས་བསྐྱེད་མ་ཐག་ཏུ་བསོད་ནམས་ཀྱི་ཕུང་པོ་མང་པོ་ཡོངས་སུ་འཛིན་པར་འགྱུར་ཞིང་བསོད་ནམས་ཀྱི་ཕུང་པོ་ཚད་མེད་པ་དང་གྲངས་མེད་པ་རབ་ཏུ་འཕེལ་བར་འགྱུར་རོ། །ཀུན་དགའ་བོ་རིགས་ཀྱི་བུའམ་རིགས་ཀྱི་བུ་མོ་གང་གིས་སངས་རྒྱས་ཁྲག་ཁྲིག་ཕྲག་བཅྭ་བརྒྱད་མངོན་སུམ་དུ་གྱུར་པ་ལ་ལོ་བྱེ་བ་ཁྲག་ཁྲིག་ཕྲག་བཅྭ་བརྒྱད་དུ་བདེ་བའི་ཡོ་བྱད་ཐམས་ཅད་ཀྱིས་བཀུར་སྟིར་བྱས། བླ་མར་བྱས། རི་མོར་བྱས། མཆོད་པ་བྱས། རྗེད་པ་བྱས། གསོལ་བ་བྱས་ཀྱང་དེ་སེམས་བསྐྱེད་པ་དང་། སྨོན་ལམ་འདི་དང་བྲལ་བར་གྱུར་ན། དེས་ནི་རིགས་ཀྱི་བུ་སྔ་མ་དེས་བསོད་ནམས་ཀྱི་ཕུང་པོ་ཇི་ཙམ་ཡོངས་སུ་བཟུང་བར་འགྱུར་བ་དེ་ཙམ་དུ་བསོད་ནམས་ཀྱི་ཕུང་པོ་རབ་ཏུ་འཕེལ་བར་མི་འགྱུར་རོ། །ཀུན་དགའ་བོ་ཁྱེའུ་འདིས་ངའི་བསྟན་པ་འདི་ལ་ཉིན་མཚན་འདིས་སེམས་ཅན་རྣམས་ཀྱི་དོན་བྱེད་པར་འགྱུར་བ་ལྟར་ནི་ངའི་ཉན་ཐོས་ཤཱ་རིའི་བུ་དང་། མཽད་གལ་གྱི་བུ་དང་། གཞན་དག་གིས་ཀྱང་ངའི་གསུང་རབ་འདི་ལ་སེམས་ཅན་རྣམས་ཀྱི་དོན་མ་བྱས་སོ། །ཀུན་དགའ་བོ་གལ་ཏེ་ཁྱེད་ཅག་གིས་ཚེའི་ཚད་བསྐལ་པར་གནས་པར་གྱུར་ལ་སེམས་ཅན་རྣམས་ལ་ཆོས་སྟོན་པར་བྱེད་ཅིང་ཉིན་མཚན་དུ་ཡིད་ལ་བྱེད་པ་གཞན་མེད་པར་ཆོས་སྟོན་པར་གྱུར་ཏེ།
དེ་ལྟར་བྱས་ཀྱང་ཁྱེད་ཅག་གིས་ནི་ཁྱེའུ་འདིས་བསྟན་པ་འདིའི་ཁུར་ཇི་ཙམ་ཐོགས་པའམ། ཐོགས་པར་འགྱུར་བ་དེ་ཙམ་གྱི་ཁུར་ཐོགས་པར་མི་ནུས་སོ། །ཀུན་དགའ་བོ་དེ་ལྟར་ན་གང་དག་སེམས་ཅན་རྣམས་ལ་ཕན་པའི་དངོས་པོ་དང་། སེམས་ཅན་རྣམས་ལ་སྙིང་བརྩེ་བ་དང་། སེམས་ཅན་རྣམས་ལ་ཕན་འདོགས་པ་དང་། སེམས་ཅན་རྣམས་ལ་འདུ་ཤེས་བཏང་སྙོམས་སུ་བྱེད་པ་དག་ནི་ཡོན་ཏན་དཔག་ཏུ་མེད་པ་ཡིན་པས་ཁྱེའུ་འདི་ཡང་ཡོན་ཏན་དཔག་ཏུ་མེད་པ་ཡིན་ཏེ། ཁྱེའུ་འདི་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་པ་ཡིན་ནོ། །ཀུན་དགའ་བོ་ཁྱོད་ཀྱིས་ལྷོ་ཕྱོགས་ནས་སྟོན་ཀའི་དུས་ཀྱི་ཚེའི་ཉི་མ་འཆར་བ་འདྲ་ཞིང་ཟླ་བ་ཉ་བའི་ཟླ་བའི་དཀྱིལ་འཁོར་ཤིན་ཏུ་རྒྱས་པ་འཆར་བ་འདྲ་བའི་ཁྱེའུ་རིན་པོ་ཆེ་སྣ་ཚོགས་ལས་བྱས་པའི་དབྱིག་པས་ས་ཆེན་པོ་འདི་ལ་རྡེབས་པར་བྱེད་ཅིང་འོང་བ་མཐོང་ངམ། དེས་ས་ཆེན་པོ་ལ་རྡེབས་པ་ན་འདི་ལྟ་བུའི་སྒྲ་འབྱུང་སྟེ། འདི་ལྟ་སྟེ་དཔེར་ན་ཡུལ་མ་ག་དྷཱ་ནས་བྱུང་བའི་སྣོད་རིན་པོ་ཆེ་ལས་བྱས་པའམ། གསེར་ལས་བྱས་པའམ། དངུལ་ལས་བྱས་པ། ཤིན་ཏུ་མཐར་ཕྱིན་པར་བྱས་པ། བྱི་དོར་ལེགས་པར་བྱས་པ། ཤིན་ཏུ་ཕྱིས་པ། དྲི་མ་མེད་པ། བུག་རྡོལ་མེད་པ། ནག་ནོག་མེད་པ། དྲི་མ་བཀྲུས་པ། རྡུལ་མེད་པ། སྣུམ་བག་མེད་པ། ཡོ་བྱད་རྣམ་པ་མང་པོའི་ཡོ་བྱད་དུ་བྱས་པ། ཤིན་ཏུ་བྱང་བའི་ཡོན་ཏན་དང་ལྡན་པ། གནས་ལྔ་རབ་ཏུ་རྫོགས་པ། གནས་བཅུ་ཡོངས་སུ་སྤངས་པ། ཉེ་བའི་སྐྱོན་བཅུ་གཉིས་དང་བྲལ་བ། ལུགས་ལན་སྟོང་དུ་བརྟགས་ཤིང་གསེར་དངུལ་གྱི་སྐྱོན་དང་བྲལ་བ། ཤིན་ཏུ་དག་པ། འབྱུང་ཁུངས་བཟང་པོ་ནས་བྱུང་བ། རིགས་དང་ལྡན་པ། གསེར་གྱི་རིགས་ཁྱད་པར་ཅན་བརྒྱ་ལས་བྱས་པ། མ་ཞོམ་པ། ཡན་ལག་བརྒྱད་ལ་མཁས་པའི་མི་སྟོང་གིས་ལེགས་པར་བསྲེགས་པ། ཉེ་བའི་སྐྱོན་ཐམས་ཅད་དང་བྲལ་བ་ལས་ནི་སྡུག་བསྔལ་ཐམས་ཅད་ཉེ་བར་ཞི་བར་བྱེད་པའི་སྒྲ་འབྱུང་ངོ་། །ཀུན་དགའ་བོ་དེ་འདྲ་བའི་དེ་ལྟ་བུ་དེ་ལྟར་སྣང་བའི་ནི་དཔེར་བྱ་བ་ཙམ་དང་། ཉེ་བར་མཚོན་པ་ཙམ་དུ་ཟད་དེ། དེ་བཞིན་དུ་ཁྱེའུ་འདིས་རིན་པོ་ཆེ་སྣ་ཚོགས་ལས་བྱས་པའི་དབྱིག་པས་ས་ཆེན་པོ་འདི་ལ་རྡེབས་པ་ན་ཡང་དེ་ལྟ་བུའི་སྒྲ་འབྱུང་ངོ་། །ཀུན་དགའ་བོ་ཁྱེའུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་ཞི་བར་གནས་ཞེས་བྱ་བ་ཡིན་ཏེ།
ལྷོ་ཕྱོགས་ལོགས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བལྟ་མཛེས་རིན་ཆེན་བརྩེགས་ཞེས་བྱ་བའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་རིན་པོ་ཆེ་བཀོད་པ་ཞེས་བྱ་བ་ནས་འོངས་པ་ཡིན་ནོ། །ཀུན་དགའ་བོ་འདི་ཇི་སྙམ་དུ་སེམས། ཅིའི་ཕྱིར་ན་འཇིག་རྟེན་གྱི་ཁམས་དེ་རིན་པོ་ཆེ་བཀོད་པ་ཞེས་བྱ་ཞེ་ན། ཀུན་དགའ་བོ་འཇིག་རྟེན་གྱི་ཁམས་དེ་ན་ལོག་པ་ཉིད་དུ་ངེས་པ་དང་མ་ངེས་པའི་སེམས་ཅན་གྱི་མིང་ཡང་མེད་དེ། ཀུན་དགའ་བོ་སེམས་ཅན་དེ་དག་ཐམས་ཅད་ནི་འཇིག་པ་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པ་ཤ་སྟག་ཡིན་ནོ། །ཀུན་དགའ་བོ་སངས་རྒྱས་ཀྱི་ཞིང་དེ་ནི་བྱང་ཆུབ་སེམས་དཔའི་ཞིང་ཁོ་ན་ཡིན་ཏེ། དེ་ན་སྐྱེས་པ་དང་བུད་མེད་ཀྱི་མིང་ཡང་མེད་དོ། །ཀུན་དགའ་བོ་སེམས་ཅན་དེ་དག་ཐམས་ཅད་ནི་ཚངས་པར་སྤྱོད་པ་དང་། གཙང་བ་དང་། དྲི་ང་བ་མེད་པ་དང་། ཤེས་པའི་སྤྱོད་ཡུལ་གཙང་བ་དང་། འཁྲིག་པ་དང་བྲལ་བ་ཡིན་ཏེ། འཇིག་རྟེན་གྱི་ཁམས་དེ་ན་འཁྲིག་པའི་ཆོས་ཀྱི་མིང་ཡང་མེད་དོ། །སངས་རྒྱས་ཀྱི་ཞིང་དེ་ན་སེམས་ཅན་དེ་དག་ལ་མི་དགེ་བའི་རྣམ་པར་རྟོག་པ་དག་ཀུན་ཏུ་འབྱུང་བ་མེད་ཅིང་། ཟས་རྣམ་གཉིས་མ་གཏོགས་པར་ཟས་ཀྱི་འདུ་ཤེས་ཀྱང་མེད་དོ། །གཉིས་གང་ཞེ་ན། ཡེ་ཤེས་ཀྱིས་སྙོམས་པར་འཇུག་པའི་ཟས་དང་། སངས་རྒྱས་ཀྱི་ཆོས་ཡང་དག་པར་བརྗོད་པའི་ཟས་སོ། །ཀུན་དགའ་བོ་སངས་རྒྱས་ཀྱི་ཞིང་དེ་ན་ཐམས་ཅད་མཁྱེན་པའི་ཡེ་ཤེས་ཀྱི་ཕུང་པོ་དང་། བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ལ་རྒྱ་ཆེར་འཇུག་པ་མ་གཏོགས་པར་ཕུང་པོ་གཉིས་དང་ཐེག་པ་གསུམ་སྟོན་པ་མེད་དེ། ཀུན་དགའ་བོ་རྣམ་གྲངས་དེས་ན་འཇིག་རྟེན་གྱི་ཁམས་དེ་རིན་པོ་ཆེ་བཀོད་པ་ཞེས་བྱ་བའི་གྲངས་སུ་འགྲོའོ། །ཀུན་དགའ་བོ་སེམས་ཅན་གང་དག་འཇིག་རྟེན་གྱི་ཁམས་གཞན་དག་ནས་སངས་རྒྱས་ཀྱི་ཞིང་དེར་སྐྱེས་པ་དང་། གང་དག་འཇིག་རྟེན་གྱི་ཁམས་དེར་སྐྱེ་བར་སེམས་སྐྱེད་པར་བྱེད་པ་དེ་དག་ཐམས་ཅད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །ཀུན་དགའ་བོ་བྱང་ཆུབ་སེམས་དཔའ་གང་དག་འཇིག་རྟེན་གྱི་ཁམས་གཞན་དག་ནས་སངས་རྒྱས་ཀྱི་ཞིང་དེར་སྐྱེ་བའི་བྱང་ཆུབ་སེམས་དཔའ་དེ་དག་གིས་ནི་སྐྱེས་མ་ཐག་ཏུ་སངས་རྒྱས་ཀྱི་ཞིང་དེ་དག་ཐམས་ཅད་མངོན་པར་ཤེས་པར་འགྱུར་ཞིང་། བྱང་ཆུབ་སེམས་དཔའ་དེ་
དག་སྐད་ཅིག་དེ་དང་། ཐང་ཅིག་དེ་དང་། ཡུད་ཙམ་དེ་ལ་སངས་རྒྱས་ཀྱི་ཞིང་དེར་སངས་རྒྱས་འབྱུང་བའི་འདུ་ཤེས་ཅན་དུ་འགྱུར་རོ། །ཀུན་དགའ་བོ་དེ་བཞིན་གཤེགས་པ་བལྟ་མཛེས་རིན་ཆེན་བརྩེགས་དེ་བྱང་ཆུབ་སེམས་དཔའ་ཁྲག་ཁྲིག་ཚད་མེད་པ་དེ་དག་ལ་ཐམས་ཅད་མཁྱེན་པ་ཉིད་དང་ལྡན་པ་ཁོ་ནའི་གཏམ་མ་འདྲེས་པ་དག་སྟོན་པར་མཛད་དེ། འདི་ལྟ་སྟེ། བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་རྒྱ་ཆེར་ཡང་དག་པར་རབ་ཏུ་སྟོན་ཏོ། །ཀུན་དགའ་བོ་འཇིག་རྟེན་གྱི་ཁམས་དེའི་བསྔགས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རེ་རེའི་ཆོས་ཀྱི་ཁྱད་པར་འདི་ལྟ་སྟེ། སྨོན་ལམ་བརྩམས་པའི་སངས་རྒྱས་ཀྱི་ཞིང་གི་བཀོད་པ་དག་ངས་བརྗོད་པར་གྱུར་ན་བསྐལ་པ་སྟོང་ཕྲག་མང་པོས་ཀྱང་མཐར་ཐུག་པར་མི་འགྱུར་ཏེ། ཀུན་དགའ་བོ་ངས་བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་ཞི་བར་གནས་པ་འདི་གང་ནས་འོངས་པའི་འཇིག་རྟེན་གྱི་ཁམས་དེའི་མིང་ཙམ་ཞིག་བརྗོད་པར་ཟད་དོ། །ཀུན་དགའ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་ཞི་བར་གནས་པ་འདི་ནི་ང་ཡོངས་སུ་མྱ་ངན་ལས་འདའ་བ་ལ་བལྟ་བ་དང་། སེམས་ཅན་མང་པོ་རྣམས་སྐྱོ་བ་བསྐྱེད་པར་བྱ་བ་དང་། འཇིག་རྟེན་གྱི་ཁམས་དེའི་མིང་དང་ཡོན་ཏན་ཡོངས་སུ་བསྒྲག་པར་བྱ་བ་དང་། དེ་བཞིན་གཤེགས་པ་དེའི་བསྔགས་པ་རབ་ཏུ་བཤད་པར་བྱ་བ་དང་། བྱང་ཆུབ་སེམས་དཔའི་ཐེག་པ་པའི་སྐྱེས་བུ་དམ་པ་རྣམས་ཀྱི་ཆོས་ཀྱི་བདག་ཉིད་ཆེན་པོ་དང་། ཡང་དག་པའི་ཡོན་ཏན་ཡོངས་སུ་བསྒྲག་པར་བྱ་བ་དང་། སངས་རྒྱས་ཀྱི་ཞིང་འདིའི་སེམས་ཅན་ཚད་མེད་པ་རྣམས་དམ་པའི་ཆོས་ཡོངས་སུ་འཛིན་པར་བྱ་བ་དང་། མ་འོངས་པའི་བྱང་ཆུབ་སེམས་དཔའ་རྣམས་ཡང་དག་པར་རབ་ཏུ་དགའ་བར་བྱ་བ་དང་། ཡང་དག་པར་དད་པ་བསྐྱེད་པར་བྱ་བའི་ཕྱིར་སངས་རྒྱས་ཀྱི་ཞིང་འདིར་འོངས་སོ། །ཀུན་དགའ་བོ་སྔོན་དེ་བཞིན་གཤེགས་པ་མར་མེ་མཛད་འཇིག་རྟེན་དུ་བྱུང་བ་ན་ཁྱེའུ་འདི་འཁོར་ལོས་སྒྱུར་བའི་རྒྱལ་པོ་མ་སྐྱེས་དགྲ་ཞེས་བྱ་བར་གྱུར་ཏེ། བྱང་ཆུབ་སེམས་དཔའི་སྤྱད་པ་སྤྱོད་དོ། །ཀུན་དགའ་བོ་དེའི་ཚེ་འཁོར་ལོས་སྒྱུར་བའི་རྒྱལ་པོ་མ་སྐྱེས་དགྲ་དེ་སྲོག་ཆགས་བྱེ་བ་ཕྲག་
མང་པོ་དག་ལ་ཆོས་སྟོན་ཅིང་དགེ་བའི་རྩ་བ་དག་ཀྱང་ཡོངས་སུ་སྨིན་པར་བྱེད་དེ། དེས་ཉི་མ་འཆར་ཀ་ཙམ་གྱི་སྔ་དྲོ་གཅིག་གིས་ཀྱང་སྲོག་ཆགས་བྱེ་བ་ཕྲག་སུམ་ཅུ་རྩ་དྲུག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཉིད་ལ་རབ་ཏུ་བཀོད་ཅིང་སྐྱོན་མེད་པར་ཞུགས་ཏེ། མི་སྐྱེ་བའི་ཆོས་ལ་བཟོད་པ་དང་ལྡན་པར་བྱས་སོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཡོངས་སུ་མྱ་ངན་ལས་འདས་ནས་དེ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །དེ་ལྟར་རབ་ཏུ་བྱུང་ནས་ཀྱང་ལོ་སྟོང་ཐམ་པར་བཅོམ་ལྡན་འདས་མར་མེ་མཛད་དེའི་རྗེས་སུ་ཆོས་ཀྱི་འཁོར་ལོ་བསྐོར་ཏོ། །དེས་སེམས་ཅན་ཚད་མེད་པ་རྣམས་ཀྱི་དོན་བྱས་ནས་ཉི་མ་ཐ་མའི་ཉི་མ་ནུབ་ཀར་ཡང་སྲོག་ཆགས་བྱེ་བ་ཕྲག་དྲུག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་ཏེ། དེ་ཉིད་ཀྱི་ཉི་མ་ནུབ་ཀར་སྲོག་ཆགས་ཁྲག་ཁྲིག་ཕྲག་བདུན་ཅུ་ཟག་པ་ཟད་པ་ལ་ཡང་རབ་ཏུ་བཀོད་པར་གྱུར་ན། སློབ་པ་རྣམས་ཀྱི་མཐོང་བའི་སའམ་བསྒོམ་པའི་ས་ལ་བཀོད་པ་ལྟ་སྨོས་ཀྱང་ཅི་དགོས། ཀུན་དགའ་བོ་ངས་སངས་རྒྱས་ཀྱི་ཡེ་ཤེས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་ཞི་བར་གནས་ཀྱི་བསྔགས་པ་མང་པོ་དང་། ཁྱེའུ་འདིས་སེམས་ཅན་ཇི་སྙེད་ཅིག་གི་དོན་བྱས་པ་དག་བརྗོད་པར་གྱུར་ན། བསྐལ་པ་སྟོང་ཕྲག་མང་པོས་ཀྱང་མཐར་ཐུག་པར་མི་འགྱུར་རོ། །ཀུན་དགའ་བོ་ཁྱོད་ཀྱིས་ངའི་སྤྱན་སྔར་རིགས་ཀྱི་བུ་རབ་ཏུ་ཞི་བར་གནས་ཀྱི་སྟན་ཐིང་ཤིག་དང་། ཁྱོད་ལ་བསོད་ནམས་མང་དུ་སྐྱེ་བར་འགྱུར་རོ། །ཀུན་དགའ་བོ་སེམས་ཅན་གང་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་ཞི་བར་གནས་ཀྱི་མིང་ཐོས་པ་དེ་དག་ལ་ནི་མངོན་སུམ་དུ་སངས་རྒྱས་བྱུང་བ་ཡིན་ནོ། །ཀུན་དགའ་བོ་གང་སུ་དག་ཡོན་ཏན་བཀོད་པ་ལུང་སྟོན་པ་རྒྱ་ཆེར་བསྟན་པའི་ཆོས་འདི་བཤད་པ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བལྟ་མཛེས་རིན་ཆེན་བརྩེགས་དེ་ལ་བལྟ་བ་དང་། ཕྱག་བྱ་བ་དང་བསྙེན་བཀུར་བྱ་བ་དང་། དམ་པའི་ཆོས་མཉན་པའི་ཕྱིར་དད་པའི་སེམས་བསྐྱེད་པ་གཅིག་ཙམ་ཐོབ་པར་གྱུར་པ་དེ་དག་ཐམས་ཅད་ནི་ཀུན་དགའ་བོ་ཆོས་ཐུན་མོང་ཡིན་པའི་ཕྱིར་བཅོམ་ལྡན་འདས་དེ་ལ་བལྟ་བ་དང་། དམ་པའི་ཆོས་ཉན་པ་དང་། སངས་རྒྱས་ཀྱི་ཞིང་དེའི་བྱང་ཆུབ་སེམས་དཔའ་སེམས་དཔའ་
ཆེན་པོ་རྣམས་ཀྱང་བལྟ་བའི་ཕྱིར་སངས་རྒྱས་ཀྱི་ཞིང་དེར་སྐྱེ་བར་ངས་ལུང་བསྟན་པ་ཡིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྨོན་ལམ་གྱི་ཁྱད་པར་ནི་མ་གཏོགས་སོ། །ཀུན་དགའ་བོ་སེམས་ཅན་གང་དག་གི་རྣ་བའི་དབང་པོས་ཡོན་ཏན་བཀོད་པ་ལུང་སྟོན་པ་རྒྱ་ཆེར་བསྟན་པའི་ཆོས་བཤད་པ་འདི་ཉིད་ཐོས་པར་གྱུར་པ་དེ་དག་ཀྱང་རྙེད་པ་ལེགས་པར་རྙེད་ཅིང་ཤིན་ཏུ་ལེགས་པར་རྙེད་པ་ཡིན་ན། གང་གིས་འདི་ཐོས་ནས་དད་པ་སྐྱེད་པར་བྱེད་པ་ལྟ་སྨོས་ཀྱང་ཅི་དགོས། ཀུན་དགའ་བོ་གནས་འདི་ལྟ་བུ་དེ་དག་དང་། ཆོས་ཀྱི་ཚིག་གི་གནས་འདི་ལྟ་བུ་དེ་དག་ལེགས་པར་བསྲུང་བར་བྱ་ཞིང་ལེགས་པར་ཡིད་ལ་བྱའོ། །དེ་ཅིའི་ཕྱིར་ཞེ་ན། ཀུན་དགའ་བོ་མདོ་སྡེ་འདི་ལྟ་བུ་དག་ནི་འཛམ་བུའི་གླིང་གི་མི་རྣམས་དང་། བྱང་ཆུབ་སེམས་དཔའི་གཟུགས་བརྙན་སྟོན་པ་རྣམས་དང་། དམ་པའི་ཆོས་སྤོང་བར་བྱེད་པ་རྣམས་ཀྱིས་སྔོན་མ་ཐོས་པའི་ཕྱིར་ཏེ། ཁྱོད་ཀྱིས་ཆོས་སྤོང་བར་བྱེད་པ་དག་ནི་མིག་ལམ་དུ་ཡང་མི་སྣང་བར་བྱའོ། །ཀུན་དགའ་བོ་ཁྱོད་ཀྱིས་འདི་ནས་ནུབ་ཕྱོགས་ཀྱི་ངོས་ཀྱི་ནམ་མཁའ་ལས་རིན་པོ་ཆེ་སྣ་ཚོགས་ཀྱི་ཁང་པ་བརྩེགས་པ་ཞིག་འོང་བ་འདི་མཐོང་ངམ། གསོལ་པ། བཅོམ་ལྡན་འདས་དེ་དེ་ལྟ་ལགས་སོ། །བཀའ་སྩལ་པ། ཀུན་དགའ་བོ་ཁྱོད་ཀྱིས་ནུབ་ཕྱོགས་ནས་ཁྱེའུ་ཞིག་སེམས་ཅན་གདུལ་བར་བྱ་བའི་ཕྱིར་རྫུ་འཕྲུལ་གྱིས་རྣམ་པར་རྩེ་ཞིང་གློ་གཉིས་ཀྱིས་ས་ཆེན་པོ་འདི་འགུལ་བར་བྱེད། རབ་ཏུ་འགུལ་བར་བྱེད། གཡོ་བར་བྱེད། རབ་ཏུ་གཡོ་བར་བྱེད། ལྡེག་པར་བྱེད། རབ་ཏུ་ལྡེག་པར་བྱེད་ཅིང་ས་ཆེན་པོ་གཡོ་བས་འཇིགས་སུ་རུང་བ་དང་། སྤུ་ཟིང་ཞེས་བྱེད་པ་ཀུན་ཏུ་སྟོན་པར་བྱེད་ཅིང་འོང་བ་མཐོང་ངམ། གསོལ་པ། བཅོམ་ལྡན་འདས་དེ་དེ་ལྟ་ལགས་སོ། །བདེ་བར་གཤེགས་པ་དེ་དེ་ལྟ་ལགས་ཏེ། བཅོམ་ལྡན་འདས་རྫུ་འཕྲུལ་གྱི་རྣམ་པར་འཕྲུལ་པ་བགྱིད་ཅིང་མཆི་བའི་ཁྱེའུ་འདི་མཐོང་ལགས་སོ། །བཀའ་སྩལ་པ། ཀུན་དགའ་བོ་རིགས་ཀྱི་བུ་འདིའི་མདུན་ནས་རིན་པོ་ཆེ་སྣ་ཚོགས་ཀྱི་ཁང་པ་བརྩེགས་པ་འོང་བ་གང་ཡིན་པ་འདིས་སངས་རྒྱས་ཀྱི་ཞིང་འདི་དྲི་སྣ་ཚོགས་ཀྱིས་ཀུན་ཏུ་གང་བར་གྱུར་ཏོ། །གསོལ་པ། བཅོམ་ལྡན་འདས་དེ་དེ་ལྟ་ལགས་སོ། །བཀའ་སྩལ་པ། ཀུན་དགའ་བོ་དེ་ནི་རིགས་ཀྱི་བུ་འདིའི་ཡེ་ཤེས་ཀྱི་སྟོབས་བསྐྱེད་པ་ཡིན་ཏེ། དེས་ན་ཁང་པ་བརྩེགས་
པ་འདི་ལས་དེ་ལྟ་བུའི་དྲི་འབྱུང་ངོ་། །ཀུན་དགའ་བོ་ཁྱོད་ཀྱིས་སྒྲ་བཞི་པོ་འདི་ལྟ་སྟེ། སྟོང་པ་ཉིད་ཅེས་བྱ་བ་དང་། དངོས་པོ་མེད་པ་ཞེས་བྱ་བ་དང་། ཉེ་བར་ཞི་བ་ཞེས་བྱ་བ་དང་། སངས་རྒྱས་ཞེས་བྱ་བ་འབྱུང་བ་འདི་དག་ཐོས་སམ། གསོལ་པ། བཅོམ་ལྡན་འདས་དེ་དེ་ལྟ་ལགས་སོ། །བཀའ་སྩལ་པ། ཀུན་དགའ་བོ་སྒྲ་འདི་དག་ནི་ཁྱེའུ་འདིའི་སྤུའི་ཁུང་བུ་དག་ནས་འབྱུང་སྟེ། ཀུན་དགའ་བོ་སྒྲ་འདི་དག་ཐོས་པས་སྲོག་ཆགས་ཁྲག་ཁྲིག་ཕྲག་དྲུག་ཅུ་རྩ་བརྒྱད་ཀྱི་དོན་བྱས་སོ། །སྟོང་གི་འཇིག་རྟེན་གྱི་ཁམས་ཀྱི་སེམས་ཅན་མང་པོ་རྣམས་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །ཀུན་དགའ་བོ་སངས་རྒྱས་ཀྱི་སྒྲ་གཅིག་པུ་ཐོས་པའི་བྱང་ཆུབ་སེམས་དཔའ་བྱེ་བ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཉིད་ལ་ངེས་པར་ཞུགས་སོ། །གང་དག་སངས་རྒྱས་ཀྱི་ཞིང་འདིའི་ལྷ་དང་མིར་བཅས་པའི་སྐྱེ་དགུ་དག་ལས་ལྷ་དང་། མི་ཁྲག་ཁྲིག་འབུམ་ཕྲག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པ་ལས་ཕྱིར་མི་ལྡོག་པ་ཉིད་ལ་གནས་པར་གྱུར་ཏོ། །ཀུན་དགའ་བོ་རིགས་ཀྱི་བུ་འདི་ནི་དེ་བཞིན་གཤེགས་པ་ང་ཡོངས་སུ་མྱ་ངན་ལས་འདའ་བ་བལྟ་བའི་ཕྱིར་ནུབ་ཕྱོགས་ལོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགའ་བའི་དབང་ཕྱུག་ཅེས་བྱ་བའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་དགའ་སྤུ་ཞེས་བྱ་བ་ནས་སངས་རྒྱས་ཀྱི་ཞིང་འདིར་འོངས་པ་ཡིན་ཏེ། ཀུན་དགའ་བོ་རིགས་ཀྱི་བུ་འདི་སངས་རྒྱས་ཀྱི་ཞིང་འདིར་འོངས་མ་ཐག་ཏུ་འདིས་སེམས་ཅན་ཚད་མེད་པ་རྣམས་ཀྱི་དོན་བྱས་ཏེ། སངས་རྒྱས་ཀྱི་མཛད་པ་བྱས་ཤིང་འདིས་ཆོས་ཀྱི་འཁོར་ལོ་ཡང་རྗེས་སུ་བསྐོར་ཏོ། །ཀུན་དགའ་བོ་བསྐལ་པ་གྲངས་མེད་པ་ཚུན་ཆད་ནས་རིགས་ཀྱི་བུ་འདིའི་སྤུའི་ཁུང་བུ་དག་ནས་སྒྲ་བཞི་པོ་འདི་ལྟ་སྟེ། སྟོང་པ་ཉིད་ཀྱི་སྒྲ་དང་། དངོས་པོ་མེད་པའི་སྒྲ་དང་། ཉེ་བར་ཞི་བའི་སྒྲ་དང་། སངས་རྒྱས་ཀྱི་སྒྲ་འདི་དག་འབྱུང་སྟེ། སྒྲ་རེ་རེས་ཀྱང་སེམས་ཅན་ཚད་མེད་པ་རྣམས་ཀྱི་དོན་བྱས་སོ། །ཀུན་དགའ་བོས་གསོལ་པ། བཅོམ་ལྡན་འདས་རིགས་ཀྱི་བུ་འདིས་དགེ་བའི་རྩ་བ་ཅི་ཞིག་བསགས་ལགས་ན་དེས་ད་ལྟར་འདིའི་སྤུའི་ཁུང་བུ་དག་ནས་འདི་
ལྟ་བུའི་སྒྲ་དག་འབྱུང་བར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་སྔོན་བྱུང་བ་འདས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲི་མེད་སྤྱན་ཞེས་བྱ་བ། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། རིགས་ཀྱི་བུ་འདི་དེའི་གསུང་རབ་ལ་དགེ་སློང་ཡེ་ཤེས་དགའ་བ་ཞེས་བྱ་བར་གྱུར་ནས་དེས་དེ་བཞིན་གཤེགས་པ་དེའི་སྤྱན་སྔ་ནས་ཡེ་ཤེས་ཀྱི་ཚིག་དང་། རྟོགས་པར་དཀའ་བའི་ཚིག་དང་། དོན་འབྱུང་བ་སྟོན་པའི་ཚིག་འདི་ལྟ་སྟེ། ཆོས་ཐམས་ཅད་སྐྱེ་བ་དང་། འགག་པ་མེད་པ་དང་། ཆོས་ཐམས་ཅད་དངོས་པོ་མེད་པ་དང་། ཆོས་ཐམས་ཅད་རང་བཞིན་གྱིས་ཉེ་བར་ཞི་བ་དང་། སངས་རྒྱས་ཐམས་ཅད་སངས་རྒྱས་གཅིག་པ་ཞེས་བྱ་བ་དག་ཐོས་ནས་ཞག་བདུན་དུ་ཡོངས་སུ་སྐྱོ་བ་མེད་པ་དང་། བརྩོན་པ་མི་གཏོང་བ་དང་། ཡིད་ལ་བྱེད་པ་གཞན་མེད་པར་ཚིག་བཞི་པོ་དེ་དག་ལུས་ལ་ཞེན་པ་དང་། ཤིན་ཏུ་བརྟན་པ་དང་། ཤིན་ཏུ་ཞག་པ་དང་། ཁ་ཏོན་བྱང་བ་དང་། ཡིད་ཀྱིས་ལེགས་པར་བརྟགས་པ་དང་། མཐོང་བས་ཤིན་ཏུ་རྟོགས་པར་བྱས་ཏེ་གནས་སོ། །ཀུན་དགའ་བོ་དགེ་སློང་དེས་དོན་གྱི་ཚིག་བསྟན་པ་བཞི་པོ་དེ་དག་གིས་སངས་རྒྱས་བྱེ་བ་སྙེད་ཀྱིས་གསུངས་པའི་ཆོས་བསྟན་པ་རྣམས་ལ་རྗེས་སུ་ཞུགས་ཏེ། བཟུང་ཞིང་རྟོགས་པར་བྱས་ནས་དེ་སེམས་ཅན་རྣམས་ལ་སྙིང་བརྩེ་བའི་ཕྱིར་གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དུ་འོངས་ཏེ་ཆོས་བསྟན་ཏོ། །ཀུན་དགའ་བོ་དེའི་ཚེ་ཆོས་སྨྲ་བའི་དགེ་སློང་ཡེ་ཤེས་དགའ་བ་ཞེས་བྱ་བར་གྱུར་པ་དེས་ལས་དེའི་འབྲས་བུ་རྣམ་པར་སྨིན་པ་ལུས་ལ་ཞེན་པ་དང་། མང་དུ་ཐོས་པས་ལོ་དྲུག་ཏུ་ལྷག་པའི་བསམ་པས་ཆོས་བསྟན་པས་ན་བསྐལ་པ་གྲངས་མེད་པ་ཚུན་ཆད་ནས་དེའི་སྤུའི་ཁུང་བུ་དག་ནས་དེ་ལྟ་བུའི་སྒྲ་དག་དང་ལྡན་པའི་རྫུ་འཕྲུལ་དེ་ཉམས་སུ་མྱོང་བར་གྱུར་ཅིང་དེའི་ལུས་ལས་ཀྱང་སྐྱེ་བོ་མང་པོའི་དོན་བྱེད་པའི་ཆོས་ཀྱི་སྒྲ་བཞི་པོ་འདི་ལྟ་སྟེ། སྟོང་པ་ཉིད་ཀྱི་སྒྲ་དང་། དངོས་པོ་མེད་པའི་སྒྲ་དང་། ཉེ་བར་ཞི་
བའི་སྒྲ་དང་། སངས་རྒྱས་ཞེས་བྱ་བའི་སྒྲ་དེ་དག་འབྱུང་བར་གྱུར་ཏེ། ཀུན་དགའ་བོ་དེའི་ཕྱིར་བསྐལ་པ་གྲངས་མེད་པ་ཚུན་ཆད་ནས་ཁྱེའུ་འདིའི་སྤུའི་ཁུང་བུ་དག་ནས་སྒྲ་བཞི་པོ་འདི་དག་འབྱུང་བར་གྱུར་ཏོ། །ཀུན་དགའ་བོ་འཛམ་བུའི་གླིང་གི་མི་གང་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་དམིགས་མེད་ཀྱི་མིང་ཐོས་པ་དེ་དག་ཀྱང་རྙེད་པ་ལེགས་པར་རྙེད་ཅིང་ཤིན་ཏུ་ལེགས་པར་རྙེད་པ་ཡིན་ན། གང་དག་གིས་ཆོས་སྟོན་པ་ཐོས་པ་དག་ལྟ་སྨོས་ཀྱང་ཅི་དགོས། ཀུན་དགའ་བོ་ལྷ་དང་མི་རྣམས་ཀྱི་སྐྱེས་པའམ། བུད་མེད་གང་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་དམིགས་མེད་ཀྱི་མིང་ཐོས་ཤིང་ཐོས་ནས་ཀྱང་དད་པ་ཐོབ་པར་གྱུར་པ་དེ་དག་ཀྱང་ཐོས་མ་ཐག་ཏུ་ཡོན་ཏན་བསམ་གྱིས་མི་ཁྱབ་པ་ཡོངས་སུ་འཛིན་པར་འགྱུར་ན། གང་དག་གིས་ཤའི་མིག་གིས་མངོན་སུམ་དུ་མཐོང་བ་དག་ལྟ་སྨོས་ཀྱང་ཅི་དགོས། དེ་ཅིའི་ཕྱིར་ཞེ་ན། ཀུན་དགའ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་དམིགས་མེད་ནི་བྱང་ཆུབ་སེམས་དཔའི་སའི་ཡོན་ཏན་དཔག་ཏུ་མེད་པ་དག་ཐོབ་པ་ཡིན་པའི་ཕྱིར་རོ། །ཀུན་དགའ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་དམིགས་མེད་འདི་ནི་དེ་བཞིན་གཤེགས་པ་ང་ཡོངས་སུ་མྱ་ངན་ལས་འདའ་བ་ལ་བལྟ་བར་འདོད་པའི་ཕྱིར་འོངས་པ་ཡིན་གྱིས། ཀུན་དགའ་བོ་ཁྱོད་ཀྱིས་དེ་བཞིན་གཤེགས་པའི་སྤྱན་སྔ་གང་དུ་རིགས་ཀྱི་བུ་འདི་འདུག་པར་འགྱུར་བར་བྱང་ཆུབ་སེམས་དཔའ་སེམས་དཔའ་ཆེན་པོ་དམིགས་མེད་ཀྱི་སྟན་ཐིང་ཤིག་དང་། དེས་ཁྱོད་ལ་ཡུན་རིང་པོར་ཕན་པ་དང་བདེ་བ་དང་མངོན་པར་ཤེས་པ་མྱུར་བ་ཉིད་དུ་ཡང་འགྱུར་རོ། །ཀུན་དགའ་བོ་འདིའི་སྟན་བཏིང་བ་ལས་བྱུང་བའི་ལས་ཀྱི་རྣམ་པར་སྨིན་པས་ཁྱོད་སྙོམས་པར་འཇུག་པ་ལ་བདེ་བར་གནས་ཤིང་སེམས་བསྐྱེད་པའི་སྐད་ཅིག་གཅིག་གིས་ཟང་ཟིང་མེད་པའི་ཆོས་འཕགས་པ་དགྲ་བཅོམ་པ་ཉིད་མངོན་སུམ་དུ་བྱེད་པར་ཡང་འགྱུར་རོ། །ཀུན་དགའ་བོ་གལ་ཏེ་ཁྱོད་ཉན་ཐོས་ཀྱི་ས་ལ་ངེས་པར་ཞུགས་པར་མ་གྱུར་ན་ནི་ཁྱོད་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཡན་ལག་ཏུ་གྱུར་པའི་དགེ་བའི་རྩ་བ་འདིས་སངས་རྒྱས་ཀྱི་ཆོས་རྣམས་རྗེས་སུ་འཐོབ་པར་ཡང་ངས་ལུང་སྟོན་པར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་དགེ་སློང་ངམ། དགེ་
སློང་མའམ། དགེ་བསྙེན་ནམ། དགེ་བསྙེན་མའམ། ལྷའམ། ཀླུའམ། གནོད་སྦྱིན་ནམ། དྲི་ཟའམ། ལྷ་མ་ཡིན་ནམ། ནམ་མཁའ་ལྡིང་ངམ། མི་འམ་ཅིའམ། ལྟོ་འཕྱེ་ཆེན་པོའམ། མི་འམ་མི་མ་ཡིན་པ་གང་ཡིན་པའམ། སེམས་ཅན་གཞན་གང་ཡང་རུང་བ་དག་གིས་ཞི་བ་བཤད་པ་ལུང་བསྟན་པ་འདི་ཐོས་ནས་དད་པ་རབ་ཏུ་འཐོབ་པར་འགྱུར་བའི་ཕྱིར་རོ། །ཀུན་དགའ་བོ་གང་དག་ཞི་བ་བཤད་པ་ལུང་བསྟན་པ་འདི་ཉན་པར་འདོད་པ་དག་གིས་དེ་བཞིན་གཤེགས་པའམ། དེ་བཞིན་གཤེགས་པའི་ཉན་ཐོས་གང་དུ་འདུག་ནས་ཞི་བ་བཤད་པ་ལུང་བསྟན་པ་འདི་འཆད་པར་འགྱུར་བའི་ཆོས་ཀྱི་སྟན་བཤམ་པར་བྱ་སྟེ། ཀུན་དགའ་བོ་དེས་སྟན་བཤམས་མ་ཐག་ཏུ་སྟན་ཕུན་སུམ་ཚོགས་པ་བཅུ་ཡོངས་སུ་འཛིན་པར་འགྱུར་རོ། །བཅུ་གང་ཞེ་ན། འཁོར་ལོས་སྒྱུར་བའི་སྟན་འཐོབ་པ་དང་། བརྒྱ་བྱིན་གྱི་སྟན་འཐོབ་པ་དང་། ཚངས་པའི་སྟན་འཐོབ་པ་དང་། སྐྱེ་དགུའི་བདག་པོའི་སྟན་འཐོབ་པ་དང་། ཚེ་རབས་དེ་དང་དེ་དག་ཏུ་དེ་བཞིན་གཤེགས་པའི་བསྟན་པ་ལ་སྟན་འཐོབ་པ་དང་། དབང་བསྐུར་བ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་ཀྱི་སྙིང་པོར་བྱང་ཆུབ་ཀྱི་ཤིང་དྲུང་དུ་སོང་བའི་སེང་གེའི་ཁྲི་སྟན་འཐོབ་པ་དང་། ཐམས་ཅད་མཁྱེན་པའི་ཡེ་ཤེས་རྟོགས་པའི་སངས་རྒྱས་ཀྱི་ཁྲི་སྟན་བླ་ན་མེད་པ་འཐོབ་པ་དང་། ཆོས་ཀྱི་འཁོར་ལོ་སྐོར་བ་ན་ཆོས་ཀྱི་འཁོར་ལོ་བླ་ན་མེད་པ་སྐོར་བའི་ཁྲི་སྟན་འཐོབ་པ་དང་། དེ་བཞིན་གཤེགས་པའི་ཆོ་འཕྲུལ་ཆེན་པོ་ཀུན་ཏུ་སྟོན་པ་ན་ལྷ་བྱེ་བ་ཕྲག་སྟོང་གིས་འདུས་བྱས་པ་འཇིག་རྟེན་ཐམས་ཅད་ལས་མངོན་པར་འཕགས་ཤིང་ཟིལ་གྱིས་མི་ནོན་ལ། བླ་ན་མེད་པའི་རྫུ་འཕྲུལ་དང་ལྡན་པའི་སེང་གེའི་ཁྲི་སྟན་འཐོབ་པ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདའ་བའི་དུས་ཀྱི་ཚེ་འདུ་བྱེད་ཐམས་ཅད་རབ་ཏུ་ཞི་བར་བྱེད་པ་རྡོ་རྗེ་ལྟ་བུའི་ཏིང་ངེ་འཛིན་ལ་བཞུགས་པ་ན་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། མིའམ་ཅི་དང་། ལྟོ་འཕྱེ་ཆེན་པོ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་དང་། མི་མ་ཡིན་པ་རྣམས་ཀྱི་ཡིད་རབ་ཏུ་དང་བ་སྐྱེད་པར་བྱེད་པ་དེ་བཞིན་གཤེགས་པའི་ཐ་མའི་ཁྲི་སྟན་འདི་འཐོབ་པར་འགྱུར་བ་སྟེ། ཀུན་དགའ་བོ་
སེང་གེའི་ཁྲི་སྟན་བཅུ་པོ་དེ་དག་འཐོབ་པར་ཤེས་པར་བྱའོ། །ཀུན་དགའ་བོ་དེ་བཞིན་གཤེགས་པའམ། དེ་བཞིན་གཤེགས་པའི་ཉན་ཐོས་ཞི་བ་བཤད་པ་ལུང་བསྟན་པ་འདི་འཆད་པ་ན། རིགས་ཀྱི་བུའམ། རིགས་ཀྱི་བུ་མོ་གང་གིས་ཆོས་སྨྲ་བ་ལ་སེམས་དང་བས་གུས་པར་བྱས་ཏེ། དགའ་བ་དང་། དད་པ་དང་། གུས་པས་ཆོས་ཀྱི་སྟན་ཤོམ་པར་བྱེད་པ་དེས་ནི་སེང་གེའི་ཁྲི་སྟན་བཅུ་པོ་དེ་དག་འཐོབ་པ་ཡོངས་སུ་འཛིན་པར་འགྱུར་རོ། །ཀུན་དགའ་བོ་ཁྱོད་ཀྱིས་རིགས་ཀྱི་བུ་དམིགས་མེད་ལ་ཐལ་མོ་སྦྱོར་ཅིག་དང་། དེས་ཁྱོད་ལ་དོན་དང་། ཕན་པ་དང་། བདེ་བར་འགྱུར་ཞིང་གང་གིས་ཁྱོད་མངོན་པར་ཤེས་པ་མྱུར་བ་ཉིད་དུ་འགྱུར་བའི་བསོད་ནམས་ཆེན་པོ་ཡང་ཁྱོད་ཀྱིས་ཡོངས་སུ་འཛིན་པར་འགྱུར་རོ། །དེ་ནས་ཚེ་དང་ལྡན་པ་ཀུན་དགའ་བོས་དེའི་ཚེ་རིགས་ཀྱི་བུ་དམིགས་མེད་ཀྱི་ཆོས་ཀྱི་སྟན་བཤམས་ནས་སེམས་རབ་ཏུ་དང་བས་ཞེ་ས་དང་བཅས། གུས་པ་དང་བཅས་པར་བྱང་ཆུབ་སེམས་དཔའ་དམིགས་མེད་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དམིགས་མེད་དཔའ་བོ་གླང་པོ་ཆེ། །དུལ་ཞིང་མཉམ་བཞག་སེམས་ཅན་ཆེ། །ཤེས་རབ་ཆེན་པོ་འོད་བྱེད་ལ། །བདག་ནི་ཐལ་མོ་སྦྱོར་བར་བགྱིད། །ཡེ་ཤེས་བརྩོན་འགྲུས་འབྱུང་བའི་གནས། །ཤེས་རབ་བརྩེགས་ཤིང་མཉམ་བཞག་པ། །མཚུངས་མེད་བརྟན་པ་འདི་ལ་ནི། །དེ་རིང་ཐལ་མོ་སྦྱར་བར་བགྱི། །དེ་ནས་བཅོམ་ལྡན་འདས་ཀྱིས་དེའི་ཚེ་ཚེ་དང་ལྡན་པ་ཀུན་དགའ་བོ་ལ་ཚིགས་སུ་བཅད་དེ་བཀའ་སྩལ་པ། དམིགས་མེད་འདི་ལ་མཆོད་པའི་ཕྱིར། །ཁྱོད་ཀྱིས་ཐལ་མོ་སྦྱར་བྱས་པའི། །རྣམ་སྨིན་ཇི་སྙེད་འཛིན་པ་དེ། །གཽ་ཏམ་བུ་ལ་བཤད་པར་བྱ། །ཀུན་དགའ་བོ་ཁྱོད་ཐལ་མོ་སྦྱར་བ་དེའི་རྣམ་པར་སྨིན་པས་ང་ཡོངས་སུ་མྱ་ངན་ལས་འདས་པ་ན་གྲོང་དང་གྲོང་ཁྱེར་དང་གྲོང་རྡལ་དང་ཡུལ་འཁོར་དང་། རྒྱལ་པོའི་ཕོ་བྲང་འཁོར་དག་ཏུ་ཉན་ཐོས་རྣམས་ལ་སྟོན་པའི་བྱ་བ་བྱེད་པར་འགྱུར་ཞིང་ཁྱོད་དེ་དང་དེ་དག་ཏུ་འཇུག་པ་དང་འབྱུང་བ་དང་འགྲེང་བ་དང་འཆག་པ་དང་ཉལ་བ་དང་འདུག་པ་དང་སྤྱོད་ལམ་ཐམས་ཅད་དུ་འཇིག་རྟེན་ན་སེམས་དང་ལྡན་པ་དང་། སེམས་མེད་པའི་འབྱུང་བ་ཐམས་ཅད་ཀྱང་ཁྱོད་ག་ལ་བ་དེ་ལོགས་སུ་འདུད་
པར་འགྱུར་རོ། །འདི་ལྟ་སྟེ། སྐྱེས་པ་དང་། བུད་མེད་དང་། ལྷའི་བུ་མོ་དང་། སྤྱོད་པ་པ་དང་། ཀུན་ཏུ་རྒྱུ་དང་། དགེ་སྦྱོང་དང་། བྲམ་ཟེ་དང་། རྒྱལ་པོ་དང་། བློན་པོ་ཆེན་པོ་དང་། ཞང་བློན་དང་། ཞང་བློན་གྱི་གཡོག་གཉུག་མ་དང་། ཚོང་དཔོན་དང་། གྲོང་མི་དང་། ལྗོངས་ཀྱི་མི་དང་། ཁྱིམ་བདག་རྣམས་དང་། གཞན་ཡང་གང་དག་མིར་གྱུར་པའི་སོ་སོའི་སྐྱེ་བོ་རྣམས་དང་། དེ་བཞིན་དུ་དུད་འགྲོའི་སྐྱེ་གནས་སུ་སྐྱེས་པ་གླང་པོ་ཆེ་དང་། རྟ་དང་། རི་དགས་དང་། ཕྱུགས་དང་། བྱ་དག་གིས་ཁྱོད་མཐོང་ན་དད་པ་འཐོབ་པར་འགྱུར་རོ། །དེ་བཞིན་དུ་རྩྭ་དང་། ཤིང་གེལ་པ་དང་། སྨན་དང་། ནགས་ཚལ་དག་དང་། མེ་ཏོག་ཡོད་པ་དག་དང་། འབྲས་བུ་ཡོད་པ་དག་ཀྱང་ཁྱོད་ག་ལ་བ་དེ་ལོགས་སུ་རབ་ཏུ་འདུད་པར་འགྱུར་རོ། །དེ་བཞིན་དུ་ཁང་ཁྱིམ་དང་། གཞལ་མེད་ཁང་དང་། ཁང་པ་བརྩེགས་པ་དང་། ཁང་བཟངས་དང་། པུ་ཤུ་དང་། སྐར་ཁུང་དང་། རྟ་བབས་དག་ཀྱང་ཁྱོད་ཀྱི་བསོད་ནམས་ཀྱི་གཟི་བརྗིད་ཀྱི་ཟིལ་གྱིས་ནོན་ཅིང་ཁྱོད་ག་ལ་བ་དེ་ལོགས་སུ་རབ་ཏུ་འདུད་པར་འགྱུར་ཏེ། ཀུན་དགའ་བོ་འདི་ལྟ་སྟེ་དཔེར་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སྒྲིབ་པ་མེད་པའི་རྣམ་པར་ཐར་པ་མངོན་སུམ་དུ་མཛད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ན་བྱང་ཆུབ་ཀྱི་སྙིང་པོའི་ཉེ་འཁོར་གྱི་རྩྭ་དང་། ཤིང་གེལ་པ་དང་། སྨན་དང་། ནགས་ཚལ་དང་། མེ་ཏོག་ཡོད་པ་དག་དང་། འབྲས་བུ་ཡོད་པ་དག་དང་། གོང་མ་བཞིན་དུ་སྦྱར་ཏེ། མི་དང་མི་མ་ཡིན་པའི་བར་དག་གིས་དེ་བཞིན་གཤེགས་པ་ག་ལ་བ་དེ་ལོགས་སུ་རབ་ཏུ་བཏུད་པར་གྱུར་ཏོ། །ཀུན་དགའ་བོ་དེ་བཞིན་དུ་ཁྱོད་ཀྱིས་ཀྱང་རིགས་ཀྱི་བུ་དམིགས་མེད་ལ་ཐལ་མོ་སྦྱར་ཅིང་ལུས་བཏུད་པའི་དགེ་བའི་རྩ་བ་འདིས་ཁྱོད་ཀྱི་སྤྱོད་ལམ་ཐམས་ཅད་དུ་མི་དང་། མི་མ་ཡིན་པ་དང་། ནགས་ཚལ་ཐམས་ཅད་ཁྱོད་ག་ལ་བ་དེ་ལོགས་སུ་འདུད་པ་དང་། རབ་ཏུ་འདུད་པ་དང་། མངོན་པར་རབ་ཏུ་འདུད་པར་འགྱུར་རོ། །ཀུན་དགའ་བོ་རིགས་ཀྱི་བུའམ་རིགས་ཀྱི་བུ་མོ་གང་ལ་ལས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའམ། ད་ལྟར་མངོན་སུམ་དུ་གྱུར་
ཅིང་བཞུགས་པ་ན་ཆོས་བཀོད་པ་ལུང་སྟོན་པ་འདི་ཐོས་ནས། ལྷག་པའི་བསམ་པས་ཐལ་མོ་གཅིག་ཙམ་སྦྱོར་བར་བྱེད་པ་དང་། ངེས་པར་རྟོག་ཅིང་མོས་པར་བྱེད་པ་དེ་དག་ནི་ངས་བསྟན་པའི་རྣམ་པར་སྨིན་པ་གང་ཡིན་པ་དེ་ལྟ་བུ་དག་ཡོངས་སུ་འཛིན་པར་འགྱུར་རོ། །ཀུན་དགའ་བོ་དེ་ལྟ་མོད་ཀྱི་སེམས་ཅན་གང་དག་གིས་ཆོས་ཀྱི་རྣམ་གྲངས་འདི་ཐོས་པར་འགྱུར་བ་དང་། གང་དག་གིས་མདོ་སྡེ་འདི་ལྟ་བུ་འདི་ལན་གཅིག་གམ། ལན་གཉིས་ཐོས་པར་འགྱུར་བ་དེ་དག་ཀྱང་ཉུང་ན། གང་དག་གིས་འདི་ལྟ་བུ་ཐོས་ནས་དད་པ་འཐོབ་པར་འགྱུར་བ་དང་། གང་དག་ལྷག་པའི་བསམ་པས་མོས་པར་འགྱུར་བ་དང་། ངེས་པར་རྟོག་པར་འགྱུར་བ་དང་། ཡང་དག་པའི་འདུ་ཤེས་སྐྱེད་པར་འགྱུར་བ་དང་། སོམ་ཉི་མེད་པར་འགྱུར་བ་དང་། ཐེ་ཙོམ་མེད་པར་འགྱུར་བ་ལྟ་སྨོས་ཀྱང་ཅི་དགོས། རིགས་ཀྱི་བུའམ་རིགས་ཀྱི་བུ་མོ་དེ་དག་ཐམས་ཅད་ནི་ངས་སངས་རྒྱས་ཀྱི་སྤྱན་གྱིས་གཟིགས་ཤིང་སངས་རྒྱས་ཀྱི་ཡེ་ཤེས་ཀྱིས་མཁྱེན་ཏེ། དེ་དག་གིས་ནི་སངས་རྒྱས་གཅིག་ལ་བསྙེན་བཀུར་བྱས་པ་མ་ཡིན་ཞིང་། དེ་དག་གིས་ནི་སངས་རྒྱས་གཅིག་ལ་དགེ་བའི་རྩ་བ་བསྐྱེད་པ་མ་ཡིན་ཏེ། རིགས་ཀྱི་བུ་དང་རིགས་ཀྱི་བུ་མོ་དེ་དག་ཐམས་ཅད་ནི་གང་དག་ད་ལྟར་ངའི་མངོན་སུམ་དུ་འཁོར་འདི་ཉིད་དུ་འདུས་ཏེ་འདུག་པ་དང་། ངའི་ཡོངས་སུ་མྱ་ངན་ལས་འདས་པ་ཆེན་པོ་བལྟ་བའི་ཕྱིར་འདིར་འོངས་པ་དག་བཞིན་དུ་ཀུན་དགའ་བོ་དེ་དག་ཀྱང་དེང་ཕྱིན་ཆད་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པ་བྱང་ཆུབ་ཀྱི་སྙིང་པོར་གཤེགས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཡོངས་སུ་མྱ་ངན་ལས་འདའ་བའི་བར་དག་ལ་མཆོད་པ་དང་བསྙེན་བཀུར་ཆེན་པོ་བྱེད་པར་འགྱུར་རོ། །དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པའི་ཡོངས་སུ་མྱ་ངན་ལས་འདས་པ་ཆེན་པོ་ཡང་མཐོང་བར་འགྱུར་རོ། །དེ་བཞིན་གཤེགས་པ་དེའི་སྤྱན་སྔར་ཁྱེའུ་བཞི་འོང་བར་འགྱུར་བ་དག་ཀྱང་མཐོང་བར་འགྱུར་ཞིང་ད་ལྟར་ངའི་སྤྱན་སྔ་ན་ཇི་ལྟ་བ་དེ་བཞིན་དུ་ཆོས་ཀྱང་ཐོས་པར་འགྱུར་རོ། །དེའི་ཚེ་ན་བྱང་ཆུབ་སེམས་དཔའ་སེམས་དཔའ་
ཆེན་པོ་དམིགས་མེད་ཀྱི་སྤུའི་ཁུང་བུ་དག་ནས་ཆོས་ཀྱི་སྒྲ་སྐད་རྒྱ་ཆེན་པོ་འབྱུང་བར་འགྱུར་བ་དག་ཀྱང་ཐོས་པར་འགྱུར་ཞིང་ཐོས་ནས་ཀྱང་དགའ་བ་སྐྱེ་བར་འགྱུར་རོ། །ཀུན་དགའ་བོ་དེ་ལྟ་བས་ན་ཁྱོད་ཀྱིས་དོན་ངེས་པར་འབྱུང་བའི་མདོ་སྡེ་འདི་ལྟ་བུ་བཤད་པ་དག་ལ་ཡང་དང་ཡང་དུ་ལུས་བཏུད་དེ་ཐལ་མོ་སྦྱར་བར་བྱ་ཞིང་སེམས་ཀྱིས་དད་པ་བསྐྱེད་པར་ཡང་བྱའོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་དེའི་ལས་ཀྱི་རྣམ་པར་སྨིན་པས་ཁྱོད་སེམས་ཅན་ཐམས་ཅད་ཀྱིས་ལེགས་པར་མཆོད་པར་འགྱུར་ཞིང་ཁྱོད་ལ་ལྷ་དང་བཅས་པའི་འཇིག་རྟེན་ཡང་རབ་ཏུ་འདུད་པར་འགྱུར་ཞིང་ཁྱོད་ཡོངས་སུ་མྱ་ངན་ལས་འདས་པའི་ལུས་ལ་ཡང་ལྷ་དང་མི་རྣམས་མཆོད་པ་བྱེད་པར་འགྱུར་བའི་ཕྱིར་རོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མ་འགགས་པ་ལ་བཀའ་སྩལ་པ། མ་འགགས་པ་ཁྱོད་ཀྱིས་ལྷ་བྱེ་བ་ཕྲག་བཞི་བཅུས་སྟེང་གི་བར་སྣང་ལས་ཆོས་ཀྱི་རྣམ་གྲངས་འདི་ཐོས་ནས་ཐལ་མོ་སྦྱར་ཏེ་ལུས་བཏུད་ཅིང་འཁོད་པ་དག་མཐོང་ངམ། གསོལ་པ། བཅོམ་ལྡན་འདས་དེ་དེ་ལྟ་ལགས་སོ། །བཀའ་སྩལ་པ། མ་འགགས་པ་དེ་དག་ནི་ཆོས་ལ་དད་པ་དང་ལྡན་པས་ཐལ་མོ་སྦྱར་ཅིང་དད་པས་ལུས་རབ་ཏུ་བཏུད་པའི་དགེ་བའི་རྩ་བ་དེས་བསྐལ་པ་གྲངས་མེད་པར་ལོག་པར་ལྟུང་བར་འགྲོ་བར་མི་འགྱུར་ཞིང་། ལྷ་དང་མིར་མཚམས་སྦྱོར་བར་འགྱུར་ལ། དེ་དག་མིར་གྱུར་པ་ན་རེ་རེས་ཀྱང་འཁོར་ལོས་སྒྱུར་བའི་རྒྱལ་སྲིད་གང་གཱའི་ཀླུང་གི་བྱེ་མ་བས་ལྷག་པ་སྙེད་བྱེད་པར་འགྱུར་རོ། །ཐམས་ཅད་དུ་ཡང་སངས་རྒྱས་འབྱུང་བ་མཉེས་པར་བྱེད་པར་འགྱུར་ཞིང་དེ་དག་དེའི་འོག་ཏུ་དགེ་བའི་རྩ་བ་དག་ཡང་དག་པར་བསྒྲུབས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ་ཐམས་ཅད་ཀྱང་འདི་ལྟ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྱུང་བ་ཐམས་ཅད་ཀྱིས་རབ་ཏུ་གདུང་བར་འོས་པ་ཞེས་བྱ་བར་མཚན་འཐུན་པའི་དེ་བཞིན་གཤེགས་པ་ཤ་སྟག་ཏུ་འགྱུར་རོ། །ཡང་དེའི་ཚེ་གྱད་དགའ་བ་ཞེས་བྱ་བ་དང་། གྱད་རྒྱལ་དཀའ་ཞེས་བྱ་བ་དང་། གྱད་སྟོབས་པོ་ཆེ་དང་། གཟི་བརྗིད་ལྷ་དང་། རྒྱལ་བའི་ལྷ་དང་། ཕྲག་པར་འཛེག་དང་། བློ་བཟང་དང་། འཇིགས་མེད་དང་། དབྱིག་དང་། བདེན་པ་དང་།
བྱང་ཕྱོགས་ཀྱི་སྟོབས་ཀྱི་མིག་དང་། གྱད་ཐམས་ཅད་བཟོད་ཅེས་བྱ་བ་དེ་དག་ཐམས་ཅད་འཁོར་ལྔ་བརྒྱ་ཙམ་དང་ལྷན་ཅིག་ཏུ་དེ་བཞིན་གཤེགས་པ་ལ་མཆོད་པ་བྱ་བའི་ཕྱིར་འཁོར་དེ་ཉིད་དུ་འདུས་ཏེ་འདུག་པར་གྱུར་ནས། དེ་དག་གིས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཏེ་ལུས་ཐུར་དུ་བཏུད་ནས་ངུ་བར་བྱེད། སྨྲེ་སྔགས་འདོན་པར་བྱེད་ཅིང་མིག་མཆི་མས་གང་བཞིན་དུ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་བཅོམ་ལྡན་འདས་ལ་མཆོད་པ་བགྱིད་པ་དང་། བྱང་ཆུབ་སེམས་དཔའ་དམིགས་མེད་དང་། བྱང་ཆུབ་སེམས་དཔའི་ཚོགས་འདི་དང་། བཅོམ་ལྡན་འདས་ཀྱི་ཉན་ཐོས་ཆེན་པོའི་དགེ་འདུན་དང་། ཆོས་ཀྱི་རྣམ་གྲངས་འདི་ལ་ཡང་མཆོད་པ་བགྱི་བའི་སླད་དུ་ཐལ་མོ་སྦྱོར་ཞིང་ལུས་ཀྱང་རབ་ཏུ་འདུད་པར་བགྱིད་ལགས་སོ། །བཅོམ་ལྡན་འདས་བདག་ཅག་གི་དགེ་བའི་རྩ་བ་འདི་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱིའོ། །དེ་ནས་དེའི་ཚེ་བཅོམ་ལྡན་འདས་ཞལ་འཛུམ་པ་མཛད་དོ། །འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་དེ་གང་གི་ཚེ་འཛུམ་པ་མཛད་པ་དེའི་ཚེ་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་ཁ་དོག་སྣ་ཚོགས་ཁ་དོག་དུ་མ་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། བཙོད་ཀ་དང་། ཤེལ་དང་། དངུལ་གྱི་ཁ་དོག་ལྟ་བུ་དག་བྱུང་སྟེ། དེ་དག་གིས་འཇིག་རྟེན་གྱི་ཁམས་མཐའ་ཡས་མུ་མེད་པ་དག་སྣང་བས་གསལ་བར་བྱས་ནས་ཚངས་པའི་འཇིག་རྟེན་གྱི་བར་དུ་མངོན་པར་འཕགས་ཏེ་ཡང་ཕྱིར་ལོག་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་དབུའི་གཙུག་ཏུ་ནུབ་པ་ཚེ་དང་ལྡན་པ་ཀུན་དགའ་བོས་མཐོང་ངོ་། །མཐོང་ནས་ཀྱང་ཚིགས་སུ་བཅད་པས་ཡོངས་སུ་ཞུས་པ། འཇིག་རྟེན་སྣང་མཛད་ཇི་སླད་དུ། །འཛུམ་པ་མཛད་པའི་རྒྱུ་གང་ལགས། །བདག་དང་སྲོག་ཆགས་གཞན་དག་གི། །སོམ་ཉི་ལེགས་པར་བསལ་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཀྱིས་གྱད་ཀྱི་བུ་འདི་དག་ལྷགས་ཏེ་སེམས་རབ་ཏུ་དང་བས་ང་དང་། བྱང་ཆུབ་སེམས་དཔའ་སེམས་དཔའ་
ཆེན་པོ་དམིགས་མེད་དང་། མདོ་སྡེའི་ཚིག་བསྟན་པ་འདི་ལ་ཐལ་མོ་སྦྱར་ཅིང་རབ་ཏུ་བཏུད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བྱེད་པ་དག་མཐོང་ངམ། གསོལ་པ། བཅོམ་ལྡན་འདས་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་གྱད་ཀྱི་བུ་འདི་དག་ཐམས་ཅད་ནི་བསྐལ་པ་གྲངས་མེད་པ་བྱེ་བར་ངན་འགྲོ་ལོག་པར་ལྟུང་བར་འགྲོ་བར་མི་འགྱུར་ཞིང་དེ་དག་ཕྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ཡང་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཡིད་བདེ་མགུ་བའི་སེམས་ལྡན་པའི། །གྱད་ཀྱི་བུ་རྣམས་འདིར་ལྷགས་ཏེ། །ཐལ་མོ་སྦྱར་ཅིང་རབ་བཏུད་པ། །ཀུན་དགའ་ཁྱོད་ཀྱིས་མ་མཐོང་ངམ། །མཁས་པ་འདི་དག་ཐམས་ཅད་ཀྱིས། །ང་ལ་མཆོད་པ་འདི་བྱས་ནས། །བླ་མེད་བྱང་ཆུབ་འཐོབ་འགྱུར་བར། །མགུ་བ་ཉིད་ཀྱིས་རྗོད་པར་བྱེད། །དམིགས་མེད་ཤེས་རབ་ལྡན་པ་དང་། །ཆོས་ལའང་གུས་དང་བཅས་བྱས་ཤིང་། །དེ་བཞིན་ཉན་ཐོས་དགེ་འདུན་ལ། །ཐལ་མོ་སྦྱར་བ་འདི་བྱས་པས། །བསྐལ་པ་བྱེ་བ་གྲངས་མེད་དུ། །དེ་དག་ངན་འགྲོར་འགྲོ་མི་འགྱུར། ཐལ་མོ་སྦྱར་བའི་ལས་དང་ནི། །ལུས་རབ་བཏུད་པས་ཕྱིན་ཆད་ནི། །དེ་དག་བྱང་ཆུབ་འཐོབ་འགྱུར་བའི། །ཕུན་སུམ་ཚོགས་པ་ཅིར་འགྱུར་བ། །ང་ཡིས་བསྐལ་པའམ་བསྐལ་པ་ནི། །བྱེ་བ་ཕྲག་བརྒྱར་བརྗོད་གྱུར་ཀྱང་། །སྤྱོད་པ་དམ་པ་སྤྱད་བྱས་པ། །དེ་ལ་གྲངས་ནི་ཡོད་མིན་པས། །བསྐལ་པ་བྱེ་བ་རྣམས་ཀྱིས་ཀྱང་། །མཐའ་མ་རྟོགས་པར་སླ་བ་མིན། །ཀུན་དགའ་བོ་དོ་མོད་ནམ་གྱི་ཐུན་ཐ་མ་ལ་སངས་རྒྱས་ང་དང་ཁྱོད་བལྟ་བའི་ཐ་མར་འགྱུར་རོ། །ཀུན་དགའ་བོ་ཁྱོད་ཀྱིས་བྱང་ཕྱོགས་ནས་འོད་ཆེན་པོ་གསེར་གྱི་ཁ་དོག་ལྟ་བུ་ཞིག་འོང་ཞིང་དེའི་གཟི་བརྗིད་ཀྱིས་བྱང་ཕྱོགས་ཀྱི་རྩྭ་དང་། ཤིང་གེལ་པ་དང་། ལྕུག་མ་དང་། ཚལ་དང་། ཤིང་ལྗོན་པ་དང་། སྨན་དང་། ནགས་ཚལ་དང་། རི་དང་། ཐང་དང་། ཁང་བཟངས་དང་། པུ་ཤུ་དང་། གཞལ་མེད་ཁང་དང་། ཁང་པ་བརྩེགས་པ་ཐམས་ཅད་དང་། མི་དང་མི་མ་ཡིན་པ་དང་། ནམ་མཁའ་དང་།
བར་སྣང་ཐམས་ཅད་འདི་ལྟ་སྟེ། གསེར་གྱི་མདོག་ལྟ་བུར་ཁ་དོག་གཅིག་ཏུ་ཀུན་ཏུ་སྣང་བར་གྱུར་པ་མཐོང་ངམ། གསོལ་པ། བཅོམ་ལྡན་འདས་དེ་དེ་ལྟ་ལགས་སོ། །བཀའ་སྩལ་པ། ཀུན་དགའ་བོ་དེ་བཞིན་དུ་ཁྱོད་ཀྱིས་བྱང་ཕྱོགས་ནས་འཛམ་བུ་ཆུ་བོའི་གསེར་ལས་བྱས་པའི་ཁང་པ་བརྩེགས་པ་བདུན་འོང་ཞིང་ཁང་པ་བརྩེགས་པ་དབུས་མའི་ནང་ན་གཟི་བརྗིད་མཆོག་དང་ལྡན་ཞིང་དཔལ་གྱིས་རྣམ་པར་མཛེས་པའི་ཁྱེའུ་ཞིག་སྐྱིལ་མོ་ཀྲུང་གིས་འདུག་པ་མཐོང་ངམ། གསོལ་པ། བཅོམ་ལྡན་འདས་དེ་དེ་ལྟ་ལགས་སོ། །བཀའ་སྩལ་པ། ཀུན་དགའ་བོ་ཁྱེའུ་འདི་ནི་མངོན་པར་ཤེས་པའི་མེ་ཏོག་ཀུན་ཏུ་རྒྱས་པ་ཐོབ་པ་ཞེས་བྱ་སྟེ། འདི་ནས་བྱང་ཕྱོགས་ལོགས་སུ་སངས་རྒྱས་ཀྱི་ཞིང་བྱེ་བ་འབུམ་ཕྲག་དྲུག་ཅུ་རྩ་བཞི་འདས་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱང་ཆུབ་ཡན་ལག་གནས་ཞེས་བྱ་བའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་མེ་ཏོག་ཅན་ཞེས་བྱ་བ་ཞིག་ཡོད་པ་དེ་ནས་ཤི་འཕོས་ནས་འཇིག་རྟེན་གྱི་ཁམས་འདིར་སྐྱེས་པ་ཡིན་ནོ། །ཀུན་དགའ་བོ་འཇིག་རྟེན་གྱི་ཁམས་དེ་ན་བྱང་ཆུབ་ཀྱི་ཡན་ལག་གི་ཚིག་གི་སྒྲ་འབྱུང་སྟེ། རྩྭ་དང་། ཤིང་གེལ་པ་དང་། ལྕུག་མ་དང་། ཤིང་ལྗོན་པའི་ཚོགས་དང་། སྨན་དང་། ནགས་ཚལ་ཐམས་ཅད་ལས་ཀྱང་བྱང་ཆུབ་ཀྱི་ཡན་ལག་གི་ཚིག་གི་སྒྲ་འབྱུང་ངོ་། །སྒྲ་དེས་སེམས་ཅན་དག་དགེ་བའི་ཆོས་རྣམས་ཀྱིས་ཡོངས་སུ་སྨིན་པར་བྱེད་དོ། །ཀུན་དགའ་བོ་དེ་བཞིན་གཤེགས་པ་བྱང་ཆུབ་ཀྱི་ཡན་ལག་གནས་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་བསྐལ་པ་དྲུག་ཁྲི་བཞི་སྟོང་དུ་བཞུགས་ཏེ་འཚོ་ཞིང་གཞེས་སོ། །དེ་བཞིན་གཤེགས་པ་དེ་ལ་བྱང་ཆུབ་སེམས་དཔའ་མ་གཏོགས་པར་ཉན་ཐོས་ནི་མི་མངའ་སྟེ། །ཀུན་དགའ་བོ་འདི་ལྟ་སྟེ་དཔེར་ན། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ཞིག་ལ་བུ་མང་པོ་བདོག་པར་གྱུར་ན་དེའི་བློན་པོ་རྣམས་ཀྱང་བུ་ཉིད་ཡིན་པར་འགྱུར་ལ། བློན་པོ་བཀའ་ལ་གཏོགས་པ་རྣམས་ཀྱང་བུ་ཉིད་ཡིན། མཆོག་གི་ཟུང་ཡང་བུ་ཉིད་ཡིན། རྒྱལ་ཕྲན་རྣམས་ཀྱང་བུ་ཉིད་ཡིན་པར་འགྱུར་རོ། །དེ་བཞིན་དུ་བཅོམ་ལྡན་འདས་དེའི་སྲས་རྣམས་ཀྱང་བྱང་ཆུབ་
སེམས་དཔའ་ཉིད་ཡིན་ལ། བློན་པོ་རྣམས་ཀྱང་བྱང་ཆུབ་སེམས་དཔའ་ཉིད་ཡིན། བློན་པོ་བཀའ་ལ་གཏོགས་པ་རྣམས་ཀྱང་བྱང་ཆུབ་སེམས་དཔའ་ཉིད་ཡིན། མཆོག་གི་ཟུང་ཡང་བྱང་ཆུབ་སེམས་དཔའ་ཉིད་ཡིན། རིམ་གྲོ་བ་རྣམས་ཀྱང་བྱང་ཆུབ་སེམས་དཔའ་ཉིད་ཡིན། དགེ་འདུན་དཀོན་མཆོག་ཀྱང་བྱང་ཆུབ་སེམས་དཔའ་ཉིད་ཤ་སྟག་གོ །ཀུན་དགའ་བོ་དེ་ལྟར་ན་འཇིག་རྟེན་གྱི་ཁམས་དེ་ནི་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་དང་། དགའ་བ་དང་། སྐྱེ་བོ་དང་། མི་མང་པོས་གང་ཞིང་བྱང་ཆུབ་སེམས་དཔའི་ཚོགས་འདུས་པ་རྣམས་ཀྱང་མངོན་པར་ཤེས་པ་མངོན་པར་འཕགས་པ། ན་ཚོད་ཀྱི་ཚུལ་གྱིས་ཏིང་ངེ་འཛིན་གྱི་སྟོབས་ཀུན་ཏུ་སྡུད་པ། ཤེས་རབ་བརྩེགས་པས་མངོན་པར་འཕགས་པ། ཡེ་ཤེས་ཡང་དག་པར་བསགས་པ་དང་ལྡན་པ། བྱང་ཆུབ་ཀྱི་སེམས་ལ་མངོན་པར་བརྩོན་པ། ཐམས་ཅད་མཁྱེན་པའི་ཡེ་ཤེས་ཡང་དག་པར་སྡུད་པ་ལ་བརྩོན་ཞིང་བྱང་ཆུབ་སེམས་དཔའི་ཆོས་ཚད་མེད་པ་དང་ལྡན་པའི་བྱང་ཆུབ་སེམས་དཔའ་ཤ་སྟག་གནས་ཏེ། ཀུན་དགའ་བོ་བྱང་ཆུབ་སེམས་དཔའ་མངོན་པར་ཤེས་པའི་མེ་ཏོག་ཀུན་ཏུ་རྒྱས་པ་ཐོབ་པ་ཞེས་བྱ་བའི་རིགས་ཀྱི་བུ་འདི་གང་ནས་འཇིག་རྟེན་གྱི་ཁམས་འདིའི་འཛམ་བུའི་གླིང་འདི་ཉིད་དུ་ཡངས་པ་ཅན་གྱི་གྲོང་ཁྱེར་དུ་སྐྱེས་པའི་འཇིག་རྟེན་གྱི་ཁམས་དེ་ནི་དེ་ལྟ་བུའི་བྱང་ཆུབ་སེམས་དཔའ་སེམས་དཔའ་ཆེན་པོ་ཤ་སྟག་གིས་ཡོངས་སུ་གང་བ་ཡིན་ནོ། །ཀུན་དགའ་བོ་རིགས་ཀྱི་བུ་འདི་ནི་དེ་བཞིན་གཤེགས་པ་ངའི་ཞབས་ལ་ཕྱག་འཚལ་ཞིང་དེ་བཞིན་གཤེགས་པ་ངའི་ཡོངས་སུ་མྱ་ངན་ལས་འདའ་བ་ཆེན་པོ་འདི་ཡང་བལྟ་བའི་ཕྱིར་རྫུ་འཕྲུལ་འདི་ལྟ་བུ་དག་ཀུན་ཏུ་སྟོན་ཅིང་འོང་སྟེ། ཀུན་དགའ་བོ་སྣང་བ་ཆེན་པོ་འདི་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་མཐུ་ཡིན་ནོ། །ཀུན་དགའ་བོ་འཛམ་བུ་ཆུ་བོའི་གསེར་ལས་བྱས་པའི་ཁང་པ་བརྩེགས་པ་བདུན་པོ་འདི་དག་ཀྱང་བཅོམ་ལྡན་འདས་དེས་བྱང་ཆུབ་ཀྱི་ཡན་ལག་བདུན་བཤད་པ་དག་སྤྲུལ་པ་མཛད་པ་ཡིན་ནོ། །ཀུན་དགའ་བོ་འཛམ་བུའི་གླིང་འདི་ན་ཁྱེའུ་འདི་དང་ལྷན་ཅིག་ཏུ་དགེ་བའི་རྩ་བ་བསྐྱེད་པའི་སྲོག་ཆགས་བྱེ་བ་འབུམ་ཕྲག་མང་པོ་དག་ཀྱང་ཡོད་དེ། ཁྱེའུ་འདི་འཛམ་བུའི་གླིང་འདིར་སྐྱེས་མ་ཐག་ཏུ་ལྷ་དང་མི་རྣམས་དགའ་
བ་དང་མཆོག་ཏུ་དགའ་བ་རྒྱ་ཆེན་པོ་ཐོབ་པར་གྱུར་ཏོ། །དེ་དག་ལས་ཁ་ཅིག་གིས་ནི་ཟག་པ་ཟད་པ་ཐོབ་བོ། །ཁ་ཅིག་གིས་ནི་སློབ་པའི་ས་ཐོབ་བོ། །སྔོན་སེམས་མ་བསྐྱེད་པ་ཁ་ཅིག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཁ་ཅིག་གིས་ནི་སེམས་བསྐྱེད་མ་ཐག་ཏུ་ཕྱིར་མི་ལྡོག་པའི་བཟོད་པ་ཐོབ་པར་གྱུར་ཏོ། །ཀུན་དགའ་བོ་གང་ན་ཁྱེའུ་འདི་སྐྱིལ་མོ་ཀྲུང་གིས་འདུག་ཅིང་འོད་འབྱུང་བའི་ཁང་པ་བརྩེགས་པ་དབུས་མ་འདི་ནི་དེ་བཞིན་གཤེགས་པ་དེའི་སྤྲུལ་པ་ཡིན་ནོ། །དེ་ལས་ནི་རིན་པོ་ཆེའི་ཁང་པ་བརྩེགས་པ་ལྷག་མ་དྲུག་པོ་གཞན་དག་ཀྱང་འབྱུང་ངོ་། །ཀུན་དགའ་བོ་དེ་བཞིན་གཤེགས་པ་དེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མངོན་པར་ཤེས་པའི་མེ་ཏོག་ཀུན་ཏུ་རྒྱས་པ་ཐོབ་པས་གང་གིས་འཇིག་རྟེན་གྱི་ཁམས་འདི་འོད་ཀྱིས་ཁྱབ་པར་བྱས་ཤིང་འདི་ལྟ་སྟེ། ཆོས་ཡང་དག་པར་འཛིན་པས་སེམས་ཅན་དཔག་ཏུ་མེད་པ་རྣམས་ལ་ཕན་འདོགས་པའི་མཐུ་ལ་ལྟོས། དེ་ནས་ཁྱེའུ་དེ་དག་ཐམས་ཅད་ལྷན་ཅིག་ཚོགས་ཏེ་ཡང་དག་པར་དགའ་ཞིང་སྲོག་ཆགས་འབུམ་ཕྲག་མང་པོས་ཡོངས་སུ་བསྐོར་ནས་སྐད་ཅིག་གཅིག་མ་ཐལ་བར་མེ་ཏོག་སྣ་ཚོགས་ཀྱི་ཆར་དག་མངོན་པར་རབ་ཏུ་འབེབས་ཤིང་བཅོམ་ལྡན་འདས་ཀྱི་ཞབས་ལ་གཏུགས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་མངོན་པར་ཤེས་པའི་མེ་ཏོག་ཀུན་ཏུ་རྒྱས་པ་ཐོབ་པ་འདིས་འཛམ་བུ་ཆུ་བོའི་གསེར་ལས་བྱས་པའི་ཁང་པ་བརྩེགས་པ་དང་ལྡན་པའི་ཆོ་འཕྲུལ་གྱིས་སེམས་ཅན་བྱེ་བ་ཁྲག་ཁྲིག་ནི་དགྲ་བཅོམ་པ་ཉིད་དུ་བཏུལ་ཏོ། །སེམས་ཅན་བྱེ་བ་ཁྲག་ཁྲིག་ནི་སློབ་པའི་སར་བཏུལ་ཏོ། །སེམས་ཅན་བྱེ་བ་ཕྲག་བརྒྱ་ནི་དཀོན་མཆོག་གསུམ་ལ་དད་པར་བྱས་ཤིང་བསླབ་པའི་གཞི་ལྔ་འཛིན་དུ་བཅུག་གོ །ལྷ་བྱེ་བ་ཕྲག་བདུན་བརྒྱ་ནི་བྱང་ཆུབ་ལ་རབ་ཏུ་བཀོད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཉིད་དུ་ངེས་པར་བྱས་སོ། །ལྷ་བྱེ་བ་ཕྲག་བདུན་ནི་མི་སྐྱེ་བའི་ཆོས་ལ་བཟོད་པ་ཐོབ་པ་ལ་རབ་ཏུ་བཀོད་དོ། །སེམས་ཅན་བྱེ་བ་ཁྲག་ཁྲིག་ཚད་མེད་གྲངས་མེད་པ་དག་ནི་བྱམས་པའི་འདུས་པ་མཐོང་བ་དང་། བྱམས་པ་མཐོང་ཞིང་
ཕྲད་པར་འགྱུར་བའི་ཕྱིར་ཡོངས་སུ་སྨིན་པར་བྱས་སོ། །ཀུན་དགའ་བོ་དེ་བཞིན་གཤེགས་པས་སེམས་ཅན་རྣམས་ཀྱི་དོན་བྱ་བ་གང་ཡིན་པ་དང་། དེ་བཞིན་གཤེགས་པའི་སྲས་ཀྱི་ཐུ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་སེམས་ཅན་རྣམས་ཀྱི་དོན་བྱ་བ་གང་ཡིན་པ་དེ་དག་ནི་ང་དང་འདི་དག་གིས་ཡོངས་སུ་རྫོགས་པར་བྱས་ཟིན་ཏོ། །ངས་སེམས་ཅན་རྣམས་ཀྱི་དོན་ཡོངས་སུ་རྫོགས་པར་བྱ་བ་གང་ཡིན་པ་དེ་ཡང་ངས་ཡོངས་སུ་རྫོགས་པར་བྱས་ཟིན་ཏོ།། །།བམ་པོ་གསུམ་པ་སྟེ་ཐ་མ། དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་རྣམས་ལ་ཐུགས་བརྩེ་བའི་སླད་དུ་བསྐལ་པའམ་བསྐལ་པ་ལས་ལྷག་པར་བཞུགས་སུ་གསོལ། དེ་ཅིའི་སླད་དུ་ཞེ་ན། ཇི་སྲིད་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་ན་བཞུགས་པར་འགྱུར་བ་དེ་སྲིད་དུ་སྐྱེས་བུ་དམ་པ་འདི་ལྟ་བུ་དག་མཐོང་བར་འགྱུར་བ་དང་། དེ་སྲིད་དུ་སེམས་ཅན་དགེ་བ་འདི་ལྟ་བུ་དག་འཛམ་བུའི་གླིང་འདིར་མཆི་བར་འགྱུར་བ་དང་། དེ་སྲིད་དུ་བདག་ཅག་གིས་སྐྱེས་བུ་དམ་པ་འདི་ལྟ་བུ་དག་ལ་བལྟ་བ་དང་། བསྙེན་བཀུར་བགྱི་བ་དག་རྙེད་པར་འགྱུར་བ་དང་། དེ་སྲིད་དུ་འཇིག་རྟེན་ན་མདོ་སྡེ་འདི་ལྟ་བུ་འདི་དག་རྒྱས་པར་འགྱུར་བ་དང་། དེ་སྲིད་དུ་སངས་རྒྱས་ཀྱི་ཆོས་རྒྱ་ཆེན་པོ་དང་ལྡན་པའི་མདོ་སྡེ་འདི་ལྟ་བུ་འདི་ཐོས་པར་འགྱུར་བ་དང་། དེ་སྲིད་དུ་བདག་ཅག་གིས་བཅོམ་ལྡན་འདས་དང་རིགས་ཀྱི་བུ་འདི་དག་གི་རྫུ་འཕྲུལ་གྱི་ཆོ་འཕྲུལ་སྣ་ཚོགས་འདི་ལྟ་བུ་འདི་དག་མཐོང་བར་འགྱུར་བ་དང་། དེ་བཞིན་གཤེགས་པ་ཡོངས་སུ་མྱ་ངན་ལས་འདས་ན་བདག་ཅག་ལ་གནས་གསུམ་ཡོངས་སུ་ཉམས་པར་འགྱུར་ལགས་ཏེ། གསུམ་གང་ལགས་ཞེ་ན། འདི་ལྟ་སྟེ། སངས་རྒྱས་ལ་བལྟ་བ་དང་། དམ་པའི་ཆོས་མཉན་པ་དང་། རྒྱ་ཆེན་པོ་ལ་མོས་པའི་སྐྱེས་བུ་དམ་པ་འདི་ལྟ་བུ་དག་ལ་བལྟ་བ་དང་། བསྙེན་བཀུར་བགྱི་བ་ཡོངས་སུ་ཉམས་པར་འགྱུར་བའི་སླད་དུའོ། །དེ་ནས་ཚེ་དང་ལྡན་པ་ཀུན་དགའ་བོས་ཚིག་དེ་དག་གསོལ་ནས་ཤིན་ཏུ་མྱུར་བར་དགེ་བའི་བཤེས་གཉེན་དང་བྲལ་བར་འགྱུར་རོ་སྙམ་ནས་ངུ་བར་བྱེད།
སྨྲེ་སྔགས་འདོན་པར་བྱེད་ཅིང་མཆི་མ་དག་ཕྱིས་ནས་ཤིང་བཅད་དེ་འགྱེལ་བ་བཞིན་དུ་ས་ལ་སྒྱེལ་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དོན་ལེགས་པར་སེམས་པས་ཚེ་དང་ལྡན་པ་ཀུན་དགའ་བོ་ལ་ཚིགས་སུ་བཅད་དེ་སྨྲས་པ། འདུས་བྱས་རྟག་པར་འགྱུར་བ་ཡི། །གནས་འདི་རྙེད་པར་མི་འགྱུར་ཏེ། །འདུས་བྱས་ཐམས་ཅད་མི་རྟག་པས། །མྱ་ངན་མ་བྱེད་ཀུན་དགའ་ཁྱོད། །བརྟགས་པས་འདུས་བྱས་འབྱུང་འགྱུར་ཞིང་། །རྟོག་པ་དེ་ཡང་མི་རྙེད་དེ། །དེ་ལྟར་ཆོས་སྟོང་ཀུན་དགའ་ཁྱོད། །ཅི་ཡི་ཕྱིར་ན་མྱ་ངན་བྱེད། །བརྟགས་པས་ཤེས་པ་སྟོང་པ་སྟེ། །ཤེས་པ་རྣམས་ཀྱིས་སངས་རྒྱས་སྟོང་། །དེ་ལ་སངས་རྒྱས་མི་དམིགས་ན། །ཅི་ཕྱིར་ཀུན་དགའ་མྱ་ངན་བྱེད། །དངོས་རྣམས་ནམ་མཁའ་འདྲ་བ་དང་། །སྨིག་རྒྱུ་ལ་ནི་ཆུ་བཞིན་པས། །བརྟག་མེད་རྣམ་པས་མི་བརྟག་ཅིང་། །མཁས་པ་རྣམ་པར་མ་རྟོག་ཤིག །ཇི་ལྟར་སྒྱུ་མའི་མཁན་པོ་ཡིས། །རྟ་དང་གླང་པོ་བཞོན་པ་དང་། །སྐྱེ་དགུའི་ཚོགས་དང་ལྗོན་ཤིང་ཚལ། །མེ་ཏོག་འབྲས་བུ་དགའ་སྤྲུལ་ལྟར། །དེ་བཞིན་འདུས་བྱས་ཐམས་ཅད་ཀྱང་། །སྒྱུ་མ་བཞིན་དུ་སྙིང་པོ་མེད། །སངས་རྒྱས་རྣམས་དང་ཉན་ཐོས་ཀྱང་། །གཞན་མིན་དེ་བཞིན་ཁོ་ན་ཡིན། །དེ་ནས་ཚེ་དང་ལྡན་པ་ཀུན་དགའ་བོས་རིགས་ཀྱི་བུ་དོན་ལེགས་པར་སེམས་པ་ལ་ཕྱིར་ཚིགས་སུ་བཅད་དེ་སྨྲས་པ། ཇི་སྐད་སྨྲས་པ་དེ་བཞིན་ཏེ། །ཆོས་རྣམས་ཐམས་ཅད་མཚན་ཉིད་མེད། །དེ་འདྲའི་ཆོས་མཆོག་བདག་གིས་ནི། །མཉན་པའི་ཐ་མ་དེ་རིང་ཡིན། །ཇི་ལྟར་མཉན་ཡོད་འཇུག་བྱ་ཞིང་། །ཀུན་དགའ་རྫོགས་སངས་ག་ལ་བཞུགས། །སྤྱན་ལྡན་གང་ནས་བྱོན་འགྱུར་ཞེས། །དྲིས་ན་ཇི་སྐད་བརྗོད་པར་བྱ། །དྲི་གཙང་ཁང་པ་མི་མཆོག་གིས། །སྟོང་པར་བཞུགས་ནས་ཇི་ལྟར་བལྟ། །ཁྲི་གདན་སྟོང་པ་མཐོང་འགྱུར་ན། །ཇི་ལྟར་གནས་འགྱུར་བརྟུལ་ཞུགས་བཟང་། །དེ་ནས་རིགས་ཀྱི་བུ་རབ་ཏུ་ཞི་བར་གནས་ཀྱིས་ཚེ་དང་ལྡན་པ་ཀུན་དགའ་བོ་ལ་ཚིགས་སུ་བཅད་དེ་སྨྲས་པ། ལོ་གྲངས་བྱེ་བར་དུས་ཀྱང་ནི། །དོན་འདི་རྙེད་པར་ཤིན་ཏུ་དཀའ། །ཆོས་དབྱིངས་ཤིན་ཏུ་བལྟ་དཀའ་བ། །སོ་སོར་རྟོག་ཤིག་ཀུན་དགའ་བོ། །ཇི་
ལྟར་ཆུ་ཤིང་སྡོང་པོ་ནི། ། ཤུན་པ་རིམ་གྱིས་བཤུས་གྱུར་ན། །དེ་ལ་སྙིང་པོ་མེད་པ་ལྟར། །ཆོས་རྣམས་རང་བཞིན་དེ་དང་འདྲ། །ཇི་ལྟར་ཆར་པ་བབ་པ་ན། །མདོར་ན་ཆུ་ཡི་ཆུ་བུར་དག །སྐྱེ་ཞིང་འགག་པར་འགྱུར་བ་ལྟར། །འགྲོ་འདིའི་དངོས་པོ་དེ་དང་འདྲ། །ཇི་ལྟར་དབུ་བ་རྡོས་པ་ལ། །མིག་ཅན་སྙིང་པོ་རྟོག་པ་ན། །དེ་ལ་སྙིང་པོ་མེད་པ་ལྟར། །འགྲོ་བ་འདི་ཀུན་དེ་དང་འདྲ། །ཇི་ལྟར་མེ་ལོང་གཟུགས་བརྙན་ནི། །རང་བཞིན་སྙིང་པོ་མེད་པ་ལྟར། །ཁམས་གསུམ་འཇིག་རྟེན་དེ་འདྲ་ཡིས། །མཁས་པ་ངུ་བར་མ་བྱེད་ཅིག །དེ་ནས་ཚེ་དང་ལྡན་པ་ཀུན་དགའ་བོས་བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་ཞི་བར་གནས་ལ་ཕྱིར་ཚིགས་སུ་བཅད་དེ་སྨྲས་པ། མཁས་པ་ཇི་སྐད་ཟེར་བ་དེ། །ཁོ་བོས་མི་ཤེས་མ་ཡིན་ཏེ། །དྲང་སྲོང་ཆེན་པོས་མདོ་སྡེ་ལས། །འཇིག་རྟེན་གསུམ་ཀུན་དངོས་མེད་གསུངས། །ལྷ་རྣམས་བྱེ་བ་ངུ་བཞིན་དང་། །མཆི་མས་བརྣངས་པ་འདི་དག་ནི། །བདག་གི་དྲུང་དུ་ཉེར་ལྷགས་ཤིང་། །ངུ་བས་བདག་གི་སྡུག་བསྔལ་བསྐྱེད། །སྤྱན་དང་ལྡན་པས་བདག་བོར་ཏེ། །རྫོགས་པའི་སངས་རྒྱས་འདི་བཞུད་ན། །ཁོ་བོ་གང་ཕྱོགས་འགྲོ་བྱ་ཞིང་། །སུ་ཞིག་བདག་གི་སྐྱོབ་པར་འགྱུར། །ཨེ་མའོ་སངས་རྒྱས་ཤིན་ཏུ་དཀོན། །བདག་གིས་སུ་ལ་མཆོད་བྱ་ཞིང་། །ཞི་བ་ཟབ་མོ་བལྟ་དཀའ་བའི། །དམ་ཆོས་སུ་ལས་མཉན་པར་བྱ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དམིགས་མེད་ཀྱིས་ཚེ་དང་ལྡན་པ་ཀུན་དགའ་བོ་ལ་ཚིགས་སུ་བཅད་དེ་སྨྲས་པ། ལོངས་ཤིག་བཙུན་པ་ཀུན་དགའ་བོ། །ཆོས་འགའ་འོང་བ་ཡོད་མིན་ལ། །འགྲོ་བར་འགྱུར་བའང་མེད་པས་ན། །མྱ་ངན་མ་བྱེད་ཆོས་ཉིད་ལྟོས། །སངས་རྒྱས་སྐྱེ་བ་ཅི་འདྲ་བར། །དེ་ཡི་བྱང་ཆུབ་དེ་དང་འདྲ། །འཁོར་ལོ་བསྐོར་བ་ཅི་འདྲ་བར། །མྱ་ངན་འདའ་བའང་དེ་དང་འདྲ། །སངས་རྒྱས་ནམ་ཡང་སྐྱེ་མེད་ཅིང་། །སངས་རྒྱས་འགག་པར་འགྱུར་བའང་མེད། །རང་བཞིན་དེ་འདྲའི་ཆོས་རྣམས་ལ། །ཀུན་དགའ་ཁྱོད་ནི་ཅི་ཕྱིར་ངུ་། །ཁོ་བོའི་སྤུ་ཡི་ཁུང་བུ་ནས། །སྟོང་དང་དངོས་པོ་མེད་པ་དང་། །ཉེ་བར་ཞི་དང་སངས་རྒྱས་ཞེས། །སྒྲ་སྐད་བཞི་པོ་འབྱུང་བ་ཉོན། །དེ་ནས་ཚེ་དང་ལྡན་པ་ཀུན་དགའ་བོས་རིགས་ཀྱི་བུ་དམིགས་མེད་ལ་ཕྱིར་
ཚིགས་སུ་བཅད་དེ་སྨྲས་པ། བརྟུལ་ཞུགས་བཟང་པོ་ཁྱེད་ཅག་ལྟ། །མྱུར་དུ་ཞིང་གཞན་འགྲོ་འགྱུར་ཞིང་། །དེར་ཡང་བདུད་རྩིའི་ཚིག་གསུང་བ། །རྫོགས་པའི་སངས་རྒྱས་མཐོང་བར་འགྱུར། །དེར་ནི་ཟབ་མོ་སངས་རྒྱས་ཀྱིས། །གསུང་བའི་ཆོས་ཀྱང་ཐོས་འགྱུར་ལ། །སངས་རྒྱས་རྣམས་ཀྱི་ཚོགས་ཀྱི་མཆོག། བྱང་ཆུབ་སེམས་དཔའ་རྣམས་ཀྱང་མཐོང་། །ཁོ་བོ་འཇིག་རྟེན་མགོན་འདས་ཞེས། །ལྷ་རྣམས་བྱེ་བ་མང་པོ་དག །ཆོ་ངེས་འདེབས་པས་མདུན་བདར་ན། །མཁས་པ་ཇི་ལྟར་གནས་པར་བྱ། །དགེ་བསྙེན་སྟོང་ཕྲག་མང་པོ་རྣམས། །ཐམས་ཅད་ཤུགས་ཆེན་ངུ་བྱེད་ཅིང་། །བདག་གི་དྲུང་དུ་ལྷགས་གྱུར་ན། །ཁོ་བོས་ཇི་ལྟར་ལན་ཡང་གདབ། །སུམ་ཅུ་རྩ་གསུམ་འཐབ་བྲལ་དང་། །དགའ་ལྡན་པ་དང་རབ་འཕྲུལ་དང་། །དབང་སྒྱུར་ཚངས་པ་ལ་སོགས་པའི། །ལྷ་ཚོགས་ཉེ་བར་ལྷགས་པ་རྣམས། །ཤཱཀྱ་སྐྱེས་མཆོག་འདས་གྱུར་ན། །ཇི་ལྟར་ཡོངས་སུ་གཟེངས་བསྟོད་ཅིང་། །བདག་ནི་ཇི་ལྟར་དེ་དག་ལ། །དམ་ཆོས་སྨྲ་བ་སྤོབས་པར་འགྱུར། །སྐྱེས་བུ་སྐྱེས་མཆོག་འདས་གྱུར་ན། །ཀུན་དགའ་འདྲེན་པ་གང་ན་ཞེས། །ལྷ་རྣམས་འདྲི་བར་གྱུར་པའི་ཚེ། །རྣམ་འདྲེན་བསམ་གཏན་ཟབ་མོ་དང་། །བསོད་ནམས་ཆེན་པོའི་གནས་པ་ལ། །ནང་དུ་ཡང་དག་བཞག་གོ་ཞེའམ། །འོན་ཏེ་འཆག་ཅིང་བཞུགས་སོ་ཞེས། །ཇི་ལྟར་ཚིག་གི་ལན་ཡང་གདབ། །དེ་ནས་རིགས་ཀྱི་བུ་མངོན་པར་ཤེས་པའི་མེ་ཏོག་ཀུན་ཏུ་རྒྱས་པ་ཐོབ་པས་ཚེ་དང་ལྡན་པ་ཀུན་དགའ་བོ་ལ་ཚིགས་སུ་བཅད་དེ་སྨྲས་པ། ཟླ་བ་གསུམ་པོ་འདི་འདས་ནས། །ཁོ་བོས་ཕྱིས་ཀྱང་བལྟ་བྱ་བར། །བདག་ནི་ཁྱོད་ལ་དམ་འཆའ་ཡིས། །ཀུན་དགའ་ཐོང་ཤིག་མ་ངུ་ཤིག །སངས་རྒྱས་སྟོང་ཕྲག་གཞན་དག་ལ། །ཤཱཀྱའི་ཏོག་གི་ཆ་བྱད་ཀྱིས། །ཆོས་མཆོག་བཤད་པར་མཛད་གསོལ་ཞེས། །ཁྱོད་ཕྱིར་བདག་གིས་གསོལ་བར་བྱ། །རྫོགས་སངས་ཐུགས་རྗེས་གཟིགས་མཛད་ཅིང་། །ཁྱོད་ཀྱི་མདུན་དུ་གཤེགས་པར་འགྱུར། །ཁྱོད་ཀྱིས་མི་མཆོག་ཡོངས་བསྙེན་གྱིས། །ཀུན་དགའ་འདི་ལ་ཁྱོད་མ་ངུ། །གང་དུ་འདི་འདྲའི་སྟོན་པ་ནི། །འཇིག་རྟེན་དུ་ནི་འདའ་འགྱུར་བ། །
ལྷ་དང་བཅས་པའི་འཇིག་རྟེན་གྱིས། །མྱ་ངན་ཆེན་པོ་བྱ་བའི་རིགས། །བདག་གིས་སངས་རྒྱས་འདི་སྐད་ཅེས། །བསྐལ་པ་བྱེ་བར་འཚོ་གྱུར་པའི། །འདུས་བྱས་ཐམས་ཅད་མཐར་འཇིག་ཅེས། །གསུངས་པ་སྟོན་པའི་དྲུང་ནས་ཐོས། །དེ་ནས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱིས་སྣམ་ལོགས་སུ་འདུག་ནས་ལན་གསུམ་དུ་སྙིང་རྗེ་ཆེན་པོའི་སྒྲ་བསྒྲགས་པ། མདོངས་པར་གྱུར་པའི་སེམས་ཅན་ལ། །གང་གིས་མིག་ནི་སྩོལ་མཛད་ཅིང་། །སྲོག་ཆགས་ཀུན་མགོན་གང་ཡིན་པ། །སྟོན་པ་དེ་རིང་མྱ་ངན་འདའ། །མི་རྣམས་འདྲེན་པ་དེ་འདས་ཞེས། །ཚིག་འདི་ཐོས་པར་གྱུར་ན་ནི། །རྒྱལ་པོ་དམ་པ་ལུས་འཕགས་བུ། །ཤིན་ཏུ་སྡུག་བསྔལ་ཇི་ལྟར་གནས། །དེ་ནས་གྱད་དང་གྱད་མོ་དང་། །གྱད་ཀྱི་བུ་རྣམས་མི་བཟད་ཅིང་། །མི་མཆོག་མྱ་ངན་འདའ་འགྱུར་ཞེས། །དེ་ན་སྙིང་རྗེས་ངུ་བར་བྱེད། །ཐ་མའི་སྟོན་པ་བལྟ་བའི་ཕྱིར། །དེ་དག་དེར་ནི་ལྷགས་གྱུར་ནས། །ཐལ་སྦྱར་རབ་བཏུད་འཁོད་ནས་ནི། །འདུད་ཅིང་ཕྱག་ཀྱང་འཚལ་བར་བྱེད། །དཔག་ཚད་ལྔ་ཡི་ཁོར་ཡུག་ཏུ། །ལྷ་དང་གནོད་སྦྱིན་རྣམས་ཀྱིས་གང་། །དེ་ཡི་ཁོ་ར་ཁོར་ཡུག་ཏུ། །མི་རྣམས་ཀྱིས་ནི་གནས་མི་རྙེད། །དྲང་སྲོང་དམ་པ་མཆོད་པའི་ཕྱིར། །དྲི་ཞིམ་མེ་ཏོག་ཆུ་བོ་དག །པུས་མོ་ནུབ་ཙམ་ཕབ་གྱུར་ཅིང་། །ཕྱེ་མའི་ཆར་པའང་ཕབ་པར་གྱུར། །དེ་ནས་དགའ་བོ་ཉེ་དགའ་གཉིས། །ཐ་མའི་སྟོན་པ་བལྟ་བའི་ཕྱིར། །བྱེ་བ་དྲུག་ཅུའི་ཀླུ་རྣམས་དང་། །ཡོངས་སུ་མྱ་ངན་འདས་པར་ལྷགས། །བྲང་འགྲོ་ཆེན་པོ་ཆུ་ལྷ་དང་། །གཟི་ཅན་དང་ནི་རྒྱ་མཚོ་དང་། །གསལ་མཐོང་དང་ནི་བཏང་བཟུང་དག །བྱེ་བ་ཕྲག་བརྒྱའི་ཀླུས་བདར་ཅིང་། །ཐ་མའི་སྟོན་པ་བལྟ་བའི་ཕྱིར། །སྤོས་ཆུའི་སྤྲིན་དག་འདུས་བྱས་ཤིང་། །ནམ་མཁའི་ངོས་ནི་ཁེབས་བྱས་ཏེ། །ཆར་བཞིན་འབེབས་ཤིང་ཉེ་བར་ལྷགས། །འཇིག་རྟེན་མགོན་པོ་མཆོད་པའི་ཕྱིར། །ལྷ་ཀླུས་ལྷ་ཡི་མེ་ཏོག་གི། །ཆར་དང་སྤོས་ཆུ་གཙང་མ་ཡི། །ཆར་པ་དག་ཀྱང་རབ་ཏུ་ཕབ། །ཀླུ་ཡི་རྒྱལ་པོ་མ་དྲོས་པ། །དུང་ཕྱུར་དྲུག་དང་ལྷན་ཅིག་ཏུ། །རིན་ཆེན་ཆར་པ་རབ་འབེབས་ཤིང་། །སྐྱེས་བུ་ཁྱུ་མཆོག་དྲུང་དུ་ལྷགས། །བྲང་འགྲོ་ཆེན་པོ་ཨེ་ལའི་འདབ། །ལྷུན་པོ་ཙམ་ཡང་ངུ་བྱེད་ཅིང་། །
ཐ་མའི་འཇིག་རྟེན་མགོན་པོ་ལ། །མཆོད་པ་བྱ་ཕྱིར་ཉེ་བར་འོངས། །ཀླུ་ཡི་བུ་མོ་སྟོང་དང་ནི། །བརྒྱ་དང་ཁྲག་ཁྲིག་རྣམས་དག་ཀྱང་། །ང་རོ་སྤྲིན་སྙེད་སྒྲོགས་བྱེད་ཅིང་། །སྟོན་པའི་དྲུང་དུ་ཉེ་བར་ལྷགས། །ཐ་མའི་འཇིག་རྟེན་མགོན་པོ་ལ། །མཆོད་པ་བྱ་ཕྱིར་དེ་དག་གིས། །སྤོས་ཆུ་གཙང་མའི་ཆར་ཆེན་ཡང་། །དེར་ནི་མངོན་པར་རབ་ཏུ་ཕབ། །གནོད་སྦྱིན་སྟོང་ཕྲག་བྱེ་བ་དང་། །བརྒྱ་དང་ཁྲག་ཁྲིག་རྣམས་དག་ཀྱང་། །སངས་རྒྱས་ཡོན་ཏན་དྲན་བྱེད་ཅིང་། །བལྟ་བའི་ཕྱིར་ནི་ཉེ་བར་ལྷགས། །རྒྱལ་པོ་ཆེན་པོ་བཞི་རྣམས་ཀྱང་། །ཐ་མའི་སངས་རྒྱས་བལྟ་བའི་ཕྱིར། །ངུ་བཞིན་མཆི་མས་བརྣངས་གྱུར་ཅིང་། །སྟོན་པའི་དྲུང་དུ་ཉེ་བར་ལྷགས། །དེ་བཞིན་ལྷ་དབང་བརྒྱ་བྱིན་ཡང་། །སུམ་ཅུ་གསུམ་པ་སྟོང་ཕྲག་ནི། །སུམ་ཅུ་གསུམ་གྱིས་མདུན་བདར་ཅིང་། །རྫོགས་སངས་རྒྱས་ཀྱི་དྲུང་དུ་འོངས། །དྲང་སྲོང་དམ་པ་མཆོད་པའི་ཕྱིར། །དེས་ཀྱང་མེ་ཏོག་མན་དཱར་དང་། །ལྷ་ཡི་ཙན་དན་ཕྱེ་མ་ཡི། །ཆར་པ་མངོན་པར་རབ་ཏུ་ཕབ། །ཚངས་པ་ངན་སྤོང་གཙུག་ཏོར་ཅན། །ཐ་མའི་སྟོན་པ་བལྟ་བའི་ཕྱིར། །གཉིས་ཀ་ཚངས་པས་མདུན་བདར་ཅིང་། །ངུ་མོས་འདེབས་ཤིང་རྗེས་སུ་ལྷགས། །གནས་གཙང་ལྷ་བརྒྱ་བྱེ་བ་ཕྲག །མང་པོ་གཟི་བརྗིད་ཆེན་པོ་རྣམས། །དེ་རིང་རྒྱལ་བ་འདའ་འགྱུར་ཞེས། །ངུ་མོས་འདེབས་ཤིང་ལྷགས་པར་གྱུར། །ལྷ་བརྒྱ་བྱེ་བ་ཕྲག་མང་པོ། །རྣམ་མང་ཆོ་ངེས་འདེབས་བྱེད་ཅིང་། །མི་མཆོག་བསྐལ་པར་བཞུགས་གསོལ་ཞེས། །བསམ་གཏན་ཆེ་ལ་གསོལ་བ་འདེབས། །བདུད་ཀྱི་བུ་ཕོ་མཁས་པ་པོ། །དེད་དཔོན་ཞེས་ནི་བྱ་བ་ཡང་། །མི་མཆོག་མྱ་ངན་འདའ་འགྱུར་ཞེས། །ཤིན་ཏུ་སྡུག་བསྔལ་གྱུར་ཅིང་འོངས། །དེས་ཀྱང་ཞབས་ལ་གཏུགས་ནས་ནི། །ཤཱཀྱའི་རིགས་སྣང་འཇིག་རྟེན་ལ། །བརྩེ་སླད་བསྐལ་པར་བཞུགས་སུ་གསོལ། །རྫོགས་པའི་སངས་རྒྱས་བཞུགས་གྱུར་ན། །ལྷ་དང་མི་ཡི་བདག་པོ་ལ། །བསམ་ཡས་དོན་དུ་འགྱུར་ལགས་ཀྱིས། །ཐུབ་ཆེན་བསྐལ་པར་བཞུགས་གསོལ་ཞེས། །མི་ཡི་མཆོག་ལ་གསོལ་བ་འདེབས། །དེ་ནས་རིགས་ཀྱི་བུ་དམིགས་མེད་ཀྱིས་ལྷ་དང་བཅས། ཚངས་པ་དང་བཅས་པའི་འཇིག་
རྟེན་དེ་དང་། བདུད་ཀྱི་བུ་དེད་དཔོན་ལ་ཚིགས་སུ་བཅད་དེ་སྨྲས་པ། བག་མེད་པས་ནི་འདས་བྱས་ཤིང་། །དེ་ལྟར་སྨྲེ་སྔགས་འདོན་བྱེད་པ། །ཁྱེད་ཀུན་མི་ཤེས་བྱིས་པ་སྟེ། །སྤྲེའུ་རྣམས་དང་ནི་འདྲ་བ་ཡིན། །ཇི་ལྟར་ཕག་ནི་སེམས་བྲལ་ཞིང་། །ཉལ་བ་མཚོན་ཆ་རྣམ་དག་གིས། །ཡོངས་སུ་གཤེགས་ནས་སད་པ་ན། །སྙིང་རྗེས་སྨྲེ་སྔགས་འདོན་པ་ལྟར། །བག་མེད་དབང་སོང་སྔན་ཅད་ནི། །གང་གིས་ཆོས་རྣམས་མ་ཐོས་པ། །ཁྱེད་ཅག་ཐམས་ཅད་དེ་འདྲ་བར། །ཁོ་བོས་དེ་ལྟར་སྤོབས་པ་ཡིན། །དེ་རིང་ཡེ་ཤེས་སྒྲོན་མ་ནི། །འཇིག་རྟེན་དུ་ནི་ནུབ་འགྱུར་ཞིང་། །ཀྱེ་མ་རྒྱལ་བ་འདས་འགྱུར་གྱིས། །དགེ་བ་དག་གིས་ལས་གྱིས་ཤིག །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མ་འགགས་པ་དང་། ཚེ་དང་ལྡན་པ་བྱམས་མའི་བུ་གང་པོ་དང་། ཚེ་དང་ལྡན་པ་རབ་འབྱོར་དང་། ཚེ་དང་ལྡན་པ་དོན་ཡོད་རྒྱལ་པོ་དང་། གནས་བརྟན་འོད་སྲུང་གཞོན་ནུ་དང་། གནས་བརྟན་གསུས་པོ་ཆེ་ཆེན་པོ་ལ་བཀའ་སྩལ་པ། དགེ་སློང་དག་ཁྱེད་ཀྱི་ལག་པ་གཡས་པ་དག་དེ་བཞིན་གཤེགས་པའི་ཕྱག་ཏུ་ཕུལ་ཅིག །དགེ་སློང་དེ་དག་གིས་བཅོམ་ལྡན་འདས་ལེགས་ལགས་སོ་ཞེས་གསོལ་ཏེ་བཅོམ་ལྡན་འདས་ཀྱི་ལྟར་མཉན་ཏོ། །དེ་ནས་དགེ་སློང་འབུམ་ཐམ་པས་བཅོམ་ལྡན་འདས་ཀྱི་ཕྱག་ཏུ་རང་རང་གི་ལག་པ་ཕུལ་ལོ། །དེ་ནས་བཅོམ་ལྡན་འདས་ཀྱིས་ཕྱག་གཡོན་པས་ནི་དགེ་སློང་དེ་དག་ཐམས་ཅད་ཀྱི་ལག་པ་ནས་བཟུང་། ཕྱག་གཡས་པས་ནི་ཀུན་དགའ་བོ་དང་། སྒྲ་གཅན་ཟིན་གྱི་ལག་པ་ནས་བཟུང་སྟེ། དགེ་སློང་དག་གནས་བརྟན་རྣམས་ལ་ཀུན་དགའ་བོ་བཟང་པོ་དང་། དཔལ་སྒྲ་གཅན་ཟིན་འདི་གཉིས་བཅོལ་ཅིང་ཡོངས་སུ་གཏད་དོ་ཞེས་ཕྱག་གིས་དགེ་སློང་དེ་དག་གི་ལག་ཏུ་གཏད་དོ། །དེ་ནས་དེའི་ཚེ་སངས་རྒྱས་ཀྱི་ཞིང་འདིར་སྒྲ་སྐད་དང་ང་རོའི་སྒྲ་སྙིང་རྗེ་ཞིང་འཇིགས་སུ་རུང་བ་དག་བྱུང་བར་གྱུར་ཅིང་སྒྲ་སྐད་དེས་སངས་རྒྱས་ཀྱི་ཞིང་དུ་གྲགས་པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་དང་། ཚེ་དང་ལྡན་པ་སྒྲ་གཅན་ཟིན་གཉིས་གནས་བརྟན་དེ་དག་ལ་ཡོངས་སུ་གཏད་པ་མཐོང་ནས་དགེ་སློང་ལྔ་བརྒྱ་ཙམ་གྱིས་ཚེའི་འདུ་བྱེད་བཏང་བར་གྱུར་ཏོ། །དེ་ཅིའི་ཕྱིར་ཞེ་ན།
འདི་ལྟར་དགེ་སློང་དེ་དག་བཅོམ་ལྡན་འདས་ཡོངས་སུ་མྱ་ངན་ལས་འདའ་བ་ལ་བལྟ་བར་མི་བཟོད་པའི་ཕྱིར་ཏེ། དེ་དག་འདི་སྙམ་དུ་འཇིག་རྟེན་གྱི་མགོན་པོ། འཇིག་རྟེན་གྱི་སྒྲོན་མ། ཐུགས་རྗེ་དང་ལྡན་པ། དགེ་བའི་བཤེས་གཉེན་དམ་པ། ཐུགས་བརྩེ་བ་དང་ལྡན་པ། ཕན་པར་བཞེད་པ་ཡོངས་སུ་མྱ་ངན་ལས་འདའ་བ་ལ་བདག་ཅག་བལྟ་བར་མི་སྤྲོས། ཇེ་དང་པོ་ཁོ་ནར་བདག་ཅག་ཡོངས་སུ་མྱ་ངན་ལས་འདའ་བར་བྱའོ། །སྙམ་དུ་སེམས་པའི་ཕྱིར་རོ། །དེ་ནས་སྐད་ཅིག་དེ་དང་། ཐང་ཅིག་དེ་དང་། ཡུད་ཙམ་དེ་ལ་སངས་རྒྱས་བཅོམ་ལྡན་འདས་ལྔ་བརྒྱ་ཐམ་པས་རང་རང་གི་སངས་རྒྱས་ཀྱི་ཞིང་དག་ན་བཞུགས་བཞིན་དུ་ཕྱག་གཡས་པ་རྣམས་བརྐྱང་སྟེ། བཅོམ་ལྡན་འདས་ལ་རབ་ཏུ་བཏུད་དོ། ། དེ་ནས་བཅོམ་ལྡན་འདས་ཀྱིས་ཕྱག་གིས་ཀུན་དགའ་བོ་དང་། སྒྲ་གཅན་ཟིན་དང་། གནས་བརྟན་རྣམས་ཀྱི་ལག་པ་ནས་བཟུང་སྟེ་ཕྱག་གིས་དེ་བཞིན་གཤེགས་པ་དེ་དག་གི་ཕྱག་ཏུ་ཕུལ་ནས། བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སྒྲ་གཅན་ཟིན་འདི་བདག་གི་བུ། །ཀུན་དགའ་བོ་ནི་གོ་རེ་ལོང་། །འདི་གཉིས་དྲང་སྲོང་ཆེ་རྣམས་ལ། །མངོན་སུམ་དུ་ནི་ཡོངས་སུ་གཏད། །དེ་རིང་འཛམ་བུའི་གླིང་དུ་ནི། །བདག་གི་མཚན་མོ་ཐ་མར་འགྱུར། །ལྷ་དང་ཀླུ་དང་མི་རྣམས་ཀྱིས། །སླན་ཅད་བདག་ནི་མཐོང་མི་འགྱུར། །གང་དག་བྱམས་པ་བསམ་ཡས་པའི། །འཇིག་རྟེན་མགོན་རྣམས་མ་གཏོགས་པར། །གཞན་གང་བདག་ལ་སྐྱོབ་འགྱུར་ཞིང་། །སུ་ཞིག་དཔུང་གཉེན་སྐྱབས་སུ་འགྱུར། །སེམས་ཅན་གཅིག་གི་སླད་དུ་ཡང་། །བསྐལ་པ་སྟོང་ཕྲག་མང་པོ་ནི། །གང་གཱའི་བྱེ་མ་ཇི་སྙེད་པ། །དེ་སྙེད་བསྐལ་པར་བསྡད་བགྱི་ན། །ཚད་མེད་བསམ་གྱིས་མི་ཁྱབ་པའི། །འཇིག་རྟེན་ཁམས་སུ་རྣམ་བལྟས་ན། །གང་གི་ཕྱིར་ནི་འདིར་བསྡད་པའི། །སེམས་ཅན་འགའ་ཡང་མ་མཐོང་ངོ་། །སེམས་ཅན་གང་དག་ཆོས་འདི་ལ། །གུས་བཅས་དོན་ནི་བདག་གིས་བགྱིས། །བློ་གྲོས་ངན་པ་གཞན་དག་ནི། །སངས་རྒྱས་བྱེ་བས་གདུལ་མི་སྤྱོད། །དེ་ནས་སངས་རྒྱས་བཅོམ་ལྡན་འདས་ལྔ་བརྒྱ་ཐམ་པ་དེ་དག་གིས་དེའི་ཚེ་ཚིགས་སུ་བཅད་པ་འདི་དག་གསུངས་
སོ། །ཁྱོད་ཀྱིས་སེམས་ཅན་དོན་རྣམས་མཛད། །སངས་རྒྱས་མཛད་པའང་ཁྱོད་ཀྱིས་མཛད། །ཆོ་འཕྲུལ་དག་ཀྱང་བསྟན་མཛད་ཅིང་། །ཆོས་ཀྱི་རྔ་ཆེན་རབ་ཏུ་བརྡུངས། །སྐྱོབ་པ་ཤཱཀྱ་སེང་གེ་ཡིས། །སྤྲིན་གྱིས་ས་གཞི་ཆེན་པོ་ལྟར། །སྲོག་ཆགས་བྱེ་བ་ཚིམ་མཛད་ཅིང་། །སེམས་ཅན་རྣམས་ཀྱི་ཟུག་རྔུ་ཕྱུང་། །དེ་ནས་སངས་རྒྱས་བཅོམ་ལྡན་འདས་དེ་དག་ལ་ཚེ་དང་ལྡན་པ་ཀུན་དགའ་བོ་དང་། ཚེ་དང་ལྡན་པ་སྒྲ་གཅན་ཟིན་གྱིས་པུས་མོ་གཡས་པའི་ལྷ་ང་ས་ལ་བཙུགས་ནས་ཚིགས་སུ་བཅད་དེ་གསོལ་པ། སངས་རྒྱས་རྣམས་ཀྱི་གཟི་བརྗིད་ཀྱིས། །སྤྱན་ལྡན་བསྐལ་པར་མཐོང་བ་དང་། །འདྲེན་པ་བསྐལ་པར་བཞུགས་འགྱུར་བར། །དཔའ་ཆེན་རྣམས་ལ་གསོལ་བ་འདེབས། །རྫོགས་པའི་སངས་རྒྱས་རྐང་གཉིས་མཆོག །ཤེས་རབ་ཆེན་པོ་བཞུགས་གྱུར་ན། །སྲོག་ཆགས་བྱེ་བ་མང་པོ་ལ། །བསམ་གྱིས་མི་ཁྱབ་དོན་དུ་འགྱུར། །ལྷ་ཡི་ཚོགས་རྣམས་འཕེལ་འགྱུར་ཞིང་། །ལྷ་མིན་རྣམས་ཀྱང་འགྲིབ་པར་འགྱུར། །ཉན་ཐོས་བྱང་ཆུབ་སེམས་དཔའ་ཡང་། །བསམ་གྱིས་མི་ཁྱབ་འཕེལ་བར་འགྱུར། །དེ་ནས་སངས་རྒྱས་བཅོམ་ལྡན་འདས་ལྔ་བརྒྱ་ཐམ་པ་དེ་དག་གིས་ཚེ་དང་ལྡན་པ་ཀུན་དགའ་བོ་དང་། ཚེ་དང་ལྡན་པ་སྒྲ་གཅན་ཟིན་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་ངུ་མོས་བཏབ་པས་ཆོག །སྨྲེ་སྔགས་བཏོན་པས་ཆོག་གིས་མྱ་ངན་མ་བྱེད་སྨྲེ་སྔགས་མ་འདོན་ཅིག །འདུས་བྱས་ཐམས་ཅད་ཀྱི་རང་བཞིན་དེ་ཡིན། མཐའ་དེ་ཡིན། འགྲོ་བ་དེ་ཡིན་ཏེ། འདུས་བྱས་སྐྱེས་པ་ལ་རྟག་པ་ཉིད་མེད་དེ། མཐའ་འདི་ལྟ་བུ་ཡིན་པས་དེ་བཞིན་གཤེགས་པ་ཆོས་ཀྱི་བདག་ཉིད་ཀྱིས་འདུས་བྱས་ཐམས་ཅད་སྤངས་པས་ན་མངའ་དབང་མི་མཛད་ཅིང་། ཡང་མངའ་བདག་མཛད་པར་ནམ་ཡང་མི་དགོངས་སོ། །རིགས་ཀྱི་བུ་དག་ཁྱེད་ངེད་ཀྱི་སངས་རྒྱས་ཀྱི་ཞིང་དུ་འོང་བར་འགྱུར་བའམ། དེ་བཞིན་གཤེགས་པས་ཕྱག་བརྐྱང་སྟེ་འོད་ཀྱིས་སྣང་བར་མཛད་པར་འགྱུར་བའི་འོད་དེས་འོང་བར་འགྱུར་རོ། །ཁྱེད་ཅག་འདི་ན་འདུག་ན་ཡང་དེ་བཞིན་གཤེགས་པས་ཞལ་ཉེ་བརསྟོན་པར་འགྱུར་ཞིང་དམ་པའི་ཆོས་བསྟན་པ་ཡང་མངོན་པར་སྟོན་པར་འགྱུར་གྱིས་མྱ་ངན་མ་བྱེད་ཅིག །དེ་ནས་
དེའི་ཚེ་བཅོམ་ལྡན་འདས་འདི་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ། ཇི་ལྟར་ཐུགས་མཉམ་པར་བཞག་པས་ཞབས་གཡས་པའི་མཐེ་བོ་དང་། ཕྱག་གཡས་པའི་མཐེ་བོ་དང་། དེ་བཞིན་
དུ་གཡོན ་པ་གཉིས་དང་། དེ་བཞིན་དུ་སྐུའི་ཡན་ལག་དང་། ཉིང་ལག་རྣམས་དང་། དེ་བཞིན་དུ་ཞབས་ཀྱི་མཐིལ་འཁོར་ལོའི་མཚན་གྱིས་སྤྲས་པ་གཉིས་དང་། དེ་བཞིན་དུ་འཇམ་ཞིང་དྲ་བས་འབྲེལ་ལ་སེན་མོ་ཟངས་ཀྱི་མདོག་ལྟ་བུའི་ཕྱག་སོར་རྣམས་དང་། ཕྱག་རིས་ཤིན་ཏུ་བཀྲ་བའི་ཕྱག་རིན་པོ་ཆེ་གཉིས་དང་། དེ་བཞིན་དུ་མཚན་ཐམས་ཅད་དང་། དེ་བཞིན་དུ་སྐུ་ལྟེ་བའི་དཀྱིལ་འཁོར་དང་། མདོམས་ཀྱི་གསང་བའི་ཐན་ཀོར་དང་། དེ་བཞིན་དུ་ཞལ་གྱི་དཀྱིལ་འཁོར་དང་། དེ་བཞིན་དུ་ཞལ་གྱི་སྨིན་མཚམས་ནས་འོད་ཟེར་བྱེ་བ་ཕྲག་འབུམ་འབུམ་རབ་ཏུ་བཀྱེ་སྟེ། འོད་ཟེར་རེ་རེའི་ཐོག་མ་ལ་ཡང་པད་མ་བྱེ་བ་ཕྲག་འབུམ་འབུམ་མངོན་པར་སྤྲུལ་ཏོ། །པད་མ་རེ་རེའི་སྙིང་པོ་ལ་ཡང་སེང་གེའི་ཁྲི་བྱེ་བ་ཕྲག་འབུམ་འབུམ་མངོན་པར་སྤྲུལ་ཏོ། །སེང་གེའི་ཁྲི་རེ་རེ་ལ་ཡང་དེ་བཞིན་གཤེགས་པ་རེ་རེ་སྤྲུལ་ཏེ། སངས་རྒྱས་ཀྱི་སྐུས་ཆོས་སྟོན་ཅིང་བཞུགས་པར་གྱུར་ཏོ། །དེ་བཞིན་གཤེགས་པའི་སྤྲུལ་པ་རེ་རེས་ཀྱང་སེམས་ཅན་བྱེ་བ་ཁྲག་ཁྲིག་འབུམ་ཕྲག་དུ་མ་དག་ཟག་པ་ཟད་པར་བྱ་བའི་ཕྱིར་བཏུལ་ཏོ། །ཁ་ཅིག་ནི་འདོད་ཆགས་དང་བྲལ་བའི་སར་བཏུལ་ཏོ། །དེ་ནས་ཡང་བཅོམ་ལྡན་འདས་ཀྱིས་དབུའི་གཙུག་ནས་འོད་ཟེར་བྱེ་བ་ཕྲག་འབུམ་རབ་ཏུ་བཀྱེ་སྟེ། འོད་ཟེར་རེ་རེའི་ཐོག་མ་ལ་ཡང་པད་མ་བྱེ་བ་ཕྲག་འབུམ་འབུམ་མངོན་པར་སྤྲུལ་ཏོ། །པད་མ་རེ་རེའི་སྙིང་པོ་ལ་ཡང་སེང་གེའི་ཁྲི་བྱེ་བ་ཕྲག་འབུམ་འབུམ་མངོན་པར་སྤྲུལ་ཏོ། །སེང་གེའི་ཁྲི་རེ་རེ་ལ་ཡང་དེ་བཞིན་གཤེགས་པ་རེ་རེ་མངོན་པར་སྤྲུལ་ཏེ་སངས་རྒྱས་ཀྱི་སྐུས་ཆོས་སྟོན་ཅིང་བཞུགས་པར་གྱུར་ཏོ། །དེ་བཞིན་གཤེགས་པ་དེ་དག་ཀྱང་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་དང་། གཟུངས་དང་། རྡོ་རྗེའི་ཚིག་ཡང་དག་པར་རབ་ཏུ་སྟོན་པ་དང་། འཁོར་གསུམ་ཡོངས་སུ་དག་པ་དང་། སངས་རྒྱས་ཀྱི་སྟོབས་དང་། མི་འཇིགས་པ་དག་ཡང་དག་པར་རབ་ཏུ་སྟོན་པ་མ་གཏོགས་པར་གཏམ་གཞན་མི་གསུང་ངོ་། །དེ་བཞིན་
གཤེགས་པའི་སྤྲུལ་པ་རེ་རེས་ཆོས་བསྟན་པ་དེས་ཀྱང་སེམས་ཅན་དག་པ་དག་ལས་སྲོག་ཆགས་བྱེ་བ་འབུམ་ཕྲག་དུ་མ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ལ་རབ་ཏུ་བཀོད་དོ། །དེ་ནས་བཅོམ་ལྡན་འདས་ཀྱིས་གྱད་རྣམས་དང་ཉེ་བ་ན་ཡོད་པ་ཤིང་སཱ་ལ་ཟུང་གི་བར་དུ་དེ་བཞིན་གཤེགས་པའི་སྐུ་གློ་གཡས་པས་སེང་གེའི་གཟིམས་ཁྲི་ལ་གཟིམས་པ་ཞིག་མངོན་པར་སྤྲུལ་པ་མཛད་ནས་སེམས་ཅན་དམྱལ་བ་ཆེན་པོ་ཡང་སོས་ཀྱི་གནས་སུ་གཤེགས་ཏེ་རང་རང་གི་སྐུ་ལས་འོད་རབ་ཏུ་བཀྱེའོ། །དེ་རབ་ཏུ་བཀྱེ་མ་ཐག་ཏུ་སེམས་ཅན་དམྱལ་བ་ཆེན་པོ་ཡང་སོས་ཀྱི་གནས་ཐམས་ཅད་སྣང་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་འོད་ཀྱིས་སེམས་ཅན་དམྱལ་བ་ཆེན་པོ་ཡང་སོས་ཀྱི་གནས་ཐམས་ཅད་སྣང་བར་མཛད་ནས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །སེམས་ཅན་འདི་དག་ཡང་དང་ཡང་། །བསད་ཅིང་བསད་ཅིང་ཕྱིར་ཡང་འཚོ། །འདུ་ཤེས་དེ་ཉིད་བསྟན་བྱེད་པས། །དེས་ན་སྡུག་བསྔལ་འབྱུང་བར་འགྱུར། །འཇིག་རྟེན་མགོན་པོ་འོད་མཛད་པ། །འཇིག་རྟེན་འདིར་ནི་བྱུང་གྱུར་ནས། །གང་གིས་སྡུག་བསྔལ་འགག་འགྱུར་བ། །ཟད་པ་མེད་ཅིང་ལེན་མེད་ལ། །འགག་པ་མེད་ཅིང་ཟག་མེད་པའི། །དམ་པའི་ཆོས་ནི་སྟོན་པར་མཛད། །གང་དག་ཆོས་འདི་རབ་ཤེས་པ། །དེ་དག་ངན་འགྲོར་འགྲོ་མི་འགྱུར། །བཅོམ་ལྡན་འདས་ཀྱིས་ཚིགས་སུ་བཅད་པ་དེ་དག་བཀའ་སྩལ་མ་ཐག་ཏུ་དེ་ནས་སྐད་ཅིག་དེ་དང་ཐང་ཅིག་དེ་དང་། ཡུད་ཙམ་དེ་ལ་སེམས་ཅན་དམྱལ་བ་ཆེན་པོ་ཡང་སོས་ཀྱི་གནས་ནས་སྲོག་ཆགས་དུང་ཕྱུར་ཕྲག་གསུམ་གྱིས་ཆོས་འདི་ཐོས་ནས་ཕྱིར་མི་འོང་བའི་འབྲས་བུ་ཐོབ་པར་གྱུར་ཏེ། ཆོས་ཐོབ་པ་དེ་དག་གིས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །ཟད་པ་མ་མཆིས་ལེན་མ་མཆིས། །མི་འགག་ཟག་པ་མ་མཆིས་པའི། །འཕགས་པའི་ཆོས་འདི་འཚལ་གྱུར་པས། །བདག་ཅག་བསིལ་གྱུར་མྱ་ངན་འདས། །མཁྱེན་ནས་ཇི་བཞིན་ཉིད་བརྙེས་ཤིང་། །སེམས་ཅན་རྣམས་ཀྱི་དབང་པོ་མཁྱེན། །རྒྱུ་དང་རྐྱེན་རྣམས་སྟོན་མཛད་ཅིང་། །སེམས་ཅན་རྣམས་ལ་ཐུགས་བརྩེ་བ། །
ཟུག་རྔུ་འབྱིན་ཅིང་གསོས་མཛད་ལ། །སྨན་སྩོལ་མཛད་ཅིང་ཐམས་ཅད་མཁྱེན། །མྱ་ངན་འདའ་བ་སྟོན་མཛད་པའི། །རྫོགས་སངས་རྒྱས་ཀྱིས་བདག་ཅག་བཏུལ། །མིག་དང་སྒྲོན་མར་གྱུར་པ་འདི། །ཤིན་ཏུ་མྱུར་བར་འདས་གྱུར་ན། །སུ་ཞིག་སྲོག་ཆགས་བྱེ་བ་རྣམས། །ཡང་སོས་གནོད་ལས་ཐར་མཛད་འགྱུར། །ཟུག་རྔུ་འབྱིན་མཛད་སྨན་པ་ཆེ། །འབྱུང་པོ་ཀུན་གྱི་གསོས་མཛད་པ། །དེ་ཡིས་སེམས་ཅན་གང་གསོས་པ། །དེ་དག་ངན་འགྲོར་མཆི་མི་འགྱུར། །དེ་ནས་བཅོམ་ལྡན་འདས་དེའི་ཚེ་སེམས་ཅན་དམྱལ་བ་ཆེན་པོ་ཐིག་ནག་གི་གནས་ཀྱི་མཐར་བཞུགས་ཏེ་འོད་རྒྱ་ཆེན་པོ་རབ་ཏུ་བཀྱེའོ། །དེས་སེམས་ཅན་དམྱལ་བ་ཆེན་པོའི་གནས་དེ་སྣང་བར་གྱུར་ནས་སྲོག་ཆགས་སྟོང་ཕྲག་མང་པོ་དག་དེ་ནས་བཏོན་ཏེ་མཐོ་རིས་ལ་རབ་ཏུ་བཀོད་དོ། །དེ་བཞིན་དུ་སེམས་ཅན་དམྱལ་བ་ཆེན་པོ་བསྡུས་གཞོམ་དང་། ངུ་འབོད་དང་ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དག་ནས་ཀྱང་སྲོག་ཆགས་སྟོང་ཕྲག་མང་པོ་དག་བཏོན་ཏེ་མཐོ་རིས་དང་མྱ་ངན་ལས་འདའ་བའི་ལམ་ལ་རབ་ཏུ་བཀོད་དོ། །དེ་ནས་སྐད་ཅིག་དེ་དང་ཐང་ཅིག་དེ་དང་། ཡུད་ཙམ་དེ་ལ་སྲོག་ཆགས་བྱེ་བ་འབུམ་ཕྲག་དུ་མ་དག་སེམས་ཅན་དམྱལ་བའི་གནས་དག་ནས་ཤི་འཕོས་ནས་དགའ་ལྡན་གྱི་ལྷའི་རིས་རྣམས་སུ་སྐྱེས་སོ། །སྐྱེས་མ་ཐག་ཏུ་ལྷའི་བུ་དེ་དག་གིས་སྔོན་གྱི་ཆོས་ཡང་དག་པར་རྗེས་སུ་དྲན་ནས་ཕྱིར་མི་འོང་བའི་འབྲས་བུ་ཐོབ་བོ། །དེ་ནས་ལྷའི་བུ་ཆོས་ཐོབ་པ། ཆོས་རྟོགས་པ། ཆོས་ཀྱི་གཏིང་དུ་ཞུགས་པ་དེ་དག་གིས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །ཇི་ལྟར་དགོན་པའི་ཤུལ་ཞིག་ཏུ། །དེད་དཔོན་འཇིགས་པ་མ་མཆིས་པས། །ཆོམ་རྐུན་གདུག་པས་གཙེས་གྱུར་པའི། །སེམས་ཅན་མང་པོ་ཐར་བགྱིད་ལྟར། །དེ་བཞིན་འཁོར་བའི་བཙོན་ར་ལས། །དེད་དཔོན་བླ་ན་མ་མཆིས་པ། །སངས་རྒྱས་བཅོམ་ལྡན་འདས་ཀྱིས་ནི། །སེམས་ཅན་བྱེ་བ་ཐར་བར་མཛད། །ཐུགས་རྗེ་ཉེ་བར་བསྐྱེད་མཛད་ཅིང་། །བདག་ཅག་སྡུག་བསྔལ་ཐར་མཛད་པའི། །བླ་མེད་དེད་དཔོན་འོད་མཛད་པ། །སངས་རྒྱས་ལ་ནི་སྐྱབས་སུ་མཆི། །
བདག་ཅག་ལུས་ཀྱིས་རེག་གྱུར་པའི། །ཆོས་དང་ཡོན་ཏན་བསམ་ཡས་པའི། །ཚོགས་མཆོག་འཕགས་པའི་དགེ་འདུན་ལའང་། །བདག་ཅག་སྐྱབས་སུ་ཉེ་བར་མཆི། །དེ་ནས་བཅོམ་ལྡན་འདས་ཀྱིས་འོད་བསིལ་ཞིང་འཇམ་པས་སེམས་ཅན་དམྱལ་བ་ཆེན་པོ་མནར་མེད་པའི་གནས་ཀྱི་སེམས་ཅན་དམྱལ་བའི་ཡོངས་སུ་གདུང་བ་སིམ་ཞིང་བསིལ་བར་མཛད་ནས་ཡན་ལག་སྟོང་ཡོངས་སུ་རྫོགས་པ། སེམས་ཅན་ཐམས་ཅད་རབ་ཏུ་སིམ་པ་སྐྱེད་པ། འཇམ་པ་སྙན་པར་གསུང་པ། ཕན་པ་དང་བདེ་བར་མཛད་པ། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་ལྡན་པའི་གསུང་གིས་སེམས་ཅན་དམྱལ་བ་པ་དེ་དག་ལ་བཀའ་སྩོལ་ཅིང་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །གང་གིས་སྟོང་ཉིད་མཚན་མེད་དང་། །སྐྱེ་མེད་འདུས་བྱས་མ་ཡིན་པའི། །ཆོས་རྣམས་རབ་ཏུ་ཤེས་གྱུར་པ། །དེ་དག་ངན་འགྲོའི་འཇིགས་ལས་འགྲོལ། །དེ་ནས་སྲོག་ཆགས་བྱེ་བ་འབུམ་ཕྲག་བརྒྱད་ཀྱིས་གསུང་དེ་ཐོས་ནས་དུས་གསུམ་ལ་ཐོགས་པ་མེད་ཅིང་ཡན་ལག་གི་ཡོན་ཏན་འབུམ་དང་ལྡན་པའི་སྒྲ་རྣ་ལམ་དུ་གྲག་པ་ཐོས་ནས་སེམས་ཅན་དམྱལ་བ་ཆེན་པོ་མནར་མེད་པའི་གནས་ནས་ཤི་འཕོས་ཏེ་གཞན་འཕྲུལ་དབང་བྱེད་ཀྱི་ལྷ་རྣམས་དང་སྐལ་བ་མཉམ་པར་སྐྱེས་སོ། །དེ་ནས་བཅོམ་ལྡན་འདས་ཚངས་པའི་འཇིག་རྟེན་དུ་གཤེགས་ཏེ་ཚིགས་སུ་བཅད་པ་འདི་དག་བཀའ་སྩལ་ཏོ། །གང་ལ་སྡུག་བསྔལ་མི་རྙེད་པའི། །སེམས་ཅན་རྣམས་ནི་མཆོག་ཏུ་བདེ། །མིང་དང་མཚན་མ་ཐ་སྙད་དང་། །འདུ་ཤེས་གང་ཡིན་ཚུལ་བཞིན་མིན། །བརྟན་པས་དེ་དག་རྣམ་སྤངས་ན། །དེས་ནི་སྡུག་བསྔལ་དག་ལས་དགྲོལ། །གང་དག་གཟུགས་མེད་རྟེན་པ་ཡི། །འདུ་ཤེས་ཀུན་ཀྱང་ཚུལ་བཞིན་མིན། །ཡང་དང་ཡང་དུ་འཆི་འཕོ་ཞིང་། །ཤི་ནས་སྐྱེ་བར་འགྱུར་བ་ཡི། །སྡུག་བསྔལ་ཕྱིར་ཞིང་རབ་འཕེལ་བ། །ཁམས་གསུམ་པ་དག་ཅི་ཕྱིར་བདེ། །གང་གིས་སྟོང་པ་སྟོང་ཤེས་ཤིང་། །སྟོང་པ་དེ་ལའང་མི་སེམས་ལ། །གང་དག་སྟོང་ཉིད་མི་མཐོང་བ། །དེ་དག་སྟོང་ཉིད་ཤེས་པ་ཡིན། །གང་གིས་ཆོས་དོན་དེ་ཤེས་པ། །
དེ་ལ་བདག་ནི་རྙེད་མི་འགྱུར། །གང་ལ་བདག་ནི་མི་རྙེད་པ། །དེ་ལ་སྡུག་བསྔལ་ག་ལ་འབྱུང་། །སྟོང་དང་ཉེ་བར་ལེན་མེད་དང་། །མཚན་མ་རྙེད་པ་མ་ཡིན་ཞིང་། །བདག་མེད་ཆོས་ནི་སྟོན་བྱེད་པ། །སངས་རྒྱས་ཐུགས་ལས་སྐྱེས་པའི་སྲས། །དེ་ནས་གང་དག་དེར་སྐྱེས་པའི་སྲོག་ཆགས་བྱེ་བ་འབུམ་ཕྲག་བརྒྱད་པོ་དེ་དག་གིས་ཟག་པ་ཟད་པ་ཐོབ་ཅིང་ལྷའི་དྲང་སྲོང་དུ་གྱུར་ནས། དེ་དག་གི་སེམས་ཅན་དམྱལ་བའི་གནས་དག་གི་སེམས་ཅན་དམྱལ་བའི་གནས་ཀྱི་སྡུག་བསྔལ་དག་རྗེས་སུ་དྲན་ཞིང་དེ་བཞིན་གཤེགས་པའི་སྐྱེས་བུའི་མཐུ་ཡང་རྗེས་སུ་དྲན་ནས་བྱས་པ་གཟོ་བའི་ཕྱིར་བདག་ཅག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདའ་བ་མ་མཐོང་བར་དང་པོ་ཁོ་ནར་བདག་ཅག་ཡོངས་སུ་མྱ་ངན་ལས་འདའ་བར་བྱའོ། །ཞེས་དེ་ནས་ལྷའི་བུ་དགྲ་བཅོམ་པ་ཉིད་ཐོབ་པ་དེ་དག་གིས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །མི་འདུལ་ཁ་ལོ་སྒྱུར་བ་གང་ཟག་མཆོག །སྣང་བ་འོད་མཛད་རབ་ཏུ་གསལ་མཛད་པ། །མྱ་ངན་འདའ་བར་མཛད་པ་ཇི་ལྟར་བལྟ། །བདག་ཅག་སྔར་ཉིད་མྱ་ངན་འདའ་བར་བགྱི། །དེ་སྐད་ཅེས་གསོལ་ནས་དེ་ཉིད་དུ་ཡོངས་སུ་མྱ་ངན་ལས་འདས་སོ། །དེ་ནས་བཅོམ་ལྡན་འདས་སྐད་ཅིག་དེ་དང་ཐང་ཅིག་དེ་དང་། ཡུད་ཙམ་དེ་ལ་ཚངས་པའི་འཇིག་རྟེན་ནས་མི་སྣང་བར་གྱུར་ཏེ། གྱད་རྣམས་དང་ཉེ་བ་ན་ཡོད་པ་ཤིང་སཱ་ལ་ཟུང་གི་བར་དུ་སླར་གཤེགས་སོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ང་ནི་དོ་མོད་ནམ་གྱི་ཐུན་ཐ་མ་ལ་ཡོངས་སུ་མྱ་ངན་ལས་འདའ་བར་འགྱུར་ཏེ། སེམས་ཅན་རྣམས་ལ་བསྟན་པར་བྱ་བའི་ཐ་མ་ནི་འདི་ཡིན་གྱིས། བདག་གིས་དེ་བཞིན་གཤེགས་པའི་ཆོ་འཕྲུལ་ཆེན་པོ་སེམས་ཅན་རྣམས་མཆོག་ཏུ་དགའ་བར་བྱེད་པ། བདེ་བ་སྐྱེད་པར་བྱེད་པ། སྡུག་བསྔལ་ཉེ་བར་ཞི་བར་བྱེད་པ། སེམས་ཅན་ཐམས་ཅད་དེ་བཞིན་གཤེགས་པའི་བདག་ཉིད་ཆེན་པོ་ལ་ཐོགས་པ་མེད་པར་འཇུག་པར་འགྱུར་བ། སངས་རྒྱས་ཡོངས་སུ་མྱ་ངན་ལས་འདའ་བ་དང་ལྡན་པ་དག་ཀུན་ཏུ་བསྟན་པར་བྱའོ། །
སྙམ་དུ་དགོངས་སོ། །དེ་ནས་བཅོམ་ལྡན་འདས་ཀྱིས་སྐུའི་གློ་གཡས་པ་བཏེགས་ཏེ། སེང་གེ་བཞིན་དུ་བག་ཚ་བ་མི་མངའ་བར་ཕྱོགས་བཅུའི་སྐྱེ་དགུ་དེ་དག་ལ་གླང་པོ་ཆེའི་ལྟ་སྟངས་ཀྱིས་གཟིགས་ནས་ཞབས་གཡས་པའི་མཐེ་བོས་ས་ཆེན་པོ་ལ་བསྣུན་ཏོ། །བསྣུན་པ་དང་དེ་ལས་སྒྲ་སྐད་ཆེན་པོ་བྱུང་ཞིང་རྣམ་པ་དྲུག་ཏུ་རབ་ཏུ་གཡོས་ཏེ། ཕྱོགས་བཅུའི་འཇིག་རྟེན་དག་འོད་བསམ་གྱིས་མི་ཁྱབ་ཅིང་ཐོགས་པ་མེད་པས་སྣང་བར་ཡང་གྱུར་ཏོ། །དེ་ནས་བཅོམ་ལྡན་འདས་ཀྱིས་སྐུ་ལས་འོད་ཟེར་འདི་ལྟ་བུ་དག་རབ་ཏུ་བཀྱེ་སྟེ། འོད་ཟེར་རབ་ཏུ་བཀྱེ་བ་དེས་སྤུའི་ཁུང་བུ་རེ་རེ་ནས་ཀྱང་འོད་ཟེར་གང་གཱའི་ཀླུང་གི་བྱེ་མ་སྙེད་དག་བྱུང་ངོ་། །འོད་ཟེར་དེ་དག་རེ་རེ་ལས་ཀྱང་འོད་ཟེར་གང་གཱའི་ཀླུང་གི་བྱེ་མ་སྙེད་དག་བྱུང་ངོ་། །འོད་ཟེར་རེ་རེས་ཀྱང་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་དག་སྣང་བར་བྱས་ཏེ། འོད་ཟེར་གཅིག་དང་འོད་ཟེར་གཉིས་པ་ལྷན་ཅིག་མི་འགྲོགས་པར་འགྲོ་ཞིང་ཡང་དང་ཡང་དུ་སྤུའི་ཁུང་བུ་སོ་སོ་ནས་འོད་ཟེར་རབ་ཏུ་བཀྱེ་བས་འཇིག་རྟེན་གྱི་ཁམས་དེ་སྙེད་སྣང་བར་མཛད་དོ། །དེ་ནས་ཡང་བཅོམ་ལྡན་འདས་ཀྱིས་འདི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་མཛད་དེ། རྫུ་འཕྲུལ་མངོན་པར་འདུ་བྱ་བ་ཇི་ལྟ་བུ་མངོན་པར་འདུ་མཛད་པས་སངས་རྒྱས་ཀྱི་མཐུ་དང་། སངས་རྒྱས་ཀྱི་བྱིན་གྱི་རླབས་ཀྱིས་སེམས་ཅན་ཐམས་ཅད་སངས་རྒྱས་ཀྱི་སྤྱན་དང་ལྡན་པར་གྱུར་ཅིང་སངས་རྒྱས་ཀྱི་སྤྱན་གྱི་བྱེ་བྲག་ཀྱང་རྟོགས་པར་གྱུར་ཏེ། དེ་དག་ཐམས་ཅད་ཀྱིས་སངས་རྒྱས་ཀྱི་ཞིང་ཇི་སྙེད་བཅོམ་ལྡན་འདས་ཀྱི་འོད་ཀྱིས་གསལ་བར་གྱུར་པ་དེ་དག་ཐམས་ཅད་མཐོང་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ཀྱིས་ཤར་ཕྱོགས་ལོགས་ན་ཁོ་ར་ཁོར་ཡུག་གི་ཁྱོན་དུ་དཔག་ཚད་འབུམ་ཡོད་པའི་གྲོང་ཁྱེར་དེ་ལྟར་ཆེ་བ། དེ་ལྟར་ཡངས་པ། དེ་ལྟར་མཐོ་བ། དེ་ལྟར་རྒྱ་ཆེ་བ་ཞིག་རྡུལ་ཕྲ་རབ་ཀྱི་རྡུལ་བརྒྱ་སྟོང་དག་གིས་ཡོངས་སུ་གང་བ་མཐོང་ངམ། གསོལ་པ། བཅོམ་ལྡན་
འདས་དེ་དེ་ལྟ་ལགས་སོ། །བཀའ་སྩལ་པ། དགེ་སློང་དག་འདི་ཇི་སྙམ་དུ་སེམས། རྡུལ་ཕྲ་རབ་ཀྱི་རྡུལ་དེ་དག་མང་བ་ཡིན་སྙམའམ། གསོལ་པ། བཅོམ་ལྡན་འདས་དེ་དེ་ལྟ་ལགས་སོ། །བཀའ་སྩལ་པ། གང་གིས་ཟག་མེད་ལེན་མེད་ཅིང་། །འགག་མེད་ཟག་པ་མེད་པ་ཡི། །ཆོས་དེ་རབ་ཏུ་ཤེས་པ་དག །དེ་དག་ངན་འགྲོར་འགྲོ་མི་འགྱུར། །དེ་ནས་སྲོག་ཆགས་བྱེ་བ་ཕྲག་སུམ་ཅུ་རྩ་གསུམ་གྱིས་ཆོས་ཀྱི་རྣམ་གྲངས་འདི་ཐོས་ནས། ཕྱིར་མི་འོང་བའི་འབྲས་བུ་ཐོབ་པར་གྱུར་ཏེ། ཆོས་ཐོབ་པ་དེ་དག་ཐམས་ཅད་ཀྱིས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །ཟད་པ་མ་མཆིས་ལེན་མ་མཆིས། །མི་འགག་ཟག་པ་མ་མཆིས་པ། །འཕགས་པའི་ཆོས་འདི་འཚལ་གྱུར་པས། །བདག་ཅག་བསིལ་གྱུར་མྱ་ངན་འདས། །མཁྱེན་ནས་ཇི་བཞིན་ཉིད་བརྙེས་ཤིང་། །སེམས་ཅན་རྣམས་ཀྱི་དབང་པོ་མཁྱེན། །རྒྱུ་དང་རྐྱེན་རྣམས་སྟོན་མཛད་ཅིང་། །སེམས་ཅན་རྣམས་ལ་ཐུགས་བརྩེ་བ། །ཟུག་རྔུ་འབྱིན་ཅིང་གསོས་མཛད་ལ། །སྨན་སྩོལ་མཛད་ཅིང་ཐམས་ཅད་མཁྱེན། །མྱ་ངན་འདའ་བ་སྟོན་མཛད་པའི། །རྫོགས་སངས་རྒྱས་ཀྱིས་བདག་ཅག་བཏུལ། །མིག་དང་སྒྲོན་མར་གྱུར་པ་འདི། །ཤིན་ཏུ་མྱུར་བར་འདས་གྱུར་ན། །སུ་ཞིག་སྲོག་ཆགས་བྱེ་བ་རྣམས། །ཡང་སོས་གནོད་ལས་ཐར་མཛད་འགྱུར། །ཟུག་རྔུ་འབྱིན་མཛད་སྨན་པ་ཆེ། །འབྱུང་པོ་ཀུན་གྱི་གསོས་མཛད་པ། །དེ་ཡིས་སེམས་ཅན་གང་གསོས་པ། །དེ་དག་ངན་འགྲོར་མཆི་མི་འགྱུར། །དེ་ནས་བཅོམ་ལྡན་འདས་དེའི་ཚེ་སེམས་ཅན་དམྱལ་བ་ཆེན་པོ་ཐིག་ནག་གི་གནས་ཀྱི་མཐར་བཞུགས་ཏེ་འོད་རྒྱ་ཆེན་པོ་རབ་ཏུ་བཀྱེའོ། །དེས་སེམས་ཅན་དམྱལ་བ་ཆེན་པོའི་གནས་དེ་སྣང་བར་གྱུར་ནས་སྲོག་ཆགས་སྟོང་ཕྲག་མང་པོ་དག་དེ་ནས་བཏོན་ཏེ་མཐོ་རིས་ལ་རབ་ཏུ་བཀོད་དོ། །དེ་བཞིན་དུ་སེམས་ཅན་དམྱལ་བ་ཆེན་པོ་བསྡུས་གཞོམ་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དག་ནས་ཀྱང་སྲོག་ཆགས་སྟོང་ཕྲག་མང་པོ་དག་བཏོན་ཏེ་མཐོ་རིས་དང་མྱ་ངན་ལས་འདའ་བ་ལ་རབ་ཏུ་བཀོད་དོ། །དེ་ནས་ཡང་བཅོམ་ལྡན་འདས་ཀྱིས་སེམས་ཅན་དམྱལ་བ་ཆེན་པོ་བརྒྱད་ཀྱི་གནས་རྣམས་སུ་འོད་ཟེར་གསེར་གྱི་ཁ་དོག་ལྟ་བུར་ཤིན་ཏུ་འཇམ་པ། དགའ་བར་གྱུར་པ།
ཡིད་དུ་འོང་བ། སྡུག་བསྔལ་ཉེ་བར་ཞི་བར་བྱེད་པ། མིག་དགའ་བར་བྱེད་པ། སྙིང་དང་མིག་རབ་ཏུ་སིམ་པ་སྐྱེད་པ། བསིལ་བ། བྱམས་པ་དང་། སྙིང་རྗེ་ལས་ངེས་པར་བྱུང་བ། ལུས་བདེ་བ་སྐྱེད་པར་བྱེད་པས་སེམས་ཅན་དམྱལ་བ་ཆེན་པོའི་གནས་དེ་དག་གསལ་བར་མཛད་ཅིང་སེམས་ཅན་དམྱལ་བ་ཆེན་པོ་དེ་དག་གི་མེའི་གདུང་བ་སྐྱེས་པའི་གདུང་བ་ཡང་ཡོངས་སུ་ཞི་བར་མཛད་ནས། སེམས་ཅན་དེ་དག་ལ་བདེ་བ་ཉེ་བར་བསྒྲུབ་པའི་ཕྱིར་སྤུའི་ཁུང་བུ་ཐམས་ཅད་ནས་མཐར་གྱིས་འོད་དེ་དག་རབ་ཏུ་བཀྱེའོ། །དེ་ནས་བཅོམ་ལྡན་འདས་ཀྱིས་འོད་ཀྱིས་སེམས་ཅན་དེ་དག་གི་ལུས་མངོན་པར་བརླན་པར་མཛད་ཅིང་ལུས་དང་སེམས་འཇམ་ཞིང་ལས་སུ་རུང་བ་བསྐྱེད་ནས་ཡོན་ཏན་འབུམ་ཕྲག་དུ་མ་དང་ལྡན་པའི་གསུང་གིས་ཚིགས་སུ་བཅད་དེ་བཀའ་སྩལ་པ། ང་ནི་འཇིག་རྟེན་བདེ་སྩོལ་ཅིང་། །ང་ནི་སྡུག་བསྔལ་ཐར་མཛད་པ། ། ང་ནི་ལུས་ངལ་གྱུར་པ་རྣམས། །རབ་ཏུ་ཞི་བ་སྟོན་མཛད་པའོ། །ངས་བཤད་ཞི་བ་བདེ་བ་དང་། །ཤིན་ཏུ་བལྟ་དཀའི་ཆོས་གང་ཡིན། །གང་དག་ཆོས་དེ་རབ་ཤེས་པ། །དེ་དག་ངན་འགྲོར་འགྲོ་མི་འགྱུར། །གང་དག་སངས་རྒྱས་སྐྱབས་སོང་བའི། །མི་རྣམས་དེ་དག་རྙེད་པ་ཡོད། །དེ་དག་བསྐལ་པ་སྟོང་རྣམས་སུ། །ཕྱིན་ཆད་སྡུག་བསྔལ་བསྟེན་མི་འགྱུར། །བཅོམ་ལྡན་འདས་ཀྱིས་ཚིགས་སུ་བཅད་པ་དེ་དག་བཀའ་སྩལ་མ་ཐག་ཏུ་དེ་ནས་སྐད་ཅིག་དེ་དང་། ཐང་ཅིག་དེ་དང་། ཡུད་ཙམ་དེ་ལ་དེ་ནས་དགེ་སློང་རབ་ཏུ་མང་པོ་དག་དང་སངས་རྒྱས་བཅོམ་ལྡན་འདས་ཚད་མེད་པ་དག་ཀྱང་། སྐད་ཅིག་དང་། ཐང་ཅིག་དང་། ཡུད་ཙམ་དེ་ལ་སེང་གེའི་གཟིམས་ཁྲི་དག་ལ་གློ་གཡས་པས་ཕབ་སྟེ་གཟིམས་པར་གྱུར་ནས་དེ་དག་ཀྱང་སླར་བཞེངས་ཏེ་ཆོ་འཕྲུལ་དེ་ལྟ་བུ་དག་ཀུན་ཏུ་སྟོན་པར་མཛད་དོ། །དེ་ནས་བཅོམ་ལྡན་འདས་ལ་འཁོར་བཞི་པོ་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཅིའི་སླད་དུ་སངས་རྒྱས་བཅོམ་ལྡན་འདས་དེ་དག་ཐམས་ཅད་འདི་ལྟ་སྟེ་དཔེར་བགྱི་ན་ད་ལྟར་བཅོམ་ལྡན་འདས་བཞིན་དུ། སྐད་ཅིག་འདི་དང་། ཐང་ཅིག་འདི་དང་། ཡུད་ཙམ་འདི་ལ་ཡོངས་སུ་མྱ་ངན་ལས་འདའ་བ་ལ་མངོན་པར་ཕྱོགས་ཤིང་ཆོ་འཕྲུལ་དེ་ལྟ་བུ་དག་ཀུན་ཏུ་སྟོན་པར་མཛད་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་དེ་བཞིན་ཏེ།
སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱང་དེང་སྲིད་པ་ཐ་མ་སྤངས་ཏེ་ཡོངས་སུ་མྱ་ངན་ལས་འདའ་བར་འགྱུར་རོ། །དེ་བཞིན་གཤེགས་པ་དེ་དག་ཐམས་ཅད་ཀྱང་ཤཱཀྱ་ཐུབ་པ་ཞེས་བྱ་བར་མཚན་འཐུན་པ་ཤ་སྟག་སྟེ། ཐམས་ཅད་ཀྱང་གྱད་རྣམས་དང་ཉེ་བ་ན་ཡོད་པ་ཤིང་སཱ་ལ་ཟུང་གི་བར་ཤ་སྟག་ཏུ་སེང་གེའི་གཟིམས་ཁྲི་ལ་སྐུའི་གློ་གཡས་པས་ཕབ་སྟེ་བཞུགས་སོ། །དེ་དག་ཐམས་ཅད་ཀྱང་དོ་མོད་ནམ་གྱི་ཐུན་ཐ་མ་ལ་ཡོངས་སུ་མྱ་ངན་ལས་འདའ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ཀྱིས་ཤར་ཕྱོགས་ན་སངས་རྒྱས་བཅོམ་ལྡན་འདས་ཚད་མེད་གྲངས་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་མཐོང་ངམ། དགེ་སློང་དག་ཁྱེད་ཀྱིས་དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། ཕྱོགས་མཚམས་རྣམས་དང་། འོག་དང་། སྟེང་གི་ཕྱོགས་དག་ན་སངས་རྒྱས་བཅོམ་ལྡན་འདས་ཚད་མེད་གྲངས་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་དག་མཐོང་ངམ། དེ་དག་གིས་གསོལ་པ། བཅོམ་ལྡན་འདས་དེ་དེ་ལྟ་ལགས་ཏེ། བགྲང་བའི་ཚུལ་གྱིས་མཐོང་ལགས་ཀྱི་དོན་དམ་པར་ནི་མ་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་ལྟ་སྟེ། དཔེར་ན་གླིང་བཞི་པ་ཆེན་པོའི་འཇིག་རྟེན་གྱི་ཁམས་ཆུའི་ཕུང་པོ་ནས་བཟུང་སྟེ། ཚངས་པའི་འཇིག་རྟེན་གྱི་མཐར་ཐུག་པའི་བར་རྡུལ་ཕྲ་རབ་ཀྱི་རྡུལ་གྱིས་ཡོངས་སུ་གང་བར་གྱུར་ན། དགེ་སློང་དག་འདི་ཇི་སྙམ་དུ་སེམས། །རྡུལ་ཕྲ་རབ་ཀྱི་རྡུལ་དེ་དག་ཚད་བཟུང་བའམ། བགྲང་བའམ། དཔེའམ། ཡོངས་སུ་བགྲང་བར་ནུས་སྙམ་མམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཀའ་སྩལ་པ། དགེ་སློང་དག་འདི་ལྟ་སྟེ། དཔེར་ན་གླིང་བཞི་པ་ཆེན་པོའི་འཇིག་རྟེན་གྱི་ཁམས་དེ་ལྟ་བུའི་བྱེ་བ་ཕྲག་འབུམ་རྡུལ་ཕྲ་རབ་ཀྱི་རྡུལ་གྱིས་ཡོངས་སུ་གང་བར་གྱུར་ན། དགེ་སློང་དག་ངས་ཤའི་སྤྱན་ཐ་མལ་པས་ཤར་ཕྱོགས་སུ་རྡུལ་ཕྲ་རབ་ཀྱི་རྡུལ་དེ་དག་ཇི་སྙེད་པ་དེ་སྙེད་ཀྱི་སངས་རྒྱས་བཅོམ་ལྡན་འདས་དག་གཟིགས་ཏེ། དཔེར་ན་གཉའ་ཤིང་གང་
ཙམ་ན་འདུག་པ། རྣམ་པར་མི་རྟོག་པ། ཤའི་མིག་མ་ཉམས་པ། རྒྱང་རིང་པོར་མི་ལྟ་བའི་རང་གི་ཡུལ་བཞིན་ནོ། །ལྷོ་ཕྱོགས་སུ་ཡང་དེ་བཞིན། ནུབ་ཕྱོགས་སུ་ཡང་དེ་བཞིན། བྱང་ཕྱོགས་སུ་ཡང་དེ་བཞིན། ཕྱོགས་མཚམས་རྣམས་སུ་ཡང་དེ་བཞིན། འོག་གི་ཕྱོགས་སུ་ཡང་དེ་བཞིན། སྟེང་གི་ཕྱོགས་སུ་དེ་བཞིན་ནོ། །དགེ་སློང་དག་ངས་འདི་ལྟ་སྟེ། དཔེར་ན་གླིང་བཞི་པ་ཆེན་པོའི་འཇིག་རྟེན་གྱི་ཁམས་འབུམ་ཆུའི་ཕུང་པོ་ནས་བཟུང་སྟེ། ཚངས་པའི་འཇིག་རྟེན་གྱི་མཐར་ཐུག་པའི་བར་རྡུལ་ཕྲ་རབ་ཀྱི་རྡུལ་གྱིས་ཡོངས་སུ་གང་བར་གྱུར་པའི་རྡུལ་ཕྲ་རབ་ཀྱི་རྡུལ་དེ་དག་ཇི་སྙེད་པ་དེ་སྙེད་ཀྱི་སངས་རྒྱས་བཅོམ་ལྡན་འདས་དག་ཤར་ཕྱོགས་ན་བྱང་ཆུབ་ཀྱི་སྙིང་པོ་ལ་བཞུགས་པ་དང་། བཞུགས་པར་གྱུར་པ་དག་ཀྱང་གཟིགས་ཏེ། སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱང་ཤཱཀྱ་ཐུབ་པ་ཞེས་བྱ་བར་མཚན་འཐུན་པ་ཤ་སྟག་ཡིན་ནོ། །དེ་བཞིན་དུ་མར་མེ་མཛད་ཅེས་བྱ་བར་མཚན་འཐུན་པའི་སངས་རྒྱས་བཅོམ་ལྡན་འདས་དང་། དེ་བཞིན་དུ་ཐམས་ཅད་ཟིལ་གྱིས་གནོན་ཅེས་བྱ་བར་མཚན་འཐུན་པ་དང་། དེ་བཞིན་དུ་པད་མ་དམ་པ་ཞེས་བྱ་བར་མཚན་འཐུན་པ་དང་། དེ་བཞིན་དུ་མངོན་པར་འཕགས་པར་གཤེགས་པ་ཞེས་བྱ་བར་མཚན་འཐུན་པ་དང་། དེ་བཞིན་དུ་གྲགས་མཆོག་ཅེས་བྱ་བར་མཚན་འཐུན་པ་དང་། དེ་བཞིན་དུ་འཁོར་བ་འཇིག་ཅེས་བྱ་བར་མཚན་འཐུན་པ་དང་། དེ་བཞིན་དུ་གསེར་ཐུབ་ཅེས་བྱ་བར་མཚན་འཐུན་པ་དང་། དེ་བཞིན་དུ་འོད་སྲུང་ཞེས་བྱ་བར་མཚན་འཐུན་པ་ཤ་སྟག་ལ་ཡང་དེ་སྙེད་གཟིགས་སོ། །དེ་བཞིན་དུ་མཚན་གཞན་དང་། གཞན་དུ་གསོལ་བའི་སངས་རྒྱས་བཅོམ་ལྡན་འདས་རྣམས་ཀྱང་གཟིགས་ཏེ། སངས་རྒྱས་བཅོམ་ལྡན་འདས་དེ་དག་གི་མཚན་དེ་དག་ཀྱང་འཇིག་རྟེན་ན་ཆོས་རྒྱ་ཆེན་པོ་དང་། ཆོས་སྣ་ཚོགས་དང་། ཆོས་མཆོག་དང་ལྡན་པའི་ལས་ཅན་དག་ཡིན་ཏེ། དེ་ལྟར་མཚན་ཐ་དད་པར་གསོལ་བའི་སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ་འཚོ་ཞིང་གཞེས་པ་དག་ཀྱང་གཟིགས་སོ། །མཚན་དེ་ལྟ་བུའི་སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདའ་བ་དག་དང་། བཞུགས་པ་དག་དང་། ཆོས་ཀྱི་འཁོར་ལོ་བསྐོར་བ་དག་ཀྱང་གཟིགས་ཏེ། ངའི་ཤའི་སྤྱན་ཐ་མལ་པ་བསྒྲིབས་པ་མེད་པ།
ཐོགས་པ་མེད་པ་ཆགས་པ་མེད་པའི་ཡུལ་དུ་སྣང་བ་ནི་དེ་དག་ཡིན་ཏེ། དེ་བཞིན་གཤེགས་པས་དེ་ལྟར་རབ་ཏུ་མཁྱེན་ཏོ། །དེ་བཞིན་གཤེགས་པས་རབ་ཏུ་མཁྱེན་པ་གང་ཡིན་པ་ནི་དེ་བས་ཀྱང་ལྷག་པ་དང་། ལྷག་པ་བས་ཀྱང་ལྷག་པ་དང་། བསམ་གྱིས་མི་ཁྱབ་པ་དང་། ཆེས་བསམ་གྱིས་མི་ཁྱབ་པ་དང་། གོང་མ་དང་། ཆེས་གོང་མ་དང་། ཚད་མེད་པ་དང་། ཆེས་ཚད་མེད་པ་དག་ཀྱང་རབ་ཏུ་མཁྱེན་ཏོ། །ཤའི་སྤྱན་ཐ་མལ་པས་ཀྱང་དེ་ལྟར་དེ་བཞིན་གཤེགས་པ་ཚད་མེད་པ་དང་། དེ་ལྟར་གཞལ་དུ་མེད་པ་དང་། དེ་ལྟར་བགྲང་དུ་མེད་པ་དང་། དེ་ལྟར་གྲངས་མེད་པ་ཡིན་ན། སངས་རྒྱས་ཀྱི་ཆོས་རྣམས་ཀྱིས་ལྟ་སྨོས་ཀྱང་ཅི་དགོས། དགེ་སློང་དག་འདི་ལྟ་སྟེ། དཔེར་ན་ཁྱིམ་པའམ་རབ་ཏུ་བྱུང་བ་གང་ལ་ལ་ཞིག་གིས་སངས་རྒྱས་ཀྱི་ཞིང་འདིའི་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། སྟོབས་བཅུ་དང་། མི་འཇིགས་པ་ཐོབ་པར་གྱུར་པ་དེ་དག་ལ་བསྐལ་པ་ཡོངས་སུ་རྫོགས་པར་བཀུར་སྟིར་བྱས། བླ་མར་བྱས། རི་མོར་བྱས། མཆོད་པར་བྱས། རྗེད་པར་བྱས། གསོལ་བར་བྱས་ཏེ། མཆོད་པ་སྣ་ཚོགས་བསམ་གྱིས་མི་ཁྱབ་པ་དག་གིས་མཆོད་པ་བྱས་པ་བས། རིགས་ཀྱི་བུའམ། རིགས་ཀྱི་བུ་མོ་ལ་ལ་ཞིག་གིས་སངས་རྒྱས་ཐམས་ཅད་རྣམ་པར་འབྱེད་པ་ཡང་དག་པར་རབ་ཏུ་སྟོན་པའི་ཆོས་ཀྱི་རྣམ་གྲངས་འདི་ལ་དད་པའི་སེམས་བསྐྱེད་པ་གཅིག་ཙམ་སྐྱེད་ཅིང་ཐེ་ཙོམ་མེད་པའི་བློས་ཡང་དག་པའི་འདུ་ཤེས་བསྐྱེད་པར་གྱུར་ན། སེམས་བསྐྱེད་མ་ཐག་ཏུ་དེ་བས་ཆེས་བསོད་ནམས་མང་དུ་སྐྱེ་བར་འགྱུར་ཞིང་སངས་རྒྱས་ཀྱི་ཡོན་ཏན་མང་པོ་དག་དང་ཡང་ཉེ་བར་འགྱུར་གྱི། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ཀྱིས་ཐམས་ཅད་མཁྱེན་པ་ཉིད་ཐོབ་པར་གྱུར་པ་ལ་བསྐལ་པར་བསྙེན་བཀུར་བྱས་པས་ནི་དེ་ལྟ་མ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་ཞིག་ཡེ་ཤེས་འདི་ལ་མོས་པར་བྱེད་པ་དེ་ནི་སངས་རྒྱས་བཅོམ་ལྡན་འདས་རྣམས་དང་ཉེ་བར་འགྱུར་ཞིང་། དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་ཡང་ཉེ་བར་འགྱུར་རོ། །ཤའི་སྤྱན་བཤད་པ་ལུང་བསྟན་པ་འདི་བཤད་པ་ན་
སྲོག་ཆགས་བྱེ་བ་ཕྲག་དྲུག་ཅུ་རྩ་གཉིས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་འབྱུང་བར་དཀའ་བ་ཡིན་གྱིས། བདག་ཅག་གིས་འདི་ཉིད་ལ་སྡུག་བསྔལ་ཟད་པ་དང་། ཉོན་མོངས་པའི་མཐའ་མ་དང་། ཟག་པ་ཟད་པ་ཐོབ་པར་བྱའོ་སྙམ་ནས་ཡང་ཕྱིར་མི་ལྡོག་པར་གྱུར་ཏོ། །སེམས་ཅན་དཔག་ཏུ་མེད་པ་རྣམས་ནི་སློབ་པའི་ས་ལ་བཀོད་པར་གྱུར་ཏོ། །བྱང་ཆུབ་སེམས་དཔའ་ཁྲག་ཁྲིག་ཕྲག་བཅུ་ནི་སེམས་དང་པོ་བསྐྱེད་པས་ཡོངས་སུ་གྲུབ་པར་གྱུར་ཏོ། །བྱང་ཆུབ་སེམས་དཔའ་བྱེ་བ་འབུམ་ཕྲག་སུམ་ཅུ་རྩ་གཉིས་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེ་ནས་བདུད་སྡིག་ཅན་སྡུག་བསྔལ་ཞིང་ཡིད་མི་བདེ་བར་གྱུར་ཏེ། མཆི་མས་བརྣངས་ཤིང་ངུ་བཞིན་བྱུང་སྟེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་སེམས་ཅན་རྣམས་བདག་གི་ཡུལ་ལས་ཡང་དག་པར་འདའ་བར་མ་གྱུར་ཅིག་སྙམ་ནས། གང་གི་སླད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདའ་བར་འཚལ་བ་དེ་ཉིད་བཅོམ་ལྡན་འདས་ཉམས་པ་མི་མངའ་བས་སྐུ་ཚེའི་ཚད་བསྐལ་པར་བཞུགས་པ་དང་འདྲ་བར་སྐྱ་རེངས་མ་ཤར་ཅིང་གདུགས་མ་བདལ་བར་ཡང་སེམས་ཅན་ཚད་མ་མཆིས་པ་རྣམས་ཀྱི་དོན་གྱི་སླད་དུ་འདི་ལྟ་སྟེ། མྱ་ངན་ལས་འདའ་བ་ལ་རབ་ཏུ་བཀོད་ལགས་པས། བཅོམ་ལྡན་འདས་དེ་བཞིན་གཤེགས་པས་བདག་གི་ཡུལ་སྟོངས་པར་མཛད་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བདུད་སྡིག་ཅན་ལ་འདི་སྐད་ཅེས་བཀའ་སྩལ་ཏོ། །སྡིག་ཅན་སེམས་ཅན་གང་དག་དགེ་བའི་ཆོས་རྣམས་ལ་མངོན་པར་མི་བརྩོན་པ་དང་། གང་དག་དེ་བཞིན་གཤེགས་པའི་ཡུལ་ལ་དད་པར་མི་བྱེད་པ་དེ་དག་ཁྱོད་ཀྱི་གྲོགས་ཡིན་ལ། ཁྱོད་ཀྱང་དེ་དག་གི་གྲོགས་ཡིན་པས་སྡིག་ཅན་ཁྱོད་ཀྱི་གྲོགས་མང་དུ་ཡོད་ཀྱིས། སྡིག་ཅན་ངུ་བར་མ་བྱེད་སྨྲེ་སྔགས་མ་འདོན་ཅིག །དེ་ནས་བཅོམ་ལྡན་འདས་ཀྱིས་དེའི་ཚེ་ཕྱག་གིས་སེན་མོའི་རྩེ་མོས་ས་གཞི་ཆེན་པོ་ལས་སའི་རྡུལ་ཞིག་བླངས་ནས་བདུད་སྡིག་ཅན་ལ་བཀའ་སྩལ་པ།
སྡིག་ཅན་འདི་ཇི་སྙམ་དུ་སེམས། ཅི་སེན་མོའི་རྩེ་མོ་ལ་རྟེན་པ་དང་ས་གཞི་ཆེན་པོ་ལ་རྟེན་པའི་རྡུལ་གང་ཡིན་པ་དེ་གཉིས་གང་མང་སྙམ་སེམས། དེ་སྐད་ཅེས་བཀའ་སྩལ་པ་དང་། །བཅོམ་ལྡན་འདས་ལ་བདུད་སྡིག་ཅན་གྱིས་འདི་སྐད་གསོལ་ཏོ། །བཅོམ་ལྡན་འདས་བཅོམ་ལྡན་འདས་ཀྱིས་ཕྱག་གི་སེན་མོའི་རྩེ་མོ་ལ་མཆིས་པའི་དོག་སའི་རྡུལ་ནི་ཉུང་གི་ས་གཞི་ཆེན་པོ་ལ་མཆིས་པ་ནི་ཤིན་ཏུ་མང་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བདུད་སྡིག་ཅན་ལ་འདི་སྐད་ཅེས་བཀའ་སྩལ་ཏོ། །སྡིག་ཅན་འདི་ལྟ་སྟེ་དཔེར་ན་ངའི་སེན་མོའི་རྩེ་མོ་ལ་འདུག་པའི་རྡུལ་བས་ཀྱང་ཆེས་ཉུང་བའི་སེམས་ཅན་དག་ངས་ཉོན་མོངས་པ་ཟད་པར་བྱས་ཏེ། ཡོངས་སུ་མྱ་ངན་ལས་འདས་པ་བླ་ན་མེད་པ་ལ་སོ་སོར་བཀོད་ཀྱི། སྡིག་ཅན་འདི་ལྟ་སྟེ་དཔེར་ན་ས་གཞི་ཆེན་པོ་ལ་རྟེན་པའི་རྡུལ་བས་ཀྱང་ཆེས་མང་བའི་སེམས་ཅན་རྣམས་ནི་ཁྱོད་ཀྱི་ཡུལ་དུ་སོང་བས་ན་སེམས་ཅན་གྱི་ཁམས་དཔག་ཏུ་མེད་པར་ཡོད་ཀྱིས་སྡིག་ཅན་ཁྱོད་དགའ་བར་གྱིས་ཤིག །སྡིག་ཅན་དེ་ལྟ་མོད་ཀྱི་སེམས་ཅན་རྣམས་ནི་བདག་ཉིད་ཀྱིས་བདག་ཉིད་ཇི་ལྟར་རིང་བར་འགྱུར་བ་དེ་ལྟར་བྱེད་པས་ན་དེ་རྣམས་ལ་ཁྱོད་ཀྱིས་ཀྱང་ཅི་ཞིག་བྱར་ཡོད། སྡིག་ཅན་དེ་ལྟར་ན་སེམས་ཅན་གྱི་ཁམས་དཔག་ཏུ་མེད་པར་ཡོད་ཀྱིས་དེ་དག་ལ་བྱ་བ་གང་ཡོད་པ་དེ་གྱིས་ཤིག །དེ་བཞིན་གཤེགས་པ་ནི་དོ་མོད་ནམ་གྱི་ཐུན་ཐ་མ་ལ་ཡོངས་སུ་མྱ་ངན་ལས་འདའ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ཀྱིས་སངས་རྒྱས་བཅོམ་ལྡན་འདས་དག་མཐོང་ངམ། གསོལ་པ། བཅོམ་ལྡན་འདས་དེ་དེ་ལྟ་ལགས་སོ། །བཀའ་སྩལ་པ། །དེ་བས་ཀྱང་ཤིན་ཏུ་ཚད་མེད་པ་དག་ཡོད་པར་བལྟའོ། །དེ་བཞིན་དུ་སངས་རྒྱས་བཅོམ་ལྡན་འདས་དེ་དག་གི་འཇིག་རྟེན་གྱི་ཁམས་དང་། སངས་རྒྱས་ཀྱི་ཞིང་ཕུན་སུམ་ཚོགས་པ་དག་མཐོང་ངམ། བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་བཀོད་པ་དང་། ཉན་ཐོས་རྣམས་ཀྱི་ཉན་ཐོས་ཀྱི་ཕུན་སུམ་ཚོགས་པ་དག་མཐོང་ངམ། །དེ་དག་གིས་གསོལ་པ། བཅོམ་ལྡན་འདས་དེ་དེ་ལྟ་ལགས་སོ། །བདེ་བར་གཤེགས་པ་དེ་དེ་ལྟ་ལགས་སོ། །བཀའ་སྩལ་པ། དགེ་སློང་དག་དེ་བཞིན་གཤེགས་
པས་ནི་དེ་བས་ཀྱང་ཕྱིར་ཞིང་ལྷག་པ་དང་། ཤིན་ཏུ་ཚད་མེད་པ་དག་ཀྱང་རབ་ཏུ་མཁྱེན་ཏེ། དགེ་སློང་དག་ངས་ཕྱོགས་བཅུའི་འཇིག་རྟེན་གྱི་ཁམས་ན་དེ་བཞིན་གཤེགས་པའི་ཕུན་སུམ་ཚོགས་པ་དང་། སངས་རྒྱས་ཀྱི་ཞིང་གི་ཕུན་སུམ་ཚོགས་པ་དེ་ལྟ་བུ་དག་མཐོང་བ་ནི་ངས་བསྐལ་པའམ། བསྐལ་པ་བརྒྱའམ། བསྐལ་པ་སྟོང་ངམ། བསྐལ་པ་འབུམའམ། བསྐལ་པ་བྱེ་བའམ། བསྐལ་པ་ཁྲག་ཁྲིག་གམ། དེ་བས་ཀྱང་ལྷག་པ་དེ་སྙེད་དུ་དཔེས་རབ་ཏུ་ཕྱེ་སྟེ་རྒྱ་ཆེར་ཡང་དག་པར་རབ་ཏུ་བརྗོད་ཀྱང་མཐར་ཐུག་པར་འགྱུར་བ་མེད་དོ། །དགེ་སློང་དག་ངས་ཁྱེད་ཅག་ཉན་ཐོས་རྣམས་ལ་སྟོན་པའི་བྱ་བ་གང་ཡིན་པ་དེ་ཡང་བྱས་ཏེ་ངས་ཆོས་ལ་སློབ་དཔོན་གྱི་དཔེ་མཁྱུད་མ་བྱས་པར་ཕྱི་ནང་མེད་པར་རྣམ་པ་ཐམས་ཅད་དུ་ཐམས་ཅད་བསྟན་ཟིན་ཏེ། དེ་ལས་ལྷག་པར་ཐོབ་པར་བྱ་བ་ནི་ཐ་ན་རྩྭའི་རྩེ་མོའི་ཆ་ཤས་ཙམ་ཡང་མེད་ཀྱིས་ད་ཁྱེད་ཅག་གིས་ནན་ཏན་ལ་གནས་པར་བྱའོ། །ངས་ཁྱེད་ཅག་ལ་མྱ་ངན་ལས་འདའ་བའི་ཆོས་ཀྱང་བསྟན། མྱ་ངན་ལས་འདའ་བར་འགྲོ་བའི་ལམ་ཡང་བསྟན། སེམས་ཅན་རྣམས་ཀྱི་དགེ་བའི་རྩ་བ་ཤིན་ཏུ་དཀའ་བ་དག་ཀྱང་ཡང་དག་པར་བསྐྱེད། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་ཡང་དག་པར་བསྒྲུབས་ཟིན་གྱིས་དེ་བཞིན་དུ་ཐམས་ཅད་རྗེས་སུ་ཡོངས་སུ་ཟུང་ལ་ཅི་ནས་ཀྱང་ཉམས་པར་མི་འགྱུར་བ་དེ་ལྟར་གྱིས་ཤིག །དེ་ནས་བཅོམ་ལྡན་འདས་ཀྱིས་དེའི་ཚེ་འདི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་མཛད་དེ། དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་མཛད་པས་སངས་རྒྱས་བཅོམ་ལྡན་འདས་དེ་དག་གིས་ཕྱོགས་བཅུའི་འཇིག་རྟེན་གྱི་ཁམས་དག་ཏུ་ཆོས་བསྟན་པ་དེ་དག་སངས་རྒྱས་ཀྱི་ཞིང་འདི་ན་གནས་པའི་སེམས་ཅན་རྣམས་ཀྱིས་ཐོས་པར་གྱུར་ཏེ། སངས་རྒྱས་བཅོམ་ལྡན་འདས་དེ་དག་གིས་ཆོས་གང་དག་བསྟན་པའི་ཆོས་དེ་དག་སྟོན་ཅིང་ཆོས་དེ་དག་ཀུན་ཏུ་ཤེས་པར་གྱུར་པའི་སེམས་ཅན་གང་གཱའི་ཀླུང་གི་བྱེ་མ་སྙེད་ནི་ཐེག་པ་གསུམ་ལ་རབ་ཏུ་བཀོད་པར་གྱུར་ཏོ། །བྱེ་བ་འབུམ་ཕྲག་བཅུ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་བཀོད་པར་གྱུར་ཏོ། །སྲོག་ཆགས་བྱེ་བ་ཁྲག་ཁྲིག་འབུམ་ཕྲག་བཅུ་ནི་རང་བྱང་ཆུབ་ལ་རབ་ཏུ་བཀོད་པར་
གྱུར་ཏོ། །སེམས་ཅན་དེ་བས་ལྷག་པ་རྣམས་ནི་ཟག་པ་ཟད་པ་ལ་གནས་པར་གྱུར་ཏོ། །དེ་ལྟར་ཆོས་བསྟན་པ་འདིས་སེམས་ཅན་ཁྲག་ཁྲིག་ཕྲག་ཚད་མེད་དཔག་ཏུ་མེད། བགྲང་དུ་མེད། གཞལ་དུ་མེད་ཅིང་བསམ་གྱིས་མི་ཁྱབ་པ་རྣམས་ཀྱི་དོན་བྱས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ད་ནི་ང་ཡོངས་སུ་མྱ་ངན་ལས་འདའ་ཡིས་ཁྱེད་ཀྱིས་ཅི་ནས་ཀྱང་སངས་རྒྱས་ཀྱི་བསྟན་པ་ཀུན་ཏུ་བསྲུང་བ་ལ་ནན་ཏན་གྱིས་ཤིག །དགེ་སློང་དག་ཁྱེད་ཀྱིས་བདག་ལ་ཕན་པ་དང་། གཞན་ལ་ཕན་པའི་ཕྱིར་དེ་ལྟར་བསླབ་པར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཁྱེའུ་བཞིའི་ཏིང་ངེ་འཛིན་ཅེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། པྲ་ཛྙཱ་བརྨ་དང་། ཞུ་ཆེན་གྱི་ལོ་ཙཱ་བ་བན་དེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།