འཕགས་པ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ཞེས་བྱ་བ་ཐེག་པ་ཆེན་པོའི་མདོ།
རྒྱུད་འབུམ་ཕ་པ་བཞུགས་སོ།
རྒྱ་གར་སྐད་དུ། ཨཱཪྱ་སུ་བརྞ་པྲ་བྷཱ་སོཏྟ་མ་སཱུ་ཏྲེནྡྲ་རཱ་ཛ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་དང་། བྱང་ཆུབ་སེམས་དཔའ་དང་། རང་སངས་རྒྱས་དང་། འཕགས་པ་ཉན་ཐོས་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བྱ་རྒོད་ཕུང་པོ་ཆོས་ཀྱི་དབྱིངས། །ཟབ་མོ་སངས་རྒྱས་སྤྱོད་ཡུལ་ན། །དེ་བཞིན་གཤེགས་པ་བཞུགས་ནས་ནི། །དག་ཅིང་རྡུལ་རྣམས་མེད་པ་ཡི། །བྱང་ཆུབ་སེམས་དཔའ་མཆོག་རྣམས་ལ། །མདོ་སྡེའི་དབང་པོའི་རྒྱལ་པོ་སྟེ། །མཉན་ན་ཤིན་ཏུ་ཟབ་པ་དང་། །ཡོངས་སུ་བརྟགས་ན་ཟབ་པ་ཉིད། །གསེར་འོད་དམ་པ་འདི་འཆད་དོ། །ཕྱོགས་བཞིར་སངས་རྒྱས་རྣམས་ཀྱིས་ནི། །བྱིན་གྱི་རླབས་ཀྱིས་བྱིན་བརླབས་པ། །མི་འཁྲུགས་པས་ནི་ཤར་ཕྱོགས་
སུ། །རིན་ཆེན་ཏོག་གིས་ལྷོ་ཕྱོགས་སུ། །འོད་དཔག་མེད་ཀྱིས་ནུབ་ཕྱོགས་སུ། །རྔ་སྒྲ་ཡིས་ནི་བྱང་ཕྱོགས་སུ། །སྡིག་པ་ཐམས་ཅད་གཞིག་པའི་ཕྱིར། །བཤད་པ་དམ་པ་བཀྲ་ཤིས་པ། །སྡིག་པའི་ལས་རྣམས་ཟད་བྱེད་པ། ། བདེ་བ་ཐམས་ཅད་སྦྱིན་བྱེད་པ། །སྡུག་བསྔལ་ཐམས་ཅད་འཇིག་བྱེད་པ། །ཐམས་ཅད་མཁྱེན་པ་ཉིད་ཀྱི་གཞི། །དཔལ་ཀུན་གྱིས་ནི་ལེགས་བརྒྱན་པ། །བྱིན་གྱིས་བརླབས་ཏེ་བརྗོད་པར་བྱ། །སེམས་ཅན་གང་དག་དབང་པོ་ཉམས། །ཚེ་ཟད་པ་དང་ཚེ་ཉམས་དང་། །ཕུན་སུམ་ཚོགས་མིན་གང་ཆགས་དང་། །ལྷ་རྣམས་རྒྱབ་ཀྱིས་ཕྱོགས་པ་དང་། །མཛའ་སྡུག་སྐྱེ་བོ་སྡང་བ་དང་། །བྲན་བཟའ་ལ་སོགས་གཙེས་པ་དང་། །ཕན་ཚུན་མཐུན་པ་མ་ཡིན་དང་། །ནོར་འགྲིབས་པས་ནི་གནོད་པ་དང་། །མྱ་ངན་ངལ་དང་གནོད་པ་དང་། །འཇིགས་པ་དང་ནི་ཕོངས་པ་དང་། །གཟའ་དང་རྒྱུ་སྐར་བྱད་སྟེམས་དང་། །མི་བཟད་གདོན་གྱིས་ཉེན་པ་དང་། །མྱ་ངན་ངལ་ལས་བྱུང་བ་ཡི། །རྨི་ལམ་སྡིག་པ་མཐོང་ན་ཡང་། །དེས་ནི་རབ་བཀྲུས་གཙང་མ་ཡིན། ། མདོ་སྡེ་དམ་པ་མཉན་པར་བྱ། །གང་དག་ཡིད་དགེ་སེམས་དང་ཞིང་། །གོས་གཙང་རྣམས་ཀྱིས་རབ་བརྒྱན་ཏེ། །ཟབ་མོ་སངས་རྒྱས་སྤྱོད་ཡུལ་བ། །མདོ་སྡེ་མཉན་པར་བྱེད་ན་ནི། །མདོ་སྡེ་འདི་ཡི་གཟི་བརྗིད་ཀྱིས། །སྲོག་ཆགས་ཀུན་གྱི་གནོད་པ་དག །ཤིན་ཏུ་མི་བཟད་འདི་འདྲ་བ། །དེ་དག་རྟག་ཏུ་ཞི་བར་འགྱུར། །འཇིག་རྟེན་སྐྱོང་བ་བདག་ཉིད་དང་། །བློན་པོ་ཚོགས་ཀྱི་དབང་ཕྱུག་བཅས། །གནོད་སྦྱིན་བྱེ་བ་དུ་མ་ཡིས། །དེ་དག་ལ་ནི་སྲུང་བར་བྱེད། །ལྷ་མོ་ཆེན་མོ་དབྱངས་ཅན་དང་། །ནཻ་རཉྫ་
ནར་གནས་པ་དང་། །འབྱུང་པོའི་མ་མོ་འཕྲོག་མ་དང་། །ས་ཡི་ལྷ་མོ་བརྟན་མ་དང་། །ཚངས་པའི་དབང་དང་ལྷ་དབང་དང་། །ཀླུ་དབང་མཐུ་ཆེན་རྣམས་དང་ནི། །མི་འམ་ཅི་དབང་ལྷ་མིན་དབང་། །དེ་བཞིན་ནམ་མཁའ་ལྡིང་དབང་རྣམས། །སྡེ་དང་སྟོབས་དང་བཞོན་པ་དང་། །བཅས་ཏེ་དེ་དག་དེར་ལྷགས་ནས། །ཉིན་དང་མཚན་མོ་མི་གཡེལ་བར། །དེ་དག་ལ་ནི་སྲུང་བར་བྱེད། །ཟབ་མོ་སངས་རྒྱས་སྤྱོད་ཡུལ་བ། །སངས་རྒྱས་ཀུན་གྱི་གསང་བ་སྟེ། །བསྐལ་པ་བྱེ་བར་རྙེད་དཀའ་བ། །མདོ་འདི་རབ་ཏུ་བཤད་པར་བྱ། །གང་དག་མདོ་འདི་ཉན་པ་དང་། །གང་དག་གཞན་ལ་ཐོས་བྱེད་དང་། །གང་སུ་རྗེས་སུ་ཡི་རང་དང་། །གང་དག་མཆོད་པ་བྱེད་པ་རྣམས། །དེ་དག་ལྷ་དང་ཀླུ་དག་དང་། །མི་དང་མི་འམ་ཅི་དག་དང་། །ལྷ་མིན་གནོད་སྦྱིན་དུ་མ་ཡིས། །བསྐལ་པ་བྱེ་བར་མཆོད་པར་འགྱུར། ། སྲོག་ཆགས་བསོད་ནམས་མེད་པ་རྣམས། །དེ་དག་བསོད་ནམས་ཕུང་པོ་ནི། །མཐའ་ཡས་གྲངས་ཀྱང་མེད་པ་དང་། །བསམ་གྱིས་མི་ཁྱབ་སྐྱེ་བར་འགྱུར། །ཕྱོགས་བཅུའི་རྫོགས་པའི་སངས་རྒྱས་དང་། །དེ་བཞིན་ཟབ་མོར་སྤྱོད་པ་ཡིས། །བྱང་ཆུབ་སེམས་དཔའ་རྣམས་ཀྱིས་ཀྱང་། །རབ་ཏུ་གཟུང་བར་འགྱུར་བ་ཡིན། །གཙང་མའི་གོས་རྣམས་རབ་བགོས་ལ། །དྲི་ཞིམ་པ་ཡི་གོས་འཆང་ཞིང་། །བྱམས་པའི་སེམས་ནི་ཉེར་བཞག་ནས། །གཡེལ་བ་མེད་པར་མཆོད་པར་བྱ། །རང་གི་སེམས་ནི་དྲི་མེད་ཅིང་། །རྒྱ་ཆེ་བར་ཡང་རབ་བྱེད་ལ། །སེམས་ཀྱང་ཤིན་ཏུ་དང་བྱེད་ཀྱིས། །མདོ་སྡེ་དམ་པ་མཉན་པར་གྱིས། །གང་དག་མདོ་འདི་ཉན་པ་ནི། །དེ་དག་མི་ནང་ལེགས་པར་འོངས། །མི་ཡི་སྲིད་པ་ལེགས་པར་ཐོབ། །འཚོ་བ་བདེ་བས་འཚོ་བར་འགྱུར། །གང་གི་རྣ་བའི་བུ་གར་ཡང་། །བཤད་པ་འདི་ནི་གྲག་འགྱུར་བ། །དེ་དག་དགེ་རྩ་སྦྱངས་པ་སྟེ། །སངས་རྒྱས་མང་པོས་རབ་ཏུ་བསྔགས། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། གླེང་གཞིའི་ལེའུ་ཞེས་བྱ་བ་སྟེ་དང་པོའོ།། །།ཡང་དེའི་ཚེ་དེའི་དུས་ན། རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན།
བྱང་ཆུབ་སེམས་དཔའ་སེམས་དཔའ་ཆེན་པོ་མཛེས་པའི་ཏོག་ཅེས་བྱ་བ། སྔོན་གྱི་རྒྱལ་བ་ལ་བསྙེན་བཀུར་བྱས་པ། དགེ་བའི་རྩ་བ་བསྐྱེད་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་ལ་རིམ་གྲོ་བྱས་པ་ཞིག་གནས་པ་དེ་འདི་སྙམ་དུ་སེམས་ཏེ། རྒྱུ་གང་དང་རྐྱེན་གང་གིས། བཅོམ་ལྡན་འདས་ཤཱཀྱ་ཐུབ་པ་འདི་ལྟ་སྟེ། ལོ་བརྒྱད་ཅུ་ཞིག་ཐུབ་སྟེ། འདི་ལྟར་སྐུ་ཚེ་ཐུང་སྙམ་ནས། དེ་ཡང་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་ཀྱང་འདི་སྐད་དུ། རྒྱུ་གཉིས་དང་རྐྱེན་གཉིས་ཀྱིས་ཚེ་རིང་བར་འགྱུར་ཏེ། གཉིས་གང་ཞེ་ན་འདི་ལྟ་སྟེ། སྲོག་གཅོད་པ་སྤངས་པ་དང་། ཁ་ཟས་རབ་ཏུ་སྦྱིན་པའོ་ཞེས་གསུངས་ཏེ། བཅོམ་ལྡན་འདས་ཤཱཀྱ་ཐུབ་པས་ནི། བསྐལ་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་མང་པོ་ནས། སྲོག་གཅོད་པ་སྤངས་པར་གྱུར་པ་ནས། དགེ་བ་བཅུའི་ལས་ཀྱི་ལམ་གྱི་བར་དུ་ཡང་དག་པར་བླངས་པར་གྱུར། ཟས་དང་ཕྱི་ནང་གི་དངོས་པོ་རྣམས་སེམས་ཅན་དག་ལ་ཡོངས་སུ་བཏང་སྟེ། ཐ་ན་རང་གི་ལུས་ཀྱི་ཤ་དང་ཁྲག་དང་རུས་པ་དང་རྐང་གིས་ཀྱང་སེམས་ཅན་ལྟོགས་པ་རྣམས་ཚིམ་པར་མཛད་ན། ཟས་གཞན་གྱིས་ལྟ་ཅི་སྨོས་སྙམ་མོ། ། དེ་ནས་སྐྱེས་བུ་དམ་པ་དེ་སངས་རྒྱས་ལ་སོང་བའི་ཡིད་ལ་བྱེད་པ་དག་ལས། འདི་ལྟ་བུའི་ཚུལ་གྱིས་བསམ་པ་འདི་དག་སེམས་པ་ན། དེའི་ཁྱིམ་ཡངས་ཤིང་རྒྱ་ཆེ་ལ་བཻཌཱུཪྱ་སྔོན་པོ་ལས་གྲུབ་པ།ལྷའི་རིན་པོ་ཆེ་དུ་མས་སྤྲས་པ། དེ་བཞིན་གཤེགས་པས་ཁ་དོག་བསྒྱུར་བ། ལྷའི་ལས་འདས་པའི་སྤོས་ཀྱིས་ཁྱབ་པར་གྱུར་ཏོ། །ཁྱིམ་དེའི་ཕྱོགས་བཞི་ནས་ལྷའི་རིན་པོ་ཆེའི་ཁྲི་བཞི་བྱུང་བར་གྱུར་ཏེ། ཁྲི་དེ་དག་ལས་ཀྱང་ལྷའི་རས་བཅོས་བུའི་རིན་པོ་ཆེའི་ཕྲུགས་རྣམས་བཏིང་བ་དག་བྱུང་བར་གྱུར་ཏོ། །ཁྲི་དེ་དག་ལས་ཀྱང་ལྷའི་མེ་ཏོག་པདྨ་རིན་པོ་ཆེ་དུ་མས་སྤྲས་པ། དེ་བཞིན་གཤེགས་པས་ཁ་དོག་བསྒྱུར་བ་དག་བྱུང་ངོ་། །པདྨ་དེ་དག་ལས་ཀྱང་སངས་རྒྱས་བཅོམ་ལྡན་འདས་བཞི་བྱུང་བར་གྱུར་ཏེ། ཤར་ཕྱོགས་ནས་ནི་དེ་བཞིན་གཤེགས་པ་མི་འཁྲུགས་པ་བྱུང་། ལྷོ་ཕྱོགས་ནས་ནི་དེ་བཞིན་གཤེགས་པ་རིན་ཆེན་ཏོག་བྱུང་། ནུབ་
ཕྱོགས་ནས་ནི་དེ་བཞིན་གཤེགས་པ་ཚེ་དཔག་མེད་བྱུང་། བྱང་ཕྱོགས་ནས་ནི་དེ་བཞིན་གཤེགས་པ་རྔ་སྒྲ་བྱུང་སྟེ། སེང་གེའི་ཁྲི་དེ་དག་ལས་སངས་རྒྱས་བཅོམ་ལྡན་འདས་དེ་དག་བྱུང་མ་ཐག་ཏུ། དེ་ནས་དེའི་ཚེ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་སྣང་བ་ཆེན་པོས་ཁྱབ་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་བར་དང་། ཕྱོགས་བཅུ་ཀུན་ཏུ་འཇིག་རྟེན་གྱི་ཁམས་ཀྱི་བར་དང་། ཕྱོགས་བཅུ་ཀུན་ཏུ་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་ཀྱི་བར་དག་སྣང་བས་ཁྱབ་པར་གྱུར། ལྷའི་མེ་ཏོག་དག་གི་ཆར་ཡང་བབ། ལྷའི་སིལ་སྙན་གྱི་སྒྲ་ཡང་བྱུང་ངོ་། །སངས་རྒྱས་ཀྱི་མཐུས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་སེམས་ཅན་ཐམས་ཅད་ཀྱང་ལྷའི་བདེ་བ་དང་ལྡན་པར་གྱུར་ཏེ། སེམས་ཅན་དབང་པོ་མ་ཚང་བ་རྣམས་ནི་དབང་པོ་ཐམས་ཅད་དང་ལྡན་པར་གྱུར། སེམས་ཅན་དམུས་ལོང་ད་ག་ནི་མིག་གིས་གཟུགས་རྣམས་མཐོང་། སེམས་ཅན་འོན་པ་དག་ནི་རྣ་བས་སྒྲ་རྣམས་ཐོས། སེམས་ཅན་སྨྱོས་པ་དག་ནི་དྲན་པ་སོ་སོར་རྙེད། སེམས་ཅན་སེམས་གཡེང་བ་དག་ནི་སེམས་མི་གཡེང་བར་གྱུར། སེམས་ཅན་སྒྲེན་མོ་དག་ནི་གོས་བགོས་པར་གྱུར། སེམས་ཅན་བཀྲེས་པ་དག་ནི་ལྟོ་འགྲངས་པར་གྱུར། སེམས་ཅན་སྐོམ་པ་དག་ནི་སྐོམ་ངོམས་པར་གྱུར། སེམས་ཅན་ནད་ཀྱིས་བཏབ་པ་དག་ནི་ནད་དང་བྲལ་བར་གྱུར། ལུས་ཀྱི་དབང་པོ་ཉམས་པ་དག་ནི་དབང་པོ་རྣམས་ཚང་བར་གྱུར་ཏེ། འཇིག་རྟེན་དུ་ངོ་མཚར་རྨད་དུ་བྱུང་བའི་ཆོས་རྣམས་རྒྱ་ཆེར་བྱུང་བར་གྱུར་ཏོ། །དེ་ནས་བྱང་ཆུབ་སེམས་དཔའ་མཛེས་པའི་ཏོག་གིས་སངས་རྒྱས་བཅོམ་ལྡན་འདས་དེ་དག་མཐོང་ནས་ངོ་མཚར་རྨད་དུ་གྱུར་ཏེ། དེ་ཚིམ་ཞིང་མགུ་ལ་ཡི་རངས་ཤིང་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས། སངས་རྒྱས་བཅོམ་ལྡན་འདས་དེ་དག་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། སངས་རྒྱས་བཅོམ་ལྡན་འདས་དེ་དག་རྣམས་རྗེས་སུ་དྲན་ལ། བཅོམ་ལྡན་འདས་ཤཱཀྱ་ཐུབ་པའི་ཡོན་ཏན་རྗེས་སུ་དྲན་ཞིང་། བཅོམ་ལྡན་འདས་ཤཱཀྱ་ཐུབ་པའི་སྐུ་ཚེའི་ཚད་ལ་ཐེ་ཚོམ་ཟ་བར་གྱུར་ཏེ།
བཅོམ་ལྡན་འདས་ཤཱཀྱ་ཐུབ་པ་འདི་ལྟར་ལོ་བརྒྱད་ཅུ་ཞིག་ཐུབ་སྟེ་སྐུ་ཚེ་ཐུང་བ་འདི་ཇི་ལྟ་བུ། འདི་ཅི་ཞིག་སྙམ་དུ་བསམ་པ་དེ་སེམས་ཤིང་འདུག་པར་གྱུར་ཏོ། །དེ་སངས་རྒྱས་བཅོམ་ལྡན་འདས་དེ་དག་གིས་དགོངས་ཤིང་མཁྱེན་བཞིན་དུ། བྱང་ཆུབ་སེམས་དཔའ་མཛེས་པའི་ཏོག་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་འདི་སྙམ་དུ། བཅོམ་ལྡན་འདས་ཤཱཀྱ་ཐུབ་པ་འདི་ལྟར་སྐུ་ཚེ་ཐུང་ངོ་སྙམ་དུ་མ་སེམས་ཤིག །དེ་ཅིའི་ཕྱིར་ཞེ་ན། རིགས་ཀྱི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་མ་གཏོགས་པར། ལྷ་དང་བཅས་པའི་འཇིག་རྟེན་དང་། བདུད་དང་བཅས་པ་དང་། ཚངས་པ་དང་བཅས་པ་དང་། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་དང་། ལྷ་དང་མི་དང་ལྷ་མ་ཡིན་དུ་བཅས་པའི་ནང་ན། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པའི་སྐུ་ཚེའི་ཚད་ཀྱི་མཐའ། ཕྱི་མའི་མཐའི་མུའི་བར་དུ་ཡང་རྟོགས་པར་ནུས་པ་ངེད་ཀྱིས་སུ་ཡང་མ་མཐོང་ངོ་། །སངས་རྒྱས་བཅོམ་ལྡན་འདས་དེ་དག་གིས་དེ་བཞིན་གཤེགས་པའི་སྐུ་ཚེའི་ཚད་བཤད་པ་བརྗོད་མ་ཐག་ཏུ། དེ་ནས་དེའི་ཚེ་སངས་རྒྱས་ཀྱི་མཐུས་ལྷའི་བུ་འདོད་པ་ན་སྤྱོད་པ་རྣམས་དང་། གཟུགས་ན་སྤྱོད་པ་རྣམས་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོའི་བར་དག་དང་། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་འདུས་ནས། བྱང་ཆུབ་སེམས་དཔའ་མཛེས་པའི་ཏོག་གི་ཁྱིམ་དེར་ལྷགས་སོ། །དེ་ནས་དེ་བཞིན་གཤེགས་པ་དེ་དག་གིས་ཐམས་ཅད་དང་ལྡན་པའི་འཁོར་དེ་ལ། བཅོམ་ལྡན་འདས་ཤཱཀྱ་ཐུབ་པའི་སྐུ་ཚེའི་ཚད་བཤད་པ་ཚིགས་སུ་བཅད་དེ་མདོར་བཀའ་སྩལ་པ། རྒྱ་མཚོའི་ཆུ་རྣམས་ཐམས་ཅད་ཀྱི། ། ཐིགས་པ་དག་ནི་བགྲང་བར་ནུས། །ཤཱཀྱ་ཐུབ་པའི་སྐུ་ཚེའི་ཚད། །སུས་ཀྱང་བགྲང་བར་མི་ནུས་སོ། །རི་རབ་རྣམས་ནི་ཐམས་ཅད་ཀྱང་། །ཕྲ་རབ་རྡུལ་དུ་བགྲང་བར་ནུས། །ཤཱཀྱ་ཐུབ་པའི་སྐུ་ཚེའི་ཚད། །སུས་ཀྱང་བགྲང་བར་མི་ནུས་སོ། །ས་ལ་གང་དག་ཡོད་པ་ཡི། །
རབ་ཏུ་ཕྲ་རྡུལ་ཇི་སྙེད་པ། །ཐམས་ཅད་བགྲང་བར་ནུས་སྲིད་ཀྱི། །རྒྱལ་བའི་སྐུ་ཚེའི་ཚད་མི་ནུས། །གལ་ཏེ་ལ་ལས་ནམ་མཁའ་ལ། །སྣ་འགའ་ཞིག་གིས་དཔག་འདོད་ཀྱང་། །ཤཱཀྱ་ཐུབ་པའི་སྐུ་ཚེའི་ཚད། །སུས་ཀྱང་བགྲང་བར་མི་ནུས་སོ། །རྫོགས་པའི་སངས་རྒྱས་འདི་སྲིད་བཞུགས། །བསྐལ་པ་དག་ནི་འདི་སྙེད་ཅིག །བསྐལ་པ་བྱེ་བ་བརྒྱ་དག་ཅེས། །གྲངས་ནི་རྙེད་པར་མི་རུང་ངོ་། །གང་ཕྱིར་དེ་ཡི་རྒྱུ་དང་ནི། །རྐྱེན་ཡང་རྣམ་པ་གཉིས་ཡིན་ཏེ། །སྡིག་པའི་འཚེ་བ་སྤངས་པ་དང་། །ཁ་ཟས་མང་པོ་བྱིན་པ་སྟེ། །དེ་ཕྱིར་བདག་ཉིད་ཆེན་པོ་དེའི། །སྐུ་ཚེའི་ཚད་གྲངས་མི་རྙེད་དོ། །བསྐལ་པ་འདི་སྙེད་ཅིག་ཅེ་འམ། །གྲངས་མེད་པ་ཡང་དེ་བཞིན་ཏེ། །དེ་བས་ཐེ་ཚོམ་མེད་པར་འགྱུར། །ཐེ་ཚོམ་ཅུང་ཟད་མ་ཟ་ཤིག །རྒྱལ་བའི་སྐུ་ཚེ་ཐ་མ་ཡི། །གྲངས་ནི་གང་དུ་མི་དམིགས་སོ། །དེ་ནས་དེའི་ཚེ་འཁོར་དེར་སློབ་དཔོན་ལུང་སྟོན་པ་བྲམ་ཟེ་ཀཽཎྜི་ནྱ་ཞེས་བྱ་བ་དང་། བྲམ་ཟེ་སྟོང་ཕྲག་དུ་མས་བཅོམ་ལྡན་འདས་ལ་མཆོད་པ་བྱས་ཏེ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་ཆེན་པོའི་སྒྲ་ཐོས་ནས་འཕྲལ་ལ་འདུས་ཏེ། བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས། བཅོམ་ལྡན་འདས་ལ་གསོལ་པ། གལ་ཏེ་བཅོམ་ལྡན་འདས་སེམས་ཅན་ཐམས་ཅད་ལ་ཐུགས་བརྩེ་བ། ཐུགས་རྗེ་ཆེན་པོ་དང་ལྡན་པ། ཕན་པར་བཞེད་པ། སེམས་ཅན་ཐམས་ཅད་ལ་ཕ་མ་ལྟ་བུ། མི་མཉམ་པ་དང་མཉམ་པར་གྱུར་པ། ཟླ་བ་ལྟ་བུར་སྣང་བར་མཛད་པ། ཤེས་རབ་དང་ཡེ་ཤེས་ཆེན་པོའི་ཉི་མ་ཤར་བ་ལྟ་བུ་ལགས་ཤིང་། གལ་ཏེ་ཁྱོད་སེམས་ཅན་ཐམས་ཅད་ལ་སྒྲ་གཅན་ཟིན་བཞིན་དུ་གཟིགས་ན། བདག་ལ་དམ་པ་ཞིག་སྩལ་དུ་གསོལ། བཅོམ་ལྡན་འདས་ཅང་མི་གསུང་བར་གྱུར་ཏོ། །དེ་ནས་སངས་རྒྱས་ཀྱི་མཐུས་འཁོར་དེར་ལིཙྪ་བཱི་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བ་དེ་སྤོབས་པ་སྐྱེས་ནས། སློབ་དཔོན་ལུང་སྟོན་པ་བྲམ་ཟེ་ཀཽཎྜི་ནྱ་ལ་འདི་སྐད་ཅེས་སྨྲས་སོ། །ཅི་བྲམ་ཟེ་ཆེན་པོ་ཁྱོད། བཅོམ་ལྡན་འདས་ལ་དམ་པ་ཅིག་གསོལ་ལམ། བདག་གིས་ཁྱོད་ལ་དམ་པ་ཞིག་སྦྱིན་ནོ། །བྲམ་ཟེས་སྨྲས་པ།
ལིཙྪ་བཱི་གཞོན་ནུ་བདག་ནི་བཅོམ་ལྡན་འདས་ལ་མཆོད་པ་དང་རིང་བསྲེལ་གྱི་ཕྱེ་མ་བགོས་པའི་ཕྱིར། བཅོམ་ལྡན་འདས་ཀྱི་རིང་བསྲེལ་ཡུངས་འབྲུ་ཙམ་ལ་བསྟེན་པར་འདོད་དོ། །རིང་བསྲེལ་ཡུངས་འབྲུ་ཙམ་དེ་མངོན་པར་མཆོད་ན། སུམ་ཅུ་རྩ་གསུམ་པའི་ལྷ་རྣམས་ཀྱི་བདག་པོ་འབའ་ཞིག་ཐོབ་ཅེས་གྲགས་སོ། །ཀྱེ་ལིཙྪ་བཱི་གཞོན་ནུ་གསེར་འོད་དམ་པའི་མདོ་ཉན་ཐོས་དང་རང་སངས་རྒྱས་ཐམས་ཅད་ཀྱིས་ཤེས་པར་དཀའ་བ། ཁོང་དུ་ཆུད་པར་དཀའ་བ་དེ་ལྟ་བུའི་མཚན་ཉིད་དང་ཡོན་ཏན་དང་ལྡན་པ་གསེར་འོད་དམ་པའི་མདོ་འཆད་ཅེས་གྲག་གིས་ཉོན་ཅིག །ཀྱེ་ལིཙྪ་བཱི་གཞོན་ནུ་གསེར་འོད་དམ་པའི་མདོ་ནི། དེ་ལྟར་ཤེས་པར་དཀའ་ཞིང་རྟོགས་པར་དཀའ་བས་ན། ཁོ་བོ་ཅག་མཐའ་འཁོབ་ཀྱི་གླིང་གི་བྲམ་ཟེ་རྣམས་ནི། གང་བཅངས་པ་ན་སེམས་ཅན་རྣམས་མྱུར་དུ་སུམ་ཅུ་རྩ་གསུམ་པའི་བདག་པོ་འཐོབ་པར་འགྱུར་བའི་རིང་བསྲེལ་ཡུངས་འབྲུ་ཙམ་ཟ་མ་ཏོག་གི་ནང་དུ་བཅུག་ལ་བཅངས་ཀྱང་རུང་ངོ་། །ཀྱེ་ལིཙྪ་བཱི་གཞོན་ནུ་ཁྱོད་ཅི་དེ་བཞིན་གཤེགས་པ་ལས་རིང་བསྲེལ་ཡུངས་འབྲུ་ཙམ་གསོལ་ནས། རིང་བསྲེལ་ཟ་མ་ཏོག་ཏུ་བཅུག་སྟེ་བཅངས་པས་སེམས་ཅན་རྣམས་སུམ་ཅུ་རྩ་གསུམ་པའི་བདག་པོ་ཐོབ་པར་མི་འདོད་དམ། ཀྱེ་ལིཙྪ་བཱི་གཞོན་ནུ་ཁོ་བོས་ནི་དམ་པ་དེ་ལྟ་བུ་གསོལ་ཏོ། །དེ་ནས་ལིཙྪ་བཱི་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བས། སློབ་དཔོན་ལུང་སྟོན་པ་བྲམ་ཟེ་ཀཽཎྜི་ནྱ་ལ་ཚིགས་སུ་བཅད་པ་དག་གིས་སླར་སྨྲས་པ། ནམ་ཞིག་གང་གཱའི་ཆུ་རྒྱུན་ལ། །མེ་ཏོག་རྣམས་ནི་སྐྱེ་བ་དང་། །བྱ་རོག་དམར་པོར་འགྱུར་བ་དང་། །ཁུ་བྱུག་དུང་མདོག་འདྲར་འགྱུར་དང་། །འཛམ་བུར་ཏ་ལའི་འབྲུ་ཆགས་དང་། །འབྲ་གོར་ཨ་མྲའི་དོགས་པ་ཆགས། །དེ་ཡི་ཚེ་ན་ཡུངས་འབྲུ་ཙམ། །རིང་བསྲེལ་དུ་ནི་གསལ་བར་འགྱུར། །ནམ་ཞིག་རུས་སྦལ་སྤུ་རྣམས་ལས། །གོས་སུ་ལེགས་པར་བཏགས་གྱུར་ཏེ། །དགུན་གྱི་གྲང་བ་སེལ་བྱེད་པ། །དེ་ཚེ་རིང་བསྲེལ་ཡོད་པར་འགྱུར། །ནམ་ཞིག་སྦྲང་བུའི་རྐང་ལག་ལས། །ཡང་ཐོག་ལེགས་པར་བྱས་གྱུར་ཏེ། །བརྟན་ཞིང་རབ་ཏུ་མི་གཡོ་བ། །དེ་ཚེ་རིང་བསྲེལ་
ཡོད་པར་འགྱུར། །ནམ་ཞིག་སྲིན་བུ་པདྨ་ཀུན། །སོ་ནི་དཀར་པོར་སྐྱེས་གྱུར་ཏེ། །རྣོ་ཞིང་ཆེན་པོར་གྱུར་པ་ན། །དེ་ཚེ་རིང་བསྲེལ་ཡོད་པར་འགྱུར། །མཐོ་རིས་སུ་ནི་འཛེག་པའི་ཕྱིར། །ནམ་ཞིག་རི་བོང་རྭ་རྣམས་ལས། །སྐས་ནི་ལེགས་པར་བྱས་གྱུར་པ། །དེ་ཚེ་རིང་བསྲེལ་ཡོད་པར་འགྱུར། །ནམ་ཞིག་སྐས་ནི་དེར་འཛེགས་ཏེ། །བྱི་བས་ཟླ་བ་བཟའ་བ་དང་། །སྒྲ་གཅན་ལ་ཡང་གནོད་བྱེད་པ། །དེ་ཚེ་རིང་བསྲེལ་ཡོད་པར་འགྱུར། །གྲོང་ན་རྒྱུ་བའི་སྦྲང་བུ་ཡིས། །ནམ་ཞིག་རྫ་མའི་ཆང་འཐུངས་ཏེ། །ཁྱིམ་ན་གནས་པར་བྱེད་འགྱུར་བ། །དེ་ཚེ་རིང་བསྲེལ་ཡོད་པར་འགྱུར། །ནམ་ཞིག་བོང་བུ་བདེ་འགྱུར་ལ། །མཆུ་དམར་བིམ་པ་འདྲར་གྱུར་ཅིང་། །གླུ་གར་རྣམས་ལ་མཁས་གྱུར་པ། །དེ་ཚེ་རིང་བསྲེལ་ཡོད་པར་འགྱུར། །ནམ་ཞིག་འུག་པ་བྱ་རོག་རྣམས། །དབེན་པར་དོང་ནས་རྩེ་བ་དང་། །ཕན་ཚུན་མཐུན་པར་གྱུར་པ་ན། །དེ་ཚེ་རིང་བསྲེལ་ཡོད་པར་འགྱུར། །པ་ལ་ཤ་ཡི་ལོ་མ་རྣམས། །རིན་ཆེན་སྣ་གསུམ་གདུགས་གྱུར་ཏེ། །ཆར་འབབ་སྐྱབས་སུ་ནམ་གྱུར་པ། །དེ་ཚེ་རིང་བསྲེལ་ཡོད་པར་འགྱུར། །ནམ་ཞིག་རྒྱ་མཚོའི་གྲུ་བོ་ཆེ། །འཁྲུལ་འཁོར་དང་ནི་གཡོར་མོར་བཅས། ། ཐང་ལ་བྱུང་སྟེ་འགྲོ་བ་ན། །དེ་ཚེ་རིང་བསྲེལ་ཡོད་པར་འགྱུར། །ནམ་ཞིག་བྱ་ནི་འུག་པ་ཡིས། །རི་བོ་སྤོས་ཀྱི་ངད་ལྡང་བ། །མཆུ་ལ་ཐོགས་ཏེ་འགྲོ་འགྱུར་བ། །དེ་ཚེ་རིང་བསྲེལ་ཡོད་པར་འགྱུར། །སློབ་དཔོན་ལུང་སྟོན་པ་བྲམ་ཟེ་ཀཽཎྜི་ནྱས་ཚིགས་སུ་བཅད་པ་འདི་དག་ཐོས་ནས། ལིཙྪ་བཱི་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་ལ་ཚིགས་སུ་བཅད་པ་འདི་དག་གིས་སླར་སྨྲས་པ། ལེགས་སོ་ལེགས་སོ་གཞོན་ནུ་མཆོག །རྒྱལ་བའི་སྲས་པོ་ཚིག་པོ་ཆེ། །དཔའ་ཞིང་ཐབས་ལ་མཁས་ལྡན་པ། །ལུང་བསྟན་པ་ནི་དམ་པ་ཐོབ། །འཇིག་རྟེན་མགོན་པོ་སྐྱོབ་པ་པོ། །དེ་བཞིན་གཤེགས་པ་ཆེ་བ་ཉིད། །བསམ་གྱིས་མི་ཁྱབ་གོ་རིམས་བཞིན། །གཞོན་ནུ་བདག་ལས་མཉན་པར་གྱིས། །སངས་རྒྱས་ཡུལ་ནི་བསམ་མི་ཁྱབ། །དེ་བཞིན་གཤེགས་རྣམས་མཚུངས་པ་མེད། །སངས་རྒྱས་ཐམས་ཅད་རྟག་ཏུ་ཞི། །སངས་རྒྱས་ཐམས་
ཅད་ཡང་དག་བྱུང་། །སངས་རྒྱས་ཐམས་ཅད་ཁ་དོག་མཚུངས། །འདི་ནི་སངས་རྒྱས་ཆོས་ཉིད་ཡིན། །བཅོམ་ལྡན་འདས་ནི་བཅོས་མ་མིན། །དེ་བཞིན་གཤེགས་པ་མ་སྐྱེས་ཏེ། །རྡོ་རྗེ་ལྟ་བུར་སྲ་བའི་སྐུ། །སྤྲུལ་པའི་སྐུ་ནི་སྟོན་པར་མཛད། །དྲང་སྲོང་ཆེན་པོའི་རིང་བསྲེལ་ནི། །ཡུངས་འབྲུ་ཙམ་ཞེས་བྱ་བ་མེད། །སྐུ་ལ་རུས་པ་ཁྲག་མེད་ན། །རིང་བསྲེལ་ཡོད་པར་ག་ལ་འགྱུར། །སེམས་ཅན་རྣམས་ལ་ཕན་པའི་ཕྱིར། །ཐབས་ཀྱིས་རིང་བསྲེལ་བཞག་པར་མཛད། །རྫོགས་པའི་སངས་རྒྱས་ཆོས་ཀྱི་སྐུ། །དེ་བཞིན་གཤེགས་པ་ཆོས་ཀྱི་དབྱིངས། །ཆོས་སྟོན་མཛད་པ་ཅི་འདྲ་བ། །བཅོམ་ལྡན་འདས་ཀྱི་སྐུ་དེ་འདྲ། །བདག་གིས་འདི་ཐོས་ཤེས་ནས་ནི། །བདག་གིས་དམ་པ་གསོལ་བར་བྱས། །དེ་ཉིད་ཁོ་ན་ལུང་བསྟན་ཕྱིར། །གཏམ་གླེང་བ་ནི་བདག་གིས་བྱས། །དེ་ནས་ལྷའི་བུ་སུམ་ཁྲི་ཉིས་སྟོང་གིས་དེ་བཞིན་གཤེགས་པའི་སྐུ་ཚེའི་ཚད་བསྟན་པ་ཟབ་མོ་དེ་ལྟ་བུ་དེ་དག་ཐོས་ནས། ཐམས་ཅད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། དེ་དག་ཡིད་ཀྱིས་ཀུན་ཏུ་རྟོག་པ་རབ་ཏུ་དགའ་ནས་སྒྲ་དབྱངས་གཅིག་ཏུ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་མྱ་ངན་ཡོང་མི་འདའ། །ཆོས་ཀྱང་ནུབ་པར་མི་འགྱུར་ཏེ། །སེམས་ཅན་ཡོངས་སུ་སྨིན་མཛད་ཕྱིར། །ཡོངས་སུ་མྱ་ངན་འདའ་བ་སྟོན། །སངས་རྒྱས་བཅོམ་ལྡན་བསམ་མི་ཁྱབ། །དེ་བཞིན་གཤེགས་པ་རྟག་པའི་སྐུ། །སེམས་ཅན་རྣམས་ལ་ཕན་པའི་ཕྱིར། །བཀོད་པ་རྣམ་པ་སྣ་ཚོགས་སྟོན། །དེ་ནས་བྱང་ཆུབ་སེམས་དཔའ་མཛེས་པའི་ཏོག་གིས། སངས་རྒྱས་བཅོམ་ལྡན་འདས་དེ་དག་དང་སྐྱེས་བུ་དམ་པ་དེ་གཉིས་ལས་བཅོམ་ལྡན་འདས་ཤཱཀྱ་ཐུབ་པའི་སྐུ་ཚེའི་ཚད་བསྟན་པ་ཐོས་ནས། ཚིམ་ཞིང་མགུ་ལ་ཡི་རངས་ཤིང་རབ་ཏུ་དགའ་སྟེ་དགའ་བ་དང་ཡིད་བདེ་བ་སྐྱེས་ནས་དགའ་བ་དང་མགུ་བ་རྒྱ་ཆེན་པོས་ཁྱབ་པར་གྱུར་ཏོ། །དེ་བཞིན་གཤེགས་པའི་སྐུ་ཚེའི་ཚད་བསྟན་པ་འདི་བཤད་པའི་ཚེ། སེམས་ཅན་ཚད་མེད་གྲངས་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་
སོ། །དེ་བཞིན་གཤེགས་པ་དེ་དག་ཀྱང་མི་སྣང་བར་གྱུར་ཏོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། དེ་བཞིན་གཤེགས་པའི་སྐུ་ཚེའི་ཚད་བསྟན་པའི་ལེའུ་ཞེས་བྱ་བ་སྟེ་གཉིས་པའོ།། །།དེ་ནས་བྱང་ཆུབ་སེམས་དཔའ་མཛེས་པའི་ཏོག་གཉིད་ཀྱིས་ལོག་པའི་རྨི་ལམ་ན། གསེར་གྱི་རྔ་ཀུན་ཏུ་སྣང་བ་འདི་ལྟ་སྟེ། ཉི་མའི་དཀྱིལ་འཁོར་འདྲ་བ་ཞིག་མཐོང་ངོ་། །ཕྱོགས་ཐམས་ཅད་ན་ཡང་སངས་རྒྱས་བཅོམ་ལྡན་འདས་གྲངས་མེད་དཔག་ཏུ་མེད་པ་དག་རིན་པོ་ཆེའི་ཤིང་དྲུང་ན། རིན་པོ་ཆེ་བཻ་ཌཱུཪྱའི་ཁྲི་རྣམས་ལ་བཞུགས་ཤིང་འཁོར་བརྒྱ་སྟོང་དུ་མས་ཡོངས་སུ་བསྐོར་ཏེ། མདུན་གྱིས་བལྟས་ནས་ཆོས་སྟོན་པ་མཐོང་ངོ་། །དེ་ནས་ཡང་སྐྱེས་བུ་བྲམ་ཟེའི་གཟུགས་ལྟ་བུ་ཞིག་རྔ་དེ་རྡུང་བ་མཐོང་སྟེ། རྔའི་སྒྲ་དེ་ལས་བསྟན་པའི་ཚིགས་སུ་བཅད་པ་འདི་ལྟ་བུ་དག་བྱུང་བ་ཐོས་སོ། །དེ་ནས་བྱང་ཆུབ་སེམས་དཔའ་མཛེས་པའི་ཏོག་གཉིད་སད་མ་ཐག་ཏུ། བསྟན་པའི་ཚིགས་སུ་བཅད་པ་དེ་དག་རྗེས་སུ་དྲན་ནོ། །རྗེས་སུ་དྲན་ནས་ཀྱང་དེའི་མཚན་མོ་ཟད་པ་དང་། རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་སྟེ། སྲོག་ཆགས་སྟོང་ཕྲག་དུ་མ་དང་ལྷན་ཅིག་ཏུ་བྱ་རྒོད་ཕུང་པོའི་རི་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བྱང་ཆུབ་སེམས་དཔའ་མཛེས་པའི་ཏོག་གིས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། རྨི་ལམ་ན་གང་རྔའི་སྒྲ་ལས་བསྟན་པའི་ཚིགས་སུ་བཅད་པ་ཐོས་པ་དེ་དག་གསོལ་ཏོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། རྨི་ལམ་མཐོང་བའི་ལེའུ་ཞེས་བྱ་བ་སྟེ་གསུམ་པའོ།། །།ནུབ་གཅིག་གཡེལ་བ་མེད་པར་ཡང་། །བདག་གིས་རྨི་ལམ་རྨིས་པ་ནི། །མཛེས་པའི་རྔ་ཆེན་མཐོང་བ་སྟེ། །ཐམས་ཅད་དུ་ནི་གསེར་གྱི་འོད། །ཉི་མ་ཇི་ལྟ་བཞིན་དུ་འབར། །ཀུན་ཏུ་རྣམ་པར་ལྷང་ངེ་སྟེ། །ཕྱོགས་བཅུ་རྣམས་སུ་སྣང་བར་གྱུར། །ཀུན་ཏུ་རིན་ཆེན་ཤིང་དྲུང་ན། །
རིན་ཆེན་བཻ་ཌཱུཪྱ་དག་གི། །ཁྲི་ལ་སངས་རྒྱས་རྣམས་བཞུགས་ཏེ། །བརྒྱ་སྟོང་ཕྲག་ནི་དུ་མ་ཡི། །འཁོར་དབུས་མདུན་གྱིས་བལྟས་པ་མཐོང་། །བྲམ་ཟེའི་གཟུགས་ནི་འདྲ་བ་ཞིག །རྔ་ཆེན་རབ་ཏུ་བརྡུང་བ་མཐོང་། །དེ་ཡིས་དེ་ལ་བརྡུངས་པ་དང་། །ཚིགས་སུ་བཅད་པ་འདི་དག་བྱུང་། །གསེར་འོད་དམ་པའི་རྔ་ཆེན་སྒྲ་ཡིས་ནི། །སྟོང་གསུམ་འཇིག་རྟེན་འཇིག་རྟེན་གསུམ་འདི་ན། །ངན་སོང་སྡུག་བསྔལ་གཤིན་རྗེའི་སྡུག་བསྔལ་དང་། །དབུལ་བའི་སྡུག་བསྔལ་མ་ལུས་ཞི་བར་ཤོག །རྔ་བོ་ཆེ་ཡི་སྒྲ་སྐད་འདི་ཡིས་ནི། །འཇིག་རྟེན་རྨོངས་པ་ཐམས་ཅད་ཞི་གྱུར་ཅིག །ཇི་ལྟར་ཐུབ་དབང་འཇིགས་མེད་འཇིགས་ཞི་ལྟར། །སེམས་ཅན་འཇིགས་མེད་འཇིགས་དང་བྲལ་བར་ཤོག །ཇི་ལྟར་འཁོར་བར་ཀུན་མཁྱེན་ཐུབ་དབང་པོ། །འཕགས་པའི་ཡོན་ཏན་ཀུན་དང་ལྡན་པ་ལྟར། །སྐྱེ་དགུ་ཏིང་འཛིན་བྱང་ཆུབ་ཡན་ལག་གི། །ཡོན་ཏན་ལྡན་ཞིང་ཡོན་ཏན་རྒྱ་མཚོར་གྱུར། །རྔ་བོ་ཆེ་ཡི་སྒྲ་སྐད་འདི་ཡིས་ནི། །སེམས་ཅན་ཐམས་ཅད་ཚངས་པའི་དབྱངས་ལྡན་གྱུར། །སངས་རྒྱས་བྱང་ཆུབ་དམ་པ་མཆོག་རེག་ཤོག །ཆོས་ཀྱི་འཁོར་ལོ་དགེ་བ་བསྐོར་གྱུར་ཅིག །བསྐལ་པ་བསམ་གྱིས་མི་ཁྱབ་བཞུགས་པར་ཤོག །འགྲོ་ལ་ཕན་ཕྱིར་ཆོས་ཀྱང་སྟོན་གྱུར་ཅིག །ཉོན་མོངས་འཇོམས་གྱུར་སྡུག་བསྔལ་སེལ་བར་ཤོག །འདོད་ཆགས་ཞེ་སྡང་གཏི་མུག་ཞི་གྱུར་ཅིག །སེམས་ཅན་གང་དག་ངན་སོང་སར་གནས་ཏེ། །རུས་པའི་ལུས་ལ་མེ་ལྕེ་རབ་འབར་བ། །དེ་དག་རྔ་ཆེན་བསྒྲགས་པ་ཐོས་གྱུར་ཅིག །སངས་རྒྱས་ཕྱག་འཚལ་ལོ་ཞེས་ཚིག་ཐོས་ཤོག །སེམས་ཅན་ཀུན་གྱིས་ཚེ་རབས་བརྒྱ་དག་དང་། །སྐྱེ་བ་སྟོང་ཕྲག་བྱེ་བར་སྐྱེ་དྲན་ཤོག །ཐུབ་པའི་དབང་པོ་རྟག་ཏུ་དྲན་གྱུར་ཅིང་། །དེ་དག་གི་ནི་རྒྱ་ཆེན་གསུང་ཐོས་ཤོག །རྔ་བོ་ཆེ་ཡི་སྒྲ་སྐད་འདི་ཡིས་ནི། །སངས་རྒྱས་རྣམས་དང་རྟག་ཏུ་འགྲོགས་རྙེད་གྱུར། །སྡིག་པའི་ལས་རྣམས་རྣམ་པར་སྤོང་བར་ཤོག །བྱ་བ་དགེ་བ་རྣམས་ནི་སྤྱོད་གྱུར་ཅིག །མི་དང་ལྷ་དང་སྲོག་ཆགས་ཐམས་ཅད་ཀྱིས། །དེ་དག་བསམ་དང་སྨོན་ལམ་གང་ཡིན་པ། །
རྔ་བོ་ཆེ་ཡི་སྒྲ་སྐད་འདི་ཡིས་ནི། །དེ་དག་རྣམས་ཀྱི་དེ་ཀུན་རྫོགས་གྱུར་ཅིག །སེམས་ཅན་གང་དག་སེམས་དམྱལ་མི་བཟད་སྐྱེས། །ལུས་ལ་མེ་ལྕེ་ཀུན་ཏུ་རབ་ཏུ་འབར། །སྐྱབས་མེད་མྱ་ངན་བཅས་ཤིང་ཡོངས་འཁྱམ་པ། །མེ་རྣམས་དེ་དག་རབ་ཏུ་ཞི་བར་ཤོག ། སེམས་དམྱལ་ཡི་དགས་མི་ཡི་འཇིག་རྟེན་ན། །སེམས་ཅན་སྡུག་བསྔལ་མི་བཟད་དྲག་པོ་གང་། །རྔ་བོ་ཆེ་ཡི་སྒྲ་སྐད་འདི་ཡིས་ནི། །དེ་དག་རྣམས་ཀྱི་སྡུག་བསྔལ་ཀུན་ཞི་ཤོག །རྟེན་མེད་དཔུང་གཉེན་མེད་པ་དང་། །སྐྱབས་མེད་པར་ཡང་གྱུར་པ་དག །དེ་རྣམས་ལ་ནི་སྐྱོབ་པ་དང་། །དཔུང་གཉེན་རྟེན་མཆོག་བདག་གྱུར་ཅིག །སངས་རྒྱས་རྐང་གཉིས་དམ་པ་དག །ཐུགས་བརྩེ་ཐུགས་རྗེ་ལྡན་པའི་ཐུགས། །གང་དག་ཕྱོགས་བཅུའི་འཇིག་རྟེན་ན། །བཞུགས་པ་བདག་ལ་དགོངས་སུ་གསོལ། །བདག་གིས་སྔོན་ཅད་སྡིག་པའི་ལས། །ཤིན་ཏུ་མི་བཟད་གང་བགྱིས་པ། །སྟོབས་བཅུའི་སྤྱན་སྔར་བདག་མཆིས་ཏེ། །དེ་དག་ཐམས་ཅད་བཤགས་པར་བགྱི། །ཕ་མ་དག་ཏུ་མི་འཛིན་དང་། །སངས་རྒྱས་རྣམས་སུ་མི་འཛིན་དང་། །དགེ་བ་དག་ཏུ་མི་འཛིན་པས། །སྡིག་པ་བདག་གིས་གང་བགྱིས་པ། ། ཕྱུག་པའི་རྒྱགས་པས་དྲེགས་པ་དང་། །རིགས་དང་ལོངས་སྤྱོད་རྒྱགས་པ་དང་། །བཞོན་པའི་རྒྱགས་པས་དྲེགས་པ་ཡིས། །བདག་གིས་སྡིག་པ་གང་བགྱིས་དང་། །ཉེས་བསམས་ཉེས་པར་སྨྲས་པ་དང་། །ཉེས་པར་བགྱིས་པའི་ལས་རྣམས་དང་། །ཉེས་པའི་དམིགས་སུ་མ་བལྟས་པས། །བདག་གིས་སྡིག་པ་གང་བགྱིས་དང་། །བྱིས་པའི་བློ་ཡི་འཇུག་པ་དང་། །མི་ཤེས་མུན་པའི་སེམས་དང་ནི། །སྡིག་པའི་གྲོགས་པོའི་དབང་གྱུར་དང་། །ཉོན་མོངས་རྣམ་པར་འཁྲུག་སེམས་དང་། །རྩེད་མོ་དགའ་བའི་དབང་ཉིད་དང་། །མྱ་ངན་དང་ནི་ནད་དབང་དང་། །ནོར་གྱིས་མི་ཆོག་ཉེས་པ་ཡིས། །བདག་གིས་སྡིག་པ་གང་བགྱིས་དང་། །འཕགས་མིན་སྐྱེ་བོ་འདྲེ་བ་དང་། །ཕྲག་དོག་སེར་སྣའི་རྒྱུ་དང་ནི། །གཡོ་དང་དབུལ་བའི་ཉེས་པ་ཡིས། །བདག་གིས་སྡིག་པ་གང་བགྱིས་དང་། །ཕོངས་པ་བྱུང་བའི་དུས་
ཀྱི་ཚེ། །འདོད་པ་རྣམས་ཀྱི་འཇིགས་རྒྱུ་དང་། །ཕྱུག་པོ་མ་ཡིན་གྱུར་པ་ཡིས། །བདག་གིས་སྡིག་པ་གང་བགྱིས་དང་། །གཡོ་བའི་སེམས་ཀྱིས་དབང་ཉིད་དང་། །འདོད་དང་ཁྲོ་བའི་དབང་དག་དང་། །བཀྲེས་དང་སྐོམ་གྱིས་ཉེན་པ་ཡིས། །བདག་གིས་སྡིག་པ་གང་བགྱིས་དང་། །བཟའ་བ་དག་དང་བཏུང་བ་དང་། །བུད་མེད་རྒྱུ་དང་གོས་ཀྱི་ཕྱིར། །ཉོན་མོངས་གདུང་བ་སྣ་ཚོགས་ཀྱིས། །བདག་གིས་སྡིག་པ་གང་བགྱིས་དང་། །ལུས་དང་ངག་དང་ཡིད་ཀྱི་སྡིག །ཉེས་པར་སྤྱད་པ་རྣམ་གསུམ་བསགས། ། འདི་འདྲའི་ཚུལ་གྱིས་གང་བགྱིས་པ། །དེ་དག་ཐམས་ཅད་བདག་འཆགས་སོ། །སངས་རྒྱས་རྣམས་དང་ཆོས་རྣམས་དང་། །དེ་བཞིན་ཉན་ཐོས་རྣམས་ལ་ཡང་། །གུས་པ་མ་ལགས་གང་བགྱིས་པ། །དེ་དག་ཐམས་ཅད་བདག་འཆགས་སོ། །གང་ཡང་རང་སངས་རྒྱས་རྣམས་དང་། །བྱང་ཆུབ་སེམས་དཔའ་རྣམས་ལ་ཡང་། །གུས་པ་མ་ལགས་བགྱིས་པ་རྣམས། །དེ་དག་ཐམས་ཅད་བདག་འཆགས་སོ། །དམ་ཆོས་སྨྲ་བ་རྣམས་ལ་ཡང་། །གུས་པ་མ་ལགས་བགྱིས་པ་དང་། །ཆོས་ལའང་གུས་པར་མ་བགྱིས་པ། །དེ་དག་ཐམས་ཅད་བདག་འཆགས་སོ། །བདག་གིས་རྟག་ཏུ་མི་ཤེས་པས། །དམ་པའི་ཆོས་ནི་སྤངས་པ་དང་། །ཕ་མ་རྣམས་ལ་མ་གུས་དང་། །དེ་དག་ཐམས་ཅད་བདག་འཆགས་སོ། །བླུན་པ་དང་ནི་བྱིས་པ་དང་། །འདོད་ཆགས་ཞེ་སྡང་གཏི་མུག་དང་། །ང་རྒྱལ་དྲེགས་པས་བསྒྲིབས་བགྱིས་པ། །དེ་དག་ཐམས་ཅད་བདག་འཆགས་སོ། །བདག་གིས་ཕྱོགས་བཅུའི་འཇིག་རྟེན་དུ། །སྟོབས་བཅུ་རྣམས་ལ་མཆོད་པར་བགྱི། །བདག་གིས་ཕྱོགས་བཅུར་སེམས་ཅན་རྣམས། །སྡུག་བསྔལ་ཀུན་ལས་འདོན་པར་བགྱི། །སེམས་ཅན་བསམ་གྱིས་མི་ཁྱབ་ཀུན། །ས་བཅུ་ལ་ནི་དགོད་པར་བགྱི། །ས་བཅུ་ལ་ནི་གནས་ནས་ཀྱང་། །ཐམས་ཅད་དེ་བཞིན་གཤེགས་གྱུར་ཅིག །ཇི་སྲིད་སྡུག་བསྔལ་རྒྱ་མཚོ་ལས། །དེ་ཀུན་ཐར་བགྱི་ནུས་སྲིད་དུ། །སེམས་ཅན་རེ་རེའི་ཕྱིར་ཡང་ནི། །བསྐལ་པ་བྱེ་བར་སྤྱད་པར་
བགྱི། །གསེར་འོད་དམ་པ་ཞེས་བགྱི་བ། །ལས་རྣམས་ཐམས་ཅད་བྱང་བགྱིད་པ། །ཟབ་མོ་དག་ནི་སྟོན་པ་ནི། །སེམས་ཅན་དེ་དག་བསྟན་པར་བགྱི། །གང་གིས་བསྐལ་པ་སྟོང་རྣམས་སུ། །སྡིག་པ་ཤིན་ཏུ་མི་བཟད་བགྱིས། །ལན་ཅིག་རབ་ཏུ་བཤགས་པ་ཡིས། །དེ་དག་ཐམས་ཅད་བྱང་བར་འགྱུར། །གང་གིས་ལས་ཀྱི་སྒྲིབ་པ་རྣམས། །མྱུར་དུ་ཡང་དག་ཟད་འགྱུར་བ། །གསེར་འོད་དམ་པ་དགེ་བ་ཡིས། །བཤགས་པ་འདི་དག་བཤགས་ནས་ནི། །རིན་ཆེན་འབྱུང་གནས་མཆོག་བཅུ་པོ། །ས་བཅུ་ལ་ནི་གནས་པར་བགྱི། །སངས་རྒྱས་ཡོན་ཏན་སྣང་བར་བགྱི། །སྲིད་པའི་མཚོ་ལས་བསྒྲལ་བར་བགྱི། །སངས་རྒྱས་རྒྱ་མཚོ་ཆུ་བོ་དང་། །ཡོན་ཏན་རྒྱ་མཚོ་ཟབ་མོ་དང་། །སངས་རྒྱས་ཡོན་ཏན་བསམ་ཡས་ཀྱིས། །ཐམས་ཅད་མཁྱེན་དུ་རྫོགས་པར་བགྱི། །ཏིང་འཛིན་བརྒྱ་ཕྲག་སྟོང་རྣམས་དང་། །གཟུངས་རྣམས་བསམ་གྱིས་མི་ཁྱབ་དང་། །དབང་སྟོབས་བྱང་ཆུབ་ཡན་ལག་གི། །སྟོབས་བཅུ་དམ་པར་འགྱུར་བར་བགྱི། །དགོངས་པའི་ཐུགས་ཀྱིས་སངས་རྒྱས་རྣམས། །བདག་ལ་རྣམ་པར་གཟིགས་སུ་གསོལ། །ཐུགས་རྗེ་ལྡན་པའི་ཐུགས་ཀྱིས་ནི། །ནོངས་པར་རབ་ཏུ་གཟུང་དུ་གསོལ། །བདག་གིས་བསྐལ་པ་བརྒྱ་རྣམས་སུ། །སྔོན་ཆད་སྡིག་པ་གང་བགྱིས་པ། །དེ་ཕྱིར་བདག་ནི་མྱ་ངན་སེམས། །ཕོངས་དང་མྱ་ངན་འཇིགས་པས་གཟིར། །སྡིག་པའི་ལས་ལ་འཇིགས་པར་བགྱིད། །ཡིད་ནི་རྟག་ཏུ་དམན་པར་འགྱུར། །གང་དང་གང་དུ་སྤྱོད་བགྱིད་པ། །བདག་ནི་གང་དུའང་དགའ་མ་མཆིས། །སངས་རྒྱས་ཐམས་ཅད་ཐུགས་རྗེ་ལྡན། །འགྲོ་བ་ཀུན་གྱི་འཇིགས་སེལ་བས། །ནོངས་པར་རབ་ཏུ་གཟུང་དུ་གསོལ། །འཇིགས་པ་དག་ལས་བདག་ཐར་མཛོད། །བདག་གི་ཉོན་མོངས་ལས་རྣམས་ཀྱི། །དྲི་མ་དེ་བཞིན་གཤེགས་པས་ཤོལ། །སངས་རྒྱས་རྣམས་ཀྱིས་བདག་ལ་ནི། །སྙིང་རྗེའི་ཆུ་ཡིས་བཀྲུ་བར་གསོལ། །སྡིག་པ་ཐམས་ཅད་བཤགས་པར་བགྱི། །སྔོན་ཆད་བདག་གིས་གང་བགྱིས་དང་། །ད་ལྟར་བདག་གི་སྡིག་པ་གང་། །དེ་དག་ཐམས་ཅད་བདག་འཆགས་སོ། །
ནོངས་པར་བགྱིས་པའི་ལས་རྣམས་ཀུན། །སླན་ཆད་མི་བགྱིད་བསྡམ་པར་བགྱི། །བདག་གིས་ནོངས་པར་བགྱིས་པ་གང་། །སྡིག་དེ་བཅབ་པར་མི་བྱའོ། །ལུས་ཀྱི་ལས་ནི་རྣམ་གསུམ་དང་། །ངག་གི་རྣམ་པ་བཞི་དག་དང་། །ཡིད་ཀྱི་རྣམ་པ་གསུམ་པོ་རྣམས། ། དེ་དག་ཐམས་ཅད་བདག་འཆགས་སོ། །ལུས་ཀྱིས་བགྱིས་དང་ངག་གི་ལས། །ཡིད་ཀྱིས་རྣམ་པར་བསམས་པ་དང་། །ལས་རྣམས་བཅུ་པོ་བགྱིས་པ་དག །དེ་དག་ཐམས་ཅད་བདག་འཆགས་སོ། །མི་དགེ་ལས་བཅུ་སྤངས་ནས་སུ། །དགེ་བ་བཅུ་པོ་བསྟེན་བགྱིས་ཏེ། །ས་བཅུ་ལ་བདག་གནས་པར་བགྱི། །སྟོབས་བཅུ་མཆོག་ཏུ་འགྱུར་བར་བགྱི། །བདག་གིས་སྡིག་པའི་ལས་གང་དག །མི་འདོད་འབྲས་བུ་ཐོབ་བགྱིད་པ། །སངས་རྒྱས་སྤྱན་སྔར་མཆིས་ནས་ནི། །དེ་དག་ཐམས་ཅད་བཤགས་པར་བགྱི། །འཛམ་བུའི་གླིང་འདིར་གང་དག་དང་། །འཇིག་རྟེན་ཁམས་ནི་གཞན་དག་ཏུ། །གང་རྣམས་དགེ་བའི་ལས་བགྱིད་པ། །དེ་དག་ཀུན་ལ་ཡི་རང་ངོ་། །ལུས་དང་ངག་དང་ཡིད་ཀྱིས་ཀྱང་། །བདག་གིས་བསོད་ནམས་གང་བསྒྲུབས་པ། །བདག་ནི་དགེ་བའི་རྩ་བ་དེས། །བྱང་ཆུབ་མཆོག་ལ་རེག་པར་བགྱི། །སྲིད་འགྲོ་ཉམ་ངར་བྱིས་པའི་བློ་ཡིས་ནི། །ཤིན་ཏུ་མི་བཟད་སྡིག་པ་གང་བགྱིས་པ། །སྟོབས་བཅུ་མི་མཉམ་སྤྱན་སྔར་མཆིས་ནས་ནི། །སྡིག་པ་དེ་ཀུན་སོ་སོར་བཤགས་པར་བགྱི། །སྐྱེ་བ་ཉམ་ང་སྲིད་པ་ཉམ་ང་དང་། །འཇིག་རྟེན་ཉམ་ང་གཡོ་སེམས་ཉམ་ང་དང་། ། ལུས་ཀྱི་སྤྱོད་པ་ཉམ་ང་སྣ་ཚོགས་ཀྱིས། །བདག་གིས་སྡིག་པ་གང་བསགས་དེ་འཆགས་སོ། །བྱིས་པ་བླུན་བྱས་ཉོན་མོངས་ཉམ་ང་དང་། །སྡིག་པའི་གྲོགས་དང་ཕྲད་པ་ཉམ་ང་དང་། །སྲིད་པ་ཉམ་ང་འདོད་ཆགས་ཉམ་ང་དང་། །ཞེ་སྡང་ཉམ་ང་གཏི་མུག་ཉམ་ང་དང་། ། ངལ་བའི་ཉམ་ང་དུས་ཀྱི་ཉམ་ང་དང་། །བསོད་ནམས་བསྒྲུབས་པ་ཉམ་ང་དག་གིས་ཀྱང་། །རྒྱལ་བ་མི་མཉམ་མངོན་སུམ་མཆིས་ནས་ནི། །སྡིག་པ་དེ་ཀུན་སོ་སོར་བཤགས་པར་བགྱི། །སངས་རྒྱས་གསེར་མདོག་རི་སྣང་རི་རབ་འདྲ། །ཡོན་ཏན་རྒྱ་མཚོ་འདྲ་ལ་ཕྱག་འཚལ་ལོ། །
རྒྱལ་བ་དེ་དག་རྣམས་ལ་སྐྱབས་སུ་མཆི། །རྒྱལ་བ་དེ་དག་ཀུན་ལ་མགོས་ཕྱག་འཚལ། །གསེར་མདོག་གསེར་ནི་དྲི་མ་མེད་པ་གསེར་གྱི་འོད། །དྲི་མེད་རྣམ་དག་བཻ་ཌཱུཪྱའི་ཡན་ལག་སྤྱན། །སངས་རྒྱས་ཉི་མ་དཔལ་གཟི་གྲགས་འབར་འབྱུང་བའི་གནས། །ཐུགས་རྗེའི་འོད་ཟེར་དག་གིས་མུན་པ་མུན་ནག་བསལ། །ཡན་ལག་རབ་ཏུ་དྲི་མེད་རབ་བཟང་རྣམ་པར་མཛེས། །སངས་རྒྱས་ཉི་མ་ཡན་ལག་དྲི་མེད་གསེར་འདྲས་ཁྱབ། །ཉོན་མོངས་མེས་གདུངས་ཡིད་ཅན་འབར་བའི་མེ་འདྲ་བ། །ཐུབ་པའི་ཟླ་བའི་འོད་ཟེར་དྲ་བས་ཚིམ་པར་མཛད། །མཚན་མཆོག་སུམ་ཅུ་གཉིས་ཀྱིས་དབང་པོ་ཡན་ལག་མཛེས། །དཔེ་བྱད་བཟང་པོ་དག་གིས་ཡན་ལག་རྣམ་པར་མཛེས། །དཔལ་གཟི་བསོད་ནམས་འབར་འཁྲུགས་འོད་ཟེར་དྲ་བ་ཡིས། །འཇིག་རྟེན་གསུམ་ན་མུན་ཁྲོད་ཉི་མ་བཞིན་དུ་བཞུགས། །དྲི་མེད་རྒྱ་ཆེན་ཁ་དོག་སྣ་ཚོགས་བཻ་ཌཱུཪྱ། །སྐྱ་རེངས་དམར་དང་དངུལ་དང་ཤེལ་བཞིན་ཡན་ལག་དམར། །འོད་ཟེར་དྲ་བ་རྣམ་པ་སྣ་ཚོགས་ལེགས་བརྒྱན་པས། །ཐུབ་ཆེན་ཁྱོད་ནི་ཉི་མ་བཞིན་དུ་དེ་བཞིན་མཛེས། །མྱ་ངན་འཁྲུག་པ་འཆི་ཆུ་རྒལ་བའི་དབའ་རླབས་ཅན། །འཁོར་བའི་ཀླུང་ཆེན་ཕོངས་པའི་ཆུ་བོར་ལྷུང་བ་ལ། །སྡུག་བསྔལ་རྒྱ་མཚོ་མཆོག་ཏུ་རྩུབ་ཅིང་ཤུགས་དྲག་པ། །བདེ་གཤེགས་ཉི་མའི་འོད་ཟེར་མང་པོ་རྣམས་ཀྱིས་སྐེམས། །ཡན་ལག་གསེར་གྱི་མདོག་ཏུ་རྣམ་པར་སྣང་། །ཡེ་ཤེས་འབྱུང་གནས་འཇིག་རྟེན་གསུམ་ཀུན་མཆོག །རབ་མཛེས་མཚན་གྱིས་ཡན་ལག་རྣམས་སྤྲས་པ། །སངས་རྒྱས་གསེར་སྐུ་འབར་ལ་ཕྱག་འཚལ་ལོ། །ཇི་ལྟར་རྒྱ་མཚོའི་ཆུ་ནི་དཔག་མེད་དང་། །ཇི་ལྟར་ས་ལ་ས་རྡུལ་མཐའ་ཡས་དང་། །ཇི་ལྟར་རི་རབ་རྡོ་མཐའ་མཚུངས་མེད་དང་། །ཇི་ལྟར་ནམ་མཁའི་མཐའ་མ་མཐའ་ཡས་པ། །དེ་བཞིན་སངས་རྒྱས་ཡོན་ཏན་མཐའ་ཡས་ཏེ། །སེམས་ཅན་ཀུན་གྱིས་ཤེས་པར་མི་ནུས་སོ། །བསྐལ་པ་དུ་མར་གཞལ་ཅིང་བསམས་ཀྱང་ནི། །ཡོན་ཏན་མཐའ་མ་ཤེས་པར་མི་ནུས་སོ། །ཆུ་ནི་སྐྲ་ཡི་རྩེ་མོའི་ཚད་ཙམ་དང་། །རྡོར་བཅས་རིར་བཅས་རྒྱ་མཚོར་བཅས་པ་ནི། །བསྐལ་པ་བགྲངས་
ན་ཤེས་པར་ནུས་ཀྱང་སྲིད། །སངས་རྒྱས་ཡོན་ཏན་ཕ་མཐར་ཤེས་མི་ནུས། །ཡོན་ཏན་ཁ་དོག་སྙན་དང་གྲགས་པ་དང་། །དགེ་བའི་མཚན་གྱིས་བརྒྱན་པའི་སྐུ་ལུས་དང་། །དཔེ་བྱད་བཟང་པོ་བརྒྱད་ཅུས་བརྒྱན་པ་ཡིས། །སེམས་ཅན་ཐམས་ཅད་དེ་འདྲར་འགྱུར་བར་ཤོག །བདག་གི་དགེ་བའི་ལས་རྣམས་འདི་དག་གིས། །འཇིག་རྟེན་མི་རིང་སངས་རྒྱས་འགྱུར་བར་བགྱི། །འགྲོ་ལ་ཕན་ཕྱིར་ཆོས་ཀྱང་བསྟན་པར་བགྱི། །སེམས་ཅན་སྡུག་བསྔལ་མང་གཟིར་ཐར་བར་བགྱི། །སྟོབས་བཅས་སྡེར་བཅས་བདུད་ལས་རྒྱལ་བར་བགྱི། ། ཆོས་ཀྱི་འཁོར་ལོ་དགེ་བ་བསྐོར་བར་བགྱི། །བསྐལ་པ་བསམ་གྱིས་མི་ཁྱབ་གནས་པར་བགྱི། །བདུད་རྩིའི་ཆུ་ཡིས་སེམས་ཅན་ཚིམ་པར་བགྱི། །ཇི་ལྟར་སྔོན་གྱི་རྒྱལ་བས་རྫོགས་པ་ལྟར། །ཕ་རོལ་ཕྱིན་དྲུག་བླ་མེད་རྫོགས་པར་བགྱི། །ཉོན་མོངས་གཞོམ་ཞིང་སྡུག་བསྔལ་བསལ་བར་བགྱི། །འདོད་ཆགས་ཞེ་སྡང་གཏི་མུག་ཞི་བར་བགྱི། །སྐྱེ་བ་བརྒྱ་དང་སྐྱེ་བ་བྱེ་བ་སྟོང་། །བདག་ནི་རྟག་ཏུ་སྐྱེ་བ་དྲན་པར་བགྱི། །ཐུབ་པའི་དབང་པོ་རྟག་ཏུ་དྲན་པར་བགྱི། །དེ་ཡི་གསུང་ནི་རྒྱ་ཆེན་ཐོས་པར་བགྱི། །བདག་ནི་དགེ་བའི་ལས་རྣམས་འདི་དག་གིས། ། རྟག་ཏུ་སངས་རྒྱས་འགྲོགས་པ་རྙེད་པར་བགྱི། །སྡིག་པའི་ལས་རྣམས་རྣམ་པར་སྤང་བར་བགྱི། །དགེ་བའི་འབྱུང་གནས་དགེ་རྣམས་སྤྱད་པར་བགྱི། །ཞིང་རྣམས་ཀུན་ན་སྲོག་ཆགས་ཐམས་ཅད་ཀྱང་། །འཇིག་རྟེན་དག་ན་སྡུག་བསྔལ་ཀུན་ཞི་གྱུར། །སེམས་ཅན་དབང་པོ་མ་ཚང་ཡན་ལག་ཉམས། །དེ་ཀུན་དེའུ་རེ་དབང་པོ་ཚང་བར་ཤོག །གང་དག་ནད་བཏབ་ཉམ་ཆུང་ལུས་ཉམས་དང་། །ཕྱོགས་བཅུ་དག་ན་སྐྱབས་མེད་གྱུར་པ་རྣམས། །དེ་ཀུན་མྱུར་དུ་ནད་ལས་ཐར་གྱུར་ཅིག །ནད་མེད་སྟོབས་དང་དབང་པོ་རྙེད་པར་ཤོག །གང་དག་རྒྱལ་པོ་ཆོམ་རྐུན་བྲེད་བསྡིགས་བསད་ཐུག་དང་། །སྡུག་བསྔལ་རྣམ་པ་སྣ་ཚོགས་བརྒྱ་ཡིས་ཕོངས་གྱུར་པ། །སེམས་ཅན་ཉམ་ཐག་གྱུར་ཅིང་སྡུག་བསྔལ་དེ་དག་ཀུན། །འཇིགས་མཆོག་མི་བཟད་བརྒྱ་པོ་དེ་ལས་ཐར་གྱུར་ཅིག །གང་དག་བརྡེགས་ཤིང་བཅིང་བས་བཅིངས་གཟིར་བ། །ཕོངས་པ་
སྣ་ཚོགས་དག་ན་གནས་གྱུར་ཅིང་། །ཉོན་མོངས་སྟོང་ཕྲག་དུ་མས་དཀྲུགས་ནས་ཀྱང་། །འཇིགས་པ་མི་བཟད་མྱ་ངན་སྣ་ཚོགས་རྙེད། །དེ་དག་ཐམས་ཅད་བཅིངས་ལས་གྲོལ་གྱུར་ཅིང་། །བརྡེག་པ་དག་ནི་བརྡེག་ལས་ཐར་བར་ཤོག །བསད་པ་རྣམས་ཀྱང་སྲོག་དང་ལྡན་གྱུར་ཅིག །ཕོངས་གྱུར་ཐམས་ཅད་འཇིགས་པ་མེད་པར་ཤོག །སེམས་ཅན་གང་དག་བཀྲེས་སྲེད་སྐོམ་གྱིས་གཟིར། །དེ་དག་ཟས་སྐོམ་སྣ་ཚོགས་རྙེད་པར་ཤོག །ལོང་བས་གཟུགས་རྣམས་སྣ་ཚོགས་མཐོང་གྱུར་ཅིག །འོན་པས་ཡིད་འོང་སྒྲ་རྣམས་ཐོས་པར་ཤོག །གཅེར་བུ་རྣམས་ཀྱིས་སྣ་ཚོགས་གོས་རྙེད་གྱུར། །སེམས་ཅན་དབུལ་པོས་གཏེར་རྣམས་རྙེད་པར་ཤོག །ནོར་འབྲུ་རིན་ཆེན་སྣ་ཚོགས་མང་པོ་ཡིས། །སེམས་ཅན་ཐམས་ཅད་བདེ་དང་ལྡན་པར་ཤོག །གང་ཡང་སྡུག་བསྔལ་ཚོར་བས་གནོད་མ་གྱུར། །སེམས་ཅན་ཐམས་ཅད་བལྟ་ན་སྡུག་པ་དང་། །གཟུགས་བཟང་མཛེས་ཤིང་ཚུལ་དུ་ཤིས་པར་ཤོག །རྟག་ཏུ་བདེ་བ་དུ་མ་རྫོགས་གྱུར་ཅིག །ཡིད་ཀྱིས་ཟས་སྐོམ་རབ་འབྱོར་བསོད་ནམས་དག །བསམས་མ་ཐག་ཏུ་དེ་དག་གྲུབ་གྱུར་ཅིག །རྫ་རྔ་ཅང་ཏེའུ་པི་བང་སྒྲ་སྙན་དང་། །ཆུ་མིག་མཚེའུ་དང་རྫིང་བུ་ལྟེང་ཀ་དང་། ། གསེར་གྱི་པདྨ་ཨུཏྤལ་པདྨ་ཅན། །ཟས་སྐོམ་གོས་ནོར་མུ་ཏིག་ནོར་བུ་དབྱིག །རྒྱན་གསེར་རིན་ཆེན་སྣ་ཚོགས་བཻ་ཌཱུཪྱ། །དེ་དག་བསམས་མ་ཐག་ཏུ་གྲུབ་གྱུར་ཅིག །འཇིག་རྟེན་གང་ནའང་སྡུག་བསྔལ་སྒྲ་མ་བྱུང་། །སེམས་ཅན་གཅིག་ཀྱང་མི་འཕྲོད་མཐོང་མ་གྱུར། །དེ་དག་ཐམས་ཅད་ཁ་དོག་རྒྱ་ཆེན་དང་། །ཕན་ཚུན་དུ་ནི་འོད་བྱེད་གྱུར་པར་ཤོག །མི་ཡི་འཇིག་རྟེན་ཕུན་སུམ་ཚོགས་གང་ཡོད། །དེ་དག་གང་དུ་བསམས་པར་སྐྱེ་བར་གྱུར། །བསམ་པ་ཐམས་ཅད་བསམས་མ་ཐག་ཏུ་ཡང་། །བསོད་ནམས་འབྲས་བུ་ཡོངས་སུ་རྫོགས་པར་ཤོག ། སྤོས་དང་ཕྲེང་བ་དག་དང་བྱུག་པ་དང་། །གོས་དང་ཕྱེ་མ་མེ་ཏོག་སྣ་ཚོགས་དག །ལྗོན་ཤིང་དག་ལས་དུས་གསུམ་འབབ་པར་ཤོག །སེམས་ཅན་དེ་དག་ལེན་ཅིང་དགར་གྱུར་ཅིག །དེ་བཞིན་གཤེགས་པ་བསམ་ཡས་ཐམས་ཅད་དང་། །རྫོགས་པའི་བྱང་ཆུབ་སེམས་དཔའ་ཉན་
ཐོས་དང་། །རྡུལ་བྲལ་དྲི་མེད་བརྟན་པའི་ཆོས་ལ་ཡང་། །ཕྱོགས་བཅུ་རྣམས་སུ་མཆོད་པ་བྱེད་པར་ཤོག །འགྲོ་བ་དམན་པ་ཐམས་ཅད་སྤོང་གྱུར་ཅིག །མི་ཁོམ་བརྒྱད་པོ་དག་ལས་འདས་པར་ཤོག །དལ་བའི་རྒྱལ་པོ་དམ་པ་ཐོབ་གྱུར་ཅིག །རྟག་ཏུ་སངས་རྒྱས་འགྲོགས་པ་ཐོབ་པར་ཤོག །རྟག་ཏུ་མཐོན་པོའི་རིགས་སུ་སྐྱེ་བར་ཤོག །ནོར་དང་འབྲུ་ཡི་མཛོད་རྣམས་འབྱོར་གྱུར་ཅིག །སྙན་དང་གྲགས་དང་གཟུགས་དང་ཁ་དོག་གིས། །བསྐལ་པ་དུ་མར་ལེགས་པར་བརྒྱན་པར་ཤོག །བུད་མེད་ཐམས་ཅད་རྟག་ཏུ་ཕོར་གྱུར་ཏེ། །དཔའ་ཞིང་རྟུལ་ཕོད་མཁས་ཤིང་གསལ་བར་ཤོག །དེ་ཀུན་རྟག་ཏུ་བྱང་ཆུབ་ཕྱིར་སྤྱོད་གྱུར། །ཕ་རོལ་ཕྱིན་པ་དྲུག་ལ་སྤྱོད་པར་ཤོག །ཕྱོགས་བཅུ་དག་ན་རིན་ཆེན་ཤིང་དབང་དྲུང་། །སངས་རྒྱས་བདེ་བཞུགས་རིན་ཆེན་བཻ་ཌཱུཪྱའི། །ཁྲི་ལ་བཞུགས་པ་དག་ནི་མཐོང་གྱུར་ཅིག །ཆོས་བསྟན་པ་ཡང་དེ་དག་ཐོས་གྱུར་ཤོག །བདག་གིས་སྡིག་པའི་ལས་རྣམས་བསྒྲུབས་པ་ནི། །སྲིད་པ་ཉམ་ངར་སྔོན་ཆད་གང་བསྒྲུབས་པ། །སྡིག་ལས་གང་དག་མི་འདོད་འབྲས་ཐོབ་པ། །དེ་དག་ཐམས་ཅད་མ་ལུས་ཟད་གྱུར་ཅིག །སེམས་ཅན་གང་དག་སྲིད་པར་བཅིངས་ནས་སུ། ། འཁོར་བའི་ཞགས་པའི་ཐག་པས་དམ་བཅིངས་པ། །ཤེས་རབ་ལག་གིས་བཅིངས་པ་བཀྲོལ་བར་ཤོག །སྡུག་བསྔལ་རྣམས་ལས་མྱུར་དུ་ཐར་གྱུར་ཅིག །སེམས་ཅན་གང་དག་འཛམ་བུའི་གླིང་འདི་དང་། །གང་དག་འཇིག་རྟེན་ཁམས་ནི་གཞན་རྣམས་ན། །བསོད་ནམས་སྣ་ཚོགས་ཟབ་མོ་རྣམས་བྱེད་པ། །དེ་དག་ཀུན་ལ་རྗེས་སུ་ཡི་རང་ངོ་། །ལུས་དང་ངག་དང་ཡིད་ཀྱིས་བསྒྲུབས་པ་ཡི། །བདག་གིས་རྗེས་སུ་ཡི་རང་བསོད་ནམས་དེ། །བདག་ནི་སྨོན་གྲུབ་འབྲས་བུ་ཡོད་པར་ཤོག །བྱང་ཆུབ་རྡུལ་བྲལ་བླ་མེད་ཐོབ་གྱུར་ཅིག །གང་དག་རྟག་དང་དྲི་མ་བྲལ་བ་དང་། ། དྲི་མེད་ཡིད་ཀྱིས་ཕྱག་འཚལ་བསྟོད་པ་དང་། །ཡོངས་སུ་བསྔོ་བ་བརྗོད་པ་འདི་ཡིས་ནི། །བསྐལ་པ་དྲུག་ཅུར་ངན་སོང་སྤོང་བར་གྱུར། །ཚིགས་སུ་བཅད་པ་བརྗོད་པ་འདི་དག་གིས། །སྐྱེས་པ་བུད་མེད་བྲམ་ཟེ་རྒྱལ་རིགས་ལས། །ཐལ་སྦྱར་འདུག་སྟེ་རྒྱལ་བ་གང་བསྟོད་པ། །
ཚེ་རབས་ཀུན་ཏུ་སྐྱེ་བ་དྲན་པར་འགྱུར། །ཡན་ལག་དབང་པོ་ཀུན་གྱིས་ཡན་ལག་བརྒྱན། །བསོད་ནམས་ཡོན་ཏན་སྣ་ཚོགས་རྣམས་དང་ལྡན། །མི་དབང་རྒྱལ་པོས་རྟག་ཏུ་དེ་མཆོད་དེ། །དེ་དང་དེ་དག་ཏུ་ནི་དེ་འདྲར་འགྱུར། །གང་དག་རྣ་བའི་བུ་གར་བཤགས་པ་འདི་ནི་གྲགས་འགྱུར་བ། །དེ་དག་སངས་རྒྱས་གཅིག་གི་གན་ནས་དགེ་བ་བྱས་མ་ཡིན། །གཉིས་ལ་མ་ཡིན་བཞི་ལ་མ་ཡིན་ལྔ་མིན་བཅུ་ལ་མིན། །དེ་ལྟར་སངས་རྒྱས་སྟོང་གི་གན་ནས་དགེ་བ་བྱས་མ་ཡིན། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས་བཤགས་པའི་ལེའུ་ཞེས་བྱ་བ་སྟེ་བཞི་པའོ།། །།འཕགས་པ་གསེར་འོད་དམ་པའི་མདོ་སྡེའི་དབང་པོའི་རྒྱལ་པོ་ཞེས་བྱ་བ་ཐེག་པ་ཆེན་པོའི་མདོ།བམ་པོ་གཉིས་པ། དེ་ནས་བཅོམ་ལྡན་འདས་ཀྱིས་རིགས་ཀྱི་ལྷ་མོ་བྱང་ཆུབ་ཡང་དག་པར་བསྡུས་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་ལྷ་མོ་དེའི་ཚེ་དེའི་དུས་ན། རྒྱལ་པོ་གསེར་གྱི་ལག་པའི་དབང་པོ་ཞེས་བྱ་བ་དེས། དེ་བཞིན་གཤེགས་པ་ཐམས་ཅད་ལ་བསྟོད་པ་པདྨའི་འབྱུང་གནས་འདིས། འདས་པ་དང་མ་འོངས་པ་དང་ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ལ་མངོན་པར་བསྟོད་དོ། །རྒྱལ་བ་གང་དག་སྔར་གྱུར་གང་བྱུང་དང་། །ཕྱོགས་བཅུའི་འཇིག་རྟེན་དག་ན་གང་བཞུགས་པ། །རྒྱལ་བ་དེ་དག་རྣམས་ལ་ཕྱག་བགྱིའོ། །རྒྱལ་བ་དེ་དག་ཀུན་ལ་བདག་གིས་བསྟོད། །ཐུབ་དབང་ཞི་ཞིང་རབ་ཞི་རྣམ་པར་དག །སྐུ་ནི་གསེར་གྱི་མདོག་ཏུ་རབ་ཏུ་གདའ། །དབྱངས་རྣམས་ཀུན་གྱིས་སངས་རྒྱས་གསུང་སྙན་ཏེ། །ཚངས་པའི་སྒྲ་དབྱངས་རབ་ཏུ་བསྒྲགས་པའི་གསུང་། །བུང་བ་རྨ་བྱ་ཨུཏྤལ་སྔོན་པོའི་དབུ། །མཐོན་མཐིང་ལྕང་ལོ་བྱ་ནི་ཙ་ཤ་འདྲ། །ཁ་བ་དུང་ལྟར་རབ་ཏུ་དཀར་བའི་ཚེམས། །རྟག་ཏུ་གསེར་ལྟར་རྣམ་པར་མཛེས་པར་གདའ། །སྤྱན་ནི་རིང་ཞིང་མཐོན་མཐིང་དྲི་མ་མེད། །ཨུཏྤལ་སྔོན་པོ་རབ་ཏུ་རྒྱས་པ་འདྲ། །ལྗགས་ནི་ཆེ་ཞིང་ལེགས་ལ་པདྨའི་མདོག །པདྨ་འདྲར་སྣང་པདྨའི་ཟེ་བ་འདྲ། །ཞལ་གྱི་མཛོད་སྤུ་པདྨ་དུང་དང་འདྲ། །བཻ་ཌཱུཪྱ་ཡི་མདོག་འདྲ་གཡས་སུ་འཁྱིལ། །ཐུབ་པའི་ཟླ་བ་ཕྲ་ཞིང་ཟླ་བ་ཟད་པ་འདྲ། །སྐུ་
ཡི་ལྟེ་བ་བུང་བ་གསལ་བ་བཞིན། །ཞལ་མཐོའི་ཤངས་ནི་རྟག་ཏུ་ལྷག་གེ་སྟེ། །འཇམ་ཞིང་ས་ལའི་གསེར་ལྟར་ཁ་དོག་བཟང་། །རྟག་པར་རྒྱུན་དུ་རྒྱལ་བ་ཐམས་ཅད་ཀྱི། །རོ་མཆོག་འཇམ་ཞིང་དམ་པ་མཆོག་རབ་འཕགས། །སྤུ་ཡི་བུ་ག་ནས་ནི་རེ་རེ་སྐྱེས། །སྤུ་རྣམས་སྐྱེས་པ་གཡས་སུ་འཁྱིལ་པ་སྟེ། །མཐོན་མཐིང་འོད་འབར་འཚེར་ཞིང་ལྕང་ལོ་ཅན། །རྨ་བྱའི་མགྲིན་སྡུག་འདྲ་བར་སྔོ་ལ་མཛེས། །བལྟམས་མ་ཐག་ཏུ་སྐུ་ཡིས་སྣང་བར་བགྱིས། །ཕྱོགས་བཅུའི་འཇིག་རྟེན་དག་ནི་ཐམས་ཅད་གང་། །འཇིག་རྟེན་གསུམ་ན་སྡུག་བསྔལ་མཐའ་ཡས་ཞི། །བདེ་བ་ཀུན་གྱི་སེམས་ཅན་རྣམས་ཀྱང་ཚིམ། །སེམས་དམྱལ་འགྲོ་དང་དུད་འགྲོའི་འགྲོ་བ་དང་། །ཡི་དགས་ལྷ་གནས་མི་ཡི་འགྲོ་རྣམས་སུ། །སེམས་ཅན་དེ་དག་ཐམས་ཅད་བདེ་བས་ཚིམ། །ངན་སོང་འགྲོ་བ་རྣམས་ནི་ཐམས་ཅད་ཞི། །ཁ་དོག་མདོག་བཟང་གསེར་དང་འདྲ་བའི་འོད། །བཙོ་མའི་གསེར་ལྟར་རབ་ཏུ་སྣང་བའི་སྐུ། །བདེ་གཤེགས་ཟླ་བ་རབ་ཏུ་དྲི་མེད་ཞལ། །འཛུམ་ཞིང་རྣམ་མཛེས་ཤིན་ཏུ་དྲི་མེད་ཞལ། །གཞོན་ནུ་བཙས་འདྲར་སྐུ་ལུས་ཡན་ལག་འཇམ། །སེང་གེ་འདྲ་བར་རྩལ་གྱིས་གནོན་པའི་མཆོག །ཕྱག་རིང་ཕྱག་ནི་རབ་ཏུ་རིང་བ་སྟེ། །སཱ་ལའི་ལྕུག་མ་རླུང་གིས་བསྐྱོད་པ་བཞིན། །འདོམ་གང་འོད་འབར་འོད་ཟེར་རབ་ཏུ་གཏོང་། །ཉི་མ་སྟོང་ལྟར་རབ་ཏུ་ལྷག་གེའོ། །ཐུབ་པའི་དབང་པོའི་སྐུ་མཆོག་དྲི་མ་མེད། །ཞིང་རྣམས་མཐའ་ཡས་ཐམས་ཅད་རབ་ཏུ་སྣང་། ། སངས་རྒྱས་འོད་ནི་རྣམ་པར་ལྷང་ངེ་བས། །ཞིང་རྣམས་མཐའ་ཡས་བརྒྱ་སྟོང་རྣམས་སུ་ཡང་། །མཚན་བྱད་ཟླ་བ་ཉི་མ་མང་པོ་དག །དེ་དག་ཐམས་ཅད་འོད་ནི་མེད་པར་གྱུར། །སངས་རྒྱས་ཉི་མ་འཇིག་རྟེན་སྒྲོན་མ་སྟེ། །སངས་རྒྱས་ཉི་མ་བརྒྱ་ཕྲག་སྟོང་རྣམས་ནི། །ཞིང་རྣམས་མཐའ་ཡས་སྟོང་ཕྲག་བརྒྱ་དག་ན། །དེ་བཞིན་གཤེགས་པའི་ཉི་མ་སེམས་ཅན་མཐོང་། །བསོད་ནམས་སྟོང་ཕྲག་བརྒྱ་དང་ལྡན་པའི་སྐུ། །ཡོན་ཏན་ཀུན་གྱིས་རབ་ཏུ་བརྒྱན་པའི་སྐུ། །གླང་ཆེན་དབང་པོའི་སྣ་འདྲ་རྒྱལ་བའི་ཕྱག །ཕྱག་དང་ཞབས་འོད་རབ་མཛེས་དྲི་མ་མེད། །ས་ཡི་སྟེང་གི་རྡུལ་
དང་མཚུངས་འདྲ་སྙེད། །ཕྲ་བའི་རྡུལ་སྙེད་སངས་རྒྱས་གང་འདས་དང་། །གང་དག་ཕྲ་བའི་རྡུལ་སྙེད་བྱུང་བ་དང་། །གང་དག་ཕྲ་བའི་རྡུལ་སྙེད་བཞུགས་པ་ཡི། །རྒྱལ་བ་དེ་དག་ལ་ནི་རབ་དང་བའི། །ངག་ཡིད་ལུས་ཀྱིས་མེ་ཏོག་དབུལ་བ་དང་། །སྤོས་རྣམས་དབུལ་དང་བསྔགས་པ་བརྒྱ་དག་དང་། །དགེ་བའི་སེམས་ཀྱིས་ཀྱང་ནི་ཕྱག་འཚལ་ལོ། །རྒྱལ་བའི་ཡོན་ཏན་གང་དག་དགེར་གྱུར་པ། །སྙིང་པོ་མཆོག་རབ་སྣ་ཚོགས་དུ་མ་སྟེ། །བདག་གིས་བསྐལ་པ་སྟོང་དུ་ལྕེ་བརྒྱ་ཡིས། །སངས་རྒྱས་ཡོན་ཏན་བརྗོད་པར་མི་ནུས་སོ། །རྒྱལ་བ་གཅིག་གི་ཡོན་ཏན་རྣམས་ཀྱང་ནི། །ལྕེ་སྟོང་གིས་ཀྱང་ཅུང་ཟད་བརྗོད་མི་ནུས། །བདག་གིས་རྒྱལ་བ་དག་ནི་ཐམས་ཅད་ཀྱི། །ཡོན་ཏན་ལྕེ་བརྒྱས་བརྗོད་པར་ག་ལ་ནུས། །ལྷར་བཅས་འཇིག་རྟེན་ཐམས་ཅད་མཚོར་གྱུར་ཏེ། །སྲིད་པའི་རྩེ་མོ་མན་ཆད་ཆུས་གང་བ། །སྐྲ་ཡི་རྩེ་མོས་དཔག་པར་ནུས་སྲིད་ཀྱི། །བདེ་གཤེགས་རྣམས་ཀྱི་ཡོན་ཏན་གཅིག་ལ་མིན། །ལུས་དང་ངག་ཡིད་རབ་ཏུ་དང་བ་ཡིས། །རྒྱལ་བ་ཀུན་ལ་བདག་གིས་བསྔགས་བསྟོད་པས། །བདག་གིས་བསོད་ནམས་འབྲས་བུ་མཆོག་བསགས་གང་། །དེས་ནི་སེམས་ཅན་རྒྱལ་བ་རེག་གྱུར་ཅིག །དེ་ལྟར་རྒྱལ་པོས་སངས་རྒྱས་རྣམས་བསྟོད་ནས། །རྒྱལ་པོ་འདི་ལྟར་སྨོན་ལམ་འདེབས་པ་ནི། །མ་འོངས་བསྐལ་པ་མཐའ་ཡས་རྣམས་སུ་ཡང་། །གང་དང་གང་དུ་བདག་ནི་སྐྱེ་བ་ན། །རྨི་ལམ་དུ་ནི་འདི་འདྲའི་རྔ་བལྟ་ཞིང་། །དེར་ནི་བཤགས་པ་འདི་འདྲ་མཉན་པར་བགྱི། །རྒྱལ་བསྟོད་པདྨ་འབྱུང་རྒྱལ་འདི་འདྲ་བ། །སྐྱེ་བ་དེ་དང་དེར་ནི་རྙེད་པར་བགྱི། །སངས་རྒྱས་ཡོན་ཏན་མཐའ་ཡས་མཚུངས་མེད་དང་། །གང་ཡང་བསྐལ་པ་སྟོང་དུ་རྙེད་དཀའ་བ། །དེ་དག་རྨི་ལམ་དུ་ཡང་མཉན་པར་བགྱི། །ཉིན་གྱུར་ཚེ་ཡང་དེ་དག་བཤད་པར་བགྱི། །སེམས་ཅན་སྡུག་བསྔལ་མཚོ་ལས་ཐར་བར་བགྱི། །ཕ་རོལ་ཕྱིན་པ་དྲུག་པོ་རྫོགས་པར་བགྱི། །ཕྱི་ནས་བྱང་ཆུབ་བླ་མེད་ཐོབ་པར་བགྱི། །བདག་གི་ཞིང་ནི་ལྷོད་པ་མེད་གྱུར་ཅིག །རྔ་ཕུལ་རྣམ་པར་སྨིན་པའི་འབྲས་བུ་དང་། །རྒྱལ་བ་ཐམས་ཅད་ལ་ཡང་བསྟོད་པའི་རྒྱུས། །ཤཱཀྱ་ཐུབ་དབང་མངོན་དུ་བལྟ་བར་བགྱི། །དེར་ནི་བདག་
གིས་ལུང་བསྟན་ཐོབ་གྱུར་ཅིག །གསེར་གྱི་ལག་པའི་དབང་དང་གསེར་གྱི་འོད། །བདག་གི་ཁྱེའུ་ནི་གང་ཡིན་འདི་གཉིས་ཀྱང་། །དེར་ནི་བུ་ཕོ་དེ་དག་གཉི་ག་དང་། །བྱང་ཆུབ་བླ་མེད་ལུང་བསྟན་ཐོབ་པར་ཤོག །སེམས་ཅན་གང་དག་གནས་དང་རྟེན་མེད་ཅིང་། ། སྐྱབས་དང་བྲལ་ནས་ཕོངས་པར་གྱུར་པ་དག །དེ་དག་ལ་ཡང་མ་འོངས་དུས་རྣམས་ན། །སྐྱོབ་དང་དཔུང་གཉེན་སྐྱབས་དང་རྟེན་གྱུར་ཤོག །སྡུག་བསྔལ་ཀུན་འབྱུང་ཟད་པར་བྱེད་གྱུར་ཅིག །དགེ་བ་ཀུན་གྱི་འབྱུང་གནས་གྱུར་པར་ཤོག །སྔོན་མཐའ་འདས་པ་དེ་དག་ཇི་སྲིད་པ། །མ་འོངས་བསྐལ་པར་བྱང་ཆུབ་སྤྱད་པར་བགྱི། །གསེར་འོད་དམ་པ་ཡི་ནི་བཤགས་པ་ཡིས། །བདག་གི་སྡིག་པའི་རྒྱ་མཚོ་བསྐམས་པར་ཤོག །བདག་གི་ལས་ཀྱི་རྒྱ་མཚོ་ཟད་གྱུར་ཅིག །བདག་གི་ཉོན་མོངས་རྒྱ་མཚོ་ཟད་པར་ཤོག །བདག་གི་བསོད་ནམས་རྒྱ་མཚོ་རྫོགས་གྱུར་ཅིག །ཡེ་ཤེས་དྲི་མེད་སྣང་བ་དམ་པ་ཡི། །བདག་གི་ཡེ་ཤེས་རྒྱ་མཚོ་རྣམ་དག་ཅིང་། །ཡོན་ཏན་ཀུན་གྱི་རྒྱ་མཚོར་གྱུར་པར་ཤོག །བྱང་ཆུབ་ཡོན་ཏན་རིན་ཆེན་རྫོགས་གྱུར་ཅིག །གསེར་འོད་དམ་པའི་བཤགས་པའི་སྟོབས་ཀྱིས་ནི། །བདག་གི་བསོད་ནམས་རབ་ཏུ་སྣང་བར་ཤོག ། བདག་གི་བྱང་ཆུབ་སྣང་བ་རྣམ་དག་གྱུར། །ཡེ་ཤེས་དྲི་མེད་སྣང་བ་དམ་པ་ཡི། །བདག་གི་ལུས་ཀྱི་འོད་ནི་སྣང་བར་ཤོག །བསོད་ནམས་སྣང་བ་ལྷག་གེར་བྱ་བའི་ཕྱིར། །འཇིག་རྟེན་གསུམ་ན་ཁྱད་པར་འཕགས་གྱུར་ཅིག །བསོད་ནམས་སྟོབས་དང་རྟག་ཏུ་ལྡན་པར་ཤོག །སྡུག་བསྔལ་རྒྱ་མཚོ་ལས་ནི་སྒྲོལ་བ་དང་། །བདེ་བ་ཀུན་གྱི་རྒྱ་མཚོ་འདྲ་བ་ཡིས། །མ་འོངས་བསྐལ་པར་བྱང་ཆུབ་སྤྱད་པར་བགྱི། །འཇིག་རྟེན་གསུམ་ན་སྔོན་མཐར་ཇི་སྙེད་གཤེགས། །དེ་དག་ཞིང་ནི་རྒྱལ་བ་ཐམས་ཅད་ཀྱི། །ཡོན་ཏན་མཐའ་ཡས་ཁྱད་འཕགས་ཅི་འདྲ་བ། །ཡོན་ཏན་མཐའ་ཡས་རྣམས་ཀྱིས་བདག་གི་ཞིང་། །མ་འོངས་དུས་ན་དེ་འདྲར་འགྱུར་བར་ཤོག །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། འདས་པ་དང་མ་འོངས་པ་དང་། ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ལ་བསྟོད་པ་མེ་ཏོག་པདྨའི་འབྱུང་གནས་ཀྱི་ལེའུ་ཞེས་བྱ་བ་སྟེ་
ལྔ་པའོ།། །།དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །བསམ་གྱིས་མི་ཁྱབ་མདོ་རྣམས་གཞན་དག་ཏུ། །སྟོང་པའི་ཆོས་རྣམས་རབ་ཏུ་རྒྱས་བཤད་དེ། །དེ་ལྟ་བས་ན་མདོ་མཆོག་དམ་པ་འདིར། །སྟོང་པའི་ཆོས་རྣམས་མདོ་ཙམ་བཤད་པ་ཡིན། །སེམས་ཅན་བློ་ཆུང་རྣམ་པར་མི་ཤེས་པས། །ཆོས་རྣམས་ཐམས་ཅད་ཤེས་པར་མི་ནུས་ཏེ། །དེ་ལྟ་བས་ན་མདོ་མཆོག་དམ་པ་འདིར། །སྟོང་པའི་ཆོས་རྣམས་མདོ་ཙམ་རབ་ཏུ་བཤད། །སེམས་ཅན་ཀུན་གྱིས་ཅི་ནས་ཤེས་འགྱུར་དང་། །སེམས་ཅན་འབྱུང་བྱའི་ཕྱིར་ནི་སྙིང་རྗེའི་དབང་། །ཐབས་དང་ཚུལ་དང་རྒྱུ་གཞན་རྣམས་ཀྱིས་ནི། །མདོ་མཆོག་དམ་པ་དབང་པོ་འདི་བཤད་དོ། །ལུས་འདི་གྲོང་ཁྱིམ་སྟོང་པ་ཇི་བཞིན་ཏེ། །དབང་པོ་རྣམས་ནི་དམག་དང་ཆོམ་རྐུན་འདྲ། །དེ་དག་ཐམས་ཅད་གྲོང་གཅིག་གནས་མོད་ཀྱི། །དེ་དག་ཕན་ཚུན་རྣམ་པར་མི་ཤེས་སོ། །མིག་གི་དབང་པོ་གཟུགས་གྱུར་རྣམས་ལ་རྒྱུག །རྣ་བའི་དབང་པོ་སྒྲ་ལ་རྣམ་པར་སྤྱོད། །སྣ་ཡི་དབང་པོ་སྣ་ཚོགས་དྲི་རྣམས་འཕྲོག །ལྕེ་ཡི་དབང་པོ་རྟག་ཏུ་རོ་ལ་རྒྱུག །ལུས་ཀྱི་དབང་པོ་རེག་པ་དག་ལ་རྒྱུག །ཡིད་ཀྱི་དབང་པོ་ཆོས་རྣམས་རྣམ་པར་སྤྱོད། །དབང་པོ་དྲུག་པོ་འདི་དག་ཕན་ཚུན་དུ། །རང་རང་ཡུལ་ལ་རབ་ཏུ་འཇུག་པར་བྱེད། །སེམས་ནི་སྒྱུ་མ་ལྟ་བུར་གཡོ་བ་ཡིན། །དབང་པོ་དྲུག་ནི་ཡུལ་ལ་རྣམ་སྤྱོད་དེ། །ཇི་ལྟར་མི་ཞིག་གྲོང་སྟོང་རྒྱུག་པ་དང་། །དམག་དང་ཆོམ་རྐུན་དག་དང་གནས་པ་བཞིན། །ཇི་ལྟར་སེམས་ནི་ཡུལ་དྲུག་གནས་བཅས་ཤིང་། །དབང་པོའི་སྤྱོད་ཡུལ་དག་ཀྱང་རབ་ཤེས་པ། །དེ་ལྟར་སེམས་ནི་ཡུལ་དྲུག་གནས་བཅས་ཏེ། །དབང་པོའི་སྤྱོད་ཡུལ་རྣམས་ཀྱང་རབ་ཏུ་ཤེས། །གཟུགས་དང་སྒྲ་དང་དེ་བཞིན་དྲི་རྣམས་དང་། །རོ་དང་རེག་བྱ་དེ་བཞིན་སྤྱོད་ཡུལ་ཆོས། ། སེམས་ནི་དབང་པོ་དྲུག་པོ་ཐམས་ཅད་ལ། །དབང་པོར་བཞུགས་པ་བྱ་བཞིན་གཡོ་བར་འགྱུར། །དབང་པོ་གང་དང་གང་དུ་གནས་བཅས་པ། །དབང་པོ་དེ་ནི་ཤེས་པར་བདག་ཉིད་བྱེད། །ལུས་ནི་གཡོ་བ་མེད་ཅིང་བྱེད་པ་མེད། །སྙིང་པོ་མེད་ཅིང་རྐྱེན་ལས་བྱུང་བ་ཡིན། །ཡང་དག་མ་ཡིན་ཡོངས་
སུ་རྟོག་ལས་བྱུང་། །གྲོང་སྟོང་ལས་ཀྱི་འཁྲུལ་འཁོར་འདྲ་བར་གནས། །ས་དང་མེ་དང་ཆུ་དང་རླུང་རྣམས་ནི། །གཞན་དུ་གནས་ཏེ་ཕྱོགས་དང་ཕྱོགས་ན་གནས། །དཔེར་ན་སྦྲུལ་གདུག་གནས་གཅིག་ཇི་བཞིན་ཏེ། །རྟག་ཏུ་ཕན་ཚུན་མཐུན་པ་མ་ཡིན་བཞིན། །ཁམས་ཀྱི་སྦྲུལ་རྣམས་བཞི་པོ་དེ་དག་ཀྱང་། །གཉིས་ནི་སྟེང་འགྲོ་གཉིས་ནི་ཐུར་དུ་འགྲོ། །ཕྱོགས་དང་ཕྱོགས་མཚམས་རྣམས་སུ་གཉིས་གཉིས་ཏེ། །ཁམས་སྦྲུལ་དེ་དག་ཐམས་ཅད་འཇིག་པར་འགྱུར། །ས་ཡི་སྦྲུལ་དང་ཆུ་ཡི་སྦྲུལ་དག་དང་། །འདི་གཉིས་འོག་ཏུ་ཟད་པར་འགྱུར་བ་ཡིན། ། མེ་ཡི་སྦྲུལ་དང་རླུང་གི་སྦྲུལ་དག་དང་། །འདི་གཉིས་སྟེང་གི་ནམ་མཁར་འགྲོ་བ་ཡིན། །ཇི་ལྟར་སྔོན་ཆད་བྱས་པའི་ལས་རྣམས་ཀྱིས། །སེམས་དང་རྣམ་ཤེས་ཀུན་ཏུ་གནས་ནས་དོང་། །ལྷ་དང་མི་དང་ངན་སོང་གསུམ་དག་ཏུ། །ཇི་ལྟར་བྱས་པའི་ལས་ཀྱིས་སྲིད་པར་སྐྱེ། །བད་ཀན་རླུང་དང་མཁྲིས་པ་ཟད་གྱུར་ན། །ལུས་ནི་གཅིན་དང་ངན་སྐྱུགས་རྣམས་ཀྱིས་གང་། །མངོན་པར་མི་དགའ་སྲིན་བུའི་ཕུང་པོར་གྱུར། །དུར་ཁྲོད་དག་ན་འཐོར་བ་ཤིང་བཞིན་གྱུར། །ལྷ་མོ་ཁྱོད་ནི་ཆོས་འདི་རྣམས་ལ་ལྟོས། །འདི་ལ་སེམས་ཅན་དེ་བཞིན་གང་ཟག་དང་། །ཆོས་རྣམས་འདི་དག་ཐམས་ཅད་སྟོང་པ་སྟེ། །མ་རིག་པ་ཡི་རྐྱེན་ལས་བྱུང་བ་ཡིན། །འབྱུང་བ་ཆེན་པོ་འདི་དག་ཆེ་འབྱུང་མིན། །མ་བྱུང་བ་ལས་བྱུང་ཞིང་མི་འབྱུང་སྟེ། །གང་གི་ཕྱིར་ནི་འབྱུང་བ་མི་འབྱུང་བ། །དེ་ཕྱིར་འབྱུང་བ་ཆེ་ཞེས་ངས་བརྗོད་དོ། །ཡོད་པ་མིན་ཞིང་གཞར་ཡང་ཡོད་མིན་ལ། ། མ་རིག་པ་ཡི་རྐྱེན་ལས་བྱུང་བ་ཡིན། །མ་རིག་འདི་ནི་ཡོད་པ་མ་ཡིན་ཏེ། །དེ་བས་ངས་ནི་མ་རིག་འདི་བཤད་དོ། །འདུ་བྱེད་རྣམ་ཤེས་མིང་དང་གཟུགས་བཅས་དང་། །སྐྱེ་མཆེད་དྲུག་དང་རེག་དང་ཚོར་བ་དང་། །སྲེད་དང་ལེན་དང་དེ་བཞིན་སྲིད་པ་དང་། །སྐྱེ་དང་རྒ་ཤི་མྱ་ངན་གནོད་པ་རྣམས། ། འཁོར་བའི་སྡུག་བསྔལ་བསམ་གྱིས་མི་ཁྱབ་པ། །འཁོར་བའི་འཁོར་ལོ་ཇི་ལྟར་གནས་པ་དག །མ་བྱུང་བ་ལས་བྱུང་དང་མི་འབྱུང་དང་། །ཚུལ་བཞིན་མ་ཡིན་སེམས་ཀྱིས་རྣམ་དཔྱད་དང་། །བདག་གི་ལྟ་བར་གྱུར་པར་བཅད་པར་གྱིས། །ཡེ་ཤེས་རལ་གྲིས་ཉོན་མོངས་རྒྱ་མོ་གྲོལ། །ཕུང་
པོའི་གནས་ལ་སྟོང་པར་གྱུར་པར་ལྟོས། །བྱང་ཆུབ་ཡོན་ཏན་རྒྱ་ཆེན་རེག་པར་གྱིས། །ངས་ནི་བདུད་རྩི་གྲོང་ཁྱེར་སྒོ་ཡང་ཕྱེ། །བདུད་རྩི་ཁུ་བའི་སྣོད་ཀྱང་ཀུན་ཏུ་བསྟན། །ང་ནི་བདུད་རྩིའི་གྲོང་ཁྱེར་གནས་དེར་འཇུག །ངས་ནི་བདུད་རྩིའི་ཁུ་བས་བདག་ཚིམ་བྱས། །ངས་ནི་ཆོས་ཀྱི་རྔ་ཆེན་དམ་པ་བརྡུངས། །ངས་ནི་ཆོས་ཀྱི་དུང་གི་མཆོག་ཀྱང་བུས། །ངས་ནི་ཆོས་ཀྱི་སྒྲོན་མ་མཆོག་འབར་བྱས། །ངས་ནི་ཆོས་ཀྱི་ཆར་པ་དམ་པ་ཕབ། །ང་ནི་ཉོན་མོངས་དགྲ་མཆོག་རྣམས་ལས་རྒྱལ། །ངས་ནི་ཆོས་ཀྱི་རྒྱལ་མཚན་དམ་པ་བསྒྲེང་། །སྲིད་པའི་མཚོ་ལས་སེམས་ཅན་རབ་ཏུ་བསྒྲལ། ། ངས་ནི་ངན་སོང་གསུམ་གྱི་ལམ་རྣམས་བཀག །སེམས་ཅན་ཉོན་མོངས་མེ་ཡིས་གདུངས་གྱུར་པ། །རྟེན་མེད་གྱུར་ཅིང་དཔུང་གཉེན་མེད་པ་དག །སྲོག་ཆགས་ཉོན་མོངས་མེས་གདུངས་ཞི་བྱས་ནས། །བདུད་རྩིའི་ཁུ་བ་བསིལ་བས་ཚིམ་པར་བྱས། །གང་ཕྱིར་བསྐལ་པ་དུ་མར་སྔོན་ཆད་ངས། །འདྲེན་པ་བསམ་གྱིས་མི་ཁྱབ་མཆོད་པ་བྱས། །ཆོས་ཀྱི་སྐུ་དེ་ཡོངས་སུ་ཚོལ་བ་ན། །བརྟུལ་ཞུགས་བརྟན་པས་བྱང་ཆུབ་ཕྱིར་སྤྱད་དེ། །ལག་པ་དང་ནི་མིག་དང་རྐང་པ་དང་། །ཡན་ལག་མཆོག་དང་བུ་སྡུག་བུ་མོ་དང་། །ནོར་དབྱིག་ནོར་བུ་མུ་ཏིག་རྒྱན་དང་གསེར། །བཻ་ཌཱུཪྱ་དང་རིན་ཆེན་སྣ་ཚོགས་བཏང་། །སྟོང་གསུམ་ཤིང་ལྗོན་ཐམས་ཅད་དང་། །རྩྭ་དང་རྩྭ་རྣམས་ཐམས་ཅད་དང་། །ནགས་ཚལ་དག་དང་ས་ལས་ནི། །སྐྱེ་བ་ཐམས་ཅད་བཅད་གཏུབས་ཏེ། །དེ་དག་ཐམས་ཅད་ཕྱེར་བརླག་ནས། །རབ་ཏུ་ཕྲ་བའི་རྡུལ་འདྲར་བྱས། །ནམ་མཁའི་དཀྱིལ་འཁོར་ཇི་ཙམ་པར། །ཕྱེ་མའི་ཕུང་པོ་སྤུངས་ནས་ནི། །འདི་ལ་ཆ་གསུམ་དབྱེ་བར་ནུས། །ས་ལ་རྡུལ་ནི་ཡོད་པ་རྣམས། །སྟོང་གསུམ་དག་ནི་ཐམས་ཅད་ཀྱི། །རྡུལ་ཁམས་བསམ་གྱིས་མི་ཁྱབ་པ། །སེམས་ཅན་ཀུན་གྱི་ཤེས་པ་གང་། ། དེ་ནི་སེམས་ཅན་གཅིག་གིར་གྱུར། །ཤེས་པ་དེ་ཡིས་རྡུལ་རྣམས་ཀྱི། །ཕྱེ་མ་བགྲང་བར་བྱེད་ན་ནི། །སེམས་ཅན་ཀུན་ལས་རབ་འཕགས་པ། །ཡེ་ཤེས་རབ་ལྡན་མི་རྣམས་ཀྱིས། །ཐམས་ཅད་བགྲང་བར་ནུས་སྲིད་ཀྱི། །རྒྱལ་བའི་མཁྱེན་ལ་མི་ནུས་སོ། །ཐུབ་པ་ཆེན་པོའི་
ཡེ་ཤེས་གང་། །སྐད་ཅིག་གཅིག་ལ་འཇུག་པ་ཡང་། །བསྐལ་པ་བྱེ་བ་དུ་མར་ནི། །གང་དུའང་བགྲང་བར་མི་ནུས་སོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། སྟོང་པ་ཉིད་ཀྱི་ལེའུ་ཞེས་བྱ་བ་སྟེ་དྲུག་པའོ།། །།དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུ་དང་། རྒྱལ་པོ་ཆེན་པོ་ཡུལ་འཁོར་སྲུང་དང་། རྒྱལ་པོ་ཆེན་པོ་འཕགས་སྐྱེས་པོ་དང་། རྒྱལ་པོ་ཆེན་པོ་མིག་མི་བཟང་རྣམས་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ནི་དེ་བཞིན་གཤེགས་པ་ཐམས་ཅད་ཀྱིས་གསུངས་པ། དེ་བཞིན་གཤེགས་པ་ཐམས་ཅད་ཀྱིས་གཟིགས་པ། དེ་བཞིན་གཤེགས་པ་ཐམས་ཅད་ཀྱིས་དགོངས་པ། བྱང་ཆུབ་སེམས་དཔའི་ཚོགས་ཐམས་ཅད་ཀྱིས་ཡོངས་སུ་བཟུང་བ། ལྷའི་ཚོགས་ཐམས་ཅད་ཀྱིས་ཕྱག་བགྱིས་པ། ལྷའི་ཚོགས་ཐམས་ཅད་ཀྱིས་མཆོད་པ། ལྷའི་དབང་པོའི་ཚོགས་ཐམས་ཅད་ཀྱིས་མངོན་པར་བསྟོད་པ། འཇིག་རྟེན་སྐྱོང་བ་ཐམས་ཅད་ཀྱིས་མཆོད་ཅིང་བསྔགས་པ་བརྗོད་ནས་རབ་ཏུ་བཀུར་བ། ལྷའི་ཁང་ཁྱིམ་ཐམས་ཅད་སྣང་བར་བགྱིད་པ། སེམས་ཅན་ཐམས་ཅད་ལ་མཆོག་ཏུ་བདེ་བ་རབ་ཏུ་སྦྱིན་པར་བགྱིད་པ། སེམས་ཅན་དམྱལ་བ་དང་དུད་འགྲོའི་སྐྱེ་གནས་དང་གཤིན་རྗེའི་འཇིག་རྟེན་གྱི་སྡུག་བསྔལ་ཐམས་ཅད་རབ་ཏུ་སྐེམས་པ། འཇིགས་པ་ཐམས་ཅད་ཀྱི་རྒྱུན་གཅོད་པ། ཕ་རོལ་གྱི་དམག་ཚོགས་ཐམས་ཅད་རབ་ཏུ་བཟློག་པ། མུ་གེའི་དགོན་པ་ཐམས་ཅད་རབ་ཏུ་ཞི་བར་བགྱིད་པ། ནད་ཀྱི་དགོན་པ་ཐམས་ཅད་རབ་ཏུ་ཞི་བར་བགྱིད་པ། གཟའ་ཐམས་ཅད་སེལ་བ། མཆོག་ཏུ་ཞི་བར་བགྱིད་པ། མྱ་ངན་དང་ཉོན་མོངས་པ་རབ་ཏུ་ཞི་བར་བགྱིད་པ། གནོད་པ་རྣམ་པ་སྣ་ཚོགས་རབ་ཏུ་ཞི་བར་བགྱིད་པ། གནོད་པ་བརྒྱ་སྟོང་རབ་ཏུ་འཇོམས་པར་བགྱིད་པ་ལགས་སོ། །བཙུན་པ་བཅོམ་ལྡན་འདས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་འཁོར་གྱི་ནང་དུ་རྒྱ་ཆེར་ཡང་དག་པར་རབ་ཏུ་
བཤད་ན། ཆོས་ཉན་པ་ཆོས་བདུད་རྩིའི་ཁུ་བ་འདིས། བདག་ཅག་རྒྱལ་པོ་ཆེན་པོ་དཔུང་དང་གཡོག་ཏུ་བཅས་པ་བཞི་ལྷའི་ལུས་འདི་གཟི་བརྗིད་ཆེན་པོས་རྣམ་པར་འཕེལ་བར་འགྱུར་རོ། །བདག་ཅག་གི་ལུས་ལ་བརྩོན་པ་དང་སྟོབས་དང་མཐུ་ཡང་སྐྱེད་པར་འགྱུར། གཟི་བརྗིད་དང་དཔལ་དང་ཕུན་སུམ་ཚོགས་པ་ཡང་དེ་དག་གི་ལུས་ལ་འཇུག་པར་འགྱུར་རོ། །བཙུན་པ་བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞི་ནི་ཆོས་དང་ལྡན་པ་ཆོས་སྨྲ་བ་ཆོས་ཀྱི་རྒྱལ་པོ་ལགས་ཏེ། བཙུན་པ་བཅོམ་ལྡན་འདས་བདག་ཅག་ནི་ཆོས་ཀྱིས་ལྷ་དང་ཀླུ་དང་གནོད་སྦྱིན་དང་ལྷ་མ་ཡིན་དང་ནམ་མཁའ་ལྡིང་དང་དྲི་ཟ་དང་མི་འམ་ཅི་དང་ལྟོ་འཕྱེ་ཆེན་པོ་རྣམས་ཀྱི་རྒྱལ་པོ་བགྱིའོ། །འབྱུང་པོའི་ཚོགས་མི་བཟད་པ་སྙིང་རྗེ་མ་མཆིས་པ་གཞན་གྱི་མདངས་འཕྲོག་པ་རྣམས་བཟློག་པར་བགྱིའོ། །བཙུན་པ་བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞི་དང་། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང་གནོད་སྦྱིན་བརྒྱ་སྟོང་ཕྲག་དུ་མ་དང་ལྷན་ཅིག་ཏུ་རྟག་པར་རྒྱུན་དུ་ལྷའི་མིག་རྣམ་པར་དག་པ། མི་ལས་འདས་པས་འཛམ་བུའི་གླིང་ཐམས་ཅད་ལ་བལྟ་བར་བགྱི། བསྲུང་བར་བགྱི། ཡོངས་སུ་བསྐྱང་བར་བགྱི་སྟེ། བཙུན་པ་བཅོམ་ལྡན་འདས་དེའི་སླད་དུ། བདག་ཅག་རྒྱལ་པོ་ཆེན་པོ་བཞི་འཇིག་རྟེན་སྐྱོང་ཞེས་མིང་དུ་ཆགས་སོ། །བཙུན་པ་བཅོམ་ལྡན་འདས་གང་སུ་དག་འཛམ་བུའི་གླིང་འདིར། ཕ་རོལ་གྱི་དམག་ཚོགས་ཀྱིས་ཡུལ་འཇོམས་པར་འགྱུར་རམ། མུ་གེའི་གནོད་པའམ། ནད་ཀྱི་གནོད་པའམ། གནོད་པ་སྣ་ཚོགས་བརྒྱ་དང་གནོད་པ་སྟོང་དང་གནོད་པ་བརྒྱ་ཕྲག་སྟོང་དག་གིས་གཙེས་པར་འགྱུར་བ་ན། བཙུན་པ་བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞིས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་འཛིན་པའི་དགེ་སློང་ཆོས་སྨྲ་བ་དེ་དག་ལ་བསྐུལ་བ་བགྱིའོ། །བཙུན་པ་བཅོམ་ལྡན་འདས་ནམ་བདག་ཅག་རྒྱལ་པོ་ཆེན་པོ་བཞིས་རྫུ་འཕྲུལ་དང་བྱིན་གྱི་རླབས་ཀྱིས་དགེ་སློང་ཆོས་སྨྲ་བ་དེ་དག་ལ་བཀུར་བ་ན། ཡུལ་གང་དང་གང་དུ་མཆི་བར་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཡུལ་དེ་དང་དེ་དག་ཏུ་རྒྱ་ཆེར་ཡང་དག་པར་སྟོན་པར་འགྱུར་ཏེ། གང་གནོད་པ་སྣ་ཚོགས་
བརྒྱ་དང་གནོད་པ་སྟོང་ཡུལ་དུ་འབྱུང་བ་འདི་ལྟ་བུ་འདི་དག་རབ་ཏུ་ཞི་བར་འགྱུར་རོ། །བཙུན་པ་བཅོམ་ལྡན་འདས་མིའི་རྒྱལ་པོ་གང་གི་ཡུལ་དུ་མདོ་སྡེའི་དབང་པོ་འཛིན་པའི་དགེ་སློང་ཆོས་སྨྲ་བ་དེ་དག་མཆི་བར་འགྱུར་བའི་ཡུལ་དེ་དག་ཏུ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཡང་བསྙེན་པར་འགྱུར་རོ། །བཙུན་པ་བཅོམ་ལྡན་འདས་ནམ་མིའི་རྒྱལ་པོས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་ཏེ་ཐོས་ནས། མདོ་སྡེའི་དབང་པོ་འཛིན་པའི་དགེ་སློང་དེ་དག་ཕྱིར་རྒོལ་བ་ཐམས་ཅད་ལས་ཀུན་ཏུ་བསྲུང་བར་བགྱིད། ཡོངས་སུ་བསྐྱབ་པ་དང་། ཡོངས་སུ་འཛིན་པ་དང་། ཡོངས་སུ་སྐྱོང་བར་བགྱིད་ན། བཙུན་པ་བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞིས། མིའི་རྒྱལ་པོའི་ཡུལ་དེ་ཐམས་ཅད་ན་གནས་པའི་སེམས་ཅན་རྣམས་ཀུན་ཏུ་བསྲུང་བར་བགྱི། ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཞི་བ་དང་བདེ་ལེགས་སུ་འགྱུར་བར་བགྱིའོ། །བཙུན་པ་བཅོམ་ལྡན་འདས་མིའི་རྒྱལ་པོས་ནམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་མདོ་སྡེའི་དབང་པོ་འཛིན་པ་ལ། བདེ་བར་སྦྱར་བ་ཐམས་ཅད་ཀྱིས་བདེ་བར་བགྱིད་ན། བཙུན་པ་བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞིས། མིའི་རྒྱལ་པོ་དེའི་ཡུལ་ཐམས་ཅད་ན་གནས་པའི་སེམས་ཅན་རྣམས་ལ་བདེ་བའི་ཡོ་བྱད་ཐམས་ཅད་ཀྱིས། བདེ་བ་དང་ཡོ་བྱད་ཐམས་ཅད་ཕུན་སུམ་ཚོགས་པར་བགྱིའོ། །བཙུན་པ་བཅོམ་ལྡན་འདས་ནམ་མིའི་རྒྱལ་པོས་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། མདོ་སྡེའི་དབང་པོ་འཛིན་པ་ལ་བསྟི་སྟང་དུ་བགྱིད། བླ་མར་བགྱིད། རིམ་གྲོར་བགྱིད་ཅིང་མཆོད་ན། བཙུན་པ་བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞིས། མིའི་རྒྱལ་པོ་དེ་ལ་རྒྱལ་པོ་ཐམས་ཅད་པས་ཆེས་བསྟི་སྟང་དུ་བགྱི། ཆེས་བླ་མར་བགྱི། ཆེས་རིམ་གྲོར་བགྱི། ཆེས་མཆོད་པར་བགྱི་སྟེ་ཡུལ་ཐམས་ཅད་དུ་ཡང་རབ་ཏུ་བསྔགས་པར་བགྱིའོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་ལ་ལེགས་སོ་ཞེས་བྱ་བ་བྱིན་ཏེ་རྒྱལ་པོ་ཆེན་པོ་དག་ལེགས་སོ་ལེགས་སོ། །
རྒྱལ་པོ་ཆེན་པོ་ཁྱོད་ཡང་ལེགས་སོ་ལེགས་སོ། །འདི་ལྟ་སྟེ་ཁྱོད་ནི་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། དགེ་བའི་རྩ་བ་རྣམས་བསྐྱེད་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་ལ་བསྙེན་བཀུར་བྱས་པ་ཆོས་དང་ལྡན་པ་ཆོས་སྨྲ་བ་ཆོས་ཀྱིས་ལྷ་དང་མི་རྣམས་ཀྱི་རྒྱལ་པོ་བྱས་པའོ། ། འདི་ལྟ་སྟེ་ཁྱོད་ནི་ཡུན་རིང་པོར་སེམས་ཅན་ཐམས་ཅད་ལ་ཕན་པའི་སེམས་དང་ལྡན་པ། བདེ་བ་དང་བྱམས་པའི་སེམས་དང་ལྡན་པ། སེམས་ཅན་ཐམས་ཅད་ལ་ཕན་པ་དང་བདེ་བར་བྱ་བའི་ལྷག་པའི་བསམ་པ་ལ་ཞུགས་པ། མི་ཕན་པ་ཐམས་ཅད་འགོག་པ། སེམས་ཅན་ཐམས་ཅད་ལ་བདེ་བ་ཐམས་ཅད་ཉེ་བར་བསྒྲུབ་པར་བརྩོན་པ་ཡིན་ཏེ། རྒྱལ་པོ་ཆེན་པོ་ཁྱེད་བཞིས། མིའི་རྒྱལ་པོ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལ་མཆོད་པ་དང་རིམ་གྲོ་བྱེད་པར་བརྩོན་པ་དེ་དག་ལ་ཀུན་ཏུ་བསྲུང་བར་གྱིས་ཤིག །ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཆད་པ་སྤང་བ་དང་། ཞི་བ་དང་བདེ་ལེགས་སུ་འགྱུར་བར་གྱིས་ཤིག །དེ་ནས་རྒྱལ་པོ་ཆེན་པོ་དཔུང་དང་། གཡོག་དང་། གནོད་སྦྱིན་བརྒྱ་སྟོང་ཕྲག་དུ་མ་དང་བཅས་པ་ཁྱེད་བཞིས་འདས་པ་དང་། མ་འོངས་པ་དང་།ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱིས་ཆོས་ཀྱི་ཚུལ་ཀུན་ཏུ་བསྲུང་བར་འགྱུར་རོ། །ཡོངས་སུ་བསྐྱང་བ་དང་ཡོངས་སུ་གཟུང་བར་ཡང་འགྱུར་རོ། །དེ་ནས་རྒྱལ་པོ་ཆེན་པོ་དཔུང་དང་། གཡོག་དང་། གནོད་སྦྱིན་བརྒྱ་སྟོང་ཕྲག་དུ་མ་དང་བཅས་པ་ཁྱེད་བཞི་ལྷ་དང་ལྷ་མ་ཡིན་དུ་གཡུལ་འགྱེད་པ་ན་རྒྱལ་བར་འགྱུར་རོ། །ལྷ་མ་ཡིན་རྣམས་ཕམ་པར་འགྱུར་རོ། །འདི་ལྟར་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ཕ་རོལ་གྱི་དམག་ཚོགས་ཐམས་ཅད་འདུལ་བར་བྱེད་པ་འདིའི་ཕྱིར། དགེ་སློང་ངམ་དགེ་སློང་མའམ་དགེ་བསྙེན་ནམ་དགེ་བསྙེན་མ་མདོ་སྡེའི་དབང་པོ་འཛིན་པ། དེ་དག་ལ་ཀུན་ཏུ་བསྲུང་བ་གྱིས་ཤིག །ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཞི་བ་དང་བདེ་ལེགས་སུ་འགྱུར་བར་གྱིས་ཤིག །དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུ་དང་། རྒྱལ་པོ་ཆེན་པོ་ཡུལ་འཁོར་སྲུང་དང་། རྒྱལ་པོ་ཆེན་པོ་འཕགས་སྐྱེས་པོ་དང་། རྒྱལ་པོ་ཆེན་པོ་མིག་མི་བཟང་སྟན་ལས་ལངས་
ཏེ། གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་མ་འོངས་པའི་དུས་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི། གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། ཡུལ་འཁོར་རམ། ཕོ་བྲང་འཁོར་གང་དུ་སྤྱོད་པར་འགྱུར་བ་དང་། མིའི་རྒྱལ་པོ་གང་དང་གང་གི་ཡུལ་དུ་སྤྱོད་པར་འགྱུར་བ་དང་། བཙུན་པ་བཅོམ་ལྡན་འདས་མིའི་རྒྱལ་པོར་གྱུར་པ་གང་ལ་ལ་ཞིག་ལྷའི་དབང་པོའི་དམ་ཚིག་རྒྱལ་པོའི་བསྟན་བཅོས་འདིས། རྒྱལ་པོ་བགྱིད་ཅིང་རྟག་པར་རྒྱུན་དུ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་ཏམ། རིམ་གྲོ་བགྱིད་དམ། མཆོད་པ་བགྱིད་དམ། དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་མདོ་སྡེའི་དབང་པོའི་རྒྱལ་པོ་འཛིན་པ་དེ་དག་ལ་ཡང་བསྟི་སྟང་བགྱིད། བཙུན་པར་བགྱིད། རིམ་གྲོར་བགྱིད་ཅིང་མཆོད་དེ་རྟག་པར་རྒྱུན་དུ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ཉན་ན། ཆོས་མཉན་པའི་ཆུ་བོའི་ཆུ་ཆོས་བདུད་རྩིའི་ཁུ་བ་འདིས་བདག་ཅག་རྒྱལ་པོ་ཆེན་པོ་བཞི་དང་། གཡོག་རྣམས་དང་གནོད་སྦྱིན་བརྒྱ་སྟོང་ཕྲག་དུ་མའི་ལྷའི་ལུས་འདི་དག་གཟི་བརྗིད་ཆེན་པོ་རྣམ་པར་འཕེལ་བར་འགྱུར། བདག་ཅག་ལ་བརྩོན་འགྲུས་དང་མཐུ་དང་སྟོབས་ཆེན་པོར་ཡང་བགྱིད་པར་འགྱུར། བདག་གི་གཟི་བརྗིད་དང་དཔལ་དང་། ཕུན་སུམ་ཚོགས་པ་ཡང་རྣམ་པར་འཕེལ་བར་འགྱུར་རོ། ། བཙུན་པ་བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞི་དཔུང་དང་གཡོག་ཏུ་བཅས་པ་གནོད་སྦྱིན་བརྒྱ་སྟོང་ཕྲག་དུ་མ་དང་ལུས་བལྟར་མི་གདའ་བར་བགྱིས་ཏེ། ད་ལྟར་དང་མ་འོངས་པའི་དུས་ན་གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། ཡུལ་འཁོར་རམ། ཕོ་བྲང་འཁོར་གང་ན། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་སྤྱོད་པར་འགྱུར་བ་དེ་དག་ཏུ་མཆི་བར་བགྱིའོ། །མིའི་རྒྱལ་པོ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་མཉན་པ་དང་། རིམ་གྲོ་བགྱིད་པ་དང་། མཆོད་པ་བགྱིད་པ་དེ་དག་ལ་ཀུན་ཏུ་བསྲུང་བར་བགྱིའོ། །ཡོངས་སུ་
བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཆད་པ་སྤང་བ་དང་། ཞི་བ་དང་བདེ་ལེགས་སུ་འགྱུར་བར་བགྱིའོ། །རྒྱལ་པོའི་ཕོ་བྲང་འཁོར་དེ་དག་དང་ཡུལ་འཁོར་དེ་དག་དང་ཡུལ་དེ་དག་ཀྱང་ཀུན་ཏུ་བསྲུང་བར་བགྱིའོ། །ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཆད་པ་སྤང་བ་དང་། ཞི་བ་དང་བདེ་ལེགས་སུ་འགྱུར་བར་བགྱིའོ། །ཡུལ་དེ་དག་ཀྱང་འཇིག་པ་དང་གནོད་པ་དང་། འཁྲུག་པ་ཐམས་ཅད་ལས་ཡོངས་སུ་ཐར་བར་བགྱིའོ། །ཕ་རོལ་གྱི་དམག་ཚོགས་རྣམས་ཀྱང་སླར་བཟློག་པར་བགྱིའོ། ། མིའི་རྒྱལ་པོ་གང་ལ་ལ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་མཉན་པ་དང་། རིམ་གྲོ་བགྱིད་པ་དང་། མཆོད་པ་བགྱིད་པ་དེའི་དགྲ་ཟླ་འདབ་ཉེ་བའི་རྒྱལ་པོ་གཞན་ཞིག་མཆིས་ལ། བཙུན་པ་བཅོམ་ལྡན་འདས་ནམ་དགྲ་ཟླ་འདབ་ཉེ་བའི་རྒྱལ་པོ་དེ་འདི་སྙམ་དུ་བདག་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ཡུལ་དེར་སོང་སྟེ། ཡུལ་དེ་རྣམ་པར་གཞིག་གོ་སྙམ་དུ་སེམས་བསྐྱེད་ན། བཙུན་པ་བཅོམ་ལྡན་འདས་དེའི་ཚེ་དེའི་དུས་ན། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདིའི་གཟི་བརྗིད་ཀྱི་མཐུས་དགྲ་ཟླ་འདབ་ཉེ་བའི་རྒྱལ་པོ་དེ་རྒྱལ་པོ་གཞན་དག་དང་གཡུལ་འགྱེད་པར་འགྱུར། རང་གི་ཡུལ་དུ་ཕྱིན་ན་ཡང་། ཡུལ་འཁྲུག་པར་འགྱུར། རྒྱལ་པོའི་འཁྲུག་པ་མི་བཟད་པ་ཡང་འབྱུང་བར་འགྱུར། ཡུལ་དུ་གཟའ་དང་ནད་ཀྱང་འབྱུང་བར་འགྱུར། ཡུལ་དུ་བྲེལ་བ་སྣ་ཚོགས་བརྒྱ་དག་ཀྱང་འབྱུང་བར་འགྱུར་རོ། །བཙུན་པ་བཅོམ་ལྡན་འདས་ནམ་དགྲ་ཟླ་འདབ་ཉེ་བའི་རྒྱལ་པོ་དེ་རང་གི་ཡུལ་དུ་ཕྱིན་པ་ན། གནོད་པ་སྣ་ཚོགས་བརྒྱ་དང་བྲེལ་བ་སྣ་ཚོགས་བརྒྱ་འདི་ལྟ་བུ་འབྱུང་ངོ་། །བཙུན་པ་བཅོམ་ལྡན་འདས་དགྲ་ཟླ་འདབ་ཉེ་བའི་རྒྱལ་པོ་དེ་ཡན་ལག་བཞི་པའི་དམག་བསོགས་ཏེ། ཕ་རོལ་གྱི་དམག་ཚོགས་སུ་མཆི་བའི་སླད་དུ་རང་གི་ཡུལ་ནས་བྱུང་སྟེ། དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ཡུལ་དེར་མཆི་འཚལ་བ་དང་། གང་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་གནས་པའི་ཡུལ་དེ་རྣམ་པར་གཞིག་འཚལ་བར་གྱུར་ན། བཙུན་པ་བཅོམ་ལྡན་འདས་བདག་
ཅག་རྒྱལ་པོ་ཆེན་པོ་བཞི་དཔུང་དང་གཡོག་ཏུ་བཅས་པ། གནོད་སྦྱིན་བརྒྱ་སྟོང་དུ་མ་དང་ལྷན་ཅིག་ཏུ་ལུས་མི་གདའ་བར་བགྱིས་ཏེ་དེར་མཆི་བར་བགྱིའོ། །ཕ་རོལ་གྱི་དམག་ཚོགས་དེ་ཡུལ་དུ་ཞུགས་པ་ལས་ཀྱང་། དེ་ཉིད་ནས་ལྡོག་པར་བགྱིའོ། །བྲེལ་བ་རྣམ་པ་སྣ་ཚོགས་བརྒྱ་དག་ཀྱང་ཉེ་བར་བསྒྲུབ་པར་བགྱིའོ། །བགེགས་ཀྱང་བགྱིའོ། །འདི་ལྟ་སྟེ་ཡུལ་དེར་ཕ་རོལ་དམག་ཚོགས་དེ་མཆི་བར་ཡང་མི་ནུས་ན། ཡུལ་གཞིག་པར་བགྱིད་པར་ལྟ་ག་ལ་འགྱུར། དེ་ནས་བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་པོ་དག་ལ་ལེགས་སོ་ཞེས་བྱ་བ་བྱིན་ཏེ། རྒྱལ་པོ་ཆེན་པོ་དག་ལེགས་སོ་ལེགས་སོ། །རྒྱལ་པོ་ཆེན་པོ་དག་ཁྱེད་ཡང་ལེགས་ཏེ། ཁྱེད་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་ཡང་དག་པར་བསྒྲུབས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདིའི་ཕྱིར། མིའི་རྒྱལ་པོ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་པ་དང་། རིམ་གྲོ་བྱེད་པ་དང་། མཆོད་པ་བྱེད་པ་དེ་དག་ལ་ཀུན་ཏུ་བསྲུང་བ་གྱིས་ཤིག །ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཆད་པ་སྤང་བ་དང་། ཞི་བ་དང་བདེ་ལེགས་སུ་འགྱུར་བར་གྱིས་ཤིག །རྒྱལ་པོའི་ཕོ་བྲང་འཁོར་དེ་དག་དང་། གྲོང་ཁྱེར་དེ་དག་དང་། ཡུལ་འཁོར་དེ་དག་དང་། ཡུལ་དེ་དག་ཀྱང་ཀུན་ཏུ་སྲུངས་ཤིག །ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཆད་པ་སྤང་བ་དང་། ཞི་བ་དང་བདེ་ལེགས་སུ་འགྱུར་བར་གྱིས་ཤིག །ཡུལ་དེ་དག་ཀྱང་འཇིགས་པ་དང་གནོད་པ་དང་འཁྲུག་པ་ཐམས་ཅད་ལས་ཡོངས་སུ་ཐར་བར་གྱིས་ཤིག །ཕ་རོལ་གྱི་དམག་ཚོགས་རྣམས་ཀྱང་ཟློག་ཅིག །འཛམ་བུའི་གླིང་ཐམས་ཅད་ན་གནས་པའི་མིའི་རྒྱལ་པོ་དག་མི་འཐབ་པ་དང་། མཚང་མི་འདྲུ་བ་དང་། མི་རྩོད་པ་དང་། མི་འགྱེད་པར་བྱ་བ་ལ་སྤྲོ་བར་གྱིས་ཤིག །རྒྱལ་པོ་ཆེན་པོ་དཔུང་དང་གཡོག་ཏུ་བཅས་པ་ཁྱེད་བཞིའི་འཛམ་བུའི་གླིང་འདིར་ནམ་གྲོང་ཁྱེར་བརྒྱད་ཁྲི་བཞི་སྟོང་དེ་དག་ན། རྒྱལ་པོ་བརྒྱད་ཁྲི་བཞི་སྟོང་དེ་དག་རང་རང་གི་ཡུལ་ལ་མངོན་པར་དགའ་བ་དང་། རྒྱལ་སྲིད་ཀྱི་དབང་ཕྱུག་དེས་མངོན་པར་དགའ་བ་དང་། རང་གི་
ནོར་གྱི་ཕུང་པོས་ཕན་ཚུན་རྣམ་པར་མི་འཚེ་བ་དང་། ཕན་ཚུན་རྣམ་པར་འཚེ་བ་མི་བསྐྱེད་པ་དང་། རང་གིས་ཇི་ལྟར་སྔོན་གྱི་ལས་བསགས་པས་རྒྱལ་པོ་ཐོབ་པའི་རང་གི་རྒྱལ་སྲིད་ཀྱི་དབང་ཕྱུག་གིས་དགའ་བ་དང་། ཕན་ཚུན་དུ་ཡུལ་འཇིག་པར་མི་བྱེད་པ་དང་། ཡུལ་གཞིག་པའི་ཕྱིར་ཕ་རོལ་གྱི་གནོད་པ་དང་། ནམ་འཛམ་བུའི་གླིང་འདིར་གྲོང་ཁྱེར་བརྒྱད་ཁྲི་བཞི་སྟོང་དག་ན་རྒྱལ་པོ་བརྒྱད་ཁྲི་བཞི་སྟོང་དེ་དག་ཕན་ཚུན་དུ་བྱམས་པའི་སེམས་སུ་འགྱུར། བྱམས་པའི་སེམས་དང་ཕན་པའི་སེམས་སུ་འགྱུར་ཏེ། ཕན་ཚུན་དུ་མི་འཐབ་མཚང་མི་འདྲུ་མི་རྩོད་མི་འགྱེད་པར་རང་རང་གི་ཡུལ་དག་ན་དགའ་བར་འགྱུར་ན། དེའི་ཕྱིར་རྒྱལ་པོ་ཆེན་པོ་དཔུང་དང་གཡོག་ཏུ་བཅས་པ་ཁྱེད་བཞི་འཛམ་བུའི་གླིང་འདི་རྒྱས་པར་འགྱུར། ལོ་ལེགས་པར་འགྱུར། ཉམས་དགའ་བར་འགྱུར། སྐྱེ་བོ་མང་པོ་དང་མིས་གང་བར་འགྱུར། ས་ཡང་མདངས་ཅན་དུ་འགྱུར། དུས་དང་ཟླ་བ་དང་ཟླ་བ་ཕྱེད་དང་ལོ་ཁྱུད་ཀོར་ཐམས་ཅད་ཀྱང་ཡང་དག་པའི་དུས་དང་ལྡན་པར་འགྱུར། གཟའ་དང་། རྒྱུ་སྐར་དང་། ཟླ་བ་དང་། ཉི་མ་ཡང་ཉིན་མཚན་དུ་ལེགས་པར་རྒྱུ་བར་འགྱུར། ཆར་པའི་རྒྱུན་ཡང་ས་ལ་དུས་དུས་སུ་འབབ་པར་འགྱུར། འཛམ་བུའི་གླིང་ཐམས་ཅད་ན་གནས་པའི་སེམས་ཅན་རྣམས་ཀྱང་ནོར་དང་འབྲུ་ཐམས་ཅད་འབྱོར་པར་འགྱུར། ལོངས་སྤྱོད་ཆེ་བ་དང་། སེར་སྣ་མེད་པར་འགྱུར། གཏོང་བ་དང་ལྡན་པར་འགྱུར། དགེ་བ་བཅུའི་ལས་ཀྱི་ལམ་དང་ལྡན་པར་འགྱུར། ཕལ་ཆེར་བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེ་བར་འགྱུར། ལྷའི་ཁང་ཁྱིམ་རྣམས་ཀྱང་ལྷ་དང་ལྷའི་བུ་རྣམས་ཀྱིས་གང་བར་འགྱུར་རོ། །རྒྱལ་པོ་ཆེན་པོ་དག་གང་ལ་ལ་ཞིག་མིའི་རྒྱལ་པོར་གྱུར་ལ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་པར་གྱུར་ཏེ། རིམ་གྲོ་བྱས། མཆོད་པ་བྱས། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་མདོ་སྡེའི་དབང་པོ་འཛིན་པ་དེ་དག་ལ་ཡང་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་ཅིང་། རྒྱལ་པོ་ཆེན་པོ་ཁྱེད་བཞི་དཔུང་དང་གཡོག་ཏུ་བཅས་པ་གནོད་སྦྱིན་སྟོང་ཕྲག་དུ་མ་ལ་སྙིང་བརྩེ་བའི་ཕྱིར་རྟག་པར་རྒྱུན་དུ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་ན། ཆོས་ཉན་པའི་ཆུའི་
ཀླུང་ཆོས་བདུད་རྩིའི་ཁུ་བ་འདིས་ཁྱེད་ཅག་གི་ལུས་འདི་དག་ཚིམ་པར་འགྱུར་རོ། །ཁྱེད་ཀྱི་ལྷའི་ལུས་འདི་དག་གི་གཟི་བྱིན་ཆེན་པོ་ཡང་རྣམ་པར་འཕེལ་ལོ། །ཁྱེད་ཀྱི་བརྩོན་འགྲུས་དང་མཐུ་དང་སྟོབས་ཀྱང་བསྐྱེད་དོ། །ཁྱེད་ཀྱི་གཟི་བརྗིད་དང་དཔལ་དང་ཕུན་སུམ་ཚོགས་པ་ཡང་རྣམ་པར་འཕེལ་ལོ། །མིའི་རྒྱལ་པོ་དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ང་ལ་ཡང་མཆོད་པ་བསམ་གྱིས་མི་ཁྱབ་པ་རྒྱ་ཆེན་པོ་ཡངས་པ་བྱས་པར་འགྱུར་རོ། །མིའི་རྒྱལ་པོ་དེས་འདས་པ་དང་མ་འོངས་པ་དང་ད་ལྟར་བྱུང་བའི་དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་ལ་ཡང་ཡོ་བྱད་བསམ་གྱིས་མི་ཁྱབ་པ་རྒྱ་ཆེ་བ་ཡངས་པ་ཐམས་ཅད་ཀྱིས་མཆོད་པ་བྱས་པར་འགྱུར་རོ། །དེས་ན་མིའི་རྒྱལ་པོ་དེ་ལ་བསྲུང་བ་ཆེན་པོ་བྱས་པར་འགྱུར་རོ། །དེས་ན་མིའི་རྒྱལ་པོ་དེ་ལ་ཀུན་ཏུ་བསྲུང་བ་དང་། ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཆད་པ་སྤང་བ་དང་། ཞི་བ་དང་བདེ་ལེགས་སུ་འགྱུར་བ་བྱས་པར་འགྱུར་རོ། །བཙུན་མོ་དམ་པ་དང་། རྒྱལ་བུ་རྣམས་དང་། བཙུན་མོའི་འཁོར་ཐམས་ཅད་དང་། རྒྱལ་པོའི་ཕོ་བྲང་འཁོར་ཐམས་ཅད་ཀྱང་བསྲུང་བ་ཆེན་པོ་བྱས་པར་འགྱུར། ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཆད་པ་སྤང་བ་དང་། ཞི་བ་དང་བདེ་ལེགས་སུ་འགྱུར་བ་བྱས་པར་འགྱུར། རྒྱལ་པོའི་ཕོ་བྲང་འཁོར་ན་གནས་པའི་ལྷ་ཐམས་ཅད་ཀྱང་ཆེས་གཟི་བརྗིད་དང་ལྡན་པ་དང་། ཆེས་སྟོབས་དང་ལྡན་པ་དང་། བདེ་བ་དང་ཡིད་བདེ་བ་བསམ་གྱིས་མི་ཁྱབ་པ་དང་ལྡན་པར་འགྱུར། དགའ་བ་སྣ་ཚོགས་མྱོང་བར་འགྱུར། གྲོང་ཁྱེར་དེ་དག་དང་ཡུལ་འཁོར་དེ་དག་ཀྱང་ཀུན་ཏུ་བསྲུང་བར་འགྱུར། ཡོངས་སུ་བསྐྱང་བར་འགྱུར། གནོད་པ་མེད་པར་འགྱུར། དགྲ་མེད་པར་འགྱུར། ཕ་རོལ་གྱི་དམག་ཚོགས་ཐམས་ཅད་ཀྱིས་མི་རྫི་བ་དང་གནོད་པ་མེད་པ་དང་འཁྲུག་པ་མེད་པར་འགྱུར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་རྒྱལ་པོ་ཆེན་པོ་རྣམ་ཐོས་ཀྱི་བུ་དང་། རྒྱལ་པོ་ཆེན་པོ་ཡུལ་འཁོར་སྲུང་དང་། རྒྱལ་པོ་ཆེན་པོ་འཕགས་སྐྱེས་པོ་དང་། རྒྱལ་པོ་ཆེན་པོ་མིག་མི་བཟང་དེ་དག་
གིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་མིའི་རྒྱལ་པོ་གང་ལ་ལ་ཞིག་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཡང་ཉན་པར་འཚལ་བར་འགྱུར། བདག་ཉིད་ལ་ཡང་བསྲུང་བ་ཆེན་པོ་བགྱིད་འཚལ་བར་འགྱུར། བཙུན་མོ་དམ་པ་དང་། རྒྱལ་བུ་རྣམས་དང་། རྒྱལ་པོའི་བུ་མོ་རྣམས་དང་། བཙུན་མོའི་འཁོར་གྱི་ཚོགས་རྣམས་ལ་ཡང་བསྲུང་བ་ཆེན་པོ་བགྱིད་འཚལ་བར་འགྱུར། རྒྱལ་པོའི་ཕོ་བྲང་འཁོར་དེ་དག་ཐམས་ཅད་ལ་ཡང་ཞི་བ་དང་བདེ་ལེགས་སུ་འགྱུར་བ་ཆེན་པོ་བསམ་གྱིས་མི་ཁྱབ་པ་མཆོག་ཏུ་ཁྱད་པར་དུ་འཕགས་པ་བླ་ན་མེད་པ་བགྱིད་འཚལ་བར་འགྱུར། ཚེ་འདི་ལ་བདག་གི་རྒྱལ་སྲིད་ཀྱི་དབང་ཕྱུག་ཆེན་པོ་བསམ་གྱིས་མི་ཁྱབ་པ་རྣམ་པར་འཕེལ་བར་བགྱིད་འཚལ་བར་འགྱུར། རྒྱལ་པོ་ཉིད་བསམ་གྱིས་མི་ཁྱབ་པ་དང་ལྡན་པར་འགྱུར། བསོད་ནམས་ཀྱི་ཕུང་པོ་དཔག་ཏུ་མ་མཆིས་པ་ཡོངས་སུ་འཛིན་འཚལ་བར་འགྱུར། བདག་གི་ཡུལ་ཐམས་ཅད་ཀྱང་ཀུན་ཏུ་བསྲུང་འཚལ་བར་འགྱུར། ཡོངས་སུ་བསྐྱང་འཚལ་བར་འགྱུར། རང་གི་ཡུལ་ན་གནོད་པ་མ་མཆིས་པ་དང་། དགྲ་མ་མཆིས་པ་དང་། ཕ་རོལ་གྱི་དམག་ཚོགས་ཀྱིས་མི་རྫི་བ་དང་། ནད་འགོ་བ་མ་མཆིས་པ་དང་། འཁྲུག་པ་མ་མཆིས་པར་བགྱིད་འཚལ་བར་འགྱུར་ན། བཙུན་པ་བཅོམ་ལྡན་འདས་མིའི་རྒྱལ་པོ་དེས་གཡེང་བ་མ་མཆིས་པའི་སེམས་དང་གུས་པ་དང་བཅས་པ་དང་རི་མོ་དང་བཅས་པས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་བསྟི་སྟང་དུ་བགྱིད་དེ་མཉན་པར་བགྱིའོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་མཉན་པའི་སླད་དུ། མིའི་རྒྱལ་པོ་དེས་རྒྱལ་པོའི་ཕོ་བྲང་ཁྱད་པར་དུ་འཕགས་པར་མཆི་བར་བགྱིའོ། །དེར་མཆིས་ནས་ཀྱང་རྒྱལ་པོའི་ཕོ་བྲང་སྤོས་ཆབ་སྣ་ཚོགས་ཀྱིས་ཆག་ཆག་གདབ་ཅིང་མེ་ཏོག་སིལ་མ་སྣ་ཚོགས་དགྲམ་པར་བགྱིའོ། །སྤོས་ཆབ་སྣ་ཚོགས་ཀྱིས་ཆག་ཆག་བཏབ་པ་དེར་ཆོས་ཀྱི་ཁྲི་མཐོན་པོ་རྒྱན་སྣ་ཚོགས་ཀྱིས་ལེགས་པར་བརྒྱན་པ་བཤམ་པར་བགྱིའོ། །ཕྱོགས་དེར་གདུགས་དང་། རྒྱལ་མཚན་དང་། བ་དན་སྣ་ཚོགས་ཀྱིས་ལེགས་པར་བརྒྱན་པར་བགྱིའོ། །མིའི་རྒྱལ་པོ་དེས་ལུས་བཀྲུ་བར་བགྱིའོ། །གོས་དྲི་རབ་ཏུ་བདའ་བ་གོས་སར་པ་མཛེས་པ་བགོས་ནས་རྒྱན་སྣ་ཚོགས་ཀྱིས་བརྒྱན་པར་བགྱིའོ། །
བདག་གི་སྟན་རབ་ཏུ་དམའ་བ་གདིང་བར་བགྱི་སྟེ། སྟན་དེ་ལ་མཆིས་ནས་རྒྱལ་པོའི་རྒྱགས་པས་དྲེགས་པར་མི་བགྱིའོ། །དེར་རྒྱལ་སྲིད་ཀྱི་དབང་ཕྱུག་ལ་ཆགས་པར་མི་བགྱིའོ། །རྒྱགས་པ་དང་ང་རྒྱལ་དང་དྲེགས་པ་ཐམས་ཅད་རྣམ་པར་སྤངས་པའི་སེམས་ཀྱིས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་མཉན་པར་བགྱིའོ། །དགེ་སློང་ཆོས་སྨྲ་བ་དེ་ལ་ཡང་སྟོན་པར་འདུ་ཤེས་བསྐྱེད་པར་བགྱིའོ། །མིའི་རྒྱལ་པོ་དེས་དེའི་ཚེ་དེའི་དུས་ན། བཙུན་མོ་དམ་པ་དང་། རྒྱལ་བུ་རྣམས་དང་། རྒྱལ་པོའི་བུ་མོ་རྣམས་དང་། བཙུན་མོའི་འཁོར་གྱི་ཚོགས་རྣམས་ལ་སྡུག་པ་དང་ཕན་པས་བལྟ་བར་བགྱིའོ། །བཙུན་མོ་དམ་པ་དང་། རྒྱལ་བུ་རྣམས་དང་། རྒྱལ་པོའི་བུ་མོ་རྣམས་ལ་ཚིག་སྙན་པ་སྨྲ་བར་བགྱིའོ། །བཙུན་མོའི་འཁོར་གྱི་ཚོགས་ཐམས་ཅད་ལ་ཡང་ཚིག་སྙན་པ་སྨྲ་བར་བགྱིའོ། །ཆོས་ཉན་པའི་མཆོད་པ་རྣམ་པ་སྣ་ཚོགས་སྦྱོར་དུ་སྩལ་བར་བགྱིའོ། ། དགའ་བ་བསམ་གྱིས་མི་ཁྱབ་ཅིང་མཚུངས་པ་མ་མཆིས་པས་བདག་ཚིམ་པར་བགྱིའོ། །དགའ་བ་དང་བདེ་བ་བསམ་གྱིས་མི་ཁྱབ་པས་བདེ་བར་བགྱིའོ། །དབང་པོ་བདེ་བར་བགྱིའོ། །བདག་ཉིད་དོན་ཆེན་པོ་ཐོབ་པར་བསམ་པར་བགྱིའོ། །བདག་དགའ་བ་ཆེན་པོས་དགའ་བར་བགྱིའོ། ། རབ་ཏུ་དགའ་བ་ཆེན་པོ་བསྐྱེད་ནས་ཆོས་སྨྲ་བ་བསུ་བར་བགྱིའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་དག་དེའི་ཚེ་དེའི་དུས་ན། མིའི་རྒྱལ་པོ་དེས་གོས་ཐམས་ཅད་དཀར་པོ་སར་པ་མཛེས་པ་བགོ་བར་བྱའོ། །སྤུད་པ་དང་རྒྱན་སྣ་ཚོགས་ཀྱིས་བདག་ལེགས་པར་བརྒྱན་པར་བྱའོ། །གདུགས་དཀར་པོ་ཡང་གཟུང་བར་བྱའོ། །རྒྱལ་པོའི་མཐུ་ཆེན་པོ་དང་རྒྱལ་པོའི་བཀོད་པ་ཆེན་པོས་བཀྲ་ཤིས་ཐ་དད་པ་སྣ་ཚོགས་ཐོགས་ཏེ། རྒྱལ་པོའི་ཕོ་བྲང་དེ་ནས་བྱུང་ལ་ཆོས་སྨྲ་བ་བསུ་བའི་ཕྱིར་དེར་འགྲོ་བར་བྱའོ། །དེ་ཅིའི་ཕྱིར་ཞེ་ན། མིའི་རྒྱལ་པོས་དེར་གོམ་པ་ཇི་སྙེད་བོར་བ་དེ་སྙེད་ཀྱི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གི་འཁོར་བ་ཕྱིར་བསྙིལ་བར་འགྱུར། དེ་སྙེད་ཀྱི་འཁོར་ལོས་སྒྱུར་པའི་རྒྱལ་རིགས་བྱེ་བ་ཁྲག་ཁྲིག་བརྒྱ་སྟོང་ཐོབ་པར་འགྱུར། དེར་གོམ་པ་ཇི་སྙེད་བོར་བ་དེ་སྙེད་དུ་ཚེ་འདི་
ལ་རྒྱལ་སྲིད་ཀྱི་དབང་ཕྱུག་ཆེན་པོ་བསམ་གྱིས་མི་ཁྱབ་པ་འཕེལ་བར་འགྱུར། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་གནས་ཡངས་ཤིང་རྒྱ་ཆེ་བ་ལྷའི་གཞལ་མེད་ཁང་རིན་པོ་ཆེ་སྣ་བདུན་ལས་བྱས་པ་དག་ཐོབ་པར་འགྱུར། མི་རྣམས་ཀྱི་རྒྱལ་རིགས་ལྷའི་རྒྱ་ཆེ་ཞིང་རྒྱ་ཆེ་བ་བརྒྱ་སྟོང་ཕྲག་དུ་མ་ཐོབ་པར་འགྱུར། སྐྱེ་བ་ཐམས་ཅད་དུ་དབང་ཕྱུག་ཆེན་པོ་ཐོབ་པར་འགྱུར། ཚེ་རིང་བར་འགྱུར། ཡུན་རིང་དུ་འཚོ་བར་འགྱུར། སྤོབས་པ་དང་ལྡན་པར་འགྱུར། ཚིག་གཟུང་བར་འོས་པར་འགྱུར། གྲགས་པ་དང་ལྡན་པར་འགྱུར། བརྗོད་པ་ཤིན་ཏུ་རྒྱ་ཆེ་བར་འགྱུར། བསྔགས་པར་འོས་པར་འགྱུར། ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ལ་ཕན་པར་འགྱུར། ལྷ་དང་མི་རྣམས་ཀྱི་བདེ་བ་རྒྱ་ཆེ་ཞིང་རྒྱ་ཆེ་བ་ཐོབ་པར་འགྱུར། སྟོབས་ཆེ་བར་འགྱུར། ཚན་པོ་ཆེ་ཆེན་པོའི་སྟོབས་ཀྱི་ཤུགས་དང་ལྡན་ཞིང་གཟུགས་བཟང་བར་འགྱུར། མཛེས་པ་དང་བལྟ་ན་སྡུག་པ་དང་། ཁ་དོག་བཟང་པོ་རྒྱས་པ་མཆོག་དང་ལྡན་པར་འགྱུར། སྐྱེ་བ་ཐམས་ཅད་དུ་དེ་བཞིན་གཤེགས་པ་དང་ཕྲད་པར་འགྱུར། དགེ་བའི་བཤེས་གཉེན་རྣམས་རྙེད་པར་འགྱུར། བསོད་ནམས་ཀྱི་ཕུང་པོ་དཔག་ཏུ་མེད་པ་ཡོངས་སུ་གཟུང་བར་འགྱུར་ཏེ། རྒྱལ་པོ་ཆེན་པོ་དག་ཡོན་ཏན་གྱི་ཕན་ཡོན་འདི་ལྟ་བུ་དག་མཐོང་ནས། མིའི་རྒྱལ་པོ་དེས་དཔག་ཚད་ཙམ་དུ་ཆོས་སྨྲ་བ་བསུ་བར་བྱ། དཔག་ཚད་བརྒྱ་དང་། དཔག་ཚད་སྟོང་དུ་ཡང་བསུ་བར་བྱ། ཆོས་སྨྲ་བ་དེ་ལ་སྟོན་པར་འདུ་ཤེས་བསྐྱེད་པར་བྱའོ། །འདི་སྙམ་དུ་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེང་བདག་གི་རྒྱལ་པོའི་ཕོ་བྲང་འདིར་འཇུག་པར་འགྱུར་རོ། །དེང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་བདག་གི་རྒྱལ་པོའི་ཕོ་བྲང་འདིར་བཤོས་གསོལ་བར་འགྱུར་རོ། །དེང་བདག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་ཆོས་འཇིག་རྟེན་ཐམས་ཅད་དང་མི་མཐུན་པ་མཉན་པར་བྱའོ། །དེང་བདག་གིས་ཆོས་ཉན་པ་འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་བྱའོ། །དེང་བདག་གིས་དེ་བཞིན་གཤེགས་
པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་མཉེས་པར་བྱས་པར་འགྱུར་རོ། །དེང་བདག་གིས་འདས་པ་དང་མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ལ་མཆོད་པ་ཆེན་པོ་བསམ་གྱིས་མི་ཁྱབ་པ་ཡངས་ཤིང་རྒྱ་ཆེ་བ་བྱས་པར་འགྱུར་རོ། །དེང་བདག་གིས་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་གྱི་སྡུག་བསྔལ་ཐམས་ཅད་ཤིན་ཏུ་རྒྱུན་བཅད་པར་འགྱུར་རོ། །དེང་བདག་གིས་ཚངས་པའི་དབང་པོའི་རྒྱལ་པོ་ཉིད་ཀྱི་ལུས་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་འཐོབ་པ་དེ་དག་གི་དགེ་བའི་རྩ་བའི་ས་བོན་བསྐྱེད་པར་འགྱུར་རོ། །དེང་བདག་གིས་བརྒྱ་བྱིན་ཉིད་ཀྱི་ལུས་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་ཐོབ་པ་དག་གི་དགེ་བའི་རྩ་བའི་ས་བོན་བསྐྱེད་པར་འགྱུར་རོ། །དེང་བདག་གིས་འཁོར་ལོས་སྒྱུར་བའི་རྒྱལ་པོ་ཉིད་ཀྱི་ལུས་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་འཐོབ་པ་དག་གི་དགེ་བའི་རྩ་བའི་ས་བོན་བསྐྱེད་པར་འགྱུར་རོ། །དེང་བདག་གིས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་འཁོར་བ་ལས་ཡོངས་སུ་ཐར་བར་བྱས་པར་འགྱུར་རོ། །དེང་བདག་གིས་བསོད་ནམས་ཀྱི་ཕུང་པོ་དཔག་ཏུ་མེད་པ་བླ་ན་མེད་པ་ཡངས་ཤིང་རྒྱ་ཆེ་བ་བསམ་གྱིས་མི་ཁྱབ་པ་ཡོངས་སུ་གཟུང་བར་འགྱུར། དེང་བདག་གིས་བཙུན་མོའི་འཁོར་གྱི་ཚོགས་ཐམས་ཅད་ལ་བསྲུང་བ་ཆེན་པོ་བྱས་པར་འགྱུར་རོ། །དེང་བདག་གིས་རྒྱལ་པོའི་ཕོ་བྲང་འདིར་ཞི་བ་དང་བདེ་ལེགས་སུ་འགྱུར་བ་བསམ་གྱིས་མི་ཁྱབ་པ་མཆོག་ཏུ་ཁྱད་པར་དུ་འཕགས་པ་བླ་ན་མེད་པ་བྱས་པར་འགྱུར་རོ། །དེང་བདག་གིས་ཡུལ་འདི་ཐམས་ཅད་ཀུན་ཏུ་བསྲུངས་པར་འགྱུར་རོ། །ཡོངས་སུ་བསྐྱངས་པ་དང་། གནོད་པ་མེད་པ་དང་། དགྲ་མེད་པ་དང་། ཕ་རོལ་གྱི་དམག་ཚོགས་ཐམས་ཅད་ཀྱིས་མི་རྫི་བ་དང་། ནད་འགོ་བ་མེད་པ་དང་། འཁྲུག་པ་མེད་པར་འགྱུར་རོ་སྙམ་དུ་སེམས་བསྐྱེད་པར་བྱའོ། །རྒྱལ་པོ་ཆེན་པོ་དག་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འཛིན་པ་དག་ལ་མིའི་རྒྱལ་པོ་དེ་དམ་པའི་ཆོས་ལ་གུས་པ་འདི་ལྟ་བུས་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པ་བྱེད་ཅིང་། རྒྱལ་པོ་ཆེན་པོ་ཁྱེད་བཞི་
དཔུང་དང་གཡོག་ཏུ་བཅས་པ་དང་། ལྷའི་ཚོགས་དེ་དག་དང་གནོད་སྦྱིན་བརྒྱ་སྟོང་དུ་མ་དག་ལ་ཤས་ཀྱི་དམ་པ་བྱིན་ན། མིའི་རྒྱལ་པོ་དེ་བསོད་ནམས་མངོན་པར་འདུ་བྱེད་པ་དང་། དགེ་བ་མངོན་པར་འདུ་བྱེད་པ་དང་། ཚེ་འདིའི་ལུས་ཀྱི་རྒྱལ་སྲིད་ཀྱི་དབང་ཕྱུག་ཆེན་པོ་བསམ་གྱིས་མི་ཁྱབ་པ་དེས་རྣམ་པར་འཕེལ་བར་འགྱུར་རོ། །ཚེ་འདི་ལ་རྒྱལ་པོའི་གཟི་བརྗིད་ཆེན་པོ་བསམ་གྱིས་མི་ཁྱབ་པ་དང་ལྡན་པར་འགྱུར་རོ། །དཔལ་དང་ཕུན་སུམ་ཚོགས་པ་དང་གཟི་བརྗིད་ཀྱིས་ཀྱང་བརྒྱན་པར་འགྱུར་རོ། །ཕྱིར་རྒོལ་བ་ཐམས་ཅད་དང་དགྲ་ཐམས་ཅད་ཆོས་དང་མཐུན་པས་ཤིན་ཏུ་ཚར་གཅོད་པར་འགྱུར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་རྒྱལ་པོ་ཆེན་པོ་བཞི་པོ་དེ་དག་གིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་གང་ལ་ལ་ཞིག་མིའི་རྒྱལ་པོར་གྱུར་ལ། དེ་ཆོས་ལ་གུས་པ་དེ་ལྟ་བུས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ཉན་ལ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་མདོ་སྡེའི་དབང་པོའི་རྒྱལ་པོ་འཛིན་པ་དེ་དག་ལ་ཡང་བསྟི་སྟང་བགྱིད། བླ་མར་བགྱིད། རིམ་གྲོར་བགྱིད། མཆོད་པ་བགྱིད་ཅིང་། རྒྱལ་པོ་ཆེན་པོ་བདག་ཅག་གི་སླད་དུ་རྒྱལ་པོའི་ཕོ་བྲང་དེ་ཤིན་ཏུ་དག་པར་ཕྱག་དར་བགྱིད། སྤོས་ཆབ་སྣ་ཚོགས་ཀྱིས་ཆག་ཆག་ལེགས་པར་འདེབས་ལ། བདག་ཅག་རྒྱལ་པོ་ཆེན་པོ་བཞི་དང་ལྷན་ཅིག་ཐུན་མོང་དུ་ཆོས་ཉན་པ་དེ་ཉན་ཅིང་བདག་དང་ལྷ་ཐམས་ཅད་ཀྱི་སླད་དུ་དགེ་བའི་རྩ་བར་ཤས་ཅུང་ཟད་ཅིག་སྦྱིན་པ་བགྱིད་ན། བཙུན་པ་བཅོམ་ལྡན་འདས་དགེ་སློང་ཆོས་སྨྲ་བ་དེ་ཆོས་ཀྱི་སྟན་ལ་མཆིས་མ་ཐག་ཏུ་མིའི་རྒྱལ་པོ་དེས་བདག་ཅག་རྒྱལ་པོ་ཆེན་པོ་བཞིའི་དོན་གྱི་སླད་དུ་སྤོས་སྣ་ཚོགས་ཀྱིས་བདུག་པར་བགྱིའོ། །བཙུན་པ་བཅོམ་ལྡན་འདས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་དེ་ལ་མཆོད་པའི་སླད་དུ་བདུག་པས་བདུགས་མ་ཐག་ཏུ་སྤོས་སྣ་ཚོགས་རྣམས་ལས་སྤོས་དང་བདུག་པ་སྣ་ཚོགས་ཀྱི་འཁྲི་ཤིང་དག་འབྱུང་བར་འགྱུར་ཏེ། དེ་དག་སྐད་ཅིག་ཐང་ཅིག་ཡུད་ཙམ་དེ་ལ་བདག་ཅག་རྒྱལ་པོ་ཆེན་པོ་བདག་ཅག་བཞིའི་རང་རང་གི་ཁང་པའི་སྟེང་གི་བར་སྣང་ལ་སྤོས་དང་བདུག་པ་སྣ་ཚོགས་ཀྱི་འཁྲི་ཤིང་དག་གི་གདུགས་རྣམས་
སུ་གནས་པར་འགྱུར། སྤོས་དྲི་རྒྱ་ཆེན་པོ་ཡང་མནམ་པར་འགྱུར། གསེར་གྱི་ཁ་དོག་ལྟ་བུའི་སྣང་བ་འབྱུང་བར་འགྱུར་ཞིང་སྣང་བ་དེས་བདག་ཅག་གི་ཁང་པ་རྣམས་ཀྱང་སྣང་བ་བགྱིས་པར་འགྱུར་རོ། །བཙུན་པ་བཅོམ་ལྡན་འདས་སྤོས་དང་བདུག་པ་སྣ་ཚོགས་ཀྱི་འཁྲི་ཤིང་དག་སྐད་ཅིག་ཐང་ཅིག་ཡུད་ཙམ་དེ་ལ་མི་མཇེད་ཀྱི་བདག་པོ་ཚངས་པ་དང་ལྷ་རྣམས་ཀྱི་དབང་པོ་བརྒྱ་བྱིན་དང་། ལྷ་མོ་ཆེན་མོ་དབྱངས་ཅན་དང་། ལྷ་མོ་ཆེན་མོ་བརྟན་མ་དང་། གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་དང་། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང་། ལྷའི་བུ་དབང་ཕྱུག་ཆེན་པོ་དང་། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དང་། གནོད་སྦྱིན་གྱི་སྡེ་དཔོན་ཆེན་པོ་ནོར་བུ་བཟང་དང་། འཕྲོག་མའི་བུ་ལྔ་བརྒྱའི་འཁོར་དང་ལྡན་པ་དང་། ཀླུའི་རྒྱལ་པོ་ཆེན་པོ་མ་དྲོས་པ་དང་། ཀླུའི་རྒྱལ་པོ་ཆེན་པོ་རྒྱ་མཚོ་དང་། དེ་དག་གི་རང་རང་གི་ཁང་པའི་སྟེང་གི་བར་སྣང་ལ་བྱུང་སྟེ། སྤོས་དང་བདུག་པ་སྣ་ཚོགས་ཀྱི་འཁྲི་ཤིང་གི་གདུགས་རྣམས་སུ་གནས་པར་འགྱུར། སྤོས་དྲི་སྣ་ཚོགས་རྒྱ་ཆེན་པོ་ཡང་མནམ་པར་འགྱུར། ཁང་པ་རྣམས་ཀྱི་ནང་དུ་གསེར་དུ་སྣང་བ་འབྱུང་བར་འགྱུར་ཞིང་སྣང་བ་དེས་གནས་ཐམས་ཅད་སྣང་བ་བགྱིས་པར་འགྱུར་རོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་དག་རྒྱལ་པོ་ཆེན་པོ་ཁྱེད་བཞིའི་རང་རང་གི་ཁང་པ་རྣམས་ཀྱི་སྟེང་གི་བར་སྣང་ལ་སྤོས་དང་བདུག་པ་སྣ་ཚོགས་ཀྱི་འཁྲི་ཤིང་དེ་དག་གདུགས་རྣམས་སུ་གནས་པར་མ་ཟད་དོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་དག་མིའི་རྒྱལ་པོ་དེས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལ་མཆོད་པའི་ཕྱིར། སྤོས་སྣ་ཚོགས་དེ་དག་གིས་བདུགས་མ་ཐག་ཏུ་ལག་ན་སྤོས་སྣོད་གཅིག་ཐོགས་པ་དེ་ལས་སྤོས་དང་བདུག་པ་སྣ་ཚོགས་ཀྱི་འཁྲི་ཤིང་རྣམས་འབྱུང་བར་འགྱུར་ཏེ། དེ་སྐད་ཅིག་ཐང་ཅིག་ཡུད་ཙམ་དེ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་ན་གང་ན་ཟླ་བ་བྱེ་བ་ཕྲག་བརྒྱ་དང་། ཉི་མ་བྱེ་བ་ཕྲག་བརྒྱ་དང་། རྒྱ་མཚོ་ཆེན་པོ་བྱེ་བ་ཕྲག་བརྒྱ་དང་། རིའི་རྒྱལ་པོ་རི་རབ་བྱེ་བ་ཕྲག་བརྒྱ་དང་། རིའི་རྒྱལ་པོ་
ཁོར་ཡུག་དང་། ཁོར་ཡུག་ཆེན་པོ་བྱེ་བ་ཕྲག་བརྒྱ་དང་། གླིང་བཞི་པ་ཆེན་པོའི་འཇིག་རྟེན་གྱི་ཁམས་བྱེ་བ་ཕྲག་བརྒྱ་དང་། རྒྱལ་ཆེན་བཞིའི་རིས་ཀྱི་ལྷ་བྱེ་བ་ཕྲག་བརྒྱ་དང་། སུམ་ཅུ་རྩ་གསུམ་གྱི་ལྷ་བྱེ་བ་ཕྲག་བརྒྱ་ནས་འདུ་ཤེས་མེད་འདུ་ཤེས་མེད་མིན་དུ་ཉེ་བར་སོང་བའི་བར་གྱི་ལྷ་བྱེ་བ་ཕྲག་བརྒྱ་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་དག་ཐམས་ཅད་དུ་སུམ་ཅུ་རྩ་གསུམ་གྱི་ལྷའི་རིས་བྱེ་བ་ཕྲག་བརྒྱ་པོ་ཐམས་ཅད་ན་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོའི་ཚོགས་རྣམས་ཀྱི་རང་རང་གི་ཁང་པ་དག་གི་སྟེང་གི་བར་སྣང་ལ་སྤོས་དང་བདུག་པ་སྣ་ཚོགས་ཀྱི་འཁྲི་ཤིང་དེ་དག་གདུགས་རྣམས་སུ་གནས་པར་འགྱུར། སྤོས་དྲི་རྒྱ་ཆེན་པོ་ཡང་མནམ་པར་འགྱུར། ལྷའི་ཁང་པ་རྣམས་སུ་གསེར་གྱི་ཁ་དོག་ལྟ་བུའི་སྣང་བ་ཡང་འབྱུང་བར་འགྱུར་ཞིང་སྣང་བ་དེས་ཀྱང་ལྷའི་ཁང་པ་རྣམས་སྣང་བ་བྱས་པར་འགྱུར་རོ། །རྒྱལ་པོ་ཆེན་པོ་དག་འདི་ལྟར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ལྷའི་ཁང་པ་ཐམས་ཅད་ཀྱི་སྟེང་གི་བར་སྣང་ལ་སྤོས་དང་བདུག་པའི་འཁྲི་ཤིང་དེ་དག་གདུགས་རྣམས་སུ་གནས་པ་དེ་བཞིན་དུ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལ་མཆོད་པའི་ཕྱིར་མིའི་རྒྱལ་པོ་དེས་སྤོས་སྣ་ཚོགས་དེ་དག་གིས་བདུགས་མ་ཐག་ཏུ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདིའི་གཟི་བརྗིད་ཀྱི་མཐུས་སྤོས་དང་བདུག་པ་སྣ་ཚོགས་ཀྱི་འཁྲི་ཤིང་དག་འབྱུང་བར་འགྱུར་ཏེ། དེ་དག་སྐད་ཅིག་ཐང་ཅིག་ཡུད་ཙམ་དེ་ལ་ཀུན་ཏུ་ཕྱོགས་བཅུའི་འཇིག་རྟེན་གྱི་ཁམས་དུ་མ་གང་གཱའི་ཀླུང་གི་བྱེ་མ་སྙེད་དག་གི་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་ཕྲག་སྟོང་རྣམས་སུ་དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་གང་གཱའི་ཀླུང་གི་བྱེ་མ་སྙེད་དག་གི་སྟེང་གི་བར་སྣང་ལ་སྤོས་དང་བདུག་པ་སྣ་ཚོགས་ཀྱི་འཁྲི་ཤིང་གི་གདུགས་རྣམས་སུ་གནས་པར་འགྱུར། དེ་དག་ཀྱང་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་ལ་སྤོས་དང་བདུག་པ་སྣ་ཚོགས་རྒྱ་ཆེ་ཞིང་རྒྱ་ཆེ་བ་མནམ་པར་འགྱུར། གསེར་གྱི་ཁ་དོག་ལྟ་བུའི་སྣང་བ་འབྱུང་བར་འགྱུར་ཞིང་སྣང་བ་དེས་ཀྱང་སངས་རྒྱས་ཀྱི་ཞིང་བྱེ་བ་ཁྲག་ཁྲིག་སྟོང་ཕྲག་
དུ་མ་གང་གཱའི་ཀླུང་གི་བྱེ་མ་སྙེད་དག་སྣང་བ་བྱས་པར་འགྱུར་རོ། །རྒྱལ་པོ་ཆེན་པོ་དག་ཆོ་འཕྲུལ་དེ་ལྟ་བུ་དེ་དག་བྱུང་མ་ཐག་ཏུ་དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་གང་གཱའི་ཀླུང་གི་བྱེ་མ་སྙེད་དག་ཆོས་སྨྲ་བ་དེ་ལ་དགོངས་པར་འགྱུར། སྐྱེས་བུ་དམ་པ་ལེགས་སོ་ལེགས་སོ། །སྐྱེས་བུ་དམ་པ་ཁྱོད་གསེར་འོད་དམ་པ་མདོ་སྡེའི་དབང་པོའི་རྒྱལ་པོའི་ཚུལ་འདི་ལྟ་བུ། ཟབ་མོར་སྣང་བ་འདི་ལྟ་བུའི་ཡོན་ཏན་བསམ་གྱིས་མི་ཁྱབ་པ་དང་ལྡན་པ་དང་འདི་ལྟ་བུ་འདི་རྒྱ་ཆེར་ཡང་དག་པར་རབ་ཏུ་འཆད་པར་འདོད་པ་ཁྱོད་ཡང་ལེགས་སོ་ལེགས་སོ་ཞེས་བྱ་བ་སྦྱིན་པར་འགྱུར་རོ། །སུ་ཐ་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་པའི་སེམས་ཅན་དེ་དག་ཀྱང་དགེ་བའི་རྩ་བ་ངན་ངོན་དང་ལྡན་པར་མི་འགྱུར་ན། གང་དག་འཛིན་པ་དང་། འཆང་བ་དང་། འཆད་པ་དང་། ཀློག་པ་དང་། ཀུན་ཆུབ་པར་བྱེད་པ་དང་། འཁོར་ལ་རྒྱ་ཆེར་ཡང་དག་པར་རབ་ཏུ་སྟོན་པ་ལྟ་སྨོས་ཀྱང་ཅི་དགོས། དེ་ཅིའི་ཕྱིར་ཞེ་ན། སྐྱེས་བུ་དམ་པ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཐོས་མ་ཐག་ཏུ་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བའི་ཕྱིར་རོ།། །།འཕགས་པ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ཞེས་བྱ་བ་ཐེག་པ་ཆེན་པོའི་མདོ།བམ་པོ་གསུམ་པ། དེ་ནས་ཕྱོགས་བཅུ་ཀུན་ཏུ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་གང་གཱའི་ཀླུང་གི་བྱེ་མ་སྙེད་དག་ན། དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་རང་རང་གི་སངས་རྒྱས་ཀྱི་ཞིང་ན་བཞུགས་པ་དག་གིས་དེའི་ཚེ་དེའི་དུས་ན། ཚིག་གཅིག་དང་ངག་གཅིག་དང་སྒྲ་སྐད་གཅིག་གིས་དགེ་སློང་ཆོས་སྨྲ་བ་ཆོས་ཀྱི་སྟན་ལ་འདུག་པ་དེ་ལ་འདི་སྐད་ཅེས་བཀའ་སྩལ་ཏོ། །སྐྱེས་བུ་དམ་པ་ཁྱོད་མ་འོངས་པའི་དུས་ན་བྱང་ཆུབ་ཀྱི་སྙིང་པོར་འགྲོ་བར་འགྱུར། སྐྱེས་བུ་དམ་པ་ཁྱོད་བྱང་ཆུབ་ཀྱི་སྙིང་པོ་མཆོག་དམ་པར་སོང་སྟེ། ཤིང་གི་རྒྱལ་པོའི་དྲུང་དུ་འདུག་ནས་འཇིག་རྟེན་གསུམ་པོ་ཐམས་ཅད་ལས་ཁྱད་པར་དུ་འཕགས་པ། སེམས་ཅན་ཐམས་ཅད་ལས་རབ་ཏུ་འདས་པའི་བརྟུལ་ཞུགས་དང་
དཀའ་ཐུབ་སྤྱོད་པའི་སྟོབས་བསྐྱེད་པའི་བྱིན་གྱིས་བརླབས་དཀའ་བ་སྤྱོད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དག་སྟོན་པར་འགྱུར། སྐྱེས་བུ་དམ་པ་ཁྱོད་བྱང་ཆུབ་ཀྱི་སྙིང་པོ་ལེགས་པར་བརྒྱན་པར་བྱེད་པར་འགྱུར། སྐྱེས་བུ་དམ་པ་ཁྱོད་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཡོངས་སུ་སྐྱོབ་པར་འགྱུར། སྐྱེས་བུ་དམ་པ་ཁྱོད་ཤིང་གི་རྒྱལ་པོའི་དྲུང་དུ་འདུག་སྟེ་བདུད་ཀྱི་སྡེ་བསམ་གྱིས་མི་ཁྱབ་པ། གཟུགས་རབ་ཏུ་འཇིགས་འཇིགས་ལྟར་འདུག་པ་མི་སྡུག་པ་སྟོན་པ། གཟུགས་མི་སྡུག་པ་སྣ་ཚོགས་དག་ལས་རྒྱལ་བར་འགྱུར། སྐྱེས་བུ་དམ་པ་ཁྱོད་བྱང་ཆུབ་ཀྱི་སྙིང་པོ་མཆོག་དམ་པར་སོང་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་དཔེ་མེད་པ་རབ་ཏུ་ཞི་བ་རྡུལ་དང་བྲལ་བ་ཟབ་མོ་མངོན་པར་རྫོགས་པར་འཚང་རྒྱ་བར་འགྱུར། སྐྱེས་བུ་དམ་པ་ཁྱོད་རྡོ་རྗེའི་གདན་སྙིང་པོ་བརྟན་པ་ལ་འདུག་སྟེ། ཆོས་ཀྱི་འཁོར་ལོས་སྒྱུར་བ་ཐམས་ཅད་ཀྱིས་མངོན་པར་བསྟོད་པ། མཆོག་ཏུ་ཟབ་པ་བླ་ན་མེད་པ་རྣམ་པ་བཅུ་གཉིས་རབ་ཏུ་བསྐོར་བར་འགྱུར། སྐྱེས་བུ་དམ་པ་ཁྱོད་ཆོས་ཀྱི་རྔ་ཆེན་པོ་བླ་ན་མེད་པ་རྡུང་བར་འགྱུར། སྐྱེས་བུ་དམ་པ་ཁྱོད་ཆོས་ཀྱི་དུང་བླ་ན་མེད་པ་འབུད་པར་འགྱུར། སྐྱེས་བུ་དམ་པ་ཁྱོད་ཆོས་ཀྱི་རྒྱལ་མཚན་ཆེན་པོ་བསྒྲེང་བར་འགྱུར། སྐྱེས་བུ་དམ་པ་ཁྱོད་ཆོས་ཀྱི་སྒྲོན་མ་བླ་ན་མེད་པ་འབར་བར་བྱེད་པར་འགྱུར། སྐྱེས་བུ་དམ་པ་ཁྱོད་ཆོས་ཀྱི་ཆར་བླ་ན་མེད་པ་འབེབས་པར་འགྱུར། སྐྱེས་བུ་དམ་པ་ཁྱོད་ཉོན་མོངས་པའི་དགྲ་སྟོང་ཕྲག་དུ་མ་ལས་རྒྱལ་བར་འགྱུར། སྐྱེས་བུ་དམ་པ་ཁྱོད་སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་ཤིན་ཏུ་འཇིགས་སུ་རུང་བ་འཇིགས་པ་ཆེན་པོའི་རྒྱ་མཚོ་ལས་སྒྲོལ་བར་འགྱུར། སྐྱེས་བུ་དམ་པ་ཁྱོད་སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དག་འཁོར་བའི་འཁོར་ལོ་ལས་ཡོངས་སུ་ཐར་བར་བྱེད་པར་འགྱུར། སྐྱེས་བུ་དམ་པ་ཁྱོད་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དག་མཉེས་པར་བྱེད་པར་འགྱུར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་རྒྱལ་པོ་ཆེན་པོ་བཞི་པོ་དེ་དག་གིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་མིའི་རྒྱལ་པོ་གསེར་འོད་དམ་པ་མདོ་སྡེའི་དབང་པོའི་རྒྱལ་
པོའི་ཡོན་ཏན་ཚེ་འདི་དང་མ་འོངས་པ་ན་འབྱུང་བ་འདི་ལྟ་བུ་འདི་དག་མཐོང་བ་སངས་རྒྱས་སྟོང་ཕྲག་བརྒྱ་ལ་དགེ་བའི་རྩ་བ་བསྐྱེད་པ། བསོད་ནམས་ཀྱི་ཕུང་པོ་དཔག་ཏུ་མ་མཆིས་པ་ཡོངས་སུ་འཛིན་པར་མཐོང་ནས་སྙིང་བརྩེ་བའི་སླད་དུ། བཙུན་པ་བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞི་དཔུང་དང་གཡོག་ཏུ་བཅས་པ་དང་། གནོད་སྦྱིན་བརྒྱ་སྟོང་ཕྲག་དུ་མ་རང་རང་གི་ཁང་པ་ན་མཆིས་པ་དག་སྤོས་དང་བདུག་པ་སྣ་ཚོགས་ཀྱི་འཁྲི་ཤིང་དག་གི་གདུགས་ཀྱིས་བསྐུལ་མ་ཐག་ཏུ་ལུས་མི་གདའ་བར་བགྱིས་ཏེ། མིའི་རྒྱལ་པོ་དེ་ཁང་པ་བརྩེགས་པ་ཕྱག་དར་མ་མཆིས་པ་ལེགས་པར་ཕྱག་དར་བགྱིས་པ། སྤོས་ཆབ་སྣ་ཚོགས་ཀྱིས་ཆག་ཆག་ལེགས་པར་བཏབ་པ། རྒྱན་སྣ་ཚོགས་ཀྱིས་ལེགས་པར་བརྒྱན་པའི་རྒྱལ་པོའི་ཕོ་བྲང་ག་ལ་བ་དེར་ཆོས་མཉན་པའི་སླད་དུ་མཆི་བར་བགྱིའོ། །མི་མཇེད་ཀྱི་བདག་པོ་ཚངས་པ་དང་ལྷ་རྣམས་ཀྱི་དབང་པོ་བརྒྱ་བྱིན་དང་། ལྷ་མོ་ཆེན་མོ་དབྱངས་ཅན་དང་། ལྷ་མོ་ཆེན་མོ་དཔལ་དང་། སའི་ལྷ་མོ་བརྟན་མ་དང་། གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་དང་། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང་། ལྷའི་བུ་དབང་ཕྱུག་ཆེན་པོ་དང་། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དང་། གནོད་སྦྱིན་གྱི་སྡེ་དཔོན་ཆེན་པོ་ནོར་བུ་བཟང་དང་། འཕྲོག་མའི་བུ་ལྔ་བརྒྱའི་འཁོར་ཅན་དང་། ཀླུའི་རྒྱལ་པོ་མ་དྲོས་པ་དང་། ཀླུའི་རྒྱལ་པོ་རྒྱ་མཚོ་དང་། ལྷ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དག་ལུས་མི་གདའ་བར་བགྱིས་ཏེ། མིའི་རྒྱལ་པོ་དེའི་ཕོ་བྲང་རྒྱན་སྣ་ཚོགས་ཀྱིས་བརྒྱན་པ་ག་ལ་བ་དང་། ཆོས་སྨྲ་བ་དེའི་ཆོས་ཀྱི་ཁྲི་མཐོན་པོ་རྒྱན་སྣ་ཚོགས་ཀྱིས་ལེགས་པར་བརྒྱན་པ། མེ་ཏོག་བཀྲམ་པའི་ས་ལ་བཤམས་པར་འགྱུར་བ་ག་ལ་བ་དེར་ཆོས་མཉན་པའི་སླད་དུ་མཆི་བར་བགྱིའོ། །བཙུན་པ་བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞི་དཔུང་དང་གཡོག་ཏུ་བཅས་པ། གནོད་སྦྱིན་བརྒྱ་སྟོང་ཕྲག་དུ་མ་དེ་དག་ཐམས་ཅད་མཐུན་པར་བགྱིས་ཏེ་མིའི་རྒྱལ་པོ་དགེ་བའི་གྲོགས་བགྱིད་པ། དགེ་བ་འཐོབ་པར་བགྱིད་པ། བླ་ན་མེད་པ་ཆོས་ཀྱི་སྦྱིན་པ་ཆེན་པོ་སྦྱིན་པ་དེ་ལ། ཆོས་ཀྱི་བདུད་རྩིའི་ཁུ་བ་འདིས་ཚིམ་པར་གྱུར་མ་ཐག་ཏུ། མིའི་རྒྱལ་པོ་དེ་
ལ་ཀུན་ཏུ་བསྲུང་བར་བགྱིའོ། །ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཞི་བ་དང་བདེ་ལེགས་སུ་འགྱུར་བར་བགྱིའོ། །རྒྱལ་པོའི་ཕོ་བྲང་དེ་དང་གྲོང་ཁྱེར་དེ་དང་ཡུལ་དེ་ཡང་ཀུན་ཏུ་བསྲུང་བར་བགྱིའོ། །ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཞི་བ་དང་བདེ་ལེགས་སུ་འགྱུར་བར་བགྱིའོ། །ཆད་པ་སྤང་བར་ཡང་བགྱིའོ། །ཡུལ་དེ་ཡང་འཇིགས་པ་དང་གནོད་པ་དང་ནད་འགོ་བ་དང་འཁྲུག་པ་ཐམས་ཅད་ལས་ཡོངས་སུ་ཐར་བར་བགྱིའོ། །བཙུན་པ་བཅོམ་ལྡན་འདས་གང་ལ་ལ་ཞིག་མིའི་རྒྱལ་པོར་གྱུར་ཏེ། མིའི་རྒྱལ་པོ་དེའི་ཡུལ་དུ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་བྱུང་ལ། བཙུན་པ་བཅོམ་ལྡན་འདས་མིའི་རྒྱལ་པོ་དེ་དགེ་སློང་དང་དགེ་སློང་མའམ་དགེ་བསྙེན་ནམ་དགེ་བསྙེན་མ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་འཛིན་པ་དག་ལ་བསྟི་སྟང་མི་བགྱིད། བླ་མར་མི་བགྱིད། རིམ་གྲོ་མི་བགྱིད། མཆོད་པ་མི་བགྱིད་ན། བདག་ཅག་རྒྱལ་པོ་ཆེན་པོ་བཞི་དང་། གནོད་སྦྱིན་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་ཆོས་ཉན་པ་འདི་དང་ཆོས་བདུད་རྩིའི་ཁུ་བ་འདིས་ཚིམ་པར་མི་བགྱིད། རིམ་གྲོ་མི་བགྱིད། ལྷའི་ལུས་འདི་དག་གི་གཟི་ཡང་རྣམ་པར་འཕེལ་བར་མི་བགྱིད། བདག་ཅག་གི་བརྩོན་འགྲུས་དང་མཐུ་དང་སྟོབས་ཀྱང་མི་བསྐྱེད། བདག་ཅག་གི་ལུས་ལ་གཟི་བརྗིད་དང་དཔལ་དང་ཕུན་སུམ་ཚོགས་པ་ཡང་རྣམ་པར་འཕེལ་བར་མི་བགྱིད་དོ། །བཙུན་པ་བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞི་དཔུང་དང་གཡོག་ཏུ་བཅས་པ་དང་། གནོད་སྦྱིན་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དག་གིས་ཡུལ་དེ་ཡལ་བར་དོར་བར་བགྱིའོ། །བཙུན་པ་བཅོམ་ལྡན་འདས་བདག་ཅག་གིས་ཡུལ་དེ་ཡལ་བར་བོར་ན་ཡུལ་ན་གནས་པའི་ལྷའི་ཚོགས་ཐམས་ཅད་ཀྱིས་ཀྱང་ཡུལ་དེ་ཡལ་བར་འདོར་བར་འགྱུར་རོ། །བཙུན་པ་བཅོམ་ལྡན་འདས་ལྷ་རྣམས་ཀྱིས་ཡུལ་དེ་ཡལ་བར་བོར་ན་ཡུལ་དེར་ཡུལ་རྣམ་པར་འཁྲུག་པ་སྣ་ཚོགས་འབྱུང་བར་འགྱུར། རྒྱལ་པོའི་འཁྲུག་པ་མི་བཟད་པ་དག་འབྱུང་བར་འགྱུར། ཡུལ་ན་གནས་པའི་
སེམས་ཅན་ཐམས་ཅད་ཀྱང་འཐབ་པ་སྐྱེ་བ་དང་མཚང་འདྲུ་བ་སྐྱེ་བ་དང་རྩོད་པ་སྐྱེ་བར་འགྱུར། རྫོགས་པ་དང་འགྱེད་པར་འགྱུར་བ་དང་གཟའ་དང་ནད་རྣམ་པ་སྣ་ཚོགས་ཡུལ་དུ་འབྱུང་བར་འགྱུར། ཕྱོགས་ཐ་དད་པ་ནས་སྐར་མདའ་ལྟུང་བར་འགྱུར། གཟའ་དང་རྒྱུ་སྐར་རྣམས་ཀྱང་ཕན་ཚུན་མི་མཐུན་པར་གདའ་བར་འགྱུར། དགུང་ཟླ་འཆར་བ་དེའང་ཉི་མ་ལྟ་བུར་གདའ་བར་འགྱུར། ཟླ་བའི་གཟའ་དང་ཉི་མའི་གཟའ་འབྱུང་བར་འགྱུར། ཉི་མ་དང་ཟླ་བ་ནམ་མཁའ་ལ་གནས་པ་ཡང་རྟག་པར་རྒྱུན་དུ་སྒྲ་གཅན་གྱི་གནོད་པ་དང་ལྡན་པར་འགྱུར། དུས་དུས་སུ་ནམ་མཁའ་ལ་འཇའི་ཁ་དོག་ལྟ་བུ་འཁྱིལ་བར་འགྱུར། ས་ཡང་གཡོ་བར་འགྱུར། ས་ལ་གནས་པའི་ཁྲོན་པ་ཡང་སྒྲ་འབྱིན་པར་གྲག་པར་འགྱུར། ཡུལ་དུ་རླུང་དྲག་པོ་ལྡང་བར་འགྱུར། ཆར་དྲག་པོ་འབབ་པར་འགྱུར། ཡུལ་དུ་མུ་གེའི་དགོན་པ་འབྱུང་བར་འགྱུར། ཕ་རོལ་གྱི་དམག་ཚོགས་ཀྱིས་ཡུལ་འཇོམས་པར་འགྱུར། ཡུལ་དེ་ཕུང་བར་འགྱུར། སེམས་ཅན་དེ་དག་ཀྱང་ཉོན་མོངས་པ་མང་བར་འགྱུར། ཡུལ་དེ་ཉམས་མི་དགའ་བར་འགྱུར་རོ། །བཙུན་པ་བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞི་དཔུང་དང་གཡོག་ཏུ་བཅས་པ་དང་། གནོད་སྦྱིན་བརྒྱ་སྟོང་ཕྲག་དུ་མ་དང་ཡུལ་ན་གནས་པའི་ལྷ་དང་ཀླུ་རྣམས་ཀྱིས་ཡུལ་དེ་ཡལ་བར་བོར་ན། ཡུལ་དེར་འདི་ལྟ་བུའི་གནོད་པ་རྣམ་པ་སྣ་ཚོགས་བརྒྱ་དང་གནོད་པ་སྣ་ཚོགས་སྟོང་འབྱུང་བར་འགྱུར་རོ། །བཙུན་པ་བཅོམ་ལྡན་འདས་གང་ལ་ལ་ཞིག་མིའི་རྒྱལ་པོར་གྱུར་ལ། དེ་བདག་ཉིད་ལ་ཀུན་ཏུ་བསྲུང་བ་ཆེན་པོ་བགྱིད་འཚལ་བར་འགྱུར། རྒྱལ་པོའི་བདེ་བ་སྣ་ཚོགས་ཡུན་རིང་པོར་མྱོང་བར་འཚལ་བར་འགྱུར། བདེ་བ་ཐམས་ཅད་བསྟབས་པའི་སེམས་ཀྱིས་རྒྱལ་པོ་ཉིད་བགྱིད་འཚལ་བར་འགྱུར། ཡུལ་ན་གནས་པའི་སེམས་ཅན་ཐམས་ཅད་བདེ་བར་བགྱིད་འཚལ་བར་འགྱུར། ཕ་རོལ་གྱི་དམག་ཚོགས་ཐམས་ཅད་ཕམ་པར་བགྱིད་འཚལ་བར་འགྱུར། ཡུལ་ཐམས་ཅད་ཡུན་རིང་དུ་ཡོངས་སུ་སྐྱོང་འཚལ་བར་འགྱུར། ཆོས་ཀྱི་རྒྱལ་པོ་ཉིད་བགྱིད་འཚལ་བར་འགྱུར། རང་གི་ཡུལ་ཡང་འཇིགས་པ་དང་གནོད་པ་དང་ནད་འགོ་བ་དང་འཁྲུག་པ་
ཐམས་ཅད་ལས་ཡོངས་སུ་ཐར་བར་བགྱིད་འཚལ་བར་འགྱུར་ན། བཙུན་པ་བཅོམ་ལྡན་འདས་མིའི་རྒྱལ་པོ་དེས་གདོན་མི་འཚལ་བར་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་མཉན་པར་བགྱི། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་མདོ་སྡེའི་དབང་པོའི་རྒྱལ་པོ་འཛིན་པ་དེ་དག་ལ་ཡང་བསྟི་སྟང་བགྱི། བླ་མར་བགྱི། རིམ་གྲོ་བགྱི། མཆོད་པ་བགྱི། བདག་ཅག་རྒྱལ་པོ་ཆེན་པོ་བཞི་དཔུང་དང་གཡོག་ཏུ་བཅས་པ་རྣམས་ཀྱང་ཆོས་མཉན་པའི་དགེ་བའི་རྩ་བ་བསགས་པ་འདི་དང་ཆོས་བདུད་རྩིའི་ཁུ་བ་འདིས་ཚིམ་པར་བགྱི། བདག་ཅག་གི་ལྷའི་ལུས་འདི་དག་གི་གཟི་ཆེན་པོ་ཡང་རྣམ་པར་འཕེལ་བར་བགྱིའོ། །དེ་ཅིའི་ཕྱིར་ཞེ་ན། བཙུན་པ་བཅོམ་ལྡན་འདས་མིའི་རྒྱལ་པོ་དེས་གདོན་མི་འཚལ་བར་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་མཉན་པར་བགྱི་སྟེ། བཙུན་པ་བཅོམ་ལྡན་འདས་ཚངས་པའི་དབང་པོས་འཇིག་རྟེན་པ་དང་འཇིག་རྟེན་ལས་འདས་པའི་བསྟན་བཅོས་རྣམ་པ་སྣ་ཚོགས་ཇི་སྙེད་བསྟན་པ་དག་དང་། ལྷའི་དབང་པོ་བརྒྱ་བྱིན་གྱིས་བསྟན་བཅོས་རྣམ་པ་སྣ་ཚོགས་ཇི་སྙེད་བསྟན་པ་དག་དང་། དྲང་སྲོང་མངོན་པར་ཤེས་པ་ལྔ་ཅན་རྣམ་པ་སྣ་ཚོགས་དག་གིས་སེམས་ཅན་དག་གི་དོན་གྱི་སླད་དུ་འཇིག་རྟེན་པ་དང་འཇིག་རྟེན་ལས་འདས་པའི་བསྟན་བཅོས་རྣམ་པ་སྣ་ཚོགས་ཇི་སྙེད་བསྟན་པ་དག་ལས་ཆེས་མཆོག་ཆེས་ཁྱད་པར་དུ་འཕགས་པ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ནི། བཙུན་པ་བཅོམ་ལྡན་འདས་ཚངས་པའི་དབང་པོ་བརྒྱ་ཕྲག་སྟོང་དེ་དག་དང་བརྒྱ་བྱིན་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དང་དྲང་སྲོང་མངོན་པར་ཤེས་པ་ལྔ་ཅན་བྱེ་བ་ཁྲག་ཁྲིག་བརྒྱ་ཕྲག་སྟོང་ཐམས་ཅད་པས་ཆེས་མཆོག་ཆེས་ཁྱད་པར་དུ་འཕགས་པའི་དེ་བཞིན་གཤེགས་པས་སེམས་ཅན་རྣམས་ཀྱི་དོན་གྱི་སླད་དུ་རྒྱ་ཆེར་ཡང་དག་པར་བཤད་པ་ལགས་སོ། །ཇི་ལྟར་ན་འཛམ་བུའི་གླིང་ཐམས་ཅད་ན་གནས་པའི་མི་རྣམས་ཀྱི་རྒྱལ་པོས་རྒྱལ་པོ་ཉིད་བགྱི་བ་དང་། ཇི་ལྟར་སེམས་ཅན་ཐམས་ཅད་བདེ་བར་འགྱུར་བ་དང་། ཇི་ལྟར་རང་གི་ཡུལ་ཀུན་ཏུ་བསྲུངས་པར་འགྱུར་བ་དང་། ཡོངས་སུ་བསྐྱངས་པར་འགྱུར་བ་དང་།
ཇི་ལྟར་ཡུལ་ཐམས་ཅད་ན་གནོད་པ་དང་དགྲ་མ་མཆིས་པར་འགྱུར་བ་དང་། ཇི་ལྟར་ཕ་རོལ་གྱི་དམག་ཚོགས་རྣམས་ཕམ་སྟེ་ཕྱིར་ཕྱོགས་པར་འགྱུར་བ་དང་། ཇི་ལྟར་ཡུལ་དེ་དག་ན་ནད་འགོ་བ་མ་མཆིས་ཤིང་འཁྲུག་པ་མ་མཆིས་པར་འགྱུར་བ་དང་། ཇི་ལྟར་ཡུལ་ཐམས་ཅད་ཆོས་ཀྱིས་འཁྲུག་པ་མ་མཆིས་ཤིང་མི་རྫི་བར་འགྱུར་བ་དང་། ཇི་ལྟར་མིའི་རྒྱལ་པོ་དེ་དག་གིས་རང་རང་གི་ཡུལ་རྣམས་སུ་ཆོས་ཀྱི་སྒྲོན་མ་ཆེན་པོ་འབར་བར་བགྱིས་ཤིང་སྣང་བར་བགྱིས་པར་འགྱུར་བ་དང་། ཇི་ལྟར་ལྷའི་ཁང་ཁྱིམ་ཐམས་ཅད་ལྷ་དག་དང་ལྷའི་བུ་རྣམས་ཀྱིས་གང་བར་འགྱུར་བ་དང་། ཇི་ལྟར་བདག་ཅག་རྒྱལ་པོ་ཆེན་པོ་བཞི་དཔུང་དང་གཡོག་ཏུ་བཅས་པ་དང་། གནོད་སྦྱིན་བརྒྱ་སྟོང་ཕྲག་དུ་མ་དང་། འཛམ་བུའི་གླིང་ན་གནས་པའི་ལྷའི་ཚོགས་ཐམས་ཅད་ཚིམ་པ་དང་རིམ་གྲོ་བགྱིད་པར་འགྱུར་བ་དང་། ཇི་ལྟར་བདག་ཅག་གི་ལྷའི་ལུས་འདི་དག་གཟི་བརྗིད་ཆེན་པོ་རྣམ་པར་འཕེལ་བར་འགྱུར་བ་དང་། ཇི་ལྟར་བདག་ཅག་གི་ལུས་ལ་བརྩོན་འགྲུས་དང་སྟོབས་དང་མཐུ་ཆེན་པོ་བསྐྱེད་པར་འགྱུར་བ་དང་། ཇི་ལྟར་བདག་ཅག་གི་ལུས་ལ་གཟི་བརྗིད་དང་དཔལ་དང་ཕུན་སུམ་ཚོགས་པ་རབ་ཏུ་འཇུག་པར་འགྱུར་བ་དང་། ཇི་ལྟར་འཛམ་བུའི་གླིང་ཐམས་ཅད་ལོ་ལེགས་ཤིང་ཉམས་དགའ་བ་དང་སྐྱེ་བོ་དང་མིས་གང་བར་འགྱུར་བ་དང་། ཇི་ལྟར་འཛམ་བུའི་གླིང་ཐམས་ཅད་ན་གནས་པའི་སེམས་ཅན་རྣམས་བདེ་བར་འགྱུར་བ་དང་། དགའ་བ་སྣ་ཚོགས་མྱོང་བར་འགྱུར་བ་དང་། ཇི་ལྟར་སེམས་ཅན་ཐམས་ཅད་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་ལྷ་དང་མིའི་བདེ་བ་རྒྱ་ཆེ་ཞིང་རྒྱ་ཆེ་བ་མྱོང་བར་འགྱུར་བ་དང་། སངས་རྒྱས་བཅོམ་ལྡན་འདས་རྣམས་དང་ལྷན་ཅིག་གནས་པར་འགྱུར་བ་དང་། མ་འོངས་པའི་དུས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེ་དག་ཐམས་ཅད་དེ་ལྟ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཚངས་པའི་དབང་པོ་བྱེ་བ་ཁྲག་ཁྲིག་བརྒྱ་སྟོང་དག་པས་ཆེས་འཕགས་པའི་ཐུགས་རྗེ་ཆེན་པོའི་སྟོབས་དང་ལྡན་པའི་བྱིན་གྱི་རླབས་དང་བརྒྱ་བྱིན་བྱེ་བ་ཁྲག་ཁྲིག་བརྒྱ་སྟོང་དག་
གི་ལྷའི་ཤེས་པ་བས་ཆེས་འཕགས་པ། དེ་བཞིན་གཤེགས་པའི་མཁྱེན་པ་བླ་ན་མེད་པ་དང་དྲང་སྲོང་མངོན་པར་ཤེས་པ་ལྔ་ཅན་རྣམ་པ་སྣ་ཚོགས་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་ཐམས་ཅད་པས་ཆེས་འཕགས་པའི་བྱིན་གྱི་རླབས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སེམས་ཅན་ཐམས་ཅད་ཀྱི་དོན་གྱི་སླད་དུ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་འཛམ་བུའི་གླིང་འདིར་རྒྱ་ཆེར་ཡང་དག་པར་རབ་ཏུ་བཤད་དོ། །མིའི་རྒྱལ་པོའི་དགོངས་པ་དང་རྒྱལ་པོའི་བསྟན་བཅོས་དང་རྒྱལ་པོའི་བགྱི་བ་གང་དག་འཛམ་བུའི་གླིང་ཐམས་ཅད་ན་མཆིས་པ་དང་། གང་དག་གིས་སེམས་ཅན་འདི་དག་ཐམས་ཅད་བདེ་བར་འགྱུར་བ་དེ་དག་ཐམས་ཅད་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་གསེར་འོད་དམ་པ་མདོ་སྡེའི་དབང་པོ་འདི་ཉེ་བར་བསྟན། ཡོངས་སུ་བརྗོད། ཡང་དག་པར་རབ་ཏུ་བཤད་དོ། །བཙུན་པ་བཅོམ་ལྡན་འདས་རྒྱུ་དེ་དང་རྐྱེན་དེས་མིའི་རྒྱལ་པོ་དེས་གདོན་མི་འཚལ་བར་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་གུས་པར་མཉན་པར་བགྱི། གུས་པར་རིམ་གྲོར་བགྱི། གུས་པར་མཆོད་པར་བགྱིའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་ལ་འདི་སྐད་ཅེས་བཀའ་སྩལ་ཏོ། །དེའི་ཕྱིར་རྒྱལ་པོ་ཆེན་པོ་ཁྱེད་བཞི་དཔུང་དང་གཡོག་ཏུ་བཅས་པས་གདོན་མི་ཟ་བར་མིའི་རྒྱལ་པོ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་པ་དང་རིམ་གྲོ་བྱེད་པ་དང་མཆོད་པ་བྱེད་པ་དེ་དག་ཀུན་ཏུ་བསྲུང་བའི་ཕྱིར་སྤྲོ་བ་ཆེར་གྱིས་ཤིག །རྒྱལ་པོ་ཆེན་པོ་དག །དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་མདོ་སྡེའི་དབང་པོ་རྒྱལ་པོ་འཛིན་པ་དེ་དག་ཀྱང་། སངས་རྒྱས་ཀྱི་མཛད་པ་འཛིན་དུ་ཆུ་གཅིག་དང་། དེ་དག་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་འདི་ལ་སངས་རྒྱས་ཀྱི་མཛད་པ་བྱེད་པར་འགྱུར། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཡང་རྒྱ་ཆེར་ཡང་དག་པར་རབ་ཏུ་འཆད་པར་འགྱུར་ཏེ། རྒྱལ་པོ་ཆེན་པོ་ཁྱེད་བཞིས་ཅི་ནས་མདོ་སྡེའི་དབང་པོ་འཛིན་པའི་དགེ་སློང་
དང་དགེ་སློང་མ་དང་དགེ་བསྙེན་དང་དགེ་བསྙེན་མ་བསྲུང་བ་དང་། གནོད་པ་མེད་པ་དང་། ནད་མེད་པ་དང་། འཁྲུག་པ་མེད་པ་དང་། སེམས་བདེ་བར་འགྱུར་ཞིང་། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཡང་དག་པར་རབ་ཏུ་སྟོན་པར་འགྱུར་བར་དགེ་སློང་ངམ་དགེ་སློང་མ་འམ་དགེ་བསྙེན་ནམ་དགེ་བསྙེན་མ་མདོ་སྡེའི་དབང་པོ་འཛིན་པ་དེ་དག་ཀུན་ཏུ་བསྲུང་བར་བྱ། ཡོངས་སུ་བསྐྱབ་པར་བྱ། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཞི་བ་དང་བདེ་ལེགས་སུ་འགྱུར་བར་བྱའོ། །དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུ་དང་། རྒྱལ་པོ་ཆེན་པོ་ཡུལ་འཁོར་སྲུང་དང་། རྒྱལ་པོ་ཆེན་པོ་འཕགས་སྐྱེས་པོ་དང་། རྒྱལ་པོ་ཆེན་པོ་མིག་མི་བཟང་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། དེའི་ཚེ་མངོན་སུམ་དུ་ཚུལ་དང་མཐུན་པའི་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་དོ། །རྒྱལ་བ་ཟླ་བ་དྲི་མ་མེད་པའི་སྐུ། །རྒྱལ་བ་ཉི་མ་འོད་ཟེར་སྟོང་གི་འོད། །རྒྱལ་བ་པདྨ་དྲི་མ་མེད་པའི་སྤྱན། །རྒྱལ་བ་མེ་ཏོག་པད་རྩ་རྡུལ་མེད་ཚེམས། །རྒྱལ་བའི་ཡོན་ཏན་རྒྱ་མཚོ་ལྟ་བུ་སྟེ། །རིན་པོ་ཆེ་ནི་དུ་མའི་འབྱུང་གནས་གྱུར། །རྒྱལ་བ་རྒྱ་མཚོ་ཡེ་ཤེས་ཆུ་ཡིས་གང་། །ཏིང་འཛིན་བརྒྱ་ཕྲག་སྟོང་གིས་ཀུན་ཏུ་གང་། །རྒྱལ་བའི་ཞབས་ནི་འཁོར་ལོར་བྲིས་པ་སྟེ། །ཁོར་ཡུག་མུ་ཁྱུད་དེ་བཞིན་རྩིབ་མ་སྟོང་། །ཕྱག་དང་ཞབས་ནི་དྲ་བས་སྤྲས་པ་སྟེ། །ཞབས་ཀྱི་དྲ་བ་ངང་པའི་དབང་པོ་བཞིན། །གསེར་གྱི་རི་བོ་ལྟ་བུར་རབ་ཏུ་གདའ། །རྒྱལ་བ་དྲི་མེད་གསེར་གྱི་རི་དབང་པོ། །ཡོན་ཏན་ཐམས་ཅད་རི་རབ་འདྲ་བ་སྟེ། །སངས་རྒྱས་རི་དབང་རྒྱལ་ལ་ཕྱག་འཚལ་ལོ། །དེ་བཞིན་གཤེགས་པ་ཟླ་བ་ཉ་བ་འདྲ། ། ནམ་མཁའ་དང་ཡང་མཚུངས་ཤིང་འདྲ་བ་སྟེ། །སྒྱུ་མ་སྨིག་རྒྱུ་ལྟ་བུ་ཆགས་མེད་པ། །རྒྱལ་བ་དྲི་མ་མེད་ལ་ཕྱག་འཚལ་ལོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་ལ་ཚིགས་སུ་བཅད་དེ་བཀའ་སྩལ་པ། སྟོབས་བཅུ་དག་གི་གསེར་འོད་དམ་པ་ཡི། །མདོ་སྡེའི་
དབང་པོའི་རྒྱལ་པོ་རབ་མཆོག་འདི། །འཇིག་རྟེན་སྐྱོང་བ་ཁྱེད་ཅག་རྣམས་ཀྱིས་ནི། །བརྩོན་འགྲུས་རབ་ཏུ་བརྟན་པས་བསྐྱང་བར་བྱ། །འདི་ལྟར་མདོ་སྡེ་དཀོན་མཆོག་ཟབ་མོ་འདི། །སེམས་ཅན་ཀུན་ལ་བདེ་བ་སྦྱིན་བྱེད་པ། །སེམས་ཅན་རྣམས་ལ་ཕན་དང་བདེ་བའི་ཕྱིར། ། འཛམ་བུའི་གླིང་འདིར་ཡུན་རིང་གནས་པར་འགྱུར། །འདི་ལྟར་སྟོང་གསུམ་གྱི་ནི་སྟོང་ཆེན་གྱི། །འཇིག་རྟེན་དག་ན་ངན་སོང་སྡུག་བསྔལ་དང་། །སེམས་ཅན་དམྱལ་བའི་སེམས་ཅན་རྣམས་ཀྱི་ནི། །སྡུག་བསྔལ་ཐམས་ཅད་ཞི་བར་བྱེད་པའོ། །གང་དག་འཛམ་བུའི་གླིང་ནི་འདི་ན་ཡང་། །འཛམ་བུའི་གླིང་གནས་རྒྱལ་པོ་ཐམས་ཅད་ཀྱིས། །རབ་ཏུ་དགའ་བ་ཆེན་པོ་བསྐྱེད་ནས་ནི། །ཆོས་རྣམས་ཀྱིས་ནི་ཡུལ་དག་བསྐྱང་བར་གྱིས། །གང་གིས་འཛམ་བུའི་གླིང་འདི་བདེ་བ་དང་། །ཤིན་ཏུ་ལོ་ལེགས་ཉམས་ཀྱང་དགར་འགྱུར་ཞིང་། །འཛམ་བུའི་གླིང་ནི་ཐམས་ཅད་དག་ན་ཡང་། །སེམས་ཅན་ཐམས་ཅད་བདེ་བར་འགྱུར་བར་གྱིས། །འདི་ནི་མི་ཡི་དབང་པོ་གང་རྣམས་ནི། །ཡུལ་ན་དགའ་དང་བདག་བདེ་དགའ་བ་དང་། །རྒྱལ་སྲིད་རྣམ་པར་འབྱོར་པ་དགའ་བ་དེས། །མདོ་སྡེའི་དབང་པོ་འདི་ནི་མཉན་པར་བྱ། །ཕ་རོལ་དགྲ་ནི་ཡང་དག་ཟད་བྱེད་པ། །ཕ་རོལ་དགྲ་ཚོགས་ཟློག་པ་དགེ་བྱེད་པ། །མཆོག་ཏུ་འཇིགས་པས་ཕོངས་པ་སེལ་བྱེད་པ། །མཆོག་ཏུ་དགེ་བྱེད་མདོ་སྡེའི་དབང་པོ་འདིའོ། །ཇི་ལྟར་རིན་ཆེན་ཤིང་ལྗོན་རབ་མཛེས་པ། །ཡོན་ཏན་ཀུན་འབྱུང་ཁྱིམ་ན་ཡོད་པ་ལྟར། ། རྒྱལ་པོ་ཡོན་ཏན་འདོད་པ་རྣམས་ཀྱིས་ཀྱང་། །མདོ་སྡེའི་དབང་པོའི་མཆོག་འདི་དེ་ལྟར་བལྟ། །ཇི་ལྟར་ཆུ་གྲང་སྐོམ་པ་སེལ་བྱེད་པ། །ཚ་བས་ཉམ་ཐག་ཆེ་ན་རྙེད་པ་ལྟར། །ཡོན་ཏན་དག་གིས་སྐོམ་པའི་རྒྱལ་པོ་ལ། །མདོ་སྡེའི་རྒྱལ་པོའི་མཆོག་འདི་དེ་བཞིན་ནོ། །ཇི་ལྟར་རིན་ཆེན་ཐམས་ཅད་འབྱུང་བའི་གནས། །རིན་ཆེན་སྣོད་ནི་ལག་མཐིལ་ཡོད་པ་ལྟར། །མི་ཡི་དབང་པོའི་ཚོགས་ལ་གསེར་འོད་མཆོག །མདོ་སྡེའི་དབང་པོའི་མཆོག་འདི་དེ་བཞིན་ནོ། །འདི་ནི་ལྷ་ཡི་ཚོགས་ཀྱིས་མངོན་མཆོད་པ། །མདོ་སྡེའི་དབང་པོ་ལྷ་དབང་ཕྱག་བྱས་པ། །
འཇིག་རྟེན་སྐྱོང་བ་རྫུ་འཕྲུལ་ཆེན་པོ་ལ། །བཞི་པོ་དག་གིས་ཀུན་ཏུ་བསྲུངས་པ་ཡིན། །ཕྱོགས་བཅུ་དག་ན་སངས་རྒྱས་རྣམས་ཀྱིས་ཀྱང་། །མདོ་སྡེའི་དབང་པོ་འདི་ནི་རྟག་ཏུ་དགོངས། །མདོ་སྡེའི་དབང་པོ་འདི་ནི་བཤད་པ་ན། །སངས་རྒྱས་རྣམས་ཀྱིས་ལེགས་ཞེས་བརྗོད་པ་བྱིན། །གནོད་སྦྱིན་བྱེ་བ་སྟོང་ཕྲག་བརྒྱ་རྣམས་ཀྱིས། །ཕྱོགས་བཅུ་དག་ཏུ་ཡུལ་ཡང་སྲུང་བར་བྱེད། །རབ་ཏུ་དགའ་ཞིང་རབ་ཏུ་མགུ་སེམས་ཀྱིས། །མདོ་སྡེའི་དབང་པོ་འདི་ནི་ཉན་པར་བྱེད། །འཛམ་བུའི་གླིང་ན་གནས་པར་གྱུར་པ་ཡི། །ལྷ་ཡི་ཚོགས་རྣམས་བསམ་གྱིས་མི་ཁྱབ་པ། །ལྷ་ཚོགས་དེ་དག་ཀུན་ཀྱང་རབ་དགའ་བས། །མདོ་སྡེའི་དབང་པོ་འདི་ནི་ཉན་པར་བྱེད། །ཆོས་རྣམས་མཉན་པར་བྱ་བ་འདི་ཡིས་ནི། །གཟི་བརྗིད་དང་ནི་སྟོབས་དང་བརྩོན་འགྲུས་ཐོབ། །གཟི་བརྗིད་ཆེན་པོ་ཡི་ནི་ལྷ་ཡི་ལུས། །ཤིན་ཏུ་རྒྱས་ཤིང་རྣམ་པར་འཕེལ་བར་འགྱུར། །དེ་ནས་རྒྱལ་པོ་ཆེན་པོ་བཞིས་བཅོམ་ལྡན་འདས་ལ་ཚིགས་སུ་བཅད་པ་འདི་ལྟ་བུ་འདི་དག་ཐོས་པ་དང་ངོ་མཚར་དུ་གྱུར་རྨད་དུ་བྱུང་བར་གྱུར་དགའ་བར་གྱུར་ཏེ། དེ་དག་ཆོས་ཀྱི་ཤུགས་ཀྱིས་ཡུད་ཙམ་ཞིག་ངུས་ནས་མཆི་མ་ཕྱིས་ཏེ། དེ་དག་ལུས་འཕར་ཡན་ལག་འདར་ཞིང་དགའ་བ་དང་བདེ་བ་དང་ཡིད་བདེ་བ་བསམ་གྱིས་མི་ཁྱབ་པ་དང་ལྡན་པར་གྱུར་ནས་ཀྱང་བཅོམ་ལྡན་འདས་ལ་ལྷའི་མེ་ཏོག་མན་དཱ་ར་བ་དག་གིས་གཏོར་མངོན་པར་གཏོར་ཏོ། །གཏོར་མངོན་པར་གཏོར་ནས་ཀྱང་སྟན་ལས་ལངས་ཏེ་གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞི་རྒྱལ་པོ་ཆེན་པོ་རེ་རེ་ཡང་གནོད་སྦྱིན་ལྔ་བརྒྱ་ལྔ་བརྒྱ་དང་ཆོས་སྨྲ་བ་དེ་བསྲུང་བ་དང་ཡོངས་སུ་བསྐྱང་བའི་སླད་དུ་རྟག་ཏུ་དགེ་སློང་ཆོས་སྨྲ་བའི་སླད་བཞིན་འབྲང་བར་བགྱིའོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། རྒྱལ་པོ་ཆེན་པོ་བཞིའི་ལེའུ་ཞེས་བྱ་བ་སྟེ་བདུན་པའོ།། །།དེ་ནས་ལྷ་མོ་ཆེན་མོ་
དབྱངས་ཅན་གྱིས་གོས་ཕྲག་པ་གཅིག་ཏུ་བགོས་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ལྷ་མོ་ཆེན་མོ་དབྱངས་ཅན་བདག་གིས་ཀྱང་དགེ་སློང་ཆོས་སྨྲ་བ་དེའི་ཚིག་བརྒྱན་པའི་སླད་དུ་སྤོབས་པ་ཉེ་བར་བསྒྲུབ་པར་བགྱི། གཟུངས་ཀྱང་སྩལ་བར་བགྱི། ངེས་པའི་ཚིག་གི་བརྗོད་པ་ཀུན་ཏུ་གཞག་པར་བགྱི། དགེ་སློང་ཆོས་སྨྲ་བ་དེ་ལ་ཡེ་ཤེས་ཀྱི་སྣང་བ་ཆེན་པོ་བགྱིའོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལས་ཚིག་གམ་ཡི་གེ་གང་ཡང་རུང་བ་དག་ཅིག་ཡོངས་སུ་ཉམས་པར་གྱུར་ཏམ། བསྐྱུད་ན་བདག་གིས་དགེ་སློང་ཆོས་སྨྲ་བ་དེའི་ངེས་པའི་སྒྲ་དང་ཚིག་དང་ཡི་གེ་དེ་དག་ཐམས་ཅད་བསྒྲུབ་པར་བགྱིའོ། །དེ་ལྟར་སངས་རྒྱས་བཅོམ་ལྡན་འདས་བརྒྱ་སྟོང་དག་ལ་དགེ་བའི་རྩ་བ་བསྐྲུན་པའི་སེམས་ཅན་དེ་དག་གི་དོན་གྱི་སླད་དུ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་འཛམ་བུའི་གླིང་ན་ཡུན་རིང་དུ་གནས་ཤིང་མྱུར་དུ་ནུབ་པར་མི་འགྱུར་བ་དང་། སེམས་ཅན་དུ་མ་དག་གིས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཐོས་ནས་ཤེས་རབ་རྣོ་བ་བསམ་གྱིས་མི་ཁྱབ་པར་འགྱུར་བ་དང་། ཤེས་རབ་ཀྱི་ཕུང་པོ་བསམ་གྱིས་མི་ཁྱབ་པ་ཐོབ་པར་འགྱུར་བ་དང་། ཚེ་འདི་ལ་ཚེ་ཕུན་སུམ་ཚོགས་པ་རབ་ཏུ་ཐོབ་པར་འགྱུར་བ་དང་། སྲོག་ལ་ཕན་གདགས་པ་དང་། བསོད་ནམས་ཀྱི་ཕུང་པོ་དཔག་ཏུ་མ་མཆིས་པ་རབ་ཏུ་འཛིན་པར་འགྱུར་བ་དང་། ཐབས་སྣ་ཚོགས་རབ་ཏུ་འཚལ་བར་འགྱུར་བ་དང་། བསྟན་བཅོས་ཐམས་ཅད་ལ་མཁས་པར་འགྱུར་བ་དང་། བཟོའི་བགྱི་བ་སྣ་ཚོགས་ཕུན་སུམ་ཚོགས་པ་རབ་ཏུ་ཐོབ་པར་འགྱུར་བ་དང་། བསྐྱུད་པ་མ་མཆིས་པར་བགྱི་བའི་སླད་དུ་དེ་ལ་གཟུངས་ཀྱང་སྩལ་བར་བགྱིའོ། ། དགེ་སློང་ཆོས་སྨྲ་བ་དེ་དང་སེམས་ཅན་ཆོས་ཉན་པ་དེ་དག་གི་དོན་གྱི་སླད་དུ་སྔགས་དང་སྨན་དང་ལྡན་པའི་ཁྲུས་ཀྱི་ལས་བརྗོད་པར་བགྱི་སྟེ། གཟའ་དང་། རྒྱུ་སྐར་དང་། སྐྱེ་བ་དང་། འཆི་བའི་གནོད་པ་དང་། འཐབ་པ་དང་། རྙོག་པ་དང་། འཁྲུག་ལོང་དང་། ཁྲག་ཁྲུག་དང་།
རྨི་ལམ་ངན་པ་དང་། ལོག་འདྲེན་གྱི་གནོད་པ་ཐམས་ཅད་དང་། བྱད་དང་རོ་ལངས་ཐམས་ཅད་རབ་ཏུ་ཞི་བར་འགྱུར། གང་གིས་མཁས་པ་དག་ཁྲུས་བགྱིད་དུ་སྩལ་བའི་སྨན་དང་སྔགས་ནི་འདི་དག་སྟེ། ཤུ་དག་གིའུ་ཝང་འུ་སུ་དང་། །ཤ་མྱང་ཤ་མི་ཤི་རི་ཤ །དབང་པོའི་ལག་དང་སྐལ་བ་ཆེ། །ཛྙ་མ་ཤིང་ཚ་ཨ་ག་རུ། །ཤི་རི་བེ་སྟ་སྲ་རྩི་དང་། །གུ་གུལ་ར་ས་ཤླ་ལ་ཀི། །རྡོ་དྲེག་ལོ་མ་རྒྱ་སྤོས་དང་། །ཙནྡན་དང་ནི་ལྡོང་རོས་དང་། །གི་ཝང་བཅས་དང་རུ་རྟ་དང་། །གུར་གུམ་གླ་སྒང་ཡུངས་ཀར་དང་། །སྦྱི་མོ་སུག་སྨེལ་ན་ལ་ད། །ནཱ་ག་གེ་སར་ཨུ་ཤི་ར། །འདི་དག་ཆ་ནི་མཉམ་བགྱིས་ནས། །སྐར་མ་རྒྱལ་ལ་བཏགས་པར་བགྱི། །ཕྱེ་མ་ལ་ནི་སྔགས་ཚིག་འདི། །ལན་བརྒྱ་མངོན་པར་གདབ་པར་བགྱི། །ཏད་ཡ་ཐཱ། སུ་ཀྲྀ་ཏེ་ཀྲྀ་ཏ་ཀ་མ་ལ་ནཱི་ལ་ཛི་ན་ཀ་ར་ཏེ། ཧཾ་ཀ་རཱ་ཏེ།ཨིནྡྲ་ཛ་ལི། ཤ་ཀད་དྲེ་བ་ཤད་དྲེ། ཨ་བརྟ་ཀ་སི་ཀེ། ན་ཀུ་ཏྲ་ཀུ། ཀ་བི་ལ་ཀ་བི་ལ་མ་ཏི། ཤཱི་ལ་མ་ཏི། སན་དྷི་དྷུ་དྷུ་མ་མ་བ་ཏི། ཤི་རི་ཤི་རི། ས་ཏྱ་སྠི་ཏེ་སྭཱ་ཧཱ། ལྕི་བས་དཀྱིལ་འཁོར་བགྱིས་ནས་ནི། །མེ་ཏོག་སིལ་མ་དགྲམ་པར་བགྱི། །གསེར་གྱི་སྣོད་དང་དངུལ་སྣོད་དུ། །མངར་བའི་ཁུ་བ་གཞག་པར་བགྱི། །སྐྱེས་བུ་གོ་ཆ་བགོས་པ་ནི། །བཞི་ཞིག་དེར་ཡང་གཞག་པར་བགྱི། །རབ་ཏུ་བརྒྱན་པའི་བུ་མོ་བཞི། །བུམ་པ་ཐོགས་པ་གཞག་པར་བགྱི། །རྟག་ཏུ་གུ་གུལ་བདུག་པར་བགྱི། །སིལ་སྙན་སྣ་ལྔ་བགྱིད་དུ་སྩལ། །གདུགས་དང་རྒྱལ་མཚན་བ་དན་གྱིས། །ལྷ་མོ་དེ་ནི་ལེགས་པར་བརྒྱན། །བར་བར་དག་ཏུ་མེ་ལོང་གཞག །མདའ་དང་མདུང་རྩེ་རྣ་བྲང་གཞག །དེ་ནས་མཚམས་ཀྱང་གཅད་པར་བགྱི། །དེ་ཡི་འོག་ཏུ་དགོས་པ་བརྩམ། །སྔགས་ཀྱི་ལས་ནི་འདི་དག་གིས། །མཚམས་བཅད་པ་ཡང་བརྩམ་པར་བགྱི། །སྱད་ཡ་ཐེ་དན། ཨ་ར་ཀེ །ན་ཡ་ནེ། ཧི་ལེ། མི་ལེ། གི་ལེ། ཁི་ཁི་ལེ་སྭཱ་ཧཱ། བཅོམ་ལྡན་འདས་ཀྱི་སྣམ་ལོགས་སུ་ཁྲུས་བགྱིས་ནས་སྔགས་འདི་བཟླས་བརྗོད་བགྱིས་ན་ཁྲུས་ཀྱི་ཞི་བར་སྦྱོར་རོ། །ཏད་ཡ་ཐཱ། ས་ག་ཊེ། བི་ག་ཌེ། བི་ག་ཏ་བ་ཏི་སྭཱ་ཧཱ། ཕྱོགས་བཞི་དག་ན་གང་གནས་པའི། །རྒྱུ་སྐར་དག་གིས་ཚེ་སྲུངས་ཤིག །བཙས་པའི་སྐར་མའི་གནོད་པ་དང་། །
ཕུང་པོའི་ལས་ཀྱི་འཇིགས་འབྱུང་དང་། །འབྱུང་པོའི་ཁམས་རྣམས་འཁྲུག་བགྱིད་པ། །འཇིགས་པ་མི་བཟད་ཞི་གྱུར་ཅིག །ཏདྱ་ཐཱ། ཤ་མེ། བི་ཤ་མེ་སྭཱ་ཧཱ། ས་ག་ཊེ། བི་ག་ཊེ་སྭཱ་ཧཱ། སུ་ཁ་ཏི་ན་ཏེ་སྭཱ་ཧཱ། སཱ་ག་ར་སཾ་བྷཱུ་ཏཱ་ཡ་སྭཱ་ཧཱ། སྐན་དྷ་མ་ཏཱ་ཡ་སྭཱ་ཧཱ། ནཱི་ལ་ཀཎྛཱ་ཡ་སྭཱ་ཧཱ། ཨ་པ་ར་ཛི་ཏ་བཱིརྱཱ་ཡ་སྭཱ་ཧཱ། ཧི་མ་བ་ཏ་སཾ་བྷཱུ་ཏཱ་ཡ་སྭཱ་ཧཱ། ཨ་ནི་མི་ལ་བཀ་ཏྲཱ་ཡ་སྭཱ་ཧཱ། ན་མོ་བྷ་ག་བ་ཏེ། བྲཧྨ་ཎེ། ན་མཿས་ར་སྭ་ཏྱཻ་དེ་བྱཻ་སིདྷྱཾ་ཏུ་མནྟྲ་པ་ད། དཾ་བྲཧྨ་ཨ་ནུ་མ་ནྱ་ཏུ་སྭཱ་ཧཱ། དགེ་སློང་ཆོས་སྨྲ་བ་དེ་བསྲུང་བ་དང་ཆོས་མཉན་པ་དེ་དག་དང་། ཡི་གེར་འདྲི་བ་དེ་དག་གི་དོན་གྱི་སླད་དུ་ཁྲུས་ཀྱི་ལས་འདིས་བདག་ཉིད་དེར་མཆི་བར་བགྱིའོ། །ལྷའི་ཚོགས་ཐམས་ཅད་དང་ལྷན་ཅིག་ཏུ་གྲོང་ངམ་གྲོང་ཁྱེར་རམ་གྲོང་རྡལ་ལམ། གཙུག་ལག་ཁང་དེར་ནད་ཐམས་ཅད་རབ་ཏུ་ཞི་བར་བགྱིའོ། །ཇི་ལྟར་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་མདོ་སྡེའི་དབང་པོ་འཛིན་པ་དེ་དག་གི་སྲོག་ལ་ཕན་གདགས་པར་འགྱུར་བ་དང་། འཁོར་བ་ལས་འབྱུང་བ་ཐོབ་པར་འགྱུར་བ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་དང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བར་གཟའ་དང་། འཐབ་པ་དང་། རྙོག་པ་དང་། བཙས་པའི་སྐར་མའི་གནོད་པ་དང་། རྨི་ལམ་ངན་པ་དང་། ལོག་འདྲེན་གྱི་གནོད་པ་ཐམས་ཅད་དང་། བྱད་དང་། རོ་ལངས་ཐམས་ཅད་རབ་ཏུ་ཞི་བར་བགྱིའོ། །དེ་ནས་བཅོམ་ལྡན་འདས་ཀྱིས་ལྷ་མོ་དབྱངས་ཅན་ལ། ལྷ་མོ་ཆེན་མོ་དབྱངས་ཅན་ཁྱོད་སྐྱེ་བོ་མང་པོ་ལ་ཕན་པ་དང་སྐྱེ་བོ་མང་པོ་ལ་བདེ་བའི་ཕྱིར་ཞུགས་ཏེ། ཁྱོད་ཀྱིས་སྔགས་དང་སྨན་དང་ལྡན་པའི་ཚིག་འདི་འདྲ་བ་བཤད་པ་ནི་ལེགས་སོ་ལེགས་སོ་ཞེས་བྱ་བ་བྱིན་ནོ། །ལྷ་མོ་དབྱངས་ཅན་གྱིས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས་ཕྱོགས་གཅིག་ཏུ་འདུག་གོ། །དེ་ནས་སློབ་དཔོན་ལུང་སྟོན་པ་བྲམ་ཟེ་ཀཽཎྜི་ནྱས་ལྷ་མོ་དབྱངས་ཅན་དེ་བཀུག་གོ། །ལྷ་མོ་ཆེན་མོ་དབྱངས་ཅན་མཆོད་འོས་དཀའ་ཐུབ་ཆེ། །འཇིག་རྟེན་ཀུན་ཏུ་རྣམ་གྲངས་མཆོག་སྦྱིན་ཡོན་ཏན་ཆེ། །རྩེར་གནས་མཛེས་མ་དར་བ་རྩྭ་
ཡི་གོས་བསྐུས་པ། དར་བ་རྩྭ་ཡི་གོས་གྱོན་རྐང་པ་གཅིག་གིས་གནས། །ལྷ་རྣམས་ཐམས་ཅད་ལྷགས་ནས་འདི་སྐད་ཅེས་སྨྲས་ཏེ། །སེམས་ཅན་རྣམས་ལ་དགེ་བའི་ཚིག་ཤོད་ལྕེ་ཁྲོལ་ཅིག །སྱཱད་ཡ་ཐེ་དན། མུ་རེ། ཙི་རེ། ཨ་བ་ཛེ། ཨ་བ་ཛ་བ་ཏེ། ཧི་གུ་ལེ། མི་གུ་ལེ། པི་ག་ལ་བ་ཏི། མ་གུ་ཤེ། མ་རི་ཙི། ས་མ་ཏི། ད་ཤ་མ་ཏི། ཨ་གྲི་མ་གྲི། ཏ་ར། ཙི་ཏ་ར། ཙ་པ་ཏི། ཙི་ཙི་རི། ཤི་རི་མི་རི། མ་རི་ཙི། པྲ་ཎ་ཡེ། ལོ་ཀ་ཛྱེཥྛེ། ལོ་ཀ་ཤྲིཥྛེ། ལོ་ཀ་པྲི་ཡེ། སིད་དྷི་པྲི་ཏེ། བི་མ་མུ་ཁི་ཤུ་ཙི་ཁ་རི། ཨ་པྲ་ཏི་ཧ་ཏེ། ཨ་པྲ་ཏེ་ཧ་ཏ། བུད་དྷེ། ན་མུ་ཙི། ན་མུ་ཙི། མ་ཧཱ་དེ་བཱི་པྲ་ཏི་གྲྀཧྣ་ན་མ་སྐ་རཾ། བདག་གི་བློ་ཐོགས་པ་མེད་པར་གྱུར་ཅིག །བསྟན་བཅོས་དང་ཚིགས་སུ་བཅད་པའི་རྒྱུད་དང་། སྡེ་སྣོད་དང་སྙན་དངགས་ལ་སོགས་པ་བདག་གི་རིག་སྔགས་དངོས་གྲུབ་ཏུ་གྱུར་ཅིག །ཏདྱ་ཐཱ། མ་ཧཱ་པྲ་བྷ་བཱ། ཧི་ལི་ཧི་ལི། མི་ལི་མི་ལི། བཅོམ་ལྡན་འདས་མ་ལྷ་མོ་དབྱངས་ཅན་གྱི་མཐུས་བདག་རྣམ་པར་རྒྱལ་བར་གྱུར་ཅིག །ཀ་ར་ཊེ་ཀེ་ཡཱུ་རེ། ཀེ་ཡཱུ་ར་བ་ཏི། ཧི་ལི་མི་ལི། ཧི་ལི་མི་ལི། ཧི་ལི་ཧི་ལི། སངས་རྒྱས་ཀྱི་བདེན་པ་དང་། ཆོས་ཀྱི་བདེན་པ་དང་། དགེ་འདུན་གྱི་བདེན་པ་དང་། དབང་པོའི་བདེན་པ་དང་། ཆུ་ལྷའི་བདེན་པས་ལྷ་མོ་ཆེན་མོ་དགུག་པར་བྱའོ། །གང་དག་འཇིག་རྟེན་ན་བདེན་པ་སྨྲ་བ་དེ་དག་གི་བདེན་པ་དང་བདེན་པའི་ཚིག་གིས་ལྷ་མོ་ཆེན་མོ་དགུག་པར་བྱའོ། །ཏདྱ་ཐཱ། ཧི་ལི་ཧི་ལི། ཧི་ལི་མི་ལི། ཧི་ལི་མི་ལི། བདག་རྣམ་པར་རྒྱལ་བར་གྱུར་ཅིག །བཅོམ་ལྡན་འདས་མ་ལྷ་མོ་ཆེན་མོ་དབྱངས་ཅན་ལ་ཕྱག་འཚལ་ལོ། །བདག་ལ་གསང་སྔགས་ཀྱི་ཚིག་རྣམས་གྲུབ་པར་གྱུར་ཅིག་སྭཱ་ཧཱ། དེ་ནས་སློབ་དཔོན་ལུང་སྟོན་པ་བྲམ་ཟེ་ཀཽཎྜི་ནྱས་ལྷ་མོ་ཆེན་མོ་དབྱངས་ཅན་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །འབྱུང་པོའི་ཚོགས་རྣམས་ཐམས་ཅད་ང་ལ་ཉན་པར་གྱིས། །ལྷ་དང་དྲི་ཟ་ལྷ་དབང་བཅས་པའི་འཇིག་རྟེན་ན། །བུད་མེད་དམ་པ་ལྷ་མོ་མཆོག་གི་རབ་གང་ཡིན། །ལྷ་མོ་དམ་པ་མཆོག་ཏུ་མཛེས་པའི་ཞལ་ལ་བསྟོད། །ཡོན་ཏན་རྣམ་པ་སྣ་ཚོགས་བསགས་པས་ཡན་ལག་བརྒྱན། །དབྱངས་
ཅན་ཞེས་བྱ་སྤྱན་ནི་ཡངས་ཤིང་བསོད་ནམས་འབར། །དྲི་མེད་ཡེ་ཤེས་ཡོན་ཏན་རྣམས་ཀྱིས་རྣམ་པར་རྒྱས། །རིན་ཆེན་སྣ་ཚོགས་ཐ་དད་ལྟ་བུ་བལྟ་བའི་ཕྱིར། །མཆོག་རབ་ངག་གི་ཡོན་ཏན་ཁྱད་པར་དེ་བསྟོད་དོ། །དམ་པ་མཆོག་གི་དངོས་གྲུབ་བྱེད་པ་དང་། །ཡང་དག་བསྔགས་དང་ཡོན་ཏན་བྱེད་པ་དང་། །དྲི་མེད་མཆོག་དང་པདྨ་འབར་བ་དང་། །མིག་མཆོག་དང་ནི་མིག་གི་དམ་པ་དང་། །དགེ་བའི་གནས་དང་དགེ་བ་མཐོང་བ་དང་། །ཡོན་ཏན་བསམ་དུ་མེད་པས་བརྒྱན་པ་དང་། །ཟླ་བ་འདྲ་དང་དྲི་མ་མེད་འོད་དང་། །ཡེ་ཤེས་འབྱུང་གནས་དྲན་པ་དམ་པ་དང་། །སེང་གེ་མཆོག་དང་མི་ལ་ཞོན་པ་དང་། །ལག་པ་བརྒྱད་རྣམས་ཀྱིས་ནི་བརྒྱན་པ་དང་། །ཟླ་བ་ཉ་བ་ལྟ་བུར་སྣང་བ་དང་། །ཡིད་དུ་འོང་བའི་ངག་དང་དབྱངས་སྙན་དང་། །ཤེས་རབ་ཟབ་མོ་དང་ནི་ལྡན་པ་དང་། །དགོས་མཆོག་སྒྲུབ་བྱེད་སེམས་ཅན་དམ་པ་དང་། །ལྷ་དང་ལྷ་མིན་དབང་པོས་མཆོད་པ་དང་། །ལྷ་དང་ལྷ་མིན་ཚོགས་ཀུན་གནས་བརྗོད་དང་། །འབྱུང་པོའི་ཚོགས་ཀྱི་གནས་རྟག་མཆོད་པའི་ཕྱིར་སྭཱ་ཧཱ། །བདག་ཅག་ལྷ་མོ་འདི་ལ་ཕྱག་བྱའོ། །བདག་ལ་ཡོན་ཏན་ཁྱད་པར་ཀུན་སྩོལ་ཅིག །དགོས་པ་ཀུན་ཏུ་བདག་ལ་དངོས་གྲུབ་སྩོལ། །དགྲ་རྣམས་ཁྲོད་ན་བདག་ལ་རྟག་ཏུ་སྲུངས། །ཡི་གེ་རྫོགས་ཤིང་ཚིག་རྒྱས་འདི་དག་ནི། །ནང་པར་ལངས་ནས་གཙང་མར་བརྗོད་པར་བྱ། །བསམ་པ་དང་ནི་ནོར་འབྲུ་ཐམས་ཅད་རྙེད། །དངོས་གྲུབ་དགེ་བ་རྒྱ་ཆེན་ཐོབ་པར་འགྱུར། ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། དབྱངས་ཅན་གྱི་ལེའུ་ཞེས་བྱ་བ་སྟེ་བརྒྱད་པའོ།། །།དེ་ནས་བཅོམ་ལྡན་འདས་ལ་ལྷ་མོ་ཆེན་མོ་དཔལ་གྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ལྷ་མོ་ཆེན་མོ་དཔལ་བདག་གིས་ཀྱང་། ཅི་ནས་ཆོས་སྨྲ་བའི་དགེ་སློང་དེ་ཡོ་བྱད་ཐམས་ཅད་ཕུན་སུམ་ཚོགས་པར་འགྱུར་བ་དང་། བྲེལ་ཕོངས་མ་མཆིས་པ་ཐོབ་པར་འགྱུར་བ་དང་། སེམས་བརྟས་པར་འགྱུར་བ་དང་། སེམས་བདེ་བར་གདུགས་མཚན་བས་པར་འགྱུར་བ་དང་། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལས་ཚིག་དང་ཡི་གེ་
རྣམ་པ་ཐ་དད་པ་དག་ཆུབ་པར་འགྱུར་བ་དང་། རྣམ་པར་རྟོགས་པར་འགྱུར་བ་དང་། ཡང་དག་པར་བརྗོད་པར་འགྱུར་བ་དང་། སངས་རྒྱས་བརྒྱ་སྟོང་དག་ལ་དགེ་བའི་རྩ་བ་བསྐྲུན་པའི་སེམས་ཅན་དེ་དག་གི་དོན་གྱི་སླད་དུ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་འཛམ་བུའི་གླིང་དུ་ཡུན་རིང་དུ་གནས་པར་འགྱུར་ཞིང་། མྱུར་དུ་ནུབ་པར་མི་འགྱུར་བ་དང་། སེམས་ཅན་རྣམས་ཀྱང་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་པར་འགྱུར་བ་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་ལྷ་དང་མིའི་བདེ་བ་མྱོང་བར་འགྱུར་བ་དང་། མུ་གེ་མ་མཆིས་པར་འགྱུར་བ་དང་། ལོ་ལེགས་པར་འགྱུར་བ་དང་། སེམས་ཅན་རྣམས་ཀྱང་བདེ་བར་སྦྱར་བ་ཐམས་ཅད་ཀྱིས་བདེ་བར་འགྱུར་བ་དང་། དེ་བཞིན་གཤེགས་པ་དང་འགྲོགས་པར་འགྱུར་བ་དང་། མ་འོངས་པའི་དུས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དང་། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་གྱི་སྡུག་བསྔལ་ཐམས་ཅད་ཤིན་ཏུ་ཆད་པར་འགྱུར་བ་གང་འདི་གོས་དང་། ཟས་དང་། མལ་ཆ་དང་། ན་བའི་གསོས་སྨན་དང་། ཡོ་བྱད་དང་། འཚོག་ཆས་གཞན་དག་གིས་ཀྱང་དགེ་སློང་ཆོས་སྨྲ་བ་དེ་སྤྲོ་བར་བགྱིའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མེ་ཏོག་ཡོན་ཏན་རྒྱ་མཚོ་བཻ་ཌཱུཪྱ་དང་། གསེར་གྱི་རི་ཁ་དོག་བཟང་པོ་གསེར་དུ་སྣང་བའི་དཔལ་ཞེས་བྱ་བ་དེ་ལ་ལྷ་མོ་ཆེན་མོ་དཔལ་གྱིས་དགེ་བའི་རྩ་བ་བསྐྱེད་དེ། དེས་ད་ལྟར་ཕྱོགས་གང་དང་གང་དུ་སེམས་པ་དང་། ཕྱོགས་གང་དང་གང་དུ་ལྟ་བ་དང་། ཕྱོགས་གང་དང་གང་དུ་འགྲོ་བའི་ཕྱོགས་དེ་དང་དེར་སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དག་བདེ་བར་སྦྱར་བ་ཐམས་ཅད་ཀྱིས་བདེ་བར་འགྱུར། ཟས་དང་། སྐོམ་དང་། ནོར་དང་། འབྲུ་དང་། འགྲོན་བུ་དང་། གསེར་དང་། ནོར་བུ་དང་། མུ་ཏིག་དང་། བཻ་ཌཱུཪྱ་དང་། དུང་དང་། མན་ཤེལ་དང་། བྱི་རུ་དང་། དངུལ་དང་། ས་ལེ་སྦྲམ་དང་། ཡོ་བྱད་གཞན་དག་གིས་ཀྱང་མི་ཕོངས་པར་འགྱུར། སེམས་ཅན་དེ་དག་ཡོ་
བྱད་ཐམས་ཅད་ཀྱང་འབྱོར་པར་འགྱུར་རོ། །ལྷ་མོ་ཆེན་མོ་དཔལ་གྱི་མཐུས་དེ་བཞིན་གཤེགས་པ་དེ་ལ་མཆོད་པར་བྱ། སྤོས་དང་མེ་ཏོག་དང་བདུག་པ་ཡང་དབུལ་བར་བྱ། ལྷ་མོ་ཆེན་མོ་དཔལ་གྱི་མིང་ནས་ལན་གསུམ་བརྗོད་ཅིང་དེ་ལ་སྤོས་དང་། བདུག་པ་དང་མེ་ཏོག་ཀྱང་བྱིན་ལ་རོ་བྲོ་བ་སྣ་ཚོགས་ཀྱང་བྱིན་ན་དེའི་འབྲུའི་ཕུང་པོ་ཆེན་པོ་རྣམ་པར་འཕེལ་བར་འགྱུར་རོ། །དེ་ལ་འདི་སྐད་ཅེས་བྱ་སྟེ། ས་ལ་ས་ཡི་བཅུད་དག་རྣམ་པར་འཕེལ། །ལྷ་རྣམས་རྟག་པར་རབ་ཏུ་དགའ་བར་འགྱུར། །འབྲས་བུ་ལོ་ཏོག་ལྡུམ་སྡོང་ལྗོན་ལྷ་རྣམས། །ལོ་ཏོག་ཤིན་ཏུ་སྣ་ཚོགས་རྣམས་ཀྱང་བསྐྱེད། །གསེར་འོད་དམ་པ་མདོ་སྡེའི་དབང་པོའི་རྒྱལ་པོའི་མིང་བརྗོད་པའི་སེམས་ཅན་དེ་དག་ལ་ལྷ་མོ་ཆེན་མོ་དཔལ་སེམས་པར་འགྱུར། དེ་དག་ལ་དཔལ་ཆེན་པོར་བྱེད་པར་འགྱུར་རོ། །ལྷ་མོ་ཆེན་མོ་དཔལ་ནི་ལྕང་ལོ་ཅན་གྱི་ཕོ་བྲང་འཁོར་ན་སྐྱེད་མོས་ཚལ་དམ་པ་བསོད་ནམས་ཀྱི་མེ་ཏོག་འོད་ཅེས་བྱ་བ་ན་རིན་པོ་ཆེ་སྣ་བདུན་ལས་བྱས་པའི་ཁང་པ་དམ་པ་གསེར་གྱི་རྒྱལ་མཚན་ཞེས་བྱ་བ་ན་གནས་ཏེ། མི་གང་ལ་ལ་འབྲུའི་ཕུང་པོ་སྤེལ་བར་འདོད་པ་དེས་རང་གི་ཁྱིམ་ཕྱག་དར་ལེགས་པར་བྱ། ཁྲུས་ལེགས་པར་བྱ། གོས་དཀར་པོ་གཙང་མ་བགོ་བར་བྱ། གོས་དྲི་རབ་ཏུ་ཞིམ་པ་བགོ་བར་བྱའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མེ་ཏོག་ཡོན་ཏན་རྒྱ་མཚོ་བཻ་ཌཱུཪྱ་དང་། གསེར་གྱི་རི་ཁ་དོག་བཟང་པོ་གསེར་དུ་སྣང་བའི་དཔལ་དེ་ལ་ཕྱག་འཚལ་ཞིང་མཚན་ནས་ཀྱང་ལན་གསུམ་བརྗོད། ལྷ་མོ་ཆེན་མོ་དཔལ་གྱི་ལག་ནས་དེ་བཞིན་གཤེགས་པ་ལ་མཆོད་པར་བྱེད། མེ་ཏོག་དང་བདུག་པ་དང་སྤོས་ཀྱང་དབུལ། རོ་བྲོ་བ་སྣ་ཚོགས་ཀྱང་དབུལ། གསེར་འོད་དམ་པ་མདོ་སྡེའི་དབང་པོའི་རྒྱལ་པོའི་མིང་ཡང་ལན་གསུམ་བརྗོད། བདེན་པའི་ཚིག་ཀྱང་བརྗོད། ལྷ་མོ་ཆེན་མོ་དཔལ་ལ་ཡང་མཆོད་ཅིང་མེ་ཏོག་དང་བདུག་པ་ཡང་འབུལ། རོ་བྲོ་བ་སྣ་ཚོགས་ཀྱང་འབུལ་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདིའི་མཐུས། དེའི་ཚེ་ལྷ་མོ་ཆེན་མོ་དཔལ་ཁྱིམ་དེ་ལ་སེམས་པར་འགྱུར། དེའི་འབྲུའི་ཕུང་པོ་ཆེན་པོ་ཡང་འཕེལ་
བར་འགྱུར་རོ། །ལྷ་མོ་ཆེན་མོ་དཔལ་དགུག་པར་འདོད་པ་དེས་རིག་པའི་གསང་སྔགས་འདི་དག་དྲན་པར་བྱའོ། །འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་ཐམས་ཅད་ལ་ཕྱག་འཚལ་ལོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །བྱམས་པ་ལ་སོགས་པ་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །དེ་དག་ལ་ཕྱག་འཚལ་ནས། རིག་པ་འདི་དག་ལ་སྦྱོར་བར་བྱ་སྟེ། རིག་སྔགས་འདི་རྣམས་བདག་ལ་འབྱོར་བར་གྱུར་ཅིག །སྱཱད་ཡ་ཐེ་དན། པྲ་ཏི་པཱུ་ར་ཎ་བཱ་རེ། ས་མནྟ་དར་ཤ་ནེ། མ་ཧཱ་བི་ཧ་ར་ག་ཏེ། ས་མནྟ། བེ་ད་ན་ག་ཏེ། མ་ཧཱ་ཀཱརྱཾ་པྲ་ཏི་པྲ་བ་ཎེ། སཏྭ་ཨརྠ་ས་མཾ་ཏཱ་ནུ་པྲ་པཱུ་རེ། ཨཱ་ཡཱ་ན་དྷརྨ་ཏཱ་མ་ཧཱ་བྷོ་གི་ནེ། མ་ཧཱ་མཻ་ཏྲེ་ཨུ་པ་སཾ་ཧི་ཧེ། ཧེ་ཏཻ་ཥི། སཾ་གྲ་ཧི་ཏེ་ཏེ་ས་མར་ཐཱ་ནུ་པཱ་ལཱ་ནི། འདི་དག་ནི་སྤྱི་བོ་ནས་དབང་བསྐུར་བའི་ཆོས་ཉིད་ཀྱི་གསང་སྔགས་ཀྱི་ཚིག་གཅིག་ཏུ་དེ་ཁོ་ན་ཡང་དག་པར་སྒྲུབ་པར་སྦྱིན་པ་མི་སླུ་བའི་དོན་གྱི་ཚིག་སྟེ། སེམས་ཅན་བར་མ་ལ་སྦྱོར་བ་རྣམས་དགེ་བའི་རྩ་བ་ཁ་ན་མ་ཐོ་བ་མེད་པ་དག་གིས་ལོ་བདུན་དུ་འདོན་ཅིང་འཛིན་པ་དག་ཡན་ལག་བརྒྱད་པའི་བསྙེན་པར་གནས་པ་ལ་བསྙེན་ཏེ། བདག་དང་སེམས་ཅན་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་བྱ་བའི་ཕྱིར་སྔ་དྲོ་དང་ཕྱི་དྲོ་སངས་རྒྱས་ཐམས་ཅད་ལ་མེ་ཏོག་དང་སྤོས་རྣམས་ཀྱིས་མཆོད་ནས། དེས་བདག་གི་བསམ་པ་འདི་འབྱོར་པར་གྱུར་ཅིག །མྱུར་དུ་འབྱོར་པར་གྱུར་ཅིག །གཙུག་ལག་ཁང་ངམ་དགོན་པའི་གནས་ཀྱང་རུང་སྟེ། ཁྱིམ་དེ་ཤིན་ཏུ་གཙང་མར་བྱས་ལ་ལྕི་བས་དཀྱིལ་འཁོར་བྱས་ཏེ། སྤོས་དང་བདུག་པ་ཡང་དབུལ་བར་བྱ། སྟན་གཙང་མ་ཡང་གདིང་བར་བྱའོ། །ས་ལ་མེ་ཏོག་སིལ་མ་བཀྲམ་ནས་བསྡད་པར་བྱའོ། །དེ་ནས་སྐད་ཅིག་དེ་ཉིད་ལ་དཔལ་འོངས་ནས་དེར་གནས་པར་འགྱུར་རོ། །དེ་ཕྱིན་ཅད་ཁྱིམ་མམ། གྲོང་ངམ། གྲོང་ཁྱེར་རམ། གྲོང་རྡལ་ལམ། གཙུག་ལག་ཁང་ངམ། དགོན་པའི་གནས་སུ་ནམ་ཡང་བྲེལ་ཅིང་ཕོངས་པ་མེད་པར་བྱེད་དོ། །འགྲོན་བུ་དང་། གསེར་དང་། རིན་པོ་ཆེ་དང་། ནོར་དང་། འབྲུ་དང་། ཡོ་བྱད་ཐམས་ཅད་འབྱོར་པ་དང་། བདེ་
བར་སྦྱར་བ་ཐམས་ཅད་ཀྱིས་བདེ་བར་འགྱུར་རོ། །དགེ་བའི་རྩ་བ་གང་དག་བྱེད་པ་དེ་དག་ཐམས་ཅད་ལས་ལྷ་མོ་ཆེན་མོ་དཔལ་ལ་ཤས་ཀྱི་མཆོག་སྦྱིན་པར་བྱ་སྟེ། དེས་ན་དེ་ཇི་སྲིད་འཚོའི་བར་དུ་དེ་ན་གནས་པར་འགྱུར། ཕོངས་པར་མི་འགྱུར། དེ་དག་གི་བསམ་པ་ཐམས་ཅད་ཡོངས་སུ་རྫོགས་པར་འགྱུར་རོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། ལྷ་མོ་ཆེན་མོ་དཔལ་གྱི་ལེའུ་ཞེས་བྱ་བ་སྟེ་དགུ་པའོ།། །།བཅོམ་ལྡན་འདས་དེ་བཞིན་གཤེགས་པ་རིན་ཆེན་གཙུག་ཏོར་ཅན་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དྲི་མ་མེད་པར་འབར་བ་རིན་ཆེན་གསེར་གྱི་འོད་ཟེར་སྣང་བའི་ཏོག་ལ་ཕྱག་འཚལ་ལོ། །དེ་བཞིན་གཤེགས་པ་འཛམ་བུ་གསེར་གྱི་རྒྱལ་མཚན་གསེར་དུ་སྣང་བ་ལ་ཕྱག་འཚལ་ལོ། །དེ་བཞིན་གཤེགས་པ་གསེར་དུ་སྣང་བའི་སྙིང་པོ་ལ་ཕྱག་འཚལ་ལོ། །དེ་བཞིན་གཤེགས་པ་ཉི་མ་བརྒྱའི་འོད་ཟེར་སྣང་བའི་སྙིང་པོ་ལ་ཕྱག་འཚལ་ལོ། །དེ་བཞིན་གཤེགས་པ་གསེར་རིན་ཆེན་འབྱུང་གནས་གདུགས་བརྩེགས་ལ་ཕྱག་འཚལ་ལོ། །དེ་བཞིན་གཤེགས་པ་གསེར་གྱི་མེ་ཏོག་འབར་བའི་འོད་ཟེར་གྱི་ཏོག་ལ་ཕྱག་འཚལ་ལོ། །དེ་བཞིན་གཤེགས་པ་སྒྲོན་མ་ཆེན་མོ་ལ་ཕྱག་འཚལ་ལོ། །དེ་བཞིན་གཤེགས་པ་རིན་ཆེན་ཏོག་ལ་ཕྱག་འཚལ་ལོ། །བྱང་ཆུབ་སེམས་དཔའ་མཛེས་པའི་ཏོག་ཅེས་བྱ་བ་དང་། བྱང་ཆུབ་སེམས་དཔའ་གསེར་འོད་དམ་པ་ཞེས་བྱ་བ་དང་། བྱང་ཆུབ་སེམས་དཔའ་གསེར་གྱི་སྙིང་པོ་ཞེས་བྱ་བ་དང་། བྱང་ཆུབ་སེམས་དཔའ་རྟག་ཏུ་ངུ་ཞེས་བྱ་བ་དང་། བྱང་ཆུབ་སེམས་དཔའ་ཆོས་འཕགས་ཞེས་བྱ་བ་དང་། ཤར་ཕྱོགས་ན་དེ་བཞིན་གཤེགས་པ་མི་འཁྲུགས་པ་ཞེས་བྱ་བ་དང་། ལྷོ་ཕྱོགས་ན་དེ་བཞིན་གཤེགས་པ་རིན་ཆེན་ཏོག་ཅེས་བྱ་བ་དང་། ནུབ་ཕྱོགས་ན་དེ་བཞིན་གཤེགས་པ་ཚེ་དཔག་མེད་ཅེས་བྱ་བ་དང་། བྱང་ཕྱོགས་ན་དེ་བཞིན་གཤེགས་པ་རྔ་སྒྲ་ཞེས་བྱ་བ་སྟེ། སུ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལས་དེ་བཞིན་གཤེགས་པའི་མཚན་དང་། བྱང་ཆུབ་སེམས་དཔའི་མིང་འདི་དག་འཛིན་ཏམ། ཀློག་གམ། ཁོང་དུ་ཆུད་པར་བྱེད་ན་དེ་རྟག་
ཏུ་ཚེ་རབས་དྲན་པར་འགྱུར་རོ། །དེ་ནས་བཅོམ་ལྡན་འདས་ལ་སའི་ལྷ་མོ་བརྟན་མས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ད་ལྟར་དང་མ་འོངས་པའི་དུས་ན་གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། དགོན་པའི་ཕྱོགས་སམ། རིའི་སྨན་ལྗོངས་སམ། ཕོ་བྲང་འཁོར་གང་དུ་གནས་པར་འགྱུར་བའི་གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། དགོན་པའི་ཕྱོགས་སམ། རིའི་སྨན་ལྗོངས་སམ། ཕོ་བྲང་འཁོར་དེར་བཙུན་པ་བཅོམ་ལྡན་འདས་སའི་ལྷ་མོ་བརྟན་མ་བདག་མཆི་བར་བགྱིའོ། །བཅོམ་ལྡན་འདས་གང་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་རྒྱ་ཆེར་ཡང་དག་པར་རབ་ཏུ་འཆད་པར་འགྱུར་བ་དང་། ས་ཕྱོགས་གང་དང་གང་ན་དགེ་སློང་ཆོས་སྨྲ་བ་དེའི་ཆོས་ཀྱི་ཁྲི་ཤོམ་པར་འགྱུར་བ་དང་། གང་དང་གང་དུ་ཆོས་སྨྲ་བ་དེ་སྟན་ལ་མཆིས་ནས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་རྒྱ་ཆེར་ཡང་དག་པར་རབ་ཏུ་སྟོན་པར་འགྱུར་བ་དེར། བཙུན་པ་བཅོམ་ལྡན་འདས་སའི་ལྷ་མོ་བརྟན་མ་བདག་ས་ཕྱོགས་དེ་དང་དེ་ཉིད་དུ་མཆི་བར་བགྱིའོ། །ལུས་འདི་མི་གདའ་བར་ཆོས་ཀྱི་ཁྲིའི་འོག་ལོགས་སུ་མཆིས་ཏེ། ཡན་ལག་གི་དམ་པ་མགོས་དགེ་སློང་ཆོས་སྨྲ་བ་དེའི་རྐང་མཐིལ་ནས་བརྟེན་པར་བགྱིའོ། །བདག་ཀྱང་ཆོས་མཉན་པ་དང་ཆོས་བདུད་རྩིའི་ཁུ་བ་འདིས་ཚིམ་པར་བགྱི། ཡང་དག་པར་རིམ་གྲོ་བགྱི། ཡང་དག་པར་མཆོད་པར་བགྱིའོ། །བདག་ཚིམ་པར་གྱུར། རིམ་གྲོ་བགྱི་བ་བགྱིས་པར་གྱུར། རབ་ཏུ་དགའ་བར་གྱུར་ནས། སའི་ཕུང་པོ་དཔག་ཚད་སྟོང་ཕྲག་དྲུག་ཅུ་རྩ་བརྒྱད་པོ་འདི་ནས་སའི་གཞི་རྡོ་རྗེ་ལ་ཐུག་པའི་བར་དུ་སའི་བཅུད་ཀྱིས་རྣམ་པར་འཕེལ་བར་བགྱི། ཡང་དག་པར་རིམ་གྲོ་བགྱི་ཡོངས་སུ་རྫོགས་པར་བགྱིའོ། ། སྟེང་དུ་ཡང་རྒྱ་མཚོའི་མཐའ་ལ་ཐུག་པའི་སའི་དཀྱིལ་འཁོར་འདི་སའི་བཅུད་ཀྱི་སྣུམ་གྱིས་བརླན་པར་བགྱིའོ། །ས་ཆེན་པོ་འདི་རབ་ཏུ་མདངས་དང་ལྡན་པར་བགྱིའོ། །དེས་ན་འཛམ་བུའི་གླིང་འདིར་རྩྭ་དང་ཤིང་གེལ་པ་དང་སྨན་དང་ནགས་ཚལ་སྣ་ཚོགས་རྣམས་མདངས་དང་རབ་
ཏུ་ལྡན་པར་འཁྲུངས་པར་འགྱུར། ཀུན་དགའི་ར་བ་དང་། ནགས་ཚལ་དང་། ཤིན་ལྗོན་པ་ཐམས་ཅད་དང་། ལོ་མ་དང་། མེ་ཏོག་དང་། འབྲས་བུ་དང་། ལོ་ཏོག་རྣམ་པ་སྣ་ཚོགས་ཐམས་ཅད་ཀྱང་རབ་ཏུ་མདངས་དང་ལྡན་པར་འགྱུར། དྲི་དང་རབ་ཏུ་ལྡན་པ་དང་། སྣུམ་དང་རབ་ཏུ་ལྡན་པ་དང་། རོ་ཞིམ་པོར་འགྱུར་བ་བལྟ་ན་རབ་ཏུ་སྡུག་པ་དང་རབ་ཏུ་ཆེ་བར་འགྱུར་རོ། །སེམས་ཅན་དེ་དག་ཀྱང་བཏུང་བ་དང་བཟའ་བ་རྣམ་པ་སྣ་ཚོགས་དེ་དག་འཚལ་ནས། ཚེ་དང་སྟོབས་དང་ཁ་དོག་དང་དབང་པོ་རྣམ་པར་འཕེལ་བར་འགྱུར་རོ། །གཟི་བརྗིད་དང་སྟོབས་དང་ཁ་དོག་དང་གཟུགས་དང་ལྡན་པར་གྱུར་ནས་ཀྱང་ས་ལ་མཆིས་པའི་དགོས་པ་རྣམ་པ་སྣ་ཚོགས་ཐ་དད་པ་བརྒྱ་སྟོང་དུ་མ་དག་བགྱིད་པར་འགྱུར། བརྩོན་པར་འགྱུར། འབད་པར་འགྱུར། སྟོབས་སུ་བགྱིད་པའི་ལས་རྣམས་བགྱིད་པར་འགྱུར་རོ། །བཙུན་པ་བཅོམ་ལྡན་འདས་རྒྱུ་དེས་འཛམ་བུའི་གླིང་ཐམས་ཅད་ཞི་བ་དང་ལོ་ལེགས་པ་དང་རྒྱས་པ་དང་ཉམས་དགའ་བར་འགྱུར། མིའི་སྐྱེ་བོ་མང་པོས་གང་བར་འགྱུར། འཛམ་བུའི་གླིང་གི་སེམས་ཅན་ཐམས་ཅད་བདེ་བར་འགྱུར། དགའ་བ་རྣམ་པ་སྣ་ཚོགས་མྱོང་བར་འགྱུར། སེམས་ཅན་དེ་དག་གཟི་བརྗིད་དང་སྟོབས་དང་ཁ་དོག་དང་གཟུགས་དང་ལྡན་པར་འགྱུར་རོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདིའི་སླད་དུ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་མདོ་སྡེའི་དབང་པོ་འདི་འཛིན་པ་དེ་དག་ཆོས་ཀྱི་སྟན་ལ་མཆིས་པའི་གན་དུ་མཆི་བར་འགྱུར། མཆིས་ནས་ཀྱང་སེམས་རབ་ཏུ་དང་བས་སེམས་ཅན་ཐམས་ཅད་ཀྱི་དོན་དང་ཕན་པ་དང་བདེ་བ་དང་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་རྒྱ་ཆེར་ཡང་དག་པར་རབ་ཏུ་བཤད་པར་བགྱི་བའི་སླད་དུ་ཆོས་སྨྲ་བ་དེ་དག་ལ་གསོལ་བ་འདེབས་པར་འགྱུར་རོ། །དེ་ཅིའི་སླད་དུ་ཞེ་ན། བཙུན་པ་བཅོམ་ལྡན་འདས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་རབ་ཏུ་བཤད་ན། སའི་ལྷ་མོ་བརྟན་མ་བདག་གཡོག་དང་བཅས་ཏེ། རབ་ཏུ་མདངས་དང་ལྡན་པ་དང་། རབ་ཏུ་སྟོབས་དང་ལྡན་པར་འགྱུར་རོ། །བདག་ཅག་གི་ལུས་ལ་སྟོབས་དང་། བརྩོན་འགྲུས་དང་།
མཐུ་ཆེན་པོ་བསྐྱེད་པར་འགྱུར། བདག་ཅག་གི་ལུས་ལ་གཟི་བརྗིད་དང་དཔལ་དང་། ཕུན་སུམ་ཚོགས་པ་ཡང་འཇུག་པར་འགྱུར་རོ། །བཙུན་པ་བཅོམ་ལྡན་འདས་སའི་ལྷ་མོ་བརྟན་མ་བདག་ཆོས་བདུད་རྩིའི་ཁུ་བ་འདིས་ཚིམ་པར་གྱུར། གཟི་བརྗིད་དང་སྟོབས་དང་། བརྩོན་འགྲུས་དང་མཐུ་དང་ཤུགས་ཆེན་པོ་ཐོབ་པར་གྱུར་ན། ས་ཆེན་པོའི་དཔག་ཚད་སྟོང་ཕྲག་བདུན་པའི་འཛམ་བུའི་གླིང་འདིའི་སའི་བཅུད་ཆེན་པོ་རྣམ་པར་འཕེལ་བར་འགྱུར། ས་ཆེན་པོ་མདངས་དང་རབ་ཏུ་ལྡན་པར་འགྱུར་རོ། །བཙུན་པ་བཅོམ་ལྡན་འདས་ས་ལ་བརྟེན་པའི་སེམས་ཅན་དེ་དག་ཐམས་ཅད་ཀྱང་འཕེལ་ཞིང་རྒྱས་ལ་ཡངས་པར་འགྱུར། ཆེན་པོར་ཡང་འགྱུར་རོ། །ས་ལ་གནས་པའི་སེམས་ཅན་དེ་དག་ཆེན་པོར་གྱུར་ནས་ཀྱང་། ལོངས་སྤྱོད་དང་ཡོངས་སུ་སྤྱོད་པ་སྣ་ཚོགས་ལ་སྤྱོད་པར་འགྱུར། བདེ་བ་ཡང་མྱོང་བར་འགྱུར་རོ། །དེ་དག་ཐམས་ཅད་བཟའ་བ་དང་། བཏུང་བ་དང་བཅའ་བ་རྣམ་པ་སྣ་ཚོགས་དང་། གོས་དང་མལ་ཆ་དང་། གནས་དང་། ཁང་པ་དང་། གཞལ་མེད་ཁང་དང་། སྐྱེད་མོས་ཚལ་དང་། ཆུ་བོ་དང་། རྫིང་དང་། ཆུ་མིག་དང་། མཚེའུ་དང་། མཚོ་དང་། ལྟེང་ཀ་དང་། འདི་ལྟ་བུའི་ཡོ་བྱད་བདེ་བ་རྣམ་པ་སྣ་ཚོགས་ས་ལ་གནས་པ་ས་ལས་བྱུང་བ་ས་ལ་བརྟེན་པ་འདི་དག་ལ་སྤྱོད་པར་འགྱུར་རོ། །བཙུན་པ་བཅོམ་ལྡན་འདས་རྒྱུ་དེས་སེམས་ཅན་དེ་དག་ཐམས་ཅད་ཀྱིས་བདག་ལ་བྱས་པ་གཟོ་བར་བགྱིའོ། །གདོན་མི་འཚལ་བར་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་བསྟི་སྟང་དུ་བགྱིས་ཏེ། མཉན་པར་བགྱི། བཀུར་སྟིར་བགྱི། བླ་མར་བགྱི། རིམ་གྲོར་བགྱི། མཆོད་པར་བགྱིའོ། །བཙུན་པ་བཅོམ་ལྡན་འདས་གང་གི་ཚེ་སེམས་ཅན་དེ་དག་ཆོས་སྨྲ་བ་དེའི་གན་དུ་མཆི་བའི་སླད་དུ། རིགས་ཐ་དད་པ་དང་ཁྱིམ་ཐ་དད་པ་དག་ནས་འབྱུང་སྟེ། མཆིས་ནས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་མཉན་པར་གྱུར་ལ། ཐོས་ནས་ཀྱང་རང་རང་གི་རིགས་དང་། ཁྱིམ་དང་གྲོང་དང་གྲོང་རྡལ་ཐ་དད་པ་དག་ཏུ་ཞུགས་ནས། རང་རང་གི་ཁྱིམ་ན་གནས་པ་དག་ཕན་ཚུན་དུ་འདི་སྐད་ཅེས་བདག་ཅག་གིས་དེ་རིང་ཆོས་མཉན་པ་ཟབ་མོ་ཐོས་སོ། །དེ་རིང་བདག་ཅག་གིས་
བསོད་ནམས་ཀྱི་ཕུང་པོ་བསམ་གྱིས་མི་ཁྱབ་པ་ཡོངས་སུ་བཟུང་ངོ་། །བདག་ཅག་གིས་ཆོས་མཉན་པ་དེས་དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དག་མཉེས་པར་བྱས་སོ། །དེང་བདག་ཅག་གིས་ཆོས་ཉན་པ་འདིས་སེམས་ཅན་དམྱལ་བ་ལས་ཡོངས་སུ་ཐར་ཏོ། །དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དང་། ཡི་དགས་ཀྱི་ཡུལ་ལས་ཡོངས་སུ་ཐར་ཏོ། །དེང་བདག་ཅག་ཆོས་ཉན་པ་འདིས་མ་འོངས་པའི་དུས་ན། ཚེ་རབས་བརྒྱ་སྟོང་ཕྲག་དུ་མར་ལྷ་དང་མིར་སྐྱེ་བ་ཡོངས་སུ་བཟུང་བར་འགྱུར་རོ། །ཞེས་གཏམ་ཟེར་བར་འགྱུར་རོ། །ཁྱིམ་ཐ་དད་པ་ན་གནས་པར་འགྱུར་བ་དེ་དག་སེམས་ཅན་གཞན་དག་ལ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལས་ཐ་ན་དཔེ་གཅིག་བརྗོད་དམ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལས་ཐ་ན་ལེའུ་གཅིག་གམ། སྔོན་བྱུང་བ་གཅིག་གམ། ཐ་ན་བྱང་ཆུབ་སེམས་དཔའི་མིང་གཅིག་གམ། དེ་བཞིན་གཤེགས་པའི་མཚན་གཅིག་གམ། ཐ་ན་ཚིག་བཞི་པའི་ཚིགས་སུ་བཅད་པ་གཅིག་གམ། ཚིག་གཅིག་གིས་སེམས་ཅན་གཞན་དག་ལ་ཐོས་པར་བགྱིད་དམ། ཐ་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདིའི་མཚན་གཞན་དག་ལ་རབ་ཏུ་སྟོན་ཏམ། བཙུན་པ་བཅོམ་ལྡན་འདས་གང་དང་གང་ན་སེམས་ཅན་རྣམ་པ་ཐ་དད་པ་དེ་དག་ས་ཕྱོགས་རྣམ་པ་ཐ་དད་པ་དག་ཏུ་མདོ་སྡེའི་གཏན་ཚིགས་རྣམ་པ་སྣ་ཚོགས་འདི་ལྟ་བུ་འདི་དག་གཅིག་ལ་གཅིག་བརྗོད་དམ། ཐོས་པར་བགྱིད་དམ། གཏམ་བརྒྱུད་བརྗོད་ན། བཙུན་པ་བཅོམ་ལྡན་འདས་ས་ཕྱོགས་དེ་དག་ཐམས་ཅད་ཤིན་ཏུ་མདངས་དང་ལྡན་པ་དང་ཤིན་ཏུ་སྣུམ་པར་འགྱུར་རོ། །ས་ཕྱོགས་དེ་དང་དེ་དག་ཏུ་སེམས་ཅན་ཐམས་ཅད་ཀྱི་ཕྱིར། སའི་བཅུད་རྣམ་པ་སྣ་ཚོགས་དང་ཡོ་བྱད་ཐམས་ཅད་རྒྱས་པར་སྐྱེ་བར་འགྱུར། རྣམ་པར་འཕེལ་བར་འགྱུར། ཤིན་ཏུ་རྒྱས་པར་འགྱུར། སེམས་ཅན་དེ་དག་ཐམས་ཅད་ཀྱང་བདེ་བར་འགྱུར་རོ། །ནོར་ཆེ་བ་དང་། ལོངས་སྤྱོད་ཆེ་བ་དང་། སྦྱིན་པ་ལ་མོས་པར་འགྱུར། དཀོན་མཆོག་གསུམ་ལ་མངོན་པར་དད་པར་འགྱུར་རོ། །དེ་སྐད་ཅེས་གསོལ་པ་དང་། བཅོམ་
ལྡན་འདས་ཀྱིས་སའི་ལྷ་མོ་བརྟན་མ་ལ་འདི་སྐད་ཅེས་བཀའ་སྩལ་ཏོ། །སའི་ལྷ་མོ་སེམས་ཅན་གང་ལ་ལ་དག་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལས་ཐ་ན་ཚིག་གཅིག་ཉན་ན་དེ་དག་མིའི་འཇིག་རྟེན་འདི་ནས་ཤི་འཕོས་ནས་སུམ་ཅུ་རྩ་གསུམ་པའི་ལྷའི་རིས་ཀྱི་ནང་དུ་ལྷའི་རིས་གང་ཡང་རུང་བ་ཞིག་ཏུ་སྐྱེ་བར་འགྱུར་རོ། །སའི་ལྷ་མོ་སེམས་ཅན་གང་ལ་ལ་དག་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལ་མཆོད་པའི་ཕྱིར། གནས་དེ་དག་ལེགས་པར་བརྒྱན་པར་བྱེད་དམ། ཐ་ན་གདུགས་གཅིག་གམ། བ་དན་གཅིག་གམ། རས་བཅོས་བུ་གཅིག་གིས་གཡོགས་ན་སའི་ལྷ་མོ་རྟག་ཏུ་བརྒྱན་པའི་གནས་དེ་དག་འདོད་པ་ན་སྤྱོད་པའི་ལྷའི་རིས་བདུན་པོ་དེ་དག་ཏུ་ལྷའི་རིན་པོ་ཆེ་སྣ་བདུན་གྱི་གཞལ་མེད་ཁང་རྒྱན་ཐམས་ཅད་ཀྱིས་ལེགས་པར་བརྒྱན་པ་དག་ཏུ་གནས་པར་འགྱུར་རོ། །གང་གི་ཚེ་སེམས་ཅན་དེ་དག་མིའི་འཇིག་རྟེན་འདི་ནས་ཤི་འཕོས་ཏེ། རིན་པོ་ཆེ་སྣ་བདུན་གྱི་གཞལ་མེད་ཁང་དེ་དག་ཏུ་སྐྱེ་བ་དེའི་ཚེ། སའི་ལྷ་མོ་རིན་པོ་ཆེ་སྣ་བདུན་གྱི་གཞལ་མེད་ཁང་རེ་རེར་ཡང་ལན་བདུན་བདུན་དུ་སྐྱེ་བར་འགྱུར་རོ། །ལྷའི་བདེ་བ་བསམ་གྱིས་མི་ཁྱབ་པ་ཡང་མྱོང་བར་འགྱུར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་སའི་ལྷ་མོ་བརྟན་མས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་དེས་ན་སའི་ལྷ་མོ་བརྟན་མ་བདག་དགེ་སློང་ཆོས་སྨྲ་བ་ཆོས་ཀྱིསྟན་ལ་མཆིས་པ་དེའི་ཆོས་ཀྱི་སྟན་གྱི་འོག་ལོགས་ཀྱི་ས་ཕྱོགས་དེ་དང་དེ་དག་ཏུ་གནས་པར་བགྱིའོ། །ཅི་ནས་ཀྱང་སངས་རྒྱས་བརྒྱ་སྟོང་དག་ལ་དགེ་བའི་རྩ་བ་བསྐྲུན་པའི་སེམས་ཅན་དེ་དག་གི་དོན་གྱི་སླད་དུ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་འཛམ་བུའི་གླིང་དུ་ཡུན་རིང་དུ་གནས་ཤིང་མྱུར་དུ་ནུབ་པར་མི་འགྱུར་བ་དང་། སེམས་ཅན་རྣམས་ཀྱང་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་པར་འགྱུར་བ་དང་།མ་འོངས་པའི་དུས་ན་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་ལྷ་དང་མིའི་བདེ་བ་བསམ་གྱིས་མི་ཁྱབ་པ་མྱོང་བར་འགྱུར་བ་དང་། དེ་བཞིན་གཤེགས་པ་དང་འགྲོགས་པར་འགྱུར་བ་དང་མ་འོངས་པའི་དུས་ན་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དང་། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་གྱི་སྡུག་བསྔལ་ཐམས་ཅད་ཤིན་ཏུ་ཆད་པར་འགྱུར་བར་ལུས་མི་གདའ་བར་བགྱིས་ཏེ། དགེ་སློང་ཆོས་སྨྲ་བ་དེའི་རྐང་པ་ལ་ཡན་ལག་གི་དམ་པ་མགོས་བརྟེན་པར་བགྱིའོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། སའི་ལྷ་མོ་བརྟན་མའི་ལེའུ་ཞེས་བྱ་བ་སྟེ་བཅུ་པའོ།། །།དེ་ནས་གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང་ལྷན་ཅིག་ཏུ་སྟན་ལས་ལངས་ཏེ། གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ད་ལྟར་དང་མ་འོངས་པའི་དུས་ན། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། དགོན་པའི་ཕྱོགས་སམ། རིའི་སྨན་ལྗོངས་སམ། ཕོ་བྲང་འཁོར་གང་དུ་འབྱུང་བར་འགྱུར་བ་དེར་བཙུན་པ་བཅོམ་ལྡན་འདས་གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་བདག་གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་པོ་དེ་དག་དང་ལྷན་ཅིག་ཏུ་གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། དགོན་པའི་ཕྱོགས་སམ། རིའི་སྨན་ལྗོངས་སམ། ཕོ་བྲང་འཁོར་དེར་མཆི་བར་བགྱིའོ། །ལུས་མི་གདའ་བར་བགྱི་སྟེ་དགེ་སློང་ཆོས་སྨྲ་བ་དེ་བསྲུང་བར་བགྱིའོ། །ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཆད་པ་སྤང་བ་དང་།ཞི་བ་དང་བདེ་ལེགས་སུ་འགྱུར་བར་བགྱིའོ། །སྐྱེས་པའམ་བུད་མེད་དམ་ཁྱེའུ་འམ་བུ་མོ་ཆོས་ཉན་པ་དེ་དག་ཐམས་ཅད་དང་། གང་སུ་དག་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལས་ཐ་ན་ཚིག་བཞི་པའི་ཚིགས་སུ་བཅད་པ་གཅིག་ཉན་པ་དང་ཐ་ན་ཚིག་གཅིག་དང་། ཐ་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལས་བྱང་ཆུབ་སེམས་དཔའི་མིང་གཅིག་གམ། དེ་བཞིན་གཤེགས་པའི་མཚན་
གཅིག་ཐོས་པར་གྱུར་ཏེ། གཟུང་བ་དང་ཐ་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདིའི་མིང་ཐོས་པར་གྱུར་ཏེ། གཟུང་བ་དེ་དག་ཐམས་ཅད་ཀྱང་ཀུན་ཏུ་བསྲུང་བར་བགྱིའོ། །ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཆད་པ་སྤང་བ་དང་། ཞི་བ་དང་བདེ་ལེགས་སུ་འགྱུར་བར་བགྱིའོ། །རིགས་དེ་དག་དང་། ཁྱིམ་དེ་དག་དང་། གྲོང་དེ་དག་དང་། གྲོང་ཁྱེར་དེ་དག་དང་། གྲོང་རྡལ་དེ་དག་དང་། དགོན་པ་དེ་དག་དང་། ཕོ་བྲང་འཁོར་དེ་དག་ཀྱང་ཀུན་ཏུ་བསྲུང་བར་བགྱིའོ། །ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཆད་པ་སྤང་བ་དང་། ཞི་བ་དང་བདེ་ལེགས་སུ་འགྱུར་བར་བགྱིའོ། །བཙུན་པ་བཅོམ་ལྡན་འདས་རྒྱུ་གང་དག་གིས། བདག་གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་ཞེས་མིང་དུ་ཆགས་པར་གྱུར་ཅེ་ན། འདི་ནི་བཙུན་པ་བཅོམ་ལྡན་འདས་ཉིད་ཀྱི་མངོན་སུམ་མོ། །བཙུན་པ་བཅོམ་ལྡན་འདས་བདག་གིས་ཆོས་ཐམས་ཅད་འཚལ་ཏོ། །ཆོས་ཐམས་ཅད་ཡོངས་སུ་འཚལ་ཏོ། །ཆོས་ཐམས་ཅད་ཁོང་དུ་ཆུད་དོ། །ཆོས་ཐམས་ཅད་ཇི་སྙེད་པ་དང་། ཆོས་ཐམས་ཅད་ཇི་ལྟ་བ་དང་གནས་པ་གང་ལགས་པ་དང་། ཆོས་ཐམས་ཅད་ཀྱི་རིགས་གང་ལགས་པ་དང་། བཙུན་པ་བཅོམ་ལྡན་འདས་ཆོས་ཐམས་ཅད་བདག་ལ་མངོན་སུམ་མོ། །བཙུན་པ་བཅོམ་ལྡན་འདས་ཆོས་ཐམས་ཅད་ལ་བདག་གི་ཡེ་ཤེས་སྣང་བ་བསམ་གྱིས་མི་ཁྱབ་བོ། །ཡེ་ཤེས་ཀྱི་གསལ་བ་བསམ་གྱིས་མི་ཁྱབ་བོ། །ཡེ་ཤེས་ཀྱི་རྒྱུ་བ་བསམ་གྱིས་མི་ཁྱབ་བོ། །ཡེ་ཤེས་ཀྱི་ཕུང་པོ་བསམ་གྱིས་མི་ཁྱབ་བོ། །བཙུན་པ་བཅོམ་ལྡན་འདས་ཆོས་ཐམས་ཅད་ལ་བདག་གི་ཡེ་ཤེས་ཀྱི་ཡུལ་འཇུག་པ་བསམ་གྱིས་མི་ཁྱབ་བོ། །བཙུན་པ་བཅོམ་ལྡན་འདས་ཇི་ལྟར་བདག་ཆོས་ཐམས་ཅད་ཡང་དག་པར་འཚལ་བ་དང་། ཡང་དག་པར་ཡོངས་སུ་བརྟགས་པ་དང་། ཡང་དག་པར་ཡོངས་སུ་འཚལ་བ་དང་། ཡང་དག་པར་རྣམ་པར་བལྟས་པ་དང་། ཡང་དག་པར་ཁོང་དུ་ཆུད་པའི་རྒྱུ་དེས་ན། བཙུན་པ་བཅོམ་ལྡན་འདས་བདག་གནོད་སྦྱིན་གྱི་སྡེ་དཔོན་ཆེན་པོ་ཡང་
དག་ཤེས་ཞེས་མིང་དུ་ཆགས་སོ། །བཙུན་པ་བཅོམ་ལྡན་འདས་བདག་གིས་དགེ་སློང་ཆོས་སྨྲ་བ་དེའི་ཚིག་བརྒྱན་པར་བགྱི་བའི་སླད་དུ་སྤོབས་པ་ཉེ་བར་བསྒྲུབ་པར་བགྱིའོ། །ཇི་ལྟར་ཆོས་སྨྲ་བ་དེའི་ལུས་མི་ངལ་བར་འགྱུར་བ་དང་། ལུས་ཀྱི་དབང་པོ་བདེ་བར་འགྱུར་བ་དང་། རབ་ཏུ་དགའ་བ་སྐྱེ་བར་འགྱུར་བ་དང་། གང་གི་སླད་དུ་སངས་རྒྱས་བརྒྱ་སྟོང་དག་ལ་དགེ་བའི་རྩ་བ་བསྐྲུན་པའི་སེམས་ཅན་རྣམས་ཀྱི་དོན་གྱི་སླད་དུ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་འཛམ་བུའི་གླིང་དུ་ཡུན་རིང་དུ་གནས་ཤིང་མྱུར་དུ་ནུབ་པར་མི་འགྱུར་བ་དང་། སེམས་ཅན་རྣམས་ཀྱང་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་པར་འགྱུར་བ་དང་། ཡེ་ཤེས་ཀྱི་ཕུང་པོ་བསམ་གྱིས་མི་ཁྱབ་པ་ཐོབ་པར་འགྱུར་བ་དང་། ཤེས་རབ་དང་ལྡན་པར་འགྱུར་བ་དང་། བསོད་ནམས་ཀྱི་ཕུང་པོ་རབ་ཏུ་འཛིན་པར་འགྱུར་བ་དང་། མ་འོངས་པའི་དུས་ན་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་ལྷ་དང་མིའི་བདེ་བ་བསམ་གྱིས་མི་ཁྱབ་པ་མྱོང་བར་འགྱུར་བ་དང་། དེ་བཞིན་གཤེགས་པ་དང་འགྲོགས་པར་འགྱུར་བ་དང་། མ་འོངས་པའི་དུས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དང་། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་གྱི་སྡུག་བསྔལ་ཐམས་ཅད་ཤིན་ཏུ་རྒྱུན་ཆད་པར་འགྱུར་བར་དེའི་སྤུའི་བུ་ག་རྣམས་སུ་མདངས་སྩལ་བར་བགྱིའོ། །དེའི་ལུས་ལ་མཐུ་དང་སྟོབས་དང་བརྩོན་འགྲུས་ཆེན་པོ་བསྐྱེད་པར་བགྱིའོ། །དེའི་ཡེ་ཤེས་ཀྱི་སྣང་བ་བསམ་གྱིས་མི་ཁྱབ་པར་བགྱིའོ། །དེའི་དྲན་པ་ཁོང་དུ་ཆུད་པར་བགྱིའོ། །དེ་ཆེར་སྤྲོ་བར་བགྱིའོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། ཡང་དག་ཤེས་ཀྱི་ལེའུ་ཞེས་བྱ་བ་སྟེ་བཅུ་གཅིག་པའོ།། །།འཕགས་པ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ཞེས་བྱ་བ་ཐེག་པ་ཆེན་པོའི་མདོ།བམ་པོ་བཞི་པ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མེ་ཏོག་ཡོན་ཏན་རྒྱ་མཚོ་བཻ་ཌཱུཪྱ་དང་གསེར་གྱི་རི་ཁ་དོག་བཟང་
པོ་གསེར་དུ་སྣང་བའི་དཔལ་དེ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་སྐུ་ལེགས་པར་བརྒྱན་པ། གང་ཆོས་ཀྱི་སྒྲོན་མ་འདི་འབར་བར་མཛད་པ་ཤཱཀྱ་ཐུབ་པ་དེ་ལ་ཕྱག་འཚལ་ལོ། །ལྷ་མོ་ཆེན་མོ་དཔལ་ཡོན་ཏན་གྱི་འབྲུ་དང་བཀྲ་ཤིས་པ་དཔག་ཏུ་མེད་པ་ཕུན་སུམ་ཚོགས་པ་དེ་ལ་ཕྱག་འཚལ་ལོ། །ལྷ་མོ་ཆེན་མོ་དབྱངས་ཅན་ཤེས་རབ་ཀྱི་ཡོན་ཏན་དཔག་ཏུ་མེད་པ་འདུས་པ་དེ་ལ་ཕྱག་འཚལ་ལོ། །ཡང་དེའི་ཚེ་དེའི་དུས་ན་རྒྱལ་པོ་སྟོབས་ཀྱི་དབང་པོའི་ཏོག་གི་བུ་རྒྱལ་པོ་མཛེས་པའི་ཏོག་དབང་བསྐུར་ནས་རིང་པོར་མ་ལོན་པ་རྒྱལ་སྲིད་ལ་གསར་དུ་གནས་པ་ལ་འདི་སྐད་ཅེས་སྨྲས་སོ། །བུ་གང་ངས་སྔོན་དབང་བསྐུར་ནས་རིང་པོར་མ་ལོན་པ་ཞིག་ན། ཡབ་མཆོག་གི་དབང་པོའི་ཏོག་ལས་བླངས་པ་རྒྱལ་པོའི་བསྟན་བཅོས་ལྷའི་དབང་པོའི་དམ་ཚིག་ཅེས་བྱ་བ་ཞིག་ཡོད་དེ། ངས་རྒྱལ་པོའི་བསྟན་བཅོས་ལྷའི་དབང་པོའི་དམ་ཚིག་དེས་ལོ་ཉི་ཁྲིའི་བར་དུ་རྒྱལ་པོ་ཉིད་བྱས་པར་གྱུར་ཏེ། ཐ་ན་སེམས་ཀྱི་སྐད་ཅིག་གཅིག་ཙམ་གྱི་ཚོད་ཀྱང་སྔོན་ཆོས་མ་ཡིན་པས་ཕྱོགས་འགའ་ཞིག་ལ་གནས་པར་མ་ཤེས་སོ། །བུ་རྒྱལ་པོའི་བསྟན་བཅོས་ལྷའི་དབང་པོའི་དམ་ཚིག་ཅེས་བྱ་བ་དེ་གང་ཞེ་ན། དེས་ན་རིགས་ཀྱི་ལྷ་མོ་དེའི་ཚེ་དེའི་དུས་ན་རྒྱལ་པོ་སྟོབས་ཀྱི་དབང་པོའི་ཏོག་གི་བུ་རྒྱལ་པོ་མཛེས་པའི་ཏོག་ལ་རྒྱལ་པོའི་བསྟན་བཅོས་ལྷའི་དབང་པོའི་དམ་ཚིག་ཅེས་བྱ་བའི་ཚིགས་སུ་བཅད་པ་འདི་དག་གིས་རྒྱ་ཆེར་ཡང་དག་པར་རབ་ཏུ་བསྟན་ཏོ། །སེམས་ཅན་ཀུན་ལ་ཕན་བྱེད་པ། །ཐེ་ཚོམ་ཐམས་ཅད་གཅོད་པ་པོ། །ཉེས་བྱས་ཐམས་ཅད་འཇིག་བྱེད་པ། །རྒྱལ་པོའི་བསྟན་བཅོས་བཤད་པར་བྱ། །རྒྱལ་པོ་ཐམས་ཅད་སོ་སོ་ནས། ། དགའ་བའི་སེམས་སུ་འགྱུར་བྱོས་ལ། །ལྷ་ཡི་དབང་པོའི་དམ་ཚིག་ཀུན། །ཐལ་མོ་སྦྱར་ཏེ་མཉན་པར་བྱོས། །རྡོ་རྗེའི་འབྱུང་གནས་རི་དབང་འདིར། །ལྷ་ཡི་དབང་པོ་འདུས་པ་ན། །ཚངས་དབང་ལ་ནི་དྲི་བའི་ཕྱིར། །འཇིག་རྟེན་སྐྱོང་བ་རྣམས་ཀྱང་ལངས། །ཁྱོད་ནི་ལྷ་གཙོ་ཚངས་
པ་སྟེ། །ཁྱོད་ནི་ལྷ་རྣམས་དབང་ཕྱུག་ལགས། །ཁྱོད་ནི་བདག་ཅག་ཐེ་ཚོམ་གཅོད། །བདག་ཅག་དོགས་པ་གཅད་དུ་གསོལ། །མིར་སྐྱེས་པ་ཡི་རྒྱལ་པོ་ལ། །ཇི་ལྟ་བུར་ན་ལྷ་ཞེས་བགྱི། །གང་གི་རྒྱུས་ན་རྒྱལ་པོ་ལ། །ལྷ་སྲས་ཞེས་ནི་བགྱི་བར་འགྱུར། །གལ་ཏེ་ལྷ་ནི་ཇི་ལྟ་བུར། །མི་ཡི་འཇིག་རྟེན་འདིར་སྐྱེ་ཞིང་། །མི་བདག་གྱུར་ཏེ་མི་རྣམས་ལ། །རྒྱལ་པོ་ཉིད་ནི་བགྱིད་པར་འགྱུར། །འཇིག་རྟེན་སྐྱོང་བས་ཚངས་དབང་ལ། །དེ་སྐད་ཡོངས་སུ་དྲིས་པ་དང་། །ལྷ་ཡི་གཙོ་བོ་ཚངས་པ་དེས། །འཇིག་རྟེན་སྐྱོང་ལ་འདི་སྐད་སྨྲས། །དེ་ལྟར་འཇིག་རྟེན་སྐྱོང་རྣམས་ཀྱིས། །ད་ལྟར་བདག་ལ་དྲིས་པས་ན། །སེམས་ཅན་ཀུན་ལ་ཕན་པའི་ཕྱིར། །བསྟན་བཅོས་དམ་པ་ཁོ་བོས་བསྟན། །མི་ཡི་གནས་སུ་སྐྱེས་པ་ཡི། །རྒྱལ་པོ་རྣམས་ཀྱི་སྐྱེ་བ་དང་། །རྒྱུ་གང་གིས་ན་ཡུལ་རྣམས་སུ། །རྒྱལ་པོར་འགྱུར་བ་བཤད་པར་བྱ། ། ལྷ་དབང་རྣམས་ཀྱིས་བྱིན་རླབས་ཀྱིས། །མ་ཡི་རུམ་དུ་འཇུག་འགྱུར་ཏེ། །ལྷ་ཡིས་སྔར་ནི་བྱིན་བརླབས་ནས། །ཕྱི་ནས་མངལ་དུ་འཇུག་པར་འགྱུར། །མི་ཡི་འཇིག་རྟེན་སྐྱེས་ཀྱང་ནི། །མི་ཡི་དབང་པོར་གྱུར་པ་ཡིན། །ལྷ་ལས་སྐྱེས་པར་གྱུར་པས་ན། །དེ་ནི་ལྷ་ཡི་སྲས་ཞེས་བྱ། །ཁྱོད་ནི་ལྷ་ཀུན་བུ་ཡིན་ཞེས། །སུམ་ཅུ་རྩ་གསུམ་ལྷ་དབང་གིས། །རྒྱལ་པོའི་སྐལ་བ་བྱིན་ནས་ནི། །མི་རྣམས་ཀྱི་ནི་དབང་པོར་སྤྲུལ། །ཉེས་པ་བྱས་པ་རྣམ་འགོག་པ། །ཆོས་མ་ཡིན་པ་གཞིག་པ་དང་། །སེམས་ཅན་ལེགས་བྱེད་དགོད་པ་དང་། ། ལྷ་ཡི་གནས་སུ་དགྱེ་བའི་ཕྱིར། །མི་ཡི་དབང་པོ་མི་ཤས་དང་། །ལྷ་ཡི་ཤས་དང་དྲི་ཟའི་ཤས། །གདོལ་པའི་ཤས་དང་སྲིན་ཤས་ཀྱིས། །ཉེས་པར་བྱེད་པ་ཟློག་པར་བྱེད། །ལེགས་པར་བྱ་བ་བྱེད་རྣམས་ལ། །མི་ཡི་དབང་པོ་ཕ་མའི་ཤས། །རྣམ་སྨིན་འབྲས་བུ་བསྟན་པའི་ཕྱིར། །ལྷ་ཡི་རྒྱལ་པོ་བྱིན་གྱིས་བརླབས། །ཚེ་འདིའི་ལེགས་པར་བྱས་པ་དང་། །ཉེས་པར་བྱས་པའི་ལས་རྣམས་ཀྱི། །རྣམ་སྨིན་འབྲས་བུ་བསྟན་པའི་ཕྱིར། །ལྷ་ཡི་རྒྱལ་པོ་བྱིན་གྱིས་བརླབས། །ཡུལ་ན་ཉེས་བྱེད་གནས་པ་དག །གང་ཚེ་རྒྱལ་པོས་ཡལ་བོར་ཞིང་། །
སྡིག་པ་ཅན་གྱི་སྐྱེ་བོ་ལ། །མཐུན་པའི་ཆད་པས་མི་གཅོད་ཅིང་། །ཉེས་པར་བྱས་པ་ཡལ་བོར་བ། །དེ་ཚེ་ཆོས་མིན་ཤིན་ཏུ་འཕེལ། །འཐབ་མོ་དང་ནི་གཡོ་རྣམས་ཀྱང་། །ཡུལ་འཁོར་དེ་ནི་ཕྱིར་ཕྱིར་འབྱུང་། །སུམ་ཅུ་རྩ་གསུམ་ཁང་པ་ན། །ལྷ་ཡི་དབང་པོ་འཁྲུག་པར་འགྱུར། །ཡུལ་ན་ཉེས་བྱེད་གནས་པ་དག །གང་ཚེ་རྒྱལ་པོས་ཡལ་བོར་བ། །དེ་ཚེ་གཡོ་ནི་མི་བཟད་པ། །དྲག་པོ་རྣམས་ཀྱིས་ཡུལ་འཇོམས་འགྱུར། །ཕ་རོལ་དམག་ཚོགས་ལྷགས་ནས་སུ། །ཡུལ་འཁོར་དེ་ནི་རྣམ་པར་འཇིག །ལོངས་སྤྱོད་རྣམས་དང་རིགས་ཀྱང་འཇིག །གང་གིས་ནོར་བསགས་ཡོད་པ་ཡང་། །གཡོ་བྱེད་རྣམ་པ་མང་པོ་ཡིས། །ཕན་ཚུན་དུ་ནི་འཕྲོག་པར་འགྱུར། །བྱ་བ་གང་གིས་རྒྱལ་པོ་ཉིད། །བྱ་བ་དེ་ནི་མི་བྱེད་ན། །གླང་ཆེན་དབང་པོས་རྫིང་བུ་བཞིན། །རང་གི་ཡུལ་འཁོར་རྣམ་པར་འཇིག །མ་རུངས་པ་ཡི་རླུང་ལྡང་ཞིང་། །མ་རུངས་པ་ཡི་ཆར་པ་འབབ། །ཉི་མ་དང་ནི་ཟླ་བ་དང་། །གཟའ་དང་རྒྱུ་སྐར་མ་རུངས་འགྱུར། །རྒྱལ་པོས་ཡལ་བར་བོར་ན་དེར། །ས་བོན་ལོ་ཏོག་མེ་ཏོག་འབྲས། །ལེགས་པར་སྨིན་པར་མི་འགྱུར་ཞིང་། །མུ་གེ་དག་ཀྱང་འབྱུང་བར་འགྱུར། ། ཡུལ་ན་ཉེས་བྱེད་གནས་པ་དག །གང་ཚེ་རྒྱལ་པོས་ཡལ་བོར་བ། །དེ་ཚེ་ལྷ་རྣམས་ཁང་པ་ན། །ཡིད་ནི་དགའ་བར་མི་འགྱུར་རོ། །ལྷ་རྒྱལ་དབང་པོས་དེ་དག་ཀུན། །རྒྱལ་འདི་ཆོས་དང་མི་ལྡན་ཏེ། །ཆོས་མིན་ཕྱོགས་ལ་གནས་པ་ཞེས། །ཕན་ཚུན་དུ་ནི་སྨྲ་བར་འགྱུར། །རྒྱལ་འདིས་རིང་པོར་མི་ཐོགས་པར། །ལྷ་རྣམས་འཁྲུག་པར་བྱེད་པར་འགྱུར། །ལྷ་རྣམས་རབ་ཏུ་འཁྲུགས་པས་ན། །དེ་ཡི་ཡུལ་ནི་རྣམ་པར་འཇིག །ཡུལ་དུ་ཆོས་མིན་འབྱུང་འགྱུར་ཞིང་། །མཚོན་ཆས་ཀྱང་ནི་འཇིག་པར་འགྱུར། །གཡོ་རྣམས་དང་ནི་འཐབ་མོ་དང་། །ནད་ཀྱང་ཀུན་ཏུ་འབྱུང་བར་འགྱུར། །ལྷ་ཡི་དབང་པོ་རབ་ཁྲོས་ཤིང་། །ལྷ་རྣམས་ཀྱིས་ཀྱང་ཡལ་བར་འདོར། །ཡུལ་འཁོར་དེ་ནི་འཇིག་པར་འགྱུར། །རྒྱལ་པོ་དེ་ནི་མྱ་ངན་རྙེད། །སྤུན་ནམ་ཡང་ན་བུ་ཡང་རུང་། །སྡུག་པ་རྣམས་དང་བྲལ་བར་འགྱུར། །
སྡུག་པའི་ཆུང་མ་དང་ཡང་བྲལ། །ཡང་ན་བུ་མོ་འཆི་བར་འགྱུར། །སྐར་མདའ་དག་ཀྱང་ལྟུང་བར་འགྱུར། །དེ་བཞིན་ཉི་མ་འདྲ་བ་འབྱུང་། །ཕ་རོལ་གྱི་ནི་དམག་ཚོགས་དང་། །མུ་གེ་ཤིན་ཏུ་འབྱུང་བར་འགྱུར། །དེ་ཡི་བློན་པོ་ཕངས་པ་དང་། །གླང་པོ་ཕངས་པ་འཆི་བར་འགྱུར། ། དེ་ཡི་འོག་ཏུ་རྔ་མོ་ནི། །ཕངས་པ་དག་ཀྱང་འཆི་བར་འགྱུར། །ཁྱིམ་དང་ལོངས་སྤྱོད་ནོར་རྣམས་ཀྱང་། །ཕན་ཚུན་དུ་ནི་འཕྲོག་པར་འགྱུར། །ཡུལ་ཡུལ་དུ་ནི་མཚོན་ཆ་ཡིས། །ཕན་ཚུན་དག་ཏུ་འདེབས་པར་འགྱུར། །འཐབ་མོ་དག་དང་རྩོད་དང་གཡོ། །ཡུལ་རྣམས་སུ་ནི་འབྱུང་བར་འགྱུར། །ཡུལ་འཁོར་དུ་ནི་གདོན་འཇུག་ཅིང་། །མི་བཟད་པ་ཡི་ནད་ཀྱང་འབྱུང་། །དེ་ཡི་འོག་ཏུ་སྦྱིན་གནས་ཀྱང་། །ཆོས་དང་ལྡན་པ་མ་ཡིན་འགྱུར། །དེ་ཡི་འཁོར་དང་བློན་པོ་ཡང་། །ཆོས་དང་ལྡན་པ་མ་ཡིན་འགྱུར། །ཆོས་དང་མི་ལྡན་སྐྱེ་བོ་ལ། །དེ་ཡི་འོག་ཏུ་མཆོད་བྱེད་འགྱུར། །ཆོས་དང་ལྡན་པའི་སེམས་ཅན་ལ། །རྟག་ཏུ་ཆད་པས་གཅོད་པར་འགྱུར། །ཆོས་དང་མི་ལྡན་སྐྱེ་བོ་བཀུར། །ཆོས་ལྡན་ཆད་པས་བཅད་པ་ན། །དེར་ནི་ཆུ་དང་རྒྱུ་སྐར་རླུང་། །རྣམ་གསུམ་རྣམ་པར་འཁྲུག་པར་འགྱུར། །ཆོས་མིན་སྐྱེ་བོ་བཟུང་བས་ན། །དམ་ཆོས་རོ་ཡི་སྙིང་པོ་མདངས། །སེམས་ཅན་མདངས་དང་ས་ཡི་བཅུད། །དངོས་པོ་རྣམ་གསུམ་རྣམ་པར་འཇིག །སྐྱེ་བོ་ངན་པ་རབ་བཀུར་ཅིང་། །སྐྱེ་བོ་དམ་པ་སྨད་པས་ན། །འཆི་དང་ལྕེ་འབབ་མུ་གེ་དང་། །རྣམ་པ་གསུམ་ནི་དེར་འབྱུང་འགྱུར། །འབྲས་བུ་ལོ་ཏོག་རོ་དང་མདངས། །དེ་ཡི་འོག་ཏུ་མེད་པར་འགྱུར། །སེམས་ཅན་ནད་པ་མང་པོ་དག །ཡུལ་རྣམས་སུ་ནི་འབྱུང་བར་འགྱུར། །མངར་ཞིང་ཆེ་བའི་འབྲས་བུ་དག །ཡུལ་རྣམས་ན་ནི་ཡོད་པ་ཡང་། །ཁ་བ་དང་ནི་ཚ་བ་དང་། །ཆུང་བ་དག་ནི་ཉིད་དུ་འགྱུར། །རྩེ་དང་རྒོད་དང་དགའ་བ་དང་། །སྔན་ཆད་དགའ་བའི་དངོས་པོ་དག །དགའ་བའི་ཉམས་ནི་མི་དགར་འགྱུར། །ཉོན་མོངས་བརྒྱ་ཡིས་རྣམ་པར་འཁྲུགས། །ལོ་ཏོག་རྣམས་དང་འབྲས་བུ་ཡི། །སྣུམ་དངོས་ཁུ་བ་ཟད་པས་ན། །ལུས་དང་ཁམས་དང་དབང་པོ་ལ། །དེ་ལྟར་ཚིམ་པར་མི་འགྱུར་
རོ། །སེམས་ཅན་རྣམས་ནི་མདོག་ངན་ཞིང་། །མཐུ་ཆུང་ཤིན་ཏུ་རིད་པར་འགྱུར། །ཁ་ཟས་མང་པོ་ཟོས་ཀྱང་ནི། །ཚིམ་པར་འགྱུར་བ་མ་ཡིན་ནོ། །སྟོབས་དང་མཐུ་དང་བརྩོན་འགྲུས་དང་། །དེ་ཡི་འོག་ཏུ་མེད་པར་འགྱུར། །སེམས་ཅན་བརྩོན་འགྲུས་ཉམས་པ་དག །ཡུལ་རྣམས་སུ་ནི་འབྱུང་བར་འགྱུར། །སྣ་ཚོགས་ནད་ཀྱིས་གཟིར་བ་ཡི། །སེམས་ཅན་ནད་མང་འབྱུང་བར་འགྱུར། །སྲིན་པོ་སྣ་ཚོགས་ལས་གྱུར་པའི། །གཟའ་དང་རྒྱུ་སྐར་འབྱུང་བར་འགྱུར། །ཆོས་མིན་ཕྱོགས་ལ་རབ་གནས་ཏེ། །རྒྱལ་པོ་ཆོས་དང་མི་ལྡན་པས། ། འཇིག་རྟེན་གསུམ་གྱི་དཀྱིལ་འཁོར་ན། །ཁམས་གསུམ་རྣམ་པར་འཇིག་པར་འགྱུར། །གང་ཚེ་རྒྱལ་པོའི་ཕྱོགས་གནས་ཏེ། །ཉེས་བྱེད་ཡལ་བར་འདོར་བའི་ཚེ། །འདི་འདྲའི་ཉེས་པ་དུ་མ་དག །ཡུལ་རྣམས་སུ་ནི་འབྱུང་བར་འགྱུར། །དགོས་པ་གང་ཕྱིར་ལྷ་དབང་གིས། ། རྒྱལ་པོ་བྱིན་གྱིས་བརླབས་པ་ཡི། །རྒྱལ་པོ་ཉིད་ནི་མི་བྱེད་ཅིང་། །ཉེས་བྱེད་ཡལ་བར་འདོར་ན་ནི། །ལེགས་པར་བྱས་པས་སེམས་ཅན་རྣམས། །ལྷ་ཡི་གནས་སུ་ལྷར་ཡང་སྐྱེ། །ཉེས་པར་བྱས་པས་ཡི་དགས་དང་། །སེམས་ཅན་དམྱལ་དང་དུད་འགྲོར་སྐྱེ། །གང་ཚེ་རྒྱལ་པོ་ཡུལ་རྣམས་ན། །ཉེས་བྱེད་ཡལ་བར་འདོར་བའི་ཚེ། །སུམ་ཅུ་རྩ་གསུམ་ལྷ་གནས་ནས། །ཉེས་པར་བྱས་པས་ལྟུང་བར་འགྱུར། །རྒྱལ་པོ་ཉིད་ནི་མི་བྱེད་ན། །དེ་ནི་བུ་ཡང་མ་ཡིན་ལ། །ལྷ་ཡི་རྒྱལ་པོ་ཕ་རྣམས་ཀྱིས། །གནས་ལ་ཉེས་དང་བཅས་པར་འགྱུར། ། གཡོ་ནི་ཤིན་ཏུ་མི་བཟད་པས། །གང་ཚེ་ཡུལ་འཁོར་འཇིག་འགྱུར་བ། །དེ་ཕྱིར་ལྷ་ཡི་དབང་པོ་ཡི། །མི་གནས་རྒྱལ་པོ་བྱིན་གྱིས་བརླབས། །ཉེས་པ་བྱས་ཞི་བྱ་བའི་ཕྱིར། །ལེགས་པར་བྱེད་ལ་འཛུད་པ་སྟེ། །ཚེ་འདི་ལ་ནི་སེམས་ཅན་ལ། །རྣམ་སྨིན་བསྐྱེད་པ་རྒྱལ་པོ་ཡིན། །ལེགས་བྱས་དང་ནི་ཉེས་བྱས་ཀྱི། །ལས་ཀྱི་རྣམ་པར་སྨིན་པའི་འབྲས། །རྣམ་པ་ཐ་དད་བསྟན་པའི་ཕྱིར། །བྱེད་པ་གང་ཡིན་རྒྱལ་པོར་བརྗོད། །བདག་གི་དོན་དང་གཞན་དོན་དང་། །ཡུལ་གྱི་ཆོས་ཀྱི་དོན་གྱི་ཕྱིར། །ལྷ་ཚོགས་རྣམས་ཀྱི་བྱིན་གྱིས་བརླབས། །ལྷ་རྣམས་
དག་ཀྱང་རྗེས་ཡི་རང་། །ཡུལ་འཁོར་རྣམས་ན་སྐྱེ་བོ་ནི། །སྡིག་ཅན་གཡོན་ཅན་འདུལ་བ་དང་། །ཡུལ་གྱི་ཆོས་ཀྱི་དོན་གྱི་ཕྱིར། །སྲོག་དང་རྒྱལ་སྲིད་རྣམས་ཀྱང་བཏང་། །ཆོས་མ་ཡིན་པས་བཟོད་བྱེད་ཅིང་། །ཤེས་བཞིན་ཡལ་བར་འདོར་བ་ནི། །ཡུལ་ན་འཇིགས་པ་མི་བཟད་པ། །དེ་འདྲ་གཞན་ནི་ཡོད་མ་ཡིན། །ཇི་ལྟར་གཡོ་རྣམས་བྱུང་བ་ལ། །གཡོ་བྱེད་ཆད་པས་མ་བཅད་ན། །ཡུལ་དུ་ཤིན་ཏུ་མི་བཟད་པའི། །གཡོ་རྣམས་ཕྱིར་ཞིང་འབྱུང་བར་འགྱུར། །གླང་ཆེན་རྣམས་ཀྱི་རྫིང་ཆེན་བཞིན། །ཡུལ་འཁོར་དེ་ནི་རྣམ་པར་འཇིག ། ལྷ་དབང་རྣམས་ཀྱང་ཁྲོ་བར་འགྱུར། །ལྷ་ཡི་གནས་ནི་རྣམ་པར་འཇིག །ཡུལ་དུ་དངོས་པོ་ཐམས་ཅད་ནི། །མ་རུངས་པར་ཡང་འགྱུར་བས་ན། །དེ་ཕྱིར་སྡིག་པ་བྱེད་པ་རྣམས། །ཉེས་པའི་རིམ་བཞིན་གདུལ་བར་བྱ། །ཆོས་ཀྱིས་ཡུལ་འཁོར་བསྐྱང་བར་བྱ། །ཆོས་མ་ཡིན་པ་སྤྱད་མི་བྱ། །སྲོག་ཀྱང་ཡོངས་སུ་གཏང་བྱ་ཞིང་། །ཉེ་འཁོན་བྱ་བར་མི་བྱའོ། །སྐྱེ་བོ་གཉེན་དང་སྐྱེ་བོ་གཞན། །ཡུལ་འཁོར་སྐྱེ་བོ་ཐམས་ཅད་ལ། །རྒྱལ་པོས་ཕྱོགས་ཀྱང་གཅིག་བྱ་ཡི། །ཕྱོགས་སུ་ལྷུང་བར་གྱུར་ཏ་རེ། །རྒྱལ་པོ་ཆོས་དང་ལྡན་པ་ཡི། ། གྲགས་པ་འཇིག་རྟེན་གསུམ་གང་སྟེ། །སུམ་ཅུ་གསུམ་གྱི་གནས་རྣམས་ན། །ལྷ་ཡི་དབང་པོ་དགར་འགྱུར་ཏེ། །འཛམ་བུའི་གླིང་ན་ངེད་ཀྱི་བུ། །འདི་ལྟར་ཆོས་ལྡན་རྒྱལ་པོ་ཡིན། །ཆོས་ཀྱི་ཡུལ་འཁོར་དེར་བསྟན་ནས། །ལེགས་པར་བྱེད་ལ་སྐྱེ་བོ་བཀོད། །རྒྱལ་པོ་དེ་ནི་ལེགས་བྱེད་པས། །སྐྱེ་བོ་དག་ནི་འདིར་འགྱེད་དེ། །ལྷ་དང་ལྷ་ཡི་བུ་རྣམས་ཀྱིས། །ལྷ་གནས་གང་བར་བྱེད་སྙམ་མོ། །ཆོས་ཀྱི་ཡུལ་འཁོར་དེར་བསྟན་པས། །རྒྱལ་པོ་རྣམས་ནི་རབ་ཏུ་དགའ། །ལྷ་དབང་རབ་ཏུ་དང་གྱུར་པས། །མི་ཡི་རྒྱལ་པོ་དེ་ལ་བསྲུང་། །ཉི་ཟླ་དང་ནི་དེ་བཞིན་དུ། །རྒྱུ་སྐར་ལེགས་པར་རྒྱུ་བར་འགྱུར། །རླུང་ཡང་དུས་སུ་ལྡང་འགྱུར་ཞིང་། །ཆར་པའང་དུས་སུ་འབབ་པར་འགྱུར། །ལྷ་གནས་རྣམས་དང་དེ་བཞིན་དུ། །ཡུལ་འཁོར་རྣམས་སུ་ལོ་ལེགས་བྱེད། །ལྷ་དང་ལྷ་ཡི་བུ་རྣམས་ཀྱིས། །ལྷ་ཡི་གནས་རྣམས་གང་
བར་བྱེད། །དེ་ལྟ་བས་ན་རྒྱལ་པོ་ཡི། །བདག་གིས་ཕངས་པའི་སྲོག་བཏང་གིས། །བདག་གིས་འཇིག་རྟེན་བདེར་འགྱུར་བ། །དཀོན་མཆོག་ཆོས་ནི་མི་བཏང་སྟེ། །ཡོན་ཏན་རྣམས་ཀྱིས་གང་བརྒྱན་པ། །ཆོས་དང་ལྡན་པས་བསྟེན་པར་བྱ། །རང་གིས་སྐྱེ་བོ་རྟག་དགའ་བ། །རྟག་ཏུ་སྡིག་པ་རྣམ་པར་སྤངས། །ཆོས་ཀྱིས་ཡུལ་འཁོར་བསྐྱང་བར་བྱ། །ཆོས་ཀྱང་ཡང་དག་བསྟན་པར་བྱ། །ལེགས་པར་བྱེད་ལ་སེམས་ཅན་དགོད། །ཉེས་བྱེད་ལས་ནི་བཟློག་པར་བྱ། །གང་ཚེ་སྡིག་པ་བྱེད་པ་རྣམས། །ཚུལ་བཞིན་འདུལ་བར་བྱེད་པའི་ཚེ། །ཡུལ་འཁོར་དུ་ནི་ལོ་ལེགས་ཤིང་། །རྒྱལ་པོ་གཟི་བརྗིད་ལྡན་པར་འགྱུར། །རྒྱལ་པོ་གྲགས་དང་ལྡན་འགྱུར་ཞིང་། །སྐྱེ་དགུ་རྣམས་ཀྱང་བདེ་བར་སྐྱོང་། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས་རྒྱལ་པོའི་བསྟན་བཅོས་ལྷའི་དབང་པོའི་དམ་ཚིག་ཅེས་བྱ་བའི་ལེའུ་སྟེ་བཅུ་གཉིས་པའོ།། །།གང་ཚེ་འཁོར་ལོས་སྒྱུར་བའི་རྒྱལ་པོར་གྱུར། །དེ་ཚེ་རྒྱ་མཚོར་བཅས་པའི་ས་རྣམས་བཏང་། །གླིང་བཞི་རིན་ཆེན་གང་བར་བཅས་པ་ཡང་། །སྔོན་གྱི་རྒྱལ་བ་དག་ལ་ངས་ཕུལ་ལོ། །ཆོས་ཀྱི་སྐུ་དེ་ཡོངས་སུ་བཙལ་བའི་ཕྱིར། ། གང་སྔོན་ཡིད་དུ་འོང་ཞིང་ཕངས་པ་ཡི། །དངོས་པོ་དེ་དག་ངས་ནི་མ་བཏང་མེད། །བསྐལ་པ་དུ་མར་ཕངས་པའི་སྲོག་ཀྱང་བཏང་། །ཇི་ལྟར་སྔོན་གྱི་བསྐལ་པ་བསམ་ཡས་ན། །རིན་ཆེན་གཙུག་ཏོར་ཅན་གྱི་བདེ་བར་གཤེགས། །མྱ་ངན་འདས་པའི་བདེ་བར་གཤེགས་པ་དེའི། ། བསྟན་ལ་ལེགས་བྱུང་ཞེས་པའི་རྒྱལ་པོ་བྱུང་། །དེ་ནི་གླིང་བཞིའི་དབང་བའི་འཁོར་ལོས་སྒྱུར། །རྒྱ་མཚོར་ཐུག་པའི་ས་ལ་རབ་ཏུ་སྟོན། །རྒྱལ་དབང་གསུང་ཕྱིར་རྒྱལ་པོའི་ཕོ་བྲང་ན། །དེ་ཚེ་རྒྱལ་པོ་དམ་པ་གཉིད་ཀྱིས་ལོག །རྨི་ལམ་དུ་ནི་སངས་རྒྱས་ཡོན་ཏན་ཐོས། །ཆོས་སྨྲ་རིན་ཆེན་སོག་པ་གཉིད་དཀྱིལ་ན། །རྣམ་པར་ལྷང་ངེར་མདོ་སྡེའི་དབང་པོ་འདི། །རབ་ཏུ་འཆད་ཅིང་འདུག་པ་མཐོང་བར་གྱུར། །རྒྱལ་པོ་དེ་ནི་གཉིད་ཀྱིས་ལོག་ལས་སད། །དེ་ཡི་ལུས་ཀུན་དགའ་བས་ཁྱབ་པར་གྱུར། །མགུ་ནས་རྒྱལ་པོའི་ཁབ་ནས་མངོན་བྱུང་སྟེ། །ཉན་ཐོས་དགེ་འདུན་
མཆོག་གི་གནས་སུ་སོང་། །རྒྱལ་བའི་ཉན་ཐོས་རྣམས་ལ་མཆོད་བྱེད་ཅིང་། །འཕགས་པའི་དགེ་འདུན་འདི་ནི་རིན་ཆེན་སོག །ཡོན་ཏན་ལྡན་པའི་དགེ་སློང་གང་ཡོད་ཅེས། །ཆོས་སྨྲ་རིན་ཆེན་སོག་པ་ཀུན་ཏུ་དྲིས། །དེ་ཡི་ཚེ་ན་རིན་ཆེན་སོག་པ་ནི། །ཕུག་གཞན་ཞིག་གི་ནང་ན་འདུག་གྱུར་ཏེ། །མདོ་སྡེའི་རྒྱལ་པོ་འདི་ནི་རྣམ་སེམས་ལ། །ཁ་ཏོན་བྱེད་ཅིང་བདེ་བར་རབ་ཏུ་འདུག །དགེ་སློང་ཆོས་སྨྲ་རིན་ཆེན་སོག་པ་དེ། །ཕུན་སུམ་གཟི་བརྗིད་དཔལ་གྱིས་རབ་འབར་ཞིང་། །ཕུག་གཞན་ཞིག་གི་ནང་ན་འདུག་གྱུར་པ། །དེ་ཡི་ཚེ་ན་རྒྱལ་པོ་དེ་ལ་བསྟན། །འདི་ན་ཆོས་སྨྲ་རིན་ཆེན་སོག་པ་འདི། །རྒྱལ་པོའི་སྤྱོད་ཡུལ་ཟབ་མོ་འཛིན་པ་སྟེ། །གསེར་འོད་དམ་པ་ཞེས་ནི་བྱ་བ་ཡི། །མདོ་སྡེའི་དབང་པོའི་རྒྱལ་པོ་རྟག་ཏུ་སྟོན། །རིན་ཆེན་སོག་པའི་རྐང་ལ་ཕྱག་འཚལ་ཏེ། །རྒྱལ་པོ་ལེགས་པར་བྱུང་བས་འདི་སྐད་སྨྲས། །གསེར་འོད་དམ་པ་མདོ་སྡེའི་དབང་པོའི་རྒྱལ། །ཟླ་བ་ཉ་བའི་ཞལ་འདྲ་བཤད་དུ་གསོལ། །རྒྱལ་པོ་ལེགས་པར་བྱུང་བ་དེ་ཉིད་ལ། །རིན་ཆེན་སོག་པས་ཁས་ནི་བླངས་པས་ན། །སྟོང་གསུམ་པ་ཡི་འཇིག་རྟེན་ཐམས་ཅད་དུ། །ལྷ་རྣམས་ཐམས་ཅད་རབ་ཏུ་དགའ་བར་འགྱུར། །དེ་ཚེ་མི་ཡི་དབང་པོས་ས་ཕྱོགས་ནི། །གཙང་ཞིང་མཆོག་ཏུ་ཁྱད་པར་འཕགས་པ་དེར། །རིན་ཆེན་ཆུ་དང་སྤོས་ཆུས་ཆག་ཆག་བཏབ། །མེ་ཏོག་སིལ་མ་བཀྲམ་སྟེ་ཁྲི་བཤམས་ནས། །རྒྱལ་པོས་ཁྲི་དེ་གདུགས་དང་རྒྱལ་མཚན་དང་། །དར་ཡུག་སྟོང་ཕྲག་དུ་མས་ལེགས་པར་བརྒྱན། །རྒྱལ་པོས་ཁྲི་དེར་ཙན་དན་དམ་པ་དག །རྣམ་པ་སྣ་ཚོགས་དག་ཀྱང་མངོན་པར་གཏོར། །ལྷ་དང་ཀླུ་དང་ལྷ་མིན་མི་འམ་ཅི། །གནོད་སྦྱིན་དབང་དང་མཁའ་ལྡིང་ལྟོ་འཕྱེ་ཆེས། །ལྷ་ཡི་མེ་ཏོག་མན་དཱ་ར་བའི་ཆར། །ཁྲི་དེ་ལ་ནི་མངོན་པར་རབ་ཏུ་ཕབ། །ཆོས་འདོད་ལྷ་ནི་བྱེ་བ་ཁྲག་ཁྲིག་སྟོང་། །བསམ་གྱིས་མི་ཁྱབ་གང་དག་ལྷགས་གྱུར་པ། །རིན་ཆེན་སོག་པ་མངོན་པར་བྱུང་བ་ན། །སཱ་ལའི་མེ་ཏོག་དག་གིས་མངོན་པར་འཐོར། །ཆོས་སྨྲ་རིན་ཆེན་སོག་པ་དེ་ཉིད་ཀྱང་། །ཤིན་ཏུ་ལུས་བཀྲུས་གཙང་མའི་གོས་བགོས་ཏེ། །ཁྲི་དེར་ཉེ་བར་སོང་བར་བྱས་ནས་ནི། །ཐལ་
མོ་སྦྱར་བ་བྱས་ཏེ་ཕྱག་ཀྱང་འཚལ། །ལྷ་དབང་དང་ནི་ལྷ་དང་ལྷ་མོ་རྣམས། །བར་སྣང་འདུག་ནས་མེ་ཏོག་མན་དཱ་རའི། །ཆར་པ་འབེབས་ཤིང་སིལ་སྙན་བརྒྱ་སྟོང་ཕྲག །བསམ་གྱིས་མི་ཁྱབ་པ་དག་རབ་ཏུ་སྒྲོགས། །རིན་ཆེན་སོག་པ་དགེ་སློང་ཆོས་སྨྲ་དེས། ། ཕྱོགས་བཅུ་དག་གི་སངས་རྒྱས་བྱེ་བ་སྟོང་། །བསམ་གྱིས་མི་ཁྱབ་པ་དག་དྲན་བྱས་ནས། །དེ་ནི་མངོན་པར་འཛེགས་ཏེ་འདུག་པར་གྱུར། །སེམས་ཅན་ཀུན་ལ་སྙིང་བརྩེ་བསྐྱེད་ནས་ནི། །སྙིང་རྗེའི་སེམས་ཀྱང་ཡང་དག་བསྐྱེད་བྱས་ཏེ། །རྒྱལ་པོ་ལེགས་པར་བྱུང་བ་དེ་ལ་ནི། །དེ་ཡི་ཚེ་ན་མདོ་སྡེ་འདི་བསྟན་ཏེ། །རྒྱལ་པོས་ཐལ་མོ་སྦྱར་བྱས་བཏུད་ནས་སུ། །ཚིག་གཅིག་གིས་ནི་རྗེས་སུ་ཡི་རང་སྟེ། །ཆོས་ཀྱི་ཤུགས་ཀྱིས་མིག་ནས་མཆི་མ་ཕྱུང་། །དེ་ཡི་ལུས་ནི་དགའ་བས་ཁྱབ་པར་གྱུར། །མདོ་སྡེ་འདི་ལ་མཆོད་པ་བྱ་བའི་ཕྱིར། །དེ་ཚེ་རྒྱལ་པོ་ལེགས་པར་བྱུང་བ་ཡིས། །ཡིད་བཞིན་ནོར་བུ་རིན་ཆེན་རྒྱལ་པོ་བླངས། །སེམས་ཅན་རྣམས་ཕྱིར་སྨོན་ལམ་བཏབ་པ་ནི། །རིན་ཆེན་བདུན་དང་ལྡན་པའི་རྒྱན་རྣམས་དང་། །གང་ཡང་འཛམ་བུའི་གླིང་འདིར་སེམས་ཅན་རྣམས། །བདེ་བར་འགྱུར་བའི་ནོར་ནི་ཆེན་པོ་ཡི། །ཆར་པ་དེ་རིང་འཛམ་བུའི་གླིང་དུ་ཕོབ། །དེ་ཡི་ཚེ་ན་རིན་ཆེན་སྣ་བདུན་དང་། །དཔུང་རྒྱན་དང་ནི་དོ་ཤལ་རྣ་ཆ་མཆོག །དེ་བཞིན་ཟས་དང་སྐོམ་དང་གོས་རྣམས་ཀྱང་། །གླིང་བཞི་དག་ཏུ་རབ་ཏུ་འབབ་པར་གྱུར། །རྒྱལ་པོ་ལེགས་པར་བྱུང་བས་འཛམ་གླིང་དུ། །རིན་ཆེན་ཆར་པ་འབབ་པ་དེ་མཐོང་ནས། །གླིང་བཞི་རིན་ཆེན་གང་བར་བཅས་པ་ནི། །རིན་ཆེན་གཙུག་ཏོར་ཅན་གྱི་བསྟན་ལ་ཕུལ། །དེ་བཞིན་གཤེགས་པ་ཤཱཀྱ་ཐུབ་པ་ང་། །རྒྱལ་པོ་ལེགས་པར་བྱུང་ཞེས་བྱ་བར་གྱུར། །གླིང་བཞི་དག་ནི་རིན་ཆེན་གང་བཅས་ཀྱི། །ས་འདི་དེ་ཚེ་ང་ཡིས་ཡོངས་སུ་བཏང་། །གང་གིས་རྒྱལ་པོ་ལེགས་པར་བྱུང་དེ་ལ། །དེ་ཚེ་མདོ་སྡེ་འདི་ནི་རབ་བསྟན་པ། །རིན་ཆེན་སོག་པ་ཆོས་སྨྲའི་དགེ་སློང་དེ། །དེ་བཞིན་གཤེགས་པ་མི་འཁྲུགས་དེར་གྱུར་ཏོ། །ངས་གང་དེ་ཚེ་མདོ་སྡེ་འདི་ཐོས་ཤིང་། །ཚིག་གཅིག་གིས་ནི་རྗེས་སུ་ཡི་རང་སྟེ། །ང་ནི་
དགེ་བའི་ལས་ནི་དེ་ཉིད་དང་། །ཆོས་ཉན་པ་དང་རྗེས་སུ་ཡི་རང་བས། །གསེར་གྱི་མདོག་དང་བསོད་ནམས་བརྒྱ་ཡི་མཚན། །བལྟ་ན་སྡུག་ཅིང་མིག་ཏུ་མངོན་མཛེས་ལ། །ལྷ་སྟོང་བྱེ་བ་རབ་ཏུ་དགའ་བྱེད་པ། །སྐྱེ་བོས་མཐོང་ན་དགའ་ལུས་རྟག་ཏུ་ཐོབ། །བསྐལ་པ་དག་ནི་བྱེ་བ་བརྒྱ་སྟོང་ཕྲག །དགུ་བཅུ་རྩ་དགུར་འཁོར་ལོས་སྒྱུར་རྒྱལ་གྱུར། །བསྐལ་པ་བརྒྱ་སྟོང་དུ་མ་མང་པོར་ཡང་། །ངས་ནི་ཁམས་ཀྱི་རྒྱལ་པོ་མྱོང་བར་གྱུར། །བསྐལ་པ་བསམ་གྱིས་མི་ཁྱབ་བརྒྱ་བྱིན་གྱུར། །ཚངས་པའི་དབང་པོ་ཡིད་བཞིན་དེ་བཞིན་ནོ། །གང་དག་ཚད་ནི་ནམ་ཡང་ཡོད་མིན་པའི། །སྟོབས་བཅུ་དཔག་མེད་ངས་ནི་བརྙེས་པར་བྱས། །ངས་གང་མདོ་ཐོས་རྗེས་སུ་ཡི་རང་བ། །བསོད་ནམས་ཕུང་པོ་དེ་ལྟར་ཚད་མེད་མང་། །བསམ་པ་ཇི་བཞིན་ངས་ནི་བྱང་ཆུབ་ཐོབ། །ཆོས་སྐུ་དམ་པ་ཡང་ནི་ངས་ཐོབ་བོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས་ལེགས་པར་བྱུང་བའི་ལེའུ་ཞེས་བྱ་བ་སྟེ་བཅུ་གསུམ་པའོ།། །།དཔལ་ལྡན་ལྷ་མོ་རིགས་ཀྱི་བུའམ་རིགས་ཀྱི་བུ་མོ་དད་པ་ཅན་གང་ལ་ལ་ཞིག །འདས་པ་དང་མ་འོངས་པ་དང་ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ལ་ཡོ་བྱད་ཐམས་ཅད་ཀྱིས་མཆོད་པ་ཆེན་པོ་ཤིན་ཏུ་རྒྱས་ཤིང་རྒྱ་ཆེ་བ་བསམ་གྱིས་མི་ཁྱབ་པ་བྱེད་པར་འདོད་ཅིང་། འདས་པ་དང་མ་འོངས་པ་དང་ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་སྤྱོད་ཡུལ་ཟབ་མོ་ཡོངས་སུ་ཤེས་པར་འདོད་པ་དེས་གཙུག་ལག་ཁང་ངམ་དགོན་པའི་ཕྱོགས་ཀྱང་རུང་སྟེ། གང་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་རྒྱ་ཆེར་ཡང་དག་པར་རབ་ཏུ་སྟོན་པའི་ཕྱོགས་དེར། དེས་གདོན་མི་ཟ་བར་གཡེང་བ་མེད་པའི་སེམས་ཀྱིས་རྣ་བ་བླགས་ཏེ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་མཉན་པར་བྱའོ། །དེ་ནས་བཅོམ་ལྡན་འདས་ཀྱིས་དོན་འདི་ཉིད་འཁོར་ལ་རྒྱ་ཆེར་བརྗོད་པའི་ཕྱིར། དེའི་ཚེ་ཚིགས་སུ་བཅད་པ་འདི་དག་གསུངས་སོ། །གང་ཞིག་སངས་རྒྱས་ཐམས་ཅད་ལ། །བསམ་ཡས་མཆོད་པ་བྱེད་འདོད་ཅིང་། །སངས་རྒྱས་ཀུན་གྱི་སྤྱོད་ཡུལ་བ། །ཟབ་མོ་རབ་ཏུ་ཤེས་འདོད་པས། །གཙུག་ལག་ཁང་
ངམ་གནས་ཁང་ངམ། །གང་ན་གསེར་འོད་དམ་པ་ཡི། །མདོ་སྡེ་དམ་པ་འདི་སྟོན་པ། །ས་ཕྱོགས་དེར་ནི་འགྲོ་བར་བྱ། །མདོ་སྡེ་བསམ་གྱིས་མི་ཁྱབ་སྟེ། །ཡོན་ཏན་རྒྱ་མཚོ་མཐའ་ཡང་ཡས། །སྡུག་བསྔལ་རྒྱ་མཚོ་དུ་མ་ལས། །སེམས་ཅན་ཐམས་ཅད་ཐར་བར་བྱེད། །མདོ་སྡེ་ཡི་ནི་ཐོག་མ་དང་། །དབུས་དང་དེ་བཞིན་ཐ་མ་མཐོང་། །མདོ་སྡེའི་དབང་པོ་རབ་ཟབ་སྟེ། །འདི་ལ་དཔེ་ནི་ཡོད་མ་ཡིན། །གང་གཱ་དང་ནི་ས་རྣམས་དང་། །རྒྱ་མཚོ་དང་ནི་ནམ་མཁའ་ལ། །གནས་པའི་རྡུལ་ནི་གང་ཡང་རུང་། །དཔེར་བྱ་བ་ནི་མི་ནུས་སོ། །ཆོས་ཀྱི་དབྱིངས་ལ་འཇུག་པ་ཡི། །དེ་ཡི་ཚེ་ན་འཇུག་པར་བྱ། །ཆོས་ཀྱི་བདག་ཉིད་མཆོད་རྟེན་ནི། །ཟབ་མོ་རབ་བརྟན་གང་ཡིན་པ། །མཆོད་རྟེན་དེ་ཡི་དབུས་ན་ནི། །རྒྱལ་བ་ཤཱཀྱ་ཐུབ་པ་མཐོང་། །ཡིད་དུ་འོང་བའི་དབྱངས་ཀྱིས་སུ། །མདོ་སྡེ་འདི་ནི་རབ་ཏུ་སྟོན། །གྲངས་མེད་བསམ་གྱིས་མི་ཁྱབ་པའི། །བསྐལ་པ་བྱེ་བ་ཇི་སྙེད་པར། །ལྷ་ཡི་དང་ནི་མི་རྣམས་ཀྱིས། །བདེ་བ་དག་ནི་རྗེས་སུ་མྱོང་། །གང་ཞིག་མདོ་སྡེ་འདི་ཉན་པ། །དེ་ལྟར་བདག་གི་བསོད་ནམས་ཀྱི། །ཕུང་པོ་བསམ་ཡས་བསྒྲུབ་སྙམ་དུ། །དེ་ཚེ་དེས་ནི་དེ་ལྟར་ཤེས། །མེས་གང་འོབས་ཀྱིས་བསྐོར་བ་ཡི། ། དཔག་ཚད་བརྒྱ་དག་འདའ་བྱེད་ཅིང་། །ཚོར་བ་དྲག་པོ་བཟོད་བྱས་ནས། །མདོ་སྡེ་མཉན་པར་གང་ནུས་པ། །གཙུག་ལག་ཁང་ངམ་གནས་ཁང་དུ། །ཞུགས་ནས་དེ་མ་ཐག་ཏུ་ནི། །སྡིག་པ་རྣམས་ནི་མེད་པར་འགྱུར། །རྨི་ངན་མཚན་ཉིད་ཐམས་ཅད་དང་། །གཟའ་དང་རྒྱུ་སྐར་གནོད་པ་དང་། །བྱད་དང་གདོན་ནི་མི་བཟད་ཀྱང་། །ཞུགས་ནས་དེ་མ་ཐག་ཏུ་ནི། །ཐམས་ཅད་གཞན་དུ་ཕྱོགས་པར་འགྱུར། །ཀླུ་ཡི་རྒྱལ་པོ་རྣམས་ཀྱིས་ནི། །རྨི་ལམ་བསྟན་པ་ཅི་འདྲ་བར། །དེར་ནི་པདྨ་འདྲ་བའི་ཁྲི། །དེ་ལྟ་བུར་ཡང་བཤམ་པར་བྱ། །ཁྲི་དེ་ལ་ནི་འདུག་ནས་སུ། །མདོ་སྡེ་འདི་ནི་རབ་ཏུ་བསྟན། །ཡི་གེར་བྲིས་པ་བཀླག་པར་བྱ། །དེ་བཞིན་ཡོངས་སུ་ཆུབ་པར་བྱ། །ཁྲི་དེ་ལས་ནི་བབས་ནས་སུ། །ཡུལ་གཞན་སོང་བར་གྱུར་ན་ཡང་། །ཁྲི་དེ་ལ་ནི་ཡོད་པ་ཡི། །ཆོ་འཕྲུལ་རྣམས་ཀྱང་སྣང་བར་འགྱུར། །ཆོས་སྨྲ་བ་ཡི་གཟུགས་སུ་ཡང་། །དེ་ནི་རེས་འགའ་
སྣང་བར་འགྱུར། །རེས་འགའ་སངས་རྒྱས་གཟུགས་སུ་སྟེ། །རེས་འགའ་བྱང་ཆུབ་སེམས་དཔར་ཡང་། །རེས་འགའ་ཀུན་ཏུ་བཟང་པོ་དང་། །དེ་བཞིན་འཇམ་དཔལ་གཟུགས་སུ་སྟེ། །རེས་འགའ་བྱམས་པའི་གཟུགས་སུ་ཡང་། །ཁྲི་དེ་ལ་ནི་སྣང་བར་འགྱུར། །རེས་འགའ་འོད་ནི་འབའ་ཞིག་སྣང་། །རེས་འགའ་ལྷ་རྣམས་སྣང་བར་འགྱུར། །ཡུད་ཙམ་ཞིག་ནི་དེར་སྣང་ནས། །དེ་ནས་མི་སྣང་བར་ཡང་འགྱུར། །སངས་རྒྱས་མཐོང་ན་བསྔགས་པར་འགྱུར། །ཐམས་ཅད་དུ་ཡང་གྲུབ་པར་བྱེད། །འབྲུ་དང་བཀྲ་ཤིས་ཕུན་སུམ་ཚོགས། །མཚན་མ་སངས་རྒྱས་སྤྲུལ་པ་ཡིན། །རྒྱལ་དང་དཔལ་དང་གྲགས་པར་བྱེད། །ཕྱིར་རྒོལ་བ་ཡང་ལྡོག་པར་བྱེད། །ཕ་རོལ་དགྲ་ཚོགས་རབ་ཏུ་འཇོམས། །གཡུལ་དུ་དགྲ་རྣམས་ཕུང་བར་བྱེད། །རྨི་ངན་ཐམས་ཅད་ཞི་བར་བྱེད། །སྡིག་པ་ཐམས་ཅད་རབ་ཏུ་འཇིག །སྡིག་པ་ཐམས་ཅད་རབ་ཞི་བྱེད། །གཡུལ་འགྱེད་པ་ན་རྒྱལ་བར་བྱེད། །འཛམ་བུའི་གླིང་འདི་ཐམས་ཅད་དུ། །གྲགས་པས་རབ་ཏུ་གང་བར་འགྱུར། །དེ་ཡི་དགྲ་རྣམས་ཐམས་ཅད་ནི། །ཤིན་ཏུ་ཕམ་པ་ཉིད་དུ་འགྱུར། །རྟག་ཏུ་དགྲ་ནི་ཆོམས་པར་འགྱུར། །སྡིག་པ་ཐམས་ཅད་རྣམ་པར་སྤངས། ། གཡུལ་ངོའི་རྩེ་ལས་རྣམ་པར་རྒྱལ། །དགྲ་དང་བྲལ་ཞིང་མཆོག་ཏུ་དགའ། །ཚངས་དབང་སུམ་ཅུ་རྩ་གསུམ་དབང་། །དེ་བཞིན་འཇིག་རྟེན་སྐྱོང་རྣམས་དང་། །ལག་ན་རྡོ་རྗེ་གནོད་སྦྱིན་དབང་། །རྒྱལ་བ་ཁྱུ་མཆོག་ཡང་དག་ཤེས། །ཀླུ་ཡི་དབང་པོ་མ་དྲོས་དང་། །དེ་བཞིན་དུ་ནི་རྒྱ་མཚོ་དང་། །མི་འམ་ཅི་དབང་ལྷ་མིན་དབང་། །དེ་བཞིན་ནམ་མཁའ་ལྡིང་དབང་པོ། །དེ་དག་ལ་ནི་སོགས་པ་དང་། །ལྷ་རྣམས་དེ་དག་ཐམས་ཅད་ཀྱང་། །ཆོས་ཀྱི་མཆོད་རྟེན་བསམ་ཡས་ལ། །རྟག་ཏུ་མཆོད་པ་བྱེད་པར་འགྱུར། །ཞེ་སར་བཅས་པའི་སེམས་ཅན་རྣམས། ། མཐོང་ནས་ཤིན་ཏུ་དགའ་བར་འགྱུར། །ལྷ་ཡི་དབང་པོ་མཆོག་དེ་དག །ཐམས་ཅད་འདི་སྙམ་སེམས་པར་འགྱུར། །ལྷ་རྣམས་དེ་དག་ཐམས་ཅད་ཀྱང་། །ཕན་ཚུན་དུ་ནི་སྨྲ་བྱེད་པ། །བསོད་ནམས་དཔལ་དང་གཟི་བརྗིད་དག །བསགས་པ་དེ་དག་ཀུན་ལ་ལྟོས། །དགེ་བའི་རྩ་བ་
སྦྱངས་པ་ཡི། །མི་རྣམས་དེ་དག་འདིར་ལྷགས་ཏེ། །གང་དག་མདོ་སྡེ་ཟབ་མོ་འདི། །ཉན་པའི་ཕྱིར་ནི་འདིར་ལྷགས་པ། །དད་པ་བསམ་གྱིས་མི་ཁྱབ་པས། །ཆོས་ཀྱི་མཆོད་རྟེན་གུས་དང་བཅས། །དེ་དག་འཇིག་རྟེན་སྙིང་རྗེ་ལྡན། །དེ་དག་སེམས་ཅན་ཕན་བྱེད་པ། ། དེ་དག་ཟབ་མོའི་ཆོས་རྣམས་ཀྱིས། །དམ་པའི་ཆོས་ཀྱི་རོ་ཡི་སྣོད། །ཆོས་ཀྱི་དབྱིངས་ལ་འཇུག་པ་ཡིས། །དེ་དག་རབ་ཏུ་འཇུག་པ་ཡིན། །གང་དག་གསེར་འོད་དམ་པའི་མདོ། །དགེ་བ་དམ་པ་འདི་ཉན་པ། །དེ་དག་སྔོན་ཆད་སངས་རྒྱས་ནི། །བརྒྱ་སྟོང་རྣམས་ལ་མཆོད་པ་ཡིན། །དགེ་བའི་རྩ་བ་དེ་ཡིས་ནི། །མདོ་སྡེ་ཉན་པ་དེ་དག་ལ། །ལྷ་དབང་རྒྱལ་པོ་དེ་ཀུན་དང་། །དབྱངས་ཅན་དང་ནི་དེ་བཞིན་དུ། །དཔལ་དང་རྣམ་ཐོས་བུ་དང་ནི། །དེ་བཞིན་རྒྱལ་པོ་བཞི་རྣམས་དང་། །གནོད་སྦྱིན་བརྒྱ་ཕྲག་སྟོང་པོ་དག །སྟོབས་ཆེན་རྫུ་འཕྲུལ་ལྡན་རྣམས་ཀྱིས། ། ཕྱོགས་བཞི་དག་ནི་ཀུན་ནས་ཀྱང་། །བསྲུང་བ་ཤིན་ཏུ་བྱེད་པར་འགྱུར། །དབང་པོ་ཟླ་བ་གཤིན་རྗེ་དང་། །རླུང་དང་ཆུ་ལྷ་ཉིད་དང་ནི། །སྐེམ་བྱེད་འཇུག་སེལ་དབྱངས་ཅན་དང་། །སྦྱིན་སྲེག་ཟ་དང་སྐྱེ་དགུ་དང་། །སྟོབས་ཆེན་ཕ་རོལ་གནོན་བྱེད་པ། །འཇིག་རྟེན་སྐྱོང་བ་དེ་ཀུན་ཀྱང་། ། ཉིན་མཚན་གཡེལ་བ་མེད་པར་ནི། །དེ་དག་རྣམས་ལ་སྲུང་བར་བྱེད། །སྟོབས་ཆེན་གནོད་སྦྱིན་དབང་གཉིས་དང་། །སྲེད་མེད་བུ་དང་དབང་ཕྱུག་ཆེ། །ཡང་དག་ཤེས་ལ་སོགས་པ་དག །གཞན་ཡང་ཉི་ཤུ་རྩ་བརྒྱད་དང་། །གནོད་སྦྱིན་བརྒྱ་ཕྲག་སྟོང་པོ་དག །སྟོབས་ཆེན་རྫུ་འཕྲུལ་ལྡན་རྣམས་ཀྱིས། །འཇིགས་ཤིང་སྐྲག་པ་ཐམས་ཅད་ནི། །དེ་དག་ལ་ནི་སྲུང་བར་བྱེད། །ལག་ན་རྡོ་རྗེ་གནོད་སྦྱིན་དབང་། །གནོད་སྦྱིན་དག་ནི་ལྔ་བརྒྱ་དང་། །བྱང་ཆུབ་སེམས་དཔའ་ཐམས་ཅད་ཀྱང་། །དེ་དག་ལ་ནི་སྲུང་བར་བྱེད། །གནོད་སྦྱིན་དབང་པོ་ནོར་བུ་བཟང་། །དེ་བཞིན་གང་བ་བཟང་པོ་དང་། །ཇི་འཇིགས་དང་ནི་འབྲོག་གནས་དང་། །དམར་སེར་དང་ནི་སེར་སྐྱ་དང་། །གནོད་སྦྱིན་དབང་པོ་རེ་རེ་ཡང་། །གནོད་སྦྱིན་ལྔ་བརྒྱ་དག་གིས་ནི། །གང་དག་མདོ་སྡེ་འདི་ཐོས་པ། །དེ་དག་རྣམས་ལ་སྲུང་བྱེད་འགྱུར། །དྲི་ཟ་སྣ་ཚོགས་སྡེ་དང་ནི། །རྒྱལ་བ་ཁྱུ་
མཆོག་རྒྱལ་བའི་རྒྱལ། །ནོར་བུའི་མགུལ་དང་ངེས་མགྲིན་དང་། །དེ་བཞིན་ཆར་པའི་བདག་པོ་དང་། །ཀམ་པོ་ཇི་དང་ནག་པོ་དང་། །དེ་བཞིན་གསེར་འདྲའི་སྐྲ་དང་ནི། །ལྔས་རྩེན་དང་ནི་ར་རྐང་དང་། །དེ་བཞིན་སྐལ་བ་ཆེན་པོ་དང་། །ཡུར་བ་ཅན་དང་ཆོས་སྐྱོང་དང་། །སྤྲེའུ་དང་དེ་བཞིན་འཁྲི་བྱེད་དང་། །ཁབ་ཀྱི་སྤུ་དང་གཉིས་བཤེས་དང་། །དེ་བཞིན་རིན་ཆེན་སྐྲ་དང་ནི། །ཡུལ་ཆེན་ཅན་དང་ཁྱིམ་མེད་དང་། །འདོད་པའི་མཆོག་དང་ཙནྡན་དང་། །མཐུ་བོ་ཆེ་དང་གངས་ཅན་དང་། །བདེ་བའི་རི་ཉིད་དེ་བཞིན་ཏེ། །སྟོབས་ཆེན་ཕ་རོལ་གནོན་བྱེད་པ། །རྫུ་འཕྲུལ་ལྡན་པ་དེ་ཀུན་ཀྱང་། །གང་དག་མདོ་སྡེ་འདི་དགའ་བ། །དེ་དག་ལ་ནི་སྲུང་བར་བྱེད། །ཀླུ་ཡི་དབང་པོ་མ་དྲོས་དང་། །དེ་བཞིན་དུ་ཡང་རྒྱ་མཚོ་དང་། །ཨེ་ལའི་འདབ་དང་བཏང་བཟུང་དང་། །དགའ་བོ་ཉེ་དགའ་གཉི་ག་དང་། །ཀླུ་ནི་བརྒྱ་ཕྲག་སྟོང་པོ་དག །སྟོབས་ཆེན་རྫུ་འཕྲུལ་ལྡན་རྣམས་ཀྱང་། །འཇིགས་ཤིང་སྐྲག་པ་ཐམས་ཅད་ལས། །དེ་དག་ལ་ནི་སྲུང་བར་བྱེད། །སྟོབས་ཅན་སྒྲ་གཅན་མི་གཏོང་དང་། །ཐགས་བཟངས་རིས་དང་བདེ་མཆོག་དང་། །རབ་སིམ་བྱེད་དང་ཕྲག་རྩུབ་དང་། །དེ་བཞིན་ལྷ་མིན་དབང་གཞན་དང་། །ལྷ་མིན་བརྒྱ་ཕྲག་སྟོང་པོ་དག །སྟོབས་ཆེན་རྫུ་འཕྲུལ་ལྡན་རྣམས་ཀྱིས། །འཇིགས་སྐྲག་བྱུང་བར་གྱུར་པ་ལས། །དེ་དག་ལ་ནི་བསྲུང་བར་འགྱུར། །འབྱུང་པོའི་མ་མོ་འཕྲོག་མ་ནི། །ལྔ་བརྒྱའི་བུ་དང་བཅས་པ་ཡང་། །འདུག་དང་ཉལ་དང་ར་རོའི་ཚེ། །དེ་དག་ལ་ནི་སྲུང་བར་བྱེད། །གདོལ་པ་མོ་དང་གཏུམ་མོ་དང་། །དེ་བཞིན་གནོད་སྦྱིན་གཏུམ་མོ་དང་། །མདུང་ཅན་དང་ནི་སོ་བརྩེགས་དང་། །སེམས་ཅན་ཀུན་གྱི་མདངས་འཕྲོག་མ། །སྟོབས་ཆེན་ཕ་རོལ་གནོན་བྱེད་པ། །རྫུ་འཕྲུལ་ལྡན་པ་དེ་ཀུན་ཀྱང་། །ཕྱོགས་བཞི་དག་ནི་ཀུན་ནས་སུ། །དེ་དག་རྣམས་ལ་སྲུང་བར་བྱེད། ། དབྱངས་ཅན་དག་ལ་སོགས་པ་རྣམས། །ལྷ་མོ་བསམ་གྱིས་མི་ཁྱབ་དང་། །དཔལ་ལ་སོགས་པ་དེ་བཞིན་དུ། །ལྷ་མོ་དག་ནི་ཐམས་ཅད་དང་། །ས་ཡི་ལྷ་མོ་ཉིད་དང་ནི། །ལོ་ཏོག་འབྲས་བུ་ནགས་ལྷ་དང་། །ཀུན་དགའ་ཤིང་ལྗོན་མཆོད་རྟེན་ལ། །གནས་པ་དག་དང་རླུང་ལྷ་དང་། །ལྷ་རྣམས་དེ་
དག་ཐམས་ཅད་འདིར། །རབ་ཏུ་དགའ་བའི་སེམས་ཀྱིས་ནི། །གང་དག་མདོ་སྡེ་འདི་དགའ་བ། །དེ་དག་རྣམས་ལ་སྲུང་བར་བྱེད། །ཚེ་དང་མདོག་དང་སྟོབས་རྣམས་ལ། །སེམས་ཅན་དག་ནི་སྦྱོར་བར་བྱེད། །དཔལ་དང་བསོད་ནམས་གཟི་བརྗིད་ཀྱིས། །ཕུན་སུམ་ཚོགས་པས་རྟག་ཏུ་བརྒྱན། །གཟའ་དང་རྒྱུ་སྐར་གནོད་པ་དག །དེ་དག་ཐམས་ཅད་ཞི་བར་བྱེད། །རྒུད་དང་སྡིག་དང་རྨི་ངན་པ། །དེ་དག་ཐམས་ཅད་ཞི་བར་བྱེད། །ཟབ་ཅིང་སྟོབས་ཆེན་ལྡན་པ་ཡི། །ས་ཡི་ལྷ་མོ་ཉིད་ཀྱང་ནི། །གསེར་གྱི་འོད་ཀྱི་དམ་པ་ཡི། །མདོ་སྡེའི་དབང་པོའི་རོ་ཡིས་ཚིམ། །དཔག་ཚད་དག་ནི་བརྒྱ་ཡི་ཕྲག །སྟོང་ཕྲག་དྲུག་ཅུ་རྩ་བརྒྱད་ནས། །རྡོ་རྗེ་གནས་ལ་ཐུག་བར་དུ། །ས་ཡི་བཅུད་ནི་རབ་ཏུ་འཕེལ། །དཔག་ཚད་བརྒྱར་ནི་ཚང་བ་ཡི། །འོག་ཏུ་ས་ཡི་བཅུད་སོང་སྟེ། །དེ་ནི་ཕྱིར་ཡང་ལོག་ནས་ནི། །ས་ཡི་སྟེང་དག་སྣུམ་པར་བྱེད། ། མདོ་སྡེ་མཉན་པའི་སྟོབས་ཀྱིས་ནི། །ལྷ་རྣམས་དེ་དག་ཐམས་ཅད་ཀྱང་། །གསེར་གྱི་འོད་ནི་དམ་པ་ཡི། །མདོ་སྡེའི་དབང་པོའི་རོས་ཚིམ་འགྱུར། །མདངས་དང་ལྡན་པར་རབ་འགྱུར་ཞིང་། །དེ་བཞིན་རབ་ཏུ་སྟོབས་ལྡན་འགྱུར། །བདེ་བར་འགྱུར་ཞིང་ཚིམ་པར་འགྱུར། །འཛམ་བུའི་གླིང་འདི་ཐམས་ཅད་ན། །འབྲས་བུ་ལོ་ཏོག་ནགས་ལྷ་རྣམས། །སྣ་ཚོགས་རོ་ཡིས་ཚིམ་འགྱུར་ཞིང་། །ཤིན་ཏུ་རབ་ཏུ་དགའ་བར་འགྱུར། །མདོ་སྡེའི་རོ་ཡིས་ཚིམ་འགྱུར་ནས། །འབྲས་བུ་རྣམས་དང་ལོ་ཏོག་དང་། །མེ་ཏོག་རྣམ་པ་སྣ་ཚོགས་དང་། །འབྲས་བུའི་ཤིང་ལྗོན་སྣ་ཚོགས་ཀྱང་། །ཀུན་ནས་རབ་ཏུ་སྐྱེ་བར་བྱེད། །འབྲས་བུའི་ཤིང་ལྗོན་ཐམས་ཅད་དང་། །ཀུན་དགའ་དག་དང་ནགས་ཚལ་རྣམས། །མེ་ཏོག་རབ་ཏུ་ཆགས་བྱེད་ཅིང་། །སྣ་ཚོགས་དྲི་ནི་རབ་ཏུ་འབྱིན། །མེ་ཏོག་རྣམ་པ་སྣ་ཚོགས་དང་། །འབྲས་བུ་སྣ་ཚོགས་ལྡན་པ་ཡི། །རྩྭ་དང་ནགས་ཚལ་ཐམས་ཅད་དག །ས་ཡི་སྟེང་ན་སྐྱེ་བར་བྱེད། །འཛམ་བུའི་གླིང་འདི་ཐམས་ཅད་ན། །ཀླུ་ཡི་བུ་མོ་བསམ་མི་ཁྱབ། །རབ་ཏུ་དགའ་བའི་སེམས་གྱུར་ནས། །རྫིང་བུའི་དྲུང་དུ་ཉེར་སོང་སྟེ། །རྫིང་བུ་རྣམས་ནི་ཐམས་ཅད་དུ། །ཀུ་མུ་ད་དང་པདྨ་དང་། །ཨུཏྤ་ལ་དང་དེ་བཞིན་དུ། །
པདྨ་དཀར་པོ་སྣ་ཚོགས་སྐྱེ། །ནམ་མཁའ་ལ་ནི་དུ་བ་དང་། །སྤྲིན་གྱི་དྲ་བ་མེད་ཅིང་དག །མུན་པ་དང་ནི་རྡུལ་མེད་ཅིང་། །ཕྱོགས་རྣམས་རབ་ཏུ་འོད་གསལ་ལོ། །ཉི་མའི་འོད་ཟེར་སྟོང་ལྡན་ཡང་། །འོད་ཟེར་དྲ་བས་འོད་ཀྱང་མཛེས། །སྣང་བ་དག་ནི་ཟབ་མོ་ཡིས། །རབ་ཏུ་དགའ་བར་འཆར་བར་འགྱུར། །དབང་པོ་ཉི་མ་ལྷ་ཡི་བུ། །འཛམ་བུ་གླིང་གི་གསེར་གྱི་ནི། །གཞལ་མེད་ཁང་ན་འདུག་པ་ཡང་། །མདོ་སྡེ་འདིས་ནི་རབ་ཏུ་ཚིམ། །དབང་པོ་ཉི་མ་རབ་དགའ་ནས། །འཛམ་བུའི་གླིང་དུ་འཆར་བྱེད་ཅིང་། །འོད་ཟེར་མཐའ་ཡས་དྲ་བ་ཡི། ། ཀུན་ནས་རབ་ཏུ་སྣང་བར་བྱེད། །དེ་ནི་ཤར་བ་ཙམ་གྱིས་ཀྱང་། །འོད་ཟེར་དྲ་བ་རབ་གཏོང་ཞིང་། །རྫིང་བུ་སྣ་ཚོགས་ཁེངས་པ་ཡི། །པདྨ་དག་ནི་ཁ་ཡང་འབྱེད། །འཛམ་བུའི་གླིང་འདི་ཐམས་ཅད་དུ། །མེ་ཏོག་འབྲས་བུ་སྨན་སྣ་ཚོགས། །ཡང་དག་ཡོངས་སུ་སྨིན་བྱེད་ཅིང་། །ས་རྣམས་ཐམས་ཅད་ཚིམ་པར་བྱེད། །ཟླ་བ་དང་ནི་ཉི་མ་ཡང་། །དེ་ཚེ་ཁྱད་འཕགས་སྣང་བར་འགྱུར། །རྒྱུ་སྐར་ཡང་དག་འབྱུང་འགྱུར་ཞིང་། །རླུང་ཡང་དེ་བཞིན་ལྡང་བར་འགྱུར། །འཛམ་བུའི་གླིང་ནི་ཐམས་ཅད་དུ། །ཀུན་ཏུ་ལོ་ཡང་ལེགས་འགྱུར་ཏེ། །གང་ན་མདོ་སྡེ་འདི་ཡོད་པ། །ཡུལ་འཁོར་དེ་ནི་ཁྱད་པར་འཕགས། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། གནོད་སྦྱིན་གྱི་གནས་ཞེས་བྱ་བ་ཀུན་ཏུ་བསྲུངས་པའི་ལེའུ་སྟེ་བཅུ་བཞི་པའོ།། །།དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་རིགས་ཀྱི་ལྷ་མོ་བྱང་ཆུབ་ཡང་དག་པར་བསྡུས་པས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་འབར་བའི་ཁྱད་པར་གྱི་གཟི་བརྗིད་རྒྱལ་པོ་ལ་སོགས་པ་ལྷའི་བུ་སྟོང་ཕྲག་བཅུ་པོ་དག་རྒྱུ་གང་དང་རྐྱེན་གང་དང་། དགེ་བའི་རྩ་བ་སྦྱངས་པ་ཅི་འདྲ་བ་དང་གང་བགྱིས་ཤིང་བསགས་པས། སྐྱེས་བུ་དམ་པ་གསུམ་པོ་འདི་དག་བྱང་ཆུབ་ཏུ་ལུང་བསྟན་པ་ཐོས་ནས། ད་ལྟར་སུམ་ཅུ་རྩ་གསུམ་གྱི་གནས་ནས་ལྷགས་ཏེ། བཅོམ་ལྡན་འདས་ལ་ཆོས་མཉན་པའི་སླད་དུ་མཆིས་ན། འདི་ལྟ་སྟེ་བྱང་ཆུབ་སེམས་དཔའ་མཛེས་པའི་ཏོག་སྐྱེས་བུ་དམ་པ་འདི་མ་འོངས་པའི་དུས་ན། བསྐལ་པ་བགྲང་བ་ལས་འདས་
པ་གྲངས་མ་མཆིས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་འདས་པ་ན། འཇིག་རྟེན་གྱི་ཁམས་གསེར་དུ་སྣང་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་གསེར་དང་རིན་པོ་ཆེའི་འབྱུང་གནས་གདུགས་བརྩེགས་ཞེས་བྱ་བ་འཇིག་རྟེན་དུ་འབྱུང་ངོ་། །ཇི་ཙམ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་དང་རིན་པོ་ཆེའི་འབྱུང་གནས་གདུགས་བརྩེགས་དེ་ཡོངས་སུ་མྱ་ངན་ལས་འདས་པའི་དམ་པའི་ཆོས་ནུབ་སྟེ། དེའི་བསྟན་པ་ཡོང་ཡེ་ཐམས་ཅད་ནུབ་པར་གྱུར་པ་ན། ཁྱེའུ་དངུལ་གྱི་ཏོག་འདི་དེ་བཞིན་གཤེགས་པ་དེའི་མཚམས་སྦྱོར་ཞིང་འཇིག་རྟེན་གྱི་ཁམས་རྡུལ་མེད་པའི་རྒྱལ་མཚན་དེ་ཉིད་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་འཛམ་བུའི་གསེར་གྱི་རྒྱལ་མཚན་གྱི་འོད་ཅེས་བྱ་བ་འཇིག་རྟེན་དུ་འབྱུང་ངོ་། ། ཇི་ཙམ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་འཛམ་བུའི་གསེར་གྱི་རྒྱལ་མཚན་གྱི་འོད་དེ་ཡོངས་སུ་མྱ་ངན་ལས་འདས་ནས། དེ་ཡི་བསྟན་པ་ཡོང་ཡེ་ཐམས་ཅད་དུ་ནུབ་པའི་བར་དུ་གྱུར་པ་ན་ཁྱེའུ་དངུལ་གྱི་འོད་འདི། དེ་བཞིན་གཤེགས་པ་དེའི་མཚམས་སྦྱོར་ཞིང་འཇིག་རྟེན་གྱི་ཁམས་རྡུལ་དང་བྲལ་བའི་རྒྱལ་མཚན་དེ་ཉིད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་གསེར་བརྒྱའི་འོད་ཟེར་གསེར་དུ་སྣང་བ་སྙིང་པོ་ཞེས་བྱ་བ་འཇིག་རྟེན་དུ་འབྱུང་ངོ་། །ཞེས་དེ་དག་ཐམས་ཅད་བཅོམ་ལྡན་འདས་ཀྱིས་དེ་
ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །བཙུན་པ་བཅོམ་ལྡན་འདས་འབར་བའི་ཁྱད་པར་གྱི་གཟི་བརྗིད་རྒྱལ་པོ་ལ་སོགས་པ་ལྷའི་བུ་སྟོང་ཕྲག་བཅུ་པོ་དེ་དག་ནི་དེ་ཙམ་དུ་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་ཡང་མ་གྱུར། སྔོན་ཕ་རོལ་ཏུ་ཕྱིན་པ་དྲུག་པོ་དག་ལ་སྤྱད་སྐད་ཀྱང་མི་གདའ། ལག་པ་དང་རྐང་པ་དང་མིག་དང་ཡན་ལག་གི་དམ་པ་མགོ་དང་། བུ་དང་ཆུང་མ་དང་བུ་མོ་ཕངས་པ་དག་སྔོན་ཡོངས་སུ་བཏང་སྐད་ཀྱང་མི་གདའ། ནོར་དང་འབྲུ་དང་། འགྲོན་བུ་དང་། གསེར་དང་། ནོར་བུ་དང་། མུ་ཏིག་དང་། བཻ་ཌཱུཪྱ་དང་། དུང་དང་། མན་ཤེལ་དང་། བྱི་རུ་དང་། དངུལ་དང་། ས་ལེ་སྦྲམ་དང་། རིན་པོ་ཆེ་རྣམས་སྔོན་ཡོངས་སུ་བཏང་སྐད་ཀྱང་མི་གདའ། བཟའ་བ་དང་། བཏུང་བ་དང་། བཞོན་པ་དང་། གོས་དང་། མལ་ཆ་དང་། ཁང་ཁྱིམ་དང་། གཞལ་མེད་ཁང་དང་། ཀུན་དགའ་ར་བ་དང་། རྫིང་བུ་དང་། ལྟེང་ཀ་དག་སྔོན་ཡོངས་སུ་བཏང་སྐད་ཀྱང་མི་གདའ། གླང་པོ་ཆེ་དང་། བ་ལང་དང་། རྟ་ཕོ་རྒོད་དང་། བྲན་ཕོ་དང་། བྲན་མོ་སྣ་ཚོགས་སྔོན་ཡོངས་སུ་བཏང་སྐད་ཀྱང་མི་གདའ་འདི་ལྟ་སྟེ། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་གྲངས་མ་མཆིས་པ་ཕྲག་དུ་མ་དེ་དག་ནི་སངས་རྒྱས་བཅོམ་ལྡན་འདས་རྣམས་ལས། དེ་བཞིན་གཤེགས་པའི་མིང་དུ་ལུང་མ་ཐོབ་ཀྱི་བར་དུ་སྔོན་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་གྲངས་མ་མཆིས་པ་དུ་མ་ནས། དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་གྲངས་མ་མཆིས་པ་དུ་མ་དག་ལ་མཆོད་པ་སྣ་ཚོགས་ཐ་དད་པ་བརྒྱ་སྟོང་བསམ་གྱིས་མི་ཁྱབ་པ་ཕྲག་དུ་མ་དང་ཡོ་བྱད་ཐམས་ཅད་ཀྱིས་མཆོད་པ་བགྱིད། ཡོངས་སུ་བཏང་བར་བགྱི་བའི་དངོས་པོ་ཐམས་ཅད་ཀྱང་ཡོངས་སུ་གཏོང་ལ། ལག་པ་དང་། རྐང་པ་དང་། མིག་དང་། ཡན་ལག་གི་དམ་པ་མགོ་དང་བུ་དང་། ཆུང་མ་དང་། བུ་མོ་ཕངས་པ་ཡོངས་སུ་བཏང་བར་བགྱི་བ་རྣམས་ཀྱང་ཡོངས་སུ་གཏོང་། ནོར་དང་། འབྲུ་དང་། འགྲོན་བུ་དང་། གསེར་དང་། ནོར་བུ་དང་། མུ་ཏིག་དང་། བཻ་ཌཱུཪྱ་དང་། དུང་དང་། མན་ཤེལ་དང་། བྱི་རུ་དང་། དངུལ་དང་། ས་ལེ་སྦྲམ་ཡོངས་སུ་བཏང་
བར་བགྱི་བ་རྣམས་ཡོངས་སུ་གཏོང་། བཟའ་བ་དང་། བཏུང་བ་དང་། བཞོན་པ་དང་། གོས་དང་། མལ་ཆ་དང་། སྟན་དང་། ཁང་ཁྱིམ་དང་། གཞལ་མེད་ཁང་དང་། ཀུན་དགའ་ར་བ་དང་། སྐྱེད་མོས་ཚལ་དང་། རྫིང་བུ་དང་། ལྟེང་ཀ་དང་། གླང་པོ་ཆེ་དང་། བ་ལང་དང་། རྟ་ཕོ་རྒོད་དང་། བྲན་ཕོ་དང་། བྲན་མོ་ཡོངས་སུ་བཏང་བར་བགྱི་བ་རྣམས་ཀྱང་ཡོངས་སུ་གཏོང་ཞིང་རིམ་གྱིས་ཕ་རོལ་ཏུ་ཕྱིན་པ་དྲུག་པོ་ཐམས་ཅད་ཡོངས་སུ་རྫོགས་པར་བགྱིད། རིམ་གྱིས་ཕ་རོལ་ཏུ་ཕྱིན་པ་དྲུག་པོ་དག་ཡོངས་སུ་རྫོགས་པར་བགྱིས་ནས་བདེ་བ་བརྒྱ་སྟོང་ཕྲག་མང་པོ་ཡང་མྱོང་བར་འགྱུར་ན། བཙུན་པ་བཅོམ་ལྡན་འདས་རྒྱུ་གང་དང་རྐྱེན་གང་དང་དགེ་བའི་རྩ་བ་སྦྱངས་པ་ཅི་འདྲ་བ་ཞིག་གིས་འབར་བའི་ཁྱད་པར་གྱི་གཟི་བརྗིད་རྒྱལ་པོ་ལ་སོགས་པ་ལྷའི་བུ་སྟོང་ཕྲག་བཅུ་པོ་འདི་དག །བཅོམ་ལྡན་འདས་ལ་ཆོས་ཉན་པའི་སླད་དུ་མཆིས་པ་འདི་དག་བཅོམ་ལྡན་འདས། འདི་ལྟར་མ་འོངས་པའི་དུས་ན་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་དུ་མ་ན། འཇིག་རྟེན་གྱི་ཁམས་སཱ་ལའི་དབང་པོ་མཐོན་པོའི་རྒྱལ་མཚན་དང་ལྡན་པ་ཞེས་བྱ་བ་དེ་ཉིད་དུ་རིགས་དང་། རུས་གཅིག་པ་དང་། མིང་གཅིག་ཏུ་རིམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། རབ་ཏུ་དང་བའི་ཞལ་ཨུཏྤ་ལའི་དྲི་བརྩེགས་པ་ཞེས་བྱ་བར་སངས་རྒྱས་སྟོང་ཕྲག་བཅུ་འཇིག་རྟེན་དུ་འབྱུང་སྟེ། མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སུ་འགྱུར་རོ་ཞེས་དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་རིགས་ཀྱི་ལྷ་མོ་བྱང་ཆུབ་ཡང་དག་པར་བསྡུས་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་ལྷ་མོ་འབར་བའི་ཁྱད་པར་གྱི་གཟི་བརྗིད་རྒྱལ་པོ་ལ་སོགས་པ་ལྷའི་བུ་སྟོང་ཕྲག་བཅུ་པོ་འདི་དག་གང་བྱས་ཤིང་བསགས་པས་ཆོས་མཉན་པའི་ཕྱིར་ད་ལྟར་སུམ་ཅུ་རྩ་གསུམ་གྱི་གནས་ནས་འདིར་ལྷགས་པ་
དེའི་དགེ་བའི་རྩ་བ་སྦྱངས་པ་ཡོད། དེའི་རྒྱུ་ཡོད། དེའི་བྱེད་པ་ཡོད་དེ། རིགས་ཀྱི་ལྷ་མོ་སྐྱེས་བུ་དམ་པ་འདི་གསུམ་གྱི་བྱང་ཆུབ་ཏུ་ལུང་བསྟན་པ་འདི་ཐོས་ནས་ཐོས་མ་ཐག་ཏུ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལ་ཤིན་ཏུ་རི་མོ་བྱེད་ཅིང་དགའ་བ་དང་དང་བ་ཐོབ་པར་གྱུར་ཏེ་དེ་ཙམ་དུ་བཻ་ཌཱུཪྱ་དྲི་མ་མེད་པ་ལྟར་ཡོངས་སུ་དག་པའི་སེམས་དང་ལྡན་པར་གྱུར་ཏོ། །དྲི་མ་མེད་ལ་ཤིན་ཏུ་རྒྱ་ཆེ་ཞིང་རྒྱས་པའི་ནམ་མཁའ་ལྟར་ཟབ་པའི་སེམས་རབ་ཏུ་དང་བ་དང་ལྡན་པར་གྱུར་ཏོ། །བསོད་ནམས་ཀྱི་ཕུང་པོ་དཔག་ཏུ་མེད་པ་ཡོངས་སུ་བཟུང་བ་དང་ལྡན་པར་གྱུར་ཏོ། །རིགས་ཀྱི་ལྷ་མོ་འབར་བའི་ཁྱད་པར་གྱི་གཟི་བརྗིད་རྒྱལ་པོ་ལ་སོགས་པ་ལྷའི་བུ་སྟོང་ཕྲག་བཅུ་པོ་འདི་དག་དེ་ཙམ་དུ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཐོས་མ་ཐག་ཏུ་ལྷག་པར་རི་མོ་བྱེད་པ་དང་རབ་ཏུ་དང་བ་ཐོབ་པར་གྱུར་ཏོ། །དེ་ཙམ་དུ་བཻ་ཌཱུཪྱ་དྲི་མ་མེད་པ་ལྟར་ཡོངས་སུ་དག་པའི་སེམས་དང་ལྡན་པར་གྱུར་ཏེ། དེའི་ཕྱིར་ལུང་བསྟན་པའི་ས་རྗེས་སུ་ཐོབ་བོ། །རིགས་ཀྱི་ལྷ་མོ་ཆོས་མཉན་པའི་དགེ་བའི་རྩ་བ་བསགས་པ་འདི་དང་སྔོན་གྱི་སྨོན་ལམ་གྱི་སྟོབས་ཀྱིས་འབར་བའི་ཁྱད་པར་གྱི་གཟི་བརྗིད་རྒྱལ་པོ་ལ་སོགས་པ་ལྷའི་བུ་སྟོང་ཕྲག་བཅུ་པོ་འདི་དག་ད་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པའི་ས་རྗེས་སུ་ཐོབ་བོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། ལྷའི་བུ་སྟོང་ཕྲག་བཅུ་ལུང་བསྟན་པ་ཞེས་བྱ་བའི་ལེའུ་སྟེ་བཅྭ་ལྔ་པའོ།། །།རིགས་ཀྱི་ལྷ་མོ་སྔོན་བྱུང་བ་འདས་པའི་དུས་བསྐལ་པ་གྲངས་མེད་པའི་ཡང་ཆེས་གྲངས་མེད་པ་རྒྱས་པ་བསམ་གྱིས་མི་ཁྱབ་པ་ཚད་མེད་པར་གྱུར་པ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རིན་ཆེན་གཙུག་ཏོར་ཅན་ཞེས་བྱ་བ་འཇིག་རྟེན་དུ་བྱུང་ངོ་། །རིགས་ཀྱི་ལྷ་མོ་དེའི་ཚེ་དེའི་དུས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་དེ་ཡོངས་སུ་
མྱ་ངན་ལས་འདས་ནས་དམ་པའི་ཆོས་ནུབ་པར་གྱུར་ཏེ་དམ་པའི་ཆོས་ལྟར་བཅོས་པར་གྱུར་པ་ན་རྒྱལ་པོ་ལྷའི་དབང་ཕྱུག་འོད་ཅེས་བྱ་བ་ཆོས་ཅན་ཆོས་ཀྱི་རྒྱལ་པོ་ཆོས་ཀྱི་རྒྱལ་སྲིད་སྐྱོང་གིས་ཆོས་མ་ཡིན་པས་ནི་མ་ཡིན་ཏེ་ཡུལ་ཐམས་ཅད་ན་གནས་པའི་སེམས་ཅན་རྣམས་ཀྱི་ཕ་མ་ལྟ་བུར་གྱུར་པ་ཞིག་བྱུང་ངོ་། །རིགས་ཀྱི་ལྷ་མོ་དེའི་ཚེ་དེའི་དུས་ན། རྒྱལ་པོ་ལྷའི་དབང་ཕྱུག་འོད་ཀྱི་ཡུལ་དུ་ཚོང་དཔོན་རལ་པ་འཛིན་ཅེས་བྱ་བ་སྨན་པ་གསོ་བར་བྱེད་པ། ཁམས་ལ་མཆོག་ཏུ་མཁས་པ། ཚེའི་རིག་བྱེད་ཡན་ལག་བརྒྱད་ཀྱི་རྒྱུད་དང་ལྡན་པ་ཞིག་བྱུང་བར་གྱུར་ཏོ། །ཀྱེ་རིགས་ཀྱི་ལྷ་མོ་དེའི་ཚེ་དེའི་དུས་ན་ཚོང་དཔོན་རལ་པ་འཛིན་ཅེས་བྱ་བ་དེའི་བུ་ཆུ་འབེབས་ཞེས་བྱ་བ། གཟུགས་བཟང་བ། མཛེས་པ་བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ། བསྟན་བཅོས་སྣ་ཚོགས་ལ་མཁས་པ། བསྟན་བཅོས་ཐམས་ཅད་རྟོགས་པར་ཁོང་དུ་ཆུད་པ། ཡི་གེ་དང་གྲངས་དང་ལག་རྩིས་དང་། རྩིས་རྣམས་ཤིན་ཏུ་བསླབས་པར་གྱུར་པ་ཞིག་བྱུང་ངོ་། །རིགས་ཀྱི་ལྷ་མོ་དེའི་ཚེ་དེའི་དུས་ན་རྒྱལ་པོ་ལྷའི་དབང་ཕྱུག་འོད་དེའི་ཡུལ་དེ་ན་སེམས་ཅན་བརྒྱ་སྟོང་ཕྲག་དུ་མ་ནད་སྣ་ཚོགས་ཀྱིས་བཏབ་པར་གྱུར་ཅིང་། ནད་སྣ་ཚོགས་ཀྱིས་ཡོངས་སུ་གཟིར་ཏེ། སྡུག་བསྔལ་མི་བཟད་པ་རྩུབ་པ་དྲག་པ་ཡིད་དུ་མི་འོང་བའི་ཚོར་བ་རྣམས་མྱོང་བར་གྱུར་ཏོ། །རིགས་ཀྱི་ལྷ་མོ་དེའི་ཚེ་དེའི་དུས་ན་ཚོང་དཔོན་གྱི་བུ་ཆུ་འབེབས་དེ། སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ། བརྒྱ་སྟོང་ཕྲག་དུ་མ་དེ་དག་གི་དོན་གྱི་ཕྱིར། སྙིང་རྗེ་ཆེན་པོའི་སེམས་སྐྱེས་པར་གྱུར་ཏོ། །སེམས་ཅན་བརྒྱ་སྟོང་ཕྲག་དུ་མ་དེ་དག་ནི་ནད་སྣ་ཚོགས་ཀྱིས་བཏབ་ཅིང་ནད་སྣ་ཚོགས་ཀྱིས་གཟིར་བ། དེ་ལྟར་སྡུག་བསྔལ་མི་བཟད་པ་རྩུབ་པ་དྲུག་པོ་ཡིད་དུ་མི་འོང་བའི་ཚོར་བ་རྣམས་མྱོང་ལ། བདག་གི་ཕ་ཚོང་དཔོན་རལ་པ་འཛིན་སྨན་པ་གསོ་བར་བྱེད་པ། ཁམས་ལ་མཆོག་ཏུ་མཁས་པ། ཚེའི་རིག་བྱེད་ཡན་ལག་བརྒྱད་ཀྱི་རྒྱུད་དང་ལྡན་པ་འདི་ནི་རྒས་འཁོགས་གཏུགས་ལམ་དུ་ཞུགས། ན་ཚོད་རྗེས་སུ་ཐོབ་པ། འཁར་བ་ལ་བརྟེན་ཅིང་འདར་ཏེ། གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་།
ཡུལ་འཁོར་དང་། རྒྱལ་པོའི་ཕོ་བྲང་འཁོར་རྣམས་སུ་འགྲོ་མི་ནུས་ན། སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ་བརྒྱ་སྟོང་ཕྲག་དུ་མ་དེ་དག་ནད་སྣ་ཚོགས་ལས་ཡོངས་སུ་ཐར་བར་བྱ་བའི་ཕྱིར། བདག་ཉིད་བདག་གི་ཕ་རལ་པ་འཛིན་གྱི་གན་དུ་སོང་ལ་ནད་ཀྱི་ཕྱིར་ཁམས་ལ་མཁས་པར་བྱ་བ་ཡོངས་སུ་དྲིས་ཏེ། ཁམས་ལ་མཁས་པར་བྱ་བ་དྲིས་པ་དེས་བདག་གྲོང་དང་། གྲོང་ཁྱེར་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་རྣམས་སུ་འགྲོ་བར་བྱའོ། །སོང་ནས་ཀྱང་སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ། བརྒྱ་སྟོང་ཕྲག་དུ་མ་དག་ནད་སྣ་ཚོགས་ལས་ཡོངས་སུ་ཐར་བར་བྱའོ་སྙམ་ནས། རིགས་ཀྱི་ལྷ་མོ་དེའི་ཚེ་དེའི་དུས་ན། ཚོང་དཔོན་གྱི་བུ་ཆུ་འབེབས་རང་གི་ཕ་རལ་པ་འཛིན་ག་ལ་བ་དེར་སོང་སྟེ། ཕྱིན་ནས། རང་གི་ཕ་རལ་པ་འཛིན་གྱི་རྐང་པ་ལ་མགོ་བོས་ཕྱག་འཚལ་ཏེ་ཐལ་མོ་སྦྱར་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཀྱང་ཚོང་དཔོན་གྱི་བུ་ཆུ་འབེབས་ཀྱིས་རང་གི་ཕ་རལ་པ་འཛིན་ལ་ཚིགས་སུ་བཅད་པ་འདི་དག་གིས་ཁམས་ལ་མཁས་པར་བྱ་བ་དྲིས་པ། ཇི་ལྟར་དབང་པོ་འཛིན་འགྱུར་ཞིང་། །ཁམས་ཀྱི་རྣམས་ཀྱང་ཡོངས་སུ་འགྱུར། །གང་གི་དུས་ན་ལུས་ཅན་ལ། །ནད་ཀྱི་རྣམས་ནི་འབྱུང་བར་འགྱུར། །དུས་དང་དུས་མིན་ཟས་ཟོས་པ། །ཇི་ལྟ་བུར་ན་བདེ་བར་འགྱུར། །གང་གི་ལུས་ཀྱི་ནང་དུ་ནི། །ལུས་ཀྱི་མི་ལ་གནོད་མི་འགྱུར། ། རླུང་ལས་གྱུར་དང་མཁྲིས་གྱུར་དང་། །འདུས་ལས་གྱུར་དང་བད་ཀན་གྱུར། །ནད་རྣམས་ཞི་བར་བགྱི་སླད་དུ། །ཇི་ལྟ་བུར་ནི་གསོ་བར་བགྱི། །གང་གིས་མི་ལ་གནོད་འགྱུར་བའི། །རླུང་ནི་གང་གི་དུས་ན་གཡོ། །གང་གི་དུས་ན་མཁྲིས་པ་གཡོ། །བད་ཀན་གང་གི་དུས་ན་གཡོ། ། དེ་ནས་ཚོང་དཔོན་རལ་པ་འཛིན་གྱིས་བུ་ཆུ་འབེབས་ལ་ཚིགས་སུ་བཅད་པ་འདི་དག་གིས་ཁམས་ལ་མཁས་པར་བྱ་བ་རྣམ་པར་བསྟན་ཏོ། །ཟླ་གསུམ་དབྱར་ཏེ་ཟླ་གསུམ་སྟོན་དུ་ཤེས། །གསུམ་ནི་དགུན་ཏེ་གསུམ་ནི་དཔྱིད་ཡིན་ནོ། །དེ་ལྟར་ཟླ་བའི་གོ་རིམས་དུས་ནི་དྲུག །ལོ་གཅིག་
ལ་ནི་ཟླ་བ་བཅུ་གཉིས་འདོད། །གསུམ་གསུམ་དུ་ནི་ཚིགས་རྣམས་བསྡུས་པར་ཤེས། །ཟླ་བ་གཉིས་གཉིས་ཤིང་ནི་དུས་སུ་བསྟན། །ཟས་དང་སྐོམ་ནི་དེ་ལྟར་འཇུ་བར་འགྱུར། །སྨན་པ་དང་ནི་ཁམས་དང་དུས་ཀྱང་བསྟན། །དབང་པོ་དང་ནི་ཁམས་རྣམས་དེ་དག་ཀྱང་། ། ལོ་གཅིག་ནང་གི་ཚིགས་ཚིགས་ཡོངས་སུ་འགྱུར། །དབང་པོ་དག་ནི་ཡོངས་སུ་འགྱུར་བ་ན། །ལུས་ཅན་རྣམས་ལ་སྣ་ཚོགས་ནད་ཀྱང་འབྱུང་། །དེ་ཉིད་ལ་ནི་སྨན་པས་ཟླ་གསུམ་བཞི། །ཚིགས་ཀྱི་བར་དང་དུས་དྲུག་རྣམས་དང་ནི། །ཁམས་དྲུག་མཁས་པར་བྱ་བ་ཤེས་པར་བྱ། ། ཟས་སྐོམ་སྨན་རྣམས་གོ་རིམས་ཇི་བཞིན་ཏེ། །རླུང་གི་ཤས་ཆེའི་ནད་ནི་དབྱར་ན་ལྡང་། །སྟོན་དུ་གྱུར་པ་ན་ནི་མཁྲིས་པ་གཡོ། །དགུན་གྱི་དུས་ན་དེ་བཞིན་འདུས་པ་སྟེ། །བད་ཀན་ཤས་ཆེའི་ནད་ནི་དཔྱིད་ན་ལྡང་། །དབྱར་ནི་སྣུམ་དྲོ་ལན་ཚྭ་སྐྱུར་བའི་རོ། །སྟོན་ནི་མངར་དང་སྣུམ་དང་བསིལ་བག་གོ། །དགུན་ནི་མངར་དང་སྣུམ་དང་སྐྱུར་བ་སྟེ། །དཔྱིད་ཀྱི་དུས་ན་རྩུབ་དྲོ་ཚ་བའོ། །བད་ཀན་ཆེ་བ་ཟོས་མ་ཐག་ཏུ་ལྡང་། །མཁྲིས་པ་ཆེ་བ་འཇུ་བའི་དུས་ན་ལྡང་། །རླུང་ཤས་ཆེ་བ་ཞུ་མ་ཐག་ཏུ་ལྡང་། །ཁམས་གསུམ་གཡོ་བ་དེ་ནི་དེ་ལྟའོ། །རླུང་གི་བདག་ཉིད་ལ་ནི་བཅུད་ཀྱིས་གསོ། །བཀྲུ་སྨན་གྱིས་ནི་མཁྲིས་པ་བསལ་བར་བྱ། །འདུས་པ་ལ་ནི་གསུམ་དང་མཐུན་ལྡན་པ། །བད་ཀན་ཚིགས་སུ་བབས་ན་སྐྱུགས་སྨན་གཏང་། །རླུང་ཤས་ཆེ་དང་མཁྲིས་དང་འདུས་པ་དང་། །བད་ཀན་ཤས་ཆེའི་ཚིགས་རྣམས་ཤེས་པར་བྱ། །དུས་གང་ཁམས་གང་ལུས་ནི་གང་ཡིན་པ། །དེ་ཡི་སྨན་དང་བཟའ་བཏུང་བསྟེན་པར་བྱ། །དེ་ནས་ཚོང་དཔོན་གྱི་བུ་ཆུ་འབེབས་ཀྱིས་ཁམས་ལ་མཁས་པར་བྱ་བ་འདི་ལྟ་བུ་དེ་ཙམ་ཞིག་ཡོངས་སུ་དྲིས་པ་དེས། ཚེའི་རིག་བྱེད་ཀྱི་ཡན་ལག་བརྒྱད་པོ་ཐམས་ཅད་ཁོང་དུ་ཆུད་པར་གྱུར་ཏོ། །རིགས་ཀྱི་ལྷ་མོ་དེའི་ཚེ་དེའི་དུས་ན། ཚོང་དཔོན་གྱི་བུ་ཆུ་འབེབས་རྒྱལ་པོ་ལྷའི་དབང་ཕྱུག་འོད་ཀྱི་ཡུལ་ན་གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དེ་ཐམས་ཅད་དུ་སོང་ནས། སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ། བརྒྱ་
སྟོང་ཕྲག་དུ་མ་དེ་དག་ལ་ཁོ་བོ་ནི་སྨན་པའོ། །ཁོ་བོ་ནི་སྨན་པའོ་ཞེས་བདག་ཉིད་ཀྱིས་ཁས་འཆེས་ཏེ། ཁོ་བོས་ཁྱེད་རྣམས་ནད་སྣ་ཚོགས་ལས་ཡོངས་སུ་ཐར་བར་བྱའོ་ཞེས་དབུགས་ཕྱུང་ངོ་། །རིགས་ཀྱི་ལྷ་མོ་ཚོང་དཔོན་གྱི་བུ་ཆུ་འབེབས་ཀྱིས། འདི་ལྟ་བུའི་ཚིག་བརྗོད་པ་དེ་ཐོས་མ་ཐག་ཏུ་སྲོག་ཆགས་བརྒྱ་སྟོང་ཕྲག་དུ་མ་དེ་དག་ཐམས་ཅད་རབ་ཏུ་དགའ་བ་ཆེན་པོ་སྐྱེས་པར་གྱུར་ཏོ། །དབུགས་ཕྱིན་པ་རྙེད་ནས་ཀྱང་དགའ་བ་དང་བདེ་བ་དང་ཡིད་བདེ་བ་བསམ་གྱིས་མི་ཁྱབ་པ་དང་ལྡན་པར་གྱུར་ཏོ། །དེའི་ཚེ་དེའི་དུས་ན་སེམས་ཅན་ནད་སྣ་ཚོགས་ཀྱིས་བཏབ་པ་ནད་སྣ་ཚོགས་ཀྱིས་གཟིར་བ་བརྒྱ་སྟོང་ཕྲག་དུ་མ་དེ་དག་ནད་སྣ་ཚོགས་ལས་ཡོངས་སུ་ཐར་ཏེ་ནད་མེད་པར་གྱུར་ཏོ། །ནད་མེད་པར་གྱུར་ནས་ཀྱང་སྔ་མཁོ་བཞིན་དུ་མཐུ་དང་སྟོབས་དང་བརྩོན་འགྲུས་དང་ལྡན་པར་གྱུར་ཏོ། །དེའི་ཚེ་དེའི་དུས་ན་སེམས་ཅན་ནད་སྣ་ཚོགས་ཀྱིས་བཏབ་པ་ནད་སྣ་ཚོགས་ཀྱིས་གཟིར་བ་བརྒྱ་སྟོང་ཕྲག་དུ་མ་དེ་དག་གི་ནང་ནས་གང་སུ་དག་ནད་དྲག་པོས་བཏབ་པ་དེ་དག་ཐམས་ཅད་ཚོང་དཔོན་གྱི་བུ་ཆུ་འབེབས་ག་ལ་བ་དེར་དོང་ནས་ཕྱིན་པ་དང་། སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ་བརྒྱ་སྟོང་ཕྲག་དུ་མ་དེ་དག་ལ་ཚོང་དཔོན་གྱི་བུ་ཆུ་འབེབས་ཀྱིས་སྨན་དཔྱད་གང་ཅི་བསྟན་པ་དེས། སེམས་ཅན་དེ་དག་ཐམས་ཅད་ཀྱི་ནད་ཐམས་ཅད་རབ་ཏུ་ཞི་བར་བྱས་སོ། །ནད་མེད་པ་དང་ནད་ཉུང་བར་གྱུར་ནས་ཀྱང་སྔ་མཁོ་བཞིན་དུ་མཐུ་དང་སྟོབས་དང་བརྩོན་འགྲུས་དང་ལྡན་པར་གྱུར་ཏོ། །རིགས་ཀྱི་ལྷ་མོ་དེའི་ཚེ་དེའི་དུས་ན་རྒྱལ་པོ་ལྷའི་དབང་ཕྱུག་འོད་ཀྱི་ཡུལ་ན་གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་ཐམས་ཅད་ན་སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ། བརྒྱ་སྟོང་ཕྲག་དུ་མ་དེ་དག་ཐམས་ཅད་ཚོང་དཔོན་གྱི་བུ་ཆུ་འབེབས་ཀྱིས་ནད་སྣ་ཚོགས་ལས་ཡོངས་སུ་ཐར་བར་བྱས་པར་གྱུར་ཏོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། ནད་རབ་ཏུ་ཞི་བར་བྱ་བའི་ལེའུ་ཞེས་བྱ་བ་སྟེ་བཅུ་དྲུག་པའོ།། །།འཕགས་པ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ཞེས་བྱ་བ་
ཐེག་པ་ཆེན་པོའི་མདོ།བམ་པོ་ལྔ་པ་སྟེ་ཐ་མ།རིགས་ཀྱི་ལྷ་མོ་གཞན་ཡང་རྒྱལ་པོ་ལྷའི་དབང་ཕྱུག་འོད་ཀྱི་ཡུལ་དུ། ཚོང་དཔོན་གྱི་བུ་ཆུ་འབེབས་ཀྱིས་སེམས་ཅན་ཐམས་ཅད་ཀྱི་ནད་མེད་པར་བྱས་པས། ན་བ་ཉུང་ཞིང་སྔ་མཁོ་བཞིན་དུ་སྤྲོ་བ་དང་སྟོབས་དང་ལྡན་པའི་ལུས་སུ་གྱུར་ཏོ། །རྒྱལ་པོ་ལྷའི་དབང་ཕྱུག་འོད་ཀྱི་ཡུལ་ན་སེམས་ཅན་ཐམས་ཅད་དགའ་ཞིང་རྩེ་ལ་དགའ་མགུར་སྤྱོད་དེ་སྦྱིན་པ་དག་ཀྱང་སྦྱིན། བསོད་ནམས་དག་ཀྱང་བྱེད་དེ། ཚོང་དཔོན་གྱི་ཁྱེའུ་ཆུ་འབེབས་ལའང་། ཚོང་དཔོན་གྱི་བུ་ཆུ་འབེབས་རྒྱལ་བར་གྱུར་ཅིག །རྒྱལ་བར་གྱུར་ཅིག །སྨན་པའི་རྒྱལ་པོ་སེམས་ཅན་ཐམས་ཅད་ཀྱི་ནད་གསོ་བ་མངོན་སུམ་དུ་བྱང་ཆུབ་སེམས་དཔར་ངེས་པ། ཚེའི་རིག་བྱེད་ཡན་ལག་བརྒྱད་པ་ཐམས་ཅད་རྟོགས་པ་ཞེས་མངོན་པར་འདུ་བྱེད་དོ། །རིགས་ཀྱི་ལྷ་མོ་ཚོང་དཔོན་གྱི་བུ་ཆུ་འབེབས་དེ་ལ་ཆུང་མ་ཆུའི་པདྨའི་སྙིང་པོ་ཞེས་བྱ་བ་ཞིག་ཡོད་དེ། རིགས་ཀྱི་ལྷ་མོ་ཆུང་མ་ཆུའི་པདྨའི་སྙིང་པོ་དེ་ལ་ཁྱེའུ་གཉིས་ཡོད་དེ། གཅིག་གི་མིང་ནི་ཆུའི་གོས་ཞེས་བྱ། གཅིག་གི་མིང་ནི་ཆུའི་སྙིང་པོ་ཞེས་བྱའོ། །རིགས་ཀྱི་ལྷ་མོ་དེ་ནས་ཚོང་དཔོན་གྱི་བུ་ཆུ་འབེབས་ཁྱེའུ་དེ་གཉིས་དང་ལྷན་ཅིག་ཏུ་མཐར་གྱིས་གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་རྣམས་སུ་འགྲོའོ། །རིགས་ཀྱི་ལྷ་མོ་དེ་ནས་དུས་གཞན་ཞིག་ན། ཚོང་དཔོན་གྱི་བུ་ཆུ་འབེབས་འབྲོག་དགོན་པ་ཞིག་ཏུ་ཕྱིན་ཏེ། དེ་ནས་འབྲོག་དགོན་པ་དེར་ཤ་ཟ་བའི་ཁྱི་དང་། སྤྱང་ཀི་དང་། ཝ་དང་། ཁྭ་དང་། བྱ་དག་གང་ན་དགོན་པ་ན་རྫིང་ཞིག་ཡོད་པ་དེར་རྒྱུག་པར་མཐོང་ནས་དེ་འདི་སྙམ་དུ་སེམས་ཏེ། ཅིའི་ཕྱིར་ཤ་ཟ་བའི་ཁྱི་དང་། སྤྱང་ཀི་ནས་བྱའི་བར་འདི་དག་ཕྱོགས་འདིར་རྒྱུག་སྙམ་མོ། །དེ་ཡང་འདི་སྙམ་དུ་སེམས་ཏེ། བདག་ཁྱི་དང་། སྤྱང་ཀི་དང་། ཝ་དང་། ཁྭ་དང་། བྱ་རྣམས་ཕྱོགས་གང་དང་གང་དུ་རྒྱུག་པའི་ཕྱོགས་དེར་འགྲོ་བར་བྱའོ་སྙམ་མོ། །རིགས་ཀྱི་ལྷ་མོ་དེ་ནས་ཚོང་དཔོན་གྱི་བུ་ཆུ་འབེབས་མཐར་གྱིས་རྒྱུ་ཞིང་སོང་སྟེ། དགོན་པ་ན་རྫིང་ཞིག་ཡོད་པ་དེ་དག་ག་ལ་བ་དེར་ཕྱིན་ཏོ། །རྫིང་ཆེན་པོ་དེ་ན་ཉ་ཁྲི་ཞིག་གནས་ཏེ་དེས་དེར་ཉ་ཁྲི་ཕྲག་མང་པོ་ཞིག་
ཆུ་དང་བྲལ་བ་མཐོང་ནས། དེས་དེ་ལ་སྙིང་རྗེ་ཆེན་པོའི་སེམས་སྐྱེས་པ་དང་། དེ་ན་ལྷ་མོ་ཞིག་ཤིང་ལས་ལུས་ཕྱེད་ཙམ་ཕྱུང་བ་ཞིག་མཐོང་སྟེ། ལྷ་མོ་དེས་ཚོང་དཔོན་གྱི་བུ་ཆུ་འབེབས་ལ་འདི་སྐད་ཅེས་སྨྲས་སོ། །རིགས་ཀྱི་བུ་ལེགས་སོ་ལེགས་སོ། །གང་གི་ཕྱིར་ཆུ་འབེབས་ཞེས་བྱ་བ་ཁྱོད་ཀྱིས་ཉ་འདི་རྣམས་ལ་ཆུ་བྱིན་ཅིག །རྣམ་པ་གཉིས་ཀྱི་ཕྱིར་ཆུ་འབེབས་ཞེས་བྱ་སྟེ། གང་ཆུ་འབེབས་པ་དང་གང་ན་ཆུ་སྦྱིན་པའོ། །དེ་བས་ན་རང་གི་མིང་དང་མཐུན་པར་བྱ་བ་བྱོས་ཤིག །ཆུ་འབེབས་ཀྱིས་སླར་སྨྲས་པ། ལྷ་མོ་ཉ་འདི་དག་ལ་ཇི་སྙེད་ཅིག་མཆིས། ལྷ་མོས་སྨྲས་པ་ཉ་ཁྲི་ཐམ་པའོ། །རིགས་ཀྱི་ལྷ་མོ་དེ་ནས་ཚོང་དཔོན་གྱི་བུ་ཆུ་འབེབས་ཆེས་མཆོག་ཏུ་སྙིང་རྗེ་བའི་སེམས་སྐྱེས་སོ། །རིགས་ཀྱི་ལྷ་མོ་དེའི་ཚེ་དགོན་པ་ན་ཡོད་པའི་རྫིང་ཆེན་པོ་ན་ཆུའི་ལྷག་མ་ཅུང་ཟད་ཙམ་ཞིག་ལུས་ཏེ། དེ་ནས་ཉ་ཁྲི་འཆི་བའི་སྒོར་ཞུགས་ཤིང་ཆུ་དང་བྲལ་བ་དེ་དག་རྒྱུག་ཅིང་རྣམ་པར་རྒྱུག་གོ། །རིགས་ཀྱི་ལྷ་མོ་དེ་ནས་ཚོང་དཔོན་གྱི་བུ་ཆུ་འབེབས་ཀྱིས་ཕྱོགས་བཞིར་བརྒྱུགས་པ་དང་། ཉ་ཁྲི་པོ་དེ་དག་ཚོང་དཔོན་གྱི་ཁྱེའུ་ཆུ་འབེབས་ཕྱོགས་གང་དུ་འགྲོ་བའི་ཕྱོགས་དེ་ལོགས་སུ་ཆུ་འབེབས་ལ་སྙིང་རྗེ་རྗེ་ལྟར་བལྟའོ། །རིགས་ཀྱི་ལྷ་མོ་དེ་ནས་ཚོང་དཔོན་གྱི་ཁྱེའུ་ཆུ་འབེབས་ཀྱིས་ཕྱོགས་བཞིར་བརྒྱུགས་ཏེ་ཆུ་བཙལ་ཀྱང་དེར་ཆུ་མ་རྙེད་ནས་ཕྱོགས་བཞིར་བལྟས་པ་དང་། དེས་ཧ་ཅང་ཡང་ཐག་མི་རིང་བ་ཞིག་ན་ཤིང་ལྗོན་པ་ཆེན་པོ་མང་པོ་ཞིག་མཐོང་ནས། ཤིང་ལྗོན་པ་དེ་དག་ལ་འཛེགས་ཏེ། ཤིང་གི་ཡལ་ག་རྣམས་བཅད་ནས་ཤིང་གི་ཡལ་ག་དེ་དག་ཁྱེར་ཏེ་རྫིང་ཆེན་པོ་ག་ལ་བ་དེར་སོང་སྟེ་ཕྱིན་པ་དང་། ཤིང་གི་ཡལ་ག་དེ་རྣམས་ཀྱིས་ཉ་ཁྲི་པོ་དེ་དག་ལ་ཤིན་ཏུ་བསིལ་བའི་གྲིབ་མ་བྱས་སོ། །རིགས་ཀྱི་ལྷ་མོ་དེ་ནས་ཚོང་དཔོན་གྱི་ཁྱེའུ་ཆུ་འབེབས་རྫིང་དེར་ཆུ་འབེབས་པ་ཚོལ་ཏེ། གང་ནས་ཆུ་འབབ་ཅེས་དེ་ཕྱོགས་བཞིར་བརྒྱུགས་ཀྱང་ཆུ་མ་རྙེད་ནས། དེ་མྱུར་བ་མྱུར་བར་ཆུའི་རྒྱུན་དེ་ཉིད་ཀྱི་རྗེས་སུ་སོང་སྟེ། རིགས་ཀྱི་ལྷ་མོ་དགོན་པ་ན་ཡོད་པའི་རྫིང་དེར་ཆུ་འབབ་པ་ཞེས་བྱ་བའི་ཀླུང་ཆེན་པོ་དེ་ལས་དེར་ཆུ་འབབ་པའི་ཀླུང་དེ་ཡང་དེའི་ཚེ། སྡིག་པ་ཅན་གྱི་སེམས་ཅན་ཞིག་གིས་ཉ་ཁྲི་པོ་དེ་དག་
གི་ཕྱིར་ཅི་ནས་ཀྱང་ཕྱིས་ཉ་དེ་དག་ལ་ཆུ་འབབ་པར་མི་འགྱུར་བ་དེ་ལྟ་བུའི་ཕྱོགས་ཀྱི་གཡང་ས་ཆེན་པོར་ཀླུང་དེ་ཕབ་བོ། །དེས་དེ་མཐོང་ནས་བསམས་པ། ཀླུང་འདི་ནི་སྐྱེ་བོ་སྟོང་གིས་ཀྱང་སྲོལ་དེ་ཉིད་དུ་དབབ་པར་མི་ནུས་ན། བདག་གི་ལྟ་དབབ་པར་ག་ལ་ནུས་སྙམ་ནས་དེ་ཕྱིར་ལོག་གོ། །རིགས་ཀྱི་ལྷ་མོ་དེ་ནས་ཚོང་དཔོན་གྱི་ཁྱེའུ་ཆུ་འབེབས་རིངས་པ་རིངས་པར་རྒྱལ་པོ་ལྷའི་དབང་ཕྱུག་འོད་ག་ལ་བ་དེར་སོང་སྟེ་ཕྱིན་ནས། རྒྱལ་པོ་ལྷའི་དབང་ཕྱུག་འོད་ཀྱི་རྐང་པ་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་ནས། དེ་དག་རྒྱུས་ནས་སྨྲས་ཏེ། བདག་གིས་ལྷའི་ཆབ་འོག་ཏུ་གྲོང་དང་། གྲོང་ཁྱེར་དང་། གྲོང་རྡལ་ཐམས་ཅད་དུ་སེམས་ཅན་གྱི་ནད་ཀྱི་རྒྱུན་ནི་བཀུམ་ན་གནས་ཆེ་གེ་མོ་ཞེས་བགྱི་བ་དེ་ན། དགོན་པ་ན་ཡོད་པ་ཞེས་བགྱི་བའི་རྫིང་ཞིག་མཆིས་པ་དེ་ན་ཉ་ཁྲི་ཞིག་གནས་པ་དེ་ཆབ་དང་བྲལ་ནས་གདུགས་ཀྱིས་གདུངས་ཤིང་མཆིས་ཏེ། ཇི་ལྟར་མི་རྣམས་ལ་སྩལ་བ་ལྟར་ཅི་ནས་དུད་འགྲོའི་སྐྱེ་གནས་སུ་གྱུར་པ་དེ་དག་ལ་ཡང་སྲོག་སྩོལ་བར་འཚལ་ན། ལྷས་གླང་པོ་ཆེ་ཉི་ཤུ་ཞིག་བདག་ལ་སྩལ་དུ་གསོལ། རྒྱལ་པོ་ལྷའི་དབང་ཕྱུག་འོད་ཀྱིས་སྨན་པའི་རྒྱལ་པོ་ཆེན་པོ་ལ་གླང་པོ་ཆེ་ཉི་ཤུ་ཞིག་བྱིན་ཅིག་ཅེས་བློན་པོ་རྣམས་ལ་བསྒོའོ། །བློན་པོ་རྣམས་ཀྱིས་སྨྲས་པ། སེམས་ཅན་ཆེན་པོ་གླང་པོ་ཆེའི་ལྷས་ག་ལ་བ་དེར་སོང་ལ་གླང་པོ་ཆེ་ཉི་ཤུ་ཞིག་ཁྲིད་དེ། སེམས་ཅན་རྣམས་ལ་ཕན་གདགས་པ་དང་བདེ་བར་གྱིས་ཤིག །རིགས་ཀྱི་ལྷ་མོ་དེ་ནས་ཚོང་དཔོན་གྱི་ཁྱེའུ་ཆུ་འབེབས་རང་གི་བུ་ཆུའི་གོས་དང་། ཆུའི་སྙིང་པོ་དང་ལྷན་ཅིག་ཏུ་གླང་པོ་ཆེ་ཉི་ཤུ་ཁྲིད་ནས་གླང་པོ་ཆེའི་རྫི་བོ་ལས་བ་ལང་གི་རྐྱལ་པ་བརྒྱ་བླངས་ཏེ། སླར་ལོག་ནས་ཆུ་འབབ་ཅེས་བྱ་བའི་ཀླུང་ཆེན་པོ་གང་དུ་འབབ་པ་དེར་སོང་སྟེ། རྐྱལ་པ་དེ་དག་ཆུས་བཀང་ནས་གླང་པོ་ཆེའི་རྒྱབ་ཏུ་ཆུ་བཀལ་ཏེ། མྱུར་བ་མྱུར་བར་དགོན་པ་ན་ཡོད་པའི་རྫིང་ག་ལ་བ་དེར་སོང་ནས་ཕྱིན་པ་དང་། ཆུ་དེ་གླང་པོ་ཆེའི་སྟེང་ནས་ཕབ་སྟེ། ཕྱོགས་བཞི་ནས་རྫིང་བུ་ཆུས་བཀང་ནས་ཕྱོགས་བཞིར་འགྲོ་བ་དང་། ཚོང་དཔོན་གྱི་ཁྱེའུ་ཆུ་འབེབས་གང་དང་གང་དུ་འགྲོ་བ་དེ་ལོགས་སུ་ཉ་ཁྲི་པོ་དག་ཀྱང་རྒྱུག་གོ། །
རིགས་ཀྱི་ལྷ་མོ་དེ་ནས་ཚོང་དཔོན་གྱི་ཁྱེའུ་ཆུ་འབེབས་འདི་སྙམ་དུ་སེམས་ཏེ། ཅིའི་ཕྱིར་ཉ་ཁྲི་པོ་འདི་དག་བདག་ག་ལ་བ་དེ་ལོགས་སུ་རྒྱུག་སྙམ་མོ། །དེ་ཡང་འདི་སྙམ་དུ་སེམས་ཏེ། ཉ་ཁྲི་པོ་འདི་དག་ནི་བཀྲེས་པའི་མེས་ཡོངས་སུ་ཉེན་ནས་བདག་ལ་བཟའ་བ་སློང་དུ་ངེས་ཀྱི་བདག་གིས་ཁ་ཟས་སྦྱིན་པར་བྱའོ་སྙམ་ནས། རིགས་ཀྱི་ལྷ་མོ་དེ་ནས་ཚོང་དཔོན་གྱི་ཁྱེའུ་ཆུ་འབེབས་ཀྱིས་རང་གིས་བུ་ཆུའི་གོས་ལ་འདི་སྐད་ཅེས་སྨྲས་སོ། །བུ་གླང་པོ་ཆེ་ཐམས་ཅད་ཀྱི་ནང་ནས་མགྱོགས་པའི་མཆོག་ལ་ཞོན་ཏེ་བདག་གི་ཁྱིམ་དུ་སོང་ལ། མྱུར་བ་མྱུར་བར་སོང་སྟེ་མེས་པོ་ཚོང་དཔོན་ལ། ཀྱེ་མེས་པོ་ཆུ་འབེབས་ཀྱི་མཆིད་ནས་ཁྱིམ་འདི་ན་ཕ་མ་དང་། སྤུན་དང་། སྲིང་མོ་དང་། བྲན་ཕོ་དང་། བྲན་མོ་དང་། ལས་བགྱིད་པ་རྣམས་ཀྱི་ཁ་ཟས་སྦྱར་བ་གང་ཅི་མཆིས་པ་ཐམས་ཅད་གཅིག་ཏུ་བསྡུས་ཏེ། ཆུའི་གོས་གླང་པོ་ཆེ་ལ་ཞོན་པའི་ལག་ཏུ་མྱུར་དུ་རྫོངས་ཤིག་ཅེས་མཆིའོ་ཞེས་དེ་སྐད་གྱིས་ཤིག །དེ་ནས་ཁྱེའུ་ཆུའི་གོས་གླང་པོ་ཆེ་དེ་ལ་ཞོན་ནས་མྱུར་བ་མྱུར་བར་རྒྱུག་ཅིང་རབ་ཏུ་རྒྱུག་སྟེ། རང་གི་ཁྱིམ་ག་ལ་བ་དེར་སོང་ནས་ཕྱིན་པ་དང་དེ་དག་རྒྱུས་ཀྱིས་ཞིབ་ཏུ་སྨྲས་ཏེ། དེ་ནས་ཁྱེའུ་ཆུའི་གོས་ཀྱིས་སྔར་སྨྲས་པའི་ཟས་སྦྱར་བ་དེ་ཐམས་ཅད་གླང་པོ་ཆེའི་རྒྱབ་ཏུ་བཀལ་ནས་གླང་པོ་ཆེ་དེ་ལ་ཞོན་ཏེ་དགོན་པ་ན་ཡོད་པའི་རྫིང་ག་ལ་བ་དེར་སོང་བ་དང་། ཆུ་འབེབས་ཀྱིས་རང་གི་བུ་ཆུའི་གོས་མཐོང་ནས་དགའ་མགུ་སྟེ་བུ་ལས་ཟས་བླངས་ནས་ཕྲུལ་ཏེ་རྫིང་དེར་གཏོར་ནས་ཉ་ཁྲི་པོ་དེ་དག་ཚིམ་པར་བྱས་ཏེ། དེ་འདི་སྙམ་དུ་བདག་གིས་དུས་གཞན་ཞིག་ན་དགོན་པའི་གནས་ཞིག་ན། དགེ་སློང་ཐེག་པ་ཆེན་པོ་ཀློག་པ་ལས་སུ་འཆི་བའི་དུས་ཀྱི་ཚེ། དེ་བཞིན་གཤེགས་པ་རིན་ཆེན་གཙུག་ཏོར་ཅན་གྱི་མཚན་ཐོས་པ་དེ་བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེའོ་ཞེས་ཐོས་ཀྱིས་བདག་གིས་ཉ་དེ་དག་ལ་རྟེན་ཅིང་འབྲེལ་པར་འབྱུང་བའི་ཆོས་ཟབ་མོ་ཡང་བཤད་ལ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་དེའི་མཚན་ཡང་བསྒྲག་པར་བྱའོ་སྙམ་མོ། །དེའི་ཚེ་ན་འཛམ་བུའི་གླིང་དེ་ན་སེམས་ཅན་རྣམས་ཀྱི་ལྟ་བ་གཉིས་སུ་གྱུར་ཏེ། ཁ་ཅིག་ནི་ཐེག་
པ་ཆེན་པོ་ལ་མངོན་པར་དད་དོ། །ཁ་ཅིག་ནི་སྨོད་དོ། །དེ་ནས་ཚོང་དཔོན་གྱི་བུ་ཁྱེའུ་ཆུ་འབེབས་ཀྱིས་དེའི་ཚེ་རྫིང་དེར་རྐང་པ་གཉི་གའི་པུས་མོ་ནུབ་ཙམ་དུ་འབོགས་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་དེ་ལ་ཕྱག་འཚལ་ལོ་ཞེས་ཆེད་དུ་བརྗོད་པ་དེ་སྐད་ཆེད་དུ་བརྗོད་དོ། །དེ་བཞིན་གཤེགས་པ་རིན་ཆེན་གཙུག་ཏོར་ཅན་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། ཕྱོགས་བཅུ་དག་ན་གང་སུ་དག་འཆི་བའི་དུས་ཀྱི་ཚེ། ངའི་མིང་ཐོས་པ་དེ་དག་དེ་ནས་ཤི་འཕོས་ནས་སུམ་ཅུ་རྩ་གསུམ་གྱི་ལྷ་རྣམས་དང་སྐལ་བ་མཉམ་པར་སྐྱེ་བར་གྱུར་ཅིག་ཅེས་སྨོན་ལམ་དེ་སྐད་བཏབ་བོ། །དེ་ནས་ཚོང་དཔོན་གྱི་ཁྱེའུ་ཆུ་འབེབས་ཀྱིས་དུད་འགྲོའི་སྐྱེ་གནས་སུ་གྱུར་པ་དེ་དག་ལ་ཆོས་འདི་བཤད་དེ་འདི་ལྟ་སྟེ། འདི་ཡོད་པའི་ཕྱིར་འདི་འབྱུང་འདི་སྐྱེས་པས་འདི་སྐྱེ་བ་སྟེ། འདི་ལྟར་མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་རྣམས་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་འབྱུང་བར་འགྱུར་ཏེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཞིག་འབྱུང་བར་འགྱུར་རོ། །འདི་ལྟ་སྟེ་མ་རིག་པ་འགགས་པས་འདུ་བྱེད་འགག་པར་འགྱུར་བ་ནས། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཞིག་ཀྱང་འགག་པར་འགྱུར་རོ་ཞེས་བྱ་བའི་བར་དུའོ། །རིགས་ཀྱི་ལྷ་མོ་དེ་ལྟར་དེའི་ཚེ་དེའི་དུས་ན་ཚོང་དཔོན་གྱི་བུ་ཆུ་འབེབས་ཀྱིས། དུད་འགྲོའི་སྐྱེ་གནས་སུ་གྱུར་པ་དེ་དག་ལ་ཆོས་དང་ལྡན་པའི་གཏམ་འདི་བརྗོད་ནས། རང་གི་བུ་ཆུའི་གོས་དང་ཆུའི་སྙིང་པོ་དང་ལྷན་ཅིག་ཏུ་རང་གི་ཁྱིམ་དུ་ཕྱིན་པའི་བར་དུའོ། །དེ་ནས་དུས་གཞན་ཞིག་ན་ཚོང་དཔོན་གྱི་ཁྱེའུ་ཆུ་འབེབས་དུས་སྟོན་ཆེན་པོ་ཟོས་
ནས་ཆང་གིས་ར་རོ་སྟེ་མལ་ན་ཉལ་བ་དང་། དེའི་ཚེ་དེའི་དུས་ན་ལྟས་ཆེན་པོ་བྱུང་བར་གྱུར་ཏེ། མཚན་མོ་དེ་འདས་པ་དང་། ཉ་ཁྲི་པོ་དེ་དག་འཆི་བའི་དུས་སུ་གྱུར་ནས་སུམ་ཅུ་རྩ་གསུམ་གྱི་ལྷ་རྣམས་དང་སྐལ་བ་མཉམ་པར་སྐྱེས་སོ། །སྐྱེས་མ་ཐག་ཏུ་དེ་དག་འདི་ལྟ་བུའི་ཚུལ་གྱིས་སེམས་ཀྱི་རྣམ་པར་རྟོག་པ་སྐྱེས་ཏེ། བདག་ཅག་དགེ་བའི་ལས་ཀྱི་རྒྱུ་གང་གིས་སུམ་ཅུ་རྩ་གསུམ་གྱི་ལྷ་རྣམས་ཀྱི་ནང་འདིར་སྐྱེས་སྙམ་མོ། །དེ་དག་ཀྱང་འདི་སྙམ་དུ་སེམས་ཏེ། བདག་ཅག་འཛམ་བུའི་གླིང་དེ་ན་ཉ་ཁྲིར་གྱུར་ཏེ་བདག་ཅག་དུད་འགྲོའི་སྐྱེ་གནས་སུ་གྱུར་པ་ལས། །ཚོང་དཔོན་གྱི་ཁྱེའུ་ཆུ་འབེབས་ཀྱིས་ཆུ་མང་པོ་དང་ཁ་ཟས་ཀྱི་མཆོག་གིས་ཚིམ་པར་བྱས་ཏེ། བདག་ཅག་ལ་རྟེན་ཅིང་འབྲེལ་པར་འབྱུང་བ་ཟབ་མོའི་ཆོས་ཀྱང་བསྟན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱི་མཚན་ཡང་བསྒྲགས་པས་དགེ་བའི་ཆོས་ཀྱི་རྒྱུ་དེ་དང་རྐྱེན་དེས་བདག་ཅག་ལྷ་རྣམས་ཀྱི་ནང་འདིར་སྐྱེས་ཀྱིས། བདག་ཅག་ཚོང་དཔོན་གྱི་ཁྱེའུ་ཆུ་འབེབས་ག་ལ་བ་དེར་དོང་སྟེ་ཕྱིན་ནས་དེ་ལ་མཆོད་པ་བྱའོ་སྙམ་མོ། །དེ་ནས་ལྷའི་བུ་ཁྲི་པོ་དེ་དག་སུམ་ཅུ་རྩ་གསུམ་གྱི་ལྷ་རྣམས་ཀྱི་ནང་ནས་མི་སྣང་བར་གྱུར་ནས། ཚོང་དཔོན་གྱི་བུ་ཆུ་འབེབས་ཀྱི་ཁྱིམ་དུ་ལྷགས་ཏེ། དེའི་ཚེ་ཚོང་དཔོན་གྱི་ཁྱེའུ་ཆུ་འབེབས་མལ་ན་ཉལ་ཞིང་འདུག་པ་དེ་ལ་ལྷའི་བུ་དེ་དག་གིས་མུ་ཏིག་གི་སེ་མོ་དོ་ཁྲི་ནི་མགོའི་ཐད་ཀར་བཞག །མུ་ཏིག་གི་སེ་མོ་དོ་ཁྲི་ནི་རྐང་པའི་དྲུང་དུ་བཞག །མུ་ཏིག་གི་སེ་མོ་དོ་ཁྲི་ནི་གཡས་ལོགས་སུ་བཞག །མུ་ཏིག་གི་སོ་མོ་དོ་ཁྲི་ནི་ གཡོན་ལོགས་སུ་བཞག་སྟེ། པུས་མོ་ནུབ་ཙམ་དུ 
་མེ་ཏོག་མན་དཱ་ར་བའི་ཆར་ཆེན་པོ་ཡང་ཕབ། ལྷའི་སིལ་སྙན་རྣམས་ཀྱང་དཀྲོལ་ནས་དེས་འཛམ་བུའི་གླིང་གི་མི་ཐམས་ཅད་ཀྱང་སད། ཚོང་དཔོན་གྱི་ཁྱེའུ་ཆུ་འབེབས་ཀྱང་སད་དོ། །དེ་ནས་ལྷའི་བུ་ཁྲི་པོ་དེ་དག་ཀྱང་ནམ་མཁའ་ལ་དོང་སྟེ། ལྷའི་བུ་དེ་དག་རྒྱལ་པོ་ལྷའི་དབང་ཕྱུག་འོད་ཀྱི་ཡུལ་གྱི་གནས་དང་གནས་གཞན་དུ་ཡང་། མེ་ཏོག་མན་དཱ་ར་བའི་ཆར་འབེབས་ཤིང་། དགོན་པ་ན་ཡོད་པའི་རྫིང་ཆེན་པོ་ག་ལ་བ་དེར་དོང་ནས། དེ་དག་གིས་རྫིང་ཆེན་པོ་དེར་མེ་ཏོག་མན་དཱ་
ར་བའི་ཆར་ཆེན་པོ་ཕབ་སྟེ། དེ་ཉིད་དུ་མི་སྣང་བར་གྱུར་ནས་སླར་ཡང་ལྷའི་གནས་སུ་དོང་སྟེ། དེ་ན་འདོད་པའི་ཡོན་ཏན་ལྔ་པོ་དག་གིས་དགའ་ཞིང་རྩེ་སྟེ། དགའ་མགུར་སྤྱོད་ཅིང་དཔལ་དང་སྐལ་བ་བཟང་པོ་ཆེན་པོ་དག་ཀྱང་མྱོང་ངོ་། །འཛམ་བུའི་གླིང་དུ་ནམ་ལངས་པ་དང་དེ་ནས་རྒྱལ་པོ་ལྷའི་དབང་ཕྱུག་འོད་ཀྱིས་ལྟས་དེ་དག་བྱུང་བ་མཐོང་ནས། སྐར་མཁན་དང་བློན་པོ་ཆེན་པོ་རྣམས་ལ་སྨྲས་པ། ཅིའི་ཕྱིར་མདང་སུམ་ལྟས་འདི་དག་བྱུང་། དེ་དག་གིས་སྨྲས་པ། ལྷ་མཁྱེན་པར་མཛད་དུ་གསོལ། ཚོང་དཔོན་གྱི་ཁྱེའུ་ཆུ་འབེབས་ཀྱི་ཁྱིམ་དུ་མུ་ཏིག་གི་སེ་མོ་དོ་བཞི་ཁྲིའི་ཆར་བབ་ཅིང་ལྷའི་མེ་ཏོག་མན་དཱ་ར་བའི་ཆར་ཡང་འབབ་པོ་ཞེས་བྱས་པ་དང་། རྒྱལ་པོ་ལྷའི་དབང་ཕྱུག་འོད་ཀྱིས་བློན་པོ་རྣམས་ལ་སྨྲས་པ། ཁྱེད་དེང་ལ་ཚོང་དཔོན་གྱི་བུ་ཆུ་འབེབས་ལ་སྙན་པའི་ཚིག་གིས་བོས་ཤིག །དེ་ནས་སྐར་མཁན་དང་བློན་པོ་ཆེན་པོ་རྣམས་ཆུ་འབེབས་ཀྱི་ཁྱིམ་ག་ལ་བ་དེར་དོང་སྟེ་ཕྱིན་ནས། ཚོང་དཔོན་གྱི་ཁྱེའུ་ཆུ་འབེབས་ལ་འདི་སྐད་ཅེས་སྨྲས་སོ། །རྒྱལ་པོ་ལྷའི་དབང་ཕྱུག་འོད་འདི་ཁྱོད་ལ་འབོད་དོ། །དེ་ནས་ཚོང་དཔོན་གྱི་ཁྱེའུ་ཆུ་འབེབས་བློན་པོ་ཆེན་པོ་རྣམས་དང་ལྷན་ཅིག་ཏུ་རྒྱལ་པོ་ལྷའི་དབང་ཕྱུག་འོད་ག་ལ་བ་དེར་དོང་བ་དང་། རྒྱལ་པོས་སྨྲས་པ། བུ་ཆུ་འབེབས་མདང་སུམ་དེ་འདྲ་བའི་ལྟས་བྱུང་བ། དེ་ཅིའི་ལྟས་ཡིན་ཤེས་སམ། དེ་ནས་ཚོང་དཔོན་གྱི་ཁྱེའུ་ཆུ་འབེབས་ཀྱིས་རྒྱལ་པོ་ལྷའི་དབང་ཕྱུག་འོད་ལ་འདི་སྐད་ཅེས་སྨྲས་སོ། །ལྷ་བདག་གིས་འཚལ་ཏེ་ཉ་ཁྲི་པོ་དེ་དག་འཆི་བའི་དུས་བགྱིས་པར་ངེས་སོ། །རྒྱལ་པོས་སྨྲས་པ། ཇི་ལྟར་ཤེས་ཆུ་འབེབས་ཀྱིས་སྨྲས་པ། ལྷ་ཆུའི་གོས་རྫིང་དེར་ཉ་ཁྲི་པོ་དེ་དག་གུམ་མམ་མ་གུམ་ལྟར་སྩལ་ཏོ། །རྒྱལ་པོས་སྨྲས་པ། དེ་ལྟར་གྱིས་ཤིག །དེ་ནས་ཚོང་དཔོན་གྱི་ཁྱེའུ་ཆུ་འབེབས་ཀྱིས་ཁྱེའུ་ཆུའི་གོས་ལ་འདི་སྐད་ཅེས་སྨྲས་སོ། །བུ་སོང་ལ་དགོན་པ་ན་ཡོད་པའི་རྫིང་བུའི་ཉ་ཁྲི་པོ་དེ་དག་ཤི་འམ་མ་ཤི་ལྟོས་ཤིག །དེ་ནས་ཁྱེའུ་ཆུའི་གོས་མྱུར་བ་མྱུར་བར་དགོན་པ་ན་ཡོད་པའི་རྫིང་ཆེན་པོ་ག་ལ་བ་དེར་སོང་བ་དང་། ཉ་ཁྲི་པོ་དེ་དག་ཤི་བའི་དུས་སུ་གྱུར་ཅིང་མེ་ཏོག་མན་དཱ་ར་བའི་ཆར་ཆེན་པོ་བབ་པ་
ཡང་མཐོང་ནས་སླར་ལོག་སྟེ་ཕ་ལ་སྨྲས་བ། འཆི་བའི་དུས་སུ་གྱུར་ཏོ། །དེ་ནས་ཚོང་དཔོན་གྱི་ཁྱེའུ་ཆུ་འབེབས་ཀྱིས་ཁྱེའུ་ཆུའི་གོས་ལས་ཚིག་དེ་ཐོས་པ་དང་། རྒྱལ་པོ་ལྷའི་དབང་ཕྱུག་འོད་ག་ལ་བ་དེར་སོང་ནས་དེ་དག་རྒྱུས་ནས་ཞིབ་ཏུ་སྨྲས་ཏེ། ལྷ་མཁྱེན་པར་མཛད་དུ་གསོལ། ཉ་ཁྲི་པོ་དེ་དག་ཐམས་ཅད་ནི་འཆི་བའི་དུས་སུ་གྱུར་ནས་སུམ་ཅུ་རྩ་གསུམ་གྱི་ལྷ་རྣམས་ཀྱི་ནང་དུ་སྐྱེས་ཏེ། དེ་དག་དང་བདག་གི་མཐུས་མདང་སུམ་དེ་ལྟ་བུའི་དགེ་བའི་ལྟས་དེ་དག་བྱུང་སྟེ། བདག་གི་ཁྱིམ་དུ་ཡང་མུ་ཏིག་གི་སེ་མོ་དོ་བཞི་ཁྲི་དང་ལྷའི་མེ་ཏོག་མན་དཱ་ར་བའི་ཆར་ཡང་ཕབ་བོ། །དེ་ནས་རྒྱལ་པོ་དགའ་ཞིང་མགུ་སྟེ་ཡི་རང་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་རིགས་ཀྱི་ལྷ་མོ་བྱང་ཆུབ་ཡང་དག་པར་བསྡུས་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་ལྷ་མོ་དེའི་ཚེ་དེའི་དུས་ན། རྒྱལ་པོ་ལྷའི་དབང་ཕྱུག་འོད་ཅེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་སེམས་ན་དེ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ཤཱཀྱ་ལག་ན་བེ་ཅོན་ཅན་དེའི་ཚེ་དེའི་དུས་ན་རྒྱལ་པོ་ལྷའི་དབང་ཕྱུག་འོད་ཅེས་བྱ་བར་གྱུར་ཏོ། །རིགས་ཀྱི་ལྷ་མོ་དེའི་ཚེ་དེའི་དུས་ན། ཚོང་དཔོན་རལ་པ་འཛིན་ཅེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་སེམས་ན་དེ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རྒྱལ་པོ་ཟས་གཙང་མ་དེའི་ཚེ་དེའི་དུས་ན། ཚོང་དཔོན་རལ་པ་འཛིན་ཅེས་བྱ་བར་གྱུར་ཏོ། །རིགས་ཀྱི་ལྷ་མོ་དེའི་ཚེ་དེའི་དུས་ན། ཚོང་དཔོན་གྱི་ཁྱེའུ་ཆུ་འབེབས་ཞེས་བྱ་བ་དེ་གཞན་ཞིག་ཡིན་པ་སྙམ་དུ་ཁྱོད་སེམས་ན། དེ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ང་དེའི་ཚེ་དེའི་དུས་ན་ཚོང་དཔོན་གྱི་བུ་ཆུ་འབེབས་ཞེས་བྱ་བར་གྱུར་ཏོ། །རིགས་ཀྱི་ལྷ་མོ་དེའི་ཚེ་དེའི་དུས་ན། ཆུང་མ་ཆུའི་པདྨའི་སྙིང་པོ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་སེམས་ན་དེ་དེ་ལྟར་མི་བལྟའོ། ། དེ་ཅིའི་ཕྱིར་ཞེ་ན། ཤཱཀྱའི་བུ་མོ་ས་འཚོ་མ་དེའི་ཚེ་དེའི་དུས་ན། ཚོང་དཔོན་གྱི་བུ་ཁྱེའུ་ཆུ་འབེབས་ཞེས་བྱ་བའི་ཆུང་མ་ཆུའི་པདྨའི་སྙིང་པོ་ཞེས་བྱ་བར་གྱུར་ཏོ། །སྒྲ་གཅན་ཟིན་ནི་དེའི་ཚེ་དེའི་དུས་ན། ཁྱེའུ་ཆུའི་གོས་ཞེས་བྱ་བར་གྱུར་ཏོ། །ཀུན་དགའ་བོ་ནི་དེའི་ཚེ་དེའི་དུས་ན། ཁྱེའུ་ཆུའི་
སྙིང་པོ་ཞེས་བྱ་བར་གྱུར་ཏོ། །རིགས་ཀྱི་ལྷ་མོ་དེའི་ཚེ་དེའི་དུས་ན་ཉ་ཁྲི་པོར་གྱུར་པ་དེ་དག་གཞན་ཞིག་ཡིན་པ་སྙམ་དུ་ཁྱོད་སེམས་ན་དེ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། འབར་བའི་ཁྱད་པར་གྱི་གཟི་བརྗིད་རྒྱལ་པོ་ལ་སོགས་པ་ལྷའི་བུ་ཁྲི་པོ་འདི་དག་དེའི་ཚེ་དེའི་དུས་ན་ཉ་ཁྲིར་གྱུར་ཏེ། གང་དག་ངས་ཆུ་དང་ཟས་ཀྱི་མཆོག་གིས་ཚིམ་པར་བྱས་ཤིང་རྟེན་ཅིང་འབྲེལ་པར་འབྱུང་བ་ཟབ་མོའི་ཆོས་ཀྱང་བསྟན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱི་མཚན་ཡང་བསྒྲགས་ཏེ། དགེ་བའི་ལས་ཀྱི་རྒྱུ་དེས་ངའི་གན་དུ་འདིར་ལྷགས་ཏེ། དེས་ན་ད་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །རབ་ཏུ་དགའ་བ་དང་དང་བ་དང་མཆོག་ཏུ་དགའ་བ་དང་། གུས་པར་ཆོས་ཉན་པས་ཐམས་ཅད་ལུང་བསྟན་པ་ཞེས་བྱ་བའི་མིང་ཡང་ཐོབ་པར་གྱུར་ཏོ། །རིགས་ཀྱི་ལྷ་མོ་དེའི་ཚེ་དེའི་དུས་ན། ཤིང་གི་ལྷ་མོར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་སེམས་ན་དེ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རིགས་ཀྱི་ལྷ་མོ་ཁྱོད་དེའི་ཚེ་དེའི་དུས་ན་ཤིང་གི་ལྷ་མོར་གྱུར་ཏོ། །རིགས་ཀྱི་ལྷ་མོ་རྣམ་གྲངས་འདིས་ན་འཁོར་བ་ནས་འཁོར་བའི་ཚེ་ངས་ཇི་ལྟར་སེམས་ཅན་མང་པོ་བྱང་ཆུབ་ཏུ་ཡོངས་སུ་སྨིན་པར་བྱས་ཏེ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པའི་ས་ཐོབ་པར་གྱུར་པར་རིག་པར་བྱའོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། ཆུ་འབེབས་ཀྱིས་ཉ་བཏུལ་བ་སྔོན་བྱུང་བའི་ལེའུ་ཞེས་བྱ་བ་སྟེ་བཅུ་བདུན་པའོ།། །།རིགས་ཀྱི་ལྷ་མོ་གཞན་ཡང་བྱང་ཆུབ་སེམས་དཔའ་ནི་གཞན་ལ་ཕན་པའི་ཕྱིར་ལུས་ཀྱང་ཡོངས་སུ་གཏོང་ངོ་། །དེ་ཇི་ལྟ་ཞེ་ན། དྲི་མ་མེད་ཅིང་ཤིན་ཏུ་རྒྱས་པའི་ཡོན་ཏན་རྣམ་པ་སྣ་ཚོགས་བརྒྱའི་འོད་ཟེར་ས་དང་ལྷ་ཡུལ་དུ་རྣམ་པར་འཕྲོ་བ་ཐོགས་པ་མེད་པའི་ཡེ་ཤེས་མཐོང་བ་དང་སྟོབས་ཀྱིས་ཕ་རོལ་གནོན་པའི་བཅོམ་ལྡན་འདས་དགེ་སློང་སྟོང་གིས་ཡོངས་སུ་བསྐོར་ཏེ། ཡུལ་ལྔ་ལེན་གྱི་ལྗོངས་སུ་ལྗོངས་རྒྱུ་ཞིང་གཤེགས་ནས་ནགས་ཚོགས་ཞིག་ཏུ་བྱོན་པ་དང་། དེར་དེས་སྔོ་ཞིང་འཇམ་ལ་མཐིང་གར་འདུག་པའི་སྤང་གི་ངོས་མེ་ཏོག་གི་དྲི་ཞིམ་པ་
རྣམ་པ་སྣ་ཚོགས་ཀྱིས་རབ་ཏུ་བརྒྱན་པའི་ས་ཕྱོགས་ཞིག་གཟིགས་སོ། །གཟིགས་ནས་ཀྱང་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ས་ཕྱོགས་འདི་ནི་མཛེས་པ་སྟེ། འདི་ན་གཏམ་གྱི་གནས་ཀྱི་མཚན་མ་ཡོད་ཀྱིས་ད་དེ་བཞིན་གཤེགས་པའི་གདན་ཐིངས་ཤིག །དེ་ནས་དེས་བཅོམ་ལྡན་འདས་ཀྱི་བཀའ་བཞིན་དུ་གདན་བཏིང་ངོ་། །གདན་བཏིང་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གདན་བཏིང་ལགས་ན་བཅོམ་ལྡན་གཙོ་བོ་མཆོག །མི་ལ་མཆོག་སྩོལ་དམ་པ་སྲིད་བཅིངས་གྲོལ། ། བཞུགས་ཏེ་མི་ལ་སྨན་སླད་མཐར་བགྱིད་ཀྱི། །བཀའ་མཆིད་དམ་པ་བདུད་རྩི་གསུང་དུ་གསོལ། །དེ་ནས་བཅོམ་ལྡན་འདས་གདན་དེ་ལ་བཞུགས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱོད་བྱ་དཀའ་བའི་ལས་བྱེད་པའི་བྱང་ཆུབ་སེམས་དཔའི་རུས་པ་རྣམས་བལྟ་བར་འདོད་དམ། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་དགེ་སློང་དེ་དག་གིས་འདི་སྐད་ཅེས་གསོལ་ཏོ། །དྲང་སྲོང་དམ་པ་སེམས་ཅན་མཆོག་གི་སྙིང་པོ་ལ། །བཟོད་དང་བརྩོན་འགྲུས་ཆེ་ལ་ཞི་དང་དུལ་དགའ་ཞིང་། །བློ་གྲོས་དྲན་དགའ་ཡོན་ཏན་དཔག་མེད་གནས་གྱུར་གྱི། །རུས་པ་བདག་ཅག་བལྟ་བའི་དུས་ལགས་དེ་ལེགས་ཤོད། །དེ་ནས་བཅོམ་ལྡན་འདས་ཕྱག་གི་མཐིལ་འཁོར་ལོ་རྩིབས་སྟོང་གི་རི་མོ་ཅན་དང་། མེ་ཏོག་ཀ་མ་ལ་གསར་དུ་ཁ་བྱེ་བ་ལྟར་འཇམ་པའི་ཕྱག་གིས་སའི་ངོས་ལ་བརྡབས་ཏེ། བསྣུན་མ་ཐག་ཏུ་ས་རྣམ་པ་དྲུག་ཏུ་གཡོས་ཏེ་ནོར་བུ་དང་གསེར་དང་དངུལ་ལས་བྱས་པའི་མཆོད་རྟེན་ཞིག་དེ་ནས་བྱུང་ངོ་། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་མཆོད་རྟེན་འདི་ཕྱེ་ཞིག །དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ནས། མཆོད་རྟེན་དེ་ཕྱེ་བ་དང་དེས་དེར་གསེར་གྱི་འཕྲ་ཅན་གྱི་ནོར་བུ་དང་མུ་ཏིག་གིས་ཁེབས་པར་གཡོགས་པའི་གསེར་གྱི་ཟ་མ་ཏོག་ཅིག་མཐོང་ངོ་། །མཐོང་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གསེར་གྱི་ཟ་མ་ཏོག་ཅིག་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ།
ཟ་མ་ཏོག་བདུན་པོ་འདི་དག་ཐམས་ཅད་ཕྱེ་ཤིག །དེ་བཞིན་དུ་ཐམས་ཅད་ཕྱེ་བ་དང་དེས་དེར་རུས་པའི་ཁ་དོག་ཁ་བ་དང་མེ་ཏོག་ཀུ་མུ་ད་དང་འདྲ་བ་དག་ཅིག་མཐོང་ངོ་། །མཐོང་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རུས་པ་དག་ཅིག་གདའོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་སྐྱེས་བུ་ཆེན་པོའི་རུས་པ་རྣམས་ཁྱེར་ཏེ་ཤོག །དེ་ནས་ཚེ་དང་ལྡན་པ་ཀུན་དགའ་བོས་རུས་པ་དེ་དག་བླངས་ཏེ། སངས་རྒྱས་བཅོམ་ལྡན་འདས་ལ་ཕུལ་བ་དང་། བཅོམ་ལྡན་འདས་ཀྱིས་རུས་པ་རྣམས་དགེ་འདུན་གྱི་མདུན་དུ་བསྣམས་ཏེ་ཕྱག་ཏུ་བཞེས་ཏེ་བཀའ་སྩལ་པ། རུས་པ་འདི་དག་ཡོན་ཏན་མཆོག་རབ་ཚོགས་ལྡན་བློ་གྲོས་མཆོག །དུལ་དང་བསམ་གཏན་བཟོད་པས་སྤྲོ་བ་གྲགས་པ་དམ་པ་མཆོག །ཕྱིར་ཞིང་བྱང་ཆུབ་འདི་ལ་རྟག་ཏུ་བློ་གྲོས་ལྡན་བྱས་ཤིང་། །སྤྲོ་བརྟན་མོས་དང་བློ་གྲོས་རྟག་ཏུ་སྦྱིན་ལ་དགའ་བའི་ཡིན། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་བྱང་ཆུབ་སེམས་དཔའི་རུས་པ་ཚུལ་ཁྲིམས་དང་ཡོན་ཏན་གྱིས་ཡོངས་སུ་བསྒོས་པ། མཆོག་ཏུ་མཐོང་བར་དཀའ་བ་བསོད་ནམས་ཀྱི་ཞིང་དུ་གྱུར་པ་རྣམས་ལ་ཕྱག་འཚོལ་ཅིག །དེ་ནས་དགེ་སློང་དེ་དག་གིས་ཐལ་མོ་སྦྱར་ཏེ་འདུན་པའི་ཡིད་ཀྱིས་རུས་པ་རྣམས་ལ་ཕྱག་འཚལ་ཏོ། །དེ་ནས་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ནི། འཇིག་རྟེན་ཐམས་ཅད་ལས་མངོན་པར་འཕགས་པ་སེམས་ཅན་ཐམས་ཅད་ཀྱིས་ཕྱག་བགྱིས་པ་ལགས་ན། ཇི་ལྟར་དེ་བཞིན་གཤེགས་པ་ཉིད་རུས་པ་འདི་དག་ལ་ཕྱག་བཞེས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་རུས་པ་འདི་དག་གིས་ང་འདི་ལྟར་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །ཀུན་དགའ་བོ་སྔོན་བྱུང་བ་འདས་པའི་དུས་ན་རྒྱལ་པོ་ཤིང་རྟ་ཆེན་པོ་ཞེས་བྱ་བ་བཞོན་པ་དང་སྟོབས་དུ་མ་དང་ལྡན་པ་ཐོགས་པ་མེད་པའི་སྟོབས་ཀྱིས་ཕ་རོལ་གནོན་པ་ཞིག་བྱུང་སྟེ། དེ་
ལ་བུ་ལྷ་གཞོན་ནུ་དང་འདྲ་བ་གསུམ་ཞིག་ཡོད་དེ་སྒྲ་ཆེན་པོ་དང་ལྷ་ཆེན་པོ་དང་སེམས་ཅན་ཆེན་པོའོ། །དེ་ནས་རྒྱལ་པོ་རྩེ་བའི་ཕྱིར་སྐྱེད་མོས་ཚལ་གྱི་སར་བྱུང་བ་དང་། གཞོན་ནུ་དེ་དག་སྐྱེད་མོས་ཚལ་དེའི་ཡོན་ཏན་ལ་ཆགས་ཤིང་མེ་ཏོག་འདོད་པས་ཕན་ཚུན་རྒྱུ་སྟེ། ནགས་སྟུག་པོ་ཆེན་པོ་བཅུ་གཉིས་སུ་ཞུགས་སོ། །དེ་ནས་རྒྱལ་པོའི་བུ་དག་དོང་བ་དང་གཞོན་ནུའི་རིམ་གྲོ་པ་རྣམས་ཀྱང་རྒྱལ་བུས་བསྐྲད་ནས་ཕན་ཚུན་དོང་སྟེ། ཀུན་ཏུ་བསྲུངས་པའི་སྐྱེད་མོས་ཚལ་ཆེན་པོའི་ནགས་སྟུག་པོ་བཅུ་གཉིས་སུ་ཞུགས་སོ། །དེ་ནས་སྒྲ་ཆེན་པོས་ནུ་བོ་གཉིས་ལ་སྨྲས་པ། ཁོ་བོའི་སྙིང་འཇིགས་པས་ནོན་ན་འདིར་བདག་ཅག་གཅན་གཟན་གྱིས་གསད་དུ་འོང་གིས་ཚུར་ཤོག །ལྷ་ཆེན་པོས་སྨྲས་པ། བདག་ལ་འཇིགས་པ་ནི་མ་མཆིས་ན། སྐྱེ་བོ་སྡུག་པ་དང་བྲལ་བ་སྙམ་བགྱིད་པའི་སྙིང་དུ་གྱུར་ཏོ། །སེམས་ཅན་ཆེན་པོས་སྨྲས་པ། ཐུབ་པས་བསྔགས་པའི་ནགས་ཁྲོད་དབེན་པ་འདིར། །བདག་ནི་མི་འཇིགས་མྱ་ངན་མ་མཆིས་ཀྱི། །ཤིན་ཏུ་རྒྱས་མཆོག་དོན་ཆེན་རྙེད་སྙམ་སྟེ། །བདག་གི་སྙིང་འདི་རབ་ཏུ་དགའ་བར་གྱུར། །དེ་ནས་རྒྱལ་བུ་གཞོན་ནུ་དེ་དག་ནགས་སྟུག་པོ་བཅུ་གཉིས་པོ་དེ་དག་གི་ཁྲོད་དུ་རྒྱུ་བ་ན་སྟག་མོ་བུ་བྱུང་ནས་ཞག་བདུན་ལོན་པ་ཞིག་བུ་ལྔས་བསྐོར་ཏེ། བཀྲེས་ཤིང་སྐོམ་པས་ཉམ་སྨད་ནས་ལུས་མཆོག་ཏུ་ཉམ་ཆུང་བར་གྱུར་པ་དེ་འདྲ་བ་ཞིག་མཐོང་ངོ་། །མཐོང་ནས་སྒྲ་ཆེན་པོས་སྨྲས་པ། ཀྱེ་མའོ་ཉོན་མོངས་མ་འདི་བུ་བྱུང་ནས་ཞག་དྲུག་གམ་ཞག་བདུན་ལོན་པར་གྱུར་ལ། ད་ལྟར་ཟས་མ་རྙེད་པས་ཡང་ན་ནི་རང་གི་བུ་ལ་ཟ་བར་འགྱུར། ཡང་ན་ནི་བཀྲེས་པས་འཆི་བའི་དུས་བྱེད་པར་འགྱུར་རོ། །སེམས་ཅན་ཆེན་པོས་སྨྲས་པ། ཉོན་མོངས་མ་འདིའི་ཟས་ཅི། སྒྲ་ཆེན་པོས་སྨྲས་པ། འདི་ལྟར་གང་ཤ་སར་པ་དང་ཁྲག་དྲོན་པོ་ཡོད་ན་དེ་ནི་སྟག་དང་དོམ་དང་དྲེད་དང་སེང་གེ་རྣམས་ཀྱི་ཟས་ཡིན་ནོ་ཞེས་ཟེར་རོ། །ལྷ་ཆེན་པོས་སྨྲས་པ། འདིར་ཉོན་མོངས་བཀྲེས་པ་དང་སྐོམ་པ་དང་ལྡན་པའི་ལུས་སུ་གྱུར་པས་སྲོག་གི་ལྷག་མ་ཅུང་ཟད་ཅིག་ལུས་ཏེ། རབ་ཏུ་ཉམ་ཆུང་བ་འདིས་གནས་འདིར་ཟས་སྐོམ་ཚོལ་ནི་མི་ནུས་ན་འདིའི་སྲོག་ཡོངས་སུ་བསྲུང་བའི་ཕྱིར་སུ་ཞིག་རང་གི་
ལུས་ཡོངས་སུ་གཏོང་བར་བྱེད་ཅིག་གུ། སྒྲ་ཆེན་པོས་སྨྲས་པ། ཀྱེ་རང་གི་ལུས་ཡོངས་སུ་བཏང་བ་ནི་བྱ་དཀའ་བའོ། །སེམས་ཅན་ཆེན་པོས་སྨྲས་པ། བདག་ཅག་ལྟ་བུ་སྲོག་དང་ལུས་ལ་མངོན་པར་ཆགས་པ་བློ་ཆུང་བ་རྣམས་ལ་ནི་ཚུལ་འདི་བྱ་དཀའ་བ་ལགས་ཀྱི་གཞན་ལུས་ཡོངས་སུ་གཏོང་བ་ལ་ཞུགས་པ་གཞན་ལ་ཕན་པར་བརྩོན་པའི་སྐྱེས་བུ་དམ་པ་རྣམས་ལ་ནི་དཀའ་བ་མ་ལགས་སོ། །ཡང་སྙིང་བརྩེ་སྙིང་རྗེ་ལས་བྱུང་འཕགས་པའི་སེམས་ཅན་དག །ལྷ་ཡུལ་དང་ནི་ས་འདིར་རང་ལུས་རྙེད་སྙམ་སྟེ། །གཞན་གྱི་སྲོག་ཕྱིར་མཐུན་པར་དགའ་བའི་ཡིད་ཀྱིས་ནི། །འགྱུར་བ་མེད་པར་འདིར་ནི་རྣམ་པ་བརྒྱ་ཡིས་རྩེ། །དེ་ནས་རྒྱལ་བུ་གཞོན་ནུ་དེ་ཤིན་ཏུ་མི་དགའ་སྟེ། སྟག་མོ་དེ་ལ་མིག་མི་འཛུམས་པར་རིང་ཞིག་ཏུ་བལྟས་ནས་སོང་ངོ་། །དེ་ནས་སེམས་ཅན་ཆེན་པོ་འདི་སྙམ་དུ་སེམས་ཏེ། ད་ནི་བདག་གི་ལུས་འདི་ཡོངས་སུ་གཏོང་བའི་དུས་ལ་བབ་བོ། །དེ་ཅིའི་ཕྱིར་ཞེ་ན། འཇིག་ཅིང་འགྱེས་པའི་ཆོས་ཅན་མཐར་འགྱེད་མཐའ་ངན་པ། །རྣག་ཅན་ལུས་འདི་ཟས་དང་སྐོམ་དང་མལ་ཆ་དང་། །བཞོན་པ་འོས་པ་ཆེན་པོ་དག་གིས་རིང་བསྲུངས་ཀྱང་། །སྔ་མེད་རང་གིས་རང་བཞིན་མི་འདོར་བྱས་དོན་མེད། །ཡང་ཐམས་ཅད་དུ་མི་གཙང་བར་གྱུར་པས་ན་དེའི་འཚོ་བ་མེད་ཀྱིས། ད་བདག་གིས་དེ་ལས་བཟང་པོ་ལ་སྦྱར་བར་བྱའོ། །དེའི་ཕྱིར་བདག་སྐྱེ་བ་དང་འཆི་བའི་རྒྱ་མཚོ་ལས་རྒལ་བའི་གྲུ་བོ་ཆེ་ལྟ་བུར་འགྱུར་རོ། །ཡང་སྙིང་པོ་མེད་ལུས་དབུ་བ་འདྲ་ལ་སྲིན་བུ་བརྒྱས་གང་བྱས་པ་ཆུད་གཟོན་པ། །འབྲས་འདྲ་བ་ཡི་སྲིད་པ་བརྒྱ་ལྡན་གཅིན་དང་ཕྱི་སས་གང་བ་འདི་བཏང་སྟེ། །མྱ་ངན་མེད་ཅིང་འགྱུར་མེད་ཕུང་མེད་དྲི་མེད་བསམ་གཏན་ལ་སོགས་ཡོན་ཏན་གྱིས། །ཀུན་ཏུ་གང་བའི་ཆོས་སྐུ་ཡོན་ཏན་བརྒྱས་གང་རྡུལ་དང་བྲལ་བ་ཐོབ་པར་བྱ། །དེ་སྙིང་རྗེ་མཆོག་དང་ལྡན་པའི་སྙིང་དུ་གྱུར་པས་དེ་ལྟར་བརྟུལ་ནས་ཁྱོད་གཉིས་གཤེགས་སུ་གསོལ། བདག་ནི་རང་གི་བགྱི་བ་ཞིག་གི་སླད་དུ་ནགས་སྟུག་པོ་བཅུ་གཉིས་སུ་འཇུག་གོ་ཞེས་དེ་གཉིས་བསྐྲད་དོ། །དེ་ནས་རྒྱལ་བུ་གཞོན་ནུ་སེམས་ཅན་ཆེན་པོ་ནགས་འདབ་དེ་
ནས་སླར་ལོག་སྟེ། སྟག་གི་གནས་སུ་སོང་ནས་ནགས་ཀྱི་ཡལ་ག་ལ་གོས་གཟར་ཏེ། བདག་ནི་འགྲོ་ལ་ཕན་ཕྱིར་བྱང་ཆུབ་མཚུངས་པ་མེད་པ་ཞི་བ་ཐོབ་འདོད་དེ། །གཞན་གྱིས་བཏང་བར་དཀའ་བའི་ལུས་ནི་བློ་གྲོས་འགྱུར་བ་མེད་པའི་སྙིང་རྗེས་སྦྱིན། །བདག་གིས་སྐྱོན་མེད་བྱང་ཆུབ་རིན་མེད་རྒྱལ་སྲས་རྣམས་ཀྱིས་གཉེར་བ་ཐོབ་པར་ཤོག །བདག་གིས་སྲིད་པའི་རྒྱ་མཚོ་རབ་ཏུ་འཇིགས་ལས་འཇིག་རྟེན་གསུམ་པོ་བསྒྲལ་བར་བྱ། །ཞེས་སྨོན་ལམ་བཏབ་བོ། །དེ་ནས་སེམས་ཅན་ཆེན་པོ་སྟག་མོའི་མདུན་དུ་ཉལ་བ་དང་། དེ་ནས་བྱམས་པ་དང་ལྡན་པའི་བྱང་ཆུབ་སེམས་དཔའ་ལ་སྟག་མོས་ཅི་ཡང་མ་བྱས་སོ། །དེ་ནས་བྱང་ཆུབ་སེམས་དཔས་ཀྱེ་མའོ་འདི་ནི་ཉམ་ཆུང་བས་མི་ནུས་སོ་སྙམ་ནས་ལངས་ཏེ། སྙིང་བརྩེ་བའི་བློ་གྲོས་ཀྱིས་མཚོན་ཆ་བཙལ་ན་གང་ནས་ཀྱང་མཚོན་ཆ་མ་རྙེད་ནས་དེས་འོད་མའི་ཡལ་ག་ལོ་བརྒྱ་ལོན་པ་སྲ་བ་ཞིག་བླངས་ཏེ། བདག་གི་མགུལ་པ་བཅད་ནས་སྟག་མོའི་མདུན་དུ་འགྱེལ་ཏོ། །བྱང་ཆུབ་སེམས་དཔའ་འགྱེལ་མ་ཐག་ཏུ་ཆུའི་དབུས་སུ་སོན་པའི་གྲུ་རླུང་གིས་བསྐྱོད་པ་བཞིན་དུ་ས་འདི་རྣམ་པ་དྲུག་ཏུ་གཡོས་སོ། །ཉི་མ་ཡང་སྒྲ་གཅན་གྱིས་ཟིན་པ་བཞིན་དུ་འོད་ཟེར་རྣམས་ཀྱིས་མཛེས་པ་མེད་དོ། །ལྷའི་སྤོས་དང་ཕྱེ་མ་དང་འདྲེས་པའི་མེ་ཏོག་གི་ཆར་ཡང་བབ་བོ། །དེ་ནས་ལྷ་ཞིག་གིས་ངོ་མཚར་དུ་གྱུར་པའི་ཡིད་ཀྱིས་བྱང་ཆུབ་སེམས་དཔའ་ལ་བསྟོད་པ། བློ་གྲོས་བཟང་པོ་ཁྱོད་འདིར་ཇི་ལྟར་ཐུགས་རྗེས་སེམས་ཅན་རྣམས་ཁྱབ་སྟེ། །མི་ཡི་དབང་པོ་རབ་ཏུ་དགྱེས་པས་ཇི་ལྟར་སྐུ་འདིར་བཏང་བས་ན། །སྐྱེ་བ་དང་ནི་འཆི་བའི་དོན་དང་བྲལ་བ་ཞི་བ་གནས་ཀྱི་མཆོག །ཞི་བ་གཙང་མ་ཁྱོད་ཀྱིས་འདིར་ནི་ཚེགས་མེད་རིང་པོར་མི་ཐོགས་བརྙེས། །དེ་ནས་སྟག་མོ་དེས་བྱང་ཆུབ་སེམས་དཔའི་ལུས་ཁྲག་གིས་སྦགས་པ་ལ་བལྡགས་ནས། ཡུད་ཙམ་གྱིས་ཤ་དང་ཁྲག་མེད་པར་རུས་པ་ཙམ་ཞིག་ལུས་པར་བྱས་སོ། །དེ་ནས་སྒྲ་ཆེན་པོས་ས་གཡོས་པ་དེ་དག་ལ་བསམས་ནས་ལྷ་ཆེན་པོ་ལ་འདི་སྐད་ཅེས་སྨྲས་སོ། །ཇི་ལྟར་ཕྱོགས་བཅུའི་རྒྱ་མཚོའི་མཐར་ཐུག་རྒྱ་མཚོར་བཅས་པ་ཡི། །ས་འདི་རབ་ཏུ་གཡོས་ཤིང་ཉི་མའང་འོད་ནི་མེད་གྱུར་ལ། །མེ་ཏོག་
ཆར་པ་བབ་ཅིང་ཁོ་བོའི་ཡིད་ཀྱང་འཁྲུགས་པས་ན། །ད་གཟོད་བདག་གི་ནུ་བོས་རང་གི་ལུས་ནི་བཏང་ཡང་དག །ལྷ་ཆེན་པོས་སྨྲས་པ། དེ་ནི་ཇི་ལྟར་སྙིང་རྗེའི་ཚིག་སྨྲ་ལ། །བཀྲེས་དང་ལྡན་ཞིང་སྡུག་བསྔལ་བརྒྱས་གཙེས་པ། །ཤིན་ཏུ་ཉམ་ཆུང་རང་གི་བུ་ལ་ཡང་། །ཟ་བར་ཆས་ལ་ལྟ་བས་བདག་ཀྱང་དོགས། །དེ་ནས་རྒྱལ་བུ་གཞོན་ནུ་དེ་གཉིས་རབ་ཏུ་མྱ་ངན་གྱིས་ནོན་ནས་མཆི་མས་མིག་གང་སྟེ་ལམ་དེ་ཉིད་ནས་སླར་ལོག་ནས་སྟག་མོའི་དྲུང་དུ་ཕྱིན་པ་དང་། གོས་ཐམས་ཅད་ནི་འོད་མའི་ཡལ་ག་ལ་གཟར། རུས་པ་རྣམས་ནི་བྱེ་ཞིང་བྲལ། ཁྲག་ནི་རྫབ་ཏུ་གྱུར། སྐྲ་ནི་ཕྱོགས་དང་ཕྱོགས་མཚམས་སུ་འཐོར་བར་མཐོང་ངོ་། །མཐོང་ནས་ཀྱང་བརྒྱལ་ཏེ་རུས་པའི་སྟེང་དུ་འགྱེལ་ནས་རིང་ཞིག་ལོན་པ་དང་། འདུ་ཤེས་རྙེད་དེ་ལངས་ནས་ལག་པ་བསྒྲེད་སྟེ་ཉམ་ཐག་པའི་སྒྲ་ཕྱུང་ངོ་། །ཀྱེ་མའོ་ནུ་བོ་སྡུག་པ་དང་ནི་རྒྱལ་པོ་དང་། །དེ་བཞིན་དུ་ནི་བུ་ལ་རབ་ཏུ་གདུང་བའི་མ། །པདྨ་འདྲ་བའི་མིག་རིང་ཁྱོད་ཀྱི་གར་བཞག་ཅེས། །མ་ནི་བདག་ཅག་ལ་ཡང་ཐ་ཆུངས་འདྲི་བར་འགྱུར། །ཀྱེ་མ་བདག་ཅག་གཉིས་ནི་ས་ཕྱོགས་འདི་ཉིད་དུ། །ཤི་ན་ལེགས་ཀྱིས་གསོན་ན་དེ་ལྟ་མ་ཡིན་ནོ། ། སེམས་ཅན་ཆེན་པོ་མེད་པར་གྱུར་པས་བདག་ཅག་ལ། །ཕ་མ་དག་གིས་ཇི་ལྟར་ལྟོ་བ་སྟེར་བར་འགྱུར། །དེ་ནས་རྒྱལ་བུ་གཞོན་ནུ་དེ་གཉིས་ཀྱིས་སྙིང་རྗེ་རྗེ་སྐད་དུ་རྣམ་པ་མང་པོར་ངུས་ནས་དོང་ངོ་། །དེ་ནས་རྒྱལ་བུ་གཞོན་ནུའི་རིམ་གྲོ་པ་རྣམས་ཀྱང་གཞོན་ནུ་ཚོལ་ཞིང་ཕྱོགས་དང་ཕྱོགས་མཚམས་སུ་རྒྱུག་པ་དང་། གཅིག་གིས་གཅིག་མཐོང་ནས། གཞོན་ནུ་ག་རེ་གཞོན་ནུ་ག་རེ་ཞེས་འདྲིའོ། །དེའི་ཚེ་བཙུན་མོ་མལ་ན་ཉལ་བའི་རྨི་ལམ་ན་སྡུག་པ་དང་བྲལ་བར་རྨིས་པ་འདི་ལྟ་སྟེ། ནུ་མ་གཉིས་བཅད་པ་དང་། སོ་ཕྱུང་བ་དང་། ཐི་བའི་ཕྲུ་གུ་སྐྲག་པ་གསུམ་ཞིག་རྙེད་པ་ལས་གཅིག་ཁྲས་ཁྱེར་བར་མཐོང་ངོ་། །དེ་ནས་བཙུན་མོ་ས་གཡོས་པས་སྙིང་དངངས་ཏེ་མོད་ལ་སད་ནས་སེམས་པ་ལ་ཞུགས་ཏེ། འབྱུང་པོའི་རྟེན་མ་རྒྱ་མཚོའི་གོས་ཅན་འདི་ནི་ཀུན་ཏུ་རབ་གཡོ་ཅི་ཞིག་གུ། །ཉི་མ་འོད་ཟེར་མེད་པར་གྱུར་པས་ང་ཡི་སྙིང་ལ་མྱ་ངན་འགྱུར་
བར་སྟོན། །ང་ཡི་ལུས་ནི་ཞུམ་ཞིང་མིག་ཀྱང་གཡོ་ལ་རང་གི་ནུ་མ་བཅད་རྨིས་པ། །ང་ཡི་བུ་རྣམས་ནགས་ཁྲོད་འདིར་ནི་རྩེར་དོང་བ་ལ་དགེ་བར་འགྱུར་རམ་གེ །དེ་ནས་དེ་སྙམ་བསམས་པ་དང་བྲན་མོ་ཡང་སྙིང་མྱོས་ཏེ་འོངས་ནས་བཙུན་མོ་ལ་སྨྲས་པ། ཇོ་མོ་གཞོན་ནུའི་རིམ་གྲོ་པ་དག་གཞོན་ནུ་ཚོལ་ཞིང་མཆིས་ན་ཇོ་ཅོ་སྟོར་ཅེས་གདའོ། །དེ་སྐད་ཅེས་ཐོས་མ་ཐག་ཏུ་བཙུན་མོའི་སྙིང་འདར་ཞིང་མིག་དང་གདོང་མཆི་མས་གང་སྟེ་རྒྱལ་པོའི་གན་དུ་སོང་ནས་སྨྲས་པ། ལྷ་བདག་གི་བུ་སྡུག་པ་སྟོར་ཅེས་ཐོས་སོ། །རྒྱལ་པོ་ཡང་སྙིང་འདར་ཞིང་ཤིན་ཏུ་མྱོས་ཏེ་ཀྱི་ཧུད་བདག་གི་བུ་སྡུག་པ་དང་བྲལ་བ་ལྟ་ཞེས་སྨྲས་སོ། །དེ་ནས་རྒྱལ་པོས་བཙུན་མོ་དབུགས་དབྱུང་བའི་ཕྱིར་ང་གཞོན་ནུ་བཙལ་བ་ལ་ནན་ཏན་དུ་བྱེད་ཀྱིས་བཟང་མོ་མྱ་ངན་མ་བྱེད་ཅིག །དེར་གཞོན་ནུ་ཚོལ་བ་ལ་ཞུགས་པ་ན་སྐྱེ་བོའི་ཚོགས་དག་རོད་རོད་པོར་གྱུར་ཏོ། །དེ་ནས་རིང་པོར་མ་ལོན་པར་རྒྱལ་པོས་རྒྱལ་བུ་གཞོན་ནུ་གཉིས་རྒྱང་རིང་པོ་ནས་འོང་བ་མཐོང་ངོ་། །མཐོང་ནས་ཀྱང་སྨྲས་པ་གཞོན་ནུ་དེ་དག་ནི་འོང་ན་ཐམས་ཅད་ནི་མ་ཡིན་ཏེ། ཀྱི་ཧུད་བུ་དང་བྲལ་བ་ལྟ་ཞེས་བྱ་བ་ནི་སྡུག་བསྔལ་བའོ། །ཇི་ལྟར་བུ་དང་བྲལ་བར་གྱུར་ན་ཡིད་ནི་མི་བདེ་བ། །མི་རྣམས་བུ་རྙེད་པ་ནི་དེ་ལྟར་དགའ་བ་མ་ཡིན་ནོ། །འཇིག་རྟེན་ནི་གང་དག་བུ་མེད་པ་དང་ཤི་བའམ། །མི་རྣམས་གང་དག་བུ་གསོན་དེ་དག་བདེ་བ་ཡིན་ནམ་ཅི། །དེ་ནས་བཙུན་མོ་ཤིན་ཏུ་མྱ་ངན་གྱིས་ནོན་ནས་རྔ་མོ་གནད་དུ་བསྣུན་པ་བཞིན་དུ་ཤིན་ཏུ་མི་བཟད་པའི་སྒྲ་ཕྱུང་ངོ་། །དེ་ལྟར་བུ་གསུམ་དག་ནི་གཡོག་གི་ཚོགས་བཅས་ཏེ། །མེ་ཏོག་རྣམས་ཀྱིས་གང་བའི་ནགས་ཁྲོད་ཞུགས་པ་ལས། །བདག་གི་བུ་དགེ་ཐ་ཆུངས་འོངས་པར་མ་གྱུར་ན། །བདག་གི་སྙིང་དང་འདྲ་བའི་ཐ་ཆུངས་དེ་ག་རེ། །དེ་ནས་དེ་གཉིས་ལྷགས་པ་དང་རྒྱལ་པོས་བུ་ལ་དྲིས་པ། ཁྱེའུ་ཐ་ཆུངས་ག་རེ་ཞེས་གཞོན་ནུ་གཉིས་ལ་དྲིས་པ་དང་། དེ་ནས་མྱ་ངན་གྱིས་ཉམ་ཐག་ཅིང་མིག་མཆི་མས་གང་སྟེ་རྐན་དང་མཆུ་དང་ཁ་དང་སོ་སྐམས་ནས་ཅང་མི་ཟེར་རོ། །བཙུན་མོས་སྨྲས་པ། ཁོ་མོའི་བུ་སྡུག་ཐ་ཆུངས་དེ་ག་རེ། །ཁོ་མོའི་སྙིང་འདི་གས་ལ་ཐུག་གྱུར་ཅིང་། །ལུས་ནི་མི་བཟད་རབ་ཏུ་གཟིར་གྱུར་
ཏེ། །ཁོ་མོའི་དྲན་པ་ཉམས་གྱུར་མྱུར་དུ་སྨྲོས། །དེ་ནས་གཞོན་ནུ་དེ་གཉིས་ཀྱིས་ཇི་ལྟར་གྱུར་པ་དེ་ཞིབ་ཏུ་སྨྲས་སོ། །དེ་ཐོས་མ་ཐག་ཏུ་རྒྱལ་པོ་དང་བཙུན་མོ་མྱོས་པར་གྱུར་ཏེ། མྱོས་པ་སངས་ནས་སྙིང་རྗེ་རྗེ་སྐད་དུ་ངུ་ཞིང་ཕྱོགས་དེར་དོང་ངོ་། །དེ་ནས་རྒྱལ་པོ་དང་བཙུན་མོས་རུས་པ་དེ་དག་ཤ་དང་ཁྲག་དང་རྒྱུས་པ་མེད་ཅིང་སྐྲ་ཕྱོགས་དང་ཕྱོགས་མཚམས་སུ་འཐོར་བ་མཐོང་ནས་ཤིང་རླུང་གིས་བཏབ་པ་བཞིན་དུ་འགྱེལ་ཏོ། །དེ་ནས་ཉེ་ཕན་དང་བློན་པོ་དག་གིས་དེ་ལྟར་གྱུར་པ་དེ་མཐོང་ནས་ཆུ་དང་རི་མ་ལ་ཡའི་ཙནྡན་གྱི་འདེ་གུས་རྒྱལ་པོ་དང་བཙུན་མོའི་ལུས་བསིལ་བར་བྱས་སོ། །དེ་ནས་རིང་ཞིག་ལོན་པ་དང་འདུ་ཤེས་རྙེད་ནས་རྒྱལ་པོ་ལངས་ཏེ་སྙིང་རྗེ་རྗེ་སྐད་དུ་འབོད་པ། ཀྱེ་མ་བུ་སྡུག་ཡིད་འོང་མཐོང་དགའ་བ། །འཆི་བདག་དབང་དུ་ཅི་ཕྱིར་དེ་མྱུར་སོང་། །འཆི་བདག་ཅི་ཕྱིར་ང་ལ་སྔར་མ་འོངས། །ང་ལ་སྡུག་བསྔལ་འདི་ལས་གཞན་མི་འབྱུང་། ། བཙུན་མོ་ཡང་མྱོས་པ་ལས་སངས་ནས་སྐྲ་གཞིག་ཅིང་ལག་པ་གཉིས་ཀྱིས་བྲང་བརྡུངས་ཏེ། ཉ་ཐང་ལ་ཕྱུང་བ་བཞིན་དུ་སའི་སྟེང་ན་འགྲེ་ལྡོག་ཅིང་མ་ཧེ་བེའུ་སྟོར་བ་དང་རྔ་མོ་རྔེའུ་སྟོར་བ་བཞིན་དུ་སྙིང་རྗེ་རྗེ་སྐད་དུ་དུའོ། །ཀྱེ་མ་སྡུག་ཅིང་གཅེས་པའི་བུ་ནི་པདྨ་འདི། །སུ་ཡིས་ས་ཡི་སྟེང་དུ་བཤིག་ནས་རབ་ཏུ་གཏོར། །ཡིད་འོང་མིག་ལྡན་ཟླ་འདྲའི་བཞིན་ཅན་བདག་གི་བུ། །བདག་གི་དགྲ་བོ་གང་གིས་དེ་རིང་ས་འདིར་བཅོམ། །ཀྱེ་མ་ས་འདིར་བུ་མཆོག་བསད་མཐོང་ན། །ལུས་འདི་ཅི་ཕྱིར་དེ་རིང་ཞིག་མ་གྱུར། །སྡུག་བསྔལ་འདི་འདྲ་མཐོང་ཡང་མ་གས་པས། །བདག་གི་སྙིང་འདི་ལྕགས་ནི་ཡིན་ཡང་དག །དེ་རིང་རྨི་ལམ་དུ་ནི་བདག་གི་ནུ་མ་འགའ་ཞིག་གིས་ནི་རལ་གྲིས་བཅད། །སོ་ཡང་ཕྱུང་བས་དེ་རིང་བདག་གི་བུ་སྡུག་དེ་ནི་མྱུར་དུ་མ་རུང་གྱུར། །བདག་གིས་ཐི་བའི་ཕྲུག་གུ་གསུམ་ཞིག་རྙེད་པ་གཅིག་འདིར་ཇི་ལྟར་ཁྲས་ཁྱེར་བཞིན། །བདག་གི་བུ་གསུམ་དག་གིས་བསྐོར་བ་ལས་ཀྱང་གཅིག་ནི་དེ་རིང་འཆི་བདག་ཁྱེར། །ཀྱེ་མ་ཧོ་སྡིག་པ་ཅན་གྱི་རྨི་ལམ་དེ་ཡི་འབྲས་བུ་གྲུབ་པ་འདི་ཡིན་ནོ། །དེ་ནས་རྒྱལ་པོ་དང་བཙུན་མོ་སྙིང་རྗེ་རྗེ་སྐད་དུ་རྣམ་པ་མང་པོར་སྨྲེ་ཞིང་རྒྱན་ཐམས་ཅད་བཀྲོལ་ནས་སྐྱེ་བོའི་ཚོགས་ཆེན་པོ་དང་ལྷན་ཅིག་ཏུ་བུའི་རུས་བུ་ལ་མཆོད་པ་བྱས་
ནས། གཞོན་ནུའི་རུས་པ་རྣམས་ཕྱོགས་འདིར་བཞག་གོ། །ཀུན་དགའ་བོ་དེའི་ཚེ་དེའི་དུས་ན་རྒྱལ་བུ་གཞོན་ནུ་སེམས་ཅན་ཆེན་པོ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་སེམས་ན་དེ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ང་ཉིད་དེའི་ཚེ་དེའི་དུས་ན་རྒྱལ་བུ་གཞོན་ནུ་སེམས་ཅན་ཆེན་པོ་ཞེས་བྱ་བར་གྱུར་ཏོ། །ཀུན་དགའ་བོ་འདོད་ཆགས་དང་ཞེ་སྡང་དང་གཏི་མུག་ལས་ཡོངས་སུ་མ་གྲོལ་བ་དེའི་ཚེ་ཡང་། སེམས་ཅན་དམྱལ་བ་ལ་སོགས་པའི་སྡུག་བསྔལ་ལས་ངས་འགྲོ་བ་མཐའ་དག་ལ་ཕན་བཏགས་ན། སྐྱོན་ཐམས་ཅད་དང་བྲལ་ཏེ་ཡང་དག་པར་རྫོགས་པར་སངས་རྒྱས་པ་ད་ལྟར་ལྟ་སྨོས་ཀྱང་ཅི་དགོས། དེ་ལྟར་སེམས་ཅན་རེ་རེའི་ཕྱིར་ཡང་སེམས་ཅན་དམྱལ་བ་རྣམས་སུ་བསྐལ་པར་གནས་པར་སྤྲོ་ཞིང་སྐྱེ་བོ་འཁོར་བ་ལས་རྣམ་པར་བསྒྲལ་ལོ། །སེམས་ཅན་གྱི་སྙིང་པོས་ཤིན་ཏུ་བྱ་དཀའ་བ་རྣམ་པ་སྣ་ཚོགས་དུ་མས་འགྲོ་བ་མཐའ་དག་ལ་ཕན་བཏགས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །བྱང་ཆུབ་མཆོག་འདི་ཡོངས་སུ་ཚོལ་བ་ན། །བསྐལ་པ་མང་པོ་རངས་ནི་ལུས་བཏང་སྟེ། །ཇི་ལྟར་རྒྱལ་པོ་དང་ནི་རྒྱལ་བུར་གྱུར། །དེ་ལྟར་ངས་ནི་ལུས་རྣམས་ཡོངས་སུ་བཏང་། ། སྔོན་གྱི་སྐྱེ་བ་རྣམས་ནི་རྗེས་དྲན་ཏེ། །ཤིང་རྟ་ཆེན་པོ་ཞེས་བྱའི་རྒྱལ་པོ་བྱུང་། །དེ་ལ་བུ་ནི་གཏོང་བ་ཆེ་ལྡན་པ། །སེམས་ཅན་ཆེ་ཞེས་བྱ་བ་དམ་པ་ཡོད། །དེ་ལ་ཕུ་བོ་དག་ནི་གཉིས་ཡོད་དེ། །མིང་ནི་སྒྲ་ཆེན་པོ་དང་ལྷ་ཆེན་པོ། །དཔུང་ཚོགས་དེ་དག་ནགས་ཚལ་སྟུག་པོར་དོང་། ། དེ་དག་སྟག་མོ་བཀྲེས་པས་གཟིར་བ་མཐོང་། །དེ་ལ་སེམས་ཅན་མཆོག་དེ་སྙིང་རྗེ་སྐྱེས། །སྟག་མོ་འདི་ནི་བཀྲེས་སྐོམ་གཟིར་བས་ན། །བདག་བུ་དེ་དག་ཟ་བར་འགྱུར་འོང་གིས། །དེ་ལྟར་བདག་ལུས་ད་ནི་གཏང་བར་བྱ། །ཤིང་རྟ་ཆེ་བུ་སེམས་ཅན་ཆེ། །སྟག་མོ་བཀྲེས་མཐོང་སྟག་ཕྲུག་རྣམས། །ཐར་བར་བྱ་ཕྱིར་སྙིང་རྗེ་ཡིས། །རི་ངོས་གཟར་ནས་མཆོངས་པ་དང་། །ས་ནི་རི་དང་བཅས་སུ་གཡོས། །བྱ་ཚོགས་རྣམ་མང་རྣམ་པར་འཐོར། །རི་དགས་ཚོགས་སྐྲག་འཇིག་རྟེན་འདི། །མུན་པས་ཐིབས་པོར་གནས་པར་གྱུར། །དེ་ཡི་ཕུ་བོ་སྒྲ་ཆེན་དང་། །དེ་བཞིན་ལྷ་ཆེན་དེ་
གཉིས་ཀྱིས། །ནགས་མཆོག་ཆེན་པོ་དེར་བལྟས་ན། །སེམས་ཅན་ཆེན་པོ་མ་རྙེད་ནས། །ཤིན་ཏུ་མྱ་ངན་ཟུག་རྔུའི་སྙིང་། །དྲན་མེད་ནགས་ཀྱི་ནང་ན་རྒྱུ། །ནུ་བོ་དེ་ནི་ཡོངས་ཚོལ་ཞིང་། །གདོང་ལ་མཆི་ཟག་ནགས་ཁྲོད་རྒྱུ། །སྒྲ་ཆེན་དེ་བཞིན་ལྷ་ཆེན་པོ། ། རྒྱལ་བུ་གཞོན་ནུ་དེ་དག་གཉིས། །སྟག་མོ་ཉམ་ཆུང་གར་ཉལ་བ། །དེར་ནི་ཉེ་བར་སོང་བ་དང་། །སྟག་མོ་དང་ནི་སྟག་ཕྲུག་གི །སྟག་གི་མཆུ་ལ་ཁྲག་ཆགས་མཐོང་། །སྐྲ་དང་རུས་པ་ཅུང་ཟད་ཅིག །ས་ལ་རྣམ་པར་འཐོར་བ་མཐོང་། །དེ་ཡི་ཁྲག་གི་ཐིགས་པ་ནི། ། ཉུང་ཞིག་ས་ལ་ཡོད་པར་གྱུར། །རྒྱལ་པོའི་བུ་ནི་དེ་གཉིས་ཀྱིས། །ཁྲག་ཆགས་པ་ཡི་ས་དེ་མཐོང་། །རབ་ཏུ་བརྒྱལ་ཏེ་ས་དེ་ལ། །འགྱེལ་ནས་ཡིད་ནི་ཉམས་པར་གྱུར། །ལུས་རྣམས་ལ་ནི་རྡུལ་གྱིས་གོས། །དྲན་དབང་ཉམས་ཤིང་སེམས་ཀྱང་མྱོས། །དེ་དག་གི་ནི་འཁོར་རྣམས་ཀྱང་། །སྙིང་རྗེར་ངུ་ཞིང་མྱ་ངན་ནོན། །དེ་དག་ཆུས་ནི་རབ་འཐོར་ཞིང་། །ལག་པ་སྒྲེང་སྟེ་ངུ་ཞིང་གནས། །དེ་ནི་འགྱེལ་མ་ཐག་ཏུ་ཡང་། །བཙུན་མོ་གཅེས་མཆོག་སྐྱེད་པའི་མ། །བུད་མེད་དག་ནི་ལྔ་བརྒྱ་དང་། །ཕོ་བྲང་ནང་ན་བདེར་འདུག་པ། །ནུ་སོར་གཉིས་ཀའི་རྩེ་མོ་ནས། །འོ་མ་ཁྲག་ཏུ་འབྱུང་ཞིང་འཛག །དེ་ཡི་ལུས་དང་ཡན་ལག་ཀུན། །ཁབ་ཀྱིས་གཙགས་པ་བཞིན་དུ་ཚ། །སྙིང་ནི་རབ་ཏུ་མྱ་ངན་གང་། །བུ་བྲལ་མྱ་ངན་དྲག་མདས་ཕོག །རྒྱལ་པོའི་གན་དུ་ཉེར་སོང་སྟེ། །མྱ་ངན་རབ་གདུངས་ཡིད་མི་དགའ། ། སྙིང་རྗེའི་སྒྲ་ཡིས་རབ་ངུ་ཞིང་། །རྒྱལ་པོ་ཤིང་རྟ་ཆེ་ལ་སྨྲས། །མི་དབང་རྒྱལ་པོ་བདག་ལ་གསོན། །བདག་ལུས་མྱ་ངན་མེ་ཡིས་ཚིག །བདག་གི་ནུ་སོར་རྩེ་གཉིས་ནས། །འོ་མ་ཁྲག་ཏུ་རབ་ཏུ་འབྱུང་། །བདག་ལུས་ཁབ་ཀྱིས་གཙགས་བཞིན་ཚ། །བདག་གི་སྙིང་ཡང་གས་ལ་ཐུག །ཇི་ལྟར་སྡུག་པའི་བུ་རྣམས་ནི། །ཕྱིན་ཅད་མི་མཐོང་འདི་འདྲའི་ལྟས། །བདག་གི་བུ་རྣམས་དེ་ལྟར་འཚལ། །ཐུགས་རྗེ་མཛོད་དེ་བདག་སྲོག་སྩོལ། །དེ་རིང་བདག་གི་རྨི་ལམ་ན། །ཐི་བ་ཕྲུག་གུ་གསུམ་རྙེད་ན། །བདག་གི་ཐི་བ་ཕྲུག་གུ་ནི། །སྡུག་ཅིང་ཡིད་འོང་གང་ལགས་
པ། །དེར་ནི་ཁྲ་མཆིས་བདག་གི་ནི། །ཐི་བ་ཕྲུག་གུ་དེ་ཁྲས་འཚལ། །བདག་གི་རྨི་ལམ་དེ་འདྲ་བའི། །མྱ་ངན་སྙིང་འདིར་རབ་ཏུ་ཞུགས། །སེམས་ནི་མྱ་ངན་རབ་གདུངས་པས། །བདག་ནི་རིང་པོར་མི་ཐོགས་འགུམ། །བདག་གི་བུ་རྣམས་དེ་ལྟར་འཚལ། །ཐུགས་རྗེ་ལྡན་པ་བདག་སྲོག་སྩོལ། །དེ་སྐད་སྨྲས་ནས་བཙུན་མོ་མཆོག །བརྒྱལ་ནས་ས་དེར་འགྱེལ་བར་གྱུར། །དྲན་པའི་དབང་པོ་རྣམ་པར་ཉམས། །སེམས་ཀྱང་སྟོར་ཞིང་དྲན་པ་མེད། །བཙུན་མོའི་འཁོར་ཚོགས་ཐམས་ཅད་ཀྱང་། །སྙིང་རྗེའི་སྐད་ཀྱིས་རབ་ཏུ་ངུ་། །བཙུན་མོ་དམ་པ་བརྒྱལ་གྱུར་ཏེ། །ས་ལ་འགྱེལ་བ་མཐོང་ནས་ནི། །དེ་མ་ཐག་ཏུ་རྒྱལ་དབང་དེ། །བུ་དང་བྲལ་བའི་མྱ་ངན་ནོན། །བློན་པོ་དང་ནི་འཁོར་རྣམས་ཀྱང་། །གཞོན་ནུ་རྣམས་ནི་བཙལ་ཕྱིར་དོང་། །གྲོང་ཁྱེར་ཀུན་གྱི་སྐྱེ་བོ་དག །ཐ་དད་ཁྱིམ་ནས་བྱུང་ཞིང་འཁོད། །ངུ་ཞིང་གདོང་ནས་མཆི་མ་ཟག །ལམ་ཁར་སེམས་ཅན་ཆེ་དེ་འདྲི། །གསོན་ནམ་འོན་ཏེ་ཤི་འམ་ཅི། །སེམས་ཅན་ཆེན་པོ་དེ་གར་སོང་། །བདག་ཅག་དེ་རིང་མཐོང་ཞིག་གམ། །ཡིད་འོང་སེམས་ཅན་མཐོང་རེ་དགའ། །དེའུ་རེ་མི་སྙན་ཐོས་འགྱུར་ཞིང་། །ཡུལ་འདིར་མྱ་ངན་མི་བཟད་རླུང་། །སྒྲ་མི་ཕྱིན་ཅིང་སྒྱུ་མཐའ་ཡས། །དྲག་པོའི་སྒྲར་བཅས་ལྡན་ཞིག་གམ། །རྒྱལ་པོ་ཤིང་རྟ་ཆེ་ལངས་ཏེ། །མྱ་ངན་ནོན་ཅིང་ངུ་བཞིན་དུ། །བཙུན་མོ་དམ་པ་སར་འགྱེལ་ལ། །བདག་ཉིད་ཆུ་ཡི་རྒྱུན་ཀྱང་འཐོར། །ཇི་སྲིད་དྲན་རྙེད་ལྡན་འགྱུར་བ། །དེ་སྲིད་དུ་ནི་ཆུ་ཡིས་གཏོར། །བདག་བུ་གུམ་མམ་གསོན་ཞིག་ཅེས། །ཞུམ་པའི་ཡིད་ཀྱིས་འདྲི་བར་བྱེད། །རྒྱལ་པོ་ཤིང་རྟ་ཆེན་པོ་ཡིས། །བཙུན་མོ་མཆོག་ལ་འདི་སྐད་སྨྲས། །བློན་པོ་དག་དང་འཁོར་རྣམས་ཀྱང་། །གཞོན་ནུ་རྣམས་ནི་ཚོལ་ཕྱིར་དོང་། །ཁྱོད་ནི་རབ་ཏུ་ཡིད་ཞུམ་ཞིང་། །རྟག་ཏུ་མྱ་ངན་སྙིང་མ་བྱེད། །དེ་ལྟར་ཤིང་རྟ་ཆེན་པོ་ཡིས། །བཙུན་མོ་དམ་པ་སྤྲོ་བསྲིངས་ཏེ། །རྒྱལ་པོ་ཕོ་བྲང་ནས་བྱུང་ནས། །མྱ་ངན་ནོན་ཅིང་ངུ་བཞིན་དུ། །བློན་པོའི་ཚོགས་ཀྱིས་ཡོངས་བསྐོར་ཏེ། །ཡིད་ནི་རབ་ཞུམ་ལུས་ཀྱང་ཞན། །སྲོག་ཆགས་བརྒྱ་ཕྲག་མང་པོ་ཡང་། །ངུ་ཞིང་མཆི་མ་ཟག་བཞིན་རྒྱུག །རྒྱལ་
བུ་རྣམས་ནི་བཙལ་བའི་ཕྱིར། །གྲོང་ཁྱེར་གྱི་ནི་མཆོག་ནས་བྱུང་། །རྒྱལ་པོ་བྱུང་བ་མཐོང་ནས་ནི། །རྒྱལ་པོའི་ཕྱི་བཞིན་ཀུན་ཏུ་འབྲང་། །རྒྱལ་པོ་ཤིང་རྟ་ཆེན་པོ་ནི། །གྲོང་ཁྱེར་ནས་བྱུང་དེ་མ་ཐག །སྡུག་པའི་བུ་ནི་བལྟ་བའི་ཕྱིར། །རྒོད་པའི་མིག་གིས་ཕྱོགས་སུ་བལྟས། །མགོ་བྲེགས་ཡན་ལག་ཁྲག་སྦགས་ཤིང་། །ལུས་ལ་རྡུལ་གྱིས་གོས་གྱུར་ལ། །གདོང་ལ་མཆི་ཟག་ངུ་བཞིན་དུ། །འོང་བའི་མི་ཞིག་མཐོང་ནས་ནི། །ཤིང་རྟ་ཆེན་པོའི་སྙིང་ལ་ཡང་། །རབ་ཏུ་མི་བཟད་མྱ་ངན་གནས། །ངུ་ཞིང་གདོང་ལ་མཆི་མ་ཟག །ལག་པ་བསྒྲེང་སྟེ་ངུ་ཞིང་འདུག །དེ་ནས་བློན་པོ་གཞན་ཞིག་ནི། །རྒྱང་རིང་མྱུར་དུ་རིངས་པར་འོང་། །འོངས་ནས་མི་དབང་རྒྱལ་པོ་ནི། །ཤིང་རྟ་ཆེ་ལ་འདི་སྐད་སྨྲས། །མི་དབང་ཐུགས་ངན་མ་མཛད་ཅིག །ཁྱོད་སྲས་ཡིད་དུ་འོང་བ་མཆིས། །རིང་པོར་མི་ཐོགས་ཁྱོད་ཀྱི་གན་འདིར་ནི། །སྲས་མཆོག་ཡིད་འོང་མཆི་བ་ཁྱོད་ཀྱིས་གཟིགས། །རྒྱལ་པོ་ཡུད་ཙམ་ལམ་དུ་ཞུགས་པ་དང་། །དེ་ནས་བློན་པོ་ཆེན་པོ་གཉིས་པ་འོངས། །རྡུལ་ཆགས་དྲི་མ་ཅན་གྱི་གོས་གྱོན་ཅིང་། །མཆི་མའི་གདོང་གིས་རྒྱལ་ལ་འདི་སྐད་ཅེས། །རྒྱལ་པོ་ཆེན་པོ་ཁྱོད་ཀྱི་སྲས་གཉིས་ནི། །མྱ་ངན་མེ་ཡིས་རབ་ཏུ་གདུངས་ཤིང་གནས། །རྒྱལ་པོ་ཁྱོད་ཀྱི་སྲས་མཆོག་གཅིག་མི་གདའ། །སེམས་ཅན་ཆེན་པོ་མི་རྟག་ཉིད་ཀྱིས་ཟིན། །སྟག་མོ་བུ་བྱུང་རིང་པོར་མ་ལོན་པ། །རང་གི་བུ་རྣམས་ཟ་བར་འདོད་པ་མཐོང་། །དེ་དག་ལ་ནི་གཞོན་ནུ་སེམས་ཅན་ཆེས། །སྙིང་རྗེ་ཆེན་པོ་ལྡན་པས་སེམས་བསྐྱེད་ནས། །བྱང་ཆུབ་ཏུ་ནི་སྨོན་ལམ་ཆེ་བཏབ་པ། །སེམས་ཅན་ཐམས་ཅད་བདག་གིས་དགྲོལ་བར་བྱ། །བྱང་ཆུབ་ཟབ་མོ་རྒྱ་ཆེན་འདོད་པ་ལ། །མ་འོངས་དུས་ན་བདག་གིས་རེག་པར་བྱ། །སེམས་ཅན་ཆེན་པོ་རི་ངོས་གཟར་ནས་མཆོངས། །སྟག་མོ་བཀྲེས་པས་ནོན་པ་དེ་ལངས་ཏེ། །ཡུད་ཙམ་གྱིས་ནི་ལུས་ལ་ཤ་མེད་བྱས། །རྒྱལ་པོའི་བུ་ནི་རུས་པ་ཉི་ཚེ་ལུས། །མ་རུངས་པ་ཡི་ཚིག་ནི་དེ་ཐོས་ནས། །རྒྱལ་པོ་ཤིང་རྟ་ཆེན་པོ་བརྒྱལ་གྱུར་ཏེ། །ས་ལ་འགྱེལ་ནས་སེམས་ཀྱང་སྟོར་བར་གྱུར། །མྱ་ངན་མེ་ནི་ཤིན་ཏུ་མི་བཟད་འབར། །འཁོར་
དང་བློན་པོ་སྙིང་རྗེའི་སྐད་ཀྱིས་ནི། །ངུ་ཞིང་མྱ་ངན་ནོན་བཞིན་དེ་དག་ཀྱང་། །ཆུས་འཐོར་ལག་པ་བསྒྲེང་སྟེ་རབ་ཏུ་ངུ་། །བློན་པོ་གསུམ་པས་རྒྱལ་ལ་སྨྲས་པ་ནི། །བདག་གིས་དེ་རིང་གཞོན་ནུ་གཉིས་པོ་དག །ནགས་ཆེན་དེ་ན་རབ་ཏུ་བརྒྱལ་གྱུར་ཅིང་། །ས་ལ་འགྱེལ་ཏེ་སེམས་ཀྱང་སྟོར་མཐོང་ནས། །དྲན་པ་རྙེད་དེ་ལངས་ཀྱི་བར་དུ་ནི། །བདག་ཅག་རྣམས་ཀྱིས་ཆབ་ཀྱིས་རབ་ཏུ་གཏོར། །ཕྱོགས་བཞི་དག་ནས་ཀུན་ནས་འབར་བར་མཐོང་། །ཡུད་ཙམ་འགྲེང་ནས་སླར་ཡང་ས་ལ་འགྱེལ། །སྙིང་རྗེའི་སྐད་ཀྱིས་སྨྲེ་སྔགས་རབ་ཏུ་འདོན། །རྟག་པར་ལག་པ་བསྒྲེང་སྟེ་གནས་ནས་ནི། །ནུ་བོ་དེ་ཡི་བསྔགས་པ་རབ་ཏུ་བརྗོད། །རྒྱལ་པོ་དེ་ནི་རབ་ཏུ་སེམས་ཞུམ་ཞིང་། །བུ་བྲལ་མྱ་ངན་ནོན་ནས་སེམས་ཀྱང་འཁྲུགས། །མྱ་ངན་རབ་ཏུ་གདུངས་ཤིང་སྨྲེ་སྔགས་འདོན། །རྒྱལ་པོ་དེ་ནི་འདི་སྙམ་ཡོངས་སུ་སེམས། །བདག་བུ་སྡུག་ཅིང་ཡིད་འོང་གཅིག་པོ་ནི། །སེམས་ཅན་ཆེན་པོ་མི་རྟག་ཉིད་ཀྱིས་ཟིན། །བདག་གི་བུ་ནི་གཉིས་པོ་དེ་དག་ཀྱང་། །མྱ་ངན་མེ་ཡིས་སྲོག་ནི་ཟད་འོང་གིས། །འདི་ལྟར་བདག་ནི་མྱུར་དུ་དེར་དོང་ལ། །མཐོང་ན་དགའ་བའི་བུ་དག་བལྟ་བར་བྱས། ། བཞོན་པ་མགྱོགས་པས་རྒྱལ་པོའི་ཕོ་བྲང་གི། །རྒྱལ་པོའི་ཁབ་ཏུ་མྱུར་དུ་བཀྲི་བར་བྱ། །དེ་དག་རྣམས་ནི་བསྐྱེད་པའི་མ་ཡི་སྙིང་། །མྱ་ངན་མེ་ཡིས་གས་པར་འགྱུར་དུ་འོང་། །བུ་གཉིས་མཐོང་ནས་ཞི་བ་ཐོབ་འགྱུར་ཏེ། །སྲོག་དང་བྲལ་བར་འགྱུར་བ་མ་ཡིན་ནོ། ། རྒྱལ་པོ་བློན་པོའི་ཚོགས་ཀྱིས་ཡོངས་བསྐོར་ནས། །གླང་ཆེན་ཞོན་ཏེ་བུ་རྣམས་བལྟ་ཕྱིར་སོང་། །བུ་གཉིས་སྙིང་རྗེའི་སྐད་ཀྱིས་རབ་ངུ་ཞིང་། །ནུ་བོའི་མིང་འབོད་ལམ་ནས་འོང་བ་མཐོང་། །རྒྱལ་པོས་བུ་དེ་གཉིས་ནི་ཁྲིད་ནས་སུ། །རབ་ཏུ་ངུ་ཞིང་ཁྱིམ་དུ་སོང་ནས་ནི། །དེ་ཡིས་སྐྱེན་པར་ལ་གོར་མྱུར་དུ་ཡང་། །བཙུན་མོ་ལ་ནི་རང་གི་བུ་རྣམས་བསྟན། །ཤཱཀྱ་ཐུབ་པ་དེ་བཞིན་གཤེགས་པ་ང་། །སྔོན་གྱི་རྒྱལ་པོ་ཤིང་རྟ་ཆེན་པོ་ཡི། །བུ་དེ་སེམས་ཅན་ཆེན་པོ་མཆོག་གྱུར་ཅིང་། །གང་གིས་སྟག་མོ་བདེ་བར་བྱས་པ་ཡིན། །རྒྱལ་
པོའི་དབང་པོ་དམ་པ་ཟས་གཙང་ནི། །ཤིང་རྟ་ཆེ་ཞེས་བྱ་བའི་རྒྱལ་པོར་གྱུར། །བཙུན་མོའང་བཙུན་མོ་དམ་པ་སྒྱུ་མར་གྱུར། །སྒྲ་ཆེན་པོ་ནི་བྱམས་པར་གྱུར་པ་ཡིན། །རྒྱལ་བུ་ལྷ་ཆེན་པོ་ཡང་དེ་བཞིན་དུ། །དེ་ནི་འཇམ་དཔལ་གཞོན་ནུར་གྱུར་པ་ཡིན། ། སྟག་མོར་གྱུར་པ་སྐྱེ་དགུའི་བདག་མོ་ཆེ། །སྟག་ཕྲུག་རྣམས་ནི་དགེ་སློང་ལྔ་པོར་གྱུར། །དེ་ནས་རྒྱལ་པོ་ཤིང་རྟ་ཆེན་པོ་དང་བཙུན་མོས་སྙིང་རྗེ་བར་སྨྲེ་སྔགས་རྣམ་པ་མང་པོ་བཏོན་ནས། རྒྱན་ཐམས་ཅད་བཀྲོལ་ཏེ་སྐྱེ་བོའི་ཚོགས་ཆེན་པོ་དང་ལྷན་ཅིག་ཏུ་བུའི་རུས་པ་ལ་མཆོད་པ་བྱས་ནས། སེམས་ཅན་ཆེན་པོ་དེའི་རུས་པ་དེ་དག་ས་ཕྱོགས་འདི་ཉིད་དུ་བཞག་སྟེ། རིན་པོ་ཆེ་སྣ་བདུན་གྱི་མཆོད་རྟེན་འདི་བྱས་སོ། །སེམས་ཅན་ཆེན་པོ་འདིས་སྟག་མོ་ལ་ལུས་ཡོངས་སུ་བཏང་ནས་ལུས་ཡོངས་སུ་བཏང་བ་འདིས་ཕྱིས་མ་འོངས་པའི་དུས་བསྐལ་པ་བགྲང་བ་ལས་ཤིན་ཏུ་འདས་པ་རྣམས་སུ་ཡང་། སེམས་ཅན་རྣམས་ལ་སངས་རྒྱས་ཀྱི་མཛད་པ་བྱའོ། །ཞེས་སྨོན་ལམ་འདི་སྐད་བཏབ་བོ། །བསྟན་པ་འདི་བཤད་པ་ན་ལྷ་དང་མིར་བཅས་པའི་སྐྱེ་དགུའི་སེམས་ཅན་གྲངས་མེད་དཔག་ཏུ་མེད་པ་དག །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །མཆོད་རྟེན་འདི་འདིར་བསྟན་པའི་རྒྱུ་ནི་འདི་ཡིན་ནོ། །རྐྱེན་ནི་འདི་ཡིན་ནོ། །མཆོད་རྟེན་དེ་ཡང་སངས་རྒྱས་ཀྱི་བྱིན་གྱི་རླབས་ཀྱིས་ས་དེ་ཉིད་ཀྱི་ནང་དུ་ཞུགས་སོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། སྟག་མོ་ལ་ལུས་ཡོངས་སུ་བཏང་བའི་ལེའུ་ཞེས་བྱ་བ་སྟེ་བཅྭ་བརྒྱད་པའོ།། །།དེ་ནས་བྱང་ཆུབ་སེམས་དཔའ་བརྒྱ་སྟོང་ཕྲག་དུ་མ་དེ་དག །དེ་བཞིན་གཤེགས་པ་གསེར་དང་རིན་པོ་ཆེའི་འབྱུང་གནས་གདུགས་བརྩེགས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་དེ་བཞིན་གཤེགས་པ་གསེར་དང་རིན་པོ་ཆེའི་འབྱུང་གནས་གདུགས་བརྩེགས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་ཀྱང་བྱང་ཆུབ་སེམས་དཔའ་བརྒྱ་སྟོང་ཕྲག་དུ་མ་དེ་དག་གིས་ཐལ་མོ་སྦྱར་ཏེ། དེ་བཞིན་གཤེགས་པ་གསེར་དང་རིན་པོ་ཆེའི་འབྱུང་གནས་གདུགས་བརྩེགས་
དེ་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །རྒྱལ་བའི་སྐུ་མདོག་བཙོ་མའི་གསེར་འདྲ་སྟེ། །སྐུ་ལུས་གསེར་གྱི་མདོག་ཏུ་རྣམ་པར་གདའ། །གསེར་གྱི་རི་དབང་ལྟ་བུའི་གསེར་གྱི་མདོག །ཐུབ་པ་པདྨ་དཀར་པོ་གསེར་མདོག་ཅན། །བཟང་པོའི་མཚན་གྱིས་སྐུ་ལུས་རབ་ཏུ་བརྒྱན། །དཔེ་བྱད་སྣ་ཚོགས་བཟང་པོས་སྐུ་ལུས་སྤྲས། །གསེར་གྱི་འོད་ལྟར་མཛེས་པ་རྣམ་པར་འབར། །ཤིན་ཏུ་དྲི་མེད་ཞི་བ་རི་དབང་འདྲ། །ཚངས་པའི་སྒྲ་དང་སྒྲ་སྙན་ཚངས་པའི་དབྱངས། །སེང་གེའི་སྒྲ་དང་འབྲུག་སྒྲ་བསྒྲགས་པའི་དབྱངས། །ཡན་ལག་དྲུག་ཅུ་བསྒྲགས་སྒྲ་དྲི་མེད་སྒྲ། །རྒྱལ་དབྱངས་རྨ་བྱ་ཀ་ལ་པིང་ཀའི་སྒྲ། །ཤིན་ཏུ་དྲི་མེད་དྲི་བྲལ་གཟི་འོད་མཛེས། །རྒྱལ་བ་བསོད་ནམས་བརྒྱ་པའི་མཚན་གྱིས་བརྒྱན། །མཁྱེན་པའི་རྒྱ་མཚོ་དྲི་མེད་དྲི་བྲལ་མཆོག །རྒྱལ་བ་ཡོན་ཏན་ཀུན་ལྡན་རི་རབ་འདྲ། །སེམས་ཅན་རྣམས་ལ་ཕན་པར་ཐུགས་བརྩེ་མཆོག །འཇིག་རྟེན་དག་ན་བདེ་བ་སྦྱིན་པའི་མཆོག །རྒྱལ་བ་དམ་པའི་དོན་རྣམས་སྟོན་པ་སྟེ། །མྱ་ངན་འདས་པའི་བདེ་ལ་འཛུད་པ་ལགས། །འཆི་བ་མེད་པའི་བདེ་བ་སྩོལ་བ་སྟེ། །རྒྱལ་བ་བདུད་རྩིའི་ཆོས་ནི་རབ་ཏུ་སྟོན། །འཆི་བ་མེད་པའི་གྲོང་ཁྱེར་འཛུད་པ་སྟེ། །བདེ་བ་ཀུན་གྱི་འབྱུང་གནས་བདེ་བའི་གནས། །རྒྱལ་བས་འགྲོ་བ་སྡུག་བསྔལ་ཐར་བར་མཛོད། །སྡུག་བསྔལ་རྒྱ་མཚོ་ལས་ནི་སྐྱེ་དགུ་སྒྲོལ། །ཞི་བའི་ལམ་ལ་སྐྱེ་དགུ་རབ་ཏུ་འཛུད། །སྐྱེ་དགུ་རྣམས་ལ་བདེ་བ་ཀུན་སྩོལ་བ། །ཁྱོད་ལ་དཔེ་ནི་བགྱི་བར་མི་ནུས་ཏེ། །ཇི་སྙེད་འདྲེན་པའི་ཡོན་ཏན་ཡེ་ཤེས་མཚོ། །སྲོག་ཆགས་ཀུན་ལ་ཁྱོད་ཀྱི་ཐུགས་རྗེ་དང་། །བྱམས་པའི་སྟོབས་དང་ཐབས་དང་བརྩོན་འགྲུས་དང་། །ཁྱོད་ཀྱི་ཡོན་ཏན་ཡེ་ཤེས་རྒྱ་མཚོ་ལས། །བསྐལ་པ་བྱེ་བ་སྟོང་ཕྲག་མང་པོར་ཡང་། །ཡོན་ཏན་ཐིགས་པ་གཅིག་ཙམ་རབ་བསྟན་པར། ། ལྷར་བཅས་འགྲོ་བའི་ནང་ན་ནུས་མ་མཆིས། །ཡོན་ཏན་མཚོ་ལས་ཡོན་ཏན་ཐིགས་བླངས་ཏེ། །དེ་ལྟར་བདག་གིས་མདོར་བསྡུས་ཅུང་ཟད་བཤད། །བདག་གིས་བསོད་ནམས་གང་བསགས་དེ་ཡིས་ནི། །སེམས་ཅན་དེ་དག་བྱང་ཆུབ་མཆོག་རེག་ཤོག །གསེར་འོད་དམ་པ་མདོ་སྡེའི་
དབང་པོའི་རྒྱལ་པོ་ལས། བྱང་ཆུབ་སེམས་དཔའ་ཐམས་ཅད་ཀྱིས་བསྟོད་པའི་ལེའུ་ཞེས་བྱ་བ་སྟེ་བཅུ་དགུ་པའོ།། །།དེ་ནས་བྱང་ཆུབ་སེམས་དཔའ་མཛེས་པའི་ཏོག་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་དོ། །ཐུབ་དབང་ཁྱོད་ནི་བསོད་ནམས་བརྒྱ་པའི་མཚན། །དཔལ་སྟོང་མཛེས་པའི་ཡོན་ཏན་རྣམས་ཀྱིས་བརྒྱན། །ཁ་དོག་རྒྱ་ཆེན་མཆོག་ཏུ་ཞི་བ་སྟོན། །ཉི་མ་སྟོང་ལྟར་འོད་ནི་རྣམ་པར་འཕྲོ། །འོད་ཟེར་དུ་མ་འབར་བས་འོད་ཀྱིས་ཁྱབ། །ཁ་དོག་སྣ་ཚོགས་དང་བས་རིན་ཆེན་འདྲ། །སྔོན་པོ་དཀར་པོ་གསེར་འོད་བཻ་ཌཱུཪྱ། །ཟངས་དང་སྐྱ་རེངས་ཤེལ་གྱི་འོད་ལྟ་བུས། །རྡོ་རྗེ་རི་དབང་རི་རབ་ཐལ་མཛད་ཅིང་། །ཞིང་རྣམས་བྱེ་བ་དུ་མར་སྣང་མཛད་དེ། །སྡུག་བསྔལ་མི་བཟད་དྲག་པོ་ཞི་བར་མཛད། །བདེ་བ་མཆོག་གིས་སེམས་ཅན་ཚིམ་པར་མཛད། །མདོག་དང་དབང་པོ་གསལ་བག་བལྟ་ན་མཛེས། །གཟུགས་བལྟས་མི་ངོམས་སྐྱེ་བོས་བལྟ་ན་དགའ། །རྨ་བྱའི་མདོག་འདྲའི་དབུ་སྐྲ་རྣམ་པར་མཛེས། ། བུང་བ་མང་པོས་གང་བའི་འོད་དང་འདྲ། །ཐུགས་རྗེ་རྣམ་དག་ཡོན་ཏན་རྣམས་ཀྱིས་བརྒྱན། །ཏིང་འཛིན་བྱམས་པ་བསོད་ནམས་དམ་པ་བསགས། །དཔེ་བྱད་བཟང་དང་ཁ་དོག་སྣ་ཚོགས་ལྡན། །ཏིང་འཛིན་བྱང་ཆུབ་ཡན་ལག་ཡོན་ཏན་བརྒྱན། །ཁྱོད་ནི་རབ་ཏུ་ཚིམ་མཛད་ཕན་པ་མཛད། །བདེ་མཛད་བདེ་བ་ཀུན་གྱི་འབྱུང་གནས་འབྱུང་། །ཡོན་ཏན་ཟབ་མོ་སྣ་ཚོགས་རྣམས་ཀྱིས་བརྒྱན། །ཞིང་རྣམས་བྱེ་བ་དག་དུ་ལྷང་ངེ་སྟེ། །མེ་ཡི་འོད་ལྟར་འོད་ཟེར་རྣམས་ཀྱིས་མཛེས། །ཇི་ལྟར་ནམ་མཁར་ཉི་དཀྱིལ་རྫོགས་པ་བཞིན། །རི་རབ་ལྟ་བུར་ཡོན་ཏན་ཀུན་ལྡན་པར། །འཇིག་རྟེན་ཁམས་རྣམས་ཀུན་ཏུ་རབ་ཏུ་གདའ། །བ་ཞོ་ཀུ་མུ་ད་དུང་ཟླ་འདྲ་ཞིང་། །ཁ་བའི་མདོག་དང་དཀར་པོ་བཟང་འདྲ་བའི། །ཚེམས་ཀྱི་ཕྲེང་བས་ཁྱོད་ཀྱི་ཞལ་མཛེས་པ། །ངང་པའི་རྒྱལ་པོ་བར་སྣང་ཇི་བཞིན་ནོ། །ཁྱོད་ཀྱི་ཞི་ཞལ་མཚམས་ནས་ཟླ་བ་འདྲ། །གཡས་
སུ་འཁྱིལ་ཞིང་ཁོང་ཆུད་འདྲ་བ་ལགས། །བཻ་ཌཱུཪྱ་འདྲའི་སྤུ་འོད་དཀར་རྣམས་ཀྱིས། །ནམ་མཁའི་དཀྱིལ་ན་ཉི་མ་ལྟ་བུར་མཛེས། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། དེ་བཞིན་གཤེགས་པ་ཐམས་ཅད་ལ་བསྟོད་པའི་ལེའུ་ཞེས་བྱ་བ་སྟེ་ཉི་ཤུ་པའོ།། །།དེ་ནས་རིགས་ཀྱི་ལྷ་མོ་བྱང་ཆུབ་ཡང་དག་པར་བསྡུས་པས། དེའི་ཚེ་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་བསྟོད་པ།རྣམ་པར་དག་པའི་ཆོས་ལ་སྤོབས་པའི་བློ་མངའ་བ། །ལས་ངན་ལམ་དང་བྲལ་བའི་བདག་ཉིད་བློ་མངའ་ཞིང་། །སྲིད་དང་སྲིད་མིན་མཁྱེན་པ་རྣམ་དག་བློ་མངའ་བ། །སངས་རྒྱས་རྣམ་དག་བློ་མངའ་བ་ལ་ཕྱག་འཚལ་ལོ། །ཀྱེ་མའོ་ཀྱེ་མའོ་སངས་རྒྱས་གཟི་བརྗིད་མཐའ་ཡས་ཏེ། །ཀྱེ་མའོ་ཀྱེ་མའོ་རྒྱ་མཚོ་དང་ནི་རི་རབ་འདྲ། །ཀྱེ་མའོ་ཀྱེ་མའོ་སངས་རྒྱས་སྤྱོད་ཡུལ་མཐའ་ཡས་ཏེ། །ཨུ་དུམ་བཱ་རའི་མེ་ཏོག་བཞིན་དུ་ཤིན་ཏུ་དཀོན། །སེམས་ཅན་དག་ནི་ཐམས་ཅད་རྗེས་སུ་གཟུང་སླད་དུ། །གང་གིས་མདོ་སྡེ་དམ་པ་འདི་འདྲ་རབ་གསུངས་པ། །མི་དབང་ཉི་མ་ཤཱཀྱའི་དབང་པོའི་རིགས་ཀྱི་ཏོག །ཀྱེ་མའོ་ཀྱེ་མའོ་དེ་བཞིན་གཤེགས་པ་ཐུགས་རྗེ་ལྡན། །དེ་བཞིན་གཤེགས་པ་ཤཱཀྱའི་ཐུབ་པ་དབང་པོ་ཞི། །ཞི་བའི་དམ་པ་ཞི་བའི་གྲོང་ཁྱེར་རབ་ཏུ་ཞུགས། །ཏིང་འཛིན་ཟབ་ཅིང་ཞི་ལ་རྡུལ་དང་བྲལ་བ་ནི། །རྒྱལ་བ་སངས་རྒྱས་སྤྱོད་ཡུལ་དེར་ཡང་རབ་ཏུ་ཞུགས། །དེ་ལྟར་ཉན་ཐོས་རྣམས་ཀྱི་ལུས་ནི་སྟོང་པ་སྟེ། །རྐང་གཉིས་དམ་པ་རྣམས་ཀྱི་གནས་པའང་སྟོང་པ་ལགས། །ཆོས་རྣམས་དེ་དག་ཐམས་ཅད་རང་བཞིན་སྟོང་ལགས་ན། །སེམས་ཅན་རྣམས་ནི་སྟོང་པའི་བདག་ཉིད་མ་འཚལ་ཏོ། །རྟག་པ་ཐེར་ཟུག་ཏུ་ནི་རྒྱལ་བ་དྲན་པར་བགྱིད། །རྒྱལ་བ་མཐོང་བར་ཡང་ནི་རྟག་ཏུ་མྱ་ངན་བགྱིད། །རྫོགས་པའི་སངས་རྒྱས་ཉི་མ་མཐོང་བར་བགྱིད་སླད་དུ། །རྟག་པར་ཡང་ནི་སྨོན་ལམ་རབ་ཏུ་འདེབས་པར་བགྱིད། །བདག་ནི་རྟག་ཏུ་དོག་སར་པུས་མོ་བཙུགས་ནས་སུ། །རྒྱལ་བའི་གཟུགས་ཀྱིས་སྐོམ་པའི་མྱ་ངན་རབ་ཏུ་སེམས། །འདྲེན་པའི་སླད་དུ་སྙིང་རྗེའི་སྐད་ཀྱིས་ངུ་བར་བགྱིད། །བདག་ནི་བདེ་བར་གཤེགས་པ་མཐོང་
བར་རབ་ཏུ་སྐོམ། །མྱ་ངན་མེ་ཡིས་ཀུན་ཏུ་རབ་ཏུ་འབར་བར་གྱུར། །མཐོང་བའི་ཆུ་བསིལ་བདག་ལ་རྟག་པར་སྩལ་དུ་གསོལ། །བདག་ནི་ཁྱོད་ཀྱི་གཟུགས་ལ་བལྟ་བས་རབ་ཏུ་སྐོམ། །ཐུགས་རྗེའི་ཆར་གྱིས་བདག་ལ་རབ་ཏུ་སིམ་པར་མཛོད། །འདྲེན་པ་ཁྱོད་ཀྱིས་བདག་ལ་ཐུགས་རྗེ་མཛད་དུ་གསོལ། །ཞི་བའི་གཟུགས་མཐོང་བ་ནི་བདག་ལ་སྩལ་དུ་གསོལ། །ཁྱོད་ནི་ལྷ་དང་བཅས་པའི་འགྲོ་བ་སྐྱོབ་པ་སྟེ། །འདི་ལྟར་ཉན་ཐོས་རྣམས་ཀྱི་ལུས་ནི་སྟོང་པ་ལགས། །སེམས་ཅན་ཐམས་ཅད་དག་ནི་རྨི་ལམ་རང་བཞིན་ཏེ། །ནམ་མཁའ་འདྲ་ཞིང་ནམ་མཁའི་ངོ་བོ་ཉིད་ཀྱང་ལགས། །སྒྱུ་མ་སྨིག་རྒྱུ་དང་ནི་ཆུ་ཡི་ཟླ་བ་འདྲ། །འདྲེན་པ་ཁྱོད་ཀྱིས་སྟོང་པ་ཚེ་དང་ལྡན་པ་ལགས། །དེ་ནས་བཅོམ་ལྡན་འདས་གདན་ལས་བཞེངས་ཏེ་ཚངས་པའི་སྒྲ་དབྱངས་ཀྱིས་བཀའ་སྩལ་པ། རིགས་ཀྱི་ལྷ་མོ་ཁྱོད་ལེགས་སོ་ཁྱོད་ཡང་ལེགས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། རིགས་ཀྱི་ལྷ་མོ་བྱང་ཆུབ་ཡང་དག་པར་བསྡུས་པ་དང་། ལྷ་མོ་ཆེན་མོ་དབྱངས་ཅན་ལ་སོགས་པ་ལྷ་ཡི་བུ་མོ་དེ་དག་ཐམས་ཅད་དང་། ལྷ་མོ་ཆེན་མོ་དཔལ་ལ་སོགས་པ་ལྷ་མོའི་ཚོགས་དེ་དག་ཐམས་ཅད་དང་། རྣམ་ཐོས་ཀྱི་བུ་ལ་སོགས་པ་ལྷའི་རྒྱལ་པོ་དེ་དག་ཐམས་ཅད་དང་། ཐམས་ཅད་དང་ལྡན་པའི་འཁོར་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། མཇུག་བསྡུས་པའི་ལེའུ་ཞེས་བྱ་བ་སྟེ་ཉི་ཤུ་རྩ་གཅིག་པའོ།། །།འཕགས་པ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །། ཡེ་དྷ་རྨཱ་ཧེ་ཏུ་པྲ་བྷ་ཝཱ་ཧེ་དུནྟེ་ཥཱནྟ་ཐཱ་ག་ཏོ་ཧྱ་བ་ད་ཏ་ཏེ་ཥཱཉྩ་ཡོ་ནི་རོ་དྷ་ཨེ་བཾ་བཱ་དཱི་མ་ཧཱ་ཤྲ་མ་ཎ།། །།