འཕགས་པ་དོན་ཡོད་པའི་ཞགས་པའི་ཆོ་ག་ཞིབ་མོའི་རྒྱལ་པོ།
དེ་ནས་ཧཱུཾ་ཞེས་བྱ་བ་དྲན་པས་ཁྲོ་བོའི་རྒྱལ་པོ་གཤེགས་པར་འགྱུར་རོ། །ལས་འགྲུབ་པ་སྟོན་པ་དང་མཐོང་བ་སྦྱིན་པ་དང་འདོད་པའི་མཆོག་ཐམས་ཅད་རབ་ཏུ་སྦྱིན་པར་འགྱུར་རོ། །འོན་ཏེ་འཕགས་པ་སྤྱན་རས་གཟིགས་དབང་ཕྱུག་དང་ཁྲོ་བོའི་རྒྱལ་པོ་སྤྱན་དྲང་བར་འདོད་ན། ཤིང་སུ་ར་བིས་མེ་སྦར་ལ། འབྲས་ཡོས་དང་། པདྨ་དང་ཨུཏྤ་ལ་དང་། ཡུངས་ཀར་དང་། ཙནྡན་དང་། ཞོ་དང་སྦྲང་རྩི་རྣམས་མར་དང་སྦྱར་ཏེ་བརྒྱ་རྩ་བརྒྱད་སྦྱིན་སྲེག་བྱའོ། །རིག་སྔགས་འཆང་བས་ཁྲུས་ལེགས་པར་བྱ་ཞིང་གོས་གཙང་མ་བགོས་ཏེ་གཙང་བར་བྱའོ། །དེ་ནས་འཕགས་པ་སྤྱན་རས་གཟིགས་དབང་ཕྱུག་དང་ཁྲོ་བོའི་རྒྱལ་པོའི་སྐུ་མདུན་ན་བཞུགས་ཤིང་རིག་སྔགས་འཆང་བ་དབུགས་འབྱིན་པར་མཛད་དོ། །མཆོག་གང་འདོད་ཅིང་གསོལ་བའི་མཆོག་དེ་ཐམས་ཅད་སྦྱིན་པར་མཛད་དོ། །ཕྱག་གཡས་པ་མགོ་བོའི་སྤྱི་བོར་འཇོག་པར་མཛད་དོ། །གལ་ཏེ་སྐལ་བ་ཆུང་བ་ཞིག་སྟེ་མངོན་དུ་ཞལ་མི་མཐོང་ན་དེའི་ཚེ་རྨི་ལམ་དུ་བསྟན་ཏེ།
ཐམས་ཅད་བཀའ་སྩོལ་ཅིང་ཇི་ལྟར་འདོད་པའི་མཆོག་སྦྱིན་ཏེ། གསང་སྔགས་གྲུབ་པ་ཆེན་པོ་དང་། ཆོ་ག་ཞིབ་མོ་གྲུབ་པ་དང་། དཀྱིལ་འཁོར་དང་ཕྱག་རྒྱ་དང་། རིམ་པར་ཕྱེ་བ་གྲུབ་པར་སྦྱིན་ནོ། །དམ་ཚིག་གྲུབ་པ་ཆེན་པོ་རབ་ཏུ་སྟོན་ཏོ། །དབང་ཕྱུག་ཐོབ་པར་བྱ་ན། འབྲས་སོ་བ་སྟུ་ར་ས་དང་། ཞོ་དང་སྦྲང་རྩི་རྣམས་མར་དང་སྦྱར་ཏེ་སྦྱིན་སྲེག་བརྒྱ་རྩ་བརྒྱད་བྱས་ན་དབང་ཕྱུག་སོ་སོར་ཐོབ་པར་འགྱུར་རོ། །གྲོང་ཐོབ་པར་བྱ་ན། ཏན་ཏུ་ལི་ཡ་ཁ་དང་ཞོ་དང་སྦྲང་རྩི་རྣམས་མར་དང་སྦྱར་ཏེ་ལན་བརྒྱ་རྩ་བརྒྱད་སྦྱིན་སྲེག་བྱས་ན་གྲོང་ཐོབ་པར་འགྱུར་རོ། །ཡུལ་གྱི་བདག་པོར་བྱ་ན་འབྲས་སཱ་ལུ་དང་རས་བལ་ས་བོན་རྣམས་མར་དང་བསྲེས་ཏེ་བརྒྱ་རྩ་བརྒྱད་སྦྱིན་སྲེག་བྱས་ན་ཡུལ་ཐོབ་པར་འགྱུར་རོ། །མི་སྣང་བར་བྱ་ན། སྐེ་ཚེ་དང་ལན་ཚྭའི་སྦྱིན་སྲེག་བྱའོ། །ནམ་མཁའ་ལ་འགྲོ་བར་བྱ་ན། ཤ་ཏ་པད་ཏྲི་ཀའི་མེ་ཏོག་གིས་སྦྱིན་སྲེག་བྱའོ། །སངས་རྒྱས་ཀྱི་སྐུ་མཐོང་བར་བྱ་ན། ཤི་ལི་དང་ཙནྡན་གྱི་ཕྱེ་མ་དང་། ཏུ་རུཥྐ་རྣམས་ཏིལ་དང་སྦྱར་ཏེ་ལན་བརྒྱ་རྩ་བརྒྱད་སྦྱིན་སྲེག་བྱས་ན་དེ་བཞིན་གཤེགས་པའི་སྐུ་མང་པོ་མཐོང་བར་འགྱུར་རོ། །དེ་བཞིན་གཤེགས་པ་དེ་དག་གིས་རིག་སྔགས་འཆང་བ་ལེགས་སོ་ལེགས་སོ་ཞེས་གསུང་ཞིང་དབུགས་འབྱིན་ཏོ། །དེ་བཞིན་གཤེགས་པ་དེ་དག་ཐམས་ཅད་ཀྱིས་མགོ་བོའི་སྤྱི་བོར་ཕྱག་འཇོག་ཅིང་མཆོག་གྲུབ་པ་ཆེན་པོ་སྩོལ་བར་མཛད་དོ། །ཐམས་ཅད་དུ་མཆོད་པ་འོས་པ་ཆེན་པོར་འགྱུར་རོ། །ཤི་ནས་བདེ་བ་ཅན་གྱི་འཇིག་རྟེན་གྱི་ཁམས་སུ་སྐལ་བ་མཉམ་པར་སྐྱེ་བར་འགྱུར་རོ། །ཚེ་རབས་དྲན་པར་འགྱུར་རོ། །འཇིག་རྟེན་ཀུན་གྱི་བླ་མར་འགྱུར་རོ། །དགྲ་ཐམས་ཅད་གཞོམ་པར་འདོད་ན་འབྲས་མ་
གྲུགས་པས་སྦྱིན་སྲེག་བྱའོ། །གཏེར་བསྒུལ་ན་དེ་ནས་དོན་ཡོད་པ་ཆེན་པོའི་སྤྱན་སྔར་བརྗོད་པར་བྱ་སྟེ། ཁྲོ་བོའི་རྒྱལ་པོའི་དངོས་གྲུབ་ཆེན་པོ་སྒྱུ་མའི་དངོས་གྲུབ་བླ་ན་མེད་པ། བཀླགས་པས་གྲུབ་པ་སོ་སོར་བསྟན་པའི་དངོས་གྲུབ་བླ་ན་མེད་པ། གྲུབ་པ་རིགས་སྔགས་འཆང་གི་རྣམ་པར་འཕྲུལ་པ་སྟོན་པ་ལྷུར་ལེན་པ་བདེ་བ་སྐྱེད་པ་ལ་མཁས་པ་རྣམས་ཀྱི་རིགས་སྔགས་འཆང་གི་དངོས་གྲུབ་ཀྱི་དེ་ཁོ་ན་ཉིད། དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་མཆོག་ཏུ་གསང་བ། བྱང་ཆུབ་སེམས་དཔའ་རྣམས་ཀྱི་རྫུ་འཕྲུལ་གྱི་རྣམ་པར་འཕྲུལ་པ། ངོགས་སུ་ཞུགས་པ་རྣམས་ཀྱི་རབ་ཏུ་སྒྲུབ་པ། དད་པའི་རྗེས་སུ་འབྲང་བ་རྣམས་རྣམ་པར་སེལ་བ། དོན་གྱི་སྟེགས་མཆོག་ཏུ་གྲུབ་པ། མལ་ཆ་དང་སྟན་མེད་པ་རྣམས་ཀྱི་གོས་སེམས་ཅན་ཐམས་ཅད་ཀྱི་མཆོད་པར་བྱ་བ་ཆེན་པོ། ཐམས་ཅད་དུ་ལས་ཐམས་ཅད་ལེགས་པར་གྲུབ་པ། སྡིག་པ་དང་སྒྲིབ་པ་ཐམས་ཅད་འཕྲོག་པ། གདུག་པ་ཐམས་ཅད་འཇོམས་པ། རྒྱལ་པོ་མཉེས་པར་བྱེད་པ། རྣམ་པར་ཐར་པ་དང་དུལ་བའི་གྲོང་ཁྱེར་ཉིད་དེ། དགེ་བསྙེན་རྣམས་ཀྱི་མཆོག་ཏུ་སྐྱིད་པ། དགེ་བསྙེན་མ་རྣམས་ཀྱི་དགའ་བ་འཕེལ་བར་བྱེད་པ། རིག་པའི་རྒྱལ་པོའི་ཡོན་ཏན་རྨད་དུ་བྱུང་བའི་དེ་ཁོ་ན་ཉིད་སྒྲུབ་པ་གྲུབ་པ་རྣམས་གཙང་མ་གཙང་སྦྲར་སྤྱོད་པ། གོས་གཙང་མ་བགོས་ཏེ། བཟའ་བ་མཆོག་ཤིན་ཏུ་གསང་བ་དང་། བག་ཡོད་ཅིང་བདེན་པར་སྨྲ་བ། དཀོན་མཆོག་གསུམ་ལ་མཆོག་ཏུ་དད་པ། བླ་མ་ལ་གུས་པ། རྟག་པར་རྒྱུན་དུ་བྱམས་པའི་སེམས་ལ་མཉམ་པར་གཞག་པ། སེམས་ཅན་ཐམས་ཅད་ལ་བརྩེ་བར་གྱུར་པ། སྦྱིན་པ་ལ་མངོན་པར་དགའ་བའི་ཡིད་ཅན། འབྱུང་པོ་ཐམས་ཅད་ལ་བརྩེ་བའི་སེམས་དང་བྱམས་པས་བླ་ན་མེད་པའི་སྒྲུབ་པ་འདི་བྱའོ། །བསླབ་པ་དང་སྡོམ་པ་བླངས་པ། དོན་ཡོད་པ་ཆེན་པོའི་སྒྱུ་མ་བླ་ན་མེད་པ་ནི་འདིའོ། །གི་ཝང་དང་། སྤྲྀ་ཀ་དང་། པུ་ཤེལ་ཙེ་དང་། ཙནྡནདང་། ལྡོང་རོས་དང་། ཤིང་ཀུན་དང་། སྤངསྤོས་དང་། ན་ལ་ད་དང་། རུ་རྟ་དང་བཅས་པ་དང་། དེ་བཞིན་དུ་འབྲས་དགང་སྟེ་འདི་རྣམས་ཐམས་ཅད་ཆ་མཉམ་སྟེ། ཕྱེ་མར་བྱས་ནས།
ཐམས་ཅད་ཞིབ་མོར་བཏགས་ལ། ག་བུར་དང་། གླ་རྩིས་བསྒོས་ཏེ། སྙིགས་མ་འདི་དག་ཚ་བའི་ཏིལ་མར་གྱིས་བཅོས་པ། ཉེའུ་ཤིང་དང་། བིལ་བ་དང་། མེ་ཏོག་བརྒྱ་པ་དང་། པུཥྐ་ར་དང་། གནྡྷ་པྲི་ཡང་ཀུ་དང་། རྒྱ་སྤོས་དང་། ས་མུ་སྟ་དང་། པྲ་པུཎྜ་རཱི་ཀ་དང་། ཤིང་མངར་རྣམས་ཆུ་བྲེ་བདུན་གང་བརསྦྱིན་པར་བྱ་སྟེ་དྲུག་ཆ་ལྷག་མར་ལུས་པ་དང་། སྙིགས་མ་བྲེ་གང་དང་འོ་མའི་སྙིགས་མ་བོར་ཏེ། ཏིལ་མར་སྲང་གཉིས་ལ་རྟག་ཏུ་བཙོ་བར་བྱའོ། །ལེགས་པར་གྲུབ་པའི་གསང་སྔགས་བཟླས་བརྗོད་བྱས་ལ་གཏོར་མ་དང་། དཀྱིལ་འཁོར་དུ་མེ་ཏོག་དང་། དྲི་བཟང་པོའི་བདུག་པ་དང་། ཏིལ་མར་བཙོ་བའི་ཆོ་ག་བཞིན་དུ་རབ་ཏུ་སྦྱར་ལ་ གང་ལས་གྲུབ་པ་ཁྱད་པར་དུ་བསྐྱེད་ཅིང་བབས་པའི་ཏིལ་མར་བྱས 
་པ་སྲུང་བའི་ཆོ་ག་བྱ་སྟེ། སྣོད་གཙང་མ་བཀང་ནས་སླར་ཡང་གསང་སྔགས་ལན་ཉི་ཤུ་རྩ་གཅིག་ཏུ་བཟླས་བརྗོད་བྱས་ནས་གསང་བའི་གནས་སུ་གཞག་པར་བྱའོ། །དེ་ནས་ལས་ཐམས་ཅད་བྱེད་དུ་གཞུགསྟེ། རིག་སྔགས་འཆང་ཁྲུས་ལེགས་པར་བྱས་པ། དྲིས་བསྒོས་པའི་ཏིལ་མར་རྟག་ཏུ་ལུས་ལ་བྱུགས་པ་འདིས། ལུས་དེ་མི་སྣང་ཞིང་དངོས་པོ་མེད་པར་སྟོན་པར་བྱེད་དོ། །ངག་ཐོས་ལ་རེག་པར་མི་བྱེད་དོ། །གང་གིས་ལུས་ཁྲུས་མ་བྱས་ཀྱི་བར་དེ་སྲིད་དུ་བདག་ཉིད་མི་སྣང་སྟེ་ལུས་མི་མཐོང་ངོ་། །དཔྲལ་བརཐིག་ལེ་བྱས་ནས། ཡན་ལག་དང་། ཉིང་ལག་རྣམས་ལ་རེག་སྟེ། གསང་སྔགས་ལན་ཅིག་བཟླས་བརྗོད་བྱས་ན་ནམ་མཁའ་ལ་འགྲོ་བར་འགྱུར་ཏེ། སྐད་ཅིག་ལ་དགའ་བར་བྱེད་པ་དང་། ལྷ་དང་བཅས་པའི་རིག་སྔགས་འཆང་གི་དབང་པོ་མཁའ་ལ་སྤྱོད་པ་རྣམས་ཀྱིས་ལྷན་ཅིག་ཏུ་ཏིལ་མར་མགོ་ལ་བྱུགས་པས་མདོག་སྔོ་བ་དང་། སྐྲ་ཅུང་ཟད་ལི་ཞིང་འཁྱིལ་བར་འགྱུར་རོ། །ཏིལ་མར་གྲུབ་པའི་རིག་སྔགས་འཆང་ཐམས་ཅད་ཀྱི་འཁོར་ལོས་སྒྱུར་བའི་མངའ་བདག་ཏུ་འགྱུར་རོ། །རེག་པ་ཙམ་གྱིས་ཚེ་བསྐལ་པ་ཁྲི་ཐུབ་པར་འགྱུར་རོ། །ལུས་པདྨ་དཀར་ཤམ་ལྟ་བུར་འགྱུར་རོ། །ལུས་རྡོ་རྗེ་ལྟར་བརྟན་པ་དང་། གནས་ཀྱི་སྒོ་ཐམས་ཅད་བྱེ་སྟེ་འདུག་གོ། །གང་དུ་འདོད་པར་འཇུག་པར་བྱེད་དོ། །དཀྱིལ་འཁོར་སྒྲུབ་
པའི་དུས་སུ་རིག་སྔགས་འཆང་ལ་ཐིག་ལེ་བྱས་ནས་ལག་ཏུ་རྡོ་རྗེ་དང་ནོར་བུ་བྱས་ན། ནམ་མཁའ་ལ་འཕུར་བར་འགྱུར་ཏེ། མོད་ལ་དཀྱིལ་འཁོར་གྲུབ་པ་སྟོན་པར་བྱེད་དོ། །ཏིལ་མར་གྱིས་རྐང་པ་ལ་བྱུགས་ན། ནམ་མཁའ་ལ་འོང་བར་བྱེད་དོ། །ལུས་ལ་བྱུགས་ན་མི་སྣང་བར་སྟོན་པར་བྱེད་དོ། །མཚལ་དང་ཏིལ་མར་ལྷན་ཅིག་སྦྱར་ཏེ། ཡན་ལག་དང་། ཉིང་ལག་ལ་ཐིག་ལེ་བྱས་ན། ལུས་འབར་བའི་སྙིང་པོ་མཐོང་བར་བྱེད་དོ། །འདི་དག་རིག་སྔགས་འཆང་གི་རྣམ་འཕྲུལ་སོ་སོར་བསྟན་པའོ། །ཡུངས་ཀར་ལ་བཟླས་ཏེ། ལན་ཅིག་བསྐུས་སམ། དཀྱིལ་འཁོར་གྱི་སྟེང་དུ་གཏོར་ན། དཀྱིལ་འཁོར་གཡོ་བར་འགྱུར་ཏེ། འཁོར་ལོ་བཞིན་དུ་བསྐོར་བར་བྱེད་དོ། །གཏོར་མའི་སྣོད་གང་བ་རྣམས་དང་། བུམ་པ་གང་བ་རྣམས་སོར་མོ་བརྒྱད་ཀྱི་ཚད་དུ་ནམ་མཁའ་ལ་འཕགས་ཏེ་འདུག་གོ། །རང་ཉིད་སེ་གོལ་གྱི་སྒྲས་ཡོངས་སུ་འདོན་པར་བྱེད་ན། སླར་ཡང་སྣོད་ནམ་མཁའ་ལ་འཕགས་ཏེ་འདུག་པ་རང་རང་གི་གནས་སུ་གནས་པར་འགྱུར་རོ། །འདི་རྣམས་དཀྱིལ་འཁོར་དགོས་པ་བླ་ན་མེད་པའི་དངོས་གྲུབ་བོ། །དེ་ནས་སེང་གེའི་ཁྲག་དང་ཏིལ་མར་ལྷན་ཅིག་སྦྱར་ཏེ། བདག་ཉིད་ཀྱི་ལུས་ལ་བྱུགས་ན། མི་ཡི་སེང་གེ་ཆེན་པོའི་གཟུགས་སུ་མཐོང་བར་འགྱུར་ཏེ། ཇི་སྲིད་ལུས་ཁྲུས་མ་བྱས་པ་དེ་སྲིད་དུ་མིའི་སེང་གེར་ཀུན་ཏུ་གནས་སོ། །གཞན་ཡང་ཇི་ལྟར་བསམས་པ་བཞིན་དུ། ནམ་མཁའ་ལ་འཕགས་ཏེ་འདུག་པ་དང་། མི་སྣང་བར་འགྱུར་བ་དང་། མེ་འབར་བ་སྟོན་པར་བྱེད་དོ། །ཕག་གི་ཁྲག་དང་སྦྱར་ན། ཕག་གི་གཟུགས་སུ་སྟོན་པར་བྱེད་དེ། ཤུགས་དང་སྟོབས་ཆེན་པོར་སྟོན་པར་བྱེད་དོ། །གླང་པོ་ཆེའི་ཁྲག་དང་སྦྱར་བས་ཚོགས་ཀྱི་དབང་ཕྱུག་ཆེན་པོའི་གཟུགས་སུ་སྟོན་པར་བྱེད་དོ། །རྟའི་ཁྲག་དང་སྔོན་པོ་ལྷན་ཅིག་སྦྱར་བ་ལུས་ལ་བྱུགས་པ་ཙམ་གྱིས་རྟ་མགྲིན་གྱི་གཟུགས་སུ་སྟོན་པར་བྱེད་དེ་ཇི་སྲིད་ཁྲུས་མ་བྱས་པ་དེ་སྲིད་དུ་མཐོང་བར་བྱེད་དོ། །བ་ལང་གི་མཁྲིས་པ་དང་ལྷན་ཅིག་སྦྱར་ན། །ཁྱུ་མཆོག་ཆེན་པོ་ལ་ཞོན་པར་མཐོང་བར་འགྱུར་རོ། །ཉའི་མཁྲིས་པ་དང་ལྷན་ཅིག་སྦྱར་ན། ཀླུའི་རྒྱལ་པོ་ཆུ་བདག་ཆེན་པོའི་གཟུགས་
སུ་མཐོང་བར་འགྱུར་རོ། །སྦྲུལ་དམར་པོའི་ཁྲག་དང་བསྲེས་ནས་སྦྱར་ན། སྦྲུལ་ཆེན་པོའི་གཟུགས་སུ་མཐོང་བར་འགྱུར་རོ། །རའི་ཁྲག་དང་བསྲེས་པས། ར་ཆེན་པོའི་གཟུགས་སུ་མཐོང་བར་འགྱུར་རོ། །པདྨའི་ལོ་མ་དང་། ཕྱེ་མ་དང་། རྩ་བ་དང་བཅས་པ་དང་། འདབ་མ་དང་མེ་ཏོག་དང་སྡོང་བུ་དང་བཅས་པ་ཏིལ་མར་གྱིས་ལྷན་ཅིག་སྦྱར་བས་ཡུངས་ཀར་ལ་བསྐུས་ཏེ་ལུས་ལ་བྱུགས་ལ་ཏིལ་མར་གྱིས་ཐིག་ལེ་བྱའོ། །མཁས་པས་ཡན་ལག་དང་ཉིང་ལག་ལ་བྱུག་པ་བྱས་ན་རྒྱལ་པོ་ཆེན་པོའི་ཆ་ལུགས་སུ་མཐོང་བར་འགྱུར་ཏེ། མ་མོའི་ཚོགས་དང་བཅས་པས་ཡོངས་སུ་བསྐོར་བས་དགོས་པ་སྣ་ཚོགས་པ་དང་། རྒྱལ་པོའི་དགོས་པ་རྣམས་བྱེད་པར་འགྱུར་རོ། །ཡིད་ལ་བསམས་པའི་དགོས་པ་ཐམས་ཅད་སྒྲུབ་པར་བྱེད་པར་འགྱུར་རོ། །ལྡོང་རོས་ཀྱི་མིག་སྨན་དང་ལྷན་ཅིག་བསྲེས་ནས་མིག་ལ་བྱུགས་ན། འཁོར་ཆེན་པོའི་དབུས་སུ། སྤྱན་རས་གཟིགས་དབང་ཕྱུག་གི་གཟུགས་སུ་མཐོང་བར་འགྱུར་རོ། །རིག་པའི་རྒྱལ་པོ་བཟླས་ཏེ་ཡུངས་ཀར་དེ་ནམ་མཁའ་ལ་གཏོར་ན། འབྲས་བུ་སྣ་ཚོགས་ཀྱི་ཆར་འབབ་པར་མཐོང་བར་འགྱུར་རོ། །པདྨའི་སྙིང་པོས་སྦྱར་ན། པདྨ་ཆེན་པོའི་ཆར་འབྱུང་བར་འགྱུར་རོ། །ཨུཏྤ་ལ་སྔོན་པོའི་ཁུ་བས་སྦྱོར་ན། ཨུཏྤ་ལ་སྔོན་པོ་ཆེན་པོའི་ཆར་འབྱུང་བ་མཐོང་བར་འགྱུར་རོ། །ཇི་ལྟར་མེ་ཏོག་གི་ཁུ་བས་སྦྱར་བ་དེ་ལྟ་དེ་ལྟར་མེ་ཏོག་གི་ཆར་ཆེན་པོ་འབྱུང་བར་འགྱུར་རོ། །ཇི་ལྟར་ཡིད་ལ་འདོད་པའི་གཟུགས་དང་། ཁ་དོག་དང་། རྟགས་དང་། དབྱིབས་སུ་མཐོང་བར་འདོད་པ་དེ་ལྟ་དེ་ལྟར་ལྷའི་ཏིལ་མར་རྙིང་པ་དང་ལྷན་ཅིག་སྦྱར་ན། དེ་ལྟ་དེ་ལྟར་དེ་དང་དེ་ཉིད་ཀྱི་གཟུགས་སུ་མཐོང་བར་འགྱུར་རོ། །གཞལ་ཡས་ཁང་ཡང་མཐོང་བར་འགྱུར་རོ། །ལག་པས་ནོར་བུ་གཅིག་བླངས་ཏེ། ཡིད་ལ་རྗེས་སུ་དྲན་པར་བྱས་ན། རྣམ་པ་སྣ་ཚོགས་པ་དུ་མའི་བདག་ཉིད་དུ་མཐོང་བར་འགྱུར་རོ། །གོས་དང་། རྒྱན་སྣ་ཚོགས་པ་རྣམས་སྟོན་པར་བྱེད་དོ། །ལག་པས་སྣོད་ལ་གཟུང་ན། སྣོད་སྣ་ཚོགས་པ་བཏོན་པར་བྱེད་དོ། །ལག་པས་བུམ་པ་ལ་གཟུང་ན། བུམ་པ་བརྒྱ་སྟོང་ཕྲག་སྟོན་པར་བྱེད་དོ། །རྐང་པའི་མཐིལ་ལ་བསྐུས་ན། གང་དུ་རྡོ་བ་ལ་རྐང་པ་
བཞག་པ་དེ་དང་དེ་ཉིད་དུ་རྐང་པའི་རྗེས་འཇོག་པར་བྱེད་དེ། མར་གསར་ལ་ཉེ་བར་འཇོག་པ་ཇི་ལྟ་བ་བཞིན་དུ། མར་གསར་མཉེན་པ་བཞིན་དུ་རྡོ་བ་ཡང་འདྲ་བར་འགྱུར་རོ། །གཏུན་ཤིང་ལ་བྱུགས་ན། རྟགས་འབྱུང་བར་འགྱུར་རོ། །མ་མོའི་དཀྱིལ་འཁོར་གྱི་གནས་སུ་ཞུགས་ན། མ་མོའི་ལྷ་རྣམས་ཀྱི་སོ་སོ་ཐ་དད་པའི་རྡུལ་བཟུང་སྟེ་ཏིལ་མར་དང་ལྷན་ཅིག་སྦྱར་ནས་སོ་སོའི་གདོང་ལ་བྱུགས་ན། ལྷ་དེ་དང་དེ་ལྟ་བུའི་གཟུགས་སུ་སྟོན་པར་བྱེད་དོ། །གཞན་ཡང་དགོས་པ་རྣམ་པ་སྣ་ཚོགས་པ་རྣམས་རང་གི་འདོད་པའི་བློས་ལས་བྱའོ། །དེ་ནས་བློ་འཕེལ་བར་བྱེད་པ་ནི། ཏིལ་མར་དང་། འོ་མ་ལྷན་ཅིག་ཟོས་ན། བློ་དང་དྲན་པ་ཆེན་པོ་འཕེལ་བར་འགྱུར་རོ། །ནུབ་གསུམ་གྱི་སྦྱོར་བས་ཚིགས་སུ་བཅད་པ་སྟོང་ཀློག་པར་བྱེད་ཅིང་འཛིན་པར་བྱེད་དོ། །ཞག་བདུན་གྱི་སྦྱོར་བས་བློ་གྲོས་རྒྱ་མཚོ་ཆེན་པོ་ལྟ་བུ་འཕེལ་བར་བྱེད་ཅིང་སོགས་པར་བྱེད་དོ། །ཞག་བཅུ་བཞིའི་སྦྱོར་བས་ཚེ་ལྷའི་ལོ་སྟོང་དུ་འགྱུར་རོ། །ཞག་ཉི་ཤུ་རྩ་གཅིག་གི་སྦྱོར་བས། བཅུད་ལེན་སྒྲུབ་པའི་དངོས་གྲུབ་འབྱུང་བར་འགྱུར་ཏེ། གཉེར་མ་དང་། སྐྲ་དཀར་སྤངས་པ་དང་། སྐྲ་ཅུང་ཟད་འཁྱིལ་བར་འགྱུར་རོ། །ལུས་འཇམ་ཞིང་མཉེན་པ་དང་། པདྨའི་ཁ་དོག་དང་འདྲ་བར་འགྱུར་རོ། །སྐྱེས་ནས་ལོ་བཅུ་ལོན་པ་དང་འདྲ་བར་གཟུགས་དང་ལང་ཚོ་དང་ལྡན་པར་འགྱུར་རོ། །གླང་པོ་ཆེ་སྟོང་ཕྲག་བཅུའི་སྟོབས་སུ་འགྱུར་རོ། །ཞག་ཉི་ཤུ་རྩ་བརྒྱད་ཀྱི་སྦྱོར་བས་གླང་པོ་ཆེས་སྲུང་གི་སྟོབས་སུ་འགྱུར་རོ། །ཞག་སུམ་ཅུ་སོ་ལྔའི་སྦྱོར་བས་ནམ་མཁའ་ལྡིང་ཆེན་པོའི་སྟོབས་སུ་འགྱུར་རོ། །ཞག་བཞི་བཅུ་རྩ་གཉིས་ཀྱི་སྦྱོར་བས་ལྷ་མ་ཡིན་གྱི་དབང་པོ་སྒྲ་གཅན་དང་འདྲ་བར་བརྩོན་འགྲུས་དང་སྟོབས་ཆེན་པོར་འགྱུར་རོ། །ཞག་བཞི་བཅུ་རྩ་དགུའི་སྦྱོར་བས་རི་རབ་ལྷུན་པོ་ཆེན་པོའི་དཀྱིལ་འཁོར་དང་འདྲ་བར་འགྱུར་ཏེ། ཀླུའི་རྒྱལ་པོ་དགའ་བོ་དང་། ཉེ་དགའ་བོས་ཡོངས་སུ་བསྐོར་བ། མི་གཡོ་ཞིང་མི་བསྒུལ་བ། རེག་པར་བྱ་བ་མ་ཡིན་ཞིང་མི་མཐོང་བ། མི་མ་ཡིན་པ་རྣམས་ཀུན་ཏུ་སྤྱོད་པ། ལྷ་རྣམས་ཐམས་ཅད་ཀྱིས་ཕྱག་བྱས་ཤིང་། ཕྱག་བྱ་བའི་འོས་སུ་གྱུར་པ། དྲང་སྲོང་རྣམས་ཀྱིས་བསྟོད་པའི་
འོས་སུ་གྱུར་པ། གནོད་སྦྱིན་དང་སྲིན་པོ་རྣམས་ཀྱི་ཕྱག་བྱ་བའི་འོས་སུ་གྱུར་པ། དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ཀྱིས་བྱིན་གྱིས་བརླབས་པ། བྱང་ཆུབ་སེམས་དཔའ་ཐམས་ཅད་ཀྱི་རབ་ཏུ་བསྔགས་པའི་འོས་སུ་གྱུར་པ། རིག་སྔགས་འཆང་བའི་དབང་པོ་ཐམས་ཅད་ཀྱི་གསང་བའི་དམ་ཚིག་གྲུབ་པ། ལྷའི་དབང་པོ་རྣམས་ཀྱིས་ལྷན་ཅིག་འགྲན་པའི་འོས་སུ་གྱུར་པ། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་རྣམས་ཀྱི་མངོན་དུ་སྨྲ་བའི་འོས་སུ་གྱུར་པ། ཀླུའི་དབང་པོ་ཐམས་ཅད་ཀྱི་ཉེ་བར་བགྲོད་པར་བྱ་བ་སྟེ། དེ་ལྟར་དོན་ཡོད་པའི་ལྕགས་ཀྱུའི་ཁྲོ་བོའི་རྣམ་པར་འཕྲུལ་པ་ཞེས་བྱ་བ་ཏིལ་མར་གྱི་རྒྱལ་པོའི་རྣམ་པར་འཕྲུལ་པ་ཡོན་ཏན་ཆེན་པོ་རྨད་དུ་བྱུང་བ་བརྒྱ་སྟོང་ཕྲག་གིས་གང་བའོ། །ཏིལ་མར་གྱི་རྒྱལ་པོའི་རིག་སྔགས་འཆང་འདིས། ཏིལ་མར་གྱི་རྒྱལ་པོ་རལ་གྲི་ལ་བྱུགས་ན། བྱུགས་པ་ཙམ་གྱིས་རལ་གྲི་འབར་བར་འགྱུར་རོ། །རིག་སྔགས་འཆང་གི་འཁོར་ལོས་སྒྱུར་བར་འགྱུར་ཏེ། རལ་གྲིའི་རིག་སྔགས་འཆང་གི་འཁོར་ལོས་སྒྱུར་བ་ཐམས་ཅད་ཀྱི་མཆོག་ཏུ་འགྱུར་རོ། །རྡོ་རྗེ་ལ་བྱུགས་ན་རྡོ་རྗེ་འབར་བར་འགྱུར་ཏེ། རིག་སྔགས་འཆང་གི་འཁོར་ལོས་སྒྱུར་བ་ནམ་མཁའ་ལ་འགྲོ་ཞིང་། རྡོ་རྗེའི་རིག་སྔགས་འཆང་གི་འཁོར་ལོས་སྒྱུར་བར་འགྱུར་རོ། །འཁོར་ལོ་ལ་བྱུགས་ན་འཁོར་ལོ་འབར་བར་འགྱུར་ཏེ། རིག་སྔགས་འཆང་ནམ་མཁའ་ལ་འགྲོ་བར་འགྱུར་རོ། །བལྟ་ན་སྡུག་པའི་འཁོར་ལོའི་རིག་སྔགས་འཆང་གི་འཁོར་ལོས་སྒྱུར་བར་མོད་ལ་འགྱུར་རོ། །དགྲ་ཐམས་ཅད་རབ་ཏུ་འཇོམས་སོ། །མདུང་རྩེ་གསུམ་པ་ལ་བྱུགས་ན་འབར་བར་འགྱུར་ཏེ། རིག་སྔགས་འཆང་གི་འཁོར་ལོས་སྒྱུར་བར་འགྱུར་ཏེ། ནམ་མཁའ་ལ་གནས་པར་བྱེད་དོ། །སྟོབས་དང་། བརྩོན་འགྲུས་དང་། ཕ་རོལ་གནོན་པ་དབང་ཕྱུག་ཆེན་པོ་དང་འདྲ་བར་འགྱུར་རོ། །འབྲས་དང་། ཕོལ་མིག་དང་། ལྷོག་པ་དང་། མེ་དབལ་དང་། ཤུ་བ་དང་། མཛེ་དང་། རྐང་ཤུ་དང་། རྩའི་རྨ་དང་། མགུལ་པ་འགགས་པ་དང་། རྣ་བའི་རྩ་ནད་དང་། མཚན་བར་རྡོལ་བ་དང་། དམུ་ཆུ་དང་། སྐྲན་དང་། རླུང་དང་། མཁྲིས་པ་དང་། བད་ཀན་དང་། འདུས་པ་
ཉིད་ལ་ཡང་། མཁས་པས་ཆུ་དྲོན་མོ་འཐུངས་པ་ཙམ་དང་། བྱུགས་པ་ཙམ་གྱིས་ནད་ཐམས་ཅད་སེལ་ལོ། །ཏིལ་མར་གྱིས་ནད་ཐམས་ཅད་སེལ་བ་དེ་བཞིན་དུ། རྩིབ་ལོགས་ན་བ་དང་། ཚད་པ་དང་། སྙིང་ན་བ་དང་། མཆིན་པ་ན་བ་དང་། བཤང་བ་འཁྱིམ་པ་དང་། ཕོ་བའི་ནད་ཀྱི་ཉེས་པ་དེ་རྣམས་ཐམས་ཅད་འཐུངས་པ་ཙམ་གྱིས་རྣམ་པར་འཇིག་པར་ཐེ་ཙོམ་མེད་དོ། །ཉམས་པ་དང་། ཟད་པ་དང་། དེ་བཞིན་དུ་རྒྱལ་པོའི་དཔལ་བཅོམ་པ་དང་། གསོ་དཔྱད་ངན་པ་རྣམས་བསྐུས་པ་ཙམ་མམ་ཟོས་པ་ཙམ་གྱིས་སྟོབས་དང་ལྡན་པར་འགྱུར་རོ། །ལུས་རྣམས་རྒྱས་པ་དང་། མགུ་བ་དང་། སྤྲོ་བ་ཆེན་པོར་འགྱུར་རོ། །གདོན་རྣམ་པ་སྣ་ཚོགས་པར་བསྲུང་བ་དང་། བརྗེད་བྱེད་མི་བཟད་པ་ལ་ཡང་། རེག་པ་ཙམ་གྱིས་དེ་དག་ཐམས་ཅད་རྣམ་པར་འཇིག་པར་ཐེ་ཚོམ་མེད་དོ། །བྱད་མི་བཟད་པ་དང་། སྡུག་བསྔལ་དང་། དུག་དང་། སྦྱར་དུག་ཉིད་ཀྱང་རེག་པ་ཙམ་གྱིས་རྣམ་པར་འཇིག་པར་འགྱུར་རོ། །བརྟན་པ་དང་། གཡོ་བའི་དུག་གང་ཡིན་པ་དང་། མཆེ་བའམ། སྦྲུལ་གོ་ཎ་ས་དང་། སྡིག་པ་ཡང་རུང་། སྲིན་བུ་དང་། ཕྱེ་མ་ལེབ་གདུག་པའམ། ནོར་རྒྱས་ཀྱི་བུ་དང་། འཇོག་པོའམ། སྦྲུལ་གྱིས་མཐོང་བའི་དུག་གམ། དབུགས་ཀྱི་དུག་མི་བཟད་པ་གང་ཡིན་པ་དང་། རེག་པའི་དུག་གང་ཡིན་པ་དང་། ཧཱ་ལ་ཧཱ་ལའི་གདུག་པ་གང་ཡིན་པ་དང་། གཞན་ད་ར་དའི་དུག་གང་ཡིན་པ་དང་། རྩ་བའི་དུག་གང་ཡིན་པ་དང་། སྡོང་བུའི་དུག་དང་། འདབ་མའི་དུག་དང་། མེ་ཏོག་གི་དུག་དང་། མདངས་ཀྱི་དུག་གང་ཡིན་པ་དང་། གཞན་དུག་རྣམ་པ་སྣ་ཚོགས་པ་དེ་རྣམས་ཐམས་ཅད་རྣམ་པར་འཇིག་པར་འགྱུར་རོ། །ཏིལ་མར་རེག་པ་ཙམ་གྱིས། ལམ་མཆོག་དང་། ལམ་གོལ་བར་སོང་བ་རྣམས་དང་། རྒྱལ་པོའི་སྒོ་དྲུང་དུ་སོང་བ་ཡང་རུང་། བསད་པར་འོས་པར་གྱུར་པ་གང་ཡིན་པ་དང་། བཅིངས་པར་གྱུར་པ་གང་ཡིན་པ་དང་། འཐབ་པ་དང་། རྩོད་པ་དང་། འགྱེད་པ་གང་ཡིན་པ་དང་། གཞན་ཡང་དགྲའི་གཟེབ་དང་། ཕ་རོལ་གྱི་དམག་ཚོགས་ཀྱི་འཇིགས་པ་ཉིད་དང་། མི་མཛའ་བ་དང་། ཕྱིར་རྒོལ་བ་གང་ཡིན་པ་ཡང་ཏིལ་མར་འདི་མངོན་པར་སྦྱར་བས་སྐད་ཅིག་དེ་ལ་ཐམས་
ཅད་འཇོམས་སོ། །རྒྱལ་པོ་ཁྲོས་པ་གང་ཡིན་པ་འཛུམ་བཞིན་དུ་བཀའ་སྩོལ་ཏོ། །གཡུལ་འགྱེདཔའི་ནང་དུའམ། ཕན་ཚུན་འཐབ་བཞིན་པ་ཐམས་ཅད་ལ་ཏིལ་མར་རྒྱལ་པོ་བླ་ན་མེད་པས་རྟག་ཏུ་རྒྱལ་བ་སྟེར་རོ། །མཁས་པས་མིག་ལ་བྱུགས་ན། མི་ཐུབ་ཅིང་ཐམས་ཅད་དུ་འགྲོ་བར་འགྱུར་རོ། །གཞན་གྱིས་ཀྱང་དགོས་པ་ཐམས་ཅད་ལ་རབ་ཏུ་སྦྱར་བར་བྱ་སྟེ། དངོས་གྲུབ་ཀྱི་གནས་ཐམས་ཅད་ཀྱི་མཆོག་ཡིན་པའི་ཕྱིར་རོ། །དེ་ནས་ཁྲོ་བོ་ལྕགས་ཀྱུ་བླ་ན་མེད་པ། སྡིག་པ་ཐམས་ཅད་སེལ་བ། མོད་ལ་གདུག་པ་ཐམས་ཅད་འཇིགས་པར་བྱེད་པ། ནད་ཐམས་ཅད་རབ་ཏུ་ཞི་བར་བྱེད་པ། མོད་ལ་ཐམས་ཅད་དུ་གྲུབ་པ་བླ་ན་མེད་པ། ནད་ཐམས་ཅད་ཞི་བ། དེ་ཁོ་ན་ཉིད་ཁྲོ་བོ་ལྕགས་ཀྱུ་བླ་ན་མེད་པའི་རས་རིས་ཀྱི་སྐུ་གཟུགས་བརྗོད་པར་བྱ་སྟེ། རས་རིས་ཀྱི་སྐུ་གཟུགས་བླ་ན་མེད་པ་འདི་མཐོང་བ་ཙམ་གྱི་མོད་ལ། བསོད་ནམས་ཀྱི་ཕུང་པོ་ཆེན་པོ་ཐོབ་པ་དང་། དགེ་བའི་རྩ་བ་ཆེན་པོ་བསྐྱེད་པར་འགྱུར་བ་དང་། རིག་པའི་གནས་ཐམས་ཅད་རྟོགས་པར་ཁོང་དུ་ཆུད་པར་འགྱུར་བ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གངྒཱའི་ཀླུང་གི་བྱེ་མ་སྙེད་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་གཉིས་མཐོང་བ་དང་། མཆོད་པ་དང་། རིམ་གྲོར་བྱ་བ་དང་། ཞེ་སར་བྱ་བ་དང་། བླ་མར་བྱས་པ་དང་། དེ་བཞིན་གཤེགས་པ་དེ་རྣམས་ཀྱི་སྤྱན་སྔར་བསོད་ནམས་ཀྱི་ཕུང་པོ་ཆེན་པོའི་དགེ་བའི་རྩ་བ་དང་ལྡན་པར་འགྱུར་བ་དང་། རས་རིས་ཀྱི་སྐུ་གཟུགས་གང་ཡིན་པ་འདི་མཐོང་བ་ཙམ་གྱི་མོད་ལ། མཐས་ཀླས་པ་ཙམ་དང་འདི་མཚུངས་པར་འགྱུར་ཏེ། འདི་དང་མཚུངས་པའི་བསོད་ནམས་ཀྱི་ཕུང་པོའི་དགེ་བའི་རྩ་བ་བསྐྱེད་པར་འགྱུར་རོ། །དེ་བཞིན་གཤེགས་པ་དང་། བྱང་ཆུབ་སེམས་དཔའ་ཐམས་ཅད་དང་། ལྷ་ཐམས་ཅད་ཀྱིས་དགོངས་པར་འགྱུར་རོ། །རས་གྲུ་བཞི་པ་གྲུ་བཞིར་ཆ་མཉམ་པ། ཤིན་ཏུ་ཐགས་བཟང་བ། ཤིན་ཏུ་གསར་བ། ཤིན་ཏུ་འཇམ་པ་མཆོག་ཏུ་མཛེས་པ། ཁྲུ་གཉིས་པའི་ཚད་ཁ་ཚར་མ་བཅད་པ། སྐྲ་དང་བྲལ་བའམ། ཡང་ན་དར་གཙང་མ་གྲུ་བཞི་ཤིན་ཏུ་རྣམ་པར་འབྱེས་པ་ལ། རི་མོ་མཁན་གཙང་མ་སྨྱུང་བར་གནས་པས། ལྷག་
མ་མ་ཡིན་པའི་ཚོན་སྣོད་གསར་པར་བཞག་ལ། ཚོན་སྣ་ཚོགས་རྣམ་པར་འབྱེས་པས། འཕགས་པ་དོན་ཡོད་ཞགས་པའི་ཁྲོ་བོ་ལྕགས་ཀྱུ་བྲི་བར་བྱའོ། །འཕགས་པ་སྤྱན་རས་གཟིགས་དབང་ཕྱུག་ཞལ་བཞི་པ། ཞལ་དང་པོ་ནི་ཞི་བ། སྤྱན་གསུམ་པ། རལ་པའི་ཅོད་པན་གྱིས་བརྒྱན་པ། འོད་དཔག་མེད་ཅོད་པན་དུ་འཆང་བ། ཟླ་བས་ཉེ་བར་མཛེས་པ། ཕྱག་བཞི་པ་རྒྱན་ཐམས་ཅད་ཀྱིས་རྣམ་པར་བརྒྱན་པ། གཡས་པའི་ཞལ་དྲག་པོའི་གཟུགས་ཅན་འཇིགས་པར་བྱེད་པ། ཚེམས་ཀྱིས་མ་མཆུ་མནན་པ། དབུ་སྐྲ་གྱེན་དུ་བརྫེས་པའི་རལ་པའི་ཐོར་ཚུགས་ཀྱིས་བརྒྱན་པ། གཡོན་པ་དྲག་པོ་ཆེན་པོ་མཆེ་བ་གཙིགས་པ། ཞལ་རྣམ་པར་འགྱུར་བ། དབུ་སྐྲ་འཁྱིལ་ཞིང་གྱེན་དུ་བརྫེས་པའི་རལ་པ་ཀུན་ཏུ་བཅིངས་པ། འོད་དཔག་མེད་ཀྱི་ཅོད་པན་ཅན། དྲག་ཏུ་བཞད་པའོ། །ཞི་བའི་ཞལ་རལ་པའི་ཅོད་པན་གྱིས་བརྒྱན་པའི་སྟེང་དུ། སྐུ་ཕྱེད་པའི་ཁྲོ་བོའི་རྒྱལ་པོ་འབར་བའི་སྙིང་པོར་ཆུད་པ་བྱ་སྟེ། སྐུ་ཨུཏྤ་ལ་སྔོན་པོའི་ཁ་དོག་ཅན། དབུ་སྐྲ་དམར་པོ་ཅུང་ཟད་འཁྱིལ་བ། འོད་དཔག་མེད་ཀྱི་ཅོད་པན་ཅན། རྒྱན་ཐམས་ཅད་ཀྱིས་རྣམ་པར་བརྒྱན་པ། ཕྱག་གཉིས་ཀྱི་གཅིག་གིས་རལ་གྲི་དང་། གཉིས་པས་ཐོ་བ་འབར་བ་ཅན་བྱའོ། །ཕྱག་གཅིག་གིས་པདྨ་འཆང་བ་སྟེ། པདྨའི་གེ་སར་འབར་བའི་སྙེན་པ་ཅན་ནོ། །གཉིས་པས་ལྕགས་ཀྱུ་དང་མདུང་རྩེ་གསུམ་སྟེ། གཡས་པ་ནའོ། །གཡོན་པས་ཁྲོ་བོ་ཆེན་པོ་དྲག་ཏུ་རྒོད་པའི་གཟུགས་ཅན། དོན་ཡོད་པའི་ཞགས་པ་འཛིན་པའོ། །གཡས་པ་དབུགས་འབྱིན་པའི་རིན་པོ་ཆེ་ཆེན་པོའི་ཆར་འབེབས་པ། ཕྱག་ཐམས་ཅད་འབར་བའི་སྙིང་པོ་འོད་ཟེར་ཁ་དོག་སྣ་ཚོགས་པ་བྱ་སྟེ། པདྨའི་གདན་ལ་སྐྱིལ་མོ་ཀྲུང་གིས་བཞུགས་པ་བྱའོ། །རྒྱ་མཚོའི་སྙིང་པོར་རི་རབ་ལ་གནས་པ། ཀླུའི་རྒྱལ་པོ་དགའ་བོ་དང་། ཉེ་དགའ་བོས་དཀྲིས་པ་བྱའོ། །ཉ་དང་ཆུ་སྲིན་དང་། ནོར་བུ་རིན་པོ་ཆེ་སྣ་ཚོགས་ཀྱིས་དཀྲིས་པ། པདྨ་དང་། ཨུཏྤ་ལ་དང་། ཀུ་མུ་དང་། པདྨ་དཀར་པོས་གཅལ་དུ་བཀྲམ་པ། དང་པ་དང་། བཞད་དང་། ངུར་པ་དང་། ཤང་ཤང་ཏེའུས་ཁྱབ་པ་བྱའོ། །གཡས་ལོགས་སུ་
ལྷ་མོ་སྒྲོལ་མ། དབུ་ཅུང་ཟད་དུད་པ། ཐལ་མོ་སྦྱར་བ་འཆང་བ། རྒྱན་ཐམས་ཅད་ཀྱིས་རྣམ་པར་བརྒྱན་པ། འཛེམ་བག་དང་བཅས་པ་བྱའོ། །དཀར་ཤམ་ཆེན་མོ་ཐལ་མོ་སྦྱར་ཏེ་ཅུང་ཟད་འདུད་པ། རྒྱན་ཐམས་ཅད་ཀྱིས་རྣམ་པར་བརྒྱན་པ། འཛེམ་བག་དང་བཅས་པ་བྱའོ། །སྲིན་མོ་ཆེན་མོ་རལ་པ་གཅིག་མ་ཁྲག་འཛག་པའི་ཐོད་པ་དང་། དྲག་མོ་དྲག་ཏུ་རྒོད་པ་བྱ་སྟེ། འབར་པའི་སྙིང་པོར་ཁྲོ་བོ་ལྕགས་ཀྱུ་ལ་བལྟ་བཞིན་པ། ལག་པ་བཞི་པ། ལག་ན་རལ་གྲི་དང་། དགྲ་སྟ་དང་། ཞགས་པ་དང་། རྡོ་རྗེ་ཐོགས་པ་རྒྱན་ཐམས་ཅད་ཀྱིས་རྣམ་པར་བརྒྱན་པར་བྱའོ། །གཡོན་ཕྱོགས་སུ་གནོད་སྦྱིན་གྱི་དབང་པོ་བྱ་སྟེ། ཞལ་ཁྲོ་གཉེར་ཅན་དྲག་པོ། དབུ་སྐྲ་གྱེན་དུ་བརྫེས་པ། འཇིགས་པར་བྱེད་པ། འབར་བའི་སྙིང་པོར་པུས་མོ་གཡས་པ་བཙུགས་པ། རལ་གྲི་དང་། དགྲ་སྟ་ཐོགས་པ། ཕྱག་གཉིས་ཐལ་མོ་སྦྱར་བ་འཆང་བ། རྒྱན་ཐམས་ཅད་ཀྱིས་རྣམ་པར་བརྒྱན་པ། ཁྲོ་བོའི་རྒྱལ་པོ་ལྕགས་ཀྱུ་ལ་ངེས་པར་བལྟ་བཞིན་པ། ཁོ་ར་ཁོར་ཡུག་ཏུ་འོད་འདོམ་གང་བ། འོད་ཟེར་སྣ་ཚོགས་འབར་བ་བྱའོ། །ལྕགས་ཀྱུ་དང་བཅས་པའི་ཁོ་ར་ཁོར་ཡུག་གི་སྟེང་དུ། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། གཤིན་རྗེ་དང་། ཆུ་ལྟ་དང་། ལུས་ངན་པོ་བྱ་སྟེ། མེ་ཏོག་སྣ་ཚོགས་ཀྱི་ཕུར་མ་ཐོགས་ཏེ། མཆོད་པ་བྱེད་བཞིན་པ་བྱའོ། །ཁྲོ་བོའི་རྒྱལ་པོ་དོན་ཡོད་ལྕགས་ཀྱུའི་རྒྱབ་ཏུ། རིན་པོ་ཆེ་སྣ་བདུན་ལས་བྱུང་བའི་ཤིང་ལྗོན་པ་བྱ་སྟེ། ཡལ་ག་དང་། འདབ་མ་དང་། ལོ་མ་རྣམ་པར་བཀྲ་བར་བྱའོ། །ཁྲོ་བོའི་རྒྱལ་པོའི་ཞབས་ཀྱི་དྲུང་དུ། རིག་སྔགས་འཆང་བྱ་སྟེ། པུས་མོ་བཙུགས་པ་མེ་ཏོག་སྣ་ཚོགས་ཐོགས་ཤིང་། ལག་ན་བགྲང་ཕྲེང་འཛིན་པ། ཁྲོ་བོའི་རྒྱལ་པོ་ལ་སྟེང་དུ་བལྟ་བཞིན་པ་བྱའོ། །ཞབས་གཉིས་པའི་དྲུང་གི་གནས་སུ་ཕོ་ཉ་མོ་བྱ་སྟེ། ཟུར་མིག་ཅན་དྲག་མོ། ལག་ན་རལ་གྲི་ཐོགས་པ། རྣམ་པར་འགྱུར་བ་ཕྱག་ཐལ་མོ་སྦྱར་བ་རྒྱན་ཐམས་ཅད་ཀྱིས་རྣམ་པར་བརྒྱན་པ་བྱའོ། །རས་རིས་ཀྱི་སྐུ་གཟུགས་ཀྱི་བྱ་བ་ཡོངས་སུ་མཐར་ཕྱིན་ནས། བྱིན་གྱིས་བརླབས་ཏེ། དེའི་འོག་ཏུ་གསང་བའི་གནས་སུ་གཞག་པར་
བྱའོ། །དེའི་དྲུང་དུ་གཙང་མས་ཟས་མི་བཟའ་བར། དེའི་སྤྱན་སྔར་ཁྲོ་བོ་ལྕགས་ཀྱུ་བརྒྱ་རྩ་བརྒྱད་བཟླས་བརྗོད་བྱ་སྟེ། མེ་ཏོག་དང་། བདུག་པ་དང་། མཆོད་ཡོན་དང་། ཞབས་བསིལ་ཇི་ལྟར་རྙེད་པ་དབུལ་བར་བྱའོ། །རས་རིས་ཀྱི་སྐུ་གཟུགས་སྒྲུབ་པའི་ཆོ་ག་འདིས་སྒྲུབ་པའི་ཆོ་ག་རྒྱས་པ་གཞན་ཡང་བྱའོ། །དེའི་འོག་ཏུ་རིག་སྔགས་འཆང་གིས་ཉི་མ་རེ་རེར་རས་རིས་ཀྱི་མདུན་དུ། གཙང་མས་ཟས་མི་ཟ་བར། དེའི་སྤྱན་སྔར་མེ་ཏོག་དང་། བདུག་སྤོས་ཕུལ་ནས། ཁྲོ་བོའི་རྒྱལ་པོ་ལན་གཅིག་བཟླས་པར་བྱའོ། །དེ་ནས་ལས་ཐམས་ཅད་དང་དགོས་པ་ཐམས་ཅད་བྱའོ། །འདི་ནི་དེ་ཁོ་ན་ཉིད་ཀྱི་དངོས་གྲུབ་བཀླགས་པས་གྲུབ་པ་སྟེ། རིག་སྔགས་འཆང་གིས། གསང་བ་མཆོག་གི་ལས་བསྒྲུབ་པ་བྱའོ། །དེ་ནས་སྐུ་གཟུགས་མཐོང་བ་ཙམ་ལ་སོགས་པས་མཚམས་མེད་པ་ལྔ་དང་། མནར་མེད་པ་ལ་གཞོལ་བ་དང་། དམ་པའི་ཆོས་སྤོང་བ་རྣམས་འདི་མཐོང་བ་ཙམ་གྱིས་ཐམས་ཅད་ཡོངས་སུ་དག་པར་འགྱུར་རོ། །སྡིག་པ་ཐམས་ཅད་དང་། སྒྲིབ་པ་ཐམས་ཅད་དང་། སྔོན་གྱི་སྒྲིབ་པ་བསགས་པ་དང་བཅས་པ་དང་། བསྐལ་པ་བརྒྱར་བསགས་པའི་སྡིག་པ་དེ་དག་ཐམས་ཅད་རྣམ་པར་འཇིག་པར་འགྱུར་རོ། །ནད་དང་འཇིགས་པ་ཐམས་ཅད་ལས་ཡོངས་སུ་གྲོལ་བར་འགྱུར་རོ། །སྡིག་པ་ཐམས་ཅད་དང་། དགྲ་ཐམས་ཅད་དང་། ཕྱིར་རྒོལ་བ་ཐམས་ཅད་དང་། མི་མཛའ་བ་རྣམ་པར་འཇིག་པར་འགྱུར་རོ། །རས་རིས་ཀྱི་སྐུ་གཟུགས་ཤིན་ཏུ་ཆུང་བ་བྱེད་པ་གང་ཡིན་པ་དེ་ཡང་ཕན་པ་བྱེད་པར་འགྱུར་ཏེ། མེ་ཏོག་གམ། བདུག་པ་དང་། དྲིའམ། བྱུག་པའམ། དཀྱིལ་འཁོར་དང་བཅས་པ་བྱེད་པའམ། ཁྲུས་ཀྱི་བུམ་པ་གང་བཀོད་པའམ། རྡུལ་སེལ་བར་བྱེད་པ་ཙམ་ཡང་རུང་སྟེ། རིག་སྔགས་འཆང་དེའི། རིགས་ཀྱི་བུའམ། རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མས། དེ་བཞིན་གཤེགས་པ་གངྒཱའི་ཀླུང་གི་བྱེ་མ་སྙེད་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་དགུའི་དེ་བཞིན་གཤེགས་པའི་དྲུང་དུ་དགེ་བའི་རྩ་བ་ཆེན་པོ་བསྐྱེད་པར་འགྱུར་རོ། །བསོད་ནམས་ཀྱི་ཕུང་པོ་ཆེན་པོ་ཡོངས་སུ་འཛིན་པར་འགྱུར་རོ། །ཕ་རོལ་ཏུ་ཕྱིན་པ་དྲུག་
ཡོངས་སུ་རྫོགས་པར་ཡང་འགྱུར་རོ། །མཚམས་མེད་པ་ལྔ་རྣམ་པར་སྦྱངས་ཤིང་བསྐལ་པའི་མཐར་ཐུག་པར་འགྱུར་རོ། །སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ཀྱིས་གཟིགས་འདོད་པར་འགྱུར་རོ། །སྐྱེ་བ་བརྗེས་ནས་ཀྱང་། འཇིག་རྟེན་གྱི་ཁམས་བདེ་བ་ཅན་དུ་འགྲོ་བར་འགྱུར་ཏེ། པདྨ་ལས་བརྫུས་ཏེ་སྐྱེ་བར་འགྱུར་རོ། །སྐྱེ་བའི་སྐྱེ་བ་དྲན་པར་ཡང་འགྱུར་རོ། །རྣམ་པར་གྲོལ་བའི་དཀྱིལ་འཁོར་གསང་བ་པདྨ་ཡངས་པའི་དཀྱིལ་འཁོར། དོན་ཡོད་ཞགས་པའི་སྙིང་པོ། དོན་ཡོད་པའི་ཁྲོ་བོ་ལྕགས་ཀྱུའི་གཟུངས་འདི་ཡང་མཐའ་དག་ཡོངས་སུ་རྫོགས་པར་ཁ་ཏོན་དུ་གནས་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་གསང་བའི་རིགས་ཀྱི་དམ་ཚིག་གསང་བ་རྣམས་དང་། གསང་སྔགས་རིམ་པར་ཕྱེ་བ་དང་། ཕྱག་རྒྱ་དང་། གསང་སྔགས་དང་། དཀྱིལ་འཁོར་རིམ་པར་ཕྱེ་བ་དང་། ཆོ་ག་ཞིབ་མོ་ཐམས་ཅད་མངོན་སུམ་དུ་འགྱུར་རོ། །སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་བར་འགྱུར་རོ། །དེ་བཞིན་གཤེགས་པ་ཐམས་ཅད་མངོན་སུམ་དུ་མཐོང་བར་འགྱུར་རོ། །ཡོན་ཏན་ཐམས་ཅད་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་ཡང་འགྱུར་རོ། །དགེ་བའི་རྩ་བ་ཐམས་ཅད་ཡང་དག་པར་སྡུད་པར་ཡང་འགྱུར་རོ། །བསོད་ནམས་ཀྱི་ཚོགས་ཆེན་པོ་དང་ལྡན་པར་འགྱུར་རོ། །འཇིག་རྟེན་ཐམས་ཅད་ཀྱི་བླ་མར་ཡང་འགྱུར་རོ། །ཚིག་བཙན་པར་ཡང་འགྱུར་རོ། །འཇིག་རྟེན་ཐམས་ཅད་དགའ་བར་ཡང་འགྱུར་རོ། །ཐམས་ཅད་དུ་མཆོད་པར་འོས་པར་ཡང་འགྱུར་རོ། །རིག་སྔགས་ཐམས་ཅད་གྲུབ་པར་འགྱུར་རོ། །ཡིད་ལ་བསམས་པ་ཐམས་ཅད་ཡོངས་སུ་རྫོགས་པར་འགྱུར་ཞིང་། དགོས་པ་ཐམས་ཅད་གྲུབ་པར་ཡང་འགྱུར་རོ། །ཐམས་ཅད་དུ་ཐོགས་པ་མེད་པ་མཁས་པའི་བློ་རུ་འགྱུར་རོ། །དེ་ནས་ཁྲོ་བོའི་ལྕགས་ཀྱུའི་དཀྱིལ་འཁོར། ཆོ་ག་ཞིབ་མོ་ཐམས་ཅད་ཀྱི་དཀྱིལ་འཁོར་དང་། གསང་བའི་ཕྱག་རྒྱ་བླ་ན་མེད་པ་བཤད་པར་བགྱིའོ། །ཁོར་ཡུག་ཏུ་ཐེམ་སྐས་བཞི་དང་ལྡན་པ། ས་དང་བ་བྱུང་བསྲེས་པའི་དཀྱིལ་འཁོར་གྲུ་བཞི་པ་བྱ་སྟེ། གཟིངས་ཀྱི་རྒྱ་དང་ཚད་མཉམ་པ། ཤིན་ཏུ་ཚད་ལ་བབ་ཅིང་
ལེགས་པར་རྣམ་པར་འབྱེས་པ། ལེགས་པར་བྱུགས་ཤིང་ཤིན་ཏུ་འཇམ་པ། འཇམ་ཤིང་མཉེན་པ་དང་ལྡན་པའོ། །ཚོན་སྣ་ཚོགས་པས་རྣམ་པར་ཕྱེ་བ་དང་། དཀྱིལ་འཁོར་མཆོག་གི་ཐིག་བཏབ་ལ། །སྣ་ཚོགས་ཚོན་རྩིས་རྣམ་པར་དབྱེ། །སྒོ་བཞི་ཤིན་ཏུ་རྣམ་འབྱེས་པ། །ཁོར་ཡུག་ཐེམ་སྐས་བཞི་དང་ལྡན། །རྟ་བབས་བཞི་ཡིས་བརྒྱན་པ་སྟེ། །དབུས་ཀྱི་དཀྱིལ་འཁོར་སྙིང་པོར་ཡང་། །ཤིན་ཏུ་རྣམ་འབྱེས་ཚད་ལ་བབ། །ཁྲུ་ཡི་ཚད་དུ་བྱ་བའོ། །དཀྱིལ་འཁོར་གྲུ་བཞི་མཉམ་པ་ཡི། །སྙིང་པོའི་དཀྱིལ་འཁོར་དབུས་སུ་ཡང་། །མཁས་པས་ཤིན་ཏུ་རྣམ་འབྱེས་པའི། །པདྨ་འདབ་མ་བཅུ་གཉིས་བྱ། །ལྕགས་ཀྱུ་ཕྱོགས་དང་རྩེ་གསུམ་དང་། །གེ་སར་པདྨའི་ཁོར་ཡུག་ཏུ། །སྙིང་པོར་གྱུར་པའི་དབུ་མཆོག་ལ། །ཁྲོ་བོ་ཞགས་པ་ཡང་བྱའོ། །དྲག་པོའི་གཟུགས་ཅན་འཇིགས་པར་བྱེད། །རལ་གྲི་དང་ནི་དགྲ་སྟའི་ཕྱག །རལ་པའི་ཅོད་པན་གྱིས་བརྒྱན་ཅིང་། །རྒྱན་རྣམས་ཀུན་གྱིས་རྣམ་པར་བརྒྱན། །ལུས་ཕྱེད་པ་དང་། ཞགས་པས་ཀུན་ནས་དཀྲིས་པ། མདུང་རྩེ་གསུམ་པ། ནམ་མཁའ་ལ་ཕྱིར་ཕྱོགས་པ། པདྨ་དང་བཅས་པ་བྱས་པ་ལ། གྲྭ་གྲྭར་འབར་བའི་གདོང་བྱའོ། །མདུང་རྩེ་གསུམ་དང་པདྨ་ལ་རབ་ཏུ་གནས་པ། དྲག་པོའི་ཞལ་འཇིགས་པར་བྱེད་པ་ཆེན་པོ་མཆེ་བ་རྣམ་པར་གཅིགས་པ། ཞལ་འཇིགས་སུ་རུང་བ་འབར་བའི་སྙིང་པོར་ཆུད་པའོ། །ནང་གི་རི་མོ་ལ། ལྕགས་སྒྲོག་དང་། མདུང་རྩེ་གསུམ་པའི་གདོང་བྲི་བར་བྱ་སྟེ། འབར་བའི་སྙིང་པོ་དང་བཅས་པ། ཁ་དོག་སྣ་ཚོགས་པའི་ཚོན་རྩིས་བྱའོ། །རི་མོ་གཉིས་པའི་ནང་དུ། པདྨ་ཁ་ཕྱེད་བྱེ་བ་གེ་སར་འབར་བ་དང་བཅས་པའི་པདྨ་བྱའོ། །རི་མོ་གསུམ་པའི་ནང་དུ། འཁོར་ལོའི་རྣམ་པའོ། །མུ་ཁྱུད་ཀྱི་ཕྱི་རོལ་ཏུ་ལག་པའི་ཕྱག་རྒྱ་ཡང་བྲི་བར་བྱ་སྟེ། མཚོན་ཆ་སྣ་ཚོགས་པ་འཛིན་པའོ། །རལ་གྲི་དང་། ཞགས་པ་དང་། མདུང་རྩེ་གསུམ་དང་། ཙ་བ་ལ་དང་། མདུང་རྩེ་གཉིས། དུང་དང་། ཏིཪྱ་དང་། འཁོར་ལོ་དང་། རྩེ་གསུམ་ཁ་གདེངས་དང་། ཐོ་བ་དང་། མདུང་དང་། རལ་གྲི་དང་། ནོར་བུ་དང་། མདུང་རྩེ་གསུམ་དང་། མདའ་བོ་ཆེ་དང་། ལས་ཀྱི་རྡོ་རྗེ་དང་། རྩེ་ལྔ་དང་། པརྴ་སཱུ་
ལ་དང་། རྡོ་རྗེ་ཟུར་གསུམ་དང་། པདྨ་དང་། རྩེ་གསུམ་དག་ཁ་དོག་སྣ་ཚོགས་འབར་བ་ཁོར་ཡུག་ཏུ་ཡོངས་སུ་བསྐོར་བ་བྲི་བར་བྱའོ། །ཁ་ཁྱེར་གྱི་རྣམ་པས་བརྒྱན་པ་ལ་ཁ་ཁྱེར་གྱི་ཕྱི་རོལ་དཀྱིལ་འཁོར་གྱི་གནས་སུ་མཚན་མ་སྣ་ཚོགས་བྲི་བར་བྱ་སྟེ། རིགས་ཆེན་པོ་བཞི་ཐུན་མོང་བའི་དཀྱིལ་འཁོར་གྱི་ཕྱག་རྒྱ་བྲི་བར་བྱའོ། །ཤར་གྱི་གནས་སུ། དེ་བཞིན་གཤེགས་པའི་རིགས་ཀྱི་མཚན་མའི་ཕྱག་རྒྱ་ཡང་བྲི་བར་བྱའོ། །ལྷོ་རུ་པདྨ་ཡངས་པའི་མཚན་མ་དཀྱིལ་འཁོར་གྱི་ཕྱག་རྒྱའོ། །ནུབ་ཀྱི་གནས་ཀྱི་དཀྱིལ་འཁོར་དུ། ནོར་བུའི་རིགས་ཀྱི་མཚན་མའི་ཕྱག་རྒྱ་རྣམས་ཀྱང་བྲི་བར་བྱའོ། །བྱང་དུ་རྡོ་རྗེའི་རིགས་ཀྱི་མཚན་མའི་ཕྱག་རྒྱ་ཡང་དག་པར་བྲིའོ། །ཤར་གྱི་སྒོ་རུ། དེ་བཞིན་གཤེགས་པའི་རིགས་ཀྱི་ཁྲོ་བོའི་རྒྱལ་པོ་སྒོ་རུ་བྲི་བར་བྱའོ། །ལྷོ་རུ་པདྨ་ཡངས་པའི་དཀྱིལ་འཁོར་གྱི་ཁྲོ་བོ་རྣམས་སོ། །ནུབ་ཏུ་ནོར་བུ་རིགས་ཀྱི་ཁྲོ་བོའོ། །བྱང་དུ་རྡོ་རྗེའི་རིགས་ཀྱི་ཁྲོ་བོ་བྲི་བར་བྱའོ། །ཁྲོ་བོ་ཐམས་ཅད་ཀྱི་གཟུགས་འབར་བའི་སྙིང་པོ། རྒྱན་ཐམས་ཅད་ཀྱིས་རྣམ་པར་བརྒྱན་པ། ལག་པ་བཞི་པ། མཚོན་ཆ་སྣ་ཚོགས་པ་འཛིན་པ་བྱའོ། །རི་རབ་ལ་གནས་པ། སྐྱིལ་མོ་ཀྲུང་ཕྱེད་པ་ལུས་ཅུང་ཟད་བསྐུམ་པ་བྱའོ། །ཕྱིའི་རི་མོའི་དཀྱིལ་འཁོར་དུ། ནོར་བུ་དང་། རྡོ་རྗེ་དང་། མེ་ཏོག་དང་། མདུང་རྩེ་གསུམ་པ་དག་གོ། །ཁོར་ཡུག་ཏུ་ཁ་ཁྱེར་འབར་བས། དཀྱིལ་འཁོར་གྱི་ཁོར་ཡུག་ཏུ་བརྒྱན་པའོ། །ལྷབ་ལྷུབ་དང་། བ་དན་དང་། རྒྱལ་མཚན་དང་། ཚོན་སྣ་ལྔ་པའི་སྐུད་པས་ཀུན་ནས་དཀྱིལ་འཁོར་ལ་ཡང་དག་པར་བརྒྱན་པའོ། །རོ་བྲོ་བའི་མཆོག་དང་ལྡན་པའི་གཏོར་མས་གང་བའི་སྣོད་ཅི་འབྱོར་པ་དང་། གཏོར་མའི་ལས་ཀྱི་ཆོ་གས་འབྱོར་པ་དང་། རྗེས་སུ་མཐུན་པར་གཞག་པར་བྱའོ། །བུམ་པ་གང་བ་དང་། པོག་ཕོར་དང་། བུམ་བུ་དང་། བུམ་པ་དང་། གཏོར་མ་དཀར་པོས་བཀང་བ་དང་། འབྲས་བུ་རྣམ་པ་སྣ་ཚོགས་པ་ཉིད་དང་། དྲི་དང་། ཕྲེང་བ་དང་། བྱུག་པ་དང་། མེ་ཏོག་ཀུན་ནས་གཅལ་དུ་དགྲམ་མོ། །འབྲས་ཡོས་དང་། ཡུངས་ཀར་གྱིས་གཏོར་བར་བྱའོ། །སྙིང་པོའི་དཀྱིལ་འཁོར་གྱི་གྲྭར། མཆོད་ཡོན་དང་།
ཞབས་བསིལ་གྱི་སྣོད་དང་། རིན་པོ་ཆེ་སྣ་བདུན་རབ་ཏུ་དགྲམ་མོ། །དྲིའི་ཆུས་བཀང་བའི་བུམ་པ་དང་། ལེགས་པར་བརྒྱན་པའི་བུམ་པ་བྱས་ནས། མཁས་པས་དར་བཟང་པོ་བཅིངས་ཏེ། དབུས་ཀྱི་དཀྱིལ་འཁོར་དུ་གཞག་པར་བྱའོ། །སྒོ་བཞིར་དྲི་ཆབ་ཀྱིས་གང་བའི་བུམ་པ་དར་གྱིས་བཅིངས་པ་གཞག་པར་བྱའོ། །མཁས་པས་སྒོ་དང་། སྒོ་རུ་ནི། བུ་རམ་དང་། ཤ་ཁ་ར་དང་། སྦྲང་རྩིའི་རོ་དང་། གཏོར་མ་གཞག་པར་བྱའོ། །མདུང་རྩེ་གསུམ་ལ། ཞོ་དང་། འོ་མ་དང་། ཟན་དང་། མཆོག་གི་བཟའ་བ་མ་ཉམས་པས། ཤིན་ཏུ་མཛེས་པའི་གཏོར་མ་གཞག་པར་བྱའོ། །དེ་བཞིན་དུ། འཁུར་བ་དང་། འཁུར་བ་ཟླུམ་པོ་ཉིད་དང་། སྣུམ་འཁུར་དང་། བེ་ཊི་མ་ཀ་དང་། ས་རཱའི་ལ་དུ་དང་། མུད་གའི་ལ་དུ་དང་། ཧྭགས་དང་། ཁ་ཡྻཱ་ནི་བཟང་པོ་རྣམས་གཞག་པར་བྱའོ། །གཏོར་མའི་ལས་ལ། ཁོར་ཡུག་ཏུ་མེ་ཏོག་བཟང་པོ་དགྲམ་ཞིང་། ཕྲེང་བས་བརྒྱན་པར་བྱའོ། །འབྲུའི་རྣམ་པ་སྣ་ཚོགས་པ་གཞག་པར་བྱའོ། །འབྲས་བུའི་ངོ་བོ་རྣམ་པ་སྣ་ཚོགས་པ་དང་། ནེའུ་གསིང་སྔོ་བསངས་དང་། ལོ་མ་མཛེས་པ་བཀྲམ་སྟེ་གཞག་པར་བྱའོ། །ཁོར་ཡུག་ཏུ་མར་མེའི་ཕྲེང་བ་དང་། དེ་བཞིན་དུ། ཨ་ག་རུ་དང་། ཙནྡན་སྤྲྀ་ཀ་དང་། ཏུ་རུཥྐ་དང་། དཔལ་གྱིས་དཀྲིས་པ་དང་། གུ་གུལ་དང་། ཀུན་ཏུ་རུ་དང་། སྦྲང་རྩི་དང་། ཧྭགས་སྦྱར་བའི་བདུག་པ་སྟེ། བདུག་པ་འདི་དག་དབུལ་བར་བྱའོ། །དཀྱིལ་འཁོར་གྱི་ཁོར་ཡུག་ཏུ་བདུག་པ་འཐུལ་བའི་པོག་ཕོར་གཞག་པར་བྱ་སྟེ། དཀྱིལ་འཁོར་གྱི་ལྷ་ལ་བདུག་པ་དབུལ་བར་བྱའོ། །ཕྱོགས་བཅིངས་པ་དང་། དཀྱིལ་འཁོར་བཅིང་བ་བྱ་སྟེ། གཙུག་ཏོར་བཅིང་ཞིང་། བདག་སྲུང་བ་དང་། གཞན་བསྲུང་བ་བྱའོ། །དེའི་འོག་ཏུ་འཇུག་པར་བྱའོ། །རིག་སྔགས་དཀྱིལ་འཁོར་མཆོག་མཐོང་བ་དང་། ཕྱག་བྱ་ཞིང་། བསྐོར་བ་ཉིད་དང་། དམ་ཚིག་ཀྱང་སྦྱིན་པར་བྱའོ། །རྟག་ཏུ་བསང་བའི་ལས་བྱས་ཏེ། དེ་ཁོ་ན་བཞིན་དུ་གསང་སྔགས་བཟླས་པ་ཡང་བྱའོ། །དཀྱིལ་འཁོར་གྱི་ཆོ་ག་ཚད་མ་ལས། ད་གོས་པ་འདི་དག་ཐམས་ཅད་བྱས་ནས། དེའི་འོག་ཏུ་རིག་སྔགས་འཆང་
གིས་ལས་ཐམས་ཅད་ཀྱི་དངོས་གྲུབ་བླ་ན་མེད་པའོ། །རྒྱལ་བ་རིགས་བཞིའི་ཡོངས་སུ་བསྐོར་བའི་དཀྱིལ་འཁོར་དུ་ཞུགས་པ་དེ་དག་ཐམས་ཅད་ནི། འགྲོ་བ་བཟང་པོར་སྐྱེ་བར་འགྱུར་རོ། །དེ་བཞིན་དུ་བདེ་བ་ཅན་དུ། འོད་དཔག་མེད་ཀྱི་སྤྱན་སྔར་པདྨ་ལས་བརྫུས་ཏེ་སྐྱེ་བར་ཐེ་ཙོམ་མེད་དོ། །ལྷའི་གཟུགས་ཤིན་ཏུ་མཛེས་པ་རྒྱན་ཐམས་ཅད་ཀྱིས་རྣམ་པར་བརྒྱན་པ། འཇིག་རྟེན་ལས་འདས་པའི་དངོས་གྲུབ་ཆེན་པོ་ཐོབ་པར་འགྱུར་ཏེ། འདི་ལ་ཐེ་ཙོམ་མི་བྱའོ། །འཇིག་རྟེན་པའི་དཀྱིལ་འཁོར་གྱི་དངོས་གྲུབ་བླ་ན་མེད་པ་དང་། ཆོ་ག་ཞིབ་མོའི་དངོས་གྲུབ་དང་། ཕྱག་རྒྱའི་དངོས་གྲུབ་དང་། ཁྲོ་བོའི་རྒྱལ་པོ་དངོས་གྲུབ་བླ་ན་མེད་པ་དང་། སྡིག་པ་དང་། སྒྲིབ་པ་ཐམས་ཅད་སེལ་བ་དང་། མོད་ལ་གདུག་པ་ཐམས་ཅད་འཇིག་པ་དང་། དགྲ་ཐམས་ཅད་བཟློག་པ་དང་། མོད་ལ་ནད་ཐམས་ཅད་རབ་ཏུ་ཞི་བ་དང་། དགོས་པ་ཐམས་ཅད་དང་། ཐམས་ཅད་དུ་དངོས་གྲུབ་བླ་ན་མེད་པ་གང་ཡིན་པ་གྲུབ་པར་འགྱུར་རོ། །འཇིག་རྟེན་ཐམས་ཅད་ཀྱི་མངའ་བདག་དང་རྟག་ཏུ་དགའ་བར་འགྱུར་རོ། །དེ་རྟག་ཏུ་རྗེས་སུ་འབྲང་བར་འགྱུར་རོ། །རྟག་ཏུ་རྒྱལ་པོ་དང་། བློན་པོར་བཅས་པ་རྣམས་ཀྱིས་དུས་རྒྱུན་དུ་བླ་ན་མེད་པའི་མཆོད་པའི་གནས་སུ་འགྱུར་རོ། །གཞན་ཡང་ལྗོངས་ཐམས་ཅད་བལྟ་ཞིང་མཆོདཔས་རྗེས་སུ་འབྲང་བར་འགྱུར་རོ། །དེ་བཞིན་ཉིད་དུ་ཡང་དགེ་སྦྱོང་རྣམས་དང་། བྲམ་ཟེ་རྣམས་དང་། རྒྱལ་རིགས་དང་། རྗེའུ་རིགས་དང་། དམངས་རིགས་དང་། སྐྱེས་པ་དང་། བུད་མེད་དང་། ཁྱེའུ་དང་། བུ་མོ་ཐམས་ཅད་ཀྱང་དགའ་བར་འགྱུར་རོ། །རྟག་ཏུ་ཚིག་བཙན་པ་དང་། རྟག་ཏུ་ལྷ་རྣམས་ཀྱིས་མངོན་པར་བསྲུངས་པ་དང་། སྐབས་གསུམ་གྱི་དབང་པོ་དང་། རྡོ་རྗེ་འཆང་བ་ཉིད་དང་། རྡོ་རྗེ་སྙིང་པོ་བདག་ཉིད་ཆེན་པོ་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། གཞོན་ནུ་དང་། དགའ་བྱེད་དབང་ཕྱུག་དང་། གཤིན་རྗེ་དང་། ཆུ་ལྷ་ཉིད་དང་། དེ་བཞིན་དུ་རྒྱལ་པོ་ཆེན་པོ་བཞི་རྣམས་རྟག་ཏུ་རྗེས་སུ་འབྲང་བར་འགྱུར་རོ། །ཁྲོ་བོའི་དཀྱིལ་འཁོར་དུ་ཞུགས་ཤིང་མཐོང་བ་ལ་ཡང་དུས་རྟག་ཏུ་སྲུང་བ་དང་། རྗེས་སུ་འབྲང་བར་འགྱུར་ཏེ་
ཐེ་ཙོམ་མི་བྱའོ། །ཡུན་རིང་དུ་འཚོ་བར་འགྱུར། རྟག་ཏུ་སྨྲ་བ་ཉུང་ཞིང་མཁས་པ་དང་། ཐམས་ཅད་དུ་དངོས་གྲུབ་ཐོབ་པར་འགྱུར་རོ། །དཀྱིལ་འཁོར་མཐོང་བ་དང་། འཇུག་པ་ལ་དགའ་བར་འགྱུར། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་ཀྱང་དགྱེས་པ་དང་བཅས་པས་བྱིན་གྱིས་རློབ་པར་འགྱུར་རོ། །སངས་རྒྱས་རྣམས་དང་། འཇིག་རྟེན་ལས་འདས་པ་དང་། དེ་བཞིན་གཤེགས་པས་དབུགས་འབྱིན་པར་འགྱུར། སངས་རྒྱས་ཐམས་ཅད་ཀྱི་ཐུགས་ལས་སྐྱེས་པའི་སྲས་ཇི་ལྟ་བ་བཞིན་ནོ། །འདི་ནི་དེ་རྣམས་ཀྱི་མངལ་གྱི་གནས་སུ་སྐྱེ་བའི་ཐ་མ་ཡིན་ནོ། །རྟག་ཏུ་སྐྱེ་བའི་སྐྱེ་བ་དྲན་པར་འགྱུར་ཏེ། འདི་ལ་ཐེ་ཙོམ་མི་བྱའོ། །སངས་རྒྱས་ཀྱི་བྱང་ཆུབ་ཏུ་འགྲོ་བ་དང་། རྟག་ཏུ་རྒྱལ་བ་རྣམས་ཀྱི་དེ་ཁོ་ན་ཉིད་མཐོང་བ་དང་། རྟག་ཏུ་སངས་རྒྱས་ཐམས་ཅད་ལ་མངོན་སུམ་དུ་ཆོས་ཉན་པར་ཐེ་ཙོམ་མེད་དོ། །འདི་ནི་སྐྱེ་བའི་ཐ་མ་ཡིན་ཏེ། ཇི་སྲིད་དུ་སངས་རྒྱས་ཀྱི་བྱང་ཆུབ་ཏུ་རྫོགས་པར་སངས་རྒྱས་པར་འགྱུར་རོ། །དགོས་པ་གཞན་རྣམ་པ་སྣ་ཚོགས་པ་དང་། ཁྲོ་བོ་ལྕགས་ཀྱུའི་ལས་བརྒྱ་ཕྲག་སྟོང་རྣམས་རང་གི་འདོད་པའི་བློས་བྱའོ། །ཐམས་ཅད་དུ་ལན་ཅིག་བཟླས་བརྗོད་བྱས་ལ། ཐམས་ཅད་དུ་ལས་ཐམས་ཅད་བྱའོ། །བཀླགས་པས་འགྲུབ་པའི་ཆོ་གའོ།། །།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས། བཅོམ་ལྡན་འདས་ཀྱི་ཞལ་དུ་བལྟས་ཏེ། བཞིན་འཛུམ་པས་ཁྲོ་བོ་ཆེན་པོ་ལྕགས་ཀྱུའི་གཟུངས་ཀྱི་ཀུན་ཏུ་སྣང་བཞིན་པའི་འོད་ཟེར་སྣ་ཚོགས་འབར་བའི་སྙིང་པོ་ལུས་ལས་ཕྱུང་ངོ་། །གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀུན་ཏུ་སྣང་བར་བྱས་སོ། །འོད་ཟེར་གྱི་སྣང་བ་གང་གིས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་རིན་པོ་ཆེ་སྣ་བདུན་གྱི་ཆར་འབབ་པའི་སྙིང་པོ་རབ་ཏུ་འབེབས་པར་འདོད་པའི་དོན་དང་། ལྷའི་མེ་ཏོག་སྣ་ཚོགས་ཀྱི་ཆར་འབེབས་པའི་དོན་དང་། ལྷའི་དྲི་དང་མཐུན་པར་གསལ་བའི་དྲི་དང་རྗེས་སུ་མཐུན་པའི་དྲི་རྣམ་པར་བཀྲ་བའི་ཆར་རྣམས་ཀྱིས་བཅོམ་ལྡན་འདས་དང་། འཕགས་པ་སྤྱན་རས་གཟིགས་
དབང་ཕྱུག་ལ་ཕབ་བོ། །རབ་ཏུ་དགྱེས་པའི་ཐུགས་ཀྱིས་ལྷའི་ཆུ་གསལ་ཞིང་རྒྱ་ཆེ་བ། དྲི་འཕྲོ་བས་རྣམ་པར་མཛེས་པའི་དཔྲལ་བའི་ཆུ་མུ་ཏིག་དང་མཉམ་ཞིང་མཚུངས་པ། ཛ་ཏིའི་འབྲས་བུ་དང་འདྲ་བར་རྣམ་པར་མཛེས་པའི་དཔྲལ་བའི་ལྷའི་ཆུས་ཡོངས་སུ་དབང་བསྐུར་ཏེ། ཐིགས་པ་ནམ་མཁའ་དང་མཉམ་པ་བཞུ་བའི་མིག་འབྲས་ལས་ལྷུང་བའི་ཆུ་སྐར་མ་ལས་རབ་ཏུ་ལྷུང་བའི་གོས། དེ་ལྟ་བུའི་དཔྲལ་བར་ཐིག་ལེ་འབར་བ་ཉི་མ་དང་། སྨིག་རྒྱུ་རྣམ་པར་མཛེས་པའི་འོད་ཟེར་ས་ལ་ལྷུང་སྟེ། བཅོམ་ལྡན་འདས་ཀྱི་སྤྱན་སྔར་ཞབས་ཀྱི་དྲུང་དུ་ལྷུང་ངོ་། །པདྨའི་འདབ་མ་བརྒྱ་སྟོང་ཕྲག་ཁ་བྱེ་བ་ལྟར་རབ་ཏུ་འཛུམ་པས་རྣམ་པར་མཛེས་པ། པདྨའི་ཟེ་འབྲུ་ལྟར་མཉེན་པ་བྱུང་བར་གྱུར་ཏོ། །བཻ་ཌཱུཪྱའི་སྡོང་བུ་ཉི་མ་བརྒྱ་སྟོང་ཕྲག་པས་ལྷག་པའི་མཐུ་སྟོབས་དང་ལྡན་པའི་འོད་ཟེར་སྣང་བས་འབར་བཞིན་པ། བཅོམ་ལྡན་འདས་ལ་མི་གང་གི་ཚད་ལྟ་བུར་གནས་པར་གྱུར་ཏོ། །དེ་ནས་རིག་པ་འཛིན་པའི་དབང་པོ་ཆེན་པོ་རྡོ་རྗེ་འཆང་གིས། ཆུའི་ཐིགས་པ་འདབ་མ་མཉམ་པ། བཻ་ཌཱུཪྱ་མཆོག་ཏུ་མཛེས་ཤིང་འབར་བ་པདྨ་ཁ་བྱེ་བ་དེ་མཐོང་ནས། ཐུགས་ངོ་མཚར་དང་། ཡ་མཚན་སྐྱེས་ཏེ། བཅོམ་ལྡན་འདས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གི་ཞབས་གཉིས་ལ་ཕྱག་འཚལ་ཏེ། འདི་སྐད་ཅེས་གསོལ་ཏོ། །སེམས་དཔའ་ཆེན་པོ་ཤིན་ཏུ་ངོ་མཚར་བ་མཐོང་ལགས་སོ། །རྨད་དུ་བྱུང་བའི་ཆོ་འཕྲུལ་ཆེན་པོ་མཐོང་ལགས་སོ། །སེམས་དཔའ་ཆེན་པོ་བདག་གིས། ལྟད་མོའི་མཆོག་མཐོང་ལགས་སོ། །སེམས་དཔའ་དག་པ་ཆེན་པོ། ཁྱོད་ཀྱིས་བདག་གི་ལྟད་མོའི་ཐེ་ཙོམ་མེད་པར་མཛོད་ཅིག་ཅེས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །ལག་ན་རྡོ་རྗེ། བདག་ལ་དོན་ཡོད་པ་པདྨ་དྲི་མ་མེད་པ་ཆུ་སྐྱེས་ཀྱི་ཞབས་ཀྱི་ལྕགས་ཀྱུ་ཞེས་བྱ་བ། དོན་ཡོད་ཞགས་པའི་སྙིང་པོ། རིག་སྔགས་ཀྱི་རྒྱལ་པོའི་དཀྱིལ་འཁོར་ཆེན་པོ་དང་། ཕྱག་རྒྱ་དང་། ལྷ་རྣམས་ཡོད་དེ། དེ་བདག་གིས་
བཅོམ་ལྡན་འདས་ཀྱི་སྤྱན་སྔར་འཁོར་ཆེན་པོའི་དབུས་སུ། དེ་བཞིན་གཤེགས་པའི་སྤྱན་སྔར་ཡོངས་སུ་བསྒྲག་པར་བགྱིའོ། །དེའི་མཐུ་དང་། རིག་སྔགས་ཀྱི་རྒྱལ་པོའི་མཐུ་སྟོབས་ཀྱི་རྫུ་འཕྲུལ་གྱི་ཆོ་འཕྲུལ་གྱི་རྣམ་པར་འཕྲུལ་པ་འདི་མཐོང་ངོ་། །དེའི་མཐུས་པདྨ་འདི་བྱུང་ངོ་། །རིག་སྔགས་ཀྱི་རྒྱལ་པོ་འདི་བདག་གི་དཔྲལ་བ་ནས་ཕྱུང་བས་ཆོ་འཕྲུལ་གྱི་རྣམ་པར་འཕྲུལ་པ་རྒྱ་ཆེ་ཞིང་ཆེ་བ་དང་ཡང་དག་པར་ལྡན་པར་གྱུར་ཏོ། །དེ་ནས་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གི་ཞབས་གཉིས་ལ་མགོ་བོས་ཕྱག་བྱས་ནས། ལན་གསུམ་བསྐོར་བ་བྱས་ཏེ། མཆོད་པ་བྱས་ནས་སོང་ངོ་། །བཅོམ་ལྡན་འདས་ག་ལ་བ་དེ་ལོགས་སུ་སོང་ནས། བཅོམ་ལྡན་འདས་ཀྱི་སྤྱན་སྔར་འདུག་སྟེ། བྱིས་པའི་ཆ་བྱད་བཟུང་ནས། བཅོམ་ལྡན་འདས་ལ་བསིལ་ཡབ་གཡོབ་པར་བྱེད་བཞིན་དུ་འདུག་གོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །སེམས་དཔའ་ཆེན་པོ་དོན་ཡོད་པ་པདྨ་དྲི་མ་མེད་པ་ཆུ་སྐྱེས་ཀྱི་ཞགས་པའི་སྙིང་པོ་ཞེས་བྱ་བ། དོན་ཡོད་པའི་ཞགས་པའི་སྙིང་པོ། རིག་སྔགས་ཀྱི་རྒྱལ་པོའི་དཀྱིལ་འཁོར་ཆེན་པོ་དང་། ཕྱག་རྒྱ་དང་། ལྷ་རྣམས་སྨྲོས་ཤིག །གང་གིས་སྨྲས་པ་ཙམ་གྱིས། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དམ་ཚིག་གསང་བའི་དཀྱིལ་འཁོར་རིམ་པར་ཕྱེ་བ་དང་། ཕྱག་རྒྱ་དང་། གསང་སྔགས་འདི་རྣམ་པར་དབྱེ་བ་བྱས་པར་འགྱུར་རོ། །སྒྲིབ་པ་མེད་པར་དཀྱིལ་འཁོར་མཐོང་བ་ཀུན་ཏུ་གནས་པར་བྱེད་དོ། །ཆོ་ག་ཞིབ་མོ་ཐམས་ཅད་དང་། གསང་སྔགས་དང་། དམ་ཚིག་དང་། ཕྱག་རྒྱ་རྣམས་རྗེས་སུ་མཐུན་པར་ཕྱོགས་ཏེ་གནས་པར་བྱེད་དོ། །དཀྱིལ་འཁོར་གྱི་དམ་ཚིག་གི་དེ་ཁོ་ན་ཉིད་དང་། རིག་སྔགས་ཀྱི་རྒྱལ་པོའི་ལྷ་ཐམས་ཅད་མདུན་ན་ཉེ་བར་གནས་པར་བྱེད་དོ། །སྒྲུབ་པའི་དེ་ཁོ་ན་ཉིད་ཀྱི་དངོས་གྲུབ་མཐོང་བར་འགྱུར་རོ། །རིག་སྔགས་འཆང་ཕྱིས་ཀྱང་རྣམ་པ་གཞན་དུ་མི་འགྱུར་རོ། །
ལས་ཐམས་ཅད་སྒྲུབ་པའི་ཆོ་ག་རྣམས་ལ་ལེགས་པར་སྒྲུབ་པའི་ཆོ་གར་ཡང་འགྱུར་རོ། །རྟག་ཏུ་རིག་སྔགས་འཆང་གི་རྗེས་སུ་འབྲང་ཞིང་། ཕྱི་བཞིན་ཕྱི་བཞིན་ལྷན་ཅིག་རྗེས་སུ་འབྲང་བར་འགྱུར་རོ་ཞེས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས། བཅོམ་ལྡན་འདས་ཀྱིས་གནང་བར་རིག་ནས། སེམས་ཅན་ཐམས་ཅད་ལ་རྗེས་སུ་བརྩེ་བའི་དོན་དུ། རིག་སྔགས་འཆང་ཐམས་ཅད་ཀྱི་མཆོག་གི་སྒྲུབ་པ་བཀླགས་པས་གྲུབ་པ་བཅོམ་ལྡན་འདས་ཀྱི་སྤྱན་སྔར་འཁོར་ཆེན་པོའི་དབུས་སུ། བཞིན་འཛུམ་ཞིང་མིག་མི་འཛུམས་པས་རིག་སྔགས་ཀྱི་རྒྱལ་པོ་འདི་སྨྲས་སོ། །དུས་གསུམ་དུ་གཤེགས་ཤིང་བཞུགས་པའི་སངས་རྒྱས་དང་། བྱང་ཆུབ་སེམས་དཔའ་རབ་འབྱམ་ཐམས་ཅད་དང་། དེ་བཞིན་གཤེགས་པའི་གསང་བའི་དཀྱིལ་འཁོར་དང་། ཕྱག་རྒྱ་དང་། གསང་སྔགས་རབ་འབྱམ་རྒྱ་མཚོ་རྣམས་ལ་ཕྱག་འཚལ་ལོ། །འཕགས་པ་རྡོ་རྗེ་འཛིན་པ་རིགས་ཐམས་ཅད་ཀྱི་གསང་བ་དང་། རིག་སྔགས་འཆང་གི་དབང་པོར་བཞུགས་པ་རྣམས་ལ་ཕྱག་འཚལ་ལོ། །འདས་པ་དང་། མ་བྱོན་པ་དང་། ད་ལྟར་བྱུང་བའི་འཕགས་པ་ཉན་ཐོས་ཀྱི་དགེ་འདུན་རྣམས་དང་། རང་སངས་རྒྱས་ཐམས་ཅད་ལ་ཕྱག་འཚལ་ལོ། །དཀྱིལ་འཁོར་གྱི་གསང་བ་ཐམས་ཅད་དང་། རིག་སྔགས་ཀྱི་རྒྱལ་པོ་ཆེན་པོའི་སྒྲུབ་པ་གྲུབ་པ་རྣམས་ལ་ཕྱག་འཚལ་ལོ། །དཀོན་མཆོག་གསུམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ཅན། རིག་སྔགས་ཐམས་ཅད་ཀྱི་དཀྱིལ་འཁོར་གྱི་རྒྱལ་པོའི་བདག་ཉིད་ཆེན་པོའི་རྣམ་པར་འཕྲུལ་པ་གྲུབ་པ་རྣམས་དང་ཕྱག་རྒྱ་ཐམས་ཅད་ལ་ཕྱག་འཚལ་ལོ། །ཏདྱ་ཐཱ། ཨོྃ་བི་མ་ལེ། བི་མ་ལ་གརྦྷེ། བི་མ་ལ་ཨམྦུ་ཛ་པདྨེ་སཱུཪྱ་བརྩ་སེ། ས་ཧ་སྲ་རསྨི་ཀི་ར་ཎེ་མ་ཧཱ་ར་སྨི་ཛྭཱ་ལ་ཨ་བ་བྷཱ་ཥི་ཏེ། ཙ་ར་ཙ་ར། ཙ་ར་ཙ་ར། སཉྩ་ར་པདྨོ་ད་རི་པདྨ་གརྦྷེ། པདྨ་བྷུ་ཛེ། སུ་བི་མ་ལ་ཨམྦུ་ཛ་བི་མ་ལེ་མ་ཎི་ཀ་ཎ་ཀ་བཛྲ་བེེ་ཌཱུཪྱ་ཨིནྡྲ་ནཱི་ལ་མ་ར་ཀ་ཏ། པདྨ་རཱ་ག་བི་བི་དྷ་མ་ཧཱ་མ་ཎི་རཏྣཱ་ལྃ་ཀྲྀ་ཏ་ཤ་རཱི་རེ། དྷ་ར་དྷ་ར། མ་ཧཱ་པདྨ་དྷ་ར། པ་ར་པ་ར་པ་
ར་ཤུ་པཱ་ཤེ་དྷ་ར། ས་ར་ས་ར་ས་མནྟ་བེེ་རོ་ཙ་ན། སརྦ་ཏ་ཐཱ་ག་ཏ་གུ་ཧྱ་ཨདྷིཥྛི་ཏེ། ཀུ་ལ་ས་མ་ཡ་པ་རི་པཱུ་ར་ཎི། བ་ར་བ་ར། བཛྲ་ཛྭཱ་ལ་མཱ་ལཱ་གརྦྷེ། བཛྲེ་བཛྲེ་བཛྲ་ཨ་དྷིཥྛི་ཏ་པདྨེ་ཧཱུྃ་ཧཱུྃ། མ་ཎི་མ་ཎི་མ་ཧཱ་མ་ཎི་ཙིནྟཱ་མ་ཎི་པཱ་ཤ་དྷ་ར། ཧུ་རུ་ཧུ་རུ་པདྨ་པདྨ་གོོ་རེ་པདྨ་པཱ་ཎི་བར་དེ། ཨ་མོ་གྷ་པདྨེ། ཨོྃ་པདྨི་ནི་པདྨ་མ་ཎི་བཛྲ་དྷ་རཱ། སརྦ་ཏ་ཐཱ་ག་ཏ་ཀུ་ལ་སཱ་ནཱ་མྱ་ས་མ་ཡ་ཨ་དྷིཥྛི་ཏེ། མ་ཧཱ་བི་པུ་ལ་བྷུ་ཛེ། བྷ་ར་བྷ་ར། སམྦྷ་ར། བྷུ་རུ་བྷུ་རུ་བྷུ་རི་ཎི། བྷི་རི་བྷི་རི། ས་མནྟ་ཨ་བ་ལོ་ཀི་ཏ་བཱིཪྱ་རཱ་ཛེ་པྲ་ས་ར་པྲ་ས་ར་སནྟ་བི་མ་ལེ། སརྦ་བིདྱཱ་མཎྜ་ལ་དེ་བ་ཏཱ་ན་མ་སྐྲྀ་ཏེ། ཏ་ར་ཏ་ར། ཏཱ་ར་ཡ་ཏཱ་ར་ཡ། ས་མནྟ་པ་རི་པཱུ་ར་ཎི་སརྦ་བོ་དྷི་སཏྭ་ཨ་བྷི་ཥེ་ཙ་ནི་སརྦ་ཏ་ཐཱ་ག་ཏ་ཨ་མོ་གྷ་ཨ་བྷི་ཥིཀྟ་ཨ་བྷི་ཥིཉྩ་ཡ་ས་མཾ་སརྦ་བིདྱཱ་མཎྜ་ལ་ཀུ་ལ། ས་མ་ཡ་ཨ་བྷི་ཥེ་ཀེེཿསརྦ་ཏ་ཐཱ་ག་ཏ་པཱ་ཎི་བར་དེ། པདྨ་གོོ་རེ་པདྨ་པྲ་བྷེ། པདྨ་བི་ཀ་ཙམྦུ་ཛ་གརྦྷེ། ཧཱུྃ་ཧཱུྃ། བཛྲེ་བཛྲེ། བཛྲེ་པདྨེ་ཏ་ཐཱ་ག་ཏ་ཀུ་ལ་ཨ་དྷིཥྛི་ཏེ། ཨ་མོ་གྷ་བ་ར་དེ། སརྦཱ་སཱ་པ་རི་པཱུ་ར་ཎི་སརྦ་པཱ་པ་དུཿཁ་པྲ་ཤ་མ་ནི། ཨ་མོ་གྷ་ཧྲྀ་ད་ཡ་སིདྡྷི་སཱ་དྷ་ཡ་བི་མ་ལེ་ཧཱུྃ་ཕཊ། ཨོྃབ་ར་དེ་པདྨ་བྷུ་ཛེ་ན་མ་སྟུ་ཏེ་པདྨ་སུ་ཏེ་སྭཱ་ཧཱ། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས། དོན་ཡོད་པ་དྲི་མ་མེད་པ་པདྨོའི་ཆུ་སྐྱེས་ཀྱི་པདྨའི་ལྕགས་ཀྱུ་དོན་ཡོད་ཞགས་པའི་སྙིང་པོ་རིགས་ཀྱི་རྒྱལ་པོ་གཟུངས་ཆེན་པོ་ཀུན་ནས་རྣམ་པར་སྣང་བར་བྱེད་པ། དེ་བཞིན་གཤེགས་པ་ཐམས་ཅད་ཀྱི་ཐུན་མོང་གི་རིགས་ཀྱི་དམ་ཚིག་གི་ཕྱག་རྒྱའི་སྙིང་པོ་འདི་སྨྲས་པའི་དེ་མ་ཐག་གི་འོག་ཏུ་པདྨ་ཟེ་འབྲུ་དང་བཅས་པའི་གེ་སར་གསལ་བར་རྣམ་པར་བྱེ་སྟེ། དཔེར་ན་གྲོང་ཁྱེར་གྱི་ཕྱོགས་གཅིག་གི་སྒོ་བྱ་ནས་རྒྱལ་མོ་བྱུང་བ་བཞིན་དུ། ལྷའི་གཟུགས་བལྟ་ན་སྡུག་པ་འོད་མཐའ་ཡས་པ་ཕྱག་བཞི་པ་རྒྱན་གྱིས་རྣམ་པར་བརྒྱན་པ། ཕྱག་ན་པདྨ། དོན་ཡོད་ཞགས་པའི་ངོ་བོའི་ཞགས་པའི་ཕྱག་དང་། ཡིད་བཞིན་གྱི་ནོར་བུ་རིན་པོ་ཆེའི་རྒྱལ་མཚན་ཆེན་པོའི་ཕྱག་དང་། མདུང་རྩེ་གསུམ་པའི་ཕྱག །སྤྱན་གསུམ་པ། ཞལ་གསུམ་པ་ཟླ་བའི་ཅོད་པན་འཆང་བ་ཞི་བ། ཞི་ཞིང་འཛུམ་པའི་ཞལ། སྐུ་ལ་འོད་ཟེར་སྣ་ཚོགས་འབར་བའི་སྙིང་པོ། པདྨ་དང་། སེང་གེའི་གདན་ལ་བཞུགས་
པ། པདྨ་ཁ་བྱེ་བའི་སྙིང་པོར་བཅོམ་ལྡན་འདས་ཀྱི་སྤྱན་སྔར་འཁོད་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། མགོ་བོས་ཕྱག་འཚལ་ཞིང་ཐལ་མོ་སྦྱར་བ་བཏུད་དེ། བཅོམ་ལྡན་འདས་ཀྱི་སྤྱན་སྔར་འདུག་སྟེ། མིག་མི་འཛུམས་པར་བལྟ་ཞིང་འཁོད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས། དོན་ཡོད་པ་པདྨ་དྲི་མ་མེད་པ་ཆུ་སྐྱེས་ཀྱི་ཞགས་པའི་ལྕགས་ཀྱུ་རིག་སྔགས་ཀྱི་རྒྱལ་པོ་བུད་མེད་ཀྱི་གཟུགས་འཛིན་པ་ལ་འདི་སྐད་ཅེས་བཀའ་སྩལ་ཏོ། །སེམས་ཅན་དག་པ་ཆེན་པོ་ཁྱོད་ཅིའི་ཕྱིར་མིག་མི་འཛུམས་པར་བལྟ། མཆོག་ཅི་དོན་དུ་གཉེར་བཞིན་དུ་འཁོད་ཅེས་སོ། །རིག་སྔགས་ཀྱི་རྒྱལ་མོས་གསོལ་པ། བཅོམ་ལྡན་འདས་བདག་དེ་བཞིན་གཤེགས་པ་ཐམས་ཅད་ཀྱི་གསང་བའི་དཀྱིལ་འཁོར་རྣམས་ཀྱི་སྤྱིའི་ཕྱག་རྒྱ་དང་། སྔགས་དང་། དམ་ཚིག་གསང་བའི་རྗེས་སུ་འཇུག་པར་བགྱིའོ། །བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །རིག་སྔགས་ཀྱི་རྒྱལ་མོ་ཉོན་ཅིག །ཁྱོད་དེ་བཞིན་གཤེགས་པ་ཐམས་ཅད་ཀྱིས་ཐམས་ཅད་དུ། དམ་ཚིག་གི་དཀྱིལ་འཁོར་དང་། ཕྱག་རྒྱའི་གསང་བར་ལུང་བསྟན་ཅིང་། ཁྱོད་དེ་བཞིན་གཤེགས་པ་རྣམ་པར་སྣང་མཛད་ཀྱིས་དཀྱིལ་འཁོར་ཐམས་ཅད་ཀྱི་མཆོག་ཏུ་ལུང་བསྟན་ནོ། །ངས་ཀྱང་དེ་བཞིན་གཤེགས་པ་ཐམས་ཅད་ཀྱི་གསང་བ་དང་། དཀྱིལ་འཁོར་དང་ཕྱག་རྒྱའི་དམ་ཚིག་ཐམས་ཅད་ཀྱི་མཆོག་ཏུ་འགྱུར་བར་ལུང་བསྟན་ནོ། །ཏུཎྜཱ་དང་། ཀར་ཤམ་དང་། སྒྲོལ་མ་དང་། ཁྲོ་གཉེར་ཅན་དང་། པདྨ་རིགས་མཛེས་མ་དང་། ལྷ་མོ་ཆེན་མོ་ཀི་ལཱི་ཀི་ལཱི་དང་། རྡོ་རྗེ་ཕོ་ཉ་མོ་དང་། དྲི་མེད་བྱེད་མ་དང་། པདྨའི་སྤྱན་མ་དང་། རྡོ་རྗེ་ལུ་གུ་རྒྱུད་མ་དང་། རྡོ་རྗེ་ཁྲོ་གཉེར་ཅན་དང་། ལྷ་མོ་པདྨ་རབ་སྣང་མ་དང་། པདྨ་སྤྱོད་བྱེད་མ་དང་། རིག་སྔགས་ཀྱི་རྒྱལ་མོ་ཆེན་མོ་དོན་ཡོད་པའི་ཕྱག་དང་། ལོངས་སྤྱོད་ལྡན་མ་དང་། དཔལ་མོ་དང་། འཇིགས་མ་དང་། དཔེ་མེད་མ་དང་། དབྱངས་ཅན་མ་དང་། རལ་གཅིག་མ་སྤྱན་སྟོང་པ། ཕྱག་སྟོང་པ། དབུ་སྟོང་པ། དོན་ཡོད་པའི་པདྨ་དང་། རིན་ཆེན་ལྷ་མོ་དང་། རིན་ཆེན་འབྱུང་གནས་
དང་། འཇིག་རྟེན་དབང་ཕྱུག་ཉིད་དང་། རིག་པའི་དབང་ཕྱུག་ཉིད་དང་། ལྷ་མོ་ཆེན་མོ་ཕྱག་རྒྱའི་དབང་ཕྱུག་དང་། རིགས་ཀྱི་དཀྱིལ་འཁོར་གྱི་ལྷ་མོ་དང་། ཧུ་ཧྭ་བཟླས་པའི་སྦྱིན་སྲེག་དང་། ཞི་བའི་ལས་དང་། ལྷ་མོ་རིགས་མཛེས་མ་དང་། རིག་སྔགས་འཆང་ཆེན་མོ་རྡོ་རྗེ་མཛེས་མ་ཉིད་དང་། ཕྱག་ན་འཁོར་ལོ་གྲུབ་པ་དང་། དེ་བཞིན་དུ་རལ་གྲི་བཟང་པོའི་རིག་པ་འཛིན་པ་དང་། ཁྲོ་བོ་ཉིད་དང་། ཁྲོ་བོའི་རྒྱལ་པོ་དང་། དུས་ཀྱི་མཚན་མོ་དང་། ཞལ་རྣམ་པར་འགྱུར་མ་དང་། མཆེ་བ་གཅིགས་མ་དང་། སེར་སྐྱ་མ་ཉིད་དང་། རང་གསལ་མ་དང་། ཕྱག་ན་རིན་ཆེན་མ་ཉིད་དང་། སའི་དཀྱིལ་འཁོར་གྱི་ལྷ་མོ་དང་། དེ་བཞིན་དུ་རྫས་ཡོངས་སུ་འཛིན་པའི་ལྷ་མོ་དང་། མཆོད་ཡོན་དང་། ཞབས་བསིལ་དང་། གཏོར་མ་ཉིད་ཀྱི་ལྷ་དང་། ཨ་གྲི་ཎི་དང་། མེ་ཏོག་དང་། བདུག་པ་དང་། ཕྲེང་བ་དང་། བྱུག་པའི་ལྷ་དང་། ཐམས་ཅད་དུ་རྗེས་སུ་སོང་བའི་ལྷ་མོ་ཁྱོད་དང་། གསང་སྔགས་ཐམས་ཅད་ལ་དབང་སྒྱུར་མ་དང་། བུད་མེད་ཀྱི་གཟུགས་འཛིན་པའི་རིག་སྔགས་ཀྱི་རྒྱལ་པོའི་མཆོག་སྒྲོལ་བར་བྱེད་པ་དང་། བདག་གི་གསང་སྔགས་ཐམས་ཅད་འཛིན་པའི་རིག་སྔགས་ཀྱི་རྒྱལ་མོའི་མཆོག་མ་དང་། རིག་སྔགས་འཆང་གི་དབང་མོ་དང་། རིགས་ཀྱི་གསང་སྔགས་དང་། དེ་བཞིན་གཤེགས་པ་ཐམས་ཅད་ཀྱིས་རིག་སྔགས་ཀྱི་རྒྱལ་མོ་ཆེན་པོ་ངེས་པར་སྦྱིན་པ་འཇིག་རྟེན་དབང་ཕྱུག་སྐྱེས་པ་ཉིད་དུ་དཔྲལ་བའི་སྨིན་མའི་བར་དུ་ལྷའི་ཆུའི་དངུལ་ལས་ངེས་པར་སྐྱེས་ཤིང་བྱུང་བ། སྐར་མའི་རྣམ་པ་དང་མཚུངས་པ། སྣ་ཚོགས་པའི་གཟུགས་ཅན་དུ་གྱུར་པའོ། །ཞེས་ལས་སྣ་ཚོགས་དང་། དབྱངས་ཅན་གང་ཡིན་པ་འདི་འཆང་བར་བྱེད་དོ། །ཞེས་དེ་བཞིན་གཤེགས་པས་ལུང་བསྟན་པ་དང་དུ་བླངས་ནས་གསུངས་སོ། །རིག་སྔགས་ཐམས་ཅད་ཀྱི་དངོས་གྲུབ་མཉམ་པར་སྐྱོབ་པ་ཐོབ་པ་དང་། དེ་བཞིན་དུ་ཆོ་ག་ཞིབ་མོའི་སྒྲུབ་པ་དང་། ཕྱག་རྒྱ་དང་། གསང་སྔགས་ཐམས་ཅད་ཀྱི་དངོས་གྲུབ་རྣམ་པ་སྣ་ཚོགས་པ་དང་། དོན་ཡོད་པའི་དངོས་གྲུབ་ཀྱང་ཐོབ་པར་བྱེད་དོ། །དོན་ཡོད་པའི་འབྲས་བུ་མཐོང་བ་དང་། བཀླགས་པས་གྲུབ་པའི་རྒྱུ་མཚན་གཞན་དང་། ཐམས་ཅད་དུ་རིགས་སྤྱིའི་དཀྱིལ་འཁོར་དང་། ཕྱག་
རྒྱའི་དངོས་གྲུབ་ཀྱི་ཕྱིར་དང་། སྤྱིའི་དཀྱིལ་འཁོར་དང་ཕྱག་རྒྱའི་དམ་ཚིག་ཉིད་ཀྱང་འདི་དྲན་པ་ཙམ་གྱིས་ཐམས་ཅད་ཐོབ་པར་བྱེད་དོ། །དཀྱིལ་འཁོར་དང་། ཕྱག་རྒྱ་དང་། གསང་སྔགས་དང་། ལྷ་དེ་དག་ཐམས་ཅད་ཀྱང་དྲན་པ་ཙམ་གྱིས་རྗེས་སུ་འབྲང་བར་འགྱུར་བར་ཐེ་ཙོམ་མེད་དོ། །རིག་སྔགས་ཀྱི་རྒྱལ་པོའི་དཀྱིལ་འཁོར་དང་ལྷ་རྣམས་དམ་ཚིག་ལ་ཀུན་ཏུ་གནས་པར་བྱེད་དོ། །དེ་ལྟ་བས་ན། འབད་པ་ཐམས་ཅད་ཀྱིས་ཟུང་ཅིག །དེ་བཞིན་དུ་ཐུབ་པ་རྣམ་པར་སྣང་མཛད་དང་། ཤཱཀྱའི་རྒྱལ་པོས་རིག་སྔགས་ཀྱི་རྒྱལ་པོར་ལུང་བསྟན་པ། དེ་བཞིན་གཤེགས་པ་ཐམས་ཅད་ཀྱིས་མིང་ཀུན་ཏུ་གཟིགས་ཤིང་ཐམས་ཅད་དུ་རྗེས་སུ་འགྲོ་བ་སྟེ། དེའི་ཕྱིར་སྤྱན་རས་གཟིགས་པདྨ་ཞེས་བྱ་བ་རིག་སྔགས་ཀྱི་རྒྱལ་པོ་བླ་ན་མེད་པ། རྡོ་རྗེའི་དངོས་གྲུབ་དངོས་གྲུབ་ཆེན་པོ། པདྨའི་རིགས་ཀྱི་དངོས་གྲུབ་བླ་ན་མེད་པ། དེ་བཞིན་གཤེགས་པའི་རིགས་ཀྱི་དངོས་གྲུབ་སྒྲུབ་པ་གྲུབ་པ། དཀྱིལ་འཁོར་ཆེན་པོའི་རིགས་དང་ནོར་བུ་ཆེན་པོའི་རིགས་ཀྱི་དམ་ཚིག་གི་དངོས་གྲུབ་སྒྲུབ་པ་གྲུབ་པ། དོན་ཡོད་པའི་སྙིང་པོའི་དཀྱིལ་འཁོར་ཐམས་ཅད་དུ་མཆོག་གི་དངོས་གྲུབ། མཆོག་གི་དང་པོ་རྡོ་རྗེའི་རིགས་སུ་བསྟན་པ། རྡོ་རྗེ་རྩེ་མོ་ཆེན་པོའི་ལྷ་དང་། དེ་བཞིན་དུ་རྡོ་རྗེ་ས་འོག་དངོས་གྲུབ་ཀྱི་ཕྱིར་རྡོ་རྗེ་ཕྲེང་བ་རིམ་པར་ཕྱེ་བའི་གྲངས་དང་རྡོ་རྗེ་མཆུའི་མཆོག་གི་དངོས་གྲུབ་རྣམས་ལ་སྤྱན་རས་གཟིགས་པདྨ་དང་། པདྨ་མཛེས་པ་དང་། དེ་བཞིན་དུའམ། མིང་སྨོས་པ་ཙམ་གྱི་མོད་ལ་རྗེས་སུ་འབྲང་ཞིང་འོང་བར་བྱེད་དོ། །དེ་བཞིན་དུ་རྡོ་རྗེ་དབང་པོ་དང་། རྡོ་རྗེ་འཛིན་པ་དང་། ལག་ན་རྡོ་རྗེ་དང་། དབང་ཕྱུག་ཆེན་པོ་རྣམས་རྟག་ཏུ་རྗེས་སུ་འབྲང་བར་འགྱུར་རོ། །དེ་ལྟ་བས་ན། རྟག་ཏུ་ཤེས་པས་རིག་སྔགས་སྨྲ་བ་དང་། མིང་གང་གི་མཆོག་འཛིན་པ་ལ། དེ་བཞིན་གཤེགས་པས་རྟག་ཏུ་རྣམ་པར་གཟིགས་པར་འགྱུར་རོ། །དེ་བཞིན་ཉིད་དུ་བྱང་ཆུབ་སེམས་དཔའ་ཐམས་ཅད་དང་། ཐུབ་པ་རྣམ་པར་སྣང་མཛད་ཀྱིས་རྟག་ཏུ་ལུང་སྟོན་པར་འགྱུར་བར་ཐེ་ཚོམ་མེད་དོ། །བཅོམ་ལྡན་འདས་ཀྱིས་རིག་སྔགས་ཀྱི་རྒྱལ་པོ་འདི་ལུང་བསྟན་མ་ཐག་ཏུ་ས་རྣམ་པར་འགྱུར་བ་དྲུག་ཏུ་གཡོས་
སོ། །གཡོས་རབ་ཏུ་གཡོས། འགུལ་རབ་ཏུ་འགུལ། ལྡེག་རབ་ཏུ་ལྡེག །འུར་འུར་རབ་ཏུ་འུར་འུར། ཆེམ་ཆེམ་རབ་ཏུ་ཆེམ་ཆེམ་མོ། །ལྷའི་མེ་ཏོག་གི་ཆར་བབ་སྟེ། འདི་ལྟ་སྟེ། ཟླ་བ་མདོག་མཛེས་དང་། དྲི་མེད་མདོག་མཛེས་དང་། མདོག་མཛེས་ཆེན་པོ་དང་། མནྡཱ་ར་བ་དང་། མནྡཱ་ར་བ་ཆེན་པོ་དང་། པདྨ་དང་། ཀུ་མུ་ད་དང་། པདྨ་དཀར་པོ་དང་། ཨུཏྤལ་སྔོན་པོ་དང་། ཨུཏྤ་ལ་དམར་པོ་དང་། མྱ་ངན་འཚང་དང་། སྐྱ་ནར་དང་། པུནྣཱ་ག་དང་། གནྡྷ་ག་པཱརྵི་ཀ་དང་། ཀོནྟ་དང་། ཨ་དྷི་མུཀྟ་ཀ་དང་། པ་ལཱ་ཤ་དང་། མཐོན་ཀ་དང་། མཐོན་ཀ་ཆེན་པོ་དང་། ཙམྤ་ཀ་དང་། སོོ་གནྡྷི་ཀ་དང་། སནྡྷ་བཱ་ར་ཎ་དང་། ནཱ་ག་པུཥྤ་དང་། སྣ་མ་དང་། ཡཱུ་ཐི་ཀ་དང་། ན་བ་མཱ་ལི་ཀ་དང་། ཏ་ར་ཎ་དང་། མ་རུ་བ་ཀ་དང་། ཀུ་བྱ་ཀའི་མེ་ཏོག་གི་ཆར་འབབ་པའི་དོན་དང་། ཚོན་རྩི་སྣ་ཚོགས་པས་བཙོས་པའི་ལྷའི་གོས་ཀྱི་ཆར་འབབ་པའི་དོན་དང་། རིན་པོ་ཆེ་སྣ་བདུན་གྱི་ལྷའི་རྒྱན་དང་། ལྷབ་ལྷུབ་དང་། རྒྱན་ཆའི་ཆར་འབབ་པའི་དོན་དང་། ལྷའི་གསེར་གྱི་མེ་ཏོག་གི་ཆར་འབབ་པའི་དོན་དང་། ལྷའི་དྲི་ཙནྡན་དང་། ཏ་མཱ་ལ་དང་། ག་པུར་དང་། གླ་རྩི་དང་། གུར་གུམ་དང་། ལྷའི་གོས་དང་། དྲི་བཟང་པོས་བསྒོས་པའི་ཕྱེ་མའི་ཆར་འབབ་པའི་དོན་དང་། ལྷའི་དྲི་ཆབ་ཀྱི་ཆར་འབབ་པའི་དོན་དང་། མ་དཀྲོལ་བར་ནམ་མཁའི་མཐིལ་དུ་རོལ་མོའི་སྒྲ་འབྱུང་བ་དང་། སུམ་ཅུ་རྩ་གཉིས་པའི་རིས་ཀྱི་ལྷའི་བུ་མེ་ཏོག་སྣ་ཚོགས་འཐོར་བར་བྱེད་པ་དང་། གོས་དང་། རིན་པོ་ཆེ་སྣ་ཚོགས་འཚེར་བར་བྱེད་པ་དང་སུམ་ཅུ་རྩ་གསུམ་པའི་རིས་ཀྱི་ལྷའི་མུ་ཏིག་གི་དོ་ཤལ་དང་། གདུ་བུ་དང་། དཔུང་རྒྱན་དང་། རྒྱན་ཟླ་གམ་ཅན་དང་། མུ་ཏིག་དམར་པོ་དང་། ཀ་ཤི་ཀའི་གོས་སྣ་ཚོགས་པ་འཐོར་བར་བྱེད་པར་གྱུར་ཏོ། །ལྷའི་དབང་པོ་བརྒྱ་བྱིན་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། གཤིན་རྗེ་དང་། ཆུ་ལྷ་དང་། གཞོན་ནུ་དང་། རྒྱལ་པོ་ཆེན་པོ་བཞི་དང་། དབང་ཕྱུག་ལ་སོགས་པ་ལྷའི་བུ་འབུམ་ཕྲག་དགུ་བཅུ་རྩ་དགུས་ལྷའི་གཞལ་ཡས་ཁང་རྣམ་པ་སྣ་ཚོགས་པ་དང་། ལྷའི་གོས་དང་མེ་ཏོག་དང་། དྲི་དང་། ཕྲེང་བ་
དང་། བྱུག་པ་རྣམས་དང་། རིན་པོ་ཆེ་སྣ་བདུན་ལས་བྱུང་བའི་གདུགས་སྣ་ཚོགས་པ་རྣམས་ནམ་མཁའི་མཐིལ་དུ་ཀུན་ཏུ་གཏོར་ནས་བཅོམ་ལྡན་འདས་ཤཱཀྱ་ཐུབ་པ་དང་། འཕགས་པ་སྤྱན་རས་གཟིགས་དབང་ཕྱུག་དང་། ཕྱག་ན་རྡོ་རྗེ་དང་། རིག་སྔགས་ཀྱི་རྒྱལ་པོའི་འཁོར་ལ་མཆོད་པའི་སྤྲིན་ཆེན་པོར་གྱུར་ཏེ་མཆོད་པ་ཆེན་པོ་བྱེད་པར་གྱུར་ཏོ། །རྫུ་འཕྲུལ་ཆེན་པོའི་ཆོ་འཕྲུལ་ཆེན་པོ་མཐོང་བར་གྱུར་ཏོ། །དངོས་གྲུབ་ཆེན་པོའི་མཚན་མ་བྱུང་བར་གྱུར་པ་རྣམས་ཡང་དག་པར་མཐོང་ངོ་། །ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ན། དེ་བཞིན་གཤེགས་པའི་འཁོར་གྱི་དཀྱིལ་འཁོར་ཐམས་ཅད་ཡང་དག་པར་མཐོང་བར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་གསང་བའི་དཀྱིལ་འཁོར་རྣམས་ཀུན་ཏུ་ཡང་དག་པར་བྱེའོ། །ལྷའི་གཞལ་ཡས་ཁང་སྣ་ཚོགས་པ་བྱུང་བར་གྱུར་པ་མཐོང་ངོ་། །དེ་ནས་ཡང་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས། བཅོམ་ལྡན་འདས་ག་ལ་བ་དེ་ལོགས་སུ་སོང་ནས་ལྷགས་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། ཞབས་གཉིས་ལ་མགོ་བོས་ཕྱག་འཚལ་ཏེ་རྡོ་རྗེ་གསོར་བཞིན་དུ། བཅོམ་ལྡན་འདས་ཀྱི་སྤྱན་སྔར་འཁོད་ནས་བཞིན་འཛུམ་པས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། རྫུ་འཕྲུལ་གྱི་རྣམ་པར་འཕྲུལ་པ་ཆེ་ཞིང་ཆེ་བ་ཡང་དག་པར་སྣང་བ་དང་། མཆོད་པའི་སྤྲིན་གྱི་ཆར་ཆེ་ཞིང་ཆེ་བ་རབ་ཏུ་འབབ་པ་དང་། བཅོམ་ལྡན་འདས་དངོས་གྲུབ་ཀྱི་མཚན་མ་ཆེ་ཞིང་ཆེ་བ་སྣང་བ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པའི་འཁོར་ཆེན་པོ་འདུས་པར་གྱུར་པའི་རིག་སྔགས་ཀྱི་རྒྱལ་པོ་སྐྱེས་པར་མཐོང་བར་སྣང་བ་དང་། ཆོ་འཕྲུལ་ཆེ་ཞིང་ཆེ་བ་སྣང་བ་དང་། རྫུ་འཕྲུལ་གྱི་རྣམ་པར་འཕྲུལ་བ་མཐོང་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གི་རིག་སྔགས་ཆེན་པོ་འབྱུང་བར་སྣང་བ་ནི། བཅོམ་ལྡན་འདས་རྒྱུ་ཅི་ལགས། རྐྱེན་ཅི་ལགས། འདི་ཅིའི་
མཐུས་སྔོན་གྱི་མཚན་མ་ཡང་དག་པར་སྣང་བ་ལགས། འདི་རྫུ་འཕྲུལ་གྱི་རྣམ་པར་འཕྲུལ་པ་གང་ཞིག་ཡང་དག་པར་སྣང་བ་ལགས། བཅོམ་ལྡན་འདས་བདག་གི་སེམས་ལ་ཐེ་ཙོམ་དེ་སྐྱེས་པར་གྱུར་པས། དེ་ངེས་པར་བསྟན་དུ་གསོལ། ཞུ་བ་ལུང་སྟོན་པར་འགྱུར་བ་གང་གིས། བདག་གི་དོགས་པ་རྣམ་པར་སེལ་བ་དང་། སོམ་ཉི་རྣམ་པར་སེལ་བར་བྱེད་པས་བཅོམ་ལྡན་འདས་ཀྱིས་བདག་ལ་སྐབས་དབྱེ་རུ་གསོལ། དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་ངེས་པར་བསྟན་པར་བྱའི་ཉོན་ཅིག །ལག་ན་རྡོ་རྗེ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གི་སྒྱུ་མ་ལྟ་བུའི་ཏིང་ངེ་འཛིན་གྱི་རྣམ་པར་འཕྲུལ་བའོ། །སྒྱུ་མ་ལྟ་བུའི་ཏིང་ངེ་འཛིན་དང་། རྡོ་རྗེ་ལྟ་བུའི་ཏིང་ངེ་འཛིན་དང་། དཔའ་བར་འགྲོ་བའི་ཏིང་ངེ་འཛིན་ལ་སོགས་པ་ཏིང་ངེ་འཛིན་གངྒཱའི་ཀླུང་གི་བྱེ་མ་སྙེད་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་དགུས་རྣམ་པར་འཕྲུལ་པའོ། །ལག་ན་རྡོ་རྗེ་སྤྱན་རས་གཟིགས་དབང་ཕྱུག་གི་མཐུས་རྫུ་འཕྲུལ་གྱི་ཆོ་འཕྲུལ་སྣང་བར་བྱེད་དོ། །དོན་ཡོད་པ་རྣམ་པར་འཕྲུལ་པ། ཀུན་ཏུ་སྣང་བའི་དཀྱིལ་འཁོར་ཆེན་པོ་དང་། ཕྱག་རྒྱ་དང་། ཆོ་ག་ཞིབ་མོ་དང་། གསང་སྔགས་དང་། གཟུངས་དང་། རིག་སྔགས་ཀྱི་རྒྱལ་པོའི་རྣམ་པར་འཕྲུལ་པ་དང་། རིག་སྔགས་ཀུན་ཏུ་སྣང་བ་དང་། རིག་སྔགས་ཀྱི་རྒྱལ་པོ་རྣམ་པར་སྣང་བར་བྱེད་དོ། །དེའི་མཐུས་སྣང་བ་འདི་དང་། རྫུ་འཕྲུལ་གྱི་རྣམ་པར་འཕྲུལ་པ་དང་། ཆོ་འཕྲུལ་འདི་སྣང་ངོ་། །ལག་ན་རྡོ་རྗེ་རིག་སྔགས་ཀྱི་རྒྱལ་པོ་འདི་མཐོང་བ་དང་། མིང་བཟུང་བ་ཙམ་གྱིས་ཀྱང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གངྒཱའི་ཀླུང་གི་བྱེ་མ་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་གཉིས་ཀྱི་རྡུལ་ཕྲ་རབ་དང་མཉམ་པ་མངོན་སུམ་དུ་མཐོང་བ་དང་། མཚན་གཟུང་བའི་དགེ་བའི་རྩ་བ་བསྐྱེད་པའི་བསོད་ནམས་ཀྱི་ཕུང་པོ་ཆེན་པོ་དང་ལྡན་པ་ཡོངས་སུ་འཛིན་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དམ་ཚིག་དང་། རིག་སྔགས་དང་། ཕྱག་རྒྱ་དང་། གསང་སྔགས་
རིམ་པར་ཕྱེ་བ་དང་། སྙིང་པོའི་མཐུ་རབ་ཏུ་འཇུག་པར་འགྱུར་རོ། །དམ་ཚིག་གི་དཀྱིལ་འཁོར་གསང་བར་རབ་ཏུ་ཞུགས་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་ཆོ་ག་ཞིབ་མོའི་རྗེས་སུ་འཇུག་པར་འགྱུར་རོ། །རིག་སྔགས་ཀྱི་རྒྱལ་པོ་འདི་ལན་ཅིག་བཟླས་པ་དེ་རྣམས་ཀྱང་། དེ་བཞིན་གཤེགས་པ་རྣམས་ཀྱི་དྲུང་དུ། འདས་པ་དང་། མ་འོངས་པ་དང་། ད་ལྟར་བྱུང་བའི་དུས་གསུམ་དུ་གཤེགས་པའི་སངས་རྒྱས་བཅོམ་ལྡན་འདས་རྣམས་ཀྱི་སྙིང་པོ་དང་། ཕྱག་རྒྱ་དང་། གསང་བའི་དཀྱིལ་འཁོར་གྱི་དམ་ཚིག་དང་། གསང་སྔགས་ཆེན་པོ་རིམ་པར་ཕྱེ་བའི་སྒྲུབ་པ་ལ་རྗེས་སུ་འཇུག་པར་འགྱུར་རོ། །དེ་ཅིའི་ཕྱིར་ཞེ་ན། ལག་ན་རྡོ་རྗེ་རིག་སྔགས་ཀྱི་རྒྱལ་པོ་འདི་ནི། རྫུ་འཕྲུལ་ཆེ་བའི་ཕྱིར་ཏེ། འདི་ལྟ་སྟེ། འདི་ནི་དེ་བཞིན་གཤེགས་པ་ཐམས་ཅད་ཀྱི་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་ཀྱི་དྲུང་དུ། སྙིང་པོ་དང་། ཕྱག་རྒྱ་རིམ་པར་ཕྱེ་བ་དང་། དཀྱིལ་འཁོར་གསང་བ་ལ་རབ་ཏུ་ཞུགས་ཤིང་དབང་བསྒྱུར་བའི་རྗེས་སུ་ཞུགས་པ་ནི་རིག་སྔགས་ཀྱི་རྒྱལ་པོའི་སྙིང་པོར་གྱུར་པ་གཅིག་པུའོ། །འདི་ལྟ་སྟེ། འོ་མ་དང་ཆུ་ཡང་དག་པར་འབྱུང་བ་བཞིན་ནོ། །སྙིང་པོ་གཅིག་པོ་འདི། རིགས་ཐམས་ཅད་ཀྱི་དཀྱིལ་འཁོར་དང་། ཕྱག་རྒྱ་རིམ་པར་ཕྱེ་བ་དང་། ཆོ་ག་ཞིབ་མོའི་རྗེས་སུ་ཞུགས་པའོ། །དེས་ན་ལག་ན་རྡོ་རྗེ་ཁྱོད་ཀྱིས་རིག་སྔགས་ཀྱི་རྒྱལ་པོ་འདི། ཀུན་ནས་རྗེས་སུ་འཇུག་པ་ཞེས་བྱའོ། །ལག་ན་རྡོ་རྗེ་རྒྱུ་དེས་ན། རིགས་ཀྱི་བུའམ། རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་རིག་སྔགས་ཀྱི་རྒྱལ་པོ་འདི། མིང་ལན་ཅིག་གཟུང་བ་ཙམ་གྱིས་དུས་གསུམ་དུ་གཤེགས་པའི་སངས་རྒྱས་བཅོམ་ལྡན་འདས་ཐམས་ཅད་ཀྱི་དྲུང་དུ། གསང་བ་ཐམས་ཅད་ཀྱི་སྙིང་པོ་དང་། གཟུངས་དང་། གསང་སྔགས་དང་། ཕྱག་རྒྱ་རིམ་པར་ཕྱེ་བ་དང་། ཆོ་ག་ཞིབ་མོ་རབ་ཏུ་སྟོན་པ་དང་། མཚན་གཟུང་བར་བྱས་པར་འགྱུར་རོ། །དུས་གསུམ་དུ་གཤེགས་པའི་དེ་བཞིན་གཤེགས་པ་དེ་རྣམས་ཀྱི་དྲུང་དུ། བསོད་ནམས་ཀྱི་ཕུང་པོ་ཆེན་པོ་
ཡོངས་སུ་གཟུང་བར་འགྱུར་རོ། །དགེ་བའི་རྩ་བ་ཆེན་པོ་དང་ལྡན་པར་འགྱུར་རོ། །དུས་གསུམ་དུ་གཤེགས་པའི་སངས་རྒྱས་བཅོམ་ལྡན་འདས་དེ་རྣམས་དང་། བྱང་ཆུབ་སེམས་དཔའ་ལེགས་སོ་ཞེས་བྱ་བ་སྩོལ་བར་འགྱུར་རོ། །དོན་ཡོད་པ་ཡངས་པ་ཆེན་པོའི་དངོས་གྲུབ་རབ་ཏུ་སྩོལ་བར་འགྱུར་རོ། །མཆོག་ཏུ་གྲུབ་པ་ཆེན་པོར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་སྤྱིའི་རིགས་ཀྱི་དམ་ཚིག་གི་དངོས་གྲུབ་སོ་སོར་རྙེད་པར་འགྱུར་རོ། །བྱང་ཆུབ་སེམས་དཔའ་ཐམས་ཅད་ཀྱི་རྣམ་པར་འཕྲུལ་པ་དང་། རིག་སྔགས་ཀྱི་སྙིང་པོ་དང་། ཏིང་ངེ་འཛིན་དང་། རྫུ་འཕྲུལ་གྱི་ཡུལ་དང་། བྱང་ཆུབ་སེམས་དཔའི་སེམས་ཀྱི་རྒྱན་དང་། ཕ་རོལ་ཏུ་ཕྱིན་པ་དྲུག་གི་རྗེས་སུ་སོང་བར་འགྱུར་རོ། །རིག་སྔགས་ཀྱི་རྒྱལ་པོའི་དཀྱིལ་འཁོར་གྱི་ལྷ་ཐམས་ཅད་རྗེས་སུ་སྦྱོར་ཞིང་དམ་ཚིག་གི་རྗེས་སུ་འཇུག་པར་འགྱུར་རོ། །ལག་ན་རྡོ་རྗེ་དེ་བཞིན་དུ། རིག་སྔགས་ཀྱི་རྒྱལ་པོའི་མཐུ་ཆེན་པོས་རྣམ་པར་འཕྲུལ་པ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ། བྱང་ཆུབ་སེམས་དཔའ་ཐམས་ཅད་ཀྱི་རྣམ་པར་འཕྲུལ་པའོ། །ལག་ན་རྡོ་རྗེ། དེ་བས་ན། དེ་རྣམས་རིག་སྔགས་ཀྱི་རྒྱལ་པོའི་མཐུ་ཆེན་པོའོ། །ལག་ན་རྡོ་རྗེ། རིག་སྔགས་ཀྱི་རྒྱལ་པོ་འདི། མེ་ཏོག་གམ། བདུག་པའམ། དྲི་དང་བྱུག་པ་དང་། རོལ་མོ་གཅིག་གིས་མཆོད་པ་དང་། ལན་ཅིག་ཙམ་གྱིས་ཀྱང་། དུས་གསུམ་དུ་གཤེགས་པའི་དེ་བཞིན་གཤེགས་པ་དེ་རྣམས་ཀྱི་སྙིང་པོ་གསང་བ་དང་། མཆོད་པ་རྣམས་བྱས་པ་དང་། མཉེས་པར་བྱས་པ་དང་། ཀློག་པར་བྱས་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་གསང་བའི་དམ་ཚིག་དང་། དཀྱིལ་འཁོར་དང་། ཕྱག་རྒྱ་དང་། གསང་སྔགས་དང་། གཟུངས་དང་། རིམ་པར་ཕྱེ་བ་དང་། ཆོ་ག་ཞིབ་མོའི་རྒྱལ་པོ་མཆོད་པ་བྱས་པར་འགྱུར་རོ། །རིག་སྔགས་ཀྱི་རྒྱལ་པོ་འདི་དྲན་པ་ཙམ་གྱིས། གནོད་སྦྱིན་དང་། སྲིན་པོ་དང་། བགེགས་དང་། ལོག་པར་འདྲེན་པ་དང་། བདུད་ཀྱི་རིགས་ཀྱི་ལྷ་དེ་རྣམས་ཐམས་ཅད་ཕྱོགས་དང་ཕྱོགས་མཚམས་
རྣམས་སུ་འབྲོས་པར་བྱེད་དོ། །ཡམས་ཐམས་ཅད་དང་། ཉེ་བར་འཚེ་བ་ཐམས་ཅད་དང་། ནད་འགོ་བ་ཐམས་ཅད་དང་། གདོན་ཐམས་ཅད་དང་། ནད་ཐམས་ཅད་དང་། འཐབ་པ་དང་། འཐབ་མོ་དང་། རྩོད་པ་དང་། འགྱེད་པ་རྣམས་ཐམས་ཅད་དང་། གཏམ་ངན་གྱི་འཇིགས་པ་རྣམས་རབ་ཏུ་ཞི་བར་བྱེད་དོ། །གདུག་པ་ཐམས་ཅད་དང་། ཕྱིར་རྒོལ་བ་ཐམས་ཅད་དང་། མི་མཛའ་བ་རྣམས་རབ་ཏུ་ཞི་བར་བྱེད་དོ། །སྡིག་པ་དང་སྒྲིབ་པ་ཐམས་ཅད་རྣམ་པར་གྲོལ་བར་བྱེད་དོ། །མཚམས་མེད་པ་ལྔ་ལ་སོགས་པ། སྡིག་པ་དང་སྒྲིབ་པ་དང་། ཉོན་མོངས་པ་རྣམས་རྣམ་པར་གྲོལ་བར་བྱེད་དོ། །དེ་བཞིན་གཤེགས་པ་ཐམས་ཅད་ཀྱིས་དབུགས་འབྱིན་པར་འགྱུར་རོ། །བྱང་ཆུབ་སེམས་དཔའ་ཐམས་ཅད་ཀྱིས་དགོངས་པར་འགྱུར་རོ། །ལྷ་རྣམས་ཐམས་ཅད་ཀྱིས་ཀྱང་ཀུན་ཏུ་སྲུང་བར་འགྱུར་རོ། །ལག་ན་རྡོ་རྗེ་རིག་སྔགས་འཆང་གི་དབང་པོ་རྗེས་སུ་འབྲང་བར་འགྱུར་ཞིང་། སྲུང་བ་དང་། སྐྱོབ་པ་དང་། སྦེད་པར་བྱེད་དོ། །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་བཅུ་རྟག་ཏུ་རྗེས་སུ་འབྲང་བར་འགྱུར་རོ། །རྒྱལ་པོ་ཆེན་པོ་བཞི་ཡང་དཔུང་དང་བཅས། འཁོར་དང་བཅས་པས་ཀུན་ནས་ཕྱོགས་བཞིར་སྲུང་བར་བྱེད་དོ། །ཐམས་ཅད་དུ་ཆོ་ག་ཞིབ་མོ་དང་། གསང་སྔགས་དང་ཕྱག་རྒྱའི་དངོས་གྲུབ་མཆོག་སྦྱིན་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དམ་ཚིག་གི་དངོས་གྲུབ་ཆེན་པོ་སྦྱིན་པར་འགྱུར་རོ། །པདྨ་ཡངས་པའི་དཀྱིལ་འཁོར་འདི་དང་། དོན་ཡོད་པའི་ཞགས་པའི་སྙིང་པོ་རྣམ་པར་གྲོལ་བའི་དཀྱིལ་འཁོར་གྱི་གསང་བ་དོན་ཡོད་པའི་དེ་ཁོ་ན་ཉིད་ཀྱི་དངོས་གྲུབ་ཏུ་འགྱུར་རོ། །ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། སྲིན་པོ་ཐམས་ཅད་ཀྱང་རྟག་ཏུ་རྗེས་སུ་འབྲང་བར་འགྱུར་རོ། །སེམས་ཅན་ཐམས་ཅད་ཀྱི་དྲུང་དུ་མཆོད་པ་ཆེན་པོ་བྱེད་པར་འགྱུར་རོ། །བཀྲ་ཤིས་དང་ཡིད་ལ་བསམས་པ་ཐམས་ཅད་ཡོངས་སུ་རྫོགས་པར་འགྱུར་རོ། །གཤེད་བྱེད་དང་། བྱད་སྟེམས་དང་། གསང་སྔགས་དང་། རོ་ལངས་དང་། སེམས་བསྒྱུར་བ་དང་། སྦོད་གཏོང་གི་སྦྱོར་བ་དང་། མཁའ་འགྲོ་མ་རྣམས་ཐམས་ཅད་འབྱེར་བར་བྱེད་
དོ། །དུག་དང་། སྦྱར་དུག་དང་། ཕྱེ་མའི་སྦྱོར་བ་རྣམས་ཐམས་ཅད་འབྱེར་བར་བྱེད་དོ། །རིམས་རྣམས་ཐམས་ཅད་འབྱོར་བར་འགྱུར་རོ། །ཉིན་གཅིག་པ་དང་། ཉིན་གཉིས་པ་དང་། ཉིན་གསུམ་པ་དང་། ཉིན་བཞི་པ་དང་། མཚན་གཅིག་པ་དང་། ཉིན་གཅིག་པ་དང་། གྲང་བའི་རིམས་དང་། རླུང་ལས་གྱུར་པ་དང་། མཁྲིས་པ་ལས་གྱུར་པ་དང་། བད་ཀན་ལས་གྱུར་པ་དང་། འདུས་པ་ལས་གྱུར་པ་དང་། མགོ་གཟེར་དང་། ཕོལ་མིག་དང་། གཡན་པ་དང་། མིག་ནད་དང་། གཞོགས་ཕྱེད་ན་བ་དང་། མ་རོ་ཙ་ཀ་དང་། མཚན་བར་རྡོལ་བ་དང་། ཕོ་བའི་ནད་དང་། བཤང་བ་འཁྱིལ་བ་དང་། རྣ་བ་ན་བ་དང་། སོ་ན་བ་དང་། རྩིབ་ལོགས་ན་བ་དང་། མཆིན་པ་ན་བ་དང་། ཚད་པ་དང་། གཅིན་ནད་དང་། གསུད་པ་དང་། ལྟོ་བ་ན་བ་དང་། ལག་པ་ན་བ་དང་། རྐང་པ་ན་བ་དང་། ཡན་ལག་ན་བ་དང་། ཉིང་ལག་ན་བ་དེ་དག་ཐམས་ཅད་དྲན་པ་ཙམ་གྱིས་རྣམ་པར་འཇིག་པར་བྱེད་དོ། །ཤ་བཀྲ་དང་། མཛེ་དང་། འབྲས་དང་། ཕོལ་མིག་དང་། ལྷོག་པ་དང་། རྐང་ཤུ་དང་། མེ་དབལ་དང་། ཤུ་བ་དང་། འབྲུམ་བུ་ཕྲ་མོ་དང་། རྨ་དང་། མགྲིན་པ་འགགས་པ་དེ་དག་ཐམས་ཅད་བྱབས་པ་ཙམ་གྱིས་རྣམ་པར་འཇིག་པར་བྱེད་དོ། །ཕྱིས་ཀྱང་ནམ་ཡང་ཚུགས་པར་མི་འགྱུར་རོ། །འདི་དེ་ལྟར་གོ་སྐབས་ཡངས་ལ་རྒྱ་ཆེ་བ་ཡིན་ནོ། །ལག་ན་རྡོ་རྗེ་རིག་སྔགས་ཀྱི་རྒྱལ་པོ་དོན་ཡོད་པ་པདྨ་དྲི་མ་མེད་པའི་ཆུ་སྐྱེས་ཀྱི་ཞགས་པ་རིག་སྔགས་ཀྱི་རྒྱལ་པོ། དོན་ཡོད་ཞགས་པའི་སྙིང་པོ་ཞེས་བྱ་བ། དུས་གསུམ་དུ་གཤེགས་པའི་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབ། རྡོ་རྗེ་གསང་བའི་སྙིང་པོ། དམ་ཚིག་བྱིན་གྱིས་རློབ་པའི་རྣམ་པར་འཕྲུལ་པ་ཞེས་བྱའོ། །དེ་ནས་ཡང་གནོད་སྦྱིན་གྱི་སྡེ་དཔོན་ཆེན་པོ་ཕྱག་ན་རྡོ་རྗེས། བཅོམ་ལྡན་འདས་ཀྱི་སྤྱན་སྔར་ཞུས་པའི་དགེ་མཚན་དང་། བཀྲ་ཤིས་པ་གསང་བ་བྱིན་གྱིས་རློབ་པ་རིག་སྔགས་ཀྱི་རྒྱལ་པོ་ཆེན་པོའི་རྣམ་པར་འཕྲུལ་པ་ཐོས་ནས་ཚིམ་པ་དང་། མགུ་བ་དང་། ཡི་རངས་པ་དང་། རབ་ཏུ་དགའ་བ་དང་། དགའ་བ་དང་ཡིད་བདེ་བ་སྐྱེས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རིག་སྔགས་ཀྱི་རྒྱལ་པོ་ཡོན་ཏན་ཕུན་སུམ་ཚོགས་པ་ཐམས་ཅད་ཀྱི་མཆོག་སྦྱིན་པར་བྱེད་པ་འདི་ནི་ཤིན་ཏུ་དཀོན་ནོ། །བཅོམ་ལྡན་འདས་རིག་
སྔགས་ཀྱི་རྒྱལ་པོ། དགེ་བའི་རྩ་བ་ཐམས་ཅད་དང་། བསོད་ནམས་ཀྱི་ཚོགས་ཐམས་ཅད་དང་། གསང་བའི་དཀྱིལ་འཁོར་གྱི་དམ་ཚིག་གི་དངོས་གྲུབ་བླ་ན་མེད་པ་ཐམས་ཅད་ཡང་དག་པར་རྫོགས་པར་བྱེད་པའི་རིག་སྔགས་ཀྱི་རྒྱལ་པོ་མཆོག་ཏུ་དཀོན་ཏེ། དེ་བཞིན་གཤེགས་པ་དང་མཉམ་པར་བལྟ་བར་བགྱིའོ། །དེ་བཞིན་གཤེགས་པ་བྱང་ཆུབ་ཀྱི་སྙིང་པོ་དང་། དམ་པའི་ཆོས་ཀྱི་འཁོར་ལོ་བསྐོར་བ་དང་མཉམ་པའོ། །བཅོམ་ལྡན་འདས་རིག་སྔགས་ཀྱི་རྒྱལ་པོ། འཕགས་པ་སྤྱན་རས་གཟིགས་དབང་ཕྱུག་གི་དཔྲལ་བའི་བར་ནས་ངེས་པར་བྱུང་བ་ནི། རིག་པ་འཛིན་པ་དེ་དག་ཐམས་ཅད་ལ་ཕན་པའི་དོན་དང་། དངོས་གྲུབ་མཐོང་བའི་དེ་ཁོ་ན་ཉིད་ཀྱི་སྒྲུབ་པ་གྲུབ་པ་ཆེད་དུ་འགྱུར་རོ། །དགེ་བའི་རྩ་བ་མཆོག་ཏུ་ཉེ་བར་བསགས་པར་འགྱུར་བ་ལས་གཞན་མ་ཡིན་ནོ། །རིག་སྔགས་ཀྱི་རྒྱལ་པོ་འདི་དྲན་པ་ཙམ་གྱིས་བསོད་ནམས་ཀྱི་ཕུང་པོ་དགེ་བའི་རྩ་བའི་ཚོགས་གཞལ་དུ་མེད་པ་དང་། ཚད་མེད་པ་དང་། གྲངས་མེད་པ་ཉེ་བར་བསགས་པར་འགྱུར་གྱི་གཞན་དུ་མ་ཡིན་ནོ། །བཅོམ་ལྡན་འདས་ཉིན་མཚན་དུ་ཡང་རིག་སྔགས་ཀྱི་རྒྱལ་པོ་འདི་དྲན་པར་བགྱི་སྐད་ཅིག་ཀྱང་མི་བརྗེད་པར་བགྱིའོ། །བཅོམ་ལྡན་འདས་ཅི་སྟེ་སླར་ཡང་སྔ་དྲོའམ། ཉིན་མོའམ། མཚན་མོའམ། ཟླ་བའམ། ལོ་རེ་ཡང་རུང་སྟེ། རིག་སྔགས་ཀྱི་རྒྱལ་པོ་འདི་བརྗེད་ན། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་བརྗེད་པར་འགྱུར། ཡོངས་སུ་དོར་བར་འགྱུར། བསོད་ནམས་ཀྱི་ཚོགས་ཐམས་ཅད་ཡོངས་སུ་དོར་བར་འགྱུར་རོ། །བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་བཀའ་སྩལ་པ། ལག་ན་རྡོ་རྗེ་དེ་དེ་བཞིན་ནོ། །ཇི་ལྟར་ཁྱོད་ཀྱིས་སྨྲས་པ་དེ་དེ་བཞིན་ཏེ། རིག་སྔགས་ཀྱི་རྒྱལ་པོ་འདི་ལག་ཏུ་སོན་པར་འགྱུར་བའི་སེམས་ཅན་དེ་ནི་དགེ་བའི་རྩ་བ་ཆུང་ངུ་སྐྱེད་པ་མ་ཡིན་ནོ། །ལག་ན་རྡོ་རྗེ་གངྒཱའི་ཀླུང་གི་བྱེ་མ་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་དགུའི་དུས་གསུམ་མཉམ་པ་ཉིད་ཀྱི་དེ་བཞིན་གཤེགས་པ་རྣམས་མ་མཐོང་བ་དང་། བསྙེན་བཀུར་མ་བྱས་པ་དང་། ཕྱག་རྒྱ་དང་། དཀྱིལ་འཁོར་དང་། དམ་ཚིག་དང་། གསང་སྔགས་རིམ་པར་ཕྱེ་བ་དང་། རིག་སྔགས་ཀྱི་ཆོ་ག་ཞིབ་མོའི་རྒྱལ་པོ་མ་ཐོས་ཤིང་མ་ཞུགས་པ་གང་ཡིན་པ་དེས་ནི།
ལག་ན་རྡོ་རྗེ་རིག་སྔགས་ཀྱི་རྒྱལ་པོ་འདི་དེའི་ལག་ཏུ་ཕྱིན་པར་མི་འགྱུར་རོ། །མི་ཐོས་ཤིང་མི་མཐོང་ལ། མིང་གི་སྒྲ་གྲགས་པ་ཙམ་དུའང་མི་འགྱུར་རོ། །ལག་ན་རྡོ་རྗེ་རིག་སྔགས་ཀྱི་རྒྱལ་པོ་འདི། གང་གི་ལག་ཏུ་སོན་པར་འགྱུར་བ་དེས་ནི། ལག་ན་རྡོ་རྗེ་གངྒཱའི་ཀླུང་གི་བྱེ་མ་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་དགུའི་དུས་གསུམ་མཉམ་པ་ཉིད་ཀྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དེའི་ལག་ཏུ་སོན་པར་འགྱུར་རོ། །དེ་བཞིན་གཤེགས་པ་དེ་རྣམས་ཀྱི་དྲུང་དུ། རིགས་ཀྱི་དམ་ཚིག་གི་དཀྱིལ་འཁོར་དང་། ཕྱག་རྒྱ་དང་། གསང་སྔགས་རིམ་པར་ཕྱེ་བ་དང་། སྙིང་པོ་དང་། གསང་བའི་ཆོ་ག་ཞིབ་མོ་ཐམས་ཅད་ལག་ཏུ་སོན་པར་འགྱུར་རོ། །གནས་ཐམས་ཅད་དུ་སོང་ཞིང་རྗེས་སུ་ཞུགས་པར་འགྱུར་རོ། །ཐམས་ཅད་རྗེས་སུ་སོང་ཞིང་། དམ་ཚིག་ཤེས་པར་འགྱུར་རོ། །རིག་སྔགས་ཐམས་ཅད་དང་། གསང་སྔགས་རིམ་པར་ཕྱེ་བ་དང་། ཕྱག་རྒྱ་ཡང་དག་པར་སྤྱོད་པར་འགྱུར་རོ། །རིག་སྔགས་འཆང་ཐམས་ཅད་ཀྱི་མཆོག་དང་། གཙོ་བོ་དང་ཐུ་བོར་འགྱུར་རོ། །དེ་བཞིན་གཤེགས་པ་དེ་རྣམས་ཐམས་ཅད་ཀྱི་དྲུང་ན། སྲས་ཀྱི་གཙོ་བོར་དུས་གསུམ་དུ་གཤེགས་པའི་དེ་བཞིན་གཤེགས་པ་རྣམས་ཀྱིས་ལུང་སྟོན་པར་འགྱུར་རོ། །དགེ་བའི་རྩ་བ་ཉེ་བར་སྟོན་པ་དང་། བསོད་ནམས་ཀྱི་ཚོགས་ཡོངས་སུ་འཛིན་པར་འགྱུར་རོ། །ལག་ན་རྡོ་རྗེ་རིག་སྔགས་ཀྱི་རྒྱལ་པོ་འདི། གང་གི་ལག་ཏུ་སོན་ཅིང་ཐོབ་པར་འགྱུར་བའི་སེམས་ཅན་གང་ཡིན་པ་དེ་ནི། དེའི་ཡོན་ཏན་དང་། ཕན་ཡོན་གཞལ་དུ་མེད་པ་ཐོབ་པར་འགྱུར་རོ། །རིག་སྔགས་ཀྱི་རྒྱལ་པོ་འདི། གང་གི་ལག་ཏུ་སོན་པར་འགྱུར་བ་དེ། སངས་རྒྱས་ཀྱི་ཕུན་སུམ་ཚོགས་པ་ཐམས་ཅད་སོ་སོར་རྙེད་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས། རིག་སྔགས་ཀྱི་རྒྱལ་པོ་འདི་སྨྲས་ནས། རང་གི་གཟུགས་ཀྱི་བདག་ཉིད་ཀྱི་དངོས་པོ་པདྨའི་ཟེ་འབྲུའི་དབུས་སུ་རིག་སྔགས་ཀྱི་རྒྱལ་པོ་འཕགས་པར་བལྟས་ནས། དོན་ཡོད་པ་ཡིད་བཞིན་ནོར་བུའི་འོད་ཅེས་བྱ་བ་ནོར་བུ་རིན་པོ་ཆེ་ཆེན་པོ་རིག་སྔགས་ཀྱི་རྒྱལ་པོ་བཅོམ་ལྡན་འདས་ལ་ཕུལ་བར་གྱུར་ཏོ། །ཨོཾ་ཨ་མོ་གྷ་ཙིནྟཱ་མ་ཎི་བར་ད་པདྨེ་ཛྭ་ལ་
ཛྭ་ལ་ན་བྷུ་ཛེ་ཧཱུྃ། འདི་ནི་དོན་ཡོད་པ་པདྨ་དྲི་མ་མེད་པའི་ཆུ་སྐྱེས་ཀྱི་ཞགས་པའི་རྩ་བའི་སྙིང་པོའོ། །འཕགས་པ་སྤྱན་རས་གཟིགས་དབང་ཕྱུག་གིས། བཅོམ་ལྡན་འདས་ལ་ཕུལ་བའི་དེ་མ་ཐག་པ་དེ་ནས་རིག་སྔགས་ཀྱི་རྒྱལ་པོ་ཐམས་ཅད། བཅོམ་ལྡན་འདས་ཀྱི་སྤྱན་སྔ་ན། བཅོམ་ལྡན་འདས་ལ་སྤྱན་མི་འཛུམས་པར་བལྟ་ཞིང་འཁོད་དོ། །བཅོམ་ལྡན་འདས་ཤཱཀྱ་ཐུབ་པས་དོན་ཡོད་པ་ཡིད་བཞིན་ནོར་བུའི་འོད་རིག་སྔགས་ཀྱི་རྒྱལ་པོ་ནོར་བུ་རིན་པོ་ཆེ་ཆེན་པོ་དེ་ལ་ཡང་། རིག་སྔགས་ཀྱི་རྒྱལ་པོས་སྤྱི་བོ་ནས་དབང་བསྐུར་རོ། །བཅོམ་ལྡན་འདས་ཀྱིས་རིག་སྔགས་ཀྱི་རྒྱལ་པོ་འདིས་དབང་བསྐུར་མ་ཐག་ཏུ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རི་དང་། ནགས་དང་འབྲོག་དགོན་པར་བཅས་པ་རྣམས་རྣམ་པར་འགྱུར་བ་དྲུག་ཏུ་གཡོས་སོ། །ཕྱོགས་བཅུ་ཀུན་ནས་དེ་བཞིན་གཤེགས་པ་ཐམས་ཅད་མཐོང་བར་གྱུར་ཏོ། །དེས་ན་དུས་གསུམ་དུ་བཞུགས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་ནམ་མཁའི་དབྱིངས་སུ་རྫུ་འཕྲུལ་གྱིས་བཞུགས་ཏེ། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ལ་ལེགས་སོ་ཞེས་བྱ་བ་བྱིན་ཏེ། ཤཱཀྱ་ཐུབ་པ་མཆོག་ཏུ་རྙེད་པར་དཀའ་བའི་མངོན་པར་དབང་བསྐུར་བའི་རྒྱལ་པོ་འདིས་མངོན་པར་དབང་བསྐུར་བ་འདི་ལེགས་སོ་ལེགས་སོ། །དུས་གསུམ་དུ་གཤེགས་པའི་དེ་བཞིན་གཤེགས་པ་སྔ་མ་རྣམས་ཀྱིས་ཀྱང་དེ་བཞིན་དུ་རིག་པའི་རྒྱལ་པོ་འདིས་དབང་བསྐུར་རོ། །ངེད་ཐམས་ཅད་ཀྱིས་ཀྱང་ཚིག་གཅིག་ཏུ་མཐུན་པས་དོན་ཡོད་པ་ཡིད་བཞིན་ནོར་བུའི་འོད་ལ་རིག་སྔགས་ཀྱི་རྒྱལ་པོ་ཆེན་པོས་མངོན་པར་དབང་བསྐུར་རོ། །དུས་གསུམ་དུ་གཤེགས་པའི་དེ་བཞིན་གཤེགས་པ་དེ་རྣམས་ཀྱང་ཕྱག་གསེར་གྱི་ཁ་དོག་ཅན་བརྐྱང་ནས། དེ་རྣམས་ཐམས་ཅད་ལ་རིག་པའི་རྒྱལ་པོས་སྤྱི་བོའི་གཙུག་ནས་མངོན་པར་དབང་བསྐུར་རོ། །འདི་ནི་མངོན་པར་དབང་བསྐུར་བའི་ཕྱག་རྒྱ་མངོན་པར་དབང་བསྐུར་བ་དང་ལྡན་པའོ། །ཨོཾ་ཨ་མོ་གྷ་བེེ་རོ་ཙ་ན་མ་ཧཱ་མུ་དྲཱ་མ་ཎི་པདྨེ་ཛྭ་ལ་པྲ་བརྡྷ་ཡ་ཧཱུྃ། ཕྱག་རྒྱ་ཆེན་པོས་མངོན་པར་དབང་བསྐུར་མ་ཐག་ཏུ། བཅོམ་ལྡན་འདས་ལ་ལེགས་སོ་ཞེས་བྱ་བ་བྱིན་ཏེ། རང་རང་གི་སངས་རྒྱས་ཀྱི་ཞིང་དུ་གཤེགས་ནས་
མི་སྣང་བར་གྱུར་ཏོ། །དེ་ནས་རིག་པའི་རྒྱལ་པོ་དེ་དེ་བཞིན་གཤེགས་པ་ཐམས་ཅད་ཀྱིས་ཕྱག་རྒྱས་དབང་བསྐུར་བ་རིག་ནས། བཅོམ་ལྡན་འདས་ལ་གཡས་སུ་བསྐོར་བ་གསུམ་བྱས་ནས་ཐལ་མོ་སྦྱར་བ་བཏུད་དེ། ཕྱག་བྱས་ནས་སྤྱན་སྔར་འདུག་སྟེ་སེམས་པར་གྱུར་ཏོ། །དེ་ནས་བཅོམ་ལྡན་འདས་རིག་སྔགས་འཆང་དེའི་རིག་པའི་རྒྱལ་པོ་སེམས་པར་གཟིགས་ནས། ཇི་ལྟར་ད་ལྟར་ཡིད་ལ་བྱེད་པ་ཡང་དག་པར་རབ་ཏུ་གསལ་བར་མཛད་དོ། །ཨོཾ་ཨ་མོ་གྷ་མཎྜ་ལ་པདྨ་ཨ་བྷི་ཥེ་ཀཾ་མ་ཎི་བཛྲེ་སརྦ་ཏ་ཐཱ་ག་ཏ་ཨ་བྷི་ཥེ་ཀེ་ཧཱུྃ། རིག་པའི་རྒྱལ་པོ་དེས་དཀྱིལ་འཁོར་དུ་མངོན་པར་དབང་བསྐུར་བས་མངོན་པར་དབང་བསྐུར་མ་ཐག་ཏུ། དེ་བཞིན་གཤེགས་པ་ཐམས་ཅད་ཀྱི་གསང་བའི་དཀྱིལ་འཁོར་རིགས་ཐུན་མོང་བའི་དམ་ཚིག་རྡོ་རྗེ་ཆེན་པོའི་ཚུལ་གྱིས་ས་གཞི་བྱིན་གྱིས་བརླབས་སོ། །དེ་བཞིན་གཤེགས་པའི་རིགས་དང་། པདྨའི་རིགས་དང་། རྡོ་རྗེའི་རིགས་དང་། ནོར་བུའི་རིགས་རྣམ་པར་ཐར་པ་ཆེན་པོའི་དཀྱིལ་འཁོར། བཅོམ་ལྡན་འདས་ཀྱི་སྤྱན་སྔར་ཆེར་འཁྲིགས་པའི་དཀྱིལ་འཁོར་དུ་བརྟགས་པ་མཐོང་ངོ་། །རང་རང་གི་དགེ་བའི་རྩ་བས་རིག་པའི་རྒྱལ་པོའི་དཀྱིལ་འཁོར་བའི་ལྷ་ཐམས་ཅད་མཐོང་ངོ་། །རྨད་དུ་བྱུང་བའི་ཆོ་འཕྲུལ་ཆེ་ཞིང་ཆེ་བ་དག་བྱུང་ངོ་། །དོན་ཡོད་པའི་རྣམ་པར་འཕྲུལ་པ་ཆེན་པོ་ཤིན་ཏུ་ངོ་མཚར་བ་དག་མཐོང་ངོ་། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་དཀྱིལ་འཁོར་ཆེན་པོའི་རྣམ་པར་འཕྲུལ་པ་འདི་ལྟ་བུ་མཐོང་ནས་དོན་ཡོད་པའི་མཆོད་པའི་ནོར་བུ་རྡོ་རྗེ་བྱིན་གྱིས་རློབས་པ་དེ་བཞིན་གཤེགས་པའི་མངོན་པར་དབང་བསྐུར་བ་བཅོམ་ལྡན་འདས་ཀྱིས་རྗེས་སུ་གནང་བ་དང་ལྡན་པའོ། །ཨོཾ་ཨ་མོ་གྷ་པཱུ་ཛ་མ་ཎི་པདྨ་བཛྲེ་ཏ་ཐཱ་ག་ཏ་བི་ལོ་ཀི་ཏེ་ས་མནྟ་པྲ་ས་ར་ཧཱུྃ། འཕགས་པ་སྤྱན་རས་གཟིགས་དབང་ཕྱུག་གིས་དོན་ཡོད་པ་མཆོད་པའི་ནོར་བུའི་སྙིང་པོ་བྱིན་མ་ཐག་ཏུ་མཆོད་པ་རྒྱ་ཆེན་པོ་རྣམ་པ་སྣ་ཚོགས་པ་དུ་མ་རབ་ཏུ་བྱུང་སྟེ། ཇི་ལྟར་རང་རང་གི་ཆོ་ག་ཇི་ལྟ་བ་བཞིན་དུ་མཆོད་པ་ཆེན་པོ་རྣམས་རབ་ཏུ་བྱུང་ངོ་། །ལྷ་རྫས་རྣམ་པ་སྣ་ཚོགས་པ་རྣམ་པར་བཀྲ་བ་ཡངས་པ་རྒྱ་ཆེན་པོ་གོ་སྐབས་ཀུན་ཏུ་གནས་པར་གྱུར་ཏོ། །དེ་བཞིན་གཤེགས་པའི་རྣམ་པར་འཕྲུལ་པ་ཆེ་ཞིང་ཆེ་བའི་བྱིན་གྱིས་བརླབས་
ཀྱི་བཀོད་པ་རིག་སྔགས་ཀྱི་དཀྱིལ་འཁོར་ཆེན་པོ་ཡང་དག་པར་མཐོང་ངོ་། །དེ་ནས་རིག་པའི་རྒྱལ་པོ་དོན་ཡོད་པ་པདྨ་དྲི་མ་མེད་པ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལས་རིང་པོར་འཕགས་པ་སྤྱན་རས་གཟིགས་དབང་ཕྱུག་ལས་མངོན་དུ་ཕྱོགས་ནས་སྟན་ལ་འདུག་གོ། །དེ་ནས་བཅོམ་ལྡན་འདས་ཀྱིས་གནོད་སྦྱིན་གྱི་སྡེ་དཔོན་ཆེན་པོ་ཕྱག་ན་རྡོ་རྗེ་ལ་བཀའ་སྩལ་པ། ཕྱག་ན་རྡོ་རྗེ་འཕགས་པ་སྤྱན་རས་གཟིགས་དབང་ཕྱུག་གི་རྣམ་པར་འཕྲུལ་བ། ཏིང་ངེ་འཛིན་གྱི་སྟོབས་བྱིན་གྱིས་རློབ་པའི་ཁྱད་པར། ཕྱག་རྒྱ་ཆེན་པོ་དང་། གསང་སྔགས་དང་། གཟུངས་དང་། ཆོ་ག་ཞིབ་མོའི་མཐུ་སྟོབས་པདྨ་ཡངས་པ་ཆེན་པོའི་གསང་བ་དོན་ཡོད་ཞགས་པའི་རྣམ་པར་འཕྲུལ་པ་རིག་པའི་རྒྱལ་པོའི་དེ་ཁོ་ན་ཉིད་ཀྱི་སྙིང་པོ་གྲུབ་པ་དམ་ཚིག་དང་རྗེས་སུ་མཐུན་པ་མཐུ་སྟོབས་དང་ཡོན་ཏན་འབྱུང་བ་ལ་ཕན་པ། དེ་བཞིན་གཤེགས་པ་ཐམས་ཅད་ཀྱི་སྙིང་པོའི་རྣམ་པར་འཕྲུལ་པ་ཡིད་ཀྱི་ཤིང་རྟ་རེ་བ་ཐམས་ཅད་ཀྱི་མཆོག་རབ་ཏུ་སྦྱིན་པ་ལ་ལྟོས། འཕགས་པ་སྤྱན་རས་གཟིགས་དབང་ཕྱུག་གིས་རེ་བ་ཐམས་ཅད་ཡོངས་སུ་རྫོགས་པར་རྗེས་སུ་སྦྱིན་ཏེ་རིག་པའི་རྒྱལ་པོ་འདི། ཕྱི་མའི་དུས་ཕྱི་མའི་ཚ་སངས་རྒྱས་ཀྱི་མཛད་པ་བྱེད་པར་འགྱུར་རོ། །རིག་པའི་རྒྱལ་པོ་འདི་སེམས་ཅན་ཐམས་ཅད་ཀྱི་སྣང་བར་བྱེད་པར་འགྱུར་རོ། །སྐྱབས་དང་། དཔུང་གཉེན་དང་། འཁྲས་དང་། ཡིད་ཀྱི་ཤིང་རྟ་རེ་བ་ཐམས་ཅད་ཡོངས་སུ་རྫོགས་པར་བྱེད་དོ། །སྡིག་པ་ཐམས་ཅད་རབ་ཏུ་ཞི་བར་བྱེད་དོ། །དགྲ་ཐམས་ཅད་རབ་ཏུ་འདུལ་བར་བྱེད་དོ། །བགེགས་དང་ལོག་པར་འདྲེན་པ་ཐམས་ཅད་རྣམ་པར་འཇིག་པར་བྱེད་དོ། །ཆར་ཆེས་པ་རབ་ཏུ་ཞི་བར་བྱེད་དོ། །ཆར་མེད་ན་ཆར་འབེབས་སོ། །རླུང་དང་། སད་དང་། སེར་བ་ལྡོག་པར་བྱེད་དོ། །མུ་གེའི་དགོན་པ་རབ་ཏུ་ཞི་བར་བྱེད་དོ། །ནད་ཐམས་ཅད་ལྡོག་པར་བྱེད་དོ། །གདུག་པ་ཐམས་ཅད་རབ་ཏུ་ཞི་བར་བྱེད་དོ། །ཚེ་དང་ནད་མེད་པ་འཕེལ་བར་བྱེད་དོ། །བསོད་ནམས་སྦྱིན་པ་དང་། དབང་ཕྱུག་སྦྱིན་པ་དང་། ནོར་སྦྱིན་པ་དང་། འབྲུ་འཕེལ་བར་བྱེད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་
གཟིགས་དབང་ཕྱུག་གིས་དོན་ཡོད་པ་དྲི་མ་མེད་པའི་ཆུ་སྐྱེས་ཀྱི་གཟུངས་ཀྱི་སྙིང་པོའི་ཡོ་བྱད་དང་། ཆོ་ག་བཀླགས་པས་འགྲུབ་པའི་དངོས་གྲུབ་གསུངས་སོ། །དེ་ནས་སྙིང་པོ་འདི་བཀླགས་པས་འགྲུབ་པར་འགྱུར་ཏེ། རིག་པའི་རྒྱལ་པོ་བཀླགས་པས་དཀྱིལ་འཁོར་གྱི་ལྷ་ཐམས་ཅད་འགུགས་པར་འགྱུར་རོ། །སྟོང་ཕྲག་བརྒྱ་བཟླས་པས་པདྨོ་ཡངས་པའི་དཀྱིལ་འཁོར་དང་། གཞལ་མེད་ཁང་གི་རྒྱན་མཐའ་དག་དང་། རིག་པའི་རྒྱལ་པོ་དང་བཅས་པའི་ལྷ་རྣམས་དང་། དེ་བཞིན་གཤེགས་པ་ཐམས་ཅད་དང་། འཕགས་པ་སྤྱན་རས་གཟིགས་དབང་ཕྱུག་གི་གཞལ་མེད་ཁང་དང་དཀྱིལ་འཁོར་དང་གཞལ་མེད་ཁང་མཐའ་དག་མཐོང་ངོ་། །དེ་ལ་ལྷ་རྣམས་རབ་ཏུ་འཇུག་པར་བྱེད་དོ། །དམ་ཚིག་ཤེས་པར་ཡང་འགྱུར་རོ། །རིག་སྔགས་ཀྱི་དཀྱིལ་འཁོར་དུ་མངོན་པར་དབང་བསྐུར་བར་ཡང་འགྱུར་རོ། །ཕྱག་རྒྱ་རིམ་པར་ཕྱེ་བ་དང་རྗེས་སུ་མཐུན་པར་ཡང་འགྱུར་རོ། །དང་པོ་རྨི་ལམ་མཐོང་བ་ཙམ་གྱིས་འགྲོའོ། །གཉིས་པར་རྨི་ལམ་མཐོང་བ་ལ་དེ་བཞིན་གཤེགས་པའི་རིགས་ཀྱི་དཀྱིལ་འཁོར་མཐོང་ངོ་། །དེ་བཞིན་གཤེགས་པ་དང་བྱང་ཆུབ་སེམས་དཔའི་ཚོགས་ཐམས་ཅད་དང་། རིག་སྔགས་ཀྱི་དཀྱིལ་འཁོར་གྱི་ལྷ་རྣམས་ཀྱིས་རང་གི་རྒྱན་དང་དཀྱིལ་འཁོར་བརྟགས་པ་མཐོང་ངོ་། །གཞལ་ཡས་ཁང་རྒྱ་ཆེན་པོ་དང་བཅས་པ་ཡང་མཐོང་ངོ་། །དེར་ཡང་རབ་ཏུ་འཇུག་པར་བྱེད་དེ། དམ་ཚིག་ཀྱང་འཛིན་པར་བྱེད་དོ། །ཕྱག་རྒྱ་དང་། དཀྱིལ་འཁོར་དང་། གསང་སྔགས་དང་། མངོན་པར་དབང་བསྐུར་བ་ཡང་སོ་སོར་ཐོབ་བོ། །རིག་སྔགས་དང་བཅས་པའི་དངོས་གྲུབ་རབ་ཏུ་ཐོབ་བོ། །གསུམ་པར་རྨི་ལམ་མཐོང་བ་ན། རྡོ་རྗེ་རིགས་ཀྱི་དཀྱིལ་འཁོར་མཐོང་སྟེ་དེ་བཞིན་གཤེགས་པ་དང་བྱང་ཆུབ་སེམས་དཔའི་ཚོགས་ཐམས་ཅད་དང་རིག་སྔགས་ཀྱི་དཀྱིལ་འཁོར་གྱི་ལྷ་རྣམས་དང་བཅས་པ་རང་གི་རྒྱན་དང་དཀྱིལ་འཁོར་དུ་བརྟགས་པ་དང་། གཞལ་མེད་ཁང་རྒྱ་ཆེན་པོ་དང་བཅས་པ་མཐོང་ངོ་། །དེ་ལ་ཡང་རྡོ་རྗེ་འཆང་རབ་ཏུ་འཇུག་པར་བྱེད་དོ། །དམ་ཚིག་གི་ཕྱག་རྒྱ་སྦྱིན་པར་བྱེད་དོ། །མངོན་པར་དབང་བསྐུར་བས་མངོན་པར་དབང་སྐུར་བར་བྱེད་དོ། །རིག་སྔགས་ཐམས་ཅད་དང་། དོན་ཡོད་པའི་རིམ་པར་ཕྱེ་བའི་དངོས་གྲུབ་ཆེན་པོ་དང་། མངོན་པར་
དབང་བསྐུར་བས་མངོན་པར་དབང་སྐུར་བར་བྱེད་དོ། །རྡོ་རྗེའི་རིགས་ཀྱི་དངོས་གྲུབ་ཆེན་པོ་དང་། དམ་ཚིག་ཐམས་ཅད་སོ་སོར་ཐོབ་བོ། །བཞི་པར་རྨི་ལམ་མཐོང་བ་ན། ནོར་བུའི་རིགས་ཆེན་པོའི་དཀྱིལ་འཁོར་དང་ཕྱག་རྒྱའི་རིམ་པར་ཕྱེ་བ་དང་ཆོ་ག་ཞིབ་མོ་དང་། རང་གི་རྒྱན་དང་དཀྱིལ་འཁོར་མཐོང་ངོ་། །དེ་བཞིན་གཤེགས་པ་དང་བྱང་ཆུབ་སེམས་དཔའི་ཚོགས་ཐམས་ཅད་ལྷའི་ཚོགས་དང་དཀྱིལ་འཁོར་དུ་གནས་པའི་ལྷ་དང་། རིག་པའི་རྒྱལ་པོ་ཡང་མཐོང་སྟེ། དེ་ལ་ཡང་རབ་ཏུ་འཇུག་པར་བྱེད་དོ། །ཕྱག་རྒྱ་དང་། དམ་ཚིག་དང་། ཆོ་ག་དང་བཅས་པ་རྗེས་སུ་ཐོབ་སྟེ། མངོན་པར་དབང་བསྐུར་བ་ཡང་རབ་ཏུ་ཐོབ་བོ། །དངོས་གྲུབ་ཆེན་པོ་དང་མཆོག་སྦྱིན་ཡང་སོ་སོར་ཐོབ་ཅིང་ཐམས་ཅད་དུ་མངོན་པར་དབང་བསྐུར་བར་ཡང་འགྱུར་རོ། །ལྔ་པར་རྨི་ལམ་མཐོང་བ་ན་རྣམ་པར་ཐར་པའི་དཀྱིལ་འཁོར་དུ་བརྟགས་པ་དང་། དོན་ཡོད་ཞགས་པའི་དཀྱིལ་འཁོར་དུ་བརྟགས་པ་དང་། པོ་ཊ་ལ་ཀའི་རིའི་གཞལ་མེད་ཁང་དང་བཅས་པ་མཐོང་ངོ་། །དེ་བཞིན་གཤེགས་པ་དང་། བྱང་ཆུབ་སེམས་དཔའི་ཚོགས་ཐམས་ཅད་དང་། ལྷ་དང་བཅས་པ་དང་། རིག་པའི་རྒྱལ་པོའི་དཀྱིལ་འཁོར་ཀྱི་ལྷ་རྣམས་མཐོང་སྟེ། དེ་ལ་ཡང་འཕགས་པ་སྤྱན་རས་གཟིགས་དབང་ཕྱུག་རང་ཉིད་སེམས་ཅན་དེ་ལ་རབ་ཏུ་འཇུག་པར་བྱེད་དོ། །དམ་ཚིག་དང་ཕྱག་རྒྱ་དང་། དཀྱིལ་འཁོར་དང་གསང་སྔགས་དང་གཟུངས་ཀྱི་དངོས་གྲུབ་སོ་སོར་ཐོབ་པོ། །རང་ཉིད་ཀྱང་དོན་ཡོད་པའི་རིག་སྔགས་ཀྱི་དབང་གིས་མངོན་པར་དབང་བསྐུར་ཏེ། མངོན་པར་དབང་སྐུར་བར་བྱེད་དོ། །ཆོ་ག་ཞིབ་མོ་ཐམས་ཅད་དང་། དངོས་གྲུབ་ཀྱང་རྗེས་སུ་སྩོལ་བར་བྱེད་དོ། །མཆོག་ཐམས་ཅད་རབ་ཏུ་སྦྱིན་པ་སོ་སོར་ཐོབ་བོ། །དྲུག་པར་རྨི་ལམ་མཐོང་བ་ན། དཀྱིལ་འཁོར་ཆེན་པོ་མཐོང་སྟེ། འཕགས་པ་སྤྱན་རས་གཟིགས་དབང་ཕྱུག་ཕྱག་སྟོང་བ་མཐོང་ངོ་། །གཞལ་མེད་ཁང་དང་བཅས་པའི་བྱང་ཆུབ་སེམས་དཔའི་ཚོགས་དང་། ལྷ་དང་། ཀླུ་དང་། གནོད་སྦྱིན་དང་དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་མཐོང་སྟེ་དེ་ལ་ཡང་རབ་ཏུ་འཇུག་པར་བྱེད་དོ། །ཕྱག་རྒྱ་དང་གསང་སྔགས་དང་དམ་ཚིག་དང་མངོན་པར་དབང་བསྐུར་བ་སོ་སོར་ཐོབ་སྟེ། རིག་སྔགས་
ཐམས་ཅད་ཀྱི་དངོས་གྲུབ་ཀྱི་མཆོག་སྦྱིན་པ་སོ་སོར་ཐོབ་བོ། །བདུན་པར་རྨི་ལམ་ཆེན་པོ་མཐོང་བས་དེ་བཞིན་གཤེགས་པ་བྱང་ཆུབ་ཀྱི་སྙིང་པོར་གཤེགས་ནས་རྡོ་རྗེའི་གདན་ལ་བཞུགས་པ་མཐོང་སྟེ། ཆོས་ཀྱི་འཁོར་ལོ་བསྐོར་བ་དང་། བདུད་འདུལ་བ་མཐོང་ངོ་། །དེ་ལ་ཡང་དེ་བཞིན་གཤེགས་པ་རྣམ་པར་སྣང་མཛད་ཕྱག་གསེར་གྱི་ཁ་དོག་ཅན་བརྐྱང་སྟེ། རང་ཉིད་ཀྱི་ཕྱག་གིས་བཟུང་ནས། རབ་ཏུ་འཇུག་པར་བྱེད་དོ། །རང་ཉིད་མངོན་པར་དབང་བསྐུར་ཞིང་མངོན་པར་དབང་སྐུར་བར་བྱེད་དོ། །དེ་བཞིན་གཤེགས་པའི་རིགས་ཐམས་ཅད་ཀྱིས་དམ་ཚིག་དང་། ཕྱག་རྒྱ་དང་། གསང་སྔགས་ཀྱི་དངོས་གྲུབ་ཀྱི་མཆོག་སྦྱིན་པ་རྗེས་སུ་སྩོལ་བར་བྱེད་དོ། །དེ་བཞིན་གཤེགས་པ་ཐམས་ཅད་ཀྱི་སངས་རྒྱས་ཀྱི་ཞིང་སྟོན་པར་བྱེད་དོ། །ནད་སྣ་ཚོགས་པ་དང་ལྡན་པའི་འཇིག་རྟེན་པ་ཐམས་ཅད་རིག་སྔགས་འཆང་གི་རྒྱལ་པོ་གཅིག་པོར་འགྱུར་རོ། །སྐྱེ་བ་བརྗེ་བ་འཆི་འཕོ་བའི་དུས་སུ་དྲན་པ་ཉེ་བར་གནས་ཤིང་དུས་བྱེད་པར་འགྱུར་རོ། །བདེ་བ་ཅན་གྱི་འཇིག་རྟེན་གྱི་ཁམས་སུ་པདྨ་ལས་བརྫུས་ཏེ་སྐྱེ་བའི་སྐལ་བ་དང་བཅས་པར་འགྱུར་རོ། །དོན་ཡོད་པའི་རིག་སྔགས་འཆང་གི་འཁོར་ལོས་སྒྱུར་བར་སྐྱེ་བར་འགྱུར་རོ། །དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་དགུས་མཆོད་པར་བྱེད་དོ། །ཡང་དག་པར་རྫོགས་པའི་སངས་རྒྱས་མངོན་སུམ་དུ་མཐོང་ནས་ཉེ་བར་སྟོན་པར་བྱེད་དོ། །ཐམས་ཅད་དུ་ཡང་དེ་རྣམས་རང་རང་གི་སངས་རྒྱས་ཀྱི་ཞིང་ཉེ་བར་སྟོན་པར་བྱེད་དོ། །ཐམས་ཅད་དུ་ཡང་།རང་གི་གསང་བ་དེ་བཞིན་གཤེགས་པ་རྣམ་པར་སྣང་མཛད་ཀྱི་དམ་ཚིག་ཉེ་བར་སྟོན་པར་བྱེད་དོ། །བསྐལ་བ་བརྒྱ་སྟོང་ཕྲག་གི་བར་དུ་ཡང་། སྔོན་གྱི་སྐྱེ་བ་རྗེས་སུ་དྲན་པར་བྱེད་དོ། །དེ་བཞིན་གཤེགས་པའི་ཁྱུ་མཆོག་ཐམས་ཅད་ཀྱི་རྫུ་འཕྲུལ་དང་། རྣམ་པར་འཕྲུལ་བ་དང་། ཏིང་ངེ་འཛིན་དང། གསང་བའི་དམ་ཚིག་དང། དཀྱིལ་འཁོར་གྱི་རིམ་པར་ཕྱེ་བ་དང་། གསང་སྔགས་དང་། གཟུངས་སྔགས་རྣམས་ལ་མངོན་དུ་ཕྱོགས་པར་འགྱུར་རོ། །སྐྱེ་བ་སྐྱེ་བར་ཡང་རང་གི་བསོད་ནམས་ཀྱི་ལས་ཀྱི་ཚོགས་དགེ་བའི་རྩ་བ་རྗེས་སུ་དྲན་པར་འགྱུར་རོ། །ཐམས་ཅད་དུ་གནས་ཐམས་ཅད་ཡོངས་སུ་དག་པའི་ལས་ཀྱི་སྒྲུབ་ཐབས་ཀྱི་ཆོ་གའི་
དངོས་གྲུབ་ཏུ་འགྱུར་རོ་ཞེས་རྩ་བའི་སྙིང་པོའི་དངོས་གྲུབ་བླ་ན་མེད་པ་བཀླགས་པས་འགྲུབ་པའོ། །དེ་ནས་འདིའི་ཡོ་བྱད་དང་ཆོ་ག་སེམས་ཅན་ཐམས་ཅད་ཀྱི་རེ་བ་ཡོངས་སུ་རྫོགས་པར་བྱེད་པའི་དངོས་གྲུབ་ཏུ་འགྱུར་རོ། །སྡིག་པ་ཐམས་ཅད་ངེས་པར་སྲེག་པ་ལ་བརྒྱ་རྩ་བརྒྱད་བཟླས་པའི་སྡིག་པ་དང་། སྒྲིབ་པ་ཐམས་ཅད་རྣམ་པར་ཉམས་པར་བྱེད་དོ། །གང་དང་གང་གི་ལས་ཀྱི་སྒྲིབ་པ་རྣམས་རྗེས་སུ་བཅིངས་པར་འགྱུར་རོ། །དེ་ཡང་ཉི་མ་བདུན་གྱིས་རང་གི་ལུས་དེ་ཡང་རང་གི་གཟུགས་ཀྱིས་ངེས་པར་འགྲོ་སྟེ་མདུན་དུ་ཉེ་བར་འདུག་སྟེ་སྦྱིན་པར་བྱེད་པ་དང་། སྔོན་གྱི་སྒྲིབ་པ་ཉེ་བར་བསགས་པ་འདི་དང་། སྡིག་པ་ཐམས་ཅད་ཡོངས་སུ་ཟད་པ་ཉིད་དང་། དགེ་བའི་རྩ་བ་ཐམས་ཅད་ཡོངས་སུ་རྫོགས་པ་དང་། བདག་ཞུམ་པ་དང་འཁྲུགས་པ་མཐའ་དག་བཟླས་པ་ཙམ་གྱིས་ཡང་དག་པར་སྨྲ་བར་བྱེད་ཅིང་མི་སྣང་བར་བྱེད་དོ། །རིམས་ཐམས་ཅད་ལ་སྐུད་པ་དཀར་པོ་ལ་མདུད་པ་ཉི་ཤུ་རྩ་གཅིག་བྱ་སྟེ། བརྒྱ་རྩ་བརྒྱད་བཟླས་པས་རིམས་ཐམས་ཅད་ཡོངས་སུ་གྲོལ་བར་བྱེད་དོ། །ནད་ཐམས་ཅད་ལ་བྱབས་པས་ཡོངས་སུ་གྲོལ་བར་བྱེད་དོ། །མཚོན་ཆས་སམ་རྨ་བྱའི་སྒྲོས་སམ། མདའ་ཡིས་ཡང་རུང་སྟེ་ནད་ཐམས་ཅད་ལས་ཡོངས་སུ་གྲོལ་བར་བྱེད་དོ། །གདོན་ཐམས་ཅད་ལ་ཚོན་སྐུད་སྣ་ལྔའི་སྐུད་པ་ལ་མདུད་པ་ལན་ཉི་ཤུ་རྩ་གཅིག་བྱས་ཏེ་བཟླས་བརྗོད་ལན་བརྒྱ་རྩ་བརྒྱད་བྱས་ཏེ་གདོན་གྱིས་ཟིན་པ་དེའི་མགུལ་བར་བཅིངས་ཏེ་ལན་བདུན་དུ་བྱ་བ་པར་བྱའོ། །གུ་གུལ་བདུག་པ་སྦྱིན་པར་བྱ། བཟླས་བརྗོད་ལན་བདུན་བྱ་བཞིན་པ་དང་བཅས་པས་གང་དང་གང་གི་གདོན་གྱིས་ཟིན་པར་གྱུར་པ་དེ་ཡང་རང་གི་ལུས་ཀྱིས་ངེས་པར་འགྲོ་སྟེ། རིག་སྔགས་འཆང་གི་མདུན་དུ་ཉེ་བར་འདུག་ནས་ཐམས་ཅད་སྨྲ་བར་བྱེད་དོ། །རང་གིས་དྲིས་པ་དེ་ཐམས་ཅད་སྨྲ་བར་བྱེད་དོ། །བཀའ་བསྒོ་བ་ཐམས་ཅད་བྱེད་པར་འགྱུར་རོ། །འཐབ་པ་དང་། འཐབ་རྩོད་དང་། རྩོད་པ་དང་། འགྱེད་པ་རྣམས་ཐམས་ཅད་ལ་སྨྲ་བའི་མཆོག་ཏུ་འགྱུར་རོ། །གཞན་ཡང་བསམ་གཏན་དང་། སྦྱིན་སྲེག་གིས་ཡོངས་སུ་གྲོལ་ལོ། །ཁར་མུར་ཏེ། རྒྱལ་པོའི་ཁབ་ཏུ་ཞུགས་ན་རྒྱལ་པོ་འཁོར་དང་བཅས་པ་དབང་དུ་གྱུར་ནས་གནས་སོ། །དུག་འཐུངས་པས་ཆུ་ལ་ཡོངས་སུ་བཟླས་ཏེ་སྦྱིན་པར་
བྱ་སྟེ་དུག་མེད་པར་འགྱུར་རོ། །དུག་གིས་ཟོས་པ་ལ་བྱབ་པར་བྱ་སྟེ། དུག་མེད་པར་འགྱུར་རོ། །དུག་དང་བྱད་སྟེམས་དང་། གསང་སྔགས་དང་། ཕྱེ་མའི་སྦྱོར་བ་ཐམས་ཅད་ལ་དྲི་དང་བསྲེས་པའི་བུམ་པ་ལ་སྟོང་ཕྲག་བརྒྱད་ཡོངས་སུ་བཟླས་པ་
བྱས་ལ་བཀྲུ་བར་བྱ་སྟེ། བཀྲུས་པ་ཙམ་གྱི་མདོ་ལ་ཐམས་ཅད་ཉམས་པར་བྱེད་དོ། །གང ་ཡང་ལུས་ཟད་པ་དང་ཉམས་པ་དང་། བསྐམས་པ་དང་། རྒྱལ་པོའི་དཔལ་མེད་པ་དང་། ལུས་ཡོངས་སུ་གདུངས་པ་ལ་རིག་སྔགས་འཆང་དེས་མ་རེག་པས་དྲིའི་ཆུས་ཡོངས་སུ་གང་བའི་བུམ་པ་དགུ་ཡུངས་ཀར་གྱིས་གཏོར་ཏེ་སྟོང་ཕྲག་བརྒྱད་ཡོངས་སུ་བཟླས་བརྗོད་བྱའོ། །དེ་ནས་ཨཱནྟ་ར་སཔྟ་དང་། བཱི་ཀ་དང་། ཨཱ་ཊ་དང་། བིལ་བ་དང་། ཤུ་ཏི་དང་། ཉེའུ་ཤིང་དང་། ཨེ་ཀསྠཱ་ན་དང་། མོ་ལོ་ཀྱ་དང་། ལུས་ཀྱི་མར་གྱིས་བསྐུ་མཉེ་བྱས་ནས་ལན་བརྒྱ་རྩ་བརྒྱད་བཟླས་བརྗོད་བྱས་ཏེ། ཨཱ་ཊ་བྱུག་པར་བྱའོ། །གཟུགས་བརྙན་བྱ་སྟེ། གོང་བུ་དེ་མཚོན་ཆས་དུམ་བུ་བརྒྱད་དུ་བྱ་སྟེ། སྣོད་ཡོངས་སུ་གང་བ་བཞིར་འཕང་བར་བྱ་ཞིང་། སྣོད་གང་བ་བཞི་མཚམས་བཞིར་འཕང་བར་བྱའོ། །དེ་ནས་སྙིང་པོས་ལན་བརྒྱ་རྩ་བརྒྱད་དུ་བྱབ་པར་བྱའོ། །དེ་ནས་ནེའུ་སིང་སྔོན་པོ་གང་དུ་ཆུ་རྒྱུན་འབབ་པར་དྲིའི་ཆུའི་བུམ་པས་ཁྲུས་བྱས་ཤིང་གོས་དཀར་པོ་དགུས་གཡོགས་པར་བྱའོ། །འཕགས་པ་སྤྱན་རས་གཟིགས་དབང་ཕྱུག་ལ་མཆོད་པ་བྱ་ཞིང་། དཀོན་མཆོག་གསུམ་ལ་མཆོད་པ་བྱའོ། །ཇི་ལྟར་འབྱོར་པའི་བྲམ་ཟེའི་སྟོན་མོ་ཡོན་དང་བཅས་པ་བྱའོ། །དེ་ནས་རང་ཉིད་བྱམས་པ་དང་ལྡན་པར་བྱའོ། །ཇི་ལྟར་འབྱོར་པ་གྱ་ནོམ་པ་གྱ་ནོམ་པས་དཀར་བའི་ཟས་ཀྱི་བཟའ་བ་དང་བཏུང་བས་ཚིམ་པར་བྱའོ། །དེ་ནས་དཔལ་མེད་པ་ཐམས་ཅད་དང་། ནད་ཐམས་ཅད་དང་། བགེགས་དང་། ལོག་པར་འདྲེན་པ་ཐམས་ཅད་ཀྱིས་མི་རེག་པ་དང་། འབྱུང་པོ་དང་། གནོད་སྦྱིན་དང་། སྲིན་པོ་དང་། གྲིབ་གནོན་དང་། བརྗེད་བྱེད་དང་། གཟའ་དང་ལོག་འདྲེན་གྱིས་ཟིན་པ་ལས་ཡོངས་སུ་གྲོལ་ལོ། །བཟའ་ཉེས་དང་། འགོམ་ཉེས་དང་། འཇིགས་པ་ཐམས་ཅད་ལས་ཡོངས་སུ་གྲོལ་བར་བྱེད་དོ། །ལུས་ཀྱི་ཕུང་པོ་ཡོངས་སུ་རྫོགས་པར་འགྱུར་རོ། །ཐམས་ཅད་དུ་འཇིགས་པ་འཇིགས་
པར་བྱེད་པའི་འཇིགས་པ་མེད་པར་འགྱུར་རོ། །སྡིག་པ་དང་སྒྲིབ་པ་དང་། ཀུན་ནས་ཉོན་མོངས་པ་ཐམས་ཅད་ལས་ཡོངས་སུ་གྲོལ་བར་འགྱུར་རོ། །རིང་དུ་འཚོ་བར་འགྱུར་རོ། །ནད་ཐམས་ཅད་དང་བྲལ་བར་འགྱུར་རོ། །སྐྱེ་བ་བརྗེས་ནས་བདེ་བ་ཅན་གྱི་འཇིག་རྟེན་གྱི་ཁམས་སུ་སྐྱེ་བར་འགྱུར་རོ། །སྐྱེ་བའི་སྐྱེ་བ་དྲན་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱིས་རྟག་ཏུ་ཡང་དགོངས་པར་འགྱུར་རོ། །བྱང་ཆུབ་སེམས་དཔའ་དང་ལྷ་ཐམས་ཅད་ཀྱིས་ཇི་སྲིད་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཀྱི་བར་དུ་དེ་འཛིན་པར་འགྱུར་རོ། །མིག་ན་བ་ལ་པ་ལཱ་ཤའི་ཆུ་དང་། ཤིང་མངར་གྱི་ཆུ་དང་། དྲི་མ་མེད་པའི་ཆུ་ལ་ལན་བརྒྱ་རྩ་བརྒྱད་ཡོངས་སུ་བཟླས་ཏེ་སྦྱར་བར་བྱ་སྟེ་མིག་ནད་འཕྲལ་དུ་ཞི་བར་བྱེད་དོ། །མགོ་བོའི་ཟུག་རྔུ་དང་། གཞོགས་ཕྱེད་ན་བ་ལ། མར་དང་ཏིལ་མར་ལ་ལན་བརྒྱ་རྩ་བརྒྱད་ཡོངས་སུ་བཟླས་ནས་འཇམ་པར་བསྲོས་པས་སྨན་ཤུ་ཏི་ལ་བསྒོས་ནས་མགོ་ལ་བསྐུ་མཉེ་བྱས་ན། མགོ་བོའི་ནད་ཐམས་ཅད་དང་། གཞོགས་ཕྱེད་ན་བའི་ནད་ཐམས་ཅད་ཡོངས་སུ་གྲོལ་ལོ། །སོའི་ཟུག་རྔུ་ལ་མེ་ཏོག་སྣ་མ་དང་། སོ་ཤིང་ལ་ལན་བརྒྱ་རྩ་བརྒྱད་དུ་ཡོངས་སུ་བཟླས་ནས་བཟའ་བར་བྱས་ན་སོའི་ཟུག་རྔུ་ཡོངས་སུ་གྲོལ་ལོ། །རྣ་བའི་ཟུག་རྔུ་ལ། ཤུ་ཏི་དང་ཏིལ་མར་ལ་བརྒྱ་རྩ་བརྒྱད་ཡོངས་སུ་བཟླས་པས་བཀང་བར་བྱ་སྟེ་རྣ་བའི་ཟུག་རྔུ་ཐམས་ཅད་ཡོངས་སུ་གྲོལ་ལོ། །ཁ་ན་བ་ལ། སྨན་མ་ཤཱུ་རོའི་ཆུ་དང་། མར་ལ་བརྒྱ་རྩ་བརྒྱད་བཟླས་ནས་འཇམ་པར་བསྲོས་པ་བཏུང་བར་བྱ་སྟེ་ཁའི་ནད་ཐམས་ཅད་ཡོངས་སུ་གྲོལ་ལོ། །ལྟོ་བའི་ཟུག་རྔུ་ལ་ལན་ཚྭ་དང་ཆུ་ལ་ལན་བརྒྱ་རྩ་བརྒྱད་ཡོངས་སུ་བཟླས་ནས་བཏུང་བར་བྱ་སྟེ་ལྟོ་བའི་ཟུག་རྔུ་ཡོངས་སུ་གྲོལ་ལོ། །སྙིང་གི་ཟུག་རྔུ་ལ། སོ་སོ་རྩ་ལམ་དང་། གོ་སྙོད་དང་པུ་སྐ་རའི་རྩ་བ་རྣམས་བཞི་འགྱུར་གྱི་ཆུའི་སུམ་ཆ་ལྷག་མར་ལུས་ཀྱི་བར་དུ་བསྐོལ་བར་བྱས་ནས་བཏུང་བར་བྱའོ། །ལན་བརྒྱད་བཟླས་པས་སྙིང་གི་ཟུག་རྔུ་དང་། གཞོགས་ན་བ་དང་། མཆིན་པ་ན་བ་དང་། མཚན་བར་རྡོལ་བ་དང་། གསུད་པ་དང་སྐྱུག་བྲོ་བ་དང་། གཅིན་ནད་རྣམས་ཏེ། དེ་བཞིན་དུ་ནད་ཐམས་ཅད་འཕྲལ་དུ་སེལ་བར་འཇིག་རྟེན་གྱི་
མགོན་པོས་འདི་གསུངས་སོ། །རྒྱལ་པོའི་འཇིགས་པས་འཇིགས་པ་རྣམས་ཀྱིས་ཡུངས་ཀར་ལ་ཡོངས་སུ་བཟླས་ནས་རྒྱལ་པོ་རྣམས་ཀྱི་སྒོར་གཏོར་བར་བྱ་སྟེ། རྒྱལ་པོའི་འཇིགས་པའི་འཇིགས་པ་ཐམས་ཅད་ལས་ཡོངས་སུ་གྲོལ་བར་འགྱུར་ཏེ། ཐམས་ཅད་དུ་ཡང་རྒྱལ་བ་སྟེར་བར་འགྱུར་རོ། །ན་ལེ་ཤམ་ལ་སྟོང་རྩ་བརྒྱད་ཡོངས་སུ་བཟླས་ཏེ། ན་ལེ་ཤམ་གྱི་འབྲས་བུ་ཁའི་རྩེ་མོར་བཅུག་སྟེ་བཅངས་ན། གང་སྨྲས་པ་དེ་དབང་དུ་འགྱུར་རོ། །གང་བླངས་པ་དེ་སོ་སོར་རྙེད་དོ། །གནས་ཐམས་ཅད་དུ་འགྲོ་བ་རྣམས་ལ་རྒྱལ་བའི་མཆོག་ཆེན་པོ་སྦྱིན་པར་འགྱུར་རོ། །ཀླུའི་ཆར་འབེབས་པ་ལ་བལ་པོ་སེའུའི་ལྕུག་མས་བྱ་སྟེ་གང་དུ་འདོད་པ་དེར། ཀླུའི་ཆར་འབེབས་སོ། །ཀླུའི་མཚོར་སོང་ནས་མཚན་མོ་བདུན་དུ་ཞོ་དང་། སྦྲང་རྩི་དང་། མར་དང་། ཡུངས་ཀར་གྱི་སྦྱིན་སྲེག་ལན་སྟོང་རྩ་བརྒྱད་དུ་བྱས་ན། གཏེར་ཆེན་པོ་རྙེད་པར་འགྱུར་རོ། །དབང་ཕྱུག་ཐོབ་པ་ལ་འབྲས་ཡོས་དང་། ཡུངས་ཀར་དང་། མར་དང་བསྲེས་པས་སྦྱིན་སྲེག་ལན་སྟོང་རྩ་བརྒྱད་དུ་བྱས་ན་དབང་ཕྱུག་ཆེན་པོ་སོ་སོར་ཐོབ་པར་འགྱུར་རོ། །དགྲ་འཇོམས་པ་ལ་སཱ་ལུའི་ཕུབ་མ་དང་། ལན་ཚྭ་དང་། ཚ་བའི་ཏིལ་མར་དང་། བསྲེས་པས་ལན་སྟོང་རྩ་བརྒྱད་སྦྱིན་སྲེག་བྱས་ན་དགྲ་ཐམས་ཅད་མེད་པར་འགྱུར་རོ། །དགྲ་རྣམས་ཐམས་ཅད་རབ་ཏུ་འདུལ་བར་འགྱུར་རོ། །སྐྲོད་པར་འདོད་པས། དེ་ཉིད་ཀྱི་ཐལ་བ་ལས་ལན་ཉི་ཤུ་རྩ་གཅིག་ཏུ་བཟླས་ཏེ། དགྲའི་སྒོར་གཏོར་བར་བྱ་སྟེ། མཚན་མོ་གཅིག་ཏུ་མི་གནས་ཏེ། ཕྱོགས་དང་ཕྱོགས་མཚམས་རྣམས་སུ་འབྲོས་པར་བྱེད་དོ། །འཁྲུག་པའི་གཡུལ་ངོར་འཇུག་པར་འདོད་པས་ཡུངས་ཀར་ལ་ལན་སྟོང་ཕྲག་བརྒྱད་དུ་ཡོངས་སུ་བཟླས་ཏེ། འཁྲུག་པའི་གཡུལ་ངོའི་དབུས་སུ་གཏོར་བར་བྱ་སྟེ། ཐམས་ཅད་དུ་རྨུགས་པ་དང་། རེངས་པ་དང་། རྨོངས་པར་འགྱུར་ཏེ་ཐམས་ཅད་དུ་རྒྱལ་བ་སྟེར་བར་འགྱུར་ཞིང་། ཐམས་ཅད་ཕྱོགས་དང་ཕྱོགས་མཚམས་རྣམས་སུ་འབྲོས་པར་བྱེད་དོ། །གནས་ན་གནས་པ་ཐམས་ཅད་ཀྱི་ཡང་རྒྱལ་བ་སྟེར་བར་འགྱུར་རོ། །ཐམས་ཅད་དུ་ཐོགས་པ་མེད་པའི་སྟོབས་དང་། བརྩོན་འགྲུས་དང་། ཕ་རོལ་གནོན་པར་འགྱུར་རོ། །ལྡོང་རོས་ལ་ལན་
སྟོང་ཕྲག་བརྒྱད་ཡོངས་སུ་བཟླས་ཏེ། མིག་གི་མིག་སྨན་དུ་བྱས་ན་མི་སྣང་བར་འགྱུར་ཏེ། འབྱུང་པོ་དང་། གནོད་སྦྱིན་དང་། སྲིན་པོ་ཐམས་ཅད་ཀྱིས་མི་མཐོང་བར་འགྱུར་རོ། །གི་ཝཾ་ལ་ལན་སྟོང་ཕྲག་བརྒྱད་ཡོངས་སུ་བཟླས་ཏེ་ཐིག་ལེ་བྱས་ནས་བུ་ག་ཐམས་ཅད་དུ་རབ་ཏུ་འཇུག་པར་བྱེད་ཅིང་། བུ་གའི་སྒོ་ཐམས་ཅད་བྱེ་སྟེ་སྒོར་གནས་པར་བྱེད་དོ། །གང་དུ་འདོད་པ་དེར་འཇུག་པར་བྱེད་དོ། །གི་ཝཾ་གིས་སྙིང་གར་ཐིག་ལེ་ བྱས་ནས། གང་དུ་འཇུག་པར་བྱེད་པ ་དེ་དང་དེ་ཉིད་དུ། མཆོད་པ་ཆེན་པོར་འགྱུར་ཏེ། ནོར་ཆེ་བ་དང་། འབྲུ་འཕེལ་བ་ཐོབ་བོ། །ལག་པ་གཉིས་ལ་བྱུགས་པས་གང་ལ་རེག་པ་དེ་དབང་དུ་འགྱུར་ཏེ། གང་བླངས་པ་དེ་ཐམས་ཅད་སོ་སོར་རྙེད་དོ། །རྒྱལ་པོ་དབང་དུ་བྱེད་པར་འདོད་པས། ལག་པ་གཡས་པ་ལ་གི་ཝཾ་གིས་བྱུགས་ནས་ལན་སྟོང་རྩ་བརྒྱད་ཡོངས་སུ་བཟླས་ཏེ། རྒྱལ་པོའི་སྒོ་ལ་ཐལ་ལྕག་སྦྱིན་པར་བྱ་སྟེ། རྒྱལ་པོ་དང་བཙུན་མོ་སྲས་དང་འཁོར་དང་བཅས་པ་བདག་ཉིད་དང་ནོར་གྱིས་ཀྱང་དབང་དུ་འགྱུར་རོ། །བུད་མེད་དབང་དུ་བྱེད་པ་ལ་མེ་ཏོག་དང་འབྲས་བུ་ལ་ལན་སྟོང་ཕྲག་བརྒྱ་རྩ་བརྒྱད་དུ་ཡོངས་སུ་བཟླས་ནས་སྦྱིན་པར་བྱ། ཡང་ན་མངག་པར་བྱ་སྟེ། འཕྲལ་ཉིད་དུ་དབང་དུ་བྱེད་པར་འགྱུར་རོ། །གང་དུ་འདོད་པ་དེ་དང་དེ་ཉིད་དུ་འགྲོའོ། །སླར་ཡང་འོང་ངོ་། །ཡང་ན་མིང་སྨོས་པས་ནམ་མཁའ་ལ་འཕང་བར་བྱ་སྟེ། གང་གི་མིང་སྨོས་པ་དེ་འགུགས་པར་འགྱུར་ཞིང་། མཚན་མོ་འོང་བར་བྱེད་དོ། །མཐུ་སྟོབས་ཀྱིས་སླར་ཡང་ཕྱིར་ལྡོག་སྟེ་འགྲོའོ། །སྐྱེས་པ་དབང་དུ་བྱེད་པ་ལ། ཛཱ་ཏི་དང་སྣ་མའི་མེ་ཏོག་ལ་ལན་བདུན་ཡོངས་སུ་བཟླས་ཏེ་སྦྱིན་པར་བྱའོ། །ཡང་ན་མངག་པར་བྱ་སྟེ། རེག་པ་ཙམ་གྱིས་བདག་ཉིད་དང་ནོར་གྱིས་ཀྱང་དབང་དུ་བྱེད་པར་འགྱུར་རོ། །གང་སྨྲས་པ་དང་། གང་བླངས་པ་དེ་ཐམས་ཅད་བྱེད་དོ། །འབངས་དང་ཅི་བསྒོ་བ་བྱེད་པར་འགྱུར་རོ། །གཞོན་ནུ་མ་དབང་དུ་བྱེད་པ་ལ། འབྲས་བུ་ལ་ལན་བརྒྱ་རྩ་བརྒྱད་ཡོངས་སུ་བཟླས་ཏེ་སྦྱིན་པར་བྱ་བའམ། མངག་པར་བྱ་སྟེ་བཟུང་བ་ཙམ་གྱིས་དབང་དུ་འགྱུར་རོ། །གྲིབ་མ་བཞིན་དུ་རྗེས་སུ་འབྲང་བར་འགྱུར་ཞིང་ཇི་སྲིད་འཚོ་བར་ཉེ་བར་གནས་པར་འགྱུར་རོ། །རྗེ་རིགས་དབང་དུ་བྱེད་པ་ལ། བ་ཤ་ཀའི་མེ་
ཏོག་ལ་ལན་བརྒྱ་རྩ་བརྒྱད་ཡོངས་སུ་བཟླས་ཏེ། སྦྱིན་པར་བྱ་སྟེ་དབང་དུ་གྱུར་ནས་ཉེ་བར་གནས་སོ། །བྲམ་ཟེ་དབང་དུ་བྱེད་པས་ཞོ་དང་འོ་མའི་བཟའ་བ་ལ་ལན་བརྒྱ་རྩ་བརྒྱད་ཡོངས་སུ་བཟླས་ནས་སྦྱིན་པར་བྱ་སྟེ། བྲམ་ཟེ་དབང་དུ་བྱེད་པ་གྲུབ་བོ། །རྒྱལ་རིགས་དབང་དུ་བྱེད་པ་ལ། བུ་རམ་དང་འོ་མ་ལ་ལན་བརྒྱ་རྩ་བརྒྱད་ཡོངས་སུ་བཟླས་ནས་སྦྱིན་པར་བྱ་སྟེ་དབང་དུ་འགྱུར་རོ། །དམངས་རིགས་དབང་དུ་བྱེད་པ་ལ། གང་དང་གང་གི་བཟའ་བ་ལ་ལན་བརྒྱ་རྩ་བརྒྱད་ཡོངས་སུ་བཟླས་ཏེ་སྦྱིན་པར་བྱ་སྟེ་ཟོས་པ་ཙམ་གྱི་མོད་ལ་དབང་དུ་འགྱུར་རོ། །རང་གི་འདོད་པའི་བྱ་བ་གཞན་རྣམ་པ་སྣ་ཚོགས་པ་བྱ་བ་རྣམས་ནི་བཀླགས་པས་གྲུབ་པར་འགྱུར་རོ། །དོན་ཡོད་པདྨའི་ཆུ་སྐྱེས་ཀྱི་རྩ་བའི་སྙིང་པོའི་ཡོ་བྱད་དང་ཆོ་གའི་སྒྲུབ་ཐབས་སོ། །དེ་ནས་དོན་ཡོད་པའི་ཕྱག་རྒྱ་དབང་བསྐུར་བའི་གཟུངས་ཀྱི་ཡོ་བྱད་དང་། ཆོ་གར་འགྱུར་ཏེ། གཟུངས་འདིའི་རིག་སྔགས་འཆང་གིས་དྲན་པ་ཙམ་དང་། བཀླགས་པ་དང་། ཕྱག་རྒྱ་བཟུང་བ་ཙམ་གྱིས་དེ་བཞིན་གཤེགས་པ་ཐམས་ཅད་ཀྱི་ཡིད་བཞིན་གྱི་ནོར་བུའི་གསང་བའི་ཕྱག་རྒྱ་དང་། དབང་བསྐུར་བའི་ཕྱག་རྒྱ་དྲན་པར་འགྱུར་རོ། །རིག་པའི་རྒྱལ་པོའི་གཟུངས་སྟོང་ཕྲག་བཟླས་པ་འདིས་དུས་གསུམ་དུ་གཤེགས་པའི་དེ་བཞིན་གཤེགས་པ་ཐམས་ཅད་ཀྱིས་གསང་བའི་ཕྱག་རྒྱས་མངོན་པར་དབང་དུ་བསྐུར་བར་འགྱུར་རོ། །རིག་སྔགས་འཆང་དེས་ཀྱང་དང་པོར་རྨི་ལམ་གྱི་ནང་དུ་མཐོང་ངོ་། །དུས་གསུམ་དུ་གཤེགས་པའི་སངས་རྒྱས་བཅོམ་ལྡན་འདས་ཐམས་ཅད་ཀྱིས་རྣམ་པར་སྣང་མཛད་ཡིད་བཞིན་ནོར་བུའི་ཕྱག་རྒྱའི་དབང་བསྐུར་བས། མངོན་པར་དབང་སྐུར་བར་བྱེད་དོ། །དེ་ཡང་དེ་བཞིན་གཤེགས་པའི་རིགས་ཀྱིས་མངོན་པར་དབང་བསྐུར་བ་དང་། དཀྱིལ་འཁོར་དང་། ཕྱག་རྒྱ་ལ་རབ་ཏུ་འཇུག་པར་བྱེད་དོ། །དེ་བཞིན་གཤེགས་པ་རང་རང་རྣམས་ཀྱང་དེ་བཞིན་གཤེགས་པའི་གསང་བའི་དབང་བསྐུར་བ་རྗེས་སུ་སྦྱིན་པར་འགྱུར་རོ། །ལེགས་སོ་ཞེས་བྱ་བའི་སྒྲ་བརྗོད་པར་མཛད་དོ། །སངས་རྒྱས་ཀྱི་ཞིང་ཐམས་ཅད་ཀྱི་སྒོ་རྣམས་བྱེ་བར་གྱུར་པའི་སྒོར་མཐོང་ངོ་། །གང་དུ་འདོད་པ་དེར་འཇུག་གོ། །དེས་ཀྱང་དེ་བཞིན་གཤེགས་པའི་གངྒཱའི་ཀླུང་གི་བྱེ་མ་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་དགུ་
དང་མཉམ་པའི་སངས་རྒྱས་བཅོམ་ལྡན་འདས་རྣམས་རིག་སྔགས་འཆང་དེ་སྲིད་འཚོའི་བར་ཏུ་རྟག་ཏུ་རྗེས་སུ་འབྲང་བར་འགྱུར་རོ། །རྟག་ཏུ་མཐོང་བ་དང་ལྡན་པར་གནས་སོ། །སྟོང་ཕྲག་གཉིས་པ་བཟླས་པས། གཉིས་པར་རྨི་ལམ་མཐོང་བར་བལྟའོ། །པདྨའི་རིགས་ཀྱི་དཀྱིལ་འཁོར་གང་ལ་ཡང་། ཡིད་བཞིན་གྱི་ནོར་བུའི་ཕྱག་རྒྱ་དང་། གཟུངས་དང་། གཞལ་མེད་ཁང་མཐའ་དག་ཡོངས་སུ་རྫོགས་པར་མཐོང་ངོ་། །དེར་ཡང་དུས་གསུམ་དུ་གཤེགས་པའི་གཞལ་མེད་ཁང་ཐམས་ཅད་མཐོང་ངོ་། །དེ་བཞིན་གཤེགས་པའི་གཞལ་མེད་ཁང་མཐོང་ངོ་། །དེ་ལ་ཡང་དེ་བཞིན་གཤེགས་པ་པདྨའི་རིགས་ཐམས་ཅད་ཀྱིས་ཡིད་བཞིན་གྱི་ནོར་བུའི་ཕྱག་རྒྱའི་དབང་བསྐུར་བས་མངོན་པར་དབང་བསྐུར་བར་འགྱུར་རོ། །རང་རང་གི་དེ་བཞིན་གཤེགས་པའི་གསང་བའི་ཕྱག་རྒྱས་མངོན་པར་དབང་བསྐུར་བ་དང་། དཀྱིལ་འཁོར་རྣམས་སྟོན་པར་མཛད་དོ། །རིག་སྔགས་འཆང་རང་ཉིད་ལ་ཡང་། མངོན་པར་དབང་སྐུར་བར་བྱེད་དོ། །ལེགས་སོ་ལེགས་སོ། །ཞེས་བྱ་བའི་སྒྲ་རྗོད་པར་བྱེད་དོ། །པདྨོ་ཡངས་པའི་དཀྱིལ་འཁོར་ཐམས་ཅད་དུ་ཡང་ཕྱག་རྒྱས་མངོན་པར་དབང་བསྐུར་བར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབ་པ་ཡིད་བཞིན་གྱི་ནོར་བུ་ཆེན་པོའི་ཕྱག་རྒྱས་མངོན་པར་དབང་བསྐུར་བས་མངོན་པར་དབང་བསྐུར་བར་འགྱུར་ཞིང་། ཡོངས་སུ་འཛིན་པར་ཡང་འགྱུར་རོ། །སྟོང་ཕྲག་གསུམ་པ་བཟླས་པས་རྨི་ལམ་ཆེན་པོ་གསུམ་པ་བསྟན་པ་མཐོང་སྟེ། གཞལ་མེད་ཁང་མཐའ་དག་ཏུ་རབ་ཏུ་གནས་པའི་རྡོ་རྗེའི་རིགས་ཀྱི་ཕྱག་རྒྱ་དང་། མངོན་པར་དབང་བསྐུར་བ་རྗེས་སུ་སྩོལ་བར་མཛད་དོ། །དེ་བཞིན་གཤེགས་པ་ཐམས་ཅད་དུས་གསུམ་དུ་གཤེགས་ཤིང་རབ་ཏུ་བཞུགས་པའི་དེ་བཞིན་གཤེགས་པའི་ཡིད་བཞིན་གྱི་ནོར་བུ་རྡོ་རྗེ་བྱིན་གྱིས་རློབ་པའི་མངོན་པར་དབང་བསྐུར་བ་དང་ཕྱག་རྒྱ་ཡང་མཐོང་ངོ་། །དེ་ཡང་དུས་གསུམ་དུ་གཤེགས་པའི་དེ་བཞིན་གཤེགས་པ་རྣམས་ཐམས་ཅད་རིག་སྔགས་འཆང་ལ་རྡོ་རྗེའི་ཕྱག་རྒྱས་མངོན་པར་དབང་བསྐུར་བ་དང་། ཡིད་བཞིན་གྱི་ནོར་བུའི་ཕྱག་རྒྱས་མངོན་པར་དབང་བསྐུར་བས། ཡིད་བཞིན་གྱི་ནོར་བུའི་ཕྱག་རྒྱས་མངོན་པར་དབང་སྐུར་བར་མཛད་དོ། །
རང་རང་རྣམས་ཀྱང་རྡོ་རྗེའི་ཕྱག་རྒྱས་མངོན་པར་དབང་བསྐུར་བ་རྗེས་སུ་སྩོལ་བར་མཛད་དོ། །དེ་བཞིན་གཤེགས་པ་ཐམས་ཅད་རྡོ་རྗེའི་དམ་ཚིག་ལ་རབ་ཏུ་འཇུག་པར་མཛད་དོ། །རྡོ་རྗེ་བྱིན་གྱིས་བརླབས་པའི་མངོན་པར་དབང་བསྐུར་བ་ལེགས་སོ་ལེགས་སོ་ཞེས་བྱ་བའི་སྒྲ་རྗོད་པར་མཛད་དོ། །དེ་བཞིན་གཤེགས་པ་ཐམས་ཅད་རྡོ་རྗེའི་རིགས་ཡང་དག་པར་བྱིན་གྱིས་རློབ་པའི་དངོས་གྲུབ་ཉེ་བར་སྟོན་པར་མཛད་དོ། །ཐམས་ཅད་དུ་རྡོ་རྗེའི་རིགས་ཀྱི་ཕྱག་རྒྱས་མངོན་པར་དབང་སྐུར་བར་འགྱུར་རོ། །སྟོང་ཕྲག་བཞི་པ་བཟླས་པས་ནོར་བུའི་རིགས་ཀྱི་དཀྱིལ་འཁོར་ཆེན་པོའི་ཕྱག་རྒྱའི་དབང་བསྐུར་བ་ཐོབ་བོ། དེ་ལ་ཡང་ནོར་བུའི་རིགས་ཆེན་པོའི་དཀྱིལ་འཁོར་གྱི་ཕྱག་རྒྱའི་དབང་བསྐུར་བ་ཐོབ་པོ། །རྨི་ལམ་སྟོན་པ་དེ་ཡང་དུས་གསུམ་པའི་དེ་བཞིན་གཤེགས་པ་ནོར་བུའི་ཕྱག་རྒྱས་དབང་བསྐུར་བའི་དཀྱིལ་འཁོར་རྣམས་མཐོང་ངོ་། །དུས་གསུམ་པའི་དེ་བཞིན་གཤེགས་པ་དེ་རྣམས་ཐམས་ཅད་ཀྱང་། རིགས་སྔགས་འཆང་དེ་ལ་ནོར་བུའི་རིགས་ཀྱི་དམ་ཚིག་གསང་བ་དང་། ཕྱག་རྒྱ་དང་། དཀྱིལ་འཁོར་དང་། མངོན་པར་དབང་བསྐུར་བས་ཡང་མངོན་པར་དབང་སྐུར་བར་བྱེད་དོ། །རང་རང་རྣམས་ཀྱང་དེ་བཞིན་གཤེགས་པ་དེ་རྣམས་ཀྱི་ནོར་བུ་གསང་བའི་ཕྱག་རྒྱས་དབང་བསྐུར་བ་གཙུག་གི་ནོར་བུ་བྱིན་གྱིས་རློབ་པ་དང་། ཡིད་བཞིན་གྱི་ནོར་བུའི་ཕྱག་རྒྱས་མངོན་པར་དབང་སྐུར་བར་བྱེད་དོ། །དེ་བཞིན་གཤེགས་པ་ཐམས་ཅད་སངས་རྒྱས་ཀྱི་ཞིང་གི་ནོར་བུའི་དཀྱིལ་འཁོར་རྣམས་ཉེ་བར་སྟོན་པར་མཛད་དོ། །ཡིད་བཞིན་གྱི་ནོར་བུའི་དངོས་གྲུབ་ཀྱི་དམ་ཚིག་གི་དབང་བསྐུར་བ་དང་། ཡིད་བཞིན་གྱི་ནོར་བུའི་ཕྱག་རྒྱས་མངོན་པར་དབང་བསྐུར་བར་བྱའོ། །ལེགས་སོ་ལེགས་སོ་ཞེས་བྱ་བའི་སྒྲ་རྗོད་པར་བྱེད་ཅིང་རྟག་ཏུ་རྗེས་སུ་འབྲང་བར་འགྱུར་རོ། །དེ་བཞིན་གཤེགས་པ་དེ་རྣམས་ཀྱང་ཇི་སྲིད་སངས་རྒྱས་ཀྱི་བར་དུ་དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་པ་བྱིན་གྱིས་རློབ་པར་ཡང་དག་པར་དགོངས་པར་འགྱུར་རོ། །ཡིད་བཞིན་གྱི་ནོར་བུའི་རིགས་ཆེན་པོའི་ཕྱག་རྒྱས་མངོན་པར་དབང་བསྐུར་བར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་ནོར་བུའི་རིགས་ཀྱི་གསང་བའི་སྙིང་པོའི་མཆོག་ཏུ་འགྱུར་རོ། །བཟླས་པ་ལྔ་པས་
རྨི་ལམ་ཆེན་པོའི་ཕྱག་རྒྱ་སྟོན་པར་བྱེད་པ་ནི། དཀྱིལ་འཁོར་ཆེན་པོ་མཐའ་དག་རྫོགས་པར་ཕྱིར་མི་ལྡོག་པའི་གནས་ཀྱི་མངོན་པར་དབང་བསྐུར་བས་མངོན་པར་དབང་བསྐུར་བར་མཐོང་ངོ་། །དེ་བཞིན་གཤེགས་པ་ཐམས་ཅད་ཀྱིས་ཀྱང་ཕྱིར་མི་ལྡོག་པ་ཆེན་པོའི་དཀྱིལ་འཁོར་ཆེན་པོར་མངོན་པར་དབང་སྐུར་བར་མཛད་དོ། །དཀྱིལ་འཁོར་ཐམས་ཅད་དང་། ཕྱག་རྒྱ་ཆེན་པོ་མངོན་པར་དབང་བསྐུར་བར་འགྱུར་རོ། །བཟླས་པ་དྲུག་པས་རྨི་ལམ་ཡང་དག་པར་སྟོན་པ་ནི། དེ་བཞིན་གཤེགས་པ་ཐམས་ཅད་བྱང་ཆུབ་ཀྱི་སྙིང་པོར་གཤེགས་ཏེ་རྡོ་རྗེའི་གདན་བྱིན་གྱིས་རློབ་པས་བྱིན་གྱིས་བརླབས་ཏེ། མངོན་པར་དབང་བསྐུར་བར་འགྱུར་རོ། །དུས་གསུམ་པའི་དེ་བཞིན་གཤེགས་པ་ཐམས་ཅད་བཞུགས་པ་མཐོང་སྟེ་སེང་གེའི་གདན་ལ་བཞུགས་པའོ། །དེ་བཞིན་གཤེགས་པ་དེ་རྣམས་ཀྱང་རང་རང་གི་རིག་སྔགས་འཆང་ཕྱིར་མི་ལྡོག་པར་མངོན་པར་དབང་སྐུར་བར་མཛད་དོ། །ལེགས་སོ་ལེགས་སོ་ཞེས་བྱ་བའི་གསུང་རྗོད་པར་མཛད་དོ། །དགོངས་པ་ཆེར་བརྟན་པས་དགོངས་པར་འགྱུར་རོ། །ཇི་སྲིད་སངས་རྒྱས་ཀྱི་བྱང་ཆུབ་ལ་མཐར་ཐུག་གི་བར་དུ་དེ་བཞིན་གཤེགས་པ་ཐམས་ཅད་རྗེས་སུ་འབྲང་བར་འགྱུར་རོ། །བཟླས་པ་བདུན་པས་རྨི་ལམ་ཆེན་པོ་སྟོན་པས། དེ་བཞིན་གཤེགས་པ་མངོན་པར་རྫོགས་པར་སངས་རྒྱས་ཏེ། ཆོས་ཀྱི་འཁོར་ལོ་བསྐོར་བ་དང་། བདུད་འདུལ་བ་དང་། དམ་པའི་ཆོས་ཀྱི་ཆར་འབེབས་པ་དང་། ཆོས་ཀྱི་སྒྲོན་མེ་སྦར་བ་དང་། ཆོས་ཀྱི་རྒྱལ་མཚན་སྒྲེང་བ་དང་། དམ་པའི་ཆོས་ཀྱི་དུང་འབུད་པ་དང་། དེ་བཞིན་གཤེགས་པ་ཐམས་ཅད་ཕྱག་རྒྱ་ཆེན་པོས་མངོན་པར་དབང་བསྐུར་བ་མཐོང་ངོ་། །དེ་བཞིན་གཤེགས་པ་དེ་རྣམས་ཀྱིས་ཀྱང་ཕྱག་རྒྱས་མངོན་པར་དབང་བསྐུར་བ་དང་། ཆོས་ཀྱི་འཁོར་ལོ་བསྐོར་བ་དང་། བདུད་འདུལ་བ་དང་། ཕྱག་རྒྱས་དབང་བསྐུར་བས་མངོན་པར་དབང་སྐུར་བར་མཛད་དོ། །ལེགས་སོ་ལེགས་སོ་ཞེས་བྱ་བའི་སྒྲ་རྗོད་པར་མཛད་དོ། །ཕྱག་རྒྱ་ཆེན་པོ་དང་དཀྱིལ་འཁོར་དང་། ཀུན་ནས་གསང་བ་དང་། རྣམ་པར་ཐར་པའི་དཀྱིལ་འཁོར་དེ་ཁོ་ན་ཉིད་ཀྱི་དངོས་གྲུབ་དང་མངོན་པར་དབང་སྐུར་བར་མཛད་དོ། །དེ་བཞིན་དུ་བཀླགས་
པ་དང་། བཟླས་པ་ཙམ་གྱིས་ཆོ་ག་དང་ལས་ཀྱི་འབྲས་བུ་སྟོན་པར་མཛད་དོ། །དོན་ཡོད་པའི་ནོར་བུ་རྣམ་པར་སྣང་མཛད་ཀྱི་ཕྱག་རྒྱ་ཆེན་པོའི་གཟུངས་ཀྱི་རྣམ་པར་འཕྲུལ་པའི་ཆོ་ག་འདི་ཡང་རྣམ་པར་སྤྱོད་པར་འགྱུར་རོ། །འདི་བཀླགས་པ་དང་དྲན་པ་ཙམ་གྱིས་དེ་བཞིན་གཤེགས་པ་ཐམས་ཅད་ཀྱི་རྣམ་པར་སྣང་མཛད་ཀྱི་དཀྱིལ་འཁོར་ཆེན་པོར་རྗེས་སུ་འཇུག་པར་འགྱུར་རོ། །ཐམས་ཅད་དུ་གནས་ལ་གནས་པའི་དམ་ཚིག་ཤེས་པར་འགྱུར་རོ། །བཟླས་པ་ཙམ་གྱི་མོད་ལ་དུས་གསུམ་དུ་གཤེགས་པའི་དེ་བཞིན་གཤེགས་པ་ཐམས་ཅད་ཀྱིས་མཚན་ནས་སྨོས་ནས་མངོན་སུམ་དུ་སྟོན་པར་མཛད་དོ། །དེ་བཞིན་གཤེགས་པ་རྣམ་པར་སྣང་མཛད་སྟོན་པར་མཛད་པར་འགྱུར་རོ། མཚན་སྨོས་ནས་འཛིན་པར་འགྱུར་རོ། །དེ་བཞིན་གཤེགས་པ་ཐམས་ཅད་རྣམ་པར་སྣང་མཛད་ཀྱི་ཕྱག་རྒྱ་འཛིན་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་གསང་བའི་མཆོག་ཏུ་འགྱུར་རོ། །སྡིག་པ་དང་སྒྲིབ་པ་དང་། གདུག་པ་ཐམས་ཅད་དང་། མཚམས་མེད་པ་ལྔ་ལ་སོགས་པ་སྔོན་གྱི་སྡིག་པ་དང་། སྒྲིབ་པ་རྣམ་པར་འཇོམས་པར་བྱེད་དོ། །བཀླགས་པ་ཙམ་དང་། ལན་ཅིག་བཟླས་པ་ཙམ་གྱིས་དེ་ཐམས་ཅད་ཡོངས་སུ་ཟད་པ་དང་། ཡོངས་སུ་གཏུགས་པར་འགྱུར་རོ། །སེམས་ཅན་གྱི་སྡིག་པའི་ཆོས་གང་ཅུང་ཟད་ཀུན་ཏུ་སྤྱད་པ་དང་། མཚམས་མེད་པ་ལྔ་བྱེད་པ། མནར་མེད་པ་ལ་མཆོག་ཏུ་གཞོལ་བའི་སེམས་ཅན་དེའི་མདུན་དུ་ལན་གསུམ་དུ་དབྱངས་གསང་བསྟོད་པས་བརྗོད་ཅིང་། དྲན་པར་བྱ་སྟེ་དེའི་སྒྲ་ཐོས་པ་ཙམ་གྱི་མོད་ལ་སྡིག་པ་དང་། སྒྲིབ་པ་ཐམས་ཅད་དང་། མཚམས་མེད་པར་སོད་བ་ཐམས་ཅད་དང་། མནར་མེད་པ་ལ་མཆོག་ཏུ་གཞོལ་བ་རྣམས་ཡོངས་སུ་དག་པར་འགྱུར་རོ། །སེམས་ཅན་དེ་ཡང་སྡིག་པ་ཐམས་ཅད་ལས་ཡོངས་སུ་གྲོལ་བར་འགྱུར་རོ། །ཡང་ན་སྡིག་པ་ཅན་གྱི་སེམས་ཅན་ཤི་བར་གྱུར་པས་བསོད་ནམས་ཀྱི་དོན་དུ་བསོད་ནམས་འདོད་པས་སེམས་ཅན་དེའི་དོན་དུ་ཡུངས་ཀར་ལ་ལན་ཉི་ཤུ་རྩ་གཅིག་ཡོངས་སུ་བཟླས་ཏེ་སེམས་ཅན་དེའི་དོན་དུ་རོ་བསྲེག་པའམ་མཆད་པའམ། སྦས་པའམ། རུས་པའི་རྐང་རུས་སམ། དུར་ཁྲོད་ཀྱི་དབུས་
སུ་དེའི་སྟེང་དུ་གདབ་ཅིང་དེར་གཏོར་བར་བྱའོ། །གཏོར་བ་ཙམ་གྱི་མོད་ལ་སེམས་ཅན་དེ་གང་དང་གང་དུ་སྐྱེས་པ་དེ་དང་དེ་ཉིད་དུ་སེམས་ཅན་དེའི་ལུས་ལ་བྱང་ཆུབ་ཆེན་པོའི་ཡན་ལག་གི་ཆུའི་དྲིའི་མཆོག་བསྒོས་པར་འགྱུར་རོ། །འཕྲལ་ཉིད་དུ་དམྱལ་བ་དང་། དུད་འགྲོ་དང་། ཡི་དགས་དང་། གཤིན་རྗེའི་འཇིག་རྟེན་དང་། ལྷ་མ་ཡིན་གྱི་ལུས་ལས་ཡོངས་སུ་གྲོལ་བར་འགྱུར་རོ། །སྡིག་པ་དང་སྒྲིབ་པ་ཐམས་ཅད་ཡོངས་སུ་ཟད་པར་འགྱུར་རོ། །དེར་ཡང་ངན་འགྲོ་རྣམས་ལས་འཕོས་པར་འགྱུར་ཞིང་བདེ་བ་ཅན་གྱི་འཇིག་རྟེན་གྱི་ཁམས་སུ་སྐྱེ་བར་འགྱུར་རོ། །འདི་ལ་སོམ་ཉི་དང་ཡིད་གཉིས་བསྐྱེད་པར་མི་བྱའོ། །གང་གི་ཚེ་ནད་དྲག་པོས་ཐེབས་པར་གྱུར་པ་དེའི་ཚེ། རིག་སྔགས་འཆང་གིས་རྣ་བར་བཟླས་བརྗོད་བརྒྱ་རྩ་བརྒྱད་སྦྱིན་པར་བྱ་སྟེ། དེ་ཡང་ནད་ཡུན་རིང་པོ་ལས་གྲོལ་ཏེ་རང་གི་གནས་སུ་འགྱུར་རོ། །ནད་ཀྱི་སྡུག་བསྔལ་ཐམས་ཅད་ལས་ཡོངས་སུ་གྲོལ་བར་འགྱུར་རོ། །སྤྱི་བོའི་གཙུག་ཏུ་ཕྱག་རྒྱས་བཏབ་སྟེ་ལན་ཉི་ཤུ་རྩ་གཅིག་བརྗོད་པར་བྱ་སྟེ་འཕྲལ་ཉིད་དུ་ཡོངས་སུ་གྲོལ་ལོ། །གལ་ཏེ་ནག་པོ་ཆེན་པོས་རང་གི་ཕྱག་རྒྱས་བཏབ་ན་དེ་ལྟར་དེ་ཉིད་ལ་བལྟས་པས་ཕྱག་རྒྱ་ཐམས་ཅད་འབྱེད་པར་འགྱུར་རོ། །གལ་ཏེ་ཡུན་རིང་དུ་མ་གྲོལ་ན་གང་གིས་ཕྱག་རྒྱས་བཏབ་པར་གྱུར་པ་དེ་མིག་གཉིས་པོ་དག་འབྱིན་པར་འགྱུར་རོ། །གདོན་གྱིས་ཟིན་པ་ཐམས་ཅད་ལ་ཚོན་སྐུད་སྣ་ལྔའི་སྐུད་པ་ལ་བཟླས་བརྗོད་ཉི་ཤུ་རྩ་གཅིག་བྱས་ནས་མདུད་པ་ཉི་ཤུ་རྩ་གཅིག་བྱས་ལ་བཅིང་བར་བྱ་སྟེ། གདོན་དང་བརྗེད་བྱེད་ཐམས་ཅད་ལས་ཡོངས་སུ་གྲོལ་བར་འགྱུར་རོ། །ནད་ཐམས་ཅད་ལ་སྐུད་པ་དཀར་པོས་བཅིང་བར་བྱ་སྟེ་ནད་ཐམས་ཅད་ལས་ཡོངས་སུ་གྲོལ་ལོ། །འཐབ་པ་དང་། འཐབ་མོ་དང་། རྩོད་པ་དང་། འགྱེད་པ་རྣམས་ཐམས་ཅད་དུ་འགྲོ་བ་ལ་ལན་བརྒྱ་རྩ་བརྒྱད་ཡོངས་སུ་བཟླས་ཏེ་ཁ་ཏོན་ཏུ་བཟུང་ན་ཐམས་ཅད་དུ་སྨྲ་བའི་མཆོག་ཏུ་འགྱུར་རོ། །ན་ལེ་ཤམ་དང་། རྒྱ་སྤོས་དང་། རུ་རྟ་དང་། ཡུང་བ་གཉིས་དང་། རོའི་མིག་སྨན་ལ་སྔགས་སྟོང་རྩ་བརྒྱད་དུ་བཟླས་ལ་ཕྱེ་མ་ཞིབ་མོར་བྱས་ཏེ། མིག་སྨན་དང་མཉམ་པར་སྦྱར་ནས་གདོན་གྱིས་ཟིན་པ་རྣམས་ཀྱི་མིག་ལ་བསྐུས་
ན། བསྐུས་པ་ཙམ་གྱི་མོད་ལ་གདོན་ཐམས་ཅད་ཡོངས་སུ་གྲོལ་ལོ། །གལ་ཏེ་ཡུན་རིང་པོར་མ་གྲོལ་ན་གདོན་གྱི་མིག་གཉིས་འབྱིན་པར་འགྱུར་རོ། །རིམས་ཉིན་བཞི་པ་ལ་མིག་གཉིས་ལ་བསྐུ་བར་བྱའོ། །གལ་ཏེ་ཡུན་རིང་དུ་མ་གྲོལ་ན་མགོ་བོ་ཚལ་པ་བདུན་དུ་འགས་པར་འགྱུར་རོ། །ལུས་ལ་མེ་འབར་བར་འགྱུར་རོ། །རིམས་ཐམས་ཅད་ལ་བསྐུས་པ་ཙམ་གྱིས་ཡོངས་སུ་གྲོལ་ལོ། །གལ་ཏེ་ཡུན་རིང་དུ་མ་གྲོལ་ན་མགོ་བོ་དུམ་བུ་བདུན་དུ་འགས་པར་འགྱུར་རོ། །དུག་གིས་ཟོས་པའི་མིག་ལ་བསྐུ་བར་བྱ་ཞིང་མངག་གཞུག་པར་བྱའོ། །དུག་འཐུངས་པ་ལ་བསྐུས་ན་དུག་མེད་པར་འགྱུར་རོ། །ཤི་བའི་མིག་ལ་བསྐུས་ན་ལྡང་བར་འགྱུར་ཏེ། དེ་སྨྲ་བར་བྱེད་དོ། །ཆུ་དང་ཡུངས་ཀར་བརྡེགས་ན་སླར་ཡང་འགྱེལ་བར་བྱེད་དོ། །མགོ་བོའི་ཟུག་རྔུ་དང་། གཞོགས་ཕྱེད་ན་བ་རྣམས་ཀྱི་མིག་ལ་བསྐུ་སྟེ། ཕྱག་རྒྱ་ཐམས་ཅད་འཇིག་པར་བྱེད་དོ། །རྒྱལ་པོ་ཁྲོས་པ་གང་གིས་སྐྱེ་བོ་གནས་ནས་འབྱིན་པ་དང་། དེ་བཞིན་དུ་མཚོན་ཆ་མང་པོ་འབབ་པ་དང་། ཕྱིར་རྒོལ་བ་དང་། དགྲ་བོ་ཉིད་ལ་ཡང་འདིས་བསྐུས་པའི་མིག་གིས་བལྟས་ན་ཐམས་ཅད་དགའ་བར་འགྱུར་རོ། །དེ་རྣམས་ཐམས་ཅད་རྟག་ཏུ་དབང་དུ་གྱུར་ནས་གནས་ཏེ་འདི་ལ་ཐེ་ཚོམ་མི་བྱའོ། །དོན་ཡོད་པའི་ཕྱག་རྒྱའི་དབང་བསྐུར་བའི་སྙིང་པོ་དང་གཟུངས་ཀྱི་ཆོ་གའི་སྒྲུབ་ཐབས་སོ། །དེ་ནས་དོན་ཡོད་པའི་དཀྱིལ་འཁོར་ཆེན་པོ་པདྨའི་དབང་བསྐུར་བའི་ནོར་བུའི་གཟུངས་ཀྱི་སྙིང་པོའི་ཡོ་བྱད་དུ་འགྱུར་ཏེ་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་གྱི་རིགས་ཐུན་མོང་བར་རྗེས་སུ་འཇུག་པར་འགྱུར་རོ། །སྟོང་རྩ་བརྒྱད་བཟླས་པས་མི་འཕམ་པའི་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་པདྨ་ཆེན་པོའི་དབང་བསྐུར་བ་ཡིད་བཞིན་གྱི་ནོར་བུའི་པདྨ་བཅིངས་པས་སྤྱི་བོར་མངོན་པར་དབང་བསྐུར་བར་འགྱུར་རོ། །དེ་ནས་དུས་གསུམ་པའི་དེ་བཞིན་གཤེགས་པ་དེ་རྣམས་ཀྱིས་བཟླས་པ་ཙམ་གྱི་མོད་ལ་དེའི་རྨི་ལམ་མཐོང་བ་ཉེ་བར་སྟོན་པར་བྱེད་དོ། །དཀྱིལ་འཁོར་ཆེན་པོ་ཡངས་པའི་རྣམ་པར་འཕྲུལ་པ་ཡང་དག་པར་མཐོང་བ་དང་ཆོ་འཕྲུལ་སྟོན་པར་བྱེད་དོ། །གཞལ་ཡས་ཁང་དང་བཅས། རྣམ་པར་འཕྲུལ་པ་དང་བཅས། ལྷའི་ཚོགས་དང་བཅས་པའི་རིག་པའི་
རྒྱལ་པོའི་དཀྱིལ་འཁོར་པའི་ལྷ་རྣམས་ཉེ་བར་སྟོན་པར་བྱེད་དོ། །འདི་ལྟ་སྟེ། དེ་བཞིན་གཤེགས་པའི་རིགས་ཀྱི་དཀྱིལ་འཁོར་དང་། པདྨའི་རིགས་ཀྱི་དཀྱིལ་འཁོར་དང་། རྡོ་རྗེའི་རིགས་ཀྱི་དཀྱིལ་འཁོར་དང་། ནོར་བུའི་རིགས་ཀྱི་དཀྱིལ་འཁོར་དང་། དོན་ཡོད་ཞགས་པའི་སྙིང་པོ་རྣམ་པར་ཐར་པའི་དཀྱིལ་འཁོར་གྱི་དཀྱིལ་འཁོར་ཆེན་པོ་དང་། རྣམ་པར་སྣང་མཛད་ཀྱི་སྙིང་པོའི་དཀྱིལ་འཁོར་ཆེན་པོ་དེ་རྣམས་ཐམས་ཅད་ཀྱང་སོ་སོ་སོ་སོའི་དཀྱིལ་འཁོར་དུ་དབང་བསྐུར་བས་མངོན་པར་དབང་བསྐུར་རོ། །རིག་པའི་རྒྱལ་པོའི་དཀྱིལ་འཁོར་གྱི་ལྷ་རྣམས་མཐའ་དག་ཉེ་བར་སྟོན་པར་བྱེད་དེ། ཇི་སྲིད་དུ་བྱང་ཆུབ་ཀྱི་སྙིང་པོར་གཤེགས་པ་དང་། ཆོས་ཀྱི་འཁོར་ལོ་བསྐོར་བ་དང་། བདུད་འདུལ་བའི་བར་གྱི་དཀྱིལ་འཁོར་ཉེ་བར་སྟོན་པར་བྱེད་དོ། །དུས་གསུམ་པའི་དེ་བཞིན་གཤེགས་པ་དེ་རྣམས་ཀྱིས་ཀྱང་དཀྱིལ་འཁོར་ཆེན་པོ་དེ་རྣམས་ཀྱིས་སོ་སོ་སོ་སོའི་དཀྱིལ་འཁོར་དུ་མངོན་པར་དབང་བསྐུར་བས་མངོན་པར་དབང་སྐུར་བར་མཛད་དོ། །དཀྱིལ་འཁོར་གྱི་མཆོག་ཐམས་ཅད་དུ་མངོན་པར་དབང་བསྐུར་བས་མངོན་པར་དབང་སྐུར་བར་མཛད་དོ། །དེ་ནས་རིག་སྔགས་འཆང་དེ་དེ་ལྟ་བུའི་རྨི་ལམ་ཆེན་པོ་མཐོང་ནས། དགའ་བ་ཆེན་པོ་རྒྱས་པར་འགྱུར་རོ། །དགའ་བ་དང་རབ་ཏུ་མགུ་བའི་སྙིང་དེས་ཀྱང་དོན་ཡོད་པ་པདྨའི་དྲི་མ་མེད་པའི་མངོན་པར་དབང་བསྐུར་བའི་ཏིང་ངེ་འཛིན་སོ་སོར་ཐོབ་བོ། །དེ་བཞིན་གཤེགས་པ་དེ་རྣམས་ཀྱིས་ཀྱང་། རིག་སྔགས་འཆང་དེ་ལ་ལེགས་སོ་ལེགས་སོ་ཞེས་རྗོད་པར་མཛད་དེ། རིག་སྔགས་འཆང་ཆེན་པོ་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་ཆེན་པོའི་རིགས་ཐུན་མོང་བའི་དམ་ཚིག་གིས་མངོན་པར་དབང་བསྐུར་བས་ཁྱོད་མངོན་པར་དབང་བསྐུར་རོ། །གྲུབ་པ་ཐོབ་པ་དེ་རྣམས་རིག་སྔགས་འཆང་ཆེན་པོ་དང་དཀྱིལ་འཁོར་གྱི་གསང་བའི་རྗེས་སུ་འཇུག་ཅིང་། དེ་བཞིན་གཤེགས་པ་ཐམས་ཅད་ཀྱི་སྲས་ཀྱི་ཐུ་བོར་འགྱུར་རོ་ཞེས་སོ་སོར་སད་དོ། །དེ་ནས་རིག་སྔགས་འཆང་གིས། བཟླས་པ་ཙམ་དང་བཀླགས་པ་ཙམ་གྱིས་དེ་མ་ཐག་པར་རྒྱ་ཆེན་པོའི་ཡོན་ཏན་གསལ་བ་དེ་ལྟ་བུ་སྐྱེ་བར་འགྱུར་རོ། །སླར་ཡང་འདིའི་གོང་ནས་གོང་དུ་རྣམ་པར་འཕྲུལ་པ་སྟོན་
པར་བྱེད་དོ། །རིག་སྔགས་འཆང་གང་ཡང་། རིགས་ཀྱི་བུའམ། རིགས་ཀྱི་བུ་མོ་གཞན་གང་ཡང་རུང་བར་གྱུར་ཀྱང་རུང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མར་གྱུར་ཀྱང་རུང་སྟེ་དུས་གསུམ་པའི་དེ་བཞིན་གཤེགས་པ་ཐམས་ཅད་ལ་མཆོད་པ་དང་། དབང་བསྐུར་བ་བྱེད་པར་འདོད་པ་དེས་གཟུངས་ཀྱི་སྙིང་པོ་འདིས་བགྲང་ཕྲེང་ངམ། ཅོད་པན་ནམ། དར་དཔྱངས་སམ། དབུ་རྒྱན་ལ་ལན་སྟོང་རྩ་བརྒྱད་དུ་ཡོངས་སུ་བཟླས་ཏེ་དེ་བཞིན་གཤེགས་པའི་དབུ་ལ་བཅིངས་ན། སྤྱན་རས་གཟིགས་དབང་ཕྱུག་གིས་མངོན་པར་དབང་བསྐུར་ཏེ། རིག་སྔགས་འཆང་དེའམ། རིགས་ཀྱི་བུའམ། རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མས་གསང་བའི་དཀྱིལ་འཁོར་ཆེན་པོ་རེ་རེའི་དུས་གསུམ་པའི་དེ་བཞིན་གཤེགས་པ་རྣམས་དང་། བྱང་ཆུབ་སེམས་དཔའི་ཚོགས་འཁོར་དང་བཅས་པ་རྣམས་ཀྱིས་རིན་པོ་ཆེ་སྣ་བདུན་ལས་བྱུང་བའི་རྣམ་པར་སྣང་མཛད་ཀྱི་སྙིང་པོའི་ནོར་བུ་ཆེན་པོ་ཡིད་བཞིན་གྱི་ནོར་བུའི་རིན་པོ་ཆེའི་དབུ་རྒྱན་འོད་ཟེར་སྣ་ཚོགས་བརྒྱ་སྟོང་ཕྲག་འབར་བས་ཡང་དག་པར་བརྒྱན་པའི་དབུ་རྒྱན་ཆེན་པོ་དང་། དར་དཔྱངས་ཀྱིས་དབང་བསྐུར་བས་དེ་བཞིན་གཤེགས་པ་ཐམས་ཅད་མངོན་པར་དབང་བསྐུར་བར་འགྱུར་ཞིང་། བྱང་ཆུབ་སེམས་དཔའི་ཚོགས་འཁོར་དང་བཅས་པ་མངོན་པར་དབང་བསྐུར་བར་འགྱུར་རོ། །དེ་ལྟར་རྒྱ་ཆེ་ཞིང་ཡངས་པ་ཆེ་བའི་གཞལ་མེད་ཁང་འདི་མཆོད་པ་དང་བསྙེན་བཀུར་བ་ཉེ་བར་གནས་པར་འགྱུར་རོ། །གང་གིས་དུས་གསུམ་པའི་དེ་བཞིན་གཤེགས་པ་བྱང་ཆུབ་སེམས་དཔའི་འཁོར་དང་བཅས་པ་ཐམས་ཅད་དང་དཀྱིལ་འཁོར་གྱི་ལྷ་རྣམས་ལ་དབང་བསྐུར་བ་དང་མཆོད་པ་དང་། བསྙེན་བཀུར་བ་ཆེན་པོར་བྱས་པར་འགྱུར་རོ། །སྙིང་པོ་འདི་བཟླས་པ་ཙམ་གྱིས་རིག་སྔགས་འཆང་གི་སྡིག་པ་དང་། སྒྲིབ་པ་དང་། གདུག་པ་ཐམས་ཅད་རབ་ཏུ་ཞི་བར་འགྱུར། རྣམ་པར་ཉམས་པར་བྱེད། རྣམ་པར་ཞིག་པར་བྱེད། ལུས་དང་ངག་དང་ཡིད་ཡོངས་སུ་དག་པར་འགྱུར་རོ། །ཉོན་མོངས་པ་དང་། སྒྲིབ་པ་དང་བྲལ་ཞིང་ངེས་པར་གྲོལ་བར་འགྱུར་རོ། །བསོད་ནམས་ཀྱི་ཕུང་པོ་ཆེན་པོ་སོགས་པར་འགྱུར་རོ། །དགེ་བའི་རྩ་བ་ཆེན་པོ་དང་ལྡན་པར་འགྱུར་རོ། །དངོས་གྲུབ་ཆེན་པོའི་མཆོག་ཏུ་
འགྱུར་རོ། །ཐམས་ཅད་དུ་ཐོགས་པ་མེད་པར་འགྱུར་རོ། །མཆོད་པ་དང་། བསྙེན་བཀུར་བ་དང་། ཚིག་བཙུན་པར་འགྱུར་རོ། །སྡིག་པ་ཐུན་ཚགས་དང་བྲལ་བར་འགྱུར་རོ། །ལུས་ལ་དྲི་བཟང་པོ་འབྱུང་བར་འགྱུར་རོ། །རྟག་ཏུ་དེ་དྲན་པས་ཁ་ནས་ཨུཏྤ་ལའི་དྲི་འབྱིན་ནོ། །ལུས་ཙནྡན་གྱི་དྲིས་བསྒོས་པར་འགྱུར་རོ། །སེམས་ཅན་ཐམས་ཅད་མཆོག་ཏུ་བྱམས་པ་དང་། མཆོད་པའི་འོས་སུ་འགྱུར་རོ། །ཐམས་ཅད་དུ་དངོས་གྲུབ་ཆེན་པོའི་མཆོག་ཏུ་འགྱུར་རོ། །བགེགས་དང་ལོག་པར་འདྲེན་པ་ཐམས་ཅད་རབ་ཏུ་འདུལ་བར་འགྱུར་རོ། །འབྱུང་པོ་དང་། གནོད་སྦྱིན་དང་། སྲིན་པོ་དང་། ཡི་དགས་དང་། ཤ་ཟ་ཐམས་ཅད་མཐོང་བ་ཙམ་གྱིས་རིང་དུ་འབྲོས་པར་འགྱུར་རོ། །ཇི་སྲིད་འཚོའི་བར་དུ་ཉེ་བར་གནས་པར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་གིས་མཆོག་སྦྱིན་པར་འགྱུར་རོ། །རྟག་ཏུ་ཡང་མཐོང་བར་འབྱུང་བར་འགྱུར་རོ། །རིག་པའི་རྒྱལ་པོ་ཡང་རྟག་པར་རྒྱུན་དུ་རྗེས་སུ་འབྲང་བར་འགྱུར་རོ། །དུས་རྒྱུན་དུ་རྟག་ཏུ་མཐོང་བ་རྗེས་སུ་འབྲང་བར་འགྱུར་རོ། །རྟག་ཏུ་རྗེས་སུ་འབྲང་བ་དང་། དངོས་གྲུབ་ཏུ་འགྱུར་རོ། །ཐམས་ཅད་དུ་དཀྱིལ་འཁོར་གྱི་སློབ་དཔོན་དུ་མངོན་པར་དབང་བསྐུར་བར་འགྱུར་རོ། །ཐམས་ཅད་དུ་དོན་ཡོད་པའི་དངོས་གྲུབ་ཀྱི་མཆོག་ཏུ་འགྱུར་རོ། །དོན་ཡོད་པ་པདྨའི་དཀྱིལ་འཁོར་གྱི་དབང་བསྐུར་བའི་གཟུངས་སོ། །དེ་ནས་དོན་ཡོད་པའི་ནོར་བུའི་མཆོད་པའི་སྤྲིན་གྱི་ཉེ་བར་སྤྱོད་པའི་ཆོ་གར་འགྱུར་ཏེ། དྲན་པ་དང་། བཀླགས་པ་དང་། བཟླས་པ་ཙམ་གྱིས་གཞལ་མེད་ཁང་ཆེན་པོ་རྒྱ་ཆེ་བ་ཡངས་པའི་མཐུ་སྟོབས་ཡངས་པ་འབྱུང་བར་འགྱུར་རོ། །མཐུ་སྟོབས་ཆེན་པོའི་ཡོན་ཏན་འབྱུང་ཞིང་མཆོད་པའི་སྤྲིན་གྱི་ཆར་ཆེན་པོ་འབབ་པར་འགྱུར་རོ། །དེ་བཞིན་གཤེགས་པ་ཐམས་ཅད་ལ་མཆོད་པའི་སྤྲིན་གྱི་ཆར་ཆེན་པོ་འབབ་པར་འགྱུར་རོ། །བསོད་ནམས་ཀྱི་ཕུང་པོའི་ཚོགས་ཀྱི་རྣམ་པར་འཕྲུལ་པ་ཆེན་པོ་འབྱུང་བར་འགྱུར་རོ། །རིག་པའི་རྒྱལ་པོ་འདི་དྲན་པ་ཙམ་དང་བཟླས་པ་ཙམ་གྱི་མོད་ལ། ཕྱོགས་བཅུའི་སངས་རྒྱས་ཀྱི་ཞིང་ཀུན་ཏུ་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་ཆེན་པོར་མཆོད་པའི་སྤྲིན་གྱི་ཆར་ཆེན་པོ་འབབ་པར་འགྱུར་རོ། །འདི་ལྟ་སྟེ། པདྨ་དང་། ཨུཏྤ་ལ་དང་།
ཀུ་མུ་ད་དང་། པདྨ་དཀར་པོ་དང་། མན་དཱ་ར་བ་དང་། མན་དཱ་ར་བ་ཆེན་པོ་དང་། མདོག་མཛེས་དང་། མདོག་མཛེས་ཆེན་པོ་དང་། མཉྫུ་ཥ་ཀ་དང་། ཟླ་བ་མཛེས་པ་དང་། དྲི་མ་མེད་པ་སྟེ་ལྷ་རྫས་ཀྱི་མེ་ཏོག་སྣ་ཚོགས་ཀྱི་ཆར་འབྱུང་བར་འགྱུར་རོ། །འདི་ལྟ་སྟེ། སྐམ་ལས་སྐྱེས་པའི་མེ་ཏོག །སཱ་ལ་དང་། ཏ་མཱ་ལ་དང་། ཙམ་པ་ཀ་དང་། མྱ་ངན་འཚང་དང་། ཨ་ཏི་མུཀྟཀ་དང་། སྐྱ་སྣར་དང་། མཐོན་ཀ་དང་། མཐོན་ཀ་ཆེན་པོ་དང་། ཀ་དམ་པ་དང་། དོང་ཀ་དང་། སིན་དྷུ་བཱ་རི་ཀའི་མེ་ཏོག་དང་། སྣ་མའི་མེ་ཏོག་དང་། ཡཱུ་ཐི་ཀ་དང་། མཱ་ལི་ཀ་གསར་པ་དང་། ཏ་ར་ཎ་དང་། ཀུ་པྱ་ཀ་དང་། མ་རུ་བ་ཀའི་མེ་ཏོག་གི་ཆར་འབབ་པར་འགྱུར་རོ། །ལྷ་རྫས་སྣ་ཚོགས་པ་རྣམས་དང་། ཀུ་མུ་དའི་རིགས་རྣམས་དང་། གཟུགས་དང་། ཁ་དོག་སྣ་ཚོགས་པ་དང་། རི་དང་ཆུ་དང་། དགོན་དུང་དང་། ཐིབས་པོ་དང་། ཆུ་རླབས་དང་། ནགས་དང་། ནགས་འདབ་དང་། སྐྱེད་མོས་ཚལ་དང་། ཆུ་ཀླུང་དང་། ལྟེང་ཀ་དང་། རྫིང་བུ་དང་། ཨ་སཱ་ཧི་ཏ་དང་། ཕུག་དང་། དགོན་པར་འབབ་པའི་ས་ལས་སྐྱེས་པའི་མེ་ཏོག་དང་། དྲི་མ་མེད་པའི་ལྷ་རྫས་དང་། ལྷ་རྫས་ཀྱི་དྲི་བཟང་དང་། ཡིད་དུ་འོང་བའི་གཟུགས་དང་། ཁ་དོག་དང་། ཤིན་ཏུ་གཞོན་ཤ་ཆགས་པ་དང་། རབ་ཏུ་སིམ་པར་བྱེད་པའི་རེག་པ་ལས་སྐྱེས་པའི་ཆར་འབབ་པར་བྱེད་དོ། །མེ་ཏོག་ཆེན་པོ་དང་། མེ་ཏོག་སྐྱེས་པ་རྣམས་ཀྱི་ཕུང་པོ་ཆེན་པོ་གཅལ་དུ་བཀྲམ་པ་རྣམས་བཅོམ་ལྡན་འདས་ཀྱི་སྤྱན་སྔར་མཆོད་པའི་སྤྲིན་དུ་འབྱུང་བར་འགྱུར་རོ། །དེ་བཞིན་དུ་དྲན་པ་དང་བསམས་པ་ཙམ་གྱིས་མེ་ཏོག་གི་མཆོད་པ་ཆེན་པོ་བྱེད་དོ། །འདི་ལྟ་སྟེ། དྲན་པ་དང་བསམས་པ་ཙམ་གྱིས་གོས་དང་རྒྱན་རྣམ་པ་སྣ་ཚོགས་རྣམ་པར་བཀྲ་བའི་མཆོད་པའི་སྤྲིན་ཆེན་པོ་ཕྱོགས་བཅུ་ཀུན་ཏུ། དེ་བཞིན་གཤེགས་པ་ཐམས་ཅད་ཀྱི་མཆོད་པར་འབྱུང་བར་འགྱུར་རོ། །འདི་ལྟ་སྟེ། དོ་ཤལ་དང་། གདུ་བུ་རྒྱན་ཅན་དང་། དཔུང་རྒྱན་དང་། རྣ་རྒྱན་དང་། གསེར་སྐུད་དང་། མུ་ཏིག་གི་དྲ་བ་དང་། རྐེད་ཆིངས་དང་། ཉིས་སྐོར་དང་། སུམ་སྐོར་དང་། སྐར་མའི་ཕྲེང་བ་དང་། གཙུག་ཏོར་འཆིང་བ་དང་། ཟླ་བ་ཕྱེད་པ་ཅན་དང་། གསེར་ཕྱེད་པ་དང་། གདུ་བུ་རྒྱན་ཅན་ཟླ་བ་ཕྱེད་པ་དང་། ཤང་ཤང་ཏེའུ་ཅན་དང་། དབུ་རྒྱན་དང་། ཅོད་པན་གྱི་དྲ་བ་དང་། གསེར་གྱི་དྲ་བ་དང་། ཨཾ་བི་ཀ་དང་། ཀརྞཱ་ཕ་ལ་ཀ་དང་།
བྲེ་ཙ་ཀ་དང་། ཏཱམྤའི་སྐུད་པ་དང་། མཆོད་ཕྱིར་ཐོགས་དང་། ཀསྥའི་ཕྲེང་བ་དང་། གསེར་གྱི་ཕྲེང་བ་དང་། རིན་པོ་ཆེས་སྤྲས་པའི་ཕྲེང་བ་དང་། རིན་པོ་ཆེ་སྣ་བདུན་གྱི་དྲིལ་བུ་དང་། རྣ་བ་གང་བ་དང་། གཙུག་ཏོར་འཆིང་བ་དང་། ཡོངས་སུ་དཀྲི་བ་དང་། གཙུག་གི་ནོར་བུའི་ཆར་རབ་ཏུ་འབབ་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་མཆོད་པའི་སྤྲིན་དུ་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་གསང་བ་རྣམས་ཀྱི་མཆོད་པའི་སྤྲིན་ཆེན་པོར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་གསང་བ་རྣམས་ཀྱི་མཆོད་པའི་སྤྲིན་ཆེན་པོར་གྱུར་ནས། རང་རང་གི་གཞལ་མེད་ཁང་གི་འབྱོར་པར་རབ་ཏུ་འགྱུར་རོ། །ཆར་དང་། ཚོན་སྣ་ཚོགས་སུ་བཙོས་པའི་ཕྱོགས་བྲལ་གྱི་གོས་སྣ་ཚོགས་པའི་མཆོད་པའི་སྤྲིན་དུ་འགྱུར་རོ། །དེ་བཞིན་གཤེགས་པ་ཐམས་ཅད་ཕྱོགས་བཅུའི་སངས་རྒྱས་ཐམས་ཅད་ཀྱི་ཞིང་རྣམས་ཀྱི་དེ་བཞིན་གཤེགས་པ་ཐམས་ཅད་ཀྱི་གསང་བའི་དཀྱིལ་འཁོར་རྣམས་དང་རྗེས་སུ་མཐུན་པའི་རི་མོའི་གོས་དང་། རི་མོའི་གཞལ་མེད་ཁང་གི་མཆོད་པའི་སྤྲིན་གྱི་ཆར་འབེབས་སོ། །འདི་ལྟ་སྟེ། ཡུལ་ཀ་ཤི་ཀའི་གོས་ཚོན་སྣ་ཚོགས་སུ་བཙོས་པ་དང་། གོས་ཀྱི་གཞལ་མེད་ཁང་དང་། དར་གོས་རྣམས་ཀྱི་ཆར་འབེབས་སོ། །འདི་ལྟ་སྟེ། ཉི་མའི་འོད་དང་། ཟླ་བ་དང་། སེང་གེ་སྐྱེས་དང་། དར་ཐོད་དང་། ཀ་ཤི་ཀ་དང་། ཀོ་ས་ལ་པའི་མིའི་དབང་པོ་དང་། ཉི་མ་དང་། ཟླ་བའི་སྣང་བ་དང་། པདྨོ་དང་། ཨུཏྤ་ལ་ཅན་གྱི་ཁ་དོག་དང་། ཀོ་དྲི་ཀཱ་དང་། གསེར་གྱི་གདུ་བུ་དང་། མུ་ཏིག་གི་འབྲས་བུ་དང་། ཀླུའི་གོ་ཆ་དང་། རྣམ་པར་སྣང་བ་དང་། ལྷའི་རྒྱན་དང་། མེ་ཏོག་སྣ་མ་དང་། ཀོ་ཤ་དང་། ཙམ་པ་ཀ་དང་། ཁ་དོག་ཅན་དང་། དར་ཐོད་ཅན་དང་། ཀནྟ་རའི་ཚོགས་དང་། ཟླ་བའི་རྒྱན་ཅན་དང་། དོང་ཀའི་མེ་ཏོག་ཅན་དང་། པདྨ་དཀར་པོ་ཅན་ཞེས་བྱ་བ་དང་། བ་མ་ལཾ་ཀ་དང་། ཀོ་ཤཱ་ཏ་ཀི་དང་། རྫོགས་པར་འཕེལ་བར་བྱེད་པ་ཅན་དང་། སྔོན་གྱི་ཡུལ་དང་གླིང་དང་ལྡན་པ་ཀུན་ནས་འོད་གསལ་བ་དང་། གདུ་བུ་རིང་པོ་དང་། དགའ་བ་འཁྱིལ་བ་དང་། རྒྱན་བསྐོར་བ་དང་། སྣ་མའི་མེ་ཏོག་གི་ཁ་དོག་ཅན་དང་། ཀན་དའི་འདབ་མ་ཅན་དང་། དཀྵི་ཎཱ་ཀཾ་དང་། ཀཉྩི་ནཱ་སའི་ཁ་དོག་ཅན་ནམ་བསྐོར་བ་དང་། གསེར་
མདོག་དང་། རིན་པོ་ཆེའི་མདོག་དང་། ཟླ་བའི་ཁ་དོག་གི་ལག་པ་དང་། མེའི་ཁ་དོག་ཅན་དང་། བེེ་ཌཱུཪྱའི་ཁ་དོག་ཅན་དང་། ནམ་མཁའི་ཁ་དོག་ཅན་དང་། ཀ་ནགྣི་ཤུ་ཀཾ་དང་། ཀུན་ནས་འཁྱིལ་ཞིང་ཡིད་བདེ་བའི་བ་སྤུ་རྣམ་པར་སྣང་ཞིང་རྣམ་པར་གསལ་པ་ཙན་དང་། ཀུན་ནས་འོད་གསལ་ཞིང་དྲི་མ་མེད་པའི་རིག་སྔགས་འཆང་གི་ཅོད་པན་ཅན་ཡང་ངོ་ཞེས་སོ། །གོས་རྣམ་པ་སྣ་ཚོགས་པ་གཞལ་དུ་མེད་པའི་ཆར་འབེབས་ཏེ། བཅོམ་ལྡན་འདས་རྣམས་གཞལ་དུ་མེད་པའི་མཆོད་སྤྲིན་དང་བཅས་པའི་ཆར་འབེབས་སོ། །དེ་བཞིན་གཤེགས་པ་ཐམས་ཅད་ཀྱི་གསང་བའི་དཀྱིལ་འཁོར་དུ་གནས་པའི་རིག་སྔགས་ཀྱི་ལྷ་ཐམས་ཅད་དང་། བྱང་ཆུབ་སེམས་དཔའི་ཚོགས་རྣམས་དང་། རྡོ་རྗེ་འཆང་དང་། རིག་སྔགས་འཆང་གི་དབང་པོ་རིག་སྔགས་འཆང་གི་ཚོགས་ཀྱིས་ཡོངས་སུ་བསྐོར་བའི་མཆོད་པའི་སྤྲིན་དུ་འགྱུར་རོ། །དེ་ལྟར་རིག་སྔགས་དྲན་པ་ཙམ་གྱིས་དེ་བཞིན་དུ་རྣམ་པ་སྣ་ཚོགས་པའི་མཆོད་པར་འགྱུར་རོ། །དྲི་སྣ་ཚོགས་པའི་ཆུ་གཞལ་དུ་མེད་པ་དང་། དྲིའི་ཕྱེ་མ་གཞལ་དུ་མེད་པ་དང་། བདུག་པ་གཞལ་དུ་མེད་པའི་མཆོད་པར་འགྱུར་རོ། །འདི་ལྟ་སྟེ། ཙནྡན་གོ་ཤིརྵ་དང་། ཏ་མ་ལའི་འདབ་མ་དང་། ཙནྡན་དང་། ཙནྡན་དམར་པོ་དང་། པདྨ་ཅན་དང་། དྲི་ཞིམ་པ་དང་། སར་ལམ་དང་། གུར་གུམ་དང་། གོས་དང་ལྡན་པ་དང་། དྲི་དང་ལྡན་པ་དང་། པུ་ཤེལ་ཙི་དང་། རྒྱ་སྤོས་དང་། ཏུ་རུཥྐ་དང་། སྤྲྀཀ་དང་། བོ་ལ་དང་། སྲ་རྩི་པོག་དང་། ན་མེ་རུ་དང་། ཤྲཱི་བེཥྚཱ་ཀ་དང་། པོག་དང་། སལླ་ཀི་དང་། གུ་གུལ་གྱི་བདུག་པ་དང་། ཧྭགས་དང་། སྦྲང་རྩི་དང་། ལྔ་བསྐོར་བ་དང་། ཀ་ཛོ་ཀ་དང་། བལླི་ཀའི་ཤིང་དང་། བལླི་ཀ་དང་། ག་པུར་དང་། གླ་རྩི་དང་། རྣམ་པ་སྣ་ཚོགས་རྣམ་པར་བཀྲ་བའི་བདུག་པ་གཞན་སྦྱར་བ་རྣམས་དང་། དྲི་ཡི་ཆུའི་རྣམ་པ་རྣམས་དང་། རྣམ་པ་སྣ་ཚོགས་པས་བསྒོས་པའི་ཕྱེ་མ་དང་ལྡན་པ་འབྱུང་བར་འགྱུར་རོ། །དེ་བཞིན་གཤེགས་པ་མཆོད་སྤྲིན་གྱི་ཆར་འབེབས་སོ། །སྒྲོན་མའི་ཤིང་སྣ་ཚོགས་པ། སྦར་བ་གཞལ་དུ་མེད་པས་སྣང་བར་བྱེད་བཞིན་པ་འབར་བར་བྱེད་དོ། །ཕྱོགས་བཅུ་རྣམས་སུ་ཀུན་ནས་སྒྲོན་མའི་ཤིང་གངྒཱའི་ཀླུང་གི་བྱེ་མ་བྱེ་བ་ཁྲག་ཁྲིག་བརྒྱ་སྟོང་ཕྲག་དང་མཉམ་པའི་སྒྲོན་མའི་ཤིང་རབ་ཏུ་འབྱུང་ངོ་། །འདི་ལྟ་སྟེ། ཏུ་རུཥྐའི་
ཏིལ་མར་དང་། ཙམ་པ་ཀའི་ཏིལ་མར་དང་། ཨུཏྤ་ལའི་ཏིལ་མར་དང་། སྣ་མའི་ཏིལ་མར་དང་། བརྵི་ཀའི་ཏིལ་མར་དང་། ཀོནྟའི་ཏིལ་མར་དང་། ཨ་ཏི་མུཀྟ་ཀའི་ཏལ་མར་དང་། པ་ལ་ཤའི་ཏིལ་མར་དང་། ཙནྡན་གྱི་ཏིལ་མར་དང་། ཛཱ་ཏིའི་འབྲས་བུའི་ཏིལ་མར་དང་། བལླའི་ཏིལ་མར་དང་། ཨ་ཤོ་གནྡྷ་ལ་སོགས་པའི་ཏིལ་མར་ལ་སྒྲོན་མེ་རབ་ཏུ་བྱེད་དེ། དེ་བཞིན་གཤེགས་པ་མཆོད་པའི་སྤྲིན་དུ་འགྱུར་རོ། །འདི་ལྟ་སྟེ། རོ་བརྒྱ་པའི་ཁ་ཟས་རྣམས་ཕྱོགས་བཅུའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡུལ་དང་དུས་སུ་ཉེ་བར་བཞུགས་པ་རྣམས་ཀྱི་སྤྱན་སྔར་རབ་ཏུ་འབྱུང་བར་འགྱུར་རོ། །འདི་ལྟ་སྟེ། རོ་བྲོ་བའི་མཆོག་རྣམ་པ་སྣ་ཚོགས་པའི་གཟུགས་དང་། རྣམ་པ་དང་། ཞིམ་ཞིང་མངར་བ་མྱང་བར་འོས་པ་དགའ་བར་བྱ་བ་ཡིད་དགའ་བ། ཙོ་ལེ་ཛྱ་དང་ཚིམ་པར་འོས་པ་དང་། དྲིའི་རིགས་ལྷ་རྫས་རྣམ་པ་སྣ་ཚོགས་པས་དུས་གསུམ་དུ་གཤེགས་པའི་བཅོམ་ལྡན་འདས་དེ་བཞིན་གཤེགས་པ་འཁོར་གྱི་ཚོགས་དང་བཅས་པ་དང་། བྱང་ཆུབ་སེམས་དཔའི་ཚོགས་འཁོར་དང་བཅས་པ་དང་། ཉན་ཐོས་ཀྱི་དགེ་འདུན་དང་བཅས་པ་དང་། རིག་སྔགས་ཀྱི་དཀྱིལ་འཁོར་གྱི་ལྷ་དང་བཅས་པ་རྣམས་ཀུན་ཏུ་ཚིམ་པར་བྱེད་པའི་འབྲས་བུ་རྣམ་པ་སྣ་ཚོགས་པ་དང་། རོ་བྲོ་བའི་མཆོག་རྣམ་པ་སྣ་ཚོགས་པ་དང་། སྦྲང་རྩི་མངར་པོའི་རོ་མྱོང་བ་དང་ལྡན་པ་བཅོམ་ལྡན་འདས་འཁོར་གྱི་ཚོགས་དང་བཅས་པའི་སྤྱན་སྔར་རབ་ཏུ་འབྱུང་བར་འགྱུར་ཏེ། དེ་བཞིན་གཤེགས་པ་ཐམས་ཅད་ཚིམ་པར་བྱེད་པའི་མཆོད་པའི་སྤྲིན་ཆེན་པོར་འགྱུར་རོ། །འདི་ལྟ་སྟེ་ལྷ་རྫས་ཀྱི་རོལ་མོའི་སྒྲ་རྣམ་པ་སྣ་ཚོགས་པ། དགའ་བར་འོས་པའི་རོལ་མོའི་ཕེག་རྡོབ་པ་རྣམས་དང་། འདི་ལྟ་སྟེ། དབྱངས་ཀྱི་ཡན་ལག་ལྔ་དང་ལྡན་པའི་མིའམ་ཅི་དང་། དྲི་ཟའི་གླུ་དབྱངས་རྣམ་པ་སྣ་ཚོགས་པ་དང་བཅས་པ་དང་། ཀླུའི་བུ་མོ་དང་། ལྷ་མ་ཡིན་གྱི་བུ་མོ་དང་། ལྷའི་བུ་མོ་དང་། ཆུ་ལས་བྱུང་བའི་བུ་མོ་རྣམས་ཀྱིས་རྣམ་པ་ཐ་དད་རྣམ་པ་སྣ་ཚོགས་པའི་གསང་སྔགས་ཀྱི་གླུ་དབྱངས་ཀྱི་རོལ་མོའི་སྒྲ་རབ་ཏུ་འཁྲོལ་བཞིན་པ་རྣམས་ཀྱིས་ཕྱོགས་བཅུའི་དེ་བཞིན་གཤེགས་པ་དེ་རྣམས་ཐམས་ཅད་ཀྱི་དུས་གསུམ་པའི་རོལ་མོ་ཆེན་པོའི་མཆོད་
པའི་སྤྲིན་དུ་འགྱུར་རོ། །རྣམ་པ་སྣ་ཚོགས་པར་མཛེས་པའི་བསྟོད་པའི་རྣམ་པས་རོལ་མོའི་ཆོ་ག་ཞིབ་མོ་ཇི་ལྟ་བ་བཞིན་དུ་གསང་བའི་ཕྱག་རྒྱ་དང་། དཀྱིལ་འཁོར་གྱི་རིམ་པར་ཕྱེ་བ་དང་། རྗེས་སུ་མཐུན་པས་ཡང་དག་པར་བསྟོད་པར་འགྱུར་རོ། །བྱང་ཆུབ་སེམས་དཔའི་ཚོགས་དང་བཅས་པའི་རིག་སྔགས་ཀྱི་ལྷ་དང་། དཀྱིལ་འཁོར་གྱི་ལྷས་རྗེས་སུ་འཛིན་པར་འགྱུར་རོ། །ཡང་དག་པར་བསྟོད་པ་རྣམས་ཀྱང་མཚན་སྨོས་པས་ཡང་དག་པར་བསྟོད་པ་བྱས་པར་འགྱུར་རོ། །དེ་བཞིན་དུ་ཡངས་པ་དང་ལྡན་པའི་གཟུངས་འཕགས་པ་སྤྱན་རས་གཟིགས་དབང་ཕྱུག་གིས་གསུངས་པ། མཆོག་ཐམས་ཅད་དུ་མཆོད་པའི་སྤྲིན་དུ་གྱུར་པ། བླ་ན་མེད་པ་དཔག་བསམ་གྱི་ཤིང་ལྟ་བུའོ། །སྣ་ཚོགས་པའི་རྫུ་འཕྲུལ་དང་རྣམ་པར་འཕྲུལ་པ་སྒྱུ་མ་ལྟ་བུའི་ཏིང་ངེ་འཛིན་བྱིན་གྱིས་རློབ་པའི་རྣམ་པར་འཕྲུལ་པས་རིག་སྔགས་འཆང་ཐམས་ཅད་ཀྱི་རྨད་དུ་བྱུང་བའི་མཆོག་གི་དངོས་གྲུབ་སྟེར་བར་བྱེད་པའོ། །སེམས་ཅན་ཐམས་ཅད་ཀྱི་མ་དང་ཕར་གྱུར་པའོ། །སེམས་ཅན་ཐམས་ཅད་ཀྱི་བསམ་པ་ཡང་དག་པར་གྱུར་པའོ། །གསང་སྔགས་འཛིན་པ་ཐམས་ཅད་ཀྱི་མཆོག་གི་དངོས་གྲུབ་དང་། བསམ་པ་ཡོངས་སུ་རྫོགས་པར་བྱེད་པའོ། །སེམས་ཅན་ཐམས་ཅད་ཀྱི་སྡིག་པ་དང་། ཉོན་མོངས་པ་དང་། སྒྲིབ་པ་ཐམས་ཅད་ཡོངས་སུ་སྦྱོང་བར་བྱེད་པའོ། །ནད་ཐམས་ཅད་སེལ་བར་བྱེད་པའོ། །སྡུག་བསྔལ་མི་བཟད་པ་གདུག་པ་ཐམས་ཅད་འཇོམས་པར་བྱེད་པའོ། །བཀྲ་ཤིས་པ་དང་། ཡིད་ཀྱི་ཤིང་རྟ་ཐམས་ཅད་ཡོངས་སུ་རྫོགས་པར་བྱེད་པའོ། །དེ་བཞིན་གཤེགས་པ་ཐམས་ཅད་ཀྱི་ཡང་དག་པར་སྐུལ་བར་བྱེད་པའོ། །བྱང་ཆུབ་སེམས་དཔའ་ཐམས་ཅད་ཀྱི་དབུགས་འབྱིན་པར་བྱེད་པའོ། །རིག་སྔགས་ཀྱི་དཀྱིལ་འཁོར་གྱི་ལྷ་ཐམས་ཅད་སྤྱན་འདྲེན་པར་བྱེད་པའོ། །དེ་བཞིན་གཤེགས་པ་ཐམས་ཅད་ཀྱི་གསང་བའི་དཀྱིལ་འཁོར་རྣམས་སྟོན་པར་བྱེད་པའོ། །ཀླུ་ཐམས་ཅད་འགུགས་པར་བྱེད་པའོ། །གནོད་སྦྱིན་དང་། སྲིན་པོ་དང་། འབྱུང་པོ་དང་། ཡི་དགས་དང་། ཤ་ཟ་དང་། བགེགས་དང་། ལོག་པར་འདྲེན་པ་ཐམས་ཅད་ལྡོག་པར་བྱེད་པའོ། །སེམས་ཅན་ཐམས་ཅད་ཀྱི་མཆོག་གི་དངོས་གྲུབ་སྦྱིན་པར་བྱེད་པའོ། །དབུགས་མ་ཕྱིན་པ་རྣམས་ཀྱི་དབུགས་འབྱིན་པར་བྱེད་པའོ། །མ་གྲོལ་
བ་རྣམས་གྲོལ་བར་བྱེད་པའོ། །སྐྱབས་མེད་པ་རྣམས་ཀྱི་སྐྱབས་སོ། །དཔུང་གཉེན་མེད་པ་རྣམས་ཀྱི་དཔུང་གཉེན་ནོ། །མགོན་མེད་པ་རྣམས་ཀྱི་མགོན་དུ་གྱུར་པའོ། །འཁྲ་ས་མེད་པ་རྣམས་ཀྱི་འཁྲ་སའོ། །བསྙེན་གནས་མ་བྱས་པ་རྣམས་ལ་བསྙེན་གནས་སྦྱིན་པའོ། །གཙང་སྦྲ་མ་བྱས་པ་རྣམས་ལ་གཙང་སྦྲར་སྤྱོད་པའོ། །མི་ཚངས་པར་སྤྱོད་པའི་གནས་ལ་ཞེན་པ་རྣམས་ལ་ཚངས་པར་སྤྱོད་པའི་གནས་སྦྱིན་པའོ། །ཐུབ་པའི་བརྟུལ་ཞུགས་མ་བྱས་པ་རྣམས་ལ་ཐུབ་པའི་བརྟུལ་ཞུགས་སྦྱིན་པའོ། །ཆོས་མ་ཡིན་པ་ལ་སྤྱོད་པ་རྣམས་ཆོས་ལ་སྦྱོར་བའོ། །མི་དགེ་བའི་ལས་ཀྱི་ལམ་ལ་སྤྱོད་པ་རྣམས་དགེ་བའི་ཆོས་ལ་སྦྱོར་བའོ། །འཇིགས་པས་ཉམ་ཐག་པ་རྣམས་ལ་མི་འཇིགས་པ་སྦྱིན་པའོ། །དབུལ་པོ་རྣམས་ལ་ནོར་སྦྱིན་པའོ། །འབྲུ་དང་བཟའ་བ་དང་བྲལ་བ་རྣམས་ལ་འབྲུ་འཕེལ་བ་ཆེན་པོ་སྦྱིན་པའོ། །མུ་གེས་ཉམས་ཐག་པ་རྣམས་ལ་སྐྱ་རྒྱལ་གྱི་ཚོགས་པ་ལ་ངེས་པར་སྦྱོར་བར་བྱེད་པའོ། །ལམ་ཉམས་པ་རྣམས་ཀྱི་ལམ་སྟོན་པར་བྱེད་པའོ། །དུས་མ་ཡིན་པར་འཆི་བར་འགྱུར་བ་རྣམས་ཀྱི་དུས་མ་ཡིན་པའི་འཆི་བ་སོ་སོར་འགོག་པའོ། །ལོང་བ་རྣམས་ཀྱི་མིག་སྦྱིན་པར་བྱེད་པའོ། །འོན་པ་རྣམས་རྣ་བ་སྦྱིན་པར་བྱེད་པའོ། །སྣ་ཉམས་པ་རྣམས་ཀྱི་སྣ་རྣམ་པར་སྦྱོང་བར་བྱེད་པའོ། །རེག་པ་མེད་པ་རྣམས་ཀྱི་བདེ་བའི་རེག་པ་ལ་ངེས་པར་སྦྱོར་བར་བྱེད་པའོ། །ལོངས་སྤྱོད་ཀྱིས་ཉམ་ཐག་པ་རྣམས་ཀྱི་ལོངས་སྤྱོད་སྦྱིན་པར་བྱེད་པའོ། །དྲན་པ་ཉམས་པ་རྣམས་ཀྱི་དྲན་པ་ཡོངས་སུ་སྦྱོང་བར་བྱེད་པའོ། །བསམ་པ་ཉམས་པ་རྣམས་ཀྱི་བསམ་པ་ཡོངས་སུ་དག་པར་བྱེད་པའོ། །ཚུལ་ཁྲིམས་ཉམས་པ་རྣམས་ཀྱི་ཚུལ་ཁྲིམས་སྦྱིན་པའོ། །སྦྱིན་པ་ལ་རྒྱབ་ཀྱིས་ཕྱོགས་པ་རྣམས་ལ་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱེད་པའོ། །བརྩོན་འགྲུས་ཉམས་པ་རྣམས་ལ་སྟོབས་དང་བརྩོན་འགྲུས་ཀྱི་མཆོག་སྦྱིན་པའོ། །བཟོད་པ་དང་བྲལ་བ་རྣམས་ལ་བཟོད་པ་དང་ཞི་བ་སྦྱིན་པའོ། །བསམ་གཏན་ཉམས་པ་རྣམས་ལ་བསམ་གཏན་དང་ཏིང་ངེ་འཛིན་ནི་ཡོངས་སུ་རྫོགས་པར་བྱེད་པའོ། །ཤེས་རབ་ཉམས་པ་རྣམས་ལ་ཤེས་རབ་ཀུན་ཏུ་སྣང་བ་དང་། བློ་གསལ་བ་དང་། ཤེས་རབ་ཆེན་པོའི་སྣང་བ་ཡོངས་སུ་རྫོགས་པར་བྱེད་དོ། །དམ་ཚིག་མི་
ཤེས་པ་རྣམས་ལ་དམ་ཚིག་སྦྱིན་པའོ། །ཕྱག་རྒྱ་དང་བྲལ་བ་རྣམས་ཀྱི་ཕྱག་རྒྱ་ཡོངས་སུ་སྦྱོར་བར་བྱེད་པའོ། །རིག་སྔགས་དང་། གསང་སྔགས་ལ་མི་མཁས་པ་རྣམས་ལ་རིག་སྔགས་དང་གསང་སྔགས་རབ་ཏུ་སྦྱིན་པའོ། །མུ་སྟེགས་རྣམས་ལ་མུ་སྟེགས་སྨྲ་བ་དང་། འཇུག་ངོགས་བཟང་པོ་དང་ལམ་རབ་ཏུ་སྒྲུབ་པར་བྱེད་པའོ། །སངས་རྒྱས་ཀྱི་བྱང་ཆུབ་ལ་རྒྱབ་ཀྱིས་ཕྱོགས་པ་རྣམས་ལ། སངས་རྒྱས་ཀྱི་བྱང་ཆུབ་ཆེན་པོ་མཆོག་སྦྱིན་པའོ། །འཁོར་བ་ལས་མ་བསྒྲལ་བ་རྣམས་སྒྲོལ་བར་བྱེད་པའོ། །མུན་པས་ལོང་བར་བྱེད་ཅིང་བསྒྲིབས་པ་རྣམས་ལ། མྱོས་པའི་མུན་པ་སེལ་བ་སྦྱིན་པར་བྱེད་པའོ། །སྒྲིབ་པར་བྱ་བ་རྣམས་ཀྱི་སྒྲིབ་པ་དང་བྲལ་བར་བྱེད་པའོ། །མཚམས་མེད་པ་ལྔའི་འགྲོ་བ་རྣམས་ཀྱི་མཚམས་མེད་པ་ལྔ་སྦྱོང་བར་བྱེད་པའོ། །ངག་ཉམས་པ་རྣམས་ཀྱི་ངག་རྣམ་པར་དག་པར་བྱེད་པའོ། །མ་གྲུབ་པ་རྣམས་ལ་མཆོག་གི་དངོས་གྲུབ་སྦྱིན་པའོ། །ཐུན་ཚགས་དང་བཅས་པ་རྣམས་ཀྱི་ཐུན་ཚགས་དང་བྲལ་ཞིང་ཡོངས་སུ་དག་པར་བྱེད་པའོ། །ངན་པ་རྣམས་ལ་མཆོག་སྦྱིན་པའོ། །མྱ་ངན་ལས་མ་འདས་པ་རྣམས་ཀྱི་མྱ་ངན་ལས་འདས་པའི་མཆོག་གོ། །བརྡ་མི་ཕྲད་པ་རྣམས་ལ་བརྡ་སྤྲོད་པར་བྱེད་པའོ། །ཀུན་ནས་འཁྲུགས་པ་རྣམས་ཀྱི་སེམས་གནས་པའི་མཆོག་གོ། །མཆོག་མེད་པ་རྣམས་ལ་མཆོག་སྦྱིན་པའོ། །རྨི་ལམ་ངན་པ་མཐོང་བ་རྣམས་ལ་རྨི་ལམ་ཆེན་པོའི་མཆོག་སྟོན་པའོ། །བཀྲེས་པ་རྣམས་ལ་ཁ་ཟས་ཀྱི་མཆོག་སྦྱིན་པའོ། །སྐོམ་པ་རྣམས་བཏུང་བ་ཆེན་པོའི་རོ་ལ་ཡོངས་སུ་ལོངས་སྤྱོད་པར་བྱེད་པའོ། །གཅེར་བུ་རྣམས་ཀྱིས་གོས་དང་བགོ་བ་སོ་སོར་ཐོབ་ཅིང་གྲུབ་པའོ། །མཛེ་ཅན་རྣམས་ཀྱི་མཛེ་དང་བྲལ་བར་བྱེད་པའོ། །ཤ་བཀྲ་ཅན་རྣམས་ཀྱི་ཤ་བཀྲ་ཡོངས་སུ་སྦྱོང་བར་བྱེད་པའོ། །རིམས་ཀྱིས་བཏབ་པ་རྣམས་ཀྱི་རིམས་དང་བྲལ་བར་བྱེད་པའོ། །གདོན་གྱིས་ཟིན་པ་རྣམས་ཀྱི་གདོན་དང་གཤེད་བྱེད་དང་། གདུལ་དཀའ་བ་རྣམས་འདུལ་བར་བྱེད་པའོ། །དགྲ་བོ་ཕྱིན་ཅི་ལོག་པ་རྣམས་ཀྱི་དགྲ་རྣམས་དང་བྲལ་བར་བྱེད་པའོ། །དབུལ་པོ་རྣམས་ལ་ནོར་སྦྱིན་པར་འགྱུར་རོ། །བུ་བཟའ་ཅན་རྣམས་ཀྱི་བུ་བཟའ་ཆེར་འཕེལ་བར་འགྱུར་རོ། །མུན་པས་ལོང་
བར་བྱས་པ་ཐམས་ཅད་ཀྱི་སྒྲོན་མའི་ཤིང་དང་། ཉི་མའི་འོད་ཟེར་སྟོང་གིས་ཀུན་ཏུ་སྣང་བའོ། །རྒྱལ་པོས་བཅོམ་པ་རྣམས་ལ་ལོངས་སྤྱོད་རྒྱ་ཆེན་པོ་ཆེར་བྱིན་པའོ། །འཁོན་པ་རྣམས་གཅིག་ཏུ་བྱེད་པའོ། །སེར་སྣ་ཅན་རྣམས་ཀྱི་སེར་སྣ་ཤིན་ཏུ་འཇོམས་པའོ། །འདོད་ཆགས་ལ་ཆགས་པ་རྣམས་ཀྱི་འདོད་ཆགས་རབ་ཏུ་འཇོམས་པའོ། །རྨོངས་པ་ཆུང་བ་མ་ཡིན་པ་རྣམས་ཀྱི་རྨོངས་པ་དང་བྲལ་བར་འགྱུར་རོ། །མི་དགེ་བའི་ལམ་གྱིས་རབ་ཏུ་ཉམས་པ་རྣམས་ཀྱི་དགེ་བའི་ལམ་གྱི་ཡིད་ཆོས་ཀྱི་ནང་དུ་ཆུད་པར་འགྱུར་རོ། །གཞན་གྱི་དབང་དུ་གྱུར་པའི་སེམས་ཅན་རྣམས་ཀྱི་འཇིགས་པ་མེད་པར་འགྱུར་ཞིང་ཡིད་ཆོས་ཀྱི་ནང་དུ་ཆུད་པར་འགྱུར་རོ། །ལོག་པར་ལྟུང་བ་རྣམས་ཀྱིས་ཤེས་རབ་དང་། བློ་དང་། ཤེས་བཞིན་དང་། བརྐམ་པ་རྣམས་ཀྱི་བློ་བསྙེན་པར་འགྱུར་རོ། །སངས་རྒྱས་མ་མཐོང་བ་རྣམས་དེ་བཞིན་གཤེགས་པ་ཐམས་ཅད་མཐོང་བར་འདོད་པར་འགྱུར་རོ། །ཆོས་ཐོས་པ་དང་བྲལ་བ་རྣམས་ཀྱི། ཆོས་ཆེན་པོའི་རོ་རྒྱ་ཆེན་པོ་ཐོས་པར་འགྱུར་རོ། །དགེ་འདུན་ལ་བསྙེན་བཀུར་བྱེད་པ་དང་བྲལ་བ་རྣམས་ཀྱི་ལྷ་དང་། ཉན་ཐོས་ཀྱི་དག་འདུན་ལ་བསྙེན་བཀུར་བྱེད་པར་འགྱུར་རོ། །དབང་པོ་ཉམས་པ་རྣམས་ཀྱི། དབང་པོ་ཡོངས་སུ་རྫོགས་པར་འགྱུར་རོ། །ཡན་ལག་རྣམ་པར་ཉམས་པའི་སེམས་ཅན་རྣམས་ཀྱི་སོ་སོའི་ཡན་ལག་ཡོངས་སུ་རྫོགས་པར་འགྱུར་རོ། །བྱང་ཆུབ་སེམས་དཔའ་མཐོང་བ་དང་བྲལ་བ་རྣམས་ཀྱི་བྱང་ཆུབ་སེམས་དཔའི་ཚོགས་ཆེན་པོ་མཐོང་བར་འགྱུར་རོ། །ལྷས་ཡོངས་སུ་སྤངས་པ་རྣམས་ཀྱི་ལྷའི་ཚོགས་ཐམས་ཅད་ཀྱིས་ཡང་དག་པར་འཛིན་པར་འགྱུར་རོ། །ཉོན་མོངས་པ་དང་སྒྲིབ་པས་དཀྲིས་པའི་སེམས་ཅན་རྣམས་ཀྱི་ཉོན་མོངས་པ་དང་། སྒྲིབ་པ་ཐམས་ཅད་ལས་ཡོངས་སུ་གྲོལ་བར་འགྱུར་རོ། །ཕྱག་ན་རྡོ་རྗེ་དོན་ཡོད་པའི་མཆོད་པའི་ནོར་བུའི་སྙིང་པོའི་གཟུངས་སྤྱན་རས་གཟིགས་དབང་ཕྱུག་གིས་གསུངས་པ་ནི་དེ་ལྟར་རྫུ་འཕྲུལ་ཆེ་སྟེ། དེ་བཞིན་གཤེགས་པ་ཐམས་ཅད་ཀྱི་མཆོད་པའི་སྤྲིན། བྱང་ཆུབ་སེམས་དཔའ་ཐམས་ཅད་ཀྱི་མཆོད་པའི་སྤྲིན་སངས་རྒྱས་ཀྱི་ཞིང་ཐམས་ཅད་དུ་རིན་པོ་ཆེ་སྣ་བདུན་གྱི་མཆོད་པའི་སྤྲིན་གྱི་ཆར་འབེབས་པ་སངས་རྒྱས་ཀྱི་ཞིང་གི་དེ་བཞིན་གཤེགས་
པ་ཐམས་ཅད་དང་མཚུངས་པར་དུས་གསུམ་དུ་གཤེགས་ཤིང་བཞུགས་པ་རྣམས་ཀྱི་དཔག་བསམ་གྱི་ཤིང་ཆེན་པོའི་མཆོད་པའི་སྤྲིན་གྱི་ཆར་འབེབས་པར་བྱེད་པའི་མཆོད་སྤྲིན་འབྱུང་བར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དམ་ཚིག་རིག་སྔགས་ཀྱི་དཀྱིལ་འཁོར་གྱི་དེ་ཁོ་ན་ཉིད་སྒྲུབ་པར་བྱེད་པ། རྨད་དུ་བྱུང་བའི་དངོས་གྲུབ་ཡང་དག་པར་སྟོན་པར་བྱེད་པའོ། །རིག་སྔགས་ཀྱི་དཀྱིལ་འཁོར་གྱི་ལྷ་ཐམས་ཅད་དང་། རིག་པའི་རྒྱལ་པོའི་ལྷ་རྣམས་དང་། གསང་སྔགས་ཀྱི་ལྷ་ཐམས་ཅད་སྤྱན་འདྲེན་ཞིང་འགུགས་པར་བྱེད་པའོ། །འདི་ནི་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱེད་པའོ། །འདི་ནི་ཐམས་ཅད་དུ་གསང་བའི་སྒོ་སྟོན་པར་བྱེད་པའོ། །ལག་ན་རྡོ་རྗེ་དོན་ཡོད་པའི་མཆོད་པའི་སྙིང་པོའི་གཟུངས་འདི་ནི་དུས་མ་ཡིན་པའི་ཆར་དང་། མུ་གེ་དང་། དུས་ཀྱི་ཆུ་རྣམ་པར་ཉམས་པ་ལ་སོ་སོར་བསྐྱེད་པའོ། །དེ་ནས་རིག་སྔགས་འཆང་གཙང་མས་ཁྲུས་བྱས་གོས་གཙང་བ་བགོས་ཏེ། ཡིད་རྩེ་གཅིག་ཏུ་བྱས་ན་སེམས་ཅན་ཐམས་ཅད་ལ་མཆོག་ཏུ་བརྩེ་བ་དང་བྱམས་པའི་སེམས་བསྒོམ་པར་བྱའོ། །མཆོད་རྟེན་གྱི་ཡན་ལག་དང་ཉེ་བའམ། ཁང་སྟོང་ངམ། རི་བོའམ། ནགས་ཐིབས་པོ་དང་། དགོན་པ་དང་། སྐྱེད་མོས་ཚལ་ལམ། དགེ་འདུན་གྱི་ཀུན་དགའ་ར་བའམ། ཆུ་ཀླུང་ངམ། མཚེའུའམ། རྫིང་བུའམ། ཀླུ་གནས་པའི་མཚོའམ། ལྷའི་གནས་སམ། རྒྱལ་པོའི་ཕོ་བྲང་ཡང་རུང་སྟེ། དེར་རིག་སྔགས་འཆང་གཙང་མར་གནས་པས་ས་གཞི་ཡོངས་སུ་བརྟགས་པ་ཆ་མཉམ་པ་མཛེས་པར་ཁྲུ་གཉིས་ཀྱི་ཚད་ཀྱི་དཀྱིལ་འཁོར་བྱས་ལ་ས་དང་བ་བྱུང་དུ་ལྡན་པས། གྲུ་བཞི་པར་ཆ་གཞལ་ཏེ། ལེགས་པར་བྱི་དོར་བྱས་ལ་ཤིན་ཏུ་འཇམ་པར་བྱའོ། །དེར་དེའི་སྟེང་དུ་ཙནྡན་དང་། དྲིའི་ཆུས་བྱུག་པར་བྱའོ། །གུར་གུམ་གྱིས་རྣམ་པ་སྣ་ཚོགས་པའི་མཚན་མ་དང་ཕྱག་རྒྱ་རྣམས་རི་མོར་བྲིའོ། །དེ་ལ་དཀྱིལ་འཁོར་གྱི་དབུས་ཀྱི་སྙིང་པོ། །ཀླུ་མགོ་བོ་དགུ་པ་སྐྱིལ་མོ་ཀྲུང་གིས་འདུག་པ་བྲིའོ། །གྲྭ་བཞིའི་ནང་དུ་ཆུད་པར་དོན་ཡོད་ཞགས་པ་བྲིའོ། །དཀྱིལ་འཁོར་གྱི་ཕྱི་རོལ་གྱི་ཁོར་ཡུག་ཏུ་ཇི་ལྟར་ཐོབ་པའི་ཕྱག་རྒྱ་དང་། གསང་སྔགས་རྣམས་བྲི་བར་བྱའོ། །སྒོ་བཞི་རྣམ་པར་དབྱེ་བར་བྱ་སྟེ། ཇི་ལྟར་འབྱོར་པའི་གཏོར་མ་
སྣ་ཚོགས་པའི་རོའི་གཏོར་མ་དཀར་པོ་དང་། མེ་ཏོག་དང་། བདུག་པ་དང་། དྲི་དང་། མར་མེ་དང་། གང་བའི་བུམ་པ་དང་། གཏོར་མ་དང་། བདུག་པའི་པོག་ཕོར་གྱིས་ཉེ་བར་མཛེས་པར་བྱའོ། །རིག་སྔགས་འཆང་གིས་ཆེས་མངོན་དུ། དོན་ཡོད་ཞགས་པ་ལན་བདུན་བཟླས་བར་བྱའོ། །ཁྲོ་བོའི་རྒྱལ་པོ་ལ་ལན་ཅིག་བཟླས་པས་མངོན་པར་དབང་བསྐུར་བར་བྱའོ། །དོན་ཡོད་པའི་ལྕགས་ཀྱུ་དང་། ཁྲོ་བོ་ལྕགས་ཀྱུ་དུས་གཅིག་ཏུ་བརྗོད་དོ། །རིག་སྔགས་ཀྱི་རྒྱལ་པོ་ལན་གསུམ་དུ་བརྗོད་པར་བྱའོ། །དེ་ནས་རིག་སྔགས་འཆང་གིས་དཀྱིལ་འཁོར་ལ་མངོན་དུ་ཕྱོགས་ཏེ་བཟླས་པའི་ཆོ་ག་བྱའོ། །དོན་ཡོད་པའི་མཆོད་པ་ནོར་བུའི་སྙིང་པོ་ལན་སྟོང་རྩ་བརྒྱད་དུ་བཟླས་བརྗོད་བྱའོ། །ནཱ་ག་གེ་སར་དང་། ན་ལ་དི་ན་དང་། རྒྱ་སྤོས་དང་། གུར་གུམ་དང་། ཙནྡན་དང་། ཡུངས་ཀར་དང་། ལི་ཁ་ར་མཉམ་པར་སྦྱར་བའི་བདུག་པ་ལ་བཟླས་བརྗོད་བརྒྱ་རྩ་བརྒྱད་བྱ་སྟེ། ཀླུའི་དཀྱིལ་འཁོར་དུ་བདུག་པ་དབུལ་བར་བྱའོ། །ཀླུའི་ལྟེ་བའི་སྟེང་དུ་བདུག་སྤོས་ཀྱི་པོག་ཕོར་གང་བ་གཞག་པར་བྱའོ། །ལན་སྟོང་རྩ་བརྒྱད་དུ་བཟླས་པའི་མོད་ཉིད་ལ། ཀླུའི་ཞགས་པ་ཆེན་པོ་ལས་ཆར་གྱི་རྒྱུན་ཆེན་པོ་འབྱིན་ཏེ་ཇི་སྲིད་འདོད་པའི་བར་དུ་ཆར་འབེབས་སོ། །ཀླུའི་རྒྱལ་པོའི་མིང་ནས་བཟུང་སྟེ་བཟླས་པར་བྱའོ། །ཀླུའི་རྒྱལ་པོ་རྒྱ་མཚོ་དང་། དགའ་བོ་དང་། ཉེ་དགའ་བོ་དང་། ནོར་རྒྱས་ཀྱི་བུ་དང་། འཇོག་པོ་དང་། ཧུ་ལུ་དང་། ཨུ་ལ་མ་བུ་ལ་དང་། ཆུ་ལྷ་དང་། ཡིད་ལྡན་དང་། ཨེ་ལའི་འདབ་མ་དང་། ཀླུའི་རྒྱལ་པོ་ཀུན་ནས་འཁོར་བའི་གདུགས་ཏེ། ཀླུའི་རྒྱལ་པོ་རྣམས་ལས་ཅིག་སྨོས་པར་བྱ་སྟེ། ཀླུའི་རྒྱལ་པོ་དེ་རྣམས་ཀྱི་བདེན་པར་དམ་བཅས་པས་རྣམ་པར་གཞག་པའི་མོད་ཉིད་ལ་ཆར་གྱི་རྒྱུན་འབྱིན་པར་བྱེད་དེ་ཇི་སྲིད་འདོད་ཀྱི་བར་དུ་ཀུན་ནས་སྦྱོར་བས་ཆར་སྟོང་ཕྲག་འབེབས་སོ། །ཡང་ན། ཡུངས་ཀར་ལ་སྟོང་རྩ་བརྒྱད་དུ་བཟླས་པས། ཀླུའི་རྒྱལ་པོའི་སྙིང་གའི་སྟེང་དུ་སྦྱིན་སྲེག་བྱའོ། །སྦྱིན་སྲེག་བྱས་པ་ཙམ་གྱི་མོད་ལ་འཕྲལ་ཉིད་དུ་སྟོང་ཕྲག་དུ་མར་ཨ་བི་རཱ་ཡ་ཆར་གྱི་རྒྱུན་འབྱིན་པར་བྱེད་དོ། །སྤར་མོ་གང་གིས་ཉིན་མཚན་གཅིག་ཏུ་རྒྱུན་མི་འཆད་པར་ཆར་འབེབས་སོ། །སྦར་མོ་གསུམ་གྱིས་ཉིན་མཚན་གསུམ་དུ་འབེབས་སོ། །སྤར་མོ་བདུན་གྱིས་ཉིན་མཚན་བདུན་དུ་ཆར་གྱི་རྒྱུན་ཆེན་པོ་ཀླུའི་རྒྱལ་
པོས་འབྱིན་པར་བྱེད་དོ། །ཡང་དག་པ་ཁོ་ནར་ཆར་གྱི་རྒྱུན་ལྟུང་ངོ་། །ཡང་ན། ཀླུའི་རས་རིས་བྱ་སྟེ། ཁྲུ་གང་གི་ཚད་ལ་ཀུན་ནས་གྲུ་བཞི་པའི་ཚད་ཀྱི་རས་ལ་རི་མོར་བྱའོ། །དེའི་དབུས་སུ་རིག་པའི་རྒྱལ་པོ་འཕགས་པ་སྤྱན་རས་གཟིགས་དབང་ཕྱུག་བྲི་བར་བྱ་སྟེ། སྐྱིལ་མོ་ཀྲུང་གིས་འདུག་པ། ཕྱག་བཞི་པ། རལ་གྲི་དང་། རྩེ་གསུམ་དང་། ཞགས་པ་དང་། པདྨ་ཐོགས་པར་བྱའོ། །ཞལ་ཁྲོ་གཉེར་ཅན་རྒྱན་ཐམས་ཅད་ཀྱིས་རྣམ་པར་བརྒྱན་པ། རལ་པའི་ཅོད་པན་གྱིས་སྤུད་པ། འོད་དཔག་མེད་ཀྱི་ཅོད་པན་ཅན་རལ་པ་ཟླ་བ་ཕྱེད་པས་ཉེ་བར་མཛེས་པ། འོད་འདོམ་གང་བས་ཡང་དག་པར་བརྒྱན་པ། ཆུ་དང་བཅས་པའི་པདྨའི་གདན་བྱའོ། །ཀླུའི་རྒྱལ་པོ་དེ་དག །པུས་མོ་གཡས་དང་གཡོན་པ་བཙུགས་པ་བྱའོ། །ཀླུའི་གདེངས་ཀ་དང་བཅས་པ། ཐལ་མོ་འཆང་བས་སྐྱབས་སུ་འགྲོ་བར་བྱེད་པར་བྱའོ། །དེ་ནས་རིག་སྔགས་དེས་རས་རིས་དེ་ལ་མངོན་དུ་ཕྱོགས་ཏེ་སྨྲ་བ་བཅད་ནས་དོན་ཡོད་པའི་མཆོད་པའི་ནོར་བུའི་སྙིང་པོའི་གཟུངས་སྟོང་རྩ་བརྒྱད་དུ་བཟླས་པར་བྱ་སྟེ། ཡུངས་ཀར་ལ་ལན་སྟོང་རྩ་བརྒྱད་བཟླས་ནས་ཀླུའི་རྒྱལ་པོ་རྒྱ་མཚོ་ལ་བསྣུན་པར་བྱའོ། །སྟོང་རྩ་བརྒྱད་རྫོགས་པ་དང་། ཆར་གྱི་རྒྱུན་ཆེན་པོ་འབེབས་པར་བྱེད་དོ། །གལ་ཏེ་ལོ་སྟོང་དུ་ཆར་མི་འབབ་པར་འགྱུར་བ་ལས་འཕྲལ་ཉིད་དུ་ལྷས་ཆར་འབེབས་པར་བྱེད་པར་ཐེ་ཙོམ་མེད་དོ། །རླུང་དང་། སད་དང་། སེར་བའི་དུས་སུ། དེའི་རས་རིས་ཁང་པའི་སྟེང་དུ་བཞག་སྟེ། རླུང་དང་སད་དང་སེར་བ་ཐམས་ཅད་ཕྱིར་ཞིང་མི་འབྱུང་ངོ་། །ཕྱོགས་གང་དུ་རས་རིས་རྣམ་པར་ལྟ་བར་བྱེད་པ་དེའི་ཕྱོགས་ཀྱི་གནས་སུ། རླུང་དང་། སད་དང་། སེར་བ་མི་འབབ་སྟེ། རིའམ། དགོན་དུང་འཁྲིགས་པར་ཡང་མི་འབབ་བོ། །ཡང་ན་རིག་སྔགས་འཆང་གིས་རས་རིས་དེ་བཟུང་ནས། ཀླུའི་གནས་ཀྱི་མཚོར་སོང་ནས། གནས་ཀྱི་མཚོ་དེར་གཞག་པར་བྱའོ། །དོན་ཡོད་ཞགས་པའི་མཆོད་པའི་ནོར་བུའི་སྙིང་པོའི་གཟུངས་སྟོང་རྩ་བརྒྱད་དུ་ཆུ་ལ་བཟླས་ཏེ་གནས་པའི་མཚོ་རུ་འཕང་བར་བྱའོ། །འཕངས་པ་ཙམ་གྱི་མོད་ལ། གནས་དེར་གནས་པའི་ཀླུ་ཁྱེའུའི་གཟུགས་ཀྱིས་ལུས་ཕྱེད་གནས་དེ་ནས་འཐོན་ཏེ། རས་རིས་དེ་ལ་ཕྱག་འཚལ་བར་བྱེད་དོ། །རིག་སྔགས་འཆང་བ་ལ་
སྨྲས་པ། རིག་སྔགས་འཆང་གིས་བཀའ་བསྒོ་བ་ཅི་ཡིན་པ་བདག་གིས་བགྱིའོ་ཞེས་སོ། །རིག་སྔགས་འཆང་གིས་སྨྲ་བར་བྱ་སྟེ། ཀླུ་ཆེན་པོ་འཛམ་བུའི་གླིང་ཀུན་ཏུ་ལྟ་བར་གྱིས་ཤིག །ཁྱེའུ་དེ་ཡང་ཕྱོགས་བཞི་ཀུན་ཏུ་རྣམ་པར་ལྟ་བར་བྱེད་དོ། །ཇི་ལྟ་ཇི་ལྟར་མཚན་མ་མཐོང་བ་དེ་ལྟ་དེ་ལྟར་རིག་སྔགས་འཆང་ལ་མཚན་མ་སྨྲ་བར་འགྱུར་ཏེ། ལེགས་པར་བྱས་པའམ། ཉེས་པར་བྱས་པ་དེ་ཐམས་ཅད་སྨྲ་བར་བྱེད་དོ། །དེ་ནས་རིག་སྔགས་འཆང་གིས་བརྗོད་པར་བྱ་སྟེ། ཀླུ་ཆེན་པོ་ཆར་ཕོབ་ལ་ཚིམ་པར་གྱིས་ཤིག་འཛམ་བུའི་གླིང་པའི་རྩྭ་དང་ནགས་ཀྱི་བདག་པོ་དང་། རི་དང་ཚང་ཚིང་དང་དགོན་པ་དང་། ཞིང་དང་ཀུན་དགའ་ར་བ་རྣམས་ཐམས་ཅད་དུ། ཆར་གྱི་རྒྱུན་འབྱིན་པར་གྱིས་ཤིག །ལྷའི་ཆུས་ཀུན་ནས་ཆར་ཕོབ་ཅིག །སེམས་ཅན་ཐམས་ཅད་ཀྱི་ལྷའི་ཆུའི་ཆར་གྱི་རྒྱུན་ཆེན་པོ་ཕོབ་ཅིག །ཀླུའི་ཁྱེའུ་ལ་སྨྲས་པ། ཀྱེ་བཅུད་ལེན་མཆོག་ཏུ་གྱ་ནོམ་པའི་རིག་སྔགས་ཀྱི་གཞི་བྱིན་ཅིག་ཅེས། རིག་སྔགས་འཆང་གིས་བརྗོད་པར་བྱའོ། །ཀླུའི་ཁྱེའུ་བདུད་རྩི་བཅུད་ཀྱིས་ལེན་གྱི་མཆོག་ཟུང་ཤིག་ཞེས་སོ། །དེ་ནས་ཀླུའི་ཁྱེའུ་དེ། རིག་སྔགས་འཆང་ལ་མངོན་དུ་ཕྱོགས་ཏེ་ཐལ་མོ་སྦྱར་ནས་ཉེ་བར་འདུག་གོ། །རིག་སྔགས་འཆང་གིས་ཀླུ་ཆེན་པོ་ཉོན་ཅིག་ཅེས་བརྗོད་པར་བྱའོ། །དེ་ནས་རིག་སྔགས་འཆང་གིས་རྟེན་ཅིང་འབྲེལ་བར་འབྱུང་བ་བསྟན་པར་བྱ། འཕགས་པའི་བདེན་པ་བཞི་པོ་རྣམས་དང་། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང་། འཕགས་པའི་ལམ་ཡན་ལག་བརྒྱད་པ་བསྟན་པར་བྱའོ། །དོན་ཡོད་ཞགས་པའི་མདོ་ཡང་བསྟན་པར་བྱའོ། །གང་གི་ཚེ་རིག་སྔགས་འཆང་དེ་ལྟ་བུའི་དེ་བཞིན་གཤེགས་པའི་ཆོས་སྟོན་བཞིན་པ་ན། ཀླུའི་ལུས་ལ་བདུག་པ་འཁྲིགས་པའི་སྤྲིན་ཆེན་པོ་ངེས་པར་འཐོན་ཏེ། ནམ་མཁའི་དཀྱིལ་དུ་གཡོགས་པར་བྱེད་ཅིང་གནས་སོ། །ཆོས་སྟོན་པའི་སྐད་ཅིག་ཐང་ཅིག་ཡུད་ཙམ་དེ་ལ། ཆར་གྱི་རྒྱུན་ཆེན་པོ་འབབ་པར་བྱེད་དེ། སའི་མཚོ་དེར་ཆར་པ་འབབ་པ་མ་ཡིན་ནོ། །རིག་སྔགས་འཆང་དང་། རས་རིས་ཀྱི་སྟེང་དུ། ཀླུའི་ཁྱེའུ་དེ་རས་རིས་དེ་ལ་མཆོད་པ་བྱེད་དེ། རིག་སྔགས་འཆང་དེ་ལ་ཡོན་དང་བཅས་པས་ཆོས་ལ་མཆོད་པ་འབུལ་བར་བྱེད་དེ། རིག་སྔགས་འཆང་གིས་སྨྲས་པ། རིག་སྔགས་འཆང་གི་
སར་ཁྱོད་ཞུགས་ཤིག །དེ་རྣམས་འདི་སྐད་ཅེས་རིག་སྔགས་འཆང་རང་གི་ཁྱིམ་གྱིས་མཆོག་གོ། །རིག་སྔགས་འཆང་གིས་སྨྲ་བར་བྱ་སྟེ། གལ་ཏེ་དགེ་བ་བཅུའི་ལས་ཀྱི་ལམ་འཁོར་དང་བཅས་པ། ཡང་དག་པར་ལེན་པར་བྱེད་ན། དེའི་ཚེ་ང་ཁྱོད་ཀྱི་གནས་མཆོག་ཏུ་འཇུག་པར་བྱའོ། གལ་ཏེ་མི་བྱེད་ན་འཇུག་པར་མི་བྱའོ་ཞེས་སོ། །དེ་ནས་ཁྱེའུ་དེ། གལ་ཏེ་བྱེད་ན། དགེ་བ་སྟོན་པ་མཐོང་བ་དེའི་ཚེ་རང་གི་གཟུགས་ཀྱིས་གནས་པར་བྱེད་དེ། ལྷ་རྫས་ཀྱི་རྣ་རྒྱན་དྲི་མ་མེད་པ་གཡོ་བ་སྐྲའི་ཅོད་པན་འཆང་བ་རྒྱན་ཐམས་ཅད་ཀྱིས་རྣམ་པར་བརྒྱན་པའོ། །གལ་ཏེ་མི་བྱེད་ན་ཁྱེའུ་དེའི་གཟུགས་མི་སྣང་བར་འགྱུར་ཏེ། སླར་ཡང་མི་མཐོང་ངོ་། །ཡང་ན་རྫུ་འཕྲུལ་ཆེན་པོ་ཅན་གྱི་ཀླུའི་རྒྱལ་པོ་མཐོང་བར་འདོད་པའི་རིག་སྔགས་འཆང་དེས། ཟངས་ཀྱི་འདབ་མ་ལ་དོན་ཡོད་པའི་མཆོད་པའི་ནོར་བུའི་སྙིང་པོའི་གཟུངས་དེའི་སྟེང་དུ་བྲི་བར་བྱ་སྟེ་སྦྲང་རྩིས་བྱུག་པར་བྱའོ། །ཡུངས་ཀར་ལ་ལན་བརྒྱ་རྩ་བརྒྱད་དུ་ཡོངས་སུ་བཟླས་ཏེ་གཏོར་བར་བྱ་སྟེ། གནས་པའི་མཚོ་དེར་འཕང་བར་བྱའོ། །གུ་གུལ་ཞོ་གཅིག་ཚད་ཀྱིས་མཆོད་ནས་བདུག་པ་སྦྱིན་པར་བྱའོ། །ཇི་སྲིད་དུ་གུ་གུལ་ཕྱེད་ཀྱི་ཆ་ཤས་ཀྱི་ལྷག་མ་ལས་ཀྱི་བར་དུ་བསྲེག་པར་བྱའོ། །སྐད་ཅིག་ཡུད་ཙམ་ཐང་ཅིག་དེ་ལ་ཀླུའི་རྒྱལ་པོ་རྒྱ་མཚོ་བྲམ་ཟེའི་གཟུགས་ཀྱིས་ཀླུའི་མཚོར་ཉེ་བར་འདུག་སྟེ། རིག་སྔགས་འཆང་ལ་ཤིས་པ་རྗོད་པར་བྱེད་དོ། །རིག་སྔགས་འཆང་གིས་ཀྱང་། ནད་མེད་པར་གྱུར་ཅིག་ཅེས་བརྗོད་པར་བྱའོ། །ཀྱེ་ཆོས་ཀྱི་དོན་གྱི་ཚིག་ཉོན་ཅིག །ཆོས་དང་འཇིག་རྟེན་མང་པོ་ཡང་སྐྱོངས་ཤིག་ཅེས་སོ། །བྲམ་ཟེ་དེ་ཡང་དགའ་སྟེ། རིག་སྔགས་འཆང་ཅི་འདོད་པའི་དོན་གང་ཡིན་པའི་དོན་དེ་སྨྲོས་ཤིག་དང་། ཐམས་ཅད་སྨྲ་བར་འགྱུར་རོ། །ཞེས་རྗོད་པར་བྱེད་དོ། །དེ་ནས་དེ་བཞིན་གཤེགས་པ་ཆེན་པོ་བདུན་དང་། བྱང་ཆུབ་སེམས་དཔའ་ཆེན་པོ་བདུན་དང་། ཉན་ཐོས་ཆེན་པོ་བཞིའི་མཚན་ནས་སྨོས་པར་བྱའོ། །དེ་ནས་བྲམ་ཟེ་དེ་རྣམ་པ་དེ་ལྟ་བུའི་ཚིག་གི་སྒྲ་ཐོས་ནས། ཡིད་རབ་ཏུ་དགའ་སྟེ། སྙིང་མགུ་བ་ཆེན་པོར་གྱུར་ནས་རིག་སྔགས་འཆང་ལ་ལེགས་སོ་ཞེས་བྱ་བའི་སྒྲ་རྗོད་པར་བྱེད་དེ། ལེགས་སོ་ལེགས་སོ་ཞེས་སྒྲ་འབྱིན་པར་བྱེད་དོ། །
མཚན་ཤིན་ཏུ་བསྔགས་པ་གང་ཡིན་པ་དེ། ཁྱོད་ཀྱིས་ཡོངས་སུ་འཛིན་པ་དང་། ལེགས་པར་ཡོངས་སུ་གྲགས་པའི་མཚན་ཤིན་ཏུ་མཉན་པར་འོས་པ་མཆོག་ཏུ་རྙེད་པར་དཀའ་བ་སྟེ། མཚན་ཁྱོད་ཀྱི་ཡོངས་སུ་བསྒྲགས་པ་མཆོག་ཏུ་རྙེད་པར་དཀའ་བ་ཉིད་རིག་སྔགས་འཆང་གང་གིས། འདི་ལྟ་སྟེ། སེམས་ཅན་དེ་རིན་པོ་ཆེ། དོན་ཡོད་པ་ཆེན་པོའི་རྣམ་པར་འཕྲུལ་པའི་མཚན་འཛིན་པར་བྱེད་པ་སེམས་ཅན་རྣམས་ཀྱི་མཆོག་ཐོས་པར་བྱེད་དོ་ཞེས་སོ། །དེ་ནས་བྲམ་ཟེ་དེ་བྲམ་ཟེའི་གཟུགས་ཀྱི་ཆ་བྱད་དེ་མི་སྣང་བར་བྱས་ནས། ཀླུའི་རྒྱལ་པོ་རྒྱ་མཚོའི་གཟུགས་ཀྱི་ཆ་བྱད་དང་། རྟགས་ཀྱིས་ཇི་ལྟ་བ་བཞིན་དུ། རིག་སྔགས་འཆང་གི་མདུན་དུ་འདུག་སྟེ་སྨྲ་བར་ཡང་བྱེད་དོ། །རིག་སྔགས་འཆང་མཆོག་ཇི་ལྟར་མངོན་པར་འདོད་པ་སྨྲོས་ཤིག་དེ་ཐམས་ཅད་རྗེས་སུ་སྩལ་བར་བགྱིའོ། །དེ་ནས་རིག་སྔགས་འཆང་གིས་ཇི་ལྟར་མངོན་པར་འདོད་པའི་མཆོག་ཐམས་ཅད་བརྗོད་པ་དེ་སྟེར་བར་འགྱུར་རོ། །ཡང་ན་མཆོག་ཏུ་འཇུག་པར་བྱེད་དོ། །ཀླུའི་རྒྱལ་པོ་འཁོར་དང་བཅས་པ་ཐམས་ཅད་དབང་དུ་གྱུར་ནས་ཉེ་བར་གནས་སོ། །ལས་ཐམས་ཅད་བཀའ་བསྒོ་བ་ཙམ་གྱིས་བྱེད་པར་འགྱུར་ཏེ། འདི་ལ་དོགས་པ་དང་། ཡིད་གཉིས་བསྐྱེད་པར་མི་བྱའོ། །སྦྱར་བ་ཙམ་གྱི་མོད་ལ། བྱ་བ་འདི་རྣམས་ཐམས་ཅད་འགྲུབ་པར་འགྱུར། དེ་ནས་རས་རིས་བླངས་ཏེ། རྒྱལ་མཚན་གྱི་རྩེ་མོ་ལ་བཏགས་པར་བྱས་ནས། ཞིང་དང་ཀུན་དགའ་ར་བ་ཐམས་ཅད་ལ་གཡས་ཕྱོགས་སུ་བསྐོར་བར་བྱ་སྟེ། རླུང་དང་། ཚད་པ་དང་། སད་དང་། སེར་བ་དང་། སྦྲང་བུ་དང་། སྦྲང་བུ་མཆུ་རིངས་དང་། ཆ་ག་པ་དང་། བྱི་བ་དང་། ནེ་ལེ་དང་། ཁྱི་དང་། ཅེ་སྤྱང་དང་། གྲོག་སྦུར་དང་། སྤྲུལ་གོ་ཎ་ས་དང་། སྡིག་པ་དང་། སྦྲང་བུ་ཏྲེ་མ་བུ་ག་དང་། སྦྲང་བུ་ཏྲི་ལ་ཊ་དང་། སྦྲུལ་གདུག་པ་དང་། དུག་གི་འཇིགས་པ་འབྱུང་བར་མི་འགྱུར་ཏེ། འཕྲལ་ཉིད་དུ་ཡོངས་སུ་གྲོལ་བར་འགྱུར་རོ། །ལོ་ཐོག་དང་། མེ་ཏོག་དང་། འབྲས་བུ་རྣམས་ལེགས་པར་ཡོངས་སུ་སྨིན་པར་འགྱུར་རོ། །རོ་བཟང་བ་དང་། ལེགས་པར་སྨིན་པར་འགྱུར་རོ། །དོན་ཡོད་པའི་ནོར་བུ་མཆོད་པའི་སྙིང་པོའི་ཀླུའི་ཆར་འབེབས་པའི་ཆོ་གའོ། །དེ་ནས་འཐབ་པ་དང་། རྩོད་པ་དང་། འགྱེད་པ་དང་། ཕ་རོལ་གྱི་དམག་ཚོགས་དང་། འབྲོག་དགོན་པའི་
འཇིགས་པ་རབ་ཏུ་ཞི་བར་འདོད་པའི་རིག་སྔགས་འཆང་དེས་རིག་པའི་རྒྱལ་པོ་འབའ་ཞིག་རས་ལ་བྲི་བར་བྱ་སྟེ། དཔལ་ལྷ་མོའི་གཟུགས་དང་། ཁ་དོག་དང་། རྟགས་དང་། དབྱིབས་དང་། རྒྱན་ཐམས་ཅད་ཀྱིས་རྣམ་པར་བརྒྱན་པ། འོད་དཔག་མེད་ཀྱི་ཅོད་པན་འཆང་བའི་རྒྱལ་པོ་ཆེན་པོ་བཞི་བྲི་བར་བྱའོ། །ཚོན་སྣ་ཚོགས་པ་རྣམ་པར་བཀྲ་བའི་རྒྱལ་མཚན་གྱི་མཆོག་གདགས་པར་བྱའོ། །ཀླུའི་རྒྱལ་པོའི་ཕོ་བྲང་དུ་འཇུག་པར་བྱའོ། །དོན་ཡོད་པའི་ཞགས་པའི་ནོར་བུའི་སྙིང་པོའི་གཟུངས་འདི་ཡང་བརྗོད་པར་བྱ་ཞིང་འཇུག་པར་བྱ་སྟེ། དང་པོར་རྒྱལ་མཚན་གྱི་མཆོག་མཐོང་བ་ཙམ་གྱི་མོད་ལ་བུད་མེད་དང་སྐྱེས་པ་དང་། ཁྱེའུ་དང་། བུ་མོ་ཐམས་ཅད་ཀྱི་ནད་ཐམས་ཅད་དང་། འཇིགས་པ་ཐམས་ཅད་དང་། སྒྲིབ་པ་ཐམས་ཅད་དང་། སྡིག་པ་ཐམས་ཅད་དང་། ནད་ཐམས་ཅད་ཡོངས་སུ་གྲོལ་ལོ། །ཉེས་པར་བྱས་པ་དང་། སྡིག་པ་ཐམས་ཅད་ཡོངས་སུ་གྲོལ་ལོ། །དུག་དང་བྱད་སྟེམས་དང་། ཕྱེ་མའི་སྦྱོར་བའི་དུག་དང་། དུག་གི་འཇིགས་པ་ཐམས་ཅད་ཡོངས་སུ་གྲོལ་ལོ། །དགྲའི་འཇིགས་པ་ཐམས་ཅད་ཡོངས་སུ་གྲོལ་ལོ། །སྡིག་པ་ཐམས་ཅད་ཡོངས་སུ་གྲོལ་ལོ། །རྒྱལ་མཚན་གྱི་མཆོག་ལ་བཏགས་པ་མཐོང་ནས་མཐོང་བ་ཙམ་གྱི་མོད་ཁོ་ན་ལ། སྔོན་གྱི་སྡིག་པ་དང་། སྒྲིབ་པ་དང་། མཚམས་མེད་པ་ལྔའི་འགྲོ་བ་རྣམས་ལས་ཡོངས་སུ་གྲོལ་བར་འགྱུར་ཏེ། འདི་ལ་ཐེ་ཚོམ་དང་། ཡིད་གཉིས་བསྐྱེད་པར་མི་བྱའོ། །དང་པོར་གྲོང་ཁྱེར་གྱི་རྒྱལ་པོའི་ཕོ་བྲང་དུ་རྒྱལ་མཚན་གྱི་མཆོག་འདི་ཞུགས་པ་ཙམ་གྱི་མོད་ལ་མི་ངས་དང་། མུ་གེ་དང་། ཡམས་ཀྱི་ནད་དང་། འབྲོག་དགོན་པའི་ཉེ་བར་འཚེ་བ་དང་། འགོ་བའི་ནད་དང་། འཁྲུག་པ་ཐམས་ཅད་དང་། གདོན་དང་། འབྱུང་པོ་དང་། གནོད་སྦྱིན་དང་། སྲིན་པོ་དང་། ཡི་དགས་དང་། ཤ་ཟ་དང་། གྲིབ་གནོན་དང་། བརྗེད་བྱེད་ཐམས་ཅད་དང་། ལོག་པར་འདྲེན་པའི་འཇིགས་པ་མི་བཟད་པ་ཐམས་ཅད་རབ་ཏུ་ཞི་བར་བྱེད་དོ། །འཐབ་པ་དང་། འཐབ་མོ་དང་། རྩོད་པ་དང་། འགྱེད་པའི་འཇིགས་པ་ཐམས་ཅད་རབ་ཏུ་ཞི་བར་བྱེད་དོ། །ཕ་རོལ་གྱི་དམག་ཚོགས་དང་། ཕྱིར་རྒོལ་བ་དང་། དགྲའི་འཇིགས་པ་ཐམས་ཅད་རབ་ཏུ་ཞི་བར་བྱེད་དོ། །ཆོམ་རྐུན་དང་། གཡོན་ཅན་དང་། རྐུན་མོའི་འཇིགས་
པ་ཐམས་ཅད་རབ་ཏུ་ཞི་བར་བྱེད་དོ། །རྨི་ལམ་ངན་པ་དང་། མཚན་མ་ངན་པ། བཀྲ་མི་ཤིས་པའི་དངོས་པོ་ཐམས་ཅད་རྣམ་པར་ཉམས་པར་བྱེད་དོ། །ཡུལ་དང་། གྲོང་དང་། དགོན་པ་པ་དང་། ནགས་ཚང་ཚིང་དང་། གྲོང་ཁྱེར་དང་། རྒྱལ་པོའི་ཕོ་བྲང་རྣམས་ཐམས་ཅད་དུ་ཡང་། བདེ་བ་བྱེད་པར་འགྱུར་རོ། །ལོ་ལེགས་པ་དང་། དགའ་བར་འོས་པ་དང་། སེམས་ཅན་ཐམས་ཅད་ཉེ་བར་འཚེ་བ་མེད་པ་དང་། ནད་མེད་པར་འགྱུར་རོ། །སེམས་ཅན་དེ་རྣམས་ཐམས་ཅད་དུ་ཡང་། ཕན་ཚུན་དུ་དགའ་བ་དང་། རབ་ཏུ་མགུ་བ་ཆེན་པོས་ཕན་ཚུན་བྱམས་པའི་སེམས་སུ་འགྱུར་རོ། །དོན་ཡོད་པའི་མཆོད་པའི་ནོར་བུའི་སྙིང་པོའི་གཟུངས་འདི་ཡིད་རྩེ་གཅིག་པས་ཚེས་བཅོ་ལྔའི་ཉ་ལ་ཉིན་མཚན་ཐོག་ཐག་ཏུ་སྨྱུང་བར་གནས་པས་གཙང་མ་གོས་གཙང་མ་བགོ་བར་བྱའོ། །འབྱུང་ལྔའི་ཉེ་རེག་གིས་གཙང་སྦྲ་དང་། ཁྲུས་དང་། དྲིའི་ཆུ་ཙམ་གྱིས་རྗེས་སུ་མཐུན་པའི་བྱུག་པ་བྱས་ཏེ། སྐྱིལ་མོ་ཀྲུང་དུ་འདུག་ནས་རིག་པའི་རྒྱལ་པོ་ལ་མངོན་དུ་ཕྱོགས་ནས་བཟླས་བརྗོད་བྱའོ། །མཚན་ཐོག་ཐག་ཏུ་མཆོད་པ་ཆེན་པོ་རྒྱུན་མི་འཆད་པར་བསྒྲུབ་པར་བྱའོ། །དྲིའི་ཏིལ་མར་གྱི་མེ་དབུལ་བར་བྱ་ཞིང་། བགྲང་ཕྲེང་དཔག་ཏུ་མེད་པ་བྱས་པའི་བཟླས་བརྗོད་དབུལ་བར་བྱའོ། །ལན་རེ་རེ་བཟླས་པས་ལན་བརྒྱ་སྟོང་ཕྲག་ཡོངས་སུ་བཟླས་པར་འགྱུར་རོ། །ཇི་སྲིད་དུ་རིག་པའི་རྒྱལ་པོའི་བྲིས་སྐུ་འབར་བར་བྱེད་དོ། །འདི་ལྟ་སྟེ། འོད་ཟེར་སྣ་ཚོགས་པ་འབྱིན་པར་བྱེད་དོ། །རིག་སྔགས་འཆང་དགའ་བར་བྱེད་ཅིང་། སྤྱི་བོའི་གཙུག་ནས་འབར་བར་བྱེད་དོ། །ནམ་མཁའ་ནས་རིག་སྔགས་འཆང་ཁྱོད་ཀྱིས་བཟླས་བརྗོད་ཀྱི་ཆོ་ག་མཆོག་ཏུ་བྱས་པ་ལེགས་སོ་ལེགས་སོ་ཞེས་སྒྲ་འབྱིན་པར་བྱེད་དོ། །འདི་ནི་རིག་སྔགས་འཆང་རྣམས་ཀྱི་མཆོག་གི་བཟླས་པའི་ཆོ་ག་སྟེ། ཁྱོད་ཀྱིས་དོན་ཡོད་པའི་ཞགས་པའི་སྙིང་པོ་རྣམ་པར་ཐར་པའི་དཀྱིལ་འཁོར་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་བྱས་པར་གྲུབ་བོ། །ཁྱོད་ཀྱིས་དོན་ཡོད་པའི་མཆོད་པའི་ནོར་བུའི་སྙིང་པོའི་གཟུངས་ཀྱི་དངོས་གྲུབ་ཀྱང་གྲུབ་བོ། །ཁྱོད་ཀྱིས་དེ་བཞིན་གཤེགས་པ་ཐམས་ཅད་ཀྱི་གསང་བའི་དཀྱིལ་འཁོར་དང་། ཕྱག་རྒྱ་རིམ་པར་ཕྱེ་བ་དང་། ཐུན་མོང་གི་སྙིང་པོ་དང་གཟུངས་སྨྲས་པས། རིག་པ་འཛིན་པའི་མཆོག་དེ་ཐམས་
ཅད་རྗེས་སུ་མཐུན་པར་སྩོལ་བར་འགྱུར་རོ། །འདི་ལྟ་སྟེ་གསང་སྔགས་ཀྱི་དངོས་གྲུབ་བམ། གཟུངས་ཀྱི་དངོས་གྲུབ་བམ། ཆོ་ག་ཞིབ་མོའི་དངོས་གྲུབ་བམ། རིགས་ཐུན་མོང་བའི་དཀྱིལ་འཁོར་གྱི་དེ་བཞིན་གཤེགས་པའི་དངོས་གྲུབ་བམ། ཕྱག་རྒྱའི་དམ་ཚིག་གི་དངོས་གྲུབ་བམ། ནམ་མཁའ་ལ་འགྲོ་བའམ། མི་སྣང་བའམ། གཟུགས་སྣ་ཚོགས་སུ་བསྒྱུར་བའམ། མིག་འཕྲུལ་ལམ། རྫུ་འཕྲུལ་སྟོན་པའམ། ཀླུའི་གཞལ་མེད་ཁང་ངམ། ལྷའི་གཞལ་མེད་ཁང་ངམ། གནོད་སྦྱིན་གྱི་གཞལ་མེད་ཁང་ངམ། དྲི་ཟའི་གཞལ་མེད་ཁང་ངམ། ལྷ་མ་ཡིན་གྱི་གཞལ་མེད་ཁང་ངམ། ནམ་མཁའ་ལྡིང་གི་གཞལ་མེད་ཁང་ངམ། མིའམ་ཅིའི་གཞལ་མེད་ཁང་ངམ་ལྟོ་འཕྱེ་ཆེན་པོའི་གཞལ་མེད་ཁང་ངམ། ཉི་མའི་གཞལ་མེད་ཁང་ངམ། ཟླ་བའི་གཞལ་མེད་ཁང་ངམ། སྐར་མའི་ཚོགས་ཀྱི་གཞལ་མེད་ཁང་ངམ། རྒྱུ་སྐར་གྱི་གཞལ་མེད་ཁང་ངམ། སྲིན་པོའི་གཞལ་མེད་ཁང་ངམ། འདོད་པའི་གཟུགས་ཀྱི་གཞལ་མེད་ཁང་ཡང་རུང་སྟེ་དེ་ཐམས་ཅད་རྗེས་སུ་འཛིན་ནོ། །འདི་ནི་ཁྱོད་ཀྱིས་བྱ་བ་ཐམས་ཅད་བཀླགས་པས་འགྲུབ་ཅིང་བཟླས་པ་ཙམ་གྱིས་འགྲུབ་པར་འགྱུར་རོ། །ཀྱེ་རིག་སྔགས་འཆང་བྱ་བ་རྣམ་པ་སྣ་ཚོགས་པ་དེ་རྣམས་རྗེས་སུ་འཛིན་ནོ། །འདི་ལྟ་སྟེ། ནོར་སྒྱུར་བར་སྨྲ་བ་དང་། ཞིང་སྨྲ་བ་དང་། ནོར་བུ་སྨྲ་བ་དང་། ཞགས་པའི་དངོས་གྲུབ་དང་། མིག་སྨན་སྒྲུབ་པ་དང་། ཐིག་ལེ་སྒྲུབ་པ་དང་། དབང་ཕྱུག་དང་། བློན་པོ་དང་། བཀྲབས་པ་དང་། མདུན་ན་འདོན་ཉིད་དང་། སྟོབས་ཆེ་བ་ཉིད་དང་། ལོངས་སྤྱོད་ལ་དམིགས་པ་དང་། ཡུལ་གྱི་བདག་པོ་ཉིད་དང་། དབང་ཕྱུག་དང་། ནོར་འཕེལ་བ་དང་། གཏེར་གཡོ་བ་དང་། ཉོ་ཚོང་གི་གྲོགས་བྱེད་པ་དང་། འགུགས་པ་དང་། ཁུང་དུ་འཇུག་པ་དང་། རི་ལ་འཇུག་པ་དང་། ནགས་སུ་འཇུག་པ་དང་། མེ་ལ་འཇུག་པ་དང་། ས་འོག་ཏུ་འཇུག་པ་དང་། ཀླུའི་ཆར་འབེབས་པ་དང་། ཆར་གྱི་རྒྱུན་དང་། སེར་བའི་རྒྱུན་དང་། སེར་བ་འབེབས་པ་དང་། གྲོང་ལྟ་བ་དང་། གཡུལ་དུ་འཇུག་པ་དང་། རིག་སྔགས་འཆང་ཉིད་དང་། སངས་རྒྱས་ཀྱི་ཞིང་མཐོང་བ་ཉིད་དང་། ལྡོང་རོས་ཀྱི་མིག་སྨན་སྒྲུབ་པ་དང་། རལ་གྲི་སྒྲུབ་པ་དང་། རྡོ་རྗེ་སྒྲུབ་པ་དང་། རྩེ་གསུམ་སྒྲུབ་པ་དང་། འཁོར་ལོ་སྒྲུབ་པ་དང་། དུང་སྒྲུབ་པ་དང་། གཏུན་ཤིང་སྒྲུབ་པ་དང་། དགྲ་སྟ་སྒྲུབ་པ་དང་། མདའ་བོ་ཆེ་སྒྲུབ་པ་དང་། ཐོ་བ་སྒྲུབ་པ་དང་། དྲིལ་བུ་སྒྲུབ་པ་དང་། རྫས་སྒྲུབ་པ་
དང་། སྨན་སྒྲུབ་པ་དང་། བཅུད་ཀྱིས་ལེན་སྒྲུབ་པ་དང་། རོ་ལངས་སློང་བར་བྱེད་པ་དང་། རང་གི་གནས་འབེབས་པ་དང་། གོས་འབེབས་པ་དང་། རིམས་འབེབས་པ་དང་། ཤི་བ་སློང་བར་བྱེད་པ་དང་། གདོན་ཐམས་ཅད་འབེབས་པ་དང་། ཐོད་པ་འབེབས་པ་དང་། བུམ་པ་འབེབས་པ་དང་། བུམ་བུ་འབེབས་པ་དང་། ལྟེང་ཀ་འབེབས་པ་དང་། དྲིལ་བུ་འབེབས་པ་དང་། ཐོ་བ་འབེབས་པ་དང་། རལ་གྲི་འབེབས་པ་དང་། མེ་ལོང་འབེབས་པ་དང་། པདྨ་འབེབས་པ་དང་། བུད་མེད་དང་། སྐྱེས་པ་དང་། ཁྱེའུ་དང་། བུ་མོ་འབེབས་པ་དང་། མཛེས་པར་བྱེད་པ་དང་། གར་བྱེད་པ་དེ་རྣམས་ཐམས་ཅད་བཀླགས་པས་གྲུབ་པ་དང་བཟླས་པས་འགྲུབ་པས་རིག་སྔགས་འཆང་རྗེས་སུ་འཛིན་ཏེ། དོན་མཐའ་ཡས་ཤིང་དོན་མཐའ་ཡས་པ་དེ་རྣམས་ཐམས་ཅད་གྲུབ་པའི་ཆེད་དུ་གྱིས་ཤིག་ཅེས་སོ། །དགོས་པ་ཐམས་ཅད་ཡོངས་སུ་རྫོགས་པར་བྱེད་དེ། རིག་སྔགས་འཆང་ཁྱོད་དགེ་བ་འགྲུབ་ཅིང་རིག་པ་སྟེ། རིག་སྔགས་འཆང་གྲུབ་པ་ཁྱོད་ཀྱིས་འཇིག་རྟེན་དང་འཇིག་རྟེན་ལས་འདས་པའི་བྱ་བ་བྱེད་པར་འགྱུར་རོ། །རིག་སྔགས་འཆང་ཁྱོད་ཤི་འཕོས་ནས་བདེ་བ་ཅན་གྱི་འཇིག་རྟེན་གྱི་ཁམས་སུ་འགྲོའོ། །དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱིས་ཁྱོད་ཕྱིར་མི་ལྡོག་པར་ལུང་བསྟན་ནོ། །འདི་ནི་སྐྱེ་བ་ཐ་མ་སྟེ། མངལ་གྱི་དྲི་མས་མ་གོས་པར་པདྨ་ལས་བརྫུས་ཏེ་སྐྱེ་བར་འགྱུར་རོ། །སྐྱེ་བའི་སྐྱེ་བ་དྲན་པར་ཡང་འགྱུར་རོ། །ཁྱོད་དགེ་བའི་རྩ་བ་ཐམས་ཅད་ལ་མངོན་པར་ཕྱོགས་པ་དང་། དེ་བཞིན་གཤེགས་པ་ཐམས་ཅད་ཀྱི་གསང་བའི་དཀྱིལ་འཁོར་དང་། ཕྱག་རྒྱ་དང་། གསང་སྔགས་དང་། གཟུངས་ཀྱི་རིམ་པར་ཕྱེ་བ་དང་། ཆོ་ག་ཞིབ་མོ་ལ་ཇི་སྲིད་བྱང་ཆུབ་ལ་མཐར་ཐུག་པའི་བར་དུ་མངོན་དུ་ཕྱོགས་པར་འགྱུར་རོ། །དེ་བཞིན་དུ་སྒྲ་ཡིས་ལུང་སྟོན་པར་བྱེད་པ་སྨྲས་ནས་མི་སྣང་བར་འགྱུར་རོ། །དེ་ནས་རིག་པའི་རྒྱལ་པོའི་རས་རིས་དེའི་སྨིན་མའི་བར་ནས་འོད་ཟེར་ཁ་དོག་སྣ་ཚོགས་པ་རྣམ་པར་བཀྲ་ཞིང་བཀྲ་བ་འབྱིན་པར་བྱེད་དེ། དེ་མ་ཐག་ཏུ་ཀུན་ནས་སྣང་བར་བྱེད་དོ། །ཀུན་ནས་སྣང་བར་བྱས་ནས་ཀྱང་། རིག་སྔགས་འཆང་གི་ལུས་ལ་བབ་སྟེ་མི་སྣང་བར་འགྱུར་རོ། །མི་སྣང་བར་གྱུར་པའི་དེ་མ་ཐག་ཏུ་རིག་སྔགས་འཆང་དེས་ཏིང་ངེ་འཛིན་སྟོང་ཕྲག་བརྒྱ་ཐོབ་པར་འགྱུར་རོ། །འདི་ལྟ་སྟེ་ཕྱིར་མི་ལྡོག་པའི་ཏིང་ངེ་འཛིན་དང་།
རྣམ་པར་སྣང་བར་བྱེད་པའི་ཏིང་ངེ་འཛིན་དང་། ཀུན་ནས་སྒོའི་ཏིང་ངེ་འཛིན་དང་། ཀུན་ནས་འོད་ཀྱི་དཀྱིལ་འཁོར་གྱི་ཏིང་ངེ་འཛིན་དང་། འོད་ཡངས་པའི་དཀྱིལ་འཁོར་གྱི་ཏིང་ངེ་འཛིན་དང་། དོན་ཡོད་པ་རྣམ་པར་འཕྲུལ་པའི་ཏིང་ངེ་འཛིན་དང་། དོན་ཡོད་པ་མཆོད་པའི་ནོར་བུའི་ཏིང་ངེ་འཛིན་དང་། དོན་ཡོད་པའི་ནོར་བུ་ཞེས་བྱ་བའི་ཏིང་ངེ་འཛིན་དང་། དངོས་གྲུབ་གསལ་བ་ཞེས་བྱ་བའི་ཏིང་ངེ་འཛིན་དང་། ཀུན་ཏུ་གཟིགས་པ་ཞེས་བྱ་བའི་ཏིང་ངེ་འཛིན་དང་། ཕྱག་རྒྱ་རིམ་པར་ཕྱེ་བའི་ཏིང་ངེ་འཛིན་དང་། དཀྱིལ་འཁོར་གསང་བའི་ཏིང་ངེ་འཛིན་དང་། དོན་ཡོད་པའི་གཟུངས་ཀྱི་ཏིང་ངེ་འཛིན་དང་། ཀུན་ཏུ་གཟིགས་པའི་ནོར་བུའི་རྒྱལ་པོའི་ཏིང་ངེ་འཛིན་དང་། དུས་ཀྱི་རྗེས་སུ་འབྲང་བའི་ཏིང་ངེ་འཛིན་དང་། པདྨ་མཆོག་ཅེས་བྱ་བའི་ཏིང་ངེ་འཛིན་དང་། པདྨ་རྣམ་པར་བལྟ་བ་ཞེས་བྱ་བའི་ཏིང་ངེ་འཛིན་དང་། ཞགས་པ་རབ་ཏུ་གནས་པ་ཞེས་བྱ་བའི་ཏིང་ངེ་འཛིན་དང་། རྟག་པར་ཁོང་དུ་ཆུད་པ་ཞེས་བྱ་བའི་ཏིང་ངེ་འཛིན་དང་། རྒྱལ་བའི་འོད་ཟེར་ཞེས་བྱ་བའི་ཏིང་ངེ་འཛིན་དང་། རྒྱུ་སྐར་ཀུན་ཏུ་གཟིགས་པ་ཞེས་བྱ་བའི་ཏིང་ངེ་འཛིན་དང་། དངོས་གྲུབ་ཀྱི་འོད་ཟེར་དྲི་མ་མེད་པ་ཞེས་བྱ་བའི་ཏིང་ངེ་འཛིན་དང་། ཀུན་ནས་ནོར་བུའི་གཟི་བརྗིད་ཅེས་བྱ་བའི་ཏིང་ངེ་འཛིན་དང་། དབང་ཕྱུག་གི་མཐུ་སྟོབས་དྲི་མ་མེད་པ་ཞེས་བྱ་བའི་ཏིང་ངེ་འཛིན་དང་། འོད་ཟེར་ཀུན་ནས་སྣང་བ་ཞེས་བྱ་བའི་ཏིང་ངེ་འཛིན་དང་། བློ་ཡང་དག་པར་འཛིན་པ་ཞེས་བྱ་བའི་ཏིང་ངེ་འཛིན་དང་། གསལ་བར་ཁོང་དུ་ཆུད་པ་ཞེས་བྱ་བའི་ཏིང་ངེ་འཛིན་དང་། ཕྱག་རྒྱ་ཀུན་ཏུ་གཟིགས་པ་ཞེས་བྱ་བའི་ཏིང་ངེ་འཛིན་དང་། ཕྱག་རྒྱ་ཀུན་ཏུ་གཟིགས་པའི་པདྨ་ཞེས་བྱ་བའི་ཏིང་ངེ་འཛིན་དང་། རྟག་པར་ཆར་འབེབས་པ་ཞེས་བྱ་བའི་ཏིང་ངེ་འཛིན་དང་། དྲི་མ་མེད་པའི་སྙིང་པོ་ཞེས་བྱ་བའི་ཏིང་ངེ་འཛིན་དང་། དངོས་གྲུབ་ཡངས་པ་ཞེས་བྱ་བའི་ཏིང་ངེ་འཛིན་དང་། མེ་ཏོག་ལྡན་པ་ཞེས་བྱ་བའི་ཏིང་ངེ་འཛིན་དང་། ཀུན་ནས་ཀུན་ཏུ་གཟིགས་པ་ཞེས་བྱ་བའི་ཏིང་ངེ་འཛིན་དང་། ཀུན་ནས་ཀུན་ཏུ་རྣམ་པར་སྦྱོང་བ་ཞེས་བྱ་བའི་ཏིང་ངེ་འཛིན་དང་། ལྕེའི་མཆོག་དང་ལྡན་པ་ཞེས་བྱ་བའི་ཏིང་ངེ་འཛིན་དང་། ཡི་གེ་རྣམ་པར་དག་པ་ཞེས་བྱ་བའི་ཏིང་ངེ་འཛིན་དང་། ཆུ་ཡོངས་སུ་སྦྱོང་བ་ཞེས་བྱ་བའི་ཏིང་ངེ་འཛིན་དང་། གཟི་བརྗིད་དང་ལྡན་པ་ཞེས་བྱ་བའི་ཏིང་ངེ་འཛིན་དང་། ཡངས་པར་བྱིན་གྱིས་བརླབས་པ་ཞེས་བྱ་བའི་ཏིང་ངེ་
འཛིན་དང་། བློ་འགུགས་པར་བྱེད་པ་ཞེས་བྱ་བའི་ཏིང་ངེ་འཛིན་དང་། མེ་ཏོག་མངོན་པར་བཀྲམ་པ་ཞེས་བྱ་བའི་ཏིང་ངེ་འཛིན་དང་། རྣམ་པར་འཕྲུལ་པ་བཀོད་པ་ཞེས་བྱ་བའི་ཏིང་ངེ་འཛིན་དང་། གཟུངས་རྣམ་པར་དག་ཅིང་དྲི་མ་མེད་པ་ཞེས་བྱ་བའི་ཏིང་ངེ་འཛིན་དང་། གཟི་བརྗིད་ཡན་ལག་ཅེས་བྱ་བའི་ཏིང་ངེ་འཛིན་དང་། ཐམས་ཅད་ཡོངས་སུ་དག་པ་ཞེས་བྱ་བའི་ཏིང་ངེ་འཛིན་སོ་སོར་ཐོབ་བོ། །མདོར་བསྡུ་ན་ཏིང་ངེ་འཛིན་འདི་རྣམས་བཀླགས་པ་ཙམ་དང་བཟླས་པ་ཙམ་གྱིས་འཇིག་རྟེན་པའི་སྒྲུབ་པའི་དངོས་གྲུབ་སོ་སོར་ཐོབ་བོ། །གང་ཞིག་བཟླས་པ་ཙམ་གྱིས་འཇིག་རྟེན་པའི་ཏིང་ངེ་འཛིན་དང་། གསང་སྔགས་དང་རྣམ་པར་འཕྲུལ་པ་རྣམས་སོ་སོར་ཐོབ་བོ། །ཏིང་ངེ་འཛིན་གཞན་དེ་རྣམས་ནི་ཏིང་ངེ་འཛིན་གྱི་རྣམ་པར་འཕྲུལ་པའི་དངོས་གྲུབ་སོ་སོར་ཐོབ་བོ། །ལག་ན་རྡོ་རྗེ་འཇིག་རྟེན་ལས་འདས་པའི་ཏིང་ངེ་འཛིན་གཞན་ཡང་བཀླགས་པས་གྲུབ་པ་དང་། བཟླས་པ་ཙམ་ལས་སོ་སོར་ཐོབ་བོ། །གང་གིས་འཇིག་རྟེན་ལས་འདས་པའི་དངོས་གྲུབ་དེ་བཞིན་གཤེགས་པ་ཐམས་ཅད་ཀྱི་གསང་བ་རིམ་པར་ཕྱེ་བ་དང་། དཀྱིལ་འཁོར་དང་། གསང་སྔགས་དང་། ཕྱག་རྒྱ་དེ་བཞིན་གཤེགས་པ་ཐམས་ཅད་ཀྱི་རིགས་ཐུན་མོང་བར་གྱུར་པ་མཐོང་བའི་དངོས་གྲུབ་སོ་སོར་ཐོབ་བོ། །ཏིང་ངེ་འཛིན་གྱི་རྣམ་པར་འཕྲུལ་པ་གང་གིས་དེ་བཞིན་གཤེགས་པ་ཐམས་ཅད་ཀྱིས་དུས་གསུམ་པའི་ཏིང་ངེ་འཛིན་དང་། དཀྱིལ་འཁོར་གྱི་གསང་བ་དང་། གསང་སྔགས་དང་། ཕྱག་རྒྱ་དང་། སྤྱི་གཙུག་ཀུན་ཏུ་གཟིགས་པར་འགྱུར་རོ། །ཕྱག་རྒྱ་དང་། གསང་སྔགས་དང་། དཀྱིལ་འཁོར་དང་། ཆོ་ག་ཞིབ་མོ་གང་ཡིན་པ་དེ་རྣམས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་གསང་བའི་རྒྱལ་མཚན་གྱི་མཆོག་ཏུ་ཀུན་ཏུ་གནས་སོ། །གང་གིས་སྐྱེ་བ་བརྗེས་པའི་མོད་དང་། བསྒོམས་པའི་མོད་ལ་རྒྱལ་མཚན་གྱི་མཆོག་དང་ལྡན་པའི་སྒོ་མཆོག་ཏུ་གནས་སོ། །འདི་ལྟ་སྟེ། དོན་ཡོད་པའི་ཡེ་ཤེས་བཀོད་པ་ཞེས་བྱ་བའི་ཏིང་ངེ་འཛིན་དང་། དཔའ་བར་འགྲོ་བ་ཞེས་བྱ་བའི་ཏིང་ངེ་འཛིན་དང་། རྒྱལ་མཚན་རྩེ་མོའི་དཔུང་རྒྱན་ཞེས་བྱ་བའི་ཏིང་ངེ་འཛིན་དང་། གཟུངས་ཀྱི་བདག་པོ་ཞེས་བྱ་བའི་ཏིང་ངེ་འཛིན་དང་། དགེ་བའི་མེ་ཏོག་གཙང་མ་ཞེས་བྱ་བའི་ཏིང་ངེ་འཛིན་དང་། སྤྱི་གཙུག་ཀུན་ཏུ་རྣམ་པར་བལྟ་བ་ཞེས་བྱ་བའི་ཏིང་ངེ་འཛིན་དང་། སེང་གེ་རྣམ་པར་རྩེ་
བ་ཞེས་བྱ་བའི་ཏིང་ངེ་འཛིན་དང་། འོད་འབར་བར་བྱེད་པ་ཞེས་བྱ་བའི་ཏིང་ངེ་འཛིན་དང་། གཟི་བརྗིད་ལྡན་པ་ཞེས་བྱ་བའི་ཏིང་ངེ་འཛིན་དང་། རིན་ཆེན་འབྱུང་གནས་ཞེས་བྱ་བའི་ཏིང་ངེ་འཛིན་དང་། གཟུངས་ཀྱི་ཕྱག་རྒྱ་ཞེས་བྱ་བའི་ཏིང་ངེ་འཛིན་དང་། རྣམ་པར་སྣང་མཛད་ཀྱི་སྙིང་པོ་ཞེས་བྱ་བའི་ཏིང་ངེ་འཛིན་དང་། དྲི་མ་མེད་པའི་འོད་ཅེས་བྱ་བའི་ཏིང་ངེ་འཛིན་དང་། ནོར་བུ་རིན་པོ་ཆེ་ཆེན་པོའི་ཆར་འབེབས་པར་བྱེད་པ་ཞེས་བྱ་བའི་ཏིང་ངེ་འཛིན་དང་། དོན་ཡོད་པ་དྲི་མ་མེད་པའི་བདག་པོ་ཞེས་བྱ་བའི་ཏིང་ངེ་འཛིན་དང་། དོན་ཡོད་པ་ཟབ་མོའི་སྒྲ་སྒྲོགས་པ་ཞེས་བྱ་བའི་ཏིང་ངེ་འཛིན་དང་། དོན་ཡོད་པའི་དངོས་གྲུབ་ཀྱི་ཞགས་པ་ཞེས་བྱ་བའི་ཏིང་ངེ་འཛིན་དང་། དོན་ཡོད་པའི་རྒྱལ་མཚན་ཞེས་བྱ་བའི་ཏིང་ངེ་འཛིན་དང་། ཡིད་བཞིན་གྱི་ནོར་བུའི་འོད་ཀྱི་སྣང་བ་རྒྱས་པ་ཞེས་བྱ་བའི་ཏིང་ངེ་འཛིན་ཏེ། འདི་རྣམས་ལ་སོགས་པའི་ཏིང་ངེ་འཛིན་མང་པོ་རྣམས་སོ་སོར་ཐོབ་ཅིང་ཏིང་ངེ་འཛིན་གཞན། འཇིག་རྟེན་ལས་འདས་པ་བརྒྱ་སྟོང་ཕྲག་བཀླགས་པ་དང་། བཟླས་པ་ཙམ་གྱིས་གྲུབ་པར་འགྱུར་རོ། །རིག་པའི་རྒྱལ་པོའི་གཟུངས་ཀྱི་སྙིང་པོ་འདི་ཡོན་ཏན་ཆེ་བ་དང་། ཕན་ཡོན་ཆེ་བ་དང་། རྫུ་འཕྲུལ་དང་། རྣམ་པར་འཕྲུལ་པ་ཆེ་བ་སྟེ། དོན་ཡོད་པ་ལྕགས་ཀྱུའི་ཆོ་ག་ཞིབ་མོ་ལ། དོན་ཡོད་པ་ནོར་བུའི་མཆོད་པ་ཞེས་བྱ་བའི་གཟུངས་འཕགས་པ་སྤྱན་རས་གཟིགས་དབང་ཕྱུག་གིས་དོན་ཡོད་ཞགས་པའི་སྙིང་པོའི་གཟུངས་གསུངས་པ། སེམས་ཅན་ཐམས་ཅད་ལ་ཕན་པ་རྗེས་སུ་འབྲང་བ། དགེ་བའི་རྩ་བ་ཐམས་ཅད་སྐྱེ་བར་བྱེད་པ། སྡིག་པ་དང་སྒྲིབ་པ་ཐམས་ཅད་རྣམ་པར་སྦྱོང་བར་བྱེད་པ། གཟུངས་ཀྱི་ཚིག་གི་སྙིང་པོ་གང་ཞིག་བཀླགས་པ་ཙམ་དང་བཟླས་པ་ཙམ་གྱིས་འདི་རྣམས་བྱེད་པའི་དངོས་གྲུབ་སོ་སོར་ཐོབ་པའོ། །སྒྲུབ་པ་འདི་རྣམས་ཐམས་ཅད་ནི་ལས་ཀྱི་རྣམ་པར་འཕྲུལ་དུ་འགྱུར་བ་མ་ཡིན་ནོ། །དེ་ནས་རིག་སྔགས་འཆང་དེ་སྨྱུང་བར་གནས་ཏེ། བཟླས་པ་གཅིག་དང་བཀླགས་པའི་དངོས་གྲུབ་ཀྱིས་དེ་ལྟ་བུའི་རྒྱས་ཤིང་གསལ་བ་ཐོབ་བོ། །དེ་ཁོ་ན་ཉིད་ཀྱི་དངོས་གྲུབ་ཡང་སོ་སོར་ཐོབ་སྟེ། དོན་རྒྱ་ཆེ་བ་དང་། ལོངས་སྤྱོད་དང་ལྡན་པ་དང་། གཟུངས་ཀྱི་དངོས་གྲུབ་ཆེན་པོ་སོ་སོར་ཐོབ་བོ། །བཀོད་པ་ཡངས་པ་རྣམ་པར་ལྟ་བ་ཞེས་བྱ་བའི་ཏིང་ངེ་འཛིན་དང་། གཟུངས་ཀྱི་གསང་བ་སོ་སོར་
ཐོབ་པོ། །དཔག་བསམ་གྱི་ཤིང་ཡང་དག་པར་གང་བའི་ཆར་འབེབས་པ་དང་། གཟུངས་ཀྱི་རྣམ་པར་འཕྲུལ་པའི་བཀོད་པ་སོ་སོར་ཐོབ་བོ། །ཡིད་བཞིན་གྱི་ནོར་བུ་ཆེན་པོའི་རྒྱ་མཚོ་དང་། རིན་པོ་ཆེ་སྣ་བདུན་གྱི་ཆར་འབེབས་པ་དང་། ཀུན་ནས་ཀུན་ཏུ་གཟིགས་པའི་རྒྱལ་མཚན་གྱི་གཟུངས་ཀྱི་གསང་བའི་ཆར་འབེབས་པའི་དངོས་གྲུབ་སོ་སོར་ཐོབ་བོ། །ཀུན་ནས་གསེར་གྱི་རྒྱལ་མཚན་གྱི་ཆར་འབེབས་པའི་གཟུངས་ཀྱི་བཀོད་པ་རྣམ་པར་བལྟས་པ་དང་། དོན་ཡོད་པའི་བཀོད་པ་རབ་འབྱམ་གྱི་དངོས་གྲུབ་རབ་ཏུ་ཐོབ་བོ། །དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་རྣམ་པར་ལྟ་བའི་རྒྱལ་མཚན་གྱི་གཟུངས་ཀྱི་རྣམ་པར་འཕྲུལ་པ་སོ་སོར་ཐོབ་བོ། །དེ་བཞིན་གཤེགས་པ་ཐམས་ཅད་ཀྱི་གསང་བའི་སྙིང་པོ་དང་། དཀྱིལ་འཁོར་རྣམ་པར་ལྟ་བའི་དངོས་གྲུབ་སོ་སོར་ཐོབ་བོ། །རྣམ་པར་ཐར་པའི་དཀྱིལ་འཁོར་ཡངས་པ་ཐམས་ཅད་སོ་སོར་ཐོབ་བོ། །ཕན་ཡོན་ཆེན་པོ་དང་། རྣམ་པར་འཕྲུལ་པ་ཆེན་པོ་བྱིན་གྱིས་བརླབས་པ་འདི་རྣམས་སོ་སོར་ཐོབ་བོ། །དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་རློབ་པས་བྱིན་གྱིས་བརླབས་པས་དོན་ཡོད་པའི་ནོར་བུའི་མཆོད་པའི་སྙིང་པོའི་གཟུངས་གང་བཀླགས་པ་ཙམ་གྱིས་ཡོན་ཏན་དང་ཕན་ཡོན་རྗེས་སུ་བསྔགས་པ་དང་། རྣམ་པར་འཕྲུལ་པ་ཆེན་པོ་སོ་སོཪ་ཐོབ་བོ། །དེ་ནས་གནོད་སྦྱིན་གྱི་སྡེ་དཔོན་ཆེན་པོ་ཕྱག་ན་རྡོ་རྗེ་མཆོག་ཏུ་དགའ་བ་སྐྱེས་ཤིང་མཆོག་ཏུ་སྐྱི་བུང་ཞེས་བྱེད་པ་སྐྱེས་ནས། བཅོམ་ལྡན་འདས་ཤཱཀྱ་ཐུབ་པའི་ཞབས་ལ་བཏུད་དེ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་གསུངས་པའི་དོན་ཡོད་པའི་ནོར་བུའི་མཆོད་པའི་སྙིང་པོའི་གཟུངས་གང་ཡིན་པ་འདི་མཆོག་ཏུ་རྙེད་པར་དཀའོ། །ཡིད་བཞིན་གྱི་ནོར་བུར་གྱུར་པའི་སྙིང་པོ་གཟུངས་གང་ཡིན་པ་ནི་མཆོག་ཏུ་རྙེད་པར་དཀའོ། །མཐུ་ཆེན་པོ་དང་། ཕན་ཡོན་ཆེན་པོ་དང་། ཡོན་ཏན་ཆེན་པོ་སྐྱེད་པ་དང་མཐུན་པ་རྣམ་པར་འཕྲུལ་པ་དང་། ཆོ་འཕྲུལ་ཆེ་བར་བལྟ་བར་བྱའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་རིག་པའི་རྒྱལ་པོ་དེ་རིགས་ཀྱི་བུའམ། རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། དགེ་སྦྱོང་ངམ། བྲམ་ཟེའམ། རྒྱལ་རིགས་སམ། བུད་མེད་དམ།
སྐྱེས་པའམ། ཁྱེའུའམ་བུ་མོ་ཡང་རུང་སྟེ། ལན་ཅིག་བཟླས་པ་དང་། དྲན་པ་ཙམ་དང་བཀླགས་པ་ཙམ་གྱིས་བསོད་ནམས་ཀྱི་ཕུང་པོ་དང་། དགེ་བའི་རྩ་བ་དང་ལྡན་པར་འགྱུར་རོ། །བཅོམ་ལྡན་འདས་སྡིག་པ་ཐམས་ཅད་ཟད་པར་གྱུར་པ་དེ་ཅི་ལགས། བཅོམ་ལྡན་འདས་འཇིག་རྟེན་པ་རྣམས་གྲུབ་པར་འགྱུར་བཅི་ལགས། འཇིག་རྟེན་ལས་འདས་པའི་ལམ་ཡོངས་སུ་དག་པར་འགྱུར་བ་ཅི་ལགས། བཅོམ་ལྡན་འདས་དེ་བཞིན་གཤེགས་པ་རྣམ་པར་གཟིགས་པར་འགྱུར་བ་ཅི་ལགས། བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་གི་རྟག་ཏུ་མཆོག་སྩོལ་བ་དེ་ཅི་ལགས། བཅོམ་ལྡན་འདས་བདག་ལ་དེའི་སྐབས་དབྱེ་བར་མཛད་དུ་གསོལ། དེ་ལྟ་བུའི་ཕན་ཡོན་ཕུལ་དུ་བྱུང་བ་ནི་བཅོམ་ལྡན་འདས་མཆོག་ཏུ་ངོ་མཚར་བར་གྱུར་པའོ། །བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་ལེགས་སོ་ལེགས་སོ། །ལག་ན་རྡོ་རྗེ་མཆོག་ཏུ་རྙེད་པར་དཀའ་བའི་དྲི་བ་དྲིས་པ་དེ་ངས་ཇི་ལྟ་བ་བཞིན་དུ་ད་ལྟ་བཤད་པར་བྱ་ཡི་ཉོན་ཅིག །ལག་ན་རྡོ་རྗེ་འདི་ནི་བཀླགས་པ་ཙམ་གྱི་མོད་དང་། བརྗོད་པ་ཙམ་གྱི་མོད་ལ་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་རྟག་ཏུ་དགའ་བ་དང་བཅས་པས་ཕྱག་གཡས་པ་སྤྱི་བོར་འཇོག་པར་བྱེད་དོ། །མངོན་སུམ་དུ་རང་གི་གཟུགས་ཀྱིས་མདུན་ན་ཉེ་བར་གནས་ཏེ་དབུགས་འབྱིན་པར་ཡང་བྱེད་དོ། །དེ་ཅི་ལྟར་ཞེ་ན། འདི་ནི་འཕགས་པ་སྤྱན་རས་གཟིགས་དབང་ཕྱུག་རང་བཞིན་གྱིས་ལུས་ཡོངས་སུ་དག་པ་གཟུང་བའི་གཟུངས་ཀྱི་སྙིང་པོའོ། །འདི་ནི་དོན་ཡོད་པའི་རང་བཞིན་གྱི་སྙིང་པོའོ། །འདི་ནི་སྒྱུ་མ་ལྟ་བུའི་ཏིང་ངེ་འཛིན་དང་གཟུངས་ཀྱི་རྣམ་པར་འཕྲུལ་པའོ། །འདི་ནི་འཕགས་པ་སྤྱན་རས་གཟིགས་དབང་ཕྱུག་གི་རང་བཞིན་མཐོང་བའོ། །འདི་ནི་བཅུ་གཅིག་ཞལ་མཐོང་བའོ། །འདི་ནི་འཕགས་པ་སྤྱན་རས་གཟིགས་དབང་ཕྱུག་གི་སྣ་ཚོགས་པའི་གཟུགས་མཐོང་བའོ། །འདི་ནི་འཕགས་པ་སྤྱན་རས་གཟིགས་དབང་ཕྱུག་གི་སྤྲུལ་པའི་སྤྲིན་མཐོང་བའོ། །འདི་ནི་མགྲིན་པ་སྔོན་པོ་དང་། སྲེད་མེད་ཀྱི་བུའི་གཟུགས་མཐོང་བའོ། །འདི་ནི་འཇིག་རྟེན་གསུམ་མཐོང་བའོ། །རྟ་མགྲིན་མཐོང་བའོ། །འདི་ནི་པདྨོ་ཡངས་པའི་གསང་བའི་དཀྱིལ་འཁོར་མཐོང་བའོ། །འདི་ནི་དེ་བཞིན་གཤེགས་པ་ཐམས་ཅད་ཀྱི་མཆོད་
པའི་སྤྲིན་གྱི་རྣམ་པར་འཕྲུལ་པའོ། །འདི་ནི་རྡོ་རྗེའི་སྙིང་པ་ཆེན་པོ་མཐོང་བའོ། །འདི་ནི་མགོའི་སྙིང་པོ་ཆེན་པོའོ། །འདི་ནི་སྣ་ཚོགས་པའི་གཟུགས་ཀྱི་རང་བཞིན་མཐོང་བའོ། །འདི་ནི་དོན་ཡོད་པའི་གཟུགས་དང་དོན་ཡོད་པའི་དངོས་གྲུབ་ཀྱི་རྣམ་པར་འཕྲུལ་པའོ། །འདི་ནི་དེས་ཐམས་ཅད་དུ་འགུགས་པས་ན་ཞགས་པར་བརྗོད་པར་བྱའོ། །དོན་ཡོད་པ་ཡིད་བཞིན་གྱི་ནོར་བུའི་མཆོད་པའི་སྙིང་པོའི་གཟུངས་སུ་བརྗོད་པར་བྱ་སྟེ། དོན་ཡོད་ཞགས་པའི་སྙིང་པོ་འཕགས་པ་སྤྱན་རས་གཟིགས་དབང་ཕྱུག་དམ་པར་གྱུར་པའི་ངོ་བོ་ཉིད་ཀྱི་སྐུ་གཞན་དུ་གྱུར་པ་མཐོང་བ་མཚུངས་པ་སྟེ། དོན་ཡོད་པའི་ནོར་བུའི་མཆོད་པའི་སྙིང་པོའི་གཟུངས་འདི་དག་མཐོང་བ་དང་མཚུངས་པར་འགྱུར་རོ། །བཀླགས་པ་དང་བརྗོད་པ་ཙམ་གྱི་མོད་ལ་དུས་གསུམ་དུ་གཤེགས་པ་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་སྲས་གཅིག་པུར་འགྱུར་རོ། །དེ་བཞིན་གཤེགས་པ་ཐམས་ཅད་ཡོངས་སུ་དག་པའི་སྐུ་ཤིན་ཏུ་དྲི་མ་མེད་ཅིང་ཡོངས་སུ་དག་པ་དང་མཉམ་པར་འགྱུར་ཏེ། དེ་བཞིན་གཤེགས་པའི་སྙིང་པོའི་སྐུར་ཡང་འགྱུར་རོ། །དུས་གསུམ་པའི་དེ་བཞིན་གཤེགས་པ་ཐམས་ཅད་ཀྱིས་ཕྱིར་མི་ལྡོག་པར་ལུང་སྟོན་ཅིང་། བླ་ན་མེད་པའི་སངས་རྒྱས་ཀྱི་བྱང་ཆུབ་ཏུ་ལུང་སྟོན་པར་འགྱུར་རོ། །བྱང་ཆུབ་སེམས་དཔའ་ཐམས་ཅད་རྟག་ཏུ་རྒྱུན་མི་འཆད་པར་མཐོང་བར་འགྱུར་རོ། །ལྷ་ཐམས་ཅད་ཀྱིས་ཡང་དག་པར་དབུགས་འབྱིན་པར་འགྱུར་རོ། །བདུད་ལ་སོགས་པ་དང་། གདུག་པའི་རྨི་ལམ་དང་། ལོག་པར་འདྲེན་པ་ཐམས་ཅད་ཚར་བཅད་པར་བྱས་པར་འགྱུར་རོ། །བཅིང་བ་ལྔས་བཅིངས་ཤིང་གཟིར་བ་དང་། གནོད་སྦྱིན་དང་། སྲིན་པོ་དང་། འབྱུང་པོ་དང་། ཤ་ཟ་དང་། ཡི་དགས་དང་། གྲུལ་བུམ་དང་། བརྗེད་བྱེད་དང་། ཚངས་པའི་སྲིན་པོ་རྣམས་ཐམས་ཅད་རིང་དུ་འབྲོས་པར་འགྱུར་རོ། །རིམས་ཐམས་ཅད་དང་། ནད་ཐམས་ཅད་དང་། འབྲས་དང་། ཕོལ་མིག་དང་། རྩོག་ཤུ་དང་། ལྷོག་པ་དང་། མཚན་བར་རྡོལ་བ་དང་། གཡན་པ་དང་། མཛེ་དང་། རྐང་ཤུ་ཐམས་ཅད་རྣམ་པར་ཉམས་པར་བྱེད་དོ། །ལུས་ཀྱི་གཟེར་ཐམས་ཅད་ཉེ་བར་ཞི་བར་བྱེད་དོ། །ཇི་ལྟར་ཤེལ་ཡོངས་སུ་དག་པ་ཇི་ལྟ་བ་བཞིན་དུ་དེ་བཞིན་གཤེགས་པའི་སྐུ་ཡོངས་སུ་དག་པར་
འགྱུར་རོ། །ཚིག་བཙན་པར་ཡང་འགྱུར་རོ། །གསང་སྔགས་དང་། ཆོ་ག་ཞིབ་མོ་ཐམས་ཅད་ཀྱི་དངོས་གྲུབ་ཏུ་ཡང་འགྱུར་རོ། །འཇིག་རྟེན་ཐམས་ཅད་དགའ་བར་ཡང་འགྱུར་རོ། །རྒྱལ་པོ་དང་། བྲམ་ཟེ་དང་། རྒྱལ་རིགས་དང་། ཁྱིམ་བདག་གིས་ཆེར་མཆོད་པར་བྱ་བར་འགྱུར་རོ། །སེམས་ཅན་ཐམས་ཅད་ཀྱི་མཆོད་པར་འོས་པ་གཅིག་པུར་འགྱུར་རོ། །ནོར་དང་འབྲུ་འཕེལ་བར་ཡང་འགྱུར་རོ། །བསམ་པ་དང་ཡིད་ཀྱི་ཤིང་རྟ་ཐམས་ཅད་ཡོངས་སུ་རྫོགས་པར་ཡང་འགྱུར་རོ། །ཆོམ་རྐུན་དང་། གཡོ་ཅན་དང་། རྐུན་པོས་རྣམ་པར་སྐྲག་པ་དང་། གཅན་གཟན་ཁྲོ་བོ་དང་། གཡང་ས་དང་། ཁྱིམ་རྡིབ་པ་དང་། གསོད་པ་དང་། འཆི་བ་དང་། གཅན་གཟན་ཁྲོ་བོའི་འཇིགས་པ་རྣམས་ཐམས་ཅད་འབྱུང་བར་མི་འགྱུར་རོ། །མེ་དང་ཆུས་དུས་བྱེད་པ་དང་། རླུང་དང་། ཚང་པ་དང་། སད་དང་། སེར་བ་རྣམས་ཀྱིས་མི་ཚུགས་སོ། །དགྲ་ཐམས་ཅད་ཀྱིས་འཇིགས་པར་མི་འགྱུར་རོ། །ཐམས་ཅད་བྱམས་པའི་ཡིད་དུ་འགྱུར་རོ། །བུད་མེད་དང་། སྐྱེས་པ་དང་། ཁྱེའུ་དང་། བུ་མོ་ཐམས་ཅད་དབང་དུ་གྱུར་པར་བྱེད་དོ། །འདི་ནི་བཀླགས་པ་ཙམ་གྱིས་འཇིག་རྟེན་པ་རྣམས་ཀྱི་ཡོན་ཏན་ཆེན་པོ་བསྐྱེད་པ་དང་། རྣམ་པར་འཕྲུལ་པར་འགྱུར་རོ། །དེ་འཆི་འཕོ་བའི་དུས་ཀྱི་ཚེ་དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་གཉིས་མངོན་སུམ་དུ་མཐོང་བར་འགྱུར་ཏེ། རིགས་ཀྱི་བུ་ཚུར་ཤོག །བདེ་བ་ཅན་གྱི་འཇིག་རྟེན་གྱི་ཁམས་སུ་སོང་དང་། ཁྱོད་ཀྱིས་ལམ་ཡོངས་སུ་དག་པར་བྱས་པའོ། །འཆི་བའི་དུས་སུ་གྱུར་པ་ན་བསམས་པ་ཉིད་ཀྱི་མོད་ལ་པདྨ་ལས་བརྫུས་ཏེ་སྐྱེ་བར་འགྱུར་རོ། །རྒྱན་ཐམས་ཅད་ཀྱིས་རྣམ་པར་བརྒྱན་པ་དང་། ཚེ་རབས་དྲན་པར་ཡང་འགྱུར་རོ། །དེ་བཞིན་གཤེགས་པ་འོད་དཔག་མེད་མངོན་སུམ་དུ་མཐོང་བ་ཙམ་གྱིས་ཕྱིར་མི་ལྡོག་པར་འགྱུར་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་འགྱུར་རོ། །རྣམ་པར་ཐར་པའི་དཀྱིལ་འཁོར་དང་པདྨོ་ཡངས་པའི་གསང་བ་མཐའ་དག་རྫོགས་པ་དང་། དོན་ཡོད་ཞགས་པའི་སྙིང་པོའི་ཆོ་ག་ཞིབ་མོ་མངོན་དུ་འགྱུར་ཞིང་ཁ་ཏོན་དུ་ཀུན་ཏུ་གནས་སོ། །དེ་བཞིན་གཤེགས་པ་ཐམས་ཅད་ཀྱི་གསང་བའི་དཀྱིལ་འཁོར་རྗེས་སུ་དྲན་པར་བྱེད་དོ། །ཐམས་ཅད་དུ་སངས་རྒྱས་ཀྱི་ཞིང་ཀུན་ཏུ་དེ་བཞིན་
གཤེགས་པ་ཐམས་ཅད་ཀྱིས་མངོན་སུམ་དུ་མཚུངས་པར་ལྷན་ཅིག་ལུང་སྟོན་པ་སོ་སོར་ཐོབ་སྟེ། ནམ་དུ་ཡང་ཕྱིར་ཞིང་རྣམ་པར་གྲོལ་བར་འགྱུར་བ་དང་། ཇི་སྲིད་དུ་སངས་རྒྱས་ཀྱི་བྱང་ཆུབ་ཏུ་བསྟན་པའི་བར་དང་། ཇི་སྲིད་དུ་ཡོངས་སུ་མྱ་ངན་ལས་འདས་པའི་ལུས་སུ་གྱུར་གྱི་བར་དུ་འཇིག་རྟེན་ལས་འདས་པའི་ཕན་ཡོན་དང་། རྣམ་པར་འཕྲུལ་པ་བཀླགས་པས་གྲུབ་པར་འགྱུར་རོ། །དེ་ནས་བཟླས་པ་ཙམ་གྱིས་དངོས་གྲུབ་བཤད་པར་བྱ་སྟེ། སྔ་དྲོ་གཅིག་བཟླས་པ་ཙམ་གྱི་མོད་ལ་མཚམས་མེད་པ་ལྔའི་སྡིག་པ་དང་། མནར་མེད་པའི་མཐར་གཏུགས་པའི་སྡིག་པ་དང་། རི་རབ་ལྷུན་པོ་ཆེན་པོ་བདུན་གྱི་ཚད་ཙམ་བ་སྤུའི་ཁུང་བུ་རེ་རེར་སྒྲིབ་པ་བསགས་པ་དང་། བསྐལ་པ་སྟོང་ཕྲག་ཏུ་བསགས་པའི་སྔོན་གྱི་སྡིག་པ་དང་སྒྲིབ་པ་དེ་རྣམས་ཐམས་ཅད་སྔ་དྲོ་གཅིག་བཟླས་པ་ཙམ་གྱིས་སྡིག་པ་དང་ལས་ཀྱི་སྒྲིབ་པ་རྣམ་པར་ཉམས་པར་བྱེད་དེ། ཟད་པ་དང་ཡོངས་སུ་གཏུགས་པར་འགྱུར་རོ། །དམྱལ་བའི་འགྲོ་བ་ཆེན་པོ་བཅུ་དྲུག་ཏུ་གཞོལ་བ་དེ་རྣམས་ཐམས་ཅད་སྐད་ཅིག་གཅིག་གིས་ཡོངས་སུ་གྲོལ་ལོ། །སྨྱུང་བར་གནས་པ་གཅིག་གིས་བཟླས་པས་དུས་གསུམ་པའི་དེ་བཞིན་གཤེགས་པའི་སངས་རྒྱས་ཀྱི་ཞིང་རྣམས་སུ་ཀུན་ཏུ་བཟང་པོ་ཆེན་པོ་ཉིད་ཐོབ་བོ། །གང་ཡང་དེ་བཞིན་གཤེགས་པའི་རིགས་དང་། པདྨོ་ཡངས་པའི་རྣམ་པར་ཐར་པའི་དཀྱིལ་འཁོར་དང་། དོན་ཡོད་ཞགས་པའི་སྙིང་པོ་ཐམས་ཅད་དུ་དངོས་སུ་རྗེས་སུ་འཇུག་པར་བྱེད་དོ། །ཐམས་ཅད་དུ་དམ་ཚིག་ཆེན་པོ་ཡང་དག་པར་འཛིན་པར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་རང་གི་གཟུགས་ཀྱིས་དངོས་སུ་མཐོང་བ་སྦྱིན་པར་བྱེད་དོ། །དུས་གསུམ་པའི་དེ་བཞིན་གཤེགས་པ་རྣམས་རང་གི་གཟུགས་ཀྱིས་དངོས་སུ་མཐོང་བར་ཉེ་བར་གནས་པར་བྱེད་དོ། །དཀྱིལ་འཁོར་པའི་ལྷ་ཐམས་ཅད་དངོས་སུ་རྗེས་སུ་འབྲང་ཞིང་གནས་ཏེ། རྟག་ཏུ་རྣམ་པར་ལྟ་བར་འགྱུར་ཞིང་ཆེར་བཅིངས་པར་འགྱུར་རོ། །རིག་པའི་རྒྱལ་པོ་ཐམས་ཅད་ཀྱང་རྟག་ཏུ་རྗེས་སུ་འབྲང་ཞིང་དངོས་སུ་མཐོང་བར་གནས་པར་བྱེད་དོ། །བརྒྱ་སྟོང་ཕྲག་བཟླས་པ་ཙམ་གྱིས་ལྕེ་རྡོ་རྗེ་ལྟར་བརྟན་པར་འགྱུར་ཞིང་། རྡོ་རྗེའི་སྙིང་པོ་དང་མཉམ་ཞིང་མཚུངས་པ་དང་། པདྨའི་འདབ་མ་ལྟ་བུའི་ཁ་དོག་དང་འདྲ་བར་འགྱུར་ཏེ། ཕྱིར་ཞིང་དེའི་ལུས་ལ་རེག་པ་
ངན་པ་འབྱུང་བར་མི་འགྱུར་རོ། །ཕྱིར་ཞིང་ལུས་འཕོ་བར་ཡང་མི་ནུས་ཤིང་། ཡོངས་སུ་དག་ཅིང་དྲི་མ་མེད་པའི་ལུས་སུ་འགྱུར་རོ། །ལུས་པདྨ་དཀར་པོའི་ཁ་དོག་དང་མཚུངས་པར་ཡང་འགྱུར་རོ། །གདུག་པ་ཐམས་ཅད་དང་། ཕྱིར་རྒོལ་བ་དང་། དགྲ་ཐམས་ཅད་དང་། འབྱུང་པོ་དང་། གནོད་སྦྱིན་དང་། སྲིན་པོ་ཐམས་ཅད་དང་། བགེགས་དང་། ལོག་པར་འདྲེན་པ་རྣམས་དང་། ཀླུ་མ་རུངས་པ་མི་བཟད་པ་དང་། བདུད་ཀྱི་རིས་ཀྱི་ལྷ་ཐམས་ཅད་ཀྱིས་ལུས་དང་ཕུང་པོ་ལ་བཟའ་བར་མི་འགྱུར་རོ། །ལུས་པདྨ་དཀར་པོའི་ཁ་དོག་དང་མཚུངས་པར་འགྱུར་ཏེ། ལྷ་རྣམས་ལྷན་ཅིག་ཏུ་རྗེས་སུ་རྒྱུ་བར་བྱེད་དོ། །ཁ་ནས་ལྷ་རྫས་ཀྱི་ཨུཏྤ་ལ་སྔོན་པོའི་དྲི་འབྱུང་བར་འགྱུར་རོ། །ལུས་ལ་ལྷ་རྫས་ཀྱི་ཙནྡན་གྱི་དྲིས་བསྒོས་པར་འགྱུར་རོ། །རྐང་པ་དང་ལག་པ་གཞོན་ཤ་ཅན་དུ་འགྱུར་རོ། །མིག་གིས་ལེགས་པར་མཐོང་བར་འགྱུར་རོ། །བཞིན་གྱི་དཀྱིལ་འཁོར་ཡོངས་སུ་རྒྱས་པར་འགྱུར་རོ། །སྙན་པ་ཐོས་པར་ཡང་འགྱུར་ཞིང་ལྷ་རྫས་ཀྱི་དྲི་ཚོར་བར་ཡང་འགྱུར་རོ། །བཟང་པོ་ལ་རེག་པའི་ལུས་སུ་ཡང་འགྱུར་རོ། །སྐྲ་བུང་བ་དང་མཚུངས་པ་ལ་ཞིང་འཁྱིལ་བའི་སྐྲ་རུ་འགྱུར་རོ། །ནམ་ཡང་ཕྱིར་ཞིང་ལུས་ཀྱི་ནང་གི་རླུང་གི་ལས་དང་། དྲི་ངན་པས་བསྒོས་པར་མི་འགྱུར་རོ། །དྲི་མ་ཐམས་ཅད་བསལ་བར་འགྱུར་རོ། །འཇམ་པ་དང་། སྙན་པ་དང་། མཉེན་པའི་ངག་ཏུ་ཡང་འགྱུར་རོ། །ལྷའི་ང་རོ་དང་། ང་རོ་བཟང་བ་དང་། ང་རོ་ཟབ་སྙན་ཅིང་མཉེན་པ་དང་། མིའམ་ཅིའི་སྒྲ་ལྟ་བུ་དང་། ཀ་ལ་པིང་ཀའི་སྒྲ་དབྱངས་སུ་འགྱུར་རོ། །མཛེས་པར་འགྲོ་བ་དང་། ཟབ་པར་འགྲོ་བར་ཡང་འགྱུར་རོ། །ལག་མཐིལ་གཏན་དུ་འཇམ་པ་དང་། སོར་མོ་རིང་བ་དང་། ལག་པའི་རི་མོ་ཤིན་ཏུ་རྣམ་པར་བཀྲ་བར་ཡང་འགྱུར་རོ། །སེང་གེའི་འགྲོས་དང་རྩལ་གྱིས་འགྲོ་བར་འགྱུར་རོ། །ཐམས་ཅད་དུ་ཐོགས་པ་མེད་པའི་འགྲོས་སུ་འགྱུར་རོ། །སེམས་ཅན་ཐམས་ཅད་ཀྱི་གཙོ་བོ་གཅིག་པུར་མཆོད་པའི་འོས་སུ་ཡང་འགྱུར་རོ། །དཔལ་རྣམ་ཐོས་སྲས་རྗེས་སུ་མཐུན་པར་རྗེས་སུ་འབྲང་བར་འགྱུར་རོ། །ཚིག་མི་མཐུན་པ་ཡང་རྗེས་སུ་མཐུན་པར་འགྱུར་རོ། །ཐམས་ཅད་དུ་ངག་རྣམ་པར་དག་པར་ཡང་
འགྱུར་རོ། །འཇིག་རྟེན་པའི་བཟླས་པའི་དངོས་གྲུབ་བོ། །འཇིག་རྟེན་ལས་འདས་པ་ནི་སྐྱེ་བ་བརྗེས་ནས། པགས་པ་གསེར་གྱི་ཁ་དོག་ལྟ་བུ་དང་། བསམས་པ་ཉིད་ཀྱི་མོད་ལ་སྐྱེ་བར་འགྱུར་ཏེ། འོད་དཔག་མེད་ཀྱི་སྤྱན་སྔར་མདུན་གྱི་པདྨའི་སྙིང་པོ་ལས་བརྫུས་ཏེ་སྐྱེ་བར་འགྱུར་ཞིང་། རྒྱན་ཐམས་ཅད་ཀྱིས་རྣམ་པར་བརྒྱན་པ་དང་། ཚེ་རབས་དྲན་པར་ཡང་འགྱུར་རོ། །དུས་གསུམ་དུ་གཤེགས་ཤིང་བཞུགས་པའི་དེ་བཞིན་གཤེགས་པ་ཐམས་ཅད་ཀྱིས་ལུང་བསྟན་པ་དང་། མངོན་པར་དབང་བསྐུར་བའི་མཆོག་བྱང་ཆུབ་ཏུ་ལུང་སྟོན་པ་དང་མངོན་པར་དབང་བསྐུར་རོ། །དེ་བཞིན་གཤེགས་པའི་རྣམ་པར་འཕྲུལ་པ་བྱིན་གྱིས་རློབ་པས་ཀྱང་བྱིན་གྱིས་བརླབས་སོ་ཞེས་པ་འཇིག་རྟེན་ལས་འདས་པའི་བཟླས་པའི་ཆོ་གའི་དངོས་གྲུབ་བོ། །དེ་ནས་བསོད་ནམས་ཀྱི་ཕུང་པོ་བརྗོད་པར་བྱ་སྟེ། འདི་བཟླས་པ་ཙམ་གྱིས་བསོད་ནམས་ཀྱི་ཕུང་པོ་དང་དགེ་བའི་རྩ་བ་དང་ལྡན་པར་འགྱུར་རོ། །རིགས་ཀྱི་བུའམ། རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ཡང་རུང་བས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས། ནོར་བུ་རིན་པོ་ཆེ་ཆེན་པོ་སྣ་བདུན་གྱིས་ཡོངས་སུ་བཀང་བར་བྱས་པ་དང་། གསེར་གྱི་མེ་ཏོག་དང་། དངུལ་གྱི་མེ་ཏོག་གིས་ཡོངས་སུ་བཀང་ནས། དུས་གསུམ་པའི་དེ་བཞིན་གཤེགས་པ་ཐམས་ཅད་ཀྱིས་ཉི་མ་རེ་རེ་ཞིང་དེ་བཞིན་གཤེགས་པ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་བ་ལ། ནོར་བུ་རིན་པོ་ཆེ་ཆེན་པོ་སྣ་བདུན་དང་། གསེར་གྱི་མེ་ཏོག་དང་། དངུལ་གྱི་མེ་ཏོག་གིས་བཀང་ནས་ཕུལ་བ་དེ་བས་ཀྱང་། དགེ་བ་དང་བསོད་ནམས་ཀྱི་ཕུང་པོ་ཆེས་མང་བར་བསྐྱེད་དོ། །གང་ཞིག་དུས་གསུམ་པའི་དེ་བཞིན་གཤེགས་པ་མཆོད་ཅིང་། ཉི་མ་རེ་རེ་ཞིང་དེ་བཞིན་གཤེགས་པ་མཆོད་པ་དེ་ཁོ་ན་བཞིན་དུ་འདི་བཟླས་པ་ཙམ་གྱིས་དགེ་བའི་རྩ་བ་དང་། བསོད་ནམས་ཀྱི་ཕུང་པོ་ཆེན་པོ་དང་ལྡན་པར་འགྱུར་རོ། །དེ་རྣམས་གང་གིས་ནོར་བུ་རིན་པོ་ཆེ་ཆེན་པོ་བྱིན་པས་དེ་རྣམས་ཀྱི་དགེ་བ་བཅུ་དྲུག་གི་ཆར་ཡང་མི་ཕོད་དོ། །དེ་བཞིན་དུ་བསོད་ནམས་ཀྱི་ཕུང་པོ་དང་། དགེ་བའི་རྩ་བ་ཆེན་པོ་བསྐྱེད་པར་འགྱུར་རོ་ཞེས་སོ། །འཇིག་རྟེན་
པའི་ཆོ་ག་སྣ་ཚོགས་པའི་ཚོགས་དང་། འཇིག་རྟེན་ལས་འདས་ལ་བསོད་ནམས་ཀྱི་ཕུང་པོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བྱེ་བ་བརྒྱ་སྟོང་ཕྲག་རྣམས་ནོར་བུ་རིན་པོ་ཆེ་ཆེན་པོ་སྣ་བདུན་གྱིས་བཀང་བ། རིན་པོ་ཆེ་སྣ་བདུན་གྱི་མེ་ཏོག་དང་། གསེར་དང་། དངུལ་གྱི་མེ་ཏོག་གིས་བཀང་བ་རྣམས་ཀྱིས་དུས་གསུམ་པའི་དེ་བཞིན་གཤེགས་པ་ཐམས་ཅད་ལ། དེ་བཞིན་གཤེགས་པ་རེ་རེ་ཞིང་ལ་ཡང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀུན་ཏུ་བཀང་ནས་ཕུལ་བར་འགྱུར་རོ། །མཆོད་པའི་སྤྲིན་ཆེན་པོར་འགྱུར་ཏེ། ཇི་སྲིད་བྱང་ཆུབ་སྙིང་པོ་ལ་མཐར་ཐུག་གི་བར་དུ་མི་ཟད་དེ་དེ་ལྟ་བུའི་བསོད་ནམས་ཀྱི་ཕུང་པོ་ཆེན་པོ་ཡོངས་སུ་འཛིན་པར་འགྱུར་ཞིང་། བསོད་ནམས་ཀྱི་ཕུང་པོ་ཆེན་པོར་ཡང་འགྱུར་ཏེ། བསོད་ནམས་ཀྱི་ཕུང་པོ་ཆེན་པོ་དང་ལྡན་པར་ཡང་འགྱུར་རོ། །འཇིག་རྟེན་དང་འཇིག་རྟེན་ལས་འདས་པའི་བཟླས་པའི་དངོས་གྲུབ་དང་། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །དེ་བཞིན་དུ་ཕན་ཡོན་ཆེན་པོ་དང་། རྣམ་པར་འཕྲུལ་བ་ཆེན་པོ་དང་། སྦྱིན་པ་ཡོངས་སུ་གཏོང་བ་ཆེན་པོ་གང་ཡིན་པ་དང་། བཟླས་པའི་ཆོ་ག་ཆེན་པོ་དང་། མཆོད་པའི་སྤྲིན་ཆེན་པོར་འགྱུར་རོ། །དེ་བཞིན་དུ་ཡོན་ཏན་བསྐྱེད་པ་དང་། རྣམ་པར་འཕྲུལ་པའི་ཆོ་གའི་ཁྱད་པར་སོ་སོར་ཐོབ་བོ། །དུས་རྟག་པར་རྒྱུན་དུ་བཟླས་པའི་ཆོ་ག་དང་ལྡན་པར་འགྱུར་བར་བྱའོ། །རྟག་ཏུ་ཡང་བྱང་ཆུབ་སེམས་དཔའ་ཐམས་ཅད་མཐོང་འདོད་པར་འགྱུར་རོ། །རྟག་ཏུ་ཡང་དགེ་བའི་རྩ་བ་དང་ཡང་དག་པར་འགྲོགས་པར་འགྱུར་རོ། །ལག་ན་རྡོ་རྗེ་གང་ཡང་རིག་པའི་རྒྱལ་པོའི་ཆོ་ག་ཞིབ་མོ་འདི་དོན་ཡོད་པའི་མཆོད་པའི་ནོར་བུའི་སྙིང་པོ་འདི་ཐ་ན་སྒྲ་ཙམ་ཡང་རྣ་བའི་བུ་གར་ལྟུང་བར་འགྱུར་བ་དང་། བྲིས་པ་རྣམས་བལྟ་བ་དང་། པོ་ཏིའམ། ཡི་གེའམ། རྩིག་པའམ་གྱང་ལ་བྲིས་པ་ལྟ་བར་བྱེད་པ་དེ་མཚམས་མེད་པ་ལྔའི་སྡིག་པ་ཐམས་ཅད་ཡོངས་སུ་ཟད་ཅིང་ཡོངས་སུ་གཏུགས་པར་འགྱུར་རོ། །སྔོན་བསགས་པའི་མནར་མེད་པར་གཞོལ་བའི་སྡིག་པ་དང་། སྒྲིབ་པ་དེ་ཐམས་ཅད་རྣམ་པར་ཉམས་པར་བྱེད་དོ། །ཡོངས་སུ་གཏུགས་པར་འགྱུར་རོ། །ཤི་འཕོས་ནས་བདེ་བ་ཅན་གྱི་འཇིག་རྟེན་གྱི་ཁམས་སུ་སྐྱེ་བར་འགྱུར་ཏེ། པདྨ་ལས་བརྫུས་ཏེ་སྐྱེ་བར་འགྱུར་རོ། །ནམ་ཡང་ཕྱིས་མངལ་
དུ་གནས་པའི་དྲི་མས་གོས་པར་མི་འགྱུར་རོ། །ཇི་སྲིད་དུ་བྱང་ཆུབ་ལ་མཐར་ཐུག་གི་བར་དུ་སངས་རྒྱས་ཀྱི་ཞིང་གང་དང་གང་དུ་སྐྱེ་བར་འགྱུར་བའི་སངས་རྒྱས་ཀྱི་ཞིང་ཐམས་ཅད་དུ་པདྨ་ལས་སྐྱེ་བར་འགྱུར་ཞིང་ཚེ་རབས་དྲན་པར་ཡང་འགྱུར་རོ། །ཕྱག་ན་རྡོ་རྗེས་གསོལ་པ། བཅོམ་ལྡན་འདས་ཅི་ལྟར་ཆོ་ག་ཞིབ་མོའི་རྒྱལ་པོ་དོན་ཡོད་པའི་ནོར་བུའི་མཆོད་པའི་སྙིང་པོའི་གཟུངས་འདི་བྲི་བར་བྱ། བཅོམ་ལྡན་འདས་འདྲི་བཞིན་པ་དེའི་བསོད་ནམས་ཀྱི་ཕུང་པོ་རབ་ཏུ་བསྐྱེད་པ་ཅི་ལགས། དགེ་བའི་རྩ་བ་ཅི་དང་ཡང་དག་པར་ལྡན་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་འདིའི་ཡོན་ཏན་དང་ཕན་ཡོན་དཔག་ཏུ་མེད་དེ། དོན་ཡོད་པའི་ལྕགས་ཀྱུའི་རིག་པའི་རྒྱལ་པོ་འདིའི་དོན་ཡོད་པའི་ནོར་བུའི་མཆོད་པའི་སྙིང་པོའི་གཟུངས་འདྲི་བཞིན་པའི་བསོད་ནམས་ཀྱི་ཕུང་པོ་རབ་ཏུ་སྐྱེ་སྟེ། ཕན་ཡོན་དཔག་ཏུ་མེད་པ་དང་ཡོན་ཏན་དཔག་ཏུ་མེད་པ་ལས་བྱུང་བའི་རྣམ་པར་འཕྲུལ་པ་སོ་སོར་ཐོབ་བོ། །གང་ཡང་དོན་ཡོད་པའི་ཞགས་པའི་ལྕགས་ཀྱུ་རིག་པའི་རྒྱལ་པོ་དོན་ཡོད་པའི་ནོར་བུའི་མཆོད་པའི་སྙིང་པོའི་གཟུངས་འདི་འདྲི་བར་འགྱུར་བ་ཉོན་ཅིག །ལག་ན་རྡོ་རྗེ་རྒྱ་མཚོ་ཆེན་པོའི་འོག་ཏུ་དཔག་ཚད་སྟོང་ཕྲག་བརྒྱད་ཅུ་རྩ་བཞི་བ་ཆུ་དང་ཞེང་དུ་དཔག་ཚད་སྟོང་ཕྲག་བརྒྱད་ཅུ་རྩ་བཞི་པ་དེ་ལས་ཆུའི་ཐིགས་པའི་ཚད་ཀྱི་ཐིགས་པ་རེ་རེའི་གྲངས་སུ་བྱེད་འདོད་པའམ། དེ་ལྟ་བུའི་ཚད་ཀྱི་ངོས་གཉིས་པར་མཚོ་ཆེན་པོ་ལས་ཐིགས་པ་རེ་རེ་ནས་བཅུ་བར་བྱ་སྟེ། དེ་ལ་ཐིགས་པ་རེ་རེ་ནས་བགྲངས་ཏེ་གཏོར་བར་བྱའོ། །དེ་ནས་རྒྱ་མཚོ་ཆེན་པོ་ཆུའི་ཐིགས་པའི་གྲངས་ཀྱིས་ཟད་པར་འགྱུར་ཞིང་ཆུ་སྐམ་པར་བྱེད་དོ། །མཚོ་ཆེན་པོ་གཉིས་པ་ལས་ཆུས་ཡོངས་སུ་གང་བར་འགྱུར་གྱི། དོན་ཡོད་པའི་ལྕགས་ཀྱུ་རིག་པའི་རྒྱལ་པོ་འདི་དང་། དོན་ཡོད་པའི་ནོར་བུའི་མཆོད་པའི་སྙིང་པོའི་གཟུངས་ཀྱི་ཆོ་ག་ཞིབ་མོ་དེ་འདྲི་བཞིན་པའི་བསོད་ནམས་ཀྱི་ཕུང་པོའི་ཚད་ནི་གཟུང་བར་ནུས་པ་མ་ཡིན་ནོ། །དེ་ལྟར་རྒྱ་ཆེ་བ། དེ་ལྟར་ཟབ་པ། དེ་ལྟར་ཡངས་པའི་ཡོན་ཏན་བསྐྱེད་པར་བྱ་བ་ནི། དོན་ཡོད་པ་ནོར་བུའི་མཆོད་པའི་སྙིང་པོའི་གཟུངས་ཀྱི་ཆོ་ག་ཞིབ་མོའི་ཆོ་གའི་རྒྱལ་པོའོ། །ལག་ན་རྡོ་རྗེ་འོན་ཀྱང་རིའི་རྒྱལ་པོ་རི་རབ་ཆེན་པོ་ནི་དཔག་ཚད་སྟོང་ཕྲག་བརྒྱད་ཅུ་རྩ་བཞི་འོག་ཏུ་རྒྱ་མཚོ་ཆེན་པོའི་ནང་དུ་ནུབ་བོ། །
དཔག་ཚད་སྟོང་ཕྲག་བརྒྱད་ཅུ་རྩ་བཞི་སྟེང་ཉིད་དུ་གནས་སོ། །སྐྱེས་བུ་སྟོབས་ཆེན་པོ་དང་ལྡན་པར་གྱུར་པ་གང་ལ་ལ་རིའི་རྒྱལ་པོ་རི་རབ་ཆེན་པོ་གང་ཡིན་པ་ཡང་ཡུངས་ཀར་གྱི་འབྲས་བུའི་ཚད་ཙམ་དུ་བྱེད་པ་དང་། ངོས་གཉིས་པར་རྒྱ་མཚོ་ཆེན་པོའི་རིའི་རྒྱལ་པོ་རི་རབ་ཆེན་པོ་ཆོ་ག་དེ་ལྟ་བུས་ཡུངས་ཀར་གྱི་འབྲས་བུ་ཙམ་དུ་བྱས་པ་ལས་སླར་ཡང་རིའི་རྒྱལ་པོ་རི་རབ་དུ་གནས་པར་བྱེད་པར་ནུས་ཀྱི་ཆོ་ག་ཞིབ་མོའི་རྒྱལ་པོ་གང་ཡིན་པ་འདི་འདྲི་བཞིན་པའི་བསོད་ནམས་ཀྱི་ཕུང་པོའི་དགེ་བའི་རྩ་བ་ནི་མི་ནུས་ཏེ། དེ་བཞིན་གཤེགས་པ་ཐམས་ཅད་ཀྱིས་སྤྱན་དང་། དེའི་གསུང་གི་ཚད་གཟུང་བར་མི་ནུས་སོ། །དེ་བཞིན་དུ་ཡོན་ཏན་དང་། ཕན་ཡོན་རྒྱ་ཆེ་ཞིང་བསོད་ནམས་ཀྱི་ཕུང་པོ་ཆེན་པོ་ཡོངས་སུ་འཛིན་ཏེ། དགེ་བའི་རྩ་བ་ཆེན་པོ་བསྐྱེད་པར་བྱིན་གྱིས་བརླབས་པར་འགྱུར་རོ་ཞེས་སོ། །རྡོ་རྗེ་འཛིན་པས་གསོལ་པ། བཅོམ་ལྡན་འདས་རིག་པའི་རྒྱལ་པོའི་ཆོ་ག་ཞིབ་མོ་དང་། ཕྱག་རྒྱ་འདི་ཅི་ལྟར་བྲི་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་ཉོན་ཅིག །རིགས་ཀྱི་བུའམ། རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། དགེ་སྦྱོང་ངམ། བྲམ་ཟེའམ། རྒྱལ་རིགས་སམ། རྗེའུ་རིགས་སམ། དམངས་རིགས་སམ། བུད་མེད་དམ། སྐྱེས་པའམ། ཁྱེའུའམ། བུ་མོ་གང་ལ་ལ་ཆོ་ག་ཞིབ་མོའི་རྒྱལ་པོ་འདི་འདྲི་བར་བྱེད་པ་དེ། ཕྱག་རྒྱ་དང་། གསང་སྔགས་རིམ་པར་ཕྱེ་བ་དང་། དཀྱིལ་འཁོར་གྱི་ལས་དང་། ཡོ་བྱད་དང་བཅས་པའི་ཆོ་གས་དོན་ཡོད་པའི་ནོར་བུའི་པདྨ་ཞགས་པའི་སྙིང་པོའི་གཟུངས། དོན་ཡོད་ཞགས་པའི་སྙིང་པོ་འཕགས་པ་སྤྱན་རས་གཟིགས་དབང་ཕྱུག་གི་རྣམ་པར་འཕྲུལ་པའི་འཁོར་ལོ་དཀྱིལ་འཁོར་ཆེན་པོ་དང་། ཕྱག་རྒྱ་དང་། དཀྱིལ་འཁོར་ཆེན་པོའི་ཀླུའི་ཞགས་པའི་རྣམ་པར་འཕྲུལ་པ་འདི་འདྲི་བར་བྱེད་དོ། །དེས་ཡོངས་སུ་དག་པའི་ངག་དང་ཡིད་ཀྱིས་དང་། ལྷག་པའི་བསམ་པ་དང་། གུས་པ་དང་བཅས་པ་དང་། ཡིད་དེར་གྱུར་པ་དང་། མཆོད་པའི་མཆོག་དང་། གུས་པ་ལ་སོགས་པའི་འདྲི་མཁན་གྱིས་བྲི་བར་བྱའོ། །མཆོག་ཏུ་གུས་པ་དང་། ཞེ་ས་དང་བཅས་པས་ཁ་ཟས་མི་མཐུན་པ་སྤངས་ཏེ། ལེགས་པར་ཡོངས་སུ་རྫོགས་པའི་ཁ་
ཟས་རོ་བྲོ་བའི་མཆོག་དང་། ལེགས་པར་འདུས་བྱས་ཤིང་ཡིད་དགའ་བའི་མེ་ཏོག་དང་འབྲས་བུའི་བཏུང་བ་གུས་པ་དང་བཅས་པས། གནས་སུ་གི་ཝང་གི་དཀྱིལ་འཁོར་དང་། མེ་ཏོག་གཅལ་དུ་བཀྲམ་ནས་དྲི་ཡིས་བདུགས་ཏེ། དར་གྱིས་སྤྲས་པའི་ཆོས་ཀྱི་སྟན་ལ་འདུག་པས་བྲི་བར་བྱའོ། །ལེགས་པར་ཁྲུས་བྱས་ཤིང་མགོ་ལ་དྲིས་བྱུག །ལུས་ལ་གོས་བགོས་ལ་མཆོད་པ་བྱའོ། །ཚེས་བརྒྱད་དམ་བཅོ་ལྔ་ལ་སོ་སོའི་ཆ་ཤས་དང་བཅས་པའི་དཀྱིལ་འཁོར་རྣམ་པར་ཕྱེ་ནས་གཏོར་མ་དང་། ཉེ་བར་སྤྱོད་པ་དབུལ་བར་བྱའོ། །མཆོག་ཏུ་དགའ་བའི་ཡིད་ཀྱིས་བྱ་སྟེ། ཡོན་དང་བཅས་པས་གསེར་གྱི་རྣ་རྒྱན་སྦྱིན་པར་བྱའོ། །བྲི་བར་བྱ་བ་ཡོངས་སུ་མ་སྤངས་པར་དོན་ཡོད་པར་བྱའོ། །ལག་པ་བརྐྱང་བས་བྱའོ། །ལེགས་པར་སྦྱང་བ་ བྱས་པས་བྱའོ། །འདི་ཡི་ཆོ་གས་འདྲི་བར་བྱེད་པ་གང ་ཡིན་པ་དེས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་གསང་བའི་དམ་ཚིག་དང་། དཀྱིལ་འཁོར་དང་ཕྱག་རྒྱ་རིམ་པར་ཕྱེ་བ་དང་། གསང་བ་བྲིས་པར་འགྱུར་རོ། །འདི་ལྟ་སྟེ། དེ་བཞིན་གཤེགས་པའི་རིགས་དང་། ནོར་བུའི་རིགས་དང་། པདྨའི་རིགས་དང་། རྡོ་རྗེའི་རིགས་གང་ཅི་ཡིན་པ་དང་། དེ་བཞིན་གཤེགས་པ་རྣམ་པར་སྣང་མཛད་ཀྱི་སྙིང་པོའི་དཀྱིལ་འཁོར་ཆེན་པོ་དེ་ཐམས་ཅད་འདྲི་བར་འགྱུར་རོ། །འདི་ལྟ་སྟེ། ཆུ་གང་ཡིན་པ་ཐམས་ཅད་ཆུ་གང་ཆེན་པོ་དང་། རྒྱ་མཚོ་ཆེན་པོའི་རྗེས་སུ་ཞུགས་ནས་རོ་གཅིག་ཏུ་འགྱུར་རོ། །འདི་ལྟ་སྟེ་ཉི་མ་ཤར་བ་ན་མུན་པས་ལྡོངས་པ་ཐམས་ཅད་ཀུན་ཏུ་སྣང་བར་བྱེད་དོ། །དེ་ཁོ་ན་བཞིན་དུ་དོན་ཡོད་པའི་ལྕགས་ཀྱུའི་རིག་པའི་རྒྱལ་པོའི་སྙིང་པོ་འདི་དང་། དོན་ཡོད་པའི་ནོར་བུའི་མཆོད་པའི་སྙིང་པོ་འདི་དང་། དོན་ཡོད་པའི་ཞགས་པའི་ནོར་བུ་པདྨའི་སྙིང་པོའི་འཕགས་པ་སྤྱན་རས་གཟིགས་དབང་ཕྱུག་གི་སྙིང་པོ་དང་། རྣམ་པར་འཕྲུལ་པ་དང་། དཀྱིལ་འཁོར་དང་། དཀྱིལ་འཁོར་ཆེན་པོ་དང་། ཕྱག་རྒྱ་དང་། དཀྱིལ་འཁོར་པའི་ཀླུའི་ཞགས་པའི་རྣམ་པར་འཕྲུལ་པ་འདི་ཐམས་ཅད་དུ་མཚུངས་པར་དེ་བཞིན་གཤེགས་པ་ཐམས་ཅད་ཀྱི་གསང་བའི་རྗེས་སུ་འཇུག་གོ། །དམ་ཚིག་དང་། ཕྱག་རྒྱ་དང་། སྙིང་པོ་རྣམས་མཚུངས་པར་དུས་གསུམ་པའི་དེ་བཞིན་གཤེགས་པའི་རིགས་སུ་རབ་
ཏུ་སྐྱེས་པའོ། །ཐམས་ཅད་དུ་མཚུངས་པར་མཆོད་པའི་སྤྲིན་གྱི་རྣམ་པར་འཕྲུལ་པའོ། །གང་ཡང་དུས་གསུམ་པའི་དེ་བཞིན་གཤེགས་པའི་རྡུལ་ཕྲ་རབ་དང་ལྷན་ཅིག་པའི་དེ་བཞིན་གཤེགས་པའི་གསུང་གི་ཐ་སྙད་ཀྱི་དེ་ཁོ་ན་ཉིད་ཡང་དག་པའི་སྙིང་པོའོ། །དོན་ཡོད་པ་ནོར་བུ་མཆོད་པའི་སྙིང་པོའི་གཟུངས་དང་། དོན་ཡོད་པ་ནོར་བུ་པདྨའི་ཞགས་པའི་སྙིང་པོ་དང་། འཕགས་པ་སྤྱན་རས་གཟིགས་དབང་ཕྱུག་གི་སྙིང་པོ་དང་། གཟུངས་ཀྱི་རྣམ་པར་འཕྲུལ་པ་དང་། འཁོར་ལོ་དང་། དཀྱིལ་འཁོར་ཆེན་པོ་དང་། ཕྱག་རྒྱའི་དཀྱིལ་འཁོར་པ་དང་། ཀླུའི་ཞགས་པའི་རྣམ་པར་འཕྲུལ་བ་དང་། དེ་བཞིན་གཤེགས་པ་རྣམ་པར་སྣང་མཛད་ཀྱིས་གསུངས་པ་དེ་ཐམས་ཅད་གསང་བའི་དམ་ཚིག་གཅིག་ཏུ་བྱིན་གྱིས་བརླབས་སོ། །རྒྱུ་དེའི་ཕྱིར་འདི་ནི་དོན་ཡོད་ཞགས་པའི་དོན་ཡོད་པའི་ལས་སྒྲུབ་པར་བྱེད་པའི་མཐུ་སྟོབས་ཀྱི་དངོས་གྲུབ་སྟེ། དོན་ཡོད་ཞགས་པའི་སྙིང་པོ་དང་། །དོན་ཡོད་ཞགས་པའི་རྣམ་པར་འཕྲུལ་པའོ། །ཞེས་བརྗོད་པར་བྱའོ། །དེ་བཞིན་དུ་འདྲི་བཞིན་པའི་དགེ་བའི་རྩ་བ་དང་། བསོད་ནམས་ཀྱི་ཕུང་པོ་ཆེན་པོ་ཡོངས་སུ་འཛིན་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་གསང་བ་དང་། མཚུངས་པ་གཅིག་གིས་མཚུངས་པའོ། །དོན་ཡོད་པའི་ཞགས་པའི་ལྕགས་ཀྱུའི་སྙིང་པོའི་ཆོ་ག་ཞིབ་མོར་བྱིན་གྱིས་བརླབས་སོ། །འདྲི་བར་བྱེད་པ་དང་། འདོན་པར་བྱེད་པ་དང་། ཀློག་པར་བྱེད་པ་དང་། བཟླས་པ་ནི་མཆོད་པའི་སྤྲིན་དུ་བྱིན་གྱིས་བརླབས་སོ། །དེའི་ཕྱིར་འདི་ནི་རིག་སྔགས་འཆང་གིས་ལེགས་པར་རབ་ཏུ་དང་བ་དང་ལས་ལ་སྤྲོ་ཞིང་བརྩོན་པས་བྱའོ། །ཤིན་ཏུ་གསལ་བ་དང་། སྤྲོ་བ་དང་། མཆོག་ཏུ་དགའ་བ་དང་། དད་པས་བྲི་བར་བྱའོ། །ཤིན་ཏུ་འབད་པས་ཕྱག་རྒྱ་དང་གསང་སྔགས་ཀྱི་སྙིང་པོ་དང་། གསུང་དང་། ཕྱག་རྒྱའི་དཀྱིལ་འཁོར་དང་། ཀླུའི་ཞགས་པའི་རྣམ་པར་འཕྲུལ་པ་བྲི་བར་བྱ། བཀླག་པར་བྱ། མཉན་པར་བྱའོ། །མཐུ་སྟོབས་ཀྱིས་མཉན་པར་བྱའོ། །མཐུ་སྟོབས་ཀྱིས་བྲི་བར་བྱ། །མཐུ་སྟོབས་ཀྱིས་མཆོད་པ་དང་བསྙེན་བཀུར་བྱའོ། །མཐུ་སྟོབས་ཀྱིས་དམ་པའི་ཆོས་མཆོད་པ་དང་། གུས་པས་འདྲི་བར་བྱེད་པ་པོ་དང་། འདྲི་བཞིན་པ་ལ་བསྙེན་བཀུར་དང་།
བླ་མ་ལ་སྲི་ཞུ་བྱེད་པར་བྱའོ། །འདི་ནི་མཆོག་ཏུ་གསང་བའོ། །དོན་ཡོད་ཞགས་པའི་རྣམ་པར་ཐར་པའི་དཀྱིལ་འཁོར་གྱི་གསང་བའོ། །ནོར་བུ་རིན་པོ་ཆེ་ཆེན་པོ་དེ་བཞིན་གཤེགས་པ་ཐམས་ཅད་ཀྱི་གསང་བ་དང་། དཀྱིལ་འཁོར་དང་། ཕྱག་རྒྱ་དང་། གཟུངས་ཀྱི་གསང་བ་བྱིན་གྱིས་བརླབས་པ་ནི་གཉིས་ཏེ། གཅིག་ནི་དོན་ཡོད་པའི་མཆོད་པའི་སྙིང་པོའི་གཟུངས་སོ། །གཉིས་པ་ནི་དོན་ཡོད་པའི་ནོར་བུའི་པདྨ་ཞགས་པའི་སྙིང་པོའོ། །འཕགས་པ་སྤྱན་རས་གཟིགས་དབང་ཕྱུག་གི་སྙིང་པོ་རྣམ་པར་འཕྲུལ་པ་དང་། འཁོར་ལོ་དང་། དཀྱིལ་འཁོར་ཆེན་པོའི་སྙིང་པོ་དང་། ཕྱག་རྒྱ་དང་། དཀྱིལ་འཁོར་ཆེན་པོའི་ཀླུའི་ཞགས་པས་རྣམ་པར་འཕྲུལ་པས་སྤྲུལ་པའོ། །འདི་ནི་ཡིད་བཞིན་གྱི་ནོར་བུ་རིན་པོ་ཆེ་ཆེན་པོར་འགྱུར་བ་སྟེ། དོན་ཡོད་པའི་དཔག་བསམ་གྱི་ཤིང་གི་མཆོད་པ་ཆེན་པོ་དེ་བཞིན་གཤེགས་པ་ཐམས་ཅད་ཀྱི་སྙིང་པོ་དོན་ཡོད་པའི་ཞགས་པའི་གསང་བ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པའོ། །འཕགས་པ་སྤྱན་རས་གཟིགས་དབང་ཕྱུག་དམ་པར་གྱུར་པའི་སྙིང་པོ་དོན་ཡོད་པའི་ཡིད་བཞིན་གྱི་ནོར་བུ་སྟེ། འདི་ནི་གཉིས་པར་རིག་སྔགས་འཆང་རྣམས་ཀྱི་ནོར་བུ་རིན་པོ་ཆེ་ཆེན་པོ་སྟེ། དོན་ཡོད་པའི་རྣམ་པར་འཕྲུལ་པ་སྒྱུ་མ་ལྟ་བུའི་ཏིང་ངེ་འཛིན་གྱི་རྣམ་པར་འཕྲུལ་པ་ཡིན་ནོ། །དེ་ནས་ཕྱག་ན་རྡོ་རྗེ་ལ་སོགས་པ་རིག་སྔགས་འཆང་ཐམས་ཅད་ཀྱི་དབང་པོ་དུ་མ་རིག་སྔགས་འཆང་བརྒྱ་སྟོང་ཕྲག་གིས་ཡོངས་སུ་བསྐོར་བ་དང་། རིག་པའི་རྒྱལ་པོའི་ལྷ་བརྒྱ་སྟོང་ཕྲག་དུ་མ་དང་། དཀྱིལ་འཁོར་གྱི་ལྷ་བརྒྱ་སྟོང་ཕྲགདུ་མ་དང་། དབང་པོ་དང་། ལྷའི་དབང་པོ་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། གཙང་མའི་གནས་ཀྱི་རིས་ཀྱི་ལྷའི་བུ་བརྒྱ་སྟོང་ཕྲག་རྣམས་དང་། གཤིན་རྗེ་དང་། ཆུ་ལྷ་དང་། ལུས་ངན་པོ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོའི་ཚོགས་སྟོང་ཕྲག་རྣམས་ཀྱིས་དེ་ལྟ་བུའི་གསུང་གི་སྒྲ་དབྱངས་ཐོས་ནས། དགའ་བ་དང་། མགུ་བ་དང་། ཡི་རངས་པ་དང་། རབ་ཏུ་མགུ་བ་དང་། དགའ་བ་དང་། ཡིད་བདེ་བ་སྐྱེས་པར་གྱུར་ཏོ། །དེ་བཞིན་དུ་གཉིས་པར་ནོར་བུ་རིན་པོ་ཆེ་ཆེན་པོ་
ཉན་པ་ལ་དེ་རྣམས་ཐམས་ཅད་ལྷན་ཅིག་ཏུ་མཐུན་པར་རྒྱལ་པོ་ཆེན་པོ་བཞི་སྔོན་དུ་འགྲོ་བས། བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ལ་མེ་ཏོག་དང་། བདུག་པ་དང་། དྲི་དང་། ཕྲེང་བ་དང་། བྱུག་པ་དང་། རོལ་མོ་དང་། ཕེག་རྡོབ་པ་སྣ་ཚོགས་པས་མཆོད་པ་བྱེད་པར་གྱུར་ཏོ། །འཕགས་པ་སྤྱན་རས་གཟིགས་དབང་ཕྱུག་དེ་ལ་ཡང་མཆོད་པ་བྱེད་པར་གྱུར་ཅིག །རིག་པའི་རྒྱལ་པོ་དེ་ལ་ཡང་མཆོད་པར་བྱེད་དོ། །བཅོམ་ལྡན་འདས་ལ་ལན་བརྒྱ་སྟོང་ཕྲག་དུ་མས་བསྐོར་བ་བྱས་ནས་ལེགས་སོ་ཞེས་རྗོད་པར་བྱེད་དེ། བཅོམ་ལྡན་འདས་ལེགས་སོ་ལེགས་སོ། །བཅོམ་ལྡན་འདས་མཆོག་ཏུ་རྙེད་པར་དཀའ་བ་གང་ཡིན་པ་དང་། བཅོམ་ལྡན་འདས་གཉིས་པར་ནོར་བུ་རིན་པོ་ཆེ་ཆེན་པོ་དོན་ཡོད་ཞགས་པའི་སྙིང་པོ་རྣམ་པར་ཐར་པའི་དཀྱིལ་འཁོར་འཛམ་བུའི་གླིང་དུ་རབ་ཏུ་བཞག་གོ་ཞེས་སོ། །བཅོམ་ལྡན་འདས་ཀྱིས་ཀྱང་བྱིན་གྱིས་བརླབས་སོ། །འཕགས་པ་སྤྱན་རས་གཟིགས་དབང་ཕྱུག་གིས་གསུངས་པའོ། །འདི་ནི་དེ་བཞིན་གཤེགས་པ་ཐམས་ཅད་ཀྱི་གསང་བའི་སྙིང་པོར་གྱུར་པ་ཐུན་མོང་བར་མཚུངས་པའོ། །ཐམས་ཅད་དུ་གསང་བ་ཕྱག་རྒྱ་དང་། གསང་སྔགས་རིམ་པར་ཕྱེ་བ་དང་། དཀྱིལ་འཁོར་ཐམས་ཅད་དང་། དེ་བཞིན་གཤེགས་པ་ཐམས་ཅད་ཀྱི་མཆོད་པའི་སྤྲིན་གྱི་རྣམ་པར་འཕྲུལ་པ་མཆོག་ཏུ་རྙེད་པར་དཀའ་བར་གསུངས་པའོ། །བཅོམ་ལྡན་འདས་བདག་དེ་དག་ཐམས་ཅད་མཐུན་པར་གྱུར་པས་ལྷན་ཅིག་པ་ཁོ་ནར་རྟག་ཏུ་རྗེས་སུ་འབྲང་ཞིང་། རིག་པའི་རྒྱལ་པོ་འདི་ཡང་དག་པར་རྗེས་སུ་འབྲང་བར་བགྱིའོ། །འདི་ཡོངས་སུ་བསྲུང་བར་བགྱིའོ། །འདི་ལྟ་སྟེ། འཛིན་པ་དང་། འདོན་པ་དང་། མཆོད་པ་དང་། བསྙེན་བཀུར་བྱེད་པ་དང་། བྲི་བ་དང་། འདྲིར་འཇུག་པ་དང་། ཉན་པ་དང་། བཟླས་པའི་ལས་སུ་འགྱུར་བར་བགྱིའོ། །རིག་སྔགས་འཆང་དེ་ལ་ཡང་རྟག་ཏུ་རྒྱུན་མི་འཆད་པར་བསྲུང་བ་དང་། བསྐྱབ་པ་དང་། སྦ་བར་བགྱིའོ། །དངོས་གྲུབ་ཀྱང་སྩལ་བར་བགྱིའོ། །རིགས་ཀྱི་བུའམ། རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། དགེ་སྦྱོང་ངམ། བྲམ་ཟེའམ། རྒྱལ་རིགས་སམ། བུད་མེད་དམ། སྐྱེས་པའམ། ཁྱེའུའམ། བུ་མོ་
གང་ཡིན་པ་དེ་ཡང་ཆོ་ག་ཞིབ་མོའི་རྒྱལ་པོ་འདིའི་མིང་ཐོས་པ་ཙམ་གྱིས་ཀྱང་། དེ་ལ་བདག་ཅག་ཐམས་ཅད་མཐུན་པར་རྟག་ཏུ་རྗེས་སུ་འབྲང་བར་བགྱི། བསྲུང་བ་དང་། བསྐྱབ་པ་དང་། སྦ་བ་དང་། སྟོབས་དང་། བརྩོན་འགྲུས་དང་། མདངས་དང་། དགའ་བ་བསྒྲུབ་པར་བགྱི། སྡིག་པ་དང་། སྒྲིབ་པ་ཐམས་ཅད་རབ་ཏུ་ཞི་བར་བགྱི། ནད་ཐམས་ཅད་བསལ་བར་བགྱི། འཇིགས་པ་དང་། ཐབ་མོ་དང་། འཐབ་པ་དང་། རྩོད་པ་དང་། འགྱེད་པ་ཐམས་ཅད་རབ་ཏུ་ཞི་བར་བགྱི། ཡམས་དང་། ཉེ་བར་འཚེ་བ་དང་། ནད་འགོ་བ་དང་། འཁྲུག་པ་དང་། མུ་གེ་དང་། མི་ངས་དང་། འབྲོག་དགོན་པའི་འཇིགས་པ་ཐམས་ཅད་སོ་སོར་ཕྱིར་བཟློག་པར་བགྱི། བདེ་བ་ལ་ཡང་དག་པར་རེག་པ་དང་། མཆོག་ཏུ་དགའ་བ་བསྒྲུབ་པར་བགྱི། བསྲུང་བར་བགྱི། ཡོངས་སུ་བསྐྱང་བར་བགྱི། དོན་མེད་པ་ཡང་སོ་སོར་བཟློག་པར་བགྱི། དོན་ལ་ཡང་ཡང་དག་པར་སྦྱར་བར་བགྱི། དོན་ཐམས་ཅད་རྗེས་སུ་སྩལ་བར་བགྱི། རྟག་ཏུ་མཆོག་སྩལ་བར་བགྱིའོ། །བཅོམ་ལྡན་འདས་ཤིན་ཏུ་རྒྱས་པའི་ཆོ་ག་ཆོ་ག་ཞིབ་མོའི་ཡོ་བྱད་དུ་དགོངས་པའོ། །དེ་ནས་ཡང་བཅོམ་ལྡན་འདས་ཀྱིས་ཕྱག་ན་རྡོ་རྗེ་སྔོན་དུ་འགྲོ་བས་རྒྱལ་པོ་ཆེན་པོ་བཞི་དང་། རིགས་པའི་རྒྱལ་པོའི་ལྷ་དེ་རྣམས་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་རྣམས་ལ་ལེགས་སོ་ཞེས་བྱ་བ་བྱིན་ཏེ། ལེགས་སོ་ལེགས་སོ་དྲང་སྲོང་ཆེན་པོ་དེ་ལྟ་བུ་བྱེད་པ་དེ་རྣམས་ཡོངས་སུ་བསྐྱང་བར་བྱ། བསྲུང་བར་བྱ། དངོས་གྲུབ་ཀྱང་སྦྱིན་པར་བྱའོ། །ངས་ཆོ་ག་ཞིབ་མོའི་རྒྱལ་པོ་རྒྱ་མཚོའི་དཀྱིལ་འཁོར་དང་། གསང་སྔགས་དང་། དཀྱིལ་འཁོར་གྱི་ཆོ་ག་ཞིབ་མོ་འདི་ཡོངས་སུ་སྲུང་བའི་ཆེད་དང་། སེམས་ཅན་དེ་རྣམས་ཐམས་ཅད་ཡོངས་སུ་སྲུང་བའི་ཆེད་དང་། སེམས་ཅན་ཐམས་ཅད་སྲུང་བའི་ཆེད་དང་། ཡོངས་སུ་བསྐྱང་བའི་ཆེད་དུ་གྲོགས་པོ་རྣམས་ལ་རྗེས་སུ་གཏད་དོ། །འདི་ཡང་བསྲུང་བར་བྱའོ་ཞེས་སོ། །དེ་ནས་ཡང་བཅོམ་ལྡན་འདས་ཀྱིས་འཕགས་པ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །ཕྱག་རྒྱ་དང་དཀྱིལ་
འཁོར་གྱི་རིམ་པར་ཕྱེ་བའི་ཆོ་ག་སྨྲོས་ཤིག །དོན་ཡོད་པའི་ནོར་བུའི་མཆོད་པའི་སྙིང་པོའི་གཟུངས་ཀྱི་གསང་བ་དང་། རིག་སྔགས་འཆང་ཐམས་ཅད་ཀྱི་སྙིང་པོའི་གསང་བ་མཆོག་གི་དངོས་གྲུབ་འདི་ཐམས་ཅད་དུ་ཐུན་མོང་བའི་སྙིང་པོ་གྲུབ་པའོ། །དེ་ནས་བྱང་ཆུབ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་དོན་ཡོད་པ་ལྕགས་ཀྱུའི་ཆོ་ག་ཞིབ་མོའི་རྒྱལ་པོའི་རིག་པའི་རྒྱལ་པོ་དོན་ཡོད་པ་ནོར་བུ་མཆོད་པའི་སྙིང་པོའི་གཟུངས་ཀྱི་ཕྱག་རྒྱ་དང་། དཀྱིལ་འཁོར་གྱི་ཆོ་ག་དང་། རས་རིས་རྣམས་གསུངས་པ། དེ་ནས་འདིའི་དཀྱིལ་འཁོར་བཤད་པར་བྱའོ། །དོན་ཡོད་པ་མཆོད་པའི་ནོར་བུའི་སྙིང་པོ་བླ་ན་མེད་པ་ནི་དཀྱིལ་འཁོར་གྲུ་བཞི་པ་བྱས་ཏེ། ཀུན་ནས་ཤིན་ཏུ་རྣམ་པར་ཕྱེ་བ་ས་དང་བ་བྱུང་གིས་ལེགས་པར་བྱུགས་ཤིང་ཤིན་ཏུ་འཇམ་པ་ལ། ཚོན་སྣ་ཚོགས་པས་བཀྲ་བའི་སྲད་བུས་ཆར་གཞལ་ཅིང་བཅད་ལ་དཀྱིལ་འཁོར་བླ་ན་མེད་པའི་དབུས་ཀྱི་དཀྱིལ་འཁོར་གྱི་སྙིང་པོར་བདག་གི་ཁྲུའི་ཚད་ཀྱིས་ཀུན་ནས་ཁྲུ་བཞི་པ་སྒོ་བཞི་རྣམ་པར་ཕྱེ་བ་བྱའོ། །ཐམས་ཅད་དུ་གསང་བ་ཐུན་མོང་བའི་དཀྱིལ་འཁོར་དང་། དབུས་ཀྱི་དཀྱིལ་འཁོར་གྱི་སྙིང་བོར་ཡང་པདྨ་བྱ་སྟེ། པདྨ་སྟོང་ཕྲག་གིས་ཤིན་ཏུ་མཛེས་པ་ལྔ་ལྔའོ། །པདྨ་དཀར་པོ་བླ་ན་མེད་པ་ལ་ཟེ་འབྲུ་དང་། གེ་སར་གྱི་ཚད་ལ་བབ་པ། ཡིད་བཞིན་གྱི་ནོར་བུའི་གེ་སར་དང་། ཟེ་འབྲུ་བཀྲ་བའི་དྲ་བའི་སྙིང་པོ་ལུས་དང་ལག་ཏུ་འཆང་ཞིང་ལག་པའི་ཕྱག་རྒྱ་གཡོན་པ་དང་གཡས་པས་བྱའོ། །དར་དཔྱངས་དང་འཁྱིལ་པས་སྤ་བ། ཟུར་ཟུར་དུ་དཔག་བསམ་གྱི་ཤིང་ཤིན་ཏུ་ཚད་ལ་བབ་པ་ཆོ་ག་ཇི་ལྟ་བ་བཞིན་དུ་བྱེད་དུ་གཞུག་གོ། །སྙིང་པོའི་འཁོར་གྱི་རེ་ཁཱ་ཡང་ཆོ་ག་ཇི་ལྟ་བ་བཞིན་དུ་ཤིན་ཏུ་ཚད་དང་ལྡན་པར་བྱའོ། །མེ་ཏོག་དང་འབྲས་བུ་སྣ་ཚོགས་པ་བྱ་ཞིང་དེ་ནས་མེ་ཏོག་གི་བར་དུ་རེ་ཁཱ་བྱའོ། །རྒྱན་སྣ་ཚོགས་ཀྱིས་རྣམ་པར་བརྒྱན་པ། གོས་སྣ་ཚོགས་པས་མཛེས་པའོ། །སྣ་ཚོགས་པའི་རྒྱན་གྱི་ཕྱི་རོལ་ཏུ་པདྨ་དང་། ཨུཏྤ་ལ་སྔོན་པོའི་ཕྲེང་བའི་རི་མོའོ། །ཨུཏྤ་ལ་སྔོན་པོའི་ཕྱི་རོལ་ཏུ་ནོར་བུ་རིན་པོ་ཆེ་སྣ་ཚོགས་པས་རྣམ་པར་བཀྲ་བའི་རི་མོ་འབར་བའི་ཕྲེང་བས་མཛེས་པའོ། །མེ་ཏོག་སྣ་མ་དང་། ཙམ་པ་ཀའི་ཕྲེང་བ་དག་ལ་སྔགས་ཀྱི་ནོར་བུའི་རི་མོ་ཡང་བྱའོ། །དེའི་ཕྱི་རོལ་གྱི་ཁོར་ཡུག་ཏུ་སྣམ་
བུའི་རྣམ་པ་བྱའོ། །རི་བོ་ལ་སྣ་ཚོགས་པའི་ལྗོན་ཤིང་དང་ལྕུག་མ་བཀྲམ་པ་དང་མེ་ཏོག་སྣ་ཚོགས་ཀྱིས་ཉེ་བར་མཛེས་པའོ། །ཁོར་ཡུག་ཏུ་ཆུ་འབབ་པའི་སྙིང་པོའི་དཀྱིལ་འཁོར་འདི་བྲི་ཞིང་ཕྱི་རོལ་གྱི་དཀྱིལ་འཁོར་གྱི་ཁོར་ཡུག་ཏུའང་བྲི་བར་བྱ་སྟེ། དཀྱིལ་འཁོར་བླ་ན་མེད་པ་ཕྱག་རྒྱ་སྣ་ཚོགས་དང་། མེ་ཏོག་སྣ་ཚོགས་དང་། བུམ་པ་དང་མཆོད་པའི་རིན་པོ་ཆེའི་སྣོད་སྣ་ཚོགས་པ་དང་། གང་བའི་བུམ་པ་སྣ་ཚོགས་པ་བྲིའོ། །མཚན་མ་དང་། ཕྱག་རྒྱ་དང་། རིན་པོ་ཆེ་སྣ་ཚོགས་པའི་ཡལ་ག་དང་། པདྨ་དང་། ཨུཏྤལ་འཆང་བ་གོས་དང་རྒྱན་སྣ་ཚོགས་པ་ཐོགས་པ་བྱའོ། །ཕྱིའི་དཀྱིལ་འཁོར་གྱི་ཁོར་ཡུག་ཏུ་མེ་ཏོག་སྣ་ཚོགས་པ་ཀུ་མུ་ད་དང་། པདྨ་དཀར་པོ་དང་། མན་དཱ་ར་བ་དང་། ཨ་ཏི་མུཀྟ་ཀ་དང་། ཝཱརྵི་ཀ་དང་། ཙམ་པ་ཀ་དང་། ཨུཏྤ་ལ་སྔོན་པོ་དང་། སྣ་མ་དང་། སྐྱ་སྣར་དང་། ཡཱུ་ཐི་ཀ་དང་། ཀ་དམ་པའི་མེ་ཏོག་གི་ཕྲེང་བས་མཛེས་པར་བྱའོ། །སྒོ་བཞིའི་གནས་སུ་རྒྱན་ཐམས་ཅད་ཀྱིས་རྣམ་པར་བརྒྱན་པར་བྱ་སྟེ། རིན་པོ་ཆེའི་ལྕུག་མ་སྣ་ཚོགས་པ་དང་། བུམ་པ་གང་བ་ཐོགས་པར་བྱའོ། །དཀྱིལ་འཁོར་གྱི་སྙིང་པོར་བ་དན་གྱིས་བརྒྱན་པར་བྱའོ། །གང་བའི་བུམ་པ་ཡོངས་སུ་བསགས་པ་དང་། མེ་ཏོག་དང་འབྲས་བུ་སྣ་ཚོགས་པ་དང་། སྣ་ཚོགས་པའི་གཟུགས་དང་བཟའ་བའི་ཁ་ཟས་རོ་བྲོ་བའི་མཆོག་གཞག་པར་བྱ། སྣ་ཚོགས་པའི་བདུག་པས་བདུགས་ལ། བདུག་པའི་བོག་ཕོར་ཡོངས་སུ་བཤམ་པར་བྱའོ། །རིག་སྔགས་འཆང་གཙང་མས་གོས་གཙང་མ་བགོ་བར་བྱ་ལེགས་པར་ཁྲུས་བྱས་ཤིང་དྲི་བཟང་པོའི་དྲིས་བསྒོས་ཏེ། རྣམ་པ་སྣ་ཚོགས་པའི་བདུག་པས་བདུགས་ལ། འབྱུང་ལྔས་ཉེ་རེག་བྱ་སྟེ་དོན་ཡོད་པ་ནོར་བུའི་མཆོད་པའི་སྙིང་པོའི་གཟུངས་འདི་ལན་སྟོང་རྩ་བརྒྱད་དུ་བཟླས་པར་བྱའ། །དུས་གསུམ་དུ་གཤེགས་པའི་དེ་བཞིན་གཤེགས་པ་རྡུལ་ཕྲ་རབ་ཀྱི་གྲངས་དང་མཉམ་པ་ཡིད་ལ་བྱ། མཆོད་པའི་སྤྲིན་ཆེན་པོ་ཡིད་ལ་བྱ་ཞིང་བཟླ་སྟེ་ཕྱོགས་བཅུ་ཀུན་ནས་སངས་རྒྱས་ཀྱི་ཞིང་ཐམས་ཅད་ཀྱི་ནང་དུ་གཏོགས་པའི་སངས་རྒྱས་བཅོམ་ལྡན་འདས་རྣམས་སངས་རྒྱས་ཀྱི་ཞིང་རེ་རེའི་དུས་གསུམ་དུ་གཤེགས་པའི་དེ་བཞིན་གཤེགས་པ་རྡུལ་ཕྲ་རབ་རྣམས་དེ་བཞིན་གཤེགས་པའི་མཆོད་པའི་སྤྲིན་གྱིས་ཇི་ལྟར་དཀྱིལ་འཁོར་དུ་ཡོངས་སུ་བསགས་ཤིང་རྣམ་པ་སྣ་ཚོགས་སུ་གཞལ་དུ་མེད་པས་ཇི་ལྟ་བ་བཞིན་དུ་ཡོངས་སུ་བསགས་པའི་དེ་བཞིན་གཤེགས་པ་རེ་རེ་ཡང་དཀྱིལ་
འཁོར་ཆེན་པོ་གཞལ་དུ་མེད་པ་བརྒྱ་སྟོང་ཕྲག་ཡོངས་སུ་བསགས་པས་བཅོམ་ལྡན་འདས་ཀྱི་སྤྱན་སྔར་མཆོད་པའི་སྤྲིན་ཆེན་པོ་བྱེད་དོ། །སྣ་ཚོགས་པའི་གོས་དང་། སྣ་ཚོགས་པའི་རྒྱན་དང་། ལྷབ་ལྷུབ་དང་། ལྷ་རྫས་ཀྱི་མེ་ཏོག་སྣ་ཚོགས་པ་དང་། ལྷ་རྫས་ཀྱི་དྲི་སྣ་ཚོགས་པ་དང་། ལྷ་རྫས་ཀྱི་བདུག་སྤོས་སྣ་ཚོགས་པ་དང་། ལྷ་རྫས་ཀྱི་འབྲས་བུ་དང་། མེ་ཏོག་སྣ་ཚོགས་པ་དང་། རོ་བརྒྱ་པའི་ཁ་ཟས་ཀྱི་མཆོག་རོ་བྲོ་བའི་མཆོག་རྣམ་པ་སྣ་ཚོགས་པ་དང་། སྒྲོན་མའི་ཤིང་སྣ་ཚོགས་པ་བརྒྱ་སྟོང་ཕྲག་རྣམས་ཀྱིས་དེ་བཞིན་གཤེགས་པ་རེ་རེའི་འཁོར་གྱི་དཀྱིལ་འཁོར་དང་བཅས་པ་ལ་མཆོད་པའི་སྤྲིན་ཆེན་པོ་བྱེད་དོ། །ཡན་ལག་ལྔ་དང་ལྡན་པའི་ལྷ་རྫས་ཀྱི་རོལ་མོའི་སྒྲ་རྣམས་ཀྱི་མཆོད་པའི་སྤྲིན་བྱེད་དོ། །དེ་ལྟ་བུའི་ཆོ་ག་རྣམས་ཕྱོགས་བཅུ་རྣམས་སུ་སངས་རྒྱས་ཀྱི་ཞིང་རེ་རེའི་དེ་བཞིན་གཤེགས་པ་རེ་རེའི་མཆོད་པའི་སྤྲིན་ཆེན་པོས་དུས་གསུམ་དུ་གཤེགས་པའི་དེ་བཞིན་གཤེགས་པ་རྡུལ་ཕྲ་རབ་ཀྱི་གྲངས་རྣམས་མཆོད་པར་འགྱུར་ཏེ། འཁོར་གྱི་དཀྱིལ་འཁོར་དང་བཅས་པ་ཐམས་ཅད་དུ་ལྷུན་གྲུབ་ཏུ་འབྱུང་བར་འགྱུར་རོ། །དཀྱིལ་འཁོར་ཆེན་པོ་གཞལ་དུ་མེད་པའི་མཆོད་པའི་སྤྲིན་གྱིས་མཆོད་པར་བྱེད་དོ། །གང་ཡང་དཀྱིལ་འཁོར་ཆེན་པོ་དེར་རྗེས་སུ་ཞུགས་པའི་སེམས་ཅན་དགེ་སྦྱོང་དང་། བྲམ་ཟེ་དང་། རྒྱལ་རིགས་དང་། རྗེའུ་རིགས་དང་། དམངས་རིགས་དང་། བུད་མེད་དང་། སྐྱེས་པ་དང་། ཁྱེའུ་དང་། བུ་མོ་གང་ཡིན་པ་དེ་རྣམས་ཐམས་ཅད་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །དེ་ལ་མཐོང་བར་འདོད་པ་དང་། རྗེས་སུ་ཡི་རང་བ་དང་། ལྷན་ཅིག་འགྲོ་བའམ། ཐ་ན་ཐོས་པ་ཙམ་གང་ཡིན་པ་དེ་ཐམས་ཅད་ཕྱིར་མི་ལྡོག་པར་འགྱུར་ཞིང་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །སྦྱིན་པ་ཆེན་པོ་ཡོངས་སུ་གཏོང་བ་ཡོངས་སུ་བཏང་བར་འགྱུར་རོ། །བསོད་ནམས་ཀྱི་ཕུང་པོ་དང་དགེ་བའི་རྩ་བ་བསྐྱེད་པར་འགྱུར་རོ། །སེམས་ཅན་རེ་རེའི་ཡང་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་ཕྲག་དགུ་བཅུ་རྩ་དགུ་དང་མཉམ་པ་དེའི་དྲུང་དུ་དགེ་བའི་རྩ་བ་དང་བསོད་ནམས་ཀྱི་ཕུང་པོ་བསྐྱེད་པར་འགྱུར་རོ། །དཀྱིལ་འཁོར་མཐོང་བ་ཙམ་གྱི་མོད་ལ། རྗེས་སུ་ཡི་རང་བ་ཙམ་གྱི་མོད་ལ་འཕྲལ་ཉིད་དུ་མཚམས་མེད་པ་ལྔའི་སྡིག་པ་ཡོངས་སུ་ཟད་པར་འགྱུར་རོ། །ནད་ཐམས་ཅད་ལས་ཡོངས་སུ་གྲོལ་བར་ཡང་འགྱུར་རོ། །སེམས་ཅན་ཐམས་ཅད་ཀྱི་བླ་མ་གཅིག་པུར་འགྱུར་རོ། །འཆི་འཕོ་ཞིང་
སྐྱེ་བ་བརྗེས་པའི་དུས་སུ་སོན་ཏེ་འཆི་བའི་མཐར་ཐུག་པ་ན། དེ་བཞིན་གཤེགས་པ་བྱེ་བ་ཕྲག་དགུ་བཅུ་རྩ་གཉིས་མངོན་སུམ་དུ་སྟོན་ཞིང་སྣང་བར་འགྱུར་རོ། །ལམ་ཉེ་བར་སྟོན་པར་བྱེད་ཅིང་དབུགས་འབྱིན་པར་བྱེད་དོ། །སངས་རྒྱས་ཀྱི་ཞིང་སྣ་ཚོགས་པ་རྣམས་སུ་སྐལ་བ་མཉམ་པ་ཉིད་ཀྱི་སྐྱེ་བར་བྱེད་དེ། རྒྱན་ཐམས་ཅད་ཀྱིས་བརྒྱན་པར་པདྨ་ལས་བརྫུས་ཏེ་སྐྱེ་བར་འགྱུར་རོ། །སྐྱེས་པ་ཙམ་གྱི་མོད་ལ། སྐྱེ་བ་ཐམས་ཅད་རྗེས་སུ་དྲན་པར་བྱེད་དོ། །དེ་བཞིན་གཤེགས་པ་ཐམས་ཅད་ཀྱི་གསང་བ་ཕྱག་རྒྱ་དང་། གསང་སྔགས་རིམ་པར་ཕྱེ་བ་དང་། ཆོ་ག་ཞིབ་མོ་དང་། དོན་ཡོད་ཞགས་པའི་རྣམ་པར་ཐར་པའི་དཀྱིལ་འཁོར་མཐའ་དག་རྫོགས་པར་ཁ་ཏོན་དུ་གནས་པར་བྱེད་དོ། །ཇི་སྲིད་སངས་རྒྱས་ཀྱི་བྱང་ཆུབ་ལ་མཐར་ཐུག་གི་བར་དུ་ཐམས་ཅད་རྒྱལ་མཚན་གྱི་རྩེ་མོར་བཅིངས་ཏེ་གནས་བར་བྱེད་དོ་ཞེས་སོ། །འདི་ནི་སྐྱེ་བའི་ཐ་མར་འགྱུར་ཏེ། མཆོད་པ་དང་། དཀྱིལ་འཁོར་གྱི་ཆོ་ག་འདི་ཐ་ན་དུད་འགྲོའི་སྐྱེ་གནས་སུ་སོང་བའི་རི་དགས་དང་བྱ་དེ་དག་ཐམས་ཅད་ཕྱིར་མི་ལྡོག་པར་འགྱུར་ཞིང་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་ཏེ། མིར་གྱུར་པ་རྣམས་ཀྱི་ལྟ་ཅི་སྨོས་སོ། །དེ་ལྟར་ཡོན་ཏན་དང་ཕན་ཡོན་ཆེན་པོའི་མཆོད་པ་ཆེན་པོ་དང་། དཀྱིལ་འཁོར་གྱི་ཆོ་གའོ། །དོན་ཡོད་པ་ནོར་བུའི་མཆོད་པའི་སྙིང་པོའི་གཟུངས་ཀྱི་རྣམ་པར་འཕྲུལ་པ་དང་ཕན་ཡོན་གྱི་ཆོ་གའི་སྒྲུབ་ཐབས་སོ།། །།དེ་ནས་རིག་པའི་རྒྱལ་པོའི་རས་རིས་བཤད་པར་བྱ་སྟེ། སེམས་ཅན་ཐམས་ཅད་ལ་ཕན་པར་བྱེད་པ་སྡིག་པ་ཐམས་ཅད་སེལ་བ་འཕྲལ་དུ་ནད་ཐམས་ཅད་ཟློག་པར་བྱེད་པ་དངོས་གྲུབ་ཐམས་ཅད་བྱེད་པའི་གནས་མཆོག་ཐམས་ཅད་སྦྱིན་པ་བཤད་པར་བྱའོ། །རས་སམ་གོས་གཞན་ནམ། རྒྱ་དར་ལ་ཀུན་ནས་ཁྲུ་བཞི་པ་ལ་གཙང་མས་གཙང་མའི་གནས་སུ་རི་མོ་མཁན་གཙང་མ་ཉིད་ཀྱིས་ཁྲུས་བྱས་གོས་གཙང་མ་བགོས་ཏེ། དྲི་སྣ་ཚོགས་པས་བདུགས་ལ་མཚོན་སྣ་ཚོགས་པ་རྣམ་པར་བཀྲ་ཞིང་ལྷག་མ་མ་ཡིན་པ་སྣོད་གསར་པར་བཞག་པས་རས་རིས་བླ་ན་མེད་པ་བྲི་བར་བྱའོ། །དབུས་སུ་དེ་བཞིན་གཤེགས་པ་ཤཱཀྱ་ཐུབ་པ་བྱ་སྟེ། གཞལ་ཡས་ཁང་གི་ཁང་པ་བརྩེགས་པར་སེང་གེའི་ཁྲི་ལ་པདྨའི་རྫིང་བུར་ཀླུའི་རྒྱལ་པོ་དགའ་བོ་དང་ཉེ་དགའ་བོ་དང་བཅས་པས་བཅོམ་ལྡན་འདས་ལ་མེ་ཏོག་འཐོར་བར་བྱེད་བཞིན་པའོ། །
གཡོན་དུ་འཕགས་པ་སྤྱན་རས་གཟིགས་དབང་ཕྱུག་བྱ་སྟེ། དོན་ཡོད་ཞགས་པ་སྐྱིལ་ཀྲུང་ཕྱེད་པས་བཞུགས་པ་རལ་བའི་ཅོད་པན་གྱིས་བརྒྱན་པ་ཚངས་པའི་ཆ་བྱད་འཆང་བ། རྒྱན་ཐམས་ཅད་ཀྱིས་རྣམ་པར་བརྒྱན་པ། འོད་དཔག་མེད་ཀྱི་ཅོད་པན་ཅན། ཕྱག་བཞི་པ། སྤྱན་གསུམ་པ། མདུང་རྩེ་གསུམ་འཛིན་པ་པདྨ་འཛིན་པ་དང་། ཞགས་པ་འཛིན་པ་དང་། ནོར་བུ་རིན་པོ་ཆེ་འཛིན་པ། བཅོམ་ལྡན་འདས་ལ་ཉེ་བར་འདུད་པར་བྱེད་བཞིན་པའོ། །གཡས་སུ་རིག་པའི་རྒྱལ་པོ་བྱ་སྟེ། ཕྱག་བཞི་པ་འཕགས་མ་སྒྲོལ་མའི་ཆ་བྱད་འཆང་བ་འོད་དཔག་མེད་ཀྱི་ཅོད་པན་ཅན། རྒྱན་ཐམས་ཅད་ཀྱིས་རྣམ་པར་བརྒྱན་པ། སྣ་ཚོགས་པའི་གོས་འཛིན་པ། པདྨ་དང་ཞགས་པ་དང་། རལ་གྲི་འཆང་ཞིང་ནོར་བུ་རིན་པོ་ཆེ་ཆེན་པོའི་རྒྱལ་མཚན་ཐོགས་ཏེ། བཅོམ་ལྡན་འདས་ལ་ཉེ་བར་འདུད་པར་བྱེད་པ་སྐྱིལ་ཀྲུང་ཕྱེད་པས་བཞུགས་པའོ། །འཕགས་པ་སྤྱན་རས་གཟིགས་དབང་ཕྱུག་གི་རྒྱབ་ཏུ་ལྷ་མོ་སྒྲོལ་མ་བྱ་སྟེ། ཐལ་མོ་སྦྱར་བ་སྨད་པ་རྒྱན་ཐམས་ཅད་ཀྱིས་རྣམ་པར་བརྒྱན་པའོ། །ལྷ་མོ་སྒྲོལ་མའི་རྒྱབ་ཏུ་གོས་དཀར་མོ་བྱ་སྟེ། རྒྱན་ཐམས་ཅད་ཀྱིས་རྣམ་པར་བརྒྱན་པ་རབ་ཏུ་བཞད་ཅིང་སྨིན་མ་དཔྲལ་བར་གཡོ་ཞིང་། བཅོམ་ལྡན་འདས་ལ་ཟུར་མིག་གིས་ལྟ་བར་བྱེད་པ་བྱའོ། །རིག་པའི་རྒྱལ་པོའི་རྒྱབ་ཏུ་འཕགས་པ་དཔལ་མཛེས་པ་བྱ་སྟེ། རྒྱན་ཐམས་ཅད་ཀྱིས་རྣམ་པར་བརྒྱན་པ། བཅོམ་ལྡན་འདས་ལ་ལྟ་བར་བྱེད་བཞིན་པ་སྣ་ཚོགས་པའི་མེ་ཏོག་གི་ཕུར་མ་འཆང་བར་བྱེད་པའོ། །ཐམས་ཅད་ལ་པདྨའི་གདན་བྱ་སྟེ། སྐྱིལ་ཀྲུང་ཕྱེད་པས་བཞུགས་པ་བྱའོ། །གོས་དཀར་མོའི་རྒྱབ་ཏུ་ཁྲོ་བོ་ཆེན་པོ་ལྕགས་ཀྱུ་བྱའོ། །དཀར་པོའི་གཞོགས་སུ་དོན་ཡོད་པའི་ལྕགས་ཀྱུ་བྱའོ། །རིག་པའི་རྒྱལ་པོའི་འོག་ཏུ་རལ་པ་གཅིག་མ་བྱ་སྟེ། ཕྱག་བརྒྱད་པ། ཞལ་མཆེ་བ་གཅིགས་པ། རལ་པ་གྱེན་དུ་བརྫེས་པ། རྒྱན་ཐམས་ཅད་ཀྱིས་རྣམ་པར་བརྒྱན་པ། མཚོན་ཆ་སྣ་ཚོགས་པ་འཛིན་པ་སྟེ། རལ་གྲི་དང་། དགྲ་སྟ་དང་། ཞགས་པ་དང་། རལ་གྲི་དང་། མདུང་རྩེ་གསུམ་དང་། རྡོ་རྗེ་དང་། པདྨ་འཆང་བ་བྱ་ཞིང་སྡིགས་མཛུབ་བྱེད་པ་བྱའོ། །སྟེང་དུ་ཕྱོགས་པ་སྐྱིལ་ཀྲུང་ཕྱེད་པས་བཞུགས་པ་བཅོམ་ལྡན་འདས་ལ་ལྟ་བར་བྱེད་བཞིན་པའོ། །ཁང་པ་བརྩེགས་པའི་སྟེང་དུ། དེ་བཞིན་གཤེགས་པ་བདུན་བྱ་སྟེ། འོད་དཔག་མེད་ཀྱང་དབུས་སུ་བྱའོ། །ལྷས་མཆོད་པ་བྱེད་བཞིན་པ་བྱའོ། །ཕྱག་
གཡོན་དང་གཡས་སུ་རྡོ་རྗེ་འཛིན་པ། བཅོམ་ལྡན་འདས་ལ་ཟས་གསར་པ་འདྲེན་པར་བྱེད་བཞིན་པའོ། །གཞོགས་གཡས་དང་གཡོན་དུ་ཁྲོ་བོའི་རྒྱལ་པོ་རྡོ་རྗེ་འཆང་བ་བྱའོ། །འོག་གི་གཞོགས་གཡས་སུ་རྒྱལ་པོ་ཆེན་པོ་བཞི་བྱའོ། །གཞོགས་གཡོན་དུ། གཤིན་རྗེ་དང་། ཆུ་ལྷ་དང་། ལུས་ངན་པོ་དང་། གཞོན་ནུ་རྣམས་རང་རང་གི་མཚོན་ཆ་འཛིན་པ་བྱ་སྟེ། ཐམས་ཅད་གླུ་ལེན་བཞིན་པ་བྱའོ། །བཅོམ་ལྡན་འདས་འོག་ཕྱོགས་ཀྱི་རྫིང་བུའི་གཡས་ལོགས་སུ་རིག་སྔགས་འཆང་པུས་མོ་བཙུགས་པ་བྱ་སྟེ། བདུག་པའི་པོག་ཕོར་དང་། མེ་ཏོག་འཛིན་ཅིང་བགྲང་ཕྲེང་ཐོགས་པ། བཅོམ་ལྡན་འདས་ལ་ལྟ་བར་བྱེད་བཞིན་པ་བྱའོ། །རས་རིས་ཀྱི་ཁོ་ར་ཁོར་ཡུག་ཏུ་རི་བོ་བྲི་བར་བྱ་སྟེ། སྣ་ཚོགས་མེ་ཏོག་གི་མགོ་ལྕོགས་བཀྲམ་ཞིང་། རིན་པོ་ཆེའི་ཤིང་ལྗོན་སྣ་ཚོགས་པས་བརྒྱན་པ། ཆུ་བོ་འབབ་ཅིང་རྗེས་སུ་སྤྱོད་པ། རི་དགས་དང་། བྱས་ཡང་དག་པར་བརྒྱན་པ་བྱའོ། །སྣ་ཚོགས་པའི་རིའི་ལྷ་དང་། ཤང་ཤང་ཏེ་འུས་ཀུན་ཏུ་ཁྱབ་པ། རྣམ་པ་སྣ་ཚོགས་པའི་ཀླུའི་གདེངས་ཀ་དང་མཚུངས་པ་གནས་སུ་གནས་པ་བྱའོ། །དེ་ནས་ཡོངས་སུ་སྦྱང་བ་བྱས་ཏེ་ཟིན་པ་དང་། རས་རིས་ལ་ཚོན་སྣ་ཚོགས་པས་བཀྲ་བར་བྱའོ། །དེ་ནས་རིག་སྔགས་འཆང་གཙང་མས་གོས་གཙང་མ་བགོ་བར་བྱའོ། །ལེགས་པར་ཁྲུས་བྱ་སྟེ། སྐྱིལ་མོ་ཀྲུང་གིས་འདུག་སྟེ། སྨྲ་བ་བཅད་ལ། དོན་ཡོད་ཞགས་པའི་སྙིང་པོ་ལན་བརྒྱ་རྩ་བརྒྱད་དང་། རིག་པའི་རྒྱལ་པོའི་གཟུངས་ལན་བརྒྱ་རྩ་བརྒྱད་དུ་བཟླས་སོ། །དེའི་ཚེ་རས་རིས་འབར་བར་འགྱུར་རོ། །འོད་ཟེར་ཁ་དོག་སྣ་ཚོགས་པ་འབྱིན་པར་བྱེད་དེ། ཕྱོགས་བཅུ་ཀུན་ཏུ་སྣང་བར་བྱེད་དོ། །རིག་སྔགས་འཆང་དགའ་ཞིང་འདོད་པར་འགྱུར་ཏེ། རིག་སྔགས་འཆང་གིས་བདག་གི་དོན་ཡོད་ཞགས་པའི་སྙིང་པོ་དང་། དོན་ཡོད་ཞགས་པའི་ལྕགས་ཀྱུ་དང་། རིག་པའི་རྒྱལ་པོའི་སྙིང་པོ་འདིའི་དངོས་གྲུབ་ཏུ་ཤེས་པར་བྱའོ། །དེ་ནས་ལས་ཐམས་ཅད་བྱེད་དུ་གཞུག་ཅིང་། འཇིག་རྟེན་དང་འཇིག་རྟེན་ལས་འདས་པའི་མཆོག་འགྲུབ་པར་འགྱུར་རོ། །རིགས་ཀྱི་བུའམ། རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་
བསྙེན་ནམ། དགེ་བསྙེན་མའམ། རྒྱལ་པོ་འམ། བློན་པོ་འམ། བྲམ་ཟེ་འམ། རྒྱལ་རིགས་སམ། ཁྱིམ་བདག་གམ། དགེ་བསྙེན་ནམ། དགེ་བསྙེན་མའམ། བུད་མེད་དམ། སྐྱེས་པའམ། ཁྱེའུ་འམ། བུ་མོ་གང་རས་རིས་ཆེན་པོ་འདི་མཐོང་ནས། མཐོང་བ་ཙམ་གྱི་མོད་ལ་མཚམས་མེད་པ་ལྔའི་སྡིག་པ་རྣམ་པར་སྦྱངས་ཤིང་ཐུན་ཚགས་སུ་འགྱུར་རོ། །མནར་མེད་པའི་སྡིག་པ་དང་སྒྲིབ་པ་རྣམས་འཕྲལ་དུ་ཡོངས་སུ་གྲོལ་ལོ། །བསོད་ནམས་ཀྱི་ཚོགས་དགེ་བའི་རྩ་བ་ཆེན་པོ་བསྐྱེད་པར་འགྱུར་རོ། །རིག་པའི་རྒྱལ་པོའི་དཀྱིལ་འཁོར་འདོད་པ་ཐམས་ཅད་དང་ཡིད་ཀྱི་ཤིང་རྟ་དང་། འདོད་པའི་དངོས་གྲུབ་ཐམས་ཅད་དང་། རིགས་ཐུན་མོང་པ་ལ་འཇུག་པའི་ཐམས་ཅད་ཐུན་མོང་བའི་དམ་ཚིག་དང་། དེ་ཁོ་ན་ཉིད་དང་། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབ་པ་དང་། ཐམས་ཅད་དུ་དངོས་གྲུབ་བྱེད་པའི་གནས། རྡོ་རྗེའི་གདན་གྱི་དཀྱིལ་འཁོར་མཆོག་བྱང་ཆུབ་ཀྱི་སྙིང་པོ་ཉེ་བར་བགྲོད་པར་བྱེད་པ་དེ་ཁོ་ན་ཉིད་ཀྱི་ཆོས་ཀྱི་འཁོར་ལོ་སྐོར་བར་བྱེད་པའི་དཀྱིལ་འཁོར་ཕྱིར་མི་ལྡོག་པར་འཇུག་པར་བྱེད་པ། དེ་བཞིན་གཤེགས་པ་ཐམས་ཅད་ཀྱི་གསང་བའི་དཀྱིལ་འཁོར། གནས་ཐམས་ཅད་དུ་སོན་པའི་དངོས་གྲུབ། ཆོ་ག་ཞིབ་མོའི་དཀྱིལ་འཁོར་ཐམས་ཅད་དུ་འཇུག་པར་བྱེད་པ། ཕྱག་རྒྱ་ཐམས་ཅད་འགུགས་པར་བྱེད་པའི་ཕྱག་རྒྱ་དང་། སངས་རྒྱས་ཀྱི་ཞིང་ཐམས་ཅད་དུ་རབ་ཏུ་འཇུག་པར་བྱེད་པ་བཤད་པར་བྱའོ། །དེ་ནས་རིག་སྔགས་འཆང་གིས་གནས་ཡོངས་སུ་བརྟགས་ཏེ། སའི་ཆ་མཛེས་པར། གཙུག་ལག་ཁང་ངམ། དགོན་པའམ། གནས་གཉིས་སམ། རི་ཕུག་གམ། ཚང་ཚིང་ངམ། རྒྱལ་པོའི་གནས་སམ། ལམ་གྱི་བཞི་མདོ་འམ། གཞན་ཡང་བྲང་སའམ། དགེ་འདུན་གྱི་ཀུན་དགའ་ར་བའམ། སྐྱེད་མོས་ཚལ་ལམ། ནགས་འདབ་ཉིད་དང་། ཀུན་དགའ་ར་བའམ། ཆུ་ཀླུང་ངམ། ལྟེང་ཀའམ། འབབ་ཆུའི་དངོའམ། མཚོ་བྲན་ནམ། མཚེའུ་དག་དང་། རྫིང་བུ་རྣམ་པར་བཀྲ་བའམ། དེ་བཞིན་གཤེགས་པའི་ཚོན་ནམ། ནེའུ་གསིང་སྔོན་པོའམ། མེ་ཏོག་སྐྱེས་པའི་གནས་སམ། ཐམས་ཅད་དུ་རྗེས་སུ་མཐུན་པར་བརྟག་པར་བྱའོ། །གནས་
གཙང་མར་མ་ཉམས་པའི་མོད་ལ། དཀྱིལ་འཁོར་དེར་དགོད་པར་བྱ་སྟེ། ས་དང་། བ་བྱུང་དང་། ཡང་དག་པར་ལྡན་པའི་དཀྱིལ་འཁོར་གྲུ་བཞི་བྱའོ། །ཁོར་ཡུག་ཏུ་ཁྲུ་བཞི་པ། ལེགས་པར་བྱུགས་ཤིང་ཤིན་ཏུ་འཇམ་པ། བེེཌཱུཪྱའི་ཁ་དོག་ཏུ་བྱའོ། །དཀྱིལ་འཁོར་ལ་ཚོན་སྣ་ཚོགས་པ་མཛེས་པས་ཕྱེ་བའི་ཐིག་གདབ་སྟེ། ཆ་མཉམ་པར་ཕྱེ་ནས་ཟུར་བཞི་པ་ལོགས་བཞི་པ། སྒོ་བཞི་རྣམ་པར་ཕྱེ་བའི་དཀྱིལ་འཁོར་མཆོག་གི་ཐིག་གདབ་བོ། །དབུས་ཀྱི་དཀྱིལ་འཁོར་གྱི་སྙིང་པོར་ཡང་། དཀྱིལ་འཁོར་ཁྲུའི་ཚད་ལ་རེ་ཁཱ་ལྔ་བྱས་པ་སྣ་ཚོགས་པའི་གཟུགས་མཛེས་པས་ཐིག་གདབ་བོ། །པདྨའི་རི་མོ་དང་། མདུང་རྩེ་གསུམ་པ་དང་། རྡོ་རྗེའི་རི་མོ་གསུམ་པ་དག་གོ། །ཨུཏྤ་ལ་བཞི་པའམ། ནོར་བུ་རིན་པོ་ཆེ་ཆེན་པོ་ནི་ལྔ་པར་བཤད་དོ། །སྙིང་པོའི་དཀྱིལ་འཁོར་གྱི་འཁོར་ཡུག་ཏུ་འབར་བའི་ཕྲེང་བ་བྱེད་དུ་གཞུག་གོ། །དབུས་ཀྱི་དཀྱིལ་འཁོར་གྱི་གནས་སོ། །པདྨ་དཀར་པོ་ཞེས་བྱ་བ་འདབ་མ་སུམ་ཅུ་རྩ་གཉིས་པ། གེ་སར་དང་། ཟེའུ་འབྲུ་དང་བཅས་པའི་པདྨ་བྱ་སྟེ། དེ་ལ་རིག་པའི་ལྷ་མོ་གཟུགས་ཇི་ལྟར་མཛེས་པ་དགོད་པར་བྱའོ། །ཇི་ལྟར་རས་རིས་འདི་ལ། གཟུགས་པདྨ་དཀར་པོ་ཞེས་བྱ་བ་དེ་ལྟ་བུ་བྲིས་ནས་དཀྱིལ་འཁོར་གྱི་ལྷ་རྣམས་མཛེས་པ་དང་། ཞི་བ་དང་། ཁྲོ་གཉེར་ཅན་མ། དྲག་པོ་སྣ་ཚོགས་པའི་གཟུགས་འཆང་བ། མཚོན་ཆ་སྣ་ཚོགས་ཐོགས་པ་དཀྱིལ་འཁོར་གྱི་ཚད་ཇི་ལྟ་བ་བཞིན་དུའོ། །རྒྱན་ཐམས་ཅད་ཀྱིས་རྣམ་པར་བརྒྱན་པ། གོས་སྣ་ཚོགས་པ་འཆང་བ་སྐྱེས་པ་ལོ་བཅུ་དྲུག་པའི་གཟུགས་དང་། བུ་མོ་ལོ་བཅུ་དྲུག་པའི་གཟུགས་འཛིན་པ་བསྲེས་པ་རྟག་ཏུ་བྲིས་ནས། པདྨའི་གདན་གྱིས་བརྒྱན་ཅིང་། ཐམས་ཅད་པདྨ་འཆང་བ་བྱེད་དུ་གཞུག་གོ། །སྙིང་པོའི་དཀྱིལ་འཁོར་གྱི་གྲྭ་བཞི་རུ་རྒྱལ་པོ་ཆེན་པོ་བཞི་བྱེད་དུ་གཞུག་སྟེ། གོ་ཆ་དང་ཡ་ལད་བགོས་པ། དྲག་པོའི་གཟུགས་འཇིགས་པར་བྱེད་པའོ། །ཕྱིའི་དཀྱིལ་འཁོར་རྣམ་པར་ཕྱེ་བ་བྱ་སྟེ། ཁོར་ཡུག་ཏུ་མཚན་མའི་ཕྱག་རྒྱ་ཐམས་ཅད་ལ་པདྨའི་གདན་འཆང་བའོ། །སྒོ་བཞིའི་གནས་རྣམས་སུ་དཀྱིལ་འཁོར་གྱི་ལྷ་བྱའོ། །གང་གཱ་དང་། ཤཱི་ཏྲ་དང་། འཇིགས་
མ་དང་། དཔེ་མེད་མ་དང་། ནོར་བུ་བཟང་པོ་དང་། ཀི་ལཱི་ཀི་ལ་དང་། གཙིགས་ཞལ་མ་སྟེ། དཀྱིལ་འཁོར་གྱི་ལྷ་འདི་རྣམས་བྲི་བར་བྱའོ། །ཕྱི་རོལ་གྱི་དཀྱིལ་འཁོར་གྱི་ཁོར་ཡུག་ཏུ་རི་བོའི་ཕྲེང་བ་དག་ལ་མེ་ཏོག་དང་། ལྗོན་ཤིང་སྣ་ཚོགས་པའི་ལྕུག་མས་ཁྱབ་ཅིང་། ཚོན་སྣ་ཚོགས་པས་རྣམ་པར་མཛེས་པ་བྲི་བར་བྱའོ། །དཀྱིལ་འཁོར་གྱི་བྱ་བ་ལེགས་པར་མཐར་ཕྱིན་པ་དང་། དེ་ནས་དཀྱིལ་འཁོར་གྱི་རྒྱན་ལ་ཁོ་ར་ཁོར་ཡུག་ཏུ་ཚོན་སྣ་ལྔས་མཛེས་པའི་བ་དན་བརྒྱ་དང་། སྣ་ཚོགས་པའི་གཟུགས་མཛེས་པ་དང་། རྣམ་པར་བཀྲ་བའི་བུམ་པ་གང་བ་དང་། གཏོར་མ་དང་། དྲིལ་བུ་མཛེས་པ་དང་། གང་བའི་བུམ་པ་དང་། བུམ་བུ་དང་། དྲི་སྣ་ཚོགས་ཀྱི་ཆུས་ཡོངས་སུ་གང་བ་དང་། རོ་སྣ་ཚོགས་པའི་གཏོར་མ་བཞག་ནས། ཁམ་ཕོར་དང་། རིལ་བ་གང་བ་དང་། དྲི་སྣ་ཚོགས་ཀྱིས་བྱུག་པ་དང་། བདུག་པ་སྣ་ཚོགས་པས་མཛེས་པ་དང་། མེ་ཏོག་གི་ཕྲེང་བ་གཅལ་དུ་བཀྲམ་པ་དང་། འབྲས་ཡོས་དང་། ཡུངས་ཀར་ཉིད་དང་། སྣ་ཚོགས་པའི་འབྲས་བུ་རྣམས་དང་། བཟའ་བའི་རྣམ་པ་གཟུགས་སྣ་ཚོགས་པ་བཞག་ནས། འབྲས་བུ་སྣ་ཚོགས་མཛེས་པ་རྣམས་བཞག་སྟེ། ཁོར་ཡུག་ཏུ་མར་མེའི་ཕྲེང་བ་དང་། གསེར་དང་། དངུལ་ལས་བྱུང་བའི་སྣོད་དྲིས་གང་བ་རྣམས་བཞག་གོ། །ཐམས་ཅད་ཇི་ལྟར་འབྱོར་པ་བྱ་སྟེ། དཀྱིལ་འཁོར་གཞལ་དུ་མེད་པ་ལས་དམན་པ་ཉིད་དུ་མི་བྱའི་ལྷག་པ་ཉིད་བྱེད་དུ་གཞུག་གོ། །དཀྱིལ་འཁོར་གྱི་ལས་རྣམས་ཇི་ལྟ་བ་བཞིན་དུ་གུས་པ་དང་། སྟོབས་དང་བརྩོན་འགྲུས་ཀྱིས་བྱའོ། །རིག་སྔགས་འཆང་གིས་གཙང་བར་གྱུར་ནས། ལེགས་པར་ཁྲུས་བྱས་ཏེ་གོས་གཙང་མ་བགོས་ནས། སྲུང་བའི་ཆོ་གས་ཕྱོགས་བཅིང་བ་དང་། དཀྱིལ་འཁོར་བཅིང་བ་དང་། མཚམས་བཅིང་བ་དང་། སྲུང་བ་ཆེན་པོ་ཡང་བྱེད་དུ་གཞུག་གོ། །དེ་ནས་གསང་སྔགས་ཀྱི་ལས་དང་། ཕྱག་རྒྱའི་ལས་བླ་ན་མེད་པར་བྱའོ། །དེ་ནས་སེམས་ཅན་གཞུག་པར་བྱ་སྟེ། དཀྱིལ་འཁོར་གང་འདོད་པར་བཅུག་ནས་ཐམས་ཅད་ཀྱི་དམ་ཚིག་དང་། ཕྱག་རྒྱ་སྦྱིན་དུ་གཞུག་གོ། །ཕྱག་བྱ་བ་དང་། བསྐོར་བ་ལ་ཐམས་ཅད་བཅུག་
ནས། སྙན་གསན་དབབ་པ་དང་སྤྱན་དྲང་བར་བྱ། ལས་ཀྱི་ཆོ་གས་གཏོར་མ་སྦྱིན་པར་བྱ། མེ་ཏོག་དང་བདུག་པ་དབུལ་བར་བྱ། བཟླས་པའི་ལས་རྣམས་དང་། ལས་ཐམས་ཅད་མདོར་བསྡུས་པ་བྱས་ནས། གཤེགས་སུ་གསོལ་བ་འདིར་བྱའོ། །དཀྱིལ་འཁོར་ན་གནས་པའི་ལྷ་རྣམས་ལ་གཏོར་མའི་ལས་ཀྱི་ཆོ་ག་དང་། དེ་བཞིན་དུ་མེ་ཏོག་དང་བདུག་པ་ཕུལ་བ་ནས་དཀྱིལ་འཁོར་ན་གནས་པ་རྣམས་གཤེགས་སུ་གསོལ་ལོ། །གང་གི་ཚེ། གསང་སྔགས་རྣམས་དང་། ཆོ་ག་ཞིབ་མོ་ཆེན་པོའི་གཟུངས་རབ་ཏུ་འཇུག་པ་ན་སའི་མཐིལ་དུ་རས་རིས་འབར་བའི་མོད་ལ་འོད་ཟེར་འབྱིན་པར་བྱེད་དེ། དཀྱིལ་འཁོར་མཐོང་ཞིང་གསང་སྔགས་འཆང་ཡང་བར་སྣང་ལ་གནས་སོ། །དེའི་སྐད་ཅིག་ལ་ཏིང་ངེ་འཛིན་ཐོབ་སྟེ། དཀྱིལ་འཁོར་དུ་ཞུགས་པའི་མོད་ལ། ཆོ་ག་ཞིབ་མོའི་དངོས་གྲུབ་བླ་ན་མེད་པ་དང་། དངོས་གྲུབ་ཐམས་ཅད་རྟག་ཏུ་མྱུར་དུ་འབྱུང་ལ་རིག་པའི་རྒྱལ་པོའི་དཀྱིལ་འཁོར་གྱི་དབུས་ནས་ལེགས་སོ་ཞེས་བྱ་བའི་སྒྲ་ཐོས་པར་འགྱུར་རོ། །རིག་པའི་རྒྱལ་པོའི་དངོས་གྲུབ་བླ་ན་མེད་པ་དང་དོན་ཡོད་ཞགས་པའི་དངོས་གྲུབ་བརྗོད་དོ། །ཇི་ལྟར་ཡིད་ལ་བྱེད་པ་ཐམས་ཅད་མྱུར་དུ་འཛིན་ནོ། །འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐོབ་སྟེ་འདི་ལ་ཐེ་ཙོམ་མེད་དོ། །སེམས་ཅན་དཀྱིལ་འཁོར་དུ་ཞུགས་པ་གང་ཡིན་པ་དེ་རྣམས་ཐམས་ཅད་ཕྱིར་མི་ལྡོག་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་ཡང་འགྱུར་རོ། །བྱང་ཆུབ་ཀྱི་སྙིང་པོར་འདུག་ནས་ཆོས་ཀྱི་འཁོར་ལོ་སྐོར་བར་བྱེད་དོ། །སེམས་ཅན་གང་དཀྱིལ་འཁོར་དེ་མཐོང་ནས་སྡིག་པ་དང་སྒྲིབ་པ་ཐམས་ཅད་དང་། མཚམས་མེད་པ་ལྔ་ལ་སོགས་པ་རྣམས་དང་། མནར་མེད་པར་གཞོལ་བ་དེ་ཐམས་ཅད་རྣམ་པར་ཉམས་པར་བྱེད་ཅིང་བདེ་བླག་ཏུ་སངས་རྒྱས་ཉིད་དུ་འགྲོའོ།། །།དེ་ནས་དོན་ཡོད་པའི་ལྕགས་ཀྱུའི་ཆོ་ག་ཞིབ་མོ་ཆེན་པོ་དང་། ཁྲོ་བོ་ལྕགས་ཀྱུ་དང་། རིག་པའི་རྒྱལ་པོ་དང་། དོན་ཡོད་ཞགས་པའི་སྙིང་པོའི་དཀྱིལ་འཁོར་ཆེན་པོ་རུ། དེ་བཞིན་གཤེགས་པ་ཐམས་ཅད་ཀྱི་རིགས་ཐུན་མོང་པའི་ཕྱག་རྒྱ་དགེ་བའི་ལས་
ཐམས་ཅད་བྱེད་པ། འབྱུང་པོ་ཐམས་ཅད་སྐྲག་པར་བྱེད་པ། གནོད་སྦྱིན་དང་། སྲིན་པོ་ཐམས་ཅད་འབྲོས་པར་བྱེད་པ། བགེགས་ཐམས་ཅད་རྣམ་པར་སྐྲག་པར་བྱེད་པ། འདོད་པའི་རིག་རྣམས་སྲེག་པར་བྱེད་པ། གདུག་པའི་ཀླུ་རྣམས་འཁྲུག་པར་བྱེད་པ། སའི་མཐིལ་གཡོ་བར་བྱེད་པ། ལྷའི་མེ་ཏོག་དང་། རིན་པོ་ཆེ་སྣ་ཚོགས་ཀྱིས་མཛེས་པ་དང་། ལྷའི་གོས་དང་ལྷབ་ལྷུབ་ཀྱི་ཆར་འབེབས་པར་བྱེད་པ། དུས་གསུམ་དུ་གཤེགས་པའི་སངས་རྒྱས་རྣམས་ཡང་དག་པར་སྐུལ་བར་བྱེད་པ། ཕྱོགས་བཅུའི་དེ་བཞིན་གཤེགས་པ་ཐམས་ཅད་ལ་སྙན་གསན་འབེབས་པར་བྱེད་པ། སུམ་ཅུ་རྩ་གསུམ་གྱི་གནས་ན་གནས་པའི་ལྷ་ཐམས་ཅད་སྤྱན་འདྲེན་པར་བྱེད་པ། བྱང་ཆུབ་སེམས་དཔའ་ཐམས་ཅད་ཀྱི་དབུགས་འབྱིན་པར་བྱེད་པ། རིག་པའི་རྒྱལ་པོ་དང་། དཀྱིལ་འཁོར་གྱི་ལྷ་ཐམས་ཅད་འགུགས་པར་བྱེད་པ། བདེ་བ་ཐམས་ཅད་དང་ཕྱིར་མི་ལྡོག་པའི་གནས་ཐོབ་པར་བྱེད་པ། བླ་ན་མེད་པ་བྱང་ཆུབ་ཀྱི་སྙིང་པོར་འགྲོ་བར་བྱེད་པ། ཆོས་ཀྱི་འཁོར་ལོ་སྐོར་བར་བྱེད་པ། ཆོས་ཀྱི་སྒྲོན་མ་འབར་བར་བྱེད་པ། ཆོས་ཀྱི་དུང་འབུད་པར་བྱེད་པ། ཕྱག་རྒྱ་དང་། ཆོས་ཀྱི་རྒྱལ་མཚན་སྒྲེང་བར་བྱེད་པ། ཆོ་ག་ཞིབ་མོ་དང་། གསང་སྔགས་བླ་ན་མེད་པ་ཐམས་ཅད་གྲུབ་པ། འདོད་པ་ཐམས་ཅད་རབ་ཏུ་སྦྱིན་པ། ཕྱག་རྒྱ་དང་། མཆོག་ཐམས་ཅད་སྦྱིན་པར་བྱེད་པ། གསང་སྔགས་ཐམས་ཅད་འཆང་བ། གཟུངས་རྣམས་ཀྱི་ཁྱད་པར་གྲུབ་པ། དེ་བཞིན་གཤེགས་པ་ཐམས་ཅད་ཀྱི་ཐུན་མོང་གི་གསང་བའི་དཀྱིལ་འཁོར་ཐམས་ཅད་དུ་འཇུག་པར་བྱེད་པ། གང་གིས་རྣམ་པར་སྣང་མཛད་དང་། ཐུབ་པ་བརྒྱད་པའི་དམ་ཚིག་གི་གནས་ཐམས་ཅད་ལ་གནས་པ། སྡིག་པ་ཐམས་ཅད་ཉམས་པར་བྱེད་པ། སྒྲིབ་པ་ཐམས་ཅད་རྣམ་པར་དག་པར་བྱེད་པ། ཀུན་ནས་ཉོན་མོངས་པ་རྣམས་སྲེག་པར་བྱེད་པ། རྟག་ཏུ་འཁོར་བ་ལས་འདོན་པར་བྱེད་པ། བདུད་དང་མ་རུངས་པ་རྣམས་ལས་སྒྲོལ་བ་པོ། རྟག་ཏུ་ཆོས་ཀྱི་ཟམ་སྟེགས་མཆོག །རྒ་བ་དང་། སྐྱེ་བ་དང་། འཆི་བ་ལས་གྲོལ་བར་བྱེད་པ། སྲིད་པ་མི་བཟད་པ་སྟོན་པར་ནུས་པ། ཚུལ་ཁྲིམས་དང་། གཏོང་བ་དང་། བརྩོན་
འགྲུས་དང་། བསམ་གཏན་དང་། ཤེས་རབ་དང་། ཏིང་ངེ་འཛིན་རྣམས་ཀྱི་དྲི་ཞིམ་པོ་སྦྱིན་ཞིང་སྲུང་བར་བྱེད་པ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱེད་པ། སྦྱིན་པའི་རིན་པོ་ཆེའི་ཕུང་པོ་ཆེན་པོ་རྟག་ཏུ་སྦྱིན་པ། རིན་པོ་ཆེའི་ཕུང་པོ་རྟག་ཏུ་སྦྱིན་པ། སངས་རྒྱས་དང་། བྱང་ཆུབ་སེམས་དཔའ་དང་། ལྷ་ཐམས་ཅད་ལ་མཆོད་པ་བྱེད་པ། བསམ་པ་ཐམས་ཅད་ཡོངས་སུ་རྫོགས་པར་བྱེད་པ། དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་བྱིན་གྱིས་རློབ་པ། སྒྱུ་མ་ལྟ་བུའི་ཏིང་ངེ་འཛིན་རྣམ་པར་འཕྲུལ་བ་ཐམས་ཅད་སྟོན་པར་བྱེད་པ། གཟུགས་སྣ་ཚོགས་དང་། རྫུ་འཕྲུལ་སྣ་ཚོགས་ཀྱི་རྣམ་པར་འཕྲུལ་པ་མཐོང་བར་བྱེད་པ། རྫུ་འཕྲུལ་ཡོངས་སུ་རྫོགས་པར་བྱེད་པ། ཆོས་ཀྱི་དབྱིངས་ཀྱི་ཕྱག་རྒྱ་རབ་ཏུ་སྟོན་པར་བྱེད་པ། ཆོས་ཀྱི་དབྱིངས་ཀྱི་སྙིང་པོ་འདི་ལ་གནས་པར་བྱེད་པ། དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་བ། མ་རུངས་པ་ཐམས་ཅད་དང་། གདོན་དང་ནད་ཐམས་ཅད་རྟག་ཏུ་རྣམ་པར་འཇིག་པར་བྱེད་པ། ཕྱིར་རྒོལ་བ་དང་། དགྲ་དང་། ཕ་རོལ་གྱི་དམག་ཚོགས་ཐམས་ཅད་ཟློག་པར་བྱེད་པ། སྒྲུབ་པར་བྱེད་པའོ། །འཇིགས་པ་རྣམས་ཐམས་ཅད་དང་། འཇིགས་པ་མི་བཟད་པ་བརྒྱད་པོ་རྣམས་ཀྱིས་འཇིགས་པ་མེད་པའོ། །དུག་དང་། བྱད་སྟེམས་དང་། ཕྱེ་མའི་སྦྱོར་བ་ཐམས་ཅད་ཉམས་པར་བྱེད་པར་ཐེ་ཙོམ་མེད་པ་ཞེས་བྱ་བ་བཤད་པར་བྱའོ། །ལག་པ་གཉིས་བཟློག་ནས། ལག་པ་གཉིས་ཀྱི་མཐེ་བོའི་སོར་མོ་དང་། སྡིགས་མཛུབ་གཉིས་བསྐུམས་ལ་སོར་མོ་གསུམ་བརྐྱང་ལ་སྙིང་གའི་གནས་སུ་གཞག་པར་བྱ་སྟེ། འདི་ནི་དོན་ཡོད་པའི་ལྕགས་ཀྱུའི་ཕྱག་རྒྱ་ཡིད་བཞིན་གྱི་ནོར་བུ་དང་མཉམ་པར་མཆོག་སྦྱིན་པ་སྟེ། ཕྱག་རྒྱ་བརྒྱ་སྟོང་ཕྲག་བྱེ་བ་གཉིས་ཙམ་དུ་བཅིངས་པར་འགྱུར་རོ། །གཞན་ཡང་དེ་བཞིན་གཤེགས་པའི་རིགས་ཀྱི་ཕྱག་རྒྱ་དང་། པདྨ་ཡངས་པའི་དཀྱིལ་འཁོར་གྱི་ཕྱག་རྒྱ་གང་ཡིན་པ་དང་། རྡོ་རྗེ་རིགས་ཀྱི་ཕྱག་རྒྱ་གང་ཡིན་པ་དང་། ནོར་བུའི་རིགས་ཀྱི་ཕྱག་
རྒྱ་གང་ཡིན་པས་ཏེ། ཕྱག་རྒྱ་སོ་སོ་སོ་སོ་བ་འདི་རྣམས་ཐམས་ཅད་ཕྱག་རྒྱ་བྱེ་བ་བརྒྱ་སྟོང་ཕྲག་རྣམས་སུ་འགྱུར་རོ། །བསོད་ནམས་ཀྱི་ཕུང་པོ་རབ་ཏུ་བྱེད་དོ། །ཕྱག་རྒྱ་འདི་ནི་ཡིད་བཞིན་གྱི་ནོར་བུའི་མཆོག་སྦྱིན་པ་པོ་འཇིག་རྟེན་དབང་ཕྱུག་མགོན་པོ་དོན་ཡོད་པའི་སྙིང་པོའོ། །ཤིན་ཏུ་གསང་བའི་ལས་ཐམས་ཅད་དུ་དོན་ཡོད་པའོ། །དུས་གསུམ་པའི་དེ་བཞིན་གཤེགས་པ་ཐམས་ཅད་ཀྱི་བླ་ན་མེད་པ་དང་། རིགས་ཐུན་མོང་བའི་གསང་བ་དང་། དམ་ཚིག་ཐམས་ཅད་དུ་མཐོང་བའོ། །ཕྱག་རྒྱ་འདིའི་ད་ལྟར་པའི་འདོད་པ་ཐམས་ཅད་དང་། ཡིད་ཀྱི་ཤིང་རྟ་ཡོངས་སུ་རྫོགས་པར་འགྱུར་བའོ། །མཆོག་ཐམས་ཅད་སྦྱིན་པར་འགྱུར་བའོ། །ཕྱག་རྒྱ་འདི་ཉིད་ཀྱིས། གུང་མོའི་སོར་མོས་མཐེ་བོང་གི་སོར་མོ་བསྐུམས་ལ། སྡིགས་མཛུབ་ཀྱིས་བསྡིགས་པར་བྱ། མིང་མེད་དང་། མཐེ་ཆུང་དག་གཅིག་ཏུ་བརྐྱང་ལ། སེན་མོས་སེན་མོ་མཉམ་པར་བཞག་ནས། སྙིང་གའི་གནས་སུ་བཞག་སྟེ། ཁྲོ་བོའི་ལྟ་བ་དང་མཚུངས་པར་བཞག་པས་ཧཱུཾ་ཡིག་གིས་བཙིར་བར་བྱའོ། །འདི་ནི་ཁྲོ་བོའི་ལྕགས་ཀྱུའི་ཕྱག་རྒྱ་ཁྲོ་བོ་ཐམས་ཅད་ཀྱི་མཆོག་དང་གཙོ་བོར་བརྗོད་པར་བྱ་སྟེ། རིགས་བྱེ་བ་སྟོང་ཕྲག་རྣམས་ཀྱི་ཐུན་མོང་བའི་ཕྱག་རྒྱ་ཐམས་ཅད་རབ་ཏུ་འཇུག་པར་འགྱུར་རོ། །ཕྱག་རྒྱ་འཛིན་པ་ཙམ་གྱིས་ཁྲོ་བོའི་ཕྱག་རྒྱ་དང་། དེ་བཞིན་གཤེགས་པའི་རིགས་སུ་བརྗོད་པ་དང་། དེ་བཞིན་དུ་པདྨའི་རིགས་གང་ཡིན་པ་དང་། རྡོ་རྗེའི་རིགས་སུ་བརྗོད་པ་གང་ཡིན་པ་དང་། ཁྲོ་བོའི་རྡོ་རྗེ་དྲག་པོས་འཇིགས་པར་བྱེད་དོ། །ཁྲོ་བོའི་རྒྱལ་པོ་འདི་ནི་ཐམས་ཅད་དུ་ཁྲོ་བོའི་རྒྱལ་པོར་བརྗོད་པར་བྱ་སྟེ། ནོར་བུའི་རིགས་གང་ཡིན་པའི་ཁྲོ་བོ་རྣམས་ཀྱི་ཕྱག་རྒྱ་རྣམས་གདུག་པ་རྣམས་འཇིགས་པ་སྦྱིན་པའོ། །ཐམས་ཅད་དུ་ཕྱག་རྒྱའི་གཙོ་བོ་ཞེས་བྱ་བ། ཁྲོ་བོའི་རྒྱལ་པོ་བླ་ན་མེད་པའོ། །དེ་བཞིན་དུ་ཁྲོ་བོའི་ལྕགས་ཀྱུའི་ཕྱག་རྒྱ་འདི་འཆིང་བཞིན་པ། རི་རབ་ལྷུན་པོ་བརྒྱ་སྟོང་ཕྲག་དང་། རྒྱ་མཚོ་ཡང་སྐེམས་པར་བྱེད་དོ། །
རི་རབ་ལྷུན་པོའི་རི་ནི་རྡུལ་ཕྲ་རབ་ཇི་ལྟ་བར་རྣམ་པར་འཐོར་བར་བྱེད་དོ། །རྒྱ་མཚོ་ཐམས་ཅད་ཀྱང་སྐེམས་པར་བྱེད་དོ། །རི་དང་རི་བོ་ཡང་ཉམས་པར་བྱེད་དོ། །ལྷ་མ་ཡིན་མ་རུངས་པ་རྣམས་དང་། ལྷ་མ་ཡིན་གྱི་དབང་པོ་སྒྲ་གཅན་དང་། དེའི་གནས་ཀྱི་ཀླུ་མ་རུངས་པ་རྣམས་སྲེག་པར་བྱེད་དོ། །དེ་བཞིན་དུ་གནོད་སྦྱིན་དང་། སྲིན་པོ་དང་། །འབྱུང་པོ་དང་། གདོན་མ་རུངས་པ་དང་། །བགེགས་བྱེད་པའི་ལྷ་མ་རུངས་པ་གང་ཡིན་པ་དང་། བདུད་ཀྱི་རིགས་རྣམས་གཅིག་ཏུ་འབར་བར་འགྱུར་ལ། ཕྱག་རྒྱ་འཛིན་པ་ཙམ་གྱིས་དེ་རྣམས་ཐམས་ཅད་རྟག་ཏུ་ཉམས་པར་བྱེད་ཅིང་། སྐད་ཅིག་དེ་ལ་འཇིག་པར་བྱེད་དོ། །ཕྱག་རྒྱ་འཛིན་པ་ཙམ་གྱིས་ཕྱིར་རྒོལ་བ་དང་། དགྲ་དང་། དེ་བཞིན་དུ་མ་རུངས་པའི་སེམས་ཅན་འཇིགས་པར་བྱེད་པ་དེ་རྣམས་ཐམས་ཅད་སྐྱབས་སུ་འགྲོ་བར་བྱེད་དོ། །ཕྱག་རྒྱ་དང་། གསང་སྔགས་དང་། དཀྱིལ་འཁོར་ཐམས་ཅད་དུ། བྱ་བ་ཐམས་ཅད་འགྲུབ་པར་བྱེད་དོ། །ཐམས་ཅད་འགྲུབ་པ་དོན་ཡོད་ཅིང་དགེ་བ་ཐམས་ཅད་འགྲུབ་པར་བྱེད་དོ། །ཕྱག་རྒྱ་འདི་ཉིད་ལས་སྡིགས་མཛུབ་གཉིས་རྡོ་རྗེའི་རྣམ་པར་བསྐུམས་ལ། གུང་མོ་ཡུད་ཙམ་བསྐུམས་ཏེ། མིང་མེད་དང་། མཐེ་བོང་གིས་སོར་མོའི་སེན་མོས་སེན་མོ་མཉམ་གཞག་སྟེ། མཐེའུ་ཆུང་བརྐྱང་ནས་སྙིང་གའི་གནས་སུ་བཞག་པ་འདི་ནི་རིག་པའི་ཕྱག་རྒྱ་ཆེན་པོ་དོན་ཡོད་པའི་ཕྱག་རྒྱ་རྨད་དུ་བྱུང་བ་ཆེན་པོ་དེ་བཞིན་གཤེགས་པ་ཐམས་ཅད་དུ་རིགས་ཐུན་མོང་བའི་ཕྱག་རྒྱ་རིག་པའི་རྒྱལ་པོ་ཐམས་ཅད་ཀྱི་བླ་ན་མེད་པ་འཇིག་རྟེན་གྱི་ཁམས་མགོན་པོས་སྙན་པར་བརྗོད་ཅིང་ལུང་བསྟན་པ། དེ་བཞིན་གཤེགས་པ་ཐམས་ཅད་ཀྱིས་དེ་བཞིན་གཤེགས་པའི་རིགས་ཀྱི་གཙོ་བོ་ཞེས་བརྗོད་པ། དེ་བཞིན་དུ་པདྨའི་རིགས་ཀྱི་གཙོ་བོ་དང་། རྡོ་རྗེའི་རིགས་ཀྱི་གཙོ་བོ་ཞེས་བརྗོད་པ་དང་། དེ་བཞིན་དུ་ནོར་བུའི་རིགས་ཀྱི་གཙོ་བོ་དང་། རིག་པའི་རྒྱལ་པོ་དང་། ཕྱག་རྒྱ་དང་། གསང་སྔགས་དང་། དཀྱིལ་འཁོར་ཐམས་
ཅད་དུ་གཙོ་བོ་སྟེ། གང་གིས་ཕྱག་རྒྱ་འདི་འཆིང་བ་དེ། གངྒཱའི་ཀླུང་གི་བྱེ་མ་བྱེ་བ་བརྒྱ་སྟོང་ཕྲག་གི་ཕྱག་རྒྱ་རྣམས་ཇི་ལྟ་བ་བཞིན་དུ་བཅིངས་པར་འགྱུར་རོ། །སྡིག་པ་དང་། ཉོན་མོངས་པ་མི་བཟད་པ་དང་། གདུག་པ་ཐམས་ཅད་རྣམ་པར་ཉམས་པར་བྱེད་དོ། །བསོད་ནམས་ཀྱི་ཕུང་པོ་བརྒྱ་སྟོང་ཕྲག་བསྐྱེད་པར་འགྱུར་རོ། །དགེ་བའི་རྩ་བ་རྣམས་ཀུན་ནས་བསྐྱེད་པར་འགྱུར་རོ། །ཕྱག་རྒྱ་འཛིན་པ་ཙམ་གྱིས་དེ་བཞིན་གཤེགས་པ་ཐམས་ཅད་ཀྱིས་རྣམ་པར་གཟིགས་པར་བྱེད་ཅིང་དགོངས་པར་བྱེད་དེ་ཐེ་ཙོམ་མེད་དོ། །བྱང་ཆུབ་སེམས་དཔའ་ཐམས་ཅད་དུ་མཆོག་སྦྱིན་པར་འགྱུར་རོ། །ལྷ་རྣམས་ཀྱིས་རྟག་པར་རྒྱུན་དུ་སྲུང་བར་བྱེད་དོ། །ཕྱག་རྒྱ་འདིའི་ཕན་ཡོན་སྔར་བརྗོད་པས་གཞལ་དུ་མེད་ཅིང་གྲངས་མེད་ལ་ཚད་མེད་པར་རབ་ཏུ་བསྒྲགས་ཤིང་ཐེ་ཙོམ་མེད་དོ། །ཕྱག་རྒྱ་འདི་མཐོང་བ་དང་། བཅིངས་པ་ཙམ་གྱིས་བསོད་ནམས་ཀྱི་ཕུང་པོ་རབ་ཏུ་བསྐྱེད་དོ། །ལག་པ་གཡས་པའི་མཐིལ་དུ་གཅིག་བརྐྱངས་ལ། དཔུང་པ་བསྐུམས་ཏེ། མིང་མེད་དང་། མཐེ་བོང་གི་སོར་མོ་འདུད་ལ་མཐེ་ཆུང་བསྐུམ་པར་བྱའོ། །མིང་མེད་ཀྱི་མཐར་རེག་ལ། གུང་མོ་བསྐུམས་ལ་སྡིགས་མཛུབ་རབ་ཏུ་བརྐྱངས་ཏེ། སྙིང་གའི་གནས་སུ་འདི་གཡོ་བ་ཙམ་མོ། །མེ་ཏོག་གམ། དྲི་དང་། བདུག་པ་དང་། ཕྲེང་བ་དང་། བྱུག་པ་དང་། གོས་སམ། རྒྱན་དང་། སྤུད་པ་རྣམས་ཀྱང་ལག་པ་གཡོན་དུ་བཟུང་ནས་དབུལ་བར་བྱ་སྟེ། དེ་བཞིན་གཤེགས་པ་དང་། བྱང་ཆུབ་སེམས་དཔའ་ཐམས་ཅད་དང་། ལྷ་རྣམས་དང་། དེ་བཞིན་དུ་རིག་པའི་རྒྱལ་པོ་རྣམས་དང་། དེ་བཞིན་དུ་དཀྱིལ་འཁོར་པའི་ལྷ་རྣམས་ཀྱི་དེ་རྣམས་ཐམས་ཅད་མཆོད་པར་འགྱུར་རོ། །ལྷ་རྫས་ཀྱི་མཆོད་པ་བླ་ན་མེད་པ་དང་། མཆོག་དང་། རབ་མཆོག་དང་། གྱ་ནོམ་པའི་མཆོད་པ་འདི་རྣམས་བྱེད་དེ། རོ་སྣ་ཚོགས་པའི་བཟའ་བ་རྣམས་དང་། རོ་བརྒྱ་བའི་འབྲས་བུ་རྣམ་པ་སྣ་ཚོགས་པ་དང་། བཏུང་བ་རྣམ་པ་སྣ་ཚོགས་པ་བདུད་རྩི་བཅུད་
ཀྱིས་ལེན་གྱི་མཆོད་པ་འདི་རྣམས་བྱེད་དོ། །ཕྱོགས་བཅུ་རྣམས་སུ་ཀུན་ནས་རིན་པོ་ཆེ་སྣ་བདུན་གྱི་ཆར་འབྱུང་ངོ་། །གསེར་དང་དངུལ་གྱི་མེ་ཏོག་བླ་ན་མེད་པ་དང་། རིན་པོ་ཆེ་རྣམ་པ་སྣ་ཚོགས་རྣམ་པར་བཀྲ་བ་ཉི་མ་དང་གཟི་བརྗིད་མཚུངས་པས་འབར་བར་བྱེད་དོ། །ཕྱག་རྒྱ་འཛིན་པ་ཙམ་གྱིས་དོན་ཡོད་པ་མཆོད་པའི་ནོར་བུའི་ཞེས་བྱ་བ་འདི་ཡིད་བཞིན་གྱི་ནོར་བུ་སྟེ། རྟག་ཏུ་ཕྱག་རྒྱའི་གསང་བ་དང་། གསང་སྔགས་རྣམས་ཡིད་ཀྱིས་བསམས་པས་དེ་རྣམས་ཐམས་ཅད་འབྱུང་བར་འགྱུར་རོ། །དཔག་བསམ་གྱི་ཤིང་དང་མཉམ་ཤིང་མཚུངས་པར་ཇི་ལྟར་ཡིད་ལ་བསམས་པ་བཞིན་དུ་མཆོད་པ་ཐམས་ཅད་བྱེད་དེ། སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་བྱེ་བ་བརྒྱ་སྟོང་ཕྲག་སྟོང་རྣམས་ཀྱི་སངས་རྒྱས་ཀྱི་ཞིང་རེ་རེའི་དུས་གསུམ་པའི་དེ་བཞིན་གཤེགས་པ་རྣམས་ཕྱག་རྒྱ་འདིའི་མཐུས་བླ་ན་མེད་པའི་མཆོད་པ་ཐམས་ཅད་ཀྱིས་མཆོད་པར་བྱེད་དོ། །དེའི་ཕྱིར་ཕྱག་རྒྱ་འདི་རྟག་ཏུ་བྱེད་པ་ནི། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །ཕྱག་རྒྱ་བཟུང་བཞིན་པ་ནི། མཆོད་པ་བླ་ན་མེད་པ་དང་། ཚེགས་ཆུང་ངུས་མཆོད་པ་ཆུང་ངུ་ཡང་ཚད་མེད་པར་རབ་ཏུ་འགྱུར་རོ། །སྦྱིན་པའི་བསོད་ནམས་ཀྱི་ཕུང་པོ་བསམ་གྱིས་མི་ཁྱབ་ཅིང་མཚུངས་པ་མེད་པ་བྱེད་དོ། །རི་རབ་ལྷུན་པོ་བྱེ་བ་བརྒྱ་སྟོང་ཕྲག་རྣམས་དང་། རིན་པོ་ཆེ་སྣ་བདུན་གྱི་ཕུང་པོས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བཀང་སྟེ། དེ་བཞིན་གཤེགས་པ་རེ་རེ་ལ་ཕུལ་བ་དེ་བཞིན་དུ། ཕྱག་རྒྱ་འཛིན་བཞིན་པས། དེ་བཞིན་གཤེགས་པ་རེ་རེ་ལ་དེ་ལྟ་བུའི་མཆོད་པའི་ཆོ་ག་བྱེད་དོ། །དེ་ལྟ་བུའི་ཕྱག་རྒྱའི་ཆོ་གའི་རྣམ་པར་འཕྲུལ་པ་ནི། འདྲེན་པ་འཇིག་རྟེན་དབང་ཕྱུག་གིས་བྱིན་གྱིས་བརླབས་པའོ། །ཕྱག་རྒྱ་འདི་ཉིད་ལས་སྡིགས་མཛུབ་གུང་མོ་ལ་རེག་པ་ནི། དཀྱིལ་འཁོར་དུ་དབང་བསྐུར་བ་དང་། མཚམས་བཅིང་བ་དང་། སྤྱན་དྲང་བ་དང་། དམ་ཚིག་ལ་འཇུག་པ་དང་། སྐོར་བ་བྱེད་པ་དང་། མེ་ཏོག་དང་། བདུག་པ་དང་། དེ་བཞིན་དུ་དྲི་དང་། མར་མེ་དང་། ཕྲེང་བ་
དང་། བྱུག་པ་དང་། གཏོར་མ་འབུལ་བར་བྱེད་པ་དང་། དེ་བཞིན་དུ་ཁྲུས་དང་། ཉེ་རེག་ཉིད་དང་། གོས་བགོ་བ་དང་། གཙུག་ཏོར་བཅིང་བ་དང་། སྲུང་བ་དང་། གཞན་སྲུང་བ་དང་། དེ་བཞིན་ཉིད་དུ་གྲོགས་སྲུང་བ་དང་། བཟླས་བཞིན་པ་དང་མཉམ་པ་ཉིད་དང་། སྐྱིལ་མོ་ཀྲུང་བཅིང་བ་དང་། སྦྱིན་སྲེག་གི་ལས་དང་། གཞན་སྤྱན་དྲང་བ་ཉིད་དང་། གསང་སྔགས་སྤྱན་དྲང་བ་ཉིད་དང་། དངོས་གྲུབ་སྒྲུབ་པ་ཉིད་དང་། ཐམས་ཅད་ནས་ཐམས་ཅད་དུ་བྱ་བ་ཐམས་ཅད་ཕྱག་རྒྱ་འདིས་བྱེད་དེ། གནས་ཐམས་ཅད་དུ་སོང་བ་དང་། གནས་གྲུབ་པ་དང་། བྱ་བ་ཐམས་ཅད་ལེགས་པར་བསྔགས་པ་དང་། ཐམས་ཅད་དུ་མཆོག་གི་ཕྱག་རྒྱ་དོན་ཡོད་པའི་ལས་རབ་ཏུ་གྲུབ་པ་དང་། ཡོན་ཏན་ཐམས་ཅད་བསྐྱེད་པ་དང་། ཐམས་ཅད་དུ་རིགས་ཐུན་མོང་བའི་དཀྱིལ་འཁོར་དུ། དོན་ཡོད་པ་སྒྲུབ་པ་པོའི་ཕྱག་རྒྱ་དོན་ཡོད་པའི་ཆོ་ག་ཞིབ་མོ་སྒྲུབ་པར་བྱེད་པའོ། །དོན་ཡོད་པའི་ལས་ཞེས་བྱ་བའི་ཕྱག་རྒྱ་འདི། དོན་ཡོད་པའི་མཆོག་སྦྱིན་པ་ཞེས་བྱ་བ་བརྗོད་པར་བྱའོ། །ཕྱག་རྒྱ་ཆེན་པོ་ལྔ་པོ་འདི་རྣམས་རྨད་དུ་བྱུང་བའི་དེ་ཁོ་ན་ཉིད་མཐོང་བ་དང་། དོན་ཡོད་པ་ཐོས་པ་ཉིད་དང་། དོན་ཡོད་པའི་འབྲས་བུ་མཐོང་བ་དང་། དོན་ཡོད་པའི་བསོད་ནམས་བསགས་པའི་དེ་ཁོ་ན་ཉིད་དང་། དོན་ཡོད་པར་སྡིག་པ་ཉམས་པ་དང་། སྒྲིབ་པ་ཐམས་ཅད་ཟད་པ་དང་། ཉོན་མོངས་པ་ཐམས་ཅད་རྣམ་པར་འཇོམས་པའི་ཕྱག་རྒྱ་དང་། དོན་ཡོད་པར་སངས་རྒྱས་རྣམས་མཐོང་བ་དང་། དོན་ཡོད་པར་སངས་རྒྱས་ཀྱི་ཞིང་མཐོང་བ་དང་། དོན་ཡོད་པར་ཚེ་འཕེལ་བར་བྱེད་པའི་ཕྱག་རྒྱ་དང་། དོན་ཡོད་པར་དངོས་གྲུབ་ཀྱི་མཆོག་སྦྱིན་པར་བྱེད་པ་མཆོག་ཏུ་གྱུར་པའོ། །སྙིང་པོ་དང་། ཕྱག་རྒྱ་འདི་འཇིག་རྟེན་དབང་ཕྱུག་གིས་སེམས་ཅན་ཐམས་ཅད་ལ་ཕན་པའི་དོན་དུ་བསྒྲགས་པའོ། །རིག་སྔགས་འཆང་རྣམས་ཀྱིས་ཁྱད་པར་དུ། ཉིན་མཚན་དུ་དང་། ཐུན་མཚམས་སུ་ཡང་། ཕྱག་རྒྱ་འདི་འཆིང་ན། བཀྲ་ཤིས་པའི་མཆོག །བསོད་ནམས་དང་། དག་པ་དང་། སྡིག་པ་ཉམས་པ་དང་། དོན་
ཡོད་པའི་དངོས་གྲུབ་དམ་པར་གྱུར་པའི་མཆོག་སྦྱིན་པར་བྱེད་དོ། །འདི་ནི་ཐར་པ་མཆོག་གི་གནས་མྱ་ངན་ལས་འདས་པ་མཆོག་ཏུ་དགེ་བའོ། །ཕྱག་རྒྱའི་གསང་སྔགས་རྣམས་སུ་འགྱུར་ཏེ། ཨོཾ་ཨ་མོ་གྷཱཾ་ཀུ་ཤ་ཛྭཱ་ལཾ་ཧཱུཾ། ཨོཾ་ཨ་མོ་གྷ་ཀྲོ་དྷ་དཾ་ཥྚེ་ཧཱུཾ། ཨོཾ་བིདྱཱ་རཱ་ཛ་པདྨེ་ཛྭ་ལཾ་ཧཱུཾ། ཨོཾ་ཨ་མོ་གྷ་བི་བི་དྷ་ཨ་མོ་གྷ་ཙིནྟཱ་མ་ཎི་པྲ་བརྟྷ་ཡ་ཧཱུཾ། ཨོཾ་ཨ་མོ་གྷ་སརྦ་ཏྲ་སཱ་དྷ་ཡ་ཤི་བེ་ཧཱུཾ། ཕྱག་རྒྱ་འཛིན་པའི་སྔགས་སོ། །དེ་ནས་དགེ་བའི་ལས་ཐམས་ཅད་བྱེད་པའི་གསང་སྔགས་ཐམས་ཅད་དུ་སྒྲུབ་པའི་ཐབས་ཀྱི་དེ་ཁོ་ན་ཉིད་ཀྱི་གནས་ཐམས་ཅད་ལ་འཇུག་པར་བྱེད་པ་བཤད་པར་བྱ་སྟེ། ཨོཾ་ཨ་མོ་གྷ་མཎྜ་ལེ་ཧཱུཾ། དཀྱིལ་འཁོར་བཅིང་བའོ། །ཨོཾ་སམནྟ་ཤུ་བྷི་པྲི་ཐི་བཱི་ས་ཧཱ་ཧཱུཾ། ས་ཡོངས་སུ་སྦྱོང་བའི་སྔགས་སོ། །ཨོཾ་ཨ་མོ་གྷ་པ་རི་ཤོ་དྷ་ནི་ཧཱུཾ། དཀྱིལ་འཁོར་ཡོངས་སུ་སྦྱོང་བའི་སྔགས་སོ། །ཨོཾ་ཨ་མོ་གྷ་པྲི་ཐི་བཱི་ས་ར་སྠ་ལེ་ཧཱུཾ། ས་དང་བ་བྱུང་གི་སྔགས་སོ། །ཨོཾ་ཨ་མོ་གྷ་ཛ་ལཿཤྲ་བ་ཎེ་ཧཱུཾ། ཆུའི་སྔགས་སོ། །ཨོཾ་ཨ་མོ་གྷ་ཨ་མྲྀ་ཏ་བ་རེ་སྭཱ་ཧཱ། དབང་བསྐུར་བའི་སྔགས་སོ། །ཨོཾ་ཨ་མོ་གྷ་བི་བྷཀྟ་བྷ་བ་ན་བ་རེ་ཧཱུཾ། ཐིག་རྣམ་པར་དབྱེ་བའི་སྔགས་སོ། །ཨོཾ་ནཱ་ནཱ་ར་ཏྣ་བ་རེ་ཛྭ་ལ་ཧཱུཾ། ཚོན་རྩིའི་རི་མོའི་སྔགས་སོ། །ཨོཾ་ཛྭ་ལ་བི་མ་ལེ་ཨ་མོ་གྷ་ཤུདྡྷེ་ཧཱུཾ། ཁྲུས་ཀྱིསྔགས་སོ། །ཨོཾ་སིདྡྷི་ཛ་ལེ་ཨ་མོ་གྷ་བུདྡྷི་ཧཱུཾ། ཉེ་རེག་གི་སྔགས་སོ། །ཨོཾ་ཨ་མོ་གྷ་བསྟྲེ་ཙྪཱེ་ད་ཧཱུཾ། གོས་བགོ་བའི་སྔགས་སོ། །ཨོཾ་ཨ་མོ་གྷ་མ་ཎི་ཧཱུཾ། གཙུག་ཏོར་བཅིང་བའི་སྔགས་སོ། །ཨོཾ་ཨ་མོ་གྷ་ར་ཀྵ་ཎ་བ་ར་ད་ཧཱུཾ། བདག་སྲུང་བའི་སྔགས་སོ། །ཨོཾ་སཏྭ་རཀྵ་ཎི་ཨ་མོ་གྷ་དཾཥྚེ་ཧཱུཾ། ཐམས་ཅད་དུ་གཞན་སྲུང་ཞིང་བདེ་བའི་ཆེད་དུ་སྲུང་བའི་སྔགས་སོ། །ཨོཾ་ཨ་མོ་གྷ་པྲ་བི་ཤ་བྷུ་བ་ནེ་ཧཱུཾ། གནས་སུ་འཇུག་པའི་སྔགས་སོ། །ཨོཾ་ན་མོ་ཨ་མོ་གྷ་བ་ཏི་ཧཱུཾ། ཕྱག་བྱེད་པའི་སྔགས་སོ། །ཨོཾ་ཨ་མོ་གྷ་ཙཀྲེ་ཧཱུཾ། བསྐོར་བའི་སྔགས་སོ། །ཨོཾ་ས་མ་ཡ་སིདྡྷེ་ཨ་མོ་གྷ་བ་ཏི་ཧཱུཾ། དམ་ཚིག་གི་སྔགས་
སོ། །ཨོཾ་ཨ་མོ་གྷ་བུཥྤེ་པྲ་བཙ་གནྔྷི་ནི་ཛ་ཡ་སྭཱ་ཧཱ། མེ་ཏོག་དང་། དྲི་དང་། ཕྲེང་བ་དང་། བྱུག་པ་དང་། བདུག་པའི་སྔགས་སོ། །ཨོཾ་ཨ་མོ་གྷ་ས་ར་སཾ་པཱུ་ར་ཎི་ར་ས་ར་སཱ་གྲ་པ་ཏི་ཧཱུཾ། ཐམས་ཅད་དུ་གཏོར་མའི་སྔགས་སོ། །ཨོཾ་ཨ་མོ་གྷ་ཏུ་ཊི་སྭཱ་ཧཱ། མར་མེའི་སྔགས་སོ། །ཨོཾ་ཨ་མོ་གྷ་བ་ཏི་ཙ་ར་བི་ཙ་ར་སཉྩ་ར་སྭཱ་ཧཱ། ཐམས་ཅད་དུ་གནས་པ་དང་། གནས་ཐམས་ཅད་དུ་སོང་བ་ན་རིག་པའི་རྒྱལ་པོས་བྱའོ། །ཐམས་ཅད་དུ་ལས་ཐམས་ཅད་བྱེད་པ་རིག་པའི་གསང་སྔགས་སྦྱར་བར་བྱའོ། །གཤེགས་སུ་གསོལ་བ་ཉིད་ཀྱང་སྔགས་འདིས་བྱའོ། །ལས་ཤིན་ཏུ་རྒྱས་པ་གཞན་ཐམས་ཅད་ནི་རིག་པའི་རྒྱལ་པོས་བྱའོ། །ལེགས་པར་བྱས་པའི་ལས་དང་། བྱ་བ་རྣམས་དང་། བྱ་བ་ཐམས་ཅད་སྒྲུབ་པར་བྱེད་པ་གཞན་རྣམས་ནི། དོན་ཡོད་པའི་ལྕགས་ཀྱུ་དང་། ཁྲོ་བོ་ལྕགས་ཀྱུ་དང་། རིག་པའི་རྒྱལ་པོའི་གསང་སྔགས་ཆེན་པོ་དང་། དཔའ་བོ་གཅིག་པའི་གསང་སྔགས་འདི་རྣམས་དང་། དེ་བཞིན་གཤེགས་པ་ཐམས་ཅད་ཀྱི་རང་གི་ལས་རྣམས་བྱའོ། །རྩ་བའི་རིག་པ་འདི་ཉིད་ཀྱིས་ལས་ཐམས་ཅད་བྱའི། དེ་ལས་ཕྱི་རོལ་དུ་གྱུར་པའི་རིག་པ་གཞན་ནི་མེད་དོ། །རིག་པ་འདི་ནི་བཀླགས་པས་གྲུབ་པའོ། །དེ་ནས་དེ་ལ་ཡངས་ཤིང་རྒྱ་ཆེ་བའི་བརྩོན་པ་བྱ་སྟེ། འབྱོར་པ་ཇི་ལྟ་བ་དང་། ཚད་ཇི་ལྟ་བ་དང་། ཇི་ལྟར་གསལ་བ་རྣམས། འབྱོར་པ་དང་བཅས་ཤིང་ཡོངས་སུ་རྫོགས་པ་དང་། ཤིན་ཏུ་གསལ་བར་བྱ་བ་རྣམས་བྱའོ། །གཙང་མ་གཙང་མས་ཁྲུས་བྱས་ཏེ། གོས་གཙང་མ་བགོ་བར་བྱ། དད་པ་དང་། གུས་པ་དང་། མཆོག་ཏུ་དང་བ་བསྐྱེད་པར་བྱ། བདེན་པར་སྨྲ་བར་བྱ། བདེན་པར་ཕྱི་རོལ་དུ་འབྱུང་བར་བྱ། བདེན་པར་སྤྲོ་བ་དང་། བརྩོན་པས་འབྱུང་བར་བྱ། ལྐོག་ཏུ་སྨྲ་བ་དང་། ཕྲ་མ་དང་། སེར་སྣ་མེད་པར་འགྱུར་བར་བྱ། སངས་རྒྱས་ཀྱི་བྱང་ཆུབ་ཀྱི་ལམ་དང་། བཀླགས་པས་གྲུབ་པའི་རིག་པ་འདི་སྒྲུབ་པར་བྱེད་པར་འགྱུར་བར་བྱ། སེམས་
ཅན་ཐམས་ཅད་ལ་བརྩེ་བ་མཆོག་ཏུ་བྱ། བྲི་བར་བྱ། འདྲིར་གཞུག་པར་བྱ། བཀླག་པར་བྱ། ཁ་ཏོན་དུ་བྱ། མཆོད་པར་བྱ། རི་མོར་བྱ། ཀུན་ཆུབ་པར་བྱ། ཆོ་ག་ཞིབ་མོའི་རྒྱལ་པོ་ཆེན་པོ་འདི་གསུངས་པ་དང་། དོན་ཡོད་ཞགས་པའི་རྣམ་པར་ཐར་པའི་དཀྱིལ་འཁོར་ཡང་དག་པར་རྨད་དུ་བྱུང་བ་འདི། བྱང་ཆུབ་སེམས་དཔའ་ཐམས་ཅད་ཀྱིས་ཕྱག་བྱས་པ། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དམ་ཚིག་ཐུན་མོང་གི་གསང་བ་དཀྱིལ་འཁོར་རིམ་པར་ཕྱེ་བ་ཐམས་ཅད་ཀྱི་གསང་བ། ཕྱག་རྒྱ་དང་། གསང་སྔགས་ཐམས་ཅད་ཀྱི་གསང་བའི་ཆོ་ག་ཞིབ་མོ་འདི། འཕགས་པ་སྤྱན་རས་གཟིགས་དབང་ཕྱུག་གིས་གསུངས་སོ། །དེ་ནས་ཡང་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་གང་ཡིན་པ་རྣམས་ཀྱང་། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་འཁོར་གྱི་དཀྱིལ་འཁོར་ཆེན་པོ་དང་བཅས་པ་ག་ལ་བ་དང་། དེ་བཞིན་གཤེགས་པ་མངོན་སུམ་དུ་གྱུར་པ་ག་ལ་བ་དེར་དོང་སྟེ་ལྷགས་ནས། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གི་སྤྱན་སྔར་སོང་སྟེ། ཞབས་གཉིས་ལ་མགོ་བོས་ཕྱག་འཚལ་ཏེ་ཐལ་མོ་སྦྱར་བར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་བདག་གིས་གཟུང་བར་བགྱིའོ། །དོན་ཡོད་པའི་ལྕགས་ཀྱུ། ཆོ་ག་ཞིབ་མོའི་རྒྱལ་པོ་ཡང་། ལྷག་པའི་རྒྱལ་པོ་ཆོ་ག་ཞིབ་མོ་འདི་ཡོངས་སུ་སྲུང་བའི་དོན་དང་། མི་ནུབ་ཅིང་རྒྱས་པར་འགྱུར་རོ། །ཆོ་ག་ཞིབ་མོའི་རྒྱལ་པོ་ཇི་ལྟར་རྙེད་པ་དེ་བཞིན་བྲིས་པ་འདི་ཡོངས་སུ་རྫོགས་སོ།། །།འདི་ནི་སྔོན་གྱི་ལོཙྪ་བ་མཁས་པ་བཞི་ཙམ་གྱིས་བགོས་ནས་བསྒྱུར་བ་ལ། བར་སྐབས་བར་སྐབས་སུ་ཆད་ཅིང་མཇུག་མ་ཚང་བ་ལས། བླ་མ་
དུས་ཀྱི་འཁོར་ལོ་བ་ཆེན་པོ་ཆོས་གྲགས་དཔལ་བཟང་པོའི་ཕྱག་ནས་རྒྱ་དཔེ་བྱུང་ཞིང་། ཆད་པ་སོབ་པ་དང་། མཇུག་བསྒྱུར་ཅིག་ཅེས་བཀས་བསྐུལ་བ་ལ་བརྟེན་ནས། བམ་པོ་བཅུ་པའི་ནང་དུ། ལས་ཀྱི་དོན་ཀུན་སྒྲུབ་པར་བྱེད་ཅེས་པ་ནས། གསང་སྔགས་བཟླས་པ་མཆོག་གྱིས་ཤིག་ཅེས་པའི་བར་དང་། བམ་པོ་བཅུ་གཉིས་པའི་ནང་དུ། བཅོམ་ལྡན་འདས་འོན་ཀྱང་དོན་ཁྱད་པར་ཅན་གྱི་ཆེད་དུ་ཞེས་པ་ནས། རིག་སྔགས་འཆང་གི་ལུས་འབར་བར་འགྱུར་ཏེ། ཞེས་པའི་བར་དང་། བམ་པོ་བཅུ་གསུམ་པའི་ནང་དུ། དཀྱིལ་འཁོར་གྱི་ཆོ་ག་འདི་ཐོས་པ་ཙམ་དང་ཞེས་པ་ནས། མི་གང་ཚད་དུ་བརྐོ་བར་བྱ་ཞེས་པའི་བར་དང་། བམ་པོ་བཅུ་བཞི་པའི་ནང་དུ། པདྨ་དང་། ཆུ་དང་། ཡུངས་ཀར་ལ་ཡོངས་སུ་བཟླས་ཏེ་ཞེས་པ་ནས། རས་དཀར་པོས་བཀྲུ་བར་བྱ་ཞིང་། ལན་བདུན་དུ་ཞེས་པའི་བར་དང་། བམ་པོ་བཅོ་ལྔ་པའི་མཚམས་སུ། དངུལ་གྱི་པོག་ཕོར་བརྒྱད་དང་ཞེས་པ་ནས། གནས་རྣམ་པ་གཞན་ཐམས་ཅད་དུ་ཇི་ལྟར་ཡིད་ལ་བྱེད་པའི་བྱ་བ་ཐམས་ཅད་དུ་བྱེད་དོ། །ཞེས་པའི་བར་དང་། བམ་པོ་བཅུ་དྲུག་པ་དང་། བཅུ་བདུན་པའི་མཚམས་སུ། དེ་ནས་སྦྱིན་སྲེག་གི་ཆོ་ག་བཤད་པར་བྱ་སྟེ་ཞེས་པ་ནས། ཕྱག་རྒྱའི་ཆོ་ག་དང་། སྒྲུབ་ཐབས་ཀྱི་ཆོ་གའོ་ཞེས་པའི་བར་དང་། བམ་པོ་བཅུ་བདུན་པ་ཞེས་པ་དང་། དེ་མ་ཐག་པར་བམ་པོ་བཅོ་བརྒྱདཔའི་མཚམས་སུ། དེ་ནས་རྟག་ཏུ་བཟླས་པའི་དཀྱིལ་འཁོར་གྱི་ཆོ་ག་བཤད་པར་བྱ་སྟེ་ཞེས་པ་ནས། འཇིག་རྟེན་མགོན་པོའི་འོད་ཟེར་གྱི་སྦྱིན་སྲེག་རབ་ཏུ་གྲོལ་ལོ་ཞེས་པའི་བར་རྣམས་ཀྱི་ཧོར་ཀོང་བསབས་ཤིང་། མཇུག་ཡོངས་སུ་རྫོགས་པར་ཤཱཀྱའི་དགེ་སློང་རིན་ཆེན་གྲུབ་ཀྱིས་བསྒྱུར་ཅིང་ཞུས་པའི་ཡི་གེ་བ་ནི་ཡོ་ག་པ་གྲུབ་པ་དཔལ་བཟང་པོའོ། །ཀུན་ཏུ་ལྷ་མོ་ཐམས་ཅད་ལའོ་ཞེས་པ་ནས། གཏེར་བསྒུལ་ན་ཞེས་པའི་བར་རྒྱ་དཔེ་ལ་མི་འདུག་གོ། །འགྲོ་བ་སེམས་ཅན་ཐམས་ཅད་ལ་ཕན་པར་གྱུར་ཅིག། །།