རལ་པ་གྱེན་བརྫེས་ཀྱི་རྟོག་པ་ཆེན་པོ། །བྱང་ཆུབ་སེམས་དཔའ་ཆེན་པོའི་རྣམ་པར་འཕྲུལ་པ་ལེའུ་རབ་འབྱམ་ལས་བཅོམ་ལྡན་འདས་མ་འཕགས་མ་སྒྲོལ་མའི་རྩ་བའི་རྟོག་པ་ཞེས་བྱ་བ།
རྒྱ་གར་སྐད་དུ། ཨཱུརྡྷ་ཛ་ཊཱ་མ་ཧཱ་ཀལྤ་མ་ཧཱ་བོ་དྷི་སཏྭ་བི་ཀུརྦྦ་ཎ་པ་ཊ་ལ་བི་ས་རཱད་བྷ་ག་བ་ཏཱ་ཨཱཪྱ་ཏཱ་རཱ་མཱུ་ལ་ཀལྤ་ནཱ་མ། བོད་སྐད་དུ། རལ་པ་གྱེན་བརྫེས་ཀྱི་རྟོག་པ་ཆེན་པོ། །བྱང་ཆུབ་སེམས་དཔའ་ཆེན་པོའི་རྣམ་པར་འཕྲུལ་པ་ལེའུ་རབ་འབྱམ་ལས་བཅོམ་ལྡན་འདས་མ་འཕགས་མ་སྒྲོལ་མའི་རྩ་བའི་རྟོག་པ་ཞེས་བྱ་བ། འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་སྒྲོལ་མའི་གྲུའི་སྟེང་གི་ནམ་མཁའི་མཐིལ་ན་རབ་ཏུ་བཞུགས་ཏེ། ངོ་མཚར་རྨད་དུ་བྱུང་བ་བསམ་གྱིས་མི་ཁྱབ་པས་རབ་ཏུ་ཕྱེ་བའི་བྱང་ཆུབ་སེམས་དཔའ་འདུས་པའི་དཀྱིལ་འཁོར་དང་ལྡན་པར་བཞུགས་སོ། །དེ་ནས་བཅོམ་ལྡན་འདས་ཀྱིས་གནས་གཙང་མའི་རིགས་ཀྱི་ལྷའི་བུ་རྣམས་ལ་བཀའ་སྩལ་པ། ལྷའི་བུ་ཁྱེད་རྣམས་ཉོན་ཅིག །བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་རྨད་དུ་བྱུང་བ་བསམ་གྱིས་མི་ཁྱབ་པའི་ཆོ་འཕྲུལ་གྱི་སྤྱོད་པ་ཏིང་ངེ་འཛིན་དང་། རྫུ་འཕྲུལ་གྱི་ཁྱད་པར་རྣམ་པར་ཐར་པའི་དཀྱིལ་འཁོར་བྱང་ཆུབ་སེམས་དཔའི་རྣམ་པར་འཕྲུལ་པ་སེམས་ཅན་ཐམས་ཅད་ཉེ་བར་འཚོ་བར་བྱེད་པ་དང་། ཚེ་དང་། ནད་མེད་པ་དང་། དབང་ཕྱུག་དང་། ཡིད་ཀྱི་ཤིང་རྟ་ཡོངས་སུ་རྫོགས་པར་བྱེད་པའི་རིག་སྔགས་དང་། གསང་སྔགས་ཀྱི་གཞི། སེམས་ཅན་ཐམས་ཅད་ལ་ཕན་པའི་ཆེད་དུ་བཤད་ཀྱིས། དེ་ལེགས་པར་ཉོན་ལ་ལེགས་པར་ཡིད་ལ་གྱིས་ཤིག །ངས་བཤད་དོ། །དེ་ནས་བཅོམ་ལྡན་འདས་ལ་ལེགས་སོ་ཞེས་སོ། །དེ་ནས་གཙང་མའི་རིས་ཀྱི་ལྷའི་བུ་དེ་རྣམས་ཐལ་མོ་སྦྱར་བ་བཏུད་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་སྤྱོད་པ་ཏིང་ངེ་འཛིན་གྱི་ཁྱད་པར་སོ་སོར་ཐོབ་པར་བྱེད་པ། རྡོ་རྗེའི་གདན་གནོན་པར་བྱེད་པ། བདུད་འདུལ་བར་བྱེད་པ། ཆོས་ཀྱི་འཁོར་ལོ་རབ་ཏུ་སྐོར་བར་བྱེད་པ། ཉན་ཐོས་དང་རང་སངས་རྒྱས་ཐམས་ཅད་ངེས་པར་འབྱུང་བར་བྱེད་པ། ལྷ་
དང་མི་རྣམས་སུ་སྐྱེ་བར་བྱེད་པ། སྡུག་བསྔལ་ཐམས་ཅད་རབ་ཏུ་ཞི་བར་བྱེད་པ། དབུལ་བ་དང་ནད་ཀྱིས་བཏབ་པ་ཐམས་ཅད་ཀྱི་ནད་སེལ་བར་བྱེད་པ་ཉིད་དང་། འཇིག་རྟེན་དང་འཇིག་རྟེན་ལས་འདས་པ་ཐམས་ཅད་ཀྱི་རིག་སྔགས་དང་། གསང་སྔགས་ཀྱི་སྤྱོད་པ་ཟིལ་གྱིས་མི་ནོན་པ་ཉིད་དང་། བསམ་པ་ཐམས་ཅད་ཡོངས་སུ་རྫོགས་པར་བྱེད་པ་དེ་གསུང་དུ་གསོལ། དེ་བཞིན་གཤེགས་པ་རྣམས་ཐམས་ཅད་དོན་མེད་པར་གསུང་བར་བྱེད་པ་མ་ལགས་ན། བཅོམ་ལྡན་འདས་བྱམས་པའི་སེམས་དང་། བདག་ཅག་དང་། སེམས་ཅན་ཐམས་ཅད་ལ་རྗེས་སུ་བརྩེ་བ་ཉེ་བར་བཟུང་ནས་དེ་གསུང་དུ་གསོལ། དེ་ནས་བཅོམ་ལྡན་འདས་ཤཱཀྱ་ཐུབ་པས་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ཆེན་པོ་ལ་སངས་རྒྱས་ཀྱི་སྤྱན་གྱིས་རྣམ་པར་གཟིགས་ནས་རྣམ་པར་དག་པའི་ཡུལ་ལ་འོད་ཟེར་རྣམ་པར་འཕྲོ་བ་རྣམ་པར་འཇོམས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་བཅོམ་ལྡན་འདས་ཀྱི་མཛོད་སྤུ་ནས་མེ་ཏོག་ལྟ་བུའི་བྱང་ཆུབ་སེམས་དཔའ་རྣམས་ཀུན་དུ་སྐུལ་བར་བྱེད་པ་ཞེས་བྱ་བའི་འོད་ཟེར་བྱེ་བ་ཁྲག་ཁྲིག་བརྒྱ་སྟོང་གིས་ཡོངས་སུ་བསྐོར་བ་ཉིད་ཀྱིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་མཐའ་ཡས་པ་འདས་ནས་ནུབ་ཕྱོགས་ཀྱི་ཆར་གང་གཱའི་ཀླུང་བརྒྱ་སྟོང་ཕྲག་གི་བྱེ་མ་དང་མཉམ་པའི་འཇིག་རྟེན་གྱི་ཁམས་ལས་འདས་པ་ན། བདེ་བ་ཅན་ཞེས་བྱ་བའི་འཇིག་རྟེན་གྱི་ཁམས་ཀྱི་རྗེས་སུ་ཞུགས་ཏེ། གང་དུ་དེ་བཞིན་གཤེགས་པ་ཚེ་དཔག་མེད་བཞུགས་པ་དེར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ཀྱང་སྔོན་གྱི་སྨོན་ལམ་གྱི་དབང་གིས་བྱང་ཆུབ་སེམས་དཔའ་སེམས་དཔའ་ཆེན་པོའི་སྤྱོད་པ་ལ་སོ་སོར་གནས་པ་རྣམས་ཀྱི་ཐབས་ཅིག་ཏུ་བཞུགས་པ་དེ་འོད་ཟེར་གྱི་སྣང་བ་མཐོང་བས་ཅུང་ཟད་རབ་ཏུ་བཞད་པའི་ཞལ་དེ་ཉིད་ཀྱིས་བྱང་ཆུབ་སེམས་དཔའི་ཚོགས་རྣམས་ལ་བཀའ་སྩལ་ཏོ། །ཀྱེ་རྒྱལ་
བའི་སྲས་རྣམས་འདི་ནི་བདག་ཅག་རྣམས་ཀུན་དུ་སྐུལ་བར་བྱེད་པའི་འོད་ཟེར་འདིར་འོངས་པ་ཡིན་པར་ཁྱེད་ཅག་གིས་ཤེས་པར་གྱིས་ཤིག །དེ་ནས་ཡང་སེམས་དཔའ་ཆེན་པོ་དེ་རྣམས་སྤྱན་འཛུམས་པ་སྤྱན་གདངས་ནས། འདིའི་འོད་ཟེར་གྱི་སྣང་བ་གང་ཡིན་པ་དེར་མངོན་པར་ཕྱོགས་ཏེ་གནས་སོ། །དེ་ནས་ཀུན་དུ་སྐུལ་བར་བྱེད་པའི་འོད་ཟེར་དེས་བདེ་བ་ཅན་གྱི་འཇིག་རྟེན་གྱི་ཁམས་ཆེན་པོ་ཀུན་དུ་སྣང་བས་ཀུན་དུ་སྣང་བར་བྱས་ནས་བཅོམ་ལྡན་འདས་དེ་བཞིན་གཤེགས་པ་ཚེ་དཔག་མེད་ལ་ལན་གསུམ་བསྐོར་བ་བྱས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་ཡེ་ཤེས་ཀྱི་སྤྱི་བོར་ནུབ་པར་གྱུར་ཏོ། །དེ་ནས་སེམས་དཔའ་ཆེན་པོ་དེ་སྟན་ལས་ལངས་ནས། བཅོམ་ལྡན་འདས་དེ་བཞིན་གཤེགས་པ་འོད་དཔག་མེད་ལ་ལན་གསུམ་བསྐོར་བ་བྱས་ནས་མགོ་བོས་རབ་ཏུ་ཕྱག་འཚལ་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགོངས་སུ་གསོལ་བདག་ཅག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་གང་ན་བ་དེར་སོང་སྟེ་བཅོམ་ལྡན་འདས་མི་མཇེད་ཀྱི་ཁམས་དེ་དང་། བཅོམ་ལྡན་འདས་ཤཱཀྱ་ཐུབ་པ་ལ་བལྟ་བ་དང་། ཕྱག་འཚལ་ཞིང་བསྙེན་བཀུར་བ་དང་། རིག་སྔགས་དང་གསང་སྔགས་ཀྱི་སྤྱོད་པ་དང་། སྒྲུབ་ཐབས་ཀྱི་ཆོ་ག་དང་། དཀྱིལ་འཁོར་གྱི་ཆོ་གའི་རྟོག་པ་དང་། གསང་བའི་རས་རིས་ཀྱི་ཆོ་ག་དང་། བཟླས་པ་དང་། རིག་པའི་དབང་བསྐུར་བ་ཐམས་ཅད་ཁྱད་པར་དུ་བསྟན་པས་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་འཚལ་ལོ། །དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་འོད་དཔག་ཏུ་མེད་པས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལ་འདི་སྐད་ཅེས་བཀའ་སྩལ་ཏོ། །སེམས་དཔའ་ཆེན་པོ་གང་ད་ལྟ་དེའི་དུས་ལ་བབ་པར་ཤེས་ན་སོང་ཤིག །ངའི་ཚིག་གིས་ཀྱང་བཅོམ་ལྡན་འདས་ཤཱཀྱ་ཐུབ་པ་ལ་གནོད་པ་ཆུང་ངམ། ཉམ་ང་བ་
ཆུང་ངམ། ལྡང་བ་ཡང་ངམ། རེག་པར་གནས་སམ་ཞེས་རྨེད་པར་བྱའོ། །དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་འོད་དཔག་ཏུ་མེད་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་བཀའ་སྩལ་ཏོ། །སེམས་དཔའ་ཆེན་པོ་གང་གཱའི་ཀླུང་བརྒྱ་སྟོང་ཕྲག་གང་གཱའི་བྱེ་མ་ལ་སོགས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཀྱང་ཁྱོད་ཀྱི་རིགས་དང་། གསང་སྔགས་ཀྱི་སྤྱོད་པ་དང་། དཀྱིལ་འཁོར་གྱི་རྟོག་པ་དང་། གསང་བའི་དབང་བསྐུར་བ་དང་། ཕྱག་རྒྱ་དང་། རས་རིས་ཀྱི་ཆོ་ག་དང་། སྦྱིན་སྲེག་དང་། བཟླས་པའི་ངེས་པ་བསམ་པ་ཐམས་ཅད་ཡོངས་སུ་རྫོགས་པར་བྱེད་པ། སེམས་ཅན་ཐམས་ཅད་ཀུན་ནས་དགའ་བར་བྱེད་པ། རིན་པོ་ཆེ་སྣང་བའི་ལེའུ་རབ་འབྱམ་འདས་པ་དང་མ་འོངས་པ་དང་། ད་ལྟར་བྱུང་བའི་ཡེ་ཤེས་རྣམས་ཀྱིས་རང་གི་རིག་སྔགས་དང་། གསང་སྔགས་ལ་འཇུག་པར་བྱེད་པ་སྟོན་པ། མཐར་ཐུག་པར་ཟིན་པ་དང་། ནང་གི་དུས་དང་ལྡན་པ་དང་། དམ་ཚིག་རབ་འབྱམ་གྱི་ལེའུ་དང་། འཇིག་རྟེན་དང་། འཇིག་རྟེན་ལས་འདས་པ་མཐའ་དག་མ་ལུས་པར་བསྡུས་པ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་དང་། འཕགས་པ་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའི་ས་ལ་བཞུགས་པ་དང་། སྤྱོད་པ་མཐར་ཐུག་པ་གསུང་བ་དང་ལྡན་པ་དག་གསུངས་པ་ལའང་། འདི་ལ་རྗེས་སུ་ཡི་རང་བ་ཁོ་ནའོ། །སེམས་དཔའ་ཆེན་པོ། ད་ལྟ་དེའི་དུས་ལ་བབ་པར་ཤེས་ན་ཁྱོད་སོང་ཤིག །ཤཱཀྱ་ཐུབ་པའི་དྲུང་དུ་དེ་ལ་མངོན་དུ་ཕྱོགས་པས་དམ་པའི་ཆོས་ཀྱི་རྣམ་གྲངས་འདི་ཉོན་ལ་ཁྱོད་ཀྱང་སྨྲ་བར་འགྱུར་རོ། །འདི་ལ་ཡང་རྩ་བའི་རིག་སྔགས་སུ་འགྱུར་བ་ནི། ན་མོ་རཏྣ་ཏྲ་ཡཱ་ཡ། ན་མོ་ཨ་མི་ཏཱ་བྷཱ་ཡ། ཏ་ཐཱ་ག་ཏཱ་ཡ། ཨཪྷ་ཏེ་སམྱཀྶཾ་བུད་དྷཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་ས་ཏྭཱ་
ཡ། ན་མོ་བྷ་ག་བ་ཏྱེེ་ཨཱཪྱ་ཏཱ་རཱ་ཡེེ། བོ་དྷི་སཏྭཱ་ཡེེ། ཏདྱ་ཐཱ། ཏཱ་རེ་རྀ་ཛུ་ཀ་དྷརྨ་ནི་ཏྱ་ཏེ། ཏཱ་རེ་ཏུཏྟཱ་རེ། ཤཱནྟ་དྷརྨ་ནིརྱཱ་ཏེ། ཏཱ་རེ་ཨ་ན་བྷི་ལཱ་པྱ། དྷརྨ་ནིཪྱ་ཏེ། ཏུཏྟཱ་རེ། ཏུ་རེ་ཏུ་རེ་ཧི་ནི། ཏྲ་ས་ནི་ཏྲ་ས་ནི། ཨོ་ཧ་ནི། མོ་ཧ་ནི། ཛམྦྷ་ནི། སྟམྦྷ་ནི། པྲ་བྷེ། ཙནྡྲ་པྲ་བྷེ་ཧི་ལི་ཧི་ལི། ཙི་ལི་ཙི་ལི། བྷེ་ག་སཱ་མི་ནི། ཀུཎྜི་ཀུཎྜི་མ་ཧཱ་ཀུཎྜ། དྷ་ར་དྷ་ར། དྷ་ན་པ་ནི་ཏཱ་རེ། ཧུ་རུ་ཧུ་རུ། ཀུ་རུ་ཀུ་རུ། ཨ་ཧཾ་ཡཱ་ཡ། ཙིནྟ་ཡཱ་མི་ཙིནྟ་དྷ་མི་ཀུ་རུ་སྭཱ་དྷཱ་ཡ་སྭཱ་ཧཱ། འདི་ནི་སེམས་དཔའ་ཆེན་པོ་ཁྱོད་ཀྱི་འཕགས་མ་སྒྲོལ་མའི་རྩ་བའི་རིག་པ་དེ་ཡིན་ཏེ། དེ་བཞིན་གཤེགས་པ་རྣམས་ཐམས་ཅད་ཀྱིས་གསུངས་ཤིང་། གསུང་བར་འགྱུར་བ་སྟེ། ཁྱོད་ཀྱིས་ཀྱང་ད་ལྟ་སྨྲ་བར་འགྱུར་རོ། །མི་མཇེད་ཀྱི་འཇིག་རྟེན་གྱི་ཁམས་དྲི་རྒྱས་པས་རྣམ་པར་ཕྱེ་བའི་མཐར་ཤཱཀྱ་ཐུབ་པ་བྱོན་ཏེ། ཤཱཀྱ་ཐུབ་པས་རྗེས་སུ་གནང་བའོ། །འདི་ལ་མཆོག་གི་སྙིང་པོར་འགྱུར་བ་ཡང་། ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། འདི་ལ་ཉེ་བའི་སྙིང་པོ་ཡང་།ན་མོ་རཏྣ་ཏྲ་ཡཱ་ཡ། ན་མཿསརྦ་བུདྡྷ་བོདྷི་སཏྭཱ་ནཱཾ། ཨོཾ་ཀུ་རུ་ཀུལླེ་སྭཱ་ཧཱ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་བཅོམ་ལྡན་འདས་ཀྱིས་རྗེས་སུ་གནང་ནས། བྱང་ཆུབ་སེམས་དཔའི་སྤྱོད་པའི་རྒྱུ་མཐུན་པ་བྱང་ཆུབ་ཀྱི་སྙིང་པོ་ཀུན་དུ་ཐོབ་པར་བྱེད་པ་ཐམས་ཅད་ཀྱི་བཀོད་པའི་རྒྱན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་ཕྱོགས་བཞི་རྣམས་དང་། སྟེང་དང་། འོག་དང་། ཐད་ཀའི་མཐར་ཐུག་པའི་ཐམས་ཅད་དུ་ཐམས་ཅད་དང་ལྡན་པའི་ཕྱོགས་ཀྱི་འཇིག་རྟེན་གྱི་ཁམས་སུ་རྫོགས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཀུན་དུ་གང་བར་གྱུར་ཏོ། །རྒྱལ་བའི་སྲས་པོ་ལེགས་སོ་ལེགས་སོ། །གང་ཁྱོད་ཀྱི་ཏིང་ངེ་འཛིན་ཁྱད་པར་འདི་ལྟ་བུ་ལ་སྙོམས་པར་ཞུགས་པ་ནི་ཉན་ཐོས་དང་རང་སངས་རྒྱས་ཐམས་
ཅད་ཀྱིས་མི་ནུས་ཏེ། བྱང་ཆུབ་སེམས་དཔའི་སྤྱོད་པ་ལ་རབ་ཏུ་ཞུགས་པ་ས་བཅུ་ལ་རབ་ཏུ་བཞུགས་པ་རྣམས་ཀྱིས་ཀྱང་སྙོམས་པར་འཇུག་པར་མི་ནུས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་འོད་དཔག་མེད་སངས་རྒྱས་བཅོམ་ལྡན་འདས་དེ་རྣམས་ཀྱིས་ཐབས་ཅིག་བྱམས་པ་དང་བཅས་པ་བཅོམ་ལྡན་འདས་མ་འཕགས་མ་སྒྲོལ་མའི་མཆོག་གི་སྙིང་པོ་མཆོག་གསང་བ་དོན་ཐམས་ཅད་སྒྲུབ་པར་བྱེད་པ་ཡི་གེ་གཅིག་པ་ཞེས་བྱ་བ་མཆོག་ཏུ་གསང་བའི་སེམས་ཅན་ཐམས་ཅད་ཀྱི་ལས་ཐམས་ཅད་བྱེད་མ། རིག་སྔགས་གཞན་རྣམས་ཀྱིས་ཀྱང་རིག་སྔགས་དང་གསང་སྔགས་ཀྱི་སྤྱོད་པའི་ཁྱད་པར་གྱིས་སྒྲུབ་པར་བྱེད་པ་དང་མཐུན་པའི་རིག་སྔགས་གསུང་བར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཚེ་དཔག་མེད་ཡུད་ཙམ་ཞིག་ཅི་ཡང་མི་གསུང་བར་གྱུར་ཏོ། །ཐམས་ཅད་དུ་ཐམས་ཅད་དང་ལྡན་པའི་འཇིག་རྟེན་ལ་སངས་རྒྱས་ཀྱི་སྤྱན་གྱིས་ཀུན་དུ་གཟིགས་ནས་སངས་རྒྱས་བཅོམ་ལྡན་འདས་རྣམས་ཀྱི་དགོངས་པ་བྱམས་པའི་བདག་ཉིད་ཀྱི་སེམས་ཀྱིས་རིག་སྔགས་གསུངས་པར་གྱུར་ཏོ། །ན་མཿསརྦ་བུདྡྷ་ནཱཾ། ཨོཾ་གཱིཿའདི་ནི་བཅོམ་ལྡན་འདས་མའི་མཆོག་གི་སྙིང་པོ་ལས་ཐམས་ཅད་བྱེད་པའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ཏིང་ངེ་འཛིན་དེ་ལས་ལངས་ནས་འདི་ལྟ་སྟེ། སྐྱེས་བུ་སྟོབས་དང་ལྡན་པ་ཞེས་བྱ་བ་དེ་ལག་པ་བསྐུམ་པ་ལས་རྐྱོང་བའམ། བརྐྱང་པ་ལས་སྐུམ་པ་དང་སེ་གོ་ལ་གཏོགས་པ་ཙམ་གྱིས་ཀྱང་མིག་འབྱེད་འཛུམས་པ་སྐད་ཅིག་ཙམ་གྱིས་ཏིང་ངེ་འཛིན་རྫུ་འཕྲུལ་གྱི་སྟོབས་མགྱོགས་པའི་བློ་ཞེས་བྱ་བའི་ཏིང་ངེ་འཛིན་གྱི་ཁྱད་པར་རྣམ་པར་འཕྲུལ་པ་ཉིད་ཅེས་བྱ་བ་ལ་སྙོམས་པར་ཞུགས་ཏེ་མི་མཇེད་ཀྱི་འཇིག་རྟེན་གྱི་ཁམས་སུ་འོངས་ནས་ཀྱང་སླར་འཁོད་དེ་སྟེང་གི་ནམ་མཁའི་མཐིལ་དུ་ནོར་བུ་རིན་པོ་ཆེ་ཆེན་པོ་ལ་སོ་སོར་འཁོད་པའི་འཁོར་གྱི་དཀྱིལ་འཁོར་ཆེན་པོའི་ནང་དུ་འཁོད་ནས་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་དུ་འོད་ཟེར་ཆེན་པོའི་ཀུན་དུ་སྣང་བས་ཀུན་དུ་སྣང་བར་བྱས་ནས་
རིན་པོ་ཆེའི་སྣང་བའི་བདག་པོའི་རྒྱན་གསལ་བར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ཏིང་ངེ་འཛིན་ལ་སྙོམས་པར་ཞུགས་མ་ཐག་ཏུ་ཁང་པ་བརྩེགས་པ་རིན་པོ་ཆེ་དུ་མས་རྣམ་པར་ཕྱེ་བ་དང་། རིན་པོ་ཆེའི་གདུགས་དུ་མས་དཔག་ཚད་བརྒྱ་སྟོང་ཕྲག་ཏུ་ཁྱབ་པ་དང་། ལྷའི་གོས་དང་། དར་གྱི་རྒྱན་གྱིས་མཛེས་པར་སྤྲས་པ་དང་། ལྷའི་མེ་ཏོག་དང་། བ་དན་དང་། རྒྱལ་མཚན་དང་། ཕྲེང་བ་དང་། རིན་པོ་ཆེ་གཡེར་ཁའི་དྲ་བ་བཅིངས་པ། སྒྲ་སྙན་པ་འཁྲོལ་བ་འཇུག་པ་དང་། བྱང་ཆུབ་སེམས་དཔའ་སོ་སོར་གནས་པར་བྱེད་པ། ལྷའི་དྲི་དང་། ཕྲེང་བ་དང་། བྱུག་པ་དང་། ཕྱེ་མའི་ཆར་འབེབས་པར་བྱེད་པ། མངོན་པར་སྤྲུལ་ཏེ་བཅོམ་ལྡན་འདས་ཤཱཀྱ་ཐུབ་པ་ལ་མཆོད་པའི་ལས་ངོ་མཚར་རྨད་དུ་བྱུང་བའི་ཆོ་འཕྲུལ་བྱང་ཆུབ་སེམས་དཔའི་རྣམ་འཕྲུལ་མཐོང་ངོ་། །དེ་ནས་གནས་གཙང་མའི་རིས་ཀྱི་ལྷའི་བུ་དེ་རྣམས་དགའ་བ་དང་བཅས་པ་སྤུ་ཟིང་ཞེས་བྱེད་དོ། །ལྷའི་གནས་ཐམས་ཅད་རབ་ཏུ་གཡོས་པ་དང་ལྡན་པ་མཐོང་ནས་སྐྲག་ཅིང་། སྙིང་འདར་ཏེ་འོན་ཏེ་འབྱོར་པ་ཡོངས་སུ་ཉམས་སམ་ཅི་ཞེས་ཕན་ཚུན་རིངས་ཐབས་སུ་སྐད་མཐོན་པོས་སྨྲ་བར་རྩོམ་ཞིང་། འདི་སྐད་ཅེས་ཀྱང་སྨྲས་སོ། །བཅོམ་ལྡན་འདས་ཡོངས་སུ་སྐྱོབས་ཤིག །ཤཱཀྱ་ཐུབ་པ་ཡོངས་སུ་སྐྱོབས་ཤིག །དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་ལྷའི་འཁོར་ལ་བཀའ་སྩལ་ཏོ། །མ་འཇིགས་ཤིག །མ་འཇིགས་ཤིག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དེ་བཞིན་གཤེགས་པ་ཚེ་དཔག་མེད་ཀྱི་སངས་རྒྱས་ཀྱི་ཞིང་ཀུན་ནས་མེ་ཏོག་ཅན་ལྟ་བུ་ནས་ང་ཉིད་ལྟ་བ་དང་ཕྱག་འཚལ་ཞིང་བསྙེན་བཀུར་བར་འདོད་དེ། དོན་ཆེན་པོ་སྤྱོད་པ་དང་། རིག་སྔགས་ཀྱི་ཚིག་དང་། ཆོས་ཀྱི་ཚིག་རྨད་དུ་བྱུང་བ་ཡང་ངེས་པར་བསྟན་པའི་ཕྱིར་འོངས་སོ། །
དེ་ནས་བཅོམ་ལྡན་འདས་ཤཱཀྱ་ཐུབ་པ་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ལ་མིག་མི་འཛུམས་པར་བལྟས་ཏེ་ཞབས་གཉིས་ལ་བཏུད་ནས་ཡི་གེའི་ཚིག་རབ་ཏུ་སྨྲས་པ་འདི་རྣམས་ཀྱིས་བཅོམ་ལྡན་འདས་ལ་མངོན་པར་བསྟོད་དོ། །ཕྱག་འཚལ་སྐྱེས་བུ་མཁྱེན་ཁྱོད་ལ། །ཕྱག་འཚལ་སྐྱེས་བུ་མཆོག་ཁྱོད་ལ། །སྤྱོད་པའི་དོན་ཀུན་སྒྲུབ་པ་པོ། །ཕྱག་འཚལ་སྐྱེས་བུ་གཙོ་ཁྱོད་ལ། །དོན་མེད་ཐམས་ཅད་བཟློག་པ་པོ། །ཕྱག་འཚལ་སྐྱེས་བུ་སེང་གེ་ཁྱོད། །ངན་སོང་ཐམས་ཅད་འཇོམས་པ་པོ། །དཔའ་བོ་ཆེན་པོ་ཁྱོད་ཕྱག་འཚལ། །བསོད་ནམས་དྲི་ནི་མཐའ་ཡས་པ། །ཕྱག་འཚལ་སྐྱེས་བུ་པད་དཀར་ཁྱོད། །སྲིད་གསུམ་འདམ་ནི་རྣམ་སྦྱོང་བ། །ཕྱག་འཚལ་སྐྱེས་བུ་པདྨ་ཁྱོད། །སྡུག་བསྔལ་ཐམས་ཅད་རྣམ་གྲོལ་བྱེད། །ཐམས་ཅད་གྲོལ་ཁྱོད་ཕྱག་འཚལ་ལོ། །གདུང་བ་ཐམས་ཅད་ལེགས་འདུལ་བྱེད། །ཞི་བ་ཁྱོད་ལ་ཕྱག་འཚལ་ལོ། །སྔགས་ཀྱི་སྤྱོད་དོན་སྒྲུབ་པ་པོ། །ཐམས་ཅད་ཁྱོད་ལ་ཕྱག་འཚལ་ལོ། །བཀྲ་ཤིས་ཀུན་གྱིས་བཀྲ་ཤིས་པ། །བཀྲ་ཤིས་ཁྱོད་ལ་ཕྱག་འཚལ་ལོ། །ཆོས་རྣམས་ཐམས་ཅད་ཀུན་ཏུ་རྟོགས། །སངས་རྒྱས་དམ་ཚིག་ཁྱོད་ཕྱག་འཚལ། །ཆོས་རྣམས་ཀུན་གྱི་དེ་བཞིན་ཉིད། །སྤྲོས་པ་མེད་པའི་རྣམ་པ་ནི། །ཡང་དག་རྗེས་འཇུག་སྟོན་པ་པོ། །དེ་བཞིན་གཤེགས་པ་ཁྱོད་ཕྱག་འཚལ། །ཤེས་དང་ཤེས་བྱའི་དངོས་པོ་ཀུན། །ལེགས་པར་བྱས་ཤིང་ཡང་དག་ཐོས། །ཐེག་གསུམ་ལམ་དང་མྱང་འདས་ལ། །རབ་ཏུ་གནས་འཇུག་རབ་གནས་པ། །ཀུན་མཁྱེན་ཁྱོད་ལ་ཕྱག་འཚལ་ལོ། །ཞེས་ཡི་གེའི་ཚིག་རབ་ཏུ་སྨྲས་པ་འདི་རྣམས་ཀྱིས་བསྟོད་པའི་ཚིག་གིས་བཅོམ་ལྡན་འདས་ཀྱི་སྤྱན་སྔར་མངོན་པར་བསྟོད་ནས་འདི་སྐད་ཅེས་ཀྱང་གསོལ་ཏོ། །བཅོམ་ལྡན་འདས་འདི་ནས་གང་གཱའི་ཀླུང་བརྒྱ་སྟོང་ཕྲག་གི་བྱེ་མ་དང་མཉམ་པའི་འཇིག་རྟེན་གྱི་ཁམས་འདས་ནས་ནུབ་ཕྱོགས་ཀྱི་ཆར་
ཀུན་ནས་མེ་ཏོག་ལྡན་ཞེས་བྱ་བའི་སངས་རྒྱས་ཀྱི་ཞིང་དུ་གྱུར་བ་དེར། བདེ་བ་ཅན་ཞེས་བྱ་བའི་འཇིག་རྟེན་གྱི་ཁམས་གང་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ། སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། ཚེ་དཔག་ཏུ་མེད་པ་བཞུགས་ཏེ། དེ་ཆོས་སྟོན་པར་མཛད་པ་ནི། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ་ཚིག་འབྲུ་བཟང་པོ་མ་འདྲེས་པ། ཡོངས་སུ་དག་པ། ཡོངས་སུ་བྱང་བའི་ཚངས་པར་སྤྱོད་པ། ཡང་དག་པར་སྟོན་པར་མཛད་ཅིང་དེ་འདི་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པར་མཛད་དོ། །རིག་སྔགས་དང་གསང་སྔགས་ཀྱི་དོན་གྱི་སྤྱོད་པ་རྣམས་དང་། བྱང་ཆུབ་སེམས་དཔའི་སྡེ་སྣོད་དང་། ལམ་གསུམ་གྱི་སྤྱོད་པའི་རྗེས་སུ་འཇུག་པའི་ལམ་དང་། སྐྱོབ་པ་དང་། གནས་དང་། སྐྱབས་དང་། དཔུང་གཉེན་དང་། བདེ་བ་དང་། ཤིན་ཏུ་མཐར་ཐུག་པ་དང་། ཤིན་ཏུ་ཡོངས་སུ་མཐར་གཏུགས་པས་སེམས་ཅན་ཐམས་ཅད་ལ་སྟོན་ཏེ། བཅོམ་ལྡན་འདས་དེ་ཉིད་ཀྱི་མཛད་པས་རྗེས་སུ་གནང་ནས་བཅོམ་ལྡན་འདས་ཀྱི་ཞབས་དྲུང་དང་། ཉེ་བ་འདིར་འོངས་ཏེ་བཅོམ་ལྡན་འདས་དེ་བཞིན་གཤེགས་པ་འོད་དཔག་མེད་དེ་བཅོམ་ལྡན་འདས་ལ་གནོད་པ་ཆུང་ངམ། ཉམ་ང་བ་ཆུང་ངམ། ལྡང་བ་ཡང་ངམ། བསྙུན་མི་མངའ་འམ། བདེ་བ་ལ་རེག་པར་གནས་སམ་ཞེས་ཡོངས་སུ་འདྲི་བར་བྱེད་དེ། འདི་སྐད་ཅེས་ཀྱང་གསུང་ངོ་། །གང་རྣམ་པ་འདི་ལྟ་བུའི་སྙིགས་མའི་དུས་གང་དུ་བཅོམ་ལྡན་འདས་ཤཱཀྱ་ཐུབ་པའི་སྐུ་དེ་ཡང་ཆོས་སྟོན་པར་མཛད་ཅིང་རྗེས་སུ་རྟོགས་པར་བྱ་བའི་སྐྱེ་བོ་ལ་ལམ་གསུམ་གྱི་བྱང་གྲོལ་དང་། ལྷ་དང་། མི་རྣམས་ཀྱི་སྐྱེ་བ་རྙེད་པར་མཛད་པ་དེ་ནི་ངོ་མཚར་རོ། །བཅོམ་ལྡན་འདས་ཤཱཀྱ་ཐུབ་པ་དེའི་བརྩོན་འགྲུས་ཀྱིས་གང་དུ་སྐལ་བ་
མེད་པའི་སེམས་ཅན་གྱི་ཚོགས་སྲིད་པ་གསུམ་ཡང་དག་པར་འཇོམས་པའི་ལམ་དུ་མཐར་ཐུག་པར་འཇུག་པར་བྱེད་གཏན་དུ་གྲུབ་པ་དང་། བདེ་བའི་རྗེས་སུ་མཐུན་པའི་མྱ་ངན་ལས་འདས་པ་ལ་སེམས་ཅན་རྣམས་རབ་ཏུ་འགོད་པར་མཛད་པ་ནི་ངོ་མཚར་རོ། །བཅོམ་ལྡན་འདས་འོན་ཀྱང་སངས་རྒྱས་བཅོམ་ལྡན་འདས་ཀྱི་ཐུགས་ནི་སངས་རྒྱས་བཅོམ་ལྡན་འདས་ཁོ་ནས་མཁྱེན་གྱིས། བདག་གིས་སངས་རྒྱས་བཅོམ་ལྡན་འདས་རྣམས་ཀྱི་ངོ་མཚར་རྨད་དུ་བྱུང་བ་བསམ་གྱིས་མི་ཁྱབ་པའི་རྣམ་པར་འཕྲུལ་པ་རྣམས། སངས་རྒྱས་ཀྱི་རྣམ་འཕྲུལ་དུ་ཤེས་པར་འདོད་པའམ། ཐུགས་ཀྱི་སྤྱད་པ་སྤྱོད་པ་ལ་རབ་ཏུ་འཇུག་པའི་སྒྲུབ་པ་དང་། སེམས་པ་ཤེས་པར་འདོད་པའམ། མཐའ་དག་ངེས་པར་སྟོན་པ་ནི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་རྣམས་ཀྱིས་ཀྱང་བརྗོད་པར་ཡང་ག་ལ་ནུས། གང་ཡང་དེ་བཞིན་གཤེགས་པ་རྣམས་ཀྱིས་དེ་བཞིན་གཤེགས་པ་རྣམས་སྒྲུབ་པ་བསྡུས་པ་དང་། སོ་སོ་བ་མ་ལུས་པའི་ངོ་བོ་འདུས་མ་བྱས་པའི་ཆོས་ཉིད་དུ་བལྟ་བར་བྱ་སྟེ། མཐོང་བས་སྤང་བར་བྱ་བ་སྤོང་བ་དང་། རིང་པོར་མི་ཐོགས་པར་སྤྱོད་པ་སྨྲ་བར་འདོད་པ་འམ། ཡོན་ཏན་སྟོན་པར་འདོད་པ་ནི་དེ་བཞིན་གཤེགས་པ་བཅོམ་ལྡན་འདས་ཁོ་ནས་མཁྱེན་གྱིས། བདག་གིས་ནི་མ་ཡིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གིས་རྫུ་འཕྲུལ་གྱི་རྣམ་པར་འཕྲུལ་པ་སྤྲུལ་ཏེ། རིན་པོ་ཆེ་ཆེན་པོའི་པདྨ་ལ་བཅོམ་ལྡན་འདས་ཤཱཀྱ་ཐུབ་པ་ལ་བལྟ་བཞིན་དུ་བཞུགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་རྣམ་པ་སྣ་ཚོགས་པའི་གཏམ་གྱི་རྗེས་སུ་འབྲངས་པའི་དེ་བཞིན་གཤེགས་པའི་གཏམ་གྱིས་མཐར་གྱི་དྲི་བ་སྔོན་དུ་འགྲོ་བས་ཕན་ཚུན་ཆོས་བསྟན་པའི་མཐར་རིགས་ཀྱི་བྱང་ཆུབ་སེམས་དཔའི་སྤྱོད་པ་སྒྲུབ་པའི་དོན་དུ་
ཉེ་བར་ཚོགས་པ་རྣམས་ལ་ཚངས་པའི་དབྱངས་དང་། ཀ་ལ་པིང་ཀ་དང་། ཀུ་ཏ་ར་དང་། བི་ཏ་རས་བསྒྲུབས་པའི་རྔ་བོ་ཆེའི་དབྱངས་སུ་གྲགས་པའི་སྒྲ་དབྱངས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་བཀའ་སྩལ་པ། སེམས་དཔའ་ཆེན་པོ་ཁྱོད་ལེགས་པར་འོངས་སམ། སེམས་དཔའ་ཆེན་པོའི་སྤྱོད་པ་དང་། སངས་རྒྱས་ཐམས་ཅད་ཀྱི་བྱིན་རླབས་སྒྲུབ་པ་དང་། བྱང་ཆུབ་སེམས་དཔའ་ཐམས་ཅད་དོན་ཡང་དག་པར་ཐོབ་པར་བྱེད་པ་དང་། རིག་སྔགས་དང་། གསང་སྔགས་ཀྱི་ཚིག་ཐམས་ཅད་དང་། གསང་བའི་དབང་བསྐུར་བ་དང་བཅས་པ་དང་། ཕྱག་རྒྱ་དང་། དཀྱིལ་འཁོར་དང་། རྟོག་པའི་དབང་བསྐུར་བ་དང་། ཚེ་དང་། ནད་མེད་པ་དང་། དབང་ཕྱུག་དང་། བསམ་པ་ཐམས་ཅད་ཡོངས་སུ་རྫོགས་པར་བྱེད་པ་དང་། སྒྲུབ་ཐབས་ཐམས་ཅད་ཀྱི་ཆོ་གའི་རྒྱུད་དང་། ཤེས་པ་དང་ཤེས་བྱ་དུས་ཀྱི་མཐར་ནུབ་པ་དང་། རྒྱལ་སྲིད་དང་། ཞིང་འདས་པ་དང་། མ་འོངས་པ་དང་། ད་ལྟར་བྱུང་བ་མདོར་བསྡུས་པ་ལས། སེམས་ཅན་ཐམས་ཅད་ཀྱི་བསམ་པ་ཐམས་ཅད་ཡོངས་སུ་རྫོགས་པར་བྱེད་པ་དང་། རང་གི་ཡོན་ཏན་འབྱུང་བ། གསང་སྔགས་ཀྱི་སྤྱོད་པའི་མཐར་འཇུག་པར་བྱེད་པ། སེམས་ཅན་གཞན་དགའ་བར་བྱེད་པ། མི་སྣང་བ་དང་ནམ་མཁར་འགྲོ་བར་བྱེད་པ། རྐང་པ་རབ་ཏུ་བརྒྱུས་པ། ཡིད་གཞུངས་པར་བྱེད་པ། འཆུགས་པར་བྱེད་པ། ས་འོག་ཏུ་རབ་ཏུ་འཇུག་པར་བྱེད་པ། མངོན་པར་སྤྱོད་པར་བྱེད་པ། དོན་ཐམས་ཅད་ཐོབ་པ། འབྲས་བུ་དང་བཅས་པ། གནོད་སྦྱིན་དང་། གནོད་སྦྱིན་མོ་དང་། ཅི་བགྱི་དང་། ཤ་ཟ་དང་། འབྱུང་པོ་ཐམས་ཅད་འགུགས་པར་བྱེད་པ། བྱིས་པ་དང་། རྒན་པོ་དང་། ལང་ཚོ་ཇི་ལྟར་གནས་བཞིན་དུ་གནས་པར་བྱེད་པ་སྟེ། མདོར་བསྡུས་ན་ལས་ཐམས་ཅད་བྱེད་པ། ཡིད་ཀྱི་ཤིང་རྟ་ཐམས་ཅད་རྫོགས་པར་བྱེད་པ། རྒྱས་པ་ཅན་དང་། ཞི་བ་ཅན་གྱི་ལས་རབ་ཏུ་བྱེད་པ།
ཇི་ལྟ་ཇི་ལྟར་རབ་ཏུ་སྦྱར་བར་བྱ་བཞིན་པ། དེ་ལྟ་དེ་ལྟར་བསྒྲུབ་པར་བྱ་བཞིན་པ། བྱང་ཆུབ་སེམས་དཔའི་སྡེ་སྣོད་དང་ལྡན་པ་ཕལ་པོ་ཆེ་རྟོག་པ་ཆེན་པོ་རིན་པོ་ཆེའི་ལེའུ་རབ་འབྱམ་ངས་རྗེས་སུ་གནང་། སངས་རྒྱས་ཐམས་ཅད་ཀྱིས་གསུངས་པ། དག་པའི་སེམས་ཅན་རིག་སྔགས་དང་གསང་སྔགས་ཀྱི་སྤྱོད་པའི་དོན། ཆོས་ཀྱི་མཛོད། སྐྱེ་བོ་མང་པོ་ལ་ཕན་པའི་ཆེད་དང་། སྐྱེ་བོ་མང་པོ་ལ་བདེ་བའི་ཆེད་དུ། ལྷ་དང་མི་རྣམས་དང་། སེམས་ཅན་ཐམས་ཅད་ལ་སྟོན་ཅིག །དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་སངས་རྒྱས་ཀྱི་བྱིན་གྱི་རླབས་ཀྱིས་ཀུན་ཏུ་སྐུལ་བར་བྱེད་པ་རྒྱན་བཀོད་པའི་འོད་ཟེར་སྣང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་དག་པའི་སེམས་ཅན་དུ་མ་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་དང་། སངས་རྒྱས་ཀྱི་ཞིང་རྣམས་འོད་ཟེར་གྱི་སྣང་བས་ཇི་སྲིད་འོག་མིན་གྱི་སྲིད་པ་ནས་ཇི་སྲིད་མནར་མེདཔ་འི་དམྱལ་བ་ཆེན་པོའི་བར་གྱི་སེམས་ཅན་གང་ལ་ལ་སྡུག་བསྔལ་གྱིས་ཤིན་ཏུ་གདུངས་པའི་སྡུག་བསྔལ་ཐམས་ཅད་རབ་ཏུ་ཞི་བར་བྱེད་པའི་འགྲོ་བ་རྣམས་ཞི་བ་དང་། ཉན་ཐོས་དང་རང་སངས་རྒྱས་དང་། བྱང་ཆུབ་སེམས་དཔའ་དང་། སངས་རྒྱས་ཐམས་ཅད་བཅོམ་ལྡན་འདས་ཀྱིས་ཡང་དག་པར་བསྐུལ་ནས་སླར་ཡང་འོད་ཟེར་དེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་སྤྱི་བོར་ནུབ་པར་གྱུར་ཏོ། །འདི་ལ་གཞན་ཤར་ཕྱོགས་ལ་སོགས་པ་རྣམ་པར་གནས་པའི་སངས་རྒྱས་ཀྱི་ཞིང་གང་ཡིན་པ་དེར་སངས་རྒྱས་བཅོམ་ལྡན་འདས་རྣམས་བསྐུལ་བའི་འོད་ཟེར་དེས་རླུང་གི་དཀྱིལའཁོར་ཡང་དག་པར་བསྐུལ་བས་བསྒྲུབས་པ་འདི་ལྟ་སྟེ། དེ་བཞིན་གཤེགས་པ་ཟླ་བ་ཉིད་ཀྱི་སྣང་བ་དྲི་ཀུན་དུ་གསལ་བའི་དཔལ་ཞེས་བྱ་བ་དང་། དེ་བཞིན་གཤེགས་པ་སྨན་གྱི་བླ་བེེཌཱུཪྱ་འོད་ཀྱི་རྒྱལ་པོ་ཞེས་བྱ་བ་དང་། དེ་བཞིན་གཤེགས་པ་ཀུན་དུ་སྣང་བའི་
དཔལ་ཞེས་བྱ་བ་དང་། དེ་བཞིན་གཤེགས་པ་ཡང་དག་པར་འཕགས་པའི་རྒྱལ་པོ་ཞེས་བྱ་བ་དང་། དེ་བཞིན་གཤེགས་པ་སཱ་ལའི་དབང་པོའི་རྒྱལ་པོ་ཞེས་བྱ་བ་དང་། དེ་བཞིན་གཤེགས་པ་འཇིག་རྟེན་དབང་ཕྱུག་རྒྱལ་པོ་ཞེས་བྱ་བ་དང་། དེ་བཞིན་གཤེགས་པ་ཚེ་དང་ཡེ་ཤེས་དཔག་ཏུ་མེད་པ་རྣམ་པར་ངེས་པའི་རྒྱལ་པོ་ཞེས་བྱ་བ་དང་། དེ་བཞིན་གཤེགས་པ་ཀུན་དུ་སྣང་བ་མཐའ་ཡས་པའི་རྒྱལ་པོ་ཞེས་བྱ་བ་དང་། དེ་བཞིན་གཤེགས་པ་བེེཌཱུཪྱའི་སྣང་བའི་འོད་ཟེར་གྱི་རྒྱལ་པོ་ཞེས་བྱ་བ་དང་། དེ་ལྟ་བུ་ལ་སོགས་པའི་སངས་རྒྱས་བཅོམ་ལྡན་འདས་བྱང་ཆུབ་སེམས་དཔས་ཡོངས་སུ་བསྐོར་བ་མཐའ་ཡས་ཤིང་མུ་མེད་པའི་འཇིག་རྟེན་གྱི་ཁམས་རྣམས་སུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་མཇེད་ཀྱི་འཇིག་རྟེན་གྱི་ཁམས་སུ་སྒྲོལ་མའི་གྲུའི་ཚལ་ན་གནས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་རིག་སྔགས་དང་གསང་སྔགས་ཀྱི་སྤྱོད་པ་ངེས་པར་སྟོན་པའི་ཚིག་གི་དོན་གྱི་ལེའུ་རབ་འབྱམ་གསུངས་པ་དེ་ལ་སངས་རྒྱས་བཅོམ་ལྡན་འདས་དེ་རྣམས་འཛུམ་པ་ཡང་དག་པར་སྟོན་པར་མཛད་དོ། །དེ་བཞིན་དུ་ལྷོ་དང་། ནུབ་དང་། བྱང་གི་ཕྱོགས་རྣམས་སུ། ཕྱོགས་བྲལ་རྣམས་སུ་ཞེས་པས། སྟེང་དང་། འོག་དང་། ཐད་ཀ་ཐམས་ཅད་དུ་ཐམས་ཅད་དང་ལྡན་པའི་སངས་རྒྱས་ཀྱི་ཞིང་རྣམས་སུ་སྣང་བར་བྱས་ནས་སངས་རྒྱས་ཀྱི་ཞིང་རྣམས་སུ་ཐམས་ཅད་དུ་ཡང་བདུད་ཀྱི་གནས་ཐམས་ཅད་སྤ་བཀོང་བར་བྱས་ཏེ། བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་བ་དང་བཅས་པ་ཉན་ཐོས་ཀྱི་དགེ་འདུན་དང་བཅས་པས་མདུན་དུ་བདར་ནས་དེ་བཞིན་གཤེགས་པའི་སྤྱོད་ཡུལ་ལ་གནས་པ་སངས་རྒྱས་ཀྱི་རྣམ་པར་འཕྲུལ་པ་བྱང་ཆུབ་སེམས་དཔའི་བདག་ཉིད་ཆེན་པོ་ཉིད་ལྟ་བར་འདོད་པ། མཆོག་གི་རིག་པའི་རྗེས་སུ་སྤྱོད་པ་སྒྲུབ་པའི་ཏིང་ངེ་འཛིན་གྱི་ཁྱད་
པར་གྱི་ལེའུ་རབ་འབྱམ་དེ་བཞིན་གཤེགས་པའི་བསྟན་པ་ཐོགས་པ་མེད་པ་ཡང་གསལ་བར་བྱེད་འདོད་པས་སོ་སོར་འཁོད་པར་གྱུར་ཏོ། །འདི་ལྟ་སྟེ། ལག་བཟང་དང་། རིན་ཆེན་བཟང་པོ་དང་། བརྟུལ་ཞུགས་བཟང་པོ་དང་། སྤྱན་བཟང་པོ་དང་། དགའ་བ་བཟང་པོ་དང་། ཆོས་གོས་བཟང་པོ་དང་། དངོས་གྲུབ་འཆར་བཟང་དང་། ཐམས་ཅད་འཕགས་དང་། ཆོས་འཕགས་དང་། རིན་ཆེན་འཕགས་དང་། རིན་ཆེན་དཔལ་དང་། ལྷུན་པོའི་དཔལ་དང་། བསམ་གྱིས་མི་ཁྱབ་པའི་དཔལ་དང་། འོད་བྱེད་དཔལ་དང་། རབ་སྣང་དཔལ་དང་། སྣང་བའི་དཔལ་དང། དོན་ཐམས་ཅད་ཀྱི་དཔལ་དང་། ལག་ན་ཐམས་ཅད་རིན་ཆེན་དང་། གཙུག་ན་ནོར་བུ་དང་། ལག་ན་རིན་ཆེན་དང་། ལག་ན་ལྷུན་པོའི་རྒྱལ་མཚན་དང་། རྣམ་པར་སྣང་མཛད་སྙིང་པོ་དང་། རིན་ཆེན་སྙིང་པོ་དང་། ཡེ་ཤེས་སྙིང་པོ་དང་། དོན་བསམ་གྱིས་མི་ཁྱབ་པའི་སྙིང་པོ་དང་། ཆོས་འཕགས་སྙིང་པོ་དང་། མཆོད་སྦྱིན་ཏོག་དང་། ཏོག་བཟང་པོ་དང་། མཐའ་ཡས་ཏོག་དང་། འོད་ཟེར་ཏོག་དང་། དྲི་མེད་ཏོག་དང་། མ་ལུས་ཏོག་དང་། ནམ་མཁའི་ཏོག་དང་། རིན་ཆེན་ཏོག་དང་། འབྲུག་སྒྲ་དབྱངས་དང་། རྔ་བོ་ཆེའི་ང་རོའི་རྒྱལ་པོ་དང་། མཐའ་ཡས་གསལ་བའི་ཡེ་ཤེས་རྒྱལ་པོ་དང་། མུན་པ་མུན་ནག་ཐམས་ཅད་རྣམ་པར་སེལ་བའི་རྒྱལ་པོ་དང་། རྣམ་པར་གཡེང་བ་ཐམས་ཅད་འཇོམས་པའི་རྒྱལ་པོ་དང་། སྤྱོད་པ་ཐམས་ཅད་ཕུལ་དུ་བྱུང་བའི་ཡེ་ཤེས་ཀྱི་རྒྱལ་པོ་དང་། འཇིག་རྟེན་དབང་པོའི་རྒྱལ་པོ་དང་། ཕུལ་དུ་བྱུང་བའི་དབང་པོའི་རྒྱལ་པོ་དང་། རྣམ་པར་སེལ་བའི་རྒྱལ་པོ་དང་། མི་གཡོ་བའི་རྒྱལ་པོ་དང་། ཉི་མའི་རྒྱལ་པོ་དང་། ཐམས་ཅད་གསལ་བ་ཡང་དག་པར་འཕགས་པའི་རྒྱལ་པོ་དང་། རང་བཞིན་ཡང་དག་པར་འཕགས་པའི་རྒྱལ་པོ་དང་། དངོས་པོ་མེད་པར་ཡང་དག་པར་འཕགས་པའི་རྒྱལ་པོ་དང་། ཕྱོགས་ལྷག་པའི་རྒྱལ་པོ་དང་། རང་
གི་དངོས་པོ་མེད་པར་སྣང་བ་དང་། བསོད་ནམས་སྣང་བ་དང་། ཀུན་དུ་ལྟ་བའི་སྣང་བ་དང་། འོད་དཔག་མེད་དང་། དཔག་ཡོད་སྣང་བ་དང་། སྤྱན་བཟང་སྣང་བ་དང་། ལེགས་འབྱུང་སྣང་བ་དང་། མཐའ་ཡས་སྣང་བ་དང་། མི་ཚུགས་སྣང་བ་དང་། མ་སྒྱུར་བ་དང་། འོག་མིན་དང་། དྲི་མེད་དང་། མེ་དང་། སྣང་བ་དང་། བློ་གྲོས་དང་། རྟོགས་པ་དང་། བདེ་བ་དང་། བདེ་བའི་མུ་ཁྱུད་དང་། མུ་ཁྱུད་ཀྱི་ཏོག་དང་། འདོད་པའི་ལྷ་དང་། ལྷའི་ལྷ་དང་། ལྟེ་བ་རྒྱས་པ་དང་། འཇིག་རྟེན་ཞི་བ་དང་། ཉེ་བའི་འཆི་ལྟས་དང་། རྔ་བོ་ཆེ་དང་། གྲུབ་པ་དང་། དཀར་པོར་གྲགས་པ་དང་། ལྷ་རབ་ཏུ་བཟོད་དཀའ་ལ་གདུལ་དཀའ་བ་དང་། གསལ་དཀའ་བ་དང་། རིང་དུ་སོང་བ་དང་། རིང་པོར་ལེན་དང་། རིང་པོར་གནས་དང་། མཐོ་ཞིང་མཐོ་བའི་མུན་པ་དང་། མཁའ་སྣང་དང་། ཀུན་ནས་སྣང་དང་། སྣང་མིན་དང་། ཁྱུ་མཆོག་དང་། ཀུན་ནས་སྣང་ལྡན་དང་། ངེས་པར་མཉམ་པ་དང་། ལྷ་ཆེན་པོ་དང་། ཤིན་ཏུ་ངེས་པའི་དཀྱིལ་འཁོར་དང་། དྲི་མ་མཐར་ཐུག་པ་དང་། མཉམ་པའི་མཚན་མ་བཟང་པོ་དང་། དཀར་པོ་དང་། ཨི་མི་ཀི་མི་དང་། ཐ་ཆུང་དང་། དཀའ་བས་འཚོ་བ་དང་། བདེ་བར་འཚོ་བ་དང་། ལེགས་པར་སྐྱེས་པ་དང་། དུ་བའི་ཏོག་དང་། མཆོད་སྦྱིན་ཏོག་དང་། དཀར་པོའི་ཏོག་དང་། ཏོག་བཟང་པོ་དང་། དབྱིག་གི་ཏོག་དང་། ནོར་དགག་ཏུ་མེད་པ་དང་། ཕ་ཆེན་པོ་དང་། དོ་ཤལ་ཕྱེད་པ་དང་། འཇིག་རྟེན་གྲགས་པ་དང་། ཀུན་དུ་གྲགས་པ་དང་། ཆེན་པོར་གྲགས་པ་དང་། མཆོག་ཏུ་གྲགས་པ་དང་། སྐྱེས་པ་དང་། སྣང་བ་དང་། ཅི་བགྱི་དང་། མཉམ་པར་བྱེད་པ་དང་། འཇིག་རྟེན་བྱེད་པ་དང་། སྣང་བ་བྱེད་པ་དང་། ཉིན་མོར་བྱེད་པ་དང་། འབྱུང་བར་བྱེད་པ་དང་། དོན་ཐམས་ཅད་བྱེད་པ་དང་། གྲུབ་པར་བྱེད་པ་དང་། འོད་བྱེད་པ་དང་། ཀུན་དུ་གསལ་བར་བྱེད་པ་དང་། རྔ་བོ་ཆེའི་དབྱངས་
དང་། སྒྲ་དབྱངས་དང་། དབྱངས་བཟང་དང་། མཐའ་ཡས་དབྱངས་དང་། ཏོག་གི་དབྱངས་དང་། འབྱུང་བའི་ཐུབ་པ་དང་། གསེར་ཐུབ་དང་། ལོག་པར་དད་སེལ་དང་། འོད་སྲུང་དང་། གཙུག་ཏོར་ཅན་དང་། ཐམས་ཅད་སྐྱོབ་དང་། རྣམ་པར་གཟིགས་དང་། ཤཱཀྱ་ཐུབ་པ་ཞེས་བྱ་བ་འདི་རྣམས་ཀྱིས་དང་། སངས་རྒྱས་བཅོམ་ལྡན་འདས་གཞན་མང་པོ་རྣམས་ཀྱིས་ཀྱང་འཁོར་གྱི་དཀྱིལ་འཁོར་ཆེན་པོ་ཀུན་དུ་སྣང་བར་བྱས་ནས་པདྨའི་གདན་ལ་སོ་སོར་བཞུགས་པར་གྱུར་ཏོ། །དེ་ལྟར་བྱང་ཆུབ་སེམས་དཔའི་ཚོགས་དེ་རྣམས་ཀྱང་བཞུགས་པ་འདི་ལྟ་སྟེ། ཕྱག་ན་རིན་ཆེན་དང་། ཕྱག་ན་རྡོ་རྗེ་དང་། ཕྱག་ན་བཟང་པོ་དང་། ནམ་མཁའི་ཕྱག་དང་། མཐའ་ཡས་ཕྱག་དང་། སའི་ཕྱག་དང་། སྣང་བའི་ཕྱག་དང་། ཤིན་ཏུ་དྲི་མེད་དང་། བཟང་པོ་བརྩེགས་པ་དང་། མང་པོ་བརྩེགས་པ་དང་། ནོར་བུ་བརྩེགས་པ་དང་། རིན་ཆེན་བརྩེགས་པ་དང་། ཨེ་ན་བརྩེགས་པ་དང་། རིན་ཆེན་གླང་པོ་དང་། ཀུན་ནས་གླང་པོ་དང་། སྤོས་ཀྱི་གླང་པོ་དང་། བཟང་འགྲོ་དང་། དྲི་མ་དང་བྲལ་བར་འགྲོ་བ་དང་། འཇིག་རྟེན་འགྲོ་བ་དང་། མཛེས་པར་འགྲོ་བ་དང་། མཐའ་ཡས་འགྲོ་བ་དང་། མཐའ་ཡས་གྲགས་པ་དང་། ལེགས་གྲགས་དང་། དྲི་མ་དང་བྲལ་བར་གྲགས་པ་དང་། འགྲོ་བར་གྲགས་པ་དང་། དྲི་མེད་གྲགས་པ་དང་། གྲགས་པའི་མགོན་པོ་དང་། མགོན་མེད་ཀྱི་མགོན་པོར་གྱུར་པ་དང་། འཇིག་རྟེན་མགོན་པོ་དང་། ཀུན་ནས་མགོན་པོ་དང་། རྒྱུན་བཤེས་ཀྱི་བུ་དང་། མཐའ་ཡས་བཤེས་ཀྱི་བུ་དང་། ཀུན་དུ་བཤེས་ཀྱི་བུ་དང་། བྱམས་མའི་བུ་དང་། མིག་བཟང་གི་བུ་དང་། ཕྱག་འཚལ་བཤེས་ཀྱི་བུ་དང་། ཏྭ་ཥ་ཏྲའི་བུ་དང་། འབྲས་བཤེས་ཀྱི་བུ་དང་། རིན་ཆེན་བཤེས་ཀྱི་བུ་དང་། སྐྱབས་གསུམ་བཤེས་ཀྱི་བུ་དང་། ཐེག་གསུམ་བཤེས་ཀྱི་བུ་དང་། མཐུ་བསྒྱིངས་དང་། ཤིན་ཏུ་ཡིད་དུ་འོང་བ་དང་། ཡིད་འོང་ལྡན་དང་། ཆོས་ཀྱི་དབང་ཕྱུག་
དང་། དངོས་པོ་མེད་པའི་དབང་ཕྱུག་དང་། ཀུན་ནས་དབང་ཕྱུག་དང་། འཇིག་རྟེན་དབང་ཕྱུག་དང་། སྤྱན་རས་གཟིགས་དབང་ཕྱུག་དང་། ལེགས་གཟིགས་དབང་ཕྱུག་དང་། རྣམ་གཟིགས་དབང་ཕྱུག་དང་། འཇིག་རྟེན་འདྲེན་པ་དང་། མཆོད་པ་བཟང་པོ་དང་། འབྲུག་སྒྲའི་དབང་ཕྱུག་དང་། རྔ་བོ་ཆེའི་དབང་ཕྱུག་དང་། བཀོད་པའི་དབང་ཕྱུག་དང་། བི་ཥ་ཏེ་སྭ་ར་དང་། ཆར་བཟང་པོ་དང་། མཆོད་པ་བཟང་པོ་དང་། གྲགས་ལྡན་དང་། ཉི་མའི་འོད་དང་། རབ་ཏུ་སྐྱེས་པ་ལ་གནས་པ་དང་། ཟླ་བའི་དབང་ཕྱུག་དང་། སོ་བའི་ཟླ་བ་དང་། ཟླ་བ་ཉིད་དང་། མཐའ་ཡས་དཔལ་དང་། ཀུན་དུ་དཔལ་དང་། འཇིག་རྟེན་དཔལ་དང་། ནམ་མཁའི་དཔལ་དང་། ནམ་མཁའི་ཀུན་སྡུད་དང་། ནམ་མཁའི་མཛོད་དང་། སའི་དབང་ཕྱུག་དང་། དབང་ཕྱུག་ཆེན་པོ་དང་། སའི་སྙིང་པོ་དང་། སྒྲིབ་པ་མེད་པ་དང་། སྒྲིབ་པ་ཐམས་ཅད་རྣམ་པར་སེལ་བ་དང་། ཀུན་དུ་བཟང་པོ་དང་། བཟང་སྐྱོང་དང་། ནོར་བཟང་དང་། ལེགས་པར་ཀུན་སྡུད་དང་། ལོ་ཐོག་ཀུན་འགྱེད་པའི་ནམ་མཁའ་དང་། ནམ་མཁའི་སྙིང་པོ་དང་། དོན་ཀུན་རྟོགས་པ་དང་། ཐམས་ཅད་འབྱུང་བ་དང་། ལྡོག་བྱ་མིན་པ་དང་། མི་ལྡོག་པ་དང་། ངན་སོང་བཟོད་དང་། རྣམ་པར་སྒྱུར་མེད་དང་། བཀྲ་ཤིས་རྣམ་འགྲེལ་དང་། གནད་ཐམས་ཅད་སྲུང་བ་ཞེས་བྱ་བ་འདི་རྣམས་ཀྱིས་དང་། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་ཐབས་ཅིག་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པའི་སྤྱོད་ཡུལ་དུ་སྒྲོལ་མའི་གྲུ་ལ་བཞུགས་པར་གྱུར་ཏོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བུད་མེད་ཀྱི་གཟུགས་འཛིན་པ་རྣམས་ཀྱིས་འཇིག་རྟེན་གྱི་སྤྱོད་པའི་དོན་མཐའ་ཡས་པ་སྒྲུབ་པ་སེམས་ཅན་མཐའ་ཡས་པ་དག་གི་བསམ་པ་རྣམ་པར་འཇུག་པར་བྱེད་པའི་ལམ་ལ་རབ་ཏུ་གནས་སུ་འཇུག་པའི་བྱ་བ་བསམ་གྱིས་མི་ཁྱབ་པའི་རིག་
སྔགས་ཀྱི་གཞི་རྗེས་སུ་འཛིན་པར་བྱེད་པ་སྨན་གྱི་ཆ་བྱད་ཀྱི་གཟུགས་འཛིན་པ་རྣམས་དང་། འདབ་ཆགས་ཀྱི་ཚོགས་རྣམ་པ་སྣ་ཚོགས་པ་དང་། གནོད་སྦྱིན་དང་། སྲིན་པོ་དང་། ནོར་བུ་དང་། སྔགས་དང་རིན་པོ་ཆེའི་རྒྱལ་པོ་དང་། སེམས་ཅན་དང་། སེམས་ཅན་མ་ཡིན་པ་གྲངས་མེད་པ་ཐམས་ཅད་ཀུན་དུ་འཇུག་ཅིང་སེམས་ཅན་གྱི་སྤྱོད་པའི་རྗེས་སུ་འཇུག་པ་རྣམས་དང་། བསམ་པ་ཇི་ལྟ་བས་སེམས་ཅན་འདུལ་བ་དེ་ལྟ་བུའི་རྗེས་སུ་འཇུག་པ་རྣམས་དང་། དེ་དག་སོ་སོའི་ཁྱད་པར་དུ་འཕགས་པའི་རྗེས་སུ་འཇུག་པ་རྣམས་དང་། རིག་པའི་རྒྱལ་པོའི་ཉེ་བར་བསྟན་པ་ཇི་ལྟ་བ་བཞིན་དུ་ཆོས་ངེས་པར་འབྱུང་བ་དེ་བཞིན་གཤེགས་པ་དང་། པདྨ་དང་། རྡོ་རྗེ་དང་། འཇིག་རྟེན་དང་འཇིག་རྟེན་ལས་འདས་པ་ཐམས་ཅད་ལ་ཀུན་དུ་འཇུག་པའི་དམ་ཚིག་གི་རིམ་པ་ལས་འདའ་བར་མི་བྱ་བར་ཚིག་གི་ལམ་ལ་རབ་ཏུ་གནས་པར་བྱེད་ཅིང་། དཀོན་མཆོག་གསུམ་གྱི་གདུང་མི་འཆད་པར་བྱེད་པ་རྣམས་ཏེ། འདི་ལྟ་སྟེ། གཙུག་ཏོར་མངོན་པར་འཕགས་པ་དང་། གདུགས་དཀར་མངོན་པར་འཕགས་པ་དང་། ལོ་མ་མཐའ་ཡས་དང་། ལོ་མ་བརྒྱ་པ་དང་། གཙུག་ཏོར་རྒྱལ་བ་དང་། མངོན་པར་འཕགས་པའི་གཙུག་ཏོར་དང་། པདྨའི་འོད་ཟེར་དང་། གསེར་གྱི་འོད་ཟེར་དང་། འོད་ཟེར་དཀར་པོ་དང་། གཙུག་ཏོར་བཀོད་པ་དང་། གསེར་གྱི་ཕུང་པོ་དང་། དཀར་པོའི་ཕུང་པོ་དང་། གཟི་བརྗིད་ཕུང་པོ་དང་། ནོར་བུའི་ཕུང་པོ་དང་། ཀུན་ནས་ཕུང་པོ་དང་། རྣམ་པར་གྲགས་པའི་ཕུང་པོ་དང་། འབྱུང་བའི་ཕུང་པོ་དང་། བདེན་པའི་ཕུང་པོ་དང་། དངོས་པོ་མེད་པའི་ཕུང་པོ་དང་། མ་ནོར་བ་དེ་བཞིན་ཉིད་ཀྱི་ཕུང་པོ་སྟེ། འདི་རྣམས་དང་། གཞན་ཡང་གཙུག་ཏོར་གྱི་རྒྱལ་པོ་ཆོས་ཀྱི་དབྱིངས་མཐའ་ཡས་པ་ལ་རབ་ཏུ་ཞུགས་པ་སེམས་ཅན་རྣམས་ཀྱི་བསམ་པ་ཇི་ལྟ་བ་བཞིན་དུ་མངོན་པར་འདོད་པ་ཡོངས་སུ་སྐོང་བར་བྱེད་པ། སྐྱེ་བོ་ཐམས་ཅད་ཀྱི་ཡིད་ཀྱི་བསམ་པ་རྟོགས་པ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་
ཕྲག་གིས་ཀྱང་མི་ནུས་པའི་གཙུག་ཏོར་རྒྱལ་པོ་ནམ་མཁའི་མཐར་ཐུག་པ་བརྗོད་པ་བསམ་གྱིས་མི་ཁྱབ་པའི་སྟོབས་དང་། ཕ་རོལ་གནོན་པའི་བདག་ཉིད་ཆེན་པོ་ལྟ་བུར་སྟོན་པར་འདོད་པས་མཐའ་དག་རྒྱས་པར་བཤད་པ་ལས་མདོར་བསྡུས་ནས་བསྟན་པར་བྱ་སྟེ། རིག་པའི་རྒྱལ་པོ་རྣམས་ཀྱིས་འདུས་པ་བཤད་པར་བྱ་བ་འདི་ལྟ་སྟེ། མཛོད་སྤུ་དང་། སྨིན་མ་དང་། སྤྱན་དང་། རྫི་མ་དང་། སྙན་དང་། མགྲིན་པ་དང་། མི་འཇིགས་པ་དང་། སྙིང་རྗེ་དང་། བྱམས་པ་དང་། བརྩེ་བའི་ཚིམ་པ་དང་། ཤེས་རབ་དང་། འོད་ཟེར་དང་། སེམས་དཔའ་དང་། འོད་ཟེར་དྲི་མ་མེད་དང་། ཆོས་གོས་ཏེ་འདི་རྣམས་དང་། གཞན་ཡང་རིག་པའི་རྒྱལ་པོ་མཐའ་ཡས་མུ་མེད་པ་དེ་བཞིན་གཤེགས་པའི་གཙུག་ཏོར་ནས་སྤྲོས་པ་རྣམས་འདི་ལྟ་སྟེ། དེ་བཞིན་གཤེགས་པའི་ལྷུང་བཟེད་དང་། ཆོས་ཀྱི་འཁོར་ལོ་དང་། དེ་བཞིན་གཤེགས་པའི་གཟིམས་ཆ་དང་། དེ་བཞིན་གཤེགས་པའི་ཐེག་པ་དང་། དེ་བཞིན་གཤེགས་པ་ཀུན་དུ་གསལ་བ་དང་། དེ་བཞིན་གཤེགས་པའི་གསུང་དང་། དེ་བཞིན་གཤེགས་པའི་མཥྛ་དང་། དེ་བཞིན་གཤེགས་པའི་གཤེགས་པ་དང་། དེ་བཞིན་གཤེགས་པའི་དྲི་མ་དང་། དེ་བཞིན་གཤེགས་པའི་རྒྱལ་མཚན་དང་། དེ་བཞིན་གཤེགས་པའི་ཏོག་དང་། དེ་བཞིན་གཤེགས་པའི་མཚན་མ་སྟེ་འདི་རྣམས་དང་། གཞན་ཡང་དེ་བཞིན་གཤེགས་པའི་སྔགས་གསུངས་པ་རྣམས་ཏེ། རིག་པའི་རྒྱལ་པོ་དང་། རྒྱལ་མོ་དང་། ཅི་བགྱི་དང་། བྲན་ཕོ་དང་། བྲན་མོ་དང་། ཕོ་ཉ་དང་། ཕོ་ཉ་མོ་དང་། གནོད་སྦྱིན་དང་། གནོད་སྦྱིན་མོ་དང་། སེམས་ཅན་དང་སེམས་ཅན་མིན་པ་སོ་སོར་ཁྱད་པར་དུ་འཕགས་པའི་རྒྱན་བཀོད་པའི་ཆོས་ཀྱི་སྤྲིན་ངེས་པར་སྤྲོས་པ། ཏིང་ངེ་འཛིན་གྱི་ཁྱད་པར་གྱི་རྒྱུ་མཐུན་པ་བྱེ་བ་བརྒྱ་སྟོང་ཕྲག་ཚད་མེད་པས་ཡོངས་སུ་བསྐོར་བ། རིག་པའི་ཚོགས་ཐམས་ཅད་གོང་ནས་གོང་དུ་རབ་ཏུ་འཇུག་བཞིན་པའི་རིག་པའི་རྒྱལ་པོ་དེ་རྣམས་
ཀྱང་དེ་བཞིན་གཤེགས་པའི་སྤྱོད་ཡུལ་དེར་རིགས་བཟང་པོར་ལྷག་པར་གནས་པ་དང་ལྡན་པར་གྱུར་ཏོ། །རིག་པའི་རྒྱལ་པོ་འདི་ལྟ་སྟེ། དེ་བཞིན་གཤེགས་པ་ཕྱག་བཅུ་གཉིས་དང་། ཕྱག་དྲུག་པ་དང་། ཕྱག་བཞི་བ་དང་། ཧཱ་ལ་ཧཱ་ལ་དང་། དོན་ཡོད་ཞགས་པ་དང་། རྟ་མགྲིན་དང་། མགྲིན་པ་མཐའ་ཡས་དང་། མགྲིན་པ་སྔོན་པོ་དང་། མགྲིན་པ་བཟང་པོ་དང་། མགུལ་བཟང་དང་། མགྲིན་དཀར་དང་། མགྲིན་སྔོན་དང་། འཇིག་རྟེན་མགྲིན་པ་དང་། རྣམ་པར་གཟིགས་པའི་དབང་ཕྱུག་དང་། འོད་ཟེར་སྟོང་འདུད་དང་། རྣམ་པར་གྲགས་པའི་ཡིད་དང་། པདྨའི་ཕྱག་དང་། ཡིད་ཀྱི་ཤིང་རྟ་དང་། ཚིག་འབྱིན་པ་པོ་དང་། རབ་ཏུ་བཞད་པ་དང་། སྒྲ་བཟང་དང་། སྐྲ་མཐའ་དང་། རྒྱུ་སྐར་དང་། རྒྱུ་སྐར་རྒྱལ་པོ་དང་། ཟླ་བའི་བུ་དང་། སྐལ་བཟང་དང་། འཇིག་རྟེན་གསུམ་ལས་རྣམ་པར་རྒྱལ་བ་དང་། མཐའ་ཡས་རྣམ་རྒྱལ་དང་། ལྷ་ལས་རྣམ་རྒྱལ་དང་། འདོད་པ་ཕུན་ཚོགས་བྱེད་དང་། ལེགས་པར་འདུལ་བ་དང་། འདུལ་བ་པོ་ཞེས་པ་འདི་རྣམས་དང་། གཞན་ཡང་རིག་པའི་རྒྱལ་མོ་ཆུ་སྐྱེས་གཙུག་ཏོར་ལ་སོགས་པ་རྣམས་ཀྱིས་ཆོས་ཀྱི་སྤྲིན་གྱི་རྒྱུ་མཐུན་པ་མཐའ་ཡས་པ་སྒྲུབ་པའི་ཏིང་ངེ་འཛིན་དུ་གྱུར་པ་བརྒྱ་སྟོང་བྱེ་བ་ཁྲག་ཁྲིག་དུ་མའི་རིག་པས་ཡོངས་སུ་བསྐོར་བ་དང་། རིག་པ་འཛིན་པའི་རྒྱལ་མོ་དུ་མ་དང་། འཇིག་རྟེན་དབང་ཕྱུག་དང་སྐུའི་ཏིང་ངེ་འཛིན་གྱི་རྣམ་པར་སྤྲོས་པ་དུ་མ་རྣམས་ལ་འདི་ལྟ་སྟེ། སྒྲོལ་མ་དང་། བསམ་པའི་སྒྲོལ་མ་དང་། གར་མ་དང་། ཁྲོ་གཉེར་ཅན་མ་དང་། ཨ་ནུཏྟཱ་ཊཱི་དང་། ལོོ་ཊཱི་དང་། ས་ཐོབ་པར་བྱེད་པ་དང་། དྲི་མ་དང་བྲལ་མ་དང་། དཀར་མོ་དང་། དཀར་ཤམ་མ་དང་། དཀར་ཤམ་ཆེན་མོ་དང་། གོས་དཀར་མོ་དང་། འཇིག་རྟེན་གོས་མ་དང་། དྲི་མེད་གོས་མ་དང་། བྱང་ཆུབ་ཡན་ལག་གི་གོས་མ་དང་། ཆུ་སྐྱེས་གོས་མ་དང་། སྟོབས་བཅུ་གོས་མ་དང་། གྲགས་ལྡན་མ་དང་།
ལོངས་སྤྱོད་ལྡན་མ་དང་། ལོངས་སྤྱོད་ཚེ་ལྡན་མ་དང་། ཨུཪྞཱུ་ཀཱ་དང་། ཥལཱུ་ཀཱ་དང་། དྲི་མེད་མཐར་བྱེད་མ་དང་། དྲི་བྲལ་མཐར་བྱེད་མ་དང་། ཀུན་དུ་མཐར་བྱེད་མ་དང་། སྡུག་བསྔལ་མཐར་བྱེད་མ་དང་། འབྱུང་པོ་མཐར་བྱེད་མ་དང་། དཔལ་མོ་དང་། དཔལ་ཆེན་མོ་དང་། མཐར་དཔལ་དང་། སྟོད་པའི་དཔལ་དང་། འཇིག་རྟེན་དཔལ་དང་། རྣམ་པར་གྲགས་པའི་དཔལ་དང་། འཇིག་རྟེན་ཡུམ་དང་། ཀུན་དུ་ཡུམ་དང་། སངས་རྒྱས་ཡུམ་དང་། སྲིང་མོ་དང་། སྐལ་ལྡན་ཤིང་རྟ་མ་དང་། ཤིང་རྟ་བཟང་མོ་དང་། ཤིང་རྟ་ལྡན་མ་དང་། ཀླུ་འདུལ་མ་དང་། འདུལ་བྱེད་མ་དང་། འབྱུང་པོ་ལྡན་མ་དང་། དཔག་མེད་མ་དང་། ལོངས་སྤྱོད་སྟོབས་མ་དང་། འགུགས་བྱེད་མ་དང་། འོད་ཟེར་རྨད་བྱུང་མ་དང་། རོ་བཟང་མོ་དང་། ཆང་ལྡན་མ་དང་། རབ་ཏུ་འགུམ་དང་། མཆོད་ལྡན་མ་དང་། འགྲམ་མ་དང་། ཀུན་དུ་འགྲམ་མ་དང་། སྐར་འོད་མ་དང་། ཟླ་བ་མ་དང་། ཟླ་བ་ལྡན་མ་དང་། རྨ་བྱ་མ་དང་། ནགས་ལྡན་མ་དང་། ནོར་སྦྱིན་མ་དང་། ཆང་ལྡན་མ་དང་། འཇིག་རྟེན་ལྡན་མ་དང་། འོད་འཕྲོ་ལྡན་མ་དང་། སྟོང་བུ་ཆེན་མོ་དང་། ཆེ་ལྡན་མ་དང་། ལེགས་པར་རྒྱས་བྱུང་མ་དང་། ལེགས་པར་དགའ་མ་དང་། དབྱིག་སྦྱིན་མ་དང་། དཔལ་མོ་དང་། དག་ལྡན་མ་དང་། ནད་མཐར་བྱེད་མ་དང་། ནད་ཐམས་ཅད་གསོ་བྱེད་མ་དང་། ནད་མེད་ལྷ་མོ་དང་། གྲགས་བྱེད་མ་དང་། དབང་བྱེད་མ་དང་། མྱུར་བྱེད་མ་དང་། བདེ་སྦྱིན་མ་དང་། བཀྲ་ཤིས་མ་དང་། བཀྲ་ཤིས་ཐོབ་བྱེད་དགའ་མ་དང་། ཟླ་བ་བཟང་མོ་དང་། ཟླ་བ་ལྡན་མ་ཞེས་བྱ་བ་འདི་རྣམས་དང་གཞན་ཡང་རིག་པའི་རྒྱལ་མོ་རི་ཁྲོད་ལོ་མ་ཅན་དང་། དུག་སེལ་མ་དང་། ཡིད་ལས་བྱུང་བ་ལ་སོགས་པ་རྣམས་ཀྱིས་ཆོས་ཀྱི་དབྱིངས་ནམ་མཁའི་རང་བཞིན་གྱི་སྒྲུབ་པ་མཐའ་ཡས་པ་སྤྱོད་པ་ཐམས་ཅད་ཀྱི་རྣམ་པར་འཕྲུལ་པ་བྱིན་གྱིས་བརླབས་པ་ཡང་དག་པར་སྐྱེས་པ་
ཡིད་ལས་བྱུང་བ་རྣམས་ཏེ་ཕོ་ཉ་དང་། ཕོ་ཉ་མོ་དང་། བྲན་ཕོ་དང་། བྲན་མོ་དང་། ཅི་བགྱི་དང་། ཅི་བགྱི་མོ་དང་། གནོད་སྦྱིན་དང་། གནོད་སྦྱིན་མོ་དང་། སྲིན་པོ་དང་། སྲིན་མོ་དང་། ཤ་ཟ་དང་། ཤ་ཟ་མོ་པདྨའི་རིགས་ཀྱི་དམ་ཚིག་ལ་རྗེས་སུ་འཇུག་པ་གསང་སྔགས་རྣམ་པར་སྤྱོད་པ་རྣམས་གང་གིས་འཁོར་གྱི་དཀྱིལ་འཁོར་ཆེན་པོ་དང་ལྡན་པ་དག་པའི་སེམས་ཅན་ངེས་པར་འཁོད་པ་དེས་རབ་ཏུ་གནས་པར་བྱེད་པས་རབ་ཏུ་གནས་ཏེ་རང་བཅོམ་ལྡན་འདས་ཤཱཀྱ་ཐུབ་པ་ལ་མཆོད་པའི་ལས་བྱེད་པ་ལ་བརྩོན་པའི་ཡིད་དང་ལྡན་པར་གྱུར་ཏོ། །བཅོམ་ལྡན་འདས་ཤཱཀྱ་ཐུབ་པའི་ཉེ་བར་ལོགས་དེར་གནས་པའི་བྱང་ཆུབ་སེམས་དཔའ་ཕྱག་ན་རྡོ་རྗེས་རང་གི་རིག་པའི་ཚོགས་ལ་བོས་པར་གྱུར་ཏེ། འདིར་འདུས་པར་འགྱུར་པ་ཁྱེད་རྣམས་ནི་རིག་པའི་ཚོགས་ཀྱིས་ཡོངས་སུ་བསྐོར་བ་ཁྲོ་བོའི་རྒྱལ་པོ་དང་། རྒྱལ་མོ་དང་བཅས་པ་རྣམས་ཀྱི་ཕོ་ཉ་མོ་ཆེན་མོ་དྲན་པ་ཙམ་ཉིད་ཀྱིས་རིག་པའི་ཚོགས་ཐམས་ཅད་འདུས་པ་རྣམས་འདི་ལྟ་སྟེ། རིག་པ་མཆོག་དང་། རིག་པ་བཟང་པོ་དང་། ལེགས་པར་གྲུབ་པ་དང་། དཔུང་བཟང་དང་། སྡེ་བཟང་དང་། ལྷ་མཐར་བྱེད་དང་། སོ་བཟང་དང་། གང་བ་བཟང་པོ་དང་། རྡོ་རྗེའི་སྡེ་དང་། རྡོ་རྗེའི་མཐའ་དང་། རྡོ་རྗེའི་ལག་པ་དང་། རྡོ་རྗེའི་དཔུང་པ་དང་། རྡོ་རྗེའི་རྒྱལ་མཚན་དང་། རྡོ་རྗེའི་བ་དན་དང་། རྡོ་རྗེའི་སྤྱོད་ཡུལ་དང་། རྡོ་རྗེ་མགོ་བོ་འཆང་དང་། རྡོ་རྗེ་མཆེ་བ་དང་། དག་པའི་རྡོ་རྗེ་དང་། རྡོ་རྗེའི་སྤུ་དང་། རྡོ་རྗེ་མཆོད་པ་དང་། རྡོ་རྗེ་དུ་མ་དང་། རྡོ་རྗེ་གོ་ཆ་དང་། རྡོ་རྗེ་མགྲིན་པ་དང་། རྡོ་རྗེ་གསུང་བ་དང་། རྡོ་རྗེ་ལྟེ་བ་དང་། རྡོ་རྗེ་མཐའ་དང་། རྡོ་རྗེ་གུར་དང་། རྡོ་རྗེ་ར་བ་དང་། རྡོ་རྗེ་མཚོན་ཆ་དང་། རྡོ་རྗེ་གཞུ་དང་། རྡོ་རྗེ་མདའ་དང་། རྡོ་རྗེ་ལྕགས་མདའ་དང་། རྡོ་རྗེ་མཚན་མ་དང་། རྡོ་རྗེ་དགྱེས་པ་དང་། རྡོ་རྗེ་ས་འོག་དང་། རྡོ་རྗེ་འཇིགས་སྤྱན་དང་། རྡོ་རྗེ་ནོར་མཐའ་དང་། རྡོ་རྗེ་ཁྲོ་བོ་དང་། ཆུའི་
ཡིད་དུ་འོང་བའི་ང་རོ་དང་། འབྱུང་པོའི་ཡིད་དུ་འོང་བའི་ང་རོ་དང་། ཁྲོ་བོ་ཆེན་པོའི་ཡིད་དུ་འོང་བའི་ང་རོ་དང་། དབང་ཕྱུག་ཆེན་པོའི་ཡིད་དུ་འོང་བའི་ང་རོ་དང་། སྦྱིན་པའི་བུའི་ཡིད་དུ་འོང་བའི་ང་རོ་དང་། རིག་པ་ཐམས་ཅད་ཀྱི་ཡིད་དུ་འོང་བའི་ང་རོ་དང་། དྲག་པོ་དང་། ཤིན་ཏུ་དྲག་པོ་དང་། འཕེན 
་པ་དང་། ཉེ་བར་
འཕེན ་པ་དང་། རྟག་ཏུ་ འཕེན ་པ་དང་། འདུལ་བའི་མཐའི་ འཕེན ་པ་དང་། ཤིན་ཏུ་རྣམ་བཀོད་ འཕེན ་པ་དང་། འཚོལ་བར་ འཕེན ་པ་དང་། སྟོབས་དང་། སྟོབས་པོ་ཆེ་དང་། ལེགས་འབྱུང་གསོང་བྱེད་དང་། བྷྲྀང་གི་རི་ཊི་དང་། ཁྲོ་བོ་དང་། ཁྲོ་བོ་ཆེན་པོ་དང་། མི་རྒས་པ་དང་། མི་གཉིད་པ་དང་། གདུང་བའི་དབྱངས་དང་། ཀླུའི་མཐའ་དང་། དབྱུག་ཆུ་དང་། དབྱུག་པ་སྔོན་པོ་དང་། ལུས་སྦྱིན་དང་། ལུས་དམར་དང་། རྡོ་རྗེའི་དབྱུག་པ་དང་། སྤྲིན་དང་། སྤྲིན་ཆེན་དང་། ནག་པོ་དང་། ནག་པོ་བརྩེགས་པ་དང་། སྣ་ཚོགས་ནད་དང་། ཐམས་ཅད་ འཕེན ་པ་པོ་དང་། འདུད་དང་། འདུད་ཆེན་པོ་དང་། ཉམ་ཐག་པ་དང་། ཉམ་ཐག་པ་ཆེན་པོ་དང་། དུས་མཐར་བྱེད་པ་དང་། གནོད་སྦྱིན་ནག་པོ་དང་། དྲག་པོ་དང་། དྲག་པོའི་གཟུགས་དང་། རྩེ་གསུམ་ཁ་གདེངས་པ་དང་། མདའ་བོ་ཆེ་དང་། བེ་ཅོན་རབ་འཇོམས་དང་། ཟ་བ་སྡུད་པའི་དཔའ་བོ་དང་། དུས་ཀྱི་མཐའི་ཉི་མ་དང་། སྲོག་འཕྲོག་པ་དང་། སྒྲ་འཇོམས་པ་དང་། ཞེ་སྡང་མི་འཛིན་པ་དང་། འཁྱིལ་པ་དང་། འཁྱིལ་པ་མིན་པ་དང་། མཐའ་ཡས་འཁྱིལ་པ་དང་། ཁྲག་འཁྱིལ་པ་དང་། དཔུང་པ་དང་། དཔུང་པ་ཆེན་པོ་དང་། གདུག་པའི་ནད་ཆེན་པོ་དང་། མེ་དཔལ་དང་། མཛེ་ཐམས་ཅད་ལས་རྒྱལ་བ་དང་། འབྲོས་པ་དང་། རྣམ་པར་འབྲོས་པ་པོ་དང་། དེ་བཞིན་རྣམ་འབྲོས་དང་། ཟ་བ་པོ་དང་། ཚིམ་མེད་འཚོལ་བ་ཞེས་པ་འདི་རྣམས་དང་། གཞན་ཡང་རིག་པའི་རྒྱལ་པོ་ཁྲོ་བོ་ཆེན་པོ་རྣམས་ཀྱིས་མ་ལུས་ཤིང་ལུས་པ་མེད་པའི་སེམས་ཅན་གདུལ་བ་དང་། སྐྲོད་པ་དང་།
གཞིག་པ་དང་། དགག་པ་དང་། གསོད་པ་དང་། རྣམ་པར་འཇོམས་པ་དང་། ཕ་དང་། ཟས་རྣམས་སྟེར་བར་བྱེད་པ་དང་། ཞི་བ་ཅན་དང་། རྒྱས་པ་ཅན་དང་། མངོན་སྤྱོད་ཅན་གྱི་ལས་རྣམས་ཤིན་ཏུ་སྦྱོར་བར་བྱེད་པ་པོ་རིག་པའི་རྒྱལ་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་རྣམས་ཀྱིས་ཡོངས་སུ་བསྐོར་བ། བཅོམ་ལྡན་འདས་ཤཱཀྱ་ཐུབ་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ངེས་པར་སེམས་པས་རང་གི་རིག་པའི་རྒྱལ་པོ་རྡོ་རྗེའི་རིགས་སྐྱོང་བ་ལ་ཕྱག་འཚལ་ཏེ་གནང་བ་ནོས་ནས་རང་གི་རིགས་ལ་གནས་པར་བྱེད་ཅིང་གནས་པས་རང་རང་གི་སྟན་ལ་འདུག་པར་གྱུར་ཏོ། །བཅོམ་ལྡན་འདས་ཕྱག་ན་རྡོ་རྗེས་ཕུལ་བའི་ཕོ་ཉ་མོ་རིག་པའི་རྒྱལ་མོ་ཁྲག་ཁྲིག་བརྒྱ་སྟོང་ཕྲག་གིས་ཡོངས་སུ་བསྐོར་བ་ཡང་རང་ཆོས་ཀྱི་དབྱིངས་ནམ་མཁའི་རང་བཞིན་སྤྲོས་པ་མེད་པ་ལ་དམིགས་ནས་གནས་དེར་འདུས་པར་གྱུར་པ་འདི་ལྟ་སྟེ། འོག་པག་མ་དང་། འོག་པག་མ་བཟང་མོ་དང་། ལུ་གུ་རྒྱུད་མ་དང་། རྡོ་རྗེ་འོད་དང་། རྡོ་རྗེའི་ལྕེ་མ་དང་། རྡོ་རྗེའི་སྨིན་མ་དང་། རྡོ་རྗེའི་སྤྱན་དང་། རྡོ་རྗེའི་ལྟེ་བ་དང་། རྡོ་རྗེ་ཁྲོ་གཉེར་མ་དང་། རྡོ་རྗེ་སྙན་མ་དང་། རྡོ་རྗེ་རི་མོ་མ་དང་། རྡོ་རྗེ་ཁབ་མ་དང་། རྡོ་རྗེ་ཁུ་ཚུར་མ་དང་། རྡོ་རྗེ་ལྕགས་ཀྱུ་མ་དང་། རྡོ་རྗེ་རལ་གྲི་མ་དང་། རྡོ་རྗེ་ཐོ་བ་མ་དང་། རྡོ་རྗེ་ལྕགས་སྒྲོག་མ་དང་། སཱ་ལ་ལྡན་མ་དང་། སཱ་ལ་བིར་ཊི་མ་དང་། མཆོག་ཏུ་བྱེད་མ་དང་། འདོད་ལྡན་མ་དང་། རྡོ་རྗེ་འདོད་ལྡན་མ་དང་། འདོད་པའི་རྡོ་རྗེ་མ་དང་། མཐོང་ཅན་མ་དང་། མཐོང་ལྡན་མ་དང་། མཐོང་བ་ཆེན་མོ་དང་། རྩེ་མོའི་གོས་མ་དང་། ཕུག་ལེན་མ་དང་། ཕུག་ལྡན་མ་དང་། ཕུག་གནས་མ་དང་། སྒོ་གནས་མ་དང་། འདོད་པ་རྡོ་རྗེ་མ་དང་། ཡིད་མགྱོགས་མ་དང་། མི་འཕམ་མགྱོགས་མ་དང་། མྱུར་མགྱོགས་མ་དང་། སྤྱན་བཟང་མ་དང་། ཆང་གནས་མ་དང་། བུང་བ་མ་དང་། བུང་བ་ལས་བྱུང་བ་མ་དང་། མཆོད་སྦྱིན་གྲུབ་མ་དང་། རླུང་མ་
དང་། གང་བའི་གོས་མ་དང་། སྐྲག་བཟང་མ་དང་། ཧིཎྜ་ནི་དང་། སྡིགས་མཛུབ་མ་དང་། ཕོ་ཉ་མོ་དང་། ཕོ་ཉ་མོ་བཟང་མོ་དང་། མཱ་མ་ཀཱི་དང་། གཡོན་པ་མ་དང་། གཟུགས་ཅན་མ་དང་། རྒྱལ་མ་དང་། རྣམ་པར་རྒྱལ་མ་དང་། གཞན་གྱིས་མི་ཐུབ་མ་དང་། དགེ་ལེགས་མ་དང་། བཞད་ལྡན་མ་དང་། བཞད་པའི་རྡོ་རྗེ་མ་དང་། འཇིག་རྟེན་ལྡན་མ་དང་། གྲགས་ལྡན་མ་དང་། རྡོ་རྗེ་ལྡན་མ་དང་། མ་དུལ་མ་དང་། འཇིག་རྟེན་གསུམ་པོ་དབང་དུ་བྱེད་མ་དང་། དབྱུག་པ་མ་དང་། དབྱུག་པ་ཆེན་མོ་དང་། སྙན་པར་སྨྲ་བ་ལྡན་མ་དང་། སྐལ་བཟང་ཉིད་ལྡན་མ་དང་། དོན་ལྡན་མ་དང་། དོན་ཆེན་ལྡན་མ་དང་། གོང་མ་སྲེག་མ་དང་། དཀར་མོ་དང་། ཤིན་ཏུ་སྤྲུལ་མ་དང་། ཤིན་ཏུ་དྲི་མེད་མ་དང་། དྲིལ་བུ་མ་དང་། རལ་གྲི་མ་དང་། རྩེ་གསུམ་ཁ་གདེངས་མ་དང་། ཁམ་མ་དང་། རྒྱལ་བྱེད་མ་དང་། གོས་མ་དང་། ཕྱག་འཚལ་མ་དང་། མིང་ཅན་མ་དང་། གསང་བ་མ་དང་། དབྱུག་འབྱིན་མ་དང་། གཏུན་ཤིང་མ་དང་། ཕོ་ཉ་མོ་ཐམས་ཅད་དབང་བྱེད་མ་ཞེས་པ་འདི་རྣམས་དང་། གཞན་ཡང་ཕོ་ཉ་མོ་ཆེན་མོ། ཕོ་ཉ་མོ་དུ་མའི་ཚོགས་ཀྱིས་ཡོངས་སུ་བསྐོར་བ་འཁོར་གྱི་དཀྱིལ་འཁོར་ཆེན་པོ་དེ་ཉིད་དུ་འདུས་པར་གྱུར་ཏོ། །ཏིང་ངེ་འཛིན་གྱི་རྒྱུ་མཐུན་པ་ཡོངས་སུ་སྒོམ་པའི་ཡིད་ལས་བྱུང་བའི་གཟུངས་མ་དུ་མའི་གདུག་པའི་སེམས་ཅན་རྣམས་ཚར་གཅོད་ཅིང་ཆད་པས་གཅོད་པ་འདི་ལྟ་སྟེ། རྡོ་རྗེའི་མེ་རབ་ཏུ་རྨོངས་པར་བྱེད་པའི་གཟུངས་མ་དང་། རི་རབ་ཀྱི་རྩེ་མོའི་ཁང་པ་བརྩེགས་པའི་གཟུངས་མ་དང་། རིན་ཆེན་རྩེ་མོའི་ཁང་པ་བརྩེགས་པའི་གཟུངས་མ་དང་། ས་འཛིན་མ་དང་། ལེགས་པར་བརྩེགས་མ་དང་། ཆད་པའི་གཟུངས་མ་དང་། ཚར་གཅོད་པའི་གཟུངས་མ་དང་། དགུག་པའི་གཟུངས་མ་དང་། དཔུང་རྒྱན་མ་དང་། དཔུང་རྒྱན་ལྡན་མ་དང་། རྒྱལ་མཚན་རྩེ་མོའི་དཔུང་རྒྱན་མ་དང་། རིན་ཆེན་རྩེ་མོའི་དཔུང་རྒྱན་མ་དང་། འཇིག་རྟེན་རྩེ་མོའི་
དཔུང་རྒྱན་མ་དང་། ག་དན་རྩེ་མོའི་དཔུང་རྒྱན་མ་དང་། གསུམ་འཁྱིལ་མ་དང་། འཇིག་རྟེན་འཁྱིལ་མ་དང་། སྟོང་འཁྱིལ་མ་དང་། ཉི་མའི་བུ་འཁྱིལ་མ་དང་། འབྱུང་པོ་ཀུན་འཁྱིལ་མ་དང་། ཏོག་ལྡན་མ་དང་། རིན་ཆེན་ལྡན་མ་དང་། ནོར་བུ་རིན་ཆེན་གཙུག་མ་དང་། བྱང་ཆུབ་ཡན་ལག་གི་སྟོབས་དང་ལྡན་མ་དང་། མཐའ་ཡས་ཏོག་དང་། ཀུན་དུ་ཏོག་དང་། རིན་ཆེན་ཏོག་དང་། རྣམ་པར་གྲགས་པའི་ཏོག་དང་། འབྱུང་པོ་ཐམས་ཅད་ཀྱི་ཏོག་དང་། མི་འཕམ་ལྡན་མ་དང་། གོས་ཤིན་ཏུ་དྲི་མེད་མ་དང་། གདོང་དྲུག་མ་དང་། དྲི་བྲལ་མ་དང་། འཇིག་རྟེན་གྲགས་མ་ཞེས་པ་འདི་དག་དང་། གཞན་ཡང་གཟུངས་མ་བརྒྱ་སྟོང་ཕྲག་བྱེ་བ་དུ་མས་ཡོངས་སུ་བསྐོར་བ་འཁོར་གྱི་དཀྱིལ་འཁོར་ཆེན་པོ་དེ་ཉིད་དུ་འདུས་པར་གྱུར་ཏོ། །སངས་རྒྱས་མཐའ་ཡས་པས་བྱིན་གྱིས་བརླབས་པ་དང་། བྱང་ཆུབ་སེམས་དཔའི་ཏིང་ངེ་འཛིན་གྱིས་བྱིན་གྱིས་བརླབས་པ་དང་། སངས་རྒྱས་ཀྱི་ཞིང་གཞན་སངས་རྒྱས་ཀྱིས་རྣམ་པར་སྤངས་པ་ན་རང་སངས་རྒྱས་བཅོམ་ལྡན་འདས་བསེ་རུ་ལྟ་བུ་དང་། ཚོགས་ན་སྤྱོད་པ་རྣམས་སེམས་ཅན་རྣམས་ཀྱི་དོན་མཛད་པ་ནི་ཅང་མི་གསུང་པར་གྱུར་པ་ལྷག་པར་གནས་པས་ཆོས་ཀྱི་ཚུལ་ཡང་དག་པར་སྟོན་པ། དེ་འཁོར་བའི་རྗེས་སུ་འཇུག་པ་རྟག་ཏུ་ཡིད་སྐྱོ་བ་རྒྱུད་ལ་སྙིང་རྗེ་ཆེན་པོ་སྤངས་ཤིང་མ་འདྲེས་པའི་སེམས་ཀྱི་བག་ཆགས་ཀྱིས་ཡོངས་སུ་བསྒོས་པ་དང་། སྔོན་བྱང་ཆུབ་ཏུ་སེམས་བསྐྱེད་པ། ཡོངས་སུ་བསྒོས་པའི་སེམས་པས་ས་གཅིག་དང་། ས་གཉིས་དང་། ས་གསུམ་དང་། ཇི་སྲིད་བྱང་ཆུབ་སེམས་དཔའི་ས་བརྒྱད་པའི་བར་ལ་ཡིད་མི་འཇུག་པ། འཁོར་བས་ཡིད་སྐྱོ་ཞིང་། འཇིགས་ཤིང་འཇིགས་པ་དང་ལྡན་པ་དེ་རྣམས་ཀྱང་འཁོར་གྱི་དཀྱིལ་འཁོར་ཆེན་པོ་དེར་འདུས་པར་གྱུར་ཏོ། །སྤོས་དྲི་ལེན་དང་། ཀུན་ནས་སྐྱེ་མཆེད་དང་། ཀུན་དུ་འོད་དང་། ཙནྡན་དང་། དུས་དང་། མུ་ཁྱུད་དང་། ཉེ་བའི་མུ་ཁྱུད་དང་། འཆི་ལྟས་དང་། ཉེ་བའི་འཆི་
ལྟས་དང་། ལོགས་བཟང་པོ་དང་། རྔ་བོ་ཆེ་དང་། ཉེ་བའི་རྔ་བོ་ཆེ་དང་། འཇིག་རྟེན་གྲགས་པ་དང་། འཇིག་རྟེན་འོད་དང་། རྒྱལ་བྱེད་དང་། རྡུལ་མེད་དང་། ཉེ་བའི་རྡུལ་དང་། ཆ་ཤས་དང་། ཉེ་བའི་ཆ་ཤས་དང་། མཚན་མ་དང་། མཚན་མ་བཟང་པོ་དང་། ཉིན་མོར་བྱེད་པ་དང་། ལེགས་བྱེད་འོད་ལྡན་དང་། འོད་བྱེད་དང་། འཇིག་རྟེན་བྱེད་པ་དང་། རྣམ་ཐོས་དང་། ལེགས་ཐོས་དང་། མཛེས་སྡུག་དང་། ལེགས་འཛིན་མཐའ་དང་། དུལ་མཛེས་དང་། མཐའ་ཡས་མཐའ་དང་། སྲིད་མཐའ་དང་། ཏོག་དཀར་པོ་དང་། མཚན་མའི་ཏོག་དང་། ཏོག་དང་། ཉེ་བའི་ཏོག་དང་། རྒྱལ་དང་། པདྨའི་བླ་མ་དང་། པདྨའི་འབྱུང་བ་དང་། རང་འབྱུང་དང་། སྐྱེས་པ་དང་། ཡིད་འོང་དང་། ཡིད་ལས་བྱུང་དང་། དབང་ཆེན་དང་། བརྩེགས་པར་གྲགས་པ་དང་། བུམ་པ་དང་། མཐའ་དག་སྤྱན་དང་། བདེ་བྱེད་དང་། ཕན་བྱེད་དང་། ཞི་བ་དང་། ཞི་བའི་ཡིད་དང་། ཆོས་དང་། ཉེ་བའི་ཆོས་དང་། རྣམ་པར་སྣང་བྱེད་དང་། མེ་ཏོག་དང་། ལེགས་སྔོ་དང་། དཔལ་ལྡན་དང་། གཉེན་ལས་ཐག་རིང་བྱེད་པ་དང་། བཟོད་པར་དཀའ་བ་དང་། གསེར་དང་། དྲི་མེད་ཏོག་དང་། ཟླ་བ་དང་། ཉེ་བའི་ཟླ་བ་དང་། སྡེ་བཟང་དང་། ལེགས་པར་སྦྱངས་པ་དང་། བརྒྱ་བྱིན་དང་། འདོད་པ་དང་། ཉེ་དབང་དང་། ནོར་ལྷ་ཞེས་པ་འདི་རྣམས་དང་། གཞན་ཡང་རང་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བསམ་གྱིས་མི་ཁྱབ་ཅིང་གཞལ་གྱིས་མི་ལང་བ་སྨོན་པ་མེད་པའི་ཆོས་ཀྱི་དབྱིངས་ནམ་མཁའི་རང་བཞིན་སྤྲོས་པ་མེད་ཅིང་འདུས་མ་བྱས་པ་ཐེག་པ་འབྲིང་ལ་རབ་ཏུ་ཞུགས་ཤིང་ངེས་པར་གཏན་ཏེ་གནས་པ། རྗེས་སུ་ཆགས་པ་དང་། ཁོང་ཁྲོ་བ་དང་བྲལ་བ་རྣམས་ཀྱིས་བཅོམ་ལྡན་འདས་ཤཱཀྱ་ཐུབ་པ་བཞུགས་པ་དང་ཐབས་ཅིག་ཏུ་བཞུགས་པར་གྱུར་ཏོ། །ཉན་ཐོས་བརྒྱ་སྟོང་ཕྲག་བྱེ་བ་དུ་མས་ཡོངས་སུ་བསྐོར་བའི་
ཉན་ཐོས་ཀྱི་དགེ་འདུན་དང་ཐབས་ཅིག་པ་འདི་ལྟ་སྟེ། འོད་སྲུང་ཆེན་པོ་དང་། ཆུ་ཀླུང་འོད་སྲུང་དང་། ག་ཡཱ་འོད་སྲུང་དང་། ལྟེང་རྒྱས་འོད་སྲུང་དང་། བྷ་ར་དྷྭ་ཛ་བསོད་སྙོམས་ལེན་དང་། བྷ་ར་དྷྭ་ཛ་དང་། མོོད་གལ་གྱི་བུ་དང་། མོོད་གལ་གྱི་བུ་ཆེན་པོ་དང་། ཤཱ་རིའི་བུ་དང་། ཤཱ་རིའི་བུ་ཆེན་པོ་དང་། སྣ་ཚོགས་མཛེས་དང་། རབ་འབྱོར་དང་། རབ་འབྱོར་ཆེན་པོ་དང་། བ་ལང་བདག་དང་། ཀ་ཏྱའི་བུ་དང་། ཀ་ཏྱའི་བུ་ཆེན་པོ་དང་། ཉེ་བར་འཁོར་དང་། བཟང་ལྡན་དང་། ཀ་པི་ན་དང་། དགའ་བོ་དང་། མཛེས་དགའ་བོ་དང་། ཉེ་དགའ་དང་། རྣ་བ་བྱེ་བ་རི་བ་དང་། འཇིག་རྟེན་འབྱུང་བ་དང་། མཐའ་ཡས་འབྱུང་བ་དང་། ཡིད་འོང་བ་དང་། ཉེ་བའི་ཡིད་འོང་བ་དང་། དགའ་ལྡན་དང་། ཉེ་བའི་དགའ་ལྡན་དང་། མ་འགགས་པ་དང་། རྩ་བ་ཀུན་དུ་གང་བ་དང་། ཉེ་བར་གང་བ་དང་། རྒྱལ་དང་། ན་བ་སོ་དང་། རུ་རུ་དང་། དྲག་པོའི་བུ་དང་། རུ་རུའི་བུ་དང་། ཀུ་རུ་དང་། ལྔས་རྩེན་དང་། ཉེ་བའི་ལྔས་རྩེན་དང་། དུས་དང་། མཉམ་པའི་དུས་དང་། ལྷ་འཛིན་དང་། སྒྲ་གཅན་འཛིན་དང་། ལྗང་སྔོ་དང་། ཉེ་བའི་ལྗང་སྔོ་དང་། བསམ་བྱ་དང་། དགའ་བ་སེམས་པ་པོ་དང་། འཆར་ཀ་དང་། ཉེ་པའི་འཆར་ཀ་དང་། དཔལ་ལྡན་དང་། ཀ་དྲུའི་བུ་དང་། གྱད་ཀྱི་བུ་དང་། ཉེར་རྫས་ལྡན་དང་། དུམ་བུ་དང་། རྒྱལ་བ་དང་། ཉེ་རྒྱལ་དང་། རྒྱལ་ཆེན་པོ་དང་། ཀུན་དུ་རྒྱལ་དང་། འབོད་བྱེད་དང་། གྲགས་སྦྱིན་དང་། གྲགས་ལྡན་དང་། ནོར་ཅན་དང་། ནོར་གྱི་རྒྱ་མཚོ་དང་། ཉེ་བའི་ནོར་ཅན་དང་། པི་ལིནྡའི་བུ་པི་པ་ལ་ཀ་དང་། འབྲས་བུ་དང་། ཉེ་བའི་འབྲས་བུ་དང་། མཐའ་ཡས་འབྲས་བུ་དང་། འབྲས་བུ་དང་བཅས་པ་དང་། གཞོན་ནུ་དང་། གཞོན་ནུ་འོད་སྲུང་། ཆེར་སྦྱིན་དང་། བཅུ་དྲུག་སྡེ་པའི་དགའ་བྱེད་དང་། ཉེ་བའི་དགའ་བྱེད་དང་། ཡོན་པོར་ཡོ་བ་དང་། རྒྱལ་བའི་ཞགས་པ་དང་། དབུགས་
འབྱིན་ཆེན་པོ་དང་། བེའུའི་བུ་དང་། ཀུ་རུ་ཀུལླེ་དང་། གྲོ་བཞིན་སྐྱེས་རྣ་བ་བྱེ་བ་རི་བ་དང་། ཁྲག་ཕ་རོལ་གྱི་མཐར་བྱེད་པ་དང་། གང་གཱའི་བུ་དང་། རིའི་རྣ་བ་ཅན་དང་། ཉེ་བའི་ཟེ་བ་དང་། དབྱར་ཅན་དང་། སྣང་བ་དང་། མཛེས་པར་སྣང་བ་དང་། དཔལ་སྦས་དང་། འཇིག་རྟེན་སྦས་པ་དང་། བླ་མ་སྦས་པ་དང་། སྣང་བ་ལ་དགའ་བ་དང་། ཞི་བྱེད་དང་། བྱིས་པ་དང་། ཉེ་བའི་བྱིས་པ་དང་། བྱེ་བ་ཉི་ཤུ་པ་དང་། མགོན་མེད་སྦྱིན་དང་། ཉེ་བའི་འཇུག་པ་དང་། ལྡོག་པ་དང་། སྨྱོ་བྱེད་དང་། ཀུན་དུ་འོད་དང་། མཚོ་བཟང་དང་། ལེགས་པ་དང་། རབ་སད་དང་། ལེགས་འོངས་དང་། ཉེར་འོངས་དང་། ཉེར་འགྲོ་དང་། འཇིག་རྟེན་འགྲོ་དང་། སྡུག་བསྔལ་མཐར་བྱེད་དང་། བསྐལ་པ་བཟང་པོ་དང་། ཆེན་པོ་བཟང་ལྡན་དང་། དོན་སྤྱོད་པ་དང་། ཕ་ཆེན་པོ་དང་། འགྲོ་ལྡན་དང་། རྒྱལ་སྐྱོང་དང་། རྒྱལ་དང་། གསལ་ལྡན་དང་། ཉེ་བའི་གསལ་ལྡན་དང་། སྨན་ཆེན་པོ་དང་། གཟི་བརྗིད་ཆེན་པོ་དང་། ལྷ་མཚམས་དང་། སྒྲུབ་བྱེད་དང་། ཚོགས་ཅན་དང་། ཚངས་པ་བཟང་པོ་དང་། མཛེས་མ་བཟང་དང་། འཇིག་རྟེན་བཟང་དང་། མཉམ་པ་དང་། ཡང་དག་གཞལ་བ་ཞེས་པ་འདི་རྣམས་དང་། གཞན་ཡང་ཆོས་ཀྱི་དབྱིངས་མཐའ་ཡས་པ་རྣམ་པར་གྲོལ་བའི་རོའི་རོ་མྱོང་བ། ཐེག་པ་གསུམ་ལ་སྙོམས་པར་འཇུག་པ། ཐེག་པ་ཆུང་ངུའི་ལམ་ཀུན་དུ་ཐོབ་པ། འཁོར་བ་ལས་བྲོས་པ། རྣམ་པར་ཐར་པའི་ལམ་གསུམ་གྱི་བསམ་གཏན་བསམས་པ། ཚངས་པའི་གནས་བཞིའི་སྤྱོད་ལམ་ལ་སྙོམས་པར་ཞུགས་པ། ལེགས་པར་མཉམ་པར་བཞག་པ། ལེགས་པར་བསྙེན་པར་རྫོགས་པ། ལེགས་པའི་ཚུལ་ལ་རབ་ཏུ་གནས་པའི་མྱ་ངན་ལས་འདས་པའི་དབྱིངས་ལ་མཉམ་པར་འཇུག་པ་མཉམ་པ་ཉིད་སྤྲོས་པ་མེད་པ་བློ་གྲོས་ཅན་རྣམས་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ཆེན་པོ་དེར་བཅོམ་ལྡན་འདས་ཤཱཀྱ་ཐུབ་པ་ས་བཅུ་
པའི་བར་མ་ཆད་པ་དཀོན་མཆོག་གསུམ་གྱི་གནས་སུ་གནས་པ་དང་ཐབས་ཅིག་ཏུ་དེ་རྣམས་ཀྱང་དེར་ཀུན་དུ་འཁོད་པར་གྱུར་ཏོ། །ཉན་ཐོས་མ་ཆེན་མོ་མྱ་ངན་ལས་འདས་པའི་དབྱིངས་ལ་རབ་ཏུ་མཉམ་པར་འཇུག་པས་རབ་ཏུ་ཞུགས་པ་དུ་མ་རྣམས་ཀྱང་། འདུས་མ་བྱས་ཀྱི་ལམ་གྱི་ཐེག་པ་ལ་དམིགས་པ་དག་ཅིང་འདོད་ཆགས་དང་བྲལ་བ་ཀུན་ནས་སྣང་བ་ཀུན་དུ་ཐོབ་པ་སྦྱིན་པར་བྱ་བའི་ཞིང་གི་ཡོན་ཏན་འཛིན་ཅིང་རྣམ་པར་སྦྱོང་བ། བདུད་ཀྱི་དཀྱིལ་འཁོར་ཐམས་ཅད་ཟིལ་གྱིས་གནོན་པ། འཇིག་རྟེན་མཆོག་གི་བདག་མོ་ལྷས་མཆོད་པ་བསོད་ནམས་ཀྱི་ཞིང་། རྐང་གཉིས་པ་དང་། རྐང་བཞི་པ་དང་། རྐང་མངས་དང་། རྐང་མེད་ཀྱི་སེམས་ཅན་ཐམས་ཅད་ཀྱི་མཆོག་གི་བདག་མོ་རྣམས་ལ་འདི་ལྟ་སྟེ། གྲགས་འཛིན་མ་དང་། གྲགས་སྦྱིན་མ་དང་། སྐྱེ་དགུའི་བདག་མོ་ཆེན་མོ་དང་། སྐྱེ་དགུའི་བདག་མོ་ལེགས་སྐྱེས་མ་དང་། དགའ་མོ་དང་། སྦོམ་དགའ་མོ་དང་། མཛེས་དགའ་མོ་དང་། སེམས་པ་མོ་དང་། མཛེས་མ་དང་། མཐའ་ཡས་མ་དང་། ཡིད་ཀྱི་ཤིང་རྟ་མ་དང་། རྒྱལ་ལྡན་མ་དང་། དཔའ་མོ་དང་། ཉེ་བའི་དཔའ་མོ་དང་། ལྷ་མོ་དང་། ལེགས་ལྷ་མོ་དང་། ལེགས་དཔལ་མོ་དང་། དཔལ་མ་དང་། རབ་སྤྱོད་མ་དང་། རབ་དགའ་མ་དང་། སྙན་པར་སྨྲ་མ་དང་། སྣར་མ་མ་དང་། ཡུལ་འཁོར་སྲུང་མ་དང་། སྲུང་མ་དང་། རྗེ་བོ་མ་དང་། ཕུན་ཚོགས་མ་དང་། ལུས་ཅན་མ་དང་། པད་པ་མ་དང་། དགའ་མ་དང་། རལ་པ་མ་དང་། ཉེ་བའི་རལ་པ་མ་དང་། ཀུན་ནས་རལ་པ་མ་དང་། འབྱུང་བ་མ་དང་། སྣང་ལྡན་མ་དང་། ཡིད་མགྱོགས་མ་དང་། སྐྲ་ལྡན་མ་དང་། ཁྱབ་འཇུག་ལེན་མ་དང་། ཁྱབ་འཇུག་ལྡན་མ་དང་། ཡིད་བཟངས་མ་དང་། ཡིད་མངས་མ་དང་། དཔལ་ལྡན་མཱ་དང་། སྡུག་བསྔལ་མཐར་ཐུག་མ་དང་། ལས་སྦྱིན་མ་དང་། ལས་འབྲས་མ་དང་། རྣམ་རྒྱལ་མ་དང་། རྒྱལ་ལྡན་མ་དང་། ནོར་
བདག་མ་དང་། ནོར་སྦྱིན་མ་དང་། ཆོས་སྦྱིན་མ་དང་། ལེགས་སྦྱིན་མ་དང་། རབ་ཟ་མ་དང་། ཨ་མྲ་མ་དང་། གྲགས་པ་འཇུག་མ་དང་། ཡིད་ལྡན་མ་དང་། རབ་བཞད་མ་དང་། སྲིད་གསུམ་མཐར་བྱེད་མ་དང་། འཁོར་གསུམ་མཐར་བྱེད་མ་དང་། སྡུག་བསྔལ་བ་མོ་དང་། ཡིད་འབྱུང་མ་དང་། ལོ་མ་གསུམ་པ་དང་། པདྨའི་ལོ་མ་དང་། པདྨ་ལྡན་མ་དང་། པདྨའི་འོད་མ་དང་། དཀའ་ཟློག་རྐང་སྤྱོད་མ་དང་། དཀའ་ཟློག་རྐང་སྤྱོད་ལྡན་མ་དང་། འདབ་གསུམ་མ་དང་། འདབ་བདུན་མ་དང་། ཨུཏྤ་ལའི་མདོག་མ་ཞེས་པ་འདི་དག་དང་། གཞན་ཡང་གནས་བརྟན་མ་ཆེན་མོ། །ཉན་ཐོས་མ་ཆེན་མོ་རྣམས། བཅོམ་ལྡན་འདས་ཀྱི་ཞབས་དྲུང་དུ་ཕྱག་འཚལ་བའི་ཕྱིར་ཉེ་བར་ལྷགས་པར་གྱུར་ཏོ། །འཁོར་གྱི་དཀྱིལ་འཁོར་དེ་རྣམས་ཉིད་བྱང་ཆུབ་སེམས་དཔའ་ཆེན་པོའི་རྣམ་པར་འཕྲུལ་པའི་མཐུ་མཐོང་བར་འདོད་ནས་འདུས་ཤིང་འཁོད་པར་གྱུར་ཏེ་ཆོས་ཉན་པའི་ཕྱིར་དང་། སྔགས་ཀྱི་སྤྱོད་པའི་དོན་བསྒྲུབ་པ་ལ་བརྩོན་པར་འདོད་པར་གྱུར་ཏོ། །དེ་ནས་བཅོམ་ལྡན་འདས་ཤཱཀྱ་ཐུབ་པས་བཅོམ་ལྡན་འདས་ཀྱི་འཁོར་གྱི་དཀྱིལ་འཁོར་ལ་གཟིགས་ནས་ལྷག་པའི་བསམ་པ་རིག་པ་དང་། དངོས་པོ་མེད་པའི་རང་བཞིན་ནམ་མཁའི་ངོ་བོ་སེམས་ཅན་གྱི་ཁམས་གསུམ་ལས་ཡང་དག་པར་འདས་པ་མཁྱེན་ནས་སེམས་དཔའ་ཆེན་པོ་ལ་བཀའ་སྩལ་ཏོ། །སེམས་དཔའ་ཆེན་པོ་སེམས་ཅན་གྱི་དོན་གྱི་སྤྱོད་པ་ལ་སོ་སོར་སོམས་ཤིག །བསམ་པ་ཇི་ལྟ་བ་བཞིན་དུ་མངོན་པར་འདོད་པའི་ལས་ཀྱི་འབྲས་བུ་ལ་དད་པ་དང་ལྡན་པ། སྔགས་ཀྱི་སྤྱོད་པའི་དོན་ཡང་དག་པར་ཐོབ་པ་ཞེས་བྱ་བའི་ཆོས་ཀྱི་ཚིག་དང་། ཞི་བའི་ཚིག་དང་། ཐར་པའི་ཚིག་དང་། རྟོག་པའི་སྒྲུབ་པ་དང་། རྣམ་པར་རྟོག་པའི་མཉམ་པ་ཉིད་ཐོབ་པར་བྱེད་པ། དེ་བཞིན་གཤེགས་པའི་སྟོབས་བཅུ་ཀུན་གྱི་སྟོབས་དང་། བདུད་ཀྱི་སྟོབས་ཐམས་ཅད་ཟིལ་གྱིས་གནོན་པར་བྱེད་པ་ཞེས་བྱ་བའི་བྱང་ཆུབ་སེམས་དཔའི་ཏིང་ངེ་འཛིན་སྒོམས་ཤིག །དེ་ནས་བཅོམ་
ལྡན་འདས་ཀྱིས་བཀའ་སྩལ་མ་ཐག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་སྙོམས་པར་ཞུགས་པར་གྱུར་ཏོ། །སྤྱན་རས་གཟིགས་དབང་ཕྱུག་སྙོམས་པར་ཞུགས་མ་ཐག་ཏུ། ཇི་ལྟར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་དག་པར་རབ་ཏུ་གཡོས་ཏེ་སྣང་བ་ཆེན་པོས་གསལ་བར་བྱས་ནས། རང་གི་རྫུ་འཕྲུལ་གྱི་སྟོབས་བསྐྱེད་པ་སྟོན་པར་གྱུར་ཅིང་། རང་གི་སྔགས་ཀྱི་ཚིག་ཀྱང་གསུངས་པར་གྱུར་ཏོ། །རྟོག་པའི་སྔགས་རྣམས་ཀྱང་སྔགས་དུ་མ། ཐུན་མོང་པ་ཅིག་གིས་རིམ་པ་ལས་མ་འདས་པར་འབྱུང་བ་ནི། ན་མཿསམནྟ་བུདྡྷཱ་ནཱཾ་ཨ་བྷཱ་བ། སྭ་བྷཱ་བ། ས་མུངྒ་ཏཱ་ནཱཾ། ན་མཿ པྲ་ཏྱེ་ཀ་བུདྡྷཱ་ཨཱཪྱ་ཤྲཱ་བ་ཀཱ་ནཱཾ། ན་མོ་བོ་དྷི་སཏྭཱ་ནཱཾ། ད་ཤ་བྷུ་མི་པྲ་ཏིཥྛི་ཏེ་ཤ་ར་ཎཾ་བོ་དྷི་སཏྭཱ་ནཱཾ། མ་ཧཱ་སཏྭ་ནཱཾ། མ་ཧཱ་སཏྭཱ་ནཱཾ། ཏདྱ་ཐཱ། ཨོཾ་ཁ་ཁ། ཁཱ་ཧི། དུཥྚ་སཏྭཱ་ད་མ་ཀ །ཨ་སི། མུ་ས་ལ། པ་ར་ཤུ། པཱ་ཤ །ཧསྟི། ཙ་ཏུར་མུ་ཁ། ཥཊ་ཙ་ར་ཎ། གཙྪ་གཙྪ། མ་ཧཱ་བིགྷྣཱ་ན། བིགྷྣཱ་ན་ཏ་ཀ། །བི་ཀྲྀ་ཏཱ་ནན། སརྦ་བྷཱུ་ཏ། བྷེ་ཡཾ་ཀ་ར། ཨཊྚཱཊྚ། ཧཱ་ས་ནཱ་དི་ནེ། བྱཱ་གྷྲ་ཙརྨ་ནི་བཱ་ས་ན། ཀུ་རུ་ཀུ་རུ་སརྦ་ཀརྨ་ཎཱཾ། ཙྪིནྡ་ཙྪིནྡ། བྷིནྡ་བྷིནྡ། ས་ར་མུ་དྲཾ། ཨཱ་ཀརྵ་ཨཱ་ཀརྵ། བྷཱུ་ཏཱ་ན། ནིརྨ་ཐ་ན། སརྦ་དུཥྚཱཾ། པྲ་བེ་ཤ་ཡ། མཎྜལ་མ་དྷྱེ། བེེ་བ་སྭ་ཏ་ཛཱི་བི་ཏཱ་ན་ཏཱ་། ཀ་ར་ཀུ་རུ་ཀུ་རུ་མ་མ་ཀྱཱརྱཱཾ། ད་ཧ་ད་ཧ། པ་ཙ་པ་ཙ། མཱ་བི་ལམྦ་ས་མ་ཡ་མ་ནུ་སྨ་ར། ཧཱུྃ་ཧཱུྃ་ཕཊ། སྥོ་ཊ་ཡ་སྥོ་ཊ་ཡ། སརྦ་ཨཱ་ཤཱ་པ་རི་པཱུ་ར་ཀ། ཧེ་ཧེ་བྷ་ག་བཱ་ན། ཀཉྩི་རཱ་ཡ་སི་མ་མ། སརྦ་ཨཪྠ་སཱངྔ་ཡ་སྭཱ་ཧཱ། འདི་ནི་བཅོམ་ལྡན་འདས་མ་འཕགས་མ་སྒྲོལ་མའི་ཁྲོ་བོ་ཆེན་པོ་སྒྲོལ་མས་གནོན་པ་ཞེས་བྱ་བ་གང་འདོད་པ་དེ་འགུགས་པར་བྱེད་ཅིང་ཐོབ་པར་བྱེད་པ། དབང་པོ་དང་། གཤིན་རྗེའི་རྒྱལ་པོ་ཡང་འགུགས་པར་བྱེད་ཅིང་འཇོམས་པར་བྱེད་པ་ཡིན་ན་སེམས་ཅན་རྣམས་ལྟ་སྨོས་ཀྱང་ཅི་དགོས། ཁྲོ་བོའི་རྒྱལ་
པོ་ཆེན་པོས་གསུངས་མ་ཐག་ཏུ་སེམས་ཅན་ཐམས་ཅད་ཉམ་ཐག་ཅིང་འཇིགས་སྐྲག་སྟེ་ཡིད་སྐྱོ་ཞིང་སྙིང་གས་པར་གྱུར་ནས། སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་ཆེན་པོ་མ་གཏོགས་པ་སྐྱབས་གཞན་མེད། སྐྱོབ་པ་གཞན་མེད། དཔུང་གཉེན་གཞན་མེད་པས་བཅོམ་ལྡན་འདས་ཀྱི་དྲུང་དུ་ཉེ་བར་ལྷགས་པར་གྱུར་ཏོ། །དེ་ནས་གང་ལ་ལ་ས་ལ་སྤྱོད་པ་དང་། མཁའ་ལ་སྤྱོད་པ་དང་། བརྟན་པ་དང་། གཡོ་བ་དང་། མངལ་སྐྱེས་དང་། སྒོང་སྐྱེས་དང་། དྲོད་གཤེར་སྐྱེས་དང་། བརྫུས་ཏེ་སྐྱེས་པ་སེམས་ཅན་གྱི་གྲངས་སུ་གཏོགས་པ་འཇིག་རྟེན་གྱི་ཁམས་མཐའ་ཡས་ཤིང་མུ་མེད་པ་ན་རྣམ་པར་གནས་པ་སྟེང་དང་། འོག་དང་། ཐད་ཀ་དང་། ཕྱོགས་དང་ཕྱོགས་བྲལ་རྣམས་སུ་སྐད་ཅིག་དེ་དང་། ཡུད་ཙམ་དེ་ལ་གབ་པ་རྣམས་ཁྲོ་བོའི་རྒྱལ་པོ་ཆེན་པོས་སྐད་ཅིག་ལ་འདིར་བཀུག་པར་གྱུར་ཏོ། །ཁྲོ་བོའི་རྒྱལ་པོ་སྒྲུབ་པར་གྱུར་པ་འདི་འདོད་ཆགས་དང་མ་བྲལ་བར་གྱུར་པ་རྣམས་ཀྱི་མདུན་དུ་བཟླས་པར་མི་བྱ་སྟེ། དེ་ཅིའི་ཕྱིར་ཞེ་ན། དེའང་འཆི་བར་འགྱུར་རམ། སྐམ་པར་འགྱུར་བའི་ཕྱིར་རོ། །དེ་ཚིག་བྱིན་གྱིས་བརླབས་ནས། སངས་རྒྱས་ཀྱི་སྐུ་གཟུགས་ཀྱི་སྤྱན་སྔའམ། རིང་བསྲེལ་དང་བཅས་པའི་མཆོད་རྟེན་ནམ། དམ་པའི་ཆོས་ཀྱི་གླེགས་བམ་མམ། སྤྱན་རས་གཟིགས་དབང་ཕྱུག་གི་སྤྱན་སྔར་བཟླས་བརྗོད་བྱའི། ལས་གཞན་གྱི་ཆེད་དུའམ། གང་ཡང་རུང་བ་དེར་བཀླག་པར་མི་བྱ་སྟེ། ཅིའི་ཕྱིར་ན་ལྟས་ངན་ཆེན་པོ་དང་། མྱ་ངན་ཆེན་པོ་དང་། བདག་ཉིད་ཉེ་བར་འཇོམས་པར་འགྱུར་བའི་ཕྱིར་རོ། །སངས་རྒྱས་བཅོམ་ལྡན་འདས་རྣམས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འབའ་ཞིག་ནི་ཐུགས་རྗེ་མཆོག་དང་ལྡན་པ་ཐམས་ཅད་མཁྱེན་པའི་ཡེ་ཤེས་ཀྱི་སྤྱོད་པ་སྒྲུབ་ཅིང་རྗེས་སུ་འཇུག་པ་སེམས་ཅན་ཐམས་ཅད་དབང་དུ་བྱེད་པ། ཆོས་ཀྱི་ཚུལ་ཡང་དག་པར་གནས་པར་བྱེད་པ། སེམས་ཅན་གྱི་ཁམས་མ་ལུས་པ་མྱ་ངན་ལས་འདས་པ་ཐོབ་པར་བྱེད་པ། བསྟན་པ་
མེད་པར་བསྟན་པ་དང་། ལམ་གསུམ་ལ་ཡང་དག་པར་སྦྱོར་བ་དང་། དཀོན་མཆོག་གི་གདུང་རྒྱུན་མི་འཆད་པ་དང་། སྔགས་ཀྱི་སྤྱོད་པ་གསལ་བར་བྱེད་པ་དང་། ཐུགས་རྗེ་ཆེན་པོའི་མཐུའི་རྒྱུ་མཐུན་པའི་ཐུགས་ཀྱིས་བདུད་ཀྱི་སྟོབས་ཟིལ་གྱིས་གནོན་པ་དང་། བགེགས་ཆེན་པོ་རྣམ་པར་གཞིག་པ་དང་། གདུག་པའི་རྒྱལ་པོ་བཟློག་པ་དང་། བདག་གི་སྟོབས་མངོན་པར་འཕེལ་བ་དང་། གཞན་གྱི་སྟོབས་ཟློག་པར་བྱེད་པ་དང་། རེངས་པ་དང་། ལྟུང་བ་དང་། ཉམས་དགང་འཆོས་པ་དང་། སྐེམས་པ་དང་། དགའ་བ་དང་། རང་གི་སྔགས་ཀྱི་སྤྱོད་པ་གསལ་བར་བྱེད་པ་དང་། ཚེ་དང་། ནད་མེད་པ་དང་། རང་གི་དབང་ཕྱུག་མངོན་པར་འཕེལ་བ་དང་། མྱུར་དུ་ལས་རྗེས་སུ་སྒྲུབ་པ་དང་། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་དང་། ཡང་དག་པར་སྡོམ་པ་དང་། དེ་དག་གི་རྒྱུ་མཚན་དང་། རྒྱུ་ལ་ཐམས་ཅད་དུ་རྟོག་གེ་པ་དང་། རྣམ་པར་རྟོག་གེ་པ་དང་བྲལ་བའི་སེམས་ཀྱིས་སྨྲས་སོ། །དེ་ནས་ཀླུ་དང་། ཀླུ་ཆེན་པོ་དང་། གནོད་སྦྱིན་དང་། གནོད་སྦྱིན་ཆེན་པོ་དང་། སྲིན་པོ་དང་། སྲིན་པོ་ཆེན་པོ་དང་། ཤ་ཟ་དང་། ཤ་ཟ་ཆེན་པོ་དང་། སྲུལ་པོ་དང་། སྲུལ་པོ་ཆེན་པོ་དང་། ལུས་སྲུལ་པོ་དང་། ལུས་སྲུལ་པོ་ཆེན་པོ་དང་། མ་མོ་དང་། མ་མོ་ཆེན་མོ་དང་། གྲུལ་བུམ་དང་། གྲུལ་བུམ་ཆེན་མོ་དང་། གཅན་གཟན་དང་། གཅན་གཟན་ཆེན་པོ་དང་། རོ་ལངས་དང་། རོ་ལངས་ཆེན་པོ་དང་། ཀམ་པོ་ཛ་དང་། ཀམ་པོ་ཛ་ཆེན་པོ་དང་། སྲིང་མོ་དང་། སྲིང་མོ་ཆེན་མོ་དང་། མཁའ་འགྲོ་མ་དང་། མཁའ་འགྲོ་མ་ཆེན་མོ་དང་། གཞིབས་པ་དང་། གཞིབས་པ་ཆེན་པོ་དང་། གནོན་པོ་དང་། གནོན་པོ་ཆེན་པོ་དང་། བྱིས་པ་དང་། བྱིས་པ་ཆེན་པོ་དང་། བྲམ་པ་དང་། བྲམ་པ་ཆེན་པོ་དང་། ནད་དང་། ནད་ཆེན་པོ་དང་། བརྗེད་བྱེད་དང་། བརྗེད་བྱེད་ཆེན་པོ་དང་། གདོན་དང་།
གདོན་ཆེན་པོ་དང་། ནམ་མཁའ་མ་མོ་དང་། ནམ་མཁའ་མ་མོ་ཆེན་མོ་དང་། གཟུགས་ཅན་མ་དང་། གཟུགས་ཅན་མ་ཆེན་མོ་དང་། གཟུགས་ངན་མ་དང་། གཟུགས་ངན་མ་ཆེན་མོ་དང་། ངུ་འབོད་དང་། ངུ་འབོད་ཆེན་པོ་དང་། གྲིབ་གནོན་དང་། གྲིབ་གནོན་ཆེན་པོ་དང་། སྦོད་གཏོང་དང་། སྦོད་གཏོང་ཆེན་པོ་དང་། ཅི་བགྱི་དང་། ཅི་བགྱི་ཆེན་པོ་དང་། གནོད་སྦྱིན་མོ་དང་། གནོད་སྦྱིན་མོ་ཆེན་མོ་དང་། ཤ་ཟ་མོ་དང་། ཤ་ཟ་མོ་ཆེན་མོ་དང་། རིམས་ནད་དང་། རིམས་ནད་ཆེན་པོ་དང་། རིམས་ཉིན་གཅིག་པ་དང་། རིམས་ཉིན་གཅིག་པ་ཆེན་པོ་དང་། རྟག་པའི་རིམས་དང་། རིམས་མི་བཟད་པ་རྣམས་དང་། རྟག་པ་ལས་བྱུང་བའི་རིམས་དང་། ཡུད་ཙམ་པ་དང་། རླུང་ལས་གྱུར་པ་དང་། མཁྲིས་པ་ལས་གྱུར་པ་དང་། བད་ཀན་ལས་གྱུར་པ་དང་། འདུས་པ་ལས་གྱུར་པ་དང་། གཅོང་དང་གཅོང་ཆེན་པོ་དང་། གྲུབ་པ་དང་། གྲུབ་པ་ཆེན་པོ་དང་། སྦྱོར་ལྡན་དང་། སྦྱོར་ལྡན་ཆེན་པོ་དང་། དྲང་སྲོང་དང་། དྲང་སྲོང་ཆེན་པོ་དང་། མིའམ་ཅི་དང་། མིའམ་ཅི་ཆེན་པོ་དང་། ལྟོ་འཕྱེ་ཆེན་པོ་དང་། ལྟོ་འཕྱེ་ཆེན་པོ་ཆེན་པོ་དང་། དྲི་ཟ་དང་། དྲི་ཟ་ཆེན་པོ་དང་། ལྷ་མ་ཡིན་དང་། ལྷ་མ་ཡིན་ཆེན་པོ་དང་། མི་དང་མི་ཆེན་པོ་དང་། ལྗོངས་དང་། ལྗོངས་ཆེན་པོ་དང་། རྒྱ་མཚོ་དང་། རྒྱ་མཚོ་ཆེན་པོ་དང་། ཆུ་ཀླུང་དང་། ཆུ་ཀླུང་ཆེན་པོ་དང་། རི་དང་། རི་ཆེན་པོ་དང་། གཏེར་དང་། གཏེར་ཆེན་པོ་དང་། ས་དང་། ས་ཆེན་པོ་དང་། ཤིང་དང་། ཤིང་ཆེན་པོ་དང་། འདབ་ཆགས་དང་། འདབ་ཆགས་ཆེན་པོ་དང་། རྒྱལ་པོ་དང་། རྒྱལ་པོ་ཆེན་པོ་དང་། བརྒྱ་བྱིན་དང་། དབང་པོ་ཆེན་པོ་དང་། ནོར་ལྷའི་བུ་དང་། སྒྲ་སྒྲོགས་དང་། འབྱུང་པོའི་བདག་པོ་དང་། དབང་ལྡན་དང་། གཤིན་རྗེ་དང་། ཚངས་པ་དང་། ཚངས་པ་ཆེན་པོ་དང་། ཉི་མའི་བུ་དང་། ནོར་སྦྱིན་དང་། ཡུལ་འཁོར་སྲུང་དང་། འཕགས་སྐྱེས་པོ་དང་། མིག་མི་བཟང་དང་།
ལུས་ངན་པོ་དང་། གང་བ་བཟང་པོ་དང་། ནོར་བུ་བཟང་པོ་དང་། ལྔས་རྩེན་དང་། རྨུགས་འཛིན་དང་། རེངས་འཛིན་དང་། ཀུཥྨ་འཛིན་དང་། ལྗང་སྔོ་དང་། སྐྲ་ལྗང་སྔོ་དང་། སེངྒེ་དང་། འཕྲོག་མ་དང་། དགའ་བྱེད་དང་། ནོར་བྱེད་དང་། ཆུའི་དབང་པོ་དང་། འཇིག་རྟེན་དབང་པོ་དང་། ཉེ་བའི་དབང་པོ་དང་། གསང་བ་དང་། གསང་བ་ཆེན་པོ་དང་། གཡོ་བ་དང་། གཡོ་བྱེད་དང་། ཆུ་སྟོད་དང་། རྟག་པའི་རི་དང་། ཁ་བའི་རི་དང་། རི་ཆེན་པོ་དང་། མིག་བརྩེགས་པ་དང་། མགོ་བོ་གསུམ་པ་ཞེས་པ་འདི་རྣམས་དང་། གཞན་ཡང་གནོད་སྦྱིན་གྱི་སྡེ་དཔོན་ཆེན་པོ་གནོད་སྦྱིན་བྱེ་བ་ཁྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་ཏེ། བྱང་ཆུབ་སེམས་དཔའི་བྱིན་གྱིས་བརླབས་དང་། རྫུ་འཕྲུལ་གྱི་སྟོབས་བསྐྱེད་པས་ཆོས་མཉན་པའི་ཕྱིར་འཁོར་གྱི་དཀྱིལ་འཁོར་ཆེན་པོ་དེ་ཉིད་དུ་འདུས་ཤིང་འདུག་པར་གྱུར་ཏོ། །གང་ཡང་སྲིན་པོའི་རྒྱལ་པོ་ཆེན་པོ་སྲིན་པོ་བྱེ་བ་ཁྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་བ་ཁྲོ་བོའི་རྒྱལ་པོ་ཆེན་པོས་བཀུག་པ་འདི་ལྟ་སྟེ། བྲོས་པ་དང་། འབྲོས་བྱེད་དང་། རྣམ་པར་འཇུ་བྱེད་དང་། གཟེར་གྱི་རྣ་བ་དང་། བུམ་པའི་རྣ་མ་དང་། ཀུན་ནས་རྣ་མ་དང་། གཤིན་རྗེ་དང་། རྣམ་པར་འཇིགས་བྱེད་དང་། འཇིགས་སུ་རུང་བ་དང་། དྲག་པོ་དང་། ཤིན་ཏུ་དྲག་པོ་དང་། མི་བཟད་པ་དང་། སྡིག་ལྡན་དང་། དབང་པོ་རྒྱལ་དང་། འཐབ་པ་དང་། ལེགས་པར་འཐབ་པ་དང་། མདུང་དང་། མདུང་རྩེ་གསུམ་དང་། མགོ་བོ་གསུམ་པ་དང་། མགོ་བོ་མཐའ་ཡས་པ་ཞེས་པའང་ཆོས་མཉན་པའི་ཕྱིར་འདུས་པར་གྱུར་ཏོ། །གང་ཡང་ཤ་ཟ་དང་། ཤ་ཟ་ཆེན་པོ་དང་། ཤ་ཟ་ཆེན་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་བསྐོར་བ་དེ་རྣམས་ཀྱང་འདི་ལྟ་སྟེ། འཐུང་གཅོད་དང་། ཉེ་བའི་འཐུང་གཅོད་དང་། ལེགས་པར་འཐུང་གཅོད་དང་། མཐའ་ཡས་འཐུང་གཅོད་དང་། ཡིད་ཀྱི་ཤིང་རྟ་དང་། ལེགས་པར་ཡིད་ཀྱི་ཤིང་རྟ་དང་། ལེགས་
པར་འདྲེན་པ་དང་། ཟ་བྱེད་དང་། སྤུ་བཟང་པོ་དང་། དྲག་པོའི་གཟུགས་ཅན་ཞེས་པ་དེ་རྣམས་ཀྱང་ཆོས་མཉན་པའི་ཕྱིར་འདུས་པར་གྱུར་ཏོ། །གང་ཡང་ཀླུའི་རྒྱལ་པོ་ཀླུ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་བསྐོར་བའི་ཁྲོ་བོའི་རྒྱལ་པོས་བྱང་ཆུབ་སེམས་དཔའི་རྫུ་འཕྲུལ་གྱི་སྟོབས་བསྐྱེད་པས་བཀུག་པ་འདི་ལྟ་སྟེ། དགའ་བོ་དང་། ཉེ་དགའ་བོ་དང་། ཟླ་བ་དང་། ཉེ་བའི་ཟླ་བ་དང་། ནོར་རྒྱས་ཀྱི་བུ་དང་། མཐའ་ཡས་དང་། འཇོག་པོ་དང་། པདྨ་དང་། པདྨ་ཆེན་པོ་དང་། དུང་སྐྱོང་དང་། དུང་དང་། དུང་སྐྱོང་མ་དང་། སྟོབས་ཀྱི་རྒྱུ་དང་། རིགས་ལྡན་དང་། བརྫུན་པའི་བཏུང་བ་དང་། བུམ་པ་སྦྱིན་དང་། རྡོ་རྗེ་ཅན་དང་། ཙམ་པའི་བུ་དང་། ཡིད་ལྡན་ཀླུ་དང་། ང་རྒྱལ་འཇོམས་དང་། ཌཾ་ཀུ་ར་དང་། ཉེ་བའི་ཌཾ་ཀུ་ར་དང་། ལ་ཀུ་ཊཱ་དང་། ལ་ཀུ་ཊཱ་ཆེན་པོ་དང་། དཀར་པོ་དང་། དཀར་པོ་བཟང་པོ་དང་། སྔོན་པོ་དང་། སྔོན་པོ་ཆུ་སྦྱིན་དང་། འོ་མའི་ཆུ་དང་། སོག་མ་མེད་དང་། རྒྱ་མཚོ་དང་། ཉེ་བའི་རྒྱ་མཚོ་ཞེས་པ་འདི་རྣམས་དང་གཞན་ཡང་ཀླུའི་རྒྱལ་པོ་ཆེན་པོ་ཀླུ་བརྒྱ་སྟོང་ཕྲག་དུ་མས་ཡོངས་སུ་བསྐོར་བ་དེ་རྣམས་ཆོས་མཉན་པའི་ཕྱིར་འཁོར་གྱི་དཀྱིལ་འཁོར་ཆེན་པོ་དེར་འདུས་ཤིང་འདུག་པར་གྱུར་ཏོ། །གང་ཡང་དྲང་སྲོང་དང་དྲང་སྲོང་ཆེན་པོ་དེ་རྣམས་འདི་ལྟ་སྟེ། རྒྱུན་ཤེས་ཀྱི་བུ་དང་། གནས་འཇོག་དང་། གཽ་ཏ་མ་དང་། སྐལ་ལྡན་ཤིང་རྟ་དང་། ཛ་ཧྣུ་དང་། ཨཾ་གི་རས་དང་། ཨ་མསྟི་དང་། སུ་ལ་སྟི་དང་། རི་བྱི་དང་། རྒྱས་པ་དང་། ནག་པོ་དང་། གཽ་ཏམ་ནག་པོ་དང་། མེ་དང་། མེའི་རྒྱུད་དང་། ཏྲཾཿགི་རས་དང་། ཛཱ་མད་ཨགྣི་དང་། ཡོད་པ་པ་དང་། ཐུབ་པ་དང་། ཐུབ་པ་མཆོག་དང་། བེེ་ས་མྦ་ཡ་ན་དང་། རྩིབ་ལོགས་སྐྱེས་དང་། དགྲ་སྟ་དང་། རྣལ་འབྱོར་དབང་ཕྱུག་དང་། པི་སྦ་ལ་དང་། པི་སྦ་ལ་ཟ་བ་དང་། གྲོག་མཁར་བ་དང་། བདུད་མདའ་ཞེས་པ་འདི་རྣམས་དང་། གཞན་ཡང་དྲང་སྲོང་ཆེན་པོ་བརྒྱ་སྟོང་ཕྲག་དུ་མས་ཡོངས་སུ་བསྐོར་བ་དེ་རྣམས་འཁོར་གྱི་དཀྱིལ་འཁོར་ཆེན་པོ་དེར་
ཉེ་བར་ཕྱིན་ཏེ་བཅོམ་ལྡན་འདས་ཤཱཀྱ་ཐུབ་པ་ལ་ཕྱག་འཚལ་ནས་གསང་སྔགས་སྤྱོད་པའི་དོན་དང་། བྱང་ཆུབ་སེམས་དཔའི་སྡེ་སྣོད་མཉན་ཅིང་རྗེས་སུ་ཡི་རང་བར་འདོད་པས་འཁོད་པར་གྱུར་ཏོ། །གང་ཡང་ལྟོ་འཕྱེ་ཆེན་པོའི་རྒྱལ་པོ་དེ་རྣམས་ཀྱང་འཁོར་གྱི་དཀྱིལ་འཁོར་ཆེན་པོ་དེར་རབ་ཏུ་ཞུགས་ཤིང་འཁོད་པར་གྱུར་པ་འདི་ལྟ་སྟེ། བྷེ་རཎྜ་དང་། བྷུ་རུཎྜ་དང་། མ་རུཎྜ་དང་། འོད་ཟེར་དང་། འོད་ཟེར་འབར་བ་ཞེས་པའོ། །གང་ཡང་ནམ་མཁའ་ལྡིང་གི་རྒྱལ་པོ་དེ་རྣམས་ཀྱང་ནམ་མཁའ་ལྡིང་བརྒྱ་སྟོང་ཕྲག་དུ་མས་ཡོངས་སུ་བསྐོར་ཏེ་འཁོར་གྱི་དཀྱིལ་འཁོར་དེར་འདུས་པར་གྱུར་པ་འདི་ལྟ་སྟེ། འདབ་བཟང་དང་། འདབ་དཀར་དང་། ཀླུ་དང་། འདབ་འགྲོ་དང་། འདབ་བཟང་སྐྱེས་དང་། ཡིད་མགྱོགས་དང་། ཀླུ་འཇོམས་དང་། རྣམ་འདུད་བུ་དང་། བྷ་ར་དྷྭ་ཛ་དང་། དགེ་མཚན་དང་། དགེ་མཚན་ཆེན་པོ་དང་། འདབ་ཆགས་རྒྱལ་པོ་སྟེ། དེ་རྣམས་ཀྱང་འཁོར་གྱི་དཀྱིལ་འཁོར་ཆེན་པོ་དེར་འདུས་པར་གྱུར་ཏོ། །གང་ཡང་མི་འམ་ཅིའི་རྒྱལ་པོ་མི་འམ་ཅི་བརྒྱ་སྟོང་ཕྲག་དུ་མས་བསྐོར་བ་དེ་རྣམས་ཀྱང་འདི་ལྟ་སྟེ། ལྗོན་པ་དང་། ཉེ་བའི་ལྗོན་པ་དང་། ལེགས་པའི་ལྗོན་པ་དང་། མཐའ་ཡས་ལྗོན་པ་དང་། འཇིག་རྟེན་ལྗོན་པ་དང་། ལྗོན་པ་གསལ་བ་དང་། བྲང་རྒྱས་དང་། བྲང་རྒྱས་ཆེན་པོ་དང་། ཡིད་ཀྱི་གཟི་བརྗིད་དང་། གཟི་བརྗིད་ཆེན་པོ་དང་། རྫུ་འཕྲུལ་ཆེན་པོ་དང་། རྣམ་པར་སྒྲོགས་པ་དང་། དབྱངས་བཟང་པོ་དང་། ཡིད་འོང་དང་། སེམས་སྐྱེད་པར་བྱེད་པ་དང་། སྨྱོ་བྱེད་དང་། ད་ན་དྷཱ་ཏ་དང་། བཏང་སྙོམས་དང་། སྙིང་རྗེ་དང་། སྙིང་རྗེ་མེད་པ་ཞེས་པ་འདི་རྣམས་དང་། གཞན་ཡང་མི་འམ་ཅིའི་རྒྱལ་པོ་སྟོང་ཕྲག་གིས་ཡོངས་སུ་བསྐོར་བ་རྣམས་ཆོས་མཉན་པའི་ཕྱིར་འདུས་པར་གྱུར་ཏོ། །དེ་བཞིན་དུ་མི་མཇེད་ཀྱི་བདག་པོ་ཚངས་པ་དང་། ཚངས་པ་ཆེན་པོ་དང་། ཀུན་དུ་འོད་གསལ་དང་། རབ་ཏུ་འོད་གསལ་དང་། དགའ་བའི་འོད་དང་། བསོད་ནམས་འོད་དང་། མི་
ཆེ་བ་དང་། མི་གདུང་བ་དང་། འོག་མིན་དང་། འོག་བཟང་དང་། འཇིག་རྟེན་མཐའ་དང་། ཅི་ཡང་མེད་པའི་སྐྱེ་མཆེད་དང་། ཅི་ཡང་མེད་པ་མིན་པ་དང་། ནམ་མཁའ་མཐའ་ཡས་དང་། ནམ་མཁའ་མཐའ་ཡས་མིན་པ་ཉིད་དང་། གྱ་ནོམ་སྣང་དང་། ཤིན་ཏུ་མཐོང་དང་། ལེགས་པར་སྤྲུལ་པ་དང་། ཡོངས་སུ་སྤྲུལ་པ་དང་། གནས་གཙང་མ་དང་། དགའ་ལྡན་དང་། འཐབ་བྲལ་དང་། སུམ་ཅུ་རྩ་གསུམ་དང་། རྒྱལ་ཆེན་བཞིའི་རིས་དང་། རྟག་མྱོས་དང་། ཕྲེང་ཐོགས་དང་། གཞོང་ཐོགས་དང་། པི་ཝང་གསུམ་པ་དང་། རི་ལ་གནས་པ་དང་། ཁང་པ་བརྩེགས་པ་ལ་གནས་པ་དང་། རྩེ་མོར་གནས་པ་དང་། ལྕང་ལོ་ཅན་ན་གནས་པ་དང་། གྲོང་ན་གནས་པ་དང་། གཞལ་མེད་ཁང་ན་གནས་པ་དང་། ནང་ན་གནས་པ་དང་། བར་སྣང་ལ་རྒྱུ་བ་དང་། ས་ན་གནས་པ་དང་། ཤིང་ལ་གནས་པ་དང་། ཁྱིམ་ན་གནས་པ་དང་། དེ་བཞིན་དུ་ལྷ་མ་ཡིན་གྱི་དབང་པོ་རབ་ཚིམ་དང་། སྟོབས་ལྡན་དང་། ཐགས་ཟངས་རིས་དང་། ལེགས་བཀྲ་དང་། དགེ་བཀྲ་དང་། སྒྲ་གཅན་དང་། ལག་པ་ལ་སོགས་པའི་ལྷ་མ་ཡིན་བྱེ་བ་སྟོང་ཕྲག་དུ་མས་ཡོངས་སུ་བསྐོར་བ་འགྲོས་རྣམ་པ་སྣ་ཚོགས་དང་། ནོར་རྣམ་པ་སྣ་ཚོགས་དང་། ལྷ་དང་གཡུལ་འགྱེད་པའི་ལྷ་མ་ཡིན་དེ་རྣམས་ཀྱང་སངས་རྒྱས་ཀྱི་བྱིན་གྱིས་བརླབས་དང་། བྱང་ཆུབ་སེམས་དཔའི་རྣམ་འཕྲུལ་ལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བར་འདོད་པས་འཁོར་གྱི་དཀྱིལ་འཁོར་དེར་འདུས་པར་གྱུར་ཏོ། །གང་ཡང་གཟའ་དང་། གཟའ་ཆེན་པོའི་འཇིག་རྟེན་གྱི་དོན་དུ་སྤྱོད་པ་བར་སྣང་ལ་སྤྱོད་པ་ལ་འདི་ལྟ་སྟེ། ཉི་མ་དང་། ཟླ་བ་དང་། མིག་དམར་དང་། ལྷག་པ་དང་། ཕུར་བུ་དང་། པ་སངས་དང་། སྤེན་པ་དང་། སྒྲ་གཅན་དང་། ས་འགུལ་དང་། མཇུག་རིངས་དང་། ཐོག་གིས་འཇོམས་པ་དང་། སྐར་མ་དང་། རྒྱལ་མཚན་དང་། དྲག་པོ་དང་། དུ་ལྡན་དང་། དུ་བ་
དང་། རྡོ་རྗེ་དང་། དྲང་སྲོང་དང་། ཆར་དང་། ཉེ་བའི་ཆར་དང་། དོན་ཉམས་དང་། ངེས་པར་ཉམས་དང་། དགོད་པའི་མཐའ་དང་། མཱཥྚི་དང་། རིཥྚི་དང་། དགའ་མ་དང་། འཇིག་རྟེན་མཐའ་དང་། ཟད་པ་དང་། རྣམ་པར་ལྟུང་བྱེད་དང་། མི་ལྟུང་བ་དང་། ཏོག་དང་། གླ་སྒང་དང་། དུས་ཀྱི་མཐའ་དང་། དུར་ཁྲོད་དང་། བི་ཤཱི་ཏ་དང་། དྲག་པོ་དང་། དཀར་པོ་དང་། བྱི་བཞིན་དང་། བྱི་བཞིན་གྱི་བུ་དང་། བྱམས་པ་དང་། ཕུར་བུ་དང་། ཕུར་བུ་གསུམ་པ་དང་། ལུ་བྷ་དང་། རོ་ཏྲ་དང་། བརྟན་པ་དང་། ཉམས་བྱེད་དང་། སྟོབས་ལྡན་དང་། དྲག་པོ་དང་། སྐྱ་རེངས་དང་། རྣམ་པར་དགོད་པ་དང་། འཆི་ལྟས་མིན་པ་དང་། སྐེམ་བྱེད་དང་། སྡེ་དང་། ཉེ་སྡེ་དང་། གཞོན་ནུ་དང་། རྩེ་བྱེད་དང་། དགོད་བྱེད་དང་། སེམས་པར་བྱེད་པ་དང་། ཐེང་པོ་དང་། གཟུགས་ངན་ཞེས་པ་སྟེ་གཟའ་ཆེན་པོ་དེ་རྣམས་ཀྱང་བརྒྱ་སྟོང་ཕྲག་དུ་མའི་འཁོར་དང་བཅས་པ་སངས་རྒྱས་ཀྱི་བྱིན་གྱིས་བརླབས་ཀྱིས་གཙང་མའི་གནས་དེར་འཁོར་དུ་འདུས་ཤིང་འཁོད་པར་གྱུར་ཏོ། །དེ་ནས་རྒྱུ་སྐར་ནམ་མཁའ་ལ་འགྲོ་ཞིང་རྗེས་སུ་འབྲང་བ་བརྒྱ་སྟོང་ཕྲག་དུ་མས་ཡོངས་སུ་བསྐོར་བ་འདི་ལྟ་སྟེ། ཐ་སྐར་དང་། བྲ་ཉེ་དང་། སྨིན་དྲུག་དང་། སྣར་མ་དང་། མགོ་དང་། ལག་དང་། ནམ་སོ་དང་། རྒྱལ་དང་། སྐག་དང་། མཆུ་དང་། གྲེ་དང་། དབོ་གཉིས་དང་། མེ་བཞི་དང་། ནག་པ་དང་། ས་རི་དང་། ས་ག་དང་། ལྷ་མཚམས་དང་། སྣྲོན་དང་། སྣྲུབས་དང་། ཆུ་སྟོད་དང་། ཆུ་སྨད་དང་། གྲོ་བཞིན་དང་། མོན་གྲུ་དང་། མོན་གྲེ་དང་། ཁྲུམས་སྟོད་དང་། ཁྲུམས་སྨད་དང་། ནམ་གྲུ་དང་། ལྷ་མོ་དང་། བྱི་བཞིན་དང་། སླར་ཡང་འབྱུང་བ་དང་། སྐར་འོད་དང་། ཨདྒི་ར་སཱ་དང་། རྒྱུ་སྐར་ལྡན་མ་དང་། ཉེ་བར་སྡུ་གུ་དང་། ཉེ་བའི་གྲེ་དང་། འཇིག་རྟེན་རབ་མཆོག་དང་། རབ་མཆོག་ལྡན་མ་དང་། དཔལ་ལྡན་མ་དང་། འཇིག་རྟེན་མགོན་པོ་དང་། ཆང་ལྡན་དང་།
རྒྱལ་བ་ཐོབ་པ་དང་། ནོར་ལྡན་དང་། ལྷའི་ནོར་ཞེས་པ་དེ་ལྟར་རྒྱུ་སྐར་རྒྱལ་པོ་དེ་རྣམས་རྒྱུ་སྐར་བརྒྱ་སྟོང་ཕྲག་དུ་མས་ཡོངས་སུ་བསྐོར་ཏེ། སངས་རྒྱས་ཀྱི་བྱིན་གྱིས་བརླབས་ཀྱིས་གནས་གཙང་མའི་གནས་སུ་འཁོར་གྱི་དཀྱིལ་འཁོར་ཆེན་པོ་དེར་འདུས་ཤིང་འཁོད་པར་གྱུར་ཏོ། །ཁྱིམ་སུམ་ཅུ་རྩ་དྲུག་ལ་འདི་ལྟ་སྟེ། ལུག་དང་། གླང་དང་། འཁྲིག་པ་དང་། ཀཪྐ་ཊ་དང་། སེང་གེ་དང་། བུ་མོ་དང་། སྲང་དང་། སྡིག་པ་དང་། གཞུ་དང་། ཆུ་སྲིན་དང་། བུམ་པ་དང་། ཉ་དང་། སྤྲེའུ་དང་། ཉེ་བའི་བུམ་པ་དང་། གསེར་བུམ་དང་། རལ་གྲི་དང་། གླང་པོ་ཆེ་དང་། མ་ཧེ་དང་། ལྷ་དང་། མི་དང་། དགེ་མཚན་དང་། དྲི་ཟ་དང་། འཇིག་རྟེན་དགོངས་པ་དང་། རྒྱལ་བའི་མཆོག་དང་། གཟི་བརྗིད་དང་། ནམ་མཁའ་དང་། གྲིབ་མ་དང་། ས་གཞི་དང་། མུན་པ་དང་། རྡུལ་དང་། ཉེ་བའི་རྡུལ་དང་། སྡུག་བསྔལ་དང་། བདེ་བ་དང་། ཐར་པའི་བྱང་ཆུབ་དང་། རང་བྱང་ཆུབ་དང་། ཉན་ཐོས་དང་། དམྱལ་བའི་རིགས་འཛིན་དང་། གཟི་བརྗིད་ཆེན་པོ་དང་། གཟི་བརྗིད་ཆེན་པོ་ལྡན་པ་དང་། བྱོལ་སོང་དང་། ཡི་དགས་དང་། ལྷ་མ་ཡིན་དང་། ཤ་ཟ་དང་། ཤ་ཟ་མོ་དང་། གནོད་སྦྱིན་དང་། སྲིན་པོ་དང་། འབྱུང་པོ་ཐམས་ཅད་པ་དང་། ཕྱོགས་ཀྱི་གླང་པོ་དང་། སྟེང་འགྲོ་དང་། ཐམས་ཅད་འགྲོ་དང་། རྣམ་བྱེ་དང་། རྣལ་འབྱོར་འགྲོ་དང་། རབ་ཏུ་གནས་པ་དང་། མཆོག་དང་། འབྲིང་དང་། ཐ་མ་ཞེས་པ་འདི་རྣམས་དང་། ཁྱིམ་ཆེན་པོ་ཁྱིམ་བརྒྱ་སྟོང་ཕྲག་དུ་མས་ཡོངས་སུ་བསྐོར་བ་འདི་རྣམས་འཁོར་གྱི་དཀྱིལ་འཁོར་ཆེན་པོར་འདུས་པ་གང་ན་བ་དེར་ཉེ་བར་ཕྱིན་ནས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་རང་རང་གི་གནས་སུ་འཁོད་པར་གྱུར་ཏོ། །གང་ཡང་གནོད་སྦྱིན་ཆེན་མོ་གནོད་སྦྱིན་མོ་བརྒྱ་སྟོང་ཕྲག་བྱེ་བས་བསྐོར་བ་འདི་ལྟ་སྟེ། མིག་བཟང་མ་དང་། སྨིན་མ་བཟང་མོ་དང་། སྐྲ་བཟང་མ་དང་། དབྱངས་སྙན་མ་དང་། བློ་གྲོས་བཟང་མོ་དང་།
དབྱིག་ལྡན་མ་དང་། མིག་བཀྲ་མ་དང་། བསམ་རྫོགས་མ་དང་། གསང་བ་མ་དང་། འོག་བག་མ་དང་། འོག་པག་བཟང་མོ་དང་། པདྨའི་དུས་མ་དང་། མི་འཇིགས་མ་དང་། མི་འཇིགས་སྦྱིན་མ་དང་། རྒྱལ་མ་དང་། རྣམ་པར་རྒྱལ་མ་དང་། ནམ་གྲུ་ཅན་མ་དང་། སྐྲ་ལྡན་མ་དང་། སྐྲ་མཐའ་མ་དང་། རླུང་མ་དང་། ཡིད་འཕྲོག་མ་དང་། ཡིད་ལྡན་མ་དང་། མེ་ཏོག་ལྡན་མ་དང་། མེ་ཏོག་གྲོང་གནས་མ་དང་། སེར་སྐྱ་མོ་དང་། འཕྲོག་མ་དང་། དཔའ་མོ་ལྡན་མ་དང་། དཔའ་མོ་དང་། དཔའ་བཟང་མ་དང་། སྣ་བཟང་མ་དང་། འོད་ལྡན་མ་དང་། ལྷ་མཛེས་མ་དང་། རོ་བཟང་མ་དང་། གསང་མཆོག་མ་དང་། བརྗོད་པ་ལ་གནས་མ་དང་། མྱ་ངན་མེད་མ་དང་། སྣང་བར་མཛེས་མ་དང་། འོད་ལྡན་མ་དང་། ཕུལ་བྱུང་ལྡན་མ་དང་། གཟུགས་ལྡན་མ་དང་། གཟུགས་མཛེས་མ་དང་། དཀར་མིན་དང་། ཞི་བ་མ་དང་། ཕྲ་མོ་མ་དང་། སྡེ་མ་དང་། དགའ་བྱེད་མ་དང་། ཉེ་བར་དགའ་བྱེད་མ་དང་། འཇིག་རྟེན་འདས་མ་ཞེས་པ་སྟེ། གནོད་སྦྱིན་མ་ཆེན་མོ་འདི་རྣམས་གནོད་སྦྱིན་མ་བརྒྱ་སྟོང་ཕྲག་དུ་མས་ཡོངས་སུ་བསྐོར་བ་དེ་རྣམས་ཀྱང་འཁོར་གྱི་དཀྱིལ་འཁོར་ཆེན་པོ་དེར་བཅོམ་ལྡན་འདས་ཤཱཀྱ་ཐུབ་པ་ལ་ཕྱག་འཚལ་ཏེ་འཁོད་པར་གྱུར་ཏོ། །གང་ཡང་ཤ་ཟ་མོ་དག་ཤ་ཟ་མོ་བརྒྱ་སྟོང་ཕྲག་དུ་མས་ཡོངས་སུ་བསྐོར་བ་དེ་རྣམས་ཀྱང་བཅོམ་ལྡན་འདས་ཤཱཀྱ་ཐུབ་པ་ལ་ཕྱག་འཚལ་ཏེ་འདུས་པར་གྱུར་པ་ལ་འདི་ལྟ་སྟེ། རྒྱན་པ་མོ་དང་། ཕྱག་དར་གྱི་ཤ་ཟ་མོ་དང་། དྲག་མོ་ཤ་ཟ་མོ་དང་། ཏ་ལ་ལའི་ཤ་ཟ་མོ་དང་། འབར་བའི་ཤ་ཟ་མོ་དང་། ཐལ་བ་ཟ་མ་དང་། ཤ་ལ་ཟ་བ་མོ་དང་། འཛིན་དཀའ་མ་དང་། འཁྲུལ་བྱེད་མ་དང་། རྨོངས་བྱེད་མ་དང་། སྒྲོགས་བྱེད་མ་དང་། སྐྱེད་བྱེད་མ་དང་། འཇིག་རྟེན་མཐར་གནས་མ་དང་། ཐལ་བའི་མཐའ་ཅན་མ་དང་། འཐུང་གཅོད་ལྡན་མ་དང་། མང་པོ་མ་དང་།
གདུལ་དཀའ་མ་དང་། ཨེ་ལ་མོ་དང་། མཚན་མ་ཅན་མ་དང་། དུ་བའི་མཐའ་ཅན་མ་དང་། དུ་བ་མ་དང་། དུ་བ་བཟང་མོ་མ་ཞེས་པ་ཤ་ཟ་མོ་ཆེན་མོ་འདི་རྣམས་ཤ་ཟ་མོ་བརྒྱ་སྟོང་ཕྲག་དུ་མས་ཡོངས་སུ་བསྐོར་བ་རྣམས་ཀྱང་འཁོར་འདུས་པའི་དཀྱིལ་འཁོར་ཆེན་པོ་དེར་རབ་ཏུ་ཞུགས་པར་གྱུར་ཏོ། །གང་ཡང་མ་མོ་དང་། མ་མོ་ཆེན་མོ་དག་འཇིག་རྟེན་གྱི་རྗེས་སུ་སྤྱོད་ཅིང་སེམས་ཅན་ལ་རྣམ་པར་འཚེ་བར་བྱེད་པ་གཏོར་མ་དང་ཕྲེང་བ་ཉིད་སྡུད་པར་བྱེད་པ་ལ་འདི་ལྟ་སྟེ། ཚངས་མ་དང་། དབང་ཕྱུག་ཆེན་མོ་དང་། ཁྱབ་འཇུག་མ་དང་། གཞོན་ནུ་མ་དང་། རྒན་བྱད་མ་དང་། ཕག་མོ་དང་། དབང་མོ་དང་། གཤིན་རྗེ་མ་དང་། མེ་མོ་དང་། ཉི་མའི་བུ་མོ་དང་། འཇིག་རྟེན་བར་མ་དང་། ཆུ་ལྷ་མོ་དང་། དབང་ལྡན་མོ་དང་། རླུང་ལྷ་མོ་དང་། གཞན་གྱི་སྲོག་འཕྲོག་མ་དང་། ཞལ་རྒྱན་པ་མོ་དང་། དགེ་མཚན་མ་དང་། དགེ་མཚན་མ་ཆེན་མོ་དང་། སྲུལ་མོ་དང་། ལུས་སྲུལ་མོ་དང་། སྐེམ་བྱེད་མ་ཞེས་པ་མ་མོ་ཆེན་མོ་འདི་རྣམས་མ་མོ་བརྒྱ་སྟོང་ཕྲག་དུ་མས་ཡོངས་སུ་བསྐོར་བ་དེ་རྣམས་འཁོར་འདུས་པའི་དཀྱིལ་འཁོར་ཆེན་པོ་དེར། སངས་རྒྱས་ལ་ཕྱག་འཚལ་ལོ་ཞེས་ཚིག་ཏུ་འདོན་ཅིང་འཁོད་པར་གྱུར་ཏོ། །དེ་བཞིན་དུ་མི་དང་མི་མ་ཡིན་པ་བརྒྱ་སྟོང་ཕྲག་དུ་མ་དང་། སེམས་ཅན་དང་སེམས་ཅན་མ་ཡིན་པ་ཇི་སྲིད་དམྱལ་བ་ཆེན་པོ་མནར་མེད་པ་ནས། སྲིད་པའི་རྩེ་མོའི་བར་སྐབས་འདིར་ཐམས་ཅད་ནམ་མཁའི་དཀྱིལ་དུ་གསལ་བར་གྱུར་ཏོ། །སེམས་ཅན་གྱི་ཚོགས་ཀྱི་སྲོག་ཆགས་འགའ་ལ་ཡང་གནོད་པ་མེད་པར་གྱུར་ཏོ། །སངས་རྒྱས་ཀྱི་བྱིན་གྱིས་བརླབས་དང་། བྱང་ཆུབ་སེམས་དཔའི་རྫུ་འཕྲུལ་གྱི་རྒྱན་གྱིས་སེམས་ཅན་ཐམས་ཅད་ཀྱི་སྤྱི་བོ་ན། སངས་རྒྱས་བཅོམ་ལྡན་འདས་དང་། སྤྱན་རས་གཟིགས་དབང་ཕྱུག་བཞུགས་པ་ཡང་དག་པར་མཐོང་བར་གྱུར་ཏོ། །དེ་ནས་བཅོམ་ལྡན་འདས་ཤཱཀྱ་ཐུབ་པ་ཐམས་ཅད་དང་ལྡན་པའི་འཁོར་ལ་སངས་རྒྱས་ཀྱི་སྤྱན་གྱིས་གཟིགས་
ནས་སེམས་དཔའ་ཆེན་པོ་དེ་ལ་བཀའ་སྩལ་ཏོ། །སེམས་ཅན་དག་གསང་སྔགས་ཀྱི་སྤྱོད་པའི་དོན་རྣམ་པར་ངེས་པའི་ཏིང་ངེ་འཛིན་གྱི་ལེའུ་རབ་འབྱམ་བྱང་ཆུབ་སེམས་དཔའི་སྡེ་སྣོད་གང་ད་ལྟ་དེའི་དུས་ལ་བབ་པར་ཤེས་ན་ཤོད་ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་བཅོམ་ལྡན་འདས་ཤཱཀྱ་ཐུབ་པས་རྗེས་སུ་གནང་བས། ནམ་མཁའི་རང་བཞིན་གྱིས་རྒྱན་བཀོད་པ་རྡོ་རྗེ་སྡུག་ཅིང་སྲ་བའི་རྒྱུན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སེམས་དཔའ་ཆེན་པོ་སྙོམས་པར་ཞུགས་མ་ཐག་ཏུ་འཁོར་གྱི་དཀྱིལ་འཁོར་ཆེན་པོ་དེ་ཐམས་ཅད་དཔག་ཚད་བརྒྱ་སྟོང་ཕྲག་དུ་མར་རྡོ་རྗེའི་རང་བཞིན་རྒྱ་ཆེན་པོར་ལྷག་པར་གནས་པར་གྱུར་ཏོ། །དེར་གནོད་སྦྱིན་དང་སྲིན་པོ་དང་། དྲི་ཟ་དང་། རླུང་ལྷ་དང་། ཤ་ཟ་དེ་རྣམས་དང་། མདོར་བསྡུས་ན་སེམས་ཅན་གྱི་ཁམས་ཐམས་ཅད་བྱང་ཆུབ་སེམས་དཔའི་བྱིན་གྱིས་བརླབས་ཀྱིས་གཞལ་ཡས་ཁང་དེ་རྡོ་རྗེ་ནོར་བུ་རིན་པོ་ཆེ་ལྟ་བུར་ཡང་དག་པར་རབ་ཏུ་གནས་སོ། །འཁོད་པར་གྱུར་པ་རྣམས་ཕན་ཚུན་རྣམ་པར་འཚེ་བ་མེད་དོ། །དེ་ནས་སེམས་དཔའ་ཆེན་པོ་དེ་འཁོར་ཆེན་པོ་འདུས་པར་མཁྱེན་ནས། ཁྲོ་བོའི་རྒྱལ་པོ་སྒྲོལ་མས་ནོན་པ་ལ་བོས་པར་གྱུར་ཏོ། །ཀྱེ་ཀྱེ་ཁྲོ་བོ་ཆེན་པོ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་འདུས་པ་འཁོར་གྱི་དཀྱིལ་འཁོར་ཆེན་པོ་འདུས་པ་འདིའི་སེམས་ཅན་ཐམས་ཅད་སྲུངས་ཤིག །དབང་དུ་གྱིས་ཤིག །གདུག་པ་རྣམས་ཐུལ་ཅིག །ཞི་བ་རྣམས་སད་པར་གྱིས་ཤིག །མ་དད་པ་རྣམས་དད་པར་གྱིས་ཤིག །ཇི་སྲིད་པའི་རིག་སྔགས་དང་། གསང་སྔགས་སྤྱོད་པ་རྗེས་སུ་སྒྲུབ་པ་བྱང་ཆུབ་སེམས་དཔའི་སྡེ་སྣོད་རྒྱ་ཆེན་པོ་དེ་ཉིད་ཀྱི་རིག་སྔགས་དང་། གསང་སྔགས་ཀྱི་སྤྱོད་པའི་དཀྱིལ་འཁོར་གྱི་ཆོ་ག་འཆང་བ་དེ་སྲིད་ཀྱི་བར་དུ་འདི་དག་གི་ཕྱི་རོལ་དུ་སོང་ལ་སྲུངས་ཤིག །དེ་སྐད་ཅེས་སྨྲས་པ་དང་། ཁྲོ་བོའི་རྒྱལ་པོ་ཆེན་པོ་བཀའ་མནོས་ནས། རྣམ་པར་འགྱུར་བ་ཆེན་པོའི་གཟུགས་ཡོངས་སུ་
བརྟགས་ཏེ་སེམས་ཅན་ཐམས་ཅད་བསྲུང་བར་བྱ་བའི་དོན་དང་། བརྟན་པར་བྱ་བའི་དོན་དུ་བཀོད་པ་ཆེན་པོའི་འཁོར་གྱི་དཀྱིལ་འཁོར་དུ་ཁྲོ་བོའི་རྒྱལ་པོ་སྒྲོལ་མས་ནོན་པ་ཁྲོ་བོ་བརྒྱ་སྟོང་ཕྲག་དུ་མས་ཡོངས་སུ་བསྐོར་བ་ཕྱོགས་བཞི་ཀུན་ནས་དེ་ལྟར་སྟེང་དང་འོག་དང་ཐད་ཀར་སྒྲ་དྲག་པོ་འདོན་བཞིན་པས་རབ་ཏུ་གནས་པར་གྱུར་ཏོ། །དེ་ནས་སེམས་ཅན་དེ་རྣམས་ཞི་བ་ཉིད་ཀྱི་ཡིད་དང་ལྡན་པས་ཡང་དག་པར་འཇུག་པའི་བཀའ་ལས་མི་འདའ་བར་གྱུར་ཏེ། སྒྲ་འདི་ལྟ་བུའང་ཐོས་པར་གྱུར་ཏོ། །གང་དམ་ཚིག་འདི་འདའ་བར་བྱེད་པ་འདི་དག་ནི་ཨརྫ་ཀའི་དོག་པ་བཞིན་དུ་མགོ་བོ་ཚལ་པ་བརྒྱར་འགས་པར་འགྱུར་ཏེ། བྱང་ཆུབ་སེམས་དཔའི་བྱིན་གྱིས་བརླབས་ཀྱང་དེ་ཡིན་ནོ། །དེ་ནས་ཡང་བྱང་ཆུབ་སེམས་དཔའ་དེ་རང་གི་རིག་སྔགས་དང་། གསང་སྔགས་ཀྱི་སྤྱོད་པའི་དོན་དུ་ཆོས་ཀྱི་ཚིག་གསུངས་པ་ཆོས་གཅིག་གིས་བྱང་ཆུབ་སེམས་དཔའ་སེམས་དཔའ་ཆེན་པོའི་གསང་སྔགས་འགྲུབ་པར་གྱུར་ཏོ། །གཅིག་པོ་གང་ཞེ་ན། འདི་ལྟ་སྟེ། ཆོས་ཐམས་ཅད་སྤྲོས་པ་མེད་པའི་རྣམ་པར་ཡང་དག་པར་རྗེས་སུ་མི་མཐོང་བའོ། །ཆོས་གཉིས་པོ་དག་ལ་རབ་ཏུ་གནས་ན་བྱང་ཆུབ་སེམས་དཔའ་སེམས་དཔའ་ཆེན་པོའི་གསང་སྔགས་འགྲུབ་པར་འགྱུར་ཏེ། གཉིས་པོ་དག་གང་ཞེ་ན། བྱང་ཆུབ་ཀྱི་སེམས་ཡོངས་སུ་མི་གཏོང་བ་དང་། སེམས་ཅན་ཐམས་ཅད་ལ་མཉམ་པ་ཉིད་དོ། །ཆོས་གསུམ་རྣམས་ཀྱི་རང་གི་གསང་སྔགས་ཀྱི་སྤྱོད་པའི་དོན་ངེས་པར་བརྟན་པ་ཡོངས་སུ་རྫོགས་པར་འགྱུར་ཏེ། གསུམ་གང་ཞེ་ན། སེམས་ཅན་ཡོངས་སུ་མི་གཏོང་བ་ཉིད་དང་། བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་སྲུང་བ་ཉིད་དང་། རང་གི་གསང་སྔགས་ཡོངས་སུ་མི་གཏོང་བ་ཉིད་དོ། །ཆོས་བཞི་ཡང་དག་པར་ལྡན་ན་སེམས་དང་པོ་བསྐྱེད་པའི་བྱང་ཆུབ་སེམས་དཔའི་རིག་སྔགས་འགྲུབ་པར་འགྱུར་ཏེ། བཞི་གང་ཞེ་ན། རང་གི་གསང་སྔགས་རྫོགས་པ་ཡོངས་སུ་མི་གཏོང་བ་ཉིད་དང་། གཞན་གྱི་གསང་སྔགས་ཉེ་བར་གཅོད་པ་མིན་པ་ཉིད་དང་། སེམས་ཅན་ཐམས་
ཅད་ལ་བྱམས་པའི་སེམས་ཉེ་བར་གནས་པ་ཉིད་དང་། སྙིང་རྗེ་ཆེན་པོ་སྒོམ་པའི་སེམས་ཏེ་ཆོས་བཞི་པོ་འདི་དག་དང་ཡང་དག་པར་ལྡན་པའི་བྱང་ཆུབ་སེམས་དཔའ་གསང་སྔགས་འགྲུབ་པར་འགྱུར་རོ། །ཆོས་ལྔས་བྱང་ཆུབ་སེམས་དཔའི་སྡེ་སྣོད་ལ་ཡང་དག་པར་འཇུག་ཅིང་གསང་སྔགས་ཀྱི་སྤྱོད་པའི་སྒྲུབ་པ་ཡོངས་སུ་རྫོགས་པར་འགྱུར་ཏེ། ལྔ་གང་ཞེ་ན། རྣམ་པ་སྣ་ཚོགས་པའི་ཡུལ་བསྟེན་པ་ཉིད་དང་། བས་མཐའི་དགོན་པ་བསྟེན་པ་ཉིད་དང་། སེམས་ཅན་གཞན་ལ་ཞེ་སྡང་མེད་པ་ཉིད་དང་། འཇིག་རྟེན་པའི་སྔགས་ལ་མི་ལྟ་བ་ཉིད་དང་། ཚུལ་ཁྲིམས་དང་། ཐོས་པ་དང་། སྤྱོད་པ་ལ་གནས་པར་བྱེད་པ་ཉིད་དེ། ཆོས་ལྔ་པོ་འདི་དག་གིས་སྔགས་ཀྱི་སྤྱོད་པའི་དོན་གྱི་དངོས་གྲུབ་ཡོངས་སུ་རྫོགས་པར་འགྱུར་རོ། །ཆོས་དྲུག་ནི་གསང་སྔགས་ཀྱི་སྤྱོད་པའི་དངོས་གྲུབ་ཡོངས་སུ་རྫོགས་པར་འགྱུར་ཏེ། དྲུག་གང་ཞེ་ན། དཀོན་མཆོག་གསུམ་ལ་དད་པ་ཉེ་བར་གཅོད་པ་མེད་པ་ཉིད་དང་། ཐེག་པ་ཆེན་པོའི་མདོ་སྡེ་ཟབ་མོའི་ཚིག་གི་དོན་མི་འདོར་བ་ཉིད་དང་། སྐྱོ་བ་མེད་པའི་སེམས་ཉིད་ཀྱིས་གསང་སྔགས་ཀྱི་སྤྱོད་པའི་དོན་ཡོངས་སུ་ཚོལ་ཞིང་དགེ་བའི་ཕྱོགས་ཡོངས་སུ་མི་སྤོང་བ་ཉིད་དེ། ཆོས་དྲུག་པོ་འདི་ནི་རིག་སྔགས་ཀྱི་སྤྱོད་པ་དང་། གསང་སྔགས་ཀྱི་དངོས་གྲུབ་ལ་ཡང་དག་པར་ཀུན་དུ་འཇུག་པ་ཉིད་དུ་འགྱུར་རོ། །ཆོས་བདུན་རྣམས་ནི། རིག་སྔགས་གྲུབ་པའི་ཆོ་ག་དང་། གསང་སྔགས་ཀྱི་སྤྱོད་པ་ལ་རྗེས་སུ་འཇུག་པར་བྱེད་པ་ཉིད་དུ་འགྱུར་ཏེ། བདུན་གང་ཞེ་ན། ཤེས་རབ་ཀྱི་ཕ་རོལ་དུ་ཕྱིན་པའི་ཚུལ་ཟབ་མོ་སྒོམ་པ་དང་། ཟློས་པ་དང་། ཉན་པ་དང་། ཁ་ཏོན་བྱེད་པ་དང་། འདྲི་བར་བྱེད་པ་དང་། བྱང་ཆུབ་སེམས་དཔའི་སྤྱོད་པ་ལ་མོས་པས་དུས་གསུམ་དུ་སྟོན་པ་དང་། ངེས་པར་སྡོམ་པ་དང་། བཟླས་པ་དང་། སྦྱིན་སྲེག་དང་། སྨྲ་བཅད་དང་། དཀའ་ཐུབ་ལ་མ་ཐོགས་པ་དང་། བློ་གྲོས་དང་། དྲན་པ་དང་། ཤེས་རབ་དང་། བརྟན་པ་དང་དུ་
ལེན་པར་བྱེད་པ་དང་། བྱང་ཆུབ་སེམས་དཔའི་ཚོགས་དང་ཐེག་པ་ཆེན་པོའི་ཆོས་ཟབ་མོའི་ཚུལ་ལ་ཡང་དག་པར་རབ་ཏུ་འཇུག་པའི་ཚུལ་དང་། རང་གི་གསང་སྔགས་དང་། སྔགས་དགུག་པ་དང་། སྲུང་བ་དང་། བསྒྲུབ་པའི་བྱ་བ་ལ་མཁས་པ་ཉིད་དང་། སྙིང་རྗེ་ཆེན་པོ་དང་། བྱམས་པ་ཆེན་པོ་དང་། བཏང་སྙོམས་ཆེན་པོ་དང་། དགའ་བ་ཆེན་པོ་ཡོངས་སུ་སྒོམ་པར་བྱེད་པ་ལས་དང་། སེམས་ཅན་གྱི་ཁམས་དང་། ཆོས་ཀྱི་དབྱིངས་སྤྲོས་པ་མེད་པའི་དེ་བཞིན་ཉིད་ལ་ཡང་དག་པར་འཇུག་པ། གཉིས་སུ་མེད་པའི་རྣམ་པ་ཐམས་ཅད་མཁྱེན་པའི་ཡེ་ཤེས་ཡོངས་སུ་ཚོལ་བ་ལས་དང་། སེམས་ཅན་ཐམས་ཅད་ཡོངས་སུ་མི་གཏོང་ལ་ཐེག་པ་དམན་པ་ལ་དགའ་བ་མེད་པ་ལས་ཏེ་ཆོས་བདུན་པོ་འདི་རྣམས་ནི་རིག་སྔགས་དང་གསང་སྔགས་ཀྱི་དངོས་གྲུབ་ཡོངས་སུ་རྫོགས་པར་འགྱུར་རོ། །ཆོས་བརྒྱད་ནི་རིག་སྔགས་དང་གསང་སྔགས་ཀྱི་སྤྱོད་པའི་དོན་གྱིས་དངོས་གྲུབ་ཡང་དག་པར་འཇུག་པ་ཉིད་དུ་འགྱུར་ཏེ། བརྒྱད་གང་ཞེ་ན། མཐོང་བ་དང་མ་མཐོང་བའི་འབྲས་བུ་ལ་དད་པས་ངོ་མཚར་བར་སེམས་པར་འདོད་པ་ཉིད་དང་། བྱང་ཆུབ་སེམས་དཔའི་དད་པའི་འབྲས་བུ་རྫུ་འཕྲུལ་དང་རྣམ་པར་འཕྲུལ་པ་ཐེ་ཚོམ་མེད་པ་ལས་དང་། ཕྱིན་ཅི་མ་ལོག་པའི་གསང་སྔགས་འཛིན་པ་ལས་བླ་མ་ལ་གུས་པ་ལས་དང་། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་རང་གི་སྔགས་དང་རྒྱུ་དང་སྤྱོད་པ་ཉེ་བར་བསྟན་པ་མི་སླུ་བར་འཛིན་ཅིང་བདོག་པ་ཐམས་ཅད་ཡོངས་སུ་བཏང་བ་ལས་དང་། དངོས་གྲུབ་ཀྱི་ཞིང་གནས་དང་། གནས་མ་ཡིན་པ་རྨི་ལམ་དུ་མཐོང་བ་སྟོན་པ་ལ་མཁས་པ་ཉིད་དང་། སེར་སྣ་དང་། གཉིད་དང་། རྨུགས་པ་མཐའ་དག་དང་བྲལ་བར་བྱེད་པ། རྟག་ཏུ་བརྩོན་འགྲུས་རྩོམ་ལ་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་བདག་ཉིད་འབུལ་བར་བྱེད་པ་ལས་དང་། མདོར་བསྡུས་ན་དགེ་བའི་རྩ་བ་ལ་ངོམས་མི་ཤེས་པའི་གོ་ཆ་བགོས་ཏེ་བགེགས་ཐམས་ཅད་རབ་ཏུ་
སེལ་བར་བྱེད་པ་ལས་དང་། བྱང་ཆུབ་ཀྱི་རྒྱུད་གནོན་པར་བྱེད་པ་དང་། ལོངས་སྤྱོད་ཆེན་པོ་དང་། དབང་ཆེ་བར་གྲགས་པ་བདག་ཉིད་སོ་སོར་འདོད་པ་དང་། དབང་ཆེ་བར་གྲགས་པའི་གང་ཟག་ལ་ཡང་དག་པར་འགྲོགས་པ་དང་། དགེ་བའི་བཤེས་གཉེན་དང་མི་འབྲལ་བ་དང་། བྱང་ཆུབ་སེམས་དཔའ་ཆེན་པོ་དང་ཡང་དག་པར་འགྲོགས་པར་བྱེད་པ་སྟེ། ཆོས་བརྒྱད་པོ་འདི་ནི་གསང་སྔགས་ཀྱི་སྤྱོད་པའི་དོན་གྱི་དངོས་གྲུབ་ལ་ཡང་དག་པར་འཇུག་པར་འགྱུར་རོ། །གྲོགས་པོ་དག་མདོར་ན་བྱང་ཆུབ་ཀྱི་སེམས་དང་མི་འབྲལ་ཞིང་དཀོན་མཆོག་གསུམ་ལ་ལྷག་པར་མོས་པ་མཆོག་ཏུ་ཚུལ་ཁྲིམས་འཆལ་པ་ལའང་སྐྱོ་བ་མེད་པའི་ཡིད་ཀྱིས་རྟག་ཏུ་མངོན་པར་བརྩོན་པས་ཡིད་སྔགས་ཀྱི་ལེའུ་རབ་འབྱམ་མཐའ་ཡས་ཤིང་རྨད་དུ་བྱུང་བ་བྱང་ཆུབ་སེམས་དཔའི་སྤྱོད་པའི་རྒྱུ་མཐུན་པའི་ཡིད་ལས་བྱུང་བ་འགྲུབ་པར་འགྱུར་རོ། །དེ་ལས་གཞན་དུ་རྟོགས་པར་བྱ་བ་མ་ཡིན་ནོ། །རྣམ་པར་རྟོག་པ་མེད་པའི་ཡིད་དུ་གྱུར་པས་ཉམས་སད་པའི་རྒྱུར་ཡང་བསྒྲུབ་པར་བྱ་བ་ཡིན་ནོ། །དེ་ནས་ཡང་ཐམས་ཅད་དང་ལྡན་པའི་འཁོར་རྫོགས་པའི་སངས་རྒྱས་དང་། བྱང་ཆུབ་སེམས་དཔའ་དང་། རང་སངས་རྒྱས་དང་། འཕགས་པ་ཉན་ཐོས་ཀྱི་བྱིན་གྱིས་བརླབས་པ་རྣམས་འདི་སྐད་དུ་རྗོད་པར་བྱེད་དེ། ཀྱེ་རྒྱལ་བའི་སྲས་སེམས་ཅན་ཐམས་ཅད་ཀྱི་དོན་གྱི་ཆེད་དུ་གསང་སྔགས་ཀྱི་སྤྱོད་པ་སྣ་ཚོགས་པའི་དོན་བྱ་བའི་ཆོས་ཀྱི་ཚུལ་ལ་རབ་ཏུ་འཇུག་པའི་རྗེས་སུ་མཐུན་པའི་ཆོས་སྟོན་ཅིག་ལེགས་སོ་ལེགས་སོ། །ཨེ་མ་བྱང་ཆུབ་སེམས་དཔའ་ཆེན་པོ་རྣམས་སྣ་ཚོགས་པའི་ཆོས་སྟོན་པའི་རྗེས་སུ་འཇུག་པར་བྱེད་པ་གསང་སྔགས་ཀྱི་སྤྱོད་པ་དགེ་བ་ལེགས་པར་གསུངས་སོ། །རྒྱལ་པོ་ཆེན་པོ་གང་ལ་ལ་ཞིག་འདུས་པའི་ལེའུ་འདི་འཛིན་པར་འགྱུར་བ་དང་། ཡིད་ལ་བྱེད་པར་འགྱུར་བ་དང་། གཡུལ་དུའང་ཐོག་མར་གླང་པོ་ཆེའི་སྟེང་དུ་འཇོག་པར་འགྱུར་བ་དང་། མེ་ཏོག་དང་། བདུག་པ་དང་། དྲི་དང་། བྱུག་པ་རྣམ་པ་སྣ་ཚོགས་པས་མཆོད་པར་
འགྱུར་བ་དེ་ལ་བདག་ཅག་མཚུངས་པར་བརྟག་པར་བགྱི། ཕྱིར་རྒོལ་བ་དང་དགྲ་བོ་དག་དབང་དུ་བགྱི། ཕ་རོལ་གྱི་དམག་དཔུང་དག་འཇིག་ཅིང་བཟློག་པར་བགྱི། གླེགས་བམ་དུ་བྲིས་ནས་རང་གི་ཁྱིམ་དུ་འཇོག་པར་འགྱུར་བའི། རིགས་ཀྱི་བུའམ་རིགས་ཀྱི་བུ་མོའམ། རྒྱལ་པོ་ཆེན་པོའམ། རྒྱལ་མོ་ཆེན་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། སྲུང་བ་ཆེན་པོ་དང་ལོངས་སྤྱོད་ཆེན་པོ་དང་། ཚེ་རིང་པོར་འགྱུར་བ་དང་། ནད་མེད་པ་དང་། རྟག་ཏུ་ལོངས་སྤྱོད་འཕེལ་བ་ཉིད་ཀྱང་བགྱིའོ། །དེ་སྐད་སྨྲས་ནས་ཐམས་ཅད་དང་ལྡན་པའི་འཁོར་དེ་ཅིའང་མི་གསུང་བར་གྱུར་ཏོ། །ཐེག་པ་ཆེན་པོའི་རིག་སྔགས་དང་། གསང་སྔགས་ཀྱི་སྤྱོད་པ་ངེས་པར་བསྟན་པ་ལས། རལ་པ་གྱེན་བརྫེས་ཀྱི་རྟོག་པ་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོའི་རྣམ་འཕྲུལ་གྱི་ལེའུ་རབ་འབྱམ་ལས། བཅོམ་ལྡན་འདས་འཕགས་མ་སྒྲོལ་མའི་རྩ་བའི་རྟོག་པ་ལས་འདུས་པའི་ལེའུ་སྟེ་དང་པོའོ།། །།དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ལ་གཟིགས་ནས། སེམས་ཅན་ཐམས་ཅད་ཀྱི་དམ་ཚིག་ལ་རྗེས་སུ་འཇུག་ཅིང་ཀུན་དུ་ལྟ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་སྙོམས་པར་ཞུགས་མ་ཐག་ཏུ་ལྟེ་བའི་དཀྱིལ་འཁོར་གྱི་ཕྱོགས་ནས་འོད་ཟེར་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་བསྐོར་བའི་འོད་ཟེར་ཕྱུང་སྟེ་སེམས་ཅན་གྱི་ཁམས་ཐམས་ཅད་ཀུན་ནས་སྣང་བར་བྱས་ནས་སྔར་ཉིད་དུ་འཁོར་འདུས་པའི་དཀྱིལ་འཁོར་ཆེན་པོ་ཀུན་དུ་སྣང་བར་བྱས་ནས་འཁོད་པར་གྱུར་ཏོ། །དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་དག་པའི་སེམས་དཔའ་སྤྱན་རས་གཟིགས་དབང་ཕྱུག་ལ་སྨྲས་པ། སེམས་དཔའ་ཆེན་པོའི་དམ་ཚིག་ལ་རྗེས་སུ་འཇུག་པ་ལས་བྱ་བའི་
དཀྱིལ་འཁོར་གྱི་ལེའུ་རབ་འབྱམ་གྱི་སྤྱོད་པ་སྒྲུབ་པ་སེམས་ཅན་ཐམས་ཅད་དང་ཐུན་མོང་དུ་གྱུར་པ་ཁྱེད་ཀྱིས་ཚོགས་གང་དུ་སེམས་ཅན་རྣམས་ཡང་དག་པར་རྗེས་སུ་ཞུགས་ནས་འཇིག་རྟེན་དང་འཇིག་རྟེན་ལས་འདས་པའི་རིག་སྔགས་དང་གསང་སྔགས་ཀྱི་དངོས་གྲུབ་ཡང་དག་པར་ཐོབ་པ་དང་ལྡན་པ་ཁྱོད་སྨྲོས་ཤིག་སྨྲོས་ཤིག །གསང་བའི་བདག་པོ་གནོད་སྦྱིན་གྱི་དབང་པོས་དེ་སྐད་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གིས་མཆོག་ཏུ་གསང་བའི་དཀྱིལ་འཁོར་གྱི་རྒྱུད་གསུངས་པ། རིག་སྔགས་ཐམས་ཅད་ཡང་དག་པར་སྐུལ་བར་བྱེད་པ་ཞེས་བྱ་བའི་རྫུ་འཕྲུལ་རྣམ་པར་སྟོན་པར་བྱེད་ཅིང་ལག་པ་གཡས་པ་བཏེག་ནས་སོར་མོའི་རྩེ་མོས་འཁོར་གྱི་དཀྱིལ་འཁོར་ལ་སྟོན་པར་བྱེད་ཅིང་། སོར་མོའི་རྩེ་མོ་དེར་རིག་པའི་རྒྱལ་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་ངེས་པར་ཕྱུང་སྟེ་ཕྱུང་ནས་ཀྱང་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་དེ་སྣང་བ་ཆེན་པོས་ཀུན་དུ་སྣང་བར་བྱས་ནས་གནས་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གིས་ཁྲོ་བོའི་རྒྱལ་པོ་སྒྲོལ་མས་ནོན་པའི་སྙིང་པོ་ལས་ཐམས་ཅད་པ། དཔའ་བོ་གཅིག་པ་སྤྱན་དྲངས་པ་དང་། གཤེགས་སུ་གསོལ་བ་དང་། ཞི་བ་ཅན་དང་། རྒྱས་པ་ཅན་དང་། མངོན་སྤྱོད་ཅན་དང་། མི་སྣང་བ་དང་། ནམ་མཁའ་ལ་འགྲོ་བ་དང་། ས་འོག་ཏུ་འཇུག་པ་དང་། རྐང་པ་རབ་ཏུ་རྒྱུ་བ་དང་། དགུག་པ་དང་། རྣམ་པར་སྡང་བ་དང་། དབང་དུ་བྱེད་པ་དང་། དྲི་དང་ཕྲེང་བ་དང་། མར་མེ་ཐམས་ཅད་རང་གི་རྒྱུད་ཀྱི་སྔགས་ཀྱིས་རབ་ཏུ་སྦྱིན་པར་བྱེད་དེ། མདོར་ན་ཇི་ལྟར་སྦྱར་བ་དེ་བཞིན། དེ་ལྟ་དེ་ལྟར་སྒྲུབ་པར་བྱེད་བཞིན་པ་ནི་ཡི་གེ་གསུམ་ཞེས་བྱ་བ་བརྩོན་འགྲུས་ཆེན་པོས་དོན་ཐམས་ཅད་སྒྲུབ་པར་བྱེད་པའི་ཁྲོ་བོའི་རྒྱལ་པོ་ཆེན་པོའོ། །དེ་གང་ཞེ་ན། ཨོྃ་ཨཱཿཧཱུྃ། འདི་ནི་ཁྲོ་བོ་ཆེན་པོ་དེའི་སྙིང་པོ་ལས་ཐམས་ཅད་པ་སྟེ་དཀྱིལ་
འཁོར་ཐམས་ཅད་དང་། གསང་སྔགས་སྤྱོད་པ་ཐམས་ཅད་ལ་བྱང་ཆུབ་སེམས་དཔའ་སེམས་དཔའ་ཆེན་པོས་ངེས་པར་བསྟན་ཏེ་བགེགས་ཐམས་ཅད་འཇིག་པར་བྱེད་པའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གིས་ཕྱག་གཡས་པ་བཏེག་ནས་ཁྲོ་བོའི་སྤྱི་བོར་བཞག་སྟེ་འདི་སྐད་ཅེས་སྨྲས་སོ། །སངས་རྒྱས་བཅོམ་ལྡན་འདས་རྣམས་དགོངས་སུ་གསོལ། གང་ལ་ལ་ཕྱོགས་བཅུའི་འཇིག་རྟེན་གྱི་ཁམས་ན་རྣམ་པར་གནས་པའི་བྱང་ཆུབ་སེམས་དཔའ་མཐའ་ཡས་ཤིང་མུ་མེད་པའི་རྫུ་འཕྲུལ་ཆེན་པོ་དང་ལྡན་པ་རྣམས་དམ་ཚིག་ལ་ལྷག་པར་གནས་པར་གྱིས་ཤིག །དེ་སྐད་ཅེས་སྨྲས་ནས་ཁྲོ་བོའི་རྒྱལ་པོ་དེ་བསྐོར་ནས་བཏང་བར་གྱུར་ཏོ། །ཁྲོ་བོའི་རྒྱལ་པོ་ཆེན་པོ་བཏང་མ་ཐག་ཏུ་ཐམས་ཅད་དང་ལྡན་པའི་འཇིག་རྟེན་གྱི་ཁམས་དག་ཏུ་སོང་ནས་སྐད་ཅིག་ཙམ་གྱིས་གདུག་སེམས་ཅན་གྱི་སེམས་ཅན་རྫུ་འཕྲུལ་ཆེན་པོ་དེ་རྣམས་ཚར་བཅད་ཅིང་བཀུག་ནས་འཁོར་གྱི་དཀྱིལ་འཁོར་ཆེན་པོ་དག་པའི་སེམས་ཅན་ལ་ཡང་དག་པར་བཅུག་སྟེ་གནས་ཇི་ལྟ་བ་བཞིན་དུ་གནས་པར་བྱས་ནས་སེམས་ཅན་གདུག་པ་རྣམས་ཀྱི་སྤྱི་བོར་ཀུན་ནས་འབར་བའི་ཕྲེང་བས་འཁྲུགས་པར་གྱུར་ནས་གནས་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གིས་སླར་ཡང་འཁོར་གྱི་དཀྱིལ་འཁོར་ལ་གཟིགས་ནས་སེམས་ཅན་ཁྱེད་ཅག་ཐམས་ཅད་ཉོན་ཅིག །གང་ཡང་ངའི་དམ་ཚིག་འདི་ལས་འདའ་བར་བྱེད་པ་དེ་ལ་ཁྲོ་བོའི་རྒྱལ་པོས་ཚར་གཅོད་པར་འགྱུར་ཏེ། གང་གི་ཕྱིར་ན་སངས་རྒྱས་བཅོམ་ལྡན་འདས་རྣམས་ཀྱིས་དམ་ཚིག་ནི་འདའ་བར་བྱ་བ་མ་ཡིན་པའི་ཕྱིར་རོ། །རིག་སྔགས་དང་། གསང་སྔགས་ཀྱི་དོན་གྱི་ཚིག་གསང་ཆེན་ཇི་ལྟར་བྱང་ཆུབ་སེམས་དཔའི་རྫུ་འཕྲུལ་ཆེན་པོ་དང་ལྡན་པ་རྣམས་ཀྱིས་ཏིང་ངེ་འཛིན་ངེས་པར་བསྟན་པ་འཆད་པར་བྱེད་དོ། །དེ་ལེགས་པར་ཉོན་ལ་ལེགས་པར་ཡིད་ལ་ཟུང་ཤིག་དང་། ངས་བཤད་དོ། །
ན་མོ་རཏྣ་ཏྲ་ཡཱ་ཡ། ན་མོ་ཨ་མི་ཏཱ་བྷཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷཱ་ཡ། ན་མ་ཨཱརྱཱ་བ་ལོ་ཀི་ཏེ། ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ན་མོ་བྷ་ག་བ་ཏྱེེ། ཨཱཪྱ་ཏ་རཱ་ཡེེ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཏདྱ་ཐཱ། རྀ་ཛུ་ཀ་དྷརྨ་ནིརྱཱ་ཏེ། ཏཱ་རེ་ཏུཏྟཱ་རེ། ཤཱནྟ་དྷརྨ་ནིརྱཱ་ཏེ། ཏཱ་རེ་ཨ་ན་བྷི་ལཱ་པྱ་དྷརྨ་ནི་རྱཱ་ཏེ་ཏུཏྟཱ་རེ་ཏུ་རེ་ཧི་ནི། དྲཱ་ས་ནི། བི་ཏྲཱ་ས་ནི། ཨོ་ཧ་ནི། མོ་ཧ་ནི། ཛམྦྷ་ནི། སྟམྦྷ་ནི། པྲ་བྷེ། ཙནྡྲ་པྲ་བྷེ་ཧི། ཧི་ལི་ཧི་ལི། བི་ལེ་བི་ལེ། བེ་ག་གཱ་མི་ནི། ཀུཎྜི་མ་ཧཱ་ཀུཎྜི། དྷ་ར་དྷ་ར་དྷ་ན་པ་ཏི། ཏཱ་རེ་ཧུ་རུ་ཧུ་རུ། ཀུ་རུ་ཀུ་རུ། ཨ་ཧཾ། ཡཱཾ་ཡཱཾ། ཙིནྟ་ཡཱ་མི། ཙིནྟ་ཏིཾ་མེ་ཀུ་རུ་སྭཱ་ཧཱ། གྲོགས་པོ་དག་འདི་ནི། ངའི་བཅོམ་ལྡན་འདས་མ་འཕགས་མ་སྒྲོལ་མའི་རྩ་བའི་རིག་སྔགས་ལས་ཐམས་ཅད་བྱེད་མ། སྲིད་པ་གསུམ་གྱི་ཆོས་ཉེ་བར་གཅོད་པ། ངན་འགྲོ་ཐམས་ཅད་ཟློག་པར་བྱེད་མའོ། །ཕྱག་རྒྱ་ཡང་འདིར་རྩ་བའི་རིག་སྔགས་ཤེས་པ་རྣམ་པར་གྲགས་པ་དེ་ལ་རབ་ཏུ་སྦྱར་བར་འགྱུར་རོ། །འདིར་མཆོག་གི་སྙིང་པོ་ལས་ཐམས་ཅད་བྱེད་པ། མྱ་ངན་ལས་འདས་པའི་བདེ་བ་ཐོབ་པར་བྱེད་པ། ཞི་བ་ཐམས་ཅད་བྱེད་པ། སངས་རྒྱས་མངོན་སུམ་དུ་མཐོང་བ་བཞིན་དུ་ཉེ་བར་གནས་པ། རང་ཉིད་ངའི་གྲོགས་པོ་བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་དོན་གྱི་ཕྱིར་མཆོག་ཏུ་གསང་བའི་རིག་སྔགས་ཀྱི་ངོ་བོས་ཉེ་བར་གནས་པ་བསམ་པ་ཐམས་ཅད་ཡོངས་སུ་རྫོགས་པར་བྱེད། གང་དང་གང་དྲན་པ་ཉིད་ཀྱིས་ལས་ཐམས་ཅད་མཐར་བྱེད་པ། འཇིགས་པ་ཆེན་པོ་རྣམས་ཡོངས་སུ་སྦྱོང་བར་བྱེད་པ་སྟེ། བཟླས་པས་ལྟ་སྨོས་ཀྱང་ཅི་དགོས། དེ་གང་ཞེ་ན། ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཏཱ་རེ་ཏུཏྟཱ་རེ་སྭཱ་ཧཱ། ཕྱག་རྒྱ་ཡང་འདིར་ཨུཏྤ་ལ་ཞེས་ཀྱང་རྣམ་པར་གྲགས་པ་ལོངས་སྤྱོད་ཐམས་ཅད་མངོན་བར་འཕེལ་བར་བྱེད་པའོ། །འདིར་ཉེ་བའི་སྙིང་པོར་གྱུར་པའང་མཆོག་ཏུ་དཔལ་དང་ལྡན་པའི་
དག་བྱེད་ཆེན་པོ་སྟེ། ན་མོ་རཏྣ་ཏྲ་ཡཱ་ཡ། ན་མཿ སརྦ་བུདྡྷ་བོ་དྷི་སཏྭཱ་ནཱཾ། ཨོྃ་ཀུ་རུ་ཀུལླེ་སྭཱ་ཧཱ། ཕྱག་རྒྱ་ཡང་འདིར་པདྨའི་ཕྲེང་བཞེས་རྣམ་པར་གྲགས་པར་འགྱུར་ཏེ། སེམས་ཅན་ཐམས་ཅད་དབང་དུ་བྱེད་མའོ། །འདིར་མཆོག་གི་སྙིང་པོར་གྱུར་པ་ཡང་། ན་མཿ སརྦ་བུདྡྷཱ་མཱཾ། ཨོྃ་གཱི། འདི་ནི་སྙིང་པོའི་མཆོག་སྟེ་མདོར་བསྡུ་ན་བྱ་བ་ཐམས་ཅད་ལ་ཡོན་ཏན་ཆེན་པོ་རྒྱས་པ་སྟེ། ཡོན་ཏན་མུར་ཐུག་པར་བརྗོད་པ་ནི་དུས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཀྱང་མི་ནུས་སོ། །ཕྱག་རྒྱ་ཡང་འདིར་བརྩོན་འགྲུས་ཆེན་པོ་ཞེས་རྣམ་པར་གྲགས་པ་བསམ་པ་ཐམས་ཅད་ཡོངས་སུ་རྫོགས་པར་བྱེད་པའོ། །འདིར་སྤྱན་དྲང་བའི་རིག་སྔགས་སུ་གྱུར་པ་ཡང་། ན་མཿསརྦ་བུདྡྷཱ་ནཱཾ། ཨོྃ་ཧེ་ཧེ་བྷ་ག་བ་ཏི་བི་ཤྭ་རཱུ་པི་ཎི་སརྦ་བ་ལ། བྷཱ་ཥི་ཏི། པྲ་བོ་དྷ་ནི་ཨཱ་ཡཱ་ནི། བྷ་ག་བ་ཏི། ཀྲཱིཌ་ཨུཏྤ་ལ་དྷི་ནི། མ་མ་ཤུདྡྷཱ་ཡ། ཏིཥྛ་ཏིཥྛ། ས་མ་ཡ་མ་ནུ་སྨ་ར། ཨ་པྲ་ཏི་ཧ་ཏ། ཤཱ་ས་ན་ཧཱུྃ། མཱ་བི་ལམྦ་ཀུ་རུ་ཀུ་རུ་ཕཊ་སྭཱ་ཧཱ། འདི་ནི་བཅོམ་ལྡན་འདས་མ་སྤྱན་དྲང་བའི་རིག་སྔགས་ཏེ། སངས་རྒྱས་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་དང་། རང་སངས་རྒྱས་ཐམས་ཅད་དང་། འཕགས་པ་ཉན་ཐོས་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། ཤ་ཟ་དང་། སྲིན་པོ་དང་། འབྱུང་པོ་ཐམས་ཅད་ཀྱི་ཡང་ཡིན་ནོ། །ཙནྡན་གྱི་ཆུ་ལ་ལན་བདུན་མངོན་པར་བསྔགས་པ་བྱས་ཏེ་ཕྱོགས་བཞི་དང་། དེ་བཞིན་དུ་སྟེང་དང་། འོག་དང་། ཐད་ཀ་ཐམས་ཅད་དུ་གཏོར་བར་བྱའོ། །སངས་རྒྱས་དང་། བྱང་ཆུབ་སེམས་དཔའ་ཐམས་ཅད་དང་། བཅོམ་ལྡན་འདས་སྒྲོལ་མ་དང་། འཇིག་རྟེན་དང་། འཇིག་རྟེན་ལས་འདས་པ་ཐམས་ཅད་ཀྱི་གསང་སྔགས་འདི་ཡིན་ཏེ། འབྱུང་པོའི་ཚོགས་ཐམས་ཅད་དང་། སེམས་ཅན་ཐམས་ཅད་ཀྱང་འོང་བར་འགྱུར་རོ། །ན་མཿ
སརྦ་བུདྡྷཱ་ནཱཾ། ཨ་པྲ་ཧི་ཧ་ཏ་ཤཱ་ས་ནཱ་ནཱཾ། ཨོྃ་དྷུ་རུ་དྷུ་རུ། དྷུ་མ་བཱ་སི་ནི། མ་མཱ་རྩིཥ་ཧཱུྃ། ཏིཥྛ་ས་མ་ཡ་མ་ནུ་སྨ་ར་སྭཱ་ཧཱ། གདུག་པའི་རིག་སྔགས་ཏེ། ཙནྡན་དང་། གུར་གུམ་དང་། ག་པུར་གཅིག་ཏུ་བྱས་ནས་བདུག་པ་དབུལ་བར་བྱའོ། །དེ་ནས་དེ་བཞིན་གཤེགས་པ་རྣམས་དང་། བྱང་ཆུབ་སེམས་དཔའ་རྣམས་ཐམས་ཅད་བྱོན་པ་རྣམས་སྤོས་ཀྱི་བདུག་པས་ཡིད་ཚིམ་ནས་ཁུགས་པར་འགྱུར་རོ། །འདིར་ཕྱག་རྒྱར་གྱུར་པའང་པདྨའི་ཕྲེང་བ་ཞེས་གྲགས་པ་སེམས་ཅན་ཐམས་ཅད་འགུགས་པར་བྱེད་ཅིང་ཞི་བ་སྟེ། སྤྱན་དྲང་བའི་རིག་སྔགས་ལའང་ཕྱག་རྒྱ་པདྨའི་ཕྲེང་བ་བཟང་པོ་འདི་ཉིད་དོ། །སངས་རྒྱས་དང་། བྱང་ཆུབ་སེམས་དཔའ་ཐམས་ཅད་དང་། སེམས་ཅན་ཐམས་ཅད་བྱོན་པ་ལའང་མཆོད་ཡོན་དབུལ་བར་བྱ་སྟེ། ག་པུར་དང་། ཙནྡན་དང་། གུར་གུམ་ཆུ་དང་སྦྱར་ནས་ཛཱ་ཏིའི་མེ་ཏོག་དང་། མཱ་ལི་ཀ་གསར་པ་དང་། དབྱར་གྱི་མེ་ཏོག་དང་། བུན་ནཱ་ཀ་དང་། བ་ཀུ་ལི་དང་། རྒྱ་སྤོས་རྣམས་ཏེ་འདི་དག་གང་ཡང་རུང་བའི་མེ་ཏོག་གམ། དུས་ཇི་ལྟ་བའི་མེ་ཏོག་གམ། དྲི་བཟང་པོའི་མེ་ཏོག་རྣམས་དང་བསྲེས་ནས་སྔགས་འདིས་མཆོད་ཡོན་དབུལ་བར་བྱའོ། །ན་མཿསརྦ་བུདྡྷཱ་ནཱཾ། ཨ་པྲ་ཏི་ཧ་ཏ་ཤཱ་ས་ནཱ་ནཱཾ། ཏདྱ་ཐཱ། ཧེ་ཧེ་མ་ཧཱ་ཀཱ་རུ་ཎི་ཀཱ། བི་ཤྭ་རཱུ་པ་དྷཱ་ར་ཎི་ཨརྒྷཾ་པྲ་ཏཱིཙྪ། ས་མ་ཡ་མ་ནུ་སྨ་ར། ཏིཥྛ་ཏིཥྛ་དེ་བ་ཏཱ་དྷིཥྛཱ་ན། མ་དྷྱེ་པྲ་བེ་ཤ་ཡ། པྲ་བེ་ཤ་ཡ། སརྦ་བུདྡྷཱ། ཨ་ནུ་ཀཾ་བ་ཀ །གྲྀཧྞ་གྲྀཧྞ་ཧཱུྃ། ཨམྦ་རི་བི་ཙཱ་རི་ཎི་སྭཱ་ཧཱ། ཕྱག་རྒྱ་འདིར་གང་བ་ཞེས་གྲགས་ཏེ་སེམས་ཅན་ཐམས་ཅད་ཀྱིས་རྗེས་སུ་འཇུག་ཅིང་བརྟན་པའོ། །འདིར་དྲིའི་རིག་སྔགས་སུ་གྱུར་པ་ཡང་། ན་མཿསརྦ་བུདྷཱ་ནཱཾ། ན་མཿས་མནྟ་གནྡྷ་ཨ་པ་བྷཱ་ཥི་ཏེ་ཤྲི་ཡེ་ཏ་ཐཱ་ག་ཏཱ་ཡ། ཏདྱ་ཐཱ། གནྡྷེ་གནྡྷེ་ཧླཱ་དེ་གནྡྷ་མ་ནོ་ར་མེ་པྲ་ཏིཙྪ་དཾ། གནྡྷཾ་ས་མ་ནཱ་ནུ་ཙཱ་རི་ཎི་སྭཱ་ཧཱ། འདིར་ཕྱག་རྒྱར་འགྱུར་བ་ཡང་། ལོ་མ་ཞེས་བྱ་བ་བསམ་པ་ཐམས་ཅད་ཡོངས་སུ་རྫོགས་པར་བྱེད་པའོ། །འདིར་མེ་ཏོག་གི་སྔགས་སུ་གྱུར་པ་ཡང་། ན་མཿསརྦ་བུདྡྷ་བོ་དྷི་སཏྭཱ་ནཱཾ། ཨ་པྲ་ཏི་ཧ་
ཏ་ཤཱ་ས་ནཱ་ནཱཾ། ན་མཿསཾ་ཀུ་སུ་མི་ཏ་རཛྙཱ་སྱ། ཏ་ཐཱ་ག་ཏཱ་སྱ། ཏདྱ་ཐཱ། ཀུ་སུ་མེ་ཀུ་སུ་མེ་ཀུ་སུ་མཱ་དྷྱོ་ཀུ་སུ་མཱ་སཱུར་བཱ་སི། ཀུ་སུ་མཱ་བ་ཏི་སྭཱ་ཧཱ། བདུག་པའི་སྔགས་འདི་ཉིད་ཀྱིས་སྔར་བཤད་པའི་བདུག་པས་བདུག་པར་བྱའོ། །རྨད་བྱུང་བསམ་མི་ཁྱབ་པའི་སྐུ། །སངས་རྒྱས་ཀུན་ལ་ཕྱག་བྱས་ནས། །ཡང་དག་རྫོགས་སངས་རྒྱས་གསུངས་པའི། །གཏོར་མའི་རིག་སྔགས་རབ་འཆད་བྱེད། །ན་མཿསརྦ་བུདྡྷ་བོ་དྷི་སཏྭཱ་ནཱཾ། ཨ་པྲ་ཏི་ཧ་ཏ་ཤཱ་ས་ནཱ་ནཱཾ། ཏདྱ་ཐཱ། ཧེ་ཧེ་བྷ་ག་བ་ཏི་མ་ཧཱ་སཏྭེ་སརྦ་བུདྡྷཱ་ཨ་བ་ལོ་ཀི་ཏེ། མཱ་བི་ལཾ་བ་ཨི་དམ་པ་ལིཾ་གྲྀཧྞ་པ་ཡ་གྲཧྞ་པ་ཧཱུྃ་ཧཱུྃ་ཧཱུྃ་སརྦ་ར་ར་ཕཊ་ཕཊ་སྭཱ་ཧཱ། ལྷ་བཤོས་འདིས་དབུལ་བར་བྱ་སྟེ། འབྱུང་པོ་ཐམས་ཅད་པའི་གཏོར་མར་འགྱུར་རོ། །འདིར་ཡང་ཕྱག་རྒྱ་ནི་དབྱུག་པ་སྟེ། གདུག་པ་ཐམས་ཅད་ཟློག་པར་བྱེད་པའོ། །ན་མཿསརྦ་བུདྡྷ་བོ་དྷི་སཏྭཱ་ནཱཾ། ཨ་པྲ་ཏི་ཧ་ཏ་ཤཱ་ས་ནཱ་ནཱཾ། སརྦ་ཏ་མོ་ཉནྡྷ་ཀཱར་བི་ཏྱཾ་སི་ཏཱ་ནཱ། ན་མཿས་མནྟ་ཛྱོ་ཏི་གནྡྷ་ཨ་བ་བྟ་ས་པྲི་ཡཱ་ཡ། ཏ་ཐཱ་ག་ཏཱ་ཡ། ཏདྱ་ཐཱ། ཧེ་ཧེ་བྷ་ག་བཱ་ན་ཛྱོ་ཏེ་རསྨི་ཤ་ཏ་ས་ཧ་སྲ། པྲ་ཏི་མཎྜི་ཏ་ཤ་རཱི་ར། བི་ཀུར་བ་བི་ཀུར་བ་མ་ཧཱ་བོ་དྷི་སཏྭཱ་མནྟ་ཛྭོ་ལོ་དྱོ་ཏ་མཱུརྟྟི། ཁུཪྷ་ཁུཪྷ། ཨ་བ་ལོ་ཀཱི་ཡ། ཨ་བ་ལོ་ཀཱི་ཡ། མཎྜ་ལ་སརྦ་སཏྭཱ་ནཱཾ་སྭཱ་ཧཱ། མར་མེའི་རིག་སྔགས་ཏེ། འདིས་མར་མེ་དབུལ་བར་བྱའོ། །ཕྱག་རྒྱ་ནི་ཁ་བྱེ་བ་ཞེས་སེམས་ཅན་ཐམས་ཅད་རྣམ་པར་སྣང་བར་བྱེད་པའོ། །ན་མཿས་མནྟ་བུདྡྷཱ་ནཱཾ། ཨ་པྲ་ཏི་ཧེ་ཏ་ཤཱ་ས་ནཱ་ནཱཾ། ཏདྱ་ཐཱ། ཛྭ་ལ་ཛྭ་ལ། ཛྭཱ་ལ་ཡ་ཛྭཱ་ལ་ཡ་ཧཱུྃ་བི་བོ་དྷ་ཀ་ཧ་ར་ཀྲྀཥྞ་པིཾ་ག་སྭཱ་ཧཱ། མེའི་བྱ་བ་བྱེད་པའི་རིག་སྔགས་སུ་འགྱུར་རོ། །འདིར་ཡང་ཕྱག་རྒྱ་ནི། ཁ་སྦྱོར་ཞེས་པར་འཇིག་རྟེན་གྲགས། །སེམས་ཅན་ཀུན་འོད་ཀྱིས་གསལ་བྱེད། །བྱང་ཆུབ་སེམས་དཔའ་བློ་ལྡན་དང་། །ཐུབ་པ་མཆོག་གིས་སྔོན་གསུངས་པའོ། །དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གིས། བྱང་ཆུབ་སེམས་དཔའ་ཕྱག་ན་རྡོ་རྗེ་ལ་སྨྲས་པ། གསང་བ་པའི་བདག་པོ་སྔགས་ཀྱི་ཚིག་འདི་ནི། གསང་ཆེན་
དང་བཅས་ཤིང་མཆོག་ཏུ་གསང་བ་ཡིན་ཏེ། བུ་ཁྱོད་ལ་ཕན་དྲག་པོའི་མཐའ། །མི་བཟད་པ་ཡི་རིགས་སུ་གྲགས། །སྔགས་རྣམས་ཐམས་ཅད་གང་ཁོ་ན། །མཁས་པ་རྣམས་ཀྱིས་བསྒྲུབ་བྱའོ། །སྤྱི་བོའི་གདུ་བུ་ཞེས་གྲགས་པ། །རྡོ་རྗེ་པདྨའི་རིགས་དག་ཀྱང་། །དེ་ནི་ངེས་པར་གཞིག་དོན་དུ། །རིག་པ་འདི་ནི་ཡང་དག་བརྗོད། །ན་མཿསརྦ་བུདྡྷ་བོ་དྷི་སཏྭཱ་ནཱཾ། ཨ་པྲ་ཏི་ཧ་ཏ་ཤཱ་ས་ནཱ་ནཱཾ། ཨོྃ་ཀ་ར་ཀ་ར། ཀུ་རུ་ཀུ་རུ། མ་མ་ཀཱརྱཱཾ་ཛཾ་བྷ། ཛཾ་བྷ་སརྦ་སརྦ་ད་ཧ་ད་ཧ། སརྦ་བཛྲ་བི་ནཱ་ཤ་ཀ །མཱརྡྷ་ཌཱ་ཀ་ཛཱི་བནྟཱཾ་ཏ་ཀ་རཱ་མ་ཧཱ་བི་ཏྲི་ཏ་རཱ་པི་ཎེ་པ་ཙ་པ་ཙ་སརྦ་དུཥྜཾ་མ་ཧཱ་ག་ཎ་པ་ཏི་ཛཱི་བནྟཱཾ་ཏ་ཀ་ར། བནྡྷ་བནྡྷ། སརྦ་གྲ་ཧཱཾ། ཥཌ་མུ་ཁ་ཋ་ཌ་བྷུ་ཛ་ཥ་ཌ་ཙ་ར་ཎ་རུ་དྲ་མཱ་ན་ཡ་བྲཧྨ་ཏྱཾ་དེ་བ་ནཱ་ན་ཡ་མཱ་བི་ལམྦ་མཱ་བི་ལམྦ་བྷུ་ཥ་ཧྲཱི་མཎྜ་ལ་མ་དྷྱེ་པྲ་བེ་ཤ་ཡ་ས་མ་ཡ་མ་ནུ་སྨ་ར་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱ་ཧཱ། གསང་བ་པའི་བདག་པོ་འདི་ནི་མཆོག་ཏུ་གསང་བ་བརྩོན་འགྲུས་ཆེན་པོ་སྒྲོལ་མའི་ཡན་ལག་ཞལ་དྲུག་པ་ཞེས་བྱ་བ་ཁྲོ་བོའི་རྒྱལ་པོ་ཆེན་པོ་ཐམས་ཅད་རྣམ་པར་འཇོམས་པ་པོ་སྟེ། འདི་བཀླགས་པ་ཙམ་གྱིས་བྱང་ཆུབ་སེམས་དཔའ་ས་བཅུ་ལ་གནས་པའི་དབང་ཕྱུག་རྣམས་ཀྱང་རྣམ་པར་འཇིག་པར་བྱེད་ན། མ་རུངས་པའི་བགེགས་རྣམས་ལྟ་ཅི་སྨོས། འདི་བཀླགས་པ་ཙམ་གྱིས་སྲུང་བ་ཆེན་པོ་བྱས་པར་འགྱུར་རོ། །འདིར་ཕྱག་རྒྱ་ཡང་རིགས་ཆེན་པོ་ཞེས་བྱ་བར་འགྱུར་ཏེ་བགེགས་རྣམ་པར་འཇིག་པར་བྱེད་པའོ། །ཁྲོ་བོའི་རྒྱལ་པོ་འདི་ཉིད་ཀྱི་སྙིང་པོ་ནི། ཨོཾ་ཧྲཱིཿཥྚཱྀཿ བི་ཀྲྀ་ཏཱ་ན་ན་ཧཱུྃ་སརྦ་ཤ་ཏྲུཾ་སྟམྦྷ་ཡ་ཕཊ་ཕཊ་སྭཱ་ཧཱ། སྔགས་འདིས་དགྲ་ཐམས་ཅད་གཟེར་ཆེན་པོའི་ནད་དང་། ཡང་རིམས་ཉིན་གཅིག་པས་ཟིན་པར་འགྱུར་རོ། །རྟག་ཏུ་བཟླས་པས། ཇི་སྲིད་སྣང་བར་བྱམས་པ་ཉིད་དུ་མི་འགྱུར། ཡང་ན་སྙིང་རྗེའི་སེམས་ཐོབ་པར་མི་འགྱུར་ཏེ། བཟླས་པ་ཟིན་གྱི་བར་དུ་གྲོལ་བར་མི་འགྱུར་ཞིང་འཆིང་བར་མི་འགྱུར་རོ། །དཀོན་མཆོག་གསུམ་ལ་གནོད་པ་བྱེད་པ་ལ་བྱའི། ཞི་བའི་སེམས་ཡོད་པ་གཞན་ལ་མ་ཡིན་ནོ། །ཕྱག་
རྒྱ་མདུང་ཆེན་པོའང་སྦྱར་བར་བྱའོ། །འདིར་ཉེ་བའི་སྙིང་པོར་གྱུར་པ་ཡང་། ཨོྃ་ཧྲཱིཿ། ཀཱ་ལ་རཱུ་པཾ་ཧཱུྃ་ཁཾ་སྭཱ་ཧཱ། སྔ་མའི་མདུང་ཆེན་པོའང་སྦྱར་བར་བྱའོ། །གདུག་པ་ཐམས་ཅད་ལ་གང་འདོད་པ་དེ་བྱེད་པར་འགྱུར་རོ། །མཆོག་གི་སྙིང་པོ་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པ་ཡི་གེ་གཅིག་པ་ཞེས་བྱ་བ་ནི་ཧཱུྃ་འདི་ནི་ལས་ཐམས་ཅད་བྱེད་པ་སྟེ། ཕྱག་རྒྱ་མདུང་ཆེན་པོའང་སྦྱར་བར་བྱའོ། །ཕུང་ཁྲོལ་ཐམས་ཅད་ཟློག་པར་བྱེད་པ་འབྱུང་པོ་ཐམས་ཅད་དཔང་དུ་བྱེད་པ་སྟེ། མདོར་ན་ཁྲོ་བོའི་རྒྱལ་པོ་འདི་ནི་ལས་ཐམས་ཅད་ལ་རབ་ཏུ་སྦྱར་བར་བྱ་སྟེ། དཀྱིལ་འཁོར་གྱི་དབུས་སུ་བཟླས་པས་གྲུབ་པའི་དུས་སུའང་། ཁྱད་པར་འབྱུང་བར་འགྱུར་རོ། །གཤེགས་སུ་གསོལ་བའི་སྔགས་སུ་གྱུར་པ་ཡང་། ན་མཿ སརྦ་བུདྡྷཱ་ནཱཾ། ཨ་པྲ་ཏི་ཧ་ཏ་ཤཱ་ས་ནཱ་ནཱཾ། ཏདྱ་ཐཱ། ཛ་ཡ་ཛ་ཡ། སུ་ཛ་ཡ། མ་ཧཱ་ཀཱ་རུ་ཎི་ཀ་བི་ཤྭ་རཱུ་པི་ནི། གཙྪ་གཙྪ་སྭ་བྷཱ་བ་ནཱཾ། སརྦ་བུདྡྷཾ་སྭ་བི་སརྫཱ་ཡ། ས་པ་རི་བཱ་རཾ། སྭ་བྷ་བཱ་ནཱཾ་ཙཱ་པྲ་བེ་ཤ་ཡ། ས་མ་ཡ་མ་ནུ་སྨ་ར། སརྦཱརྠ་སྭ་མེ་སི་དྷྱཾ་ཏུ། བི་དྷྱ་ས་དཱཿམ་ནོ་ར་ཐཾ་ཙ་མེ་པ་རི་པཱུ་ར་ཡ་སྭཱ་ཧཱ། འདི་ནི་གཤེགས་སུ་གསོལ་བའི་སྔགས་ཏེ་ལས་ཐམས་ཅད་ལ་སྦྱར་བར་བྱའོ། །ཕྱག་རྒྱ་བཟང་པོའི་གདན་ཞེས་གྲགས་པ་སྟེ། འདིས་གདན་ཡང་སྦྱིན་པར་བྱའོ། །ཡིད་ཀྱིས་ལན་བདུན་བཟླས་པས་ཐམས་ཅད་གཤེགས་སུ་གསོལ་ལོ། །འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་རྣམས་དང་། སྔགས་རྣམས་ཉིད་ལའང་སྔགས་ཀྱི་དངོས་གྲུབ་དང་། དམ་ཚིག་དང་། བཟླས་པ་དང་། དུས་དང་། ངེས་པར་སྡོམ་པ་རྣམས་ལའང་རབ་ཏུ་སྦྱར་བར་བྱའོ། །དེ་ནས་ཡང་སེམས་དཔའ་ཆེན་པོས་སླར་ཡང་གནས་གཙང་མའི་ལྷའི་བུ་རྣམས་ལ་ཀུན་དུ་གཟིགས་ཏེ། འཁོར་གྱི་དཀྱིལ་འཁོར་ཆེན་པོ་ལ་རང་གི་རིག་པའི་ཚོགས་སྔགས་ཀྱི་ལེའུ་རབ་འབྱམ་གསུངས་པར་གྱུར་ཏོ། །ན་མཿསརྦ་བུདྡྷཱ་ནཱཾ། ཨ་པྲ་ཏི་ཧ་ཏ་ག་ཏཱི་ནཱཾ་ཨོྃ་ནི་ཊི་སྭཱ་ཧཱ། འདི་ནི་འཕགས་མ་སྒྲོལ་མའི་རྗེས་སུ་སྤྱོད་པའི་སྐྲ་ཅན་
མ་ཞེས་བྱ་བའི་རིག་པ། ལས་ཐམས་ཅད་པ་སྟེ་དམ་ཚིག་ཆེན་པོའི་ཕྱག་རྒྱའི་སྙིང་པོ་དུག་གི་ལས་ཐམས་ཅད་ལ་ཀུན་དུ་སྦྱར་རོ། །ན་མཿས་མནྟ་བུདྡྷཱ་ནཱཾ། ཨ་པྲ་ཏི་ཧ་ཏ་ཤཱ་ས་ནཱ་ནཱཾ། ཨོྃ་ནི་ཊི། འདི་ནི་ཉེ་བར་སྤྱོད་པའི་སྐྲ་ཅན་མ་ཞེས་བྱ་བའི་རིག་པ་ལས་ཐམས་ཅད་པ་སྟེ། ཕྱག་རྒྱ་ནི་ཁ་བྱེ་བ་ཞེས་པ་གཟའི་ལས་ཐམས་ཅད་ལ་སྦྱར་བར་བྱའོ། །ན་མཿས་མནྟ་བུདྡྷཱ་ནཱཾ། ཨ་པྲ་ཏི་ཧ་ཏ་ཤཱ་ས་ནཱ་ནཱཾ། ཨོྃ་ནི། རིག་པ་འདི་ནི་སྡོང་བུ་ཅན་ཞེས་བྱ་བ་སྤྱོད་པའི་དགེ་བའི་ལས་ཐམས་ཅད་བྱེད་པ་སྟེ། ཕྱག་རྒྱ་ནི་བཟང་པོའི་གདན་གྱིས་གནོད་སྦྱིན་མོ་རྣམས་དགུག་པར་བྱ་བ་ལ་སྦྱར་རོ། །ན་མཿས་མནྟ་བུདྡྷཱ་ནཱཾ། ཨ་ཙིནྟྱདྡྷཱ་ཏ་རཱུ་པི་ཎཱཾ། ཨོྃ་ཥྚེེ་སྭཱ་ཧཱ། མཁའ་འགྲོ་མ་ཀུན་འཇོམས་པ་ཡི། །ཕྱག་རྒྱ་སྦུབས་ཅན་ཡང་དག་སྦྱར། །བྱང་ཆུབ་སེམས་དཔས་བཤད་པ་ཡི། །རིག་སྔགས་ཐོད་པ་ཅན་ཞེས་བྱ། །སངས་རྒྱས་ཀུན་གྱི་པདྨ་ཉིད། །རབ་བསྔགས་ལྷ་ཡི་གཟུགས་ཅན་མ། །ན་མཿས་མནྟ་བུདྡྷ་ནཱཾ། ཨ་པྲ་ཏི་ཧ་ཏ་ག་ཏི། ཙཱ་ར་ཎཾ། ཏདྱ་ཐཱ། ཨོཾ་བ་ར་དེ་སཱ་ཧཱ། ཕྱག་རྒྱ་ཨུཏྤ་ལ་ཉིད་ནི། །དཔལ་གྱི་བདག་ཉིད་སྤྱན་ལ་སྦྱར། །གཟུགས་མང་འཆང་བའི་ལྷ་མོ་ནི། །མྱུར་དུ་ལོངས་སྤྱོད་རབ་སྒྲུབ་པའོ། །ན་མཿས་མནྟ་བུདྡྷཱ་ནཱཾ། ཨ་ཙིནྟྱ་དྡྷཱུ་ཏ་རཱུ་པི་ཎཱཾ་ཨོྃ་སུ་རི་སྭཱ་ཧཱ། ཕྱག་རྒྱ་མདུང་དང་ཡང་དག་ལྡན། །རིམས་རྣམས་ཐམས་ཅད་རྣམ་འཇོམས་པའོ། །ན་མཿས་མནྟ་བུདྡྷཱ་ནཱཾ། ཨ་ཙིནྟདྡྷཱ་ཏ་རཱུ་པི་ཎཱཾ་ཨོཾ་ཏུ་རེ་སྭཱ་ཧཱ། བསམ་པའི་སྒྲོལ་མ་ལྡན་པ་ཞེས། །རབ་བསྔགས་ལས་རྣམས་ཐམས་ཅད་པ། །དབྱུག་པའི་ཕྱག་རྒྱར་ཡང་དག་ལྡན། །བགེགས་རྣམས་འཇོམས་བྱེད་མ་ལ་སྦྱར། །ན་མཿས་མནྟ་བུདྡྷཱ་ནཱཾ། ཨ་ཙིནྟྱདྡྷཱུ་ཏ་རཱུ་པི་ཎཱཾ། ཏདྱ་ཐཱ། ཨོཾ་བི་ལོ་ཀི་ནི་སྭཱ་ཧཱ། རིག་པ་སྣང་ལྡན་ཞེས་བྱ་བ། །འཇིག་རྟེན་ཐམས་ཅད་དབང་དུ་བྱེད། །བདེ་བ་ཐམས་ཅད་རབ་སྦྱིན་པ། །པདྨ་ཕྱག་རྒྱས་སྦྱར་བར་བྱ། །ན་མཿས་མནྟ་བུདྡྷཱ་ནཱཾ། ཨ་ཙིནྟྱ་དྡྷཱུ་ཏ་རཱུ་པི་ཎཱཾ། ཏདྱ་ཐཱ། ཨོཾ་བི་ཤྭ། བི་ཤྭ་སཾ་བྷ་བེ་བི་ཤ་རཱུ་པི་ཎཱཾ་
ཀ་ཧ་ཀ་ཧ་ཨཱ་བི་ཤ་ཨཱ་བི་ཤ་ས་མ་ཡ་མ་ནུ་སྨ་ར་རུ་རུ་ཏིཥྛ་སྭཱ་ཧཱ། རིག་པ་བརྩོན་འགྲུས་ཆེན་མོ་ནི། །འཇིག་རྟེན་འདྲེན་པས་བསྟན་པ་སྟེ། །སྙིང་པོ་ཕྱག་རྒྱ་མཉམ་པ་ཉིད། །སེམས་ཅན་ཐམས་ཅད་འབེབས་ཤིང་དགེ། །སྣ་ཚོགས་ཞེས་བྱར་ཡང་དག་བསྒྲགས། །ན་མཿས་མནྟ་བུདྡྷཱ་ནཱཾ། ཨོྃ་ཙིནྟྱདྦྷུ་ཏ་རཱུ་པི་ཎཱཾ། ཏདྱ་ཐཱ། ཨོྃ་ཤྭེ་ཏེ་པྲཱ་བ་སུ་ཧྭཱ་ཧཱ། པདྨའི་གདན་གྱི་རྣམ་པར་དགོད། །ལས་རྣམས་ཐམས་ཅད་བྱེད་པའོ། །ན་མཿས་མནྟ་བུདྡྷཱ་ནཱཾ། ཨ་པྲ་ཏི་ཧ་ཏ་ག་ཏི་པྲཱ་ཏི་རི་ཎཱཾ། ཏདྱ་ཐཱ། ཨོྃ་ཤྲཱིཿརིག་པ་འདི་ནི་དཔལ་མོ་ཆེ། །འཇིག་རྟེན་མགོན་གྱིས་བསྟན་པ་སྟེ། །ཕྱག་རྒྱ་ཁ་སྦྱོར་ལྡན་པ་ཡི། །རྒྱལ་སྲིད་ཆེན་པོ་རབ་སྦྱིན་བྱེད། །ན་མཿས་མནྟ་བུདྡྷཱ་ནཱཾ། སརྦ་སཏྭཱ་བྷ་ཡ་པྲ་དཱ་ཡི་ཀཱ། ཏདྱ་ཐཱ། ཨོྃ་ཨ་ཛི་ཏེ་ཀུ་མཱ་ར་རཱུ་པི་ཎཱི། ཨོྃ་ཧི་ཨ་གཙྪ་མ་མ་ཀར་ཡཾ་ཀུ་རུ་སྭཱ་ཧཱ། མི་ཐུབ་མ་ཞེས་རྣམ་གྲགས་མ། །གཞོན་ནུ་བདུད་རྩི་ལས་བྱུང་བ། །གང་བའི་ཕྱག་རྒྱར་ལྡན་པ་ཡིས། །དགྲ་རྣམས་ཐམས་ཅད་ཟློག་པར་བྱེད། །ན་མཿས་མནྟ་བུདྡྷཱ་ནཱཾ། ཨ་ཙིནྟྱདྦྷུ་ཏ་རཱུ་པི་ཎཱཾ། ཏདྱ་ཐཱ། ཨོཾ་ཛ་ཡེ་སྭཱ་ཧཱ། བི་ཛ་ཡེ་སྭཱ་ཧཱ། ཨ་ཛི་ཏེ་སྭཱ་ཧཱ། སྲིང་མོ་བཞི་ཞེས་རྣམ་གྲགས་པ། །བྱང་ཆུབ་སེམས་དཔའི་རྗེས་འགྲོ་བ། །ས་རྣམས་མཐའ་དག་ཡོངས་རྒྱུ་ཞིང་། །སེམས་ཅན་རྗེས་སུ་འཛིན་བྱེད་པ། །མིང་པོ་ཏུ་བུ་རུ་ཞེས་གྲགས། །འདི་རྣམས་ཀྱིས་ནི་རྗེས་སུ་སྤྱོད། །གྲུ་ཡི་བཞོན་པ་མཉམ་ཞོན་ནས། །རྒྱ་མཚོ་ལ་ནི་ངེས་པར་གནས། །ཁུ་ཚུར་ཕྱག་རྒྱས་རྣམ་པར་དགོད། །བསམ་པ་ཐམས་ཅད་ཡོངས་རྫོགས་བྱེད། །ན་མཿས་མནྟ་བུདྡྷཱ་ནཱཾ། ལོ་ཀཱ་གྲཱ་དྷི་བ་ཏི་ནཱཾ། ཏདྱ་ཐཱ། ཨོྃ་ཀུ་མཱ་རི་མ་ཧཱ་ཀུ་མཱ་རི་ཀྲཱི་ཌ་ཀྲཱི་ཌ། མ་ཧཱ་རཱཀྵ་སི་བོ་དྷི་སཏྭཱ་ནུ་ཛྙཱ་ཏ་མ་ཡུ་རཱ་ས་ནེ་པཱ་ཤ །པར་ཤཱུ་པཱ་ཎི་རཀྟཱཾ་གཱི་རཀྟ་གནྡྡྷཱ་ནུ་ལེ་པ་ན་པྲི་ཡེ་པྲི་ཡེ། ཁ་ཁ་ཁཱ་ཧི་ཁཱ་ཧི་ཧཱུྃ་ནྲི་ཏྱ་རཀྟ་པུཥྤཱ་རྩི་ཏ་མཱུ་རྟྟི་ས་མ་ནུ་སྨ་ར། བྷྲ་མ་བྷྲ་མ། བྷྲ་མ་ཡ་བྷྲ་མ་ཡ། ཧུ་ལུ་ཧུ་ལུ་མཱ་བི་ལམྦ། སརྦ་ཀརྨཱ་ཎི་མེ་ཀུ་རུ་ཀུ་རུ།
པི་ཙི་ཏྲ་རཱུ་པ་དྷཱ་རི་ཎི། ཏིཥྛ་ཏིཥྛ། ཧཱུྃ་ཧཱུྃ་སརྦ་བུདྡྷཱ་ནུ་ཛྙཱ་ཏེ་སྭཱ་ཧཱ། སེམས་ཅན་རྗེས་སུ་འཛིན་བྱེད་པའི། །བྱང་ཆུབ་སེམས་དཔས་བཤད་པས་ན། །ས་རྣམས་མ་ལུས་ཀུན་ནས་ནི། །རྣམ་པ་དྲུག་ཏུ་རབ་ཏུ་གཡོས། །སེམས་ཅན་ཀུན་ལ་ཕན་དོན་དང་། །གདུག་པའི་སེམས་ཅན་ཟློག་བྱེད་པ། །བདག་གི་རིག་པ་རྟག་ཏུ་གྲགས། །རྟག་ཏུ་སྲུང་བར་ཡོངས་སུ་གྲགས། །སྲུང་བ་ལྟོས་འགྲོ་དེ་ཉིད་ཀྱི། །འཇིག་རྟེན་མཚན་མས་ལེགས་པར་མཚན། །སྙིང་རྗེས་ཐུགས་ནི་བརླན་པ་ཡི། །བྱང་ཆུབ་སེམས་དཔའ་དེ་ནས་གསུངས། །བྱང་ཆུབ་སེམས་དཔའ་བདག་ཉིད་ཆེ། །བྱིས་པ་རྣམས་ལ་ཕན་དོན་དུ། །གང་ལ་སེམས་ཅན་སྤྱོད་གསུངས་པ། །འགྲོ་བ་རྣམས་ལ་རྣམ་སྤྱོད་ལྡན། །ཕྱག་རྒྱ་དབྱུག་པའི་སྲོག་ཤིང་ལྡན། །བདག་ཉིད་ཆེན་པོས་སྦྱར་ནས་ནི། །ཚངས་པ་ལ་སོགས་འགུགས་བྱེད་ན། །མི་རྣམས་འབྲས་བུ་སྨོས་ཅི་དགོས། །གཞོན་ནུའི་སེམས་སུ་མ་ལུས་པའི། །རྟོག་པ་འདི་ནི་བསྡུས་ནས་སུ། །སྲིན་པོ་རྣམས་སུ་གྲགས་པ་ཡི། །རིག་སྔགས་འདི་ནི་ཡང་དག་བསྟན། །སེམས་ཅན་རྗེས་གཟུང་འདོད་པ་ཡི། །བྱང་ཆུབ་སེམས་དཔའ་དེ་ལྟར་བཤད། །ཡིག་གསུམ་ཞེས་བྱའི་སྙིང་པོ་འདི། །རིག་སྔགས་འདི་ནི་ཡང་དག་བཤད། །སེམས་ཅན་ཀུན་ལ་ཕན་དོན་དུ། །ཉེ་བར་ལོངས་སྤྱོད་འགུགས་པའི་མཆོག །ཕྱག་རྒྱ་དབྱུག་པའི་སྲོག་ཤིང་ནི། །རྣམ་བཀོད་ལས་རྣམས་ཐམས་ཅད་པའོ། །ཨོྃ་ཧཱུྃ་ཛཿ། རིག་སྔགས་འདི་ནི་མདོར་བསྡུས་ནས། །མི་རྣམས་འབྲས་བུ་བྱེད་པ་ཡིན། །ན་མཿས་མནྟ་བུདྡྷཱ་ནཱཾ། ས་མནྟོ་ཏྱོ་ཏི་ཏ་མཱུརྟྟི་ནཱཾ། ཨ་བི་ཀྲྀ་ཏ་གྲ་ཧ་ཧཱུྃ་ཕཊ་སྭཱ་ཧཱ། ཉེ་བའི་སྙིང་པོ་འདི་ཡང་ནི། །ཕྱག་རྒྱ་དགྲ་སྟ་ཡང་དག་ལྡན། །དེ་བཞིན་འབྱུང་པོ་འགུགས་པར་བྱེད། །དེ་བཞིན་གཟའ་དང་མ་མོར་བཅས། །ཐམས་ཅད་ཕྱག་རྒྱས་རྒྱས་བཏབ་པ། །བཀོད་ན་འབྲས་བུ་བཅས་པར་འགྱུར། །འབྱུང་པོ་རྣམས་ནི་རྣམ་སྐྲག་བྱེད། །གདུག་པ་ཞུགས་པ་རྣམ་པར་གྲོལ། །འདི་ནི་
བཅོམ་ལྡན་འདས་མ་འཕགས་མ་སྒྲོལ་མའི་ཕོ་ཉ་མོ་ཆེན་མོ་ལས་ཐམས་ཅད་པ་རལ་པ་གཅིག་མ་ཞེས་བྱ་བ་རྗེས་སུ་སྤྱོད་པ་ལས་ཐམས་ཅད་པ་སྟེ་བཟླས་པ་ཙམ་ཁོ་ནས་ལས་ཐམས་ཅད་བྱེད་དོ། །འབྱུང་པོ་ཐམས་ཅད་སྐྲག་པར་བྱེད་པ་དང་། འགུགས་པར་བྱེད་པ་དང་། དབང་དུ་བྱེད་པ་དང་། རིག་པ་འཛིན་པ་ཇི་ལྟར་འདོད་པ་དེ་ཐམས་ཅད་རྫོགས་པར་བྱེད་དོ། །ན་མཿས་མནྟ་བུདྡྷཱ་ནཱཾ། ཨ་པྲ་ཏི་ཧ་ཏ་ཤཱ་ས་ནཱ་ནཱཾ། ཏདྱ་ཐཱ། ཨོྃ་པྲཧྨཱ་སུ་པྲཧྨཱ་པྲཧྨཱ། བཪྩ་སེ་ཤཱནྟིཾ་ཀུ་རུ་སྭཱ་ཧཱ། སྔགས་འདི་ཚངས་པ་ཆེན་པོ་སྟེ། །བྱང་ཆུབ་སེམས་དཔས་བཤད་པ་ཡིན། །འབྱུང་པོ་ཞི་བ་རབ་ཏུ་ཐོབ། །སྐད་ཅིག་ཉིད་ལ་བསིལ་བར་འགྱུར། །ཕྱག་རྒྱ་པདྨ་ཡང་དག་ལྡན། །མྱུར་དུ་དགེ་ལེགས་ཐོབ་པར་འགྱུར། །མངོན་སྤྱོད་ཀྱི་ནི་ལས་རྣམས་ལ། །སྲིད་སྲུང་གི་ནི་རིག་བྱེད་འདོད། །འདི་ནི་མདོར་བསྡུས་བརྗོད་པ་སྟེ། །ཆོ་ག་འདི་ནི་མདོར་བསྡུས་པའོ། །ན་མཿས་མནྟ་བུདྡྷཱ་ནཱཾ། ཨ་པྲ་ཏི་ཧ་ཏ་ཤཱ་ས་ནཱ་ནཱཾ། ཏདྱ་ཐཱ། ཨོཾ་ག་རུ་ཌ་བ་ཧ་ན་ཙཀྲ་པཱ་ནི་ཙ་ཏུར་བྷུ་ཛ་ཧཱུྃ་ཧཱུྃ། ས་མ་ཡ་མ་ནུ་སྨ་ར། བོ་དྷི་སཏྭ་ཨཱཛྙཱ་པ་ཡ་ཏི་སྭཱ་ཧཱ། བྱང་ཆུབ་སེམས་དཔས་བཀའ་སྩལ་པ། །ཞི་བའི་དོན་ནི་མྱུར་དུ་བྱེད། །འབྱུང་པོ་རྣམས་ནི་རྣམ་འཇིག་བྱེད། །ཁྱབ་འཇུག་གཟུགས་ཀྱི་ལུས་ཅན་ཡིན། །ཕྱག་རྒྱ་འཁོར་ལོར་ཡང་དག་ལྡན། །བརྟན་པའི་དོན་ནི་ཡང་དག་བྱེད། །གང་འདི་ཁྱབ་འཇུག་རྒྱུད་དུ་ནི། །ཆོ་ག་རྒྱས་པར་བསྟན་པ་སྟེ། །སེམས་ཅན་ཀུན་གྱི་སྒྲུབ་བྱེད་དེ། །བྱང་ཆུབ་སེམས་དཔས་བཤད་པ་ཡིན། །ན་མཿས་མནྟ་བུདྡྷཱ་ནཱཾ། ཨ་པྲ་ཏི་ཧ་ཏ་ཤཱ་ས་ནཱ་ནཱཾ། ཏདྱ་ཐཱ། མ་ཧཱ་མ་ཧེ་ཤྭ་ར་བྷུ་ཏཱ་དྷི་པ་ཏི་བྲྀ་ཥ་བྷ། དྷྭ་ཛེ་པྲ་ལཾ་བ་ཛ་ཊ་མུ་ཀུ་ཊ་དྷཱ་རི་ཎཱི། སི་ཏ་བྷསྨ་དྷུ་ས་ར་ཏ། མཱུརྟི་ས་ཨཾ་ཕཊ་ཕཊ་བོ་དྷི་སཏྭ་ཨཱཛྙཱ་པ་ཡ་ཏི་སྭཱ་ཧཱ། སེམས་ཅན་རྣམས་ལ་ཕན་འདོད་པས། །སྔགས་འདི་བདག་གིས་རབ་ཏུ་བརྗོད། །མདུང་གི་ཕྱག་རྒྱ་མཉམ་པར་ལྡན། །འབྱུང་པོ་ཐམས་ཅད་རྣམ་འཇིག་པ། །འདི་ཡང་བསྟན་
པའི་ཆོ་ག་འདི། །སེམས་ཅན་ས་སྟེངས་གནས་པ་ལ། །སྔོན་ནི་ཞི་བའི་རྒྱུད་དུ་བསྟན། །ཡོན་ཏན་སྣ་ཚོགས་རྒྱ་ཆེ་བ། །ཞི་བའི་རྒྱུད་ཀྱིས་ཀྱང་བརྗོད་དོ། །ན་མཿས་མནྟ་བུདྡྷཱ་ནཱཾ། ཨ་པྲ་ཏི་ཧ་ཏ་ཤཱ་ས་ནཱ་ནཾ། ཏདྱ་ཐཱ། ཨོྃ་ཤ་ཀུ་ནི་པ་ཏ་ཏ་པཀྵི་ཎ། ཤ་ཀ་ཁ་ཁ། ཁཱ་ཧི་ཁཱ་ཧི་ས་མ་ཡ་མ་ནུ་སྨ་ར་ཧཱུྃ་ཏིཥྛ་བོ་དྷི་སཏྭ་ཨཱཛྙཱ་པ་ཡ་ཏི་སྭཱ་ཧཱ། སྔགས་འདི་བརྩོན་འགྲུས་ཆེན་པོ་སྟེ། །ནམ་མཁའ་ལྡིང་ཞེས་རྣམ་པར་གྲགས། །གདུལ་དཀའ་འདུལ་བ་རྣམས་ཀྱི་མཆོག །གདེངས་ཀ་ཅན་གྱི་དུག་རྣམས་འཇོམས། །ཕྱག་རྒྱ་ཆེ་དང་ཡང་དག་ལྡན། །ཕུང་ཁྲོལ་མི་བཟད་བཅས་པ་འཇོམས། །བརྟན་དང་གཡོ་བའི་དུག་རྣམས་ནི། །གསོ་བར་བྱེད་པར་ཐེ་ཚོམ་མེད། །གདུལ་བྱའི་སེམས་ཅན་ལ་བརྩེ་བས། །བྱང་ཆུབ་སེམས་དཔའི་ཡང་དག་བཀའ། །ནམ་མཁའ་ལྡིང་གི་གཟུགས་ཀྱིས་སྤྱོད། །འདབ་ཆགས་རྒྱལ་པོ་འོད་ཆེན་ལྡན། །ཇི་སྲིད་ནམ་མཁའ་ལྡིང་རྒྱུད་དུ། །བསྟན་པའི་ཆོ་ག་རྒྱས་དེ་རྣམས། །སེམས་ཅན་ཀུན་ལ་ཕན་པའི་རྒྱུད། །བདག་གིས་ཀྱང་ནི་བརྗོད་པ་ཡིན། །མཁའ་ལྡིང་མངོན་པར་བརྗོད་རྒྱུད་དུ། །ཁྲོ་བོའི་རྒྱལ་པོ་མ་བསྟན་ན། །གདེངས་ཅན་དུག་ནི་གཞོམ་པའི་ཕྱིར། །འདབ་ཆགས་གཟུགས་ཀྱིས་རྣམ་པར་རྒྱུ། །ཇི་སྲིད་འཇིག་རྟེན་པ་ཡི་སྔགས། །དེ་རྣམས་ཆོ་ག་དཔེར་བརྗོད་པ། །གདུལ་བྱའི་སེམས་ཅན་དོན་དུ་ནི། །དེ་ལྟ་དེ་ལྟར་རྣམ་པར་སྤྱོད། །གང་ཡང་དེ་བཞིན་གཤེགས་སྔགས་དང་། །རྡོ་རྗེ་པདྨའི་རིགས་དག་ཀྱང་། །དེ་རྣམས་ཆོ་ག་རབ་འབྱམ་འདིར། །སྔ་མ་ཁོ་ནར་གསུངས་པས་ཡིན། །ཇི་ལྟར་མ་མ་རྣམ་མང་པོ། །བྱིས་པ་འབད་པས་སྲུང་བྱེད་པ། །དེ་བཞིན་བྱིས་མཐའི་བློ་ཅན་ལ། །ང་ནི་རིག་སྔགས་གཟུགས་ཀྱི་རྒྱུ། །སྟོབས་བཅུ་ལྡན་པས་སྔོན་གསུངས་པ། །ད་ལྟའང་ང་ཡིས་བསྟན་པ་ཡིན། །སྔགས་རྒྱུད་དོན་ནི་མ་ལུས་པ། །རྟོགས་པས་རབ་གསུངས་འོད་ཆེན་པོ། །རྒྱལ་བ་མཆོག་གིས་གང་གསུངས་པ། །སྟོབས་བཅུ་ལྡན་པའི་སྲས་ཀྱིས་གསུངས། །
རྨད་བྱུང་བསམ་མི་ཁྱབ་གཟུགས་ཅན། །སྤྱན་རས་གཟིགས་ཀྱིས་གསུངས་པའོ། །དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ཐམས་ཅད་དང་ལྡན་པའི་འཇིག་རྟེན་གྱི་ཁམས་དེ་དང་། འཁོར་གྱི་དཀྱིལ་འཁོར་ཆེན་པོ་དེ་ལ་ཀུན་དུ་གཟིགས་ནས་དམ་ཚིག་ཐམས་ཅད་ཡང་དག་པར་སྐུལ་བར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །གང་དུ་ཏིང་ངེ་འཛིན་ལ་གནས་པས་སེམས་ཅན་མ་ལུས་པའི་སྒྲུབ་པའི་སྤྱོད་པའི་ཡིད། སེམས་ཅན་ཐམས་ཅད་ལ་རབ་ཏུ་གནས་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྙོམས་པར་ཞུགས་མ་ཐག་ཏུ་ཐམས་ཅད་དང་ལྡན་པའི་འཁོར་ཆེན་པོ་གནས་རྣམ་པར་བཀྲ་བའི་ཕྱག་ན་རིན་པོ་ཆེའི་སྙིང་པོ་རྒྱན་བཀོད་པའི་དཀྱིལ་འཁོར་བསམ་གྱིས་མི་ཁྱབ་ཅིང་རྨད་དུ་བྱུང་བའི་རྣམ་པར་འཕྲུལ་པ་རང་སངས་རྒྱས་ཐམས་ཅད་དང་། འཕགས་པ་ཉན་ཐོས་དང་། སྤྱོད་པ་ལ་ཞུགས་པའི་བྱང་ཆུབ་སེམས་དཔའ་རྣམས་དང་། ས་བཅུ་དང་ལྡན་པ་ས་བཅུའི་དབང་ཕྱུག་ལ་གནས་པ་རྣམས་ཀྱིས་ཀྱང་། དཀྱིལ་འཁོར་དེ་བྲི་བའམ་འདྲིར་འཇུག་པར་མི་ནུས་ན། སོ་སོའི་སྐྱེ་བོར་གྱུར་པའི་སེམས་ཅན་རྣམས་ཀྱིས་ལྟ་སྨོས་ཀྱང་ཅི་དགོས། འཕགས་པའི་དཀྱིལ་འཁོར་བཟང་པོ་དེའི་དམ་ཚིག་སྒྲུབ་པའི་གནས་ལ་གནས་པ་བྱང་ཆུབ་སེམས་དཔའ་ཆེན་པོས་གཟིགས་ནས། སངས་རྒྱས་བཅོམ་ལྡན་འདས་ཐམས་ཅད་དང་། རང་སངས་རྒྱས་ཐམས་ཅད་དང་། འཕགས་པ་ཉན་ཐོས་ཐམས་ཅད་དང་། བྱང་ཆུབ་སེམས་དཔའ་ས་བཅུ་ལ་གནས་པ་རྒྱལ་ཚབ་ཏུ་མངོན་པར་དབང་བསྐུར་ཞིང་དམ་ཚིག་ཐོབ་པ་ཐམས་ཅད་དང་། སྤྱོད་པ་ལ་ཞུགས་པ་རྣམས་དང་། ཟག་པ་དང་བཅས་པ་དང་། ཟག་པ་མེད་པའི་སེམས་ཅན་ཐམས་ཅད་སྤྱན་རས་གཟིགས་དབང་ཕྱུག་གིས་བྱིན་གྱིས་བརླབས་ཀྱིས་སངས་རྒྱས་དང་བྱང་ཆུབ་སེམས་དཔའི་སྤྱོད་པ་བསམ་གྱིས་མི་ཁྱབ་པའི་རྒྱུ་མཐུན་པ་དང་། ཏིང་ངེ་འཛིན་གྱི་ཁྱད་པར་གྱིས་ཐུགས་
ལས་བྱུང་བའི་དཀྱིལ་འཁོར་དུ་ཞུགས་པ་བདག་ཉིད་ཀྱིས་ཡང་དག་པར་ཤེས་པར་གྱུར་ཏོ། །སོ་སོའི་སྐྱེ་བོ་ཐམས་ཅད་ཀྱིས་དེ་ཡིད་ཀྱིས་དམིགས་པར་མི་ནུས་ན། བྲི་བའམ་འདྲིར་འཇུག་པ་ལྟ་སྨོས་ཀྱང་ཅི་དགོས། །དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གིས་དཀྱིལ་འཁོར་ཆེན་པོའི་དམ་ཚིག་ལ་རྗེས་སུ་རབ་ཏུ་ཞུགས་པའི་སེམས་ཅན་དེ་རྣམས་ལ་སྨྲས་པ། གྲོགས་པོ་དག་ཉོན་ཅིག །འདི་ནི་དེ་བཞིན་གཤེགས་པ་རྣམས་དང་བྱང་ཆུབ་སེམས་དཔའ་རྣམས་ཀྱིས་ཀྱང་འདའ་བར་མི་བྱ་བའི་དམ་ཚིག་ཡིན་ན། སེམས་ཅན་རྣམས་དང་། འཕགས་པ་གཞན་རྣམས་ཀྱང་ལྟ་སྨོས་ཀྱང་ཅི་དགོས། དེ་ནས་ཡང་སེམས་དཔའ་ཆེན་པོས་ཕྱག་ན་རྡོ་རྗེ་གསང་བ་པའི་བདག་པོ་ལ་སྨྲས་པ། ཀྱེ་རྒྱལ་བའི་སྲས། མི་ལས་འདས་པའི་དམ་ཚིག་ཡིད་ལས་བྱུང་བ་ནི་ངེས་པར་བསྟན་ཏོ། །མི་རྣམས་ལ། དེ་བཞིན་གཤེགས་པ་རྣམས་ཡོངས་སུ་མྱ་ངན་ལས་འདས་ན་ཡང་དག་ཏུ་སེམས་ཅན་རྣམས་ཡང་དག་པར་ཞུགས་ནས། འཇིག་རྟེན་དང་འཇིག་རྟེན་ལས་འདས་པའི་རིག་པ་དང་། སྔགས་ཀྱི་དངོས་གྲུབ་ཐམས་ཅད་འགྲུབ་པར་འགྱུར་བར་བཤད་པར་བྱའོ། །དེ་ནས་ཡང་གསང་བ་པའི་བདག་པོ་ཕྱག་ན་རྡོ་རྗེས། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་སྨྲས་པ། ཀྱེ་རྒྱལ་བའི་སྲས་གང་ད་ལྟ་དུས་ལ་བབ་པར་ཤེས་ན་གསུངས་ཤིག་གསུངས་ཤིག །ཤཱཀྱ་སེངྒེ་འཇིག་རྟེན་མགོན། །ཡོངས་སུ་མྱ་ངན་འདས་པ་ན། །མི་རྣམས་མཆོག་གི་སངས་རྒྱས་ཞིང་། །སེམས་ཅན་ས་སྟེངས་ཁྱོད་དཀྱིལ་འཁོར། །མཐོང་བ་ཙམ་གྱིས་འཇིག་རྟེན་ན། །སྔགས་ཀྱི་དངོས་གྲུབ་རབ་ཏུ་སྐྱེ། །མི་ཤེས་ཆོ་ག་ཉམས་པའམ། །དམ་ཚིག་བདག་པོར་མ་གྱུར་ན། །ཚངས་པ་བདག་ཉིད་ཆེན་པོས་ཀྱང་། །རིག་སྔགས་དངོས་གྲུབ་མི་འགྱུར་རོ། །སྔགས་ལ་མངོན་པར་མི་བརྩོན་དང་། །དམ་ཚིག་བསྟན་པ་མི་མཐོང་ན། །རྣམ་པར་དུ་མར་འབད་བྱས་ཀྱང་། །རིག་པའི་
དངོས་གྲུབ་མི་འགྱུར་རོ། །དམ་ཚིག་སྦྱོར་བ་ཉམས་པ་ན། །བརྒྱ་བྱིན་གྱིས་ཀྱང་རབ་འབད་ལས། །རིག་པའི་དངོས་གྲུབ་མི་འགྱུར་ན། །ས་སྟེངས་མི་རྣམས་སྨོས་ཅི་དགོས། །དམ་ཚིག་བསྟན་བཅོས་དེ་ཉིད་ཤེས། །སྤྱོད་པའི་ལས་རྣམས་སྒྲུབ་པ་དེ། །འཇིག་རྟེན་པ་དང་འཕགས་པའི་སྔགས། །བཀླགས་པ་ཙམ་གྱིས་འགྲུབ་པར་འགྱུར། །བྱང་ཆུབ་སེམས་དཔའི་དཀྱིལ་འཁོར་དུ། །རབ་ཞུགས་ལས་རྣམས་ཐམས་ཅད་བྱེད། །བྱང་ཆུབ་སེམས་དཔའ་བསྟན་པ་ལ། །དེ་ཡི་རིག་པའི་དངོས་གྲུབ་རྟག །དེ་ནས་ཡང་གསང་བ་པའི་བདག་པོ་ལག་ན་རྡོ་རྗེས། སེམས་དཔའ་ཆེན་པོ་དེ་ལ་གསོལ་བ་བཏབ་པར་གྱུར་ཏོ། །ཀྱེ་ཀྱེ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་སེམས་ཅན་གྱི་དོན་གྱི་ཕྱིར་དཀྱིལ་འཁོར་ཆོ་ག་གསུངས་སོ། །དང་པོ་རེ་ཞིག་ཆོ་འཕྲུལ་གྱི་ཟླ་ཕྱེད་དམ། ནག་པ་ཅན་ནམ། ས་གཅན་གྱི་ཟླ་བའི་དཀར་པོའི་ཕྱོགས་ལ་རབ་ཏུ་བསྔགས་པའི་ཉི་མ་དང་། གཟའ་བཟང་པོ་བལྟས་ཏེ། རྒྱུ་སྐར་དགེ་བ་དང་ཡང་དག་པར་ལྡན་པའི་དཀར་པོའི་ཕྱོགས་ཀྱི་ཚེས་གཅིག་དང་། ཟླ་བ་ཉ་བའམ། དུས་གཞན་ལ་དབྱར་གྱི་ཟླ་བ་སྤངས་ཏེ། སྔ་དྲོ་ས་རབ་ཏུ་གནས་པར་བྱའོ། །གྲོང་ཁྱེར་ཆེན་པོ་ལ་བརྟེན་པའམ། གང་དུ་དཀྱིལ་འཁོར་གྱི་སློབ་དཔོན་རང་ཉིད་གནས་པར་ཏེ། རྒྱ་མཚོར་འཇུག་པའམ། ཆུ་ཀླུང་ལ་བརྟེན་པའམ། རྒྱ་མཚོའི་ངོགས་དང་ཉེ་བར་གྲོང་ཁྱེར་ཆེན་པོའི་བྱང་ཤར་གྱི་ཕྱོགས་ཀྱི་ཆར་ཧ་ཅང་ཡང་མི་རིང་། ཧ་ཅང་ཡང་མི་ཉེ་བར་དཀྱིལ་འཁོར་གྱི་སློབ་དཔོན་སོང་ནས། ཉི་མ་བདུན་ནམ། ཟླ་ཕྱེད་དུ་མཐའ་གཅིག་ཏུ་སྨྱུང་བའམ། ཉེ་བར་གནས་ནས་སོ་སོར་གནས་པར་བྱའོ། །གང་གནས་དེ་རྣམས་སུའང་གཙང་མའི་ས་ཕྱོགས་རྡོ་བ་དང་། གྱོ་མོ་དང་། ཐལ་བ་དང་། སོལ་བ་དང་། ཕུབ་མ་དང་། ཐོད་པ་དང་། རུས་པ་དང་། རུས་པ་གནས་པ་དང་བྲལ་བ། ཤིན་ཏུ་ཡོངས་སུ་སྦྱང་བ་བྱས་པའི་ས་ཕྱོགས་སུ། སྲོག་ཆགས་མེད་པའི་ཆུ་ལ། བ་བྱུང་ལྔ་དང་བསྲེས་པའི་ཙནྡན་དང་།
ག་པུར་དང་། གུར་གུམ་གྱི་ཆུས་ཁྲོ་བོའི་རྒྱལ་པོ་སྒྲོལ་མས་ནོན་པ་སྟོང་ཕྲག་བརྒྱད་ཀྱིས་མངོན་པར་བསྔགས་པ་དེས་བཅོམ་ལྡན་འདས་མའི་ཕྱག་རྒྱ་ཆེན་པོ་ཡང་དག་པར་ལྡན་པས། ས་ཕྱོགས་དེ་ལ་ཕྱོགས་བཞི་རྣམས་སུ་མངོན་པར་གཏོར་ཞིང་སྟེང་དང་འོག་དང་ཐད་ཀ་དང་ཕྱོགས་བྲལ་རྣམས་སུའང་ཀུན་ནས་གཏོར་བར་བྱའོ། །དེ་ནས་ས་ཕྱོགས་དེར་ཀུན་ནས་གྲུ་བཞིར། ཁྲུ་བཅུ་དྲུག་གམ། ཁྲུ་བཅུ་གཉིས་སམ། ཁྲུ་བརྒྱད་བྱ་སྟེ། དེ་ལ་ཆེན་པོ་ནི་ཁྲུ་བཅུ་དྲུག་གོ། །བར་མ་ནི་ཁྲུ་བཅུ་གཉིས་སོ། །ཆུང་ངུ་ནི་ཁྲུ་བརྒྱད་དོ། །དཀྱིལ་འཁོར་རྣམ་པ་གསུམ་པོ་འདི། །ཐམས་ཅད་གཟིགས་པས་གསུངས་པ་ཡིན། །རྒྱལ་སྲིད་འདོད་ཕྱིར་ཆེན་པོ་སྟེ། །བར་མ་ལོངས་སྤྱོད་འཕེལ་བར་བྱེད། །ཆུང་ངུ་སྔགས་ཀྱི་དམ་ཚིག་ནི། །ལས་རྣམས་ཀུན་བྱེད་ཞི་པ་ཡིན། །དེ་ལ་ཡིད་ལ་འདོད་པ་གང་ཡང་རུང་བའི་དཀྱིལ་འཁོར་བྲི་བར་བྱའོ། །དེ་ལ་སའི་ཕྱོགས་དེར་ཁྲུ་གཉིས་ཙམ་བརྐོས་ལ། དེར་རྡོ་བ་དང་། སོལ་བ་དང་། ཐལ་བ་དང་། རུས་པ་དང་། སྐྲ་ལ་སོགས་པ་དང་། སྲོག་ཆགས་ཀྱི་རིགས་རྣམ་པ་སྣ་ཚོགས་པ་གལ་ཏེ་མཐོང་ན་སའི་ཕྱོགས་གཞན་དུ་བརྐོ་བར་བྱའོ། །གནོད་པ་མེད་པ་དང་། ཉེ་བར་འཚེ་བ་མེད་པ་དེར་འགྱུར་རོ། །རིའི་རྩེ་མོ་དང་། རྒྱ་མཚོར་འབབ་པའི་ཆུ་ཀླུང་ཆེན་པོའི་ཆུ་ངོགས་རྣམས་སུའང་གང་རབ་ཏུ་འབད་པ་ཆེན་པོས་ཤིན་ཏུ་སོ་སོར་བརྟགས་ཏེ་ཤིན་ཏུ་གཙང་ཞིང་སྲོག་ཆགས་མེད་པར་བྱས་ནས་བྲི་བར་བྱའོ། །སའི་ཕྱོགས་དེར་སླར་ཡང་སྲོག་ཆགས་མེད་པའི་ཆུ་ལ་བའི་རྣམ་ལྔ་བསྲེས་པས་ཆུ་ཀླུང་གི་འགྲམ་གྱི་ས་གཙང་མའམ། གྲོག་མཁར་གྱི་སའམ། གང་དུ་སྲོག་ཆགས་མེད་པའི་ས་དེས་དགང་བར་བྱའོ། །བཀང་ནས་ཀྱང་ལེགས་པར་བརྡུངས་ཏེ་ཀུན་ནས་མཉམ་པར་བྱས་ལ་ཇི་ལྟར་འདོད་པའི་དཀྱིལ་འཁོར་རྣམ་པ་གསུམ་བྱའོ། །སེང་ལྡེང་གི་ཕུར་བུ་བཞི་ལ་ཁྲོ་བོའི་རྒྱལ་པོ་ཉིད་ཀྱིས་ལན་བདུན་མངོན་པར་བསྔགས་པར་བྱས་ནས་ཕྱོགས་བཞི་རྣམས་སུ་གདབ་པར་བྱའོ། །ཚོན་སྣ་ལྔའི་སྐུད་པ་ལ་ཁྲོ་བོའི་རྒྱལ་
པོས་ལན་བདུན་མངོན་པར་བསྔགས་པར་བྱས་ནས་ཀུན་ནས་དཀྱིལ་འཁོར་གྲུ་བཞི་པའི་རྣམ་པར་དཀྲི་བར་བྱའོ། །དེ་བཞིན་དུ་དབུས་ཀྱི་གནས་སུ། ནང་དུའང་ཟུར་བཞིའི་རྣམ་པར་བྱའོ། །དབུས་ཀྱི་ནང་ན་གནས་པའི་དཀྱིལ་འཁོར་གྱི་སློབ་དཔོན་གྱིས་རྩ་བའི་རིག་པའམ། རྩ་བའི་སྙིང་པོ་སྟོང་ཕྲག་བརྒྱད་བཟླས་པར་བྱའོ། །ཕྱག་རྒྱ་ཆེན་པོ་དང་རྩ་བའི་སྔགས་ཀྱིས་གཙུག་ཏོར་བཅིངས་ཏེ་ཁྲོ་བོའི་རྩ་བའི་སྔགས་ཀྱིས་གྲོགས་བསྲུངས་ནས་བདག་ཉིད་བསྲུང་བར་བྱས་ཏེ། བཟླས་པ་བྱེད་བཞིན་དུ་ཕྱི་རོལ་དུ་བྱུང་སྟེ། དཀྱིལ་འཁོར་ལ་གཡས་སུ་བསྐོར་བ་བྱས་ནས་ཁ་ཤར་དུ་ཕྱོགས་ཏེ་ཀུ་ཤའི་ཁྲེས་ལ་ཉེ་བར་འདུག་ནས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཡིད་ལ་བྱས་ཏེ་དཀྱིལ་འཁོར་དེ་ཀུན་ནས་གྲུ་བཞིའི་རྣམ་པར་དཀྲི་བར་བྱའོ། །དེ་ཉིད་ཀྱི་ཕྱི་རོལ་དུ་ཞག་གཅིག་སྨྱུང་བར་གནས་པས་རབ་ཏུ་གནས་པར་བྱའོ། །དེ་ལ་འདིར་དཀྱིལ་འཁོར་གྱི་སློབ་དཔོན་གྱི་སྔོན་སྤྱད་པ་རྣམས་བྱས་ཏེ། རང་གི་རིག་པ་དང་། སྔགས་དང་རྒྱུད་ལ་མཁས་པའི་མཁན་པོས་སེམས་ཅན་ཐམས་ཅད་ཀྱི་དོན་གྱི་ཕྱིར་ཐེག་པ་ཆེན་པོ་ལ་ལྷག་པར་མོས་པས་ཞག་གཅིག་སྨྱུང་བར་གནས་པས་གྲོགས་བཟང་པོ་དང་ཡང་དག་པར་ལྡན་པ། བསྟན་བཅོས་རྣམ་པ་སྣ་ཚོགས་པའི་བྱ་བ་མཐོང་བས་ཚོན་ལྔའི་ཕྱེ་མ་ཞིབ་མོ་འབར་བས་ལེགས་པར་སྦྱང་བ་བྱས་ནས། རྩ་བའི་རིག་པའི་སྔགས་དང་སྙིང་པོས་མངོན་པར་བསྔགས་པའི་ཕྱེ་མ་དཀྱིལ་འཁོར་དབུས་སུ་གདབ་པར་བྱའོ། །ཕ་རོལ་དུའང་རྒྱལ་མཚན་དང་། བ་དན་སྒྲེང་བ་དང་། རྟ་བབས་བཞེས་བརྒྱན་པ་དང་། ཆུ་ཤིང་གི་སྡོང་བུ་འབྲས་བུའི་ཚོགས་ཀྱིས་གཡུར་ཟ་ཞིང་ཀུན་ནས་འབྲས་བུའི་ཚོགས་རྣམས་ཀྱིས་རབ་ཏུ་འཕྱང་བཞིན་པ་དང་། རྔ་བོ་ཆེ་དང་། རྫ་རྔ་དང་། དུང་གི་སྒྲ་ངེས་པར་སྒྲོགས་པའི་སའི་ཕྱོགས་སུ་བསྒྲག་པར་བྱའོ། །ངོས་བཞིར་རྗེས་སུ་མཐུན་པའི་བར་དུ་བསྔགས་པའི་སྒྲའི་ཆོས་མཉན་པར་བྱའོ། །ཕྱོགས་བཞི་རྣམས་སུ་ཐེག་པ་ཆེན་པོའི་མདོ་སྡེའི་གླེགས་བམ་བཀླག་པར་བྱའོ། །འདི་ལྟ་སྟེ། ཤེས་རབ་ཀྱི་ཕ་རོལ་དུ་ཕྱིན་པ་
ལྷོ་ཕྱོགས་སུ་བཀླག་པར་བྱའོ། །འཕགས་པ་ཟླ་བ་སྒྲོན་མའི་ཏིང་ངེ་འཛིན་ནུབ་ཕྱོགས་སུའོ། །འཕགས་པ་སྡོང་པོ་བཀོད་པ་བྱང་ཕྱོགས་སུའོ། །འཕགས་པ་གསེར་འོད་དམ་པ་ཤར་ཕྱོགས་སུའོ། །དེ་ལྟར་གླེགས་བམ་ཀློག་པ་པོ་མེད་ན་མདོ་སྡེ་བཞི་པོ་ཀློག་པར་རྟོགས་པའི་གང་ཟག་ཆོས་སྨྲ་བ་པོ་ལ་ཆོས་མཉན་པའི་ཕྱིར་གསོལ་བ་གདབ་པར་བྱའོ། །དེ་ནས་དཀྱིལ་འཁོར་གྱི་སློབ་དཔོན་ལངས་ནས་ཙནྡན་དང་། ག་པུར་དང་། གུར་གུམ་རྣམ་པར་བསྲེས་པའི་མེ་ཏོག་དཀར་པོ་དྲི་ཞིམ་པ་ལ་རྩ་བའི་རིག་པ་བཟླས་ཏེ། དཀྱིལ་འཁོར་དེ་ཐམས་ཅད་དུ་གཅལ་དུ་དགྲམ་པར་བྱའོ། །མངོན་པར་བཀྲམ་ནས་ཕྱི་རོལ་དུ་བྱུང་སྟེ། ཞག་བདུན་གྱི་བར་དུ་འདོད་པའི་ཁ་ཟས་བསྟེན་པ་གཉིས་སམ། གསུམ། བྱང་ཆུབ་ཀྱི་སེམས་བསྐྱེད་པ། གསོ་སྦྱོང་ཉེ་བར་གནས་པ་བསྟེན་པ་ལ་གནས་པའི་རི་མོ་མཁན་དེ་གྲོགས་སམ། སློབ་མ་དེས་ཁས་བླངས་པ་རབ་ཏུ་གཞུག་པར་བྱའོ། །གང་རྩ་བའི་རིག་པ་ཉིད་ཀྱིས་གཙུག་ཏོར་བཅིང་བ་བྱས་ནས། དེ་ནས་གསེར་དང་། དངུལ་དང་། རིན་པོ་ཆེ་རྣམ་པ་སྣ་ཚོགས་པའི་གོ་འཕང་རྣམ་པར་བཀྲ་ཞིང་། འབར་ལ་མཛེས་པའི་ཟངས་ཀྱི་ཕྱེ་མ་ཞིབ་མོ་སོ་སོར་བཟུང་ནས་ལོངས་སྤྱོད་ཆེན་པོ་དང་ལྡན་ཞིང་། ཆོས་དང་ལྡན་པའི་རྒྱལ་པོ་ཆེན་པོ་རྣམས་འདིར་གཞུག་པར་བྱའོ། །དཀྱིལ་འཁོར་མཐོང་བ་ཉིད་ལས་ངེས་པར་བྱང་ཆུབ་ལ་གཞོལ་བ་ཡིན་ནོ། །སྔགས་སྒྲུབ་པར་བྱེད་པ་ལྟ་ཅི་སྨོས། ཤཱཀྱའི་སྐྱེས་མཆོག་མྱ་ངན་འདས། །སེམས་ཅན་བསོད་ནམས་ཆུང་རྣམས་ལ། །འདི་ལྟའི་ལོངས་སྤྱོད་ག་ལ་ཡོད། །ཆོ་ག་འདི་ནི་བསྟན་པར་བྱ། །བྱང་ཆུབ་སེམས་དཔའ་འོད་ཆེན་ལྡན། །སྐྱེ་བོ་བཀྲེན་པ་གཟིགས་ནས་ནི། །ཉུང་ཞིང་མདོར་བསྡུས་དཀྱིལ་འཁོར་ནི། །མདོར་བསྡུས་ནས་ནི་བསྟན་པ་ཡིན། །འབྲས་སཱ་ལུ་དང་ཐུག་པོ་ཆེའི་ཕྱེ་མ་ཤིན་ཏུ་ཞིབ་མོ་ཚོན་སྣ་ལྔ་པ་འབར་བས། དཀར་པོ་དང་། སེར་པོ་དང་། དམར་པོ་དང་། ནག་པོ་དང་། ལྗང་གུའི་ཁ་དོག་ཏུ་ཁ་བསྒྱུར་ལ། སྔར་བཞག་པའི་ཕྱེ་མ་དཀྱིལ་འཁོར་གྱི་སློབ་དཔོན་གྱིས་
བླངས་ནས་བཅོམ་ལྡན་འདས་མའི་ཕྱག་རྒྱ་ཆེན་པོ་བཅིངས་ཏེ་རྩ་བའི་རིག་པས་ཕྱེ་མ་ལ་ཕྱག་རྒྱས་གདབ་པར་བྱའོ། །གཞན་ཞི་བ་སྒྲུབ་པའི་སློབ་དཔོན་གྱིས་དཀྱིལ་འཁོར་གྱི་ཕྱི་རོལ་ལྷོ་ཤར་གྱི་ཕྱོགས་སུ་ལས་ཀྱི་ཆོ་ག་མཐོང་བས་མེ་ཐབ་བྱའོ། །ཁྲུ་གཉིས་ཀྱི་ཚད་ལ་དཔངས་ཁྲུ་གང་ཙམ་ཁོ་ར་ཁོར་ཡུག་ཏུ་པདྨའི་ཟེ་བའི་རྣམ་པར་ཤིང་པ་ལཱ་ཤའི་ཡམ་ཤིང་རྣམས་ཀྱིས་མེ་རབ་ཏུ་སྦར་ཏེ། ཤིང་དཔལ་འབྲས་ཀྱི་ཡམ་ཤིང་མཐོ་གང་ཙམ་གྱི་ཚད་ལ་རླན་དང་བཅས་པ། ཞོ་དང་སྦྲང་རྩི་དང་། མར་ལ་བཏགས་པ་རྣམས་ཀྱིས་རྩ་བའི་སྙིང་པོས་སམ། ཕྱག་རྒྱ་དང་། རྩ་བའི་རིག་སྔགས་ཀྱིས་མེ་ལྷ་སྤྱན་དྲང་བར་བྱའོ། །སྤྱན་དྲངས་ནས་ཀྱང་སྔར་བརྗོད་པའི་ཡི་གེ་གཅིག་པ་ཉིད་ཀྱི་རིག་པའམ། རྩ་བའི་རིག་པའི་སྙིང་པོས་སླར་ཡང་བརྒྱ་རྩ་བརྒྱད་སྦྱིན་སྲེག་བྱའོ། །དེ་ནས་དཀྱིལ་འཁོར་གྱི་སློབ་དཔོན་གྱིས་གཙུག་ཏོར་གཙང་ཞིང་ཡོ་བྱད་ཚོགས་པར་བྱས་ནས་བདག་ཉིད་དང་རི་མོ་མཁན་ཆེས་མཁས་པའམ། སློབ་མ་བྱེད་དུ་གཞུག་གོ། །དེ་ནས་དཀྱིལ་འཁོར་གྱི་སློབ་དཔོན་གྱིས་སངས་རྒྱས་དང་། བྱང་ཆུབ་སེམས་དཔའ་རྣམས་ཡིད་ལ་བྱས་ནས་སྔར་བརྗོད་པའི་བདུག་པའི་རིག་པས་བསྲེག་གོ། །ཐལ་མོ་སྦྱར་བ་བྱས་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་བྱས་ནས་ཕྱེ་མ་བླངས་ཏེ། གཟུགས་ཀྱི་རྣམ་པར་བྱ་ཞིང་། རི་མོ་མཁན་མཁས་པས་རྫོགས་པར་བྱའོ། །ཆོ་ག་འདི་དག་གིས་དང་པོ་ཁོ་ནར་རེ་ཞིག་སངས་རྒྱས་བཅོམ་ལྡན་འདས་ཤཱཀྱ་ཐུབ་པ་རྣམ་པ་ཐམས་ཅད་ཀྱི་མཆོག་དང་ལྡན་པ་རིན་པོ་ཆེ་སེངྒེའི་ཁྲི་ལ་བཞུགས་པ་གནས་གཙང་མའི་གནས་ན་ཆོས་སྟོན་པར་མཛད་བཞིན་པ་ཀུན་དུ་བྲིའོ། །དཀྱིལ་འཁོར་གྱི་སློབ་དཔོན་གྱིས་ཀུན་དུ་བྲིས་ནས་རྗེས་སུ་སྒྲུབ་པ་པོས་བདག་ཉིད་སྲུང་བའི་ཆོ་ག་དང་། རིག་པ་བྱས་ནས་འབྱུང་པོ་ཐམས་ཅད་པའི་གཏོར་མ་སྦྱིན་པར་བྱ་སྟེ། དཀྱིལ་འཁོར་
གྱི་ཕྱི་རོལ་གྱི་ཕྱོགས་བཞི་དང་སྟེང་དང་འོག་ཏུ་གཏོར་བར་བྱའོ། །དེ་ནས་ཁྲུས་བྱས་ནས་མེ་ཐབ་དང་ཉེ་བར་སོང་ནས་གོས་གཙང་མ་བགོས་ཏེ་གཙང་སྦྲ་དང་། སྲུང་བའི་ཆོ་ག་བྱས་ཏེ་རྩ་བའི་རིག་པས་གུར་གུམ་དང་བསྲེས་པའི་མར་གྱི་སྲེག་བླུགས་སྟོང་ཕྲག་བརྒྱད་སྦྱིན་སྲེག་བྱའོ། །དེ་ནས་ཀུ་ཤའི་ཁྲེས་ལ་ཉེ་བར་འདུག་སྟེ་དེ་ཉིད་དུ་བཟླས་པ་བྱེད་ཅིང་དེ་ཉིད་དུ་གནས་པར་བྱའོ། །ཡུངས་ཀར་དཀར་པོ་ལ་ཁྲོ་བོའི་རྒྱལ་པོ་སྒྲོལ་མས་ནོན་པའི་སྔགས་བརྒྱ་རྩ་བརྒྱད་དུ་མངོན་པར་བསྔགས་ཏེ། མངོན་པར་བསྔགས་ནས་ཁམ་ཕོར་ཁ་སྦྱོར་དུ་གཞག་པར་བྱའོ། །བགེགས་ཀྱི་རྣམ་པར་འགྱུར་བའི་གཟུགས་རྣམས་དུ་མ་དང་། ང་རོ་དྲག་པོ་དང་། རླུང་དང་། ཆར་དང་། ཡུལ་ངན་གཞན་དང་གཞན་གང་ཡང་རུང་བ་འོངས་པ་མཐོང་ན། ཁྲོས་པས་ཡུངས་ཀར་གྱི་སྲེག་བླུགས་ལན་བདུན་སྦྱིན་སྲེག་བྱའོ། །དེ་ནས་བགེགས་རབ་ཏུ་འཇིགས་པར་འགྱུར་རོ། །མིའི་བགེགས་ལ་ནི་ལན་ལྔ་ཆང་པ་ནས་སྦྱིན་སྲེག་བྱས་ན་སྐྱེས་བུ་དེ་རེངས་པར་འགྱུར་བའམ། ནུས་པ་མེད་པར་འགྱུར་བའམ། འཆི་བར་འགྱུར་བའམ། སྐད་ཅིག་དེ་ཉིད་ལ་མི་མ་ཡིན་པས་ཟིན་པར་འགྱུར་རོ། །དེ་ནས་རྗེས་སུ་སྒྲུབ་པ་པོས་དེ་ཉིད་དུ་ཀུ་ཤའི་ཁྲེས་ལ་ཉེ་བར་འདུག་ནས་ཁྲོ་བོའི་རྒྱལ་པོ་སྒྲོལ་མས་ནོན་པས་བཟླས་པ་བྱེད་ཅིང་གནས་པར་བྱའོ། །དེ་ནས་དཀྱིལ་འཁོར་གྱི་སློབ་དཔོན་གྱིས་བཅོམ་ལྡན་འདས་ཤཱཀྱ་ཐུབ་པའི་སྐུ་གཟུགས་ཀྱི་གཡས་ཀྱི་གཞོགས་སུ་རང་སངས་རྒྱས་གཉིས་པདྨའི་གདན་ལ་བཞུགས་པ་སྐྱིལ་ཀྲུང་གིས་ཉེ་བར་བཞུགས་པར་བྱའོ། །དེའི་འོག་ཏུ་ཉན་ཐོས་ཆེན་པོ་གཉིས་ཆོས་ཉན་པར་བྱའོ། །དེ་རྣམས་ཀྱིའང་གཡས་སུ་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་རྒྱན་ཐམས་ཅད་ཀྱིས་བརྒྱན་པ་སྟོན་ཀའི་སྤྲིན་གྱི་མདོག་ལྟར་དཀར་བ་པདྨའི་གདན་ལ་བཞུགས་པ་ཕྱག་གཡོན་པས་པདྨ་བསྣམས་ནས། གཡས་པས་མཆོག་སྦྱིན་པའོ། །དེའི་ཡང་གཡས་སུ་བཅོམ་ལྡན་འདས་མ་གོས་དཀར་
མོ་ཕྱག་ན་པདྨ་བསྣམས་པ། ཕྱག་གཡས་པས་བཅོམ་ལྡན་འདས་ཤཱཀྱ་ཐུབ་པ་ལ་ཕྱག་འཚལ་བཞིན་པ་པདྨའི་གདན་ལ་ཉེ་བར་བཞུགས་པ། རལ་བའི་ཅོད་པན་འཆང་བ། དར་ལ་དཀར་པོའི་ན་བཟའ་བསྣམས་པ། དར་ལའི་སྟོད་གཡོགས་བླ་གོས་བསྣམས་པ། ཐལ་བ་ནག་པོའི་ཐིག་ལེ་གསུམ་བྱས་པའོ། །དེ་བཞིན་དུ་བརྟན་པ་དང་། ཁྲོ་གཉེར་ཅན་མ་ཡང་། རང་རང་གི་གདན་ལ་རང་རང་གི་སྤྱོད་ལམ་དུ་གནས་ཤིང་ཉེ་བར་བཞུགས་པའང་བྱའོ། །དེ་རྣམས་ཀྱི་གཡས་སུ་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་དང་། དེ་བཞིན་གཤེགས་པ་སྤྱན་མ་དང་། གཙུག་ཏོར་རྒྱལ་མོའང་བྱའོ། །དེ་བཞིན་དུ་བྱང་ཆུབ་སེམས་དཔའ་བཅུ་དྲུག་བྱ་བ་ལ། འདི་ལྟ་སྟེ། ཀུན་དུ་བཟང་པོ་དང་། སའི་སྙིང་པོ་དང་། ནམ་མཁའི་མཛོད་དང་། སྒྲིབ་པ་ཐམས་ཅད་རྣམ་པར་སེལ་བ་དང་། ངན་སོང་སྤོང་དང་། བྱམས་པ་ཕྱག་ན་རྔ་ཡབ་ཐོགས་པ་སངས་རྒྱས་བཅོམ་ལྡན་འདས་ལ་ལྟ་བཞིན་པ་དང་། དྲི་མ་མེད་པའི་བློ་གྲོས་དང་། དྲི་མ་མེད་པའི་ཏོག་དང་། ནོར་བཟང་དང་། ཟླ་འོད་དང་། དྲི་མ་མེད་པར་གྲགས་པ་དང་། ནད་ཐམས་ཅད་གསོ་བར་བྱེད་པ་དང་། ཆོས་ཐམས་ཅད་ཀྱི་དབང་ཕྱུག་རྒྱལ་པོ་དང་། འཇིག་རྟེན་འགྲོ་བ་དང་། བློ་གྲོས་ཆེན་པོ་དང་། མངོན་པར་འཛིན་པ་ཞེས་པ་སྟེ། བྱང་ཆུབ་སེམས་དཔའ་ཆེན་པོ་བཅུ་དྲུག་པོ་འདི་རྣམས་རབ་ཏུ་ཞི་བའི་སྐུ་དང་། རྒྱན་ཐམས་ཅད་ཀྱིས་བརྒྱན་པ་བྲིའོ། །རིག་པའི་རྒྱལ་པོའི་གཙོ་བོ་དང་། རིག་པའི་རྒྱལ་མོ་དང་། པདྨའི་རིགས་ཀྱི་གཟུགས་དང་། ཕྱག་རྒྱ་རྣམས་ལུང་ལས་ཇི་ལྟར་བཤད་པ་བཞིན་དང་། གནས་ཇི་ལྟ་བ་བཞིན་དུ་བྲིའོ། །མཐའི་གནས་སུའང་གྲུ་བཞིའི་རྣམ་པར་གནས་གཞག་པར་བྱའོ། །པདྨའི་མེ་ཏོག་ལེགས་པར་བྱས་པ་དང་། རིག་པའི་ལྷ་གང་གིས་དྲན་པ་ཡང་གནས་དེ་རྣམས་སུ་གཞག་པར་བྱའོ། །དེ་བཞིན་དུ་བཅོམ་ལྡན་འདས་ཤཱཀྱ་ཐུབ་པའི་གཡས་ཀྱི་གཞོགས་སུ་རང་སངས་རྒྱས་ནམ་
མཁའ་དང་། ཡོངས་སུ་ཞེས་བྱ་བ་གཉིས་ཀྱང་ངོ་། །དེ་བཞིན་དུ་ཤར་དུ་ཁ་བལྟས་པའི་དཀྱིལ་འཁོར་ཐམས་ཅད་དུ་འཇུག་པའི་སྒོ་རྣམས་བྱའོ། །བཅོམ་ལྡན་འདས་ཤཱཀྱ་ཐུབ་པའི་གཡོན་གྱི་གཞོགས་སུ་རང་སངས་རྒྱས་ཙནྡན་དང་། གྲུབ་པ་ཞེས་པ་གཞན་གཉིས་ཀྱང་ཀུན་ཏུ་བྲིའོ། །དེ་རྣམས་ཀྱི་འོག་ཏུ་ཉན་ཐོས་ཆེན་པོ་འོད་སྲུང་ཆེན་པོ་དང་། ཀ་ཏྱ་ན་དང་གཉིས་ཀུན་དུ་བྲིའོ། །དེ་རྣམས་ཀྱིའང་གཞོགས་སུ་འཕགས་པ་ཕྱག་ན་རྡོ་རྗེ་ཨུཏྤ་ལ་ལྟར་སྔོ་བསངས་སུ་སྣང་བ་རབ་ཏུ་ཞི་བའི་གཟུགས་རྒྱན་ཐམས་ཅད་ཀྱིས་བརྒྱན་པ། ཕྱག་གཡས་རྔ་ཡབ་ཐོགས་པ། གཡོན་པ་ཁྲོ་བོའི་སྤྱི་བོར་བཞག་པའོ། །རྡོ་རྗེ་ཁུ་ཚུར་དང་། རྡོ་རྗེ་ལྕགས་ཀྱུ་དང་། རྡོ་རྗེ་ལྕགས་སྒྲོག་དང་། དཔུང་བཟང་དང་། རྡོ་རྗེ་སྡེ་རྣམས་ཆ་བྱད་ཇི་ལྟ་བ་དང་། མཚན་མ་ཇི་ལྟ་བ་བཞིན་དུ་བགེགས་རྣམས་འཇོམས་པའོ། །རིག་པའི་རྒྱལ་པོ་དང་། རྒྱལ་མོ་འཁོར་དང་བཅས་པ་ཐམས་ཅད་དང་། གཟུགས་དང་ཕྱག་རྒྱ་ལ་སོགས་པ་རྣམས་ཇི་ལྟར་དྲན་པ་བཞིན་དུ་བྲིའོ། །དེ་རྣམས་ཀྱིའང་གཡོན་དུ་གྲུ་བཞིའི་རྣམ་པར་རྡོ་རྗེའི་ཕྱག་རྒྱ་གཉིས་བྲི་བར་བྱའོ། །བྲིས་ནས་ཀྱང་གནས་གང་དུ་རིག་པའི་ཚོགས་མ་དྲན་པ་དེ་རྣམས་གནས་འདིར་བཞུགས་ཤིག་ཅེས་བརྗོད་པར་བྱའོ། །དེ་རྣམས་ཀྱི་སྟེང་དུ་ཕ་རོལ་ཏུ་ཕྱིན་པ་དྲུག་དང་། བཅོམ་ལྡན་འདས་མ་མཱ་མ་ཀཱི་ཀུན་དུ་བྲི་སྟེ་རྒྱན་ཐམས་ཅད་ཀྱིས་བརྒྱན་པ་རབ་ཏུ་ཞི་བའི་ལུས་སོ། །དེ་རྣམས་ཀྱིའང་སྟེང་དུ་གཙུག་ཏོར་གྱི་རྒྱལ་པོ་བརྒྱད་ཀུན་ནས་འབར་བའི་ཕྲེང་བས་འཁྲུགས་པ། ཕྱག་རྒྱ་བཅིངས་པ་རང་རང་གི་འཁོར་ལོས་སྒྱུར་བའི་རྒྱལ་པོ་ཆེན་པོའི་གཟུགས་སུ་ཀུན་དུ་བྲི་སྟེ། གསེར་མདོག་དབང་པོ་རབ་ཏུ་ཞི་བ་རྒྱན་ཐམས་ཅད་ཀྱིས་བརྒྱན་པ་དེ་བཞིན་གཤེགས་པའི་སྐུ་གཟུགས་ལ་ཅུང་ཟད་བལྟ་བ་སྦྱིན་པ་རྣམས་འདི་ལྟ་སྟེ། གཙུག་ཏོར་འཁོར་ལོས་སྒྱུར་བ་དང་། གཙུག་ཏོར་མངོན་པར་འཕགས་པ་དང་། གཙུག་ཏོར་གདུགས་དཀར་པོ་དང་། རྒྱལ་བའི་གཙུག་ཏོར་དང་། པདྨའི་གཙུག་ཏོར་དང་། རྣམ་པར་
རྒྱལ་བའི་གཙུག་ཏོར་དང་། གཟི་བརྗིད་ཕུང་པོ་དང་། གཙུག་ཏོར་མཐོན་པོ་ཞེས་པ་སྟེ། གཙུག་ཏོར་བརྒྱད་པོ་འདི་རྣམས་ཀུན་དུ་བྲིའོ། །འཇུག་པའི་ཕྱོགས་ཀྱི་སྒོར་ནི་བྱང་ཆུབ་སེམས་དཔའ་གཉིས་བྱ་སྟེ། གཡས་ཕྱོགས་སུ་ནི་འཇིག་རྟེན་ལས་འདས་པར་འགྲོ་བ་ཞེས་བྱ་བ་རབ་ཏུ་ཞི་བའི་ལུས་རལ་པའི་ཅོད་པན་འཆང་བ། ཕྱག་གཡས་མཆོག་སྦྱིན་པས་ཕྲེང་བ་འཛིན་པ། ཕྱག་གཡོན་པས་སྤྱི་བླུགས་འཛིན་ཅིང་སྒོ་ལ་མངོན་དུ་ཕྱོགས་པ། བཞིན་ཅུང་ཟད་ཁྲོ་གཉེར་དང་བཅས་པ་ཀུན་དུ་བྲིའོ། །འཇུག་པའི་སྒོའི་གཡོན་ཕྱོགས་སུ་ནི་བྱང་ཆུབ་སེམས་དཔའ་ཆེན་པོ་མ་རྒྱལ་བ་ལས་རྒྱལ་བ་བྲི་བར་བྱ་སྟེ། རབ་ཏུ་ཞི་བའི་ལུས་རལ་པའི་ཅོད་པན་འཆང་བ། ཕྱག་གཡོན་དབྱུག་གུ་དང་། རིལ་བ་སྤྱི་བླུགས་འཛིན་པ། ཕྱག་གཡས་པས་བགྲང་ཕྲེང་བ་ཟུང་ནས་མཆོག་སྦྱིན་པས་རབ་ཏུ་སྦྱིན་པར་བྱེད་པ། བཞིན་ཅུང་ཟད་ཁྲོ་གཉེར་ཅན་འཇུག་པའི་སྒོ་ལ་མངོན་པར་ཕྱོགས་པ་ཀུན་དུ་བྲིའོ། །སེང་གེའི་ཁྲིའི་འོག་ཏུ་ཆོས་ཀྱི་འཁོར་ལོ་ཀུན་ནས་འབར་བའི་ཕྲེང་བས་འཁྲུགས་པ་དེའི་འོག་ཏུ་རིན་པོ་ཆེའི་གཞལ་ཡས་ཁང་དེ་ལ་གནས་པའི་བཅོམ་ལྡན་འདས་མ་རིག་པའི་རྒྱལ་མོ་ཆེན་མོ་ཧ་ཅང་མི་སྐེམ། ཧ་ཅང་མི་སྦོམ་པའི་ལུས་སུ་གནས་པ། རབ་ཏུ་ཞི་བའི་སྐུ། གཟུགས་མཛེས་ཤིང་ཅུང་ཟད་འཛུམ་པའི་བཞིན། ཕྱག་གཡོན་པས་ཨུཏྤལ་སྔོན་པོ་བསྣམས་པ། ཕྱག་གཡས་པས་དཔལ་འབྲས་བསྣམས་པ། བྱིས་པའི་རྒྱན་ཐམས་ཅད་ཀྱིས་བརྒྱན་པ། རིན་པོ་ཆེའི་ཅོད་པན་འཆང་བ། མུ་ཏིག་གི་ཕྲེང་པས་མཆོད་ཕྱིར་ཐོགས་པ་བྱས་པ། དར་ལའི་སྟོད་གཡོགས་མནབས་པ། དར་གྱི་ན་བཟས་སྨད་གཡོགས་པ། ཀུན་ནས་འབར་བའི་ཕྲེང་བས་འཁྲུགས་པ། པདྨའི་གདན་ལ་ཉེ་བར་བཞུགས་པ། ཁྲོ་བོའི་རྒྱལ་པོར་གྱུར་པ། སྒྲོལ་མས་ནོན་པ་ལ་གཟིགས་པར་གྱུར་པ། དཀྱིལ་འཁོར་དུ་འཇུག་པའི་སྒོ་ལ་མངོན་པར་ཕྱོགས་པ། བལྟ་ན་སྡུག་པ་ཐམས་ཅད་དུ་སྲིན་མོ་རལ་པ་གཅིག་པ་བྱས་པའི་གཟུགས་འཆང་བ་ཀུན་དུ་བྲིའོ། །དེའི་
གཡས་ཕྱོགས་ཀྱི་གཞོགས་སུ་པདྨའི་འོག་ཏུ་ཁྲོ་བོའི་རྒྱལ་པོ་སྒྲོལ་མས་ནོན་པ་བྲི་སྟེ། རྣམ་པར་འགྱུར་བ་ཆེན་པོའི་གཟུགས་ཅན་ཀུན་ནས་འབར་བའི་ཕྲེང་བས་འཁྲུགས་པ། བཀའ་སོ་སོར་བཞེས་བཞིན་པ། བྱང་ཆུབ་སེམས་དཔའ་ཆེན་པོར་གྱུར་པ་ལ་བལྟ་བ་ཀུན་ནས་བྲིའོ། །གཡོན་གྱི་གཞོགས་སུ་པདྨའི་འོག་ཏུ་གནས་གཙང་མའི་རིས་ཀྱི་ལྷའི་གཟུགས་ཅན་བྱང་ཆུབ་སེམས་དཔའ་ལྔ་བྲི་བར་བྱ་སྟེ། འདི་ལྟ་སྟེ། ཤིན་ཏུ་དྲི་མ་མེད་པ་དང་། ཤིན་ཏུ་དུལ་བ་དང་། དག་པ་དང་། མུན་པ་སེལ་བྱེད་དང་། ཀུན་དུ་སྣང་བ་ཞེས་པ། དེ་རྣམས་ཐམས་ཅད་ཀྱང་གནས་གཙང་མའི་གནས་ན་འདུག་པ། རིན་པོ་ཆེ་འབར་བ་དུ་མའི་རྡོའི་མཐིལ་དང་འདྲ་བ། ཀུན་ནས་འབར་བ་རྣམ་པར་བཀྲ་བའི་མེ་ཏོག་རྣམས་ཀྱིས་གཅལ་དུ་བཀྲམ་པ། གཟུགས་མཛེས་པ་ཀུན་དུ་བྲིའོ། །ཕྱི་རོལ་གྱི་ཁོར་ཡུག་ཏུ་གྲུ་བཞིར་རྟ་བབས་བཞི་དང་ལྡན་པ་རྣམས་པར་བཀྲ་བའི་ཚོན་སྣ་ལྔས་གསལ་བ། ཤིན་ཏུ་དྲང་བའི་མི་དམའ་བས་ནང་གི་དཀྱིལ་འཁོར་བྱའོ། །ཤར་གྱི་ཕྱོགས་སུ་བཅོམ་ལྡན་འདས་ཤཱཀྱ་ཐུབ་པའི་སྟེང་དུ་རི་མོའི་དབུས་སུ་མེ་ཏོག་གི་རྒྱལ་པོའི་དབང་པོ་པདྨའི་གདན་ལ་ཉེ་བར་བཞུགས་པ་དེ་བཞིན་གཤེགས་པའི་གཟུགས་ཤིན་ཏུ་ཆུང་ཙམ་དུ་བྱ་སྟེ། ཀུན་ནས་འབར་བའི་ཕྲེང་བས་འཁྲུགས་པ། ཕྱག་མཆོག་སྦྱིན་པས་རབ་ཏུ་སྦྱིན་པ། སྐུའི་གཙུག་ཏོར་ལ་བཞུགས་པའོ། །དེའི་གཡས་སུ་གཙུག་ཏོར་འཁོར་ལོས་སྒྱུར་བའི་ཕྱག་རྒྱ་བྲི་བར་བྱའོ། །གཡོན་དུ་གཟི་བརྗིད་ཕུང་པོའི་ཕྱག་རྒྱ་བྲི་བར་བྱའོ། །དེ་བཞིན་གཤེགས་པའི་སྤྱན་མའི་སྟེང་དུ་ཤེས་རབ་ཀྱི་ཕ་རོལ་ཏུ་ཕྱིན་མ་བྲི་བར་བྱའོ། །བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་གི་སྟེང་དུ་ཤེས་རབ་ཀྱི་ཕ་རོལ་ཏུ་ཕྱིན་མའི་གཡས་སུ་བཅོམ་ལྡན་འདས་འོད་དཔག་ཏུ་མེད་པ་དེ་བཞིན་གཤེགས་པའི་སྐུར་བྱ་སྟེ། ཕྱག་མཆོག་སྦྱིན་པས་རབ་ཏུ་སྦྱིན་པ་པདྨའི་གདན་ལ་ཉེ་བར་བཞུགས་པ། ཀུན་ནས་འབར་བའི་ཕྲེང་བས་འཁྲུགས་པའོ། །དེའི་ཡང་གཡས་སུ་
ལྷུང་བཟེད་དང་། ཆོས་གོས་ཀྱི་ཕྱག་རྒྱའོ། །དེ་བཞིན་དུ་མཐར་གྱིས་འཇུག་པའི་གནས་སུ་པདྨའི་ཕྱག་རྒྱ་བྱའོ། །བཅོམ་ལྡན་འདས་མེ་ཏོག་ཀུན་ནས་རྒྱས་པའི་རྒྱལ་པོ་དེ་བཞིན་གཤེགས་པའི་གཡོན་དུ་གཙུག་ཏོར་གཟི་བརྗིད་ཕུང་པོའི་ཕྱག་རྒྱ་བྲི་སྟེ་ཀུན་ནས་འབར་བས་འཁྲུགས་པའོ། །དེའི་ཡང་གཡོན་དུ་དེ་བཞིན་གཤེགས་པ་རིན་ཆེན་ཏོག་གི་སྐུ་རིན་པོ་ཆེའི་རི་ལ་ཉེ་བར་བཞུགས་པ་ཆོས་སྟོན་པར་མཛད་བཞིན་པ་བེེཌཱུཪྱ་སྔོན་པོ་དང་། མར་གད་དང་། པདྨ་རཱ་ག་རྣམ་པ་སྣ་ཚོགས་པ་འབར་བའི་འོད་འབྱིན་པ། ཀུན་ནས་ཀུན་དུ་འོད་གསལ་བ་བྲིའོ། །དེའི་ཡང་གཡོན་དུ་རྒྱལ་བའི་གཙུག་ཏོར་གྱི་ཕྱག་རྒྱ་ཀུན་ནས་འབར་བ་འཁྲུགས་པ་ཀུན་དུ་བྲིའོ། །དེའི་ཡང་གཡོན་དུ་ཆོས་ཀྱི་འཁོར་ལོའི་ཕྱག་རྒྱ་ཀུན་ནས་འབར་བ་བྲིའོ། །དེའི་ཡང་གཡོན་དུ་རིལ་བ་སྤྱི་བླུགས་དང་བགྲང་ཕྲེང་དང་བཟང་པོའི་གདན་གྱི་ཕྱག་རྒྱ་བྲིའོ། །སྒོའི་གནས་སུ་རྡོ་རྗེ་རྩེ་གསུམ་པ་གཉིས་ཀ་ནས་ཀུན་ནས་འབར་བར་བྲིའོ། །བཅོམ་ལྡན་འདས་སྤྱན་རས་གཟིགས་དབང་ཕྱུག་གི་འོག་ཏུ་ཕྱག་རྒྱ་ཆེན་པོ་དབྱུག་པ་ཅན་དང་། ཨུཏྤ་ལའི་ཕྱག་རྒྱ་ཀུན་ནས་འབར་བ་འདི་དག་ཕན་ཚུན་མ་འབྱར་བར་ཀུན་དུ་བྲིའོ། །དཀྱིལ་འཁོར་གྱི་རྣམ་པ་ཀུན་དུ་བྲིས་པའི་ཕྱི་རོལ་གྱི་དཀྱིལ་འཁོར་དེ་ཡང་ཚོན་སྣ་ལྔས་འབར་བ་རྣམ་པར་བཀྲ་ཞིང་བལྟ་ན་སྡུག་པ། ཟུར་བཞིས་རྣམ་པར་མཛེས་པ། རྟ་བབས་བཞིའི་རྣམ་པ་ཕྱོགས་བཞིར་རོ། །ནང་གི་དཀྱིལ་འཁོར་ལས་ཁྲུ་གཉིས་ཙམ་གྱི་ཕྱི་རོལ་གྱི་ཤར་ཕྱོགས་སུ་ཚངས་པ་ཆེན་པོ་བྲི་བར་བྱ་སྟེ། གདོང་བཞི་པ། གོས་དཀར་པོ་བགོས་པ། སྟོད་གཡོགས་གོས་དཀར་པོ་ཅན། མཆོད་ཕྱིར་ཐོགས་པ་དཀར་པོ་ཅན། གསེར་གྱི་མདོག་རལ་པའི་ཅོད་པན་འཆང་བ། གཡོན་ན་དབྱུག་པ་དང་སྤྱི་བླུགས་ཐོགས་པ། ཕྱག་ན་རྡོ་རྗེའོ། །དེའི་ཡང་གཡས་སུ་འོད་གསལ་གྱི་ལྷའི་བུ་བྱ་སྟེ། ལུས་དར་ལའི་གོས་བགོས་པ། དར་ལའི་སྟོད་གཡོགས་ཅན། བཞིན་རབ་ཏུ་ཞི་བ། རལ་པའི་ཅོད་པན་
འཆང་བ། མཆོད་ཕྱིར་ཐོགས་དཀར་པོ་ཅན། སྐྱིལ་ཀྲུང་གིས་ཉེ་བར་འདུག་པ། ཕྱག་གཡས་མཆོག་སྦྱིན་པའོ། །དེའི་ཡང་གཡས་སུ་འོག་མིན་པའི་ལྷའི་བུ་བྱ་སྟེ་རྒྱན་ཐམས་ཅད་ཀྱིས་རྣམ་པར་བརྒྱན་པ། རབ་ཏུ་ཞི་བའི་ལུས། སེམས་བསམ་གཏན་ལ་གནས་པ་དར་ལའི་གོས་བགོས་པ། དར་ལའི་སྟོད་གཡོགས་ཅན། སྐྱིལ་ཀྲུང་གིས་ཉེ་བར་འདུག་པ། ཕྱག་གཡས་པས་མཆོག་སྦྱིན་པ། མཆོད་ཕྱིར་ཐོགས་དཀར་པོ་ཅན་ནོ། །དེའི་རིམ་པས་དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། འཐབ་བྲལ་དང་། བརྒྱ་བྱིན་ལ་སོགས་པའི་ལྷའི་བུ་རྣམས་བྲི་བར་བྱ་སྟེ། གོ་རིམས་ཇི་ལྟ་བ་བཞིན་དང་། ཆ་བྱད་དང་། དབྱིབས་ཇི་ལྟ་བ་བཞིན་ནོ། །བརྒྱ་བྱིན་གྱི་འོག་ཏུ་རྒྱལ་པོ་ཆེན་པོ་བཞིའི་རིས་ཏེ། རྟག་མྱོས་དང་། ཕྲེང་ཐོགས་དང་། ལག་ན་གཞོང་ཐོགས་དང་། པི་ཝང་གཉིས་པ་དང་། ས་བླ་པའི་ལྷའི་བུ་རྣམས་གོ་རིམས་ཇི་ལྟ་བ་དང་། ཆ་བྱད་ཇི་ལྟ་བ་བཞིན་བྲི་བར་བྱའོ། །དེ་བཞིན་དུ་ལྷོ་ཕྱོགས་སུ། མི་ཆེ་བ་དང་། མི་གདུང་བ་དང་། ཤིན་ཏུ་མཐོང་དང་། གྱ་ནོམ་སྣང་དང་། དགེ་ཆུང་དང་། བསོད་ནམས་སྐྱེས་ལ་སོགས་པའི་ལྷའི་བུ་རྣམས་ཆ་བྱད་དང་། དབྱིབས་ཇི་ལྟ་བ་བཞིན་དུ་བྲི་བར་བྱའོ། །དེ་བཞིན་དུ་ནུབ་ཀྱི་ཕྱོགས་དང་། དེ་བཞིན་དུའང་། བྱང་གི་ཕྱོགས་སུའང་ངོ་། །ནུབ་ཀྱི་ཕྱོགས་སུ་དེ་རྣམས་ཀྱི་འོག་ཏུ་ཕྲེང་གཉིས་ལ་བརྟེན་ནས་བྲི་བར་བྱའོ། །དཀྱིལ་འཁོར་གཉིས་ཀྱི་ཕ་རོལ་ཏུ་དཀྱིལ་འཁོར་གསུམ་པར་འགྱུར་ཏེ། ཕྱོགས་བཞིར་རྒྱལ་པོ་ཆེན་པོ་བཞི་གོ་རིམས་བཞིན་དུ་བྲི་བར་བྱའོ། །བྱང་ཕྱོགས་སུ་འཇུག་པའི་གཡས་ངོས་སུ་ནོར་སྦྱིན་གཏེར་དང་ཉེ་བར་གནས་པ་རྒྱན་ཐམས་ཅད་ཀྱིས་རྣམ་པར་བརྒྱན་པ། ཅོད་པན་ཅུང་ཟད་བཅོམ་པ། གནོད་སྦྱིན་གྱི་གཟུགས་ཅན་ནོ། །དེའི་གཡས་སུ་ནོར་བུ་བཟང་པོ་དང་། གང་བ་བཟང་པོ་གནོད་སྦྱིན་གྱི་སྡེ་དཔོན་དག་བྲིའོ། །དེ་བཞིན་དུ་རིམ་གྱིས་གནོད་སྦྱིན་མ་ཆེན་མོ་འཕྲོག་མ་
བྲི་སྟེ། གཞོན་ནུ་དགའ་བྱེད་ཕང་ན་འདུག་པ། དཀྱིལ་འཁོར་ལ་ངེས་པར་རྟོག་བཞིན་པ་བྲིའོ། །ལྔས་རྩེན་དམར་སེར་འཇིགས་སུ་རུང་བའང་བྲི་སྟེ། དེ་རྣམས་ཀྱི་ཉེ་ལོགས་སུ་གནོད་སྦྱིན་རྣམས་ཀྱི་ཕྱག་རྒྱ་བྲི་བར་བྱའོ། །དེ་བཞིན་དུ་རིམ་གྱིས་ནུབ་ཀྱི་ཕྱོགས་སུ་ལྷ་ལག་ན་ཞགས་པ་ཐོགས་པ་དང་། ཀླུ་དགའ་བོ་དང་། ཉེ་དགའ་བོ་དང་། འཇོག་པོ་དང་། ནོར་རྒྱས་ཀྱི་བུ་ལ་སོགས་པ་རྒྱལ་པོ་ཆེན་པོ་བརྒྱད་བྲི་བར་བྱའོ། །དེ་བཞིན་དུ་ཕྲེང་གཉིས་པ་ལ་བརྟེན་ནས་གོ་རིམས་བཞིན་དུ་གནོད་སྦྱིན་དང་། སྲིན་པོ་དང་། དྲི་ཟ་དང་། མིའམ་ཅི་དང་། ལྟོ་འཕྱེ་ཆེན་པོ་དང་། དྲང་སྲོང་དང་། གྲུབ་པ་དང་། ཡི་དགས་དང་། ཤ་ཟ་དང་། ནམ་མཁའ་ལྡིང་དང་། མི་དང་མི་མ་ཡིན་པ་ལ་སོགས་པ་དང་། སྨན་དང་། ནོར་བུ་རིན་པོ་ཆེའི་བྱེ་བྲག་དང་། རི་བོ་དང་། ཆུ་བོ་དང་། གླིང་རྣམས་གོ་རིམས་བཞིན་དུ་གཙོ་བོར་གྲགས་པ་དང་། མཆོག་ཏུ་གཙོ་བོ་ཐམས་ཅད་ཀྱང་བྲི་བར་བྱའོ། །ལྷོ་ཕྱོགས་སུ་གཤིན་རྗེ་མ་མོ་བདུན་གྱི་འཁོར་དང་བཅས་པ་བྲི་བར་བྱའོ། །ཤར་གྱི་ཕྱོགས་སུ་མེ་ལྷ་ཀུན་འབར་བའི་ཕྲེང་བས་འཁྲུགས་པ། དབྱུག་པ་དང་། རིལ་པ་སྤྱི་བླུགས་དང་བགྲང་ཕྲེང་ལག་ན་ཐོགས་པ། རལ་པའི་ཅོད་པན་འཆང་བ། གོས་དཀར་པོ་བགོས་པ། དར་ལའི་སྟོད་གཡོགས་ཅན། མཆོད་ཕྱིར་ཐོགས་དཀར་པོ་ཅན། གསེར་གྱི་མདོག་ཐལ་བའི་ཐིག་ལེ་གསུམ་བྱས་པ། སྣ་ཚོགས་པའི་རྒྱན་དང་། མཚོན་ཆ་དང་། ཆ་བྱད་དང་། དབྱིབས་དང་། ཁ་དོག་དེ་ཡང་ཕྲེང་གཉིས་པ་ལ་བརྟེན་ནས་བྲི་བར་བྱའོ། །ཐམས་ཅད་ནས་འཇུག་པའི་དཀྱིལ་འཁོར་ཆེན་པོར་དཀའ་ཟློག་གི་བདག་པོ་ཁྱུ་མཆོག་ལ་ཞོན་པ། ལག་པ་གཡས་རྩེ་གསུམ་ཐོགས་པའོ། །ལྷ་མོ་དཀའ་ཟློག་མའང་རྒྱན་ཐམས་ཅད་ཀྱིས་བརྒྱན་པའོ། །སྨིན་དྲུག་གི་བུའང་རྨ་བྱ་ལ་ཞོན་པ། ལག་ན་མདུང་ཐུང་ཐོགས་པ། གཞོན་ནུའི་གཟུགས་ཅན། གདོང་དྲུག་བ་ལུས་དམར་པོར་སྣང་བ་གོས་སེར་པོ་བགོས་ཤིང་སྟོད་གཡོགས་གོས་སེར་པོ་ཅན། ཕྱག་གཡོན་
པས་དྲིལ་བུ་ཐོགས་ནས་བ་དན་དམར་པོ་ཐོགས་པའོ། །གོ་རིམས་བཞིན་དུ་བྷྲྀང་གི་རི་ཏི་ཤིན་ཏུ་རིད་པའི་རྣམས་པ་དང་། ཚོགས་ཀྱི་བདག་པོ་ཆེན་པོ་དང་། དགའ་བྱེད་དབང་ཕྱུག་དང་། ནག་པོ་ཆེན་པོ་དང་། མ་མོ་བདུན་པོ་རྒྱན་དང་། ཆ་བྱད་དང་། དབྱིབས་ཇི་ལྟ་བཞིན་དུ་མངོན་པར་བྲིའོ། །ནོར་ལྷ་བརྒྱད་དང་། དྲང་སྲོང་བདུན་དང་། ཁྱབ་འཇུག་ཕྱག་བཞི་པ། ཕྱག་ན་འཁོར་ལོ་དང་། བེ་ཅོན་དང་། མདུང་དང་། རལ་གྲི་ཐོགས་པ། ནམ་མཁའ་ལྡིང་གི་བཞོན་པ། རྒྱན་ཐམས་ཅད་ཀྱིས་བརྒྱན་པའོ། །གཟའ་བརྒྱད་དང་། རྒྱུ་སྐར་ཉི་ཤུ་རྩ་བདུན་དང་། གང་ས་སྟེངས་ཀྱི་དཀྱིལ་འཁོར་ལ་རབ་ཏུ་རྒྱུ་བའི་ཉེ་བའི་གཟའ་བརྒྱད་ཀྱང་བྲིའོ། །གོ་རིམས་བཞིན་དུ། དཀར་པོ་དང་། ནག་པོའི་ཚེས་བཅོ་ལྔ་དང་། ཁྱིམ་བཅུ་གཉིས་དང་། དུས་དྲུག་དང་། ཟླ་བ་བཅུ་གཉིས་དང་། ལོ་ཚིགས་དང་། སྲིང་མོ་བཞི་གྲུ་ལ་ཞོན་པ་དང་། ལྔ་པ་མིང་པོ་ཆུ་ལ་གནས་པ་རྣམས་ཏེ། མདོར་ན། ཕྱག་རྒྱ་རྣམས་སུ་རྣམ་པར་གཞག་པར་བྱའོ། །ལྷ་རྣམས་གོ་རིམས་བཞིན་དུ་ཕྲེང་གཉིས་སུ་བྱའོ། །མདོར་ན་དཀྱིལ་འཁོར་གསུམ་པའང་། དཀྱིལ་འཁོར་གསུམ་ལ་བརྟེན་ནས་མངོན་པར་བྲི་བར་བྱ་སྟེ། དཀྱིལ་འཁོར་གསུམ་པོ་རྣམས་སུའང་གྲུ་བཞིར་རྣམ་པར་གཞུག་པར་བྱའོ། །འདི་རྣམས་བཅོམ་ལྡན་འདས་སོ། །མདོར་བསྡུ་ན་སངས་རྒྱས་བཅོམ་ལྡན་འདས་སེམས་དཔའ་ཐམས་ཅད་ཀྱི་གཙོ་བོ་ནི་ངེས་པར་མངོན་པར་བྲི་བར་བྱའོ། །པདྨའི་རིགས་འཕགས་པ་སྤྱན་རས་གཟིགས་དབང་ཕྱུག་ནི་གཡས་སུ་ངེས་པར་བྲི་བར་བྱའོ། །རྡོ་རྗེའི་རིགས་འཕགས་པ་ཕྱག་ན་རྡོ་རྗེ་ནི་གཡོན་དུ་ངེས་པར་བྲི་བར་བྱའོ། །བྱང་ཆུབ་སེམས་དཔའ་རྣམས་ཀྱི་གཙོ་བོ་འཕགས་པ་ཀུན་དུ་བཟང་པོའང་ངེས་པར་བྲི་བར་བྱའོ། །འཇམ་དཔལ་གཞོན་ནུར་གྱུར་པ་ངེས་པར་བྲི་བར་བྱའོ། །ལྷག་མ་རྣམས་ཇི་ལྟར་རྣམ་པར་བཞག་པ་བཞིན་དུ་ཕྱག་རྒྱ་རྣམས་སུ་ངེས་པར་བྲི་བར་བྱའོ། །འདི་དག་ནི་ནང་གི་དཀྱིལ་འཁོར་རོ། །དཀྱིལ་འཁོར་བར་པ་ལ་ཡང་། ཤར་གྱི་ཕྱོགས་སུ་མི་མཇེད་ཀྱི་བདག་པོ་ཚངས་པ་ངེས་པར་མངོན་པར་བྲི་
བར་བྱའོ། །དེ་བཞིན་དུ་ལྷོའི་ཕྱོགས་སུ་འོད་གསལ་བའོ། །འོག་མིན་དང་གཟུགས་ཅན་མིན་པ་རྣམས་ལྷའི་དཀྱིལ་འཁོར་གྱི་རྣམ་པར་རོ། །འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་མི་གསལ་བའི་ལྷ་རྣམས་ནི་མ་ཡིན་ནོ། །བྱང་གི་ཕྱོགས་སུ་བརྒྱ་བྱིན་ལྷའི་རྒྱལ་པོ་དང་། རབ་འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། འོད་ཆུང་ལ་སོགས་པའི་ལྷའི་བུ་རྣམས་ལྷའི་རྒྱལ་པོ་རེ་རེ་ངེས་པར་མངོན་པར་བྲི་བར་བྱའོ། །ལྷག་མ་རྣམས་ནི་ཇི་ལྟར་རྣམ་པར་བཞག་པ་བཞིན་དུ་ཕྱག་རྒྱ་རྣམས་སུ་མངོན་པར་བྲི་བར་བྱའོ། །དེ་བཞིན་དུ་དཀྱིལ་འཁོར་གསུམ་པར་ཡང་བྱང་གི་ཕྱོགས་སུ་འབྱུང་པོའི་བདག་པོ་དབང་ལྡན་དཀའ་ཐུབ་ཟློག་པ་དང་བཅས་པ་ངེས་པར་མངོན་པར་བྲི་བར་བྱའོ། །སྒོ་གཉིས་པའི་ཉེ་ལོགས་སུ་གཞོན་ནུ་སྨིན་དྲུག་གི་བུ་རྨ་བྱའི་གདན་ལ། ལག་ན་མདུང་ཐུང་ཐོགས་པ། ལུས་དམར་པོར་སྣང་བ། གོས་སེར་པོའི་སྟོད་གཡོགས་བགོས་པ། ཕྱག་གཡས་ན་དྲིལ་བུ་དང་བ་དན་དམར་པོ་ཐོགས་པ། གཞོན་ནུའི་གཟུགས་ཅན་དཀྱིལ་འཁོར་ལ་ངེས་པར་རྟོག་བཞིན་པའོ། །ཤར་གྱི་ཕྱོགས་སུ་ནམ་མཁའ་ལྡིང་འདབ་ཆགས་ཀྱི་གཟུགས་ཅན་དང་། དྲང་སྲོང་མཱརྐཎྜ་ངེས་པར་མངོན་པར་བྲི་བར་བྱའོ། །ལྷག་མ་རྣམ་པར་བཞག་པ་བཞིན་དུ་ཕྱག་རྒྱ་རྣམས་སུ་ཡང་ངོ་། །ལྷོ་ཤར་དུ་གཞོན་ནུ་བཞི་དང་། གཞོན་ནུ་མིང་པོ་དང་ལྷན་ཅིག་པ་གྲུའི་བཞོན་པ་ལ་ཀུན་དུ་གནས་པ་ཆུ་གཏེར་ཆེན་པོ་ལ་ཡོངས་སུ་རྒྱུ་བར་བྱེད་པ། མེ་ལྷའི་རྒྱལ་པོའང་ངེས་པར་མངོན་པར་བྲི་བར་བྱའོ། །དེ་བཞིན་དུ་ལྷོའི་ཕྱོགས་སུ་ལང་ཀའི་གྲོང་གི་སྲིན་པོའི་བདག་པོ་ཤིན་ཏུ་འཇིགས་སུ་རུང་བ་སྟེ་དེར་ཤིང་པི་ཙུ་མ་རྡ་ལ་བརྟེན་ནས་གནས་པ་དང་། རྨུགས་འཛིན་ཆུའི་དབང་པོ་ཞེས་བྱ་བ་གནོད་སྦྱིན་གྱི་གཟུགས་ཅན་བྱང་ཆུབ་སེམས་དཔའ་ངེས་པར་མངོན་པར་བྲི་བར་བྱའོ། །ལྷག་མ་ཕྱག་རྒྱ་རྣམས་སུའང་རྣམ་པར་གཞག་པར་བྱའོ། །དེ་བཞིན་དུ་ལྷོ་ནུབ་ཀྱི་ཕྱོགས་སུ་ཀླུའི་གཙོ་བོ་དགའ་བོ་དང་། ཉེ་དགའ་བོ་ངེས་པར་བྲི་བར་བྱ་སྟེ། གཟའི་གཙོ་བོ་ཉི་མ་ཡང་ངོ་། །
ནུབ་ཀྱི་ཕྱོགས་སུ་ཐུབ་པ་སེར་སྐྱ་ཞེས་བྱ་བ་དྲང་སྲོང་མཆོག་དང་། མུ་སྟེགས་ཅན་གཅེར་བུ་པའི་ཁྱུ་མཆོག །གཅེར་བུའི་གཟུགས་སུ་གོ་རིམས་བཞིན་དུ་ཕྱག་རྒྱ་རྣམས་སུ་རྣམ་པར་གཞག་པར་བྱའོ། །བྱང་ནུབ་ཀྱི་ཕྱོགས་སུ་གནོད་སྦྱིན་གྱི་རྒྱལ་པོ་ནོར་སྦྱིན་དང་། དྲི་ཟའི་རྒྱལ་པོ་ཟུར་ཕུད་ལྔ་པ་དང་། མིའམ་ཅིའི་རྒྱལ་པོ་ལྗོན་པ་སྟེ་འདི་རྣམས་ངེས་པར་བྲི་བར་བྱའོ། །ལྷག་མ་ནི་དབྱིབས་ཇི་ལྟར་ཀུན་དུ་གནས་པ་བཞིན་དུ་གོ་རིམས་བཞིན་ཕྱག་རྒྱ་རྣམས་སུའང་མངོན་པར་བྲི་བར་བྱའོ། །དཀྱིལ་འཁོར་བཞི་མངོན་པར་བྲིའོ་ཞེས་པ་ཕྱི་རོལ་གྱི་དཀྱིལ་འཁོར་བཞི་པར་རི་མོ་ལྔས་སྤྲས་པ་ཕྱག་རྒྱའི་ཕྲེང་བས་མཛེས་པར་བྱས་པ་གྲུ་བཞི་དང་རྟ་བབས་བཞིའི་རྣམ་པ་དང་། རྒྱལ་པོ་ཆེན་པོ་བཞིས་རྣམ་པར་བརྒྱན་པ། གོ་རིམས་ཇི་ལྟ་བ་བཞིན་དུ་གནས་པ་འདི་ལྟ་སྟེ། འཇུག་པའི་སྒོར་ཕྱག་རྒྱར་གྱུར་པ་ནི་ཨུཏྤ་ལ་སྔོན་པོ་བྲིའོ། །གཡས་དང་གཡོན་དུ་ནི་པདྨ་དང་། རྡོ་རྗེ་དང་། དགྲ་སྟ་དང་། དུང་དང་། མདུང་རྩེ་གསུམ་དང་། བེ་ཅོན་དང་། འཁོར་ལོ་དང་། སྭ་སྟི་ཀ་དང་། བུམ་པ་དང་། ཉ་དང་། དུང་དང་། གདུབ་ཀོར་དང་། རིལ་བ་སྤྱི་བླུགས་དང་། རྒྱལ་མཚན་དང་། བ་དན་དང་། ཞགས་པ་དང་། དྲིལ་བུ་དང་། གྲི་དང་། ཐོ་བ་དང་། གཞུ་དང་། ལྕགས་མདའ་སྟེ་འདི་རྣམས་རྣམ་པ་སྣ་ཚོགས་པའི་མཚོན་ཆའི་མཆོག་གི་ཕྱག་རྒྱས་ཁོར་ཡུག་ཏུ་གྲྭ་བཞིར་ཕྲེང་བས་ཁྱབ་པར་བྱའོ། །དེ་ནས་ཕྱི་རོལ་གྱི་ཕྱོགས་བཞིར་ཕྱག་རྒྱ་ཆེན་པོ་བཞི་གཞག་པར་བྱ་སྟེ། བྱང་ཕྱོགས་སུ་དཀྱིལ་འཁོར་གྲུ་བཞི་པའི་རྣམ་པ་ཅན་བྱས་ནས་རྡོ་རྗེ་གཉིས་ཀ་ནས་རྩེ་མོ་གསུམ་པའི་རྣམ་པ་ཀུན་ནས་འབར་བའོ། །ཤར་ཕྱོགས་སུ་དཀྱིལ་འཁོར་གྲུ་གསུམ་པའི་རྣམ་པ་ཅན་ཀུན་ནས་འབར་བ་ཅན་གཞག་པར་བྱའོ། །ལྷོའི་ཕྱོགས་སུ་དཀྱིལ་འཁོར་གཞུའི་རྣམ་པ་ཅན་བྱས་ནས་ལྷུང་བཟེད་ཀུན་ནས་འབར་བ་ཅན་གཞག་པར་བྱའོ། །ནུབ་ཀྱི་ཕྱོགས་སུ་དཀྱིལ་འཁོར་ཉི་མའི་རྣམ་པ་ཅན་བྱས་ནས་ཨུཏྤ་ལ་སྔོན་པོ་རང་གི་སྡོང་བུ་དང། འདབ་མ་དང་ལྡན་པ་ཀུན་ནས་འབར་བའོ། །ཕྱོགས་བྲལ་རྣམས་སུ་ཕྱག་རྒྱ་བཞིར་
འགྱུར་རོ། །ནུབ་བྱང་གི་ཕྱོགས་སུ་དཀྱིལ་འཁོར་ཟླུམ་པོའི་རྣམ་པ་བྱས་ནས་ཞགས་པ་ཀུན་ནས་འབར་བའོ། །ལྷོ་ནུབ་ཀྱི་ཕྱོགས་སུ་དཀྱིལ་འཁོར་རིང་པོའི་རྣམ་པ་བྱས་ནས་དབྱུག་པ་ཀུན་ནས་འབར་བའོ། །ལྷོ་ཤར་གྱི་ཕྱོགས་སུ་དཀྱིལ་འཁོར་གྲུ་གསུམ་པའི་རྣམ་པ་ཅན་བྱས་ནས་དགྲ་སྟ་ཀུན་ནས་འབར་བའོ། །བྱང་ཤར་གྱི་ཕྱོགས་སུ་རལ་གྲི་ཀུན་ནས་འབར་བ་གཞག་པར་བྱའོ། །ཐམས་ཅད་ནས་མངོན་པར་བྲིས་ནས་སྟེང་དང་འོག་དང་ཐད་ཀར་ཕྱག་རྒྱ་གསུམ་ཕྱིའི་དཀྱིལ་འཁོར་གྱི་སྒོ་དང་ཉེ་བར་ཕྱེ་མ་ཉིད་ཀྱིས་བྲི་བར་བྱ་བ་ལ་འདི་ལྟ་སྟེ། གོས་དང་། བསིལ་ཡབ་དང་། ལྷམ་ཀུན་ནས་འབར་བ་དེ་རྣམས་མངོན་པར་བྲི་བར་བྱའོ། །ཞེས་སོ། །བྱང་ཆུབ་སེམས་དཔའ་བློ་ལྡན་པས། །སེམས་ཅན་ཕན་དོན་འདོད་པ་ཡི། །དཀྱིལ་འཁོར་ཆོ་ག་འདི་རྣམས་ཀྱིས། །མདོར་བསྡུས་འདིར་ནི་བསྟན་པ་ཡིན། །དེ་ནས་དཀྱིལ་འཁོར་གྱི་སློབ་དཔོན་གྱིས་དང་པོ་ཉིད་དུ་སློབ་མ་གཟུང་བར་བྱ་སྟེ། དབང་པོ་མ་ཚང་བ་མེད་པ་དང་ཡན་ལག་ཐམས་ཅད་མཛེས་པའི་བྲམ་ཟེ་དང་། རྒྱལ་རིགས་དང་། རྗེ་རིགས་དང་། དམངས་རིགས་བྱང་ཆུབ་ཏུ་སེམས་བསྐྱེད་པ་ཐེག་པ་ཆེན་པོའི་ཐེག་པ་པ། ཐེག་པ་གཞན་མི་འདོད་པའི་ངང་ཚུལ་ཅན་གྱི་སེམས་དཔའ་ཆེན་པོ་དད་ཅིང་དགེ་བའི་ཆོས་ཅན་དང་། རྒྱལ་སྲིད་ཆེན་པོ་མངོན་པར་འདོད་པ་དང་། ལོངས་སྤྱོད་ཆུང་བ་ལ་སྨོད་པ་དང་། ལོངས་སྤྱོད་ཆེན་པོ་མངོན་པར་འདོད་པ་དང་ལྡན་པ་དང་། བཟང་ཞིང་དུལ་ལ་ཚུལ་ཁྲིམས་དང་ལྡན་པའི་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་སྡོམ་པ་ལ་གནས་པ། གསོ་སྦྱོང་ལ་ཉེ་བར་གནས་ཤིང་སྡོམ་པ་ལ་གནས་པའི་བྱང་ཆུབ་སེམས་དཔའ་ཆེན་པོ་ལ་ཞེ་མི་སྡང་བ་དང་། ཕྱོགས་ཆེན་པོ་དང་། རིགས་དང་ལྡན་པ་དང་། རང་བཞིན་གྱིས་ཆོས་སྤྱོད་པ། ཉིན་དང་མཚན་དུ་སྨྱུང་བར་གནས་པ་གོས་གཙང་མ་བགོས་པ། སྐྲ་དྲི་ཞིམ་པ་དང་། ཁྲུས་གསུམ་བྱས་པ། མི་སྨྲ་བར་གྱུར་པ། དེའི་ཉིན་མོ་ག་བུར་དང་། གུར་གུམ་དང་། མ་ལ་ཡའི་ཙནྡན་དྲི་ཞིམ་པོས་དྲི་ཞིམ་པར་བྱས་པ། རྟག་ཏུ་ཉེ་རེག་བྱས་པ་དང་ལྡན་པ།
ཀུ་ཤའི་ཁྲེས་ལ་ཉེ་བར་འདུག་སྟེ། བསྲུང་བའི་ཆོ་ག་བྱས་པ་དང་། ཚངས་པར་སྤྱོད་པ་དང་། བདེན་པ་དང་ལྡན་པ་དང་། རྒྱལ་བར་དགོངས་པ་ཕྱིའི་དཀྱིལ་འཁོར་དེ་ཉིད་དུ་ཧ་ཅང་ཡང་མི་ཉེ་ཧ་ཅང་ཡང་མི་རིང་བར་གཞག་པར་བྱའོ། །གཙང་ཞིང་གཙང་སྦྲ་བྱས་པ་ཇི་སྲིད་གཅིག་ནས་བརྒྱད་ལ་སོགས་པའི་བར་རྣམས་ཏེ། གཞན་རྣམས་ནི་མ་ཡིན་ནོ། །དེ་རྣམས་ཀྱང་ཕན་ཚུན་ཀུན་དུ་ཆགས་པ། རྒྱལ་རིགས་སྤྱི་བོར་མངོན་པར་དབང་བསྐུར་བའི་རྒྱལ་པོ་ཆེན་པོ་དང་། དེ་རྣམས་ཀྱི་བུ་གཞོན་ནུ་མ་རྣམས་གྲོང་པའི་ཆོས་མ་ཤེས་པ་སྟེ་བཅོམ་ལྡན་འདས་གཞོན་ནུའི་གཟུགས་ཅན་བྱང་ཆུབ་སེམས་དཔའ་ཆེན་པོ་འཇམ་དཔལ་བྱིས་པའི་སྐྱེ་བོ་རབ་ཏུ་སད་པར་བྱེད་པ། གཞོན་ནུའི་སྐྱེ་བོ་དགའ་བར་བྱེད་པས་སོ། །དེ་ནས་ཆེས་ཐོག་མར་དེ་ལྟ་བུའི་གྲོང་པའི་ཆོས་མི་ཤེས་པ་རབ་ཏུ་གཞུག་པར་བྱ། །རྒྱལ་པོ་ཆེན་པོ་མངོན་པར་འཕེལ་བ་དང་། ཚེ་དང་ནད་མེད་པ་དང་། དབང་ཕྱུག་དང་ལོངས་སྤྱོད་ཆེན་པོ་མངོན་པར་འཕེལ་བ་དང་། ཁྱད་པར་དུའང་ཚུལ་ཁྲིམས་དང་ལྡན་པས་རིག་པའི་དངོས་གྲུབ་ངེས་པར་གནས་པའི་ཕྱིར་རོ། །དེ་ལྟར་སྔར་བཞག་པ་བྱས་ནས་གྲོགས་བཟང་པོ་དང་ལྡན་པའི་སློབ་དཔོན་གྱིས་ག་པུར་གྱི་བདུག་པ་བསྲེགས་ཏེ། རྒྱབ་ཀྱིས་ཕྱོགས་པ་མིན་པར་ཕྱི་རོལ་དུ་འབྱུང་བར་བྱ་སྟེ། བྱུང་ནས་ཀྱང་ཇི་ལྟར་བདེ་བའི་ཆུ་ཤིན་ཏུ་གཙང་སྦྲ་བྱས་པ། སྲོག་ཆགས་མེད་པ། རྩ་བའི་རིག་པ་བརྒྱད་བརྒྱ་མངོན་པར་བཟླས་པ། ཕྱག་རྒྱ་ཆེན་པོས་རྒྱས་བཏབ་པའི་ཆུས་ཁྲུས་བྱས་ནས། ཉེ་རེག་བྱས་ཏེ་གོས་གཙང་མ་བགོས་པའི་གཙང་མས། མེ་ཐབ་ཏུ་སོང་ནས། ཀུ་ཤའི་ཁྲེས་ལ་ཉེ་བར་འདུག་སྟེ་བྱང་ཤར་དུ་མངོན་པར་ཕྱོགས་པས་ག་བུར་དང་གུར་གུམ་ཙནྡན་དང་བསྲེས་པའི་མར་གྱི་སྲེག་བླུགས་སྟོང་ཕྲག་བརྒྱད་སྦྱིན་སྲེག་བྱའོ། །སྔར་བརྗོད་པའི་ཆོ་གས་སྤྱན་དྲངས་པ་དང་། གཤེགས་སུ་གསོལ་ལོ། །སླར་ཡང་དཀྱིལ་འཁོར་དུ་འཇུག་པར་བྱའོ། །ཞུགས་ནས་བུམ་པ་གང་བ་བརྒྱད་གཙང་མའི་གོས་དང་ལྡན་པ་ཤིང་ས་ཧ་ཀ་རའི་ཡལ་འདབ་དང་འབྲས་བུས་རྣམ་པར་བརྒྱན་པ་གསེར་དང་དངུལ་དང་རིན་པོ་
ཆེ་དང་། འབྲུ་ནང་དུ་བཅུག་པ། དེ་ལྟ་བུ་བཅོམ་ལྡན་འདས་ཤཱཀྱ་ཐུབ་པ་ལ་སོ་སོར་དབུལ་བར་བྱའོ། །གཉིས་པ་ནི་སངས་རྒྱས་ཐམས་ཅད་ལའོ། །གསུམ་པ་ནི་འཕགས་པ་ཉན་ཐོས་ཀྱི་དགེ་འདུན་ཐམས་ཅད་ལའོ། །བཞི་པ་ནི་བྱང་ཆུབ་སེམས་དཔའ་ཐམས་ཅད་ལའོ། །ལྔ་པ་ནི་བྱང་ཆུབ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལའོ། །དྲུག་པ་ནི་ལྷ་ཐམས་ཅད་ལའོ། །བདུན་པ་དང་བརྒྱད་པ་ནི་དཀྱིལ་འཁོར་གཉིས་པའི་སྒོ་ཁང་དུ་གཞག་པར་བྱ་སྟེ། གཅིག་པ་ནི་སེམས་ཅན་ཐམས་ཅད་དང་ཐུན་མོང་དུ་གྱུར་བར་ཡོངས་སུ་བསྔོས་ནས་གཞག་པར་བྱའོ། །དེ་ནས་སྔར་བརྗོད་པའི་ཆོ་ག་ཉིད་ཀྱིས་བདུག་པ་བསྲེག་ཅིང་ཨུཏྤ་ལའི་ཕྱག་རྒྱ་བཅིངས་ནས་སླར་ཡང་སྤྱན་དྲང་བར་བྱ་སྟེ། སངས་རྒྱས་ཐམས་ཅད་དང་། རང་སངས་རྒྱས་ཐམས་ཅད་དང་། འཕགས་པ་ཉན་ཐོས་དང་། བྱང་ཆུབ་སེམས་དཔའ་ཆེན་པོ་རྣམས་དང་། འབྱུང་པོ་ཐམས་ཅད་དང་། སྤྱན་རས་གཟིགས་དབང་ཕྱུག་ཀྱང་སྔར་བརྗོད་པའི་ཆོ་ག་ཉིད་ཀྱིས་སྤྱན་དྲང་བར་བྱའོ། །དེ་བཞིན་དུ་མེ་ཏོག་དང་། བདུག་པ་དང་། དྲི་དང་། མར་མེ་དང་། ལྷ་བཤོས་ཀྱང་སྔར་བསྟན་པ་ཉིད་ཀྱི་ལས་ཀྱིས་ལྷ་བཤོས་ཐམས་ཅད་ཀྱིས་ཐམས་ཅད་དུ་གོ་རིམས་བཞིན་དུ་བྱའོ། །མར་མེ་སྨོས་པ་ཉིད་ཀྱིས་མར་གྱི་མར་མེ་དབུལ་བར་བྱའོ། །འཕགས་པ་དང་། འཕགས་པ་མ་ཡིན་པ་ཐམས་ཅད་ལ་ལྷ་བཤོས་སྨོས་པས། སཱ་ལུའི་ཟན་ཞོ་དང་། སྦྲང་རྩི་དང་ལྡན་པ། འོ་ཐུག་ཁྱད་པར་ཅན་གྱིས་ཉེ་བར་སྦྱར་བའི་མར་ལ་བཙོས་པའི་སྣུམ་ཁུར་གྱིས་མྱ་ངན་མེད་པ་འཁྱིལ་བ་དང་། ཁཎྜ་ལ་སོགས་པ་ཐམས་ཅད་དེ་བཞིན་གཤེགས་པ་རྣམས་ལ་དབུལ་བར་བྱའོ། །ཕྱི་རོལ་གང་བ་དང་། ཙནྡན་གྱི་ཐང་ཆུ་སྦྲང་རྩི་དང་འོ་མ། འོ་ཐུག་བཙོས་པའི་བཟའ་བ་རྣམས་རང་སངས་རྒྱས་ཐམས་ཅད་དང་། འཕགས་པ་ཉན་ཐོས་དང་། བྱང་ཆུབ་སེམས་དཔའ་ཆེན་པོ་དང་། འཕགས་པའི་ལྷ་རྣམས་ལ་མེ་ཏོག་དྲི་ཞིམ་པོ་རྣམས་ཀྱང་དབུལ་བར་བྱའོ། །
ལ་དུ་ཅན་དང་། གརྦྷཏྐྭཱ་ཁྱད་པར་དང་། སྔར་གྱི་ཡོ་བྱད་རྣམས་ལྷ་ཐམས་ཅད་དང་། འབྱུང་པོའི་ཚོགས་དང་། སེམས་ཅན་ཐམས་ཅད་ལ་དབུལ་བར་བྱའོ། །དེ་བཞིན་དུ་སྣ་མ་དང་། རྒྱ་སྤོས་ཀྱི་མེ་ཏོག་དང་། པུནྣཱ་ག་ལ་སོགས་པ་རྣམས་སྔར་ངེས་པར་བསྟན་པ། སངས་རྒྱས་དང་། རང་སངས་རྒྱས་དང་། འཕགས་པ་ཉན་ཐོས་དང་། བྱང་ཆུབ་སེམས་དཔའ་ཆེན་པོ་རྣམས་དང་། འཕགས་པ་དང་། འཕགས་པ་མ་ཡིན་པའི་ལྷ་རྣམས་ཐམས་ཅད་ལ་དབུལ་བར་བྱའོ། །ཁྱད་པར་དུ་དེ་བཞིན་གཤེགས་པའི་རིགས་ལ་སྣ་མའི་མེ་ཏོག་དང་། པདྨའི་རིགས་ལ་པདྨ་དང་། དེ་བཞིན་དུ་ཕྱག་ན་རྡོ་རྗེའི་རིགས་ལ་ཨུཏྤ་ལ་དང་། གཞན་རྣམས་ལ་ཐ་མལ་པའི་སྔགས་ཀྱིས་སོ། །དེ་བཞིན་གཤེགས་པའི་རིགས་ལ་ག་པུར་གྱི་བདུག་པའོ། །པདྨའི་རིགས་ལ་ཙནྡན་ནོ། །དེ་བཞིན་དུ་གསང་བའི་བདག་པོ་རྡོ་རྗེ་ཅན་ཉིད་ཀྱི་གུ་གུལ་དུ་ཤེས་པར་བྱའོ། །སྔགས་གཞན་ཐམས་ཅད་ལ་བདུག་པ་ཐ་མལ་པ་དབུལ་བར་བྱའོ། །འཕགས་པ་རྣམས་ནི་ཐམས་ཅད་ལ། །མར་གྱི་མར་མེ་དབུལ་བར་བྱའོ། །འཕགས་པ་མིན་པའི་སྔགས་རྣམས་ལ། །དྲི་ཞིམ་ཏིལ་མར་དབུལ་དུ་གཞུག །ཆོ་གའི་གོ་རིམས་བཞིན་དུ་ནི། །བདུག་པ་མཐོང་བའི་རྒྱུ་ཡིས་སོ། །དེ་བཞིན་ཁོ་ནར་བརྗོད་པའི་དྲི། །སྔགས་རྣམས་ཀུན་ལ་རྟག་པར་དེའོ། །དེ་བཞིན་གཤེགས་ལ་གང་བརྗོད་དང་། །ཕྱག་ན་རྡོ་རྗེར་གང་བརྗོད་པ། །རང་རང་གི་ནི་རྒྱུད་རྣམས་སུ། །སྔགས་སྤྱོད་དོན་དུ་སྒྲུབ་པ་པོས། །འདིར་ནི་ཆོ་ག་བལྟ་བར་བྱ། །ཀུན་ནས་རྗེས་སུ་འཇུག་པའོ། །ཞེས་པའོ། །དེ་ནས་དཀྱིལ་འཁོར་གྱི་སློབ་དཔོན་སྔར་ཆོ་ག་མཐོང་བས་སྤྱན་དྲང་བ་དང་། མཆོད་པ་དང་། བདུག་པ་ལ་སོགས་པ་དང་། ལྷ་བཤོས་རབ་ཏུ་དབུལ་བ་རྗེས་སུ་འཇུག་པའི་བྱ་བ་བྱས་ནས། དེའི་འོག་ཏུ་སྒྲུབ་པའི་གྲོགས་མཆོག་མཁས་ཤིང་སྐྱེན་པས། འབྱུང་པོ་ཐམས་ཅད་པའི་གཏོར་མ་ཤ་མེད་པ་ཐམས་ཅད་དང་། རྔ་པ་ཊ་ཧ་དང་། དུང་གི་སྒྲའི་སྒྲ་དབྱངས་ངེས་པར་སྒྲོགས་པས། བདུག་པ་དང་། མེ་ཏོག་དང་། མར་མེ་དང་། ཕྲེང་བས་
རྣམ་པར་སྤྲས་པ་ཕྱོགས་བཞི་རྣམས་དང་། ཕྱོགས་བྲལ་རྣམས་དང་སྟེང་དང་འོག་དང་ཐད་ཀ་ཐམས་ཅད་དུ་ཕྱིའི་དཀྱིལ་འཁོར་ལ་བསྐོར་བ་བྱས་ནས་འབྱུང་པོ་ཐམས་ཅད་པའི་གཏོར་མ་རྒྱ་ཆེར་གཏང་བར་བྱའོ། །དེ་ནས་ཁྲུས་བྱས་ནས་སླར་ཡང་ཞོ་དང་། སྦྲང་རྩི་དང་། མར་ལ་བཏགས་པའི་འབྲས་སཱ་ལུ་དང་། ཐུག་པོ་ཆེའི་སྦྱིན་སྲེག་རྩ་བའི་རིག་པའམ་སྙིང་པོས་སྟོང་ཕྲག་བརྒྱད་བྱའོ། །སྦྱིན་སྲེག་བྱས་ནས་ཀྱང་སྔར་བཀོད་པའི་དཀྱིལ་འཁོར་ལ་རྗེས་སུ་ཞུགས་པའི་སེམས་དཔའ་ཆེན་པོ་ལ་སྲུང་བའི་ཆོ་ག་རྣམས་བྱས་པའི་དཀྱིལ་འཁོར་གྱི་སློབ་དཔོན་གྱིས་སློབ་མ་ཉིད་དུ་ཁས་བླངས་པ། བྱང་ཆུབ་ཏུ་སེམས་བསྐྱེད་པ། གསོ་སྦྱོང་བྱས་པ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་བདག་ཉིད་ཀྱི་ལུས་དངོས་གྲུབ་ཀྱི་དོན་དུ་ཕུལ་བ། སེམས་ཅན་ཐམས་ཅད་ཀྱི་ཉེ་བར་ལོངས་སྤྱོད་པ་ཐུན་མོང་པར་གྱུར་པ་བླ་ན་མེད་པའི་བྱང་ཆུབ་ཀྱི་སྙིང་པོ་གནོན་པར་བྱེད་པ། དགེ་བ་རྣམས་ཐམས་ཅད་མཁྱེན་པའི་ཡེ་ཤེས་ཀྱི་སངས་རྒྱས་ཐོབ་པར་འདོད་པ་རྣམས་ལ་དཀྱིལ་འཁོར་བསྟན་པ་ཉིད་ལས་སྡིག་པ་ཐམས་ཅད་ལས་གྲོལ་བར་འགྱུར་ཏེ། མཚམས་མེད་པ་བྱེད་པའི་སྐྱེ་བོ་རྣམས་ཀྱང་སྐད་ཅིག་དེ་ལ་གྲོལ་བར་འགྱུར་རོ། །དེ་ནས་དཀྱིལ་འཁོར་གྱི་སློབ་དཔོན་གྱིས་གོས་མཉམས་པ་ཐ་ག་པས་བཏགས་མ་ཐག་པ། སྐྲ་དང་བྲལ་བ། རྩ་བའི་རིག་པས་ལན་བདུན་མངོན་པར་བསྔགས་པ། དྲི་ཞིམ་པོའི་ཙནྡན་དང་། གུར་གུམ་གྱིས་བསྒོས་པའི་དར་གྱིས་དཀྱིལ་འཁོར་དུ་འཇུག་པར་འདོད་པ་རྣམས་གདོང་གཡོགས་ནས་ཐོག་མ་ནས་བཅོམ་ལྡན་འདས་མ་སྒྲུབ་པ་པོས་རབ་ཏུ་འཇུག་པར་བྱའོ། །རྒྱལ་པོའི་བུ་སྤྱི་བོ་ནས་དབང་བསྐུར་བའམ། རྒྱལ་རིགས་ཀྱི་བུའམ། གཞན་ཡང་སྤྲོ་བ་ཆེན་པོ་རྒྱལ་སྲིད་ཆེན་པོ་འདོད་པའང་རབ་ཏུ་གཞུག་པར་བྱའོ། །དཀྱིལ་འཁོར་གཉིས་པར་གནས་པ་གདོང་གཡོགས་ནས་དྲི་བཟང་པོའི་མེ་ཏོག་ཙནྡན་དང་གུར་གུམ་དག་གིས་རྣམ་པར་བསྲེས་པ་བྱིན་ཏེ། ཤིན་ཏུ་གཙང་སྦྲ་བྱས་པའི་ལག་པ་
དག་གིས་མེ་ཏོག་འཐོར་དུ་གཞུག་པར་བྱའོ། །གང་དུ་དེའི་མེ་ཏོག་བབས་པ་དེ་ལ་དེའི་རིག་པའི་སྔགས་སྦྱིན་པར་བྱའོ། །སྐྱེ་བ་གཞན་རྣམས་སུ་དེ་ཉིད་དང་འདི་རྗེས་སུ་འབྲེལ་པའོ་ཞེས་ཀུན་དུ་གྲགས་པ་ཡིན་ཞིང་། དེ་ཉིད་འདིའི་དགེ་བའི་བཤེས་གཉེན་དང་བྱང་ཆུབ་ཀྱི་སྙིང་པོ་གནོན་པར་བྱེད་པ་དང་། བྱང་ཆུབ་ཆེན་པོ་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་བྱེད་པའི་དོན་དུ་མངོན་པར་སྒྲུབ་པར་བྱེད་པའོ། །དེ་ཉིད་འདིའི་བསྒྲུབ་པར་བྱ་བ་དང་། ལོངས་སྤྱོད་ཆེན་པོ་དང་། རྒྱལ་སྲིད་ཆེན་པོ་དང་། དབང་ཆེ་བར་གྲགས་པའི་གང་ཟག་དང་། འགྲོགས་པ་འདིའི་མངོན་པར་སྒྲུབ་པར་བྱེད་པའོ། །སྐྱེ་བ་འདི་ཉིད་དུ། སྒྲུབ་པ་གང་དང་ལྡན་པ་ལྷག་པར་སྤྱོད་པ་ལས། ལས་རྣམས་ཐམས་ཅད་འགྲུབ་པར་འགྱུར་རོ། །དེ་བཞིན་དུ་རིམ་གྱིས་དེ་ལྟ་བུ་ལ་སོགས་པ་ཇི་སྲིད་དུ་བརྒྱད་པོ་རྣམས་དེ་སྲིད་དེ་གཞན་རྣམས་ནི་མ་ཡིན་ནོ། །ཞེས་སོ། །སྒྲུབ་པར་འདོད་པ་གཞན་ཡང་ཅི་ལྟར་འདོད་པ་བཞིན་དུ་སྡིག་པ་ཟད་པའི་དོན་དུ་དམ་ཚིག་ཙམ་དུ་འགྱུར་ཞེས་པའོ། །དཀྱིལ་འཁོར་གྱི་སློབ་དཔོན་གྱིས་མངོན་པར་དབང་བསྐུར་བ་སྦྱིན་ན་དང་པོ་རེ་ཞིག་དཀྱིལ་འཁོར་གྱི་ཕྱི་རོལ་ཧ་ཅང་མི་རིང་། ཧ་ཅང་མི་ཉེ་བའི་བྱང་ཤར་གྱི་ཕྱོགས་ཀྱི་ཆའི་ས་ཕྱོགས་རྩ་བའི་སྔགས་ཀྱིས་བྱིན་གྱིས་བརླབས་ཤིང་སྔགས་ཀྱིས་དག་པར་བྱས་ནས་དེ་ནས་རྒྱལ་པོ་མངོན་པར་དབང་བསྐུར་བ་དེ་བཞིན་དུ་སེམས་བཞིན་པས་མཐའ་གཅིག་ཏུ་སངས་རྒྱས་དང་། ཆོས་དང་། དགེ་འདུན་ལ་མངོན་པར་དང་བའི་དད་པ་དང་། སྤྲོ་བ་ཆེན་པོ་དང་ལྡན་པ་བྱང་ཆུབ་ཀྱི་སེམས་དང་མ་བྲལ་བ། ཐེག་པ་ཆེན་པོ་ལ་ཞུགས་པ། དཀོན་མཆོག་གསུམ་ལ་བསྙེན་བཀུར་བྱེད་པ། དབང་པོ་མ་ཚང་བ་མེད་ཅིང་མ་སྨད་པ། སྐྱེ་བ་འདི་ཉིད་ལ་རིག་པ་དང་། སྔགས་སྒྲུབ་པར་འདོད་པ། བསམ་པ་བཟང་ཞིང་། སྔགས་ཀྱི་སྤྱོད་པ་ལ་སྤྲོ་བའི་ཡིད་དང་ལྡན་པ། དགེ་མཚན་འདོད་པའི་རང་བཞིན་ཅན། སད་པའི་རྒྱུར་ཡང་རིག་པའི་དོན་ལ་རྣམ་རྟོག་མེད་ཅིང་དེར་གཏད་པའི་ཡིད་ཅན་དེ་ལྟ་བུ་ལ་སོགས་པ་ལྔ་ཇི་སྲིད་པར་མངོན་པར་དབང་བསྐུར་བར་བྱའོ། །ལྷག་མ་རྣམས་སྤང་བར་བྱའོ་ཞེས་སོ། །ཤེས་རབ་ཅན་དང་སྤྱོད་པ་ལ་མ་
རྨོངས་པའི་ཁྱད་པར་ལས་ཏེ། གཞན་རྣམས་བསྟེན་པར་བྱ་བ་མ་ཡིན་ནོ། །དེ་ནས་རྒྱལ་པོ་ཐམས་ཅད་དབང་བསྐུར་བ་བཞིན་དུ་ཡོ་བྱད་ཐམས་ཅད་བསགས་ཏེ། སློབ་དཔོན་དང་མཁན་པོ་མཉེས་པར་བྱའོ། །དེ་ནས་བླ་རེ་བྲེས་ཏེ་རྒྱལ་མཚན་དང་། བ་དན་དང་གདུགས་དཀར་པོ་མགོ་བོར་འཛིན་བཞིན་པ་དང་། རྔ་ཡབ་དཀར་པོ་གཡོབ་བཞིན་པ་དང་། བཀུར་སྟི་ཆེན་པོས་དུང་དང་། རྔ་བོ་ཆེ་དང་། རྫ་རྔའི་དགའ་བའི་སྒྲ་ངེས་པར་སྒྲོགས་པ་དང་། རྒྱལ་བའི་སྒྲ་དང་། བཀྲ་ཤིས་ཀྱི་ཚིགས་སུ་བཅད་པས་མངོན་པར་བསྔགས་པ་དང་། བདེ་ལེགས་ཀྱི་ཚིགས་སུ་བཅད་པ་རྒྱལ་བས་གསུངས་པ་རྣམས་ཀྱིས་མངོན་པར་བསྟོད་བཞིན་པས་བསྐོར་བ་དང་། བཀྲ་ཤིས་དེ་བྱས་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་བྱས་ནས། འདི་སྐད་ཅེས་བརྗོད་པར་བྱའོ། །སློབ་དཔོན་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྔགས་ཀྱི་སྤྱོད་པ་མངོན་པར་བསྒྲུབ་པ་ལ་ཡང་དག་པར་རྗེས་སུ་འཇུག་པ་དང་། འཇིག་རྟེན་པ་ཐམས་ཅད་ལས་འདས་པའི་གསང་ཆེན་རྣམ་པར་ཐར་པའི་དཀྱིལ་འཁོར་དུ་ཡང་དག་པར་རྗེས་སུ་འཇུག་པ་དང་། ཆོས་ཀྱི་རྒྱལ་སྲིད་ཐམས་ཅད་ཀྱིས་སངས་རྒྱས་ཉིད་མངོན་པར་རྟོགས་པར་འདོད་པ་དང་། མདོར་བསྡུས་ནས་བརྗོད་ནས་སངས་རྒྱས་ཉིད་འབྱུང་བའི་ཕྱིར་བདག་ཉིད་སྤྲོ་བར་བགྱིའོ་ཞེས་སོ། །དེ་ནས་ཀུ་ཤའི་ཁྲེས་ལ་ཉེ་བར་འདུག་སྟེ་ཤར་དུ་མངོན་པར་ཕྱོགས་པས་དཀྱིལ་འཁོར་མཐོང་ཞིང་རྟོགས་པ་ལ་དང་པོ་རེ་ཞིག་རིག་པའི་མངོན་པར་དབང་བསྐུར་བ་བྱིན་ནས་ཕྱག་རྒྱ་ཆེན་པོ་རྩ་བའི་རིག་པ་བཟླས་པར་བྱའོ། །དེ་ནས་རིག་པ་དང་། སྔགས་དག་གང་གནས་པ། གྲོ་གའི་འདབ་མ་ལ་གི་ཝང་གིས་བྲི་བར་བྱའོ། །བྲིས་ནས་ཙནྡན་དང་གུར་གུམ་དག་གིས་ལག་པ་དག་དང་ཁམ་ཕོར་ཁ་སྦྱར་བཀྲུས་ནས་དེ་ནས་གྲོ་གའི་འདབ་མ་ཁམ་ཕོར་ཁ་སྦྱར་གྱི་ནང་དུ་བཞག་པར་བྱས་ནས་དཀྱིལ་འཁོར་གྱི་ནང་དུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་ཞབས་ཀྱི་དྲུང་དུ་གཞག་པར་བྱའོ། །དེ་ནས་དེར་ཉེ་བར་འདུག་སྟེ་རིག་པ་རྩ་བའི་སྔགས་བརྒྱ་རྩ་བརྒྱད་སྔ་མ་ཉིད་དུ་བརྗོད་པར་བྱའོ། །དེ་ནས་
དེར་ཀུ་ཤའི་ཁྲེས་ལ་ཉེ་བར་འདུག་པ་མངོན་པར་དབང་བསྐུར་བར་བྱའོ། །ཕྱི་རོལ་གྱི་དཀྱིལ་འཁོར་དུ་ཐམས་ཅད་དང་ཐུན་མོང་དུ་གྱུར་པའི་བུམ་པ་གང་བ་སྒོ་དང་ཉེ་བར་སྔར་བཞག་པ་བླངས་ནས་སློབ་དཔོན་གྱིས་རྩ་བའི་རིག་པ་བཟླས་ཤིང་སྤྱི་བོར་མངོན་པར་དབང་བསྐུར་བར་བྱའོ། །སློབ་མ་ཇི་ལྟར་འདོད་པའི་ཆུས་སྤྱི་བོ་ནས་མངོན་པར་དབང་བསྐུར་བར་བྱའོ་ཞེས་སོ། །དེ་ནས་དེ་ལ་ཁམ་ཕོར་ཁ་སྦྱར་དེ་དེའི་ཆེད་དུ་སྦྱིན་པར་བྱའོ། །མར་མེ་ལ་ཀློག་ཏུ་གཞུག་པར་བྱའོ། །གལ་ཏེ་དེས་བཅོམ་ལྡན་འདས་རིག་པའམ་སྔགས་བཟུང་བ་ཉིད་ཡིན་པར་གྱུར་ན་བཀླགས་པ་ཉིད་ལས་ཀྱང་ལས་བྱེད་དོ། །རྣམ་པ་གཞན་དུ་ན་རིམ་གྱིས་འབད་པས་བསྒྲུབས་པས་བྱེད་པར་འགྱུར་རོ། །གཞན་རྣམས་ནི་སྔགས་བཟླས་པ་ཁོ་ནས་འགྲུབ་པར་བྱེད་དོ། །དེ་ནས་སྔགས་ཡོངས་སུ་གཟུང་བར་འགྱུར་རོ། །དང་པོ་སྒྲུབ་པ་ཁོ་ནས་འགྲུབ་པར་བྱེད་དོ། །ཞེས་པ་རྣམ་པར་རྟོག་པ་མེད་པ་ལས་སོ། །དེ་ཁོ་ན་སྔར་བྲིས་པ་སློབ་དཔོན་གྱི་སྒྲུབ་པ་གསུམ་གྱིས་ངེས་པར་འགྲུབ་པར་འགྱུར་རོ། །འབད་པ་མེད་པར་རོ། །དེ་བཞིན་དུ་ཐོག་མར་རིག་པའི་མངོན་པར་དབང་བསྐུར་བ་སྦྱིན་པར་བྱའོ། །དཀྱིལ་འཁོར་གཉིས་པར་མངོན་པར་དབང་བསྐུར་བ་ནི། དཀྱིལ་འཁོར་གཉིས་པར། དཀྱིལ་འཁོར་ཐམས་ཅད་ལ་དང་། ལྷ་ཐམས་ཅད་ལ་གང་རབ་ཏུ་བསྟབས་པའི་བུམ་པ་གང་བ་དེས་སྔ་མའི་ཆོ་ག་གང་ཡིན་པ་ཇི་ལྟ་བ་དེ་ཉིད་ཀྱིས་སྤྱི་བོར་མངོན་པར་དབང་བསྐུར་བར་བྱས་ན་སྡིག་པ་ཐམས་ཅད་ལས་གྲོལ་བར་འགྱུར་ཏེ། སངས་རྒྱས་ཐམས་ཅད་ཀྱིས་རྗེས་སུ་གནང་བར་འགྱུར་རོ། །འཇིག་རྟེན་དང་འཇིག་རྟེན་ལས་འདས་པ་ཐམས་ཅད་ཀྱི་དམ་ཚིག་དང་། དཀྱིལ་འཁོར་དང་། སྔགས་དང་། ཕྱག་རྒྱ་སྒྲུབ་པ་ལ་ཡང་ལྷག་པར་འདོད་པར་འགྱུར་རོ། །བྱང་ཆུབ་སེམས་དཔའ་ཐམས་ཅད་ཀྱིས་སློབ་དཔོན་དུ་མངོན་པར་དབང་བསྐུར་བ་སྦྱིན་ནོ། །དཀྱིལ་འཁོར་གསུམ་པར་ཉན་ཐོས་དང་། རང་སངས་རྒྱས་ཐམས་ཅད་ལ་ཕུལ་བའི་བུམ་པ་གང་བ་ཆོ་ག་དེ་ཉིད་ཀྱིས་སྤྱི་བོར་མངོན་པར་དབང་བསྐུར་བར་བྱའོ། །ཁྱོད་ལ་སངས་རྒྱས་བྱང་ཆུབ་སེམས་
དཔའ་རྫུ་འཕྲུལ་ཆེན་པོ་དང་ལྡན་པ་ཐམས་ཅད་ཀྱིས་འཇིག་རྟེན་དང་འཇིག་རྟེན་ལས་འདས་པ་ཐམས་ཅད་ཀྱི་རིག་པའི་སྔགས་རྣམས་དང་། དཀྱིལ་འཁོར་འདྲི་བ་དང་། ཉེ་བར་སྟོན་པ་དང་། རྒྱུད་དང་རྒྱུད་ཀྱི་ཕྱག་རྒྱ་དང་སྤྱད་པ་ངེས་པར་སྟོན་པ་དང་། རང་གི་ཆོ་ག་ངེས་པར་སྟོན་པར་རྗེས་སུ་གནང་ངོ་ཞེས་བརྗོད་པར་བྱའོ། །སྐྱེ་བ་འདི་ཉིད་དམ་གང་ཕྱི་མ་གཞན་དང་གཞན་རྣམས་སུ་སངས་རྒྱས་ཉིད་ངེས་པར་ཐོབ་བོ། །དེ་བཞིན་དུ་རྒྱལ་བ་དང་རྣམ་པར་རྒྱལ་བའི་མངོན་པར་དབང་བསྐུར་བ་དང་སྔར་ངེས་པར་བསྟན་པའི་ཆོ་གས་བཅོམ་ལྡན་འདས་ལ་སྔར་ཕུལ་བའི་བུམ་པ་གང་བ་དང་། བྱང་ཆུབ་སེམས་དཔའ་ལ་ཕུལ་བའི་བུམ་པ་གང་བས་དེ་བཞིན་དུ་ཁོ་ནར་མངོན་པར་དབང་བསྐུར་རོ། །དེ་བཞིན་དུ་ཡང་ཁྱོད་ལ་སངས་རྒྱས་བཅོམ་ལྡན་འདས་རྣམས་དང་། བྱང་ཆུབ་སེམས་དཔའ་ཆེན་པོ་རྣམས་དང་། ཉན་ཐོས་རྣམས་ཀྱིས་འབྱུང་པོ་ཐམས་ཅད་ཀྱིས་མི་ཚུགས་པ་དང་། ལུས་ཅན་ཐམས་ཅད་ཀྱིས་མི་ཐུབ་ཅིང་རྣམ་པར་རྒྱལ་བ་དང་། ཁྱོད་སྔགས་རྣམས་ཐམས་ཅད་ཇི་ལྟར་འདོད་པ་བཞིན་དུ་སྒྲུབས་ཤིག་ཅེས་རྗེས་སུ་གནང་ངོ་ཞེས་བརྗོད་པར་བྱའོ། །དེ་ནས་དཀྱིལ་འཁོར་གྱི་སློབ་དཔོན་གྱིས་སེམས་ཅན་ལྔ་པོ་ཉིད་རེ་རེ་ལ་ཇི་ལྟར་འདོད་པ་བཞིན་དུ་མངོན་པར་དབང་བསྐུར་པ་སྦྱིན་པར་བྱའོ། །དེ་ནས་དེ་དག་རིམ་གྱིས་དཀྱིལ་འཁོར་དུ་བཅུག་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕུལ་ཏེ། དཀྱིལ་འཁོར་ལ་བསྐོར་བ་ལན་གསུམ་བྱས་ནས་གཤེགས་སུ་གསོལ་བར་བྱའོ། །དེ་ནས་ཉི་མ་གཞན་ལ་རིམ་གྱིས་རིག་པ་དང་གསང་སྔགས་ཀྱི་སྤྱོད་པ་རྣམས་ལ་བསླབ་པར་བྱ་ཞིང་། རྣམ་པར་སྦྱར་བར་བྱའོ། །སྐད་ཅིག་དེ་ཉིད་ལ་སོང་ནས་སྔར་བརྟེན་པར་ཕུལ་བ། བྱང་ཆུབ་སེམས་དཔའ་ཆེན་པོ་ལ་སྔར་ཕུལ་བའི་ཆུ་བུམ་པ་གང་བ་བླངས་ནས། དཀྱིལ་འཁོར་དུ་ཞུགས་པ་དེ་རྣམས་ལ་ཆུ་ཁྱོར་བ་གསུམ་ཤར་དུ་མངོན་པར་ཕྱོགས་པར་བྱས་ནས་འཐུང་དུ་གཞུག་པར་བྱའོ། །འདི་སྐད་བརྗོད་པར་བྱ་སྟེ། ཀྱེ་བྱང་ཆུབ་སེམས་དཔའ་ཆེན་པོ་གསང་བའི་དམ་ཚིག་གང་གིས་འདའ་བར་བྱེད་པ་བསོད་
ནམས་མ་ཡིན་པ་མང་པོ་སྐྱེ་བར་འགྱུར་རོ། །དཀྱིལ་འཁོར་གང་དུའམ། དེར་ཡང་རིགས་དམན་པ་གང་གིས་དཀྱིལ་འཁོར་དུ་འོངས་པ་དེ་རྣམས་ཀྱང་དཀྱིལ་འཁོར་གྱི་སློབ་དཔོན་གྱིས་སྙིང་རྗེ་ཆེན་པོའི་སེམས་བསྐྱེད་ནས་གྲོགས་བྱེད་པའི་ལག་པར་གོས་དཀར་པོ་གཙང་མ་མགོ་བོར་བཅིངས་པ་གཞན་གྱིས་སམ་གོས་ཀུན་དུ་གཡོགས་ཏེ་གནས་པ་དམ་ཚིག་གི་ཕྱག་རྒྱ་བཅིངས་ནས་རིགས་དམན་པ་རྣམས་ཀྱིས་མེ་ཏོག་གཏོར་བར་བྱའོ། །དེ་ནས་གྲོགས་བྱེད་པ་དེ་རྣམས་ཀྱིས་ཀྱང་། རབ་ཏུ་ཞུགས་པའི་སེམས་ཅན་ཐམས་ཅད་ཀྱིས་ཁྲུས་བྱའོ། །དེ་རྣམས་ཀྱིས་ཡང་དམ་ཚིག་ཙམ་དེ་འབྱུང་བར་འགྱུར་རོ། །སྒྲུབ་པ་ཡང་གྲུབ་པར་འགྱུར་རོ། །དེ་སྔར་བྱས་པའི་མེའི་བྱ་བའི་གནས་སུ་སོང་ནས་རྩེ་མོ་མ་ཉམས་པའི་ཀུ་ཤ་རྣམས་ཀྱིས་སོ། །དེར་ཡང་མེ་ཐབ་རྣམ་པ་གསུམ་དུ་བརྗོད་དོ། །ཞི་བ་དང་། རྒྱས་པ་དང་། མངོན་སྤྱོད་དོ། །ཞི་བའི་དོན་དུ་པད་མའི་རྣམ་པའོ། །ཡང་ན་ཚིམ་པར་བྱེད་པས་དབང་དུ་བྱེད་པའང་ངོ་། །མངོན་སྤྱོད་ལ་ཟུར་གསུམ་མོ། །དེ་ལ་མེའི་བྱ་བའི་ཆོ་ག་ཐམས་ཅད་ལ་ཀུ་ཤ་དགྲམ་པར་འགྱུར་རོ། །སངས་རྒྱས་ཐམས་ཅད་ལ་ཕྱག་བྱ་བ་བྱས་ནས་ཤར་གྱི་རྩེ་མོར་མེའི་བྱ་བ་གཞག་པར་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཕྱི་ནས་མེའི་བྱ་བ་མཛད་པ་རྣམས་ལ་ཕྱག་བྱས་ནས་ལྷོའི་རྩེ་མོར་རོ། །བྱང་ཆུབ་སེམས་དཔའ་ཐམས་ཅད་ལ་ཕྱག་བྱས་ནས། བྱང་གི་རྩེ་མོར་སྦྱིན་པར་བྱའོ། །དེ་བཞིན་དུའང་བྱ་བ་རྣམས་གྲོགས་བྱེད་པས་གནས་པའི་ངང་ཚུལ་ཅན་གྱིས་མེའི་བྱ་བ་ཀུ་ཤ་རྣམས་ཀྱིས་སོ། །ཐོག་མར་རྩ་བའི་རིག་པས་སོ། །ཐོག་མར་ཞོ་དང་སྦྲང་རྩི་དང་མར་ལ་བཏགས་པའི་འབྲས་ཡོས་ཀྱི་སྦྱིན་སྲེག་ཉི་ཤུ་རྩ་གཅིག་སྦྱིན་པར་བྱའོ། །ཞི་བའི་དོན་དུ་སྙིང་པོའི་མར་གྱིས་སོ། །རྒྱས་པའི་དོན་དུ་ཤིང་ཨ་པཱ་མརྒ་གསུམ་གྱི་སྦྱིན་སྲེག་གོ། །མངོན་སྤྱོད་ལ་ཀ་ཊ་ཀེ་ཡིས་སོ། །མེའི་བྱ་བའི་ཆོ་ག་འདིའང་ཐམས་ཅད་དུ་ཐུན་མོང་བའི་སྒྲུབ་པ་རྣམས་ལ་ཡང་ངོ་། །དཀྱིལ་འཁོར་ཐམས་ཅད་ཀྱི་ཉེ་བར་སྤྱོད་པ་རྣམས་སུའང་ངོ་། །དེ་ནས་དཀྱིལ་འཁོར་གྱི་སློབ་དཔོན་གྱིས་གནས་
གཙང་མའི་གཙོ་བོའི་ལྷ་ཉིད་བསྟན་ནས། མེའི་ཆོ་གའི་བྱ་བ་བྱས་ཏེ་འདི་སྐད་ཅེས་བརྗོད་པར་བྱའོ། །དཀྱིལ་འཁོར་ཐམས་ཅད་དུ་རབ་ཏུ་ཞུགས་པ་རྣམས་ལ། དེ་ནས་རྩ་བའི་རིག་པ་བཟླས་པས་མཆོད་ཡོན་ནོ། །སངས་རྒྱས་བཅོམ་ལྡན་འདས་རྣམས་དང་། བྱང་ཆུབ་སེམས་དཔའ་རྣམས་དང་། གཞན་ཡང་རྫུ་འཕྲུལ་ཆེན་པོའི་ལྷའི་ཁྱད་པར་རྣམས་དང་། བཅོམ་ལྡན་འདས་ཀྱི་ཉན་ཐོས་རྣམས་ཀྱང་གསན་དུ་གསོལ། གང་དམ་ཚིག་གི་དཀྱིལ་འཁོར་འདིར་ཆོ་ག་ལས་འདས་པར་ཡང་རུང་སྟེ། གུས་པར་བྱེད་པ་དང་། གཞན་ཡང་གང་ཅུང་ཟད་བདག་ཉིད་ཉམས་པར་བྱ་བ་དེ་དག་དགེ་བའི་རྩ་བ་འདིས་དཀྱིལ་འཁོར་ཐམས་ཅད་རབ་ཏུ་གནས་པ་དང་། དེ་བཞིན་གཤེགས་པ་ཐམས་ཅད་ཀྱི་སྤྱོད་ཡུལ་དང་། བྱང་ཆུབ་སེམས་དཔའ་ཐམས་ཅད་ཀྱི་སྤྱོདཡུལ་དང་མ་བྲལ་བར་ཐོབ་པར་གྱུར་ཅིག །མྱུར་དུ་བདེབ་དང་ལྡན་པ་ཐོབ་པར་གྱུར་ཅིག །དེ་སྐད་ཅེས་བརྗོད་པར་བྱའོ། །དཀྱིལ་འཁོར་དུ་རབ་ཏུ་ཞུགས་པའི་སེམས་ཅན་རྣམས་ཐམས་ཅད་ལ། མདོར་ན་བྱང་ཆུབ་ཀྱི་སེམས་དང་མི་འབྲལ་བར་འགྱུར་བར་བྱའོ། །སྦྱིནཔ་ལ་རབ་ཏུ་ཆགས་པ་དང་། བྱམས་པ་ལ་སོགས་པ་ལ་གནས་པ་དང། སངས་རྒྱས་དང་བྱང་ཆུབ་སེམས་དཔའ་ཐམས་ཅད་མཆོད་པ་དང་། མདོར་ན་ལུང་དང་རིག་པ་དང་གསང་སྔགས་སངས་རྒྱས་དང་། བྱང་ཆུབ་སེམས་དཔས་གསུངས་པ་རྣམས་བལྟ་བར་བྱ། བྱང་ཆུབ་ཀྱི་སེམས་དང་མི་འབྲལ་བར་འགྱུར་བར་བྱའོ་ཞེས་བརྗོད་པར་བྱའོ། །དེ་ནས་དཀྱིལ་འཁོར་གྱི་སློབ་དཔོན་གྱིས་བྱང་ཆུབ་སེམས་དཔའ་ལ་སོགས་པ་དེ་རྣམས་ཐམས་ཅད་ལ་དྲི་བཟང་པོའི་མེ་ཏོག་གིས་མཆོད་ཡོན་ཕུལ་ནས་སམ་དེ་ནས་ཡིད་ཀྱིས་མཆོད་ཡོན་ཕུལ་ནས་རྩ་བའི་རིག་པ་བཟླས་པས་གཙྪ་གཙྪ་ཞེས་པ་དང་། སྭཱ་ཧཱ་ཞེས་པ་ཁོ་ན་བཟླས་པས་ཕྱོགས་བཞིར་རྣམ་པར་བལྟས་ཏེ། བཅོམ་ལྡན་འདས་མའི་རྩ་བའི་ཕྱག་རྒྱ་བཅིངས་ནས་གྱེན་དུ་ངེས་པར་བལྟས་པས་གཤེགས་སུ་གསོལ་བར་བྱའོ། །ཞེས་པའོ། །བྱང་ཆུབ་སེམས་དཔའི་སྡེ་སྣོད་བཅོམ་ལྡན་འདས་མ་འཕགས་མ་སྒྲོལ་མ་རལ་པ་གྱེན་བརྫེས་ཀྱི་རྩ་བའི་ཆོ་ག་ལས།
དཀྱིལ་འཁོར་གྱི་ཆོ་ག་རབ་འབྱམ་གྱི་ལེའུ་སྟེ་གཉིས་པ་རྫོགས་སོ།། །།དེ་ནས་སེམས་དཔའ་ཆེན་པོ་དེ་སླར་ཡང་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ལ་རྣམ་པར་གཟིགས་ནས་ལྷའི་བུ་རྣམས་ཐམས་ཅད་ལ་སྨྲས་པར་གྱུར་ཏེ། ཁྱེད་རྣམས་ཉོན་ཅིག །མཆོག་གི་གྲུབ་པ་མཆོག་ཏུ་གསང་བ་སྒྲུབ་ཐབས་ཐམས་ཅད་ཀྱི་ཆོ་ག་རིག་པའི་ལས་ཐམས་ཅད་བྱེད་པ་དང་། རིག་པའི་ལས་བཟང་པོ་བྱེད་པ། ཆེན་པོ་ཉིད་དང་། དོན་ཆེན་པོ་བྱེད་པ། ཕུང་ཁྲོལ་ཐམས་ཅད་ཟློག་པར་བྱེད་པ། དོན་ཐམས་ཅད་སྒྲུབ་པར་བྱེད་པ། མཆོག་ཏུ་བཀྲ་ཤིས་པ་ཐམས་ཅད་ཀུན་ནས་བཀྲ་ཤིས་པ། སངས་རྒྱས་ཐམས་ཅད་ཀྱིས་གསུངས་པ། བདག་གི་མཆོག་ཏུ་གསང་བའི་སྙིང་པོ་ཡང་དག་པར་གྱུར་པ། ལས་ཕྲན་ཚེགས་ཐམས་ཅད་ལ་ཉེ་བར་སྦྱར་བར་བྱ་བ། རིག་པའི་རྒྱལ་མོ་ཆེན་མོའི་ལས་ཆེན་པོ་ཐམས་ཅད་ཀྱི་དངོས་གྲུབ་བྱེད་པའི་སྒྲོལ་མ་གང་ཞེ་ན། ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། གྲོགས་པོ་དག་འདི་ནི་འཕགས་མ་སྒྲོལ་མ་ལས་ཆེན་པོ་ཐམས་ཅད་བྱེད་པ་ལས་ཕྲན་ཚེགས་ཐམས་ཅད་བཀླགས་པས་གྲུབ་པ། མཆོག་ཏུ་གསང་བ་ཤིན་ཏུ་གསང་བ་མཆོག་ཏུ་གྲུབ་པ་གཞན་གྱིས་རབ་ཏུ་སྦྱར་བའི་ལས་ཐམས་ཅད་འཇིག་པར་བྱེད་པའི་རིག་པ་འདི་འང་དཀྱིལ་འཁོར་གཉིས་པའི་ཆོ་ག་དང་། སྒྲུབ་ཐབས་སུ་གྱུར་ཏེ། འཕགས་མ་སྒྲོལ་མས་ལས་ཆེན་པོ་ཐམས་ཅད་མདོར་བསྡུས་པ་དང་། ལས་ཕྲན་ཚེགས་ཐམས་ཅད་ལའང་ཉེ་བར་སྦྱར་བར་བྱ་ཞིང་། དཀྱིལ་འཁོར་ཐམས་ཅད་ཀྱི་ཆོ་ག་དང་སྒྲུབ་ཐབས་རྣམས་ལའང་ངོ་། །ཉིན་མཚན་གང་དུ་འམ་དེར་ཡང་རུང་སྟེ། གཙང་མའི་ཕྱོགས་སུ་བྲི་བར་བྱའོ། །བདག་ཉིད་ཉེས་པ་མེད་པ་དཀྱིལ་འཁོར་གྱི་སློབ་དཔོན་གྱིས་གཅིག་པུས་དང་པོ་རེ་ཞིག་གྲུ་བཞི་མཉམ་པ་སྒོ་བཞི་པ་ཁྲུ་བཞིའི་ཚད་དང་ལྡན་པའི་དབུས་པདྨའི་ཕྱག་རྒྱ་དེའི་གཡས་སུ་ཨུཏྤ་ལ་སྔོན་པོ་དང་། དབྱུག་པའི་ཕྱག་རྒྱ་དང་། རིལ་བ་སྤྱི་བླུགས་ཀྱི་ཕྱག་རྒྱ་
གཡོན་དུ་རྡོ་རྗེ་རྩེ་གསུམ་གྱི་ཕྱག་རྒྱ་དང་། གོས་དཀར་མོའི་ཕྱག་རྒྱ་དང་། རྟ་མགྲིན་དང་དཔལ་ཆེན་པོའི་ཕྱག་རྒྱའོ། །ཤར་སྒོར་པད་མ། བྱང་དུ་ཨུཏྤ་ལ། ལྷོ་རུ་རྡོ་རྗེ། ནུབ་ཏུ་འཇུག་པའི་རིམ་པ་ལས་འདས་པར། སྟེང་དུ་འཁྱིལ་བའི་རྣམ་པའི་ཞགས་པའི་ཕྱག་རྒྱའོ། །དེའི་འོག་ཏུ་ཕྱི་ནས་མེའི་བྱ་བ་བྱས་ནས་སྔར་བརྗོད་པའི་ཆོ་གས་མཆོད་པ་ལ་སོགས་པ་བྱས་ཏེ། དཀྱིལ་འཁོར་དུ་འཇུག་པར་བྱའོ། །དེ་ལ་རྒྱལ་སྲིད་འདོད་པས་ཧདྤྱའི་ཤིང་དུའོ། །ལོངས་སྤྱོད་འདོད་པས་རང་གི་ཁྱིམ་གྱི་ལྷའོ། །རྟ་འདོད་པས་རྟའི་བྲེས་སུའོ། །གླང་པོ་ཆེ་འདོད་པས་གླང་པོ་ཆེའི་བྲེས་སུའོ། །བུ་འདོད་པས་བོ་དེ་ཙེའི་ཤིང་གི་དྲུང་དུའོ། །ཚངས་པའི་སྲིན་པོས་ཟིན་པ་ལ་ཚངས་པས་བསྐྱངས་པ་རུའོ། །ཀླུས་ཟིན་པ་ལ་ཀླུ་ཤིང་དང་ཉེ་བ་རུའོ། །མཁའ་འགྲོ་མས་ཟིན་པ་ལ་ལམ་བཞི་མདོ་རུའོ། །གནོད་སྦྱིན་གྱིས་ཟིན་པ་ལ་པ་ཊའི་ཤིང་གི་དྲུང་དུའོ། །སྲུལ་པོས་ཟིན་པ་ལ་ཁྲོན་པའི་དྲུང་དུའོ། །གཞན་རྣམས་ཀྱང་ཇི་ལྟར་འདོད་པ་བཞིན་དུ་གང་དུའང་། དེ་རུ་ཡང་ཉེས་པ་མེད་དོ། །གྲོགས་པོ་དག་མདོར་བསྡུ་ན། རིག་པ་འདི་ནི་དཀྱིལ་འཁོར་དང་། ལས་ཐམས་ཅད་པ་སྟེ། ལས་ཐམས་ཅད་ལ་རབ་ཏུ་སྦྱར་བར་བྱའོ། །གསང་ཆེན་འདི་དང་ལྷན་ཅིག་རབ་ཏུ་སྦྱར་བར་བྱ་སྟེ་དཀྱིལ་འཁོར་འདི་ནི་སེམས་ཅན་རྣམས་ལ་ཕན་པར་འདོད་པའི་འབྲས་བུ་ཡོད་པའོ། །ལོངས་སྤྱོད་ཐམས་ཅད་མངོན་པར་འཕེལ་བར་བྱེད་པ་སྒྲོལ་མའི་དཀྱིལ་འཁོར་གྱི་རིག་པ་སྒྲུབ་པ་པོ་རྣམས་ལ་ཕན་པའི་དོན་གྱི་ཕྱིར་འབྱོར་པ་ཐམས་ཅད་མངོན་པར་འཕེལ་བར་བྱེད་པ་སྟེ། མདོར་ན་ཕྱི་མའི་ལུས་ཅན་འབྱུང་བར་འགྱུར་བ་ཐམས་ཅད་ཀྱི་སློབ་དཔོན་དུ་གྱུར་པ་རབ་ཏུ་གྲགས་སོ། །དེ་ནས་དཀྱིལ་འཁོར་ཆེན་པོར་གྱུར་པ་གང་ཐོབ་ནས་དཔལ་མེད་པ་འཇོམས་པར་བྱེད་ཅིང་ཞི་བར་བྱེད། ནད་དང་དགྲ་འཕྲོག་པ་དེ་ལྟ་བུའི་དཀྱིལ་འཁོར་སེམས་ཅན་ཐམས་ཅད་ཀྱི་གཟི་བརྗིད་དང་སྟོབས་སྒྲུབ་པར་བྱེད་པ་མཐོང་ཞིང་ཐོས་ནས་དེ་ནས་ཆོ་ག་ལ་རབ་ཏུ་དང་བ་སྐྱེ་བར་འགྱུར་བ་གང་ཡིན་པ་དེ་རྣམས་སངས་རྒྱས་ཐམས་ཅད་ཀྱི་བྱང་ཆུབ་ཏུ་བདག་གིས་
ལུང་སྟོན་པར་ཐེ་ཚོམ་མེད་དོ། །གང་ཡང་མ་འོངས་པའི་སངས་རྒྱས་འབྱུང་བར་འགྱུར་རོ། །འཇིག་རྟེན་གྱི་འདྲེན་པ་དེ་རྣམས་ཀྱང་རྗེས་སུ་ཡི་རང་བར་འགྱུར་རོ། །ས་སྟེངས་དཀྱིལ་འཁོར་སྨྲ་བ་ནི། །ཞི་བའི་ལས་རྣམས་ཐམས་ཅད་བྱེད། །བཀྲེན་པ་རྣམས་ཀྱིས་འཕན་པ་ཐོབ། །སེམས་ཅན་མགོན་མེད་སྡུག་བསྔལ་ཅན། །རྣམས་ཀྱིས་དཀྱིལ་འཁོར་རབ་སྦྱར་བྱ། །ཨིནྡྲ་ནཱི་ལ་སོགས་ཕྱེ་མས། །དཀྱིལ་འཁོར་ཡང་དག་ཀུན་དུ་བྲི། །ཨིནྡྲ་ནཱི་ལ་སོགས་མེད་ན། །སཱ་ལུའི་ཕྱེ་མས་ཡང་དག་བྲི། །སཱ་ལུའི་ཕྱེ་མ་སོགས་མེད་ན། །སོ་ཕག་ཕྱེ་མ་སོགས་ཀྱིས་བྲི། །སོ་ཕག་ཕྱེ་མ་སོགས་མེད་ན། །བྱེ་མ་རྣམས་ཀྱིས་ཡང་དག་བྲི། །དེ་ལྟར་ཡོན་ཏན་ཀུན་བསྡུས་པའི། །སྒྲོལ་མའི་དཀྱིལ་འཁོར་རྨད་བྱུང་བ། །འཇིག་རྟེན་མགོན་པོའི་ཡང་དག་བཀའ། །བྱང་ཆུབ་སེམས་དཔས་གསུངས་པ་ཡིན་ཞེས་སོ། །བྱང་ཆུབ་སེམས་དཔའི་སྡེ་སྣོད་དང་ལྡན་པ་ཐེག་པ་ཆེན་པོའི་མདོ་སྡེ་བཅོམ་ལྡན་འདས་མ་འཕགས་མ་སྒྲོལ་མ་རལ་པ་གྱེན་བརྫེས་ཀྱི་རྩ་བའི་ཆོ་ག་ལས་སྒྲུབ་ཐབས་ཀྱི་ཆོ་ག་དང་། དཀྱིལ་འཁོར་གྱི་ཆོ་ག་རབ་འབྱམ་གྱི་ལེའུ་སྟེ་གསུམ་པ་རྫོགས་སོ།། །།དེ་ནས་སེམས་དཔའ་ཆེན་པོས་སླར་ཡང་དཀྱིལ་འཁོར་ཆེན་པོ་དེ་ལ་ཀུན་དུ་གཟིགས་ནས་དངོས་པོ་མེད་པའི་རང་བཞིན་ཡང་དག་པར་འཕགས་པ་དགོངས་ནས་བཅོམ་ལྡན་འདས་མ་རིག་པའི་རྒྱལ་པོ་ཆེན་པོ་དེ་བཞིན་གཤེགས་པ་ཐམས་ཅད་ཀྱིས་གསུངས་ཤིང་མངོན་པར་ཡི་རང་བར་གྱུར་པ། མཆོག་གི་སྒྲུབ་པའི་ཆོ་ག་རས་རིས་ཀྱི་ཆོ་ག་གསུངས་སོ། །དང་པོ་ར་ཞིག་དགེ་བའི་ཉི་མ་ལ་དཔའ་བོའི་རིན་གྱིས་ཉོས་པའི་རས་བལ་བླངས་ནས་བྲམ་ཟེའི་བུ་མོའི་ལག་པས་རས་བལ་བྱེད་དུ་གཞུག་པར་བྱའོ། །དེ་ནས་རས་བལ་དེ་ལ་ལྷག་པར་གནས་པར་བྱ་སྟེ་རྩ་བའི་རིག་པ་དཔའ་བོའི་རིན་གྱིས་ཉོས་པའི་དོག་པ་བླངས་ནས་འདི་སྐད་ཅེས་བརྗོད་པར་བྱའོ། །སངས་རྒྱས་དང་བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་ཐམས་ཅད་ལྷག་པར་གནས་པར་མཛོད་ཅིག །བཅོམ་ལྡན་འདས་དང་། བྱང་ཆུབ་སེམས་དཔའ་ཆེན་པོ་རྣམས་
ལེགས་པར་འཚོ་ཞིང་བདག་གི་སྐྱེ་བ་འབྲས་བུ་ཡོད་པ་དང་། སྔགས་ཀྱི་དངོས་གྲུབ་ལྷག་པར་གནས་པར་མཛོད་ཅིག །དེའི་དུས་སུ་རྔ་པ་ཊ་ཧ་དང་། རྔ་བོ་ཆེ་དང་། དུང་དང་། པི་ཝང་དང་། གླིང་བུ་དང་། འཁར་རྔ་དང་། རྔ་མུར་ཛའི་སྒྲ་ཐོས་པར་གྱུར་པའམ། རྒྱལ་རིགས་སམ། རྒྱལ་རིགས་མོའམ། བུད་མེད་དམ། ཁྱེའུའམ། བུ་མོའམ། མི་རྣམས་གློ་བུར་དུ་འདི་སྐད་ཅེས། རྒྱལ་དང་། གྲུབ་པ་དང་། དངོས་གྲུབ་སྦྱིན་པ་དང་། བྱིན་པ་དང་། ཟུང་ཤིག་དང་། དཔལ་དང་། འབྲས་བུ་དང་བཅས་པ་དང་། ལས་ཀྱི་འཁོར་ལོ་དང་། མང་པོ་ཞེས་པ་འདི་ལྟ་བུ་ལ་སོགས་པ་གཞན་ཡང་དགེ་བའི་སྤྲ་རབ་ཏུ་འདོན་པ་དང་། དྲིལ་བུའི་སྒྲ་བྱུང་བ་དང་། དགའ་བའི་སྒྲ་ཡང་རུང་སྟེ། དེ་རྣམས་རིག་པ་འཛིན་པས་སངས་རྒྱས་བཅོམ་ལྡན་འདས་རྣམས་དང་། བྱང་ཆུབ་སེམས་དཔའ་རྣམས་ཀྱིས་ཀྱི་བྱིན་གྱིས་བརླབས་པར་ཤེས་པར་བྱའོ། །གཞན་དུ་དངོས་གྲུབ་འབྲས་བུ་མེད་དོ་ཞེས་པས་སོ། །དེའི་དུས་སུ་དེ་རྣམས་མ་རུངས་པའི་སྒྲ་འབྱིན་པའམ། ཟུང་ཤིག །ཟོ་ཤིག །འཛིན་དུ་ཆུ་གཅིག །ཉམས་པ་རྣམ་པར་བརླག་པ། ཀྱི་ཧུད། རིང་བ་མེད་པ་དེ་ལྟ་བུ་ལ་སོགས་པའི་སྒྲ་འབྱིན་པར་བྱེད་པ་དང་། མི་དང་། མ་ཧེ་དང་། ཅེ་སྤྱང་དང་། བོང་བུ་དང་། བྱི་ལ་དང་། དུད་འགྲོ་དམན་པ་རྐང་གཉིས་པ། རྐང་བཞི་པ་རྣམས་ཀྱི་སྒྲ་འདོན་པར་གྱུར་ན། དེ་ལ་སྒྲུབ་པ་པོས་མཆོག་གི་དངོས་གྲུབ་མེད་དོ་ཞེས་ཤེས་པར་བྱ་ཞིང་། སྐྱེ་བ་འདི་ཉིད་ལ་ཀུན་དུ་བརྟུལ་བར་བྱའོ། །སླར་ཡང་སྔ་མ་བཞིན་དུ་བྱས་ནས་བརྩམ་པར་བྱ་སྟེ། དེ་ལྟ་བུ་ལན་བདུན་གྱིས་མཚམས་མེད་པ་ལྔ་བྱེད་པའང་བདུན་པའི་ལས་ཀྱི་སྦྱོར་བས་འགྲུབ་པར་འགྱུར་རོ། །ཞེས་སོ། །དེ་ནས་སྒྲུབ་པ་པོས་གཞོན་ནུ་མ་དེ་ལ་སྲུང་བ་བྱས་ནས་ཀུ་ཤའི་ཁྲེས་ལ་ཉེ་བར་འདུག་ཏུ་བཅུག་སྟེ་ཤར་དུ་མངོན་པར་ཕྱོགས་པའམ། བྱང་དུ་མངོན་པར་ཕྱོགས་པར་བཞག་ནས་བདག་ཉིད་ཙཱ་རུའི་སྟོན་མོ་བཟའ་ཞིང་གཞོན་ནུ་མ་དེ་ལ་ཡང་ཙཱ་རུའི་སྟོན་མོ་བཟར་གཞུག་པར་བྱའོ། །སྔ་མ་ཁོ་ནར་ཡོངས་སུ་བརྟགས་
པའི་ཀུ་ཤའི་ཁྲེས་ལ་ཆོ་ག་དེ་ཉིད་ཀྱིས་རས་བལ་འཁལ་དུ་གཞུག་པར་བྱའོ། །དོག་པ་དེ་འཇམ་པ་དང་། ལེགས་པར་བསྒྲིམས་པ་སྔར་བརླབས་པའི་བུ་མོས་ཡང་དག་པར་བླངས་ཏེ། གཅིག་དང་ལྔ་དང་བརྒྱད་ལ་སོགས་པ་ནས་ཇི་སྲིད་བཅུ་དྲུག་ཙམ་གྱི་བར་དུ་ཀཱ་ར་ཥཱའི་སྲང་གྲངས་ལེགས་པར་བགྲངས་པ་དང་ལྡན་པའི་གཞོན་ནུ་མས་བྱའོ། །དེ་ལ་རབ་ནི་བཅུ་དྲུག་བྱ། །དེ་བཞིན་འབྲིང་ནི་བརྒྱད་པ་སྟེ། །ཕྲན་ཚེགས་ལས་རྣམས་བསྒྲུབ་པ་ལ། །ལྔ་དང་གཅིག་ནི་ཐ་མའོ། །སྔགས་རྣམས་ཀུན་ལ་སྔགས་རིག་པས། །ཇི་ལྟར་ནུས་པ་བཞིན་དུ་བྱ། །དེ་ནས་བརྩམས་ཏེ་གང་ཅུང་ཟད། །སྡིག་པའི་ལས་རྣམས་སྔོན་བྱས་པ། །དོག་པ་ལ་དམིགས་སེམས་ཀྱིས་ནི། །དེ་ཡི་སྐད་ཅིག་ཉིད་ལ་འཇིག །དོག་པ་འདི་ནི་བླངས་ནས་སུ། །གཙང་མའི་སྣོད་དུ་གཞུག་པར་བྱ། །ཕྱོགས་སུ་གྱུར་པར་བཞག་བྱས་ནས། །ག་པུར་གྱི་ནི་བདུག་པས་བདུག །སྲོག་ཆགས་ཡན་ལག་མིན་འབྱུང་བའམ། །གུར་གུམ་ཙནྡན་ལ་སོགས་སམ། །ཙམ་པ་ཀ་སོགས་མཱ་ལི་ཀ། །དྲི་ཞིམ་མེ་ཏོག་རྣམས་ཀྱིས་བསྒོས། །གཙང་མའི་ཕྱོགས་སུ་བཞག་ནས་ནི། །སྲུང་བའི་ཆོ་ག་བྱས་ནས་ནི། །སྔགས་རིག་ལས་ཀུན་ཤེས་པ་ཡིས། །ཤིན་ཏུ་མཉམ་བཞག་བཟླས་པར་བྱ། །དེ་ནས་ཐ་ག་པར་སོང་ནས། །ཇི་ལྟར་འདོད་པའི་གླ་བྱིན་ཏེ། །ཡན་ལག་བྲལ་མིན་སྐེམས་མིན་ཉིད། །དཀར་པོའི་ཆོས་ལ་རྟག་ཏུ་དགའ། །ནད་ཀྱིས་གདུངས་མིན་རྒན་པོ་མིན། །ལུད་པ་དབུགས་མི་བདེ་ལས་གྲོལ། །མ་ནིང་མཚན་གཉིས་མིན་པ་དང་། །དེ་ནི་དམན་པ་མིན་ཉིད་དང་། །ངན་པར་ལྟུང་བ་སྤངས་པ་ནི། །ཀུན་ནས་མཚན་ཉིད་ཡང་དག་ལྡན། །རབ་བསྔགས་བལྟ་ན་སྡུག་པ་དང་། །བློ་ཡིས་ཀུན་དུ་སྤྱོད་པ་དགེ། །འཇིག་རྟེན་པ་ཡི་འཇུག་པར་བརྟེན། །དངོས་གྲུབ་འདོད་པ་དེ་ལ་ནི། །རས་མཆོག་འཐག་པ་བྱེད་པ་ལ། །རབ་བསྔགས་དགེ་བའི་སྟོབས་ལྡན་ནམ། །བློ་ལྡན་བཟོ་ནི་ཤིན་ཏུ་མཁས། །ཤིན་ཏུ་མཁས་པར་མཆོག་གྱུར་པའི། །རས་ནི་འཐག་བྱེད་མཆོག་གིས་ནི། །རས་ཀྱི་རབ་
ལ་བྱ་བ་ཡིན། །འབྲིང་ལ་འབྲིང་པོ་སྒྲུབ་པར་བྱེད། །ཐ་མས་ཕྲན་ཚེགས་ལས་རྣམས་ནི། །དམན་པ་ཉིད་ནི་ཀུན་ལས་སོ། །བཟོ་བོས་ཇི་ལྟར་སྨྲ་བ་བཞིན། །དེ་ལས་གྲུ་ནི་ཇི་བཞིན་སྦྱིན། །བཟོ་བོ་ཡི་ནི་དང་པོའི་ངག །སྨྲས་པ་དེ་ལས་སྔགས་རིག་པས། །མྱུར་དུ་རིན་ནི་སྦྱིན་པར་གྱིས། །དཔའ་བོའི་ཚོང་ཞེས་དེ་ལ་བརྗོད། །དོན་དུ་གཉེར་བ་ཉིད་དང་དེའི། །རིན་གྱི་དངོས་པོ་ཟློག་པར་བྱེད། །མྱུར་དུ་དངོས་གྲུབ་བྱེད་གང་འདིའི། །རས་ནི་བླ་ན་མེད་པའི་མཆོག །ལས་རྣམས་ཤིན་ཏུ་མཆོད་པར་འོས། །ལྷ་དང་མི་ཡི་བདེ་ཉིད་དང་། །འབྱུང་པོ་ཀུན་གྱི་དཔལ་ཡིན་ཞེས། །ཡང་དག་རྫོགས་སངས་རྒྱས་ཀྱིས་གསུངས། །དེ་ནས་རིག་པ་འཛིན་པས་ཐ་ག་པ་ལ་གསོ་སྦྱོང་བྱིན་ནས། ཤིན་ཏུ་དག་པའི་རྒྱུ་སྐར་ལའམ། ཆོ་འཕྲུལ་གྱི་ཟླ་ཕྱེད་ལའམ། དཀར་པོའི་ཉི་མའམ། དཀར་པོའི་གཟའ་ངེས་པར་བལྟས་ཏེ་དཀར་པོའི་ཟླ་ཕྱེད་གཞན་ལའང་རུང་སྟེ། ཤིང་ས་ཧ་ཀཱ་རིའི་སྙེ་མ་དང་མེ་ཏོག་སྐྱེས་ཤིང་ཤིང་གི་མེ་ཏོག་དང་ཡལ་ག་རྒྱས་ཤིང་དཔྱིད་ཀའི་དུས། དུས་ཀྱི་མཆོག་དེར་སྔ་དྲོ་ཉི་མ་འཆར་བའི་ཚེ་སྔར་བསྟན་པའི་རྒྱུ་མཐུན་དང་བཅས་པས་ཐ་ག་པ་ཙཱ་རུའི་བཟའ་བ་ཟོས་ཤིང་གོས་དཀར་པོ་གྱོན་པ་མགོ་ལ་གཙུག་ཏོར་བཅིངས་ནས་ལེགས་པར་བཀྲུས་པ། ཙནྡན་དཀར་པོ་དང་། གུར་གུམ་དག་གང་ཡང་རུང་བས་ལེགས་པར་བྱུགས་པ། ལུས་ལ་རྗེས་སུ་བྱུགས་པ། ག་པུར་གྱི་དྲིས་ཁ་བསྒོས་པ། ཡིད་དགའ་ཞིང་བཀྲེས་པ་དང་། སྐོམ་པ་དང་བྲལ་བར་བྱས་ནས། ཐགས་ཀྱི་སྣས་ལ་སོགས་པའི་ཡོན་ཏན་ཐམས་ཅད་ཀྱང་ས་དང་། བ་ལང་གི་ལྕི་བ་དག་གིས་བཀྲུས་ཏེ་གསར་པ་རྣམས་ཀྱང་སླར་ཡང་བའི་རྣམ་ལྔས་བཀྲུ་བར་བྱའོ། །དེ་ནས་སྲོག་ཆགས་མེད་པའི་ཆུས་བཀྲུ་བར་བྱའོ། །ཙནྡན་དཀར་པོ་དང་། གུར་གུམ་གྱིས་མངོན་པར་གཏོར་བར་བྱའོ། །སའི་ཕྱོགས་གཙང་མ་ཅ་ཅོ་དང་བྲལ་ཞིང་། ལྗོངས་ཀྱི་མི་དང་བྲལ་བ་རྣམ་པར་དབེན་པའི་གནས་བླ་གབ་དང་བཅས་ཤིང་གསང་བར་མེ་ཏོག་དང་བདུག་པ་ལ་སོགས་པས་མཆོད་དོ། །དེ་ནས་རྗེས་སུ་
སྒྲུབ་པ་པོས་ཡང་དག་པར་སྦྱོང་བར་བྱེད་པའི་སྔགས་ཉིད་ཡུངས་ཀར་དཀར་པོ་ལ་བརྒྱ་རྩ་བརྒྱད་མངོན་པར་བསྔགས་པར་བྱས་ནས་ཕྱོགས་བཞི་རྣམས་དང་། སྟེང་དང་འོག་དང་ཕྱོགས་བྲལ་རྣམས་སུ་གཏོར་བར་བྱའོ། །དེ་ནས་ཐ་ག་པ་ལ་ཡུངས་ཀར་གྱིས་ཡང་དག་པར་བསྣུན་ནས་ཕྱག་རྒྱ་ཆེན་པོས་གཙུག་ཕུད་ལྔ་པ་བཅིངས་ཏེ། གཙུག་ཏོར་བཅིང་བ་བྱས་ན་སྲུང་བ་ཆེན་པོ་བྱས་པར་འགྱུར་རོ། །གལ་ཏེ་རས་རབ་ཡིན་ན་ཞེང་དུ་ཁྲུ་བཞི། ཆུར་ཁྲུ་བརྒྱད་ཀྱི་ཚད་འདི་ཙམ་དུ་ཐ་ག་པས་བྲན་པར་བྱའོ། །འབྲིང་པོར་གྱུར་ན་ཞེང་དུ་ཁྲུ་དོ་ཆུར་ཁྲུ་ལྔ་ཉིད་དོ། །ཐ་མ་ནི་བདེ་བར་གཤེགས་པའི་མཐོ་གང་གི་ཚད་ལ་ཆུར་ནི་སངས་རྒྱས་ཀྱི་ཁྲུ་གང་ཉིད་དོ། །དེ་ལས་སངས་རྒྱས་བཅོམ་ལྡན་འདས་ཀྱི་མཐོ་གང་ནི་ཡུལ་དབུས་ཀྱི་སྐྱེས་བུ་ཚད་དང་ལྡན་པའི་ཁྲུ་གཅིག་སྟེ། འདི་ནི་བདེ་བར་གཤེགས་པའི་མཐོའོ་ཞེས་བསྒྲགས་ཏེ་ཚད་འདིས་ཚད་ཀུན་དུ་བཤད་དོ། །འདི་ནི་ཕུར་པའི་དངོས་གྲུབ་ཏུ། །སྐྱེས་བུ་མཆོག་གིས་གསུངས་པ་ཡིན། །ཐུབ་པ་མི་སྣང་གྱུར་འོག་ཏུ། །རྒྱལ་སྲིད་འདོད་ལ་འབྲིང་པོ་སྟེ། །ལོངས་སྤྱོད་ཆེན་པོ་དོན་གཉེར་བའི། །སྐྱེས་བུ་ལྷ་དང་ལྷ་མིན་དང་། །གདེངས་ཅན་ཐ་མ་གྲུབ་པར་བཤད། །འབྲིང་ལ་དངོས་གྲུབ་འབྲིང་པོའོ། །རས་འབྲིང་པོ་ནི་རྟག་པ་རུ། །སེམས་ཅན་ཀུན་གྱི་ལས་རྣམས་སྒྲུབ། །ཕྲན་ཚེགས་ལས་རྣམས་བསྒྲུབ་བྱ་ལ། །རས་ཐ་མ་ནི་རྟག་པ་རུ། །ལས་རྣམས་ཐམས་ཅད་སྒྲུབ་པར་བྱེད། །རྫས་རྣམས་ཀུན་ལ་རྟག་ཏུ་ནི། །ལས་རྣམས་ཐམས་ཅད་སྒྲུབ་པར་བྱེད། །རས་རིས་གསུམ་གྱིས་ངེས་བསྟན་པའི། །དངོས་གྲུབ་དཔལ་དོན་གཉེར་བའི་མི། །བརྒྱ་བྱིན་བདེ་སོགས་བདག་པོ་ཡང་། །ཆོ་ག་ཉམས་ན་མི་འགྲུབ་སྟེ། །ཆོ་ག་ཡང་དག་ལྡན་གྱུར་ན། །མི་ཡི་སྐྱེ་བོ་ཕལ་པ་ལའང་། །འབད་པ་ཡིས་ནི་ལས་རྣམས་ཀུན། །མྱུར་བ་ཉིད་དུ་འགྲུབ་པར་འགྱུར། །རྒྱལ་དང་རྒྱལ་མཆོག་སྲས་རྣམས་ཀྱིས། །སྦྱོར་བ་འདི་ནི་ཡང་དག་བཤད། །སེམས་ཅན་བཀྲེན་པ་མགོན་མེད་པ། །སྡུག་བསྔལ་
གྱིས་གདུངས་ཀུན་གྱི་དཔལ། །བྱང་ཆུབ་ལམ་དུ་གང་འདི་ནི། །དེ་ཉིད་གཟིགས་པ་རྣམས་ཀྱིས་བསྟན། །ཆོས་འདི་བྱང་ཆུབ་རྒྱུ་ཡིན་པར། །སྔགས་ཀྱི་ལམ་གྱིས་བསྟན་པ་ཡིན། །དཀྱིལ་འཁོར་ཡང་དག་བསྟན་པ་གང་། །འཇིག་རྟེན་དཀྱིལ་འཁོར་ཐམས་ཅད་དང་། །འཇིག་རྟེན་འདས་པའང་འགྲུབ་འགྱུར་ཏེ། །འབད་པ་མེད་པར་སྔགས་རྣམས་འགྲུབ། །གང་ཞིག་བྱང་ཆུབ་རྒྱུར་འདོད་པ། །དེ་ལ་རྟག་ཏུ་དངོས་གྲུབ་འགྱུར། །རྟག་ཏུ་འགྲོ་ལ་མི་ཕན་པ། །གཞན་ལ་དངོས་གྲུབ་མེད་པར་གསུངས། །བྱང་ཆུབ་ཆེད་དུ་འཇུག་ཀུན་ལ། །རས་རིས་ཐམས་ཅད་འགྲུབ་པར་གསུངས། །སྤྱན་རས་གཟིགས་ཀྱི་དབང་ཕྱུག་གི། །དམ་ཚིག་འདི་ནི་ཁྱད་པར་དུ། །མྱུར་དུ་བྱ་བའི་དོན་བསྒྲུབ་ཕྱིར། །འདིར་ནི་མཐའ་དག་ཐོབ་པ་རུ། །བཅོམ་ལྡན་འདས་ཀྱིས་གསུངས་པ་ཡིན། །དེ་ནས་རིམ་གྱིས་བཟོ་བོ་ཡིས། །འབད་པས་རས་ནི་བཏག་པར་བྱ། །ཉིན་ཞག་ལྔ་དང་བརྒྱད་རྣམས་དང་། །བཅུ་དྲུག་གཉིས་ཀ་བཞི་དག་དང་། །ཉིན་མཚན་ཉིད་ཀྱིས་མྱུར་བ་རུ། །རས་ནི་འཐག་པ་རྫོགས་པ་དང་། །བཟོ་བོ་མཆོག་ཏུ་གྲུབ་པ་ནི། །ཉིན་མཚན་གྱིས་ནི་དགེ་བ་ཡིན། །གཙང་སྦྲའི་སྤྱོད་པ་ཕུན་སུམ་ཚོགས། །བཟོ་བོ་རྟག་ཏུ་བྱིན་བརླབས་པ། །ཐག་རིང་གནས་སུ་སོང་ནས་ནི། །བཤང་དང་གཅི་བ་ཡོངས་སུ་དོར། །འོངས་པའི་གོས་དང་བཅས་བཀྲལ་ནས། །གཞན་པའི་གོས་གཞན་བགོ་བྱ་ཞིང་། །གོས་དཀར་འཆང་ཞིང་ཕྲེང་བར་ལྡན། །ཡང་དང་ཡང་དུ་ཉེ་རེག་བྱ། །ལུས་ལ་ཙནྡན་དཀར་པོས་བྱུག །བཟོ་ལ་སོགས་པ་གཙང་བར་བྱ། །རྟག་ཏུ་འཇམ་ཞིང་ལེགས་སྦྱངས་པས། །སླར་ཡང་འབད་པས་བཏག་པར་བྱ། །དེ་ལ་སོགས་པའི་རབ་སྦྱོར་ནི། །རྒྱལ་བ་གཞན་གྱིས་གསུངས་པའམ། །འབད་པས་རྣམ་དཔྱད་དང་ཚུལ་གྱིས། །རས་ནི་མ་ལུས་བཏག་པར་བྱ། །རས་ཀྱི་ཐགས་ནི་རྫོགས་པ་དང་། །སྔར་གྱི་ལས་ཀྱིས་ལེགས་སྤྲུལ་པ། །དེ་རྣམས་ཚད་ལྡན་མཉམས་པ། །བྱའོ་བཟང་པོའི་ཉིན་ཞག་ལ། །རྒྱུད་དང་རྒྱུད་དུ་མཉམ་པར་འཇུག །དཀར་པོའི་ཕྱོགས་
ཀྱི་མཛེས་པ་ལ། །འོད་མའི་ཤིང་ནི་ཁྲུ་བཞི་ལ། །རས་ནི་བླངས་ནས་དེ་ནས་འགྲོ། །ནོར་ནི་རྒྱ་ཆེར་འགོད་པ་ཡིས། །བཟོ་བོ་བདེ་ལེགས་བྱས་ནས་ནི། །བརྟུལ་ཞུགས་བཟང་པོ་ལེགས་སྤྱོད་པའི། །སྔགས་པ་ཇི་ལྟར་འདོད་སོང་ནས། །དྲི་ཞིམ་མེ་ཏོག་གིས་མཆོད་དེ། །གཙང་བའི་ཕྱོགས་སུ་རྣམ་པར་དགོད། །འདི་ཉིད་ཀྱིས་ནི་སྔགས་ཀྱིས་ནི། །སྲུང་བའི་ཆོ་ག་རབ་ཏུ་བྱེད། །གང་ཞིག་རས་བལ་སྔོན་དུ་ནི། །སླར་ཡང་རྣམ་མང་ཡོངས་སྦྱངས་པ། །དེ་ཉིད་ཀྱིས་ནི་བདག་ཉིད་དང་། །རས་ཉིད་བསྲུང་བར་བྱ་བའོ། །བྱང་ཆུབ་སེམས་དཔའ་དཔའ་བོ་ཆེ། །སྔགས་བཟླས་པ་ཡིས་གསུངས་པ་ཡིན། །སངས་རྒྱས་རྣམས་ནི་མང་པོས་དང་། །ངས་ཀྱང་དེ་ནི་སླར་ཡང་སྟེ། །དེ་ཉིད་གསང་སྔགས་ཐམས་ཅད་ཀྱིས། །རྣམ་པར་སྤྱོད་པའི་སྔགས་ཀྱི་གཟུགས། །བརྩོན་འགྲུས་ཆེན་པོ་གཟི་བརྗིད་ཆེ། །སྔགས་ཀྱི་དོན་ཀུན་སྒྲུབ་པ་པོ། །སྣ་ཚོགས་སྐྱོབ་པའི་རྒྱུ་རྣམས་ནི། །རྣམ་པ་སྣ་ཚོགས་བྱེད་པར་འགྱུར། །འཛམ་གླིང་གནས་པའི་སེམས་ཅན་རྣམས། །སེམས་ཀྱི་སྤྱོད་པ་ཀུན་དུ་རྨོངས། །དད་པ་མེད་ཅིང་ཕྱིན་ཅི་ལོག །ལོག་པའི་ཀུན་སྤྱོད་ལ་རབ་བརྐམ། །སྔགས་རྣམས་སྒྲུབ་པར་མི་བྱེད་པའི། །དེ་ཉིད་ཕྱིར་ན་སླར་གསུངས་པ། །འཁོར་བ་མུན་པའི་བཙོན་རར་འཁྱམས། །གང་ཡང་རྟག་ཏུ་ཡིད་དག་ཅིང་། །དད་ལྡན་ལྟད་མོ་བཀྲ་ཤིས་དང་། །སྔགས་རྣམས་ཀུན་ལ་རྟག་ཏུ་སྤྱོད། །བདག་ཉིད་ཆེན་པོ་དངོས་གྲུབ་འདོད། །རྟག་ཏུ་འཛིན་ཅིང་འཆང་བ་དང་། །སྤྲོ་བ་ཆེ་ཞིང་གཟི་བརྗིད་ཆེ། །རྒྱལ་བས་གསུངས་པའི་སྔགས་རྣམས་གང་། །འབད་པ་མེད་པར་ཡང་དག་འགྲུབ། །དད་པ་མེད་པའི་སྐྱེ་བོ་ལ། །དཀར་པོའི་ཆོས་རྣམས་མི་སྐྱེ་སྟེ། །ས་བོན་ཚྭ་སྒོར་བཏབ་པ་ལ། །མྱུ་གུ་མེད་ཅིང་འབྲས་མེད་བཞིན། །དད་པ་རྟག་ཏུ་ཆོས་ཀྱི་རྩར། །དོན་ཀུན་གཟིགས་པས་གསུངས་པ་ཡིན། །ཆོས་དོན་ངང་ཚུལ་ཅན་དེ་རྣམས། །སྔགས་ཀྱིས་དངོས་གྲུབ་རྟག་ཏུ་བརྗོད། །དེ་ནས་སྒྲུབ་པོས་བཟོ་བོ་ནི། །རི་མོ་མཁན་ནམ་བདག་ཀྱང་རུང་། །རི་མོ་མཁས་པས་
མ་འདྲེས་པའི། །ཚོན་རྩི་ཁ་དོག་གསལ་བ་དང་། །ཁ་དོག་ཅན་གྱི་ཚོན་བླངས་ནས། །ཇི་ལྟར་ཐ་ག་པ་ལ་ནི། །སྔར་གྱི་ཆོ་ག་དེ་ཉིད་ཀྱིས། །མཚན་ཉིད་ཡང་དག་ལྡན་པ་ཡིས། །རི་མོ་མཁན་ལ་གོང་བཞིན་དུ། །རྒྱས་པ་རུ་ནི་བྱ་བའོ། །ཇི་ལྟར་སྔར་བཞིན་ཐ་ག་པའི། །ཆོ་ག་དེ་ཉིད་ཀྱིས་ནི་དེ། །རས་ལ་རི་མོ་བྲི་བར་བྱ། །ཡང་ན་རང་གིས་རི་མོ་བྲི། །ག་པུར་གུར་གུམ་ཙནྡན་ལས། །སོ་ཕག་ཚོན་ལ་བསྒོ་བར་བྱ། །བདུག་པ་བསྲེགས་ཤིང་སྔགས་ཉིད་ཀྱིས། །ལན་གྲངས་བརྒྱ་རྩ་བརྒྱད་བཟླས་ནས། །ནཱ་ག་གེ་སར་པུནྣཱ་ག། །བ་ཀུ་ལཱ་དང་ཙམ་པ་ཀཱ། །བཱ་རི་ཥི་ཀ་དྷཱ་ན་སྐུ། །མཱ་ལི་ཏ་ཡི་མེ་ཏོག་སོགས། །རས་དེ་ལ་ནི་མངོན་པར་གཏོར། །ཤར་དུ་མངོན་ཕྱོགས་ཀུ་ཤ་ཡི། །ཁྲེས་ལ་ཉེར་འདུག་དད་པའི་བློས། །སངས་རྒྱས་བྱང་ཆུབ་སེམས་དཔའ་ཀུན། །སེམས་དཔར་གྱུར་པས་འདི་ཕྲ་མོ། །ལག་པས་བླངས་ནས་མ་འཁྲུགས་པའི། །སེམས་ཀྱིས་རས་ལ་རི་མོ་བྲི། །དང་པོ་རེ་ཞིག །དེ་བཞིན་གཤེགས་པ་ཤཱཀྱ་ཐུབ་པ་བྲི་བར་བྱ་སྟེ་རྣམ་པ་ཐམས་ཅད་ཀྱི་མཆོག་དང་ལྡན་པ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་མཚན་པ། དཔེ་བྱད་བཟང་པོ་བརྒྱད་ཅུས་ཉེ་བར་མཛེས་པའི་སྐུ་རིན་པོ་ཆེའི་པདྨ་ལ་བཞུགས་པ་ཀུན་ནས་འོད་འབར་བ། ཀུན་ནས་འོད་འདོམ་གང་གིས་ཉེ་བར་མཛེས་པའི་སྐུ། ཆོས་སྟོན་པར་མཛད་བཞིན་པ། རབ་ཏུ་དང་བའི་སྐུ། རྣམ་པ་ཐམས་ཅད་ཀྱི་མཆོག་དང་ལྡན་པ། དབུས་ན་གནས་པའི་པདྨ་བཻཌཱུཪྱའི་སྡོང་པོ་ཅན། འོག་ན་ཀླུའི་རྒྱལ་པོ་སྲ་བ་གདན་ཆེན་པོ་པདྨའི་སྡོང་བུ་དེ་ལ་འཛིན་བཞིན་པས་དེ་བཞིན་གཤེགས་པ་ལ་ལྟ་ཞིང་ལག་པ་གཡས་པས་ཕྱག་འཚལ་བ། དཀར་པོ་རྒྱན་ཐམས་ཅད་ཀྱིས་རྣམ་པར་བརྒྱན་པ། ལུས་ཕྱེད་མིའི་རྣམ་པ་ཅན་གྱི་དགའ་བོ་དང་། ཉེ་དགའ་བོ་བྲི་བར་བྱའོ། །པདྨའི་མཚོ་དེའི་ཁོར་ཡུག་ཏུ་པདྨའི་འདབ་མ་དང་། མེ་ཏོག་དང་། ཅུང་ཟད་ཁ་བྱེ་བ་དང་རྣམ་པར་ཁ་བྱེ་བ་དང་། ཆུ་ལས་སྐྱེས་པའི་བྱ་དང་། ཉ་ལ་སོགས་པས་མངོན་པར་ཁྱབ་པ། མ་ལུས་པར་བཀོད་པ། མཛེས་པའི་རྣམ་པར་མངོན་པར་བྲི་བར་བྱའོ། །
གང་བཅོམ་ལྡན་འདས་ཀྱི་རྩ་བའི་པདྨའི་སྡོང་བུ་དང་། འདབ་མ་དེ་ཉིད་ལ་རྣམ་པར་འཕྲོས་པའི་པདྨའི་མེ་ཏོག་དུ་མ་རྣམས་རིམ་གྱིས་མཐོ་བའོ། །གཡོན་གྱི་གཞོགས་སུ་པདྨའི་མེ་ཏོག་བརྒྱད་དེ། དེ་རྣམས་ལ་ཡང་པདྨ་རྣམས་ལ་བཞུགས་པའི་བྱང་ཆུབ་སེམས་དཔའ་ཆེན་པོ་བརྒྱད་ཀྱི་སྐུ་མངོན་པར་བྲི་བར་བྱའོ། །དང་པོ་རེ་ཞིག་འཕགས་པ་སྤྱན་རས་གཟིགས་དབང་ཕྱུག་པདྨའི་ཟེ་བ་ལྟར་ཅུང་ཟད་དཀར་བའི་གུར་གུམ་དང་། གསེར་གྱི་མདོག་ཅན་འོད་དཔག་ཏུ་མེད་པའི་ཅོད་པན་གྱིས་དབུ་ལ་རྣམ་པར་བརྒྱན་པ། ཕྱག་ན་ཨུཏྤ་ལ་སྔོན་པོ་འཛིན་པ་གཡས་ཀྱི་ཕྱག་གིས་དེ་བཞིན་གཤེགས་པ་ལ་ཕྱག་འཚལ་བར་བྱེད་བཞིན་པ། སྐུ་མཛེས་པ་དེ་བཞིན་གཤེགས་པ་ལྟ་བ་ཞི་བའི་རྣམ་པ། བཞིན་ཅུང་ཟད་འཛུམ་པ། ཀུན་ནས་འབར་བས་འཁྲིགས་པས་དཀྱིལ་འཁོར་གྱི་དབུས་སུ་གནས་པའོ། །པདྨ་གཞན་ལ་ནི་འཕགས་པ་ཟླ་འོད་གཞོན་ནུ་དེ་བཞིན་དུ་མངོན་པར་བྲི་བར་བྱའོ། །གསུམ་པ་ལ་ནོར་བཟངས་སོ། །བཞི་པ་ལ་སྒྲིབ་པ་ཐམས་ཅད་རྣམ་པར་སེལ་བའོ། །ལྔ་པ་ལ་ནམ་མཁའ་མཛོད་དོ། །དྲུག་པ་ལ་སའི་སྙིང་པོའོ། །བདུན་པ་ལ་འཇམ་དཔལ་ལོ། །བརྒྱད་པ་ལ་སྤྱན་བཟང་སྟེ། འདི་དག་ཐམས་ཅད་གཞོན་ནུའི་ཆ་བྱད་ཅན། །གཞོན་ནུ་རྒྱན་གྱིས་མངོན་པར་བརྒྱན་པ་མངོན་པར་བྲི་བར་བྱའོ། །བཅོམ་ལྡན་འདས་ཀྱི་གཡས་ཀྱི་གཞོགས་སུ་བྱང་ཆུབ་སེམས་དཔའ་ཆེན་པོ་བརྒྱད་ལ། བྱམས་པ་མ་གཏོགས་པ་རྒྱན་ཐམས་ཅད་ཀྱིས་རྣམ་པར་བརྒྱན་པ་སྟེ། བཅོམ་ལྡན་འདས་ཀྱི་ཉེ་ལོགས་སུ་འཕགས་པ་བྱམས་པ་ཚངས་པར་སྤྱོད་པའི་ཆ་བྱད་འཛིན་པ། དབུ་ལ་རལ་པའི་ཅོད་པན་བཅིངས་པ། གསེར་མདོག་ངུར་སྨྲིག་དམར་པོ་གསོལ་བ། དར་ལ་དམར་པོའི་སྟོད་གཡོགས་བྱས་པ། ཚོམ་བུ་གསུམ་གྱི་མཚན་མ་བྱས་པ། གཟུགས་མཛེས་པ་དབྱིག་པ་དང་། རིལ་བ་སྤྱི་བླུགས་གཡོན་གྱི་ཕྱག་ཏུ་བཀོད་པ། ཀྲྀཥྞ་སཱ་རའི་པགས་པ་ཕྲག་པ་གཡོན་དུ་བགོས་པ། ཕྱག་གཡས་པ་བགྲང་ཕྲེང་བཟུང་ནས་དེ་བཞིན་གཤེགས་པ་ལ་
ཕྱག་འཚལ་བར་བྱེད་བཞིན་པ། དེར་གཏོད་པའི་ལྟ་བ། བསམ་གཏན་ལ་དམིགས་པའི་སེམས་ཀྱི་སྤྱོད་པ་ཅན་ནོ། །པདྨ་གཉིས་པ་ལ་འཕགས་པ་ཀུན་དུ་བཟང་པོ་པྲི་ཡང་ཀུ་ལྟར་སྔོ་བསངས་ཀྱི་མདོག་སྐུ་རྒྱན་ཐམས་ཅད་ཀྱིས་བརྒྱན་པ། ཕྱག་གཡོན་པས་ཡིད་བཞིན་གྱི་ནོར་བུ་རིན་པོ་ཆེ་བསྣམས་པ། ཕྱག་གཡས་པས་དཔལ་འབྲས་བསྣམས་ནས་མཆོག་སྦྱིན་པ། མཛེས་པའི་གཟུགས་ཅན་དེ་བཞིན་དུ་མངོན་པར་བྲི་བར་བྱའོ། །གསུམ་པ་ལ་འཕགས་པ་སྤྱན་རས་གཟིགས་དབང་ཕྱུག་སྟོན་ཀའི་སྤྲིན་ལྟར་དཀར་བ། གསེར་གྱི་རྒྱན་གྱིས་རྣམ་པར་བརྒྱན་པ། རལ་པའི་ཅོད་པན་འཆང་བ། མཆོད་ཕྱིར་ཐོགས་དཀར་པོ་ཅན། ཐམས་ཅད་མཁྱེན་པ་དབུ་ལ་བྱས་པ། འཕགས་པ་འོད་དཔག་མེད་སྟོབས་བཅུ་པ། རལ་པའི་ནང་དུ་ཉེ་བར་བཞུགས་པ། གཟུགས་མཛེས་པ། ཕྱག་གཡོན་ན་པདྨ་བསྣམས་པ། ཕྱག་གཡས་མཆོག་སྦྱིན་པ། བསམ་གཏན་ལ་དམིགས་པར་གྱུར་པའི་སེམས་ཀྱི་སྤྱོད་པ་ཅན་སྐུ་ཀུན་ནས་གསལ་བར་གྱུར་པའོ། །བཞི་པ་ལ་འཕགས་པ་ཕྱག་ན་རྡོ་རྗེ་ཕྱག་གཡོན་པས་རྡོ་རྗེ་བསྣམས་པ། ཕྱག་གཡས་པས་ཉེ་བར་འགོག་པ་འབྲས་བུ་དང་བཅས་པ་བསྣམས་ནས་མཆོག་སྦྱིན་པ། གསེར་མདོག་རྒྱན་ཐམས་ཅད་ཀྱིས་རྣམ་པར་བརྒྱན་པ། མཛེས་པའི་གཟུགས་ཅན་ཞི་བའི་ལྟ་བ་དང་ལྡན་པ། དོ་ཤལ་ཕྱེད་པས་ལུས་ཉེ་བར་དཀྲིས་པ། མུ་ཏིག་གི་དོ་ཤལ་གྱི་མཆོད་ཕྱིར་ཐོགས་བྱས་པ། ཅོད་པན་རིན་པོ་ཆེ་འབར་བས་རྣམ་པར་འཕྲོ་བ། དར་སྲབ་མོའི་ཤམ་ཐབས་དང་། དར་ལ་དཀར་པོའི་བླ་གོས་བྱས་པའོ། །འཕགས་པ་སྤྱན་རས་གཟིགས་དབང་ཕྱུག་དང་ཀུན་དུ་བཟང་པོའི་ཤམ་ཐབས་དང་། བླ་གོས་ཀྱང་དེ་བཞིན་ནོ། །ལུས་ཀྱི་རྣམ་པ་ནི་སྔར་བསྟན་པ་ཇི་བཞིན་ནོ། །དེ་བཞིན་གཤེགས་པའི་པདྨ་ལྔ་པ་ལ་འཕགས་པ་བློ་གྲོས་ཆེན་པོ། དྲུག་པ་ལ་ཞི་བའི་བློ་གྲོས། བདུན་པ་ལ་རྣམ་པར་སྣང་མཛད་ཀྱི་སྙིང་པོའོ། །བརྒྱད་པ་ལ་ངན་སོང་སྤོང་བ་ཞེས་པའི་བྱང་ཆུབ་སེམས་དཔའ་འདི་རྣམས་ཕྱག་ན་འབྲས་བུ་དང་གླེགས་བམ་བསྣམས་པ། རྣམ་པ་ཀུན་དུ་མཛེས་པ། དར་ལའི་སྟོད་
གཡོགས་ཅན། རྒྱན་ཐམས་ཅད་ཀྱིས་རྣམ་པར་བརྒྱན་པ། གཡོ་བ་དང་ལྡན་པའི་སྐུ་ངུར་སྨྲིག་དམར་པོ་གསོལ་བ། སྐྱིལ་མོ་ཀྲུང་གིས་ཉེ་བར་འདུག་པ་རིན་པོ་ཆེའི་རྡོ་ལེབ་ལ་བཞུགས་པ་ཞི་བའི་ཆ་བྱད་ཅན། ཀུན་ནས་འབར་བའི་ཕྲེང་བས་འཁྲུགས་པ། དྲི་ཞིམ་པོའི་མེ་ཏོག་གིས་གཅལ་དུ་བཀྲམ་པ་ལ་འདི་ལྟ་སྟེ། མཱ་ལ་ཏཱི་དང་། བཱརྵི་ཀཱ་དང་། དྷ་ནུ་སྐ་རི་ཀཱ་དང་། པུནྣཱག་དང་། ནཱ་ག་གེ་སར་ལ་སོགས་པའི་མེ་ཏོག་རྣམས་ཀྱིས་རས་ལ་ཀུན་ནས་གཅལ་དུ་བཀྲམ་བཞིན་པས་མངོན་པར་བྲིའོ། །བཅོམ་ལྡན་འདས་ཤཱཀྱ་ཐུབ་པའི་གཡོན་གྱི་གཞོགས་སུ་འཕགས་པ་འཇམ་དཔལ་གང་ཡིན་པའི་སྟེང་དུ་རིན་པོ་ཆེ་དུ་མས་སྤྲས་པའི་ཤིན་ཏུ་རིང་པོའི་རྣམ་པའི་གཞལ་མེད་ཀྱི་དཀྱིལ་འཁོར་རོ། །བྲག་རིའི་རྒྱལ་པོ་ཉེ་བར་མཛེས་པ་རིན་པོ་ཆེའི་རྡོ་ལེབ་ཀྱིས་བཀབ་པ་རི་བོའི་རྣམ་པ་ལྟ་བུར་མངོན་པར་བྲི་བར་བྱའོ། །དེར་གནས་པའི་སངས་རྒྱས་བཅོམ་ལྡན་འདས་བརྒྱད་མངོན་པར་བྲི་བར་བྱ་བ་ལ་འདི་ལྟ་སྟེ། རིན་ཆེན་གཙུག་ཏོར་ཅན་རིན་པོ་ཆེ་བེེཌཱུཪྱའི་འོད་རྣམ་པར་འཕྲོ་བ། ཀུན་ནས་འོད་འདོམ་གང་བ། པདྨ་རཱ་ག་དང་། ཨིནྡྲ་ནཱི་ལ་དང་། མ་ར་ཀ་ཏ་ལ་སོགས་པ་དང་། བེེ་ཌཱུཪྱ་དང་། རྡོའི་སྙིང་པོ་ལ་སོགས་པ་ནོར་བུ་རིན་པོ་ཆེ་ཆེན་པོའི་ཁྱད་པར་རྣམས་ཀྱིས་ཀུན་ནས་རབ་ཏུ་འབར་བཞིན་པ། ཅུང་ཟད་ཉི་མ་འཆར་ཀའི་མདོག་འདྲ་བ། དེ་བཞིན་གཤེགས་པའི་སྐུ་ཆོས་གོས་སེར་པོའི་སྟོད་གཡོགས་མནབས་པ། སྐྱིལ་ཀྲུང་གིས་བཞུགས་པ། ཆོས་སྟོན་པར་མཛད་བཞིན་པ། ཤམ་ཐབས་སེར་པོ་མནབས་པ་སྐུ་ལ་སྐྱེས་བུ་ཆེན་པོའི་མཚན་གྱིས་གོ་ཆ་བགོས་པ། དཔེ་བྱད་བཟང་པོ་བརྒྱད་ཅུས་ཉེ་བར་མཛེས་པའི་སྐུ་རབ་ཏུ་ཞི་བའི་གཟིགས་སྟངས་ཅན། རྣམ་པ་ཐམས་ཅད་ཀྱི་མཆོག་དང་ལྡན་པའི་དེ་བཞིན་གཤེགས་པ་རིན་ཆེན་གཙུག་ཏོར་ཅན་མངོན་པར་བྲིའོ། །གཉིས་པ་ལ་དེ་བཞིན་གཤེགས་པ་མེ་ཏོག་ཡང་དག་པར་སྐྱེས་པའི་རྒྱལ་པོའི་དབང་པོ་གསེར་གྱི་མདོག་ཏུ་མངོན་པར་བྲི་བར་བྱའོ། །ནཱ་ག་གེ་སར་ཆེས་བཟང་བ་དང་། བ་ཀུ་ལ་ལ་སོགས་པའི་མེ་ཏོག་རྣམས་ཀྱིས་མངོན་པར་གཏོར་བ་མངོན་པར་
བྲི་བར་བྱའོ། །འཕགས་པ་འཇམ་དཔལ་ལ་མངོན་པར་གཟིགས་བཞིན་པ་ཀུན་ནས་འོད་ཅན་རིན་པོ་ཆེའི་འོད་རྣམ་པར་འཕྲོ་བའི་མཐར་ཐུག་པའོ། །གསུམ་པ་ལ་དེ་བཞིན་གཤེགས་པ་སཱ་ལའི་དབང་པོའི་རྒྱལ་པོ་མངོན་པར་བྲི་བར་བྱ་སྟེ་པདྨའི་གེ་སར་གྱི་མདོག་ཏུ་སྣང་བ། ཆོས་སྟོན་པར་མཛད་བཞིན་པའོ། །བཞི་པ་ལ་དེ་བཞིན་གཤེགས་པ་སྤྱན་བཟང་མངོན་པར་བྲི་བར་བྱའོ། །ལྔ་པ་ལ་བཟོད་པར་དཀའ་བའོ། །དྲུག་པ་ལ་རྣམ་པར་སྣང་མཛད་རྒྱལ་བའོ། །བདུན་པ་ལ་སྨན་གྱི་བླ་བེེ་ཌཱུཪྱའི་འོད་ཀྱི་རྒྱལ་པོའོ། །བརྒྱད་པ་ལ་དེ་བཞིན་གཤེགས་པ་སྡུག་བསྔལ་ཐམས་ཅད་རབ་ཏུ་ཞི་བར་བྱེད་པའི་དབང་པོའི་རྒྱལ་བ་མངོན་པར་བྲི་བར་བྱ་སྟེ། ཐམས་ཅད་གསེར་གྱི་ཁ་དོག་ཅན་དེ་བཞིན་གཤེགས་པའི་སྐུའི་རྣམ་པ་མི་འཇིགས་པ་སྦྱིན་པར་མཛད་པའོ། །དེ་བཞིན་གཤེགས་པ་རྣམས་ཀྱི་སྟེང་དུ་ཡང་བྲིས་སྐུའི་ཟུར་གཉིས་ཀ་ནས་སྤྲིན་གྱི་གོ་བར་ན་གནས་པའི་གནས་གཙང་མའི་རིས་ཀྱི་ལྷའི་བུ་གཉིས་མེ་ཏོག་གི་ཆར་འབེབས་པར་བྱེད་བཞིན་པ་བྲིའོ། །བར་སྣང་ལ་གནས་ནས་སངས་རྒྱས་དང་བྱང་ཆུབ་སེམས་དཔའ་དང་རང་སངས་རྒྱས་དང་འཕགས་པ་ཉན་ཐོས་ཐམས་ཅད་ལ་ཕྱག་འཚལ་བར་བྱེད་བཞིན་པ། མངོན་པར་བྲི་བར་བྱའོ། །རང་སངས་རྒྱས་རྣམས་ཀྱི་བྱང་དུ་འཕགས་པ་ཉན་ཐོས་ཆེན་པོ་བརྒྱད་བྱང་ཆུབ་སེམས་དཔའ་རྣམས་དབུའི་གནས་སྤངས་པའི་སྟེང་དུ་མངོན་པར་བྲི་བར་བྱའོ། །འདི་ལྟ་སྟེ། གནས་བརྟན་ཤཱ་རིའི་བུ་དང་། མོོད་གལ་གྱི་བུ་ཆེན་པོ་དང་། འོད་སྲུང་ཆེན་པོ་དང་། རབ་འབྱོར་དང་། སྒྲ་གཅན་འཛིན་དང་། དགའ་བོ་དང་། བཟང་ལྡན་དང་། ཀ་པི་ན་ཞེས་པའོ། །རང་སངས་རྒྱས་ཀྱིས་རྣམས་འདི་ལྟ་སྟེ། དྲི་ངད་ཅན་དང་། ཙནྡན་དང་། ཉེ་བའི་འཆི་ལྟས་དང་། དཀར་པོ་དང་། སི་ཀ་དང་། དབང་པོ་དང་། མུ་ཁྱུད་དང་། མུ་ཁྱུད་བཟང་པོ་ཞེས་པའོ། །ཐམས་ཅད་མཆོག་ཏུ་ཤིན་ཏུ་མཛེས་པ་ཞི་བའི་ཆ་ལུགས། ཞི་བའི་བདག་ཉིད། རབ་ཏུ་དུལ་བའི་རྣམ་པའོ། །ཉན་ཐོས་ཆེན་པོ་རྣམས་ཐལ་མོ་སྦྱར་བར་བྱས་
ནས་སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ལ་ངེས་པར་རྟོག་པར་བྱེད་པའོ། །སྟེང་ངོས་སུའང་གནས་གཙང་མའི་ལྷ་དང་། ཉེ་བར་གནས་པའི་ལྷའི་བུ་གཞན་གཉིས་དར་གྱི་བླ་རེ་ཀུན་ནས་ཆུར་རིང་ཞིང་ཤིན་ཏུ་མཛེས་པ་བཟུང་ནས་སངས་རྒྱས་དང་བྱང་ཆུབ་སེམས་དཔའ་དང་རང་སངས་རྒྱས་དང་། འཕགས་པ་ཉན་ཐོས་ཐམས་ཅད་ཀྱི་སྟེང་དུ་འཛིན་པར་བྱེད་བཞིན་པ་ལྷའི་ཕྲེང་བ་དང་གོས་འཆང་བའི་ལྷའི་བུ་མངོན་པར་བྲིའོ། །བཅོམ་ལྡན་འདས་ཤཱཀྱ་ཐུབ་པའི་སྟེང་ངོས་སུ་དབུ་ལ་མུ་ཏིག་གི་དོ་ཤལ་དང་། རིན་པོ་ཆེའི་སྐུད་པ་ལ་པདྨ་རཱ་ག་དང་། ཨིནྡྲ་ནཱི་ལ་ལ་སོགས་པ་རྣམས་ཀྱིས་བརྒྱུས་པའི་རིན་པོ་ཆེའི་སྐུད་པའི་ཚོགས་དེ་ལ་དར་གྱི་བླ་རེ་ལེགས་པར་བཀོད་ཅིང་ཁོར་ཡུག་ཏུའང་མུ་ཏིག་གི་དོ་ཤལ་རབ་ཏུ་འཕྱང་བ་མཛེས་པར་གྱུར་པ་མངོན་པར་བྲི་བར་བྱའོ། །སངས་རྒྱས་བཅོམ་ལྡན་འདས་ཀྱི་པདྨའི་གདན་གྱི་འོག་ཏུ་བྱང་ཆུབ་སེམས་དཔའ་ཆེན་པོ་དང་ཉེ་བར་ཀླུའི་རྒྱལ་པོ་ཉེ་དགའ་བོའི་གཞོགས་སུ་རིན་པོ་ཆེའི་རི་བོ། པདྨའི་མཚོ་ལས་མངོན་པར་འཕགས་པ། རིན་པོ་ཆེའི་ནྱུ་གུ་དང་། ཕུག་དང་། རི་སུལ་དང་། བྱི་རུའི་འཁྲི་ཤིང་ཡོངས་སུ་དཀྲིས་པའི་རིན་པོ་ཆེའི་ཤིང་དང་། དྲང་སྲོང་ཆེན་པོ་ཉེ་བར་གནས་ཤིང་བསྟེན་པའི་རི་བོ། །དེའི་སྟེང་དུ་ཁྲོ་བོའི་རྒྱལ་པོ་སྒྲོལ་མས་ནོན་པ་དྲག་པོ་ཆེན་པོའི་གཟུགས་ཅན་ཕྱག་གཡོན་པས་ཞགས་པ་བཟུང་ནས། གཡས་པས་དབྱུག་པ་འཛིན་པ། བཞིན་ཁྲོ་གཉེར་ཅན། བྱང་ཆུབ་སེམས་དཔའ་ཆེན་པོ་ལ་བལྟ་ཞིང་བཀའ་ནོད་པར་བྱེད་བཞིན་པ། གསུས་པ་རློ་བ། སྐྲ་གྱེན་དུ་བརྫེས་པ། མིག་སྨན་ནག་པོ་སྤྲིན་དང་མཚུངས་པ། ཨག་ཚོམ་སེར་སྐྱ་དང་། སྐྲ་རིང་ཞིང་སེན་མོ་རིང་བ། མིག་དམར་བ། མགྲིན་པའི་ཕྱོགས་སྦྲུལ་གྱིས་བརྒྱན་པ། སྟག་གི་པགས་པའི་ཤམ་ཐབས་ཅན། བགེགས་ཐམས་ཅད་རྣམ་པར་འཇོམས་པ། ཆེས་མི་བཟད་པ་ཆེན་པོ། ཁྲོ་བོའི་རྒྱལ་པོ་ཆེན་པོ། ཀུན་ནས་འབར་བ། ཁྲོ་བོའི་རྒྱལ་པོ་སྒྲོལ་མས་ནོན་པ་རྣམས་འདི་ཉིད་ཁོ་ནས་བྲི་བར་བྱའོ། །དེའི་འོག་ཏུ་རལ་པ་ཅན་དེ་དང་དེའོ། །རི་དེའི་འོག་ཏུ་རྡོའི་སྟེང་དུ་ཉེ་བར་འདུག་པ། པུས་མོ་ས་ལ་
འདུད་པའི་ལུས་ཅན་ལག་པ་སྤོས་ཕོར་ཐོགས་པ། ཆ་བྱད་དང་། དབྱིབས་དང་། འཇུག་པ་དང་སྤྱོད་པ་ཇི་ལྟ་བ་བཞིན་དུ་བྱས་པ། འཕགས་པ་འཇམ་དཔལ་ལ་ལྟ་བར་གྱུར་པ་ཡང་དག་པར་བྲིའོ། །བཅོམ་ལྡན་འདས་ཤཱཀྱ་ཐུབ་པའི་འོག་གཡས་ཀྱི་གཞོགས་སུ་ཀླུའི་དབང་པོའི་རྒྱལ་པོ་དགའ་བོ་དང་། ཉེ་ལོགས་སུ་པདྨའི་མཚོ་ལས་མངོན་པར་འཕགས་པའི་རིན་པོ་ཆེའི་རིའི་དབང་པོའི་རྒྱལ་པོ་གཞན་གསུངས་པ་དེ་བཞིན་དུ་མངོན་པར་བྲི་སྟེ། ཁྲོ་བོའི་རྒྱལ་པོ་སྒྲོལ་མས་ནོན་པ་ཕན་པ་ལྷའི་མེ་ཏོག་གཅལ་དུ་བཀྲམ་པ་མངོན་པར་བྲི་སྟེ། རི་དེ་ནི་སྤྱན་རས་གཟིགས་དབང་ཕྱུག་གི་འོག་ཏུ་བྲིའོ། །རི་དེ་ནི་ཤིན་ཏུ་མཐོ་བ། པདྨ་རཱ་གའི་རྡོ་ལེབ་དང་། དེ་ཉིད་ཀྱི་མྱུ་གུ་དང་། བེེ་ཌཱུཪྱའི་རང་བཞིན་གྱི་རྩེ་མོའི་རྣམ་པར་བྲི་བར་བྱའོ། །དེ་ལ་བརྟེན་པའི་ལྷ་མོ་སྤྱན་རས་གཟིགས་དབང་ཕྱུག་གི་ཐུགས་རྗེ། འཕགས་མ་སྒྲོལ་མ་ལུས་རྒྱན་ཐམས་ཅད་ཀྱིས་བརྒྱན་པ། དར་ལ་དམར་པོའི་སྟོད་གཡོགས་དང་། དར་ལ་ཁྲ་བོའི་ཤམ་ཐབས་ཅན་བུད་མེད་ཀྱི་རྒྱན་ཐམས་ཅད་ཀྱིས་རྣམ་པར་བརྒྱན་པ། ཕྱག་གཡོན་ན་ཨུཏྤལ་སྔོན་པོ་བསྣམས་པ། གསེར་མདོག་ཅན་མ། ཧ་ཅང་མི་སྦོམ། ཧ་ཅང་མི་རྒན་པ། སེམས་བསམ་གཏན་ལ་གནས་པ། བཀའ་ནོད་ཅིང་འདུག་པ། ཕྱག་གཡས་པས་མཆོག་སྦྱིན་པར་འདོད་པ། ལུས་ཅུང་ཟད་བཏུད་པ། སྐྱིལ་མོ་ཀྲུང་གིས་ཉེ་བར་འདུག་པ། འཕགས་པ་སྤྱན་རས་གཟིགས་དབང་ཕྱུག་ལ་ཅུང་ཟད་ལྟ་བར་གྱུར་པ། ཀུན་ནས་འབར་བའི་ཕྲེང་བས་ཡོངས་སུ་བསྐོར་བའོ། །དེ་ཉིད་དུའང་རིན་པོ་ཆེ་བེེཌཱུཪྱའི་རྩེ་མོ་དེ་ཉིད་དུའང་། པུནྣཱ་གའི་ཤིང་གིས་ཡོངས་སུ་བསྐོར་བ། ཡལ་ག་ཐམས་ཅད་ལ་ཀུན་ནས་མེ་ཏོག་གིས་སྤྲས་ཤིང་། ཁ་བྱེ་བར་གྱུར་པས་བཅོམ་ལྡན་འདས་མ་སྒྲོལ་མ་ལ་མངོན་པར་བཀབ་པ། ཡལ་ག་དུད་པ་དེ་ཉིད་ཀྱིས་ཀྱང་ཤིན་ཏུ་བཀྲ་བའི་བྱི་རུའི་མྱུ་གུ་འབྲེལ་བ་རྣམ་པར་བཀྲ་བའི་གཟུགས་ཅན་གྱི་ཚོན་རྩི་འབར་བ་ན་ལྷ་མོ་སྒྲོལ་མའི་བཞིན་ཀུན་དུ་སྣང་བར་མངོན་པར་བྲིའོ། །ལྷ་མོ་བགེགས་ཀུན་འཇོམས་པ་མོ། །འཇིགས་པ་འཇོམས་པར་བྱེད་པའི་མཆོག །སྒྲུབ་པ་པོ་ནི་
སྲུང་དོན་དུ། །མཆོག་སྦྱིན་དགེ་བ་བྲི་བར་བྱ། །བུད་མེད་གཟུགས་འཆང་ལྷ་མོ་ནི། །ཐུགས་རྗེ་སྟོབས་བཅུ་ལྡན་པའི་སྲས། །འབྱུང་པོ་ཀུན་གྱི་དཔལ་ཡིན་ཏེ། །མཆོག་སྦྱིན་བྱེད་མ་བྲི་བར་བྱ། །ལྷ་མོ་ལས་ཆེན་བྱེད་པ་མོ། །བྱང་ཆུབ་སེམས་དཔའ་འོད་ཆེན་པོ། །བགེགས་ཀུན་རྣམ་པར་འཇོམས་དོན་དུ། །སྒྲུབ་པ་པོ་ནི་ཀུན་དུ་འདོད། །མི་དབང་རྣམས་ནི་སྲུང་དོན་དུ། །དཔལ་གྱི་དོན་དུ་རབ་ཏུ་གྲགས། །ཁྲོ་རྒྱལ་དབང་པོ་གང་ཡིན་ཏེ། །རི་ཡི་རྩེ་མོར་གནས་འདོད་པ། །བགེགས་ཀུན་རྣམ་པར་གཞིག་པའི་ཕྱིར། །རྒྱལ་མཆོག་སྲས་རྣམས་ཀྱིས་གསུངས་སོ། །དྲག་པོ་ཆེན་པོ་བརྩོན་འགྲུས་ཆེ། །གཏུམ་ཆེན་འོད་ཟེར་ཆེན་པོ་སྟེ། །བསྟན་པ་ལ་སྡང་སེམས་ཅན་རྣམས། །ཚར་བཅད་ཆེད་ཉིད་རབ་ཏུ་བརྟག །སྒྲུབ་པ་པོ་ནི་སྲུང་དོན་དང་། །བགེགས་རྣམས་ཐམས་ཅད་འཇོམས་པ་དང་། །མི་བཟད་ཁྲོ་བོའི་ངང་ཚུལ་ཅན། །སྔགས་ཀྱི་ལྷ་རྣམས་འགུགས་པར་བྱེད། །ཤིན་ཏུ་དྲག་པོ་དྲག་གཟུགས་ཅན། །བརྩེ་བ་མེད་ཅིང་ངེས་པར་འགོག །སྡིག་པ་དྲག་པོ་སྤྱོད་པ་རྣམས། །དབང་དུ་མ་གྱུར་དབང་དུ་བྱེད། །མཁའ་སྤྱོད་ས་ལ་སྤྱོད་པ་དང་། །ཀུན་ནས་ས་འོག་སྤྱོད་པ་དང་། །ཐུབ་པའི་བསྟན་པ་འགལ་བྱེད་པའི། །གདུག་པ་ཐམས་ཅད་འཇོམས་པར་བྱེད། །རས་ནི་ཀུན་ནས་གྲུ་བཞི་དང་། །གྲྭ་བཞི་དག་ཏུ་བྲི་བར་བྱ། །རས་ཀྱི་འོག་གི་མཐའ་རྣམས་སུའང་། །ཆུ་བོ་རྒྱ་ཆེར་བྱ་བ་ཡིན། །ཀླུ་ནི་གདེངས་ཀས་མཚན་པ་ཅན། །གཅིག་ཉིད་ཀུན་དུ་བྱ་བ་ཡིན། །ཡན་ལག་དཀར་ཞིང་བཟང་བ་དང་། །ལུས་ཕྱེད་མི་ཡི་རྣམ་པར་སྐྱེས། །རྟག་ཏུ་ཐལ་མོ་སྦྱོར་བྱེད་པ། །མགོ་བོའི་སྟེང་དུ་བཞག་བྱས་ནས། །གདེངས་ཀ་བདུན་པ་བརྩོན་འགྲུས་ཆེ། །དབང་ཆེན་ལྡན་པའི་ཀླུ་དེ་ནི། །མིང་ནི་མཐའ་ཡས་ཞེས་བྱ་ཡིན། །དེ་བཞིན་གཤེགས་ལ་ངེས་པར་ལྟ། །ནོར་བུ་རིན་ཆེན་གྱིས་མཛེས་ཤིང་། །ཤིན་ཏུ་མཛེས་ཤིང་གཟུགས་མཛེས་པ། །རིན་ཆེན་རྒྱན་གྱིས་རྣམ་པར་བརྒྱན། །འབར་བའི་ཕྲེང་ལྡན་ཀུན་དུ་བྲི། །ཀླུ་དབང་ཆེན་པོར་རྣམ་པར་གྲགས། །ཐུབ་པའི་བསྟན་
ལ་རབ་ཞུགས་པའི། །འཇིག་རྟེན་ཀུན་ལ་ཕན་པར་བརྩོན། །བགེགས་ཀུན་རྣམ་པར་གཞོམ་དོན་དུ། །ཆུ་བོ་ལ་བརྟེན་བྲི་བར་བྱ། །དེ་ལ་རས་ཀྱི་ཆོ་ག་འདི། །མདོར་བསྡུས་རྒྱལ་བས་གསུངས་པ་ཡིན། །རྒྱས་པར་དེ་བཞིན་གཤེགས་རྣམས་ཀྱིས། །ཀུན་ནས་བཤད་པ་སྔར་གསུངས་སོ། །མཁས་པ་གང་ཞིག་འདྲི་བྱེད་པ། །དེ་ཡི་བསོད་ནམས་མཐའ་ཡས་སོ། །སྡིག་པ་ཤིན་ཏུ་མི་བཟད་པ། །བསྐལ་པ་བྱེ་བ་བྱས་པ་གང་། །ས་སྟེངས་བྲིས་སྐུ་མཐོང་བ་ཡིས། །དེ་ཡི་སྐད་ཅིག་ཉིད་ལ་འཇོམས། །མཚམས་མེད་ལྔ་པོ་བྱེད་པ་དང་། །ཚུལ་ཁྲིམས་འཆལ་དང་སྨད་པ་དང་། །སྡིག་པ་ཀུན་ལ་རབ་འཇུག་དང་། །འཁོར་བར་ཡོངས་སུ་རྒྱུ་བ་ཡི། །འགྲོ་བ་སྐྱེ་གནས་དམན་པ་རྣམས། །དེ་རྣམས་རས་རིས་འཛིན་མི་གཞུག །དེ་རྣམས་རས་རིས་མཐོང་བས་ནི། །འབྲས་བུ་ཡོད་པར་ཐུབ་དབང་གསུངས། །དེ་ཕྱིར་མཐོང་བ་ཙམ་གྱིས་ནི། །སྐད་ཅིག་དེ་ལ་སྡིག་པ་འཇིག །དག་པས་འཇུག་པ་ཉིད་དང་ནི། །རྗེས་སུ་ཟློས་པ་དག་འཇུག་པ། །སྔགས་མཉན་པ་ལ་བརྩོན་པ་ཡི། །མི་རྣམས་གྲུབ་ཐོབ་སྨོས་ཅི་དགོས། །བསྐལ་པ་བྱེ་བར་སངས་རྒྱས་ཀུན། །མཆོད་པའི་བསོད་ནམས་གང་ཡིན་པ། །ས་སྟེངས་རས་རིས་འདྲི་བ་ཡི། །སྔགས་པ་བསོད་ནམས་དེ་ཐོབ་འགྱུར། །གང་གཱ་ཡི་ནི་བྱེ་མ་ཡི། །ཚད་དུ་གྲགས་པ་གང་ཡིན་པ། །དེ་ཡི་ཚད་གྱུར་སངས་རྒྱས་དང་། །རྒྱལ་སྲས་རང་རྒྱལ་བསེ་རུ་དང་། །ཉན་ཐོས་རྣམས་ལ་འཇིག་རྟེན་དུ། །སླར་ཡང་ལན་མང་མཆོད་སྟོན་གསོལ། །འབྲས་བུ་ཐོབ་པ་གང་ཡིན་དེའི། །སྔགས་པ་རས་རིས་བྲིས་པ་དང་། །མཐོང་དང་ཆོ་ག་ཀློག་པ་དང་། །རྗེས་སུ་ཡི་རང་བ་ཉིད་དང་། །ཆོ་ག་ཐམས་ཅད་རབ་བརྟགས་པ། །དེ་ཡི་སྔགས་ཀྱི་དངོས་གྲུབ་དེས། །ཇི་སྲིད་འཇིག་རྟེན་པ་ཡི་སྔགས། །གང་ཞིག་རྒྱལ་བ་སྐྱེས་མཆོག་དང་། །དེ་སློབ་བསེ་རུ་ལྷ་རྣམས་དང་། །བྱང་ཆུབ་སེམས་དཔའ་བདག་ཉིད་ཆེས། །གསུངས་པའི་སྔགས་རྣམས་ཐམས་ཅད་ནི། །རས་རིས་འདི་ཡི་སྤྱན་སྔར་འགྲུབ། །བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོའི་མདོ་སྡེ་ལས།
བཅོམ་ལྡན་འདས་མ་འཕགས་མ་སྒྲོལ་མ་རལ་པ་གྱེན་དུ་བརྫེས་པའི་རྩ་བའི་ཆོ་ག་རབ་འབྱམ་གྱི་བྲིས་སྐུ་དང་པོ་རྫོགས་སོ།། །།དེ་ནས་བཅོམ་ལྡན་འདས་ཤཱཀྱ་ཐུབ་པས་ཐམས་ཅད་དང་ལྡན་པའི་འཁོར་ལ་གཟིགས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་བཀའ་སྩལ་པ། སེམས་དཔའ་ཆེན་པོ་གཞན་ཡང་ཁྱོད་ཀྱི་རས་རིས་ཀྱི་ཆོ་ག་བར་མ་ཡོད་དེ། དེ་ངས་བཤད་པར་བྱ་ཡིས། དེ་ལེགས་པར་ཉོན་ལ་ལེགས་པར་ཡིད་ལ་གྱིས་ཤིག །བཤད་པར་བྱའོ། །དང་པོ་རེ་ཞིག་སྔར་བསྟན་པའི་དོག་པ་དང་། སྔར་བརྗོད་པ་ཉིད་ཀྱི་ཆོ་ག་དང་། སྔར་ཡོངས་སུ་བརྟགས་པའི་བཟོ་བོ་དང་། སྔར་གྱི་ཚད་བར་མ་ཉིད་ཀྱིས་རས་ཤིན་ཏུ་དག་པ། འཇམ་པ། ཤིན་ཏུ་སྦྱངས་པ། ཁ་ཚར་དང་བཅས་པ། ཚོན་མ་འདྲེས་པ། སྐྲ་དང་འདྲེས་པ་དང་བྲལ་བ་ལ་སོགས་པ་རྣམས་ཀྱིས་ཚད་དང་གཟུགས་མ་གཏོགས་པ་དང་པོ་ཇི་ལྟ་བ་དེ་བཞིན་ཉིད་ཀྱིས་རས་རིས་ཕྱི་མ་འདྲིར་གཞུག་པར་བྱའོ། །དང་པོ་རེ་ཞིག་གནས་གཙང་མའི་གནས་ཀུན་ནས་མཛེས་པའི་རྣམ་པ་རིན་པོ་ཆེ་ཤེལ་གྱི་རང་བཞིན་ལྟ་བུ་མུ་ཏིག་དཀར་པོའི་དོ་ཤལ་གྱིས་བརྒྱན་པ། དེའི་དབུས་སུ་བཅོམ་ལྡན་འདས་ཤཱཀྱ་ཐུབ་པ་འདྲིར་གཞུག་པར་བྱ་སྟེ། རིན་པོ་ཆེ་སེང་གེའི་ཁྲི་ལ་ཉེ་བར་བཞུགས་པ། ཆོས་སྟོན་པར་མཛད་བཞིན་པ། རྣམ་པ་ཐམས་ཅད་ཀྱི་མཆོག་དང་ལྡན་པའོ། །གཡས་ཀྱི་གཞོགས་སུ་འཕགས་པ་སྤྱན་རས་གཟིགས་དབང་ཕྱུག་པདྨའི་གེ་སར་དུ་སྣང་བའམ། གུར་གུམ་མམ། ཉི་མའི་ཁ་དོག་ཅན། ཕྲག་པ་གཡོན་པའི་ཕྱོགས་སུ་པདྨ་བསྣམས་པ། ཐལ་མོ་སྦྱར་བ་བྱས་ཏེ་བཅོམ་ལྡན་འདས་ཤཱཀྱ་ཐུབ་པ་ལ་ངེས་པར་རྟོག་བཞིན་པ། བཞིན་ཅུང་ཟད་འཛུམ་པ། བྱང་ཆུབ་སེམས་དཔའ་ཆེན་པོ། བདེ་ལེགས་དབུས་མའི་ཅོད་པན་ཅན། མཆོད་ཕྱིར་ཐོགས་དཀར་པོ་ཅན། པུས་མོ་གཡས་པའི་ལྷ་ང་དང་། མགོ་འདུད་པའོ། །བཅོམ་ལྡན་འདས་ཤཱཀྱ་ཐུབ་པའི་གཡོན་གྱི་གཞོགས་སུ་ཕྱག་ན་རྡོ་རྗེ་པྲི་ཡང་ཀུ་ལྟར་སྔོ་བསངས་སྔར་ཇི་ལྟར་བསྟན་པ་དེ་བཞིན་དུ་མངོན་པར་བྲིའོ། །
འོན་ཀྱང་བཅོམ་ལྡན་འདས་ལ་རྔ་ཡབ་གཡོབ་པར་བྱེད་བཞིན་པའོ། །དེའི་གཞོགས་སུ་འཕགས་པ་བྱམས་པ་དང་། ཀུན་དུ་བཟང་པོ་དང་། ཕྱག་ན་རྡོ་རྗེ་དང་། བློ་གྲོས་ཆེན་པོ་དང་། ཞི་བའི་བློ་གྲོས་དང་། ནམ་མཁའ་མཛོད་དང་། སྒྲིབ་པ་ཐམས་ཅད་རྣམ་པར་སེལ་བ་སྟེ་འདི་རྣམས་རིམ་གྱིས་མངོན་པར་བྲི་བར་བྱ་སྟེ། དང་པོ་ཇི་ལྟ་བ་བཞིན་དུ་རྒྱན་ཐམས་ཅད་ཀྱིས་བརྒྱན་པ་འདྲིར་གཞུག་པར་བྱའོ། །དེ་རྣམས་ཀྱི་སྟེང་དུ་སངས་རྒྱས་བཅོམ་ལྡན་འདས་བརྒྱད་འདྲིར་གཞུག་པར་བྱ་སྟེ། བཞུགས་པ་ཕྱག་གཡས་མི་འཇིགས་པ་སྦྱིན་པ། ཆོས་གོས་སེར་པོའི་བླ་གོས་མནབས་པའི་སྐུ་ཅན། ཕྱག་གཡོན་པས་ཆོས་གོས་ཀྱི་རྣ་བ་འཛིན་པ། ཅུང་ཟད་དམར་བར་སྣང་བའི་ངུར་སྨྲིག་གི་ཤམ་ཐབས་ཅན་ཀུན་ནས་སྣང་བའི་རྣམ་པ་ཐམས་ཅད་ཀྱི་མཆོག་དང་ལྡན་པ་འདི་ལྟ་སྟེ། དེ་བཞིན་གཤེགས་པ་མེ་ཏོག་རབ་ཏུ་རྒྱས་པའི་རྒྱལ་པོ་དང་། རིན་ཆེན་གཙུག་ཏོར་ཅན་དང་། ཐམས་ཅད་སྐྱོབ་དང་། ལོག་པར་དད་སེལ་དང་། གསེར་ཐུབ་དང་། འོད་སྲུང་དང་། སྤྱན་བཟང་ཞེས་པའི་སངས་རྒྱས་བཅོམ་ལྡན་འདས་འདི་རྣམས་འདྲིར་གཞུག་པར་བྱའོ། །བཅོམ་ལྡན་འདས་ཀྱི་གཡས་ཀྱི་གཞོགས་སུ་འཕགས་པ་སྤྱན་རས་གཟིགས་དབང་ཕྱུག་དང་། ཉེ་བར་འཁོར་གྱི་དཀྱིལ་འཁོར་ཆེན་པོ་འདྲིར་གཞུག་པར་བྱའོ། །ཉན་ཐོས་ཆེན་པོ་བརྒྱད་དང། རང་སངས་རྒྱས་བརྒྱད་སྔར་ཇི་ལྟར་བསྟན་པ་དེ་བཞིན་དུ་འདྲིར་གཞུག་པར་བྱ་སྟེ། འོན་ཀྱང་འཕགས་པ་མོོད་གལ་གྱི་བུ་ཆེན་པོ་དང་། ཤཱ་རིའི་བུ་བཅོམ་ལྡན་འདས་ཤཱཀྱ་ཐུབ་པ་ལ་རྔ་ཡབ་གཡོབ་པར་བྱེད་བཞིན་དུ་འཁོར་བའི་ལུས་སུ་མངོན་པར་བྲི་བར་བྱའོ། །དེ་བཞིན་དུ་གནས་གཙང་མའི་རིས་ཀྱི་ལྷའི་བུ་མངོན་པར་བྲི་བར་བྱའོ། །ལྷ་རྣམས་ཀྱི་དབང་པོ་བརྒྱ་བྱིན་དང་། རབ་འཐབ་བྲལ་དང་། དགའ་ལྡན་དང་། འཕྲུལ་དགའ་དང་། དག་པ་དང་། དྲི་མ་མེད་པ་དང་། ཤིན་ཏུ་མཐོང་དང་། འོད་གསལ་དང་། ཚངས་པ་མི་མཇེད་ཀྱི་བདག་པོ་དང་། འོག་མིན་ཏེ་དེ་ལྟ་བུ་ལ་སོགས་པའི་ལྷའི་བུ་གཟུགས་ན་སྤྱོད་པ་དང་། འདོད་པ་ན་སྤྱོད་པའི་ལྷའི་བུ་རྣམས་རིམ་གྱིས་མངོན་པར་བྲི་བར་བྱའོ། །
སྤྱན་རས་གཟིགས་དབང་ཕྱུག་དང་ཉེ་བར་གནས་པའི་འཁོར་གྱི་དཀྱིལ་འཁོར་ཉེ་བར་སྤྲས་པ་དགོད་དེ། རང་གིི་གཟུགས་དང་ཆ་བྱད་འཆང་བ་འདྲིར་གཞུག་པར་བྱའོ། །བཅོམ་ལྡན་འདས་ཀྱི་སེང་གེའི་ཁྲིའི་འོག་ཏུ་རྒྱ་མཚོ་ཆེན་པོ་ལས་མངོན་པར་འཕགས་པའི་ཀུན་ནས་རིན་པོ་ཆེའི་རི་བོ་ཇི་སྲིད་དུ་རས་ཀྱི་མཐའ་མར་འདྲིར་གཞུག་པར་བྱ་སྟེ། རས་ཀྱི་མཐའི་གྲྭའི་ཕྱོགས་གཅིག་ཏུ་སྒྲུབ་པ་པོ་ཆ་བྱད་དང་དབྱིབས་ཇི་ལྟ་བའི་རྣམ་པ་པུས་མོ་དང་། མགོ་བོ་བཏུད་པ། ལག་པ་སྤོས་ཕོར་ཐོགས་པ་འདྲིར་གཞུག་པར་བྱའོ། །རིན་པོ་ཆེའི་རི་བོ་དེ་ལ་འཕགས་པ་སྤྱན་རས་གཟིགས་དབང་ཕྱུག་གི་འོག་ཏུ་ཁྲོ་བོའི་རྒྱལ་པོ་སྒྲོལ་མས་ནོན་པ་སྔར་ཇི་ལྟར་ངེས་པར་བསྟན་པ་དེ་བཞིན་དུ་མངོན་པར་བྲིའོ། །བཅོམ་ལྡན་འདས་ཀྱི་གཡོན་གྱི་གཞོགས་ཀྱི་སེང་གེའི་ཁྲིའི་འོག་ཏུ་འཕགས་པ་སྤྱན་རས་གཟིགས་དབང་ཕྱུག་གི་ཞབས་ཀྱི་དྲུང་དང་ཉེ་བ་དེར་རིན་པོ་ཆེའི་རི་ལ་བཞུགས་པའི་ལྷ་མོ་སྒྲོལ་མ་མངོན་པར་བྲི་སྟེ་སྔར་ཇི་ལྟར་ངེས་པར་བསྟན་པ་དེ་བཞིན་འདྲིར་གཞུག་པར་བྱའོ། །རས་དེའི་ཁོར་ཡུག་ཏུའང་མེ་ཏོག་སིལ་མ་མངོན་པར་གཏོར་ཏེ་ཙམ་པ་ཀ་དང་། ཨུཏྤ་ལ་སྔོན་པོ་དང་། པདྨ་དང་། སོོ་གནྡྷི་ཀ་དང་། མཱ་ལ་ཏཱི་དང་། བརྵི་ཀ་དང་། དྷཱ་ནུསྐཱརྵི་ཀཱ་དང་། པུནྣཱ་ག་དང་། ནཱ་ག་གེ་སར་ལ་སོགས་པའི་མེ་ཏོག་རྣམས་ཀྱིས་ཁོ་ར་ཁོར་ཡུག་ཏུ་གཅལ་དུ་བཀྲམ་པར་བྱའོ། །རས་ཀྱི་སྟེང་། རས་ཀྱི་མཐའི་གྲྭ་གཉིས་སུ་ལྷའི་བུ་གཉིས་མེ་ཏོག་གི་ཚོགས་འཐོར་བར་བྱེད་བཞིན་པ། གཟུགས་རྣམ་པར་བཀྲ་བ། བར་སྣང་ལ་གནས་པའི་ཆར་སྤྲིན་གྱི་ནང་ན་ལྡིང་བ་ཁ་དོག་དཀར་པོར་མངོན་པར་བྲི་བར་བྱའོ། །འདི་ནི་རས་རིས་འབྲིང་པོར་བརྗོད། །རྟག་ཏུ་དགེ་ལེགས་དོན་འབྱུང་བ། །ས་སྟེངས་སྐྱེ་བོ་མི་རྣམས་ལ། །དངོས་གྲུབ་འབྲིང་པོ་སྦྱིན་པར་བྱེད། །འཁོར་བར་ཀུན་དུ་འཁོར་བ་ན། །སྡིག་པ་ཅུང་ཟད་སྔོན་བྱས་གང་། །འདིར་ནི་བྲིས་སྐུ་མཐོང་བ་ཡིས། །དེ་ཡིས་སྐད་ཅིག་ཉིད་ལ་འཇིག །སེམས་ཅན་རྨོངས་བ་མི་ཤེས་བ། །དེ་རྣམས་འགྲོ་བ་ལྔ་པོར་འཁྱམས། །གང་ཞིག་བྱང་ཆུབ་སེམས་དཔའ་ཡི། །བྲིས་སྐུ་བར་མ་མཐོང་བ་ཡང་། །སྡིག་པ་བྱེད་པར་འགྱུར་བ་དང་། །
མཚམས་མེད་ལྔ་པོ་བྱེད་པ་དང་། །ཚུལ་འཆལ་གྱིས་ཀྱང་འགྲུབ་པར་འགྱུར། །རྣམ་པ་སྣ་ཚོགས་སྔགས་གསུངས་པའང་། །ཤིན་ཏུ་མྱུར་བར་དངོས་གྲུབ་ནི། །བཟླས་པ་བྱས་པས་ཐོབ་པར་འགྱུར། །ནད་ཅན་རྣམས་ནི་ནད་ལས་གྲོལ། །བཀྲེན་པས་ནོར་ནི་རྙེད་པར་འགྱུར། །བུད་མེད་རྣམས་ནི་བུ་ཐོབ་འགྱུར། །བྲིས་སྐུ་བར་པ་བལྟ་བ་ན། །མཐོང་བ་ཙམ་གྱིས་དེ་ཡི་ཚེ། །བསོད་ནམས་རྒྱས་པ་ཆེན་པོ་ཐོབ། །ངེས་པར་ལྷ་དང་མི་རྣམས་ཀྱི། །བདེ་བའི་སྐལ་བ་ཅན་འགྱུར་མི། །དེ་ཡི་སྐྱེ་བ་གཞན་ལ་ཡང་། །ངེས་པར་སངས་རྒྱས་ཉིད་དུ་འགྱུར། །བྲི་བ་དང་ནི་ཀློག་པ་དང་། །ལྷ་མཆོད་པ་དང་འདྲིར་འཇུག་དང་། །དེ་བཞིན་མཐོང་དང་རེག་ཉིད་ཀྱང་། །སྡིག་པ་ཀུན་ལས་གྲོལ་བར་འགྱུར། །འདི་ལྟར་འོད་ཆེན་བྲིས་སྐུ་ལ། །དོན་དུ་གཉེར་དང་གསོལ་འདེབས་པ། །རྗེས་སུ་ཡི་རང་བ་ལས་ཀྱང་། །སྐྱེ་བ་འབྲས་བཅས་མྱུར་དུ་ཐོབ། །བསྐལ་མཆོག་ཕྱེ་མ་རྣམས་ཀྱིས་ཀྱང་། །སྐྱེ་བོས་བསོད་ནམས་གང་ཐོབ་པ། །ཚིག་ཏུ་བརྗོད་པར་མི་ནུས་སོ། །བྲིས་སྐུ་མཐོང་བ་འབྲས་བུར་བཅས། །ཞེས་བྱ་བ་བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་ལས་བཅོམ་ལྡན་འདས་འཕགས་མ་སྒྲོལ་མ་རལ་པ་གྱེན་དུ་བརྫེས་པའི་རྩ་བའི་ཆོ་ག་རབ་འབྱམ་ལས། ལེའུ་གསུམ་པ་ཡོངས་སུ་རྫོགས་སོ།། །།དེ་ནས་ཡང་བཅོམ་ལྡན་འདས་ཤཱཀྱ་ཐུབ་པས་སླར་ཡང་སེམས་དཔའ་ཆེན་པོ་དེ་ལ་བཀའ་སྩལ་པ་སེམས་དཔའ་ཆེན་པོ་ཁྱོད་ཀྱི་རས་རིས་ཀྱི་ཆོ་ག་ཆུང་ངུ་ཞེས་བྱ་བ་གཞན་གསུམ་པ་ཡང་ཡོད་དེ། །གང་འབད་པ་མེད་པར་དངོས་གྲུབ་འགྲུབ་པར་འགྱུར་བ་སྟེ། སྔར་བསྟན་པ་ཉིད་ཀྱི་ཆོ་ག་ཉིད་དང་། བཟོ་བོས་བདེ་བར་གཤེགས་པའི་མཐོ་གང་གི་ཚད་ཙམ་ཐད་ཀར་དང་། དེ་བཞིན་ཁོ་ནར་ཀུན་ནས་གྲུ་བཞི་པ་ལ་སྔར་བཞིན་དུ་རས་རིས་སྔར་བསྟན་པའི་ཚོན་རྩི་རྣམས་ཀྱིས་འདྲིར་གཞུག་པར་བྱའོ། །དང་པོ་རེ་ཞིག་བྱང་ཆུབ་སེམས་དཔའ་ཆེན་པོ་སེངྒེའི་གདན་ལ་སྐྱིལ་ཀྲུང་གིས་བཞུགས་པ་བྱིས་པ་ཁྱེའུ་སྔར་བཞིན་དུ་ཆོས་སྟོན་པར་མཛད་བཞིན་པ་ཀུན་ནས་འོད་ཟེར་འཕྲོ་བར་
བྱེད་བཞིན་པ། མཛེས་པའི་གཟུགས་ཅན་འདྲིར་གཞུག་པར་བྱའོ། །གཡོན་གྱི་གཞོགས་སུ་འཕགས་པ་ཀུན་དུ་བཟང་པོ་རིན་པོ་ཆེའི་རྡོ་ལེབ་ལ་གནས་པ་ཕྱག་ན་རྔ་ཡབ་ཐོགས་པ་གཡོན་ན་ཡིད་བཞིན་གྱི་ནོར་བུ་ཐོགས་པ་ཁ་དོག་བྲི་ཡང་ཀུ་ལྟར་སྔོ་བསངས་སོ། །གཡས་ཀྱི་གཡོགས་སུའང་འཕགས་པ་སྤྱན་རས་གཟིགས་དབང་ཕྱུག་རིན་པོ་ཆེའི་རྡོ་ལེབ་ལ་གནས་པ་ཕྱག་ན་རྔ་ཡབ་ཐོགས་ཤིང་། ཕྱག་གཡོན་པདྨ་བསྣམས་པ། ཀུན་ནས་འོད་དང་ལྡན་པའི་ལུས་ཅན་འཕགས་པ་སྤྱན་རས་གཟིགས་དབང་ཕྱུག་སྔ་མ་བཞིན་དུ་མངོན་པར་བྲི་བར་བྱའོ། །སེང་གེའི་ཁྲིའི་འོག་ཏུ་གསེར་གྱི་རི་བོ། །ཇི་སྲིད་རས་ཀྱི་མཐའི་བར་དུ་འདྲིར་གཞུག་པར་བྱའོ། །རས་རིས་ཀྱི་མཐའི་ཟུར་དུ་འཕགས་པ་སྤྱན་རས་གཟིགས་དབང་ཕྱུག་གི་སེང་གེའི་འོག་ཏུ་གཡས་ཀྱི་གཞོགས་སུ་ཁྲོ་བོའི་རྒྱལ་པོ་སྒྲོལ་མས་ནོན་པ་སྔ་མ་བཞིན་དུ་འདྲིར་གཞུག་པར་བྱའོ། །དེའི་འོག་ཏུ་སྒྲུབ་པ་པོ་ལག་ན་སྤོས་ཕོར་ཐོགས་པ་སྔ་མ་བཞིན་དུ་འདྲིར་གཞུག་པར་བྱའོ། །དེ་ཐམས་ཅད་སྔ་མ་ཇི་ལྟ་བ་དེ་བཞིན་དུའོ། །དེ་ནས་འཕགས་པ་སྤྱན་རས་གཟིགས་དབང་ཕྱུག་གི་སྟེང་དུ་དེ་བཞིན་གཤེགས་པ་འོད་དཔག་མེད་འདྲིར་གཞུག་པར་བྱ་སྟེ། རིན་པོ་ཆེའི་རིའི་ཕུག །སོར་བཅུ་དྲུག་པའི་ཚད་ན་བཞུགས་པ། ཁང་པ་བརྩེགས་པ་འདྲི་བའི་རི་བོའི་བྱ་སྐྱིབས་མཐོ་བ་འདྲིར་གཞུག་པར་བྱའོ། །རས་རིས་དེའི་ཁོར་ཡུག་ཏུ་རི་བོའི་ཁོར་ཡུག་ཏུ་རི་བོའི་རྣམ་པས་ཡོངས་སུ་བསྐོར་བ་མངོན་པར་བྲིའོ། །རས་རིས་དེའི་སྟེང་གི་ཟུར་དུ་གནས་པའི་རི་བོའི་བྱ་སྐྱིབས་དང་ཀུན་ཏུ་འབྲེལ་བར་ལྡིང་བཞིན་པ་ལྟ་བུ་མེ་ཏོག་སྣ་ཚོགས་འཐོར་བར་བྱེད་པའི་གནས་གཙང་མའི་རིས་ཀྱི་ལྷའི་བུ་དག་པ་དང་རྣམ་པར་དག་པ་ཞེས་བྱ་བ་གཉིས་སུ་འདྲིར་གཞུག་པར་བྱའོ། །རས་དེ་ལ་མེ་ཏོག་སྣ་ཚོགས་ཀྱིས་གཅལ་དུ་བཀྲམ་པ་མངོན་པར་འདྲིར་གཞུག་པར་བྱའོ། །རས་རིས་རྣམ་གསུམ་མཚན་ཉིད་ནི། །ཐམས་ཅད་འདིར་ནི་བསྟན་པ་ལས། །འདི་ནི་ཆུང་ངུ་ཞེས་བྱ་སྟེ། །རས་རིས་ཕྲན་ཚེགས་ལས་ལ་ཤིས། །སྡིག་ལས་ཤིན་ཏུ་མི་བཟད་པ། །བསྐལ་པ་བྱེ་བ་སྟོང་ཕྲག་ཏུ། །རས་རིས་མཐོང་བས་གྲོལ་འགྱུར་ཏེ། །རས་
རིས་མཐོང་བ་ཙམ་གྱིས་ནི། །སྐད་ཅིག་ཉིད་ལས་གྲོལ་བར་འགྱུར། །བསྐལ་པ་བྱེ་བ་སྟོང་ཕྲག་ཏུ། །བློ་ལྡན་སངས་རྒྱས་བསྙེན་བཀུར་བྱས། །རས་རིས་ཐ་མ་མཐོང་བ་ཡི། །བཅུ་དྲུག་ཆར་ཡང་མི་ཕོད་དོ། །སངས་རྒྱས་སྐྱོབ་པ་ཐམས་ཅད་ལ། །མཆོད་བྱས་བསོད་ནམས་གང་ཡིན་དེ། །རས་རིས་ཆུང་ངུ་མཐོང་བ་ལ། །མཁས་པས་དེ་ཡི་བསོད་ནམས་ཐོབ། །མཛེས་པ་ཡི་ནི་ལས་རྣམས་དང་། །ལོངས་སྤྱོད་རྒྱུར་ཡང་འདི་སྤྱོད་དོ། །རིག་དང་གསང་སྔགས་ཇི་སྙེད་པ། །ཚངས་དབང་དྲང་སྲོང་གིས་བཤད་དང་། །ནམ་མཁའ་ལྡིང་གིས་གང་བཤད་དང་། །ཆུ་ལྷ་ཉི་མ་ལུས་ངན་དང་། །ནོར་སྦྱིན་སོགས་དང་སྲིན་པོ་དང་། །ལྷ་མིན་དབང་པོ་ཐམས་ཅད་དང་། །ལྟོ་འཕྱེ་ཆེ་དང་ཟླ་བ་དང་། །རླུང་དང་གཤིན་རྗེ་ལ་སོགས་དང་། །སེང་གེ་འཕྲོག་བྱེད་སོགས་བཤད་པའི། །སྔགས་རྣམས་ཐམས་ཅད་འདིར་དྲངས་ཏེ། །རས་རིས་སྤྱན་སྔར་འགྲུབ་པར་འགྱུར། །ཞི་བ་ཅན་དང་དེ་བཞིན་དུ། །རྒྱས་པ་ཅན་རྣམས་བྱ་བ་སྟེ། །དེ་བཞིན་འདིར་ནི་མི་བཟད་པ། །རྒྱལ་མཆོག་གིས་སྨད་སྤང་བར་བྱ། །ཞེས་བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་ལས་བཅོམ་ལྡན་འདས་འཕགས་མ་སྒྲོལ་མའི་རྩ་བའི་ཆོ་ག་བཞི་པ་རས་རིས་ཀྱི་ཆོ་ག་རབ་འབྱམ་རྫོགས་སོ།། །།དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་སྟན་ལས་ལངས་ཏེ་བཅོམ་ལྡན་འདས་ཤཱཀྱ་ཐུབ་པ་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་ཞབས་ལ་ཕྱག་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཆོས་ཀྱི་རྣམ་གྲངས་འདི་གསུངས་པ་ནི་ལེགས་སོ་ལེགས་སོ། །རིག་པའི་བརྟུལ་ཞུགས་ཐམས་ཅད་དཔྱད་པའི་དོན་དང་། ཕན་པའི་ཕྱིར་དང་། བདེ་བའི་ཕྱིར་དང་། འཇིག་རྟེན་ལ་སྙིང་བརྩེ་བས་བྱང་ཆུབ་སེམས་དཔའི་ཐབས་ལ་མཁས་པ་བསྟན་པ། མྱ་ངན་ལས་འདས་པའི་གྲོང་ཁྱེར་དུ་འགྲོ་བར་
བྱེད་པའི་ཆོས་ལྷག་མ་དང་བཅས་པ་ངེས་པར་བྱང་ཆུབ་ལ་རྒྱུན་དུ་མཆོག་ཏུ་གཞོལ་བ། བྱང་ཆུབ་སེམས་དཔའ་རྣམས་ཀྱིས་རིག་པ་དང་། སྔགས་ཀྱི་སྤྱོད་པ་ཐམས་ཅད་ཀྱི་དོན་སྒྲུབ་པར་བྱེད་པ་བདག་གི་རིག་པ་གསང་ཆེན་འདི་ཉིད་སྐྱེ་བོ་ཐམས་ཅད་རྒྱས་པར་བྱེད་པར་འགྱུར་བ་མ་འོངས་པའི་དུས་འཇིག་རྟེན་གྱི་བླ་མར་མྱ་ངན་ལས་འདས་པ་ན་དེ་བཞིན་གཤེགས་པ་ཉི་མའི་རིགས་ནུབ་པ་སངས་རྒྱས་དང་བྱང་ཆུབ་སེམས་དཔའ་དང་། རང་སངས་རྒྱས་དང་། འཕགས་པ་ཉན་ཐོས་ཐམས་ཅད་ཀྱིས་སྤངས་ཤིང་ཐམས་ཅད་བོར་ཏེ་མུན་པར་གྱུར་པ་དང་། སྣོད་ཀྱི་འཇིག་རྟེན་རྣམ་པར་ཞིག་སྟེ་འཕགས་པའི་ལམ་དང་། རིག་པ་དང་། སྔགས་དང་། སྨན་དང་། ནོར་བུ་རིན་པོ་ཆེ་ཐམས་ཅད་དང་བྲལ་བ། སྐྱེ་བོ་ལེགས་པས་ཡོངས་སུ་བཟུང་བའི་སྣང་བ་མེད་པའི་སེམས་ཅན་གྱི་ཁམས་འབྱུང་བར་འགྱུར་ཏེ། ལེ་ལོ་ཅན་དང་། དྲན་པ་ཉམས་པ་དང་། མ་དད་པ་དང་། མི་སྲུན་པ་དང་། མི་དགེ་བའི་བཤེས་གཉེན་གྱིས་ཡོངས་སུ་ཟིན་པ་སྒྱུ་དང་གཡོ་དང་། བརྫུན་དང་གཡོ་བའི་སྤྱོད་པ་དང་ལྡན་པ་དེ་རྣམས། ཆོས་ཀྱི་རྣམ་གྲངས་འདི་ཐོས་ནས་ཀུན་དུ་སྐྲག་པར་འགྱུར་ཏེ། ལེ་ལོ་དང་། སྙོམ་ལས་ལ་མངོན་པར་དགའ་ཞིང་དད་པ་མེད་པར་འགྱུར་ཏེ། འདོད་པ་ཚོལ་ཞིང་གསང་སྔགས་ཚོལ་བར་མི་འགྱུར་ཏེ། ལོག་པར་ལྟ་བ་ལ་དགའ་བ་རྣམས་ཀྱང་བསོད་ནམས་མ་ཡིན་པ་མང་པོ་ལ་འཇུག་པར་འགྱུར་ཏེ། དམ་པའི་ཆོས་སྤོང་བར་བྱེད་པ་འབྱུང་བར་འགྱུར་རོ། །མནར་མེད་པ་ལ་མཆོག་ཏུ་གཞོལ་ཞིང་དྲག་པོའི་ཡང་དྲག་པོར་འགྲོ་བ་སྡུག་བསྔལ་གྱིས་གདུངས་པ་དེ་རྣམས་ཀྱི་དོན་གྱི་ཕྱིར་དང་། དབང་དུ་མ་གྱུར་པ་རྣམས་དབང་དུ་གྱུར་པར་བྱ་བ་དང་། དབང་དུ་གྱུར་པ་རྣམས་ལ་མི་འཇིགས་པ་རབ་ཏུ་སྦྱིན་པ་དང་། ཐབས་ལ་མཁས་པས་བསྡུ་བའི་སྦྱོར་བ་རིག་པ་དང་། རས་རིས་ཀྱི་ཆོ་ག་ད་ལྟ་གསུངས་པའི་དུས་ལ་བབ་པར་དགོངས་ན་བཅོམ་ལྡན་འདས་གསུང་དུ་གསོལ། །དེ་སྐད་ཅེས་གསོལ་པ་དང་། བཅོམ་ལྡན་འདས་མཆོག་ཏུ་གསང་བ་རིག་པའི་བརྟུལ་ཞུགས་ཀྱི་ཆོ་ག་རབ་འབྱམ་མཆོག་ཏུ་
གསང་བ་འདོད་པའི་དོན་བྱེད་པ་དོན་ཆེན་པོ་རྣམ་པར་འབྱོར་པར་གྱུར་པ་རིག་པ་བདུན་ཅུ་པོ་ཐམས་ཅད་ཀྱི་མཆོག་གི་སྙིང་པོ། རྣམ་པར་རྟོག་པ་མེད་པའི་དུས་དེར་འགྲུབ་པར་འགྱུར་རོ། །དེ་ཡང་སེམས་ཅན་རྣམས་འདུལ་བའི་དོན་གྱི་ཐབས་ལ་མཁས་པས་འཁོར་བར་ཀུན་དུ་འཇུག་པ་རྣམས་སྐྱོབ་པ། ངེས་པར་བྱང་ཆུབ་ལ་མཆོག་ཏུ་གཞོལ་བར་བྱེད་པ་སངས་རྒྱས་བྱེ་བ་ཕྲག་བདུན་ཅུ་རྩ་དྲུག་གིས་གསུངས་པར་གྱུར་པ། འདི་ལ་རིག་པ་ནི། ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཏཱ་རེནྡྲ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། འཕགས་མ་སྒྲོལ་མ་ཤིན་ཏུ་རྒྱས་པ་ཞེས་བྱ་བའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཏཱ་རེ་ཏུ་རེ་ཏུ་རེ་སྭཱ་ཧཱ། འཕགས་མ་སྒྲོལ་མ་བཞིན་བཟང་མ་ཞེས་བྱ་བའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། འཕགས་མ་སྒྲོལ་མ་དབུས་ལེགས་མ་ཞེས་བྱ་བའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཏདྱ་ཐཱ། ཏཱ་རེ་ཏུཏྟ་རེ་ཏུ་རེ་སྭཱ་ཧཱ། འཕགས་མ་སྒྲོལ་མ་ལེགས་སྤྱོད་མ་ཞེས་བྱ་བའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། འཕགས་མ་སྒྲོལ་མ་མཚན་ལེགས་མ་ཞེས་བྱ་བའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཏ་རེ་ཏུ་རེ་ཏུ་རེ་སྭཱ་ཧཱ། འཕགས་མ་སྒྲོལ་མ་ལྷོ་ཆུང་མ་ཞེས་བྱ་བའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཏཱ་རེ་ཏུཏྟཱ་རེ་ཏུ་རེ་ཏུ་རེ་སྭཱ་ཧཱ། འཕགས་མ་སྒྲོལ་མ་ལེགས་གནས་མ་ཞེས་བྱ་བའོ། །ན་མོ་རཏྣ་ཏཱ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཏཱ་རེ་ཏུཏྟཱ་རེ། ཏུ་རེ་ཏུ་རེ་སྭཱ་ཧཱ། འཕགས་མ་སྒྲོལ་མ་ཉེ་བར་འདུད་པ་ཞེས་བྱ་བའོ། །ཞེས་པ་འདི་བཅོམ་ལྡན་འདས་བདག་གི་རིག་པ་
ཆེན་པོ་མཆོག་གི་སྙིང་པོ་ཆེན་པོ་དང་མཚུངས་པ་བྱ་བ་ཐམས་ཅད་མཆོག་ཏུ་གྲུབ་པ། སེམས་ཅན་ཐམས་ཅད་ལ་སངས་རྒྱས་བཞིན་དུ་སྐྱེས་པ། སངས་རྒྱས་ཐམས་ཅད་ཀྱིས་རྗེས་སུ་ཡི་རང་བ། འཇིགས་པ་ཆེན་པོ་བརྒྱད་ལས་སྐྱོབ་པ། ལས་ཐམས་ཅད་བྱེད་པ། བྱང་ཆུབ་ཀྱི་ལམ་སྟོན་པ་པོ། །པདྨའི་རིགས་ཀྱི་རིག་པ། རབ་དང་། འབྲིང་དང་། ཐ་མ་ལ་ཡང་དག་པར་རབ་ཏུ་སྦྱོར་བ། ཤིན་ཏུ་མཛེས་པའི་ལས་ཀྱི་འབྲས་བུ་རྣམ་པར་སྨིན་པ། རབ་ཏུ་སྦྱིན་པ་དང་། བསྟན་པ་ནུབ་པའི་དུས་ཀྱི་ཚེའང་འགྲུབ་པར་འགྱུར་རོ། །དམ་པའི་ཆོས་ཀྱི་ཚུལ་བསྲུང་བའི་ཆེད་དུ། མཉམ་པར་འཇུག་ཅིང་འགྲུབ་པར་འགྱུར་རོ། །དེ་རྣམས་སྦྱོར་བ་ཆུང་ངུ་ཉིད་ཀྱིས་རྒྱལ་སྲིད་ཆེན་པོ་དང་། ལོངས་སྤྱོད་ཆེན་པོའི་དབང་ཕྱུག་གི་དོན་དེ་རྣམས་འགྲུབ་པར་འགྱུར་རོ། །དེ་རྣམས་ཤིན་ཏུ་མྱུར་བར་དེའི་ཚེ་དེའི་དུས་སུ་དངོས་གྲུབ་ཐོབ་པར་འགྱུར་རོ། །རས་རིས་ཀྱི་ཆོ་ག་མདོར་བསྡུས་པར་གྱུར་པ་འདི་དེའི་ཚེ་དེའི་དུས་ན་འཇིགས་པ་ཆེན་པོ་དང་། སྙིགས་མ་ལྔའི་སེམས་ཅན་བསོད་ནམས་ཆུང་བ་འབྱུང་བར་འགྱུར་ཏེ། དབང་ཆུང་བར་གྲགས་པ། ཚེ་ཐུང་བ། བརྩོན་འགྲུས་ཞན་པས་རས་རིས་ཀྱི་ཆོ་ག་ཤིན་ཏུ་རྒྱས་པའི་ལས་བསྒྲུབ་པར་བྱ་བ་ལ་སོགས་པའི་ལས་རྣམས་རབ་ཏུ་བརྩོན་པར་མི་ནུས་ཏེ། དེ་རྣམས་ཀྱི་དོན་དུ་ཆེས་མདོར་བསྡུས་ཏེ་གསུངས་པ་ནི། དང་པོ་རེ་ཞིག་དཔའ་བོའི་རིན་གྱིས་དོག་པ་ཉོས། སྲང་ཚད་ཙམ་མམ་སྲང་ཕྱེད་ཙམ། དཀྱུས་སུ་ཁྲུ་གང་ཙམ་ལ་ཞེང་དུ་ཁྲུ་ཕྱེད་ཙམ་པའི་རས་ཁ་ཚར་དང་བཅས་པ་ཐ་ག་པས་བཏག་པར་བྱའོ། །ཡང་ན་སླར་ཡང་སྐྲ་དང་བྲལ་བའི་རས་ཀྱི་དུམ་བུ་གསར་པ་སྟེང་འོག་ཏུ་ཇི་ལྟར་འདོད་པ་ཁྲུ་གཉིས་སམ་བཞིའམ། དྲུག་གམ། ལྔའམ། བཅུའམ། བརྒྱད་པའི་རས་ཤིན་ཏུ་དཀར་བ་བླངས་ཏེ། ཇི་ལྟར་འདོད་པ་བཞིན་དུ་རི་མོ་མཁན་འདྲིར་གཞུག་པར་བྱའོ། །ཙནྡན་དང་ག་པུར་དང་གུར་གུམ་གྱིས་བསྒོས་པའི་མ་འདྲེས་པའི་ཚོན་རྩི་དེ་རྣམས་དང་། རས་ཙནྡན་དང་། གུར་གུམ་དང་། ག་པུར་རྣམས་གཅིག་ཏུ་བྱས་པས་སྲོག་ཆགས་མེད་པའི་ཆུ་རྙོག་མ་མེད་པ་དང་བསྲེས་ཏེ། སྣོད་གསར་པར་
རས་སྦང་དུ་བཅུག་ནས་ཉི་མ་གསུམ་དུ་ལེགས་པར་མནན་ལ་བཞག་གོ། །གཙང་བའི་ཕྱོགས་སུ་སྲུང་བ་བྱས་ཏེ་བདག་ཉིད་ཀྱང་གཙང་མར་བྱས་ནས། དཀར་པོའི་ཕྱོགས་ཀྱི་ཉ་ལ་རས་ཀྱི་སྣོད་ཀྱི་མདུན་དུ་ཁ་ཤར་དུ་ཕྱོགས་པས་ཀུ་ཤའི་ཁྲེས་ལ་ཉེ་བར་འདུག་སྟེ། སྔགས་ཀྱི་ཚིག་འདི་ལན་སྟོང་ཕྲག་བརྒྱད་བརྗོད་པར་བྱའོ། །ཏདྱ་ཐཱ། ཨོཾ་ཧེ་ཧེ་བྷ་ག་བཱ་ན། བ་ཧུ་རཱུ་པ་དྷ་ར་དི་བྱ་ཙཀྵུ་ཥ། ཨ་བ་ལོ་ཀ་ཡ། ཨ་བ་ལོ་ཀ་ཡ་མཱཾ། ས་མ་ཡ་མ་ནུ་སྨ་ར། ཀུ་མཱ་ར་རཱུ་པ་དྷ་ར་ཎ། མ་ཧཱ་བོ་དྷི་སཏྭ། ཀིཉྩ་ར་ཡ་སི་ཧཱུྃ་ཕཊ་ཕཊ་སྭཱ་ཧཱ། སྔགས་འདི་བཟླས་པ་བྱས་ལ་དེ་ཉིད་དུ་ཉལ་བར་བྱའོ། །རྨི་ལམ་དུ་གྲུབ་པའམ། མི་འགྲུབ་པར་སྟོན་པར་འགྱུར་རོ། །དེ་ནས་ལངས་ནས་གྲུབ་པའི་མཚན་མའི་རྨི་ལམ་མཐོང་ན། རིང་པོ་མི་ཐོགས་པར། རས་རིས་བྲི་བར་བྱའོ། །གལ་ཏེ་གྲུབ་པའི་མཚན་མའི་རྨི་ལམ་མ་མཐོང་ན་རས་དེ་སྣོད་དེ་ནས་ཕྱུང་སྟེ་ཉི་མ་ལ་བསྐམ་པར་བྱའོ། །བསྐམས་ནས་སླར་ཡང་སྣོད་གསར་པ་གཞན་ཞིག་ཏུ་ལེགས་པར་སྦས་ལ་སྲུང་བ་བྱས་ཏེ་གཞག་པར་བྱའོ། །དེ་ནས་སླར་ཡང་མཆོག་གི་སྙིང་པོ་དེ་རྣམས་ལས་སྔགས་གང་ཡང་རུང་བ་གཅིག་བཟུང་ནས་ཇི་ལྟར་འདོད་པ་བཞིན་དུ་ཡི་གེ་དྲུག་པོ་རྣམས་ལས་སླར་ཡང་ཡི་གེ་འབུམ་བཟླས་པར་བྱའོ། །དེ་ནས་ཆེས་མྱུར་བར་རས་རིས་འགྲུབ་པར་འགྱུར་རོ། །དང་པོ་རེ་ཞིག་རས་དེ་བླངས་ནས། ཆོ་འཕྲུལ་གྱི་ཟླ་ཕྱེད་དམ། གཞན་ཡང་དཀར་པོའི་ཉི་མ་དང་། རྒྱུ་སྐར་དགེ་བ་དང་། ཡང་དག་པར་ལྡན་པ། དགེ་བའི་ཚེས་དཀར་པོའི་གཟའི་རེས་ཀྱི་ཉི་མ་ལ་ཤིན་ཏུ་མཛེས་པའི་དགེ་མཚན་དང་། བཀྲ་ཤིས་ཕུན་སུམ་ཚོགས་པའི་མཚན་མོ་ནམ་ཕྱེད་ཀྱི་དུས་ཀྱི་ཚེ། རི་མོ་མཁན་གསོ་སྦྱོང་ལ་ཉེ་བར་གནས་པས་རས་རིས་དེ་འདྲིར་གཞུག་པར་བྱའོ། །གཙང་མའི་ཕྱོགས་སུ་ག་པུར་གྱི་བདུག་པ་བསྲེགས་ཏེ་དང་པོ་རེ་ཞིག་འཕགས་པ་སྤྱན་རས་གཟིགས་དབང་ཕྱུག་སྐུ་རྒྱན་ཐམས་ཅད་ཀྱིས་བརྒྱན་པ་བྱས་ཏེ། དབུ་ཟུར་ཕུད་ཅན་སྐྱེས་བུ་ཆེན་པོའི་མཚན་གྱིས་རྣམ་པར་བརྒྱན་པ། གསེར་གྱི་མདོག་ཅན། དར་ལ་སྔོན་པོ་གཡོ་བཞིན་པའི་ཤམ་ཐམས་ཅད་དར་ལ་སྔོན་པོའི་བླ་
གོས་མནབས་པ། སེང་གེའི་ཁྲིལ་སྐྱིལ་ཐུང་ཕྱེད་པས་བཞུགས་ཏེ་ཆོས་འཆད་བཞིན་པ། ཞབས་གཡས་པ་རིན་པོ་ཆེའི་ཞབས་རྟེན་ལ་བཞག་པ། སེང་གེའི་ཁྲི་ལ་བཞུགས་པ། རྣམ་པ་ཐམས་ཅད་ཀྱི་མཆོག་དང་ལྡན་པ། བལྟ་ན་སྡུག་པ་བཞིན་ཅུང་ཟད་འཛུམ་པ། སྒྲུབ་པ་པོ་ལ་གཟིགས་པར་གྱུར་པ་བྲི་བར་བྱའོ། །གཡས་ཀྱི་གཞོགས་སུ་འཕགས་པ་ཀུན་དུ་བཟང་པོ་པྲི་ཡང་ཀུ་ལྟར་སྔོ་བསངས། རྔ་ཡབ་དཀར་པོ་གཡོབ་བཞིན་པ། ཕྱག་གཡོན་ན་ཡིད་བཞིན་གྱི་ནོར་བུ་བསྣམས་པ། ལུས་ཐམས་ཅད་མཛེས་པ། རྒྱན་ཐམས་ཅད་ཀྱིས་བརྒྱན་པ། དར་ལ་སྔོན་པོ་གཡོ་བ་དང་བཅས་པའི་ཤམ་ཐབས་མནབས་པ། མུ་ཏིག་གི་དོ་ཤལ་གྱི་མཆོད་ཕྱིར་ཐོགས་པ་ཅན། ཕྱག་གཡོན་པས་པདྨ་དཀར་པོ་བསྣམས་པ། ཕྱག་གཡས་པས་རྔ་ཡབ་དཀར་པོ་གསེར་གྱི་ཡུ་བ་ཅན་བསྣམས་ནས་གཡོབ་པར་བྱེད་བཞིན་པ་ཞི་བའི་རྣམ་པ་ཅན་སྤྱན་རས་གཟིགས་དབང་ཕྱུག་ལ་བལྟ་བར་གྱུར་པའོ། །དེ་བཞིན་དུ་འཕགས་པ་ཀུན་དུ་བཟང་པོ་པདྨ་དཀར་པོའི་གདན་ལ་བཞུགས་པ་སྟེ་དེ་དག་གཉིས་ཀའང་དེ་ལྟར་མངོན་པར་བྲིའོ། །པདྨའི་སྡོང་བུ་གཅིག་ལས་འཐོན་པའི་པདྨ་གསུམ་གྱི་དབུ་མ་རྩ་བའི་པདྨའི་ཟེ་འབྲུ་ལ་བྱང་ཆུབ་སེམས་དཔའ་ཆེན་པོའི་སེང་གེའི་ཁྲི་དང་རིན་པོ་ཆེའི་ཞབས་རྟེན་ནོ། །པདྨ་གཞན་ལ་ནི་འཕགས་པ་ཀུན་དུ་བཟང་པོའོ། །པདྨ་གསུམ་པ་ལ་ནི་འཕགས་པ་མཐུ་ཆེན་ཐོབ་བོ། །པདྨའི་སྡོང་བུ་དེ་ནི་མཛེས་པ། རིན་པོ་ཆེ་མར་གད་ཀྱི་རྣམ་པ་ལ་པདྨའི་མེ་ཏོག་དུ་མ་ཁ་བྱེ་བ་དང་། ཕྱེད་ཙམ་ཁ་བྱེ་བ་དང་། མེ་ཏོག་ཁ་མ་བྱེ་བ་དང་ལྡན་པ། མཚོ་ཆེན་པོ་མ་དྲོས་པ་ལས་བྱུང་བའི་ཀླུའི་རྒྱལ་པོ་དགའ་བོ་དང་ཉེ་དགའ་གཉིས་མཚོ་ཆེན་པོ་ལས་སྐྱེས་པའི་པདྨའི་སྡོང་བུ་ལ་འཛིན་པ། ཀླུའི་རྒྱལ་པོ་དེ་གཉིས་ཁ་དོག་དཀར་བ། གདེངས་ཀ་བདུན་གྱིས་བརྒྱན་པ། རྒྱན་ཐམས་ཅད་ཀྱིས་མཛེས་པ། ལུས་ཕྱེད་མིའི་ལུས་ལ་སྦྲུལ་གྱི་གདེངས་ཀས་མཚན་པ། ཕྱེད་སྦྲུལ་གྱི་ལུས་ཅན་འཕགས་པ་སྤྱན་རས་གཟིགས་དབང་ཕྱུག་ལ་ངེས་པར་རྟོག་བཞིན་པ། ཕྱེད་ཆུའི་
ནང་དུ་ནུབ་པ། ནོར་བུ་རིན་པོ་ཆེ་དང་གོས་ཀྱིས་ཉེ་བར་མཛེས་པ་བྲི་བར་བྱའོ། །མཚོ་ཆེན་པོ་དེའི་ཁོར་ཡུག་གི་འོག་ཏུ་རས་རིས་ཀྱི་མཐའི་གྲྭ་གཡས་ཀྱི་གཞོགས་སུ་སྒྲུབ་པ་པོ། འཕགས་པ་སྤྱན་རས་གཟིགས་དབང་ཕྱུག་གི་ཞབས་ཀྱི་དཀྱིལ་འཁོར་ལ་ངེས་པར་རྟོག་བཞིན་པ་ལག་ན་སྤོས་ཕོར་ཐོགས་པ་ལུས་དང་པུས་མོའི་ལྷ་ང་འདུད་པ། ཆ་བྱད་དང་ཁ་དོག་ཇི་ལྟ་བ་བཞིན་དུ་མངོན་པར་བྲིའོ། །འཕགས་པ་སྤྱན་རས་གཟིགས་དབང་ཕྱུག་གི་སྟེང་དུ། རས་ཀྱི་མཐའ་གཉིས་སུ་ལྷའི་བུ་ཕྲེང་བ་འཛིན་པ་གཉིས་མེ་ཏོག་གི་ཕྲེང་བ་བཟུང་ནས་ནམ་མཁའ་ལ་ལྡིང་བ། མེ་ཏོག་གི་ཚོགས་ཆེན་པོ་འཐོར་བར་བྱེད་བཞིན་པ། ཤིན་ཏུ་མཛེས་པ་དག་མངོན་པར་བྲིའོ། །རས་རིས་དེའི་ཁོར་ཡུག་ཏུ་ནཱ་ག་གེ་སར་ལ་སོགས་པའི་མེ་ཏོག་རབ་ཏུ་བཀྲམ་པ་བྲི་བར་བྱ་སྟེ། ཇི་ལྟར་འདོད་པའི་གཟུགས་གསུམ་ལྷག་པར་གནས་པའམ། མངོན་པར་བྲིའོ། །འཕགས་པ་སྤྱན་རས་གཟིགས་དབང་ཕྱུག་ཆོས་སྟོན་པར་མཛད་བཞིན་པ་དང་། འཕགས་པ་ཀུན་དུ་བཟང་པོ་དང་། འཕགས་པ་ཕྱག་ན་རྡོ་རྗེ་ཕྱག་ན་རྔ་ཡབ་ཐོགས་པ་འདྲིར་གཞུག་པར་བྱའོ། །སྒྲུབ་པ་པོ་ཇི་ལྟར་འདོད་པའི་གཟུགས་གསུམ་པོ་རྣམས་གདོན་མི་ཟ་བར་འདྲིར་གཞུག་པར་བྱ་སྟེ་ཇི་ལྟར་འདོད་པའི་རྣམ་པ་དང་། དབྱིབས་ཇི་ལྟར་གནས་པ་བཞིན་དུའམ། སྒྲུབ་པ་པོ་ཇི་ལྟ་ཇི་ལྟར་འདོད་པ་དེ་ལྟ་དེ་ལྟར་བྲི་བར་བྱའོ། །དབུས་སུ་བྱང་ཆུབ་སེམས་དཔའ་སེམས་དཔའ་ཆེན་པོ། མཐའ་གཉིས་སུའང་། ཕྱག་ན་རྡོ་རྗེ་དང་། ཀུན་དུ་བཟང་པོ་ཇི་ལྟར་འདོད་པ་བཞིན་དུ་གདོན་མི་ཟ་བར་འདྲིར་གཞུག་པར་བྱའོ། །ཇི་ལྟར་རྙེད་པའི་རས་ཀྱི་དུམ་བུ་མཐོ་གང་ངམ། ཁྲུ་གང་ཙམ་ལ་བདག་ཉིད་དམ། གཞན་གྱིས་སམ། རི་མོ་མཁན་གསོ་སྦྱོང་མེད་པའམ། དད་པ་ཅན་ནམ། གཙང་མའམ། མི་གཙང་བའམ། ཚུལ་ཁྲིམས་དང་ལྡན་པའམ། ཚུལ་ཁྲིམས་འཆལ་པའང་རུང་སྟེ། རི་མོ་མཁན་གྱིས་འདྲིར་གཞུག་པར་བྱའོ། །སྒྲུབ་པ་པོ་བདག་ཉིད་ནི། གདོན་མི་ཟ་བར་སྔོན་སྤྱད་པ་བྱས་པ། དད་པས་བྱང་
ཆུབ་ཏུ་སེམས་བསྐྱེད་པ་གདོན་མི་ཟ་བར་འགྱུར་བས་ཏེ། དེ་ལྟར་ན་སྔགས་འགྲུབ་པར་འགྱུར་གྱི་གཞན་དུ་སྡིག་པ་བྱེད་པས་ནམ་ཡང་མ་ཡིན་ནོ། །དེ་ལྟར་དད་པར་གྱུར་པ་ཡིས། །སྔགས་ཀྱི་ལྷ་རྣམས་བསྒྲུབ་བྱ་ཞིང་། །དད་པ་དེ་ཡིས་གསང་སྔགས་རྒྱལ། །འགྲུབ་འགྱུར་འདིར་ནི་གཞན་དུ་མིན། །གང་ཕྱིར་དད་པ་ཐེག་པའི་མཆོག །གང་གིས་འདྲེན་པ་འགྲོ་བར་བྱེད། །དད་པ་མེད་པའི་མི་རྣམས་ལ། །དཀར་པོའི་ཆོས་རྣམས་མི་སྐྱེ་སྟེ། །ས་བོན་མེ་ཡིས་ཚིག་པ་ལས། །མྱུ་གུ་སྔོན་པོ་ཇི་བཞིན་ནོ། །དད་དང་ལྡན་པའི་མི་རྣམས་ལ། །སངས་རྒྱས་ལས་རྣམས་འགྲུབ་པར་འགྱུར། །ལྟ་རྣམས་ཀུན་དང་ཁྱད་པར་དུ། །གསང་སྔགས་རྣམས་ནི་ཐམས་ཅད་ནི། །དད་པ་མེད་ན་མི་འགྲུབ་བོ། །འཇིག་རྟེན་པ་ཡི་ལྷ་རྣམས་དང་། །གང་ཡང་འཇིག་རྟེན་འདས་དེ་བཞིན། །དད་དང་ལྡན་པར་བརྗོད་པ་དང་། །རྙོག་པ་བྲལ་བས་འགྲུབ་པར་འགྱུར། །ཡིད་ནི་བྱང་ཆུབ་དེར་སོན་པས། །དེ་རྣམས་བྱང་ཆུབ་ངེས་པར་འགྲུབ། །གཞན་གྱིས་འགྲུབ་པར་མ་གསུངས་ཏེ། །བསྟན་པ་འདི་ལས་ཟློག་པ་ཡིན། །རས་རིས་ཆུང་དང་ཆེན་པོ་དང་། །བར་མ་ཡོངས་སུ་བསྒྲགས་པ་ཡིན། །ལས་རྣམས་ཐམས་ཅད་སྒྲུབ་བྱེད་པ། །དེ་ནི་རབ་ཏུ་བཤད་པར་བྱ། །བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་ལས་བཅོམ་ལྡན་འདས་མ་འཕགས་མ་སྒྲོལ་མ་རལ་པ་གྱེན་བརྫེས་ཀྱི་ཆོ་ག་ལས་རས་རིས་ཀྱི་ཆོ་ག་རབ་འབྱམ་ལྔ་པ་རྫོགས་སོ།། །།དེ་ནས་ཡང་བཅོམ་ལྡན་འདས་ཤཱཀྱ་ཐུབ་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་བཀའ་སྩལ་པ། སེམས་ཅན་ཆེན་པོ་ཁྱོད་ཀྱིས་སེམས་ཅན་དེ་རྣམས་ཀྱི་དོན་གྱི་ཕྱིར་བསྟན་པ་གང་ཡིན་པ་དེ་རྣམས་རས་རིས་ཀྱི་ཆོ་ག་རབ་འབྱམ་བཤད་པ་འདི་ཐབས་ཉུང་ངུ་ཉིད་ཀྱིས་འགྲུབ་པར་འགྱུར་ཏེ་དེ་རྣམས་ཀྱི་དོན་གྱི་ཕྱིར་སྒྲུབ་པར་བྱེད་པ་ཐབས་ཡོན་ཏན་རྒྱས་པ་རབ་ཏུ་དབྱེ་བས་རྣམ་པར་ཕྱེ་བ་ལས་རྣམ་པར་དབྱེ་བ་དེ་ཡང་དག་པར་མཐུན་པར་བཤད་པར་བྱའི། དེ་ལེགས་པར་ཉོན་ལ། ལེགས་པར་ཡིད་ལ་གྱིས་ཤིག་སེམས་ཅན་ཐམས་ཅད་ཀྱི་དོན་གྱི་ཕྱིར་བཤད་པར་བྱའོ། །དེ་
ནས་ཡང་བྱང་ཆུབ་སེམས་དཔས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་འབྱོར་བ་བསྟན་པར་མཛད་ཅིང་སྔགས་ཀྱི་སྤྱོད་པའི་ཡོན་ཏན་སྒྲུབ་པའི་མཐུ་གསལ་བར་མཛད་པ་ལེགས་པར་གསུངས་པ་ནི་ལེགས་སོ། །བཅོམ་ལྡན་འདས་གང་ད་ལྟ་དེའི་དུས་ལ་བབ་པར་དགོངས་ནས་བདག་ཅག་ལ་ཐུགས་བརྩེ་བའི་སླད་དུ་བཀའ་སྩལ་དུ་གསོལ། དེ་ནས་བཅོམ་ལྡན་འདས་ཤཱཀྱ་ཐུབ་པས་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ལ་གཟིགས་ནས་འཛུམ་པ་མཛད་དོ། །དེ་ནས་བཅོམ་ལྡན་འདས་ཤཱཀྱ་ཐུབ་པའི་ཞལ་གྱི་སྒོ་ནས་འོད་ཟེར་སྔོན་པོ་དང་། སེར་པོ་དང་། དཀར་པོ་དང་། བཙོད་དང་། ཤེལ་གྱི་ཁ་དོག་ལ་སོགས་པ་བྱུང་བར་གྱུར་ཏོ། །འོད་ཟེར་དེ་བྱུང་མ་ཐག་ཏུ་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་སྣང་བར་བྱས་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་གནས་ཐམས་ཅད་སྤ་བཀོད་པར་མཛད་ནས། རྒྱུ་སྐར་གྱི་འོད་དང་། རིའི་ལྷའི་ཚོགས་ཀྱི་འོད་དང་། གང་དུ་ཟླ་བ་དང་ཉི་མ་འདི་ལྟར་མཐུ་ཆེ་ཞིང་རྫུ་འཕྲུལ་ཆེ་བ་དེ་དག་གི་འོད་ཀྱང་སྤ་བཀོད་པར་མཛད་ནས་དེ་རྣམས་མི་གསལ་ཞིང་འོད་མེད་པར་གྱུར་ཏེ་རྣམ་པར་སྣང་བར་མི་འགྱུར་ཞིང་སྤ་བཀོང་བར་མཛད་དེ་ནོར་བུ་དང་སྔགས་དང་སྨན་དང་རིན་པོ་ཆེའི་འོད་ཐམས་ཅད་མེད་པར་བྱས་ནས་སླར་ཡང་བཅོམ་ལྡན་འདས་ཤཱཀྱ་ཐུབ་པའི་ཞལ་གྱི་སྒོར་ནུབ་པར་གྱུར་ཏོ། །དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་འཁོར་གྱི་དཀྱིལ་འཁོར་དེ་ཉིད་ན་འདུས་ཤིང་འཁོད་པར་གྱུར་པ་དེ་སྟན་ལས་ལངས་ནས། རིངས་པའི་ཚུལ་གྱིས་བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །སངས་རྒྱས་བཅོམ་ལྡན་འདས་རྣམས་ནི་རྒྱུ་མ་མཆིས་རྐྱེན་མ་མཆིས་པར་འཛུམ་པ་མི་མཛད་ན། བཅོམ་ལྡན་འདས་འཛུམ་པ་མཛད་པའི་རྒྱུ་གང་ལགས་རྐྱེན་གང་ལགས། དེ་སྐད་ཅེས་གསོལ་བ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་དེ་དེ་བཞིན་ནོ། །དེ་
དེ་བཞིན་ཏེ། དེ་བཞིན་གཤེགས་པ་ནི་ཇི་སྐད་སྨྲས་པ་དེ་བཞིན་དུ་རྒྱུ་མེད་རྐྱེན་མེད་པར་འཛུམ་པ་མི་མཛད་ཀྱི། རྒྱུ་ཡོད། རྐྱེན་ཡོད་དོ། །གང་ཞིག་མདོ་སྡེའི་དབང་པོ་བཅོམ་ལྡན་འདས་མ་འཕགས་མ་སྒྲོལ་མའི་རྩ་བའི་ཆོ་ག་རིག་པའི་སྤྱོད་པ་རྗེས་སུ་སྒྲུབ་པ་ལས་སྒྲུབ་པར་བྱེད་པའི་ཐབས་ལ་ཡང་དག་པར་གཞོལ་བ། ཆོས་ཀྱི་སྤྲིན་ལ་བརྟེན་ཅིང་ཡང་དག་པར་རྗེས་སུ་འཇུག་ཅིང་རྗེས་སུ་འབྲང་བར་བྱེད་པར་འགྱུར་བ་དང་། འཛིན་པར་འགྱུར་བ་དང་། ཀློག་པར་འགྱུར་བ་དང་། དད་པར་འགྱུར་བ་དང་། གླེགས་བམ་དུ་བྲི་བར་བྱས་ནས་མཆོད་པར་འགྱུར་བ་དང་། ཙནྡན་དང་། ཕྱེ་མ་དང་། བྱུག་པ་དང་། བདུག་པ་དང་། ཕྲེང་བ་དང་། གདུགས་དང་། རྒྱལ་མཚན་དང་། བ་དན་རྣམ་པ་སྣ་ཚོགས་པའམ། སིལ་སྙན་གྱི་རྣམ་པའི་ཁྱད་པར་རམ། རོལ་མོ་སྣ་ཚོགས་དང་། ཕེག་རྡོབ་པ་དང་། ཐ་ན་རྗེས་སུ་ཡི་རང་བ་དང་ལྡན་པའི་སེམས་རྒྱུན་དུ་ཐོབ་པའམ། སྤུ་ཟིང་ཞེས་བྱེད་པ་སྐྱེ་བར་བྱེད་པར་འགྱུར་བའམ། རིག་པའི་མཐུ་དང་ནུས་པ་ཐོས་ནས་དགའ་བ་སྐྱེ་བར་འགྱུར་བའམ། རྗེས་སུ་ཡི་རང་བར་འགྱུར་བའམ། སྤྱོད་པ་སོ་སོར་སྒྲུབ་པར་འགྱུར་བ་དེ་རྣམས་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏེ་དེ་རྣམས་ཐམས་ཅད་སངས་རྒྱས་བཅོམ་ལྡན་འདས་སུ་བྱེད་པར་འགྱུར་རོ། །དེ་ཉིད་ཀྱི་ཕྱིར་རྒྱལ་བ་འཛུམ་པ་མཛད་ཀྱིས་རྣམ་པ་གཞན་དུ་མ་ཡིན་ནོ། །དང་པོ་རེ་ཞིག་དམ་ཚིག་མཐོང་བ། སྔོན་སྤྱད་པ་རྣམས་བྱས་པ། མངོན་པར་དབང་བསྐུར་ཐོབ་པས། རྟོག་པའི་རྒྱལ་པོ་འདི་ལ་རྩ་བའི་རིག་པའམ། སྙིང་པོའམ། ཉེ་བའི་སྙིང་པོའམ། གཞན་གང་ཡང་རུང་བའི་སྔགས་བཟུང་ནས་ཡི་གེ་གཅིག་པའམ། ཇི་ལྟར་འདོད་པ་བཞིན་ཡང་རུང་སྟེ། དགོན་པ་ཆེན་པོར་སོང་ནས་ལོ་བདུན་དུ་བཟླས་པ་བྱ་སྟེ། འབྲས་བུ་དང་། ཆུའི་བཟའ་བ་དང་། རྩ་བ་དང་། འདབ་མ་བཟའ་ཞིང་། སྔོན་སྤྱོད་པ་རྣམས་བྱས་པར་འགྱུར་རོ། །དེ་ནས་རིའི་རྩེ་མོར་འཛེགས་ཏེ་རས་རིས་ཀྱི་ཐུ་བོ་ཞལ་ནུབ་དུ་ཕྱོགས་པར་བཞག་ནས། བདག་ཉིད་ཤར་དུ་མངོན་པར་ཕྱོགས་ཏེ། ཀུ་ཤའི་ཁྲེས་ལ་ཉེ་བར་
འདུག་ནས་པདྨ་དཀར་པོ་དང་། ཙནྡན་དཀར་པོ་དང་། གུར་གུམ་གྱིས་མངོན་པར་བཏགས་ཏེ། འབུམ་ཕྲག་གཅིག་བཅོམ་ལྡན་འདས་ཤཱཀྱ་ཐུབ་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་རང་སངས་རྒྱས་དང་། འཕགས་པ་ཉན་ཐོས་རྣམས་ཀྱི་རས་རིས་ཀྱི་འོག་ནས་དབུལ་བར་བྱའོ། །ག་བུར་གྱི་བདུག་པ་ཡང་ཇི་ལྟར་འབྱོར་པ་བསྲེག་གོ། །ལྷའི་བུ་རྣམས་ལ་ཇི་ལྟར་རྙེད་པའི་མེ་ཏོག་གིས་མཆོད་པ་བྱའོ། །དེ་ནས་ཆོ་འཕྲུལ་གྱི་ཕྱོགས་ཀྱི་དཀར་པོའི་ཉའམ། ཉ་སོ་སོ་ལ་མཚན་མོ་ཕྱེད་ཀྱི་དུས་ཀྱི་ཚེ་རས་རིས་ཀྱི་སྤྱན་སྔར་མེ་ཐབ་པདྨའི་རྣམ་པ་ལྟ་བུ་བྱས་ནས་ཙནྡན་དཀར་པོའི་ཤིང་གི་མེ་སྦར་ཏེ། གུར་གུམ་དང་ག་པུར་གཅིག་ཏུ་བྱས་ནས་སྲེག་བླུགས་ཇི་ལྟར་འབྱོར་པས་སྟོང་ཕྲག་བརྒྱད་སྦྱིན་སྲེག་བྱས་ཏེ། དེ་ནས་བསྲུང་བ་བྱའོ། །དེ་ནས་བཅོམ་ལྡན་འདས་ཤཱཀྱ་ཐུབ་པ་ལས་འོད་ཟེར་བྱུང་སྟེ། རས་རིས་ཀྱི་ཁོར་ཡུག་ཏུ་གཅིག་ཏུ་འབར་བར་གྱུར་པ་འབྱུང་ངོ་། །དེ་ནས་སྒྲུབ་པ་པོ་ཙནྡན་དང་། གུར་གུམ་གྱིས་བཏགས་པའི་པདྨ་དཀར་པོའི་མེ་ཏོག་གིས་མཆོད་ཡོན་དབུལ་ལོ། །དེ་ནས་སྒྲུབ་པ་པོས་རིངས་པའི་ཚུལ་གྱིས་རས་རིས་ལ་བསྐོར་བ་ལན་གསུམ་བྱས་ནས། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་དང་། རང་སངས་རྒྱས་འཕགས་པ་ཉན་ཐོས་རྣམས་ལ་ཕྱག་འཚལ་ནས་སྔར་སྒྲུབ་པ་པོས་བྲིས་པའི་རས་མཐའི་ཕྱོགས་ནས་འཇིགས་པ་མེད་པས་རས་རིས་གཟུང་བར་བྱའོ། །དེ་ནས་བཟུང་བ་ཙམ་གྱིས་འཕུར་བར་འགྱུར་ཏེ། སེ་གོལ་གཏོགས་པ་ཙམ་ལ་ཚངས་པའི་འཇིག་རྟེན་ལས་འདས་ཏེ། བདེ་བ་ཅན་གྱི་འཇིག་རྟེན་གྱི་ཁམས་སུ་ཀུན་དུ་གནས་པར་འགྱུར་རོ། །གང་དུ་བཅོམ་ལྡན་འདས་དེ་བཞིན་གཤེགས་པ་མེ་ཏོག་ཡང་དག་པར་སྐྱེས་པའི་དབང་གིས་རྒྱལ་པོ་དེ་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པར་བྱེད་པ་དང་། བསྐལ་པ་ཆེན་པོ་སྟོང་དུ་རྒ་བ་མེད་པ་དང་། འཆི་བ་མེད་པར་རོལ་པར་འགྱུར་རོ། །བྲིས་སྐུ་གནས་པ་དེ་ཉིད་དུ་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ། །དེ་རྣམས་ཀྱི་བྱིན་གྱིས་བརླབས་
ཀྱང་ཤེས་སོ། །ཞིང་སྟོང་ཕྲག་ཀྱང་འདའ་བར་བྱེད་དོ། །ལུས་སྟོང་ཕྲག་སྟོན་པར་བྱེད་དོ། །རྫུ་འཕྲུལ་གྱི་མཐུ་དུ་མ་ཡང་དག་པར་འབྱིན་པར་བྱེད་པར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་དགེ་བའི་བཤེས་གཉེན་དུ་འགྱུར་རོ། །ངེས་པར་བྱང་ཆུབ་ལ་གཞོལ་བར་འགྱུར་རོ། །བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་སྡེ་སྣོད། བཅོམ་ལྡན་འདས་མ་འཕགས་མ་སྒྲོལ་མ་རལ་པ་གྱེན་བརྫེས་ཀྱི་རྩ་བའི་ཆོ་ག་བྲིས་སྐུ་རབ་འབྱམ་ལས། མཆོག་གི་སྒྲུབ་པའི་ཐབས་ཀྱི་ཆོ་ག །ལས་ཀྱི་འབྲས་བུ་དྲུག་པ་རྫོགས་སོ།། །།དེ་ནས་ཡང་སེམས་དཔའ་ཆེན་པོས་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ན་འདུག་པའི་ལྷ་ཚོགས་རྣམས་ལ་བཀའ་སྩལ་པ། གྲོགས་པོ་དག་ཁྱེད་ཅག་ཉོན་ཅིག །ལས་ཆེན་པོ་དང་བཅས་པའི་རིག་པ་འཕགས་མ་སྒྲོལ་མའི་སྤྱོད་པའི་དཀྱིལ་འཁོར་སྒྲུབ་པར་བྱེད་པའི་ལས་ཀྱི་ཆོ་ག་སྒྲུབ་པ་པོ་སྲུང་བའི་དོན་དུ་གསང་བ་དམ་པ་མཆོག་གི་སྙིང་པོ་དེ་བཞིན་གཤེགས་པ་ཐམས་ཅད་ཀྱིས་གསུངས་པ་རིག་པའི་རྒྱལ་མོ་ཆེན་མོ་གང་གིས་བཟླས་ན་སྔགས་ཐམས་ཅད་བཟླས་པར་འགྱུར་རོ། །ཀྱེ་ཀྱེ་ལྷའི་ཚོགས་རྣམས་འདི་ནི་འདའ་བར་བྱེད་པ་མ་ཡིན་པའི་རིག་པའི་རྒྱལ་མོ་བྱང་ཆུབ་སེམས་དཔའ་ས་བཅུའི་དབང་ཕྱུག་ཀྱང་རིག་པ་འདིས་འགུགས་ཤིང་། དབང་དུ་བྱེད་ལ་ཡང་དག་པར་འདོད་པར་འགྱུར་བར་བྱེད་ན་དེ་ལས་གཞན་པའི་བྱང་ཆུབ་སེམས་དཔའ་དང་། འཇིག་རྟེན་དང་འཇིག་རྟེན་ལས་འདས་པ་རྣམས་སྨོས་ཅི་དགོས། སྔགས་ཐམས་ཅད་དང་བགེགས་ཐམས་ཅད་འཇོམས་པར་བྱེད་པ་སྟེ། འདི་ནི་བརྩོན་འགྲུས་ཆེ་བ་དང་། མཐུ་ཆེ་བ་དང་། གཅིག་ཏུ་དཔའ་བ། རིག་པ་ཐམས་ཅད་གཅིག་ཁོ་ནར་སྔགས་ཐམས་ཅད་ཀྱི་མཆོག་ཏུ་བཤད་པ་དང་། གཅིག་ཁོ་ན་རིག་པའི་རྒྱལ་མོ་འཇིགས་པ་ཆེན་པོ་རྣམས་ལས་མཆོག་ཏུ་བཤད་པ་སྟེ། དེ་གང་ཞེ་ན། ལས་ཆེན་པོ་ཐམས་ཅད་བྱེད་པ། དོན་ཐམས་ཅད་སྒྲུབ་པ། བྱ་བ་ཐམས་ཅད་བྱེད་པ། སྔགས་ཐམས་ཅད་གཅོད་པར་བྱེད་པ། གདུག་པའི་ལས་རྣམས་དང་སྡིག་པ་ཐམས་ཅད་རབ་ཏུ་
འཇོམས་པར་བྱེད་པ། སྔགས་ཐམས་ཅད་སོ་སོར་རྫོགས་པར་བྱེད་པ། དགེ་བར་བྱེད་པ། འཇིག་རྟེན་དང་འཇིག་རྟེན་ལས་འདས་པའི་རིག་པ་དང་། སྔགས་ཐམས་ཅད་ཀྱི་གོང་ནས་གོང་དུ་རབ་ཏུ་འཇུག་པ། ཐོགས་པ་མེད་པ། དེ་བཞིན་གཤེགས་པ་ཐམས་ཅད་ཀྱི་སྙིང་པོ་ཡང་དག་པར་གྱུར་པ། བསམ་པ་ཐམས་ཅད་ཡོངས་སུ་རྫོགས་པར་བྱེད་པ། དེ་གང་ཞེ་ན། ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཏཱ་རེ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། གྲོགས་པོ་དག་འདི་ནི་མཆོག་ཏུ་གསང་བ་དམ་པ་ལས་ཆེན་པོ་ཐམས་ཅད་བྱེད་པ། རིག་པའི་རྒྱལ་མོ་ཆེན་མོ་སེམས་ཅན་ཐམས་ཅད་ཀྱིས་འདའ་བར་བྱེད་པ་མ་ཡིན་པ། འབྱུང་པོ་ཐམས་ཅད་ཀྱིས་མི་ཚུགས་པ། སངས་རྒྱས་ཐམས་ཅད་ཀྱིས་བཀྲ་ཤིས་པ། རིག་པ་དང་སྔགས་ཐམས་ཅད་ཀྱིས་བསྒྲུབས་པ། འཇིག་རྟེན་ཐམས་ཅད་ཀྱི་མངའ་བདག །རིག་པའི་དབང་ཕྱུག་ཐམས་ཅད་ཀྱི་དབང་ཕྱུག །རྣམ་པར་སྡང་བ་ཐམས་ཅད་ལ་བྱམས་པའི་བདག་ཉིད། སྐྱེ་བོ་རྣམས་ལ་སྙིང་བརྩེ་བ་དང་། བགེགས་ཐམས་ཅད་རྣམ་པར་འཇོམས་པར་བྱེད་པ་སྟེ། མདོར་ན་ཇི་ལྟ་ཇི་ལྟར་རབ་ཏུ་སྦྱར་བ་དེ་ལྟ་དེ་ལྟར་རབ་ཏུ་བྱེད་དོ། །མ་བསྒྲུབས་པར་ཡང་ལས་རྣམས་བྱེད་དོ། །རིག་པ་བཟླས་ནས་གང་ལ་རེག་པ་དེ་དབང་དུ་འགྱུར་རོ། །གོས་ལ་མངོན་པར་བསྔགས་ནས་གྱོན་ན་སྐལ་བ་བཟང་པོར་འགྱུར་རོ། །སོ་ཤིང་ལ་མངོན་པར་བསྔགས་ཏེ་ཟོས་ན་སོ་ནད་སེལ་བར་འགྱུར་རོ། །ཀ་ར་བཱི་ར་དཀར་པོ་ལ་ལན་བདུན་མངོན་པར་བསྔགས་ནས་ཟོས་ན་དོན་དུ་མ་གཉེར་བར་ཡང་ཁ་ཟས་འབྱུང་བར་འགྱུར་རོ། །མིག་གི་ནད་ལ་རྒྱམ་ཚ་ཕྱེ་མར་བྱས་པ་ལ་ལན་བདུན་མངོན་པར་བསྔགས་ནས་མིག་བཀང་ན་མིག་ནད་སེལ་བར་བྱེད་དོ། །རྣ་བའི་ནད་ལ་གླང་པོ་ཆེའི་རྒྱབ་ནས་འཐོན་པ་འབྲུག་སྒྲོགས་པ་ན་འབྱུང་བའི་ཚིདྷྲི་ཀ །ཀ་བུ་ཀའི་ལོ་མར་བཏུམས་ཏེ་མེ་ཆུང་ངུས་བཙོ་བར་བྱའོ། །ཚོས་ནས་ཕྱིར་བཙོས་པ་བྱས་ལ་ཆུ་དྲོ་འཇམ་ལ་རྒྱམ་ཚ་དང་སྦྱར་བ་བྱས་ནས་ལན་བདུན་མངོན་པར་བསྔགས་ཏེ་དེས་རྣ་བ་དག་པར་
བྱས་ཏེ་སྐད་ཅིག་དེ་ཉིད་ལ་ཉེ་བར་ཞི་བར་བྱེད་དོ། །བུད་མེད་བུ་འབྱུང་བའི་དུས་སུ་མངལ་འགགས་ནས་གཟེར་བས་ཟིལ་གྱིས་ནོན་པར་གྱུར་ན། ཨ་ཊརླུ་ཥ་ཀའི་རྩ་བ་སྲོག་ཆགས་མེད་པའི་ཆུ་ལ་བཏགས་ནས་ལྟེ་བའི་ཕྱོགས་སུ་བྱུགས་ན་བདེ་བླག་ཏུ་བཙའ་བར་འགྱུར་རོ། །སྐྱེས་བུ་ཟུག་རྔུས་ཉམས་པའམ། མཚོན་ནང་དུ་ལུས་པ་ལ་མར་རྙིང་པ་ལ་བརྒྱ་རྩ་བརྒྱད་མངོན་པར་བསྔགས་ནས་བླུད་པར་བྱ་བའམ། དེའི་ཕྱོགས་སུ་བྱུགས་ན། དེའི་སྐད་ཅིག་ཉིད་ལ་ཟུག་རྔུ་མེད་པར་འགྱུར་རོ། །མ་ཞུ་བ་དང་། གསུད་པ་དང་། ཚད་པའི་ནད་ལ་ཁ་རུ་ཚ་དང་། རྒྱམ་ཚ་དང་། ཚྭ་གཞན་གང་ཡང་རུང་བ་ལ་མངོན་པར་བསྔགས་ནས་ཟོས་ན། ནད་དེ་ལས་གྲོལ་བར་འགྱུར་ཏེ་ཉི་མ་དེ་ཉིད་ལ་བདེ་བར་གནས་པར་འགྱུར་རོ། །གཏན་ནད་ཀྱི་ཚད་པའམ། འཕྲལ་གྱི་ཚད་པ་ལ་ཡང་རུང་སྟེ། མ་ཏུ་ལུང་གའི་རྩ་བ་བཏགས་ནས་སྲོག་ཆགས་མེད་པའི་ཆུ་འཐུང་དུ་གཞུག་སྟེ་གནོད་པ་མེད་པར་དེ་ལས་གྲོལ་བར་འགྱུར་ཏེ། ལན་བདུན་བཟླས་པས་སམ། གཉིས་བཟླས་པས་སོ། །བུད་མེད་མོ་གཤམ་མི་སྐྱེ་བའི་ཆོས་རྣམས་སྐྱེ་བར་འདོད་ན་ཨ་ཤྭགནྡྷའི་རྩ་བའི་མར་དང་ལྷན་ཅིག་བསྐོལ་ཏེ་བའི་འོ་མས་བསྲེས་ཏེ་ལན་ཉི་ཤུ་རྩ་ལྔ་ཡོངས་སུ་བཟླས་ཏེ། ཟླ་མཚན་གྱི་དུས་སུ་འཐུང་དུ་བཅུག་ནས་ཁྲུས་བྱས་པའི་མཐར་སྐྱེས་པ་གཞན་སྤང་ཞིང་ཁྱིམ་པ་ཡང་འདོད་པས་ལོག་པར་གཡེམ་པ་ཡོངས་སུ་སྤངས་ན། རང་གི་སྐྱེས་པའམ། རང་གི་བདག་པོའི་བུ་སྐྱེ་བར་འགྱུར་རོ། །ལོ་གསུམ་མམ། ལོ་ལྔ་རབ་ཏུ་སྐྱེས་པའི་དུས་ལས་ལྷག་པའམ། ལོ་དུ་མར་བུ་མ་ཆགས་པའམ་གཞན་གྱི་སྔགས་དང་སྨན་གྱི་ཕྱག་རྒྱས་བཏབ་པ་དང་། གཞན་གྱིས་གདུག་པར་བྱས་པའམ། མངལ་འཛིན་པ་མི་འཛིན་པར་བྱས་པའམ། ནད་ཀུན་དུ་ལངས་པའམ། སྦྱོར་བ་གཞན་ཀུན་དུ་སྤངས་པའམ། ནད་གཞན་གང་ཡང་རུང་བ་ཅུང་ཟད་ཀྱིས་ཡོངས་སུ་མི་འཛིན་པར་བྱས་པའམ། བརྟན་པ་དང་། གཡོ་བ་དང་། བཅོས་མ་དང་། བཅོས་མ་མ་ཡིན་པ་ལ་སོགས་པའི་དུག་ལ་སོགས་པ་རབ་ཏུ་ཞུགས་
པའམ། རྩ་བ་དང་། སྔགས་དང་། སྨན་དང་། མཛའ་བ་དང་། མི་མཛའ་བའི་སྦྱོར་བ་བྱས་པ་ལ། མར་རྙིང་པ་དང་། རྨ་བྱའི་མདོངས་གཅིག་ཏུ་བྱས་ནས་བཏགས་ལ། ཤ་ཁ་ར་དང་ལྷན་ཅིག་སྦྱར་ཏེ། ལན་ཉི་ཤུ་རྩ་བདུན་མངོན་པར་བསྔགས་ནས། ཨ་རུ་ར་ཙམ་བཟའ་བར་བྱ་སྟེ། ཉིན་ཞག་བདུན་གྱི་བར་དུ་ཤ་ཁ་ར་དང་ལྡན་པའི་འོ་མ་བསྐོལ་བ་བཏུང་བར་བྱ་ཞིང་ཡང་དང་ཡང་དུ་སྔགས་ཀྱང་བཟླས་སོ། །ཀླད་པ་ན་བ་ལ་བྱ་རོག་གི་གཤོག་པ་ལ་ལན་བདུན་མངོན་པར་བསྔགས་ཏེ་དེས་བྱ་བས་ན་བདེ་བར་གནས་པར་འགྱུར་རོ། །བུད་མེད་ལ་ཆེས་སྤྱད་པ་ལ་སོགས་པའི་ནད་རྣམས་ལ་ཨ་ལམ་བུ་ཤའི་རྩ་བ་འོ་མ་དང་ལྷན་ཅིག་བཏགས་ནས་ནི་ལི་ཀའི་རྩ་བ་དང་ལྡན་པ་ལ་བརྒྱ་རྩ་བརྒྱད་དུ་མངོན་པར་བཟླས་ནས་འོ་མས་སྐྱོ་མར་སྦྱར་ནས་བཏུང་བར་བྱའོ། །དེ་བཞིན་དུ་རིམས་ཉིན་བཞི་པ་དང་། ཉིན་གཅིག་པ་དང་། ཉིན་གཉིས་པ་དང་། ཉིན་གསུམ་པ་དང་། རྒྱུན་པ་དང་། རྟག་པའི་རིམས་དང་། རིམས་དྲག་པོ་ལ་སོགས་པ་རྣམས་ལ་འོ་ཐུག་མར་དང་སྦྱར་ལ་བརྒྱ་རྩ་བརྒྱད་མངོན་པར་བསྔགས་ཏེ་འཐུང་དུ་བཅུག་ན་བདེ་བར་གནས་པར་འགྱུར་རོ། །དེ་བཞིན་དུ་མཁའ་འགྲོ་མའི་གདོན་གྱིས་ཟིན་པ་ལ། བདག་ཉིད་ཀྱི་གདོང་ལ་ལན་བརྒྱ་རྩ་བརྒྱད་མངོན་པར་བསྔགས་ནས་བལྟས་ན་བདེ་བར་གནས་པར་འགྱུར་རོ། །དེ་བཞིན་དུ་མ་མོ་དང་། བྱིས་པ་དང་། སྲུལ་པོ་དང་། རོ་ལངས་དང་། གྲུལ་བུམ་གྱི་གདོན་ལ་སོགས་པ་རྣམས་དང་། མི་ཐམས་ཅད་གདུག་པ་ཅན་དྲག་པོས་མངོན་པར་ཟིན་པ་ལ་བདག་ཉིད་ཀྱི་ལག་པ་ལ་བརྒྱ་རྩ་བརྒྱད་མངོན་པར་བསྔགས་ཏེ། ཟིན་པ་དེའི་མགོ་བོ་ལ་རེག་ན་བདེ་བར་གནས་པར་འགྱུར་རོ། །ལན་ཅིག་བཟླས་པས་བདག་ཉིད་སྲུང་ངོ་། །གཉིས་བཟླས་པས་གྲོགས་པོ་སྲུང་ངོ་། །གསུམ་བཟླས་པས་ཁྱིམ་སྲུང་ངོ་། །བཞི་བཟླས་པས་གྲོང་སྲུང་ངོ་། །ལྔ་བཟླས་པས་གྲོང་གི་སྤྱོད་ཡུལ་དུ་གྱུར་པ་སྲུང་བར་འགྱུར་རོ། །དེ་བཞིན་དུ་ཇི་སྲིད་སྟོང་ཕྲག་གི་བར་དུ་བཟླས་པས་དམག་གི་ཚོགས་སྲུང་བ་བྱས་པར་འགྱུར་རོ། །འདི་རྣམས་སམ་གཞན་ཡང་ལས་ཕྲ་མོ་རྣམས་མ་བསྒྲུབས་
པར་ཡང་བྱེད་དོ། །དེ་ནས་སྒྲུབ་པར་འདོད་ན་ཕྲ་མོའི་ལས་རྣམས་མི་བྱ་བར་མཐའ་གཅིག་ཏུ་སོང་ནས་དབེན་པའི་ཕྱོགས་རྒྱ་མཚོར་འགྲོ་བའི་ཆུ་ཀླུང་འབབ་པ་དང་། རྒྱ་མཚོའི་ངོགས་དང་། གང་གཱའི་ཀླུང་གི་ངོགས་དང་། གཞན་ཡང་ཆུ་ཀླུང་ཆེན་པོའི་ངོགས་ལ་བརྟེན་ནས། ཕྱོགས་གཙང་མ་ཕྱག་དར་བྱས་ནས་ཁྲུས་ལན་གསུམ་བྱ་ཞིང་། གོས་ལན་གསུམ་བརྗེས་ཏེ། སྨྲ་བ་བཅད། སློང་མོའི་ཁ་ཟས་ཟ་ཞིང་། ལོ་མ་དང་། ནས་ཟན་དང་། འོ་མ་དང་འབྲས་བུ་ཟ་ཞིང་འབུམ་ཕྲག་བཅུ་གཅིག་བཟླས་པར་བྱའོ། །གྲུབ་པའི་མཚན་མ་མཐོང་ན། དེ་ནས་སྒྲུབ་པ་བརྩམ་པར་བྱ་སྟེ་ཕྱོགས་དེ་ཉིད་དུ་རས་རིས་ཐུ་བོ་དེར་བཞག་ལ། རས་རིས་ལ་མཆོད་པ་ཆེན་པོ་བྱས་ནས་གསེར་དངུལ་གྱི་རང་བཞིན་ནམ། ཟངས་དང་སའི་རང་བཞིན་གྱི་མར་མེའི་སྣོད། ཏུ་རུཥྐའི་འབྲུ་མར་གྱིས་བཀང་བའམ། དྲི་ཞིམ་པོའི་འབྲུ་མར་གྱིས་བཀང་བའམ། བའི་མར་གྱིས་བཀང་བའི་མར་མེའི་སྣོད་དུ་རས་གསར་པ་དུམ་བུར་བྱས་པའི་མར་མེ་འབུམ་ཕྲག་གཅིག་རས་རིས་ལ་དབུལ་བར་བྱའོ། །དེའི་ཁོར་ཡུག་ཏུ་མར་མེའི་ཕྲེང་བ་རྣམས་ཕུལ་མ་ཐག་ཏུ་རས་རིས་ལས་འོད་ཟེར་རྣམས་བྱུང་མ་ཐག་ཏུ་རས་རིས་ཀུན་ནས་འབར་བའི་ཕྲེང་བར་འགྱུར་རོ། །སྟེང་གི་བར་སྣང་ལ་རྔ་བོ་ཆེའི་སྒྲ་སྒྲོགས་ཤིང་ལེགས་སོ་ཞེས་པ་ཡང་ཐོས་ཏེ། དེ་ནས་རིག་པ་འཛིན་པས་རིངས་པའི་ཚུལ་གྱིས་རས་རིས་ཀྱི་མཐའི་ཟུར་དུ་སྒྲུབ་པ་པོ་སྔར་བྲིས་པར་རས་རིས་ལ་བརྟེན་པ་ལ་མཆོད་ཡོན་ཕུལ་ནས་བསྐོར་བ་བྱས་ཏེ་སངས་རྒྱས་ཐམས་ཅད་ལ་ཕྱག་བྱས་ལ་གཟུང་བར་བྱའོ། །དེ་ནས་བཟུང་བ་ཙམ་གྱིས་མར་མེ་འཛིན་པ་དེ་རྣམས་ཐམས་ཅད་ཀྱི་ལྷན་ཅིག་ཏུ་འཕུར་བར་འགྱུར་རོ། །གཅིག་གིས་ལྷག་པའི་གཞལ་མེད་ཁང་བརྒྱར་ཡང་འགྲོ་བར་བྱེད་དོ། །ལྷའི་སིལ་སྙན་དང་སོ་སོར་ཡང་དག་པར་ལྡན་པ་དང་། སྒྲ་སྙན་པའི་གླུ་དབྱངས་སྒྲོགས་ཤིང་གར་བྱེད་པའི་རིག་པ་འཛིན་མ་དེ་རྣམས་ཀྱིས་འཁོར་ཡུག་ཏུ་ཀུན་ཏུ་ཁྱབ་པར་སྣང་བ་སྒྲུབ་པ་པོ་རིག་པ་འཛིན་པའི་རྒྱལ་པོ་ཆེན་པོར་དབང་སྐུར་བར་བྱེད་དོ། །མར་མེ་འཛིན་པ་དེ་རྣམས་ཀྱིས་ལྷན་ཅིག་
རྒ་བ་མེད་ཅིང་འཆི་བ་མེད་པར་རོལ་པར་བྱེད་དོ། །བསྐལ་པ་ཆེན་པོར་གནས་ཤིང་ཉི་མ་འཆར་ཀ་འདྲ་བ་དང་། ལྷའི་རྒྱན་གྱིས་མཛེས་པ་དང་། རྣམ་པར་བཀྲ་བའི་གོས་ཀྱིས་བརྒྱན་པ། དེ་རྣམས་དབང་དུ་བྱས་ནས་མངག་གཞུག་པར་འགྱུར་ཏེ། དེ་རྣམས་དང་ལྷན་ཅིག་སྤྱོད་པར་གྱུར་ཏེ་ལྷའི་རིག་པ་འཛིན་པ་ཐམས་ཅད་ཀྱང་འདིའི་བྲན་ཉིད་དུ་ཉེ་བར་གནས་པར་འགྱུར་རོ། །རིག་པ་འཛིན་པའི་རྒྱལ་པོ་ཆེན་པོར་འགྱུར་ཞིང་རིང་དུ་འཚོ་ཞིང་གྲུབ་པ་ཐམས་ཅད་ཀྱིས་མི་ཚུགས་པར་འགྱུར་རོ། །སྐད་ཅིག་ཙམ་གྱིས་ཚངས་པའི་འཇིག་རྟེན་དུ་མངོན་པར་འགྲོ་བར་འགྱུར་རོ། །བརྒྱ་བྱིན་གྱིས་ཀྱང་གྲངས་སུ་མི་འགྲོ་ན་དེ་ལས་གཞན་པའི་རིག་པ་འཛིན་པ་རྣམས་ཀྱིས་ལྟ་ཅི་སྨོས། མཐར་ཡང་འདིས་སངས་རྒྱས་ཉིད་དུ་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་ཀྱང་དགེ་བའི་བཤེས་གཉེན་དུ་འགྱུར་རོ། །ལས་སྒྲུབ་པའི་ཐབས་གཞན་ཡང་ཡོད་དེ། ཆེས་དཀའ་ཐུབ་བྱས་པ། དེ་ནས་མཐའ་གཅིག་ཏུ་སོང་ནས་ལྷག་པར་གནས་ཏེ་འདུ་འཛི་མེད་ཅིང་འདུ་འཛི་དང་བྲལ་བའི་དགོན་པ་ཆེན་པོར་ཞུགས་ནས། གནས་གང་ན་པདྨའི་མཚོ་ཆེན་པོ་དང་། ཆུ་དང་བཅས་པ། རི་བོ་གཅིག་ལ་བརྟེན་པའི་རི་བོ་དེའི་རྩེ་མོར་འཛེགས་ཏེ། རིག་པ་རྣམས་ཀྱི་དྲི་དང་མེ་ཏོག་ལ་སོགས་པ་ཕུལ་ནས་དེ་རྣམས་ཇི་ལྟར་འདོད་པ་བཞིན་དུ། འོ་མའམ་ནས་ཟན་དང་། པདྨའི་རྩ་བ་དང་། འབྲས་བུ་བཟའ་ཞིང་འོ་མ་ལས་བྱུང་བ་ཟོས་ཏེ་རིག་པ་འབུམ་ཕྲག་བཅུར་བཟླས་པ་བྱའོ། །བཟླས་པའི་མཐར་ཡང་སྔར་བསྟན་པའི་ཆོ་ག་དེ་ཉིད་ཀྱིས་རས་རིས་ཀྱི་ཐུ་བོ་བཞག་ནས། པདྨའི་མེ་ཏོག་ལ་ཙནྡན་དཀར་པོ་དང་། གུར་གུམ་གྱིས་བཏགས་ཏེ་སེང་ལྡེང་གི་ཤིང་གི་མེ་སྦར་ནས་སྔར་ཡོངས་སུ་བཏགས་པའི་པདྨས་སྟོང་ཕྲག་སུམ་ཅུ་རྩ་དྲུག་གིས་སྦྱིན་སྲེག་བྱའོ། །དེ་ནས་སྦྱིན་སྲེག་གི་མཐར། བཅོམ་ལྡན་འདས་ཤཱཀྱ་ཐུབ་པའི་རས་རིས་ལས་འོད་ཟེར་འབྱུང་སྟེ། དེས་སྒྲུབ་པ་པོ་ཀུན་དུ་སྣང་བར་བྱས་ནས་སྤྱི་བོར་ནུབ་པར་འགྱུར་རོ། །རེག་མ་ཐག་ཏུ་སྒྲུབ་པ་པོ་མངོན་པར་ཤེས་པ་ལྔར་འགྱུར་རོ། །བྱང་ཆུབ་
སེམས་དཔའི་ས་ཐོབ་བོ། །ལྷའི་གཟུགས་ཀྱིས་ཇི་ལྟར་འདོད་པ་བཞིན་དུ་རྣམ་པར་རྒྱུ་སྟེ། བསྐལ་པ་སུམ་ཅུ་རྩ་དྲུག་ཏུ་འཚོ་བར་འགྱུར་རོ། །སངས་རྒྱས་ཀྱི་ཞིང་སུམ་ཅུ་རྩ་དྲུག་འདའ་བར་བྱེད་དོ། །དེ་རྣམས་ཀྱི་མཐུ་ཡང་ཡང་དག་པར་རྗེས་སུ་མཐོང་ངོ་། །སངས་རྒྱས་སུམ་ཅུ་རྩ་དྲུག་མཉེས་པར་བྱེད་དོ། །དེ་རྣམས་ཀྱང་མཆོད་པ་དང་བསྙེན་བཀུར་བས་མངོན་པར་དགའ་བར་འགྱུར་རོ། །མཐར་ཡང་བྱང་ཆུབ་ལ་མཆོག་ཏུ་གཞོལ་བར་འགྱུར་རོ། །བྱང་ཆུབ་སེམས་དཔའ་ཆེན་པོ་དགེ་བའི་བཤེས་གཉེན་གྱིས་ཡོངས་སུ་ཟིན་པར་འགྱུར་རོ། །ཇི་སྲིད་བྱང་ཆུབ་ཏུ་མྱ་ངན་ལས་འདས་པའི་མཐར་ཐུག་པའི་བར་དུའོ། །བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་བཅོམ་ལྡན་འདས་མ་འཕགས་མ་སྒྲོལ་མ་རལ་པ་གྱེན་དུ་བརྫེས་པའི་རྩ་བའི་ཆོ་ག་ལས། ལས་མཆོག་སྒྲུབ་པའི་ཐབས་ཀྱི་ཆོ་ག་བདུན་པའི་ལེའུ་རབ་འབྱམ་ཡོངས་སུ་རྫོགས་སོ།། །།དེ་ནས་ཡང་བཅོམ་ལྡན་འདས་ཤཱཀྱ་ཐུབ་པས་སླར་ཡང་སྒྲུབ་པའི་ལས་མཆོག་གསུངས་ཏེ། རྟོག་པའི་རྒྱལ་པོ་འདི་ལ་རྩ་བའི་རིག་པའི་སྔགས་ཡོངས་སུ་བཟུང་ནས་གང་གཱའི་ཀླུང་དུ་ཞུགས་ནས་གྲུའི་བཞོན་པ་ལ་རབ་ཏུ་གནས་ཏེ། གང་གཱའི་དབུས་སུ་འོ་མ་དང་ཆུ་བཏུང་ཞིང་། སྟོང་ཕྲག་སུམ་ཅུར་ཇི་ལྟར་འདོད་པའི་ཉིན་ཞག་གི་བཟླས་པ་བྱའོ། །དེ་ནས་བཟླས་པའི་མཐར་ཀླུ་ཐམས་ཅད་མཐོང་ངོ་། །དེ་ནས་སྒྲུབ་པ་བརྩམས་ཏེ་གྲུའི་དབུས་དེ་ཉིད་དུ་མེ་ཐབ་པདྨའི་རྣམ་པ་བྱའོ། །དེ་ནས་ནཱ་ག་གེ་སར་ལ་སོགས་པའི་མེ་ཏོག་རྣམས་ཀྱིས་རས་རིས་ལ་མཆོད་པ་ཆེན་པོ་བྱའོ། །རས་རིས་ཀྱི་ཐུ་བོ་ཞལ་ནུབ་ཏུ་ཕྱོགས་པར་བཞག་སྟེ་བདག་ཉིད་ཤར་དུ་མངོན་པར་ཕྱོགས་ཏེ་ཀུ་ཤའི་ཁྲེས་ལ་འདུག་ནས། ནཱ་ག་གེ་སར་གྱི་མེ་ཏོག་རེ་རེ་ལ་ལན་བདུན་མངོན་པར་བསྔགས་པ་བྱས་ནས་སེང་ལྡེང་གི་ཤིང་གིས་མེ་སྦར་ཏེ། ཙན་དན་དཀར་པོ་དང་གུར་གུམ་བསྲེས་པའི་ནཱ་ག་གེ་སར་གྱི་མེ་ཏོག་རྣམས་ཀྱིས་སྟོང་ཕྲག་བཅུའི་བར་ཇི་སྲིད་པར་སྦྱིན་སྲེག་
བྱའོ། །གཞན་ཀླུ་རྣམས་མཐོང་བ་ན་ཉེ་བར་བཅིངས་པའི་དངོས་གྲུབ་ཀྱི་རྫས་རྣམས་རབ་ཏུ་ཆགས་པས་བླང་བར་མི་བྱའོ། །གང་ལས་སྦྱིན་སྲེག་གི་མཐར་ཀླུའི་བཞོན་པ་དང་ལྷན་ཅིག་འཕུར་བར་འགྱུར་རོ། །རིག་པ་འཛིན་པ་རྣམས་ཀྱི་རྒྱལ་པོར་འགྱུར་རོ། །ཀླུའི་དབང་པོ་རྒྱལ་པོ་ཐམས་ཅད་ཀྱང་རྗེས་སུ་འབྲང་ཞིང་བྲན་བཞིན་དུ་གནས་སོ། །བར་གྱི་བསྐལ་པ་སུམ་ཅུར་འཚོ་བར་འགྱུར་རོ། །རང་དབང་དུ་སྤྱོད་པར་འགྱུར་རོ། །འགྲོ་བ་ལ་ཐོགས་པ་མེད་དོ། །འཕགས་པ་སྤྱན་རས་གཟིགས་དབང་ཕྱུག་མངོན་སུམ་དུ་མཐོང་སྟེ། དེའི་སྤྱི་བོ་ལ་རེག་པར་མཛད་དོ། །རེག་པ་ཙམ་གྱིས་མངོན་པར་ཤེས་པ་ལྔར་འགྱུར་རོ། །ངེས་པར་སངས་རྒྱས་ཉིད་དུ་ལྷག་པར་འགྲོ་བར་བྱེད་དོ། །གཞན་ཡང་མཆོག་གི་སྒྲུབ་པའི་ཆོ་གའི་སྒྲུབ་ཐབས་སུ་འགྱུར་བ་ནི་སྔར་བཞིན་དུ་གང་གཱའི་ཀླུང་དུ་ཞུགས་ནས་བིལ་བའི་ཤིང་གི་རང་བཞིན་གྱི་ཤིང་གཅིག་ཉིད་ཀྱིས་གྲུའི་བཞོན་པ་བྱས་ནས་ཤིན་ཏུ་བརྟན་པ་ལེགས་པར་བྱས་པ་དེར་མངོན་པར་འཛེགས་ནས་བིལ་བའི་ཤིང་གི་རང་བཞིན་གྱི་སྐྱ་བ་དེས་གྲུ་དེའི་རྗེས་སུ་སྒྲུབ་པ་པོ་ཆེས་མཁས་ཤིང་གསལ་བ་ཉིད་ཀྱིས་གཡབ་པར་བྱ་སྟེ། གང་གཱའི་ཀླུང་ཆེན་པོ་ཡོངས་སུ་མི་དོར་བར་ཀུན་ནས་ཐད་ཀའམ་རྒྱུན་རིངས་སུ་གཡབ་པར་བྱའོ། །དེ་ནས་རྩ་བའི་རིག་པ་བཟུང་ནས་སམ། སྙིང་པོའམ། ཉེ་བའི་སྙིང་པོའམ། ཡི་གེ་གཅིག་པའམ། ཁྲོ་བོའམ། ཕོ་ཉའམ། རིང་དུ་རྗེས་སུ་འབྲང་བའམ། གཞན་གང་ཡང་རུང་བའི་སྔགས་བཟུང་ནས་རས་རིས་ཀྱི་ཐུ་བོ་དེ་ཉིད་དུ། ཞལ་ནུབ་ཏུ་ཕྱོགས་པར་བཞག་ནས་བདག་ཉིད་དང་པོ་ཞལ་ཤར་དུ་ཕྱོགས་ལ། ཕྱིས་ནི་ཇི་ལྟར་འདོད་པར་བྱའོ། །འོ་མ་དང་། ནས་ཟན་དང་། འབྲས་བུ་བཟའ་བའམ། ཆུའམ། པདྨའི་རྩ་བ་དང་། འབྲས་བུ་བཟའ་ཞིང་། སྨྲ་བ་བཅད་དེ། དུས་གསུམ་དུ་ཁྲུས་བྱ་ཞིང་། གོས་ལན་གསུམ་བརྗེས་ཏེ། ཤིན་ཏུ་དཀར་བའི་ལས་ཀུན་དུ་སྤྱོད་ཅིང་ཤིན་ཏུ་དཀར་བའི་བློ་དང་ལྡན་པས་དང་པོ་རེ་ཞིག་རས་རིས་ཀྱི་སྤྱན་སྔར་ཇི་ལྟར་ཉེ་བར་བསྟན་པ་བཞིན་དུ་སྔར་ཆོ་ག་མཐོང་བས་རིག་པ་འབུམ་ཕྲག་བཅུ་བཟླས་པར་བྱའོ། །དེ་ནས་གལ་ཏེ་རྩ་
བའི་རིག་པར་འགྱུར་རོ། །དེ་ནས་སྟོང་ཕྲག་དྲུག་ཅུ་བཟླས་པའི་མཐར་གྲུ་རྒྱ་མཚོ་ཆེན་པོར་འགྲོ་བར་འགྱུར་རོ། །དེ་ནས་སྒྲུབ་པའི་ཡོ་བྱད་རྣམས་བསྡུས་ཏེ་སྔར་གནས་དེ་ཉིད་དུ་གཞག་པར་བྱའོ། །དེ་ནས་གྲུའི་བཞོན་པ་རྒྱ་མཚོ་ཆེན་པོར་འགྲོ་བ་ན། འཇིགས་པར་མི་བྱ་ཞིང་། བཟློག་པར་མི་བྱའོ། །སྒྲུབ་པ་པོའི་དབང་ལས་མ་གཏོགས་པར་བཟློག་པར་ནུས་པ་ཡང་མ་ཡིན་ནོ། །དེ་ནས་དཔག་ཚད་སྟོང་དུ་གནས་པའི་རྒྱ་མཚོ་ཆེན་པོར་ཡང་ཡུད་ཙམ་གྱིས་འཇུག་པར་བྱེད་དོ། །ལམ་ཐུང་ན་ལྟ་ཅི་སྨོས། དེར་ཞུགས་ནས་ཆུའི་སྟེང་དུ་སྒྲུབ་པའི་ལས་བརྩམ་པར་བྱའོ། །དེ་ནས་མེ་ཐབ་སྔར་གྱི་རྣམ་པའམ་རྫ་མཁན་གྱིས་བྱས་པའི་སའི་སྣོད་དུ་སེང་ལྡེང་གི་མེ་སྦར་ལ་ནཱ་ག་གེ་སར་གྱི་ཟེ་འབྲུ་དང་། མེ་ཏོག་ཙནྡན་དཀར་པོ་དང་། ག་པུར་དང་བསྲེས་པའི་སྲེག་བླུགས་ཆེས་ཉུང་བའམ། ཆེས་མང་བའི་ཚད་ཀྱང་རུང་སྟེ། སྔར་བཞིན་དུ་རྩ་བའི་རིག་པས་འབུམ་ཕྲག་དྲུག་ཅུ་སྦྱིན་སྲེག་བྱའོ། །སྦྱིན་སྲེག་བྱེད་པ་ན། ལང་ཀའི་གྲོང་ན་གནས་པའི་སྲིན་པོ་གཟུགས་སྣ་ཚོགས་འཛིན་པ་རྣམས་ཧཱ་ཧཱ་ཞེས་སྒྲོགས་པ་དང་། ཀླུའི་གྲོང་ལོངས་སྤྱོད་ལྡན་ན་གནས་པའི་ཀླུའི་རྒྱལ་པོ་རྣམ་པ་སྣ་ཚོགས་པའི་གཟུགས་འཆང་བ། ཆེས་ཞི་བ་དང་། ཆེས་ཁྲོ་བ་རྣམས་ལངས་ཏེ་ཀླུ་དང་སྲིན་པོ་རྣམས་ཀྱང་འདི་སྐད་ཅེས་སྨྲའོ། །ཁྱེད་བཞེངས་ཤིག་བཞེངས་ཤིག །བདག་ཅག་གི་རྗེ་བོ་མཛོད་ཅིག་ཅེས་སོ། །དེ་བཞིན་དུ་ལྷ་མ་ཡིན་དང་། གནོད་སྦྱིན་དང་ལྷ་དང་། ལྟོ་འཕྱེ་ཆེན་པོ་དང་། གྲུབ་པ་དང་། མི་མ་ཡིན་པ་ཐམས་ཅད་ཀྱང་རབ་ཏུ་ཆགས་པར་བྱེད་མོད་ཀྱི་ལྡང་བར་མི་བྱའོ། །དེ་ནས་རིག་པ་འཛིན་པས་སྔགས་བཟླ་ཞིང་ལག་པ་གཡོན་པའི་སྡིགས་མཛུབ་ཀྱིས་བསྡིགས་པར་བྱའོ། །དེ་ནས་རྣམ་པར་བྱོལ་ཞིང་ཕན་ཚུན་རབ་ཏུ་འབྲོས་ལ་འཇིགས་པར་བྱེད་དོ། །དེ་ནས་སྦྱིན་སྲེག་གི་མཐར་གྲུ་དེས་སྒྲུབ་པ་པོ་དེ་ཁྱེར་ནས་སྐད་ཅིག་ལ་འོག་མིན་གྱི་གནས་སུ་འགྲོ་བར་བྱེད་དོ། །འཇིག་རྟེན་གྱི་ཁམས་གཞན་དུའང་འགྲོ་ཞིང་འོང་བར་བྱེད་དོ། །བྱང་ཆུབ་སེམས་དཔའི་སེམས་ཤེས་པར་འགྱུར་རོ། །མངོན་
པར་ཤེས་པ་ལྔ་དང་། རྫུ་འཕྲུལ་ཆེན་པོ་དང་། མཐུ་ཆེན་པོ་དང་ལྡན་པར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་རྟག་ཏུ་མཐོང་བར་འགྱུར་རོ། །ཀླུ་ཐམས་ཅད་དང་། སྲིན་པོ་ཐམས་ཅད་དང་། གནོད་སྦྱིན་ཐམས་ཅད་དང་། ལྷ་ཐམས་ཅད་དང་། ལྷ་མ་ཡིན་ཐམས་ཅད་དང་། སེམས་ཅན་ཐམས་ཅད་ཀྱང་འདིའི་དབང་དུ་འགྱུར་ཏེ། བཀའ་བཞིན་བྱེད་པ་ལ་བཞག་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། རང་སངས་རྒྱས་དང་འཕགས་པ་ཉན་ཐོས་རྣམས་འདིའི་སྔགས་གྲུབ་པ་དེ་རྣམས་ཀྱང་འདི་ལ་བྱམས་པའི་བདག་ཉིད་དུ་འགྱུར་རོ། །རྗེས་སུ་འདོད་པར་འགྱུར་རོ། །སེམས་ཅན་ཐམས་ཅད་ཀྱིས་མི་ཚུགས་པར་འགྱུར་རོ། །གཞན་ཡང་ལས་ཀྱི་ཆོ་ག་མཆོག་སྒྲུབ་ཐབས་སུ་འགྱུར་བ་ནི་བིལ་བའི་ཤིང་ལ་གྲུ་བོ་ཆེའི་བཞོན་པ་བྱེད་དུ་གཞུག་སྟེ། ཤིང་གཅིག་གི་བཞོན་པའམ། བསྡུས་པའང་རུང་སྟེ་གནས་ཆེན་པོ་བྱའོ། །གང་གཱའི་དབུས་ཀྱི་གླིང་དེར་གནས་པའི་གྲུའི་བཞོན་པར་སྐྱེས་བུ་བརྒྱ་ཉི་ཤུ་ལག་ན་སྒྲོན་མེ་ཐོགས་པ་རྣམས་གྲུའི་བཞོན་པ་ལ་འཛེགས་ཏེ་གོས་དཀར་པོ་གྱོན་ཞིང་སྲུང་བ་བྱས་པ་རས་རིས་ཀྱི་ཐུ་བོ་སྔར་གྱི་ཆོ་གས་ཀུན་དུ་བཞག་པའི་སྤྱན་སྔར་གཞག་པར་བྱའོ། །དེ་ནས་རས་རིས་ལ་མཆོད་པ་ཆེན་པོ་བྱས་ནས་ནཱ་ག་གེ་སར་གྱི་ཕྱེ་མ་རྣམས་དང་གུར་གུམ་དང་། ཙནྡན་དཀར་པོ་དང་། ག་པུར་བསྲེས་པ་དང་། སེང་ལྡེང་གི་སྲེག་བླུགས་སྟོང་ཕྲག་སུམ་ཅུ་རྩ་དྲུག་སྦྱིན་སྲེག་བྱའོ། །དེ་ནས་སྦྱིན་སྲེག་གི་མཐར་གྲུ་དེ་སྐད་ཅིག་ཙམ་གྱིས་ཚངས་པའི་འཇིག་རྟེན་དུ་འགྲོ་ཞིང་འོང་བར་འགྱུར་ཏེ་ཇི་ལྟར་འདོད་པ་བཞིན་དུ་རྣམ་པར་རྒྱུའོ། །འཕགས་པ་སྤྱན་རས་གཟིགས་དབང་ཕྱུག་མཐོང་བར་བྱེད་དོ། །མཐོང་བ་ཙམ་ལས་ཐོབ་པར་འགྱུར་རོ། །མངོན་པར་ཤེས་པ་ལྔ་དང་ཡུན་རིང་དུ་འཚོ་ཞིང་བསྐལ་པ་ཆེན་པོར་གནས་པར་འགྱུར་རོ། །རིག་པ་འཛིན་པའི་འཁོར་ལོས་སྒྱུར་བའི་རྒྱལ་པོ་ཆེན་པོར་འགྱུར་རོ། །མར་མེ་འཛིན་པ་དེ་རྣམས་ཀྱང་འདིའི་རིག་པ་འཛིན་པ་གྲུབ་པར་འགྱུར་རོ། །ལྷན་ཅིག་སྤྱོད་པ་དེ་རྣམས་དང་། ཐབས་ཅིག་ཏུ་ཇི་ལྟར་
འདོད་པ་བཞིན་དུ་རྣམ་པར་རྒྱུ་ཞིང་། རང་དགར་འགྲོ་བར་འགྱུར་རོ། །སངས་རྒྱས་བཅོམ་ལྡན་འདས་རྣམས་མཆོད་པ་དང་། བསྙེན་བཀུར་གྱིས་མངོན་པར་དགྱེས་པར་འགྱུར་རོ། །མཐར་ཡང་སངས་རྒྱས་ཉིད་དུ་ངེས་པར་འགྱུར་རོ། །གཞན་ཡང་ལས་ཀྱི་ཆོ་གའི་སྒྲུབ་ཐབས་དམ་པར་གྱུར་པ་ནི། ཆུ་ཀླུང་འགྲམ་མམ་རྒྱ་མཚོའི་ངོགས། །དེ་བཞིན་ཁ་བ་ཅན་གྱི་རིར། །རི་ཡི་རྒྱལ་པོ་འབིགས་བྱེད་དེ། །དེར་ནི་ལས་མཆོག་བསྒྲུབ་པར་བྱ། །ས་ཧྱེ་མ་ལ་ཡ་ཉིད་དང་། །རི་བོ་སྤོས་ཀྱི་ངད་ལྡང་དང་། །བྱ་རྒོད་ཕུང་པོའི་རི་རྒྱལ་དུ། །ལས་ཀྱི་མཆོག་ནི་བསྒྲུབ་པར་བྱ། །རྒྱ་མཚོ་ཆེན་པོའི་བྲག་དང་ནི། །ཤིང་སོགས་མེ་ཏོག་ལྡན་པ་སྟེ། །རྒྱལ་བས་གསུངས་པའི་སྔགས་རྣམས་ནི། །ཕྱོགས་འདི་རྣམས་སུ་བསྒྲུབ་པར་བྱ། །རྣམ་པར་དབེན་པའི་ཕྱོགས་གཙང་མ། །བས་མཐའི་གྲོང་གི་ཆོས་བཞི་ལ། །མི་སྨྲ་རེག་པ་སྤངས་ནས་ནི། །རྟག་ཏུ་གཅི་བ་བྱ་བ་ཡིན། །ལུས་ལ་ལྷ་གནས་བཤང་བ་དང་། །བརྟུལ་ཞུགས་ཅན་དག་གཙང་སྦྲ་བྱ། །རེག་ན་གཞོན་ཤ་ཅན་རྣམས་འདོད། །སྲོག་ཆགས་སྤངས་པའི་ས་རྣམས་ནི། །གསུམ་པོ་ཚུལ་བཞིན་བླངས་ནས་ནི། །རྟག་པ་ཁོ་ནར་བཤང་ལམ་ལའོ། །དེ་བཞིན་གཉིས་ཀའི་མཐར་ལག་པ། །སྔགས་པས་རྟག་ཏུ་ས་དག་ནི། །སྔར་བསྟན་པ་དག་བླངས་ནས་ནི། །ཟློས་བོས་རྟག་ཏུ་རྐང་པ་ཉིད། །གཡས་དང་དེ་ལས་གཞན་པ་ནི། །ཕན་ཚུན་ཉིད་དུ་ཀུན་བཞག་ནས། །འབད་པས་རྐང་པ་བཀྲུ་བར་བྱ། །རྒྱ་ཆེར་སྔར་ནི་བརྗོད་པ་བཞིན། །སྔགས་ཟློས་པོ་ཡི་གཙང་སྦྲ་ཡང་། །དྲི་ང་མེད་པའི་གཙང་སྦྲ་སྟེ། །རྟག་ཏུ་ཐུབ་པ་ཉིད་ཀྱིས་གསུངས། །འདི་དག་མདོར་བསྡུས་བསྟན་པ་ཡིན། །རྒྱུད་རྣམས་ཀུན་དུ་མཐོང་ངོ་ཞེས། །མངའ་བདག་ཐུབ་པ་ཉིད་ཀྱིས་གསུངས། །དེ་ནས་ཟློས་པོས་ཉེ་རེག་བྱ། །སྡོམ་བརྩོན་དངོས་གྲུབ་ལས་ལ་དགའ། །སྔར་བརྗོད་པ་ཡི་ཆོ་ག་ཡིས། །ཡིད་ཀྱི་ནང་གི་དག་པ་ཡིན། །གཙང་སྦྲ་རྣམ་པ་ལྔ་རུ་བརྗོད། །སྔགས་པས་སྔགས་རྣམས་ཐམས་ཅད་དུ། །ལུས་ཀྱི་གཙང་སྦྲ་དེ་བཞིན་དུ། །ངག་ཡིད་ཁོ་ནར་རབ་ཏུ་བསྒྲགས། །བཞི་པ་བདེན་པའི་གཙང་སྦྲ་སྟེ། །ཆུ་ནི་
ལྔ་པར་བརྗོད་པར་བྱ། །བདེན་པའི་ཆོས་ནི་ཁྲོ་བ་ཐུལ། །རྒྱུད་ཤེས་བསྟན་བཅོས་མཐོང་བ་དང་། །ཕྲ་མོའི་དེ་ཉིད་དོན་ལ་མཁས། །སྔགས་ཤེས་ལས་ལ་གྲགས་པ་དང་། །རྒྱུ་ཡིས་ནང་ལ་མཁས་པ་སྟེ། །དེ་ལ་དངོས་གྲུབ་རྙེད་མི་དཀའ། །བདེན་པའི་ཆོས་ནི་རྣམ་སྤངས་པའི། །བརྫུན་པའི་ཚིག་ནི་སྨྲ་མི་བྱ། །བདེན་པ་ཐམས་ཅད་རྣམ་སྤངས་པའི། །མ་རུངས་རབ་ཏུ་མ་རུངས་ཉིད། །རྣམ་པར་སྡང་དང་འཁྲུགས་བཅས་དང་། །རྩུབ་ཅིང་གནད་ནི་འགེམས་པ་དང་། །བདེན་པའི་ཆོས་ནི་རྣམ་པར་ཉམས། །སེམས་ཅན་གཞན་ལ་གདུང་བར་བྱེད། །ཕྲ་མ་ཉོན་མོངས་ཅན་སེམས་དང་། །ཆོས་རྣམས་ཐམས་ཅད་སྤངས་པ་དང་། །དེ་བཞིན་འཚེ་བའི་བདག་ཉིད་ཅན། །རྟག་ཏུ་ཁྲིམས་འཆལ་ཆོས་མིན་སྤྱོད། །སྔགས་ཟློས་པ་ཡིས་སྤང་བར་བྱ། །དེ་བཞིན་ཉིད་དུ་གྲོང་གི་ཆོས། །ཁྲོ་བ་བརྣབ་སེམས་འབྱུང་བ་ཡི། །འཇིག་རྟེན་ཕ་རོལ་འཇིགས་པ་རྣམས། །བློ་ལྡན་རང་རྒྱལ་བསེ་རུ་དང་། །སླར་ཡང་རྟག་ཏུ་ཉོན་མོངས་དང་། །སྔོན་གྱི་སངས་རྒྱས་རྣམས་ཀྱིས་སྨད། །དེ་བཞིན་རྟག་ཏུ་བརྫུན་སྨྲ་བ། །འཇིག་རྟེན་དངོས་གྲུབ་འདོད་དོན་གཉེར། །ས་སྟེངས་བརྫུན་སྨྲ་ཉེ་བར་སྨྲ། །མི་བཟད་དམྱལ་བ་ཆེན་པོར་ལྟུང་། །སྔོན་གྱིས་ཉེས་པ་ལས་དེ་བཞིན། །དགའ་བས་གཤིན་རྗེའི་འཇིག་རྟེན་དུ། །རྟག་ཏུ་སླར་ཡང་དེར་གནས་སོ། །རྟག་ཏུ་བརྫུན་སྨྲས་ཉེར་འཚོ་བ། །མི་བཟད་ངན་འགྲོར་ལྟུང་བར་འགྱུར། །ཐིག་ནག་རབ་ཏུ་ཚ་བ་དང་། །ཡང་སོས་རལ་གྲི་ལོ་མ་དང་། །དེ་བཞིན་ཤལ་མ་ལ་ཡི་ནགས། །དེར་ནི་བསྐལ་པ་མང་པོར་གནས། །བརྫུན་དུ་སྨྲ་བའི་སྐྱེ་བོ་ནི། །གསང་སྔགས་ལོག་པར་སྨྲ་བ་དང་། །རྨོངས་པས་ལོག་པར་བརྗོད་པ་ཡི། །འབྱུང་པོ་རྣམས་ལ་སླུ་བྱེད་པ། །དེ་ལ་གྲུབ་པ་ག་ལ་ཡོད། །དེ་ཕྱིར་རྨོངས་པ་ལས་འདི་ཡིས། །སྔགས་ཀྱི་དངོས་གྲུབ་མ་མཐོང་ནས། །སྔགས་པའི་དངོས་གྲུབ་མེད་དོ་ཞེས། །འདི་སྐད་དུ་ནི་ཚིག་སྨྲ་བ། །གང་གིས་སངས་རྒྱས་བསྟན་པ་ནི། །ས་སྟེངས་འདིར་ནི་རབ་སྤངས་པ། །བསྐལ་པ་བྱེ་བ་མང་པོ་ཡིས། །དེ་ཡིས་གྲུབ་པར་ག་ལ་འགྱུར། །དེ་ཕྱིར་འདི་ནི་མི་བཟད་པའི། །འཇིགས་
ཆེན་མནར་མེད་འཚེད་པར་འགྱུར། །ཡང་སོས་དང་ནི་ཐིག་ནག་དང་། །རབ་ཏུ་ཚ་བར་འཚེད་པ་དང་། །སེམས་ཅན་སྡིག་སྦྲུལ་ལ་སོགས་པ། །སྤངས་པའི་ས་ཕྱོགས་འདོད་པར་བྱ། །འབྲས་བུ་མེ་ཏོག་ཡང་དག་ལྡན། །དྲི་མེད་ཆུ་ནི་རབ་བསྔགས་པ། །སྔགས་རིག་པས་ནི་སྔགས་བསྙེན་བྱ། །ཡུལ་གཞན་རྣམས་སུ་བསྒྲགས་མི་བྱ། །ལྷ་ཡི་གནས་སམ་དུར་ཁྲོད་དམ། །བརྟན་པའི་མཚན་མ་གཅིག་པ་དང་། །རྟགས་གཅིག་དེ་བཞིན་བས་མཐའ་རུ། །སྔགས་རིག་སྔགས་ནི་བསྙེན་པ་བྱ། །བདག་དང་གྲོགས་རྣམས་བསྲུང་བྱས་ནས། །སྔར་སྤྱད་གསང་སྔགས་ལྡན་པ་དང་། །སྔགས་པས་རྟག་ཏུ་སྔགས་བཟླས་བྱ། །དགོན་པ་ཆེ་མཆོག་ཤིང་ཆེན་དང་། །མེ་ཏོག་འབྲས་བུ་ལ་སོགས་འབྱུང་། །རི་ཡི་རྩེ་དང་ཁུང་བུ་དང་། །ཆུ་ཡི་གནས་ནི་གཙང་མར་བཅས། །འབབ་ཆུ་ཆེ་འགྲམ་ཡིད་འོང་བར། །སྔགས་རིག་པས་ནི་སྔགས་བསྙེན་བྱ། །སྔགས་ཤེས་ནས་ནི་ངེས་རྟོགས་བྱེད། །ཤར་ཕྱོགས་སུ་ཡང་ཆུ་ཀླུང་ཆེ། །ལུ་ཧི་ཏ་འགྲམ་དགེ་བ་དང་། །དེ་བཞིན་ཀཱ་མ་རུ་པའི་ཡུལ། །གྲོང་མཆོག་འཕེལ་བར་བྱེད་པ་དང་། །དམའ་བ་གང་དུ་འདི་འགྲོ་མཆོག །འདུག་པ་དང་ནི་ཆུ་ཀླུང་མཆོག །གནས་དེར་རྟག་ཏུ་ཟློས་པ་དང་། །གཙང་མ་བློ་གྲོས་ལྡན་པས་བསྟེན། །སྔོན་དུ་བསྙེན་པའང་དེར་གྱིས་ཤིག །གང་གཱའི་སྒོ་རུ་ལས་རྣམས་ཀུན། །དེ་བཞིན་རྟག་ཏུ་གང་གཱ་དང་། །དུག་ཅན་པ་ནི་ཕྲད་པ་རུ། །རབ་ཏུ་སྦྱོར་བ་ཀུན་ཉིད་དང་། །གཙང་མའི་སྔགས་ཀྱིས་བཟླས་པ་བྱ། །དུར་ཁྲོད་ཆེ་དང་གཞན་ཉིད་ནི། །ཟློས་པོས་དེར་ནི་རྟག་ཏུ་བཟླས། །དྲི་མེད་ཆུ་དང་འབབ་ཆུ་ནི། །སྲོག་ཆགས་རྣམས་ཀྱིས་སྤངས་པ་རུ། །དེ་ཉིད་ཕྱིར་ནི་ཤིན་ཏུ་ནི། །མཉམ་གཞག་སྔགས་ཀྱིས་བཟླས་པ་བྱ། །དེར་ནི་འཇིག་རྟེན་བསམ་པ་ཡི། །བསོད་ནམས་མིན་པ་ཅུང་ཟད་མཐོང་། །འོན་ཀྱང་སྔགས་ཀྱིས་ཉེར་བསྟན་པས། །ཅུང་ཟད་དུས་སུ་འདུག་པར་བྱ། །དེ་ནས་གཞན་དུ་འགྲོ་བར་བྱ། །ཟླ་བ་གཟས་ཟིན་དུས་དེར་ནི། །དུས་མ་བབ་ནའང་དུས་ཅུང་ཟད། །དེར་འདུག་བྱ་ཡི་གཞན་དུ་མིན། །གཞན་དུ་སྔགས་རིག་ཅི་ནུས་པས། །
དེ་ནས་མྱུར་དུ་འགྲོ་བར་བྱ། །བདེ་གཤེགས་མཆོད་རྟེན་བཞུགས་པ་ཡི། །ས་སྟེངས་རྣམས་སུ་ཀུན་དུ་འདུག །འཇིག་རྟེན་མུ་སྟེགས་ཐམས་ཅད་ནི། །ལྟ་བ་ངན་པར་ལྷུང་བ་རྣམས། །མུ་སྟེགས་ཅན་གཞན་གནས་རྣམས་ནི། །སྔགས་རིག་པས་ནི་རྟག་ཏུ་སྤངས། །སྔགས་ཤེས་དེར་ནི་མི་བསྡད་དོ། །སྐྱེས་མཆོག་བློ་གྲོས་རྒྱུ་ངན་པ། །རྒྱལ་བ་མཆོག་གིས་གང་བཞུགས་དང་། །རང་རྒྱལ་བསེ་རུ་ལྟ་བུ་དང་། །བྱང་ཆུབ་སེམས་དཔའ་སྐལ་བ་ཆེ། །རྒྱལ་མཆོག་སྲས་པོ་ཉན་ཐོས་རྣམས། །དེ་རྣམས་ཀུན་བཞུགས་ས་སྟེངས་ཀྱི། །ཡུལ་རྣམས་ཀུན་དུ་སྔགས་ཤེས་པས། །འབད་པས་སྔོན་དུ་བསྙེན་པ་བྱ། །མཉམ་པར་གཞག་པས་གསང་སྔགས་ནི། །གནས་དེ་རུ་ནི་བཟླས་པར་བྱ། །གསུངས་པའི་གནས་ནི་འདི་རྣམས་སུ། །གསུངས་པའི་ལས་རྣམས་ཐམས་ཅད་དང་། །ལས་ཀྱི་ཆོ་གའི་སྒྲུབ་ཐབས་རྣམས། །འདི་རྣམས་རྙེད་པར་མ་གྱུར་ན། །གང་ཡང་རུང་བའི་གནས་དེར་ནི། །གཙང་མས་སྔོན་དུ་བསྙེན་པ་བྱ། །དད་ཅིང་མོས་པས་སྒྲུབ་ཐབས་ཀྱི། །ཆོ་ག་མཆོག་གི་ལས་བརྩམ་མོ། །དང་པོ་རེ་ཞིག །བྲིས་སྐུའི་ཐུ་བོ་ཞལ་ནུབ་ཏུ་བསྟན་ནས་བཞག་སྟེ། བདག་ཉིད་ཤར་དུ་མངོན་པར་ཕྱོགས་ལ་གྲོག་མཁར་གྱི་སའམ། གང་གཱའི་ཀླུང་གི་འགྲམ་གྱི་ས་བླངས་ནས་པུ་ཤེལ་ཙེ་དང་། ཙནྡན་དཀར་པོ་དང་། གུར་གུམ་དང་། ག་པུར་རྣམས་བསྲེས་ལ་རྨ་བྱའི་གཟུགས་བྱས་ཏེ། དེ་བྲིས་སྐུའི་སྤྱན་སྔར་བཞག་ནས་རྩེ་མོ་མ་བཅད་པའི་ཀུ་ཤ་གཙང་མའི་ཕྱོགས་ནས་བྱུང་བས་འཁོར་ལོའི་རྣམ་པ་བྱས་ནས་བྲིས་སྐུའི་སྤྱན་སྔར་ལག་པ་གཡས་པས་བཟུང་སྟེ། ལག་པ་གཡོན་པས་ནི་རྨ་བྱའོ། །དཀར་པོའི་ཟླ་བ་ཉ་བའི་མཚན་ཕྱེད་ན་བྲིས་སྐུ་ལ་མཆོད་པ་ཆེན་པོ་བྱས་ནས་ག་པུར་གྱི་བདུག་པ་བསྲེགས་པའི་དྲི་དང་ཇི་སྲིད་ནམ་ལངས་པའི་བར་དེ་སྲིད་དུ་བཟླས་པར་བྱའོ། །དེ་ནས་ཉི་མ་འཆར་བའི་དུས་ཀྱི་ཚེ་དེ་རྨ་བྱའི་རྒྱལ་པོར་འགྱུར་རོ། །འཁོར་ལོ་ཡང་འབར་རོ། །བདག་ཉིད་ལྷའི་ཕྲེང་བ་དང་གོས་འཆང་ཞིང་རྣམ་པར་བརྒྱན་པ་དང་། ཉི་མ་འཆར་ཀ་འདྲ་བར་འདོད་པའི་གཟུགས་ཅན་དུ་
སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་བྱས་ཏེ་རས་རིས་ལ་བསྐོར་བ་བྱས་ལ་རས་རིས་བླངས་ནས་རྨ་བྱའི་གདན་དེ་ལ་འདུག་ན་ཡུད་ཙམ་གྱིས་ཚངས་པའི་འཇིག་རྟེན་ལས་འདའ་བར་བྱེད་དོ། །རིག་པ་འཛིན་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་བསྐོར་བའི་རིག་འཛིན་གྱི་རྒྱལ་པོ་འཁོར་ལོས་སྒྱུར་བར་འགྱུར། བསྐལ་པ་དྲུག་ཅུའི་བར་དུ་འཚོ་བར་འགྱུར་རོ། །ཇི་ལྟར་འདོད་པར་འགྲོ་ཞིང་། རབ་ཏུ་སྤྱོད་པར་འགྱུར་རོ། །ཐོགས་པ་མེད་པར་འགྲོའོ། །ལྷའི་ཕུན་སུམ་ཚོགས་པ་དང་ལྡན་པར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་མངོན་སུམ་དུ་མཐོང་བར་འགྱུར་རོ། །དེ་ཉིད་འདིའི་དགེ་བའི་བཤེས་གཉེན་དུ་འགྱུར་རོ། །མཐར་ཡང་སངས་རྒྱས་ཉིད་ཐོབ་པར་འགྱུར་རོ། །དེ་བཞིན་དུ་དབྱིག་པ་དང་། རིལ་བ་སྤྱི་བླུགས་དང་། མཆོད་ཕྱིར་ཐོགས་དང་། ལྡོང་རོས་དང་། གི་ཝང་དང་། རལ་གྲི་དང་། ལྕགས་མདའ་དང་། མཚོན་རྩེ་གཅིག་པ་དང་། དགྲ་སྟ་དང་། མཚོན་ཆའི་ཁྱད་པར་རྣམ་པ་སྣ་ཚོགས་པ། སའི་རང་བཞིན་གྱི་ཁྱད་པར་དང་། རྐང་གཉིས་པ་དང་། རྐང་བ་བཞི་པ་དང་། བྱ་དང་། བཞོན་པའི་ཁྱད་པར་སེང་གེ་དང་། སྟག་དང་། གཟིག་ལ་སོགས་པ་རྣམས་གྲོག་མཁར་གྱི་ས་དྲི་ཞིམ་པོའི་དྲི་ཞིམ་བསྲེས་པ་ལས་བྱས་པའམ། སྟན་དང་། བཞོན་པ་དང་། མལ་ཆ་དང་། གདུགས་དཀར་པོ་དང་། ཅོད་པན་དང་། རྒྱན་གྱི་བྱེ་བྲག་ཐམས་ཅད་དང་། རིན་པོ་ཆེའི་བྱེ་བྲག་ཐམས་ཅད་དང་། རབ་ཏུ་བྱུང་བའི་ཡོ་བྱད་ཀྱི་བྱེ་བྲག་ཐམས་ཅད་ལ་བགྲང་ཕྲེང་དང་། །མཆིལ་ལྷམ་དང་། ལྷུང་བཟེད་དང་། ཆོས་གོས་དང་། ཁབ་དང་། གྲི་ལ་སོགས་པ་རྒྱལ་གྱི་ལྕགས་ལས་བྱས་པའམ། གཞན་ཡང་གང་ཅུང་ཟད་སེམས་ཅན་གྱི་ཡོ་བྱད་སྣོད་ལ་སོགས་པ་རྒྱལ་གྱི་ལྕགས་ལས་བྱས་པའམ། གྲོག་མཁར་གྱི་སའམ། ཆུ་ཀླུང་གི་ས་ལས་བྱས་པ་དེ་ཐམས་ཅད་པའི་རྣམ་ལྔས་བཀྲུས་ནས་མངོན་པར་བསང་གཏོར་བྱས་ཏེ་སྔ་མ་བཞིན་དུ་སྦྱོར་བའི་སྔགས་སམ། ཡི་གེ་གཅིག་པའི་སྔགས་སམ། སྔགས་གཞན་གང་ཡང་རུང་བ་བརྒྱ་རྩ་བརྒྱད་མངོན་
པར་བསྔགས་པ་བྱས་ནས་རྟོག་པའི་རྒྱལ་པོ་འདིར་གསུངས་པ་མ་གཏོགས་པ་སྒྲུབ་པའི་ཆོ་གའི་རིག་པ་ཇི་ལྟར་འདོད་པ་དང་། ཇི་ལྟར་མངོན་པར་དགའ་བས་བདག་ཉིད་སྲུང་ཞིང་གྲོགས་པོ་ཡོངས་སུ་བསྐྱབ་པར་བྱས་པ། ཤིན་ཏུ་གསང་ཐུབ་ཅིང་སྔགས་དང་རྒྱུད་ཤེས་པ། སྔར་བསྟན་པའི་གནས་སུ་བྲིས་སྐུ་ཞལ་ནུབ་ཏུ་བསྟན་ལ་བཞག་སྟེ་བདག་ཉིད་སྔར་བཞིན་དུའོ། །བྲིས་སྐུ་ལ་མཆོད་པ་ཆེན་པོ་བྱས་ནས་གཙོ་བོར་ག་པུར་གྱི་བདུག་པ་བསྲེགས་ཏེ་སྔར་བསྟན་པའི་མཚོན་ཆ་དང་ཡོ་བྱད་དང་སེམས་ཅན་གྱི་ཁྱད་པར་རྣམས་སྔར་བསྟན་པའི་བཅོས་མར་བྱས་ལ། ཡར་ངོའི་ཟླ་བ་ཉ་བའི་མཚན་མོ་རྫས་དེ་རྣམས་གང་རུང་བླངས་ཏེ་མཚན་མོ་ཇི་སྲིད་དུ་བཟླས་པ་བྱས་ན་ཉི་མ་འཆར་བའི་དུས་ཀྱི་ཚེ་བར་སྐབས་འདིར་བྲིས་སྐུ་ལ་འོད་ཟེར་གྱི་ཕྲེང་བ་ཆེན་པོ་ཀུན་དུ་མཐོང་ངོ་། །གལ་ཏེ་སྒྲུབ་པ་པོ་བཞོན་པའི་ཁྱད་པར་བླངས་པར་གྱུར་ན། དེ་ལ་ཞོན་ནས་ཇི་ལྟར་འདོད་པར་འགྲོ་བར་འགྱུར་རོ། །གལ་ཏེ་རྒྱན་གྱི་ཁྱད་པར་རམ། མཚོན་ཆའི་ཁྱད་པར་བླངས་པའམ། བཅངས་པས་རིག་པ་འཛིན་པའི་རྒྱལ་པོ་ཆེན་པོར་འགྱུར་རོ། །ཇི་ལྟར་འདོད་པ་བཞིན་འགྲོ་ཞིང་། ལྷའི་ལུས་ཅན་ཉི་མ་ཤར་བ་དང་མཚུངས་པ་འོད་ཟེར་ཆེན་པོའི་ཕྲེང་བ་དང་ལྡན་པ་གློག་ལྟར་གསལ་བའི་སྐུ། རིག་པ་འཛིན་པ་ཐམས་ཅད་ཀྱི་མངའ་བདག །རིང་དུ་འཚོ་ཞིང་བསྐལ་པ་ཆེན་པོར་གནས་པ་རིག་པ་འཛིན་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་བསྐོར་ལྷའི་ནོར་བུ་རིན་པོ་ཆེའི་གཞལ་ཡས་ཁང་ན་སྤྱོད་པ། སྔར་ཡོངས་སུ་བརྟགས་པའི་སའི་རང་བཞིན་གྱི་བཞོན་པ་གང་གིས་གྲུབ་པ་དེ་ཉིད་མཐུ་ཆེན་པོར་འགྱུར་ཏེ། དེ་ཉིད་འདིའི་བཞོན་པ་དང་། དེ་ཉིད་འདིའི་གྲོགས་པོ་སྟེ། གཞན་གྱི་སྔགས་ཀྱི་དངོས་གྲུབ་བཟློག་པར་གྱུར་པ་བདག་གི་སྔགས་ཀྱི་དངོས་གྲུབ་ཀུན་ཏུ་སྦྱར་བར་བྱས་པ། བྱམས་པའི་བདག་ཉིད་ཅན། ཕན་པར་འདོད་པ་རྟག་ཏུ་རྗེས་སུ་བཅིངས་པ། དེ་ཉིད་འདིའི་མཚོན་ཆ་དང་། རྒྱན་དང་། རིན་པོ་ཆེའི་བྱེ་བྲག་དང་། སྟན་དང་། མལ་ཆ་དང་། སེམས་ཅན་ལ་སོགས་པ་གང་ཡིན་པ་དེ་ཉིད་འདིའི་བསྲུང་བ་དང་། བསྐྱབ་པ་དང་། སྦ་
བ་ཆེན་པོ་རྟག་ཏུ་རྗེས་སུ་འབྲེལ་བར་འགྱུར་རོ། །མཐུ་ཆེན་པོ་དང་བརྩོན་འགྲུས་ཆེན་པོ་དང་། ལུས་ཆེན་པོར་འགྱུར་རོ། །འཕགས་པ་སྤྱན་རས་གཟིགས་མངོན་སུམ་དུ་མཐོང་ཞིང་ལེགས་སོ་ཞེས་བྱ་བ་གནང་སྟེ་སྤྱི་བོར་བྱུགས་ནས་ཇི་སྲིད་བྱང་ཆུབ་སྙིང་བོ་རྗེས་སུ་ཐོབ་ཀྱི་བར་དུ་དགེ་བའི་བཤེས་གཉེན་མཛད་དེ། སྟོབས་བཅུ་པོ་རྣམས་ངེས་པར་ཀུན་ནས་ཐོབ་སྟེ་མཆོད་པའི་འོས་སུའང་འགྱུར་རོ། །སེམས་ཅན་རྣམས་ཀྱིས་ཟིལ་གྱིས་མི་ནོན་པ་དང་། འབྱུང་པོ་ཐམས་ཅད་ཀྱིས་མི་ཚུགས་པར་འགྱུར་རོ། །ཡང་དག་པའི་མཐའི་རིགས་རྒྱུན་མི་གཅོད་པ་དང་། ས་ཐོབ་པར་ཡང་འགྱུར་རོ། །སྟོབས་བཅུ་དང་བྱང་ཆུབ་སེམས་དཔའ་ཉིད་དུ་ངེས་པ་དང་ཏིང་ངེ་འཛིན་དུ་འགྱུར་རོ། །མདོར་བསྡུས་ནས་ལས་མཆོག་ཐམས་ཅད་དང་། གནས་མཆོག་ལ་གནས་པས་རས་རིས་མཆོག་གི་སྤྱན་སྔར་མཆོད་པ་མཆོག་ལ་མངོན་པར་དགའ་བས་ལས་མཆོག་གཞན་ཉིད་བྱའོ། །རིག་པ་འཛིན་པ་ཉིད་ནམ་མཁའ་ལ་འགྲོ་བ་དང་། བྱང་ཆུབ་སེམས་དཔའི་རྗེས་སུ་འཇུག་པ་དང་། མངོན་པར་ཤེས་པ་ལྔ་དང་། ས་རྗེས་སུ་ཐོབ་པར་བྱེད་པ་ཉིད་དང་། ལུས་འདི་ཉིད་ཀྱིས་འཇིག་རྟེན་གྱི་ཁམས་སུ་ཀུན་དུ་འགྲོ་བ་ཉིད་དང་། སྟོབས་བཅུའི་རྒྱུད་ཡོངས་སུ་རྫོགས་པར་བྱེད་པ་ཉིད་ཀྱི་ཕྱིར་དང་། འཕགས་པ་བྱམས་པ་མངོན་སུམ་དུ་མཐོང་བ་ཉིད་ཀྱི་ཕྱིར་དང་། ཆོས་བསྟན་པ་དོན་ཡོད་པ་ཉིད་ཀྱི་ཕྱིར་དང་། སངས་རྒྱས་ཀྱི་གདུང་རྒྱུན་མི་གཅོད་པ་ཉིད་ཀྱི་ཕྱིར་དང་། ཐམས་ཅད་མཁྱེན་པའི་ཡེ་ཤེས་ཀུན་དུ་གནོན་ཅིང་རྗེས་སུ་ཐོབ་པར་བྱེད་པ་ཉིད་ཀྱི་ཕྱིར་དང་། ཆོས་ཀྱི་སྤྲིན་རྣམ་པར་འབྱོར་པ་ལ་རྗེས་སུ་འཇུག་པ་ཉིད་ཀྱི་ཕྱིར་དང་། ཉོན་མོངས་པའི་ཡོངས་སུ་གདུང་བ་མེད་ཅིང་བདུད་རྩིའི་ཆར་གྱི་རྒྱུན་གྱིས་རབ་ཏུ་ཞི་བ་ཉིད་ཀྱི་ཕྱིར་དང་། འཇིག་རྟེན་རྗེས་སུ་འཛིན་པ་ལ་རབ་ཏུ་འཇུག་ཅིང་ནན་ཏན་བྱེད་པ་ཉིད་ཀྱི་ཕྱིར་དང་། དེ་བཞིན་གཤེགས་པའི་ཆོས་ཀྱི་ཚུལ་སྲུང་བ་ཉིད་ཀྱི་ཕྱིར་དང་། དེ་བཞིན་གཤེགས་པའི་གསུང་དོན་ཡོད་པར་བྱེད་པ་ཉིད་ཀྱི་ཕྱིར་དང་། སྔགས་ཀྱི་སྤྱོད་
པའི་སྒྲུབ་པའི་ཐབས་ཀྱི་ཆོ་ག་རབ་ཏུ་སྒོམ་པ་ཉིད་ཀྱི་ཕྱིར་དང་། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་དང་། རང་སངས་རྒྱས་དང་། འཕགས་པ་ཉན་ཐོས་བདག་ཉིད་ཆེན་པོ་རྣམས་འབྱུང་བ་ཉིད་ཀྱི་ཕྱིར། རྟོག་པའི་རྒྱལ་པོ་འདི་བསྒྲུབ་པར་བྱ་སྟེ། སྔགས་ཀྱི་མཐུ་རབ་འབྱམ་དང་ལྡན་པ་རས་རིས་ཐུ་བོ་སྤྱན་སྔ་དང་ཉེ་བར་འདུག་ནས་འཇིག་རྟེན་པ་དང་། འཇིག་རྟེན་ལས་འདས་པ་ཐམས་ཅད་ཀྱི་སྔགས་ཀྱི་ཆོ་ག་དང་། རྒྱུད་ཐམས་ཅད་དུ་རྣམ་པ་སྣ་ཚོགས་པའི་ལམ་སྟེ། མདོར་ན་འདིར་རྟོག་པ་གཞན་དུ་གསུངས་པའི་ལས་རྣམས་ཀྱིས་ཀྱང་རས་རིས་ཀྱི་རྒྱལ་པོ་འདི་བསྒྲུབ་པར་བྱ་སྟེ། མྱུར་དུ་དེ་རྣམས་ཀྱི་དངོས་གྲུབ་ཏུ་འགྱུར་ཏེ་གང་ངས་བསྟན་པ་དེ་དག་གདོན་མི་ཟ་བར་འགྲུབ་པར་འགྱུར་རོ། །བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་བཅོམ་ལྡན་འདས་མ་འཕགས་མ་སྒྲོལ་མ་རལ་པ་གྱེན་བརྫེས་ཀྱི་རྩ་བའི་ཆོ་ག་ལས། རས་རིས་མཆོག་གི་སྒྲུབ་པའི་ལེའུ་སྟེ་བརྒྱད་པ་རྫོགས་སོ།། །།དེ་ནས་བཅོམ་ལྡན་འདས་ཤཱཀྱ་ཐུབ་པས་སླར་ཡང་འཁོར་གྱི་དཀྱིལ་འཁོར་ཆེན་པོ་དེ་ལ་གཟིགས་ནས་བྱང་ཆུབ་སེམས་དཔའ་ཆེན་པོ་ལ་བཀའ་སྩལ་པ། སེམས་དཔའ་ཆེན་པོ་ཁྱོད་ཀྱི་རས་རིས་ཀྱི་ཆོ་ག་བར་མའི་ལས་ཀྱི་ཆོ་གའི་སྒྲུབ་ཐབས་བར་མ་ཡོད་དོ། །དེ་མདོར་བསྡུས་ནས་བཤད་པར་བྱ་ཡིས། ལེགས་པར་ཡིད་ལ་གྱིས་ཤིག་དང་བཤད་པར་བྱའོ། །དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྟོན་པ་འཇིག་རྟེན་ལ་ཐུགས་བརྩེ་བ་ཅན། སེམས་ཅན་ཐམས་ཅད་ལ་ཕན་པར་དགྱེས་པ། བདག་ཅག་ལ་ཐུགས་བརྩེ་བའི་དོན་དང་། མ་འོངས་པའི་སྐྱེ་བོ་རྣམས་ལ་གཟིགས་ནས་གང་དེའི་དུས་ལ་བབ་པར་དགོངས་ན་དེ་གསུང་དུ་གསོལ། དེ་སྐད་ཅེས་གསོལ་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །སེམས་དཔའ་ཆེན་པོ་ཉོན་ཅིག །དང་པོ་རེ་ཞིག་
ཚུལ་ཁྲིམས་དང་བརྟུལ་ཞུགས་དང་། གཙང་སྦྲའི་ཀུན་དུ་སྤྱོད་པ་དང་། ངེས་པར་སྡོམ་པ་དང་། བཟླས་པ་དང་། སྦྱིན་སྲེག་དང་། བསམ་གཏན་དང་། ཆོ་ག་དང་། གང་དུ་རབ་ཏུ་གནས་པ་སྟེ། སེམས་ཅན་ཐམས་ཅད་ཀྱི་སྤྱོད་པ་སྒྲུབ་པའི་ལས་འབྲས་བུ་དང་བཅས་ཤིང་དོན་མེད་པར་མི་འགྱུར་བ་དང་། སྔགས་ཐམས་ཅད་ཀྱི་རབ་ཏུ་སྦྱོར་བའི་དངོས་གྲུབ་འགྲུབ་པར་འགྱུར་བ་དེ་གང་ཞེ་ན། དེ་ངས་བཤད་ཀྱིས་སེམས་དཔའ་ཆེན་པོ་ཉོན་ཅིག །དང་པོ་རེ་ཞིག་རིག་པའི་བརྟུལ་ཞུགས་དང་། ཚུལ་ཁྲིམས་ཡང་དག་པར་བླང་བ་དང་པོ་ཉིད་དུ་ཡང་དག་པར་བླངས་ཏེ། དང་པོ་རེ་ཞིག་དཀྱིལ་འཁོར་གྱི་སློབ་དཔོན་གྱིས་ཉེ་བར་བསྟན་པའི་དམ་ཚིག་ལ་ཡང་དག་པར་རྗེས་སུ་འཇུག་པར་བྱའོ། །ཁྱོད་ཀྱིས་རྟོག་པའི་རྒྱལ་པོ་གསུངས་པ། སྔར་ངེས་པར་བསྟན་པ་གསལ་བ། ཡིད་གཞུངས་པ་དང་ལྡན་པ། སློབ་དཔོན་དུ་དབང་བསྐུར་བ་ཐོབ་པ། ཁྱོད་ཀྱིས་བསྟན་པའི་ཆོ་ག་ཤེས་པ། མཁས་པ། གསལ་བ། ཆོས་དང་ལྡན་པ། བདེན་པར་སྨྲ་བ། སྤྲོ་བ་ཆེ་བ། བྱས་པ་གཟོ་བ། བརྟན་པ། སེམས་བཟང་པ། ཧ་ཅང་མི་རྒན་ཅིང་ཧ་ཅང་མི་གཞོན་པ། རྙེད་པ་དང་། བཀུར་སྟི་ཐམས་ཅད་ལ་འདོད་པ་མེད་པ། ཚངས་པར་སྤྱོད་པ། སྙིང་རྗེ་དང་ལྡན་པ། རྙེད་པ་ཙམ་གྱིས་སམ་ལོངས་སྤྱོད་རྒྱུར་རམ། རྗེས་སུ་ཆགས་པའི་རྒྱུར་ཡང་བརྫུན་མི་སྨྲ་ན། ཤིན་ཏུ་ཆུང་ངུ་ཙམ་ཉིད་དང་། རྙེད་པ་དང་། རྨོངས་པའི་རྣམ་པ་ལྟ་སྨོས། དམ་བཅས་པ་བརྟན་པ་དང་། འབྱུང་པོ་ཐམས་ཅད་ལ་མཉམ་པ་ཉིད་དུ་སྙིང་བརྩེ་བ་དང་ལྡན་པ་དང་། སྦྱིན་པ་དང་ཚུལ་ཁྲིམས་དང་། སྔར་སྤྱད་པ་བྱས་པ་ཁྱོད་ཀྱི་གསང་བའི་རིག་པ་དང་། སྔགས་རྗེས་སུ་ཟློས་པ་དང་། རིག་པ་སྔོན་དུ་བསྙེན་པ་བྱས་པ་ཁྱོད་ཀྱི་དཀྱིལ་འཁོར་དུ་ཡང་དག་པར་ཞུགས་པ། འཇིག་རྟེན་ཤེས་པ། ཡང་དག་པར་རྗེས་སུ་འཛིན་པར་བྱེད་པ། འབྲས་བུ་དང་ལྡན་ཞིང་མཁས་པ། ལེགས་པ་ལ་རབ་ཏུ་ཞུགས་པ། མི་འཇིགས་ཤིང་མི་གནོད་ལ། ཆགས་པ་མེད་པ། དཔའ་བ། བརྩོན་འགྲུས་བརྟན་པ།
ནད་མེད་པ་སྟེ། ནད་གང་གིས་ལས་སུ་མི་རུང་བའི་ངང་ཚུལ་ཅན་དང་། རིགས་ཆེ་ཞིང་མཐོ་བར་རབ་ཏུ་སྐྱེས་པ་ཞེས་པ། ཡོན་ཏན་འདི་རྣམས་དང་ལྡན་པ་ནི་དཀྱིལ་འཁོར་གྱི་སློབ་དཔོན་དུ་འགྱུར་ཏེ། སྒྲུབ་པ་པོ་ཡང་དེ་དང་འདྲ་བའམ། ཡན་ལག་ཅུང་ཟད་མ་རྫོགས་པའོ། །དེ་ལྟ་བུའི་དཀྱིལ་འཁོར་གྱི་སློབ་དཔོན་ལ་མཆོད་པ་བྱས་ནས་འདིའི་དོན་དུ་གསོལ་བ་གདབ་པར་བྱ་སྟེ། སློབ་དཔོན་གྱིས་བྱང་ཆུབ་སེམས་དཔའ་སེམས་དཔའ་ཆེན་པོའི་རིག་པ་དང་སྔགས་དང་བཅོམ་ལྡན་འདས་མ་དེའི་དཀྱིལ་འཁོར་གྱི་དམ་ཚིག་ལ་རྗེས་སུ་འཇུག་པར་འཚལ་ན་བདག་ཅག་ལ་རྗེས་སུ་བརྩེ་བའི་དོན་དང་། ཕན་པའི་ཐུགས་བསྐྱེད་ནས་དེ་སློབ་དཔོན་གྱིས་གསུང་དུ་གསོལ། དེ་ནས་དཀྱིལ་འཁོར་གྱི་སློབ་དཔོན་གྱིས་སྔར་བསྟན་པའི་ཆོ་གས་སློབ་མ་ཇི་ལྟ་བ་བཞིན་རིམ་གྱིས་བརྟགས་ནས་གཞུག་པར་བྱ་ཞིང་སྔར་བཞིན་དུ་མངོན་པར་དབང་བསྐུར་བ་བྱིན་ནས་རིག་པ་དང་སྔགས་བྱིན་ལ་རིམ་པ་ཇི་ལྟ་བར་དམ་ཚིག་བསྟན་པར་བྱའོ། །གསང་ཆེན་དང་། ཕྱག་རྒྱ་དང་། རྒྱུད་དང་། སྔགས་དང་ལས་རྣམས་ཀྱང་དུས་རིང་མོ་ཉིད་ནས་ཡོངས་སུ་བརྟགས་ཏེ། བསམ་པ་ཤེས་ནས་རྒྱུད་དང་སྔགས་ལ་སོགས་པ་དང་། ལས་རྣམས་ཐམས་ཅད་བསྟན་པར་བྱའོ། །གཞན་དུ་མ་ཡིན་ནོ་ཞེས་པའི་ཆོ་ག་འདི་རབ་ཏུ་བསྒྲགས་སོ། །དེ་ནས་སློབ་མས་དཀྱིལ་འཁོར་གྱི་སློབ་དཔོན་ལ་ཇི་ལྟར་ནུས་པས་གང་གིས་སློབ་དཔོན་དགྱེས་པའམ་བདག་ཉིད་དང་ལོངས་སྤྱོད་ཀྱང་དབུལ་བར་བྱའོ། །དེ་ནས་དཀྱིལ་འཁོར་གྱི་སློབ་དཔོན་དེས་བུའི་འདུ་ཤེས་ཉེ་བར་གཞག་པར་བྱའོ། །བུ་བཞིན་དུ་བསྐྱང་བར་བྱའོ། །མ་བཞིན་ལོངས་སྤྱོད་ཀྱིས་ཉེ་བར་བསྡུ་བར་བྱའོ། །དེ་ནས་སྒྲུབ་པ་པོ་དེས་རིག་པ་དང་སྔགས་གང་ཡང་རུང་བ་ཞིག་བཟུང་ནས་མཐའ་གཅིག་ཏུ་སོང་སྟེ། སྔར་བསྟན་པའི་གནས་རྒྱ་ཆེར་གོང་མ་བཞིན་དུ་སྦྱར་བས་རིག་པ་ལ་སོགས་པ་དེ་རྣམས་ཉིད་ཀྱིས་སྤྱན་དྲང་བ་དང་། གཤེགས་སུ་གསོལ་བ་དང་། མར་མེ་དང་། དྲི་དང་། བདུག་པ་དང་། གཏོར་མ་དང་། ལྷ་བཤོས་དག་དཀྱིལ་འཁོར་དུ་གསུངས་པའི་ཆོ་ག་ཉིད་ཀྱིས་
རྒྱས་པར་བྱས་ཏེ་སྤྱན་དྲངས་ནས་གདན་ཕུལ་བ་ཐུན་མཚམས་གསུམ་དུ་ཁྲུས་གསུམ་བྱ་ཞིང་གོས་ལན་གསུམ་བརྗེས་ཏེ་ཉི་མ་སོ་སོ་ལ་བཟླས་པ་བྱའོ། །དེ་ལ་ཐུན་མཚམས་ཀྱི་དུས་ཞེས་བྱ་བ་ནི་མཚན་མོའི་མཐའ་ནས་བརྩམས་ཏེ་ཇི་སྲིད་ཉི་མ་འཆར་བའི་དུས་ཙམ་གྱི་བར་འདི་ལ་དང་པོར་བཤད་དོ། །ཉི་མ་གུང་ནི་ཉི་མ་ཤར་བའི་མཐར་དུས་ཙམ་གྱི་ཚད་ཀྱི་མཚམས་ཉི་མའི་དཀྱིལ་འཁོར་ནམ་མཁའ་ལ་ཡང་དག་པར་བརྟེན་པ་ནི་ཆོ་ག་ཤེས་པས་གུང་གི་ཐུན་མཚམས་སུ་ཤེས་པར་བྱའོ། །ནུབ་པའི་དུས་སུ་ཡང་ལྷག་མ་བཞི་ཆ་ཙམ་ཐུན་མཚམས་གསུམ་པར་བརྗོད་པར་བྱའོ། །སློབ་དཔོན་མཁས་པ་བཤེས་གཉེན་ཅན། །ཚུལ་ཁྲིམས་བརྟུལ་ཞུགས་ཡང་དག་ལྡན། །ཆེན་པོའི་རིགས་སུ་འཁྲུངས་པ་དང་། །ཀུན་ནས་བརྩོན་འགྲུས་བརྟན་པ་ནི། །སྔགས་དང་རྒྱུད་སོགས་ཡང་དག་ལྡན། །བྱ་བ་ཀུན་ལ་བློ་གྲོས་བྱང་། །ཕྲ་ཞིང་མཁས་ལ་ཚད་ཤེས་པ། །ཆོས་ཀྱི་དབྱིངས་ནི་རྟག་ཏུ་འཛིན། །སྤྲོ་བ་ཆེ་ཞིང་གཟི་བརྗིད་ལྡན། །འཇིག་རྟེན་ཆོས་ལ་ལྟོས་པ་མེད། །ཐུབ་པ་མཆོག་གི་ཆོས་ལ་དད། །འཇིག་རྟེན་པ་རྣམས་དོར་བ་དང་། །བཟླས་པ་བྱ་ཞིང་རྣམ་དབེན་བྱས། །སྔོན་དུ་བསྙེན་པ་རྗེས་བརྟེན་པ། །བྱང་ཆུབ་སེམས་དཔའི་གསང་སྔགས་ཤེས། །དེ་ལས་གཞན་པའི་རྐྱེན་རྣམས་མཐོང་། །སངས་རྒྱས་ཀྱིས་གསུངས་གསང་སྔགས་དང་། །འཇིག་རྟེན་པ་ཡི་རབ་སྦྱོར་ཤེས། །སྲུང་བ་བྱས་ཤིང་མཐུ་བརྟན་པ། །གཙང་སྦྲའི་ཀུན་སྤྱོད་ལ་རྟག་དགའ། །སངས་རྒྱས་ཉེ་བསྟན་ལམ་ལ་ནི། །ཀུན་ནས་རྗེས་སུ་འཇུག་པ་དང་། །གསང་སྔགས་རྒྱལ་བས་གསུངས་པ་ཡིན། །གསང་སྔགས་ཟློས་ལ་རྟག་ཏུ་བརྩོན། །རྟག་ཏུ་མཐོང་ཆོས་འབྲས་བུ་དང་། །འཇིག་རྟེན་ཕ་རོལ་དེ་བཞིན་ཉིད། །སྡིག་པ་ཀུན་ལ་འཇིགས་པ་དང་། །ཕྲ་མོ་ཙམ་ལའང་དེ་བཞིན་ནོ། །གཙང་ཞིང་མཁས་ལ་ལེ་ལོ་མེད། །ཡིད་གཞུངས་བལྟ་ན་སྡུག་པ་དང་། །སྟོབས་བཅུ་པས་བཤད་སྔགས་གང་དང་། །དེ་བཞིན་ཁོ་ནར་རྒྱལ་སྲས་དང་། །འཇིག་རྟེན་པ་ཡི་སྔགས་གང་ཉིད། །རྡོ་རྗེ་པདྨའི་རིགས་དག་ལའང་། །དེ་ལ་རྟག་ཏུ་
ངལ་བར་བྱས། །གཞུང་དང་བསྟན་བཅོས་དོན་འཛིན་པ། །ནད་མེད་ནུས་པ་མེད་མིན་པ། །རྒ་དང་ནད་ནི་རྣམ་པར་སྤངས། །དེ་བཞིན་བཤེས་གཉེན་ཅན་སྔགས་གྲུབ། །ཀུན་ནས་མྱུར་དུ་བྱེད་པ་དང་། །མཐའ་ཡི་རིང་མིན་ཞིང་དེ་བཞིན། །ཚངས་པར་སྤྱོད་ཅིང་ཤེས་རབ་ཆེ། །ཁྱད་པར་དུ་ནི་ཤེས་པ་དང་། །གཅིག་ཏུ་འདུ་འཛི་མེད་པ་དང་། །དཔའ་ཞིང་དབང་བསྐུར་ཐོབ་པ་དང་། །དེ་འདིར་བྱང་ཆུབ་ཕ་རོལ་སོན། །སྲིད་པ་ཞི་བར་བྱེད་ལ་བརྩོན། །དེ་བཞིན་ཉིད་དུ་རིག་སྔགས་བྱ། །མཐུ་ཆེན་འཇིག་རྟེན་ཤེས་པ་དང་། །འགྲོ་བ་སེམས་ཅན་རྗེས་སེམས་པ། །དཔལ་ཉིད་དང་ནི་རབ་ཏུ་ལྡན། །སྦྱིན་དང་འབྱུང་པོ་ཕན་ལ་དགའ། །དེ་བཞིན་ཁྱད་འཕགས་སློབ་དཔོན་ལ། །རྟག་ཏུ་གསོལ་བ་གདབ་པར་བྱ། །དེས་ནི་དཀྱིལ་འཁོར་བྲིས་པ་ཡི། །སྔགས་ཀྱི་དངོས་གྲུབ་སྟེར་བར་བྱེད། །དེ་ཉིད་ཀྱིས་ནི་དབང་བསྐུར་གྱིས། །འབྲས་བུ་ཆེན་པོ་སྦྱིན་པར་འགྱུར། །དངོས་གྲུབ་འདོད་པའི་སློབ་མས་ཀྱང་། །ཐུབ་པ་བཞིན་དུ་རྟག་ཏུ་མཆོད། །དེ་ཡི་གསུང་ནི་མི་འགོམ་པ། །སློབ་མས་འབད་པས་བྱ་བ་ཡིན། །ཇི་ལྟར་འབྱོར་ཅིང་བདོག་པ་ཡི། །ལོངས་སྤྱོད་དེ་ལ་དབུལ་བར་བྱ། །ཉུང་ངུ་ཙམ་མམ་མང་ཡང་རུང་། །གང་གིས་མཉེས་པར་འགྱུར་བ་དང་། །ལུས་ནི་འཚོ་བའི་རྒྱུ་ཡི་ཕྱིར། །ཕ་ལ་ནོར་ནི་སྟེར་བ་ལྟར། །དེ་བཞིན་སློབ་མ་ཆོས་ཤེས་པས། །སློབ་དཔོན་ལ་ནི་ནོར་དབུལ་བྱ། །མཐའ་ཡི་དབང་ཕྱུག་དངོས་གྲུབ་ཐོབ། །ཚེ་དང་དེ་བཞིན་ནད་མེད་དང་། །རྒྱས་པའི་འགྲོ་བ་ཐོབ་པར་འགྱུར། །སློབ་མས་བླ་མ་དེ་མཆོད་ན། །དེ་ཡི་སྔགས་རྣམས་འགྲུབ་པར་འགྱུར། །ལམ་དང་ཆོ་ག་ཉེར་མཐོང་དང་། །བསྙེན་པ་ལས་ཀྱང་བརྟེན་པ་ལས། །དེ་བཞིན་རི་མོར་བྱས་མཆོད་ལས། །སངས་རྒྱས་ཐམས་ཅད་དགྱེས་པར་འགྱུར། །དེ་བཞིན་རྒྱལ་མཆོག་སྲས་རྣམས་དང་། །ལྷ་རྣམས་ཐམས་ཅད་དགྱེས་པར་འགྱུར། །བླ་མ་རྟག་ཏུ་བསྙེན་བཀུར་ན། །བླ་མ་སྔགས་རྣམས་མཐོང་བ་ཡིས། །འདི་དག་ཐམས་ཅད་བརྟན་པར་
འགྱུར། །སྒྲུབ་པོས་སྔོན་དང་ཐོག་མར་ནི། །དམ་ཚིག་ལ་ནི་རྗེས་འཇུག་བྱ། །དམན་ནམ་དེ་དག་མཉམ་ཡང་རུང་། །གལ་ཏེ་ཆེས་མཆོག་གྱུར་པ་ཡང་། །རྨོངས་པའམ་ལྷག་པར་ཁྲོ་བ་ཡིས། །རྟག་ཏུ་བླ་མ་བརྙས་མི་བྱ། །དེས་ཀྱང་རྒྱུད་འདིར་དེ་ལ་ནི། །མན་ངག་རྟག་ཏུ་སྦྱིན་པར་བྱ། །གང་ཚེ་སྔགས་ཀྱི་དངོས་གྲུབ་བྱིན། །འདིས་ནི་སེར་སྣ་བྱས་པ་མིན། །སྔར་བསྟན་སློབ་མ་དེ་ལ་ནི། །མན་ངག་རྟག་ཏུ་སྦྱིན་པར་བྱ། །གང་ཚེ་སྔགས་ཀྱི་དངོས་གྲུབ་བྱིན། །ལུས་ཅན་ཞེན་པ་འཕེལ་བྱེད་པའི། །མིག་ནི་གང་ལ་ཡོད་གྱུར་པ། །དེ་ཉིད་སློབ་མ་ཉིད་བྱའོ། །སློབ་དཔོན་ནམ་ནི་སློབ་མའི་རྒྱུར། །ཕན་ཚུན་རྗེས་སུ་འཇུག་བྱེད་པ། །གང་དུ་ཞེན་པའི་རྒྱུན་སྐྱོང་བ། །འཇམ་པོའི་རྒྱུན་ནི་འཛིན་པ་སྟེ། །དེ་ལ་སྔགས་ནི་སྦྱིན་པར་བྱ། །སློབ་དཔོན་དེ་བཞིན་སློབ་མ་ནི། །སློབ་མ་བླ་མར་མཐོང་བ་ལ། །རྟག་ཏུ་སྤྲོ་བར་འགྱུར་བའམ། །གཉིས་ཀས་དངོས་གྲུབ་ཡང་དག་འབྱོར། །དེ་ལ་རྟག་ཏུ་ལམ་ཉིད་དང་། །སྔགས་ཀྱི་སྤྱོད་པ་རྗེས་བསྟན་བྱ། །གཉིས་ཀས་ཕ་དང་བུར་ཤེས་པས། །སྔགས་ནི་འབྲས་བཅས་རྗེས་འཇུག་པ། །བརྟན་དང་དགའ་བ་དེ་བཞིན་ཐོབ། །རྟག་ཏུ་སློབ་མས་བླ་མ་ནི། །རབ་ཏུ་འབད་པས་བསྲུང་བར་བྱ། །བུ་ནི་བདག་ཉིད་ཆེན་པོ་རྣམས། །སངས་རྒྱས་ཆོས་རྒྱུན་མི་འཆད་འགྱུར། །དེ་མེད་མགོན་མེད་དེ་རྣམས་ལ། །ཇི་སྐད་གསུངས་པའི་སྔགས་རྣམས་སྦྱིན། །སེམས་ཅན་བཀྲེན་དང་མ་ནིང་ལའང་། །ཐམས་ཅད་ལ་ནི་ཁྱད་པར་དུ། །སྔགས་ཀྱི་སྤྱོད་པ་ཁྱད་པར་འཕགས། །ཐ་མ་མཆོག་དང་བར་མ་ལ། །དུས་རྣམས་ཀུན་ཏུ་བྱ་བའོ། །ཡོངས་སུ་ཐོབ་པའི་ཆོས་རྣམས་ལ། །རྗེས་སུ་གཟུང་བའི་རྒྱུན་བྱའོ། །འགྲོ་བ་བློ་གྲོས་ངེས་པ་ཡི། །འདོད་པ་རྣམས་ལའང་རབ་སྦྱིན་བྱ། །དེ་ཕྱིར་ཇི་ལྟར་འདོད་པའི་སྔགས། །སློབ་མ་ཉིད་ཀྱིས་བླང་བར་བྱ། །དེ་ཉིད་ཀྱིས་ནི་ཉེར་བསྟན་པས། །ལམ་ཉིད་ཡིན་ནོ་གཞན་དུ་མིན། །དངོས་གྲུབ་འདོད་པས་གང་དེ་ལ། །
ཕ་ནི་ཕ་རོལ་སོང་བ་ན། །ཕ་བཞིན་མགོ་བོས་ཕྱག་བྱས་ཏེ། །དེ་ནས་ཇི་ལྟར་འདོད་པར་འགྲོ། །དེ་ནས་འདིར་ནི་སོང་ནས་ནི། །མཉམ་པར་བཞག་པས་གསང་སྔགས་བཟླས། །སློང་མོ་སློང་བའི་རྗེས་འཇུག་ཅིང་། །སྨྲ་བ་བཅད་དེ་དུས་གསུམ་བཟླས། །དེ་ལྟར་བསྟན་པ་ཉིད་དུ་འགྱུར། །ཇི་ལྟའི་ལམ་ལ་རབ་འཇུག་པ། །དེ་ཚེ་རྣམ་འགྱུར་དེ་གཅོད་པ། །ཁང་སྟོང་དང་ནི་དགོན་པ་ཆེ། །རི་བོ་ཆེ་དང་ཆུ་ཀླུང་ངོགས། །གཙང་དང་བ་ལང་གནས་མཚོ་ཆེན། །རྣམ་དབེན་སྐྱེ་བོ་སྤངས་པ་བསྟེན། །ལྷ་ཁང་དང་ནི་ཤིང་དྲུང་དང་། །མཚན་གཅིག་རི་ནི་མཐོན་པོ་དང་། །རྒྱ་མཚོ་ཆེ་འགྲམ་ཉམས་དགའ་དང་། །ཆུ་གླིང་ངམ་ནི་གླིང་རྣམས་དང་། །རྣམ་པ་སྣ་ཚོགས་སྔར་བསྟན་པའི། །ཡུལ་རྣམས་སྣ་ཚོགས་ཡིད་འོང་བ། །འདི་རྣམས་ལས་ཀྱང་ཕྱོགས་གཞན་དུ། །མཉམ་པར་བཞག་པས་སྔགས་བཟླས་བྱ། །གྲོགས་པོ་མཚན་ཉིད་ལྡན་པ་ནི། །སྔགས་དོན་ངེས་པའི་རྟོག་གེ་པ། །ལྟས་ནི་རྣམ་པ་དེ་ཉིད་ཤེས། །དཔའ་ཞིང་གཡུལ་ལས་རྣམ་རྒྱལ་བ། །སྙིང་སྟོབས་ལྡན་ཞིང་བཟོད་པ་ཅན། །དད་དང་ཚུལ་ཁྲིམས་ཕུན་ཚོགས་ལྡན། །རྒྱལ་བས་གསུངས་པའི་ཡུལ་འདིར་ནི། །རབ་བསྔགས་མཚན་ཉིད་དང་ལྡན་པ། །བཟོད་དང་ལྡན་པའི་གྲོགས་པོ་ཡིས། །འབད་པ་མེད་པར་ཉིད་ཀྱིས་ནི། །ལས་རྣམས་རྒྱལ་བ་འགྲུབ་པར་འགྱུར། །ཐོ་རངས་མལ་ནས་ལངས་ནས་ནི། །འབབ་ཆུ་མཚོ་ཆེན་ལས་བྱུང་བའི། །སྲོག་ཆགས་མེད་ཅིང་དྲི་མ་མེད། །ཆུ་དེ་ཉིད་ལ་ཁྲུས་བྱས་ནས། །ས་དང་བ་བྱུང་ཕྱེ་མ་ཡིས། །སྔགས་ཤེས་ལུས་ནི་དྲིལ་ཕྱིས་བྱ། །དེ་ནས་སྔགས་ཀྱིས་སྦྱང་བྱས་པའི། །ཆུ་ཉིད་ཤིན་ཏུ་དྲི་མེད་ལ། །ཟློས་པོ་བརྩོན་པས་ཁྲུས་བྱའོ། །ཧ་ཅང་ཡུན་རིང་ཁྲུས་མི་བྱ། །དེ་ནས་ལངས་ལ་ལག་པ་དག །ས་དག་གིས་ཀྱང་བཀྲུ་བར་བྱ། །བདུན་དང་བདུན་དང་ཡང་ལན་བདུན། །ཉི་ཤུ་རྩ་གཅིག་ཉེ་རེག་བྱ། །ཡང་དེར་སོ་ཤིང་ཀུན་དུ་སྤྱད། །སོ་སྦྱངས་ནས་ནི་དོར་བར་བྱ། །དེ་ནས་
སྐྱོབ་ལ་ཕྱག་བྱས་ཤིང་། །འཇིག་རྟེན་མགོན་ལ་ཕྱག་བྱས་ནས། །སྔགས་རིག་མཆོད་པ་ཡིད་འོང་བྱ། །བྱ་བ་སྣ་ཚོགས་བསྟོད་མཆོད་ཀྱིས། །ཡང་དང་ཡང་དུ་ཡང་དག་བསྟོད། །དེ་བཞིན་དྲི་ཞིམ་མེ་ཏོག་གིས། །སྟོན་པ་སྐྱོབ་ལ་མཆོད་ཡོན་དབུལ། །སངས་རྒྱས་རྣམས་ལ་མགོས་ཕྱག་བྱས། །དེ་ཚེ་སློབ་མར་གྱུར་པ་རྣམས། །འཇིག་རྟེན་མགོན་པོ་དེ་རྣམས་ཀྱི། །སྤྱན་སྔ་ཉིད་དུ་སྡིག་པ་བཤགས། །བདག་ཉིད་དག་ཀྱང་ཕུལ་བྱས་ནས། །རས་རིས་སྤྱན་སྔར་འཁོད་པར་བྱ། །ཀུ་ཤའི་ཁྲེས་ལ་ཉེ་བར་འདུག །སྔགས་རིག་གཉིས་ཀ་འདུག་ནས་ནི། །མཚན་ཉིད་ཇི་ལྟ་བ་བཞིན་ཏེ། །དེར་ནི་བགྲང་ཕྲེང་ཉིད་ཀྱིས་ནི། །རབ་ཏུ་འབད་པས་བཟླས་པ་བྱ། །དེ་ཚེ་སྔགས་གཞན་མི་བཟླས་སོ། །ཆོ་ག་དམན་པ་ཡང་སྤང་ཞིང་། །ཧ་ཅང་མཆོག་ཀྱང་དེ་བཞིན་ནོ། །བར་མ་བར་མའི་ལས་དག་ལ། །བརྟུལ་ཞུགས་ཅན་དག་སྔགས་བཟླས་བྱ། །ཧ་ཅང་མཐོན་པོ་སྤང་བར་བྱ། །གལ་ཏེ་ཚིག་ནི་དམན་པའང་མིན། །བར་མ་བར་མའི་ལས་རྣམས་ལ། །རབ་ཏུ་བསྔགས་པར་རྒྱལ་བས་གསུངས། །ཧ་ཅང་མཐོ་མིན་དམའ་བ་མིན། །བར་མར་རྟག་ཏུ་བཟླས་པ་བྱ། །སྔོན་གྱི་སངས་རྒྱས་ཐམས་ཅད་ཀྱིས། །ཚིག་ནི་དཔལ་དང་ལྡན་པར་གསུངས། །གཞན་གྱི་དྲུང་དུ་མི་བཟླས་ཤིང་། །གཞན་གྱི་ལས་ལམ་རྟག་ཏུ་གསང་། །བདག་ཉིད་རིག་པའི་ཡུལ་དུ་བཟླས། །སྔགས་ནི་བར་མ་དེ་བཞིན་དུ། །བཟླས་པས་རབ་ཏུ་འབྱོར་བར་འགྱུར། །སྔགས་ནི་ལེགས་པར་ཐོས་པ་འགའ། །དངོས་གྲུབ་འབྲིང་པོ་འདོད་པ་ཉིད། །སྔགས་ནི་དགེ་བར་བཟླས་པར་བྱ། །དེ་ཕྱིར་སྐྱེ་བོ་དང་བྲལ་བར། །སྔགས་ཀྱི་དེ་ཉིད་དོན་ལེགས་ཐོས། །ཚོགས་དང་བྲལ་ཞིང་རྣམ་དབེན་པར། །ཟློས་པ་པོས་ནི་སྔགས་བཟླས་བྱ། །མཚན་མོ་ཡི་ནི་བཞི་ཆ་དང་། །དེ་ཡི་ཕྱེད་ཀྱི་ཕྱེད་ཉིད་ཀྱི། །སྐྱ་རེངས་དམར་པོའི་དུས་ཙམ་སྟེ། །ཉི་མའི་དཀྱིལ་འཁོར་ཤར་བ་ན། །ཐུན་ནི་དང་པོར་རེ་བཞིན་
དུ། །ཐུབ་པའི་སྐྱེས་མཆོག་གིས་གསུངས་སོ། །དུས་ཀྱི་ཚད་ནི་བཞི་ཡིན་ཏེ། །བར་མར་ཡོངས་སུ་བསྒྲགས་པ་ཡིན། །དེ་ནས་ཉི་མ་ཕྱེད་ནུབ་ན། །སྔགས་ཀྱི་བཟླས་པ་དེ་ཚེ་བཏང་། །སྔགས་ཟློས་བོར་བ་དེ་ཡི་ཚེ། །མཆོད་ཡོན་ཕུལ་ནས་གཤེགས་སུ་གསོལ། །བརྟུལ་ཞུགས་ཅན་གྱིས་རྣམ་གཞན་སྤང་། །དེ་ཚེ་བོར་བའི་གདུགས་ལྷག་ན། །ཐུབ་པའི་བསྟན་ལ་དགེ་བ་བྱ། །ཤེས་རབ་ཕ་རོལ་ཕྱིན་ལ་སོགས། །དམ་པའི་ཆོས་ནི་ཀློག་པ་དང་། །ས་བཅུ་པ་ཡི་གླེགས་བམ་ནི། །མཆོད་དང་ཀློག་པ་རྟག་ཏུའོ། །དེ་ནས་དུས་ལ་བབ་གྱུར་ན། །རང་སྔགས་སྔགས་ཀྱི་མགོན་པོ་དང་། །ཐུབ་པ་སྐྱེས་མཆོག་ཕྱག་བྱས་ནས། །དེ་ནས་འཚོ་བ་ལ་འགྲོ་ཞིང་། །དེ་བཞིན་དུས་སུ་སྤྱོད་པར་ལྡན། །དུས་སུ་ཟ་ཞིང་དབང་པོ་ཐུལ། །སྒྲུབ་པོ་ཆོས་དང་ལྡན་པ་དང་། །སངས་རྒྱས་བསྟན་ལ་རབ་དད་བརྩོན། །གྲོང་གཞན་དུ་ནི་འཇུག་པ་ན། །མི་སྨྲ་གཙང་སྦྲ་སྤྱོད་ལ་དགའ། །སེམས་ཅན་རྟག་ཏུ་ཆོས་ལྡན་པའི། །ཁྱིམ་དུ་བསོད་སྙོམས་དག་ལ་འཇུག །ཟློས་པོ་སྲོག་ཆགས་མེད་པའི་ཆུ། །ཚོས་པར་གྲུབ་པ་གཙང་མར་འདོད། །ཡང་དག་ལྟ་བ་ཕུན་སུམ་ཚོགས། །སངས་རྒྱས་བསྟན་ལ་རབ་ཏུ་དད། །དེ་ལྟའི་ཁྱིམ་དུ་རྟག་ཏུ་ནི། །བསོད་སྙོམས་དོན་དུ་སློང་མོ་བླང་། །དཔེར་ན་བརྩོན་པས་གོ་བགོས་ཏེ། །ཉམ་ངའི་ཡུལ་དུ་རབ་ཏུ་འཇུག །རྟག་ཏུ་དགྲ་ནི་འཇོམས་པར་བྱེད། །དགྲ་རྣམས་ཀྱིས་གཞོམ་མི་ནུས་པ། །དེ་བཞིན་སྔགས་པ་སློང་མོས་འཚོ། །རྟག་ཏུ་གྲོང་དུ་འཇུག་པ་ན། །དེ་བཞིན་ཆགས་པར་འོས་པ་ཡི། །གཟུགས་སྒྲ་མཐོང་ན་མི་དགེ་བ། །འདོད་ཆགས་ཞི་བའི་དོན་གྱི་ཕྱིར། །མི་སྡུག་དགེ་བ་བསྒོམ་པར་བྱ། །ལང་ཚོའི་རྣམ་པས་བརྒྱན་པ་ཡི། །བུད་མེད་ལུས་ནི་མཐོང་ནས་ཀྱང་། །སྨད་ཅིང་རུལ་བའི་ལུས་རྣམས་ནི། །སྲིན་བུས་ཟོས་ཤིང་དུར་ཁྲོད་གནས། །ལུས་ཀྱི་མི་རྟག་སྡུག་བསྔལ་བ། །མི་གཙང་དྲི་མི་ཞིམ་
པར་བསྒོམ། །གང་ལ་བྱིས་པ་རྨོངས་པ་ཡི། །འགྲོ་བ་ལྔ་པོར་འགྲོ་ཞིང་འཁོར། །ལས་ཀྱི་སྲད་བུས་བརྒྱུས་པ་ནི། །ཡུན་རིང་དུས་སུ་མྱ་ངན་བྱེད། །མི་ཤེས་སྒྲིབ་པས་རྨོངས་པ་ནི། །དམུས་ལོང་སྡུག་བསྔལ་རྒྱུ་ཅན་ནོ། །གང་དུ་བློ་ནི་ཕྱིན་ཅི་ལོག །ཆགས་པས་སྐྱེ་བོ་ཕོངས་པར་འགྱུར། །རྣམ་པ་སྣ་ཚོགས་ལས་ལམ་གྱིས། །རྣམ་པ་དུ་མར་ཆགས་གྱུར་པ། །རིང་ནས་ཁྱོགས་ཀྱིས་འགྲོ་བ་ནི། །འགྲོ་དང་འོང་བ་སྤྱོད་པར་བྱེད། །རྟག་པ་ཉིད་ཕྱིར་རྗེས་ཆགས་པ། །འཛིན་པའི་ཀུན་དུ་སྤྱོད་པ་སྤྱོད། །གང་དུ་སེམས་ཅན་མི་དགེ་དགའ། །ལམ་དུ་ཡུན་རིང་རྒྱུ་བར་བྱེད། །ཟོ་ཆུན་ཁྱུད་མོའི་རྣམ་པ་བཞིན། །སྲིད་པའི་མཚོ་ཆུང་འབྱུང་བ་རྣམས། །འགྲོ་བ་དེ་རྣམས་མི་བཟད་པའི། །སྡུག་བསྔལ་ཆུ་བོས་ཀུན་དུ་གཡེངས། །དེ་བཞིན་བུད་མེད་སྡུག་བསྔལ་གྱི། །རྩ་བ་འབའ་ཞིག་ཡིན་པ་རུ། །སངས་རྒྱས་བྱང་ཆུབ་སེམས་དཔའ་དང་། །དེ་བཞིན་ཉན་ཐོས་རང་རྒྱལ་དང་། །ཐུབ་པ་རྣམས་ཀྱིས་གསུངས་པ་ཡིན། །སྲིད་པའི་རྒྱ་མཚོ་མི་འཁྲུགས་པའི། །མཚོ་ཆེན་འདི་དག་བསྐམ་པར་དཀའ། །བུད་མེད་སེམས་ཀྱིས་བསླུས་པ་ཡི། །སེམས་ཅན་གནས་གང་བྱིང་བ་དེ། །དམྱལ་བ་དུད་འགྲོའི་འཇིག་རྟེན་དང་། །ཡི་དགས་འཇིག་རྟེན་ལྷ་མ་ཡིན། །དེ་བཞིན་མི་ཡི་འཇིག་རྟེན་ཉིད། །ལྷ་ཡི་འགྲོ་བར་འགྲོ་བར་བྱ། །རྟག་ཏུ་ཀུན་ནས་ཡོངས་སུ་འཁོར། །བུད་མེད་ཆགས་པས་བསླུས་པ་ནི། །འཁོར་བའི་རྒྱ་མཚོ་བཙོན་ར་ཡི། །འདམ་རྫབ་ཆེན་པོར་བྱིང་བར་འགྱུར། །བུད་མེད་ཆགས་པའི་བླུན་པོའི་མི། །རོ་ལ་ཆགས་པའི་ཅེ་སྤྱང་བཞིན། །གང་ལ་སེམས་ཅན་རྟག་དགའ་བ། །མི་བཟད་སྡུག་བསྔལ་བཟོད་པར་བྱེད། །དཀར་པོ་ཆོས་ལ་ངེས་པར་ཉམས། །སངས་རྒྱས་བསྟན་ལ་རབ་ཏུ་གནས། །སྲིད་པའི་མཚོ་ཡི་སྡུག་བསྔལ་ཉིད། །ཐམས་ཅད་ཟློག་པར་བྱེད་པ་ཡིན། །སྔགས་ཟློས་པ་ལ་དགའ་ཞིང་བརྩོན། །དབང་ཆེར་གྲགས་ཤིང་ཡིད་དང་ལྡན། །གཟི་
བརྗིད་ལྡན་ཞིང་སྔགས་ཐུབ་པ། །དེ་རྣམས་ལ་ནི་སྡུག་བསྔལ་མེད། །ཡང་དག་སྡོམ་དང་ཚགས་བདེན་ཤེས། །བླ་མ་ལྷ་མ་མཆོད་པ་བྱེད། །མ་དང་ཕ་ལ་གུས་པ་རྣམས། །གསུམ་པོ་རྣམས་ལ་སྡུག་བསྔལ་མེད། །མི་རྟག་སྡུག་བསྔལ་སྟོང་པ་དང་། །གཞན་གྱི་དོན་ལ་རྗེས་སུ་བསྙེན། །བུད་མེད་ལུས་ལ་འབྱུང་པོའི་གཟུགས། །དེ་བཞིན་འབྲས་དང་ཟུག་རྔུ་དང་། །བློ་ངན་ཕུང་པོའི་ལྕགས་ཀྱུས་ཟིན། །འཁོར་བ་ལས་ནི་མི་འདའ་བ། །རྟག་ཏུ་བུད་མེད་ཆགས་གྱུར་པ། །དེ་ལ་དངོས་གྲུབ་ཡོད་པ་མིན། །དེ་ལ་མཆོག་འགྲོ་ཡོད་མ་ཡིན། །འགྲོ་བ་འབྲིང་ཡང་ཡོད་མ་ཡིན། །དངོས་གྲུབ་ཆུང་ངུའང་ཡོད་མ་ཡིན། །འདིར་ནི་ཟློས་པོ་ཁྲིམས་འཆལ་ན། །ཚུལ་ཁྲིམས་འཆལ་ལ་ཐུབ་དབང་གིས། །སྔགས་ཀྱི་དངོས་གྲུབ་མ་བསྟན་ཏོ། །མྱ་ངན་འདས་གྲོང་འགྲོ་བ་ཡི། །ལམ་ཡང་མེད་ཅིང་ཕྱོགས་དང་བྲལ། །འདིར་ནི་བྱིས་པ་སྨད་པ་ལ། །སྔགས་གྲུབ་པ་ནི་ག་ལ་ཡོད། །སྐྱེ་བོ་ཚུལ་འཆལ་འདི་ལ་ནི། །དེ་ལ་བདེ་འགྲོའང་ཡོང་མ་ཡིན། །བདེ་བ་ཉིད་ལ་གཞོལ་བའང་མེད། །དེ་བཞིན་རྒྱལ་བས་གསུངས་པའི་སྔགས། །གྲུབ་པར་འགྱུར་བ་སྨོས་ཅི་དགོས། །ཏ་ལའི་ཤིང་གི་མགོ་བོ་ནི། །གང་ཚེ་བཅད་ན་སླར་ཡང་ནི། །སྔོན་པོ་ཉིད་དུ་མི་འགྱུར་ཞིང་། །མྱུ་གུ་སླར་ཡང་ནམ་ཞིག་འགྱུར། །དེ་བཞིན་སྔགས་གྲུབ་རྨོངས་པ་ནི། །ཚུལ་ཁྲིམས་འཆལ་ཞིང་སྡིག་པའི་ལས། །རྟག་ཏུ་སླར་ཡང་བུད་མེད་ཆགས། །མི་དགེའི་གྲོགས་དང་ཕྲད་པ་ལ། །སྔགས་ཀྱི་རྒྱལ་པོ་ག་ལ་འགྲུབ། །དེ་བས་གང་ཚེ་ཟློས་པ་པོ། །བདེ་བར་གཤེགས་པས་སྤངས་པ་ཡི། །བུད་མེད་ཉེས་པ་རྣམས་སྤྱད་དེ། །གང་གི་དངོས་གྲུབ་བསྒྲུབ་བྱ་སྟེ། །བྱིས་པ་བུད་མེད་ལ་རྨོངས་པ། །གཞན་གྱིས་གྲུབ་པར་མ་བསྟན་ནོ། །དེ་ནས་དང་པོར་བློ་ལྡན་པ། །གཙང་ཞིང་འདུ་འཛི་མེད་ལ་དགའ། །རིགས་ལྡན་བརྟན་ཞིང་དཔའ་བ་དང་། །སེམས་བཟང་ལྡན་ཞིང་མཐོང་ན་དགའ། །ཆོས་དང་ཆོས་མིན་རྣམས་
དཔྱོད་ཤེས། །དེ་རྣམས་གྲུབ་པ་རྙེད་མི་དཀའ། །དེ་ལྟར་སྔགས་ཤེས་ཞུགས་པ་ནི། །གྲོང་དུ་བསོད་སྙོམས་ཕྱིར་དུ་འཇུག །ཇི་ལྟར་འདོད་པ་བཞིན་སོང་ནས། །སྔར་ནི་བརྟགས་པའི་གནས་དག་ཏུ། །མཁས་པས་དག་པའི་བློས་བཟའ་བ། །བཟའ་བ་ཕྱོགས་སུ་བཞག་ནས་ནི། །ཕྱི་རོལ་སོང་ནས་རྐང་པ་བཀྲུ། །དེ་ནས་སླར་ཡང་གནས་དེ་རུ། །སྲོག་ཆགས་མེད་པའི་ཆུ་རྣམས་ཀྱིས། །དང་པོ་འདྲེན་པ་ཉིད་ཡིན་ཏེ། །གཉིས་པ་ལ་ནི་ལག་གཡོན་གྱིས། །རྐེད་པ་མན་ཆད་དྲིལ་ཕྱིས་བྱ། །ཀུན་དུ་གཡས་པ་སླར་བྱིན་ནས། །ལག་པས་ཡིས་བཀྲུ་བར་བྱ། །སྔར་བཞག་པ་ཡི་དག་པ་དང་། །གཙང་མ་རྣམས་ཀྱི་བདུན་ཉིད་དུ། །བཟའ་ཞིང་དག་ཆུས་གཙང་སྦྲར་བྱས། །སེར་སྐྱའི་བ་ལས་བྱུང་བ་ཡི། །བ་ཡི་ལྕི་བ་སེར་པོ་དག །གཙང་ཞིང་དྲི་མེད་སྣོད་བླང་ལ། །སྲོག་ཆགས་མེད་པའི་ཆུས་སྦྱར་ཏེ། །དང་པོར་སྟོན་པ་ཐུབ་པ་ཡི། །མཆོག་ལ་དཀྱིལ་འཁོར་བྱ་བ་ཡིན། །ཁྱད་པར་ཁྲུ་གང་ཙམ་དུ་འོ། །གཉིས་པ་རང་སྔགས་མགོན་པོ་ལ། །གསུམ་པ་རིགས་ཀྱི་ལྷ་མོ་ལ། །གང་ཞིག་སྔགས་པ་ཟློས་པ་པོ། །སླར་ཡང་རྟག་ཏུ་བྱ་བ་ཡིན། །བཞི་པ་སེམས་ཅན་ཐམས་ཅད་ཀྱི། །ཉེ་བར་ལོངས་སྤྱོད་དོན་དུ་གྲགས། །གཡས་སུ་འཇིག་རྟེན་མགོན་པོ་ཡི། །དཀྱིལ་འཁོར་འདི་ནི་རྟག་ཏུ་བྱ། །དཀོན་མཆོག་གསུམ་གྱི་ཆེད་དུ་ནི། །དཀྱིལ་འཁོར་དེ་ནི་གྲུ་བཞི་པའོ། །གཉིས་པ་རང་སངས་རྒྱས་རྣམས་དང་། །གསུམ་པ་སྟོབས་བཅུ་ལྡན་པའི་སྲས། །དཀྱིལ་འཁོར་བདུན་པོ་འདི་དག་ནི། །ཀུན་ནས་གྲུ་བཞི་པ་རུའོ། །ཁྲུ་གང་ངམ་ནི་ཁྲུ་ཕྱེད་རུང་། །ཉིན་རེ་ཞིང་ཡང་བྱ་བའོ། །ཟློས་པོས་དེ་ཚེ་སྦས་པའི་ཕྱོགས། །སྡིག་པ་འཇོམས་བྱེད་ཉིན་རེ་བཞིན། །དེ་ནས་སྔགས་པ་ཐུབ་པ་ལངས། །ལག་གཉིས་འབད་པས་བཀྲུས་ནས་ནི། །གཙང་མའི་ཆུ་ཡིས་ཉེ་རེག་བྱ། །དག་ཅིང་སྲོག་ཆགས་སྤངས་པ་ཡི། །དྲི་མ་མེད་པའི་གཙང་མ་ནི། །འབད་པས་གཙང་མའི་སྣོད་དུ་བླང་། །མཚོ་ཆེན་དང་ནི་འབབ་ཆུའམ། །
ཆུ་མིག་ཆུ་བོ་ལ་གནས་པ། །གཙང་མའི་ཕྱོགས་ནས་བྱུང་བ་ཡི། །སེམས་ཅན་གཙང་མ་ལག་གིས་བཅུས། །སྔགས་པས་སླར་ཡང་ཉེ་རེག་བྱ། །གཉིས་སམ་གསུམ་དུ་རྟག་ཏུ་ཡང་། །དེ་ནས་ཁ་ལ་རེག་བྱ་ཞིང་། །དེ་བཞིན་ཉིད་དུ་རྣ་བའི་རྒྱུན། །མིག་དང་སྣ་ཡི་བུ་ག་དང་། །སྤྱི་བོ་ལྟེ་བའི་ཕྱོགས་རེག་བྱ། །དགེ་བ་སྤྱོད་པས་ལན་ལྔའམ་བདུན། །ཆོ་ག་བཞིན་དུ་ཐམས་ཅད་བྱ། །གཙང་སྦྲའི་སྤྱོད་པ་ཕུན་སུམ་ཚོགས། །ཟློས་པོ་གཙང་མར་གྱུར་ནས་ནི། །བསོད་སྙོམས་སྣོད་ནི་བླངས་ནས་སུ། །ཆུ་ཡི་ནང་དུ་འགྲོ་བར་བྱ། །གང་དུ་ཆུ་བོ་རབ་གནས་པ། །དེ་བཞིན་དམའ་བར་གྱུར་པ་དང་། །ཆུ་ཀླུང་རབ་ཏུ་འབབ་ལ་སོགས། །མི་ཡི་འཇིག་རྟེན་རྗེས་གཟུང་རྒྱུར། །དེ་བཞིན་རྟག་ཏུ་སྔགས་བཟླས་བྱ། །དེ་ཉིད་ཕྱིར་ན་ཐུབ་པའི་གཙོས། །བརྩོན་འགྲུས་ཆེན་པོས་འདི་གསུངས་སོ། །མཚན་ནི་འོད་སྲུང་ཞེས་བྱ་བས། །སྔོན་ནི་དེ་ཚེ་ས་སྟེངས་དེར། །སྒྲོལ་མའི་རྟོག་པའི་རྒྱལ་པོ་འདིར། །འབྱུང་པོ་རྣམས་ལ་ལེགས་དོན་དུ། །སྔགས་ནི་རབ་ཏུ་གསུངས་པ་ཡིན། །སྡུག་བསྔལ་གྱུར་པའི་འཇིག་རྟེན་ཀུན། །དབུལ་ཞིང་སྐྱོ་ལ་ཤ་ཐང་བ། །མཆོག་ཏུ་ཉོན་མོངས་གྱུར་པ་རྣམས། །འདི་རྣམས་དོན་དུ་གསུངས་པ་ཡིན། །འབྱུང་པོ་རྣམས་ལ་ལེགས་པ་ཉིད། །སླར་ཡང་ཀུན་དུ་བསྟེན་པ་རྣམས། །འབྱུང་པོ་ཀུན་གྱི་ཟས་དོན་དུ། །གསང་སྔགས་འདི་ནི་མཆོག་ཏུ་གསུངས། །ང་ཡིས་གསང་སྔགས་འདི་བརྗོད་ཀྱི། །བྱང་སེམས་ལ་བསྟེན་ཐམས་ཅད་དང་། །ཉན་ཐོས་རྣམས་ནི་མཉན་པར་གྱིས། །ནད་ཀྱིས་ཟིན་པ་འཇོམས་བྱེད་ཅིང་། །བཀྲེས་པའི་ནད་ཀྱིས་གཟིར་བ་དང་། །གང་ཡང་སེམས་ཅན་སྐོམ་པ་དང་། །སྡུག་བསྔལ་ཐམས་ཅད་ཞི་དོན་དང་། །འབྱོར་པ་འདོད་རྣམས་མཉན་པར་གྱིས། །འོད་སྲུང་འོད་ནི་ཆེན་པོ་ལ། །ཐུབ་པའི་གཙོ་བོས་དེ་སྐད་གསུངས། །ཉོན་མོངས་རྣམས་ནི་ཡིད་མགུ་ནས། །ཁྱབ་བདག་དེ་ལ་གསོལ་བ་
འདེབས། །ཆོས་ཀྱི་རྒྱལ་པོ་ཐུབ་པ་ཆེ། །ཆོས་མཁྱེན་གསང་སྔགས་བཤད་དུ་གསོལ། །དམ་ཚིག་མཆོག་ལ་ཉེར་གནས་པའི། །སེམས་ཅན་རྣམས་ལ་རྗེས་བརྩེར་མཛོད། །དེ་སྐད་གསོལ་ནས་ཐུབ་པ་ཡིས། །སྔགས་མཆོག་རྒྱས་པར་གསུང་བར་བྱེད། །ཀ་ལ་པིང་ཀ་སྒྲ་དབྱངས་དང་། །རྔ་བོ་ཆེ་དང་སྤྲིན་གྱི་སྒྲ། །ཚངས་དབྱངས་བརྩོན་འགྲུས་ཆེན་པོ་དང་། །ཚངས་པའི་སྲས་གང་རྒྱལ་མཆོག་གིས། །གང་ཡང་ཅུང་ཟད་འདིར་འོངས་པ། །རྐང་མེད་པ་དང་རྐང་མངས་དང་། །རྐང་གཉིས་པ་དང་རྐང་བཞི་པ། །འབྱུང་པོའི་ཚོགས་རྣམས་ཀུན་ཉོན་ཅིག །མདོར་ན་སེམས་ཅན་དོན་ཀུན་དུ། །བདེ་འབྱུང་སྔགས་ནི་བཤད་པར་བྱ། །འདས་དང་མ་འོངས་ད་ལྟར་གྱི། །སེམས་ཅན་ལ་སོགས་འདིར་ལྷགས་པ། །མདོར་བསྡུས་ནས་ནི་བཤད་པར་བྱ། །འབྱོར་པ་འདོད་པ་རྣམས་ཉོན་ཅིག །ན་མཿ ས་མནྟ་བུདྡྷཱ་ནཱཾ། ཨ་པྲ་ཏི་ཧ་ཏ་ཤཱ་ས་ནཱ་ནཱཾ། ཏདྱ་ཐཱ། ཨོྃ་ག་ག་ནེ། ག་ག་ན། གཉྫོ་ཨཱ་ན་ཡ། སརྦ་ལ་ཧུ་ལ་ཧུ། ས་མ་ཡ་མ་ནུ་སྨ་ར། ཨཱ་ཀརྵ་ཎེ། མཱ་བི་ལམྦ། ཡ་ཐེ་པི་ཏཾ་སཾ་པཱ་དཱ་ཡ་སྭཱ་ཧཱ། བཅོམ་ལྡན་འདས་འོད་སྲུང་གིས་དེ་སྐད་ཅེས་གསུངས་ནས། ཅང་མི་གསུང་བར་གྱུར་ཏོ། །ཡང་དག་པར་རྫོགས་པའི་སངས་རྒྱས་འོད་སྲུང་གིས། རིག་པའི་སྔགས་ཀྱི་ཚིག་འདི་རྒྱ་ཆེར་གསུངས་པའི་བར་སྐབས་འདིར་ནམ་མཁའ་ཐམས་ཅད་ཆེན་པོ་ལ་འོས་པའི་ཟས་ཀྱི་སྤྲིན་གྱིས་ཡོངས་སུ་གང་བར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཀྱི་ནམ་མཁའི་མཐིལ་ཐམས་ཅད་ཟས་ཀྱི་སྤྲིན་གྱིས་རབ་ཏུ་གཡོགས་པར་སྣང་བར་གྱུར་ཏོ། །བསམ་པ་ཇི་ལྟ་བ་བཞིན་དུ་མངོན་པར་འདོད་པའི་དོན་དུ་བླང་བར་བཀྲུ་བར་བྱ། །སླར་ཡང་དེ་ནས་ལངས་ནས་ནི། །གཙུག་ལག་ཁང་ངམ་གནས་སུ་འགྲོ། །གང་སུ་སྔོན་ནི་ཡང་དག་བསྟེན། །གང་དུ་གནས་པ་དེར་འགྲོ་བྱ། །སོང་ནས་ཟློས་པོས་ཕྱོགས་དེ་རུ། །ལྷུང་བཟེད་དེ་ནི་གཞག་པར་བྱ། །དེ་ནས་མྱུར་དུ་ཉེ་རེག་བྱ། །དེ་བཞིན་
སླར་ཡང་ལྷུང་བཟེད་བླང་། །ལྷུང་བཟེད་ས་ལ་ལོ་མ་འམ། །དངུལ་ལམ་དེ་བཞིན་གསེར་ཉིད་དང་། །ཟངས་སམ་ཤིང་ཤུན་དག་ཀྱང་རུང་། །སྟོན་པ་ལ་ནི་ལྷ་བཤོས་དབུལ། །སྟོན་ལ་ལྷ་བཤོས་ཕུལ་ནས་ནི། །སླར་ཡང་རིག་སྔགས་རྒྱལ་ལའོ། །འགྲོན་པོ་གཅིག་ནི་འོངས་གྱུར་དང་། །སྡུག་བསྔལ་ཅན་ལའང་ཅི་ནུས་སྦྱིན། །བཤོས་ཉིད་ཀྱང་ནི་ཐམས་ཅད་དུ། །ཀུན་ནས་ངེས་པར་བཟའ་བ་ཉིད། །ཧ་ཅང་མང་པོ་སྦྱིན་མི་བྱ། །སྔགས་ཤེས་འདིར་ནི་གདུང་མི་བྱ། །ཀུན་ནས་རིག་པ་ལྡན་པར་བྱ། །ལྟོ་བའི་ཚད་ཙམ་བཞག་ནས་ནི། །གཞན་པའི་ཟན་ནི་རྟག་ཏུའོ། །བཀྲེས་དང་སྐོམ་པས་ཉེན་པ་ཡིས། །སྔགས་དོན་སྒྲུབ་པར་མི་ནུས་ཏེ། །ཧ་ཅང་ཉུང་དང་མང་ཟོས་ན། །སྔགས་དོན་བསྙེན་པར་མི་ནུས་སོ། །དེ་ཉིད་ཕྱིར་ན་རྒྱལ་དབང་གིས། །སེམས་ཅན་ཟས་ཀྱིས་གནས་སོ་ཞེས། །ལུས་ཅན་ཀུན་ལ་གསུངས་པ་ཡིན། །གང་གིས་མི་རྣམས་འཚོ་བ་དང་། །ལྷ་དང་ལྷ་མིན་དྲི་ཟ་དང་། །ཀླུ་དང་གནོད་སྦྱིན་མིའམ་ཅི། །སྲིན་པོ་ཡི་དགས་ཤ་ཟ་དང་། །འབྱུང་པོ་སྐར་མ་གཟའ་དག་ནི། །གང་ཞིག་ཟས་ལ་མི་ལྟོས་པ། །དེ་ནི་འགའ་ཡང་ཡོད་མ་ཡིན། །རྟག་ཏུ་ཁ་ཟས་རགས་པ་ནི། །ཁམ་གྱི་ཟས་ཞེས་གྲགས་པའོ། །སེམས་ཅན་ཕྲ་མོའི་ཟས་ཅན་སྤང་། །དེ་བཞིན་གཤེགས་པས་གསུངས་པ་ནི། །བསམ་གཏན་ཟས་ཅན་རྟག་པར་ནི། །གཟུགས་ནི་སྤྱོད་ཅིང་གཡོ་བ་སྟེ། །གཟུགས་མེད་ཉིད་ཀྱི་ལྷ་རྣམས་ཀྱང་། །ཏིང་འཛིན་འབྲས་བུ་ཟ་བའོ། །སྲིད་པ་བར་མའི་སེམས་ཅན་ཡང་། །དྲི་ཟ་བར་ནི་རབ་ཏུ་གྲགས། །དེ་བཞིན་འདོད་ཁམས་སེམས་ཅན་རྣམས། །ཟས་ནི་རྣམ་པ་སྣ་ཚོགས་ཟ། །འདོད་དང་ལྡན་པའི་ལྷ་དང་མི། །ཁམ་གྱི་ཟས་ནི་ཟ་བར་བྱེད། །དེ་ཉིད་ཕྱིར་ན་ཐུབ་དབང་གིས། །སེམས་ཅན་ཟས་ཀྱིས་གནས་པ་ཞེས། །ཆོས་ཀྱི་རྒྱུ་རུ་བསྟན་པ་ཡིན། །གང་དེ་རྣམས་ནི་རབ་ཏུ་གྲགས། །ཟློས་པོ་རྟག་ཏུ་བརྩོན་པ་ནི། །ཟས་ཀྱི་ཚོད་ནི་རིག་པར་བྱ། །གང་ཕྱིར་རིག་པ་བསྙེན་པ་ནི། །ཟས་འདི་ལ་ནི་རབ་ཏུ་གནས། །
ཀུན་སྤྱོད་མ་ནོར་དག་པ་དང་། །དགེ་ཞིང་ཚངས་པར་སྤྱོད་པ་དང་། །ཟས་ཀྱི་ཚོད་ཀྱང་ཤེས་པ་ལ། །དེ་ཡིས་དངོས་གྲུབ་རྙེད་མི་དཀའ། །དཔེར་ན་ཁུར་ནི་དྲང་བའི་རྒྱུར། །ཤིང་རྟ་ཡུན་རིང་གནས་དོན་དུ། །ཤིང་རྟའི་མིག་ནི་སྐུ་བར་བྱེད། །དེ་བཞིན་སྔགས་པ་སྔགས་རིག་པས། །ཟས་ནི་གནས་པའི་ཆེད་དུ་སྤྱད། །ལུས་ནི་གསོ་བའི་དོན་དུ་ནི། །ཟློས་པོ་རྟག་ཏུ་གསོ་བར་བྱ། །སྔགས་རྣམས་བསྒྲུབ་པའི་དོན་ཕྱིར་དང་། །བྱང་ཆུབ་ཚོགས་ཀྱི་རྒྱུ་ཡི་ཕྱིར། །ཟས་ཐམས་ཅད་དང་། །ཇི་ལྟར་མངོན་པར། སྲེད་པའི་བཟའ་བ་དེ། དེ་རྣམས་སུ་ཆར་འབབ་པར་གྱུར་ཏོ། །ཇི་ལྟར་མངོན་པར་སྲེདཔའི་བཟའ་བ་དེ་རྣམས་ཀྱིས་ཟས་ཀྱི་བྱ་བ་བཀྲེས་པའི་སྡུག་བསྔལ་ཞི་བའི་དོན་དང་། སྐོམ་པ་རྣམས་ཀྱིས་བཏུང་བ་ཡན་ལག་བརྒྱད་དང་ལྡན་པའི་ཆུ་བོའི་རྒྱུན་ལྟ་བུ་བཏུང་བར་བྱ་བ་ཡང་ཡིད་ལ་འདོད་པ་བཞིན་དུ་དེར་བབ་པར་གྱུར་ཏོ། །སེམས་ཅན་ཐམས་ཅད་ཀྱང་སྐད་ཅིག་དེ་ལ་བཀྲེས་པའི་ནད་ཐམས་ཅད་རབ་ཏུ་ཞི་བ་དང་། སྐོམ་པ་ཐམས་ཅད་བསལ་བར་བྱས་པར་གྱུར་ཏོ། །ཐམས་ཅད་དང་ལྡན་པའི་འཁོར་ཐམས་ཅད་ཀྱང་ངོ་མཚར་ཐོབ་ཅིང་ཚིམ་པ་ཐོབ་ནས་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་ཞིང་རྗེས་སུ་ཡི་རངས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་དེ་ཉིད་དུ་མི་སྣང་བར་གྱུར་ཏོ། །བཅོམ་ལྡན་འདས་འོད་སྲུང་ཡང་དེ་བཞིན་གཤེགས་པའི་གནས་ལ་ཡོངས་སུ་བཞུགས་སོ། །བཅོམ་ལྡན་འདས་ཤཱཀྱ་ཐུབ་པ་ངས་ཀྱང་དེའི་ཚེ་རྟོག་པའི་རྒྱལ་པོའི་ཆོ་ག་འདི་ལ་སེམས་ཅན་ཐམས་ཅད་ཀྱི་དོན་གྱི་ཕྱིར་དང་། བཀྲེས་པ་དང་། སྐོམ་པ་བསལ་བའི་དོན་གྱི་ཕྱིར་དང་། ཁྱད་པར་དུ་སྔགས་ཟློས་པ་པོ་ཐམས་ཅད་ཀྱི་ཕྱིར་གསུངས་པ་ལ་མངོན་པར་རྗེས་སུ་ཡི་རང་ངོ་། །དང་པོ་རེ་ཞིག་ཟློས་པ་པོས་སྔགས་འདི་བསྒྲུབ་པར་བྱའོ། །གལ་ཏེ་བསོད་སྙོམས་ལ་འགྲོ་བར་མི་སྤྲོ་ན་རིའི་རྩེ་མོར་འཛེགས་ནས་འབུམ་ཕྲག་བདུན་བཟླས་པ་བྱ། །དེ་ནས་དཀར་གསུམ་བཟའ་བའམ། འོ་མ་བཏུང་
བའོ། །རིའི་རྩེ་མོ་དེ་ཉིད་དུ་འཕགས་མ་སྒྲོལ་མའི་རས་རིས་བར་མ་སྔར་བཞིན་དུ་བཞག་ནས་མཆོད་པ་ཆེན་པོ་བྱས་ཏེ་གཏོར་མ་དང་ལྷ་བཤོས་རྒྱ་ཆེན་པོ་བྱས་ནས། ཡང་དག་པར་རྫོགས་པའི་སངས་རྒྱས་འོད་སྲུང་གིས་གསུངས་པའི་གསང་སྔགས་འདི་ཉིད་ཀྱིས་སེང་ལྡེང་གི་ཡམ་ཤིང་རྣམས་ཀྱིས་མེ་སྦར་ནས་ཨུ་དུམ་བཱ་རའི་ཡམ་ཤིང་ལ་ཞོ་དང་སྦྲང་རྩི་དང་མར་ལ་བཏགས་པ་རླན་དང་བཅས་པའམ། །དཔལ་འབྲས་ཀྱི་ཡམ་ཤིང་ཀྱང་རུང་སྟེ་སྟོང་ཕྲག་བརྒྱད་དུ་སྦྱིན་སྲེག་བྱའོ། །དེ་ནས་མཚན་ཕྱེད་ཀྱི་དུས་ཀྱི་ཚེ་སྤྲིན་ནག་པོ་ཆེན་པོ་དང་། རླུང་གི་དཀྱིལ་འཁོར་འོང་བར་འགྱུར་ཏེ་འཇིགས་པར་མི་བྱ། ལངས་ན་འགྲོ་བར་ཡང་མི་བྱའོ། །བཅོམ་ལྡན་འདས་མ་འཕགས་མ་སྒྲོལ་མའི་སྙིང་པོས་བདག་ཉིད་བསྲུང་བར་བྱ་ཞིང་། །དཀྱིལ་འཁོར་བཅིང་བ་དང་། གྲོགས་རྣམས་ཀྱང་སྔར་བཞིན་བསྲུང་བར་བྱའོ། །དེ་ནས་རླུང་ནག་པོའི་དཀྱིལ་འཁོར་མི་སྣང་བར་འགྱུར་ཏེ། བུད་མེད་ཀྱང་རྒྱན་ཐམས་ཅད་ཀྱིས་རྣམ་པར་བརྒྱན་པ། འོད་ཀྱི་ཕྲེང་བ་དང་ལྡན་པས་ཕྱོགས་རྣམས་ཀྱང་ཀུན་དུ་སྣང་བར་བྱེད་བཞིན་པ། སྒྲུབ་པ་པོའི་མདུན་དུ་འདུག་སྟེ། ཀྱེ་ཀྱེ་སེམས་དཔའ་ཆེན་པོ་ལོངས་ཤིག །གྲུབ་པ་ཡིན་ནོ། །ཞེས་སོ། །དེ་ནས་སྒྲུབ་པ་པོས་སྣ་མའི་མེ་ཏོག་དང་བསྲེས་པའི་དྲི་ཆུས་མཆོད་ཡོན་དབུལ་ལོ། །དེ་ནས་དེ་ཉིད་དུ་མི་སྣང་བར་འགྱུར་རོ། །ཉི་མ་དེ་ནས་བདག་ཉིད་དམ་འདིའི་གྲོགས་པོ་ཉི་ཤུ་རྩ་ལྔ་ལ་དེང་ནས་ཇི་ལྟར་མངོན་པར་འདོད་པའི་བཟའ་བ་རྣམས་རབ་ཏུ་སྟེར་བར་བྱེད་དོ། །ཇི་ལྟར་འདོད་པའི་ཡོ་བྱད་རྣམས་ཀྱང་ཀུན་དུ་སྦྱིན་པར་བྱེད་དོ། །དེ་ནས་སྒྲུབ་པ་པོས་མཆོད་ཡོན་ཕུལ་ནས་གཤེགས་སུ་གསོལ་བར་བྱའོ། །རས་རིས་ལ་བསྐོར་བ་ལན་གསུམ་བྱས་ནས་རས་རིས་བླངས་ཏེ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་བྱས་ནས་དེ་ནས་རིའི་རྩེ་མོའམ། མི་མེད་པའི་གནས་སུ་འགྲོ་བར་བྱའོ། །དེར་བདག་ཉིད་དམ། གྲོགས་པོས་ཕྱག་དར་བྱས་ནས་དགྲམ་པར་བྱ་བ་རྣམས་བཀྲམ་ལ་གནས་དེར་ནམ་མཁའ་ལ་འགྲོ་བ་ལ་སོགས་པའི་ལས་རྣམས་བྱའོ། །དེ་ནས་
སྒྲུབ་པ་པོས་སྔར་བཞིན་དུ་ཀུ་ཤའི་ཁྲེས་ལ་ཉེ་བར་འདུག་སྟེ་རས་རིས་བར་མ་སྔར་བཞིན་དུ་བཞུགས་སུ་གསོལ་ནས་སེང་ལྡེང་གི་ཤིང་གིས་མེ་སྦར་ལ་ཐུན་གསུམ་དུ་པདྨ་དཀར་པོའི་མེ་ཏོག །ཞོ་དང་། སྦྲང་རྩི་དང་། མར་ལ་བཏགས་པ་རྣམས་ཀྱིས་ཉི་མ་ཉི་ཤུ་རྩ་གཅིག་ཏུ། རྩ་བའི་རིག་པའམ་སྙིང་པོའམ་ཉེ་བའི་སྙིང་པོས་ལས་ཆེན་པོ་ཐམས་ཅད་ཀྱི་ཆེད་དུའམ་ཡི་གེ་གཅིག་པའི་ཆེད་དུ་སྟོང་ཕྲག་བརྒྱད་དུ་སྦྱིན་སྲེག་བྱའོ། །དེ་ནས་མཚན་ཕྱེད་ཀྱི་དུས་ཀྱི་ཚེ་སྦྱིན་སྲེག་གི་མཐར་བཅོམ་ལྡན་འདས་མ་སྒྲོལ་མ་མངོན་སུམ་དུ་མཐོང་བར་འགྱུར་ཞིང་། འདོད་པའི་མཆོག་གནང་བར་བྱེད་དོ། །ནམ་མཁའ་ལ་འགྲོ་བའམ། མི་སྣང་བའམ་བྱང་ཆུབ་སེམས་དཔའི་སའམ། ཪང་སངས་རྒྱས་སམ། མངོན་པར་ཤེས་པ་ལྔ་ཉིད་དམ། ཚེ་རིང་བ་ཉིད་དམ། རྒྱལ་སྲིད་ཆེན་པོ་དང་། ལོངས་སྤྱོད་ཆེན་པོ་ཉིད་ཀྱི་ཆེད་དམ། རྒྱལ་པོ་ཆེན་པོ་མཉེས་པ་ཉིད་དམ། འཕགས་པ་སྤྱན་རས་གཟིགས་དབང་ཕྱུག་གི་རྗེས་སུ་རྣམ་པར་སྤྱོད་པ་ཉིད་དམ། མདོར་ན་ཡིད་ལ་འདོད་པ་དེ་ཐམས་ཅད་གནང་བར་བྱེད་དོ། །གང་བླངས་ཀྱང་རུང་སྟེ། དེ་མཐུན་པར་གནང་བར་བྱེད་ཅིང་། གྲུབ་པའི་རྫས་རྣམས་ཐམས་ཅད་ཀྱང་ཐོབ་བོ། །སེམས་ཅན་ཆེན་པོ་རྣམས་འགུགས་པར་བྱེད་པའམ། མདོར་ན་ཇི་ལྟ་ཇི་ལྟར་ཞུས་པ་དེ་ཐམས་ཅད་མཛད་དོ། །ལས་ཀྱི་ཉེས་པ་རབ་ཏུ་སྤགས་པ་ཡང་ཡང་དག་པར་སྦྱོང་བར་བྱེད་དོ། །ཞེས་བཅོམ་ལྡན་འདས་ཤཱཀྱ་ཐུབ་པས་གསུངས་སོ། །ལས་ཀྱི་ཆོ་ག་གཞན་པ་བར་མའི་སྒྲུབ་ཐབས་སུ་འགྱུར་བ་ནི། །དང་པོ་རེ་ཞིག་ཁྱད་པར་གྱི་གནས་སམ། གཙང་མའི་ཕྱོགས་སམ། ཆུ་ཀླུང་ངམ། ཆུ་གླིང་གི་འགྲམ་དུ་སྔར་བཞིན་དུ་ཐམས་ཅད་བྱས་ནས་རས་རིས་ཞལ་ནུབ་ཏུ་ཕྱོགས་པར་གཞག་ལ། བདག་ཉིད་ཁ་ཤར་དུ་ཕྱོགས་བས་གནས་ནས་ཀུ་ཤའི་ཁྲེས་ལ་ཉེ་བར་འདུག་སྟེ། རྒྱས་པར་གོང་བཞིན་དུ་སྦྱར་བར་བྱ་སྟེ་ཐུན་གསུམ་དུ་འབུམ་ཕྲག་དྲུག་བཟླས་པར་བྱའོ། །བཟླས་པ་ཡོངས་སུ་རྫོགས་པ་དང་། དོང་ཀའི་མེ་
ཏོག་ཙནྡན་དཀར་པོ་དང་བསྲེས་པའམ་གུར་གུམ་དང་བསྲེས་པས་སྔ་མ་དེ་བཞིན་ཁོ་ནར་མེ་སྦར་ནས་སྟོང་ཕྲག་བརྒྱད་སྦྱིན་སྲེག་བྱའོ། །སྦྱིན་སྲེག་གི་མཐར་རས་རིས་འགུལ་ན་བློན་པོ་ཉིད་དོ། །རས་རིས་ལ་འོད་ཀྱི་སྣང་བ་བྱུང་ན་འོད་ལས་རྒྱལ་སྲིད་དོ། །རས་རིས་ཀུན་ནས་འབར་བའི་ཕྲེང་བས་འཁྲུགས་ན་རྒྱལ་པོ་ཆེན་པོ་བཞིའི་རིགས་ཀྱི་རྒྱལ་སྲིད་དོ། །རས་རིས་ལ་མེ་བྱུང་ན་སུམ་ཅུ་རྩ་གསུམ་གྱི་དབང་ཕྱུག་ཉིད་དེ་བརྒྱ་བྱིན་ཉིད་དོ། །རས་རིས་ཆོས་སྟོན་པར་བྱེད་པ་བྱུང་ན་བྱང་ཆུབ་སེམས་དཔའ་གསུམ་གྱི་དབང་ཕྱུག་ཉིད་དོ། །རས་རིས་ཀྱི་ཕྱག་སྤྱི་བོར་རེག་ན་མངོན་པར་ཤེས་པ་ལྔ་དང་། ས་བདུན་རྗེས་སུ་ཐོབ་པ་དང་། སྟོབས་བཅུ་ངེས་པ་ཉིད་རིམ་གྱིས་ཐོབ་པར་བྱེད་པ་ཉིད་དོ། །དེ་ནས་སྒྲུབ་པ་པོས་བཅོམ་ལྡན་འདས་འོད་སྲུང་གིས་གསུངས་པའི་སྔགས་བསྒྲུབས་ཏེ་བཀྲེས་པ་དང་སྐོམ་པ་ཕྱིར་གཞིལ་བའི་དོན་རྗེས་སུ་ཐོབ་པ་དེ་ཉིད་ཀྱིས་དང་། ཆོ་ག་དེ་ཉིད་ཀྱིས་ཡོ་བྱད་ཀྱི་རིག་པའི་སྤྱོད་པའི་དོན་སྒྲུབ་པའི་ཐབས་ཀྱི་ཆོ་གའི་ཆོས་ལ་ཡང་དག་པར་ནན་ཏན་བྱའི་གཞན་དུ་གྲུབ་པར་མི་འགྱུར་རོ། །དེ་ལྟར་རིམ་གྱིས་སྔགས་ཀྱི་སྤྱོད་པ་ལ་རྗེས་སུ་འཇུག་ཅིང་མདོར་ན་ནན་ཏན་ངེས་པར་སྒྲུབ་པར་བྱེད་དེ། རྫས་དང་སྨན་དང་ཡོ་བྱད་ཀྱི་ཁྱད་པར་དང་། ནོར་བུ་རིན་པོ་ཆེ་རྣམས་ཇི་ལྟར་སྔར་ངེས་པར་བསྟན་པ་བཞིན་དུ་སྒྲུབ་པར་བྱེད་དོ། །སྔགས་ཤེས་སྔགས་ནི་ཟློས་པ་པོའང་། །ཆོ་ག་བཤད་པ་ལ་སེམས་པ། །སྔགས་པ་དེ་ཚེ་དེ་ཕྱོགས་སུ། །གཙང་མའི་འགྲོ་བས་ཟས་ཀྱང་ནི། །ཟོས་ནས་ཡིད་ནི་དགའ་བ་དང་། །དབང་པོ་ཡོངས་སུ་རྫོགས་པ་དང་། །ལྷུང་བཟེད་ལྷག་མ་རྟག་བླངས་ཏེ། །སེམས་བཟང་ཆུ་བོ་གཙང་མར་འགྲོ། །མཐའ་གཅིག་ཏུ་ནི་བོར་ནས་ནི། །བརྟུལ་ཞུགས་ཅན་གྱིས་དུད་འགྲོ་སྦྱིན། །དུད་འགྲོ་རྣམས་ལ་མཐུན་བྱིན་ནས། །འབད་པས་ལྷུང་བཟེད་བཀྲུ་བར་བྱེད། །ལྷག་མ་ལྷུང་བཟེད་བྱ་བ་ནི། །སྒུམ་མེད་ཟས་དང་དྲི་བྲལ་གང་། །ལྷུང་བཟེད་ལྷག་མར་ཐུབ་པས་གསུངས་། །གང་དུ་སློང་བའི་སྣོད་དུ་ནི། །
དེ་རུ་ཟན་ནི་མི་བཟའ་སྟེ། །དེར་ནི་བཟའ་བ་འབྲས་བུ་དང་། །རྫས་རྣམས་རྟག་ཏུ་བཟའ་མི་བྱ། །པད་འདབ་ཀྱིས་ཀྱང་མ་ཡིན་ཏེ། །ཨུཏྤ་ལ་ལས་བྱུང་བས་སམ། །དྲི་བཟང་ལྡན་རྣམས་སྤངས་པ་སྟེ། །སྔགས་པས་དེར་ནི་མི་བཟའོ། །གང་ཡང་སྔགས་པས་ཀུ་མུ་ད། །སླ་ཀྵ་ཨུ་དུམ་བཱ་ར་ལས་བྱུང་། །པ་ཊིའི་འདབ་མ་དང་ཡང་ནི། །ཚེར་མའི་ཡལ་གའི་རི་ཁྲོད་བྱུང་། །ཨ་མྲའི་འདབ་མ་རུ་ཡང་མིན། །དེ་བཞིན་སཱ་ཊ་ལ་ལས་བྱུང་། །སཱ་ལའི་འདབ་མ་ཤི་རི་ཥ། །བྱང་ཆུབ་ཤིང་ལས་བྱུང་བ་དང་། །གང་དུ་བཅོམ་ལྡན་སངས་རྒྱས་ནི། །ཤཱཀྱ་སེང་གེ་བཞུགས་པ་ཡི། །ཤིང་དེ་འབད་པས་སྤང་བར་བྱ། །ཤིང་དེ་ཡི་ནི་ཡལ་ག་དང་། །ནཱ་ག་གེ་སར་ཤིང་ལའང་མིན། །གང་དུ་ནམ་ཡང་བཟའ་མི་བྱ། །མཁས་པས་དེ་ཀུན་ཅིས་ཀྱང་སྤང་། །ཐུབ་པའི་ལོ་མའི་སྤྱིལ་པོ་ནི། །རྨོངས་པས་ནམ་ཡང་འགོམ་མི་བྱ། །སྔགས་པ་དམ་ཚིག་ཉམས་པར་འགྱུར། །ཟས་ནི་ལོ་མ་དེ་རྣམས་ལས། །གཞན་པའི་ལོ་མ་རྣམས་སུ་བཟའ། །ས་བྱུང་ཟངས་སུ་ངེས་བསྟན་དང་། །དེ་བཞིན་གསེར་དང་དངུལ་ལས་བྱུང་། །ཤེལ་དང་རྡོ་བ་ལས་བྱུང་བ། །དེ་བཞིན་བཟའ་བ་བླངས་ནས་ནི། །རྟག་ཏུ་སྔགས་པས་དེར་ནི་བཟའ། །ལོ་མའི་རྒྱབ་ཏུ་མི་བཟའ་སྟེ། །དེ་བཞིན་ལག་པའི་མཐིལ་དུའང་མིན། །སྟོབས་བཅུ་པ་ཡི་སྲས་རྣམས་དང་། །རང་རྒྱལ་བསེ་རུ་ལྟ་བུ་གང་། །དེ་བཞིན་གཤེགས་པའི་ཉན་ཐོས་གཙོ། །ལོ་མ་གཞན་དང་ལྷ་བཤོས་འབྱུང་། །ཟློས་པོས་དེ་རྣམས་སྤང་བར་བྱ། །ཡི་གེ་རྐང་པས་ཀྱང་མི་འགོམ། །སྣ་ཚོགས་བཟའ་བ་སྣུམ་ཁུར་དང་། །དེ་བཞིན་བཏུང་དང་བཟའ་བ་རྣམས། །སྔགས་པས་འབད་པས་བླང་བར་བྱ། །རྒྱལ་དང་རྒྱལ་བའི་མཆོག་རྣམས་དང་། །དེ་བཞིན་ཉན་ཐོས་སྐྱེས་བུ་མཆོག །དཀོན་མཆོག་གསུམ་ལ་ཕུལ་བ་ཡི། །ལྷ་བཤོས་ཐམས་ཅད་ཉིད་ཀྱང་ནི། །ཟློས་པོས་རྟག་ཏུ་སྤང་བར་བྱ། །ཆུང་ངུ་ཙམ་ཡང་ལུས་ཅན་ལ། །སྔགས་རྣམས་
དེ་ཡིས་མི་འགྲུབ་སྟེ། །ཀུན་ནས་བཀྲ་ཤིས་ཐམས་ཅད་དང་། །རྟག་ཏུ་དཔལ་ནི་སྨོས་ཅི་དགོས། །རྒྱལ་བ་ཅན་དང་ཞི་བ་ཅན། །ལྷ་བཤོས་གཏོར་མ་ཟ་བྱེད་པ། །དེ་ཚེ་དེ་ཡི་ཀུན་མི་འགྲུབ། །གཙང་ཞིང་མཁས་ལ་ཚུལ་ཁྲིམས་ལྡན། །སྙིང་རྗེ་སྙིང་རྗེའི་ལས་ཅན་དང་། །གཙང་སྦྲའི་སྤྱོད་པ་ལ་དགའ་བ། །རིག་སྔགས་ཀུན་དུ་སྒྲུབ་པར་བྱེད། །སེམས་ཅན་གཞན་ལ་བྱིན་པའི་ཟས། །ཟློས་པོས་དེ་ནི་བཟའ་མི་བྱ། །གཞན་གྱིས་རབ་ཏུ་མ་བརྟགས་པའི། །ཟས་གཞན་བཟའ་བར་མི་བྱའོ། །རང་ལ་བྱིན་པས་ཁ་ཟས་ནི། །ཅུང་ཟད་ཙམ་ཡང་བླང་བར་བྱ། །སྔགས་ཤེས་དེ་ལྟར་འཇུག་པ་ནི། །དེ་ཡི་དངོས་གྲུབ་སྡིག་པའི་དགྲ། །ཡོངས་སུ་རྫོགས་པར་བྱེད་པར་གནས། །ཟློས་པོས་ཆོ་ག་འདི་ཡིས་ནི། །བཟའ་བ་ལེན་པའི་བརྟུལ་ཞུགས་ཅན། །ཐུབ་པ་རྣམས་ཀྱིས་ལེགས་པར་བསྔགས། །སྔགས་རྣམས་ཐམས་ཅད་སྒྲུབ་པ་ལ། །མདོར་ན་ཆོ་ག་མཐོང་བ་ཡིས། །བཟའ་བ་ཀུན་དང་ལས་རྣམས་ལའོ། །དེ་ནས་གཞན་ཡང་རབ་འཆད་བྱེད། །སྔགས་ནི་ཐམས་ཅད་སྦྱོང་བར་བྱེད། །དེ་ནས་ཟློས་པོས་ཉེ་རེག་བྱ། །དེ་ཚེ་སྔགས་འདི་བརྗོད་པར་བྱ། །དེ་ཚེ་སྔགས་པས་ལན་བདུན་དུ། །ལུས་སྦྱོང་བྱེད་པ་བཟླས་བྱས་ནས། །འབྱུང་པོའི་ཚོགས་དང་ལྷ་རྣམས་འདིར། །དེ་དོན་རྒྱས་པ་མཉན་པར་གྱིས། །ལུས་ཀུན་ཉེ་རེག་བྱས་ནས་སུ། །ཐུབ་པས་སྔགས་འདི་བརྗོད་པར་བྱ། །ན་མཿ སརྦ་བུདྡྷཱ་ནཱཾ། ཨ་པྲ་ཧི་ཧ་ཏ་ཤཱ་ས་ནཱ་ནཱཾ། ཏདྱ་ཐཱ། ཨོཾ་སརྦ་ཀིལྦི་ཥ། ནཱ་ཤ་ནི། ནཱ་ཤ་ཡ། སརྦ་དུཥྚ་པྲ་ཡུཀྟཾ། ས་མ་ཡ་མ་ནུ་སྨ་ར་ཧཱུྃ་ཛཿསྭཱ་ཧཱ། སྔགས་འདིས་བསླབ་པའི་ཟས་གཞན་གང་ཡང་རུང་བ་ཡོངས་སུ་སྤྱོད་པ་ན་སྔགས་ལན་བདུན་མངོན་པར་བསྔགས་པ་བྱས་ནས་ཡོངས་སུ་ལོངས་སྤྱད་པར་བྱའོ། །ཟོས་ནས་སྔ་མ་བཞིན་དུ་ཉེ་རེག་བྱས་ཏེ་སྤྱི་བོ་ལ་སོགས་པའི་ལུས་ཐམས་ཅད་དུ་བྱུགས་ནས་དེ་ནས་ངལ་བསོ་བར་བྱའོ། །ངལ་སོས་ནས་ཡུད་ཙམ་ཕྱེད་དམ་ཐུན་གཅིག་ལའོ། །དེ་ནས་
རས་རིས་དང་། སངས་རྒྱས་ཐམས་ཅད་ལ་མངོན་པར་ཕྱག་བྱས་ནས། དམ་པའི་ཆོས་ཀྱི་གླེགས་བམ་བཀླག་པར་བྱའོ། །འཕགས་པ་ཤེས་རབ་ཀྱི་ཕ་རོལ་དུ་ཕྱིན་པ་དང་། འཕགས་མ་ཟླ་བ་སྒྲོན་མའི་ཏིང་ངེ་འཛིན་དང་། འཕགས་པས་བཅུ་པ་དང་། འཕགས་པ་གསེར་འོད་དམ་པ་དང་། འཕགས་པ་རྨ་བྱ་ཆེན་མོ་དང་། འཕགས་པ་རིན་པོ་ཆེ་ཏོག་གི་གཟུངས་ཏེ་འདི་རྣམས་ལས་གཞན་དང་གཞན་གང་ཡང་རུང་བ་བཀླག་པར་བྱའོ། །ཉི་མའི་དུས་ཀྱི་ཚད་བཞི་ཆ་ཙམ་དུའོ། །དེ་ནས་ཡོངས་སུ་ཞི་ནས་ཇི་ལྟར་འདོད་པ་བཞིན་དུ་བཀླག་པར་བྱ་སྟེ་གླེགས་བམ་བརྟུལ་ནས་གོས་གཙང་མ་བགོས་ཏེ་དམ་པའི་ཆོས་ལ་ཕྱག་བྱས་ནས་དེ་ནས་ཁྲུས་ཀྱི་ཆེད་དུ་ཆུ་ཀླུང་གི་འགྲམ་མམ་མཚོ་ཕྲན་ཆེན་པོར་འཇུག་པས་སོང་ནས། སྲོག་ཆགས་མེད་པའི་ཆུ་བླངས་ཏེ་ལན་བདུན་མངོན་པར་བསྔགས་པར་བྱས་ནས་རིག་པ་འདིས་ཆུ་ལ་གདབ་བོ། །གང་ཞེ་ན། ན་མཿ ས་མནྟ་བུད་དྷཱ་ནཱཾ་ཨ་པྲ་ཏི་ཧ་ཏ་ཤཱ་ས་ནཱ་ནཱཾ། ཏདྱ་ཐཱ། ཨོྃ་སརྦ་དུཥྚ་སྟཾ་བྷ་ཡ་ཧཱུྃ། ན་དཱི་བ་ར་དྷ་རི་ཎེ། ས་མ་ཡ་མ་ནུ་སྨ་ར་ཕཊ་ཕཊ་སྭཱ་ཧཱ། འདིས་སྲུང་བ་བྱས་ནས་ཕྱོགས་རྣམས་བཅིང་བ་དང་། གྲོགས་རྣམས་དང་། དཀྱིལ་འཁོར་བཅིང་བ་དང་། ཁ་བཅིང་བ་དང་། གདུག་པ་དང་། རབ་ཏུ་གདུག་པ་རྣམས་ཐམས་ཅད་འགུགས་པར་བྱེད་པ་དང་། བགེགས་བཅིང་བ་ལ་ཡང་སྲད་བུ་ལ་ལན་བདུན་བཟླས་ནས་རྐེད་པའི་ཕྱོགས་སུ་བཅིངས་པས་ཐམས་ཅད་ཡོངས་སུ་འཆགས་པ་དང་། བཟླས་པའི་དུས་ཐམས་ཅད་དང་། ཁྲུས་ཀྱི་དུས་ཐམས་ཅད་དང་། གདུག་པའི་བགེགས་རྣམ་པར་གཞོམ་པ་དང་། རབ་ཏུ་ཞི་བའི་དོན་དུ་སྔགས་འདི་སྟོང་ཕྲག་གཅིག་བཟླས་པར་བྱའོ། །དེ་ནས་ལས་ཐམས་ཅད་བྱེད་དོ། །པདྨའི་གདན་ལ་ཕྱག་རྒྱ་ཆེན་པོ་དང་ལྡན་པ་དགོད་པར་བྱའོ། །ལས་རྣམས་ཐམས་ཅད་དུ་ཐམས་ཅད་ཀྱི་རྣམ་པ་གཞན་དུ་མི་འགྱུར་རོ། །དེ་ནས་སྒྲུབ་པ་པོས་ས་ལས་བྱུང་བའི་ཕྱེ་མ་ལ་སོགས་པ་རྣམས་བླངས་ནས་ཇི་ལྟར་བདེ་བར་ཁྲུས་བྱ་ཞིང་སྲོག་ཆགས་མེད་པའི་
ཆུས་ཁྲུས་བྱས་ཏེ། ཐམས་ཅད་དུ་ལས་ཐམས་ཅད་ལ་སྲོག་ཆགས་མེད་པ་ཉིད་ཀྱིས་བྱའོ། །དེ་ནས་ཁྲུས་བྱས་ནས་སའི་རང་བཞིན་ནམ་གཞན་དྲི་ཞིམ་པོ་དང་ལྡན་པའི་དྲི་དང་། ཡོ་བྱད་ཀྱི་ཁྱད་པར་གྱིས་རྗེས་སུ་བྱུག་པར་བྱའོ། །ཆུའི་ནང་དུ་མཆིལ་མ་དང་། བཤང་བ་དང་གཅི་བ་ལ་སོགས་པ་ཡང་དོར་བར་མི་བྱའོ། །རྩེ་བར་ཡང་མི་བྱའོ། །སྙིང་རྗེ་དང་ལྡན་པས་བདག་དང་སེམས་ཅན་ཐམས་ཅད་ལ་སོ་སོར་བརྟག་པར་བྱ་སྟེ། བདག་མེད་པ་དང་། སྟོང་པ་དང་། སྡུག་བསྔལ་དང་ལྡན་པ་དང་། སྡུག་བསྔལ་ཉེ་བར་འགགས་པ་དང་། ཚོར་བས་མངོན་པར་ནོན་པ་དང་། ཆུ་རླབས་བཞིན་དུ་མངོན་པར་འབྱུང་བའི་རབ་ཏུ་སྦྱོར་བའི་སྡུག་བསྔལ་དང་ལྡན་པའི་སེམས་ཅན་རྣམས་འདི་ལྟར་སྒྲུབ་པ་དང་བྲལ་བ་སྔགས་ཤེས་པས་གང་དེ་བཞིན་དུ་དུག་དང་། གཅོད་པ་དང་། ལྟུང་བ་དང་། རྣམ་པར་འཐོར་བ་དང་། རྣམ་པར་འཇིགས་པ་ལ་སོགས་པ་རྣམས་ཀྱིས་སྡུག་བསྔལ་གྱི་ཕུང་པོ་ཉེ་བར་འགོག་པར་བྱ་བཞིན་པ། འཁོར་བའི་རྒྱ་མཚོ་ཐིབས་པོ་གནས་པའི་བདག་ཉིད་དུ་མཐོང་ཞིང་གནས་མེད་པ་དང་སྐྱོབ་པ་མེད་པ་དང་། སྐྱབས་མེད་པ་དང་། ཤིན་ཏུ་དམན་པའི་ཡིད་ཅན་གྱི་བདག་ཉིད་དུ་བརྟགས་ནས་སྒོམ་པ་པོ་མགྲིན་པ་ནུབ་ཙམ་གྱི་ཆུ་ན་གནས་པའམ། ལྟེ་བ་ཙམ་དུ་གནས་པའི་ཆུ་དེ་ཉིད་ཀྱི་ནང་དུ་སེམས་རྩེ་གཅིག་ཏུ་ཉེ་བར་གཟུང་བར་བྱའོ། །དང་པོར་རེ་ཞིག་པདྨ་ཆེན་པོའི་འདབ་མ་ལ་མེ་ཏོག་ཆེན་པོ་དང་ལྡན་པ་པདྨ་ཆེན་པོའི་ལོ་མས་ཉེ་བར་མཛེས་པ། བལྟ་ན་སྡུག་པ། རིན་པོ་ཆེ་བེེཌཱུཪྱའི་རང་བཞིན་ལས་བྱུང་བའི་སྡོང་བུ་དང་། རིན་པོ་ཆེ་མ་ད་ཀ་ལས་གྲུབ་པའི་པདྨའི་གེ་སར་དང་། ཤེལ་ལས་བྱས་པའི་སྡོང་པོ་ལེགས་པར་ཁ་ཕྱེ་བ་དང་དེའི་རྗེས་སུ་སྐྱེས་པའི་ཤེལ་དང་པདྨ་རཱ་གའི་མེ་ཏོག་རྣམས་ཀྱིས་མཛེས་པའོ། །དེའི་སྟེང་དུ་སེང་གེའི་ཁྲི་རིན་པོ་ཆེ་དུ་མས་ཉེ་བར་མཛེས་པ་རས་བཅོས་བུ་ཟུང་གིས་བཀབ་པའོ། །དེའི་སྟེང་དུ་བཞུགས་པའི་སངས་རྒྱས་བཅོམ་ལྡན་འདས་བསམ་པར་བྱ་སྟེ། ཆོས་སྟོན་པར་མཛད་ཅིང་བཞུགས་པ་གསེར་གྱི་མདོག་ཏུ་སྣང་བ་ཀུན་ནས་འོད་འབར་བའི་ཕྲེང་བས་ཁྱབ་
པའི་འོད་ཀྱི་དཀྱིལ་འཁོར་གྱིས་བརྒྱན་པ་ཚད་ཆེན་པོ་ནམ་མཁའ་ལྟ་བུ་མཆོག་ཏུ་བྲིས་བཞིན་པ། སྐྱིལ་མོ་ཀྲུང་གིས་ཉེ་བར་བཞུགས་པ། གཡས་སུ་འཕགས་པ་སྤྱན་རས་གཟིགས་དབང་ཕྱུག་རྣམ་པ་ཐམས་ཅད་ཀྱི་མཆོག་དང་ལྡན་པ། པདྨ་ཆེན་པོའི་གདན་ལ་བཞུགས་བ། རྔ་ཡབ་བསྣམས་པ། བཅོམ་ལྡན་འདས་བཞུགས་པའི་གྲྭ་ན་འཁོད་དེ། ལུས་དམར་སེར་གུར་གུམ་བཏགས་པའི་ཁ་དོག་ལྟ་བུའོ། །གཡོན་དུ་འཕགས་པ་མཐུ་ཆེན་པོ་ཐོབ་སྟོན་ཀའི་སྤྲིན་ལྟར་དཀར་བ་ཕྱག་ན་རྔ་ཡབ་ཐོགས་པའོ། །དེ་བཞིན་དུ་བྱང་ཆུབ་སེམས་དཔའ་བརྒྱད་ལ། འཕགས་པ་བྱམས་པ་དང་། ཀུན་དུ་བཟང་པོ་དང་། སའི་སྙིང་པོ་དང་། ནམ་མཁའི་མཛོད་དང་། སྒྲིབ་པ་ཐམས་ཅད་རྣམ་པར་སེལ་བ་དང་། འཕགས་པ་འཇམ་དཔལ་དང་། འཕགས་པ་ཕྱག་ན་རྡོ་རྗེ་དང་། ནོར་བཟང་ཞེས་པ་བྱང་ཆུབ་སེམས་དཔའ་བཅུ་པོ་འདི་རྣམས་ཀྱི་གཡས་སུ་རང་སངས་རྒྱས་བརྒྱད་བསམ་པར་བྱ་སྟེ། ཙནྡན་དང་། སྤོས་ངད་ལྡན་དང་། ཏོག་དང་། ཏོག་དཀར་དང་། འདོད་པ་དང་། ཉེ་བའི་འདོད་པ་དང་། མུ་ཁྱུད་དང་། མུ་ཁྱུད་བརྒྱད་དོ། །དེ་ཉིད་དུ་ཉན་ཐོས་ཆེན་པོ་བརྒྱད་གནས་པ་ལ་འདི་ལྟ་སྟེ་འཕགས་པ་མོོད་གལ་གྱི་བུ་ཆེན་པོ་དང་། འཕགས་པ་ཤཱ་རིའི་བུ་དང་། བ་ལང་བདག་དང་། བྷ་ར་དྷྭ་ཛ་བསོད་སྙོམས་ལེན་དང་། པི་ལིན་དའི་བུ་དང་། འཕགས་པ་སྒྲ་གཅན་ཟིན་དང་། འཕགས་པ་འོད་སྲུང་ཆེན་པོ་དང་། འཕགས་པ་ཀུན་དགའ་བོ་ཞེས་པའི་ཉན་ཐོས་ཆེན་པོ་དེ་རྣམས་དང་ཉེ་བར་དགེ་སློང་གི་དགེ་འདུན་མཐའ་ཡས་པ་བསྒོམ་པར་བྱའོ། །རང་སངས་རྒྱས་རྣམས་དང་ཉེ་བར་རང་སངས་རྒྱས་མཐའ་ཡས་པ་བསྒོམ་པར་བྱའོ། །བྱང་ཆུབ་སེམས་དཔའ་བརྒྱད་པོ་རྣམས་ཀྱི་གནས་སུའང་བྱང་ཆུབ་སེམས་དཔའི་དགེ་འདུན་མཐའ་ཡས་པ་བསྒོམ་པར་བྱའོ། །དེ་བཞིན་དུ་ཀུན་ནས་འཁོར་གྱི་དཀྱིལ་འཁོར་དུ་འཁོར་གྱི་དཀྱིལ་འཁོར་ཆེན་པོ་དང་ལྡན་པར་བསྒོམ་པར་བྱའོ། །བྱང་ཆུབ་སེམས་དཔའ་ཆེན་པོ་བདག་ཉིད་ཀྱང་ལྟེ་བ་ཙམ་གྱི་ཆུ་ལ་གནས་བཞིན་དུ་ལྷ་དང་མིའི་མེ་ཏོག་རྣམ་པ་སྣ་ཚོགས་པ་ལ་མེ་ཏོག་མན་དཱ་ར་བ་དང་། མན་དཱ་ར་བ་
ཆེན་པོ་དང་། པདྨ་དང་། པདྨ་ཆེན་པོ་དང་། དྷཱ་ནུ་སྐཱ་རི་ཀ་དང་། པརྵི་ཀ་དང་ཨིནྟྲ་བ་རའི་མེ་ཏོག་རྣམ་པ་སྣ་ཚོགས་པ་ཚད་ཆེན་པོ་ཕུང་པོ་ཆེན་པོར་གནས་པ་རི་རབ་ཙམ་གྱི་མེ་ཏོག་གི་ཕུར་མས་བཅོམ་ལྡན་འདས་ལ་མཆོད་པ་བྱ་ཞིང་། འཕགས་པ་ཉན་ཐོས་དང་རང་སངས་རྒྱས་ཐམས་ཅད་དང་། བྱང་ཆུབ་སེམས་དཔའ་རྣམས་ལ་ཕྱེ་མ་དང་། ཆོས་གོས་དང་། གདུགས་དང་། རྒྱལ་མཚན་དང་། བ་དན་རྣམས་དང་། ལྷ་དང་མིའི་མར་མེ་མང་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་ཡིད་དུ་འོང་བ་རྣམས་ཀྱིས་མཆོད་པར་བྱའོ། །དེ་བཞིན་དུ་གཏོར་མ་དང་། བདུག་པ་དང་། ལྷ་བཤོས་དང་། མཆོད་པ་དང་། བསྙེན་བཀུར་ལ་སོགས་པ་ཡོ་བྱད་ལྷ་དང་མིའི་ཉེར་མཁོ་རྣམས་དབུལ་བར་བྱའོ། །བཅོམ་ལྡན་འདས་ཤཱཀྱ་ཐུབ་པའི་སྨིན་མཚམས་ཀྱི་མཛོད་སྤུ་ནས་འོད་ཟེར་མངོན་པར་འཕྲོ་བཞིན་པས་བདག་ཉིད་དང་ཕྱོགས་ཐམས་ཅད་ཀྱང་ཀུན་དུ་སྣང་བཞིན་པར་བསྒོམ་པར་བྱའོ། །སྒོམ་པ་པོ་བསམ་གཏན་ལ་ཞུགས་མ་ཐག་ཏུ། ཚངས་པའི་བསོད་ནམས་ཀྱི་འབྲས་བུ་ཐོབ་བོ། །ངེས་པར་བྱང་ཆུབ་མཆོག་ཏུ་གཞོལ་བར་འགྱུར་རོ། །དེ་ལྟ་བུ་སོགས་བསམ་གཏན་རྣམས། །འཇིག་རྟེན་སྐྱེས་མཆོག་རྣམས་ཀྱིས་གསུངས། །འབྱུང་པོ་ཀུན་ཀྱང་ལེགས་པ་དང་། །སྔགས་པ་རྣམས་ལ་ཕན་དོན་དང་། །དེ་ཚེ་བསམ་གཏན་དང་པོའི་གཙོ། །སྔགས་པ་ཀུན་ལ་ཕན་དོན་དུ། །སེམས་ཅན་རྣམས་ཀྱི་ཕྱིར་གསུངས་སོ། །དེ་ནས་ཐུབ་མཆོག་བདུན་པ་ཡི། །དཀྱིལ་འཁོར་རྣམ་པར་བརྗོད་པར་བྱ། །ཐུབ་པས་དང་པོར་གསུངས་པ་ཡིན། །གཉིས་པ་ཡི་ནི་དཀྱིལ་འཁོར་དང་། །གསུམ་པར་ཡང་ནི་དེ་ལས་གཞན། །དང་པོར་མཆོག་གི་དངོས་གྲུབ་སྟེ། །བར་མ་ལ་ནི་དེ་བཞིན་གཞན། །ཆུང་ངུ་ལ་ནི་ཕྲན་ཚེགས་འགྲུབ། །ཐུབ་པ་མཆོག་གིས་ངེས་པར་གསུངས། །དེ་བཞིན་རས་རིས་བསམ་གཏན་ནི། །ཐུ་བོ་བར་མ་ཆུང་ངུ་སྟེ། །ཐམས་ཅད་སྡིག་པ་འཇིག་བྱེད་པའོ། །དེ་ལས་གཞན་ཡང་མཁས་པས་ནི། །
བསམ་གཏན་རྣམ་པ་རབ་བསྒྲུབ་བྱ། །བསམ་གཏན་དེ་ལ་རབ་གནས་ན། །སྔགས་རྣམས་དེ་ལ་འགྲུབ་པར་འགྱུར། །ཇི་ལྟར་འདོད་པའི་ཆོ་ག་བཤད། །ཟློས་པོས་བསམ་གཏན་བསྒོམས་ནས་ནི། །སྔགས་ཀྱི་མཆོད་ཡོན་དེར་ཕུལ་ནས། །ཇི་ལྟར་བདེ་བར་གཤེགས་སུ་གསོལ། །ཆུ་ཚོགས་དེ་ལས་བསྒྲལ་ནས་ནི། །དེ་ནས་ཇི་ལྟར་བདེ་བར་འགྲོ། །གནས་ནི་སྔོན་དུ་ངེས་བསྟན་པར། །ཆོ་ག་མཐོང་བས་ལེགས་ཞི་བར། །དེ་ལ་སྔགས་པས་གསང་སྔགས་བཟླས། །སྔར་ལས་ཇི་ལྟར་བརྗོད་པ་བཞིན། །རང་གི་ལྷ་ནི་སྤྱན་དྲངས་པ། །དེར་ནི་སྔགས་ཀྱིས་གཤེགས་སུ་གསོལ། །དེ་ནས་བདག་ཉིད་དེ་བཞིན་ཉིད། །གྲོགས་པོ་རྣམས་ནི་བསྲུངས་བྱས་ནས། །དགེ་བའི་ལས་ཀྱིས་དེ་ཉིད་ཤེས། །ཆོ་གའི་ལས་ལ་དགའ་ཞིང་འདུད། །རྣམ་པ་སྣ་ཚོགས་བསྟོད་མཆོད་ཀྱིས། །གང་ཟག་མཆོག་ལ་ཀུན་བསྟོད་ནས། །རང་སྔགས་སྔགས་ཀྱིས་མགོན་པོ་དང་། །ཉན་ཐོས་རང་རྒྱལ་བསེ་རུ་དང་། །བྱང་ཆུབ་སེམས་དཔའ་སེམས་དཔའ་ཆེ། །འཇིག་རྟེན་གསུམ་པོ་རྗེས་འཛིན་བཟོད། །དེ་ནས་གསང་སྔགས་ཟློས་པ་པོས། །སྟན་དེ་ལས་ནི་སླར་ལངས་ནས། །ཐག་རིང་གནས་སུ་སོང་ནས་ནི། །ཕྱི་རོལ་རླུང་གི་རྣམ་པར་སྤངས། །སྣབས་དང་མཆིལ་མ་རྣམ་པར་དོར། །བཤང་དང་གཅི་བའང་དེ་བཞིན་ནོ། །ཉིན་པར་བྱང་དུ་ཁ་ཕྱོགས་ཤིང་། །མཚན་མོ་ལྷོ་རུ་ཁ་བལྟའོ། །སྔགས་ཟློས་པོས་ནི་ནམ་ཡང་དེར། །དོན་རྣམས་བསམ་པར་མི་བྱའོ། །དེར་ནི་རང་ལས་བྱེད་གསུངས་པའི། །སྔགས་ཀྱི་བཟླས་པ་མི་བྱའོ། །རབ་སྔགས་འགྲོ་བ་མཚན་སོགས་ཀྱི། །དེ་ཚེ་ས་སྟེངས་ཉེར་འདུག་སྟེ། །དག་པའི་ཆུ་ཡིས་ཉེ་རེག་བྱ། །གཙང་མའི་གོས་མཐའ་ཆུར་གཞུག་བྱ། །ས་ཡི་ཕུང་པོ་བདུན་ཉིད་ཀྱིས། །འབད་པས་རྐང་པ་བཀྲུས་བྱས་ནས། །རབ་ཏུ་འཛག་པ་བདུན་བླངས་ནས། །བཤང་བ་འཛག་པ་སུམ་ཅུ་སྟེ། །གཉིས་ཀའི་མཐའ་ལ་ལག་པ་དག །མཆིལ་མ་དོར་བ་ཉིད་དང་ནི། །སྣབས་ལའང་གཉིས་དེ་དེ་བཞིན་ནོ། །དེ་ནས་འབད་པས་ཉེ་རེག་བྱ། །གནས་ལ་རིང་དུ་སོང་བའི་སར། །དེ་བཞིན་སྒྲ་ཙམ་
སོང་ནས་ནི། །ལམ་ལ་སོགས་པ་ཡངས་པ་རུ། །དེ་ནས་གཞན་གྱི་ཅི་འདོད་བཞིན། །ལྷོ་ཕྱོགས་མཐའ་ཡི་ཕྱི་རོལ་ཏུ། །ཆུ་དང་གཡང་ས་མེད་པ་དང་། །དེ་བཞིན་བྱེ་མས་ཁྱབ་པ་དང་། །ཆུ་ཀླུང་སྤངས་ཤིང་ངོགས་ཀྱང་སྤངས། །འབད་པས་མི་གཙང་ཆུ་སྤངས་པར། །གསང་ཞིང་ཤིན་ཏུ་སྦྱངས་པ་དང་། །བས་མཐའ་ལྗོངས་ནི་སྤངས་པ་དང་། །རྣམ་པར་དབེན་པའི་སར་སོང་ནས། །སྔགས་པས་མི་གཙང་དོར་བར་བྱ། །ཟློས་པོ་དུས་ནི་ཤེས་བྱས་ནས། །ཇི་ལྟར་འདོད་པའི་ཤུགས་དག་མིན། །དེ་ནས་དག་པའི་ཕྱོགས་སོང་སྟེ། །བས་མཐར་དེ་བཞིན་བཤང་བ་དང་། །གཅི་བའི་བྱ་བ་བྱས་ནས་ནི། །དེ་རུ་ལུས་ནི་ཅི་བདེ་བར། །གཉིས་ཀའང་གསང་གཡོགས་སྦས་པ་དང་། །སྐྱེ་བོ་མེད་པའི་ས་སྤང་བར། །གསང་སྔགས་རྒྱལ་པོ་བསྒྲུབ་པར་བྱ། །དེ་བཞིན་ཁོ་ནར་ཐམས་ཅད་དུ། །རི་བོ་དང་ནི་ཚང་ཚིང་དང་། །བས་མཐའི་གནས་མལ་ཉམས་དགའ་བ། །དེ་བཞིན་རྒྱལ་བས་སྤངས་པ་ཡི། །གདུག་པའི་སེམས་ཅན་རྣམ་བྲལ་བར། །གསང་སྔགས་རྒྱལ་པོ་ཐམས་ཅད་སྒྲུབ། །རྒྱལ་པོ་ཆོས་དང་ལྡན་པའི་ཡུལ། །སྐྱེ་བོ་གཙང་སྦྲ་སྤྱོད་ལ་དགའ། །མ་དང་ཕ་ལ་གུས་པ་དང་། །གཉིས་སྐྱེས་རིགས་ཀྱིས་དོར་བ་རུ། །ལྷ་རྣམས་དངོས་གྲུབ་ཐོབ་པར་འགྱུར། །གནས་དེར་ཡིན་གྱིས་གཞན་དུ་མིན། །ཉམས་དགའ་སྐལ་ལྡན་ཤིང་རྟའི་འགྲམ། །ཡ་མུ་ན་ཉིད་རབ་མཛེས་པ། །སིན་དྷུ་ན་ར་མ་ད་བཀྵེ། །ཟླ་བའི་ཆ་ནི་གཙང་མའི་འགྲམ། །ཀཱ་བེ་རཱི་དང་དབྱངས་ཅན་ཉིད། །ཆུ་ཀླུང་ཆེན་པོ་ཤཱི་ཏ་ཉིད། །འདི་གྲུབ་ཞིང་གཞན་མ་ཡིན་པར། །སྟོབས་བཅུ་ལྡན་སྲས་རྣམས་ཀྱིས་བཤད། །སྟོབས་བཅུ་པ་ཡིས་གསུངས་པའི་ཞིང་། །བྱང་ཕྱོགས་ལམ་མེད་རི་བོ་དང་། །ཁ་ཆེ་དང་ནི་རྒྱ་ཡུལ་དང་། །བལ་ཡུལ་དེ་བཞིན་མང་ཡུལ་དང་། །རྒྱ་ནག་ཆེ་དང་ལི་ཡུལ་ཉིད། །དེ་དག་མ་ལུས་གྲུབ་པའི་ཞིང་། །བྱང་གི་ཕྱོགས་སུ་བརྟེན་པ་ཡི། །གང་ཡང་རི་དང་ཆུ་བོ་དང་། །བསོད་ནམས་ཡུལ་དུ་རབ་ཏུ་བརྗོད། །ནས་དང་གྲོ་ནི་ཟ་བའོ། །གང་དུ་སེམས་ཅན་སྙིང་རྗེ་ལྡན། །དེ་རུ་རྟག་པར་དངོས་གྲུབ་འགྱུར། །དཔལ་
གྱི་རི་བོ་བྲག་རི་ཆེ། །ལྷོ་ཕྱོགས་ཡུལ་དུ་གནས་པ་ཡི། །དཔལ་ལྡན་འབྲས་ཕུང་མཆོད་རྟེན་ནི། །ས་སྟེངས་རྒྱལ་བའི་རིང་བསྲེལ་འཛིན། །དེར་ནི་སྔགས་རྣམས་བསྒྲུབ་པར་བྱ། །མྱུར་དུ་ལས་དང་ལས་རྣམས་སོ། །རྡོ་རྗེ་གདན་དང་མཆོད་རྟེན་ཆེ། །ཆོས་ཀྱི་འཁོར་ལོ་མཛེས་པ་དང་། །གང་དུ་ཐུབ་གཙོ་ཞི་བར་གཤེགས། །དེར་ཡང་དངོས་གྲུབ་བལྟ་བར་བྱ། །ལྷ་ལས་བབས་པའི་མཆོད་རྟེན་ནི། །ས་པཀྵེ་དང་ཆོ་འཕྲུལ་ཆེ། །སེར་སྐྱ་ཞེས་བྱའི་གྲོང་མཆོག་དང་། །ལུམྦིའི་ཚལ་དུ་འཁྲུངས་པ་དེར། །གསང་སྔགས་རྒྱལ་པོ་འགྲུབ་པར་འགྱུར། །རྒྱལ་བས་བསྟོད་ཅིང་རབ་བསྔགས་པའི། །བྱ་རྒོད་ཕུང་པོའི་རི་དེར་དང་། །དེ་བཞིན་བྲག་དང་བསིལ་བའི་ཚལ། །མེ་ཏོག་ཞེས་བྱའི་གྲོང་མཆོག་དང་། །དེ་བཞིན་རྟག་ཏུ་ཀཱ་ཤའི་གྲོང་། །བཅོམ་བརླག་ཀ་ནྱ་ཀུབ་ཛི་དང་། །ས་སྟེངས་གྲོང་ནི་འཕགས་རྒྱལ་དང་། །མཆོད་རྟེན་དེ་བཞིན་ཡངས་པ་ཅན། །རྟག་ཏུ་ས་སྟེངས་མི་ཐི་ལ། །གྲོང་དང་གྲོང་ཁྱེར་གཙོ་བོ་རྣམས། །གང་གཞན་རྒྱལ་བ་ཡང་དག་འབྱུང་། །རབ་བསྔགས་བསོད་ནམས་ཡུལ་དག་ཏུ། །དེ་རྣམས་སུ་ནི་དངོས་གྲུབ་སྒྲུབ། །འདི་རྣམས་ལས་གཞན་ཡུལ་རྣམས་ནི། །གྲོང་དང་ལྗོངས་དང་རི་བོ་དང་། །གནས་དང་གྲོང་མཆོག་གཙོ་བོ་ནི། །འོ་མའམ་འབབ་ཆུ་ལ་བརྟེན་པ། །དེར་ནི་རྣམ་དབེན་རྗེས་འཇུག་ཅིང་། །བཟླས་དང་སྦྱིན་སྲེག་དགའ་བར་འགྱུར། །གནས་ནི་བླ་གབ་མེད་པ་དང་། །རྟག་ཏུ་ཁང་པ་སྟོང་པ་རུ། །སྔོན་དུ་བསྙེན་པ་བྱ་བའོ། །སྔགས་རྣམས་རྗེས་མཐུན་ལས་རྣམས་ནི། །སྔགས་པས་རྟག་ཏུ་ཡུལ་དབུས་སུ། །སྔགས་བཟླས་ཡང་དག་འདོད་པར་བྱ། །བཟླས་ལ་རབ་ཞུགས་རྟག་ཏུ་བརྩོན། །སྔགས་རིག་གཏོང་བ་དག་ལ་གོམས། །ཚུལ་ཁྲིམས་སྤྱོད་ཅིང་ཤིན་ཏུ་བརྟན། །འབྱུང་པོ་ཀུན་ལ་ཕན་པར་དགའ། །སྔགས་ཀྱི་སྤྱོད་པ་ལ་དད་པ། །བརྟུལ་ཞུགས་ཅན་གྱིས་སྔར་བཞིན་བཟླས། །གཙང་མའི་ཡུལ་དང་གཙང་སྦྲ་ཅན། །ཀླ་ཀློ་རྐུན་མ་སྤངས་པ་དང་། །དེར་ནི་བསྐལ་པ་ཆེན་པོར་གནས། །དམ་ཚིག་སྣང་བ་
བྲལ་བའི་ཕྱིར། །དམྱལ་བ་མི་བཟད་མུན་པ་རུ། །བྱིས་པའི་སྐྱེ་བོ་འཚེད་པར་བྱེད། །དམ་པའི་ཆོས་ལ་སྨད་པ་དང་། །མི་ཤེས་མུན་པས་བསྒྲིབས་པ་དང་། །ཡེ་ཤེས་བྱིས་པའི་ངོ་བོ་འམ། །རྨོངས་པ་ལོག་པའི་ང་རྒྱལ་ཅན། །རིག་པའི་རྒྱལ་པོ་བརྙས་བྱེད་པ། །མི་བཟད་དམྱལ་བར་ལྟུང་བར་འགྱུར། །དེ་ཕྱིར་སྡིག་པ་མི་བྱ་ཞིང་། །ལོག་པར་སྨྲ་བའང་སྨད་པ་ཡིན། །དམ་པའི་ཆོས་ལ་བརྙས་པ་དང་། །ལོག་པར་ལྟ་བ་སྨད་པ་ཡིན། །དེ་ཕྱིར་རྟག་ཏུ་དད་གྱུར་ནས། །གསང་སྔགས་ཆོ་ག་རྟག་ཏུ་བསྟེན། །བདེན་པར་སྨྲ་ཞིང་ཆོས་ཤེས་པ། །སེམས་ཅན་རྣམས་ལ་རྟག་ཏུ་ཕན། །སྔགས་ཤེས་སྔགས་ནི་སྟེན་པར་བྱེད། །དེ་ཡི་དངོས་གྲུབ་ངེས་པར་འགྱུར། །མཆོག་དང་འབྲིང་དང་ཐ་མ་ཡིས། །ལས་ནི་རྣམ་པ་སྣ་ཚོགས་བྱེད། །ལས་རྣམས་བྱ་བ་རྣམས་ཀྱིས་བྱེད། །རྟག་ཏུ་ཕན་པའི་བྱ་བ་ཡིས། །བྱ་བའི་ལས་དང་ཡང་དག་ལྡན། །དེ་ལ་རྟག་ཏུ་གྲུབ་པར་འགྱུར། །བྱ་བའི་དོན་དང་དོན་ཀུན་ཕྱིར། །ལས་ནི་རྣམ་པ་སྣ་ཚོགས་བྱ། །བྱ་བའི་དོན་དུ་བྱ་མིན་གང་། །བྱ་བའི་ལས་ལ་སྦྱར་བར་བྱ། །འབྲས་བཅས་ཉིད་ཀྱི་བྱ་དོན་གྱི། །བྱ་བ་ཉིད་དུ་རྟག་ཏུ་བྱ། །བྱ་བ་ལས་དང་འབྲས་བུ་ཉིད། །བྱ་བ་ལས་འབྲས་རྟག་ཏུའོ། །འབྲས་མེད་འབྲས་བུ་ཉིད་འགྱུར་ཞིང་། །འབྲས་བུ་ཉིད་ཀྱང་རྟག་ཏུ་འབྲས། །འབྲས་མེད་འབྲས་བུ་བཅས་པ་ཉིད། །ཐམས་ཅད་ཉིད་ཀྱང་འབྲས་བུ་བཅས། །རྣལ་འབྱོར་སྔགས་ནི་བསྒྲུབ་བྱ་སྟེ། །ཡང་དག་སྦྱོར་དང་བྲལ་བ་ཡང་། །བྲལ་དང་ཡང་དག་ལྡན་སྒྲུབ་པོ། །བསྒྲུབ་བྱ་སྒྲུབ་བྱེད་མེད་པར་ནི། །དེ་ལ་གྲུབ་པ་ཡོད་མ་ཡིན། །གྲུབ་པའི་རྫས་ནི་ཐམས་ཅད་ཀྱང་། །གྲུབ་པའི་རྒྱུ་དང་འགལ་བ་ཡིན། །སྔགས་ཀྱི་དངོས་གྲུབ་མ་གྲུབ་པ། །སྔགས་ནི་སྒྲུབ་པར་བྱེད་པའི་རྒྱུ། །བྱེད་པར་འདོད་པ་དེ་ལས་ཏེ། །འདོད་པའི་ལས་ནི་བྱང་བར་འགྱུར། །ལས་མིན་ལས་ནི་ཐམས་ཅད་ལ། །ལས་ཀྱི་རྒྱུད་ནི་མི་བྱའོ། །སྔགས་དང་རྒྱུད་ཀྱི་དོན་ལྡན་པའི། །ལས་ནི་མཐའ་དག་བརྩམ་པར་བྱ། །བརྩམས་དང་རྩོམ་པའི་འདུད་པ་ཡི། །ལས་ཉིད་བརྩམ་པར་མི་བྱའོ། །
བྱ་བ་མ་བརྩམས་སྔགས་རྣམས་ནི། །ལུས་ཅན་ཀུན་ལ་འགྲུབ་མི་འགྱུར། །སེམས་ཅན་ཀུན་རྗེས་སྐྱོང་བ་ཡི། །ཐུབ་པའི་གཙོ་བོས་སྔོན་གསུངས་པ། །གསང་སྔགས་སྨྲ་བས་བསྟན་པ་ཡི། །རྒྱལ་བའི་སྲས་ཀྱི་ཡང་དག་སྡོམ། །སྒྲུབ་པོ་སྔགས་ནི་ཀུན་ཤེས་ཤིང་། །རྟོག་པའི་རྒྱལ་པོ་འདི་ལ་ཚིག །སྔགས་ཀྱི་ཚུལ་གྱིས་བསྟན་པ་ཡིན། །ལམ་ནི་བྱང་ཆུབ་རྒྱུར་གྱུར་པ། །སྔགས་ཀུན་ཉིད་ནི་སྒྲུབ་པར་བྱེད། །རིག་པ་མཉམ་པར་འགྱུར་བ་ཡིན། །དེ་ནི་རིང་པོར་མི་ཐོགས་པར། །མཁས་པས་དངོས་གྲུབ་འགྱུར་བ་ཡིན། །འབྱུང་པོ་ཐམས་ཅད་ཞི་དོན་དུ། །སངས་རྒྱས་ཀུན་གྱིས་རབ་ཏུ་བསྒྲགས། །གསང་སྔགས་ཚུལ་གྱི་ལམ་འདིས་ནི། །མྱ་ངན་འདས་གྲོང་འགྲོ་བ་ཡི། །དེ་བཞིན་རྟག་ཏུ་བྱང་ཆུབ་ལམ། །ཆོས་དོན་ཐམས་ཅད་རྫོགས་པར་བྱེད། །དེ་ཡི་མཐར་ཐུག་དཔུང་གཉེན་ནི། །དང་པོ་གནས་ནི་སངས་རྒྱས་ཉིད། །དེ་བཞིན་འདིར་ནི་ལྷུན་གྲུབ་ཏུ། །འབྲས་བུར་བཅས་པའི་དངོས་གྲུབ་ཐོབ། །སྣ་ཚོགས་ལས་དང་ཆོས་ཤེས་པ། །སྔགས་རྣམས་བྱེད་པར་འགྱུར་བ་ཡིན། །ཚུལ་ཁྲིམས་བསམ་གཏན་རྣམ་ཐར་རྣམས། །འདི་རྣམས་མདོར་བསྡུས་ཐོབ་པ་ཡིན། །དངོས་གྲུབ་དོན་ཀུན་སྒྲུབ་བྱེད་པ། །རྒྱལ་བ་གཙོ་བོས་གསུངས་པ་ཡིན། །གང་ཟག་རྐང་པའི་དོན་ཐོབ་པ། །དམ་པའི་འགྲོ་བར་གནས་པ་དང་། །དེ་བཞིན་རྟག་ཏུ་གནོད་སྦྱིན་གཙོ། །ཐ་མས་རྒྱལ་སྲིད་རྒྱུ་ཡིན་ཏེ། །ལྷ་མིན་ལྷ་ཡི་འཇིག་རྟེན་གྱི། །དེ་བཞིན་དེ་རྣམས་བདག་པོ་ནི། །སྔགས་པས་ཐམས་ཅད་ཐོབ་པར་འགྱུར། །བྱ་བ་འབྲས་བཅས་བྱེད་པར་འགྱུར། །གཙང་སྦྲའི་ཀུན་སྤྱོད་ཡང་དག་ལྡན། །ཚུལ་ཁྲིམས་བསམ་གཏན་རྟག་ཏུ་དགའ། །སྔགས་རྣམས་ཀུན་ཏུ་གསུངས་པ་ཡིན། །དེ་ནས་སྔགས་པས་སྔགས་བཟླས་བྱ། །སྔགས་པ་འབྱོར་བ་འདོད་པ་ཡིས། །རྣམ་པ་སྣ་ཚོགས་ལས་བྱས་ཏེ། །དེ་བཞིན་མཆོག་དང་བར་མ་དང་། །ཐ་མ་ཉིད་ཀྱང་བྱ་བ་ཡིན། །ཐ་མས་ལོངས་སྤྱོད་འཕེལ་བ་ཡིན། །བར་མས་གོང་མའི་ལུས་ཅན་ཉིད། །མཆོག་ཉིད་
ཀྱིས་ནི་ལྡང་བ་ཉིད། །ཟློས་པོས་རྟག་ཏུ་ཐོབ་པར་བྱེད། །སྔགས་པས་བཟླས་མཐར་ངལ་བསོ་ཞིང་། །ཇི་སྲིད་དུས་སུ་བརྟག་པར་བྱ། །བཟླས་པའི་དུས་ལ་བབ་པ་ན། །དེར་ནི་བསྒྲུབ་པ་བྱ་བ་ཡིན། །དེ་བཞིན་ལས་རྣམས་སྒྲུབ་པར་བྱེད། །དེ་ལ་རྟག་ཏུ་བཟླས་པས་སྐྱེས་བུ་རང་གི་སྡིག་པ་ཟད་པར་བྱེད་དོ། །སྔགས་པས་སྔོན་ལས་ཀྱི་ཆོ་ག་གང་བྱས་པ་སྐྱེ་བ་བརྒྱུད་པ་རྣམས་སུ་གྲུབ་པར་གནས་པ་དེ། དེ་བཞིན་དུ་ལས་ཚོགས་ལ་རྙེད་པར་འགྱུར་བ་དེ་སྐྱེས་པས་སྔགས་བཟླས་པས། སླར་ཡང་སྔགས་ཟློས་པ་པོའི་སྡིག་པ་ཟད་པའི་དོན་དང་། ལས་དེ་འཇོམས་ཤིང་སྔགས་གྲུབ་པར་འགྱུར་ཏེ། དེ་བཞིན་དུ་མཆོག་དང་། བར་མ་དང་ཐ་མའི་འཇིག་རྟེན་གྱི་མཆོད་པ་དང་བཟླས་པས་སྡིག་པ་མ་ལུས་པར་ཟད་པར་བྱེད་ཅིང་། སྐྱེ་བ་བརྒྱུད་པ་རྣམས་སུ་གང་བར་བྱས། སྡིག་པ་དེ་ཐམས་ཅད་འཇིག་པར་བྱེད་དེ་དེ་བཞིན་གཤེགས་པ་རྣམས་ཀྱི་སྔགས་བཟླས་པས། ལུས་རྣམ་པ་སྣ་ཚོགས་པའི་རྒྱན་གྱིས་བརྒྱན་པ་དང་། ཐུབ་པ་རྣམས་ཀྱིས་གནས་པས་དགའ་བ་དང་། ཡོན་ཏན་ཐམས་ཅད་ཀྱིས་གྲགས་པར་འགྱུར་བ་དང་། གནོད་སྦྱིན་གྱི་ཁང་པར་གནས་པའི་རྒྱལ་པོ་ཉིད་དང་། རྟག་ཏུ་དོན་ཐམས་ཅད་ཀྱི་དངོས་གྲུབ་ཀྱང་ཐོབ་པ་དང་ལྡན་ནོ། །བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ། བཅོམ་ལྡན་འདས་མ་འཕགས་མ་སྒྲོལ་མ་རལ་པ་གྱེན་བརྫེས་ཀྱི་རྩ་བའི་རྟོག་པ་ལས། རས་རིས་བར་མའི་ཆོ་ག་རབ་འབྱམ་སྟེ་དགུ་པ་རྫོགས་སོ།། །།དེ་ནས་ཡང་བཅོམ་ལྡན་འདས་ཤཱཀྱ་ཐུབ་པས་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ལ་གཟིགས་ནས། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་བཀའ་སྩལ་པ། བྱང་ཆུབ་སེམས་དཔའ་ཆེན་པོ་ཁྱོད་ཉོན་ཅིག །ཁྱོད་ཀྱི་རིག་པའི་སྔགས་རྗེས་སུ་སྤྱོད་པ་སེམས་ཅན་མཐའ་དག་གི་དོན་ལ་བརྩོན་པ། སེམས་ཅན་རྣམས་གང་གིས་བཟླས་པར་བྱ་བའི་རིག་པའི་སྔགས་དང་། གང་དང་ལྡན་པས་བགྲང་བར་བྱ་བའི་བགྲང་ཕྲེང་གི་ཆོ་ག །རྒྱུད་ཐམས་ཅད་
ཀྱི་ཐུན་མོང་གི་སྒྲུབ་ཐབས་ཀྱི་ཆོ་ག་སྔགས་ཐམས་ཅད་ཀྱི་ཆོ་ག་དེ་ལེགས་པར་ཉོན་ལ། ལེགས་པར་ཡིད་ལ་ཟུང་ཤིག་བཤད་པར་བྱའོ། །དེ་སྐད་ཅེས་བཀའ་སྩལ་པ་དང་། སེམས་དཔའ་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལེགས་སོ་ལེགས་སོ། །བཅོམ་ལྡན་འདས་བདག་ཅག་ལ་རྗེས་སུ་བརྩེ་བས་ཉེ་བར་བླངས་ནས་རིག་པའི་སྔགས་ཐམས་ཅད་ཀྱི་སྤྱོད་པ་དང་། དམ་ཚིག་ལ་རབ་ཏུ་ཞུགས་པའི་སེམས་ཅན་རྣམས་དང་། སེམསཅན་ཐམས་ཅད་ཀྱི་དོན་གྱི་ཕྱིར་ཡང་དེ་བཀའ་སྩལ་དུ་གསོལ། །དེ་སྐད་ཅེས་གསོལ་བ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །སེམས་དཔའ་ཆེན་པོ་རྣམ་པར་དབྱེ་བ་རྒྱས་པར་བཤད་པར་བྱའོ་ཉོན་ཅིག །གང་གིས་སྔགས་ཐམས་ཅད་ཀྱི་སྤྱོད་པ་ལ་མངོན་པར་བརྩོན་པ། སེམས་ཅན་གྱི་དོན་ཐམས་ཅད་སྒྲུབ་པར་བྱེད་པ་དེ་གང་ཞེ་ན། དང་པོ་རེ་ཞིག །སྔགས་སུ་འགྱུར་བ་ནི། ན་མཿསརྦ་བུདྷཱ་ནཱཾ། ཨ་ཙིནྟྱ་དྡྷཱུ་ཏ། རཱུ་པི་ནཱཾ། ཨ་ཙིནྟྱདྡྷུ་ཏ། རཱུ་པི་ནཱཾ། ཏདྱ་ཐཱ། ཨོྃ་ཀུ་རུ་ཀུ་རུ་སརྦ་ཨཪྠ་སཱ་དྷཱ་ཡ། སརྦ་དུཥྚ་བི་མོ་ཧ་ནི། ག་ག་ནཱ་བ་ལཾ་བེ། བི་ཤོ་དྷཱ་ཡ་སྭཱ་ཧཱ། རིག་པ་འདིས་བགྲང་ཕྲེང་ཐམས་ཅད་ལ་ལས་བྱའོ། །སྦྱང་བ་དང་། དབུགས་པ་དང་། བླང་བ་དང་། རྒྱུ་བ་ལ་སོགས་པའི་ལས་རྣམས་བྱའོ། །དང་པོ་བགྲང་ཕྲེང་ཤིང་ལ་ནི། ལན་གྲངས་སུམ་ཅུ་རྩ་བདུན་དུ། །དེ་ཡིས་མངོན་པར་བསྔགས་བྱས་ནས། །བརྟུལ་ཞུགས་ཅན་གྱིས་བསྲུང་བ་བྱ། །མཚན་མོ་གཅིག་ཏུ་གཉིད་ལོག་ནས། །དེར་ནི་རྨི་ལམ་བརྟག་པར་བྱ། །མི་མ་ཡིན་གཟུགས་ཀུན་རྫོགས་པ། །མི་སྡུག་ལྷག་པར་མཆེ་བ་གཙིགས། །སྔགས་པ་ལ་ནི་དེས་སྨྲས་པ། །བཅོམ་ལྡན་སེམས་པ་ཇི་བཞིན་ལོང་། །སྒྲུབ་པོ་ཐོ་རངས་ལངས་ནས་ནི། །ཤིང་དེ་རུ་ནི་འགྲོ་བར་བྱེད། །མི་སྡུག་གཟུགས་ལྡན་གཙིགས་པ་ཆེ། །རྨི་ལམ་དུ་ཡང་མ་མཐོང་ན། །སྔགས་པས་ཤིང་དེ་བོར་བར་བྱ། །དེ་ནས་གཞན་དུ་འགྲོ་བར་གྱིས། །དང་པོ་རུ་དྲཱཀྵ་
ཡིན་ཏེ། །དེ་ལས་གཞན་པ་དབང་པོའི་ཤིང་། །བོ་དེ་ཙེ་ནི་འདོད་པའོ། །གཞན་ཡང་འབྲས་བུ་འབྱུང་བ་ཡི། །ཤིང་ལ་འཛེགས་པའི་ལེགས་རྫོགས་པའི། །གྲོགས་དང་ལྷན་ཅིག་འཛེག་པར་བྱ། །གྲོགས་པོ་མེད་པར་གྱུར་ན་ནི། །རང་ཉིད་དེ་ལ་འཛེག་པར་བྱ། །སྟེང་གི་ཡལ་གའི་འབྲས་གནས་སུ། །འཛེགས་ནས་ཕུན་ཚོགས་བརྟུལ་ཞུགས་ཅན། །དེ་ལ་རྟག་ཏུ་བག་ཡོད་པས། །སྟེང་གི་ཡལ་གའི་འབྲས་བུ་བླངས། །སྟེང་གི་ས་ལ་ལེགས་སྦྱར་བྱ། །སྟེང་གི་མཆོག་གི་དངོས་གྲུབ་ཏུ། །གང་ཟག་མཆོག་གིས་གསུངས་པ་ཡིན། །བར་མར་དངོས་གྲུབ་འབྲིང་པོ་སྟེ། །ཐ་མ་ལ་ནི་འོག་མའོ། །སྲོག་ཆགས་རྣམས་ཀྱིས་མ་སྨད་པའི། །འབྲས་བུ་དེ་རྣམས་ཡང་དག་བླང་། །ནུབ་ཀྱི་ཡལ་ག་ལས་ཐོབ་པ། །རྫས་ཀྱི་རྒྱུར་ནི་བསྒྲུབ་པར་བྱ། །བྱང་གི་གནོད་སྦྱིན་མོ་ལ་སོགས། །ལྷ་རྣམས་ལྷན་ཅིག་འགུགས་པར་བྱེད། །དགུག་པའི་བྱ་བ་བཤད་པ་ནི། །ཀུན་གྱི་དོན་དུ་ཞི་ཕྱིར་རོ། །ལྷ་དང་ལྷ་མིན་གཡུལ་འགྱེད་དང་། །མིའམ་ཅི་དང་སྲིན་པོ་རྣམས། །འདོད་པ་རྣམ་པ་སྣ་ཚོགས་བྱེད། །འབྱུང་པོ་ཐམས་ཅད་རྒྱས་པའི་ཕྱིར། །འབྲས་བུ་དང་བཅས་ལས་རྣམས་ནི། །མ་ལུས་སྤྱོད་པ་བྱེད་པའོ། །ཤར་གྱི་ཕྱོགས་སུ་ཡལ་ག་དང་། །དེར་གནས་འབྲས་བུ་འབྱུང་བ་རྣམས། །དེ་བཞིན་འབད་པས་བྱས་གྱུར་ན། །ཚེ་རིང་པོ་ཡི་དོན་གྱི་རྒྱུ། །རྟག་ཏུ་སྔགས་ཀྱིས་དངོས་གྲུབ་འབྲས། །རྣམ་པ་སྣ་ཚོགས་བྱེད་པ་ཡིན། །གང་ཞིག་ལྷོར་ནི་འགྲོ་བ་ཡི། །ཡལ་ག་ལོ་མར་རབ་ལྡན་པ། །སེམས་ཅན་རྣམས་ཀྱི་སྲོག་འཕྲོག་བྱེད། །དེ་ནི་ཟློས་པོས་འབད་པས་སྤང་། །ལྷོ་རུ་རྟེན་པའི་ཡལ་ག་ལ། །འབྲས་བུ་གང་དུ་ཡང་དག་བརྗོད། །ཕྱོགས་དེར་གདུང་དབྱེ་དགྲ་རྣམས་ཀྱི། །སྲོག་ནི་འཇིག་པར་བྱེད་པ་ཡི། །བསོད་ནམས་མ་ཡིན་མང་པོའི་རྒྱུ། །དེ་ནི་ཟློས་པོས་འབད་པས་སྤངས། །འོག་ཏུ་འཕྱང་བའི་ཡལ་གར་གནས། །འབྲས་བུ་གང་ཞིག་རབ་བསྒྲགས་པ། །ལྷ་མ་ཡིན་དང་ལྡན་པ་ཡི། །ས་ཡི་འོག་ཏུ་དེ་རྣམས་འགྲོ། །དེ་རྣམས་འབྲས་བཅས་ཕྲེང་བ་ནི། །བླངས་ནས་ཡང་དག་རབ་བསྒྲགས་པ། །འོག་ཏུ་འགྲོ་
བའི་འཁྲི་ཤིང་ལ། །དེ་ནས་དེ་ནི་ས་འོག་འགྲོ། །དེ་རུ་རབ་ཏུ་ཞུགས་ནས་ལྷའི། །བདེ་ཉིད་ཟློས་པོས་དེར་འགྱུར་རོ། །ལྷ་མིན་བུ་མོས་ཡང་དག་ལྡན། །དེ་ནི་བསྐལ་པར་གནས་པར་བྱེད། །བགྲང་ཕྲེང་འབྲས་བུ་ཀུན་བླངས་ནས། །དེ་ནས་ཟློས་པོས་བཟླས་པ་བྱ། །ལྷན་ཅིག་སྲུང་བ་བྱས་ནས་ནི། །དེ་ནས་ཇི་ལྟར་བདེ་བར་འགྲོ། །དེ་ཉིད་རིང་པོའི་གནས་སུ་ནི། །གཙང་མའི་ཕྱོགས་དེར་སྔགས་པ་ནི། །དེ་བཞིན་རྟག་ཏུ་འདུག་པར་བྱ། །བགྲང་ཕྲེང་སྐྱེས་པ་སྦྱར་བར་བྱ། །བརྩོན་པས་བགྲང་ཕྲེང་འབྲས་བུ་བླང་། །དེ་ནས་ཀུན་ཏུ་ཡང་དག་སྦྱང་། །དེར་ནི་ཕྲེང་བ་དབུགས་པར་གྲགས། །གསུམ་བདུན་བརྒྱད་དང་གཅིག་དང་ནི། །ལན་གྲངས་ཉི་ཤུ་རྩ་གཅིག་ཏུ། །སྔགས་ཤེས་དེར་ནི་སྦྱང་བར་བྱ། །རྟག་ཏུ་སྔ་མའི་སྔགས་ཀྱིས་ནི། །བརྒྱད་དམ་བདུན་དུ་བཟླས་བྱས་པ། །དེ་ནས་དེ་ནི་དག་པར་འདོད། །པདྨའི་རྩ་ལག་ལེགས་བརྗོད་པས། །བུ་མོས་བཀལ་བའི་སྲད་བུ་ཡི། །སུམ་འགྱུར་ལྔ་དང་ལྡན་པ་ཡི། །བརྟུལ་ཞུགས་ཅན་གྱིས་ཕྲེང་ཐག་བྱ། །སྔགས་ཀྱི་དེ་ཉིད་ཤེས་པས་བརྒྱུ། །འབྲས་བུ་ཕྲ་མོ་ཟླུམ་པོར་བཅས། །རྟག་ཏུ་སྲོགས་ཆགས་བུ་ག་མེད། །ཡན་ལག་མ་ཉམས་མ་སྨད་པ། །མཛེས་ཤིང་ཁ་དོག་སྡུག་པ་དང་། །བུ་ག་མེད་ཅིང་གས་པ་མེད། །རིལ་བུ་ཟླུམ་པོ་ཇི་བཞིན་པ། །དེ་བཞིན་རུ་དྲཱཀྵ་དང་ནི། །བོ་དེ་ཙེ་དང་ཨིནྟྲ་ཀྵ། །འབྲས་ཉིད་རྟག་ཏུ་ལུང་ཐང་མཛེས། །འབྲས་བུ་དམ་པའམ་གང་གི་ཚེ། །སྔགས་པ་མཆོག་ཏུ་བརྩོན་པ་ཡིས། །འབད་པས་བགྲང་ཕྲེང་བརྒྱུ་བར་བྱ། །གསེར་རམ་ཡང་ན་དངུལ་དག་གམ། །ནོར་བུ་ཤེལ་ལས་བྱུང་བ་དང་། །མུ་ཏིག་དུང་ཉིད་མུ་ས་ར། །བྱི་རུ་ཡིས་ཀྱང་བྱ་བ་སྟེ། །ཕྲེང་བ་རྣམ་པ་སྣ་ཚོགས་བྱ། །གཞན་ཡང་རིན་ཆེན་ལས་བྱུང་བའི། །བགྲང་ཕྲེང་བཟང་པོ་བྱ་བ་དང་། །ས་ལས་བྱུང་བའི་ལྡུམ་པོ་ཡི། །རིལ་བུས་བགྲང་ཕྲེང་ཅན་དག་ནི། །མཉམ་པར་བཞག་སྟེ་སྲད་བུ་བརྒྱུ། །གཞན་ཡང་རིལ་བུ་འགའ་ཞིག་གམ། །འབྲས་བུའམ་ཁམས་ལས་བྱུང་བ་ཡིས། །ཀུ་ཤའི་རྩེ་མོས་བརྒྱུས་པ་ཡང་། །ཟློས་པོས་འབད་དེ་བྱ་བ་
ཡིན། །བརྒྱ་རྩ་བརྒྱད་དམ་ཉི་ཤུ་ལྔ། །ལྔ་བཅུ་འདི་དག་བར་མ་ཡིན། །སྔགས་པ་མཉམ་པར་གཞག་པ་ཡིས། །འབྲས་བུའི་ཚད་རྣམས་བརྒྱུ་བར་བྱ། །སྟོང་རྩ་བརྒྱད་པ་ཉིད་བྱ་བ། ཕྲེང་བ་འདི་ནི་ཐུ་བོ་ཡིན། །ཕྲེང་བ་རྣམ་པ་འདི་བཞི་ནི། །སྔགས་པས་རྟག་ཏུ་བརྒྱུ་བར་བྱ། །དེ་ནས་བརྒྱུས་ཏེ་སྔགས་རྣམས་ནི། །ཕྱི་མོ་གསུམ་མམ་གཉིས་ཉིད་དང་། །རྒྱ་ལྕགས་ལས་བྱུང་གདུ་བུ་དང་། །དེ་བཞིན་གསེར་དང་དངུལ་དག་དང་། །དེ་ནས་ཟངས་བྱུང་གདུ་བུས་ཀྱང་། །ཕྲེང་བ་ཀུན་ནས་བརྒྱུ་བར་བྱ། །དེ་ནས་མཐའ་རུ་ཡང་མིག་བྱ། །དེ་ལ་རིམ་གྱིས་དགོད་པར་བྱ། །འབད་པས་མཛེས་པར་དཀྲི་བ་བྱ། །སངས་རྒྱས་མ་ལུས་བཞུགས་པར་ནི། །ཡོངས་སུ་གསལ་བར་བྱས་དེ་ནས། །དཀྱིལ་འཁོར་ལྟ་བུར་མཐོང་བ་ཡིན། །སྦྲུལ་གྱི་གདེངས་ཀའི་རྣམ་པ་བཞིན། །ཡོངས་སུ་དཀྲིས་པས་བརྒྱན་པ་ཡིན། །མུ་ཏིག་དོ་ཤལ་རྣམས་མཚུངས་ཤིང་། །མགུལ་རྒྱན་རྣམ་པར་སྤྲུལ་པའོ། །དེ་ནས་འབབ་ཆུ་དགེ་བའི་མཐར། །དྲི་མ་མེད་ལ་ཁྲུས་བྱས་ནས། །གོ་རིམས་ཇི་བཞིན་ཁྲུས་བྱས་ཏེ། །ཆུ་ཡི་གནས་ལ་ལྡང་བར་བྱ། །དེ་བཞིན་བརྩོན་པས་ཉེ་རེག་བྱ། །བགྲང་ཕྲེང་སྲད་བུ་བླངས་ནས་ནི། །བ་ཡི་རྣམ་ལྔས་རབ་ཏུ་བཀྲུ། །ས་ཡི་ཕྱེ་མས་རབ་བཀྲུས་ནས། །གཙང་མའི་གོས་ལ་དྲི་བཟང་གིས། །རྗེས་སུ་ཉེ་བར་བྱུགས་པ་དང་། །རབ་ཏུ་བསྔགས་པའི་ཁ་དོག་ཀྱང་། །ཙནྡན་དཀར་པོ་གུར་གུམ་དང་། །འབད་པས་དྲོན་མོས་བཀྲུ་བར་བྱ། །དེ་བཞིན་གཉིས་ཀ་འགྲོ་བར་འགྱུར། །ཇི་ལྟའི་གནས་སུ་སོང་ནས་ནི། །གང་དུ་རས་རིས་བར་པ་ནི། །རྒྱལ་མཆོག་ཐུབ་པའི་གཙོ་བོ་ནི། །ཤཱཀྱ་སེང་གེ་མི་ཡི་མཆོག །སྟོན་པའི་གཟུགས་བརྙན་དེ་བཞིན་དུ། །ས་སྟེངས་རྒྱལ་བའི་རིང་བསྲེལ་ཅན། །མཆོད་པ་དེ་ཡི་སྤྱན་སྔར་དགོད། །དེ་དང་ཉེ་བར་བཞག་ནས་ནི། །དེ་ཚེ་དེ་ཡི་སྤྱན་སྔ་རུ། །དམ་ཚིག་ལ་གནས་སྟོང་རྩ་བརྒྱད། །སོན་པའམ་བརྒྱ་ཡང་གཅིག་ཏུ་ནི། །བརྒྱད་དང་བཅས་པ་བཟླས་བྱས་ནས། །ཉིན་མཚན་སྨྱུང་བར་གནས་གྱུར་ནས། །བདུན་པའི་ཐུབ་ལ་ཕྲེང་བ་དབུལ། །སྔ་མ་དེ་བཞིན་བཟླས་བྱ་བ། །ཚད་ཉིད་དེ་དང་
མཉམ་པར་བྱ། །དེ་ནས་ཕྲེང་ལ་ཡོངས་སུ་བཟླས། །མཚན་མོ་དེ་ཉིད་དུ་འཁོད་དེ། །ཀུ་ཤ་བཏིང་བའི་ས་གཞི་ལ། །སྔགས་ཤེས་དེར་ནི་ཉལ་བར་བྱ། །རྨི་ལམ་གང་དང་གང་མཐོང་བ། །དགེ་བའི་རྨི་ལམ་མཐོང་ན་ནི། །རྨི་ལམ་ངེས་པར་བསྟན་པ་ཡིན། །དངོས་གྲུབ་དེ་ཡིས་བསྒྲུབ་པར་བྱ། །སངས་རྒྱས་ཉན་ཐོས་བསེ་རུ་རྣམས། །གལ་ཏེ་རྨི་ལམ་མཐོང་གྱུར་ན། །སྔགས་པས་འབྲས་བུ་བཅས་པར་འགྲུབ། །ངེས་པར་དེ་ཡི་ཆོ་ག་བྱ། །དགེ་སློང་གཟུགས་དང་བྲམ་ཟེ་ཡི། །གཟུགས་བརྙན་སྣ་ཚོགས་མཛེས་པ་མཐོང་། །གལ་ཏེ་རྨི་ལམ་དེ་མཐོང་ན། །ཕྲེང་བ་དབུལ་བྱ་དེ་བཞིན་དུ། །སྔགས་ཀྱི་དོན་ཀུན་སྒྲུབ་པ་པོ། །དེ་བཞིན་གདོན་མི་ཟ་བར་འགྲུབ། །བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་བཅོམ་ལྡན་འདས་མ་འཕགས་མ་སྒྲོལ་མ་རལ་པ་གྱེན་བརྫེས་ཀྱི་རྩ་བའི་རྟོག་པ་ལས། རས་རིས་བར་མའི་ཆོ་ག་རབ་འབྱམ་ལས་བཅུ་པ་བགྲང་ཕྲེང་གི་ཆོ་གའི་ལེའུ་རབ་འབྱམ་རྫོགས་སོ།། །།དེ་ནས་ཡང་བཅོམ་ལྡན་འདས་ཤཱཀྱ་ཐུབ་པས་སླར་ཡང་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ཆེན་པོ་ལ་གཟིགས་ནས་བྱང་ཆུབ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་བཀའ་སྩལ་པ། སེམས་དཔའ་ཆེན་པོ་ཁྱོད་ཀྱི་རིག་པའི་སྔགས་ཀྱི་ལེའུ་རྫོགས་པའི་ཁྱད་པར་གྱི་ཆོ་ག་དང་། སྦྱིན་སྲེག་གི་ལས་རབ་ཏུ་སྦྱོར་བའི་རིག་པའི་སྒྲུབ་པ་ཡོད་དེ། མེ་ལ་ཉེ་བར་སྤྱོད་པའི་ཁྱད་པར་གྱི་ཆོ་ག་ལས་གང་དུ་རིག་པའི་སྤྱོད་པ་ལ་མངོན་པར་བརྩོན་པའི་སེམས་ཅན་རྣམས་རབ་ཏུ་སྦྱོར་ཞིང་གནས་པར་འགྱུར་བ་དེ་གང་ཞེ་ན། རིག་པའི་སྔགས་ཀྱི་ཚོགས་གསང་ཆེན་ནི། ཏདྱ་ཐཱ། ཨོྃ་ཏིཥྛ་ཧ་རི་པིངྒ་ལེ། ཧི་རཀྵ་དི་ཧི་ད་དཱ་དཱི་པཱ་ཡ་ཧཱུྃ་ཕཊ་ཕཊ་སྭཱ་ཧཱ། སྤྱན་རས་གཟིགས་དབང་ཕྱུག་འདི་ནི་མཆོག་གི་སྙིང་པོ་ལས་ཐམས་ཅད་བྱེད་པ། འདོད་པ་ཐམས་ཅད་སྟེར་བའོ། །དང་པོ་རེ་ཞིག་སྒྲུབ་པ་པོས་མེའི་སྙིང་པོ་འདི་ལན་ཅིག་བཟླས་པས། མར་གྱི་སྲེག་བླུགས་གསུམ་མེ་ལ་སྦྱིན་སྲེག་བྱ་སྟེ་མེ་ལྷ་སྤྱན་དྲངས་པར་འགྱུར་རོ། །དེ་བཞིན་དུ་རབ་ཏུ་སྦྱར་ཏེ། ཞི་བ་
ཅན་དང་། རྒྱས་པ་ཅན་དང་། དྲག་པོའི་ལས་རྣམས་ལ་ཡམ་ཤིང་རྣམ་པ་གསུམ་དུ་འགྱུར་རོ། །མྱ་ངན་མེད་ཤིང་ཞི་དོན་དུ། །ཁྱད་པར་བརླན་དང་བཅས་པ་ཉིད། །མཐོ་གང་འམ་ནི་ཁྲུ་གང་ཙམ། །སོར་མོ་གསུམ་དུའང་མཐོ་བ་ཡི། །སྣམ་པའི་རྣམ་པ་རབ་ཏུ་ཤེས། །ཆོ་ག་འདི་ནི་བྱ་བ་ཡིན། །བུ་ག་མེད་ཅིང་སེར་ག་མེད། །དེ་བཞིན་ནེ་ཙོའི་གཤོག་པ་འདྲ། །ལྗང་དང་དཀར་བའི་ཁ་དོག་གམ། །ཁ་དོག་ནག་པོ་སྤང་བར་བྱ། །སྲིན་བུ་རྣམས་ཀྱིས་ཟོས་པ་སྤང་། །བུ་ག་མེད་པའང་ཡང་དག་སྦྱིན། །གཞན་ཡང་ཁ་དོག་མཆོག་མིན་པ། །ཐ་མའི་ཆོས་ཀྱང་སྤངས་པའོ། །དེ་རྣམས་སྐམ་དང་རློན་པའང་ཡིན། །དེ་ཡི་ཚེ་ཡང་བརྩམ་པར་བྱ། །མ་རུལ་ཡོན་པོ་མིན་ཉིད་དང་། །ཤིན་ཏུ་རིང་བའང་སྤང་བར་བྱ། །དེ་ནས་མེ་ཐབ་བྱས་ནས་ནི། །ཀུན་ནས་ཟུར་ནི་བཞི་པ་རུ། །འོག་ཉིད་དུ་ནི་འབད་པས་བརྐོ། །ཁྲུ་བཞི་པ་ཡི་ཚད་དང་ནི། །ཁྲུ་གསུམ་ཁྲུ་ནི་གཉིས་པ་དང་། །དེ་བཞིན་ཉིད་དུ་ཁྲུ་གཅིག་པ། །རྟག་ཏུ་སྲོག་ཆགས་སྤངས་པ་དང་། །བྱེ་མས་ལེག་པར་སྦྱར་བ་དེ། །དེ་ནས་པད་འདྲའི་ཁ་ཁྱེར་ནི། །ཀུན་ནས་དཀྱིལ་འཁོར་རྣམ་པའོ། །ཡང་ན་འབད་པས་ཟུར་བཞི་པ། །འདབ་མ་གསུམ་དུ་བྱ་བའོ། །ཞི་བ་ཅན་དང་རྒྱས་པ་ཅན། །འདི་ཡང་ཡང་དག་བསྒྲགས་པ་ཡིན། །མངོན་སྤྱོད་ལ་ནི་ས་དབུས་སུ། །རྡོ་རྗེ་བྱ་ཞིང་རྩེ་གཉིས་སུ། །རྩེ་མོ་གསུམ་དུ་བྱ་བ་ཡིན། །མེ་ཐབ་རྒྱ་ལ་ཁྲུ་གཉིས་རེ། །གཙང་མའི་ཕྱོགས་སུ་དེ་བཞིན་བདར། །ཆུ་ཀླུང་འགྲམ་དུ་དེ་བཞིན་སྤྱད། །བསྟན་པ་གཅིག་གི་ཕྱོགས་རྣམས་དང་། །དུར་ཁྲོད་ཁང་པ་སྟོང་པ་རུ། །སྦྱིན་སྲེག་ལེགས་པར་བརྩམ་པར་བྱ། །དེ་བཞིན་རི་བོའི་རྩེ་ཉིད་དང་། །རྟག་ཏུ་ལྷ་ཁང་སྟོང་པ་དང་། །དེ་བཞིན་ཉིད་དུ་དགོན་པ་ཆེ། །གང་ཡང་སྒྲུབ་པའི་ཕྱོགས་རྣམས་ནི། །གང་ཟག་མཆོག་གིས་གསུངས་པ་དང་། །སྦྱིན་སྲེག་ལས་ནི་ཐམས་ཅད་ལ། །དེ་རྣམས་གནས་སུ་གསུངས་པ་ཡིན། །ཁྲུ་གང་ཚད་དུ་གནས་པ་ཡི། །ཀུ་ཤའི་ཁྲེས་ལ་ཉེར་འདུག་ནས། །དེར་ནི་སྔགས་ཤེས་ཁྱད་པར་དུ། །སྦྱིན་སྲེག་གི་ནི་ལས་བྱའོ། །གནས་དེ་ཉིད་
དུ་རབ་གནས་པས། །མྱུར་དུ་དངོས་གྲུབ་ཐེ་ཚོམ་མེད། །ཤར་དང་བྱང་དུ་ཁ་ཕྱོགས་པས། །ཞི་བ་ཅན་དང་རྒྱས་པ་བྱ། །ལྷོ་རུ་དྲག་པོའི་ལམ་རྣམས་ཏེ། །དེ་ནི་སྔགས་པས་སྤང་བར་བྱ། །ཤར་བལྟས་ཞི་བའི་དངོས་གྲུབ་སྟེ། །རྒྱས་པ་ཅན་ཡང་བྱང་དུ་ཕྱོགས། །དེ་ཡིས་སྔགས་ནི་དུས་རྟག་ཏུ། །རིག་པའི་བཟླས་པ་བརྩམ་པར་བྱ། །བིལ་བ་ཨརྒ་སླཀྵ་དང་། །ནྱ་གྲོ་དྷ་ཡིས་རྒྱས་ལས་བྱ། །མངོན་སྤྱོད་ཤིང་ནི་སྐམ་པོ་དང་། །ཚ་བ་སྐྱུར་དང་རྣོན་པོ་རྣམས། །དེ་དག་ཐམས་ཅད་སྤང་བྱ་སྟེ། །ཐུབ་པ་རྣམས་ཀྱིས་རྟག་ཏུ་བཀག །ཞི་བ་ཅན་དང་རྒྱས་པ་ཅན། །རློན་པའི་ཤིང་གིས་རབ་ཏུ་ཤིས། །དེ་བཞིན་དྲག་ལས་ལ་ཤིང་སྐམ། །ཚ་བ་སྐྱུར་དང་རྣོན་པོ་རྣམས། །ཡམ་ཤིང་དེ་རྣམས་མེད་ན་ནི། །ཤིང་ལ་དེ་རྣམས་སུ་རྟག་བྱ། །རྩེ་མོ་གཉིས་སུ་བརྟག་པ་བྱ། །སྔོ་དང་སྣུམ་དང་འདྲ་བ་དང་། །རྨ་བྱའི་མགྲིན་པ་དང་མཚུངས་པའི། །རྣམ་པ་དེ་ལྟའི་ཀུ་ཤ་ཡིས། །ཁོ་ར་ཡུག་ཏུ་ཀུ་ཤ་ནི། །རྟག་ཏུ་དགྲམ་པར་བྱ་བ་ནི། །ཞི་བ་ཅན་དང་རྒྱས་པ་ཅན། །མར་གད་དང་ནི་མཚུངས་པས་སོ། །དེ་བཞིན་རྟག་ཏུ་སྐམ་པོའི་རྩིས། །སྡིག་པའི་ལས་ནི་བྱ་བ་སྟེ། །འདིར་ནི་རྒྱལ་བ་མཆོག་གིས་བཀག །དྲི་མེད་ཆུ་ནི་དག་པ་ལ། །རྟག་ཏུ་སྲིན་བུས་སྤངས་པ་ཡི། །དེ་ནས་ཀུན་ནས་བསང་གཏོར་བྱ། །གཡས་ཕྱོགས་སུ་ནི་བསྐོར་བྱས་ཏེ། །བརྩོན་པས་མེ་ནི་སྦར་བར་བྱ། །ཆོ་ག་ཇི་བཞིན་ཉེ་རེག་བྱ། །གཙང་མའི་རྩྭ་ཡི་རྩ་བ་ཡིས། །སྒྲོན་མེ་ཚད་དང་ལྡན་བྱས་ནས། །དེ་ནས་ཁུ་ཚུར་བརྩམས་བྱས་ནས། །འབད་པས་མེ་ནི་སྦར་བར་བྱ། །ཁ་ཡི་རླུང་གིས་མི་བྱ་སྟེ། །རྟག་ཏུ་གོས་ཀྱི་མཐས་ཀྱང་མིན། །ཤམ་ཐབས་བླ་གོས་མངོན་པར་སྤང་། །གོས་གཞན་གྱིས་ཀྱང་ལག་པ་ཡི། །རླུང་གི་ཉེ་བར་གཞོམ་པ་ལ། །མངོན་པར་དགའ་བས་མ་ཡིན་ནོ། །གཙང་མའི་རླུང་ཡབ་དེ་བཞིན་གོས། །ནོར་བུས་ཀྱང་ནི་རླུང་ཡབ་བྱ། །རླུང་ནི་ཡང་དག་འབྱུང་བ་འདིས། །མེ་ནི་མཉམ་པར་བྱས་པ་ལ། །སྔགས་ཤེས་པས་ནི་མེ་སྦར་བྱའོ། །སྦྱིན་སྲེག་དོན་དུ་མཉམ་གཞག་པས། །དེ་ནས་གཡས་པ་མིན་པ་ཡིས། །དེར་ནི་བསང་གཏོར་བྱས་
ནས་ནི། །དེར་ནི་བ་ཡི་མར་གྱིས་ནི། །སྲེག་བླུགས་གསུམ་ནི་སྦྱིན་པར་བྱ། །དེ་ནས་ཀྱང་ནི་ཕྱག་བྱ་སྟེ། །སངས་རྒྱས་ཀུན་དང་སྐྱོབ་པ་དང་། །རང་སྔགས་སྔགས་ཀྱི་མགོན་པོ་ལ། །དེ་ནས་ཅི་འདོད་ཕྱག་བྱའོ། །དེ་ཚེ་མེ་ཡི་སྙིང་པོ་ཡི། །སྔགས་ནི་ལན་བརྒྱ་བཟླས་པ་ཡིས། །བརྩོན་ལྡན་དྲི་ཞིམ་མེ་ཏོག་གིས། །རྟག་ཏུ་མེ་ནི་སྤྱན་དྲང་བྱ། །སྔགས་ཤེས་རྟག་ཏུ་སྤྱན་དྲངས་ནས། །གནས་ལ་མཁས་པས་གདན་དང་གནས། །སྔགས་དེས་དབུལ་ཞིང་གཞན་གྱིས་མིན། །ཞོ་དང་མར་དུ་བསྲེས་པ་དང་། །སྦྲང་རྩི་བཏགས་པའི་ཡམ་ཤིང་ནི། །དེ་ལས་ལན་གསུམ་སྦྱིན་སྲེག་བྱ། །རྒྱས་པའི་དོན་དུ་སྔགས་དང་ལས། །ཀུན་ནས་འབར་བའི་ཕྲེང་བ་ཡིས། །འཁྲུགས་པ་དེར་ནི་ངེས་སྦྱར་བྱ། །སྐོམ་པ་ཚིམ་པར་བསམ་པར་བྱ། །ཞི་བའི་ལས་དང་རྒྱས་པ་ཅན། །དེ་ལ་གསང་སྔགས་རིག་པ་ཡིས། །ལྷ་ཡི་གཟུགས་ནི་དགའ་བའོ། །མངོན་སྤྱོད་ལས་ལ་ཐུན་མོང་པའི། །ངེས་པར་འབྱུང་བའི་ལྷ་རྣམས་ལས། །གཞན་པའི་གཟུགས་ནི་བལྟ་བར་བྱ། །རིམ་པ་ཇི་བཞིན་མེ་ཐབ་འདིར། །ཇི་ལྟར་རྙེད་པའི་མེ་ཏོག་དང་། །མར་ལ་ལན་བདུན་ཡོངས་བཟླས་པས། །དེ་ཚེ་སྤྱན་དྲང་རྣམ་པ་དེར། །ཇི་ལྟར་སླར་ཡང་སྤྱན་དྲངས་པ། །ལྷག་པར་གནས་པས་གཉིས་ཀ་གནས། །ཡམ་ཤིང་རྫས་དང་བསྲེས་པ་དང་། །མར་དང་སྦྲང་རྩི་མཉམ་བསྟན་པ། །དེ་བཞིན་དུ་ནི་ཞོ་བསྲེས་པས། །སྟོང་ངམ་འབུམ་གྱི་ཚད་དང་ནི། །བརྒྱ་དང་བརྒྱད་དུའང་རྟག་པར་བྱ། །དེ་བཞིན་སྔགས་པས་རིག་པ་བཟུང་། །ལན་རེ་བཟླས་ཤིང་མེ་ལ་དོར། །འབར་བའི་མེ་ཡི་ཕྲེང་བ་དང་། །དེ་བཞིན་མེ་ལྕེ་གཅིག་གྱུར་པ། །ཞི་བའི་ལས་ཀྱི་སྦྱིན་སྲེག་བྱ། །དུ་བ་མེད་ལའང་རྒྱས་པ་ཅན། །དུ་བཅས་དྲག་པོའི་ལས་རྣམས་ནི། །རྒྱལ་བས་སྨད་ཅིང་སྤངས་པ་ཡིན། །མེ་ནི་ཁ་དོག་ལྡན་གྱུར་ན། །སྦྱིན་སྲེག་ལས་ནི་རབ་ཏུ་སྦྱར། །ཞི་བ་ཅན་ལ་ཁ་དོག་དཀར། །རྒྱལ་བ་མཆོག་གིས་རྟག་ཏུ་བསྔགས། །གལ་ཏེ་མེ་དཀར་སྦྱིན་སྲེག་བྱེད། །དེ་ལ་སྔགས་རྣམས་འགྲུབ་པར་འགྱུར། །དེ་བཞིན་རྟག་ཏུ་ཁ་དོག་དཀར། །རྒྱས་པ་ཅན་གྱིས་དངོས་
གྲུབ་འདོད། །ནག་པོ་དུ་བའི་ཁ་དོག་དང་། །སེར་སྐྱ་ཡང་ནི་སྡིག་པ་ཅན། །ཁ་དོག་རྣམ་གསུམ་རབ་བསྒྱུར་བས། །དངོས་གྲུབ་རྣམ་གསུམ་འདི་དག་ཡིན། །གཞན་པའི་ཁ་དོག་སྤྲིན་མདོག་གམ། །སླར་ཡང་བརྟན་པའི་ས་སྟེངས་དེར། །སྔགས་པ་དེ་ལ་དངོས་གྲུབ་མེད། །དེ་ལྟའི་ཁ་དོག་འདྲ་བའམ། །རྣམ་པ་སྣ་ཚོགས་ཁ་དོག་ཅན། །མེ་ནི་འབར་བ་དེ་མཐོང་ན། །སླར་ཡང་ལས་རྣམས་བརྩམ་པར་བྱ། །ཕྱིར་ཞིང་བཟླས་པ་བྱ་བ་ཡིན། །གལ་ཏེ་སྔགས་ནི་གྲུབ་གྱུར་ན། །ལས་ཀྱི་ཆོ་ག་མཐོང་བ་ཡིས། །སླར་ཡང་སྦྱིན་སྲེག་ལ་རབ་འཇུག །གཤེགས་གསོལ་སྤྱན་དྲང་ཉིད་ལ་ནི། །མེ་ཡི་སྔགས་ནི་བརྗོད་པར་བྱ། །སྔར་ནི་རབ་ཏུ་བརྟགས་པས་ཀྱང་། །དཀྱིལ་འཁོར་འདི་ནི་གཤེགས་སུ་གསོལ། །སྤྱན་དྲང་བ་ཡི་ལས་རྣམས་ནི། །དེ་ཉིད་དུ་ནི་ལས་རྣམས་ཀྱང་། །དེ་ཉིད་ཀྱིས་ནི་བྱ་བ་ཡིན། །མེ་ཡི་སྤྱོད་པ་དེ་བཞིན་གཟུགས། །རས་རིས་ཀྱི་ནི་སྤྱན་སྔར་བརྩམ། །དེར་ནི་སྔགས་རྣམས་འགྲུབ་འགྱུར་བར། །སྔོན་གྱི་དེ་བཞིན་གཤེགས་པས་གསུངས། །རྒྱལ་བས་བསྔགས་པའི་ལས་རྣམས་ནི། །ཐམས་ཅད་དེ་ཉིད་དུ་བྱའོ། །གཞན་པའི་ལས་ནི་བྱ་བ་སྟེ། །སྡིག་པའི་ལས་ནི་ཁྱད་པར་དུ། །གང་དུ་རྒྱལ་མཆོག་གིས་སྨོད་དང་། །འཇིག་རྟེན་འགལ་དང་སྨད་རྣམས་སོ། །ལྡང་དང་འཁོར་ལོས་སྒྱུར་བ་དང་། །བྱང་ཆུབ་སེམས་དཔའི་ས་རྣམས་དང་། །དེ་བཞིན་མངོན་ཤེས་ལྔ་དང་ནི། །འཇིག་རྟེན་ལྷ་ཉིད་ལྡན་པ་འགྲུབ། །རྟག་ཏུ་རས་རིས་ལ་བརྩོན་ཤེས། །སྦྱིན་སྲེག་ལས་ལ་མཁས་པ་ནི། །ས་ཡི་འོག་གི་བདག་པོའམ། །ཡང་ན་བར་སྣང་སྤྱོད་པར་འགྱུར། །ས་བླའི་ལྷ་དང་གནོད་སྦྱིན་ཉིད། །རྟག་ཏུ་གནོད་སྦྱིན་མོ་རྣམས་འགུགས། །རྒྱལ་སྲིད་བདག་པོ་ཉིད་དང་ནི། །ཡུལ་དང་ཡང་ན་གྲོང་ཉིད་དམ། །རིག་པ་འཛིན་དང་ལྷ་མིན་ཉིད། །སེམས་ཅན་ཐམས་ཅད་དབང་དུ་བྱེད། །འབྱུང་པོ་ཐམས་ཅད་འགུགས་པར་བྱེད། །སེམས་དཔའ་ཆེན་པོ་བདག་ཉིད་ཆེ། །བྱང་ཆུབ་སེམས་དཔའ་སེམས་དཔའ་ཆེ། །ས་བཅུ་ལ་ནི་ཡང་དག་བརྟེན། །སྦྱིན་སྲེག་ལས་ཀྱིས་འགུགས་བྱེད་ན། །ས་སྟེངས་མི་
རྣམས་སྨོས་ཅི་དགོས། །སྡེ་དཔོན་བདག་པོ་དེ་བཞིན་དུ། །ཁྱད་པར་འཇིག་རྟེན་དབང་ཕྱུག་དང་། །འབྱུང་པོ་ཐམས་ཅད་ཀུན་དབང་བྱེད། །དེ་བཞིན་ཉིད་དུ་མི་བདག་ཉིད། །འབྱུང་པོ་ཐམས་ཅད་དབང་དོན་དང་། །ཡང་ན་ས་སྟེངས་རྒྱལ་པོ་མཉམ། །དེ་བཞིན་རྟག་ཏུ་ལས་ཀུན་ལ། །ཐམས་ཅད་སྦྱིན་སྲེག་གིས་ནི་བྱ། །ཀུན་ནས་ཀུན་ཏུ་བརྩོན་ལྡན་པས། །ལས་ཀུན་ཡང་དག་བསྟེན་པར་བྱ། །དེ་ཆེད་ངེས་པར་བསྒྲུབ་པར་བྱ། །དཔལ་དོན་ལས་ནི་མཆོག་ཡིན་ཏེ། །བར་མ་ཉིད་ཀྱང་སྒྲུབ་པར་བྱེད། །ཡང་ན་ཆུང་ངུ་ཉིད་ཀྱང་ངོ་། །དེ་བཞིན་དུ་ནི་རྫས་རྣམས་ཀུན། །དེ་བཞིན་སླར་ཡང་འགྲུབ་པར་གསུངས། །སྦྱིན་སྲེག་ལས་ལ་རབ་འཇུག་པས། །འབྲས་བུར་བཅས་པའི་དངོས་གྲུབ་མཐོང་། །ཕྱག་རྒྱ་བཅིང་དང་རིག་པ་ཉིད། །ལས་རྣམས་ཀུན་ལ་རྟག་ཏུ་བྱ། །སྦྱིན་སྲེག་ལས་ལ་རབ་འཇུག་པས། །བདག་ཉིད་སྲུང་བར་འགྱུར་བ་ཡིན། །དེ་ནས་སྔགས་འདི་བཀླག་པར་བྱ། །འདི་ནི་རྟག་ཏུ་ལས་རྣམས་ལ། །བདུན་བཟླས་པའམ་བརྒྱད་བཟླས་སོ། །ན་མཿསརྦ་བུདྡྷ་བོ་དྷི་སཏྭཱ་ནཱཾ། ཨ་པྲ་ཏི་ཧ་ཏ་ག་ཏི་མ་ག་ཏཱ་ནཱཾ། ཏདྱ་ཐཱ། ཨོྃ་ཛྭཱ་ལ་ཏིཥྠ་ཧཱུྃ། རུ་རུ་བི་ཤྭ་སམྦྷ་བེ་སྭཱ་ཧཱ། །སྔགས་ཀྱི་རབ་སྦྱོར་འདི་ཡིས་ནི། །སླར་ཡང་ཤིང་ལ་བཟླས་བྱ་བ། །གཉིས་བཟླས་པའམ་བདུན་བཟླས་པ། །སྔགས་རིག་དེས་མེར་སྦྱིན་སྲེག་བྱ། །མེ་ཏོག་བདུག་པ་དྲི་དག་གམ། །མདོར་ན་ཐམས་ཅད་ཉིད་ཀྱང་ནི། །གསང་སྔགས་བཟླས་པའི་ཆུ་རྣམས་ཀྱིས། །འདི་ཉིད་ཀྱིས་ནི་བསང་གཏོར་བྱ། །དེ་ནས་ལས་རྣམས་ཐམས་ཅད་ནི། །རྒྱུ་འདིས་ཆོ་ག་བརྩམ་པར་བྱ། །ལས་རྣམས་དག་ནི་ཐམས་ཅད་ལ། །སྔ་མའི་རབ་སྦྱོར་ཉིད་ཀྱིས་བྱ། །སྔར་གྱི་སྐྲ་ཅན་མ་བཅིངས་ནས། །ཕྱག་རྒྱ་ཆེན་མོར་གྲགས་ལྡན་མ། །བསྲུང་བ་བྱས་པར་གྱུར་དེ་ནས། །ཟློས་པོས་རིག་པ་གཅིག་གིས་ནི། །ལས་རྣམས་ཐམས་ཅད་བརྩམ་པར་བྱ། །དངོས་གྲུབ་རྒྱུ་ལ་མཁས་པ་ཡིས། །གལ་ཏེ་དགེ་མཚན་མཐོང་གྱུར་པ། །རྟག་ཏུ་དགེ་བའི་སྒྲ་གྲགས་ན། །དེ་ལ་སྔགས་ཀྱི་འབྲས་བུ་ནི། །ཇི་ལྟར་འདོད་བཞིན་མཆོག་
སྩོལ་འགྱུར། །དང་པོ་ལས་ལ་རབ་སྦྱོར་དང་། །སྔགས་ཀྱི་རྒྱུ་ལ་རབ་འཇུག་པས། །འབྲས་མེད་འབྲས་བུ་བཅས་པ་ཉིད། །དངོས་གྲུབ་དེ་ལ་བརྗོད་པར་བྱ། །རྒྱལ་བའི་སྒྲ་འམ་པ་ཊ་ཧ། །རྔ་བོ་ཆེ་ཡི་སྒྲ་གྲགས་ན། །བརྩོན་ལྡན་ཀུན་འགྲོའི་དངོས་གྲུབ་སྟེ། །སྦྱིན་སྲེག་ལས་ལ་ཡང་དག་བརྟེན། །གཞན་ཡང་དགེ་མཚན་དཔལ་དང་ནི། །འདབ་ཆགས་སྒྲ་ནི་བཟང་པོ་དང་། །རྣམ་པ་སྣ་ཚོགས་སྒྲ་དབྱངས་སམ། །རྒྱལ་བས་བསྔགས་ཤིང་རབ་བསྔགས་པ། །བཀྲ་ཤིས་བཟང་པོ་ཡིད་འོང་དང་། །རྣམ་པ་སྣ་ཚོགས་སྒྲ་དང་ནི། །གདུགས་དང་རྒྱལ་མཚན་བ་དན་དང་། །བུད་མེད་རྒྱན་གྱིས་བརྒྱན་པ་དང་། །དེ་བཞིན་བུམ་པ་གང་བ་དང་། །མཆོད་ཡོན་མཐོང་ན་དངོས་གྲུབ་རྒྱུ། །ཁ་དོག་རྣམ་པ་དུ་མ་དང་། །རབ་སྔགས་འཇིག་རྟེན་གྱིས་མཆོད་པའི། །དགེ་སློང་རྣམས་དང་དགེ་སློང་མ། །མཐོང་ནས་དེ་རྣམས་བལྟ་བ་ལ། །གསང་སྔགས་སྤྱོད་ཚུལ་སྣ་ཚོགས་འགྲུབ། །བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ། བཅོམ་ལྡན་འདས་མ་འཕགས་མ་སྒྲོལ་མ་རལ་པ་གྱེན་བརྫེས་ཀྱི་རྩ་བའི་རྟོག་པ་ལས། བགྲང་ཕྲེང་སྲད་བུའི་ཆོ་གའི་ལེའུ་རབ་འབྱམ་བཅུ་གཅིག་པ་ཡོངས་སུ་རྫོགས་སོ།། །།དེ་ནས་ཡང་བཅོམ་ལྡན་འདས་ཤཱཀྱ་ཐུབ་པས་སླར་ཡང་འཁོར་གྱི་དཀྱིལ་འཁོར་ཆེན་པོ་ལ་གཟིགས་ནས། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་བཀའ་སྩལ་པ། སེམས་དཔའ་ཆེན་པོ་ཁྱོད་ཀྱི་རིག་པའི་གསང་ཆེན་ཡོད་དོ། །སྔགས་ཐམས་ཅད་ཀྱི་སྒྲུབ་ཐབས་ཀྱི་ཆོ་གའི་དམ་ཚིག་ཤེས་པ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་མཛོད་ལས་བྱུང་བ། ཆོས་ཀྱི་སྤྲིན་ལ་མཐུན་པར་རབ་ཏུ་ཞུགས་པ། ནམ་མཁའི་རང་བཞིན། འཇིག་རྟེན་དང་འཇིག་རྟེན་ལས་འདས་པའི་སྔགས་ཀྱི་མངའ་བདག་ཆེས་གཙོ་བོར་གྱུར་པ་སེམས་དཔའ་ཆེན་པོ་དཔེར་ན་དེ་བཞིན་གཤེགས་པ་ནི་སེམས་ཅན་ཐམས་ཅད་ཀྱི་གཙོ་བོ། །ཆེས་གཙོ་བོར་གྱུར་པ་ལྷ་དང་མི་རྣམས་ཀྱི་ནང་ནས་སྐྱེས་བུའི་ཁྱུ་མཆོག་སངས་རྒྱས་བཅོམ་ལྡན་འདས་ཡིན་ནོ། །བྱང་ཆུབ་སེམས་དཔའ་
དེ་བཞིན་དུ་རིག་པའི་རྒྱལ་པོ་འདི་ནི་སྔགས་ཐམས་ཅད་ཀྱི་མཆོག་ཏུ་བསྟན་ཅིང་། གཙོ་བོ་དམ་པ་ཡིན་ཏེ། དེ་བཞིན་གཤེགས་པ་གང་གཱའི་ཀླུང་གི་བྱེ་མ་སྙེད་ཀྱི་སངས་རྒྱས་བཅོམ་ལྡན་འདས་བརྗོད་དུ་མེད་པ་རྣམས་ཀྱིས་སྔར་གསུངས་པ་དེ་བཞིན་གཤེགས་པ་རིན་ཆེན་ཏོག་གི་མཆོག་གི་སྙིང་པོ་མཆོག་ཏུ་གསང་བ་ཀུན་ནས་བཀྲ་ཤིས་པར་འདོད་པ་སངས་རྒྱས་ཐམས་ཅད་ཀྱིས་ཡང་དག་པར་བསྟོད་ཅིང་རབ་ཏུ་བསྔགས་ལ། སེམས་ཅན་ཐམས་ཅད་ལ་དབུགས་འབྱིན་པ། སྡིག་པ་ཐམས་ཅད་རབ་ཏུ་ཞི་བར་བྱེད་པ། འདོད་པ་ཐམས་ཅད་སྦྱིན་པ། རེ་བ་ཐམས་ཅད་ཡོངས་སུ་རྫོགས་པར་བྱེད་པ་དེ་གང་ཞེ་ན། །བར་སྐབས་འདིར་བཅོམ་ལྡན་འདས་ཤཱཀྱ་ཐུབ་པའི་སྨིན་མཚམས་ཀྱི་མཛོད་སྤུ་ནས་སངས་རྒྱས་ཐམས་ཅད་ཡང་དག་པར་སྐུལ་བར་བྱེད་པ་ཞེས་བྱ་བའི་འོད་ཟེར་བྱུང་བར་གྱུར་ཏོ། །གང་འདི། ཕྱོགས་བཅུ་སྟེང་འོག་ཐམས་ཅད་དང་ལྡན་པའི་སངས་རྒྱས་ཀྱི་ཞིང་རྣམས་ཀུན་དུ་སྣང་ཞིང་སེམས་ཅན་ཐམས་ཅད་ཀྱི་ཡིད་ཀྱང་ཚིམ་པར་བྱས་ནས་སླར་ཡང་བཅོམ་ལྡན་འདས་ཤཱཀྱ་ཐུབ་པའི་གཙུག་ཏོར་དུ་ནུབ་པར་གྱུར་ཏོ། །བཅོམ་ལྡན་འདས་ཀྱི་གཙུག་ཏོར་ནས་ཀུན་ནས་འབར་བའི་འཕྲོ་བའི་ལུས་ཅན་བལྟ་བར་མི་ནུས་པའི་སེམས་ཅན་ཀུན་གང་གིས་ཀྱང་མི་ཐུབ་པ། འོད་ཆེན་པོ་ཡང་དག་པར་བྱུང་བ། འོད་ཀྱི་དཀྱིལ་འཁོར་གྱིས་ལུས་བརྒྱན་པ། རྣམ་པ་སྣ་ཚོགས་པའི་གཟུགས་ཅན། འཁོར་ལོས་སྒྱུར་བ་ཆེན་པོའི་གཟུགས་དང་ལྡན་པ། རིག་པའི་རྒྱལ་པོ་ཡི་གེ་གཅིག་པ་ཞེས་བྱ་བར་གྱུར་ཏོ། །བྱུང་ནས་ནམ་མཁའི་དཀྱིལ་ཀུན་དུ་སྣང་བར་བྱས་ཏེ། རིག་པའི་རྒྱལ་པོ་ཐམས་ཅད་ཀྱིས་ཡོངས་སུ་བསྐོར་བ། རིག་པ་འཛིན་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་མདུན་དུ་བདར་ནས་མཆོད་བཞིན་པ། འཇིག་རྟེན་ཐམས་ཅད་ཀྱི་བླ་མ། རིག་པའི་འཁོར་ལོས་སྒྱུར་བའི་རྒྱལ་པོས་མངོན་པར་བསྔགས་བཞིན་པ། སངས་རྒྱས་ཐམས་ཅད་ལ་མངའ་སྒྱུར་བཞིན་པ། སངས་རྒྱས་དང་བྱང་ཆུབ་སེམས་དཔའ་ས་བཅུ་ལ་བཞུགས་པ་རྣམས་ཀྱི་རིམ་གྲོ་བྱེད་བཞིན་པའི་བློ་གྲོས་ཆེན་པོ། ནམ་མཁའི་དཀྱིལ་
ཐམས་ཅད་ཀྱི་ལྷའི་རིན་པོ་ཆེས་ཉེ་བར་མཛེས་པ་དང་། ནོར་བུ་རིན་པོ་ཆེའི་དོན་དུ་བྱས་པས་ཐམས་ཅད་བཀང་སྟེ། མཛེས་པའི་གཟུགས་ཅན་མཆོག་ཏུ་འོད་གསལ་བ། སྤྲུལ་པ་པོ་རྣམ་པ་སྣ་ཚོགས་པའི་གཟུགས་བྱེ་བ་ཁྲག་ཁྲིག་བརྒྱ་སྟོང་ཕྲག་འབྱིན་བཞིན་པ། ཡི་གེ་གཅིག་པའི་སྒྲ་འདོན་བཞིན་པ། འོད་ཟེར་ཆེན་པོ་འབར་བ་རབ་ཏུ་འཕྲོ་བཞིན་པ་བར་སྣང་གི་ཕྱོགས་སུ་གནས་པར་གྱུར་ནས་བཅོམ་ལྡན་འདས་ཤཱཀྱ་ཐུབ་པ་ལ་ཉེ་བར་ཕྱོགས་ནས་ལྟ་བར་བྱེད་བཞིན་པ། དེ་ཐམས་ཅད་དང་ལྡན་པའི་གནས་གཙང་མའི་འཁོར་གྱི་དཀྱིལ་འཁོར་ཆེན་པོ་ལ་ཀུན་ཏུ་ལྟ་ཞིང་སྣང་བར་བྱེད་བཞིན་པའོ། །དེ་ནས་བཅོམ་ལྡན་འདས་ཤཱཀྱ་ཐུབ་པས་ཡི་གེ་གཅིག་པའི་རྟོག་པའི་རྒྱལ་པོ་ཆེན་པོ་འདི་བཀའ་སྩལ་ཏོ། །ན་མཿསརྦ་བུདྡྷཱ་ནཱཾ། བྷྲུྃ་བཀའ་སྩལ་པ་ཙམ་ཉིད་ལ་འཇིག་རྟེན་གྱི་ཁམས་སངས་རྒྱས་ཀྱི་ཞིང་རྣམས་ཐམས་ཅད་དུ་རྣམ་པར་འགྱུར་བ་དྲུག་ཏུ་གཡོས་པར་གྱུར་ཏོ། །སེམས་ཅན་གང་ལ་ལ་བཀྲེས་པ་དང་སྐོམ་པ་ལ་སོགས་པའི་སྡུག་བསྔལ་སྐྱེས་པ་མེད་པར་གྱུར་ཏོ། །དེ་ནས་ཡང་བཅོམ་ལྡན་འདས་ཤཱཀྱ་ཐུབ་པས། དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་གྱི་རྫུ་འཕྲུལ་ཡང་དག་པར་བསྟན་པའི་ཕྱིར་དང་སྡིག་པ་ཐམས་ཅད་རབ་ཏུ་འཇོམས་པར་བྱེད་པའི་ཕྱིར་དང་། སྡུག་བསྔལ་ཐམས་ཅད་རྣམ་པར་སྦྱོང་བར་བྱེད་པའི་ཕྱིར་དང་། རྟོག་པའི་རྒྱལ་པོ་འདི་སེམས་ཅན་ཐམས་ཅད་ཡང་དག་པར་སྲུང་བའི་ཕྱིར་དང་། དམྱལ་བའི་སྡུག་བསྔལ་ཐམས་ཅད་ཉེ་བར་ཞི་བར་བྱེད་པའི་ཕྱིར་དང་། བསམ་གྱིས་མི་ཁྱབ་པའི་རྫུ་འཕྲུལ་མངོན་པར་འདུ་བྱ་བ་ཀུན་དུ་བསྟན་པའི་ཕྱིར་དང་། སངས་རྒྱས་ཐམས་ཅད་དང་བྱང་ཆུབ་སེམས་དཔའ་ཐམས་ཅད་ཀྱིས་བསམ་གྱིས་མི་ཁྱབ་པ་རྫུ་འཕྲུལ་གྱི་མཐུ་ཀུན་ཏུ་བསྟན་པའི་ཕྱིར་རིག་པའི་རྒྱལ་པོ་ཆེན་པོའི་རྟོག་པ་འདི་བཀའ་སྩལ་ཏོ། །སེམས་དཔའ་ཆེན་པོ་གང་ལ་སྔགས་ཀྱི་རྒྱལ་པོ་འདི་སྒྲུབ་པར་འདོད་ན་དེའི་དོན་གྱི་ཕྱིར་ཆོ་ག་འདིར་འགྱུར་རོ། །དང་པོ་རེ་ཞིག་མ་བརྟགས་པ་དང་། མི་སྨྲ་བ་དང་། མི་ཟ་བར་བརྗོད་པའི་མཐུ་དང་། སྔགས་ཀྱིས་འདུལ་བ་ལ་རབ་ཏུ་བརྩོན་པས་འབྱུང་པོ་ཐམས་ཅད་ལ་རབ་ཏུ་བརྩེ་བས་གཞན་
སྡུག་ན་བདག་སྡུག་པར་ལེགས་པར་མཐོང་བར་བྱེད་པའི་ཡེ་ཤེས་དང་ལྡན་པ་དབང་པོ་རྣམས་ལེགས་པར་བཟུང་སྟེ་རྣམ་པར་གཡེང་བ་དང་བཅས་པའི་སེམས་དང་། ང་རྒྱལ་དང་། སེར་སྣ་ལག་པ་ལ་འཇུག་པ། རབ་ཏུ་དགག་པའི་དོན་དུ་རྫས་ཡོངས་སུ་འཇལ་བ་དང་། ལྷ་གཞན་ལ་ཕྱག་མི་བྱེད་པ་དང་། དཀོན་མཆོག་གསུམ་ལ་དང་བ་ཤིན་ཏུ་མངོན་དུ་གྱུར་པའི་དད་པའི་ནོར་གྱིས་བཅོམ་ལྡན་འདས་མ་འཕགས་མ་སྒྲོལ་མ་ལ་མངོན་པར་དང་བ་དང་། སྙིང་རྗེ་ཆེན་པོའི་བདག་ཉིད་དང་། ལེགས་པར་བརྩོན་པའི་བསམ་པས་བྱང་ཆུབ་ཏུ་སེམས་བསྐྱེད་ཅིང་། མདོར་ན་བྱང་ཆུབ་ཆེན་པོར་སྨོན་ལམ་བཏབ་པ། རྒྱུན་དུ་སྒྲུབ་པར་འགྱུར་བར་བྱའོ། །དེ་ལ་དང་པོ་རེ་ཞིག་བྲིས་སྐུའི་ཆོ་གར་འགྱུར་ཏེ་རྒྱལ་པོ་ཐམས་ཅད་ཀྱི་བདག་པོ་འཁོར་ལོས་སྒྱུར་བ། མ་ཉམས་པའི་རས་ལྷག་མ་མིན་པ། ཁ་དོག་ཅན་ལ་བཅོམ་ལྡན་འདས་ཀྱི་སྐུ་གཟུགས་འདྲིར་གཞུག་པར་བྱ་སྟེ། གསེར་ལྟར་སེར་བའི་གཟུགས་བརྙན་ཆོས་སྟོན་པར་བྱེད་བཞིན་པ་སེང་གེའི་ཁྲི་ལ་ཉེ་བར་བཞུགས་པ། རྣམ་པ་ཐམས་ཅད་ཀྱི་མཆོག་དང་ལྡན་པ་ལུས་ཐམས་ཅད་ཀུན་ནས་འབར་བའི་དོ་ཤལ་ཅན་བྱའོ། །སྟེང་དུ་རིའི་རྩེ་མོར་གློག་དང་སྤྲིན་དང་བཅས་པའོ། །འོག་ཏུ་པདྨའི་མཚོ་བྱའོ། །བཅོམ་ལྡན་འདས་ཀྱི་གཙུག་ཏོར་འོད་ཟེར་ལས་བྱུང་བཞིན་པ་བྱའོ། །སྒྲུབ་པ་པོ་ཡང་གནས་དང་ཆ་བྱད་དང་། དབྱིབས་ཀྱི་རྣམ་པ་ཇི་ལྟ་བ་བཞིན་དང་། ལག་ན་སྤོས་ཕོར་ཐོགས་པ་བཅོམ་ལྡན་འདས་ལ་ལྟ་བར་བྱེད་བཞིན་པ། རས་རིས་རྣམ་པ་དེ་ལྟ་བུར་བྲིས་ལ་སྒྲུབ་པ་པོ་ཡང་དུས་གསུམ་དུ་ཁྲུས་བྱ་ཞིང་གོས་གཙང་མ་བགོས་ཏེ། སྐྱེ་བོ་དང་བྲལ་བའི་དབེན་པར་རྒྱུན་ཆེན་པོར་རས་རིས་བཞུགས་སུ་གསོལ་ལ་རྣམ་པ་ཐམས་ཅད་དུ་ལུས་དང་ངག་དང་། སེམས་ཡོངས་སུ་སྐྱོ་བ་མེད་པར་སངས་རྒྱས་བཅོམ་ལྡན་འདས་ལ་མཆོད་པ་རྒྱ་ཆེན་པོ་བྱས་ནས། ཟླ་བ་ཉ་ལ་ཉིན་མཚན་དུ་སྨྱུང་བར་གནས་ཏེ་སྒྲུབ་པ་བརྩམ་པར་བྱའོ། །ལོ་མ་དང་། ཟན་དང་། འོ་མ་དང་། སློང་མོའི་བསོད་སྙོམས་ཀྱི་བཟའ་བ་དང་། ཆུ་དང་། ཕྱེའི་བཟའ་བའམ། འོ་མ་དང་ནས་ཟན་བཟའ་བར་བྱའོ། །ཨ་
ག་རུའི་བདུག་པ་བསྲེགས་ཏེ་འབུམ་ཕྲག་བཅུར་བཟླས་པ་བྱའོ། །སྔོན་དུ་བསྙེན་པ་བྱས་པ་དང་། སྔོན་སྤྱད་པ་བྱས་པར་འགྱུར་རོ། །དེ་ནས་མིག་སྨན་སྒྲུབ་པར་འདོད་ན་དཔའ་བོའི་རིན་གྱིས་ཉོས་པའི། དཔའ་བོ་བཟང་པོ་ལས་བྱུང་བའི་མིག་སྨན་སྲང་གཅིག་བླངས་ནས་བྲམ་ཟེའི་བུ་མོས་བ་བྱུང་ལྔ་ཁ་བྱང་དུ་བལྟས་པ་འཐག་ཏུ་གཞུག་པར་བྱའོ། །མིང་མེད་ཀྱི་སོར་མོས་རིལ་བུ་བཞི་བྱས་ལ་པདྨའི་འདབ་མས་བཀབ་ལ་སྐམ་དུ་གཞུག་པར་བྱའོ། །སངས་རྒྱས་བཅོམ་ལྡན་འདས་ཀྱི་ཆོ་ག་བཞིན་དུ་མེ་སྦར་ནས་སྟོང་ཕྲག་རྫོགས་པར་སྦྱིན་སྲེག་བྱ་སྟེ། དེ་ནས་རིང་བསྲེལ་དང་བཅས་པའི་མཆོད་རྟེན་ལ་རས་རིས་བཞུགས་ནས་མཆོད་པ་རྒྱ་ཆེན་པོ་རྒྱ་ཆེན་པོར་བྱས་ཏེ། ཕྱོགས་བརྒྱད་དུ་པ་ལཱ་ཤའི་ཤིང་གིས་མེ་སྦར་ནས་ཞོ་དང་སྦྲང་རྩི་དང་། མར་ལ་བཏགས་པའི་རྣམ་པར་འདྲེན་པའི་སྦྱིན་སྲེག་བྱའོ། །དེ་ནས་ཕྱོགས་བཞི་རྣམས་སུ་དཀྱིལ་འཁོར་བྱས་ནས་ཕྱོགས་སྐྱོང་བ་རྣམས་བཞག་སྟེ། དཀྱིལ་འཁོར་གཉིས་པར་རབ་ཏུ་སད་པར་བྱེད་པ་ལག་ཏུ་ཡུངས་ཀར་ཐོགས་པའོ། །དཀྱིལ་འཁོར་གསུམ་པར་ལེགས་པར་གྲོགས་བཟང་པོའམ། གྲོགས་མེད་ཀྱང་རུང་སྟེ། སྔགས་ཀྱི་མཆོད་པ་ཆེན་པོ་བྱས་ནས་བསྲུང་བ་བྱ་སྟེ། ཁ་ཤར་དུ་ཕྱོགས་པས་ཉེ་བར་འདུག་ལ་ཀུ་ཤ་བཏིང་ཞིང་བཀྲམ་ནས་ཨ་ཤྭཏྠའི་འདབ་མ་གསུམ་གྱི་སྟེང་ནས་དང་། བཞིས་འོག་ནས་གཡོགས་ཏེ། ལག་པས་མནན་ལ་ཇི་སྲིད་དྲོ་བར་གྱུར་པ་དང་། དུ་བ་འཐུལ་བ་དང་། རབ་ཏུ་འབར་བ་དེ་སྲིད་དུ་བཟླས་པར་བྱའོ། །དང་པོ་དངོས་གྲུབ་ནི་འདིས་རྒྱལ་བའི་བདག་ཉིད་ཀྱི་སྤྱན་ཏེ། གང་མཐོང་བ་དང་། གང་རྣམས་མཐོང་བ་དེ་རྣམས་ཐམས་ཅད་དབང་དུ་འགྱུར་རོ། །གཉིས་པའི་དངོས་གྲུབ་ནི་གླང་པོ་ཆེ་དགུའི་སྟོབས་དང་། རླུང་ལྟར་མགྱོགས་པ་དང་། ལོ་ལྔ་བརྒྱར་འཚོ་བ་དང་། གླང་པོ་ཆེ་བཅུ་འཕྲོགས་པ་དང་། རིག་པ་འཛིན་པ་ཐམས་ཅད་ཀྱི་ཟིལ་གྱིས་གནོན་པ་མ་ཡིན་པ་དང་འབར་ཞིང་འཆཪ་བའི་ཉི་མ་དང་འདྲ་བ། ལུས་རིན་པོ་ཆེས་བརྒྱན་པ། བར་གྱི་བསྐལ་པར་གནས་ཤིང་གཞན་འདྲེན་པར་བྱེད་པ། རིག་པ་འཛིན་པ་ཟིལ་གྱིས་མི་ནོན་པའི་འཁོར་ལོས་སྒྱུར་བ། གསར་དུ་འགྲོ་བཞིན་པ། རླུང་
གི་ལམ་བདུན་དུ་རྣམ་པར་རྒྱུ་བར་བྱེད་པར་འགྱུར་རོ། །རྣ་བའི་མིག་སྨན་བསྟེན་པ་དང་། ལྡོང་རོས་ལག་པ་ཡང་དངོས་གྲུབ་རྣམ་པ་གསུམ་མོ། །དེ་ནས་རྡོ་རྗེ་སྒྲུབ་པར་འདོད་ན་ཐོག་ཕོག་པའི་ཤིང་བླངས་ནས། སོར་བཅུ་དྲུག་པའི་ཚད་ཀྱི་རྡོ་རྗེའི་རྣམ་པ་བྱའོ། །ཟླུམ་སྐོར་དུ་ཁྲུ་གང་ཙམ་གྱི་ཚད་ཀྱི་མཆོད་རྟེན་བྱས་ནས། དེའི་སྤྱན་སྔར་ཆོ་ག་འདི་མཐོང་བས་ཟླ་བ་ཉ་ལ་མཚན་མོ་གསུམ་དུ་སྨྱུང་བར་གནས་པས་སངས་རྒྱས་བཅོམ་ལྡན་འདས་ལ་མཆོད་པ་རྒྱ་ཆེན་པོ་བྱས་ནས་རྡོ་རྗེ་དེ་ཉིད་ལ་ངེས་པར་སེམས་པས་ལྟ་བཞིན་པ་དང་ལྡན་པས་རྡོ་རྗེ་བླངས་ཏེ། དུར་ཁྲོད་དུ་འགྲོ་བར་བྱའོ། །ཤར་དུ་རྒྱུན་འབབ་པ་དང་མཐུན་པའི་རྒྱུན་བྱའོ། །ཆུ་ཀླུང་གི་འགྲམ་གཉིས་ཀྱིས་བླངས་ནས་བ་བྱུང་ལྔས་ཟླུམ་སྐོར་བྱའོ། །ཟླུམ་སྐོར་བྱས་ནས་ཁྲུ་གང་ཙམ་གྱི་ཚད་ཀྱི་མཆོད་རྟེན་བྱས་ནས་དེའི་སྤྱན་སྔཪ་ཆོ་ག་འདི་མཐོང་བས་མཆོད་པ་བྱའོ། །དེ་ནས་དུར་ཁྲོད་དུ། རས་རིས་དེའི་དྲུང་དུ་རྡོ་རྗེ་བཞག་སྟེ། དེའི་སྟེང་དུ་བཞག་ནས་ལག་པས་མནན་ལ་ཇི་སྲིད་དུ་གོང་བུའི་འོག་གི་ཁུང་བུར་ལྟུང་བ་དེ་སྲིད་དུ་བཟླས་པར་བྱའོ། །དེ་ནས་ཁྲུས་བྱས་ནས་དེ་ཉིད་དུ་ལག་པས་རྡོ་རྗེ་བླངས་ནས་རབ་ཏུ་འཇུག་གོ། །བསླངས་པའི་བསོད་སྙོམས་བླངས་ནས་བཅོམ་ལྡན་འདས་ལ་གཏོར་མས་ཉེ་བར་མཆོད་དེ། ཁྲུས་བྱས་ནས་རྡོ་རྗེ་དེ་ཉིད་ལ་དུར་ཁྲོད་ཀྱི་ཐལ་བ་ཇི་སྲིད་སྦགས་པར་སོ་སོར་གཞག་གོ། །ཆོ་ག་འདིས་དུར་ཁྲོད་ཀྱི་ཤ་ལ་བཟླས་པར་བྱའོ། །མཐར་མཚན་མོ་གསུམ་དུ་ཆོ་ག་བཞིན་དུ་གཏོར་མའི་མཆོད་པ་དབུལ་བར་བྱས་ནས་བདག་ཉིད་དམ། གྲོགས་བཟང་པོ་ལ་བསྲུང་བ་བྱས་ཏེ། ལག་པ་གཉིས་ཀྱིས་མནན་ཏེ་ཇི་སྲིད་དུ་དངོས་གྲུབ་རྣམ་པ་གསུམ་དུ་གྱུར་པ་དེ་སྲིད་དུ་བཟླས་པ་བྱའོ། །དངོས་གྲུབ་དང་པོ་ལ་གང་བལྟས་པ་དང་གང་གིས་མཐོང་བ་དེ་རྣམས་རབ་ཏུ་དགའ་ཞིང་དབང་དུ་འགྱུར་རོ། །གཉིས་པ་རས་རིས་ཀྱི་སའི་རྡུལ་ཕྱིས་པ་ཙམ་གྱིས་མི་སྣང་བ་དང་། གླང་པོ་ཆེ་སྟོང་ཕྲག་དགུའི་སྟོབས་དང་ལྡན་པ་དང་། རླུང་ལྟར་མགྱོགས་པ་དང་། སྐལ་བ་དྲུག་འཕྲོག་པ་དང་། འདོད་པས་འགྲོ་བ་དང་། ཆར་འབེབས་པ་དང་། རྣམ་པར་སྣང་བར་བྱེད་པ་དང་། མཐུ་ཆེན་པོར་འགྱུར་རོ། །གསུམ་པ་ལ་ནི་ཉི་མ་འཆར་ཀ་དང་
མཚུངས་པ་དང་། ལོ་སྟོང་ཕྲག་བཅུར་འཚོ་ཞིང་འཁོར་ལོས་སྒྱུར་བ་ཡང་འདྲེན་པར་འགྱུར་རོ། །རྡོ་རྗེའི་ལག་པར་རྣམ་པར་རྒྱུ་སྟེ། དེ་བཞིན་དུ་པདྨ་དང་དགྲ་སྟ་ལག་པའི་ཆོ་གས་ཡང་ངོ་། །དེ་ནས་རིལ་བུ་སྒྲུབ་པར་འདོད་ན་སྔོན་དུ་བསྙེན་པ་བྱས་ཏེ་ལོར་སྐྱེས་པའི་སྡིགས་མཛུབ་ཀྱི་སོར་མོ་བླངས་ནས་སྔར་གྱི་ཆོ་གས་མཆོད་རྟེན་བྱས་ཏེ་དུར་ཁྲོད་དུ་མཆོད་པ་རྒྱ་ཆེན་པོ་བྱས་ནས་ཁ་ཤར་དུ་ཕྱོགས་པས་རབ་ཏུ་ཞུགས་ལ་དེ་སྲིད་དུ་སོར་མོ་ངེས་པར་རིག་བྱ་སྟོན་པས་མནན་ནས་རྡོ་རྗེ་ལས་འོད་ཟེར་འཕྲོ་བ་དེ་སྲིད་དུ་བཟླས་པ་བྱའོ། །ཉིན་མོ་ནམ་མཁའི་རླུང་ལ་བསྲུང་བ་བྱ་ཞིང་། མཚན་མོ་གཉིད་མི་ལོག་པར་ཐོ་རངས་ཇི་སྲིད་དུ་སོར་མོ་རྣམས་དགུག་པར་བྱའོ། །བཀུག་པའི་གནས་དེར་མཚན་མོ་གསུམ་དུ་སྨྱུང་བར་གནས་པ། །བ་དང་བེའུ་རྒྱུད་མཚུངས་པ། གྲགས་པ་དང་ལྡན་པའི་འོ་མ་བླངས་ནས་སངས་རྒྱས་བཅོམ་ལྡན་འདས་ལ་ཙནྡན་གྱི་མཎྜལ་དང་། མར་གྱི་མར་མེ་རབ་ཏུ་སྦར་ནས་ཀུ་ཤའི་ཁྲེས་ལ་འདུག་སྟེ་སྟོང་ཕྲག་བརྒྱད་མངོན་པར་བསྔགས་པར་བྱས་ནས་སའི་སྣོད་དུ་འོ་མ་བླུག་པར་བྱ་ཞིང་། ཐལ་བས་ཀྱང་དཀྱིལ་འཁོར་བཅིངས་ལ་ཐོ་རངས་ཁྲུས་བྱས་ནས་སྔར་འདི་ཉིད་ཀྱིས་ངེས་པར་བསྲུབས་པའི་མར་སར་བླངས་ནས་བཅོམ་ལྡན་འདས་ལ་མཆོད་པ་བྱས་ཏེ་སྟོང་ཕྲག་བརྒྱད་དུ་མངོན་པར་བསྔགས་ནས་མ་རེག་པ་ཟོས་ནས་མཐོང་བ་ཞེས་བྱ་སྟེ། འདོད་པ་ཐམས་ཅད་སྦྱིན་པར་འགྱུར་རོ། །གྲོལ་བར་འདོད་ན་གནས་ལ་ཕན་པའི་དྲི་ཐམས་ཅད་ལ་སོགས་པ་ལ་དཔའ་བོའི་རིན་གྱིས་ཉོས་ཏེ་མཚན་མོ་གསུམ་དུ་སྨྱུང་བར་གནས་པར་བྱས་ཏེ་སངས་རྒྱས་བཅོམ་ལྡན་འདས་ལ་མཆོད་པ་རྒྱ་ཆེན་པོ་བྱས་ཏེ། མར་གྱི་མར་མེ་རབ་ཏུ་སྦར་ནས་རང་ཉིད་སྔགས་ཟློས་ཤིང་བརྟག་པར་བྱའོ། །དེ་ནས་གཟུགས་བརྙན་བྱས་ནས་ཨ་ཤྭཏྠའི་འདབ་མ་བདུན་གྱི་སྟེང་དུ་བཞག་ནས་བཅོམ་ལྡན་འདས་ཀྱི་སྤྱན་སྔར་ཇི་སྲིད་དུ་རང་གི་རིག་པ་དེ་སྲིད་དུ་བཟླས་པར་བྱའོ། །དེ་ནས་ཕྱེ་མར་བྱས་ནས་ཕྱེ་མ་དེས་ཀུན་དུ་རེག་པ་དེ་དབང་དུ་འགྱུར་རོ། །ཆོ་ག་འདི་ཉིད་ཀྱིས་ནཱ་ག་གེ་སར་གྱི་ཕྱེ་མ་ལ་གཟུགས་བརྙན་བྱས་ཏེ། བདུག་པའི་ཁམ་ཕོར་བརྒྱད་བརྒྱར་སྦྱིན་སྲེག་བྱས་ན་གང་ལ་རྗེས་སུ་སེམས་
པ་དེ་དབང་དུ་བྱེད་དོ། །ཆོ་ག་འདི་ཉིད་ཀྱིས་ཨ་པཱ་མརྒའི་ཡམ་ཤིང་གིས་སྦྱིན་སྲེག་བྱའོ། །ནོར་འདོད་ན་བ་ལང་གི་གནས་སུ་སོང་ནས་སངས་རྒྱས་བཅོམ་ལྡན་འདས་ཀྱི་སྤྱན་སྔར་ས་ལ་མ་ལྷུང་བའི་བ་བྱུང་གིས་ལག་པས་མ་བཟོས་པའི་མཆོད་རྟེན་བྱས་ལ་ཆོ་ག་བཞིན་དུ་མཆོད་ནས་གུ་གུལ་བསྲེགས་ཏེ་སྟོང་ཕྲག་བརྒྱར་བཟླས་པ་བྱའོ། །བ་ལང་སྟོང་ངམ་ནོར་རྙེད་པར་འགྱུར་རོ། །ཆོ་ག་འདི་ཉིད་ཀྱིས་མར་དང་། སྦྲང་རྩི་ལ་སོགས་བསྲེག་ཅིང་སྟོང་ཕྲག་བརྒྱར་བཟླས་པ་བྱའོ། །གྲོང་བཅུ་གཉིས་ཀྱིས་བསྐོར་བ་རྙེད་པར་འགྱུར་རོ། །ཆོ་ག་འདི་ཉིད་ཀྱིས་མཆོད་རྟེན་བྱས་ནས་ཙནྡན་གྱིས་བཏགས་པའི་པདྨའི་གདན་དང་ལྷ་བཤོས་སྟོང་ཕྲག་བརྒྱ་དབུལ་ཏེ་ཡུལ་གྱི་དཔོན་པོ་ཐོབ་པར་འགྱུར་རོ། །ཆོ་ག་འདི་ཉིད་ཀྱིས་གུ་གུལ་གྱི་བདུག་པ་བསྲེགས་ཏེ་ཙམ་པ་ཀའི་མེ་ཏོག་སྟོང་ཕྲག་བརྒྱ་དབུལ་ཏེ། གསེར་སྟོང་རྙེད་པར་འགྱུར་རོ། །ཆོ་ག་འདི་ཉིད་ཀྱིས་ནཱ་ག་གེ་སར་གྱི་མེ་ཏོག་སྟོང་ཕྲག་བརྒྱར་དབུལ་བར་བྱ་སྟེ། རས་བཅོས་བུའི་གོས་སྟོང་རྙེད་པར་འགྱུར་རོ། །དེ་བཞིན་དུ་མེ་ཏོག་ཐམས་ཅད་འདོད་པའི་ཆོ་ག་ཐམས་ཅད་དུར་ཁྲོད་དུ་རོ་བསྲེགས་པའི་ཐལ་བ་བླངས་ནས་ཟླ་བ་ཉ་ལ་ཉིན་མཚན་དུ་སྨྱུང་བར་གནས་ཏེ་མིང་མེད་ཀྱི་སོར་མོའི་ཁྲག་གིས་ཟླུམ་སྐོར་བྱས་ནས་གཟུགས་བརྙན་བྲིས་ཏེ་རྐང་པ་གཡོན་པས་མནན་ནས་སྟོང་ཕྲག་བརྒྱད་བཟླས་པ་བྱས་ན། དང་པོ་གོས་བདུན་དང་། མདོར་ན་རིགས་དང་བཅས་པ་ཐམས་ཅད་རྙེད་པར་འགྱུར་རོ། །མཆོད་རྟེན་བྱས་ནས་ཤིང་ཨདྷི་བ་ལ་ཛ་ལ་ཞོ་དང་སྦྲང་རྩི་དང་། མར་ལ་བཏགས་པ་སྟོང་ཕྲག་བརྒྱད་སྦྱིན་སྲེག་བྱའོ། །གང་སྟོན་པའི་བུ་མོ་དེས་སྦྱིན་པར་བྱེད་དོ། །མི་སྦྱིན་ན་འཆི་བར་འགྱུར་རོ། །སཱ་ལའི་རྒྱབ་ནས་བྱུང་བའི་གཟུགས་བརྙན་བྱས་ལ་ཡུངས་མར་གྱིས་འདི་བཀང་ནས་ལྕགས་ཀྱི་ཐུར་མས་ཕུག་སྟེ་ཚ་བའི་ཏིལ་མར་གྱིས་བྱུགས་ཏེ་དུར་ཁྲོད་དུ་སྟོང་ཕྲག་བརྒྱད་བཟླས་པར་བྱའོ། །ལུས་གཅིག་པའི་བུད་མེད་དམ། དམངས་རིགས་དབང་དུ་འགྱུར་རོ། །གཉིས་པ་ལ་རྗེ་རིགས་དང་། རྒྱལ་རིགས་མའོ། །གསུམ་པ་ལ་དགེ་སློང་དང་། བྲམ་ཟེ་མའོ། །ཞེས་ཏེ་མདོར་ན་མ་བསྒྲུབས་པར་
ཡང་ལས་བྱེད་པར་འགྱུར་རོ། །གི་ཝང་ལ་ལན་བདུན་མངོན་པར་བསྔགས་པས་ཁྱད་པར་དུ་བྱས་ནས་གང་མཐོང་བ་དང་། གང་རྣམས་མཐོང་བ་དེ་ཐམས་ཅད་དགའ་བར་འགྱུར་རོ། །དེ་བཞིན་དུ་མིག་སྨན་གྱིས་སོ། །ཐོ་རངས་ལངས་ནས་ལན་བདུན་མངོན་པར་བསྔགས་པའི་ཆུས་བདེ་བར་ཁྲུས་བྱས་ན་གང་ལ་བལྟས་པ་དེ་སྦྱིན་པར་བྱེད་ཅིང་དེ་འབངས་སུ་ཡང་འགྱུར་རོ། །དེ་བཞིན་དུ་ཏིལ་མར་སོ་ལ་མ་རེག་པར་བཟའ་བས་འདོད་པས་ཁྱེར་བའི་ཆུ་ལ་ལན་བདུན་མངོན་པར་བསྔགས་པར་བྱས་ནས་འཐུངས་ན་དོན་དུ་མ་གཉེར་བར་ཡང་བཟའ་བ་རྙེད་དོ། །རྒྱལ་པོའི་ཁབ་ཏུ་ཞུགས་ནས་ཆོས་གོས་ཀྱི་མཐའ་ནས་བཟུང་སྟེ་ལན་ཉི་ཤུ་རྩ་གཅིག་ཏུ་ཡོངས་སུ་བཟླས་ནས་ལག་པ་གཡོན་པས་མདུད་པ་བྱའོ། །རྒྱབ་ཏུ་མི་ལྟ་བར་སོང་ན་སྨྲ་བ་ཐམས་ཅད་ཀྱི་མཆོག་ཏུ་འགྱུར་རོ། །ཆོམ་རྐུན་གྱི་ནང་དུ་སོང་བས་ཀུན་དུ་འཕྲོག་པར་བྱ་བ་ཉིད་ལ་བཟླས་པས་གཙང་བར་བྱེད་དོ། །གཅོད་པ་དང་། འབུགས་པ་ལ་སོགས་པ་རྣམས་ཀྱི་སྔགས་རྣམས་སོ། །སཱ་ལུའི་འབྲུ་དང་། ཀ་ར་བཱིར་དཀར་པོ་དང་། དོན་གྲུབ་དང་། །ཀཱ་བ་རྣམས་ཀྱིས་གཟུགས་བརྙན་བྱས་ནས་ལག་པ་གཡོན་པས་མནན་ཏེ་སྟོང་ཕྲག་བརྒྱད་བཟླས་པ་བྱས་ན་སྟེང་དུ་ལངས་པར་བྱས་པར་འགྱུར་རོ། །རིམས་གཞོམ་པར་འདོད་ན་གི་རི་ཀདྣ་ཀ་རའི་མེ་ཏོག་ལ་སྟོང་ཕྲག་བརྒྱད་བཟླས་པ་བྱས་ན་ཉི་མ་བདུན་གྱིས་ཤ་ཟའི་རིམས་ཉམས་པར་བྱེད་དོ། །སེང་ལྡེང་གི་ཡམ་ཤིང་གིས་སྦྱིན་སྲེག་སྟོང་ཕྲག་བརྒྱད་བྱས་ན་གདོན་ཐམས་ཅད་འཇོམས་པར་བྱེད་དོ། །ཐལ་བ་ལ་ལན་བདུན་བཟླས་པས་ཕ་རོལ་གྱི་སྔགས་རྣམས་འཆིང་བར་བྱེད་དོ། །ཆུ་ལ་ལན་ཅིག་བཟླས་པས་གྲོལ་ལོ། །དེ་ལྟ་བུ་ལ་སོགས་པའི་ལས་རྣམས་སོ། །དེ་ནས་ཡང་། བཅོམ་ལྡན་འདས་ཤཱཀྱ་ཐུབ་པས་སླར་ཡང་འཁོར་གྱི་དཀྱིལ་འཁོར་ཆེན་པོ་དེ་ལ་གཟིགས་ནས་བྱང་ཆུབ་སེམས་དཔའ་ཆེན་པོ་ལ་བཀའ་སྩལ་པ། སེམས་དཔའ་ཆེན་པོ་འདོད་པ་ཕུན་སུམ་ཚོགས་པར་བྱེད་པ་ཞེས་བྱ་བ་ཡོད་དོ། །དེ་ནི་རིགས་ཀྱི་བདག་པོ། སངས་རྒྱས་ཐམས་ཅད་ཀྱི་རྗེས་སུ་ཡི་རང་བ་རྟོག་པའི་རྒྱལ་པོ་འདི་སྒྲུབ་ཐབས་ཀྱི་ཆོ་ག་བཅོམ་ལྡན་འདས་མ་འཕགས་མ་
སྒྲོལ་མའི་གསང་ཆེན་དུ་གྱུར་པ་སྒྲུབ་པ་པོས་གདོན་མི་ཟ་བ་ཁོ་ནར་དྲན་པར་བྱ་བ་སྟེ། དེ་སེམས་དཔའ་ཆེན་པོ་ཁྱོད་ལ་བཤད་དོ། །དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གིས་བཅོམ་ལྡན་འདས་མ་སྒྲུབ་པའི་དོན་དུ་རིགས་ཀྱི་བདག་པོ་གསུང་དུ་གསོལ། འདོད་པ་ཕུན་སུམ་ཚོགས་བྱེད་པ། །བཅོམ་ལྡན་རྡུལ་མུན་རྣམ་པར་གྲོལ། །ཆགས་པས་མངོན་པར་ཞི་བ་དང་། །བྱང་ཆུབ་ངེས་འབྱིན་སྡིག་པ་ལས། །ཀུན་དུ་གཟིགས་པའི་ཟླ་བ་ལ། །འཕགས་པ་སྤྱན་རས་གཟིགས་དབང་ཕྱུག །སྲིད་པའི་ས་བོན་རྣམ་འཇོམས་པར། །ཕྱག་འཚལ་མཆོད་དེ་ཁྱོད་ལ་བརྟེན། །བཤད་བྱ་གལ་ཏེ་འབྱུང་བར་བྱེད། །སླར་ཡང་སྲིད་པར་འབྱུང་བར་འགྱུར། །ཏདྱ་ཐཱ། ཤྭེ་ཏེ་ཤྭེ་ཏེཾ་གེ་ཤྭེ་བྷུ་ཛེ་ཤྭེ་ཏ། མཱ་ལྱེ་རཱ་ལཾ་ཀྲྀ་ཏེ། ཛ་ཡེ་བི་ཛ་ཡེ་ཨ་ཛི་ཏེ་ཨ་པ་རཱ་ཛི་ཏེ་སྭཱ་ཧཱ། དྲན་པ་ཉིད་ལས། འདིའི་སྔགས་ཀྱི་དངོས་གྲུབ་མྱུར་དུ་འབྱུང་བར་འགྱུར་རོ། །དེ་ལ་འདིའི་སྔགས་ནི་ཐོ་རངས་ལངས་ནས་བཅོམ་ལྡན་འདས་མ་འཕགས་མ་སྒྲོལ་མའི་སྒྲུབ་པ་པོས་གཙང་མར་གྱུར་པ་ལན་བདུན་བྱས་ཆུ་བོར་ཞུགས་ཤིང་ཐལ་མོ་སྦྱར་ཏེ་ཡོངས་སུ་བཟླས་ནས་ཤར་དུ་མངོན་པར་ཕྱོགས་པས་གཏོར་བར་བྱའོ། །བགེགས་ཐམས་ཅད་ཞི་བར་འགྱུར་ཞིང་ལས་ཀྱི་དངོས་གྲུབ་ཀྱང་འབྱུང་ངོ་། །སྙིང་ཁར་མཐེ་བོང་བྱིན་ནས་ལན་ཅིག་བཟླས་ན་ལྷ་རྣམས་ཀྱིས་བྱིན་གྱིས་རློབ་པར་འགྱུར་རོ། །བདག་ཉིད་རྣམ་པར་དག་པར་ཡང་འགྱུར་རོ། །དེའི་ཕྱག་རྒྱ་ཡང་འདིར་སྦྱར་བར་བྱའོ། །བགེགས་ཐམས་ཅད་མེད་པར་འགྱུར་ཞིང་ལས་ཀྱི་དངོས་གྲུབ་ཀྱང་འབྱུང་ངོ་། །སྙིང་ཁར་མཐེ་བོང་བྱིན་ནས་ལན་ཅིག་བཟླས་ན་ལྷ་རྣམས་ཀྱིས་བྱིན་གྱིས་རློབ་པར་འགྱུར་རོ། །བདག་ཉིད་རྣམ་པར་དག་པར་ཡང་འགྱུར་རོ། །དེའི་ཕྱག་རྒྱ་ཡང་འདིར་སྦྱར་བར་བྱའོ། །དེ་ནས་འདིའི་སྒྲུབ་ཐབས་ཀྱི་ཆོ་གར་འགྱུར་ཏེ། མ་ཉམས་པའི་རས་སྐྲ་དང་བྲལ་བ་འབྲས་བུ་ཅན་ནམ། མ་འདྲེས་པའི་ཚོན་གྱིས་རི་མོ་མཁན་གསོ་སྦྱོང་ཅན་གྱིས་འཕགས་པ་སྤྱན་རས་གཟིགས་དབང་ཕྱུག་འདྲིར་གཞུག་པར་བྱའོ། །པདྨའི་སྙིང་པོ་ལ་འདུག་པ། སྟག་གི་པགས་
པའི་ཤམ་ཐབས་ཅན་རལ་པ་གྱེན་དུ་བརྫེས་པ་དེ་ཡང་རབ་ཏུ་འཕྱང་བཞིན་པ། ཕྱག་ན་བྱ་མ་བུམ་ཐོགས་པའམ། པདྨ་དཀར་པོའི་འདབ་མ་བསྣམས་པ། གཡོན་གྱི་གཞོགས་སུ་ལྷ་མོ་འཕགས་མ་དཀར་མོ་ཆེན་མོ་སེང་གེའི་གདན་ལ་ཉེ་བར་འདུག་པ། ཕྱག་པདྨ་དང་། མཆོག་སྦྱིན་མ་དང་། སྒྲུབ་པ་པོ་ནི་སྔོན་བཞིན་ནོ། །དེ་ནས་རིག་པ་འཛིན་པས་འོ་མ་དང་ནས་ཟན་བཟའ་ཞིང་བྲིས་སྐུའི་སྤྱན་སྔར་སྔོན་དུ་བསྙེན་པ་བྱའོ། །དྲི་ཞིམ་པོའི་མེ་ཏོག་ལག་པ་རྣམས་ཀྱིས་མཆོད་པ་དང་། མར་གྱི་མར་མེ་དང་། ཨ་ག་རུ་དང་། ཏུ་རུཥྐའི་བདུག་སྤོས་དང་། གཏོར་མ་ཡང་རིག་པ་འཛིན་པས་དེ་བཞིན་དུ་དབུལ་བར་བྱའོ། །ན་མོ་བུདྡྷཱ་སྱ། ན་མོ་དྷརྨཱ་སྱ། ན་མཿ སཾ་གྷ་སྱ། ན་མ་ཨཱཪྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ན་མོ་ཨཱཪྱཱ་ཡ། མ་ཧཱ་སཏྭཱ་ཡ། ཏདྱ་ཐཱ། སུ་རུ་མེ་སུ་རུ་མ། ཀུ་རུ་ཀུ་རུ། སུ་རུ་མེ་ཀརྨ་སཱ་དྷཱ་ཡ། བུདྡྷ་སདྱེ་ན། དྷརྨ་སཏྱེ་ན། སཾ་གྷ་སཏྱེ་ན། ཨཱ་གཙྪ་ཤཱིགྷྲཱཾ་དེ་བ་དཏྟེ་སྭཱ་ཧཱ། སྤྱན་དྲང་བའི་རིག་པའོ། །ཏདྱ་ཐཱ། ད་མེ་ད་སེ་སྭཱ་ཧཱ། དྲིའི་རིག་པའོ། །ཏདྱ་ཐཱ། ཧུ་ཧུ་ཧུ་ར་ཧུ་མ་ཧཱ་མེ་དེ་སྭ་རེ་སྭཱ་ཧཱ། །མེ་ཏོག་གི་རིག་པའོ། །ཏདྱ་ཐཱ། མེ་གྷ་བི་ཧྲ་ཏེ་སྭཱ་ཧཱ། བདུག་པའི་རིག་པའོ། །ཏདྱ་ཐཱ། ཏུ་ཏུ་ཏུ་ཏུ་ཏུ་རུ་མ་ཧཱ་ཏུ་རུ་ཎེ་སྭཱ་ཧཱ། གཏོར་མའི་རིག་པའོ། །འདི་རྣམས་ཉིད་དང་མར་མེ་བདུན་གྱི་ཕྲེང་བ་གནས་པའི་རས་རིས་ཀྱི་སྤྱན་སྔར་ཀུ་ཤའི་ཁྲེས་ལ་ཉེ་བར་འདུག་སྟེ། ཞོ་དང་། སྦྲང་རྩི་དང་། མར་ལ་བཏགས་པའི་པདྨའི་སྦྱིན་སྲེག་བྱ་སྟེ་འབུམ་ཕྲག་བདུན་དེ་སྲིད་པར་རོ། །རང་ཉིད་འགུལ་བ་དང་འཕགས་པ་སྤྱན་རས་གཟིགས་དབང་ཕྱུག་མངོན་སུམ་དུ་མཐོང་བར་འགྱུར་རོ། །རང་འདོད་པ་དེ་རྙེད་པར་འགྱུར་རོ། །ཆོ་ག་འདི་ཉིད་ཀྱིས་བིལ་བའི་ཡམ་ཤིང་གིས་སྟོང་ཕྲག་བརྒྱར་སྦྱིན་སྲེག་བྱས་ན་གང་འདོད་པ་དེ་ཡང་དག་པར་རྫོགས་པར་བྱེད་དོ། །གང་གཱའི་ཀླུང་གི་འགྲམ་དུ་ཉེ་བར་གནོད་པ་མེད་པ། སྐྱེ་བོ་དང་བྲལ་བར་བྱེ་མ་ལ་མཆོད་རྟེན་བྱས་ནས་དྲི་དང་མེ་ཏོག་དང་བདུག་སྤོས་ལ་སོགས་པ་ཕུལ་ཏེ་སྟོང་ཕྲག་བརྒྱད་བཟླས་པ་བྱའོ། །ཉི་མ་སོ་སོ་རེ་རེ་ཞིང་མཆོད་རྟེན་བྱའོ། །བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོའི་མདོ་སྡེ་བཅོམ་ལྡན་འདས་མ་
འཕགས་མ་སྒྲོལ་མ་རལ་པ་གྱེན་བརྫེས་ཀྱི་རྩ་བའི་རྟོག་པ་ལས་ལེའུ་རབ་འབྱམ་བཅུ་གཉིས་པ་རྫོགས་སོ།། །།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་ཐམས་ཅད་དང་ལྡན་པའི་འཇིག་རྟེན་གྱི་ཁམས་ལ་ལྷའི་སྤྱན་གྱིས་གཟིགས་ནས། ཡངས་པ་དང་ལྡན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་ཏིང་ངེ་འཛིན་དེ་ལས་བཞེངས་ཏེ་ཡངས་པ་དང་ལྡན་པ་ཞེས་བྱ་བའི་སྔགས་ཀྱི་རྒྱལ་པོ་ཆེན་པོ་འདི་བཀའ་སྩལ་ཏོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཏདྱ་ཐཱ། བི་མ་ལེ་བི་མ་ལེ། བི་པུ་ལ་པྲ་བྷེ། བི་པུ་ལ་པྲི་ཡེ། བི་པུ་ལ་མ་ཏི། ས་མ་ཡ་མ་ནུ་སྨ་ར། ཏྭ་མེ། བ་རུ་སཱཾ། སཱ་དྷ་ཡ་སཱ་དྷ་ཡ། གརྫ་གརྫ། ཧ་ན་ཧ་ན། བི་པུ་ལ་མ་ཏི། ཧྲྀ་ད་ཡ། མ་ནུ་སྨ་ར། བུདྡྷ་སཏྱེ་ན། དྷརྨ་སཏྱེ་ན། སཾ་གྷ་སཏྱེ་ན། བོ་དྷི་སཏྭཱ་སཏྱེ་ན། བི་པུ་ལ་མ་ཏི་སཏྱེ་ན། བཛྲ་པཱ་ཎི་སཏྱེ་ན། སཏྱ་བཱ་ཏི་སཏྱེ་ན། ལེ་ལེ་ལེ་ལེ། ཨོྃ་ཨོྃ་ཨོྃ། བྷུ་བ་བྷུ་བ་བྷུ་བ། ག་ག་ག །མ་ཐ་མ་ཐ་མ་ཐ། ཧཱུྃ་ཧཱུྃ་ཧཱུྃ། ཨ་བ་ལོ་ཀི་ཏེ། མུ་ཙེ་སྭཱ་ཧཱ། འདི་ནི་མཐུ་ཆེན་པོ་ཐོབ་པ་ཡངས་པ་དང་ལྡན་པ་ཞེས་བྱ་བ་རིག་པའི་རྒྱལ་པོ་ཆེན་པོ་བཅོམ་ལྡན་འདས་མ་འཕགས་མ་སྒྲོལ་མའི་ཏིང་ངེ་འཛིན་ལས་བྱུང་བ། བཀླགས་པས་གྲུབ་པ། བདག་སྲུང་བ་དང་། གཞན་སྲུང་བ་དང་། གྲོང་སྲུང་བ་དང་། རིའི་འཇིགས་པ་དང་། གདུག་པའི་འཇིགས་པ་དང་། ཤ་ཟའི་འཇིགས་པ་དང་། མདོར་བསྡུ་ན་འཇིགས་པ་ཐམས་ཅད་བཀླགས་པ་ཙམ་གྱིས་སེལ་བར་བྱེད་དོ། །འདི་ལས་གཞན་ཡང་སྔགས་ཀྱི་ཆོ་གར་འགྱུར་བ་ནི། ན་མོ་རཏྣ་ཏྲ་ཡཱ་ཡ། ན་མ་ཨཱཪྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ད་དེ་ཤཱནྟེ། པྲ་སནྣ་ཙི་ཏེ་སྭཱ་ཧཱ། སྤྱན་དྲང་བའི་སྔགས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཤྭེ་ཏེ་ས་མ་ཡེ་ཏྱེ་ཐཱ། བི་ཤུདྡྷ་བསྟི་སྭཱ་ཧཱ། གོས་བགོས་པའི་སྔགས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ།
མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། མུ་ནེ་མུ་ནེ། ཤཱནྟེ་བི་ཤུདྡྷེ་ག་ག་ན་ཏ་ལེ་པུ་གནྡྷེ་གནྡྷ། ཨུ་ད་ཀ་བ་ལིཾ་ཙ་ཧ་ར་ཧ་ར་ཀ་ར་ཀ་ར་བི་བྷུ་སྭཱ་ཧཱ། མེ་ཏོག་དང་། དྲི་དང་། བདུག་པ་དང་། མར་མེ་ཐམས་ཅད་ལ་སྔགས་འདིས་ལན་བདུན་མངོན་པར་བསྔགས་པས་ལན་ཅིག་བཟླས་སམ་དབུལ་བར་བྱའོ། །སའི་གོང་བུ་དཀར་པོས་རྟག་ཏུ་བདག་ཉིད་གཙང་བར་བྱའོ། །བཅོམ་ལྡན་འདས་ལ་གུར་གུམ་གྱི་ཆུ་དང་། ཙནྡན་དང་། ག་པུར་གྱི་དྲི་དང་། ཏུ་རུཥྐ་ལ་སོགས་པ་དང་། ཨ་ག་རུའི་བདུག་པ་དང་། བལླི་ཀའམ། ཙམ་པ་ཀའི་མེ་ཏོག་གི་ཕྲེང་བ་དང་། འོ་མ་སུམ་ཅུ་རྩ་གཉིས་སུ་འགྲོ་བར་བྱ་སྟེ། ཟན་གྱི་གཏོར་མ་དང་། བའི་མར་གྱི་མར་མེ་རྣམས་སོ། །དེ་ནས་འདིའི་རས་རིས་འབྱུང་སྟེ། འདོད་པའི་སྐྲ་དང་བྲལ་བ་ཁ་ཚར་མ་བཅད་པ་ཇི་ལྟར་རྙེད་པར་གྱུར་པ་ལ་བཅོམ་ལྡན་འདས་སྤྱན་རས་གཟིགས་དབང་ཕྱུག་གུར་གུམ་གྱིས་བྲི་བར་བྱའོ། །ཆུ་ལས་སྐྱེས་པའི་པདྨའི་གདན་དང་ཕྱག་ན་པདྨ་དང་པདྨའི་ཕྲེང་བས་བརྒྱན་པར་བྱས་པ། གོས་དཀར་པོ་ཅན་མཆོད་ཕྱིར་ཐོགས་པ། ཕྱག་མི་འཇིགས་པ་རབ་ཏུ་སྦྱིན་པ། རལ་པ་གྱེན་དུ་བརྫེས་པ་དེ་ལྟ་བུར་བྲི་བར་བྱའོ། །བཅོམ་ལྡན་འདས་སྔར་བརྗོད་པའི་གནས་སུ་རས་རིས་ཞལ་ཤར་དུ་མངོན་པར་ཕྱོགས་པར་བཞུགས་སུ་གསོལ་ནས་འབུམ་ཕྲག་བཅུར་བཟླས་པར་བྱའོ། །བཟླས་པ་ཡོངས་སུ་རྫོགས་པ་ན་མེ་སྦར་ནས་སྦྲང་རྩི་དང་མར་སྦྱར་བས་དུས་གསུམ་དུ་སྦྱིན་སྲེག་ཇི་སྲིད་འབུམ་རྫོགས་ཀྱི་བར་དུ་བྱས་ན་གང་མངོན་པར་འདོད་པ་དེ་རྙེད་པར་འགྱུར་རོ། །རྒྱལ་སྲིད་ཀྱི་ལོངས་སྤྱོད་འདོད་ན་གུར་གུམ་དང་། ཙནྡན་དང་། མེ་ཏོག་བརྒྱ་པ་དང་། འབྲས་ཡོས་རྣམས་གཅིག་ཏུ་བྱས་ནས་མར་དང་སྦྲང་རྩིས་བཏགས་ནས་ཐུན་གསུམ་དུ་སྦྱིན་སྲེག་བྱའོ། །སྦྱིན་སྲེག་མཐའི་ཉི་མ་ལ་མཐོང་བ་སྩོལ་བར་བྱེད་དོ། །མཚན་མ་འདི་རྣམས་ཀྱང་སྩོལ་ཏེ་གཙུག་པུད་གྱེན་དུ་བརྫེས་པར་འགྱུར་རོ། །སྐྱོན་མེད་པའི་འོད་ཀྱི་རྒྱལ་མཚན་དང་། ཕྲེང་བ་འབར་བའི་རས་རིས་རབ་ཏུ་སྦྱིན་པའམ་སྨྲ་བར་བྱེད་དོ། །རིག་པ་འཛིན་པས་ཡིད་ཀྱིས་བཟླས་པ་བྱ། ནམ་མཁར་ལྷའི་ངག་ཐོས་ན་
གྲུབ་པ་ཡིན་ནོ། །དེ་ནས་རྒྱལ་སྲིད་སླར་རྙེད་ན་ཆོས་ཀྱིས་བྱེད་དུ་གཞུག་གོ། །སླར་ཡང་དེ་ཉིད་ཏིང་ངེ་འཛིན་བསྒོམ་པར་བྱ་བཞིན་པ་ནི་བཅོམ་ལྡན་འདས་མ་འཕགས་མ་སྒྲོལ་མའི་རྟོག་པའི་རྒྱལ་པོ་ཆེན་པོ་རྐང་པ་གཅིག་པ་ཞེས་བྱ་བའི་རིག་པའི་རྒྱལ་པོ་ཆེན་པོ་གསུངས་པར་གྱུར་ཏོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ན་མོ་བུདྡྷ་ཨ་བྷིཥེ་ཀ་སྱ་པྲ་ཛྭ་ལི་ཏ་དཱི་པྟ་ནེ་པྲ། བྷུ་ཛཱ་ཡ་པྲ་ཛྭ་ལི་ཏཾ། དཱིཔྟ་ཧ་པུ་ཀ་མཎྜ་ལཱ་ཡ། ཏདྱ་ཐཱ། ཧྲྀ་ད་ཡ་མཱ་བརྟ་ཡི་ཥྱ་མི་གྷུ་ཊ། བན་དྷ་དྷུཾ་དྷཾ་དྷཾ་དྷཾ་དྷཾ། ཙ་ར་ཙ་ར་བ་ར་ཡ་ཤསྨ། ཨོྃ་ཀ་རཾ་པྲ་ཏ། བིདྱཱ་ཏེ་ཛ་ཡ་མ་ཧཱ། བིདྱཱ་ཡ་ཡ་སྭ་ཡསྐ་པྲ་བཪྟ་ཡ་ཧ་ར་ཎེ་ར་ཎེ་ར་ཀ་རུ་ཎེ། མུ་ནི་མུ་ནི། བི་མུ་ནི། ཤཱནྟ་ཙིནྟ་སྭཱ་ཧཱ། འདི་ནི་མཐུ་ཆེན་པོ་ཐོབ་པ་རྐང་པ་གཅིག་པ་ཞེས་བྱ་བའི་རིག་པའི་རྒྱལ་པོ་ཐོགས་པ་མེད་པ་བཟླས་པ་ཙམ་གྱིས་འཐབ་པ་དང་། འཐབ་མོ་དང་རྩོད་པ་ལ་སོགས་པ་ཐམས་ཅད་འཇོམས་པར་བྱེད་པ་དཔག་ཏུ་མེད་པའི་སྟོབས་ཀྱིས་ཕ་རོལ་གནོན་པ་རིག་པའི་རྒྱལ་པོ་སྟེ། རིགས་ཀྱི་བུ་བྱང་ཆུབ་ཏུ་སེམས་བསྐྱེད་པས་སྒྲུབ་པ་བརྩམས་ཏེ་ཁྲུས་གསུམ་བྱས་ཏེ་ཐུན་གསུམ་དུ་སྟོང་ཕྲག་བརྒྱད་བཟླས་པར་བྱའོ། །ཇི་སྲིད་ཟླ་བ་ཉའི་བར་དུ་བཅོམ་ལྡན་འདས་ཀྱི་སྤྱན་སྔར་མཆོད་པ་ཆེན་པོ་བྱས་ནས་དཔག་ཏུ་མེད་པར་བཟླས་པར་བྱའོ། །ལས་ཕྲན་ཚེགས་རྣམས་ཐམས་ཅད་གྲུབ་པར་འགྱུར་རོ། །འདི་རྣམས་ནི་འདིའི་འཁོར་དུ་གྱུར་པའི་སྔགས་ཏེ། ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། བི་བྷུ་རི་བི་བྷུ་རི། བྷུ་མི། ཨཱ་ཀཱ་མ་བྷུ་མི་ཨཱ་ཀཱ་མ་བྷུ་མི་ཨཱ་ཀཱ་མ་ཏིཥྛ་ཏིཥྛ་བི་ཛ་ཡ། བརྟ། ཤ་ཤ་ཤ་ཤ་ཤ་ཤ། ཐ་ཐ་ཐ་ཐ་ཐ་ཐ་ཐ་ཐ། ཨ་ཀནྠ། ཨཀྣྡྷ། པདྨ་ཧ་སྟཱ་ཡ་སྭཱ་ཧཱ། རས་རིས་རབ་ཏུ་གནས་པར་བྱེད་པའི་སྔགས་སོ། །དང་པོར་རི་མོ་མཁན་གྱི་ལས་དང་འོག་ཏུ་རས་རིས་ཀྱི་ཆོ་གར་འགྱུར་ཏེ། མ་འདྲེས་པའི་ཁ་དོག་གིས་སྤྱན་རས་གཟིགས་དབང་ཕྱུག་ཞབས་གཅིག་གནས་པ་འདྲིར་གཞུག་པར་བྱའོ། །མེ་ཏོག་སྣ་མའི་ཕྲེང་བའི་མཆོད་ཕྱིར་ཐོགས་པ་ཅན་མེ་ཏོག་གི་ཕྲེང་བའི་འོད་ཀྱིས་བརྒྱན་པ་དབྱུག་
པ་དང་། རིལ་པ་སྤྱི་བླུགས་ཕྱག་ན་བསྣམས་པ་ཕྲག་པར་གཡང་གཞི་ནག་པོ་ཀུན་དུ་འཕྱང་བར་བྱའོ། །གཡས་པས་དབུགས་འབྱིན་པར་བྱེད་པ་ལྟ་བུའི་རས་རིས་འདྲིར་བཅུག་ནས་དེའི་སྤྱན་སྔར་དགེ་སློང་གི་ཚོགས་ལ་སྟོན་མོ་བྱའོ། །ཡོན་ཡང་ཅི་འབྱོར་པ་དབུལ་ལོ། །ན་མོ་རཏྣ་ཏྲ་ཡཱཾ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཛ་ལ་དྷ་ར། བི་མུཀྟ་ཡ་ཐཱ་ཡ་སྭཱ་ཧཱ། ཉེ་བར་བྱུགས་པའི་སྔགས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། སུགནྡྷ། བི་མུཀྟ་བི་ཛ་ཡ་སྭཱ་ཧཱ། དྲིའི་སྔགས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། སུ་མ་ན་ཤྲི་ཡེ། ས་སཾ་དརྴ་ན་སོ་སོ་མ་ན། སོ་སོ་མ་ན་སྭཱ་ཧཱ། མེ་ཏོག་གི་སྔགས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཏདྱ་ཐཱ། དྷུ་མྲ་བརྩ་སི་ར་ར་ར་ར། ལ་ལཱ་ཡ། མུ་ནེ་སྭཱ་ཧཱ། བདུག་པའི་སྔགས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ན་མཿཔྲི་ཡཾ་ཀ་ར། པྲི་ཏི་བི་ཛ་ཡེ། ཨོྃ་ཛ་ཡེ་བི་ཛ་ཡེ་སཾ་ཀལྤ་སྭཱཧཱ། གཏོར་མའི་སྔགས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ན་མཿཤུ་ཙི་ནི། མ་ཏི་བི་མ་ལི། བི་ཤུདྡྷ་ག་ཏི་སྭཱ་ཧཱ། ཉེ་རེག་གི་སྔགས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ན་མཿཏདྱ་ཐཱ། ཤྭེ་ཏེ་པཎྜ་བཱ་སི་ནི་རཀྵ་རཀྵ་མཱཾ་སྭཱ་ཧཱ། འདིས་ཐམས་ཅད་དུ་བདག་ཉིད་བསྲུང་བར་བྱའོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། དྷ་ར་དྷ་རི་ཤྩིཏྟེ། ཛ་བ་རི་ཤུ་པ་ཅི་བ་ཏི་སྭཱ་ཧཱ། འདིས་ས་བླང་བར་བྱའོ། །ན་མོ་རཏྣ་ཏྲ་ཡཱ་ཡ། ན་མོ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ན་མ། ཛ་ལི་ཛ་ལི། ཙ་ལཱ་ར་ལེ། བ་བ་རེ། ར་ར་རེ་སྭཱ་ཧཱ། སྔགས་འདིས་ཁྲུས་བྱའོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་
སཏྭཱ་ཡ། མ་ཧཱ་སཏྭཱ་ཡ། ཏདྱ་ཐཱ། ན་མཿཤུ་ལམྦི། བསྟྲཾ་ཏ་དྷཱ་རཱ་རི་ཕ་བ་ནེ་སྭཱ་ཧཱ། གོས་ཀྱི་སྔགས་ཏེ་འདི་གོས་ལ་ཡོངས་སུ་བཟླས་ཏེ་བགོ་བར་བྱ་ཞིང་། དེ་བཞིན་དུ་བཅོམ་ལྡན་འདས་ལའང་དབུལ་བར་བྱའོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཏདྱ་ཐཱ། ན་མ་ཨུ་ཙྪུཥྨ་པ་ར་མ། ད་ཤ། ཤོ་དྷ་ན། ཤོ་དྷ་ཡ་སྭཱ་ཧཱ། གཅི་བ་དང་། བཤང་བ་དང་། མཆིལ་མ་དང་། མི་གཙང་བ་ཐམས་ཅད་འདིས་ཡོངས་སུ་ཕྱིས་ན་གཙང་མར་འགྱུར་རོ། །གཙང་སྦྲའི་སྔགས་སོ། །རྒྱ་སྤོས་ཞོའམ་སྲང་གཉིས། ཙནྡན་གཉིས། འདབ་མ་ཅན་གྱི་རུམ་རུ་གཉིས། གུར་གུམ་གཉིས། དྲི་འདི་རྣམས་བཅོམ་ལྡན་འདས་ལ་དབུལ་བར་བྱའོ། །ག་པུར་དང་། ཙནྡན་གྱི་བདུག་པའོ། །འདི་ལྟ་བུའི་ཆོ་གས་ཇི་སྐད་གསུངས་པའི་གནས་སུ་རས་རིས་ཞལ་ཤར་དུ་ཕྱོགས་པར་བཞུགས་སུ་གསོལ་ནས། ཁྲུས་གསུམ་བྱ་ཞིང་གོས་ལན་གསུམ་བརྗེས་ནས་རྟག་ཏུ་གསོ་སྦྱོང་ལ་གནས་པས་འབུམ་ཕྲག་དྲུག་བཟླས་པར་བྱའོ། །མཐར་པདྨ་དཀར་པོ་རེ་བཅོམ་ལྡན་འདས་ཀྱི་ཞབས་ཀྱི་དྲུང་དུ་ཡོངས་སུ་དོར་ཞིང་དབུལ་བར་བྱ་སྟེ་ཉི་མ་གསུམ་ལ་སྟོང་ཕྲག་བརྒྱད་དུའོ། །དེ་ནས་མཚན་མོ་གསུམ་དུ་སྨྱུང་བར་གནས་ཏེ་མཚན་ཐོག་ཐག་མི་སྨྲ་བར་པདྨ་མར་ལ་བཏགས་པ་རྣམས་ཀྱིས་སྦྱིན་སྲེག་བྱའོ། །དངོས་གྲུབ་ཀྱི་མཚན་ཉིད་དུ་འགྱུར་བ་ནི་རིག་པ་འཛིན་པ་རབ་ཏུ་གྲོལ་བ་རྣམ་པ་གསུམ་དུ་རྒྱུ་བར་བྱེད་དོ། །དེ་ནས་བཅོམ་ལྡན་འདས་གྲུབ་པར་འགྱུར་རོ། །རིག་པ་འཛིན་པར་འདོད་ན་རིག་པ་འཛིན་པར་འགྱུར་རོ། །ལྷ་མ་ཡིན་འདོད་ན་ལྷ་མ་ཡིན་དུ་འགྱུར་རོ། །རྒྱལ་སྲིད་འདོད་ན་ཐམས་ཅད་པའི་རྒྱལ་སྲིད་ཆེན་པོར་འགྱུར་རོ། །གང་འདོད་པ་དེ་ཐམས་ཅད་ཐོབ་པར་འགྱུར་རོ། །བཅོམ་ལྡན་འདས་མ་སྒྲོལ་མའི་རྩ་བའི་རྟོག་པ་ཡངས་པ་དང་ལྡན་པའི་ཏིང་ངེ་འཛིན་ངེས་པར་སྐྱེའོ། །རྐང་པ་གཅིག་པ་ཞེས་བྱ་བའི་རིག་པའི་རྒྱལ་པོ་ཡོངས་སུ་རྫོགས་སོ།། །།དེ་ནས་ཡང་བྱང་ཆུབསེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ཏིང་ངེ་འཛིན་གྱི་རྒྱལ་པོ་དེ་ཉིད་སྒོམ་
བཞིན་དུ། བཅོམ་ལྡན་འདས་མ་རིག་པའི་རྒྱལ་མོའི་རྟོག་པར་འཇུག་པ་ཞེས་བྱ་བའི་རིག་པའི་རྒྱལ་པོ་ཆེན་པོ་གསུང་བར་གྱུར་ཏོ། །དེ་ལ་འདི་རྣམས་སྔགས་ཀྱི་ཚིག་ཆེན་པོར་འགྱུར་ཏེ། ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ཛི་ཡ་ཤྲཱི་གརྦྷ་སྱ། སམྱཀྶཾ་བུདྡྷེ་སྱ། ན་མོ་མ་ཧེ་ཤྭ་རེ་སྭ། བོ་དྷི་སཏྭ་སྱ། ན་མཿ ཨཱི་ཤ་པྲ་བྷ་སྱ། བོ་དྷི་སཏྭ་སྱ། ན་མཿཨཱ་ཀཱ་ཤ་གརྦྷ་སྱ། བོ་དྷི་སཏྭ་སྱ། ན་མོ་བཛྲ་མ་ཏེ་སྱ། བོ་དྷི་སཏྭ་སྱ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། བྷ་ག་བ་ཏེ་ཧྲྀ་ད་ཡ། མཱ་བཱ་ཧ་ཡི་ཥྱཱ་མི། ཨོྃ་ཏ་ར་ཏ་ར། ཨོྃ་ཨོྃ་ཨོྃ་ཨོྃ་བྷུ་བ་ཨ་བྷ་ཡ་ཨ་བྷ་ཡ་བ་ར་དེ་ཨུ་ཙུཥྨ་ཏི་ཨུ་ཙུཥྨ་ཏི། སུ་ཁཱ་བ་ཏི། སུ་ཁཱ་བ་ཏི། ར་ར་ར་ར་ལ་ལ་ལ་ལ་ཙུ་ལུཥྐ་ཁ་ག །ཁ་ག །ཨཱ་གཙྪ་ཨཱ་གཙྪ་བྷ་ག་བ་ཏེ་མ་མ་བ་རཾ། དཱ་སྱ་སི། ཨ་བྷ་སྭ་ར། མ་པྲཱ་པྟ་བི་པུ་ལ་མ་ཏི་ས་མཱ་དྷི་བི་ཛ་ཏེ་སྭཱ་ཧཱ། འཇུག་པ་ཞེས་བྱ་བ་རིག་པའི་རྒྱལ་པོ་ཆེན་པོ་བཀླགས་པ་ཙམ་གྱིས་གྲུབ་པར་འགྱུར་བ་སྟེ་འཇིགས་པ་ཐམས་ཅད་སྲུང་བ་དང་། ཞིང་ཐམས་ཅད་དུ་ལས་རྣམས་བྱེད་དོ། །དེ་ནས་འདིའི་རས་རིས་ཀྱི་ཆོ་གར་འགྱུར་ཏེ་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་ཀུན་ནས་དཀར་བ་སྔར་གསུངས་པའི་རས་རིས་ཀྱི་མཚན་ཉིད་ཀྱི་རིན་པོ་ཆེའི་པདྨ་ལ་གནས་པ་ཕྱག་ན་པདྨ་དཀར་པོ་བསྣམས་པ། གཙུག་པུད་གྲོལ་བ། ཕྱག་ན་རིལ་བ་སྤྱི་བླུགས་བསྣམས་པའོ། །གཡས་དང་གཡོན་པ་དག་ཏུ་ཇི་ལྟར་རིགས་པ་བཞིན་ཏེ་གཡོན་གྱི་གཞོགས་སུ་གཞོན་ནུ་དཀར་པོ་ཕྱག་ན་པདྨ་བསྣམས་པ། བཅོམ་ལྡན་འདས་ལ་ཕྱག་འཚལ་བར་བྱེད་བཞིན་པ། འདྲིར་གཞུག་པར་བྱའོ། །གཡས་ཀྱི་གཞོགས་སུ་བཅོམ་ལྡན་འདས་མ་དཔལ་ཆེན་མོ་ཕྱག་ན་པདྨ་བསྣམས་པ། པདྨ་ལ་ཉེ་བར་འདུག་པ་འདྲིར་གཞུག་པར་བྱའོ། །གཡོན་གྱི་གཞོགས་སུ་སའི་ལྷ་མོ་རིན་པོ་ཆེ་སྣ་བཞིའི་གཞོང་པ་ཕྱག་ན་བསྣམས་པའོ། །ནམ་མཁའ་ལ་འོད་གསལ་གྱི་བྱང་ཆུབ་སེམས་དཔའ་དཀར་པོ་
མེ་ཏོག་གི་ཕྲེང་བ་ཡོངས་སུ་ཐོགས་པ་འདྲིར་གཞུག་པར་བྱའོ། །གཡས་ཀྱི་གཞོགས་སུ་སྒྲུབ་པ་པོ་ལག་ན་སྤོས་ཕོར་ཐོགས་པ་སྔར་བཞིན་ནོ། །རྣམ་པ་དེ་ལྟ་བུའི་རས་རིས་བྱས་ནས་སྔར་གསུངས་པའི་གནས་སུ་བཞུགས་ནས་མཆོད་པ་རྒྱ་ཆེན་པོ་བྱ་སྟེ། འོ་མ་དང་ནས་ཟན་བཟའ་ཞིང་རྩ་བའི་སྔགས་ཀྱིས་སྤྱན་དྲང་ངོ་། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ན་མཿ སརྦ་བུདྡྷ་བོ་དྷི་སཏྭེ་བྷྱཿ། ཏདྱ་ཐཱ། པཎྜ་པཎྜ་ལ་གྷུ་ཤུ་ཙི་བི་མ་ལེ་སྭཱ་ཧཱ། དཀྱིལ་འཁོར་གྱི་སྔགས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ན་མཿ སརྦ་བུདྡྷ་བོ་དྷི་སཏྭེ་བྷྱཿ། ཏདྱ་ཐཱ། ཨགྣི་ཛུ་ལུ་ཛུ་ལུ་ཧུ། ར་མ་མེ་སྭཱ་ཧཱ། དྲིའི་སྔགས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ན་མཿ སརྦ་བུདྡྷ་བོ་དྷི་སཏྭེ་བྷྱཿ། ཏདྱ་ཐཱ། དྷུ་བ་སིདྡྷི་བྲཧྨ་ཏེ་ཛོ་སྭཱ་ཧཱ། མེ་ཏོག་གི་སྔགས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ན་མཿ སརྦ་བུདྡྷ་བོ་དྷི་སཏྭེ་བྷྱཿ། ཏདྱ་ཐཱ། བི་པུ་ལ་ཏེ་ཛ་པྲཧྨ་ཤྭ་ར་སྭཱ་ཧཱ། བདུག་པའི་སྔགས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ན་མཿསརྦ་བུདྡྷ་བོ་དྷི་སཏྭེ་བྷྱཿ། ནི་དྷི་བི་པུ་ནི་ཨ་བྷ་ཡ་པྲ་ད་སྭཱ་ཧཱ། གཏོར་མའི་སྔགས་སོ། །འདི་ཉིད་མར་མེའི་སྔགས་སོ། །བུ་ཤེལ་ཙེ་དང་། བཱ་ལ་ཀ་དང་། ག་པུར་ཆ་མཉམ་པའི་དྲིའི་ཕྲེང་བ་དང་། ཀ་ར་བཱི་ར་དམར་པོའི་མེ་ཏོག་དང་། སྣ་མའི་མེ་ཏོག་ལག་པ་དང་། དཔལ་བཏགས་པ་དང་། སྲ་རྩི་པོག་དང་། ཤ་ལྱ་ཀཱི་དང་། བུ་རམ་སྦྱར་བའི་བདུག་པ་དང་། དཀར་གསུམ་གྱི་གཏོར་མ་དང་། བའི་མར་གྱི་མར་མེ་སྟེ་དེ་ལྟ་བུར་བྱས་ནས་འབུམ་ཕྲག་དྲུག་བཟླས་པར་བྱའོ། །མཐར་ཟླ་བ་ཉ་ལ་མཚན་མོ་གསུམ་དུ་སྨྱུང་བར་གནས་ཏེ་ཀ་ར་བཱི་རའི་མེ་ཏོག་ཞོ་དང་སྦྲང་རྩི་དང་མར་ལ་བཏགས་པ་རྣམས་ཀྱིས་སྟོང་ཕྲག་བརྒྱད་དུས་གསུམ་དུ་སྦྱིན་སྲེག་བྱ་སྟེ། དེ་ལྟ་བུའི་ཉི་མ་གསུམ་དུ་བྱའོ། །དེ་ནས་ཉི་མ་
གསུམ་པ་ལ་མཆོད་པ་རྒྱ་ཆེན་པོ་བྱས་ནས་ཇི་སྐད་བརྗོད་པའི་ཆོ་གས་བཅུ་གཉིས་ཡོངས་སུ་འགྱུར་བའི་ཁམ་ཕོར་ཞོ་དང་། སྦྲང་རྩི་དང་། འོ་ཐུག་ཁམ་ཕོར་བཅུ་ཀུ་ཤའི་ཁྲེས་ལ་འདུག་སྟེ། སྲོད་ནས་བརྩམས་ནས་ཇི་སྲིད་དངོས་གྲུབ་ཀྱི་མཚན་མ་མ་བྱུང་གི་བར་དེ་སྲིད་དུ་བཟླས་པ་བྱའོ། །ལྷའི་མེ་ཏོག་གི་ཆར་འབབ་པ་དང་། འབྲུག་དང་རྔ་བོ་ཆེ་རྣམས་ཀྱང་སྒྲ་སྒྲོགས་པ་དང་། རས་རིས་འགུལ་བ་དང་། མར་མེའི་རྩེ་མོ་འཕེལ་ལོ། །དེ་ནས་གྲུབ་པ་ཡིན་ཏེ་ས་ཐམས་ཅད་ལ་དབང་བའི་རྒྱལ་པོར་འགྱུར་རོ། །གང་མངོན་པར་འདོད་ཀྱང་རུང་སྟེ་ཐམས་ཅད་ཐོབ་པར་བྱེད་དོ། །བཅོམ་ལྡན་འདས་མ་འཕགས་མ་སྒྲོལ་མའི་ཡངས་པ་དང་ལྡན་པའི་ཏིང་ངེ་འཛིན་གྱི་རྒྱལ་པོའི་རྩ་བའི་རྟོག་པར་འཇུག་པ་ཞེས་བྱ་བའི་རིག་པའི་རྒྱལ་པོ་ཆེན་པོ་ཡོངས་སུ་རྫོགས་སོ།། །།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་སེམས་ཅན་རྗེས་སུ་གཟུང་བའི་ཆེད་དུ་སླར་ཡང་ཏིང་ངེ་འཛིན་གྱི་རྒྱལ་པོ་དེ་ཉིད་སྒོམ་བཞིན་དུ་བཅོམ་ལྡན་འདས་མ་འཕགས་མ་སྒྲོལ་མའི་རྟོག་པའི་རྒྱལ་པོ་ཆེན་པོར་སྐྱེ་བོ་དབུལ་པོ་རྗེས་སུ་གཟུང་བའི་ཆེད་དུ་དཀར་མོ་ཆེན་མོའི་རིག་པ་བཀའ་སྩལ་ཏོ། །དེ་ལ་འདི་རྣམས་ནི་དོན་ཐམས་ཅད་སྒྲུབ་པར་བྱེད་པའི་རིག་པའི་སྔགས་ཀྱི་ཚིག་རྣམས་སུ་འགྱུར་རོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཀྲྀཥྞ་ཛི་ནཾ་བ་ར་དྷ་ར། ཀ་མ་ལཱ་ཡ། ཏཱིཀྵཾ་པདྨ་ཨ་ས་ན་སྠཾ་ཨ་བྷ་ཡ་པྲད། མ་གྲ་ཧ་ཏཾ། བྷཱ་ཥ་སྭཛྫ་ཊ་མ་ཀུ་ཊ་དྷ་རི། ཎོོ་པདྨ་བཪྞ་ཨཱཪྱ་ཨ་བ་ལོ་ཀིི་ཏེ་ཤྭ་རི་མ་ཧཾ་ས་ར་ཎཾ་པྲ་པདྱ། ཏདྱ་ཐཱ། ཤྭེ་ཏེ་བི་ཛ་ཡེ་ཤྭེ་ཏ་བསྟྲ། ཤྭེ་ཏ་བྷུ་ཛེ། ཤྭེ་ཏ་པདྨ་ཨ་ལཾ་ཀཱིརྟ་ཛ་ཡེ་བི་ཛ་ཡེ། ཨ་བྷ་ཡེ་ཤྭེ་ཏཾ་ཨཾ་ཤུ་མ་བྷ་ཡ་པྲ་ཏེ་ཤྭེ་ཏཾ་ཙ་ག་ག་ན་ཤུདྡྷཾ་ཤྭེ་ཏཾ་བིདྱཱ། ས་མ་པྲ་ས་མ་པྲ་བྷེ་ཤྭེ་ཏེ་བྷྱཿ། བྷ་བ་སྱ། ཤཀླཱཾ་ཤུ་རཾ་བྷ་བཱནྟ་རེ་པཎྜ་ར། པ་ཊ་པ་ཊཱ་ཡ་ར་ར་ར་ར་ར་ཡ་བི་ཛ་ཡེ་སྭཱ་ཧཱ། པ་རི་ཀླཱི་བ་ལེ་བ་རེ་བ་རཱ་ཡ་སྭཱ་ཧཱ། འདི་ནི་མཐུ་ཆེན་པོ་ཐོབ་པའི་དཀར་མོ་ཆེན་མོ་ཞེས་བྱ་བའི་རིག་པའི་རྒྱལ་མོ་སྟེ་ལས་ཐམས་ཅད་བྱེད་མ། དབུལ་བ་དང་། ནད་རབ་ཏུ་
ཞི་བར་བྱེད་མ། དོན་ཐམས་ཅད་སྒྲུབ་པར་བྱེད་མ། དོན་ཐམས་ཅད་ཡོངས་སུ་རྫོགས་པར་བྱེད་མ་སྟེ། གང་འདི་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་བྱང་ཆུབ་ཏུ་སེམས་བསྐྱེད་པས་རྟག་ཏུ་དྲན་པར་བྱེད་པ་དང་། མཆོད་པ་བྱེད་པར་འགྱུར་རོ། །སྐྱེ་བོ་ཡོངས་སུ་སྐྱོབ་པར་བྱེད་པར་འགྱུར་ཞིང་སྐྱེ་བོ་ཐམས་ཅད་དགའ་བར་ཡང་འགྱུར་རོ། །དེ་ནས་འདི་ཡི་ཆོ་ག་ནི་སྔར་བརྗོད་པའི་ཆོ་གས་ཁྲུ་བཅུ་པའི་རས་བྱེད་དུ་བཅུག་ནས་ཁ་ཚཪ་བཅད་པ་ལ་ཙནྡན་གྱི་ཁུ་བས་མནན་པར་བྱའོ། །ཁ་དོག་མ་འདྲེས་པས་དྲིའི་ཁུ་བས་གནུར་བས་བཅོམ་ལྡན་འདས་བྲི་བར་བྱའོ། །སྟོན་ཀའི་སྤྲིན་ལྟར་དཀར་བ་ཕྱག་ན་རིལ་བ་སྤྱི་བླུགས་ཐོགས་པ། ཕྱག་གཡས་ཀྱིས་པདྨ་བསྣམས་པ། རལ་པ་གྱེན་དུ་བརྫེས་པ་པདྨའི་གདན་གོས་དཀར་པོ་ཕྲེང་བ་དཀར་པོའི་རྒྱན་གྱིས་བརྒྱན་པ། པདྨའི་ཕྲེང་བ་བཅུ་དྲུག་རྣམས་ཀྱིས་བརྒྱན་པ། ཐམས་ཅད་དཀར་པོ་རྣམས་ཀྱིས་ཐམས་ཅད་དཀར་པོའོ། །བྱང་ཆུབ་སེམས་དཔའ་བཅུ་དྲུག་འོག་ཏུ་བྲི་བར་བྱའོ། །འཇིག་རྟེན་སྐྱོང་བ་བཞི་པོ་རྣམས་ཕྱོགས་འཁོར་རྣམས་སུའོ། །སའི་ལྷ་མོ་འདི་བྲི་བར་བྱ་སྟེ། ཕྱག་གཡས་ཀྱིས་ཙཾ་གཽ་ཊ་ཀ་ཐོགས་པའོ། །འཕགས་པ་སྤྱན་རས་གཟིགས་དབང་ཕྱུག་གི་སྤྱི་གཙུག་གི་ཆ་ལ་དེ་བཞིན་གཤེགས་པ་པདྨའི་ཕལ་པོ་ཆེ་གཡོན་དུ་དེ་བཞིན་གཤེགས་པ་མི་བསྐྱོད་པ་མི་འཇིགས་པ་རབ་ཏུ་སྦྱིན་པ་གཡོན་པས་ཆོས་གོས་བསྣམས་པ། གསེར་མདོག་ཕྱག་ནས་འོད་ཟེར་འཕྲོ་བར་བྱེད་བཞིན་པའོ། །བྱང་ཆུབ་སེམས་དཔའ་ཐམས་ཅད་ཀྱང་འོད་ཟེར་གྱི་ཕྲེང་བ་ཅན་རྣམ་པར་བཀྲ་བའི་རྒྱན་ཐམས་ཅད་ཀྱིས་ལུས་བརྒྱན་པའོ། །སྒྲུབ་པ་པོ་ཡང་གཡས་ཕྱོགས་སུ་ཆ་བྱད་དང་རྣམ་པ་ཇི་ལྟ་བ་བཞིན་དུ་འདྲིར་གཞུག་པར་བྱའོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། སྭེ་ཏེ་སྭེ་ཏེ་སྭེ་ཏེ་སྭེ་ཏ་བྷུ་ཛེ་པ་རཱ་ཀྲ་མེ་བི་ཛ་ཡ་བི་ཙེ་དྷུ་ཏེ་སྭཱ་ཧཱ། དྲི་དཀར་པོའི་ཆུས་དཀྱིལ་འཁོར་ཉེ་བར་བྱུག་པར་བྱའོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨབ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ན་མོ་མ་ཧཱ་སྭ་ཧཱ་ཡ།
སྭེ་ཏ་གནྡྷ་བི་ཤུདྡྷ་ཡ། སུ་གནྡྷཱ་ཡ་སྭཱ་ཧཱ། དྲིའི་སྔགས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ན་མོ་མ་ཧཱ་སྭེ་ཏཱ་ཡ། ཛྱོ་ཏི་སྨ། ཏཱི་ཛྱེ་ཏི་པ་ར་སྭཱ་ཧཱ། མེ་ཏོག་གི་རིག་པའོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ན་མོ་མ་ཧཱ་སྭེ་ཏཱ་ཡ། སྭེ་ཏ་པ་རཱ་ཡ། དྷུ་པ་པ་རཱ་ཡ་སྭཱ་ཧཱ། དཀར་པོ་བསྲེས་པ་དང་ལྷན་ཅིག་པའི་བདུག་པ་དབུལ་བར་བྱའོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ན་མོ་མ་ཧཱ་སྭེ་ཏཱ་ཡ། བ་ལ་བཱིཪྻ་པྲ་བ་ར་བ་ར་ཤུཀླླཾ་ཤུཀླློད་ན་བ་ར་པྲི་ཡཱ་ཡ། བ་ར་བ་ར་བ་ར་བ་ར་ཤུཀླེ་ཤུཀླཱ་ཤུཀླེ་སྭཱ་ཧཱ། གཏོར་མའི་སྔགས་ཏེ་ལྷག་མ་རྩ་བའི་རིག་པ་ཉིད་ཀྱིས་དབུལ་བར་བྱའོ། །མེ་ཏོག་དང་། བདུག་པ་དང་། དྲི་དང་། ཕྲེང་བ་ཉིད་དཀར་པོའི་རྣམ་པ་ཞོ་དང་སྦྲང་རྩི་དང་མར་ལ་བཏགས་པ་རྣམས་ཀྱིས་སྦྱིན་སྲེག་བྱའོ། །དཀར་པོའི་ཕྱོགས་ཀྱི་ཚེས་གཅིག་ནས་བརྩམས་ཏེ་ཇི་སྲིད་ཟླ་བ་ཉའི་བར་དུ་ཏིལ་མར་ལ་སྟོང་ཕྲག་བརྒྱད་ཀྱི་སྦྱིན་སྲེག་དང་རིག་པ་འཛིན་པ་གོས་དཀར་པོ་བགོས་ཏེ་ཙཱ་རུའི་སྟོན་མོ་བཟའ་ཞིང་མཆོད་ཕྱིར་ཐོགས་དཀར་པོ་འཆང་བ་ཀུ་ཤའི་ཁྲེས་ལ་ཉེ་བར་འདུག་པས་སྦྱིན་སྲེག་ལ་སོགས་པ་བྱའོ། །མཆོད་པ་ཆེན་པོ་བྱས་ནས་ཉིན་མཚན་དུ་གཏོར་མའི་མཆོད་པ་ལ་སོགས་པ་བྱའོ། །སྲོད་ནས་བརྩམས་ནས་ཇི་སྲིད་དངོས་གྲུབ་ཀྱི་མཚན་མ་བྱུང་བའི་བར་དུ་བཟླས་པ་བྱའོ། །ལྷའི་རྔ་བོ་ཆེའི་སྒྲ་དབྱངས་ཐོགས་པ་དང་། ས་རབ་ཏུ་གཡོ་བ་དང་། ནམ་མཁའ་ལ་མེ་ཏོག་གི་ཆར་དང་། རས་རིས་ལས་ཀྱང་འོད་ཟེར་འབྱུང་བར་འགྱུར་རོ། །བར་སྐབས་འདིར་བཅོམ་ལྡན་འདས་བྱང་ཆུབ་སེམས་དཔའ་འབྱོན་ཏེ་དམྱལ་བ་དང་ཡི་དགས་དང་། དུད་འགྲོ་རྣམས་སྐད་ཅིག་དེ་ལ་ཞི་བར་འགྱུར་རོ། །བྱོན་པ་ལ་མཆོད་ཡོན་དབུལ་བར་བྱའོ། །དེ་ནས་བཅོམ་ལྡན་འདས་གསུང་བར་འགྱུར་ཏེ་ཅི་འདོད་པ་དེ་རྣམས་སྦྱིན་པར་བྱེད་དོ། །རིག་པ་འཛིན་པ་དེ་ཉིད་དམ། རིག་པ་འཛིན་པའི་རྒྱལ་པོ་ཉིད་དམ། རྒྱལ་སྲིད་ཆེན་པོར་
ལུས་ཡོངས་སུ་རྗེ་བ་ཉིད་དམ། ས་འོག་ཏུ་འཇུག་པ་ཉིད་དམ། མིག་སྨན་དང་། ལྡོང་རོས་དང་། གི་ཝང་ངམ། ཐོས་པ་འཛིན་པ་ཉིད་དམ། མངོན་པར་ཤེས་པ་ལྔ་ཡང་རུང་སྟེ་གང་དོན་དུ་གཉེར་བ་དེ་རྙེད་དོ། །བཅོམ་ལྡན་འདས་མ་འཕགས་མ་སྒྲོལ་མ་རལ་པ་གྱེན་བརྫེས་ཀྱི་རྩ་བའི་རྟོག་པ་ཡངས་པ་དང་ལྡན་པའི་ཏིང་ངེ་འཛིན་གྱི་རྒྱལ་པོ། དཀར་མོ་ཆེན་མོའི་རྟོག་པ་ཡོངས་སུ་རྫོགས་སོ།། །།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ཡངས་པ་དང་ལྡན་པའི་ཏིང་ངེ་འཛིན་གྱི་རྒྱལ་པོ་སེམས་ཅན་ཐམས་ཅད་ལ་ཀུན་དུ་གཟིགས་པར་བྱས་ནས་བཅོམ་ལྡན་འདས་རིག་པའི་རྒྱལ་པོ་ཐམས་ཅད་ཀྱི་རྗེས་སུ་སོན་པ་པོ་ཞེས་བྱ་བའི་རིག་པའི་རྒྱལ་པོ་བཀའ་སྩལ་ཏོ། །དེ་ལ་འདི་རྣམས་ནི་གྲུབ་པའི་སྔགས་ཀྱི་ཆོ་ག་རྣམས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། བི་མུཀྟི་ཙེ་ཏ་པཱ་ཡ། བི་ཛ་ཡ། པ་རཱ་ཀྲ་མ་ཡ། ཨ་པྲ་ཏི་ཧ་ཏ། གླཱི་ཡཱ་ཡ། ཨ་པ་རི་མི་ཏ། དྷརྨྨ་དེ་ཤ་ཧ་ནཱ་ཡ། དུཿཁ་བི་ཤོ་དྷ་ནཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཨརྟྟ་པ་རི་དྲ་ན་ཧྲྀ་ད་ཡ་མཱ་དྷ་ཡི་ཥྱ་མི་མི་ཏི། ཏདྱ་ཐཱ། ལ་བེ་ཨཱ་ལཾ་བེ་ལམྦ་པྲ་མུཀྟ་ལམྦ་སྠི་རེ། ལམྦ་བི་དྱཱ་ཡ་ཏེ། ན་མཿཀཱ་རུ་ནི། ཀཱ་རུ་ཎེ། ཀཱ་རུ་ཎ་ཡ་ཏི། བོ་མུ་ནེ་ཀུ་རུ་ཎཱནྡྷ་ཧྲྀ་ད་ཡེ་ཀཱ་རུ་ཎནྷྲ་ན་མ་སྟུ་ཏེ། ཤཱནྟ་མུཀྟེ་ཙ། ཤཱ་ནེ་ཀ་ཡ་བི་བོ། །སྟ་ཏ་ཤཱནྟ་པྲ་བྷཱ་ཏེ། ནི་ཏྱཾ་བ་ག་བ་ཏྱ། ན་མ་སྟུ་ཏེ། སུ་རུ་སུ་རུ། ཨཱ་གཙྪ་ཨཱ་གཙྪ་བྷ་ག་བཱ་ན་མ་མ་བ་རཾ་དཱི་སྱ་སི། དུཿཁི་ཏཱ་ནཱ་མ་ས་ར་དྲི་ཎི་ཀ་རཾ་སྭཱ་ཧཱ། འདི་ནི་མཐུ་ཆེན་པོ་ཐོབ་པ་སེམས་ཅན་ཐམས་ཅད་མི་འགྲོ་བར་བྱེད་པ་རིག་པའི་རྒྱལ་པོ་ཆེན་པོ་དྲན་པ་ཙམ་གྱིས་ཕྱི་བཞིན་རྗེས་སུ་འབྲང་བར་གྱུར་པ། ཉམ་ཐག་པ་རྣམས་ཡོངས་སུ་སྐྱོབ་པར་བྱེད་པ། ངན་འགྲོ་རྣམ་པར་ཟློག་པར་བྱེད་པ་བཀླགས་པས་གྲུབ་པ། མདོར་ན་འཇིགས་པ་ཐམས་ཅད་ལ་དྲན་པ་ཙམ་གྱིས་འདིའི་གྲོགས་བརྒྱད་སྲུང་བ་ལ་སྦྱོར་བ། རིག་པའི་རྒྱལ་པོ་
འདི་རྗོད་པར་བྱེད་པ་དང་། སྒྲུབ་པར་བྱེད་པ་དང་། ཡོངས་སུ་འཇུག་པར་བྱེད་པ་དེ་ནམ་ཡང་ངན་འགྲོ་ལོག་པར་ལྟུང་བར་མི་འགྱུར་རོ། །དབུལ་པོར་གྱུར་པའི་རིགས་ཀྱི་བུ་གང་ལ་ལ་བྱང་ཆུབ་ཏུ་སེམས་བསྐྱེད་དེ་ཀློག་པར་བྱེད་བཟླས་པར་བྱེད། སྒྲུབ་པར་བྱེད་སེམས་ལ་རྗེས་སུ་ཆགས་པར་བྱེད་པ་ཡང་དེ་ཤི་འཕོས་ནས་བདེ་བ་ཅན་དུ་སྐྱེ་བར་འགྱུར་རོ། །དེ་ནས་འདིའི་སྒྲུབ་ཐབས་ཀྱི་ཆོ་ག་ནི་བཅོམ་ལྡན་འདས་སྤྱན་རས་གཟིགས་དབང་ཕྱུག་བྱོན་པ་བྲི་བར་བྱ་སྟེ་མི་འཇིགས་པ་སྦྱིན་པ། རལ་པ་གྱེན་དུ་བརྫེས་པ། སྐུ་ལ་སྐྱེས་བུ་ཆེན་པོའི་མཚན་གྱིས་བརྒྱན་པ། སྤྱན་གསུམ་པ། ཟླ་བའི་འོད་ཟེར་རབ་ཏུ་འབར་བའི་སྐུ། འཇིགས་པ་བརྒྱད་པོ་ཐམས་ཅད་སྐྱོབ་པ། བཅོམ་ལྡན་འདས་འོད་དཔག་མེད་དབུ་ལ་བཞུགས་པ། མཆོད་ཕྱིར་ཐོགས་དཀར་པོ་ཅན་བྲི་བར་བྱའོ། །སྒྲུབ་པ་པོ་སྔར་བཞིན་དུའོ། །རྣམ་པ་འདི་ལྟ་བུའི་རས་རིས་བྲིས་ནས་མཆོད་པ་ཆེན་པོ་བྱ་སྟེ། འདི་ཉིད་ཀྱིས་དྲི་དང་མེ་ཏོག་དང་། བདུག་པ་དང་། གཏོར་མ་ཆོ་གས་དབུལ་ལོ། །གང་བྱེད་པ་ལ་གཅིག་ཏུ་དཔའ་བས་རིག་པའི་རྒྱལ་པོ་ཆེན་པོ་འདི་དུས་མ་ཡིན་པར་གཞོལ་ལོང་ལ་གནས་པས་ཀུ་ཤའི་ཁྲེས་ལ་ཉེ་བར་འདུག་སྟེ་བྱམས་པའི་བདག་ཉིད་ཅན་ཉིད་ཀྱིས་སེམས་ཅན་ཐམས་ཅད་ཀྱི་རྗེས་སུ་སོན་པས་སྟོང་ཕྲག་བརྒྱད་བཟླས་པ་བྱའོ། །དེ་ནས་གྲུབ་པར་འགྱུར་ཏེ་གང་འདོད་པ་དེ་ཐམས་ཅད་དང་། ལས་ཕྲན་ཚེགས་ལ་སོགས་པ་བྱེད་དོ། །ཆུས་དུག་འཇོམས་པར་བྱེད་དོ། །ཀུ་ཤས་བྱབས་པས་རིམས་ཉིན་གཅིག་པའམ། ཉིན་གཉིས་པའམ་ཉིན་བཞི་པ་ལ་སོགས་པ་འཇོམས་པར་བྱེད་དོ། །སྔགས་བཟླས་པ་ཉིད་མེ་ཏོག་ལ་ཡོངས་སུ་བཟླས་ཏེ་གང་ལ་བྱིན་པ་དེ་དབང་དུ་འགྱུར་རོ། །མདོར་ན་བྱ་བས་པས་ནད་ཐམས་ཅད་འཇོམས་པར་བྱེད་དོ། །འདིའི་སྒྲུབ་ཐབས་སུ་གྱུར་པ་ནི་རས་རིས་སྔར་བརྗོད་པའི་གནས་སུ་བཞུགས་སུ་གསོལ་ནས་འབུམ་བཟླས་སོ། །མཐར་མཚན་མོ་གཅིག་སྨྱུང་བར་གནས་པར་གནས་པས་ཕྱོགས་སྐྱོང་རྣམས་ལ་གཏོར་མ་དབུལ་ཏེ། གཏོར་མ་ནི་དཀར་གསུམ་དུ་འགྱུར་རོ། །མཆོད་པའི་
ཆོ་ག་བྱས་ནས་ཀུ་ཤའི་ཁྲེས་ལ་ཉེ་བར་འདུག་སྟེ་སྲོད་ནས་བརྩམས་ནས། ཇི་སྲིད་དངོས་གྲུབ་ཀྱི་མཚན་མར་གྱུར་གྱི་བར་དེ་སྲིད་དུ་བཟླས་པར་བྱའོ། །རས་རིས་རབ་ཏུ་འགུལ་བ་དང་། མར་མེའི་རྩེ་མོ་འཕེལ་ན་ཐམས་ཅད་ལ་དབང་བའི་རྒྱལ་པོར་འགྱུར་རོ། །མ་གྲུབ་ན་ཡུལ་རྙེད་དོ། །མི་འཇིགས་པ་ཐམས་ཅད་རབ་ཏུ་སྦྱིན་ནོ། །བཟླས་པས་སེམས་ཅན་ཐམས་ཅད་དབང་དུ་བྱེད་དོ། །ནད་ཐམས་ཅད་རབ་ཏུ་ཞི་བར་བྱེད་དོ། །འཆིང་བ་ཐམས་ཅད་གཅོད་པར་བྱེད་དོ། །ཡང་ན་དྲན་པས་འགྲོ་བར་བྱེད་དོ། །བཅོམ་ལྡན་འདས་མ་འཕགས་མ་སྒྲོལ་མའི་རྩ་བའི་རྟོག་པ་ཡངས་པ་དང་ལྡན་པའི་ཏིང་ངེ་འཛིན་གྱི་རྒྱལ་པོར་སེམས་ཅན་ཐམས་ཅད་རྗེས་སུ་སོན་པར་བྱེད་པ་པོ་ཞེས་བྱ་བའི་རིག་པའི་རྒྱལ་པོ་ཆེན་པོ་རྫོགས་སོ།། །།དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ཡངས་པ་དང་ལྡན་པའི་ཏིང་ངེ་འཛིན་གྱི་རྒྱལ་པོ་སྒོམ་བཞིན་དུ་གསེར་འོད་ཅེས་བྱ་བའི་རིག་པ་ཆེན་པོའི་རྟོག་པའི་རྒྱལ་པོ་ཆེན་པོར་བཅོམ་ལྡན་འདས་མའི་ཡང་རྟོག་པའི་རྒྱལ་པོ་ཆེན་པོར་བཀའ་སྩལ་ཏོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། པྲ་ཛྭ་ལི་ཏ་ཧ་སྟ་ཀ་མཎྜ་ལུ་པྲི་ཡཱ་ཡ། ཏདྱ་ཐཱ། སུ་ར་སྱ་ཨ་མྲྀ་ཏ་ཨ་པྲ་ཏི་ཧ་ཏེེ། བེ་བེ་ཙ་ཙ་རེ་ཙརྠ་རེ་བེ་བེ་རུ་རུ་བེ་རུ་རུ་དྷྭེ་ཐེ་ཐེ། ས་ར་དྷྭེ། ས་ར་ས་ར་དྷྭི། གུ་གུ་མེ་གྷ་ནེ་གྷ་ན་གྷ་ནེ། ཨ་པྲ་ཏི་ཧ་སྟེ་བུདྡྷ་ས་ཏྱཾ་དྷ་རྨྨ་ས་ཏྱཾ་སཾ་གྷ་ས་ཏྱཾ་ཨུ་པ་རི་སཏྱེ་ན་བྷ་ག་བཱ་ན་ས་མ་ཡ་མ་ནུ་སྨ་ར། པདྨ་གརྦྷ་སྭཱ་ཧཱ། པདྨ་སུ་བཪྞ་ཏི་སྭཱ་ཧཱ། པདྨ་ཛ་སྭཱ་ཧཱ། པདྨ་པྲི་ཡཱ་ཡ་སྭཱ་ཧཱ། པདྨ་སུ་ཏྲི་ཏིཥྛ་ཏ་ཙ་ར་ཎཱ་ཡ་སྭཱ་ཧཱ། སརྦ་བྷ་ཡ་ད་ད་སྭཱ་ཧཱ། ཨཱཪྱ་ཨ་མི་ཏཱ་བྷ་ས་མཱ་ཛྙཱ་པ་ཡ་ཏི་སྭཱ་ཧཱ། འདི་ནི་མཐུ་ཆེན་པོ་ཐོབ་པ་གསེར་འོད་ཅེས་བྱ་བའི་རིག་པའི་རྒྱལ་པོ་ཆེན་པོ་སངས་རྒྱས་དུ་མས་རྗེས་སུ་གནང་བ་གསེར་བཞིན་དུ་སེམས་ཅན་ཐམས་ཅད་ཉེ་བར་འཚོ་བར་བྱེད་པ་བཀླགས་པས་གྲུབ་པ་གནོད་སྦྱིན་ཐམས་ཅད་ལས་
གྲོལ་བར་བྱེད་ཅིང་འཕོ་བར་བྱེད་པ། བཟླས་པ་ཙམ་གྱིས་ནད་སེལ་བར་བྱེད་པའོ། །དེ་ནས་འདིའི་རས་རིས་ཀྱི་ཆོ་གར་འགྱུར་ཏེ། བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་གསེར་གྱི་མདོག་ལྟར་སྣང་བ་རལ་པ་གྱེན་དུ་བརྫེས་བ། ཕྱག་གཡས་པས་མི་འཇིགས་པ་སྦྱིན་པ། པདྨའི་ཕྲེང་བས་སོ་སོར་བརྒྱན་པ་རིལ་བ་སྤྱི་བླུགས་ཕྱག་ན་བསྣམས་པ། གོས་དཀར་པོ་ཅན། བཞིན་རབ་ཏུ་འཛུམ་པ། ཞབས་གཉིས་པདྨ་ལ་གནས་པའོ། །སྒྲུབ་པ་པོ་ཡང་སྤོས་ཕོར་ལག་ན་ཐོགས་པ་སྟེ་སྔར་བཞིན་ནོ། །དེ་ལྟ་བུའི་རས་རིས་ཀྱི་ཆོ་ག་བྱས་ནས་སྔར་བརྗོད་པའི་གནས་སུ་བཞུགས་ནས་འབུམ་ཕྲག་ལྔར་བཟླས་པར་བྱའོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། བོ་དྷི་སཏྭཱ་ཡ། མ་ཧཱ་སསྭཱ་ཡ། ཛ་ལེ་ཛ་ལེ་ད། ཤུ་ཙི་དུརྦ་ཙེ་ཨ་པྲ་དེ་ཤུ་ཙི་ནི་པྲ་བྷུ་ཏེ་སྭཱ་ཧཱ། །ཉེ་བར་བྱུག་པའི་སྔགས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། པདྨ་གརྦྷེ། སུ་གནྡྷ་ཡ། མུ་རུ་སུ་རུ་སྭཱ་ཧཱ། དྲིའི་སྔགས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། བྷུ་བཿབྷུརྦྷུ་བ། བིདྱཱ་ཙནྡྲ་ཙ་ལེ་ཙ་ལེ་སྭཱ་ཧཱ། མེ་ཏོག་གི་སྔགས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། པདྨ་ཤྲི་ཡེ་བར་བ་རི་ལེ་སྭཱ་ཧཱ། བདུག་པའི་སྔགས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཨ་མྲྀ་ཏེ་ཨ་མྲྀ་ཏེ་ག་ཧྭ་རེ་སུ་མུ་ཁེ་སྭཱ་ཧཱ། གཏོར་མའི་སྔགས་སོ། །དེ་ལྟར་སྔ་མ་བཞིན་དུ་བྱས་ཏེ། ཨ་ག་རུའི་སྦྱིན་སྲེག་གིས་གང་འདོད་པ་དེ་རྙེད་དོ། །ཙནྡན་གྱི་སྦྱིན་སྲེག་གིས་འགུགས་སོ། །སྣ་མའི་མེ་ཏོག་གི་སྦྱིན་སྲེག་གིས་སྐྱེ་བོ་ཐམས་ཅད་དགའ་བར་འགྱུར་རོ། །ཆོ་འཕྲུལ་གྱི་ཕྱོགས་ཀྱི་ཚེས་གཅིག་ནས་བརྩམས་ཏེ་རས་རིས་ཀྱི་སྤྱན་སྔར་མཆོད་པའི་ཆོ་གས་ཐུན་གསུམ་དུ་སྟོང་ཕྲག་བརྒྱད་བཟླས་པར་བྱས་ཏེ་ཇི་སྲིད་ཟླ་བ་ཉ་བའི་བར་
དུའོ། །མཚན་མོ་གསུམ་སྨྱུང་བར་གནས་པར་རྒྱ་མཚོར་འགྲོ་བའི་ཆུ་ཀླུང་གི་འགྲམ་མམ། ཆུ་གླིང་དུ་རས་རིས་བཞུགས་ནས་མཆོད་པའི་ཆོ་ག་བྱ་སྟེ། སྲོད་ནས་བརྩམས་ནས་ཇི་སྲིད་དངོས་གྲུབ་ཀྱི་མཚན་མར་འགྱུར་བ་དེ་སྲིད་དུ་བཟླས་པར་བྱའོ། །རས་རིས་རབ་ཏུ་འགུལ་བའམ། མར་མེའི་རྩེ་མོ་མངོན་པར་འཕེལ་ལམ། ནམ་མཁའ་ལ་མེ་ཏོག་གི་ཆར་འབབ་བམ། འབྲུག་གི་སྒྲ་ཐོས་པའང་རུང་སྟེ་རས་རིས་འགུལ་བས་ནི་རྒྱལ་པོ་ཆེན་པོར་འགྱུར་རོ། །མར་མེ་འཕེལ་ན་གྲོང་གི་རྗེ་བོར་འགྱུར་རོ། །མེ་ཏོག་བབས་ན་ཡུལ་གྱི་བདག་པོར་འགྱུར་རོ། །འབྲུག་གི་སྒྲས་གྲོང་བཅུ་དྲུག་སོ་སོར་རྙེད་དོ། །མ་གྲུབ་ན་ལས་དང་ཡོ་བྱད་ཐམས་ཅད་ཡང་དག་པར་འབྱོར་པར་འགྱུར་རོ། །ནད་ཐམས་ཅད་སྤངས་པར་འགྱུར་རོ། །བཅོམ་ལྡན་འདས་མ་འཕགས་མ་སྒྲོལ་མ་རལ་པ་གྱེན་བརྫེས་ཀྱི་རྩ་བའི་རྟོག་པ་ཡངས་པ་དང་ལྡན་པའི་ཏིང་ངེ་འཛིན་གྱི་རྒྱལ་པོ་གསེར་འོད་ཅེས་བྱ་བའི་རིག་པའི་རྒྱལ་པོ་ཆེན་པོ་ཡོངས་སུ་རྫོགས་སོ།། །།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་སླར་ཡང་ཡངས་པ་དང་ལྡན་པའི་ཏིང་ངེ་འཛིན་གྱི་རྒྱལ་པོ་སྒོམ་བཞིན་དུ། བཅོམ་ལྡན་འདས་མ་རིག་པའི་རྒྱལ་པོ་ཆེན་པོ་རྟོག་པའི་རྒྱལ་པོ་ཆེན་པོའི་མཐུ་ཡང་དག་པར་བསྟན་པའི་ཆེད་དུ་སངས་རྒྱས་བཅུ་གཉིས་ཀྱིས་མངོན་པར་དབང་བསྐུར་བ་ཞེས་བྱ་བའི་རིག་པའི་རྒྱལ་པོ་ཡིད་ལ་བྱས་ནས་བཀའ་སྩལ་པ། ན་མོ་རཏྣ་ཏྲ་ཡཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ས་ཊཱ་ས་ཊ་ས་ར་ས་རཱ་ཎི་ཤུདྡྷ་བི་ཏྲི་མུ་ཁེ་བི་ཛ་ཡེ་སྭཱ་ཧཱ། འདི་ནི་མཐུ་ཆེན་པོ་ཐོབ་པ་རིག་པའི་དབང་བསྐུར་བ་ཞེས་བྱ་བ་རིག་པའི་རྒྱལ་པོ་ཆེན་པོ་སྟེ། གང་ལ་ཀློག་པར་བྱེད་ཟློས་པར་བྱེད་པ་དེས་སངས་རྒྱས་བྱེ་བ་ཕྲག་བཅུ་གཉིས་ལ་ཕྱག་བྱས་པར་འགྱུར་རོ། །འདི་རྟག་ཏུ་བཟླས་པས་ངན་འགྲོ་ལོག་པར་ལྟུང་བ་ཐམས་ཅད་དུ་མི་འགྱུར་རོ། །སྐྱེ་བ་བརྒྱ་ཕྲག་བཅུ་གཉིས་སུ་སྐྱེ་བ་དྲན་པར་འགྱུར་རོ། །དུས་ཐམས་ཅད་མངོན་པར་ཤེས་པ་ལྔ་དང་ཐུན་
མཚམས་གསུམ་དྲན་པར་འགྱུར་རོ། །དེའི་ནད་ཐམས་ཅད་དང་ཤ་ཟ་ལ་སོགས་པ་རྣམས་དང་། སྲིན་པོ་ལུས་ལ་འཕོ་བར་མི་འགྱུར་ཏེ་བསྐལ་པ་བྱེ་བ་བརྒྱ་ཕྲག་ཏུ་ཡང་དེ་ལྟར་འགྱུར་རོ། །འདིའི་རས་རིས་ཀྱི་ཆོ་ག་ནི་མ་ཉམས་པའི་རས་སྔར་བརྗོད་པའི་མཚན་ཉིད་དང་ལྡན་པ་ལ་འཕགས་པ་སྤྱན་རས་གཟིགས་དབང་ཕྱུག་ཀུན་ནས་བྲི་བར་བྱའོ། །རལ་པ་གྱེན་དུ་བརྫེས་པ་དཀར་པོ་ཕྱག་ན་པདྨ་སྟེ་གཡས་པས་མཆོག་སྦྱིན་པ་གཡོན་པའི་ཕྱག་གིས་པདྨ་བསྣམས་པ་དེའི་སྟེང་དུ་ཡང་དག་པར་རྫོགས་པའི་སངས་རྒྱས་བཅུ་གཉིས་བྲི་བར་བྱའོ། །གསེར་མདོག་མི་འཇིགས་པ་རབ་ཏུ་སྦྱིན་པའོ། །འདི་ལྟ་སྟེ་པདྨའི་བླ་མ་དང་། ཡོན་ཏན་བླ་མ་དང་། ཡེ་ཤེས་དབང་ཕྱུག་དང་། རྟག་པར་སྒྲ་དབྱངས་དང་། རྣམ་པར་གཟིགས་དང་། གཙུག་ཏོར་ཅན་དང་། ཐམས་ཅད་སྐྱོབ་དང་། ལོག་པར་དད་སེལ་དང་། གསེར་ཐུབ་དང་། འོད་སྲུང་དང་། ཤཱཀྱ་ཐུབ་པ་དང་། འོད་དཔག་མེད་དང་། མི་འཁྲུགས་པ་སྟེ། ཡང་དག་པར་རྫོགས་པའི་སངས་རྒྱས་འདི་རྣམས་ཀུན་ནས་བྲི་བར་བྱའོ། །དེ་ལྟ་བུའི་རས་རིས་འདྲིར་བཅུག་ནས་སྔར་གསུངས་པའི་གནས་སུ་བཞུགས་ནས་འབུམ་ཕྲག་གསུམ་བཟླས་པ་བྱའོ། །འདི་ཉིད་ཀྱིས་དྲི་དང་མེ་ཏོག་དང་། བདུག་པ་ལ་སོགས་པ་དབུལ་བར་བྱའོ། །གང་བྱེད་པ་ལ་གཅིག་ཏུ་དཔའ་བས་འབུམ་ཕྲག་བཟླས་པར་བྱའོ། །དེ་ནས་མཚན་མོ་གསུམ་དུ་སྨྱུང་བར་གནས་ཏེ་རས་རིས་ལ་མཆོད་པ་ཆེན་པོ་བྱས་ནས་མིག་སྨན་ནམ། ལྡོང་རོས་སམ། གི་ཝང་ཡང་རུང་སྟེ་སྟོང་དུ་བཟླས་པའི་རས་རིས་ཀྱི་སྤྱན་སྔར་ཨ་ཤྭཏྠའི་འདབ་མའི་ནང་དུ་བཏུམས་ཏེ་ཇི་སྐད་གསུངས་པའི་ཆོ་གས་ཀུ་ཤའི་ཁྲེས་ལ་ཉེ་བར་འདུག་སྟེ་སྲོད་ནས་བརྩམས་ཏེ་ཇི་སྲིད་དྲོ་བར་གྱུར་པ་དང་། དུ་བ་འཐུལ་བ་དང་། འབར་བར་གྱུར་པ་དེ་སྲིད་དུ་བཟླས་པར་བྱའོ། །དྲོ་བར་བྱེད་བཞིན་པས་ནི་ཐིག་ལེ་བྱས་ན་ཐམས་ཅད་དབང་དུ་བྱེད་དོ། །དུ་བ་འཐུལ་བཞིན་པས་ནི་མི་སྣང་བར་འགྱུར་རོ། །འབར་བས་ནི་ནམ་མཁའ་ལ་འགྲོའོ། །རས་རིས་རབ་ཏུ་འགུལ་ན་རྒྱལ་སྲིད་དུ་འགྱུར་རོ། །བཅོམ་ལྡན་འདས་མ་འཕགས་མ་སྒྲོལ་མ་རལ་པ་གྱེན་བརྫེས་ཀྱི་རྩ་བའི་རྟོག་པ་ཡངས་པ་དང་ལྡན་པའི་ཏིང་ངེ་
འཛིན་ལས་ངེས་པར་སྐྱེས་པ་སངས་རྒྱས་བཅུ་གཉིས་ཀྱིས་མངོན་པར་དབང་བསྐུར་བ་ཞེས་བྱ་བའི་རིག་པའི་རྒྱལ་པོ་ཆེན་པོ་རྫོགས་སོ།། །།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་སླར་ཡང་ཡངས་པ་དང་ལྡན་པའི་ཏིང་ངེ་འཛིན་བསྒོམ་བཞིན་པས་ཐམས་ཅད་དང་ལྡན་པའི་འཇིག་རྟེན་གྱི་ཁམས་ཡང་དག་པར་དགོངས་ནས་བཅོམ་ལྡན་འདས་མ་འཕགས་མ་སྒྲོལ་མའི་རྟོག་པའི་རྒྱལ་པོ་ཆེན་པོ་ལྷག་པར་མོས་པའི་ཕྲེང་བ་ཞེས་བྱ་བ་སངས་རྒྱས་ཀྱིས་གསུངས་པ་འདི་བཀའ་སྩལ་ཏོ། །ན་མོ་རཏྣ་ཏྲ་ཡཱ་ཡ། ན་མོ་ཨ་མི་ཏཱ་བྷཱ་ཡ། ན་མོ་ན་མཿསརྦ་བོ་དྷི་སཏྭཱ་ཡ། ན་མ་ཨཱཪྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། མཎྜ་བི་ཤཱ་ལ་ཀཱིརྟི་སརྦ་བིདྱཱ་སྭཱ་ཧཱ། འདི་ནི་མཐུ་ཆེན་པོ་ཐོབ་པ། ལྷག་པར་མོས་པའི་ཕྲེང་བ་ཞེས་བྱ་བའི་རིག་པའི་རྒྱལ་མོ་ཆེན་མོ་སྟེ། སངས་རྒྱས་དུ་མས་རྗེས་སུ་གནང་བ། བྱང་ཆུབ་སེམས་དཔའ་དུ་མའི་ཏིང་ངེ་འཛིན་ཡང་དག་པར་སྐྱེད་པར་བྱེད་པ་འདི་བསྒྲུབ་པར་བྱའོ། །དབུལ་པོ་གང་ལ་ལ་བསྒྲུབ་པར་བྱ་བ་རས་རིས་ཟླ་བའི་ནང་དུ་དེའི་འབྱོར་པ་རྒྱས་པར་འགྱུར་རོ། །དབུལ་པོ་ཐོབ་པ་གང་ལ་ལ་རིག་པ་འདི་དོན་ཆེན་པོ་སྦྱིན་པས་མཆོད་པ་བྱ་བར་འགྱུར་རོ། །འཇིག་རྟེན་གྱི་རྣམ་པར་འབྱོར་པ་སྒྲུབ་པར་བྱེད་པའི་ལས་སོ། །དེ་ནས་སྒྲུབ་ཐབས་སུ་འགྱུར་བ་ནི་བཅོམ་ལྡན་འདས་སྤྱན་རས་གཟིགས་དབང་ཕྱུག་སྔར་བརྗོད་པའི་རས་རིས་བྲི་བར་བྱའོ། །དགུ་པ་ནས་བརྩམས་ཏེ་དཀར་པོའི་ཟླ་བ་ཉ་ལ་ཡོངས་སུ་རྫོགས་པར་བྱེད་དུ་གཞུག་པར་བྱའོ། །པདྨ་དཀར་པོའི་གདན་ལ་བཞུགས་པ་རལ་པ་གྱེན་དུ་བརྫེས་པའོ། །འཕགས་པ་འོད་དཔག་ཏུ་མེད་པ་གཉིས་པ་སྟེང་དུའོ། །རང་གཞོགས་སུ་ཤཱཀྱ་ཐུབ་པ་ཡང་ངོ་། །འཕགས་པ་སྤྱན་རས་གཟིགས་དབང་ཕྱུག་གི་གཡས་སུ་དཔལ་ཆེན་མོ་བྲི་བར་བྱའོ། །གཡོན་གྱི་གཞོགས་སུ་རྡོ་རྗེ་སྡེ་བྲི་བར་བྱའོ། །སྐུ་མདོག་དཀར་པོ་སྟོན་ཀའི་སྤྲིན་ལྟར་དཀར་བ་ཕྱག་ན་རིལ་བ་སྤྱི་བླུགས་དང་། ཆུ་སྣོད་བསྣམས་པའོ། །འཕགས་པ་སྤྱན་རས་གཟིགས་དབང་ཕྱུག་གི་སྤྱི་བོར་ཨ་ཏི་མུཀྟ་ཀའི་མེ་ཏོག་གོ། །འཕགས་
པ་འོད་དཔག་མེད་ལ་བརྵའི་མེ་ཏོག་གི་ཕྲེང་བའོ། །ཤཱཀྱ་ཐུབ་པ་ལ་སྣ་མའི་མེ་ཏོག་གི་ཕྲེང་བའོ། །དཔལ་ཆེན་མོ་ལ་ནཱ་ག་གེ་སར་གྱི་མེ་ཏོག་གི་ཕྲེང་བའོ། །རྡོ་རྗེ་སྡེ་ལ་མེ་ཏོག་དཀར་པོའི་ཕྲེང་བ་དང་། བདུག་པ་དྲི་ཞིམ་པོ་རྣམས་ཇི་ལྟར་འབྱོར་པ་དབུལ་བར་བྱའོ། །སྔར་བརྗོད་པའི་གནས་སུ་རས་རིས་བཞུགས་སུ་གསོལ་ནས་འབུམ་ཕྲག་གསུམ་བཟླས་པར་བྱའོ། །དེ་ནས་ཟླ་བ་ཉ་ལ་རས་རིས་ལ་མེ་ཏོག་གི་ཕྲེང་བ་ལ་སོགས་པའི་མཆོད་པ་ཆེན་པོ་བྱས་ནས་ཀུ་ཤའི་ཁྲེས་ལ་ཉེ་བར་འདུག་སྟེ་འདི་ཉིད་ཀྱིས་གང་བྱེད་པ་དེ་ཐམས་ཅད་ལ་གཅིག་ཏུ་དཔའ་བས་བྱའོ། །རིག་པའི་རྒྱལ་མོ་ཆེན་མོ་གང་ཇི་སྲིད་ཕྲེང་བ་ཐམས་ཅད་རབ་ཏུ་གཡོ་བའི་མཚན་མ་འབྱུང་གི་བར་དུ་བཟླས་པར་བྱའོ། །དངོས་གྲུབ་ཀྱི་མཚན་ཉིད་གང་གི་ཚེ། མངོན་པར་འདོད་པ་དེ་ཐམས་ཅད་ཐོབ་པར་འགྱུར་རོ། །གང་ཐམས་ཅད་དུ་རས་རིས་ཀྱི་སྤྱན་སྔར་ཏིལ་གྱིས་མངོན་པར་བཏགས་པའི་སྦྱིན་སྲེག་འབུམ་ཕྲག་དྲུག་བྱས་ན་རྒྱལ་སྲིད་རྙེད་དོ། །ཡུལ་གྱི་ལོངས་སྤྱོད་འདོད་ན་རས་རིས་ཀྱི་སྤྱན་སྔར་ཡུངས་ཀར་དང་ཏིལ་དང་ཙེ་ཀ་ཏའི་སྦྱིན་སྲེག་འབུམ་ཕྲག་གསུམ་བྱས་ན་ཡུལ་རྙེད་དོ། །རས་རིས་ཀྱི་སྤྱན་སྔར་མར་དང་སྦྲང་རྩི་བཏགས་པའི་གུར་གུམ་དང་། སྲ་རྩི་པོག་དང་། ན་ལེ་ཤམ་དང་། རུ་རྟ་རྣམས་འབུམ་ཕྲག་བདུན་སྦྱིན་སྲེག་བྱས་ན་རྒྱལ་སྲིད་ཆེན་པོ་རྙེད་དོ། །མ་གྲུབ་ན་ཡུལ་རྙེད་དེ་ནོར་གྱི་བདག་པོ་ཆེན་པོར་འགྱུར་རོ། །བཅོམ་ལྡན་འདས་མ་འཕགས་མ་སྒྲོལ་མ་རལ་པ་གྱེན་བརྫེས་ཀྱི་རྩ་བའི་རྟོག་པ་ཡངས་པ་དང་ལྡན་པའི་ཏིང་ངེ་འཛིན་གྱི་རྒྱལ་པོ་ལྷག་པར་མོས་པའི་ཕྲེང་བ་ཞེས་བྱ་བའི་རིག་པའི་རྒྱལ་པོ་ཡོངས་སུ་རྫོགས་སོ།། །།