འཕགས་པ་ནོར་བུ་ཆེན་པོ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པ་གསང་བ་དམ་པའི་གསང་བའི་ཆོ་ག་ཞིབ་མོའི་རྒྱལ་པོ་ཞེས་བྱ་བའི་གཟུངས།
རྒྱ་གར་སྐད་དུ། ཨཱཪྱ་མ་ཧཱ་མ་ཎི་བི་པུ་ལ་བི་མཱ་ན་སུ་པྲ་ཏིཥྛི་ཏ་གུ་ཧྱ་པ་ར་མ་ཧ་སྱ་ཀ་ལཱ་རཱ་ཛཱ་ནཱ་མ་དྷཱ་ར་ཎཱི། བོད་སྐད་དུ། འཕགས་པ་ནོར་བུ་ཆེན་པོ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པ་གསང་བ་དམ་པའི་གསང་བའི་ཆོ་ག་ཞིབ་མོའི་རྒྱལ་པོ་ཞེས་བྱ་བའི་གཟུངས། བམ་པོ་དང་པོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དེ་ནས་བཅོམ་ལྡན་འདས་ཀྱིས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་འདུས་པ་དང་པོ་ལ་བདུད་བྱེ་བ་ཕམ་པར་མཛད། དཔྱོད་པ་དང་། ཀུན་དུ་རྒྱུ་དང་། གཅེར་བུ་པ་ཐམས་ཅད་དང་། མུ་སྟེགས་ཅན་གཞན་རྣམས་ཀྱང་བཏུལ་ནས་ཕམ་པར་མཛད་དེ། འཁོར་བའི་སྐྱོན་འཁོར་བའི་ཆུ་བོའི་ཕ་རོལ་དུ་གཤེགས་སོ། །གང་གི་ཚེ་བདུད་ཀྱི་སྡེ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་གཡོག་བདུད་ཀྱི་སྡེ་ཕྲག་དཀྲིགས་པ་ཅན་དག་གིས་འཛམ་བུའི་གླིང་བཀང་བ། དེའི་ཚེ་བཅོམ་ལྡན་འདས་ཀྱིས་ས་གཞི་རྡོ་རྗེར་བྱིན་གྱིས་བརླབས་ནས། སེམས་ཅན་དེ་དག་གིས་འཇིགས་ཤིང་འཇིགས་སུ་རུང་བའི་སྒྲ་ཡང་མ་ཐོས་ཤིང་། མཚོན་ཆའི་ཆར་དེ་དག་ཐམས་ཅད་ཀྱང་མེ་ཏོག་སྣ་ཚོགས་སུ་བབ་པར་གྱུར་ཏོ། །རྒྱལ་པོའི་ཁབ་ཀྱི་གྲོང་ཁྱེར་གྱི་སུམ་མདོའི་དབུས་དེའི་ས་དེ་ཡང་རྡོལ་ནས་
རིན་པོ་ཆེ་སྣ་བདུན་གྱི་པདྨ་འདབ་མ་སྟོང་པ། སྡོང་བུ་ནི་བཻཌཱུཪྱ། སྙིང་པོ་ནི་འཛམ་བུ་ཆུ་བོའི་གསེར། ཟེ་བ་ནི་རྡོའི་སྙིང་པོ། སྲིད་ནི་ཚངས་པའི་འཇིག་རྟེན་གྱི་བར་ལ་ཐུག་པ། འོད་དང་ལྡན་པ་ཞིག་བྱུང་སྟེ། པདྨ་དེ་བྱུང་ནས་ཕྱོགས་བཅུ་ཐམས་ཅད་དུ་སྣང་བར་བྱས་སོ། །དེ་ནས་པདྨ་དེ་ལས་ནོར་བུ་རྡོ་རྗེ་མཆོག་ལྡན་ཞེས་བྱ་བའི་གཟུངས་ཀྱིས་སྐུལ་བའི་སྒྲ་འདི་བྱུང་ངོ་། །ཕྱོགས་བཅུ་ན་བཞུགས་པའི་དེ་བཞིན་གཤེགས་པ་གང་ལགས་པ་ཐམས་ཅད་ལ་ཕྱག་འཚལ་ལོ། །ཨོྃ་མ་ཎི་བཛྲ་ཧྲྀ་ད་ཡ། བཛྲ་མཱ་ར་སེེ་ནྱ་བི་དྲ་བ་ནི། ཧ་ན་ཧ་ན། བཛྲ་གརྦྷེ་ཏྲཱ་ས་ཡ་ཏྲཱ་ས་ཡ། སརྦ་མཱ་ར་བྷུ་བ་ནཱ་ནི་ཧཱུྃ་ཧཱུྃ། སནྡྷ་ར་སནྡྷ་ར། བུདྡྷ་མེེ་ཏྲི་སརྦ་ཏ་ཐཱ་ག་ཏ། བཛྲེ་ཀལྤ་ཨ་དྷིཥྛི་ཏེ་སྭཱ་ཧཱ། པདྨ་དེ་ལས་ཡང་ལེགས་སོ་ཞེས་བྱ་བའི་སྒྲ་གྲགས་ཏེ། དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྒྲས་བཀང་ནས། ཤཱཀྱ་ཐུབ་པ་སྲིད་པའི་དགོན་པ་ལས་ནི་རྒལ། བདུད་ནི་བཅོམ། ཉོན་མོངས་པའི་རྡུལ་ནི་སྤངས། མ་རིག་པའི་སྒོ་ངའི་སྦུབས་ནི་དྲལ། ཆོས་ཀྱི་སྒྲོན་མ་ཆེན་པོ་ནི་སྦར་ཏེ། གང་གི་ཕྱིར་གཟུངས་འདིའི་མཐུས་ས་གཞི་རྡོ་རྗེར་བྱིན་གྱིས་བརླབས་ནས། བདུད་ནི་བཅོམ་པ་ལེགས་སོ་ལེགས་སོ། །དེ་ནས་གསང་བ་བའི་བདག་པོ་ལག་ན་རྡོ་རྗེ་སྤུ་ཟིང་ཞེས་བྱེད་ཅིང་ལུས་འདར་ནས། བཅོམ་ལྡན་འདས་ཀྱི་ཞབས་གཉིས་ལ་གཏུགས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅིའི་སླད་དུ་རིག་སྔགས་ཆེན་མོ་འདི་འདུས་པ་དང་པོ་ལ་འཛམ་བུའི་གླིང་དུ་བྱུང་བ་ལགས། བཅོམ་ལྡན་འདས་རིག་སྔགས་འདི་འཇིག་རྟེན་དུ་སྔོན་བྱུང་བར་མ་ཐོས་ལགས་སོ། །དེ་ནས་བཅོམ་ལྡན་འདས་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་ནོར་བུ་ཆེན་པོ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པ་གསང་བ་ཞེས་བྱ་བའི་གཟུངས་ཡོད་དེ། དེའི་མཐུས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྡོ་རྗེའི་རང་བཞིན་དུ་གྱུར་ནས། མཚོན་ཆའི་ཆར་འབབ་པ་འདི་ཡང་མེ་ཏོག་
སྣ་ཚོགས་སུ་གྱུར་ཏེ་འབབ་བོ། །གཟུངས་འདིའི་མཐུས་བདུད་ཀྱི་འཁོར་བཅོམ་ནས་སྲོག་ཆགས་བྱེ་བ་བཏུལ་ཏོ། །འདིའི་མཐུས་སུམ་མདོའི་དབུས་སུ་པདྨ་འདི་བྱུང་བར་གྱུར་ཏོ། །ལག་ན་རྡོ་རྗེ་གཟུངས་འདི་མེད་པར་མངོན་པར་རྫོགས་པར་བྱང་ཆུབ་པར་མི་ནུས། བདུད་བྱེ་བ་ཕམ་པར་མ་ཡིན། ཉོན་མོངས་པའི་རྒྱ་མཚོ་སྐེམས་པར་མ་ཡིན་ཏེ། ཆོས་ཀྱི་སྒྲོན་མ་སྦར་བར་མི་ནུས་སོ། །ལག་ན་རྡོ་རྗེ་ངས་དཀའ་བ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་སྤྱད་ན། ཇི་སྲིད་ངས་གཟུངས་འདི་མཉན་པ་དང་། མངོན་པར་བརྩོན་པས་བརྩོན་འགྲུས་མ་བྱས་ཀྱི་བར་དུ་ངས་སངས་རྒྱས་ཉིད་ཐོབ་པར་མ་ནུས་ཀྱི། ཕྱིས་ངས་སངས་རྒྱས་ཉིད་ཐོབ་བོ། །ལག་ན་རྡོ་རྗེ་གཟུངས་འདི་ནི་མཐུ་ཆེ་ཞིང་ཕན་ཡོན་ཆེ་བ་ཡིན་ནོ། །ལག་ན་རྡོ་རྗེ་འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་དེ་ཁོ་ན་ཉིད་ཡང་དག་པར་སངས་རྒྱས་ཀྱི་སྐུ་ཡོངས་སུ་སྒྲུབ་པ་ཡིན་ནོ། །ལག་ན་རྡོ་རྗེ་འདིའི་མིང་བཟུང་བ་ཙམ་གྱིས་དེ་བཞིན་གཤེགས་པ་ཐམས་ཅད་ཀྱི་མཚན་བཟུང་བར་འགྱུར་རོ། །བརྗོད་ཅིང་བཟླས་པ་ཙམ་གྱིས་དེ་བཞིན་གཤེགས་པ་ཐམས་ཅད་ལ་མཆོད་པ་དང་། བསྙེན་བཀུར་དང་། ཞབས་ལ་ཕྱག་བྱས་པར་འགྱུར་རོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེས་མེ་ཏོག་སྣ་ཚོགས་དང་། དྲི་དང་། བདུག་པ་སྣ་ཚོགས་ཀྱིས་མཆོད་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་ཞབས་ལ་གཏུགས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མི་མཇེད་ཀྱི་འཇིག་རྟེན་གྱི་ཁམས་དེ་ན་ཡོན་ཏན་གྱི་ཁྱད་པར་ཅི་འདྲ་བ་དག་གདའ་བ་བསྟན་དུ་གསོལ། བཅོམ་ལྡན་འདས་དེ་བཞིན་གཤེགས་པའི་སྐུ་ཡང་དག་པའི་ཆོས་ཀྱི་གཞི་འདི་དག་ལས་གཞན་པ་དགེ་བའི་རྩ་བ་ངན་ངོན་ཙམ་གྱིས་ནི་སེམས་ཅན་རྣམས་ཀྱི་ཚོགས་བསགས་པར་མི་བགྱི་ལགས་སོ། །དེ་ནས་བཅོམ་ལྡན་འདས་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་སེམས་ཅན་
དེ་དག་ནི་སྙོམ་ལས་ཅན། བརྩོན་འགྲུས་དམན་པ། གཏི་མུག་གིས་རྨོངས་པ། འདོད་པའི་དྲེགས་པས་རྨོངས་པ། ཡིད་ཆེས་པར་དཀའ་བ། ཕར་མི་འཛིན་པ། མར་མི་འཛིན་པ། དགེ་སྦྱོང་དུ་མི་འཛིན་པ། བྲམ་ཟེར་མི་འཛིན་པ། རིགས་ཀྱི་གཙོ་བོ་ལ་བསྙེན་བཀུར་མི་བྱེད་པ་དེ། དེས་ནི་གཟུངས་འདི་ལག་ཏུ་འོང་བར་མི་འགྱུར་ཞིང་། བསོད་ནམས་ཆུང་བ། སྐལ་བ་ཆུང་བ། བློ་ཞན་པ་རྣམས་ཀྱིས་ཀྱང་ཉན་པར་མི་འགྱུར། འཆད་པར་མི་འགྱུར་ཞིང་། སྡིག་པ་ཐམས་ཅད་འཇིག་པར་བྱེད་པ། དེ་བཞིན་གཤེགས་པས་གསུངས་པའི་གཟུངས་འདི་ལ་དད་པ་སྐྱེད་པར་མི་འགྱུར་རོ། །དེ་ནས་བཅོམ་ལྡན་འདས་ཀྱིས་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ང་ནི་འདི་ནས་ཤར་ཕྱོགས་ལོགས་སུ་སངས་རྒྱས་ཀྱི་ཞིང་ཚད་མེད་པ་གང་གཱའི་ཀླུང་གི་བྱེ་མ་དང་མཉམ་པའི་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་འདས་པ་དེ་ན་འཇིག་རྟེན་གྱི་ཁམས་ནོར་བུའི་སྒྲོན་མ་ཞེས་བྱ་བ་གྲོང་ཁྱེར་གྱི་ཁོ་ར་ཁོར་ཡུག་ཏུ་དཔག་ཚད་བཅུ་གཉིས་པའི་ར་བ་རིན་པོ་ཆེ་སྣ་བདུན་ལས་བྱས་པ། རྒྱས་པ། བདེ་བ། ཉམས་དགའ་བ། ལོ་ལེགས་པ། སྐྱེ་བོ་དང་། མི་མང་བོས་གང་བ། སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དང་། སྐྱེ་བོའི་ཚོགས་ཐམས་ཅད་རྒྱན་ཐམས་ཅད་ཀྱིས་བརྒྱན་པ་ཉིད་སྣང་ཞིང་ནོར་བུ་དང་། གསེར་འབར་བའི་མགོ་རྒྱན་སྣ་ཚོགས་ཀྱིས་མགོ་བརྒྱན་པ། ལྷའི་གཟུགས་ཅན། མཐུ་དང་བརྩོན་འགྲུས་ཆེན་པོ་དང་ལྡན་པ། བཤེས་གཉེན་ཐམས་ཅད་དང་ལྡན་པ། རིག་པའི་གནས་རྟོགས་པར་ཁོང་དུ་ཆུད་པ། སྣང་བ་ཡོད་པར་འགྲོའོ། །འཇིག་རྟེན་གྱི་ཁམས་དེ་ན་རྒྱལ་པོ་ནོར་བུ་སྣ་ཚོགས་ཞེས་བྱ་བ་རྒྱལ་སྲིང་བྱེད་དུ་འཇུག་སྟེ། བློན་པོ་བྱེ་བ་ཕྲག་བརྒྱད་ཅུས་ཡོངས་སུ་བསྐོར་ཅིང་། བཙུན་མོ་དམ་པ་གསལ་བྱེད་མ་ཞེས་བྱ་བ་བུད་མེད་ཉི་ཁྲིའི་འཁོར་ཅན། ལྷའི་བུ་མོ་ཐམས་ཅད་ཀྱི་ལུས་ལ་འགྲན་པ་ཞིག་ཡོད་དོ། །འཇིག་རྟེན་གྱི་ཁམས་དེ་ན་ཡང་མེ་ཏོག་གི་ཤིང་དང་། འབྲས་
བུའི་ཤིང་དང་། དྲང་ཆུའི་ཤིང་དང་། དྲིའི་ཤིང་གང་ཡིན་པ་དེ་དག་ཐམས་ཅད་ཀྱང་རིན་པོ་ཆེ་སྣ་བདུན་གྱི་རང་བཞིན་ཡིན་ནོ། །ཆུ་ལས་སྐྱེས་པའི་མེ་ཏོག་གང་ཡིན་པ་དེ་དག་ཐམས་ཅད་ཀྱང་རིན་པོ་ཆེ་སྣ་བདུན་གྱི་རང་བཞིན་ཡིན་ནོ། །ཐང་ལས་སྐྱེས་པའི་མེ་ཏོག་གང་ཡིན་པ་དེ་དག་ཐམས་ཅད་ནི་འཛམ་བུ་ཆུ་བོའི་གསེར་གྱི་རང་བཞིན་ཡིན་ནོ། །མི་རྣམས་ཀྱི་ཚེའི་ཚད་ནི་བསྐལ་པ་བརྒྱད་ཁྲི་ཐུབ་སྟེ། ཐམས་ཅད་ཀྱང་དགེ་བ་བཅུའི་ལས་ཀྱི་ལམ་དང་ལྡན་པ། སངས་རྒྱས་དང་། ཆོས་དང་། དགེ་འདུན་ལ་མངོན་པར་དད་པ་ཡིན་ནོ། །རྒྱལ་པོ་དེ་ཡང་ཆོས་དང་མཐུན་པས་རྒྱལ་སྲིད་སྐྱོང་བར་བྱེད་ཀྱིས། ཆོས་དང་མི་མཐུན་པས་ནི་མ་ཡིན་ཏེ། སེམས་ཅན་ཐམས་ཅད་ལ་ཕན་པའི་བསམ་པ་ཅན་ཡིན་ནོ། །འཇིག་རྟེན་གྱི་ཁམས་དེ་ན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནོར་བུ་ཆེན་པོ་རྣམ་པར་བཀྲ་བ་རབ་གནས་གཙང་མ་ཞེས་བྱ་བ་བྱང་ཆུབ་སེམས་དཔའི་ཚོགས་ཆེན་པོས་ཡོངས་སུ་བསྐོར་ཅིང་། རིག་སྔགས་འཆང་བྱེ་བ་ཕྲག་མང་པོས་ཡོངས་སུ་བསྐོར་ནས་སངས་རྒྱས་ཀྱི་མཛད་པ་མཛད་དེ། དེ་བཞིན་གཤེགས་པ་དེ་ནི་གསེར་གྱི་ཁ་དོག་གི་སྐུ་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་མངའ་བ། འོད་འདོམ་གང་གིས་ཀུན་ནས་བསྐོར་བ། འོད་རིན་པོ་ཆེ་སྣ་བདུན་ལྟར་ཤིན་ཏུ་སྤ་བ་ཡིན་ནོ། །བྱང་ཆུབ་སེམས་དཔའ་དེ་དག་ཐམས་ཅད་ཀྱང་གསེར་གྱི་ཁ་དོག་གི་ལུས་འོད་འཕྲོ་བ། མཚན་དང་ལྡན་པ། རིན་པོ་ཆེ་སྣ་བདུན་གྱི་པདྨའི་སྟན་ལ་འཁོད་པ་སྟེ། ཐམས་ཅད་ཀྱང་སྤོབས་པ་མི་ཟད་པ། སྒྲིབ་པ་མེད་པའི་ཡེ་ཤེས་སྤྱོད་ཡུལ་བ། རིག་པའི་གནས་རྟོགས་པར་ཁོང་དུ་ཆུད་པས་འདི་ལྟ་སྟེ། ནོར་བུ་ཆེན་པོ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པའི་གསང་བ་ཞེས་བྱ་བའི་གཟུངས་སེམས་ཤིང་། གཟུངས་དེ་ཉིད་ཀྱི་མཐུས་ཡོན་ཏན་གྱི་ཁྱད་པར་འདི་བྱུང་བར་གྱུར་ཏོ། །དེ་བཞིན་གཤེགས་པ་དེ་ཡང་གཟུངས་འདི་སེམས་ཅན་ཐམས་ཅད་ལ་རབ་ཏུ་སྟོན་ཏོ། །སེམས་ཅན་དེ་རྣམས་ཀྱང་གཟུངས་འདིའི་མཐུས་བདེ་བ་
ཉམས་སུ་མྱོང་བ་སྟེ་སེམས་ཅན་དེ་དག་ཐམས་ཅད་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དང་། ལྷ་མ་ཡིན་གྱི་རིས་རྣམས་ལས་ཡོངས་སུ་ཐར་པར་གྱུར་ཏོ། །ངན་སོང་གི་སྒོ་ཐམས་ཅད་ཀྱང་བཅད་པར་གྱུར་ཏོ། །མཐོ་རིས་ཀྱི་སྒོ་རྣམས་ཕྱེའོ། །བདེ་འགྲོའི་སྒོ་ཐམས་ཅད་ཀྱང་ཕྱེ་སྟེ། འཇིག་རྟེན་གྱི་ཁམས་དེའི་སེམས་ཅན་གང་ཡིན་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་སོ། །འཇིག་རྟེན་གྱི་ཁམས་དེ་ན་སེམས་ཅན་ཐམས་ཅད་བྱམས་པའི་སེམས་ཀྱིས་གནས་ཏེ། འདི་ལྟ་སྟེ། ཆུ་དང་འོ་མ་གཅིག་ཏུ་གྱུར་པ་བཞིན་ནོ། །དེ་བཞིན་གཤེགས་པ་དེས་ཀྱང་སྔོན་བྱང་ཆུབ་སེམས་དཔར་གྱུར་པ་ན། ནོར་བུ་ཆེན་པོ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པའི་གསང་བ་འདི་སྒྲུབ་པ་ན་སྨོན་ལམ་འདི་སྐད་ཅེས། བདག་གིས་སངས་རྒྱས་ཀྱི་ཞིང་དུ་སྐྱེ་བར་གྱུར་པའི་སེམས་ཅན་གང་ཡིན་པ་དེ་དག་ཐམས་ཅད་ངེས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཅིག་ཅེས་སྨོན་ལམ་བཏབ་སྟེ། གང་དག་གཟུངས་འདི་ཉན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བྱེད་པ་དང་། སྒོམ་པ་དང་། འདོན་པ་དང་། སེམས་པ་དང་། སྒྲུབ་པར་བྱེད་པ་དང་། ཆུང་དུ་ན་མིང་ཉན་པར་བྱེད་དམ། ལག་པས་རེག་གམ། ལུས་ལ་འཆང་ངམ། མིག་གིས་མཐོང་བ་ཙམ་མམ། གླེགས་བམ་ལ་བྲིས་པའམ། རས་ལ་བྲིས་པའམ། རྩིག་པ་ལ་བྲིས་པ་མཐོང་ན་མཚམས་མེད་པ་ལྔ་བྱས་པའམ། མནར་མེད་པར་གཞོལ་བའམ། དམ་པའི་ཆོས་སྤངས་པའམ། འཕགས་པ་ལ་སྐུར་བ་བཏབ་པའམ། ཤེན་པའམ། གདོལ་པའམ། རྔོན་པའམ། བྱ་བའམ། ལོང་བའམ། འོན་པའམ། ཤ་བཀྲ་ཅན་ནམ། བཀྲེན་པའམ། ཞར་བའམ། སྒུར་པོའམ། དམན་པའམ། སྔོན་གྱི་ལས་ཀྱིས་འཕངས་པའི་སྒྲིབ་པ་ཅན་ནམ། མྱོང་བར་གྱུར་པར་མ་ངེས་པའམ། བདུད་ཀྱི་ཞགས་པས་
བཅིངས་པའམ། ལྟ་བ་ངན་པར་ལྟུང་བའམ། ལོག་འདྲེན་གྱིས་ཟིན་པའམ། རྒྱུ་སྐར་དང་། གཟའི་གནོད་པར་བྱས་པ་དེ་དག་ཐམས་ཅད་ངེས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །ཆུང་ངུ་ན་དུད་འགྲོའི་སྐྱེ་གནས་པ་རི་དགས་དང་། བྱ་དང་། སྦྲང་བུ་མཆུ་རིངས་དང་། ཤ་སྦྲང་དང་། བྱི་བ་དང་། གྲོག་སྦུར་རྣམས་དང་། གཞན་ཡང་སྲོག་ཆགས་ཀྱི་རིགས་སྣ་ཚོགས་སྒོ་ང་ལས་སྐྱེས་པའམ། མངལ་ལས་སྐྱེས་པའམ། དྲོད་གཤེར་ལས་སྐྱེས་པའམ། རྫུས་ཏེ་སྐྱེས་པ་ལ་སོགས་ཏེ། དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་ཏེ། འདི་ལ་ཐེ་ཚོམ་དང་། ཡིད་གཉིས་བསྐྱེད་པར་མི་བྱའོ། །དེ་ནས་བཅོམ་ལྡན་འདས་ཀྱིས་ཚིག་འདི་གསུངས་མ་ཐག་ཏུ་འཁོར་དེ་དག་ཐམས་ཅད་དགའ་ཞིང་། བ་སྤུའི་ཁུང་བུ་རྣམས་གཡོས་པར་གྱུར་ཏོ། །ལྷའི་མེ་ཏོག་ཨུཏྤལ་དང་། པདྨ་དང་། ཀུ་མུད་དང་། པདྨ་དཀར་པོ་དང་། མན་དཱ་ར་བ་དང་། མན་དཱ་ར་བ་ཆེན་པོའི་ཆར་ཡང་རབ་ཏུ་འབབ་བོ། །ལྷའི་སིལ་སྙན་རྣམས་ཀྱང་སྒྲ་འབྱིན་ཏོ། །འཁོར་གྱི་དཀྱིལ་འཁོར་དེ་དག་ཐམས་ཅད་ཀྱི་རང་རང་གི་ལུས་ལས་ཀྱང་འོད་ཟེར་བྱུང་བར་གྱུར་ཏོ། །བཅོམ་ལྡན་འདས་ཀྱི་སྤྱན་སྔར་ཡང་རིན་པོ་ཆེ་སྣ་བདུན་གྱི་ཁང་བ་བརྩེགས་མ་བཀྲ་བ། བལྟ་ན་སྡུག་པ། ཤིན་ཏུ་རྣམ་པར་ཕྱེ་བ། ཉམས་དགའ་བ། ཀ་བ་བཞི་ཟུག་པ། སྒོ་བཞི་དོད་པ། ཐེམ་སྐས་བཞི་དང་ལྡན་པ། འོད་འབར་བ། གྲྭ་བཞི་ན་ནོར་བུ་རིན་པོ་ཆེ་ཆེན་པོ་བཞི་ཉི་མ་ལྟར་འོད་འབར་བ། ནོར་བུ་དང་། རིན་པོ་ཆེ་དང་། མུ་ཏིག་གི་དྲ་བ་དུ་མ་དཔྱངས་པ། དྲིལ་བུ་མང་པོས་མཛེས་པར་བྱས་པ། དར་གྱི་བ་དན་མང་པོས་ཀུན་ནས་བརྒྱན་པ། མེ་ཏོག་སྣ་ཚོགས་དུ་མའི་ཆུན་པོས་མཛེས་པར་བྱས་པ་ཞིག་བྱུང་ངོ་། །ས་འདི་ཡང་རྣམ་པ་དྲུག་ཏུ་རབ་ཏུ་གཡོས་ཏེ། འགུལ་ལྡེག་ལ་སྒྲ་འབྱིན་ཅིང་མཐོ་བ་དང་དམའ་བར་གྱུར་ཏོ། །ལྷའི་གནས་ཐམས་ཅད་ཀྱང་འོད་ཀྱིས་སྣང་བར་བྱས་ཏེ།
ལྷའི་གནས་ན་གནས་པ་ཐམས་ཅད་བསྐུལ་ཏོ། །རྒྱལ་པོ་ཆེན་པོ་བཞི་ཡང་བསྐུལ་ཏོ། །རིག་སྔགས་འཆང་གི་གནས་ཐམས་ཅད་ཀྱང་བསྐུལ་ཏོ། ལྷའི་གནས་ཐམས་ཅད་ཀྱང་འབར། ཀུན་དུ་རབ་ཏུ་འབར་ཞིང་མེ་ལྕེ་གཅིག་ཏུ་གྱུར་པ་དང་། བར་ཆད་བྱེད་པའི་ལོག་འདྲེན་ཐམས་ཅད་ཀྱང་དངངས་སྐྲག་སྟེ། ཆོ་ངེས་འདེབས་ཤིང་ཕྱོགས་བཅུར་བྱེར་རོ། །དེ་ནས་བཅོམ་ལྡན་འདས་ཀྱི་མཛོད་སྤུ་ནས་འོད་ཟེར་རབ་ཏུ་བཀྱེ་སྟེ། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀུན་ནས་སྣང་བར་བྱས་ཤིང་། སངས་རྒྱས་ཀྱི་ཞིང་ཐམས་ཅད་སྣང་བར་བྱས་ཏེ། སངས་རྒྱས་བཅོམ་ལྡན་འདས་དེ་རྣམས་བསྐུལ་ནས་སླར་དབུའི་གཙུག་ཏུ་ནུབ་བོ། །དེ་ནས་སངས་རྒྱས་བཅོམ་ལྡན་འདས་དེ་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ལ་ལེགས་སོ་ཞེས་བྱ་བ་བྱིན་ཏེ། བཅོམ་ལྡན་འདས་ལེགས་སོ་ལེགས་སོ། །བཅོམ་ལྡན་འདས་ཁྱོད་དེ་བཞིན་གཤེགས་པ་ནོར་བུ་བཟང་པོ་རྣམ་པར་བཀྲ་བ་རབ་གནས་གཙང་མ་དེ་གཟིགས་པ་དང་། ཕྱག་བགྱི་བ་དང་། བསྙེན་བཀུར་བགྱི་ཞིང་བཞུད་པའི་དུས་ལ་བབ་ཀྱིས་བཞུད་ལ་ནོར་བུ་ཆེན་པོ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པ་གསང་བ་ཞེས་བགྱི་བའི་གཟུངས་དེ་ཡང་རྒྱས་པར་གསོན་ཅིག །བཅོམ་ལྡན་འདས་གཟུངས་དེ་ནི་མཐུ་ཆེ་ཞིང་ཕན་ཡོན་ཆེ་བ་ལགས་སོ། །གཟུངས་དེ་ནི་སྔོན་གྱི་དེ་བཞིན་གཤེགས་པ་རྣམས་ཀྱིས་བྱིན་གྱིས་བརླབས་པ་ལགས་ཏེ། གང་ལ་ལ་ཞིག་ཉན་ཏམ། ཆུང་ངུ་ན་མིང་ངམ། ལག་པས་རེག་ན་ཡང་ཕྱིར་མི་ལྡོག་པར་འགྱུར་ཞིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ནས་གཤེགས་པའི་སངས་རྒྱས་བཅོམ་ལྡན་འདས་རྣམས་ཀྱིས་གསོལ་བ་བཏབ་པར་ཐུགས་སུ་ཆུད་ནས། ཡང་འོད་ཟེར་བྱེ་བ་ཁྲག་ཁྲིག་བརྒྱ་སྟོང་བཀྱེ་སྟེ། ཇི་ལྟར་ལྷགས་པའི་འཁོར་དེ་ལ་བོས་ནས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་
ཚུར་ཤེག །དེ་བཞིན་གཤེགས་པའི་བརྡ་བྱུང་བ་ནི་འདི་ཡིན་ནོ། །དེ་ནས་བཅོམ་ལྡན་འདས་ཉིད་ཀྱིས་གདན་ལས་བཞེངས་པ་དང་། ཁང་པ་བརྩེགས་མ་དེའི་དབུས་སུ་རྡོ་རྗེའི་སེང་གེའི་ཁྲི་བྱུང་ནས། ཁྲི་དེའི་སྟེང་དུ་རིན་པོ་ཆེའི་པདྨ་བཀྲ་བ། བལྟ་ན་སྡུག་པ། ཡིད་དུ་འོང་བ། སྡོང་བུ་ནི་གསེར། པདྨའི་སྙིང་པོ་ནི་མུ་ཏིག་དམར་པོ་ཅན་ཞིག་བྱུང་སྟེ། དེ་ལ་བཅོམ་ལྡན་འདས་བཞུགས་སོ། །བཅོམ་ལྡན་འདས་བཞུགས་མ་ཐག་ཏུ་ས་ཆེན་པོ་འདི་ཆེ་ཐང་དུ་གཡོས་པར་གྱུར་ཏོ། །བཅོམ་ལྡན་འདས་ཀྱང་ནོར་བུ་ཆེན་པོ་དག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །འཁོར་ཐམས་ཅད་དབུགས་ཕྱུང་ནས་སྟེང་གི་ནམ་མཁའི་དཀྱིལ་དུ་འཁོར་གྱི་དཀྱིལ་འཁོར་ཐམས་ཅད་འཁོད་དེ། འཁོར་མང་པོ་དང་། འཁོད་པ་ཆེན་པོ་དང་། སངས་རྒྱས་ཀྱི་བྱིན་གྱི་རླབས་ཆེན་པོ་དང་། རྣམ་པར་སྤྲུལ་བ་དང་། བྱང་ཆུབ་སེམས་དཔའ་མང་པོའི་འཁོར་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་མང་པོ་དང་། རིག་སྔགས་འཆང་བྱེ་བ་ཕྲག་མང་པོའི་འཁོར་དང་། གསང་བའི་བདག་པོ་ལག་ན་རྡོ་རྗེ་དང་ཐབས་ཅིག་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་ཐམས་ཅད་དང་། རྒྱལ་པོ་ཆེན་པོ་བཞི་དང་གཤེགས་སོ། །དེ་དག་ཐམས་ཅད་ཤར་ཕྱོགས་ལོགས་སུ་དོང་བ་དང་། ཚད་མེད་པའི་གང་གཱའི་ཀླུང་གི་བྱེ་མ་དང་མཉམ་པའི་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་འདས་ནས། ནོར་བུ་སྒྲོན་མ་ཞེས་བྱ་བའི་འཇིག་རྟེན་གྱི་ཁམས་སུ་ཕྱིན་པར་མཐོང་སྟེ། བཅོམ་ལྡན་འདས་ཀྱི་རྫུ་འཕྲུལ་གྱི་མཐུས་སྐད་ཅིག་ཐང་ཅིག་ཡུད་ཙམ་གྱིས་འཇིག་རྟེན་གྱི་ཁམས་དེར་ཕྱིན་ཏོ། །འཇིག་རྟེན་གྱི་ཁམས་དེར་བྱོན་མ་ཐག་ཏུ་ནམ་མཁའ་ལས་བབས་ནས། བཅོམ་ལྡན་འདས་དེ་བཞིན་གཤེགས་པ་ནོར་བུ་བཟང་པོ་རྣམ་པར་བཀྲ་བ་རབ་གནས་གཙང་མ་དེའི་དྲུང་དུ་གཤེགས་སོ། །དེར་གཤེགས་ནས་བཅོམ་ལྡན་
འདས་གནོད་པ་མི་མངའ་འམ། བསྐྱོད་པ་ཡང་ངམ། བདེ་བ་ལ་རེག་པར་གནས་སམ་ཞེས་གསུངས་ནས། རིན་པོ་ཆེ་སྣ་བདུན་གྱི་པདྨ་འདབ་མ་སྟོང་པ་ཞིག་བྱིན་ནོ། །དེ་ནས་བཅོམ་ལྡན་འདས་ལྷའི་གཞལ་མེད་ཁང་ན་འཁོར་དང་བཅས་པ་བཞུགས་པ་དང་། དེས་ཕྱག་གསེར་གྱི་ཁ་དོག་ཅན་བརྐྱང་ནས། ཟབ་ཅིང་ཟབ་པས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ཡང་དག་པར་དགྱེས་པར་མཛད་དེ། ཁང་པ་བརྩེགས་མ་དེ་ཉིད་དུ་བཞུགས་ནས། བཅོམ་ལྡན་འདས་ཀྱིས་ཀྱང་ཞུས་པ། བཅོམ་ལྡན་འདས་ཁྱོད་ཀྱིས་ཆོས་ཀྱི་འཁོར་ལོ་ལེགས་པར་བསྐོར་ལགས་སམ། ཁྱོད་ཀྱིས་བདུད་དཔུང་དང་བཞོན་པར་བཅས་པ་བཅོམ་ལགས་སམ། ཁྱེད་ཀྱིས་ཆོས་ཀྱི་སྒྲོན་མ་མ་སྤར་ལགས་སམ། ཆོས་ཀྱི་རྒྱལ་མཚན་བསྒྲེང་ལགས་སམ། ཆོས་ཀྱི་རྔ་བརྡུངས་ལགས་སམ། ཆོས་ཀྱི་དུང་རབ་ཏུ་བུས་ལགས་སམ། བཅོམ་ལྡན་འདས་ཁྱོད་ཀྱིས་འཇིག་རྟེན་དུ་སངས་རྒྱས་འབྱུང་བ་བླ་ན་མེད་པའི་ཐམས་ཅད་མཁྱེན་པ་མཁྱེན་པར་བགྱིས་ལགས་སམ། བཅོམ་ལྡན་འདས་ཁྱོད་ཀྱིས་དེང་འཛམ་བུའི་གླིང་དུ་ཆོས་ཀྱི་འཁོར་ལོ་ཆོས་ཀྱི་གཏེར་ལན་གཉིས་སུ་བསྐོར་བ་མཛོད་ཅིག །བཅོམ་ལྡན་འདས་ཀྱིས་ཚིག་འདི་གསུངས་མ་ཐག་ཏུ་སངས་རྒྱས་ཀྱི་ཞིང་འཇིག་རྟེན་གྱི་ཁམས་དེ་ཐམས་ཅད་རྣམ་པ་དྲུག་ཏུ་གཡོས། རབ་ཏུ་གཡོས། ཀུན་དུ་རབ་ཏུ་གཡོས། འགུལ། རབ་ཏུ་འགུལ། ཀུན་དུ་རབ་ཏུ་འགུལ། ལྡེག །རབ་ཏུ་ལྡེག །ཀུན་དུ་རབ་ཏུ་ལྡེག །འུར་འུར། རབ་ཏུ་འུར་འུར། ཀུན་དུ་རབ་ཏུ་འུར་འུར། ཆེམ་ཆེམ། རབ་ཏུ་ཆེམ་ཆེམ། ཀུན་དུ་རབ་ཏུ་ཆེམ་ཆེམ་སྟེ། མེ་ཏོག་གི་ཆར་ཆེན་པོ་ཡང་རབ་ཏུ་འབབ། རྫུ་འཕྲུལ་གྱི་ཆོ་འཕྲུལ་ཆེན་པོ་ཡང་སྣང་། སིལ་སྙན་རྣམས་ཀྱང་མ་དཀྲོལ་བར་སྒྲ་འབྱིན། སྟེང་གི་ནམ་མཁའི་བར་སྣང་གི་ལྷའི་བུ་རྣམས་ཀྱང་ལྷའི་སིལ་སྙན་ཤིན་ཏུ་ཡིད་དུ་འོང་བ་ཡན་ལག་ལྔ་པ་དག་དཀྲོལ་བར་བྱེད། ཀླུ་ཆེན་པོ་གང་དག་ཡིན་པ་
དེ་དག་ཐམས་ཅད་ཀྱང་རིན་པོ་ཆེ་སྣ་ཚོགས་ཀྱི་ཆར་རབ་ཏུ་འབེབས་པར་བྱེད། དྲིའི་ཕྱེ་མ་སྣ་ཚོགས་དང་། ཙནྡན་གྱི་ཆུ་སྣ་ཚོགས་ཀྱི་ཆར་ཡང་འབེབས་པར་བྱེད། གོས་སྣ་ཚོགས་དང་། རྒྱན་དང་། ལྷབ་ལྷུབ་སྣ་ཚོགས་ཀྱི་ཆར་ཡང་རབ་ཏུ་འབེབས་པར་བྱེད། ལྷའི་མུ་ཏིག་དམར་པོ་དང་། སྤུག་དང་། ནོར་བུ་རིན་པོ་ཆེ་ཆེན་པོ་རྣམ་པར་སྣང་བྱེད་དང་། ནོར་བུ་རིན་པོ་ཆེ་ཆེན་པོ་ཉི་མའི་སྙིང་པོ་དང་། ཆུ་ཤེལ་དང་། མེ་ཤེལ་དང་། དཔལ་གྱི་སྙིང་པོའི་ཆར་ཡང་རབ་ཏུ་འབེབས་པར་བྱེད། ལྷའི་མེ་ཏོག་ཨུཏྤ་ལ་དང་། པདྨ་དང་། ཀུ་མུ་ད་དང་། པདྨ་དཀར་པོ་དང་། མན་དཱ་ར་བ་དང་། མན་དཱ་ར་བ་ཆེན་པོའི་ཆར་ཡང་རབ་ཏུ་འབེབས་པར་བྱེད། ལྷའི་འཛམ་བུ་ཆུ་བོའི་གསེར་ལས་བྱུང་བའི་མེ་ཏོག་དང་། ལྷའི་དངུལ་ལས་བྱུང་བའི་མེ་ཏོག་གི་ཆར་ཡང་རབ་ཏུ་འབེབས་པར་བྱེད། ལྷའི་མེ་ཏོག་གི་ཕྲེང་བའི་ཆར་ཡང་རབ་ཏུ་འབེབས་པར་བྱེད། ནམ་མཁའི་དཀྱིལ་ན་གནས་པའི་ལྷའི་བུ་རྣམས་ཀྱང་ཨ་ལ་ལ་ཞེས་སྒྲ་སྙན་པར་འབྱིན་ཅིང་། དབྱངས་ཀྱང་རྗེས་སུ་སྒྲོགས་པར་བྱེད། ལེགས་སོ་ཞེས་བྱ་བ་ཡང་སྦྱིན་པར་བྱེད། བཅོམ་ལྡན་འདས་ཤཱཀྱ་ཐུབ་པ་འཇིག་རྟེན་དུ་ཆོས་ཀྱི་འཁོར་ལོ་ལན་གཉིས་སུ་བསྐོར་བ་དང་། ཡིད་བཞིན་གྱི་ནོར་བུ་རིན་པོ་ཆེ་ཆེན་པོ་ཆོས་ཀྱི་རྒྱལ་མཚན་འཛམ་བུའི་གླིང་དུ་བཞག་པ་དང་། འདི་ལྟ་སྟེ། ནོར་བུ་ཆེན་པོ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པ་གསང་བའི་རྒྱལ་པོའི་ཆོ་ག་ཞིབ་མོ་ཆེན་པོ་འཛམ་བུའི་གླིང་དུ་རབ་ཏུ་སྤྱོད་པར་བགྱིས་པ་ལེགས་སོ་ལེགས་སོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནོར་བུ་བཟང་པོ་རྣམ་པར་བཀྲ་བ་རབ་གནས་གཙང་མའི་མཛོད་སྤུ་ནས་འོད་ཟེར་སྣ་ཚོགས་བཀྱེ་སྟེ། འོད་ཟེར་དེ་དག་གིས་ཕྱོགས་བཅུའི་འཇིག་རྟེན་གྱི་ཁམས་མཐའ་དག་གི་སངས་རྒྱས་ཀྱི་ཞིང་ཐམས་ཅད་དུ་སངས་རྒྱས་བཅོམ་ལྡན་འདས་ཐམས་ཅད་བསྐུལ་ཞིང་སྣང་བར་མཛད་དོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ཡང་
སྣང་བར་མཛད། ལྷའི་གནས་ཐམས་ཅད་དང་། ཀླུའི་གནས་ཐམས་ཅད་དང་། དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དང་། ལྷ་མ་ཡིན་གྱི་རིས་རྣམས་སུ་ཡང་བསྐུལ་ཅིང་སྣང་བར་མཛད་དེ། སླར་ལོག་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་ལན་གསུམ་བསྐོར་བ་བྱས་ནས། སླར་ཡང་གཙུག་ཏོར་གྱི་གསེབ་ཏུ་ཞུགས་སོ། །དེ་ནས་ཕྱོགས་བཅུའི་སངས་རྒྱས་ཀྱི་ཞིང་དེ་དག་ཐམས་ཅད་ཀྱི་སངས་རྒྱས་བཅོམ་ལྡན་འདས་དེ་དག་ཐམས་ཅད་རང་རང་གི་སངས་རྒྱས་ཀྱི་ཞིང་དག་ནས་རྫུ་འཕྲུལ་གྱི་རྣམ་པར་འཕྲུལ་པ་མཛད་ནས། ཚད་མེད་པའི་གང་གཱའི་ཀླུང་གི་བྱེ་མ་དང་མཉམ་པའི་སངས་རྒྱས་བཅོམ་ལྡན་འདས་རྣམས་སངས་རྒྱས་ཀྱི་ཞིང་དེར་གཤེགས་ནས། སོ་སོའི་རྫུ་འཕྲུལ་གྱི་ཆོ་འཕྲུལ་གྱིས་རིན་པོ་ཆེ་སྣ་བདུན་གྱི་ཁང་པ་བརྩེགས་མ་དག་སྤྲུལ་ནས། ཁང་བ་བརྩེགས་མའི་ནང་དུ་འཛམ་བུ་ཆུ་བོའི་གསེར་ལས་བྱུང་བའི་སེང་གེའི་ཁྲི་དག་བྱུང་བ་དེ་ལ་སངས་རྒྱས་བཅོམ་ལྡན་འདས་དེ་དག་ཐམས་ཅད་རང་རང་གི་འཁོར་དང་། ཁང་པ་བརྩེགས་མའི་ནང་དུ་ཞུགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ནོར་བུ་བཟང་པོ་རྣམ་པར་བཀྲ་བ་རབ་གནས་གཙང་མས། དེ་བཞིན་གཤེགས་པ་དེ་དག་ཐམས་ཅད་ཡང་དག་པར་དགྱེས་པར་མཛད་དེ། རྫུ་འཕྲུལ་གྱི་ཆོ་འཕྲུལ་ཆེན་པོས་ལེགས་པར་མཆོད་ནས། རང་རང་གི་སེང་གེའི་ཁྲི་ལ་བཞུགས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནོར་བུའི་སྙིང་པོ་དེ་བཞིན་གཤེགས་པ་ནོར་བུ་བཟང་པོ་རྣམ་པར་བཀྲ་བ་རབ་གནས་གཙང་མ་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སངས་རྒྱས་འདུས་པ་ཆེན་པོ་ཡང་རབ་ཏུ་གདའ། བྱང་ཆུབ་སེམས་དཔའི་འདུས་པ་ཆེན་པོ་དང་། ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་།
ལྟོ་འཕྱེ་ཆེན་པོ་དང།མི་དང་མི་མ་ལགས་པའི་འདུས་པ་ཆེན་པོ་ཐམས་ཅད་ཀྱང་རབ་ཏུ་གདའ། རིག་སྔགས་འཆང་གི་ཚོགས་འདུས་པ་ཆེན་པོ་ཡང་ལྷགས་ནས། འདི་ལྟ་སྟེ། ལག་ན་རྡོ་རྗེ་ལ་སོགས་པ་བྱང་ཆུབ་སེམས་དཔའ་ཆེན་པོའི་ཚོགས་ཀྱང་ལྷགས། བཅོམ་ལྡན་འདས་རྫུ་འཕྲུལ་གྱི་ཆོ་འཕྲུལ་ཆེན་པོ་ཡང་གདའ་ལགས་པས། བཅོམ་ལྡན་འདས་ནོར་བུ་ཆེན་པོ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པ་གསང་བ་རབ་ཏུ་བསྟན་པའི་དུས་ནི་འདི་ལགས་སོ། །ཚོད་ནི་འདི་ལགས་སོ་ཞེས་ལན་གཉིས་ལན་གསུམ་དུ་གསོལ་བ་བཏབ་པ་དང་། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནོར་བུ་བཟང་པོ་རྣམ་པར་བཀྲ་བ་རབ་གནས་གཙང་མས་བྱང་ཆུབ་སེམས་དཔའ་སེམས་དཔའ་ཆེན་པོ་ནོར་བུའི་སྙིང་པོ་ལ་བཀའ་སྩལ་པ། རིགས་ཀྱི་བུ་སོང་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་གསོལ་བ་ཐོབ་ཤིག་དང་། དེས་ཁྱོད་ལ་རབ་ཏུ་སྟོན་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནོར་བུའི་སྙིང་པོ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་སྤྱན་སྔར་འདུག་ནས། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནོར་བུའི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ནོར་བུ་ཆེན་པོ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པ་གསང་བ་འདི་སེམས་ཅན་ཐམས་ཅད་ལ་ཐུགས་བརྩེ་བའི་སླད་དུ་རབ་ཏུ་བསྟན་དུ་གསོལ། དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་གསོལ་བ་བཏབ་པར་ཐུགས་སུ་ཆུད་ནས། གསང་བ་པའི་བདག་པོ་ལག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ་སོང་ལ་འཁོར་མང་པོ་འདིའི་དབུས་ཀྱིས་ཕྱོགས་སུ་རྡོ་རྗེས་ས་ལ་སྣུན་ཅིག །དེ་ནས་གསང་བ་པའི་བདག་པོ་ལག་ན་རྡོ་རྗེས་བཅོམ་ལྡན་འདས་ཀྱིས་བཀའ་སྩལ་
བ་མཉན་ནས། འཁོར་གྱི་སའི་དཀྱིལ་འཁོར་ཆེན་པོའི་དབུས་གང་ན་བ་དེར་སོང་ནས། ས་ཕྱོགས་དེ་ལ་རྡོ་རྗེས་བསྣུན་ཏེ་ས་ལ་བསྣུན་མ་ཐག་ཏུ་དེ་ནས་གྲུ་བཞི་རགས་སོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རྣམ་པ་དྲུག་ཏུ་རབ་ཏུ་གཡོས་སོ། །གཡོས་མ་ཐག་ཏུ་ས་ཕྱོགས་དེར་རིན་པོ་ཆེ་སྣ་བདུན་གྱི་ཁང་པ་བརྩེགས་མ་གྲུ་བཞི་པ། ཀ་བ་བཞི་ཟུག་པ། སྒོ་བཞི་བཏོད་པ། མཉམ་པ། ཉམས་དགའ་བ། ཤིན་ཏུ་རྣམ་པར་ཕྱེ་བ། ཆས་མཛེས་པར་བྱས་པ། བཀྲ་བ། བལྟ་ན་སྡུག་པ། འོད་འབར་བ། ཐེམ་སྐས་བཞི་དང་ལྡན་པ། འཕང་དུ་དཔག་ཚད་གསུམ་ཡོད་ལ། རྒྱར་དཔག་ཚད་ལྔ་ཡོད་པ་ཞིག་བྱུང་ངོ་། །ཁང་པ་བརྩེགས་མའི་དབུས་དེར་ཡང་འཛམ་བུ་ཆུ་བོའི་གསེར་ལས་བྱུང་བའི་མཆོད་རྟེན་ནོར་བུ་དང་། རིན་པོ་ཆེ་དང་། མུ་ཏིག་གི་དྲ་བ་དུ་མས་བརྒྱན་པ། རིན་པོ་ཆེ་སྣ་བདུན་ལས་བྱུང་བའི་དྲིལ་བུ་གཡེར་ཀའི་དྲ་བས་གཡོགས་པ། དྲིལ་བུ་དུ་མ་འཕྱང་དུ་བཅུག་པ། དར་གྱི་ཆུན་པོ་དུ་མས་མཛེས་པར་བྱས་པ། མེ་ཏོག་གི་ཆུན་པོ་དུ་མས་མངོན་པར་བརྒྱན་པ་ཞིག་བྱུང་ངོ་། །མཆོད་རྟེན་དེའི་དབུས་ན་དེ་བཞིན་གཤེགས་པ་གསུམ་གྱི་སྐུ་བཞུགས་སོ། །དེ་ནས་སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱིས་ཁང་པ་བརྩེགས་མ་དེ་ལ་མཆོད་པ་མཛད་དོ། །བྱང་ཆུབ་སེམས་དཔའི་འཁོར་དེ་ཡང་ཁང་པ་བརྩེགས་མ་དེ་དང་། མཆོད་རྟེན་ལ་མཆོད་པར་བྱེད། རྗེད་པར་བྱེད། མེ་ཏོག་དང་། བདུག་པ་དང་། དྲི་དང་། ཕྲེང་བ་དང་། བྱུག་པ་དང་། གདུགས་དང་། རྒྱལ་མཚན་དང་། བ་དན་དང་། རོལ་མོ་དང་། ཐལ་མོ་སྦྱར་བ་དང་། ཕྱག་འཚལ་བར་བྱེད་དོ། །དེ་ནས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པའི་འཁོར་མང་པོ་དེ་དག་ངོ་མཚར་སྐྱེས་ཏེ་ཡ་མཚན་དུ་གྱུར། སྤྲོ་བར་གྱུར་ནས་ཁང་པ་བརྩེགས་མ་དང་། མཆོད་
རྟེན་འདི་ཅིའི་ཕྱིར་བྱུང་བར་གྱུར་ཅེས་ཅ་ཅོ་དང་ག་ཞའི་སྒྲ་མཐོན་པོར་འབྱིན་ཅིང་། མཆོད་རྟེན་དང་ཁང་པ་བརྩེགས་མ་དེ་ལ་སྐོར་བ་བྱེད། མཆོད་པར་བྱེད། རྗེད་པར་བྱེད། མེ་ཏོག་དང་། བདུག་པ་དང་། དྲི་དང་། ཕྲེང་བ་དང་། བྱུག་པ་དང་། སིལ་སྙན་སྣ་ཚོགས་དང་། ཕེག་རྡོབ་པ་དག་གིས་མཆོད་པར་བྱེད་དོ། །བྱང་ཆུབ་སེམས་དཔའ་དེ་དག་ཐམས་ཅད་དང་། འཁོར་གྱི་དཀྱིལ་འཁོར་ཐམས་ཅད་ཀྱང་ཐལ་མོ་སྦྱར་ནས་འཁོད་དེ་ཕྱག་འཚལ་བར་བྱེད་དོ། །དེ་ནས་ཁང་པ་བརྩེགས་མ་དེ་ལས་སྒྲ་བྱུང་བ། ཀྱེ་འཁོར་མང་པོ་དག་པར་སྣང་ལ་ཅི་སྣང་ལྟོས་ཤིག་ལྟོས་ཤིག །དེ་ནས་ཇི་ལྟར་འདུས་པའི་འཁོར་མང་པོ་དེ་དག་ཐམས་ཅད་ཀྱིས་བར་སྣང་ལ་བལྟས་ཏེ། བལྟས་མ་ཐག་ཏུ་བེེཌཱུཪྱ་དང་། ནོར་བུ་རིན་པོ་ཆེ་ཆེན་པོ་ལས་བྱུང་བའི་སྤྲིན་གྱི་ཕུང་པོ་ཆེན་པོ་ཞིག་བྱུང་ངོ་། །དེ་ནས་སྤྲིན་གྱི་ཕུང་པོའི་སྟེང་དུ་ནོར་བུ་ཆེན་པོ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པ་གསང་བ་ཞེས་བྱ་བའི་གཟུངས་འདི་ཡི་གེ་གསེར་གྱི་ཁ་དོག་ཏུ་བྲིས་པར་མཐོང་ངོ་། །ནམ་མཁའི་དཀྱིལ་དེ་ཉིད་ལས་སྒྲ་བྱུང་བ། སངས་རྒྱས་བཅོམ་ལྡན་འདས་ཐམས་ཅད་ནོར་བུ་ཆེན་པོ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པ་གསང་བ་ཞེས་བྱ་བའི་གཟུངས་བཀླག་ཏུ་གསོལ་བཀླག་ཏུ་གསོལ། སྒྲ་བྱུང་མ་ཐག་ཏུ་དེ་བཞིན་གཤེགས་པ་རེ་རེའི་སྤྱན་སྔར་སྤྲིན་གྱི་ཕུང་པོ་ལ་བྲིས་པ་བྱུང་ནས་འདི་སྐད་ཅེས་ཀྱང་དབྱངས་སུ་སྒྲོགས་སོ། །བཅོམ་ལྡན་འདས་ཤཱཀྱ་ཐུབ་པ་དེ་ལ་ཕྱག་འཚལ་ལོ་ཕྱག་འཚལ་ལོ། །མཆོད་རྟེན་མཆོག་འདི་སྒོ་ཕྱེ་ཤིག །མཆོད་རྟེན་དེའི་དབུས་ན་དེ་བཞིན་གཤེགས་པ་གསུམ་གྱི་སྐུ་བཞུགས་ཏེ། དེའི་མཐུས་ཆོ་འཕྲུལ་གྱི་རྣམ་པར་སྤྲུལ་པའི་ཁྱད་པར་ཆེན་པོ་འདི་སྣང་ཞིང་དེ་ཁོ་ནའི་མཐུས། དེ་བཞིན་གཤེགས་པ་ཐམས་ཅད་ཀྱི་རྫུ་འཕྲུལ་རྣམ་པར་འཕྲུལ་པ་ཡང་སྣང་། ནོར་བུ་ཆེན་པོ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པའི་གསང་བའི་གཟུངས་ཀྱི་དཀྱིལ་འཁོར་དང་། ཆོ་ག་དང་། རིག་སྔགས་དང་། ཆོ་ག་ཞིབ་མོའི་ཡོ་བྱད་དང་བཅས་པ་མཐའ་དག་
རྫོགས་ཤིང་རྒྱས་པར་འཁོར་གྱི་དབུས་སུ་ལེགས་པར་རབ་ཏུ་འཆད་པར་འགྱུར་རོ། །དེ་ནས་ཕྱོགས་བཅུ་ནས་འདུས་པའི་སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱིས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་འདི་སྐད་ཅེས་གསུངས་སོ། །བཅོམ་ལྡན་འདས་མཆོད་རྟེན་རིན་པོ་ཆེ་འདི་དང་འདི་ན་བཞུགས་པ་འདི་ལྟ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནོར་བུའི་རྒྱལ་པོ་མེ་ཏོག་རྒྱལ་མཚན་དང་། ནོར་བུ་རྣམ་པར་བཀྲ་བ་དང་། རྡོ་རྗེ་འཕགས་པའི་རྒྱལ་པོ་ཞེས་བྱ་བ་དེ་དག་བསྟན་པའི་སྐབས་དབྱེ་བར་མཛོད་ཅིག །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་རྫུ་འཕྲུལ་གྱི་ཆོ་འཕྲུལ་ཆེན་པོས་ཁང་པ་བརྩེགས་མའི་མཆོད་རྟེན་གང་ན་བར་བཞུད་དེ། ཕྱག་གཡས་པ་གསེར་གྱི་ཁ་དོག་ཅན་བསོད་ནམས་བརྒྱའི་མཚན་གྱིས་བརྒྱན་པ་བརྐྱང་ནས། མཆོད་རྟེན་མཆོག་དེའི་སྒོའི་སྒོ་འཕར་ཕྱེ་སྟེ། དེ་བཞིན་གཤེགས་པའི་སྐུ་རྣམས་བསྟན་ཏོ། །དེ་ནས་དེ་བཞིན་གཤེགས་པ་དེ་རྣམས་ཀྱིས། དེ་བཞིན་གཤེགས་པ་ཤཱཀྱ་ཐུབ་པ་ལ་ལེགས་སོ་ཞེས་བྱ་བ་བྱིན་ཏེ། ཤཱཀྱ་ཐུབ་པ་ལེགས་སོ་ལེགས་སོ། །དེང་ཁྱོད་ཀྱིས་འཛམ་བུའི་གླིང་དུ་ཆོས་ཀྱི་འཁོར་ལོ་ལན་གཉིས་པ་བསྐོར་ཏོ། །བཅོམ་ལྡན་འདས་སེང་གེའི་ཁྲི་འདི་ཉིད་ལ་བཞུགས་ཤིག །དེ་ནས་དེ་བཞིན་གཤེགས་པ་ཤཱཀྱ་ཐུབ་པ་མཆོད་རྟེན་གྱི་ནང་དུ་ཁྲི་དེ་ཉིད་ལ་བཞུགས་སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་འདི་དག་ཁང་པ་བརྩེགས་མའི་མཆོད་རྟེན་གྱི་ནང་དུ་ཅིའི་སླད་དུ་བྱུང་། གང་ནས་ནི་གཤེགས། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་སྔོན་བྱུང་བ་བསྐལ་པ་བསམ་གྱིས་མི་ཁྱབ་པ། ཚད་མེད་པ། དཔག་ཏུ་མེད་པ། གཞལ་དུ་མེད་པ། གཞལ་གྱིས་མི་ལང་བ། ཚད་གཟུང་དུ་མེད་པ། ཆེས་གྲངས་
མེད་པ་ན་གང་གི་ཚེ་འཛམ་བུའི་གླིང་འབྱོར་པ་དང་། རྒྱས་པ་དང་། ལོ་ལེགས་པ་དང་། ཉམས་དགའ་བ་དང་། སྐྱེ་བོ་དང་། མི་མང་པོས་གང་ཞིང་། མ་རྨོས་པ་མ་བཏབ་པའི་འབྲས་སཱ་ལུ་བྱུང་སྟེ། བདག་གི་བ་མེད་ཅིང་ཡོངས་སུ་བཟུང་བ་མེད་དེ། འཇིག་རྟེན་ཐམས་ཅད་བདེ་བ་དང་ལྡན་པ། དེའི་ཚེ་འཛམ་བུའི་གླིང་ན་སངས་རྒྱས་མེད་དོ། །དེའི་ཚེ་རིའི་རྒྱལ་པོ་རིན་ཆེན་རི་བོ་ཞེས་བྱ་བ་དེ་ལ་དྲང་སྲོང་གསུམ་ཞིག་གནས་ཏེ། གཅིག་གི་མིང་ནི་ནོར་བུའི་གཙུག་ཏོར། གཉིས་པ་ནི་གསེར་གྱི་གཙུག་ཏོར། གསུམ་པ་ནི་རྡོ་རྗེའི་གཙུག་ཏོར་ཞེས་བྱ་སྟེ། དེ་རྣམས་བདག་ཅག་ཇི་ལྟར་སེམས་ཅན་ཐམས་ཅད་བསྒྲལ་བའི་ཕྱིར་འདི་ལྟ་སྟེ། འཇིག་རྟེན་བླ་ན་མེད་པ་ཡང་དག་པར་རྫོགས་པར་བྱང་ཆུབ་པའི་སངས་རྒྱས་ཉིད་འཐོབ་པར་འགྱུར་སྙམ་ཞིང་། གཅིག་ཏུ་སངས་རྒྱས་ཡིད་ལ་བྱེད། ཆོས་ཡིད་ལ་བྱེད། དགེ་འདུན་ཡིད་ལ་བྱེད་དོ། །དེ་ནས་དྲང་སྲོང་དེ་རྣམས་དེ་སྙམ་དུ་བསམས་ནས། ཡུད་ཙམ་ཞིག་ཅང་མི་སྨྲ་བར་གྱུར་ཅིང་སེམས་པ་ན། དེ་རྣམས་ཀྱིས་སེམས་ཅན་ཐམས་ཅད་མངོན་པར་དགའ་བའི་བྱམས་པ་རྣམ་པར་བཀྲ་བའི་གཞལ་མེད་ཁང་ཞེས་བྱ་བའི་ཏིང་ངེ་འཛིན་ཐོབ་ཅིང་། ལྷའི་མིག་སྐྱེས་ནས་ཇི་ཙམ་ན་སྟེང་དུ་བལྟས་ན། གནས་གཙང་མའི་རིས་ཀྱི་ལྷའི་བུ་བར་སྣང་ལ་སྒྲ་འབྱིན་པ། སྐྱེས་བུ་དམ་པ་ལེགས་སོ་ལེགས་སོ། །ཁྱོད་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་འདི་ནི་ལེགས་སོ། །ཀྱེ་སྐྱེས་བུ་དམ་པ་དག་ནོར་བུ་ཆེན་པོ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པ་གསང་བ་སྔོན་གྱི་དེ་བཞིན་གཤེགས་པ་རྣམས་ཀྱིས་སེམས་ཅན་ཐམས་ཅད་ལ་ཕན་པའི་དོན་དུ་གསུངས་པ་ཐོས་པ་ཙམ་གྱིས་ཕྱིར་མི་ལྡོག་པ་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་ཐོབ་པར་འགྱུར། ཆོས་ཐམས་ཅད་མངོན་དུ་འགྱུར། གཟུངས་ཀྱི་སྒོ་ཐམས་ཅད་མངོན་དུ་འགྱུར། བདུད་ཐམས་ཅད་བརྒྱལ་བར་འགྱུར། ཆོས་ཐམས་ཅད་ཀྱི་སྒྲོན་མ་སྦར་
བར་འགྱུར། དགེ་བའི་རྩ་བ་ཐམས་ཅད་མངོན་དུ་འགྱུར། ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་འགྱུར། དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དང་། ཡི་དགས་ཀྱི་ཡུལ་དང་། ལྷ་མ་ཡིན་གྱི་ཆོས་རྣམས་ལས་ཡོངས་སུ་ཐར་བར་འགྱུར། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ལས་ཡོངས་སུ་ཐར་བར་འགྱུར་བ་ཐོབ་ནས། ཕྱི་མའི་ཚེ་ཕྱི་མའི་དུས་ན་འཛམ་བུའི་གླིང་འདི་ན་སེམས་ཅན་གང་དག་ཕར་མི་འཛིན་པ་དང་། མར་མི་འཛིན་པ་དང་། དགེ་སྦྱོང་དུ་མི་འཛིན་པ་དང་། བྲམ་ཟེར་མི་འཛིན་པ་དང་། མི་དགེ་བ་དང་། དམ་པའི་ཆོས་སྤོང་བ་དང་། འཕགས་པ་ལ་སྐུར་པ་འདེབས་པ་དང་། མནར་མེད་པར་གཞོལ་བ་དང་། སངས་རྒྱས་དང་། བྱང་ཆུབ་སེམས་དཔའ་ལ་སླུ་བ་དང་། དགྲ་བཅོམ་པ་གསོད་པ་དང་། མཚམས་མེད་པ་ལྔ་བྱེད་པ་དང་། བྲམ་ཟེ་གསོད་པ་དང་། བ་ལང་གསོད་པ་དང་། ཆོམ་རྐུན་བྱེད་པ་དང་། གཡོན་ཅན་དང་། ཤོ་གམ་སྒུགས་པ་དང་། བརྫུན་དུ 
་སྨྲ་བ་དང་། མ་བྱིན་པར་ལེན་པ་དང་། འདོད་པས་ལོག་པར་སྤྱོད་པ་དང་། ཕྲ་མ་སྨྲ་བ་དང་། ཚིག་ཀྱལ་པ་སྨྲ་བ་དང་། གཞལ་བ་ལ་སྒྱུ་བྱེད་པ་དང་། གཞལ་ལུགས་ལ་སྒྱུ་བྱེད་པ་དང་། སྲང་ལ་སྒྱུ་བྱེད་པ་དང་། གཞན་གྱི་ནོར་འཕྲོག་པ་དང་། གཏམས་པ་བརྣོག་པ་དང་། བཤེས་པ་ལ་འཁུ་བ་དང་། སྔོན་གྱི་ལས་ཀྱི་སྒྲིབ་པས་ཟིན་པ་དག་འབྱུང་བར་འགྱུར་ཏེ། དེ་དག་ཐམས་ཅད་གཟུངས་འདིའི་མཐུས་ཐོས་པ་ཙམ་མམ། བཀླགས་པའམ། ཀུན་ཆུབ་པར་བྱས་པའམ། ལུས་ལ་ཐོགས་སམ། བྲིས་ནས་འཆང་ངམ། རྒྱལ་མཚན་གྱི་རྩེ་མོ་ལ་འདོགས་སམ། གླེགས་བམ་དུ་བྱེད་དམ། རས་ལ་བྲིས་པའམ། དར་ལ་བྲིས་པའམ། རྩིག་པ་ལ་བྲིས་པའམ། རབ་ལ་བྲིས་
པའམ། ཆུང་ངུ་ན་སྒྲ་ཉན་པའམ། ལག་པས་རེག་གམ། གྲིབ་མས་ཕོག་གམ། སེམས་ཅན་གཞན་གྱིས་རེག་ན་ཡང་དེ་དག་ཐམས་ཅད་གདོན་མི་ཟ་བར་ཕྱིར་མི་ལྡོག་པར་གྱུར་ནས། བླ་ན་མེད་པ་ཡང་དག་པར་རྫོགས་པར་བྱང་ཆུབ་མངོན་པར་རྫོགས་པར་སངས་རྒྱས་པར་འགྱུར། ཚེ་འདི་ཉིད་ལ་ཡང་ཡོན་ཏན་བརྒྱ་སྟོང་མཐའ་ཡས་པ་ཐོབ་པར་འགྱུར་རོ། །སྡིག་པ་ཐམས་ཅད་དང་བྲལ་བར་འགྱུར། དགེ་བའི་རྩ་བ་ཐམས་ཅད་དང་ལྡན་པར་འགྱུར། བདུད་ཐམས་ཅད་མཐར་བྱེད་པར་འགྱུར། འཇིག་རྟེན་ཐམས་ཅད་དགའ་བར་འགྱུར། སེམས་ཅན་ཐམས་ཅད་ཀྱི་མཆོད་པའི་འོས་སུ་འགྱུར། རྒྱལ་པོ་དང་། རྒྱལ་བུ་དང་། བློན་པོ་དང་། བཙུན་མོའི་འཁོར་དང་བཅས་པ་ཐམས་ཅད་དགའ་བར་འགྱུར། དགེ་སྦྱོང་དང་། བྲམ་ཟེ་ཐམས་ཅད་དགའ་བར་འགྱུར། ཚིག་གཟུང་བར་འོས་པར་འགྱུར། རྟག་ཏུ་ལག་པ་དང་། རྐང་པ་གཞོན་ཤ་ཅན་དུ་འགྱུར། ཚིག་མཉེན་ཞིང་སྙན་པར་འགྱུར། བཀྲེན་པར་མི་འགྱུར་ཏེ། འཇིག་རྟེན་པའི་སྡུག་བསྔལ་ཉམས་སུ་མྱོང་བར་མི་འགྱུར། ལུས་ལ་དུག་གིས་མི་ཚུགས་ཏེ། མཚོན་གྱིས་མ་ཡིན། མེས་མ་ཡིན། ཆུས་མ་ཡིན། དེ་ལ་གཅན་གཟན་ཁྲོ་བོའི་འཇིགས་པས་མི་ཚུགས་ཏེ། མི་རྒོད་ཀྱི་འཇིགས་པས་མ་ཡིན། ཆོམ་རྐུན་གྱི་འཇིགས་པས་མ་ཡིན། ཀླ་ཀློའི་འཇིགས་པས་མ་ཡིན། ལམ་དང་ལམ་གོལ་བའི་འཇིགས་པས་མ་ཡིན། གནོད་སྦྱིན་གྱི་འཇིགས་པས་མ་ཡིན། འབྱུང་པོའི་འཇིགས་པས་མ་ཡིན། སྲིན་པོའི་འཇིགས་པས་མ་ཡིན། ཤ་ཟའི་འཇིགས་པས་མ་ཡིན། མཁའ་འགྲོ་མའི་འཇིགས་པས་མ་ཡིན་ཏེ། སྦྲུལ་གྱི་འཇིགས་པ་མི་འབྱུང་། ལུས་ལ་རིམས་ཀྱིས་མི་ཚུགས་ཏེ། ཞག་གཅིག་པའམ། ཞག་གཉིས་པའམ། ཞག་གསུམ་པའམ། ཞག་བཞི་པའམ། རྟག་པའི་རིམས་སམ། རིམས་ཐམས་ཅད་ཀྱིས་ལུས་ལ་མི་ཚུགས་པར་འགྱུར། མིག་གི་ནད་མི་འབྱུང་སྟེ། རྣ་
བའི་ནད་མ་ཡིན། སྣའི་ནད་མ་ཡིན། ལྕེའི་ནད་མ་ཡིན། ཁའི་ནད་མ་ཡིན། སོའི་ནད་མ་ཡིན། མཆུའི་ནད་མ་ཡིན། མགྲིན་པའི་ནད་མ་ཡིན། རྣ་བར་ཟུག་པ་མ་ཡིན། ལག་པའི་ནད་མ་ཡིན། རྒྱབ་ཀྱི་ནད་མ་ཡིན། ཆུ་སོའི་ནད་མ་ཡིན། གཞང་འབྲུམ་གྱི་ནད་མ་ཡིན། གཅིན་ནད་མ་ཡིན། འཁྲུ་བའི་ནད་མ་ཡིན། ཤུ་བའི་ནད་མ་ཡིན། བརླའི་ནད་མ་ཡིན། བྱིན་པའི་ནད་མ་ཡིན། རྐང་པའི་ནད་མ་ཡིན། ནད་ཐམས་ཅད་མི་འབྱུང་ངོ་། །འདི་ལྟ་སྟེ། བས་ལྡག་དང་། ལྷོག་པ་དང་། མེ་དཔལ་དང་། ལྟོ་ན་བ་དང་། གཡན་པ་དང་། ཕོལ་མིག་དང་། ཁྱི་རྔོ་དང་། མཛེ་དང་། རྐང་ཤུ་ལ་སོགས་པ་ཐམས་ཅད་ཀྱི་ཐམས་ཅད་དུ་མི་འབྱུང་། ཀླད་པ་ན་བ་མ་ཡིན། གཞོགས་ཕྱེད་ན་བ་མ་ཡིན། ལོང་བར་མི་འགྱུར། ཞར་བར་མི་འགྱུར། སྒུར་པོ་མ་ཡིན། ཕ་རོལ་གྱི་མཐུས་འཆི་བར་མི་འགྱུར། འོན་པར་མི་འགྱུར། ཤ་བཀྲ་ཅན་དུ་མི་འགྱུར། བརྙས་ཤིང་གནས་པར་མི་འགྱུར་ཏེ། ཡོན་ཏན་གྱི་ཁྱད་པར་འདི་དག་ཆོས་དང་ལྡན་པར་འབྱུང་བར་འགྱུར་རོ། །འཆི་བའི་ཚེ་ན་ཡང་སྤོབས་པ་མི་ཟད་པར་འགྱུར། སེམས་འཁྲུགས་པས་དུས་བྱེད་པར་མི་འགྱུར། དེ་བཞིན་གཤེགས་པ་ཐམས་ཅད་ཞལ་མངོན་སུམ་དུ་བསྟན་ནས་དབུགས་འབྱིན་པ་མཛད་པར་འགྱུར། ལུས་ལ་བྱད་དང་གཡེངས་བྱེད་ཀྱིས་མི་ཚུགས། ལུས་ལ་སྔགས་ཀྱི་སྦྱོར་བས་མི་ཚུགས། བདེ་བར་གཉིད་ཀྱིས་ལོག་པར་འགྱུར། བདེ་བར་སད་པར་འགྱུར། རྨི་ལམ་ན་ཡང་སངས་རྒྱས་བརྒྱ་སྟོང་མཐོང་བར་འགྱུར། དེ་བཞིན་གཤེགས་པ་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ཐམས་ཅད་མཐོང་བར་འགྱུར་ཏེ། གསང་བའི་གཟུངས་ཀྱི་མཐུས་ཡོན་ཏན་གྱི་ཁྱད་པར་དེ་ལྟ་བུ་འབྱུང་ངོ་ཞེས་སྨྲ་བ་མཐོང་ངོ་། །དེ་ནས་དྲང་སྲོང་དེ་རྣམས་ཀྱི་དགའ་བ་སྙིང་ལ་རེག་ཅིང་སྤྲོ་བ་ཐོབ་ནས་མར་སར་གྱི་གོང་བུ་བཞུ་བ་བཞིན་དུ་ལུས་ཞིག་ནས་ཞུ་བའི་ཁུ་བ་དེ་སའི་ནང་དུ་ཐིམ་མོ། །དེ་ནས་ས་གཞི་དེ་ལས་སྨྱིག་མའི་
མདེའུ་གསེར་གྱི་ཁ་དོག་ཅན། རྩ་བ་རིན་པོ་ཆེ་སྣ་བདུན་ལས་བྱས་པ། ལོ་མ་གསེར་ལས་བྱས་པ། རྩེ་མོ་མུ་ཏིག་ལས་བྱས་པ། བཀྲ་བ། བལྟ་ན་སྡུག་པ། སྟོབས་དང་ལྡན་པ། གཟི་དང་ལྡན་པ། དྲི་ཞིམ་པ། ཤིན་ཏུ་ཡིད་དུ་འོང་བ་གསུམ་སྐྱེས་སོ། །སྨྱིག་མའི་མདེའུ་དེ་རྣམས་ཟླ་བ་བཅུ་ལོན་པ་དང་གས་ཏེ། དེ་རྣམས་ཀྱི་དབུས་ནས་ཁྱེའུ་གཟུགས་བཟང་པོ་མཛེས་པ། བལྟ་ན་སྡུག་པ། ཁ་དོག་རྒྱས་པ་མཆོག་དང་ལྡན་པ་གསུམ་བྱུང་ངོ་། །དེ་ནས་ཁྱེའུ་དེ་རྣམས་ཕྱོགས་དེ་ཉིད་དུ་དེའི་དྲུང་ན་སྐྱིལ་མོ་ཀྲུང་བཅས་ཏེ་སྒོམ་ཞིང་འཁོད་དོ། །ཇི་ཙམ་ན་ཞག་བདུན་ལོན་པའི་ཉིན་མོ་བྱང་ཆུབ་མངོན་པར་རྫོགས་པར་སངས་རྒྱས་ཏེ། གསེར་གྱི་ཁ་དོག་གི་ལུས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་སྤྲས་པ། འོད་འདོམ་གང་གིས་ཀུན་ནས་སྤྲས་པར་གྱུར་ཏོ། །སྨྱིག་མའི་མདེའུ་དེ་རྣམས་ཀྱང་ཁང་པ་བརྩེགས་མར་གྱུར་ཏོ། །ནོར་བུ་ཆེན་པོ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པ་གསང་བའི་གཟུངས་འདི་ཡང་ནམ་མཁའ་ལ་གསེར་གྱི་ཡི་གེར་སྣང་ངོ་། །རྒྱལ་པོ་ཆེན་པོ་བཞི་ཡང་སྟེང་ནས་གདུགས་འཛིན་ཅིང་མེ་ཏོག་གིས་གཏོར་ཏེ། འདི་སྐད་ཅེས་འཇིག་རྟེན་དུ་སངས་རྒྱས་བྱུང་ངོ་ཞེས་དབྱངས་སུ་སྒྲོགས་ཤིང་འདི་ལྟ་སྟེ། ཀླུའི་བདག་པོ་རྒྱལ་པོ་ཆེན་པོའི་གཙུག་གི་ནོར་བུ་ཞེས་བྱ་བ་དང་། གྲུལ་བུམ་གྱི་བདག་པོ་རྒྱལ་པོ་ཆེན་པོ་ནོར་བུའི་སྙིང་པོ་ཞེས་བྱ་བ་དང་། བྲང་འགྲོའི་བདག་པོ་རྒྱལ་པོ་ཆེན་པོ་ནོར་བུའི་འོད་ཅེས་བྱ་བ་དང་། གནོད་སྦྱིན་གྱི་བདག་པོ་རྒྱལ་པོ་ཆེན་པོ་ནོར་བུའི་རྡོ་རྗེ་ཞེས་བྱ་བ་འཁོར་གནོད་སྦྱིན་བརྒྱ་སྟོང་ཕྲག་དུ་མ་དང་། བཅོམ་ལྡན་འདས་དེ་དག་ལ་མཆོད་པ་བྱེད་དོ། །ས་ཕྱོགས་དེ་ཡང་རིན་པོ་ཆེ་སྣ་བདུན་གྱི་རང་བཞིན་དུ་གྱུར་ཏོ། །མེ་ཏོག་གི་ཤིང་ཐམས་ཅད་ཀྱང་རིན་པོ་ཆེའི་རང་བཞིན་དུ་གྱུར་ཏོ། །ལག་ན་རྡོ་རྗེ་དེའི་ཚེ་དེའི་དུས་ཀྱི་ཚེ་དྲང་སྲོང་སྨྱིག་མའི་མདེའུ་རྣམས་ལས་བྱུང་བ་བྱང་ཆུབ་མངོན་པར་རྫོགས་པར་སངས་རྒྱས་པ་གང་ཡིན་པ་དེ་དག་གཞན་ཞིག་ཡིན་སྙམ་ན་དེ་ལྟར་མི་
བལྟའོ། །དེ་ཅིའི་ཕྱིར་ཞེ་ན། ལག་ན་རྡོ་རྗེ་དེ་དག་ན་ཁང་པ་བརྩེགས་མའི་མཆོད་རྟེན་གྱི་དེ་བཞིན་གཤེགས་པ་འདི་དག་ཡིན་ནོ། །ས་ཕྱོགས་ཀྱང་འདི་ཡིན་ནོ། །འཇིག་རྟེན་གྱི་ཁམས་ཀྱང་འདི་ཡིན་ནོ། །སྨྱིག་མའི་མདེའུའི་ཁང་པ་བརྩེགས་མ་ཡང་འདི་ཡིན་ནོ། །བྱང་ཆུབ་སེམས་དཔའི་འཁོར་འདུས་པ་ཡང་འདི་ཡིན་ནོ། །དེ་རྣམས་དྲང་སྲོང་དུ་གྱུར་པ་ན་གཟུངས་འདི་ཐོས་པ་ཙམ་མམ། སྙིང་པོ་སེམས་ལ་བསྒོམས་པ་ཙམ་གྱིས་དྲང་སྲོང་གི་ལུས་སྤངས་ནས་བྱང་ཆུབ་མངོན་པར་རྫོགས་པར་སངས་རྒྱས་སོ། །ལག་ན་རྡོ་རྗེ་དེའི་ཚེ་དེའི་དུས་ཀྱི་ནམ་མཁའི་དཀྱིལ་ན་གནས་གཙང་མའི་རིས་ཀྱི་ལྷའི་བུ་གཟུངས་འདིའི་ཡོན་ཏན་གྱི་ཁྱད་པར་བསྔགས་པ་སྨྲ་བ་གང་ཡིན་པ་དེ་གཞན་ཞིག་ཡིན་སྙམ་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ང་ཉིད་དེའི་ཚེ་དེའི་དུས་ན་གནས་གཙང་མའི་རིས་ཀྱི་ལྷར་གྱུར་ཏོ། །ལག་ན་རྡོ་རྗེ་དེའི་ཚེ་དེའི་དུས་ན་གནས་གཙང་མ་ཞེས་བྱ་བ་གང་གིས་དྲང་སྲོང་དེ་རྣམས་དང་། དེ་བཞིན་གཤེགས་པ་དེ་རྣམས་ལ་བཀུར་སྟི་དང་། རིམ་གྲོ་བྱས་པ་གང་ཡིན་པ་དེ་གཞན་ཞིག་ཡིན་སྙམ་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནོར་བུ་བཟང་པོ་རྣམ་པར་བཀྲ་བ་རབ་ཏུ་གནས་པ་འདི་གནས་གཙང་མ་ཞེས་བྱ་བ་རིམ་གྲོ་བར་གྱུར་པ་ན་དེ་རྣམས་ཀྱིས་དེ་བཞིན་གཤེགས་པར་ལུང་བསྟན་ཏོ། །དེ་ནས་སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱིས་དེ་བཞིན་གཤེགས་པ་ཤཱཀྱ་ཐུབ་པ་ལ་ལེགས་སོ་ཞེས་བྱ་བ་བྱིན་ནོ། །ཤཱཀྱ་ཐུབ་པ་ཁྱོད་ཀྱིས་སངས་རྒྱས་ཀྱི་ཡུལ་གྱི་རྣམ་པར་འཕྲུལ་བའི་བྱིན་གྱི་རླབས་འདི་འདྲ་བས་སྔོན་གྱི་སྦྱོར་བ་གསུངས་ཤིང་། དེ་བཞིན་གཤེགས་པའི་གསང་བའི་གཟུངས་འདི་ཡང་དག་པར་བསྟན་ཏེ། དེ་བཞིན་གཤེགས་པ་ཐམས་ཅད་ཀྱི་གསང་བའི་གཟུངས་འདི་དེ་བཞིན་གཤེགས་པ་ཐམས་ཅད་ཀྱི་ཡུམ། དེ་བཞིན་གཤེགས་པ་ཐམས་ཅད་ཀྱི་སྙིང་པོ་གསང་བ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་བསྐོར་བ། དེ་
བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་སྙིང་པོར་གཤེགས་པའི་གསང་བ། དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་སེང་གེའི་ཁྲི་ལ་གཤེགས་པའི་གསང་བ། དེ་བཞིན་གཤེགས་པ་ཐམས་ཅད་ཀྱི་རྫུ་འཕྲུལ་གྱི་ཆོ་འཕྲུལ་གྱི་གསང་བ་དང་། དེ་བཞིན་གཤེགས་པ་ཐམས་ཅད་ཀྱི་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པའི་གསང་བ། དེ་བཞིན་གཤེགས་པ་ཐམས་ཅད་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པའི་དགོངས་པའི་གསང་བ། དེ་བཞིན་གཤེགས་པ་ཐམས་ཅད་ཀྱི་རིག་པའི་གནས་ཀྱི་གསང་བ། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་གྱི་གསང་བ། དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཡང་དག་པར་འཛིན་པའི་གསང་བ། དེ་བཞིན་གཤེགས་པ་ཐམས་ཅད་ཀྱི་འོད་ཟེར་བྱེ་བ་རབ་ཏུ་འགྱེད་པའི་གསང་བ། དེ་བཞིན་གཤེགས་པ་ཐམས་ཅད་ཀྱི་ཡང་དག་བའི་མཐའི་གསང་བ། དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་གྱི་རྣམ་པར་འཕྲུལ་པའི་བྱིན་གྱི་རླབས་ཀྱི་གསང་བ། དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་སེམས་ཀྱི་རྒྱན་གྱི་གསང་བ། བྱང་ཆུབ་སེམས་དཔའ་ཐམས་ཅད་སངས་རྒྱས་ཀྱིས་ཐམས་ཅད་ལ་རབ་ཏུ་དགོད་པའི་གསང་བ། དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་རྟོགས་པར་ཁོང་དུ་ཆུད་པའི་གསང་བ། སྒྲིབ་པ་ཐམས་ཅད་འཇིག་པར་བྱེད་པའི་གསང་བ་འདི་གསུངས་པ་ལེགས་སོ་ལེགས་སོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་དགོངས་པ་དང་ལྡན་ཞིང་། །མཁྱེན་བཞིན་དུ་དེ་བཞིན་གཤེགས་པ་ཐམས་ཅད་ལ་གཟིགས་ནས། འོད་ཟེར་ཁ་དོག་སྣ་ཚོགས་བྱེ་བ་ཁྲག་ཁྲིག་བརྒྱ་སྟོང་འདི་ལྟ་སྟེ། །སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བརྒན་དང་། ཤེལ་དང་། དངུལ་གྱི་ཁ་དོག་དག་བཀྱེ་སྟེ། དེ་རྣམས་འཇིག་རྟེན་གྱི་ཁམས་མཐའ་ཡས་མུ་མེད་པ་རྣམས་སུ་དོང་ནས། སངས་རྒྱས་ཀྱི་ཞིང་ཐམས་ཅད་སྣང་
བར་བྱས་ཏེ། དེ་བཞིན་གཤེགས་པ་ཐམས་ཅད་བསྐུལ་ནས་སླར་ལོག་སྟེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། དབུའི་གཙུག་ཏོར་གྱི་གསེབ་ཏུ་ཞུགས་སོ། །འོད་ཟེར་དེ་དག་ཞུགས་མ་ཐག་ཏུ་བཅོམ་ལྡན་འདས་ཀྱིས་ཚངས་པའི་གསུང་དབྱངས་ཆེན་པོས་བཀང་ནས་རིག་སྔགས་ཆེན་མོ་འདི་གསུངས་སོ། །ཨོྃ་སརྦ་ཏ་ཐཱ་ག་ཏ་མ་ཎི་ཤ་ཏ་དཱིཔྟ། ཛྭཱ་ལ་ཛྭཱ་ལ། དྷརྨ་དྷཱ་ཏུ་གརྦྷེ། མ་ཎི་མ་ཎི་མ་ཧཱ་མ་ཎི་ཏ་ཐཱ་ག་ཏ་ཧྲྀ་ད་ཡ་མ་ཎི་སྭཱ་ཧཱ། བཅོམ་ལྡན་འདས་ཀྱིས་རིག་སྔགས་ཀྱི་རྒྱལ་མོ་འདི་གསུངས་མ་ཐག་ཏུ་རི་དང་། ཚལ་དང་། ནགས་ཚལ་དུ་བཅས་པའི་ས་རྣམ་པ་དྲུག་ཏུ་རབ་ཏུ་གཡོས་སོ། །སངས་རྒྱས་བཅོམ་ལྡན་འདས་ཐམས་ཅད་ཀྱིས་ཀྱང་ལེགས་སོ་ཞེས་བྱ་བ་བྱིན་ཏེ། ཤཱཀྱ་ཐུབ་པ་ཁྱོད་ཀྱིས་མཆོག་ཏུ་གསང་བ་འདི་གསུངས་པ་ནི་ལེགས་པར་གསུངས་ཏེ་ལེགས་སོ་ལེགས་སོ། །བཅོམ་ལྡན་འདས་ལ་མཆོད་པའི་ལས་ཀྱི་ཕྱིར། འཛམ་བུ་ཆུ་བོའི་གསེར་ལས་བྱུང་བའི་སྤྲིན་ཆེན་པོ་ནམ་མཁའི་དཀྱིལ་དུ་ཆགས་སོ། །ཕྱོགས་བཅུ་ཀུན་དུ་རིན་པོ་ཆེ་སྣ་བདུན་གྱི་ཆར་བབ་བོ། །ཙནྡན་སྦྲུལ་གྱི་སྙིང་པོའི་ཕྱེ་མའི་ཆར་ཡང་བབ་བོ། །ཨུ་དུམ་བཱ་རའི་མེ་ཏོག་གི་ཆར་བབ་བོ། །བཅོམ་ལྡན་འདས་ལ་མཆོད་པའི་ལས་ཀྱི་ཕྱིར། གཞན་ཡང་མེ་ཏོག་སྣ་ཚོགས་པདྨ་དང་། ཀུ་མུ་ད་དང་། པདྨ་དཀར་པོ་དང་། དྲི་ངད་ལྡང་བ་དང་། མན་དཱ་ར་བ་དང་། མན་དཱ་ར་བ་ཆེན་པོ་དང་། མེ་ཏོག་མདོག་མཛེས་དང་། མདོག་མཛེས་ཆེན་པོ་དང་། མཉྫུ་ཥ་ཀ་དང་། མཉྫུ་ཥ་ཀ་ཆེན་པོ་དང་། ཡིད་འོང་དང་། པ་རི་ཥ་ཀ་དང་། མེ་ཏོག་ཙམ་པ་ཀའི་ཆར་དག་བབ་བོ། །བདུད་ཀྱི་གནས་ཐམས་ཅད་ཀྱང་རབ་ཏུ་འབར་བར་གྱུར་ཏེ། བདུད་ཀྱི་རིས་ཀྱི་ལྷ་ཐམས་ཅད་སྐྲག་ཅིང་རྨོངས་པར་གྱུར་ཏོ། །བགེགས་དང་ལོག་འདྲེན་ཐམས་ཅད་ཀྱི་ལུས་རྔུལ་ཅིང་། ལུས་དྲི་མི་ཞིམ་པར་གྱུར་ནས་ཕྱོགས་བཅུར་རབ་ཏུ་འབྲོས་པར་བརྩམས་སོ། །སངས་རྒྱས་ཀྱི་བསྟན་པ་ལ་མངོན་པར་དད་
པའི་ལྷ་གང་དག་ཡིན་པའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་དག་གིས་ཀྱང་རང་རང་གི་གཞལ་མེད་ཁང་རྣམས་བཅོམ་ལྡན་འདས་ལ་མཆོད་པའི་ལས་ཀྱི་ཕྱིར་ཕུལ་ལོ། །དེ་ནས་ནོར་བུ་རབ་སྣང་སེམས་ལ་སོགས་པ་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ནོར་བུ་དང་། རིན་པོ་ཆེ་སྣ་ཚོགས་ཐོགས་ནས་བཅོམ་ལྡན་འདས་གང་ན་བ་དེ་ལོགས་སུ་མཆོད་པ་བྱེད་དོ། །དེ་ནས་ལག་ན་རྡོ་རྗེ་ལ་སོགས་པའི་རིག་སྔགས་འཆང་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་རས་བཅོས་བུའི་གོས་བརྒྱ་སྟོང་གིས་བཅོམ་ལྡན་འདས་ལ་མཆོད་པ་བྱེད་དོ། །རྒྱལ་པོ་ཆེན་པོ་བཞི་ཡང་རྒྱལ་ཆེན་བཞིའི་རིས་ཀྱི་ལྷའི་བུ་བརྒྱ་སྟོང་ཕྲག་དུ་མ་མེ་ཏོག་སྣ་ཚོགས་དང་། བདུག་པ་དང་། དྲི་དང་། ཕྲེང་བ་དང་། བྱུག་པ་དང་། ཕྱེ་མ་དང་། ཆོས་གོས་དང་། གདུགས་དང་། རྒྱལ་མཚན་དང་། བ་དན་དག་ཐོགས་ནས། བཅོམ་ལྡན་འདས་ལ་མཆོད་པ་བྱེད་དོ། །ཚངས་པ་ལ་སོགས་ཏེ་ཚངས་རིས་ཀྱི་ལྷའི་བུ་རྣམས་དང་། བརྒྱ་བྱིན་ལ་སོགས་པ་སུམ་ཅུ་རྩ་གསུམ་གྱི་རིས་ཀྱི་ལྷའི་བུ་བརྒྱ་སྟོང་དག་ཀྱང་བཅོམ་ལྡན་འདས་ལ་མཆོད་པའི་ལས་ལ་བརྩོན་པར་བྱེད་དོ། །དེ་བཞིན་དུ་སྲེད་མེད་ཀྱི་བུ་དང་། དབང་ཕྱུག་ཆེན་པོ་དང་། ནོར་བུ་བཟང་པོ་དང་། གང་བ་བཟང་པོ་དང་།སྟོབས་ཀྱི་ལྷ་ལ་སོགས་པ་ཡང་བཅོམ་ལྡན་འདས་ལ་མཆོད་པ་བྱེད་དོ། །ལྷའི་བུ་ཉི་མ་དང་། ཟླ་བ་ཡང་ནམ་མཁའི་དཀྱིལ་ནས་བཅོམ་ལྡན་འདས་ལ་མཆོད་པ་བྱེད་དོ། །དཔལ་ལྷ་མོ་ཆེན་མོ་དང་། ལྷ་མོ་ཆེན་མོ་དབྱངས་ཅན་མ་དང་། ལྷ་མོ་ཆེན་མོ་དུད་ཅན་མ་དང་། གནོད་སྦྱིན་མོ་ཆེན་མོ་འཕྲོག་མ་ཡང་འཁོར་བརྒྱ་སྟོང་དང་། ལྷ་མོ་ཆེན་མོ་འཇིགས་བྱེད་མ་དང་། རྡོ་རྗེ་ནག་མོ་དང་། མེ་ཏོག་སོ་དང་། ལྷ་མོ་ཆེན་མོ་ཕོ་ཉ་མོ་དག་ཀྱང་རང་རང་གི་གཞལ་མེད་ཁང་རྣམས་ཀྱིས་བཅོམ་ལྡན་འདས་ལ་མཆོད་པ་བྱེད་
དོ། །དྲི་ཟའི་རིས་ཀྱི་ལྷའི་བུ་དུ་མ་དག་ཀྱང་སིལ་སྙན་ཡན་ལག་ལྔ་དང་ལྡན་པ་བརྒྱ་སྟོང་བཅོམ་ལྡན་འདས་ལ་མཆོད་པའི་ལས་ཀྱི་ཕྱིར་བརྩོན་པས་དཀྲོལ་བར་བྱེད་དོ། །ཀླུའི་རྒྱལ་པོ་བརྒྱ་སྟོང་ཕྲག་དུ་མ་འདུས་པ་འདི་ལྟ་སྟེ། ཀླུའི་རྒྱལ་པོ་རྒྱ་མཚོ་དང་། ཀླུའི་རྒྱལ་པོ་དགའ་བོ་དང་། ཉེ་དགའ་བོ་དང་། ཆུ་ལྷ་དང་། ཤིན་ཏུ་རབ་གནས་དང་། གཙུག་ན་ནོར་བུ་དང་། ཀླུའི་རྒྱལ་པོ་རྣམ་པ་ཀུན་ནས་རྫོགས་པའི་འོད་དག་ཀྱང་རིན་པོ་ཆེ་ནོར་བུ་སྐར་འོད་སྣ་ཚོགས་ཀྱིས་བཅོམ་ལྡན་འདས་ལ་མཆོད་པ་བྱེད་དོ། །འཁོར་ཆེན་པོ་ཡང་འདུས་པར་གྱུར་ཏོ། །འཁོར་ལོས་སྒྱུར་བའི་རྒྱལ་པོ་ཆེན་པོ་དེ་ཡང་བློན་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མའི་འཁོར་དང་། བཙུན་མོའི་ཚོགས་ཀྱི་འཁོར་དང་བཅས་ཤིང་། བུ་སྟོང་དུ་གཅིག་གིས་མ་ཚང་བས་ཡོངས་སུ་བསྐོར་ཏེ་མདུན་གྱིས་བལྟས་སོ། །ས་དེ་ཡང་རྡོ་རྗེའི་རང་བཞིན་དུ་གྱུར་ཏོ། །དེ་ནས་འཁོར་ཆེན་པོ་དེ་ཉིད་ཀྱི་དབུས་བཅོམ་ལྡན་འདས་ཀྱི་སྤྱན་སྔར་ས་ལ་བརྟོལ་ནས་རིན་པོ་ཆེ་སྣ་བདུན་གྱི་པདྨ་འདབ་མ་སྟོང་པ་ཞིག་བྱུང་སྟེ། པདྨ་དེའི་སྟེང་དུ་འཛམ་བུ་ཆུ་བོའི་གསེར་ལས་བྱས་པའི་འཁོར་ལོ་རྩིབས་སྟོང་བ། མུ་ཁྱུད་དང་བཅས་པ། ལྟེ་བ་དང་བཅས་པ། ལྷག་པའི་འོད་འཕྲོ་བ། ཉི་མ་བཞིན་དུ་གསལ་བ་ཞིག་བྱུང་ངོ་། །དེའི་འོད་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྣང་བར་བྱས་ནས་འཁོར་ལོ་དེའི་ལྟེ་བའི་ནང་ནས་སྒྲ་བྱུང་བ། ཤཱཀྱ་ཐུབ་པ་གང་འདི་འདྲ་བའི་གཟུངས་ཀྱི་གསང་བ་རྣམས་གསུངས་པ་ནི་ལེགས་སོ་ལེགས་སོ། །ཆོས་ཀྱི་འཁོར་ལོ་བསྐོར་བའི་རིག་སྔགས་ཀྱི་རྒྱལ་པོ། བྱང་ཆུབ་ཆེན་པོའི་སྙིང་པོར་གཤེགས་པའི་རིག་སྔགས། དེ་བཞིན་གཤེགས་པ་ཐམས་ཅད་ཀྱི་རིག་སྔགས་ཀྱི་སྙིང་པོ། དེ་བཞིན་གཤེགས་པ་རྣམས་ཀྱི་ཡང་དག་པའི་ཚུལ་གྱི་རིག་སྔགས་ཀྱི་སྙིང་པོ་འདི་བཅོམ་ལྡན་འདས་ཡང་གསུངས་ཤིག །ནོར་བུ་ཆེན་པོ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པ་གསང་བ་ཞེས་བྱ་བའི་གཟུངས་གསུངས་
ཤིག། བཅོམ་ལྡན་འདས་ཀྱིས་བསྐུལ་བའི་སྙིང་པོ་དང་ལྡན་པ་ཞེས་བྱ་བའི་གཟུངས་གསུངས་ཏེ། དེ་བཞིན་གཤེགས་པ་ཐམས་ཅད་བསྐུལ་ཅིང་། འཁོར་གྱི་དཀྱིལ་འཁོར་ཆེན་པོ་འདུས་པས། བཅོམ་ལྡན་འདས་དེ་བཞིན་གཤེགས་པའི་གསང་བ་གསུང་བའི་དུས་ནི་འདི་ལགས་སོ། །བཅོམ་ལྡན་འདས་འདི་ནི་སངས་རྒྱས་ཉིད་སྒྲུབ་པའི་རྩ་བ། སྡིག་པ་ཐམས་ཅད་སེལ་བ། སྡུག་བསྔལ་ཐམས་ཅད་ཀྱི་མཚོ་སྐེམས་པ། འཁོར་བའི་འབྲོག་དགོན་པ་ལས་ངེས་པར་འབྱིན་པ་ལགས། འདི་ནི་ཆུ་བོ་ཆེན་པོ་ལས་སྒྲོལ་བ་ལགས་ཏེ། གཟུངས་འདི་མ་མཆིས་པར་སངས་རྒྱས་ཉིད་སྒྲུབ་པར་རྡོ་མི་ཐོགས་ལགས་སོ། །འདི་ནི་སངས་རྒྱས་ཉིད་ཀྱི་ས་བོན་ལགས། འདི་ནི་ཆོས་ཀྱི་འཁོར་ལོ་བསྐོར་བ་ལགས། འདི་ནི་ཆོས་ཀྱི་སྒྲོན་མ་སྤོར་བ་ལགས། འདི་ནི་ཆོས་ཀྱི་རྒྱལ་མཚན་བསྒྲེང་བ་ལགས། འདི་ནི་ཆོས་ཀྱི་དུང་རབ་ཏུ་འབུད་པ་ལགས། འདི་ནི་ཆོས་ཀྱི་རྔ་རྡུང་བ་ལགས། འདི་ནི་ཆོས་ཀྱི་སེང་གེའི་ཁྲི་ལ་མཆིས་པ་ལགས་ཏེ། དེའི་སླད་དུ་བཅོམ་ལྡན་འདས་ཀྱིས་ཆོ་ག་ཞིབ་མོའི་རྒྱལ་པོ་ཆེན་པོ་འདིའི་དམ་ཚིག་དང་དཀྱིལ་འཁོར་ཆོ་ག་དང་བཅས་པ། གསང་བ་དང་བཅས་པ། ཕྱག་རྒྱའི་ལེའུ་དང་བཅས་པ། རས་བཅོས་བུ་ཟུང་དང་བཅས་པ། ཡོ་བྱད་དང་བཅས་པའི་ཆོ་ག་ལེགས་པར་རྒྱས་པར་གསུངས་ཤིག །དེ་ནས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པའི་འཁོར་འདུས་པ་རྣམས་ཡ་མཚན་དུ་གྱུར། སྤྲོ་བར་གྱུར་ནས་ཐམས་ཅད་ཀྱིས་བཅོམ་ལྡན་འདས་ལ་ཕྱག་བྱས་ཏེ། བཅོམ་ལྡན་འདས་ཀྱི་ཞལ་དུ་བལྟས་ཤིང་འཁོད་དོ། །དེ་ནས་བཅོམ་ལྡན་འདས་ཀྱིས་བསྐུལ་བ་ཡང་དག་པ་འདི་དང་། གསོལ་བ་བཏབ་པ་གསན་ནས་རིག་སྔགས་ཀྱི་ཆོ་ག་ཞིབ་མོ་འདི་རྒྱས་པར་བཀའ་སྩལ་ཏོ། །བསྐུལ་བའི་ལེའུ་སྟེ་ཆོ་ག་དང་པོའོ།། །།
འཕགས་པ་ནོར་བུ་ཆེན་པོ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པ་གསང་བ་དམ་པའི་གསང་བའི་ཆོ་ག་ཞིབ་མོའི་རྒྱལ་པོ། བམ་པོ་གཉིས་པ། དེ་ནས་སྡིག་པ་ཀུན་ནི་སེལ་བྱེད་པའི། །རིག་སྔགས་ལུས་ཀྱི་དྲི་མ་མེད་བྱེད་པ། །སངས་རྒྱས་བྱང་ཆུབ་བླ་ན་མེད་པ་ཡི། །ཆོ་ག་ཞིབ་མོའི་རྒྱལ་པོ་དགེ་བར་བཤད། །དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །ཨོྃ་བི་པུ་ལ་གརྦྷེ། མ་ཎི་པྲ་བྷེ། ཏ་ཐཱ་ག་ཏ་ནིནྡེ་ཤ་ནེ། མ་ཎི་མ་ཎི། སུ་པྲ་བྷེ། བི་མ་ལེ། སཱ་ག་ར་གམྦྷཱི་རེ། ཧཱུྃ་ཧཱུྃ། ཛྭཱ་ལཱ་ཛྭཱ་ལཱ། བུདྡྷ་བི་ལོ་ཀི་ཏེ། གུ་ཧྱ་ཨདྷིཥྵཱི་ཏ་གརྦྷེ་སྭཱ་ཧཱ། དེ་ནས་བཅོམ་ལྡན་འདས་ཀྱིས་ནོར་བུ་ཆེན་པོ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པ་གསང་བ་དམ་པའི་གཟུངས་འདི་བཀའ་སྩལ་པ་ན་ས་ཆེན་པོ་འདི་རྣམ་པ་དྲུག་ཏུ་གཡོས་སོ། །རིན་པོ་ཆེའི་ཆར་ཆེན་པོ་བབ་པར་གྱུར་ཏོ། །མེ་ཏོག་གི་ཆར་ཆེན་པོ་འབབ་པོ། །འཁོར་ཐམས་ཅད་ཀྱང་འདུས་ཏེ་ཐམས་ཅད་ཀྱིས་ཅ་ཅོ་དང་ག་ཞའི་སྒྲ་ཕྱུང་ནས་ཐམས་ཅད་ས་བཅུ་ལ་གནས་པར་གྱུར་ཏེ། ཐམས་ཅད་དགེ་བའི་ཆོས་དང་ལྡན་པར་གྱུར་ཏོ། །དེ་ནས་སངས་རྒྱས་བཅོམ་ལྡན་འདས་ཐམས་ཅད་ཀྱིས་ཤཱཀྱ་ཐུབ་པ་ལ་ལེགས་སོ་ཞེས་བྱ་བ་བྱིན་ཏེ། ཤཱཀྱ་ཐུབ་པ་གང་བྱང་ཆུབ་ཀྱི་སྙིང་པོར་འགྲོ་བའི་གཟུངས་འདི་ལྟ་བུ་གསུངས་པ་ལེགས་སོ་ལེགས་སོ། །ཐོས་པ་ཙམ་གྱི་མོད་ལ་སྡིག་པ་དང་ངན་འགྲོ་ཐམས་ཅད་འཇིག་པར་འགྱུར་རོ། །གཟུངས་འདི་དྲན་པས་དེ་བཞིན་གཤེགས་པ་ཐམས་ཅད་ལ་ལྷའི་ན་བཟའ་དང་། བདུག་པ་དང་། མེ་ཏོག་དང་། དྲི་དང་། ཕྲེང་བ་དང་། བྱུག་པས་མཆོད་པར་འགྱུར་རོ། །བཀླགས་པ་ཙམ་གྱི་མོད་ལ་ཕྱིར་མི་ལྡོག་པར་གྱུར་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱིས་བསོད་ནམས་མངོན་པར་འདུ་བྱེད་པ། བསྐལ་པ་འམ། བསྐལ་པ་བརྒྱའམ། བསྐལ་པ་སྟོང་ངམ། བསྐལ་པ་བརྒྱ་སྟོང་དུ་ཡང་བརྗོད་པར་མི་སྤྱོད་དེ། དེ་ལྟར་གཟུངས་འདི་ཕན་ཡོན་ཆེ་བ་ལགས་སོ། །བདུད་ཀྱི་རིས་ཀྱི་ལྷ་ཐམས་
ཅད་ཀྱིས་བར་ཆད་བྱ་བར་མི་ནུས་ཏེ། བགེགས་ཀྱིས་བྱ་བར་མ་ཡིན། ཕྱིར་རྒོལ་བས་མ་ཡིན། མི་མཛའ་བས་མ་ཡིན། འབྱུང་པོས་མ་ཡིན། གདོན་གྱིས་མ་ཡིན། གནོད་སྦྱིན་གྱིས་མ་ཡིན། སྲིན་པོས་མ་ཡིན། མི་དང་། མི་མ་ཡིན་པས་གླགས་རྙེད་པར་མི་འགྱུར་རོ། །དེའི་དགེ་བའི་རྩ་བ་མང་དུ་འཕེལ་བར་འགྱུར་ཏེ། ལན་ཅིག་དྲན་པ་ཙམ་གྱིས་ཀྱང་དེ་ལྟར་ཡོན་ཏན་གྱི་ཕན་ཡོན་མང་པོར་འགྱུར་ན་ཤིན་ཏུ་བྱ་བ་མང་པོ་བྱེད་པ་ལྟ་སྨོས་ཀྱང་ཅི་དགོས། དེ་ནས་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དང་། རྒྱལ་པོ་ཆེན་པོ་བཞི་བཅོམ་ལྡན་འདས་ག་ལ་བ་དེར་སོང་སྟེ་བཅོམ་ལྡན་འདས་ལ་མཆོད་པ་བྱས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་སེམས་ཅན་དེ་རྣམས་བསྲུང་བར་བགྱིའོ། །ཡོངས་སུ་བསྐྱང་བར་བགྱིའོ། །སྤྲོ་བར་བགྱིའོ། །རྟག་ཏུ་རྒྱུན་མི་འཆད་པར་བསྲུང་བ་དང་། བསྐྱབ་པ་དང་། སྦ་བར་བགྱིའོ། །དེ་ནས་བཅོམ་ལྡན་འདས་ཀྱིས་ཕྱག་གསེར་གྱི་ཁ་དོག་ཅན་བརྐྱང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེའི་མགོ་ལ་བཞག་ནས་རྒྱལ་པོ་ཆེན་པོ་བཞི་པོ་དེ་རྣམས་ལ་དབུགས་ཕྱུང་སྟེ། ངས་གཟུངས་འདི་གཏད་དོ། སེམས་ཅན་དེ་ཡང་གཏད་དོ། །བཅོམ་ལྡན་འདས་བདག་ཅག་གིས་ཆོ་ག་ཞིབ་མོའི་རྒྱལ་པོ་ཆེན་པོ་འདི་དང་སེམས་ཅན་ཡོངས་སུ་བསྐྱང་བའི་སླད་དུ་ཡོངས་སུ་གཟུང་ལགས་སོ། །དེ་ནས་བཅོམ་ལྡན་འདས་ཀྱིས་གཟུངས་ཀྱི་སྙིང་པོ་བཀའ་སྩལ་པ། ཨོྃ་མ་ཎི་བཛྲེ་ཧཱུྃ། འདི་ནི་སྙིང་པོའོ། །ཨོྃ་མ་ཎི་དྷ་རི་ཧཱུྃ་ཕཊ། ཉེ་བའི་སྙིང་པོའོ། །རྩ་བའི་རིག་སྔགས་ཀྱི་ཆོ་ག་ནི་ཚེས་གྲངས་མ་ཡིན་རྒྱུ་སྐར་མིན། སྨྱུང་བ་ཡང་ནི་བྱ་མི་དགོས། དེ་བཞིན་གཤེགས་པའི་སྐུ་གཟུགས་སམ། མཆོད་རྟེན་སྐུ་གདུང་དང་བཅས་པའི་དྲུང་དུ་བཟླས་བརྗོད་འབའ་ཞིག་ཁྲི་བྱས་ནས་ཚེས་བཅྭ་ལྔའི་ཟླ་བ་ཉ་ལ་ཤིན་ཏུ་ཁྲུས་བྱས་ཏེ། གོས་གཙང་མ་བགོས་ནས་མཆོད་རྟེན་སྐུ་གདུང་དང་བཅས་པའི་དྲུང་དུ་ཅི་འབྱོར་པ་མཆོད་པ་བྱ་སྟེ། མར་མེ་བཞི་དབུལ་བར་བྱ། དྲི་དང་། མེ་ཏོག་ལ་སོགས་པ་ཡང་དབུལ་བར་བྱའོ། །ཟས་དཀར་གསུམ་བཟའ་བར་བྱའོ། །མཆོད་
རྟེན་ལ་བསྐོར་བ་བརྒྱ་རྩ་བརྒྱད་བྱའོ། །རིག་སྔགས་བརྒྱ་རྩ་བརྒྱད་བཟླས་ནས་དེ་ཉིད་ཀྱི་དྲུང་དུ་ཉལ་ན་ནམ་ལངས་ཀྱི་དུས་ཚུན་ཆད་དེ་བཞིན་གཤེགས་པ་མཐོང་བར་འགྱུར་རོ། །འཕགས་པ་ལག་ན་རྡོ་རྗེ་ཡང་མཐོང་བར་འགྱུར་རོ། །བསམ་པ་ཐམས་ཅད་ཡོངས་སུ་རྫོགས་པར་འགྱུར་རོ། །གང་འདོད་པ་དེ་རྙེད་པར་འགྱུར་རོ། །གལ་ཏེ་མཚམས་མེད་པ་ལྔའི་ལས་བྱས་པ་ཞིག་ཡིན་ན་ཡང་དེས་དུས་གསུམ་དུ་བསྒྲུབས་ན་གདོན་མི་ཟ་བར་མཐོང་བར་འགྱུར་རོ། །སོམ་ཉི་དང་། ཡིད་གཉིས་བསྐྱེད་པར་མི་བྱའོ། །ནང་པར་ལངས་ཏེ་བཟླས་བརྗོད་བརྒྱ་རྩ་བརྒྱད་བྱས་ན་དོན་ཐམས་ཅད་འགྲུབ་པར་འགྱུར་རོ། །དེའི་ལུས་ལ་དུག་གིས་ཚུགས་པར་མི་འགྱུར་ཏེ། སྦྱོར་བ་ངན་པས་མ་ཡིན། ཆུ་ཡིས་མ་ཡིན། མེ་ཡིས་མ་ཡིན། ཆོམ་རྐུན་གྱིས་འཕྲོག་པར་མི་འགྱུར་ཏེ། ལུས་ལ་ནད་ཀྱིས་ཚུགས་པར་མི་འགྱུར། དགྲས་འཇིགས་པར་མི་འགྱུར། དེའི་ལུས་ལ་ནད་མི་འབྱུང་སྟེ། མིག་ནད་མ་ཡིན། སྣ་ནད་མ་ཡིན། ལྕེ་ནད་མ་ཡིན། རྣ་བའི་ནད་མ་ཡིན། སོ་ནད་མ་ཡིན། ཀླད་ནད་མ་ཡིན། ཡན་ལག་དང་ཉིང་ལག་གི་མ་ཡིན། རིམས་མ་ཡིན་ཏེ། །ཞག་གཅིག་པའམ། ཞག་གཉིས་པའམ། ཞག་གསུམ་པའམ། ཞག་བཞི་པས་ལུས་ལ་ཚུགས་པར་མི་འགྱུར་རོ། །སྦྲུལ་གྱི་འཇིགས་པས་མ་ཡིན། གཅན་གཟན་ཁྲོ་བོའི་འཇིགས་པས་མ་ཡིན་ཞིང་། ལུས་ལ་བྱད་ཀྱིས་ཚུགས་པར་མི་འགྱུར་རོ། །གཟུངས་འདི་ནི་ཡོན་ཏན་དེ་ལྟ་བུ་དང་ལྡན་པ་ཡིན་ཏེ། འཇིགས་པ་ཐམས་ཅད་རབ་ཏུ་འཇོམས་པར་བྱེད་པ་ཡིན། སྡིག་པ་ཐམས་ཅད་འཇིག་པར་བྱེད་པ་ཡིན། ཡོན་ཏན་ཐམས་ཅད་གྲུབ་པར་བྱེད་པ་ཡིན། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱེད་པ་ཡིན། དེ་བཞིན་གཤེགས་པའི་དེ་ཁོ་ན་ཉིད་གྲུབ་པར་བྱེད་པ་ཡིན་ཏེ། གཟུངས་འདི་ནི་བཀླགས་པས་གྲུབ་པ་སྟེ་ལས་ཐམས་ཅད་བྱེད་དོ། །རི་ཁར་འཛེགས་ཏེ་བཟླས་བརྗོད་བྱས་ན་མིག་གིས་གང་དུ་བལྟས་པ་དེར་སེམས་ཅན་རྣམས་ཀྱི་སྡིག་པ་ཐམས་ཅད་འཇིག་པར་འགྱུར་རོ། །སེམས་ཅན་དམྱལ་བ་ཐམས་
ཅད་ལས་ཐར་པར་འགྱུར་རོ། །དུད་འགྲོའི་སྐྱེ་གནས་སུ་སོང་བ་ཐམས་ཅད་ཀྱང་ཐར་བར་འགྱུར་རོ། །ལྷ་ཁང་དུ་ཞུགས་ཏེ་བཟླས་བརྗོད་བྱས་ན་ལྷ་ཐམས་ཅད་དེས་ཅི་བསྒོ་བ་བཞིན་བྱེད་པར་འགྱུར་རོ། །ཀླུའི་གནས་སུ་ཞུགས་ཏེ་བཟླས་བརྗོད་བྱས་ན་ཀླུ་རྣམས་དབང་དུ་འགྱུར་རོ། །ཉི་མ་ལ་ཁ་བལྟས་ཏེ་བཟླས་བརྗོད་བྱས་ན་ཉི་མ་མངོན་སུམ་དུ་བབས་ནས་མདུན་ན་འདུག་ཅིང་མཆོག་ཅི་སྨྲ་བ་དེ་སྦྱིན་པར་བྱེད་དོ། །ལག་ན་རྡོ་རྗེའི་མདུན་དུ་བཟླས་བརྗོད་བྱས་ན་མཆོག་ཐམས་ཅད་སྟེར་ཅིང་མཐོང་བར་ཡང་འགྱུར་རོ། །ཤུ་དག་ལ་སྔགས་སྟོང་རྩ་བརྒྱད་བཟླས་ནས་དེ་ཟོས་ནས་རྒྱལ་པོའི་ཕོ་བྲང་དུ་ཞུགས་ན་རྒྱལ་པོའི་བཙུན་མོ་འཁོར་དང་བཅས་པ་དགའ་བར་འགྱུར་རོ། །ཅི་སྨྲས་པ་དེ་སྦྱིན་པར་བྱེད་དོ། །ན་ལེ་ཤམ་གྱི་འབྲུ་ལ་ལན་བདུན་བཟླས་ཏེ་ཁར་བཅུག་ན་ཅི་སྨྲས་པ་སྟེར་བར་བྱེད་ཅིང་དབང་དུ་འགྱུར་རོ། །ཡུངས་ཀར་ལ་སྟོང་རྩ་བརྒྱད་བཟླས་ཏེ་ནམ་མཁའ་ལ་གཏོར་ན་རླུང་དང་། སེར་བ་ཐམས་ཅད་བཀག་པར་འགྱུར་རོ། །ལན་ཚྭ་ལ་ལན་བརྒྱ་རྩ་བརྒྱད་བཟླས་ཏེ་བྲམ་ཟེ་རྣམས་ལ་བྱིན་ན་གང་དང་གང་གིས་ལན་ཚྭ་ཟོས་པ་དེ་དང་དེ་ཁོ་ན་དབང་དུ་འགྱུར་རོ། །རྒྱལ་རིགས་དབང་དུ་བྱ་ན་ཡུངས་ཀར་གྱི་སྦྱིན་སྲེག་བྱའོ། །གུ་གུལ་ལ་སྔགས་སྟོང་རྩ་བརྒྱད་བཟླས་ཏེ། གང་དང་གང་གི་གདོན་ལ་བདུགས་ན་དེ་དང་དེ་ཉིད་འབབ་པར་འགྱུར་རོ། །བདུགས་ན་གདོན་ཐམས་ཅད་ལས་ཐར་བར་འགྱུར་རོ། །ཆར་མི་འབབ་པའི་ཚེ་ཀླུའི་གཟུགས་བྱས་ཏེ། གནས་གྲུ་བཞིར་བྱས་ལ་བ་སེར་མོའི་ལྕི་བ་ལས་ཀླུ་མགོ་གསུམ་པ་བྱས་ལ་སྙིང་གར་གསེར་གྱིས་གླན་པར་བྱའོ། །ལུས་ནི་ལི་ཁྲིས་བྱུག་པར་བྱའོ། །གནས་ཀྱི་གཞི་ནི་སྔོན་པོར་བསྐུ་བར་བྱའོ། །གནས་གྲུ་བཞི་ནི་ཤིང་པ་ལ་ཤ་ལྟར་ཁ་དོག་སྔོན་པོར་བྱའོ། །བུམ་པ་གང་བ་བཞི་གཞག་པར་བྱའོ། །པོག་པོར་བཞི་གཞག་པར་བྱའོ། །བུམ་པ་བཞི་གཞག་པར་བྱ་སྟེ། གཅིག་ནི་འོ་མ། གཅིག་ནི་ཞོ། གཅིག་ནི་འོ་ཐུག །གཅིག་ནི་ཞུན་མར་བུ་རམ་ཅན་ནོ། །བའི་ལྕི་བས་གླིང་བཞི་པའི་དཀྱིལ་འཁོར་བྲི་བར་བྱའོ། །གྲྭ་བཞིར་ཕྱེས་པདྨ་བྲི་བར་བྱའོ། །མདའ་བཞི་བཙུགས་ལ་ཚོན་སྐུད་སྣ་ལྔས་བསྐོར་བར་བྱའོ། །ཚོན་
སྣ་ལྔའི་བ་དན་གདགས་པར་བྱའོ། །བདུག་པ་སྣ་བཞི་པོ་གུ་གུལ་དང་། ཅེ་པོག་དང་། ཙནྡན་དང་། ཏུ་རུཥྐ་བསྲེག་པར་བྱའོ། །ས་བོན་བདུན་གཏོར་བར་བྱའོ། །ཁ་དོག་ལྔའི་གཏོར་མ་གཞག་པར་བྱའོ། །འབྲས་བུ་དང་མེ་ཏོག་གཞག་པར་བྱའོ། །རིག་པ་འཛིན་པས་ཁ་ཤར་ཕྱོགས་སུ་བལྟས་ཏེ་འདུག་ནས་རིག་སྔགས་སྟོང་རྩ་བརྒྱད་བཟླས་ཏེ།ཡུངས་ཀར་རེ་རེ་ནས་སྤྱི་བོར་བརྡེག་པར་བྱའོ། །སྟོང་རྩ་བརྒྱད་ཚང་བར་བཟླས་ན་དེ་ནས་ཀླུ་རྣམས་ཆར་གྱི་རྒྱུན་འབེབས་པར་བྱེད་དོ། །ཀླུ་ཐམས་ཅད་དེའི་དབང་དུ་འགྱུར་རོ། །ཡུངས་ཀར་ལ་བཟླས་བརྗོད་བྱས་ཏེ། ཀླུའི་མཚེའུར་གཏོར་ན་ཆར་གྱི་རྒྱུན་འབེབས་པར་བྱེད་དོ། །སེང་ལྡེང་གི་ཕུར་བུ་ལ་བཟླས་བརྗོད་བྱས་ཏེ་ཀླུའི་གནས་སུ་བཙུགས་ན་རླུང་དང་། སེར་བ་ཐམས་ཅད་བཅིངས་པར་འགྱུར་རོ། །ཡུངས་ཀར་ལ་བརྒྱ་རྩ་བརྒྱད་བཟླས་བརྗོད་བྱས་ཏེ་ལོག་འདྲེན་གྱི་ཀླད་པར་བཏབ་ན་ལོག་འདྲེན་ཐམས་ཅད་བཅིངས་པར་འགྱུར་རོ། །འོ་མས་བཀྲུས་ན་ཕྱིར་སོས་པར་འགྱུར་རོ། །ལས་གང་དང་གང་ཁོ་ན་བྱ་བའི་ལས་དེ་དང་དེ་དག་འགྲུབ་པར་འགྱུར་རོ། །གཙང་མས་གོས་གཙང་མ་བགོ་བར་བྱ་སྟེ། འདི་ནི་རྩ་བའི་རིག་སྔགས་ཀྱི་ཆོ་གའི་ཚུལ་ཡིན་ནོ། །གཉིས་པའོ།། །།ད་ནི་སྙིང་པོའི་ལས་རྣམས་འབྱུང་སྟེ། བཟླས་བརྗོད་འབུམ་བྱས་ན་དེ་བཞིན་གཤེགས་པ་ཐམས་ཅད་མཐོང་བར་འགྱུར་རོ། །ཉིས་འབུམ་བྱས་ན་སངས་རྒྱས་ཀྱི་ཞིང་ཐམས་ཅད་མཐོང་བར་འགྱུར་རོ། །སུམ་འབུམ་བྱས་ན་དཀྱིལ་འཁོར་ཐམས་ཅད་དུ་ཞུགས་པར་འགྱུར་རོ། །གསང་སྔགས་ཐམས་ཅད་འགྲུབ་པར་འགྱུར་རོ། །བཞི་འབུམ་བྱས་ན་རིག་འཛིན་ཐམས་ཅད་ཀྱི་འཁོར་ལོས་སྒྱུར་བར་འགྱུར་རོ། །ལྔ་འབུམ་བྱས་ན་ལྷ་མ་ཡིན་གྱི་སྒོ་ཐམས་ཅད་འབྱེད་པར་འགྱུར་རོ། །ཀླུའི་གནས་ཐམས་ཅད་འབྱེད་པར་འགྱུར་རོ། །དྲུག་འབུམ་བྱས་ན་གཏེར་ཐམས་ཅད་འབར་བར་འགྱུར་རོ། །བཟླས་བརྗོད་བདུན་འབུམ་བྱས་ན་ཚེ་རབས་ཐམས་ཅད་དྲན་པར་འགྱུར་རོ། །བཟླས་བརྗོད་བརྒྱད་འབུམ་བྱས་ན་རིན་ཆེན་ཕྱག་རྒྱའི་ཏིང་ངེ་འཛིན་ཐོབ་པར་འགྱུར་རོ། །བཟླས་བརྗོད་དགུ་
འབུམ་བྱས་ན་བྱང་ཆུབ་སེམས་དཔའ་ཐམས་ཅད་ཀྱི་རྣམ་པར་སྤྲུལ་པའི་བྱིན་གྱི་བརླབས་ཐམས་ཅད་འཐོབ་པར་འགྱུར་རོ། །བཟླས་བརྗོད་ས་ཡ་བྱས་ན་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བ་ཐོབ་པར་འགྱུར་རོ། །དེ་བཞིན་གཤེགས་པ་ཐམས་ཅད་དང་ཕྲད་པར་འགྱུར་ཏེ། དེ་ལ་སོགས་པ་གོང་ནས་གོང་དུ་ཡོན་ཏན་གྱི་ཁྱད་པར་ཐོབ་པར་འགྱུར་རོ། །མཚམས་མེད་པ་ལྔ་བྱས་པའམ། འཕགས་པ་ལ་སྐུར་པ་བཏབ་པའམ། དམ་པའི་ཆོས་སྤངས་པའམ། མནར་མེད་པར་གཞོལ་བ་ཡང་རུང་དེ་དག་ཐམས་ཅད་ཀྱིས་བཟླས་བརྗོད་འབུམ་བྱས་ན་ལས་ཀྱི་སྒྲིབ་པ་ཐམས་ཅད་བྱང་བར་འགྱུར་རོ། །ཕྱིར་མི་ལྡོག་པར་འགྱུར། སྐྱེ་བ་དྲན་པར་འགྱུར། དེ་བཞིན་གཤེགས་པ་ཐམས་ཅད་ཀྱིས་དགོངས་པར་འགྱུར། མིག་རྣམ་པར་དག་པ་དང་། རྣ་བ་རྣམ་པར་དག་པ་དང་། སྣ་རྣམ་པར་དག་པ་དང་། ལྕེ་རྣམ་པར་དག་པ་དང་། དབང་པོ་ཡོངས་སུ་དག་པ་ཐོབ་པར་འགྱུར་ཏེ། དེ་ལྟར་གོང་ནས་གོང་དུ་ཡོན་ཏན་གྱི་ཁྱད་པར་དང་། གོང་ནས་གོང་དུ་ལུས་རྣམ་པར་དག་པ་ཐོབ་པར་འགྱུར་རོ། །གཞན་ཡང་འཇིག་རྟེན་གྱི་དངོས་གྲུབ་ཏུ་བྱ་བ་རྣམས་གྲུབ་པར་འགྱུར་རོ། །དེ་ཁོ་ན་གྲུབ་པ་བླ་ན་མེད་པ་ལྡོང་རོས་ལ་སྒྲུབ་པ་བཤད་དེ་ཤིན་ཏུ་ཁྲུས་བྱས་པ། གོས་གཙང་མ་བགོས་པ། ཟས་དཀར་གསུམ་བཟའ་བས་ལྔོས་རོས་བླངས་ཏེ། ཟངས་ཀྱི་སྣོད་དུ་བཞག་ནས་སངས་རྒྱས་བཅོམ་ལྡན་འདས་ཀྱི་སྤྱན་སྔར་ཚེས་བཅུ་གསུམ་ནས་ཚེས་བཅྭ་ལྔའི་ཉའི་བར་དུ་བཟླས་བརྗོད་འབུམ་བྱས་ན་དེ་ནས་རྣམ་པ་གསུམ་འགྲུབ་པར་རིག་པར་བྱ་སྟེ། གལ་ཏེ་ནག་པོར་གྱུར་ན་དཔྲལ་བ་ལ་ཐིག་ལེ་བྱའོ། །དེ་ནས་མི་སྣང་བར་འགྲུབ་པར་འགྱུར་ཏེ། ལྷ་མ་ཡིན་གྱི་སྒོ་ཐམས་ཅད་དུ་འཇུག་པར་འགྱུར། གནས་ཐམས་ཅད་དུ་འཇུག་པར་འགྱུར། གང་འདོད་པ་དེ་བྱེད་པར་འགྱུར་རོ། །གལ་ཏེ་དུད་པ་བྱུང་ན་དེས་མིག་བསྐུ་བར་བྱའོ། །དེ་ནས་བྱང་ཆུབ་སེམས་དཔའི་གནས་ཐམས་ཅད་མཐོང་བར་འགྱུར། ལག་ན་རྡོ་རྗེའི་གནས་ཐམས་ཅད་མཐོང་བར་འགྱུར། ནོར་དང་འབྲུ་ཐམས་ཅད་རྙེད་པར་འགྱུར་ཏེ། གང་དུ་
འདོད་པ་དེར་འགྲོ་བར་འགྱུར་རོ། །གལ་ཏེ་འབར་བར་གྱུར་ན་ནམ་མཁའ་ལ་འགྲོ་བར་འགྱུར། འབར་བའི་སྒྲོན་མ་ཞེས་བྱ་བའི་གཟུངས་ཀྱི་ཏིང་ངེ་འཛིན་ཐོབ་པར་འགྱུར། ལྷའི་གནས་སུམ་ཅུ་རྩ་གསུམ་གྱི་ལྷ་ཐམས་ཅད་ཀྱི་དཔོན་པོར་འགྱུར། གང་འདོད་པ་དེ་བྱེད་པར་འགྱུར། རིའི་རྩེ་མོར་འཛེགས་ཏེ་བཟླས་བརྗོད་འབུམ་བྱས་ན་འཇིག་རྟེན་ཐམས་ཅད་ཀྱི་གཙོ་བོར་འགྱུར། གང་འདོད་པ་དེ་བྱེད་པར་འགྱུར། འཛམ་བུའི་གླིང་གི་མི་ཐམས་ཅད་ཅི་བསྒོ་བ་བཞིན་བྱེད་པར་འགྱུར་རོ། །མཚོར་ཞུགས་ཏེ་བཟླས་བརྗོད་སྟོང་རྩ་བརྒྱད་བྱས་ན་ཀླུ་ཐམས་ཅད་མཐོང་བར་འགྱུར། ཡུངས་ཀར་བླངས་ནས་སྔགས་སྟོང་རྩ་བརྒྱད་བཟླས་ནས་ནམ་མཁའ་ལ་གཏོར་ན་ཆར་ཆེན་པོ་འབབ་པར་འགྱུར། ཀླུ་ཐམས་ཅད་དབང་དུ་འགྱུར་རོ། །རྟག་ཏུ་བཟླས་བརྗོད་བྱས་ན་དཔལ་ཆེན་པོ་ཐོབ་པར་འགྱུར་རོ། །བུམ་པ་ཆུས་བཀང་སྟེ་ཧབ་ཤང་ཚེའུ་དང་། ཤིང་པ་ལ་ཤ་དང་། ཡུངས་ཀར་དང་། གུར་གུམ་དང་། ཙནྡན་རྣམས་ལྷན་ཅིག་བུམ་པ་དེར་བླུགས་ལ་བཟླས་བརྗོད་ཁྲི་བྱས་པས་ནད་ཆེན་པོས་ཐེབས་པ་བཀྲུས་ན་ནད་ཐམས་ཅད་མེད་པར་འགྱུར། ནད་ཐམས་ཅད་དང་བྲལ་བར་འགྱུར། དེའི་སྡིག་པ་ཐམས་ཅད་ཀྱང་འཇིག་པར་འགྱུར། བྱད་ཐམས་ཅད་འཇིག་པར་འགྱུར། དཔལ་ཐམས་ཅད་ཐོབ་པར་འགྱུར་རོ། །མཛེའི་ནད་ཀྱིས་ཐེབས་པ་བཀྲུས་ན་མཛེ་ནད་ལས་ཡོངས་སུ་ཐར་བར་འགྱུར་རོ། །ཤ་བཀྲའི་ནད་ཀྱིས་ཐེབས་པ་ཡང་བཀྲུས་ན་ཤ་བཀྲའི་ནད་ལས་ཡོངས་སུ་ཐར་བར་འགྱུར་རོ། །བུད་མེད་བུ་འདོད་པ་རྣམས་དེས་ཁྲུས་བྱས་ན་བུ་རྙེད་པར་འགྱུར་རོ། །དངོས་གྲུབ་མེད་པ་ཁྲུས་བྱས་ན་དངོས་གྲུབ་ཆེན་པོ་ཐོབ་པར་འགྱུར་རོ། །དེ་ལ་སོགས་པ་གོང་ནས་གོང་དུ་འཇིག་རྟེན་གྱི་དངོས་གྲུབ་ཏུ་བྱ་བ་རྣམས་ཀྱང་གྲུབ་པར་འགྱུར་རོ། །གང་འདོད་པ་དེ་བྱེད་པར་འགྱུར་རོ། །ཉེ་བའི་སྙིང་པོའི་ལས་རྣམས་འབྱུང་སྟེ། བཟླས་བརྗོད་འབུམ་བྱས་ན་བགེགས་དང་ལོག་འདྲེན་ཐམས་ཅད་རྐང་པ་ལ་གཏུགས་ནས་ཀྱེ་རིག་པ་འཛིན་པ་བདག་སྐྱོབས་ཤིག །བདག་ཅག་གི་སྲོག་ཆུད་མ་གསན་ཅིག་དང་བཀའ་ཅི་སྩལ་བ་དེ་བགྱིའོ་ཞེས་བརྗོད་པར་འགྱུར་རོ། །བཟླས་བརྗོད་ཉི་ཁྲི་
ཆིག་སྟོང་བྱས་ན་ལྷ་ཐམས་ཅད་དང་། ཀླུ་ཐམས་ཅད་དབང་དུ་འགྱུར། རིག་སྔགས་ཐམས་ཅད་ཀྱི་བདག་པོར་འགྱུར་རོ། །ཅི་བསྒོ་བ་དེ་བྱེད་པར་འགྱུར་རོ། །བཟླས་བརྗོད་སུམ་ཁྲི་བྱས་ན་འབྱུང་པོ་དང་། གནོད་སྦྱིན་ལ་སོགས་པ་ཐམས་ཅད་དབང་དུ་འགྱུར་རོ། །བཟླས་བརྗོད་ལྔ་ཁྲི་བྱས་ན་གང་དགུག་པ་དེ་ཁུགས་པར་འགྱུར་ཏེ། ལྷའམ། ཀླུའམ། གནོད་སྦྱིན་ནམ། དྲི་ཟའམ། ནམ་མཁའ་ལྡིང་ངམ། མིའམ་ཅིའམ། ལྷ་མ་ཡིན་ནམ། རིག་འཛིན་ནམ། བུད་མེད་དམ། བྲམ་ཟེའམ། རྒྱལ་རིགས་སམ། ས་བདག་གམ། བློན་པོའམ། བཙུན་མོའམ། ཁྲོམ་གྱི་རུ་པའམ། མདུན་ན་འདོན་ནམ། གཞན་ཡང་སེམས་ཅན་སྣ་ཚོགས་ཁུགས་པར་འགྱུར་རོ། །གུ་གུལ་དང་ཡུངས་ཀར་གྱི་སྦྱིན་སྲེག་དྲུག་ཁྲི་བྱས་ན་དྲི་མ་མེད་པའི་ཏིང་ངེ་འཛིན་ཐོབ་པར་འགྱུར་རོ། །བདུན་ཁྲིས་ནི་རིག་འཛིན་གྱི་འཁོར་ལོས་སྒྱུར་བར་འགྱུར་རོ། །བརྒྱད་ཁྲིས་ནི་ལག་ན་རྡོ་རྗེ་འཁོར་གྱི་ཚོགས་དང་བཅས་པ་མདུན་ན་སྡོད་པར་འགྱུར་རོ། །དགུ་ཁྲིས་ནི་བྱང་ཆུབ་སེམས་དཔའ་ཐམས་ཅད་ཀྱིས་དབུགས་འབྱིན་པར་འགྱུར་རོ། །འབུམ་ཚང་བས་ནི་དེ་བཞིན་གཤེགས་པ་ཐམས་ཅད་མཐོང་བར་འགྱུར་ཏེ། །རིགས་ཀྱི་བུ་ཁྱོད་གསང་སྔགས་ཐམས་ཅད་དང་། བསྟན་བཅོས་ཐམས་ཅད་གྲུབ་ཀྱིས་གང་འདོད་པ་དེར་སོང་ཤིག །དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པས་ཕྱིར་མི་ལྡོག་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་བཞིན་གཤེགས་པ་རྣམས་ཀྱིས་གནང་གིས་འཇིག་རྟེན་པའམ། འཇིག་རྟེན་ལས་འདས་པའི་དགོས་པ་གཞན་དག་ཀྱང་ཅི་འདོད་པ་བཞིན་ཁྱོད་ཀྱིས་ལས་ཐམས་ཅད་བྱོས་ཤིག་ཅེས་སྟོན་པར་འགྱུར་རོ། །ཨོྃ་མ་ཎི་ཀུཎྜ་ལི་ཧཱུྃ་ཧཱུྃ་ཕཊ་སྭཱ་ཧཱ། གདན་གྱི་སྔགས་སོ། །ཨོྃ་མ་ཎི་བི་ཛ་ཡེ་དྷ་རཱ་དྷ་རཱ་ཧཱུྃ་ཕཊ་སྭཱ་ཧཱ། དཀྱིལ་འཁོར་གྱི་སྔགས་ཏེ། ཡུངས་ཀར་ལ་ལན་བདུན་བཟླས་པས་སོ། །ཨོྃ་ཛྭ་ལི་ཏ་མ་ཎི་རུ་ཙི་ར་གྲི་ཎི་ཧཱུྃ་ཧཱུྃ་ཕཊ། ཡུངས་ཀར་དང་དྲི་ཆུར་བསྲེས་པ་ལ་ལན་བརྒྱ་རྩ་བརྒྱད་བཟླས་ཏེ་ཕྱོགས་
བཞི་བཅིང་ངོ་། །ཨོྃ་མ་ཎི་པྲ་བྷ་བ་ཏི་ཧ་ན་ཧ་ན་ཧཱུྃ་ཕཊ་སྭཱ་ཧཱ། ཐལ་བ་དང་། ཆུ་ལ་ལན་ཉི་ཤུ་རྩ་གཅིག་བཟླས་པས་ལོག་འདྲེན་བཅིང་ངོ་། །ཨོྃ་མ་ཎི་ཏིཥྛ་ཏིཥྛ་ཧཱུྃ་ཕཊ། ལན་བདུན་བཟླས་ཏེ་གཙུག་ཏོར་བཅིང་ངོ་། །ཨོྃ་མ་ཎི་བི་བུ་ལེ་དི་རི་དི་རི་ཧཱུྃ་ཕཊ། གོས་ཀྱི་སྔགས་སོ། །ཨོྃ་བི་དུ་མ་ཏི་ཧ་ར་ཧ་ར་མ་ཎི་ཧཱུྃ་ཧཱུྃ་ཕཊ། ཉེ་རེག་གི་སྔགས་སོ། །ཨོྃ་སུ་ནིརྨྨ་ལ་བ་ཏི་ཧ་ར་ཧ་ར་པཱ་པཾ་མི་ལི་མི་ལི་ཧཱུྃ་ཧཱུྃ་ཕཊ་སྭཱ་ཧཱ། ཡུངས་ཀར་ལ་ལན་བརྒྱ་རྩ་བརྒྱད་བཟླས་ཏེ་ཁྲུས་བྱའོ། །ཨོྃ་མ་ཎི་དྷ་རེ་ཧཱུྃ་ཧཱུྃ་ཕཊ། བསང་གཏོར་གྱི་སྔགས་སོ། །ཨོྃ་དི་རི་དི་རི་བི་མ་ལ་ཀ་རི་ཧཱུྃ་ཧཱུྃ་ཕཊ། མཆོད་ཕྱིར་ཐོགས་ཀྱི་སྔགས་སོ། །ཨོཾ་སརྦ་ཏ་ཐཱ་ག་ཏ་པུཥྤ་མ་ཎི་ཧཱུྃ་ཧཱུྃ་ཕཊ། མེ་ཏོག་གི་སྔགས་སོ། །ཨོྃ་སརྦ་ཏ་ཐཱ་ག་ཏ་གནྡྷ་མ་ཎི་སྥ་ར་ཎ་ཧཱུྃ་ཧཱུྃ་ཕཊ། དྲིའི་སྔགས་སོ། །ཨོྃ་ཛྭ་ལི་ཏ་མ་ཎི་པྲ་བ་ར་ཀཱུ་ཊ་ག་ར་སྥ་ར་ཎ་བི་ག་ཏི་ཧཱུྃ། བདུག་པའི་སྔགས་སོ། །ཨོྃ་ཛྭ་ལི་ཏི་ཤི་ཁ་རི་ཏ་པ་ལི་ཧཱུྃ་ཧཱུྃ་ཕཊ། མར་མེའི་སྔགས་སོ། །ཨོྃ་པྲ་བ་རཱ་གྲ་པ་ལི་ས་ར་ས་ར་ཧཱུྃ་ཧཱུྃ། གཏོར་མའི་སྔགས་སོ། །ཨོྃ་མ་ཧཱ་མ་ཎི་པཱུ་ར་ཡ་དྷ་ར་དྷ་ར་ཧཱུྃ་ཧཱུྃ་ཕཊ། མཆོད་ཡོན་གྱི་སྔགས་སོ། །ཨོྃ་མ་ཧཱ་བི་མ་ལེ་ཧཱུྃ་ཧཱུྃ་བ་ར་བ་ར་ཧཱུྃ། ལྷ་བཤོས་ཀྱི་སྔགས་སོ། །ཨོྃ་ཛྭཱ་ལ་སྤུ་རད་ག་གན་པྲ་ཏ་ར་ཎི་ཧཱུྃ་ཧཱུྃ། སྦྱིན་སྲེག་གི་སྔགས་སོ། །ཨོྃ་རུ་ཙི་ར་མ་ཎི་པྲ་བརྟ་ཡ་ཧཱུྃ། བགྲང་ཕྲེང་གི་སྔགས་སོ། །སྔགས་འདིས་ལན་བདུན་བགྲང་ཕྲེང་ལ་བཏབ་སྟེ་བཟླས་བརྗོད་བྱས་ན་དེ་བཞིན་གཤེགས་པ་ཐམས་ཅད་ཀྱིས་གསུངས་པའི་གསང་སྔགས་དེ་དག་ཐམས་ཅད་བཟླས་པར་འགྱུར་ཞིང་། བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་བཟླས་པར་ཡང་འགྱུར་རོ། །ཨོྃ་བཛྲ་མ་ཎི་ཀ་ར་ཀིང་ཀ་རི་ཧཱུྃ་ཧཱུྃ་ཕཊ། སྐྱིལ་མོ་ཀྲུང་གི་སྔགས་སོ། ཨོྃ་སུ་པྲ་བརྟི་ཏ་བེ་གེ་མ་ཎི་མ་ཎི་སྭཱ་ཧཱ། བཟླས་བརྗོད་ཀྱི་སྔགས་སོ། །ཨོྃ་སརྦ་ཏ་ཐཱ་ག་ཏ་ཐཱ་ཡུ་ཛ་བེ་ཏ་ར་ཏ་ར་ཧཱུྃ་མ་ཎི་ཀ་ན་ནེ་སྭཱ་ཧཱ། དེ་བཞིན་གཤེགས་པ་ཐམས་ཅད་བསྐུལ་པའི་སྔགས་སོ། །ཨོྃ་སུ་བི་པུ་ལ་པྲ་བ་རེ་དུ་རུ་དུ་རུ་ཧཱུྃ་ཧཱུྃ། སྤྱན་དྲང་བའི་སྔགས་སོ། །ཨོྃ་སརྦ་ཏ་ཐཱ་ག་ཏ་ཨ་དྷིཥྵཱ་ན་ཙི་ཏ་སཾ་རཀྵ་ན་བཛྲེ་ཧཱུྃ་ཧཱུྃ། གསོལ་བ་གདབ་པའི་སྔགས་སོ། །ཨོྃ་སུ་བི་པུ་ལ་བ་ད་ནི་ཧ་ར་ཧ་ར་ཧཱུྃ།
བྱང་ཆུབ་སེམས་དཔའ་རྣམས་ལ་གསོལ་བ་གདབ་པའི་སྔགས་སོ། །ཨོྃ་ཨ་བྷི་ས་མ་ཡེ་བཛྲ་དྷ་ར་དྷ་ར་ཧཱུྃ། ལྷ་དང་། ཀླུ་ལ་སོགས་པ་ཐམས་ཅད་བོད་པའི་སྔགས་སོ། །ཨོྃ་མ་ཎི་བེ་ག་བ་ཏི་ཧཱུྃ། རྒྱལ་པོ་ཆེན་པོ་བཞི་བོད་པའི་སྔགས་སོ། །ཨོྃ་ཤུ་པ་མ་ཎི་ཧུ་ལུ་ཧུ་ལུ་ཧཱུྃ། སློབ་མའི་སྔགས་སོ། །ཨོྃ་སརྦ་ཏ་ཐཱ་ག་ཏ་ཧྲྀ་ད་ཡ་བཛྲི་ཎི་དྷ་ར་དྷ་ར་ཧཱུྃ་ཧཱུྃ། འཇུག་པའི་སྔགས་སོ། །ཨོྃ་བཱི་ར་བཱི་ར་ཛེ་ག་ག་ན་བཱ་ཧི་ནི་ལི་ཧུ་ལུ་ཧུ་ལུ་ཧཱུྃ་ཧཱུྃ་ཧཱུྃ། ཐམས་ཅད་དུ་མཁྱེན་པར་བྱ་བའི་སྔགས་སོ། །ཨོྃ་མ་ཎི་སུཾ་བྷ་ནི་བེ་ག་བ་ཏི། བདག་དང་ཆེ་གེ་མོ་ལ་སྲུངས་ཤིག་ཧཱུྃ། སྲུང་པའི་སྔགས་སོ། །ཨོྃ་སརྦ་ཏ་ཐཱ་ག་ཏ་ཀུ་ལོ་ཏི་ཏེ་སྨ་ར་ཎ་བི་ག་ཏེ། ཛྭཱ་ལ་ཛྭཱ་ལ་ཧཱུྃ་སྭཱ་ཧཱ། སླར་གཤེགས་སུ་གསོལ་བའི་སྔགས་སོ། །ཐམས་ཅད་ལ་སྦྱར་བར་བྱའོ། །སྙིང་པོ་འདི་རྣམས་ཀྱི་ཕན་ཡོན་ནི་འདི་དག་ཐམས་ཅད་ཡིན་ཏེ་དཔག་ཏུ་མེད་དོ། །ཐམས་ཅད་དུ་ཡང་ལན་བརྒྱ་རྩ་བརྒྱད་བཟླས་བརྗོད་བྱས་ཏེ། དེ་ནས་དགོས་པ་བརྩམ་པར་བྱའོ། །འདི་བཏོན་པས་ནི་ཐམས་ཅད་འགྲུབ། །འདིས་ནི་འགྲོ་བའི་སྡིག་ཀུན་སེལ། །སྡིག་པ་དེ་ཀུན་ཟད་བྱེད་ཅིང་། །སྡུག་བསྔལ་ཀུན་ལས་རྣམ་པར་གྲོལ། །སངས་རྒྱས་བྱང་ཆུབ་སེམས་དཔའ་དག །ལུང་སྟོན་འགྱུར་ཏེ་ཐེ་ཚོམ་མེད། །གང་གིས་སྔ་མར་སྡིག་པའི་ལས། །མང་པོ་བྱས་པ་འཇིག་པར་འགྱུར། །རིག་པ་བླ་མེད་སུ་འཛིན་པ། །དེ་དག་མྱུར་དུ་སངས་རྒྱས་འགྲུབ། །ཆོས་ཀྱི་འཁོར་ལོ་བླ་མེད་པའི། །བྱང་ཆུབ་རྟོགས་པར་སླ་བ་དང། །ཇི་ལྟར་གང་གཱའི་བྱེད་སྙེད་ཀྱི། །བསོད་ནམས་དཔག་ཏུ་མེད་འཐོབ་བོ། །རིགས་སྔགས་རྒྱས་པར་སྒྲུབ་པའི་ལེའུ་སྟེ་ཆོ་ག་གཉིས་པའོ།། །།དེ་ནས་དཀྱིལ་འཁོར་གྱི་ཆོ་ག་བཤད་པར་བྱའོ། །སྔོན་དུས་ཡོངས་སུ་བརྟགས་ནས་ཕྱི་ནས་ལས་བརྩམ་པར་བྱའོ། །དྲིའི་སྣོད་གཙང་མར་བླུགས་པའི་ཚོན་སྣ་ལྔའི་ཕྱེ་མས་དཀྱིལ་འཁོར་སྒོ་བཞི་པ་བྲིའོ། །དེ་ནས་དཀྱིལ་འཁོར་གྱི་དབུས་སུ་ཙནྡན་གྱིས་བྱུགས་ཏེ་གུར་གུམ་གྱིས་མཆོད་པར་བྱའོ། །དབུས་ཀྱི་དཀྱིལ་འཁོར་གྱི་ཚད་ནི་ཁྲུ་གཉིས་པའོ། །ཕྱིའི་དཀྱིལ་འཁོར་ནི་ཁྲུ་བཞི་པ་རྭའི་རང་བཞིན་དང་ལྡན་པའོ། །དཀྱིལ་འཁོར་གྱི་སྙིང་པོའི་དབུས་
སུ་རིན་པོ་ཆེ་སྣ་བདུན་གྱི་གཞལ་མེད་ཁང་དང་སངས་རྒྱས་ཀྱི་པདྨའི་གདན་བཀྲ་ཞིང་ཚོན་སྣ་བདུན་དང་ལྡན་པ་བྱའོ། །པདྨའི་སྙིང་པོའི་སྟེང་དུ་གསེར་གྱི་འཁོར་ལོ་རྩིབས་སྟོང་པ་མུ་ཁྱུད་དང་ལྟེ་བ་དང་ལྡན་པ་ཀུན་ནས་འབར་བའི་ཕྲེང་བ་ཅན་ཏེ་ཡུ་བ་ནི་བེེཌཱུཪྱའོ། །དཀྱིལ་འཁོར་གྱི་སྙིང་པོ་ལ་ཀུན་ནས་ཁ་ཁྱེར་དང་ལྡན་པར་བྱའོ། །ཤར་ལ་སོགས་པའི་སྒོར་ནི་ཁྲུའི་ཚད་ཙམ་གྱི་གདུགས་དང་། རྒྱལ་མཚན་དང་། ཚོན་སྣ་ལྔའི་རྒྱ་ནག་གི་གོས་ཟུང་གིས་བརྒྱན་པར་བྱའོ། །
གཡོན་དུ ་ལག་ན་རྡོ་རྗེ་བསྡིགས་པའི་གཟུགས་ཅན་རྔ་ཡབ་དང་མཚོན་ཆ་ཐོགས་ཤིང་བཞུགས་པའོ། །གཡས་སུ་བྱང་ཆུབ་སེམས་དཔའ་ནོར་བུ་རྡོ་རྗེ་རྒྱན་ཐམས་ཅད་ཀྱིས་བརྒྱན་པ་གཡས་པ་ན་ནོར་བུ་དང་རྔ་ཡབ་ཐོགས་ནས་བཞུགས་པའོ། །ཟུར་བཞིར་རྒྱལ་པོ་ཆེན་པོ་བཞི་བྲི་བར་བྱ་སྟེ། གོ་ཆ་དང་ཚེམ་ཚེམ་བགོས་ཤིང་ལག་ན་མཚོན་ཆ་ཐོགས་པ། རྒྱན་ཐམས་ཅད་དང། རལ་པའི་ཅོད་པན་དང་ལྡན་པ་དྲག་པོའི་གཟུགས་ཅན་བྲི་བར་བྱའོ། །མཚམས་བཞིར་སྤོས་ཆུས་གང་བའི་གསེར་གྱི་སྣོད་བཞི་གཞག་པར་བྱའོ། །གལ་ཏེ་གསེར་གྱི་སྣོད་མེད་ན་རྫའི་བུམ་པ་ཚད་མི་ཆུང་བ་ལ་གསེར་གཡོགས་ནས་བྱའོ། །དེ་ལྟ་བུའི་སྣོད་མི་འཛག་པར་འོ་མས་གང་བར་བྱས་ནས་ཕྱོགས་བཞིར་གཞག་པར་བྱའོ། །དཀྱིལ་འཁོར་གྱི་གཡས་ལོགས་སུ་ལྷ་མོ་དཔལ་ཆེན་མོ་རྒྱན་ཐམས་ཅད་ཀྱིས་བརྒྱན་པའོ། ། གཡོན་དུ ་ལྷ་མོ་ཆེན་མོ་དུང་ཅན་མ་བཞུགས་པ་བྲིའོ། །སྒོའི་དབུས་སུ་ལྷ་མོ་ཆེན་མོ་རྡོ་རྗེ་ཕོ་ཉ་མོ་ཕྱག་བརྒྱད་པ་ལག་ན་མཚོན་ཆ་སྣ་ཚོགས་ཐོགས་པ། རྒྱན་ཐམས་ཅད་ཀྱིས་བརྒྱན་ཅིང་བཞུགས་པ་བྲིའོ། །དཀྱིལ་འཁོར་གྱི་སྙིང་པོའི་ཕྱོགས་བཞིར་དར་སྔོན་པོ་འཕྱང་བ་དང་། བཅུད་སྣ་ཚོགས་གཞག་པར་བྱའོ། །ཚུལ་སྣ་ཚོགས་གཞག་པར་བྱའོ། །བུམ་པ་གང་བ་བཞི་དང་། མར་མེ་སུམ་ཅུ་རྩ་གཉིས་དང་། འབྲས་བུ་དང་མེ་ཏོག་སྣ་ཚོགས་རྣམས་གཞག་པར་བྱའོ། །སངས་རྒྱས་བཅོམ་ལྡན་འདས་ཀྱི་ནི་གསེར་ལས་གྲུབ་པའི་བུམ་པ་གཞག་གོ། །སོ་སོར་ཏུ་རུཥྐ་བསྲེག་པར་བྱའོ། །དཀྱིལ་འཁོར་གྱི་སྙིང་པོར་དངུལ་གྱི་རང་བཞིན་གྱི་བུམ་པ་གཞག་གོ། །
རྡོ་རྗེ་འཛིན་པའི་བདུག་སྤོས་སོ། །ནོར་བུ་འཛིན་པའི་ཏུ་རུཥྐ་དང་། ཙནྡན་དང། མ་ཧཱ་རཱ་ཛྙཱ་དང་། ཀུན་དུ་རུ་དང་། ཀཱ་ཀ་བི་ཛ་དང། སྤོས་དཀར་གྱི་བདུག་པའོ། །དཔལ་ལྷ་མོའི་ཙནྡན་ནོ། །དུད་ཅན་མའི་གུ་གུལ་ལོ། །ཕོ་ཉ་མོའི་ཤ་ལའི་བདུག་སྤོས་ཏེ་སོ་སོར་བསྲེག་པར་བྱའོ། །གཏོར་མ་ཡང་སྦྱིན་ནོ། །དཀྱིལ་འཁོར་གྱི་སྙིང་པོའི་བྱ་བའོ། །ཕྱི་རོལ་གྱི་དཀྱིལ་འཁོར་ནི་སྒོ་བཞི་རྣམ་པར་འབྱེས་ཤིང་ཆ་མཛེས་པ་བཀྲ་ཤིས་ཀྱི་སྒོ་བཞི་གནས་པར་བྱའོ། །ཤར་གྱི་སྒོར་ཁྱབ་འཇུག་འཁོར་དང་བཅས་པའོ། །ལྷོར་དབང་ཕྱུག་ཆེན་པོའོ། །ནུབ་ཏུ་མེ་ཏོག་སོ་ཞེས་བྱ་བའི་གནོད་སྦྱིན་མོའོ། །བྱང་དུ་འཇིགས་བྱེད་མ་ཞེས་བྱ་བའི་ལྷ་མོ་ངོ་ཚ་དང་བཅས་པ་བྱ་སྟེ། ན་ཆུང་བདུན་དང་བཅས་པའོ། །དེ་ནས་ཕུར་བུ་སུམ་ཅུ་སོ་གཉིས་གདབ་པར་བྱས་ལ་ཁ་དོག་ལྔའི་སྐུད་པས་ཕུར་བུ་བཅིང་ངོ་། །ཟུར་བཞི་མཉམ་པར་ཁ་དོག་ལྔའི་བ་དན་གྱིས་བརྒྱན་ནོ། །མེ་ཏོག་སྣ་ཚོགས་དགྲམ་པ་དང་། གཏོར་མ་དང་། མེ་ཏོག་སྣ་ཚོགས་རྣམས་མ་འཁྲུགས་པ་མཉམ་པར་བྱའོ། །བཅུད་སྣ་ཚོགས་འཕྲོག་པའི་སྣོད་བདུན་གཞག་གོ། །རྫའི་སྣོད་སུམ་ཅུ་རྩ་གཉིས་དང་། ཕྱེ་མའི་སྣོད་སུམ་ཅུ་རྩ་གཉིས་དང་། པོག་ཕོར་སུམ་ཅུ་རྩ་གཉིས་དང་། མར་མེ་བརྒྱ་རྩ་བརྒྱད་གཞག་པར་བྱའོ། །ཕྲེང་བ་བརྒྱ་རྩ་བརྒྱད་དང་། དྲི་ཡིས་གང་བ་སྣ་ཚོགས་གཞག་པར་བྱའོ། །བདུག་པ་དང་། ཀུན་དུ་རུ་སྣ་ཚོགས་སྲེག་གོ། །དེ་ནས་སྒོ་ནས་འཇུག་པ་ལ་དྲི་ཡིས་གང་བའི་བུམ་པ་གཉིས་བཞག་ལ། ཇི་ལྟར་རྙེད་པའི་གཏོར་མ་བྱིན་ནས་ཇི་ལྟ་བ་བཞིན་དུ་གཞུག་པའི་ཆོ་ག་ལ་སྤྱད་ལ། དེ་ནས་ཨོཾ་མ་ཎི་བི་པུ་ལ་པྲ་ཏིཥྛི་ཏ་སིདྡྷི་ཨ་བྷི་ཥིཉྩ་ཡ་མཱཾ་སརྦ་ཏ་ཐཱ་ག་ཏ་ཨ་བྷིཥིཀེེརྦྷ་ར་བྷ་ར་སཾ་བྷ་ར་ཧཱུྃ། ཇི་ལྟ་བ་བཞིན་དུ་སྔགས་འདིས་དབང་བསྐུར་ན་དེ་བཞིན་གཤེགས་པ་ཐམས་ཅད་ཀྱིས་དབུགས་འབྱིན་པ་དང་། ཐམས་ཅད་འགྲུབ་པ་དང་། མྱ་ངན་ལས་འདས་པ་ཡང་མངོན་དུ་འགྱུར་རོ། །གང་བསམས་པའི་དོན་དེ་དེ་བཞིན་དུ་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་རྟོགས་པའི་རྗེས་སུ་འཇུག་གོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཟབ་མོ་ལ་བཟོད་པ་
འཐོབ་ཅིང་རྗེས་སུ་རྟོགས་པར་འགྱུར་རོ། །བྱང་ཆུབ་ཀྱི་སྙིང་པོར་འགྲོ་བར་འགྱུར་རོ། །དེ་ལྟ་བུ་ལ་སོགས་པ་ཡོན་ཏན་གྱི་ཁྱད་པར་རྣམས་འཐོབ་སྟེ། ཇི་སྲིད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ལམ་མ་རྫོགས་ཀྱི་བར་དུ་ཕྱིར་མི་ལྡོག་པར་འགྱུར་རོ། །དཀྱིལ་འཁོར་གྱི་ཆོ་ག་སྒྲུབ་པའི་ལེའུ་སྟེ་ཆོ་ག་གསུམ་པའོ།། །།དེ་ནས་ཕྱག་རྒྱའི་མཚན་ཉིད་བཤད་པར་བྱའོ། །སྙིང་པོ་ཆེན་པོ་བཞིའི་ཕྱག་རྒྱ་ལ་སྦྱར་བ་དང་། དེ་བཞིན་གཤེགས་པའི་རིགས་སྤྱི་ལ་སྦྱར་བ་དང་། ལག་ན་རྡོ་རྗེའི་སྙིང་པོ་བཞིའི་ཕྱག་རྒྱ་བཏུས་པ་རྣམས་དང་། དཀྱིལ་འཁོར་གྱི་གདན་གྱི་ཕྱག་རྒྱ་དང་། ཕྱག་རྒྱ་གཞན་ཡང་བརྩམ་པར་བྱའོ། །འདིར་དེ་བཞིན་གཤེགས་པའི་རིགས་ཀྱི་ཕྱག་རྒྱ་ལ་སྦྱར་བའི་ཆོ་ག་དང་། ཕྱི་རོལ་གྱི་ཕྱག་རྒྱ་གཟུང་བར་བྱའོ། །ཐམས་ཅད་དུ་ཕྱག་རྒྱ་གཞན་རྣམས་ཇི་ལྟར་བདེ་བར་བརྗོད་དོ། །ཇི་ལྟར་དེ་བཞིན་གཤེགས་པའི་རིགས་ལ་སྦྱར་བ་ནི། ཨོྃ་སརྦ་ཏ་ཐཱ་ག་ཏ་ཧྲྀ་ད་ཡ་མ་ཎི་ཛྭ་ལ་ནི་ཨཱ་བེ་ཤ་བ་ཧཱུྃ། དེ་བཞིན་གཤེགས་པའི་སྙིང་པོ་དང་ཕྱག་རྒྱའོ། །ཨོྃ་སརྦ་ཏ་ཐཱ་ག་ཏ་པྲ་པ་རཱ་གྲ་མ་ཎི་ཧཱུྃ། དེ་བཞིན་གཤེགས་པའི་དམ་ཚིག་གི་ཕྱག་རྒྱའོ། །ཨོྃ་སརྦ་ཏ་ཐཱ་ག་ཏ་བཱི་སཾ་བོ་དྷ་བཛྲ་ཧཱུྃ་ཧཱུྃ། དེ་བཞིན་གཤེགས་པའི་དབུགས་དབྱུང་བའི་ཕྱག་རྒྱའི། །ཨོྃ་སརྦ་ཏ་ཐཱ་ག་ཏ་ཨ་དྷིཥྵཱ་ན་མ་ཎི་མ་ཎི་ཧཱུྃ་ཧཱུྃ་ཕཊ། དེ་བཞིན་གཤེགས་པའི་བྱིན་གྱི་བརླབས་ཀྱི་ཕྱག་རྒྱའོ། །ཨོྃ་སརྦ་ཏ་ཐཱ་ག་ཏ་པྲ་བ་ར་མ་ཎི་རུ་ཙི་རེ་ཧཱུྃ་ཧཱུྃ་ཕཊ། དེ་བཞིན་གཤེགས་པའི་རྡོ་རྗེ་སེང་གེའི་ཁྲིའི་ཕྱག་རྒྱའོ། །ཨོྃ་སརྦ་ཏ་ཐཱ་ག་ཏ་བི་པུ་ལ་སཾ་བྷ་བེ་ཧཱུྃ་ཧཱུྃ་ཕཊ། དེ་བཞིན་གཤེགས་པའི་དབང་བསྐུར་བའི་ཕྱག་རྒྱའོ། །ཨོྃ་སརྦ་ཏ་ཐཱ་ག་ཏ་ས་མ་ཡ་མ་ཎི་བཛྲ་ཧཱུྃ་ཧཱུྃ། ཆོས་ཀྱི་འཁོར་ལོའི་ཕྱག་རྒྱའོ། །ཨོྃ་སརྦ་ཏ་ཐཱ་ག་ཏ་ཛ་ཡ་ཨ་པ་རཱ་ཛ་ཏ་བཛྲ་ཧཱུྃ་ཧཱུྃ། གཞན་གྱིས་མི་ཐུབ་པའི་ཕྱག་རྒྱའོ། །ཨོྃ་སརྦ་ཏ་ཐཱ་ག་ཏ་དྷརྨ་དྷཱ་ཏུ་མ་ཧཱ་མ་ཎི་ཤི་ཁ་རེ་ཧ་ར་ཧ་ར་ཧཱུྃ་ཧཱུྃ། དེ་བཞིན་གཤེགས་པའི་འཁོར་ལོ་སྐོར་བའི་ཕྱག་རྒྱའོ། །ཨོྃ་སརྦ་ཏ་ཐཱ་ག་ཏ་མ་ཧཱ་བཛྲ་ཧ་ར་ཧ་ར་ཡ་དྷ་ར་དྷ་ར་ཧཱུྃ་ཕཊ། འཕགས་པ་ལག་ན་རྡོ་རྗེས་གཟུང་བའི་ཕྱག་རྒྱའོ། །ཨོྃ་དུ་རུ་དུ་རུ་མ་ཎི་མ་ཎི་མ་ཧཱ་བིནྡུ་
ཏ་མ་ཎི་སྭཱ་ཧཱ། ཡིད་བཞིན་གྱི་ནོར་བུའི་ཕྱག་རྒྱ་སྟོ། །འཕགས་པ་ནོར་བུ་རྡོ་རྗེའི་ཕྱག་རྒྱའོ། །ཨོྃ་ལོ་ཀ་པཱ་ལི་ཏེ་ཛ་ཡ་ཛ་ཡ་ཧཱུྃ་ཧཱུྃ། རྒྱལ་པོ་ཆེན་པོ་བཞི་རྣམས་ཀྱི་ཕྱག་རྒྱ་གཟུང་བར་བྱའོ། །ཨོྃ་བུ་ལཱ་གྲ་པ་ཏི་སཾ་བ་ར་ཧཱུྃ། དཔལ་ལྷ་མོའི་ཕྱག་རྒྱ་གཟུང་བར་བྱའོ། །ཨོྃ་དིཥྚི་ཎི་སཾ་ཧཱུྃ། དུང་ཅན་མའི་སྡིགས་པའི་ཕྱག་རྒྱའོ། །ཨོྃ་ཨཱ་ག་མ་ཡ་དྲཱི་ར་མུཙྪ་ད་ཏཱ་ཧཱ་སྟི་ནི་ཧཱུྃ། ཕོ་ཉ་མོའི་ཕྱག་རྒྱ་བཅིང་བར་བྱའོ། །ཨོཾ་ས་མནྟ་ཀ་ར་བི་པཱུ་ར་ནེ་ཏ་ཀ་ཏ་ཀ་ཧཱུྃ་ཧཱུྃ་ཕཊ། དཀྱིལ་འཁོར་ན་གནས་པ་ཐམས་ཅད་ཀྱི་ཕྱག་རྒྱ་སྟེ། སྤྱན་དྲང་བའི་ཕྱག་རྒྱ་གཟུང་བར་བྱའོ། །ཨོྃ་ས་ར་ས་ར་བི་ས་ར་ཧཱུྃ་ཧཱུྃ། པདྨའི་ཕྱག་རྒྱའོ། །ཕྱག་རྒྱ་རྒྱས་པའི་ལེའུ་སྟེ་ཆོ་ག་བཞི་པའོ།། །།དེ་ནས་དོན་ཀུན་སྒྲུབ་པའི་སྐུ་གཟུགས་ཀྱི་ཆོ་ག་བཤད་པར་བྱ་སྟེ། རས་ཁ་ཚར་མ་བཅད་པ། སྐྲ་མེད་པ། ཁྲུ་གང་བའམ། ཁྲུ་དོ་གྲུ་བཞི་ལྷམ་པ་ལ་རི་མོ་མཁན་སྨྱུང་བ་བྱས་པས་སྣོད་སར་པར་ཚོན་སྦྱིན་མེད་པས་བཅོམ་ལྡན་འདས་རྒྱན་ཐམས་ཅད་ཀྱིས་བརྒྱན་པ། པདྨའི་སྟེང་ན་ཆོས་འཆད་ཅིང་བཞུགས་པ། ཁང་པ་བརྩེགས་མས་ཡོངས་སུ་བསྐོར་བ་བྲི་བར་བྱའོ། །གཡས་སུ་ལག་ན་རྡོ་རྗེ་ལག་པ་བཅུ་གཉིས་པ་སྟོན་ཀའི་འདམ་བུ་མདའ་རྒྱུ་ལྟ་བུའི་མདོག་ཅན། ལག་པ་ན་མཚོན་ཆ་སྣ་ཚོགས་ཐོགས་པ། གདོང་བཞི་པ་བྱ་སྟེ། གདོང་དང་པོ་ནི་ཞི་བའོ། །གཉིས་པ་ནི་ཁྲོ་བོའོ། །གསུམ་པ་ནི་མཆེ་བ་གཙིགས་པའོ། །བཞི་པ་ནི་གདོང་ཁྲོ་གཉེར་ཅན་གྱེན་དུ་ལྟ་བ་སྟེ། རལ་པའི་ཐོར་ཚུགས་ཀྱིས་བཞུགས་པ། རྒྱན་ཐམས་ཅད་ཀྱིས་བརྒྱན་པ། པདྨའི་སྟེང་ན་སྐྱིལ་མོ་ཀྲུང་ཕྱེད་ཀྱིས་འདུག་པར་བྱའོ། །གཡོན་ཕྱོགས་སུ་ནི་བྱང་ཆུབ་སེམས་དཔའ་ནོར་བུ་རྡོ་རྗེ་ཞེས་བྱ་བ་གདོང་བཞི་པ། ལག་པ་བཅུ་དྲུག་པ་བྱ་སྟེ། ལག་པ་གཡས་ན་ཡིད་བཞིན་གྱི་ནོར་བུ་ཐོགས་ནས་དེ་བཞིན་གཤེགས་པ་ལ་དབུལ་བ། ལག་པ་གཡོན་ན་པདྨ་ཐོགས་པ། ལག་པ་གཅིག་གིས་དབུགས་འབྱིན་པ། ལག་པ་གཉིས་ནི་ཐལ་མོ་སྦྱར་བ་བྱའོ། །ལག་པ་གཞན་ནི་མཚོན་ཆ་སྣ་ཚོགས་ཐོགས་པ་བྱ་སྟེ། རྩེ་གསུམ་པ་དང་། འཁོར་ལོ་དང་། རྡོ་རྗེ་དང་།
རལ་གྲི་དང་། མེ་ཏོག་གི་ཕུར་མ་དང་། བགྲང་ཕྲེང་དང་། རིལ་བ་སྤྱིའུ་བླུགས་དང་། རལ་གྲི་དང་། གླེགས་བམ་དང་། མཆོད་རྟེན་དང་། རི་རབ་བོ། །གདོང་དང་པོ་ནི་ཞི་བའོ། །གདོང་གཡས་པ་ནི་ནག་པོ་ཆེན་པོ་དང་འདྲ་བའོ། །གདོང་གཡོན་པ་ནི་མིའི་སེང་གེའི་དབྱིབས་ཤིང་པ་ལ་ཤའི་ཁ་དོག་ལྟ་བུའོ། །གདོང་གོང་མ་ནི་བཞིན་བསྒྱུར་བ། པདྨའི་སྟན་ལ་སྐྱིལ་མོ་ཀྲུང་ཕྱེད་ཀྱིས་འདུག་པ་བྱའོ། །དེའི་འོག་ཏུ་དུང་ཅན་མ་བྲི་སྟེ། ལག་པ་བརྒྱད་བ་པུས་མོ་བཙུགས་ནས་བཅོམ་ལྡན་འདས་ལ་མཆོད་པའི་ལས་ལ་མངོན་པར་བརྩོན་པ་བྱའོ། །ལག་ན་རྡོ་རྗེའི་འོག་ཏུ་དཔལ་ལྷ་མོ་ཆེན་མོ་པུས་མོ་བཙུགས་ནས་ནོར་བུ་རིན་པོ་ཆེ་སྣ་ཚོགས་ཀྱི་སྣོད་བཅོམ་ལྡན་འདས་དེ་བཞིན་གཤེགས་པ་ལ་དབུལ་བར་བྱའོ། །དཔལ་ལྷ་མོ་ཆེན་མོའི་རྒྱབ་ཏུ་ཕོ་ཉ་མོ་བཞིན་འཛུམ་པ་ལག་པ་བཞི་པ། རྒྱན་སྣ་ཚོགས་ཀྱིས་བརྒྱན་པ། མཚོན་ཆ་སྣ་ཚོགས་འཛིན་པ་བྱའོ། །དུང་ཅན་མའི་རྒྱབ་ཏུ་མེ་ཏོག་སོ་གོས་དཀར་མོ་གྱོན་པ། མེ་ཏོག་ཐོགས་ནས་བཅོམ་ལྡན་འདས་ལ་གྱེན་དུ་བལྟ་བ་བྱའོ། །སངས་རྒྱས་བཅོམ་ལྡན་འདས་ཀྱི་སྤྱན་སྔར་རིན་པོ་ཆེ་སྣ་བདུན་གྱི་ཁ་དོག་ཅན་གྱི་པདྨ་འདབ་མ་བརྒྱད་པ། སྡོང་བུ་ནི་བཻ་ཌཱུཪྱ་སྙིང་པོ་ནི་གསེར་ལས་བྱས་པ་བྱའོ། །དེའི་སྟེང་དུ་འཛམ་བུའི་ཆུ་བོའི་གསེར་གྱི་འཁོར་ལོ་ཤིན་ཏུ་རྣམ་པར་ཕྱེ་བ་ལྟེ་བ་དང་བཅས་པ། ཀུན་ནས་འབར་བ་ཤིན་ཏུ་རྣམ་པར་བཀྲ་བ་བྲི་བར་བྱའོ། །པདྨ་དེའི་དྲུང་དུ་རྒྱལ་པོ་ཆེན་པོ་བཞི་ཡ་ལད་དང་། གོ་ཆ་དང་། ཚེ་མ་ཚེ་མ་བགོས་པ། རྒྱན་ཐམས་ཅད་ཀྱིས་བརྒྱན་པ་བྲི་བར་བྱའོ། །པདྨ་དེའི་དྲུང་དུ་རྫིང་བུ་རིན་པོ་སྣ་ཚོགས་ཀྱིས་བརྒྱན་པ་བྱའོ། །རྫིང་དེའི་འགྲམ་དུ་རིག་པ་འཛིན་པ། ལག་པ་ན་པོག་ཕོར་དང་། མེ་ཏོག་གི་མགོ་ལྕོགས་ཐོགས་ལ་ལག་པ་ཅིག་ཤོས་ན་བགྲང་ཕྲེང་ཐོགས་ཏེ་པུས་མོ་བཙུགས་ནས་དེ་བཞིན་གཤེགས་པ་ལ་གྱེན་དུ་བལྟ་བ་བྱའོ། །ཁང་པ་བརྩེགས་མའི་གན་དུ་ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་ལ་སོགས་པ་ནམ་མཁའི་དཀྱིལ་ན་བཅོམ་ལྡན་འདས་ལ་མེ་ཏོག་སྣ་ཚོགས་ཀྱིས་མཆོད་པ་བྱེད་པ་བྱའོ། །དེ་ལ་སོགས་
པ་སྐུ་གཟུགས་ཀྱི་ཆོ་ག་རྣམས་བྱའོ། །དེ་ནས་རིག་པ་འཛིན་པ་གོས་དཀར་པོ་བགོས་ཏེ། ཟས་དཀར་གསུམ་ཟ་བས་ཚེས་བརྒྱད་ནས་ཚེས་བཅོ་ལྔ་ཉའི་བར་དུ་སྐུ་གཟུགས་ཀྱི་མདུན་དུ་བཟླས་བརྗོད་འབུམ་ཚང་བར་བྱའོ། །དེ་ནས་སྐུ་གཟུགས་འགུལ་ཞིང་བདག་ཉིད་འབར་བར་མཐོང་བར་འགྱུར། སྒྲིབ་པ་མེད་པའི་མིག་ཐོབ་པར་འགྱུར། ནོར་བུ་རྣམ་དག་སྤྱོད་པ་ཞེས་བྱ་བའི་ཏིང་ངེ་འཛིན་ཐོབ་པར་འགྱུར། རིག་འཛིན་ཐམས་ཅད་ཀྱི་འཁོར་ལོས་སྒྱུར་བར་འགྱུར། དེ་བཞིན་གཤེགས་པ་ཐམས་ཅད་མཐོང་བར་འགྱུར། བཟླས་བརྗོད་བྱས་པ་ཙམ་གྱི་མོད་ལ་དམྱལ་བ་དང་། དུད་འགྲོའི་སྐྱེ་གནས་ལས་ཐར་བར་འགྱུར། འདོད་ཆགས་དང་། ཞེ་སྡང་དང་། གཏི་མུག་ལ་སོགས་པ་ཐམས་ཅད་སྤངས་པར་འགྱུར། སེར་སྣའི་དྲི་མ་དང་བྲལ་བར་འགྱུར། བསོད་ནམས་ཐམས་ཅད་དང་ལྡན་པར་འགྱུར། བདེ་བ་ཐམས་ཅད་དང་ལྡན་པར་འགྱུར། དགེ་བའི་རྩ་བ་ཐམས་ཅད་ཡང་དག་པར་བཟུང་བར་འགྱུར། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པར་འགྱུར། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་དབུགས་འབྱིན་པར་འགྱུར། ལྷ་ཐམས་ཅད་ཀྱིས་ཡང་དག་པར་བཟུང་བར་འགྱུར། གནོད་སྦྱིན་དང་། སྲིན་པོ་དང་། ཡི་དགས་དང་། ཤ་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་ཐམས་ཅད་ཀྱིས་ཀྱང་སྲུང་བར་འགྱུར། རྒྱལ་པོའི་ཕོ་བྲང་ཐམས་ཅད་དུ་མཆོད་པའི་བོས་སུ་འགྱུར། འཇིག་རྟེན་ཐམས་ཅད་ལ་དབང་བསྐུར་བར་འགྱུར། ཡོན་ཏན་དང་། ཕ་རོལ་ཏུ་ཕྱིན་པ་ཐམས་ཅད་ཡོངས་སུ་བཟུང་བར་འགྱུར། དེ་ལ་སོགས་པ་ཡོན་ཏན་གྱི་ཁྱད་པར་ཐོབ་པར་འགྱུར། མཐོང་བ་ཙམ་མམ། བཟླས་བརྗོད་བྱས་པ་ཙམ་མམ། བཀླགས་པ་ཙམ་གྱིས་ཡོན་ཏན་དང་། ཕན་ཡོན་འདི་དག་ཡོངས་སུ་བཟུང་བར་འགྱུར་ན་ཆེས་ལྷག་པར་མང་དུ་བྱེད་པ་ལྟ་སྨོས་ཀྱང་ཅི་དགོས། གང་ཞིག་ཀློག་པར་བྱེད་པ་དང་། འདོན་པར་བྱེད་པ་དང་། བཟླས་བརྗོད་ལ་མངོན་པར་བརྩོན་པར་བྱེད་པ་དང་། སྒྲུབ་པར་བྱེད་པ་དང་།
ཕྱག་རྒྱའི་ཚོགས་སྒྲུབ་པར་བྱེད་པ་དང་། རིག་སྔགས་སྒྲུབ་པར་བྱེད་པ་དང་། རས་ཟུང་སྒྲུབ་པར་བྱེད་པའི་སེམས་ཅན་དེ་ནི་དེ་བཞིན་གཤེགས་པ་ཁོ་ནར་བརྗོད་པར་བྱ་སྟེ། མཆོད་པའི་འོས་སུ་འགྱུར། ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་གྱིས་ཕྱག་བྱ་བའི་འོས་སུ་འགྱུར་རོ། །སེམས་ཅན་དེ་ནི་དེ་བཞིན་གཤེགས་པ་དང་མཚུངས་བར་བལྟ་བ་དང་ཤེས་པར་བྱ། དེ་བཞིན་གཤེགས་པ་ཐམས་ཅད་ཀྱིས་ལུང་བསྟན་པ་གནང་བས་སེམས་ཅན་དེ་ནི་ཕྱིར་མི་ལྡོག་པར་གྱུར་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་གསལ་བར་ལུང་བསྟན་པ་ཡིན་ནོ། །ཕྱིན་ཆད་མའི་མངལ་དུ་སྐྱེ་བར་མི་འགྱུར། འཇིག་རྟེན་གྱི་ཁམས་གང་དང་གང་དུ་འགྲོ་བ་དེ་དང་དེར་པདྨ་ལས་རྫུས་ཏེ་སྐྱེ་བར་ཤེས་པར་བྱའོ། །ཕྱིན་ཆད་དེ་བཞིན་གཤེགས་པ་དང་འབྲལ་བར་མི་འགྱུར། བྱང་ཆུབ་སེམས་དཔའ་དང་ཡང་འབྲལ་བར་མི་འགྱུར་ཏེ། གང་དང་གང་དུ་སྐྱེས་པ་དེར་ཐམས་ཅད་དུ་དེ་བཞིན་གཤེགས་པ་དང་ཕྲད་པ་དང་། བྱང་ཆུབ་སེམས་དཔའ་དང་ཕྲད་པར་འགྱུར་ཞིང་བྱང་ཆུབ་ཀྱི་སྙིང་པོའི་བར་དུ་མཐར་ཕྱིན་པར་བྱེད་པར་འགྱུར་རོ། །སྐུ་གཟུགས་རྒྱས་པ་ཆེན་པོའི་ལེའུ་སྟེ་ཆོ་ག་ལྔ་པའོ།། །།དོན་ཀུན་སྒྲུབ་པར་བྱེད་པ་ཡི། །སྦྱིན་སྲེག་ཆོ་ག་བཤད་པར་བྱ། །སེམས་ཅན་ཀུན་གྱི་བདེ་ཐོབ་པ། །ཞི་བ་ཡི་ནི་ལས་བརྩམ་མོ། །རིག་པ་འཛིན་པས་གསང་བྱ་སྟེ། །ངེས་པར་ཚངས་པར་སྤྱོད་པ་ཡིས། །སེམས་ཅན་ཐམས་ཅད་ཡིད་དགའ་བའི། །དེ་ནས་སྦྱིན་སྲེག་དག་བྱའོ། །ཨོྃ་སྭཱ་ཧཱ་པ་ཏི་བྷཱུར་བྷུ་བཱ་ཧཱུྃ་ཧཱུྃ་ཕཊ་སྭཱ་ཧཱ། སྔགས་འདིས་ཏིལ་དང་། ཡུངས་ཀར་དང་། མར་ལས་སྦྱིན་སྲེག་བྱས་ན་རིག་སྔགས་འཆང་ཐམས་ཅད་གྲུབ་པར་འགྱུར་རོ། །བགེགས་དང་། ལོག་འདྲེན་ཐམས་ཅད་ཚར་བཅད་པར་འགྱུར་རོ། །སྡིག་པ་ཐམས་ཅད་དང་། གནོད་པ་ཐམས་ཅད་དང་། ཕྱིར་རྒོལ་བ་དང་། མི་མཛའ་བ་ཐམས་ཅད་རྨུགས་པར་བྱས་པར་འགྱུར། རེངས་པར་བྱས་པར་འགྱུར། རྨོངས་པར་བྱས་བར་འགྱུར་རོ། །རྨི་ལམ་ངན་པ་དང་། ལྟས་ངན་པ་ཐམས་ཅད་མེད་པར་འགྱུར་རོ། །གུ་གུལ་དང་། ཡུངས་ཀར་དང་།
མར་ལས་སྦྱིན་སྲེག་སྟོང་རྩ་བརྒྱད་བྱས་ན་གདོན་ཐམས་ཅད་ཀྱི་ཀླད་པ་འགས་པར་འགྱུར། འབྱུང་བོ་ཐམས་ཅད་ཀྱིས་གནོད་པ་བྱས་པ་ལས་ཡོངས་སུ་ཐར་བར་འགྱུར། རིམས་ནད་ལ་སོགས་པ་ཐམས་ཅད་ཞི་བར་འགྱུར་རོ། །ནད་ཐམས་ཅད་དང་བྲལ་བར་འགྱུར་རོ། །མར་དང་། ཡུངས་ཀར་ལས་སྦྱིན་སྲེག་སྟོང་རྩ་བརྒྱད་བྱས་ན་ཡུལ་ཐོབ་པར་འགྱུར་རོ། །ས་བོན་བདུག་པ་དང་། མར་ལས་སྦྱིན་སྲེག་སྟོང་རྩ་བརྒྱད་བྱས་ན་བདུད་ལ་སོགས་པའི་གདུག་པས་འཇིགས་སྐྲག་པ་དང་། ཕ་རོལ་གྱི་དམག་ཚོགས་ལ་སོགས་པ་འཇིག་པར་འགྱུར་རོ། །སྒྲོན་ཤིང་དང་མར་ལས་སྦྱིན་སྲེག་སྟོང་རྩ་བརྒྱད་བྱས་ན་རྒྱལ་པོ་བཙུན་མོའི་འཁོར་དང་བཅས་པ་དགའ་བར་འགྱུར་རོ། །ཅི་འདོད་པ་དེ་བྱེད་དོ། །གང་དང་གང་སླངས་པ་དེ་དང་དེ་འཐོབ་པོ། །རི་ཁར་སྲ་ཙི་བོག་དང་། ཡུངས་ཀར་དང་། མར་ལས་སྦྱིན་སྲེག་བྱས་ན་ལྷ་མ་ཡིན་གྱི་སྒོ་ཐམས་ཅད་འབྱེད་པར་འགྱུར། རིག་འཛིན་གྱི་རྒྱལ་པོར་འགྱུར་རོ། །ཡུངས་ཀར་དང་། ཏིལ་མར་དང་། ནཱ་ག་གེ་སར་ལས་སྦྱིན་སྲེག་སྟོང་རྩ་བརྒྱད་བྱས་ན་ཀླུ་ཐམས་ཅད་དབང་དུ་འགྱུར་རོ། །ཅི་བསྒོ་བ་བྱེད་དོ། །དུས་སུ་ཆར་གྱི་རྒྱུན་འབེབས་པར་བྱེད་དོ། །ཕྱིན་ཆད་སེར་བའི་འཇིགས་པ་མི་འབྱུང་ངོ་། །ཁ་ཟས་ལས་སྦྱིན་སྲེག་སྟོང་རྩ་བརྒྱད་བྱས་ན་འབྲུ་སྟོང་དུ་འཕེལ་ཞིང་མང་པོར་འགྱུར་རོ། །ལན་ཚྭ་ལ་སྦྱིན་སྲེག་སྟོང་རྩ་བརྒྱད་བྱས་ན་གནོད་སྦྱིན་མོ་ཐམས་ཅད་ལྷགས་ནས། རྗེ་བཙུན་སྲོག་དང་མ་ད་བྲལ་ཅིག་དང་། བཀའ་ཅི་སྩལ་བ་དེ་བགྱིའོ་ཞེས་རྐང་པ་ལ་གཏུགས་པར་འགྱུར་རོ། །འབྲས་དང་མར་ལས་སྦྱིན་སྲེག་སྟོང་རྩ་བརྒྱད་བྱས་ན་དཔལ་ཆེན་པོ་ཐོབ་པར་འགྱུར་རོ། །ཉི་མ་ལ་ཁ་བལྟས་ཏེ་ན་ལེ་ཤམ་ལས་སྦྱིན་སྲེག་སྟོང་རྩ་བརྒྱད་བྱས་ན་དེ་ལ་ལྷ་ཐམས་ཅད་རྟག་ཏུ་རྒྱུན་མི་འཆད་པར་སྲུང་བ་དང་། སྐྱོབ་པ་དང་། སྦེད་པ་བྱེད་པར་འགྱུར་རོ། །དཔལ་ཐམས་ཅད་ཐོབ་པར་འགྱུར་རོ། །དཔལ་ལྷ་མོའི་མདུན་དུ་ཏིལ་དང་། ཡུངས་ཀར་ལས་སྦྱིན་སྲེག་བྱས་ན་ནོར་མང་པོ་འཕེལ་བར་འགྱུར་རོ། །ཤིང་ཨར་ཀའི་ཡམ་སྲེག་ཤིང་དང་མར་ལས་སྦྱིན་སྲེག་བརྒྱ་རྩ་བརྒྱད་བྱས་ན་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བསྐུལ་བར་འགྱུར་རོ། །སྡིག་པ་
ཐམས་ཅད་དང་བྲལ་བར་འགྱུར། འཇིག་རྟེན་དང་། འཇིག་རྟེན་ལས་འདས་པའི་གསང་སྔགས་ཐམས་ཅད་མངོན་དུ་འགྱུར།ནད་ཐམས་ཅད་དང་བྲལ་བར་འགྱུར། དགྲ་ཐམས་ཅད་ལས་རྒྱལ་བར་འགྱུར། འཇིག་རྟེན་གྱི་སྡུག་བསྔལ་ཐམས་ཅད་འབྱུང་བར་མི་འགྱུར་རོ། །རིག་སྔགས་འདིའི་མཐུས་བདེ་བ་ཐམས་ཅད་འགྲུབ་པར་འགྱུར། རྨི་ལམ་ངན་པ་དང་། ལྟས་ངན་པ་ཐམས་ཅད་མེད་པར་འགྱུར། བྱད་ཐམས་ཅད་དང་། བཅིངས་པ་ཐམས་ཅད་དང་། གནོད་པ་ཐམས་ཅད་ནམ་ཡང་འབྱུང་བར་མི་འགྱུར་རོ། །དེ་ལ་སོགས་ཏེ་སྦྱིན་སྲེག་གི་ལས་རྣམས་ཀྱིས་མཆོག་ཏུ་ཞི་བར་བྱེད་དོ། །བདེ་བ་རབ་ཏུ་སྦྱིན་པར་བྱེད། ནོར་ཐོབ་པར་བྱེད། དོན་གྲུབ་པར་བྱེད་ཅིང་ལྟ་བ་ངན་པར་ལྟུང་བའི་སེམས་ཅན་ཐམས་ཅད་ཉམས་པར་བྱེད་དོ། །སྦྱིན་སྲེག་གྲུབ་པ་རྒྱས་པའི་ལེའུ་སྟེ་ཆོ་ག་དྲུག་པའོ།། །།དེ་ནས་བཅོམ་ལྡན་འདས་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་འདི་ནི་ཆོ་ག་ཞིབ་མོའི་རྒྱལ་པོ་ཡིན། འདི་ནི་ཡོན་ཏན་ཁྱད་པར་ཆེན་པོ་ཅན་ཡིན། འདི་ནི་དེ་བཞིན་གཤེགས་པ་ཐམས་ཅད་ཀྱི་སྙིང་པོ་སངས་རྒྱས་ཐམས་ཅད་སྐྱེད་པའི་ཡུམ་ཡིན། འདི་ནི་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་བསྐོར་བ་ཡིན། འདི་ནི་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་སྙིང་པོར་གཤེགས་པ་ཡིན། འདི་ནི་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་རྒྱལ་མཚན་འཛུགས་པ་ཡིན། འདི་ནི་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་དུང་རབ་ཏུ་འབུད་པ་ཡིན། འདི་ནི་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་གང་ན་ཡིན། འདི་ནི་དེ་བཞིན་གཤེགས་པ་ཐམས་ཅད་ཕམ་པར་བྱེད་ཅིང་འཇོམས་པར་བྱེད་པ་ཡིན། འདི་ནི་དེ་བཞིན་གཤེགས་པ་ཐམས་ཅད་ཀྱི་གསང་བ་དམ་པ་ཡིན། འདི་ནི་དེ་བཞིན་གཤེགས་པ་ཐམས་ཅད་ཀྱི་གསང་ཆེན་ཡིན། ལག་ན་རྡོ་རྗེ་འདི་ནི་འཛམ་བུའི་གླིང་གི་སེམས་ཅན་ཐམས་ཅད་ཀྱི་ཉོན་མོངས་པ་འདུལ་བ་ཡིན། འདི་ནི་དེ་བཞིན་གཤེགས་པ་ཐམས་ཅད་ཀྱི་སྡིག་པ་འཇིག་པ་ཡིན། འདི་ནི་འཛམ་བུའི་གླིང་གི་སེམས་ཅན་ཐམས་ཅད་
ཀྱི་དམྱལ་བ་ཐམས་ཅད་སྐེམས་པ་ཡིན། ཡི་དགས་ཀྱི་འཇིག་རྟེན་ཟློག་པ་ཡིན། དུད་འགྲོའི་སྐྱེ་གནས་ལས་ཐར་བར་བྱེད་པ་ཡིན་ནོ། །འདི་ནི་འཛམ་བུའི་གླིང་གི་སེམས་ཅན་ཐམས་ཅད་ཀྱི་སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་སྐེམས་པར་བྱེད་པ་ཡིན་ནོ། །ལག་ན་རྡོ་རྗེ་འོན་ཀྱང་བསོད་ནམས་ཀྱི་ཕུང་པོ་འབྱུང་བ་ལྷའི་མིག་གིས་བལྟ་བའམ། དེ་བཞིན་གཤེགས་པའི་ཐུགས་ཀྱིས་ཀྱང་བརྗོད་ཀྱིས་མི་ལང་སྟེ། ཡོན་ཏན་གྱི་ཁྱད་པར་དེ་ལྟར་རྒྱ་ཆེ་ཞིང་དེ་ལྟར་ཟབ་པ། རབ་མཆོག་གྱ་ནོམ་པ་ལ་སོགས་པ་དེ་ལྟར་གོང་ནས་གོང་དུ་རྣམ་པར་འཕྲུལ་པ་ཆེན་པོའི་ཁྱད་པར་དུ་འཕགས་པ་ཡིན་ནོ། །ནོར་བུ་ཆེན་པོ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པ་གསང་བའི་གཟུངས་ཀྱི་ཆོ་ག་ཞིབ་མོའི་རྒྱལ་པོ་འདི་ནི་སེམས་ཅན་སྐལ་བ་ཆུང་བ་རྣམས་ཀྱི་ལག་ཏུ་འོང་བར་མི་འགྱུར་ཏེ། ཐོས་པར་མི་འགྱུར། བསྙེན་བཀུར་བྱེད་པར་མི་འགྱུར། འཆང་བར་མི་འགྱུར་རོ། །གང་གིས་གང་གཱའི་ཀླུང་གི་བྱེ་མ་དང་མཉམ་པའི་དེ་བཞིན་གཤེགས་པ་རྣམས་མ་མཐོང་བ་དེའི་ལག་ཏུ་མཆོག་ཏུ་གསང་བ་འདི་འོང་བའམ། ཉན་པའམ། བསྙེན་བཀུར་བྱེད་པའམ། འཛིན་པར་ལྟ་ག་ལ་འགྱུར། ལག་ན་རྡོ་རྗེ་དེ་བཞིན་གཤེགས་པའི་གསང་བ་འདི་ནི་ཤིན་ཏུ་གཏིང་དཔག་དཀའ་སྟེ། ལག་ན་རྡོ་རྗེ་གང་གིས་སངས་རྒྱས་བཅོམ་ལྡན་འདས་ཆུ་བོ་གང་གཱའི་ཀླུང་བྱེ་བ་ཁྲག་ཁྲིག་བརྒྱ་སྟོང་གི་བྱེ་མ་དང་མཉམ་པ་རྣམས་ལ་བསྐལ་པ་བརྒྱ་སྟོང་དུ་བདེ་བའི་ཡོ་བྱད་ན་བཟའ་དང་། བསོད་སྙོམས་དང་། གཟིམས་མལ་དང་། སྙུན་དཔྱད་ཀྱི་རྐྱེན་སྨན་གྱི་ཡོ་བྱད་དང་། བཟའ་བ་དང་། བཅའ་བ་དང་། ཞལ་ཟས་དང་། བཏུང་བ་དང་། བཅིབས་པ་དང་། ཕོ་བྲང་རྣམས་དེ་བཞིན་གཤེགས་པ་རྣམས་ལ་ཉི་མ་རེ་རེ་འབུལ་ཞིང་། དེ་བཞིན་དུ་མེ་ཏོག་དང་། བདུག་པ་དང་། དྲི་དང་། ཕྲེང་བ་དང་། བྱུག་པ་དང་། གདུགས་དང་།རྒྱལ་མཚན་དང་། བ་དན་གྱིས་དེ་ལྟར་དེ་བཞིན་གཤེགས་པ་ཐམས་ཅད་ལ་མཆོད་པ་
བྱེད་པ་དང་། གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རིན་པོ་ཆེ་སྣ་བདུན་གྱིས་བྱུར་བུར་བཀང་སྟེ། ཉི་མ་རེ་རེར་སངས་རྒྱས་ཐམས་ཅད་ལ་དབུལ་བ་ནི་བསོད་ནམས་ཀྱི་ཕུང་པོ་ཆེན་པོ་བསྐྱེད་པ་མ་ཡིན་གྱི། ལག་ན་རྡོ་རྗེ་གང་གིས་དེ་བཞིན་གཤེགས་པའི་གསང་བ་འདི་ལན་ཅིག་བཟླས་བརྗོད་བྱས་ན་བསོད་ནམས་ཀྱི་ཕུང་པོ་ཆེས་མང་པོ་དང་ལྡན་པར་འགྱུར་ཏེ། དེ་བཞིན་གཤེགས་པ་ཐམས་ཅད་ཀྱིས་ཀྱང་བརྗོད་ཀྱིས་མི་ལང་ངོ་། །གང་གིས་དེ་བཞིན་གཤེགས་པའི་གསང་བའི་གཟུངས་ཀྱི་རྒྱལ་པོ་འདི་ལན་ཅིག་དྲན་པར་གྱུར་ན། དེ་གོང་དུ་བཤད་པའི་ཡོན་ཏན་གྱི་ཁྱད་པར་ཡོངས་སུ་བསྒྲགས་པས་དེ་བཞིན་གཤེགས་པ་ཐམས་ཅད་མཆོད་པར་འགྱུར། མཁོ་བའི་ཡོ་བྱད་ཁྱད་པར་དུ་འཕགས་པ་ཇི་ལྟ་བ་ཐམས་ཅད་ཀྱིས་དེ་བཞིན་གཤེགས་པའི་གསང་བ་རྣམས་ལ་དེ་ལྟར་ཉིན་གཅིག་བཞིན་མཆོད་པར་འགྱུར་རོ། །དེ་ནས་འཁོར་འདུས་པ་དེ་དག་ཐམས་ཅད་དང་། ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་ཐམས་ཅད་ཀྱིས། ཨ་ལ་ལ་ཞེས་ཅ་ཅོ་དང་། ག་ཞའི་སྒྲ་ཆེར་བཏོན་ནས། བཅོམ་ལྡན་འདས་ཀྱི་ཞབས་ལ་གཏུགས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ་མའོ་སངས་རྒྱས་འབྱུང་བ་དང་མཚུངས་པར་མཆོག་ཏུ་རྙེད་པར་དཀའ་བ་གསང་བ་དམ་པའི་སྙིང་པོ་འཛམ་བུའི་གླིང་དུ་བཞག་ལགས་སོ། །དེ་ནས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱིས་ཤཱཀྱ་ཐུབ་པ་ལ་ལེགས་སོ་ཞེས་བྱ་བ་བྱིན་ནས། རང་རང་གི་སངས་རྒྱས་ཀྱི་ཞིང་རྣམས་སུ་གཤེགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ཡང་རྫུ་འཕྲུལ་གྱི་ཆོ་འཕྲུལ་ཆེན་པོས་མི་མཇེད་ཀྱི་འཇིག་རྟེན་གྱི་ཁམས་སུ་གཤེགས་སོ། །འཕགས་པ་ནོར་བུ་ཆེན་པོ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པ་གསང་བ་དམ་པའི་གསང་བའི་ཆོ་ག་ཞིབ་མོའི་རྒྱལ་པོ་སྟེ་བདུན་པ་རྫོགས་སོ།། །།རྒྱ་གར་གྱི་མཁན་པོ་བིདྱཱ་གརྦྷ་པྲ་བྷ་དང་། ལོཙྪ་བ་བནྡེ་དཔལ་གྱི་ལྷུན་པོས་བསྒྱུར། རྒྱ་གར་གྱི་མཁན་པོ་བིདྱཱ་ཀ་ར་པྲ་བྷ་དང་། ཞུ་ཆེན་
གྱི་ལོ་ཙྪ་བ་བནྡེ་དཔལ་བརྩེགས་ཀྱིས་ཞུས་ཏེ་གཏན་ལ་ཕབ་པ།།