དབང་རིན་པོ་ཆེ་འཁོར་ལོ་རྣམ་པར་བཤད་པ།
རྒྱ་གར་སྐད་དུ། རཏྣ་ཨ་བྷི་ཥིཉྩ་ཨ་ནུ་ཙཀྲ་པྲ་སེ་ནཱ་མ། བོད་སྐད་དུ། དབང་རིན་པོ་ཆེ་འཁོར་ལོ་རྣམ་པར་བཤད་པ་ཞེས་བྱ་བ། བཅོམ་ལྡན་འདས་པདྨ་དབང་ལ་ཕྱག་འཚལ་ལོ། །དེ་ནས་པདྨ་དབང་ཆེན་ལ། །གསང་བའི་བདག་པོས་འདི་སྐད་གསོལ། །ཀྱེ་ཀྱེ་བཅོམ་ལྡན་དབང་ཆེན་སྐུ། །གསང་བའི་དབང་གི་རྣམ་པའི་ཚོམ། །དབང་ཆེན་ཉིད་ཀྱི་བཀའ་སྩོལ་ཅིག །དེ་ནས་ཕྱག་ན་རྡོ་རྗེ་ལ། །གསང་བའི་གསང་བདག་ཆེན་པོ་ཡིས། །གསང་བའི་དབང་ནི་འདི་སྐད་བཤད། །ཀྱེ་རྡོ་རྗེ་འཛིན་པ་ཉོན་ཅིག །ངས་བསྟན་ལེགས་པར་ཡིད་ལ་ཟུང་། །དབང་གི་རྣམ་པ་བཤད་བྱ་ཡི། །དཀྱིལ་འཁོར་ཚོན་དང་རྫས་རྣམས་བཤད། །སྐུ་གསུང་ཐུགས་དང་ཚོན་ཡིག་བཤད། །ཕྱི་དང་ནང་དང་གསང་བ་བཤད། །ཡོངས་སུ་རྫོགས་པ་ཆེན་པོ་བཤད། །ཕྱི་ལྟར་བཤད་པ་འདི་ལྟ་སྟེ། །དཀྱིལ་དང་འཁོར་དང་བྷནྡྷ་དང་། །དཀྱིལ་ནི་དབང་གི་གཞི་ཡིན་ལ། །
འཁོར་ནི་དབང་གི་ལམ་ཡིན་ནོ། །བྷན་ནི་འཛིན་པའི་དོན་ཡིན་ལ། །དྷ་ནི་གསང་མཆོག་བདེ་བའི་གནས། །སྐུ་ནི་སྤྲུལ་པའི་གསང་མཆོག་སྟེ། །རྡོ་རྗེ་ཐུགས་ཀྱི་དོན་ཡིན་ནོ། །དྲིལ་བུ་རྟོགས་པ་མཆོག་གསང་ཡིན། །སྤྱན་ལ་དབང་ནི་བསྐུར་བ་ནི། །ཐུགས་གསང་རྡོ་རྗེའི་སྐུ་ཐོབ་ཡིན། །དྲི་མེད་སྤྱན་ནི་རྣམ་པ་ལྔ། །མི་རྟོག་ཐོབ་པ་ཐེ་ཚོམ་མེད། །རྡོ་རྗེ་ལས་ཀྱི་ཆུ་ཉིད་ནི། །རྒྱུ་གཅིག་འབྲས་བུ་ཁྱད་པར་ཆེ། །གཉིས་སུ་ཟད་ཅིང་བརྟགས་པ་གཉིས། །འཁོར་དང་མྱ་ངན་འདས་པའོ། །དགོངས་སུ་གསོལ་བའི་ཐ་ཚིག་ནི། །ཐོབ་པའི་རྒྱུད་དང་བླང་ཐབས་སོ། །སྙན་གྱི་དབང་དག་བསྐུར་བ་ཡང་། །ཐོགས་མེད་སྙན་ནི་རྣམ་དྲུག་གིས། །དོན་དང་ལས་ནི་རྫོགས་པའོ། །ཤངས་ལ་དབང་ནི་རྫོགས་བྱེད་པ། །དྲི་ལྡན་མཚན་མ་གསུམ་ཐོབ་སྟེ། །གནས་བྱེད་ལྗགས་ལ་དབང་བ་ན། །རོ་ལྡན་འབྲས་བུ་བརྒྱད་ཐོབ་པོ། །དེ་ལྟར་རྫོགས་བྱེད་དབང་གི་ཚིག །མཁས་པ་ཡིས་ནི་རྫོགས་པར་བྱ། །འདུས་པ་བཞི་ཡང་རྫོགས་པ་སྟེ། །མེད་པ་བཞི་ཡང་ཐོབ་པ་སྟེ། །སྣང་བ་གསུམ་ལ་དབང་བསྐུར་ཐོབ། །རྡོ་རྗེའི་གསང་ཐོབ་དྲུག་ཐོབ་སྟེ། །འཛིན་པ་བཅུ་ལས་རྣམ་པར་ཐར། །སྟོང་པ་ཉིད་ནི་རྣམ་གསུམ་རྫོགས། །སྟོང་པའི་ཡུལ་ནི་གཞི་དག་ལ། །རང་དབང་ཉིད་དུ་བསྒྱུར་དབང་ཐོབ། །ལོག་པ་ཉིད་ལས་རྣམ་པར་གྲོལ། །ས་མཆོག་བཅུ་གཅིག་ཡོངས་སུ་རྫོགས། །མཚན་མ་བཅུ་དྲུག་ཟིལ་གྱིས་གནོན། །གཅིག་ལས་འབྲས་བུ་རྣམ་གསུམ་ཐོབ། །གཉིས་རྫོགས་ས་ལ་རྣམ་པར་གནས། །མཆོག་ཏུ་ལྡན་པ་གསུམ་ཡིག་ཡིན། །བྱ་བྲལ་ཐེག་པ་གསུམ་ཐོབ་སྟེ། །སྐྱེ་མེད་འཁོར་ལོ་དྲུག་ཀྱང་བསྐོར། །ཏིང་འཛིན་དྲུག་ལ་དབང་བསྒྱུར་ཞིང་། །སྡུག་བསྔལ་གསུམ་ལས་རྣམ་པར་ཐར། །བྱེད་པའི་སྦྱོར་བ་ཤིན་ཏུ་ཐོབ། །ཁམས་གསུམ་ལས་ནི་རྣམ་པར་རྒྱལ། །ལམ་གསུམ་ལས་ནི་རྣམ་པར་བརྒལ། །ཀྱང་བྱུང་འདུས་པའི་རྩ་ནི་སྟོང་ཕྲག་ལས། །བདེ་བའི་རླུང་ནི་བརྒྱད་ཅུ་ཐོབ། །འཚེར་བའི་ཐིག་ལེ་རྣམ་དགུ་ལས། །སྟོང་པའི་བདེ་བ་བཅོ་བརྒྱད་ཐོབ། །གསང་བ་ལུས་ནི་གསུམ་དག་ལ། །བརྟེན་པའི་འབྲས་བུ་བཅུ་བདུན་ནོ། །གསང་མཆོག་བདེ་བ་གཉིས་ལས་ནི། །འདོད་པའི་འབྲས་བུ་དྲུག་ཐོབ་པོ། །རིགས་ནི་རྣམ་པ་དྲུག་དག་ལས། །སོ་སོའི་མཚན་ཉིད་བཅུ་གཉིས་ཐོབ། །སྟོང་ཉིད་ཤེས་རབ་བདུན་ལས་ནི། །ཐད་ཀའི་འབྲས་བུ་བདུན་ཐོབ་པོ། །གསང་བའི་དཀྱིལ་འཁོར་
བཅུ་དགུ་ལས། །མུན་པ་བཅུ་གཅིག་རྣམ་པར་སངས། །རིག་པ་རྩལ་དབང་བཅོ་བརྒྱད་ལས། །སྣང་བ་འཆར་ཚུལ་བཅོ་ལྔ་ཐོབ། །སྦྱོར་བའི་མཚན་ཡིག་དྲུག་ཅུ་ལས། །ཕྱག་མཚན་དྲུག་ཅུ་རྩ་གཉིས་གསལ། །ལྷ་ཡི་མཚན་མ་དྲུག་ཅུ་གཉིས། །སྐུ་གསུང་ཐུགས་དང་བཅས་པ་གསལ། །གཉིས་དང་གཉིས་ལས་བཞིར་འགྱུར་དང་། །ཕྱེད་ཕྱེད་དྲུག་པ་སུམ་ཅུ་བདུན། །ལྷག་མ་ལྷག་མ་དང་པོའི་བདུན། །དྲུག་ཚོ་དག་ལ་བདུན་འགྱུར་རོ། །བརྒྱད་ཆ་ལ་ནི་ས་བོན་དངོས། །དྲུག་ཅུ་གཉིས་ནི་རྣམ་པར་གསལ། །ཕྱག་རྒྱ་རྣམ་པ་བཞི་ལྡན་ལས། །བདེ་གསང་ཕྱག་རྒྱ་བཞི་གཉིས་ཐོབ། །མཚན་མེད་སྐུ་ནི་རྣམ་དྲུག་ལས། །སེམས་ཀྱི་དཀྱིལ་འཁོར་རྣམ་ལྔ་རྫོགས། །ཀ་ལི་ཡི་གེ་བཞི་བཅུ་ལས། །མཚན་མའི་དབང་ནི་བཞི་གཉིས་ཐོབ། །རྟགས་ཀྱི་ཕྱག་རྒྱ་བདུན་ལས་ནི། །དབང་ཆེན་འཁོར་ལོ་རྣམ་གསུམ་ཐོབ། །གསུང་གི་འཁོར་ལོ་སུམ་ཅུ་ལས། །ཐུགས་ཀྱི་ཏིང་འཛིན་ལྔ་བཅུ་ཐོབ། །གསང་བའི་སྦྱོར་ཐོབ་དྲུག་ལས་ནི། །ཡབ་ཡུམ་བདེ་བ་སུམ་ཅུ་ཐོབ། །དོན་གྱི་སྙིང་པོ་སོ་གཅིག་ལས། །རྟགས་ཀྱི་ཕྱག་རྒྱ་ང་གཅིག་ཐོབ། །བསྒྲལ་བའི་ཡན་ལག་བཅུ་དགུ་ལས། །ཐུགས་ལྡན་དཀྱིལ་འཁོར་བརྒྱད་ཅུར་སྣང་། །ཉི་ཟླ་གཉིས་ནི་སུམ་འགྱུར་ལས། །སྐུ་གསུམ་འབྲས་བུ་བརྒྱ་འགྱུར་ཐོབ། །ཆོ་འཕྲུལ་བརྒྱད་ཅུ་རྩ་ལྔ་ལས། །ཡི་དམ་སུམ་ཅུ་རྩ་གཉིས་སྙེད། །སྟོང་རིག་གསལ་ལྡན་ཉི་ཤུ་ལ། །རྟོགས་པའི་འབྲས་བུ་བཅུ་གཉིས་ཐོབ། །ཁྱབ་བྱེད་རླུང་ནི་ལྔ་དག་ལས། །སྐྱེ་མེད་འབྲས་བུ་གསུམ་ཡང་ཐོབ། །རྟོག་པ་མེད་པ་ཆོས་ཀྱི་སྐུ། །རྣམ་པ་དྲུག་ནི་འདིར་སྣང་སྟེ། །ཐབས་ལྡན་བདེ་བ་ཉི་ཤུ་ཐོབ། །གསང་བའི་ངོ་བོ་གསུམ་ལ་ནི། །སྟོང་པ་ཉིད་ཀྱི་ཆོས་ལྔ་རྫོགས། །ས་བོན་འབྲས་བུ་དྲུག་ལས་ནི། །ཐད་ཀའི་འབྲས་བུ་རྣམ་དྲུག་བཟློག །སྟོང་པའི་མཚན་མ་བསམ་ཡས་ལས། །མཐའ་བཞི་བྲལ་བའི་དྲི་མེད་ཐོབ། །ཤེས་རབ་རྣམ་པ་བཞི་དག་གིས། །མུན་པའི་རྒྱུ་ནི་རྣམ་དྲུག་བཅད། །ཕྱོགས་མཚམས་བུམ་པ་བརྒྱད་ཀྱིས་ནི། །རྣམ་ཐར་སྟོང་པ་བཅུ་དྲུག་ཐོབ། །གསང་བའི་སྐུར་ཐབས་འདི་དག་ལས། །ཡོན་ཏན་འབྲས་བུ་བརྒྱ་རྩ་ཐོབ། །ཕྱིན་པའི་བལྟ་བ་རྣམ་བཞི་ལས། །དྲོད་རྟགས་བཞི་བཅུ་རྩ་གཉིས་རྫོགས། །སྐུ་ཡི་རང་བཞིན་ལྔ་དག་ལས། །མཐོང་བའི་སྐྱེས་
ཚུལ་གསུམ་ཡང་ཐོབ། །སྣང་བ་རྣམ་པ་བཞི་དག་ལས། །མཐོང་བའི་ཐབས་ནི་སོ་སོར་ཐོབ། །འདིར་སྣང་གཅིག་ལས་མ་འདས་ཚེ། །བདེན་པའི་ཁྱད་ནི་རེ་རེ་ལས། །ཡུལ་ནི་སོ་སོར་གཅོད་པར་ངེས། །འབྲས་བུའི་སྣང་བ་སྐྱེས་ཚུལ་ཐོབ། །བར་གྱི་སྣང་བ་དང་པོ་ལས། །མཐོང་བའི་ཡུལ་ནི་རེ་རེ་སྟེ། །འཇུག་དང་གྲོལ་བའི་དུས་གསུམ་ཐོབ། །སྨིན་པའི་འབྲས་བུ་ཡིད་ཆེས་གསུམ། །བར་གྱི་སྣང་བ་ཐ་མ་ལ། །འཇུག་པའི་སྣང་བ་སོ་སོ་དྲུག །མཐོང་སྟོང་ལམ་ཡང་དེ་བཞིན་ཏེ། །མུན་པའི་འཁོར་སྒོ་དྲུག་ལས་ཐར། །ཕྱེད་ཕྱེད་འདས་པའི་མཚམས་འཇུག་ཚེ། །སྤྲུལ་པའི་རྒྱུ་ནི་རྣམ་གཉིས་ཐོབ། །ལྔ་བརྒྱ་དག་ན་གྲོལ་བར་ངེས། །གསུང་མཆོག་གསུང་ནི་དྲུག་ཕྲག་བདུན། །མ་བཅོས་རྒྱུ་ལྔ་ལས་འཕྲོས་ནས། །བཞི་ནི་རྣམ་པར་བཅད་བྱས་ནས། །འཁྲུལ་པ་བཞི་ལས་རྣམ་པར་ཐར། །ཨཱ་ལི་སྒྲ་བསྒྱུར་སྟོང་ཕྲག་ལས། །འཇུག་པའི་ས་བོན་བདུན་ཉིད་དང་། །མཐར་ཕྱིན་ངེས་པའི་ས་ལ་ཐོབ། །གསང་བའི་ཕྱག་རྒྱ་དགུ་ལས་ནི། །སྐྱེ་མེད་མཚོན་པ་དགུ་འཐོབ་པོ། །ཨེ་མ་ཧོ་མགོན་པོ་རྫོགས་སངས་རྒྱས། །ཐོབ་བྱེད་སྡོམ་པ་བཤད་དུ་གསོལ། །རྫོགས་སངས་རྒྱས་ཀྱིས་བཀའ་སྩལ་ཏེ། །ཀྱེ་མ་ཉེ་དབང་གསང་བའི་བདག །ཐོབ་བྱེད་རྟགས་ཀྱི་འབྲས་བུ་ལས། །ཐབས་ནི་རྣམ་པ་སྡོམ་སྟེ་བཤད། །སྨིན་པར་བྱེད་པ་དྲུག་ཚེ་ན། །གཞི་དང་བཞེངས་དང་བཞག་པ་དང་། །ཡོངས་སུ་གྲོལ་བ་བཞི་ཡིན་ནོ། །རྫོགས་པའི་སྟོང་པ་བརྒྱད་ཚེ་ན། །ཁྲེགས་ཆོད་ཐོད་རྒལ་གཉིས་ཡིན་ནོ། །མཚན་མ་བཞི་བཅུའི་ཚེ་ན་ནི། །རྒྱས་འདེབས་རང་གྲོལ་གཉིས་ཡིན་ནོ། །རྟགས་ཀྱི་འབྲས་བུ་དྲུག་ཚེ་ན། །དངོས་དང་མཚན་མེད་གཉིས་ཡིན་ནོ། །རབ་ཏུ་བསྐུར་དང་རྫས་དྲུག་ཆེ། །སྟོང་པ་རང་གསལ་སྐྱེད་གསུམ་ཡིན། །ཕྱག་རྒྱ་རྣམ་པ་བཞི་ཚེ་ན། །སྟོང་དང་མཚན་མ་རྒྱས་འདེབས་སོ། །གནས་པ་དྲུག་གི་ཚེ་ན་ཡང་། །བཞག་ཐབས་རྣམ་པ་བཞི་ཡིན་ནོ། །མཚན་མ་གནས་བསྒྱུར་གསུམ་ཚེ་ན། །ཐར་ཆགས་སྐད་ཅིག་གཉིས་ཡིན་ནོ། །བུམ་པ་བརྒྱ་རྩའི་ཚེ་ན་ཡང་། །ཐིག་ལེ་གཅིག་དང་སྟོང་ཉིད་དོ། །ལུས་ཀྱི་གནས་ལུགས་བཞི་ཚེ་ན། །རྩ་དང་རླུང་དང་ཐིག་ལེའོ། །འབབ་
ལུགས་རྣམ་པ་བཞི་ཚེ་ན། །ཡི་གེ་དགོངས་པ་འོད་ཟེར་རོ། །རྒྱུད་པ་རྣམ་པ་བཞི་ཚེ་ན། །དམ་དང་ཆོད་དང་ཆེན་ལས་སོ། །སྒྲུབ་ཐབས་རྣམ་པ་བཞི་ཚེ་ན། །ཐབས་དང་རྒྱུ་དང་ཡོན་ཏན་ནོ། །རྫས་ནི་རྣམ་པ་བཞི་ཚེ་ན། །བདེ་འཁོར་ཆོས་དང་ལོངས་སྤྲུལ་ལོ། །ཏིང་འཛིན་རྣམ་པ་བཞི་ཚེ་ན། །རྫོགས་དང་ཡན་ལག་མ་ཡིན་ནོ། །ཐོབ་ལུགས་རྣམ་པ་བཞི་ཚེ་ན། །ངོ་དང་ཆོས་དང་ལོངས་སྤྲུལ་ལོ། །ཡོན་ཏན་རྣམ་པ་བཞི་ཚེ་ན། །སྟོང་དང་གསལ་དང་བསྐུར་གནས་སོ། །བསྐུར་བའི་གནས་ནི་བཞི་ཚེ་ན། །བསྡིམ་དང་ཐིམ་དང་ཐོབ་དང་མཐོང་། །མ་བསྐུར་སྐྱོན་ནི་བཞི་ཚེ་ན། །སྡུག་དང་སྔངས་དང་དྲེད་རྟབ་པོ། །གསང་བ་རྣམ་པ་བཞི་ཚེ་ན། །ཐབས་དང་རྒྱུ་དང་ཡོན་ཏན་ནོ། །འབྱུང་བ་རྣམ་པ་བཞི་ཚེ་ན། །འབྱུང་དང་སྟོང་དང་གསལ་འཚེར་རོ། །རྟོགས་ལུགས་རྣམ་པ་བཞི་ཚེ་ན། །འགུལ་དང་འཕྲིགས་དང་ལྡེམ་མེའོ། །འབྲས་བུ་རྣམ་པ་བཞི་ཚེ་ན། །སྟོང་དང་སྣང་དང་གསལ་ཕྱིན་ནོ། །ཐུགས་རྗེ་རྣམ་པ་བཞི་ཚེ་ན། །འཕྲོ་དང་མཆེད་དང་སྐུ་རྫོགས་པའོ། །མེད་པའི་ལམ་ནི་བཞི་ཚེ་ན། །འཆར་དང་འགགས་དང་འཕྲོག་གནས་སོ། །ཐོབ་དང་རྒྱུ་མཐུན་རྣམ་བཞི་ན། །སྐྱེ་དང་འཆི་དང་ན་བྲལ་ལོ། །མ་བསྐུར་རྫོགས་པ་བཞི་ཚེ་ན། །ཁྲེགས་ཆོད་ཐོད་རྒལ་རང་བཞག་གོ། །རྩལ་ལས་ཤར་ལུགས་བཞི་ཚེ་ན། །ཐད་ཀར་རང་གྲོལ་ཟིལ་གནོན་ནོ། །གཞི་ལ་རྫོགས་པ་བཞི་ཚེ་ན། །མ་བསྒྱུར་མ་བཅོས་མ་བསླད་དོ། །གཞི་ལ་བསྐྱང་ཚུལ་བཞི་ཚེ་ན། །རང་དག་རྦད་ཆོད་ཀ་དག་གོ། །ལམ་དུ་བླང་བ་བཞི་ཚེ་ན། །རང་དག་ལྟ་དང་གཞི་བཞག་གོ། །འབྲས་བུར་དྲིལ་བ་བཞི་ཚེ་ན། །ཡེ་དག་ཡེ་རྫོགས་ཡེ་ཉིད་དོ། །སྣང་བ་རྣམ་པ་བཞི་ཚེ་ན། །གཅོད་དང་བཟློག་དང་བསྒྱུར་བཏང་ངོ་། །རིག་པ་རྣམ་པ་བཞི་ཚེ་ན། །རྟོགས་དང་གྲོལ་དང་མཐར་ཕྱིན་ནོ། །སྦྱོར་བ་རྣམ་པ་བཞི་ཚེ་ན། །ཡུལ་དང་སེམས་དང་རྟོགས་སྐུའོ། །སེམས་ལ་དབང་བ་བཞི་ཚེ་ན། །ཕྱི་ནང་གསང་བ་ཡོངས་རྫོགས་སོ། །གསལ་བ་རྣམ་པ་བཞི་ཚེ་ན། །མ་དང་བུ་དང་ཐད་ཀའོ། །གསལ་བའི་ཡུལ་ནི་བཞི་ཚེ་ན། །རྫོགས་དང་སྣང་དང་བསྒྱུར་བའོ། །སྟོང་པ་རྣམ་པ་བཞི་ཚེ་ན། །སེམས་དང་ཆོས་དང་མཚན་མའོ། །གསལ་བའི་གདམས་པ་བཞི་ཚེ་ན། །དངོས་དང་དངོས་
མེད་རང་གསལ་ལོ། །དངོས་པོ་རྣམ་པ་བཞི་ཚེ་ན། །མཚན་མའི་མང་དང་ཡི་གེའོ། །མཆོག་ལྡན་དངོས་གྲུབ་རྣམ་པ་བཞི་ཡི་ཚེ། །དངོས་དང་སྣང་དང་རང་བཞིན་ནོ། །སྟོང་པའི་ཐིག་ལེ་དྲུག་གི་ཚེ། །ངོ་དང་འོད་དང་ནམ་མཁའོ། །མཚན་མའི་ཡིག་འབྲུ་གཉིས་ཀྱི་ཚེ། །དཀར་དང་དམར་དང་འཕྲོ་འདུའོ། །ཐབས་དང་ཤེས་རབ་འཁྲིལ་སྦྱོར་ཚེ། །ཡུལ་དང་རིག་པ་བདེ་བའོ། །དཀྱིལ་འཁོར་རྣམ་བཞི་བསྡིམ་པའི་ཚེ། །མི་དམིགས་གསུམ་དང་འོད་དྲུག་གོ། །ལྷ་ཡི་མཚན་མ་འཇུག་ཚེ་ན། །སྟོང་ཉིད་གསུམ་དང་རང་གསལ་ལོ། །ཆོས་སྐུའི་བདེ་བ་དྲུག་བྱེད་ཚེ། །ས་དང་དཀྱིལ་འཁོར་རྫོགས་སྐུའོ། །སྨིན་བྱེད་ཐོབ་པའི་ཡུལ་བཞིའི་ཚེ། །ས་བོན་མྱུ་གུ་འབྲས་བུའོ། །དགའ་བདེའི་ཡུལ་ནི་བཞི་ཚེ་ན། །སྣང་བ་རྒྱས་འདེབས་བདེ་ཆེན་རོལ། །རྟོག་མེད་ལམ་ནི་བཞི་ཡི་ཚེ། །སྣང་དང་མི་སྣང་ཆོས་མཆོག་གོ། །འཇུག་པ་རྣམ་པ་གསུམ་གྱི་ཚེ། །མཐོང་དང་རྟོགས་དང་ཐོབ་པའོ། །ལས་ཀྱི་རྣམ་པ་བཞི་ཡི་ཚེ། །རྟགས་དང་མཚན་མ་དུས་ཚོད་དོ། །རླུང་གི་འཕྲོ་འདུ་བཞི་ཡི་ཚེ། །གནས་དང་ལམ་དང་འཆར་སྒོ་གཅུན། །འགྱུར་བའི་དུས་ཚོད་བཞི་ཚེ་ན། །གནད་དང་གཅུན་དང་བརྟན་བཟློག་གོ། །ཐིག་ལེ་བདེ་བ་གཉིས་ཀྱི་ཚེ། །དྲན་དང་བསྡིམ་དང་བསྐོར་ལོག་གོ། །བསྐོར་ལོག་རྣམ་པ་བཞི་ཚེ་ན། །མུཾ་དང་ཨ་དང་སྤྲོ་བསྡུའོ། །མཚན་མའི་ཡི་གེ་གཉིས་ཀྱི་ཚེ། །སྒྲ་དང་མཚན་མ་ཁ་དོག་གོ། །གསང་བའི་འཕྲོ་འདུ་གཉིས་ཀྱི་ཚེ། །བདེ་དང་སྟོང་དང་ཁྱབ་བཞིའོ། །དྲན་པ་རྣམ་པ་བཞི་ཡི་ཚེ། །སྨིན་དང་གྲོལ་དང་བརྡལ་བའོ། །བཀྲ་ཤིས་མཚན་མ་བཞི་ཡི་ཚེ། །གཞལ་ཡས་རྣམ་པ་བཞི་ཡིན་ནོ། །མཚན་མ་བྷན་དྷ་བརྒྱད་ཀྱི་ཚེ། །སྐུ་དང་དབྱིངས་དང་རྣམ་ཐར་རོ། །གསལ་འཚེར་ཡུ་བ་ཅན་གྱི་ཚེ། །དབྱིངས་དང་ཐབས་དང་རབ་སྣང་ངོ་། །ཚལ་ཆེན་དུམ་བུ་གཅིག་པའི་ཚེ། །ཉག་གཅིག་སྤྲོས་བྲལ་གཞི་རྫོགས་སོ། །དཀར་འཚེར་དམར་ལ་དྭངས་པའི་ཚེ། །རྒྱས་གདབ་ཏིང་འཛིན་རོ་མྱང་གཉིས་ཡིན་ནོ། །སྦྲུལ་སྡུག་ཡིད་འོང་ལྔ་ཡི་ཚེ། །འོད་དང་ཁ་དོག་མཚན་མའོ། །མུ་མེད་གསལ་འཚེར་ལྔ་ཡི་ཚེ། །
གཞི་དང་ལམ་དང་འབྲས་བུའོ། །རིན་ཆེན་རོ་མཆོག་བཅུད་ཀྱི་ཚེ། །འཛིན་དང་རྫོགས་དང་རྟོགས་པའོ། །པདྨ་སྲེ་བྱེད་ལུ་མའི་ཚེ། །ཤེས་རབ་ཡུམ་དང་སེམས་མའོ། །ལས་རྣམས་གྲུབ་བྱེད་ལས་ཀྱི་ཚེ། །སྐུ་ལྔ་ཡེ་ཤེས་ལྔ་ཆོས་ལྔའོ། །ལས་ཀྱི་རྫས་ནི་བརྒྱད་ཀྱི་ཚེ། །བསྐུར་དང་ཐོབ་དང་འབྲས་བུའོ། །རིན་ཆེན་རྫས་ནི་བརྒྱད་ཀྱི་ཚེ། །ཐོབ་དང་གནས་དང་བརྟན་པའོ། །དཀྱིལ་དང་འཁོར་ནི་གཉིས་ཀྱི་ཚེ། །རིག་དང་ཡེ་ཤེས་ཡུལ་ཡིན་ནོ། །སྐུ་གསུམ་ཡུལ་དང་སྣང་བའི་ཚེ། །གསལ་དང་དྲོ་དང་བསིལ་བའོ། །སྣང་དང་མུན་དང་སྣང་བསྒྱུར་ཚེ། །འདྲིས་དང་ཤེས་དང་ཐག་ཆོད་དོ། །སོ་སོའི་མཚན་ཉིད་གསལ་བའི་ཚེ། །འོད་དང་ཁ་དོག་སྐུ་ལྔའོ། །རིག་གསལ་ཆོས་ཉིད་གཉིས་ཀྱི་ཚེ། །གནས་པ་དང་ནི་མཁའ་དབྱིངས་སོ། །གསལ་བའི་ལམ་བཞི་སྒོ་འབྱེད་ཚེ། །རིག་པ་ཡོན་ཏན་དངོས་གྲུབ་པོ། །རྫོགས་དང་གསལ་དང་འཕྲོ་བའི་ཚེ། །ཡུལ་དང་སྣང་བ་རྟོགས་ལུགས་སོ། །སེམས་ཀྱི་ཡུལ་དང་རིག་ཡུལ་ཚེ། །གསལ་དང་འཕྲོ་དང་རྫོགས་གྲུབ་པོ། །བཤད་བྱེད་རྣམ་གཉིས་བསྐུར་བའི་ཚེ། །ཡི་གེ་ཕྱག་མཚན་འཁོར་ལོའོ། །འདས་དང་འཛིན་དང་དམ་ཚིག་ཚེ། །གཟུང་དང་གནས་དང་སྐྱོན་ཡོན་ནོ། །གསང་བའི་དམ་ཚིག་དྲུག་གི་ཚེ། །གསུམ་དང་དྲུག་དང་ཆ་དགུའོ། །སངས་རྒྱས་གསུམ་དུ་འགྱུར་བའི་ཚེ། །འཁོར་དང་འཁྲུལ་དང་བཟློག་ལུགས་སོ། །འབྱུང་བ་རྣམ་པ་གཉིས་ཀྱི་ཚེ། །བྱུང་ས་གནས་ས་གྲོལ་ལུགས་སོ། །རིག་པ་ཉིད་ཀྱི་གནས་ལུགས་ཚེ། །གྲོལ་ལུགས་རྟོགས་ལུགས་ཐོབ་ལུགས་སོ། །སྐྱེ་མེད་ཡུལ་ལ་གནས་པའི་ཚེ། །ལྟ་ཐབས་བཞག་ཐབས་བསྐྱལ་ཐབས་སོ། །རང་བཞིན་རྣམ་པ་ལྔ་ཡི་ཚེ། །མིག་དང་ནམ་མཁའི་རིགས་སྣང་ངོ་། །སྟོང་པ་ཉིད་ཀྱི་ཆོ་འཕྲུལ་ཚེ། །རྫོགས་དང་རང་བཞིན་སྣང་བའོ། །གསང་སྔགས་འབྲས་བུ་བརྟག་པའི་ཚེ། །རང་བཞིན་སེམས་དང་སྤྱོད་ཡུལ་བྲལ། །སེམས་ཀྱི་འཁོར་ལོ་གནས་བྱུང་ཚེ། །ཆོས་དང་ཆོས་མིན་འཁྲུལ་པའོ། །ཡུལ་སེམས་གཉིས་སུ་སྣང་བའི་ཚེ། །ཆོས་ཉིད་གནས་དང་འབྲས་བུའོ། །ཡང་གསང་འབྲས་བུ་གཉིས་ཀྱི་ཚེ། །སྟོང་པ་ཉིད་དང་
ཆོས་སྐུའོ། །ས་ལམ་རྣམ་པར་རྫོགས་བྱེད་ཚེ། །བཅུ་དང་ལྔ་དང་བཞི་ཡིན་ནོ། །རྟགས་དང་དབྱིངས་རིག་གསལ་བའི་ཚེ། །སྣང་བའི་ཡུལ་དང་བཟུང་ཐབས་སོ། །ཡེ་ཤེས་གཉིས་ལ་ལམ་གྱི་ཚེ། །སྣང་དང་མུན་དང་གོ་དབྱེའོ། །གོ་བའི་དུས་ནི་རྣམ་བཞིའི་ཚེ། །ཅོག་བཞག་རང་གྲོལ་མ་བསྐྱེད་པའོ། །ཕྱི་ནང་གསལ་བྱེད་གདམས་པའི་ཚེ། །ཞིང་ཁམས་ལུས་དང་ཐིག་ལེའོ། །སྐྱོན་མེད་རང་བཞིན་དག་པའི་ཚེ། །ཀ་དག་ལྷུན་གྲུབ་མ་ངེས་པའོ། །ལོངས་སྐུའི་མཚན་ཉིད་སྣང་བའི་ཚེ། །དཀར་དང་དམར་དང་སེར་ལྗང་ངོ་། །དེ་ནི་ཡང་དག་རྫོགས་པའི་ལམ། །གདམས་པའི་དུས་སུ་ཤེས་པར་བྱའོ། །དེ་བཞིན་གཤེགས་པ་བཅོམ་ལྡན་འདས། །རྫོགས་པའི་སངས་རྒྱས་དབང་ཆེན་སྐུ། །དེ་དག་རྣམ་པ་བཤད་པའི་ཚོམ། །དཔའ་བོ་རྡོ་རྗེ་དབང་གི་སྐུས། །ལེགས་པར་དགོངས་ཏེ་བཀའ་སྩོལ་ཅིག །རྡོ་རྗེ་ཁྲོ་བོས་རང་སྣང་བ། །གར་ལྡན་ཉིད་ཀྱིས་བཀའ་སྩལ་པ། །དཔའ་བོ་རྡོ་རྗེ་སེམས་དཔའི་སྐུ། །ལེགས་པར་བཤད་པར་བྱ་བ་ནི། །གང་དག་དེ་ལ་དཔེ་སྤྱོད་ཅིང་། །སྒྲ་ནི་བདུན་ཕྲག་ཉི་ཤུ་ལས། །ལྷག་མ་རྣམས་ལ་སུམ་ཆ་ཕྱེད། །དངོས་པོ་ལ་ནི་དྲུག་འགྱུར་རོ། །ཡན་ལག་རྣམ་ལ་གསུམ་གསུམ་ཕྱེད། །རབ་ཀྱིས་གདམས་པ་ཉིས་འགྱུར་ཚེ། །རབ་ཀྱིས་ལྷག་མ་ཕྱེད་ཕྱེད་དོ། །འབྲིང་ལ་གདམས་པ་ཉི་ཤུ་གཅིག །ལྷག་མ་ལ་ནི་བཞི་བཞིའོ། །ཐ་མ་ལ་ནི་ཉིས་འགྱུར་རོ། །གསུམ་གསུམ་ལ་ནི་ཕྲག་ཡས་དྲུག །ལྷག་མ་གསུམ་ནི་རེ་རེའོ། །དེ་ནས་བཞི་ནི་དྲུག་འགྱུར་རོ། །དབང་པོའི་ཡུལ་ནི་སུམ་ཆ་སྟེ། །ལམ་ལ་ལྔ་ལྔ་ཟུང་དུ་འཇུག །བཞི་ལ་གསུམ་གསུམ་དགུ་འགྱུར་རོ། །འབྲས་བུ་ལ་ནི་དྲུག་འགྱུར་རོ། །ལྷག་མ་རྣམས་ལ་ཕྱེད་ཕྱེད་དོ། །གསུམ་ལ་ཕྱེད་ནི་དྲུག་དྲུག་གོ། །དེ་དག་རྣམས་ལ་སོ་སོའི་ལུང་། །མདོ་ནི་རྣམ་པ་བཅོ་བརྒྱད་ལས། །ལྔ་ལྔ་ཟུང་དང་ཕྱེད་འགྱུར་རོ། །བདེ་བ་སྟོང་པ་ཉིད་ལས་ནི། །དང་པོ་བར་དང་ཐ་མར་འགྱུར། །སྟོང་པའི་ལམ་ནི་འདུས་པའོ། །དེ་རྣམས་ལ་ནི་དང་པོའོ། །བདེན་པ་འདུས་པས་བཞི་སྣང་ལ། །ལམ་ནི་དྲུག་དྲུག་ཕྱེད་སྣང་ངོ་། །
དེ་ནི་གསང་བའི་གནས་དྲུག་ཡིན། །ཆོ་འཕྲུལ་ཡིག་འབྲུ་གསུམ་དག་ཡིན། །དྲན་པ་ལ་ནི་སུམ་འགྱུར་རོ། །ཤེས་པའི་དུས་ནི་གཅིག་ཤེས་སོ། །སྣང་བ་མཐོང་བའི་ཡུལ་དུས་ནས། །ཡུལ་ལས་ཐེ་ཚོམ་གཉིས་ཡིན་ནོ། །གཉིས་གཉིས་གསུམ་འགྱུར་དགུ་སྣང་སྟེ། །ཕྱག་མཚན་སུམ་ཅུ་རྩ་གཉིས་འགྱུར། །མཚན་མ་སྣང་བའི་རྒྱུ་དྲུག་ལས། །སོ་སོའི་ལམ་ནི་བརྒྱད་ཕྲག་གོ། །གསང་བའི་ལམ་ནི་བདུན་ཅུ་གཉིས། །རྒྱུ་ལས་གནས་པ་དྲུག་འགྱུར་རོ། །རྟགས་ལ་གཉིས་གཉིས་ལམ་འགྱུར་ཚེ། །གསང་བའི་སྐུ་གསུམ་གཉིས་ཏེ་དྲུག །དང་པོ་དཀར་དམར་གཉིས་དག་ལས། །ཐ་མ་དཀར་དམར་ལྔ་འགྱུར་རོ། །དེ་དག་རྣམས་ལ་ཕྱེད་ཕྱེད་དོ། །རྣམ་པར་འཕྲོ་བ་ཉིད་ཀྱང་ཡིན། །རྟགས་ཀྱི་ལྷག་མ་བཞི་བཞིའོ། །བྱ་བྲལ་འབྲས་བུ་ཐོབ་པའི་ཚེ། །ལྷག་མའི་ངེས་ཤེས་སུམ་ཆ་ཕྱེད། །སྟོང་པ་ཉིད་ནི་བདུན་འགྱུར་རོ། །ལྷག་མའི་འབྲས་བུ་གཅིག་ཏུ་གསལ། །ཆོས་ཀྱི་རྒྱུ་ནི་བདུན་གཉིས་ལས། །རྟོགས་པའི་འབྲས་བུ་དེ་ཕྲག་གོ། །གཅོད་བྱེད་ཤེས་རབ་དེ་བཞིན་ཆ། །དང་པོ་ལས་ཀྱི་ཕྱེད་བཀྱེད་པ། །རང་རང་སྣང་བ་རྫོགས་པར་བཤད། །དེ་འོག་ལས་ནི་ཉིས་འགྱུར་ལས། །དབང་གི་སྣང་བ་ཉིས་འགྱུར་རོ། །ཕྱེད་མ་ལས་ནི་ཕྱེད་འགྱུར་བ། །དེ་ཡི་འབྲས་བུ་རྫོགས་པའོ། །དེ་དག་དྲུག་ཆ་ཉིས་འགྱུར་ལས། །ཐད་ཀའི་འབྲས་བུ་རྫོགས་པའོ། །དེ་ཡི་སྣང་གསུམ་རྫོགས་པ་ལས། །ཞིང་ཁམས་རྣམ་པ་དྲུག་འགྱུར་རོ། །ལས་ཀྱི་འབྲས་བུ་ཉིས་འགྱུར་ལས། །དབང་རྫོགས་འབྲས་བུ་གཉིས་ཡིན་ནོ། །དབང་རྫོགས་འབྲས་བུ་ཉིས་འགྱུར་ལས། །རང་བཞིན་དབང་གི་འབྲས་བུ་དྲུག །དེ་ནི་ཕྱེད་དང་ཉིས་འགྱུར་ལས། །བཞི་རྫོགས་དབང་གི་འབྲས་བུའོ། །དེ་ཡི་རང་བཞིན་དྲུག་ལས་ནི། །ལམ་གྱི་དབང་གི་འབྲས་བུའོ། །དེ་ཡི་གཅོད་བྱེད་ཉིས་འགྱུར་ལས། །རང་བཞིན་དབང་བའི་འབྲས་བུ་དྲུག །དེ་ནི་ཕྱེད་དང་ཉིས་འགྱུར་ལས། །བཞི་རྫོགས་དབང་གི་འབྲས་བུའོ། །དེ་ཡི་རང་བཞིན་དྲུག་ལས་ནི། །ཁམས་ཀྱི་དབང་གི་འབྲས་བུའོ། །དེ་ཡི་གཅོད་བྱེད་རྣམ་དྲུག་ལས། །རིག་པ་རྩལ་དབང་འབྲས་བུའོ། །དེ་ཡི་འགྱུར་མེད་འབྲས་བུ་ལས། །འབྲས་བུའི་དབང་གི་
འབྲས་བུའོ། །དེ་ཉིད་རྣམ་པ་གསུམ་ལས་ནི། །གཞི་ལམ་དབང་གི་འབྲས་བུའོ། །དེ་ཡི་ལུང་ནི་རྣམ་བཞི་ལས། །ཡིད་ཆེས་དབང་གི་འབྲས་བུའོ། །དེ་ཡི་ལས་ནི་རྣམ་བདུན་ལས། །མཚོན་པ་དབང་གི་འབྲས་བུའོ། །དེ་ལྟར་རྫོགས་བྱེད་ལམ་ལྔ་ལས། །བློ་གཞན་དབང་གི་འབྲས་བུའོ། །དེ་ལྟར་རྟོགས་པའི་སྐྱེས་བུ་དེས། །སྐྱེ་མེད་ས་ལ་རྣམ་པར་ཕྱིན། །མཐར་ཕྱིན་དབང་གི་འབྲས་བུའོ། །རྫོགས་སངས་རྒྱས་དང་མཉམ་སྦྱོར་བ། །དཀྱིལ་འཁོར་ཐམས་ཅད་མ་བསྒྲུབས་འགྲུབ། །ཐེ་ཚོམ་རྟོག་པ་ཆོད་པའོ། །ཞེས་རྫོགས་པ་རང་བྱུང་ཆེན་པོའི་རྒྱུད་ལས། དབང་རིན་པོ་ཆེ་འཁོར་ལོ་རྣམ་པར་བཤད་པའི་ལེའུ་སྟེ་ཉི་ཤུ་རྩ་བཞི་པའོ། །རྫོགས་སོའོ།། །།གཏེར་ནས་ གཏེར་དུ་སྩལ་པ་ལགས། །སྔགས་ཀྱི་སྲུང 
་མས་སྲུངས་ཤིག །བཅོམ་ལྡན་འདས་དཔལ་ཁྲག་འཐུང་གི་རྒྱལ་པོ་ལ་ཕྱག་འཚལ་ལོ། །དེ་ནས་སྒྲ་ཐམས་ཅད་གཏན་ལ་ཕབ་པའི་མན་ངག །དོན་དང་ཡེ་ཤེས་ཀྱི་འདྲེལ་པ། གསང་སྔགས་ཀྱི་ལྟ་ཕུག །དོན་ཐམས་ཅད་ཀྱི་འདུས་ས། ཡེ་ཤེས་ཆེན་པོའི་མདོ་འདི་བསྟན་ཏེ། དེ་ལ་སྒྲའི་སྡོམ་བྱང་འདི་ལྟ་སྟེ། ཐམས་ཅད་དུ་སྒྲ་གར་གྲགས་པར། རང་བཞིན་རང་བྱུང་གི་ཐུགས་རྗེའི་ཡི་གེར་འདི་ལྟར་ཤེས་པར་བྱའོ། །དེ་ལ་འོག་ནས་བཤད་དེ། ཨཿནི་སྐྱེ་མེད་ཀྱི་ཡི་གེར་ཀུན་ཏུ་ཤེས་པར་བྱའོ། །ཧ་ནི་དག་པའི་ཡི་གེར་ཤེས་པར་བྱའོ། །ས་ནི་མི་འགྱུར་བའི་ཡི་གེར་ཤེས་པར་བྱའོ། །ཤ་ནི་ཤེས་རབ་ཀྱི་ཡི་གེར་ཤེས་པར་བྱའོ། །ལ་ནི་གཅོད་བྱེད་ཀྱི་ཡི་གེར་ཤེས་པར་བྱའོ། །ར་ནི་རང་བྱུང་ཐུགས་རྗེའི་ཡི་གེར་ཤེས་པར་བྱའོ། །ཡ་ནི་རང་སྣང་གི་ཡི་གེར་ཤེས་པར་བྱའོ། །འ་ནི་འགག་མེད་ཀྱི་ཡི་གེར་ཤེས་པར་བྱའོ། །ད་ནི་མཚོན་པའི་ཡི་གེར་ཤེས་པར་བྱའོ། །ཀ་ནི་སྐུ་གསུམ་གྱི་ཡི་གེར་ཤེས་པར་བྱའོ། །ཁ་ནི་གཉིས་སྣང་གི་ཡི་གེར་ཤེས་པར་བྱའོ། །ག་ནི་སྐྱོབ་པའི་ཡི་གེར་ཤེས་པར་བྱའོ། །ང་ནི་འཁོར་བའི་ཡི་གེར་ཤེས་པར་བྱའོ། །ཅ་ནི་ལྕི་བའི་ཡི་གེར་ཤེས་པར་བྱའོ། །ཆ་ནི་རྒྱན་གྱི་ཡི་གེར་ཤེས་པར་བྱའོ། །ཇ་ནི་སྣང་བའི་ཡི་གེར་ཤེས་པར་བྱའོ། །ཉ་ནི་ཤེས་པའི་ཡི་གེར་ཤེས་པར་བྱའོ། །ཏ་ནི་རྟག་པའི་ཡི་གེར་ཤེས་པར་བྱའོ། །ཐ་ནི་ཤིན་ཏུ་འཐུག་པའི་ཡི་གེར་ཤེས་
པར་བྱའོ། །ད་ནི་ཆད་པའི་ཡི་གེར་ཤེས་པར་བྱའོ། །ན་ནི་ལུས་ཀྱི་ཡི་གེར་ཤེས་པར་བྱའོ། །པ་ནི་སྟོང་པའི་ཡི་གེར་ཤེས་པར་བྱའོ། །ཕ་ནི་ཐབས་ཀྱི་ཡི་གེར་ཤེས་པར་བྱའོ། །བ་ནི་མ་རིག་པའི་ཡི་གེར་ཤེས་པར་བྱའོ། །མ་ནི་གཞི་མཉམ་པའི་ཡི་གེར་ཤེས་པར་བྱའོ། །ཙ་ནི་ལམ་གྱི་ཡི་གེར་ཤེས་པར་བྱའོ། །ཚ་ནི་འབྱུང་བའི་ཡི་གེར་ཤེས་པར་བྱའོ། །ཛ་ནི་འཛིན་པའི་ཡི་གེར་ཤེས་པར་བྱའོ། །མཚན་མ་ལམ་གྱི་ཡི་གེ་ནི། །ཝ་ཞེས་བྱ་བ་ཤིན་ཏུ་ཉུང་ངོ་། །ཞ་ནི་བཞག་ཐབས་ཀྱི་ཡི་གེར་ཤེས་པར་བྱའོ། །ཟ་ནི་སྣང་བ་རང་ལོག་པའི་ཡི་གེར་ཤེས་པར་བྱའོ། །དེ་ལ་འདོགས་དང་ཡན་ལག་ནི། །དང་པོའི་དབང་དུ་འབོད་པར་བྱའོ། །སྒྲ་མི་ཤེས་པའི་ཡི་གེ་ནི་འདི་ལྟ་སྟེ། །ཐ་ལ་ར་བཏགས་བྱུང་བ་ནི། ཐར་ཞེས་འབོད་པར་བྱའོ། །ཨ་ཡང་དེ་བཞིན་ནོ། །དེ་བཞིན་དུ་ན་དང་། ཞ་དང་། ཟ་དང་། འ་དང་། ཨ་དང་། ར་སྟ་མི་འབྱུང་བ་ཐམས་ཅད་ལ་དེ་བཞིན་དུ་འབོད་པར་བྱའོ། །ཏ་ལ་ཡ་བཏགས་བྱུང་བ་ན། །ཏད་ཞེས་བྱ་བར་འབོད་པར་བྱའོ། །ཐ་ལ་བྱུང་ན། ཆེ་ཞེས་བྱ་བ་འབོད་པར་བྱའོ། །ད་ལ་བྱུང་ན། སྲིད་ཅེས་བྱ་བ་འབོད་པར་བྱའོ། །ན་ལ་བྱུང་ན། ར་ཞེས་འབོད་པར་བྱའོ། །འ་ལ་བྱུང་ན་འོད་ཅེས་འབོད་པར་བྱའོ། །ཙ་ལ་བྱུང་ན་ཙན་ད་ཞེས་འབོད་པར་བྱའོ། །ང་ལ་བྱུང་ན། ཏྲི་ཞེས་འབོད་པར་བྱའོ། །ཉ་ལ་བྱུང་ན་མཉན་ཞེས་འབོད་པར་བྱའོ། །ས་ལ་བྱུང་ན། སིན་ཞེས་འབོད་པར་བྱའོ། །ཨ་ལ་བྱུང་ན། བྲིད་ཅེས་འབོད་པར་བྱའོ། །ཅ་ལ་བྱུང་ན། འདུད་ཅེས་འབོད་པར་བྱའོ། །ཆ་ལ་བྱུང་ན། ཨོཾ་ཞེས་འབོད་པར་བྱའོ། །ཇ་ལ་བྱུང་ན། ལྟེ་བ་ཞེས་འབོད་པར་བྱའོ། །ཧ་ལ་བྱུང་ན། སིབ་ཞེས་འབོད་པར་བྱའོ། །དེ་མ་ཡིན་པའི་མི་རིགས་པ་གང་ལས་བྱུང་ཡང་། འོད་ཅེས་བྱ་བར་འབོད་དོ། །དེ་ཡང་རྡོ་རྗེ་སེམས་དཔའི་སྒྲ་དོན་གྱི་མན་ངག་ཏུ་བཤད་པའོ། །དེ་བཞིན་དུ་སྒྲ་ལས་ཐབས་ཀྱི་ཡན་ལག་འབྱུང་བར་བསྟན་པའོ། །སྔགས་ཀྱི་གཏན་ཚིགས་རྒྱས་པར་བསྟན་པའི་ལེའུ་སྟེ་ཉེར་ལྔ་པའོ།། །།ཨི་ཐི། གྷུ་ཧྱ། ཁ་ཐམ་རྫོགས་སོ། །རྫོགས་པ་རང་བྱུང་གི་རྒྱུད་མ་བུ་བཅུ་གཉིས་པ་རྫོགས་སོ།། །།