ཁྲུས་ཐམས་ཅད་ཀྱི་ལུང་།

རྒྱ་གར་སྐད་དུ། སརྦ་སིན་དྷུ་ཧུ་ཀ་ར་ཡ་སིང་ནཱ་མ། བོད་སྐད་དུ། ཁྲུས་ཐམས་ཅད་ཀྱི་ལུང་ཞེས་བྱ་བ། བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དེ་ནས་འཁོར་དེ་རྣམས་ཀྱི་ནང་ནས། གསང་བའི་བདག་ཉིད་རྡོ་རྗེ་རྣམ་འཇོམས་ཀྱིས་འདི་སྐད་ཅེས་གསོལ་ཏོ། །ཀྱེ་ཀྱེ་བཅོམ་ལྡན་དབང་གི་བདག །ཁམས་གསུམ་འཁོར་བའི་སེམས་ཅན་ལ། །རྣམ་རྟོག་དྲི་མ་བསམ་ཡས་པས། །སྒྲིབ་པ་རྣམ་པ་གཉིས་སྦྱངས་པའི། །ཐབས་ཆེན་མཚོན་པའི་ཡན་ལག་དང་། །སེམས་ཅན་དྲི་མ་ཅན་དག་གི། །རྟོགས་པ་སྦྱངས་པའི་ཁྲུས་ཆེན་དང་། །ཁྲུས་ཀྱི་སྒྲུབ་པ་གསུང་དུ་གསོལ། །དེ་ནས་པདྨ་ཧེ་རུ་ཀས། །རྣམ་འཇོམས་ཉིད་ལ་བཀའ་སྩལ་པ། །ཀྱེ་མ་རྡོ་རྗེ་རྣམ་འཇོམས་ཉོན། །ངས་བསྟན་ལེགས་པར་ཡིད་ལ་ཟུང་། །ཁྲུས་ཀྱིས་རྣམ་རྟོག་སྦྱོར་བྱེད་ན། །ཤིན་ཏུ་དབེན་པའི་གནས་དག་ཏུ། །ཕྱི་མཚམས་ཚུལ་བཞིན་བྱ་བ་དང་། །སྤྱི་བཤགས་ལ་སོགས་རབ་ཏུ་བྱ། །དེ་ནས་དཀྱིལ་འཁོར་འདོམ་གང་ལ། །བ་ཡི་རྣམ་ལྔས་སྦྱང་བར་བྱ། །ཙནྡན་ལ་སོགས་དྲི་ཞིམ་པོས། །ཆག་ཆག་རབ་ཏུ་བཏབ་ནས་ནི། །ཐིག་ནི་གཞུང་དང་མཐུན་པ་སྟེ། །ཤིན་ཏུ་རྒྱས་

པར་གདབ་བྱ་སྟེ། །དེ་ནས་ཚོན་སྣ་ལྔ་ཡང་དགྱེ། །དབུས་ནི་ཟླུམ་པོའི་ཕོ་བྲང་དུ། །པདྨ་མཛེས་པ་འདབ་བརྒྱད་བྲི། །པདྨའི་ལྟེ་བ་སྔོན་པོས་བཀང་། །འདབ་མ་རྣམས་ནི་མཛེས་ཚོན་ནོ། །དེ་ཡི་ཕྱི་རོལ་གྲུ་བཞི་སྟེ། །སྒོ་དང་བཅས་པ་དག་ཏུ་བྲི། །གྲུ་ཆད་ལྗང་གུ་མཛེས་པ་སྟེ། །སྒོ་རྣམས་རིགས་དང་འདྲ་བའོ། །སྒོ་ཡི་མཐའ་མ་ཟླུམ་པོ་སྟེ། །རྡོ་རྗེའི་ར་བར་བཅས་པ་བྲི། །ཟླུམ་པོའི་ཁ་དོག་དམར་པོ་བྱ། །བར་ཁྱམས་ནག་པོ་དག་ཏུ་བྱ། །དེ་ནས་དཀྱིལ་འཁོར་དེ་ཉིད་ལ། །རྫས་ནི་འདི་ལྟར་དགོད་པར་བྱ། །པདྨའི་ལྟེ་བའི་དཀྱིལ་དག་ཏུ། །བུམ་པ་མཛེས་པ་གཅིག་བཞག་སྟེ། །ཚོན་སྐུད་ལྔ་ཡི་གཟུང་ཐག་གདགས། །པདྨའི་འདབ་མ་རེ་རེ་ལ། །ལྷ་བཤོས་རེ་རེ་གཞག་པར་བྱ། །དཀྱིལ་འཁོར་ཕྱོགས་མཚམས་བརྒྱད་ཉིད་དུ། །ཕུར་པ་བཅུ་ལ་ཁྲོ་བོའི་སྔགས། །ཕྱོགས་བཅུ་ཉིད་དུ་རབ་ཏུ་བཀོད། །ཕྱོགས་སྐྱོང་བཅུ་ལ་གཏོར་མ་བཅུ། །ཡི་དྭགས་འབྱུང་པོའི་གཏོར་མ་དང་། །རིགས་དྲུག་རྣམས་ལ་གཏོར་མ་གཅིག །ཆོས་སྐྱོང་འཁོར་དང་བཅས་པ་དང་། །མ་མོ་རྣམས་ལ་གཏོར་མ་གཅིག །དབུས་སུ་དཔལ་གྱི་གཏོར་མ་བཅའ། །སྒོ་བཞིར་རལ་གྲི་བཞི་ཡང་གཟུག །གྲུ་བཞིར་མདའ་བཞིར་མེ་ལོང་བཞི། །དར་སྣ་དག་ཀྱང་གདགས་པར་བྱ། །ཁྲུས་ཆུའི་བུམ་པ་གཅིག་ནི་གྲུ་ཆད་དེ། །བུམ་པ་དེ་དག་རྣམས་ལ་ཡང་། །སྨན་གྱི་ཡོ་བྱད་སྣ་ཚོགས་དང་། །ཀ་ར་བུ་རམ་ལ་སོགས་དང་། །གསེར་དང་མན་ཤེལ་ནོར་བུ་དང་། །རིན་ཆེན་སྣ་ལྔ་ཅི་སྙེད་དང་། །རྒྱ་མཚོའི་ཚྭ་དང་ལན་ཚྭ་དང་། །ཚྭ་སྣ་ཅི་སྙེད་ཡོད་པ་དང་། །སྤོས་དང་ཙནྡན་གླ་རྩི་དང་། །དྲི་ཞིམ་པ་ཡི་སྤོས་རྣམས་དང་། །མར་དང་ཤ་དང་རོ་ཞིམ་དང་། །འབྲས་དང་ནས་དང་འབྲུ་རྣམས་དང་། །ཤིང་ཐོག་ལ་སོགས་འབྲས་བུ་རྣམས། །བུམ་པ་དག་གི་སྙིང་པོར་གསུངས། །རས་དཀར་དྲི་མེད་གཙང་མ་ཡིས། །མགུལ་ཆིངས་དག་ནི་བྱ་བར་གསུངས། །དེ་ནས་དཀྱིལ་འཁོར་དེ་ཉིད་ལ། །རས་དཀར་མཛེས་པས་གདུགས་སུ་བྱ། །ཡུངས་ཀར་སཱ་ལུ་ལྗང་པ་ཡིས། །བུམ་པའི་ཁ་རྒྱན་བྱ་བར་གསུངས། །

དེ་ནས་བཅོམ་ལྡན་དབང་ཆེན་ལ། །རྣམ་འཇོམས་ཉིད་ཀྱིས་ཡང་ཞུས་པ། །ཀྱེ་ཀྱེ་བཅོམ་ལྡན་དབང་ཆེན་སྐུ། །དཀྱིལ་འཁོར་རྫས་ཉིད་དེ་ལྟར་ན། །སྒོམ་ཐབས་མཆོད་པའི་རིམ་པ་གསུངས། །བཅོམ་ལྡན་པདྨ་ཧེ་རུ་ཀས། །རྡོ་རྗེ་ཁྲོ་བོ་དེ་ཉིད་ལ། །སྟོབས་ལྡན་ཉིད་ཀྱིས་བཀའ་སྩལ་པ། །ཀྱེ་མ་ཉོན་ཅིག་རྣམ་པར་འཇོམས། །སྒྲུབ་པ་ཆེན་པོ་དེ་ཉིད་ལ། །འཇུག་དུས་ཚེས་ཆེན་བཅོ་ལྔ་ལ། །བསྒྲུབ་པའི་ཞག་གྲངས་རབ་ནི་བདུན། །འབྲིང་བོ་ཞག་ལྔ་ཐ་མ་གསུམ། །དེ་ལྟར་བསྒྲུབ་པ་བྱེད་པའི་ཚེ། །དང་པོ་དབང་གི་བྲོ་བརྡུང་ཞིང་། །དེ་ཚེ་རྣལ་འབྱོར་ཆེན་པོ་རྣམས། །བསྒོམ་པའི་རིམ་པ་འདི་ལྟ་སྟེ། །པདྨ་དབང་གི་དཀྱིལ་འཁོར་རྣམས། །སྐད་ཅིག་ཙམ་ལ་རབ་ཏུ་བསྐྱེད། །དབུས་སུ་པདྨ་ཧེ་ རུ་ཀ །དབུ་གསུམ་ཕྱག་དྲུག་ཞབས་བཞི་སྟེ། །གཡས་ཀྱི་ཞལ་ནི་ལྗང་གུ་སྟེ། །གཡོན ་ནི་སྔོ་ལ་དབུས་ནི་དམར། །ཕྱག་དྲུག་གཡས་ཀྱི་དང་པོ་ན། །དགྲ་སྟྭ་བསྣམས་ཤིང་སྐྱེ་རྩ་གཅོད། །འོག་མ་གཉིས་ཀྱི་ཕྱག་མཚན་ནི། །མདུང་ཐུང་རལ་གྲི་བསྣམས་པའོ། །གཡོན་པ་གསུམ་གྱི་ཕྱག་མཚན་ནི། །བམ་དབྱུག་ཐོད་པ་སྡིགས་མཛུབ་སྟེ། །དབུ་ཡི་སྟེང་ན་རྟ་མགོ་གསུམ། །རྟ་སྐད་སྒྲོགས་ཤིང་དབང་སྐད་འཚེར། །མེ་རི་སྣ་ཚོགས་འཕྲོ་བའི་མེ། །དེ་ལྟ་བུ་ཡི་དབང་ཆེན་ཉིད། །བདག་ཉིད་ཐུགས་ཀའི་དཀྱིལ་འཁོར་དུ། །ཡི་གེ་ཧྲཱྀཿཉིད་དམར་པོ་བསམ། །དེ་ཉིད་འོད་དུ་ཞུ་བ་དང་། །བདག་ཉིད་པདྨ་དབང་དུ་བསྐྱེད། །དེ་ནས་ཧྲཱྀཿཧྲཱྀཿཞེས་བརྗོད་པས། །བདག་ཉིད་སྟེང་དུ་ཆད་པར་བསམ། །དེ་ནས་རྟ་མགོ་གསུམ་དུ་བསམ། །དེ་ནས་བཛྲ་ཧྲཱྀཿཞེས་བརྗོད། །དེ་ཉིད་འོད་དུ་ཞུ་བ་དང་། །བདག་ཉིད་དཔལ་ཆེན་མདུན་དག་ཏུ། །རྡོ་རྗེ་རྣམ་འཇོམས་བསྒོམ་པའོ། །དེ་ཉིད་སྐུ་མདོག་ཕྱག་མཚན་ནི། །ཞལ་གཅིག་ཕྱག་གཉིས་སྐུ་མདོག་སྔོ། །གཡས་པས་བུམ་པ་དཀར་པོ་བསྣམས། །རྡོ་རྗེ་རྒྱ་གྲམ་བུམ་པའི་ཁ་ཉིད་བཅད་པའོ། །གཡོན་པས་སྡིགས་མཛུབ་ཕུར་པ་འདྲིལ། །ཀླུ་དབང་རིགས་བཞིས་སྐུ་ལ་བརྒྱན་

པའོ། །དེ་ལྟར་གསལ་བར་བསྒོམ་པ་དང་། །བསྙེན་པ་གཙོ་བོའི་སྔགས་འདི་བརྗོད། །ཨོཾ་པདྨཱནྟ་ཀྲྀཏ་བཛྲ་ཀྲོ་དྷ་ཧ་ཡ་གྲཱི་བ་ཧཱུྃ་ཧྲཱྀཿ། སྔགས་དེ་བརྒྱ་རྩ་བརྒྱད་བརྗོད་པས། །རྣམ་འཇོམས་སྐུ་ནི་གྲངས་མེད་བསམ། །རྡོ་རྗེ་རྣམ་འཇོམས་དེ་དག་གི། །ཐུགས་ཀའི་ཡི་གེ་ས་བོན་ལས། །ཁྲུས་ཀྱི་ལྷ་མོ་གྲངས་མེད་བསམ། །སྟོང་གསུམ་ཐམས་ཅད་ཁེངས་པར་བསམ། །ཁྲུས་ཀྱི་ལྷ་མོ་དེ་དག་ནི། །སྐུ་མདོག་དཀར་མོ་འོད་ཟེར་ཅན། །གཡས་པ་རྣམས་ནི་བུམ་པ་སྟེ། །གཡོན་པ་རྣམས་ནི་སྡིགས་མཛུབ་བོ། །དེ་ནས་བཅོམ་ལྡན་བདེ་ཆེན་དེས། །རྣམ་འཇོམས་ཉིད་ལ་ལུང་བསྟན་པ། །ཀྱེ་མ་རྡོ་རྗེ་རྣམ་འཇོམས་ཉོན། །གསང་སྔགས་ཁྲུས་ཀྱི་སྒྲིབ་སྦྱང་སྔགས། །ཁྱོད་ཀྱིས་འདུས་པའི་ཚོགས་ལ་སྨྲོས། །དེ་ནས་རྣམ་འཇོམས་དེ་ཉིད་ཀྱིས། །གསང་སྔགས་ཁྲུས་ཀྱི་ཚིག་འདི་སྨྲས། །ན་མཿཙཎྜ་བཛྲ་ཀྲོ་དྷཱ་ཡ་ཧུ་ལུ་ཧུ་ལུ་ཧཱུྃ་ཕཊ། དེ་སྐད་སྔགས་དེ་ལན་ཉེར་གཅིག །བརྗོད་ཅིང་བཅོམ་ལྡན་དབང་ཉིད་བསམ། །དེ་ལས་འོད་ཟེར་རབ་འཕྲོས་པས། །ཁམས་གསུམ་རྒྱུད་དྲུག་སེམས་ཅན་གྱི། །རྣམ་རྟོག་སྒྲིབ་པ་སྦྱངས་པར་བསམ། །དེ་ནས་ཁྲུས་ཀྱི་ལྷ་མོ་རྣམས། །གསལ་བ་འོད་དང་ལྡན་གྱུར་ནས། །བདུད་རྩིའི་བུམ་པ་དེ་དག་གིས། །ནང་ནས་བདུད་རྩིའི་ཆུ་རྒྱུན་བབས། །དེ་ཉིད་སྟོང་གསུམ་ཁྱབ་པ་ལས། །བདག་དང་མཐའ་ཡས་སེམས་ཅན་གྱི། །སྡུག་བསྔལ་ཐམས་ཅད་མེད་པ་དང་། །སྒྲིབ་པ་ཐམས་ཅད་བཀྲུས་པར་བསམ། །ཕྱི་དང་ནང་གི་ནད་རྣམས་ཀྱང་། །ལྷ་མོ་དེ་དག་ཐམས་ཅད་ཀྱིས། །བདུད་རྩིའི་ཆུ་ཡིས་བཀྲུས་པར་བསམ། །རྒྱུན་དུ་དེ་ལྟར་བསམ་བཞིན་དུ། །སྤྱི་ཆོག་གཞུང་དང་མཐུན་པར་བྱ། །རྒྱུན་དུ་བགྲངས་པའི་སྔགས་འདིའོ། །ཨོཾ་བཛྲ་ཙཎྜ་སརྦ་ཨཱ་ཤུཌྜྷ་རཾ་ཡཱ། སརྦ་པཱ་པ་བི་ཤོ་དྷ་ཧོ་རཾ་རཾ་ཁཾ་རཾ་རཾ། བཛྲ་ཙཎྜ་རཾ་རཾ། དེ་ནི་རྒྱུན་འབུལ་དག་ཏུ་བཟླས། །དེ་ནས་བསྒྲུབ་པའི་ཐ་མ་ལ། །རིགས་ཀྱི་སློབ་མ་དེ་དག་ལ། །དབུས་ཀྱི་བུམ་པས་དབང་བསྐུར་བྱ། །ཁྲུས་ཀྱི་བུམ་པས་ཁྲུས་ཉིད་བྱ། །གཙོ་བོའི་བུམ་པ་དེ་ཉིད་དུ། །དཔལ་ཆེན་

དེ་ཉིད་སྐུ་བསྟན་པ། །སློབ་བུའི་སྤྱི་གཙུག་དག་ཏུ་བཞག །འོག་མའི་སྔགས་འདི་ཉིད་ལན་བདུན་བརྗོད། དེ་ནས་རྡོ་རྗེ་སློབ་དཔོན་དེས། །ཆེ་བའི་གླུ་འདི་རབ་ཏུ་བླངས། །ཧཱུྃ་བདུད་རྩི་དག་པའི་ཡེ་ཤེས་སྐུ། །ཆོས་ཉིད་མཁའ་མཉམ་ཡེ་ཤེས་བུམ། །རྣམ་རྟོག་ཀུན་སྦྱོང་ཡེ་ཤེས་ཆུ། །རིག་པ་འོད་གསལ་སྙིང་པོར་བཅས། །མཁའ་གསང་མཉམ་སྦྱོར་ལན་ཚྭའི་རོ། །རྣམ་དག་དྲི་མེད་བཅུད་ལེན་སྨན། །འདོད་ཡོན་ལས་གྲུབ་རིན་པོ་ཆེ། །རིན་ཆེན་འོད་འབར་དྲི་ཞིམ་སྤོས། །གསོ་བྱེད་རྡོ་རྗེའི་འོ་མའི་ཆུ། །འདོད་པ་ཚིམ་བྱེད་འབྲས་བུ་དང་། །བསྙེན་འདྲིལ་ཐུགས་རྗེའི་དར་དཔྱང་དང་། །འབྲས་བུ་བཅུད་ཀྱིས་གཏམས་པ་ཡི། །ཆོས་ཉིད་མཉམ་པའི་བུམ་པ་ཡིས། །སྐལ་ལྡན་འདི་ལ་དབང་བསྐུར་བས། །ཆོས་ཉིད་རང་སྟོབས་རྙེད་ནས་ཀྱང་། །དབང་ཆེན་སྐུ་དང་ལྡན་པར་ཤོག །ཨོཾ་མ་ཧཱ་ཀཱ་ལ་ཤ་སིདྡྷི་བཛྲ་ཧཱུྃ། དེ་ནས་ཁྲུས་ཀྱི་བུམ་པ་ཡིས། །སློབ་མ་དེ་ལ་ཁྲུས་བྱས་ཏེ། །སྤྱི་གཙུག་དག་ཏུ་བཞག་ལ་ཡང་། །སྔགས་ནི་འོག་མ་ལན་བདུན་བརྗོད། །དེ་ནས་ཁྲུས་ཀྱི་བུམ་པ་དེ། །རྣམ་འཇོམས་ཉིད་དུ་གསལ་བར་བསྒོམ། །དེ་ནས་རྡོ་རྗེ་སློབ་དཔོན་དེས། །ཆེ་བའི་གླུ་འདི་བརྗོད་པར་བྱ། །རྣམ་དག་དྲི་མེད་ཡེ་ཤེས་ཆུས། །བཀྲུས་པས་རྣམ་རྟོག་སྡུག་བསྔལ་བྲལ། །རྣམ་རྟོག་དྲི་མ་ལས་སྦྱོངས་ཤིང་། །སངས་རྒྱས་ཞིང་ཁམས་རབ་འབྱམས་ཀྱི། །ཡེ་ཤེས་ཆུ་རྒྱུན་བབས་ནས་ན། །ཁྱོད་ཀྱི་རྣམ་རྟོག་བྱང་གྱུར་ནས། །ཕྱི་དང་ནང་གི་སྡུག་བསྔལ་རྣམས། །ཐམས་ཅད་ཞི་བར་གྱུར་ནས་ཀྱང་། །ཡེ་ཤེས་སྣང་བ་གསལ་བར་སྟོན། །དག་པའི་ཡེ་ཤེས་བདུད་རྩི་འདིས། །དྲི་མའི་སྐྱོན་རྣམས་བྱང་བ་དང་། །མི་གཙང་ལ་སོགས་ཉམས་པ་ཀུན། །ཤེལ་སྒོང་ལྟ་བུར་གྱུར་ནས་ནི། །རྣམ་འཇོམས་ཉིད་ཀྱི་སྐུ་གསུང་ཐུགས། །རིགས་ཀྱི་བུ་ལ་རྫོགས་པར་ཤོག །ཨོཾ་ཙཎྜ་བཛྲ་ཀྲོ་དྷ་ཀཱ་ཡ་ཧཱུྃ་ཧཱུྃ་ཧྲིཿ། དེ་ནས་གཏོར་མས་དབང་བསྐུར་བྱ། །གཏོར་མ་གཏོང་ཞིང་དཀྱིལ་འཁོར་བསྡུ། །ཞེས་རྫོགས་
པ་རང་བྱུང་ཆེན་པོའི་རྒྱུད་ལས། ཁྲུས་ཀྱི་ལེའུ་སྟེ་གཉིས་པའོ།། །།