དཔལ་པདྨ་དབང་ཆེན་དྲེགས་པ་དབང་སྡུད་ཀྱི་རྒྱུད་ཅེས་བྱ་བ།
རྒྱུད་འདི་དཔེ་གཅིག་ལས་བསྡུར་ས་མ་འབྱོར། རྒྱ་གར་སྐད་དུ། ཤྲཱི་པདྨ་མ་ཧཱ་བ་ཤ་སཾ་བྷཱ་ཏ་ཏནྟྲ་ནཱ་མ། བོད་སྐད་དུ། དཔལ་པདྨ་དབང་ཆེན་དྲེགས་པ་དབང་སྡུད་ཀྱི་རྒྱུད་ཅེས་བྱ་བ། ལྷུན་གྱིས་གྲུབ་པའི་སངས་རྒྱས་རྣམས་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་སངས་རྒྱས་ཐམས་ཅད་ཀྱི་ངོ་བོ་ཉིད་དེ་ནི། པདྨ་ཅན་ནམ་བདེ་བ་ཅན་ཞེས་བྱ་བའི་གནས་བཙུན་མོའི་བྷ་ག་ལས་བཞེངས་ཏེ། འདི་ལྟར་འཁོར་གྱི་དཀྱིལ་འཁོར་ལ་གཟིགས་པ་ནི། ས་བཅུའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་གཟིགས་ནས་ཤེས་བྱའི་སྒྲིབ་པ་ཆ་ཕྲ་བ་རྣམས་སྦྱངས་པར་མཛད་དོ། །རང་སངས་རྒྱས་རྣམས་ལ་གཟིགས་ནས་རྟེན་ཅིང་འདྲེལ་པར་འབྱུང་བ་རྣམས་རྣམ་པར་དག་པར་སྟོན་པར་མཛད་དོ། །ཉན་ཐོས་རྣམས་ལ་གཟིགས་ནས་འགོག་པ་ལས་བསླངས་ཤིང་སྦྱངས་པར་མཛད་དོ། །བྱ་བ་ལས་ཀྱི་རྒྱུད་ཀྲི་ཡ་བ་ལ་གཟིགས་ནས་རིགས་གསུམ་གྱི་དོན་རྣམ་པར་དག་པར་མཛད་དོ། །ཆ་མཐུན་སྤྱོད་པའི་རྒྱུད་ཨུ་པ་ཡ་ལ་གཟིགས་ནས་རིགས་བཞིའི་གདུང་རྣམ་པར་དག་པར་མཛད་དོ། །རྣམ་གྲོལ་རིག་པའི་རྒྱུད་རྣལ་འབྱོར་ཐེག་པ་ལ་གཟིགས་ནས་སུམ་ཅུ་རྩ་གཉིས་རྣམ་པར་དག་པར་མཛད་དོ། །རྣལ་འབྱོར་བླ་ན་མེད་པའི་རྒྱུད་བསྐྱེད་རྫོགས་རྣམ་པ་གསུམ་གྱི་ལྟ་སྤྱོད་ཀྱིས་དྲེགས་པ་ཐམས་ཅད་དབང་དུ་སྡུད་པར་མཛད་པར་ཡང་གཟིགས་སོ། །དེ་ནས་འགྲོ་བའི་རིགས་བསམ་ཡས་པ་ལ་གཟིགས་ནས། སེམས་ཉིད་སངས་རྒྱས་པ་ཡིན་པ་ལས། སྣང་བ་སྣོད་དང་བཅུད་དུ་སྣང་བ་འདི་ཐམས་ཅད་ནི། སེམས་ཉིད་ཆོས་སྐུ་ལས་སྣང་བ་ཆོས་སྐུའི་འོད་གསལ་དུ་གཏན་ལ་
འབེབས་པའི་ཕྱིར། ཉིད་སྐུ་ཞལ་གསུམ་ཕྱག་དྲུག་པར་བསྟན་པ་ནི་འདི་ལྟ་སྟེ། དབུས་ཀྱི་སྐུ་མདོག་དཀར་དམར་པདྨ་རཱ་གའི་མདངས་སུ་གནས། གཡས་ཐུགས་ཀྱི་ཞལ་སྔོ་བ། གཡོན་ཡོན་ཏན་གྱི་ཞལ་སེར་བ། གཡས་དང་པོ་ལ་པདྨའི་སྡོང་བུ། བར་མ་ན་རྡོ་རྗེ་རྩེ་གསུམ། ཐ་མ་ན་མདའ་འཛིན་པ། གཡོན་དང་པོ་ན་བུམ་པ། བར་པ་ན་དཔལ་བེའུ། ཐ་མ་ན་གཞུ་འཛིན་པ། རྒྱན་རིན་ཆེན་སྣ་ཚོགས་པའི་ན་བཟས་མཛེས་པ། ཡུམ་ཕྱག་རྒྱ་མ་དང་བཅས་པ། དམར་མོ་རྡོ་རྗེ་དྲིལ་བུས་འཁྱུད་པ། རིན་ཆེན་སེང་གེ་ཉི་ཟླ་པདྨའི་ཁྲི་ལ། ཡེ་ཤེས་འོད་འཁྱིལ་གོང་བུའི་ནང་ན་བཞུགས་པ། ཞལ་ནས་གསང་བའི་སྔགས་བརྗོད་པ་ནི། ཨོཾ་ཨཱ་རོ་ལིཀ །པཱཾ་རཱ་ག་ར་ཏི་སྟཱཾ་སྭཱ་ཧཱ། ཞེས་བརྗོད་པས་འཁོར་གྱི་བྱང་ཆུབ་སེམས་དཔའ་རྣམས་ཀྱིས་མཐོང་བར་གྱུར་ཏེ། དེ་ནས་འཁོར་རྣམས་ཀྱིས་བསྟོད་པ་འདི་མཛད་ནས་བསྟོད་དོ། །ཧཱུཾ་དྲི་མེད་རྣམ་དག་ཞི་བ་ལས། །སྤྲོས་པ་ཐམས་ཅད་རབ་ཞི་བའི། །ཡེ་ཤེས་ཚོགས་མཆོག་མངའ་བརྙེས་པ། །རང་བཞིན་དག་པ་ཆོས་ཀྱི་སྐུ། །ཐུགས་རྗེས་སྡུག་བསྔལ་སེལ་མཛད་པ། །བསོད་ནམས་ཚོགས་རྫོགས་གཟུགས་ཀྱི་སྐུ། །ལས་དང་ཉོན་མོངས་ཤེས་བྱ་ཡི། །དྲི་མ་སྤངས་པའི་སྐུར་གྲུབ་པ། །གསུང་མཆོག་སྐུ་གསུང་དང་བ་དང་། །ལུས་ངག་སེམས་ཀྱིས་ཕྱག་འཚལ་བསྟོད། །ཐུགས་རྗེ་ཆེན་པོས་གཟུང་བ་དང་། །ཡེ་ཤེས་སྣང་བ་གསལ་བར་མཛོད། །དུས་ཀྱིས་མནར་བའི་སྐྱེ་བོ་རྣམས། །འདུལ་ཕྱིར་ཁྲོ་བོར་བཞེངས་སུ་གསོལ། །རྟག་ཆད་མཐའ་ལ་ཞེན་པ་ཡི། །གདུག་པ་ཅན་རྣམས་དབང་དུ་སྡུས། །ཞེས་བསྟོད་དོ། །དེ་ནས་གར་དབང་བདེ་བ་ཆེན་པོའི་སྐུ་དེས། ཧཱུཾ་དྲུག་རོལ་པའི་ཆོ་འཕྲུལ་བསྟན་ནས། ཨོཾ་མ་ཧཱ་པདྨ་ཤྲཱི་ཧེ་རུ་ཀ་པདྨ་ཀྲོ་ཏཱི་ཤྭ་རཱི་ཧཱུཾ། མ་ཧཱ་ཙནྜ་སརྦ་དུཥྚཱ་ན་ཧཱུཾ་ཕཊ། ཅེས་བརྗོད་པས། ཉིད་ཀྱི་སྐུ་ཁྲོ་བོ་ཆེན་པོ་དབུ་ལྔ་ཕྱག་བཅུ་དྲུག་པར་གྱུར་ཏེ། སྐུ་མདོག་དམར་པོ་དབུ་ལྔ་པ། དབུ་ལྔའི་ནང་ན་རྡོ་རྗེ་དབྱིངས་ཀྱི་དཀྱིལ་འཁོར་དུ་གསལ་བ། ལྟག་པ་ན་རྟ་མགོ་ལྔའི་རྟ་མགྲིན་དབང་གི་དཀྱིལ་འཁོར་དུ་གསལ་བ། གཤོག་པ་
ཁམས་གསུམ་རྣམ་པར་རྒྱལ་བ་དང་། ཐུགས་ཀ་ཡེ་ཤེས་སེམས་དཔའ་དང་། གཟི་ལྡན་ཡུམ་གྱི་དཀྱིལ་འཁོར་དང་། ཕྱག་གཡས་པ་བརྒྱད་ན་རྡོ་རྗེ་དང་། ཁ་ཊྭཱཾ་དྲིལ་བུར་བཅས་པ་དང་། རྡོ་རྗེ་ལྕགས་ཀྱུ་དང་། སྦྲུལ་གྱི་ཞགས་པ་དང་། འཁོར་ལོ་དང་། རིན་པོ་ཆེ་ཟུར་འཕྱང་བརྒྱད་པ་དང་། རལ་གྲི་དང་། རྡོ་རྗེ་ལུ་གུ་རྒྱུད་ཀྱི་ཕྲེང་བའོ། །ཕྱག་གཡོན་པ་བརྒྱད་ན།པདྨའི་ཡུ་བ་ནས་འཛིན་པ། ཐོད་ཁྲག་སྣོད་བཀང་བ་དང་། ཁྲོ་བོ་ཆེན་པོའི་སྙིང་འབྱིན་པ་དང་། གཤིན་རྗེའི་དབྱུག་པ་ཐོགས་པ་དང་། རྡོ་རྗེ་རྒྱ་གྲམ་དང་། རྡོ་རྗེ་བེ་ཅོན་དང་། མེ་འོད་ཀྱི་ཕྲེང་བ་དང་། ཏྲི་ཤཱུལ་དང་། ཁྱུང་གི་ཁྲ་བསྣམས་པ། ཞབས་ཁྲོ་བོ་བརྒྱད་ཀྱི་གདན་ལ་བཞུགས་པར་གྱུར་ཏེ། ཞལ་ནས་ཉིད་ཀྱི་སྙིང་པོ་ཡི་གེ་བཅུ་བདུན་པ་འཛིན་པ་འདི་བརྗོད་དོ། །ཨོཾ་པདྨ་སིཌྜྷ་སི་དྷོ་ཧ་ཧེ་ཙཀྲ་བྷྱོ། བྷྱོ་ཧཱུཾ་ཧཱུཾ་ཕཊ། ཅེས་བརྗོད་ཅིང་གདུག་པ་ཅན་འདུལ་བའོ། །དེ་ནས་ཉིད་ཀྱི་འཁོར་ནི། སྐུ་ཡི་ཁམ་རྒྱ་དཀར་མོ་འཁོར་ལོ་དང་། གསུང་གི་ཁམ་རྒྱ་དམར་མོ་པདྨ་དང་། ཐུགས་ཀྱི་ཁམ་རྒྱ་ནག་མོ་རྡོ་རྗེ་དང་། ཡོན་ཏན་ཁམ་རྒྱ་སེར་མོ་དྲིལ་བུ་དང་། ལས་ཀྱི་ཁམ་རྒྱ་ལྗང་གུ་རལ་གྲི་དང་། གསད་པའི་ཁམ་རྒྱ་སྣ་ཚོགས་མདོག་ཅན་ཁཱ་ཊྭཱཾ་བསྣམས་པ། ཁམ་རྒྱ་མོ་དྲུག་པོ་ཀུན་ཀྱང་གཡོན་ན་བདུད་རྩིའི་ཐོད་པ་བསྣམས་པ། ཞལ་ནས་རང་སྔགས་བརྗོད་པ།བུཌྜྷ་བཛྲ་ཨོཾ། སཏྭ་བཛྲ་ཧཱུཾ། རཏྣ་བཛྲ་ཏྲཱཾ། དྷརྨཱ་བཛྲ་ཧྲཱྀཿ། ཀརྨ་བཛྲ་ཧཱ།གུ་ཧྱ་བཛྲ་ཕཊ། ཅེས་བརྗོད་ཅིང་འཁོར་ལོ་འབར་བའི་རྩེ་མོ་དྲུག་ལ་བཞུགས་སོ། །ལོང་བ་ཆེན་པོ་བརྒྱད་ནི། ཤར་རྡོ་རྗེའི་ལོང་བ་དཀར་པོ་དང་། ལྷོ་རིན་ཆེན་ལོང་བ་སེར་པོ་དང་། ནུབ་པདྨའི་ལོང་བ་དམར་པོ་དང་། བྱང་ལས་ཀྱི་ལོང་བ་ལྗང་གུ་དང་། མཚམས་ཀྱི་ལོང་བ་ཕྱེད་གཟུགས་ཀྱི་མདོག་ཅན་དང་། ཕྱག་བཞིན་གཡས་པ་ཟངས་གྲི་དང་ཐོད་པ། གཡོན་རྒྱུ་ཕྲེང་དང་སྙིང་བསྣམས་པ། རང་གི་ཞལ་ནས་རང་སྔགས་བརྗོད་པ་ནི། ཨོཾ་ཤྭ་རི་ཁཱ་ཧི་ཧཱུཾ། ཨོཾ་ཤྭ་རི་ཁཱ་ཧི་ཏྲཱཾ།ཨོཾ་ཤྭ་རི་ཁཱ་ཧི་ཧྲིཿ། ཨོཾ་ཤྭ་རི་ཁཱ་ཧི་ཧཱ། ཞེས་བརྗོད་ཅིང་ཐོད་རུས་ཀྱི་བར་ཁྱམས་དང་པོ་ལ། སྐུ་གཅེར་བུའི་ཚུལ་གྱིས་གནས་སོ། །དེ་ཉིད་ཀྱི་གནས་ལ་བཞུགས་པའི་དམུས་ལོང་དྲུག་ཅུ་པོ་རྣམས་ནི།
ཕྱོགས་རེ་ན་རིགས་ཀྱི་མདོག་ཅན་བཅོ་ལྔ་བཅོ་ལྔ་བཞུགས་ཏེ། ཕྱག་གཡས་ན་ལྕགས་ཀྱུ་གཡོན་ཕུར་བུ་བསྣམས་པའོ། །ཞལ་ནས་རང་སྔགས་བརྗོད་པ་ནི། ཨོཾ་ཤྲཱི་རཾ་ཁཱ་ཧི་ཧཱུཾ། ཨོཾ་ཤྲཱི་རཾ་ཁཱ་ཧི་ཏྲཱཾ། ཨོཾ་ཤྲཱི་རཾ་ཁཱ་ཧི་ཧྲཱྀཿ། ཨོཾ་ཤྲཱཾ་རཾ་ཁཱ་ཧི་ཧཱ། ཞེས་བརྗོད་ཅིང་བར་ཁྱམས་དང་པོ་ལ་གནས་སོ། །ཟ་བྱེད་དཔལ་གྱི་ཁྱི་བརྒྱད་ནི། སྐུ་མདོག་མཐིང་ནག་སྤྱང་ཀིའི་མགོ་ཅན། གཡས་གྲི་གུག །གཡོན་ཐོད་པ་འཛིན་པ། རང་གི་སྤྲུལ་པ་ཅེ་སྤྱང་བརྒྱད་དང་། ཡེ་ཤེས་ཀྱི་སྤྲུལ་པ་ཁྱི་བཅུ་ཡང་། ཞལ་ནས་རང་སྔགས་བརྗོད་པ་ནི། ཨོཾ་དཱིཔྟ་ཙཀྲ་ཤྭ་ན་མུ་ཁ་ཁ་ལོང་ཁ་ཧཱུཾ་ཕཊ། ཀུ་རུ་ཀུ་རུ་ཡཀྴ་ཧཱུཾ་ཕཊ།ཅེས་བརྗོད་ཅིང་བར་ཁྱམས་གཉིས་པ་མེ་རི་དམར་པོ་ལ་བཞུགས་སོ། །འཁོར་གྱི་སྒོ་བ་བཞི་ནི། མགོ་དགུ་པོ་ལ་རྐང་གཅིག་པོ། མདོག་དཀར་ལག་ན་ལྕགས་ཀྱུ་བསྣམས་པ། ཞལ་ནས་ཧཱུཾ་ཧཱུཾ་ཕཊ། ཅེས་བརྗོད་ཅིང་ཤར་སྒོར་བཞུགས་སོ། །འོད་གཤོག་མགོ་བརྒྱད་རྐང་བརྒྱད་པོ་སེར་པོ་ལག་ན་ཞགས་པ་ཐོགས་ཤིང་། ཧཱུཾ་ཏྲཱཾ་ཏྲཱཾ་ཕཊ། ཅེས་བརྗོད་ཅིང་ལྷོ་སྒོར་བཞུགས་སོ། །ཡེ་ཤེས་མགོ་དྲུག་ལག་དྲུག་རྐང་དྲུག་པོ་དམར་པོ་ཕྱག་ན་ལྕགས་སྒྲོག་བསྣམས་ཤིང་། ཞལ་ནས་ཧཱུཾ་ཧྲཱྀཿཧྲཱྀཿཕཊ། ཞེས་བརྗོད་ཅིང་། ནུབ་སྒོར་བཞུགས་སོ། །གསང་བ་མགོ་གསུམ་ལག་གསུམ་རྐང་གསུམ་པོ་ལྗང་གུ་ནི། ཕྱག་ན་དྲིལ་བུ་བསྣམས་ཤིང་། ཞལ་ནས་ཧཱུཾ་ཧཱུཾ་ཧཱ་ཧཱ་ཕཊ། ཅེས་བརྗོད་ཅིང་བྱང་སྒོར་བཞུགས་སོ། །སྒོ་བ་དེ་ཀུན་གྱི་ཕྱག་གཡོན་ན། ཐོད་ཁྲག་ཉིད་ཀྱིས་ལོངས་སྤྱོད་མཛད་པའོ། །མེ་འབྲུག་དམར་པོ་བྷྲིང་གི་རི་ཏི་དང་། རླུང་འབྲུག་སྔོན་པོ་ཀ་ལ་ཤ་ནི། ཨོཾ་ཛི་ན་ལཾ་ཏེ་ཙེ་རཾ། ཡཀྴ་ཀུ་བྷ་ཉྫ་ཧཱུཾ་ཕཊ། ཅེས་བརྗོད་ཅིང་སྟེང་འོག་ཕྱོགས་མཚམས་ཀུན་ཏུ་ཁྱབ་བོ། །ཡང་སྤྲུལ་ཕོ་ཉ་ནི། དུར་བྱ་དང་། ཁྲུང་ཁྲུང་དང་། བསེའི་བྱན་གླག་དང་། ཁྱི་སྤྱང་མ་རྣམས་དང་གདོང་དགུ་གྲངས་མེད་པ་ཡང་། ཨོཾ་ཧ་ཧ་རུ་ལུ་མ་ཧཱ་ཙ་ཤྭ་རཱི་ན་ཡེ་ཨ་ཧཱུཾ་ཧཱུཾ་ཧཱུཾ་ཕཊ། ཅེས་བརྗོད་པར་བྱེད་ཅིང་། ཕྱི་རོལ་སྒོ་ནས་ར་བའི་མཚམས་ཀྱི་བར་དུ་གནས་སོ། །པདྨ་དབང་ཆེན་དྲེགས་པ་དབང་སྡུད་ཀྱི་རྒྱུད་ལས། ཉིད་ཀྱི་སྐུ་མངོན་པར་བསྟན་པ་རྩ་
བའི་དཀྱིལ་འཁོར་གྱི་ལེའུ་སྟེ་དང་པའོ།། །།དེ་ནས་བཅོམ་ལྡན་འདས་ཀྱིས་གསང་སྔགས་ཀྱི་ལས་ཡོངས་སུ་རྫོགས་པ་འདི་གསུངས་སོ། །གསང་སྔགས་ཀུན་གྱི་ངོ་བོ་ནི། །སྤྱི་དང་བྱེ་བྲག་རྣམ་པ་གཉིས། །སྤྱིར་ནི་སྔགས་ཀྱི་ངོ་བོ་ནི། །ཐབས་དང་ཤེས་རབ་རྣམ་པ་གཉིས། །དེ་ལ་ཐབས་ཞེས་བརྗོད་པ་ནི། །ཀུན་རྫོབ་སྒྱུ་མ་ཙམ་དུ་སྣང་། །ཤེས་རབ་ཞེས་ནི་གང་བརྗོད་པ། །དོན་དམ་སྐྱེ་བ་མེད་པའོ། །སྟོང་པ་ཉིད་ཀྱི་རང་བཞིན་ནོ། །ཁྱད་པར་སྔགས་ཀྱི་ངོ་བོ་ནི། །ཁྱེད་ལ་ངས་ནི་རབ་བཤད་ན། །སྔགས་ཀྱི་ངོ་བོ་ལྷ་ཡི་སྐུ། །དྲང་སྲོང་མཐུ་ལས་ཁྱད་པར་འཕགས། །ངེས་ཚིག་སྤྱི་དང་ཁྱད་པར་གཉིས། །སྤྱི་ཡི་ངེས་པའི་ཚིག་བཤད་པ། །སྐྱོབ་པའི་ཕྱིར་ན་སྔགས་ཡིན་ཏེ། །ཡིད་བསྐྱབ་པ་ཡི་དོན་ཡིན་ནོ། །ཁྱད་པར་སྔགས་ནི་ངེས་ཚིག་ནི། །ཤེས་སྐྱོབ་ཡོན་ཏན་ལྡན་པ་ཡིན། །སྔགས་ཀྱི་དབྱེ་བ་རྣམ་པ་གཉིས། །སྤྱི་དང་བྱེ་བྲག་གཉིས་སུ་བཤད། །སྤྱི་ཡི་དབྱེ་བ་རྣམ་གཉིས་ཏེ། །ཀུན་རྫོབ་ཀྱི་ནི་སྔགས་ཞེས་བྱ། །ལྷ་ཡི་དཀྱིལ་འཁོར་ཡིད་ལ་བྱེད། །དོན་དམ་པ་ཡི་སྔགས་ཞེས་པས། །གཉིས་སུ་མེད་པའི་རང་བཞིན་ཏེ། །སྟོང་པ་ཆེན་པོའི་ཡེ་ཤེས་དང་། །དེ་ཡུལ་བྱེད་པའི་ཡེ་ཤེས་ཏེ། །ཡུལ་དང་ཡུལ་ཅན་ཡེ་ཤེས་ཏེ། །རྟོགས་པ་འཁོར་བ་བདག་ལ་སྐྱོབ། །བྱེ་བྲག་སྔགས་ཀྱི་དབྱེ་བ་གསུམ། །གསང་སྔགས་རིག་སྔགས་གསང་སྔགས་ཡིན། །གསང་སྔགས་དོན་ནི་རྣམ་པ་བཞི། །བཟོད་པ་ཐོབ་པའི་རྒྱུར་འགྱུར་གཟུངས། །གསང་སྔགས་གཟུངས་དང་ཆོས་ཀྱི་གཟུངས། །དོན་གྱི་གཟུངས་ཞེས་བྱ་བར་འདོད། །བཟོད་པ་ཐོབ་པའི་རྒྱུར་འགྱུར་བས། །བསྐྱེད་རིམ་མཐར་ཕྱིན་རྣལ་འབྱོར་རམ། །མཚན་བཅས་རྫོགས་རིམ་རྣལ་འབྱོར་རམ། །མཚན་མེད་རྣལ་འབྱོར་ཨ་དང་ཧཱུཾ། །དེ་དག་བརྗོད་བྱ་ཐོབ་བྱེད་རྣམས། །རང་བཞིན་མེད་པར་སེམས་པ་ནི། །དེ་ལྟར་ཡུལ་དང་ཡུལ་ཅན་དེ། །རང་བཞིན་མེད་པར་རྟོགས་པ་ནི། །དགའ་བ་མཆོག་ཏུ་དགའ་ཆེན་སྐྱེས། །དེ་ལ་གཟུངས་ཐོབ་ཅེས་བྱའོ། །དྲན་དང་ཤེས་རབ་གཅིག་ཏུ་བྱས། །བཟོད་པ་འཛིན་པར་བྱེད་པས་གཟུངས། །གཟུངས་ཐོབ་
པ་དེས་དེ་མ་ཐག །ཕྱག་རྒྱ་ཆེན་པོའི་ཡེ་ཤེས་སྐྱེ། །མཐུན་པའི་བཟོད་པ་ཆེན་པོ་སྟེ། །དོན་དམ་ཆོས་རྣམས་བཟོད་པ་ནི། །དེ་སྐྱེས་རིང་པོ་མི་ཐོགས་པར། །ཕྱག་རྒྱ་ཆེན་པོའི་ཡེ་ཤེས་ཐོབ། །གསང་སྔགས་ཀྱི་ནི་གཟུངས་ཤེས་པ། །དེ་ཡང་ཕྱག་རྒྱ་ཆེན་པོ་ནི། །ཐོབ་པ་ཡན་ཆད་གང་ཟག་དེས། །རང་གི་ཏིང་ངེ་འཛིན་དང་ནི། །སྔོན་གྱི་སྨོན་ལམ་སྟོབས་བསྐྱེད་པས། །གསང་སྔགས་ཚིག་ནི་འདི་དག་གིས། །སེམས་ཅན་རྣམས་ཀྱི་ནད་སོགས་པ། །མེད་པར་གྱུར་ཅིག་ཅེས་བརྗོད་ཅིང་། །ཏིང་འཛིན་དབང་གི་སྟོབས་ཀྱིས་ནི། །སེམས་ཅན་རྣམས་ཀྱི་ཡམས་ནད་སོགས། །མེད་ཅིང་བྱིན་བརླབས་ལྷར་འགྲུབ་འགྱུར། །དེས་ན་ཏིང་ངེ་འཛིན་གྱི་དབང་། །དེ་ལྟར་གྱུར་པས་གསང་སྔགས་རྣམས། །འཛིན་པར་བྱེད་པས་གསང་སྔགས་གཟུངས། །ཆོས་ཀྱི་གཟུངས་ཞེས་བྱ་བ་ཡང་། །ཕྱག་རྒྱ་ཆེན་པོ་ཐོབ་པ་འམ། །སྟོན་པ་མཁའ་འགྲོའམ་བླ་མ་ཡིས། །སྔོན་ཆད་མ་ཐོབ་མ་ཤེས་པའི། །བདག་ཉིད་གསང་བའི་ཆོས་བཤད་པ། །ཐོས་པ་ཙམ་གྱིས་མི་བརྗེད་འཛིན། །དྲན་པ་ཤེས་རབ་ཆོས་ཀྱི་གཟུངས། །དོན་གྱི་གཟུངས་ནི་དེ་བཞིན་དུ། །གསུངས་པའི་ཆོས་རྣམས་དེ་དག་ནི། །དོན་རྣམས་མི་བརྗེད་འཛིན་པ་ནི། །དྲན་པ་ཤེས་རབ་དོན་གྱི་གཟུངས། །དེ་ལ་རིག་སྔགས་ཞེས་བྱ་བ། །སྟོང་པ་ཆེན་པོའི་ཡེ་ཤེས་དེ། །ཡེ་ཤེས་ཡུལ་དུ་བྱས་རྟོགས་པས། །མ་རིག་སྤངས་ཤིང་རིག་པ་སྐྱེད། །དེ་ཕྱིར་རིག་སྔགས་ཞེས་བྱའོ། །གསང་སྔགས་མཚན་རྒྱུད་སྔགས་དང་དོན། །འདི་ཞེས་ངེས་པར་ཤེས་པར་བྱ། །མཚན་ནི་གསང་སྔགས་ཞེས་བྱ་སྟེ། །སྣོད་མ་ཡིན་ལ་གསང་བ་དང་། །བློ་ཆུང་ཐེག་པ་དམན་ལ་གསང་། །གསང་ཐུབ་དངོས་གྲུབ་མི་ཡལ་ཕྱིར། །སངས་རྒྱས་རྣམས་ཀྱིས་གསང་བར་བསྔགས། །དེ་ཕྱིར་གསང་སྔགས་ངེས་པའི་མཚན། །རྒྱུད་ནི་འདྲེལ་ཕྱིར་རྒྱུད་ཅེས་བྱ། །གཞི་ཐབས་འབྲས་བུའི་འདྲེལ་པའི་ཕྱིར། །གཞི་ནི་བདེན་གཉིས་རང་བཞིན་གནས། །ཐབས་ནི་བསྒྲུབ་པའི་རང་བཞིན་གནས། །འབྲས་བུ་ཆོས་སྐུ་གཟུགས་སྐུར་གནས། །སྔགས་ནི་ནུས་པའི་མཐུ་ཆེན་དེ། །བསྒོམ་པའི་གསང་
སྔགས་བསྐྱེད་རྫོགས་གཉིས། །སྤྱོད་པའི་གསང་སྔགས་སྦྱོར་སྒྲོལ་གཉིས། །བཟླས་པའི་གསང་སྔགས་ཡེ་ཤེས་ཉིད། །བཟའ་བའི་གསང་སྔགས་བདུད་རྩི་ལྔ། །དོན་ནི་ཀུན་རྫོབ་དོན་དམ་གཉིས། །དོན་དམ་ཡུལ་དང་ཡུལ་ཅན་ཉིད། །ཡུལ་ནི་སྟོང་པའི་ཡེ་ཤེས་ཉིད། །ཡུལ་ཅན་ཞེས་སུ་བྱ་བ་ཡང་། །མི་རྟོག་ཡེ་ཤེས་ཡུལ་བྱས་ཤིང་། །དེ་རྟོགས་གཟུངས་སུ་གྱུར་པ་ཡིས། །གནོད་པའི་འཚེ་བ་ནུབ་པར་བྱེད། །ཀུན་རྫོབ་བསྔགས་དེ་ཐོབ་པའི་ཐབས། །སྔགས་ཀྱི་གཟུངས་དང་སྔགས་ཀྱི་མིང་། །བརྡའ་དང་ཚིག་སོགས་ཐམས་ཅད་ཡིན། །ཞེས་གསུངས་སོ། །པདྨ་དབང་ཆེན་དྲེགས་པ་དབང་སྡུད་ཀྱི་རྒྱུད་ལས། གསང་སྔགས་ཐམས་ཅད་དབང་དུ་སྡུད་པར། སྔགས་ཀྱི་ངོ་བོ་ངེས་ཚིག་དབྱེ་བ་སྟེ་ལེའུ་གཉིས་པའོ།། །།དེ་ནས་བཅོམ་ལྡན་འདས་ཀྱིས་གསང་སྔགས་ཀྱི་ལམ་རྣམ་པར་བཀོད་པས་སྔགས་ཐམས་ཅད་དབང་དུ་བསྡུ་བ་འདི་གསུངས་སོ། །འབྲས་བུའི་ཐེག་ཆེན་གསང་སྔགས་འདི། །ཁྱད་པར་གྱུར་ཕྱིར་ཁྱད་པར་ཆེ། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་གྱུར་དང་། །དོན་གཅིག་ཕྱིར་ནའང་མ་རྨོངས་པས། །སྔགས་ཀྱི་ཐེག་པ་ཁྱད་པར་འཕགས། །འབྲས་བུ་ཉིད་དུ་ལམ་ཤེས་པས། །ཚེ་ལུས་གཅིག་ལ་རྫོགས་སངས་རྒྱ། །དེ་ལ་གསང་སྔགས་སློབ་མ་ནི། །སྣོད་དང་ལྡན་པ་གཅེས་པ་སྟེ། །དེ་ཕྱིར་དམ་ཚིག་སྲོག་ལྡན་གཞུག །དམ་ཚིག་མི་ལྡན་སྤང་བར་བྱ། །དམ་ཚིག་དང་ལྡན་བཟློག་པ་ནི། །མཁའ་འགྲོ་མ་ཡི་འཚེ་བ་དང་། །དུས་མ་ཡིན་པར་འཆི་བ་དང་། །ཤི་ནས་དམྱལ་བར་འགྲོ་བའོ། །དམ་ཚིག་མི་ལྡན་བཅུག་པ་ཡང་། །ཚུལ་དེ་ཉིད་དུ་ཤེས་པར་བྱ། །ཐེག་ཆེན་སྔགས་ཀྱི་སྤྱོད་པ་ལ། །སྐྱོན་འདོགས་སྨོད་པ་བྱེད་པ་ནི། །མཁའ་འགྲོ་མ་ཡིས་མྱུར་དུ་གསོད། །དེ་ནས་དམྱལ་བར་སྐྱེ་བར་འགྱུར། །དེས་ན་ཟབ་མོའི་སྤྱོད་པ་ལ། །སྐྱོན་འདོགས་སྨོད་པ་སྤང་བྱའོ། །སྐལ་དང་ལྡན་པའི་གང་ཟག་དེ། །བླ་མ་དམ་པར་གྱུར་པ་ནི། །ཐེག་པ་མཐའ་དག་མ་ལུས་པའི། །གྲུབ་པའི་མཐའ་ལ་མ་རྨོངས་ཤིང་། །རྒྱུད་ཀྱི་དགོངས་པ་ཤེས་པ་དང་། །
དཀྱིལ་འཁོར་ལ་སོགས་ཀུན་མཁས་ཤིང་། །སྙིང་རྗེ་ཆེན་པོ་དང་ལྡན་པ། །བླ་མའི་བཀའ་ནི་ཐོབ་པ་ལ། །ཚོགས་ཀྱི་འཁོར་ལོའི་དགའ་སྟོན་བྱ། །ཡོན་དབུལ་དབང་བསྐུར་གསོལ་བ་བཏབ། །དེ་ལྟར་གསོལ་བ་བཏབ་པ་དང་། །བླ་མས་ཀྱང་ནི་བསྙེན་པ་དང་། །ས་ཆོག་ལྷག་གནས་ཆོ་ག་དང་། །དཀྱིལ་འཁོར་ཆོ་ག་རྒྱས་པ་དང་། །འཇུག་པ་དབང་བསྐུར་ཡོན་བླང་བྱ། །དེ་ལྟར་སློབ་མས་བླ་མ་ལ། །སེམས་བསྐྱེད་སྡོམ་བླང་དབང་མནོས་ནས། །དེ་ནས་སློབ་མ་དམ་པ་ཡིས། །དབང་སེམས་དེ་ཉིད་དམ་ཚིག་བསྲུང་། །དེ་བས་བསྲུང་ལ་འབད་པར་བྱ། །དམ་ཚིག་བསྲུངས་པའི་ཡོན་ཏན་ཡང་། །མཆོག་དང་ཐུན་མོང་དངོས་གྲུབ་འགྲུབ། །མ་བསྲུངས་པ་ཡི་སྐྱོན་རྣམས་ཀྱང་། །རྡོ་རྗེ་དམྱལ་བར་ངེས་པར་ལྟུང་། །དེ་ཡི་སྡུག་བསྔལ་བཟོད་པར་དཀའ། །མཚན་ཉིད་ཤེས་པར་བྱ་བ་ཡང་། །དེ་ལྟར་སྣོད་དུ་རུང་བ་དང་། །རང་གི་བླ་མ་དམ་པ་ལ། །ཐེག་ཆེན་སྔགས་ཀྱི་རྒྱུད་མཉན་ནས། །སྔགས་སོང་མཚན་ཉིད་ཤེས་པར་བྱ། །དེ་ནས་རང་སེམས་སྦྱང་བར་བྱ། །སེམས་སྦྱང་དོན་ནི་རྣམ་པར་དྲུག །སྐྱོན་ཡོན་ཡུལ་དང་རྒྱུད་ལ་བསྐྱེད། །སྤང་བྱ་སྤོང་ཐབས་འབྲས་བུ་ཡིན། །རྣལ་འབྱོར་རང་སེམས་མ་སྦྱངས་པར། །རྫོགས་པའི་བྱང་ཆུབ་མི་འགྲུབ་ལ། །དེ་མ་གྲུབ་པར་གྱུར་པས་ནི། །གཞན་གྱི་དོན་རྣམས་མི་འགྲུབ་པས། །དེ་ཕྱིར་སེམས་ནི་སྤྱད་པར་བྱའོ། །སེམས་སྦྱང་ཡོན་ཏན་བསམ་མི་ཁྱབ། །དཔག་ཏུ་མེད་པའི་དངོས་གྲུབ་ཐོབ། །ཡུལ་ནི་རྣམ་པ་གཉིས་ཡིན་ཏེ། །འཇུག་པའི་ཡུལ་ནི་སྔོན་བྱུང་གི། །སྟོན་པའི་སྤྱོད་པ་བཞིན་དུ་འཇུག །དམིགས་པའི་ཡུལ་ཡང་རྣམ་པ་གཉིས། །མཚན་བཅས་མཚན་མ་མེད་པ་སྟེ། །ཡེ་ཤེས་ཐིག་ལེ་ཕྱག་མཚན་སྐུ། །དེ་སོགས་མཚན་མ་ཅན་དུ་འདོད། །སྟོང་པ་ཉིད་ཀྱི་རང་བཞིན་ལ། །དམིགས་པ་མེད་པའི་ཚུལ་གྱིས་དམིགས། །ལམ་གྱིས་རྒྱུད་ལ་སྐྱེད་པ་ཡང་། །ཉེ་གྲོགས་ལམ་དངོས་དེ་གྲོགས་གསུམ། །ཉེ་བའི་གྲོགས་ཀྱང་རྣམ་པ་ལྔ། །བསྒྲུབ་པའི་གནས་དང་ཤིས་པའི་དུས། །མཚན་ལྡན་གྲོགས་དང་
མཐུན་པའི་རྫས། །ཤེས་པའི་སྟོན་པ་ཕུན་སུམ་ཚོགས། །ལམ་དངོས་འདི་ལྟར་འཇུག་པར་བྱ། །ཕྱི་ལམ་དངོས་མཆོག་རིམ་པ་རྣམས། །རྣལ་འབྱོར་བསྒོམ་པས་བསླབ་པར་བྱ། །བྱ་སྤྱོད་རྣལ་འབྱོར་རྒྱུད་གསུམ་ནི། །མཚན་མ་དང་བཅས་བསྒྲུབ་ཐབས་ནི། །མཚན་མ་མེད་པའི་བསྒྲུབ་པར་འདོད། །རྣལ་འབྱོར་རྒྱུད་ལུང་མན་ངག་གསུམ། །བསྐྱེད་རིམ་རྫོགས་རིམ་རྣམ་པ་གཉིས། །རྫོགས་ཆེན་ལམ་ནི་རང་སེམས་ཉིད། །སངས་རྒྱས་རང་སར་གྲོལ་བའོ། །ལམ་དེ་ཆོ་གའི་རིམ་པ་དང་། །དོན་རིམ་དགོས་པའི་རིམ་པ་བཤད། །ཆོ་གའི་རིམ་པ་བྱ་བ་ནི། །རྒྱས་པ་དཔེ་བྱས་བསྡུས་པ་ཡིན། །རྒྱས་པར་འདོད་པའི་རྣལ་འབྱོར་ནི། །བསྒྲུབ་པ་རྟེན་གྱི་གང་ཟག་གིས། །དང་པོ་བླ་མ་དམ་པ་ལས། །དམ་ཚིག་དབང་ཐོབ་བསྲུང་ལ་འབད། །གདམས་ངག་མནོས་ནས་ཉམས་སུ་བླངས། །གནས་གཞི་ཡིད་དུ་འོང་བ་རུ། །གྲོགས་ནི་ཆོས་དང་མཐུན་པའམ། །བདག་ཉིད་གཅིག་པུ་སྒྲུབ་པ་པོས། །དུས་ཚེས་བཟང་པོ་དག་ལ་འཇུག །གཏོར་མ་གཏང་ཞིང་སཱཙྪ་གདབ། །སྦྱིན་སྲེག་ཡི་དམ་བཟླས་པ་བྱ། །ཁྲུས་བྱས་མཎྜལ་མེ་ཏོག་བཀྲམ། །སྲུང་བའི་འཁོར་ལོ་བསྒོམ་པར་བྱ། །སེམས་ཅན་སྡུག་བསྔལ་བྲལ་བར་འདོད། །དེ་ནས་བྱམས་པ་བསྒོམ་པར་བྱ། །སེམས་ཅན་བདེ་དང་ལྡན་པར་འདོད། །དེ་ནས་དགའ་བ་བསྒོམ་པར་བྱ། །བདག་གིས་བྱང་ཆུབ་ཐོབ་པར་བྱ། །སེམས་ཅན་དོན་བྱ་སྤྲོ་བར་བྱ། །དེ་ནས་བཏང་སྙོམས་བསྒོམ་པར་བྱ། །དེ་གསུམ་མི་དམིགས་པར་ཡང་བསྒོམ། །དེ་ནས་ལྷ་དང་བླ་མ་སྤྲུལ། །ཕྱག་འཚལ་མཆོད་དང་སྡིག་བཤགས་སོགས། །བདུན་པོ་རྣམ་དག་བསོད་ནམས་ཚོགས། །དེ་ནས་ཏིང་འཛིན་རྣམ་པ་གསུམ། །ཡེ་ཤེས་ཚོགས་ལས་རང་ཉིད་ལྷ། །བྱ་སྤྱོད་རྣལ་འབྱོར་རྒྱུད་རྣམས་ནི། །སྟོང་པ་ཉིད་ཀྱི་སྔགས་བརྗོད་ནས། །བདག་ཉིད་དམ་ཚིག་སེམས་དཔར་བསྐྱེད། །མདུན་དུ་ཡེ་ཤེས་སེམས་དཔར་སྤྲུལ། །བླ་མེད་རྣལ་འབྱོར་བསྐྱེད་རྫོགས་དང་། །དབང་བསྐུར་སྐུ་གསུང་ཐུགས་བྱིན་བརླབ། །སྤྱན་དྲང་བཞུགས་མཆོད་བསྟོད་
པར་བྱ། །ཡི་གེ་ཕྱག་མཚན་ཐིག་ལེ་སྐུ། །ཕྲ་མོ་སྤྲོ་བསྡུ་འབར་འཛག་ལ། །དམིགས་ནས་རྫོགས་རིམ་བསྒོམ་པར་བྱ། །སྐྱེ་བར་གྱུར་ན་ངག་བཟླས་བྱ། །ཤིན་ཏུ་སྐྱོ་བར་གྱུར་པ་ན། །མཆོད་བསྟོད་བྱས་ལ་སྤྱན་དྲངས་པ། །རང་བཞིན་གནས་སུ་གཤེགས་སུ་གསོལ། །སྤྲུལ་པ་རྣམས་ནི་རང་ལ་བསྡུ། །དེ་ཡང་མཚོན་པའི་དཔེ་བཤད་པ། །སྙིང་རྗེ་རྩ་བ་ལྟ་བུ་ལ། །བྱམས་པ་སྡོང་པོ་ཡིན་པར་འདོད། །དགའ་བ་ཡལ་ག་རྒྱས་པ་སྟེ། །ཚོགས་གཉིས་ལོ་མ་ལྟ་བུ་ལ། །རྣལ་འབྱོར་གཞན་ནི་མེ་ཏོག་འདྲ། །བསྒྲུབ་པའི་རྣལ་འབྱོར་པ་ཡི་རྒྱུད། །ཡོངས་སུ་སྨིན་པ་འབྲས་བུ་ཡིན། །བསྡུས་པའི་ཆོ་ག་རིམ་པ་བཞིན། །བྱ་སྤྱོད་རྣལ་འབྱོར་བསྒོམ་པ་ཡང་། །བདག་ཉིད་ལྷ་རུ་བསྐྱེད་བྱས་ནས། །འཁོར་གྱི་དཀྱིལ་འཁོར་མདུན་དུ་སྤྲུལ། །མར་མེ་གྱེས་པའི་ཚུལ་གཉིས་སུ། །གཅིག་ནི་དཀྱིལ་འཁོར་གཙོ་བོར་སྣང་། །གཅིག་ནི་ལས་ཀྱི་ལྷར་བྱས་ནས། །མཆོད་བསྟོད་དེ་བཞིན་ཐམས་ཅད་བྱ། །དེ་ནི་ཕྱི་ནང་ཐུན་མོང་ཡིན། །ཁྱད་པར་ལམ་དུ་བཤད་པ་ནི། །རྣལ་འབྱོར་བླ་ན་མེད་པ་ནི། །བདག་ཉིད་ལྷ་རུ་གསལ་བྱས་ནས། །དབང་བསྐུར་བྱིན་བརླབ་སྤྱན་དྲངས་ནས། །བདག་དང་གཉིས་སུ་མེད་བྱས་ཏེ། །བདག་ཉིད་ལྷ་ཡི་སྙིང་ག་ནས། །ལྷ་མོར་སྤྲུལ་ནས་བྱ་བ་འམ། །འཁོར་གྱི་ལྷ་མོས་བདག་ཉིད་ལ། །མཆོད་བསྟོད་ལ་སོགས་བྱས་ནས་ནི། །ཡང་ནི་བདག་གི་སྙིང་གའམ། །སྐུ་ལ་སོགས་པར་བསྡུ་བར་བྱ། །བཟླས་པའི་དུས་ནི་ཐམས་ཅད་དུ། །མགལ་མེ་བསྐོར་བ་ལྟ་བུ་འམ། །ཐག་མདུང་འཕེན་པའི་ཚུལ་འདྲ་དང་། །སྒྲོ་ཡི་ཆུན་པོ་འདྲ་བ་དང་། །ཐིག་གུ་བསྒྲིལ་པ་ལྟ་བུ་དང་། །སྒྲོག་སྤེལ་ལྕགས་སྒྲོག་ལྟ་བུ་ནི། །སྐབས་ཀྱི་སྟོབས་ཀྱིས་ཤེས་པར་བྱ། །དེ་ལྟར་བསྒོམས་ཤིང་བསྒྲུབས་པ་ལས། །མཚན་མ་བརྟན་པོ་འབྱུང་བར་འགྱུར། །མཚན་མ་ཐོབ་ནས་མཚན་མེད་བསྒོམ། །མཚན་མ་མེད་པ་མངོན་གྱུར་ནས། །ཕྱག་རྒྱ་ཆེན་པོའི་དངོས་གྲུབ་ཡིན། །དེ་དག་གསང་སྔགས་ཕྱི་ནང་གི། །ཐུན་མོང་ལམ་དེ་གཉིས་སུ་དབྱེ། །དེ་
ནས་དོན་གྱི་རིམ་པ་ནི། །དེ་བཞིན་གཤེགས་པས་ཚད་མེད་བསྒོམས། །ཚོགས་ནི་རྣམ་གཉིས་བསགས་པ་དང་། །བདུད་རྣམས་ཐམས་ཅད་བཏུལ་བ་དང་། །ཐམས་ཅད་ལ་ཡང་མ་ཆགས་དང་། །སྔ་ཕྱི་བྱང་ཆུབ་མཆོག་སེམས་བསྐྱེད། །ཐོས་པའི་ཤེས་རབ་བྱང་བ་དང་། །བསམ་པའི་ཤེས་རབ་དཔྱད་པ་དང་། །བསྒོམ་པའི་ཤེས་རབ་མཐར་ཕྱིན་བསླབ། །དེ་བཞིན་རྣལ་འབྱོར་སྒྲུབ་པ་པོས། །ཚད་མེད་པ་དང་ཚོགས་གཉིས་དང་། །སྲུང་བའི་འཁོར་ལོ་པདྨ་དང་། །ཟླ་བ་དང་ནི་ཡི་གེ་དང་། །ཕྱག་མཚན་སྐུ་རུ་གྱུར་པ་བསྟན། །ཡང་ནི་དེ་བཞིན་གཤེགས་པ་ཡི། །ཚོགས་ཀྱི་ལམ་དང་སྦྱོར་བའི་ལམ། །མཐོང་བའི་ལམ་དང་བསྒོམ་པའི་ལམ། །མི་སློབ་པ་ཡི་ལམ་དང་ནི། །གཞན་དོན་སྐུ་གཉིས་བྱིན་བརླབས་སོ། །དེ་བཞིན་དུ་ནི་སྒྲུབ་པ་པོས། །བསོད་ནམས་ཚོགས་དང་ཡེ་ཤེས་ཚོགས། །ཡི་གེའམ་ཟླ་བ་ཚེས་པ་འམ། །ཟླ་རྒྱས་ཡི་གེ་འཕྲོ་འདུ་དང་། །ཟླ་བའམ་ཟླ་བ་གཉིས་པ་འམ། །ཕྱག་མཚན་དང་ནི་སྐུ་དག་བརྟན། །དེ་བཞིན་གཤེགས་པའི་འཕྲོ་འདུ་ནི། །མཛད་པ་སྤྲོ་དང་བསྡུ་བ་དང་། །བྱིན་གྱིས་བརླབ་པར་བསྟན་པའོ། །དེ་དག་བྱ་སྤྱོད་རྣལ་འབྱོར་འདོད། །ཡང་ནི་བླ་མེད་རྣལ་འབྱོར་པས། །བདུད་རྣམས་གདུལ་ཕྱིར་མཚམས་རྣམས་གཅད། །བསོད་ནམས་རྒྱུད་ལྡན་ཕུད་གཏོར་བརླབ། །མ་དག་རྒྱུད་ལ་བརྟེན་ནས་ནི། །ཚོགས་བསག་ཕྱིར་ན་ཚད་མེད་བསྒོམ། །དག་པ་སངས་རྒྱས་ལ་བརྟེན་ནས། །ཚོགས་བསག་ཕྱིར་ན་ཡན་ལག་བདུན། །བསོད་ནམས་ཚོགས་བསག་བཤགས་པ་བྱ། །ཡེ་ཤེས་ཚོགས་ནི་བསག་པའི་ཕྱིར། །སྐུ་གསུམ་བྱུང་ཚུལ་ཏིང་འཛིན་གསུམ། །སྣོད་རྣམས་སྦྱང་བས་གཞལ་ཡས་གསལ། །བཅུད་རྣམས་སྦྱང་བས་ལྷ་ཚོགས་གསལ། །ལམ་གྱི་དབང་རྣམས་བླང་བའི་ཕྱིར། །ཡེ་ཤེས་རྣམ་ལྔས་དབང་ཡང་བསྐུར། །ཟབ་མོའི་དབང་གསུམ་ལྡན་པས་ན། །སྐུ་གསུང་ཐུགས་སུ་བྱིན་གྱིས་བརླབ། །སངས་རྒྱས་སེམས་ཅན་གཉིས་མེད་ཕྱིར། །ཡེ་ཤེས་དམ་ཚིག་གཉིས་མེད་བསྲེ། །གང་ཡང་བདག་ལས་གཉིས་མེད་ཕྱིར། །
མཆོད་ཅིང་བསྟོད་དེ་བཟླས་པ་བྱ། །རྟག་པའི་མཐའ་ལ་མི་གནས་ཕྱིར། །སྟོང་ཉིད་རང་གི་ཡུལ་དུ་ཐིམ། །དགོས་པ་དེ་བཞིན་གཤེགས་པ་ཡིས། །བདེན་གཉིས་ལམ་བཞིར་བསྒོམ་བྱས་ཤིང་། །ཚོགས་བསགས་སྐུ་གསུམ་ཐོབ་པ་བཞིན། །རྣལ་འབྱོར་རྣམས་ཀྱིས་ཐུན་གཅིག་ལ། །བསྒོམ་པའི་ཚུལ་ཡང་དེ་བཞིན་སྣང་། །གོམས་པས་ཕྱིས་ཀྱང་དེ་བཞིན་འགྲུབ། །དེ་ཕྱིར་ཁྱད་པར་འབྲས་བུའི་ལམ། །དེ་ཡི་གྲོགས་ནི་རྣམ་པ་ལྔ། །གཏོར་མ་སྦྱིན་སྲེག་རབ་ཏུ་གནས། །ཚ་ཚྭ་བུམ་པས་དབང་བསྐུར་རོ། །བདག་གཞན་བར་ཆད་ཉེར་ཞི་ཕྱིར། །གཏོར་མའི་ཆོ་ག་བྱ་བ་ཡང་། །མ་ཆག་གཏོར་བས་གཏོར་མ་སྟེ། །འབྱུང་པོ་སྤྱི་ཡི་གཏོར་མ་དང་། །ལྷ་མགྲོན་སོ་སོའི་གཏོར་མ་ཡིན། །ལྷ་ཚིམ་བར་ཆད་བགེགས་ལ་སོགས། །ཞི་ཕྱིར་སྦྱིན་སྲེག་ཆོ་ག་བྱ། །རྟོགས་སྒྲིབ་ཉམས་ཆགས་ལ་སོགས་བསྲེག །གང་འདོད་དངོས་གྲུབ་སྦྱིན་པར་བྱེད། །དོན་དམ་སྦྱིན་སྲེག་མི་རྟོག་བསྒོམ། །ཀུན་རྫོབ་སྦྱིན་སྲེག་ཕྱི་དང་ནང་། །ནང་ནི་རང་གིས་བཟའ་བ་ཉིད། །ཕྱི་ཡི་སྦྱིན་སྲེག་རྣམ་པ་གཉིས། །ལས་རྣམས་ཐམས་ཅད་སྦྱིན་སྲེག་དང་། །ལས་བཞི་སོ་སོའི་སྦྱིན་སྲེག་གོ། །དེ་ཉིད་གང་མོས་རིགས་ལྔ་དང་། །ཕྲིན་ལས་དབང་དུ་བྱ་བ་ཡིན། །དངོས་གྲུབ་ཤིན་ཏུ་མྱུར་བ་དང་། །སྐུ་གསུང་ཐུགས་རྟེན་ཁྱད་པར་ཕྱིར། །རབ་གནས་བཟང་པོའི་ཆོ་ག་བྱ། །ཁྱད་པར་གྱུར་པས་རབ་ཏུ་གནས། །རབ་ཏུ་གནས་པ་རྣམ་པ་གསུམ། །སྐུ་གཟུགས་གླེགས་བམ་རྡོ་རྗེ་དྲིལ། །བསོད་ནམས་ཁྱད་པར་ཅན་བསགས་ཕྱིར། །ཚྭ་ཚྭ་གདབ་པའི་ཆོ་ག་བྱ། །མཆོད་པའི་ཡུལ་གྱུར་ཚྭ་ཚྭ་བཤད། །དབྱེ་བ་རྣམ་པ་གཉིས་ཡིན་ཏེ། །ཆོ་ག་རྒྱས་བསྡུས་ཕྲལ་དུ་བྱ། །བག་ཆགས་སྦྱངས་དང་དབང་བསྐུར་ཕྱིར། །བུམ་པའི་ཆོ་ག་རབ་ཏུ་བྱ། །ཡོན་ཏན་ཐམས་ཅད་འདུ་བ་དང་། །དགོས་པ་བྱེད་ཕྱིར་བུམ་པའོ། །བུམ་པ་རྣམ་པ་གཉིས་ཡིན་ཏེ། །སྐབས་སུ་བྱ་དང་དཀྱིལ་འཁོར་བཞེངས། །གནས་སྐབས་ཕྱི་ནང་གསང་བ་དེ། །ཕྱི་ནི་རྫ་པ་རིན་ཆེན་
སོགས། །ནང་ནི་ཐོད་པ་མཚན་དང་ལྡན། །གསང་བ་ཡུམ་གྱི་བྷ་ག་ཉིད། །དཀྱིལ་འཁོར་དབང་གི་བུམ་པ་དང་། །ཁྲུས་དང་མཆོད་པ་ཚེ་བུམ་ཡིན། །སྤང་བར་བྱ་བ་རྣམ་པ་གཉིས། །ངན་རྟོག་སེམས་བདག་མཚན་འཛིན་དང་། །བཟང་རྟོག་སངས་རྒྱས་བདག་ཏུ་འཛིན། །སྤོང་བའི་ཐབས་ནི་རྣམ་པ་གཉིས། །ངན་རྟོག་བཟང་རྟོག་བདག་གིས་སྤང་། །བཟང་རྟོག་མི་རྟོག་པ་ཡིས་སྤང་། །སྤྱོད་པ་འགྲོ་ཉལ་འདུག་སྡོད་ཀུན། །ཉིད་ཀྱི་ལྷ་ཡི་ང་རྒྱལ་ལྡན། །འགྲོ་དུས་ལྷ་ཡི་སྤྱོད་པ་ཡང་། །ལྷག་པའི་ལྷའམ་རིགས་གསུམ་མམ། །ལྷའམ་ལྷ་མོ་གང་འདོད་བྱ། །སྐབས་སུ་ལུས་ཕྱག་བསྐོར་བ་བྱ། །མཎྜལ་དབུལ་དང་ཡི་དམ་བཟླས། །བརྟུལ་ཞུགས་སྤྱོད་པ་རབ་ཏུ་བྱ། །ཡངས་པའི་འབྲས་བུ་རྣམ་པ་གཉིས། །ཐུན་མོང་དོན་ཤེས་གྲུབ་ཆེན་བརྒྱད། །མཆོག་ལ་རིག་འཛིན་རྣམ་བཞི་དང་། །སྐུ་གསུམ་སྐུ་བཞི་སྐུ་ལྔ་སོགས། །ཕྱག་རྒྱ་ཆེན་པོ་མཆོག་བསྒྲུབ་བོ། །ཞེས་གསུངས་སོ། །པདྨ་དབང་ཆེན་དྲེགས་པ་དབང་སྡུད་ཀྱི་རྒྱུད་ལས། གསང་སྔགས་ཀྱི་ལམ་དབང་དུ་བསྡུ་བ་སྟེ་ལེའུ་གསུམ་པའོ།། །།དེ་ནས་འཁོར་གྱི་བྱང་ཆུབ་སེམས་དཔའ་ལ་སོགས་པ་རྣམས་ཀྱིས། བཅོམ་ལྡན་འདས་གར་གྱི་དབང་ཕྱུག་ཆེན་པོ་ལ་རང་རང་གི་མངོན་པ་དོན་དུ་གཉེར་བར་བྱ་བའི་ཕྱིར། མགྲིན་གཅིག་ཏུ་འདི་སྐད་ཅེས་ཆེད་དུ་བརྗོད་དོ། །ཧཱུཾ་མི་གནས་ཡེ་ཤེས་ཐུགས་ཀྱི་དཀྱིལ་འཁོར་ནས། །འབར་བའི་རྒྱལ་པོ་ཁྲོ་བོ་ཀུན་གྱི་རྗེ། །གར་དགུ་འཇིགས་པའི་ཆ་ལུགས་ཧཱུཾ་སྒྲ་ཅན། །འཁོར་བཅས་ཁྲོ་བོའི་ཚོགས་རྣམས་གཤེགས་སུ་གསོལ། །ཛཿཧཱུཾ་བཾ་ཧོཿ། ཨེ་ཧྱེ་ཧི་བྷ་ག་བཱན་ས་མ་ཡ་སྟྭཾ། སྲིད་གསུམ་འདྲེན་མཛད་ཐར་ལམ་འདྲེན་པའི་དཔལ། །རིགས་ལྔ་བདེ་གཤེགས་སེམས་དཔའ་སྲས་བཅས་ཚོགས། །ཐབས་དང་ཤེས་རབ་གཉིས་མེད་འགྲོ་དོན་མཛད། །རྡོ་རྗེ་བཀོད་པའི་དཀྱིལ་འཁོར་ཚོགས་ལ་ཕྱག་འཚལ་ལོ། །དབང་དྲག་ཀླུ་རྒྱལ་འཇོམས་མཛད་གསུང་ཉིད་ལྷ། །ཐུགས་རྗེ་ཐབས་མཁས་ཕྲ་མེན་འདུལ་མཛད་ཅིང་། །ཕྲིན་ལས་སྣ་ཚོགས་རྟ་མགོ་ལྗང་གུར་སྟོན། །འགྲོ་འདུལ་བརྗིད་པའི་སྐུ་ལ་ཕྱག་འཚལ་ལོ། །ཐིག་ལེ་ཆོས་སྐུ་གདལ་བའི་དཀྱིལ་འཁོར་ནས། །
གཉིས་མེད་སྣ་ཚོགས་མ་བསྒྲིབས་ས་ལེར་གསལ། །ཐུགས་རྗེ་ཡེ་ཤེས་སེམས་དཔའ་སྔགས་ཀྱི་གནས། །ཕྱག་རྒྱའི་རྟེན་གནས་འཕྲོ་འདུ་མཛད་ལ་ཕྱག་འཚལ་ལོ། །མཁའ་འགྲོ་བཅུ་དྲུག་རབ་ཏུ་རྔམ་ཆེན་སྐུ། །འཇིགས་པའི་མཚོན་ཆས་འགྲོ་བའི་ལས་རྒྱུད་སྟོངས། །གནས་རྣམས་སོ་སོ་སྣ་ཚོགས་སྟོན་པའི་སྐུ། །འགྲོ་བ་འདུལ་བའི་ལྷ་ལ་ཕྱག་འཚལ་ལོ། །དྲེགས་བྱེད་དབང་སྡུད་ཁྲོ་བོ་གནོན་པའི་སྟོབས། །མི་མཐུན་ཚོགས་འཇོམས་གཉེན་པོའི་ཚུལ་དུ་གནས། །བརྗིད་པའི་ཆས་བརྒྱད་ཕྲིན་ལས་བླ་ན་མེད། །བདུད་འདུལ་ཁྲོ་བོའི་ཚོགས་ལ་ཕྱག་འཚལ་ལོ། །ཐུགས་རྗེའི་མཛད་པས་ཁམས་གསུམ་ཟིལ་གྱིས་གནོན། །ཐབས་དང་ཤེས་རབ་འདམ་རྫབ་མུན་པ་སེལ། །གསང་བའི་ཕྱག་རྒྱ་དྲུག་པའི་ཏིང་འཛིན་གསལ། །ཁམས་གསུམ་གནོན་པའི་ལྷ་ལ་ཕྱག་འཚལ་ལོ། །དུས་གསུམ་སངས་རྒྱས་ཀུན་གྱི་རང་བཞིན་ལས། །དཀྱིལ་འཁོར་ཐམས་ཅད་སྐུ་གསུང་ཐུགས་སུ་སྡུད། །གནས་གསུམ་སྟོན་པས་ཆོས་བཤད་རྒྱུད་སྦྱངས་ཤིང་། །བྱིན་རླབས་ནམ་མཁའི་མཛོད་ལ་ཕྱག་འཚལ་ལོ། །བདེ་བར་གཤེགས་པ་ཐམས་ཅད་བསྐྱེད་པའི་ལམ། །ཡུམ་གྱི་ཚུལ་གྱིས་བདེ་ཆེན་དགྱེས་པར་མཛད། །རང་རིག་མཁའ་འགྲོའི་གཙོ་མོ་དབྱིངས་ཀྱི་ཚུལ། །ཆགས་ཆེན་གཟི་ལྡན་གཙོ་ལ་ཕྱག་འཚལ་ལོ། །ཆོས་སྐུ་མཉམ་ཉིད་བདེ་ཆེན་བྱང་ཆུབ་སེམས། །མ་བསྒྲིབས་ཕྱི་ནང་མེད་པའི་བདེ་གསལ་བའི། །ཟབ་མོའི་ཚུལ་གནས་རང་བཞིན་གཡོ་བ་མེད། །སྣང་སྟོང་བདེ་བའི་སྐུ་ལ་ཕྱག་འཚལ་ལོ། །ཨ་ཏི་པུ་ཧོཿ། པྲ་ཏཱིཙྪ་ཧོཿ། པདྨ་བནྡ་ནཾ་ཀ་རོ་མི། ཨ་ལ་ལ་ཧོཿ། ཨོཾ་དགའ་བོ་རོལ་མོ་གླུ་བྲོ་གར་གྱི་ཚོགས། །འདོད་པའི་ཡོན་ཏན་ཁྱད་པར་འཕགས་པའི་སྤྲིན། །སྟོང་གསུམ་མཐུན་པར་སྣང་བའི་སྤྱོད་ཡུལ་དུ། །ལྷ་མོའི་ཚོགས་བཅས་ཟག་པ་མེད་པར་དབུལ། །ཨཱོཾ་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཏརྔྷེ་ཨུདྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། ཨཱོཾ་བཛྲ་དྷཱུཾ་བེ་ཧཱུཾ་སྭཱ་ཧཱ། ཨཱོཾ་བཛྲ་པུཥ྇་ཧཱུཾ་སྭཱ་ཧཱ། ཨཱོཾ་བཛྲ་ཨཱ་ལོ་ཀེ་ཧཱུཾ་སྭཱ་ཧཱ། ཨཱོཾ་བཛྲ་ནཻ་བི་དྱ་ཧཱུཾ་སྭཱ་ཧཱ། ཨཱོཾ་བཛྲ་གནྡྷེ་ཧཱུཾ་སྭཱ་ཧཱ། རང་བྱུང་བདུད་རྩི་ལྔ་དང་སྨན་སྣ་ཚོགས། །མཉམ་
པའི་དོན་གྱིས་དབྱེར་མེད་རང་བཞིན་གཅིག །དམ་རྫས་ལྔ་པོ་ལེགས་སྦྱར་བྱིན་བརླབས་པས། །གཉིས་མེད་དགྱེས་པའི་དམ་ཚིག་བསྐང་གྱུར་ཅིག །མ་ཧཱ་པཉྩ་ཨ་མྲྀ་ཏ་ཁ་ཁ་ཁཱ་ཧི་ཁཱ་ཧི། ཨོཾ་ཧུ་ལུ་ཧུ་ལུ་རཾ་ཛྭ་ལ་ཨོཾ་ཨེ་ཨཱ་ར་ལི། ཛཿཧཱུཾ་བཾ་ཧོཿ།ཨ་ལ་ལ་ཧོ། ཨཱོཾ་མ་ཏྲཾ་རཱུ་ཏྲ་ཧ་ལ་ཧ་ལ་ཧཱུཾ་ཕཊ། དུག་གསུམ་དངོས་པོའི་ཚོགས་རྣམས་སྦྱང་བའི་ཕྱིར། །རྔམ་པའི་ཁྲོ་ཚོགས་སྤྲུལ་པ་ཕྱོགས་བཅུར་སྤྲོས། །ཁྲོ་འཛུམ་ཕྱག་རྒྱའི་ཚོགས་རྣམས་བསྟེན་མཛད་ཅིང་། །ཧ་ཧེ་རུ་ལུ་གསང་སྔགས་དྲག་ཏུ་བརྗོད། །ཧ་ལའི་རྡོ་རྗེའི་བཤུག་པའི་གད་རྒྱངས་ཀྱིས། །བདུད་དང་སྲིན་པོའི་ཚོགས་རྣམས་བརྒྱལ་བར་མཛད། ཨཱོཾ་སརྦ་པཱ་པཾ་ཀ་ར་ཧི་ཏ་ས་བི་ཤྭ་མ་ཏང་རཱུ་ཏྲ་ཧཱུཾ་ཕཊ། ཨཱོཾ་པཱ་པ་ཀ་ར་ཧི་ཏ་ས་བི་ཤྭ་ཁ་ཊྭཱཾ་ག་རཱུ་ཏྲ་ཧཱུཾ་ཕཊ། ཨཱོཾ་སརྦ་པཱ་པ་ཀ་རེ་ཧི་ཏ་ས་བི་ཤྭ་ཨ་ཀ་ར་ཤ་རཱུ་ཏྲ་ཧཱུཾ་ཕཊ། ཧཱུཾ་དཔལ་ཆེན་ཐུགས་ཀྱི་ཕོ་ཉའི་ཚོགས། །དཔལ་ཆེན་རྡོ་རྗེ་ཐོག་ཐོག་སེར་ཆེན་འབེབས། །ཧཱུཾ་དང་ཕཊ་ཀྱིས་སྲིད་གསུམ་འཁོར་བ་འཇིགས། །ཧཱུཾ་ཆེན་ཧཱུཾ་གི་བྱིན་རླབས་བསམ་མི་ཁྱབ། །རྡོ་རྗེ་ཁྲག་འཐུང་ཁྲག་གི་རྒྱ་མཚོ་སྐེམ། །རྡོ་རྗེའི་མཚོན་ཆ་གནམ་ལྕགས་མཐུ་འདྲ་བས། །གསང་སྔགས་ལོག་པར་ལྟ་བའི་བདུད་རྣམས་འཇོམས། །རྡོ་རྗེའི་སེར་ཆེན་རང་བཞིན་ཐོག་བཅས་འཁྲུགས། །ཉམས་པའི་སྙིང་སྲོག་ཁྲག་བཅས་ཐང་ལ་ཕྱུང་། །ཡེ་ཤེས་རྔམ་པའི་ཐུགས་རྗེ་ཨ་ལ་ལ། །ཨཱོཾ་པདྨ་མ་ཧཱ་ཤྲཱི་ཧེ་རུ་ཀ་བྷནྡྷ་བྷནྡྷ་གརྫ་གརྫ་ཧ་ལ་ཧ་ལ་ཧཱུཾ་ཕཊ། ཧཱུཾ་ཐུགས་རྗེ་རྣམ་དག་པདྨའི་རང་བཞིན་ལས། །ཐུགས་རྗེའི་སྤྲུལ་པ་ཐར་ལམ་བྱང་ཆུབ་སེམས། །ཕྱོགས་བཞི་དབུས་ལྔར་བརྗིད་པའི་དབུ་མཆོག་ནི། །གྲུབ་པའི་སངས་རྒྱས་མཁྱེན་ལྔ་ཡེ་ཤེས་ལྔ། །དཔའ་ལུས་ཁྱད་པར་འཕགས་པ་ཞལ་གྱི་དབྱིབས། །དབང་མཆོག་ལྷུན་གྱིས་གྲུབ་པའི་རྟ་སྐད་ཅན། །ཐུགས་ལས་ཐུགས་རྗེ་ཐབས་མཁས་སྤྲུལ་པ་ནི། །ཡེ་ཤེས་བྱིན་རློབ་ཁྲོ་རྒྱལ་འབུམ་དུ་སྟོན། །སྨིན་མཛད་སྨོན་ལམ་ཡུན་རིང་ལས་གྲུབ་པའི། །དམིགས་པའི་མཐའ་བྲལ་པདྨ་ཡུམ་གྱི་ཚུལ། །ཆོས་རྣམས་མ་ལུས་གསལ་བར་གཟིགས་པ་ཡི། །ཆགས་མེད་ཐུགས་རྗེ་པདྨ་སྤྱན་གྱི་ཚུལ། །སྒྲ་སྐད་ཐམས་ཅད་མཐའ་ལས་
གྲོལ་བ་ཡི། །ཟབ་དང་རྒྱ་ཆེ་ཆོས་ཀྱི་མཚན་ཉིད་གསན། །ཤངས་ཀྱི་རླུང་སྒྲོམ་དུག་གསུམ་རྩད་ནས་གཅོད། །ཞལ་གྱི་ཧོམ་ལྔ་གདངས་ལས་རྒྱུད་ལྔ་སྒྲོལ། །རྣོ་དབལ་མཆེ་བས་སྐྱེ་ཤི་རྩད་ནས་གཅོད། །ལེ་བརྒན་ལྗགས་ཀྱིས་གསུང་རབ་རྒྱ་མཚོ་འཆད། །རོལ་པའི་ཕྱག་གིས་འགྲོ་བ་འདུལ་ལ་མཁས། །གཤོག་བཞི་བརྐྱངས་པས་ཕྲིན་ལས་རྣམ་བཞི་མཛད། །ཞབས་བརྒྱད་རོལ་པས་གཟིར་གནོན་མཛད་པའི་ཚུལ། །སྐུ་ཆེ་ཡན་ལག་རགས་ཏེ་རི་བོ་བཞིན། །ཐུགས་མཆོག་ཡེ་ཤེས་སྟོང་གི་ཉི་མ་བརྡལ། །ལྷ་ཡི་ལྷ་མཆོག་བྱིན་རླབས་འབྱུང་བའི་གནས། །ངོ་མཚར་རོལ་པས་ཁྲོ་བོ་ཀུན་གྱི་རྗེ། །དཔའ་བོ་ཐབས་མཆོག་མངའ་ལ་ཕྱག་འཚལ་བསྟོད། །དེ་རྗེས་འཁོར་ལ་དམ་ཚིག་སྦྱིན་མཛད་ཅིང་། །གཏོར་མ་རྒྱ་ཆེན་བྱིན་བརླབ་སྔགས་ཀྱིས་དབུལ། །ཨོཾ་ཨཱཿཧཱུཾ་སརྦ་པཉྩ་ཨ་མྲྀ་ཏ་ས་མ་ཡོ་ག་སིདྡྷི་ཧཱུཾ། ས་ཧོ་ཀ་མ་ལ་པུ་ར་ཏ་ཧཱུཾ། ཨཱོཾ་བཛྲ་ས་མ་ཡ་མ་ཧཱ་ཀྲོ་ཏ་ཨོཾ་ཨཱཿཧཱུཾ། མ་ཧཱ་ཡོ་ག་ཙིཏྟ་རཾ། བ་མེ་ལ་རཀྟ་ཁཱ་ཧི་ཁཱ་ཧི་ཧཱུཾ། ཨོཾ་ཁ་ཁ་ལེ་ལེ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཨི་དན་ས་མ་ཡ་ཨ་ལ་ལ་ཧོ། ཐུན་སྐབས་ཐ་མའི་གཏོར་མ་ལ། །བསྲེག་སྦྱང་བྱིན་བརླབ་འདོད་ལྔ་བདུད་རྩིའི་ཚོགས། །རང་གི་སྔགས་ཀྱིས་མགྲོན་ཚོགས་ཀུན་བསྡུས་ཏེ། །དེ་དག་སྦྱང་ཞིང་བྱིན་བརླབས་ཕྱག་རྒྱའི་རྒྱུ། །སྐུ་གསུང་ཐུགས་གསལ་རིགས་ཀྱི་ཅོད་པན་ཅན། །མཉམ་སྙོམས་ལོངས་སྤྱོད་བདུད་རྩིས་ཚིམ་གྱུར་ནས། །རང་ཉིད་ལྷ་དང་གཉིས་མེད་གནས་པ་དང་། །རྒྱལ་བའི་བསྟན་པ་བསྲུང་བའི་ཕྲིན་ལས་བཅོལ། །ཨོཾ་ལྷ་ཀླུ་གནོད་སྦྱིན་སྲིན་པོ་གཤིན་རྗེ་ཀླུ། །དྲི་ཟ་གྲུལ་བུམ་མེ་ལྷ་མཁའ་འགྲོའི་ཚོགས། །ལྷ་མིན་འདབ་བཟངས་དབང་ལྡན་སྲུལ་པོ་དང་། །འགྲོ་དྲུག་གནས་པའི་གང་ཟག་རྫུ་འཕྲུལ་ཅན། །སྙིང་རྗེ་ལན་ཆགས་མགྲོན་བཅས་མ་ལུས་ཀུན། །སྐུ་གསུང་ཐུགས་ཀྱི་ཕྱག་རྒྱ་སྦྱང་བྱས་ནས། །རང་རིག་ལྷས་བརྒྱན་གཉིས་མེད་གནས་པ་དག །བདུད་རྩི་དགའ་བའི་ལོངས་སྤྱོད་འདི་བཞེས་ལ། །བདག་གི་ཞི་རྒྱས་དབང་དྲག་ལས་བསྒྲུབ་ཅིང་། །རྣལ་འབྱོར་འཁོར་བཅས་བསྲུང་བར་མཛད་པ་དང་། །འགྲོ་བ་བདེ་ལེགས་ཕུན་སུམ་ཚོགས་མཛད་ཅིང་། །ནད་རྐྱེན་བར་ཆད་མ་ལུས་བསལ་བ་
དང་། །རྒྱལ་བའི་བསྟན་པ་རྗེས་སུ་བསྲུང་མཛོད་ལ། །རང་གི་གནས་སུ་བདེ་བར་གཤེགས་པར་མཛོད། །ཨཱོཾ་ཧྲི་ཧ་ཧ་ཡ་དྷཱོ་ཏ་མ་བི་ན་ས་མ་ཡ་བ་ལིཾ་ཏ་ཁཱ་ཧི། ཨརྒྷཾ་མཱཾ་ས་ཁཱ་ཧི། ཞེས་གསུངས་སོ། །པདྨ་དབང་ཆེན་དྲེགས་པ་དབང་སྡུད་ཀྱི་རྒྱུད་ལས། ཡེ་ཤེས་དཀྱིལ་འཁོར་དབང་སྡུད་མཉེས་པའི་ལེའུ་སྟེ་བཞི་པའོ།། །།དེ་ནས་བཅོམ་ལྡན་འདས་པདྨ་དབང་ཆེན་ཧེ་རུ་ཀས་རྗེ་བཙུན་འཕགས་པ་གནོད་མཛེས་ཆུ་དབང་གི་སྒྲུབ་པའི་ཐབས་འདི་དག་གསུངས་སོ། །འདི་བསྒྲུབ་པ་ཡི་གང་ཟག་ནི། །བྱང་ཆུབ་མཆོག་ཏུ་སེམས་བསྐྱེད་པ། །སྡོམ་པ་དང་ནི་དམ་ཚིག་ལྡན། །དབང་བསྐུར་ཐོབ་ཅིང་བརྩོན་འགྲུས་ཅན། །བླ་མ་མཆེད་གྲོགས་དག་ལ་གུས། །དེ་ལྟ་བུ་ཡི་སྔགས་པས་བསྒྲུབ། །གནས་ནི་ཡིད་དུ་འོང་བ་དང་། །ཤིན་ཏུ་དབེན་པར་བྱ་བ་འམ། །རང་ཉིད་གང་དུ་གནས་ཀྱང་རུང་། །རྒྱུན་དུ་གང་དུ་འདུག་པར་བསྒྲུབ། །གཉིས་པ་བྱ་ཐབས་རྟེན་བཤད་པ། །གསེར་དངུལ་ཟངས་ཀྱི་ཤོག་བུ་ལ། །པདྨ་འདབ་བརྒྱད་གཉིས་བྱས་ལ། །གཅིག་ལ་གནོད་སྦྱིན་ཕོ་དགུ་བྲི། །གཅིག་ལ་གནོད་སྦྱིན་མོ་དགུ་བྲི། །དེ་ལ་རབ་གནས་ལེགས་བྱས་ནས། །དེ་གཉིས་ཁ་སྦྱར་མཉེས་བསམ་ལ། །མར་དང་སྦྲང་རྩི་ཀ་རས་གྲིལ། །ཟ་མ་ཏོག་གི་ནང་དུ་ནི། །མེ་ཏོག་སེར་པོས་བཀང་བ་ཡི། །དབུས་སུ་གའུ་སྩལ་བྱས་ནས། །མཎྜལ་གྲུ་བཞི་ཁྲུ་བརྒྱད་པ། །བྱི་དོར་ལེགས་བྱས་རྣམ་ལྔས་བྱུག །མེ་ཏོག་སེར་པོ་བཀྲམ་པའི་དབུས། །ཟ་མ་ཏོག་ནི་བཞག་ནས་ཀྱང་། །དུས་གསུམ་མཆོད་བསྟོད་བསྐོར་དང་བཟླས། །དེ་ལྟར་བྱེད་པའི་སྔགས་པ་ལ། །གྲུབ་ཆེན་བརྒྱད་ཀྱང་སྟེར་བྱེད་ན། །དངོས་གྲུབ་ཕལ་ཆེར་ལྟ་ཅི་དགོས། །དེ་ནས་བཅོམ་ལྡན་འདས་ཀྱིས་ལྷ་དང་གསང་སྔགས་བཤད་པ་འདིའོ། །ཨཱོཾ་ཛཾ་བྷ་ལ་ཛ་ལེནྡྲཱ་ཡ་སྭཱ་ཧཱ། དབུས་གནོད་འཛིན་གྱི་སྔགས་སོ། །ཨཱོཾ་མ་ཎི་བྷ་དྲཱ་ཡ་སྭཱ་ཧཱ།ཤར་ནོར་བུ་བཟང་པོའི་སྔགས་སོ། །ཨོཾ་པུརྞ་བྷ་དྲཱ་ཡ་སྭཱ་ཧཱ། ལྷོར་གང་བ་བཟང་པོའི་སྔགས་སོ། །ཨཱོཾ་དྷ་ན་པ་ཏ་ཡེ་སྭཱ་ཧཱ། ནུབ་ནོར་སྦྱིན་གྱི་སྔགས་སོ། །ཨཱོཾ་བཻ་ཤྲཱ་མ་ཎཱ་ཡ་སྭཱ་ཧཱ། བྱང་ནོར་སྦྱིན་ཆེན་པོའི་སྔགས་སོ། །ཨཱོཾ་ཀེ་ལི་མཱ་ལི་ནེ་སྭཱ་ཧཱ། ཤར་ལྷོ་རོལ་པའི་ཕྲེང་བའི་སྔགས་སོ། །ཨོཾ་མུ་ཁེན་དྲཱ་
ཡ་སྭཱ་ཧཱ། ལྷོ་ནུབ་སྒོའི་དབང་པོའི་སྔགས་སོ། །ཨཱོཾ་ཙ་རེནྡཱ་ཡ་སྭཱ་ཧཱ། ནུབ་བྱང་སྤྱོད་པའི་དབང་པོའི་སྔགས་སོ། །ཨཱོཾ་ཙི་པི་ཀུནྜ་ལི་ནེ་སྭཱ་ཧཱ། བྱང་ཤར་རྒྱལ་བ་འཁྱིལ་པའི་སྔགས་སོ། །ཨཱོཾ་བ་སུ་དྷཱ་རི་ཎྱཻ་སྭཱ་ཧཱ། དབུས་ནོར་སྦྱིན་མའི་སྔགས་སོ། །ཨཱོཾ་ཙནྡྲཱ་སྐཱནྟཱ་ཡཻ་སྭཱ་ཧཱ། ཤར་དུ་ཟླ་འོད་མའི་སྔགས་སོ། །ཨོཾ་ཨཱརྱ་ཡཻ་སྭཱ་ཧཱ། ལྷོར་འཕགས་མའི་སྔགས་སོ། །ཨོཾ་སུ་དཏྟཱ་ཡཻ་སྭཱ་ཧཱ། ནུབ་རབ་སྦྱིན་མའི་སྔགས་སོ། །ཨོཾ་དཏྟཱ་ཡཻ་སྭཱ་ཧཱ། བྱང་སྦྱིན་མའི་སྔགས་སོ། །ཨོཾ་ས་ར་སྭཏྱཻ་སྭཱ་ཧཱ། ཤར་ལྷོ་དབྱངས་ཅན་མའི་སྔགས་སོ། །ཨཱོཾ་དེ་བྱཻ་སྭཱ་ཧཱ། ལྷོ་ནུབ་ལྷ་མོའི་སྔགས་སོ། །ཨཱོཾ་གུཔྟ་ཡཻ་སྭཱ་ཧཱ། ནུབ་བྱང་སྦས་མའི་སྔགས་སོ། །ཨོཾ་སུ་བྷ་དྲཱ་ཡཻ་སྭཱ་ཧཱ། བྱང་ཤར་བཟང་མོའི་སྔགས་སོ། །ཨོཾ་ཛཾ་ཛཾ་བྷ་ལ་སྭཱ་ཧཱ། བཟླས་པའི་སྔགས་སོ། །ཨོཾ་ཛཾ་ཛཾ་བྷ་ལ་ཛ་ལེནྡྲ་དྷ་ན་མེ་དྷི་ཧྲཱྀཿསྭཱ་ཧཱ། བསྒྲུབ་པའི་སྔགས་སོ། །ཨོཾ་སྭཱ་ཧཱ། ལས་སྦྱོར་ཆུ་འབུལ་བའི་སྔགས་སོ། །གནོད་སྦྱིན་ཆེན་པོ་འདི་བརྒྱད་ཡང་། །སྐུ་མདོག་ཕྱོགས་མཐུན་དབུས་མ་སེར། །གཡས་པའི་ཕྱག་ན་ཨ་རུ་ར། །གཡོན་པ་ནེའུ་ལེའི་རྐྱལ་བུ་འཛིན། །དེ་ཡི་ཆུང་མ་དགུ་པོ་ཡང་། །དབུས་མ་གསེར་མདོག་ཕྱོགས་མཐུན་འཁོར། །གཡས་པ་མཆོག་སྦྱིན་ཕྱག་རྒྱ་ལ། །གཡོན་པ་འབྲས་ཀྱི་སྙེ་མ་འཛིན། །ཡང་ན་ཞལ་གསུམ་ཕྱག་དྲུག་སྟེ། །སྐུ་མདོག་རིགས་མཐུན་ཕྱོགས་ཀྱི་མདོག །གཡས་ན་ལྕགས་ཀྱུ་ཞགས་པ་དང་། །ནེའུ་ལེའི་རྐྱལ་པ་འཛིན་པའོ། །གཡོན་ན་བི་ཛ་པཱུ་ར་དང་། །རྡོ་རྗེ་ལྕགས་ཀྱུ་འཛིན་པ་དང་། །ནེའུ་ལེའི་རྐྱལ་པ་བསྣམས་པ་ནི། །བློ་མཆོག་རྣམས་ཀྱིས་བསྒོམ་པར་བྱ། །དེ་ནས་ཡི་གེ་དགོད་པ་ནི། །སྤྱི་བོར་ཨཱོཾ་སྟེ་ཁ་ལ་ཛཾ། །དཔུང་གཡས་བྷ་སྟེ་དཔུང་གཡོན་ལ། །སྙིང་ཁར་ཛ་སྟེ་བརླ་གཡས་ལེན། །བརླ་གཡོན་དྲ་ལ་གསང་བར་ཡ། །བྱིན་པར་སྭཱ་སྟེ་རྐང་མཐིལ་ཧཱ། །དེ་ནས་ཕྱག་རྒྱས་དགུག་པ་ཡང་། །ལག་གཉིས་སྙིང་གར་ཁུ་ཚུར་བཅང་། །གུང་མོའི་ཚིགས་ནི་དབུས་མ་དང་། །གསུམ་པོ་བཀུག་ལ་ཕྱག་རྒྱའོ། །དེ་ལ་ཆུ་འབུལ་མན་ངག་ནི། །ཟླ་བ་དང་ནི་རྡོ་རྗེ་བསམ། །ཡི་གེ་ཨཱོཾ་ལས་གདུ་བུ་ནི། །སོ་སོར་མཁྲིག་མར་བསམ་པར་བྱ། །བཾ་ནི་ཟླ་བའི་མདོག་ཅན་དེ། །དེ་ལ་
བདུད་རྩི་རབ་འབར་བ། །དྲི་མེད་སོ་སོར་མངོན་ཕྱོགས་པས། །མཁས་པས་བུམ་པ་བཞིན་དུ་བལྟ། །མཛུབ་མོ་ལ་ནི་ནོར་བུ་བཟང་། །གང་བ་བཟང་ཞེས་གུང་མོ་ལ། །སྲིན་ལག་ལ་ནི་ནོར་སྦྱིན་ཏེ། །ནོར་སྦྱིན་ཆེན་པོ་མཐེའུ་ཆུང་ལ། །མཐེ་བོར་ཙི་བི་ཀུནྜ་ལི། །ཀི་ལི་མི་ལི་མཁྲིག་མར་ཏེ། །སྒོ་དབང་སྤྱོད་པའི་དབང་པོ་དག །ལག་པའི་ངོས་ལ་རྣམ་པར་བསམ། །སྔགས་པས་ནོར་འཛིན་ཆུ་དབང་ནི། །ལག་པའི་དབུས་སུ་རྣམ་བཞག་སྟེ། །རང་རང་སྔགས་ཀྱིས་རིམ་བཞིན་བསམ། །དང་པོར་ཡི་གེ་ཨོཾ་དང་ནི། །རཏྣ་བཛྲ་རང་མིང་ལྡན། །བཞི་ཡི་མཐའ་དང་དེ་བཞིན་དུ། །སྭཱ་ཧཱར་བཅས་པ་སྔགས་སུ་དྲངས། །རྡོ་རྗེ་བདུད་རྩི་ལག་པར་བསམ། །འདི་ལྟར་སྤྱི་བོར་ཆོ་ག་བཞིན། །མཁས་པ་ཆུ་ཡི་སྦྱིན་བླུགས་བརྒྱ། །ཉིན་རེ་བཞིན་ནི་ལེགས་པར་དབུལ། །དེ་ནས་གལ་ཏེ་འགྱངས་པ་ན། །ནན་ཏུར་བྱ་བར་རིགས་པ་ཡིས། །བདག་ཉིད་པདྨ་དབང་ཆེན་གྱིས། །ཐུགས་ལས་ཡི་གེ་མཐིང་ནག་ཧཱུཾ། །དེ་ལས་རྡོ་རྗེ་ཧཱུཾ་མཛད་སྤྲུལ། །ཞལ་གཅིག་སྤྱན་གསུམ་ཕྱག་བཞི་པ། །གཡས་གཡོན་དང་པོ་ཕྱག་གཉིས་ན། །རྡོ་རྗེ་དྲིལ་བུ་བསྣོལ་མར་འཛིན། །འོག་མ་ལྕགས་ཀྱུ་ཞགས་པ་ཐོགས། །སྟག་གི་ཤམ་ཐབས་མཛེས་པར་བསམ། །སྤྲ་ཚིལ་སྐུ་གཟུགས་ཆུ་བདག་འདྲ། །དུག་དང་ཚ་བ་གསུམ་དང་ནི། །སྐྱེ་ཚེ་ཚ་བའི་མར་ཁུ་དང་། །ཁྲག་གིས་གཟུགས་ལ་བྱུག་ནས་ནི། །དེ་སྔགས་བཟླས་ཤིང་དུར་ཁྲོད་ཀྱི། །མེ་ལ་བདུག་ན་ཞག་བདུན་གྱིས། །མངོན་སུམ་འདོད་པ་སྟེར་བར་བྱེད། །དེ་ནས་བཟོད་པར་གསོལ་བྱས་ནས། །རྫས་དང་བྲལ་བར་བྱས་པ་ཡི། །མཚན་མ་དབེན་པར་བཞག་ལ་མཆོད། །དེས་ནི་ནན་ཏུར་བསྒྲུབ་པའོ། །དེ་ནས་བཅོམ་ལྡན་འདས་ཀྱིས་འཕགས་པ་ཛཾ་བྷ་ལྷ་ལ་བསྟོད་པ་འདི་གསུངས་སོ། །ནོར་གྱི་དབང་ཕྱུག་རིན་ཆེན་གཏེར་མངའ་བ། །གནོད་སྦྱིན་མང་པོའི་ནོར་འཆང་ཀུན་གྱི་རྗེ། ། བྱང་ཕྱོགས་སྐྱོང་བའི་མགོན་པོ 
་ཛཾ་བྷ་ལ། །བཅོམ་ལྡན་གྲུབ་མཆོག་སྩོལ་ལ་ཕྱག་འཚལ་བསྟོད། །གང་གི་ཐུགས་ནི་སྟོན་ཀའི་ཟླ་བ་ལྟར་དཀར་བ། །ཡོན་ཏན་འོད་ཟེར་ཐམས་ཅད་རབ་རྫོགས་ཤིང་། །ཉེས་པའི་མུན་པ་མ་ལུས་རབ་སེལ་བ། །བཅོམ་ལྡན་ནོར་ལྷའི་པདྨར་རབ་ཏུ་འདུད། །
ཐུགས་རྗེའི་དབང་བྱས་བཀྲ་ཤིས་སྐུ་མངའ་བ། །གསེར་གྱི་པདྨ་ལྟ་བུར་ཡིད་འོང་ཞིང་། །དམན་པ་རྣམས་ཀྱིས་མཐོང་དཀའ་དམ་པ་ཡི། །གཙུག་གི་ནོར་བུ་ཁྱོད་ལ་ཕྱག་འཚལ་བསྟོད། །གསུང་གི་ཆུ་འཛིན་ཤིན་ཏུ་སྡུག་པོ་ལས། །ཆོས་དབྱིངས་བདུད་རྩིའི་ཆུ་རྒྱུན་རབ་འབེབས་པས། །དད་པའི་ལྟོ་བ་རབ་རྒྱས་དགེ་བ་ཡི། །པདྨ་སྐྱེད་མཛད་ཁྱེད་ལ་ཕྱག་འཚལ་བསྟོད། །བྱམས་དང་སྙིང་རྗེའི་རང་བཞིན་མི་གཡོ་ཡང་། །ནོར་བུ་རིན་ཆེན་དཔག་བསམ་ཤིང་ལྟ་བུར། །ས་གསུམ་པོ་ཡི་དགོས་པ་དུས་གཅིག་ཏུ། །རྩལ་བར་མཛད་པ་ཁྱེད་ལ་ཕྱག་འཚལ་བསྟོད། །ཡུལ་རྣམས་སྒྱུ་མ་ལྟ་བུར་རབ་མཁྱེན་ཀྱང་། །སྔོན་གྱི་སྨོན་ལམ་ལྗགས་ཀྱི་སོ་བརྡར་བས། །གཏེར་གྱི་དབང་པོ་མ་ལུས་རབ་བསྣམས་པ། །གནོད་སྦྱིན་གཟུགས་འཛིན་ཁྱོད་ལ་ཕྱག་འཚལ་བསྟོད། །མ་རིག་མུན་པས་ཐར་པའི་ལམ་དང་བྲལ། །སྲིད་པའི་གཡང་ས་སྡུག་བསྔལ་མེ་ནང་དུ། །བརྩེ་མེད་སྟོབས་ལྡན་ལས་ཀྱིས་འཕངས་པས་ན། །མགོན་པོ་ཉིད་ཀྱིས་བདག་ལ་མྱུར་དུ་སྐྱོབས། །ཞེས་ནི་རྣལ་འབྱོར་སྒྲུབ་པ་པོ། །གང་གིས་བསྟོད་པ་འདིས་བསྟོད་ན། །ནོར་གྱི་ཆར་པ་མྱུར་དུ་འབེབས། །འབྲུ་ཡི་བང་མཛོད་རྒྱས་པར་འགྱུར། །པདྨ་དབང་ཆེན་དྲེགས་པ་དབང་སྡུད་ཀྱི་རྒྱུད་ལས། ) མགོན་པོ་གནོད་སྦྱིན་ཤིང་རྟའི་ལེའུ་སྟེ་ལྔ་པའོ།། །།དེ་ནས་བཅོམ་ལྡན་འདས་ཀྱིས་བགེགས་ཀྱི་རྒྱལ་པོ་ཚོགས་ཀྱི་བདག་པོ་རྣམས་སྒྲུབ་པའི་ཐབས་རྣམས་གསུངས་སོ། །གང་ཞིག་རྣལ་འབྱོར་སྒྲུབ་པ་པོས། །སྐུ་ཡི་ཚོགས་བདག་དཀར་པོ་བསྒྲུབ། །དབྱི་མོང་ཤིང་ངམ་ཙནྡན་ཤིང་། །མཐེ་བོང་ཙམ་པའི་ཚོགས་བདག་སྐུ། །དཀར་པོ་གླང་ཆེན་གཞོན་ནུའི་གདོང་། །གཡས་ན་ལ་ཕུག་བགྲང་ཕྲེང་དང་། །གཡོན་གཉིས་ལ་དུ་དགྲ་སྟྭ་བསྣམས། །བྱི་བ་སྔོན་པོའི་ཁྲི་ལ་བཞུགས། །དེ་ཡི་གསང་སྔགས་རབ་བཤད་ཀྱིས། །ནོར་གྱི་བདག་པོ་དབང་དུ་བྱེད། །ཨཱོཾ་གུ་མ་ག་ཎ་པ་ཏི་སྭཱ་ཧཱ། བསྙེན་པའི་སྔགས་སོ། །སྔགས་རྣམས་མ་ཕྱི་སོར་བཞག །ཨོཾ་ཧྲི་ཧ་སྡི་མུ་ཁ་ལ་ལ་མ་བྷྱོ་དྷ་ར་ཡ། ཨུ་ཙིཏྟ་མ་ལ་ཡ་མ་ཧཱ་ར་མ་ནི། ཀྲཾ་བྲུམ་ཧྲི་ཧཱུཾ་ཏྲཾ། ཨུ་ཙིཏྟ་ཡ་སྭཱ་ཧཱ། སྙིང་
པོའོ། །ཨོཾ་བ་ར་ཏ་ཀ་ཨུ་ཙི ཁྠུ ་སྭཱ་ཧཱ། བསྒྲུབ་པའི་སྔགས་སོ། །ཨོཾ་བཛྲ་ཨ་རུ་ཤ་གུ་ཏེ་ས་ཏེ་ཨཱ་ཀར་ཤ་ཡ་ཧཱུཾ་ཛཿ། དངོས་གྲུབ་བླང་བའི་སྔགས་སོ། །ཡར་ངོའི་ཚེས་བརྒྱད་གནམ་སྟོང་བར། །དུས་གསུམ་བརྒྱ་རྩ་བརྒྱད་བཟླས་ན། །ཡུལ་ཁམས་དབང་དུ་འདུ་བར་འགྱུར། །མཆན་ཁུང་གཡོན་དུ་ཚོགས་བདག་སྐུ། །སྦས་ནས་སྔགས་བཟླས་གང་འདོད་པ། །རང་གི་དབང་དུ་བྱེད་པར་འགྱུར། །རྣལ་འབྱོར་གང་ཞིག་སྒྲུབ་པ་པོས། །གསུང་གི་ཚོགས་བདག་དམར་པོར་བསྒྲུབ། །ཟངས་ལ་ཚོགས་བདག་དམར་པོའི་སྐུ། །གླང་ཆེན་གདོང་ཅན་ཕྱག་བཞི་པ། །གཡས་ན་ལ་ཕུག་ནོར་བུ་དང་། །གཡོན་པ་དགྲ་སྟྭ་ཁ་ཊྭཱཾ་ག །གསུས་པོ་ཆེ་ལ་རྒྱན་གྱིས་བརྒྱན། །ཟླ་བའི་གདན་བཞུག་སྔགས་འདིས་བསྒྲུབ། །ཨོཾ་བྷཱུཾ་ག་ཎ་པ་ཏི་ས་ར་ཀ་རཏྣ་སིདྡྷི་ཧཱུཾ། འབོད་པའི་སྔགས་སོ། །ཨཱོཾ་བྷ་ག་ཏྲཻ་ཀ་དང་ཤྚ་བི་དྷ་ཧཱུཾ་ཕཊ། བསྒྲུབ་པའི་སྔགས་སོ། །ཙནྡན་དམར་པོ་བྱུག་པ་ཡི། །མཎྜལ་སྟེང་དུ་ཚོགས་བདག་བཞུགས། །མེ་ཏོག་དམར་པོས་མཆོད་པ་བྱ། །ལྷ་ཀླུ་མི་ཡི་བུ་མོ་ཡིས། །བདག་ལ་བཀུར་སྡི་བྱེད་པར་འགྱུར། །བུད་མེད་ཐམས་ཅད་དབང་དུ་སྡུད། །གང་གི་བསྒྲུབ་པའི་རྣལ་འབྱོར་པས། །ཐུགས་ཀྱི་ཚོགས་བདག་ནག་པོ་བསྒྲུབ། །དུར་ཁྲོད་རས་ལ་སྐུ་བྲིས་ཏེ། །མདུན་དུ་མཎྜལ་སྟེང་དུ་གཞག །མི་ཤ་མར་ཁུ་འབྲས་ལ་སོགས། །གཏོར་མ་ཐོད་པར་བཤམས་ལ་འབུལ། །རང་ཉིད་པདྨ་དབང་ཆེན་བསྒོམ། །མདུན་དུ་ཚོགས་བདག་གླང་གདོང་ནག །རལ་གྲི་གཡས་ལ་ཐོད་པ་གཡོན། །རྩངས་པ་ཞོན་པ་བསམ་པར་བྱ། །ཨཱོཾ་ཧྲི་ཛཾ་བེ་མོ་ཧྲི་སྟམ་བྷི་ཨན་དྷི་ཧཱུཾ་ཧཱུཾ་ཧཱུཾ། ཧ་ཧ་ཧ། བི་ནཱ་ཡ་ཀ་ཧ་ཏི་བྷི་ཤ་ཙི་བ་ལིཾ་གྷྲྀ་ཧྞ་གྲྀ་ཧྞ་ཧཱུཾ་ཕཊ། འབུམ་ཚོ་གསུམ་བཟླས་གཏོར་མ་འབུལ། །མི་ཤ་གླང་ཁྲག་མར་ཁུ་ཡིས། །སྦྱིན་སྲེག་ཁྲི་འབུམ་དངོས་སུ་ཡང་། །དེ་ལ་གང་འདོད་དངོས་གྲུབ་བླངས། །གསད་པར་འདོད་ན་བཙན་དུག་དང་། །གུ་གུལ་ཚ་དང་དགྲ་ཡི་མིང་། །མར་ངོའི་བཅུ་བཞིའི་ནུབ་མོ་ལ། །ཚེར་མའི་ཧོམ་དུ་ཁྲི་ཚོ་གཅིག །བསྲེག་ན་ཞག་བདུན་དག་ན་གསོད། །དེ་ཡི་གསང་སྔགས་འདི་བཟླས་སོ། །ཨཱོཾ་ཧྲི་བི་ནཱ་ཡ་ཀ་ཆེ་གེ་མོ་ཤ་ཏཱུཾ་ན་ཤ་ཡ་སྟྭཾ་
བྷ་མཱ་ར་ཡ་ཧཱུཾ་ཕཊ། རྣལ་འབྱོར་གང་ཞིག་སྒྲུབ་པ་པོས། །ཡོན་ཏན་ཚོགས་བདག་སེར་པོ་བསྒྲུབ། །རིན་ཆེན་གསེར་སོགས་རྫ་ས་ལ། །ཚོགས་བདག་སེར་པོ་སྤྲེལ་མགོ་ཅན། །ཕྱག་གཉིས་ཐལ་མོ་སྦྱར་བར་བྱ། །ཁོང་དུ་རིན་ཆེན་འབྲུ་སྤོས་དང་། །དར་ཟབ་སྔགས་དང་བཅས་པ་གཞུག །མཎྜལ་གྲུ་བཞི་སེར་པོ་ཡི། །སྟེང་དུ་བཞག་ནས་མཆོད་པར་བྱ། །སྔགས་འདི་བཟླས་ན་འཛམ་གླིང་གི། །ལོངས་སྤྱོད་ནོར་གྱི་ཆར་པ་འབེབས། །གུ་གུལ་དུད་པས་རྟག་ཏུ་བདུག །ཨཱོཾ་རཏྣ་རཏྣ་རཏྣ་རཏྣ་ག་ཎ་པ་ཏི་ག་ག་ག་ག་ག་ག་ག་ག་ག་ཎ་པ་ཏི་ཙུ་རུ་ཙུ་རུ་མ་ནུ་པ་ཏྲ་རུ་རུ་རུ་རུ་ག་ཎ་པ་ཏ་ཡེ་ག་ཎ་པ་ཏ་ཡེ་སྭཱ་ཧཱ། བསྙེན་པ་གོ་བརྒྱད་པའི་སྔགས་སོ། །ཨཱོཾ་བཛྲ་ཨ་རུ་རུ་ཤ་མ་ཧཱ་གུ་ར་བེ། མ་མ་པུཥྚིཾ་ཀུ་རུ། ཨཱ་ཀཪྴ་ཡ་ཧཱུཾ་ཛཿ། སྒྲུབ་པའི་སྔགས་སོ། །འདོད་པའི་ལོངས་སྤྱོད་མ་ལུས་དང་། །གཏེར་ཆེན་པོ་ཡང་རྙེད་པར་འགྱུར། །གང་ཞིག་རྣལ་འབྱོར་སྒྲུབ་པ་པོས། །ཕྲིན་ལས་ཚོགས་བདག་ནག་པོ་བསྒྲུབ། །ཚོགས་བདག་ནག་པོ་གླང་ཆེན་མགོ། །ཕྱག་བཞི་ཞབས་ནི་བརྐྱང་བསྐུམ་བཞུགས། །གཡས་པ་མཆེ་བ་ཞགས་པ་འཛིན། །གཡོན་པ་དགྲ་སྟྭ་ཁ་ཊྭཱཾ་བསྣམས། །ཡུམ་ནི་ཕག་གདོང་དགྲ་ཁ་ཊཱཾ་སྟྭ་དང་། །བྷནྡྷ་ཁྲག་བཀང་ཞལ་དུ་སྟོབ། །ཨཱོཾ་ན་མོ་ག་ཎ་བ་བྷེ་ཛཿ། ཡ་བ་ར་ནེ་ཛྷི་བ་ཏྲི་ཡ་སྭཱ་ཧཱ། འབོད་པའོ། །རཱུ་པ་པཀྵ་བི་ནཱ་ཡ་ཀ་མེ་ར་ཧཱུཾ། ཏྲི་ན་ག་བྷེ་ཐེ་སུ་རུ་བྷ་ཧཱུཾ་ཕཊ། ཡཀྴ་ཀ་ལ་མ་ཧཱ་བྷཻ་ར་བེ་ཏྲི་བྲ་ཙ་ཤ་ཏྲུཾ་ནྲྀ་ཛ་ནྲྀ་ཛ། རྦད་པའི་སྔགས་སོ། །ཡཀྴ་ཀ་ལ། མ་ཧཱ་བྷཻ་ར་བེ། དེ་བ་ཡཀྴ་མ། ནཱ་ག་ཆེ་གེ་མོ་ཐུམ་རིལ་ཡ། རྦད་པའི་སྔགས་གཉིས་པའོ། །ནཱ་ཤ་ཡ་ནཱ་ཤ་ཡ། སེ་ག་ཡ་ས་ཤ་ཡ། ཙཱུ་ར་ཎ་ཙཱུ་ར་ཎ། ཏྲཱ་ས་ཡ། ན་ག་ཡ་ཀ་ཏྲ་ཤ་མཱ་ར་ཡ། ཧ་ན་ཙཀྲ། ཧ་ན་ཙཀྲ། བི་ནཱ་ཡ་ཀ་ཛི་བི་ཏཱནྟ་ཏ་ཀ་རཱ་ཡ།ཆེ་གེ་མོ་མཱ་ར་ཡ་ཧཱུཾ་ཧཱུཾ་ཕཊ་ཕཊ། གསད་པའི་སྔགས་སོ། །ཨཱོཾ་བྷི་གྷ་བྷི་བ་བྷྱི་སརྦ་བིདྱཱ་བི་ཤ་ཡ། ཧྲྀ་ད་ཡཱ་ཧྲྀ་ད་ཡཱ། ཧཱུཾ་ཙི་ཏུ་པ་ཏུ། སྲ་མ་དུ་ཏ་ཡ། ཧ་ན་ཧ་ན་གྲྀ་ཧྞ་གྲྀ་ཧྞ། པ་ཙ་པ་ཙ། བྷྲ་མ་བྷྲ་མ། བྷྲ་མ་ཡ་བྷྲ་མ་ཡ། ཧཱུཾ་ཧཱུཾ་ཕཊ་ཕཊ། གསད་པའི་སྔགས་གཉིས་པའོ། །རྦད་སྔགས་གཉིས་ནི་ཉིན་དང་མཚན། །
དང་པོ་དགྲ་བོ་སྲོག་ནས་འདྲེན། །གཉིས་པ་དགྲ་ལ་རྦད་པར་བྱ། །གསད་སྔགས་གཉིས་ནི་ཉིན་དང་མཚན། །དང་པོ་གསད་པའི་གསད་སྔགས་ཡིན། །གཉིས་པ་ཐུན་གྱིས་གསད་པའི་སྔགས། །དཀྱིལ་འཁོར་གྲུ་གསུམ་ནག་པོ་རུ། །དགྲ་གཟུགས་སྤྲ་ཚིལ་ལས་བྱས་ཏེ། །དེ་ཡི་སྙིང་གར་མིང་རུས་གཞུག །དགྲ་རྫས་རྙེད་ཚད་དེ་ལ་བྱུག །ལ་དུ་ལ་ཕུག་ཉ་ཤ་དང་། །སྒོག་བཙོང་འབྲས་ཆན་དཀར་གསུམ་དང་། །མངར་གསུམ་སྦྱར་བའི་གཏོར་མ་དང་། །ཅེ་སྤྱང་ཐོད་པར་སྐྱེ་ཚེ་དང་། །ཉུང་དཀར་ཉུང་ནག་ཟི་ར་ཡིས། །ཐུན་བྱ་ལིངྒར་བྲབ་པར་བྱ། །ཐ་མར་བཀའ་རྟེན་འོག་ཏུ་གནན། །དགྲ་བགེགས་འབྱུང་པོ་དབང་དུ་བྱེད། །ཚོགས་ཀྱི་བདག་པོས་འདུལ་བར་འགྱུར། །ཞེས་གསུངས་སོ། །པདྨ་དབང་ཆེན་དྲེགས་པ་དབང་སྡུད་ཀྱི་རྒྱུད་ལས། ཚོགས་ཀྱི་བདག་པོས་དབང་དུ་སྡུད་པ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ལེའུ་སྟེ་དྲུག་པའོ།། །།དེ་ནས་བཅོམ་ལྡན་འདས་ཀྱིས་སྤྲེའུའི་རྒྱལ་པོ་ཧ་ལུ་མནྡྷའི་སྒྲུབ་པ་འདི་གསུངས་སོ། །ཤེས་རབ་སྙིང་རྗེ་ལྡན་པ་ཡིས། །དབང་དང་དམ་ཚིག་ཐོབ་ནས་ནི། །སེམས་ཅན་ཀུན་ལ་སྙིང་རྗེར་ལྡན། །དེ་ལྟ་བུ་ཡི་གང་ཟག་གིས། །རྒྱལ་གྱི་ཉིན་པར་སྐུ་གཟུགས་འཆའ། །དེ་ཡང་སྔ་དྲོའི་དུས་སུ་ཤིས། །རབ་ནི་གསེར་དངུལ་ཟངས་དང་ལྕགས། །འབྲིང་ནི་སྤྲེའུ་ཤིང་ཞེས་བྱ་དང་། །པྲ་མ་ཙ་རའི་ཤིང་ལ་བྱ། །ཐ་མ་རྫ་ས་དག་ལ་བྱས། །དབང་དང་དམ་ཚིག་ལྡན་པ་ཡི། །བཟོ་བོ་མཁས་པས་བྱ་བ་ཡང་། །ཚད་ནི་རྩེ་སོར་བརྒྱད་པ་ལ། །དབྱིབས་ནི་ཞལ་གསུམ་ཕྱག་བཞི་པ། །རྩ་ཞལ་དབུས་མ་སྤྲེའུ་གདོང་དམར། །གཡས་པ་ཁྱུང་གི་མགོ་ནི་སེར། །གཡོན་པ་སེང་གེའི་དབུ་ཡང་དཀར། །ཕྱག་གཡས་དང་པོ་རིན་པོ་ཆེ། །གཡོན་པ་འབྲས་བུ་ཅན་གྱི་ཤིང་། །འོག་མ་གཉིས་ནི་ཐུགས་ཀར་ནི། །ཐལ་མོ་ཁོང་སྟོང་སྦྱར་བ་ལ། །སྤྲེའུའི་ཞབས་གཉིས་ཙོག་པུར་བཞུགས། །སྐུ་མདོག་སེར་པོ་མཇུག་མ་ཅན། །ལེགས་པར་བྱས་ནས་དབང་པོ་ཚང་། །གདན་ནི་བུམ་པ་པདྨ་དང་། །བྲག་གི་སྟེང་ན་བཞུགས་པར་བྱ། །སྐུ་གཟུགས་ཁོང་སྟོང་ནང་དུ་ནི། །སྤྲེའུའི་སྙིང་དང་རིན་ཆེན་ལྔ། །བྱི་བའི་ཕོ་
མཚན་འབྲུ་སྣ་ལྔ། །སྙིང་པོ་ལྔ་དང་སྨན་ལྔ་དང་། །དྲི་སྣ་ལྔ་དང་ཙནྡན་དམར། །དར་ཟབ་གུ་གུལ་དཀར་པོ་རྣམས། །ནང་དུ་བཅུག་ལ་ཞབས་སྡོམ་བྱ། །དེ་ལ་གྷ་ལས་སྐུ་བསྐྱེད་ནས། །སྤྱན་དྲང་རང་རྒྱུད་བསྡིམ་མཆོད་དེ། །རྟེན་འདྲེལ་སྙིང་པོ་བཟླས་ནས་ནི། །དབེན་པའི་གནས་སམ་མཆོད་པའི་གྲལ། །མཎྜལ་སྟེང་དུ་བཞུགས་སུ་གསོལ། །ཡི་གེ་གྷ་ལས་སྐུ་ཡང་བསྐྱེད། །རང་ཉིད་ཡི་དམ་རྟ་མགྲིན་སྐུ། །ཐུགས་ཀའི་ཉི་མའི་དབུས་ཉིད་ནས། །ཧྲཱྀཿལས་འོད་ཟེར་འཕྲོས་ནས་ནི། །རང་རྒྱུད་གནས་ནས་འགུགས་པར་བྱའོ། །ཡི་གེ་ཧྲཱྀཿདམར་འོད་དཔུང་སྟེ། །ནུབ་ཕྱོགས་སྣང་མཛད་ཞིང་ཁམས་ནས། །ཁ་སར་པ་ཎིའི་ནུས་མཐུ་རྣམས། །མདུན་གྱི་སྤྲེའུ་ལ་ཐིམ་པས། །སྐུ་གསུང་ཐུགས་སུ་བྱིན་གྱིས་བརླབ། །དེ་དུས་ཨོཾ་ཨཱཿཧཱུཾ་ཞེས་བརྗོད། །ཁ་སར་པཱ་ཎི་ཐུགས་རྗེ་ཆེ། །དེ་ཡི་བྱིན་རླབས་སྤྲུལ་པ་ཡི། །སྤྲེའུ་ཧ་ལུ་མ་དྷ་ཡི། །སྲོག་ནས་དྲོང་བའི་སྔགས་འདི་ཡིན། །ཨཱོཾ་བ་ར་ཏ་ཀ་ཧ་ཡ་གྲཱི་བ་ཧ་ལུ་མན་དྷ་སྭཱ་ཧཱ། བཞི་གསུམ་བཅུ་གཉིས་ངོ་བོ་ལས། །མགོ་མཇུག་འབྲུ་བཞི་ལྡན་པ་ནི། །བསྙེན་པའི་སྔགས་ཞེས་བྱ་བ་སྟེ། །གསང་སྔགས་ཆེན་པོ་རང་སྲོག་ཡིན། །བསྙེན་པ་འབུམ་དུ་བཟླས་པས་ན། །བུད་མེད་ཐམས་ཅད་དབང་དུ་འདུ། །བསྙེན་པ་ཉིས་འབུམ་བཟླས་གྱུར་ན། །སྐྱེས་པ་ཕོ་རྣམས་དབང་དུ་སྡུད། །བསྙེན་པ་སུམ་འབུམ་བཟླས་གྱུར་ན། །འཇིག་རྟེན་ནོར་རྫས་དབང་དུ་སྡུད། །འདི་དུས་ཐལ་སྦྱར་ཕྱག་གི་ནང་། །སྤྲེའུ་ལ་སྤོས་ཀྱི་རེངས་བུ་དབུལ། །བསྙེན་པ་ཐེམ་པར་གྱུར་ནས་ནི། །སྐར་མ་རྒྱལ་གྱི་དུས་སུ་འམ། །ཡང་ན་ཟླ་སྟོད་བཅོ་ལྔ་ལ། །མཆོད་པ་གཏོར་མ་རྒྱ་ཆེན་འབུལ། །ཁམ་བུའི་གཏོར་རྒྱན་ལ་ཕུག་དང་། །འབྲས་ཆན་གཏོར་མ་དབུལ་བྱ་ཞིང་། །རྩ་སྔགས་བསྙེན་པའི་མཇུག་ཏུ་ཡང་། །དངོས་གྲུབ་བླང་བའི་སྔགས་འདི་གདགས། །རཏྣ་རཏྣ་སིདྡྷི་སིདྡྷི། ཕ་ལ་ཕ་ལ། བ་ཤང་ཀུ་རུ། བ་སུ་དྷ་ར། པུཥྚིཾ་ཀུ་རུ་སྭཱ་ཧཱ། ཞེས་གསུངས་སོ། །པདྨ་དབང་ཆེན་དྲེགས་པ་དབང་སྡུད་
ཀྱི་རྒྱུད་ལས། བྱང་ཆུབ་སེམས་དཔའ་སྤྲེའུའི་རྒྱལ་པོ་ཧ་ལུ་མ་དྷ་དབང་སྡུད་ཀྱི་ལེའུ་སྟེ་བདུན་པའོ།། །།དེ་ནས་བཅོམ་ལྡན་འདས་ཀྱི་སྐུ་གསུང་ཐུགས་ཀྱི་མཁའ་འགྲོ་མས་དབང་དུ་བསྡུ་བ་འདི་དག་བསྒྲུབ་པར་གསུངས་སོ། །རྡོ་རྗེ་རིན་ཆེན་པདྨ་ཡི། །མཁའ་འགྲོ་རྣམ་གསུམ་བསྒྲུབ་པར་བྱ། །སྐུ་ཡི་རིན་ཆེན་མཁའ་འགྲོ་སེར། །གསུང་གི་པདྨ་མཁའ་འགྲོ་དམར། །ཐུགས་ཀྱི་རྡོ་རྗེ་མཁའ་འགྲོ་ནག །ཀུན་ཀྱང་ཞལ་གཅིག་ཕྱག་གཉིས་ཏེ། །གཡས་པ་ཡིད་བཞིན་ནོར་བུ་ལ། །གཡོན་པ་གཏེར་གྱི་བུམ་པ་བསྣམས། །དེ་ཡི་གསང་བའི་ཐུགས་ཀྱི་སྔགས། །ཨཱོཾ་ན་མ་སུ་ཏྲི་མུ་ཁྲི་མ་ཧཱ་པི་ཤ་ཙི་རྣ་ཡེ་སྭཱ་ཧཱ། ནོར་འདུ་བའི་སྔགས་སོ། །ཨཱོཾ་གྲྀ་ན་བ་ན་མ་ཧཱ་པི་ཤ་ཙི་ནེ་ཡེ་སྭཱ་ཧཱ། ཟས་འདུ་བའི་སྔགས་སོ། །ཨཱོཾ་མི་ལི་ཀི་ལི་སེ་ལི་ཀི་སྭཱ་ཧཱ། གོས་འདུ་བའི་སྔགས་སོ། །དེ་ནས་གཏོར་མ་བྱ་བ་ནི། །ཆང་གི་ཆང་བུ་གསུམ་བྱས་ནས། །ཨོཾ་དང་ཨཱཿདང་ཧཱུཾ་ཞེས་པ། །བྱིན་བརླབ་བདུད་རྩི་གསོལ་དགྱེས་བསམ། །སྒྲུབ་པོས་འདི་སྐད་བརྗོད་ལ་དབུལ། །མཁའ་འགྲོ་མ་ཁྱེད་གསུམ་གཏོར་མས་མཆོད་པས། ནོར་དང་ཟས་དང་གོས་ཀྱིས་མི་ཕོངས་པའི་དངོས་གྲུབ་དང་། དེ་ཉིད་ཆོས་དང་མཐུན་པའི་གྲོགས་སུ་མཛད་དུ་གསོལ། ཞེས་བརྗོད་གཙང་སར་གཏོར་བ་ཡིས། །སེམས་ཅན་རྣམས་ལ་ཅི་འདོད་པ། །གཏོར་མ་དེ་ལས་འབྱུང་བར་བསམ། །ཏྲཱཾ་ལས་རིན་ཆེན་ཕུང་པོར་བསམ། །པདྨ་དབང་ཆེན་དྲེགས་པ་དབང་སྡུད་ཀྱི་རྒྱུད་ལས། མཁའ་འགྲོ་མ་རྣམ་པ་གསུམ་གྱི་དབང་དུ་སྡུད་པའི་ལེའུ་སྟེ་བརྒྱད་པའོ།། །།དེ་ནས་བཅོམ་ལྡན་འདས་ཀྱིས་གནོད་སྦྱིན་གཞན་གྱིས་མི་ཐུབ་པའི་སྒྲུབ་པ་འདི་གསུངས་སོ། །དང་པོ་སྒྲུབ་པར་འདོད་པ་ཡིས། །བྱང་ཕྱོགས་གནས་སུ་དཀྱིལ་འཁོར་ནི། །གྲུ་བཞི་པ་ཡི་རྣམ་ལྔས་བྱུག །དེ་དབུས་དམར་ལ་ཟླུམ་པ་བྱ། །བཤོས་བུ་དག་ལ་རི་བོང་སྙིང་། །ལེའུ་བརྒན་དར་ཡང་གདགས་པར་བྱ། །ཧྲཱྀཿལས་གྲི་གུག་འོད་ཞུ་བས། །གནོད་སྦྱིན་གཞན་གྱིས་མི་ཐུབ་དམར། །གྲི་གུག་གཡས་ལ་ཐོད་པ་གཡོན། །ནེའུ་ལེའི་རྐྱལ་པ་མཆན་ཁུང་བཀལ། །
ཡབ་ཡུམ་ནོར་སྦྱིན་སྐུ་མདོག་ལྗང་། །རིན་ཆེན་གཡས་ལ་རྐྱལ་བུ་གཡོན། །སྤྱན་དྲང་བཞུགས་མཆོད་སྔགས་འདི་བཟླས། །ཨཱོཾ་ཧྲི་ཨ་པ་ར་ཛི་ཏ་ཡག་ཤ་ཧཱུཾ། ཨཱོཾ་ཨུ་མ་རི་ཧྲིང་ཧྲིང་ཛ་ཛཿ། འབུམ་ཚོ་གསུམ་དུ་བཟླས་པར་བྱའོ། །རྫ་ཡི་གའུ་ཁ་སྦྱོར་དུ། །ཕོ་མོའི་འཁོར་ལོ་རྩིབས་བརྒྱད་བྲི། །གསེར་དངུལ་བྱེ་རུ་མུ་ཏིག་ཤེལ། །དཀར་གསུམ་མངར་གསུམ་བླུག་ལ་བཞག །ཉ་ནས་གཟུག་ལ་ཉ་ལ་གདོན། །གྲངས་ཐེམ་དཀར་གསུམ་མངར་གསུམ་ཟ། །གའུ་དབེན་པར་སྦ་བར་བྱ། །མ་དྷལ་ཙནྡན་ཆུ་ཡིས་བསིལ། །ཨོཾ་ཧྲཱྀཿཨཱཾ་ཧཱུཾ། ཨ་པ་ར་ཛི་ཏ་ཧྲཱྀཿ། ཧཱུཾ་ཨུ་མ་རི་ཧྲིང་ཧྲིང་། ཛོ་པ་རི་ཛོ་པ་རི་ཧྲིང་ཧྲིང་ཧཱུཾ་ཧཱུཾ། ཨཱ་ཀཪྴ་ཡ་ཛཿཛཿ། ཤཱིནྟཾ་ཀུ་རུ་པུཥྚིཾ་ཀུ་རུ་སྭཱ་ཧཱ། བུད་མེད་འདུ་དང་ནོར་འཕེལ་དང་། །དགྲ་ཡི་གནོད་པ་མི་འབྱུང་དང་། །ལྷ་མིན་རྣམས་ཀྱིས་གཏེར་ཆར་འབེབས། །དཀར་གསུམ་འབྲས་ཆན་ཁུ་བ་ཤ །ཤིང་ཐོག་བཟང་དྲུག་གཏོར་མ་ཆང་། །འབྲུ་གསུམ་སྔགས་ཀྱིས་བྱིན་བརླབས་ནས། །རྡོ་རྗེ་གསུམ་གྱི་ཕྱག་རྒྱ་བྱས། །ཨོཾ་ཨ་པ་ར་ཛི་ཏ་ཡག་ཤ་ཧྲིཾ་ཨུ་མ་རི་ཧྲིཾ་ཧྲིཾ་ཧཱུཾ་ཧཱུཾ། བ་ལིཾ་ཏ་ཨ་མྲྀ་ཏ་ཁ་ཁ་ཁཱ་ཧི་ཁཱ་ཧི། མཱ་ར་ཡ་མཱ་ར་ཡ། པ་ཙ་པ་ཙ། ཧ་ན་ཧ་ན། ཤ་ཏྲུཾ་པ་ཙ་ཡ། ཤཱནྟིཾ་པུཥྚིཾ་ཀུ་རུ་སྭཱ་ཧཱ། སྔགས་བདུན་བརྗོད་ལ་གཏོར་མ་དབུལ། །ཨཱོཾ་འདོད་པ་ལྔ་ལ་ལོངས་སྤྱོད་ཅིང་། །ཁམས་གསུམ་དབང་དུ་སྡུད་བྱེད་པའི། །ཅི་བསམ་ལྷུན་གྱིས་འགྲུབ་པ་ཡི། །དངོས་གྲུབ་ཆེན་པོ་བདག་ལ་སྩོལ། །ཚིག་འདི་ཟངས་ཀྱིས་བྲིས་ནས་ནི། །གུང་མོ་བར་དུ་བཅུག་བྱས་ན། །ཉ་ཡི་ནུབ་མོ་ཁོ་འོང་བས། །རྣལ་འབྱོར་མི་སྨྲ་བརྟན་པར་བྱ། །སྨྲས་ན་བར་ཆད་ཆེན་པོ་འབྱུང་། །བླ་མ་མཆེད་ལ་གནོད་པ་དང་། །སངས་རྒྱས་བསྟན་པ་བསྲུང་བ་ལ། །དཀྱིལ་འཁོར་གྲུ་གསུམ་ནང་དུ་ནི། །རི་བོང་ཐོད་པ་བཞག་བྱས་ལ། །ལྟག་པར་ཕ་དང་མེས་པོ་བྲི། །རྣ་བ་གཡས་པ་ཕ་སྤུན་ལ། །གཡོན་པ་ལ་ནི་བུ་སྲིང་བྲི། །ཁ་རུ་མིང་རུས་གང་ཡིན་གཞུག །ཨཱོཾ་ཡ་ཤ་ཨ་པ་ར་ཛི་ཏ་ཆེ་གེ་མོ་ཨཱ་ཀཪྴ་ཡ་ཛ་ཛཿ། དགུག་པའི་སྔགས་
སོ། །ཨ་པ་ར་ཛི་ཏ་འུབ་ཏྲེ་ཡ་ཡཱ། གཟུགས་ལ་དབབ་པའོ། །རྦད་པུ་ནི་རྦད་པུ་ནི་ཙིཏྟ་ལ་ཛ་ཛཿ། ཡག་ཤ་ཆེ་གེ་མོ་ཐུམ་ལཾ་ཐུམ་རིལ་རྦད་ཛ་ཛཿ། ཡག་ཤ་ཚལ་པ་ཛ་ལ་བ་ཡ་ཡཱ། ཆེ་གེ་མོ་མཱ་ར་ཡ་ཨ་པ་ར་ཛི་ཏས་སོད་སོད། ཉུང་དཀར་ཉུང་ནག་དུག་ཁྲག་དང་། །སྐྱེ་ཚེས་བརྡེག་ཅིང་ཟླ་གཅིག་བསྒྲུབ། །དམག་དཔོན་བྱེད་དང་སྲོག་ཆགས་བཤས། །ཨ་ཙར་བསྐོར་བ་བྱེད་པ་ན། །ལིངྒ་མེ་ལ་བསྲེག་པར་བྱ། །ཐལ་བ་ཆུ་ལ་བསྐུར་བར་བྱ། །དགྲ་བོ་མྱུར་དུ་འཆི་བར་འགྱུར། །པདྨ་དབང་ཆེན་དྲེགས་པ་དབང་སྡུད་ཀྱི་རྒྱུད་ལས། གནོད་སྦྱིན་ཆེན་པོ་ཨ་པ་ར་ཛི་ཏ་སྒྲུབ་པའི་ཐབས་བསྟན་པ་སྟེ་ལེའུ་དགུ་པའོ།། །།དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སྤྲེའུ་སྒྲུབ་པ་འདི་གསུངས་སོ། །ཐུགས་རྗེ་ཆེན་པོའི་སྤྲུལ་པ་ནི། །བྱང་ཆུབ་སེམས་དཔའ་སྤྲེའུ་རུ་བསྟན། །དང་པོ་བྱང་ཆུབ་སེམས་བསྐྱེད་ནས། །སྟོང་པ་ཉིད་ཀྱི་རང་བཞིན་ལས། །ཨཱོཾ་ལས་བྱང་ཆུབ་སེམས་སྤྲེའུ། །གཡས་ན་རི་བོང་འཛིན་པ་ལ། །གཡོན་ན་ཤིང་ལོ་འདབ་བཅས་འཛིན། །སྔགས་འདིས་དེ་ཉིད་བསྐྱེད་པར་བྱ། །ཨོཾ་སིདྡྷི་ཝརྣ་མུ་ཁམ། རང་འདྲ་སྤྱན་དྲང་བསྡིམ་མཆོད་འབུལ། །ཨཱོཾ་བྷོ་ཏྲེ་བྷོ་ཏྲེ། མ་བྷི་ཤ་མ་བྷི་ཤ །མ་ཛ་ར་མ་ཛ་ར་ཧཱུཾ་ཕཊ་སྭཱ་ཧཱ། ལག་མཐིལ་མཆིལ་མ་བླུགས་ནས་ནི། །རང་གི་སྲིན་ལག་གཡས་པ་ཡིས། །སྨིན་ཕྲག་དག་ཏུ་ཐིག་ལེ་ནི། །ལན་གྲངས་ཉི་ཤུ་རྩ་གཅིག་བྱ། །གནོད་པ་ཀུན་ལས་བསྲུང་བར་འགྱུར། །གལ་ཏེ་ཐིག་ལེ་འཆོར་བ་ན། །ལུས་ཀྱི་གཟུགས་ཀྱིས་བསྲུང་བ་ལ། །ཤིང་ལ་ཕོ་མཚན་གཟུགས་བྱས་ལ། །སྔགས་བྲིས་གུར་གུམ་ཆུས་བྱུགས་ལ། །རང་གི་སྐེད་པར་གདགས་པར་བྱ། །ཁྱེའུ་བུ་མོ་གཙང་མ་ནི། །ཆགས་པ་མ་སྤྱད་གཞོན་པ་ཡིས། །བཀལ་བའི་སྐུད་པ་གསུམ་བསྒྲིལ་ལ། །མདུད་པ་བདུན་ནམ་གསུམ་བྱས་ནས། །བརྒྱའམ་སྟོང་བཏབ་སྐེ་ལ་གདགས། །ཡང་ན་ཁྱི་ཡི་རྔ་མ་དང་། །ར་དག་གི་ནི་ཨོག་ཞོལ་དང་། །ར་ཕོའི་རྨང་ཁའི་སྤུ་གསུམ་ལ། །སྐུད་པ་བྱས་ནས་སྔགས་བཟླས་ཏེ། །སྐེད་པ་དག་ལ་གདགས་པར་བྱ། །ང་ཡི་
སྔགས་འདི་བཟླས་པ་བྱ། །ཨཱོཾ་ཧ་ར་ཧ་ར། བྷནྡྷ་ནི། ཤུ་ཀྲ་དྷ་ར་ནི། སི་ར་ཐེ་སྭཱ་ཧཱ། ཡང་ནི་ས་བོན་འཛག་པ་ལ། །སེང་གེ་དཀར་མོའི་ཐག་པ་གཅད། །རང་གི་བུ་སྲིང་འདོམས་ཀྱི་སྤུ། །ཁྱི་མོའི་མཇུག་སྤུའི་སྐུད་པ་ཡིས། །གང་འཛག་གསང་བའི་རྡོ་རྗེ་བཅིང་། །སེང་གེ་དཀར་མོའི་ལྕགས་ཐག་གཅད། །གསང་བ་རྡོ་རྗེའི་གཟུགས་བྲིས་ནས། །སྔགས་བྲིས་བུ་མོ་གཙང་མ་ཡིས། །སྐུད་པ་བཀལ་ནས་འཁོར་ལོ་དེ། །བརྒྱ་རྩ་བརྒྱད་བཟླས་རང་སྐེད་གདགས། །ཨཱོཾ་ཤུ་ཀྲ་དྷ་ར་དྷ་ར་སྭཱ་ཧཱ། གཡོན་དུ་བྲིས་པའོ། །ཨཱོཾ་ཤུ་ཀྲ་དྷ་ར་དྷ་ར་ཧཱུཾ་ཧཱུཾ་སྭཱ་ཧཱ། གཡས་སུ་བྲི་བའོ། །འཆང་བ་པོ་ཀ་སྱ་རཀྵ་རཀྵ་སྭཱ་ཧཱ། དབུས་སུ་བྲི་བའོ། །ཨཱོཾ་ཨན་ལྷ་འཚུག་འཚུག་སྭཱ་ཧཱ། རྩེ་མོར་འཁོར་ལོ་ལ་བྲི་བའོ། །རྡོ་རྗེ་ཆེ་བའི་མན་ངག་ལ། །ཐར་ནུ་རེའུ་ལྕགས་ལན་ཚྭ་དང་། །བོང་བུའི་གསང་ཚེར་ཟོ་འཛེར་དང་། །ཁྱི་ཡི་གསང་ཚིལ་སྦྲང་རྩི་སྦྱར། །བྱུགས་ཤིང་མཉེས་ནས་བསྐམ་པར་བྱ། །རྫ་མི་ལྡང་བསྲུང་བ་ནི། རྡོ་རྗེའི་གཟུགས་ནི་བྲིས་ནས་ཀྱང་། །སྔགས་བཀོད་དོར་རྟར་གདགས་པར་བྱ། །དེས་ནི་ལྡང་བར་འགྱུར་བ་ཡིན། །ཏ་ར་སོ་ཕུལ། འབྲས་བུ་གཡོན་པའི་རྩ་བར་བྲི་བའོ། །ཧྱ་ཐེན་ཐེན་ཐེན། འབྲས་བུའི་དབུས་སུ་བཀོད་པའོ། །མོ་རི། ཕོ་ཕུལ། འབྲས་བུ་གཡས་པའི་རྩ་བར་བྲི་བའོ། །ཐས་ཧས་ཁྱི་སིང་ལང་ལང་།འབྲས་བུ་གཉིས་ཀྱི་བར་དུ་བཀོད་པར་བྱའོ། །བྷི་མོ་ཁྱི་གང་ལེ་ལང་ལ། གཡོན་དུ་བྲིའོ། །ཁྱི་ཁ་ལ་ནི་ལང་ལང་། གཡས་སུ་བྲི་བའོ། །མ་ཧེ་སོ་ནི་པར་ལང་ལང་། །དབུས་སུ་བྲིའོ། །པཾང་པཾང་པཾང་པཾང་། འཁོར་ལོ་ལ་བྲིའོ། །པི་ས་ར་ཐ་ཁ་ལ་བྲིའོ། །པདྨ་དབང་ཆེན་དྲེགས་པ་དབང་སྡུད་ཀྱི་རྒྱུད་ལས། ལུས་ཟུངས་དབང་དུ་བྱ་བ་རྩ་བ་རང་གསང་གི་ལེའུ་སྟེ་བཅུ་པའོ།། །།དེ་ནས་བཅོམ་ལྡན་འདས་ཀྱིས་རྡོ་རྗེ་ཕུབ་ཁུར་ཞེས་བྱ་བ་འདི་གསུངས་སོ། །དབུས་སུ་ཨཱོཾ་གྱི་ཁོག་པ་ན། །ལུས་ངག་ཡིད་ཀྱི་སྲུང་སྔགས་བྲི། །གྲུ་བཞི་ལོགས་ལ་
སྔགས་ཀྱིས་བརྒྱན། །ཨཱོཾ་གྱི་མགོ་མཇུག་ངོས་སུ་ནི། །བརྣག་པའི་ལིངྒ་གནན་པར་བྱ། །ལོགས་གཉིས་རྡོ་རྗེས་མཚན་པར་བྱ། །ཟུར་བཞིར་སྡེ་བརྒྱད་བདུད་དང་ནི། །ཀླུ་དང་ས་བདག་བསྲུང་བར་བྱ། །དེ་ཡི་སྔགས་ནི་འདི་ཡིན་ནོ། །བཛྲ་ཧཱུཾ་སང་ཧ་ཁ་མ། བཛྲ་ཀཱ་ཡ། བཛྲ་བཱཀ །ཙིཏྟ་བཛྲ་ཧ་རི་སང་སང་།རྡོ་རྗེའི་རྒྱལ་པོའི་ལུས་ངག་ཡིད་གསུམ་ལ་ཀ་སྱ་ཡེ་རཀྵ་རཀྵ། ཨཱོཾ་གྱི་ཁོག་པར་བྲི་བའོ། །སང་སང་ཧེར་ཧེར་བྷ་ཛོ། ནེ་ལོ་ཁི་ཁི། ཀ་ལ་སད་མོ་ནི་ན་ཏི། ཛྷ་བ་ཀྱི། གྲུ་བཞི་ལྕགས་རིའི་ནང་དུ་བྲི་བའོ། །ཙཀྲ་བཛྲ་ཧེ་རུ་ཀ་རཀྵ། ཧེ་བཛྲ་མུ་སེང་ཁ་རཀྵ། ཏ་ལོ་ལེ་ས་ར་རཀྵ་རཀྵ། མ་ས་ཛྷ་རཀྵ་རཀྵ། ཟུར་བཞིར་ཤར་དུ་བྲི་བའོ། །ལམ་ལམ་བདུད། ལིམ་ལིམ་ཀླུ། ཕེམ་ཕེམ་ས་བདག །ས་མ་ཡ་སྡེ་བརྒྱད། ཟུར་བཞིར་བྲི་བའོ། །པ་ར་ཡ། སེ་པ་ར་ནི། ཀང་ཁ་མོ་ནི། པ་ར་ཡ། འོག་ཏུ་བྲི་བའོ། །འཁོར་ལོ་ནམ་མཁར་བསྐོར་བྱས་ན། །ལྷ་སྲིན་གནོད་པ་དབང་དུ་བྱེད། །ས་ལ་བརྡུང་ན་ཀླུ་རྣམས་བརྒྱལ། །ཤོག་དྲིལ་མགུལ་དུ་བཏགས་པ་ན། །རྡོ་རྗེའི་ཕུབ་ཁུར་ལྟ་བུ་སྟེ། །ཅིས་ཀྱང་ཚུགས་པར་མི་འགྱུར་རོ། །ཐམས་ཅད་དབང་དུ་སྡུད་པར་བྱེད། །དྲེགས་པ་དབང་སྡུད་ཆེན་པོ་ཡིན། །སྤྲེའུ་ཐལ་སྦྱར་བྱང་ཆུབ་སེམས། །སྤྱན་རས་གཟིགས་སྤྲུལ་ཆེན་པོ་སྟེ། །གཡས་ན་ཁམ་ཤིང་འཛིན་པ་ལ། །གཡོན་ན་འཁོར་ལོ་འཕྱར་བར་བསྒོམ། །པདྨ་དབང་ཆེན་དྲེགས་པ་དབང་སྡུད་ཀྱི་རྒྱུད་ལས། རྡོ་རྗེ་གུར་ཕུབ་ཀྱི་ལེའུ་སྟེ་བཅུ་གཅིག་པའོ།། །།དེ་ནས་བཅོམ་ལྡན་འདས་ཀྱིས་འཁོར་འདས་ཀྱི་ཆོས་ཐམས་ཅད་ཉིད་ཀྱི་ངང་དུ་རྫོགས་པར་བྱ་བའི་ཕྱིར། གསང་བའི་མན་ངག་འདི་དག་གསུངས་སོ། །རྣམ་པར་ཤེས་དང་བེམ་རིག་ལས། །མགལ་མ་མ་ཐག་བདེ་བ་སྤྲོ། །སྒོ་ང་དག་ལ་བརྟེན་པ་ཡི། །དམིགས་པ་དེ་ལ་གསལ་བ་ན། །མི་རྟ་ཆུ་དང་འོ་མ་བཞིན། །ཡུལ་ལ་འདྲེལ་ནས་བྱུང་བ་སྟེ། །སྣང་དང་མཆེད་གྲོགས་ཉེར་ཐོབ་པས། །གསུམ་གསུམ་དག་ཏུ་གསལ་བ་སྟོང་། །སྣང་སྟོང་གཉིས་མེད་ཕྱོགས་དག་པ། །གསེར་གྱི་བ་ཐག་འདྲ་བར་བྱ། །
གཡས་པ་མེ་ལ་གཡོན་རླུང་དང་། །གཉིས་པ་བརྡལ་ཆུ་ཁམས་ཀུན་སྟོང་། །གཙོ་དང་འཁོར་དུ་གང་བྱུང་བ། །ལོ་ཟླ་ཞག་དང་ཉི་མ་ལས། །སྲོག་དང་རྩོལ་བ་བསྒོམ་པར་བྱ། །གསང་སྟོང་རྟོགས་པར་གྱུར་པ་ན། །སྤྱི་མགྲིན་སྙིང་ལྟེ་གསང་བ་རུ། །དགའ་བཞི་བརྒྱད་གཉིས་ཡབ་ཡུམ་ལས། །ལྷན་ཅིག་སྐྱེས་པས་བདེ་ཆེན་བཟླས། །རིག་པ་ཀུན་ཁྱབ་སྲོག་ལ་བྱུང་། །མི་རྟོག་ཐབས་ཀྱི་གནས་སུ་ཚུད། །བདེ་བ་ཡེ་ཤེས་འཆང་བའོ། །རང་བྱུང་ཡེ་ཤེས་ཆེན་པོ་ཡིན། །ཕོ་མོ་མ་ནིང་ཐོད་རྒལ་གཟུད། །ཚ་གྲངས་ནུས་པ་ཡོན་ཏན་ཟིན། །དུ་བ་སྨིག་རྒྱུ་སྲིན་མེ་དང་། །མར་མེ་ཉི་མ་ལུས་སེམས་མཐོང་། །རྡོ་རྗེའི་བཟླས་པ་དེ་ལྟར་བྱ། །གྲུ་གསུམ་ལས་ནི་གཞན་བཟླས་པ། །ཡིད་བཞིན་ནོར་བུ་ལྟ་བུའི་ཨོཾ། །ལྔ་པའི་དང་པོ་བཞི་གསུམ་སྦྱར། །ལྔ་པའི་ཐ་མ་ལྔ་དང་པོ། །སྟེང་དུ་ཨི་ཞེས་བྱ་བ་དང་། །བཞི་ཡི་དང་པོ་བདུན་པའི་གསུམ། །དེ་ལ་ཨི་ཡིས་སྤྲས་པ་ནི། །བཞི་པའི་དང་པོ་ཨིས་སྤྲས་ཏེ། །བདུན་པའི་ཐ་མ་གཉིས་བླངས་པའི། །ཐ་མ་ཨི་ཡིས་བརྒྱན་པར་བྱ། །གཉིས་པའི་དང་པོ་དང་པོའི་གསུམ། །དེ་སྦྱར་དང་པོ་དྲུག་གཉིས་སྤྲས། །ལྔ་པའི་བཞི་པ་ལན་གཉིས་བླངས། །དེ་ལ་དྲུག་པའི་དང་པོ་ནི། །གཉིས་སྦྱར་ཨོ་གཉིས་བརྒྱན་པར་བྱ། །བདུན་པའི་བཞི་པ་ལན་གསུམ་ལ། །ཨུ་གསུམ་སྦྱར་ནས་ཐིག་ལེ་གསུམ། །ལྔ་པའི་གཉིས་ལ་བཞིའི་དང་པོ། །དེ་གཉིས་སྤྲས་པས་བཅུ་བདུན་པའོ། །བཟླས་པའི་སྔགས་རྣམས་འདི་ལས་བྱུང་། །ཀ་ཁ་ག་གྷ་ང་། །ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ། ཨ་ཨཱ། ཨི་ཨཱིཾ། ཨུ་ཨཱུ། ཨེ་ཨཻ། ཨོ་ཨཽ། ཨཾ་ཨཿ། ཞེས་གསུངས་སོ། །པདྨ་དབང་ཆེན་དྲེགས་
པ་དབང་སྡུད་ཀྱི་རྒྱུད་ལས། རླུང་རྡོ་རྗེའི་བཟླས་པ་གསང་སྔགས་བསྡུ་བའི་ལེའུ་སྟེ་བཅུ་གཉིས་པའོ།། །།དེ་ནས་བཅོམ་ལྡན་འདས་ཀྱིས་ཐུགས་ལས་ཧྲཱྀཿཞེས་བརྗོད་པས། པདྨ་ཧེ་རུ་ཀ་དོན་ཡོད་པས། གཡས་དཀར་གཡོན་སྔོ་དབུས་དམར་ཞལ། །རྟ་མགོ་ལྗང་གུ་ཧྲཱྀཿབརྗོད་པ། །གཡས་ན་རྡོ་རྗེ་ཁ་ཊྭཱཾ་ག་དང་ཅང་ཏེའུ། །གཡོན་ན་མེ་དཔུང་ཞགས་པ་ཐོད་ཁྲག་བསྣམས། །ཡུམ་གཟི་ལྡན་མ་དང་འཁྲིལ་བར་གྱུར་ནས།ཉིད་ཀྱི་འཁོར་རྣམས་ལ་བཀའ་སྩལ་པ། རྣམ་པར་རྟོག་བྲལ་གདོད་ནས་སྐྱེ་མེད་དབྱིངས། །མ་བཅོས་མཐའ་ཡས་ཆེན་པོར་གསལ། །མཉམ་ཉིད་བདེ་ཆེན་བྱང་ཆུབ་སེམས་ཀྱི་མཆོག །སྨྲ་བསམ་ཡུལ་འདས་མཐའ་དག་འོད་གསལ་ཞིང་། །དེ་ལྟའི་ཆོས་ཀྱི་སྐུ་ལ་གནས་བཞིན་དུ། །དམིགས་མེད་ཡུལ་བྲལ་སྙིང་རྗེས་ཡོངས་ལ་ཁྱབ། །མཁའ་སྣང་སྟོང་པའི་ཆོ་འཕྲུལ་གསལ་མཛད་ཅིང་། །དེ་ལྟའི་ལོངས་སྤྱོད་རྫོགས་པའི་སྐུར་བཞེངས་ནས། །དྲི་མེད་ཐུགས་རྗེའི་འོད་མདངས་གསལ་བ་ཡིས། །ཐུགས་ཀྱི་རྟགས་སྟོན་འོད་ཟེར་རྒྱལ་བའི་སྐུ། །རྣམ་གསུམ་སེམས་དཔའ་གསང་སྔགས་འོད་ཕྲེང་ཚོགས། །ཆགས་པའི་སྐྱོན་བྲལ་ཡེ་ཤེས་ལྔ་ཡི་མདངས། །དཀྱིལ་འཁོར་སྣ་ཚོགས་འབྱུང་བའི་རྒྱུ་ཉིད་དེ། །རྐྱེན་གྱི་སྔགས་བཅས་མ་ལུས་གསལ་བར་བྱེད། །དེ་ལྟའི་སྤྲུལ་པ་སྐུ་རུ་ཤར་བ་ཡིས། །དབང་སྡུད་དབང་གི་རྒྱུད་ཆེན་གསུངས་པ་ནི། །ཟུང་ལ་མཐའ་ཡས་འགྲོ་བའི་དོན་དུ་སྤྱོད། །ཅེས་གཏད་པས་འཁོར་ཐམས་ཅད་ཀྱིས་རྗེས་སུ་འཛིན་པར་གྱུར་ཏོ། །པདྨ་དབང་ཆེན་དྲེགས་པ་ཟིལ་གནོན་དབང་དུ་སྡུད་པ་ལས། རྒྱུད་གཏད་པའི་ལེའུ་སྟེ་བཅུ་གསུམ་པའོ།། །། དབང་ཆེན་དྲེགས་པ་དབང་སྡུད་ཀྱི་རྒྱུད་རྫོགས་སོ།། །། གུ་རུ་པདྨ་དང་ཁ་ཆེ་ཨཱ་ནནྟས་བསྒྱུར་བའོ།། །།