སྒྲོལ་མའི་སྒྲུབ་ཐབས།
ཀླུ་སྒྲུབ།
༄། །རྒྱ་གར་སྐད་དུ། ཏཱ་ར་སཱ་དྷ་ནི། བོད་སྐད་དུ། སྒྲོལ་མའི་སྒྲུབ་ཐབས། རྗེ་བཙུན་སྒྲོལ་མ་ལ་ཕྱག་འཚལ་ལོ། །འཁོར་བའི་སེམས་ཅན་ཐམས་ཅད་ཀྱི། །སྡུག་བསྔལ་ཐམས་ཅད་སྤངས་ནས་ནི། །མྱ་ངན་འདས་པ་རབ་སྟེར་བ། །ཆུ་ལས་སྐམ་སར་འདོན་པ་བཞིན། །རྗེ་བཙུན་མ་ལ་ཕྱག་འཚལ་ནས། །སྒྲུབ་པའི་ཐབས་ནི་བྲི་བར་བྱ། །སྒྲུབ་པའི་ཐབས་ནི་གཞན་རྣམས་ལས། །འདི་ནི་མཆོག་ཏུ་གྱུར་པ་ཡིན། །ཡིད་དང་རྗེས་སུ་མཐུན་པའི་གནས་སུ་ཁྲུས་བྱས་ལ། སྟན་བདེ་བ་ལ་འདུག་སྟེ། སྐད་ཅིག་གིས་བདག་ཉིད་རྗེ་བཙུན་མར་བསྐྱེད་ལ། དེའི་ཐུགས་ཀར་སྣ་ཚོགས་པདྨ་དང་ཟླ་བའི་སྟེང་དུ་ཏཱཾ་ལྗང་གུ་བསམ། ཏཱཾ་ལས་འོད་ཟེར་ཕྱོགས་བཅུར་འཕྲོས་པས་སངས་རྒྱས་དང་བྱང་ཆུབ་སེམས་དཔའ་རྣམས་དང༌། བླ་མ་དང་རྗེ་བཙུན་མ་སྤྱན་དྲངས་ལ་ཕྱག་འཚལ་བ་དང༌། ཨོཾ་བཛྲ་པུཥྤེ་ཨཱཿཧཱུཾ། ཞེས་བྱ་བ་ལ་སོགས་པས་མཆོད་པ་དབུལ་བ་དང༌། སྡིག་པ་བཤགས་པ་དང༌། བསོད་ནམས་ལ་རྗེས་སུ་ཡི་རང་བ་དང༌། ཆོས་ཀྱི་འཁོར་ལོ་
༄། །བསྐོར་བར་བསྐུལ་བ་དང༌། མྱ་ངན་ལས་མི་འདའ་བར་བཞུགས་སུ་གསོལ་བ་དང༌། གསུམ་ལ་སྐྱབས་སུ་འགྲོ་བ་དང༌། སེམས་བསྐྱེད་པ 
་དང༌། དགེ་བའི་རྩ་བ་བསྔོ་བར་བྱའོ། །དེ་ནས་བྱམས་པ་དང། སྙིང་རྗེ་དང༌། དགའ་བ་དང༌། བཏང་སྙོམས་ཚད་མེད་པ་བཞི་བསྒོམ་པར་བྱའོ། །དེའི་རྗེས་ལ་ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭཱ་བྷཱ་བ་ཨཱཏྨ་ཀོ྅ཧཾ། །ཞེས་བརྗོད་ལ་སྟོང་པའི་དང་ལས་པཾ་དམར་པོ་ཅིག་བསམ། དེ་ཡོངས་སུ་གྱུར་པ་ལས་སྣ་ཚོགས་པདྨ། །དེའི་སྟེང་དུ་ཨ་དཀར་པོ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར། དེའི་སྟེང་དུ་ཏཱཾ་ལྗང་གུ་གཅིག་བསམ། དེ་ལས་འོད་ཟེར་ཕྱོགས་བཅུར་འཕྲོས་པས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྱན་དྲངས་ནས་ཏཱཾ་ལ་ཚུར་ཐིམ་པས་ཐིག་ལེ་དཀར་པོ་ཅིག་ཏུ་གྱུར། ཐིག་ལེ་དེ་ཡོངས་སུ་གྱུར་པ་ལས་ཨུཏྤལ་སྔོན་པོའོ། །དེའི་སྟེང་དུ་ཨ་དཀར་པོ་ཅིག་བསམ། དེ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་ཅིག་བསམ། དེའི་སྟེང་དུ་ཏཱཾ་ལྗང་གུ་ཅིག་བསམ། ཏཱཾ་ལས་འོད་འཕྲོས་པས་སེམས་ཅན་གྱི་དོན་བྱས་སེམས་ཅན་ཐམས་ཅད་སྒྲོལ་མའི་རང་བཞིན་དུ་གྱུར་ཏེ། འོད་ཟེར་ཚུར་འདུས་ཏེ་ཏཱཾ་ལ་ཐིམ་པས་ཨུཏྤལ་དང༌། པདྨའི་
༄། །དཀྱིལ་དང༌། ཏཱཾ་ཡོངས་སུ་གྱུར་པ་ལས་བདག་ཉིད་རྗེ་བཙུན་སྒྲོལ་མ་སྐུ་མདོག་ལྗང་གུ་ཞལ་གཅིག་ཕྱག་གཉིས་མ་ཕྱག་གཡས་པ་མཆོག་སྦྱིན། གཡོན་པ་ཨུཏྤལ་བསྣམས་པ། ཞབས་གཡས་བརྐྱང་གཡོན་བསྐུམ་དུ་བཞུགས་པ། རྒྱན་ཐམས་ཅད་ཀྱིས་བརྒྱན་པ། ལོ་བཅུ་དྲུག་ལོན་པ་ལྟ་བུར་བསྒོམ་པར་བྱའོ། །དེ་ནས་ཕྱོགས་བཞིའི་པདྨ་འདབ་མ་བཞི་ལ་ཨ་དཀར་པོ་བཞི་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་བཞི་བསམ། དེ་ནས་བདག་ཉིད་ཀྱི་ལྟེ་བ་ནས་འོད་ཟེར་བཞི་འཕྲོས་པ་ལས་ཤར་དུ་དཀར་པོ། ལྷོར་སེར་པོ། ནུབ་ཏུ་དམར་པོ། བྱང་དུ་ནག་པོ། དེ་བཞི་ཡོངས་སུ་གྱུར་པ་ལས་ཡི་གེ་བཞི་རུ་གྱུར་ཏེ། ཤར་དུ་ཨོཾ་དཀར་པོ། །ལྷོ་རུ་ཏཱ་སེར་པོ། ནུབ་ཏུ་རེ་དམར་པོ། །བྱང་དུ་ཏུ་ནག་པོ། དེ་རྣམས་ཡོངས་སུ་གྱུར་པ་ལས་ཤར་དུ་པདྨ་དཀར་པོ། །ལྷོ་རུ་མྱ་ངན་མེད་པའི་ཤིང་སེར་པོ། ནུབ་ཏུ་པདྨ་དམར་པོ། བྱང་དུ་གྲི་གུག་ནག་པོ། །ཕྱག་མཚན་དེ་བཞིའི་སྟེང་དུ་ཨ་དཀར་པོ་བཞི་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་བཞིའི་སྟེང་དུ་ཤར་དུ་ཨོཾ་དཀར་པོ། ལྷོ་རུ་ཏཱ་སེར་པོ། ནུབ་ཏུ་རེ་དམར་པོ། བྱང་དུ་ཏུ་ནག་པོ། ཕྱག་མཚན་དང་ཟླ་བའི་ས་བོན་ཡོངས་སུ་གྱུར་པ་ལས། ཤར་དུ་སོ་སོར་འབྲང་མ་སྐུ་མདོག་དཀར་མོ་ཞལ་གཅིག་མ། ཕྱག་གཉིས་མ། སྤྱན་
གསུམ་མ། སྐྱིལ་ཀྲུང་དང་བཅས་པ ། ཕྱག་གཡས་ནོར་བུ་རིན་པོ་ཆེ། གཡོན་པ་ན་པདྨ་དཀར་པོའི་སྟེང་ན་རིན་པོ་ཆེའི་བུམ་པ་སེར་པོ་བསྣམས་པའོ། །ལྷོ་ཕྱོགས་སུ་འོད་ཟེར་ཅན་སྐུ་མདོག་སེར་མོ་ཞལ་གཅིག་ཕྱག་གཉིས་མ་སྤྱན་ གསུམ་མ། སྐྱིལ་ཀྲུང་དང་བཅས་པ ་ཕྱག་གཡས་ན་རྡོ་རྗེ་བསྣམས་པ། གཡོན་པ་ན་མྱ་ངན་མེད་པའི་ཤིང་སེར་པོའོ། །ནུབ་ཕྱོགས་སུ་ཕག་མོ་སྐུ་མདོག་དམར་མོ་ཞལ་གཅིག་ཕྱག་གཉིས་མ། ཕག་གི་གདོང་པ་ཅན། སྤྱན་ གསུམ་པ ་སྐྱིལ་ཀྲུང་དང་བཅས་པ། ཕྱག་གཡས་ན་པདྨ་དམར་པོ། གཡོན་མཉམ་པར་གཞག་པའོ། །བྱང་ཕྱོགས་སུ་རལ་པ་གཅིག་མ་སྐུ་མདོག་ནག་མོ་ཁྲོ་མོའི་ཞལ་ཅན། ཞལ་གཅིག་ཕྱག་གཉིས་མ། སྤྱན་ གསུམ་མ། ཕྱག་གཡས་པ ་ན་གྲི་གུག་བསྣམས་པ། གཡོན་པ་ན་ཐོད་པ་ཁྲག་གིས་བཀང་པ་བསྣམས་
༄། །པ། སྟག་གི་པགས་པའི་ཤམ་ཐབས་ཅན། སྐྱིལ་ཀྲུང་དུ་བཞུགས་པའོ། །དེ་ནས་གཙོ་མོའི་ཐུགས་ཀ་ནས་སྣ་ཚོགས་པདྨའི་སྟེང་ན་ཟླ་བའི་དཀྱིལ་འཁོར་དེའི་སྟེང་ན་ཏཱཾ་ལྗར་གུ་དེ་ལས་འོད་ཟེར་འཕྲོས་པས་ཡེ་ཤེས་གྱི་ལྷ་ལྔའི་བདག་ཉིད་སྤྱན་དྲངས་ནས་མདུན་དུ་བྱོན་པ་ལ་མཆོད་པ་དབུལ་བར་བྱ་སྟེ། ཨརྒྷཾ་དབུལ་བ་ནི། ཨོཾ་ཨཱཿ་ཧཱུཾ་ཨརྒྷཾ་པྲི་ཏཱིཙྪ་སྭཱཧཱ། ཨོཾ་ཨཱཿ་ཧཱུཾ་པུ་ཥྤཾ་པྲ་ཏཱིཙྪ་སྭཱཧཱ། ཨོཾ་ཨཱཿ་ཧཱུཾ་དྷཱུ་པཾ་པྲ་ཏཱིཙྪ་སྭཱ་ཧཱ། ཨོཾ་ཨཱཿ་ཧཱུཾ་དཱི་པཾ་པྲ་ཏཱིཙྪ་སྭཱཧཱ། ཨོཾ་ཨཱཿ་ཧཱུཾ་གནྡྷ་པྲ་ཏཱི་སྭཱཧཱ། ཨོཾ་ཨཱཿ་ཧཱུཾ་ནཻ་ཝྸི་དྱཾ་པྲ་ཏཱིཙྪ་སྭཱ་ཧཱ་ཞེས་མཆོད་པ་བྱས་ལ་སྙིང་གར་ཨུཏྤལའི་ཕྱག་རྒྱ་བྱས་ལ་ཛཿཧཱུཾ་བཾ་ཧོཿ། ཞེས་བྱ་བས་དགུག་པ་དང་གཞུག་པ་དང་བཅིང་བ་དང་དགྱེས་པ་བྱས་སོ། །དེ་ནས་བདག་གི་ཐུགས་ཀ་ནས་སྣ་ཚོགས་པདྨ་དང་ཟླ་བའི་དཀྱིལ་འཁོར་གྱི་ཏཱཾ་ལྗང་གུ་ལས་འོད་ཟེར་འཕྲོས་ཏེ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྱན་དྲངས་ནས། དེ་རྣམས་ཀྱི་ཕྱག་ན་རིན་པོ་ཆེའི་བུམ་པ་བདུད་རྩིས་བཀང་བ་ཐོགས་ནས་བྱོན་པ་ལ་སྔ་མ་ལྟར་མཆོད་པ་དབུལ་བར་བྱའོ། །ཨ་བྷི་ཥིཉྩ་ཏུ་མཱཾ་སརྦ་ཏ་ཐཱ་ག་ཏཱ་ཞེས་བརྗོད་པས་བདུད་རྩིའི་བུམ་པ་ཆུས་བཀང་བས་དབང་བསྐུར་བར་བསམས་ལ་རིགས་ཀྱི་བདག་པོས་དབུ་བརྒྱན་པ་ནི་གཙོ་མོའི་སྤྱི་བོར་དོན་ཡོད་གྲུབ་པའོ། །སོ་སོར་འབྲང་མ་ལ་ནི་རྣམ་པར་སྣང་མཛད་དོ། །འོད་ཟེར་ཅན་མ་ལ་ནི་རིན་ཆེན་འབྱུང་ལྡན་ནོ། །ཕག་མོ་ལ་སྣང་བ་མཐའ་ཡས་སོ། །རལ་གཅིག་མ་ལ་མི་བསྐྱོད་པས་དབུ་བརྒྱན་ནོ། །དེ་ནས་སྐུ་གསུང་ཐུགས་བྱིན་གྱིས་བརླབ་པ་ནི་སྤྱི་བོར་ཟླ་བའི་དཀྱིལ་འཁོར་གྱི་སྟེང་དུ་ཨོཾ་དཀར་པོ། མགྲིན་པར་པདྨ་དམར་པོའི་སྟེང་དུ་ཨཱཿདྨར་པོ་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ནག་པོ། དེ་ནས་གཙོ་མོ་ཉིད་ལ་བྱིན་གྱིས་བརླབ་པར་བྱའོ། །འཁོར་ལ་ནི་མི་དགོས་སོ། །དེ་ནས་གནས་རྣམ་པ་བརྒྱད་དུ་ཕྱག་རྒྱ་བཅིང་བར་བྱ་སྟེ། གནས་བརྒྱན་ན་ཟླ་བའི་དཀྱིལ་འཁོར་བརྒྱད་ཡོད་པའོ། །དེའི་སྟེང་ན་ཡི་གེ་བརྒྱད་ཡོད་པ་ནི་ཁ་དོག་དཀར་པོའོ། །ལག་པ་གཉིས་ཁུ་ཚུར་བཅིངས་ཏེ། མཐེ་བོ་གཉིས་མཛུབ་མོའི་སྟེང་དུ་བཞག་ལ་སྤྱི་བོར་གཏུགས་ཏེ་ཨོཾ་སྭཱ་ཧཱ་ཞེས་བརྗོད་པ་ནི་སྤྱི་བོའི་ཕྱག་རྒྱའོ། །
༄། །ཁུ་ཚུར་གཉིས་བཅིངས་ཏེ་མཛུབ་མོ་གཉིས་རང་བཞིན་དུ་བཀུག་སྟེ་རྩེ་མོ་གཉིས་སྤྲད་མཐེ་བོང་གཉིས་གུང་མོའི་རྒྱབ་ཏུ་བརྐྱང་ལ་དཔྲལ་བར་གཏུགས་ཏེ་ཏཱ་སྭཱ་ཧཱ་ཞེས་བརྗོད་པ་ནི་དཔྲལ་བའི་ཕྱག་རྒྱའོ། །ཐལ་མོ་ཁོང་སྟོང་དུ་བྱས་ལ་མཐེ་བོང་གཉིས་ནང་དུ་བཀུག་སྟེ་མིག་གཉིས་སུ་གཏུགས་ཤིང་རེ་སྭཱ་ཧཱ་ཞེས་བརྗོད་པ་ནི་མིག་གི་ཕྱག་རྒྱའོ། །ཁུ་ཚུར་གཉིས་བཅངས་ཏེ་མཛུབ་མོ་གཉིས་རང་བཞིན་དུ་བཀུག་སྟེ་རྩེ་མོ་གཉིས་སྤྲད་མཐེ་བོང་གུང་མོའི་སྟེང་དུ་བརྐྱང་ལ་མགྲིན་པར་གཏུགས་ཏེ་ཏུཏ་སྭཱ་ཧཱ་ཞེས་བརྗོད་པ་ནི་མགྲིན་པའི་ཕྱག་རྒྱའོ། །ཁུ་ཚུར་བཅིངས་ཏེ་མཐེ་བོང་གཉིས་དང་མཛུབ་མོ་གཉིས་གྱེད་ལ་དཔུང་པ་གཉིས་ཀྱི་སྟེང་དུ་གཏུགས་ཏེ་ཏཱ་སྭཱ་ཧཱ་ཞེས་བྱ་བ་ནི་དཔུང་པའི་ཕྱག་རྒྱའོ། །ཐལ་མོ་སྦྱར་ལ་མཐེ་བོང་གཉིས་བསླང་སྟེ་གྱེད་ལ་སྙིང་གར་གཏུགས་ཏེ་རེ་སྭཱ་ཧཱ་ཞེས་བྱ་བ་ནི་སྙིང་གའི་ཕྱག་རྒྱའོ། །ཁུ་ཚུར་གཉིས་བཅིངས་ཏེ་མཐེ་བོང་གཉིས་དང་མཐེའུ་ཆུང་གཉིས་བརྐྱང་སྟེ་གུང་མོ་གཉིས་རྩེ་སྤྲད་པ་བཀུག་སྟེ་ལྟེ་བར་གཏུགས་ཏེ་ཏུ་སྭཱ་ཧཱ་ཞེས་བྱ་བ་ནི་ལྟེ་བའི་ཕྱག་རྒྱའོ། །ཁུ་ཚུར་གཉིས་བཅིངས་ཏེ་མཐེ་བོང་གཉིས་མཛུབ་མོའི་སྟེང་དུ་བརྐྱང་ལ་གུང་མོ་གཉིས་རང་སོར་བརྐྱང་སྟེ་རྩེ་མོ་གཉིས་སྤྲད་ལ་བག་ཙམ་བསྐུམ་སྟེ། གསང་བའི་གནས་སུ་གཏུགས་ལ་རེ་སྭཱ་ཧཱ་ཞེས་བྱ་བ་ནི་གསང་བའི་ཕྱག་རྒྱའོ། །ཕྱག་རྒྱ་བཅིངས་པའི་དགོས་པ་ནི་དམ་ཚིག་བསྲུང་བར་འགྱུར་ པ་དང༌། ལུས་ངག་ཡིད་གསུམ ་དགེ་བ་ལ་བརྟེན་པར་འགྱུར་བ་དང༌། ཀུན་རྫོབ་པ་དང་དོན་དམ་པའི་ཆོས་ཐམས་ཅད་སེམས་ལ་བརྟེན་པ་ཉིད་དུ་འཛིན་པའོ། །ཡང་དགོས་པ་གཉིས་སྟེ་འཇིག་རྟེན་པ་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་འབྱུང་བར་འགྱུར་བ་དང༌། བདག་ལ་བདུད་ལ་སོགས་པའི་བར་ཆད་ཐམས་ཅད་ཀྱིས་མི་ཚུགས་པར་འགྱུར་བའི་དགོས་པའོ། དེ་ནས་བདག་གི་སྙིང་གར་སྣ་ཚོགས་པད་ཟླའི་སྟེང་དུ་ཏཱཾ་ལྗང་གུ་ལས་འོད་ཟེར་འཕྲོས་པས་སེམས་ཅན་ཐམས་ཅད་ལ་ཕོག་སྟེ་སེམས་ཅན་ཐམས་ཅད་རྗེ་བཙུན་མའི་གཟུགས་སུ་བྱས་པས་སེམས་ཅན་ཐམས་ཅད་ཀྱི་ཉོན་མོངས་པ་ལྔ་དག་པར་བྱས་སོ། །དེ་ནས་ཚུར་འདུས་ཏེ་ཏཱཾ་ལ་ཐིམ་པར་འགྱུར་རོ། །དེ་ལྟར་སྤྲོ་བ་དང་བསྡུ་པར་བྱའོ། །སྐྱོན་བཟླས་པ་བྱ་སྟེ་ཐུགས་ཀའི་ཟླ་བའི་
༄། །དཀྱིལ་འཁོར་གྱི་སྟེང་ན་ཏཱཾ་ལྗང་གུ་ལ་ཡི་གེ་བཅུས་གཡས་སྐོར་དུ་བསྐོར་ཏེ་མར་མེའི་ཕྲེང་བ་ལྟ་བུར་བཟླས་པར་བྱའོ། །ཨོཾ་ཏཱ་རེ་ཏུཏྟཱ་ཏུ་རེ་ཏུ་རེ་སྭཱ་ཧཱ་ཞེས་བརྗོད་པར་བྱའོ། །དེར་ཡང་མགྱོགས་པ་མ་ཡིན། །བུལ་བ་མ་ཡིན་པར་ཏེ་སྔགས་བཟླས་པའི་ལུགས་ གསུམ་སྟེ་རང་གིས་ཐོས་ལ་གཞན་གྱིས་མི་ཐོས་པ ་དང༌། རང་གཞན་གཉིས་ཀས་ཐོས་པ་དང༌། ངག་མ་ཡིན་པའི་སེམས་ཀྱིས་བཟླས་ པ་དང་གསུམ ་མོ། །དང་པོའི་དགོས་པ་ནི་ཞི་བ་དང་རྒྱས་པ་དང་དགུག་ པ་འགྲུབ་པར་འགྱུར་རོ། །གཉིས་པས་ནི་མངོན་སྤྱོད་འགྲུབ་པར་འགྱུར་རོ། །གསུམ ་པས་ནི་ཕྱག་རྒྱ་ཆེན་པོའི་དངོས་གྲུབ་ཐོབ་པར་འགྱུར་རོ། །བསྙེན་པའི་གྲངས་ནི་བྱེ་བ་ཕྲག་གཅིག་གོ །ལས་ལ་སྦྱོར་བའི་དུས་སུ་གཙོ་མོའི་སྐུ་མདོག་སྒྱུར་གྱི་འཁོར་གྱི་མི་སྒྱུར་རོ། །དེ་ཡང་ཞི་བ་ལ་ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། མམ་ཤཱནྟིཾ་ཀུ་རུ་སྭཱ་ཧཱ་ཞེས་བརྗོད་པར་བྱའོ། །རྒྱས་པ་ལ་ནི་ཨོཾ་ཏཱ་རེ་ཏུཏྟཱ་རེ་ཏུ་རེ་བཽ་ཥཊ་མ་མ་པུཥྚིཾ་ཀུ་རུ་བརྗོད་པར་བྱའོ། །དགྲ་གྲོགས་པོར་བྱ་བ་ལ་ནི། ཨོཾ་ཏཱ་རེ་ཏུཏྟཱ་རེ་ཏུ་རེ་བ་ཥཊ་ཨ་མུ་ཀཾ་བ་ཤིཾ་ཀུ་རུ་བ་ཥཊ་ཅེས་བརྗོད་པར་བྱའོ། །དགུག་པ་ལ་ནི་ཨོཾ་ཏཱ་རེ་ཏུཏྟཱ་རེ་ཏུ་རེ་ཛྙཱ་ན་ཨ་མུ་ཀཾ་ཨཱ་ཀཪྵ་ཡ་ཛཿ་ཞེས་བརྗོད་པར་བྱའོ། །བསྐྲད་པ་ལ་ནི་ཨོཾ་ཏཱ་རེ་ཏུཏྟཱ་རེ་ཏུ་རེ་ཕུ་ཨ་མུ་ཀ་ཨུ་ཙ་ཊ་ཡ་ཕུ་ཞེས་བརྗོད་པར་བྱའོ། །བཅིང་པ་ལ་དགྲ་ལུས་བཅིང་བ་ནི། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀ་སྟཾ་བྷ་ཡ་ལཾ་ཞེས་བརྗོད་པར་བྱའོ། །དག་བཅིང་བ་ནི་ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ་ལཾ་ཨ་མུ་ཀ་ཝཱ་ཙ་སྟཾ་བྷ་ཡ་ལཾ་ཞེས་བརྗོད་པར་བྱའོ། །དགྲ་རང་གི་གནས་སུ་བཅིང་བ་ནི། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ་ལཾ་ཨཱ་ཀཪྵ་ཨ་མུ་ཀ་ལཾ་སྟཾ་བྷ་ཡ་ལཾ་ཞེས་བརྗོད་པར་བྱའོ། །གསད་པ་ལ་ནི་ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ་ཧཱུཾ་ཕཊ་ཨ་མུ་ཀཾ་མཱ་ར་ཡ་ཧཱུཾ་ཕཊ་ཅེས་བརྗོད་པར་བྱའོ། །དེ་ནས་གཏོར་མ་གཏང་བར་བྱ་སྟེ་མདུན་དུ་ཨ་དཀར་པོ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་གྱི་སྟེང་དུ་གཏོར་མའི་སྣོད་དངུལ་ལས་བྱས་པར་མོས་པར་བྱའོ། །དེའི་ནང་དུ་ཨ་དཀར་པོ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར། །དེའི་སྟེང་དུ་ཨོཾ་དཀར་པོ་ལས་འོད་ཟེར་འཕྲོས་པས་ཡེ་ཤེས་ཀྱི་བདུད་རྩི་བཀུག་སྟེ་ཨོཾ་དང་ཟླ་བ་ལ་བབས་པས་དེ་རྣམས་ཞུ་བས་འོ་མ་ལྟ་བུར་གྱུར་ཏོ། །དེ་ནས་ཨོཾ་ཨཱཿ་ཧཱུཾ་ཞེས་ལན་གསུམ་
༄། །བརྗོད་ལ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ་ཞེས་བརྗོད་དེ། གཙོ་འཁོར་ཐམས་ཅད་ཀྱི་ལྕེ་རྡོ་རྗེའི་སྦུ་གུ་དང་ལྡན་པས་གསོལ་བར་བསམ་པར་བྱའོ། །ཆོས་སྐྱོང་བ་རྣམས་ལ་ནི། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎྰཾ་ཨཱ་དྱ་ནུ་ཏྤནྣ་ཏྭཱཏ་ཨོཾ་ཨཱཿ་ཧཱུཾ་ཕཊ་སྭཱ་ཧྰ་ཞེས་ལན་གསུམ་བརྗོད་དེ་ལྕེ་རྡོ་རྗེའི་སྦུ་གུ་དང་ལྡན་པས་གསོལ་བར་བསམ་པར་བྱའོ། །ཐུན་ཐ་མ་ལ་ནི་ཡེ་ཤེས་ཀྱི་ལྷ་གཤེགས་སུ་གསོལ་ལོ། །དམ་ཚིག་སེམས་དཔའ་བདག་ལ་བསྡུ་བར་བྱའོ། །ད་ནི་རྣམ་པར་དག་པར་བཤད་པར་བྱའོ། །གཙོ་མོའི་ཞལ་གཅིག་ཏུ་བྱུང་བ་ནི་ཆོས་ཐམས་ཅད་ཡེ་ཤེས་གཅིག་ཏུ་རྟོགས་པའོ། །སྐུ་མདོག་ལྗང་གུ་བྱུང་བ་ནི་ལས་སྣ་ཚོགས་ལ་དབང་བའོ། །ཕྱག་གཉིས་སུ་བྱུང་བ་ནི་གཡས་པ་ཀུན་རྫོབ་གཡོན་པ་དོན་དམ་བདེན་པ་གཉིས་རྟོགས་པའོ། །ཞབས་གཡས་བརྐྱང་བ་ནི་བདུད་ལ་སོགས་པའི་སྐྱོན་ཐམས་ཅད་སྤངས་པའོ། །གཡོན་པ་སྐུམ་པ་ནི་ཡོན་ཏན་ཐམས་ཅད་རྫོགས་པའོ། །རྒྱན་ཐམས་ཅད་ཀྱིས་བརྒྱན་པ་ནི་ཚོགས་ཡོངས་སུ་རྫོགས་པ་སྟེ། གཙོ་འཁོར་མཐུན་པའོ། །ཕྱག་གཡས་པ་མཆོག་སྦྱིན་པ་ནི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པའོ། །གཡོན་པ་སྐྱབས་སྦྱིན་པ་ནི་སེམས་ཅན་ཐམས་ཅད་འཇིགས་པ་ལས་སྐྱོབ་པའོ། །ཨུཏྤལ་བསྣམས་པ་ནི་སེམས་ཅན་ཐམས་ཅད་དགའ་བར་བྱེད་པའོ། །ལོ་བཅུ་དྲུག་ལོན་པ་ལྟ་བུ་ནི་སེམས་ཅན་ཐམས་ཅད་ཀྱི་དོན་བསྒྲུབ་པའི་ནུས་པ་དང་ལྡན་པའོ། །ཟླ་བའི་དཀྱིལ་འཁོར་གྱི་གདན་ནི་ཤེས་རབ་དང་ལྡན་པའོ། །སྣ་ཚོགས་པདྨའི་གདན་ནི་སྙིང་རྗེའི་རང་བཞིན་དང་ལྡན་པའོ། །རིགས་ནི་དོན་ཡོད་གྲུབ་པའི་རིགས་སོ། །ཕུང་པོ་ནི་རྣམ་པར་ཤེས་པའི་ཕུང་པོའོ། །ཡེ་ཤེས་ནི་ཆོས་ཀྱི་དབྱིངས་རྣམ་པར་དག་པའི་ཡེ་ཤེས་སོ། །སོ་སོར་འབྲང་མའི་སྐུ་མདོག་དཀར་མོ་ནི་ཆོས་ཐམས་ཅད་དྲི་མ་མེད་ པ་དང་ལྡན་པའོ། །ཞལ་གཅིག་ཕྱག་གཉིས་སུ་བྱུང་བ་གཙོ་མོ་དང་མཐུན་ནོ། །སྤྱན་གསུམ ་ནི་དུས་ གསུམ་མཁྱེན་པའོ། །ཕྱག་གཡས་པ ་རིན་པོ་ཆེ་ནི་སེམས་ཅན་ཐམས་ཅད་ཀྱི་དགོས་འདོད་ཀྱི་རེ་བ་སྐོང་བའོ། །ཕྱག་གཡོན་པའི་པདྨ་དཀར་པོ་ནི་ཆོས་ཐམས་ཅད་སྐྱོན་དང་བྲལ་པའི་རྟགས་སོ། །དེའི་སྟེང་ན་རིན་པོ་ཆེའི་བུམ་པ་སེར་པོ་ཡོད་པ་ནི་ཆོས་ཐམས་ཅད་ལ་རིན་
༄། །པོ་ཆེར་འཛིན་པའོ། །ཕུང་པོ་ནི་གཟུགས་ཀྱི་ཕུང་པོའོ། །ཡེ་ཤེས་ནི་མེ་ལོང་ལྟ་བུའི་ཡེ་ཤེས་སོ། །རིགས་ནི་རྣམ་པར་སྣང་མཛད་ཀྱི་རིགས་སོ། །འོད་ཟེར་ཅན་གྱི་སྐུ་མདོག་སེར་མོ་ནི་སེམས་ཅན་ཐམས་ཅད་ཀྱི་དོན་རྒྱས་པར་བྱེད་པའོ། །ཞལ་གཅིག་ཕྱག་གཉིས་ནི་གཙོ་མོ་དང་མཐུན་ནོ། །ཕྱག་གཡས་ཀྱི་རྡོ་རྗེའི་ར་འོག་མ་ལྔ་ནི་ཕུང་པོ་ལྔ་དག་པའོ། །སྟེང་གི་ར་ལྔ་ནི་རྒྱལ་བ་རིགས་ལྔ་དང་ལྡན་ནོ། །གཡོན་པའི་མྱ་ངན་མེད་པའི་ཤིང་ནི་སེམས་ཅན་ཐམས་ཅད་ཀྱི་དུཿཁ་སྤོང་བར་བྱེད་པའོ། །ཕུང་པོ་ནི་ཚོར་བའི་ཕུང་པོ་རྣམ་པར་དག་པའོ། །ཡེ་ཤེས་ནི་མཉམ་པ་ཉིད་ཀྱི་ཡེ་ཤེས་སོ། །རིགས་ནི་རིན་ཆེན་འབྱུང་ལྡན་གྱི་རིགས་སོ། །ཕག་མོ་ཞལ་གཅིག་ཕྱག་གཉིས་ནི་གཙོ་མོ་དང་མཐུན་ནོ། །སྐུ་མདོག་དམར་མོ་ནི་སེམས་ཅན་ཐམས་ཅད་ལ་སྙིང་རྗེ་དང་ལྡན་པའོ། །ཕག་གི་གདོང་པ་ནི་བདུད་ཐམས་ཅད་འདུལ་བའོ། །ཕྱག་གཡས་ཀྱི་པདྨ་དམར་པོ་ནི་ཆོས་ཐམས་ཅད་རིན་པོ་ཆེ་པདྨ་རཱ་ག་ལྟ་བུར་བུར་རྟོགས་པའོ། །གཡོན་མཉམ་གཞག་ནི་ཆོས་ཐམས་ཅད་མཉམ་པ་ཉིད་དུ་རྟོགས་པའོ། །ཕུང་པོ་ནི་འདུ་ཤེས་ཀྱི་ཕུང་པོ་རྣམ་པར་དག་པའོ། །ཡེ་ཤེས་ནི་སོ་སོར་རྟོག་པའི་ཡེ་ཤེས་སོ། །རིགས་ནི་སྣང་བ་མཐའ་ཡས་ཀྱི་རིགས་སོ། །རལ་པ་གཅིག་མའི་ཞལ་གཅིག་ཕྱག་གཉིས་ནི་གཙོ་མོ་དང་མཐུན་པའོ། །ཁྲོ་མོའི་ཞལ་ནི་བདུད་འདུལ་པའི་རྟགས་སོ། །ཕྱག་གཡས་ཀྱི་གྲི་གུག་ནི་ཉོན་མོངས་པ་གཅོད་པའི་རྟགས་སོ། །ཕྱག་གཡོན་པའི་ཐོད་པ་ནི་རྣམ་རྟོག་ཐམས་ཅད་སྤངས་པའི་རྟགས་སོ། །སྐུ་མདོག་ནག་མོ་ནི་བྱམས་པ་ཆེན་པོའི་རྟགས་སོ། །སྟག་གི་པགས་པའི་ཤམ་ཐབས་ནི་འཁོར་བ་ཁྲུག་ཆོལ་གྱི་རང་བཞིན་ཀུན་རྫོབ་ཀྱི་བདེན་པ་རྟོགས་པའོ། །ཕུང་པོ་ནི་འདུ་བྱེད་ཀྱི་ཕུང་པོ་རྣམ་པར་དག་པའོ། །ཡེ་ཤེས་ནི་བྱ་བ་ནན་ཏན་གྱི་ཡེ་ཤེས་སོ། །རིགས་ནི་མི་བསྐྱོད་པའི་རིགས་སོ། །འཁོར་བཞི་ཀ་སྐྱིལ་ཀྲུང་དུ་བྱུང་བ་ནི་གཞན་གྱི་དོན་ལ་ཤིན་ཏུ་བརྟན་པའོ། །མཚམས་ཀྱི་པདྨ་བཞི་ལ་ཨུཏྤལ་བཞི་བྱུང་བ་ནི། སྤྱན་མ། མཱ་མ་ཀཱི། གོས་དཀར་མོ། སྒྲོལ་མ་སྟེ་ལྷ་མོ་བཞིའོ། །འབྱུང་བ་བཞི་རྣམ་པར་དག་པའོ། །ཚད་མེད་པ་བཞིའི་ངོ་བོ་ལྷའི་བདག་ཉིད་ན་རྒྱལ་བ་རིགས་
༄། །ལྔའི་སྤྲུལ་པ་ཉོན་མོངས་པ་ལྔ་སྤངས་པ་སྟེ་གཙོ་མོ་ཕྲག་དོག་སྤངས་པའོ། །སོ་སོར་འབྲང་མ་གཏི་མུག་སྦྱངས་པའོ། །འོད་ཟེར་ཅན་ང་རྒྱལ་སྤངས་པའོ། །ཕག་མོ་ཆགས་པ་སྤངས་པའོ། །རལ་གཅིག་མ་ཞེ་སྡང་སྤངས་པའོ། །དེ་ནི་བསྐྱེད་པའི་རིམ་པ་སྟེ་སྤྲུལ་བའོ། །སྟོང་པ་ཉིད་དུ་མོས་ནས་རྫོགས་པའི་རིམ་པ་བསྒོམ་པ་ནི་ལོངས་སྤྱོད་རྫོགས་པའི་སྐུ་དེ་ཡང་ནི་བདག་གི་སྙིང་གར་སྣ་ཚོགས་པདྨ་དང་ཟླ་བའི་དཀྱིལ་འཁོར་གྱི་སྟེང་གི་ཏཱཾ་ལྗང་གུ་ལས་འོད་ཟེར་དཀར་པོ་རྣམ་སྣང་གི་རང་བཞིན་དུ་གཙོ་མོའི་ལྟེ་བ་ནས་བྱུང་བས་སོ་སོར་འབྲང་མ་སྤྱན་དྲངས་ནས་བདག་གི་དཔྲལ་བར་ཐིམ་མོ། །ཡང་ལྟེ་བ་ནས་འོད་ཟེར་དམར་པོ་འོད་དཔག་མེད་ཀྱི་རང་བཞིན་དུ་བྱུང་བས་ཕག་མོ་སྤྱན་དྲངས་ནས་གཙོ་མོའི་མགྲིན་པར་ཐིམ་མོ། །ཡང་ལྟེ་བ་ནས་འོད་ཟེར་ནག་པོ་མི་བསྐྱོད་པའི་རང་བཞིན་དུ་བྱུང་བས་རལ་གཅིག་མ་གཙོ་མོའི་ཐུགས་ཀར་ཐིམ་མོ། །ཡང་ལྟེ་བ་ནས་འོད་ཟེར་རིན་ཆེན་འབྱུང་ལྡན་གྱི་རང་བཞིན་དུ་བྱུང་བས་འོད་ཟེར་ཅན་གཙོ་མོའི་ལྟེ་བར་ཐིམ་མོ། །དེ་ནས་གཙོ་མོ་ཉིད་པདྨ་དང་ཟླ་བ་དང་ཏཱཾ་གི་ངོ་བོར་གྱུར་ཏོ། །པདྨ་ཡང་ཟླ་བ་ལ་ཐིམ། ཟླ་བ་ཏཱཾ་ལ་ཐིམ། ཏཱཾ་ཟླ་ཚེས་ལ་ཐིམ། ཟླ་ཚེས་ཐིག་ལེ་ལ་ཐིམ། ཐིག་ལེ་བིནྡུ་ལ་ཐིམ་མོ། །བིནྡུ་དམར་པོ་ཁབ་ཀྱི་རྩེ་མོ་ལྟ་བུར་གྱུར་ཏེ། དེ་ནི་ཆོས་ཀྱི་སྐུའོ། །དེ་ནས་རྣམ་པར་རྟོག་པ་མེད་པར་ཉལ་བར་བྱའོ། །དེ་ནས་ནང་པར་སྡར་ལྡང་བའི་དུས་སུ། ནཱ་ད་དེ་ཐིག་ལེར་སོང༌། དེ་ཏཱཾ་དུ་སོང༌། དེ་ཡོངས་སུ་གྱུར་པ་ལས་བདག་ཉིད་གཙོ་བོ་ཉིད་ཀྱིས་སྐད་ཅིག་གིས་བསྐྱེད་ནས། དེའི་ཐུགས་ཀ་ནས་སྣ་ཚོགས་པདྨ་དང་ཟླ་བའི་དཀྱིལ་འཁོར་གྱི་ཏཱཾ་ལས་འོད་འཕྲོས་པས་ཡེ་ཤེས་ཀྱི་འཁོར་ལོ་སྤྱན་དྲངས་ལ་བསོད་ནམས་ཀྱི་ཚོགས་སོགས་པ་ལ་སོགས་པ་སྔ་མ་ལྟར་བྱའོ། །རྗེ་བཙུན་སྒྲོལ་མའི་སྒྲུབ་ཐབས་ཞེས་བྱ་བ། སྒྲོལ་མ་རྒྱ་མཚོའི་རྒྱུད་ནས་ཕྱུང་བ་འཕགས་པ་ཀླུ་སྒྲུབ་ཀྱིས་མཛད་པ་རྫོགས་སོ།། །།རྒྱ་གར་གྱི་པཎྜི་ཏ་ཆེན་པོ་དྷརྨཱ་བཛྲ་དང༌། བོད་ཀྱི་རྡོ་ལོ་ཙཱ་བ་དགེ་སློང་དར་མ་རིན་ཆེན་གྱིས་བསྒྱུར་པའོ། །ཆོས་འཁོར་འཇོ་འཇོའི་གཙུག་ལག་ཁང་དུ་དགེ་བའི་བཤེས་གཉེན་ཆེན་པོ་ཆོས་ཀྱི་བློ་གྲོས་ཀྱིས་ཡོན་བདག་མཛད་པའོ།། །།