རང་བཞིན་དུ་གནས་པའི་སྔགས་ཀྱི་སྤྱོད་པ་བཅུ་པ་ཞེས་བྱ་བ།
གཉིས་མེད་རྡོ་རྗེ།
རྒྱ་གར་སྐད་དུ། །མནྟྲ་ཙཪྻ་ད་ཤ་ཀ་སྭ་བྷཱ་བས་ནཱ་མ། བོད་སྐད་དུ། རང་བཞིན་དུ་གནས་པའི་སྔགས་ཀྱི་སྤྱོད་པ་བཅུ་པ་ཞེས་བྱ་བ། འཕགས་པ་འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །བླ་མ་དང་ནི་ལྷག་པའི་ལྷ། །ཐ་དད་མེད་པར་མཆོད་པར་བྱ།། འགྲོ་བ་རྣམས་དང་རང་ཉིད་ལ། །བདག་གཞན་མི་འབྱེད་དུས་གསུམ་གཏེར། །ལུས་དང་ལོངས་སྤྱོད་སྲོག་རྣམས་ཀྱིས། །འགྲོ་བའི་མཆོག་གཙོ་བཙལ་བས་རྙེད། །དེ་ཡིས་དབང་བསྐུར་རིན་པོ་ཆེ། །དུས་གསུམ་དི་ནི་དྲན་པར་བྱེད། །ཕྱི་དང་ནང་གི་ཆོས་སྤྱོད་ཀུན། །གཉེན་པོ་བསྟེན་པས་མ་ཡིན་ཞིང༌། །དད་པའི་སྟན་ལས་གང་འོངས་པ། །ཁས་ཟས་བཞིན་དུ་བསྟེན་པར་བྱ། །ལྷ་ཡི་རྣལ་འབྱོར་བ་ཅན། །ཡང་ན་རིགས་གཟུངས་མཆོག་གཙོ་བོར། །བྱས་པའི་གང་ཡིན་དེ་དག་ནི། །ཐུན་བཞིར་བསྟན་པས་བསྒོམ་པར་བྱ། །གལ་ཏེ་རྫོགས་པའི་སྐལ་ཡོད་ན། །ཡེ་ཤེས་སྐུ་སྟེ་རབ་འབྱུང་བ། །འཇམ་དཔལ་ཡེ་ཤེས་སེམས་དཔའ་ཡི། །མིང་ནི་ཡང་དག་བརྗོད་པའི་མཆོག །བཟླས་བརྗོད་དོན་དང་ཀློག་པ་དང༌། །བྱ་བའི་རིམ་པ་ལ་མོས་ན། །རིགས་གཞན་དུ་མ་མ་ཡིན་པའི། །རང་གི་རིགས་ལ་བསླབ་པར་བྱ། ། གང་ཟག་འོ་མར་ལྡན་པ་དང༌། །དེ་བཞིན་བཟའ་དང་མཐུན་པའི་དུས། །སངས་རྒྱས་རྣམས་ནི་བསྡུས་བྱས 
་ལ། །བདུད་རྩི་མྱང་བ་བསྒྲུབ་པར་བྱ། །གླུ་དང་གར་ནི་ཇི་སྙེད་དང༌། །དེ་བཞིན་ཡུལ་ལ་རོ་སྙོམས་ན། །ཡུལ་གྱིས་བསླང་བ་མ་ཡིན་ཞིང༌། །རང་གི་ཉམས་ཀྱིས་རོལ་པར་བྱ། །དབེན་པའི་གནས་ལ་བརྟེན་དུས་སུ། །གཙང་སྤྲ་ངོ་ཚ་སྤྱོད་པས་མིན།། དོགས་པ་ཀུན་ལས་གྲོལ་བའི་སེམས། །བསྙུང་དང་དཀའ་ཐུབ་གནས་མི་བྱ། །སྐྱོ་དུབ་སྡུག་བསྔལ་ཅི་བྱུང་ཡང༌། །དམ་པའི་དྲིན་གྱིས་གཟེངས་བསྟོད་དེ། །ཡི་ཆད་སྒྱིད་ལུག་མི་འགྱུར་བར། །སེམས་དགེ་བ་ལ་གནས་པར་བྱ། སྔགས་ཀྱི་སྤྱོད་པ་ལ་གནས་པའི། །སྔགས་པ་མཁའ་སྤྱོད་གནས་སུ་འགྲོ། །སྔགས་ལ་ཞུགས་ནས་སྤྱོད་པ་སྤོབ། །མཁའ་འགྲོ་སྐྲག་ཅིང་མནར་མེད་འགྲོ། །རང་བཞིན་དུ་གནས་པའི་སྔགས་ཀྱི་སྤྱོད་པ་བཅུ་པ་ཞེས་བྱ་པ། །དཔལ་ལྡན་གཉིས་མེད་རྡོ་རྗེས་མཛད་པ་རྫོགས་སོ། །རྣལ་འབྱོར་པ་བསོད་སྙོམས་པ་པྲ་ཛྙཱ་ཤཱི་ཛྙཱན་ཀཱི་རྟིས་རང་འགྱུར་དུ་མཛད་པའོ།། །།