རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བའི་རྒྱ་ཆེར་བཤད་པ།
ཀུན་དགའ་སྙིང་པོ།
རྒྱ་གར་སྐད་དུ། མཱ་ཡཱ་ཛཱ་ལ་མ་ཧཱ་ཏནྟྲ་རཱ་ཛ་ཊཱི་ཀཱ་ཁྱ། བོད་སྐད་དུ། རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བའི་རྒྱ་ཆེར་བཤད་པ། བཅོམ་ལྡན་འདས་ངག་གི་དབང་ཕྱུག་ལ་ཕྱག་འཚལ་ལོ། །རྫོགས་པའི་སངས་རྒྱས་ལྔ་རྣམས་དང༌། །ལེགས་སྦྱངས་རིགས་པ་བརྒྱད་པ་ནི། །ཡུམ་གྱུར་ལྷ་མོ་བཞི་པོ་དང༌། །སྟོབས་ཆེན་ཁྲོ་བོ་བཅུ་པོ་དང༌། །སྟོང་དུ་བཞིས་མ་ཚང་བའི་སྟོང༌། །བྱང་ཆུབ་སེམས་རྣམས་ཕྱག་འཚལ་ཏེ། །རྒྱུད་བཟང་སྙིང་པོ་སྦས་པ་ཡི། །བདག་གིས་འགྲེལ་པ་གསལ་བར་བྱ། །འདི་སྐད་བདག་གིས་ཐོས་པ་ཞེས་བྱ་བ་ལ་སོགས་བ་འདིའི་བརྗོད་བྱ་ནི་གང་ཡིན། འབྲེལ་པ་ནི་གང་ཡིན། །དགོས་པ་ནི་ཅི་ཞིག་ཡོད། དགོས་པའི་ཡང་དགོས་པ་ནི་ཅི་ཞིག་ཡོད་ཅེ་ན་དེ་བརྗོད་པར་བྱ་སྟེ་དེ་ལ་བརྗོད་པར་བྱ་བ་ནི། བཅོམ་ལྡན་འདས་སྒྱུ་འཕྲུལ་དྲ་བ་སྟེ་དངོས་པོ་ཐམས་ཅད་
ཀྱི་ངོ་བོ་ཉིད་དུ་སྤྲུལ་པས་རྣམ་པར་སྣང་མཛད་རྡོ་རྗེའི་དེ་བཞིན་གཤེགས་པ་ནི་བརྗོད་པར་བྱ་བ་ཡིན་ལ། དེ་སྟོན་པར་བྱེད་པའི་རྒྱུད་ལ་ཡང་དེ་སྐད་ཅེས་བྱ་སྟེ་སྐྱེས་པའི་རབས་ལ་སོགས་པ་བཞིན་ནོ། །འདི་དག་ནི་རྗོད་པ་དང་བརྗོད་པར་བྱ་བའི་མཚན་ཉིད་དམ། ཐབས་དང་ཐབས་ལས་བྱུང་བའི་མཚན་ཉིད་དང་ལྡན་པ་ནི་འབྲེལ་པའོ། །གདུལ་བྱ་རྣམས་དཀོན་མཆོག་གསུམ་ལ་སྐྱབས་སུ་བཏང་བ་ལ་སོགས་པ་སྔོན་དུ་འགྲོ་བས་དཀྱིལ་འཁོར་དུ་འཇུག་པ་ལ་སོགས་པ་རྗེས་སུ་གནང་བས་མངོན་པར་འདོད་པ་བསྐྱེད་པ་ནི་དགོས་པའོ། །མངོན་པར་འདོད་པ་ཡང་དག་པར་སྐྱེས་པ་རྣམས་དཀྱིལ་འཁོར་དུ་འཇུག་པ་ལ་སོགས་པའི་རིམ་གྱིས་རྣམ་པ་ཐམས་ཅད་ཀུན་དུ་བཟང་པོའི་ཡེ་ཤེས་ཐོབ་པ་ནི་དེའི་དགོས་པའི་ཡང་དགོས་པ་ཡིན་ནོ། །རྒྱུད་འདིར་རྒྱུད་ཀྱི་བདག་པོ་ནི་དཔལ་རྣམ་པར་སྣང་མཛད་དེའི་ཡོན་ཏན་སྟོན་པའི་གླེང་གཞི་ཏིང་ངེ་འཛིན་གསུམ་སྟོན་པར་བྱེད་པ་ནི་བཅོམ་ལྡན་འདས་ཞེས་བྱ་བ་ནས་བརྩམས་ཏེ་རྒྱུད་སྟོན་པའི་ཏིང་ངེ་འཛིན་སྟོན་པ་མཐར་ཐུག་པ་ཡིན་ནོ། །དེ་ནས་བརྩམས་ཏེ་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་ཞེས་བྱ་བའི་མཐར་ཐུག་པ་ནི་རྒྱུད་ཡིན་ནོ། །དེ་སྡུད་པར་བྱེད་པ་ནི་ལྕང་ལོ་ཅན་གྱི་ཕོ་བྲང་ན་གནས་པ་ས་བཅུའི་དབང་ཕྱུག་རྡོ་རྗེ་འཆང་གི་རང་གི་དཀྱིལ་འཁོར་ན་གནས་པ་ཀུན་དུ་བཟང་པོ་ལ་སོགས་པ་བྱང་ཆུབ་སེམས་དཔའི་ཚོགས་རྣམས་ལ་འདི་སྐད་ཅེས་བྱ་བ་ལ་སོགས་པ་སྨྲས་པ་ཡིན་ཏེ། དེ་ལ་འདི་སྐད་ཅེས་བྱ་བ་འདིས་ནི་བདག་ཉིད་ཀྱི་ཐོས་པའི་ཤེས་པས་མངོན་དུ་གཟུང་བ་སྟེ་རྒྱུད་ཀྱི་དོན་ངེས་པར་གཟུང་བས་ན་རྒྱུད་ཀྱི་དོན་ཕྱིན་ཅི་ལོག་པ་ཉིད་དུ་སྨྲས་པ་ཡིན་ཏེ་འདི་ནི་འདི་སྐད་ཅེས་པའོ། །བདག་གིས་ཞེས་བྱ་བ་ནི་བདག་ཉིད་ཁས་ལེན་པའི་ཚིག་གིས་ན་མངོན་སུམ་དུ་ཐོས་པའོ། །ཐོས་པ་ཞེས་བྱ་བ་འདི་ནི་བདག་ཉིད་ཀྱིས་ཁོང་དུ་ཆུད་པ་ནི་མེད་པའོ། །གང་གི་ཚེ་གང་ལས་གང་དུ་འཁོར་ཅི་འདྲ་བ་དང་ཅི་ཞིག་ཐོས་ཞེས་འདྲི་བ་ལས། ཅི་རིགས་པར་ལན་འདེབས་པའི་ཕྱིར་སྨྲས་པ་ནི་དུས་གཅིག་ན་ཞེས་བྱ་བ་ནི་ལན་ཅིག་གིས་དུས་ན་ཞེས་བྱ་བའི་དོན་ཏེ་དུས་གཅིག་ན་འདི་ཐོས་ཀྱི་གཞན་གྱི་ཚེ་ན་ནི་གཞན་དག་གོ་ཞེས་པ་སྟེ། འདིས་ནི་སྡུད་པར་བྱེད་པ་བདག་ཉིད་ཐོས་པ་མང་བར་སྟོན་པ་ཡིན་ནོ། །ཡང་ན་དུས་གཅིག་ན་ཞེས་བྱ་བ་ནི་སྐད་ཅིག་མ་གཅིག་ལ་ཞེས་བྱ་བའི་
དོན་དེ་རྣམ་པར་ཐར་པའི་སྒོ་བསམ་གྱིས་མི་ཁྱབ་པ་ལ་དབང་ཐོབ་པས་བདག་གིས་ཐོས་པར་བྱ་བ་གང་ཅི་ཡང་རུང་བ་དེ་ཐམས་ཅད་སྐད་ཅིག་མ་གཅིག་ལ་ཐོས་བ་དེ་ཡང་བརྗོད་པ་མེད་དོ་ཞེས་པ་སྟེ་འདིས་ནི་བདག་ཉིད་ཚད་མའི་སྐྱེས་བུ་ཡིན་པར་བསྟན་ཏོ། །བཅོམ་ལྡན་འདས་ཞེས་བྱ་བ་ནི་བདུད་བཞི་བཅོམ་པ་འམ་དབང་ཕྱུག་ལ་སོགས་པ་དང་ལྡན་པས་ན་བཅོམ་ལྡན་འདས་གནས་རྣམ་པར་སྣང་མཛད་དེ་དེ་བཞུགས་སོ་ཞེས་བྱ་བར་སྦྱར་རོ། །དེ་ནི་འདི་སྐད་སྟོན་པ་ཡིན་ཏེ་གང་གི་ཚེ་བཅོམ་ལྡན་འདས་གནས་གཙང་མའི་སྟེང་ཁང་པ་བརྩེགས་པའི་གཞལ་ཡས་ཁང་བྱང་ཆུབ་སེམས་དཔའ་ཆེན་པོ་ལ་སོགས་པའི་འཁོར་རྣམས་ཀྱིས་བསྐོར་ཏེ་བཞུགས་པ་དེའི་ཚེ་བཅོམ་ལྡན་འདས་ལས་གནས་དེ་ཉིད་དུ་འཁོར་དེ་རྣམས་དང་ལྷན་ཅིག་ཏུ་བདག་གིས་རྒྱུད་འདི་དུས་གཅིག་ན་ཐོས་ཞེས་པའོ། །གནས་གཙང་མའི་སྟེང་ན་ཞེས་བྱ་བ་ལ་སོགས་པ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པ་ཐུགས་སུ་ཆུད་པས་སངས་རྒྱས་བཅོམ་ལྡན་འདས་ནི་གཙང་མ་སྟེ་དེ་རྣམས་ཀྱི་བཞུགས་གནས་ཡིན་པས་གནས་སོ། །དེ་བས་ན་གནས་ཐམས་ཅད་དེ་ལས་མཆོག་ཏུ་གྱུར་པས་ན་སྟེང་ན་སྟེ་གཙོ་བོར་གྱུར་པའོ། །དེ་ཡང་ཡི་གེ་བྷྲཱུཾ་ལས་ངེས་པར་འབྱུང་བ་རང་གི་དམ་ཚིག་ལ་ཀུན་དུ་ཆགས་པའི་རྡོ་རྗེ་དབྱིངས་ཀྱི་དབང་ཕྱུག་མ་ཡོངས་སུ་གྱུར་པ་རིན་པོ་ཆེ་སྣ་བཞིའི་རང་བཞིན་གྱི་མཆོད་རྟེན་ནོ། །དེ་ལ་ཁང་པ་བརྩེགས་མ་ཟུར་བཞི་ལ་སོགས་པ་དང་ལྡན་པ་ནི་དེ་ཉིད་ཀྱི་ཁྱད་པར་ཡིན་ནོ། །རིན་པོ་ཆེ་སྣ་ཚོགས་པའི་ཞེས་བྱ་བ་ནི་པདྨ་རཱ་ག་ལ་སོགས་པའི་རིན་པོ་ཆེ་སྣ་ཚོགས་པའོ། །བཀོད་པ་ནི་དེ་རྣམས་ཀྱི་ཚོགས་ཏེ་རིག་པའི་ཁྱད་པར་དང་བཅོས་བས་གང་བཞུགས་པ་དེ་ལ་དེ་སྐད་ཅེས་བྱའོ། །དེ་བས་ན་དེ་ཉིད་དུའོ། །འདི་ནི་རྒྱུད་ཕྱི་མ་ཡིན་པས་ངེས་པར་གསང་བ་འདུས་པ་ལས་ཤེས་པར་བྱ་སྟེ་དེ་ལས་འདི་ཉིད་གསུངས་པ་ནི། དེ་ནས་དེ་བཞིན་གཤེགས་པ་མི་བསྐྱོད་པས་དེ་བཞིན་གཤེགས་པ་ཐམས་ཅད་ཀྱི་བཙུན་མོའི་བྷ་ག་ལ་དམ་ཚིག་ཆེན་པོའི་དཀྱིལ་འཁོར་གྲུ་བཞིར་བྱིན་གྱིས་བརླབས་པ་ནི་ཞེས་བྱ་བ་ལ་སོགས་པའོ། །གཞལ་ཡས་ཁང་གི་ཁྱད་པར་འདི་ཡང་ནམ་མཁའི་ཁམས་ཐམས་ཅད་པ་གཞན་འཕྲུལ་དབང་བྱེད་ན་དབང་སྒྱུར་གྱི་ལྷ་རྣམས་ཀྱི་གནས་ན་ཡོད་པ་ཡིན་པར་ཤེས་པར་བྱ་སྟེ། འདོད་ཆགས་ལ་སྤྱོད་
པའི་སེམས་ཅན་རྣམས་རྗེས་སུ་གཟུང་བར་བྱ་བའི་ཕྱིར་སྟོན་པར་མཛད་པ་ཡིན་པའི་ཕྱིར་རོ། །དེ་བས་ན་དེ་ཉིད་ནི་གནས་གཙང་མའི་ལྷའི་གནས་ཀྱི་སྟེང་ནི་མ་ཡིན་ནོ། །གཞན་ཡང་གཞལ་ཡས་ཁང་དེ་ཉིད་ཀྱི་ཁྱད་པར་བསྟན་པ་ནི་ཤིན་ཏུ་རྣམ་པར་ཕྱེ་བ་ཞེས་བྱ་བ་ལ་སོགས་པ་ཡིན་ཏེ་ཤིན་ཏུ་རྣམ་པར་མཛེས་པ་ཡང་ཡིན་ཞིང་རྣམ་པར་ཕྱེ་བ་སྟེ་གཅིག་ལ་གཅིག་མ་འདྲེས་པ་ཡང་ཡིན་ལ་དེ་ཡང་རྡོ་རྗེའི་རང་བཞིན་གྱི་ཀ་བ་སྟེ་ཀ་བ་བརྒྱད་ཀྱི་ཚུལ་དུ་དེས་ཉེ་བར་མཛེས་པ་ནི་བརྒྱན་པ་སྟེ་དེར་ཞེས་སྔ་མ་དང་སྦྱར་རོ། །གཞལ་མེད་ཁང་ཆེན་པོའི་མཆོག་གི་བཀོད་པ་ཞེས་བྱ་བ་ནི་ཕྱོགས་བརྒྱད་དུ་བསྐོར་བ་གང་ཡིན་པ་དེ་ལ་དེ་སྐད་ཅེས་བྱའོ། །རྡོ་རྗེ་དྲིལ་བུ་སྒྲ་སྒྲོགས་པ་ནི་ཆོས་རྣམས་ཀྱི་དེ་ཁོ་ན་ཉིད་ཇི་ལྟ་བ་བཞིན་དུ་སྟོན་པའི་སྒྲ་དང་བཅས་པར་ཡང་དག་པར་བྱུང་བ་གང་ཡིན་པ་དེ་ལ་དེ་སྐད་ཅེས་བྱའོ། །ཡིད་ལས་བྱུང་བའི་མཆོད་པའི་ཁྱད་པ་ཆེན་པོས་ཤེས་པར་བྱ་བ་ནི་སངས་རྒྱས་ལ་སོགས་པའི་སྤྲུལ་པ་རྣམས་ཀྱིས་ཏེ་དེས་བརྒྱན་པ་ནི་སྤུད་བའོ། །འཁོར་ལོ་ནི་འོག་ནས་བཤད་པའི་མཚན་ཉིད་དང་ལྡན་པའི་དཀྱིལ་འཁོར་རོ། །རྡོ་རྗེ་ནི་མི་ཕྱེད་པའོ། །སྤྲས་པ་ནི་དེའི་དོན་དུ་སྤྲས་པར་བྱས་པ་དེ་རུ་སྟེ་ཉེ་བར་མཚོན་པ་འདིས་ན་དེ་བཞིན་དུ་སྒོ་དང་སྒོ་ཁྱུད་དང་མཚམས་རྣམས་སུ་ཡང་རྡོ་རྗེ་ལ་སོགས་པས་སྤྲས་ཤིང་བརྒྱན་པའོ། །ཆ་བྱད་སྣ་ཚོགས་འཆང་བ་ནི་སངས་རྒྱས་ཐམས་ཅད་ཀྱི་སྐུ་སྟོན་པས་སམ་རིགས་ལྔའི་སངས་རྒྱས་ཅོད་པན་ལ་བཀོད་པས་རྡོ་རྗེ་སེམས་དཔའ་ལ་སོགས་པ་གང་ཡིན་པ་དེ་ལ་དེ་སྐད་ཅེས་བྱ་སྟེ་དེ་རྣམས་ཀྱིས་བརྒྱན་པ་ཞེས་བྱ་བར་སྔ་མ་དང་སྦྱར་རོ། །དེ་བཞིན་གཤེགས་པ་ནི་ཆོས་སྐུའི་ངོ་བོ་སྟེ་བཅོམ་ལྡན་འདས་རྣམ་པར་སྣང་མཛད་ཆེན་པོའོ། །དེའི་སྤྲུལ་པ་ནི་ལོངས་སྤྱོད་རྫོགས་པའི་སྐུ་འཆང་བ་རྣམ་པར་སྣང་མཛད་རྡོ་རྗེའི་དེ་བཞིན་གཤེགས་པ་སྟེ་བདག་པོ་དེ་ལས་ངེས་པར་འབྱུང་བའི་ཕྱིར་རོ། །དེས་གང་དུ་གདུལ་བྱ་རྣམས་ཀྱི་དོན་བྱ་བ་བྱས་ཤིང་བསྐྱོད་པ་གང་ཡིན་པ་དེ་ལ་དེ་སྐད་ཅེས་བྱའོ། །ཡང་ན་དེ་བཞིན་གཤེགས་པ་ནི་ལོངས་སྤྱོད་རྫོགས་པའི་སྐུ་རྣམ་པར་སྣང་མཛད་འོག་མིན་ན་བཞུགས་པའོ། །དེའི་སྤྲུལ་པ་ནི་དེ་ལས་གཞན་པའི་རྣམ་པར་སྣང་མཛད་རྡོ་རྗེའི་དེ་བཞིན་གཤེགས་པ་སྟེ་དེས་ཞེས་བྱ་བ་ལ་སོགས་པ་ནི་སྔ་མ་བཞིན་ནི། །དེ་བས་ན། གནས་
ལས་གཡོ་བ་མི་མངའོ། །ཞེས་གསུངས་པ་ཡིན་ནོ། །རྣམ་པར་སྣང་མཛད་ནི་སྐུ་རྡོ་རྗེའོ། །དེའི་སྙིང་པོ་ནི་སྐྱེ་གནས་སོ། །ཡང་དག་པར་བྱུང་བ་ནི་བླ་ན་མེད་པའི་ཡེ་ཤེས་ཐུགས་སུ་ཆུད་པ་གང་ཡིན་པ་དེ་ལ་དེ་སྐད་ཅེས་བྱའོ། །སྣ་ཚོགས་པ་ནི་དོན་ཡོད་གྲུབ་པའོ། །རྡོ་རྗེ་ནི་མི་བསྐྱོད་པའོ། །རིན་པོ་ཆེ་ནི་རིན་ཆེན་འབྱུང་ལྡན་ནོ། །འོད་དཔག་མེད་ནི་ཚེ་དཔག་ཏུ་མེད་པའོ། །དེ་ཡང་འདིར་སྤྱོད་པས་བསྐྱོད་ནས་ཞེས་བྱ་བ་ནི་ཇི་སྐད་དུ་བཤད་པའི་སྤྱོད་པ་སྤྱད་པ་དེ་སྨོན་ལམ་གྱི་གྲོགས་དང་བཅས་པས་བསྐྱོད་པ་ནི་གདུལ་བྱ་རྣམས་ཀྱི་སྤྱོད་ཡུལ་ལ་འཇུག་པ་ཟག་པ་མེད་པའོ། །འདི་སྐད་སྟོན་པ་ཡིན་ཏེ་འོག་མིན་ཞེས་བྱ་བའི་གཞལ་ཡས་ཁང་ནི་དེ་བཞིན་གཤེགས་པ་རྣམས་ཉིད་ཀྱི་བཞུགས་གནས་ཡིན་པ་ལས་གཞན་དུ་བཞུགས་པ་ནི་གདུལ་བྱའི་འགྲོ་བ་རྣམས་ཀྱི་ངོར་མཛད་པ་ཡིན་ནོ་ཞེས་པའོ། །སྒོ་བཞིའི་སྒོ་སྐབས་ལས་བྱུང་བ། །ཞེས་བྱ་བ་ནི་སྟོང་པ་ཉིད་ཅེས་བྱ་བ་ལ་སོགས་པའི་རྣམ་པར་ཐར་པའི་སྒོ་བཞིའོ། །དེ་ཉིད་འཇུག་པར་དཀའ་བས་གོ་སྐབས་དང་འདྲ་བས་ན་གོ་སྐབས་ཏེ་དེའི་བདག་ཉིད་ཀྱི་དཀྱིལ་འཁོར་གྱི་དེ་ཁོ་ན་ཉིད་ཀྱང་གདོང་བཞི་པ་ལྟོ་བ་འཕྱང་བ་ཕྱག་རྒྱ་གཉིས་བྱང་ཆུབ་མཆོག་གི་ཕྱག་རྒྱ་ཅན་ཡང་གཡས་ན་འཁོར་ལོ་བསྣམས་པ། གཡོན་དྲིལ་བུ་དཀུར་བརྟེན་པས་འཛིན་པ་ལ་ཡང་ཉེ་བར་གདགས་པས་དེ་སྐད་ཅེས་བྱ་པའོ། །དེ་ལས་བྱུང་བས་ནི་དེ་ལས་འཐོན་པ་སྟེ་དེའི་གཟུགས་སུ་ཡོངས་སུ་གྱུར་པ་དེ་ཡང་སྒོ་བཞི་སྐབས་ནི་བྱུང་བ་ཡིན་པས་ན་དེ་སྐད་ཅེས་བཤད་དེ་ཁང་པ་བརྩེགས་མར་ཞེས་དེ་བཞིན་དུ་སྦྱར་བར་བྱའོ། །བཅོམ་ལྡན་འདས་དེའི་ཕྱག་རྒྱ་ཁྱད་པར་ཇི་ལྟ་བུ་ཞིག་ཡིན་ཞེ་ན། དེའི་ཕྱིར་བྱང་ཆུབ་སེམས་དཔའ་ཆེན་པོ་ཞེས་བྱ་བ་ལ་སོགས་པ་གསུངས་ཏེ། བྱང་ཆུབ་སེམས་དཔའ་ཆེན་པོའི་ཚོགས་ནི་བྱམས་པ་ལ་སོགས་པའི་ཚོགས་སོ། །རིག་པའི་ལྷ་མོ་རྣམས་ནི་སྤྱན་ལ་སོགས་པ་སྟེ་ད་རྣམས་ཀྱིས་བརྒྱན་པ་ནི་འཁོར་དུ་གྱུར་པ་ཉིད་དུ་གནས་པས་སོ། །ཁྲོ་བོའི་རྒྱལ་པོ་ནི་གཤིན་རྗེ་གཤེད་ལ་སོགས་པ་སྟེ་ཁྲོ་བོ་དེའི་དམ་ཚིག་གི་ཕྱག་རྒྱ་རྣམས་ཀྱང་ཡོད་པར་ཤེས་པར་བྱའོ། །བྲན་པོ་ནི་གཞན་གྱིས་མི་ཐུབ་པ་ལ་སོགས་པའི་ཁྲོ་བོའོ། །བྲན་མོ་ནི་དེའི་དམ་ཚིག་གི་ཕྱག་རྒྱའོ། །ཕོ་ཉ་ནི་རྟ་མགྲིན་ལ་སོགས་
པའི་ཁྲོ་བོའོ། །ཕོ་ཉ་མོ་ནི་དེའི་དམ་ཚིག་གི་ཕྱག་རྒྱའོ། །ཕྱག་བརྙན་ནི་བདུད་རྩི་འཁྱིལ་པ་ལ་སོགས་པའི་ཁྲོ་བོའོ། །ཕྱག་བརྙན་མ་ནི་དེའི་དམ་ཚིག་གི་ཕྱག་རྒྱའོ། །བསྐོར་བ་ཞེས་བྱ་བ་ནི་དཀྱིལ་འཁོར་དུ་བྱས་པའོ། །མདུན་གྱིས་བལྟས་པ་ཞེས་བྱ་བ་ནི་ཐམས་ཅད་ཀྱིས་འདིའི་སྤྱན་སྔར་བཏུད་པར་བྱས་པ་སྟེ་དེ་ལ་མངོན་དུ་ཕྱོགས་པས་གནས་པའོ། །འདིས་ནི་འཇིག་རྟེན་ལས་འདས་པའི་འཁོར་ཕུན་སུམ་ཚོགས་པ་བསྟན་པ་ཡིན་ནོ། །བདེ་བའི་ཏིང་ངེ་འཛིན་ནི་བདེ་བ་ཆེན་པོའི་ཏིང་ངེ་འཛིན་ཏེ་དེས་དེའི་རང་བཞིན་དུ་བྱས་པ་ནི་གང་གིས་བདེ་བ་ཆེན་པོའི་ངོ་བོ་ཉིད་ཀྱི་བདག་ཉིད་དུ་བྱས་པ་གང་ཡིན་པ་དེ་ལ་དེ་སྐད་ཅེས་བྱ་སྟེ། དེ་ཉིད་ཀྱིས་ན་ཡེ་ཤེས་དེ་ལ་དམིགས་པ་ཡིན་ཏེ་རྣམ་པ་ཐམས་ཅད་དུ་ཀུན་དུ་བཟང་པོའི་ཡེ་ཤེས་ཐོབ་པའོ། །དེ་ནམ་མ་བྲལ་བ་སྟེ་རྟག་ཏུ་ཡང་དག་པར་ལྡན་པའོ། །ཐུགས་རྗེ་ཆེན་པོ་ནི་དམིགས་པ་མེད་པའོ། །སེམས་ཅན་རྣམས་ལ་མཉེས་གཤིན་པ་ནི་བྱམས་པའི་སྤྱོད་པས་དེ་རྣམས་ཀྱི་དོན་མཛད་པའི་དགོངས་པ་བསྒྲུབ་པའོ། །དེ་ཡང་འདི་ནི་ཐུགས་རྗེ་ཆེན་པོའི་མཉེས་གཤིན་པ་ཡིན་པས་དེ་སྐད་ཅེས་བྱའོ། །དེ་བས་ན་འདི་ནི་སེམས་ཅན་བསྒྲལ་བ་ལ་མངོན་པར་བརྩོན་པར་མཛད་པ་ཞེས་བྱ་བ་སྟེ་བདག་ལ་སོགས་པ་མངོན་པར་ཞེན་པར་ལྷུང་བའི་སེམས་ཅན་རྣམས་བསྒྲལ་བའི་ཕྱིར་ཆོས་བདག་མེད་པ་ལ་སོགས་པ་སྟོན་པར་མཛད་པ་ལ་མངོན་པར་བརྩོན་ཞིང་རབ་ཏུ་འབད་པའི་ཁྱད་པར་དང་ལྡན་པ་གང་ཡིན་པ་དེ་ལ་དེ་སྐད་ཅེས་བྱའོ། །ལྷ་དང་ཀླུ་དང་ཞེས་བྱ་བ་ལ་སོགས་པས་ནི་འཇིག་རྟེན་པའི་འཁོར་ཕུན་སུམ་ཚོགས་པ་སྟོན་པ་ཡིན་ཏེ་ལྷ་ལ་སོགས་པ་བརྒྱད་ཀྱི་དཀྱིལ་འཁོར་ཇི་ལྟ་བ་བཞིན་དུ་རང་གི་སྙིང་པོས་དཀྱིལ་འཁོར་གྱི་ཕྱི་རོལ་དུ་རང་གི་ཕྱོགས་སུ་བསམ་པར་བྱའོ་ཞེས་བྱ་བ་ནི་མན་ངག་གོ །བཞུགས་སོ་ཞེས་བྱ་བ་ནི་རྫུ་འཕྲུལ་ལ་སོགས་པ་རྣམས་ཀྱིས་གདུལ་བྱ་རྣམས་ཀྱི་ཡིད་འཕྲོག་པར་བྱེད་པར་མཛད་ནས་བཞུགས་པའོ། །དེ་ནས་ཞེས་བྱ་བ་ནི་སྐབས་སོ། །ཕྱག་ན་རྡོ་རྗེ་ཞེས་བྱ་བ་ལ་སོགས་པ་ལ་རྡོ་རྗེ་སེམས་དཔའ་ལ་གཟིགས་པ་མཛད་ནས་འཛུམ་པར་གྱུར་པའོ། །དེ་ལ་གཟིགས་པར་མཛད་པ་ནི་ཕྱག་ན་རྡོ་རྗེ་ནི་སྲས་ཀྱི་ཐུ་བོ་ཡིན་པའི་ཕྱིར་རོ།།
སློབ་དཔོན་དང་སློབ་མའི་ཡུལ་ལ་ཡང་འདྲི་བའི་རིམ་པ་དེ་ཉིད་ཡིན་པའི་ཕྱིར་འདིར་འཛུམ་པར་མཛད་པ་ནི་དགོངས་པ་དང་བཅས་པ་སྟེ་གཟིགས་པ་ནི་དེའི་རང་བཞིན་ཤེས་པར་བྱ་བའི་ཕྱིར་རོ། །དེས་ནི་ཞེས་བྱ་བ་ནི་གང་གིས་ན་བཅོམ་ལྡན་འདས་བཞེད་པར་མཛད་པ་དད་གཟིགས་པར་མཛད་པའི་རྒྱུ་དེས་ནི་ངོ་མཚར་གྱི་ཆོས་སུ་གྱུར་པ་མཛད་དོ་སྙམ་དུ་ཤེས་ནས་བཅོམ་ལྡན་འདས་ངོ་མཚར་དུ་གྱུར་ལགས་ཏེ་རྨད་དུ་བྱུང་བར་གྱུར་ཏོ་ཞེས་བྱ་བའི་དོན་ཏོ། །དེའི་སླད་དུ་དེ་བཀའ་སྩལ་དུ་གསོལ་ཞེས་བྱ་བ་སྟེ་རྣམ་པ་གང་གིས་སེམས་ཅན་རྣམས་ལ་ཕན་པ་དང་རྗེས་སུ་མཐུན་པས་བཞད་པར་གང་སྟོན་པར་མཛད་པ་དེ་བཞིན་དུ་དེ་ཉིད་ཀྱི་རྣམ་པས་དེའི་དགོངས་པ་བཅོམ་ལྡན་འདས་ཀྱིས་བཀའ་སྩལ་དུ་གསོལ་ཞེས་པའོ། །སེང་གེ་ཆེན་པོའི་སྒྲའི་སྒྲ་བསྒྲགས་པས་ཞེས་བྱ་བ་ནི་སེང་གེ་ཆེན་པོའི་སྒྲ་ཉིད་ཀྱིས་སྒྲ་སྒྲོགས་ཤིང་སྐད་འབྱིན་པའི་ངང་ཚུལ་གང་ལ་ཡོད་པ་དེ་སྐད་ཅེས་བྱ་སྟེ། དེ་ལྟ་བུའི་འཇིགས་པ་མེད་ཅིང་ཐོགས་པ་མེད་པའི་གསུངས་དེས་ཞེས་བྱ་བའི་བར་གྱིས་སོ། །དེ་ནས་ཞེས་བྱ་བ་ལ་སོགས་པ་ནི་དེ་ནས་དེ་མ་ཐག་ཏུ་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ་ཞེས་ཉེ་བར་མཚོན་པའི་ཚིག་གི་འོག་མ་དང་སྦྱར་རོ། །རྒྱུད་ཀྱི་རྒྱལ་པོ་ཆེན་པོ་ནི་ཁྱད་པར་དུ་གྱུར་པ་སྟེ་དེ་བསྟན་པར་བྱའོ་ཞེས་བྱ་བར་སྦྱར་རོ། །ཡེ་ཤེས་ཆེན་པོ་ནི་ཐམས་ཅད་མཁྱེན་པའི་ཡེ་ཤེས་སོ། །རྣམ་པར་བསྒྱིངས་པ་ནི་རྣམ་པར་རོལ་པ་སྟེ་སྔོན་གྱི་སྨོན་ལམ་གྱི་ཤུགས་སྟོབས་ཀྱིས་གང་དུ་དཀྱིལ་འཁོར་སྤྲུལ་པ་ལ་སོགས་པ་དེ་ལ་དེ་སྐད་ཅེས་བྱའོ། །དེ་ཡང་འདིར་སྒྱུ་འཕྲུལ་དྲ་བ་ཞེས་ཀྱང་འདི་ཉིད་ལ་བྱའོ། །རྒྱུད་ཐམས་ཅད་ནི་འཕགས་པ་དེ་ཁོ་ན་ཉིད་བསྡུས་པ་ལ་སོགས་པ་རྩ་བའི་རྒྱུད་རྣམས་སོ། །དེའི་ཕྱི་མ་ནི་དམ་ཚིག་ཆེན་པོའི་དེ་ཁོ་ན་ཉིད་ལ་སོགས་པའི་རྒྱུད་དོ། །དེ་ལས་ཀྱང་རྒྱུད་ཀྱི་རྒྱལ་པོ་འདི་ཕྱི་མ་ཡིན་པས་དེ་སྐད་ཅེས་བྱའོ། །ཐབས་བདེ་ཞེས་བྱ་བ་ནི་འདི་ལས་ཤེས་རབ་དང་ཐབས་བདེ་བ་ཉིད་ཀྱི་ཐབས་ཀྱིས་མངོན་པར་འདོད་པའི་དོན་མྱུར་དུ་ཐོབ་པ་ཉིད་སྟོན་པས་སོ། །དེ་བས་ན་འདི་ཉིད་ནི་བསྒྲུབ་པའོ། །རྡོ་རྗེ་ཡེ་ཤེས་རོལ་པས་ཞེས་བྱ་བ་ལ་སོགས་པ་ཕ་རོལ་པ་ཞེས་བྱ་བ་ཞེས་བྱ་བ་ནི་སྒེག་པའི་གཟུགས་སོ། །དེས་རོལ་ཅིང་མཉེས་
པར་བྱེད་པ་སྟེ་དེ་ཉིད་ཀྱི་ཐབས་གང་ལ་ཡོད་པ་དེ་ལ་དེ་སྐད་ཅེས་བྱའོ། །དེ་ཁོ་ན་ཉིད་ཐམས་ཅད་ནི་འོག་ནས་བཤད་པའི་དེ་ཁོ་ན་ཉིད་བཅུ་སྟེ་དེ་རྣམས་ཀྱི་འབྱུང་གནས་ཡིན་པས་དེ་ཁོ་ན་ཉིད་ཐམས་ཅད་ཀྱི་འབྱུང་གནས་སོ། །ཅི་ཞིག་མཛད་ནས་རྒྱུད་ཀྱི་རྒྱལ་པོ་སྟོན་པར་མཛད་ཅེ་ན། སྟང་སྟབས་ཞེས་བྱ་བ་ལ་སོགས་པ་གསུངས་ཏེ་སྟང་སྟབས་ནི་ཡན་ལག་གི་རྣམ་པར་འགྱུར་བ་ཚམ་དམ་ལ་སོགས་པ་རྣམ་པར་གཞག་པའི་མཚན་ཉིད་ཅན་ཏེ་དེས་བདུད་བཞི་ལས་རྣམ་པར་རྒྱལ་བ་གང་ཡིན་པ་དེ་ལ་དེ་སྐད་ཅེས་བྱའོ། །ཐབས་དང་ཤེས་རབ་དག་ནི་དམ་ཚིག་དང་ཕྱག་རྒྱ་ཆེན་པོའི་བདག་ཉིད་དུ་བསྐྱེད་པ་སྟེ་དེའི་བདག་ཉིད་ཀྱི་བདེ་བ་ཆེན་པོའི་རྡོ་རྗེ་སེམས་དཔའ་ལ་སོགས་པ་སྟེ་དེ་ལ་དེ་སྐད་ཅེས་བྱའོ། །ཡང་ན་འདིར་ཐབས་དང་ཤེས་རབ་བདེ་བ་ཆེན་པོའི་རྡོ་རྗེ་ཞེས་བྱ་བ་དེ་ལ་དེ་སྐད་ཅེས་བཤད་དེ་དེས་བསྒྲལ་བ་ནི་ངན་སོང་གསུམ་ལ་སོགས་པར་ལྷུང་བའི་འགྲོ་བ་རྣམས་ཀྱི་དོན་མཛད་པ་སྟེ་དེའི་དོན་རོལ་པས་བཞད་པའི་རང་བཞིན་གང་ཡིན་པའོ། །དེའི་རྣམ་པར་བསྒྱིངས་པ་ནི་རྣམ་པར་རོལ་པ་ཏིང་ངེ་འཛིན་གང་གིས་ཡིད་ལ་བྱེད་པའི་དོན་འདི་ཉིད་ཀྱི་རྗེས་སུ་འགྲོ་བའི་མིང་གང་ལ་ཡོད་པ་དེ་ལ་དེ་སྐད་ཅེས་བྱའོ། །དེ་ནས་སྙོམས་པར་ཞུགས་པ་ནི་ཐུགས་ལ་མངོན་པར་མཛད་པ་སྟེ་སྒྱུ་འཕྲུལ་དྲ་བའི་རྒྱུད་སྟོན་པའི་རྣམ་པ་ལ་ཐུགས་རྩེ་གཅིག་ཏུ་མཛད་ཅེས་བྱ་བའི་དོན་ཏོ། །སྒྱུ་འཕྲུལ་དྲ་བའི་རྒྱུད་ཀྱི་རྒྱལ་པོ་ཆེན་པོའི་དམ་ཚིག་དང་ཞེས་བྱ་བ་ལ་སོགས་པས་ནི་རྒྱུད་ཀྱི་བསྡུས་པའི་དོན་གསུངས་པ་ཡིན་ནོ། །དེ་དག་ཉིད་སྟོན་པའི་རྒྱུད་ངས་བཤད་པར་བྱ་ཞེས་བྱ་བ་ལ་སོགས་པ་སྟེ་དེ་ནི་འདི་སྐད་དུ་བཤད་པའི་ཏིང་ངེ་འཛིན་ལ་སྙེམས་པར་ཞུགས་ནས་རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བ་དེའི་དཀྱིལ་འཁོར་ལ་སོགས་པ་བཤད་པར་བྱའོ་ཞེས་པའོ། །དེ་བས་ན་ཏིང་ངེ་འཛིན་མཆོག་དེ་ལ་སྙོམས་པར་ཞུགས་ལ་ཞེས་བྱ་བ་ནི་ཤིན་ཏུ་མཉམ་པར་གཞག་པར་གྱིས་ལ་རྒྱུད་ཀྱི་རྒྱལ་པོ་ཉོན་ཅིག་ཅེས་དེ་སྐད་དུ་གསུངས་སོ་ཞེས་ཉེ་བར་སྦྱར་ཏེ་ཐམས་ཅད་དུ་ཡང་དམ་པའི་ཆོས་ཉན་པའི་ཚུལ་ཡིན་ནོ། །འདི་སྐད་སྟོན་པ་ཡིན་ཏེ། ཇི་ལྟར་འོག་མིན་དུ་ཡང་དག་པར་རྫོགས་པའི་སངས་རྒྱས་མི་བསྐྱོད་པ་ལ་སོགས་པས་ཡོངས་
སུ་བསྐོར་ཏེ་ཇི་སྐད་དུ་བཤད་པའི་གནས་སུ་བབ་པ་འདི་ནི་དང་པོའི་སྦྱོར་བ་ཞེས་བྱ་སྟེ་ཏིང་ངེ་འཛིན་དང་པོའོ། །ཡེ་ཤེས་ཀྱི་ལྷའི་འཁོར་གྱིས་བསྐོར་བ་ནི་དཀྱིལ་འཁོར་གྱི་མཆོག་ཅེས་བྱ་བའི་ཏིང་ངེ་འཛིན་གཉིས་པའོ། །ལས་ཀྱི་མཆོག་ཅེས་བྱ་བ་ནི་ཏིང་ངེ་འཛིན་གསུམ་པའོ། །རྣམ་པར་སྨིན་པ་ལས་བྱུང་བའི་བྱམས་པ་ལ་སོགས་པ་བསྟན་པ་ནི་རྒྱུད་གཞན་དག་དང་རྗེས་སུ་མཐུན་པར་ཤེས་པར་བྱའོ། །དེ་ལྟར་འཇུག་པས་གཟུགས་དང་གཟུགས་མེད་པ་ལ་སྤྱོད་པ་རྣམས་ཀྱི་དོན་མཛད་ནས་ཇི་སྐད་དུ་གསུངས་པའི་གནས་སུ་ཏིང་ངེ་འཛིན་གསུམ་གྱིས་དཀྱིལ་འཁོར་བསྐྱེད་ཅིང་དེར་མངོན་སུམ་དུ་འཇུག་པ་ལ་སོགས་པ་སྐལ་པ་དང་ལྡན་པའི་འདོད་པ་ལ་སྤྱོད་པ་རྣམས་ཀྱང་འཇུག་པ་ལ་སོགས་པར་བྱ་བའི་ཕྱིར་བསྐྱེད་ཅིང་དེ་བཞིན་གཤེགས་པ་ལ་སོགས་པ་མཐོང་བའི་སྐལ་བ་དང་ལྡན་པའི་སེམས་ཅན་རྣམས་ཀྱི་དོན་མཛད་པའི་ཕྱིར་རྒྱུད་གསུངས་པ་ཡིན་ནོ་ཞེས་བྱ་བ་ནི་སྤྱིའི་དོན་ཡིན་ཏེ། དེ་དག་ཐམས་ཅད་ཀྱང་གླེང་སློང་བར་བྱེད་པའི་རྒྱུད་ཀྱི་སྡུད་པ་པོས་རང་བཟོ་སྤང་བར་བྱ་བའི་ཕྱིར་བཤད་པ་ཡིན་ལ་གདུལ་བྱ་རྣམས་ཀྱིས་ཀྱང་རྟག་ཏུ་གུས་པས་མཉམ་པ་དང་བསམ་པ་ལ་སོགས་པ་བྱའོ་ཞེས་བསྟན་པ་ཡིན་ནོ། །དེ་ལ་རེ་ཞིག་ཅེས་བྱ་བ་ནི་དེའི་འོག་ཏུ་སློབ་དཔོན་དང་ལྡན་ན་འགྲུབ་པར་འགྱུར་གྱི་དེ་དང་བྲལ་བས་བསྒྲུབ་པ་ནི་དངོས་གྲུབ་ཏུ་མི་འགྱུར་རོ་ཞེས་པའོ། །དང་པོར་ཞེས་བྱ་བ་ནི་སློབ་དཔོན་གྱི་ཡོན་ཏན་བཤད་པ་བརྗོད་དགོས་ཏེ། འདི་ལྟར་དཀྱིལ་འཁོར་ལ་སོགས་པ་གང་ཡོན་ཏན་དང་ལྡན་པའི་སློབ་དཔོན་ལ་བསྙེན་བཀུར་བྱས་ནས་དཀྱིལ་འཁོར་བྲིས་ཏེ་གསང་སྔགས་ཡོངས་སུ་གཟུང་བར་བྱས་ནས་ཏིང་ངེ་འཛིན་དང་ཡེ་ཤེས་ཀྱི་མན་ངག་ལ་སོགས་པ་ཡང་མནོས་ཏེ། སྒྲུབ་པ་པོས་དངོས་གྲུབ་བསྒྲུབ་པར་བྱ་བ་ཡིན་པས་ན་ཚུལ་འདིས་ནི་ལེའུའི་གོ་རིམས་ཀྱང་བསྟན་ཏོ། །ཡེ་ཤེས་སྙིང་པོ་ཁྱོད་ཉོན་ཅིག །ཅེས་བྱ་བ་ནི་ཕྱག་ན་རྡོ་རྗེ་ལ་བོས་པ་སྟེ་དེས་གསོལ་བ་བཏབ་པའི་ཕྱིར་རོ། །བརྟན་ཞིང་ཞེས་བྱ་བ་ནི་ལུས་བསྡམས་པའོ། །དུ་ལབ་ཞེས་བྱ་བ་ནི་ངག་བསྡམས་པའོ། །བློ་གྲོས་ལྡན་ཞེས་བྱ་བ་ལ་སོགས་པ་ནི་ཡིད་བསྡམས་པའོ། །གསང་སྔགས་རྒྱུད་ཀྱི་སྦྱོར་བ་ཤེས། །ཞེས་བྱ་བ་ནི་སྔགས་དང་སྨན་དག་གིས་བགེགས་བྱུང་བ་བཟློག་པར་
ནུས་པའོ། །དེ་ཉིད་བཅུ་ནི་ཡོངས་ཤེས་ཤིང༌། །ཞེས་བྱ་བ་ནི་འོག་ནས་འབྱུང་བའི་དེ་ཁོ་ན་ཉིད་བཅུ་ཤེས་པའོ། །ཐེག་པ་ཆེ་ལ་རྟག་དགའ་བ། །ཞེས་བྱ་བ་ནི་ཐེག་པ་ཞེས་བྱ་བའི་སྒྲ་ནི་རིགས་པའི་ཚུལ་གྱི་སྒྲུབ་པ་སྟེ། བྱང་ཆུབ་སེམས་དཔའི་ལམ་འབྲས་བུ་དང་བཅས་པ་ནི་ཐེག་པ་ཆེན་པོའོ། །དེ་ལ་དགའ་བ་ནི་མངོན་པར་བཞུགས་པའོ། །ཉན་ཐོས་རྣམས་ཀྱི་ལམ་འགྲོ་དང༌། །ཞེས་བྱ་བ་ནི་ཉན་ཐོས་ཀྱི་ཐེག་པའི་ལམ་གྱིས་འགྲོ་བ་སྟེ་ཐབས་དང་བྲལ་བ་ཞེས་བྱ་བའི་དོན་ཏོ། །ཐེག་པ་ཆེན་པོ་མི་ཤེས་དང༌། །ཞེས་བྱ་བ་ནི་སྔགས་ཀྱི་མཚན་ཉིད་ཡང་དག་པར་མི་ཤེས་པའོ། །ཁྱད་པར་ཇི་ལྟ་བུ་ཞེ་ན། གསང་བ་དེ་ཉིད་བསྡུས་པ་ཡི། །ཞེས་བྱ་བ་གསུངས་ཏེ་དོན་གྱི་སྒྲར་ནི་གསང་བ་ཤེས་པར་བྱ་སྟེ་དེ་རྣམས་གང་དུ་བསྡུས་པ་དེ་ལ་དེ་སྐད་ཅེས་བྱའོ། །བསྟན་བཅོས་རྣམས་ལ་སྨོད་པ་མིན། །ཞེས་བྱ་བ་ནི་སྔགས་ཀྱི་ཚུལ་གྱི་མཚན་ཉིད་ལ་རྣམ་པར་འཚེ་བའོ། །གོང་དུ་བསྟན་པའི་ཞེས་བྱ་བ་ལ་སོགས་པ་ནི་བསྟན་པ་ཉིད་ལ་སོགས་པའི་མཚན་ཉིད་དང་ལྡན་པའི་སློབ་དཔོན་སྒྲུབ་པ་པོས་གཟུང་ཞིང་མཉེས་པར་བྱ་བ་འོས་པ་ཡིན་ནོ། །བླ་མ་སངས་རྒྱས་ཀུན་དང་མཉམ། །ཞེས་བྱ་བ་ལ་སོགས་པ་ནི་སློབ་དཔོན་ལ་ནན་ཏན་བྱ་བ་གསུངས་པ་སྟེ་དེ་བཞིན་གཤེགས་པ་ལ་སོགས་པའི་རིགས་རྣམ་པ་ལྔ་ལ་ཡང་རང་གི་རིགས་ཀྱི་བདག་པོ་བཞིན་དུ་བལྟ་བར་བྱའོ་ཞེས་བྱ་སྟེ་སངས་རྒྱས་ཀུན་དང་མཉམ་ཞེས་བྱ་བ་ལ་སོགས་པའི་ཚིག་རྐང་ལྔ་ནི་བཤད་པའོ། །སྐྱོན་རྣམས་ཀྱིས་ནི་དངོས་གྲུབ་ཉམས། །ཞེས་བྱ་བ་ནི་གང་གི་ཕྱིར་སྐྱོན་བཟུང་བ་ནི་དངོས་གྲུབ་ཉམས་པར་འགྱུར་རོ་ཞེས་བྱ་བའི་དོན་ཏོ། །རྨི་ལམ་དུ་ཞེས་བྱ་བ་ལ་སོགས་པ་འདིས་ནི་སློབ་དཔོན་ལ་སྨོད་པ་ཤིན་ཏུ་ཡང་ཁ་ན་མཐོ་བ་ཆེ་བར་བསྟན་ཏེ་དམ་པའི་བདག་ཉིད་ནི་བརྙས་པར་བྱེད་པ་དང་གདུག་པའི་བསམ་པ་ཅན་དག་གོ །དད་པ་ཞེས་བྱ་བ་ནི་གུས་པ་དང་ལྡན་པ་རྣམས་ཀྱིས་སོ། །སྔགས་ཀྱི་ཚུལ་ལ་སོགས་པ་སློབ་དཔོན་དང་སློབ་མའི་འབྲེལ་པས་འཇུག་པས་ན་འཇུག་པ་སྟེ་དེ་སྟོན་པའི་གཞུང་གི་ལེའུ་ལ་ཡང་འཇུག་པའི་རིམ་པར་ཕྱེ་བའི་སྒྲར་བརྗོད་དོ། །ལེའུ་དང་པོའི་འགྲེལ་པའོ།། །།སློབ་མ་དང་སློབ་དཔོན་འབྲེལ་བར་གྱུར་ན་ནི་དཀྱིལ་འཁོར་དུ་འཇུག་པར་བྱ་དགོས་
ཏེ་དེ་བས་ན་དེ་ནས་ཞེས་བྱ་བ་ལ་སོགས་པ་གཉིས་པ་དཀྱིལ་འཁོར་གྱི་ལེའུ་གསུངས་སོ། །དེ་ནས་ཞེས་བྱ་བ་ནི་དེ་མ་ཐག་ཏུ་སྟེ་བཅོམ་ལྡན་འདས་ཀྱིས་རྡོ་རྗེ་འཆང་ལ་བཀའ་སྩལ་པ་ཞེས་བྱ་བར་སྦྱར་རོ། །ཅི་ཞིག་མཛད་ནས་ཤེ་ན་སྒྱུ་འཕྲུལ་ཆེན་པོ་ཞེས་བྱ་བ་ལ་སོགས་པ་གསུངས་ཏེ་སྒྱུ་འཕྲུལ་ཆེན་པོའི་ཡོ་ཤེས་ནི་ལྷ་རྣམས་སྤྲུལ་པའི་ཡེ་ཤེས་སོ། །དེའི་རྣམ་པར་བསྒྱིངས་པ་ནི་རྣམ་པར་འཕྲུལ་པའོ། །གསང་བ་ནི་དམ་ཚིག་གི་ཕྱག་རྒྱའི་ཚུལ་ཏེ་དེ་དང་ལྷན་ཅིག་བྱིན་གྱིས་བརླབས་ཤིང་བསྐྱེད་པའི་རིམ་པའི་དཀྱིལ་འཁོར་གང་ཡིན་པ་དེ་ལ་དེ་སྐད་ཅེས་བྱ་སྟེ། ཇི་སྐད་དུ། བྷ་ག་ལ་ནི་ལིངྒ་གཞག །ཡང་དང་ཡང་དུ་སྔགས་བཟླས་ཤིང༌། །དཀྱིལ་འཁོར་དཀྱིལ་འཁོར་འདྲ་བར་ནི། །རྣལ་འབྱོར་པ་ཡིས་རྟག་ཏུ་སྤྲོ། །ཞེས་གསུངས་པས་སོ། །དེ་ཁོ་ན་ཉིད་ཀྱི་གསང་བ་སྟེ་བྱིན་གྱིས་བརླབས་པས་དེ་ལ་དེ་སྐད་ཅེས་བྱའོ། །དེ་ཉིད་ནི་མཆོག་གི་རྡོ་རྗེ་སྟེ་ཡེ་ཤེས་དམ་པའི་གཟུགས་ཅན་ནོ། །དེ་ལ་དམིགས་པས་ན་མིང་དེ་སྐད་ཅེས་བྱ་བའི་ཏིང་ངེ་འཛིན་གང་གི་ཡིན་པ་དེ་ལ་སྙོམས་པར་ཞུགས་པ་ནི་མངོན་སུམ་དུ་མཛད་པ་སྟེ། བཅོམ་ལྡན་འདས་དཀྱིལ་འཁོར་འདྲི་བ་སྟོན་པའི་རྣམ་པ་ལ་ཐུགས་རྩེ་གཅིག་ཏུ་མཛད་ཅེས་བྱ་བའི་དོན་ཏེ་འདི་ནི་མཚན་མ་ཐོབ་ནས་དཀྱིལ་འཁོར་བྲི་བར་བྱའོ་ཞེས་སྟོན་པ་ཡིན་ནོ། །གོང་མའི་ཡང་གོང་མ་ཞེས་བྱ་བ་ནི་མཆོག་ཏུ་གཙོ་བོར་གྱུར་པའོ། །ཡེ་ཤེས་ཆེན་པོའི་སྙིང་པོ་འབར་བ་རྡོ་རྗེའི་སྙིང་པོའི་འབྱུང་གནས་ཞེས་བྱ་བ་ནི། དེ་བཞིན་གཤེགས་པའི་ཡེ་ཤེས་འབར་བས་སྙིང་པོར་བྱས་པ་དེ་ལ་དེ་སྐད་ཅེས་བྱའོ། །དེ་བས་ན་འདི་ཉིད་ནི་བགེགས་མེད་པའི་ཕྱིར་རྡོ་རྗེའི་སྙིང་པོ་ཞེས་བྱའོ། །དེ་བཞིན་གཤེགས་པའི་སངས་རྒྱས་ཀྱི་ཞིང་དུ་སངས་རྒྱས་ཉིད་ཀྱི་གྲངས་སུ་འགྲོ་བར་འགྱུར་རོ་ཞེས་བྱ་བ་ནི་སངས་རྒྱས་ཉིད་དུ་རྒྱུད་འདི་ཉིད་ཀྱིས་གྲངས་སུ་འགྲོ་བར་འགྱུར་རོ་ཞེས་བྱ་བའི་དོན་ཏོ། །རིགས་ངེས་པ་ཉིད་དུ་འགྱུར་པའི་ཕྱིར་རོ། །རྡོ་རྗེ་རྩེ་མོའི་རྒྱུད་ལས་དེ་སྐད་དུ། ས་རྣམས་ཐོབ་ཀྱང་རྒྱལ་བའི་གཞི། །ཡིང་རྟོན་པར་མི་འགྱུར་མིན་ཏེ། །ཇི་སྲིད་སངས་རྒྱས་ལ་གནས་པར། །ཐེག་དམན་འཇིགས་པ་དེ་ལ་ཡོད། །གསང་བའི་འཁོར་ལོ་ཆེན་པོ་འདིར། །རྒྱལ་བའི་སྲས་པོ་རབ་གནས་ན། །ཐེག་པ་ཆེན་པོ་ལ་
གཞོལ་པས། །ཡིད་རྟོན་པར་ནི་འགྱུར་བ་ཡིན། །ཞེས་གསུངས་པ་ཡིན་ནོ། །ལྷ་ཉིད་ཀྱི་སྟང་སྟབས་སུ་འདུག་ལ་ཞེས་བྱ་བ་ནི་ལྷ་རྣམས་ཀྱི་སྟང་སྟབས་སུ་ཡན་ལག་རྣམ་པར་བཞག་ལ་རྣལ་འབྱོར་ཆེན་པོས་གནས་པ་གང་ཡིན་པ་དེ་ལ་དེ་སྐད་ཅེས་བྱའོ། །རྡོ་རྗེའི་འགྲོས་ཀྱིས་ཡོངས་སུ་བསྐོར་བར་བྱའོ་ཞེས་བྱ་བ་ནི་རྐང་བའི་འོག་ཏུ་ཨ་བཀོད་པ་ལས་བྱུང་བའི་སྣ་ཚོགས་རྡོ་རྗེ་བསམས་ལ་དེའི་ཚུལ་དུ་བྱེད་ཅིང་ཡོངས་སུ་བསྐོར་བར་བྱའོ། །ཁྲོ་བོའི་ང་རྒྱལ་ཧཱུཾ་སྒྲོགས་ཤིང༌། །ཞེས་བྱ་བ་ནི་ཁྲོ་བོ་རྡོ་རྗེ་ཧཱུཾ་མཛད་ཀྱི་སྦྱོར་བ་བྱས་ནས་ཡི་གེ་ཧཱུཾ་བརྗོད་པ་གང་ཡིན་པ་དེ་ལ་དེ་སྐད་ཅེས་བྱའོ། །རྫོགས་པའི་བྱང་ཆུབ་རྫོགས་པར་བྱ་བ་དང་ཞེས་བྱ་བ་ནི་རྙེད་པ་དོན་དུ་གཉེར་བས་དཀྱིལ་འཁོར་འདྲི་བ་བཀག་པའོ། །དེངས་ཤིག་ཅེས་བྱ་བ་ནི་སོང་ཤིག་པའོ། །གཡས་བརྐྱང་བ་དང་ཞེས་བྱ་བ་ལ་སོགས་པ་ལ། གང་གཡས་གཤོལ་དབྱིབས་ལྟ་བུར་ནི། །གཡས་ཀྱི་བརླ་དང་པུས་མོ་བསྲངས། །གཡོན་གྱི་བྱིན་པ་བརླར་སྦྱར་ཏེ། །ཐད་ཀར་འཇོག་པར་བྱེད་པ་དག །རྒྱ་རུ་མཐོ་ལྡར་བྱས་པ་ནི། །གཡས་བརྐྱང་བར་ནི་རབ་ཏུ་གྲགས། །དེ་ཁོ་ན་ཉིད་བཟློག་པ་ནི། །གཡོན་བརྐྱང་བར་ནི་ཤེས་པར་བྱ། །རྐང་བའི་སོར་མོ་ཕྱིར་བསྟན་ཞིང༌། །པུས་མོའི་ལྷ་ང་གཉིས་བརྐྱང་པ། །རྒྱར་ནི་ཉི་ཤུ་རྩ་དྲུག་སོར། །ས་གའི་འདུག་སྟངས་ཡིན་པར་བརྗོད། །གང་དུ་པུས་མོ་གཉིས་འཇོག་པའི། །ནང་དུ་ལག་གཉིས་བཅུག་ནས་ནི། །ནང་པའི་གཤོག་པ་ལྟར་བྱས་པ། །ཟླུམ་པོའི་འདུག་སྟངས་ཡིན་པར་གྲགས། །རྐང་མཐེ་བ་དང་ནི་རྟིང་པ་དག ། ཤིན་ཏུ་སྦྱར་བས་བཅེར་བ་དག །བརྟན་པ་མཐུན་པའི་རྐང་ཐབས་སུ། །དེ་ཉིད་ཤེས་པ་རྣམས་ཀྱིས་བཤད། །རུས་སྦལ་གྱི་རྐང་ཐབས་ནི་རྡོ་རྗེ་ཁུ་ཚུར་གཉིས་བཅིངས་ལ་མཐེའུ་ཆུང་གཉིས་ལྕགས་སྒྲོག་གི་རྣམ་པ་ལྟར་བཅིངས་ཏེ་མཛུབ་མོ་གཉིས་རྩེ་སྦྱར་ནས་བཟློག་སྟེ་ཁའི་མདུན་དུ་བཞག་ལ་རྐང་པ་གཉིས་རུས་སྦལ་གྱི་ཚུལ་དུ་ས་ལ་འཇོག་པའོ། །ལ་ལ་དག་ནི་རུས་སྦལ་གྱི་རྐང་སྟབས་ནི་འོག་ནས་བཤད་པ་ལྟ་བུའོ་ཞེས་ཟེར་རོ། །རྡོ་རྗེ་བརྡེག་པ་ནི་གཡས་བརྐྱང་བའམ་གཡོན་བརྐྱང་བ་དག་གང་ཡང་རུང་བས་གནས་ལ་རྡོ་རྗེ་བརྡེག་པ་ནས་བསམ་གཏན་གྱི་ཚུལ་
གྱི་མཐར་ཐུག་པའི་བར་བཅིང་བར་བྱའོ། །ལ་ལ་དག་ནི་གཡོན་དཀུར་བརྟེན་ལ་གཡས་ཀྱིས་སྙིང་གར་རྡོ་རྗེ་བསྟོད་དེ་འཇོག་པ་ནི་རྡོ་རྗེ་བརྡེག་པའོ་ཞེས་ཟེར་རོ། །རྡོ་རྗེའི་འཇོ་ཚུལ་ནི་སྙིང་གའི་མདུན་དུ་འགྱིང་བ་དང་བཅས་པས་རྡོ་རྗེ་ཀུན་དུ་བསྐོར་བའོ། །རྐང་པ་ཡ་གཅིག་གི་སྟང་སྟབས་ནི་རྡོ་རྗེ་ཧཱུཾ་མཛད་ཀྱི་ཕྱག་རྒྱ་ཆེན་པོ་དང་ལྡན་པས་རྐང་པ་གཡས་པ་བཏེག་སྟེ་བརླ་གཡོན་པ་ལ་བཞག་ནས་རྐང་པ་གཅིག་གིས་ཡོངས་སུ་བསྐོར་བའོ། །བུང་བའི་འཕུར་སྟབས་ནི་ལག་པ་གཉིས་ཀྱིས་གར་བྱས་ནས་པདྨའི་ཐལ་མོ་བཅིངས་ལ་སོར་མོ་ཐམས་ཅད་མཐེ་བོ་ནས་རིམ་བཞིན་བཀྲོལ་བས་ཕྱོགས་ཐམས་ཅད་དུ་རྡོ་རྗེ་ཐལ་མོ་བྱས་པས་ཡོངས་སུ་བསྐོར་བའོ། །ལ་ལ་དག་ནི་ལག་པ་གཡས་པ་དང་གཡོན་གཉིས་ཀྱིས་རང་རང་གི་རྐང་པའི་མཐེ་བོ་བཟུང་བ་སྔོན་དུ་འགྲོ་བས་རིམ་བཞིན་དུ་ལུས་གཡས་པ་དང་གཡོན་དུ་བསྐོར་བའོ་ཞེས་ཟེར་རོ། །སེང་གེའི་སྟང་སྟབས་ནི་རང་གི་ཁ་འོག་ཏུ་བལྟས་ཏེ་གདངས་ལ་ལག་པ་གཡོན་པའི་མཁྲིག་མའི་སྟེང་དུ་ལག་པ་གཡས་པ་དེ་བཞིན་དུ་སྦྱར་བའོ། །སེང་གེ་གླལ་བ་ནི་ཐམས་ཅད་མ་ལུས་པར་ལྟ་བ་སྔོན་དུ་འགྲོ་བ་ལས་དེ་ཉིད་ལྕེ་འགུལ་བ་དང་བཅས་པའོ། །རྡོ་རྗེ་སྒྲོག་ནི་རང་གི་སྙིང་གར་རྡོ་རྗེ་བཅིང་པ་སྟེ། རྡོ་རྗེ་ཁུ་ཚུར་གཉིས་བསྡམས་ལ། །མཛུབ་མོ་བཀུག་སྟེ་བཅིངས་ནས་སུ། །བསྐོར་བའི་ཚུལ་དུ་བྱས་པ་ནི། །ལྷ་རྣམས་དགུག་པའི་དམ་པའོ། །ཞེས་བཤད་པའོ། །རྡོ་རྗེ་གསོར་བ་ནི་རྡོ་རྗེ་གསོར་བའི་ཕྱག་རྒྱ་བཅིངས་ནས་རྡོ་རྗེ་གསོར་བ་སྟེ་ལག་པ་རྡོ་རྗེའི་འོག་ཏུ་བསྐོར་ལ་སྟེང་དུ་སྒེག་དང་བཅས་པས་གསོར་བ་ཞེས་བྱ་བའི་དོན་ཏོ། །རྡོ་རྗེའི་སྟང་སྟབས་ནི་འོག་ནས་བཤད་པའི་རྡོ་རྗེ་རྩེ་ལྔ་པ་འཕེན་པའོ། །ལ་ལ་ན་རེ་གཡོན་པ་རྡོ་རྗེ་ཁུ་ཚུར་ལ་མཛུབ་མོ་བསྒྲེང་ལ་སྡིགས་མཛུབ་ཏུ་བྱས་ནས་གཡས་པའི་རྡོ་རྗེ་ཁུ་ཚུར་གྱིས་བཟུང་ལ་བསྣུན་པའི་ཚུལ་བྱས་པ་ཡིན་པར་འདོད་དོ། །རྡོ་རྗེ་གར་ནི་རྡོ་རྗེའི་ཁུ་ཚུར་གཉིས་ཀྱིས་ཇི་ལྟ་བ་བཞིན་དུ་མད་དུ་གར་བྱེད་པའོ། །རྡོ་རྗེ་འཇིགས་སུ་རུང་བ་ནི་འོག་ནས་བཤད་པའི་རྡོ་རྗེ་གནོད་སྦྱིན་གྱི་ཕྱག་རྒྱས་ཁ་གདངས་ལ་སྲིན་ལག་སྦྱར་ནས་མཁུར་བ་མིག་གི་ཚུལ་གྱིས་འཇིགས་པ་སྐྱེད་པ་ལྟར་བྱེད་པའོ། །རྡོ་རྗེ་རོ་ལངས་མ་ནི་འོག་ནས་བཤད་པའི་ཁྲོ་བོ་གཤིན་རྗེ་གཤེད་
ཀྱི་ཕྱག་རྒྱ་བཅིངས་ལ་རོ་ཟ་བའི་ཚུལ་ལོ། །རྡོ་རྗེ་ཐོབ་ནི་གཡོན་པའི་རྡོ་རྗེ་ཁུ་ཚུར་གྱིས་ཕུར་བུ་བཟུང་སྟེ་བགེགས་ཀྱི་སྟེང་དུ་བཞག་ལ་གཡས་པའི་རྡོ་རྗེ་ཁུ་ཚུར་གྱིས་ཐོབ་བ་བཟུང་སྟེ་བརྡུང་བའོ། །སྒོ་བཞི་བྱིན་གྱིས་བརླབ་པ་ནི་རྡོ་རྗེ་སྐྱིལ་མོ་ཀྲུང་དང་བྱང་ཆུབ་མཆོག་གི་ཕྱག་རྒྱར་ལྡན་པས་ཡོངས་སུ་བསྐོར་ཞིང་ཤར་ལ་སོགས་པ་ཕྱོགས་བཞིར་ས་གནོན་ལ་སོགས་པའི་ཕྱག་རྒྱ་བཅིངས་ལ་སྟོང་པ་ཉིད་ལ་སོགས་པའི་རྣམ་པར་ཐར་པའི་སྒོ་བཞི་བསྒོམ་པའོ། །རྡོ་རྗེའི་གདུ་བུ་ནི་འོག་ནས་བཤད་པའི་བདུད་རྩིའི་ཐབ་སྦྱོར་གྱི་ཕྱག་རྒྱས་བགེགས་གསོད་པའི་ཚུལ་དུ་བྱེད་པའོ། །བུད་མེད་ཀྱི་སྒྱུ་འཕྲུལ་གྱི་སྟང་སྟབས་ནི་གར་སྔོན་དུ་འགྲོ་བས་རྡོ་རྗེ་སྒེག་མོའི་ཕྱག་རྒྱ་བཅིངས་ལ་མགོ་བོ་གཡོན་དུ་ཅུང་ཟད་འདུད་པར་བྱས་པའོ། །རྡོ་རྗེ་དྲལ་བ་ནི་ལག་པ་གཡོན་པ་ན་གནས་པའི་ཁྲོ་བོའི་རྡོ་རྗེའི་ནང་ན་འདུག་པ་ཐམས་ཅད་བསམས་ལ་ལག་པ་གཡས་པར་གནས་པའི་ཁྲོ་བོའི་རྡོ་རྗེས་བསྣུན་པའོ། །རྡོ་རྗེ་སྟོབས་པོ་ཆེའི་བརྡེག་པ་ནི་འོག་ནས་བཤད་པའི་སྟོབས་པོ་ཆེའི་བརྡེག་པས་གདུག་པ་རྣམས་སྐྲག་པར་བྱེད་པའོ། །རྡོ་རྗེ་མཆེ་བ་ནི་འོག་ནས་བཤད་པའི་འདོད་པའི་རྒྱལ་པོའི་ཕྱག་རྒྱ་དང་ལྡན་པས་ཇི་ལྟ་བ་བཞིན་དུ་གདུག་པ་ཐམས་ཅད་ཟ་བའོ། །རྡོ་རྗེའི་གད་མོ་ནི་ཧ་ཧ་ཞེས་དགོད་པའི་ཚུལ་གྱིས་ཡི་གེ་ཧ་བཞི་བརྗོད་པའི་རྗེས་ཐོགས་ལ་སྟང་སྟབས་བྱེད་པའོ། །རྡོ་རྗེའི་སྒྲ་ནི་གཡོན་པ་ཁྲོ་བའི་ཁུ་ཚུར་གྱི་མཛུབ་མོ་སྙིང་གར་བསྒྲེང་ལ་གཡས་པའི་ཁུ་ཚུར་གྱིས་གཡས་པའི་རྣ་དྲུང་དུ་དྲིལ་བུ་འཁྲོལ་བའོ། །རལ་གྲིའི་སྟབས་ནི་འོག་ནས་བཤད་པའི་མི་གཡོ་བའི་ཕྱག་རྒྱས་བགེགས་རྣམས་ཇི་ལྟ་བ་བཞིན་དུ་གཅོད་པའོ། །རྡོ་རྗེའི་སྟབས་ནི་གཡོན་པའི་ཁྲོ་བོའི་ཁུ་ཚུར་ལས་མཛུབ་མོ་བསྒྲེང་ལ་ལག་པ་གཡས་པ་བ་དན་གསུམ་པར་བྱས་པས་རྡོ་རྗེ་གསོར་བའི་ཚུལ་དུ་བྱེད་པའོ། །འཁོར་ལོའི་སྟབས་ནི་འོག་ནས་བཤད་པའི་འཁོར་ལོ་འཕང་བའི་ཕྱག་རྒྱས་འཕེན་བའོ། །གཏུན་ཤིང་གི་ཐབས་ནི་རྡོ་རྗེ་བཅིངས་པས་བཟུང་བའི་གཏུན་ཤིང་གིས་བགེགས་རྣམས་བརྡུང་བའོ། །ཞགས་པའི་ཐབས་ནི་དེ་བཞིན་དུ་རྡོ་རྗེ་ཞགས་པའི་ཕྱག་རྒྱས་གཞུག་པའི་ཐབས་སུ་བྱས་པའོ། །པདྨའི་ཚུལ་ནི་འོག་ནས་བཤད་པའི་པདྨའི་
སྟང་སྟབས་ཀྱི་ཚུལ་དུ་བྱེད་པའོ། །བེ་ཅོན་གྱི་ཐབས་ནི་དེ་བཞིན་དུ་དབྱིག་སྔོན་གྱི་ཕྱག་རྐྱས་མཛུབ་མོ་བསྒྲེང་བའོ། །མི་འཇིགས་པའི་ཚུལ་ནི་དོན་ཡོང་བར་གྲུབ་པའི་ཕྱག་རྒྱ་ཇི་ལྟ་བ་བཞིན་དུ་བཅིང་བའོ། །ལྕགས་ཀྱུའི་ཐབས་ནི་འོག་ནས་བཤད་པའི་ལྕགས་ཀྱུའི་ཕྱག་རྒྱས་དགུག་པའོ། །གཤོལ་གྱི་ཐབས་ནི་གཡོན་པའི་རྡོ་རྗེ་ཁུ་ཚུར་གྱིས་བཟུང་བའི་གཤོལ་གྱིས་ས་འདྲ་ལ་ཞིང་གཡས་པས་ཀྱང་རབ་ཏུ་བཟློག་པའོ། །མདུང་གི་ཐབས་ནི་རྡོ་རྗེ་ཁུ་ཚུར་གྱིས་མདུང་འཕེལ་པའོ། །གཞུའི་ཐབས་ནི་ལག་པ་གཡོན་པས་གཞུ་བཟུང་ལ་གཡས་པས་རྣ་བའི་བར་དུ་གཞུ་རྒྱུད་དྲངས་ནས་འཇོག་པར་བྱེད་པའོ། །མདའ་གཟུང་བའི་ཐབས་ནི་གཡོན་པའི་རྡོ་རྗེ་ཁུ་ཚུར་གྱིས་གཞུ་བཟུང་བ་ཇི་ལྟ་བ་བཞིན་དུ་གར་བྱེད་པ་སྔོན་དུ་འགྲོ་བས་ལྟེ་བར་གན་རྐྱལ་དུ་བཞག་ལ། གཡས་པའི་མཐེ་བོ་དང་མཛུབ་མོ་གཉིས་ཀྱི་བར་དུ་མདའ་གསོར་བར་བྱེད་པའོ། །མདའ་འཕང་བའི་ཐབས་ནི་དེ་བཞིན་དུ་མདའ་འཕེན་པར་བྱེད་པའོ། །ཐག་མདུང་བསྐོར་བའི་ཐབས་ནི་གཡོན་པའི་ཁུ་ཚུར་གྱི་མཛུབ་མོ་བསྒྲེང་ལ་གཡས་པའི་ཁུ་ཚུར་གྱིས་ཐག་མདུང་ཡོངས་སུ་བསྐོར་བའོ། །མཆོག་སྦྱིན་པའི་ཚུལ་ནི་འོག་ནས་བཤད་པའི་རིན་ཆེན་འབྱུང་ལྡན་གྱི་ཕྱག་རྒྱ་བཅིང་པའོ། །མདུང་ཐུང་གི་ཐབས་ནི་གཡོན་པ་རྡོ་རྗེ་ཁུ་ཚུར་ལས་སྙིང་གར་མཛུབ་མོ་བསྒྲེང་ལ་ལག་པ་གཡས་པས་གསོར་བ་སྔོན་དུ་འགྲོ་བས་མདུང་ཐུང་རབ་ཏུ་འཕེན་པའི་ཚུལ་ལོ། །མཚོན་རྩེ་གཅིག་པའི་ཐབས་ནི་དེ་བཞིན་དུ་མཚོན་རྩེ་གཅིག་འཕེན་པའི་ཚུལ་དུ་བྱེད་པའོ། །ཕྱག་འཚལ་བའི་ཚུལ་ནི་སྟོད་པར་བྱེད་པའི་ཚུལ་གྱིས་ལག་པ་ཐལ་མོ་སྦྱར་ནས་སྙིང་གར་འཇོག་པའོ། །རྡོ་རྗེའི་འདུག་སྟངས་ཀྱི་ཚུལ་ནི་འོག་ནས་བཤད་པའི་མི་བསྐྱོད་པའི་ཕྱག་རྒྱ་བཅིང་བའོ། །བསམ་གཏན་གྱི་ཚུལ་ནི་འོག་ནས་བཤད་པའི་འོད་དཔག་མེད་པའི་ཕྱག་རྒྱ་བཅིང་པ་སྟེ་རུས་སྦལ་གྱི་རྐང་སྟབས་ནས་བསམ་གཏན་གྱི་ཚུལ་གྱི་མཐར་ཐུག་པ་ལ་གཡས་བརྒྱད་པ་དང་གཡོན་བརྐྱང་བ་དག་བཅིང་བར་བྱའོ་ཞེས་གཞན་དག་འདོད་དོ། །རྡོ་རྗེའི་སྐྱིལ་མོ་ཀྲུང་ནི་གཡས་པའི་བྱིན་པ་དང་བརླའི་བར་དུ་རྐང་པ་གཡོན་པ་ཇི་ལྟ་བ་བཞིན་དུ་བཅུག་སྟེ། དེའི་སྟེང་དུ་རྐང་བ་གཡས་
པ་བཞག་པའོ། །པདྨའི་འདུག་སྟངས་ནི་ད་བཞིན་དུ་རྐང་པ་གཡོན་པ་ཕབ་སྟེ་འོག་ཏུ་འཇོག་པའོ། །སེམས་དཔའི་སྐྱིལ་མོ་ཀྲུང་ནི་དེ་བཞིན་དུ་ཅུང་ཟད་ཙམ་གྱིས་རྐང་པ་གཡས་པ་བརླ་གཡོན་པའི་སྟེང་དུ་གཞག་པའོ། །དཔའ་བོའི་འདུག་སྟངས་ནི་རྐང་པ་གཡོན་པས་སྐྱིལ་མོ་ཀྲུང་ཕྱེད་དུ་བཅས་ལ། དེའི་དྲུང་དུ་རྐང་པ་གཡས་པ་དྲང་པོར་གཞག་པའོ། །བཟང་པོའི་འདུག་སྟངས་ནི་རྐང་པ་གཉིས་ཀ་སྟན་གྱི་སྟེང་ནས་དྲང་པོར་ཐུར་དུ་བརྐྱང་ནས་འཇོག་པའོ། །ཙོག་བུའི་འདུག་སྟངས་ནི་རྐང་པ་གཉིས་ཀྱི་བར་མཐོ་གང་གིས་མཆོད་པ་སྟན་གྱི་སྟེང་དུ་བཞག་པ་ཙོག་ཙོག་པོར་འདུག་པའོ། །རོལ་པའི་སྟང་སྟབས་ནི་རྐང་པ་གཡས་པ་སེམས་དཔའི་སྐྱིལ་མོ་ཀྲུང་དུ་བྱས་ལ་གཡོན་པ་འོག་ཏུ་འགྱིང་བག་ཏུ་བརྐྱང་བའོ། །མདུན་དུ་བསྣུན་པ་དང་ཕྱིར་འགྱེལ་བ་ནི་རྡོ་རྗེ་ཁུ་ཚུར་གཉིས་མདུན་དང་རྒྱབ་ཏུ་བལྟས་ལ་དེ་ཉིད་ཀྱིས་མདུན་དུ་ཕྱོགས་པ་དང་ཕྱིར་བལྟ་བའོ། །རྡོ་རྗེ་སྐྱིལ་མོ་ཀྲུང་ལ་སོགས་པ་སྟང་སྟབས་དགུ་བཅིང་བའི་དུས་སུ་ནི་ཇི་ལྟ་བ་བཞིན་དུ་རྡོ་རྗེ་བརྡེག་པ་བྱའོ། །མཐུན་པའི་རྐང་སྟབས་ཀྱིས་གནས་པས་འདུག་ལ་ཐལ་མོ་སྤྱི་བོར་སྦྱར་ཏེ་གནས་ནས་ཤར་ཕྱོགས་སུ་ཁ་བལྟས་ཏེ། དེ་བཞིན་གཤེགས་པ་རྣམས་ལ་སྲི་ཞུ་དད་བཅས་ཤིང་རྣམ་པར་རོལ་པའི་གར་གྱི་མཆོག་རྡོ་རྗེའི་སྟང་སྟབས་དང་སྦྱར་བས་སྔགས་པས་ཕྱག་བྱས་ནས་སྔ་མའི་ཐལ་མོ་སྙིང་གར་ཕ་བ་སྟེ་པདྨའི་སྦྱོར་བས་ཕྱོགས་ཐམས་ཅད་དུ་བསྐོར་ནས་ཁུ་ཚུར་བཅིངས་ལ་ཕྱག་འཚལ་བ་དང་བཅས་པའི་རྡོ་རྗེ་ལྡང་བའི་ཕྱག་རྒྱ་བཅིང་བར་བྱས་ནས་ཁྲོ་བོའི་ང་རྒྱལ་དང་ལྡན་པས་སྔགས་ཟློས་ཤིང་སྟང་སྟབས་རེ་རེ་ཞིང་གར་སྔོན་དུ་འགྲོ་བས་ཇི་སྐད་དུ་བཤད་པའི་སྟང་སྟབས་བཅིངས་ཏེ། དེ་ལས་བྱུང་བའི་རྡོ་རྗེ་ཧཱུཾ་མཛད་ལ་སོགས་པའི་ཁྲོ་བོ་རྣམས་ཀྱིས་བགེགས་རྣམས་གཞོམ་པ་ལ་སོགས་པ་དང་པོར་བྱས་ནས་ས་གཞི་རྡོ་རྗེའི་རང་བཞིན་དུ་བྱིན་གྱིས་བརླབས་ལ་སྔ་མ་བཞིན་དུ་གར་བྱས་ཏེ། རྐེད་པ་གཡོན་པ་ཇི་ལྟ་བ་བཞིན་བཟུར་ལ་སྟང་སྟབས་རྣམས་བསྡུ་བར་བྱའོ། །ཕུར་བུས་གནས་ལྔར་བཅིང་བ་དང༌། །ཞེས་བྱ་བ་ནི་དཀྱིལ་འཁོར་གྱི་དབུས་སུ་དང་ཤར་ལྷོ་ལ་སོགས་པའི་མཚམས་བཞིར་རོ། །དྲ་བ་དང་ར་བས་མཚམས་བཅིང་བ་དང་ཞེས་བྱ་བ་ནི་དཀྱིལ་འཁོར་
མངོན་པར་འདོད་པའི་སའི་ཆ་ཀུན་ནས་རྡོ་རྗེ་རབ་ཏུ་འབར་བས་བར་མཚམས་མེད་པར་ཁྱབ་པར་བདག་གིར་བྱས་པའི་ཚུལ་ལོ། །ཕྱོགས་བཅིང་བ་ཞེས་བྱ་བ་ནི་སྔ་མ་བཞིན་དུ་ཕྱོགས་བཅུར་ཁྱབ་ཅིང་སའི་ཆ་རྣམས་བདག་གིར་བྱ་བ་སྟེ་ར་བའི་རྩ་བའི་རྡོ་རྗེ་རྣམ་པར་བྱས་པ་ནི་དཀྱིལ་འཁོར་བཅིང་བ་ཡང་ཡིན་པར་ཤེས་པར་བྱའོ། །བསྒོམས་ཏེ་ཞེས་བྱ་བ་ནི་བསམས་པའོ། །གཏན་ལ་དབབ་པར་བྱའོ་ཞེས་བྱ་བ་ནི་དེ་ལྟར་འདི་ཉིད་དུ་སེམས་བསྐྱེད་པའོ། །རང་གི་མིང་ནས་སྨོས་ཏེ་ཞེས་བྱ་བ་ནི་རང་གི་རྡོ་རྗེའི་མིང་གི་ཡི་གེ་ཧཱུཾ་དང་སྤེལ་བའི་སྒྲ་ནི་འདིར་དཀྱིལ་འཁོར་གྱི་སྟང་སྟབས་ཀྱི་དུས་སུ་སྔགས་ཡིན་ལག་གསང་སྔགས་འདི་ཉིད་ནི་འཁོར་ལོ་ཐམས་ཅད་ཀྱི་བླ་ན་མེད་པར་འགྱུར་བར་གྲགས་པའོ། །འཁོར་ལོ་ཞེས་བྱ་བ་ནི་འཁོར་ལོ་ལ་གནས་པའི་ལྷ་མ་ལུས་བ་རྣམས་ལ་དཀྱིལ་འཁོར་གྱི་ལྷ་རྣམས་ཀྱི་བཞུགས་གནས་སུ་གྱུར་པའོ། །འཁོར་ལོ་ནི་རང་གི་གནས་ཡིན་པར་ཤེས་བར་བྱའོ། །མཐའ་ཀུན་དུ་ཡང་ཞེས་བྱ་བ་ནི་མཐའ་ཐོག་ཐག་ཏུའོ། །མཚམས་ནས་སྨོས་ཏེ་ཞེས་བྱ་བ་ནི་སྔགས་གདོན་པས་སོ། །སྤྱན་དྲང་སྟེ་ཞེས་བྱ་བ་ལ་སོགས་པ་ནི་དཀྱིལ་འཁོར་གྱི་ལྷ་རྣམས་སྤྱན་དྲངས་ལ་ཇི་ལྟ་བ་བཞིན་དུ་རྒྱས་བཏབ་སྟེ་མཆོད་པ་ལ་སོགས་པ་བྱའོ། །དེ་ནས་ཞེས་བྱ་བ་ལ་སོགས་པ་ནི་སློབ་མ་ལྷག་པར་གནས་པར་བྱས་ལ་ཆོས་ཀྱང་བསྟན་པར་བྱ་ཞེས་འོག་མ་དང་སྦྱར་རོ། །ཇི་ལྟར་སྟ་གོན་དུ་གནས་པར་བྱ་ཞེ་ན་སྦོས་ཆུས་ཞེས་བྱ་བ་ལ་སོགས་པ་གསུངས་ཏེ། སྦོས་ཆུས་བསངས་ཏེ་ལག་པ་གཡས་པས་སྤྱི་བོ་དང་སྙིང་གར་གཏུག་པ་བྱས་ནས་སྙིང་གར་རྡོ་རྗེ་རྩེ་ལྔ་པ་འབར་བ་དང༌། སྤྱི་བོར་ཐམས་ཅད་བྱེད་པ་སྣ་ཚོགས་རྡོ་རྗེ་བསམས་ནས་དཔུང་བ་གཡོན་པ་སྲུང་སྐུད་ཀྱིས་བཅིང་བར་བྱས་ལ། ལག་པ་གཡས་པར་སོ་ཤིང་དང་ཀུ་ཤ་ཇི་ལྟ་བ་བཞིན་དུ་བྱིན་ཏེ་འདུག་པ་ལ་གསུམ་ལ་སྐྱབས་སུ་འགྲོ་བ་ལ་སོགས་པ་འཛིན་དུ་གཞུག་གོ །སངས་རྒྱས་བྱང་ཆུབ་ཡིད་ཀྱིས་གཟུང༌། །ཞེས་བསྟན་པ་འདིས་ནི་བྱང་ཆུབ་ཏུ་སེམས་བསྐྱེད་པ་ཡིན་ལ་དེས་ན་བདག་དབུལ་བར་བྱས་པ་ཡིན་པས་ལོགས་ཤིག་ཏུ་མ་གསུངས་པར་ཤེས་པར་བྱ་སྟེ། གང་གིས་བྱང་ཆུབ་ཏུ་སེམས་བསྐྱེད་པ་དེས་ནི་ཐམས་ཅད་ཡོངས་སུ་བཏང་བ་ཡིན་ནོ་ཞེས་གསུངས་པའི་ཕྱིར་
རོ། །ཅི་ནུས་ཀྱིས་ཞེས་བྱ་བ་ལ་སོགས་པ་ནི་ལམ་མཆོག་འདི་ནི་ཞེས་བྱ་བ་ལ་སོགས་པ་ཟབ་ཅིང་རྒྱ་ཆེ་བའི་ཆོས་བཟང་པོ་ཅི་ནུས་པ་དང་ཅི་འདོད་པ་བཤད་པར་བྱའོ། །སྔར་བསྟན་པའི་བྱ་བས་སླར་གཤེགས་སུ་གསོལ་ཞེས་བྱ་བ་ནི་རྩ་བའི་རྒྱུད་ལས་བསྟན་པའི་སླར་ཡང་གཤེགས་སུ་གསོལ་བའི་སྦྱོར་བས་སླར་གཤེགས་སུ་གསོལ་ལོ་ཞེས་བྱ་བའི་དོན་ཏོ། །སླར་གཤེགས་སུ་གསོལ་བ་འདི་ནི་བསྙེན་པའི་ཞག་དང་དཀྱིལ་འཁོར་ཉེ་བར་སྡུད་པའི་འདུས་སུ་ཡང་བྱའོ། །མཆོད་པ་ལ་སོགས་པ་ནི་མཆོད་པའི་ཆོག་འོག་ནས་བཤད་པའི་མཚན་ཉིད་དང་ལྡན་པས་བྱ་ཞིང་རྗེས་སུ་མཉེས་པ་ལེགས་པར་བྱའོ། །འདི་ལ་དོན་ལ་ལ་ནི་འདི་ཉིད་ནས་དངོས་སུ་གསལ་བར་བསྟན་ལ། ལ་ལ་ནི་དོན་གྱི་དབང་གིས་གཞན་ལས་འབྱུང་བ་དང་སྦྱར་བའི་དོན་འགའ་ཞིག་ཀྱང་ཡོད་དེ་མན་ངག་ཇི་ལྟར་བསྟན་པ་བཞིན་དུ་གཞུང་བསྲངས་ཏེ་ཆོག་ཐམས་ཅད་ཀྱིས་དཀྱིལ་འཁོར་བྲི་བ་ལ་སྦྱར་བར་བྱའོ། །དེས་ན་རྒྱུད་ལ་མ་ཚང་བ་དང་ལྷག་པ་ཡོད་དུ་ཟིན་ཀྱང་སོམ་མ་ཉི་མི་བྱ་སྟེ་དོན་གྱི་དབང་གིས་ཅི་རིགས་པར་སྦྱར་བར་བྱའོ། །འདིའི་དཀྱིལ་འཁོར་གྱི་ཆོག་རྒྱས་པ་ནི་ལོགས་ན་ཡོད་པས་སྐབས་འདིར་ཚིག་གི་དོན་ཉིད་ཙམ་ལས་མ་བྲིས་སོ། །དཀྱིལ་འཁོར་གྱི་ས་གཞིར་གློ་གཡས་པས་ཉལ་ཏེ་ཞེས་བྱ་བ་ནི་དཀྱིལ་འཁོར་གྱི་སའི་མཐར་སློབ་མའི་མཆོག་ལ་སོགས་པ་དང་ལྷན་ཅིག་ཏུ་མཉམ་པར་གཞག་པ་དང་ལྡན་པའི་ཡིད་ཀྱིས་ཉལ་བར་བྱའོ། །རྨི་ལམ་ཞེས་བྱ་བ་ལ་སོགས་པ་ལ། རྨི་ལམ་སངས་རྒྱས་མཐོང་བ་ནི། །ཡོན་ཏན་རྒྱ་མཚོ་མངོན་སུམ་བཞིན། །མཆོད་རྟེན་དང་ནི་སྐུ་གཟུགས་དང༌། །དེ་ལ་མཆོད་པ་རྩོམ་པ་དང༌། །ཞེས་བྱ་བ་ལ་སོགས་པ་ནི་རྨི་ལམ་བཟང་པོའོ། །དེ་ལས་བཟློག་པ་ནི་རྨི་ལམ་ངན་པ་སྟེ་དེ་མཐོང་བ་ནི་དེ་ལ་ཞི་བར་བྱེད་པ་ཤེས་པར་བྱའོ། །ཉི་མ་གཉིས་པ་ཞེས་བྱ་བ་ནི་སྟ་གོན་ལ་གནས་པའི་ཞག་ལ་ལྟོས་པ་སྟེ་ས་ཡོངས་སུ་གཟུང་བ་ལས་ལྟོས་ན་ནི། ནུབ་གསུམ་པ་ནི་འཇུག་པ་ཡིན། །ཞེས་གསུངས་པ་ཡིན་ནོ། །ཚོན་དང་ཐིག་ལ་སངས་རྒྱས་ལྔའི། །ཞེས་བྱ་བ་ལ་སོགས་པ་ལ་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་ལྔར་སྔགས་དང་ཕྱག་རྒྱས་བསྒོམ་ཞིང་ལྷག་པའི་བསམ་པས་སྤྲུལ་ནས་
བསྐྱེད་པའི་ཚོན་དང་ཐིག་གི་བྱ་བའོ། །འདི་ནི་ཆོས་དབྱིངས་དག་པ་སྟེ། །ཞེས་བྱ་བ་ལ་སོགས་པ་ལ་ལྷག་པར་མོས་པའི་ཚུལ་འདི་ནི་ཚོན་སེར་པོའི་ཡིན་ཏེ་ལྷག་པ་རྣམས་ལ་ཡང་རིམ་པ་འདིས་རང་དང་རྗེས་སུ་མཐུན་པ་ལྷག་པར་མོས་པར་བྱ་བར་ཤེས་པར་བྱའོ། །ཀུན་དུ་ཞེས་བྱ་བ་ནི་དབང་ལྡན་གྱི་ཕྱོགས་ནས་བརྩམས་ཏེ་གཡས་སུ་བསྐོར་བའི་རིམ་གྱིས་སོ། །དང་པོ་ས་གཞི་ཞེས་བྱ་བ་ལ་སོགས་པ་ནི་གྲུབ་པ་མདོར་བསྡུས་པའི་དབང་བསྐུར་བའི་དཀྱིལ་འཁོར་ལ་ངེས་པ་འདི་ཡིན་པར་བསྟན་གྱི་ཐམས་ཅད་ཀྱི་ནི་མ་ཡིན་ཏེ། གཞན་དག་ནས་ཟླ་བ་ཉ་ནས་ཕྱི་མའི་ཟླ་བའི་ཉའི་བར་དུ་བྱའོ་ཞེས་བྱ་བ་ལ་སོགས་པ་དཀྱིལ་འཁོར་གྱི་ལས་རྒྱ་ཆེར་སྟོན་པའི་ཕྱིར་རོ། །ཡང་ན། ཁྲུ་ལྔ་འམ་ཁྲུ་དོ་བ། །ཁྲུ་གང་བ་ཡི་ཞེས་བྱ་བ་ནི་ཁྲུ་ལྔ་ལ་སོགས་པའི་ཚད་དུ་བྱས་པའི་དཀྱིལ་འཁོར་ལ་དེ་སྐད་ཅེས་གསུངས་པ་ནི་ཕྱོགས་ཙམ་སྟེ་གྲངས་མེད་པའི་གྲངས་ལ་འཇུག་པར་བྱའོ་ཞེས་གསུངས་པ་ཡིན་ནོ། །བར་དུའོ་ཞེས་བྱ་བ་ནི་བརྒྱད་ཅུ་དང་ལྔ་བཅུ་ལ་སོགས་པ་ཡོངས་སུ་གཟུང་ངོ༌། །གྲུ་བཞི་པ་ལ་ཞེས་བྱ་བ་ལ་ཕྱོགས་བཞིའི་ཐིག་གིས་མཉམ་པར་བྱས་པའོ། །རྡོ་རྗེའི་ཤུགས་ཀྱིས་ཞེས་བྱ་བ་ལ་སོགས་པ་ལ་ཨོཾ་བཛྲ་བེ་ག་ཀྲ་མ་ཧཱུཾ་ཞེས་བྱ་བ་བརྗོད་པ་སྟེ། འཇུག་པ་འམ་ནི་འབྱུང་བ་ན། །སྲད་བུ་ཡིད་ཀྱིས་བཏེག་པ་ནི། །རྡོ་རྗེ་ཤུགས་ཞེས་གྲགས་པ་སྟེ། །དེ་ནས་རི་མོ་བགོམ་པར་བྱ། །ཞེས་གསུངས་པའི་ལྷའི་ང་རྒྱལ་གྱི་རོལ་པས་བྱ་བའོ། །གྲྭ་རྣམས་སུ་ནི་ཞེས་བྱ་བ་ནི་ཕྱིའི་དཀྱིལ་འཁོར་གྱི་མཚམས་སུའོ། །སྒོའི་ནང་ལོགས་ཞེས་བྱ་བ་ནི་སྒོ་ཁྱུད་ཀྱི་མཚམས་རྣམས་སུའོ། །དཀར་པོས་བྱ་ཞེས་བྱ་བ་ལ་སོགས་པ་ལ་འདི་སྐད་ཅེས་གསུངས་མོད་ཀྱི་འོན་ཀྱང་ཚོན་གྱི་རིམ་པ་ནི་སེར་པོ་དང་དཀར་པོ་དང་སྔོན་པོའམ་སྔོན་པོ་དང་དཀར་པོ་དང་སེར་པོ་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ་རྩ་བའི་དཀྱིལ་འཁོར་གྱི་ཕྱེད་དུའོ། །དེ་ལ་མངོན་དུ་ཕྱོགས་པར་ཁྲུ་དོས་ཆོད་པར་དབང་བསྐུར་བའི་དཀྱིལ་འཁོར་ཚོན་དཀར་པོ་གཅིག་པུ་འམ་ཚོན་སྣ་ལྔས་བྲིས་ཏེ་དེའི་དབུས་སུ་དཀར་པོ་འམ་ཚོན་སྣ་ལྔས་དེའི་ཕྱེད་ཀྱི་ཚད་ལས་པདྨ་འདབ་མ་བརྒྱད་པ་བྱའོ། །རིན་ཆེན་ཞེས་བྱ་བ་ལ་སོགས་པ་ལ་རིན་པོ་ཆེ་ནི་བྱི་རུ་དང༌། གསེར་དང་དངུལ་དང་མུ་ཏིག་དང་ནོར་བུར་གྲགས་
བའོ། །སྨན་ནི་བྲྀ་ཧ་ཏི་དང༌། ཀཎྜ་ཀ་རི་དང༌། ས་ཧ་དང༌། དཎྜ་ཨུཏྤལ་དང༌། ཤྭེ་ཧ་ཨ་པར་ཛི་ཏ་ཞེས་བྱའོ། །འབྲུ་ནི་འབྲས་དང་ནས་གྲོ་དང་ཏིལ་དང་མ་ཤའོ། །སྤོས་ཆུ་ནི་ཙནྡན་དཀར་པོ་ལ་སོགས་པ་དང་ལྡན་པའི་ཆུ་སྟེ་དེ་སྤོས་ཀྱིས་ཡོངས་སུ་བདུགས་པའོ། །ལས་ཀུན་བྱེད་པས་ཞེས་བྱ་བ་ནི་ལས་ཐམས་ཅད་བྱེད་པ་བདུད་རྩི་ཐབ་སྦྱོར་གྱི་གསང་སྔགས་བཟླས་པ་ལ་དེ་སྐད་ཅེས་བྱའོ། །སེམས་ཅན་ཀུན་ལ་བསང་གཏོར་བྱ། །ཞེས་བྱ་བ་ནི་སེམས་ཅན་ཐམས་ཅད་ལ་བསང་གཏོར་བྱ་བའི་ཕྱིར་གཞག་པ་ཡིན་པར་ཤེས་པར་བྱའོ། །ཇི་ལྟར་བསང་གཏོར་བྱ་ཞེ་ན། ཡང་ན་ཀུ་ཤའི་ཆུན་པོས་བྱ། །ཞེས་གསུངས་ཏེ་ཀུ་ཤའི་ཆུན་པོའམ་ཨ་མྲའི་འདབ་མ་ལ་སོགས་པས་བྱ། ལྷ་བཤོས་ཞེས་བྱ་བ་ནི་དཀྱིལ་འཁོར་གྱིའོ། །གཏོར་མ་ཕུལ་ལ་ཞེས་བྱ་བ་ནི་འདིར་གཏོར་མ་ནི་ཕྱོགས་ཀྱི་གཏོར་མ་བསྟན་པ་ཡིན་ནོ། །སྤྱན་དྲང་བར་བྱའོ་ཞེས་བྱ་བ་ནི་རྡོ་རྗེ་བསྡུ་པའི་ཕྱག་རྒྱ་དང་སྔགས་དག་གིས་དེ་བཞིན་གཤེགས་པ་ཐམས་ཅད་ལ་སོགས་པ་བསྡུ་བར་བྱེད་པའོ། །གསལ་བར་བྱས་ཏེ་ཞེས་བྱ་བ་ནི་རྡོ་རྗེ་གནོད་སྦྱིན་ནམ་བདུད་རྩི་ཐབ་སྦྱོར་གྱིས་སོ། །གཞུག་པ་དང་ཞེས་བྱ་བ་ནི་རྡོ་རྗེ་ཞགས་པས་སོ། །བསྡམས་པ་དང་དབང་དུ་བྱས་ཏེ་ཞེས་བྱ་བ་ནི་ལྕགས་སྒྲོག་དང་འབེབས་པ་དག་གིས་སོ། །ཕུར་བུ་དང་ཞེས་བྱ་བ་ལ་སོགས་པ་ལ་སྔར་བཤད་པའི་གསང་སྔགས་ཕྱག་རྒྱ་དང་བཅས་པས་ཅི་རིགས་པར་ཕུར་བུ་ལ་སོགས་པ་བྱའོ། །རོལ་མོའི་ཁྱད་པར་དཔག་ཏུ་མེད་པ་རྣམས་ཀྱིས་ཀྱང་ཞེས་བྱ་བ་ནི་རོལ་མོའི་རྣམ་པ་འདི་ལྟ་སྟེ་གླིང་བུ་དང་པི་ཝང་དང་རྫ་རྔ་དང་མུ་ཀུཎྜ་དང་ཆ་ལང་དང༌། རྔོ་བོ་ཆེ་དང་རྫ་རྔ་ཆེན་པོ་དང༌། རྔ་རིངས་དང་ཀུན་ཛ་ཏ་དང་ཏི་མི་ལ་ལ་སོགས་པ་རོལ་མོའི་སིལ་སྙན་བཅུ་པོ་སྟོང་ཕྲག་གིས་སོ། །བསྟོད་པར་བྱའོ་ཞེས་བྱ་བ་ནི་མཆོད་པའོ། །བཟོད་པར་གསོལ་ཏེ་ཞེས་བྱ་བ་ལ་སོགས་པ་ལ་མ་ཚང་བ་དང་ལྷག་པ་ཉེ་བར་གཟུང་བའི་ཕྱིར་འདི་ཡོ་བྱད་མ་ཚང་བ་དང་ཉམས་པ་ལས་བྱུང་བ་གང་དག་ཡོད་པ་དེ་དག་ཐམས་ཅད་བཟོད་པར་མཛོད་ཅིག་ཅེས་བརྗོད་ལ། དངོས་གྲུབ་ཐམས་ཅད་ཀྱི་ཕྱིར། ཆོས་ཀྱི་དབྱིངས་ཀྱི་བྱིན་རླབས་དང༌། །ཞེས་བྱ་བ་ལ་སོགས་པས་གསོལ་བ་གདབ་པོ། །སློབ་མ་ཞེས་བྱ་བ་ནི་ཇི་སྐད་དུ་བསྟན་པའི་དཀྱིལ་འཁོར་བྲི་བར་རོ། །ཅི་ཞིག་བྱས་ནས་གཞུག་
པར་བྱ་ཞེས་ན་སྙིང་པོ་འདི་དང་ཕྱག་རྒྱས་ཞེས་བྱ་བ་ལ་སོགས་པ་གསུངས་ཏེ་སྙིང་ག་དང་དབུང་མགོ་གཉིས་དང་ལྐོག་མ་དང་སྤྱི་བོར་ཛི་ན་ཛི་ཀ་ཅེས་བྱ་བ་ལ་སོགས་པའི་སྙིང་པོ་གསུམ་དགོད་ཅིང་སྐུ་རྡོ་རྗེ་ལ་སོགས་པའི་ཕྱག་རྒྱས་བསྲུངས་ལ་རྡོ་རྗེ་སྲུང་བའི་སྔགས་དང་ཕྱག་རྒྱས་གོ་བགོ་བར་བྱས་ལ་གཞུག་པར་བྱའོ། །དོར་བར་བྱ་སྟེ་ཞེས་བ་ནི་འཕང་བའོ། །གདོང་གཡོགས་དགྲོལ་ཞེས་བྱ་བ་ནི་འདི་སྐད་ཅེས་བརྗོད་དོ་ཞེས་ཚིག་འོག་མ་དང་སྦྱར་རོ། །དངོས་གྲུབ་ཐམས་ཅད་ཅེས་བྱ་བ་ལ་སོགས་པ་ལ་དངོས་གྲུབ་ཐམས་ཅད་ཀྱི་ཕུན་སུམ་ཚོགས་པ་ནི་འདའ་བར་མི་བྱ་བའི་ངོ་བོ་ཉིད་དུ་འགྱུར་བའོ། །བ་ཤྱ་བཛྲ་ཞེས་བྱ་བ་ནི་དེ་སྐད་ཅེས་བརྗོད་པར་བྱའོ་ཞེས་ཤེས་པར་བྱའོ། །དེ་ནས་དབང་བསྐུར་བ་སྦྱིན་པར་བྱའོ། །རིག་པའི་དབང་བསྐུར་བའོ། །དྲི་དང་མེ་ཏོག་ཅེས་བྱ་བ་ལ་སོགས་པས་དབང་བསྐུར་རོ་ཞེས་འོག་ནས་བཤད་པ་དང་སྦྱར་རོ། །སྟེང་དུ་བླ་རེ་བྲེ་བར་བྱ། །ཞེས་བྱ་བ་ནི་སློབ་མའི་ཞེས་བྱ་བར་སྦྱར་རོ།། གང་དག་ཅེ་ན་གདུགས་དང་རྒྱ་པ་མཚན་ལ་སོགས་པ་སྟེ་བཀྲ་ཤིས་པར་འགྱུར་བ་དེ་དང་གིས་བཀླུབས་ཤིང་ཉེ་བར་བརྒྱན་པར་བྱའོ། །རྣམ་རྒྱལ་བུམ་པ་ཡིས་ཞེས་བྱ་བ་ནི་དཀྱིལ་འཁོར་གྱི་བདག་པོའི་བུམ་པས་སོ། །ལྷ་མོ་བཞི་རྣམས་དང་ཞེས་བྱ་བ་ནི་རེ་རེ་ཞིང་ཏིང་ངེ་འཛིན་གྱི་བདག་པོ་དང་ལྷ་མོ་གསུམ་གསུམ་ཡོངས་སུ་བཟླས་པའི་བུམ་པ་བཞིས་སོ། །ལྷ་རྣམས་ཀུན་གྱི་བཞི་པོ་ཡིས། །ཞེས་བྱ་བ་ནི་རེ་རེ་ཞིང་གཤིན་རྗེ་གཤེད་ལ་སོགས་པ་ཁྲོ་བོ་གཉིས་གཉིས་ཡོངས་སུ་བཟླས་པའི་བུམ་པ་བཞི་རྣམས་ཀྱིས་སོ། །འདི་ནི་བུམ་པའི་གྲངས་ངེས་པ་ཡིན་ཏེ། འབྱོར་ན་ནི་དཀྱིལ་འཁོར་གྱི་ལྷ་རྣམས་རེ་རེའི་དང་བུམ་པ་གང་བ་བྱས་ཏེ། བུམ་པ་གང་བས་ནི་མཆོད་པར་བྱའོ་ཞེས་གསུངས་པའི་ཕྱིར་རོ། །འདི་སྐད་སྟོན་པ་ཡིན་ཏེ། དང་པོ་རྣམ་པར་སྣང་མཛད་ཀྱི་སྔགས་ཀྱིས་སོ། །དེ་ནས་མི་བསྐྱོད་པ་དང་སྤྱན་མ་དང་རྡོ་རྗེ་སེམས་མ་དང་སྐུལ་བྱེད་མ་དང་མི་གཡོ་མ་དང་གཤིན་རྗེ་གཤེད་ལ་སོགས་པའི་གསང་སྔགས་བཞིས་དབང་བསྐུར་བར་བྱའོ། །ཕྱིར་མི་ལྡོག་པའི་དབང་ནི་སློབ་དཔོན་དག་རྒྱུད་གཞན་གྱི་རྗེས་སུ་འབྲངས་ནས་ཇི་སྐད་དུ་བཤད་པ་ལས་གཞན་འཆད་དེ། ཡི་གེའི་དོན་དང་མན་ངག་ལས་ཤེས་པར་བྱའོ། །འདིས་ནི་སློབ་དཔོན་གྱི་དབང་བསྐུར་བ་བསྟན་པ་
ཡིན་ནོ། །ཏིལ་གྱི་གང་བུ་ཞེས་བྱ་བ་ལ་སོགས་པས་ནི་རྗེས་སུ་གནང་བའི་དབང་བསྐུར་བ་གསུངས་པ་ཡིན་ཏེ། དེ་ཉིད་ལ་ནི་དབང་བསྐུར་བ། །ཞེས་བྱ་བ་ལ་སོགས་པ་ལ་རྟག་པ་ཁོ་ནར་བདག་ཉིད་དབང་བསྐུར་བ་སྟེར་བ་དེའི་ཚེ་ཇི་སྐད་དུ་གསུངས་པའི་རྒྱལ་བ་འདི་རྣམས་ཀྱིས་དབང་བསྐུར་བ་སྩོལ་བར་མཛད་དོ་ཞེས་དེ་ལྟ་བུའི་ངོ་བོ་ཉིད་དཀྱིལ་འཁོར་གྱི་དེ་ཁོ་ན་ཉིད་ཤེས་པས་བསམ་པར་བྱའོ། །ཆོས་ཀྱི་མཚན་ཉིད་བསྟན་པར་བྱ། །ཞེས་བྱ་བ་ནི། ཆོས་རྣམས་གཟུགས་བརྙན་ལྟ་བུ་སྟེ། །ཞེས་བྱ་བ་ལ་སོགས་པའོ། །མི་ཤེས་རབ་རིབ་ལ་སོགས་པ། །ཞེས་བྱ་བ་ལ་སོགས་པའི་སྒྲ་ནི་མི་དགེ་བའི་བག་ཆགས་ལ་སོགས་པ་ཡོངས་སུ་གཟུང་ངོ༌། །གཟུགས་བརྙན་ཕྱག་རྒྱ་བསྟན་པར་བྱ། །ཞེས་བྱ་བའི་ཐུར་མ་ལ་སོགས་པ་སྟོན་པའི་ལག་པའི་ཕྱག་རྒྱ་བཅིངས་ལ་བསྟན་ནོ་ཞེས་བྱ་བའི་དོན་ཏོ། །རུས་པ་ལ་བབ་ཀྱང་ཞེས་བྱ་བ་ནི་གཤིས་འཇིགས་པར་འགྱུར་པས་ཀྱང་ངོ༌། །ལུས་ཀྱང་ཞེས་བྱ་བ་ལུས་ཀྱང་ཞེས་བྱ་བའི་སྒྲ་ནི་ལུས་ལ་ཡང་མི་བལྟ་བའོ། །འདི་སྐད་སྟོན་ཏེ་ལུས་བྱིན་པས་ཀྱང་སློབ་མས་བླ་མ་འདི་ཅི་ནས་མགུ་བ་དེ་ལྟར་བྱའོ་ཞེས་པའོ། །བསླང་སྟེ་ཞེས་བྱ་བ་ནི་བསླང་ལ་རྗེས་སུ་གནང་བ་དེ་ཉིད་བསྟན་པའོ། །ཆོག་མཐོང་བས་ཞེས་བྱ་བ་ནི་འོག་ནས་གནས་བཤད་པའི་ཆོགས་སོ། །དེ་བཞིན་དུ་བསྒོམ་པའི་རིམ་པའི་ཚུལ་ཞེས་བྱ་བ་ནི་དེ་ཁོ་ན་ཉིད་དང་གསང་བའི་དབྱེ་བས་ཞི་བ་དང་རྒྱས་པའི་རིམ་གྱིས་དཀྱིལ་འཁོར་གྱི་ལྷ་རྣམས་ལེགས་པར་མཆོད་ལ་ཇི་སྐད་དུ་བཤད་པ་བཞིན་གཤེགས་སུ་གསོལ་ལོ་ཞེས་བྱ་བར་སྦྱར་རོ། །སྤྲུལ་པ་ནི་རང་གི་སྙིང་གར་ཉེ་བར་བསྡུ་བར་ཤེས་པར་བྱའོ། །ཚོན་རྩི་བསྡུ་བ་ཞེས་བྱ་བ་ལ་སོགས་པ་ནི་གོ་སླའོ། །དཀྱིལ་འཁོར་བྲི་བའི་ཆོ་ག་སྟོན་པའི་གཞུང་གི་ལེའུ་ལ་དཀྱིལ་འཁོར་རིམ་པར་ཕྱེ་བ་ཞེས་བྱ་བའི་སྒྲར་བརྗོད་དོ། །ལེའུ་གཉིས་པའི་འགྲེལ་པའོ།། །།དཀྱིལ་འཁོར་དུ་ཞུགས་པས་ནི་སྔགས་ཡོངས་སུ་ཟུང་ངར་བྱ་དགོས་པས་དེ་ནས་ཞེས་བྱ་བ་ལ་སོགས་པས་ལེའུ་གསུམ་པ་གསུངས་ཏེ། བཅོམ་ལྡན་འདས་ཀྱིས་བཀའ་སྩལ་པ་ཞེས་ཉེ་བར་མཚོན་པའི་ཚིག་གི་འོག་མ་དང་སྦྱར་རོ། །ཅི་ཞིག་མཛད་ནས་ཤེ་ན་གསང་སྔགས་ཀྱི་ཞེས་བྱ་བ་ལ་སོགས་པ་གསུངས་པ་སྟེ་གསང་སྔགས་ཉིད་ནི་
འཁོར་ལོ་སྟེ། ཡང་དང་ཡང་དུ་བཟླས་པས་ན་འཁོར་ལོ་བཞིན་དུ་འཁོར་བའམ། འཁོར་ལོ་བསྐྱེད་པའི་ཕྱིར་འཁོར་ལོའོ། །དེ་རྣམས་བསྐོར་བ་ནི་གསུངས་པ་སྟེ། དེའི་དོན་གྱི་རྡོ་རྗེའི་ཡེ་ཤེས་ལ་དམིགས་པའི་ཏིང་ངེ་འཛིན་གང་ཡིན་པ་དེ་ལ་དེ་སྐད་ཅེས་བྱའོ། །དེ་ལ་སྙོམས་པར་ཞུགས་པ་ནི་མངོན་སུམ་དུ་མཛད་པ་སྟེ། སྔགས་སྟོན་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བ་ནི་དོན་ཏོ། །གསང་སྔགས་ཀྱི་སྙིང་པོའི་ཡི་གེ་རྣམས་ཞེས་བྱ་བ་ནི་འདིར་བཤད་ཀྱིས་ཞེས་ཉེ་བར་སྦྱར་ཏེ། བཅོམ་ལྡན་འདས་ནི་རྟག་ཏུ་མཉམ་པར་གཞག་པ་ཡིན་དུ་ཟིན་ཀྱང་ཏིང་ངེ་འཛིན་ལ་དམིགས་པ་སྔོན་དུ་འགྲོ་བས་སྔགས་སྟོན་པར་མཛད་པ་འདིས་ནི་འདི་སྐད་སྟོན་ཏེ། རྣལ་འབྱོར་པས་ཀྱང་ཆོས་བདག་མེད་པ་བསྒོམ་པ་དང་རྗེས་སུ་འབྲེལ་བའི་རང་གི་ལྷ་ལ་དམིགས་པ་སྔོན་དུ་འགྲོ་བས་སྔགས་སྟོན་པར་མཛད་པ་འདིས་ནི་འདིའོ། །རྣམ་པར་སྣང་མཛད་དོ་ཞེས་བྱ་བ་འདིས་ནི་གསང་སྔགས་དང་རིག་པའི་སྐྱེས་བུ་གཉིས་ཐ་མི་དད་པར་གསུངས་པ་ཡིན་ཏེ། གཞན་དུ་རྣམ་པར་སྣང་མཛད་ལས་གཞན་པའོ་ཞེས་ཐ་དད་པར་སྟོན་པར་འགྱུར་རོ། །དེ་ཡང་འདི་ཉིད་ནས་སྤྱན་ལ་སོགས་པའི་གསང་སྔགས་གསུངས་པའི་འོག་ཏུ། དེ་ནས་འདི་ནི་གསུངས་ཙམ་གྱིས། །ཞེས་བྱ་བ་ལ་སོགས་པ་བཤད་ད། དེ་བས་ན་འདི་གཉིས་ནི་ཐ་མི་དད་པ་ཡིན་ནོ། །ཀུན་དུ་བཟང་པོའོ་ཞེས་གསུངས་པ་འདི་ནི་བྱམས་པ་ལ་སོགས་པ་ལ་མ་གཏོགས་པར་བཤད་པ་ཡིན་པས། བྱམས་པ་ལ་སོགས་པ་བྱང་ཆུབ་སེམས་དཔའ་བཅུ་དྲུག་ལེའུ་གཉིས་པར་བསྟན་པ་གང་ཡིན་པ་དེ་ནི་ཉེ་བར་མཚོན་པ་ཙམ་དུ་ཟད་དོ། །དེ་བས་ན་འདིར་ནོར་བཟངས་དག་ཀྱང་དགོད་པར་བྱ་སྟེ། དེ་བས་ན་ཅི་རིགས་པར་བཞིས་མཚང་བའི་བྱང་ཆུབ་སེམས་དཔའ་སྟོང་བྲི་བའམ་བསྒོམ་མོ་ཞེས་པ་འདིར་རིག་པ་ཁོ་ན་ཡིན་ནོ། །འདིར་མ་བཤད་པའི་བྱང་ཆུབ་སེམས་དཔའ་རྣམས་ཀྱི་སྤྱིའི་སྔགས་ནི། ཨོཾ་སརྦ་སཾ་སྐཱ་ར་བ་རི་ཤུདྷཿདྷརྨཱ་ཏེ་མ་ཧཱ་ཡ་ན་པ་རི་པཱ་རེ་སྭཱ་ཧཱ། ཞེས་བྱ་བའོ། །སྔགས་ཀྱི་རྗེས་སུ་འབྲངས་ནས་གཤིན་རྗེ་གཤེད་ལ་སོགས་པའི་ཁྲོ་བོ་བཞིས་གཤིན་རྗེ་དང༌། ཁྱབ་འཇུག་དང༌། ཚངས་པ་དང༌། ལོག་འདྲེན་ཆུང་མ་དང་བཅས་པ་གནོན་པར་ཤེས་པར་བྱའོ། །འདི་དག་ནི་དཀྱིལ་
འཁོར་དུ་དགོད་པའི་གསང་སྔགས་ཀྱི་ཡི་གེ་རྣམས་ཏེ་ཞེས་བྱ་བ་ན་དཀྱིལ་འཁོར་དུ་ལྷ་རྣམས་དགོད་པ་ལ་ཇི་སྐད་དུ་བཤད་པའི་གསང་སྔགས་ཀྱི་ཡི་གེ་རྣམས་ཡང་དག་པར་སྦྱར་བར་བྱའོ་ཞེས་བྱ་བ་ནི་ཚིག་གི་ལྷག་མའོ། །དཀྱིལ་འཁོར་དུ་ཞེས་བྱ་བའི་ཉེ་བར་མཚོན་པ་ལས་ནི་ལྷའི་རྣལ་འབྱོར་ལ་སོགས་པ་ཡང་ཤེས་པར་བྱའོ། །དེ་དག་ལ་ཞེས་བྱ་བ་ལ་སོགས་པ་ནི་བཤད་མ་ཐག་པའི་གསང་སྔགས་ཀྱི་ཚོགས་དེ་དག་གོ །བརྟེན་ནས་ཞེས་བྱ་བ་ནི་མཚན་གཞིར་བྱས་ནས་འདི་ཉིད་ཀྱི་འཁོར་གྱི་དོན་དུ་རིགས་དང་རྟོག་པ་ལ་སོགས་པའི་བྱེ་བྲག་གིས་གསང་སྔགས་བྱེ་ཕྲག་དུ་མ་གསུངས་པ་ཡིན་ནོ། །གཞན་དག་ནི་དེ་ལ་བརྟེན་ཤིང་ཐོབ་ནས་ངས་སྔགས་བྱེ་བ་ཕྲག་དུ་མ་གསུངས་སོ་ཞེས་བཅོམ་ལྡན་འདས་ཀྱིས་བཀའ་སྩལ་པ་ཡིན་གྱི་འདི་ནི་གསང་སྔགས་ཀྱི་ཚོགས་མ་ཡིན་ཏེ་ཆོས་རྣམས་ཀྱི་ཆོས་ཉིད་ནི་གནས་པ་སྟེ། འདི་ལྟ་སྟེ་སྔགས་ཀྱི་ཆོས་ཉིད་ཀྱང་དེ་ནི་མི་རིགས་ཏེ་སྔགས་གསུངས་པ་ཉིད་མ་ཡིན་གྱི་སྔ་མ་ཁོ་ན་རིགས་པར་ཤེས་སོ། །གཏན་ཚིགས་དང་ཡང་མི་འགལ་ཏེ་དོན་དམ་པར་སྟོང་པ་ཉིད་དུ་ཡང་མེད་པ་ཡིན་ནོ། །ཏིང་ངེ་འཛིན་གྱི་བྱེ་བྲག་ལས་བྱུང་བ་ཞེས་བྱ་བ་ནི་ཏིང་ངེ་འཛིན་ཕུལ་དུ་བྱུང་བ་དང་རིག་པའི་སྐྱེས་བུར་ལྡན་པས་སོ། །ལྕགས་ཀྱུས་ཞེས་བྱ་བ་ལ་སོགས་པ་ནི་རྡོ་རྗེ་ལྕགས་ཀྱུ་ལ་སོགས་པའི་ཕྱག་རྒྱ་ནི་འདི་ཉིད་ནས་འབྱུང་བས་མ་བྲིས་སོ། །དེ་དག་ལ་སོགས་པ་ནི་སྤྱན་དྲང་བའི་སྦྱོར་བའོ་ཞེས་བྱ་བ་ནི་རྡོ་རྗེ་བསྡུ་བ་ལ་སོགས་པའི་སྦྱོར་བའོ། །དེ་དག་སྔགས་དེ་རྣམས་ཀྱི་གོ་རིམས་ནི་རྣམ་པར་སྣང་མཛད་ཀྱི་ངོ་བོ་ཉིད་ཆོས་ཀྱི་དབྱིངས་ཀྱི་ཡེ་ཤེས་ནི་ཐུན་མོང་གི་མཚན་ཉིད་དེ། དེ་ལས་མེ་ལོང་ལྟ་བུ་ལ་སོགས་པའི་ཡེ་ཤེས་བཞི་བྱུང་ངོ༌། །དེ་བས་ན་ཡེ་ཤེས་དེའི་བདག་ཉིད་མི་བསྐྱོད་པ་ལ་སོགས་པ་བཞིར་བསྟན་ཏོ། །དེ་ལྟ་ན་ཡང་དེ་སྒོམ་པར་བྱེད་པའི་རྣལ་འབྱོར་པའི་རྒྱུད་ལ། ཇི་སྲིད་དུ་ཀུན་དུ་འགྲོ་བའི་སྟོང་པ་ཉིད་ཀྱི་མཚན་ཉིད་ཅན་བྱང་ཆུབ་སེམས་དཔའི་ས་དང་པོ་མངོན་དུ་བྱས་ནས། ཆོས་ཀྱི་དབྱིངས་ལས་བརྩམས་ནས་ཇི་སྲིད་ཀྱི་བར་གྱི་མཐར་ཐུག་པ་ལས་འཇུག་པའི་དགའ་བ་ཉེ་བར་མི་འབྱུང་བ་དེ་སྲིད་ཀྱི་བར་དུ་སྐྱེ་བར་མི་འགྱུར་རོ། །དེ་བས་ན་ཡེ་ཤེས་བཞི་ཐོབ་པའི་རྒྱུར་གྱུར་པས་དགའ་བ་བཞིའི་བདག་ཉིད་ཅན་ནི་
སྤྱན་ལ་སོགས་པ་བཞིའོ། །དེ་ཡང་ཇི་སྲིད་དུ་བྱང་ཆུབ་ཀྱི་ཕ་རོལ་ཏུ་ཕྱིན་པ་ལ་སོགས་པ་བཞི་ཡོངས་སུ་དག་པར་མི་འགྱུར་བ་དེ་སྲིད་དུ་འབྱུང་བར་མི་འགྱུར་རོ། །དེ་བས་ན་བྱང་ཆུབ་ཀྱི་ཕ་རོལ་ཏུ་ཕྱིན་པ་ལ་སོགས་པའི་བདག་ཉིད་ཅན་ནི་རྡོ་རྗེ་སེམས་མ་ལ་སོགས་པ་བཞི་ཡིན་ནོ། །དེ་ཡང་ཕ་རོལ་ཏུ་ཕྱིན་པ་བཞི་དང་བྲལ་བས་ནི་འབྱུང་བར་མི་འགྱུར་རོ། །དེ་བས་ན་སྦྱིན་པ་ལ་སོགས་པ་ཕ་རོལ་ཏུ་ཕྱིན་པའི་བདག་ཉིད་ཅན་ནི་སྐུལ་བྱེད་མ་ལ་སོགས་པ་བཞིའོ། །དེ་ཡང་ཡང་དག་པར་སྤོང་བར་དང༌། རྫུ་འཕྲུལ་གྱི་རྐང་པ་དང༌། དབང་པོ་དང་སྟོབས་ཀྱི་བདག་ཉིད་ཅན་ངེས་པར་འབྱེད་པའི་ཆ་བཞི་དང་བྲལ་བས་ནི་འབྱུང་བར་མི་འགྱུར་རོ། །དེ་བས་ན་ངེས་པར་འབྱེད་པའི་ཆ་བཞིའི་བདག་ཉིད་ཅན་ནི་གཤིན་རྗེའི་གཤེད་ལ་སོགས་པ་བཞིའོ། །དེ་ཡང་ལུས་དང་ཚོར་བ་དང་སེམས་དང༌། ཆོས་དྲན་པ་ཉེ་བར་གཞག་པ་མེད་ན་འབྱུང་བར་མི་འགྱུར་རོ། །དེ་བས་ན་དེའི་བདག་ཉིད་ཅན་མི་གཡོ་བ་ལ་སོགས་པ་བཞི་བསྟན་ཏོ། །གོ་རིམས་ཇི་སྐད་དུ་བཤད་པའི་ནང་དུ་བྱམས་པ་ལ་སོགས་པ་ནི་མི་གཏོགས་ཏེ་རྣམ་པར་སྨིན་པ་ལས་བྱུང་བའི་སེམས་དཔའ་ཡིན་པའི་ཕྱིར་རོ། །སྔགས་རབ་ཏུ་སྟོན་པའི་གཞུང་གི་ལེའུ་ལ་ནི་གསངས་སྔགས་རིམ་པར་ཕྱེ་བ་ཞེས་བྱ་བའི་སྒྲར་བརྗོད་དོ། །རིམ་པར་བྱེ་བ་གསུམ་པའི་འགྲེལ་པའོ།། །།སྔགས་ཡོངས་སུ་བཟུང་བས་ན་ཏིང་ངེ་འཛིན་ཡོངས་སུ་ཤེས་པར་བྱ་དགོས་པས་དེ་ནས་ཞེས་བྱ་བ་ལ་སོགས་པ་ལེའུ་བཞི་པ་གསུངས་ཏེ། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ་ཞེས་བྱ་བར་སྦྱར་རོ། །ཅི་ཞིག་མཛད་ནས་ཤེ་ན་ཡེ་ཤེས་ཆེན་པོའི་ཞེས་བྱ་བ་ལ་སོགས་པ་གསུངས་ཏེ། ཡེ་ཤེས་ཆེན་པོ་ནི་ཆོས་ཀྱི་དབྱིངས་ལ་སོགས་པ་ཡེ་ཤེས་རྣམ་པ་ལྔའོ། །དེ་ཡཾ་སྟོབས་ནི་ནུས་པ་སྟེ་ཐོགས་པ་མེད་པའོ། །དེའི་རྣམ་པར་འཕྲུལ་པ་ནི་སངས་རྒྱས་ལ་སོགས་པའི་སྤྲུལ་པས་རྣམ་པར་སྤྱོད་པའོ། །དེ་ཉིད་རྡོ་རྗེ་སྟེ་འབྲས་བུ་ལན་པའི་ཕྱིར་དོན་ཡོད་པའི་ནུས་པ་ཅན་ཡིན་ལ་དེ་ལ་དམིགས་པའི་ཏིང་ངེ་འཛིན་གང་ཡིན་པ་དེ་ལ་ཡང་དེ་སྐད་ཅེས་བྱའོ། །དེ་ལ་སྙོམས་པར་ཞུགས་པ་ནི་མངོན་སུམ་དུ་མཛད་པ་སྟེ། ཏིང་ངེ་འཛིན་སྟོན་པའི་རྣམ་པར་ཐུགས་རྩེ་གཅིག་ཏུ་མཛད་དེ་ཞེས་བྱ་བའི་དོན་ཏོ། །ཏིང་ངེ་འཛིན་ལ་
དམིགས་པས་ནི་འདི་སྐད་སྟོན་པ་ཡིན་ཏེ་དངོས་གྲུབ་ཀྱི་ཕྱིར་ལྷའི་གཟུགས་བསྒོམ་པ་ནི་རྡོ་རྗེ་ཕྲ་མོ་བསྒོམ་པའི་སེམས་བརྟན་པར་བྱས་ནས་བསྒོམ་པར་བྱའོ་ཞེས་པའོ། །གཟུགས་བརྙན་ཞེས་བྱ་བ་ལ་སོགས་པ་ལ་གཟུགས་བརྙན་བསྐྱེད་པའི་ཕྱིར་རས་དང་རྩིག་པ་དང༌། །ཤིང་ལེབ་ལ་སོགས་པ་ལ་སངས་རྒྱས་ལ་སོགས་པའི་བར་ཁོང་དུ་ཆུད་པར་བྱའོ་ཞེས་བྱ་བ་ནི་ཚིག་གི་ལྷག་མའོ། །འདི་ནི་གཉིས་སུ་སྦྱོར་བ་ཡིན་ཏེ་སེམས་ཡོངས་སུ་དག་པའི་དབང་དུ་མཛད་པའི་དམིགས་པ་བསྟན་པའོ། །རྒྱུད་ཡོངས་སུ་དག་པ་ནི་གཉིས་སུ་སྦྱོར་བ་ལ་མངོན་པར་ཞེན་པར་མི་བྱེད་དེ་ཇི་སྐད་དུ། རྣལ་འབྱོར་ཡང་དག་མ་ཡིན་སེམས། །ལྷ་ལ་དམིགས་པར་བྱེད་པ་དག །རྣལ་འབྱོར་གཟུགས་བརྙན་རང་བཞིན་ཏེ། །ལུགས་མ་ལ་སོགས་རྣལ་འབྱོར་སྐྱེ། །ཡང་དག་མཆོག་སེམས་རྣལ་འབྱོར་པ། །ལྷ་ལ་དམིགས་པར་བྱེད་པ་དག །རང་གི་དམ་ཚིག་བདག་སྦྱོར་བས། །མི་འགྱུར་དམ་པ་འགྲུབ་པར་འགྱུར། །ཞེས་གསུངས་པས་སོ། །གསང་སྔགས་འཆང་རྣམས་ཀྱི་ཞེས་བྱ་བ་ནི་སྔགས་པ་རྣམས་ཀྱིའོ། །ཏིང་ངེ་འཛིན་གསང་ཆེན་ཞེས་བྱ་བ་ནི་རིགས་དང་དམ་ཚིག་དང་ཕྱག་རྒྱ་མཆོག་དང་ལྷན་ཅིག་སྦྱོར་བའོ། །རྣལ་འབྱོར་དག་པ་འདི་ནི་གཙོ་པོའི་དབང་དུ་མཛད་པ་བསྟན་པ་ཡིན་པས་འདི་སྐད་གསུངས་པ་ཡིན་ཏེ། ཏིང་ངེ་འཛིན་ལ་སོགས་པ་བསྟན་པས་གནས་སྐབས་ཇི་ལྟ་བ་བཞིན་དུ་དེ་ཁོ་ན་ཉིད་དང་གསང་སྔགས་དང་གསང་ཆེན་གྱི་རྣལ་འབྱོར་དུ་འགྱུར་རོ། །འདིས་ནི་འདི་སྐད་སྟོན་པ་ཡིན་ཏེ། མོས་པ་ཇི་ལྟ་བས་རྣལ་འབྱོར་གསུམ་ལས་གང་ཡང་རུང་བ་བསྒོམས་ནས་མངོན་པར་འདོད་པའི་དངོས་གྲུབ་ཀྱི་སྐལ་པ་ཅན་དུ་འགྱུར་རོ། །དོན་འདི་ཉིད་གཞན་དག་ལས་ཀྱང་རིགས་ཀྱི་བུ་སེམས་འདི་ནི་རང་བཞིན་གྱིས་འོད་གསལ་བ་སྟེ། འདི་ལྟ་སྟེ་ཇི་ལྟར་སེམས་ཡོངས་སུ་སྦྱངས་པ་དེ་ལྟ་དེ་ལྟར་འགྱུར་རོ་ཞེས་གསུངས་པ་ཡིན་ནོ། །ཨོཾ་གྱི་ཡེ་ཤེས་ལས་བསྒྲུབ་པ། །ཞེས་བྱ་བ་ནི་ཡེ་ཤེས་ནི་ཆོས་ཀྱི་དབྱིངས་ཀྱི་མཚན་ཉིད་དོ། །དེ་ཉིད་ཡི་གེ་ཨོཾ་ཡིན་པས་ན་ཨོཾ་གྱི་ཡེ་ཤེས་ཏེ་དེས་བསྒྲུབས་པའི་རྡོ་རྗེ་བསྒོམ་པར་བྱའོ་ཞེས་བྱ་བར་སྦྱར་རོ། །རྫོགས་པའི་གོ་རིམས་ཀྱང་བྱང་ཆུབ་ཀྱི་སེམས་
ཀྱི་ལེའུའི་རིམ་པས་སོ། །ཤེས་རབ་ཡེ་ཤེས་རབ་རྒྱས་པ། །ཞེས་བྱ་བ་ནི་ཆོས་བདག་མེད་པའི་ཡེ་ཤེས་ཀྱིས་བློ་རྒྱས་པར་བྱས་པའོ། །ཞལ་གསུམ་གྱིས་ནི་ཞེས་བྱ་བ་ནི་འདོད་ཆགས་དང་ཞེ་སྡང་དང་གཏི་མུག་རྣམ་པར་དག་པར་སྟོན་པར་བྱེད་པས་རྣམ་པར་ཐར་པའི་སྒོ་གསུམ་གྱི་ངོ་བོ་སྟེ་ཁ་དོག་ནི་གཅིག་པའོ། །ལ་ལ་ནི་མན་ངག་ལས་ཞལ་གསུམ་གྱི་མདོག་ནི་འདུས་པ་ལྟར་གསུམ་དུ་བྱའོ་ཞེས་ཟེར་རོ། །སྤྱན་གསུམ་ནི་ཞལ་དང་པོ་འམ་རེ་རེ་ཞེང་གསུམ་སྟེ་ཐམས་ཅད་དུ་ཡང་དེ་བཞིན་ནོ། །དང་པོ་བསམ་གཏན་ཕྱག་རྒྱ་ཅན། །ཞེས་བྱ་བ་ནི་ཕྱག་རྒྱ་དང་པོའི་གཡས་དང་གཡོན་ནི་ཏིང་ངེ་འཛིན་གྱི་ཕྱག་རྒྱར་བྱས་པའོ། །བགྲང་ཕྲེང་ལྡན་ཞེས་བྱ་བ་ནི་སྔགས་ཀྱི་ནོར་བུ་དང་བཅས་པའོ། །ནུ་མ་འཛིན་ཞེས་བྱ་བ་ནི་ནུ་མ་བཟུང་བ་སྟེ། ལྷ་མོ་ཡང་ཕྱག་གཉིས་པ་སྐུ་མདོག་གསེར་མོ་ལག་པ་གཉིས་ཀྱིས་བཅོམ་ལྡན་འདས་ལ་འཁྱུད་པར་བྱེད་པ་སྟེ། གཤིན་རྗེ་གཤེད་ཀྱི་ལྷ་མོ་གཉིས་ཕྱག་གཉིས་མངའ་བར་བཤད་པ་འདིས་ཉེ་བར་མཚོན་པ་ཡིན་པའི་ཕྱིར་རོ། །ལ་ལ་ན་རེ་རང་གི་བདག་པོ་དང་འདྲ་བར་ཐམས་ཅད་བསམ་མོ་ཞེས་ཟེར་ཏེ་འདིས་ནི་གསང་བའི་རྣལ་འབྱོར་བཤད་དོ། །མཆོད་པའི་དུས་སུ་ནི་ནུ་མ་འཛིན་པ་མེད་པར་བྱའོ། །འཇིགས་ཤིང་སྐྲག་མཛད་པ་ཞེས་བྱ་བ་ནི་འདིར་དེ་ནས་ཞེས་ཉེ་བར་མཚོན་པའི་ཚིག་གི་བསྒོམ་པར་གྱིས་ཞེས་བྱ་བ་འདི་དང་སྦྱར་རོ། །དེ་བཞིན་དུ་རིགས་ལས་ཀྱང་འདི་ཉིད་ཀྱི་འོག་ནས་སྟོན་ཏོ། །སྤྲིན་ཞེས་བྱ་བ་ནི་ཚད་མེད་པའོ། །ཡང་དག་འབྱུང་ཞིང་ལེགས་འཁྱུད་པ། །ཞེས་བྱ་བ་ནི་གལ་ཏེ་རྙེད་ན་གཞན་དང་མི་འགྲོ་བ་ཉིད་ལ་སོགས་པའི་མཚན་ཉིད་དང་ལྡན་པའི་རིག་མ་བཞི་ལ་མངོན་པར་སྦྱོར་བར་བྱས་ལ་དེས་ཇི་ལྟ་བ་བཞིན་དུ་མཆོད་པར་སྦྱེད་པ་ནི་རྣལ་འབྱོར་པ་དེས་དེ་བཞིན་གཤེགས་པ་ཐམས་ཅད་རང་གི་དམ་ཚིག་གིས་འཁྱུད་པའི་སྐུ་སྤྲོ་བར་བསྒོམ་པར་བྱ་སྟེ། འདིས་ནི་གསང་བའི་རྣལ་འབྱོར་བཤད་པ་ཡིན་ནོ། །ནང་གི་གསང་སྔགས་བཟླས་བརྗོད་ཅིང༌། །ཞེས་བྱ་བ་ནི་ནང་གི་བཟླས་པས་སོ། །དེ་ཉིད་སྤྱོད་ཡུལ་བ་ཞེས་བྱ་བ་ནི་རང་གི་ལྷའི་རྣལ་འབྱོར་གྱི་ཡུལ་ཏེ་འདིས་ནི་དེ་ཁོ་ན་ཉིད་ཀྱི་རྣལ་འབྱོར་གསུངས་པ་ཡིན་ནོ། །རྣལ་འབོར་འདི་ལ་ནི་ནུ་མ་འཛིན་པ་མེད་པས་སྡིགས་མཛུབ་ལ་སོགས་
བ་ཅི་རིགས་པར་གཟུང་ངོ༌། །འདིར་ཡང་འམ་གྱི་སྒྲས་ནི་ཕྱོགས་གཞན་སྟོན་པར་བྱེད་པ་ཡིན་པར་ཤེས་པར་བྱ་སྟེ། སྒོམ་པ་པོ་གཅིག་གིས་གསུམ་ཆར་བྱ་བར་མི་རིགས་པས་སྒྲུབ་པ་པོ་གཅིག་གིས་དེ་ཁོ་ན་ཉིད་དང༌། གསང་བ་དང་གསང་བ་ཆེན་པོ་རྣམས་རིམ་བཞིན་དུ་བསྒོམ་པར་བྱའོ་ཞེས་ཤེས་པར་བྱ་བའི་ཕྱིར་ཏིང་ངེ་འཛིན་གསུམ་ཉེ་བར་བཀོད་དེ། ཏིང་ངེ་འཛིན་འདིའི་རིམ་པ་ནི་འོག་ནས་བཤད་པའི་ཏིང་ངེ་འཛིན་རྣམས་ལ་ཡང་འདི་བཞིན་ཤེས་པར་བྱ་སྟེ། ལ་ལ་ར་དེ་ཁོ་ན་ཉིད་ལ་སོགས་པར་སྟོན་པའི་ཕྱིར་རོ། །དེ་ཡང་ཉེ་བར་མཚོན་པ་ནི་ཏིང་ངེ་འཛིན་ཐམས་ཅད་ཀྱི་ཞེས་བྱ་བ་ལ་སོགས་པ་སྨོས་པ་ཡིན་ཏེ། ཏིང་ངེ་འཛིན་ཐམས་ཅད་ཀྱི་ཞེས་པ་ལྷ་ཐམས་ཅད་ལ་དམིགས་པའི་བདག་ཉིད་ཅན་གྱི་སྟོབས་ཏེ་ཐོགས་པ་མེད་པའི་ནུས་པ་རྫོགས་པར་བྱེད་པའི་ཡེ་ཤེས་ནི་ཆོས་ཀྱི་དབྱིངས་ཤེས་པར་བྱ་བ་སྟེ། དེ་འགེངས་ཤིང་རྫོགས་པར་བྱེད་པའི་བཅོམ་ལྡན་འདས་ནི་དེའི་ངོ་བོས་རྣལ་འབྱོར་པའི་སེམས་ལ་སྐྱེད་པར་མཛད་པ་རྣམ་པར་སྣང་མཛད་གང་ཡིན་པ་དེ་ལ་དེ་སྐད་བྱ་སྟེ། དེ་ཉིད་ལ་དམིགས་པའི་དོན་འདིས་འགྲོ་བའི་དོན་བྱེད་པའི་ཕྱིར་ཏིང་ངེ་འཛིན་བསྟན་ཏོ། །རྡོ་རྗེ་སེམས་དཔའ་ལ་སོགས་པ་བཤད་པར་སྐུ་གསུང་ཐུགས་ཀྱི་རིམ་པ་དང་རྗེས་སུ་མཐུན་པར་འཇིག་རྟེན་དབང་ཕྱུག་གི་ཏིང་ངེ་འཛིན་གསུངས་ཏེ། ཨོཾ་ཞེས་བྱ་བ་ནི་སོ་སོར་རྟོག་པའི་ཡེ་ཤེས་ཉིད་ཡི་གེ་ཨ་ཞེས་བྱ་བར་ཤེས་པར་བྱ་སྟེ། ཐམས་ཅད་དུ་ཡང་ཡེ་ཤེས་ཇི་ལྟ་བ་ཉིད་གསང་སྔགས་ཀྱི་ཡི་གེ་ཡིན་ནོ་ཞེས་བྱ་བའི་ཚུལ་གྱིས་སོ། །ཚིག་གི་ལམ་ཞེས་བྱ་བ་ནི་ལུང་གི་ཆོས་མ་ལུས་པའི་ངོ་བོ་ཉིད་དུ། །དབུ་རྒྱན་ཐམས་ཅད་མཁྱེན་པས་བྱས། །ཞེས་བྱ་བ་ལ་ཐམས་ཅད་མཁྱེན་པ་ནི་འོད་དཔག་ཏུ་མེད་པ་སྟེ། དེས་དབུ་རྒྱན་བྱས་པ་ནི་གཙོ་བོའི་རིན་པོ་ཆེའི་དབུ་རྒྱན་གང་ལ་མངའ་བ་དེ་ལ་དེ་སྐད་ཅེས་བྱའོ། །གདན་ནི་བཞི་དང་ལྡན་ཞེས་བྱ་བ་ལ་ཟླ་བའི་གདན་ཏེ་ཉེ་བར་མཚོན་པ་འདིས་ནི་གཞན་དག་གི་ཡང་གདན་དུ་ཟླ་བ་འབྱུང་བ་ཡིན་ནོ། །ལ་ལ་ནི་ལྷ་མོ་བཞི་དང་གདན་གཅིག་པས་གདན་ནི་བཞི་དང་ལྡན་ཞེས་བྱ་བའོ་ཞེས་བྱ་ཟེར་རོ། །ཕྱག་གཉིས་པདྨ་རྣམ་པར་འབྱེད། །ཅེས་བྱ་བ་ནི་གཡོན་པའི་པདྨའི་ཁུ་ཚུར་གྱིས་པདྨའི་སྡོང་བུ་
གཡོན་པའི་སྟ་ཟུར་གྱི་གནས་སུ་འཛིན་ལ། གཡས་ཀྱི་པདྨ་ཁུ་ཚུར་གྱིས་རང་གི་སྙིང་གར་པདྨའི་འདབ་མ་འབྱེད་པ་ལ་བརྩོན་པ་སྟེ་འདིར་དེ་ལ་བལྟ་ཞིང་ཞེས་བྱ་བ་ནི་ཚིག་གི་ལྷག་མའོ། །ཡང་ཚིག་གི་ལམ་ཞེས་བྱ་བ་ནི་རྟོགས་པའི་ཆོས་མ་ལུས་པའི་ངོ་བོའོ། །རྣམ་པ་ཐམས་ཅད་ཅེས་བྱ་བ་ལ་སོགས་པ་ལ་རྣམ་པ་ཐམས་ཅད་ནི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་བརྒྱན་པའོ། །མཆོག་ནི་ཕུལ་དུ་བྱུང་བའོ། །རྒྱ་ཆེ་བ་ནི་ཡུལ་ན་གནས་པ་དང་གསལ་བ་དང་རྫོགས་པ་ཉིད་དང་ལྡན་པའོ། །ཆོས་ཀྱི་རྒྱལ་པོ་ནི་ཆོས་གཉིས་ཀའི་བདག་པོ་བཅོམ་ལྡན་འདས་འཇིག་རྟེན་དབང་ཕྱུག་སྟེ། དེ་ལ་དམིགས་པའི་ཏིང་ངེ་འཛིན་ལ་དེ་སྐད་ཅེས་བྱའོ། །ཧཱུཾ་ཞེས་བྱ་བ་ནི་མེ་ལོང་ལྟ་བུའི་ཡེ་ཤེས་ཡི་གེ་ཧཱུཾ་ངོ༌། །མཐིང་ཤུན་བཟང་པོ་ཞེས་བྱ་བ་ནི་སྐུ་མདོག་མཐིང་ཤུན་ལྟ་བུའོ་ཞེས་བྱ་བའི་དོན་ཏོ། །སངས་རྒྱས་མི་འཁྲུགས་ཅོད་པན་ཅན། །ཞེས་བྱ་བ་ནི་མི་བསྐྱོད་པ་ཅོད་པན་ལ་བཞུགས་པ་གང་ཡིན་པ་དེ་ལ་དེ་སྐད་ཅེས་བྱ་སྟེ། འདིས་ནི་ཤར་དུ་མི་བསྐྱོད་པ་བྲི་བར་བྱའོ་ཞེས་གང་བཤད་པ་དེར་རྡོ་རྗེ་སེམས་དཔའི་འབྲི་བར་རིགས་པ་ཡིན་ནོ། །དབུ་རྒྱན་ཐམས་ཅད་མཁྱེན་པས་བྱས། །ཞེས་བྱ་བ་འདིས་ནི་འོད་དཔག་མེད་ཀྱི་གནས་སུ་ཡང་འཇིག་རྟེན་དབང་ཕྱུག་གོ །འདི་དག་གི་རྗེས་སུ་འབྲངས་པས་རིན་ཆེན་འབྱུང་ལྡན་དང་དོན་ཡོད་གྲུབ་པའི་གནས་སུ་ཡང་རང་གི་དེ་བཞིན་གཤེགས་པས་དབང་བསྐུར་བ་དང༌། ཤིན་ཏུ་འབྲེལ་བའི་འཁོར་ལོས་སྒྱུར་བ་གཉིས་བྲི་སྟེ། རྡོ་རྗེ་སེམས་དཔའི་མི་བསྐྱོད་པ། །རྡོ་རྗེ་རིན་ཆེན་དགོས་འདོད་འབྱུང༌། །རྡོ་རྗེ་ཆོས་ནི་འཇིག་རྟེན་དབང༌། །རྡོ་རྗེ་ལས་ནི་རབ་སྒྲུབ་སྩོལ། །ཞེས་གསུངས་པས་རྡོ་རྗེ་སེམས་དཔའ་ལ་སོགས་པ་ཉིད་མི་བསྐྱོད་པ་ལ་སོགས་པའི་སྒྲར་བཤད་པ་ལ་ཉེས་པ་མེད་དོ། །རོལ་པའི་སྟབས་སུ་ལེགས་པར་བཞུགས། །ཞེས་བྱ་བ་ནི་སྟན་གྱི་ནང་དུ་མཐོ་གང་གིས་མཆོད་པར་རྐང་པ་བཞག་ནས་ཕྱོགས་གཉིས་སུ་བརྐྱང་སྟེ། གཡོན་ཕྱོགས་ཅུང་ཟད་དབབ་པར་བྱའོ་ཞེས་བྱ་བའི་མཚན་ཉིད་ཅན་ཏེ་དེས་གནས་པའོ། །ལ་ལ་ན་རེ་གང་རྣལ་འབྱོར་དང་རྗེས་སུ་མཐུན་པའི་གནས་པས་འདུག་པར་བྱའོ་ཞེས་ཟེར་རོ། །དེ་ལྟར་ཀུན་དུ་ཁྱབ་པ་ཉིད། །ཅེས་བྱ་བ་འདིར་དེ་དག་གིས་ཞེས་ཉེ་བར་སྦྱར་བར་བྱའོ། །
དེ་བཞིན་དུ་རིགས་ལ་སོགས་པ་རྣམས་ལ་ཡང་དེ་ལྟར་ཤེས་པར་བྱའོ། །རྒ་ཤི་རྣམས་ཀྱི་ཕ་རོལ་འགྲོ། །ཞེས་བྱ་བ་ནི་དེ་དང་བྲལ་བའི་དོན་ཏོ། །སེམས་ཆེན་པོ་ཞེས་བྱ་བ་ལ་སོགས་པ་ལ་སེམས་ཆེན་པོ་ནི་གཉིས་ཀྱིས་དབེན་པའོ། །དེའི་རྫོགས་པར་བྱེད་པ་ནི་གདུལ་བྱ་རྣམས་ཀྱི་སེམས་རང་བཞིན་གྱིས་རྣམ་པར་བྱང་བ་ཉིད་དུ་གནས་པའི་མི་བདེན་པའི་ཀུན་དུ་རྟོག་པ་བསལ་བ་དེ་ལྟར་རྫོགས་ཤིང་དོན་དེ་ཀུན་ནས་མཐར་ཕྱིན་པར་བྱེད་པ་དེའི་སྟོབས་ཏེ་ནུས་པ་གང་ཡིན་པ་དེ་ཉིད་མཐའ་ཡས་པའི་ཏིང་ངེ་འཛིན་རྡོ་རྗེའི་རྒྱལ་པོ་ལ་སོགས་པའི་ངོ་བོ་ཉིད་ནི་རྒྱལ་པོ་སྟེ། གཙོ་བོར་གྱུར་པ་བཅོམ་ལྡན་འདས་ཐུགས་རྡོ་རྗེ་དེ་སྟོན་པའི་ཕྱིར་རོ། །དེ་ཉིད་ནི་རྡོ་རྗེ་ཐུགས་ཏེ་སེམས་ཅན་གྱི་དོན་བྱ་བ་ལ་འཇུག་པ་ལ་ཐོགས་པ་མེད་པའི་ཕ་རོལ་གནོན་པ་དང་ལྡན་པའི་ཕྱིར་རོ། །དེ་ལ་དམིགས་པས་ན་ཏིང་ངེ་འཛིན་དེ་ལ་མིང་དེ་སྐད་ཅེས་བྱའོ། །ཏྲཾ་གི་ཡེ་ཤེས་ལས་བསྒྲུབས་པ། །ཞེས་བྱ་བ་ནི་མཉམ་པ་ཉིད་ཡི་ཡེ་ཤེས་ཡི་གེ་ཏྲཾ་སྟེ། དེ་ལས་བསྒྲུབས་པ་ནི་དེ་བཞིན་དུ་གཞན་དག་གིས་ཇི་ལྟ་བ་བཞིན་དུ་འདི་ཉིད་བསྒོམས་པས་འཚང་རྒྱ་བ་ཉིད་ཐོབ་པའོ་ཞེས་བྱ་བའི་དོན་ཏོ། །དེ་བཞིན་དུ་ཐམས་ཅད་ལ་ཡང་འབྲས་བུ་ཉེ་བར་ལེན་པའི་གཞིར་གྱུར་པས་ན་ལྷ་རྣམས་དང་རྗེས་སུ་མཐུན་པའི་གཟུགས་སུ་གདགས་ཏེ། གདུལ་བྱ་རྣམས་འབྲས་བུ་ལ་གཞོལ་བས་འཇུག་པའོ། །རིན་ཆེན་ཞེས་བྱ་བ་ལ་སོགས་པ་ལ་རིན་ཆེན་ནི་རིན་པོ་ཆེའི་རིགས་སོ། །རིན་ཆེན་མངོན་པར་མཐོ་བ་ཞེས་བྱ་བ་ནི་གདུལ་བྱའི་སྐྱེ་བོ་རྣམས་ཀྱི་བསམ་པ་ཡོངས་སུ་རྫོགས་པར་བྱེད་པ་ཉིད་དུ་འབྱུང་ངོ༌། །དེའི་ཡེ་ཤེས་ནི་དེས་བསྐྱེད་པ་སྟེ་ཡེ་ཤེས་ཀྱི་ཚོགས་ཀྱི་འབྲས་བུ་སྩོལ་བས་རིན་ཆེན་འབྱུང་ལྡན་ཏེ། ཏིང་ངེ་འཛིན་དེ་ལ་ཡང་མིང་དེ་སྐད་ཅེས་བྱའོ། །དེ་ལ་དམིགས་པ་ཞེས་བྱ་བ་ལ་སོགས་པ་ནི་བཤད་ཟིན་ཏོ། །ཁཾ་གི་ཡེ་ཤེས་ལས་བསྒྲུབས་པ། །ཞེས་བྱ་བ་ལ་ཡེ་ཤེས་ནི་བྱ་བ་ནན་ཏན་སྒྲུབ་པ་སྟེ་དེ་ཉིད་ཡི་གེ་ཁཾ་ཡིན་ནོ། །ཁཾ་གི་ཡི་ཤེས་ལས་བསྒྲུབས་པ་ནི་ངེས་པར་འབྱུང་བའོ། །ཏིང་འཛིན་ཕྱག་རྒྱས་ལེགས་ཞུགས་པ། །ཞེས་བྱ་བ་ནི་ཇི་སྲིད་དུ་བཤད་པའི་མཚན་ཉིད་ཅན་གྱི་བསམ་གཏན་གྱི་ཕྱག་རྒྱས་ཤིན་ཏུ་ལེགས་པར་ཞུགས་པའོ། །མརྐ་ཏ་སྟེ་ཡི་འོད་
ལྟར་འབར། །ཞེས་བྱ་བ་ནི་སྐུ་མདོག་མར་ཀ་ཏའི་འོད་འབར་བ་སྟེ་ལྗང་གུ་ཞེས་བྱ་བའི་དོན་ཏོ། །ལ་ལ་དག་ནི་འོད་ཀྱི་དཀྱིལ་འཁོར་མ་ར་ཀ་ཏ་ལྟ་བུའོ་ཞེས་ཟེར་མོད་ཀྱི་དེ་ནི་མི་རིགས་ཏེ་བཅོམ་ལྡན་འདས་ཀྱི་སྐུ་མདོག་འཆད་པའི་སྐབས་ཡིན་གྱི་འོད་ནི་མ་ཡིན་ནོ། །ལེགས་པར་འགྲུབ་ཕྱིར་སླར་ཡང་སྡུད། །ཅེས་བྱ་བ་ནི་སེམས་དབང་དུ་གྱུར་པ་ལེགས་པར་འགྲུབ་པའི་ཕྱིར་སྤྲོས་པ་རྣམས་སླར་ཉེ་བར་སྡུད་པ་སྟེ། འདི་ཡང་རྣལ་འབྱོར་པའི་རིམ་པ་བསྟན་པའི་ཕྱིར་བཤད་པ་ཡིན་ཏེ། འདིའི་འོག་མ་རྣམས་ལ་ཡང་འདི་བཞིན་ཁོང་དུ་ཆུད་པར་བྱའོ། །འོད་ཟེར་ཆེན་པོས་རབ་གསལ་ཞིང༌། །ཞེས་བྱ་བ་ལ་འོད་ཟེར་ཆེན་པོ་ནི་ཡེ་ཤེས་ཀྱི་སྣང་བའི་ངོ་བོ་ཉིད་དུ་གྱུར་པའི་ཕྱིར་བཅོམ་ལྡན་འདས་དོན་ཡོད་གྲུབ་པའི་ཆོས་ཀྱི་སྐུའོ། །དེ་དང་འདྲ་བ་ནི་དེའི་རྒྱུ་མཐུན་པ་ལས་བྱུང་བ་ལོངས་སྤྱོད་རྫོགས་པའི་སྐུའི་ཚུལ་འཛིན་པ་ཞེས་བྱ་བའི་དོན་ཏོ། །ནམ་མཁའི་སྙིང་པོ་ནི་ནམ་མཁའི་སྐྱེ་གནས་ཅན་ནོ། །ནམ་མཁའ་དང་མཉམ་པ་ཞེས་བྱ་བ་ནི་རྣམ་པར་མི་རྟོག་པ་ཉིད་དང༌། ཁྱབ་པ་ཉིད་དང༌། ཐམས་ཅད་ཀྱི་གནས་སུ་གྱུར་པ་ཉིད་ལ་སོགས་པས་མཉམ་པས་ན་ནམ་མཁའ་དང་མཉམ་པའོ། །གཏན་ཚིགས་དེ་ཉིད་ཀྱིས་ན་འདུ་བྱེད་ཐམས་ཅད་སྤངས་པའི་ཞེས་བྱའོ། །ནམ་མཁའ་ཞེས་བྱ་བ་ལ་སོགས་པ་ལ་ནམ་མཁའ་དང་མཉམ་པར་འདུ་བྱེད་ཐམས་ཅད་ཀྱི་གོ་འབྱེད་པ་གང་ཡིན་པ་སྟེ། དེ་ཉིད་ནི་བྱ་བསྒྲུབ་པའི་ཡེ་ཤེས་ཡོངས་སུ་གྱུར་པ་ལས་བྱུང་བས། ཡེ་ཤེས་ཀྱི་རྡོ་རྗེ་ནི་བཅོམ་ལྡན་འདས་དོན་ཡོད་གྲུབ་པའོ། །དེ་ལ་དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །རྣམ་པར་སྣང་མཛད་ལ་སོགས་པའི་ཡེ་ཤེས་ཀྱི་རྗེས་སུ་འབྲངས་ནས་འདིར་རིགས་ཀྱིས་བསྡུས་པའི་ཡེ་ཤེས་ཀྱི་ཆ་རྣམས་ཡིན་པར་ཤེས་པར་བྱའོ། །རྒྱན་ཞེས་བྱ་བ་ནི་དམ་ཚིག་གི་ཕྱག་རྒྱའི་ཚུལ་གྱིས་མཉེས་པར་བྱེད་པའོ། །འོད་དམར་འོད་ཟེར་ཕྲེང་བ་ཅན། །ཞེས་བྱ་བ་ནི་འོད་དམར་པོ་དང་འོད་ཀྱི་ཕྲེང་བ་དམར་པོ་གང་ལ་ཡོད་པའོ། །དེ་བས་ན་དེ་ནི་ལྷ་རྣམས་འཇིགས་པས་སེམས་མྱོས་ཏེ་ཞེས་བྱ་བ་སྟེ། གང་གིས་ལྷ་རྣམས་ནི་ལག་པ་ཐལ་མོ་སྦྱར་བར་བྱེད་ཅེས་བྱ་བ་སྟེ་ལག་པ་གཉིས་ཀྱི་སོར་མོ་ཐམས་ཅད་ཀུན་ནས་ཐལ་མོ་སྦྱར་བ་བྱས་པ་གང་ཡིན་པ་དེ་ལ་དེ་སྐད་ཅེས་
བྱའོ། །བྱང་ཆུབ་ཡན་ལག་འབྲས་བརྒྱན་པའི། །ཞེས་བྱ་བ་ནི་བྱང་ཆུབ་ཀྱི་ཡན་ལག་ནི་སྦྱིན་པ་ལ་སོགས་པ་འམ་བྱང་ཆུབ་ཀྱི་ཡན་ལག་བདུན་ནོ། །དེའི་འབྲས་བུ་ནི་འཚང་རྒྱའོ། །དེ་ཉིད་ནི་རྒྱན་ཏེ་སྙིང་པོ་ཡིན་ལ་དེ་རྟོག་པའི་སྦྱོར་བ་ལས་ཡང་དག་པར་འབྱུང་བ་གང་ཡིན་པ་དེ་ལ་དེ་སྐད་ཅེས་བྱ་སྟེ་དེ་བས་ན་དེ་བསྒོམ་པར་བྱའོ། །ཡེ་ཤེས་ཀྱི་ཞེས་བྱ་བ་ལ་སོགས་པ་ལ་ཡེ་ཤེས་ནི་ཆོས་བདག་མེད་པའི་མཚན་ཉིད་ཅན་ནོ། །སྤྱན་ནི་ཆོས་རྣམས་གཉིས་སུ་མེད་པ་དང་དབེན་པར་རྟོག་པའི་མཚན་ཉིད་ཅན་གྱིས་སྣང་བར་བྱེད་པ་ནི་སོ་སོར་སྣང་བའི་ཡེ་ཤེས་ཏེ། དེ་ཉིད་གཟུང་བ་དང་འཛིན་པའི་རྣམ་པར་རྟོག་པས་མི་ཤིགས་པས་ན་རྡོ་རྗེའོ། །དེའི་འཇོ་ཚུལ་ནི་རྣམ་པར་རོལ་པ་སྟེ། སེམས་ཅན་རྣམས་ལ་ཕན་པའི་ཕྱིར་སྔོན་གྱི་འཕེན་ཤུགས་ཀྱི་སྦྱོར་བས་མཛད་པ་གང་ཡིན་པ་སྟེ། བཅོམ་ལྡན་འདས་ཡུམ་སངས་རྒྱས་སྤྱན་དེ་ལ་དེ་སྐད་ཅེས་བྱའོ། །དེ་ལ་དམིགས་པ་ཞེས་བྱ་བ་ལ་སོགས་པ་ནི་བཤད་ཟིན་ཏོ། །རྡོ་རྗེའི་གདན་ཅན་ཞེས་བྱ་བ་ནི་རྡོ་རྗེའི་གདན་ལ་བཞུགས་པ་སྟེ། རྣམ་པར་མི་གཡོ་བའི་གདན་བརྙེས་པའི་དོན་ཏོ། །ལ་ལ་དག་ན་རེ་རང་གི་དམ་ཚིག་གི་ཕྱག་རྒྱ་རྡོ་རྗེ་ལ་སྐྱེས་བུའི་ཚུལ་གྱིས་ཉེ་བར་གནས་པས་བཞུགས་པའོ། །ཉེ་བར་མཚོན་པ་འདིས་ནི་ལྷ་མོ་ཐམས་ཅད་ཀྱང་ཚུལ་འདི་ཉིད་དོ་ཞེས་ཟེར་རོ། །དགོད་ཅིང་ཞེས་བྱ་བ་ནི་དབུས་དང་གཡས་ཀྱི་ཞལ་ལོ། །ཞལ་རས་ཁྲོ་བག་བཅས་ཞེས་བྱ་བ་ནི་ཞལ་དབུས་མའི་གཡོན་པའི་ཆ་ཁྲོ་བག་ཏུ་བཅས་ལ་ཞལ་གྱི་ཆའི་ཕྱེད་ནི་དགོད་བག་ཏུ་གནས་པ་གང་ཡིན་པ་དེ་ལ་དེ་སྐད་ཅེས་བྱའོ། །ཤིན་ཏུ་གདུག་པའི་ཅིག་ཤོས་རྣམས་ཚར་གཅོད་པ་དང་རྗེས་སུ་གཟུང་བའི་ཚུལ་གྱིས་བཞུགས་སོ་ཞེས་བྱ་བའི་དོན་ཏོ། །གཡོན་པ་བསྡིགས་པའི་མཛུབ་མོ་སྟེ། །ཞེས་བྱ་བ་ནི་ཕྱག་རྒྱ་གཡོན་པའི་རྡོ་རྗེ་ཁུ་ཚུར་ལས་བྱུང་བའི་ཁྲོ་བོའི་སྡིགས་མཛུབ་མཛད་པས་གནས་ཤིང་དེ་ཁོ་ན་ཉིད་ལ་གནས་པས་དེ་གཟིགས་ཞེས་བྱ་བའི་དོན་ཏོ། །དངོས་མེད་དངོས་པོའི་མཚན་ཉིད་ཅན། །ཞེས་བྱ་བ་ནི་དངོས་པོ་རྣམས་མེད་ཅིང་མིག་ཡོར་ལྟ་བུའི་ཚུལ་གྱིས་གཟུགས་ཆེན་པོའི་དངོས་པོའི་མཚན་ཉིད་ཅན་ཁམས་གསུམ་ལྟ་བུའི་རྣམ་པར་འཇུག་པའི་སེམས་དང་སེམས་ལས་བྱུང་བའི་བདག་ཉིད་ཅན་གང་ཡིན་
པ་དེ་ལ་དེ་སྐད་ཅེས་བྱ་སྟེ། དོན་དམ་པར་ནི་གཉིས་སུ་མེད་པའི་ཡེ་ཤེས་ཀྱི་ངོ་བོ་ཉིད་དོ་ཞེས་བྱ་བའི་དོན་ཏོ། །བསྒོམ་པར་བྱ་ཞེས་བྱ་བ་ནི་མོས་ཤིང་དང་པའི་རྗེས་སུ་འགྲོ་བའི་སེམས་ཀྱིས་སོ། །སྒྱུ་འཕྲུལ་ཞེས་བྱ་བ་ལ་སོགས་པ་ལ་སྒྱུ་འཕྲུལ་ནི་སངས་རྒྱས་ལ་སོགས་པའི་སྤྲུལ་པའི་བདག་ཉིད་ཅན་ནོ། །དེའི་འབྱུང་བ་ནི་གདུལ་བྱ་རྣམས་ཀྱི་སྐལ་བ་ཇི་ལྟ་བ་བཞིན་དུ་བསྟན་པའོ། །དེའི་རྒྱུ་སྟོབས་ཀྱི་ཡེ་ཤེས་ནི་ཡེ་ཤེས་བཅུའི་སྟོབས་ཏེ་གཉིས་སུ་མེད་པའི་ཡེ་ཤེས་ཀྱི་ནུས་པའོ། །དེ་དང་ལྡན་པ་ཉིད་ནི་བཅོམ་ལྡན་འདས་ཡུམ་མཱ་མ་ཀཱིའོ། །ཟབ་མོ་ནི་འཕགས་པ་མ་ཡིན་པས་ངོ་བོ་ཉིད་མི་རྟོགས་པའོ། །དེ་ལ་དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །མི་འཇིགས་སྦྱིན་མཛད་མ་ཞེས་བྱ་བ་ནི་ཕྱག་དང་པོས་སོ། །སངས་རྒྱས་ཀྱི་སྐུ་རྣམས་འབྱུང་བ་བསྒོམ་པར་གྱིས་ཞེས་བྱ་བ་ནི་སངས་རྒྱས་ཀྱི་སྐུ་རྣམས་འབྱུང་བ་ཉིད་དེ་དེ་ལྟ་བུའི་ལུས་གང་ཡིན་པ་དེ་ལ་དེ་སྐད་ཅེས་བྱ་སྟེ། སྤྲུལ་པ་རྣམས་སྤྲུལ་བར་མཛད་ཅེས་བྱ་བའི་དོན་ཏོ། །རིན་ཆེན་སྐུར་ནི་ཞེས་བྱ་བ་ནི་རང་གི་ལུས་རིན་པོ་ཆེ་སྟེ་འདི་ནི་གཉིས་སུ་མེད་པའི་སྦྱོར་བ་གསུངས་པ་ཡིན་ནོ། །གཉིས་སུ་སྦྱོར་བའི་མིང་ཡང་འདི་ཉིད་ལས་ཉེ་བར་མཚོན་པར་བྱའོ། །པདྨའི་ཞེས་བྱ་བ་ལ་སོགས་པ་ལ་པདྨའི་གཟུགས་ཀྱིས་ནི། ཇི་ལྟར་པདྨ་རབ་དམར་ཡང༌། །ཞེས་བྱ་བའི་དཔེས་བསྟན་པས་ན། འདོད་ཆགས་ལ་སོགས་པ་རྣམ་པར་ཐར་པའི་སྒོའི་ངོ་བོ་ཉིད་ཀྱིས་སོ། །རྣམ་པར་རོལ་པ་ནི་སེམས་ཅན་གྱི་དོན་གྱི་ཕྱིར་རྣམ་པར་བརྩེ་བའོ། །དེས་སངས་རྒྱས་རྣམས་ཀྱིས་སམ་སངས་རྒྱས་རྣམས་བཞིན་དུ་རྒྱལ་མཚན་ཉིད་ཅན་ཐོབ་ཅིང་བསྙེས་པ་སྟེ་ཡུམ་གོས་དཀར་མོ་གང་ཡིན་པ་དེ་ལ་དེ་སྐད་ཅེས་བྱའོ། །དེ་ཉིད་ནི་མི་ཕྱེད་པའི་ཡེ་ཤེས་ཀྱི་ངོ་བོ་ཉིད་ཡིན་པས་ན་ཡེ་ཤེས་རྡོ་རྗེའོ། །དེ་ལ་དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །སྒེག་པའི་ཆ་ལུགས་ལ་གནས་པ། །ཞེས་བྱ་བ་ནི་ཅུང་ཟད་བཞད་པའི་ཚུལ་ཅན་ནོ། །མ་ར་ཀ་ཏའི་འོད་དང་ལྡན། །ཞེས་བྱ་བ་ནི་མ་ར་ཀ་ཏ་ལྟ་བུའི་འོད་ཟེར་གྱི་མདངས་གང་ཡིན་པ་དེ་ལ་དེ་སྐད་ཅེས་བྱ་སྟེ། སྐུ་མདོག་ལྗང་གུ་ཞེས་བྱ་བའི་དོན་ཏོ། །སངས་རྒྱས་སྤྲོ་བ་ཀུན་དུ་འཁྲུག །ཅེས་བྱ་བ་ནི་སངས་རྒྱས་ཀྱང་ཡིན་ལ་སྤྲོ་བར་མཛད་པ་ཡིན་པས་ན་དེ་ལ་དེ་སྐད་ཅེས་བྱ་སྟེ་དེ་རྣམས་ཀྱི་སྐུ་ལ་ཁྱབ་པའོ། །
སེམས་ཅན་ཐམས་ཅད་ཅེས་བྱ་བ་ལ་སོགས་པ་ལ་སེམས་ཅན་ཐམས་ཅད་དབང་དུ་བྱས་པ་དེ་ལ་རག་ལས་པ་ཉིད་ཀྱི་ཐུགས་རྗེ་ཆེན་པོའི་སྟོབས་ཀྱིས་བཞུད་ཅིང་འགྲོ་བས་ན་དེ་ལ་དེ་སྐད་ཅེས་བྱ་ལ། ངོ་བོ་ཉིད་དེ་ལ་མངོན་པར་དགའ་བའི་རྣལ་འབྱོར་པའི་སེམས་ཅན་རྣམས་སྨིན་ཅིང་དགའ་བར་བྱེད་པ་སྟེ་དེ་ཉིད་ནི་ཡེ་ཤེས་ཀྱི་རྡོ་རྗེའོ། །དམིགས་པ་ཞེས་བྱ་བའི་དོན་ནི་བཤད་ཟིན་ཏོ། །སེམས་མ་ཞེས་བྱ་བ་ལ་སོགས་པ་ནི་རྡོ་རྗེ་སེམས་མ་དང༌། རྡོ་རྗེ་རིན་ཆེན་མ་དང་རྡོ་རྗེ་ཆོས་མ་དང་རྡོ་རྗེ་ལས་མའོ་ཞེས་བྱ་བ་ནི་མཚན་དེ་སྐད་ཅེས་བྱའོ། །རོལ་པས་རྗེས་སུ་མཉེས་མཛད་མ། །ཞེས་བྱ་བ་ནི་སྒེག་པ་དང་རྗེས་སུ་མཐུན་པས་རོལ་པར་མཛད་པའོ། །ཇི་ལྟར་རིགས་པ་ཞེས་བྱ་བ་ནི་རང་གི་བདག་པོའི་ས་བོན་ལས་བསྒྲུབ་པ་སྟེ། ཁ་དོག་དང་གཟུགས་དང་ཕྱག་མཚན་ཡང་དེ་དང་འདྲ་བ་འཆང་ལས་རྡོ་རྗེ་སེམས་མ་དང༌། རྡོ་རྗེ་ཆོས་ལ་ནུ་མ་འཛིན་པ་མེད་པ་དེའི་ཕྱག་གཉིས་པས་སྡིགས་མཛུབ་དང་ཞགས་པ་འཛིན་པར་བྱའོ། །འཕགས་པའི་བདེན་པ་བཞི་ཞེས་བྱ་བ་ལ་སོགས་པ་ལ་འཕགས་པའི་བདེན་པ་བཞི་ནི་མི་བསྐྱོད་པ་ལ་སོགས་པ་སྟེ་དེ་ཐབས་དང་ཤེས་རབ་ཀྱི་བདེན་པས་དགའ་ཞིང་མཉེས་པར་བྱེད་པས་ན་དེ་སྐད་ཅེས་བྱའོ། །དེ་ལ་དམིགས་པ་ལ་སོགས་པའི་དོན་ནི་བཤད་ཟིན་ཏོ། །སྐུ་གསུམ་ རྒྱལ་བ་བྱེ་བ་ཕྲག་བདུན་གྱིས་ཞེས་བྱ་བ་ནི་ཆོས ་དང་ལོངས་སྤྱོད་རྫོགས་པ་དང༌། སྤྲུལ་པའི་སྐུའི་བདག་ཉིད་ཅན་གྱི་རྒྱལ་བ་བྱེ་བ་ཕྲག་བདུན་གྱིས་ཡང་དག་པར་སྟོན་པའོ། །གསང་སྔགས་གླུ་ཡིས་ཞེས་བྱ་བ་ལ་ནི་གསང་སྔགས་གསུངས་པས་སོ། །བསྟོད་ཅེས་བྱ་བ་ནི་རྣམ་པར་མཁྱེན་ཞིང་བསྔགས་པར་མཛད་པའོ། །ཡི་གེ་དགུ་པ་ཞེས་བྱ་བ་ནི་ཨོཾ་ཞེས་བྱ་བ་ལ་སོགས་པའི་གསང་སྔགས་ཀྱི་ངོ་བོ་ཉིད་ཡིན་པའི་ཕྱིར་རོ། །ཐབས་དགུ་ཅན་ཞེས་བྱ་བ་ནི། སྒེག་པ་དཔའ་བ་མི་སྡུག་པ། །དགོད་དང་ཁྲོ་དང་འཇིགས་རུང་དང༌། །སྙིང་རྗེ་རྔམ་དང་ཞི་བ་ནི། །གར་ཐབས་དགུ་རུ་ཤེས་པར་བྱ། །ཞེས་བྱ་བ་སྟེ་དེ་རྣམས་གང་ལ་ཡོད་པ་དེ་ལ་དེ་སྐད་ཅེས་བྱ་སྟེ། གདུལ་བྱ་རྣམས་ཀྱི་བསམ་པའི་བྱེ་བྲག་གིས་དེ་དག་དང་ལྡན་པས་དེ་སྐད་གསུངས་པ་ཡིན་ནོ། །ལྷ་དགུ་ཡིས་ནི་གནས་སུ་མཛད། །ཅེས་བྱ་བ་ནི་ལྷ་དགུས་བཞིར་མཛད་པའི་རྒྱལ་བའི་གནས་གང་ཡིན་པ་དེ་ལ་དེ་སྐད་ཅེས་བྱའོ། །དོན་གྱིས་
ནི་འདི་སྐད་སྟོན་པ་ཡིན་ཏེ། ཨོཾ་ལས་སྤྱི་བོར་རྣམ་པར་སྣང་མཛད་དེ་སེར་པོ། ཙ་ལས་མིག་ཏུ་འཁོར་ལོས་སྒྱུར་བ་སྟེ་སེར་པོ། ལེ་ལས་མགྲིན་པར་མི་གཡོ་བ་སྟེ་ནག་པོ། ཙུ་ལས་སྙིང་གར་བཙུག་ན་ནོར་བུ་སྟེ་དམར་པོ། ལེ་ལས་དཔུང་མགོར་དོན་ཡོད་པའི་ཞགས་པ་སྟེ་ནག་པོ། ཅུ་ལས་ལྟ་བར་སྐུལ་བྱེད་མ་སྟེ། དམར་པོ། དེ་ལས་བརླ་གཉིས་སུ་རྡོ་རྗེ་འཆད་བ་སྟེ་ནག་པོ། སྭཱ་ལས་བྱིན་པ་གཉིས་སུ་རལ་པ་གཅིག་མ་སྟེ་ནག་པོ། ཧཱ་ལས་རྐང་པ་གཉིས་ཀྱི་སྟེང་དུ་རྡོ་རྗེ་སེན་མོ་ཅན་དཀར་པོ་སྟེ་དེ་དག་བཞུགས་པའོ། །སྟོན་ཀའི་འདམ་བུའི་མདོག་ཅེས་བྱ་བ་ནི་སྐུ་མདོག་སྟོན་ཀའི་འདམ་བུའོ་ཞེས་བྱ་བའི་དོན་ཏོ། །ན་ཆུད་སྐལ་ལྡན་དར་ལ་བབ། །ཅེས་བྱ་བ་ནི་ན་ཚོད་གཞོན་ཞིང་དར་ལ་བབ་པ་དང་ལྡན་པའོ། །རིག་སྔགས་ཐམས་ཅད་སྒྲོལ་མཛད་མ། །ཞེས་བྱ་བ་ནི་ལྷ་མོ་ཐམས་ཅད་ཀྱི་ནང་ན་ཡུམ་འདི་ནི་ཤིན་ཏུ་ཡང་སེམས་ཅན་རྣམས་སྒྲོལ་བར་མཛད་དོ་ཞེས་བྱ་བའི་དོན་ཏོ། །ཞལ་དང་པོ་ནི་སྐུ་མདོག་དང་མཐུན་ལ་གཡས་གཡོན་གནས་པའི་ཞལ་གཉིས་ཀྱི་སྐུ་མདོག་བསྟན་པ་ནི་ཞལ་དབུས་མ་ནི་སྐུའི་མདོག་ཅན་ཉིད་ཡིན་ཏེ་ཐམས་ཅད་དུ་ཡང་དེ་བཞིན་ནོ། །མཆེ་བ་ཟླ་བ་ཚེས་པ་འདྲ། །ཞེས་བྱ་བ་ནི་ཚེས་གཅིག་གི་ཟླ་བ་ལྟ་བུའོ། །ལྗགས་ནི་གློག་བཞིན་སྐྱོད་པར་མཛད། །ཅེས་བྱ་བ་ནི་ལྕེ་གློག་ལྟར་གཡོ་བའོ། །ཚེམས་ཀྱིས་སྒྲོགས་གནོན་རྣམ་པར་གདངས། །ཞེས་བྱ་ནི་མ་མཆུའི་སྒྲོས་ཚེམས་ཀྱིས་མནན་པས་རྣམ་པར་གདངས་པ་ནི་ཅུང་ཟད་གདངས་པའོ། །རྩ་བའི་ཕྱག་རྒྱ་ཞེས་བྱ་བ་ནི་འོག་ནས་བཤད་པས་སོ། །སེ་གོལ་གཏོགས་ཞེས་བྱ་བ་ནི་བ་དན་གསུམ་པའི་ཕྱག་གིས་སེ་གོལ་གཏོགས་པའི་ཚུལ་ལོ། །སྟོད་གཡོགས་པང་པར་རྣམ་པར་བཅིངས། །ཞེས་བྱ་བ་ནི་སྟེང་ནས་བླ་གོས་གྱོན་པ་པང་བར་བཅིངས་ཞེས་བྱ་བའི་དོན་ཏོ། །ཆོ་འཕྲུལ་རྣམས་པ་སྣ་ཚོགས་དང༌། །ཞེས་བྱ་བ་ནི་ཀུན་བརྗོད་པ་ལ་སོགས་པའི་ཆོ་འཕྲུལ་རྣམ་པ་སྣ་ཚོགས་པ་གང་ཡིན་པ་དེ་དང་ངོ༌། །ཐལ་མོ་སྦྱོར་བར་བྱེད་ལ་བརྩོན། །ཞེས་བྱ་བ་ནི་ཐལ་མོ་སྦྱོར་བའོ། །ལ་ལ་ན་རེ་ལག་པ་སྦྱར་བ་བྱས་པའོ། །ཞེས་ཟེར་རོ། །རྒྱལ་བ་མཐའ་ཡས་པ་ཞེས་བྱ་བ་ལ་སོགས་པ་ལ། རྒྱལ་བ་ནི་རྣམ་པར་སྣང་མཛད་ལ་སོགས་པའོ། །མཐའ་ཡས་པ་ནི་ཚད་མེད་པའོ། །
དེ་རྣམས་ཀྱི་ཡེ་ཤེས་ནི་ཆོས་ཀྱི་དབྱིངས་ལ་སོགས་པའི་ཡེ་ཤེས་ལྔ་སྟེ། དེ་ལས་བྱུང་བའི་བཅོམ་ལྡན་འདས་ཡུམ་སྐུལ་བྱེད་མ་ལ་ཡང་དེ་སྐད་ཅེས་བྱའོ། །དེ་ཉིད་ནི་སྟོབས་ཏེ་དེས་ལྷ་དགུའི་ཚོགས་ཀྱི་རྡོ་རྗེ་གདུག་པ་རྣམས་ལས་རྣམ་པར་རྒྱལ་བས་ན་དེ་སྐད་ཅེས་བྱ་སྟེ་དེ་ལ་དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །གསེར་གྱི་མདོག་དང་ལྡན་ཞེས་བྱ་བ་ནི་སེར་པོའོ། །རོལ་སྟང་སྟབས་ཀྱིས་གནས་པས་གནོན། །ཞེས་བྱ་བ་ནི་རོལ་པའི་སྟང་སྟབས་ཀྱི་མཚན་ཉིད་ནི་སྔར་བཤད་པ་སྟེ་དེ་ཉིད་ནི་གཞིར་གྱུར་པས་གནས་ཏེ། དེས་གནོན་ཅིང་བདག་གིས་མཛད་པ་གང་ཡིན་པ་དེ་ལ་དེ་སྐད་ཅེས་བྱ་སྟེ། རོལ་པའི་སྟང་སྟབས་ཀྱིས་བཞུགས་ཞེས་བྱ་བའི་དོན་ཏོ། །སངས་རྒྱས་སྤྲིན་སྤྲོས་ཐོབ་པར་མཛད། །ཅེས་བྱ་བ་ནི་སངས་རྒྱས་ཀྱི་སྤྲིན་སྤྲོས་པས་ཐོབ་པར་མཛད་ཅེས་བྱ་བ་གདུལ་བྱའི་སྐྱེ་བོ་རྣམས་ཀྱི་ཀྱེ་ཤེས་སྐྱེད་པར་མཛད་པས་དེ་སྐད་ཅེས་བྱའོ། །ཆོས་མཛོད་ཅེས་བྱ་བ་ནི་ཡེ་ཤེས་རིན་པོ་ཆེའི་འབྱུང་གནས་སུ་གྱུར་ཅེས་བྱ་བའི་དོན་ཏོ། །སངས་རྒྱས་རིན་ཆེན་ཞེས་བྱ་བ་ལ་སོགས་པ་ལ་སངས་རྒྱས་རྣམས་ཀྱི་སྤྲིན་ནི་ཚོགས་སོ། །སངས་རྒྱས་ཀྱི་སྤྲིན་དེའི་ཡེ་ཤེས་ཇི་སྐད་དུ་བཤད་པ་ནི་རྙེད་པར་དཀའ་བས་ན་རིན་པོ་ཆེ་སྟེ། སངས་རྒྱས་ཀྱི་སྤྲིན་ཡེ་ཤེས་དེ་ཉིད་ལ་དེ་སྐད་ཅེས་བྱའོ། །དེས་སྔོན་གྱི་སྨོན་ལམ་ཉེ་བར་བསགས་པས་སྣང་བར་གྱུར་ཅིང་འགྲོ་བ་མ་ལུས་པའི་ཡིད་ལ་འདོད་པའི་དོན་རྫོགས་པར་མཛད་པ་ཉིད་དུ་སོ་སོར་སྣང་བར་བྱེད་པ་སྟེ་རིན་ཆེན་སྒྲོལ་མ་ལ་དེ་སྐད་ཅེས་བྱའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །སྟོན་ཀའི་ཟླ་བའི་འོད་དང་མཚུངས། །ཞེས་བྱ་བ་ནི་དཀར་བའོ། །པདྨ་ལ་བཞུགས་པ་ཞེས་བྱ་བ་ནི་པདྨ་དེ་ལ་བཞུགས་པའོ། །གལ་ཏེ་དེ་སྐད་བཤད་མོད་ཀྱི་འོ་ན་ཀྱང་པདྨའི་སྟེང་དུ་ཟླ་བའི་དཀྱིལ་འཁོར་ཏེ་བསྐྱེད་པའི་རིམ་པ་ལས་བྱུང་བའི་ཡིན་པའི་ཕྱིར་རོ། །རོལ་པའི་སྟང་སྟབས་བརྩོན་པ་སྟེ། །ཞེས་བྱ་བ་ནི་རོལ་པའི་སྟང་སྟབས་ཀྱིས་དེ་ལ་བཞུགས་ནས་གདུག་པ་རྣམས་ཟློག་པར་མཛད་པ་ལ་རབ་ཏུ་འབད་པས་བརྩོན་པར་མཛད་པའོ། །རྣམ་པར་བལྟ་བ་ཞེས་བྱ་བ་ནི་ཕྱོགས་ཐམས་ཅད་དུ་གཟིགས་པའོ། །ཉལ་དང་ཞེས་བྱ་བ་ལ་འདིར་ནི་འཁོར་ལོའི་སྔགས་རྣམས་ཡིན་པར་ཤེས་པར་བྱ་སྟེ།
འདིས་ནི་མཉམ་པར་མ་གཞག་པའི་རྣལ་འབྱོར་གསུངས་པ་ཡིན་ནོ། །འཇིགས་པ་ཐམས་ཅད་ཅེས་བྱ་བ་ལ་སོགས་པ་ལ་སེར་སྣ་ཉེ་བར་བསགས་པས་རང་གི་སེམས་ཉིད་ཕྱི་དང་ནང་གི་བགེགས་རྣམས་སུ་སྣང་སྟེ་དེ་ལ་འཇིགས་པའོ། །དེ་འཇིགས་པ་ནི་ཉེ་བར་ཞི་བ་སྟེ། དེ་འཇིགས་པར་ནུས་པ་ནི་བདག་དང་བདག་གིར་གཉིས་སུ་རྟོག་པ་ལ་ཀུན་དུ་སྤྱོད་པ་ལ་ཀུན་དུ་འདུག་པའི་སེར་སྣ་སྤོར་བར་ནུས་པའི་ཡེ་ཤེས་གང་ཡིན་པ་དེ་ཉིད་ནི་རྡོ་རྗེ་སྟེ། དེའི་ངོ་བོ་ཉིད་དུ་གྱུར་པ་ཉིད་དང་དེ་ཐོབ་པའི་ཐབས་ཀྱི་བདག་ཉིད་ཅན་དུ་གྱུར་པས་བཅོམ་ལྡན་འདས་ཡུམ་ཁྲོ་གཉེར་ཅན་ལ་ཡང་དེ་སྐད་ཅེས་བྱའོ། །དེ་ལ་དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །ཐམས་ཅད་བཅིང་བ་བསྐྱེད་པས་ཏེ། །ཞེས་བྱ་བ་ནི་གདུག་པ་ཐམས་ཅད་ཀྱི་བཅིང་བ་སྟེ་བགེགས་བྱེད་པའི་ནུས་པ་མེད་པའོ། །དེ་སྐྱེད་པར་མཛད་པས་ན་དེ་སྐད་ཅེས་བྱའོ། །དེ་ཉིད་ཀྱིས་ན། སེམས་ཅན་མ་ལུས་དེས་འདུལ་བྱེད། །ཅེས་བྱ་བ་གསུངས་ཏེ་འདི་ཡང་རོལ་པའི་སྟང་སྟབས་ཀྱིས་བཞུགས་པའོ། །རྡོ་རྗེ་ཞེས་བྱ་བ་ལ་སོགས་པའི་རྡོ་རྗེ་སྒྲོག་ནི་མི་ཤེས་པའི་མཚན་ཉིད་ཅན་ནོ། །དེའི་འགྲོ་བ་ནི་ཇི་ལྟར་བཅིངས་པ་འདི་རྣམ་པར་མི་ཤིགས་པར་འགྱུར་ཞེས་རྟོག་པ་སྟེ། བཅོམ་ལྡན་འདས་ཡུམ་རྡོ་རྗེ་ལུ་གུ་རྒྱུད་ལ་དེ་སྐད་ཅེས་བྱ་སྟེ། དེ་ཉིད་ཡེ་ཤེས་རྡོ་རྗེའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །ཐུབ་པ་སྐྱེས་མཆོག་ཅེས་བྱ་བ་ནི་བར་ཆད་མེད་པར་མངོན་པར་རྫོགས་པར་འཚང་རྒྱ་བར་འགྱུར་བ་སྟེ། དེས་ན་དེ་བཞིན་གཤེགས་པ་རྣམས་ཀྱིས་མཆོག་ཏུ་གྱུར་པའོ། །སེམས་དཔའི་སྐྱིལ་མོ་ཀྲུང་དུ་བཞུགས། །ཞེས་བྱ་བ་ནི་སེམས་དཔའི་སྐྱིལ་མོ་ཀྲུང་གིས་གནས་པའོ། །སངས་རྒྱས་བྱང་ཆུབ་སེམས་དཔའ་ཡི། །སྤྲིན་རྣམས་དེ་བཞིན་འཕྲོ་བར་མཛད། །ཅེས་བྱ་བ་ནི་སངས་རྒྱས་ཀྱི་རྣམ་པའི་སྤྲིན་རྣམས་ཀྱིས་ཁམས་གསུམ་ཁྱབ་པར་མཛད་པ་དང་དེ་བཞིན་དུ་བྱང་ཆུབ་སེམས་དཔའ་སྤྲིན་རྣམས་ཀྱང་འཕྲོ་བ་མཛད་དོ་ཞེས་བྱ་བར་སྦྱར་ཏེ་བསྒོམ་པར་བྱའོ་ཞེས་བ་བ་ནི་ཚིག་གི་ལྷག་མའོ། །བྱམས་པའི་ཞེས་བྱ་བ་ལ་སོགས་པ་ལ་བྱམས་པའི་སྟོབས་མངའ་བས་ན་བྱམས་པའི་སྟོབས་ཏེ་འཕགས་པ་བྱམས་པའོ། །ཡེ་ཤེས་ཉིད་ཀྱིས་བདུད་བཞི་ལས་
རྒྱལ་བའི་མཚན་ཉིད་ཅན་ཡིན་པས་ན་རྣམ་པར་རྒྱལ་བ་སྟེ་དེ་ཉིད་ནི་རྡོ་རྗེའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །ཤེས་རབ་ཡེ་ཤེས་མཆོག་ཐོབ་པ། །ཞེས་བྱ་བ་ནི་ཤེས་རབ་ཀྱི་མཆོག་ནི་ཆོས་བདག་མེད་པའི་མཚན་ཉིད་ཅན་ནོ། །ཟབ་མོའི་ཚུལ་ནི་སྟོན་པ་པོ།། ཞེས་བྱ་བ་ནི་དངོས་པོ་རྣམས་གཉིས་སུ་མེད་པར་སྟོན་པའོ། །ཟུར་ཕུད་གསུམ་ཞེས་བྱ་བ་ནི་ཟུར་ཕུད་གསུམ་དང་ལྡན་པས་ན་དེ་སྐད་ཅེས་གསུངས་སོ། །འཇོ་སྒེག་ཐབས་ཀྱིས་རོལ་པ་སྟེ། །ཞེས་བྱ་བ་ནི་ཤས་ཆེར་སྒེག་པའི་སྟང་སྟབས་དང་ལྡན་པའོ། །ཤེས་རབ་འཆང་ཞེས་བྱ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་བསྣམས་པའོ། །ཤེས་རབ་ཡོན་ཏན་མཆོག་གིས་བཀླུབས། །ཞེས་བྱ་བ་ནི་སྒྲུབ་པ་པོ་འཕགས་པ་འཇམ་དཔལ་གྱི་ལྷའི་ང་རྒྱལ་གྱིས་བརྒྱན་པར་བྱས་པའོ། །སངས་རྒྱས་འདོད་པས་ཞེས་བྱ་བ་ནི་འཚང་རྒྱ་བར་ཡིད་ལ་འདོད་པས་སོ། །འཇམ་པའི་རབ་མཆོག་གི་ཞེས་བྱ་བ་ལ་སོགས་པ་ལ་འཇམ་པ་ནི་བྱིས་པའི་ཆ་ལུགས་འཆང་བའོ། །དེ་ཉིད་ཕུལ་དུ་བྱུང་བས་ན་རབ་པོ། །དེ་བཞིན་གཤེགས་པ་ཐམས་ཅད་ཀྱི་དེས་པར་འབྱེད་པའི་ཤེས་རབ་དང་ཡེ་ཤེས་ཀྱི་ངོ་བོ་ཉིད་དུ་གྱུར་པས་ན་མཆོག་གོ །ཤེས་རབ་དང་ཡེ་ཤེས་ནི་གཉིས་ཀྱིས་རྣམ་པར་དབེན་པའི་ཤེས་རབ་དང་ཡེ་ཤེས་སོ། །རྣམ་པར་རྟོག་པ་ཐམས་ཅད་འཇིག་པས་ན་རྡོ་རྗེ་སྟེ་དེ་རྟོགས་པའི་ཚུལ་གྱིས་སྣང་ཞིང་རབ་ཏུ་གསལ་བས་ན་བྱང་ཆུབ་སེམས་དཔའ་འཇམ་དཔལ་དེ་ལ་དེ་སྐད་ཅེས་བྱའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །དེ་ལ་སོགས་པ་ཞེས་བྱ་བ་ལ་སོགས་པ་འདིས་ནི་བྱང་ཆུབ་སེམས་དཔའ་ལྷག་མ་རྣམས་བསྟན་པ་ཡིན་ནོ། །གྲངས་མེད་པ་ཞེས་བྱ་བ་ནི་ཚིག་འདི་གྲངས་མེད་པ་ཉིད་སྟོན་པ་ནི་མ་ཡིན་གྱི་འོན་ཀྱང་མང་པོ་སྟོན་པ་སྟེ། དེ་རྣམས་ནི་བཞིས་མ་ཚང་བའི་བྱང་ཆུབ་སེམས་དཔའ་སྟོང་ཡོད་པར་ཤེས་པར་བྱའོ། །ས་བོན་ཡིག་འབྲུ་རྣམས་ལས་འཁྲུངས། །ཞེས་བྱ་བ་ནི་མིང་གི་ཡི་གེའི་དང་པོ་ལས་བྱུང་བའོ། །ཡེ་ཤེས་ཕྱག་རྒྱའི་སྦྱོར་བ་ཅན། །ཞེས་བྱ་བ་ནི་ཟླ་བ་དང་རྡོ་རྗེ་ལ་སོགས་པ་བསྒོམ་པའི་རིམ་པ་དང་ལྡན་པའོ། །སྣ་ཚོགས་ཉམས་ཀྱིས་དགའ་བར་མཛད། །ཅེས་བྱ་བ་ནི་སྒེག་པ་ལ་སོགས་པའི་གར་གྱི་ཉམས་ཀྱིས་དེ་ལ་མངོན་པར་ཞེན་པ་
རྣམས་གར་སྟབས་ཀྱིས་ཉམས་དེ་དང་དེས་དགའ་བ་སྐྱེད་པར་མཛད་ཅེས་བྱ་བའི་དོན་ཏོ། །གསང་སྔགས་ཟློས་པས་བསྒོམ་པར་བྱ། །ཞེས་བྱ་བ་ནི་འདིར་བྱེད་པའི་ཚིག་མེད་པར་བྱས་ནས་མཚམས་སྦྱར་ཏེ། ས་བོན་ཡིག་འབྲུ་རྣམས་ལས་འཁྲུངས། །ཞེས་བྱ་བ་དང༌། སངས་རྒྱས་ལ་སོགས་པ་སྤྲོས་ཏེ། །སོ་སོའི་སྔགས་བརྗོད་པ་ནི་ཡི་གེ་དེ་ལས་སྤྲོ་བ་དང་བསྡུ་བ་དང་གནས་དང་བརྟན་པར་གྱུར་པར་རྣལ་འབྱོར་པ་རྣམས་ཀྱིས་རྟག་ཏུ་དྲན་ཞིང་བསྒོམ་པར་བྱའོ། །འདིར་བསྒྲེས་ཏེ་བསྟན་པའི་བྱང་ཆུབ་སེམས་དཔའ་དེ་དག་ཐམས་ཅད་ཀྱང་ཕྱག་དང་པོ་གཉིས་ནི་བསམ་གཏན་གྱི་ཕྱག་རྒྱར་བྱའོ། །གཡས་ཀྱི་གཉིས་པས་ནི་མཆོག་སྦྱིན་པའོ། །གཡོན་གྱི་གཉིས་པས་ནི་རང་གི་ཕྱག་རྒྱ་རྒྱལ་མཚན་འཛིན་པར་བྱའོ་ཞེས་བྱ་བ་ནི་མན་ངག་གོ །འཇམ་པའི་དབྱངས་ཀྱི་ཞེས་བྱ་བ་ནི་དེ་དང་འབྲེལ་པའོ། །གཟི་བརྗིད་དང་ལྡན་ཞེས་བྱ་བ་ནི་འབར་མ་སྟེ་ཞེས་བྱ་བ་དང་སྦྱར་ཏེ། ཉི་མའི་དཀྱིལ་འཁོར་གྱི་འོད་དང་གདན་དུ་ལྡན་པས་ན་དེ་སྐད་ཅེས་གསུངས་སོ། །མདོག་ནི་དབྱར་གྱི་ཆར་སྤྲིན་འདྲ། །ཞེས་བྱ་བ་ནི་སྐུ་མདོག་སྡོ་ནག་གོ །སྦྲུལ་གྱི་རྒྱན་གྱིས་བརྒྱན་པ་སྟེ། །ཞེས་བྱ་བ་ནི་མཐའ་ཡས་དང་རིག་ལྡན་ནག་པོས་དབུ་སྐྲ་བཅིངས་པ་འཇོག་པོ་གསེར་མདོག་དང་ལྡན་པས་ནི་རྣ་རྒྱན་བྱས་པ། པདྨ་ཆེན་པོ་གསེར་བཙོ་མའི་མདོག་དང་ལྡན་པས་ནི་ལག་གདུབ་བྱས་པ། ཀརྐོ་ཊ་མདོག་དཀར་བས་ནི་སེ་རལ་ཁར་བྱས་པ། ནོར་ཅན་མདོག་པདྨ་དམར་པོ་ལྟ་བུས་ནི་སྐ་རགས་བྱས་ལ། དུང་སྐྱོང་དང་པདྨ་མདོག་དཀར་བ་དང་དམར་བས་ནི་རྐང་གདུབ་བྱས་པ་སྟེ་དེ་དག་ཐམས་ཅད་ཀྱང་གདེངས་ཀ་བསྐྱིལ་པ་དང་ནོར་བུ་དང་ལྡན་པའོ། །རོལ་པའི་སྟང་སྟབས་ཅན་ཞེས་བྱ་བ་ནི་རོལ་པའི་སྟང་སྟབས་དང་ལྡན་པས་ན་དེ་སྐད་ཅེས་བྱའོ། །མ་ཧེ་ཆིབས་ཞེས་བྱ་བ་ནི་འདི་སྐད་གསུངས་སུ་ཟིན་ཀྱང་རྒྱུད་ཆེན་པོའི་རྗེས་སུ་འབྲངས་ནས་མ་ཧེས་ཉེ་བར་མཚོན་པ་གཤིན་རྗེ་ཆུང་མ་དང་བཅས་པ་ཡིན་པར་ཤེས་པར་བྱའོ། །དེའི་ཞེས་བྱ་བ་ནི་མ་ཧེས་ཉེ་བར་མཚོན་པས་གཤིན་རྔེའོ། །དབུ་ཡི་སྟེང་ན་མི་འཁྲུགས་བཞུགས། །ཞེས་བྱ་བ་ནི་མི་བསྐྱོད་པའི་དབུའི་སྟེང་ན་བཞུགས་པ་གང་ཡིན་པ་དེ་ལ་དེ་སྐད་ཅེས་བྱའོ། །སྟེང་ན་སྐུ་གསུམ་ཞེས་བྱ་བ་ལ་སོགས་པ་ནི་སྟེང་གི་ཆར་སྐུ་གསུམ་གྱི་བདག་
ཉིད་དུ་གནས་པ་འཇམ་དཔལ་གྱིས་ལེགས་པར་བརྒྱན་པར་བྱས་པ་ལ་དེའི་འོག་ཏུ་མི་བསྐྱོད་པའོ། །མདའ་ཡང་གསོར་ཞེས་བྱ་བ་ནི་མདའ་གསོར་བར་མཛད་པའོ། །གཡོན་པ་སྡིགས་མཛུབ་ཞགས་པ་ཅན། །ཞེས་བྱ་བ་ནི་གཡོན་པ་རྡོ་རྗེ་ཁུ་ཚུར་ལ་མཛུབ་མོ་བསྒྲེང་བས་ཞགས་པ་འཛིན་པའོ། །ལྷ་མོ་ཡིས་ནི་གཡས་ནས་འཁྱུད། །ཅེས་བྱ་བ་ལ་སོགས་པ་ལ་གཡས་ལོགས་ན་གནས་པའི་ལྷ་མོ་མདོག་དེ་ཉིད་དང་འདྲ་བས་གཡོན་གྱིས་འཁྱུད་པའོ། །ལྷ་མོ་དེའི་གཡས་ན་ཨུཏྤལ་སྔོན་པོ་འཛིན་པའོ། །གཡོན་པ་ཞེས་བྱ་བ་ལ་སོགས་པ་ལ་གཡོན་ལོགས་ན་གནས་པའི་ལྷ་མོས་གཡས་ཀྱིས་འཁྱུད་ལ་དེའི་གཡོན་ན་ནི་པདྨ་དཀར་པོ་ཐོགས་པའོ། །སྔར་མ་བྲེད་ནས་ཕྱག་ཀྱང་འཚལ། །ཞེས་བྱ་བ་ནི་འཇིགས་ཤང་བྲེད་ནས་ཕྱག་འཚལ་ཞིང་མགོ་བཏུད་པ་སྟེ། དེ་ཉིད་ཀྱིས་ན་སྔར་མ་སྟེ་མྱོས་པར་གྱུར་པའོ། །འོད་ཟེར་དམར་པོ་འབར་དང་བཅས། །ཞེས་བྱ་བ་ནི་འོད་ཟེར་དམར་བ་སྟེ་དེ་ཉིད་ཀྱིས་ན་འབར་བ་དང་བཅས་པའི་འོད་ཀྱི་དཀྱིལ་འཁོར་གྱིས་བསྐོར་བའོ། །སངས་རྒྱས་སྤྲིན་འཕྲོས་ཐོབ་པར་མཛད། །ཅེས་བྱ་བ་ནི་སངས་རྒྱས་ཀྱི་སྤྲིན་རྣམས་འཕྲོ་བས་མངོན་པར་འདོད་པའི་དོན་གདུལ་བྱའི་སྐྱེ་བོ་རྣམས་ཀྱིས་ཀུན་ནས་ཐོབ་ཅིང་རྙེད་བར་མཛད་པས་ན་སངས་རྒྱས་སྤྲིན་འཕྲོས་ཐོབ་པར་མཛད་དེ་སྤྲུལ་པའི་སྤྲིན་གྱིས་སེམས་ཅན་དོན་མཛད་ཅེས་བྱ་བའི་དོན་ཏོ། །བསྒོམས་ནས་སུ་ཞེས་བྱ་བ་ནི་འདིར་ཇི་སྐད་དུ་གསུངས་པའི་མཚན་ཉིད་དང་ལྡན་པར་བསྒོམས་པ་འདི་བདག་པོར་འགྱུར་རོ་ཞེས་བྱ་བར་སྦྱར་རོ། །ཉལ་ལམ་ཞེས་བྱ་བ་ནི་ཡང་གི་སྒྲས་ནི་བསྡད་པའམ་སྡོད་པར་ཤེས་པར་བྱའོ། །ཀུན་དུ་ཟོས་ཤིང་ཞེས་བྱ་བ་འདིས་ནི་བཟའ་བར་བྱ་བའི་དམ་ཚིག་བསྟན་ཏོ། །ལེགས་པར་བསམས་ཏེ་ཞེས་བྱ་བ་ནི་གདུག་པ་རྣམས་ཚར་གཅོད་ཅིང་འཇིག་པའོ། །འདོད་པ་ལྔའི་ཞེས་བྱ་བ་ལ་སོགས་པ་ལ་རྣམ་པར་སྣང་མཛད་དང་རིན་ཆེན་འབྱུང་ལྡན་དང༌། སྣང་བ་མཐའ་ཡས་དང་དོན་ཡོད་གྲུབ་པ་དང༌། མི་བསྐྱོད་པའི་བདག་ཉིད་ཅན་གྱི་གཟུགས་དང་སྒྲ་དང་དྲི་དང་རོ་དང་རེག་བྱའི་མཚན་ཉིད་ཅན་གྱི་འདོད་པའི་བདག་ཉིད་སྒྱུ་མའི་སྐྱེས་བུ་ལྟ་བུའམ་མ་སྐྱེས་པར་མོས་པ་སྔོན་དུ་འགྲོ་བས་དེ་བཞིན་གཤེགས་པ་ལ་སོགས་པ་མཆོད་པའི་ཡིད་ལ་བྱེད་པས་ཉེ་བར་ལོངས་སྤྱོད་ན་གོས་པ་མེད་ཅིང་
སྡིག་པའི་སྣོད་དུ་མི་འགྱུར་རོ། །དེ་བས་ན་ཆོས་ཐམས་ཅད་ལ་བརྟེན་པ་མེད་པས་ན་ནམ་མཁའ་ལྟ་བུར་ཞེས་གསུངས་པ་ཡིན་ནོ། །དེ་སྐད་དུ་གཞན་དག་ལས་ཀྱང༌། ཆགས་པ་ཡེ་ཤེས་འདོད་པ་ཡིས། །རྟག་ཏུ་འདོད་པའི་ཡོན་ཏན་བསྟེན། །བྱང་ཆུབ་སེམས་དཔའ་མཉེས་པར་བྱ། །བྱང་ཆུབ་དཔའ་བོ་ཆགས་པས་བྱ། །གཟུགས་ལ་རྣམ་གསུམ་ཤེས་བྱས་ནས། །མཆོད་པ་བྱེད་པས་མཆོད་པར་བྱ། །བཅོམ་ལྡན་དེ་ཉིད་སྣ་ཚོགས་པ། །སངས་རྒྱས་རྣམ་པར་སྣང་མཛད་བཞི། །སྒྲ་ལ་རྣམ་གསུམ་ཤེས་བྱས་ནས། །ལྷ་རྣམས་ལ་ནི་དབུལ་བར་བྱ། །དེ་ཉིད་བཅོམ་ལྡན་སྣ་ཚོགས་པ། །སངས་རྒྱས་རིན་ཆེན་འབྱུང་གནས་གཙོ། །དྲིལ་རྣམ་གསུམ་ཤེས་བྱས་ནས། །སངས་རྒྱས་ལ་སོགས་དབུལ་བར་བྱ། །དེ་ཉིད་བཅོམ་ལྡན་སྣ་ཚོགས་པ། །འདོད་ཆགས་ཆོས་ཀྱི་འབྱུང་གནས་གཙོ། །རོ་ལ་རྣམ་གསུམ་ཤེས་བྱས་ནས། །ལྷ་རྣམས་ལ་ནི་དབུལ་བར་བྱ། །དེ་ཉིད་སངས་རྒྱས་སྣ་ཚོགས་པ། །སངས་རྒྱས་ཐོགས་མེད་རྡོ་རྗེ་འཛིན། །རེག་ལ་རྣམ་གསུམ་ཤེས་བྱས་ནས། །བདག་གི་རིགས་ལ་དབུལ་བར་བྱ། །དེ་ཉིད་བཅོམ་ལྡན་རྡོ་རྗེ་ཅན། །མི་བསྐྱོད་པ་ཡི་ཚུལ་བརྙེས་པའོ། །གཟུགས་དང་སྒྲ་དང་རོ་ལ་སོགས། །རྟག་ཏུ་སེམས་ནི་སྦྱར་བར་བྱ། །འདི་ནི་སངས་རྒྱས་ཐམས་ཅད་ཀྱི། །གསང་བ་སྙིང་པོ་བསྡུས་པའོ། །ཞེས་བྱ་བ་ལ་སོགས་པ་གསུངས་པ་ཡིན་ནོ། །གཤེད་བྱེད་ཅེས་བྱ་བ་ལ་སོགས་པ་ལ་གཤེད་བྱེད་ནི་འཕྲོག་པའི་བདག་ཉིད་དོ། །དེ་ཉིད་རྣམ་པ་ཐམས་ཅད་ཀྱི་ཐམས་ཅད་བྱེད་པའམ། གདུག་པ་རྣམས་འཇོམས་པའི་ཕྱིར་སློང་བར་བྱེད་པས་ན་གཤེད་བྱེད་ཐམས་ཅད་སློང་བར་བྱེད་པའོ། །དེ་ཉིད་ནི་ཐོགས་པ་མེད་པའི་ཕྱིར་ཡེ་ཤེས་ཀྱང་ཡིན་ལ་རྡོ་རྗེ་ཡང་ཡིན་པས་དེ་སྐད་ཅེས་བྱའོ། །ཡང་ན་གཤེད་བྱེད་ཐམས་ཅད་སློང་བར་བྱེད་ཅིང་སྐྱེད་པར་བྱེད་པའི་ཡེ་ཤེས་རྡོ་རྗེ་ཡིན་པས་དེ་སྐད་ཅེས་བྱའོ། །བཅོམ་ལྡན་འདས་དེ་ཉིད་ཀྱིས་གཤིན་རྗེར་འཇིག་རྟེན་དུ་གྲགས་པ་གསོད་པ་ནི་ཟློག་པར་མཛད་པ་སྟེ། འདུལ་བའི་ཐབས་དང་བཅས་པས་ཉོན་མོངས་པའི་གནས་ལས་བཟློག་སྟེ། དེ་བཞིན་གཤེགས་པའི་ལམ་ལ་འཇུག་པར་མཛད་པས་དེ་སྐད་ཅེས་བྱའོ། །དེ་ལ་དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །
མིའུ་ཐུང་ཞེས་བྱ་བ་ནི་མི་ཐུང་གི་ཁྱད་པར་དང་ལྡན་པའོ། །འོད་ཟེར་དམར་པོའི་དཀྱིལ་འཁོར་ཏེ་ཉི་མའི་དཀྱིལ་འཁོར་རོ། །དེའི་འོད་ཟེར་དེ་ལ་མངའ་བས་ན་དེ་སྐད་ཅེས་བྱ་སྟེ། འོད་ཀྱི་དཀྱིལ་འཁོར་དམར་པོ་རབ་འཕྲོ་བ། །ཞེས་བྱ་བའི་དོན་ཏོ། །རོལ་པའི་སྟབས་ཀྱིས་པདྨར་བཞུགས།། ཞེས་བྱ་བ་ལ་རོལ་པའི་སྟང་སྟབས་ཀྱིས་པདྨའི་གདན་ལ་བཞུགས་པས་དེ་སྐད་ཅེས་བྱའོ། །ཤེས་རབ་མཐར་བྱེད་ཅེས་བྱ་བའི་དོན་གྱིས་ན་པདྨའི་སྟེང་ན་ཁྱབ་འཇུག་ཆུང་མ་དང་བཅས་པ་དེའི་སྟེང་ན་བཅོམ་ལྡན་འདས་ཇི་ལྟ་བ་བཞིན་དུ་བཞུགས་པའོ། །རྣམ་པར་འགྱུར་ཞེས་བྱ་བ་ནི་ཞལ་གྱི་མཆེ་བ་གཙིགས་པའོ།། ཚེམས་ཀྱིས་སྒྲོས་ཀྱང་མནན་ཞེས་བྱ་བ་ནི་མཆེ་བས་མ་མཆུའི་སྒྲོས་གནོན་པར་མཛད་པ་སྟེ། ཞལ་གསུམ་ལས་གཡོན་གྱི་ཞལ་སྟེང་གི་ཚེམས་ཀྱིས་སྒྲོས་མནན་པའོ། །སྣ་ཚོགས་རྒྱན་གྱིས་འབར་བ་སྟེ། །ཞེས་བྱ་བ་ནི་སྣ་ཚོགས་པ་ནི་སྒེག་པ་ལ་སོགས་པས་ཡན་ལག་འགྱུར་བར་བྱེད་པའི་གར་སྟབས་རྣམས་དང་ལྡན་པས་འབར་བའོ། །སྤྱི་བོའི་སྟེང་ནི་སྤྱི་གཙུག་གོ །དངོས་པོ་བསྒོམ་བྱས་ན་ཞེས་བྱ་བ་ནི་རབ་ཏུ་དང་ཞིང་མོས་པའི་རྗེས་སུ་འགྲོ་བའི་བསམ་པས་བསྒོམ་པའོ། །གཞན་གྱིས་མི་ཐུབ་པ་ཞེས་བྱ་བ་ལ་སོགས་པ་ལ་གདུག་པ་ཐམས་ཅད་ཟིལ་གྱིས་མནན་པ་གང་གིས་ཀྱང་མི་ཐུབ་པས་གཞན་གྱིས་མི་ཐུབ་པ་སྟེ། དེ་ཉིད་ཡེ་ཤེས་ཀྱི་རྡོ་རྗེའོ། །དམིགས་པ་ཞེས་བྱ་བ་ནི་སོགས་པའི་དོན་ནི་བཤད་ཟིན་ཏོ། །སྤྱན་གསུམ་པ་ཞེས་བྱ་བ་འདིར་ལྡན་ཞེས་བྱ་བ་ནི་ཚིག་གི་ལྷག་མའོ། །རོལ་པའི་སྟབས་ཀྱིས་པདྨར་ཞུགས། །ཞེས་བྱ་བ་ནི་བཤད་ཟིན་ཏོ། །དེ་ལྟ་མོད་ཀྱི་པདྨ་མཐར་བྱེད་ཅེས་བྱ་བའི་དོན་གྱི་རྗེས་སུ་འབྲངས་ནས་པདྨའི་སྟེང་ན་ཚངས་པ་ཆུང་མ་དང་བཅས་པ་དེའི་སྟེང་ན་བཅོམ་ལྡན་འདས་ཇི་ལྟ་བ་བཞིན་དུ་བཞུགས་པའོ། །ཁྲོ་བོའི་ལྟ་བས་རྟོག་པར་མཛད། །ཅེས་བྱ་བ་ནི། ཁྲོ་གཉེར་བསྙེར་བས་རབ་ཏུ་འཇིགས། །ཁྲོ་བོའི་ལྟ་བས་རབ་ཏུ་འཛུམ། །ཁྲོ་བོའི་ལྟ་བས་མཉམ་གཞག་ན། །ཁམས་གསུམ་དག་ཀྱང་འཇིགས་པར་བྱེད། །ཅེས་བཤད་བ་ནི་ཁྲོ་བོའི་ལྟ་བའི་མཚན་ཉིད་དེ་དེས་གཟིགས་པར་མཛད་པས་ན། ཁྲོ་བོའི་ལྟ་བས་རྟོག་མཛད་པ། །ཞེས་བྱའོ། །ལྗགས་ནི་བསྐྱོད་མཛད་ལ་ཞེས་བྱ་བ་ནི་ལྗགས་སྤྱོད་པར་མཛད་ཅིང་འཇིགས་པས་ན་ལྗགས་ནི་སྐྱོད་པར་
མཛད་པའོ། །སངས་རྒྱས་གཟུགས་ནི་མང་པོ་དག །ཅེས་བྱ་བ་ནི་སངས་རྒྱས་ཀྱི་སྐུ་དུ་མ་དག་འཕྲོ་བར་བྱེད་པ་ལ་སོགས་པ་གང་ཡིན་པ་དེ་ལ་དེ་སྐད་ཅེས་བྱའོ། །འཕྲོ་ཞིང་འདུ་བར་ཞེས་བྱ་བ། །ཉེ་བར་མཚོན་པས་ན་འཕྲོ་བ་དང་བསྡུ་བ་དང་གནས་པ་དང་བརྟན་པར་བྱའོ། །བསྒོམས་བྱས་ནས་ཞེས་བྱ་བ་ནི་འདིར་ཐུན་གསུམ་དུ་གོམས་པར་བྱའོ་ཞེས་སྦྱར་བར་བྱའོ། །རྟ་མཆོག་ཅེས་བྱ་བ་ལ་སོགས་པ་ལ་རབ་མཆོག་ཏུ་གྱུར་པའི་རྟ་མཆོག་ཐམས་ཅད་འཇོམས་པར་བྱེད་པའི་ངོ་བོ་ཉིད་དུ་དབུ་གསུམ་གྱི་སྟེང་དུ་འཇོག་པར་མཛད་པས་ན་རྟ་མཆོག་སྟེ་དེ་ཉིད་ནི་ཡེ་ཤེས་ཀྱི་རྡོ་རྗེའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །བགེགས་ཀྱི་གཤེད་ཅེས་བྱ་བ་ནི་དངོས་གྲུབ་མ་ལུས་པའི་བགེགས་སུ་གྱུར་པ་འཇོམས་པའོ། །མེ་ཡི་དཀྱིལ་འཁོར་བཞུགས་ཞེས་བྱ་བ་ནི་འབར་བའི་དཀྱིལ་འཁོར་གྱིས་བསྐོར་བའོ། །ཨུཏྤལ་སྔོན་པོའི་འདབ་མའི་མདོག །ཅེས་བྱ་བ་ནི་ཨུཏྤལ་སྔོན་པོའི་འདབ་མ་ལྟ་བུའི་མདོག་དང་གཟི་མདངས་ཡོད་པས་ན་དེ་སྐད་ཅེས་བྱ་བ་སྟེ་སྐུ་མདོག་སྔོན་པོ་ཞེས་བྱ་བའི་དོན་ཏོ། །ཞབས་ཀྱིས་བགེགས་ནི་མནན་པ་སྟ། །ཞེས་བྱ་བ་ནི་ཞབས་གཡོན་པས་པདྨའི་སྟེང་ན་ཚོགས་ཀྱི་བདག་པོ་གནས་པ་གནོན་པར་མཛད་པ་གང་ཡིན་པ་དེ་ལ་དེ་སྐད་ཅེས་བྱའོ། །གཉིས་པ་པདྨའི་སྟེང་ན་བཞུགས། །ཞེས་བྱ་བ་ནི་བཅོམ་ལྡན་འདས་དེ་ཉིད་ཀྱི་གཉིས་པ་སྟེ་ཞབས་གཡས་པ་པདྨ་ལ་འཇོག་པར་མཛད་པས་ན་བཅོམ་ལྡན་འདས་འདི་ཡང་རོལ་པའི་སྟབས་ཀྱིས་པདྨ་ལ་བཞུགས་པར་བསྒོམ་པར་བྱའོ་ཞེས་འདིར་ཡང་སྔ་མ་བཞིན་ནོ། །ཡེ་ཤེས་མཁས་པས་ཞེས་བྱ་བ་ནི་བསྒོམ་པའི་ཡེ་ཤེས་ལ་མཁས་པའོ། །བགེགས་ཐམས་ཅད་ཅེས་བྱ་བ་ལ་སོགས་པ་ལ་བགེགས་ཐམས་ཅད་རྣམ་པར་གཞོམ་པ་ནི་རྣམ་པར་འཇིག་པ་སྟེ། དེས་རྣམ་པར་རྒྱལ་བ་མངའ་བས་ན་དེ་སྐད་ཅེས་བྱ་སྟེ་དེ་ཉིད་ནི་ཡེ་ཤེས་རྡོ་རྗེའོ། །དེ་ལ་དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །མིག་གཡོན་ཞེས་བྱ་བ་ནི་གཡོན་པ་ཡོ་པའོ། །ཧཱུཾ་གིས་སྙིང་གའི་ཕྱོགས་ཀྱང་བཀང༌། །ཞེས་བྱ་བ་ནི་སྙིང་གའི་ཕྱོགས་ན་གནས་པའི་ཡི་གེ་ཧཱུཾ་གི་སྒྲས་ལུས་ཁྱབ་པའོ། །མཐིང་ཤུན་གྱི་ནི་མདོག་ཅན་ཏེ། །ཞེས་བྱ་བ་ནི་ཁ་དོག་གཞན་དང་ཤིན་ཏུ་མ་འདྲེས་པའི་མཐིང་གི་མདོག་ཅན་ནོ། །ཐུབ་པ་ནི་མི་དགེ་
བ་རྣམས་རྣམ་པ་ཐམས་ཅད་དུ་སྡོམ་པའི་བདག་ཉིད་དུ་གྱུར་པའི་ཕྱིར་རོ། །བགེགས་ཀྱི་ཆུ་མཇིངས་ཞེས་བྱ་བ་ལ་སོགས་པ་ལ་མ་རིག་པའི་མུན་པས་ཉེ་བར་བསགས་པའི་སེམས་ཀྱི་རྒྱུན་རྣམ་པར་སྤྱོད་བར་མཛད་པས་བགེགས་ཀྱི་ཆུ་པོའི་མཇིངས་འཇོམས་པའོ། །སྤྱན་གཡོ་བ་ནི་ཕྱོགས་ཐམས་ཅད་དུ་ལེགས་པར་གཟིགས་པ་ལ་བརྩོན་པའོ། །དེ་ཉིད་ཉི་མའི་དཀྱིལ་འཁོར་དང་ལྡན་པས་ན་འབར་བའོ། །ཆང་པས་བཟུང་སྟེ་བལྟ་བ་དང༌། །ཞེས་པ་ནི་ཁུ་ཚུར་དམ་དུ་བཅས་པས་དམ་དུ་བཟུང་བའོ། །སྣ་ཚོགས་ཞེས་བྱ་བ་ལ་སོགས་པ་ལ་དུས་ཐམས་ཅད་པའི་མེ་ཏོག་སྣ་ཚོགས་པ་ཆུ་ལས་སྐྱེས་པ་དང་ཐད་ལས་སྐྱེས་པའི་མཆོག་རྣམས་ཁྱད་པར་དུ་སྤེལ་ཞིང་བཀོད་པས་བཅིངས་ཤིང་དཀྲིས་པ་སྟེ། དེས་རྩ་བར་བཅིངས་པའི་ཅོད་པན་གྱི་དབུ་རྒྱན་རིན་པོ་ཆེ་ལས་བྱས་པ་གང་ཡིན་པ་དེ་ལ་དེ་སྐད་ཅེས་བྱ་ལ། དེ་མངའ་བས་ནི་བཅོམ་ལྡན་འདས་མི་གཡོ་མགོན་ལ་ཡང་དེ་སྐད་ཅེས་བྱ་སྟེ། དབུའི་སྟེང་དུ་དུས་ཐམས་ཅད་པའི་མེ་ཏོག་གི་ཕྲེང་བས་དབུ་རྒྱན་བྱས་པའོ། །ཆོ་འཕྲུལ་ཆེན་པོ་དུ་མ་འཕྲོ། །ཞེས་བྱ་བ་ནི་གདུལ་བྱ་རྣམས་མོས་པར་བྱེད་པའི་ཕྱིར་རྫུ་འཕྲུལ་ལ་སོགས་པ་དང་ལྡན་པའོ་ཞེས་བྱ་བ་ནི་ཚིག་གི་ལྷག་མའོ། །དེ་ལྟར་ཞེས་བྱ་བ་ནི་དེ་བཞིན་དུའོ། །རྟག་ཏུ་ཞེས་བྱ་བ་ནི་རྣལ་འབྱོར་པ་གང་དུས་ཐམས་ཅད་དུ་སྤྱོད་ལམ་རྣམ་བཞིར་བསྒོམ་མོ་ཞེས་བྱ་བའི་བར་རོ། །སྒོམ་པར་བྱེད་ཅེས་བྱ་བ་ནི་འདིར་འདི་ལྟར་རོ། །བླ་ན་མེད་པའི་ཞེས་བྱ་བ་ལ་སོགས་པ་ལ་ཆོས་ཐམས་ཅད་ཕྱིན་ཅི་མ་ལོགས་པར་ཁོར་དུ་ཆུད་པ་ནི་བྱང་ཆུབ་པའོ། །དེ་ལས་ཁྱད་པར་དུ་གྱུར་པ་གཞན་མེད་པས་དེ་ཉིད་ནི་བླ་ན་མེད་པའོ། །ཐེམ་སྐས་ལ་ནི་འཇོག་པར་འགྱུར། །ཞེས་བྱ་བ་ནི་སེམས་ཀྱི་རྒྱུན་འཕགས་པའི་ལམ་ལ་རྫོགས་པས་གནས་པ་སྟེ། འདི་དག་གིས་ནི་བྱང་ཆུབ་རབ་ཏུ་འབད་པས་བསྒྲུབ་པར་བྱའོ་ཞེས་བསྟན་ཏོ། །དེ་བཞིན་གཤེགས་པ་ཞེས་བྱ་བ་ལ་སོགས་པ་ལ་དེ་བཞིན་གཤེགས་པ་ཐམས་ཅད་ཀྱི་བཀའ་བཞིན་བྱེད་པ་ནི་སྒྲུབ་པ་པོ་མ་ལུས་པའི་མངོན་པར་འདོད་པའི་དངོས་གྲུབ་སྩོལ་བའི་ཕྱིར་སད་པར་མཛད་པའོ། །དེ་ལ་མི་གཡོ་བ་ནི་མི་འགུལ་བའོ། །ཡེ་ཤེས་ནི་དེ་བཞིན་གཤེགས་པའི་གང་ཡིན་པ་དེ་ལ་དེས་རྣམ་པར་བསྒྱིངས་པ་ནི་སེམས་ཅན་མ་ལུས་པའི་དོན་རྫོགས་པར་མཛད་པའོ། །
དེ་རྣམ་པར་རོལ་པ་མངའ་བས་ན་བཅོམ་ལྡན་འདས་མི་གཡོ་བ་ལ་དེ་སྐད་ཅེས་བྱ་སྟེ་དེ་ཉིད་རྡོ་རྗེའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །མིང་ནི་འདོད་པའི་དབང་ཕྱུག་སྟེ། །ཞེས་བྱ་བ་ནི། ཊཀྐིའི་འདོད་པ་ཡིན་པར་གྲགས། །ཞེས་གསུངས་པས་ན་འདོད་པ་མ་ལུས་པའི་བདག་པོར་གྱུར་པས་ན་མཚན་དེ་ལྟར་བསྒྲགས་ཞེས་ཚིག་འོག་མ་དང་སྦྱར་རོ། །དབུ་རྒྱན་སངས་རྒྱས་ཀྱིས་བརྒྱན་པའི། །ཞེས་བྱ་བ་ནི་སངས་རྒྱས་མི་བསྐྱོད་པའི་དབུ་རྒྱན་གྱི་ཅོད་པན་དང་ལྡན་པ་སྟེ་གཙོ་བོའི་རིན་པོ་ཆེའི་དབུ་རྒྱན་གྱིས་བརྒྱན་པའོ། །དཔྲལ་བར་ཁྲོ་གཉེར་བསྡུས་མཛད་པ། །ཞེས་བྱ་བ་ནི་དཔྲལ་བ་ནི་སྨིན་མའི་བར་དུ་ཁྲོ་གཉེར་བསྡུས་པར་མཛད་པ་གང་ཡིན་པ་དེ་ལ་དེ་སྐད་ཅེས་བྱའོ། །འབར་བ་སྟེ་ཞེས་བྱ་བ་ནི་དངོས་པོ་ཁྱད་པར་ཅན་དང་ལྡན་པས་དེ་སྐད་ཅེས་བྱའོ། །དཀྱིལ་འཁོར་དམར་པོ་ཞེས་བྱ་བ་ནི་ཉི་མའི་དཀྱིལ་འཁོར་རོ། །འདོད་པའི་རྒྱལ་པོའི་ཕྱག་རྒྱ་ནི་འོག་ནས་འཆད་དོ། །རོལ་པའི་སྟབས་ནི་རོལ་པའི་སྟང་སྟབས་མཛད་པའོ། །འོག་གི་བགེགས་ལ་སྡང་བར་མཛད། །ཅེས་བྱ་བ་ནི་འོག་གི་བགེགས་རྣམས་སྐྲག་པར་མཛད་པའོ། །སངས་རྒྱས་སྤྲོས་པས་ཀུན་དུ་ཁྱབ། །ཅེས་བྱ་བ་ནི་སངས་རྒྱས་རྣམས་ཀྱི་ཁྲོ་བས་ཀུན་དུ་འཁྲིགས་པས་ལུས་ལ་ཁྱབ་པའོ། །བླ་མེད་ཡེ་ཤེས་ཐོབ་བྱའི་ཕྱིར། །ཞེས་བྱ་བ་ནི་ཐམས་ཅད་ལ་མཆོག་ཏུ་གྱུར་པའི་ཡེ་ཤེས་ཐོབ་པའི་དོན་དུའོ། །ཏིང་ངེ་འཛིན་བཟང་པོ་ཞེས་བྱ་བ་ནི་སེམས་མཆོག་ཏུ་རྩེ་གཅིག་པ་ཐོབ་བས་སོ། །སྙིང་པོ་ཐམས་ཅད་ཅེས་བྱ་བ་ལ་སོགས་པ་ལ་སངས་རྒྱས་དང་རྡོ་རྗེ་འཛིན་པ་ལ་སོགས་ཐམས་ཅད་ཀྱི་སྙིང་པོ་ནི་གཉིས་སུ་མེད་པའི་ཡེ་ཤེས་སོ། །དེ་ཐམས་ཅད་ནས་འགུགས་པ་ནི་འདྲེན་པའོ། །དེ་རྣམ་པར་རྒྱལ་བ་སྟ་གདུག་པ་རྣམས་ཟིལ་གྱིས་གནོན་པའི་མཚན་ཉིད་མངའ་བས་ན་དེ་སྐད་ཅེས་བྱའོ། །དེ་ཉིད་ཡེ་ཤེས་རྡོ་རྗེ་སྟེ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །སྐུ་ནི་སྤྲིན་སྔོན་འདྲ་བ་སྟེ། །ཞེས་བྱ་བ་ན་སྐུ་སྤྲིན་སྔོན་པོ་དང་འདྲ་བར་སྔོ་བ་མངའ་བས་ན་དེ་སྐད་ཅེས་བྱའོ། །དབུ་རྒྱན་ལ་ནི་སངས་རྒྱས་བཞུགས། །ཞེས་བྱ་བ་ནི་ཅོད་པན་ལ་མི་བསྐྱོད་པ་འཇོག་པའོ། །རོལ་སྟབས་མཛད་ཅེས་བྱ་བ་ནི་རོལ་པའི་སྟང་སྟབས་མཛད་པའོ། །དཀྱིལ་འཁོར་ཞེས་བྱ་བ་ནི་ཉི་མའི་དཀྱིལ་འཁོར་རོ། །
སྦྱོར་བའི་ཡེ་ཤེས་ཀྱིས་བསྐུལ་བའི། །ཞེས་བྱ་བ་ནི་དམ་ཚིག་གི་ཕྱག་རྒྱ་དང་སྦྱོར་བའོ། །དེའི་ཡེ་ཤེས་ནི་འཁྱུད་པ་ལ་སོགས་པ་སྟེ་གནས་སྐབས་དེར་ཅི་རིགས་པར་རིགས་ལྔར་བཞུགས་པའི་ལྷ་ཐམས་ཅད་ཀྱི་རབ་ཏུ་དགའ་བ་རྣམ་པར་དག་པ་ཉིད་དེ། དེས་བསྐུལ་བར་སོ་སོར་རིག་པས་རབ་ཏུ་དགའ་བའི་བདག་ཉིད་ཅན་བདག་གིར་མཛད་ཅེས་བྱ་བའི་བར་དུའོ། །གཞན་དག་ནི་ལྷ་དང་གཉིས་སུ་མེད་པའི་ང་རྒྱལ་གྱི་བདག་ཉིད་ཅན་གྱི་སྦྱོར་བ་བསྒོམ་པ་ནི་ཡེ་ཤེས་ཀྱིས་བསྐུལ་བའོ་ཞེས་འདོད་དོ། །བསྒོམ་པར་བྱའོ་ཞེས་བྱ་བ་ནི་ཚིག་གི་ལྷག་མའོ། །དབང་བདག་བརྡེག་པའི་ཞེས་བྱ་བ་ལ་སོགས་པ་ལ་དབང་བདག་ནི་ལྷ་ཆེན་པོའོ། །དེ་ལ་བརྡེག་པ་སྟོན་པར་གྱུར་པ་ལ་སོགས་པའི་མངོན་པའི་ང་རྒྱལ་གསལ་བར་མཛད་པ་སྟེ། དེའི་ཡེ་ཤེས་གང་ཡིན་པ་དེ་རྣམ་པར་རྒྱལ་བ་འདི་ལ་མངའ་བས་དབྱིག་སྔོན་ལ་དེ་སྐད་ཅེས་བྱ་སྟེ་དེ་ཉིད་རྡོ་རྗེའོ། །དམིགས་པ་ཞེས་བྱ་བ་ལ་སོགས་པའི་དོན་བཤད་ཟིན་ཏོ། །མིག་དམར་སྐྲ་འབར་གྱེན་དུ་བརྫེས། །ཞེས་པ་ནི་མིག་དམར་པོ་མངའ་བས་ན་མིག་དམར་རོ། །ཡང་དེ་ཉིད་ནི་དབུ་སྐྲ་འབར་ཞིང་འོད་དང་ལྡན་པས་གྱེན་དུ་བརྫེས་པ་གང་ལ་མངའ་བ་དེ་ལ་དེ་སྐད་ཅེས་བྱའོ། །པདྨ་ལ་བཞུགས་འགྱིང་བག་ཅན། །ཞེས་བྱ་བ་ནི་པདྨའི་གདན་གྱི་སྟེང་ན་ཁྲོ་བོའི་ང་རྒྱལ་གྱིས་སྟང་སྟབས་དང་བཅས་པས་བཞུགས་པའོ། །དྲན་པོ་ནི་དྲག་པོའི་ལས་མཛད་པའི་ཕྱིར་རོ། །ཚམ་དམ་བཅས་པས་གཏོར་ཞེས་བྱ་བ་ནི་ཙམ་ངམ་དང་བཅས་ཤིང་རོལ་པའི་སྟང་སྟབས་ཞེས་བྱ་བ་དང་ཁྲོ་བོའི་ང་རྒྱལ་གྱིས་བཞུགས་པས་ཚམ་དམ་བཅས་ཞེས་བྱ་སྟེ་སྟང་སྟབས་དེས་བགེགས་རྣམ་འཐོར་ཞིང་སྐྲོད་པར་བྱེད་པ་བསྐྱེད་པས་དེ་སྐད་ཅེས་བྱའོ། །ཕྱོགས་བཅུའི་ཞེས་བྱ་བ་ནི་རང་རང་གི་ཕྱོགས་སུའོ། །འབར་བ་རྣམས་ཀྱིས་ཡོངས་སུ་བསྐོར། །ཞེས་བྱ་བ་ནི་ཉི་མའི་འོད་ཀྱི་དཀྱིལ་འཁོར་དང་ལྡན་པས་དེ་སྐད་ཅེས་བྱའོ། །སྤྲིན་ཞེས་བྱ་བ་ནི་འདིར་ལྡན་པའི་ཚིག་ཏུ་ཤེས་པར་བྱའོ། །སྒོམ་པའི་མཆོག་གིས་ཞེས་བྱ་བ་སྒོམ་པའི་མཆོག་ཐོབ་པས་སོ། །བསྒོམ་པར་བྱ་ཞེས་བྱ་བ་ནི་འདིར་དེ་བཞིན་དུ་བསྒོམ་པའོ། །འཆོལ་བ་ཞེས་བྱ་བ་ལ་འཆོལ་
བའི་རྒྱུད་ལས་བཤད་པའི་ཀུན་དུ་སྤྱོད་པ་ལ་ནི་འཆོལ་བ་ཞེས་བྱ་བའི་སྒྲར་བརྗོད་དོ། །དེའི་ཡེ་ཤེས་ནི་རང་བཞིན་གྱིས་འོད་གསལ་བར་རྟོགས་པའོ། །དེའི་སྟོབས་ནི་ཐོགས་པ་མེད་པའི་ནུས་པའོ། །དེས་རྣམ་པར་རྒྱལ་བ་ནི་དེ་དང་འདྲ་བས་རྗེས་སུ་འགྲོ་བའི་སེམས་ཅན་མེད་པས་ན་ཁྲོ་བོ་སྟོབས་པོ་ཆེ་ལ་དེ་སྐད་ཅེས་བྱ་སྟེ་དེ་ཉིད་རྡོ་རྗེའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །སྐུ་གསུམ་ལྡན་པ་ཞེས་བྱ་བ་ནི་སྐུ་གསུམ་གྱི་བདག་ཉིད་ཅན་སྐུ་དང་གསུང་དང་ཐུགས་རྡོ་རྗེའི་ངོ་བོ་ཉིད་དུ་གྱུར་པས་དེ་སྐད་ཅེས་བྱ་སྟེ། ཐམས་ཅད་ལ་ཡང་དེ་བཞིན་དུ་ཤེས་པར་བྱའོ། །འོད་བཟང་བ་ཞེས་བྱ་བ་ནི་འོད་དམར་པོའོ། །འོད་མ་གང་འོད་ཀྱིས་རྣམ་པར་བརྒྱན། །ཞེས་བྱ་བ་ནི་ཀུན་ནས་འོད་ཟེར་མདོག་གང་གིས་སྐུ་རབ་ཏུ་མཛེས་པའོ། །ངོས་ན་ལྷ་མོ་རབ་བཞུགས་པ། །ཞེས་བྱ་བ་ནི་ངོས་གཉིས་ན་གསང་བ་ཆེན་པོའི་དེ་ཁོ་ན་ཉིད་ལྔའི་ཚུལ་གྱིས་གནས་པའོ། །རིགས་ཀྱི་ཡུམ་ནི་བཞི་པོ་རྣམས། །ཞེས་བྱ་བ་ནི་ལ་ལ་ནི་རྡོ་རྗེ་སེམས་མ་ལ་སོགས་པ་ཡིན་པར་འདོད་ལ། གཞན་དག་ནི་སྤྱན་ལ་སོགས་པ་ཡིན་ནོ་ཞེས་ཟེར་མོད་ཀྱི་དེ་གཉིས་ལས་ཕྱོགས་སྔ་མ་ནི་མི་རིགས་སོ། །དེ་དང་ལྡན་ཞེས་བྱ་བ་ནི་ཚིག་གི་ལྷག་མའོ། །ཕྱག་རྒྱ་འདི་དག་ཀྱང་གང་གི་ཕྱིར་སྔར་བཤད་མོད་ཀྱི་འོན་ཀྱང་བསྐྱེད་པའི་རིམ་པ་ལ་དགོངས་པ་ཉིད་ཀྱིས་ན་གཙོ་བོ་ཉིད་དུ་བསྟན་པའི་ཕྱིར་ཡང་ཕྱག་རྒྱ་འདི་དག་ཉེ་བར་དགོད་པ་མཛད་པ་ཡིན་ནོ། །རྗེས་ཆགས་ཞེས་བྱ་བ་ནི་རྗེས་སུ་དགྱེས་པའི་བདག་ཉིད་ཅན་ཡིན་པས་སོ། །སྤྲོས་བཅས་དགའ་སྟོན་ཡིན་ཞེས་བྱ་བ་ནི་འཁོར་ལོས་སྒྱུར་བའི་སྤྲོ་བ་དང་བཅས་པའི་དགའ་སྟོན་ཏེ། ཀུན་དུ་དགའ་བ་གང་ཡིན་པ་དེ་ལ་དེ་སྐད་ཅེས་བྱའོ། །འདིར་ལྷ་མོ་རྣམས་ནི་ཕྱག་གཉིས་པའོ། །གཙུག་ཏོར་འོད་ཟེར་ལྔ་པ་ཅན། །ཞེས་བྱ་བ་ནི་འདིར་དེ་ཉིད་ཡིན་པར་ཤེས་པར་བྱའོ། །ཀུན་དུ་འཁོར་ལོའི་ཕྲེང་བར་ལྡན། །ཞེས་བྱ་།བ་ནི་འོད་ཀྱི་དཀྱིལ་འཁོར་གྱི་ཕྱི་རོལ་དུའོ། །འཁོར་ལོའི་བར་ན་རྡོ་རྗེ་གནས། །འོད་ཟེར་ཕྲེང་བས་རྣམ་པར་བརྒྱན། །ཞེས་བྱ་བ་ནི་རྡོ་རྗེ་ཕྲེང་བའི་ནང་དུ་འོད་ཀྱི་འཁོར་བྱས་པས་རྗེས་སུ་འབྲེལ་བའི་རྡོ་རྗེ་ཕྲེང་བའི་འོད་ཟེར་གྱི་རྣམ་པ་ཅན་པས་བརྒྱན་པ་སྟེ། ཉེ་བར་མཚོན་པ་འདིས་ན་དེའི་ནང་དུ་རིན་པོ་ཆེ་དང་
པདྨ་དང༌། ཨུཏྤལའི་ཕྲེང་བས་ཀྱང་བརྒྱན་པར་ཤེས་པར་བྱའོ། །བྱང་ཆུབ་སྙིང་པོ་དོན་གཉེར་བ། །ཞེས་བྱ་བ་ནི་བྱང་ཆུབ་ཀྱི་སྙིང་པོ་མངོན་པར་འདོད་པས་སོ། །འདོད་པ་ཐོབ་ཅེས་བྱ་བ་ནི་འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པ་ཐམས་ཅད་བྱེད་དོ། །བྱང་ཆུབ་སྙིང་པོ་ཞེས་བྱ་བ་ལ་སོགས་པ་ལ་བྱང་ཆུབ་ཀྱི་སྙིང་པོ་ནི་དེ་བཞིན་གཤེགས་པའི་ཡེ་ཤེས་སོ། །དེས་གདུལ་བྱའི་སྐྱེ་བོའི་བསམ་པ་རྣམ་པ་ཐམས་ཅད་དུ་རྫོགས་པར་བྱེད་ཅིང་བརྒྱན་པ་དང་སྤུད་པར་མཛད་པས་ན་བྱང་ཆུབ་ཀྱི་སྙིང་པོ་ཐམས་ཅད་ཀྱིས་བརྒྱན་པ་སྟེ་འཁོར་ལོས་སྒྱུར་པའོ། །དེ་ཉིད་ཀྱི་ཡེ་ཤེས་ན་འཁོར་ལོའི་ངོ་བོ་ཉིད་ཡིན་པས་ན་ཡེ་ཤེས་འཁོར་ལོའི་རྡོ་རྗེའོ། །དམིགས་པ་ཞེས་བྱ་བ་ལ་སོགས་པ་ནི་བཤད་ཟིན་ཏོ། །གོང་དུ་དེ་དག་ལ་བརྟེན་ནས་ཏིང་ངེ་འཛིན་གྱི་ཁྱད་པར་ལས་ངེས་པར་འབྱུང་པའི་གསང་སྔགས་བྱེ་བ་ཕྲག་དུ་མ་གསུངས་སོ་ཞེས་བྱ་བའི་དོན་དེ་ཉིད་རིམ་བཞིན་དུ་བསྟན་པ་ཡིན་ཏེ་གསང་སྔགས་དམ་པའི་ཚོགས་དང་ལྷ་རྣམས་ཐ་མི་དད་པར་གཞག་པ་ཡིན་པས་ཅི་རིགས་པར་བསྒྲུབ་པའི་ཕྱིར་འཁོར་ལོས་སྒྱུར་བ་དང་པོར་ཉེ་བར་བཀོད་པ་ཡིན་ནོ། །སྐུ་གསུམ་ཞེས་བྱ་བ་ནི་རང་དང་རྗེས་སུ་མཐུན་པའི་སྐུ་གསུམ་དང་ལྡན་པས་ན་དེ་སྐད་ཅེས་གསུངས་སོ། །བཱི་ཛ་པཱུ་ར་ནེའུ་ལེ་ཅན། །ཞེས་བྱ་བ་ནི་ལག་པ་གཡས་པ་ན་བཱི་ཛ་པཱུ་རའོ། །གཡོན་པ་ན་ནེའུ་ལེའོ། །ངོས་ལ་རྒྱན་རྣམས་ཐམས་ཅད་ཀྱིས། །བརྒྱན་པའི་གནོད་སྤྱིན་མོ་བཞི་དག །ཅེས་བྱ་བ་ནི་སྔ་མ་བཞིན་ནོ། །གཞན་དག་ནི་འདི་དག་ཕྱོགས་རྣམ་པ་བཞི་ན་གནས་སོ་ཞེས་ཟེར་རོ། །རྡོ་རྗེ་བདུད་རྩི་ལག་ནས་པས། །ཞེས་བྱ་བ་ནི། ཨཱཿ་དང་ཧཱུཾ་ལས་བྱུང་བ་ཡི། །ཟླ་བ་རྡོ་རྗེ་ལག་པར་བསམ། །ཡི་གེ་ཨོཾ་ལས་གདུ་བུ་ནི། །སེར་པོ་མཁྲིག་མར་བསམ་པར་བྱ། །བཾ་ནི་ཟླ་བའི་མདོག་འདྲ་བ། །དེ་ལས་བདུད་རྩིའི་ཆར་རབ་འབབ། །དྲི་མེད་སེར་མོར་མངོན་ཕྱོགས་པ། མཁས་པས་བུམ་པ་བཞིན་དུ་བལྟ། །མཛུབ་མོ་ལ་ནི་ནོར་བུ་བཟང༌། །རྫོགས་བཟངས་ཞེས་བྱ་གུང་མོ་ལ། །སྲིན་ལག་ལ་ནི་ནོར་སྤྱིན་ཏེ། །ནོར་སྤྱིན་ཆེན་པོ་མཐེའུ་ཆུང་ལ། །མཐེ་བོང་བི་ཙི་ཀུཎྜ་ལི། །ཀི་ལི་མ་ལི་མཁྲིག་མར་ཏེ། །སྒོ་དབང་སྤྱོད་པའི་དབང་པོ་དག །ལག་
པའི་ངོས་ལ་རྣམ་པར་བསམ། །སྔགས་པས་གནོད་གནས་ཆུ་དབང་ནི། །ལག་པའི་དབུས་སུ་རྣམ་པར་བསམ། །དྲིས་བསྒོས་ལག་པའི་དབུས་སུ་ནི། །རང་རང་སྔགས་ཀྱིས་རིམ་བཞིན་བསམ། །དང་པོར་ཡི་གེ་ཨོཾ་དང་ནི། །རཏྣ་བཛྲེ་རང་མིང་དང༌། །བཞི་ཡི་མཐའ་དང་དེ་འོག་ཏུ། །སྭཱ་ཧཱར་བཅས་པ་སྔགས་སུ་བསྒྲགས། །རྡོ་རྗེ་བདུད་རྩི་ལག་པར་བསམ། །འདི་ལྟར་སྤྱི་བོར་ཆོ་ག་བཞིན། །མཁས་པས་ཆུ་ཡི་སྤྱིན་བླུགས་བརྒྱ། །ཉིན་རེ་ཞིང་ནི་ལེགས་པར་དབུལ། །རིན་པོ་ཆེ་ཞེས་བྱ་བ་ལ་སོགས་པ་ལ་རིན་པོ་ཆེ་ནི་ཡིད་བཞིན་གྱི་ནོར་བུ་ལ་སོགས་པའོ། །སྤྱིན་པ་ནི་སེམས་ཅན་ཐམས་ཅད་ལ་སྟོབས་པ་སྟེ་དེ་ལྟ་བུའི་རིན་པོ་ཆེའི་ཆར་འབེབས་པས་ན་དེ་སྐད་ཅེས་བྱའོ། །དེ་ཉིད་སྤྱིན་པ་ལ་སོགས་པའི་ཕ་རོལ་ཏུ་ཕྱིན་པའི་ཡེ་ཤེས་ཀྱི་སྤྲིན་དང་ལྡན་པས་ན། སྣོན་གནས་པ་ལ་ཡེ་ཤེས་ཀྱི་སྤྲིན་ཞེས་བྱ་སྟེ་དེ་ཉིད་རྡོ་རྗེའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །རྟ་བདུན་ལྡན་པའི་ཤིང་རྟར་ཞུགས། །ཞེས་བྱ་བ་ནི་རྟ་བདུན་གཤིབས་པའི་ཤིང་རྟ་ལ་གནས་པའོ། །འབར་པའི་དཀྱིལ་འཁོར་སྣང་མཛད་པ། །ཞེས་བྱ་བ་ནི་ཉི་མའི་དཀྱིལ་འཁོར་ལས་བྱུང་པའི་འོད་ཟེར་འབར་བའི་འོད་ཀྱི་དཀྱིལ་འཁོར་ཡོངས་སུ་རྒྱས་པའི་བདག་ཉིད་ཅན་ནོ། །ཕྱོགས་བཅུ་བསྲུང་པར་བརྩོན་པ་སྟེ། །ཞེས་བྱ་བ་ནི་ཕྱོགས་བཅུ་ན་གནས་པའི་གདུག་པ་རྣམས་ལས་བསྲུང་པའི་ཕྱིར་བརྩོན་ཞིང་རབ་ཏུ་འབད་པར་མཛད་པའོ། །མིག་དང་ཁ་ནི་འདྲུབ་པར་བྱེད། །ཅེས་བྱ་བ་ནི་གདུག་པ་རྣམས་ཀྱི་མིག་དང་ཁ་འདྲུབ་པར་མཛད་པར་བསྒོམ་པར་བྱ་སྟེ་སྔ་མ་བཞིན་ནོ། །ཉེ་པར་སྤྱོད་པ་རྣམས་སྤངས་ཏེ། །ཞེས་བྱ་བ་ནི་མི་བདེན་པའི་རྣམ་པར་རྟོག་པ་བསལ་ལ་རྣམ་པ་ཐམས་ཅད་དུ་ལྷ་མོ་བསྒོམ་པས་གནས་པར་བྱའོ། །ཧཱུཾ་མཛད་ཅེས་བྱ་བ་ནི་ཡི་གེ་ཧཱུཾ་གི་སྐྲ་ལེགས་པར་སྒྲོགས་པ་ལ་བརྩོན་པའོ། །འདི་ནི་ཞེས་བྱ་བ་ནི་འོད་ཟེར་ཅན་གྱི་ཏིང་ངེ་འཛིན་གྱིས་སོ། །དབང་དུ་ཞེས་བྱ་བ་ནི་རྣལ་འབྱོར་པ་དེ་ཉིད་ཀྱིས་སོ། །སྡང་བ་ཐམས་ཅད་ཅེས་བྱ་བ་ལ་སོགས་པ་ལ་སྡང་བ་ཐམས་ཅད་ཀྱིས་མི་ཚུགས་པར་བྱེད་པ་ནི་གདུག་པ་ཐམས་ཅད་བཟློག་པ་སྟེ་ལྷ་མོ་འོད་ཟེར་ཅན་ནོ། །དེ་ཉིད་ནི་ཐོགས་པ་མེད་ཅིང་མཆོག་ཏུ་གྱུར་པའི་ཡེ་ཤེས་དང་ལྡན་པས་ན་ཡེ་ཤེས་ཀྱི་རྡོ་རྗེ་མཆོག་
རབ་ཅེས་བྱའོ། །དམིགས་པ་ཞེས་པ་ལ་སོགས་པའི་དོན་ནི་བཤད་ཟིན་ཏོ། །དེ་སྟེང་ཁ་དོག་ལྔ་པོ་དག །རབ་ཏུ་འདྲེས་པའི་སངས་རྒྱས་བཞུགས། །ཞེས་བྱ་བ་ནི་སྔ་མ་བཞིན་ཏེ་ཁ་དོག་སེར་པོ་ལ་སོགས་པའོ། །སླར་ཡང་དེ་ལ་ཁ་དོག་ལྔའི། །སངས་རྒྱས་བདུད་རྩིའི་ཆར་འབེབས་མཛད། །ཅེས་བྱ་བ་ནི་ཁྲོ་བོའི་འོད་འབར་བས་གདོན་བསལ་པའི་སེམས་ཅན་ལ་རྡོ་རྗེ་བདུད་རྩིའི་ཆུའི་བུམ་པ་ཕྱག་གཉིས་ཀྱིས་འཛིན་པའི་དེ་བཞིན་གཤེགས་པ་རྣམས་ཀྱིས་དབང་བསྐུར་བར་བསམ་མོ་ཞེས་སྦྱར་རོ། །ནད་ཐམས་ཅད་ཅེས་བྱ་བ་ལ་སོགས་པ་ལ་ནད་ཐམས་ཅད་ནི་རིམས་ལ་སོགས་པའོ། །ཉེ་པར་ཞི་བ་ནི་བསལ་བ་སྟེ་དེ་ནུས་པའི་ཡེ་ཤེས་ཐོགས་པ་མེད་པ་གང་ཡིན་པ་སྟེ་དེའི་ངོ་བོ་ཉིད་དུ་གྱུར་པས་ན་རི་ཁྲོད་ཀྱི་ཤིང་ལོ་ཅན་ལ་ཡང་དེ་སྐད་ཅེས་བྱའོ། །དེ་ཉིད་ནི་རྡོ་རྗེ་འབར་པའི་གཟུགས་ཅན་ཏེ་མི་བཟད་པའི་སྲུང་བའོ། །དེ་ལ་དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །སྤྲུལ་མགོ་བདུན་གྱི་གདེངས་ཀ་རྒྱས། །ཞེས་བྱ་བ་ནི་སྤྲུལ་མགོ་བདུན་གྱི་གདེངས་ཀ་ཅོད་ཕན་གྱི་སྟེང་དུ་འཇོགས་པས་རྒྱས་ཤིང་ཁྱད་པར་གང་ཡིན་པ་དེ་ལ་དེ་སྐད་ཅེས་བྱའོ། །དེ་ཉིད་ནི་ནོར་བུ་འབར་བས་བརྒྱན་པ་སྟེ་ཞེས་བྱ་བ་ནི་སྤྲུལ་མགོ་རྣམས་ཀྱི་སྟེང་ན་འོད་འབར་བ་དེའི་དབུས་ན་གནས་པའི་ནོར་བུ་ལས་བྱུང་པའི་འོད་ཟེར་མཛེས་པས་འབར་པའི་ནོར་བུས་རྣམ་པར་བརྒྱན་པའོ། །འོད་ནི་དམར་པོའི་དཀྱིལ་འཁོར་ཅན། །ཞེས་བྱ་བ་ནི་འོད་ཀྱི་དཀྱིལ་འཁོར་དམར་པོ་འབར་པའོ། །འཇའ་རྣམས་འཕྲོ་བས་བསྐོར་པ་སྟེ། །ཞེས་བྱ་བ་ནི་རབ་ཏུ་འཕྲོ་བའི་འཇའ་འདྲ་པའི་ཡེ་ཤེས་ཀྱི་ཕྲེང་བ་གང་ལ་ཡོད་པ་དེ་ལ་དེ་སྐད་ཅེས་བྱའོ། །ཀུན་ནས་འབར་བ་རྣམས་ཀྱིས་ཁེབས། །ཞེས་བྱ་བ་ནི་འབར་པའི་ཚོགས་ཀྱིས་ཁེབས་པའོ། །སངས་རྒྱས་ཞེས་བྱ་བ་ལ་སོགས་པ་ལ་དེ་ལྟར་གྱུར་པའི་སངས་རྒྱས་ཀྱི་སྐུའི་གཟུགས་བརྙན་འཕྲོ་པ་ཕྱག་གི་པདྨ་གཉིས་ཀྱིས་ཡི་གེ་བཾ་ལས་བྱུང་པའི་བུམ་པ་བདུད་རྩིའི་ཆུ་ས་ཡོངས་སུ་གང་བའི་ཟླ་བའི་མདོག་ལྟར་དཀར་པ་ཐོགས་པར་བསྒོམ་མོ་ཞེས་བྱ་བར་སྦྱར་རོ། །ཁ་ནི་ཛ་ཡིས་རྣམ་བརྒྱན་པ། །ཞེས་བྱ་བ་ནི་བུམ་པ་དེ་ཡི་གེ་ཛས་ཁ་ཉེ་པར་མཛེས་པར་བྱས་པར་བསྒོམ་མོ་ཞེས་སྦྱར་རོ། །
ལ་ལ་ནི་དུག་གིས་བརྒྱལ་པར་བྱའོ་ཞེས་ཟེར་རོ། །དུག་གིས་ཕོག་པ་རྣམས་ལ་ལྡུངས། །ཞེས་བྱ་བ་ནི་སངས་རྒྱས་དེ་རྣམས་འདོད་ཆགས་ལ་སོགས་པའི་དུག་གིས་བརྒྱལ་པའི་སེམས་ཅན་རྣམས་ལ་ལྡུགས་པར་མཛད་པར་བསྒོམ་པར་བྱའོ། །དུག་གིས་ཕོག་པ་རྣམས་ལ་ཞེས་བྱ་བ་ནི་དུག་མེད་པར་བྱ་བའི་ཕྱིར་རོ། །དེ་ལྟར་བསྒོམ་པ་ཞེས་བྱ་བ་ནི་དུག་སེལ་མའི་ཏིང་ངེ་འཛིན་ཏོ། །ཉོན་མོངས་པ་ཞེས་བྱ་བ་ལ་སོགས་པ་ལ་ཉོན་མོངས་པ་ཐམས་ཅད་ནི་འདོད་ཆགས་ལ་སོགས་པའོ། །དེ་དག་ཉིད་ཐམས་ཅད་ནི་འདོད་ཆགས་ལ་སོགས་པའོ། །དེ་དག་ཉིད་ཐབས་མེད་པར་བསྟེན་ན་འབྲས་བུ་ཡིད་དུ་མི་འོང་པ་འབྱིན་པས་ན་དུག་སྟེ་དེ་ཉེ་པར་འཇོམས་པར་མཛད་པས་ན་དུག་སེལ་མལ་དེ་སྐད་ཅེས་བྱའོ། །དེ་ཉིད་གདེངས་ཀའི་དབང་པོ་སྟེ་ཀླུ་རྣམས་ཀྱི་བདག་པོར་གྱུར་པའོ། །དེ་ཉིད་གཞིག་པར་མི་ནུས་པ་དང་མི་ལྡོག་པའི་ཕྱིར་རྡོ་རྗེ་ཡེ་ཤེས་སོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །ཐོར་ཚུགས་རྒྱལ་པའི་སྐུ་གཟུགས་བཞུགས། །ཞེས་བྱ་བ་ནི་འོད་དཔག་ཏུ་མེད་པའི་སྐུ་ནི་རྒྱལ་པའི་སྐུ་སྟེ་དེ་ཐོར་ཚུགས་ཀྱི་དབུས་ན་བཞུགས་པ་གང་ཡིན་པ་དེ་ལ་དེ་སྐད་ཅེས་བྱའོ། །པདྨ་དཀར་པོ་ལྟ་བུར་སྣང༌། །ཞེས་བྱ་བ་ནི་པདྨ་དག་པ་དང་འདྲ་པའོ། །ཉམས་སེམས་སྟོབས་ལྡན་ཞེས་བྱ་བ་ནི་གར་སྟབས་ཀྱི་རོའི་ཉམས་དང་ཉེ་པར་ལྡན་པའོ། །བགྲང་ནོར་ཕྲེང་བ་ཅན་ཞེས་བྱ་བ་ནི་བགྲང་ཕྲེང་དང་ལྡན་པའོ། །རོལ་པའི་སྟངས་སྟབས་ཞེས་བྱ་བ་ནི་རོལ་པ་དང་བཅས་པས་སོ། །རིན་ཆེན་རི་ཕུག་ནང་བཞུགས་པ། །ཞེས་བྱ་བ་ནི་རིན་པོ་ཆེའི་རི་ཕུག་གི་དབུས་ན་བཞུགས་པའོ། །རྣལ་འབྱོར་སེམས་པས་ཞེས་བྱ་བ་ནི་ཧ་ལ་ཧ་ལའི་ཐབས་དང་ཤེས་རབ་སྒོམ་པར་བྱེད་པས་སོ། །རྣམ་པར་མི་རྟོག་ཏིང་འཛིན་གྱིས། །ཞེས་བྱ་བ་ནི་ཆོས་ཀྱི་དབྱིངས་ཇི་ལྟ་བ་བཞིན་དུ་གནས་པ་ལ་ལྷག་པར་མོས་པས་ཡང་དག་མ་ཡིན་པའི་ཀུན་དུ་རྟོག་པ་བསལ་པའི་ཏིང་ངེ་འཛིན་གྱིས་སོ། །ནང་གི་བཟླས་པ་ཞེས་བྱ་བ་ལ་སོགས་པ་ལ་བསམ་གཏན་གྱི་བཟླས་པས་སྔགས་ཟློས་པ་སྟེ། གཅིག་དང་གཉིས་དང་གསུམ་ལ་སོགས་པའི་གཟུགས་འཕྲོ་བས་བསྒོམ་པ་ནི་མ་ཡིན་ནོ། །འདོད་པ་ཐམས་ཅད་ཅེས་བྱ་བ་ལ་སོགས་པ་ལ་འདོད་པ་ཐམས་ཅད་ནི་ཡོངས་སུ་དག་པའི་གཟུགས་ལ་སོགས་པའོ། །དེ་
རབ་ཏུ་བསྒྲུབ་པ་ནི་སྒྲུབ་པ་པོའི་རྒྱུད་ལ་རྫོགས་པར་མཛད་པས་ན་འདོད་པ་ཐམས་ཅད་རབ་ཏུ་སྒྲུབ་པའོ། །དེ་ཉིད་ནི་ཧ་ལ་ཧ་ལ་འདི་ཡིན་པས་ནི་དེ་སྐད་ཅེས་བྱའོ། །དེ་ཉིད་ནི་གདུལ་བྱའི་སྐྱེ་བོ་མ་ལུས་པའི་འདོད་ཆགས་ལ་སོགས་པའི་དུག་འཇོམས་པ་ཉིད་ཀྱིས་ཐོགས་པ་མེད་པའི་ཤིན་ཏུ་སིམ་པའི་ཡེ་ཤེས་དང་ལྡན་པས་ན་ཡོངས་སུ་མཉེས་པར་བྱེད་པ་ཡེ་ཤེས་རྡོ་རྗེའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །སྲིན་མོ་ཞེས་བྱ་བ་ནི་དེ་ལྟ་བུའི་གཟུགས་འཛིན་པའི་ཕྱིར་རོ། །ཐོར་ཚུགས་ཞེས་བྱ་བ་ལ་སོགས་པ་ལ་ཐོར་ཚུགས་དང་ཅོད་པན་གྱིས་བརྒྱན་པའི་སྤྱི་བོ་དེ་ཉིད་ལ་མི་བསྐྱོད་པ་བཞུགས་པ་ཞེས་བྱ་བ་ནི་དེ་ཉིད་ཀྱི་མགོ་ལ་མི་བསྐྱོད་པ་བཞུགས་པ་གང་ཡིན་པ་དེ་ལ་དེ་སྐད་ཅེས་བྱའོ། །ལག་ན་ཁྲག་གིས་བཀང་པའི་ཐོད་པ་ཐོགས་བ་ཞེས་བྱ་བ་ནི་མིའི་ཁྲག་གིས་ཡོངས་སུ་བཀང་པའི་མིའི་ཐོད་པ་ལག་པ་གཡས་ཀྱི་དང་པོ་ལ་ཐོགས་པ་གང་ཡིན་པ་དེ་ལ་དེ་སྐད་ཅེས་བྱའོ། །གཡོན་པ་གཅིག་གིས་ནི་སྡིགས་མཛུབ་བྱེད་པ་ཞེས་བྱ་བའོ། །རོལ་པའི་སྟབས་ཀྱིས་ཞེས་བྱ་བ་ནི་རོལ་པའི་སྟང་སྟབས་ཀྱིས་བཞུགས་པའོ། །འདི་ལྟ་བུ་ཞེས་བྱ་བ་ལ་སོགས་པ་ལ་བཤད་མ་ཐག་པའི་བཟླས་པ་དང་སྒོམ་པ་འདི་ལྟ་བུ་དང་ལྡན་པས་སོ། །ཧཱུཾ་གིས་ཧཱུཾ་མཛད་པ་ཞེས་བྱ་བ་ནི་ཁྲོ་བོ་ལ་ཞེན་པའི་ཧཱུཾ་སྒྲ་སྒྲོགས་པར་བརྩོན་པའོ། །སེམས་ཅན་ཀུན་དོན་ཕུན་ཚོགས་པའི། །ཞེས་བྱ་བ་ནི་སྤྱིན་པ་ལ་སོགས་པས་སེམས་ཅན་ཐམས་ཅད་ཀྱི་དོན་བྱ་བའི་ཕྱིར་ཉེ་པར་བསགས་པའི་བསོད་ནམས་དང་ཡེ་ཤེས་ཀྱི་ཚོགས་ཕུན་སུམ་ཚོགས་པའི་རྒྱུ་དང་ཡང་དག་པར་ལྡན་པས་སོ། །སེམས་ཅན་ཐམས་ཅད་ཅེས་བྱ་བ་ལ་སོགས་པ་ལ་སེམས་ཅན་ཐམས་ཅད་དེ། གདུག་པ་རྣམས་གསོད་པའི་མཆོག་ཡིན་ལ། དེ་ཉིད་ཀྱིས་ན་རབ་སྟེ་པད་དཀར་མའོ། །དེ་ཉིད་ནི་བྱང་ཆུབ་ཀྱི་སྙིང་པོར་བདུད་བཞི་ལས་རྣམ་པར་རྒྱལ་པའི་ཕྱིར་བཅོམ་ལྡན་འདས་ཀྱི་སྟོབས་བཅུའི་ངོ་བོ་ཉིད་དུ་གྱུར་པས་ན་བྱང་ཆུབ་ཀྱི་སྙིང་པོ་རྣམ་པར་རྒྱལ་བའི་སྟོབས་ཞེས་བྱའོ། །དམིགས་པ་ཞེས་པ་ལ་སོགས་པའི་དོན་ནི་བཤད་ཟིན་ཏོ། །ཕྱེད་ཟུར་པ་ནི་རྣམ་པར་རོལ། །ཅེས་བྱ་བ་ནི་གཡོན་ལོགས་དཔག་བསམ་གྱི་ཤིང་ལ་བརྟེན་པས་རྟེན་པ་དང་བཅས་པའོ། །འཇམ་
པའི་ཁྲོ་བོ་རྡོ་རྗེ་ཡིས། །ཞེས་བྱ་བ་ནི་གཤིན་རྗེ་གཤེད་ཀྱིས་སོ། །དེ་ཡིས་མགོ་ནི་མནན་ནས་བཞུགས། །ཞེས་བྱ་བ་ནི་དཀྱིལ་འཁོར་གྱི་དབང་པོ་འཇམ་དཔལ་གྱི་སྦྱོར་པས་བཞུགས་པའོ། །གནོད་སྤྱིན་མོ་ཞེས་བྱ་བ་ལ་སོགས་པ་ལ་གནོད་སྤྱིན་མོ་ཐམས་ཅད་ཀྱི་སྒྲུབ་པ་ནི་རང་དབང་དུ་བྱ་བ་ཉིད་རྫོགས་པར་བྱེད་པ་སྟེ། དེ་ལ་མཆོག་ཏུ་གྱུར་པ་ནི་འཇམ་དཔལ་རང་གི་ཁྲོ་བོ་དང་བཅས་པའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །ཡི་གེ་གསུམ་པ་མིག་གསུམ་གཟུགས། །ཞེས་བྱ་བ་ནི་བཤད་མ་ཐག་པའི་ཡི་གེ་གསུམ་གྱི་གཟུགས་ཅན་ནོ། །དེ་ཉིད་གསུམ་པ་ནི། །ཁྱབ་འཇུག་ལྷ་ཆེན་མེས་པོ་ཆེ། །ཞེས་བྱ་བ་སྟེ་ཁྱབ་འཇུག་ནི་ནོར་ལྷའོ། །ལྷ་ཆེན་པོ་ནི་བདེ་བྱེད་དོ། །མེས་པོ་ཆེན་པོ་ནི་ཚངས་པའོ། །རང་གི་མཚོན་ཐོགས་ལ་ཞེས་བྱ་བ་ནི་མཚོན་ཆ་ཐོགས་པ་ནི་ཉེ་པར་མཚོན་པ་ཙམ་སྟེ་དེ་ལ་ཁྱབ་འཇུག་ནི་མདོག་སྔོན་པོ་ལག་པ་བཞི་པ། གཡས་དང་གཡོན་ན་དབྱུག་པ་དང་རྡོ་རྗེ་དང༌། དུང་དང་འཁོར་ལོ་འཛིན་པ་ནམ་མཁའ་ལྡིང་ལ་ཞོན་པའོ། །ལྷ་ཆེན་པོ་ནི་ཤེལ་གྱི་མདོག་ཅན་མགྲིན་པ་སྔོ་བ། མིག་གསུམ་པ། སྟག་གི་པགས་པ་གྱོན་པ། །མཚན་མ་འགྲེང་བ། ལག་པ་དྲུག་པ། གཡས་ན་མདུང་རྩེ་གསུམ་པ་དང་རྡོ་རྗེ་དང་ཊ་མ་རུ་ཐོགས་པ། གཡོན་གཉིས་ན་ཁ་ཊྭཱཾ་ག་དང་ཐོད་པ་ཁྲག་གིས་བཀང་བ་ཐོགས་པ་ཅིག་གིས་ཨུ་མ་ལ་འཁྱུད་པ་ཁྱུ་མཆོག་ལ་ཞོན་པའོ། །ཚངས་པ་ནི་མདོག་སེར་པོ་ལག་པ་བཞི་པ་གཡས་ན་རྡོ་རྗེ་དང་ཕྲེང་བ་དང་གཡོན་ན་དབྱིག་པ་དང་སྤྱི་བླུགས་འཛིན་པ་དང་དད་པ་ལ་ཞོན་པ་སྟེ་དེ་དག་ཀྱང་རིན་པོ་ཆེའི་ཅོད་པན་ཅན་ནོ། །རྡོ་རྗེའི་ཏིང་འཛིན་བསྒོམ་ནས་ནི། །ཞེས་བྱ་བ་ནི་རྡོ་རྗེ་ཧཱུཾ་མཛད་ཀྱི་ཏིང་ངེ་འཛིན་བསྒོམ་པས་སོ། །རྡོ་རྗེ་ཧཱུཾ་མཛད་ཀྱིས་བསྐུལ་ན། །ཞེས་བྱ་བ་ནི་རྡོ་རྗེ་ཧཱུཾ་མཛད་ཀྱི་རྣལ་འབྱོར་པས་འདོད་པའི་རྒྱལ་པོས་ལྷ་ཆེན་པོ་ལ་སོགས་པ་གང་ཡང་རུང་བ་བཀུག་ནས་ཁྲོ་བོ་ཏི་རཱི་ནྟི་རིའི་ཕྱག་རྒྱ་བཅིངས་ཏེ། རྡོ་རྗེ་འདི་ནི་རྡོ་རྗེ་ཆེ། །ཞེས་བྱ་བ་ལ་སོགས་པའི་སྤྱིའི་དམ་ཚིག་བསྒོམ་ཞིང་ཁྱད་པར་གྱི་དམ་ཚིག་ཇི་ལྟ་པ་ཡང་བསྟན་ནས་མངོན་པར་འདོད་པའི་ལས་གྲུབ་པར་གྱིས་ཤིག་ཅེས་བསྐུལ་པ་བྱས་ལ། རྡོ་རྗེ་ཧཱུཾ་མཛད་ཀྱི་ཕྱག་རྒྱས་ཀྱང་སྡིགས་མཛུབ་བྱས་ནས་བསྒྲུབས་ན་
འཇིགས་པས་དངོས་གྲུབ་སྟེར་བར་འགྱུར་རོ། །འཇིག་རྟེན་ཞེས་བྱ་བ་ལ་སོགས་པ་ལ་འཇིག་རྟེན་ཐམས་ཅད་ཀྱི་ལྷ་རྣམས་སྒྲུབ་པར་བྱེད་པས་སྤུན་གསུམ་ལ་འདི་སྐད་ཅེས་བྱའོ། །དེ་ཉིད་ཀྱིས་ན་མིག་གསུམ་པ། །ཞེས་བྱ་བ་ལ་ལྷ་ཆེན་པོའི་བདག་ཉིད་ཀྱི་རྣམ་པར་རོལ་པ་ནི་རྣམ་པར་བརྩེ་བའོ། །ཡེ་ཤེས་རྡོ་རྗེ་ཞེས་བྱ་བ་ནི་འཇིག་རྟེན་པའི་ཐོགས་པ་མེད་པར་ཤེས་པའི་ཚུལ་ལོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །དཀྱིལ་འཁོར་ལ་མ་གཏོགས་པའི་ལྷ་ཅུང་ཟད་ཙམ་ཞིག་བསྟན་ནས། ད་ནི་འདིར་མ་གཏོགས་པ་གཞན་དག་ཀྱང་བསྟན་པའི་ཕྱིར་གཞན་ཡང་ཞེས་བྱ་བ་ལ་སོགས་པ་གསུངས་སོ། །གསང་སྔགས་ཞེས་བྱ་བ་ནི་གསང་སྔགས་ཀྱི་སྐྱེས་བུ་སྟེ། འདི་ནི་མངོན་པར་འདོད་པའི་སྔགས། །ས་བོན་གང་ཡིན་པ་སྦྱར་བྱས་ཏེ་ཞེས་བྱ་བ་གསུངས་སོ། །རྡོ་རྗེའི་ཡིག་འབྲུ་རྣམས་བསྒོམས་པས། །ཞེས་བྱ་བ་ནི་རྒྱུད་ཀྱི་ནང་ན་རབ་ཏུ་གྲགས་པས་རང་རང་གི་ས་བོན་གྱི་ཡི་གེའམ་མིང་གི་དང་པོའི་ཡི་གེ་དང་དེ་བཞིན་དུ་རྗེས་སུ་སྦྱར་པའོ། །འཕྲོག་མ་ཞེས་བྱ་བ་ལ་སོགས་པ་ལ་འཕྲོག་མ་ནི་ཡི་གེ་ཧ་ལས་སྐྱེས་པ་བུ་ལྔ་བརྒྱས་ཡོངས་སུ་བསྐོར་པ་རྣམ་པར་བསམས་ན་འགྲུབ་པར་འགྱུར་རོ། །དཔའ་ཅན་ཡང་ཞེས་བྱ་བ་ནི་དཔའ་ཅན་ལ་སོགས་པ་གནོད་སྤྱིན་མོ་ལྔ་བརྒྱས་ཡོངས་སུ་བསྐོར་པའོ། །ཏིང་ངེ་འཛིན་རབ་ཏུ་སྟོན་པའི་གཞུང་གི་ལེའུ་ལ་ཏིང་ངེ་འཛིན་རིམ་པར་ཕྱེ་བ་ཞེས་བྱ་བའི་སྒྲར་གསུངས་སོ། །ལེའུ་བཞི་པའི་འགྲེལ་པའོ།། །།ཏིང་ངེ་འཛིན་ཡོངས་སུ་ཤེས་པས་རང་གི་བསྟན་པ་ལ་ཞུགས་པའི་སེམས་ཅན་རྣམས་ལ་ཕན་པའི་གསང་སྔགས་ཀྱི་མཐུ་བསྟན་པར་བྱ་དགོས་པས་ན་དེ་ནས་ཞེས་བྱ་བ་ལ་སོགས་པས་ལེའུ་ལྔ་པ་གསང་སྔགས་ཀྱི་ཡེ་ཤེས་རྣམ་པར་བསྒྱིངས་པའི་རིམ་པར་ཕྱེ་བ་གསུངས་ཏེ། བཅོམ་ལྡན་འདས་ཀྱིས་ཕྱུང་ངོ་ཞེས་བྱ་བར་སྦྱར་རོ། །ཅི་ཞིག་མཛད་ནས་ཤེན། ཞི་ལ་རྡུལ་དང་བྲལ་པའི་མཆོག །ཅེས་བྱ་བ་གསུངས་ཏེ་འདོད་ཆགས་ལ་སོགས་པ་ཉེ་པར་ཞི་བས་ན་ཞི་བའོ། །དེས་རྡུལ་དང་བྲལ་པ་ནི་རྙོག་པ་དང་བྲལ་པ་སྟེ། བཅོམ་ལྡན་འདས་རྣམ་པར་སྣང་མཛད་དོ། །དེའི་མཆོག་ནི་དམ་ཚིག་གི་ཕྱག་རྒྱར་གྱུར་པ་ཉིད་དེ་ཡུམ་སངས་
རྒྱས་སྤྱན་ནོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །དེ་ལ་སྙོམས་པར་ཞུགས་པ་ནི་མངོན་སུམ་དུ་མཛད་པ་སྟེ་སྤྱན་གྱི་གསང་སྔགས་སྟོན་པའི་རྣམ་པར་ཐུགས་རྩི་གཅིག་ཏུ་མཛད་ཅེས་བྱ་བའི་དོན་ཏོ། །གསང་སྔགས་སྟོན་པའི་ཏིང་ངེ་འཛིན་ཐམས་ཅད་ལ་ཡང་ལྷ་དེའི་གསང་སྔགས་སྟོན་པའི་རྣམ་པར་ཐུགས་རྩེ་གཅིག་ཏུ་མཛད་པར་ཤེས་པར་བྱའོ། །ཏིང་ངེ་འཛིན་ལ་དམིགས་པར་མཛད་པས་ནི་འདི་སྐད་སྟོན་ཏེ། མཚན་མ་ཐོབ་པ་ཉིད་ཀྱིས་ཞི་བ་ལ་སོགས་པའི་ལས་ལ་གསང་སྔགས་རབ་ཏུ་སྦྱར་པར་བྱའོ་ཞེས་སྟོན་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་ཡུམ་ཞེས་བྱ་བ་ནི་རིགས་དེའི་ཡུམ་དུ་གྱུར་པའི་ཕྱིར་རོ། །ཡེ་ཤེས་སྐྱེད་པར་མཛད་པས་སྣ་ཚོགས་པའི་ལས་ཀྱི་བྱ་བ་མཛད་པ་ཞེས་བྱ་བ་ནི་ཡེ་ཤེས་སྐྱེད་པར་མཛད་པས་སེམས་ཅན་གྱི་ཁམས་སྣ་ཚོགས་ཤིང་མ་ལུས་པའི་ལས་མཛད་པ་ཉིད་ཀྱིས་ན་མངོན་པར་འདོད་པའི་བྱ་བ་རྫོགས་པར་མཛད་པའི་རྒྱུར་གྱུར་པའོ། །ལས་ཀུན་རབ་ཏུ་རྫོགས་མཛད་པས། །ཞེས་བྱ་བ་ནི་ཞི་བ་ལ་སོགས་པའི་ལས་རྣམས་སྒྲུབ་པར་མཛད་པས་སོ། །དགྱེས་པ་ནི་སེམས་ཅན་གྱི་ཁམས་ཐམས་ཅད་བདེ་པར་བྱས་པར་གཟིགས་པས་དགྱེས་པའོ། །བདུད་ཀྱི་དཔུང་རྣམས་འདར་གྱུར་ཏེ། །ཞེས་བྱ་བ་ནི་སེམས་ཅན་རྣམས་འཇོམས་པར་བྱེད་པའི་བདུད་ཀྱི་སྡེ་རྣམས་གཡོས་པའོ། །སངས་རྒྱས་རྡོ་རྗེས་དྲན་བྱེད། །ཅེས་བྱ་བ་ནི་རང་ཉིད་ལ་ཡོངས་སུ་སྐྱོབ་པའི་ཕྱིར་རྣམ་པར་སྣང་མཛད་རྗེས་སུ་དྲན་པར་གྱུར་པའོ། །འདིའི་འོག་མ་རྣམས་ལ་ཡང་སོ་སོར་སྔགས་བརྗོད་པ་ན་རྣམ་པར་སྣང་མཛད་ལ་སོགས་པ་རྗེས་སུ་དྲན་པ་ཇི་ལྟ་བ་བཞིན་དུ་དོན་འདི་ཉིད་ཀྱིས་བསྒྲེ་པར་བྱའོ། །འདིས་ནི་འདི་སྐད་སྟོན་པ་ཡིན་ནོ། །རིགས་ཀྱི་བདག་པོས་བྱས་པའི་འཚོ་པ་ཉེ་པར་ཞི་པར་བྱ་བ་ལ་ནི་རིགས་ཀྱི་ཡུམ་གྱི་གསང་སྔགས་དྲན་པར་བྱ་ཞིང་བསྒོམ་མོ་ཞེས་ཤེས་པར་བྱའོ། །སངས་རྒྱས་རྣམས་ཀྱི་ཞི་བསྐྱེད་ཡུམ། །ཞེས་བྱ་བ་ནི་སངས་རྒྱས་རྣམས་དང་འབྲེལ་པའི་གདུལ་བྱ་རྣམས་ཀྱི་ཞི་བ་བསྐྱེད་པའམ། ཡང་ན་གལ་ཏེ་སྒྲུབ་པ་པོ་ཞི་བ་བྱེད་ཀྱང་སྔགས་པ་གཞན་གྱིས་ཕུར་བུས་བཏབ་པས་སྒྲུབ་པ་པོ་ལ་བྱ་པའི་དངོས་གྲུབ་མི་སྩོལ་
ན། དེའི་ཚེ་ཤེས་པར་བྱས་ནས་དེ་རྣམས་ཀྱི་གཟུགས་བརྙན་བྱས་ལ་ཕུར་བུས་བཏབ་སྟེ། སླར་ཕྱུང་ནས་སངས་རྒྱས་སྤྱན་གྱི་གསང་སྔགས་བཟླས་པའི་འོ་མས་བཀྲུས་ན་དེའི་ཚེ་དེ་རྣམས་ཞི་བར་འགྱུར་རོ། །དེ་ནས་དེའི་མངོན་པར་འདོད་པའི་དངོས་གྲུབ་སྩོལ་པར་འགྱུར་བསམ་འདི་ལ་ནི། སངས་རྒྱས་རྣམས་ཀྱི་ཞི་བསྐྱེད་ཡུམ། །ཞེས་བྱ་བྱའོ། །འདི་དག་ཀྱང་ངེས་པར་ཤེས་པར་བྱ་བ་ནི་གཞན་གྱིས་བཀྲིར་མི་རུང་བ་ལ་སོགས་པའི་སྒྲུབ་པ་པོའི་དབང་དུ་བྱས་པ་ཡིན་ཏེ། ཏིང་ངེ་འཛིན་ཐོབ་པས་དགུག་པ་ལ་སོགས་པ་ལ་འཇོག་པའི་ཚུལ་དང་འདྲ་པར་ཤེས་པར་བྱའོ། །རྡོ་རྗེ་དམ་ཚིག་གིས་བསྐུལ་ན། །ཞེས་བྱ་བ་ནི་ངེས་པར་བསྐུལ་བའོ། །མ་གྲུབ་རྣམས་ལ་གྲུབ་པར་སྩོལ། །ཞེས་བྱ་བ་ནི་དངོས་གྲུབ་མ་གྲུབ་པ་རྣམས་ལ་དངོས་གྲུབ་སྩོལ་པར་མཛད་པའོ། །འདི་སྐད་སྟོན་པ་ཡིན་ཏེ། གང་དེ་བཞིན་གཤེགས་པའི་རིགས་ལས་བྱུང་པའི་གསང་སྔགས་རྣམས་དངོས་གྲུབ་མི་སྩོལ་ན་དེ་སྤྱན་གྱི་གསང་སྔགས་སྔགས་དང་སྤེལ་ནས་བཟླས་ན་དངོས་གྲུབ་སྩོལ་པར་འགྱུར་རོ་ཞེས་བྱའོ། །དེ་ནས་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །སྐུ་གསུམ་འབར་པའི་མཆོག་གི་དམ་ཚིག་ཅེས་བྱ་བ་ལ་སྐུ་གསུམ་གྱི་བདག་ཉིད་ཅན་མི་བསྐྱོད་པའོ། །དེ་ཉིད་ནི་ཐབས་དང་ཤེས་རབ་ཀྱི་ངོ་བོས་ཁྲོ་བོའི་གཟུགས་སུ་གྱུར་པས་ན་འབར་པའོ། །དེ་ཉིད་ཀྱིས་ན་འཇིགས་བྱེད་ལ་སོགས་པའི་ཁྲོ་བོ་རྣམས་ཀྱི་མཆོག་གོ །དེའི་དམ་ཚིག་ནི་ཡུམ་མཱ་མ་ཀཱིའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །རྡོ་རྗེ་འཆང་པའི་མཆོག་ཐམས་ཅད་ཀྱི་ཡུམ་ཞེས་བྱ་བ་ནི་རིགས་དེའི་ཡུམ་དུ་གྱུར་པས་སོ། །རྡོ་རྗེའི་དཀྱིལ་འཁོར་བསྐྱེད་པ་ཞེས་བྱ་བ་ནི་རྡོ་རྗེའི་རིགས་ཀྱི་ཡེ་ཤེས་སྐྱེད་པར་མཛད་པས་སོ། །དངོས་གྲུབ་ཐམས་ཅད་རབ་ཏུ་སྩོལ་པར་མཛད་པ་ཞེས་བྱ་བ་ནི་སངས་རྒྱས་སྤྱན་དང་འདྲ་པའོ། །ཐམས་ཅད་ཅེས་བྱ་བ་ནི་སངས་རྒྱས་ལ་སོགས་པའོ། །རྗེས་དྲན་གྱུར་ཞེས་བྱ་བ་ནི་རྗེས་སུ་དྲན་པ་སྟེ། །དགྱེས་པས་ཞེས་བྱ་བ་ནི་ཚིག་གི་ལྷག་མའོ། །དངོས་གྲུབ་ཐམས་ཅད་སྲུང་མཛད་མ། །ཞེས་བྱ་བ་ནི་དངོས་གྲུབ་ཐམས་ཅད་ཀྱི་སྲུང་བ་འདིས་བྱའོ་ཞེས་བྱ་བའི་དོན་ཏོ། །འདི་ནི་སྤྱིའི་
སྲུང་བའི་ཆོ་གའོ། །དེ་བཞིན་ལས་རྣམས་འགྲུབ་པ་ཡིན། །ཞེས་བྱ་བ་ནི་ཇི་ལྟར་ཇི་ལྟ་བ་ལ་སོགས་པའི་ལས་རྣམས་གྲུབ་པའི་རྒྱུར་གྱུར་པས་སྤྱན་ལ་སོགས་པར་སྤྲུལ་པར་མཛད་པ་དེ་བཞིན་དུ་སྤྲུལ་པའི་དོན་ཏོ། །དེ་ནས་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །འདོད་ཆགས་ཆེན་པོ་ཞེས་བྱ་བ་ལ་རང་བཞིན་གྱིས་རྣམ་པར་དག་པའི་སྙིང་རྗེ་ཆེན་པོའི་ངོ་བོ་ཉིད་ནི་འདོད་ཆགས་ཆེན་པོ་སྟེ་དེས་ཆགས་པ་ནི་དམར་བའོ། །པདྨ་ནི་པདྨའི་རིགས་སོ། །དེའི་གར་གྱིས་གར་བྱེད་པའི་ཚུལ་གྱིས་རྣམ་པར་འཕྲུལ་པས་འཐོར་ཞིང་ནམ་མཁའི་ཁམས་མ་ལུས་པར་ཁྱབ་པ་སྟེ་བཅོམ་ལྡན་འདས་འོད་དཔག་མེད་ལ་དེ་སྐད་ཅེས་བྱའོ། །དེའི་རྣམ་པར་འཕྲུལ་པ་ནི་ཤིན་ཏུ་དགའ་བའི་སྐུས་རྣམ་པར་རོལ་པའོ། །དེའི་དོན་དམ་ཚིག་གི་རྡོ་རྗེ་ནི་དམ་ཚིག་གི་ཕྱག་རྒྱ་སྟེ་གོས་དཀར་མོའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །ཆོས་ཐམས་ཅད་འཛིན་པ་མཆོག་གི་ཡུམ་ཞེས་བྱ་བ་ནི་རིགས་དེའི་ཡུམ་དུ་གྱུར་པས་སོ། །ཐམས་ཅད་དབང་དུ་བྱས་པ་ལ། །ཞེས་བྱ་བ་ལ་སོགས་པ་ལ་སངས་རྒྱས་ལ་སོགས་པ་ཐམས་ཅད་དབང་དུ་བྱ་བ་ནི་མི་འདའ་པར་བྱས་པའོ། །དེའི་ཁོར་དུ་ཆུད་པ་ནི་རྣལ་འབྱོར་པ་རྣམས་ཀྱིས་རྟོགས་པར་བྱེད་པ་སྟེ། བཅོམ་ལྡན་འདས་དོན་ཡོད་གྲུབ་པ་ལ་དེ་སྐད་ཅེས་བྱའོ། །དེའི་རྡོ་རྗེ་གསུམ་མཉམ་པ་ཉིད་ཀྱིས་དགའ་བར་བྱེད་པ་ནི་སྐུ་གསུམ་རྡོ་རྗེ་སྐྱེ་བ་མེད་པར་མཛད་པ་སྟེ་ཡུམ་སྒྲོལ་མའོ། །སྣ་ཚོགས་ཐམས་ཅད་འཆང་པའི་ཡུམ་གྱི་མཆོག །ཅེས་བྱ་བ་ནི་རིགས་དེའི་ཡུམ་དུ་གྱུར་པས་སོ། །དེ་བཞིན་གཤེགས་པ་ཞེས་བྱ་བ་ལ་སོགས་པ་ལ་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ལ་འཇུག་པས་ན་ཡེ་ཤེས་ལ་འཇུག་པ་སྟེ་ཁྲོ་བོའི་ཐབས་དང་ཤེས་རབ་ནི་ཁྲོ་བོའི་ཡེ་ཤེས་སོ། །དེས་སྒྲོལ་བ་ནི་སེམས་ཅན་གདུག་པ་ངན་འགྲོར་ལྟུང་བ་རྣམས་སྒྲོལ་བས་གཤིན་རྗེ་གཤེད་ལ་ཡང་དེ་སྐད་ཅེས་བྱའོ། །དེ་ལ་དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །འཇིགས་པ་སྐྱེས་གྱུར་ན་ཞེས་བྱ་བ་ནི་དེ་བཞིན་གཤེགས་པ་དང་བྱང་ཆུབ་སེམས་དཔའ་དང་བཅས་པ་ཐམས་ཅད་འཇིགས་པ་སྐྱེས་པའོ། །འདིར་ལ་ལ་
དག་ནི་དེ་རྣམས་ལ་འཇིགས་པ་མི་མངའ་བས་འདི་ནི་མི་འཇིགས་སོ་ཞེ་ན་དེ་མ་ཡིན་ཏེ། གང་གི་ཕྱིར་རང་གིས་དམ་བཅས་པ་ནི་འཇིགས་པ་སྟེ་དེ་རྣམས་གདུལ་བའི་དབང་དུ་མཛད་ནས་དམ་བཅས་པ་འདི་ལ་འཇིགས་པ་རྣམ་པར་འཇོག་པར་མཛད་དེ། གལ་ཏེ་ཇི་སྐད་དུ་བཤད་པའི་ཚུལ་གྱིས་སྒྲུབ་པ་ལ་ལན་བདུན་བཞུགས་པའི་སྔགས་པས་གྲུབ་པར་མ་གྱུར་ན་དེའི་ཚེ་འཕགས་པ་གཤིན་རྗེ་གཤེད་ལ་སོགས་པས་ཕུར་བུས་བཏབ་སྟེ། ཁོ་བོ་ཅག་བསྒྲུབ་པར་བྱ་བ་ཡིན་པས་བཅོམ་ལྡན་འདས་ནི་གཏུམ་པོའི་སྙམ་ནས་འདིར་སྔགས་པས་ཕུར་བུས་འདེབས་པར་འགྱུར་རོ།། ཞེས་འཇིགས་པ་ཀུན་དུ་སྐྱེས་པས་དངོས་གྲུབ་སྩོལ་བར་མཛད་པར་འགྱུར་ཏེ་ཇི་སྐད་དུ། རྡོ་རྗེ་ཧཱུཾ་མཛད་ཕྱག་རྒྱ་ཡིས། །ཇི་ལྟ་དེ་ལྟ་དེ་རྣམས་ཁྲོས། །སངས་རྒྱས་ཐམས་ཅད་གཟིར་ན་ནི། །འཇིགས་པས་དངོས་གྲུབ་སྩོལ་བར་འགྱུར། །ཞེས་གསུངས་པས་སོ། །རྡོ་རྗེ་ར་བ་དྲ་བའི་ཞེས་བྱ་བ་ནི་བཅོམ་ལྡན་འདས་ཀྱི་གཟི་བྱིན་བཟོད་པར་དཀའ་བས་རྡོ་རྗེ་རབ་དང་འདྲ་བས་གོ་མནན་པས་ན་ཡེ་ཤེས་སྣ་ཚོགས་ཅན་ལ་གཟིགས་པ་སྟེ། འདིས་ནི་བཅོམ་ལྡན་འདས་དེ་བསྙེན་པར་དཀའ་བ་བསྟན་ཏོ། །སྲུབས་ཅིག་པའམ་ཞེས་བྱ་བ་ནི་དུམ་བུ་གཅིག་པའོ། །སྲུབས་གཉིས་པ་ཞེས་བྱ་བ་ནི་དུམ་བུ་གཉིས་པ་ཞེས་བྱ་བའི་དོན་ཏོ། །ལྷ་མོ་བཞི་ཡི་སྦྱོར་བ་དང༌། །སངས་རྒྱས་ལྔ་ཡིས་བྱིན་བརླབས་ཏེ། །ཞེས་བྱ་བ་ནི་ཇི་སྐད་དུ་གསུངས་པའི་ཐོད་པའི་དབུས་སུ་ཁྲག་གིས་ཐོད་པ་ལ་པདྨ་འདབ་བརྒྱད་བྲི་སྟེ། དེའི་དབུས་དང་ཤར་ལ་སོགས་པའི་འདབ་མ་བཞིར་རྣམ་པར་སྣང་མཛད་ལ་སོགས་པ་ལྔ་དང་ཤར་ལྷོ་ལ་སོགས་པ་མཚམས་ཀྱི་འདབ་མ་བཞི་ལ་སྤྱན་ལ་སོགས་པ་བཞི་དགོད་པ་ནི་སངས་རྒྱས་ཀྱི་བྱིན་གྱིས་བརླབས་པ་དང༌། ལྷ་མོ་བཞིའི་སྦྱོར་བ་དང་དེ་ལྡན་པར་འགྱུར་རོ། །རྐང་རྗེས་ས་ཡི་ཆོ་ག་ལ། །ཞེས་བྱ་བ་ནི་བསྒྲུབ་པར་བྱ་བའི་རྐང་རྗེས་ཀྱི་ས་དང་ཆུ་བོའི་ངོགས་གཉིས་ཀྱི་ས་ལས་གཟུགས་བརྙན་བྱས་ཏེ། དེའི་སྙིང་གར་བསྒྲུབ་པར་བྱ་བའི་མིང་དང་སྤེལ་བའི་གཤིན་རྗེ་གཤེད་ཀྱི་སྔགས་ཏཱ་ལ་ལ་སོགས་པ་ལ་བྲིས་ཏེ་བཅུག་ནས་གཡོགས་པ་སྟེ་འདི་ནི་རྐང་རྗེས་ཀྱི་སའི་ཆོ་གའོ། །རྐང་པས་མནན་ཏེ་དེ་ལ་བཟླས། །ཞེས་
བྱ་བ་ནི་གཤིན་རྗེ་གཤེད་ཀྱི་རྣལ་འབྱོར་པས་དེའི་དཀྱིལ་འཁོར་གྱི་དབུས་སུ་འདུག་ལ་བསྒྲུབ་པར་བྱ་བ་རྡོ་རྗེ་རླུང་གི་དཀྱིལ་འཁོར་ལ་བསྐྱོན་ཏེ། རྣམ་པར་སྣང་མཛད་ལ་སོགས་པས་རང་གི་ཞགས་པ་དང་ལྕགས་ཀྱུས་བཅིངས་ཏེ། དྲངས་པར་གྱུར་པར་བསམས་ལ་རྐང་པ་གཡོན་པའི་མཐིལ་དུ་ཟླ་བའི་དཀྱིལ་འཁོར་ལ་གནས་པའི་རྡོ་རྗེ་ལྕགས་ཀྱུ་ཁ་ཐུར་དུ་བལྟས་པས་ཐོད་པའི་ནང་དུ་གཟུགས་བརྙན་བཅུག་པ་མནན་ལ་དགུག་པའི་ཚུལ་གྱིས་རྐང་པ་བསྐྱོད་ཅིང་གཤིན་རྗེ་གཤེད་ཀྱི་གསང་སྔགས་བསྒྲུབ་པར་བྱ་བ་དགུག་པའི་མིང་དང་སྤེལ་ཏེ་བཟླས་པར་བྱའོ་ཞེས་བྱ་བ་ནི་བསྡུས་པའི་དོན་ཏོ། །སྤྲིན་ཆེན་པོ་ཞེས་བྱ་བ་ལ་སོགས་པ་ལ་སྐལ་བ་ཇི་ལྟ་བ་བཞིན་དུ་དམ་པའི་ཆོས་ཀྱི་ཆུ་རྒྱུན་རྣམས་ཀྱིས་འགྲོ་བའི་དོན་མཛད་པས་སྤྲིན་ཆེན་པོ་དང་འདྲ་བས་ན་སྤྲིན་ཆེན་པོ་སྟེ་སངས་རྒྱས་བཅོམ་ལྡན་འདས་སོ། །དེ་རྣམས་ཀྱི་ཡེ་ཤེས་ཀྱི་རྡོ་རྗེ་མཆོག་ནི་གདུག་པ་འདུལ་བའི་ཐབས་ཀྱི་ཡེ་ཤེས་སོ། །དེ་ལས་བྱུང་བས་ན་དམ་པ་རྡོ་རྗེ་བདུད་རྩི་ཁྲོ་བོ་སྟེ་བདུད་རྩིའི་ཐབ་སྦྱོར་རོ། །དམིགས་པ་ཞེས་བྱ་བ་ལ་སོགས་པའི་དོན་ནི་སྔ་མ་བཞིན་ནོ། །ཁྲོ་བོའི་འཁོར་ལོ་སྤེལ་ནས་སུ། །ཞེས་བྱ་བ་ནི་འཁྱམ་ཞིང་སྨེལ་ཞིང་འཁྱམས་པའི་ཏཱ་ལའི་ལོ་མ་ལ་དུག་ལ་སོགས་པས་འཁོར་ལོ་རྩིབས་བརྒྱད་པ་བྲིས་ལ་ལྟེ་བར་ཧཱུཾ་ལྷ་སྦྱིན་ཨུཙྪ་ཊ་ཡ་ཕཊ་ཅེས་བྱ་བ་དང༌། རྩིབས་བརྒྱད་ལའང་དེ་བཞིན་དུ་དགོད་དོ། །མུ་ཁྱུད་ལ་བསྒྲུབ་པར་བྱ་བའི་མིང་སྐྲོད་པ་དང་སྤེལ་ཏེ་ཕྲེང་བའི་སྔགས་བྲིའོ། །ཚོགས་བདག་རྐང་པའི་དྲུང་དུ་གཞག །ཅེས་བྱ་བ་ནི་ཚོགས་ཀྱི་བདག་པོའི་རྐང་པའི་འོག་ཏུ་བསྒྲུབ་པར་བྱ་བ་གཟུགས་བརྙན་གཞག་པ་གང་ཡིན་པ་དེ་ལ་དེ་སྐད་ཅེས་བྱའོ། །ཧཱུཾ་དང་ཕཊ་ཀྱིས་བསྐུལ་ནས་སུ། །ཞེས་བྱ་བ་ནི་ཧཱུཾ་ཆེ་གེ་མོ་ཨུཙྪ་ཊ་ཡ་ཕཊ་ཅེས་ཚོགས་ཀྱི་བདག་པོ་བསྐུལ་བ་གང་ཡིན་པ་དེ་ལ་དེ་སྐད་ཅེས་བྱའོ། །འདི་སྐད་སྟོན་པ་ཡིན་ཏེ་བསྒྲུབ་པར་བྱ་བའི་སྲུང་བ་བསལ་བ་སྔོན་དུ་འགྲོ་བས་གཟུགས་བརྙན་གྱི་སྙིང་གར་འཁོར་ལོ་བཅུག་ལ་བདུད་རྩི་ཐབ་སྦྱོར་གྱི་སྦྱོར་བ་དང་ལྡན་པས་ཚོགས་ཀྱི་བདག་པོ་ཇི་ལྟ་བ་བཞིན་བཀུག་ལ་དམ་ཚིག་བྱིན་པ་དེའི་རྐང་པའི་འོག་ཏུ་གཟུགས་བརྙན་སྦས་ནས་ཧཱུཾ་
ཆེ་གེ་མོ་ཨུཙྪ་ཊ་ཡ་ཕཊ་ཅེས་བརྗོད་ཅིང་དེ་ལ་བཀའ་བསྒོ་བས་བསྒྲུབ་པར་བྱ་བ་གཅེར་བུ་ཏིལ་མར་གྱིས་བསྐུས་པ་རྔ་མོ་ལ་བསྐྱོན་ཏེ་རྡོ་རྗེ་རླུང་གི་དཀྱིལ་འཁོར་གྱིས་བཏེག་ནས་ལྷོ་ཕྱོགས་སུ་ཁྱེར་བར་བསམ་ཞིང་དེའི་ཁྱིམ་ཡང་རྔ་མོ་གཅིག་གིས་ཡོངས་སུ་ཁྱེར་བར་བསམས་ལ་ཁྲོས་པས་ཉི་མ་ཕྱེད་དང༌། མཚན་ཕྱེད་ལ་ཉིན་ཞག་བདུན་གྱི་བར་དུ་བརྒྱ་རྩ་བརྒྱད་བཟླས་ན་ངེས་པར་སྐྲོད་པར་འགྱུར་རོ། །རིན་པོ་ཆེ་བརྩོན་པ་ཞེས་བྱ་བ་ལ་སོགས་པ་ལ་རིན་པོ་ཆེ་ནི་རིན་པོ་ཆེའི་རིགས་སོ། །བརྩོན་པ་ནི་ཐམས་ཅད་ཀྱི་བསམ་པ་ཡོངས་སུ་རྫོགས་པར་མཛད་པས་རབ་ཏུ་འབད་པའི་ཁྱད་པར་རོ། །དེས་སྤྲོས་པས་ན་ཁྲོ་བོ་གཞན་གྱིས་མི་ཐུབ་པ་དེ་ལ་དེ་སྐད་ཅེས་བྱ་སྟེ་དེ་ཉིད་ཡེ་ཤེས་ཀྱི་རྡོ་རྗེའོ། །དམིགས་པ་ཞེས་བྱ་བ་ལ་སོགས་པའི་དོན་བཤད་ཟིན་ཏོ། །སྐེམས་བྱེད་ཀྱི་གདོན་ཞེས་བྱ་བ་ནི་བྱིས་པའི་གདོན་ནོ། །རྡོ་རྗེ་གཟིར་བའི་སྦྱོར་བ་ཡིས། །ཞེས་བྱ་བ་ནི་སྲིན་པོ་ལ་སོགས་པའི་གདོན་རིག་པ་མཆོག་གི་རྒྱུད་ཀྱི་ཆོ་ག་ལས་མཚན་མ་ཤེས་པར་བྱས་ལ་དེ་ཇི་ལྟ་བ་བཞིན་དུ་བཀུག་ལ་བསྒྲུབ་པར་བྱ་བའི་ལུས་ལ་གཞུག་ཅིང་བཅིངས་ལ་ར་བ་ལ་སོགས་པ་བྱས་ཏེ། ཡི་གེ་ཧཱུཾ་ལས་བྱུང་བའི་རྡོ་རྗེ་གཉིས་ཀྱིས་གཟིར་བར་བསམས་ལ་ཧཱུཾ་འབར་བ་ལས་བྱུང་བའི་རྡོ་རྗེ་ལྟ་བུའི་ཡུངས་ཀར་གྱིས་སྲིན་པོ་ལ་སོགས་པ་རྣམས་སོལ་ཅིག་ཅེས་བསྐུལ་བའི་ཚིག་དང་བཅས་པར་གསང་སྔགས་བཟླས་ལ་བརྡེག་ཅིང་བསལ་བ་ལ་སོགས་པའི་ལས་རྣམས་བྱས་ཏེ། འདི་ནི་རྡོ་རྗེ་གཟིར་བའི་སྦྱོར་བའོ། །ཡོན་ཏན་རིན་པོ་ཆེ་ཞེས་བྱ་བ་ལ་སོགས་པ་ལ་ཡོན་ཏན་རིན་པོ་ཆེ་ལྟ་བུའི་ཡོན་ཏན་དེ་ལུང་དང་རྟོགས་པའི་བདག་ཉིད་ཅན་ནོ། །དཔག་ཏུ་མེད་པ་ནི་ཚད་མེད་པ་སྟེ་དེ་ཀུན་ནས་བསགས་པ་ཁྲོ་བོ་རྟ་མགྲིན་གང་ཡིན་པ་དེ་ལ་དེ་སྐད་ཅེས་བྱ་སྟེ་དེ་ཉིད་རྡོ་རྗེའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །ལག་པ་ལ་ཞེས་བྱ་བ་ལ་སོགས་པ་ནི་གོ་སླའོ། །འདི་སྐད་སྟོན་པ་ཡིན་ཏེ། མཚན་མ་ཇི་ལྟ་བ་བཞིན་དུ་ཤེས་པར་བྱས་ནས་ལག་པ་གཡོན་པ་ལ་ཟླ་བ་རྡོ་རྗེ་དེའི་དབུས་སུ་པདྨ་འདབ་མ་བརྒྱད་པ་དཀར་པོ། །དེའི་དབུས་སུ་ཡི་གེ་ཧ་ཟླ་བའི་མདོག་ཅན་བསམས་ལ་དུག་གིས་ཟིན་པའི་མདུན་དུ་རྟ་མགྲིན་གྱི་
ཕྲེང་བའི་སྔགས་ཉི་ཤུ་རྩ་གཅིག་བཟླས་ཏེ་བསྒྲུབ་པར་བྱ་བ་གོས་ཀྱིས་བཀབ་སྟེ་ནུབ་ཕྱོགས་སུ་ཁ་བསྟན་ལ་བཞག་ནས་དེའི་ལུས་ལ་ཕྲེང་བའི་སྔགས་ཇི་ལྟ་བ་བཞིན་བཀོད་ལ། ཞི་བར་མཛད་པའི་རྟ་མགྲིན་དུ་གསོལ་ཅིག་ཅེས་བསྐུལ་བའི་ཚིག་དང་བཅས་པར་སྔགས་བཟླས་པར་བཅོམ་ལྡན་འདས་ཀྱིས་བསྒྲུབ་པར་བྱ་བ་སྟེ། བདུད་རྩིའི་རྒྱུན་གྱིས་ཡོངས་སུ་འགེངས་པར་བསམས་ལ་གོས་དྲང་ཞིང་རྟ་མགྲིན་གྱི་ང་རྒྱལ་དུ་བྱས་པས་དུག་བསལ་བར་བྱའོ། །གལ་ཏེ་མྱུར་བར་ལྡང་སྟེ་འཛིན་པར་འདོད་ན་དེས་དེའི་སྙིང་གར་པདྨ་དཀར་པོའི་ལྟེ་བར་ཡི་གེ་ཧ་བསམ་པར་ཡང་ཤེས་པར་བྱའོ། །ཁྲོ་རྒྱལ་ཏིང་འཛིན་ལ་གནས་ནས། །རྡོ་རྗེ་གསུམ་གྱི་ཡི་གེས་མཛེས། །ཞེས་བྱ་བ་ནི་ཁྲོ་བོ་རྟ་མགྲིན་གྱི་ཏིང་ངེ་འཛིན་ལ་གནས་ནས། ཨོཾ་ཨཱཿ་ཧཱུཾ་ཞེས་བྱ་བས་ཉེ་བར་མཛེས་པའི་ལུས་ཀྱིས་སོ། །ཁམས་གསུམ་དག་ཀྱང་ཞེས་བྱ་བ་ནི་ཁམས་གསུམ་པོ་རྣམས་ཀྱང་ངོ༌། །དོན་ཡོད་པར་འབྱུང་བ་ཞེས་བྱ་བ་ལ་སོགས་པ་ལ་དོན་ཡོད་ཅིང་དོན་དང་ལྡན་པས་ཐོགས་པ་མེད་པའི་དངོས་གྲུབ་སྩོལ་བ་འབྱུང་ཞིང་བསྐྱེད་པ་སྟེ། ཁྲོ་བོ་བཙོན་སྔོན་པོ་ཅན་ལ་དེ་སྐད་ཅེས་བྱའོ། །དེ་ཉིད་ནི་རྒྱལ་མཚན་གྱི་མཆོག་ནོར་བུའི་རྡོ་རྗེ་སྟེ་རྡོ་རྗེས་མཚན་ཞིང་ཡིད་བཞིན་གྱི་ནོར་བུ་ལྟར་བསམ་པ་ཐམས་ཅད་ཡོངས་སུ་རྫོགས་པར་བྱེད་པས་དེ་བཞིན་གཤེགས་པ་ཐམས་ཅད་ཀྱིས་བསྟོད་པ་ཉིད་ཡིན་པས་ན་རྒྱལ་མཚན་གྱི་མཆོག་ནོར་བུ་རྡོ་རྗེ་ཞེས་བྱའོ། །དམིགས་པ་ཞེས་བྱ་བ་ལ་སོགས་པའི་དོན་ནི་གོ་སླའོ། །སངས་རྒྱས་ཐམས་ཅད་ཅེས་བྱ་བ་ནི་དེ་དང་འབྲེལ་པས་ན་བཅོམ་ལྡན་འདས་དབྱུག་སྔོན་ཅན་ནོ། །སྦྱོར་བའི་ཆོ་གས་བསྐུལ་ནས་ཞེས་བྱ་བ་ནི་གདུག་པ་རྣམས་གསོད་པའི་བར་དུ་སྦྱོར་བས་སོ། །དེ་ལ་སྦྱོར་བའི་ཆོ་ག་ནི་འདི་ཡིན་ཏེ་ཐུགས་རྡོ་རྗེའི་རྣལ་འབྱོར་བས་བསྒྲུབ་པར་བྱ་བའི་རྡོ་རྗེ་པདྨའོ་སྦྱོར་བ་ཇི་ལྟ་བ་བཞིན་དུ་ཞུགས་ལ། དེའི་སྙིང་ག་ན་གནས་པའི་བྱང་ཆུབ་ཀྱི་སེམས་ཇི་ལྟ་བ་བཞིན་དུ་འཐུངས་ཏེ་དེ་ཉིད་ལས་བྱུང་བའི་ཁྲོ་བོ་དབྱུག་སྔོན་ཅན་གྱི་ང་རྒྱལ་ཅན་དུ་བྱས་ལ། རང་གི་དཀྱིལ་འཁོར་ལ་གནས་པའི་དེ་བཞིན་གཤེགས་པ་ཐམས་ཅད་ཁྲོས་པ་དང༌། བསྒྲུབ་པར་བྱ་བ་ཡང་དཀོན་མཆོག་
གསུམ་ལ་སོགས་པ་རྣམ་པར་འཇིག་པར་བསྒོམས་ལ། སངས་རྒྱས་དང་རྡོ་རྗེ་འཛིན་པ་ལ་སོགས་པ་རང་གི་དམ་ཚིག་གིས་བཟློག་པར་བྱ་སྟེ། བཅོམ་ལྡན་འདས་དེ་བཞིན་གཤེགས་པ་འདི་ནི་དཀོན་མཆོག་གསུམ་ལ་སོགས་པ་ལ་གནོད་པར་བྱེད་པ་དེ་འདིའི་དམ་ཚིག་སྦྱིན་པ་ལ་སོགས་པ་མི་ལེན་ཏེ། སེམས་ཅན་དེ་ནི་བྱང་ཆུབ་ཀྱི་སེམས་དང་བྲལ་བ་ཡིན་ལ་ཁྱེད་རྣམས་ནི་བྱང་ཆུབ་ཀྱི་སེམས་དང་རབ་ཏུ་འབྲེལ་བ་ཡིན་པས། དེས་ན་འདིའི་སྙིང་སྤང་བར་མཛད་དུ་གསོལ་ཞེས་བརྗོད་ལ། དེའི་སྙིང་སྤངས་ནས་དེ་བཞིན་གཤེགས་པར་རྣམ་པར་བསམ་མོ། །ཡང་སྦྱོར་བ་གཞན་དག་གིས་སྲུང་བ་ལ་སོགས་པ་བསམས་ནས་ཁྲག་གིས་གཤེར་བའི་གོས་བགོས་པའམ་གཅེར་བུས་ཆུ་བོའི་དོགས་གཉིས་ཀྱི་ས་ལ་སོགས་པ་ལས་བསྒྲུབ་བྱའི་གཟུགས་བརྙན་བྱས་ལ་རྐང་པ་གཡོན་པས་མནན་ཏེ་བསྒྲུབ་པར་བྱ་བ་ཡང་དེར་དགུག་པ་དང་གཞུག་པ་དང་བཅིང་བ་བྱས་ལ་ཁྲོས་པས། ཇི་ལྟ་བ་བཞིན་དུ་མངོན་སྤྱོད་ཀྱི་ཆོ་ག་རྫོགས་པ་ལ་བརྩོན་པར་བྱ་ཞིང་བེ་ཅོན་སྔོན་པོ་ཅན་ཟློས་པས་དེ་གསོད་པ་ལ་བརྩོན་པའི་རྡོ་རྗེ་བེ་ཅོན་སྔོན་པོ་ལ་སོགས་པ་དཔག་ཏུ་མེད་པ་སྤྲོ་བར་བྱའོ། །ཀུན་དུ་ཞེས་བྱ་བ་ལ་སོགས་པ་ལ་ཀུན་ནས་ཐམས་ཅད་དུ་སངས་རྒྱས་ལ་སོགས་པ་རྣམ་པར་འཕྲོ་བ་སྟེ། དེའི་བཀོད་པའི་ཚོགས་ཡོད་པས་ཁྲོ་བོ་སྟོབས་པོ་ཆེ་ལ་དེ་སྐད་ཅེས་བྱ་སྟེ་དེ་ཉིད་རྡོ་རྗེའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །ལས་ཀུན་རབ་ཏུ་སྒྲུབ་པར་བྱེད། །ཅེས་བྱ་བ་ནི་རྣལ་འབྱོར་པ་མོས་པའི་སྟོབས་ཀྱིས་གསང་སྔགས་འདི་ཉིད་ཀྱིས་ཞི་བ་ལ་སོགས་པའི་ལས་རྣམས་ཀྱང་འགྲུབ་པར་འགྱུར་བས་དེ་སྐད་ཅེས་བྱའོ། །ཆར་པ་ཆེ་ན་གཅོད་འགྱུར་ལ། །ཞེས་བྱ་བ་ནི་ཁྲོ་བོ་སྟོབས་པོ་ཆེའི་རྣལ་འབྱོར་གྱིས་ནམ་མཁའ་ལ་གནས་པའི་ཆུའི་ཚོགས་རྣམས་འཐུངས་པར་ལྷག་པར་མོས་ནས་མཚོན་ཆ་ཕྱག་རྒྱས་སྤྲིན་རྣམས་གཏུབ་པར་བྱའོ། །ཆར་པ་ཆུང་ན་རབ་ཏུ་འབེབས། །ཞེས་བྱ་བ་ཡང་སྦྱོར་བ་འདི་ཉིད་ནས་བཤད་དོ། །ཀུན་དུ་ཞེས་བྱ་བ་ལ་སོགས་པ་ལ་ཀུན་ནས་ཐམས་ཅད་དུ་འབར་བས་སྙིང་པོར་བྱས་པས་བཅོམ་ལྡན་འདས་འདོད་པའི་རྒྱལ་པོ་ལ་དེ་སྐད་ཅེས་བྱ་སྟེ་དེ་ལ་དམིགས་པས་ན་དེ་སྐད་ཅེས་བྱའོ། །
རྐང་གཡས་ཞེས་བྱ་བ་ལ་སོགས་པ་ལ་རྐང་པ་གཡས་པའི་མཐིལ་དུ་ཟླ་བའི་དཀྱིལ་འཁོར་གྱི་འོག་ཏུ་ཡི་གེ་ཨ་ལས་སྣ་ཚོགས་རྡོ་རྗེ་དེའི་ཡང་འོག་ཏུ་ཡི་གེ་ཛཿ་ལས་རྡོ་རྗེ་ལྕགས་ཀྱུ་ཁ་ཐུར་དུ་བལྟས་པ་རྣམ་པར་བསམས་ལ་མཚན་དེ་བསྒྲུབ་པར་བྱ་བའི་གཟུགས་བརྙན་མནན་ནོ་ཞེས་བྱ་བར་སྦྱར་རོ། །སྐུ་གསུམ་ཡེ་ཤེས་སྟོབས་ལྡན་པས། །ཞེས་བྱ་བ་ནི་སྐུ་གསུམ་གྱི་ཡེ་ཤེས་བྱིན་གྱིས་བརླབས་ལ་ཁྲོ་བ་དང་བཅས་པས་གཡོན་ཕྱོགས་སུ་ལུས་ཅུང་ཟད་འདུད་པར་བྱའོ། །ཁྲོ་གཉེར་རིམ་པར་བསྙེར་བྱས་ཏེ། །ཞེས་བྱ་བ་ལ་སོགས་པ་ནི་དཔྲལ་བ་བསྐུལ་བ་བྱས་སོ་ཞེས་བྱ་བའི་དོན་ཏོ། །རྡོ་རྗེ་ཞེས་བྱ་བ་ལ་སོགས་པ་ལ་རྡོ་རྗེ་ལྟར་རབ་ཏུ་འབར་བའི་ཡེ་ཤེས་ནི་གདུག་པ་རྣམས་འདུལ་བའི་ཐབས་ཀྱི་ཡེ་ཤེས་ཏེ་དེས་རབ་ཏུ་འབར་བས་གཏུམ་པོར་གྱུར་པ་སྟེ་ཁྲོ་བོ་མི་གཡོ་བའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །གཙོ་བོ་ཞེས་བྱ་བ་ནི་འདིར་དྲན་ཞེས་བྱ་བ་དང་རྗེས་སུ་སྦྱར་རོ། །དགུག་བྱེད་ཅིང་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །སྐུ་གསུམ་གྱི་ཞེས་བྱ་བ་ལ་སོགས་པ་ལ་འདི་ནི་རྟག་ཏུ་སྐུ་གསུང་ཐུགས་མི་ཟད་པའི་ཡེ་ཤེས་ཀྱི་མཐར་ཐུག་པ་ཡིན་པས་ན་སྐུ་གསུམ་རྡོ་རྗེའི་ཡེ་ཤེས་སོ། །དེ་ཉིད་ཧཱུཾ་བཞིས་བསྙེན་པར་དཀའ་བའི་ངོ་བོ་ཉིད་པས་ན་འབར་བའོ། །དེ་ཉིད་དེ་བཞིན་གཤེགས་པ་རྣམས་ཀྱིས་ཐབས་དང་ཤེས་རབ་ཀྱི་ཁྲོ་བོའི་གཟུགས་ཀྱིས་སྲིད་པ་གསུམ་པོ་མ་ལུས་པའི་བདག་པོར་གྱུར་ཅིང་མི་ཤེས་པའི་བུད་ཤིང་རྣམས་བསྲེགས་པས་ན་འབར་བའི་རྡོ་རྗེའོ། །དེ་ཉིད་བགེགས་རྣམས་འཇིག་ཅིང་རྙོག་པར་བྱེད་པས་ན་འཇིགས་པ་ཆེན་པོ་སྟེ། བཅོམ་ལྡན་འདས་གནོད་མཛེས་ལ་དེ་སྐད་ཅེས་བྱའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །བཅོམ་ལྡན་འདས་འདི་ནི་སྐུ་མདོག་ནག་པོ་ཞལ་གཡས་དཀར་གཡོན་དམར་པ་ཕྱག་གཉིས་འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་བཅིང་བ། གཡས་གཉིས་ན་རྡོ་རྗེ་དང་འཁོར་ལོ་བསྣམས་པ་གཡོན་གཉིས་ན་ལྕགས་ཀྱུ་དང་ཞགས་པ་བསྣམས་པ། མི་བསྐྱོད་པའི་ཅོད་པན་ཅན་གཡོན་བརྐྱང་པས་བཞུགས་པ་ཡི་གེ་ཧཱུཾ་ལས་བྱུང་བར་ཤེས་པར་བྱའོ། །སྐུ་གསུང་
རྡོ་རྗེ་མཆོག་མངའ་བའི། །ཞེས་བྱ་བ་ནི་རྣམ་པར་སྣང་མཛད་ཅེས་བྱ་བ་དང་སྦྱར་རོ། །ཡེ་ཤེས་ཀྱིས་འཇོམས་ཞེས་བྱ་བ་ནི་རང་གི་ཏིང་ངེ་འཛིན་གྱི་ཡེ་ཤེས་དང་བྲལ་བའོ། །ལྕགས་ཀྱུ་ཡིས་ནི་རྣམ་དྲལ་ཏེ། །ཞེས་བྱ་བ་ནི་སྙིང་གར་རོ། །རྡོ་རྗེ་ཞགས་པས་བཅིངས་ནས་སུ། །ཞེས་པས་ནི་མགུལ་དུའོ། །འདི་སྐད་སྟོན་པ་ཡིན་ཏེ། གནོད་མཛེས་ཀྱི་རྣལ་འབྱོར་པས་རང་གི་དཀྱིལ་འཁོར་གྱི་དབུས་སུ་འདུག་སྟེ། ནམ་མཁའི་དབྱིངས་ན་བཞུགས་པའི་དེ་བཞིན་གཤེགས་པ་ཐམས་ཅད་ལྕགས་ཀྱུ་དང་ཞགས་པ་ཇི་ལྟ་བ་བཞིན་དུ་བསྣམས་པའི་གནོད་མཛེས་ཀྱི་སྦྱོར་བ་ལ་ཞུགས་པས་བསྒྲུབ་པར་བྱ་བ་རྡོ་རྗེ་རླུང་གི་དཀྱིལ་འཁོར་ལ་བསྐྱོན་ལ་དམ་ཚིག་གི་ཕྱག་རྒྱའི་གཟུགས་སུ་བསྐྱེད་ལ་བུ་མོ་འགུགས་པ་ལ་བརྩོན་པར་བསམས་ནས་མིང་དང་སྤེལ་བའི་སྦྱོར་བས་སྔགས་བཟླས་པ་བྱ་ཞིང་དགུག་པར་བྱའོ། །དགུག་ཅེས་བྱ་བ་ལ། རབ་ཏུ་མྱུར་བར་གཡོ་བའི་མིག །མིག་གི་རྫི་མ་འདྲེན་པ་ནི། །འབར་བའི་ལྟ་བ་ཞེས་གྲགས་ཏེ། །འགྲོ་བ་ཐམས་ཅད་དགུག་པར་གསུངས། །ཞེས་གསུངས་པའི་འབར་བའི་ལྟ་བའང་དགུག་པའི་ལས་ཐམས་ཅད་ལ་སྦྱར་བར་བྱའོ། །རྡོ་རྗེ་སེམས་དཔའ་ལ་སོགས་པའི་སྔར་བཤད་པའི་གསང་སྔགས་ཀྱིས་ཀྱང་མངོན་པར་འདོད་པའི་ལས་བསྒྲུབ་ཏུ་རུང་སྟེ་གང་འདིའི་གདུལ་བྱའི་སྐྱེ་བོ་རྣམས་ལ་རབ་ཏུ་སྣང་བའི་དབང་དུ་མཛད་ནས་སྤྱན་ལ་སོགས་པའི་ལས་སོ་སོར་ངེས་པར་བཤད་ཀྱི་འོ་ན་ཀྱང་རྣལ་འབྱོར་པའི་མོས་པའི་དབང་གིས་དེ་དག་ཐམས་ཅད་ཀྱང་ལས་ཐམས་ཅད་མཛད་པ་ཡིན་ནོ།། ད་ནི་ཐམས་ཅད་ཀྱི་སྤྱིའི་ལས་ཀྱི་ཚིག་རྣམས་ཀྱི་དོན་གསུངས་པ་ཡིན་ཏེ། ཡེ་ཤེས་ཆེན་པོ་ཞེས་བྱ་བ་ལ་སོགས་པ་ལ་ཡེ་ཤེས་ཆེན་པོ་ནི་ལྷ་རྣམས་སྤྲུལ་པའི་ཡེ་ཤེས་སོ། །དེའི་རྣམ་པར་བསྒྱིངས་པ་ནི་རྣམ་པར་རོལ་པ་སྟེ་སངས་རྒྱས་ལ་སོགས་པ་འགུགས་པའོ། །དེའི་དགའ་སྟོན་ནི་དེས་དགའ་སྟོན་མཛད་པ་སྟེ་རྣལ་འབྱོར་པ་རྣམས་ཀྱིས་མངོན་པར་འདོད་པའི་དངོས་གྲུབ་ཐོབ་པར་མཛད་པའོ། །དེ་ལ་དམིགས་པས་ན་ཏིང་ངེ་འཛིན་དེ་ལ་ཡང་མིང་དེ་སྐད་ཅེས་བྱ་སྟེ། ལས་ཀྱི་ཚོགས་བསྐྱེད་པའི་རྣམ་པ་ལ་ཐུགས་རྩེ་གཅིག་ཏུ་མཛད་ཅེས་བྱ་བའི་དོན་ཏོ། །
སྐུ་གསུམ་གྱི་མཆོག་རྡོ་རྗེ་འཆང་སྐྱེད་པར་མཛད་པ་ཞེས་བྱ་བ་ནི་སྐུ་གསུམ་གྱི་བདག་ཉིད་ཅན་རྡོ་རྗེ་འཛིན་པ་བསྐྱེད་པའོ། །དེ་ཉིད་ནི་སངས་རྒྱས་བྱང་ཆུབ་སྟེ་དེ་ཁོ་ན་ཉིད་ཀྱི་ཡེ་ཤེས་ཀྱི་བདག་པོའི་ངོ་བོ་ཉིད་ཡིན་པས་སོ། །འབྱིན་ཞེས་བྱ་བ་ནི་ཕྱུང་བ་སྟེ་ལས་ཀྱི་ཚོགས་རྣམས་ཤེས་པར་བྱ་སྟེ། རྡོ་རྗེ་འཛིན་པའི་རྗེས་སུ་དྲན་ནས་ལས་ཀྱི་ཚོགས་རྣམས་བཤད་དོ་ཞེས་བྱ་བའི་དོན་ཏོ། །འདིས་ནི་འདི་སྐད་སྟོན་པ་ཡིན་ཏེ་ལས་འདི་དག་ཐམས་ཅད་ལ་དེ་ཡོངས་སུ་རྫོགས་པར་བྱ་བའི་ཕྱིར་བཅོམ་ལྡན་འདས་དེ་བསྐུལ་བ་བྱ་སྟེ་དངོས་གྲུབ་ཐམས་ཅད་ནི་དེ་ལ་རག་ལས་པ་ཡིན་པའི་ཕྱིར་རོ། །དེ་བས་ན་འདི་ཉིད་ཀྱི་འོག་ནས། རྒྱལ་པོ་ཀུན་གྱི་གནས་ལ་བཞུགས། །རྡོ་རྗེ་སེམས་དཔའ་སེམས་དཔའ་ཆེ། །ཀུན་གྱི་སེམས་རབ་རྫོགས་མཛད་པ། །ཡང་དང་ཡང་དུ་རབ་བསྐུལ་བར། །ཞེས་གསུངས་པའི་ཕྱིར་རོ། །བྱང་ཆུབ་ཆེན་པོ་རྡོ་རྗེ་འཆང་བ་ནི་བྱང་ཆུབ་ཀྱི་སེམས་ཀྱི་ངོ་བོ་ཉིད་དེ། དེ་དྲན་པ་སྔོན་དུ་འགྲོ་བས་ལས་ཀྱི་ཚོགས་རྣམས་བཤད་པ་ཡིན་ནོ། །དེས་ནི་འདི་སྐད་སྟོན་པར་འགྱུར་ཏེ་བྱང་ཆུབ་ཀྱི་སེམས་བསྒོམ་པ་བརྟན་པར་གྱུར་པས་ཁམས་གསུམ་པོ་སེམས་ཙམ་དུ་ཤེས་ནས་ལས་རྣམས་བྱས་ན་འགྲུབ་པར་འགྱུར་རོ་ཞེས་པའོ། །འཁོར་ལོ་ཆེ་ལ་རྣམ་གནས་ནས། །ཞེས་བྱ་བ་ནི་དཀྱིལ་འཁོར་ཆེན་པོ་ལ་འདུག་པས་སོ། །འདི་སྐད་སྟོན་པ་ཡིན་ཏེ། གནོད་མཛེས་ཀྱི་དཀྱིལ་འཁོར་ལ་གནས་པ་སྟེ། དཀྱིལ་འཁོར་དེ་ལ་གནས་པའི་རྣལ་འབྱོར་པས་དེའི་སྔགས་བཟླས་ཤིང་སངས་རྒྱས་ཀྱི་སྤྲིན་གནོད་མཛེས་ཀྱི་སྦྱོར་བས་ཞུགས་པ་ལྕགས་ཀྱུ་དང་ཞགས་པ་བསྣམས་པ་སྤྲོས་པས་འགུགས་པར་བྱེད་པའོ། །སངས་རྒྱས་རྣམས་ཀྱི་སྤྲིན་ནི་དེ་བཞིན་གཤེགས་པ་ཐམས་ཅད་དོ། །རྡོ་རྗེ་འཆང་བའི་སྤྲིན་ནི་རྡོ་རྗེ་སེམས་དཔའི་སྤྲིན་ནོ། །གཞན་དག་ལ་ཡང་དེ་བཞིན་ནོ། །དགུག་པར་གསུངས་པ་འདི་ནི་གཙོ་བོ་མ་ཡིན་གྱི། སྔ་མ་ཉིད་དུས་དང་པོ་བྱ་བར་ཡང་ཤེས་པར་བྱའོ། །དེ་བས་ན་གཞན་དག་ལས་ཀྱང༌། །སྔགས་ཀྱི་སེམས་དཔས་བྱ་བ་ནི། །རྡོ་རྗེ་གསང་བ་རྨད་པོ་ཆེ། །ཁྲོ་བོ་རྒྱལ་པོ་བཀུག་ནས་ནི། །སངས་རྒྱས་ཐམས་ཅད་རབ་ཏུ་མཆོད། །ཅེས་གསུངས་པ་ཡིན་ནོ། །ད་ནི་རྣལ་འབྱོར་ཐམས་ཅད་ཀྱི་མངོན་པར་འདོད་
པའི་བུ་མོ་ལ་སོགས་པ་དགུག་པ་ཡིན་ཏེ། ཀུན་མཁྱེན་ཡེ་ཤེས་རང་བཞིན་གཙོ། །ཞེས་བྱ་བ་ནི་སྐུ་གསུང་ཐུགས་ཀྱི་ཡེ་ཤེས་ཀྱི་ངོ་བོ་ཉིད་དོ། །རང་སྔགས་སྐྱེས་བུར་བདག་བསྒོམས་ན། །ཞེས་བྱ་བ་ནི་གཤིན་རྗེ་གཤེད་ལ་སོགས་པ་གང་ཡང་རུང་བའི་རང་གི་ལྷའི་སྐུར་རང་གི་སྔགས་ཀྱི་བདག་ཉིད་རྣམ་པར་བསམས་པའོ། །རླུང་ལ་རྐང་པ་བཞག་ནས་སུ། །ཞེས་བྱ་བ་ལ་སོགས་པ་ནི་རྐང་པའི་འོག་ཏུ་རླུང་གི་དཀྱིལ་འཁོར་གཞག་པ་གང་ཡིན་པ་དེ་ལ་དེ་སྐད་ཅེས་བྱ་སྟེ། རླུང་གི་དཀྱིལ་འཁོར་ལ་བསྐྱོན་ཞེས་བྱ་བའི་དོན་ཏོ། །ལྕགས་ཀྱུས་སྙིང་ནས་དྲངས་ནས་ནི། །ཞེས་བྱ་བ་ནི་ལྕགས་ཀྱུས་སྙིང་དྲངས་པ་གང་ཡིན་པ་དེ་ལ་དེ་སྐད་ཅེས་བྱའོ། །འདི་སྐད་སྟོན་པ་ཡིན་ཏེ། རྣལ་འབྱོར་པ་རང་གི་ལྷའི་ཕྱག་རྒྱ་ཆེན་པོ་དང་ལྡན་པས་དེའི་དཀྱིལ་འཁོར་གྱི་དབུས་སུ་འདུག་སྟེ། མངོན་པར་འདོད་པའི་བུ་མོ་དམ་ཚིག་གི་ཕྱག་རྒྱའི་གཟུགས་སུ་བསྐྱེད་ལ་རླུང་གི་དཀྱིལ་འཁོར་ལ་བསྐྱོན་ཏེ་དེ་ལ་མངོན་པར་ཕྱོགས་པར་དྲངས་ཤིང༌། རང་གི་ལྷའི་གཟུགས་ཀྱིས་ལྕགས་ཀྱུ་དང་ཞགས་པ་ཐོགས་ཏེ། གནས་ཇི་ལྟ་བ་བཞིན་དུ་བཅིངས་ལ་དྲངས་ནས་ཁྱེར་ཏེ་འོངས་པར་བསམ་པ་དང་དཀྱིལ་འཁོར་པ་རྣམས་ཀྱང་དེ་འགུགས་པར་བརྩོན་པར་བསམ་ཞིང་བདག་ཉིད་ཀྱང་མིང་དང་སྤེལ་པའི་སྦྱོར་བས་གསང་སྔགས་ཟློས་ཤིང་དགུག་པར་བྱའོ། །སྐྱེས་པ་དགུག་པ་ལ་ནི་སྦྱོར་བ་འདི་ཉིད་གོ་བཟློག་པ་ཡིན་པར་ཤེས་པར་བྱའོ། །ཐག་རིང་པོ་ནས་དགུག་ན་བསྒྲུབ་པར་བྱ་བ་གལ་ཏེ་ཡོངས་སུ་བསྐམས་པར་འགྱུར་བ་ཡང་སྲིད་པས། དེ་ལྟར་མི་འགྱུར་པར་བྱ་བའི་ཕྱིར། རྡོ་རྗེ་རྣམ་པར་སྣང་མཛད་ནི། །ཞེས་བྱ་བ་ལ་སོགས་པ་གསུངས་ཏེ་བསམས་ཞེས་བྱ་བ་ནི་བསྒྲུབ་པར་བྱ་བའི་མགོ་བོ་ལའོ། །དེ་ནི་ཞེས་བྱ་བ་ནི་བསྒྲུབ་པར་བྱའོ། །འདི་སྐད་སྟོན་པ་ཡིན་ཏེ་རླུང་གི་དཀྱིལ་འཁོར་ལ་བསྐྱོན་ཏེ་ཐག་རིང་པོ་ནས་དགུག་ན་བསྒྲུབ་པར་བྱ་བའི་མགོ་ལ་ཟླ་བའི་སྟེང་ན་བཅོམ་ལྡན་འདས་རྣམ་པར་སྣང་མཛད་སྐུ་མདོག་དཀར་པོ་བདུད་རྩི་འབབ་པ་བསམས་ལ་དགུག་པར་བྱའོ་ཞེས་པའོ། །རྡོ་རྗེ་དཀྱིལ་འཁོར་ལས་བྱུང་བ། །ཞེས་བྱ་བ་ནི་རྡོ་རྗེ་ཟླ་བའི་དཀྱིལ་འཁོར་གྱི་སྟེང་དུ་རྣམ་པར་བཞུགས་པར་བསྒོམ་མོ་ཞེས་ཤུགས་ཀྱིས་སྦྱར་རོ། །རྡོ་རྗེ་ལྕགས་ཀྱུ་སྐུ་ཆེན་
པོ། །ཞེས་བྱ་བ་ནི་ཡི་གེ་ཛཿ་ལས་བྱུང་བའི་ལྕགས་ཀྱུ་འབར་བ་ཕྱག་ན་བསྣམས་པའི་རང་གི་ལྷའོ། །འདི་ནི་བུ་མོ་དགུག་པའི་སྦྱོར་བའི་ཁྱད་པར་རོ། །གཞན་དག་ན་རེ། རྡོ་རྗེ་དཀྱིལ་འཁོར་ལས་བྱུང་བ། །རྡོ་རྗེ་ལྕགས་ཀྱུ་སྐུ་ཆེན་པོ། །ཞེས་བྱ་བ་རྡོ་རྗེ་རླུང་གི་དཀྱིལ་འཁོར་གྱི་གཟུགས་སུ་ཡོངས་སུ་གྱུར་པར་བསྒོམས་ལ་དེ་ལ་བསྐྱོན་ནས་བུ་མོ་དགུག་པར་བྱའོ་ཞེས་ཟེར་རོ། །རྡོ་རྗེ་གསུམ་གསུངས་ཁྲོ་བོ་ནི། །ཞེས་བྱ་བ་ནི་སྐུ་གསུང་ཐུགས་ཀྱི་རྡོ་རྗེའི་ཡི་གེ་ལས་བྱུང་བ་ཞལ་གསུམ་པ་མི་བསྐྱོད་པའི་གཙུག་གི་ནོར་བུ་ཅན། སྐུ་མདོག་སྔོ་བ་རོལ་པའི་སྟང་སྟབས་ཀྱིས་བཞུགས་པར་ཁྲོ་བོ་རྡོ་རྗེ་ས་འོག་བསྒོམ་མོ་ཞེས་བྱ་བ་ནི་ལྷག་མའོ། །གསལ་ཤིང་རྡོ་རྗེ་ལྕགས་ཀྱུ་ཞགས་པ་ཡིས། །ཞེས་བྱ་བ་ནི་གསལ་ཤིང་དང་ཞགས་པ་ལ་སོགས་པ་དང་ལྡན་པས་འདི་སྐད་ཅེས་བྱའོ། །དེ་ཡང་ཕྱག་གཡས་པ་གཉིས་ན་གསལ་ཤིང་དང་ལྕགས་ཀྱུ་བསྣམས་པ། གཡོན་གཉིས་ན་རྡོ་རྗེ་དང་ཞགས་པ་བསྣམས་པ་ཡིན་པར་རིགས་སོ། །ཉེ་བར་མཚན་པ་འདིས་ན་གཡས་ཀྱི་ཅིག་ཤོས་ལ་ནི་རལ་གྲི། གཡོན་ན་དགྲ་སྟ་བསྣམས་པར་ལ་ལ་འདོད་དོ། །དྲངས་ན་ཞེས་བྱ་བ་ནི་ལྕགས་ཀྱུས་དྲངས་ནས་ཞགས་པས་བཅིངས་ལ་བསྒྱེལ་བའི་ཚུལ་དུ་བྱས་པའོ། །འདི་སྐད་སྟོན་པ་ཡིན་ཏེ་རྣལ་འབྱོར་པ་ཇི་སྐད་དུ་བཤད་པའི་རྡོ་རྗེ་ས་འོག་རྣལ་འབྱོར་པས་དེའི་དཀྱིལ་འཁོར་གྱི་སྦྱོར་བས་འདུག་སྟེ། དེ་ཉིད་ཀྱིས་སྔ་མ་བཞིན་དུ་ལྷ་མ་ཡིན་གྱི་བུ་མོ་འགུགས་བཞིན་པར་བསམས་ལ་མིང་དང་སྤེལ་ནས་དེའི་སྔགས་བཟླས་པའི་སྦྱོར་བས་དགུག་པར་བྱ་སྟེ། ལྷ་མ་ཡིན་གྱི་བུ་མོ་དགུག་པའི་ཁྱད་པར་གྱི་སྦྱོར་བའོ། །གཟས་ཟིན་ཚེ་ན་ཁར་བཅུག་སྟེ། །རྫས་རྒྱལ་རྡོ་རྗེ་ལྕགས་ཀྱུས་བསྒྲུབ། །ཅེས་བྱ་བ་ནི་གཟས་ཟིན་པའི་ཚེ་ན་རྫས་ཁར་བཅུག་ལ་རྡོ་རྗེ་ལྕགས་ཀྱུས་དགུག་པའི་སྦྱོར་བས་ནམ་མཁའི་ཁམས་ཐམས་ཅད་ན་གནས་པའི་འཕགས་པ་གཤིན་རྗེ་གཤེད་ལ་སོགས་པ་འགུགས་པ་ལ་བརྩོན་པ་རྣམས་དགུག་པ་ལ་སོགས་པ་བྱས་ཏེ་བསྒྲུབ་པར་བྱའོ། །འདི་སྐད་སྟོན་པ་ཡིན་ཏེ། རྣལ་འབྱོར་པས་གཤིན་རྗེ་གཤེད་ལ་སོགས་པའི་རང་གི་དཀྱིལ་འཁོར་གྱི་དབུས་སུ་འདུག་སྟེ། གཟས་ཟིན་པའི་ཚེ་རྫས་ཁར་བཅུག་ལ་དེར་འཕགས་
པ་གཤིན་རྗེ་གཤེད་ལ་སོགས་པ་ཇི་ལྟ་བ་བཞིན་དུ་དགུག་པ་ལ་སོགས་པ་བྱས་ལ་ཟླ་བའམ་ཉི་མ་གཟས་ཟིན་པ་ལ་བལྟ་བཞིན་དུ་ཇི་སྲིད་གཟས་མ་བཏང་གི་བར་དུ་བཟླས་པར་བྱའོ། །དེ་ནས་བསྲུང་བ་བྱས་པ་དེ་ལྟར་བསྒྲུབས་པའི་རྫས་ཀྱི་རྒྱལ་པོ་འདི་ཉིད་ཀྱིས་དྲག་པོ་ལ་སོགས་པ་གང་ཡང་རུང་པའི་མིང་བྲིས་ལ་རྐང་བ་གཡོན་བས་མནན་ཏེ་བསྒྲུབ་པར་བྱ་བ་ཡང་རྡོ་རྗེ་རླུང་གི་དཀྱིལ་འཁོར་ལ་བསྐྱོན་ཏེ། གཤིན་རྗེ་གཤེད་ལ་སོགས་པ་རྣམས་ཀྱིས་ལྕགས་ཀྱུས་དྲང་ཞིང་ཞགས་པས་བཅིངས་ནས་འགུགས་བཞིན་པར་བསམས་ལ། དེ་བཞིན་དུ་མིང་སྤེལ་བའི་སྦྱོར་བས་གསང་སྔགས་བཟླས་ན་ཁུགས་པར་འགྱུར་རོ། །བུད་མེད་དགུག་པ་ལ་ནི་རྐང་བ་གཡས་པས་མནན་ནོ། །སངས་རྒྱས་འཁོར་ལོ་ལེགས་བསམས་ཏེ། །འཇམ་པའི་རྡོ་རྗེ་རྣམ་པར་བསྒོམ། །ཞེས་བྱ་བ་ནི་རྣམ་པར་སྣང་མཛད་ཀྱི་དཀྱིལ་འཁོར་གྱི་དབུས་སུ་ཇི་སྐད་བཤད་པའི་འཇམ་དཔལ་གྱི་སྐུར་བདག་ཉིད་བསྒོམ་པར་བྱའོ། །ལག་ན་རྡོ་རྗེ་ལྕགས་ཀྱུ་ཐོགས། །ཞེས་བྱ་བ་ནི་ཕྱག་གཉིས་ན་རྡོ་རྗེ་དང་ལྕགས་ཀྱུ་བསྣམས་པ་སྟེ། སྙིང་གར་འདི་ཉིད་བསྒོམ་ཞེས་བྱ་བ་ནི་ཁྱད་པར་རོ། །འདི་སྐད་སྟོན་པ་ཡིན་ཏེ་འཇམ་དཔལ་གྱི་རྣལ་འབྱོར་བ་རང་གི་དཀྱིལ་འཁོར་གྱི་དབུས་སུ་འདུག་སྟེ། རང་གི་སྙིང་གར་ཉི་མའི་དཀྱིལ་འཁོར་ལ་ཇི་སྐད་དུ་གསུངས་པའི་གཤིན་རྗེ་གཤེད་ཀྱི་སྐུར་དེའི་གསང་སྔགས་ཀྱིས་བསྒོམས་ལ་སྔ་མ་བཞིན་དུ་ལེགས་པར་སྤྲོས་ཏེ། མངོན་པར་འདོད་པའི་གནོད་སྦྱིན་མོའི་སྙིང་གར་ཞུགས་པ་དང༌། དེ་བསྐལ་བའི་མེ་བཞིན་དུ་སྲེག་པར་འགྱུར་ལ་རང་གི་མདུན་ན་བསིལ་བར་གྱུར་པའི་ལམ་ཡོད་པ་ལ་ཨཱ་གྩྪ་ཞེས་བྱ་བའི་སྔགས་ཀྱིས་འཇམ་དཔལ་རྡོ་རྗེ་ལ་སྐྱབས་སུ་འགྲོ་བར་མངོན་པར་འདོད་པར་བསམས་ལ་གཤིན་རྗེ་གཤེད་ཀྱི་གསང་སྔགས་ཡི་གེ་ཀྵི་དང་སྤེལ་བས་སྔགས་བཟླས་ལ་དགུག་པར་བྱའོ། །ཕྱག་རྒྱ་གསང་སྔགས་སྤྱོར་བ་དང༌། །ཞེས་བྱ་བ་ལ་སོགས་པ་ལ་གཤིན་རྗེ་གཤེད་ལ་སོགས་པའི་རྣལ་འབྱོར་བས་རང་གི་དཀྱིལ་འཁོར་གྱི་དབུས་སུ་འདུག་སྟེ། རང་གི་ཕྱག་རྒྱ་དང་གསང་སྔགས་ལས་བྱུང་བའི་གཤིན་རྗེ་གཤེད་ལ་སོགས་པ་གྲངས་མེད་པས་ནམ་མཁའ་ཀུན་དུ་
བཀང་སྟེ། འཁོར་ལོ་དང་རྡོ་རྗེ་ལ་སོགས་པ་རང་གི་མཚན་མ་དང་ལྕགས་ཀྱུ་ཕྱག་ན་བསྣམས་པས་བསྒྲུབ་པར་བྱ་བ་འགུགས་པར་གྱུར་པར་བསམ་ཞིང་ཁྱད་པར་གྱི་སྦྱོར་བས་དགུག་པར་བྱའོ། །འདི་ནི་དགུག་པ་སྤྱིའི་ཡིན་པས། དགུག་པར་བྱ་བའི་གནས་སུ་གསུངས། །ཞེས་བྱ་བ་ཡིན་ཏེ་དགུག་པ་ཐམས་ཅད་ཀྱི་གཞིར་གྱུར་པ་ཡིན་ནོ། །གཞན་དུ་བྱས་ན་འགྲུབ་མི་འགྱུར། །ཞེས་བྱ་བ་ནི་གལ་ཏེ་སྤྱི་དང་ཁྱད་པར་གྱི་སྦྱོར་བ་དག་གིས་འགུགས་པ་ལ་སོགས་པ་མི་བྱེད་ན་དེའི་ཚེ་དེ་འགྲུབ་པར་མི་འགྱུར་རོ། །དེ་བས་ན་གཉིས་ཀས་ཀྱང་བྱའོ་ཞེས་བྱ་བར་གནས་སོ། །རྒྱལ་པོའི་ཞབས་དྲུང་ཀུན་གནས་པས། །ཞེས་བྱ་བ་ནི་རྒྱལ་པོ་ནི་སྔགས་ཐམས་ཅད་ཀྱིའོ། །ཀུན་གྱི་གནས་ལ་བཞུགས་ཞེས་བྱ་བ་ནི་གཉིས་སུ་མེད་པའི་ཡེ་ཤེས་ཉིད་ཀྱིས་ལྷ་ཐམས་ཅད་ཀྱི་སྐུ་ལ་རྣམ་པར་བཞུགས་པའོ། །ཡང་དང་ཡང་དུ་བསྐུལ་པར་བྱ། །ཞེས་བྱ་བ་ནི་བཅོམ་ལྡན་འདས་བདག་ལ་དངོས་གྲུབ་བསྩལ་དུ་གསོལ་ཞེས་སྐད་ཅིག་རེ་རེ་ཞིང་བསྐུལ་བར་བྱ་སྟེ། ཅིའི་ཕྱིར་ཞེ་ན་རྒྱལ་པོ་ཀུན་གྱི་གནས་ལ་བཞུགས་པས་བྱ་བ་ཡིན་པའི་ཕྱིར་རོ། །གཞན་དག་ནི་དགུག་པའི་ལས་རྣམས་ལ་བཅོམ་ལྡན་འདས་གནོད་མཛེས་ཉིད་བསྐུལ་བར་བྱའོ་ཞེས་ཟེར་རོ། །ཡེ་ཤེས་ཀྱིས་ཞེས་བྱ་བ་ལ་སོགས་པ་ལ་ཡེ་ཤེས་ཀྱིས་རྣམ་པར་རྒྱལ་བ་ནི་གདུག་པའི་རང་བཞིན་ཟིལ་གྱིས་གནོན་པ་སྟེ་ཟིལ་གྱིས་གནོན་པ་གང་ཡིན་པ་དེ་ལ་དེ་སྐད་ཅེས་བྱ་སྟེ། རལ་པ་གཅིག་མའོ། །དེ་ཉིད་རྡོ་རྗེ་སྟེ་དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །གསང་སྔགས་བཟླས་བརྗོད་བྱས་པ་ཡིས། །ཞེས་བྱ་བ་ལ་སོགས་པ་ནི་རལ་བ་གཅིག་མའི་རྣལ་འབྱོར་བས་དེའི་དཀྱིལ་འཁོར་གྱི་དབུས་སུ་འདུག་ལ་སྔ་མ་བཞིན་དུ་ཀླུའི་བུ་མོ་འགུགས་པར་བྱེད་པར་བསམས་ལ། བསྒྲུབ་པར་བྱ་བའི་མིང་དང་མདུང་ཅན་མའི་སྔགས་སྤེལ་ཞིང་བཟླའོ། །འདོད་པའི་ཡོན་ཏན་ལྔས་ཆགས་པའི། །ཞེས་བྱ་བ་ནི་གཟུགས་ལ་སོགས་པ་ལ་རྗེས་སུ་ཆགས་པས་བདག་ཉིད་ཀྱིས་ཏེ། བཅོམ་ལྡན་འདས་མ་འདི་ཡང་སྐུ་མདོག་སྔོ་བོ་ཅོད་པན་ལ་མི་བསྐྱོད་པས་བརྒྱན་པ། རལ་གྲི་དང་ལྕགས་ཀྱུ་དང་རྡོ་རྗེ་དང་སྡིགས་མཛུབ་དང་བཅས་པའི་ཞགས་པ་དང་ཁྲག་གིས་ཡོངས་སུ་གང་
བའི་ཐོད་པ་དང་དགྲ་སྟ་ཕྱག་ན་བསྣམས་པ། རོལ་པའི་སྟང་སྟབས་ཀྱིས་ལེགས་པར་བཞུགས་པ། ཡི་གེ་ཧཱུཾ་ལས་བྱུང་བ་མཆོག་ཏུ་ཀླུའི་བུ་མོ་འགུགས་པར་ཤེས་པར་བྱའོ། །ནམ་མཁའ་ཆེན་པོ་ཞེས་བྱ་བ་ལ་སོགས་པ་ལ་ནམ་མཁའ་ནི་གོ་འབྱེད་དོ། །ཆེན་པོ་ནི་ཐམས་ཅད་དུ་ཁྱབ་པ་སྟེ། སེམས་ཅན་གྱི་དོན་མཛད་པའི་ཕྱིར་མགྱོགས་པའི་ཤུགས་དང་ལྡན་པའི་སེམས་ཀྱིས་ཁྱབ་པར་གང་ཡིན་པ་དེ་ལ་དེ་ལ་དེ་སྐད་ཅེས་བྱ་བ་སྟེ། དེས་ན་འཇུག་པར་དཀའ་པའི་ཕྱིར་རྒྱ་མཚོ་དང་ཆོས་མཐུན་པར་གནས་པ་ན་སྐུལ་བྱེད་མ་ལ་དེ་སྐད་ཅེས་བྱའོ། །དེ་ཉིད་འདའ་བར་མི་བྱ་བས་ན་དམ་ཚིག་གོ །དེ་ལ་དམིགས་པ་ནི་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །སྦྱོར་བ་ཡིས་ཞེས་བྱ་བ་ནི་སྤྱི་བོར་རྣམ་པར་སྣང་མཛད་དགོད་པ་ལ་སོགས་པའོ། །འདི་སྐད་སྟོན་ཏེ། སྐུལ་བྱེད་མའི་རྣལ་འབྱོར་བས་དེའི་དཀྱིལ་འཁོར་གྱི་དབུས་སུ་འདུག་ལ། ཀླུའི་བུ་མོ་ལ་སོགས་པ་རྡོ་རྗེ་རླུང་གི་དཀྱིལ་འཁོར་ལ་བསྐྱོན་ཏེ། འཕགས་མ་ཙུན་དེའི་སྐུ་ནམ་མཁའ་ཁྱབ་པ་རྣམས་ཀྱིས་འགུགས་པར་བྱེད་པར་བསམས་ལ། དེ་བཞིན་གསང་སྔགས་བཟླས་ནས་བཀུག་སྟེ་ཉེ་བར་ལོངས་སྤྱད་བར་བྱའོ། །ནམ་མཁའ་ཞེས་བྱ་བ་ལ་སོགས་པ་ལ་ཐམས་ཅད་ཁྱབ་པས་ནམ་མཁའ་སྟེ། རང་བཞིན་གྱིས་རྣམ་པར་དག་པ་ཆོས་ཉིད་ཀྱི་ཡེ་ཤེས་སོ། །དེ་ཉིད་མི་ཕྱེད་པས་ན་རྡོ་རྗེའོ། །དེས་རྣམ་པར་རྒྱལ་བ་ནི་གདུག་པ་རྣམས་ཟིལ་གྱིས་གནོན་པ་ལ་བརྩོན་པ་ཡིན་པ་དེ་ལ་དེ་སྐད་ཅེས་བྱ་སྟེ་ཁྲོ་གཉེར་ཅན་ནོ། །དེ་ཉིད་མཆོག་སྟེ་དེ་ལ་དམིགས་པ་ཞེས་བྱ་བ་ལ་སོགས་པ་ནི་གོ་སླའོ། ཆོས་ཞེས་བྱ་བ་ལ་སོགས་པ་ལ་ཆོས་ཆེན་པོ་ལུང་དང་རྟོགས་པའི་མཚན་ཉིད་དོ། །དེ་ཉིད་གཉིས་སུ་མེད་པའི་ཡེ་ཤེས་ཀྱི་བདུད་རྩི་འདྲེན་པས་ན་བདུད་རྩིའོ། །དེ་ཉིད་ནི་དམ་ཚིག་སྟེ་རྒྱུ་རྫོགས་པ་གང་ཡིན་པ་སྟེ། དེ་ཡང་འདིར་རྡོ་རྗེ་ཁྲོ་གཉེར་ཅན་གྱི་རྣལ་འབྱོར་བས་དེའི་དཀྱིལ་འཁོར་ལ་གནས་ཏེ་ཉེ་བར་ལོངས་སྤྱད་པར་བྱའོ། །ཡང་ན་ཞེས་བྱ་བ་ལ་ཡང་སྨོས་པས་ནི་འགོག་པའི་རྡོ་རྗེ་བཟླས་པ་ལ་སོགས་པས་སམ། རྡོ་རྗེ་ཕྲ་མོ་ལ་སོགས་པ་བསྒོམས་པས་སེམས་རྩེ་གཅིག་པ་ཐོབ་པའོ། །སྐྱེ་བོ་མེད་པའི་ཞེས་བྱ་བ་ནི་གཙུག་ལག་ཁང་ལ་སོགས་པར་རོ། །གསང་སྔགས་
བྱེ་བ་བཟླས་ནས་སུ། །ཞེས་བྱ་བ་ནི་ཡི་གེའི་ཕྲེང་བ་བཟླས་པས་སོ། །ལས་རྣམས་ཐམས་ཅད་བྱ་བར་གསུངས། །ཞེས་བྱ་བ་ནི་སྔགས་དེ་ཡིས་སོ། །འདི་སྐད་སྟོན་པ་ཡིན་ཏེ་ལྷའི་བུ་མོ་མཆོག་དགུག་པ་ལ་སོགས་པ་ཇི་སྐད་དུ་གསུངས་པའི་ཆོ་ག་གང་དག་ཡོད་པ་དེ་དག་ཐམས་ཅད་ལ་རྡོ་རྗེ་ཕྲ་མོ་ལ་སོགས་པ་བསྒོམས་པས་སེམས་རྩེ་གཅིག་པ་ཐོབ་པའམ་བཟླས་བརྗོད་བྱེ་བ་བྱས་ནས་བྱའོ། །བསྐྲད་པ་ལ་སོགས་པ་ནི་བཟླས་བརྗོད་བྱེ་པ་མ་བྱས་པའམ། སེམས་རྩེ་གཅིག་པ་མ་ཐོབ་པས་ཀྱང་དད་པ་བརྟན་པོར་བྱས་པས་ལ་ལ་བྱར་རུང་བ་ཡོད་དོ། །གཞན་དག་སློབ་དཔོན་སྨོད་པ་དང༌། །ཞེས་བྱ་བ་ལ་སོགས་པ་ནི་མངོན་སྤྱོད་ཀྱི་ཡུལ་གསུངས་པ་ཡིན་ནོ། །ཉེ་བར་མཚོན་པ་འདིས་ནི་དཀོན་མཆོག་གསུམ་ལ་གནོད་པར་བྱེད་པ་ལ་སོགས་པའང་བསྡུའོ། །བྱང་ཆུབ་དངོས་གྲུབ་ལེགས་པར་ཐོབ། །ཅེས་བྱ་བ་ནི་མངོན་སྤྱོད་ཀྱི་ཡན་ལག་འདིས་མངོན་སྤྱོད་བྱ་བར་འོས་པ་ལ་ལས་བྱས་ལ་སེམས་ཅན་ཐམས་ཅད་འདུལ་བའི་ཐབས་ཀྱི་བདག་ཉིད་ཅན་གྱི་བྱང་ཆུབ་རྟོགས་པར་འགྱུར་རོ། །སྐུ་གསུམ་ཡེ་ཤེས་ལས་བྱུང་བ། །ཞེས་བྱ་བ་ལ་སྐུ་དང་གསུང་དང་ཐུགས་ལས་བྱུང་བའི་གསོད་པའོ། །དགྲ་ལ་ཡང་ཞེས་བྱ་བ་ལ་ཡང་རྒྱུད་གཞན་དག་ལས། ཕྱོགས་བཅུའི་སེམས་ཅན་ཐམས་ཅད་ཀྱི། །ལུས་དང་དག་སེམས་བསད་པར་ནི། །ཁྱད་པར་དག་ཏུ་བསྒོམ་པར་བྱ། །དགྲ་རྣམས་ལ་ནི་གདོན་མི་ཟ། །ཞེས་གསུངས་པས་འདིར་སོ་མ་ཉི་མི་བྱ་སྟེ་འདི་ཉིད་ཀྱིས་ནི་གཅིག་ཏུ་བྱ་བ་བདག་གི་ངོ་བོ་ཉིད་བསྟན་པ་ཡིན་ནོ། །འདི་སྟོན་པ་ཡིན་ཏེ་སེམས་ཅན་ཐམས་ཅད་གསོད་པ་དང་གཙུག་ལག་ཁང་ལ་སོགས་པ་རྣམ་པར་འཇིག་པ་དང༌། སློབ་དཔོན་ལ་གནོད་པར་བྱེད་པ་ལ་སོགས་པ་མངོན་སྤྱོད་ཀྱི་ཡན་ལག་བྱ་བར་འོས་པ་ལ་ལྷའི་བསྲུང་བ་དང་བྲལ་བར་བྱ་སྟེ། བསྐལ་བ་དུ་མར་དམྱལ་བ་ལ་སོགས་པར་གནས་པར་འགྱུར་རོ་ཞེས་སྙིང་རྗེའི་སེམས་བསྐྱེད་ལ་མི་བསྐྱོད་པ་ལ་སོགས་པའི་སངས་རྒྱས་ཀྱི་ཞིང་དུ་བསྐྱོད་པར་བྱའོ་ཞེས་བསམས་ནས་མེད་པར་བྱ་བའམ། བསད་པའི་དངོས་པོ་དམིགས་ལ་གཤིན་རྗེ་གཤེད་ལ་སོགས་པའི་རྣལ་འབྱོར་བས་མངོན་སྤྱོད་ཀྱིས་བྱ་བའི་ལས་བྱའོ། །ཁྲག་གམ་ཆུ་ཡིས་ཞེས་བྱ་བ་ལ་སོགས་པ་ནི་ཆོ་ག་གསུངས་པ་ཡིན་ཏེ། མཚན་མ་ཞེས་བྱ་བ་ནི་བསྲུབ་
བར་བྱ་བའི་གཟུགས་བརྙན་ནོ། །ཁྲོ་བོའི་རྒྱལ་པོ་ཞེས་བྱ་བ་ནི་གཤིན་རྗེ་གཤེད་ལ་སོགས་པའོ། །གསང་སྔགས་བརྒྱ་རྩ་བརྒྱད་བཟླས་ན། །ཞེས་བྱ་བ་ནི་བཟླས་བརྗོད་བརྒྱ་རྩ་བརྒྱད་བྱས་པས་སོ། །སངས་རྒྱས་ཀྱང་ནི་ངེས་པར་འཇིག །ཅེས་བྱ་བ་ནི་སྦྱོར་བ་ཕུལ་དུ་བྱུང་བར་གསུངས་པ་ཡིན་ཏེ། ཅིའི་ཕྱིར་ཞེ་ན་འདི་ལྟར་དེ་རྣམས་ལ་ནི་འཆི་བར་འགྱུར་བ་ནི་མི་སྲིད་ལ། འདིར་དེ་དག་གིས་མངོན་སྤྱོད་བྱ་བའི་ཕུར་བུ་བཤད་པ་ལ་ཡང་མ་ཡིན་ན་ཅིའི་ཕྱིར་གསུངས་ཤེ་ན། དེ་ནི་བདེན་ཏེ་དེ་དག་འཆི་བར་འགྱུར་བ་མི་སྲིད་པ་ཉིད་ཡིན་མོད་ཀྱི། འོན་ཀྱང་སྦྱོར་བ་འདི་ཉིད་ལ་དངོས་གྲུབ་མཆོག་སྩོལ་བ་ལས་མི་ལྡོག་བ་ལ་བྱའོ། །རྒྱུད་གཞན་དག་ལས། འགའ་ཞིག་སྦྱོར་བ་མ་ཐོབ་པས། །སངས་རྒྱས་གསོད་པའི་བདག་ཉིད་ཅན། །དེ་ལ་ཕན་པར་བྱ་བའི་ཕྱིར། །དངོས་གྲུབ་མྱུར་བར་རབ་ཏུ་བསྒོམ། །ཞེས་གསུངས་པས་སོ། །ཆུས་བརླན་པའི་ཞེས་བྱ་བ་ལ་སོགས་པ་ནི་བཤད་མ་ཐག་པའི་དོན་ཉིད་གསལ་བར་བསྟན་པས་སོ། །ཁྲོ་བོའི་མདུན་དུ་བཅིངས་ནས་སུ། །ཞེས་བྱ་བ་ནི་ཁྲོ་པོའི་ང་རྒྱལ་དྲག་པོས་བྱའོ། །ཁྲོ་བོ་འཁྲུགས་པ་ཡིས་ཞེས་བྱ་བ་ནི་ཐམས་ཅད་དུ་ཁྲོ་བོའི་ལུས་འབར་པས་ཁྱབ་པའི་ཚུལ་གྱིས་སོ། །ཁ་བཞིན་རྣམ་པར་བསྒྱུར་བྱས་ཏེ། །ཞེས་བྱ་བ་ནི་ཁ་བཞིན་རྣམ་པར་བསྒྱུར་པ་ནི་འཇིགས་པར་བྱེད་པའི་གཟུགས་ཅན་ཏེ་རྣམ་པར་བསྒྱུར་བ་དེས་དུ་མར་རྣམ་པར་བསྒྱུར་བ་སྟེ། རང་གི་ལས་ཀྱི་རྗེས་སུ་མཐུན་པའི་སྟོབས་དང་ལྡན་པ་དེ་ལ་དེ་སྐད་ཅེས་བྱའོ། །ནམ་མཁའི་ཁམས་ཀྱང་འཇིགས་པར་འགྱུར། །ཞེས་པ་འདིས་ནི་ཆེ་བའི་བདག་ཉིད་བསྟན་པ་ཡིན་ནོ། །མ་མོའི་གནས་ཞེས་བྱ་བ་ལ་སོགས་པ་ནི་མངོན་སྤྱོད་ཀྱི་གནས་ཀྱི་ངེས་པ་གསུངས་པ་སྟེ། གང་ན་མོ་བདུན་པོ་གནས་པ་ནི་མ་མོའི་གནས་སོ། །ཤིན་གཅིག་ཏུ་ཞེས་བྱ་བ་ནི་ཤིང་གཞན་གྱི་གྲིབ་མས་མ་ནོན་པ་ཞེས་བྱ་བའི་དོན་ཏོ། །དེའི་རྐང་རྗེས་ལ་ཞེས་བྱ་བ་ནི་བསྒྲུབ་པར་བྱ་བའི་རྐང་པ་རྗེས་ཀྱི་སའོ། །ཡང་ཞེས་བྱ་བའི་སྒྲས་ནི་ཆུ་བོའི་དོགས་གཉིས་ཀྱིས་ལ་སོགས་པ་ཡང་བསྡུས་ཏེ་དེ་དག་གིས་གཟུགས་བརྙན་བྱའོ་ཞེས་བྱ་བ་ནི་ལྷག་མའོ། །མི་རུས་ལས་བྱས་ཕུར་བུ་དག །ཅེས་བྱ་བ་ནི་མིའི་རུས་པ་ལས་བྱས་
བའི་ཕུར་བུས་སོ། །ཕུར་བུ་ཡིས་ནི་ཞེས་བྱ་བ་ནི་ལྟེ་བ་ཡན་ཆད་སྟོད་བདུད་རྩི་འཁྱིལ་བའི་གཟུགས་ཅན་ལ་སྨད་རྡོ་རྗེ་རྩེ་གཅིག་པའི་དབྱིབས་སུ་བྱས་པའོ། །འདི་སྐད་སྟོན་པ་ཡིན་ཏེ། གཤིན་རྗེ་གཤེད་ལ་སོགས་པ་ཡང་རུང་བའི་སྦྱོར་བ་བྱས་ལ། ཇི་སྐད་དུ་བཤད་པའི་ཕུར་བུ་བླངས་ནས་ངོས་བཞིར་ཡི་གེ་ཧཱུཾ་བཞི་སྤྱི་བོར་གཅིག་བཀོད་ལ་དེ་ཉིད་ཀྱིས་ངུར་ཁྲོད་དུ་སྣ་ཚོགས་རྡོ་རྗེ་བྲིས་ལ་རྐང་རྗེས་ཀྱིས་དང་དུག་ལ་སོགས་པ་རྣམས་ཀྱིས་དེའི་གཟུགས་བརྙན་བྱས་ཏེ། དུག་ལ་སོགས་པ་སེམས་པར་བྱས་པའི་ཏ་ལའི་འདབ་མ་ལ་སོགས་པར་དེའི་མིང་དང་སྤེལ་ཏེ་གསང་སྔགས་བྲིས་ལ་དེའི་ཁོང་དུ་བཅུག་སྟེ་ས་ལ་སོགས་པས་ཀྱང་བཀབ་ལ། ཡི་གེ་ཨའ་ས་བོན་ལས་སྔར་བྲིས་པའི་སྣ་ཚོགས་རྡོ་རྗེའི་སྟེང་དུ་ལྷོ་ཕྱོགས་སུ་མངོན་དུ་ཕྱོགས་པར་བཞག་ལ་གནོད་མཛེས་ཀྱིས་བསྒྲུབ་པར་བྱ་བའི་སྙིང་དྲངས་ནས་གཞུག་པ་དང་བཅིང་བ་བྱས་ལ། འོག་ནས་བཤད་པའི་ཕུར་བུའི་གསང་སྔགས་བརྒྱ་རྩ་བརྒྱད་བཟླས་པའི་ཕུར་བུས་སྙིང་གར་བཏབ་ལ་ནང་གི་ཡི་གེ་པས་མཚན་པའི་སྣ་ཚོགས་རྡོ་རྗེ་བྲིས་པའི་ཁམ་ཕོར་གྱིས་བཀབ་སྟེ། དེ་ཡང་སད་བཀབ་ལ་དེའི་སྟེང་དུ་རྐང་བ་གཡོན་པས་མནན་ཏེ་ཉི་མ་ཕྱེད་དམ་མཚན་ཕྱེད་ན་གསང་སྔགས་བརྒྱ་རྩ་བརྒྱད་བཟླས་བརྗོད་བྱའོ། །གདོན་གྱི་ལས་ཐམས་ཅད་ལ་ཕུབ་མ་དང་རྡོ་བ་དང་ནི་མ་པའི་ལོ་མ་དང་སྐྱུར་རྩབས་དང༌། སྐེ་ཚེ་ལ་སོགས་པ་དང་ལྡན་པའི་འབྲས་ཆན་དམར་པོ་རང་ཉིད་ཁྲོ་བོའི་ང་རྒྱལ་དང་ལྡན་པས་ནང་གི་སྦྱིན་སྲེག་གི་ཆོ་ག་ཇི་ལྟ་བ་བཞིན་དུ་བཟའ་བར་བྱའོ། །དགྲའི་ཁྱིམ་སྒོར་ཞེས་ཚིག་མང་པོ་སྣོས་པས་ནི་གྲོང་རྡལ་ལ་སོགས་པ་ཡང་བཟུང་སྟེ་ཕུར་བུ་ཞེས་བྱ་བར་རྗེས་སུ་སྦྱར་པར་བྱའོ། །སྦྱོར་བ་འདི་དག་ལ་ཡང་བརྐོས་ཏེ་གཞུག་ཅེས་བྱ་བར་སྦྱར་རོ། །ཤེས་དང་མི་ཤེས་རྣམ་སྤངས་པ། །ཞེས་བྱ་བ་ནི་ཤེས་པ་དང་མི་ཤེས་པའི་རྣམ་པར་རྟོག་པ་དང་བྲལ་བའམ་ཡང་ན་གཉིས་སུ་མེད་པའི་རྣམ་པར་འཇུག་པའི་ཡེ་ཤེས་ནི་ཤེས་པའོ། །མི་ཤེས་པ་ནི་དེ་ཉིད་མི་ཤེས་པ་སྟེ་དེ་དང་བྲལ་པས་ན་མི་ཤེས་སྤངས་པ་སྟེ་སྤངས་པ་ནི་དོར་བའོ། །འདི་སྐད་སྟོན་པ་ཡིན་ཏེ་འདི་དག་ཐམས་ཅད་ནི་སེམས་ཙམ་མོ་ཞེས་ངེས་པར་བསམས་ལ་གཤིན་རྗེ་གཤེད་ལ་སོགས་པ་གང་ཡང་རུང་པའི་ང་རྒྱལ་གྱིས་ཇི་སྐད་གསུངས་
བའི་ཕུར་བུས་བླངས་ལ། ལས་ཀྱི་རྗེས་སུ་མཐུན་པའི་བསྐུལ་ཚིག་དང་སྤེལ་པའི་གསང་སྔགས་བརྒྱ་རྩ་བརྒྱད་བཟླས་བརྗོད་བྱས་ལ། དགྲའི་ཁྱིམ་སྒྲོ་ལ་སོགས་པར་བརྐོས་ཏེ་གཞུག་པར་བྱའོ། །ཐོད་པ་ཡོངས་སུ་རྫོགས་པ་ཞེས་བྱ་བ་ནི་ཇི་སྐད་དུ་བཤད་པའི་མཚན་ཉིད་ཐམས་ཅད་དང་ལྡན་པའོ། །འམ་གྱི་སྒྲ་མ་རྙེད་ན་གཞན་དག་ཀྱང་རུང་པའོ། །རྡོ་རྗེའི་ཚིག་གིས་ཞེས་བྱ་བ་ནི་རྡོ་རྗེའི་ཚིག་གིས་བྱིན་གྱིས་བརླབས་པས་ན་རྡོ་རྗེའི་ཚིག་གོ །འདི་སྐད་སྟོན་པ་ཡིན་ཏེ། ཆེ་གེ་མོ་སྐྲོད་ཅེས་བྱ་བ་དང་སྤེལ་བ་གཤིན་རྗེ་གཤེད་ལ་སོགས་པ་གང་ཡང་རུང་བའི་གསང་སྔགས་ཇི་སྐད་དུ་བཤད་པའི་ཐོད་པ་ལ་དུག་ལ་སོགས་པ་རྣམས་ཀྱིས་ལེགས་པར་བྲིས་ལ། རྡོ་རྗེའི་ཚིག་གིས་བརྒྱ་རྩ་བརྒྱད་ཡོངས་སུ་བཟླས་ཏེ་དགྲའི་སྒོ་ཁང་ལ་སོགས་པར་པས་ན་གྲོང་ལ་སོགས་པ་སྐྲོད་པར་འགྱུར་རོ། །འཆི་བའམ་བསྐམས་པར་འགྱུར་ཞེས་བྱ་བ་ནི་སོད་ཅིག་པའམ་སྐོམས་ཤིག་ཅེས་བྱ་བ་སྤེལ་བའི་གསང་སྔགས་བྲིས་པས་སོ། །ཉེ་བར་མཚོན་པ་འདིས་ན་སྐྲོད་ཅིག་ཅེས་པ་ལ་སོགས་པ་ཡང་ཡོངས་སུ་བསྡུའོ། །འདི་སྐད་སྟོན་པ་ཡིན་ཏེ་ཁྲོ་བོ་གང་ཡང་རུང་བའི་ང་རྒྱལ་དུ་བྱས་ནས། ལྷ་ཆེན་པོ་གཅེར་བུ་སྐྲ་བཤིག་བ་ལྷོ་ཕྱོགས་ན་གནས་པ་འདོད་པའི་རྒྱལ་པོའི་སྔགས་དང་ཕྱག་རྒྱས་དེ་བཀུག་ལ། རྡོ་རྗེ་འདི་ནི་རྡོ་རྗེ་ཆེ། །སངས་རྒྱས་ཀུན་གྱིས་བྱིན་བརླབས་པ། །དམ་ཚིག་འདས་ན་མྱུར་བར་ནི། །རིགས་རྒྱུད་བཅས་པ་ཐལ་བར་བྱེད། །ཨོཾ་ཧ་ན་ས་མ་ཡ་ཧཱུཾ་ཕཊ་ཅེས་བརྗོད་ལ་སྔར་བཤད་པའི་ཁྲོ་བོ་ཏི་རཱི་ནྟི་རིའི་དམ་ཚིག་བྱིན་ལ་ཁ་ཞིང་ཚ་བའི་བཀྲ་མི་ཤིས་པའི་མེ་ཏོག་རྣམས་ཀྱིས་མཆོད་ལ་དེ་བླངས་ནས་དེ་ཡང་རང་གི་ལས་བྱ་བར་བསྒོ་སྟེ་སླར་བཏང་ན་གྲོང་ངམ་གྲོང་ཁྱེར་གྱི་ལྷོ་ཕྱོགས་ཀྱི་འབུས་ཟོས་པའི་ཏ་ལའི་འདབ་མ་ལ་སོགས་པ་ལ་བདག་ཉིད་མངོན་པར་འདོད་པའི་ལས་དང་རྗེས་སུ་མཐུན་པར་བསྒྲུབ་པར་བྱ་བའི་མིང་དང་སྤེལ་པའི་སྤྱོད་པས་གཤིན་རྗེ་གཤེད་ལ་སོགས་པ་གང་ཡང་རུང་པའི་གསང་སྔགས་མི་རུས་ལ་སོགས་པ་ཕྱག་རྒྱས་གཏོར་པའི་ཚུལ་གྱིས་སམ་ཡི་གེ་ཕྱིན་ཕྱོགས་སུ་བྲིས་ལ་དུག་ལ་སོགས་པ་དང་ནི་མ་པའི་ལོ་མ་ལ་སོགས་པ་དང་མི་གཙང་བས་བསྐུས་ཏེ་གསང་སྔགས་བརྒྱ་རྩ་བཟླས་ལ་མེ་ཏོག་དེ་ལན་བདུན་མངོན་པར་བཟླས་པ་བྱས་ནས། དེའི་
འོག་ཏུ་ཏ་ལའི་འདབ་མར་སྦྱར་ཏེ་མེ་ཏོག་ལྷག་མ་རྣམས་ཀྱིས་དཀྲིའོ། །དེ་ནས་དགྲའི་སྒོ་ཁང་ཅོག་བུས་དོང་བྱས་ལ་ཉི་མ་ཕྱེད་དམ་མཚན་ཕྱེད་ན་སྦ་བར་བྱའོ། །དེ་བཞིན་གཤེགས་པ་ཞེས་བྱ་བ་ལ་སོགས་པ་ལ་དེ་བཞིན་གཤེགས་པ་ཐམས་ཅད་ཇི་སྐད་དུ་བཤད་པའི་སྒྲུབ་པའི་ཐབས་ཀྱི་རིམ་པས་སྒྲུབ་པ་ལ་ལན་བདུན་ཞུགས་པའི་སྒྲུབ་པ་པོ་ལ་དངོས་གྲུབ་མི་སྩོལ་ན་ཕུར་བུས་གདབ་པ་འདི་མངོན་པར་འདོད་དོ། །དེ་རྣམས་ཀྱི་སྐུ་གསུམ་ནི་སྐུ་དང་གསུང་དང་ཐུགས་ཏེ་ངོ་བོ་ཉིད་དང་ལོངས་སྤྱོད་རྫོགས་པ་དང་སྤྲུལ་པའི་སྐུའོ། །དེ་རྣམས་ཀྱི་ཕུར་བུས་གདབ་པའི་ཕྱིར་རྡོ་རྗེ་ཕུར་བུས་ཏེ་བདུད་རྩི་ཐབ་སྦྱོར་ལ་སོགས་པའི་གཟུགས་སོ། །དེ་ཉིད་ཡེ་ཤེས་རྡོ་རྗེ་སྟེ་དེ་ལ་དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །དེ་བཞིན་གཤེགས་པ་ཐམས་ཅད་ཕུར་བུས་གདབ་ལ་ཐོགས་བ་མེད་པའི་གསང་སྔགས་གསུང་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་དོན་ཏོ། །ཐམས་ཅད་ཅེས་བྱ་བ་ལ་སོགས་པ་ལ་ཁམས་གསུམ་པོ་ཐམས་ཅད་ཀྱི་སྟེ་ཁམས་གསུམ་བྱུང་བའི་དེ་བཞིན་གཤེགས་པ་ལ་སོགས་པའི་ཡེ་ཤེས་ནི་ཡེ་ཤེས་ཀྱི་བདག་ཉིད་ཅན་ཏེ་སྐུ་གསུང་ཐུགས་སོ། །དེ་རྣམས་ཕུར་བུས་འདེབས་པར་བྱེད་པའི་སྙིང་པོ་གང་ཡིན་པ་དེ་ཉིད་ནི་རྡོ་རྗེ་སྟེ་མིང་དེ་སྐད་ཅེས་བྱའོ། །ཕུར་བུ་སྤྱིའི་སྔགས་ལ་ནི་སརྦ་དུ་ཥྚཱ་ན་སརྦ་པཱ་བཾ་ཞེས་བྱ་བ་བཏོན་པ་ལ་བསྒྲུབ་པར་བྱ་བའི་མིང་གཞུག་པར་བྱའོ། །ཨཱ་ཛྙཱ་པ་ཡ་ཏི་ཞེས་བྱ་བ་ལ་འོག་ཏུ་ལྷ་སྦྱིན་གྱི་ཞེས་བྱ་བ་ལ་ཡང་གཞུག་གོ །རྡོ་རྗེ་སེམས་དཔའ་མཉམ་གཞག་སྟེ། །ཞེས་བྱ་བ་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་པའོ། །སྐུ་གསུམ་རྡོ་རྗེའི་མཐར་ཐུག་པ། །ཞེས་བྱ་བ་ནི་སྐུ་དང་གསུང་དང་ཐུགས་རྡོ་རྗེའི་མཐར་ཐུག་པ་སྟེ་བསྒྲུབ་པར་བྱ་བའི་ཞལ་གསུམ་ཞེས་བྱ་བ་ནི་ལྷག་མའོ། །སྦྱང་ཞེས་བྱ་བ་ནི་མི་རུས་ལ་སོགས་པ་ལས་བྱས་པའི་ཕུར་བུའི་དབང་དུ་བྱས་ནས་གདབ་པོ་ཞེས་བྱ་བའི་དོན་ཏོ། །ཁྲོ་བོ་ནས་འབྲས་ཉིད་དུ་ནི། །ཞེས་བྱ་བ་ནི་ཡི་གེ་ཧཱུཾ་ལས་བྱུང་བ་ཞལ་གསུམ་པ་ཕྱག་དྲུག་པ་སྐུ་མདོག་ནག་པོ་རོལ་པའི་སྟང་སྟབས་ཀྱིས་བཞུགས་པ། མི་བསྐྱོད་པའི་གཙུག་གི་ནོར་བུ་ཅན། ཕྱག་ན་རལ་གྲི་དང་ལྕགས་
ཀྱུ་དང༌། འཁོར་ལོ་དང༌། ཞགས་པ་དང༌། དགྲ་སྟ་དང༌། རྩེ་གསུམ་པ་བསྣམས་པའོ། །རྡོ་རྗེ་གསུམ་གྱི་ཕུར་བུ་བསམ། །ཞེས་བྱ་བ་ནི་སྐུ་གསུང་ཐུགས་ཀྱི་ཕུར་བུའོ། །བདག་ཉིད་ཆེན་པོ་སྟོབས་པོ་ཆེ། །ཞེས་བྱ་བ་ནི་སྟོབས་པོ་ཆེའམ་རྡོ་རྗེ་ཧཱུཾ་མཛད་ཆེན་པོ་ལ་སོགས་པས་སོ། །བདུད་རྩི་ཐབ་སྦྱོར་རྡོ་རྗེ་དང༌། །ཞེས་བྱ་བ་ལ་སོགས་བདུད་རྩི་ཐབ་སྦྱོར་གྱི་གཟུགས་ཅན་གྱི་ཕུར་བུས་སོ། །རྡོ་རྗེའི་རྣལ་འབྱོར་གྱིས་ཞེས་བྱ་བ་ནི་ཁྲོ་བོའི་སྦྱོར་པ་དང་ལྡན་པས་འདི་ལ་ཕུར་བུས་གདབ་པར་བྱའོ་ཞེས་བྱ་བའི་བསམ་པ་བརྟན་པོས་སོ། །སྟེང་དུ་འང་དམ་ཚིག་དེ་ཉིད་ནི། །ཞེས་བྱ་བ་ནི་ཐུགས་ཀ་ནས་བརྩམས་ཏེ་ཇི་སྲིད་དབུའི་བར་རྡོ་རྗེ་ཕུར་བུ་དེ་ཉིད་བསམ་པར་བྱའོ། །དམ་ཚིག་ནི་ངེས་པར་བསྒོམ་པར་བྱ་བ་ཡིན་པའི་ཕྱིར་རོ། །འདི་སྐད་སྟོན་པ་ཡིན་ཏེ་གང་གི་ཚེ་རྣལ་འབྱོར་བས་བསྒྲུབ་པ་བདུན་གྱིས་ཀྱང་མ་གྲུབ་ན། རྡོ་རྗེ་སེམས་དཔའ་འམ་གང་ཡང་རུང་པའི་ང་རྒྱལ་དུ་ཇི་ལྟ་བ་བཞིན་དུ་བྱས་ལ་སྔ་མ་ལྟར་མི་རུས་ལ་སོགས་པ་ལས་བྱས་པའི་ཕུར་བུ་ཐོགས་ཏེ་ས་ལ་སོགས་པ་ལས་བྱས་པའི་རང་གི་ལྷ་མདུན་དུ་བཞག་སྟེ། དེར་གཉིས་པ་ཡང་དགུག་ཅིང་གཞུག་ལ་བཅིངས་ནས་ཕུར་བུས་ཡང་དག་པར་བཏབ་སྟེ་དེས་ཀྱང་དབུ་ནས་བརྩམས་ཏེ། ཇི་སྲིད་ཞབས་ཀྱི་མཐར་ཐུག་གི་བར་དུ་ཕྲུག་པར་བསམས་ལ་སྡིགས་མཛུབ་བྱ་བ་ལ་སོགས་པའོ་གནས་བཤད་པའི་སྦྱོར་བ་རྣམས་ཀྱིས་བསྒྲུབ་པར་བྱའོ། །བསམ་གཏན་རྡོ་རྗེའི་སྦྱོར་བ་ཡིས། །ཞེས་བྱ་བ་འདིས་ནི་བསམ་གཏན་གྱི་ཕུར་བུ་ཉིད་གསུངས་པའོ། །རྒྱལ་ཆེན་པོ་རྡོ་རྗེ་སེམས་དཔའ་དང༌། ཞེས་བྱ་བ་ལ་ནི་ཐུགས་རྗེའི་རྣལ་འབྱོར་བ་དེ་ལ་དེ་སྐད་ཅེས་བྱའོ། །སངས་རྒྱས་ཀུན་ཀྱང་ཕུང་བུས་འདེབས། །ཞེས་བྱ་བ་ནི་སངས་རྒྱས་ཀྱང་དེའི་ཕུར་བུས་འདེབས་ཞེས་བྱ་བ་བསྡམ་དང་སྦྱར་རོ། །སྤྱིའི་གསང་སྔགས་ཀྱིས་དེ་བཞིན་གཤེགས་པ་ཕུར་བུས་འདེབས་པ་ནི་བཅོམ་ལྡན་འདས་ཉིད་གཙོ་བོ་ཉིད་དེ་ཕུར་བུས་གདབ་པ་དེ་ལ་ནི་དེ་བཞིན་གཤེགས་པ་རྣམས་ཡིན་ནོ། །ལྷ་ལྷག་མ་རྣམས་བུར་བུ་གདབ་པ་ལ་ནི་རང་གི་བདག་པོ་རྣམས་ཀྱིས་བྱའོ། །ཁྱད་པར་གྱི་གསང་སྔགས་ཀྱིས་ཐམས་ཅད་ཀྱིས་ཕུར་བུ་གདབ་པ་ལ་ནི་སྐུ་རྡོ་རྗེ་ལ་སོགས་པ་ཉིད་ཀྱིས་སོ། །མྱུར་དུ་འཆི་
བ་འམ་བསྐམས་པར་འགྱུར། །ཞེས་བྱ་བ་ནི་སངས་རྒྱས་ཀྱང་ཞེས་བྱ་བ་ནི་སྔ་མ་དང་སྦྱར་རོ། །འདི་སྐད་སྟོན་པ་ཡིན་ཏེ་སྐུ་རྡོ་རྗེའི་རྣལ་འབྱོར་བས་རང་གི་བསྒྲུབ་པར་བྱ་བའི་དེ་བཞིན་གཤེགས་པ་མདུན་དུ་བསམས་ལ་དེ་ལ་གཉིས་པ་ཡང་དགུག་ཅིང་གཞུག་ལ་བཅིངས་ནས་དེའི་སྟེང་དུ་ཧཱུཾ་ལས་ཕུར་བུ་ཇི་ལྟ་བ་བཞིན་དུ་བསམས་ལ་ཁྲོས་པས་དེ་ལ་བཀའ་བསྒོ་པའི་ཚུལ་གྱིས་ཕུར་བུས་གདབ་པའི་གསང་སྔགས་ཇི་ལྟ་བ་བཞིན་དུ་ཟློས་ཤིང་ཕུར་བུས་འདེབས་པར་བསམས་ལ། ཕྱག་རྒྱ་དང་ཚམ་དམ་གྱིས་ཕུར་བུས་གདབ་པར་བྱའོ། །སྐུ་ལ་སོགས་པའི་ཕུར་བུས་གདབ་པ་ནི་ཁྱད་པར་གྱི་གསང་སྔགས་གསུངས་པ་ལ། སྐུའི་ཡེ་ཤེས་ནི་རྣམས་པར་སྣང་མཛད་ཀྱིས་ཡེ་ཤེས་སོ། །དེའི་རྣམ་པར་བསྒྱིངས་པ་ནི་དེ་བཞིན་གཤེགས་པ་ལ་སོགས་པའི་སྐུའི་ཕུར་བུས་སེམས་ཅན་གྱི་དོན་མཛད་པའོ། །དེ་ཉིད་ནི་རྡོ་རྗེ་སྟེ་དམིགས་པ་ཞེས་བྱ་བའི་དོན་ནི་བཤད་ཟིན་ཏོ། །དེ་བཞིན་གཤེགས་པ་ལ་སོགས་པའི་སྐུའི་ཕུར་བའི་གསང་སྔགས་གསུངས་པའི་རྣམ་པ་ལ་ཐུགས་རྩེ་གཅིག་ཏུ་མཛད་ཅེས་བྱ་བའི་དོན་ཏོ། །རྡོ་རྗེའི་ཞེས་བྱ་བ་ལ་སོགས་པ་ལ་རྡོ་རྗེའི་སྐུ་ནི་རྣམ་པར་སྣང་མཛད་དེ་དེ་ཉིད་དམ་ཚིག་གོ །གཉིས་སུ་མེད་པ་ནི་གཉིས་སུ་མེད་པའི་ཡེ་ཤེས་ཀྱི་རྒྱུ་མཐུན་པ་ལས་བྱུང་བ་དེའི་ཕུར་བུ་ཡིན་ལ་དེའི་དོན་གསང་སྔགས་འབྱུང་ཞེས་བྱ་བར་སྦྱར་རོ། །སྟང་སྟབས་ཀྱི་ཕྱག་རྒྱ་གསུངས་པ་ནི་ཕན་ཚུན་ཞེས་བྱ་བ་ལ་སོགས་པ་ཡིན་ཏེ། ཕན་ཚུན་དཀྲི་པའི་ཚུལ་དུ་བྱ་བ་ནི་ལག་པ་གཡོན་པ་སྒྲུབས་ལ་དེའི་སྟེང་དུ་གཡས་པ་བཞག་སྟེ། གཡོན་པའི་མཐེའུ་ཆུང་ལ་སོགས་པས་གཡས་པའི་མཐེའུ་ཆུང་ལ་སོགས་པ་བཟུང་སྟེ། ཕན་ཚུན་དཀྲི་བ་ལྟ་བུར་བྱས་ལ་གཡོན་པའི་མཐེ་བོ་གཡས་པའི་ལག་མཐིལ་གྱི་དབུས་སུ་བཀུག་ལ་བཞག་སྟེ། མཐེ་བོ་དང་སྦྱར་བ་ནི་མཐེ་བོ་སྦྱོར་བ་སྟེ་དེས་རྡོ་རྗེ་ཕུར་བུ་གདབ་པར་བྱའོ་ཞེས་བྱ་བའི་དོན་ཏོ། །སྣང་མཛད་ཞབས་ཀྱིས་མནན་ནས་སུ། །ཞེས་བྱ་བ་ནི་རྣམ་པར་སྣང་མཛད་ཀྱི་སྦྱོར་བས་བཟུང་པའོ། །བཏབ་པ་ཙམ་གྱིས་ཞེས་བྱ་བ་ནི་བསྒྲུབ་པར་བྱ་བ་ལའོ། །སྐུ་གསུང་ཡེ་ཤེས་ལས་བྱུང་བའི། །ཞེས་བྱ་བ་ནི་སྐུ་དང་གསུང་དང་ཐུགས་ལས་བྱུང་བའི་བཅོམ་ལྡན་འདས་རྣམ་པར་སྣང་
མཛད་དོ། །དམ་ཚིག་མཆོག་གི་བཞེངས་པར་མཛད། །ཅེས་བྱ་བ་ནི་བཅོམ་ལྡན་འདས་རྣམ་པར་སྣང་མཛད་རྡོ་རྗེ་ཕུར་བུའི་རྣམ་པར་ཡོངས་སུ་གྱུར་པར་བསྒོམ་པ་ནི་དམ་ཚིག་སྟེ་དེ་ཉིད་མཆོག་གིས་འབྱུང་བར་འགྱུར་བའོ། །གཞན་དུ་བྱས་ན་བརླག་པར་འགྱུར། །ཞེས་བྱ་བ་ནི་གལ་ཏེ་རྡོ་རྗེ་ཕུར་བུ་འབྱུང་བ་མ་བསྒོམས་པར་སྔགས་དང་ཕྱག་རྒྱ་འབའ་ཞིག་རབ་ཏུ་སྦྱར་ན་དེའི་ཚེ་མངོན་པར་འདོད་པའི་དངོས་གྲུབ་ཉམས་པར་འགྱུར་རོ། །འདི་སྐད་སྟོན་པ་ཡིན་ཏེ་རྣམ་པར་སྣང་མཛད་ཀྱི་རྣལ་འབྱོར་པས་ཁྲོས་པས་རང་གིས་བསྒྲུབ་པར་བྱ་བ་མདུན་དུ་ཇི་ལྟ་བ་བཞིན་དུ་བསམས་ཏེ་ཚམ་དམ་གྱི་ཕྱག་རྒྱ་བཅིངས་ཏེ། དེའི་འོག་ཏུ་ཕྱག་རྒྱ་བཅིངས་པ་ལས་བྱུང་བའི་འཁོར་ལོ་འབར་བ་ཡོངས་སུ་གྱུར་པའི་རྡོ་རྗེའི་ཕུར་བུ་བསྒྲུབ་པར་བྱ་བ་ལ་སོགས་པའི་མགོ་ནས་བརྩམས་ཏེ་རྐང་པའི་མཐར་ཐུག་གི་བར་དུ་གཟུགས་བརྙན་གྱི་ཚུལ་དུ་ཕུར་བུས་བཏབ་པར་བསམ་མོ། །ཡང་ན་བཏབ་པ་ཙམ་གྱིས་སེམས་དཔའ་ཆེ། །ཞེས་བྱ་བ་ནི་སྔ་མ་བཞིན་ནོ། །སྐུ་གསུང་ཡེ་ཤེས་ལས་བྱུང་བ། །ཞེས་བྱ་བ་ནི་ཕུར་བུའི་གཟུགས་ཅན་གྱི་བཅོམ་ལྡན་འདས་རྣམ་པར་སྣང་མཛད་དོ། །དམ་ཚིག་གིས་ཞེས་བྱ་བ་ལ་ནི་བཅོམ་ལྡན་འདས་དེ་ཉིད་ཚམ་དམ་གྱི་ཕྱག་རྒྱས་སླར་ཡང་བསྡུ་བའི་སྦྱོར་བ་མཆོག་གིས་ཆོ་ག་བཞིན་དུ་གནས་ཇི་ལྟ་བར་སླར་བསྡུའོ་ཞེས་བསྟན་ཏོ། །བཞེངས་པར་མཛད་ཅེས་བྱ་བ་ནི་བསྒྲུབ་པར་བྱ་བ་ལ་བཏབ་ནས་གྱེན་དུ་བཞུད་པའོ། །གཞན་དུ་བྱས་ན་བརླག་པར་འགྱུར། །ཞེས་བྱ་བ་ནི་སྟང་སྟབས་རྗེས་སུ་མ་བསྡུས་པའི་ཉེས་པས་སྲིན་པོ་ལ་སོགས་པ་རྣམས་ཀྱིས་ཉེ་བར་གནོད་པ་བྱེད་པའི་གླགས་རྙེད་པར་འགྱུར་བས་གནོད་པར་འགྱུར་བའི་དོན་ཏོ། །དེ་ཡང༌། སྔགས་པས་གང་ཡང་རུང་བཟུང་ནས། །དེ་ལ་འང་བྱམས་པ་ཉིད་དུ་བྱ། །རྡོ་རྗེ་གར་ལ་གནས་ནས་ཀྱང༌། །དེ་ནས་ཕྱག་རྒྱ་ལེགས་པར་བསྡུ། །ལས་ཀྱི་ཆོ་ག་མཐོང་བ་ཡིས། །རྡོ་རྗེ་གནས་སུ་གཞག་པར་བྱ། །གཞན་དུ་གསང་བ་པ་ཀུན་དང༌། །སྲིན་པོ་རྣམས་ནི་གནོད་བྱེད་དེ། །གླགས་སྐབས་ཚོལ་བར་བྱེད་པ་ཡིས། །གནོད་བྱེད་རྣམས་ནི་འཚེ་བྱེད་ཅིང༌། །གླགས་ཚོལ་རྗེས་མཐུན་ཤེས་
ནས་ནི། །སྔགས་པ་ལ་ནི་རབ་གནོད་བྱེད། །དེ་བས་རྣམ་པ་ཐམས་ཅད་དུ། །སྒྲུབ་པ་པོ་ནི་བློ་ལྡན་པས། །རྡོ་རྗེའི་གནས་ནི་ཤེས་བྱས་ལ། །སྟང་སྟབས་བསྡུ་ལ་སྦྱར་བར་བྱ། །ཞེས་གསུངས་པ་ཡིན་ནོ། །འདི་ཡང་མཚམས་སྦྱར་བ་བསྟན་པ་ལས་ཤེས་པར་བྱའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་སྟང་སྟབས་བྱ་བ་དག་བྱས་ནས། དེ་བཞིན་དུ་བསྒྲུབ་པར་བྱ་བ་ཕུར་བུས་བཏབ་པར་རྣམ་པར་བསམས་ལ། རྡོ་རྗེ་ཁུ་ཚུར་གཉིས་ཀྱིས་ཇི་ལྟ་བ་བཞིན་གར་བྱས་ནས་ཆོ་ག་བཞིན་དུ་རྐེད་པ་གཡོན་པའི་གནས་སུ་བསྡུ་བར་བྱའོ། །རྡོ་རྗེ་ཐུགས་ཀྱིས་ཞེས་བྱ་བ་ལ་སོགས་པ་ལ་རྡོ་རྗེ་ཐུགས་ཀྱི་ཡེ་ཤེས་ཆེན་པོ་ནི་ཐུགས་རྡོ་རྗེའི་ཡེ་ཤེས་སོ། །དེའི་རྣམ་པར་སྣང་མཛད་བསྒྱིངས་པ་ནི་དེ་བཞིན་གཤེགས་པ་ལ་སོགས་པའི་ཐུགས་ཀྱི་ཕུར་བུས་རྣལ་འབྱོར་པའི་མངོན་པར་འདོད་བའི་དོན་རྫོགས་པར་མཛད་པ་སྟེ་དེ་ཉིད་རྡོ་རྗེའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །དམ་ཚིག་ཆེན་པོ་ཡིས་ཞེས་བྱ་བ་ལ་སོགས་པ་ལ་ཆེན་པོ་ནི་སངས་རྒྱས་ལ་སོགས་པ་སྟེ། དེ་རྣམས་ཀྱི་དམ་ཚིག་ནི་འོག་ནས་བཤད་པའི་སྟང་སྟབས་སོ། །དེས་ཕུར་བུས་འདབས་པས་དེའི་དོན་ཏུ་གསང་སྔགས་ཕྱུང་ངོ་ཞེས་བྱ་བར་སྦྱར་རོ། །རྩེ་མོ་ལྔ་པ་བཅིངས་ནས་སུ། །ཞེས་བྱ་བ་ལ་སོགས་པ་ལ། རྡོ་རྗེ་བསྡམས་པ་བཅིངས་ནས་སྲིན་ལག་གཉིས་པོ་གོ་བཟློག་སྟེ་གུང་མོའི་ནང་དུ་གཞུག །མཐེ་བོ་དང་མཐེའུ་ཆུང་དག་སྦྱར་གུང་མོ་དག་ཀྱང་སྦྱར་བར་བྱས་ལ་གུང་མོ་གཉིས་དམ་པོར་སྦྱར་བའི་ཚིགས་གསུམ་པའི་གནས་སུ་མཛུབ་མོ་བཀུག་ནས་རྡོ་རྗེ་དང་འདྲ་བར་ནས་གང་ཙམ་གྱིས་མ་རིག་པར་བཞག་ན་རྩེ་མོ་ལྔ་པ་བཅིངས་པ་འགྱུར་ཏེ། དེས་རྡོ་རྗེའི་ཕུར་བུ་གདབ་པར་བྱས་པར་འགྱུར་བས་རྡོ་རྗེ་ཕུར་བུ་གདབ་པར་བྱ་བའི་དོན་ཏོ། །རྡོ་རྗེ་ཐུགས་ཀྱི་ཞབས་ཀྱིས་མནན། །ཞེས་བྱ་བ་ནི་ཐུགས་རྡོ་རྗེའི་སྦྱོར་བས་གཟུང་བའོ། །སྐུ་གསུམ་ཡེ་ཤེས་ལས་བྱུང་བའི། །ཞེས་བྱ་བ་ནི་ཐུགས་རྡོ་རྗེ་ཕུར་བུའི་གཟུགས་སུའོ། །དམ་ཚིག་མཆོག་གིས་ཞེས་བྱ་བ་ལ་སོགས་པའི་ཡན་ལག་དང་སྤྱིའི་དོན་བཤད་ཟིན་ཏོ། །འཇིག་རྟེན་དབང་ཕྱུག་ཅེས་བྱ་བ་ལ་སོགས་པ་ལ་འཇིག་རྟེན་དབང་ཕྱུག་ཉིད་ནི་གསུང་གི་ངོ་བོའོ། །དེ་ཉིད་དམ་ཚིག་སྟེ་དེའི་རྣམ་པར་བསྒྱིངས་པ་ནི་
དེ་བཞིན་གཤེགས་པ་ལ་སོགས་པའི་གསུང་གི་ཕུར་བུས་སེམས་ཅན་གྱི་དོན་མཛད་པ་སྟེ་དེ་ཉིད་རྡོ་རྗེའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །གསུང་གི་ཞེས་བྱ་བ་ལ་སོགས་པ་ལ་གསུང་གི་དམ་ཚིག་ནི་འཇིག་རྟེན་དབང་ཕྱུག་གོ །དེའི་སྟང་སྟབས་ནི་འོག་ནས་བཤད་པའོ། །དེས་ཕུར་བུ་འདེབས་པས་ན་དེའི་དོན་དུ་གསང་སྔགས་ཕྱུང་ངོ་ཞེས་བྱ་བར་སྦྱོར་རོ། །རྡོ་རྗེ་སོར་མོ་བཅུམ་པ་ཡི། །ཞེས་བྱ་བ་ལ་སོགས་པ་ལ་ཐལ་མོ་ཁོང་སྟོང་སྦྱར་བ་བཅིངས་ལ་པདྨ་ཁ་བྱེ་བ་ལྟ་བུར་རྡོ་རྗེའི་སོར་མོ་གཞག་པ་ནི་པདྨ་ཁ་བྱེ་འབར་བ་སྟེ་དེས་རྡོ་རྗེའི་ཕུར་བུ་གདབ་པར་བྱའོ་ཞེས་སྦྱར་རོ། །འདོད་ཆགས་རྡོ་རྗེའི་ཞབས་ཀྱིས་མནན། །ཞེས་བྱ་བ་ནི་འཇིག་རྟེན་དབང་ཕྱུག་གིས་སྦྱོར་བས་གཟུང་བའོ། །སྐུ་གསུམ་ཡེ་ཤེས་ལས་བྱུང་བ། །ཞེས་བྱ་བ་ནི་འཇིག་རྟེན་དབང་ཕྱུག་ཕུར་བུའི་གཟུགས་ཅན་ནོ། །དམ་ཚིག་མཆོག་གིས་ཞེས་བྱ་པ་ལ་སོགས་པའི་ཡན་ལག་གི་དོན་དང་སྤྱིའི་དོན་ནི་སྔ་མ་བཞིན་ནོ། །སྐུ་གསུང་ཐུགས་ཀྱི་ཆགས་པ་ཡི། །ཞེས་བྱ་བ་ནི་རང་གི་ལྷའི་སྐུ་གསུང་ཐུགས་བསྒོམ་པ་གཙོ་བོ་ལས་བྱུང་བའི་ཡིད་བདེ་བའི་ཁྱད་པར་དང་ལྡན་པའི་གསང་སྔགས་ལ་སོགས་པས་ཕུར་བུ་གདབ་པོ། །ཆོ་ག་བཟང་པོ་ཙམ་གྱིས་ནི། །ཞེས་བྱ་བ་ནི་བཤད་མ་ཐག་པའི་ཆོ་གའི་རྣམ་པས་སོ། །མནན་གྱུར་འདི་ལ་ཐེ་ཚོམ་མེད། །ཅེས་བྱ་བ་འདིས་ནི་བསམ་གཏན་གྱི་ཕུར་བུ་བསྒོམ་པ་གཙོ་བོ་བསྟན་ཏོ། །མཉེས་ཤིང་ཞེས་བྱ་བ་ནི་དེ་བཞིན་གཤེགས་པ་ལ་སོགས་པའི་ཕུར་བུས་རྣལ་འབྱོར་པའི་མངོན་པར་འདོད་པའི་དངོས་གྲུབ་གཟིགས་པའོ། །དེ་ཉིད་ཀྱིས་ན་མགུ་བ་མཉེས་པའོ། །རྡོ་རྗེ་དབྱངས་ནི་འདི་སྐད་གསུངས། །ཞེས་བྱ་བ་ནི་ཐོགས་པ་མེད་པའི་སྒྲས་གསུངས་པའོ། །ཨེ་མའོ་གསང་པའི་ཚིག་གི་མཆོག །ཅེས་བྱ་པ་ནི་སྤྱིའི་ཕུར་བུའོ། །ཨེ་མའོ་སྙིང་པོ་ཀུན་འདུས་པ། །ཞེས་བྱ་བ་ནི་སྐུའི་ཕུར་བུའོ། །ཨེ་མའོ་ཞི་བ་ཆོས་ཀྱི་ཚིག །ཅེས་བྱ་བ་ནི་གསུང་གི་ཕུར་བུའོ། །ཨེ་མའོ་ཡེ་ཤེས་ཕུར་བུ་གདབ། །ཅེས་བྱ་བ་ནི་ཐུགས་ཀྱི་ཕུར་བུའོ། །གསང་སྔགས་ཀྱི་ཕུར་བུ་ཞེས་བྱ་བ་ནི་གང་འདིར་བཤད་མ་ཐག་པའི་གསང་སྔགས་དེ་ཐམས་ཅད་ཀྱི་ཕུར་བུའོ། །བདེ་གཤེགས་བཀའ་ཡི་རྗེས་སུ་བྱེད། །ཅེས་བྱ་བ་ནི་གང་དེ་བཞིན་གཤེགས་པའི་བཀའ་རྗེས་སུ་
བྱེད་པའི་དོན་གྱིས་ན་འདི་སྐད་སྟོན་ཏེ། གསང་སྔགས་ཀྱི་ཕུར་བུ་གདབ་པ་ལ་སོགས་པ་ནི་དོན་དམ་པར་མི་སྲིད་མོད་ཀྱི་འོན་ཀྱང་དེ་བཞིན་གཤེགས་པས་དམ་ཚིག་མཆོག་མཁྱེན་པས་ཕུར་བུས་གདབ་པ་ལ་སོགས་པ་གསུངས་པ་ཡིན་ནོ། །འདི་དག་ཅེས་བྱ་པ་ལ་སོགས་པ་ལ་གཉིས་སུ་མེད་པའི་ཡེ་ཤེས་ཀྱི་རྒྱུ་མཐུན་བ་ཉིད་ཡིན་པས་ཕུར་བུ་ནི་དེ་ཁོ་ན་ཉིད་ལས་གྱུར་བའོ། །ད་ནི་དཀྱིལ་འཁོར་གྱི་ལྷ་རྣམས་ལ་མ་གཏོགས་པའི་འོད་ཟེར་ཅན་ལ་སོགས་པའི་གསང་སྔགས་དང་ལས་རྣམས་ཀྱང་གསུངས་པ་ནི་ཆོམ་རྐུན་ཐམས་ཅད་ཅེས་བྱ་བ་ལ་སོགས་པ་ཡིན་ཏེ། ཆོམ་རྐུན་ཐམས་ཅད་འཆིང་ཞིང་ལྡོངས་པར་བྱེད་པའི་རྡོ་རྗེ་ནི་འོད་ཟེར་ཅན་ནོ། །དེ་ལ་དམིགས་བ་ཞེས་བྱ་བའི་དོན་ནི་བཤད་ཟིན་ཏོ། །ཐུགས་ནི་དགྱེས་ཤིང་མགུ་བར་གྱུར། །ཞེས་བྱ་བ་ནི་གདུག་པ་མ་ལུས་པ་ལྡོངས་པར་བྱེད་པའི་རིགས་སྔགས་འདིས་སེམས་ཅན་གྱི་ཁམས་བདེ་བར་བྱས་པར་གཟིགས་པས་རབ་ཏུ་དགྱེས་པ་བརྙེས་པའོ། །སྦྱོར་བ་ཞེས་བྱ་བ་ནི་ཉེ་བར་མཚོན་པ་ཙམ་སྟེ་དེས་ན་བསྒོམ་པ་ལ་སོགས་པ་ཡང་མངོན་པར་བརྩོན་པའོ། །དེའི་རབ་ཏུ་སྦྱོར་བ་ཡང་འདི་ཡིན་ཏེ་རྟ་བདུན་གྱི་ཉེ་བར་མཛེས་པར་བྱས་པའི་ཤིང་རྟ་ལ་གནས་པའི་གཞལ་ཡས་ཁང་གི་ནང་དུ་ལྷ་མོ་འོད་ཟེར་ཅན་གྱི་ང་རྒྱལ་ཇི་ལྟ་བ་བཞིན་དུ་བྱས་ཏེ། དེའི་དཀྱིལ་འཁོར་གྱི་དབུས་ཀྱི་ངོས་ཐམས་ཅད་ལ་དེའི་གྲོགས་རྣམས་དེར་གནས་པར་བསམས་ལ། ཉི་མའི་དཀྱིལ་འཁོར་གཉིས་ཀྱིས་གཞལ་ཡས་ཁང་ཁ་སྦྱར་བྱས་ཏེ། དེ་ལས་བྱུང་བའི་འོད་ཟེར་དམར་པོ་རྣམས་ལྷ་མོ་འོད་ཟེར་ཅན་གྱི་སྐུར་ཡོངས་སུ་གྱུར་པ་ཁབ་དང་སྐུད་པ་ཐོགས་པས་གདུག་པ་རྣམས་ཀྱི་ཁ་དང་མིག་འཚེམ་པར་བསམས་ལ། ལག་པ་གཡོན་པར་ཟླ་བ་རྡོ་རྗེ་ཟླ་བ་ལ་ཡང་འཁོར་ལོ་རྩིབས་བརྒྱད་པ་དེའི་ལྟེ་བར་འོད་ཟེར་གྱི་སྔགས་ཉིད་བརྟག་གོ །སྔགས་དེའི་ལོགས་ཀྱི་རྩིབས་རྣམས་ལ་གྲོགས་ཀྱི་མིང་བཀོད་ལ། དབུགས་མི་འབྱིན་པར་དེའི་སྔགས་ལན་བདུན་བརྗོད་ལ། ཨོཾ་ཨཱཿ་ཧཱུཾ་ཞེས་བརྗོད་ནས། རྡོ་རྗེ་ཁུ་ཚུར་གྱིས་གོས་ཀྱིས་གཡོགས་པར་བྱས་ལ། དེ་མ་བཀྲོལ་བར་འོད་ཟེར་ཅན་གྱི་གསང་སྔགས་ཟློས་ཤིང་མི་སྨྲ་བར་དོགས་པ་མེད་ཅིང་བློ་བརྟན་པས་འགྲོ་བར་བྱའོ། །གདོན་པར་བྱེད་པ་ཞེས་བྱ་བ་ལ་སོགས་པ་ལ་གནོད་པར་བྱེད་པ་ཐམས་ཅད་ནི་སེམས་ཅན་མང་པོ་ལ་འཁུ་
བར་བྱེད་པ་ལ་སོགས་པའོ། །དེ་རྣམས་འདུལ་བ་ནི་རང་གི་ཉེས་པ་ལས་བཟློག་པ་སྟེ་དེ་ནི་རྡོ་རྗེ་པདྨ་དཀར་པོའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །དུར་ཁྲོད་ཀྱི་རས་ལ་སྲིན་མོ་བཙག་གིས་བྲིས་ནས་ཞེས་བྱ་བ་ནི་དུར་ཁྲོད་ཀྱི་རས་ཉིད་ལ་བྲི་བའོ། །ལེགས་པར་སྦས་ཏེ་ཞེས་བྱ་བ་ལ་དབེན་པར་གཞག་པར་བྱའོ་ཞེས་བྱ་པ་ནི་ལྷག་མའོ། །རིག་སྔགས་བརྒྱ་རྩ་བརྒྱད་བཟླས་བརྗོད་བྱས་ལ་ཞེས་བྱ་བ་ནི་རྗེས་སུ་མཐུན་པར་བསྒྲུབ་པར་བྱ་བའི་མིང་བསྐུལ་ཚིག་དང་བཅས་པའོ། །མིང་ནས་སྨོས་ཤིང་ཞེས་བྱ་བ་ནི་བསྒྲུབ་པར་བྱ་བའི་མིང་བརྗོད་པའོ། །ཕྱིར་རྒོལ་པ་དང་དགྲ་ཐམས་ཅད་ཅེས་བྱ་བ་ནི་རྫས་གཅིག་མངོན་པར་འདོད་པ་ལས་བྱུང་བའི་དགྲ་བོ་ནི་ཕྱིར་རྒོལ་བའོ། །མི་མཛའ་བའི་ཕྱོགས་སུ་ལྷུང་བ་ནི་དགྲ་བོའོ། །བཅིང་བ་ཞེས་བྱ་བ་ནི་ཅི་ཡང་མི་བྱེད་པ་ཉིད་དུ་བྱེད་དོ། །དེ་ཉིད་ནི་འོག་མས་བསྟན་པ་ནི་མནན་པ་དང་ཞེས་བྱ་བ་ལ་སོགས་ཏེ་མི་འགུལ་བར་བྱས་པ་ནི་མནན་པའོ། །ཚིག་དང་བྲལ་བར་བྱས་པ་ནི་རྨོངས་པའོ། །འདི་སྐད་སྟོན་པ་ཡིན་ཏེ་རིན་ལ་མི་བརྩེག་པར་ཉེས་པའམ་འབད་པ་མེད་ལས་བྱུང་བའི་དུར་ཁྲོད་ཀྱི་རས་ལ་བཅོམ་ལྡན་འདས་ཇི་ལྟ་བ་བཞིན་དུ་བྲིས་ལ་དབེན་པར་བཞག་སྟེ། དགུག་པ་ལ་སོགས་པ་བྱས་ནས་གུ་གུལ་གྱིས་བདུག་པ་བསྲེག་ལ་ཉིན་ཞག་བདུན་གྱི་བར་དུ་ཐུན་བཞིར་མེ་ཏོག་དམར་པོ་ལ་སོགས་པ་མཆོད་པ་རྣམ་པ་ལྔས་ལེགས་པར་མཆོད་ལ། ལྷ་སྦྱིན་སྟམྦྷ་ཡ་ཞེའམ། ཛམྦྷ་ཡ་ཞེས་བསྐུལ་བའི་ཚིག་དང་བཅས་པར་རིག་པ་ལ་ལན་བརྒྱ་རྩ་བརྒྱད་བཟླས་ལ་རས་རིས་བླངས་ཏེ་ཉི་མའི་གུང་ངམ་མཚན་ཕྱེད་དུ་དུར་ཁྲོད་དུ་སོང་སྟེ་དེར་ཙོག་བུས་དོང་བྱས་ལ། ཐོད་པ་གཉིས་ཀྱི་བར་དུ་རས་རིས་བཅུག་ལ་སས་བཀབ་སྟེ་ཡུངས་ཀར་དཀར་པོ་ལ་རིག་སྔགས་ལྷ་སྦྱིན་སྟམྦྷ་ཡ་ཞེས་བསྐུལ་བའི་ཚིག་དང་ལྡན་པར་བརྒྱ་རྩ་བརྒྱད་བཟླས་ལ། དེའི་སྟེང་དུ་གཏོར་ལ་ལས་གྲུབ་ནས་བཅོམ་ལྡན་འདས་མ་སྤྱན་དྲངས་ལ་ཇི་ལྟ་བ་བཞིན་མཆོད་དེ་སླར་གཤེགས་སུ་གསོལ་ལོ། །ནད་ཆེན་པོ་ཞེས་བྱ་བ་ལ་སོགས་པ་ལ་ནད་ཆེན་པོ་ཐམས་ཅད་ནི་རིམས་ལ་སོགས་པའོ། །དེ་སེལ་བ་ནི་མེད་པར་བསལ་ཏེ་དེས་ན་རྣམ་པར་རྒྱལ་བ་ཞེས་བྱ་བ་སྟེ་རི་ཁྲོད་ཀྱི་ལོ་མ་ཅན་ལ་དེ་སྐད་ཅེས་བྱའོ། །
དེ་ཉིད་ནི་ཡེ་ཤེས་ཀྱི་རྡོ་རྗེའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །ཡམ་ཤིང་ཞེས་བྱ་བ་ལ་སོགས་པ་ནི་གོ་སླའོ། །འདི་སྐད་སྟོན་པ་ཡིན་ཏེ་ཞི་བའི་ཚོགས་ཐབ་ཁུང་གི་དབུས་སུ་བཅོམ་ལྡན་འདས་ཡུམ་ཇི་ལྟ་བ་བཞིན་དུ་བསྐྱེད་ལ། དེའི་ཞལ་དུ་ཏིལ་ལ་སོགས་པ་མར་ལ་སོགས་དང་བསྲེས་པ་དབུལ་ཞིང་སྲེག་བླུགས་རེ་རེའི་རྗེས་ཐོགས་ལ་ཡང་དེའི་སྐུ་ལས་བྱུང་བའི་བདུད་རྩིའི་ཆུས་ཡོངས་སུ་གང་བའི་བུམ་པ་འཛིན་པའི་རི་ཁྲོད་ཀྱི་ལོ་མ་ཅན་གྱི་ལྷ་མོ་ནམ་མཁའ་ཁྱབ་པ་རྣམས་ཀྱིས་བསྒྲུབ་པར་བྱ་བའི་དབང་བསྐུར་བར་གྱུར་བས་རིམས་ལ་སོགས་པའི་ནད་ཐམས་ཅད་སེལ་བར་བསམ་པར་བྱའོ། །སྡང་བ་ཐམས་ཅད་ཅེས་བྱ་བ་ལ་སོགས་པ་ལ་སྡང་བ་ཐམས་ཅད་རྣམ་པར་འཇོམས་པ་ནི་ནུས་པ་མེད་པར་བྱས་པའོ། །དེས་སེམས་ཅན་རྣམས་གདུག་པའི་འཇིགས་པ་ལས་སྒྲོལ་ཞིང་ཐར་བར་བྱེད་པས་ན་སྡང་བ་ཐམས་ཅད་རྣམ་པར་སེལ་བ་ཞེས་བྱ་སྟེ། སྟོང་ཆེན་མོ་རབ་ཏུ་འཇོམས་མ་ལ་དེ་སྐད་ཅེས་བྱའོ། །དེ་ཉིད་ཡེ་ཤེས་ཆེན་པོའི་སྟོབས་ཀྱིས་རྣམ་པར་རྒྱལ་བ་ཞེས་བྱ་སྟེ། ཡེ་ཤེས་ཆེན་པོའི་སྟོབས་ཀྱིས་རྣམ་པར་རྒྱལ་བས་སོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །གྱུར་ཅེས་བྱ་བ་ནི་དེ་ལྟར་གྱུར་བའོ། །གཙོ་བོ་ཞེས་བྱ་བདེ་ལྟར་ཤེས་ནས་འདི་སྐད་སྨྲས་སོ་ཞེས་བྱ་བ་ནི་ལྕགས་མའོ། །ཕྱག་སྟོང་ལྡན་ཞིང་ཞལ་སྟོང་ལ། །ཞེས་བྱ་བ་ནི་སྤྲུལ་པ་ཉིད་ཀྱིས་སོ། །གང་ཕྱིར། བརྩོན་འགྲུས་ཆེན་མོ་ཕྱག་བརྒྱད་བ། །ཞེས་བྱ་བ་དང༌། ཞལ་རས་ཉི་མ་བཞི་པ་སྟེ། །ཞེས་བྱ་བ་གསུངས་པའི་ཕྱིར་རོ། །ཁྲོ་དང་སྒེག་པའི་ཉམས་དང་ལྡན། །ཞེས་བྱ་བ་ནི་སྒེག་པའི་ཉམས་དང་བཅས་པ་དང་ལྡན་པའོ་ཞེས་བྱ་བའི་བར་དུའོ། །ཕྱག་གཡོན་པདྨ་རྡོ་རྗེ་ནོར། །ཞེས་བྱ་བ་ནི་ཕྱག་གཡོན་པ་ལ་དང་པོ་ན་པདྨའི་སྟེང་ན་རྡོ་རྗེས་མཚན་པའི་ཡིད་བཞིན་གྱི་ནོར་བུ་བསྣམས་པའོ། །མདོག་དམར་ཞེས་བྱ་བ་ནི་ཉི་མའི་འོད་ཀྱི་དཀྱིལ་འཁོར་ཅན་ནོ། །རང་གི་རྣལ་འབྱོར་ལ་བརྩོན་པ། །ཞེས་བྱ་བ་ནི་རང་གི་ང་རྒྱལ་དུ་བྱས་པ་ལ་རབ་ཏུ་འབད་པས་སོ། །འབར་ཕྲེང་ཅན་ཞེས་བྱ་བ་ལ་འདིར་བསྒོམ་མོ་ཞེས་བྱ་བ་ནི་ལྷག་མའོ། །དེའི་ལས་ཡི་བསྐུལ་བའི་ཞེས་བྱ་བ་ནི་རྒྱུད་གཞན་གྱི་དཔུང་རྣམ་པར་བཟློག་ཤིག་ཅེས་བྱ་
བ་ལ་སོགས་པའི་ཚིག་དང་ལྡན་པས་བསྐུལ་བར་བྱའོ་ཞེས་བྱ་བའི་དོན་ཏོ། །རྣལ་འབྱོར་དབང་ཕྱུག་ལས་འདོད་པས། །ཞེས་བྱ་བ་ནི་སྔགས་པས་བློའི་ཡུལ་དུ་བྱས་པའོ། །འདི་ཞེས་བྱ་བ་ནི་རབ་ཏུ་སྦྱོར་བས་སོ། །དཔུང་ཆེན་པོ་ཞེས་བྱ་བ་ནི་ཡན་ལག་བཞི་པའི་མཚན་ཉིད་དོ། །རྣམ་པར་ལྟ་བ་ནི་བདག་ལ་སོགས་པ་བསྲུང་བའི་ཕྱིར་ངེས་པར་རྟོག་པའོ། །གང་ཐམས་ཅད་བསྲུང་བ་དེ་ནི་སྟོབས་ཀྱི་མཆོག་སྟེ་ཤིན་ཏུ་སྟོབས་དང་ལྡན་པའོ། །སྟོང་ཆེན་མོ་རབ་ཏུ་འཇོམས་མ་ནི་ཤིན་ཏུ་ངོ་མཚར་དུ་གྱུར་པ་ལ་འཇུག་པས་ཏེ་སྟོང་གིས་ལན་སྟོང་དུ་རྣམ་པར་འཇོམས་པས་ན་བཅོམ་ལྡན་འདས་ཡུམ་དེ་ལ་དེ་སྐད་ཅེས་བྱའོ། །དེ་ཉིད་ཡེ་ཤེས་ཀྱིས་རྣམ་པར་རྒྱལ་བའི་རྡོ་རྗེའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ནོ། །འདིས་ནི་འདི་སྐད་སྟོན་པ་ཡིན་ཏེ། འགའ་ཞིག་བདག་ཉིད་སྲུང་ཞིང་གཞན་གྱི་དཔུང་རྣམ་པར་འཇིག་པ་ལ་ཇི་སྐད་བཤད་པའི་བཅོམ་ལྡན་འདས་ཡུམ་འདི་དང་སྦྱར་བར་བྱའོ། །བརྒྱ་བྱིན་ཞེས་བྱ་བ་ལ་སོགས་པ་ལ་བརྒྱ་བྱིན་གྱི་མངོན་པར་མཐོ་བ་ནི་བསྒྲེང་བའོ། །འདིའི་དོན་གྱི་སྟོབས་ནི་ནུས་པའི་ཁྱད་པར་དེ་ཡང་དག་པར་བསྐྱེད་པའི་རྒྱལ་མཚན་མཆོག་གི་དཔུང་རྒྱན་གང་ཡིན་པ་དེ་ལ་དེ་སྐད་ཅེས་བྱའོ། །དེ་ཉིད་ཀྱང་ལ་མ་ཡིན་རྣམ་པར་འཛོམས་པས་ན་དེ་སྐད་ཅེས་གསུངས་པ་ཡིན་ཏེ་དེ་ཉིད་ནི་རྒྱལ་བའི་རྡོ་རྗེའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །ཕྱོགས་བསྡིགས་པ་ཡི་ཕྱག་རྒྱ་ཅན། །ཞེས་བྱ་བ་ལ་རང་རང་གི་ཕྱོགས་ན་འདུག་པའི་གདུག་པ་རྣམས་ལ་བསྡིགས་པའི་མཛུབ་མོའི་ཕྱག་རྒྱ་དང་ལྡན་པའོ་ཞེས་བྱ་བ་ནི་ལྷག་མའོ། །བསྡིགས་པ་སྟེ་ཞེས་བྱ་བ་ནི་བསྲུང་བའི་བདག་ཉིད་ཅན་ནོ། །རྡོ་རྗེ་རོ་ལངས་ཕྱུང་བ་ཡིས། །ཞེས་བྱ་བ་ནི་འབྱིན་པའོ། །དཔུང་རྣམས་བཅོམ་ཞིང་གཏོང་བར་བལྟ། །ཞེས་བྱ་བ་ནི་བཅོམ་ལྡན་འདས་མ་དེ་བསྒོམ་ཞིང་དེ་ལས་བྱུང་བའི་རོ་ལངས་རྣམས་ཀྱིས་གཞན་གྱི་དཔུང་རྣམ་པར་འཛོམས་བར་བལྟ་བ་དང༌། བསྒོམ་པར་བྱའོ་ཞེས་འདིར་གཉི་ག་སྦྱར་རོ། །འདི་སྐད་སྟོན་པ་ཡིན་ཏེ་སྔར་བསྙེན་པ་བྱས་ལ་རས་རིན་ལ་མི་བརྩེག་པར་ཉོས་ཏེ་དེའི་སྔགས་ཟློས་པ་ལ་བརྩོན་ཞིང་གསོ་སྦྱོང་དང་ལྡན་པའི་བཟོ་བོ་མཁས་པས་བཅོམ་ལྡན་འདས་མ་ཇི་ལྟ་བ་བཞིན་དུ་བྲིས་ལ། དེས་དགུག་པ་ལ་སོགས་
བ་བྱས་ཏེ་དུས་ཅུང་ཟད་དུ་ཡང་བཟླས་ལ་གཡུལ་འགྱེད་པའི་ས་ཕྱོགས་སུ་སོང་སྟེ་གླང་པོ་ཆེའི་རྒྱབ་ཏུ་གཞན་གྱི་དཔུང་ལ་མངོན་བར་ཕྱོགས་བར་རས་རིས་བསྒྲེངས་ལ་དེས་དགུག་པ་སོགས་པ་བྱས་ཏེ་རས་དཀར་པོ་མ་སྤྱད་པས་གཡོགས་ནས་མཆོད་ཆ་འབབ་བ་ལ་མངོན་པར་ཕྱོགས་བའི་དུས་སུ་གླང་བོའི་མདུན་དུ་བརྟན་ཞིང་མི་དར་ལ་བབ་པའི་སྐྱེས་བུ་མཚོན་ཆ་སྟོང་ཐོགས་བས་གཤིན་རྗེ་གཤེད་ལ་སོགས་པའི་ཁོར་བོའི་ང་རྒྱལ་དུ་བྱས་ལ་རིག་པ་མིག་གཡོ་བའི་དར་དབྱངས་བཅིངས་ཏེ་བསྟན་པ་ལ་སོགས་པ་བསྲུང་བའི་དོན་དུ་རྒྱལ་བར་གྱུར་ཅིག་བའི་སྒྲ་དབྱངས་དང་དུང་གིས་གྲ་དང་ཅ་ཅོ་གདོན་པར་བྱ་ཞིང་ང་རྒྱལ་བསྐྱེད་ལ་མྱུར་བར་རས་རིས་ཕྱི་ནས་དེ་ལས་བྱུང་བའི་རོ་ལངས་རྣམས་ཀྱིས་གཞན་ཡི་དབུར་འཛོམས་པར་འགྱུར་བཞིན་པར་བལྟས་ལ། རྒྱལ་བར་གྱུར་ཅིག་རྒྱལ་བར་གྱུར་ཅིག་ཅེས་བརྗོད་ཅིང་གསང་སྔགས་གདོན་པར་བྱའོ། །འཇིག་རྟེན་གསུམ་ལ་ཞེས་བྱ་བ་ལ་སོགས་པ་ལ་འཇིག་རྟེན་གསུམ་ནི་གནས་ཏེ་དེ་ལ་གནས་པའི་གདུག་པ་རྣམ་པར་འཇིག་པར་ནུས་ཤིང་བསལ་བའོ། །དེ་ལ་མཁས་པ་ནི་ལེགས་པར་བྱང་བ་སྟེ་རྒྱལ་མཚན་མཆོག་གི་དཔུང་རྒྱན་ལ་དེ་སྐད་ཅེས་བྱའོ། །དེ་ཉིད་ནི་མཆོག་སྟེ་སངས་རྒྱས་རྣམས་ཀྱི་རྩེ་མོ་ཡིན་ལ་དེ་ཉིད་རྡོ་རྗེའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །མངལ་ཞེས་བྱ་བ་ལ་སོགས་པ་ལ་བུད་མེད་ཐམས་ཅད་ཀྱི་མངལ་ཡང་དག་པར་བསྐྱེད་པ་ནི་མངལ་ཆགས་པ་སྟ། དོན་དེ་སྤྲོས་པར་མཛད་པས་ན་སོ་སོར་འབྲང་མ་ཆེན་མོ་ལ་དེ་སྐད་ཅེས་བྱ་སྟེ་དེ་ཉིད་རྡོ་རྗེའོ། །དེ་ལ་དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །འཇིགས་པ་དང་ནི་སྐྲག་པ་ཡིས། །ཞེས་བྱ་བ་ནི་རྗེས་སུ་ཉེ་བར་གྱུར་པར་ཤེས་པར་བྱའོ། །སྐུ་གསུམ་འཕྲོ་བ་དང་ལྡན་པ། །ཞེས་བྱ་བ་ནི་སྐུ་དང་གསུང་དང་ཐུགས་ཏེ་གསུམ་གྱི་ཚུལ་སྤྲོ་བ་གང་ཡིན་པ་དེ་ལ་དེ་སྐད་ཅེས་བྱ་བ་སྟེ་བསྒོམ་པ་ཞེས་བྱ་བ་ནི་ལྷག་མའོ། །བུམ་པའི་མཚོ་དང་ཞེས་བྱ་བ་ལ་སོགས་པ་ནི་སྦྱོར་བ་གསུངས་པ་སྟེ། མངལ་འཛག་པ་དང་བུ་མི་འཆོ་བ་དང༌། །མངལ་མི་ཆགས་པ་དང༌། མངལ་ཉམས་པ་རྣམས་སོ་སོ་འབྲང་མ་ཆེན་མོའི་དཀྱིལ་འཁོར་འདིར་བཅུག་ལ་དེ་ཞེས་བྱ་བ་འདིས་བསམ་མོ་ཞེས་བྱ་བ་ནི་ལྷག་མའོ། །སྐལ་ངན་ནི་ཞེས་བྱ་བ་ནི་སྡིག་པའི་ལུས་བྱུང་བའོ། །སྡིག་བ་
དྲལ་བས་དྲལ་ནས་ཀྱང༌། །ཞེས་བྱ་བ་ནི་སྡིག་པ་དྲལ་བའི་སྔགས་ཕྱག་རྒྱ་དང་བཅས་པས་སོ། །དེ་ལ་འདི་ནི་སྔགས་དང་ཕྱག་རྒྱའོ། །རྡོ་རྗེ་བཅིང་བ་དམ་བྱས་ཏེ། །གུང་མོ་གཉི་ག་སྦྱར་ནས་སུ། །ཐ་མ་བཞི་ནི་རྩེ་མོ་སྦྱར། །སྡིག་པ་འཛོམས་པར་གྲགས་པ་ཡིན། །ཞེས་གསུངས་པ་ནི་སྡིགས་པ་དྲལ་བའི་ཕྱག་རྒྱའོ། །ཨོཾ་བཛྲ་པཱ་ཎི་བི་སྥོ་ཊ་ཡ་སརྦ་ཨ་པཱ་བནྡྷ་ནཱ་ནི་པྲ་མོ་ཀཥ་ཡ་ག་ཏི་བྷྱ་སརྦ་སཏྭཱ་མཾ། སརྦ་ཏ་ཐཱ་ག་ཏཱ་བཛྲ་ས་མ་ཡ་ཏྲཊ། ཅེས་བྱ་བ་ནི་སྔགས་སོ། །འདི་སྐད་སྟོན་པ་ཡིན་ཏེ། སོ་སོ་འབྲང་མ་ཆེན་མོའི་དཀྱིལ་འཁོར་ཇི་ལྟ་བ་བཞིན་དུ་བྲིས་ལ། བུད་མེད་བུ་མི་འཚོ་བའམ་མངལ་ཉམས་པར་དཀྱིལ་འཁོར་དུ་བཅུག་ལ་རིག་པའི་དབང་བསྐུར་བ་བྱིན་ལ་དབང་བསྐུར་བའི་དཀྱིལ་འཁོར་དུ་བཀུག་སྟེ་བཞག་ནས། ཇི་སྐད་དུ་བཤད་པའི་སྡིག་པ་རྡོ་རྗེ་ཞགས་པའི་ཕྱག་རྒྱ་དང་སྔགས་ཀྱིས་ཕྱུང་ལ་སྡིག་པ་དྲལ་བའི་ཕྱག་རྒྱ་དང་སྔགས་ཀྱིས་ཡང་དག་པར་དྲལ་ཏེ། སོ་སོ་འབྲང་མ་ཆེན་མོའི་སྐུར་རྣལ་འབྱོར་མ་ཆེན་མོ་བསམས་ལ་སངས་རྒྱས་དང་རྡོ་རྗེ་འཛིན་པ་ལ་སོགས་པ་དེའི་ལུགས་ལ་འཛམ་པའི་གཟུགས་ཅན་དུ་བཞུགས་པར་བསམས་ལ་དབང་བསྐུར་བའི་ཆོ་གས་བུམ་པའི་ཆུས་དབང་བསྐུར་བར་བྱའོ། །མངལ་ཐམས་ཅད་ཅེས་བྱ་བ་ལ་བུད་མེད་ཐམས་ཅད་ཀྱི་མངལ་དེས་རྣམ་པར་གཟིགས་པས་བརྟན་པར་བྱེད་པའི་ཡེ་ཤེས་གང་ཡིན་པ་དེ་སོ་སོ་འབྲང་ཞིང་ཚོར་བར་བྱེད་པས་བཅོམ་ལྡན་འདས་མ་དེ་ལ་དེ་སྐད་ཅེས་བྱ་སྟེ་དེ་ཉིད་རྣམ་པར་རྒྱལ་བའི་རྡོ་རྗེའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །ནོར་གྱི་རྒྱུན་ཞེས་བྱ་བ་ལ་སོགས་པ་ལ་ནོར་གྱི་རྒྱུན་ནི་མངོན་པར་འདོད་པའི་རིན་པོ་ཆེའི་རྒྱུན་ཡང་དག་པར་འཛིན་ཅིང་སེམས་ཅན་སོ་སོའི་རྒྱུད་ལ་མི་གཡོ་བར་བྱེད་པས་ནོར་གྱི་རྒྱུན་ལ་དེ་སྐད་ཅེས་བྱ་སྟེ་དེ་ཉིད་ཡེ་ཤེས་རྡོ་རྗེའོ། །དམིགས་པ་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །བཅོམ་ལྡན་འདས་ནོར་གྱི་རྒྱུན་ཞེས་བྱ་བ་ལ་ཞེས་བྱ་བའི་སྒྲ་ནི་སོགས་པའི་སྒྲ་སྟེ་དེ་བས་ན་དབུལ་བ་རྣམ་པར་འཇིག་པ་ཞེས་བྱ་བ་ལ་སོགས་པ་ཡོངས་སུ་གཟུང་ངོ༌། །དེ་བས་ན་འདི་ལྟར་མཚན་རྣམས་ཞེས་བྱ་བ་ཚིག་མང་པོ་ལ་སྨོས་པ་ཡིན་ནོ། །བའི་ཞེས་བྱ་བ་ནི་ཡི་གེ་བ་ལས་བསམ་པར་བྱ་སེ་བཤད་མ་ཐག་པའི་མན་ངག་གཞུག་པར་གྱུར་པ་ཇི་ལྟ་བ་བཞིན་དུ་
བསམས་ལ་རིན་པོ་ཆེ་སྤྲོ་བར་བྱའོ་ཞེས་སྦྱར་བར་བྱའོ། །དེ་ལ་ཁྱིམ་གྱི་ཕྱོགས་དབེན་པ་ཞིག་ཏུ་བཅོམ་ལྡན་འདས་མ་རས་རིས་ལ་སོགས་པར་སྤྱན་དྲང་བ་ལ་སོགས་པར་སྤྱན་དྲང་བ་ལ་སོགས་པའི་ཆོ་ག་ཐམས་ཅད་ཇི་ལྟ་བ་བཞིན་དུ་རྫོགས་པར་བྱས་ལ་ཁྱིམ་དེར་ཚུལ་ཁྲིམས་རྣམ་པར་དག་ཅིང་དགེ་བ་ཕུན་སུམ་ཚོགས་པའི་བུད་མེད་གཙོ་མོ་མཆོད་པ་ལ་སོགས་པ་བྱེད་དུ་བཅུག་ནི་ཁྱིམ་ཡང་དག་པར་འབྱོར་པར་འགྱུར་བར་ཤེས་པར་བྱའོ། །ནོར་གྱི་རྒྱུན་ཞེས་བྱ་བ་ལ་སོགས་པ་ལ་ནོར་གྱི་རྒྱུན་རབ་ཏུ་འབེབས་ཤིང་དེར་རྒྱ་ཆེ་བའི་ཡེ་ཤེས་ཀྱི་ངོ་བོ་ཉིད་དུ་གྱུར་པས་བཅོམ་ལྡན་འདས་ཡུམ་ལ་དེ་སྐད་ཅེས་བྱ་སྟེ་དེ་ཉིད་རྡོ་རྗེའོ། །དམིགས་པ་ཞེས་བྱ་བ་ལ་སོགས་པ་ནི་སྔར་བཤད་ཟིན་ཏོ། །འཕྲོག་མའི་ཞེས་བྱ་བ་ལ་འཕྲོག་མའི་དགའ་སྟོན་ནི་སྤྲོ་བ་སྟེ་དེས་གནོད་སྦྱིན་མའི་ཚོགས་དགའ་བར་བྱེད་ཅིང་ཡིད་བདེ་བ་བསྐྱེད་པའོ། །དེས་དངོས་གྲུབ་ཏུ་གྱུར་པ་སྟེ་དོན་དེ་ནི་རྡོ་རྗེའོ། །དམིགས་པ་ཞེས་བྱ་བ་ལ་སོགས་པ་ནི་རིགས་དང་ལྡན་པའི་མིང་སྟེ་གནོད་སྦྱིན་མའི་ཚོགས་དགའ་བར་བྱེད་པ་འཕྲོག་མའི་གསང་སྔགས་གསུངས་པའི་རྣམ་པར་ཐུགས་རྩེ་གཅིག་ཏུ་མཛོད་ཅེས་བྱ་བའི་དོན་ཏོ། །དངོས་གྲུབ་ཕྱིར་ནི་མངོན་ཕྱོགས་ནས། །ཞེས་བྱ་བ་ནི་དངོས་གྲུབ་སྩོལ་བའི་ཕྱིར་མངོན་དུ་ཕྱོགས་པར་གྱུར་པའོ། །ཁྲོ་བོའི་འཁོར་ལོ་གནོད་སྦྱིན་མ་བརྒྱད་ཀྱི་ཞེས་བྱ་བ་ནི་ཇི་སྐད་དུ་བཤད་པའི་ཕྱིའི་དཀྱིལ་འཁོར་དུ་ཕྱོགས་བརྒྱད་ལ་ཁོར་བོ་བརྒྱད་ཡོད་པའི་ཁྲོ་བོའི་འཁོར་ལོ་དེར་ཐུགས་རྡོ་རྗེ་ལ་སོགས་པའི་གནས་སུ་རྫོགས་བ་ལ་སོགས་པའི་དམ་ཚིག་གི་ཕྱག་རྒྱའོ། །གནོད་སྦྱིན་མོ་བརྒྱད་པོ་ནི་གནོད་སྦྱིན་གྱི་མདོག་ཅན་ནོ། །དབུས་ན་འཕྲོག་མས་བརྒྱན་ཞེས་བྱ་བ་ནི་རྣམ་པར་སྣང་མཛད་ཀྱི་གནས་སུ་འཕྲོག་པ་རྒྱན་ཐམས་ཅད་ཀྱིས་བརྒྱན་པའོ། །ལྕགས་ཀྱུའི་འབྲས་བུ་ནེའུ་ལེ་ཅན། །ཞེས་བྱ་བ་ནི་གནོད་སྦྱིན་དང་གནོད་སྦྱིན་མོ་རྣམས་ཀྱི་ལག་པ་གཡས་པ་གཉིས་ན་འབྲས་བུ་བཱི་ཛ་པཱུ་ར་དང་ལྕགས་ཀྱུ་ཐོགས་པ། ལག་པ་གཡོན་གྱི་དང་པོས་ནེའུ་ལེ་འཛིན་པ་གཉིས་པས་སྟན་ལ་བསྙེས་ཏེ་འཛིན་པའོ། །གནོད་སྦྱིན་བརྒྱད་ཀྱིས་བརྒྱན་ནས་སུ། །གནོད་སྦྱིན་མ་ཀུན་བསྒྲུབ་པར་བྱ། །ཞེས་བྱ་བ་ནི་རིམ་པ་གཉིས་པ་ལ་ཤར་ལ་སོགས་པའི་ཕྱོགས་རྣམས་སུ་གང་བ་བཟང་པོ་དང༌། རྣམ་ཐོས་
སྲས་དང་ནོར་སྦྱིན་དང་ནོར་བུ་བཟང་པོ་ཞེས་བྱ་བའི་གནོད་སྦྱིན་བཞི་པོ་སྔོན་པོ་དང་སེར་པོ་དང་དམར་པོ་དང་སེར་པོའོ། །མེ་ལ་སོགས་པའི་མཚམས་རྣམས་སུ་བི་ཙི་ཀུཎྜ་ལི་དང་ཀི་ལི་མ་ལི་དང་སྒོའི་དབང་མོ་དང༌། སྤྱོད་པའི་དབང་མོ་དམར་མོ་དང་ལྗང་གུ་དང་སེར་པོ་དང་གསེར་གྱི་མདོག་སྟེ་དེ་རྣམས་ཀྱིས་བཀླུབས་ཤིང་བརྒྱན་པ་གཤིན་རྗེ་གཤེད་ལ་སོགས་པའི་སྦྱོར་བས་ཇི་ལྟ་བ་བཞིན་དུ་བསྒྲུབ་པར་བྱའོ། །འཕྲོག་མ་ཡང་གཡོན་གྱི་གཉིས་པས་དགའ་བྱེད་ནུ་མ་ལྡུད་ཅིང་འཛིན་པའོ། །གསང་སྔགས་རྣམས་ཀྱི་ཡེ་ཤེས་ནི་དེའི་རྣམ་པར་བསྒྱིངས་པས་རྣལ་འབྱོར་པའི་མངོན་པར་འདོད་པའི་ལས་བསྐྱེད་པར་ནུས་པ་ཡིན་ལ། དེ་རབ་ཏུ་སྟོན་པར་བྱེད་པའི་གཞུང་ནི་རིམ་པར་ཕྱེ་བ་སྟེ། དེས་ན་གསང་སྔགས་ཀྱི་ཡེ་ཤེས་བསྒྱིངས་པའི་རིམ་པར་ཕྱེ་པའི་སྒྲར་གསུངས་སོ། །ལེའུ་ལྔ་པའི་འགྲེལ་པའོ།། །།གསང་སྔགས་མཐུ་ནི་རང་གི་ཕྱག་རྒྱ་དང་མཆོད་པའི་ཆོ་ག་མེད་པར་ཕུན་སུམ་ཚོགས་པར་མི་འགྱུར་བས། དེ་ནས་ཞེས་བྱ་བ་ལ་སོགས་པ་དྲུག་པ་ཕྱག་རྒྱ་དང་མཆོད་པའི་ལེའུ་གསུངས་སོ། །སྐུ་གསུམ་གྱི་ཡེ་ཤེས་ཀྱི་རྡོ་རྗེ་ལས་ཡང་དག་པར་བྱུང་བ་ཞེས་བྱ་བ་ནི་སྐུ་རྡོ་རྗེ་ལ་སོགས་པའི་ཡེ་ཤེས་ལས་བྱུང་བའོ། །ཐ་དད་པ་ཞེས་བྱ་བ་ནི་རྣམ་པར་སྣང་མཛད་ལ་སོགས་པའི་དབྱེ་བས་སོ་སོ་བ་ཡིན་གྱི་རྡོ་རྗེ་ཁུ་ཚུར་གཉིས་ཀྱིས་ཕྱི་རོལ་དང་ནང་དུ་རྡོ་རྗེ་བཅིངས་པས་ཀྱང་ཕྱག་རྒྱའི་དོན་སྟོན་པ་ནི་མ་ཡིན་ནོ། །འདི་ན་ལུས་ནི་བྱིན་བརླབས་ཏེ། །རང་གི་གཟུགས་སུ་རྣམ་བསྒོམས་ན། །ཞེས་བྱ་བ་ནི་ཕྱག་རྒྱ་རིམ་པར་ཕྱེ་བ་འདི་ན་དམ་ཚིག་གི་ཕྱག་རྒྱ་ནི་ལུས་ཏེ་སྐུ་བྱིན་གྱིས་བརླབ་པའི་ལག་པའི་ཕྱག་རྒྱ་བཅིངས་པ་ཡིན་པར་ཤེས་པར་བྱའོ། །སྒོམ་པར་བྱེད་པ་ན་ཡང་རང་གི་ངོ་བོ་ཉིད་ཇི་ལྟ་བ་བཞིན་གྱི་སྦྱོར་བས་ལྷ་དང་ཧ་མོའི་སྐུས་ཐ་དད་པའི་ཕྱག་རྒྱ་སོ་སོ་ལ་ལྟོས་པས་རྣམ་བསྒོམས་ན་ཞེས་ཚིག་དཔང་པོར་བྱས་པ་ཡིན་ནོ། །ལག་པ་གཉིས་ཁུ་ཚུར་བཅངས་པ་ལས་ཞེས་བྱ་བ་ནི་ལག་པ་གཉིས་ཀྱིས་རྡོ་རྗེའི་བཅིང་བ་ནང་དུ་བཅིངས་པའི་ཁུ་ཚུར་བྱས་པའོ། །དེ་ཉིད་ལས་ཞེས་བྱ་བ་ནི་བཤད་མ་ཐག་པའི་ཕྱག་རྒྱ་བཅིངས་པ་སྟེ་ཕྱག་རྒྱ་གསུམ་པོ་དེ་དག་སྔགས་དང་བཅས་པ་ནི་ལྷ་ཐམས་ཅད་ཀྱི་སྐུ་གསུང་ཐུགས་བྱིན་གྱིས་རློབ་པར་བྱེད་པ་ཡིན་ནོ། །ལག་པ་གཉིས་ཞེས་བྱ་བ་ལ་སོགས་པ་ནི་
ལས་ཀྱི་ཕྱག་རྒྱ་གསུངས་པ་ཡིན་ཏེ་གོ་སླའོ། །གཟུང་བ་ཞེས་བྱ་བ་ནི་གཡོན་པའི་མཛུབ་མོ་བསྒྲེང་བའོ་ཞེས་སྔ་མ་དང་སྦྱོར་རོ། །མཐེ་བོང་གཉིས་ནི་བསྣོལ་བྱས་ལ། །མཛུབ་མོའི་རྩེ་མོ་བཀུག་ནས་ནི། །གུང་མོ་བསྙམས་པའི་ཚིགས་སུ་སྦྱར། །རྡོ་རྗེ་དབྱིངས་ཀྱི་དབང་མོར་བཤད། །ཅེས་གསུངས་པ་དང་དེ་ལ་བཤད་མ་ཐག་པའི་མཚན་ཉིད་ཅན་ནི་བཅོམ་ལྡན་འདས་རྣམ་པར་སྣང་མཛད་ཀྱི་དམ་ཚིག་གི་ཕྱག་རྒྱ་ཡིན་པར་ཤེས་པར་བྱའོ། །ལག་པ་གཡོན་པ་ཞེས་བྱ་བ་ནི་པང་པར་བཀན་ཏེ་གཞག་པའོ། །གཡས་པ་ཞེས་བྱ་བ་ནི་ཁ་ཐུར་དུ་བལྟས་པར་བྱའོ། །དེ་བཞིན་དུ་ཞེས་བྱ་བ་ནི་ལག་པ་གཡོན་པའོ། །མཆོག་སྦྱིན་པར་མཛད་པ་ཞེས་བྱ་བ་ནི་མཆོག་སྦྱིན་པའི་ཚུལ་དུའོ། །དེ་ཉིད་ཅེས་བྱ་བ་ནི་ལག་པ་བཀན་པའི་ཚུལ་གྱིས་སོ། །བསམ་གཏན་གྱི་ཚུལ་དུ་ཞེས་བྱ་བ་ནི་བསམ་གཏན་གྱི་ཐབས་ཀྱིས་སོ། །དེ་ཉིད་ལས་ཞེས་བྱ་བ་ནི་ལག་པ་གཡོན་པ་བཀན་པའོ། །མི་འཇིགས་པར་སྦྱིན་པར་བྱས་ལ་ཞེས་བྱ་བ་ནི་ལག་པ་གཡོན་པ་བ་དན་གསུམ་པར་བདག་དང་ཉེ་བར་གཞག་པ་སྟེ་དེས་མི་འཇིགས་པ་སྦྱིན་པའི་ཚུལ་དང་ལྡན་པའོ། །རྡོ་རྗེ་སེམས་མ་ལ་སོགས་པའི་དམ་ཚིག་གི་ཕྱག་རྒྱ་ནི་མི་བསྐྱོད་པ་ལ་སོགས་པའི་ཡང་ཤེས་པར་བྱའོ། །རྡོ་རྗེ་བཅིང་བ་ཞེས་བྱ་བ་ནི་རྡོ་རྗེ་བཅིང་བ་ཕྱི་རོལ་དུ་བཅིངས་པའོ། །དེ་ཉིད་ལས་ཞེས་བྱ་བ་ནི་སྔ་མ་དང་འདྲའོ། །དེ་ཉིད་ཅེས་བྱ་བ་ནི་བཤད་མ་ཐག་པའི་ཕྱག་རྒྱ་དང་འདྲའོ། །དེ་ཉིད་ལས་ཞེས་བྱ་བ་ལ་སོགས་པ་ནི་རྡོ་རྗེ་བསྡམས་པ་ཕྱི་རོལ་དུ་བཅིངས་པ་ལ་གུང་མོ་གཉིས་ནང་དུ་བཅུག་སྟེ་ཕན་ཚུན་ལྟོ་སྦྱར་ལ་གཞག་པའོ། །ལ་ལ་དག་ནི་མཐེ་བོང་དང་མཐེའུ་ཆུང་གཉིས་རྡོ་རྗེ་ལྟར་བྱས་ལ་རྩེ་སྤྲད་པར་བྱའོ་ཞེས་མན་ངག་ལས་བཤད་དོ་ཞེས་ཟེར་རོ། །མི་བསྐྱོད་པ་ལ་སོགས་པའི་ལས་ཀྱི་ཕྱག་རྒྱ་ནི་རང་རང་གི་ཇི་ལྟར་རྡོ་རྗེ་སེམས་མ་ལ་སོགས་པའི་ཡང་ཡིན་པར་ཤེས་པར་བྱའོ། །བཞག་ལ་ཞེས་བྱ་བ་ནི་ཚིགས་གསུམ་པར་བཞག་སྟེ་ནས་གང་ཙམ་གྱིས་མ་རེག་པར་བྱ་བར་བལྟ་བར་བྱའོ། །པདྨ་ཁམ་ཕྱེ་བའི་ཚུལ་དུ་བྱས་པ་ནི་པདྨ་ཁ་མ་ཕྱེ་བ་དང་འདྲ་བའོ། །མཛུབ་མོ་གཉིས་ཞེས་བྱ་བ་ལ་སོགས་པ་ལ་མཛུབ་མོ་གཉིས་ཀྱིས་གུང་མོའི་སེན་མོ་བཀུག་ནས་མནན་པ་གང་ཡིན་
པ་དེ་ལ་དེ་སྐད་ཅེས་བྱ་སྟེ། མཐེ་བོ་གཉིས་དང་མཛུབ་མོ་གཉིས་ཀྱི་བར་དུ་གུང་མོ་བཅུག་ལ་བཙིར་ནས་གནས་པའོ། །ཐལ་མོ་སྦྱར་ཞེས་བྱ་བ་ནི་ཐལ་མོ་ཁོང་སྟོང་དུ་བྱས་པའོ། །ཚིགས་དབུ་མར་ཞེས་བྱ་བ་ནི་ཚིགས་པར་མ་དང་མཛུབ་མོར་སྦྱར་བའོ། །མཛུབ་མོ་གཉིས་མཐེ་བོའི་རྩེ་མོར་བཀུག་པ་ཞེས་བྱ་བ་ནི་མཛུབ་མོ་གཉིས་རྩེ་སྦྲད་ལ་མཐེ་བོང་གཉིས་ཀྱི་སྟེང་དུ་རིན་པོ་ཆེ་འདྲ་བར་བཀུག་ནས་སྦྱར་ལ་གཞག་ཅེས་བྱ་བའི་དོན་ཏོ། །མཐེའུ་ཆུང་གི་སེན་མོ་མནན་ནས་ཞེས་བྱ་བ་ནི་རང་རང་གི་མཐེའུ་ཆུང་གི་སེན་མོ་ལུ་གུ་རྒྱུད་འདྲ་བ་ལ་ལྷག་མ་རྡོ་རྗེའི་མཚན་ཉིད་དུ་བྱས་པས་སྦྱོར་བར་བྱའོ། །ལ་ལ་ན་རེ་ཡང་ན་སྟང་སྟབས་ཀྱི་སྦྱོར་བ་ཇི་ལྟ་བ་བཞིན་དུ་བྱའོ་ཞེས་ཟེར་རོ། །མཛུབ་མོ་དང་མཐེའུ་ཆུང་གཉིས་ལུ་གུ་རྒྱུད་ལྟར་བཅིང་ཞེས་བྱ་བ་ནི་རྡོ་རྗེ་ཁུ་ཚུར་གཉིས་རྒྱབ་སྦྱར་བ་བྱས་ལ་ལག་པ་གཉིས་ཀྱི་མཛུབ་མོ་དང་མཐེའུ་ཆུང་ལུ་གུ་རྒྱུད་ལྟར་བྱས་ཏེ་མདུད་པ་བྱས་པའོ། །ལག་པ་གཉིས་ཞེས་བྱ་བ་ལ་སོགས་པ་ལ་རྡོ་རྗེ་བསྡམས་པ་བཅིངས་པས་ཁུ་ཚུར་ནང་དུ་བཅིངས་ཏེ་གུང་མོ་སྦྱར་ལ་རྩེ་མོའི་ཚུལ་དུ་བཞག །སྲིན་ལག་གཉིས་གུང་མོའི་རྒྱབ་ཏུ་བཅར་ཏེ་བཟློག་པའི་ཚུལ་གྱིས་གཞག །མཛུབ་མོ་གཉིས་གུང་མོའི་ཚིགས་གསུམ་པའི་གནས་སུ་གདུ་བུའི་ཚུལ་དུ་གཞག །མཐེ་བོང་གཉིས་གུང་མོ་ལ་ཕྱོགས་པར་བཞག་ལ་ཅུང་ཟད་རྡོ་རྗེ་འདྲ་བར་དགུག་གོ །ལ་ལ་ནི་མཐེའུ་ཆུང་སྦྱར་བར་བྱས་ལ་གུང་མོའི་བར་དུ་གཞག་གོ་ཞེས་ཟེར་རོ། །བཟློག་པ་དཔྲལ་བར་གཞག་ཅེས་པ་བ་ནི་བཟློག་སྟེ་ཁུ་ཚུར་དུ་བསྟན་ལ་དབྲལ་བར་གཞག་པའོ། །སེན་མོ་མནན་ནས་ཞེས་བྱ་བ་ནི་མནན་པའོ། །རལ་གྲི་ཤུབས་ནས་ཕྱུང་བ་ཞེས་བྱ་བ་ལ་སོགས་པ་ནི་ལག་པ་གཡོན་པའི་མཐེ་བོས་སྲིན་ལག་དང་མཐེའུ་ཆུང་མནན་ཏེ་གཞག་པ་ལ་ལག་པ་གཡས་པས་ཀྱང་རང་གི་སྲིན་ལག་དང་མཐེའུ་ཆུང་གི་སེན་མོ་མནན་ལ་གུང་མོ་དང་མཛུབ་མོ་གཉིས་ཅི་བདེར་བཅུག་ནས་རལ་གྲི་ལྟར་དྲངས་ཏེ་དེའི་ཚུལ་དུ་བྱས་ལ་ལག་པ་གཡོན་པ་སྙིང་གར་ཇི་ལྟ་བ་བཞིན་དུ་གཞག་གོ །ཁྲོ་བོའི་སོར་མོ་ཞེས་བྱ་བ་ནི་ལག་པ་གཡོན་པའི་མཛུབ་མོ་བསྒྲེང་བའོ། །རྡོ་རྗེ་ཁུ་ཚུར་ཞེས་བྱ་བ་ནི་གཡོན་པ་རྡོ་རྗེ་ཁུ་ཚུར་དུ་བྱས་པའོ། །མེ་ཏོག་གི་ཚུལ་
དུ་ཞེས་བྱ་བ་ནི་ནཱ་ག་གེ་སར་འདྲ་བའོ། །གཡོན་པ་ཞེས་བྱ་བ་ནི་གཡོན་པ་རྡོ་རྗེ་ཁུ་ཚུར་དུ་བྱས་པའོ། །གླང་པོ་ཆེའི་སྣ་ལྟར་ཞེས་བྱ་བ་ནི་སྣའི་མདུན་དུ་ལག་པ་གཡས་པའི་རྡོ་རྗེ་ཁུ་ཚུར་གླང་པོ་ཆེའི་སྣའི་ཚུལ་དུ་གཞག་པའོ། །བསྒྲེང་ལ་ཞེས་བྱ་བ་ན་འདིར་གཡས་ཀྱི་ཆ་ཡིན་པར་ཤེས་པར་བྱའོ། །གཡས་ཞེས་བྱ་བ་ལ་སོགས་པ་ལ་གཡས་པའི་ཆས་ནམ་མཁའ་ལ་བཏེག་ལ། གཡོན་པའི་རྡོ་རྗེ་ཁུ་ཚུར་དུ་གནས་པས་གཡས་པའི་ལག་མཐིལ་ན་བ་དན་གསུམ་པ་ཇི་ལྟ་བར་བྱའོ། །ཆུ་རླབས་ལྟར་དྲང་བ་ཞེས་བྱ་བ་ནི་ཆུ་རླབས་འདྲེན་པ་ལྟར་བྱས་པའོ། །གཡོན་པ་ཟླ་བའི་ཚུལ་དུ་བྱས། །ཞེས་བྱ་བ་ནི་གཡོན་པ་རྡོ་རྗེ་ཁུ་ཚུར་བཅིངས་ལ་མཐེ་བོང་དང་མཛུབ་མོ་གཉིས་ཟླ་བ་ཕྱེད་པའི་ཚུལ་དུ་བྱས་པའོ། །གཡོན་པ་རྡོ་རྗེ་ཁུ་ཚུར་ཞེས་བྱ་བ་ནི་གཡོན་པ་རྡོ་རྗེ་ཁུ་ཚུར་འགྱིང་བའི་ཚུལ་གྱིས་གཡོན་པའི་ལྟ་བུར་དུ་གཞག་པའོ། །འདོད་ཆགས་ཀྱི་དུག་ཐམས་ཅད་སེལ་བ་ཞེས་བྱ་བ་འདིས་ནི་རྣམ་པར་སྣང་མཛད་ལ་སོགས་པ་གང་ཡང་རུང་བའི་སྦྱོར་བས་རྣལ་འབྱོར་པས་དུག་བསལ་བའི་ལས་བྱེད་པས་ན་ཕྱག་རྒྱ་འདིས་ཇི་ལྟ་བ་བཞིན་དུ་བྱའོ་ཞེས་བསྟན་ཏོ། །མཛུབ་མོ་བསྒྲེང་ལ་ཞེས་བྱ་བ་ནི་མཛུབ་མོ་གཉིས་སྡིགས་མཛུབ་ཀྱི་ཚུལ་དུ་བསྒྲེང་བའོ། །འདིས་ནི་དེ་བཞིན་གཤེགས་པ་ཐམས་ཅད་སྤྱན་འདྲེན་ནོ་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ནི་ལྕགས་ཀྱུས་སྤྱན་དྲང་ངོ་ཞེས་གང་གསུངས་པ་དེ་འདིས་དྲང་བར་བྱས་ཏེ། ཨོཾ་བཛྲ་ཨདྐུ་ཤ་ཨཱ་ཀཪྵ་ཡ་ཧཱུཾ་ཞེས་བྱ་བའི་སྔགས་དང་ཕྱག་རྒྱ་འདི་སྦྱར་བར་བྱའོ། །འགྲམ་པ་གཉིས་སུ་གཞག་པ་ཞེས་བྱ་བ་ནི་འགྲམ་པ་གཉིས་སུའོ། །ཁྲོ་བོ་རྣམས་ནི་ཞལ་གྱི་ཕྱག་རྒྱས་སོ་ཞེས་བྱ་བ་ནི་རྡོ་རྗེ་མཆེ་པའི་ཕྱག་རྒྱས་སོ། །བྱང་ཆུབ་སེམས་དཔའ་རྣམས་ནི་རྡོ་རྗེའི་ཕྱག་རྒྱས་སོ་ཞེས་བྱ་བ་ནི་རྩེ་མོ་ལྔ་པ་བཅིངས་ལ་ཞེས་བྱ་བ་ལ་སོགས་པའི་མཚན་ཉིད་ཅན་གྱི་རྡོ་རྗེའི་ཕྱག་རྒྱས་སོ། །རིག་མའི་ལྷ་མོ་རྣམས་ནི་རིགས་ཀྱི་ཡུམ་རྣམས་ཀྱིས་སོ་ཞེས་བྱ་བ་ནི་རྡོ་རྗེ་སེམས་མ་དང་སྐུལ་བྱེད་མ་ལ་སོགས་པ་ནི་ཅི་རིགས་པར་སངས་རྒྱས་སྤྱན་ལ་སོགས་པའི་ཕྱག་རྒྱས་ཏེ་རིགས་ཀྱི་ཡུམ་རྣམས་ཀྱི་ཕྱག་རྒྱས་སོ། །བྲན་རྣམས་ནི་ཞགས་པའི་ཕྱག་རྒྱས་སོ་ཞེས་བྱ་བ་ལ་འོག་ནས་བཤད་པའི་རྡོ་རྗེ་ཞགས་པའི་ཕྱག་རྒྱས་སོ། །ཕོ་ཉ་རྣམས་ནི་ལྕགས་ཀྱུའི་ཕྱག་
རྒྱས་སོ་ཞེས་བྱ་བ་ནི་དེ་བཞིན་གཤེགས་པ་སྤྱན་འདྲེན་པའི་ཕྱག་རྒྱ་ཉིད་དོ། །ཕྱག་རྒྱའི་རྣམ་པར་དབྱེ་བ་འདི་ནི་སྤྱན་དྲང་བ་ཡིན་ནོ། །གཞུག་པ་ལ་སོགས་པ་ལ་ནི་ཐམས་ཅད་ཀྱང་རྡོ་རྗེའི་ཞགས་པ་དང༌། ལྕགས་སྒྲོག་དང་འབེབས་པའི་ཕྱག་རྒྱས་བྱའོ། །དྲག་པོའི་ལས་ལ་ནི་རྡོ་རྗེ་མཁའ་འགྲོ་མའི་ཕྱག་རྒྱ་དང་ཨོཾ་བཛྲ་ཌཱ་ཀི་ནི་ཆེ་གེ་མོའི་ར་ཀ་ཏ་མཱ་ཀཪྵཱ་ཡ་ཨ་ཀྲྀཥུ་ཙ་ཤ་ཡ་ཧཱུཾ་ཕཊ་ཅེས་བྱ་བ་དང་སྦྱར་རོ། །རྡོ་རྗེ་ཁུ་ཚུར་ཞེས་བྱ་བ་ནི་སོ་སོའིའོ། །དཀྱིལ་འཁོར་ཕྱག་རྒྱ་ཞེས་བྱ་བ་ནི་དཀྱིལ་འཁོར་གདེག་པའི་ཕྱག་རྒྱ་སྟེ། འདི་ཡང་ཨོཾ་བཛྲ་ཏིཥྛ་ཞེས་བྱ་བ་འདི་དཀྱིལ་འཁོར་གྱི་བདག་པོའི་སྙིང་པོ་དང་བཅས་པས་སྔ་མ་བཞིན་དུ་སྦྱར་བར་བྱའོ། །མཁྲིག་མ་གཉིས་བསྣོལ་ཏེ་ཞེས་བྱ་བ་ནི་མཛུབ་མོ་གཉིས་བསྣོལ་ནས་མཁྲིག་མ་གཉིས་ཀྱི་དབུས་སུ་གཟུགས་ཏེ། ཁ་ཐུར་དུ་བལྟས་པས་ངོས་ལ་བཅར་ལ་གདེག་པར་བྱའོ། །སྒོ་དབྱེ་བའི་ཕྱག་རྒྱ་ཡང་ཨོཾ་བཛྲོད་གྷ་ཌ་ཞེས་བྱ་བ་ལ་སོགས་པའི་སྔགས་ཀྱི་སྒྲ་བསྒྲགས་ལ། ཨོཾ་བཛྲོད་གྷ་ཌ་ཡ་ས་མ་ཡ་པྲ་བེ་ཤཱ་ཡ་ཧཱུཾ་ཞེས་བྱ་བའི་གསང་སྔགས་དང་སྦྱར་བར་བྱའོ། །གདོན་ཐམས་ཅད་སྐྲག་པར་བྱེད་པའི་ཕྱག་རྒྱ་ནི་ཨོཾ་ཧཱུཾ་བཛྲ་རཀྵ་ས་མ་ཡ་ཕཊ་ཅེས་བྱ་བ་འདི་དང་ཇི་ལྟ་བ་བཞིན་དུ་སྦྱར་རོ། །ལྷ་མ་ཡིན་གྱི་བུ་མོ་ཀུན་སྨྲར་གཞུག་པའི་ཕྱག་རྒྱས་ཞེས་བྱ་བ་ནི་མཚན་མ་ཐོབ་པས་ལྷ་མ་ཡིན་གྱི་ཕུག་ཏུ་འཇུག་པ་ན་དེའི་སྒོའི་འཁྲུལ་འཁོར་ལ་བལྟས་ལ། རྡོ་རྗེས་འོག་གི་སྦྱོར་བས་རོལ་པའི་སྟང་སྟབས་ཀྱིས་འདུག་ནས་ཇི་སྐད་དུ་གསུངས་པའི་ཕྱག་རྒྱ་བཅིངས་ཏེ་ང་རྒྱལ་དང་བཅས་པས་གསང་སྔགས་བརྗོད་ལ། ཕྱག་རྒྱ་དེ་བཅིངས་པ་ལས་བྱུང་བའི་རྡོ་རྗེ་རྩེ་ལྔ་པ་འབར་བས་འཁྲུལ་འཁོར་རྣམ་པར་གཞོམ་པར་བྱ་བ་ནི་སྦྱོར་བའོ། །དེ་བས་ན་ལྷ་མ་ཡིན་གྱི་སྒྱུ་མའི་འཁྲུལ་འཁོར་གཞིག་པ་ཞེས་གསུངས་ཏེ། གང་གི་ཚེ་ལྷ་མ་ཡིན་གྱི་བུ་མོ་ལེགས་པར་འོངས་སོ་ཞེས་བྱ་བ་ལ་སོགས་པའི་ཚིག་མི་སྨྲ་ན་དེའི་ཚེ་ཆོ་ག་འདི་ཉིད་དང་ཕྱག་རྒྱ་འདི་ཉིད་དྲན་པར་བྱའོ། །དེ་བས་ན་ལྷ་མ་ཡིན་གྱི་བུ་མོ་སྨྲར་གཞུག་པ་ཞེས་གསུངས་པ་ཡིན་ནོ། །སྟང་སྟབས་དང་བཅས་པར་ཧཱུཾ་ཞེས་སྒྲོགས་པ་ཞེས་བྱ་བ་ནི་རོལ་པའི་སྟང་སྟབས་དང་བཅས་པས་ཡི་གེ་ཧཱུཾ་བརྗོད་པའོ། །རྡོ་རྗེ་ནག་
མོའི་ཕྱག་རྒྱ་ལ་དཔུང་པ་གཡས་པ་བཏེག་ལ་རྡོ་རྗེ་ཁུ་ཚུར་བརྡེག་པའི་ཚུལ་དུ་བྱ་བ་སྟེ་འདི་ཡང་མངོན་སྤྱོད་ཀྱི་ལས་རྣམས་ལ། ཨོཾ་བཛྲ་ཀཱ་ལི་ཏརྫཱ་ཡ་ཧཱུཾ་ཞེས་བྱ་བ་འདི་དང་སྦྱར་རོ། །རྡོ་རྗེའི་ཕུར་བུའི་ཕྱག་རྒྱ་དེ་བཞིན་གཤེགས་པ་ལ་སོགས་པ་གཞན་དག་ལ་འབེབས་པའི་ཚེ་ནི། ཨོཾ་བཛྲ་ཀཱི་ལི་ཀཱི་ལ་ཡ་ཧཱུཾ་ཞེས་བྱ་བ་འདི་དང་སྦྱར་རོ། །དེ་བཞིན་གཤེགས་པ་ལ་སོགས་པའི་ཕུར་བུའི་སྔགས་དང་ཕྱག་རྒྱའི་དབྱེ་བ་ཉེ་བར་མ་བསྟན་པའི་ཕྱིར་རོ། །རྡོ་རྗེ་ཁུ་ཚུར་ཞེས་བྱ་བ་ནི་གཡོན་པའི་རྡོ་རྗེ་ཁུ་ཚུར་གྱིས་སེང་ལྡེང་ལ་སོགས་པའི་ཕུར་བུ་བཟུང་ལ་བསྒྲུབ་པར་བྱ་བའི་མགོ་ལ་བཞག་སྟེ། གཡས་པའི་རྡོ་རྗེ་ཁུ་ཚུར་གྱིས་བརྡུང་པ་ནི་རྡོ་རྗེ་ཐོ་བའི་ཕྱག་རྒྱ་སྟེ། ཨོཾ་བཛྲ་མུངྒ་ར་ཨཱ་ཀོ་ཊ་ཡ་ཧཱུཾ་ཞེས་བྱ་བའི་སྔགས་དང་སྦྱར་རོ། །འདི་ནི་སྤྱིར་ཕུར་བུས་འདེབས་པ་ལ་ཚུལ་འདི་ཡིན་ཏེ། བསམ་གཏན་དང་ཕྱག་རྒྱས་ཕུར་བུ་འདེབས་པ་ལ་ནི་ཕྱག་རྒྱ་ཉིད་ཀྱིས་ཕུར་བུ་གཞག་པར་བསམས་ལ་དེ་བཞིན་དུ་བརྡུང་ངོ༌། །ལག་པ་གཉིས་ཞེས་བྱ་བ་ལ་སོགས་པ་ལ་ལག་པ་གཉིས་ཀྱི་རྡོ་རྗེ་ཁུ་ཚུར་ཕན་ཚུན་རྒྱབ་སྦྱར་ལ་མཐེའུ་ཆུང་གཉིས་མདུད་དེ་མཛུབ་མོ་གཉིས་སོ་སོར་ཕྱེ་ནས་ལྕགས་སྒྲོག་ལྟར་བཅིང་བར་བྱའོ། །ཕྱག་རྒྱ་འདི་ཡང་ཨོཾ་བཛྲ་སྥོ་ཊ་བནྡྷ་ཡ་ཧཱུཾ་ཞེས་བྱ་བའི་སྔགས་འདི་དང་སྦྱར་རོ། །བཅིང་བའི་འོག་ཏུ་མཉེས་པར་བྱ་བར་རིགས་པ་ཡིན་པས་རྒྱུད་གཞན་དག་ལས་བསྟན་པའི་སྔགས་དང་ཕྱག་རྒྱས་བཟུང་སྟེ་བཤད་མ་ཐག་པའི་ཕྱག་རྒྱ་དེ་ཉིད་དྲིལ་བུ་ལྟར་སྙིང་གར་བསྐྱོད་པ་ནི་རྡོ་རྗེ་འབེབས་པའི་ཕྱག་རྒྱ་སྟེ། ཨོཾ་བཛྲ་ཨཱ་བེ་ཤ་ཧཱུཾ་ཞེས་བྱ་བ་འདི་དང་སྦྱར་རོ། །བཅིང་བ་ནི་གཞུག་པའི་འོག་ཏུ་འབྱུང་བས་རྡོ་རྗེ་ཞགས་པའི་ཕྱག་རྒྱ་འབའ་ཞིག་ཀྱང་སྟོན་པར་ཤེས་པར་བྱ་སྟེ། རྡོ་རྗེ་ལྕགས་ཀྱུའི་ཕྱག་རྒྱ་བཅིང་བ་ལས་མཛུབ་མོ་གཉིས་ཞགས་པར་བྱ་བ་ནི་རྡོ་རྗེ་ཞགས་པའི་ཕྱག་རྒྱ་སྟེ་ཨོཾ་བཛྲ་པཱ་ཤ་པྲ་བེ་ཤ་ཡ་ཧཱུཾ་ཞེས་བྱ་བ་འདི་དང་སྦྱར་རོ། །རྡོ་རྗེ་སོགས་ལེའུ་ཕྱག་རྒྱ་ནི་གཤིན་རྗེ་གཤེད་ལ་སོགས་པ་གང་ཡང་རུང་བའི་སྦྱོར་བ་དང་དེའི་གསང་སྔགས་ཀྱིས་རྣམ་པར་དག་པར་བྱའོ་ཞེས་བསྐུལ་བའི་ཚིག་དང་བཅས་པས་བསྒྲུབ་པར་བྱ་བའི་མགོ་བོ་ནས་བརྩམས་ཏེ་རྣམ་པར་དག་པ་ནི་མངོན་སྤྱོད་ཀྱི་ལས་ཀྱི་སྦྱོར་བའོ། །རྡོ་རྗེ་སྲིན་མོའི་ཕྱག་རྒྱ་དང་ཨ་ལ་ལ་ཞེས་བརྗོད་ལ་འཕགས་པ་གཤིན་རྗེ་གཤེད་ལ་སོགས་
པ་གང་ཡང་རུང་བའི་སྦྱོར་བས་བསྒྲུབ་པར་བྱ་བའི་སྲུང་བ་འཕྲོགས་ལ་མདུན་དུ་རྡོ་རྗེ་སྲིན་པོ་ལ་སོགས་པ་རྣམས་ཀྱིས་རྣམ་པར་ཟ་བར་བསམས་ལ་ཨོཾ་བཛྲ་རཱཀྵ་ས་བྷ་ཀྵ་ཡ་ཐ་ཕཊ་ཅེས་བྱ་བ་འདི་དང་སྦྱར་རོ། །མཐེ་བོང་ཞེས་བྱ་བ་ནི་མཐེ་བོ་དང་གུང་མོ་ཆན་པའི་ཕྱག་རྒྱ་དང་སྟོབས་པོ་ཆེའི་སྦྱོར་བས་སོ། །ཨོཾ་བཛྲ་ཀྲོ་དྷ་མ་ཧཱ་པ་ལ། ཀ་ར་ཀ་ར། ཙྪིནྡ་ཙྪིནྡ་ཧཱུཾ་ཕཊ་ཅེས་བྱ་བ་འདིས་སྤྲིན་གཏུབ་པའི་ལྟ་བ་དང་སྦྱར་རོ། །དེ་བས་ན་ཚར་གཅོད་པར་བྱའོ་ཞེས་གསུངས་པ་ཡིན་ནོ། །སྐམ་པའི་ཕྱག་རྒྱ་དང་རྡོ་རྗེ་ཧཱུཾ་མཛད་ལ་སོགས་པ་གང་ཡང་རུང་བའི་སྦྱོར་བ་དང༌། ཨོཾ་བཛྲ་ཀཱི་ལིཀཱི་ལ་ཡ་སརྦ་བ་གྷྣཱི་ན་བཛྲ་དྷ་ར་ཨཛྙཱ་ཡ། བུདྡྷ་ས་ཏྱེན་ཧཱུཾ་ཧཱུཾ་ཧཱུཾ་ཕཊ་ཅེས་པའི་གསང་སྔགས་འདིས་འཁྲུལ་འཁོར་ཐམས་ཅད་དབྱུང་བ་ལ་སྦྱར་རོ། །གསང་སྔགས་འདི་ལ་ཡང་སརྦ་བིགྷྣཱ་ན་ཞེས་བྱ་བ་བོར་ལ་བསྒྲུབ་པར་བྱ་བའི་མིང་གཞུག་གོ །རྡོ་རྗེ་ནམ་མཁའ་ལྡིང་གི་ཕྱག་རྒྱ་ནི་རྟ་མགྲིན་ལ་སོགས་པ་གང་ཡང་རུང་བའི་ཁྲོ་ཡོངས་སུ་གྱུར་པའི་རྡོ་རྗེ་ནམ་མཁའ་ལྡིང་གི་གཟུགས་ཀྱིས་དུག་ལ་སོགས་པས་ཕོག་པའི་བསྒྲུབ་པར་བྱ་བའི་མགོ་བོར་རྡོ་རྗེ་ནམ་མཁའ་ལྡིང་གི་བདུད་རྩིའི་རྒྱུན་ཡོངས་སུ་ལྡུགས་པར་བསམས་ལ། རྣལ་འབྱོར་པས་ཀྱང་དེའི་ཚུལ་དུ་བྱ་ཞིང་ཨོཾ་བཛྲ་མཱ་རཱ་ཡ་ན་བི་ཥ་མེ་པ་མཱ་ཡ་ཨ་མྲྀ་ཏ་ཨམྦུ་མེ་གྷཻ་ཧཱུཾ་ཞེས་བརྗོད་ཅིང་ཇི་ལྟ་བ་བཞིན་དུ་སྦྱར་རོ། །རྡོ་རྗེ་མདའི་ཕྱག་རྒྱས་ཕ་རོལ་གྱི་དཔུང་བཤིག་པའི་སྦྱོར་བ་ནི་འདི་ཡིན་ཏེ། ཁྲོ་བོ་གང་ཡང་རུང་བའི་ང་རྒྱལ་དུ་བྱས་ལ་ཡི་གེ་བ་ལས་གཞུ། ཨ་ལས་བྱུང་བའི་གཞུ་རྒྱུད་དང་བཅས་པ་གཡོན་པའི་རྡོ་རྗེ་ཁུ་ཚུར་གྱིས་བཟུང་ལ། གཡས་པའི་རྡོ་རྗེ་ཁུ་ཚུར་ལ་སོགས་པས་ཧཱུཾ་ལས་བྱུང་བའི་མདའི་ཆར་ཧཱུཾ་དང་ཕཊ་ཀྱི་མདེའུ་དང་བཅས་པ་ཧཱུཾ་གི་མདའ་མེ་འབར་བ་དང་འདྲ་བ་ལག་པས་དྲངས་ནས་གཞུ་ལག་པར་བཞག་ལ་ཁྲོས་པས་ཕྱོགས་བཞིར་ཧཱུཾ་ཕཊ་ཅེས་བརྗོད་ལ་འཕངས་ཏེ་དེས་ཀྱང་ཕ་རོལ་གྱི་དཔུང་ཐལ་བར་བྱས་པར་བསམ་མོ། །འདོད་པའི་རྒྱལ་པོ་ལ་སོགས་པའི་ཁྲོ་བོ་གང་ཡང་རུང་བའི་སྐུ་སེའུའི་མེ་ཏོག་ལྟར་དམར་བའི་ཨུཏྤལ་ལ་དམར་པོས་རྣ་རྒྱན་བྱས་པར་བདག་ཉིད་བསམས་ལ་སྔ་མ་བཞིན་དུ་གཞུ་བླངས་ཏེ་ཕཊ་ལས་མདའ་དེའི་ལྟོང་གི་ཕྱོགས་སུ་འདོད་པའི་རྒྱལ་པོ་དབུས་སུ་རྡོ་རྗེ་དབང༌། རྡོ་རྗེ་རྩེ་གཅིག་བ་འདྲ་
བའི་མདེའུའི་རྩ་བར་རྡོ་རྗེ་ཆགས་པ་མདེའུའི་རྩེ་མོར་རྣམ་པར་རྒྱལ་བའི་རྡོ་རྗེ་ལྟོང་དུ་མི་བསྐྱོད་པ་བཀོད་ལ་བདག་ཉིད་ཀྱི་སྙིང་གའི་ཟླ་བ་ལ་ཡི་གེ་ཀྵྨཾ་བསམ། ཡི་གེ་ཀ་ལས་བསྒྲུབ་པར་བྱ་བ་མདུན་དུ་བསམས་ལ། བཛྲ་དྲྀ་ཥྚི་མ་ཊ་ཞེས་བྱ་བ་མིག་ཏུ་བཀོད་ལ། རྡོ་རྗེ་ལྟ་བ་ཀུན་ཆགས་པས། །རབ་ཏུ་དགའ་ཞང་གདངས་པའི་མིག །དེ་ཡིས་བུད་མེད་བལྟས་ན་ནི། །རྟག་ཏུ་དབང་དུ་གྱུར་པ་ཡིན། །ཞེས་བྱ་བ་འདིས་རྡོ་རྗེ་བལྟ་བར་བྱས་ལ་འདོད་པ་ནི་བདག་གོ་ཞེས་བསྒོམ་ཞིང༌། ཨོཾ་ཊཀྐི་ཧོ་ཆེ་གེ་མོ་བ་ཞིང༌། ཨོཾ་ཊཀྐི་ཧོ་ཆེ་གེ་མོ་བ་བོ་ལ་སྙིང་གར་ལྕགས་ཀྱུ་དམར་པོ་གསང་བར་ནག་པོ་ནུ་མ་གཡས་དང་གཡོན་དུ་དཀར་པོ་སྙིང༌། གར་ལྗང་གུའི་རྣམ་པས་བརྡེག་པར་བྱའོ། །མདའ་རེ་རེས་ཕུག་པའི་འོག་ཏུ་ཡང་མདའ་ལས་བྱུང་བའི་རྣམ་པར་རྒྱལ་བའི་རྡོ་རྗེ་ལ་སོགས་པའི་གྲངས་ཇི་ལྟ་བ་བཞིན་དུ་དེའི་ལུས་ལ་ཞུགས་ནས་དབང་དུ་བྱས་པར་གྱུར་པར་བསམས་ལ། མུན་པ་སེལ་བའི་འོད་ཟེར་དམར་པོས་ནང་གི་ལུས་ཐམས་ཅད་དང༌། དེ་ཉིད་ཀྱིས་ཕྱི་དང་ནང་དུ་བཅས་པའི་ལུས་ལ་ཁྱབ་པ་དང་ཉེ་དུ་དང་མཛའ་བཤེས་ཀྱི་ཚོགས་རྣམས་ཀྱིས་ས་ལ་འགྱེལ་བ་ལས་སློང་བར་བྱེད་བཞིན་པར་གནས་ལ་འདུ་ཤེས་མེད་ཅིང་ཁྲག་རབ་ཏུ་སྐྱུག་པ་ལ་ཐུག་པར་བསམས་ལ། རང་གི་དམ་ཚིག་གི་ལྷ་མོ་རང་གི་ལུས་ལས་ཕྱུང་བས་བཀུག་ནས་རྐང་མཐིལ་གྱི་འོག་ཏུ་གཞག་ལ་སྒྲུབ་པ་པོས་བཤད་མ་ཐག་པའི་ཆོགས་ཇི་ལྟ་བ་བཞིན་དུ་སྲུང་བ་བྱའོ། །མཉེས་པར་བྱེད་པའི་རྡོ་རྗེ་མདའི་ཕྱག་རྒྱའི་སྦྱོར་བའོ། །ཁུ་ཚུར་གཉིས་ནི་ཞེས་བྱ་བ་ནི་ལག་པ་གཉིས་ཀྱིས་རྡོ་རྗེ་བསྡམས་པ་ནང་དུ་བཅིངས་པར་བྱས་པའི་ཁུ་ཚུར་གྱིས་ཡུལ་གཞིག་པས་གླང་པོ་ཆེའི་རྒྱབ་ཏུ་ཞོན་ཏེ་འཁོར་ལོས་སྒྱུར་བ་ཇི་ལྟ་བ་བཞིན་དུ་ང་རྒྱལ་བྱས་ལ་འཁོར་ལོས་སྒྱུར་བའི་ཕྱག་རྒྱ་གོས་ཀྱིས་བཀག་པ་བཅིངས་ཏེ་དེ་ལས་བྱུང་བའི་འཁོར་ལོས་སྒྱུར་བའི་ཚོགས་ཀྱིས་ཕ་རོལ་གྱི་དཔུང་རྣམ་པར་གཏོར་བར་བསམས་ལ་ཕྱག་རྒྱ་འཕང་ཚུལ་དུ་བྱ་སྟེ་འཁོར་ལོ་ཅན་གྱི་ཕྱག་རྒྱ་འདིས་གཡུལ་ལས་སྒྲོལ་བར་བྱེད་དོ། །ཁུ་ཚུར་གཉིས་ཀྱིས་མཐེའུ་ཆུང་གཉིས་དཀྲིས་ལ་ཞེས་བྱ་བ་ནི་རྡོ་རྗེ་ཁུ་ཚུར་གཉིས་མཐེའུ་ཆུང་གཉིས་ཀྱིས་ལུ་གུ་རྒྱུད་ཀྱི་ཚུལ་དུ་དཀྲིས་ལ། གཤིན་རྗེ་གཤེད་ལ་སོགས་པ་གང་ཡང་རུང་བའི་སྦྱོར་བ་བྱ་སྟེ། ཧེ་རུ་ཀའི་རྡོ་རྗེའི་ཕྱག་རྒྱ་
བཅིངས་ལ། ཨོཾ་ཧ་རུ་ཀ་བཛྲ་སརྦ་དུཥྚ་མ་ཡུ་མུང་དྷ་བ་ར་བ་ན་ཛ་ཀ་ཧཱུཾ་ཕཊ་ཅེས་བརྗོད་ལ་བྱིན་གྱིས་བརླབ་པ་དང་དབང་བསྐུར་བ་བྱས་ཏེ། དཔྲལ་བར་བཞག་ལ་གསང་སྔགས་འདི་ཉིད་ལན་བདུན་བཟླས་ཏ་དུར་ཁྲོད་དུ་འཇུག་པ་ལ་སོགས་པ་བྱའོ་ཞེས་བསྟན་ཏོ། །དུར་ཁྲོད་དུ་ཞེས་བྱ་བ་ལ་སོགས་པ་ལ་གར་བྱེད་པ་སྟེ་ལྷ་ཆེན་པོའི་གཟུགས་ཇི་ལྟ་བ་བཞིན་དུ་བསྒོམས་ལ་གར་བྱེད་ཅིང་དེའི་ཕྱག་རྒྱ་བཅིང་ངོ་ཞེས་བྱ་བའི་དོན་ཏོ། །མ་མོ་རྣམས་ཀྱི་ཞེས་བྱ་བ་ནི་ཁྱབ་འཇུག་མ་ལ་སོགས་པ་སྟེ་དེ་རྣམས་ཕྱག་རྒྱས་བྱིན་གྱིས་བརླབ་པ་ལ་འདི་ཉིད་སྦྱར་རོ། །ལྷ་རྣམས་ཀྱི་དམ་ཚིག་གི་ཕྱག་རྒྱ་བསྟན་པ་ལ་ནི་རང་གི་བདག་པོའི་དམ་ཚིག་གི་ཕྱག་རྒྱ་ལག་པ་གཉིས་ཀྱིས་བཅིངས་པ་ཡིན་ཞེས་བསྟན་ཏོ། །ཐམས་ཅད་ཀྱི་རང་གི་ས་བོན་གྱི་ཡི་གེ་རྣམས་ནི་ཆོས་ཀྱི་ཕྱག་རྒྱའོ། །སོ་སོའི་ལས་ཀྱི་ཕྱག་གྱ་མ་གསུངས་པ་དག་གི་ཡང་ཕྱག་རྒྱ་དང་པོའི་གཡས་དང་གཡོན་གཉི་གར་བྱས་པ་ལས་བྱུང་བའི་རྡོ་རྗེ་ཁུ་ཚུར་གྱི་ཏིང་ངེ་འཛིན་གྱི་ལེའུ་ལས་གསུངས་པའི་རང་གི་མཚན་མ་འཛིན་པའི་ཚུལ་དུ་ནི་ལས་ཀྱི་ཕྱག་རྒྱའོ། །ཕྱག་རྒྱ་ཆེན་པོ་མ་གསུངས་པ་ཡང་ལས་ཀྱི་ཕྱག་རྒྱ་ཉིད་རང་གི་མཚན་མ་དང་བཅས་པ་ནི་ཕྱག་རྒྱ་ཆེན་པོའོ། །ལ་ལར་ནི་དྲག་པོའི་སྒྲུབ་པར་བསྟན་པ་ལ་ནི་ཕྱག་རྒྱ་བཞིས་རྒྱས་བཏབ་པའི་མན་ངག་ཇི་སྐད་དུ་བསྟན་པ་བཞིན་དུ་བྱའོ། །ལས་ཀྱི་ཚོགས་ལྷག་མ་རྣམས་ལ་ནི་དེ་ལྷག་མ་ཡིན་ནོ་ཞེས་ཟེར་རོ། །གཞན་དག་ནི་སྒྲ་ཇི་བཞིན་པར་བྱའོ་ཞེས་ཟེར་རོ། །རྡོ་རྗེ་སེམས་མ་ལ་སོགས་པས། རིན་ཆེན་ཅོད་ཕན་ཕྲེང་དབང་བསྐུར། །ཞེས་བྱ་བ་ནི་དམ་ཚིག་དང་ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་ཅི་རིགས་པས་རྒྱས་བཏབ་ནས་རྣམ་པར་སྣང་མཛད་དང་བྱམས་པ་ལ་ནི་རྡོ་རྗེ་རིན་ཆེན་མའི་སྔགས་དང་ཕྱག་རྒྱ་འཁོར་ལོ་དང་རིན་པོ་ཆེའི་ཅོད་པན་གྱིས་དབང་བསྐུར་བར་གསུངས་པས་དབང་བསྐུར་རོ། །རྡོ་རྗེ་སེམས་དཔའ་ལ་སོགས་པ་ལ་ནི་སེམས་མ་རྡོ་རྗེ་ལ་སོགས་པའི་སྔགས་དང་ཕྱག་རྒྱས་སོ། །ཇི་སྐད་དུ་བཤད་པའི་དེ་བཞིན་གཤེགས་པ་རྣམས་དང་སྤྱན་ལ་སོགས་པའི་དབང་བསྐུར་བ་དང༌། ལྷག་མ་དབང་བསྐུར་བ་མ་གསུངས་པ་ལ་ནི་རང་གི་བདག་པོ་དང་རྗེས་སུ་མཐུན་པར་དབང་བསྐུར་བས་དབང་བསྐུར་ལ་དར་དབྱངས་དང་ཕྲེང་བས་དབང་བསྐུར་
བ་ནི་ཐམས་ཅད་ལ་སྦྱར་བར་བྱའོ། །རྡོ་རྗེ་ཁུ་ཚུར་གཉིས་ཀྱིས་ནི། །རྒྱབ་ཏུ་མདུད་པ་ལྟར་དོར་བྱ། །ཞེས་བྱ་བ་ནི་དབང་བསྐུར་བའི་འོག་ཏུ་བཛྲ་ཏུ་ཥྱ་ཧོ་ཞེས་བྱ་བ་དང་ཐལ་མོ་བརྡབས་པས་མཉེས་པར་བྱས་ལ་རྡོ་རྗེ་ཁུ་ཚུར་གཉིས་ཀྱིས་རྣམ་པར་སྣང་མཛད་ལ་སོགས་པའི་དབུ་རྒྱན་ཅོད་པན་གྱི་རྩེ་མོའི་ཆ་ལ་བཛྲ་ར་ཀྵ་ཧཾ་ཞེས་བྱ་བ་བཀོད་ལ་དེ་ལས་བྱུང་བའི་འོད་ཟེར་ལྗང་གུས་གོ་བགོས་པར་བསམས་ནས། གོ་ཆའི་ཚུལ་དུ་དེས་བདག་ཉིད་གོ་བགོས་ལ་ཇི་ལྟ་བ་བཞིན་དུ་བགྱིད་བ་དང་བཅས་པས་རྣ་བ་གཉིས་ཀྱི་མཐའ་མ་ལ་སོགས་པ་ནས་དགྲོལ་ཞིང་དར་དབྱངས་དཔྱངས་པ་ལ་སོགས་པའི་ཚུལ་དུ་བྱའོ། །འཁོར་ལོར་ཞེས་བྱ་བ་ལ་སོགས་པ་ལ་དེའི་འོག་ཏུ་ཏིང་ངེ་འཛིན་རིམ་པར་ཕྱེ་བ་ལས་གསུངས་པའི་རིགས་ཀྱིས་རང་གི་ཏིང་ངེ་འཛིན་ལ་སྙོམས་པར་ཞུགས་པའི་དཀྱིལ་འཁོར་གྱི་འཁོར་ལོ་ཡང་དག་པར་ཞུགས་པར་བསམ་མོ། །དེ་ནས་མཆོད་ཡོན་ཕུལ་ལ་བཞིན་འཛུམ་པས་རྡོ་རྗེ་གར་ལས་བྱུང་བའི་སྒེག་ཅིང་དགའ་བའི་རྡོ་རྗེ་སྙིང་གར་གནས་པས་ཞེས་དང་བཅས་ཤིང་འཛུམ་པའི་མིག་གིས་ཕྱག་བྱ་བས་ཕྱག་བྱས་ལ། འདོད་ཆགས་ཆེན་པོ་བདེ་བ་ཆེ། །རྡོ་རྗེ་ཆེན་པོ་ལས་ཆེ་བ། །རྡོ་རྗེ་སེམས་དཔའ་དེང་བདག་གྲུབ། །ཅེས་དེ་ཁོ་ན་ཉིད་ཀྱིས་ཡང་དག་པར་བསྐུལ་བར་བྱའོ། །སངས་རྒྱས་ས་རབ་ཅེས་བྱ་བ་ལ་སོགས་པ་ལ་རྡོ་རྗེ་སྒེག་མོ་ལ་སོགས་པས་མཆོད་པ་བཞིན་ཡེ་ཤེས་ལྔའི་བདག་ཉིད་ཅན་རྡོ་རྗེ་འཛིན་པའི་ས་རབ་ཏུ་རྫོགས་པར་བྱེད་ཅིང་མཐར་ཕྱིན་པར་བྱེད་པ་སྟེ། ཕྱིའི་མཆོད་པ་རྣམས་ཀྱང་བྱའོ་ཞེས་བྱ་བ་ནི་ལྷག་མའོ། །སངས་རྒྱས་ནི་འདིར་སངས་རྒྱས་རྡོ་རྗེ་འཛིན་པར་བརྗོད་ཅེས་གསུངས་པས་རྡོ་རྗེ་འཆང་བ་ཉིད་ཡིན་པར་བཟུང་སྟེ། ཕན་ཡོན་དང་བཅས་པས་བརྗོད་པའི་དབང་དུ་བྱས་ནས་ཐམས་ཅད་ལས་མཆོག་ཏུ་གྱུར་པའི་དོན་སྟོན་པའི་ཕྱིར་རོ། །གསང་བའི་མཆོད་པ་ཉིད་བསྟན་པའི་ཕྱིར། ཅུང་ཟད་ཅེས་བྱ་བ་ལ་སོགས་པ་གསུངས་ཏེ། རྡོ་རྗེ་ཁུ་ཚུར་གཉིས་ཀྱིས་འགྱིང་བག་ཏུ་བྱས་ནས་གཡོན་ཕྱོགས་སུ་སྒེག་པས་མགོ་ཅུང་ཟད་བཏུང་བ་ནི་སྒེག་མོའི་ཕྱག་རྒྱའོ། །ཧཱུཾ་ཞེས་བྱ་བས་ཞེས་བྱ་བ་ལ་སོགས་པ་ལ་གཡོན་པའི་རྡོ་རྗེ་ཁུ་ཚུར་གྱིས་མཛུབ་མོ་བསྒྲེངས་ལ་འོག་ཏུ་གཞག །གཡས་
པའི་མཛུབ་མོ་གར་གྱི་རྣམ་པས་གླུ་ལེན་ཅིང་པི་ཝང་བསྒྲེང་བ་ལྟ་བུར་བྱས་ལ་སྒེག་པས་ལུས་ཅུང་ཟད་བསྐྱོད་པ་ནི་གླུ་མའི་ཕྱག་རྒྱ་སྟེ་ཕྲེང་བ་མའི་འོག་ཏུ་ཤེས་པར་བྱའོ། །དེ་ནས་ཞེས་བྱ་བ་ལ་སོགས་པ་ལ་རིན་པོ་ཆེའི་ཁུ་ཆུར་དག་གིས་མགོ་བོ་ལ་རིན་པོ་ཆེའི་ཕྲེང་བ་བཅིང་བའི་ཚུལ་དུ་བྱ་བ་ནི་ཕྲེང་བ་མའི་ཕྱག་རྒྱའོ། །ཕྲེང་བ་ཡིས་ཞེས་བྱ་བ་ནི་ཕྲེང་བ་མའིའོ། །ལྷ་རྣམས་ཀུན་ལ་ཞེས་བྱ་བ་ནི་ལྷ་ཐམས་ཅད་ལ་སྟེ་ཕྲེང་བ་མ་ནི་སྒེག་མོའི་འོག་ཏུ་ཤེས་པར་བྱའོ། །ལག་པ་གཉིས་ཞེས་བྱ་བ་ལ་སོགས་པ་ཇི་ལྟ་བ་བཞིན་དུ་གར་བྱ་བ་ནི་གར་མཁན་མའི་ཕྱག་རྒྱའོ།། ཕྱིའི་མཆོད་པ་བསྟན་པའི་ཕྱིར་མེ་ཏོག་ཅེས་བྱ་བ་ལ་སོགས་པ་གསུངས་ཏེ། །རྡོ་རྗེ་ཁུ་ཚུར་གཉིས་ཀྱིས་གར་བྱས་པ་ལས་བྱུང་བའི་རྡོ་རྗེ་ཐལ་མོ་སྤྱི་བོར་བཞག་པ་ལ་ཕབ་སྟེ་སྙིང་གར་མེ་ཏོག་འབུལ་བའི་ཚུལ་དུ་བྱ་བ་ནི་མེ་ཏོག་མའི་ཕྱག་རྒྱའོ། །བདུག་སྤོས་རྩེ་མོའི་ཞེས་བྱ་བ་ལ་སོགས་པ་ལ་དེ་བཞིན་དུ་རྡོ་རྗེ་བཅིང་བ་བྱས་ལ་བཟློག་སྟེ། བསྒྲེངས་ནས་གུང་མོ་བདུག་སྤོས་ཀྱི་རྩེ་མོའི་ཚུལ་དུ་བྱས་ནས་གར་གྱིས་འོག་ཏུ་བདུག་སྤོས་དབུལ་བའི་ཚུལ་དུ་བྱ་ཞིང་ལག་པ་རྣམ་གྲངས་བསྐོར་བ་ནི་བདུག་པ་མའི་ཕྱག་རྒྱའོ། །མཐེ་བོ་གཉིས་ཞེས་བྱ་བ་ལ་སོགས་པ་ལ་དེ་བཞིན་དུ་རྡོ་རྗེ་བཅིང་བ་ལས་བྱུང་བའི་གཡས་གཡོན་གྱི་མཐེ་བོང་གཉིས་བསྒྲེངས་ལ་མར་མེ་འབུལ་བའི་ཚུལ་དུ་ལག་པ་བསྐོར་བ་ནི་མར་མེའི་ཕྱག་རྒྱའོ། །དུང་གི་ཚུལ་དུ་ཞེས་བྱ་བ་ལ་སོགས་པ་ལ་དེ་བཞིན་དུ་རྡོ་རྗེའི་ཐལ་མོ་དུང་འདྲ་བར་བྱས་པ་ཡོངས་སུ་བསྐོར་ནས་དུང་ཕོར་ཉིད་དང་མཆོད་ཡོན་འབུལ་བའི་ཚུལ་དུ་བྱས་ལ་ཡང་སླར་བཟློག་ནས་དེ་ཉིད་དང་གར་བྱ་བའི་སྦྱོར་བས་བྱུག་པས་བྱུག་པའི་ཚུལ་གྱིས་ལྷ་ཐམས་ཅད་ལ་བྱུག་པ་ནི་བྱུག་པ་མའི་ཕྱག་རྒྱའོ། །འདི་རྣམས་ཀྱི་སྙིང་བོ་ནི། ཧོ་བཛྲ་ལཱ་སྱེ། ཏྲཊ་བཛྲ་མཱ་ལེ། གྲི་བཛྲ་གཱི་ཏི། ཀྲིཊ་བཛྲ་ནྲི་ཏྱེ། ཏྲ་བཛྲ་པུཥྤེ། ཨོཾ་བཛྲ་དྷཱུ་པེ། ཁ་བཛྲ་ཨཱ་ལོ་ཀེ། ཊ་བ་བཛྲ་གནྡྷེ་ཞེས་བྱ་བ་དང་རིམ་བཞིན་སྦྱར་རོ། །འདི་སྐད་སྟོན་པ་ཡིན་ཏེ། སྙིང་གར་སྣ་ཚོགས་རྡོ་རྗེ་བསམས་ལ་དེའི་འོག་ཏུ་སྒེག་མོའི་ས་བོན་གྱི་ཡི་གེ་བསམས་ཏེ། དེའི་ཕྲེང་བ་ལས་བདག་ཉིད་རྡོ་རྗེ་སྒེག་མོའི་གཟུགས་སུ་ཡོངས་སུ་གྱུར་པར་བསམས་ལ། བཤད་
མ་ཐག་པའི་དེའི་ལས་ཀྱི་ཕྱག་རྒྱ་བཅིངས་ཏེ། དེའི་ཚེ་དེ་ཉིད་ཀྱི་གསང་སྔགས་འདོན་ཅིང་སྤྲོ་བ་དང་བསྡུ་བ་ཐམས་ཅད་བྱས་ནས། ལྷ་མོ་སྒེག་མོའི་གཟུགས་ཀྱིས་འདོད་པ་དང་དགའ་བའི་མཆོད་པ་རྣམས་ཀྱིས་དཀྱིལ་འཁོར་གྱི་ལྷ་རྣམས་ལ་མཆོད་པར་བྱའོ། །དེ་ནས་བསྡུས་ལ་རང་གི་ལུས་ཀྱི་ནང་དུ་ཆུད་པའི་སྣ་ཚོགས་རྡོ་རྗེ་ལ་ཡང་དག་པར་དགུག་པ་དང་གཞུག་པ་དང་བཅིང་བ་དང་དབང་དུ་བྱས་ལ་བཞག་སྟེ་ཡིད་ཀྱིས་ཇཿ་ཧཱུཾ་བཾ་ཧོཿ་ཞེས་བརྗོད་དོ། །དེ་བཞིན་དུ་དྲིའི་བར་གྱི་མཆོད་པ་རྣམས་ལ་ཡང་བྱའོ། །དེ་ནས་ཞེས་བྱ་བ་ལ་སོགས་པ་ལ་ཡི་གེ་ཨོཾ་འདོན་ཅིང་རྡོ་རྗེའི་ཁུ་ཚུར་གཉིས་ཀྱིས་རྫ་རྔ་ལ་སོགས་པ་སིལ་སྙན་བརྡུང་བའི་ཚུལ་བྱའོ། །དེ་བཞིན་དུ་རྔ་ཡབ་གཡོབ་པའི་ཚུལ་དང་ཉི་མ་འཛིན་པའི་ཚུལ་དང༌། ལག་པ་གཡས་གཡོན་གཉིས་བརྐྱང་ལ་སྲིན་ལག་གི་ཚིགས་དབུ་མ་བཀུག་ནས་བ་དན་གསུམ་པའི་ཚུལ་དུ་བསྒྲེངས་ནས་ལག་པ་གཉིས་བརྐྱང་ལ་སྟེང་དུ་བཏེག་པ་ལྟར་གཞག་པ་དང༌། གཡོན་པའི་རྡོ་རྗེ་ཁུ་ཚུར་གྱིས་རིན་པོ་ཆེའི་ཕྱི་མ་འགྱེད་པ་ལྟར་བྱའོ། །ལྷ་བཤོས་དབུས་བ་ནི་གོ་སླའོ། །དེ་བཞིན་དུ་རྡོ་རྗེ་ཐལ་མོ་གཉིས་བརྐྱང་བས་ན་བཟའ་དབུལ་བ་དང༌། རྡོ་རྗེ་ཁུ་ཚུར་གཉིས་ཀྱིས་ན་བཟའ་བསྐོན་པའི་ཚུལ་དུ་བྱ་བ་དང༌། ལག་པ་གཡོན་པས་ཚད་མེད་པ་ལྟ་བུ་ནི་ལྷ་ཐམས་ཅད་ཀྱི་གཞལ་ཡས་ཁང་ངོ༌། །མཁྲིག་མའི་སྟེང་དུ་གདུ་བུ་འདོགས་པའི་ཚུལ་དུ་བྱས་པས་གདུ་བུ་དབུལ་བ་དང་དོ་ཤལ་འདོགས་པའི་ཚུལ་གྱིས་དོ་ཤལ་དབུལ་བ་དང༌། ཞབས་ལ་རྐང་གདུབ་དབུལ་བའི་ཚུལ་གྱིས་རྐང་རྒྱན་བྱ་བ་དང་སྙན་ལ་སྙན་རྒྱན་བྱ་བ་དང༌། དེ་བཞིན་དུ་མགུལ་རྒྱན་བྱ་བ་དང༌། དཔུང་པའི་རྩ་བའི་འོག་ཏུ་དཔུང་རྒྱན་བྱ་བའི་ཚུལ་དང༌། དེ་ནས་སོར་བཞིའི་འོག་ཏུ་སྲུང་སྐུད་ཀྱི་ཚུལ་གྱིས་སྲུང་སྐུད་བྱ་བ་དང་མེ་ཁ་ལའི་ཚུལ་དུ་སྐེད་པར་སྐ་རགས་བྱ་བ་སྟེ། དེ་དག་དང་གཞན་དག་ཀྱང་ཤེས་པར་བྱའོ། །གཡོན་པ་དེ་བཞིན་གཤེགས་པའི་ཁུ་ཚུར་དུ་བྱས་པའི་མཐེ་བོའི་སྟེང་དུ་ལག་པ་གཡས་པ་ཁ་ཐུར་དུ་བསྟན་ལ་བརྐྱང་བའི་གདུགས་ཀྱི་ཚུལ་གྱིས་གདུགས་དབུལ་བ་དང་ལག་པ་གཡོན་པ་པང་བར་བསམ་གཏན་བྱ་བ་ལྟར་བཞག་ལ་ལག་པ་གཡས་པ་ཁ་ཐུར་དུ་བསྟན་ཏེ་བླ་རེ་བསྐྱེད་པའི་བསམ་
པས་ནམ་མཁའ་ལ་ཡོངས་སུ་བསྐོར་རོ། །རྡོ་རྗེ་དྲིལ་བུ་ཞེས་བྱ་བ་ལ་སོགས་པ་ནི་སྒོ་དབྱེ་བའི་ཡིན་པར་ཤེས་པར་བྱའོ་ཞེས་ལ་ལ་དག་ཟེར་རོ། །གཞན་དག་ནི་མཆོད་པའི་དབང་དུ་བྱས་པའི་བདག་ཉིད་ཡིན་གྱི་རང་བཞིན་གྱི་མཆོད་པའི་འབྲས་བུ་ལ་མི་དད་པ་དང་མི་ཤེས་པའི་སྒོ་འཕང་འབྱེད་པའི་དྲིལ་བུའི་སྒྲས་རང་གི་ལྷག་པར་མོས་པས་བསྒོམ་པའི་དོན་གྱི་འབྲས་བུ་སྟེར་བའི་ནུས་པས་དྲིལ་བུ་ཉིད་གསང་སྔགས་དཀྲོལ་བས་དབྱེ་བ་བྱའོ་ཞེས་ཟེར་རོ། །འདིས་ནི་འདི་སྐད་སྟོན་ཏེ། དྲིལ་བུ་དཀྲོལ་བས་ཡིད་ཀྱིས་རང་བཞིན་གྱི་མཆོད་པའི་ཚོགས་ཀྱི་འབྲས་བུ་ཕྱིན་ཅི་མ་ལོག་པ་སྩོལ་བར་བྱིན་གྱིས་རློབས་པར་འགྱུར་བ་ཡིན་ནོ། །དེ་བས་ན་གཞན་དག་ལས་ཀྱང་དེ་བཞིན་གཤེགས་པ་ཐམས་ཅད་མཆོད་པར་བྱས་ནས་སམ། ལྷ་རྣམས་རབ་ཏུ་བསྒྲུབས་ནས་དྲིལ་བུ་དཀྲོལ་ལོ་ཞེས་གསུངས་ཏེ། བཤད་པ་འདི་དག་ཀྱང་དྲིལ་བུ་དཀྲོལ་ལོ། །མཆོད་པའི་མཐའ་ཞེས་བྱ་བ་ལ་སོགས་པ་ལ་བཛྲ་སཏྭ་སུ་སཾ་གྲ་ཧཱ་ཏ་ཞེས་བྱ་བ་ལ་སོགས་པའི་གསང་བའི་སྙིང་པོ་གླུ་བླང་བ་སྒེག་པ་ལ་སོགས་པའི་ཉམས་དང་རྗེས་སུ་མཐུན་པའི་ཀླུ་ལེན་ཅིང་བསྟོད་པའི་མཆོད་པ་བྱའོ། །དེ་ནས་དཀྱིལ་འཁོར་གྱི་ལྷ་རྣམས་རང་གི་བདེ་བའི་བདག་ཉིད་ཅན་སེམས་སོ་སོར་རྟོགས་པའི་རྣམ་པར་བསྒོམས་ལ་སྒེག་མོ་ལ་སོགས་པའི་རིག་པའི་ལྷ་མོ་རྣམས་ཀྱིས་བདག་གོ་ཞེས་ལུས་ཀྱི་ངོ་བོ་ཉིད་ཀྱི་མཆོད་པའི་དགའ་སྟོབས་རྣམས་ཀྱིས་འགྲོ་བ་མ་ལུས་པར་བཀང་ལ་དེ་དང་ཐ་མི་དད་པའི་ང་རྒྱལ་དང་གླུ་བླང་སྟེ། སྟོང་པ་ཤིན་ཏུ་རྣལ་འབྱོར་ཡོད་མེད་མཐུས། །ནམ་མཁའ་ཉིད་དུ་དམ་ཚིག་ཉེ་བར་གཤེགས། །བདེ་གཤེགས་བདེ་བར་གཤེགས་པ་བཞེངས་སུ་གསོལ། རྡོ་རྗེ་སེམས་དཔའ་དཔལ་བཟད་སྐལ་ཁྱོད་བདག །ཅེས་བྱ་བས་བླང་བར་བྱའོ། །དེ་ནས་དེ་ལྟར་བླངས་ནས་ཀྱང༌། །ཨོཾ་ས་གསུམ་གྱིས་ནི་ཕྱག་བྱས་པ། །ཨོཾ་ས་གསུམ་གྱི་ནི་སྟོན་པ་པོ། །ས་གསུམ་ལ་ནི་འབྱོར་སྩོལ་པ། །ས་གསུམ་བདག་ནི་གྲུབ་པར་མཛོད། །ཅེས་བྱ་བ་འདིས་མཆོད་ཅིང་བསྟོད་པར་བྱའོ། །དེ་ནས་རང་གི་དངོས་གྲུབ་ཀྱི་ཕྱིར་གསོལ་བ་གདབ་པར་བྱ་སྟེ། རྗེས་སུ་ཆགས་པའི་རྣམ་དག་དགའ་བའི་པདྨོ་རྣམ་དག་པའི།།
མཆོད་པས་མཆོད་པ་གསལ་བར་རྗེས་སུ་མཆོད་བྱས་ན། །མཆོག་ཏུ་རྟག་པའི་རྣལ་འབྱོར་བདེ་བས་བདེ་བ་གྲུབ་པར་མཛོད། །ཀྱེ་མཆོག་ཏུ་བདེ་བའི་དམ་ཚིག་ངོ་བོ་ཉིད། །མཆོག་ཏུ་བདེ་བ་ཤིན་ཏུ་རྣལ་འབྱོར་སྐལ་བཟང་མཆོག་དགྱེས་པ། །རང་གི་དམ་ཚིག་སྐྱོན་མེད་རྟག་པར་རོལ་ཅིག་རོལ་ཅིག་ཧོ། །ཀྱེ་མཆོག་ཏུ་གསང་བའི་བདག་པོ་རང་གི་དམ་ཚིག་ཡིན་པའི་ཕྱིར། །རབ་ཏུ་གསང་བའི་ལྷ་མོ་མཆོག་རྣམས་སོ། །ཞེས་བྱའོ། །དེ་ནས་དཀྱིལ་འཁོར་བྱིན་གྱིས་བརླབ་པའི་ཕྱིར་གསོལ་བ་གདབ་པར་བྱ་སྟེ། འགྲོ་བའི་རྒྱུ་ནི་རྣམ་པ་སྣ་ཚོགས་འདུལ་བ་གསལ་བར་མཁྱེན། །དམ་ཚིག་ཐམས་ཅད་དངོས་པོ་བརྟན་གཡོ་ཀུན་གྱི་ངོ་བོར་གྱུར། །རྒྱལ་བ་ཀུན་གྱི་བདག་ཉིད་རྣལ་འབྱོར་བདེ་བ་མཁའ་འགྲོ་སྒྱུ་མ་ཧོ། །ཀྱེ་དམ་པ་རྟག་པའི་དངོས་གྲུབ་ཆེན་པོ་རབ་ཏུ་སྒྲུབ་ལ་སྟོན། །ཛཿ་ཧཱུཾ་བཾ་ཧོཿ་།ཨེ་མ་ཧོ་བདེ་མཆོག་བདེ་བ་དྲོངས། །རྣམ་པར་སྤྲུལ་ཧཱུཾ་སྣང་བར་མཛོད། །ཨ་ལ་ལ་ཧོ། །དེ་བཞིན་གཤེགས་པ་ཐམས་ཅད་ཀྱི། །མཁའ་འགྲོ་སྒྱུ་མ་སྣ་ཚོགས་ཀྱིས། །སློབ་མ་གཞུག་ཏུ་གསོལ་ཞེས་བྱའོ། །དེ་ནས་དཀྱིལ་འཁོར་འདི་དག་ཐམས་ཅད་དེའི་གསང་སྔགས་བརྗོད་ནས་རང་གི་སྙིང་གའི་དམ་ཚིག་གི་ཕྱག་རྒྱར་བཅུག་སྟེ། དཀྱིལ་འཁོར་གྱི་བདག་པོའི་དམ་ཚིག་གི་ཕྱག་རྒྱ་བཅིངས་ལ། དེའི་གསང་སྔགས་བརྒྱ་རྩ་བརྒྱད་བཟླའོ། །ལྷག་མ་རྣམས་ཀྱི་གསང་སྔགས་ནི་ལན་བདུན་བཟླས་བརྗོད་བྱའོ། །དེ་ནས་གྲུབ་པའི་དཀྱིལ་འཁོར་གཙུག་ཏོར་ལ་སོགས་པ་ལས་བྱུང་ལ། རང་གི་གནས་སུ་བཞག་སྟེ། དྲྀ་ཌྷ་བཛྲ་ཏིཥྠ་ཞེས་བྱ་བས་བརྟན་པར་བྱའོ།། ཨོཾ་བ་བཛྲ་མུཥྚི་བ་ཞེས་བྱ་བས་དམ་ཚིག་གི་ཕྱག་རྒྱས་བྱིན་གྱིས་བརླབ་པར་བྱ་བ་ཡང་ཤེས་པར་བྱའོ། །རྡོ་རྗེ་ཐེག་པ་ཞེས་བྱ་བ་ལ་སོགས་པ་ལས་ཇི་སྐད་དུ་བཤད་པའི་ཡིད་ཀྱི་མཆོད་པ་ནི་ཆོས་ཀྱི་དབྱིངས་ཀྱི་རྒྱུ་མཐུན་པ་ལས་བྱུང་བའི་ཕྱིར་དོན་དམ་པའི་མཆོད་པ་ཡོད་པས་དེ་ཉིད་ཀྱིས་ན་འདི་ནི་རྡོ་རྗེ་ཐེག་པ་མཉེས་པར་བྱེད་པ་སྟེ་རྡོ་རྗེ་ཐེག་པ་བསྡུས་པ་རྣམ་པར་སྣང་མཛད་ལ་སོགས་པ་མཉེས་པར་བྱེད་པ་ཡིན་ཏེ། དེ་རྣམས་ཀྱིས་དགྱེས་པའི་ངོ་བོ་ཉིད་དུ་གྱུར་པས་སོ། །གང་གིས་རྣམ་རྟོག་རྣམ་སྤངས་ཏེ། །ཞེས་བྱ་བ་ནི་མི་བདེན་པའི་ཕྱིའི་དོན་གྱི་རྣམ་པར་རྟོག་བ་
སྤངས་པའོ། །བྱང་ཆུབ་སེམས་ནི་རྣམ་བསྒོམ་པས། །ཞེས་བྱ་བ་ནི་བྱང་ཆུབ་ཀྱི་སེམས་ཀྱི་ལེའུའི་རིམ་པས་ཆོས་བདག་མེད་པ་སྒོམ་པར་བྱེད་པའོ། །ལུས་དང་སེམས་ནི་རྣམ་དག་བས། །ཞེས་བྱ་བ་ནི། དེ་ཉིད་ཚོལ་ལ་ཐོག་མར་ནི། །ཐམས་ཅད་ཡོད་ཅེས་བརྗོད་པར་བྱ། །དོན་རྣམས་རྟོགས་ཤིང་ཆགས་མེད་པས། །དེ་ཡི་འོག་ཏུ་དབེན་པའོ། །ཞེས་བྱ་བའི་ཚུལ་གྱིས་སོ། །རྣམ་པར་སྣང་མཛད་ལ་སོགས་པ་ཀུན་རྫོབ་ཀྱི་བདེན་པ་ལས་མི་འདའ་བའི་ཚུལ་གྱིས་མངོན་པར་ཡིད་ཆེས་པའི་རྒྱུས་དད་པ་གང་ཡིན་པའི་ཞེས་བྱེད་པའི་ཚིག་མི་མངོན་པར་མཚམས་སྦྱར་ཏེ། དེ་རྣམས་ཀྱི་མཆོད་པ་ནི་བླ་ན་མེད་པའོ། །སེམས་ཅན་གང་གིས་ཞེས་བྱ་བ་ལ་སོགས་པ་ལ་གང་དངོས་པོ་ལ་མངོན་པར་ཞེན་པ་དང༌། མངོན་པར་མ་ཞེན་པའི་མཚན་ཉིད་ནི་མཐའ་གཉིས་ཏེ་དེ་ལས་དབེན་པ་ཆོས་བདག་མེད་པའི་ཡེ་ཤེས་ནི་དབུ་མའི་ཐེག་པ་སྟེ་དེ་བསྒོམས་ལ་དབྱེར་མི་ཕྱེད་པ་དང་ལྡན་པའི་རྒྱུན་ལ་གནས་པ་དག་གི་ཡིན་གྱི་ཐེག་པ་དམན་པ་ལ་ལྷག་པར་མོས་ཤིང་མངོན་པར་ཞེན་པའི་མཐར་ལྟུང་བ་དེ་རྣམས་ཀྱི་མཆོད་པ་ནི་ཀུན་རྫོབ་པའོ། །དེའི་ཞེས་བྱ་བའི་སྒྲ་ནི་ཐ་དད་པའི་རིམ་པ་དང་ངེས་པ་གཟུང་བ་ཡིན་པར་བལྟ་བར་བྱའོ་ཞེས་བྱ་བའི་ཚུལ་གྱིས་སོ། །མངོན་པར་ཞེན་པ་དང་མཐར་ལྟུང་བ་རྣམས་ཀྱིས་ནི་མཆོད་པ་ཉིད་མེད་པར་ཤེས་པར་བྱའོ། །མཐའ་གཉིས་སུ་རྟོག་པ་སྤངས་པ་ནི་ཡིད་ཀྱི་མཆོད་པ་འབའ་ཞིག་ཏུ་མ་ཟད་ཀྱི་མེ་ཏོག་ལ་སོགས་པའི་དངོས་སུ་འབྱོར་པའི་མཆོད་པ་རྣམས་ཀྱང་མིག་ཡོར་ལྟ་བུར་མངོན་བར་འདུས་བྱས་པས་དེ་ལ་ཡང་མངོན་པར་ཞེན་པ་མེད་དེ། སྒྱུ་མའི་སྐྱེས་བུ་བཞིན་དུ་སྤྱད་པར་བྱའོ་ཞེས་བྱ་བའི་ཚུལ་དུ་ཤེས་པར་བྱའོ། །དེ་བས་ན། བུམ་པ་གང་བ་ཇི་སྙེད་པ། མེ་ཏོག་ལ་སོགས་རྣམས་ཀྱིས་མཆོད། །ཅེས་བྱ་བའི་རིམ་པ་འདིས་གཞག་པར་བྱའོ། །དེ་ལ་རེ་ཞིག་རྣམ་པར་རྒྱལ་བའི་བུམ་པ་ཇི་སྐད་བཤད་པ་ལ་ཨོཾ་མ་ཧཱ་སུ་ཁ་བཛྲ་ཨ་མོ་གྷ་ས་མ་ཡོ་ད་ཀ་སིདྡྷྱ་ཨ་བྷི་ཥིཉྩ་སརྦ་སུ་ཀ་སོ་མ་ན་སྱ་ཨ་དྷྱ་ཀུ་རུ་ཀུ་རུ་ཛཿ་ཧཱུཾ་བཾ་ཧོཿ་ཨ་ཞེས་བྱ་བས་དཀྱིལ་འཁོར་གྱི་བདག་པོའི་དམ་ཚིག་གི་ཕྱག་རྒྱས་གཟུང་བའི་འཁོར་ལོ་དང༌། མེ་ཏོག་གི་ལྕུག་མ་ལ་ཉི་ཤུ་རྩ་གཅིག་
བཟླས་ཏེ། དེའི་གསང་སྔགས་ཀྱིས་དེའི་མདུན་དུ་གཞག་གོ །བུམ་པ་གཞན་རྣམས་ནི་འབྲུ་ལྔ་ལ་སོགས་པ་དང་ལྡན་ཞིང་མི་བསྐྱོད་པ་ལ་སོགས་པའི་མཚན་མས་མཚན་བ་ལ། ཨོཾ་བཛྲོད་ཀ་ཧཱུཾ་ཞེས་ལན་བརྒྱ་རྩ་བརྒྱད་བཟླས་བརྗོད་བྱ་སྟེ་མི་བསྐྱོད་པ་ལ་སོགས་པའི་གསང་སྔགས་ལན་བདུན་བཟླས་ལ་དེ་རྣམས་ཀྱི་དེ་ཉིད་ཀྱིས་གཞག་པར་བྱའོ། །དེ་བཞིན་དུ་བུམ་པ་གང་བ་ལ་ཨ་མྲཱི་ལོ་མ་ལ་སོགས་པས་ཁ་དག་བཅིང་རྡོ་རྗེའི་ཆུའི་སྔགས་ཀྱིས་ལན་བདུན་བཟླས་པ་བྱས་ལ་ལྷ་ཐམས་ཅད་ལ་དབུལ་བར་བྱའོ། །དེ་ནས་ཡི་གེ་ཨོཾ་ལ་མངོན་པར་བསྐྱོད་ལ་རྡོ་རྗེའི་རྩེ་མོས་བཟླས་པའི་ཆུས་བསང་གཏོར་བྱ་ཞིང༌། རྡོ་རྗེ་མེའི་ཕྱག་རྒྱ་དང་སྔགས་ཀྱིས་བཏབ་པ་དང༌། རྡོ་རྗེ་མེ་ཏོག་ལ་སོགས་པའི་ཕྱག་རྒྱ་དང༌། སྔགས་ཡོངས་སུ་བཟླས་པའི་མེ་ཏོག་དང་སྤོས་དང་མར་མེ་དང་བྱུག་པ་སོ་སོའི་གསང་སྔགས་བརྗོད་ཅིང་དཀྱིལ་འཁོར་གྱི་ལྷ་ཐམས་ཅད་ལ་མཆོད་པར་བྱའོ། །དེ་ནས་རྡོ་རྗེ་བཅིང་བ་བྱས་ནས་རལ་གྲི་འཕྱར་བའི་ཚུལ་གྱིས་ཕྱག་རྒྱ་དང་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུཏྤནྣ་ཏྭཱ་ཏ་ཅེས་བྱ་བ་འདིས་ཡོངས་སུ་བཟླ་ཞིང་ལས་ཐམས་ཅད་པའི་ཆུས་བསང་བའི་བཟའ་བ་དང་བཅའ་བ་དང་མྱང་བ་དང་བལྡག་པ་རྣམ་པ་སྣ་ཚོགས་པ་རྣམས་སོ་སོའི་གསང་སྔགས་བརྗོད་ནས་དབུལ་བར་བྱའོ། །དེ་ནས་ལྷ་མོ་སོ་སོ་ལ་རེ་རེའམ་སྤྱིར་རས་ཟུང་ཅིག །ཨོཾ་སརྦ་བད་པཱུ་ར་པཱུ་ར་ཨཱ་བརྟ་ཨཱ་བརྟ་ཧོ་ཞེས་མངོན་པར་བསྔགས་ལ་རང་གི་གསང་སྔགས་ཀྱིས་ཀྱང་འབྱོར་བ་ཅི་ཡོད་པས་དབུལ་བར་བྱའོ། །དེ་ནས་ཐལ་མོ་སྦྱར་བ་སྤྱི་བོར་བཞག་ལ། ཨོཾ་ལས་བྱུང་བའི་དཔག་བསམ་གྱི་ཤིང་ལ་སོགས་པས་ནམ་མཁའི་ཁམས་ཐམས་ཅད་གང་བར་བྱས་ལ་ཡིད་ཀྱིས་དབུལ་བར་བྱའོ། །ཨོཾ་ཨ་ནུཏྟ་ར་སརྦ་པཱ་ཛ་ཞེས་བྱ་བ་ལ་སོགས་པ་འོག་ནས་བཤད་པའི་གསང་སྔགས་ལན་གསུམ་བརྗོད་པས་བྱིན་གྱིས་བརླབས། དེ་ནས་དྲིལ་བུ་དཀྲོལ་ཏེ་ཡི་གེ་བརྒྱ་པ་ལན་བདུན་བཟླས་པས་དཀྱིལ་འཁོར་བརྟན་པར་བྱའོ། །དེ་ནས་རྡོ་རྗེ་ཧཱུཾ་མཛད་ཀྱི་སྦྱོར་བ་དང་ལྡན་པས་ཕྱི་རོལ་དུ་བྱུང་ལ་བཅོམ་ལྡན་འདས་དང་ལྷན་ཅིག་ཕྱོགས་བཅུ་ནས་འོངས་པའི་སེམས་ཅན་ནི་སྣང་བ་ཐམས་ཅད་ལ་ཕྱོགས་ཀྱི་གཏོར་
མ་ཇི་ལྟ་བ་བཞིན་བྱིན་ཏེ་ཉེ་རེག་བྱས་ནས་སླར་ཞུགས་ལ་སྦྱིན་སྲེག་བྱས་ཏེ་ཕྱག་རྒྱ་དང་ཕྱག་རྒྱའི་ལན་དག་གིས་མཆོད་པ་ཡང་བྱ་བར་ཤེས་པར་བྱའོ། །མཆོད་པ་དེ་དག་ཅེས་བྱ་བ་ལ་སོགས་པ་ལ་གོང་དུ་བཤད་མ་ཐག་པའི་མཆོད་པ་ཐབས་ཀྱི་བདག་ཉིད་ཅན་དེ་དག་གསན་པ་དང་སེམས་ཅན་གྱི་དོན་དུ་འགྱུར་བར་གཟིགས་པས་ངོ་མཚར་དུ་གྱུར་པའི་སྤྱན་ཕྱེ་ནས་ལེགས་སོ་ཞེས་བྱ་བ་རབ་ཏུ་གསུང་པ་སྟེ། མཆོག་ཏུ་དགྱེས་པར་མཛད་པའོ། །ཨེ་མའོ་ཞེས་བྱ་བ་ལ་སོགས་པ་ལ་ཨེ་མའོ་ཞེས་བྱ་བ་ནི་ངོ་མཚར་དུ་གྱུར་པའོ། །སུ་ཞིག་ཅེ་ན་སངས་རྒྱས་ཐམས་ཅད་ཀྱེའོ། །ཅི་ཞིག་ངོ་མཚར་དུ་གྱུར་ཞེ་ན་ཐབས་ཞེས་བྱ་སྟེ། ཐབས་ཞེས་བྱ་བ་ནི་དོན་དམ་པའི་མཆོད་པའི་ཚིགས་གསུངས་པ་ཡིན་ནོ། །ཅིའི་ཕྱིར་ཞེ་ན་སངས་རྒྱས་བྱང་ཆུབ་ཐོབ་པའི་ཞེས་གསུངས་པ་སྟེ་དེ་ཐོབ་པའི་ཕྱིར་རོ། །གང་གིས་ཤེ་ན་རྡོ་རྗེ་བསྒོམས་པས་ཞེས་བྱ་བ་སྟེ། རྡོ་རྗེ་བསྒོམ་པ་ནི་རྣམ་པར་སྣང་མཛད་ལ་སོགས་པ་བསྒོམ་པ་སྟེ། སྒྲུབ་པ་པོས་ཞེས་བྱ་བ་ནི་ལྷག་མའོ། །དེའི་ཁྱད་པར་ཇི་ལྟ་བུ་ཞེ་ན། དཀའ་བ་མེད་པས་ཞེས་བྱ་བ་གསུངས་ཏེ། དཀའ་བ་མེད་པ་སྟེ་ཉོན་མོངས་པ་ཐམས་ཅད་དང་བྲལ་བའི་ཐབས་གང་ཡིན་པ་དེས་བྱང་ཆུབ་སྟེ་ཆོས་ཐམས་ཅད་ཕྱིན་ཅི་མ་ལོག་པར་ཁོང་དུ་ཆུད་པ་ཐོབ་ཅིང་མངོན་སུམ་དུ་བྱེད་པའོ། །རྡོ་རྗེ་ཐེག་ཆེན་ཞེས་བྱ་བ་ལ་སོགས་པ་ལ་གང་བཅོམ་ལྡན་འདས་རྣམ་པར་སྣང་མཛད་ཀྱིས་རྡོ་རྗེའི་ཐེག་པ་བླ་ན་མེད་པ་སྟེ། ཐེག་པ་ཆེན་པོ་མངོན་སུམ་དུ་མཛད་པ་དེ་ནི་རྣམ་པར་རྟོག་པའི་དྲི་མ་ཐམས་ཅད་དང་བྲལ་བའི་ཕྱིར་ལེགས་སོ་ཞེས་བྱ་བའོ། །ཇི་ལྟར་ཐུགས་སུ་ཆུད་པའི་ངོ་བོ་ཉིད་དེ་སྟོན་པ་དེ་ཡང་ཆོས་དང་གང་ཟག་ལ་བདག་མེད་པ་རབ་ཏུ་སྟོན་པ་ལགས་སོ། །དེ་ཡང་རྟོག་གེ་ཐམས་ཅད་ཀྱིས་རྟོག་པར་མི་ནུས་པས་ཟབ་པ་ཉིད་དང་བརྟན་པ་ཉིད་ཤེས་བྱའི་དཀྱིལ་འཁོར་མ་ལུས་པར་ཁྱབ་པར་བྱེད་པ་ཡིན་པས་ན་རྒྱ་ཆེ་བ་སྟེ་དེ་ཡང་སྨྲ་བ་པོའི་གདུལ་བྱ་མ་ལུས་པར་ཟིལ་གྱིས་མནན་ཏེ་གནས་པས་ལེགས་སོ། །དེ་ལའང་ཐོགས་པ་མེད་པའི་དེ་བཞིན་གཤེགས་པ་ལ་སོགས་པའི་རིན་པོ་ཆེའི་བསྡུས་པ་གང་ཡིན་པ་འདུས་པ་དེའང་སྐྱེས་བུ་དམ་པའི་དོན་སྒྲུབ་པ་
དང་ཉེ་བར་འཆམ་པའི་མཐར་ཐུག་པ་ཡིན་པའི་ཕྱིར་ལེགས་སོ་ཞེས་པའོ། །ཡེ་ཤེས་སྐུ་གསུམ་ལས་བྱུང་བའི། །ཞེས་བྱ་བ་ནི་རྣམ་པར་སྣང་མཛད་ལ་སོགས་པའི་ཡེ་ཤེས་ལས་བྱུང་བའོ། །བྱང་ཆུབ་སེམས་དཔའ་ཞེས་བྱ་བ་ནི་བྱམས་པ་ལ་སོགས་པའོ། །སངས་རྒྱས་ཐམས་ཅད་ཀྱིས་རྡོ་རྗེ་ཐེག་པའི་བསྔགས་པ་ཞེས་བྱ་བ་ནི་དེ་བྱས་པའི་ཕན་ཡོན་ལ་དགྱེས་པས་གསུངས་པའོ། །དགའ་བ་ཞེས་བྱ་བ་ནི་སྔོན་བྱུང་བའི་ཆོས་ཐོས་པས་ཡིད་བདེ་བ་ཐོབ་པར་གྱུར་པ་ཡིན་ལ་དུས་ཕྱིས་སྔོན་ཆོས་འདིས་བདག་ཅག་བསྡུས་ས་ཞེས་སེམས་ཤིང་ཡིད་བདེ་བ་ཐོབ་པས་མཆི་མ་འབྱིན་ཅིང་རབ་ཏུ་ངུ་བར་གྱུར་པ་ཡིན་གྱི། བྱང་ཆུབ་སེམས་དཔའ་རྣམས་ལ་ནི་ཡིད་མི་བདེ་བ་ཉིད་མི་འབྱུང་ངོ་ཞེས་ལ་ལ་འདོད་དོ། །གཞན་དག་ན་རེ་དེ་དག་ཀྱང་ནམ་ཞིག་བདག་མངོན་པར་རྫོགས་པར་སངས་རྒྱས་ནས་འགྲོ་བ་མ་ལུས་པའི་མངོན་པར་འདོད་པའི་དོན་རྫོགས་པར་བྱེད་པའི་ཆོས་ཀྱི་འཁོར་ལོ་བསྐོར་བར་བྱ་ཞེས་འདི་ལྟར་རྟག་ཏུ་དགའ་ཞིང་འདོད་པ་ཉིད་ཡིན་གྱི། དེ་རྣམས་ཀྱི་ནང་དུ་འདི་ཡོངས་སུ་མི་ཤེས་པའི་བྱང་ཆུབ་སེམས་དཔའ་མི་སྲིད་དོ་ཞེས་ཟེར་རོ། །དེ་ལ་འདི་ནི་གསང་བ་འདུས་པའི་རྒྱུད་ཕྱི་མ་ལྟ་བུ་ཡིན་པས་འདི་ཉིད་བསྐལ་པ་གཞན་ལ་བསྟན་པའི་ཕྱིར། དེའི་ཚེ་བྱུང་བའི་བྱམས་པ་ལ་སོགས་པ་རྣམས་ནི་མདོ་སྡེའི་སྤྱོད་པར་བྱེད་པ་བྱུང་སྟེ། དེ་ཡང་གསང་བ་འདུས་པའི་རྒྱུད་ལས་དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་དེ་བཞིན་གཤེགས་པ་ཐམས་ཅད་དང་བྱང་ཆུབ་སེམས་དཔའ་དེ་དག་ལ་བོས་ཏེ་གསུངས་པ་བཅོམ་ལྡན་འདས་དེ་བཞིན་གཤེགས་པ་རྣམས་སྔོན་བྱུང་བ་ན་བརྗོད་ཀྱིས་མི་ལང་བའི་སངས་རྒྱས་ཀྱི་ཞིང་གི་རྡུལ་ཕྲ་རབ་དང་མཉམ་པའི་བསྐལ་པ་ཡང་འདས། གང་བཅོམ་ལྡན་འདས་མར་མེ་མཛད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱང་འདས། འོད་སྲུངས་ཐུབ་པ་ཆེན་བོ་མངོན་པར་སངས་རྒྱས་པས་ཀྱང་མ་གསུངས་ཏེ། ཅིའི་ཕྱིར་ཞེ་ན། བཅོམ་ལྡན་འདས་གསང་བ་ཆེན་པོའི་དོན་བཤད་པ་དེའི་ཚེ་དེའི་དུས་ན་སེམས་ཅན་རྣམས་སྐལ་བ་མེད་པའི་ཕྱིར་རོ་ཞེས་ཆེ་བའི་བདག་ཉིད་བསྟན་པའི་ཕྱིར་གསུངས་ཏེ། དེ་ནི་སྒྲ་ཇི་བཞིན་ཡིན་པར་ཤེས་
པར་བྱའོ་ཞེས་ཟེར་རོ། །གཙོ་བོ་ཞེས་བྱ་བ་ལ་སོགས་པ་ལ་སྔོན་ཆད་མ་རྙེད་པ་ལ་སོགས་པའི་ཆོས་ཐོས་པས་མགུ་བ་སྟེ་ཡིད་དགའ་བར་གྱུར་པའོ། །མཐའ་རྣམས་མེད་པ་ནི་མངོན་པར་ཞེན་པའི་མཐའ་གཉིས་དང་བྲལ་བའོ། །སྐྱེ་བ་མེད་པ་ནི་ཇི་ལྟར་ཡོངས་སུ་བརྟགས་པའི་སྐྱེ་བའི་ངོ་བོ་ཉིད་མེད་པའོ། །ཡི་གེ་མེད་པ་ནི་དག་གི་སྤྱོད་ཡུལ་ཐམས་ཅད་ལས་འདས་པའི་རང་བཞིན་ཅན་ཡིན་པས་སོ། །གནས་པ་མེད་པ་ནི་སོ་སོར་ངེས་པའི་གནས་མེད་པས་སོ། །རྣམ་པ་དེ་དག་གིས་ནམ་མཁའ་འདྲའོ། །དེ་ཉིད་ཀྱིས་རྣམ་པར་རྟོག་པའི་དྲི་མ་ཐམས་ཅད་དང་བྲལ་བས་རྣམ་རྟོག་ལས་གྲོལ་བ་ཞེས་བྱའོ། །རྟོག་པ་རྣམས་ཀྱིས་ཞེས་བྱ་བ་ལ་སོགས་པ་ལ་གདུལ་བྱའི་སྐྱེ་བོ་རྣམས་ཀྱིས་བཅོམ་ལྡན་འདས་དེ་རྣམ་པར་རྟོག་པ་མི་མངའ་ཡང་ཡིད་བཞིན་གྱི་ནོར་བུ་ལྟ་བུར་རང་ཉིད་སོ་སོར་སྣང་བའི་ཚུལ་གྱིས་སྔགས་ལ་སོགས་པ་སྟོན་པར། རྣམ་པར་བརྟགས་པས་རྟག་པས་བརྟགས། །ཞེས་བྱ་བ་ལ་རྟོགས་པའི་ཐབས་སུ་བརྟགས་པ་གང་གིས་ཡེ་ཤེས་ཀྱི་སྲེས་པོ་ཀུན་ཞེས་བྱ་བ་ལ་ཡེ་ཤེས་རྟོག་པ་ལ་སོགས་པ་བྱང་ཆུབ་སེམས་དཔའ་ཐམས་ཅད་སངས་རྒྱས་ཀྱི་ས་ཐོབ་ཅིང་རྟོགས་པར་འགྱུར་པའོ། །བདེ་བ་ལས་འཁྲུངས་ཞེས་བྱ་བ་ལ་སོགས་པ་ལ་བདེ་བ་ནི་བྱང་ཆུབ་ཀྱི་སེམས་ཀྱི་བདག་ཉིད་ཅན་ནོ། །དེ་ལས་འཁྲུངས་པ་ནི་དོན་གྱི་དངོས་པོའི་རྣམ་པ་གཉིས་སུ་མེད་པར་བསྒོམས་པ་སྟེ་དེ་ལས་བྱུང་བའི་ཕྱིར་རོ། །རྡོ་རྗེ་འཆང་བ་ནི་གཉིས་སུ་མེད་པའི་སེམས་ཀྱི་ངོ་བོ་ཉིད་དུ་རྟག་ཏུ་བྱུང་བའོ། །དངོས་པོ་ནི་ཡོད་པ་ངོ་བོ་སྟེ། དེ་གཉིས་སུ་མེད་པའི་རྣམ་པ་ནི་དངོས་པོ་མེད་པ་སྟེ། དེའི་འབྱུང་གནས་སོ། །གང་དུ་ཞེས་པ་ནི་རྒྱུད་གང་དུ་རྡོ་རྗེ་འཆང་བ་དེ་ཉིད་དང་པོར་རྣམ་པར་སྣང་མཛད་དུ་ཡི་གེ་ཨོཾ་གྱིས་སྟོན་པ་སྟེ། དག་པའི་གདུལ་བྱ་རྣམས་རྣམ་པར་དག་པར་བྱ་བའི་ཕྱིར་གང་གིས་སངས་རྒྱས་རྣམ་པར་སྣང་མཛད་དུ་སྤྲུལ་པ་གང་ཡིན་པ་དེ་ལ་དེ་སྐད་ཅེས་བྱ་བའོ། །གཟུགས་མེད་ཚུལ་གྱིས་ཞེས་བྱ་བ་ནི་སངས་རྒྱས་ཀྱི་རྣམ་པར་བཀོད་པས་གདུལ་བྱ་རྣམས་དཀའ་བར་བྱ་བའི་ཕྱིར་དེ་བཞིན་གཤེགས་པ་ལ་སོགས་པའི་སྤྲུལ་པའི་ཕྲེང་བ་གང་གིས་བསྐོར་བ་དེ་ལ་དེ་སྐད་ཅེས་བྱའོ། །སྒྱུ་འཕྲུལ་དྲ་བ་
ཁྱོད་ལ་ཕྱག་འཚལ་ལོ། །ཞེས་བྱ་བ་ནི་རྒྱུད་ལ་ཕྱག་བྱས་པས་བཅོམ་ལྡན་འདས་ལ་ཕྱག་བྱས་པ་ཡིན་ནོ། །གསུང་སྙན་ཞེས་བྱ་བ་ལ་སོགས་པ་ལ་སྤྲོས་པ་མེད་པའི་གསུང་དུ་བཞུགས་པ་ནི་འཇིག་རྟེན་དབང་ཕྱུག་སྟེ། ཡི་གེ་ཐམས་ཅད་ཀྱིས་ཁྱབ་པར་བྱས་པའི་ཚོགས་དང་ལྡན་པའི་རྒྱུད་གང་ཡིན་པ་དེ་ལ་ཕྱག་འཚལ་ལོ་ཞེས་བྱ་བར་སྦྱོར་རོ། །མིག་གསུམ་པ་ནི་ལྷ་ཆེན་པོའོ། །འདུལ་བར་མཛད་པ་ནི་ཆུང་མ་དང་བཅས་པ་རྣམ་པར་དུལ་བར་བྱས་པ་སྟེ། དེས་ན་གང་གི་སྒྱུ་འཕྲུལ་གྱི་ཚུལ་དུ་མ་དང་ལྡན་པའི་མཁས་པས་ནི་དེ་ལས་གཞན་པ་མེད་པའོ། །ཡང་རྒྱུད་གང་དུ་རྗེས་སུ་ཆགས་བའི་ངོ་བོ་ཉིད་དུ་གྱུར་པ་རྡོ་རྗེ་འཆང་དེ་ལ་ཕྱག་འཚལ་ལོ་ཞེས་སྔ་མ་དང་སྦྱར་རོ། །ཁྱད་པར་ཇི་ལྟ་བུ་ཞེ་ན། ལྷ་མོ་དག་ཅེས་བྱ་བ་སོགས་པ་གསུངས་ཏེ། ལྷན་ཅིག་སྐྱེས་པའི་གནས་པ་དང༌། སྒེག་པ་དང་བཅས་པའི་དགོངས་པས་ཕྱག་གཡས་ཀྱིས་རྡོ་རྗེ་བསྟོད་ནས་གསོར་ཞིང་ཕྱག་གཡོན་གྱིས་དྲིལ་བུ་ལེགས་པར་བསྣམས་ཏེ་དཀྲོལ་བ་རིགས་ལྔ་མ་ལུས་པ་ཡང་དག་པར་བསྡུས་པའི་ལྷ་མོ་དང་བཙུན་མོའི་ཚུལ་གྱིས་འདུས་པར་མཛད་པ་གང་ཡིན་པ་དེ་ལ་དེ་སྐད་ཅེས་བྱའོ། །དམ་ཚིག་ཐོབ་ཅིང་བྱ་བ་བྱས་པས་བཙུན་མོའི་དོན་འདི་ཉིད་གསལ་བར་གསང་བ་ལྔའི་སེམས་དཔའ་ཆེན་པོའི་རིམ་པ་ལས་གསུངས་པ་ནི་གཅིག་གི་སྟེ། ཀཱི་ལི་ཀཱི་ལས་རྡོ་རྗེ་སེམས་དཔའ་ཕྱག་གིས་ཀུན་ནས་འཁྱུད་པ་ལ་བརྩོན་པ་དང༌། གཉིས་པ་སྟེ་རྡོ་རྗེ་ཆགས་མས་རྗེས་སུ་ཆགས་ཤིང་རབ་ཏུ་དགའ་བར་ནུས་པ་དང༌། གསུམ་པ་སྟེ་རྡོ་རྗེ་སྙེམས་མ་ཁྲོ་བོའི་ཚུལ་གྱིས་མེ་ཏོག་གི་ཕྲེང་བ་ཅུང་ཟད་འཕེན་པར་ཤེས་པར་བྱའོ། །དེ་ལ་བཞི་པ་ནི་རྡོ་རྗེ་མཚན་ཆ་མོ་སྟེ། རབ་ཏུ་དགའ་མའི་མདའ་འཕེན་ཅིང་འབིགས་བར་བྱེད་དོ། །དེ་ལྟར་ལྷ་མོ་ཐམས་ཅད་འདུས་པས་བཙུན་མོའི་གཟུགས་བྱེད་པར་ཁོང་དུ་ཆུད་པར་བྱའོ། །འདིས་ནི་འདི་སྐད་སྟོན་ཏེ། བཅོམ་ལྡན་འདས་རྡོ་རྗེ་འཆང་འདིར་གསང་བ་ལྔའི་དེ་ཁོ་ན་ཉིད་ཀྱི་རིམ་པས་ཀྱང་བསྒོམ་པར་བྱའོ་ཞེས་པའོ། །གླུ་དེ་དག་གིས་བསྡུས་པའི་དོན་རྣལ་འབྱོར་པས་བསྒོམས་ན་རབ་ཏུ་དགའ་བའི་རྡོ་རྗེ་མཉམ་པ་ཉིད་དེས་ཐོབ་པར་འགྱུར་རོ། །ཕྱག་རྒྱ་དང་མཆོད་པའི་ཆོ་ག་རབ་ཏུ་སྟོན་པའི་གཞུང་གི་ལེའུ་ལ་ནི་ཕྱག་
རྒྱ་དང་མཆོད་པ་རིམ་པར་ཕྱེ་བའི་སྒྲར་བརྗོད་དོ། །ལེའུ་དྲུག་པའི་འགྲེལ་པའོ།། །།ཕྱག་རྒྱ་དང་མཆོད་པ་ཡང་ཀུན་རྫོབ་དང་དོན་དམ་པའི་བྱང་ཆུབ་ཀྱི་སེམས་བསྒོམ་པ་དང་བྲལ་བས་སེམས་ཅན་རྣམས་ལ་ཁྱད་པར་གྱི་མཐུ་སྟེར་བར་མི་འགྱུར་བས། དེ་ནས་ཞེས་བྱ་བ་ལ་སོགས་པ་བདུན་པ་བྱང་ཆུབ་ཀྱི་སེམས་བསྒོམ་པའི་ཡེ་ཤེས་བསྐྱེད་པའི་ལེའུ་གསུངས་པ་ཡིན་ནོ། །དེ་ལ་འཁོར་ན་གནས་པའི་བྱང་ཆུབ་སེམས་དཔའ་རྣམས་ཀྱི་དོན་ལ་གཟིགས་ནས་དེ་བཞིན་གཤེགས་པ་རྣམས་གསོལ་བ་འདེབས་པར་མཛད་ཀྱི་མི་མཁྱེན་པ་ནི་མ་ཡིན་པར་ཤེས་པར་བྱ་སྟེ། ཚོགས་དང་ཆོས་ཀྱི་སྐུ་དང་ནི། །འགྲོ་བའི་དོན་ནི་སྤྱོད་པ་ཡིས། །སངས་རྒྱས་ཐམས་ཅད་མཉམ་པ་སྟེ། །སྐུ་ཚེ་རིགས་དང་ཚད་ཀྱིས་མིན། །ཞེས་བྱ་བའི་གྲུབ་པའི་མཐའི་རྗེས་སུ་འབྲངས་ན་དེ་མི་སྲིད་པས། དེ་བཞིན་གཤེགས་པ་རྣམས་ཀྱི་ཐུགས་སུ་ཆུད་ནས་བྱང་ཆུབ་ཀྱི་སེམས་རྣམས་ཡོངས་སུ་མཁྱེན་པའི་ཕྱིར་ནི་མ་ཡིན་ནོ། །ཚིག་མཐུན་པར་དབྱངས་ཀྱི་སྒྲ་སྐད་གཅིག་གིས་ཞེས་བྱ་བ་ལ་དབྱངས་ནི་ལྟེ་བ་ནས་བྱུང་ནས་དུང་གི་སྒྲར་གྱུར་ཅིང་སྙིང་གི་པདྨའི་ཐིག་ལེ་ལས་བྱུང་བའི་ཚིག་གིས་ཆ་ཤས་ལྐོག་མའི་གནས་སུ་ཡོངས་སུ་གྱུར་པའོ། །དེ་ནས་ལྕེའི་རྩ་བ་ལས་བྱུང་བ་ནི་སྒྲ་ཞེས་བྱའོ། །དེ་ནས་ཡི་གེའི་མིང་ཅན་གྱིས་སྒྲ་དབྱངས་ལྕེ་ལ་གནས་པའི་ཚིག་ནི་འདི་སྐད་དེ་ཇི་སྐད་དུ། དུང་གི་སྒྲ་ནི་གསལ་བ་དབྱངས། །པདྨའི་ཁམས་ལ་ཡང་དག་གནས། །པདྨའི་གེ་སར་ཐིག་ལེ་ལས། །ཚིགས་རྣམས་ཀྱི་ནི་ཆ་ཤས་ཏེ། །ལྐོག་མར་ཕྱིན་ནས་དབྱངས་སུ་འགྱུར། །དབྱངས་ལས་ལྷག་པའི་སྒྲ་ཡིན་ལ། །སླར་ཡང་ལྕེ་རུ་ཕྱིན་པ་ནི། །དམ་པའི་ཡི་གེ་བཟང་པོའོ། །ཞེས་བཤད་པ་ཡིན་ནོ། །དགོངས་པ་གཅིག་པས་ནི་འདི་ཉིད་གཅིག་པ་ཉིད་དེ་དེ་ལྟ་བུའི་ཚིག་མཐུན་པའི་སྒྲ་དབྱངས་དེས་བཤད་པར་གསོལ་བ་འདེབས་པའོ། །ལ་ལ་ནི་རྣམ་གྲངས་ཡིན་པར་འདོད་དོ། །བཅོམ་ལྡན་འདས་ཞེས་བྱ་བ་ལ་སོགས་པ་ལ་དུས་གསུམ་གྱི་སངས་རྒྱས་རྣམས་ཀྱི་ཐུགས་སུ་ཆུད་པར་བྱ་བའི་ངོ་བོ་ཉིད་ཡིན་པས་ན་དེ་བཞིན་གཤེགས་པ་ཀུན་གྱིའོ། །གཉིས་སུ་མེད་པའི་ཡེ་ཤེས་ཀྱི་ངོ་བོ་ཉིད་ཡིན་པས་ན་ཡེ་ཤེས་སོ། །གསུང་རབ་ཐམས་ཅད་ཀྱི་
སྙིང་པོ་ཡིན་པས་ན་སྙིང་པོའོ། །རང་བཞིན་གྱིས་འོད་གསལ་བར་གྱུར་པས་ན་མཆོག་ཏུ་དྲི་མ་མེད་པའོ། །བྱང་ཆུབ་ཀྱི་བདག་ཉིད་ཅན་གྱི་སེམས་ནི་བྱང་ཆུབ་ཀྱི་སེམས་ཏེ་དོན་དམ་པའོ། །དེ་ལས་ལྷག་པར་གྱུར་པ་མེད་པས་ན་བླ་ན་མེད་པ་སྟེ་འདིས་ནི་ཆོས་ཀྱི་སྐུའི་ངོ་བོ་ཉིད་དུ་བསྟན་པ་ཡིན་ནོ། །རྣམ་པར་སྣང་མཛད་ལ་སོགས་པའི་ཕྱག་རྒྱ་ཆེན་པོ་ལ་སོགས་པའི་ངོ་བོ་ཉིད་དུ་གྱུར་པ་ནི་དེ་བཞིན་གཤེགས་པ་ཐམས་ཅད་ཀྱིའོ། །ཇི་སྐད་དུ་གསུངས་པའི་ཡེ་ཤེས་ཡོངས་སུ་གྱུར་པ་ཡིན་པས་ན་ཡེ་ཤེས་སོ། །གཟོད་མ་ནས་མ་སྐྱེས་པར་ལྷག་པར་མོས་པས་རྣམ་པར་བསྒོམས་པར་གྱུར་པས་ན་སྙིང་པོའོ། །རྣལ་འབྱོར་ཆེན་པོའི་རྣམ་པར་དགོད་པ་ལ་བཞུགས་པའི་ལྷ་འཁོར་ལོར་སྟོན་པས་ན་མཆོག་ཏུ་དྲི་མ་མེད་པའོ། །བྱང་ཆུབ་ཐོབ་པའི་ཐབས་ཀྱི་མཆོག་གི་ངོ་བོ་ཉིད་དུ་གྱུར་པས་བྱང་ཆུབ་ཀྱི་སེམས་ཏེ་ཀུན་རྫོབ་བོ། །ཐབས་ཐམས་ཅད་ཀྱི་མཆོག་ཏུ་གྱུར་པས་བླ་ན་མེད་པ་སྟེ། འདིས་ནི་ལོངས་སྤྱོད་རྫོགས་པའི་སྐུའི་ངོ་བོ་ཉིད་དུ་བསྟན་པ་ཡིན་ཏེ་འབྲེལ་བས་བསྟན་པ་ལས་འདི་ལྟར་ཡང་ཤེས་པར་བྱའོ། །བྱང་ཆུབ་ཀྱི་སེམས་གཉིས་པོ་ཉིད་བཤད་པའི་ཕྱིར་གསོལ་བ་བཏབ་པའི་ཕྱིར་དང༌། ཇི་ལྟ་བ་ཉིད་སྐབས་ལ་བབ་པར་གཟིགས་པའི་ཕྱིར་བྱང་ཆུབ་སེམས་དཔའ་ཐམས་ཅད་ལ་འདི་སྐད་ཅེས་བཀའ་སྩལ་ཏོ་ཞེས་བྱ་བ་སྟེ། བྱང་ཆུབ་ཀྱི་སེམས་བརྟན་པས་དེ་དག་ཉིད་ཀྱིས་དོན་དུ་འགྱུར་བའི་ཕྱིར་དེ་རྣམས་ལ་འདི་སྐད་གསུངས་ཀྱི་དེ་བཞིན་གཤེགས་པ་ཐམས་ཅད་ལ་ཡང་ཇི་སྐད་གསུངས་པའི་བཤད་པ་རིགས་པ་མ་ཡིན་ཏེ་བྱང་ཆུབ་ཀྱི་སེམས་སྐྱེད་ཅིག་ཅེས་བྱ་བ་ནི་ལྷག་མའོ། །དེ་ལ་དོན་དམ་པའི་བྱང་ཆུབ་ཀྱི་སེམས་ཀྱི་དབང་དུ་མཛད་ནས་གནས་པ་ནི་སེམས་ལུས་ལྟ་བུ་དང་ཞེས་བྱ་བ་སྟེ་དེ་བཞིན་གཤེགས་པ་ལ་སོགས་པའི་སྐུ་ནི་དོན་དམ་པར་དངོས་པོ་མེད་པའི་ངོ་བོ་ཉིད་ཡིན་པས་མིག་ཡོར་ཙམ་ཡིན་པས་ན་དེ་ལྟ་བུ་སྟེ་དེ་དང་འདྲ་བར་སེམས་གཉིས་སུ་མེད་པའི་རྣམ་པར་འཇུག་པས་བསྐྱེད་པར་བྱའོ་ཞེས་ཉེ་བར་བསྟན་པའི་ཚིག་གིས་སྔ་མ་དང་སྦྱར་རོ། །ལུས་སེམས་ལྟ་བུ་དང་ཞེས་བྱ་བ་ནི་ཇི་ལྟར་སེམས་དོན་དམ་པར་གཟུང་བ་དང་འཛིན་པ་པོ་མེད་པས་གཉིས་ཀྱིས་རྣམ་པར་དབེན་པ་ཡིན་ལ་ལུས་ཀྱང་དེ་དང་འདྲའོ་ཞེས་བྱ་བ་
ནི་སྔ་མ་བཞིན་ནོ། །སེམས་ཀྱང་ཚིག་ཏུ་རབ་ཏུ་བརྗོད་པ་ལྟ་བུ་ཡིན་ནོ་ཞེས་བྱ་བ་ནི་ཇི་ལྟ་བ་ཚིག་ཏུ་བརྗོད་པ་ནི་སྐྱེད་པར་བྱེད་པའི་རྒྱུ་མེད་པས་སྒྲ་བརྙན་དང་མཚུངས་པའི་ངོ་བོ་ཉིད་ཡིན་ལ་སེམས་ཀྱང་དེ་དང་འདྲའོ་ཞེས་བྱ་བ་ནི་སྔ་མ་བཞིན་ཏེ་ལུས་ཀྱང་ཚིག་ཏུ་རབ་ཏུ་བརྗོད་པ་ལྟ་བུའོ་ཞེས་ཤེས་པར་བྱའོ། །ལུས་དང་སེམས་དག་ནི་དངོས་པོ་མེད་པ་ངོ་བོ་ཉིད་ཡིན་པས་ནུས་པ་མེད་པར་བསྟན་ཞིང་སྐྱེ་བ་མེད་པའི་རང་བཞིན་དག་གི་དོན་གྱིས་རྒྱ་ཆེར་དངོས་པོ་མེད་པར་གྱུར་པས་དེ་སོ་སོར་སྤྲོས་ནས་བསྟན་པ་ནི་མ་ཡིན་ནོ། །འདི་སྐད་སྟོན་པ་ཡིན་ཏེ། ཇི་སྐད་དུ་བཤད་པའི་ལུས་དང་ངག་དང་སེམས་ནི་ཆོས་བདག་མེད་པ་མཉམ་པས་ངོ་བོ་ཉིད་གཅིག་པ་སྟེ། འདི་ནི་དོན་དམ་པའི་བྱང་ཆུབ་ཀྱི་སེམས་སོ། །འབྲེལ་བར་བསྟན་པ་ལས། འདི་ལྟར་ཡང་ཤེས་པར་བྱ་སྟེ། ལུས་དང་ངག་དང་སེམས་རྡོ་རྗེ་ལྟ་བུར་ཇི་ལྟ་བ་བཞིན་བསྒོམས་པའི་སེམས་སྐྱེད་ཅིག་ཅེས་བྱའོ། །ཕྱོགས་འདི་ལ་ནི་ལུས་ལ་བརྟེན་པའི་ཕྱིར་སེམས་ལ་ལུས་ཞེས་བྱ་སྟེ། འདི་ནི་ཐབས་ཀྱི་ངོ་བོ་སྟེ་ཀུན་རྫོབ་བྱང་ཆུབ་ཀྱི་སེམས་སོ། །དེ་ནས་ཞེས་བྱ་བ་ལ་སོགས་པ་ལ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ལྟ་བུར་ཇི་སྐད་དུ་བཤད་པའི་དོན་དམ་པ་ཀུན་རྫོབ་ཀྱི་ཐབས་ཀྱི་ངོ་བོས་བྱང་ཆུབ་ཀྱི་སེམས་གཉིས་སུ་མེད་པས་གཅིག་ཏུ་སྦྱོར་བ་བྱས་པས་བདག་ཉིད་ཀྱི་ལུས་དང་ངག་དང་སེམས་དངོས་པོ་མེད་པར་བྱས་ནས་ཇི་སྐད་དུ་བཤད་པ་རྟོགས་པ་སྟེ་དགའ་བས་རང་དགའི་ཚིག་ཏུ་སྨྲ་བའི་ཆེད་དུ་བརྗོད་པ་ནི། ཨེ་མའོ་ཞེས་བྱ་བ་ལ་སོགས་པའོ།། ཨེ་མའོ་ནི་ངོ་མཚར་དུ་གྱུར་པའོ། །ཀུན་དུ་བཟང་པོ་ནི་རྣམ་པར་སྣང་མཛད་ཆེན་པོའོ། །འདོད་ཆགས་ལ་སོགས་པའི་སྤྱོད་པ་རྣམ་པར་དག་པ་སྟོན་པར་མཛད་པའོ། །སྐུ་གསུང་ཐུགས་ཀྱི་རྡོ་རྗེ་ཅན། །ཞེས་པ་ནི་རྣམ་པར་སྣང་མཛད་ཀྱི་ཐབས་ཀྱི་ངོ་བོའོ། །ཅི་ཞིག་ངོ་མཚར་ཆེ་ཞེན། ཆོས་རྣམས་སྐྱེ་བ་མེད་པ་སྟེ། །ཞེས་བྱ་བ་ལ་སོགས་པ་སྟེ། སྐྱེ་བ་མེད་པ་ནི་གཉིས་སུ་མེད་པའི་ཡེ་ཤེས་ཀྱི་བདག་ཉིད་ཅན་ནོ། །འགྱུར་བ་མེད་པ་ནི་ཆོས་རྣམས་ཡི་གེ་མེད་པས་ངོ་བོ་ཉིད་ལས་མི་འཕྲོ་བའི་ཆོས་ཉིད་ཅན་ནོ། །གནས་པ་མེད་པ་ནི་སོ་སོར་ངེས་པའི་གནས་ལ་མི་
བརྟེན་པའོ། །རྟོག་དང་སྨྲ་བ་རྣམས་སྤངས་པ། །ཞེས་བྱ་བ་ནི་དེ་བཞིན་གཤེགས་པ་ལ་སོགས་པར་རྟོག་ཅིང་སྨྲ་བ་དང་བྲལ་བའོ། །བསྐྱེད་པར་བྱ་ཞེས་རབ་ཏུ་གསུངས། །ཞེས་པ་ནི་དོན་དམ་པར་སྐྱེ་བ་མེད་ཀྱང་གདུལ་བྱ་རྣམས་ལ་རྗེས་སུ་བརྩེ་བས་སྐྱེ་བ་མེད་པ་ལ་སོགས་པ་ལས་བཟློག་པ་ནས། གང་འདི་རྣམ་པར་སྣང་མཛད་ལ་སོགས་པ་བསྐྱེད་པར་རབ་ཏུ་གསུངས་ཤིང་སྒྲ་སྒྲོགས་པ་འདི་ནི་ངོ་མཚར་ཆེ་སྟེ། དེ་བཞིན་གཤེགས་པ་གཅིག་པུ་ཉིད་གདུལ་བྱ་རྣམས་ཀྱི་མོས་པའི་དབང་གིས་རྣམ་པ་ལྔར་གྱུར་ཏེ་ཇི་སྐད་དུ། འཇིག་རྟེན་ཁམས་ནི་སྟོང་དག་ཏུ། །ངས་ནི་མདོ་སྡེ་གང་བཤད་པ། ཚིག་འབྲུ་ཐ་དད་དོན་གཅིག་སྟེ། །ཞེས་བྱ་བ་ལ་སོགས་པ་གསུངས་པ་དེ་ཐབས་ཀྱི་ངོ་བོས་གཅིག་ལས་ཀྱང་གདུལ་བྱའི་སྐྱེ་བའི་དབང་གིས་རྣམ་པ་ལྔར་སོ་སོར་སྣང་ངོ༌། །དེ་ཡང་འདི་ནི་རང་བྱུང་བཅོམ་ལྡན་འདས། །གཅིག་པུ་རབ་ཏུ་ཆེ་བའི་ལྷ། །སངས་རྒྱས་རྡོ་རྗེ་འཛིན་ལ་སོགས། །གདུལ་བྱ་རྣམས་ལ་བཅོས་མར་བཤད། །ཅེས་གསུངས་པས་སོ། །དེ་ལྟར་དེ་བཞིན་གཤེགས་པའི་རིགས་ཀྱི་སེམས་བྱང་ཆུབ་ཀྱི་སེམས་རྣམ་པ་གཉིས་པ་བསྟན་ནས། ད་ནི་བཅོམ་ལྡན་འདས་རྣམ་པར་སྣང་མཛད་དེ་ཉིད་མི་བསྐྱོད་པ་ལ་སོགས་པའི་སྐུའི་ཚུལ་དེ་ལ་མོས་པའི་སྐྱེ་བོ་རྣམས་ལ་རྗེས་སུ་བརྩེ་བའི་ཕྱིར་དེའི་རིགས་ཀྱི་བྱང་ཆུབ་ཀྱི་སེམས་གསུངས་པས་འདིར་དེ་ཉིད་ལ་གསོལ་བ་བཏབ་པ་ལ་སོམ་ཉི་མི་བྱའོ། །དེ་བཞིན་དུ་ཐམས་ཅད་ལ་ཡང་བཀའ་སྩལ་བ། ཀུན་ལ་དང་པོ་ཉིད་ཡིན་པར་ཤེས་པར་བྱའོ། །ལ་ལ་ནི་སྒྲ་ཇི་བཞིན་པ་ཉིད་ལ་ཞུགས་ཏེ། དེས་ནི་ཡང་དག་པར་གསུངས་པས་རྟོགས་ཤིང་ཁོང་དུ་ཆུད་པ་མ་ཡིན་ནོ་ཞེས་ཤེས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་ཀྱི་སེམས་འདི་གསུངས་སོ་ཞེས་བྱ་བར་སྦྱར་རོ། །ཅི་ཞིག་མཛད་ནས་ཤེ་ན་གསུང་ཞེས་བྱ་བ་ལ་སོགས་པ་གསུངས་ཏེ། གསུང་གིས་སྤྲོས་པ་ནི་གསུང་གི་རྣམ་པར་རྟོག་པས་བྱང་ཆུབ་ཀྱི་སེམས་རབ་ཏུ་སྟོན་པའི་མཚན་ཉིད་ཅན་ནོ། །འདི་ཉིད་ནི་མི་སླུ་བའི་དོན་སྐྱེད་པས་རྡོ་རྗེའོ། །དེ་ལ་དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །རང་གི་བྱང་ཆུབ་སེམས་ཀྱི་སེམས་སྟོན་པའི་རྣམ་པ་ལ་
ཐུགས་རྩེ་གཅིག་ཏུ་མཛད་ནས་ཞེས་བྱ་བའི་དོན་ཏོ། །ཏིང་ངེ་འཛིན་འོག་ནས་འབྱུང་བ་རྣམས་ཀྱི་དོན་ཡང་འདི་བཞིན་དུ་བཤད་པར་བྱའོ། །དངོས་པོ་འདི་དག་ཅེས་བྱ་བ་ལ་སོགས་པ་ལ་བྱང་ཆུབ་སེམས་ལ་སོགས་པའི་བདག་ཉིད་ཅན་རྡོ་རྗེ་སེམས་དཔའ་ལ་སོགས་པ་རྣམས་དང༌། ཕུང་པོ་ལ་སོགས་པ་ནི་དངོས་པོ་སྟེ། དེ་རྣམས་ལ་ནི་གཉིས་སུ་རྣམ་པར་རྟོག་པས་དངོས་པོར་བརྟགས་པས་ན་དངོས་པོ་སྟེ་དེ་ནི་སྐྱེ་བ་མེད་པའོ། །ཅིའི་ཕྱིར་ཞེ་ན། ཆོས་རྣམས་མེད་ཅིང་ཆོས་ཅན་མེད། །ཅེས་བྱ་བ་གསུངས་ཏེ་དོན་དམ་པ་གཉིས་སུ་མེད་པའི་ངོ་བོ་ཉིད་ཡིན་པའི་ཕྱིར་རོ། །འདི་ནི་དོན་དམ་པ་བྱང་ཆུབ་ཀྱི་སེམས་སོ། །རྡོ་རྗེ་རིགས་ཇི་ལྟར་འབྱུང་བ་ཡིན་ཞེ་ན། ནམ་མཁའ་བཞིན་དུ་དམིགས་པ་མེད་པའི་ཞེས་བྱ་བ་གསུངས་ཏེ། ཇི་ལྟར་ནམ་མཁའ་ནི་རྫས་ཐམས་ཅད་དུ་མེད་ཅིང་དམིགས་པ་ལས་འདས་པ་ཡིན་ཡང་རྟོག་པ་གྲག་པའི་བློས་དམིགས་པར་བྱེད་དེ། རྡོ་རྗེའི་རིགས་ཀྱང་དེ་དང་འདྲ་བར་བལྟ་བར་བྱའོ། །འདི་ནི་ཀུན་རྫོབ་པ་བྱང་ཆུབ་ཀྱི་སེམས་སོ། །བྱང་ཆུབ་སེམས་འདི་བརྟན་པ་ཡིན་ཞེ་ན་བྱ་བ་ལ་བརྟན་པ་ཡིན་ཞེ་ན་བྱ་བ་ནི་གང་དོན་དམ་པའི་བྱང་ཆུབ་ཀྱི་སེམས་སུ་བཤད་པ་དེ་ནི་རྣམ་པར་རྟོག་བས་མི་ཕྱེད་ཅིང་དེ་འཇིག་པར་བྱེད་པ་མ་ཡིན་ལ། ཀུན་རྫོབ་བྱང་ཆུབ་ཀྱི་སེམས་གང་ཡིན་པ་དེ་ལའང་འཁོར་བར་སེམས་ཅན་གྱི་དོན་བྱེད་པ་དེ་ནི་སྐྱོ་བར་མི་འགྱུར་བས་བརྟན་པ་ཡིན་ནོ། །དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པ་ལ། དེ་བཞིན་གཤེགས་པ་ཐམས་ཅད་ནི་ཐམས་ཅད་གཟུགས་ཀྱི་སྐུའི་ངོ་བོའོ། །དེ་རྣམས་དམིགས་སུ་མེད་པ་ནི་དོན་དམ་པར་གཉིས་སུ་མེད་པའི་ཡེ་ཤེས་ཀྱི་ངོ་བོ་ཉིད་ཡིན་པས་སོ། །དངོས་པོ་འདི་དག་ཅེས་བྱ་བ་ལ་སོགས་པ་སྦྱིན་པའི་ཕ་རོལ་ཏུ་ཕྱིན་པའི་བདག་ཉིད་ཅན་རིན་པོ་ཆེའི་རིགས་ཀྱི་བསྡུས་པ་རྡོ་རྗེ་རིན་པོ་ཆེན་ལ་སོགས་པ་དང་ཕུང་པོ་ལ་སོགས་པ་ནི་དངོས་པོ་སྟེ་ཇི་ལྟར་ཡོངས་སུ་སྣང་བ་འདི་དག་ནི་དངོས་པོ་མེད་པ་ཉིད་ཡིན་ནོ། །ཅིའི་ཕྱིར་ཞེ་ན། ཆོས་ཀྱི་མཚན་ཉིད་སྤངས་པ་ཡིན། །ཞེས་གསུངས་པ་སྟེ་ཆོས་ནི་ཇི་སྐད་དུ་བཤད་པའི་གཟུགས་ལ་སོགས་པའི་ངོ་བོ་ཉིད་དོ། །དེ་རྣམས་ཀྱི་མཚན་ཉིད་ནི་གཟུགས་ལ་སོགས་པ་དེ་དག་ཉིད་སྐྱེ་བ་དང་མི་རྟག་པ་ལ་
སོགས་པའོ། །དེ་རྣམས་སྤངས་པ་ནི་བྲལ་བ་སྟེ་སྐྱེ་བ་མེད་པ་ལ་སོགས་པ་གཟུགས་ལ་སོགས་པའི་ངོ་བོར་བརྟག་པ་མེད་པའི་ཕྱིར་འདི་ནི་དོན་དམ་པའོ། །དེ་ལྟར་ན་རྡོ་རྗེ་རིན་ཆེན་ལ་སོགས་པ་ཇི་ལྟར་འབྱུང་ཞེ་ན། བདག་མེད་ཆོས་ལས་ཡང་དག་འབྱུང༌། །ཞེས་བྱ་བ་གསུངས་ཏེ། བདག་མེད་པའི་ཆོས་ནི་ཇི་སྐད་དུ་བཤད་པ་སྟེ། དེ་བས་ན་གལ་ཏེ་བདག་སངས་རྒྱས་སུ་གྱུར་ན་འགྲོ་བ་མ་ལུས་པའི་འདོད་པའི་དོན་མ་ལུས་པ་རྫོགས་པར་བྱའོ་ཞེས་དེ་ལྟ་བུའི་མཚན་ཉིད་ཅན་གྱི་སྨོན་ལམ་གྱི་ཤུགས་ཀྱི་སྟོབས་ཀྱིས་གདུལ་བྱ་རྣམས་ལ་མིག་ཡོར་ཙམ་དུ་སོ་སོར་འབྱུང་བ་ནི་ཡང་དག་པར་འབྱུང་བ་སྟེ་འདི་ནི་ཀུན་རྫོབ་པོ། །དེ་ཡང༌། རྟག་ཏུ་དྲི་མེད་ཐུགས་རྗེའི་ཤུགས་ལས་བྱུང༌། །སྨོན་ལམ་གྲུབ་པ་མི་འགག་ཆོས་ཉིད་ཅན། །འགྲོ་བའི་དོན་གྲུབ་ལྷུར་མཛད་མཐའ་ཡས་པ། །ཐུགས་རྗེའི་བདག་ཉིད་རྟག་ཏུ་རྣམ་པར་སྣང༌། །ཞེས་བྱ་བ་ལ་སོགས་པ་གསུངས་པ་ཡིན་ནོ། །བྱང་ཆུབ་སེམས་ནི་བརྟན་པ་ཡིན། །ཞེས་བྱ་བའི་དོན་ནི་སྔ་མ་བཞིན་ནོ། །མེ་ལྕེ་འབར་བ་ཞེས་བྱ་བ་ལ་སོགས་པ་ལ་འབར་བ་དང་བཅས་པའི་མེ་ལྟ་བུའི་རྡོ་རྗེ་འབར་བ་ཉོན་མོངས་པའི་མུན་ནག་ཐམས་ཅད་དང་བྲལ་བ་སོ་སོར་རྟོག་པའི་ཡེ་ཤེས་ཏེ། དེ་ལ་དམིགས་པ་ཞེས་བྱ་བ་ལ་སོགས་པའི་དོན་ནི་སྔ་མ་བཞིན་ནོ། །དངོས་པོ་ཞེས་བྱ་བ་ལ་སོགས་པ་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་བདག་ཉིད་ཅན་ཆོས་ཀྱི་རིགས་ཀྱིས་བསྡུས་པ་རྡོ་རྗེ་ཆོས་ལ་སོགས་པ་དང་ཕུང་པོ་ལ་སོགས་པ་ནི་དངོས་པོ་སྟེ་དེ་སྐྱེ་བ་མེད་པ་ནི་སྔ་མ་བཞིན་ནོ། །དེ་བས་ན། སྐྱེ་བ་མེད་པའི་དངོས་པོ་དེ་རྣམས་ལ། །དངོས་པོ་མེད་ཅིང་བསྒོམ་པ་མེད། །ཅེས་བྱ་སྟེ་དེ་རྣམས་ལ་དངོས་པོ་མེད་པས་ཚུལ་གང་གིས་སྤྱིའི་མཚན་ཉིད་བསྒོམ་པའི་ཚུལ་དེ་མེད་པས་ན་སྒོམ་པ་ཡང་མེད་དེ་འདི་ནི་དོན་དམ་པའོ། །འོ་ན་རྡོ་རྗེ་ཆོས་ཇི་ལྟར་འབྱུང་ཞེ་ན། ནམ་མཁའ་ཡི་ནི་གནས་ཐོབ་པར། །དེ་ལྟར་དངོས་རྣམས་རབ་ཏུ་བརྗོད། །ཅེས་བྱ་བ་གསུངས་ཏེ། ནམ་མཁའ་ཉིད་གནས་སུ་གྱུར་པ་ཇི་སྐད་དུ་བཤད་པའི་བྱང་ཆུབ་ཀྱི་སེམས་བསྒོམ་པ་ལ་གནས་པ་གང་ཡིན་པ་དེ་ལ་དེ་སྐད་ཅེས་བྱའོ། །དེ་ཐོབ་པ་ནི་ཆོས་ཐམས་ཅད་ནམ་མཁའ་དང་མཉམ་པར་གནས་པའི་སེམས་
བརྟན་པ་ཐོབ་ནས་འཇིག་རྟེན་ལས་འདས་པའི་ཡེ་ཤེས་ཀྱི་རྗེས་ལ་ཡང་དག་པར་འཇིག་རྟེན་པའི་ཡེ་ཤེས་བསྒོམས་པས་རྡོ་རྗེ་ཆོས་ལ་སོགས་པའི་མཚན་ཉིད་མཇལ་ཞིང་ཡུལ་དུ་བྱས་པ་སྟེ་འདི་ནི་ཀུན་རྫོབ་བོ། །དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པ་ལ་དེ་བཞིན་གཤེགས་པ་ཐམས་ཅད་ནི་གཟུགས་ཀྱི་སྐུའི་ངོ་བོ་ཉིད་དོ། །དེ་ཉིད་ནི་བླ་མ་ཡིན་ལ་དེ་རྣམས་ཀྱི་ཡང་བླ་མ་ནི་ངོ་བོ་ཉིད་ཀྱི་སྐུ་སྟེ་དེ་ཉིད་རྡོ་རྗེའོ། །ཆོས་རྣམས་རང་བཞིན་འོད་གསལ་བ། །ཞེས་བྱ་བ་ལ་སོགས་པ་ལ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་སོགས་པའི་བདག་ཉིད་ཅན་ལས་ཀྱི་རིགས་ཀྱིས་བསྡུས་པའི་རྡོ་རྗེ་ལ་སོགས་པ་དང་ཕུང་པོ་ལ་སོགས་པ་ནི་ཆོས་རྣམས་ཏེ་དེ་རྣམས་ནི་རང་བཞིན་ཏེ་ངོ་བོ་ཉིད་ཀྱིས་འོད་གསལ་བ་སྟེ། གཉིས་སུ་མེད་པའི་ཡེ་ཤེས་ཀྱི་སྣང་བའི་ངོ་བོ་ཉིད་ཡིན་པའི་ཕྱིར་རོ། །དེ་དག་ཀྱང་ཅིའི་ཕྱིར་ཞེ་ན། གཟོད་ནས་དག་ཅིང་ཞེས་བྱ་བ་གསུངས་ཏེ། སྐྱེ་བ་ལ་སོགས་པའི་ཉེས་པ་རྣམས་མ་སྐྱེས་པས་གཟོད་ནས་དག་པའོ། །དེ་དག་ཀྱང་ཅིའི་ཕྱིར་ཞེ་ན། རྙོག་པ་མེད་ཅེས་བྱ་བ་གསུངས་ཏེ་དོན་དམ་པར་རྣམ་པར་རྟོག་པའི་རྙོག་པ་ཐམས་ཅད་དང་བྲལ་བས་ན་རྙོག་པ་མེད་པའོ། །དེ་ཉིད་ཀྱིས་ན། སེམས་ཅན་མེད་ཅིང་སྲོག་ཀྱང་མེད། །ཅེས་བྱ་བ་གསུངས་ཏེ། ཐོག་པ་མེད་ཅིང་མཉམ་མེད་ལ། །བསམ་གྱིས་མི་ཁྱབ་བྱང་ཆུབ་འདི། །སྐྱེ་དང་འགག་པ་སྟོང་པས་ན། །རི་བོང་རྭ་བཞིན་བདག་མེད་དོ། །ཞེས་བཤད་པས་སེམས་ཅན་ལ་སོགས་པའི་རྣམ་པར་རྟོག་པ་ཐག་རིང་དུ་སྤངས་པ་ཡིན་པས་ན་མེད་པ་ཞེས་བྱའོ། །སངས་རྒྱས་ཉིད་མེད་བྱང་ཆུབ་མེད། །ཅེས་བྱ་བ་ནི་གཉིས་སུ་མེད་པའི་ཡེ་ཤེས་རྟོགས་པའི་གནས་སྐབས་ན་སངས་རྒྱས་ཉིད་དང་བྱང་ཆུབ་ཅེས་བྱ་བ་མངོན་པར་རྟོགས་པའི་ངོ་བོ་འདི་ནི་རྣམ་པར་རྟོག་པ་ལ་སྤྱོད་པ་སྟེ་སངས་རྒྱས་ཉིད་དང་བྱང་ཆུབ་པ་མེད་དོ། །དེ་བས་ན། དངོས་དང་དངོས་མེད་ཡོངས་ཚེལ་བ། །ཟག་མེད་མྱ་ངན་འདས་ཞེས་བརྗོད། །ཅེས་བཤད་པ་ཡིན་གྱི་དེ་བཞིན་གཤེགས་པ་ཐམས་ཅད་མེད་པ་ཉིད་ནི་མ་ཡིན་ནོ། །གཞན་ཡང་ཆོས་ཐམས་ཅད་ཀྱི་དེ་ཁོ་ན་ཉིད་གཉིས་སུ་མེད་པར་རིག་པའི་སེམས་དང་སེམས་ལས་བྱུང་བའི་ངོ་བོ་ཉིད་གཉིས་སུ་མེད་པའི་རྣམ་པར་སྣང་མཛད་ནི་ངོ་བོ་ཉིད་མེད་པས་མེད་
ཅེས་བཤད་པ་ཡིན་ཏེ་འདི་ནི་དོན་དམ་པའི་བྱང་ཆུབ་ཀྱི་སེམས་སོ། །འོ་ན་རྡོ་རྗེ་ལ་སོགས་པར་ཇི་ལྟར་སོ་སོར་སྣང་ཞེ་ན། རྨི་ལམ་སྒྱུ་མ་ལྟར་སྣང་བའི། །ཞེས་བྱ་བ་གསུངས་ཏེ་ཇི་ལྟར་རྨི་ལམ་ལ་སོགས་པར་རབ་ཏུ་སྣང་བས་གཉིས་སུ་རྣམ་པར་རྟོག་པ་རྩད་ནས་འབྱིན་པར་བརྟགས་པ་དེ་བཞིན་དུ་རྡོ་རྗེ་ལ་སོགས་པ་ཡང་སྣང་སྟེ་འདི་ནི་ཀུན་རྫོབ་བོ། །བྱང་ཆུབ་སེམས་འདི་བརྟན་པ་ཡིན། །ཞེས་བྱ་བའི་དོན་ནི་བཤད་ཟིན་ཏོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་རྡོ་རྗེ་དེ་བཞིན་གཤེགས་པ་ཞེས་བྱ་བ་ནི་རྣམ་པར་སྣང་མཛད་ཀྱིའོ། །བྱང་ཆུབ་ཀྱི་སེམས་རྣམ་པར་དག་པ་ཐོབ་ནས་ཞེས་བྱ་བ་ནི་བཤད་མ་ཐག་པའི་བྱང་ཆུབ་ཀྱི་སེམས་དམ་པའོ། །ཨེ་མའོ་ཞེས་བྱ་བ་ལ་སོགས་པ་ལ། ཨེ་མའོ་ཞེས་བྱ་བ་ནི་ངོ་མཚར་དུ་གྱུར་པའོ། །ཆོས་ཀྱི་སྐུའི་ངོ་བོ་ཉིད་དུ་གྱུར་པས་ན་སངས་རྒྱས་སོ། །རྣམ་པར་རྟོག་པ་ཐམས་ཅད་དང་བྲལ་བས་ན་དག་པའོ། །དེ་ཉིད་འདི་ལྟ་བུའི་མངོན་པར་འདོད་པའི་དོན་རྫོགས་པར་བྱེད་པའི་ཆོས་སྟོན་པ་ལ་ཉེ་བར་དམིགས་པར་མཛད་པ་དེ་ཡང་ལེགས་སོ་ཞེས་པའོ། །བདག་མེད་ཆོས་ལས་ལེགས་བྱུང་བ། །ཞེས་བྱ་བ་ནི་ཆོས་བདག་མེད་པ་རྣམ་པ་ལས་ཡང་དག་པར་བྱུང་ཞིང་སྐྱེས་པའི་དོན་དམ་པའི་བྱང་ཆུབ་སེམས་དེ་ལ་ཕྱག་འཚལ་ལོ་ཞེས་དོན་དམ་པ་ལ་སྟོན་པའོ། །བྱང་ཆུབ་ཚོགས་ཀྱིས་ཞེས་བྱ་བ་ལ་སོགས་པ་ལ། བྱང་ཆུབ་ཚོགས་ཀྱིས་བསྒོམ་པ་ཡིས། །ཞེས་བྱ་བ་ནི་བྱང་ཆུབ་ཀྱི་སེམས་སྐྱེད་པར་བྱེད་པའི་བསོད་ནམས་དང་ཡེ་ཤེས་ཀྱི་ཚོགས་སྨོན་ལམ་གྱིས་བགོས་པར་གྱུར་པས་སོ། །མི་གཡོ་ཡི་གེ་ལས་བྱུང་བ། །ཞེས་བྱ་བ་ནི་མི་འགྱུར་བས་ན་མི་གཡོ་བ་སྟེ། དོན་དམ་པའི་སེམས་སོ། །དེའི་ངོ་བོ་ཉིད་ནི་ཨོཾ་ལ་སོགས་པའི་ཡི་གེ་ལ་ཡང་ཉེ་བར་འདོགས་པས་དེ་སྐད་ཅེས་བྱ་སྟེ། ཡི་གེའི་རྣམ་པ་མངོན་པར་འདུ་བྱས་པའི་གནས་སྐབས་དེ་ལས་སྐྱེས་པ་ན་བྱུང་བའོ། །རྨི་ལམ་སོགས་ལྟར་དེ་ལས་སྐྱེས། །ཞེས་བྱ་བ་ནི་རྨི་ལམ་སོགས་པ་ལྟར་སོ་སོར་སྣང་བ་ཙམ་དུ་སྐྱེ་བར་ཟད་དེ་དེ་ལྟར་ན་དེ་ཉིད་ནི་གདོད་མ་ནས་མ་སྐྱེས་པའི་ངོ་བོ་ཉིད་དུ་གྱུར་པའི་ཐུགས་རྡོ་རྗེ་རྣམ་པར་སྣང་མཛད་ལ་ཕྱག་འཚལ་ལོ་ཞེས་བྱ་བ་སྟེ་ཀུན་རྫོབ་
ཏུ་སྟོན་པའོ། །ཐབས་ཀྱི་ངོ་བོ་ཉིད་ཀུན་རྫོབ་ཀྱི་བྱང་ཆུབ་ཀྱི་སེམས་སུ་བསྟན་པ་དེ་ཇི་ལྟར་བསྒོམ་པར་བྱ་ཞེ་ན། གནས་དང་སྟན་ནི་ཞེས་བྱ་བ་ལ་སོགས་པ་གསུངས་ཏེ། གནས་དང་སྟན་ནི་རྣམ་བསམས་ཏེ། །སེམས་དཔའི་སྐྱིལ་མོ་ཀྲུང་བཅས་ནས། །ཞེས་བྱ་བ་ནི་ཇི་སྐད་དུ་བཤད་པའི་གནས་རྣམ་པར་བསམ་ཞིང་བསྐྱེད་ནས་དེར་ཡང་པདྨ་ལ་སོགས་པར་བྱའོ་ཞེས་བྱ་བ་ནི་ཚིག་གི་ལྷག་མའོ། །ཇི་ཞིག་བྱས་ནས་ཤེ་ན། དང་པོར་རང་བཞིན་དག་པའོ། །ཞེས་བྱ་བ་ལ་སོགས་པ་གསུངས་ཏེ་ཞེས་པའི་སྒྲ་ནི་དོན་ལྷག་མ་རྣམས་ཉེ་བར་མཚོན་ཏེ། ཨོཾ་སརྦ་ཐཱ་ག་ཏ་ཨ་ནུ་ཥཾ་སི་ཏ། སརྦ་སཏྭ་ནཾ་ཙ་སརྦ་སིདྡྷ་ཡ་སཾ་པཪྻནྟཾ་སརྦ་ཏ་ཐཱ་ག་ཏ་ཤྩ་ཨ་དྷིཥྛཱ་ན་ཏཾ་སྭ་བྷཱ་བ་ཤུདྡྷཿ་སརྦ་དྷརྨཱཿ་སྭ་བྷཱ་བ་ཤུདྡྷོ྅ཧཾ་ཞེས་བརྗོད་ལ། རང་བཞིན་གྱིས་དག་པར་ལྷག་པར་མོས་པས་དག་པའི་ཆོས་ཀྱི་ཚུལ་ལ་གནས་པར་འགྱུར་རོ། །རྡོ་རྗེ་སེམས་མ་ནི་ཉེ་བར་མཚོན་པ་ཙམ་སྟེ། དེས་ན་རང་གི་རིགས་ཏེ་ཡུམ་ལྔའི་དམ་ཚིག་གི་ཕྱག་རྒྱ་རྣམས་ཀྱིས་ཀྱང་བྱ་བར་ཤེས་པར་བྱའོ། །བྱིན་གྱིས་བརླབ་ཅེས་བྱ་བ་ནི་ཉེ་བར་མཚོན་པ་ཙམ་སྟེ། དེས་ན་དབང་བསྐུར་བ་དང་ཏིང་ངེ་འཛིན་དང་མཆོད་པ་ཡང་བྱའོ་ཞེས་གསུངས་པ་ཡིན་ནོ། །ཡིད་ཀྱིས་ཧཱུཾ་ལས་རྡོ་རྗེ་ཅན། །ཞེས་བྱ་བ་ནི་ཡི་གེ་ཧཱུཾ་ལས་བྱུང་བའི་རྡོ་རྗེ་ཅན་ཏེ་རྡོ་རྗེ་འཆང་བར་རང་གི་ལུས་ཡིད་ཀྱིས་རྣམ་པར་བསམས་ལ་བྱིན་གྱིས་བརླབ་པ་དང་དབང་བསྐུར་བར་བསྒོམས་ནས་ཡང་དག་པར་མཆོད་དེ་རང་གི་ང་རྒྱལ་བསྐྱེད་ལ་གནས་དང་སྟན་བསྐྱེད་པར་བྱའོ་ཞེས་པ་ནི་རིམ་པའོ། །ལྕགས་ཀྱུ་ནི་ཞེས་བྱ་བ་ལ་སོགས་པ་ལ་མདུན་དུ་གཞལ་ཡས་ཁང་དང་དཀྱིལ་འཁོར་རྣམ་པར་བསམས་པའི་སྟེང་དུ་དཀྱིལ་འཁོར་གཉིས་པ་ཡང་སྤྱན་དྲང་ཞིང་ལེགས་པར་བསྟོད་ལ་ལག་པ་སྟེང་དུ་བསྟོད་ནས་བསྐོར་བའི་རྡོ་རྗེ་ལྕགས་ཀྱུས་དགུག་པར་བྱའོ། །འདི་ནི་ཉེ་བར་མཚོན་པ་ཙམ་སྟེ། གཞུག་པ་དང་བཅིང་བ་དང་དབང་དུའང་བྱ་བར་ཤེས་པར་བྱའོ། །བྱེད་ནས་དང་པོར་ཕྱོགས་བཅིངས་ཏེ། །ཞེས་བྱ་བ་ལ་སོགས་པ་ལ་ཕྱོགས་བཅིངས་པའི་རྗེས་ལ་དམ་ཚིག་ཅེས་བྱ་བའི་ཉེ་བར་མཚོན་པས་ན་ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་གདབ་པར་བྱའོ་ཞེས་བྱ་བར་ཡང་
རིགས་པ་ཡིན་ནོ། །ལ་ལ་ནི་སྒྲ་ཇི་བཞིན་པ་ཉིད་དུ་སྨྲའོ། །སྦྱོར་བ་བྱ་ཞེས་བྱ་བ་ནི་སྔགས་དང་ཕྱག་རྒྱ་དག་གིས་སོ། །འདི་ནི་བྱ་བའི་རྒྱུད་ཀྱི་དབང་དུ་བྱས་པའོ། །དེའི་རིམ་པ་ནི་འདི་ཡིན་ཏེ་མཆོད་ཡོན་དང་ཞབས་བཀྲུ་བ་དང་ཞལ་བསིལ་རྣམས་ཕུལ་ལ་གདན་ཇི་ལྟ་བ་བཞིན་དུ་བསྟབས་ཏེ་ཐལ་མོ་སྦྱར་ནས། བདེ་བར་གཤེགས་སོ་བཅོམ་ལྡན་འདས། །ཚུར་གཤེགས་འདིར་ནི་བཞུགས་སུ་གསོལ། །བདག་ལས་མཆོད་པ་བཞེས་ནས་ནི། །བདག་ཀྱང་བློ་དང་ལྡན་པར་མཛོད། །ཅེས་བྱ་བ་བརྗོད་ལ་བཅོམ་ལྡན་འདས་ཇི་སྲིད་འདིར་མཆོད་པ་བགྱིད་པ་དེ་སྲིད་དུ་བདེན་པ་དམ་པས་བཞུགས་སུ་གསོལ་ཞེས་གསོལ་བ་བཏབ་སྟེ། ཕུར་བུ་དང་ཕྱོགས་དང་དཀྱིལ་འཁོར་བཅིང་བ་དང་ར་བ་དང་དྲ་བ་བྱས་ལ་ཡང་མཆོད་པ་ཕུལ་ཏེ། དམ་ཚིག་ལ་སོགས་པ་ཕྱག་རྒྱ་བ་ཞིས་རྒྱས་གདབ་པར་བྱའོ། །དབང་བསྐུར་བ་ཞེས་བྱ་བ་ནི་རྗེས་སུ་མཐུན་པའི་དབང་བསྐུར་བ་བརྟན་པར་བྱའོ་ཞེས་སྔ་མ་དང་སྦྱར་རོ། །མཚོན་ཆ་གོ་ཆ་ལ་སོགས་ཞེས་བྱ་བ་ནི་སོགས་པའི་སྒྲས་དབུ་དང་སྤྱི་གཙུག་ཏུ་མཚོན་ཆ་དང་གོ་ཆ་བྱ་བ་མ་ལུས་པ་ཡོངས་སུ་གཟུང་ངོ༌། །སིལ་སྙན་མཆོད་སོགས་བསྒོམ་པར་བྱ། །ཞེས་བྱ་བྱ་བ་ནི་ཇི་སྐད་དུ་བཤད་པའི་ཕྱག་རྒྱ་དང་མཆོད་པའི་ཆོ་ག་བྱ་བའི་རིམ་གྱིས་སོ། །རྣམ་པ་ཀུན་གྱིས་མཉེས་བྱ་བ་ནི་སྔར་བཤད་མ་ཐག་པའི་ཕྱི་དང་གསང་བའི་མཆོད་པ་ལ་སོགས་པའི་ཁྱད་པར་གྱིས་སོ། །རྣལ་འབྱོར་བདག་ཉིད་ཅན་གྱིས་བརྟག །ཅེས་བྱ་བ་ནི་ཡང་དེ་བཞིན་དུ་བཅོམ་ལྡན་འདས་ཀྱི་སྤྱན་སྔར་མགོ་དང་གཙུག་ལ་སོགས་པས་བདག་ཉིད་ཀྱི་སྦྱོར་བ་བྱས་ལ། རྡོ་རྗེ་ལ་སོགས་པ་བླངས་ནས་བཟླས་པ་དང་བསྒོམ་པ་དག་བྱའོ། །འདི་སྐད་སྟོན་པ་ཡིན་ཏེ་ཇི་སྐད་དུ་བཤད་པའི་ཕྱིའི་ཁྲུས་བྱ་བའི་ཆོ་གས་ཁྲུས་བྱ་བའམ། ནང་གི་ཁྲུས་བྱས་ནས་ལྷའི་ཁང་པ་ཇི་ལྟ་བ་བཞིན་དུ་ཞུགས་ལ་འདུག་སྟེ། དེ་ནས་ཨོཾ་སྭ་བྷཱ་བ་ཤུདྡྷཿ་སརྦ་དྷརྨཱཿ་སྭ་བྷཱ་བ་ཤུདྡྷོ྅ཧཾ་ཞེས་བརྗོད་ལ། ཐལ་མོ་གསུམ་གྱིས་བགེགས་བསལ་ནས། རང་གི་ལུས་ལྷའི་སྐུར་སྐད་ཅིག་གིས་བསམས་ཏེ། ལྐོག་མའི་ཕྱོགས་སུ་ཡི་གེ་ཧྲཱིཿ་ལས་པདྨ་འདབ་མ་བརྒྱད་པ་ལས་པདྨའི་འདབ་མ་གཅིག་ལྕེར་གྱུར་པ་ལ་ཨ་ལས་ཟླ་བར་གྱུར་པའི་
སྟེང་དུ་ཧཱུཾ་ལས་རྡོ་རྗེ་རྩེ་ལྔ་པ་དཀར་པོ་བསམས་ལ། ཨོཾ་བཛྲ་ཛི་ཧྭ་ཞེས་བྱ་བས་བྱིན་གྱིས་བརླབ་པོ། །དེ་ནས་ལག་པ་གཉིས་ལ་ཨ་གཉིས་ལས་ཟླ་བ་བསམས་ལ། དེར་ཡི་གེ་ཧཱུཾ་ལས་རྡོ་རྗེ་གཉིས་བསམ་པ་དང་ཡི་གེ་ཧཱུཾ་ཉིད་ལས་སོར་མོ་རྣམས་རྡོ་རྗེ་རྩེ་གཅིག་པའི་རྣམ་བར་བསམས་ལ་གུང་མོ་དང་མཛུབ་མོ་དང་སྲིན་ལག་དང་མཐེའུ་ཆུང་དང་མཐེ་བོ་རྣམས་སུ་གྲངས་ཇི་ལྟ་བ་བཞིན་དུ། ཨོཾ་ཧཱུཾ་ཏྲམ་ཨ་ཁཾ་ཞེས་བྱ་བའི་ཡི་གེ་ལྔ་བཀོད་ལ། དེ་བཞིན་གཤེགས་པ་ཐམས་ཅད་ལ་སོགས་པ་རང་གི་ལྷའི་གཟུགས་ཀྱི་གཟུགས་བརྙན་དུ་སྣང་བས་བདག་ཉིད་ནི་རྒྱལ་པོའི་བཀའ་མངོན་སུམ་པ་ལྟར་འདའ་བར་དཀའ་བར་བསྒོམས་ནས་ཕྱག་རྒྱ་ཕན་ཚུན་བཅིངས་ཏེ། ཐལ་མོ་མདུན་དུ་ཕྱོགས་པས་མཉམ་པར་བྱས་ལ་ཨ་ནྱོ་ནྱཱ་ནུ་ག་ཏ་སརྦ་དྷརྨཱ་ཞེས་བརྗོད་དོ། །དེ་ནས་སོར་མོ་རྣམས་ཕན་ཆུན་རྩེ་མོ་བསྣོལ་བ་བྱས་ལ་ཨ་ཏྱནྟཱ་ནུ་པྲ་བིཥྛ་སརྦ་དྷརྨཱ་ཧཱུཾ་བཛྲ་ཨཉྫ་ལི་ཞེས་བརྗོད་དོ། །དེ་ནས་རྡོ་རྗེ་བསྡམས་པ་ལེགས་པར་བཅིངས་ལ། ཨ་ཏྱནྟཱ་ནུ་པྲ་བིཥྛ་སརྦ་དྷརྨཱ་ཞེས་བརྗོད་དེ་རྡོ་རྗེ་བསྡམས་པ་བཅིངས་པ་དེས་མཐར་ཐུག་པ་མེད་པའི་ནམ་མཁའི་ཁམས་ན་བཞུགས་པའི་སངས་རྒྱས་ཀྱི་ཡོན་ཏན་བསྡུས་ལ་ཧཱུཾ་བཛྲ་བནྡྷ་ཞེས་བརྗོད་དོ། །དེ་ནས་རང་གི་སྙིང་གའི་ཟླ་བ་ལ་རྡོ་རྗེ་ཡོངས་སུ་གྱུར་པ་ལས་རྡོ་རྗེའི་འཁོར་ལོ་རྩིབས་བརྒྱད་པ་དེའི་དབུས་སུ་འང་ཡི་གེ་ཨོཾ་བསམས་ལ་བཛྲ་བནྡྷ་ཏྲཊ་ཅེས་བརྗོད་ལ། རྡོ་རྗེ་བསྡམས་པ་རང་གི་སྙིང་གར་དཀྲོལ་བར་དེ་ན་བཞུགས་པའི་སངས་རྒྱས་ཀྱི་ཡོན་ཏན་རྡོ་རྗེ་འཁོར་ལོ་ལ་རབ་ཏུ་བཞུགས་པར་བསམ་མོ། །དེ་ནས་རྣམ་པར་སྣང་མཛད་ཀྱི་དམ་ཚིག་གི་ཕྱག་རྒྱ་བཅིངས་ལ། ཨོཾ་ཛི་ན་ཛི་ཀ་ཨ་ཞེས་བྱ་བ་འདིས་ཕྱག་རྒྱ་བཅིང་བ་བྱས་ལ་དཀྱིལ་འཁོར་ཆེན་པོའི་ཕྱག་རྒྱ་བཅིང་པ་ཡང་དེ་བཞིན་བྱའོ། །དེ་ནས་རྡོ་རྗེ་འབེབས་པའི་ཕྱག་རྒྱ་བཅིངས་ལ་བཛྲ་ཨཱ་བེ་ཤ་ཨ་ཞེས་ལན་གསུམ་བརྗོད་ལ་མཉེས་པར་བྱའོ། །རྡོ་རྗེ་བསྡམས་པ་བཅིངས་ལ་མཐེའུ་ཆུང་དང་སྲིན་ལག་གི་རྩ་བའི་ནང་དུ་མཐེ་བོ་བཅུག་ལ་སྙིང་གར་ཅུང་ཟད་བསྐྱོད་པ་ནི་རྡོ་རྗེ་འབེབས་པའི་དམ་ཚིག་གི་ཕྱག་རྒྱའོ། །དེ་ནས་ཏིཥྛ་བཛྲ་དྲྀ་ཌྷོ་མེ་བྷ་བ། ཧྲྀ་ད་ཡཾ་མེ་ཨ་དྷི་ཏིཥྛ་སརྦ་སིདྡྷིམྨ་མེ་བྲ་ཡཙྪ་ཧཱུཾ་ཧ་ཧ་ཧ་ཧ་ཧོཿ་ཞེས་བྱ་བ་འདིས་དབབ་པ་ཉེ་བར་
བསྡུ་བར་བྱས་ལ་བཛྲ་སནྡྷི་ཞེས་བྱ་བའི་སྔགས་ཀྱིས་དམ་ཚིག་གི་ཁུ་ཚུར་བཅང་ཞིང༌། ཨོཾ་བཛྲ་མུཥྚི་བཾ་ཞེས་བྱ་བའི་སྔགས་འདིས་བརྟན་པར་བྱའོ། །རྡོ་རྗེ་འབེབས་པའི་དམ་ཚིག་གི་ཕྱག་རྒྱ་བཅིངས་ལ་མཛུབ་མོ་བཀུག་ཅིང་ཚིགས་གསུམ་བའི་རྒྱབ་ཏུ་བཅིངས་བ་འདི་ནི་དམ་ཚིག་གི་རྡོ་རྗེའི་ཁུ་ཚུར་རོ། །དེ་ནས་སྔར་བཤད་པའི་རིམ་པས་བགེགས་ལ་སོགས་པ་གཞོམ་པ་ནས་མེ་ཏོག་ལ་སོགས་པ་མཆོད་པ་ལྔ་བསྐྱེད་པའི་མཐར་ཐུག་པའི་ཆོ་ག་བྱས་ལ། རྡོ་རྗེ་འཁོར་ལོའི་ཕྱག་རྒྱ་བཅིངས་ཏེ་ཁར་བཞག་ནས་ཨོཾ་བཛྲ་རྩཀྲ་ཧཱུཾ་ཞེས་བརྒྱ་རྩ་བརྒྱད་བརྗོད་ལ་མདུན་དུ་དཀྱིལ་འཁོར་བསམ་པར་བྱའོ། །རྡོ་རྗེ་ཁུ་ཚུར་གཉིས་བཅིངས་ལ་མཛུབ་མོ་དང་མཐེའུ་ཆུང་ལྕགས་ཀྱུ་ལྟར་མདུད་པ་བྱས་པ་ནི་འདིའི་ཕྱག་རྒྱའི་མཚན་ཉིད་དོ། །དེ་ནས་ཨོཾ་སརྦ་ཏ་ཐཱ་ག་ཏ་ཀཱ་ཡ་བཱ་ཀ་ཙིཏྟ་བཛྲ་པྲ་ཎཱ་མེ་བཛྲ་བནྡྷ་ནཾ་ཀ་རོ་མི་ཞེས་བརྗོད་ལ་ཡན་ལག་ལྔས་ཕྱག་རྒྱའོ། །གལ་ཏེ་འབྱོར་ན་བདུག་སྤོས་ལ་སོགས་པ་ཕྱིའི་མཆོད་པ་ལྔ་དང༌། ཡང་མཆོད་པ་རྣམ་པ་བརྒྱད་ཀྱིས་ཡང་དག་པར་མཆོད་ནས་མཆོད་པ་ཉི་ཤུའི་བར་དུ་ཇི་ལྟ་བ་བཞིན་དུ་བྱས་ལ། རང་གི་སྙིང་ག་དང་དཔྲལ་བ་དང་ལྕེ་དང་སྤྱི་གཙུག་ཏུ་ཨ་ལས་ཟླ་བའི་དཀྱིལ་འཁོར་བསམ་ཞིང་དེར་ཡང་རྡོ་རྗེ་དང་རིན་པོ་ཆེ་དང༌། པདྨ་དང་རལ་གྲི་ཧཱུཾ་ཏྲཾ་ཨ་ཁཾ་ཞེས་བྱ་བ་ལས་བསྐྱེད་ལ་སྙིང་ག་དང་དཔྲལ་བ་དང་ཁ་དང་སྤྱི་བོར་གནས་པའི་རྡོ་རྗེ་ཐལ་མོ་བརྐྱང་ནས་ལུས་ཐམས་ཅད་ས་ལ་ཕབ་སྟེ། ཤར་དང་ལྷོ་དང་ནུབ་དང་བྱང་གི་ཕྱོགས་སུ་གྲངས་ཅི་ལྟ་བ་བཞིན་སྙིང་པོ་འདིས་ཕྱག་བྱའོ། །ཨོཾ་སརྦ་ཏ་ཐཱ་ག་ཏ་བཱུ་ཛ་ཨུ་པསྠ་ནཱ་ཡ་ཨཱཏྨ་ནཾ་ནི་ཪྻཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་སཏྭ་ཨ་དྷི་ཏི་ཥྛ་སྭ་མཱཾ། སརྦ་ཏ་ཐཱ་ག་ཏ་པཱུ་ཛ་ཨ་བྷི་ཥེ་ཀཱ་ཡ་ཨཱཏྨ་ནཱཾ་ནི་ཪྻཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་རཏྣ་ཨ་བྷི་ཥི་ཉྩ་མཱཾ། ཨོཾ་སརྦ་ཏ་ཐཱ་ག་ཏ་པཱུ་ཛ་པྲ་བརྟ་ནཱ་ཡཱ་ཨཱཏྨ་ནཾ་ནི་ཪྻཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་དྷརྨཱ་པྲ་བརྟཱ་ཡ་མཱཾ། ཨོཾ་སརྦ་ཏ་ཐཱ་ག་ཏ་པཱུ་ཛ་ཀརྨ་ཎེ་ཨཱཏྨ་ནཱཾ་ནི་ཪྻཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་ཀརྨ་ཀུ་རུ་མཱཾ། དེ་ནས་མདུན་དུ་འདུག་ལ་ཇི་ལྟ་བ་བཞིན་དུ་སྡིག་པ་བཤགས་པ་ལ་སོགས་པའི་རིམ་གྱིས་སྡོམ་པ་བླངས་ལ་སྨོན་ལམ་བྱ་སྟེ། ཆོས་བདག་མེད་པའི་མཉམ་པ་ཉིད་ཀྱིས་རང་གི་སྙིང་གར་
དཀྱིལ་འཁོར་བཅུག་ལ་རྡོ་རྗེ་གནོད་སྦྱིན་དང་རྡོ་རྗེ་ཧཱུཾ་མཛད་ཀྱི་སྔགས་དང་ཕྱག་རྒྱ་དག་གིས་ཇི་ལྟ་བ་བཞིན་དུ་སྡིག་པ་བསལ་བར་བྱའོ། །དེ་ནས་ཆོས་ཀྱི་འཁོར་ལོའི་ཕྱག་རྒྱ་བཅིངས་ལ། ཧཱུཾ་ཊཀྐི་སྥོ་ཊ་ཡ་མ་ཧཱ་བི་དཱ་ག་བཛྲ་དྷ་ར་སནྟྱེ་ན་ཐ་ཞེས་བྱ་བའི་སྔགས་ཀྱི་མཐར་དེ་བཞིན་གཤེགས་པ་ཐམས་ཅད་ལ་སོགས་པའི་འདོད་ཆགས་དང་བྲལ་བས་དྲལ་བར་བྱའོ། །རྡོ་རྗེ་བསྡམས་པ་དམ་བཅིངས་ཏེ། །མཐེ་བོ་མཐེའུ་ཆུང་སྦྱར་ནས་ནི། །ལྷག་མ་རྣམས་ནི་འཁོར་ལོར་བྱ། །ཆོས་ཀྱི་འཁོར་ལོ་ཞེས་བྱར་གྲགས། །ཞེས་བྱ་བ་ནི་ཆོས་ཀྱི་འཁོར་ལོའི་ཕྱག་རྒྱའོ། །དེ་ནས་རབ་ཏུ་དགའ་བའི་རྡོ་རྗེའི་ཕྱག་རྒྱ་བཅིངས་ལ། ཨོཾ་མཧཱ་སུ་ཁ་བཛྲ་སཏྭ་ཡ་སརྦ་སཏྭེ་བྷྱོ། ཛཿ་ཧཱུཾ་བཾ་ཧོཿ་ཞེས་བྱ་བ་འམ་མ་ཧྱཾ་ཞེས་བྱ་བའི་སྔགས་ལན་བདུན་བརྗོད་པར་བྱའོ། །རྡོ་རྗེ་བསྡམས་པ་དམ་བཅིངས་ལ། །གཡོན་པའི་མཐེའུ་ཆུང་མངལ་དུ་ནི། །གཡས་པ་ཡིས་ནི་མཐེ་བོ་མཚན། །བཅུག་ལ་བསྐྱོད་ཅིང་ཅུང་ཟད་བཙིར། །ཞེས་བྱ་བ་འདི་ནི་རབ་ཏུ་དགའ་བའི་རྡོ་རྗེའི་ཕྱག་རྒྱའོ། །དེ་ནས་རང་གི་སྙིང་གར་ཟླ་བའི་དཀྱིལ་འཁོར་ལ་འཁོར་ལོའི་དབུས་སུ་གནས་པའི་ཡི་གེ་ཨོཾ་བསམས་ལ། དེའི་འོད་ཟེར་གྱིས་རེག་པ་ལས་བདག་ཉིད་སྡིག་པ་ཐམས་ཅད་དང་བྲལ་ཞིང་བསོད་ནམས་ཐམས་ཅད་དང་ལྡན་པར་བསམས་ལ། རེག་པ་དེ་ཉིད་ཀྱིས་རྣམ་པར་སྣང་མཛད་ཀྱི་སྐུར་ངེས་པར་བསམས་ལ་སྐུ་དང་གསུད་དང་ཐུགས་བྱིན་གྱིས་བརླབས་པའི་ཕྱག་རྒྱ་རྣམས་ཀྱིས་མགོ་དང་སྙིང་ག་དང་ལྐོག་མར་བྱིན་གྱིས་བརླབ་སྟེ་སྙིང་ག་དང་དཔྲལ་བ་དང༌། མགོ་དང་ལྐོག་མ་དང་སྤྱི་བོ་རྣམས་སུ་ཟླ་བའི་དཀྱིལ་འཁོར་ལ་གནས་པའི་རྡོ་རྗེ་ལ་སོགས་པའི་ཡི་གེ་ཧཱུཾ་ལ་སོགས་པས་མཚན་པར་བསམ་མོ། །དེ་ནས་སྙིང་གར་རྡོ་རྗེ་སེམས་དཔའི་ཕྱག་རྒྱས་ཨོཾ་སཏྭ་བཛྲི་ཎི་ཧཱུཾ། ཨ་དྷི་ཏི་ཥྛ་མཱཾ་ཞེས་བྱ་བས་བྱིན་གྱིས་བརླབ་པོ། །དེ་བཞིན་དུ་རྣམ་པར་སྣང་མཛད་ཀྱི་དམ་ཚིག་གི་ཕྱག་རྒྱ་བཅིངས་ལ་གཡས་སུ་བསྐོར་བའི་བར་གྱི་སྦྱོར་བས་ལུས་ཐམས་ཅད་ཡོངས་སུ་བསྐོར་ལ་སྙིང་གར་བཞག་ནས། ཨོཾ་བཛྲ་དྷཱ་ཏྭཱི་ཤྭ་རི་ཧཱུཾ་བཛྲ་ཎི་ཨ་དྷི་ཏིཥྛ་མཱཾ་ཞེས་བྱ་བས་བྱིན་གྱིས་བརླབ་པོ། །དེ་ནས་དེ་བཞིན་གཤེགས་པ་ལྔའི་ས་བོན་གྱི་ཡི་གེ་བྱིན་གྱིས་བརླབས་
བའི་གཙོ་བོ་ལྔ་དང་ལྡན་པའི་རིན་པོ་ཆེའི་ཅོད་པན་མགོ་ལ་བསམས་ལ། རྡོ་རྗེ་རིན་ཆེན་གྱི་ཕྱག་རྒྱ་དཔྲལ་བར་བཞག་སྟེ། ཨོཾ་བཛྲ་དཏྣ་ཨ་བྷི་ཉྩ་མཱཾ་ཞེས་པས་དབང་བསྐུར་རོ། །དེ་ནས་རྣམ་པ་ཐམས་ཅད་ཀྱི་མཆོག་དང་ལྡན་པའི་རང་གི་ལྷའི་གཟུགས་སུ་རྣམ་པར་བསམ་མོ། །དེ་ནས་ཇི་ལྟ་བ་བཞིན་དུ་མཆོད་པ་བྱས་ལ་རྡོ་རྗེ་དབྱིངས་ནི་བདག་གོ་ཞེས་ང་རྒྱལ་བྱའོ། །དེ་ནས་ཐལ་མོ་སྦྱར་བ་བྱས་ལ། ཨོཾ་བི་མ་ལ་ལོ་ད་དྷི་ཧཱུཾ་ཞེས་བྱ་བས་རྒྱ་མཚོ་ཆེན་པོ་དེའི་སྟིང་དུ་ཨོཾ་ཨ་ཙལ་བྷི་ར་ཧཱུཾ་སྭཱ་ཧཱ་ཞེས་བྱ་བས་ས་གཞི་གསེར་གྱི་རང་བཞིན་ཅན། དེའི་སྟེང་དུ་ཨོཾ་ཨ་ཙ་ལ་ཧཱུཾ་ཞེས་བྱ་བས་རིན་པོ་ཆེ་སྣ་བཞིའི་རང་བཞིན་གྱི་རིའི་རྒྱལ་པོ་རི་རབ་བྱིན་གྱིས་བརླབ་བོ། །དེ་ནས་གཞན་འཕྲུལ་དབང་བྱེད་ཀྱི་དབང་སྒྱུར་གྱི་རྒྱལ་པོའི་གནས་ཇི་ལྟ་བ་བཞིན་དུ་བསྐྱེད་ལ། དེའི་སྟེང་དུ་ཡི་གེ་བྷཱུཾ་ལས་ཟུར་བཞི་ལ་སོགས་པ་དང་ལྡན་པའི་ཁང་པ་བརྩགས་མ་རྣམ་པར་བསམས་ལ་དེའི་ཕྱོགས་གཅིག་ཏུ་པདྨ་བསམ་སྟེ། དེར་འདུག་ནས་མདུན་དུ་རྣམ་པར་སྣང་མཛད་ཀྱི་དམ་ཚིག་གི་དཀྱིལ་འཁོར་ཇི་ལྟ་བ་བཞིན་དུ་རྣམ་པར་བསམས་ལ་རྡོ་རྗེ་དང་དྲིལ་བུ་འཛིན་པས་རང་གི་གནས་ལ་བཞུགས་པའི་དཀྱིལ་འཁོར་གྱི་ལྷ་རྣམས་བསྒོམས་ཏེ། སྐུ་གསུང་ཐུགས་བྱིན་གྱིས་བརླབ་པའི་ཕྱག་རྒྱ་རྣམས་ཀྱིས་བྱིན་གྱིས་བརླབ་པ་དང༌། རྡོ་རྗེ་སྲུང་བས་གོ་པ་གོས་ལ་མཆོད་ཡོན་ཕུལ་ཏེ་ཇི་ལྟ་བ་བཞིན་དུ་སྤྱན་དྲངས་ལ་ཁང་པ་བརྩེགས་མའི་ནང་དུ་གནས་པ་ལ་རང་གི་ལྷའི་ང་རྒྱལ་དུ་བྱས་ནས་རྡོ་རྗེ་ཐལ་མོ་བསྐོར་བ་སྙིང་གར་བཞག་ནས་མགོ་ཅུང་ཟད་བཏུད་དེ་བསྟོད་པ་བྱའོ། །དེ་ནས་དགུག་པ་ལ་སོགས་པ་བྱ་བ་སྟེ། དེ་བཞིན་དུ་སྒོ་བཅིང་བ་དང་སྲུང་བ་ཐམས་ཅད་ཀྱིས་ལེགས་པར་བསྲུངས་ལ། དམ་ཚིག་ལ་སོགས་པའི་ཕྱག་རྒྱ་བཞིས་རྒྱས་གདབ་པོ། །དེ་ནས་རང་དང་རྗེས་སུ་མཐུན་པའི་དབང་བསྐུར་བས་དབང་བསྐུར་ལ་སྙིང་གར་སྙིང་པོ་བཀོད་དེ། དེ་ཉིད་ལ་ཉེ་བའི་སྙིང་པོ་ལ་སོགས་པ་ལྷག་པར་མོས་པས་སྙིང་གའི་ཕྱོགས་སུ་དབུ་དང་གཙུག་ཕུང་དང་ནུ་མ་གཉིས་དང་ལག་པ་གཡས་པའི་རྩ་བ་དང་གཡོན་པའི་རྩ་བ་དང་ལུས་ཐམས་ཅད་ལ་དགོད་དོ། །དེ་ནས་བདུག་སྤོས་ལ་སོགས་པའི་མཆོད་པ་བརྒྱད་བྱས་ལ། དཔག་
བསམ་གྱི་ཤིང་ལ་སོགས་པ་ཡང་ཕུལ་ནས་དྲིལ་བུ་བླངས་ཏེ་བསྟོད་པས་མཉེས་པར་བྱས་ལ་ཕྱག་བཞི་བྱའོ། །ད་ནས་རང་གི་དམ་ཚིག་གི་ཕྱག་རྒྱས་བདག་ཉིད་བྱིན་གྱིས་བརླབས་ལ་སྤོས་ཆུས་དབང་བསྐུར་ཏེ་དེ་བཞིན་དུ་སྙིང་པོ་དགོད་པ་བྱས་ན་སྤོས་ཆུས་རྡོ་རྗེ་རིན་ཆེན་གྱི་དབང་བསྐུར་བས་དབང་བསྐུར་ལ། མདུན་དུ་དཀྱིལ་འཁོར་བསྒོམས་ནས་བདག་ཉིད་ཀྱང་རང་གི་ལྷའི་ངོ་བོ་ལ་རྡོ་རྗེ་དང་དྲིལ་བུ་ཐོགས་པར་གྱུར་པས་ལྷའི་ཐུགས་ཀའི་ཟླ་བ་ལས་བཟླ་བར་བྱ་བའི་སྙིང་པོ་རྣམ་པར་བཀོད་ནས་ཇི་ཙམ་འདོད་ཀྱི་བར་དུ་བཟླས་པ་དང་བསྒོམ་པ་བྱའོ། །ཕྱག་རྒྱ་དང་བྱིན་གྱིས་བརླབ་པ་ལྷོད་པར་གྱུར་པའམ། བདག་ཉིད་གཏོང་བར་འདོད་ན་ཡི་གེ་བརྒྱ་པ་བཟླ་ས་པར་བྱའོ། །དེ་ནས་བཟླས་བརྗོད་ཇི་ལྟ་བ་བཞིན་དུ་ཕུལ་ལ། མངོན་པར་འདོད་པའི་དངོས་གྲུབ་ཀྱི་ཕྱིར་གསོལ་བ་བྱས་ནས་སྦྱིན་སྲེག་བྱས་ཏེ་བདུག་སྤོས་ལ་སོགས་པ་རྣམས་ཀྱིས་ཡང་དག་པར་མཆོད་ལ་མཚན་བརྒྱ་རྩ་བརྒྱད་ཀྱིས་བསྟོད་དེ། དཀྱིལ་འཁོར་གཤེགས་སུ་གསོལ་བའི་རིམ་པས་ལྷ་རྣམས་གཤེགས་སུ་གསོལ་ལ། བདག་ཉིད་དབང་བསྐུར་བ་དང་གོ་བགོ་བ་བྱས་ནས་ལངས་ལ། མཆོད་རྟེན་གྱི་ལས་ལ་སོགས་པ་ཉིན་རེ་བཞིན་ཐུན་པ་ཞིང་བྱ་སྟེ་འདི་ནི་བྱིན་གྱིས་བརླབ་པ་ཞེས་བྱ་བའི་རྣལ་འབྱོར་རོ། །གཟུགས་ཉིད་ཅེས་བྱ་བ་ནི་རང་གི་ལུས་རང་གི་ལྷའི་མཚན་ཉིད་དུ་སྦྱོར་རོ། །བྱིན་གྱིས་བརླབ་པ་ཞེས་བྱ་བ་ལ་སོགས་པ་ནི་རྣལ་འབྱོར་གསུམ་གྱི་མཚན་ཉིད་ཅེས་བྱ་བ་སྟེ། བྱིན་གྱིས་བརླབ་པ་ཞེས་བྱ་བ་ནི་སྔགས་དང་ཕྱག་རྒྱས་སོ། །བྱང་ཆུབ་སེམས་ནི་དག་པ་དང༌། །ཞེས་བྱ་བ་ནི་དོན་དམ་པར་བྱང་ཆུབ་ཀྱི་སེམས་བསྒོམས་པས་བློ་ཤིན་ཏུ་རྣམ་པར་དག་པའོ། །གསང་སྔགས་ས་བོན་སྐྱེ་བ་ཆེ། །ཞེས་བྱ་བ་ནི་དེའི་རྗེས་ལས་ཐོབ་པའི་དག་པའི་འཇིག་རྟེན་པའི་སེམས་སོ། །ཕྱག་རྒྱའི་ཚོགས་སུ་བརྟག་པ་ཡིས། །རིམ་གྱིས་གཟུགས་ནི་རྫོགས་བྱས་པ། །ཞེས་བྱ་བ་ནི། དེ་བཞིན་ཉིད་སྣང་སྒྱུ་ལས་བྱུང༌། །གསལ་དང་གྲིབ་མ་ལས་ཀྱང་འདས། །འཕགས་པའི་རིགས་ཀྱི་སྔགས་ལས་སྐྱེས། །གཉིས་གྱུར་འཇིག་པ་ལ་རབ་བརྩོན། །ཞེས་བྱ་བའི་རིམ་གྱིས་སོ། །ཡོངས་སུ་རྫོགས་པའི་རྣལ་འབྱོར་
ནི་གོ་སླ་བས་འདིར་མ་སྨོས་སོ། །དང་པོ་དམ་ཚིག་བྱིན་བརླབ་པ། །ཞེས་བྱ་བ་ནི་དང་པོ་བྱིན་གྱིས་བརླབ་པའི་རྣལ་འབྱོར་རོ། །དམ་ཚིག་ནི་དམ་ཚིག་ལ་མངོན་པར་ཞེན་པའི་ཕྱི་རོལ་གྱི་དོན་ཡོད་པར་སྨྲ་བ་རྣམས་ཀྱི་ཕྱིར་ཡིན་པར་ཤེས་པར་བྱའོ། །རྣལ་འབྱོར་སྤྱོད་པའི་ཞེས་བྱ་བ་ལ་རྣལ་འབྱོར་སྤྱོད་པའི་རྣམ་པར་ཤེས་པ་ཙམ་དུ་སྨྲས་སོ། །དབུ་མའི་ཞེས་བྱ་བ་ནི་ཆོས་ཐམས་ཅད་སྐྱེ་བ་མེད་པར་སྨྲ་བའོ། །འདི་ནི་རྣལ་འབྱོར་ཆོ་གར་བཤད། །ཅེས་བྱ་བ་ནི་རྣལ་འབྱོར་གྱི་ཆོ་གའི་དབྱེ་བའི་རྣམ་པ་གསུམ་མོ། །རྟག་པའི་རྣལ་འབྱོར་གསལ་བར་བསྟན་པའི་ཕྱིར་ཉོན་མོངས་དྲི་མར་ཞེས་བྱ་བ་ལ་སོགས་པ་གསུངས་ཏེ། བྱང་ཆུབ་སེམས་ཀྱི་དག་པ་ནི་དོན་དམ་པའི་བྱང་ཆུབ་ཀྱི་སེམས་སོ། །དེ་ནི་རང་བཞིན་ཞེས་བྱ་བ་ལ་སོགས་པ་ལ། ཐལ་མོ་གསུམ་གྱིས་སྦྱར་ཞེས་བྱ་བ་ནི་ལྷའི་ཁང་པར་ཞུགས་པའི་འོག་ཏུ་དེར་སྭ་བྷཱ་ཝ་ཤུདྡྷཿ་སརྦ་དྷརྨཱ། སྭ་བྷཱ་ཝ་ཤུདྡྷོ྅ཧཾ་ཞེས་བརྗོད་ལ། བགེགས་རྣམ་པར་བསལ་ཏེ་བྱང་ཆུབ་ཀྱི་སེམས་ཇི་ལྟ་བས་སེམས་སྦྱང་བར་བྱའོ་ཞེས་ལ་ལ་འདོད་དོ། །གཞན་དག་ན་རེ་ཐལ་མོ་གསུམ་གདབ་པ་ཙམ་གྱིས་སེམས་ཀྱི་ངོ་བོ་ཉིད་རྟོགས་པར་བྱས་པའི་འོག་ཏུ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་བྱ་བ་ངོ་བོ་ཉིད་ངག་པ་ཡོངས་སུ་སྟོན་པར་བྱེད་པའི་ཚིག་འདིས་རབ་ཏུ་སད་པ་དང་བྱིན་གྱིས་བརླབ་པར་བྱའོ་ཞེས་ཟེར་རོ། །སེམས་ལ་སོ་སོར་བརྟག་པར་བྱ། །ཞེས་བྱ་བ་ནི་ཇི་སྐད་བཤད་པ་བཞིན་དུ་བསམས་པའི་དཀྱིལ་འཁོར་གྱི་དབུས་སུ་རྣམ་པར་སྣང་མཛད་ཀྱི་རང་གི་དམ་ཚིག་གིས་སྐུ་ལ་འཁྱུད་པར་རྣམ་པར་བསམས་ལ། ཨ་ལི་ཙམ་གྱི་གཟུགས་ཅན། ཨོཾ་ཙིཏྟ་བརྩི་བེ་དྷཾ་ཀ་རོ་མི་ཞེས་བརྗོད་པས་དེའི་ཞལ་དུ་ཞུགས་ནས་དམ་ཚིག་གི་ཕྱག་རྒྱའི་པདྨའི་གནས་སུ་སོང་བ་སྟེ། འདིས་ནི་སེམས་ཀྱི་སོ་སོར་རྟོག་པ་ཞུགས་ཤིང་འཕངས་པར་བྱས་པར་འགྱུར་རོ། །ཕྱི་རོལ་རང་བཞིན་སྟོང་པར་བྱ། །ཞེས་བྱ་བ་ནི་ཕྱི་རོལ་ངོ་བོ་ཉིད་ཀྱི་རང་བཞིན་སྟོང་པ་ཡིན་པར་བསམ་མོ་ཞེས་བྱ་བ་ནི་ལྷག་མའོ། །སེམས་ཙམ་ལ་ནི་གནས་ནས་སུ། །བྱང་ཆུབ་ཚོགས་ཀྱི་བག་ཆགས་དེས། །ཞེས་བྱ་བ་ནི་ཇི་སྐད་དུ་བཤད་པའི་རྣམ་པར་སྣང་མཛད་བྱང་ཆུབ་ཀྱི་སེམས་ཀྱི་གཟུགས་
སུ་ཡོངས་སུ་གྱུར་པ་ལ་དེར་ཡང་དཀྱིལ་འཁོར་ལྷ་རྣམས་རབ་ཏུ་ཞུགས་པར་བསམས་ལ། དེའི་འོག་ཏུ་བདག་ཉིད་མཉམ་པར་བཞག་སྟེ། སེམས་དཔའི་གཟུགས་གསལ་བ་ལ་ཆོས་ཀྱི་རི་མོས་དབུགས་སུ་ཕུག་ལ་སྙིང་ག་དང་འོད་དང་སྟན་ཟླ་བའི་རྣམ་པ་དང་བཅས་པ་མཆོག་ཏུ་མྱ་ངན་ལས་འདས་པའི་བདེ་བ་ཆེན་པོའི་ངོ་བོ་རྣམ་པར་སྣང་མཛད་ཏིང་ངེ་འཛིན་ལ་སྙོམས་པར་ཞུགས་པ་བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པའི་བདག་ཉིད་ཅན་ལ། བདེ་བར་གཤེགས་པ་ཐམས་ཅད་ཀྱི་ཐུགས་ཀྱང་དེ་ཉིད་དུ་དྲངས་ལ་བརྒྱལ་བར་གྱུར་པ་ལ། ཨ་ལ་སོགས་པའི་སངས་རྒྱས་ཀྱི་ཡོན་ཏན་གྱི་ངོ་བོ་ཞུགས་པར་བསམ་ཞིང་ཨོཾ་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་བྱ་བས་བྱིན་གྱིས་བརླབ་པོ། །དེས་སྒོ་བྱས་པའི་ཞེས་བྱ་བ་ལ་སོགས་པ་ལ་སྙིང་ག་ལ་སོགས་པར་ཨ་བཀོད་ལ་ཨོཾ་བོ་དྷི་ཙིཏྟ་ཨུ་པཱ་ད་ཡཱ་མི། ཞེས་བརྗོད་ལ་ཐབས་དང་ཤེས་རབ་ཀྱི་ཡེ་ཤེས་སྒོམ་པར་བྱེད་པས་བདག་ཉིད་བསྒོམས་ཤིང་གཅིག་ཏུ་གྱུར་པར་བསྒོམས་ལ་སྤྱན་ལ་སོགས་པས་ཇི་ལྟ་བ་བཞིན་དུ་བསླངས་ནས་ཀུན་དུ་བཟང་པོའི་གཟུགས་སུ་རྣམ་པར་བསམས་ལ་ཡི་གེ་ཀ་ལ་སོགས་པ་ཞུགས་པར་བྱས་ནས་སྙིང་ག་ལ་སོགས་པའི་ཟླ་བའི་གཟུགས་ཀྱི་སྟེང་དུ་བརྟག་པར་བྱའོ། །དེ་ནས་རྒྱུད་གཞན་གྱི་ནང་ནས་གསུངས་པའི་རིམ་པས་དམ་ཚིག་དང་ཆོས་དང་ཆོས་དང་ལས་ཀྱི་ཕྱག་རྒྱ་བསམས་ལ། ཐུགས་ཀའི་ཟླ་བ་ལ་ཡི་གེ་ཨོཾ་བཀོད་ནས་རྣམ་པར་སྣང་མཛད་ཇི་ལྟ་བ་བཞིན་དུ་བསམ་པར་བྱའོ། །པདྨ་ལ་གནས་པ་ཞེས་བྱ་བ་ནི་འོག་ཏུ་པཾ་ལས་བྱུང་བའི་པདྨ་བསམས་པའི་སྟེང་དུ་བདག་ཉིད་དམ་མཚན་ཐམས་ཅད་དང་ལྡན་པར་བསྒོམ་མོ། །དེ་བཞིན་དུ། ཨོཾ་གྱི་མྱུ་གུས་བཀྲུན་པ་ཡི། །ཡན་ལག་ཀུན་གྱི་མཚན་ཉིད་གཟུགས། །རྡོ་རྗེ་སྐུ་ནི་བསྒོམ་པར་བྱ། །ཞེས་བྱ་བ་འདིས་ཏིང་ངེ་འཛིན་རིམ་པར་ཕྱེ་བ་གསུམ་པའི་དོན་དང་སྦྱར་རོ། །དེ་ནས་སྐུ་མ་ལུས་པའི་ངོ་བོར་གྱུར་པའི་ཡི་གེ་ཨོཾ་ནི་སྤྱི་གཙུག་ཏུ་བསམ། གསུང་མ་ལུས་པའི་ངོ་བོ་ཡི་གེ་ཨཱཿ་ལྐོག་མར་བསམ། ཐུགས་མ་ལུས་པའི་ངོ་བོ་ཡི་གེ་ཧཱུཾ་སྙིང་གར་བསམ་མོ་ཞེས་བྱ་བ་ནི་ལྷག་མ་སྟེ། དེ་དག་གིས་ནི་རྒྱུད་ཀྱི་བདག་པོའི་རྣལ་འབྱོར་གསུངས་པ་ཡིན་ནོ། །ཡི་གེ་
གསུམ་གྱིས་ཞེས་བྱ་བ་ལ་སོགས་པས་ནི་ཐུགས་རྡོ་རྗེ་ལ་སོགས་པའི་རྣལ་འབྱོར་གསུངས་པ་ཡིན་ཏེ་ཏིང་ངེ་འཛིན་རིམ་པར་ཕྱེ་བ་ལས་གསུངས་པའི་རང་གི་ས་བོན་གྱི་ཡི་གེ་དེ་རྣམ་པར་བཀོད་པའི་འོག་ཏུ་རྡོ་རྗེ་སེམས་དཔའ་རང་གི་ལྷའི་སྐུ་མདོག་དང་བཞུགས་ཚུལ་དང་གདན་དང་འོད་དང་ཕྱག་མཚན་རྣམས་ལྷག་པར་བསྒོམས་ཏེ། མདོག་གཟུགས་འོད་དང་འདྲ་བར་བསམ། །ཞེས་བྱ་བའི་ཉེ་བར་མཚོན་པས་སོ། །ང་རྒྱལ་བསྐྱེད་ཅེས་བྱ་བ་ལ་སོགས་པས་ནི་ཐ་མལ་པ་མ་ཡིན་པ་ཉིད་དུ་གསུངས་པའོ། །དེ་ནས། རྡོ་རྗེའི་བདག་ཉིད་བདག་ཡིན་བརྗོད། །ཅེས་བྱ་བའི་ཉེ་བར་མཚོན་པས་རྣམ་པར་སྣང་མཛད་ཀྱི་ལུས་ལ། ཨོཾ་བཛྲ་ཨཱཏྨ་ཀོ྅ཧཾ། །ཨོཾ་སྭ་བྷཱ་ཝ་ཤུདྡྷོ྅ཧཾ། ཨོཾ་ས་རས་མོ྅ཧཾ་ཞེས་ང་རྒྱལ་ཡིན་ནོ། །ཇི་ལྟ་བྱ་བ་ཡིན་ཏེ། དེ་དག་ནི་རྣལ་འབྱོར་ཆེན་པོ་བསྐྱེད་པར་བྱ་བའི་འོག་ཏུ་ཤེས་པར་བྱའོ། །ཆ་ཤས་ཀྱི་དྲ་བ་ཅན་ཞེས་བྱ་བ་ནི་སྤྱན་ལ་སོགས་པའི་དྲ་བ་རང་གི་ལུས་ལ་རྣམ་པར་དགོད་པའོ། །ཡེ་ཤེས་སེམས་དཔའ་རྫོགས་པར་བརྟག །ཅེས་བྱ་བ་མདུན་དུ་ཡེ་ཤེས་སེམས་དཔའ་ཇི་ལྟ་བ་བཞིན་དུ་བསྒོམས་ལ་དགུག་པ་ལ་སོགས་པས་རང་གི་ལུས་ལ་བསྐྱེད་པར་བྱའོ། །དེར་བསྐྱེད་ནས་དེའི་འོག་ཏུ་ལག་པའི་ཕྱག་རྒྱས་གོ་ཆ་དང་མཚོན་ཆ་ལ་སོགས་བ་བརྟག་གོ་ཞེས་བྱ་བར་སྦྱར་རོ། །ཡེ་ཤེས་སེམས་དཔའ་བསྒྲུབ་པའི་སྔོན་དུ་འདི་བྱའོ་ཞེས་ཟེར་རོ། །ལ་ལ་ནི་ཇི་སྐད་བུ་བཤད་པ་བཞིན་རིགས་པ་ཡིན་ནོ་ཞེས་ཟེར་རོ། །དེ་འོག་ལག་པའི་ཕྱག་རྒྱ་ཡིས། །ཞེས་བྱ་བ་ནི་གསོལ་བ་འདེབས་པ་སྔོན་དུ་འགྲོ་བས་བྱིན་གྱིས་བརླབ་པ་བྱས་ནས། དེའི་འོག་ཏུ་ལག་པའི་ཕྱག་རྒྱ་བྱིན་གྱིས་བརླབ་པ་མངོན་དུ་བྱའོ། །གོ་ཆ་མཚོན་ཆ་ལ་སོགས་བྱ། །ཞེས་བྱ་བ་ནི་ཕྱག་རྒྱ་རྣམས་ཀྱིས་དབང་བསྐུར་བའི་འོག་ཏུ་བྱ་བ་ཁོང་དུ་ཆུད་པར་བྱའོ། །རྫོགས་སངས་རྒྱས་ལྔས་དབང་བསྐུར་ཏེ། །ཞེས་བྱ་བ་ནི་ཆོ་གའི་ཚུལ་ཉིད་ནི་མ་ཡིན་གྱི་སྲིད་པའི་དབང་དུ་མཛད་ནས་གསུངས་པ་ཡིན་ཏེ། དེ་ཅིའི་ཕྱིར་ཞེ་ན། ཐམས་ཅད་ལ་ནི་སངས་རྒྱས་ལྔའི་ཅོད་པན་དུ་བྱས་པར་མི་འདོད་དོ། །བྱང་ཆུབ་སེམས་ནི་ཞེས་བྱ་འདིས། །ཅོད་པན་ཕྲེང་བ་རྣམས་ཀྱིས་བརྒྱན། །ཞེས་བྱ་བའི་བར་གྱི་གཞུང་གིས་ནི་དང་པོའི་སྦྱོར་བའི་ཏིང་ངེ་
འཛིན་གསུངས་པ་ཡིན་ནོ། །དེ་ནས་དེ་འོག་ཅེས་བྱ་བ་ལ་སོགས་པ་ལ། ཇི་ལྟ་བ་བཞིན་དུ་མངོན་པར་རྫོགས་པར་སངས་རྒྱས་ནས་ཐུགས་རྡོ་རྗེ་ལ་སོགས་པ་བཞི་སྤྲུལ་པའི་ཕྱིར་དེ་དང་ལྷན་ཅིག་ཏུ་ཇི་སྐད་དུ་བཤད་པའི་གནས་སུ་བབས་ནས། སྤྱན་ལ་སོགས་པའི་ལྷ་མོ་སངས་རྒྱས་ཀྱི་སྤྲུལ་བ་མཛད་པའི་སྒྱུ་མ་སྤྲོ་བར་བྱའོ། །ཕྱོགས་བཅུར་ཁྲོ་བོ་བཅུ་དང་ཞེས་བྱ་བ་ནི་ཤར་ལ་སོགས་པ་ཕྱོགས་བཅུའི་མཐར་ཐུག་པར་གཤིན་རྗེ་གཤེད་ལ་སོགས་པའི་ཁྲོ་བོ་བཅུ་སྤྲོ་ཞེས་བྱ་བར་སྦྱར་རོ། །དེ་ཅིའི་ཕྱིར་ཞེ་ན། འདི་ལྟར་དཀྱིལ་འཁོར་བྲི་བའི་དུས་སུ་གཙུག་ཏོར་འཁོར་ལོས་སྒྱུར་བ་ཆེན་པོ་དང༌། གནོད་མཛེས་དག་སྟེང་དང་འོག་དང་བླ་ག་བ་དང་ཕུར་བུའི་ཚུལ་དུ་བསམ་པར་བྱའོ་ཞེས་ཤེས་པར་བྱའོ། །དཀྱིལ་འཁོར་གྱི་རིམ་པར་ཕྱེ་བ་ལས་ཁྲོ་བོ་བརྒྱད་བསྟན་པ་ནི་ཉེ་བར་མཚོན་པ་ཙམ་ཡིན་ནོ། །ཇི་ལྟ་བུ་ཞིག་ཅེ་ན། ཡན་ལག་ཅེས་བྱ་བ་ལ་སོགས་པ་གསུངས་ཏེ། ཡན་ལག་བཞི་ཡི་དཔུང་དང་ལྡན། །ཞེས་བྱ་བ་ནི་ལྷ་མོ་བཞིའི་ཚོགས་དང་ལྡན་པའོ། །ཡན་ལག་བཞི་ཡི་དཔུང་དང་ལྡན། །ཞེས་གསུངས་པའི་དོན་དེ་ཉིད་བསྟན་པའི་ཕྱིར། བསྙེམས་མ་དང་ནི་ཞེས་བྱ་བ་ལ་སོགས་པ་གསུངས་ཏེ། འདིར་བསྙེམས་མ་ཞེས་བྱ་བའི་སྒྲས་ནི་ཀི་ལི་ཀི་ལ་ཡོངས་སུ་གཟུང་ངོ༌། །མེ་ཏོག་ལྡན་མ་ནི་རྡོ་རྗེ་ཆགས་མའོ། །མཚོན་ཆ་མ་ནི་རྡོ་རྗེ་མཚོན་ཆ་མའོ། །རྩེ་མོ་ཅན་ནི་དུས་ཐམས་ཅད་པའི་མེ་ཏོག་གི་ཕྲེང་བས་བརྡེགས་པས་ན། ཕྱག་རྒྱའི་ཉེ་བར་མཚོན་པ་ནི་རྡོ་རྗེ་བསྙེམས་མ་ཡིན་ནོ། །རྡོ་རྗེ་མཚོན་ཆ་མ་ལ་སོགས་པ་བཞི་ནི། སྤྱན་ལ་སོགས་བཞིའི་ངོ་བོ་ཉིད་ཡིན་ནོ། །སྒྱུ་མའི་ཆ་བྱད་རྣམ་མང་པོའི། །ཞེས་བྱ་བ་ནི་གདུལ་བྱའི་ཡིད་མགུ་བར་བྱེད་པའི་སྒྱུ་མའི་རྣམ་པའི་ཆ་བྱད་སྣ་ཚོགས་པ་གང་ཡིན་པ་དེ་ལ་དེ་སྐད་ཅེས་བྱའོ། །རྣམ་པར་རོལ་པས་བྱིན་གྱིས་བརླབ། །ཅེས་བྱ་བ་ནི་རྣམ་པར་རོལ་པ་སྟེ་རྡོ་རྗེ་དང་པདྨའི་རྩེ་འཛིན་བྱིན་གྱིས་བརླབ་ཅིང་རྫོགས་པར་མཛད་པའོ། །དེ་ཉིད་ཆེན་པོའི་བདག་ཉིད་ལྡས། །ཞེས་བྱ་བ་ནི་དེ་ཉིད་ཆེན་པོ་ནི་ལྷ་མོ་ལྔའི་བདག་ཉིད་དོ། །བདག་ཉིད་ལྔས་ཞེས་པ་ཡེ་ཤེས་ལྔའི་བདག་ཉིད་ཅན་གང་ཡིན་པ་དེ་ལ་དེ་སྐད་ཅེས་བྱའོ།།
ཕྱོགས་བཞིར་འཁོར་ལོ་གནས་བྱས་ཏེ། །ཞེས་བྱ་བ་ནི་སྔར་བཤད་པའི་ལྷ་མོ་དེ་རྣམས་ཕྱོགས་བཞིར་འཁོར་ལོ་སྟེ་དཀྱིལ་འཁོར་གྱི་ཚུལ་གྱིས་གནས་པར་བྱས་ཤིང་འཇོག་པ་གང་ཡིན་པ་དེ་ལ་དེ་སྐད་ཅེས་བྱའོ། །དེས་ན་རང་གི་དམ་ཚིག་གིས་སྐུལ་འཁྱུད་པའོ། །འཕགས་མ་བཞི་ཡི་དགའ་བ་ནི། །ཞེས་བྱ་བ་ནི་སྤྱན་ལ་སོགས་པའམ། རྡོ་རྗེ་མཚོན་ཆ་མ་ལ་སོགས་པ་འཕགས་མ་བཞི་པོ་དགའ་བདེ་ཡང་དག་པར་སྐྱེད་པར་གང་ཡིན་པ་དེ་ལ་དེ་སྐད་ཅེས་བྱའོ། །དགའ་བས་ཞེས་བྱ་བ་ནི་རང་གི་དམ་ཚིག་གི་ཕྱག་རྒྱའི་དགའ་བ་ལས་བྱུང་བའི་སོ་སོ་རང་གིས་རིག་པའི་བདེ་བའི་ངོ་བོ་སྟེ། དེའི་རྗེས་ལ་ཇི་སྐད་དུ་བཤད་པའི་ཁྲོ་བོ་རྣམས་སྤྲོ་བར་བྱའོ་ཞེས་བྱ་བར་སྦྱར་རོ། །དེ་ལྟར་སྤྲོ་བ་བསྟན་ནས། ད་ནི་ཐམས་ཅད་ཅེས་བྱ་བ་ལ་སོགས་པས་བསྡུ་བ་གསུངས་པ་ཡིན་ཏེ། ཇི་སྐད་དུ་གསུངས་པའི་སྤྲོ་བ་སྣ་ཚོགས་པས་ཁྱབ་པར་བྱས་ནས་བཀུག་སྟེ་དཀྱིལ་འཁོར་གྱི་སྦྱོར་བར་བ་ཞག་ལ། དེའི་དབུས་སུ་སྣ་ཚོགས་པ་གནས་པར་བྱའོ་ཞེས་བྱ་བ་ནི་ལྷག་མ་སྟེ། འདི་དག་གིས་ནི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །ལས་ཀྱི་མཆོག་ཅེས་བྱ་བའི་ཏིང་ངེ་འཛིན་གསུམ་པ་སྟེ་གསང་བའི་ཚོགས་མཐོན་པོ་ལ་སོགས་པའི་རྗེས་སུ་འབྲངས་ནས་ཤེས་པར་བྱའོ། །ཏིང་ངེ་འཛིན་གསུམ་བསྐྱེད་ནས་ད་ནི་བཟླས་པ་དང་བསྒོམ་པར་བྱའོ་ཞེས་བསྟན་པའི་ཕྱིར། རབ་དགའི་ལོངས་སྤྱོད་ལོངས་སྤྱོད་པ། །ཞེས་བྱ་བ་གསུངས་ཏེ་ཤེས་རབ་དང་ཐབས་ལས་བྱུང་བའི་ཁྱད་པར་ནི་རབ་ཏུ་དགའ་བའོ། །དེ་ལ་སོགས་པའི་དོན་ནི་བཤད་ཟིན་ཏོ།། །།ཏིང་འཛིན་ཀུན་གྱིས་འཁོར་ལོ་བལྟ། །ཞེས་བྱ་བ་ལ་སོགས་པས་ནི་སླར་ཡང་ཡེ་ཤེས་ཀྱི་དཀྱིལ་འཁོར་སྤྱན་དྲངས་ཤིང་བསྟོད་པ་ལ་སོགས་པ་བྱས་ནས་ཅི་རིགས་པ་དཀྱིལ་འཁོར་གྱི་འཁོར་གྱི་འཁོར་ལོ་དམ་ཚིག་གི་ཕྱག་རྒྱས་ཏིང་ངེ་འཛིན་ལ་སྙོམས་པར་ཞུགས་པར་བལྟ་ཞིང་བསམ་པ་ཉིད་དང་བདག་ཉིད་ཀྱང་རྗེས་སུ་མཉེས་པ་ཐོབ་པར་བྱས་ལ། ཨོཾ་སརྦ་ཏ་ཐཱ་ག་ཏཱ་ནུ་རཱ་ག་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་བྱ་བས་བྱིན་གྱིས་བརླབས་ཏེ། རྡོ་རྗེའི་གཟུགས་དམ་ཚིག་གི་ཕྱག་རྒྱའི་པདྨ་དེས་སྒེག་པ་ལ་སོགས་པའི་ཚུལ་གྱིས་རོལ་པ་ཉིད་ཀྱི་རབ་ཏུ་
གཞུག་པར་བྱ་ཞེས་བྱ་བར་སྦྱར་རོ། །དེ་ནས་ཅི་ཞིག་བྱ་ཞེ་ན། པདྨའི་ཞེས་བྱ་བ་ལ་སོགས་པ་གསུངས་ཏེ། དམ་ཚིག་གི་ལྷ་མོའི་པདྨའི་གཟུགས་ཀྱིས་གཟུགས་རྣམས་རབ་ཏུ་དགའ་བ་གང་ཡིན་པ་ད་ལས་སངས་རྒྱས་དང་རྡོ་རྗེ་འཆང་ལ་སོགས་པ་སྤྲོ་ཞེས་བྱ་བ་ནི་ལྷག་མའོ། །ཡང་ན་བལྟ་ཞེས་བྱ་བ་སྔ་མ་དང་སྦྱར་རོ། །ཏིང་འཛིན་ཀུན་གྱིས་དཀྱིལ་འཁོར་བལྟ། །ཞེས་ཇི་སྐད་དུ་གསུངས་པ་དེ་ཉིད་ཀྱི་ཁྱད་པར་ནི་མ་ལུས་ཞེས་བྱ་བ་ལ་སོགས་པ་ཡིན་ཏེ། འང་ཞེས་བྱ་བའི་སྒའི་དོན་ལྷག་མ་མ་ལུས་པའི་ལྷ་རྣམས་ཀྱི་འཁོར་ལོ་རྣམས་ཀྱང་ཞེས་བྱ་བའི་དོན་ཏོ། །མདོག་ལྡན་ཞེས་བྱ་བ་ནི་རིགས་དང་རྗེས་སུ་མཐུན་པ་དང་ལས་དང་རྗེས་སུ་མཐུན་པ་དང་ལྡན་པའི་བདག་ཉིད་ཅན་གྱི་གཟུགས་ནི་མདོག་ལྡན་བདག་ཉིད་ཅན་གཟུགས་སོ། །མདོག་དང་ལྡན་པའི་བདག་ཉིད་ཅན་གྱི་གཟུགས་ཀྱང་ཡིན་ལ་སྤྲོ་བ་ཡང་ཡིན་པས་དེ་སྐད་ཅེས་བྱའོ། །དེ་ཡང་ཇི་སྐད་དུ་བཤད་པའི་ཡི་གེ་ཨེ་དང་ཨ་ལས་བྱུང་པའི་སྣ་ཚོགས་རྡོ་རྗེ་སྐ་རགས་ཀྱིས་ཉེ་པར་མཛེས་པ། ཡི་གེ་ཏྲཾ་ལས་བྱུང་པའི་རིན་པོ་ཆེ་ཟུར་གསུམ་གྱི་ནང་དུ་ཆུད་པ། ཡི་གེ་ཧྲི་ལས་བྱུང་པའི་པདྨའི་དབུས་ན་གནས་པ་ལས། མདོག་དང་ལྡན་པའི་བདག་ཉིད་ཅན་གྱི་གཟུགས་སུ་སྤྲོ་པའི་ལྷ་མོའི་འཁོར་ལོ་གང་ཡིན་པ་དེ་ལ་དེ་སྐད་ཅེས་བྱ་སྟེ་དེ་ལྟར་ཡང་བལྟའོ་ཞེས་བྱ་བ་སྔ་མ་དང་སྦྱར་རོ། །རྡོ་རྗེ་གཞུག་པར་བྱའོ་ཞེས་གསུངས་པ་ཇི་ལྟར་བསམ་ཞེ་ན། རྒྱུད་རྣམས་ཞེས་བྱ་བ་ལ་སོགས་པ་གསུངས་ཏེ། རྒྱུད་གཞན་དག་ལས་བྱུང་པའི་མཚན་ཉིད་དང་ལྡན་པ་དངོས་སུའམ། བསམ་གཏན་ལས་བདག་ཉིད་ཅན་བྱུང་བ་རང་གི་བསམ་གཏན་ལ་གནས་པར་བསམ་མོ། །སྒེག་མོ་གླུ་དང་གར་རྣམས་དང༌། །ཞེས་བྱ་བ་ལ་སོགས་པ་ལ་སྐུ་རྡོ་རྗེ་ལ་སོགས་པའི་མཆོད་པའི་ཚུལ་གྱིས་པདྨར་རྡོ་རྗེ་བཅུག་སྟེ། ཨོཾ་སརྦ་ཏྭ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་བརྗོད་ལ་མཆོད་པ་བྱའོ། །སྒེག་མོ་ཞེས་བྱ་བ་ལ་སོགས་པ་སྨོས་མོད་ཀྱི་ཕྲེང་བ་མས་ཀྱང་མཆོད་པར་བྱ་ཞེས་བྱའོ། །ཕྱིའི་མཆོད་པ་ཞེས་བྱ་བ་ལ་སོགས་པ་ནི་གོ་སླའོ། །གང་འདི་ལྟར་གསུངས་མོད་ཀྱི་འོ་ན་ཀྱང་ཕྱིའི་མཆོད་པ་དང་སྒེག་མོ་ལ་སོགས་པའི་མཆོད་པ་ལ་སྙོམས་པར་འཇུག་པའི་
མཆོད་པའི་རིམ་གྱིས་ཕྱི་དང་གསང་པའི་མཆོད་པ་བྱའོ་ཞེས་སྟོན་པ་ཡིན་ནོ། །བསྒོམ་པས་ཞེས་བྱ་བ་ནི་རྣལ་འབྱོར་བསྒོམ་པས་སོ། །མྱུར་ཆེས་པ་དང་བུལ་ཆེས་དང་ཞེས་བྱ་བའི་སྒྲ་ནི་ཤས་ཆེར་འདི་ལྟར་མི་བྱའོ། །གུག་སྐྱེད་ཉམས་མིན་པར་ཞེས་བྱ་བ་ནི་འདི་དག་མཆད་པར་མི་བྱའོ། །རྟོག་པ་ངན་པ་སྤངས་ཏེ་ཞེས་བྱ་བ་ནི་རྟག་པ་དང་ཆད་པ་ལ་སོགས་པའི་རྟོག་པ་དང་བྲལ་བས་སོ། །བ་དན་ཚུལ་དུ་བྱ་བས་ཞེས་བྱ་བ་ནི་སྔར་བཤད་པའི་མཆོད་པ་ཉི་ཤུ་ཉེ་པར་མཚོན་པ་ཡིན་ནོ། །མཆོད་ཅེས་བྱ་བ་ལ་བྱའོ་ཞེས་བྱ་བ་ནི་ལྷག་མའོ། །གཤེགས་སུ་གསོལ་ཞེས་བྱ་བ་ནི་སླར་གཤེགས་སུ་གསོལ་པ་སྟེ། སྤྲུལ་པ་རྣམས་ནི་རང་གི་ལུས་ཉིད་ལ་ཉེ་པར་བསྡུ་པར་བྱའོ། །སྐུ་དང་ཞེས་བྱ་བ་ལ་སོགས་པས་ནི་མཉམ་པར་གཞག་པའི་རྣལ་འབྱོར་གསུངས་པ་ཡིན་ནོ། །བར་ཆད་བྱེད་པ་རྣམས་ལ་ནི། །ཞེས་བྱ་བ་ནི་བགེགས་ཀྱིས་གཙེས་པར་གྱུར་པའོ། །རྡོ་རྗེ་ཐེག་པ་རབ་རྫོགས་པ། །ཞེས་བྱ་བ་ནི་རྣམ་པར་སྣང་མཛད་ཀྱིའོ། །སྣ་ཚོགས་ལས་རྣམས་སྟོན་པ་པོ། །ཞེས་བྱ་བ་ནི་དོན་ཡོད་པར་གྲུབ་པའོ། །རིན་ཆེན་ཞེས་བྱ་བ་ནི་རིན་ཆེན་འབྱུང་ལྡན་ནོ། །འདོད་ཆགས་ཆེན་པོ་ཞེས་བྱ་བ་ལ་སོགས་པ་ནི་འོད་དཔག་ཏུ་མེད་པའོ། །དཔལ་ལྡན་ཞེས་བྱ་བ་ལ་སོགས་པ་ནི་མི་བསྐྱོད་པའོ། །འདིས་ནི་འདི་སྐད་སྟོན་ཏེ། དེ་བཞིན་གཤེགས་པ་ལྔའི་ཕུལ་དུ་བྱེད་པའོ། །དེའི་ཡེ་ཤེས་བྱུང་པའི་ཡོན་ཏན་ཐོབ་ནས་བདག་ཉིད་དེ་བཞིན་གཤེགས་པར་གྱུར་པའོ། །འདིར་རྣལ་འབྱོར་རྣམས་ཀྱིས་རིམ་པ་དང༌། ལྷ་བསྒོམ་པའི་ཚུལ་རྒྱ་ཆེར་ནི་དེ་ཁོ་ན་ཉིད་བསྡུས་པ་དང༌། གསང་བ་འདུས་པ་ལ་སོགས་པ་ལས་བྱུང་པ་དེ་བཞིན་དུ་ཤེས་པར་བྱའོ། །སྒྲུབ་པའི་ཐབས་ལོགས་ན་ཡོད་པས་འདིར་མ་བྲིས་སོ། །ཡོངས་སུ་རྟོག་པའི་རྣལ་འབྱོར་མང་དུ་ཡོད་མོད་ཀྱི་འདིར་མ་བསྟན་ནོ། །བྱང་ཆུབ་ཀྱི་སེམས་ནི་ཇི་སྐད་དུ་བཤད་པའི་རྣམ་པ་གཉིས་སོ། །བསྒོམ་པ་ནི་ཡང་དང་ཡང་དུ་མངོན་དུ་བྱེད་པའོ། །དེའི་ཡེ་ཤེས་སྒྲུབ་པ་ནི་བྱང་ཆུབ་ཀྱི་སེམས་རྣམ་པ་གཉིས་མངོན་པར་རྟོགས་པའི་ཚུལ་དུས་ངེས་པར་སོ་སོར་བསྒྲུབ་པ་སྟེ། དེ་སྟོན་པའི་གཞུང་གི་ལེའུ་ལ་རིམ་པར་ཕྱེ་
པའི་སྒྲར་བརྗོད་དོ། །ལེའུ་བདུན་པའི་འགྲེལ་པའོ། །།བྱང་ཆུབ་ཀྱི་སེམས་བསྒོམ་པ་རྫོགས་སུ་ཟིན་ཀྱང་སྦྱོར་པའི་ཐབས་མེད་པར་ཕུན་སུམ་ཚོགས་པར་མི་འགྱུར་པས། དེ་ནས་ཞེས་བྱ་བ་ལ་སོགས་པས་བརྒྱད་པ་སྦྱོར་པའི་ཐབས་ཀྱི་སྒྲུབ་པའི་རིམ་པར་ཕྱེ་བ་གསུངས་པ་ཡིན་ཏེ། བཅོམ་ལྡན་འདས་ཀྱིས་བཀའ་སྩལ་ཏོ་ཞེས་བྱ་བར་སྦྱར་རོ། །ཅི་ཞིག་མཛད་ནས་ཤེ་ན། དེ་བཞིན་གཤེགས་པ་ཐམས་ཅད་ཀྱི། །ཞེས་བྱ་བ་ལ་སོགས་པ་གསུངས་ཏེ་དེ་བཞིན་གཤེགས་པ་ཐམས་ཅད་དེ་རྣམ་པར་སྣང་མཛད་ལ་སོགས་པའི་བཀའ་ནི་ཞི་བ་ལ་སོགས་པའི་ལས་སྐྱེད་པའོ། །དེ་ལ་བསྐྱེད་པའི་དོན་གྱི་འཁོར་ལོ་ནི་དཀྱིལ་འཁོར་ཏེ་དེ་རབ་ཏུ་བསྒྲུབ་ཅིང་བསྐྱེད་པས་དེའི་དོན་དུ་ཡེ་ཤེས་ཀྱི་རྡོ་རྗེ་ལ་དམིགས་པ་གང་ཡིན་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏེ། །དེ་བཞིན་གཤེགས་པ་ཐམས་ཅད་ཞི་བ་ལ་སོགས་པའི་ལས་བྱེད་པའི་དཀྱིལ་འཁོར་སྟོན་པའི་རྣམ་པ་ལ་ཐུགས་རྩེ་གཅིག་ཏུ་མཛད་ཅེས་བྱ་བའི་དོན་ཏོ། །འཁོར་ལོ་ཐམས་ཅད་ཅེས་བྱ་བ་ལ་སོགས་པ་ལ་འཁོར་ལོ་ཐམས་ཅད་ལ་རང་གི་མིང་ལས་བྱུང་པའི་དཀྱིལ་འཁོར་ཐམས་ཅད་རབ་ཏུ་བསྒྲུབ་ཏེ། ཞི་བལ་སོགས་པ་ལ་རབ་ཏུ་སྦྱོར་པའི་ལས་གང་ཡིན་པ་དེའི་ཚོགས་ནི་མང་པོའོ། །དེའི་ཕྱི་དང་ནང་གི་བདག་ཉིད་ཅན་གྱི་ཆོ་ག་བཀའ་སྩལ་ཏོ་ཞེས་པ་སྟེ་གསུངས་པའོ། །ལྷ་ནི་ཞེས་བྱ་བ་ལ་སོགས་པ་ལ་རྣམ་པར་སྣང་མཛད་ལ་སོགས་པའི་ལྷ་གང་ཡང་རུང་བ་ཞིག་དཀྱིལ་འཁོར་གྱི་དབུས་སུ་བཀོད་ན་དཀྱིལ་འཁོར་དེ་དེ་ཉིད་ཡིན་ཏེ། རྣམ་པར་སྣང་མཛད་འབྱུང་བ་རྡོ་རྗེ་ཞེས་མཁས་པ་རྣམས་ཀྱིས་བརྗོད་དོ། །འདི་ལྟར་སྟོན་པ་ཡིན་ཏེ། རྣམ་པར་སྣང་མཛད་ཀྱི་དཀྱིལ་འཁོར་ནི་སྔར་བཤད་པ་ཉིད་དོ། །གང་གི་ཚེ་མི་བསྐྱོད་པ་ལ་སོགས་པ་བཞིའི་དཀྱིལ་འཁོར་བྱེད་པ་དེའི་ཚེ་དབུས་སུ་གང་བྲིས་པའི་གནས་སུ་རྣམ་པར་སྣང་མཛད་བྲིའོ་ཞེས་ཁ་ཅིག་ཟེར་རོ། །གཞན་དག་ནི་མི་བསྐྱོད་པའི་དཀྱིལ་འཁོར་ལ་རྣམས་པར་སྣང་མཛད་ནི་མི་བསྐྱོད་པའི་གནས་སུའོ། །དེའི་གནས་སུ་ནི་མི་བསྐྱོད་པ་བྲིའོ། །རིན་ཆེན་འབྱུང་ལྡན་གྱི་དཀྱིལ་
འཁོར་ལ་ནི་རྣམ་པར་སྣང་མཛད་ནི་མི་བསྐྱོད་པའི་གནས་སུ་མི་བསྐྱོད་པ་ནི་རིན་ཆེན་འབྱུང་ལྡན་གྱི་གནས་སུ་རིན་ཆེན་འབྱུང་ལྡན་ནི་རྣམ་པར་སྣང་མཛད་ཀྱི་གནས་སུ་བྲིའོ་ཞེས་ཟེར་རོ། །འོད་དཔག་ཏུ་མེད་པ་དང་དོན་ཡོད་གྲུབ་པའི་དཀྱིལ་འཁོར་ལ་ཡང་འདི་ཉིད་ཀྱི་རྗེས་སུ་འབྲངས་ནས་ཤེས་པར་བྱའོ། །སྤྱན་ལ་སོགས་པའི་དཀྱིལ་འཁོར་ལ་ཡང་རྣམ་པར་སྣང་མཛད་ཉིད་སྤྱན་ལ་སོགས་པའི་གཟུགས་ཇི་ལྟ་བར་བསམས་ལ། སྤྱན་ལ་སོགས་པ་ཡང་རང་ཉིད་ཀྱི་གནས་སུ་བཞུགས་པར་བསྒོམ་མོ། །འོད་ཟེར་ཅན་ལ་སོགས་པའི་དཀྱིལ་འཁོར་གྱི་ལྷ་ལམ་གཏོགས་པའི་ལྷ་རྣམས་ཀྱི་དཀྱིལ་འཁོར་ལ་ནི་བྱང་ཆུབ་ཀྱི་སེམས་རིམ་པར་ཕྱེ་པའི་རིམ་པ་ཉིད་ཀྱིས་རྣམ་པར་སྣང་མཛད་ལ་སོགས་པའི་སྐུ་ཡོངས་སུ་གྱུར་པ་ཉིད་འོད་ཟེར་ཅན་ལ་སོགས་པའི་ལྷ་རྣམས་ཀྱི་གཟུགས་སུ་གྱུར་ནས་རང་གི་གནས་སུ་བཞུགས་ལ། ལྷ་ལྷག་མ་རྣམས་ཀྱི་ཚུལ་ནི་དེ་བཞིན་དུ་བསམ་པར་བྱའོ། །འཕྲོག་མའི་དྲག་པོ་སྒྲུབ་པའི་དཀྱིལ་འཁོར་དུ་ནི། ཇི་སྐད་དུ་བཤད་པ་ལས་དེའི་རིམ་པ་གཞན་ཡིན་ཏེ། དེ་ཡང༌། ཁྲོ་བོའི་འཁོར་ལོར་གནོད་སྤྱིན་མོ། །བརྒྱད་ཀྱི་དབུས་ན་འཕྲོག་མས་བརྒྱན། །གནོད་སྦྱིན་བརྒྱད་ཀྱིས་རྣམ་པར་བརྒྱན། །གནོད་སྤྱིན་མོ་ཀུན་བསྒྲུབ་པར་བྱ། །ཞེས་བཤད་པ་ཡིན་ནོ། །དེ་ལ་མ་གཏོགས་པར་བཤད་པའི་གནོད་སྤྱིན་དང༌། གནོད་སྤྱིན་མོ་གཞན་དག་སྒྲུབ་པ་ལ་ནི་ཚུལ་འདི་ཉིད་ཡིན་ཏེ། གནོད་སྤྱིན་མེ་གང་སྒྲུབ་པ་དེ་དབུས་སུ་བཀོད་པ་དེ་ལ་དབུས་སུ་ནི་འཕྲོག་མའོ། །གནོད་སྤྱིན་དང་གནོད་སྦྱིན་མོར་བཤད་པ་ལ་མ་གཏོགས་པ་རིགས་གཞན་དག་སྒྲུབ་པ་ལ་ཐམས་ཅད་དུ་འཕྲོག་མ་མེད་པར་དེའི་གནས་སུ་བསྒྲུབ་པར་བྱ་བའི་གནོད་སྤྱིན་ནམ་གནོད་སྤྱིན་མོ་བསམ་པར་བྱའོ། །ལ་ལ་ནི་རྣམ་པར་སྣང་མཛད་ཀྱི་དཀྱིལ་འཁོར་བཏོན་ནས་དེའི་གནས་སུ་བཤད་པ་དང༌། མ་བཤད་པའི་གནོད་སྤྱིན་དང་གནོད་སྤྱིན་མོ་བཀོད་ལ་སྔོན་དུ་འགྲོ་བས་བསྒྲུབ་པར་བྱའོ་ཞེས་ཟེར་ཏེ། དེས་ནི་དྲག་པོའི་སྒྲུབ་པའི་གཞུང་གི་དོན་ཡང་དག་པར་རྟོགས་པར་ཤེས་མོད་ཀྱི་སྔར་བཤད་པའི་དོན་དེ་ཉིད་གཞུང་དང་རྗེས་སུ་མཐུན་
པར་མཐོང་ངོ༌། །ལྷ་ཆེན་པོ་ལ་སོགས་པའི་དཀྱིལ་འཁོར་ལ་ནི་རྣམ་པར་སྣང་མཛད་ལ་སོགས་པའི་གནས་སུ་ཁྲོ་བོའི་རྡོ་རྗེ་དང༌། སྒྱུ་མའི་རྡོ་རྗེ་དང་རྡོ་རྗེ་དྲིལ་བུ་དང་མི་སྨྲ་བའི་རྡོ་རྗེ་དང་རྡོ་རྗེ་མཚོན་ཆ་གྲངས་ཇི་ལྟ་བ་བཞིན་དུ་དགོད་པར་ཤེས་པར་བྱ་སྟེ། དེ་ལ་རྡོ་རྗེ་དྲིལ་བུ་ནི་མདོག་དམར་བ་གདོང་དྲུག་པ་ལག་པ་བཞི་པ་གཡས་ན་མདུང་ཐུང་དང་དྲིལ་བུ་ཐོགས་པ། གཡོན་ན་ཁྱིམ་བྱ་དང་དྲིལ་བུ་འཛིན་པ་རྨ་བྱ་ལ་ཞོན་པའོ། །རྡོ་རྗེ་མཚོན་ཆ་ནི་མདོག་སེར་སྐྱ་ལག་པ་བཞི་པ། གཡས་ན་རྡོ་རྗེ་དང་ལྕགས་ཀྱུ་ཐོགས་པ། གཡོན་གྱི་གཅིག་གིས་ནི་སྟན་ལ་བསྙེམས་ཐབས་སུ་འདུག་ལ། གཉིས་པས་ནི་རང་གི་རྡོ་རྗེ་འཛིན་པ་གླང་པོ་ཆེ་དཀར་པོ་ལ་ཞོན་པའོ། །སྤྱན་མ་ལ་སོགས་པའི་གནས་སུ་ནི་འཇིགས་བྱེད་མ་ལ་སོགས་པ་ལྷ་མོ་ཞི་སྟེ། དེ་ལ་འཇིགས་བྱེད་མ་ནི་མདོག་ལྗང་གུ་གཡས་ཀྱིས་རྡོ་རྗེ་འཛིན་པ། གཡོན་གྱིས་རལ་ཕུབ་ཐོགས་པའོ། །དཔལ་མོ་ནི་མདོག་སེར་བ་གཡས་ན་རྡོ་རྗེ་གཡོན་ན་པདྨ་ཐོགས་པའོ། །དབྱངས་ཅན་མ་ནི་མདོག་ལྗང་གུ་གཡས་གཡོན་གཉིས་ན་རྡོ་རྗེ་དང་པི་ཝང་ཐོགས་པའོ། །དཀའ་ཐུབ་ཟློག་མ་ནི་མདོག་ལྗང་གུ་གཡས་ཀྱི་ལག་པ་གཉིས་ན་རྡོ་རྗེ་དང་འཁོར་ལོ་ཐོགས་པ། གཡོན་གཉིས་ན་དུང་དང་པོ་ཏི་ཐོགས་པ་སེང་གེ་ཞོན་པའོ། །རྡོ་རྗེ་སེམས་མ་ལ་སོགས་པའི་གནས་སུ་ནི་དྲག་མོ་དང་ཚངས་མ་དང་ཁྱབ་འཇུག་མ་དང་གཞོན་ནུ་མ་དང༌། ནག་མོ་དང༌། ནག་མོ་ཆེན་མོ་དང༌། གནོད་སྤྱིན་མོ་དང༌། སྲིན་མོ་རྣམས་དགོད་པར་བྱའོ། །དེ་ལ་འདི་རྣམས་ཀྱི་ལག་པ་ལ་ལག་ཆ་ནི་མདུང་རྩེ་གསུམ་པ་དང༌། ཕྲེང་བ་དང་འཁོར་ལོ་དང་དྲིལ་བུ་དང༌། གྲི་དང་ཆུ་གྲི་དང་མཆེ་བ་དང་ཁ་ཊྭཱཾ་ག་རིམ་བཞིན་ཐོགས་པ་གཡོན་གྱི་སྡིགས་མཛུབ་བསྒྲེང་པའོ། །ཕྱིའི་དཀྱིལ་འཁོར་དུ་གཤིན་རྗེ་གཤེད་ལ་སོགས་པ་དགོད་པ་ཡང་དེ་བཞིན་ཏེ། འདི་ནི་ཁྲོ་བོ་རྡོ་རྗེ་དྲག་པོ་སྒྲུབ་པའི་དཀྱིལ་འཁོར་རོ། །ཁྲོ་བོ་རྡོ་རྗེ་མ་གཏོགས་པའི་ལྷ་གཞན་སྒྲུབ་པ་ལ་ནི་རྣམ་པར་སྣང་མཛད་ལ་སོགས་པ་ཉད་དགོད་པར་བྱའོ། །འདིར་མ་བཤད་པའི་སྒྲུབ་ཐབས་ལ། རྡོ་རྗེའི་རིགས་པ་མཆོག་བཏོན་ལ། དེའི་གནས་སུ་རང་གི་བསྒྲུབ་པར་བྱ་བའི་ཏིང་ངེ་འཛིན་འཇིག་རྟེན་པའི་ལྷ་གང་ཡང་རུང་བ་དགོད་པར་
བྱའོ་ཞེས་ཁོང་དུ་ཆུད་པར་བྱའོ། །འདི་ཡང་ལ་ལ་དག་ནི་རྣམ་པར་སྣང་མཛད་ཀྱི་དཀྱིལ་འཁོར་དུ་དེ་བཏོན་ལ། ལྷ་ཆེན་པོ་ལ་སོགས་པ་གང་ཡང་རུང་བ་དགོད་པ་སྔོན་དུ་འགྲོ་པས་བསྒྲུབ་པ་ནི་ཤིན་ཏུ་འབྲེལ་པ་མེད་པར་སྨྲ་པ་ཡིན་པས་དེའི་གཞུང་ནི་མ་བྲིས་ཏེ། ཇི་སྐད་བཤད་པ་འདི་ཉིད་ཤིན་ཏུ་རིགས་པ་ཁོ་ནར་མཐོང་ངོ༌། །དེ་ཡང༌། རྡོ་རྗེའི་ཏིང་འཛིན་བསྒོམས་ནས་ནི། །རྡོ་རྗེ་ཧཱུཾ་མཛད་ཀྱིས་བསྐུལ་ན། །མོད་ལ་དངོས་གྲུབ་ཐོབ་པར་འགྱུར། །ཞེས་སྔར་བཤད་པ་ཡིན་ནོ། །ཞི་དང་ཞེས་བྱ་བ་ལ་སོགས་པ་ལ། རང་གི་དཀྱིལ་འཁོར་གྱི་བདག་པོའི་སྦྱོར་པས་དཀྱིལ་འཁོར་གྱི་ལྷ་རྣམས་བསྒོམས་ཏེ་ལས་དང་རྗེས་སུ་མཐུན་པར་ལྷ་རྣམས་སྤྲུལ་ལ། ཆེ་གེ་མོའི་ཞི་བར་མཛོད་ཅིག་ཅེས་བྱ་བ་ལ་སོགས་པ་བསྐུལ་པའི་ཚིག་དང་ལྡན་པས་གསང་སྔགས་བཟླས་ནས་ཞི་བ་ལ་སོགས་པའི་ལས་རྣམས་ལ་ལྷའི་འཁོར་ལོ་ངེས་པར་སྦྱར་པས་ལས་དེ་རྣམས་བྱའོ། །དེ་ལྟར་བསྟན་ནས་ད་ནི་ཞི་བ་སྤྱན་དང་ཞེས་བྱ་བ་ལ་སོགས་པ་ལྷ་རྣམས་ཀྱི་སོ་སོར་ངེས་པ་ལས་དེ་ཉིད་དུ་གསུངས་པ་ཡིན་ཏེ་ཐམས་ཅད་དུ་ཡང༌། གསུམ་པའི་མཐའ་ཅན་དག་གིས་བྱ། །ཞེས་འོག་ནས་བཤད་པ་དང་སྦྱར་རོ། །འོད་ཟེར་ཅན་དང་རི་ཁྲོད་མ། །ཞེས་བྱ་བ་འདིར་སྦྱར་པར་བྱ་ཞེས་བྱ་བ་ནི་ལྷག་མའོ། །ཆགས་པའི་རྡོ་རྗེ་ཞེས་བྱ་བ་ནི་སྙིང་རྗེ་ཆེན་པོའི་ཆགས་པའོ། །གསང་སྔགས་དེ་ཉིད་ཀྱིས་བསྐུལ་ན། །ཞེས་བྱ་བ་ནི་གསང་སྔགས་ལ་ལས་དང་རྗེས་སུ་མཐུན་པར་བསྐུལ་པའི་ཚིག་བཅུག་པས་ཡང་དག་པར་བསྐུལ་པའོ། །ལྷ་རྣམས་ཀྱི་སོ་སོའི་ངེས་པ་བསྟན་ནས་ད་ནི་སྤྱན་དང་ཞེས་བྱ་བ་ལ་སོགས་པས་ལས་ཀྱི་སྦྱོར་པ་ངེས་པར་གསུངས་ཏེ། རིལ་བ་སྤྱི་བླུགས་ཀྱིས་བརྒྱན་པ། །ཞེས་བྱ་བ་ནི་ཕྲེང་བ་དང་རིལ་བ་སྤྱི་བླུགས་ཀྱིས་མཛེས་པར་བྱས་པའོ། །དང་པོ་ཏིང་འཛིན་གྱིས་སྤྲུལ་ནས། །ཞེས་བྱ་བ་ནི་དང་པོ་སྟེ་ཐོག་མར་ཏིང་ངེ་འཛིན་དེ་བསམ་གཏན་གྱིས་སྤྲུལ་ཅིང་བསྐྱེད་ནས། བདག་ཉིད་རྣམ་པར་སྣང་མཛད་ཀྱི་སྐུར་བསམ་པ་ཡིན་པར་ཤེས་པར་བྱའོ། །དེ་ཉིད་ཀྱི་ཕྱིར། རྣམ་པར་སྣང་མཛད་གནས་འདུག་སྟེ། །ཞེས་བྱ་བ་གསུངས་པ་ཡིན་ནོ། །བུམ་པ་ཟླ་བའི་མདངས་ལྡན་པ། །ཞེས་བྱ་བ་ནི་ཟླ་བའི་
འོད་འདྲ་པའི་བུམ་པ་ད་ལ་དེ་སྐད་ཅེས་བྱའོ། །བདུད་རྩི་འོ་མས་རབ་བཀང་སྟེ། །ཞེས་བྱ་བ་ནི་བྱང་ཆུབ་ཀྱི་སེམས་ཀྱི་ཆུས་བཀང་པ་ལག་པ་གཉིས་ཀྱིས་འཛིན་པར་བསམ་མོ་ཞེས་བྱ་བར་སྦྱར་རོ། །ལག་གཉིས་པད་རྩ་དཀར་མཆོག་གི །ཞེས་བྱ་བ་ནི་ལག་པ་པདྨའི་རྩ་བའི་མདོག་ལྟར་དཀར་པའི་མཆོག་གང་ཡིན་པ་དེ་ལ་དེ་སྐད་ཅེས་བྱའོ། །འདི་སྐད་སྟོན་ཏེ། དཀྱིལ་འཁོར་གྱི་དབུས་སུ་ཟླ་བའི་དཀྱིལ་འཁོར་གྱི་སྟེང་དུ་རྣམ་པར་སྣང་མཛད་དབང་པོ་ཞི་ཞིང་སྐུ་མདོག་དཀར་བར་བདག་ཉིད་བསྒོམས་ལ་རང་གི་སྙིང་གར་ནད་པ་བསམ་སྟེ། རང་གི་དམ་ཚིག་གི་ཕྱག་རྒྱ་དང་ཡང་དག་པར་སྦྱོར་པའི་བྱང་ཆུབ་ཀྱི་སེམས་ལས་སྤྱན་དང་སྐུལ་བྱེད་མའི་ངོ་བོར་རྣམ་པར་བསམས་ལ། ཕྱག་གཉིས་ཀྱིས་ཇི་སྐད་དུ་བཤད་པའི་བུམ་པ་བསྣམས་ཤིང༌། ཕྱག་གཞན་ཕྲེང་བ་དང་རིལ་པ་སྤྱི་བླུགས་ཀྱིས་བརྒྱན་པ་སྤྲུལ་ལ། དེ་རྣམས་ཀྱིས་ནམ་མཁའ་བཀང་སྟེ་སྔགས་བརྗོད་པ་ལས་བྱུང་པའི་འོད་ཟེར་གྱི་ཚོགས་རྣམས་ཀྱིས་བསྐུལ་ལ་བསྒྲུབ་པར་བྱ་བ་ལ་དབང་བསྐུར་ཏེ་དེར་རབ་ཏུ་ཞུགས་ནས་ཡང་དེ་རྣམས་ཀྱི་བ་སྤུའི་བུ་ག་རྣམས་ལས་རྣམ་པར་སྣང་མཛད་ཁ་སྦྱར་གྱི་སྦྱོར་པས་ཕྱུང་བ་ལས་ཡང་དག་པར་བྱུང་པའི་བྱང་ཆུབ་ཀྱི་སེམས་ཀྱི་ཆུའི་རྒྱུན་རྣམས་ཀྱིས་དེ་ལ་དབང་བསྐུར་པར་བྱའོ། །དེ་ནས་དེ་རྣམས་ཀྱང་དེ་ཉིད་དུ་རབ་ཏུ་ཞུགས་པར་ཡང་ཤེས་པར་བྱའོ། །སྦྱོར་བ་འདི་དག་དང་འབྲེལ་པ་གཞན་དག་ལས་ཀྱང༌། བ་སྤུའི་བུ་ག་རྣམས་ལས་ནི། །སངས་རྒྱས་སྤྲིན་ནི་རྣམ་པར་སྤྲོ། །ཞེས་བྱ་བ་ལ་སོགས་པས་སྟོན་པ་ཡིན་ནོ། །དེ་ནས་དེས་བླ་ན་མེད་པའི་ཞི་བ་ཐོབ་པར་རྣམ་པར་བསམ་མོ། །རིན་ཆེན་མ་ཞེས་བྱ་བ་ལ་སོགས་པ་ལ་རིན་ཆེན་འབྱུང་ལྡན་གྱི་ཏིང་ངེ་འཛིན་དུ་དང་པོར་སྤྲུལ་ཅིང་བསམ་མོ་ཞེས་བྱ་བ་ནི་ལྷག་མའོ། །རིན་ཆེན་མ་ཞེས་བྱ་བ་ལ་སོགས་པ་ནི་རིན་ཆེན་སྒྲོལ་མའོ། །ཕྱག་ན་རིན་ཆེན་པདྨ་ཅན། །ཞེས་བྱ་བ་ནི་ཕྱག་གཉིས་ཀྱིས་པདྨ་དང་རིན་པོ་ཆེ་བསྣམས་ལ། ཅིག་ཤོས་གཉིས་ཀྱིས་ནི་ཇི་སྐད་དུ་བཤད་པའི་བུམ་པ་བསྣམས་པའོ། །བདུད་རྩིས་རབ་ཏུ་གང་བ་དང༌། །ཞེས་བྱ་བ་ནི་བསམ་མོ་ཞེས་སྔ་མ་དང་སྦྱར་རོ། །འདི་སྐད་སྟོན་ཏེ། དཀྱིལ་འཁོར་གྱི་
དབུས་སུ་ཟླ་བའི་དཀྱིལ་འཁོར་སེར་པོའི་སྟེང་དུ་བདག་ཉིད་རིན་ཆེན་འབྱུང་ལྡན་སྐུ་མདོག་སེར་པོར་བསམས་ལ། རང་གི་སྙིང་གའི་ཟླ་བའི་དཀྱིལ་འཁོར་ལ་བསྒྲུབ་བྱ་བསམས་ནས་སྔ་མ་བཞིན་དུ་རིན་ཆེན་སྒྲོལ་མ་དང་གོས་དཀར་མོའི་གཟུགས་ལ་ཕྱག་གཉིས་ན་བུམ་པ་ཐོགས་ཤིང༌། དེ་ལས་གཞན་པའི་ཕྱག་གིས་པདྨ་དང་རིན་པོ་ཆེ་བསྣམས་པ་སྤྲུལ་ལ། དེ་རྣམས་ཀྱིས་ནམ་མཁའ་མ་ལུས་པར་བཀང་སྟེ། དེ་བཞིན་དུ་བཀུག་ནས་བསྒྲུབ་པར་བྱ་བ་ལ་དབང་བསྐུར་ལ་དེ་རྣམས་དེར་རབ་ཏུ་གཞུག་གོ །དེ་ནས་ཡང་དེའི་པ་སྤུའི་བུ་ག་རྣམས་ལས་རིན་ཆེན་འབྱུང་ལྡན་མ་བཞིན་དུ་ཕྱུང་ལ། དེ་ལས་བྱུང་པའི་བྱང་ཆུབ་ཀྱི་སེམས་ཀྱི་ཆུའི་རྒྱུན་གྱིས་མངོན་པར་དབང་བསྐུར་ལ། དེ་ཡང་དེར་གཞུག་པར་བྱ་བར་ཤེས་པར་བྱ་སྟེ། བ་སྤུའི་བུ་ག་རྣམས་ལས་ནི། །རིན་ཆེན་སྤྲིན་ནི་སྤྲོ་པར་བྱ། །ཞེས་བྱ་བ་ལ་སོགས་པས་སྟོན་པ་ཡིན་ནོ། །དེ་རྣམས་ཀྱིས་བླ་ན་མེད་པའི་སངས་རྒྱས་ཐོབ་པར་གྱུར་པར་བསམ་མོ། །ལྷ་མོ་སྐུ་ཆེན་ཞེས་བྱ་བ་ལ་སོགས་པ་ལ། འོད་དཔག་ཏུ་མེད་པ་སྐུ་མདོག་དམར་པོར་བསམ་ཞེས་བྱ་བ་ལ་ནི་ལྷག་མའོ། །སྒྲོལ་མ་དེ་བཞིན་ལུ་གུ་རྒྱུད། །ཅེས་བྱ་བ་ནི་སྒྲོལ་མ་དང་ལུ་གུ་རྒྱུད་དང་བཅས་པར་བསམ་པར་བྱ་སྟེ། ཕྱག་གཉིས་ན་ནི་ཞགས་པ་དང་ལྕགས་ཀྱུ་འཛིན་པ། ཕྱག་ཅིག་ཤོས་གཉིས་ན་ནི་མེ་ཏོག་ཅན་གྱི་མདའ་དང་ཞུ་བསྣམས་པའོ། །དེ་ནས་དེ་དག་བསམ་པ་ནི། བཀུག་སྟེ་མདའ་ཡིས་བསྣུན་ན་ནི། །ཞེས་བྱ་བ་སྟེ། ལྕགས་ཀྱུས་བཀུག་ལ་མདའ་བསྣུན་པའོ། །ཉེ་པར་མཚོན་པ་འདིས་ནི་ཞགས་པས་བཅིངས་པས་ཀྱང་དབང་དུ་མཛད་པའོ། །འདི་སྐད་སྟོན་ཏེ་རང་གི་དཀྱིལ་འཁོར་གྱི་དབུས་སུ་ཟླ་བའི་དཀྱིལ་འཁོར་པདྨ་དམར་པོའི་མདོག་ཅན། དེའི་སྟེང་དུ་བདག་ཉིད་འོད་དཔག་ཏུ་མེད་པ་མདོག་དམར་བ་རང་གི་སྙིང་གར་ཟླ་བའི་དཀྱིལ་འཁོར་པདྨ་དམར་པོའི་མདོག་ཅན་ལ་བསྒྲུབ་པར་བྱ་བ་བསམས་ནས་སྔ་མ་བཞིན་དུ་སྒྲོལ་མ་དང་ལུ་གུ་རྒྱུད་ཀྱི་གཟུགས་ཅན་མ་ཇི་སྐད་དུ་བཤད་པའི་མཚོན་ཆ་ཐོགས་པ་སྤྲུལ་ནས། དེས་ནམ་མཁའ་མ་ལུས་པར་བཀང་བས་བསྒྲུབ་པར་བྱ་བ་བཅིངས་ནས་བཀུག་སྟེ། རང་གི་སྙིང་གར་བཅུག་ནས། སྔ་མ་བཞིན་དུ་མདའི་སྦྱོར་
བས་བསྣུན་པས་དེ་རྣམས་དེར་གཞུག་གོ །དེ་ནས་ཡང་དེའི་བ་སྤུའི་བུ་ག་རྣམས་ལས་འོད་དཔག་ཏུ་མེད་པ་ཇི་ལྟ་བ་བཞིན་དུ་ཕྱུང་ལ། དེ་ལས་བྱུང་པའི་བྱང་ཆུབ་ཀྱི་སེམས་ཀྱི་ཆུའི་རྒྱུན་གྱིས་དེ་དབང་བསྐུར་ནས་དེའང་དེར་གཞུག་གོ་ཞེས་སྔ་མ་བཞིན་དུ་ཤེས་པར་བྱའོ། །དེ་ནས་དེ་བླ་ན་མེད་པའི་དབང་དུ་འགྱུར་པ་ཐོབ་པར་བསམ་པར་བྱའོ། །ཡམས་དང་ཞེས་བྱ་བ་ལ་སོགས་པ་ལ་ཡམས་ནི་ནད་འགོ་པའི་འཆི་བས་འཆི་བ་དང༌། ཁྱིམ་ལ་སོགས་པར་སྲིན་པོ་ལ་སོགས་པ་མཐོང་བ་སྟེ་དེས་བྱས་པའི་ཉེ་པར་འཚེ་བ་ནི་གནོད་པ་སྟེ། ཉེ་བར་འཚེ་བ་དེ་རྣམས་གཞིག་ཅིང་བསྐྱབ་པའི་ཕྱིར་འོད་ཟེར་ཅན་དང་རི་ཁྲོད་ཅན་གྱི་ཤིང་ལོ་མ་རབ་ཏུ་སྦྱར་པར་བྱའོ་ཞེས་ཤེས་པར་བྱའོ། །ཇི་ལྟར་ཞེ་ན་སྐུ་ཆེན་གྱིས་ཀྱང་ཞེས་བྱ་བ་ལ་སོགས་པ་གསུངས་ཏེ། སྔར་བཤད་པའི་ཚུལ་དུ་ཞེས་བྱ་བ་ནི་ཏིང་ངེ་འཛིན་རིམ་པར་ཕྱེ་བ་ལས་གསུངས་པའི་ཚུལ་དུ་མཚོན་ཆ་ལ་སོགས་པ་བསྣམས་པར་བསམ་པར་བྱའོ། །ཅི་ཞིག་བྱས་ནས་ཤེ་ན། བདུད་རྩི་ཡིས་ཀྱང་རྣམ་པར་བཟློག །ཅེས་བྱ་བ་གསུངས་ཏེ། བདུད་རྩིའི་ཆར་འབེབས་པའི་རྒྱུར་གྱུར་པས་ཡམས་དང་གནོད་པའི་རྣམ་པ་བཟློག་པར་བྱའོ་ཞེས་ཤེས་པར་བྱའོ། །འདི་སྐད་སྟོན་ཏེ། རང་གི་དཀྱིལ་འཁོར་གྱི་དབུས་སུ་ཟླ་བའི་དཀྱིལ་འཁོར་ལྗང་གུ་དེའི་སྟེང་དུ་བདག་ཉིད་དོན་ཡོད་པར་གྲུབ་པ་སྐུ་མདོག་མརྒད་ལྟ་བུའི་མདོག་ཅན་གྱི་རང་གི་སྙིང་གའི་ཟླ་བའི་དཀྱིལ་འཁོར་མདོག་ལྗང་གུ་ལ་བསྒྲུབ་པར་བྱ་བ་བསམས་ཏེ། འོད་ཟེར་ཅན་དང་རི་ཁྲོད་ཀྱི་ལོ་མ་ཅན་གྱི་གཟུགས་ལ་ཁྲོ་པོ་ཇི་ལྟ་བ་བཞིན་དུ་སྐུར་སྤྲུལ་པ་དེ་རྣམས་ཀྱིས་ནམ་མཁའ་མ་ལུས་པར་བཀང་སྟེ། དེའི་ལུས་ལས་བྱུང་པའི་ཁྲོ་བོ་འབར་བ་རྣམས་ཀྱིས་གདུག་པ་རྣམས་ཀྱི་མིག་དང་ཁ་ཚེམས་ཤིང་ཐལ་བར་བྱས་པར་རྣམ་པར་བསམས་ལ། འོད་ཟེར་ཅན་ལ་སོགས་པའི་ལྷ་མོའི་ཚུལ་གྱིས་ཞི་པའི་གཟུགས་སུ་ཡོངས་སུ་གྱུར་ནས་བུམ་པ་ཐོགས་པ་བཀུག་ནས་དབང་བསྐུར་ཏེ་དེ་རྣམས་དེར་གཞུག་གོ །དེ་ནས་ཡང་དེའི་བ་སྤུའི་བུ་ག་རྣམས་ནས་དོན་ཡོད་པར་གྲུབ་པ་ཇི་ལྟ་བ་སྤྲུལ་ལ། དེ་ལས་བྱུང་པའི་བྱང་ཆུབ་ཀྱི་སེམས་ཀྱི་ཆུའི་རྒྱུན་གྱིས་དབང་བསྐུར་ཏེ། དེ་ཡང་དེར་རབ་ཏུ་
ཞུགས་པ་ནི་སྔ་མ་བཞིན་དུ་ཤེས་པར་བྱའོ། །དེ་ནས་དེ་ཉེ་བར་འཚེ་བ་དང་བྲལ་པ་རྣམ་པར་བསམ་མོ། །མརྒད་ལྟ་བུའི་མདོག་ཅན་ལ། །ཞེས་བྱ་བ་ནི་དོན་ཡོད་པར་གྲུབ་པ་སྐུ་མདོག་ལྗང་གུའི་རྣམ་པར་བསམས་ལ་བཤད་མ་ཐག་པའི་སྦྱོར་བ་བྱའོ་ཞེས་སྟོན་པ་ཡིན་ནོ། །ལ་ལ་དག་ནི་མི་བསྐྱོད་པ་མརྒད་ཀྱི་མདོག་ལྟ་བུའི་ཞེས་ཟེར་ཏེ། དེ་ནི་མདོག་དང་རྗེས་སུ་མི་མཐུན་པས་མི་རིགས་སོ། །ཧཱུཾ་ཞེས་བྱ་བའི་སྒྲ་སྒྲོགས་པ། །ཞེས་བྱ་བ་ནི་ཡི་གེ་ཧཱུཾ་འདོན་པ་སྟེ། མི་བསྐྱོད་པ་སྐུ་མདོག་ཨིནྡྲ་ནཱི་ལ་ལྟ་བུར་བསམ་མོ་ཞེས་བྱ་བ་ནི་ལྷག་མའོ། །རྡོ་རྗེས་བསྡིགས་པར་བརྩོན་པ་ཡིས། །ཞེས་བྱ་བ་ནི་ཉེ་པར་མཚོན་པ་འདིས་ནི་ཏིང་ངེ་འཛིན་རིམ་པར་ཕྱེ་བ་ལས་གསུངས་པའི་མཚོན་ཆ་བསྣམས་པ་ཡིན་པར་རིགས་སོ། །འདི་སྐད་སྟོན་ཏེ་རང་གི་དཀྱིལ་འཁོར་གྱི་དབུས་སུ་ཉི་མའི་དཀྱིལ་འཁོར་གྱི་སྟེང་དུ་བདག་ཉིད་མི་བསྐྱོད་པ་སྐུ་མདོག་སྔོན་པོར་བསམས་ལ། རང་གི་སྙིང་གར་ཉི་མའི་དཀྱིལ་འཁོར་ལ་བསྒྲུབ་པར་བྱ་བ་སྲུང་བ་དང་བྲལ་ཞིང་ལྷས་སྤངས་པར་བསམས་ལ་སྔ་མ་བཞིན་དུ་ཁྲོ་གཉེར་ཅན་དང་མཱ་མ་ཀཱིའི་གཟུགས་ཀྱི་སྤྲུལ་པས་ནམ་མཁའ་མ་ལུས་པ་ཀུན་བཀང་སྟེ། དེ་བཞིན་དུ་བཀུག་ནས་རྡོ་རྗེ་མེའི་འཆར་གྱིས་བསྲེགས་ལ་དེ་རྣམས་དེར་གཞུག་གོ །ཡང་དེའི་བ་སྤུའི་བུ་ག་རྣམས་ལས་མི་བསྐྱོད་པ་ཇི་ལྟ་བ་བཞིན་དུ་སྤྲུལ་ལ། དེ་བཞིན་དུ་རྡོ་རྗེ་མེའི་འཆར་འབེབས་པར་བྱ་སྟེ། དེའི་ལུས་ལ་དེ་ཞུགས་པས་བསྐམས་ཤིང་ཤི་བར་བསམ་མོ། །ཡན་ལག་གཞིག་པ་ལ་ཡང་ཆོ་ག་འདི་ཉིས་བྱའོ། །འདི་ནི་ནང་གི་ཞི་བ་ལ་སོགས་པའི་ཆོ་ག་སྟེ། བསྒྲུབ་པར་བྱ་བ་མདུན་དུ་བསམས་ལ་ལས་ལྔ་པོ་བྱ་བ་ནི་ཕྱིའི་ཆོ་གའོ། །བྱིན་བརླབས་ཞེས་བྱ་བ་ལ་སོགས་པ་ལ་བྱིན་གྱིས་བརླབས་པའི་ངོ་བོ་ཉིད་ནི་རྡོ་རྗེ་སེམས་མའོ། །དམ་ཚིག་དང་དབང་བསྐུར་པའི་ངོ་བོ་ཉིད་ནི་རིན་ཆེན་སེམས་མའོ། །དེ་ཉིད་འོག་ནས་གསུངས་པ་ནི། རྡོ་རྗེ་སེམས་མ་རིན་ཆེན་འཆང༌། །ཞེས་བྱ་བ་ཡིན་ནོ། །ཆོས་དང་རྡོ་རྗེ་ལས་ཆོས་མ། །ཞེས་བྱ་བ་ནི་ཆོས་ཀྱི་སེམས་མ་དང་ལས་ཀྱི་སེམས་མ་སྟེ། དེ་ལྟར་ན་ལྷ་མོ་བཞི་པོའི་འདི་ཉིད་སྦྱར་རོ། །ཇི་ལྟར་ཞེ་ན། སྦྱོར་བ་ཞེས་བྱ་བ་གསུངས་ཏེ། བཤད་མ་ཐག་པའི་ཞི་བ་ལ་སོགས་པའི་ལས་བཞིའི་ཚིག་སྦྱར་རོ། །
ཞེས་སྟོན་ཏོ། །བཅུ་དྲུག་ཅེས་བྱ་བ་ནི་ཉེ་བར་མཚོན་པ་འདིས་ནི་ཚད་གསུངས་པ་ཡིན་ཏེ། ཆོས་དང་བྱམས་པ་ལ་སོགས་པ་གཟུང་ངོ༌། །རང་གི་ཕྱོགས་ཞེས་བྱ་བ་ལ་སོགས་པ་ལ་ཤར་ལ་སོགས་པའི་ཕྱོགས་ན་གནས་པའི་བྱམས་པ་ལ་སོགས་པས་ཞི་བ་དང་རྒྱས་པ་དང་དབང་དང་ཡམས་དང་གནོད་པ་ཉེ་བར་ཞི་བའི་ལས་ངེས་པར་བྱེད་པའོ། །འབྲས་བུ་དོན་ཡོད་སྤྱིན་བྱེད་པའི། །ཁྲོ་བོའི་ལུས་ལ་ལེགས་གནས་ཏེ། །ཞེས་བྱ་བ་ལ་སོགས་པས་ནི་དོན་ཆེན་པོ་ཉིད་ཡིན་པའི་ཕྱིར་བསྟན་པའི་དོན་དུ་སླར་ཡང་མངོན་སྤྱོད་ཀྱི་ལས་བྱ་བ་གསུངས་པ་ཡིན་ཏེ། ཁྲོ་བོའི་ལུས་ལ་ཞེས་བྱ་བ་ནི་གཤིན་རྗེ་གཤེད་ལ་སོགས་པའི་སྐུར་ལེགས་པར་གནས་པར་བྱས་ལ། ཁྲོ་བོའི་རྒྱལ་པོ་ལས་ལ་ངེས་པར་སྦྱར་བར་བྱའོ། །ཇི་ལྟར་ཞེ་ན་དམ་ཚིག་ཅེས་བྱ་བ་ལ་སོགས་པ་གསུངས་ཏེ། དམ་ཚིག་ལ་སོགས་པ་ནི་རྡོ་རྗེ་སེམས་དཔའ་ལ་སོགས་པ་བསྒྲུབ་པར་བྱ་བའི་ལུས་ལ་གནས་ཤིང་སྐུ་གསུང་ཐུགས་སྒོམ་པས་རྣམ་པར་བསྒོམ་པའོ། །བསྐུལ་བ་ནི་བཅོམ་ལྡན་འདས་འདི་ནི་དཀོན་མཆོག་གསུམ་ལ་གནོད་པ་བྱེད་པའོ་ཞེས་བྱ་བ་ལ་སོགས་པའི་བསྐུལ་བ་རྣམས་ཀྱིས་ཕྱུང་སྟེ་ཞེས་བྱ་བའི་དོན་ཏོ། །དེའི་རས་ཞེས་བྱ་བ་ནི་དུར་ཁྲོད་ཀྱི་རས་སོ། །དེའི་གཟུགས་བརྙན་བཅིང་བར་བྱ། །ཞེས་བྱ་བ་ནི་བསྒྲུབ་པར་བྱ་བའི་ལུས་ཀྱི་རྣམ་པ་དང་འདྲ་བར་བྱས་ལ་བྱའོ། །ཕུར་བུ་ཞེས་བྱ་བ་ནི་སྔ་མ་བཞིན་དུ་མངོན་པར་འདུས་བྱས་པས་སོ། །མེ་འབར་བ་ལ་ཞེས་བྱ་བ་ནི་འབར་བའི་མེ་ལ་སྟེ་བསྐམས་པ་དང་བཅད་པ་ནི་སྔ་མ་བཞིན་ཏེ། གོང་ནས་གོང་དུ་ཕུལ་དུ་བྱུང་བའི་སྦྱོར་བས་སོ། །རུས་སྦལ་གྱི་ནི་རྐང་སྟབས་སྦྱར། །ཞེས་བྱ་བ་ནི་ཙོག་ཙོག་པོར་འདུག་སྟེ་རྐང་བ་གཡོན་པའི་སྟེང་དུ་རྐང་བ་གཡས་པ་གཞག་པར་བྱ་བ་ནི་རུས་སྦལ་གྱི་རྐང་སྟབས་ཀྱི་མཚན་ཉིད་དོ། །ལས་འདི་ཞེས་བྱ་བ་ནི་ལས་རྣམས་སོ། །འདི་སྐད་བསྟན་པ་ཡིན་ཏེ། རང་གི་དཀྱིལ་འཁོར་གྱི་དབུས་སུ་གཤིན་རྗེ་གཤེད་ལ་སོགས་པ་གང་ཡང་རུང་བའི་སྦྱོར་བས་འདུག་ལ། དཀོན་མཆོག་གསུམ་ལ་གནོད་པ་བྱེད་པའི་བསྒྲུབ་བྱ་མདུན་དུ་བསམས་ཏེ། དེའི་སྙིང་གར་དེ་རང་གི་ལྷ་འདོད་པའི་རྒྱལ་པོས་བཀུག་ལ་དེའི་མགོ་
འཁོར་ལོའམ་པདྨའམ་རྡོ་རྗེ་འབར་བ་ཀུན་དུ་འཁྲུགས་པ་རྣམ་པར་བསམས་ལ། བཅོམ་ལྡན་འདས་ཀྱིས་ཞེས་བྱ་བ་ལ་སོགས་པས་ཇི་ལྟ་བ་བཞིན་དུ་བཟློག་ལ་བསྒྲུབ་པར་བྱ་བའི་སྙིང་གའི་ཟླ་བ་ལ་དེའི་མིང་བྲིས་ལ། ཨོཾ་མ་ཎི་རི་ཏི་ན་ར་བ་ཏི་ར་ཛཱ་ཡོ་གི་ནི་ཛ་སྭཱ་ཧཱ། ཞེས་བྱ་བ་ཁ་དོག་ལྔ་པའི་འོད་ཟར་གྱི་ཚོགས་ཀྱིས་མིང་དྲངས་ནས་བཀུག་པའི་ཚུལ་དུ་རིག་སྔགས་དང་སྤེལ་བས་རང་གི་རྐང་བའི་འོག་ཏུ་གཞག་གོ །དེ་ནས་བྱང་ཆུབ་སེམས་ཀྱི་ཇི་ལྟ་བ་བཞིན་དུ་དཔྲལ་བ་སྔོན་དུ་འགྲོ་བས། མགོ་དང་སྤྱི་གཙུག་ལ་སོགས་པའི་སྲུང་བ་བསལ་ལ། ཇི་སྐད་དུ་བཤད་པའི་ཚུལ་གྱིས་དེའི་གཟུགས་བརྙན་བསྐྱེད་དེ་རྣམ་པར་ཤེས་པ་རླུང་དང་འདྲ་ཞིང་སྲིན་བུ་མེ་ཁྱེར་ལྟ་བུར་ལྕགས་ཀྱུས་བཀུག་ནས། ཞགས་པས་གཞུག་ཅིང་ལྕགས་སྒྲོག་གིས་བཅིངས་ཏེ་གཟིར་བ་འདི་ལྟ་བུ་ཞག་བདུན་གྱི་བར་དུའོ། །དེ་ནས་རྐང་བས་མནན་ལ་དུས་དེ་སྲིད་ཀྱི་བར་དུ་བཟླས་བརྗོད་བྱའོ། །དེ་ནས་པོ་སོན་ཆའི་ཚེར་མས་ཕུག་ལ་དུས་དེ་སྲིད་ཀྱི་བར་དུ་བཟླའོ། །དེ་ནས་ཕུར་བུས་བཏབ་ལ་དེ་བཞིན་དུ་བཟླའོ། །དེ་ནས་མེས་གདུང་བར་བྱའོ། །དེ་ནས་གཅད་དོ། །དེ་ནས་སྦྱིན་སྲེག་བྱེད་ཅིང་ཞག་བདུན་བཟླའོ། །དེ་ལྟར་ཉིན་ཞག་བདུན་ཁྲོ་བོའི་ང་རྒྱལ་བྱས་ལ་འབར་བའི་ལུས་ཀྱིས་ལས་བྱས་ན་ངེས་པར་འཇིག་པར་འགྱུར་བར་གདོན་མི་ཟའོ། །ཆོ་ག་བཞིན་དུ་དགུག་པར་བྱ། །ཞེས་བྱ་བ་ནི་སྔར་བཤད་པའི་ཆོགས་སོ། །རྡོ་རྗེ་གཞན་གྱིས་ཞེས་བྱ་བ་ནི་གཤིན་རྗེ་གཤེད་ལ་སོགས་པའི་ཁྲོ་བོའོ། །བསྣུན་པར་བྱེད་པ་ཞེས་བྱ་བ་ནི་བརྡེག་བཞིན་པའོ། །གཏུབ་པ་དང་ཞེས་བྱ་བ་ནི་རྣམ་པར་གཞིག་པའོ། །རྒྱུ་མ་ལང་ལོང་ནར་བར་བསམ། །ཞེས་བྱ་བ་ནི་རྒྱུ་མ་དང་ཡན་ལག་ཀུན་དབྲལ་ཞིང་ནར་ལ་བསྒྲུབ་པར་བྱ་བ་འཇིག་པས་རྣམ་པར་མྱོས་པར་བསམ་པར་བྱའོ་ཞེས་སྔ་མ་དང་སྦྱར་རོ། །འདི་སྐད་སྟོན་ཏེ་རང་གི་དཀྱིལ་འཁོར་གྱི་དབུས་སུ་གཤེན་རྗེ་གཤེད་ལ་སོགས་པ་གང་ཡང་རུང་པའི་སྦྱོར་བས་འདུག་ལ་བསྒྲུབ་པར་བྱ་བ་མདུན་དུ་བསམས་ཏེ། སྲུང་བ་ལ་སོགས་པ་དང་ཕྲལ་ལ། ཇི་སྐད་དུ་བཤད་པའི་ཁྲོ་བོ་སྤྲུལ་ནས། ལ་ལས་ནི་ཞགས་པས་བཅིངས་ནས་ལྷོ་ཕྱོགས་སུ་ཁྲིད་
པར་གྱུར་པ་དང༌། ལ་ལས་ནི་རྡོ་རྗེས་བརྡེག་བཞིན་པ་དང་ལ་ལས་ནི་གཏུན་ཤིང་གིས་བརྡུང་བཞིན་པ་དང་ལ་ལས་ནི་འཁོར་ལོས་གཅོད་བཞིན་པ་དང༌། ལ་ལས་ནི་ལྕགས་ཀྱུ་ལ་སོགས་པས་འདྲེན་བཞིན་པ་དང༌། ལ་ལས་ནི་ཟ་བཞིན་པར་རྣམ་པར་བསམས་ལ་སྔར་བཤད་པའི་རྡོ་རྗེ་གནོད་སྦྱིན་གྱི་ཕྱག་རྒྱས་བཅིངས་ཏེ་འབར་བའི་ཚུལ་གྱིས་ཇི་སྐད་དུ་བཤད་པའི་གསང་སྔགས་བཟླས་ནས། དཀྱིལ་འཁོར་གྱི་ལྷ་རྣམས་དེ་གསོད་བར་བརྩོན་པར་བསམ་པར་བྱའོ། །མིང་ནས་བསྐུལ་བར་བྱ་བ་ནི་ཆེ་ག་མོ་ཟོ་ཤིག་ཅེས་བྱ་བ་ལ་སོགས་པས་བསྐུལ་པ་སྟེ། སྔར་བཤད་པའི་བསྐུལ་པའི་སྦྱོར་བ་འདི་དང་སྦྱར་རོ། །རླུང་གི་ཞེས་བྱ་བ་ལ་སོགས་པས་ནི་སྦྱོར་བ་གཞན་གསུངས་པའོ། །རྡོ་རྗེ་ཁྲོ་བོས་ཞེས་བྱ་བ་ནི་དབྱུག་སྔོན་ལ་སོགས་པའོ། །དཀྲི་བར་བྱ་ཞེས་བྱ་བ་ནི་བསྒྲུབ་པར་བྱ་བ་ལ་བསམ་ཞེས་བྱ་བ་ནི་ལྷག་མ་སྟེ། འདི་ནི་བསམ་གཏན་གྱིས་སྐྲོད་པའོ། །འདི་སྐད་སྟོན་ཏེ་ཁྲོ་བོ་གང་ཡང་རུང་པའི་སྦྱོར་བས་རང་གི་དཀྱིལ་འཁོར་གྱི་དབུས་སུ་འདུག་ལ། བསྒྲུབ་པར་བྱ་བ་དེ་བཞིན་དུ་མགོ་དང་གཙུག་ལ་སོགས་པའི་སྲུང་བ་བསལ་ལ། ཡཾ་ལས་རླུང་གི་དཀྱིལ་འཁོར་བསྐྱེད་པ་ལ་བསྐྱོན་ཏེ་རྡོ་རྗེ་རྔ་མོའི་རྒྱབ་ཏུ་བསྐྱོན་ཏེ། གཅེར་བུ་སྤྱི་གཙུག་སྐྲ་གྲོལ་བ་ཏིལ་མར་གྱིས་ལུས་བསྐུས་ལ། བསྒྲུབ་པར་བྱ་བའི་ཁ་དང་གདོང་དང༌། ལག་པ་གཉིས་དང༌། སྙིང་ག་དང༌། ལྐོག་མར་ཡི་གེ་ཡཾ་དུ་བའི་མདོག་ཅན་བསམས་ལ། དབྱུག་སྔོན་གྱི་རྡོ་རྗེས་མཚན་པའི་དབྱུག་པས་རྡོ་རྗེ་རྔ་མོ་བརྡབ་པས་ལྷོ་ཕྱོགས་སུ་ཁྱེར་ཞིང་རྔ་མོའི་གཅིན་གྱིས་དེའི་ལུས་ཡོངས་སུ་གཡེངས་པར་གྱུར་པར་བསམས་ཏེ། དེ་ཉིད་དང་ལྷན་ཅིག་ཏུ་ཡུལ་གཞན་དུ་ཕྱིན་པར་བསམ་པར་བྱ་ཞིང་ཁ་གདོང་མ་བཀྲུས་ཤིང་ཇི་སྲིད་དུ་བྱ་རོག་མ་ལངས་པ་དེ་སྲིད་དུ། ཨོཾ་བྷེ་རི་བྷེ་རི་གནྡྷ་རི་ཙཎྜ་ལཱི་མ་ཏཾ་གི་སྭཱ་ཧཱ་ཞེས་བརྗོད་ལ་ཁའི་དབུགས་ཀྱིས་བསྒྲུབ་པར་བྱ་བ་བཏེག་ན་ངེས་པར་སྐྲོད་པར་འགྱུར་རོ། །དེའི་རྐང་རྗེས་ས་ཞེས་བྱ་བ་ལ་སོགས་པའི་སྦྱོར་བའི་དོན་ནི་བཤད་ཟིན་ཏོ། །དེ་ལྟར་ན་དེའི་སྦྱོར་བའི་ལས་ཞེས་བྱ་བ་ནི་ཇི་སྐད་དུ་བཤད་པའི་ཆོགས་བསྟན་པའི་གསང་སྔགས་བྲི་བ་ལ་སོགས་པའི་ལས་
ཀྱིས་བསྐྲད་པར་འགྱུར་ཞེས་ཀྱང་སྦྱར་རོ། །བསྒོམ་ཞིང་ཆོ་ག་བཞིན་བྱས་ན། །ཞེས་བྱ་བ་ནི་རང་གི་སྦྱོར་བས་དེ་བཞིན་དུ་འདུག་པ་ལ་བསམ་གཏན་གྱིས་བསྐྲད་པའི་སྦྱོར་བ་བསྒོམས་པས་སྐྲོད་པར་འགྱུར་རོ་ཞེས་འོག་ནས་སྨོས་པ་དང་སྦྱོར་རོ། །དེའི་མིང་གསང་སྔགས་དང་སྤེལ་ཞིང་ཞེས་བྱ་བ་ནི་བསྒྲུབ་པར་བྱ་བའི་མིང་དང་སྔགས་སུ་སྤེལ་བ་སྟེ། འདིས་ཀྱང་ཕྱི་དང་ནང་གི་རྣམ་པའི་བྱེ་བྲག་ཅན་གྱི་སྦྱོར་བ་མ་ལུས་པ་གསུངས་པ་ཡིན་ནོ། །འདི་སྐད་སྟོན་ཏེ། དེ་བཞིན་དུ་ཁྲོ་བོ་གང་ཡང་རུང་བའི་སྦྱོར་བས་རང་གི་དཀྱིལ་འཁོར་གྱི་དབུས་སུ་འདུག་ལ་སྲུང་བ་ལ་སོགས་པ་བསལ་ཏེ། ཏ་ལའི་ལོ་མ་ལ་སོགས་པ་ཕྱག་རྒྱ་གཏོར་བའི་ཚུལ་ལམ་ཡི་གེ་གོ་བཟློག་པའི་ཚུལ་གྱིས་བདུད་རྩི་འཁྱིལ་བ་ལ་སོགས་པ་གང་ཡང་རུང་པའི་སྔགས་ཆེ་གེ་མོ་སྐྲོད་ཅིག་ཅེས་བྱ་བའི་ཚིག་དང་སྤེལ་བའི་སྦྱོར་བས་དུག་ལ་སོགས་པས་བྲིས་ལ་ནི་མ་པའི་ལོ་མ་སྨེ་པར་བྱས་པ་དང༌། ཁྲག་ལ་སོགས་པ་བསྐུས་ལ། ཏ་ལའི་ལོ་མ་དེ་འུག་པའི་སྒྲོས་སམ་དགེ་སྦྱོང་གི་སྐྲས་དཀྲིས་ཤིང་སྤེལ་བ་བྱས་ལ། ཉི་མ་ཕྱེད་དམ་མཚན་ཕྱེད་ལ་ཁྱིམ་གྱི་དབུས་ལ་སོགས་པར་བརྐོས་ནས་ཇི་སྐད་བཤད་པའི་བསམ་གཏན་གྱིས་བཀོད་པའི་སྦྱོར་བས་བསྒོམ་པར་བྱའོ། །འཐབ་མོ་འགྱེད་པ་ཞེས་བྱ་བ་ནི་ལྷའི་གཟུགས་སུ་བསྒོམས་པས་གནས་ལ་འཐབ་བཞིན་པར་ཡོངས་སུ་བསམ་མོ་ཞེས་སྦྱར་རོ། །འདི་སྐད་སྟོན་ཏེ་དེ་བཞིན་དུ་གཤིན་རྗེ་གཤེད་ལ་སོགས་པའི་རང་གི་དཀྱིལ་འཁོར་གྱི་དབུས་སུ་འདུག་ལ་བསྒྲུབ་པར་བྱ་བའི་སྲུང་ལ་སོགས་པ་བསལ་ཏེ། དེའི་གནས་དང་ཉེ་བར་གཤིན་རྗེ་གཤེད་ལ་སོགས་པའི་ཁྲོ་བོ་གཉིས་བསམས་ལ། དེའི་སྙིང་གར་ཡི་གེ་ཧཱུཾ་དམར་པོ་དང་ནག་པོ་བསམས་ལ་བསྒྲུབ་པར་བྱ་བའི་དཔྲལ་བར་ཡང་བཀོད་ནས། ཁྲོ་བོ་གཉིས་འཐབ་བཞིན་པར་བསྒྲུབ་པར་བྱ་བ་དབྱེ་ཞིང་འགྲས་པར་བསམ་མོ། །རང་གི་ལག་པའི་སེན་མོ་ལ་དེའི་མིང་གི་ཡི་གེའི་ཕྲེང་བ་ཕྱིན་ཅི་ལོག་ཏུ་བཀོད་ལ། ཕན་ཚུན་བདར་ནས་ཆེ་གེ་མོ་འགྲས་བར་གྱུར་ཅིག་ཅེས་བསྐུལ་ལ་ཁྲོས་པས་རང་གིས་གསང་སྔགས་བཟླ་བར་བྱའོ། །ཧཱུཾ་ཞེས་བྱ་བས་གང་བའི་ཞེས་བྱ་བ་ནི་ཡི་གེ་ཧཱུཾ་བརྗོད་པས་སོ། །རྡོ་རྗེ་ཕྲ་མོ་བསྒོམས་
བྱས་ནས། །ཞེས་བྱ་བ་ནི་ཧཱུཾ་ལས་བྱུང་བའི་ནས་འབྲུ་ཙམ་གྱི་རྡོ་རྗེ་རྩེ་མོ་ལྔ་པ་འབར་བར་བསམས་ལ་དགང་བར་བྱའོ་ཞེས་འོག་མ་དང་སྦྱར་རོ། །གང་དུ་ཞེ་ན། སྣ་ཡི་རྩེ་མོ་ནས་བཏོན་ཏེ། །ཞེས་བྱ་བ་གསུངས་ཏེ། མན་ངག་ཇི་ལྟ་བ་བཞིན་དུ་སྣའི་རྩེ་མོར་བསྒོམ་པས། རྡོ་རྗེ་ཕྲ་མོ་བསྐྱེད་ནས་དེས་དུས་ཕྱིས་དགང་བར་བྱའོ། །སྣ་ཚོགས་རྡོ་རྗེ་ཞེས་བྱ་བ་ལ་སོགས་པ་ནི་རེ་རེ་ཞིང་རྩེ་མོ་ལྔ་བ་ལ་ཁ་བཞི་པའི་རྡོ་རྗེའོ། །ཡང་ན་རེ་རེ་ཞིང་རྩེ་གསུམ་པ་ཁ་བཞི་བའི་རྡོ་རྗེ་ནི་སྣ་ཚོགས་རྡོ་རྗེའོ། །བཅིངས་ནས་སུ་ཞེས་བྱ་བ་ནི་ལག་པའི་དབུས་ལ་སོགས་པའོ། །རྡོ་རྗེ་འབར་བ་ལ་ཞེས་བྱ་བ་ལ་སོགས་པ་ཇི་སྐད་དུ་བཤད་པའི་རྡོ་རྗེ་འབར་པས་བསྒྲུབ་པར་བྱ་བའི་ལུས་སྐེམས་པ་གང་ཡིན་པ་དེ་ལ་དེ་སྐད་ཅེས་བྱའོ། །འདི་སྐད་སྟོན་པ་ཡིན་ཏེ། མན་ངག་ཇི་ལྟ་བ་བཞིན་དུ་རྡོ་རྗེ་ཕྲ་མོ་བསྒོམ་པས་བསྐྱེད་ལ། དེ་བཞིན་དུ་ཁྲོ་བོ་གང་ཡང་རུང་བའི་སྦྱོར་པས་རང་དཀྱིལ་འཁོར་གྱི་དབུས་སུ་འདུག་སྟེ་བསྒྲུབ་པར་བྱ་བ་མདུན་དུ་བསམས་ལ་སྲུང་བ་ལ་སོགས་པ་བསལ་ནས། ཧཱུཾ་ཞེས་བརྗོད་ལ་སྣའི་དབུགས་ཀྱིས་ཇི་སྐད་དུ་བཤད་པའི་རྡོ་རྗེ་དྲངས་ཏེ། དེ་བསྒྲུབ་པར་བྱ་བའི་རྐང་བ་ལ་སོགས་པའི་གནས་སུ་སྣ་ཚོགས་རྡོ་རྗེ་རྣམ་པར་སྤྲོས་ལ་བསྒྲུབ་པར་བྱ་བ་འདིའི་གཤེར་པའི་རྫས་རྣམས་རྡོ་རྗེ་མཁའ་འགྲོ་མས་གཞིབས་པར་བསམས་ལ་ཇི་སྐད་བཤད་པའི་འདོད་པའི་རྒྱལ་པོའི་ཕྱག་རྒྱ་བཅིངས་ནས་ཁྲོ་བོ་ཞེས་པས། ཨོཾ་ཞེས་བྱ་བ་ལ་སོགས་པར་བསྟན་པའི་གསང་སྔགས་དེས་བསད་པ་ལ་སོགས་པའི་སྦྱོར་བས་འདོན་པར་བྱའོ། །མཁས་པས་ཞེས་བྱ་བ་ནི་མཁས་པས་ཞེས་བྱའོ་ཞེས་སྔ་མ་དང་སྦྱར་བའམ་དེ་ནས་མཁས་པས་དགབ་ཀྱི་འོག་མ་དང་སྦྱར་རོ། །རླུང་གི་ཕྱོགས་སོང་སྟེ་ཞེས་བྱ་བ་ནི་རླུང་གི་ཕྱོགས་ཀྱི་ཆ་སྟེ་རླུང་ལྷས་ཕྱེ་བའི་མཚམས་སོ། །དེ་དག་ཅེས་བྱ་བ་ནི་ཐིག་ལེའོ། །དེ་ནི་ཞེས་བྱ་བ་ནི་ཁམ་ཕོར་དེ་བསམ་མོ་ཞེས་སྦྱར་ཏེ། དེ་ནི་ཞེས་བྱ་བ་ནི་རི་རབ་ཀྱིས་མནན་པར་བསྒོམ་མོ་ཞེས་ཤེས་པར་བྱའོ། །ཡཾ་ཞེས་བྱ་བ་ལ་སོགས་པ་ལ་ཡཾ་ལས་བྱུང་བའི་རླུང་བདུན་འོག་གི་ཆར་གནས་པ་རྣམས་ཀྱིས་ཡོངས་སུ་གཡོ་བ་དང་རི་རབ་དེ་
ཞེས་བྱ་བ་ནི་སྔ་མ་བཞིན་དུ་རླུང་མནན་པར་བྱའོ་ཞེས་བྱ་བའི་དོན་ཏོ། །ནང་དུ་རླུང་རྣམས་ངེས་པར་ཆུད་བར་བྱ་ཞེས་བྱ་བ་ནི་བྱ་བའི་ཁྱད་པར་གྱིས་ནི་གཉིས་པ་ཡིན་ཏེ། ནང་སྟེ་དབུས་སུ་རླུང་རྣམས་ཆུད་ཅིངས་པས་པ་སྟེ་རླུང་ཚོགས་རི་རབ་ཀྱིས་གཡོགས་པ་གང་ཡིན་པ་དེ་ལ་དེ་སྐད་ཅེས་བྱའོ། །གཞན་ཡང་དེ་ཉིད་ཁྱད་པར་ནི། ལཾ་ཞེས་བྱ་བ་ལ་སོགས་པ་གསུངས་པ་ཡིན་ཏེ། ཡི་གེ་ལཾ་ལས་མཚན་པའི་དབང་ཆེན་གྱི་དཀྱིལ་འཁོར་གང་ཡིན་པ་དེར་རོ། །འདི་སྐད་སྟོན་ཏེ་རྣམ་པར་སྣང་མཛད་ཀྱི་རྣལ་འབྱོར་བས་ཇི་སྐད་དུ་བཤད་པའི་ཕྱོགས་སུ་སོང་ལ། དེའི་དཀྱིལ་འཁོར་གྲུ་བཞི་བ་བྱས་ཏེ། དེར་འཁོར་ལོའི་སྦྱོར་བས་མཐའ་མར་དྲུག་དབུས་སུ་གཅིག་བྱ་སྟེ་དེ་རྣམས་ལ་ཡང་ཡཾ་བཀོད་ལ། དེ་ཡོངས་སུ་གྱུར་པ་ལས། རླུང་ལྷ་རྣམས་སུ་བསམས་ཏེ་འདོད་པའི་རྒྱལ་པོས་གཉིས་བ་ཡང་བཀུག་ནས་གཞུག་པ་དང་བཅིང་བ་དང་དམ་ཚིག་དང༌། བཀའ་བསྒོ་པ་ཇི་ལྟ་བ་བཞིན་དུ་བྱས་ཏེ། ཧཱུཾ་ཧཱུཾ་སཱུཾ་ཧཱུཾ་ཞེས་བྱ་བ་ལས་བསྐྱེད་པའི་ཁམ་ཕོར་ལས་རིའི་རྒྱལ་པོ་རི་རབ་ཁ་ཐུར་དུ་བལྟས་བ་ལ་ཡི་གེ་ཧཾ་བཟླས་ལ་རབ་ཏུ་བཀབ་སྟེ། དེའི་སྟེང་དུ་ཡི་གེ་ལཾ་ལས་དབང་ཆེན་གྱི་དཀྱིལ་འཁོར་ཟུར་བཞི་པ་ཁ་དོག་སེར་པོ་བསམས་ལ། དབང་ཆེན་གྱི་དཀྱིལ་འཁོར་དེ་ཡང་ཁྲོ་བོའི་རྡོ་རྗེ་ཆེན་པོ་རྩེ་ལྔ་བས་མནན་པར་རྣམ་པར་བསམས་ལ་དེའི་སྟེང་དུ་རྐང་པ་གཡོན་བ་བཞག་ནས། འཕགས་པ་མི་གཡོ་མགོན་གྱི་གསང་སྔགས་ལ་རྗེས་སུ་མཐུན་པའི་བསྐུལ་ཚིག་དང་བཅས་པ་བརྒྱ་རྩ་བརྒྱད་བཟླས་པར་བྱའོ་ཞེས་བསྟན་པ་འདི་ནི་དེ་གཙོ་བོར་བསྟན་པ་ཡིན་གྱི་སྦྱོར་བ་གཞན་གྱི་བྱ་བ་ལ་ཡང་ཉེས་པ་མེད་དོ། །ཀླུ་བརྒྱད་དགོད་དབུས་ཞེས་བྱ་བ་ནི་ཤར་གྱི་འདབ་མ་ནས་བརྩམས་ཏེ་སྔར་བཤད་པའི་ཀླུ་བརྒྱད་དགོད་པའོ། །རྡོ་རྗེ་ཁྲོ་བོའི་སྐུ་ཞེས་བྱ་བ་ནི་གཙོ་བོར་ཁྲོ་བོ་སྟོབས་པོ་ཆེའི་སྐུས་སོ། །གཟིར་ནས་སུ་ཞེས་བྱ་བ་ནི་གཟིར་བར་བསམ་མོ་ཞེས་བྱ་བ་ཚིག་གི་ལྷག་མའོ། འདི་སྐད་སྟོན་ཏེ་དེ་བཞིན་དུ་རང་གི་དཀྱིལ་འཁོར་གྱི་དབུས་སུ་སྟོབས་པོ་ཆེའི་སྦྱོར་བས་འདུག་ལ་མདུན་དུ་སྤང་ལེབ་ལ་སོགས་པའི་གཞི་ལ་མེའི་དཀྱིལ་འཁོར་དེའི་འོག་ཏུ་རླུང་དེར་ཡང་ཆུའི་དབུས་སུ་ཇི་སྐད་དུ་བཤད་པའི་པདྨ་བྲིས་ལ། དེའི་འདབ་མ་བརྒྱད་ལ་ཇི་སྐད་དུ་བཤད་པའི་ཀླུ་བརྒྱད་
ཡི་གེ་ན་ཧཱུཾ་གཉིས་ཀྱི་བར་དུ་བཅུག་པའི་རྣམ་པར་དགོད་ལ། དེར་ཡང་སྟོབས་པོ་ཆེས་ཀླུ་དགུག་པ་ལ་སོགས་པ་བྱས་ཏེ། རྟིང་བས་བཏེག་པར་བསམས་ལ། ཧཱུཾ་གིས་རབ་ཏུ་གཟིར་བར་གྱུར་བས་ཀླུའི་བདག་པོ་སྐྱུགས་པར་གྱུར་པ་རྣམས་པར་བསམས་ལ་ཆར་ཕོ་བ་ཤིག་ཅེས་བའི་བསྐུལ་ཚིག་དང་བཅས་པར་སྔགས་བཟླའོ། །དབུས་ཞེས་བྱ་བ་ནི་ལྟེ་བ་ལའོ། །ཀླུ་རྣམས་ཀྱི་སྙིང་པོ་ཡོངས་སུ་བཅུག་ཅེས་བྱ་བ་ནི་ཀླུའི་ས་བོན་གྱི་ཡི་གེ་ཧཱུཾ་གཉིས་དང་སྤེལ་བ་ཉིད་ཀྱིས་ཡོངས་སུ་བསྐོར་རོ། །ཧཱུཾ་ཞེས་བྱ་བ་བཟླས་བརྗོད་བྱས་ན་ནི། །ཞེས་བྱ་བ་ནི་ཡི་གེ་ཧཱུཾ་དང་སྤེལ་ལ་ཡི་གེ་ན་བཟླས་ཤིང་བསམས་ན་ཀླུའི་ཚོགས་རྣམས་ཀྱིས་ཆར་འབེབས་སོ། །བཤད་མ་ཐག་པའི་སྦྱོར་བ་འདི་ནི་བཙུན་པ་མར་མེ་མཛད་སེང་གེས་ཀྱང་དེ་སྐད་དུ་བཤད་དོ། །འདི་སྐད་སྟོན་ཏེ། གལ་ཏེ་སྔར་བཤད་པའི་སྦྱོར་བས་ཆར་མི་འབབ་ན་ཐམས་ཅད་དེ་བཞིན་དུ་བསྐྱེད་ནས་དབུས་ཀྱི་ནའི་ནང་དུ་བརྒྱད་ཅར་བཅུག་ལ་ཧཱུཾ་ན་ཧཱུཾ་ཞེས་བྱ་བྱ་བ་བཟླ། སྟོབས་པོ་ཆེ་བསྒོམས་ལ་རང་ཉིད་ཀྱིས་བཟླས་པ་བྱའོ། །བཀུག་ནས་ཞེས་བྱ་བ་ནི་བཀུག་པའོ། །འབྱུང་བ་ཞེས་བྱ་བ་ནི་རྣམ་པར་འབྱིན་པའོ། །འདི་སྐད་སྟོན་ཏེ་དེ་བཞིན་དུ་རླུང་གི་དཀྱིལ་འཁོར་དབུས་སུ་རྟ་མགྲིན་གྱི་གཟུགས་ཁམས་གསུམ་པའི་ཚད་ཙམ་གྱིས་གནས་ལ། ལྕེའི་དབུས་སུ་ཡི་གེ་ཧཱུཾ་འབར་བའི་ཕྲེང་བས་ཁྱབ་པར་བཀོད་ལ། ཇི་སྐད་དུ་བཤད་པའི་ཁ་དོག་ཅན་གྱི་ཁ་གདངས་པའི་དབུགས་རྔུབ་པའི་རླུང་སྒྲ་དང་བཅས་པས་མནད་ར་ལ་སོགས་པ་ཇི་སྐད་བཤད་པའི་སྤྲིན་རྣམས་བཀུག་ལ་དབུགས་དབྱུང་བའི་རླུང་གིས་ཤིང་བལ་བཞིན་གཏོར་ལ་རང་གི་ཕྲེང་བའི་སྔགས་བཟླས་ཏེ། སྦྱོར་བ་འདི་ལ་གཙོར་ནི་རྟ་མགྲིན་སྦྱར་རོ། །བཅད་གཏུབ་སྟེ་ཞེས་བྱ་བ་ནི་སྤྲིན་རྣམས་བཏུབ་བོ། །འདི་སྐད་སྟོན་ཏོ། །དེ་བཞིན་དུ་དཀྱིལ་འཁོར་གྱི་དབུས་སུ་བདུད་རྩི་ཐབ་སྦྱོར་གྱི་སྦྱོར་བས་འདུག་ལ་ཉི་མ་འདི་དཀྱིལ་འཁོར་ལ་དེའི་མདོག་ཅན་གྱི་ཡི་གེ་ཧཱུཾ་བཀོད་ལ་སྡིགས་མཛུབ་བྱ་བའི་ཚུལ་གྱིས་རང་གི་གསང་སྔགས་བཟླས་པས། ཧཱུཾ་ལས་བྱུང་བའི་རྡོ་རྗེ་ལ་སོགས་པས་སྤྲིན་རྣམས་བཏུབ་པར་བསམས་ཏེ། སྦྱོར་བ་འདི་ལ་གཙོར་ནི་བདུད་རྩི་ཐབ་སྦྱོར་སྦྱར་རོ། །རྣམ་པར་སྣང་མཛད་ཀྱི་ཞེས་བྱ་བ་ནི་
རྣམ་པར་སྣང་མཛད་ཀྱི་སྦྱོར་བས་གནས་པར་བསམ་པའོ། །མདའ་གཞུ་ཞེས་བྱ་བ་ལ་སོགས་པ་ལ། མདའ་གཞུ་ལ་སོགས་པ་ཐོགས་ནས་དེ་དང་དེས་འཕེན་ཅིང་དྲག་པོའི་ཆར་རབ་ཏུ་འབེབས་པའོ། །དེ་ཉིད་ཀྱིས་ནི་བདུད་ལས་རྣམ་པར་རྒྱལ་བ་སྟེ་ཕྱག་དྲུག་ཅེས་གསུངས་པས་ནི་གཡོན་གྱི་གཅིག་གི་ས་ནི་སྡིགས་མཛུབ་མཛད་པར་ཡང་ཤེས་པར་བྱའོ། །སྐྲག་པར་མཛད་ཅེས་བྱ་བ་ནི་འཇིགས་པར་མཛད་པའོ། །དེ་ལྟ་བུར་བསམས་ནས་ཅི་ཞིག་བྱེད་ཅེ་ན་འཇིགས་ཤིང་ཞེས་བྱ་བ་ལ་སོགས་པ་གསུངས་ཏེ་སྔར་བཤད་པའི་གདུག་པ་རྣམས་ཡིན་པར་ཤེས་པར་བྱའོ། །འདི་སྐད་སྟོན་ཏེ་དེ་བཞིན་དུ་རྣམ་པར་སྣང་མཛད་ཀྱི་སྤྱོར་བས་འདུག་ལ། ཡི་གེ་ཧཾ་ལས་དཔྲལ་བ་ལས་མི་གཡོ་བ་བྱུང་སྟེ་ཡི་གེ་ཧཱུཾ་ལས་སྒྲ་སྒྲོགས་པ་ལས་བྱུང་བའི་མེའི་དཀྱིལ་འཁོར་གྱིས་བསྐོར་ཏེ་བཞུགས་པ་དེའི་ཕྱག་ཏུ་ཡི་གེ་ཁ་ལས་རལ་གྲིར་ཡོངས་སུ་བརྟགས་པ་དང༌། ཀྵྨཱཾ་ལས་ཞགས་པ། ཧཱུཾ་དང་སྤེལ་བའི་དྷའི་ལས་གཞུ། ཧོ་སྔ་མ་བཞིན་སྤེལ་བ་ལས་མདའ། ཧཱུཾ་ལས་རྡོ་རྗེ་བྱུང་བར་བསམས་པ་ལ་དཀྱིལ་འཁོར་གྱི་ལྷ་རྣམས་ཀྱིས་ཀྱང་ཡོངས་སུ་བསྐོར་བར་བསྒོམས་ནས། ཞགས་པས་བཀུག་ནས་བགེགས་རྣམས་ཀུན་ནས་རལ་གྲི་ལ་སོགས་པས་གཏུབ་པར་བསམས་ཏེ་གསང་སྔགས་བཟླས་བརྗོད་བྱའོ། །ཕུར་བུ་ཞེས་བྱ་བ་ནི་ཕུར་བུས་གདབ་པ་བྱས་པའོ། །འོད་ཟེར་ཅན་གྱི་གསང་སྔགས་བཟླས་པ་ཡིས། །ཞེས་བྱ་བ་ནི་འོད་ཟེར་ཅན་གྱི་གསང་སྔགས་འདོན་པས་ལན་ཉི་ཤུ་རྩ་གཅིག་པས་མངོན་པར་བསྔགས་པའི་ཕུར་བུ་སྟེ་དེས་མིག་ཏུ་གདབ་པ་ཞེས་སྦྱར་རོ། །ཕྱི་བཞིན་རྡོ་རྗེ་གཏུན་ཤིང་དག་གིས་བརྡུངས། །ཞེས་བྱ་བ་ནི་རྡོ་རྗེ་གཏུན་ཤིང་ཐོགས་པའི་ཁྲོ་བོས་རྒྱབ་ནས་བརྡུང་བར་བསམ་པར་བྱའོ། །འདི་སྐད་སྟོན་ཏེ་དེ་བཞིན་དུ་གཤིན་རྗེ་གཤེད་ལ་སོགས་པ་གང་ཡང་རུང་བའི་སྦྱོར་བས་འདུག་ལ། རྐང་རྗེས་ཀྱི་ས་དང་མིའི་ཁྲག་དང་དུར་ཁྲོད་ཀྱི་སོལ་བ་རྣམས་ལས་མིའི་གཟུགས་བྱས་ལ། མི་རུས་ལས་བྱས་པའི་ཕུར་བུ་ཇི་སྐད་དུ་བཤད་པའི་གཟུགས་ཅན་ལ། འོད་ཟེར་ཅན་གྱི་གསང་སྔགས་ལན་ཉི་ཤུ་རྩ་གཅིག་བཟླས་ཏེ་དེས་མིག་གཉིས་སུ་ཕུར་བུས་གདབ་པའི་མིའི་གཟུགས་བརྙན་རྡོ་རྗེ་ཁྲོ་བོ་རྡོ་རྗེ་གཏུན་ཤིང་
ཐོགས་པས་བརྡུང་ཞིང་དེ་རེངས་པར་བྱ་བའོ། །ཚོགས་ཀྱི་བདག་པོ་ལྷོ་ཕྱོགས་སུ་མངོན་པར་ཕྱོགས་ནས་གདུག་པའི་ཁར་བཅུག་པར་ཡང་བསམས་ལ་ཇི་སྐད་དུ་བཤད་པའི་གསང་སྔགས་བཀའ་ལུང་བསྒོམ་པའི་ཚུལ་གྱིས་བཟླའོ། །ཞུགས་པའི་འོག་ཏུ་དེས་ཟོས་བར་བསམ་མོ། ལས་འདི་བསམས་པས་མོད་ལས་ནི། །ཞེས་བྱ་བ་ནི་ཇི་སྐད་དུ་བཤད་པའི་བསམ་གཏན་གྱིས་གཟུགས་བརྙན་བྱ་བ་ལ་སོགས་པའི་ལས་རྣམས་ཀྱིས་སོ། །མཁའ་ལ་ཞེས་བྱ་བ་ནི་བདག་ཉིད་ནམ་མཁའི་ཕྱོགས་སུ་གནས་ལ་བརྒྱ་བྱིན་དུ་བསམ་མོ་ཞེས་བྱ་བའི་དོན་ཏོ། །ཀླུ་བརྒྱད་དག་དང་ཆར་སྤྲིན་དག་ལ་བསྒོ། །ཞེས་བྱ་བ་ནི་ཇི་སྐད་དུ་བཤད་པའི་བཀའ་བསྒོ་པར་བསམ་མོ་ཞེས་བཤད་པའི་ཚིག་གིས་སྔ་མ་དང་སྦྱར་རོ། །དེ་ནས་ཅི་ཞིག་བྱ་ཞེ་ན། བརྒྱ་བྱིན་ཞེས་བྱ་བ་ལ་སོགས་པ་གསུངས་སོ། །སྤྲིན་ཚོགས་ཞེས་བྱ་བ་ནི་ཀླུ་ལ་བྱ་བར་འདོད་དེ། དེ་ཅིའི་ཕྱིར་ཞེ་ན་སྔར་དེ་ཉིད་ལས་བསྒོ་བའི་ཕྱིར་རོ། །འདབ་མས་བཀབ་ནས་ནི་ཞེས་བྱ་བ་ནི་གཤོག་པའི་རླུང་གིས་དེ་བཀབ་པའོ། །མཆུས་བརྐོས་ཞེས་བྱ་བ་ནི་མཆུ་བཙུགས་པའོ་ཞེས་བྱ་བར་སྦྱར་རོ། །འདི་སྐད་སྟོན་ཏེ། དེ་བཞིན་དུ་ཁྲོ་བོ་གང་ཡང་རུང་བའི་སྦྱོར་བས་རང་གི་དཀྱིལ་འཁོར་གྱི་དབུས་སུ་འདུག་ལ། ནམ་མཁའ་ལ་གནས་པའི་བརྒྱ་བྱིན་དུ་བདག་ཉིད་རྣམ་པར་བསམས་ལ་བར་སྣང་ལ་གནས་ནས་འོག་ཏུ་ཇི་སྐད་དུ་བཤད་པའི་ནམ་མཁའ་ལྡིང་དང༌། ཀླུའི་ཁྱིམ་ལ་སོགས་པ་ཚིག་པ་སེལ་བར་བྱེད་པར་བསམས་ལ། ཇི་སྐད་དུ་བཤད་པའི་སྔགས་བཟླས་ཤིང་བཀའ་བསྒོ་བས་ཆར་གྱི་རྒྱུན་གྱིས་མེ་གསོད་ཅིང༌། ཀླུའི་ཚོགས་ནམ་མཁའ་ལྡིང་གི་གཤོག་པའི་རླུང་གིས་གཡབ་པ་དང་མཆུས་བཙུགས་པས་དེ་བྱེད་པར་བསམ་མོ། །ལྷ་མོ་བཞི་པོས་ཡོངས་སུ་བསྐོར། །ཞེས་བྱ་བ་ནི་རྡོ་རྗེ་མཚོན་ཆ་ལ་སོགས་པས་ཡོངས་སུ་བསྐོར་པའོ། །དེ་ཉིད་གསུངས་པ་ནི། བསྙེམས་མ་ཞེས་བྱ་བ་ལ་སོགས་པ་སྟེ་བསྙེམས་མ་དང་རྡོ་རྗེ་མཚོན་ཆ་མ་དང༌། རྡོ་རྗེ་ཀི་ལི་ཀའི་ལིའོ། །ཆུ་སྲིན་རྒྱལ་མཚན་ནི་རྡོ་རྗེ་བྱམས་མའོ། །མེ་ཏོག་གི་གཞུ་དང་རོལ་བས་མཚན་པ་དང༌། རྡོ་རྗེ་བསྙེམས་མ་རྣམས་ཀྱིས་ཡོངས་སུ་བསྐོར་བའོ། །གཡས་པའི་ཕྱག་གིས་ཞེས་བྱ་བ་ནི་གཡས་
བ་རྡོ་རྗེ་བསྣམས་པའོ། །གཡོན་པས་རྡོ་རྗེ་དྲིལ་བུ་དཀུར་འཇོག་པའོ་ཞེས་བྱ་བ་ནི་རྐེད་པའི་ཕྱོགས་སུ་རྡོ་རྗེ་དྲིལ་བུ་འཇོག་པ་གང་ཡིན་པ་དེ་ལ་དེ་སྐད་ཅེས་བྱའོ། །བཅོམ་ལྡན་འདས་ཀྱིས་ཕྱག་ལྷག་མ་དག་ལ་ནི་མེ་ཏོག་ཅན་གྱི་མདའ་དང་གཞུ་བསྣམས་པའོ། །ལྡེ་མ་བག་ཅེས་བྱ་བ་ལ་སོགས་པ་ལ་ལྡེ་མ་བག་གི་ལྷ་མོ་རྣམས་ཀྱི་འཇོ་ཚུལ་གྱིས་ཡོངས་སུ་བཤད་ལ། དེས་སྒེག་ཅིང་རོལ་པ་དང་བཅས་པའོ། །སེམས་དཔའ་བྱུང་བ་ཞེས་བྱ་བ་ལ་སོགས་པ་ལ། སེམས་དཔའ་ནི་རྡོ་རྗེ་སེམས་དཔའ་ལ་སོགས་པ་སྟེ། དེ་བྱུང་བ་ནི་སྤྲུལ་པའོ། །དེའི་སྤྲིན་ནི་དེའི་ཚོགས་སོ། །དེ་དང་འབྲེལ་བ་ནི་རབ་ཏུ་འབྲེལ་བར་བྱས་པ་གང་ཡིན་པ་དེ་ལ་དེ་སྐད་ཅེས་བྱའོ། །རིན་ཆེན་ཅོད་པན་ཞེས་བྱ་བ་ལ་སོགས་པ་ལ་དབང་བསྐུར་བའི་ཕྱིར་རིན་ཐང་ཆེ་བའི་རིན་པོ་ཆེའི་ཅོད་པ་ན་བཅིངས་ཤིང་དར་དབྱངས་རྣ་བ་གཉིས་ཀྱི་མཐར་འཕྱང་བ་གང་ཡིན་པ་དེ་ལ་དེ་སྐད་ཅེས་བྱའོ། །ནམ་མཁའ་ལས་བབ་པའི་ཞེས་བྱ་བ་ནི་ནམ་མཁའི་བའི་ཕྱོགས་ལས་རྡོ་རྗེའི་ཐོག་འབབ་པ་ཟློག་པར་བྱེད་པར་བསམ་པའོ། །ཨོཾ་ཞེས་བྱ་བ་ལ་སོགས་པ་ལ་ཆེ་གེ་མོ་ཞེས་བྱ་བའི་སྒྲ་ནི་སེམས་ཅན་གྱི་སྒྲ་རབ་ཏུ་སྟོན་པར་བྱེད་པ་ཡིན་ནོ། །དེ་ནས་ནི་ཡི་གེ་ཛཿ་དེ་ནས་ཡི་གེ་ཧཱུཾ་བཀོད་པ་བྱས་ལ། སུ་ར་ཏ་ཞེས་བྱ་བའི་སྒྲའི་མཐར་སྟྭཾ་ཞེས་རབ་ཏུ་སྦྱར་རོ། །གལ་ཏེ་རྒྱུད་གཞན་དག་ལས་བཤད་པ་སུ་ར་ཏ་སྟྭཾ་ཞེས་པ་རྣམ་པར་དགོད་དམ་ཞེ་ན། བནྡྷ་ཞེས་བྱ་བ་གསུངས་ཏེ། ཡི་གེ་པཾ་རྣམ་པར་བཀོད་ལ་རྒྱུད་གཞན་དག་དང་རྗེས་སུ་མཐུན་པར་ཡི་གེ་ཧོཿ་ཡང་གཟུང་བར་བྱ་སྟེ། ལས་དང་རྗེས་སུ་མཐུན་པར་བསྐུལ་བའི་ཚིག་གཞུག་སྟེ། དེ་ནས་མཐའ་མང་ཕཊ་ཅེས་བྱ་བ་སྟེ། སྔགས་འདི་དག་རིགས་པར་སྦྱར་བ་ནི། ཨོཾ་མ་ཧཱ་སུ་ཁ་བཛྲ་སཏྭ་ཛཿ་ཧཱུཾ་པཾ་ཧོཿ་སུ་ར་ཏ་སྟྭཾ་ཆེ་གེ་མོའི་བཛྲ་པ་ཏཾ་ནི་བ་ར་ཡ་ཕཊ་ཅེས་བྱའོ། །དེ་ལྟར་ཞེས་བྱ་བ་ལ་སོགས་པ་ལ་ཐོག་མ་དང་ཐ་མ་མེད་ཅིང༌། གཉིས་སུ་མེད་པའི་བྱང་ཆུབ་ཀྱི་སེམས་ཡེ་ཤེས་བླ་ན་མེད་པ་དེ་ཉིད་ནི་ས་བོན་གྱི་ངོ་བོ་ཉིད་བས་གོ་འཕང་སྟེ་གནས་ཡིན་ལ། དེ་རྒྱས་པར་བྱེད་པ་ནི་རྣལ་འབྱོར་བའི་རྒྱུད་ལ་རྒྱ་ཆེར་གནས་པར་བྱེད་ཅིང་གཉིས་སུ་རྟོག་པའི་འཆིང་བ་སེལ་བར་བྱེད་པ། རྣལ་འབྱོར་བ་རབ་ཏུ་སད་པར་བྱེད་པས་རྒྱས་པར་བྱེད་པ་སྟེ་ཇི་སྐད་
དུ་བཤད་པའི་སྦྱོར་བའི་རིམ་པ་འདིས་བསྒོམ་ཞིང་བསམས་ལ། ནམ་མཁའ་ལས་ནི་བབ་པ་ཡི། །ཐོག་ཐོག་རྣམ་པར་བཟློག་པར་བྱ། །ཞེས་སྔ་མ་དང་སྦྱར་རོ། །འདི་སྐད་སྟོན་ཏེ། རང་གི་དཀྱིལ་འཁོར་གྱི་དབུས་སུ་རྡོ་རྗེ་སེམས་དཔའི་སྦྱོར་བས་འདུག་ལ། བསྒྲུབ་པར་བྱ་བའི་སྟེང་གི་ནམ་མཁའི་ཕྱོགས་སུ་ཇི་སྐད་དུ་བཤད་པའི་ལྷ་མོ་བཞིས་ཡོངས་སུ་བསྐོར་བའི་བདེ་བ་ཆེན་པོ་རྣམ་པར་བསམས་ལ། སེར་བ་འབབ་པ་བཟློག་པའི་ཕྱིར་ཨོཾ་ཞེས་བྱ་བ་ལ་སོགས་པའི་སྔགས་གདོན་པས་བཅོམ་ལྡན་འདས་བསྐུལ་བར་བྱའོ། །དེ་ནས་བཅོམ་ལྡན་འདས་ཀྱིས་འདི་སྐད་གསུངས་སོ་ཞེས་མི་མངོན་པའི་ཚིག་གིས་སྦྱར་རོ། །ཅི་ཞིག་མཛད་ཅེ་ན་མི་འཁྲུགས་ཞེས་བྱ་བ་ལ་སོགས་པ་གསུངས་སོ། །མི་བསྐྱོད་པ་དང་རིན་ཆེན་འབྱུང་ལྡན་དང་སྣང་བ་མཐའ་ཡས་དང༌། དོན་ཡོད་གྲུབ་པའི་རྒྱལ་པོ་དང༌། སྔགས་ཀྱི་སེམས་དཔའི་བསྐལ་པ་བཟང་པོ་པ་བཅུ་དྲུག་ནི་ཉེ་བར་མཚོན་པ་ཙམ་མོ། །ཁྲོ་བོ་ནི་གཤིན་རྗེ་གཤེད་ལ་སོགས་པའོ། །རིག་པའི་རྒྱལ་མོ་ནི་སྤྱན་ལ་སོགས་པའི་རིག་པའི་ལྷ་མོའོ། །ཐམས་ཅད་ལྡན་པ་ནི་ཐམས་ཅད་དང་བཅས་པའོ། །རྣམ་པར་གཟིགས་པ་ནི་ལྟ་བའོ། །སྐུ་གསུང་ཐུགས་ཀྱི་རྡོ་རྗེ་ཅན། །ཞེས་བྱ་བ་ནི་རྡོ་རྗེ་ཅན་ནི་རྡོ་རྗེ་འཛིན་པ་དགྱེས་ཤིང་རོལ་པའོ། །སྨིན་མ་མཛེས་པར་བསྐྱོད་ནས་སུ། །ཞེས་བྱ་བ་ནི་སྨིན་མ་མཛེས་པར་བསྐྱོད་ཅིང་རྣམ་པར་བརྩེ་བའི་ཁྱད་པར་རྩོམ་པས་རབ་ཏུ་འཛིན་པ་གཡོན་པའི་སྨིན་མ་བསྐྱོད་ཅིང་འཇིགས་པར་བསྐྱོད་པ་སྟེ་དེས་ཞེས་འོག་མ་དང་སྦྱར་རོ། །ཡན་ལག་འཕྲོག་མའི་འཛུམ་མཛད་ནས། །ཞེས་བྱ་བ་ནི་ཡན་ལག་རྣམ་པར་དགོད་པ་རྣམས་ཀྱིས་ཏེ་ཚིག་སྔ་མ་རྣམས་དང་སྦྱར་རོ། །ཐུགས་ཀྱིས་སེམས་ནི་དགའ་བ་མཛད། །ཅེས་བྱ་བ་ནི་གཉིས་སུ་མེད་པའི་རྡོ་རྗེ་ཡེ་ཤེས་ཀྱི་ངོ་བོ་ཉིད་ཀྱིས་ཐུགས་ཀྱི་བདག་ཉིད་ཀྱིས་སེམས་རྡོ་རྗེ་སེམས་དཔའ་དང་འབྲེལ་བའི་དགའ་བས་མོས་པར་མཛད་པའོ་ཞེས་ཤེས་པར་བྱའོ། །བསྒྲིབས་ནས་རྡོ་རྗེ་གསོར་ནས་དེས། །ཞེས་བྱ་བ་ནི་རྡོ་རྗེ་འདེབས་པས་སོ། །ལྡེམ་བག་ཅེས་བྱ་བ་ལ་སོགས་པ་སྨོས་ལ། ལྡེམ་
བག་དང་སྒེག་པ་དང་བཅས་པས། རྡོ་རྗེའི་ལྟ་བའི་རོལ་པས་བལྟས་པའི་ངོ་བོ་ཉིད་གང་ཡིན་པ་དེ་ནི་ལྡེམ་བག་འཇོ་ཚུལ་གྱིས་བལྟས་པའོ། །ལག་པ་གཉིས་ཞེས་བྱ་བ་ལ་སོགས་པ་ལ་རྡོ་རྗེ་ཁུ་ཚུར་གཉིས་ཀྱིས་པདྨ་བསྐོར་བའི་ཚུལ་དུ་ཡོངས་སུ་བསྐོར་ནས་སྤྱི་བོར་མེ་ཏོག་གི་ཐལ་མོ་སྦྱར་བ་བྱས་ཏེ་གསོལ་བ་ཞེས་བྱ་བར་སྦྱར་རོ། །ཇི་སྐད་རྣམ་པ་ཐམས་ཅད་དུ། །ཞེས་བྱ་བ་ནི་ཕྱི་དང་ནང་གིས་སོ། །ཟུར་གྱིས་རྣམ་པར་གཟིགས་པ་དང༌། །ཞེས་བྱ་བ་ནི་རྣམ་པར་ལྟ་བ་ནི་གཟིགས་པ་སྟེ་བཞད་པ་ཆེན་པོ་དང་ཟུར་གྱིས་གཟིགས་པ་ཅིའི་ཕྱིར་མཛད་ཅེས་བྱ་བའི་དོན་ཏོ། །སྨིན་མ་བསྐྱོད་པ་འཛུམ་མཛད་པ། །ཞེས་བྱ་བ་ནི་སྨིན་མ་བསྐྱོད་ཅིང་འཛུམ་པ་དང་བཅས་པ་འཛུམ་པ་དང་འབྱེད་པ་ལ་སོགས་པའི་མཚན་ཉིད་ཅན་གྱིས་སོ། །བསྟན་ཞིང་ཟབ་པའི་གསུང་གིས་ནི། །ཞེས་བྱ་བ་ནི་རྒྱུན་མི་འཆད་པར་སྟོན་པའི་གསུང་གི་ཟབ་མོའི་དོན་སྟོན་པས་སོ། །བདེ་བས་བྱང་ཆུབ་ཐོབ་འགྱུར་ལྡན། །ཞེས་བྱ་བ་ནི་དངོས་སུ་བསྟན་པས་སོ། །ཉོན་ཅིག་ཅེས་བྱ་བ་ནི་ཚིག་ཡོངས་སུ་བསྒྱུར་ནས་སྦྱར་རོ། །གང་ལ་ཞེས་བྱ་བ་ལ་སོགས་པ་ལ་དངོས་པོ་གང་གི་ཆོས་བདག་མེད་པའི་མཚན་ཉིད་ཅན་གྱི་ངོ་བོ་ནི་གཉིས་སུ་མེད་པའི་མཚན་ཉིད་དེ་བརྟགས་པའི་ངོ་བོར་མེད་པའོ། །མཐའ་གཉིས་ཀྱི་ནི་མཚན་མ་མེད། །ཅེས་བྱ་བ་ནི་རྟག་པ་དང་ཆད་པ་དང་བྲལ་ཏེ་ཆོས་ཀྱི་དབྱིངས་ཐོག་མ་དང་ཐ་མ་མེད་པའོ། །དེ་ལ་ཡང་འགའ་ཞིག་འཁྲུལ་པར་འགྱུར་ཞེ་ན། དེ་ཕྱིར་དབུས་ལ་སྤྱོད་པ་མེད་པ་དག །ཅེས་ཏེ་སྐད་ཅིག་མ་རེ་རེ་ཞིང་འཇིག་པས་ན་སྐད་ཅིག་མ་གསུམ་གྱི་གནས་སྐབས་ཀྱི་དབུས་མེད་དོ། །དེ་མེད་པས་ན་དེ་ལ་མངོན་པར་ཞེན་པ་རིང་དུ་སྤངས་པ་ཉིད་ཡིན་ནོ། །ཡང་ན་འཇུག་པ་དང་ལྡན་པའི་སེམས་དག་གིས་དབུས་དག་ན་ཇི་སྐད་དུ་བཤད་པའི་ཡེ་ཤེས་རྟོགས་པའི་བདག་ཉིད་ཅན་གྱི་གནས་པའི་སེམས་མཐའ་གཉིས་ལ་ལྟོས་པ་དེའི་དབུས་ན་ཞེན་པར་བྱེད་པ་རྣམ་པར་རྟོག་པ་མེད་དེ། དགའ་བ་མེད་པའི་ཕྱིར་རོ། །དུས་གསུམ་ཉིད་ལ་ཡོངས་སུ་གནས་པའི་དུས་གསུམ་པོ་མེད་པས་དུས་གསུམ་འདས་པའོ་ཞེས་སྔ་མ་དང་སྦྱར་རོ། །ཐམས་ཅད་དུ་ཁྱབ་པས་ན་ནམ་མཁའ་འདྲ་བའོ། །དེ་ལ་ཞེས་བྱ་བ་ལ་སོགས་པ་ལ་དེ་ལྟར་འདི་ལྟ་བུའི་ཡེ་ཤེས་ལ་གནས་པར་གྱུར་ན། དེ་རྟོགས་པའི་
མཚན་ཉིད་ཅན་གྱི་བྱང་ཆུབ་ཉམས་སུ་མྱང་བར་བྱ་བ་མེད་པས། རྣམ་པར་སྣང་མཛད་ལ་སོགས་པ་བསྒོམ་པའི་ཐབས་ཀྱི་ཡེ་ཤེས་དང་བྲལ་བ་ཡིན་ཏེ། དེ་ལས་ཇི་སྐད་དུ་བཤད་པ་དེའི་ཡེ་ཤེས་རྟོགས་པར་འདོད་པའི་ཐབས་རྣམས་ངས་བཤད་པར་བྱའོ་ཞེས་པའོ། །ཕུང་པོ་ལ་ཞེས་བྱ་བ་ལ་སོགས་པ་ལ་ཕུང་པོ་ལྔ་ལ་བདག་ཉིད་ཀྱི་གཟུང་བ་དང་འཛིན་པའི་རྣམ་པས་སོ་སོར་སྣང་བར་གྱུར་བའི་དངོས་པོ་ནི་དངོས་པོ་མེད་པ་སྟེ། དོན་དམ་པར་སེམས་ཅན་དམིགས་སུ་མེད་པས་དངོས་པོ་དེ་ཉིད་ནི་གཉིས་སུ་མེད་པའི་ཡེ་ཤེས་ཀྱི་མཚན་ཉིད་དོ། །སེམས་ཅན་ལ་ཕན་འདོགས་པར་བྱེད་པ་སྦྱོར་བ་ལ་སོགས་པ་བྱང་ཆུབ་ཀྱི་སེམས་ཀྱི་གྲོགས་སུ་གྱུར་པ་སྤྲུལ་པ་དང་བཅས་པས་སེམས་ཅན་ལ་རྗེས་སུ་ཕན་འདོགས་པར་བྱེད་དེ། དེ་བཞིན་གཤེགས་པ་ལ་སོགས་པའི་སྤྲུལ་པའི་རྒྱུ་མཛད་པའི་ངག་པ་འཇིག་རྟེན་པའི་ཡེ་ཤེས་ཀྱིས་སྐུ་གསུམ་གྱི་མཆོག་དཀྱིལ་འཁོར་གྱི་ལྷ་རྣམས་མཆོད་ནས། བདག་ཉིད་རྣམ་པར་སྣང་མཛད་ལ་སོགས་པའི་ངོ་བོར་བསྡུས་པ་ལས་བསྐྱེད་པར་བྱའོ། །ཐབས་ཉེ་བར་བསྟན་ནས། ད་ནི་སེམས་རིན་པོ་ཆེའི་བདག་ཉིད་ཆེ་བར་བསྟན་པའི་ཕྱིར། སེམས་ཀྱི་ཞེས་བྱ་བ་ལ་སོགས་པ་གསུངས་ཏེ། སྐུ་ནི་ཞེས་བྱ་བ་སྐུ་རྡོ་རྗེའོ། །སེམས་ཀྱི་ཆོས་རྣམས་བསྟན་པ་ཡིས། །ཞེས་བྱ་བ་ནི་ཆོས་སྟོན་པའི་ངོ་བོ་གསུང་རྡོ་རྗེ་ཐོབ་པའོ། །སེམས་ཀྱིས་བྱང་ཆུབ་ཐོབ་གྱུར་པས། །ཞེས་བྱ་བ་ནི་ཐུགས་རྡོ་རྗེའི་ངོ་བོ་ཉིད་དོ། །སྐུ་རྡོ་རྗེ་ལ་སོགས་པ་དེ་རྣམས་ལ་ཡང་དངོས་པོར་མངོན་པར་ཞེན་པར་མི་བྱའོ་ཞེས་བསྟན་པའི་ཕྱིར། དེ་བཞིན་ཉིད་ཀྱི་རྣམ་པར་བསྒོམ། །ཞེས་བྱ་བ་གསུངས་ཏེ་དེ་བཞིན་ཉིད་ཀྱི་རྣམ་པར་བསྒོམ་པའོ། །གཉིས་སུ་མེད་པའི་ཡེ་ཤེས་ལ་མངོན་པར་ཞུགས་པས་རྣམ་པར་སྣང་མཛད་ལ་སོགས་པའི་སྐུར་ཇི་ལྟར་བསྒོམ་ཞེ་ན། སེམས་ནི་ཞེས་བྱ་བ་ལ་སོགས་པ་གསུངས་ཏེ། ཇི་སྐད་དུ་བཤད་པའི་མཚན་ཉིད་ཅན་གྱིས་སེམས་སྐུ་རྡོ་རྗེ་ལ་སོགས་པའི་རྣམ་པར་ཡོངས་སུ་གྱུར་པ་ནི་སྒྱུ་མ་ལྟ་བུའི་རྣམ་པ་རང་དབང་དུ་གྱུར་པར་མོས་པས་རབ་ཏུ་བསྒོམ་ཞིང་བསམ་པར་བྱའོ། །དེ་བས་སྐུ་རྡོ་རྗེ་ལ་སོགས་པར་མངོན་པར་བྱང་ཆུབ་པ་ཡང་སྒྱུ་མ་དང་འདྲའོ། །དཔེར་ན་ཞེས་བྱ་བ་ལ་སོགས་པ་ནི་དཔེ་གསུངས་པའོ། །གྱོ་མོ་ཞེས་བྱ་བ་ལ་གྱོ་མོ་ལ་སོགས་པའི་སྦྱོར་བས་སོ། །ཞེན་པའི་སེམས་ལ་
ཞེས་བྱ་བ་ནི་སེམས་ཆོས་ཉིད་ཀྱིས་ཉེ་བར་བསྒོས་པས་སོ། །དེ་བཞིན་ཞེས་བྱ་བ་ལ་སོགས་པས་ནི་དཔེས་བསྟན་པའི་དོན་གསུངས་ཏེ། བསོད་ནམས་ཡེ་ཤེས་ཀྱི་རང་བཞིན་ཞེས་བྱ་བ་ནི་བསོད་ནམས་ཀྱི་ངོ་བོ་ཉིད་དང༌། ཡེ་ཤེས་ཀྱི་ངོ་བོ་ཉིད་ཀྱི་ཚོགས་ཀྱིས་ཞེས་བྱ་བ་བལྟ་བར་བྱའོ། །ཚོགས་ཀྱི་བསྒོས་པའི་སེམས་ཞེས་བྱ་བ་ནི་སྔར་བཤད་པའི་ཚོགས་དང་ལྡན་པས་སོ། །སེམས་རང་བཞིན་གྱིས་འོད་གསལ་བ་ཉིད་དུ་བསྟན་ནས། ད་ནི་གློ་བུར་གྱི་དྲི་མ་ཅན་ཉིད་དུ་བསྟན་པའི་ཕྱིར། དངོས་པོ་ཞེས་བྱ་བ་ལ་སོགས་པ་གསུངས་ཏེ། དངོས་པོ་དེ་རྣམས་ཀྱི་དོན་དམ་པའི་ངོ་བོ་ཉིད་ནི་བརྟགས་པའི་ངོ་བོ་ཉིད་དང་བྲལ་བ་ཉིད་དངོས་པོ་མེད་པའི་ངོ་བོ་ཉིད་ཀྱི་མཚན་ཉིད་ཅན་ཡིན་པར་མི་ཤེས་པས་གཟུགས་ལ་སོགས་པ་མི་བདེན་ཞིང་ཡོད་པ་མ་ཡིན་པའི་དངོས་པོ་ལ་རྣམ་པར་རྟོག་པས་གཟུང་བ་དང་འཛིན་པར་ཞེན་པའི་བག་ཆགས་ཀྱིས་བསྒོས་པས་རིན་པོ་ཆེའི་སེམས་དྲི་མ་ཅན་དུ་བྱས་པ་ཡིན་ནོ། །དེ་ནས་རྣལ་འབྱོར་དེ་སྤྱོད་པའི་གཞུང་གིས་ཀྱང་དངོས་པོ་རྣམས་ངོ་བོ་ཉིད་མེད་པར་བསྟན་ནས། ད་ནི་མདོ་སྡེ་བའི་གཞུང་སུན་འབྱིན་པས་ཀྱང་དངོས་པོ་ཐམས་ཅད་མཉམ་པ་ཉིད་དུ་གསུངས་པ་ནི་འབྱུང་བ་ཆེན་པོ་ཞེས་བྱ་བ་ལ་སོགས་པ་སྟེ། འབྱུང་བ་ཆེན་པོ་བཞི་ནི་ས་ལ་སོགས་པའོ། །དངོས་པོ་ཐམས་ཅད་ནི་གཟུགས་ལ་སོགས་པ་ཐམས་ཅད་དོ། །ལྡན་པ་ནི་འདྲེས་པའོ། །གཟུགས་ཞེས་བྱ་བ་ནི་བསྟེན་པའོ། །དེ་ལྟ་ན་ཡང་དངོས་པོ་དེ་རྣམས་ལ་གཙང་བ་དང་མི་གཙང་བ་ལ་སོགས་པར་ཡོངས་སུ་བརྟགས་པའི་མི་ཤེས་པའི་སྟོབས་ཀྱིས་སྒྲོ་བཏགས་པ་ཡིན་ནོ། །སོགས་པའི་སྒྲས་ནི་གཅིག་དང་དུ་མ་ལ་སོགས་པའི་དངོས་པོར་ཡོངས་སུ་བརྟགས་པ་ནི་མི་རིགས་ཏེ། གཅིག་དང་དུ་མའི་དངོས་པོ་དག་ནི་ཕན་ཚུན་འགལ་བ་ཡིན་ནོ་ཞེས་ཤེས་པར་བྱའོ། །སོ་སོར་སྣང་བའི་དབང་གིས་ཡོད་པ་ཡིན་ནོ་ཞེས་ཀྱང་ཤེས་པར་མི་བྱ་སྟེ། ཟླ་བ་གཉིས་སུ་མཐོང་བ་ཡོད་པ་ཉིད་དུ་ཐལ་བར་འགྱུར་རོ། །འབྱུང་བ་ཆེན་པོ་བཞིའི་ཕྲ་རབ་ཆ་ཤས་དང་ཆ་ཤས་ཅན་མ་ཡིན་པ་དང་ཇི་ལྟ་བ་བཞིན་བརྟག་པར་བྱ་བ་མ་ཡིན་པ་ལ་སོགས་པ་རྒྱ་ཆེར་སྦྱར་བར་བྱའོ། །དེ་བས་ན་རིགས་པ་རྗེས་སུ་ཞུགས་པ་རྣམས་ཀྱིས་རྣམ་པར་བརྟགས་པ་ཐམས་ཅད་ནི་སེམས་ཅན་ཉིད་ཡིན་པས་གནས་སོ། །དེའི་ཕྱིར་གང་འདི་གཟུང་བ་ལ་སོགས་པར་ཡོངས་སུ་བརྟགས་པ་དེ་ནི་
བདག་ཏུ་འཛིན་པ་ལ་མངོན་པར་ཞེན་པ་སྟེ། ཉེ་བར་མཚོན་པ་འདིས་ནི་ཕུང་པོ་དང་ཁམས་དང་སྐྱེ་མཆེད་ལ་སོགས་པར་མངོན་པར་ཞེན་པས་ཆོས་ཀྱི་དེ་ཁོ་ན་ཉིད་མི་རྟོགས་ཤིང་མུ་སྟེགས་ལ་སོགས་པའི་ཚུལ་དུ་བྱས་པས་བྱང་ཆུབ་ཇི་ལྟར་ཐོབ་པར་འགྱུར་ཞེས་པའོ། །ལས་དང་རྗེས་སུ་འབྲེལ་པ་གསུངས་པ་ནི་བྱང་ཆུབ་ཅེས་བྱ་བ་ལ་སོགས་པ་སྟེ། བྱང་ཆུབ་ནི་རྣམ་པ་གཉིས་ཉིད་དུ་གསུངས་ཏེ། གང་གི་ཕྱིར་འདི་ལས་གཞན་པ་བྱང་ཆུབ་ནི་དེ་རྣམས་ཀྱིས་འགྱུར་བས་དེ་ཡང་བྱ་བ་མ་ཡིན་ནོ་ཞེས་བྱང་ཆུབ་ཀྱི་མཚན་ཉིད་བསྟན་པའི་ཕྱིར་འདི་སྐད་གསུངས་ཏེ། ཇི་སྲིད་དུ་གཟུང་བ་དང་འཛིན་པ་ལ་སོགས་པའི་རྣམ་པར་རྟོག་པ་ལ་ཀུན་དུ་སྤྱོད་པ་དེ་སྲིད་དུ་ཕྱིན་ཅི་ལོག་གི་རྣམ་པར་རྟོག་ལ་ལྡོག་པར་མི་འགྱུར་རོ། །དེ་མི་ལྡོག་ན་གྲོལ་བར་ག་ལ་འགྱུར་ཞེས་བྱ་བར་དགོངས་སོ། །རྒྱ་ཆེར་ནི་འདི་ཉིད་གཞན་ལས་སྟོན་པས་དེར་བརྟག་པར་བྱ་སྟེ། འདིར་ནི་ཞིབ་ཏུ་མ་བཤད་དོ། །ལྷག་བཅས་ཕུང་པོའི་ངོ་བོ་སྟེ། །ཞེས་བྱ་བ་ལ་སོགས་པ་ལ་ཡོངས་སུ་གདུང་བའི་བདག་ཉིད་ཅན་གྱི་ཉོན་མོངས་པ་དང༌། ཤེས་བྱའི་སྒྲིབ་པའི་བག་ཆགས་མེད་པས་ན་ནམ་མཁའ་ལྟར་དྲི་མ་མེད་པ་སྟེ། ལོངས་སྤྱོད་རྫོགས་པའི་སྐུ་རྡོ་རྗེ་ལ་སོགས་པའི་ངོ་བོ་ཉིད་ཆོས་ཀྱི་དབྱིངས་ཀྱི་རྒྱུ་མཐུན་པ་ལས་བྱུང་བ་ནི་ལྷག་མ་དང་བཅས་པའི་བྱང་ཆུབ་ཡིན་པར་ཤེས་པར་བྱ་སྟེ། ཕུང་པོ་ངོ་བོ་ཉིད་ཅེས་གོང་མ་དང་སྦྱར་བར་བྱའོ། །གཟུང་བ་དང་འཛིན་པའི་རྣམ་པ་ལས་ལྡོག་ཅིང་ཕུང་པོ་ལྔ་མེད་པ་ཉིད་དུ་མེད་པའི་ཡེ་ཤེས་ནམ་མཁའ་ལྟར་དྲི་མ་མེད་པ་གང་ཡིན་པ་དེ་ལ་ནི་ལྷག་མ་མེད་པའི་བྱང་ཆུབ་ཡིན་ནོ་ཞེས་ཤེས་པར་བྱ་སྟེ། འདི་ནི་ཕུང་པོ་མེད་པ་ཡིན་ལ་འདི་ཉིད་ཀྱིས་ན་གཉིས་སུ་མེད་པའི་ཡེ་ཤེས་ཀྱི་ངོ་བོར་བཟུང་སྟེ། ཐོག་མ་དང་ཐ་མ་མེད་པའི་ངོ་བོ་ཉིད་ཡིན་པའི་ཕྱིར་རོ། །བྱང་ཆུབ་གཉིས་དེ་དག་ཀྱང་ཉོན་མོངས་པ་དང་ཤེས་བྱའི་སྒྲིབ་པ་ཡང་སྤངས་ཤིང༌། བསོད་ནམས་དང་ཡེ་ཤེས་
ཀྱི་ཚོགས་ཡོངས་སུ་རྫོགས་པར་བྱེད་ལ་སེམས་ཅན་རྣམས་ལ་རྗེས་སུ་ཕན་འདོགས་པར་བྱེད་པའི་སྦྱིན་པ་ལ་སོགས་པ་བྱང་ཆུབ་ཀྱི་སེམས་ཀྱི་གྲོགས་སུ་གྱུར་པ་དང་ཆོས་བདག་མེད་པ་བསྒོམ་པ་ལ་མངོན་པར་བརྩོན་པས་ཐོབ་པར་འགྱུར་རོ། །འདི་ལྟར་དེ་དག་ཐམས་ཅད་ནི་ཐེག་པ་དམན་པ་ལ་མེད་དེ། དེ་རྣམས་ནི་ཇི་སྐད་དུ་བཤད་པའི་བྱང་ཆུབ་ཀྱིས་འདུལ་བའི་སྣོད་དུ་གྱུར་པ་མ་ཡིན་ནོ། །བླ་མེད་བྱང་ཆུབ་འདི་ལྟ་བུ། །ཞེས་བྱ་བ་ནི་བྱང་ཆུབ་རྣམ་པ་གཉིས་པོ་འདི་དག་ཉིད་དོ། །རྡོ་རྗེ་ཡེ་ཤེས་རྣམས་ཀྱི་ཐབས། །ཞེས་བྱ་བ་ནས་མཁའ་ལྟར་དྲི་མ་མེད་པ་ཡིན་ནོ་ཞེས་བྱ་བའི་བར་གྱི་དོན་བྱང་ཆུབ་ཀྱི་སེམས་རིམ་པར་ཕྱེ་བ་ལས་གསུངས་མོད་ཀྱི། དེ་ལྟར་གསུངས་པའི་དྲག་པོ་བསྒྲུབ་པའི་བྱ་བ་ལ་ཡང་ཆོས་ཀྱི་དེ་ཁོ་ན་ཉིད་ཀྱི་རང་གི་ངོ་བོ་རྟོགས་པ་ཉིད་ཀྱིས་བྱའོ་ཞེས་བསྟན་པའི་ཕྱིར་རོ། །དེའི་བྱང་ཆུབ་ཅེས་བྱ་བ་ལ་སོགས་པ་ལ་རྣལ་འབྱོར་པ་གང་ཞིག་ཇི་སྐད་དུ་བཤད་པའི་བསྒོམ་པ་དང༌། བཟླས་པ་ལ་རབ་ཏུ་ཞུགས་པས་སྒྲུབ་པ་བདུན་གྱི་བར་གྱིས་ཀྱང་མ་གྲུབ་ན་ཇི་སྐད་དུ་བཤད་པའི་བྱང་ཆུབ་བསྒྲུབ་པའི་ཕྱིར་དང༌། ལས་སྣ་ཚོགས་པ་བྱ་བའི་དོན་དུ་དྲག་པོ་བསྒྲུབ་པའི་ཆོ་ག་མ་ལུས་པར་གསུངས་པ་ཡིན་ནོ། །བདེ་བའི་ཐབས་ཀྱིས་ཞེས་བྱ་བ་ནི་ཐབས་དེ་ལས་སོ། །འདི་ཞེས་བྱ་བ་ནི་ལྷ་འདི་རྣམས་ཀྱི་ཕྱག་རྒྱ་རྣམས་དང༌། སྔར་བསྟན་པའི་བསྒོམ་པ་རྣམས་ཀྱི་དྲག་པོ་བསྒྲུབ་པ་ལ་སོགས་པའི་ལས་ལ་སྦྱར་བར་བྱའོ།། དམ་ཚིག་ཅེས་བྱ་བ་ནི་རང་གི་བདེན་པའི་ཚིག་ཡོངས་སུ་སྐྱོ་བས་རྒྱལ་བས་བསྟན་པའི་ལས་བཞི་པོ་བྱེད་པའོ། །ལས་གང་ལ་རབ་ཏུ་སྦྱར་བར་བྱ་ཞེ་ན། དེའི་ཕྱིར་རྡོ་རྗེ་ལྕགས་ཀྱུ་ལ་སོགས་པའི་སོ་སོའི་ངེས་པའི་ལས་གསུངས་པ་ནི་གསང་སྔགས་རིགས་པས་ཞེས་བྱ་པ་ལ་སོགས་པ་སྟེ། རྡོ་རྗེ་ཧཱུཾ་མཛད་ལ་སོགས་པའི་སྦྱོར་བས་གནས་ཏེ། ཧཱུཾ་ལས་བྱུང་བའི་རྡོ་རྗེ་ལྕགས་ཀྱུ་བཏབ་པས་དགུག་པར་བྱའོ་ཞེས་ཤེས་པར་བྱའོ། །དེ་ནས་ཅི་ཞིག་བྱ་ཞེ་ན། འདི་ནི་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་བཅིང་བས་བཅིང་བར་བྱ། །ཞེས་
བྱ་བ་ནི་གཞུག་པའི་འོག་ཏུ་རྡོ་རྗེ་ལྕགས་སྒྲོག་གིས་བཅིང་བར་བྱའོ་ཞེས་ཤེས་པར་བྱའོ། །རྡོ་རྗེ་ལྕགས་ཀྱུའི་འོག་ཏུ་ནི་རྡོ་རྗེ་ཞགས་པས་བཅིང་བ་ཡིན་པས། རྡོ་རྗེ་ཁུ་ཚུར་གྱིས་བཟུང་ནས་ཞེས་བྱ་བ་འདིར་རྡོ་རྗེ་ཁུ་ཚུར་གྱིས་བཟུང་ནས་བཙིར་བར་བྱ་བར་ཤེས་པར་བྱའོ།། རྡོ་རྗེ་ནག་མོ་ལ་སོགས་པ་ནི་འདིར་སྒྲུབ་པོ་ཞེས་བྱ་བར་སྦྱར་རོ། །དེ་ནས་ཞེས་བྱ་བ་ལ་སོགས་པ་ལ་དེ་ནས་འཁོར་ཐམས་ཅད་ཀྱིས་དྲག་པོ་སྒྲུབ་པའི་ཆོ་ག་བསམ་པ་གཅིག་གིས་ལེགས་སོ་ཞེས་བྱ་བ་ལ་སོགས་པ་གསོལ་ཏོ། །གཙོ་བོ་རྡོ་རྗེ་རྣམ་སྣང་མཛད། །ཅེས་བྱ་བ་ལ་སོགས་པ་འདི་དག་ལས་ལེགས་སོ་ཞེས་བྱ་བ་དང་པོས་ནི་སྐུའི་སྒོ་ནས་སོ། །གཉིས་པས་ནི་གསུང་གི་སྒོ་ནས་སོ། །གསུམ་པས་ནི་ཐུགས་ཀྱི་སྒོ་ནས་སོ། །བཞི་པས་ནི་སྐུ་དང་གསུང་དང་ཐུགས་ཀྱི་སྒོ་ནས་སོ། །ཐུགས་རྡོ་རྗེའི་ལྕགས་ཀྱུས་ཀུན་ནས་འབར་ཞེས་བྱ་བ་ནི་ཐུགས་རྡོ་རྗེ་ཉིད་ལྕགས་ཀྱུ་དང་འདྲ་བས་གདུལ་བྱའི་སྐྱེ་པོ་འགུགས་པའི་ཕྱིར་གང་འདི་ལྟར་འབར་བར་གྱུར་པ་དེ་ལེགས་སོ། །གསང་ཆེན་ཞེས་བྱ་བ་ནི་ཐམས་ཅད་ལ་མི་སྟོན་པས་སོ། །ཐེག་པའི་ཚུལ་འདི་ལ་གནས་ན། ཞེས་བྱ་བ་ནི་ཡེ་ཤེས་འདི་ཐེག་པའི་སྦྱོར་བའི་མཚན་ཉིད་ལ་གནས་པའོ། །བདེ་བས་ཞེས་བྱ་བ་ལ་སོགས་པ་ལ་བླ་ན་མེད་པའི་བྱང་ཆུབ་བདེ་བས་ཐོབ་པའོ། །སྔགས་འདི་རྣམས་ཀྱི་ཕྱག་རྒྱ་ནི་སྔར་སྨྲས་པ་དང་མཐུན་ནོ། །འདི་སྐད་སྟོན་པ་ཡིན་ཏེ། ཇི་སྐད་དུ་བཤད་པའི་རྣལ་འབྱོར་པས་རྡོ་རྗེ་ཧཱུཾ་མཛད་ལ་སོགས་པའི་སྦྱོར་བས་རང་གི་དཀྱིལ་འཁོར་གྱི་དབུས་སུ་འདུག་ལ་བསྒྲུབ་པར་བྱ་བའི་ལྷ་མདུན་དུ་བསམ་སྟེ། གཉིས་པ་རྡོ་རྗེ་ལྕགས་ཀྱུ་ལ་སོགས་པའི་སྔགས་དང་ཕྱག་རྒྱས་དགུག་པ་དང་གཞུག་པ་དང་བཅིང་བ་དང་རྡོ་རྗེ་ཁུ་ཚུར་གྱི་གཟུང་བས་ཡང་དག་པར་བཟུང་ནས། གནས་ལྔར་ཕུར་བུས་གདབ་ཅིང་བརྡུང་བ་དང༌། སྡིགས་མཛུབ་ལ་སོགས་པ་བྱས་ནས་བསྒྲུབ་པར་བྱའོ། །ཡེ་ཤེས་སྙིང་པོའི་སྙིང་པོ་ཅན། །ཞེས་བྱ་བ་ནི་དྲག་པོ་བསྒྲུབ་པའི་ཡེ་ཤེས་ཀྱི་སྙིང་པོའི་སྙིང་པོ་ཅན་གྱི་གསང་སྔགས་ཀྱི་མཆོག་ཡིན་ནོ་ཞེས་བྱ་བར་སྦྱར་བར་བྱའོ། །འདི་དག་སུ་ལ་བསྟན་མི་བྱ།།
ཞེས་བྱ་བ་ནི་གང་ཡང་རུང་བ་འགའ་ཞིག་ལ་མི་བསྟན་པ་དང་སྒྲུབ་པ་ལའང་དང་པོར་ཞུགས་མ་ཐག་པ་རྣམས་ལ་བསྒྲུབ་པར་མི་བྱའོ། །སྦྱོར་བ་ཞེས་བྱ་བ་ལ་སོགས་པ་ལ་ཞི་བ་ལ་སོགས་པའི་སྦྱོར་བའི་ཐབས་ཀྱིས་ཇི་སྐད་དུ་བཤད་པའི་ངོ་བོ་ཉིད་སྒྲུབ་པ་སྟེ། དེ་སྟོན་པའི་གཞུང་གི་ལེའུ་ལ་རིམ་པར་ཕྱེ་བའི་སྒྲར་བཤད་དོ། །ལེའུ་བརྒྱད་པའི་འགྲེལ་པའོ།། །།སྦྱོར་བ་ཡང་སྦྱིན་སྲེག་གིས་ཡོངས་སུ་རྫོགས་པར་འགྱུར་བས། །དེ་ནས་ཞེས་བྱ་བ་ལ་སོགས་པ་རིམ་པར་ཕྱེ་བ་དགུ་པ་གསུངས་པ་ཡིན་ཏེ། བཅོམ་ལྡན་འདས་ཀྱིས་འདི་སྐད་བཤད་དོ་ཞེས་ཉེ་བར་མཚོན་པའི་ཚིག་གིས་སྦྱོར་རོ། །ཅི་ཞིག་མཛད་ནས་ཤེ་ན། སྦྱོར་བའི་ལས་ཐམས་ཅད་ཅེས་བྱ་བ་ལ་སོགས་པ་གསུངས་ཏེ་སྦྱོར་བ་ནི་རྣམ་པར་དགོད་པའི་ཁྱད་པར་རོ། །ལས་ཐམས་ཅད་ནི་དབབ་པ་ལ་སོགས་པའོ། །དེའི་ཚོགས་ནི་ལས་མང་པོའོ། །དེའི་རྗེས་སུ་འབྲེལ་པ་ནི་འདི་ལྟར་བྱའོ་ཞེས་པའི་ངེས་པའོ། །དེ་ཉིད་ནི་རྡོ་རྗེའི་ངོ་བོ་སྟེ། །དེ་ལས་དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །དབབ་པ་ལ་སོགས་པ་ཞེས་བྱ་བ་ལ་སོགས་པའི་རྣམ་པར་གཞག་པ་སྟོན་པའི་རྣམ་པ་ལ་ཐུགས་རྩེ་གཅིག་ཏུ་མཛད་ཅེས་བྱ་བའི་དོན་ཏོ། །དབབ་པ་ལ་སོགས་པ་ལས་བྱ་བ་འདི་བཤད་དོ་ཞེས་བྱ་བ་ལ་འདིར་ཡེ་ཤེས་སྙིང་པོ་ཅན་ཁྱོད་ཉོན་ཅིག་ཅེས་གསུངས་སོ་ཞེས་མཚམས་སྦྱར་རོ། །ཨོཾ་ཞེས་བྱ་བ་མགོར་བཞག་སྟེ། །ཞེས་བྱ་བ་ལ་སོགས་པ་ལ་གང་གི་མགོར་ཡི་གེ་ཨོཾ་གཞག་པ་དང༌། ཁའི་པདྨ་ལ་ཡི་གེ་ཨ་གཞག་པ་དང་སྙིང་གར་ཡི་གེ་ཧཱུཾ་བསྐུལ་བར་བཞག་པ་གང་ཡིན་པའོ་ཞེས་སྦྱར་བ་ཐམས་ཅད་དུ་བྱའོ། །ཡཾ་ནི་རླུང་གི་དཀྱིལ་འཁོར་ལ། །ཞེས་བྱ་བ་ཡི་གེ་ཡཾ་ལས་བྱུང་བའི་རླུང་གི་དཀྱིལ་འཁོར་རོ། །བཞག་ནས་ཞེས་བྱ་བ་ནི་དེར་འཇོག་པས་ན་དེ་སྐད་ཅེས་བྱ་སྟེ། དེར་བསྒྲུབ་པར་བྱ་བ་བསམ་མོ་ཞེས་བྱ་བར་ཤེས་པར་བྱའོ། །དབབ་སྣོད་སྐུལ་བྱེད་གཟུང་བ་དེའི། །ཞེས་བྱ་བ་ནི་དབབ་པའི་སྣོད་དོ། །སྐུལ་བྱེད་མའི་གཟུགས་སུ་བསམ་པའོ། །གཟུགས་ཀྱི་ངོ་བོར་ཞེས་བྱ་བ་ནི་བསྒྲུབ་པར་བྱ་བའི་གཟུགས་ཡོངས་སུ་
གྱུར་ནས་སྐུལ་བྱེད་མའི་ངོ་བོར་བསམ་པའོ། །རྡོ་རྗེ་འཆང་བའི་ང་རྒྱལ་གྱིས། །ཞེས་བྱ་བ་ནི་རྡོ་རྗེ་འཆང་བ་ནི་བདག་གོ་ཞེས་ང་རྒྱལ་དུ་བྱས་པ་གང་ཡིན་པ་དེ་ལ་དེ་སྐད་ཅེས་བྱའོ། །འདི་སྐད་སྟོན་ཏེ། དཀྱིལ་འཁོར་དུ་སློབ་མ་གཞུག་པ་དང༌། དམ་ཚིག་བསྟན་པ་ལ་སོགས་པ་ཇི་ལྟ་བ་བཞིན་དུ་བྱས་ལ། དེའི་མགོ་ལ་རྣམ་པར་སྣང་མཛད་ལྐོག་མར་གསུང་རྡོ་རྗེ་སྙིང་གར་ཐུགས་རྡོ་རྗེ་ཇི་ལྟ་བ་བཞིན་དུ་བསམས་ལ། རྐང་པའི་འོག་ཏུ་ཡི་གེ་ཡཾ། །མཐའ་མ་གཉིས་སུ་ཧ་རྣམ་པར་བཞག་སྟེ། བ་དན་དང་རླུང་གི་དཀྱིལ་འཁོར་དུ་བསམས་ལ་བསྒྲུབ་པར་བྱ་བ་སྐུལ་བྱེད་མའི་སྐུ་ཇི་ལྟ་བ་བཞིན་དུ་བསྒོམས་ཏེ། དྲིལ་བུ་དཀྲོལ་བ་ལ་རྡོ་རྗེ་སེམས་དཔའི་ང་རྒྱལ་གྱིས་ཇི་སྐད་དུ་བཤད་པའི་ཕྲེང་བའི་སྔགས་བཟླས་པར་བྱའོ། །དབང་ཆེན་དཀྱིལ་འཁོར་ལ་གནས་ཨོཾ། །ཞེས་བྱ་བ་ལ་སོགས་པ་ལ་ཡི་གེ་ལཾ་ལས་དབང་ཆེན་གྱི་དཀྱིལ་འཁོར་གནས་བརྒྱད་དུ་ཨོཾ་དང་འབྲེལ་བའི་རྣམ་པ་དགོད་པས་ལྟེ་བའི་ནང་ན་གནས་པའོ། །དབུས་སུ་ཞེས་བྱ་བ་ནི་དགུག་པར་བྱ་བའི་མིང་ངོ༌། །ཧཱུཾ་བཞི་ཡིས་ནི་རྣམ་པར་མཛེས། །ཞེས་བྱ་བ་ནི་ཕྱོགས་བཞི་ནས་ཧཱུཾ་གིས་བསྐོར་བའོ།། བསྒོམ་ཞིང་གསང་སྔགས་བསྐུལ་ཚིག་གིས། །ཞེས་བྱ་བ་ནི་ཆེ་གེ་མོ་རེངས་པར་གྱིས་ཤིག་ཅེས་བྱ་བའི་བསྐུལ་བའི་ཚིག་དང་བཅས་པའི་གསང་སྔགས་ཀྱིས་ཏེ། བཟླས་པ་ཞེས་བྱ་བ་ནི་བཟླས་བརྗོད་བྱས་པའི་ཡི་གེ་བའི་སྲད་བུས་ཞེས་བྱ་བར་སྦྱར་རོ། །དཀྲི་བར་བྱ་ཞེས་བྱ་བ་ནི་བསྒྲུབ་པར་བྱ་བ་རེངས་པར་བསྒོམ་ཞིང་དཀྲི་བའོ། །དེ་ཅི་ཞིག་བྱེད་ཅེ་ན། འདིས་ནི་ཞེས་བྱ་བ་ལ་སོགས་པ་གསུངས་སོ། །འདི་སྐད་སྟོན་པ་ཡིན་ཏེ། དེ་བཞིན་དུ་གཤིན་རྗེ་གཤེད་ལ་སོགས་པ་གང་ཡང་རུང་བའི་སྦྱོར་བས་འདུག་ལ་ཁམ་ཕོར་གཅིག་ལ་ཡི་གེ་ཡཾ་ཡོངས་སུ་བཟླས་པའི་ཡུང་བའི་ཁུ་བས་དབང་ཆེན་གྱི་དཀྱིལ་འཁོར་བྲིས་ལ། དེའི་ཕྱོགས་བརྒྱད་དུ་ཨོཾ་བརྒྱད་དེའི་དབུས་སུ་དེ་ཉིད་ཀྱིས་པདྨ་འདབ་མ་བརྒྱད་པ་བྲི། འདབ་མ་དེ་ལ་ཡི་གེ་བཾ་བརྒྱད། །ལྟེ་བ་ལ་ཕྱོགས་བཞིན་ཡི་གེ་ཧཱུཾ་བཞི་བཞི་བཀོད་པས་བསྐོར་བར་བསྒྲུབ་པར་བྱ་
བའི་མིང་བྲིས་ལ། ཇི་སྐད་དུ་བཤད་པའི་མིའི་མིང་གིས་དེའི་སྙིང་དྲངས་ལ་གཞུག་པ་དང་བཅིང་བ་བྱས་ནས་དེའི་མིང་ཡོངས་སུ་གྱུར་བའི་བསྒྲུབ་པར་བྱ་བ་དེའི་མགོར་ཡང་ཡི་གེ་ཧཱུཾ་གཞག་པ་ལས་རྡོ་རྗེ་འཆང་ཁྲོས་པར་གྱུར་པ་དེས་ཀྱང་མནན་པར་བསམས་ལ། ཁམ་ཕོར་གཉིས་པར་ཡང་དེ་བཞིན་བྲིས་ཏེ། དེས་སྔ་མ་བཀབ་ལ་ཡི་གེ་བ་ལས་བྱུང་བའི་སྲད་བུ་སེར་པོས་གཤིན་རྗེ་གཤེད་ལ་སོགས་པ་གང་ཡང་རུང་བའི་གསང་སྔགས་བསྐུལ་བའི་ཚིག་དང་བཅས་པར་བརྒྱ་རྩ་བརྒྱད་པས་དབུགས་མི་གཏོང་བར་དཀྲིས་ལ་མདུད་པ་བྱས་ཏེ། རྐང་པ་གཡོན་པར་མནན་ནས་དེ་བཞིན་དུ་གསང་སྔགས་བརྒྱ་རྩ་བརྒྱད་བཟླ་བར་བྱའོ། །སྐུ་གསུམ་ལྡན་པའི་མདའ་ཐོགས་ཤིང༌། །ཞེས་བྱ་བ་ནི་སྐུ་རྡོ་རྗེ་ལ་སོགས་པའི་ཡི་གེ་གསུམ་བཀོད་པའི་མདའ་དེའི་ཕྱག་གཡས་ཀྱིས་ཡོངས་སུ་འཛིན་པའོ། །གཡོན་པ་ཡིས་ནི་ཞེས་བྱ་བ་ནི་གཡོན་གྱིས་སོ། །འདོད་པས་ཞེས་བྱ་བ་ནི་འདོད་ཆགས་ཀྱིས་སོ། །བཞག་སྟེ་ཞེས་བྱ་བ་ནི་མདུན་དུ་འཇོག་པའོ། །པདྨ་ཞེས་བྱ་བ་ནི་ཉེ་བར་མཚོན་པ་སྟེ། དེས་ན་གནས་ལྔར་རོ། །རྣལ་འབྱོར་ཅན་གྱིས་ཞེས་བྱ་བ་ནི་རྣལ་འབྱོར་པས་སོ། །འདི་སྐད་སྟོན་ཏེ་དེ་བཞིན་དུ་འདོད་ཆགས་རྡོ་རྗེ་ཅན་གྱི་གཟུགས་ཀྱིས་མདའ་ལ་སོགས་པ་ཇི་ལྟ་བ་བཞིན་དུ་འཛིན་ཅིང་མདུན་དུ་བུད་མེད་རྣམ་པར་བསྒོམས་ལ། དེའི་སྤྱི་བོར་ཟླ་བའི་དཀྱིལ་འཁོར་ལ་ཨོཾ་ཛཾ་ཞེས་བྱ་བ་བཀོད་ལ། དེ་ལས་བྱུང་བའི་འོད་ཟེར་དམར་པོའི་ཚོགས་ཀྱིས་གནས་བཅུ་བདུན་དུ་གཏོགས་པའི་དྲེགས་པ་སད་པར་བྱས་པས་དེས་ཀྱང་དེ་བརྒྱལ་བར་བྱས་ཤིང་དྲེགས་པ་འདོར་བར་བསམས་ལ་སྔ་མ་བཞིན་དུ་རྡོ་རྗེ་མདའི་སྦྱོར་བས་གནས་ལྔར་དབུག་པར་བྱའོ། །དོས་གཉིས་ལ་ནི་པདྨ་བྲི། །ཞེས་བྱ་བ་ནི་ངོས་གཉིས་སུ་པདྨ་བྲི་བའོ། །མཛེས་པར་བྱ་ཞེས་བྱ་བ་ཉེ་བར་མཛེས་པའོ། །བྲི་བ་ནི་པདྨའི་ལྟེ་བ་ལ་བྲིའོ། །མི་ཡིས་བཏགས་ནས་ནི་ཞེས་བྱ་བ་ནི་མི་སྐྲས་བཅིངས་ནས་ཟླུམ་པོར་བྱ་བས་སོ། །ཐིང་རིལ་གྱི་རྐང་རུས་ཀྱིས་ཞེས་བྱ་བ་ནི་ཐིང་རིལ་
ཞེས་བྱ་བ་ནི་བྱའི་རྐང་པའི་རུས་པས་སོ། །ཁྲེ་མ་ཧཱུཾ་མིང་ནས་བརྗོད་ཅིང་བརྡུང༌། །ཞེས་བྱ་བ་ནི་ཟས་སྦྱིན་མ་ཁུག་ཅིག་ཁྲེཾ་ཧཱུཾ་ཞེས་བྱ་བ་བརྗོད་ཅིང་བརྡུང་ངོ༌། །ཅི་ཞིག་བྱས་ནས་ཤེ་ན། ལམ་གྱི་སུམ་མདོར་ཞེས་བྱ་བ་ལ་སོགས་པ་གསུངས་ཏེ། གཡོན་པ་ཞེས་བྱ་བ་ནི་རྐང་པ་གཡོན་པས་སོ། །འགུགས་པར་བརྩོན་པ་ཞེས་བྱ་བ་ནི་ཟས་སྦྱིན་མ་འགུགས་པར་བརྩོན་པའོ། །ལྕགས་ཀྱུས་བྱ་ཞེས་བྱ་བ་ནི་རྐང་པ་གཡོན་པའི་མཐེ་བོང་ཉིད་ཀྱིས་རྡོ་རྗེས་མཚན་པའི་ལྕགས་ཀྱུ་བྲིའོ་ཞེས་སྔ་མ་དང་སྦྱར་རོ། །གཟུགས་ཅན་གྱིས་ནི་རྟིང་བར་བརྡུང༌། །ཞེས་བྱ་བ་ནི་རྣལ་འབྱོར་པས་རྐང་པས་འགུགས་པའི་ཚུལ་དུ་བྱའོ། །འདི་ནི་ཁམས་གནས་པའི་ཞེས་བྱ་བ་ནི་ཁམས་གསུམ་ན་གནས་པའི་ཟས་སྦྱིན་མ་རྣམས་སོ། །འདི་སྐད་སྟོན་ཏེ་མིའི་མགོ་ཐོད་གཉིས་ལས་ཅང་ཏེའུ་བྱས་ལ། སྤྲེའུའི་པགས་པས་གཡོགས་ནས་བུད་མེད་ན་ཚོད་དང་པོ་དང་ལྡན་པའི་ཁྲག་གིས་ངོས་གཉིས་སུ་པདྨ་བྲིས་ལ། དེར་ཡང་ཡི་གེ་ཁྲེཾ་བཀོད་ནས་ཧེ་རུ་ཀའི་སྦྱོར་བ་བྱས་ལ་དེའི་སྔགས་དང་ཕྱག་རྒྱས་བྱིན་གྱིས་བརླབས་ཏེ། ཉི་མ་ཕྱེད་དམ་མཚན་ཕྱེད་ན་ལམ་གྱི་སུམ་མདོར་རྐང་པ་གཡོན་པའི་མཐེ་བོས་དཀྱིལ་འཁོར་ཕྱེད་དང་འདྲ་བ་བྱས་ལ། དེའི་གྲར་ཡང་རྡོ་རྗེས་མཚན་པའི་ལྕགས་ཀྱུ་བྱས་ལ་དེའི་དབུས་སུ་འདུག་སྟེ། རྐང་པས་འགུགས་པའི་ཚུལ་དུ་བྱས་ནས། ཁྲག་འཐུང་གི་སྔགས་ཀྱི་མཐར་ཟས་སྦྱིན་མ་བཀུག་ལ། ཁྲེཾ་ཧཱུཾ་ཞེས་བྱ་བ་དང༌། མིའི་སྐྲས་འཁོར་ལོར་བྱས་ལ་ཐིང་རིལ་གྱི་རྐང་པའི་རུས་པས་བརྡུངས་ནས། ཁྲག་འཐུང་གིས་ཟས་སྦྱིན་མ་བསྣམས་ཏེ་བྱོན་པར་བསམ་པར་བྱའོ། །རྣལ་འབྱོར་པ་སེམས་ལ་དབང་དུ་གྱུར་པ་ཐོབ་པས་ཚིག་ཙམ་ལ་སོགས་པས་ཐམས་ཅད་དབང་དུ་འགྱུར་བ་བསྟན་པའི་ཕྱིར། གང་ཡང་རུང་བའི་གཟུགས་བརྙན་ལ། །གནས་པ་ཡིས་ནི་ང་རྒྱལ་གྱིས། །ཞེས་བྱ་བ་གསུངས་ཏེ། རྣམ་པར་སྣང་མཛད་ལ་སོགས་པ་གང་ཡང་རུང་བའི་གཟུགས་བརྙན་དུ་གནས་པའི་ང་རྒྱལ་གྱིས་སོ། །ཚིག་གི་རྣམ་པ་ཙམ་གྱིས་ཀྱང༌། །ཞེས་བྱ་བ་
ནི་ཚིག་གམ་ལུས་ཀྱི་རྣམ་པས་ཀྱང་ལྷ་ལ་སོགས་པ་མངག་གཞུག་ཏུ་འགྱུར་ཞིང་ཐམས་ཅད་བྱེད་པར་འགྱུར་རོ་ཞེས་ཚིག་རྣམ་པར་བསྒྱུར་བར་སྦྱར་བར་བྱའོ། །གང་ཚེ་དབང་ཉིད་ལ་གནས་པ། །ཞེས་བྱ་བ་ནི་དབང་ཉིད་ལ་གནས་པས་གནས་པའོ། །མ་ཙམ་གྱིས་ཀྱང་གཅོད་པའི་མཆོག །ཅེས་བྱ་བ་ནི་གསོད་པས་འདུལ་བ་མ་ཙམ་གྱིས་ཀྱང་གཅོད་པའི་མཆོག་གོ །གླུ་དང་གར་ཞེས་བྱ་བ་ནི་བསྒོམ་པས་བསྒྲུབ་པར་བྱ་བ་དང་གཅིག་ཏུ་གྱུར་ནས་བདག་ཉིད་ཇི་ལྟ་བ་བཞིན་དུ་གར་རབ་ཏུ་བྱས་པས་འགྲོ་བའི་གཟུགས་ལྷའི་ཡེ་ཤེས་སུ་བསྒྲུབ་པའོ། །དེ་ལ་དང་པོར་སྦྱིན་སྲེག་བྱ། །མེ་ནི་ལྷ་ཡི་ཞལ་ཡིན་པས། །ཞེས་བྱ་བ་ནི་དེ་ལ་སྦྱིན་སྲེག་དང་པོ་བྱས་ནས། གཞན་དག་ལ་སྦྱིན་སྲེག་བྱ་བ་ཡིན་པས་འདི་སྐད་ཅེས་བཤད་དོ། །གཙུབ་ཤིང་ལས་ནི་བྱུང་བའི་མེ། །ཞེས་བྱ་བ་ནི་ཞི་བའི་བུད་ཤིང་གཙུབས་པ་ལས་བྱུང་བའི་མེའོ། །དགེ་བ་ཡི་ནི་ལས་རྣམས་བྱེད། །ཅེས་བྱ་བ་ནི་ཞི་བ་ལ་སོགས་པའི་ལས་སུ་གང་གསུངས་པ་དེ་ཉིད་ནི་དགེ་བའི་ལས་ཏེ་དེ་བྱེད་པའོ། །གདོལ་པའམ་དུར་ཁྲོད་ལས་བྱུང་བའི། །ཞེས་བྱ་བ་ནི་རིགས་ངན་གྱི་ཁྱིམ་ལས་བྱུང་བ་དང༌། དུར་ཁྲོད་ཀྱི་ཤིང་ལ་སོགས་པ་ལས་བྱུང་བའོ། །ཐབ་ཁུང་ཟླུམ་པོ་ཞེས་བྱ་བ་ལ་སོགས་པ་ལ། ཞི་བའི་ཐབ་ཁུང་ཟླུམ་པོ་སྟེ། །རྒྱས་པ་ལ་ནི་ཟུར་བཞི་པ། །དབང་གི་དོན་དུ་ཟླ་གམ་སྟེ། །མངོན་སྤྱོད་ལ་ནི་གྲུ་གསུམ་མོ། །ཞེས་བཤད་པའོ། །ཞི་བའི་ཐབ་ཁུང་ནི་འདི་ལྟར་བདུད་དང་ཡམས་ཀྱི་འཚེ་བ་ཉེ་བར་ཞི་བར་ཤེས་པར་བྱའོ། །དཀྱིལ་འཁོར་ཟུར་བཞི་ཁ་ཁྱེར་ལ། །རྡོ་རྗེའི་མཚན་མ་དག་གིས་བརྒྱན། །ཞེས་བྱ་བ་ནི་རྡོ་རྗེ་ཞེས་བྱ་བ་ནི་ཉེ་བར་མཚོན་པས་ཁ་ཁྱེར་དང་དཀྱིལ་འཁོར་གྱི་མཚམས་སུ། ལས་ཀྱི་རྗེས་སུ་མཐུན་པར་རྣམ་པར་སྣང་མཛད་ལ་སོགས་པའི་མཚན་མ་གཞག་པའོ། །ལ་ལ་དག་ནི་ཐམས་ཅད་དུ་ཡང་རྡོ་རྗེ་རྩེ་ལྔ་པ་ཉིད་ཀྱིས་བརྒྱན་པར་བྱའོ་ཞེས་ཟེར་རོ། །སྦྱིན་སྲེག་དེ་ཉིད་ཚུལ་རིགས་པས། །ཞེས་བྱ་བ་ནི་ཇི་སྐད་དུ་གསུངས་པའོ། །པདྨའི་ཞེས་བྱ་བ་ལ་སོགས་པ་ལ་ཞི་བའི་ནི་གཙུག་ཏོར་རོ། །དབང་གི་ནི་པདྨའོ། །མངོན་སྤྱོད་ཀྱི་ནི་རྡོ་རྗེ་
རྩེ་ལྔ་པར་གྲགས་པའི་རྡོ་རྗེའོ། །རྡོ་རྗེ་ནི་བདུད་དང་ཡམས་ཀྱི་འཚེ་བ་ཉེ་བར་ཞི་བའི་དོན་དུའོ། །རྒྱས་པ་ནི་རིན་པོ་ཆེ་སྟེ་དེ་དག་ཐམས་ཅད་ཀྱང་ཞི་བ་ལ་སོགས་པའི་ཐབ་ཁུང་གི་དབུས་སུ་པདྨའི་སྟེང་དུ་བྱའོ། །ཇི་ལྟར་རིགས་པར་འདུག་ནས་སུ། །ཞེས་བྱ་བ་ནི་ཞི་བ་ལ་སོགས་པའི་ལས་ལ་ཀུ་ཤའི་ཆུན་པོའི་བསྟན་ལ་སོགས་པ་ལ་འདུག་པའོ། །དགང་གཟར་མར་གྱིས་བཀང་ནས་ནི། །བླུགས་གཟར་བཀང་སྟེ་དེ་བཞིན་བསྲེག །ཅེས་བྱ་བ་ནི་དགང་གཟར་མར་གྱིས་ཡོངས་སུ་བཀང་བས་རིགས་ཀྱི་སྙིང་པོའི་གསང་སྔགས་བརྗོད་ལ་རིམ་གྱིས་བླུགས་གཟར་ཡོངས་སུ་བཀང་བས་སྲེག་བླུགས་དབུལ་བར་བྱ་སྟེ། དེས་མེའི་གཟི་བྱིན་བསྐྱེད་པར་བྱ་སྟེ། སྦྱིན་སྲེག་ལ་དགོས་གཡས་སུ་བཞག །ཅེས་བྱ་བ་ནི་ལས་ཀྱི་ཆོ་ག་ཇི་ལྟ་བས་སྦྱིན་སྲེག་གི་རྫས་དྲི་དང་མེ་ཏོག་ལ་སོགས་པ་གཞག་གོ །གཡོན་དུ་ཆུ་ཡི་སྣོད་དག་གོ །ཞེས་བྱ་བ་ནི་བསང་གཏོར་གྱི་ཆུའི་སྣོད་དོ། །ལས་ཀུན་བྱེད་པས་བཟླས་ནས་སུ། །ཞེས་བྱ་བ་ལས་ཐམས་ཅད་པ་སྟེ་རིགས་ཐམས་ཅད་ལས་ཐམས་ཅད་བྱེད་པས་སོ། །བསང་གཏོར་དང་ནི་འཐོར་འཐུང་བྱས། །ཞེས་བྱ་བ་ནི་བསང་གཏོར་བྱ་བ་ཉིད་ཀྱིས་འཐོར་འཐུང་ལ་སོགས་པ་བྱའི་གཞན་མི་དགོས་སོ། །ལ་ལ་ནི་གཉིས་པ་ལ་ཡང་ལས་ཐམས་ཅད་བྱེད་པ་དང་རང་གི་གསང་སྔགས་དང་རིགས་ཀྱི་སྙིང་པོའི་རིག་པ་དག་བཟླས་བརྗོད་བྱ་བར་ཤེས་པར་བྱའོ་ཞེས་འདོད་དོ། །ཀུ་ཤའི་རྩེ་མོ་ཞེས་བྱ་བ་ལ་སོགས་པ་ལ་ཐབ་ཁུང་འཁོར་བ་ཡོངས་སུ་བསྐོར་བ་སྟེ། དང་པོར་ཤར་དུ་རྩེ་བསྟན་དགྲ་མ། །གཉིས་པ་ལྷོ་རུ་ཁ་བལྟས་པ། །གསུམ་པ་རྩེ་མོ་ནུབ་ཏུ་བལྟ། །བཞི་པ་བྱང་དུ་རྩེ་བལྟས་པའོ། །ཞེས་བྱ་བའི་ཚུལ་འདིས་ཀུ་ཤའི་རྩེ་མོས་མནན་པའི་ཐབ་ཁུང་བྱའོ། །གཡས་པ་མི་འཇིགས་མཐེབ་བསྐྱོད་ཅིང༌། །ཞེས་བྱ་བ་ནི་ལག་པ་གཡོན་པས་ལག་པ་གཡས་པའི་མཁྲིག་མ་གཟུང་ལ་ལག་པ་གཡས་པ་བརྐྱང་སྟེ་མི་འཇིགས་པ་སྦྱིན་པའི་ཚུལ་དུ་བྱས་ལ། མཐེ་བོ་ལག་པའི་མཐིལ་དུ་གཞག་སྟེ་སྤྱན་འདྲེན་པའི་ཚུལ་གྱིས་བསྐྱོད་པར་བྱའོ། །ལག་གཡོན་རྡོ་རྗེ་བསང་གཏོར་ཏེ། །ཞེས་བྱ་བ་ནི་བདུད་རྩི་ཐབ་སྦྱོར་གྱི་གཡོན་པའི་རྡོ་རྗེ་ཁུ་ཚུར་གྱི་ཕྱག་རྒྱས་སོ། །དེ་ལ་ལག་པ་གཡས་པས་ཇི་བཞིན་དུ་བསངས་ལ། ཕྱག་རྒྱ་བཞིས་མངོན་
པར་རྒྱས་གདབ་བོ། །མཆོད་ཡོན་མཆོད་པ་རྣམ་ལྔ་དབུལ། །ཞེས་བྱ་བ་ནི་མཆོད་ཡོན་དང་ཞབས་བསིལ་དང༌། བསང་གཏོར་ཕུལ་ནས་མེ་ཏོག་ལ་སོགས་པ་རྣམས་ཀྱིས་མཆོད་དོ། །ཐོག་མ་དང་ཐ་མར་དེ་ཇི་ལྟར་བསམ་ཞེ་ན། མེའི་ཕྱོགས་ནས་བོད་པ་ནི། །ཞེས་བྱ་བ་ལ་སོགས་པ་གསུངས་ཏེ། མེའི་ཕྱོགས་ནས་ཇི་སྐད་དུ་གསུངས་པའི་གཟུགས་སོ། །ལས་ཀྱི་འོད་ཟེར་རྣམས་ཀྱིས་བརྒྱན། །ཞེས་བྱ་བ་ནི་ཞི་བ་ལ་སོགས་པ་ལ་དཀར་པོ་ལ་སོགས་པའི་འོད་ཟེར་རྣམས་ཀྱིས་བརྒྱན་ཅིང་སྤུད་པའོ། །དེའི་ཕྱག་ཇི་ལྟར་བསམ་ཞེ་ན་ལག་པ་དང་པོ་ཞེས་བྱ་བ་ལ་སོགས་པ་གསུངས་ཏེ། བཞུགས་སུ་གསོལ་ཞེས་བྱ་བ་ནི་སྤྱན་དྲངས་པའི་འོག་ཏུའོ། །དེ་ལ་སྦྱིན་སྲེག་ལ་དགོངས་པ། །ཀུན་ལ་ལན་གསུམ་སྲེག་བླུགས་འབུལ། །ཞེས་བྱ་བ་ནི་མཆོད་ཡོན་ལ་སོགས་པ་ཕུལ་བའི་འོག་ཏུ་བགེགས་དང་བཅས་པ་དང༌། བགེགས་མེད་པར་རྟགས་ལ་སྦྱིན་སྲེག་གི་ཡོ་བྱད་མར་ལ་སོགས་པ་ཐམས་ཅད་ལས་སྲེག་བླུགས་ལན་གསུམ་དབུལ་ལོ། །རིམ་པ་འདི་ཡི་ཚུལ་གྱིས་ནི། །མཁས་པས་ལྷ་རྣམས་ཚིམ་པར་བྱ། །ཞེས་བྱ་བ་ནི་དེ་ནས་པདྨ་དང་ཟླ་བ་ལ་ལྷ་རྣམས་ཇི་ལྟ་བ་བཞིན་དུ་བསམས་ཏེ། རང་གི་གནས་ནས་སྤྱན་དྲངས་ལ་མཆོད་ཡོན་ལ་སོགས་པ་ཕུལ་ནས། དང་པོ་ལས་དང་རྗེས་སུ་མཐུན་པའི་སྔགས་ཀྱིས་དགང་བླུགས་ཕུལ་ལ་ཕྱི་ནང་གི་གསང་སྔགས་ཀྱིས་ཀྱང་ཇི་ལྟ་བ་བཞིན་དུ་སྦྱིན་སྲེག་བྱས་ལ་མཁས་བདག་གིས་ལྷ་རྣམས་ཚིམ་པར་བྱའོ། །ལེགས་པར་ཚིམ་བྱས་བཟོད་གསོལ་ཏེ། །ཞེས་བྱ་བ་ནི་ཡོ་བྱད་མ་ཚང་བ་ལ་སོགས་པ་ཉེས་པར་མི་གཟུང་བའི་ཕྱིར་བཟོད་པ་མཛོད་ཅིག་ཅེས་བརྗོད་དོ། འདོད་པའི་དངོས་གྲུབ་གསོལ་བ་གདབ། །ཅེས་བྱ་བ་ནི་ཞི་བ་ལ་སོགས་པའི་མངོན་པར་འདོད་པའི་དངོས་གྲུབ་རྫོགས་པའི་ཕྱིར་གསོལ་བ་བཏབ་ནས་ཇི་ལྟ་བ་བཞིན་དུ་གཤེགས་སུ་གསོལ་བར་བྱའོ་ཞེས་ཤེས་པར་བྱའོ། །འཁྱིལ་པ་ཞེས་བྱ་བ་ནི་འཁྱིལ་བར་གྱུར་པའོ། །སྒོམ་དང་བཟླས་ལ་འབད་པར་བྱ། །ཞེས་བྱ་བ་ནི་དེའི་འོག་ཏུའོ། །ཨོཾ་ཞེས་བྱ་བ་དང་ཞེས་བྱ་བ་ལ་སོགས་པ་ཡི་གེ་ཨོཾ་གྱི་གླུའི་རྣམ་པ་སྔགས་ཀྱིས་མཐར་བྱ་བ་ནི་རྒྱས་པའི་ལས་ལ་སྦྱར་རོ། །སྭཱ་ཧཱ་ནི་ཞི་བ་ལའོ། །ཧོ་ནི་
དབང་ལ་ཤེས་པར་བྱའོ། །མངོན་སྤྱོད་ལ་ནི་ཡི་གེ་ཧཱུཾ་གིས་སོ། །བདུད་དང་ཡམས་ཀྱི་འཚེ་བ་ཉེ་བར་ཞི་བ་ལ་ཡི་གེ་ཕཊ་ཀྱིས་རབ་ཏུ་ཞི་བར་བྱས་པའོ། །དེ་ལྟར་བྱས་ནས་དེའི་འོག་ཏུ། །ཞི་བའི་སེམས་ཀྱིས་ཞི་བ་ལ། །ཞེས་བྱ་བ་ནི་སྔགས་པས་ཞི་བའི་ལས་ལ་སེམས་ཞི་བ་སྟེ་བདུད་དང་ཡམས་ཀྱི་འཚེ་བ་ཉེ་བར་ཞི་བ་ལ་ཡང་བསྐུལ་བའི་ཚིག་དང་ཞེས་བྱ་བ་ལ་སོགས་པ་སྟེ། ཆེ་གེ་མོ་ཞི་བར་མཛོད་ཅིག་ཅེས་བྱ་བ་ལ་སོགས་པ་བསྐུལ་བའི་ཚིག་དང་གསང་སྔགས་སྤེལ་བ་དང་ལྡན་པས་ལས་བྱའོ། །སྔགས་བསྒྲུབས་ཞེས་བྱ་བ་ལ་སོགས་པ་ལ་ཞི་བ་ལ་སོགས་པའི་ལས་སྣ་ཚོགས་པ་གང་ཡིན་པ་ལ། རྣམ་པར་སྣང་མཛད་ལ་སོགས་པ་ངེས་པར་སྦྱར་བ་ལས་ལས་གང་ཡིན་པ་དེ་ཉིད་ཡོངས་སུ་རྫོགས་ནས་མཆོད་པར་བྱའོ། །བཤད་གཅི་ལ་སོགས་པའི་སྦྱིན་སྲེག་བྱས་པས་ཇི་ལྟར་སྡིག་པར་མི་འགྱུར་ཞེས་འགའ་ཞིག་སོམ་ཉི་སྐྱེ་བར་འགྱུར་བ་ཇི་སྟེ་ཞེས་བྱ་བ་ལ་སོགས་པ་གསུངས་ཏེ། ཅི་སྟེ་ཡེ་ཤེས་སེམས་དཔའི་ཞལ། །མི་གཙང་བ་ཡིས་བཀང་ན་ཀོ། །ཞེས་བྱ་བ་ནི་ཞལ་ཡོངས་སུ་བཀང་པའི་ཕྱིར། ཅིའི་ཕྱིར་བསྔགས་པར་བྱ་བ་མ་ཡིན་པར་ཡོངས་སུ་གཟུང༌། གལ་ཏེ་ཞེས་བྱ་བ་ལ་སོགས་པས་ནི་གཏན་ཚིགས་གསུངས་པ་སྟེ་སྡིག་པ་ཡིན་ན་མངོན་པར་འདོད་པའི་འབྲས་བུ་ཇི་ལྟར་འབྱུང་སྟེ་དེ་བས་ན་མེད་དོ་ཞེས་སྟོན་ཏེ། ཆོས་ནི་རང་བཞིན་གྱིས་དག་སྟེ། །སྐྱེ་བ་མེད་ཅིང་གནས་མེད་ཀྱང༌། །ཞེས་བྱ་བ་ནི་དོན་དམ་པར་རོ། །སེམས་ཅན་ཡེ་ཤེས་ཞེས་བྱ་བ་ལ་སོགས་པ་ལ་སངས་རྒྱས་རྣམས་ཀྱིས་ལྷག་པར་མོས་པའི་འབྲས་བུའི་ཡེ་ཤེས་རབ་ཏུ་གྲུབ་པའི་ཕྱིར་བསྟན་ཏོ། །དམ་པའི་དོན་དུ་དགེ་སྤངས་ན། །ཞེས་བྱ་བ་ནི་གང་གི་ཕྱིར་གཉིས་སུ་མེད་པའི་ཡེ་ཤེས་ནི་བག་ཆགས་ཐམས་ཅད་རྩ་བ་ནས་འབྱིན་པས་སོ། །སྨོས་ཅི་དགོས་ཞེས་བྱ་བ་ནི་འཛིན་པར་རྟོག་པའོ། །དཔེ་བསྟན་པའི་ཕྱིར་དཔེར་ན་ཆུ་ཀླུང་ཞེས་བྱ་བ་ལ་སོགས་པ་སྟེ། ཆུ་གང་ཆུ་ཀླུང་གིས་ཞེས་བྱ་བ་ནི་འདིར་མཐོང་ངོ་ཞེས་ཤེས་པར་བྱའོ། །ཆུ་ལས་རྒལ་བའི་གཟིངས་བྱས་ནས། །ཞེས་བྱ་བ་ནི་ཆུ་དེ་ལས་བརྒལ་བའི་ཕྱིར་རོ། །དཔེ་བསྟན་པའི་དོན་གསུངས་པ་ནི། དེ་བཞིན་ཞེས་བྱ་བ་ལ་སོགས་པ་ཡིན་ཏེ། ཆོས་ཀྱི་ལམ་ནི་བསྐྱེད་
བྱས་ཀྱང༌། །ཞེས་བྱ་བ་ནི་ཇི་སྐད་དུ་བཤད་པའི་ཆོས་ཀྱི་ལམ་ལ་གནས་པས་འཁོར་བའི་ཕ་རོལ་ཏུ་སོན་པའོ། །ཆོས་དང་ཆོས་མིན་རྣམ་སྤངས་ནས། །ཞེས་བྱ་བ་ནི་དེ་གཉིས་ཀའི་རྣམ་པར་རྟོག་པ་དང་བྲལ་བའོ། །འདི་སྐད་སྟོན་ཏེ། བག་ཆགས་ཐམས་ཅད་རྩད་ནས་འདོན་པའི་ཕྱིར་བསོད་ནམས་ཀྱང་སྡང་བར་བྱ་ན་གཞན་དག་ལྷ་ཅི་སྨོས། །ད་ནི་དེ་ལྟར་བསྟན་པ་འདི་བཅོམ་ལྡན་འདས་ཀྱིས་གསུངས་པ་ཡིན་ནོ་ཞེས་སོམ་ཉི་དང་བྲལ་བའི་བསམ་པས་རབ་ཏུ་འཇུག་པར་བྱའོ་ཞེས་བསྟན་པའི་ཕྱིར། དེའི་ཕྱིར་ཞེས་བྱ་བ་ལ་སོགས་པ་གསུངས་ཏེ། ཇི་སྐད་དུ་བཤད་པའི་ལུང་གི་ཆོས་ལ་གོམས་པའི་རྒྱུད་ཀྱིས་ཟབ་མོའི་ཆོས་རྣམ་པར་འཕེལ་བར་བྱའོ། །ལས་ཀྱི་རིམ་པ་རྒྱས་པ་བསྟན་པ་ནི་འདིར་མ་གསུངས་སོ། །ཞི་བའི་ཐབ་ཁུང་ནི་ཁྲུ་གང་ཙམ་ཤིན་ཏུ་མཛེས་བ་ཟླུམ་པོར་བྱས་པ་དེའི་འོག་སོར་བཅུ་གཉིས་བརྐོ་ཞིང་མཐའ་ཀུན་དུ་སོར་བཞི་ཡོངས་སུ་དོར་བ། ཁ་ཁྱེར་སོར་བཞི་པ་ངོས་ཤིན་ཏུ་མཉམ་པར་བྱའོ། །མཚམས་སུ་ནི་རྡོ་རྗེའོ། །དེའི་དབུས་སུ་ནི་པདྨའི་སྟེང་དུ་འཁོར་ལོའི་ཚད་སོར་བརྒྱད་པ་དབངས་སུ་སོར་གཅིག་པ་གཞག་གོ །ཐབ་ཁུང་ལས་དཀར་གྱིས་བྱུགས་ཤིང་མཐའ་ཀུན་དུ་ཁྲུ་གང་ཙམ་གྱིས་གཞི་སྐྱོང་ནུལ་བྱ་ཞིང་ཡང་བའི་ལྕི་བས་བྱུག་པར་བྱའོ། །དེ་ནས་ཙནྡན་དཀར་པོ་དང་མེ་ཏོག་དཀར་པོ་དྲི་ཞིམ་པའི་སེལ་མ་གཏོར་ལ་ཐུག་གསུམ་དུ་བྱ་སྟེ། འདི་ནི་ཐབ་ཁུང་གི་མཚན་ཉིད་དོ། །དགང་གཟར་དང་བླུགས་གཟར་ནི་སེང་ལྡེང་ལ་སོགས་པའི་རྒྱུ་ལས་བྱ་སྟེ། ཡུ་བའི་ཚད་ནི་སྐྱེས་བུ་ཚད་དང་ལྡན་པའི་མཐེབ་སོར་ཉི་ཤུ་རྩ་བཞི་པའོ། །དེའི་ཕྱི་རོལ་དུ་སྟེང་གི་ཆལ་ཟུར་བཞི་སོར་བཞིའི་ཚད་ལ་འོག་ཏུ་ཟབས་སུ་སོར་གཉིས་བ་རྐོ་ཞིང་ཁུ་བ་འཛག་པའི་བུ་ག་ཟླུམ་པོ་མཐེའུ་ཆུང་གི་ཚད་ཙམ་ལ་དེའི་དབུས་སུ་དེ་དང་རྗེས་སུ་འཚམ་པའི་འཁོར་ལོ། དེའི་རྩེ་མོའི་ཆར་སོར་བརྒྱད་པའི་ཚད་དམ་པདྨའི་འདབ་མ་འདྲ་བ་བྱའོ། །ཡུ་པའི་འོག་གི་ཆར་ནི་རྡོ་རྗེ་དང་རིན་པོ་ཆེར་བྱས་ལ་ཡུ་བ་དེ་བཞིན་གཤེགས་པའི་ཁུ་ཚུར་གྱིས་གཟུང་བར་བྱ་སྟེ། འདི་ནི་བླུགས་གཟར་གྱི་མཚན་ཉིད་དོ། །དགང་གཟར་ནི་ཁྲུ་གང་གི་ཚད་ལ་དེའི་ཁ་པདྨའི་འདབ་མ་འདྲ་བ་ལས་སོར་གཉིས་པའི་ཚད་སོར་གཅིག་བརྐོས་པའི་དབུས་སུ་ནི་འཁོར་ལོ་བྱའོ། །ཡུ་བའི་འོག་
གི་ཆར་རྡོ་རྗེ་རིན་པོ་ཆེ་བྱ་བ་ནི་སྔ་མ་བཞིན་ཏེ་འདི་ནི་དགང་གཟར་གྱི་མཚན་ཉིད་དོ། །བུད་ཤིང་གི་དོན་དུ་ནི་དགོན་པའི་བ་ལང་གི་ལྕི་བ་བཟང་པོ་དང༌། དེ་བཞིན་དུ་ཤ་ལི་དང་ཤིང་དྲི་ཞིམ་པོ་དག་ཀྱང་ཞི་བའི་ལས་ལ་བུད་ཤིང་ཡིན་ནོ། །རྫས་ནི་བའི་འོ་མ་དང་ཞོ་དང་འབྲས་ཡོས་དང་ཏིལ་དང་དཱུར་བ་དང་ཀུ་ཤ་སྔོན་པོ་དང༌། པྲི་ཡང་ཀུའི་མེ་ཏོག་དང༌། འབྲས་སཱ་ལུའི་ཆན་དང༌། མེ་ཏོག་དཀར་པོ་དང༌། ནཱ་ག་གེ་སར་དང༌། ཐང་ཆུ་དྲི་ཞི་མ་པ་དང༌། སྦྲང་རྩི་དང༌། འབྲས་དང༌། ཞོ་ལ་སོགས་པ་ཇི་སྙེད་པའམ། ཡང་ན་མཆོད་སྦྱིན་གྱི་རྫས་རྣམས་ཀྱིས་སྲེག་བླུགས་བྱའོ། །ཡམ་ཤིང་ནི་ལོ་མ་དང་བཅས་ཤིང་རླན་དང་བཅས་པ། རྩེ་མོ་ལས་སྐྱེས་པ་མཐོ་གང་ཙམ་ལ་སྦྲང་རྩི་དང་འོ་མ་དང་མར་ལ་བཏགས་ཤིང་ཙནྡན་དཀར་པོའི་ཆུས་ཡོངས་སུ་བསྒོས་པའོ། །ཡང་ཡམ་ཤིང་གི་མཚན་ཉིད་ནི། པ་ལ་ཤ་དང་ཨུ་དུ་མྺཱ་ར། །བླ་ག་ཤ་དང་ནི་ནྱ་གྲོ་དྷ། །ཨ་རྐ་དང་ནི་སེང་ལྡེང་དང༌། །ཨ་མྲ་བེ་ཀཾ་ཀ་དང་ནི། །ཀ་སྨ་རི་དང་ཤ་མི་དང༌། །ཨ་བ་མརྒད་ལས་བྱུང་བ། །ཨ་ཤྭ་ཏྠ་དད་བཅས་པ་ནི། །ཡམ་ཤིང་བཅུ་གཉིས་དག་ཏུ་བསྟན། །སར་པ་ལས་ནི་མཛུབ་གང་ཙམ། །ལས་རྣམས་ཀུན་ལ་དབུལ་བར་བྱ། །བཟང་ཞིང་སར་ལ་དྲང་བ་དང༌། །དྲི་ཞིམ་ཆུ་ཡིས་བཀྲུས་པ་དང༌། །ཞི་བའི་སྲེག་རྫས་གང་ཅུང་ཟད། །དེ་བཞིན་རྒྱས་པའི་སྲེག་རྫས་དང༌། །གང་ཡང་བདག་གི་ཁ་ཟས་དག །ལས་རྣམས་ཀུན་ལ་དབུལ་བར་བྱ། །ཞི་བ་ལ་ནི་མངར་བ་དང༌། །མེ་ཏོག་དྲི་བཟང་དཀར་པོ་ཤིས། །དེ་བས་ལས་དེ་བྱེད་པ་ཡི། །མདོར་ན་དེ་ཡི་དབང་དུ་བྱ། །ཏི་ལ་ཀ་དང་ཀུ་ཏ་ཛ་དང༌། །ཀར་ནི་པ་ལ་སོ་མ་དང༌། །བིལ་པའི་མེ་ཏོག་ཀ་རྙྫ། །ཐམས་ཅད་ལས་ནི་ཐམས་ཅད་པ། །བུ་རམ་ཐང་ཆུ་བསྲེས་པ་དང༌། །རི་ལུ་བཟང་པོ་བྱ་བ་ནི། །རྫོགས་སངས་འཇིག་རྟེན་འདྲེན་པ་ཡིས། །ཞི་བ་ཡི་ནི་ལས་ལ་གསུངས། །ཏུ་རུ་སྐ་དང་ཨ་ག་རུ། །ག་པུ་ར་ཙནྡན་བུ་ར་མ་དང༌། །ཐང་ཆུ་དང་ནི་ཞོ་དག་ནི། །ལས་རྣམས་ཀུན་ལ་འཇུག་པ་ཡིན། །དྲི་ཞིམ་ཤིང་སྐྱེས་ཐང་ཆུ་ནི། །ཞི་བ་ཡི་ནི་ལས་ལ་གྲགས། །མངར་བ་མཆོག་ཏུ་བཤད་པ་ན། །སེར་སྐྱ་ལས་རྣམས་ཐམས་ཅད་ལའོ། །དྲི་ཡི་རྫས་ནི་ཡིད་འོང་དང༌། །དཀར་
པོ་ཞི་བའི་ལས་ལ་གསུངས། །ཁྱད་པར་ན་ནི་ཨ་ག་རུ། །ནག་པོ་ལས་རྣམས་ཀུན་ལ་བསྔགས། །སྭ་སྟིའི་ཐུག་པ་འབྲས་ཡོས་དང༌། །མར་དང་སྦྲང་རྩི་ནས་འོ་ཐུག །བི་ཛ་པཱུ་ར་དེ་དག་རྣམས། །ངེས་པར་ཞི་བའི་ལྷ་བཤོས་སོ། །སྭ་སྟེ་ཀ་དང་ཨུ་ལོ་པི། །བཟང་པོ་ཅི་འབྱོར་བུ་རམ་ཅན། །ལག་པན་རྩ་བ་འབྲས་བུ་ཅན། །འོ་ཐུག་དག་ནི་འདོད་པ་སྟེ། །དེ་ནི་ཐམས་ཅད་འདོད་ཅེས་བྱ། །ལྷ་བཤོས་དོན་གྲུབ་བྱེད་པའོ། །དེ་ལྟ་བུ་འམ་ཡོན་ཏན་ཐམས་ཅད་དང་ལྡན་པས་ཞི་པའི་ལས་བྱེད་པར་འདོད་ན་ཕྱིའི་ཁྲུས་བྱའོ། །ཁྲུས་བྱ་བའི་ཆོ་གས་ཁྲུས་བྱ་བའམ་ནང་གི་ཁྲུས་བྱས་ལ་ཇི་ལྟ་བ་བཞིན་དུ་སྦྱིན་སྲེག་གི་ཁང་པར་རབ་ཏུ་ཞུགས་ཏེ་བསང་བ་ལ་སོགས་པ་དང༌། ཕྱོགས་བཅིང་བ་ལ་སོགས་པ་གནས་བརྟན་པར་བྱས་པའི་བར་གྱི་ཆོ་ག་བྱས་ཏེ་སྦྱིན་སྲེག་གི་ཡོ་བྱད་ཐམས་ཅད་རྡོ་རྗེ་རྩེ་མོ་བཟླས་པའི་ཆུས་ཡོངས་སུ་བསངས་ལ། བདུད་རྩི་ཐབ་སྦྱོར་གྱིས་ཀྱང་ཡོངས་སུ་བཟླས་ཏེ་གཡས་ཕྱོགས་སུ་གཞག་གོ །བསང་གཏོར་གྱི་ཆུ་སྣོད་ལ་བདུད་རྩི་ཐབ་སྦྱོར་གྱི་ཡོངས་སུ་བཟླས་ནས་གཞག་གོ །མཆོད་ཡོན་གྱི་སྣོད་ཀྱང་སྔ་མ་བཞིན་དུ་མངོན་པར་འདུས་བྱས་ལ་དུད་རྩི་ཐབ་སྦྱོར་གྱིས་མངོན་པར་བསྔགས་ཤིང་རིགས་ཀྱི་སྙིང་པོ་དང་རིགས་ཀྱི་རིག་པ་དག་ཡོངས་སུ་བཟླས་ལ་གཡོན་ཕྱོགས་སུ་གཞག་གོ །དེ་ནས་གོས་དཀར་པོ་བགོས་ཤིང་ཤིན་ཏུ་གཙང་བས། རི་རབ་རི་ཡི་བྲག་འདྲ་བར། །འཛུམ་པ་མེད་པ་ཡི་ནི་མིག །བྱམས་པའི་ལྟ་བ་ཡིན་པར་བཤད། །ནད་དང་གནོད་པ་དུག་སེལ་ལོ། །ཞེས་བྱ་བ་བྱམས་པའི་ལྟ་བས་ཤར་རམ་བྱང་དུ་བལྟས་ཏེ་ཀུ་ཤའི་ཆུན་པོ་དང་པདྨའི་གདན་གྱིས་འདུག་ནས། ཇི་ལྟ་བ་བཞིན་དུ་ལྷའི་རྣལ་འབྱོར་བྱས་པའི་ཆོ་ག་ཇི་ལྟ་བ་བཞིན་བྱས་ནས། དེའི་ཆོས་དང་དམ་ཚིག་བཟུང་ལ་དེ་བཞིན་དུ་ཁང་པ་བརྩེགས་མ་བསམས་ཏེ། གཅིག་པུར་ཞུགས་ལ་སྤོས་ཀྱིས་བྱུག་པ་དང༌། བོ་དེ་ཙེ་གཅིག་གིས་དབུས་སུ་མཚན་མའི་གདུ་བུ་ལ་སངས་རྒྱས་སྤྱན་གྱི་རིག་པ་བརྒྱ་རྩ་བརྒྱད་ཡོངས་སུ་བཟླས་ཏེ་ལག་པ་གཡས་པའི་མཁྲིག་མར་བཅིང་ངོ༌། །དེའི་ལག་པའི་སྲིན་ལག་གི་སོར་མོ་ལ་རྣམ་པར་སྣང་མཛད་ཀྱི་སྙིང་པོ། དེ་བཞིན་དུ་བཟླས་པའི་བསང་བྱེད་ཀྱང་གདགས་པར་བྱའོ། །དེ་ནས་
ཀུ་ཤའི་གསང་སྔགས་བཟླས་ནས་དགོད་པར་བྱ་སྟེ་སྔགས་པ་མཉམ་པར་བཞག་ནས་ཞི་བའི་ལས་རྣམས་རབ་ཏུ་བསྒྲུབ་པའི་ཕྱིར། དང་པོ་ཤར་དུ་རྩེ་བསྟན་དགྲ་མ། །གཉིས་པ་ལྷོ་ཕྱོགས་ཁ་བལྟས་ལ། །གསུམ་པའི་རྩེ་མོ་ནུབ་བྱང་དུའོ། །དེ་ནས་ཐབ་ཁུད་ཀུ་ཤའི་རྩེ་མོ་གྱེན་དུ་བལྟ་བ་མཐུག་པས་བཀབ་ལ་ལས་དང་རྗེས་སུ་མཐུན་པའི་མེ་ཏོག་གིས་ཀུན་དུ་ཉེ་བར་མཛེས་པར་བྱའོ། །ཨོཾ་བཛྲ་སཏྭ་ཨ་ཞེས་བྱ་བ་ནི་ཀུ་ཤ་ལ་གདབ་པའི་སྔགས་སོ། །དེ་ནས་ཡི་གེ་ཨོཾ་དང་སྭཱ་ཧཱའི་མཐར་ཐུག་པ་ལས་ཐབ་ཁུང་བྱུང་བར་བསམས་ལ། མངར་ཞིང་འོ་མ་ཅན་གྱི་ཤིང་ལས་བྱུང་བའི་རྒྱུན་བཞག་གི་མེའམ། དགེ་འདུན་གྱིའམ། ཚང་བང་ཆེན་པོའི་མེ་ལས་སྦྱིན་སྲེག་གི་མེ་བླངས་ལ། ཨོཾ་བཛྲ་ཨ་མྲི་ཏེ་ཧཱུཾ་ཕཊ་ཅས་བྱ་བས་ཇི་ལྟ་བ་བཞིན་བསང་ཞིང་སྦྱངས་ནས་དེའི་གསང་སྔགས་བརྗོད་ནས་ཐབ་ཁུང་དུ་བཅུག་སྟེ། སྔར་བཤད་པའི་ཡམ་ཤིང་གི་རླུང་ཡབ་ཀྱིས་རླུང་དང༌། ཇི་སྐད་དུ་བདག་པོའི་གསང་སྔགས་ཀྱིས་མེའི་ཕྱོགས་སུ་མངོན་པར་རང་གིས་ཕྱོགས་ནས་རྡོ་རྗེ་མེ་ཇི་སྐད་དུ་བཤད་པའི་གཟུགས་ཅན་དྲང་སྲོང་རྣམས་ཀྱིས་ཡོངས་སུ་བསྐོར་བ་མདོག་དཀར་པོ་སྤྱན་དྲངས་ལ་ཐབ་ཁུང་གི་དབུས་སུ་ཉེ་བར་བཞུགས་པར་བསམ་མོ། །དེ་ནས་མཆོད་ཡོན་དང་ཞབས་བསིལ་དང་འཐོར་འཐུང་ཕུལ་ནས་དེ་ཉིད་ཀྱི་ཕྱག་རྒྱ་ཆེན་པོ་ལ་དམིགས་ཏེ། ཨོཾ་ཨགྣ་ཡེ་ཧ་བྱ་ཀ་བྱ་ཧ་ཎ་ཡཱ་དི་པྱཱ་དི་པ་མཱ་སྭཱ་ཧཱ་ཞེས་བརྗོད་དོ། །ལག་པ་གཡས་པ་བཏེག་ནས་ནི། །འབར་བའི་ཚུལ་དུ་བསྟན་པ་དག །རྡོ་རྗེ་མེ་ཡི་ཕྱག་རྒྱ་འདི། །རང་གི་ཡིན་པར་ཡོངས་སུ་བརྟག །ཆོས་ཀྱི་ཚེ་ག་ཤེས་པ་ཡི། །སྔགས་པས་ལྕེ་ལ་ཟླ་བ་དང༌། །དེ་སྟེང་རྡོ་རྗེ་དཀར་པོ་བསམ། །ཧཱུཾ་ནི་དབུས་སུ་བསམ་པར་བྱ། །ལག་པ་གཡས་དང་གཡོན་དག་གིས། །གར་གྱི་ཚུལ་གྱིས་བྲག་པ་དག །འདིར་ནི་ལས་ཀྱི་རྒྱར་གྲགས་ཏེ། །སྔགས་པར་ལས་ཀྱི་དངོས་གྲུབ་སྟེར། །དེ་ནས་ཕྱག་རྒྱ་ཆེན་པོ་ཇི་ལྟ་བཞིན་དུ་བཅིངས་ནས། ཨོཾ་བཛྲ་བནྡྷ་ཧཾ་ཞེས་བརྗོད་དོ། །རྡོ་རྗེ་སྲུང་བ་དམ་བཅིངས་ནས། །རྡོ་རྗེ་བཅིངས་པ་བཙིར་བ་དག །འདི་ནི་སྲུང་བའི་དམ་ཚིག་སྟེ། །སེམས་ཅན་ཐམས་ཅད་བསྲུང་བའོ། །ཞེས་བྱ་བས་དམ་ཚིག་བསྒོ་བར་བྱའོ། །
དེ་ནས་མཆོད་ཡོན་ཕུལ་པ་རང་གི་གསང་སྔགས་ཀྱིས་མེ་ཏོག་ལ་སོགས་པས་མཆོད་དོ། །དེ་ནས་གཡོན་པའི་དེ་བཞིན་གཤེགས་པའི་ཁུ་ཚུར་གྱིས་བླུགས་གཟར་བཟུང་ལ་གཡས་པས་དགད་གཟར་བཟུང་ནས། དེས་མར་བླངས་ལ་རིམ་གྱིས་ཡོངས་སུ་བཀང་སྟེ། མེ་ལྷའི་གསང་སྔགས་བརྗོད་ཅིང་དེས་དགང་བླུགས་གསུམ་མམ་མཁས་པས་གུས་པ་དང་བཅས་པས་དབུལ་ལོ། །ཡོ་བྱད་ཅན་ཐམས་ཅད་ལས་ཀྱང་སྲེག་བླུགས་གསུམ་གསུམ་དབུལ་ལོ། །དེ་ནས་བློ་དང་ལྡན་པས་བགེགས་མེད་པ་དང་བགེགས་དང་བཅས་པ་ཡང་དག་པར་བརྟགས་ནས་བགེགས་དང་བཅས་པ་ལ་རྡོ་རྗེ་གནོད་སྦྱིན་གྱིས་བགེགས་ཟ་བ་དག་བྱས་ལ། དེ་ནས་མཁས་པས་བདུད་རྩི་ཐབ་སྦྱོར་གྱི་གསང་སྔགས་ཀྱིས་ཁང་བ་དེ་བསང་གཏོར་བྱའོ། །དེ་ནས་སྤོས་དང་མེ་ཏོག་ལ་སོགས་པས་ཡང་དག་པར་མཆོད་པའི་དོན་ཇི་ལྟ་བ་བཞིན་དུ་བྱས་ལ་གཡས་ནས་བསྐོར་ཞིང་བསང་གཏོར་བྱའོ། །ཡང་རང་གི་རིག་པས་མར་ལ་སོགས་པ་མཁས་པས་སྦྱིན་བླུགས་གསུམ་དབུལ་ལོ། །དེ་ནས་སླར་ཡང་ལེགས་པར་བསང་གཏོར་དང་འཐོར་འཐུང་ཡང་དང་ཡང་བྱའོ། །དེ་ནས་མེ་འབར་བའི་རྣམ་པར་བསམས་ལ་སྦྱིན་སྲེག་གི་གནས་སུ་གཞག་གོ ། དེ་ནས་ཐབ་ཀྱི་དབུས་སུ་པདྨ་དེ་ཡང་ཟླ་བའི་དཀྱིལ་འཁོར་དེའི་སྟེང་དུ་རང་གི་སྔགས་སྭཱ་ཧཱའི་མཐར་ཐུག་པས་རྣམ་པར་སྣང་མཛད་སྐུ་མདོག་དཀར་པོ་ཐུགས་ཞི་བའི་བདག་ཉིད་ཅན་ན་བཟའ་དཀར་པོ་བསྣམས་པ། དབང་པོ་ཞི་བའི་རང་གི་དམ་ཚིག་གི་ཕྱག་རྒྱ་དང་བཅས་པ་ལ་དཀྱིལ་འཁོར་གྱི་ལྷ་རྣམས་ཀྱིས་ཡོངས་སུ་བསྐོར་བའམ། གསང་བ་ལྔའི་དེ་ཁོ་ན་ཉིད་ཆེན་པོའི་ཚུལ་ཇི་ལྟ་བ་བཞིན་དུ་བློས་བསམས་ལ། སྒོ་ཕྱེ་སྟེ་བསྡུ་བ་བྱས་ནས་མཚན་བརྒྱ་རྩ་བརྒྱད་ཀྱིས་བསྟོད་ལ་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱ་བ་བྱས་ནས། རྡོ་རྗེ་གནོད་སྦྱིན་གྱིས་བགེགས་བསལ་ལ། ཕྱོགས་དང་མཚམས་དང་དཀྱིལ་འཁོར་བཅིང་བ་དང་དྲ་བ་དང་རབ་བྱས་ལ། རྡོ་རྗེ་སྲུང་བས་བསྲུང་བྱ་ཐམས་ཅད་ཡང་དག་པར་བསྲུངས་ལ། རྡོ་རྗེ་ཁུ་ཚུར་གྱིས་སྒོ་བཅད་དེ་མཆོད་ཡོན་ཕུལ་ནས་ཕྱག་རྒྱ་བཞིས་རྒྱས་བཏབ་ལ་དབང་བསྐུར་ནས་
ཡང་མཆོད་ཡོན་ཕུལ་ཏེ། དེ་ཁོ་ན་ཉིད་ཀྱི་བསྐུལ་བས་ཡང་དག་པར་བསྐུལ་ལ། དེ་ཉིད་ལ་ཕྱི་དང་གསང་བའི་མཆོད་པ་བྱས་ཏེ་རྡོ་རྗེ་གླུས་ཡང་དག་པར་བསྟོད་ནས་བདེ་བའི་བདག་ཉིད་དུ་བསམས་ལ། བསླང་བ་ལ་སོགས་པ་བྱས་ནས་རང་གི་སྙིང་གར་ཡང་དག་པར་བཅུག་སྟེ་དེའི་གསང་སྔགས་བརྒྱ་རྩ་བརྒྱད་ཡོངས་སུ་བཟླས་ནས་ཕྱིར་ཕྱུང་ལ་དེ་ཉིད་དུ་བཞག་སྟེ་བརྟན་པར་བྱས་ལ་ཡང་དག་པར་མཉེས་པར་བྱའོ། །བཟླས་བརྗོད་ལ་ཇི་ལྟ་བ་དང༌། དཀྱིལ་འཁོར་ལ་ཇི་ལྟ་བ་དེ་བཞིན་དུ་སྦྱིན་སྲེག་བསྒོམ་པ་འདི་ལ་སོམ་ཉི་མི་བྱའོ། །བཟླས་པ་ན་འབར་བའི་དཀྱིལ་འཁོར་རམ་ཡང་དག་པ་ཇི་ལྟ་བ་བཞིན་དུ་བསྒྲུབས་ནས་མཐེ་བོང་དང་སྲིན་ལག་དག་གིས་མེ་ཏོག་གཅིག་བཟུང་ནས་དེ་ཉིད་དུ་ཡང་དག་པར་གཞག་པར་བྱའོ། །དེ་ནས་མཆོད་ཡོན་དང་འཐོར་འཐུང་དང་ཞབས་བསིལ་བ་དང་བསང་གཏོར་དག་བྱས་ནས་མེ་ཏོག་ལ་སོགས་པ་དག་གིས་ཡང་དག་པར་མཆོད་པར་བྱའོ། །ཐོག་མར་སྟོན་པ་མཐུ་ཆེན་དང༌། །ཤེས་རབ་ཕ་རོལ་ཕྱིན་མ་དང༌། །ཉན་ཐོས་འདོད་ཆགས་བྲལ་རྣམས་དང༌། །བྱང་ཆུབ་སེམས་དཔའ་རྣམས་ལ་མཆོད། །བྱམས་མ་དེ་བཞིན་གཤེགས་མཛོད་ཡུམ། །རིག་སྔགས་གཞན་གྱིས་མི་ཐུབ་དང༌། །དགའ་བོ་ཞེས་བྱ་ཀླུ་རྒྱལ་གཉིས། །གནས་གཙང་རིགས་ཀྱི་ལྷ་རྣམས་དང༌། །འདི་དག་ལས་ལ་དགོད་བྱ་ཞིང༌། །ཞི་ལ་རྟག་ཏུ་མཆོད་པར་བྱ། །བྱུག་སྤོས་མེ་ཏོག་ལ་སོགས་པ། །ལེགས་པར་བཞག་ནས་ལས་རྣམས་བྱ། །ཡང་མཆོད་ཡོན་ཕུལ་ལ་འཐོར་འཐུང་དང་བསང་གཏོར་བྱས་ཏེ། སྔ་མ་བཞིན་དུ་བླུགས་གཟར་མར་གྱིས་བཀང་ལ། དེའི་སྟེང་དུ་དགང་གཟར་ཁ་སྦུབས་ཏེ་བཞག་ནས། བཅོམ་ལྡན་འདས་མངོན་སུམ་བཞིན་བལྟས་ལ་དེའི་ལྗགས་ལ་ཡི་གེ་ཧཱུཾ་བཀོད་དེ། ཨོཾ་ཛི་ན་ཛི་ཀ་ཅེས་བརྗོད་ནས་སྲེག་བླུགས་གསུམ་གསུམ་དབུལ་ཏེ། དགང་བླུགས་དབུལ་བ་ཐམས་ཅད་ལ་ཡང་པུས་མོའི་བར་དུ་ལག་པ་བཅུག་སྟེ་བྱའོ། །དེ་ནས་གཡོན་ངོས་སུ་བསྒྲུབ་པར་བྱ་བ་བཞག་པའམ། བསམས་ལ་དེའི་དུས་ཐམས་ཅད་དུ་བསགས་པའི་སྡིག་པ་ལྟེ་བར་གནས་པ་ལ་ཡི་གེ་ཧཱུཾ་གི་འབར་བས་
ཕྱུང་ལ་དུམ་བུ་བརྒྱར་བྱས་ཏེ་ཏིལ་དུ་ཡོངས་སུ་བརྟགས་ལ། ཨོཾ་སརྦ་པཱ་པཾ་ད་ཧ་ན་བཛྲཱ་ཡ། ལྷ་སྦྱིན་གྱི་སརྦ་པཱ་པཾ་བྷསྨི་ཀུ་རུ་སྭཱ་ཧཱ། ཞེས་བརྗོད་ལ་ལག་པ་གཡས་པའི་མཐེ་བོ་དང་སྲིན་ལག་གི་བར་ནས་ཏིལ་གྱི་སྦྱིན་སྲེག་བརྒྱ་རྩ་བརྒྱད་བྱའོ། །དེ་ནས་ཡང་མཆོད་ཡོན་ཕུལ་བ་དེ་བཞིན་དུ་དགང་བླུགས་གསུམ་ཕུལ་ཏེ། ཨོཾ་ཛི་ན་ཛི་ཀ་ལྷ་སྦྱིན་གྱི་ཤཱནྟི་ཀུཾ་རུ་སྭཱ་ཧཱ་ཞེས་ཇི་སྐད་དུ་བཤད་པའི་ཡམ་ཤིང་དབུལ་ཏེ་དེ་ལ་ནི་ངེས་པ་མེད་དོ། །དེ་ནས་དགང་གཟར་གྱིས་མར་ལ་སོགས་པ་ཁུ་བའི་རྫས་ཐམས་ཅད་བསྒྲུབ་པར་བྱ་པའི་ལག་པ་གཡས་པ་གཡོན་པས་བཟུང་ལ་སྲེག་བླུགས་བརྒྱ་དབུལ་ལོ། །དགང་གཟར་ཕུལ་འོག་ཏུ་དགང་གཟར་གྱི་རྩེ་མོ་དང་སྭཱ་ཧཱ་སྭཱ་ཧཱ་ཞེས་བྱ་བས་འགེངས་ཏེ་དེས་དེའི་མགོ་ལ་འོད་ཟེར་དཀར་པོ་འབར་བ་འབབ་པའི་རྣམ་པ་བྱ་བའམ། ལྷའི་སྐུ་ལ་སྐུ་དཔག་ཏུ་མེད་པ་འཛིན་པ་རྣམ་པར་ཕྱུང་ལ་དེའི་མགོ་ལ་འབབ་པས་དེ་རྣམས་ཀྱི་རིམས་ལ་སོགས་པ་ཐམས་ཅད་དང་བྲལ་ཞིང་ཤེལ་སྒང་དག་པ་ལྟ་བུར་བྱ་བར་རྣམ་པར་བསམ་མོ། །དེ་ནས་ཏིལ་ལ་སོགས་པ་དང༌། དེ་ནས་བཟའ་བ་རྣམས་དབུལ་བར་བྱ་སྟེ་འདིར་ཡང༌། དེ་ནས་ཡམ་ཤིང་རྗེས་སུ་དབུལ། །ཡམ་ཤིང་འོག་ཏུ་མར་དབུལ་ཞིང༌། །དེ་ནས་ཏིལ་དང་འབྲས་ཆན་རྣམས། །ཆོ་ག་འདི་ནི་མདོར་བསྡུས་པའོ། །ཞེས་གསུངས་པ་ནི། ཞུ་བའི་རྫས་ཐམས་ཅད་ནི་ཞལ་ཅུང་ཟད་གདངས་པར་བསམས་ཏེ་དབུལ་ལོ། །ཡམ་ཤིང་ནི་འོད་ཀྱི་དཀྱིལ་འཁོར་དུའོ། །ཞོ་དང་འབྲས་ཆན་དང་བཟའ་བ་ལ་སོགས་པ་དག་ནི་ཕྱག་ཏུའོ། །མེ་ཏོག་ནི་དབུ་ལའོ། །དྲི་ནི་ཐུགས་ཀར་རོ། །སྤོས་ནི་འོད་ཀྱི་རྩེ་མོར་རོ། །མར་མེ་ནི་འོད་ཀྱི་དཀྱིལ་འཁོར་ལ་དབུལ་ལོ། །ལ་ལ་ན་རེ་རྫས་ཐམས་ཅད་ཀྱང་ཞལ་དུ་དབུལ་ལོ་ཞེས་ཟེར་རོ། །དགང་བླུགས་དབུལ་པའི་འོག་ཏུ་འབར་བའི་མཚན་མ་རྣམས་རྟོགས་པར་བྱ་བ་བརྩམ་པར་བྱ་སྟེ། དེ་ནས། དགང་བླུགས་བུལ་ནས་རབ་འབར་བའི། །མཁས་པས་འབར་བའི་མཚན་མ་ལས། །ལས་ཀྱི་དངོས་གྲུབ་མཚན་མ་ནི། །དེ་ཡིས་ངེས་པར་སྐྱེ་བར་འགྱུར། །འཇའ་དང་འདྲ་ཞིང་མདོག་སྡུག་དང༌། །བྱི་རུ་བཅག་པ་ལྟ་བུ་དང༌། །གཡས་སུ་འཁོར་ཞིང་ཤིན་ཏུ་སྣུམ། །ཨིནྡྲ་བཀོད་པའི་འོད་འདྲ་དང༌། །
ལེ་བརྒན་རྩི་དང་བཻ་ཌཱུཪྻའི། །མདོག་འདྲ་དབྱིབས་ནི་བླུགས་གཟར་དང༌། །མདུད་རྩེ་གསུམ་དང་རྡོ་རྗེ་དང༌། །དཔལ་བེའུ་ཉ་དང་པདྨ་དུང༌། །རྔ་ཡབ་གདུགས་དང་རྒྱལ་མཚན་དང༌། །བུམ་པ་གཡུང་དྲུང་འདྲ་བྱུང་དང༌། །གླིང་བུ་རྫ་རྔ་ལྟར་ཟབ་དང༌། །ཡིད་འོང་དྲི་ནི་ཞིམ་པ་དང༌། །གཟུགས་ནི་དཀར་ཞིང་དུ་བ་མེད། །ཉི་མ་ལྟར་འབར་དུ་བ་མེད། །གཡས་སུ་བསྐོར་ཞིང་འབར་བ་དང༌། །ཤིན་ཏུ་འབར་ཞིང་འབར་བ་སླ། །ཞི་ལ་ཁ་དོག་སེར་པོ་ནི། །ལྷ་རྣམས་ཀུན་གྱིས་རབ་ཏུ་བསྔགས། །རྡོ་རྗེ་ཞི་ཞིང་དེ་བཞིན་དུ། །བསྒྲུབ་བྱ་རྗེས་སུ་འཛིན་ལ་བརྩོན། །གཞན་ཡང་རྩེ་གཅིག་འབར་བ་དམ་པ་སྟེ། །རྩེ་གཉིས་པ་ནི་འབྲིད་དུ་བཤད། །རྩེ་གསུམ་པ་ནི་ཐ་ཆད་དེ། །དེ་དག་གིས་ནི་དངོས་གྲུབ་སྟེར། །དེ་ལྟར་མཚན་མ་བརྟགས་ནས་ནི། །དྲི་མ་མེད་ཅིང་བགེགས་བྲལ་བ། །སྒྲུབ་པ་པོས་ནི་འབད་གྱུར་པས། །སྒྲུབ་པ་ཉེ་བར་བརྩམ་པར་བྱ། །དེ་ནས་བཟློག་ནས་གཞན་དག་ནི། །དྲི་མ་ཅན་དང་བདུགས་པ་དང༌། །མེ་ནི་ལས་དང་མི་མཐུན་དང༌། །དུ་བ་མང་ཞིང་འཕྲོ་བ་དང༌། །འབར་པར་དཀའ་ཞིང་ཅུང་ཟད་འབར། །མེ་ལྕེ་རྣམ་པར་ཆད་པ་དང༌། །གཟི་བརྗིད་དག་ཀྱང་རྩུབ་པ་དང༌། །གནག་ཅིང་པ་ལ་ཤ་ཡི་མདོག །མདུང་དང་དེ་བཞིན་ཞིབ་མ་དང༌། །དེ་བཞིན་བ་ལང་མགོ་དང་ནི། །མི་རོའི་དྲི་དང་དྲི་མི་ཞིམ། །བོང་བུའི་དྲི་དང་དྲི་མི་ཞིམ། །སྦྱིན་སྲེག་བྱེད་པ་འབར་བས་གདུངས། །མེ་ལྕེ་རྣམ་པར་རྒོད་པ་དང༌། །བགེགས་དང་བཅས་པའི་མེ་རྣམས་ནི། །རྒོད་ཅིང་གཟུགས་ནི་འཇིགས་བག་ཅན། །དེ་ལྟ་བུ་ནི་བགེགས་དང་བཅས་པར་ཤེས་ནས་མེ་དང་ལྷའི་ཁང་པ་བསངས་ནས་རྡོ་རྗེ་གནོད་སྦྱིན་གྱི་ཕྱག་རྒྱ་དང་སྔགས་སུ་བཅས་པས་རྣམ་པར་སྦྱངས་ལ། རྡོ་རྗེ་སྲུང་བས་བསྲུང་ཞིང་ཡོངས་སུ་སྐྱོང་བ་བྱས་ལ་བདུད་རྩི་ཐམ་སྦྱོར་གྱི་སྔགས་ཀྱིས་ལན་བདུན་བདུན་སྲེག་བླུགས་དབུལ་བར་བྱའོ། །དེ་ནས་དེ་བཞིན་དུ་མཆོད་ཡོན་ཕུལ་ལ་ཅི་འདོད་པའི་སྦྱིན་སྲེག་བྱའོ། །སྤྱན་ལ་སོགས་པ་རྣམས་ཀྱིས་ཀྱང་དེ་བཞིན་དུ་བསྐུལ་ཚིག་དང་རྫས་ཐམས་ཅད་ལ་དེ་བཞིན་དུ་སྲེག་བླུགས་བདུན་པ་དུན་དབུལ་ལོ། །དེ་ལྟར་ཇི་སྐད་དུ་གསུངས་པ་བཞིན་སྦྱིན་སྲེག་བྱས་ནས་མཐར་གཟི་བྱིན་བསྐྱེད་
པའི་ཕྱིར། ཡི་གེ་ཧཱུཾ་དང་རང་གི་སྔགས་བརྗོད་ནས་མར་གྱི་སྲེག་བླུགས་བདུན་དབུལ་ལོ། །དེ་ནས་མཆོད་ཡོན་ཕུལ་ལ་འཐོར་འཐུང་གི་ཕྱག་རྒྱ་དང་ལས་ཐམས་ཅད་པས་བཟླས་པའི་ཆུས་འཐོར་འཐུང་ཕུལ་ལ་བསང་གཏོར་བྱས་ནས་ཕྱི་དང་གསང་བའི་མཆོད་པ་རྣམས་ཀྱིས་ཡང་དག་པར་མཆོད་ལ་ལེགས་པར་བསྟོད་དེ་ཕྱག་བྱས་ནས་མཆོད་ཡོན་ཕུལ་ལ་མེ་ཏོག་དང་བཅས་པའི་ཐལ་མོ་སྦྱར་ཏེ། བཅོམ་ལྡན་འདས་ལ་བཏུད་ནས། །གང་ཡང་བདག་བློ་གཏི་མུག་པས། །ལེགས་སྤྱད་འདི་ལ་ཉེས་བྱས་གང༌། །གང་ཕྱིར་ལུས་ཅན་སྐྱབས་གྱུར་པས། །དེ་ནི་མགོན་པོས་བཟོད་པར་མཛོད། །མ་རྙེད་པ་དང་མ་ཚང་དང༌། །མགོན་པོ་ནུས་པ་མ་མཆིས་པས། །འདིར་ནི་བྱ་བ་གང་བྱས་པ། །དེ་དག་ཐམས་ཅད་བཟོད་པར་མཛོད། །ཅེས་བྱ་བ་འདིས་གསོལ་བ་གདབ་བོ། །དེ་ནས་མངོན་པར་འདོད་པའི་དངོས་གྲུབ་གསོལ་ལ་དཀྱིལ་འཁོར་དུ་བཤད་པའི་རིམ་པས་གཤེགས་སུ་གསོལ་ལོ། །དེ་ནས་སྦྱིན་སྲེག་གི་ཁང་པའམ་དཀྱིལ་འཁོར་དུ་མཆོད་ཡོན་ཕུལ་ནས་རབ་ཏུ་འཇུག་པར་བྱའོ། །དེ་ནས་མེ་ལྷ་འབར་བའི་རྣམ་པ་དང་མཐེ་བོ་དང་སྲིན་ལག་གིས་མེ་ཏོག་བླངས་ལ། ཨོཾ་ཨ་གན་ཡེ་ཧ་བྱ་ཀ་བྱ་བཱ་ཧཱ་ནཱ་ཡ་སུརྦ་བར་ཧི་ཏོ་བྷ་བ་ཞེས་བྱ་བས་བཞུགས་སུ་གསོལ་ལོ། །དེ་ནས་མཆོད་ཡོན་ཕུལ་ལ་ཉེ་རེག་དང་བསང་གཏོར་དང་འཐོར་འཐུང་བྱས་ཏེ་དགད་བླུགས་ཕུལ་ལ་སྲེག་རྫས་ཀྱི་ལྷག་མ་ཐམས་ཅད་ལས་སྲེག་བླུགས་གསུམ་ཕུལ་ལ་དེའི་འོག་ཏུ་དགང་བླུགས་གསུམ་ཕུལ་ནས་བསང་གཏོར་དང་འཐོར་འཐུང་དང་ཉེ་རེག་དང་མཆོད་ཡོན་ཕུལ་ཏེ། མེ་ཏོག་ལ་སོགས་པས་ཀྱང་མཆོད་པ་བྱས་ནས་ཨ་ཀཱ་རོ་མུ་ཁཾ་ཞེས་བྱ་བ་ལ་སོགས་པའི་སྔགས་ཀྱིས་ཕྱོགས་བཅིང་བ་ལ་སོགས་པ་བསལ་ལ། ཨོཾ་ཨགྣ་ཡེ་ཧ་བྱ་བ་ཧ་ཎ་ཡ་གཙྪ་གཙྪ་སྭཱ་ཧཱ། ཞེས་བརྗོད་ལ་སྤྱན་དྲང་བའི་ཕྱག་རྒྱ་ཉིད་ལས་མཐེ་བོས་གཤེགས་སུ་གསོལ་ལོ། །དེ་ཉིད་དུ་སྲུང་བ་བྱས་ལ་བཟླས་པའི་ཁང་པའམ་དཀྱིལ་འཁོར་དུ་ཞུགས་ལ་ལེགས་པར་མཆོད་དེ་བཟླས་པའམ་བསྒོམ་པ་ཅི་རིགས་པར་བྱས་ལ་གཤེགས་སུ་གསོལ་བ་ལ་སོགས་པ་བྱའོ། །བྱམས་པའི་དྲིན་ལ་ཉེ་བའམ། །དཀོན་མཆོག་གསུམ་ལ་གཅིག་ཏུ་གཞོལ། །སྔགས་པས་རིམ་པ་འདི་
ཡིས་ནི། །བསྒྲུབ་པར་བྱ་བའི་ཞི་བ་བྱ། །ཟླ་བ་ཡར་གྱི་ཚེས་གཅིག་ལ། །མགོ་བཙུགས་ནས་ནི་བརྩམ་པར་བྱ། །བྱེ་བྲག་ཏུ་ནི་སྲོད་ལ་སྟེ། །དེ་ནི་ཞི་བའི་ལས་ཀྱི་དུས། །གཙང་མའི་རིས་ཀྱི་ལྷ་རྣམས་ལ། །དེ་ནས་ཀུན་དུ་གཟིགས་པས་ན། །ལས་རྣམས་མྱུར་དུ་འགྲུབ་པར་འགྱུར། །དེ་བས་དེར་ནི་ཀུན་བརྩམ་མོ། །དུས་མིན་འཆི་དང་ནད་རྣམས་དང༌། །ཡམས་ཀྱི་ནད་དང་གནོད་པ་དང༌། །དེ་བཞིན་བགེགས་དང་འོག་ནད་དང༌། །ཞི་བར་བྱེད་པས་ཞི་ཞེས་བྱ། །ཞི་བའི་ཚིག་གོ །འདི་ཉིད་ཀྱི་རྗེས་སུ་འབྲངས་ནས་རྒྱས་པ་ལ་སོགས་པའི་ལས་གཞན་དག་ལའང་ཤེས་པར་བྱ་སྟེ་དེ་དག་གི་དབྱེ་བ་ནི་གཞུང་མངས་ཀྱིས་འཇིགས་པས་འདིར་རྒྱས་པར་མ་བྲིས་སོ། །ད་ནི་དམ་ཚིག་མེད་ན་དངོས་གྲུབ་ཏུ་མི་འགྱུར་བར་བསྟན་པའི་ཕྱིར་དབང་པོ་གཉིས་ནི་ཞེས་བྱ་བ་ལ་སོགས་པ་གསུང་སྟེ། རང་གི་ལྷའི་ང་རྒྱལ་གྱིས་གཟི་བྱིན་བསྐྱེད་ཅིང་འབར་བར་གྱུར་བས་རྣམ་པ་ཐམས་ཅད་ཀྱི་མཆོག་དང་ལྡན་པའི་རང་གི་ལྷའི་སྐུར་བསྒོམས་པའི་ཡེ་ཤེས་ཀྱི་ཚེ་འདི་ཉིད་ལ་ཡེ་ཤེས་རྫོགས་པར་བྱའོ་ཞེས་སྦྱར་རོ། །དམ་ཚིག་འདི་དག་ཐམས་ཅད་ཀྱང་སྐུ་རྡོ་རྗེ་ལ་སོགས་པའི་དབྱེ་བས་གསུམ་དུ་ཡང་འགྱུར་བས། ལས་ལས་བྱུང་བར་ཞེས་བྱ་བ་ལ་སོགས་པ་གསུངས་ཏེ་དགེ་བ་དང་མི་དགེ་བའི་ལས་ལས་བྱུང་བའི་སྐྱེས་པ་དང་བུད་མེད་ཀྱི་གཟུགས་ཡིད་དུ་འོང་བ་དང༌། ཡིད་དུ་མི་འོང་བ་དཔག་ཏུ་མེད་པ་མཐོང་བ་ནི་དེ་ཉིད་ཀྱི་སྤྲུལ་པ་སྟེ། དེ་བས་ན་སྐུ་རྡོ་རྗེ་ཉིད་དུ་ལུས་ཐམས་ཅད་ཀྱི་ངོ་བོ་ཡིན་ནོ་ཞེས་རྣལ་འབྱོར་པས་ལྷག་པར་མོས་པ་བྱས་ཏེ། དེ་ནས་དེ་བཞིན་གཤེགས་པ་སྐུ་རྡོ་རྗེ་རྣམ་པར་སྣང་མཛད་ཁམས་གསུམ་པ་ཐམས་ཅད་ཀྱི་ལུས་རྡོ་རྗེ་ལ་གནས་ཤིང་ཞེས་གཞན་དག་ལས་གསུངས་པས་སོ། །ངན་རྟོག་ཅེས་བྱ་བ་ལ་སོགས་པ་ལ། སེམས་ཅན་ཐམས་ཅད་ཀྱི་སེམས་ལ་བརྟགས་པ་དང་བདག་ལ་སོགས་པའི་རྟོག་པའི་དྲ་བ་རྣམས་དང་དབྱིག་པ་དང་ཐལ་ལྕག་ལ་སོགས་པས་བརྡུང་ཞིང་སྨད་པ་དང༌། སུན་དབྱུང་བར་མི་བྱའོ། །བདག་ཉིད་ཀྱིས་ཀྱང་སྨད་པར་མི་བྱ་སྟེ། སྡུག་བསྔལ་བ་དང་ཡིད་མི་བདེ་བ་ཐམས་ཅད་མི་འདོད་བཞིན་དུ་རྒྱུན་དུ་འབྱུང་
བ་ལས་ཅི་ནུས་པར་རང་གི་བདག་ཉིད་ཐམས་ཅད་ལ་རྟག་ཏུ་བསྲུང་བར་བྱའོ་ཞེས་བྱ་བ་ལ་སོགས་པ་གསུངས་པའི་ཕྱིར་རོ། །དེ་ཡང་ཐུགས་རྡོ་རྗེ་ཡང་གང་ཡིན་བ་དེ་ཉིད་ནི་སེམས་ཅན་ཐམས་ཅད་ཀྱི་ངོ་བོ་ཡིན་ནོ། །དེ་ཡང་དེ་ནས་བཅོམ་ལྡན་འདས་དེ་བཞིན་གཤེགས་པ་ཐུགས་རྡོ་རྗེ་ཁམས་གསུམ་པ་ཐམས་ཅད་ཀྱི་སེམས་རྡོ་རྗེ་ལ་གནས་ཤིང་ཞེས་གསུངས་པའི་ཕྱིར། སྲིད་པའི་བསྐྱེད་རྩུབ་ཅེས་བྱ་བ་ལ་སོགས་པ་ལ། སྲིད་པ་ནི་ནོར་སོ་སོར་སྒྲུབ་པ་ལ་བསྡུ་ཞིང་ལྷུར་ལེན་པ་ཡིན་པར་ཤེས་པར་བྱའོ། །ཚིག་ནི་ངག་གི་རྣམ་པའོ། །ཇི་སྐད་དུ་བཤད་པའི་ཕ་རོལ་པོའི་ཚིག་ཀྱང་སྨོད་བར་མི་བྱའོ་ཞེས་ཀྱང་ཤེས་པར་བྱའོ། །གཏན་ཚིག་ཀྱང་འདིར་དེ་བཞིན་དུ་ཁོང་དུ་ཆུད་པར་བྱའོ། །རང་གི་ལུས་སུ་གཏོགས་པའི་ཤ་ལ་སོགས་པ་ལ་རྣམ་པར་སྣང་མཛད་ལ་སོགས་པ་བསམ་པར་བྱའོ་ཞེས་བསྟན་པའི་ཕྱིར། རྣམ་པར་སྣང་མཛད་ཅེས་བྱ་བ་ལ་སོགས་པ་གསུངས་ཏེ། རང་གི་ལུས་པོའི་ཤ་ལ་ཡི་གེ་ཨོཾ་ལས་རྣམ་པར་སྣང་མཛད་ཇི་ལྟ་བ་བཞིན་དུ་བསམ་པར་བྱའོ། །རྐང་ནི་མི་བསྐྱོད་པའི་གནས་ཞེས་བྱ་བ་ནི་རྐང་ནི་བྱང་ཆུབ་ཀྱི་སེམས་ཏེ་དེ་ཉིད་མི་བསྐྱོད་པའི་བཞུགས་གནས་ཡིན་པས་ན་གནས་སོ། །དེ་ཡང་འདི་སྐད་དུ་སྟོན་ཏེ། རྐང་ལ་ཡི་གེ་ཧཱུཾ་ལས་མི་བསྐྱོད་པ་བསམ་པར་བྱའོ་ཞེས་བྱའོ། །རིན་ཆེན་འབྱུང་བ་ཞེས་བྱ་བ་ནི་ཡི་གེ་ཏྲཾ་ལས་རིན་ཆེན་འབྱུང་ལྡན་བསམ་མོ། །སེམས་ཅན་རྣམས་ཀྱི་ཞེས་བྱ་བ་ལ་སོགས་པ་ལ་སེམས་ཅན་རྣམས་ཀྱི་ཕུང་པོའི་རུས་གོང་ཡི་གེ་ཨ་ལས་སྣང་བ་མཐའ་ཡས་བསམ་པའོ། །རྩའི་ཞེས་བྱ་བ་ལ་སོགས་པ་ལ་རྩའི་ཚིགས་རྣམས་ཀྱི་རྒྱུན་ལ་ཁཾ་ལས་དོན་ཡོད་གྲུབ་པ་བསམ་མོ། །གང་འདིར་རྟེན་དང་བརྟེན་པའི་ངོ་བོ་ཉིད་ཀྱིས་རྣམ་པར་སྣང་མཛད་ལ་སོགས་པར་བསྟན་མོད་ཀྱི་འོན་ཀྱང་དེའི་ངོ་བོ་ཉིད་ཡིན་པར་ཤེས་པར་བྱའོ། །དམ་ཚིག་མཁས་པ་ཞེས་བྱ་བ་ལ་སོགས་པ་ལ། ཤ་ལ་སོགས་པའི་ངོ་བོ་ཉིད་རྣམ་པར་སྣང་མཛད་ལ་སོགས་པར་སྔགས་པ་རྣམས་ཀྱིས་གསང་བ་ཡིན་པར་བསྟན་ཏོ། །རྟེན་ཅིང་ཞེས་བྱ་བ་ལ་སོགས་པ་ལ་མེ་ཏོག་ལ་སོགས་པས་མཆོད་ནས། སྤྱན་ལ་སོགས་པས་ཇི་ལྟ་བ་བཞིན་དུ་བྱ་སྟེ་བཟའ་བར་བྱའོ་ཞེས་གཞན་དག་འདོད་མོད་ཀྱིས་དེ་ཉིད་མི་
རིགས་པར་འདི་ཉིད་ཀྱི་འོག་ནས་སྟོན་ཏོ། །འདོད་ཆགས་ཞེས་བྱ་བ་ལ་སོགས་པ་ལ་འདོད་ཆགས་ནི་རྡོ་རྗེ་ཆོས་སོ། །ཞེ་སྡང་ནི་རྡོ་རྗེ་སེམས་དཔའོ། །རྨོངས་པ་ནི་རྣམ་པར་སྣང་མཛད་དོ། །སྲེད་པ་ནི་ཡིད་ཀྱིས་མངོན་པར་འདོད་པ་སྟེ་དེ་ཡང་རྡོ་རྗེ་རིན་ཆེན་ནོ། །འདུ་བྱེད་ནི་ཕྲག་དོག་སྟེ་དེ་ཡང་སྣ་ཚོགས་རྡོ་རྗེའོ། །གསུང་རྡོ་རྗེ་ལ་སོགས་པ་འདི་དག་འདོད་ཆགས་ལ་སོགས་པའི་ངོ་བོ་ཉིད་ཇི་ལྟར་ཡིན་པ་ནི་བཅོམ་ལྡན་འདས་ཀྱིས་ཟླ་གསང་ཐིག་ལེའི་རྒྱུད་ལས་གསལ་བར་བསྟན་ཏེ། དེ་འདིར་གཏན་ཚིགས་ཀྱི་ཚུལ་གྱིས་བྲི་བར་བྱ་སྟེ། ཤེས་རབ་ཐབས་ཀྱི་རང་བཞིན་གྱིས། །སེམས་ཅན་ཐམས་ཅད་དགའ་མཛད་ཅིང༌། །པདྨ་པདྨ་སད་མཛད་པས། །དེ་ཕྱིར་འདོད་ཆགས་ཞེས་བརྗོད་དོ། །ནང་སོང་གསུམ་གྱིས་འཇིགས་བྱེད་དུ། །སེམས་ཅན་ཉོན་མོངས་སྡང་བྱེད་པས། །དེ་ཡི་ཕྱིར་ན་རྡོ་རྗེ་ཆེ། །ཞེ་སྡང་ཞེས་ནི་བསྒྲགས་པ་ཡིས། །ངན་སོང་འཇིགས་པ་ཆེན་པོ་རུ། །སེམས་ཅན་ཐམས་ཅད་རྨོངས་བྱེད་པས། །དེ་ཡི་ཕྱིར་ནི་གཏི་མུག་ཆེ། །རྟག་པ་ཐུབ་པ་མཆོག་ཡིན་ནོ། །བདེ་ཆེན་སྦྱིན་པའི་སྤྲིན་གྱིས་ནི། །སེམས་ཅན་ཐམས་ཅད་ང་རྒྱལ་བསྐྱེད། །ནམ་མཁའ་བདེ་བ་བསྡུ་བའི་ཕྱིར། །དེའི་ཕྱིར་མཁས་ཆེན་ང་རྒྱལ་ཡིན། །རོ་ལ་སོགས་པ་མཉམ་སྦྱོར་བས། །ཕྲག་དོག་རྡོ་རྗེ་གདོན་མི་ཟ། །སྣ་ཚོགས་པ་ནི་ཕྱེ་བའི་ཕྱིར། །དེ་ཡི་ཕྱིར་ནི་སྣ་ཚོགས་ཆེ། །ཞེས་གསུངས་པ་ཡིན་ནོ། །ལ་ལ་ནི་འདོད་ཆགས་ལ་སོགས་པ་ཉིད་བྱང་ཆུབ་ཀྱི་ངོ་བོར་བསྒོམ་པ་ཁྱད་པར་དུ་བརླབས་ནས་གསུང་རྡོ་རྗེ་ལ་སོགས་པའི་ངོ་བོ་ཉིད་ཀྱིས་ཆོས་ལྔའི་ཐར་པ་ཐོབ་པར་བྱེད་པ་བསྟན་ལ། དེ་ལ་མངོན་པར་ཞེན་པ་མ་སྤངས་པས་ནི་སྡིག་པ་དང་བཅས་ཤིང་ཉོན་མོངས་པ་ལ་ཉེ་བར་བརྟེན་པས་ནི་མི་ཤེས་པ་ཐོབ་པར་བྱེད་པའི་ངོ་བོ་ཉིད་ཡིན་པར་དེ་བཞིན་གཤེགས་པས་གསུངས་པ་ཡིན་ནོ། །དེ་ཡང༌། ཐབས་ཆེན་རྣམས་དང་ལྡན་གྱུར་ན། །ཉོན་མོངས་བྱང་ཆུབ་ཡན་ལག་འགྱུར། །འཁོར་བའང་ཞི་བའི་མཚན་ཉིད་དེ། །དེ་ཕྱིར་དེ་བཞིན་གཤེགས་བསམ་ཡས། །ཞེས་བཤད་པའི་ཕྱིར་རོ་ཞེས་ཟེར་རོ། །བཤད་གཅི་ཞེས་བྱ་བ་ལ་སོགས་པ་ལ་བཤད་པ་ལ་སོགས་པ་རྟག་ཏུ་ཡོངས་སུ་འཛག་པའི་
ཆོས་ཅན་དུ་གྱུར་པ་འབྱུང་བ་ཆེན་པོའི་བདག་ཉིད་ཅན་གྱི་དམ་ཚིག་ནི་རྣམ་པར་སྣང་མཛད་ལ་སོགས་པའི་ངོ་བོས་བསྟེན་པར་འོས་པ་ཉིད་དུ་བསྐྱེད་ཅིང་བསྒོམ་པ་ལ་བརྩོན་པས་དེ་མན་ངག་བཞིན་དུ་སྦྱར་བ་དང་རྟོགས་པ་དང་རབ་ཏུ་འབར་བར་བྱས་ནས་བཟའ་བར་བྱའོ། །དཀྱིལ་འཁོར་ལ་སོགས་པ་ལ་ཡང་རྫས་འདི་ཉིད་ཀྱིས་སློབ་མ་རྣམས་ལ་དམ་ཚིག་གི་ཕྱིར་སྦྱིན་པར་བྱ་སྟེ་དམ་ཚིག་གིས་གསང་སྔགས་རྣམས་གྲུབ་པར་འགྱུར་རོ། །ཞེས་གསུངས་པས་འདིར་སོམ་ཉི་མི་བྱའོ། །སྦྱིན་སྲེག་རབ་ཏུ་སྟོན་པའི་གཞུང་གི་ལེའུ་ལ་ནི་སྦྱིན་སྲེག་གི་རིམ་པར་ཕྱེ་བའི་སྒྲར་བརྗོད་དོ། །ལེའུ་དགུ་པའི་འགྲེལ་པའོ།། །།སྦྱིན་སྲེག་བྱས་ཀྱང་ཆོ་ག་མ་ཚང་བས་ཀྱང་དངོས་གྲུབ་ཀྱི་སྣོད་དུ་མི་འགྱུར་བས་དེ་ནས་ཞེས་བྱ་བ་ལ་སོགས་པས་བཅུ་པ་ཆོ་ག་ཐམས་ཅད་བསྟན་པའི་རིམ་པར་ཕྱེ་བ་གསུངས་ཏེ། བཅོམ་ལྡན་འདས་ཀྱིས་བཀའ་སྩལ་ཏོ་ཞེས་བྱ་བར་སྦྱར་རོ། །ཅི་ཞིག་མཛད་ནས་ཤེ་ན། ཏིང་ངེ་འཛིན་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། ཏིང་ངེ་འཛིན་ཐམས་ཅད་ནི་རྣམ་པར་སྣང་མཛད་ལ་སོགས་པའི་ཏིང་ངེ་འཛིན་ཏོ། །དེ་རྣམས་ཀྱི་དངོས་གྲུབ་ནི་འཁོར་ལོ་ལ་སོགས་པའི་དངོས་གྲུབ་བོ། །དེ་ཉིད་ནི་དམ་པའི་རྡོ་རྗེའོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །རྣམ་པར་སྣང་མཛད་ལ་སོགས་པའི་འཁོར་ལོ་ལ་སོགས་པའི་དངོས་གྲུབ་སྟོན་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་དོན་ཏོ། །དམ་ཚིག་ཐམས་ཅད་ཀྱི་ཞེས་བྱ་བ་ལ་སོགས་པ་ལ། དཀྱིལ་འཁོར་གྱི་ལྷ་ཐམས་ཅད་ཀྱི་འཁོར་ལོ་ལ་སོགས་པའི་དངོས་གྲུབ་གསུངས་སོ་ཞེས་བྱ་བའི་དོན་ཏེ། གསང་སྔགས་ཞེས་བྱ་བ་ལ་སོགས་པ་ལ་རང་གི་ལྷའི་སྐུ་གསུང་ཐུགས་བསྒོམ་པ་ལ་མངོན་པར་བརྩོན་པས་འཁོར་ལོ་ལ་སོགས་པའི་དངོས་གྲུབ་བདག་ལ་སྩོལ་ཅིག་ཅེས་བྱ་བའི་བསྐུལ་ཚིག་དང་བཅས་པར་གསང་སྔགས་བརྗོད་ལ་དེའི་འོག་ཏུ་འཁོར་ལོ་ལ་སོགས་པ་ལ་སྐུ་རྡོ་རྗེ་ལ་སོགས་པ་གཞུག་ཅིང་བསྒོམ་པའི་རྣམ་པར་བྱས་ནས། རང་རང་གི་དཀྱིལ་འཁོར་གྱི་དབུས་སུ་འཁོར་ལོ་ལ་སོགས་པའི་རྫས་བསྒྲུབ་པར་བྱའོ། །དངོས་གྲུབ་སྒྲུབ་པའི་ཐབས་གསང་ཆེན་ཞེས་
བྱ་བ་ནི་བུ་མོ་ལ་སོགས་པའི་དངོས་གྲུབ་སྒྲུབ་པའི་ཐབས་ཀྱང་ཉོན་ཅིག་ཅེས་འདིར་དང་གི་སྒྲ་ཡོད་པར་བལྟའོ། །དེ་གསལ་བར་བསྟན་པའི་ཕྱིར་རྣམ་པར་སྣང་མཛད་ཅེས་བྱ་བ་ལ་སོགས་པ་གསུངས་པ་ནི་གོ་སླའོ། །འདི་སྐད་སྟོན་ཏེ། ཇི་སྐད་དུ་བཤད་པའི་སྦྱོར་བས་ལྷའི་རྣལ་འབྱོར་བྱས་ལ། ཚེས་གྲངས་དང་རྒྱུ་སྐར་ལ་སོགས་པ་ཤིས་པ་ལ་འཁོར་ལོའི་དངོས་གྲུབ་ཀྱི་ཕྱིར་སྐུ་རྡོ་རྗེ་ལ་མཆོད་ཡོན་ཕུལ་ཏེ། ཇི་སྐད་དུ་བཅོམ་ལྡན་འདས་ཀྱི་བཀའ་ཐོབ་པ་དེ་སྲིད་ཀྱི་བར་དུ་གསང་སྔགས་དམ་པ་བཟླས་པའམ་བསྒོམ་པར་བྱའོ། །དེ་ནས་བཀྲ་ཤིས་དང་དགེ་མཚན་དག་བྱ་ཞིང་དུལ་བའི་སྤྱོད་ལམ་ཕུན་སུམ་ཚོགས་པས་བདག་ཉིད་སོང་ལ་རིན་ལ་མི་རྩེག་པར་གནམ་ལྕགས་ཉོའོ། །དེ་ནས་བཟོ་བོ་བཟང་པོ་ལ་གླ་རྔན་ལ་མི་རྩེག་པར་འདོད་ལོ་རྩིབས་བརྒྱད་པའམ་དྲུག་པ་མཐོ་གང་པ་བྱས་ནས་ལས་ཐམས་ཅད་བཟླས་པའི་ཆུ་དང་སྤྱན་གྱི་གསང་སྔགས་བཟླས་པའི་ཆུས་བསངས་གཏོར་བྱའོ། །དེ་ནས་ལས་ཐམས་ཅད་བཟླས་པའི་བ་ཡི་རྣམ་ལྔས་བཀྲུའོ། །དེ་ནས་ཏིལ་གྱི་ཆུས་སོ། །དེ་ནས་སྤོས་ཀྱི་ཆུས་སོ། །དེ་ནས་རྣམ་པར་སྣང་མཛད་ཀྱི་སྙིང་པོ་བཟླས་པའི་སྤོས་ཆུས་བཀྲུའོ། །དེ་ནས་ཤིན་ཏུ་བསྔགས་པའི་སྣོད་ཀྱི་སྟེང་དུ་བཞག་ལ་ཐུན་བཞིར་བཟླས་པ་དང་སྒོམ་པ་ཇི་ལྟ་བ་བཞིན་དུ་བྱས་ནས། གསང་སྔགས་ཚིམ་པར་བྱ་བའི་ཕྱིར། རྫས་དང་རྗེས་སུ་མཐུན་པའི་སྦྱིན་སྲེག་ཇི་ལྟ་བ་བཞིན་དུ་བྱས་ཏེ། ཨོཾ་ཏེ་ཛེ་ཏེ་ཛེ་སྭཱ་ནི་སིདྡྷི་ས་དྷཱ་ཡ་ཧཱུཾ་ཕཊ་ཅེས་བྱ་བ་འདི་ནི་སྦྱིན་སྲེག་བྱས་ལ་རྫས་གཟི་བྱིན་བསྐྱེད་དོ། །མེ་ཏོག་ལ་སོགས་པས་ཀྱང་མཆོད་ནས་ལས་ཐམས་ཅད་པས་ཀྱང་བཟླས་པའི་ཆུ་དང༌། ལག་པས་བྲན་ཞིང་རེག་པར་བྱའོ། །དེ་ནས་སྒྲུབ་པ་ལ་བབ་པའི་དུས་སུ་རི་བོ་ལ་སོགས་པར་དཀྱིལ་འཁོར་བྲིས་ལ་དཀྱིལ་འཁོར་གྱི་ལས་ཐམས་ཅད་ཇི་ལྟ་བ་བཞིན་དུ་རྫོགས་པར་བྱ་སྟེ་བདག་ཉིད་དབང་བསྐུར་བ་ལ་སོགས་པ་བྱས་ནས། རྣམ་པར་སྣང་མཛད་དང་སྤྱན་གྱི་སྔགས་ཀྱིས་སྦྱིན་སྲེག་བརྒྱ་རྩ་བརྒྱད་དང་ལྡན་པས་འཁོར་ལོ་ལ་སྤྱིན་སྲེག་དབུལ་ལོ། །དཀྱིལ་འཁོར་གྱི་ལྷ་རྣམས་ལ་ཡང་རྫས་དང་རྗེས་སུ་མཐུན་པར་སྦྱིན་སྲེག་བྱའོ། །དེ་ནས་ཇི་སྐད་བཤད་པའི་གསང་
སྔགས་ཀྱིས་བརྒྱ་རྩ་བརྒྱད་སྦྱིན་སྲེག་བྱས་པས་གཟི་བྱིན་བསྐྱེད་པ་ལེགས་པར་གསུངས་ནས། སྦྱིན་སྲེག་ཇི་ལྟ་བ་བཞིན་དུ་ཉེ་བར་བསྡུ་བར་བྱའོ། །དེ་ནས་དཀྱིལ་འཁོར་གྱི་སར་ཞུགས་ལ་མཆོད་ཡོན་དབུལ་བ་ལ་སོགས་པའི་མཆོད་པ་བྱས་ནས་ཕྱག་བྱས་ཏེ། འཁོར་ལོ་མདུན་དུ་བཞག་ལ་དེར་ཡང་སྐུ་རྡོ་རྗེ་ལ་སོགས་བཞུགས་པར་བསྒོམས་ནས། ཨོཾ་ཛི་ན་ཛི་ཀ །ཙ་ཀྲ་སིདྡྷི་མེ་བྲ་ཡཙྪ་ཞེས་བྱ་བའི་གསང་སྔགས་མཚན་ཐོག་ཐག་བཟླས་བརྗོད་བྱའོ། །དེ་ནས་ཉི་མ་འཆར་བ་ན་འཁོར་ལོ་འབར་བར་མཐོང་ན་ལངས་ཏེ། སྤྱན་གྱི་གསང་སྔགས་བརྗོད་ཅིང་དེ་བླངས་ལ་ཡི་གེ་བརྒྱ་པས་བརྟན་པར་བྱས་ནས་དཀྱིལ་འཁོར་ཇི་ལྟ་བ་བཞིན་དུ་བསྡུ་བར་བྱས་ཏེ། སངས་རྒྱས་ལ་སོགས་པ་ལ་མཆོད་པའི་ཕྱིར་རྫས་རྣམ་པར་བགོ་བར་བྱ་ཞིང༌། བླ་མ་ལ་ནི་རིན་པོ་ཆེ་ལ་སོགས་པ་བདག་ཏུ་བཟུང་བ་ཡོད་པས་མཆོད་ལ་ཕྱག་བྱས་ནས་དེའི་སྐལ་བ་བླང་བར་བྱའོ། །སྒྲུབ་པའི་གྲོགས་མཆོག་ལ་ནི་ནོར་སྦྱིན་པའམ་བླ་མའི་ཡང་དག་པའི་མན་ངག་བྱིན་པས་དེའི་སྐལ་བ་བླངས་ལ་རྣམ་པར་སྣང་མཛད་ཀྱི་སྔགས་ཟློས་ཤིང་གང་དུ་འདོད་པས་སོང་ན་ཇི་སྐད་འདོད་པའི་ཡོན་ཏན་དང་ལྡན་པར་འགྱུར་རོ། །རྡོ་རྗེ་ལ་སོགས་པ་སྒྲུབ་པ་ཡང་དེ་བཞིན་ནོ། །སྐུ་གསུམ་རྣམ་པར་འཕེལ་འགྱུར་ཞིང༌། །ཞེས་བྱ་བ་ནི་ཨོཾ་ཨཱཿ་ཧཱུཾ་ཞེས་བྱ་བས་སྐུ་རྡོ་རྗེ་ལ་སོགས་པ་རབ་ཏུ་ཞུགས་པ་འཕེལ་བར་འགྱུར་རོ། །རྫས་ཀྱི་དངོས་གྲུབ་བསྟན་ནས་ད་ནི་བུ་མོ་བསྒྲུབ་པ་བསྟན་པའི་ཕྱིར། རྫས་ཀྱིས་དངོས་གྲུབ་ཅེས་བྱ་བ་ལ་སོགས་པ་གསུངས་ཏེ། ཕྱག་རྒྱ་ཆེན་པོའི་རྗེས་ཐོགས་ལ་དམ་ཚིག་གི་ཕྱག་རྒྱ་བསྒྲུབ་པའོ། །རྣལ་འབྱོར་ཆེ་ལ་རྣམ་གནས་པས། །ཞེས་བྱ་བ་ནི་དཀྱིལ་འཁོར་གྱི་ལྷ་རྣམས་རང་གི་ལུས་ལ་དགོད་ཅིང་འཇོག་པས་སོ། །དེ་ལ་རྣམ་པར་སྣང་མཛད་ཀྱི་རྣལ་འབྱོར་ཆེན་པོ་ནི་འདི་ཡིན་ཏེ། ལྷ་ཐམས་ཅད་ཀྱི་གནས་སུ་ས་མ་ཡ་ཨ་ཞེས་བྱ་བས་ཟླ་བའི་དཀྱིལ་འཁོར་ལ་སོགས་པ་བཀོད་ལ། སྙིང་ག་རྨི་བསྐྱོད་པ་རྣམ་པར་བསམ་མོ། །དཔྲལ་བར་ནི་རིན་ཆེན་འབྱུང་ལྡན། །ལྐོག་མ་ནི་འོད་དཔག་ཏུ་མེད་པ། སྤྱི་བོར་དོན་ཡོད་པར་གྲུབ་པ། མི་གཉིས་སུ་སངས་རྒྱས་སྤྱན། །མི་བསྐྱོད་པའི་གཡོན་ལོགས་སུ་མཱ་མ་
ཀཱིའོ། །འོད་དཔག་མེད་ཀྱི་གཡོན་ལོགས་སུ་གོས་དཀར་མོ། དོན་ཡོད་པར་གྲུབ་པའི་གཡོན་ལོགས་སུ་སྒྲོལ་མ། མི་བསྐྱོད་པ་ལ་སོགས་པའི་གཡོན་ལོགས་སུ་རྡོ་རྗེ་སེམས་མ་ལ་སོགས་པ་བཞི་མི་བསྐྱོད་པའི་རྒྱབ་ཏུ་སྐུལ་བྱེད་མ་རིན་ཆེན་འབྱུང་ལྡན་གྱི་ཡོན་ཏན་ལོགས་སུ་རིན་ཆེན་སྒྲོལ་མ། དེ་བཞིན་གཤེགས་པ་ལྷག་མའི་རྒྱབ་ཏུ་ཁྲོ་གཉེར་ཅན་མ་དང་རྡོ་རྗེ་ལུ་གུ་རྒྱུད། ལྟེ་བར་གཤིན་རྗེ་གཤེད། མཛོད་སྤུར་གཞན་གྱིས་མི་ཐུབ་པ། ཁ་ལ་རྟ་མགྲིན་གསང་བའི་གནས་སུ་སྡུད་རྩི་ཐབ་སྦྱོར། རྐང་པ་གཉིས་སུ་སྟོབས་པོ་ཆེ། དབྲལ་བའི་སྟེང་དུ་མི་གཡོ་བ། མི་བསྐྱོད་པའི་མདུན་དུ་འདོད་པའི་རྒྱལ་པོ། དཔུང་པ་གཉིས་སུ་དབྱུག་སྔོན་ཅན། མི་བསྐྱོད་པ་དང་འདོད་པའི་རྒྱལ་པོའི་བར་དུ་གནོད་མཛེས་རྒྱལ་པོ། སྤྱི་གཙུག་གི་སྟེང་དུ་འཁོར་ལོས་སྒྱུར་བ། སྤྱི་གཙུག་གི་དབུས་སུ་རྣམ་པར་སྣང་མཛད་བསམ་པར་བྱའོ། །དེ་ནས་ཛཿ་ཧཱུཾ་པཾ་ཧོཿ་ཞེས་པ་བརྗོད་ལ་ཡིད་ཀྱིས་རྣམ་པར་སྣང་མཛད་ལ་སོགས་པའི་ཡེ་ཤེས་སེམས་དཔའ་ཕབ་སྟེ། རྣམ་པར་སྣང་མཛད་ལ་སོགས་པ་དགུག་པ་དང༌། གཞུག་པ་དང༌། བཅིང་བ་དང་དབང་དུ་བྱ་བ་ཇི་ལྟ་བ་བཞིན་དུ་བྱས་ནས་ཕྱག་རྒྱ་བཞིས་རྒྱས་གདབ་པར་བྱའོ། །གང་འདི་བུ་མོ་བསྒྲུབ་པ་བསྟན་པ་ཡིན་མོད་ཀྱི་འོན་ཀྱང་ཕྱག་རྒྱ་ཆེན་པོ་ལ་སོགས་པ་བསྒྲུབ་པ་ལ་ཡང་ཤེས་པར་བྱའོ། །རང་གི་ལྷའི་རྣལ་འབྱོར་གྱིས་དུས་ཇི་སྲིད་དུ་གྲུབ་པར་མ་གྱུར་ན་རྣལ་འབྱོར་ཆེན་པོའི་ཚུལ་གྱིས་དངོས་གྲུབ་འཐོབ་སྟེ། སློབ་དཔོན་གྱི་དབང་བསྐུར་བས་དབང་བསྐུར་བ་ཉིད་ཀྱིས་རྣལ་འབྱོར་ཆེན་པོ་བསྒོམ་པར་བྱའི། རང་གི་རིག་པའི་དབང་བསྐུར་བས་ནི་མ་ཡིན་ནོ། །མི་བསྐྱོད་པ་ལ་སོགས་པའི་རྣལ་འབྱོར་ཆེན་པོ་ཡང་དེ་བཞིན་དུ་ཤེས་པར་བྱའོ། །དེ་བཞིན་གཤེགས་པའི་བཙུན་མོ་ཆེ། །ཞེས་བྱ་བ་ནི་སངས་རྒྱས་སྤྱན་ནོ། །ཞེ་སྡང་རིགས་ནི་འདྲེན་མཛད་པ། །རྡོ་རྗེ་གདན་ཅན་མཱ་མ་ཀཱི། །ཞེས་བྱ་བ་ནི་ཞེ་སྡང་གི་རིགས་འཐོབ་པར་བྱེད་པའོ་ཞེས་སྦྱར་རོ། །རིན་ཆེན་འབྱུང་བའི་ལྷ་མོ་དང༌། །ཞེས་བྱ་བ་ནི་གོས་དཀར་མོའོ། །ལྷ་མོ་འགྲོ་ལ་དབང་མཛད་མ། །ཞེས་བྱ་བ་ལ་སོགས་པ་ནི་སྒྲོལ་མ་ལ་སོགས་པའི་ལྷ་མོའོ། །བུ་མོ་
འདི་དག་ཅེས་བྱ་བ་ལ་སོགས་པ་ནི། སྤྱན་ལ་སོགས་པའི་རྣལ་འབྱོར་མ་སྟེ། བུ་མོ་ནི་ངེས་པར་སྤྱན་ལ་སོགས་པའི་ཚིག་གི་སྒྲར་བརྗོད་དོ། །དེ་བས་ན་བུ་མོ་འདི་དག་སྟེ་སྤྱན་ལ་སོགས་པའི་རྣལ་འབྱོར་མ་ནི་མིག་ཡངས་ཤིང་མཛེས་ལ་ལོ་བཅུ་དྲུག་ལོན་པའི་ན་ཚོད་དང་ལྡན་པ། གཟུགས་དང་ལང་ཚོས་བརྒྱན་པ། །གསང་སྔགས་ཀྱི་རྒྱུད་ལ་ཤིན་ཏུ་བྱང་བ། །གཞན་ཡང་རང་གི་དམ་ཚིག་དང་ཕྱག་རྒྱ་ཤིན་ཏུ་ལེགས་པར་བསླབ་པ་བླངས་པ་ལ། རྡོ་རྗེ་དང་ནི་པདྨ་བསྐུལ། །ཞེས་འོག་ནས་སྨོས་པའི་ཚིག་དང་སྦྱར་རོ། །རང་གི་ཕྱག་རྒྱའི་ཁྱད་པར་བསྟན་པའི་ཕྱིར་ལྷ་མོའི་ཞེས་བྱ་བ་ལ་སོགས་པ་སྨོས་ཏེ། ལྷ་མོ་བྱི་དོར་ལེགས་བྱས་ཏེ། །ཞེས་བྱ་བ་ནི་རང་གི་ལྷའི་རྣལ་འབྱོར་དུ་བྱས་པ་ནི་བྱི་དོར་རོ། །རིགས་ལྔ་ཡི་ནི་ཆོགས་ཆེན་མ། །ཞེས་བྱ་བ་ནི་རྣལ་འབྱོར་ཆེན་པོར་བྱས་ལ་གཞག་སྟེ། གསང་བ་བསྐུལ་ལོ་ཞེས་འོག་ནས་སྨོས་པ་དང་སྦྱར་རོ། །ཇི་སྐད་བསྐུལ་ཞེ་ན་གཞག་སྟེ་སྤྲད་པའི་སྦྱོར་བ་ཡིས། །ཞེས་བྱ་བ་ལ་སོགས་པ་གསུངས་ཏེ། དེ་ཉིད་བསྟན་པ་ནི་པདྨ་ལ་ནི་ཞེས་བྱ་བ་ལ་སོགས་པ་སྟེ། དམ་ཚིག་གི་ཕྱག་རྒྱའི་གསང་བའི་པདྨ་དེར་རྡོ་རྗེ་གཞུག་པ་བྱས་ལ་དེ་དང་ལྷན་ཅིག་སྤྲད་པ་དང་འཁྱུད་ནས་རྡོ་རྗེ་དང་པདྨ་བསྐུལ་བར་བྱའོ་ཞེས་བྱ་བར་ཤེས་པར་བྱའོ། །འདི་ཉིད་གསུངས་པ་ནི་གར་གྱི་ཚུལ་གྱིས་ཞེས་བྱ་བ་ལ་སོགས་པ་སྟེ་རུས་སྤལ་བསྐོར་བ་བཅིངས་པ་ལ་སོགས་པའི་གར་གྱི་ཚུལ་གྱིས་བསྐོར་བ་ལ་སོགས་པའི་རིམ་གྱིས་མཆན་ཁུང་བསྡམས་པའི་གར་རོ། །དེ་བཞིན་སྤྲོ་དང་བསྡུ་པ་ཡིས། །ཞེས་བྱ་བ་ནི་སངས་རྒྱས་རྣམས་ཀྱིས་ནམ་མཁའ་ཁྱབ་པར་བསམ་པའི་སངས་རྒྱས་ལ་སོགས་པ་ལ་དགའ་བས་མཉེས་པར་བྱ་སྟེ། ནམ་མཁའ་ལ་མངོན་པར་འཕགས་པའི་ཚུལ་དུ་བྱའོ་ཞེས་ཐམས་ཅད་དུ་གནས་སོ། །མདོ་ལས་སྒྱུ་མ་དྲེགས་མྱོས་ནས་ཞེས་བྱ་བ་ལ་སོགས་པ་ལ། དེ་ནས་སྐད་ཅིག་གིས་ལྷ་མོའི་ཡང་དག་པའི་བདེ་བས་ཚིམ་པའི་རྡོ་རྗེ་ལས་བྱུང་བའི་བདུད་རྩི་དེ་ཉིད་ཕྱུང་ལ་དེ་ཇི་ལྟ་བ་བཞིན་དུ་ལེགས་པར་བརྟེན་ཏེ་རབ་ཏུ་འབར་བར་བྱས་ཏེ། པདྨ་ལ་གནས་པ་ཉིད་ཁས་བཏུང་ཞིང་རང་གི་ལྷའི་
ང་རྒྱལ་དང་ལྡན་པས་ཚིམ་པར་བྱ། རྣལ་འབྱོར་མས་ཀྱང་ཚུལ་འདི་བཞིན་རྡོ་རྗེ་ལས་བདུད་རྩི་བླངས་ལ་བཏུང་བར་བྱའོ། །འཐུངས་པ་ཙམ་ཉིད་ཀྱིས་ཞེས་བྱ་བ་ནི་འཐུངས་པའི་འོག་ཏུ། དེ་བཞིན་གཤེགས་པ་ལྔའི་སྐུར་ཡོངས་སུ་གྱུར་པ་འཐོབ་པ་ནི་ཁྱད་པར་གྱི་འབྲས་བུ་ཉིད་བསྟན་པ་ཡིན་ནོ། །དེ་ཡང་འདི་སྐད་སྟོན་ཏེ། དང་པོ་རྡོ་རྗེ་ཕྲ་མོའི་ཏིང་ངེ་འཛིན་བསྒོམས་པས་སེམས་རྩེ་གཅིག་པ་ཐོབ་ཅིང་བརྟན་པར་བྱས་ནས། ཚུལ་འདི་ལྟར་སྔར་ཏིང་ངེ་འཛིན་ཉི་ཚེ་ཙམ་གྱིས་བློ་བྱང་བར་བྱས་ལ། དེའི་འོག་ཏུ་དངོས་སུ་བྱ་བ་ཡིན་གྱི། གཞན་དུ་ནི་དངོས་གྲུབ་ཏུ་མི་འགྱུར་ཏེ་དེ་ཡང༌། གཞན་དུ་འདོད་པའི་ལོངས་སྤྱོད་ལ། །མངོན་པར་ཞེན་པ་སྐྱེ་འགྱུར་ན། །མ་བསླབས་དབང་གི་སྔགས་པ་ནི། །ཉམས་པར་འགྱུར་གྱི་འགྲུབ་མི་འགྱུར། །སློབ་མ་བཟང་ལའང་རྣམ་ཀུན་དུ། །སྦྱོར་པ་འདི་ནི་མི་བསྟན་ཏེ། །བསམ་པ་ཁྱད་པར་ཤེས་བྱས་ནས། །མནའ་བསྒགས་ནས་ནི་བསྟན་པར་བྱ། །ཞེས་གསུངས་པ་དང་པོའི་རྡོ་རྗེ་ཕྲ་མོའི་ཏིང་ངེ་འཛིན་གྱིས་སེམས་རྩེ་གཅིག་པ་ཐོབ་ཅིང་སེམས་སྦྱང་བ་དང་འབར་པའི་ནུས་པ་ཡོད་པར་བྱས་ན་དངོས་གྲུབ་ཏུ་འགྱུར་གྱི། གཞན་དུ་འདོད་པའི་ཡུལ་གྱིས་སེམས་འཕྲོགས་ཏེ་ཉོན་མོངས་པའི་དབང་དུ་གྱུར་པས་དངོས་གྲུབ་ཉམས་ཤིང་ཐེ་ཚོམ་གྱི་གཞིར་གྱུར་པས་སེམས་ཅན་དམྱལ་བ་ལ་སོགས་པར་སྐྱེ་བར་འགྱུར་བས་དུས་ལ་བཅིང་སེམས་དབང་དུ་གྱུར་ན་གདོད་ཅིག་མངོན་སུམ་དུ་བྱ་བ་ཡིན་ནོ། །ནམ་མཁའ་འདྲ་བའི་ཆོས་ཀུན་ལ། །ཞེས་བྱ་བ་ལ་སོགས་པ་ལ་ནམ་མཁའ་དང་འདྲ་བར་རྣམ་པར་རྟོག་པ་དང་བྲལ་བའི་ཆོས་ཐམས་ཅད་ལ་ཤེས་རབ་དང་ཐབས་སུ་ལྡན་པས་བཤད་མ་ཐག་པའི་ཆོག་རྣམ་པར་སྤེལ་ཞིང་རྫོགས་པར་བྱའོ། །རྡོ་རྗེ་པདྨས་བྱིན་བརླབས་པས། །ཞེས་བྱ་བ་ནི་བྱང་ཆུབ་ཀྱི་སེམས་སྔོན་དུ་འགྲོ་བ་ཞེས་བྱེད་པའི་ཚིག་མི་མངོན་པར་བྱས་ནས་སྦྱར་རོ། །རྗེས་སུ་ཆགས་པ་ཞེས་བྱ་བ་ལ་སོགས་པ་ལ་དམ་ཚིག་གི་ཕྱག་རྒྱ་ལ་རྗེས་སུ་ཆགས་པས་རྗེས་སུ་མཉེས་པར་བྱས་ན་འགྲུབ་པར་འགྱུར་རོ་ཞེས་སྔ་མ་དང་སྦྱར་རོ། །ཇི་ལྟར་འགྲུབ་པར་འགྱུར་ཞེ་ན། བདེ་བ་ཐབས་ཞེས་བྱ་བ་གསུངས་ཏེ་འདི་ཡང་བྱ་བའི་ཁྱད་པར་
གྱིས་གཉིས་པ་ཡིན་ནོ། །ཁྱད་པར་བསྟན་ནས་ད་ནི་ཐུན་མོང་དུ་བསྟན་པའི་ཕྱིར། སྦྱོར་བའི་ཁྱད་པར་ཞེས་བྱ་བ་ལ་སོགས་པ་གསུངས་ཏེ། འདི་ལྟར་རྡོ་རྗེ་སེམས་མ་ལ་སོགས་པ་བཞིའམ་སྐུལ་བྱེད་མ་ལ་སོགས་པ་བཞིའི་སྦྱོར་བའི་ཁྱད་པར་གྱིས་ལམ་གསུམ་དུ་འཇུག་པ་སྟེ། དུས་གསུམ་དུ་གཤེགས་པའི་གསང་སྔགས་རྣམས་འགྲུབ་པར་འགྱུར་རོ་ཞེས་འོག་མ་དང་སྦྱར་རོ། །ལས་ཀྱི་ཕྱག་རྒྱ་ངས་བཤད་དང༌། །ཞེས་བྱ་བ་ནི་ཕྱག་རྒྱ་རིམ་པར་ཕྱེ་བ་ལས། ལས་ཀྱི་ཕྱག་རྒྱའི་དེ་ཁོ་ན་ཉིད་དེའི་ཚུལ་དུ་བསྟན་པས་འགྲུབ་པར་འགྱུར་རོ་ཞེས་བྱ་བར་སྦྱར་རོ། །ལག་པའི་ཕྱག་རྒྱ་དག་ཅེས་བྱ་བ་ནི་ལག་པས་བྱས་པའི་དམ་ཚིག་གི་ཕྱག་རྒྱའི་དེ་ཁོ་ན་ཉིད་ཀྱི་ཚུལ་ལོ། །ཡེ་ཤེས་ཕྱག་རྒྱས་རབ་བསྐུལ་བས། །ཞེས་བྱ་བ་ནི་ཇི་སྐད་དུ་བཤད་པའི་ཕྱག་རྒྱས་རབ་ཏུ་བསྐུལ་པས་སོ། །དམ་ཚིག་མཆོག་གིས་འགྲུབ་པར་འགྱུར། །ཞེས་བྱ་བ་ནི་རང་གི་བདག་པོ་དང་ལྡན་པས་སོ། །འདིས་རྣལ་འབྱོར་བཅིར་འགྱུར་ཞེ་ན། ཐུབ་པ་ཆེན་པོ་ཞེས་བྱ་བ་ལ་སོགས་པ་གསུངས་སོ། །ཕྱི་དང་ནང་གིས་ལ་སོགས་པའི་ཁམས་ལྔ་པོ་རྣལ་འབྱོར་པས་སྤྱན་ལ་སོགས་པའི་ངོ་བོར་རྣམ་པར་བསྒོམས་པར་བྱའོ་ཞེས་བསྟན་པའི་ཕྱིར། དེ་ནས་ཞེས་བྱ་ལ་སོགས་པ་གསུངས་ཏེ་ཁམས་གསུམ་གྱི་དམ་ཚིག་གི་འཁོར་ལོ་འདི་ཞེས་བྱ་བ་ནི་སྲིད་པ་གསུམ་པོ་འདི་ཉིད་ནི་ཁམས་གསུམ་སྟེ། དེར་དམ་ཚིག་འཁོར་ལོ་ནི་སྤྱན་ལ་སོགས་པའི་ངོ་བོ་ཉིད་གང་ཡིན་པའོ། །སྒྲོལ་མ་ཞེས་བྱ་བ་ལ་སོགས་པ་ལ། །སྒྲོལ་མ་རླུང་དུ་རབ་ཏུ་བསྒྲགས། །གོས་དཀར་མོ་ནི་མེ་ཞེས་བརྗོད། །ཅེས་བྱ་བར་སྦྱར་ཏེ་གཞན་དག་ལས་འདིར། གོས་དཀར་ཅན་དང་སྒྲོལ་མ་ནི། །མེ་དང་རླུང་དུ་རབ་ཏུ་བསྒྲགས། །ཞེས་གསུངས་པས་སོ། །མཁའ་དབྱིངས་ཞེས་བྱ་བ་ནི་ནམ་མཁའི་དབྱིངས་ནི་ཆོས་ཀྱི་དབྱིངས་ཏེ་གཉིས་སུ་མེད་པའི་ཡེ་ཤེས་ཀྱི་ངོ་བོ་ཉིད་དོ། །དེ་ཉིད་རྡོ་རྗེ་འཆང་བར་བཤད། །ཅེས་བྱ་བ་ནི། རྫས་ཐམས་ཅད་དང་བྲལ་བས་ནམ་མཁའ་རྡོ་རྗེ་སྟེ། དངོས་པོ་མེད་པ་ལ་ནམ་མཁའ་རྡོ་རྗེ་ཞེས་བྱ་བར་གཞན་དག་གི་རྗེས་སུ་འབྲངས་ནས་ཤེས་པར་བྱའོ། །དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ལ་སོགས་པ་ལ། དེ་བཞིན་གཤེགས་པ་ཐམས་ཅད་
ཀྱིས་ནི་རྣམ་པར་སྣང་མཛད་ལ་སོགས་པའིའོ། །མཉམ་པ་ཉིད་དུ་གནས་པ་ནི་དོན་དམ་པར་གཉིས་སུ་མེད་པའི་ངོ་བོ་ཉིད་དོ། །དེ་ཉིད་ལ་གནས་པ་ནི་ཐམས་ཅད་དུ་རྟག་ཏུ་བཞུགས་པའི་ཕྱིར་རོ། །དམིགས་པ་ཞེས་བྱ་བ་ལ་སོགས་པའི་དོན་ནི་བཤད་ཟིན་ཏོ། །དེ་བཞིན་གཤེགས་པ་ཐམས་ཅད་ཀྱི་ངོ་བོ་ཉིད་གཅིག་ཏུ་དམིགས་པའི་རྣམ་པ་ལ་ཐུགས་རྩེ་གཅིག་ཏུ་མཛད་ཅེས་བྱ་བའི་དོན་ཏོ། །བྱམས་པ་ལ་སོགས་པ་ཁྱེད་ཐམས་ཅད་ཀྱིས་ཏིང་ངེ་འཛིན་འདི་ཉིད་མངོན་དུ་བྱའོ་ཞེས་བྱ་བ་བསྟན་པར་བྱ་བའི་ཕྱིར། དཀྱིལ་འཁོར་གྱི་འཁོར་ལོ་ལ་རྣམ་པར་གཟིགས་ནས་ཅང་མི་གསུང་བར་གྱུར་པ་ཡིན་ཏེ། འདི་ནི་བཅོམ་ལྡན་འདས་ཀྱིས་ཆོས་བདག་མེད་པའི་ཡེ་ཤེས་རྒྱུ་མཐུན་པ་ཉེ་བར་བསྟན་ནས་ཆོས་རྣམས་དེ་ཉིད་ཉེ་བར་བསྡུ་བའི་སྒོ་ནས་དེར་རྫོགས་པར་བསྟན་པ་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ། དུས་བསྟན་པའི་འོག་ཏུ་བྱམས་པ་ཇི་སྐད་དུ་བཤད་པའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ནི་དགེ་བའི་གཤེགས་གཉེན་ལ་རག་ལུས་པ་ཡིན་ནོ་ཞེས་བྱ་བ་རྣམ་པར་བསམས་ནས་སློབ་དཔོན་གྱིས་སློབ་མ་ལ་སངས་རྒྱས་ལ་སོགས་པ་སྟེར་བ་ཡིན་པར་ཤེས་ཏེ། དེ་བཞིན་གཤེགས་པ་ལྟར་གུས་པ་བསྐྱེད་པར་བྱའོ་ཞེས་བསམས་ནས། དེ་བཞིན་གཤེགས་པས་གསུངས་པར་འདོད་ནས་ཕྱག་བྱས་ཏེ་འདི་སྐད་ཅེས་གསོལ་ཏོ་ཞེས་བྱ་བ་ལ་སོགས་པ་ནི་གདུལ་བྱའི་སྐྱེ་བོའི་ཐེ་ཚོམ་བཟློག་པའི་ཕྱིར་རང་ཉིད་ཀྱིས་མ་གསུངས་སོ་ཞེས་ཤེས་པར་བྱའོ། །རྡོ་རྗེ་བྱང་ཆུབ་ཀྱི་སེམས་སུ་ཞེས་བྱ་བ་ལ་སོགས་པ་ལ་སངས་རྒྱས་ཉིད་ལ་སོགས་པ་ཐོབ་པར་བྱེད་པས་སམ། སློབ་མ་དམ་བཅས་པ་དེ་བྱས་པས་ནི་དེའི་སྒྲ་གསུངས་པ་ཡིན་ནོ། །དེས་ཀྱང་འདི་ལྟར་བལྟ་བར་བྱའོ་ཞེས་བྱ་བ་ནི་ཅིའི་ཕྱིར་ཞེ་ན། བྱམས་པ་བྱང་ཆུབ་ཀྱི་སེམས་རྡོ་རྗེ་སློབ་དཔོན་དང་གཉིས་སུ་མེད་པའི་ཕྱིར་རོ་ཞེས་བྱ་བ་འོག་མ་དང་སྦྱར་རོ་གང་གི་ཕྱིར་ཞེ་ན། ཇི་སྐད་དུ་བཤད་པའི་བྱང་ཆུབ་ཀྱི་སེམས་དང༌། དེ་གཉིས་ནི་མཉམ་པའི་ཚུལ་གྱིས་གནས་པས་ན་གཉིས་བྱར་མེད་པའི་ཕྱིར་རོ་ཞེས་གསུངས་སོ། །བར་ནས་ཞེས་བྱ་བའི་
སྒྲ་ནི་མངོན་པར་འདོད་པའི་དོན་རྫོགས་པར་བྱེད་པ་ཉིད་དོ་ཞེས་རིགས་པ་དང་ལྡན་པར་ཡོངས་སུ་གཟུང་ངོ༌། །རིགས་ཀྱི་བུ་ཞེས་བྱ་བ་ལ་སོགས་པ་ལ། འདི་ལྟར་དངོས་སུ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དུས་གསུམ་དུ་བྱོན་ནས་འདི་སྐད་གསུངས་ཏེ། ཀུན་ནས་ཀྱང་རྣལ་འབྱོར་ཆེན་པོའི་རྣམ་པར་གཞག་པས་བཞུགས་ནས་དེ་བཞིན་གཤེགས་པ་ཐམས་ཅད་ཀྱིས་མཆོད་པ་རྗེས་སུ་འཛིན་པའི་མཚན་ཉིད་རྣམས་ཡང་དག་པར་མཆོད་ཅིང་རྗེས་སུ་གསུངས་ནས་ཡང་སླར་གཤེགས་པར་མཛད་པའོ། །འདི་སྐད་སྟོན་ཏེ་སློབ་མས་སློབ་དཔོན་ནི་སངས་རྒྱས་ལ་སོགས་པ་ཡང་བཀའ་བཞིན་བྱེད་པའོ་ཞེས་ཁོང་དུ་ཆུད་ནས་སངས་རྒྱས་ལ་སོགས་པ་སྒྲུབ་པར་འདོད་པས་སློབ་དཔོན་ཉིད་ཀུན་ནས་གཟུང་བར་བྱའོ་ཞེས་བྱ་བ་སྟེ་དོན་འདི་ཉིད་གསལ་བར་བྱེད་པའི་ཕྱིར་འདི་སྐད་ཅེས་བྱ་བ་ལ་སོགས་པ་གསུངས་ཏེ། བརྒྱུད་པའི་རིམ་གྱིས་བདག་ཅག་ལ་མན་ངག་སྟོན་པ་རྩོལ་བ་སྐྱེད་པར་མཛད་པས་ན་བདག་དེ་བཞིན་གཤེགས་པ་ཐམས་ཅད་ཀྱི་ཕ་ཡིན་ནོ། །བདག་ཅག་གི་མ་ཡིན་ནོ་ཞེས་དེ་བཞིན་གཤེགས་པ་གསུངས་པའམ། དཀྱིལ་འཁོར་དུ་བཤད་པའི་སྒྲུབ་པའི་ཐབས་ཀྱི་རིམ་གྱིས་རྫོགས་པར་བྱས་པས་ན་དེ་སྐད་གསུངས་སོ། །ཇི་སྲིད་ཀྱི་སྒྲས་ནི་བདག་གི་དོན་ནི་སེམས་ཅན་གྱི་དོན་བྱས་པ་སྟེ་མཆོག་ཏུ་ཕན་བཏགས་པའོ་ཞེས་བྱ་བ་ལ་སོགས་པ་ཡོངས་སུ་བཟུང་ངོ༌། །བདག་ཅག་ནི་སྟོན་པའོ་ཞེས་བྱ་བ་ནི་དམ་ཚིག་ལས་འདའ་བར་བྱེད་པའི་སློབ་མ་མཐོང་ནས་དངོས་གྲུབ་སྤྱིན་པའི་ཕྱིར་རང་གི་ལུང་བསྒོ་བ་ལ་འཇོག་པས་བདག་ཅག་སྟོན་པའོ། །དཔེར་ན་ཞེས་བྱ་བ་ལ་སོགས་པ་ལ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཕྱག་རྒྱ་བཞི་ལ་བསོད་ནམས་ཀྱི་ཕུང་པོ་ཇི་སྙེད་སྐྱེ་བ་བས་སློབ་དཔོན་གྱི་བ་སྤུའི་ཁུང་བུ་གཅིག་ནས་བསོད་ནམས་ཀྱི་ཕུང་པོ་སྐྱེ་བ་གང་ཡིན་པ་དེ་ནི་སྔ་མ་བས་ཆེས་ལྷག་པའི་བསོད་ནམས་ཀྱི་ཕུང་པོ་སྐྱེ་བར་འགྱུར་རོ་ཞེས་པ་སྟེ་སྒྲུབ་པ་པོས་དེ་བཞིན་གཤེགས་པ་རྣམས་པས་སློབ་དཔོན་འདི་ཆེས་ལྷག་པར་བལྟ་པར་བྱ་སྟེ། དེ་རྣམས་ཀྱི་དམ་ཚིག་ཐོབ་པ་དེ་ལ་རག་ལུས་སོ། །ཞེས་འདི་ལྟར་མཆོག་ཏུ་བསྟན་པའི་ཚིག་གི་ངོ་བོ་དངོས་སུ་ཁོང་དུ་ཆུད་པར་མི་ནུས་པའི་
ཕྱིར་སེམས་ཅན་གྱི་ཁམས་ཤིན་ཏུ་དད་པ་མེད་པས། གཞན་ཡང་བྱས་པ་དེ་གསལ་བར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་སྨྲས་ཏེ། བྱང་ཆུབ་ཀྱི་སེམས་ཞེས་བྱ་བ་ལ་སོགས་པ་འོག་མ་དང་སྦྱར་ཏེ། ཇི་སྐད་ཀྱི་སྒྲས་སངས་རྒྱས་ལ་སོགས་པ་འཐོབ་པའི་རྒྱུར་གྱུར་པ་ཞེས་བྱ་བ་ལ་སོགས་པར་ཡོངས་སུ་གཟུང་སྟེ། དེ་ཡང་སློབ་དཔོན་ཡིན་ནོ་ཞེས་བྱ་བར་དགོངས་སོ། །དེ་ནས་ཞེས་བྱ་བ་ལ་སོགས་པ་དེ་ལྟ་བུའི་མཐུ་ཆེན་པོ་དང་ལྡན་པའི་རྡོ་རྗེ་སློབ་དཔོན་ཆེན་པོ་ལ་བརྙས་པའི་སེམས་ཅུང་ཟད་བསྐྱེད་པ་ཙམ་གྱིས་ཡུན་རིང་པོར་དམྱལ་བའི་གནས་སུ་གནས་པར་འགྱུར་རོ་ཞེས་གདུལ་བྱ་རྣམས་ཀྱིས་ཁོང་དུ་ཆུད་པར་བྱ་བའི་ཕྱིར་འཇིགས་ཤིང་སྐྲག་པའི་ཡིད་ཀྱིས་ཅང་མི་སྨྲ་པར་གྱུར་ཏོ། དེ་ལྟར་རྣམ་པར་སྣང་མཛད་ཀྱི་སློབ་དཔོན་ལ་ནན་ཏན་དུ་བྱ་བ་བསྟན་ནས། དེ་ལ་སངས་རྒྱས་ཐམས་ཅད་ཀྱི་གཞུང་མ་ཡིན་པར་གདུལ་བའི་སྐྱེ་བོ་འགའ་ཞིག་སོམ་ཉི་སྐྱེ་བར་འགྱུར་བས་དེ་བཟློག་པར་བྱ་བའི་ཕྱིར། དེ་ནི་མི་བསྐྱོད་པ་ལ་སོགས་པ་ཡང་དོན་དེ་ཉིད་གསུངས་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་སོ། །དེ་བཞིན་གཤེགས་པ་འོད་དཔག་མེད་དང༌། དེ་བཞིན་གཤེགས་པ་རྣམ་པར་སྣང་མཛད་ཅེས་བྱ་བ་ནི་འོད་དཔག་ཏུ་མེད་པའི་སྒྲ་ནི་སྣང་བ་མཐའ་ཡས་སོ། །རྡོ་རྗེ་འཆང་ཞེས་བྱ་བ་ལ་སོགས་པ་ལ། རྣམ་པར་སྣང་མཛད་ལ་སོགས་པ་ཐམས་ཅད་ཀྱི་རྡོ་རྗེ་འཆང་བ་ནི་ཡེ་ཤེས་འཛིན་པ་སྟེ། དེའི་དངོས་གྲུབ་ནི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་པོ། །དེའི་དམ་ཚིག་གི་རྒྱུར་གྱུར་པ་ནི་སློབ་དཔོན་ཏེ་དེ་ལ་དམིགས་པ་ནི་མངོན་སུམ་དུ་མཛད་པའོ། །དེ་ཉིད་རྡོ་རྗེ་སྟེ་ཏིང་ངེ་འཛིན་གང་ལ་དམིགས་པའི་ཏིང་ངེ་འཛིན་གྱིས་འདི་སྐད་སྟོན་ཏེ། དམ་ཚིག་གང་ལ་ཡིན་པ་མངོན་སུམ་དུ་མཛད་པ་སྟེ་དེ་བཞིན་གཤེགས་པ་ཐམས་ཅད་ལ་སོགས་པའི་དངོས་གྲུབ་དང༌། དམ་ཚིག་གི་སློབ་དཔོན་ལ་དམིགས་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་དོན་ཏོ། །ཕྱོགས་བཅུ་དུས་གསུམ་དུ་བྱུང་བའི་ཞེས་བྱ་བ་ནི་སྔ་མ་བཞིན་དུ་མཆོད་པར་བྱེད་པའོ། །མཆོད་པ་མཛད་ཅིང་ཕྱག་འཚལ་བར་མཛོད་ཅིག་ཅེས་བྱ་བ་ནི་ཏིང་ངེ་འཛིན་གསུམ་གྱི་རིམ་གྱིས་དཀྱིལ་འཁོར་བསྒྲུབ་པ་ལ་
སོགས་པར་འཇུག་པ་ལ་ཕྱག་འཚལ་བ་སྟེ། ཐམས་ཅད་ཀྱིས་གུས་པ་བསྐྱེད་པར་བྱ་བའི་ཕྱིར་ཞེས་བྱ་བ་སྟེ་སྤྱིའི་དོན་ནི་སྔ་མ་བཞིན་ནོ། །དེ་ཅིའི་ཕྱིར་ཞེ་ན། ཞེས་བྱ་བ་ལ་སོགས་པ་ནི་འདི་ལྟར་སློབ་དཔོན་ལ་ནན་ཏན་ཏུ་བྱ་བ་ལས་སྡོག་པར་མི་བྱ་སྟེ། བདག་ཅག་རྣམས་ཀྱིས་སློབ་དཔོན་འདི་ཉིད་ལས་མི་འབྲལ་བ་ལས་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཐམས་ཅད་བསྒྲུབ་པར་བྱའོ་ཞེས་འདི་ལྟ་བུའི་བསམ་པས་འཇུག་པའི་གདུལ་བྱ་རྣམས་ལ། དེ་དང་བྲལ་བས་གསང་སྔགས་ཀྱི་དངོས་གྲུབ་མེད་དོ་ཞེས་བྱ་བ་དེ་བཞིན་གཤེགས་པ་རྣམས་ཀྱིས་རབ་ཏུ་བསྟན་པར་བཞེད་ནས་གསུངས་པ་ཡིན་ནོ། །དེ་ནས་ཞེས་བྱ་བ་ལ་སོགས་པ་ནི་བྱམས་པ་ལ་སོགས་པ་བྱང་ཆུབ་སེམས་དཔའ་དེ་རྣམས་ཀྱི་དེ་བཞིན་གཤེགས་པ་དེ་དག་ལ་འོག་ནས་བཤད་པའི་དོན་གསོལ་བའོ། །དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ལ་སོགས་པ་ལ་དེ་བཞིན་གཤེགས་པ་ཐམས་ཅད་ལ་སོགས་པའི་དངོས་གྲུབ་གང་ལ་གནས་ཤེ་ན། གསང་བ་གསུམ་ནི་ཞེས་བྱ་བ་ལ་སོགས་པ་གསུངས་ཏེ། སྐུ་རྡོ་རྗེ་ལ་སོགས་པ་གསང་བ་གསུམ་དང་ལྡན་པའི་སློབ་དཔོན་གྱི་ལུས་ལ་སོགས་པ་ལ་གནས་པའོ། །ལུས་དང་ངག་དང་ཡིད་ཀྱི་རྡོ་རྗེའི་རྡོའི་གསང་བ་གང་ལ་གནས་པ་ཞེས་བྱང་ནི། དེ་བཞིན་གཤེགས་པ་རྣམས་དང༌། སློབ་དཔོན་གྱི་ཡང་ཞེས་ཤེས་པར་བྱའོ། །གང་དུ་ཡང་མ་ཡིན་ནོ་ཞེས་བྱ་བར་དེ་བཞིན་གཤེགས་པ་ཐམས་ཅད་ཀྱིས་གསུངས་སོ་ཞེས་སྔ་མ་དང་སྦྱར་ཏེ། དེ་བཞིན་གཤེགས་པ་ཐམས་ཅད་ཀྱི་སྐུ་རྡོ་རྗེ་ལ་སོགས་པ་ཇི་ལྟར་ཡོངས་སུ་བརྟགས་པའི་ངོ་བོ་ཉིད་ནི་དོན་དམ་པར་དངོས་པོ་མེད་པའི་ངོ་བོ་ཉིད་ཡིན་པས་གང་ལ་ཡང་མི་གནས་སོ། །དེ་བཞིན་དུ་སློབ་དཔོན་གྱི་ཡང་དོན་དམ་པར་གཉིས་སུ་མེད་པའི་ཡེ་ཤེས་ཡིན་པར་དེ་ཡང་སོ་སོར་ངེས་པའི་ཕྱོགས་ན་གནས་པ་མ་ཡིན་པས་གང་ན་ཡང་མི་གནས་སོ་ཞེས་བརྗོད་དོ། །དེ་ནས་ཞེས་བྱ་བ་ལ་སོགས་པ་ལ་དེ་བཞིན་གཤགས་པ་ལ་སོགས་པའི་སྐུ་རྡོ་རྗེ་ལ་སོགས་པ་ཇི་ལྟ་བ་བཞིན་དུ་ཡོངས་སུ་བརྟགས་པའི་དོན་དམ་པར་དངོས་པོ་མེད་པའི་ངོ་བོ་ཉིད་ཡིན་ལ། སློབ་དཔོན་གྱི་ལུས་དང་ངག་དང་ཡིད་ཀྱང་དོན་དམ་པར་མེད་པ་ཉིད་ཡིན་པ་
ལས་ཀུན་རྫོབ་ཏུ་དངོས་གྲུབ་དེ་འབྱུང་བར་འགྱུར་པ་ནི། སྔགས་ཀྱི་ཚུལ་གྱིས་ཆོས་ཉིད་ཀྱི་ཆེ་བའི་བདག་ཉིད་ཡིན་པར་མཐོང་ནས་དགའ་བ་ཐོབ་པ་ངོ་མཚར་དུ་གྱུར་པ་དང༌། གཞན་ཡང་ཆོས་ཉིད་ནི་སོ་སོར་རང་གིས་རིག་པའོ་ཞེས་རབ་ཏུ་བསྟན་པའི་ཕྱིར། ཅི་འང་མི་ཟེར་བར་འཁོད་དོ་ཞེས་བྱ་བ་ནི་འདི་ཉིད་ཀྱི་རྣམ་གྲངས་སོ། །འདི་སྐད་སྟོན་ཏེ། ཇི་སྐད་དུ་བཤད་པ་བཞིན་སློབ་དཔོན་ལ་ནན་ཏན་དུ་བྱ་སྟེ་དངོས་གྲུབ་རྣམས་ནི་དེ་ལ་རག་ལས་པའི་ཕྱིར་རོ། །དེ་བས་ན་འདི་ལྟར་རྒྱུད་གཞན་དག་ལས་སློབ་དཔོན་ལ་སྨོད་པར་བྱེད་པ་ལ་ནི་དངོས་གྲུབ་ཐམས་ཅད་གཞན་དུ་འགྱུར་བར་གསུངས་སོ། །སྟང་སྟབས་ཞེས་བྱ་བ་ནི་ཡན་ལག་གི་འགྱུར་བ་སྟེ་བརྐྱང་བསྐུམ་ལ་སོགས་པའི་མཚན་ཉིད་ཅན་ནོ། །འདུག་སྟངས་ཞེས་བྱ་བ་ནི་གནས་པའོ། །ལས་ལ་སྦྱར་བ་ཞེས་བྱ་བ་ནི་ཞི་བ་ལ་སོགས་པའི་ལས་རྣམས་ལ་ངེས་པར་སྦྱར་བའོ། །སླར་བསྡུ་བ་ཞེས་བྱ་བ་ནི་ཉེ་བར་བསྡུ་བའོ། །བཅུ་ཡིན་པར་ཞེས་བྱ་བ་ནི་དཀྱིལ་འཁོར་ལ་སོགས་པ་དེ་ཁོ་ན་ཉིད་བཅུ་སྟེ་རང་གི་ལྷའི་སྦྱོར་བ་ཙམ་དང་འབྲེལ་བ་ཡིན་པར་སངས་རྒྱས་རྣམས་གསུངས་པས་འདིས་ནི་སངས་རྒྱས་ཐམས་ཅད་ཀྱི་རྗེས་སུ་མཐུན་པའི་གཞུང་དུ་བསྟན་པ་ཡིན་ནོ། །དུས་གསུམ་དུ་བྱུང་བའི་རྒྱལ་བ་ཐུགས་རྗེ་རོ་གཅིག་པ་རྣམས་ཀྱིས་ཞེས་བྱ་བ་འདི་ནི་སྡུད་པར་བྱེད་པའི་ཚིག་ཡིན་ནོ། །གསང་བ་དང་གསང་ཆེན་དང་ཡེ་ཤེས་ཞེས་བྱ་བ་ནི་དཀྱིལ་འཁོར་ལ་སོགས་པ་སྟེ་དེ་ཁོ་ན་ཉིད་རྣམ་པ་བཅུ་གསང་བ་སྟེ། རང་གི་དམ་ཚིག་གི་ཕྱག་རྒྱ་དང་སྙོམས་པར་འཇུག་པ་དང་ལྡན་པའི་སྦྱོར་བ་ཡང་དག་པ་འབྲེལ་བར་གསུངས་སོ་ཞེས་སྔ་མ་དང་སྦྱར་རོ། །གསང་བ་རྣམ་པ་ལྔའི་དེ་ཁོ་ན་ཉིད་ཆེན་པོ་དང་འབྲེལ་བའི་དཀྱིལ་འཁོར་ལ་སོགས་པ་རྣམ་པ་བཅུ་ནི་གསང་ཆེན་ཡིན་ནོ་ཞེས་དེ་བཞིན་དུ་སྦྱར་རོ། །དེ་བས་ན་འདི་ལྟར་རྣམ་པ་གསུམ་གྱིས་ཞེས་བྱ་བ་ལ་སོགས་པ་གསུངས་ཏེ་དེ་དཀྱིལ་འཁོར་གྱི་དེ་ཁོ་ན་ཉིད་ལ་སོགས་པའི་དབྱེ་བས་རྣམ་པ་གསུམ་དུ་སྙིང་པོའི་ངོ་བོ་བསྟན་པ་ཡིན་ནོ། །བླ་མས་དམ་ཚིག་ཇི་ལྟ་པའི་དབང་དུ་བྱས་ནས་བཤད་པར་བྱའོ་ཞེས་བྱ་བ་ནི་དེ་ཁོ་ན་ཉིད་ལ་སོགས་པ་ལ་ལྷག་པར་མོས་པ་རྣམས་ལ་དེ་ཁོ་ན་ཉིད་ལ་སོགས་པའི་རིམ་གྱིས་མངོན་པར་འདུས་བྱས་པ་དང་བཅས་པས་བསྟན་པར་
བྱའི་མོས་པ་དང་མི་མཐུན་པར་གཞན་དུ་བསྟན་ན་དམ་ཚིག་ཉམས་ཤིང་དེ་ཡང་བསླུས་པར་འགྱུར་རོ། །དེ་ཁོ་ན་ཉིད་ལ་སོགས་པ་ཉིད་གསུངས་པ་ནི་སེམས་ཅན་རྣམས་ལ་ཞེས་བྱ་བ་ལ་སོགས་པ་ཡིན་ཏེ། རྣལ་འབྱོར་གྱི་རིམ་པ་ནི་རང་གི་ལྷའི་རྣལ་འབྱོར་ཙམ་གྱི་རིམ་པའོ། །ལྷག་པའི་རྣལ་འབྱོར་གྱི་རིམ་པ་ནི་དམ་ཚིག་གི་ཕྱག་རྒྱ་དང་ཡང་དག་པར་སྦྱོར་བ་དང་ལྡན་པའི་རང་གི་ལྷའི་རྣལ་འབྱོར་གྱི་རིམ་པའོ། །རྣལ་འབྱོར་ཆེན་པོའི་རིམ་པ་ནི་གསང་བ་ལྔའི་བདག་ཉིད་ཀྱི་རང་གི་ལྷའི་རིམ་པས་ཏེ་འདི་དག་གིས་དཀྱིལ་འཁོར་གྱི་ཆོ་ག་ལ་སོགས་པ་གནས་སྐབས་སུ་ཇི་ལྟ་བ་བཞིན་དུ་དཀྱིལ་འཁོར་གྱི་དེ་ཁོ་ན་ཉིད་ལ་སོགས་པ་ཅུང་ཟད་བསྟན་པ་ཅུང་ཟད་ཙམ་གྱིས་ཉུང་དུ་བསྟན་པ་ཡིན་ཏེ། འདིར་བཤད་པའི་དཀྱིལ་འཁོར་ལ་སོགས་པ་དེ་ཁོ་ན་ཉིད་རྣམ་པ་བཅུ་ལ་སོགས་པ་སློབ་དཔོན་གྱི་ཁ་ལས་རྒྱ་ཆེར་ཤེས་པར་བྱ་སྟེ་གཞུང་མངགས་ཀྱིས་དོགས་པས་འདིར་མ་བྲིས་སོ། །བཤད་མ་ཐག་པའི་དོན་དེ་ཁོ་ན་ཉིད་རྣམས་ནི། ཐམས་ཅད་ན་ཡང་ཡོད་པར་བསྟན་པའི་ཕྱིར་འདི་དག་གི་ཞེས་བྱ་བ་ལ་སོགས་པ་གསུངས་ཏེ་འདི་དག་ཅེས་བྱ་བ་ནི་དཀྱིལ་འཁོར་གྱི་དེ་ཁོ་ན་ཉིད་ལ་སོགས་པ་གསལ་བར་ཕྱེ་བ་ལས་ལྟོས་པ་ཡིན་པས་སོ། །དམ་ཚིག་ཐམས་ཅད་ཉམས་པར་བྱེད་དོ། །ཞེས་བྱ་བ་ལ་སོགས་པ་ལ་འདིར་འདི་ལྟར་སྦྱར་པར་བྱ་སྟེ། སེམས་ཅན་ལ་མཆོག་ཏུ་ཕན་འདོགས་པར་བྱེད་པ་བསྔགས་ཤིང་ཡིད་དུ་འོང་བ་ལ་སོགས་པ་སུལ་དུ་བྱས་ནས་བསོད་ནམས་བསགས་པའི་རྒྱུར་གྱུར་པ་ལ་བརྟེན་ནས་བྱང་ཆུབ་ཀྱི་སྤྱོད་པ་ལ་སྤྱད་པར་བྱ་བ་ཡིན་ནོ། །དེ་བས་བསླུས་ཤིང་ཡང་དག་པའི་ཚུལ་མ་བསྟན་ན་དམ་ཚིག་སྟེ་རྡོ་རྗེ་སེམས་དཔའ་ལ་སོགས་པའི་དམ་ཚིག་ལས་ཉམས་ཤིང་ཡོངས་སུ་ཟད་པར་འགྱུར་རོ། །དེའི་དམ་ཚིག་ལས་ཉམས་པ་ལ་བདུད་དང་མཁའ་འགྲོ་ལ་སོགས་པས་ཡོངས་སུ་བཟུང་སྟེ། དེ་ནས་དེ་གསོད་ལ་དེ་ལྟར་སྐྱེས་བུ་ཤི་བར་གྱུར་ནས་ཀྱང་སེམས་ཅན་དམྱལ་པ་མི་ཟད་པ་སྟེ་མནར་མེད་པ་ལ་སོགས་པའི་ངན་སོང་དུ་འགྲོ་བར་འགྱུར་རོ། །ཤེས་པར་བྱས་ནས་ཞེས་བྱ་བ་ནི་གང་གི་ཕྱིར་སེམས་ཅན་སླུ་བ་ནི་ཉེས་པ་ཆེན་པོ་ཡིན་ཏེ་དེ་བས་ན་དེ་རྣམས་དེ་བཞིན་གཤེགས་པའི་ལམ་ཡང་དག་པར་སྤྱོད་པ་ལ་གཟུད་ཅིང་
ཡང་ནས་ཡང་ཐོས་པས་ཞེས་བྱ་བ་དང་འཛིན་དུ་གཞུག་པ་དང༌། ཇི་ལྟར་ཐོས་པ་དེ་བཞིན་དུ་མན་ངག་བྱིན་པས། དེ་ཉིད་ལ་བརྟེན་པ་ལ་སོགས་པའི་རིམ་གྱིས་གསང་སྔགས་ཀྱི་ཚུལ་ཐེག་པ་ཆེན་པོ་ལ་སེམས་ཅན་རྣམས་སྦྱར་ཞིང་གཞུག་པར་བྱའོ། །རྡོ་རྗེ་ཐེག་པ་ལ་ཞུགས་པའི་རྣལ་འབྱོར་པས་བཟླས་པ་དང་སྒོམ་པ་ལ་མངོན་པར་མི་དགའ་ན་བྱང་ཆུབ་ཐོབ་པར་དཀའོ་ཞེས་བསྟན་པའི་ཕྱིར་དང༌། རྒྱུད་ཀྱི་མཐར་ཇི་སྐད་དུ་བཤད་པའི་དངོས་གྲུབ་བསྒྲུབ་པ་ལ་སྤྲོ་བ་སྐྱེད་པའི་ཕྱིར། གང་ཞིག་འདི་ལ་བརྩོན་པ་མ་བྱས་པ། །ཞེས་བྱ་བ་ལ་སོགས་པ་གསུངས་ཏེ་ཇི་སྐད་དུ་བཤད་པའི་གསང་སྔགས་ཀྱི་ཚུལ་གྱི་བདུད་རྩིའི་རོ་ཐོས་པ་དང་ཤེས་ཤིང་རྟོགས་པ་ཐོབ་པས་སྡིག་པ་གཞོམ་པའི་ཕྱིར་བཟླས་པ་དང་སྒོམ་པ་ལ་བརྩོན་པས་མི་བྱེད་པ་དེ་དཀའ་ཐུབ་ཀྱི་སྤྱོད་པ་ལ་སོགས་པས་ཇི་ལྟར་མངོན་པར་བྱང་ཆུབ་པར་འགྱུར་ཞེས་ཤེས་པར་བྱ་སྟེ་གང་བདེ་བླག་གིས་སྦྱོར་བས་མི་ནུས་པ་གང་ཡིན་པ་སྟེ་དགའ་བ་ཉིད་ནི་མ་ཡིན་ནོ་ཞེས་བྱ་བའི་དོན་ཏོ། །རྣམ་པ་གཞན་གྱིས་བྱང་ཆུབ་པ་མེད་དོ་ཞེས་བཀག་ནས་ད་ནི་གང་གིས་རྣལ་འབྱོར་བསྒོམ་པར་བྱ་བ་དེ་བསྟན་པའི་ཕྱིར། རྣལ་འབྱོར་གཅིག་ཅེས་བྱ་བ་ལ་སོགས་པ་གསུངས་ཏེ། རྣམ་པར་སྣང་མཛད་ལ་སོགས་པ་གང་ཡང་རུང་པའི་རྣལ་འབྱོར་ཤེས་པར་བྱས་ལ། སྐྱེ་བོ་མེད་པར་སོང་སྟེ་སྒྲའི་ཚེར་མ་ལ་སོགས་པ་དང་བྲལ་བའི་གནས་སུ་ཕྱིན་ནས་འདུ་འཇི་ཐམས་ཅད་དང་བྲལ་བར་བྱས་ཏེ། དངོས་གྲུབ་ཀྱི་རྣམ་པ་ཆོ་ག་གང་གིས་སྐྱེ་བ་གང་ལ་བཟླས་བརྗོད་ལ་སོགས་པ་ལ་ཞུགས་པའི་སྐྱེ་བོ་དེ་ཉིད་ལ་སངས་རྒྱས་ཀྱི་ཡོན་ཏན་སྟོབས་བཅུ་དང༌། མི་འཇིགས་པ་ལ་སོགས་པ་རྣམས་དང་ལྡན་ཞིང་སེམས་ཅན་གྱི་དོན་བྱེད་པའི་ནུས་པ་དང་ལྡན་པའི་བསོད་ནམས་ཀྱི་ཚོགས་བསགས་པ་རྙེད་ཅིང་ཐོབ་པར་འགྱུར་བར་བྱའོ། །རྣལ་འབྱོར་གྱི་ཁྱད་པར་ཡང་ཇི་ལྟ་བུ་ཞེ་ན། དེའི་ཁྱད་པར་བསྟན་པའི་ཕྱིར་ཆོས་བདག་མེད་པ་བསྒོམས་པ་ཞེས་བྱ་བ་ལ་སོགས་པ་གསུངས་ཏེ་གང་ཆོས་བདག་མེད་པ་ཁོང་དུ་ཆུད་པ་མཁས་པས་སོ། །ཤེས་རབ་དང་ཡེ་ཤེས་ཀྱི་འཇོ་ཚུལ་གྱིས་ཞེས་པ་ནི་ཐབས་དང་བཅས་པའི་ཤེས་རབ་དང་ཡེ་ཤེས་ཀྱི་རྣམ་པར་རྩེ་ཞིང་རོལ་
པ་གང་ཡིན་པའོ། །སྤྲོ་བ་དང་བསྡུ་བ་དང་གསང་བ་ལྔའི་བདག་ཉིད་ཅན་གྱི་གཙོ་བོ་ལ་མཆོད་པར་བྱའོ་ཞེས་བྱ་བ་ནི་སངས་རྒྱས་ལ་མཆོད་པ་མེ་ཏོག་ལ་སོགས་པ་སྒྲོ་བ་དང་བསྡུ་བ་དང་གསང་བ་ལྔའི་བདག་ཉིད་ཅན་གྱི་གཙོ་བོ་རང་གི་ལྷག་པའི་ལྷ་སྒོམ་པའི་སྦྱོར་བས་མཆོད་པ་གང་ལ་ཡོད་པ་དེ་ཉིད་ཐོབ་པས་མཆོད་དོ་ཞེས་སྦྱར་རོ། །གཞན་ཡང་དེ་ཉིད་ཀྱི་ཁྱད་པར་བསྟན་པའི་ཕྱིར་དངོས་པོ་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། དོན་དམ་པར་དངོས་པོ་མེད་པའི་ངོ་བོ་ཉིད་ཡིན་པས་ན་དཀྱིལ་འཁོར་གྱི་དེ་ཁོ་ན་ཉིད་ལ་སོགས་པ་གཞི་བཅུ་སྟེ། དེ་ཁོ་ན་ཉིད་བཅུའི་གཞི་ཐམས་ཅད་ནི་རྣམ་པར་སྣང་མཛད་ལ་སོགས་པའི་རིམ་གྱིས་སྦྱོར་བ་གོམས་པས་དངོས་པོ་ཐམས་ཅད་ཀྱི་དོན་རྟོགས་པའོ། །ཟླ་གསང་ཐིག་ལེའི་ཚུལ་གྱིས་རྡོ་རྗེ་དང་པདྨས་དབང་བསྐུར་བ་ཉིད་ནི་བཤད་གཅི་ལ་སོགས་པའི་ངོ་བོ་རྣམ་པར་སྣང་མཛད་ལ་སོགས་པའི་ངོ་བོ་ཉིད་དུ་ཡོངས་སུ་གྱུར་པར་ལྷག་པར་མོས་ནས་སྤྱང་བ་ལ་སོགས་པ་བྱས་ཏེ། ཉིན་རེ་ཞིང་སྤྱད་དེ་སངས་རྒྱས་ཀྱི་ཐབས་མཁས་པ་བསམ་གྱིས་མི་ཁྱབ་པས་འདི་ལྟ་སྟེ་འདི་ཉིད་ཀྱིས་ཀྱང་འབྲས་བུ་རབ་ཏུ་སྩོལ་བར་འགྱུར་ཏེ། གསང་སྔགས་ཀྱི་ཆོས་ཉིད་བསམ་པ་ཡིན་ནོ་ཞེས་ཡིད་ལ་བྱས་པས་བདུད་རྩི་ལྔ་རྣམས་ཀྱིས་དགའ་བ་དང་མགུ་བར་བྱེད་དོ། །བདུད་རྩི་ལྔས་དགའ་བར་བྱེད་དོ་ཞེས་བྱ་བ་ལ་ལ་ནི་མེ་ལོང་ལྟ་བུ་ལ་སོགས་པའི་ཡེ་ཤེས་ལྔའི་རྒྱུ་མཐུན་པ། དེས་རིགས་ལྔའི་ངོ་བོ་ཉིད་བདུད་རྩི་ལྔ་སྟེ་དེས་དགའ་བར་བྱེད་པའོ་ཞེས་བྱ་བ་ནི་སྔ་མ་བཞིན་ནོ། །གསང་བར་བྱ་བའི་ཆོས་གསང་བས། །ཞེས་བྱ་པ་ནི་འོག་ནས་ཤིན་ཏུ་གསང་ཞིང་སྦ་བར་བྱས་ཏེ་ཞེས་པ་སྐལ་བ་ངན་པའི་སྐྱེ་བོ་རྣམས་ཀྱི་ཕྱིར་སྟོན་པར་མི་བྱེད་ཀྱི་རང་ཉིད་སྦས་པས་འཇོག་པའོ། །གཟུགས་སྒྲ་ཞེས་བྱ་བ་ལ་སོགས་པ་ལ་བལྟས་བ་དང་རེག་བས་བལྟ་བར་བྱ་བའི་གཟུགས་དང་རྣ་བས་མཉན་པར་བྱ་བ་ཐམས་ཅད་དོ། །རེག་པ་ནི་རེག་བྱས་རེག་པའོ། །འདོད་པའི་ཡོན་ཏན་ལྔ་པོ་འདི་དག་ལ་སྤྱོད་ནས་རྣལ་འབྱོར་ལ་གནས་ཤིང༌། རྣམ་པར་སྣང་མཛད་ལ་སོགས་པའི་སངས་རྒྱས་ཉིད་ནི་འདོད་པར་བྱ་བ་ཡིན་པས་ན་འདོད་པའོ། །དེ་ཉིད་བསླབ་ཅིང་གོམས་པར་བྱ་བས་ན་ཡོན་ཏན་ནོ། །དེ་རྣམས་ཀྱི་རྣམ་པ་ནི་
གཟུགས་བརྙན་ལ་སོགས་པའི་མཚན་ཉིད་དེ་ཟ་བ་ལ་སོགས་པའི་རྣལ་འབྱོར་སེམས་ཤིང་རང་གི་ལྷའི་སྦྱོར་བ་བསྒོམས་པས་སྤྱོད་ཅིང་རྣམ་པར་སྤྱོད་པར་འགྱུར་བ་སྟེ་ཐམས་ཅད་རྟོགས་ཤིང་ཁོང་དུ་ཆུད་པའི་ཚུལ་ལོ། །འདི་སྐད་སྟོན་ཏེ་གཟུགས་ལ་སོགས་པ་ཡུལ་ལྔ་ནི་རྣམ་པར་སྣང་མཛད་ལ་སོགས་པའི་བདག་ཉིད་ཅན་དུ་རྣལ་འབྱོར་པས་ཐམས་ཅད་དུ་བསྒྲུབ་པར་བྱའོ་ཞེས་པའོ། །བལྟས་དང་ཁུ་ཚུར་རྣམ་པ་ཡིས། །སེམས་ཅན་ཐམས་ཅད་དབང་དུ་བྱེད། །ཅེས་བྱ་བ་ནི་བལྟ་བ་ནི་མཐོང་བའོ། །ཁུ་ཚུར་ནི་བཅིང་བའོ། །ཉེ་བར་མཚོན་པ་འདིས་ན་སྨིན་མ་བསྐྱོད་པ་ལ་སོགས་པ་ཡོངས་སུ་གཟུང་སྟེ་ཚུལ་དེ་དག་གིས་སེམས་ཅན་ཐམས་ཅད་དབང་དུ་བྱེད་པས་ན་འདི་སྐད་ཅེས་བྱའོ། །འདི་སྟོན་ཏེ་མཉམ་པར་མ་བཞག་པའི་སྦྱོར་བས་གང་གི་ཚེ་རྣལ་འབྱོར་བ་སྤྱོད་པ་དེའི་ཚེ་མཐོང་བ་ལ་སོགས་པས་རང་གི་ལྷའི་ང་རྒྱལ་དུ་བྱས་ནས་སེམས་ཅན་ཐམས་ཅད་རང་དབང་དུ་བྱེད་དེ། དེའི་བདག་ཉིད་ནི་ལྷའི་ང་རྒྱལ་ཉིད་ཀྱིས་སེམས་པར་བྱེད་དོ། །དེ་ནས་གང་གི་ཚེས་བདག་ལ་སོགས་པ་མངག་གཞུག་པར་གྱུར་པ་དེའི་ཚེ་བདག་ཉིད་ཀྱིས་ཕྱོགས་བཅིང་བ་དང༌། སྔ་མ་བཞིན་དུ་བཟླས་པ་དང་སྒོམ་པ་ལ་སོགས་པ་ལ་བརྩོན་པ་ཉིད་ཀྱིས་བསྒྲུབ་པའི་མཚན་མ་ཐོབ་པར་བྱས་ནས་སྒྲུབ་པ་ལ་འཇུག་པར་བྱའོ། །འཁོར་ལོ་ལ་སོགས་པའི་དངོས་གྲུབ་ཐམས་ཅད་ཀྱི་བྱ་བའི་ཐབས་ནི་ཆོ་ག་ཐམས་ཅད་དེ་དེ་སྟོན་པའི་གཞུང་གི་ལེའུ་ལ་རིམ་པར་ཕྱེ་བའི་སྒྲར་བརྗོད་དོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཞེས་བྱ་བ་ལ་སོགས་པ་ལ་བཅོམ་ལྡན་འདས་ཀྱིས་རྒྱུད་གསུངས་པས་ཡང་དག་པའི་དོན་རྫོགས་པར་མཐོང་བས་ཡིད་དགའ་བར་གྱུར་པ་སྟེ། ལྷ་དང་མི་དང་ལྷ་མ་ཡིན་དང་བཅས་པའི་འཇིག་རྟེན་པ་མངོན་པར་དགའ་བ་སྟེ། ཇི་སྐད་དུ་གསུངས་པ་རང་གིས་ཐོས་པའི་ཤེས་པས་མངོན་སུམ་དུ་ཐོས་ཤིང་ཡིད་ལ་འཇོག་པས་བཅོམ་ལྡན་འདས་རྣམ་པར་སྣང་མཛད་ལས་ཐོས་པས་ན་བྱམས་པ་ལ་སོགས་པ་མངོན་པར་དགའ་བར་གྱུར་བ་སྟེ། བསྟོད་དོ་ཞེས་བྱ་བའི་སྒྲས་ནི་ཡོངས་སུ་རྫོགས་པའོ། །རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བའི་རྒྱ་ཆེར་བཤད་པ། སློབ་དཔོན་མཁས་པ་ཆེན་པོ་ཀུན་དགའ་སྙིང་པོས་
མཛད་པ་རྫོགས་སོ།། །།ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཞིང་ཞུས་ཏེ་གཏན་ལ་ཕབ་པའོ།།