དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངན་སོང་ཐམས་ཅད་ཡོངས་སུ་སྦྱོང་བའི་གཟི་བརྗིད་ཀྱི་རྒྱལ་པོ་ཞེས་བྱ་བའི་བརྟག་པའི་བཤད་པ།
ཀུན་དགའ་སྙིང་པོ།
རྒྱ་གར་སྐད་དུ། སརྦ་དུ་རྒ་ཏི་པ་རི་ཤོ་དྷ་ཡ་ཏེ་ཛོ་རཱ་ཛཱ་ཡ་ཏ་ཐཱ་ག་ཏཱ་ཡ་ཨརྷ་ཏེ་ས་མྱཀྶཾ་བུདྡྷཱ་ཡ་ཀལྤ་ནཱ་མ་ཊཱི་ཀ །བོད་སྐད་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངན་སོང་ཐམས་ཅད་ཡོངས་སུ་སྤྱོང་བའི་གཟི་བརྗིད་ཀྱི་རྒྱལ་པོ་ཞེས་བྱ་བའི་བརྟག་པའི་བཤད་པ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཉེས་པའི་སྐྱོན་བྲལ་ཡོན་ཏན་མཐའ་དག་རྫོགས། །བདེ་ལེགས་ཇི་སྙེད་ཐམས་ཅད་འབྱུང་བའི་གནས། །སྐུ་གསུམ་མཆོག་གི་བདག་ཉིད་རྣམ་སྣང་མཛད། །གནས་གསུམ་འདྲེན་པའི་གཙོ་ལ་ཕྱག་འཚལ་ལོ། །སྐུ་གསུམ་གཙུག་ཏོར་བདག་ཉིད་རྒྱུད་ཆེན་ལས། །རྡོ་རྗེ་རྩེ་མོའི་ཀལྤའི་རྒྱུད་འདི་ཉིད། །རབ་ཏུ་ཟབ་ཅིང་རྒྱ་ཆེ་རྟོགས་དཀའ་བའི། །མདོ་ཡི་དོན་འདི་མདོ་ཙམ་དགྲོལ་བར་བྱ། །དེ་ལ་འདི་སྐད་བདག་གིས་ཐོས་པ་དུས་གཅིག་ན་ཞེས་བྱ་བ་ལ་སོགས་པ་འདིའི་བརྗོད་པར་བྱ་བ་དང་འབྲེལ་པ་ནི་གང་ཞིག་ཡིན། དེ་བཞིན་དུ་དགོས་པ་དང༌། དགོས་པའི་དགོས་པ་ནི་ཅི་ཞིག་ཡིན་ཞེ་ན། དེ་བརྗོད་པར་བྱ་སྟེ། བཅོམ་ལྡན་འདས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་གཟི་བརྗིད་ཀྱི་རྒྱལ་པོའི་བརྟག་པ་ངན་སོང་ཐམས་ཅད་ཡོངས་སུ་སྦྱོང་བ་སྐུ་གསུམ་གྱི་གཙུག་ཏོར་གྱི་རྒྱུད་ཆེན་པོ་ཞེས་བྱ་བ་འདི་ནི་རྒྱུན་ཡིན་ལ། འདིའི་འདི་སྐད་བདག་གིས་ཞེས་བྱ་བ་ལ་སོགས་པ་ནས། ཀུན་རིག་རྣམ་པར་སྣང་མཛད་སྐུ་གསུམ་གྱི་རྒྱུད་ཀྱི་བདག་དང་གཞན་གྱི་དོན་ཕུན་སུམ་ཚོགས་པ་སྟོན་པར་བྱེད་པ་ཡིན་ཏེ། དེ་ཡང་དགའ་ནས་རྗེས་སུ་ཡི་རང་ངོ་བས་གདུལ་བྱ་རྣམས་འདོད་པ་བསྐྱེད་པར་བྱ་བའི་ཕྱིར་གསུངས་པ་ཡིན་ནོ། །དེ་ལ་ཡང་རྒྱུད་ཀྱི་དོན་དབང་པོ་རབ་མགོ་སྨོས་པས་གོ་བ་དང༌། དབང་པོ་འབྲིང་ཚིག་དང་དོན་རྣམ་པར་ཕྱེ་བས་གོ་བ་རྣམས་ལ་ནི་རྒྱུད་ཀྱི་མཚན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངན་སོང་ཐམས་ཅད་ཡོངས་སུ་སྤྱོང་བ་གཟི་བརྗིད་ཀྱི་རྒྱལ་པོའི་བརྟག་པ་སྐུ་གསུམ་གྱི་གཙུག་ཏོར་གྱི་རྒྱུད་ཆེན་པོ་ཞེས་བྱ་བས་ཀྱང་དབུ་ཞབས་ཀྱི་དོན་རྟོགས་པར་འགྱུར་ལ། དབང་པོ་འབྲིང་ཚིག་དང་དོན་རྣམ་པར་ཕྱེ་བས་གོ་བ་རྣམས་ལ་ནི་དེ་ཉིད་ཀྱི་དོན་རྣམ་པར་ཕྱེ་བས་གོ་བ་ཡིན་ཏེ། དེ་ཉིད་ཀྱི་དོན་ཡང་བཅོམ་ལྡན་འདས་ཞེས་བྱ་བ་ལ་སོགས་པ་སྟེ། བཅོམ་པ་ནི་ཉོན་མོངས་པའི་སྒྲིབ་པ་དང༌། ཤེས་བྱའི་སྒྲིབ་པ་གཉིས་
གཏན་སྤངས་པས་ཕུང་པོའི་བདུད་ལ་སོགས་པ་བཞི་བཅོམ་པའོ། །ལྡན་པ་ནི་ལེགས་པའི་ཡོན་ཏན་དྲུག་དང་ལྡན་པས་ན་བཅོམ་ལྡན་འདས་ཏེ། དེ་ཡང༌། ཉོན་མོངས་ཤེས་རབ་ཀྱིས་ཐུབ་སྟེ། །དེའི་ཕྱིར་ཤེས་རབ་འཇོམས་ཞེས་བྱ། །དབང་ཕྱུག་ལ་སོགས་དྲུག་ལྡན་པས། །བཅོམ་ལྡན་འདས་ཞེས་རབ་ཏུ་བརྗོད། །ཅེས་སོ། །མངོན་པར་རྫོགས་པར་བྱང་ཆུབ་པ་ལྔ་རྫོགས་ཤིང་ཆོས་ཐམས་ཅད་ངོ་བོ་ཉིད་མེད་པ་སྟོང་པ་ཉིད་ཀྱི་ཆོས་ཉིད་དུ་སངས་རྒྱས་པ་ལ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་བྱའོ། །དེ་ཡང༌། གསང་བ་ཆེན་པོ་ཚོགས་མཐོ་བ། །ཞེས་བྱ་བའི་རྒྱུད་ལས། སྔ་མ་ཇི་ལྟར་གཤེགས་པ་བཞིན། །མངོན་པར་བྱང་ཆུབ་རྣམ་ལྔ་ཡིས། །ཆོས་རྣམས་ཐམས་ཅད་དངོས་མེད་པར། །རྫོགས་སངས་རྒྱས་ལས་སངས་རྒྱས་བརྗོད། །ཅེས་གསུངས་སོ། །དེ་ཡང་སྐུ་གསུམ་གྱི་བདག་ཉིད་དེ་བདག་གི་དོན་ཕུན་སུམ་ཚོགས་པའི་བདག་ཉིད་དུ་བསྟན་ཏོ། །དེ་ལ་གཉེན་པོ་ཕུན་སུམ་ཚོགས་པ་ནི་གཟི་བརྗིད་ཀྱི་རྒྱལ་པོ་ཞེས་བྱ་སྟེ། བཅོམ་ལྡན་འདས་རྣམ་པར་སྣང་མཛད་དམ། ཤཱཀྱ་ཐུབ་པའི་ཐུགས་ཀ་ནས་ནང་སེམས་ཀྱི་དཀྱིལ་འཁོར་ཆེན་པོའི་འོད་ཟེར་གྱིས་ངན་སོང་ཐམས་ཅད་སྦྱངས་པས་ན་གཟི་བརྗིད་ཀྱི་རྒྱལ་པོ་ཞེས་བྱའོ། །བརྟག་པ་ཞེས་བྱ་བ་ནི་ཐབས་ཀྱི་དཀྱིལ་འཁོར་ཕུན་སུམ་ཚོགས་པ་འགྲོ་བའི་དོན་དུ་སྣ་ཚོགས་པའི་དཀྱིལ་འཁོར་དུ་སྣང་བར་བརྟག་པའོ། །དེའི་ཕྱིར་ཡང་གསུངས་པ། རྣམ་པར་མི་རྟོག་ཆོས་དག་ལས། །སེམས་ཅན་དོན་དུ་ཡོངས་སུ་རྟོག །རྟོག་པས་བརྟག་པ་ལས་བྱུང་བ། །རྡོ་རྗེ་སེམས་དཔའ་སེམས་དཔའ་ཆེ། །ཞེས་གསུངས་ཏེ། དེ་བས་ན་རྡོ་རྗེ་སེམས་དཔའ་ཉིད་དེ་རྟོག་པའི་ལྷ་རྣམས་ཀུན་ཀྱང་སརྦ་བིཏ་ཀྱི་ལྷ་རྣམས་སུ་གྱུར་ནས་མོས་པ་ཇི་ལྟར་འདོད་པ་བཞིན་དུ་སེམས་ཅན་གྱི་དོན་གྱི་དབང་གིས་སྣང་ངོ༌། །དེའི་ཕྱིར་ན་དེ་བཞིན་གཤེགས་པ་དང་རིགས་ཀྱི་ལྷ་རྣམས་ཐམས་ཅད་ཀྱི་དཀྱིལ་འཁོར་བཅུ་གཉིས་བསྡུས་པའི་དོན་དུ་ཡོངས་སུ་བརྟག་པ་དེའོ། །གཞན་གྱི་དོན་ཕུན་སུམ་ཚོགས་པ་བསྟན་པའི་ཕྱིར་ངན་སོང་ཐམས་ཅད་ཡོངས་སུ་སྤྱོང་བ་ཞེས་བྱ་སྟེ། དེ་ཡང་རྒྱུ་སྦྱངས་པ་དང༌། འབྲས་བུ་སྦྱངས་པ་དང༌། རྐྱེན་སྦྱངས་པ་གསུམ་གྱིས་འབྲས་བུ་ངན་
སོང་གསུམ་སྦྱང་ངོ༌། །ཐམས་ཅད་ནི་ཁམས་གསུམ་ཀའོ། །ཡོངས་སུ་སྦྱོང་བ་ནི་ནང་སེམས་ཀྱི་དཀྱིལ་འཁོར་ཏེ་ཕྱག་རྒྱ་དང༌། སྙིང་པོ་སྟེ་བཅུ་གཅིག་པའོ། །སྔགས་དང་རིག་པ་སྦྱོང་བའི་ཕྱིར་ན་སྦྱོང་བ་ཞེས་བྱའོ། །སྦྱོང་བའི་ཐབས་ཇི་ལྟ་བུ་ཞིག་གིས་སྦྱོང་སྙམ་པ་ལ། བཅོམ་ལྡན་འདས་ཚངས་པ་ཆེན་པོ་པདྨའི་གདན་ལ་བཞུགས་ཏེ། ངན་སོང་གི་རྒྱུད་ཐམས་ཅད་ཡོངས་སུ་སྦྱོང་བཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ངན་སོང་གི་རྒྱུད་ལས་རྣམ་པར་གྲོལ་བ་ཞེས་བྱ་བའི་བྱང་ཆུབ་སེམས་དཔའ་སེམས་དཔའ་ཆེན་པོའི་འོད་ཟེར་སྡུད་པའི་ཕྲེང་བ་མང་པོ་ཉིད་ཀྱིས་དཔྲལ་བའི་མཛོད་སྤུ་ནས་བྱུང་བས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཁྱབ་པར་བྱས་ནས་ཞེས་བྱ་བ་ལ་སོགས་པའོ། །དེ་ལ་སྦྱོང་བ་རྣམ་པ་གསུམ་གྱི་སྒོ་ནས་མཚོན་པར་བྱེད་པའི་ཕྱིར་ན་སྐུ་གསུམ་གྱི་གཙུག་ཏོར་གྱི་རྒྱུད་ཆེན་པོ་ཞེས་བྱ་བ་གསུངས་ཏེ། དེ་ལ་ཉོན་མོངས་པ་ལྔའི་འབྲས་བུ་མཚམས་མེད་པ་ལྔ་བྱས་པ་དག་མནར་མེད་པའི་དམྱལ་བར་ལྟུང་བ་དེ་ལས་བསྐྱབ་པའི་ཕྱིར་རྣམ་པར་སྣང་མཛད་སྐུའི་རང་བཞིན་ལོངས་སྤྱོད་རྫོགས་པའི་སྐུའི་དཀྱིལ་འཁོར་དུ་རྩ་བའི་རྒྱུད་གྲུབ་པར་མཛད་པ་དང༌། དེ་བཞིན་གཤེགས་པ་གསུང་གི་རང་བཞིན་སྤྲུལ་པའི་སྐུའི་དཀྱིལ་འཁོར་དུ་དེ་དག་གི་རྐྱེན་དུ་གྱུར་པའི་སྒྲིབ་པ་ལྔ་པོ་དེ་དག་རྣམ་པར་སྦྱོང་བའི་ཕྱི་མའི་རྒྱུད་གྲུབ་པར་མཛད་པ་དང༌། དེ་དག་གི་རྒྱུར་གྱུར་པའི་ཉོན་མོངས་པ་ལྔའི་རང་བཞིན་ཅན་སྦྱོང་བའི་ཕྱིར་ན་དེ་བཞིན་གཤེགས་པའི་ཐུགས་ཀྱི་རང་བཞིན་ཆོས་ཀྱི་སྐུའི་དཀྱིལ་འཁོར་ཕྱི་མའི་ཡང་ཕྱི་མའི་རྒྱུད་དུ་གྲུབ་པར་མཛད་པས་ན་སྐུ་གསུམ་གྱི་གཙུག་ཏོར་གྱི་རྒྱུད་ཆེན་པོ་ཞེས་བྱའོ། །དེ་ལ་ཉོན་མོངས་པའི་འབྲས་བུ་མནར་མེད་པའི་དམྱལ་བ་ཆེན་པོར་ལྟུང་བ་དེ་ལས་བསྐྱབ་པ་ནི་དང་པོའི་དཀྱིལ་འཁོར་གྱི་དགོས་པའོ། །རྒྱུ་དང་རྐྱེན་སྦྱངས་ནས་འཇིག་རྟེན་དང་འཇིག་རྟེན་ལས་འདས་པའི་བདེ་བ་ཕུན་སུམ་ཚོགས་པ་གྲུབ་བར་མཛད་པ་ནི་སྐུ་གཉིས་ཉེ་བར་མཚོན་པའི་སྒོ་ནས་ཕྱི་མ་དང་ཕྱི་མའི་རྒྱུད་ཀྱིས་བྱེད་དེ་དགོས་པའི་ཡང་དགོས་པའོ། །དེའི་ཡང་དེའི་དོན་ལ་སྙེགས་པ་ནི་འདི་ཡིན་ཏེ། ཡེ་ཤེས་ཤིན་ཏུ་རྣམ་པར་
དག་པའི་དབང་གིས་ཉོན་མོངས་པ་དང་ཤེས་བྱའི་སྒྲིབ་པ་ཐམས་ཅད་ནི་སྤངས་པ་ནམ་མཁའ་བཞིན་དུ་སྤྲོས་པའི་བག་ཆགས་ཀྱི་ཐ་སྙད་ཐམས་ཅད་ནི་བསལ་བའི་རང་བཞིན་གྱིས་གསལ་བ་ཆོས་ཀྱི་རང་བཞིན་ཡིན་ནོ། །དེ་ལྟར་ཡིན་མོད་ཀྱང་ཡོངས་སུ་དག་པ་དང་མ་དག་པའི་སེམས་ཅན་གདུལ་བའི་དོན་དུ་སྔོན་གྱི་སྨོན་ལམ་གྱི་ཤུགས་ཀྱིས་སྐུའི་བཀོད་པ་དང༌། གསུང་གི་བཀོད་པ་དང༌། ཡེ་ཤེས་རྣམ་པར་དག་པའི་དཀྱིལ་འཁོར་དོན་དམ་པ་དང༌། ཀུན་རྫོབ་ཀྱི་ཡུལ་འདི་གྲུབ་པར་མཛད་ནས་ངན་སོང་གི་སྡུག་བསྔལ་རྣམས་གཉེན་པོ་ཡེ་ཤེས་དང༌། ཐབས་ཀྱི་དཀྱིལ་འཁོར་ཕུན་སུམ་ཚོགས་པའི་སྒོ་ནས་ཕན་འདོགས་པར་མཛད་པ་ལ་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཟི་བརྗིད་ཀྱི་རྒྱལ་པོའི་བརྟག་པ་ངན་སོང་ཐམས་ཅད་ཡོངས་སུ་སྦྱོང་བ་ཞེས་བྱ་བ་སྐུ་གསུམ་གྱི་བཙུག་ཏོར་གྱི་རྒྱུད་ཆེན་པོའོ། །དེ་ཡན་ཆད་ཀྱིས་ནི་རྒྱུད་ཀྱི་མཚན་བློ་འབྲིང་དོན་རྣམས་པར་ཕྱེ་བས་གོ་བ་དང་དགོས་འབྲེལ་བསྟན་ནས། ད་ནི་དབང་པོ་ཐ་མ་ཚིག་དང་ཡི་གེ་ལྷུར་བླངས་པས་གོ་བའི་དབང་དུ་བྱས་ནས་བཤད་དེ། དེ་ལ་མདོ་སྡེ་འདི་ལ་ཡང་བསྡུས་ཏེ་བསྟན་པ་དང་རྒྱས་པར་བསྟན་པའོ། །བསྡུས་པར་བསྟན་པ་ལ་ཡང་སྐུ་གསུང་ཐུགས་ཀྱིས་བསྟན་པའི་དང་པོ་ལ་དོན་རྣམ་པ་གསུམ་སྟེ། དང་པོར་གླེང་གཞི་བསྟན་པ་དང༌། གླེང་བསླང་བ་བསྟན་པ་དང༌། གཞུང་རྒྱས་པར་བསྟན་པའོ། །གླེང་གཞི་ལ་ཡང་ཕུན་སུམ་ཚོགས་པ་བཞི་སྟེ། དུས་ཕུན་སུམ་ཚོགས་པ་དང༌། སྟོན་པ་ཕུན་སུམ་ཚོགས་པ་དང༌། གནས་ཕུན་སུམ་ཚོགས་པ་དང༌། འཁོར་ཕུན་སུམ་ཚོགས་པ་དང་བཞིར་བསྟན་ཏོ། །དེ་ལ་ཅིའི་ཕྱིར་ཡང་དག་པར་སྡུད་པར་བྱེད་བས་ཐོག་མར་གླེང་གཞི་སྨོས་ཤེ་ན། དེ་ནི་རྒྱུ་གཉིས་ཀྱི་ཕྱིར་སྨོས་ཏེ། རྒྱུ་གཉིས་ནི་ཡང་དག་པར་སྡུད་པར་བྱེད་པ་བདག་ལ་ཡིད་ཆེས་པར་བྱེད་པ་བསྐྱེད་པའི་ཕྱིར་ཡང་ཐོག་མར་གླེང་གཞི་སྨོས་ལ། ཡིད་བརྟན་དུ་རུང་བས་སངས་རྒྱས་བཅོམ་ལྡན་འདས་ཀྱིས་གསུངས་པར་བསྟན་པས་དེ་ལ་གུས་པ་བསྐྱེད་པའི་ཕྱིར་ཡང་དག་པར་སྡུད་པར་བྱེད་པས་ཐོག་མར་གླེང་གཞི་སྨོས་སོ། །གླེང་བསླང་བ་ལ་ཡང་གཉིས་ཏེ། སྟོན་པས་གླེང་བསླང་བ་དང༌། འཁོར་གྱིས་གླེང་བསླང་བའོ། །གཞུང་རྒྱས་པར་བསྟན་པ་ལ་ཡང་བསྡུས་པའི་
དོན་བཅུ་གཉིས་ཏེ། དེ་ཡང་གསུམ་དུ་ཤེས་པར་བྱ་སྟེ། རྩ་བའི་རྒྱུད་དང༌། ཕྱི་མའི་རྒྱུད་དང༌། ཕྱི་མའི་ཡང་ཕྱི་མའི་རྒྱུད་དོ། །དེ་ལ་འདི་སྐད་བདག་གིས་ཐོས་པ་དུས་གཅིག་ན་ཞེས་བྱ་བ་ནས། ཚངས་པ་ཆེན་པོ་པདྨའི་གདན་ལ་བཞུགས་ཏེ་ཞེས་བྱ་བ་ཡན་ཆད་ཀྱིས་གླེང་གཞི་བསྟན་ཏེ། དེ་ལ་ཡང་བསྒྲུབ་པར་བྱ་བ་དང༌། སྒྲུབ་པར་བྱེད་པ་གཉིས་ཀྱིས་བསྟན། བསྒྲུབ་པར་བྱ་བ་ནི་སྡུད་པ་པོས་བདག་ཉིད་ཚད་མར་བྱ་བ་སྟེ། དེ་ཡང་ཡུལ་དང་དུས་དང་རང་གི་ངོ་བོའི་བྱེ་བྲག་གིས་རྣམ་པ་གསུམ་དུ་བསྟན་ཏེ། དེ་ནི་མནོར་བར་སྡུད་པ་པོ་ཕུན་སུམ་ཚོགས་པའོ། །ངན་སོང་གི་རྒྱུད་ཐམས་ཅད་ཡོངས་སུ་སྦྱོང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་ཞེས་བྱ་བ་ནས་གང་དེ་བཞིན་གཤེགས་པ་རྣམས་ཀྱིས་གདུལ་བར་མི་འགྱུར་བ་ནི་གནས་མ་ཡིན་ནོ་ཞེས་བྱ་བ་ཡན་ཆད་ཀྱིས་ནི་སྟོན་བས་གླེང་བསླང་བ་སྟེ། དེ་ལ་ཡང་སྟོན་པའི་ཆེ་བ་ཉིད་བསྟན་པའི་ཞར་ལ་གཞན་དོན་ཕུན་སུམ་ཚོགས་པ་དང༌། དེ་ལ་ངོ་མཚར་སྐྱེས་པ་ངོ་མཚར་གྱི་རྒྱུ་བཅུ་ཐེ་ཚོམ་བསལ་བ་དང་གསུམ་གྱིས་བསྟན་ཏོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་རང་གི་སྟན་ལས་ལངས་ཏེ་ཞེས་བྱ་བ་ནས་བླ་ན་མ་མཆིས་པའི་ཡང་དག་པར་རྫོགས་པའི་བྱང་ཆུབ་ཐོབ་པར་བགྱི་བའི་སླད་དུ་བཤད་པར་གསོལ་ཞེས་བྱ་བ་ཡན་ཆད་འཁོར་གྱིས་གླེང་བསླང་བསྟན་ཏོ། །དེ་ནས་བཅོམ་ལྡན་འདས་ཀྱིས་བརྒྱ་བྱིན་དང་ཞེས་བྱ་བ་ནས། ཛྙཱ་ན་ས་མ་ཡེ་ཧཱུཾ་ཞེས་བྱ་བས་འཁོར་བྱིན་གྱིས་བརླབས་པ་བསྟན། སྙོམས་པར་ཞུགས་ནས་ཡང་ཞེས་བྱ་བ་ནས། ཨོཾ་ཤ་ཨོཾ་བྷཱ་ཞེས་བྱ་བ་ཡན་ཆད་ཀྱིས་སྦྱོར་བ་དང་པོ་དང༌། དཀྱིལ་འཁོར་རྒྱལ་མཆོག་དང༌། ནང་སེམས་ཀྱི་དཀྱིལ་འཁོར་གྱི་ཏིང་ངེ་འཛིན་བསྟན། ལྷའི་དབང་པོ་དེ་བཞིན་གཤེགས་པ་ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོའི་སྙིང་པོ་འདི་རིགས་ཀྱི་བུ་འམ་ཞེས་བྱ་བ་ནས་བདེ་བ་ཐམས་ཅད་མྱོང་བར་འགྱུར་རོ་ཞེས་བྱ་བ་ཡན་ཆད་ཀྱིས་ཕན་ཡོན་བསྟན། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་ཞེས་བྱ་བ་ནས། དེ་ནི་དཀྱིལ་འཁོར་སྙིང་པོར་གསུངས། །ཞེས་བྱ་བ་ཡན་ཆད་ཀྱིས་རང་བཞིན་གྱི་དཀྱིལ་འཁོར་བསྟན། དེ་ནས་ཡང་བཅོམ་ལྡན་འདས་ཀྱིས་སེམས་ཅན་ཐམས་ཅད་ལ་ཐུགས་བརྩེ་བའི་སླད་དུ་ཕྱིའི་དཀྱིལ་འཁོར་འདི་གསུངས་སོ་ཞེས་བྱ་
བ་ནས་དེའི་གཏོར་མ་ཇི་ལྟར་མཐུན་པར་བྱ་ཞེས་བྱ་བ་ཡན་ཆད་ཀྱིས་སློབ་དཔོན་གྱི་ལས་ཀྱི་རིམ་པའི་ཆོ་ག་རྒྱས་པར་བཤད། དེ་ནས་སྔགས་པ་བླ་མེད་བྱང་ཆུབ་ཀྱི། །བླ་མེད་གནས་སུ་སློབ་མ་སྨིན་པར་བྱ། །ཞེས་བྱ་བ་ནས། དངོས་གྲུབ་མྱུར་དུ་འགྲུབ་པར་འགྱུར། །ཞེས་བྱ་བ་ཡན་ཆད་ཀྱིས་སློབ་མ་གཞུག་པའི་ཆོ་ག་རྒྱས་པར་བསྟན། དེ་ནས་བཅོམ་ལྡན་འདས་ཀྱིས་ལྷའི་དབང་པོ་བརྒྱ་བྱིན་དང་ཞེས་བྱ་བ་ནས། བྲན་བཞིན་ལས་ཀུན་བྱེད་པར་འགྱུར། །ཞེས་བྱ་བ་ཡན་ཆད་ཀྱིས་ལས་ཀྱི་སྒྲུབ་པ་བསྟན། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ་ཞེས་བྱ་བ་ནས། བདེ་གཤེགས་རྒྱལ་བ་ཉིད་ཀྱིས་གསུངས། །ཞེས་བྱ་བ་ཡན་ཆད་ཀྱིས་ཤི་བ་ལ་ཕན་གདགས་པའི་ཆེད་དུ་དབང་བསྐུར་བ་དང༌། ལྷའི་གཟུགས་སུ་བརྟགས་པ་དང༌། ཁྱིམ་དུ་བཞག་པ་དང༌། མཆོད་རྟེན་བྱ་བ་དང༌། སྔགས་ཀྱིས་ཕན་གདགས་པ་དང༌། སྦྱིན་སྲེག་གིས་ཕན་གདགས་པ་དང༌། རོ་བསྲེགས་པས་ཕན་གདགས་པ་དང༌། མི་འགྲུབ་པའི་སྐྱོན་ཡོན་བསྟན་པའོ། །དེ་ནས་བརྒྱ་བྱིན་ལ་སོགས་ལྷ། །ཞེས་བྱ་བ་ནས་བསྟི་སྟང་དུ་བྱས་ཏེ་ཕྱག་བཙལ་ནས་དེ་བཞིན་དུ་སོང་ངོ་ཞེས་བྱ་བ་ཡན་ཆད་ཀྱིས། དྲི་མ་མེད་པའི་སྐྱེ་གནས་དང༌། ཆོ་འཕྲུལ་དང༌། མཆོད་པ་བསྟན་ཏོ། །དེ་ནས་བརྒྱ་བྱིན་དང་ཚངས་པ་ལ་སོགས་པའི་ལྷ་རྣམས་ཡ་མཚན་དུ་གྱུར་ཏེ་ཞེས་བྱ་བ་ནས་བཅོམ་ལྡན་འདས་བདག་ཅག་གིས་གདོན་མི་ཟ་བར་སངས་རྒྱས་ཉིད་དུ་འགྲུབ་པའི་སྣོད་དུ་གྱུར་པ་ལ་སོགས་སོ་ཞེས་བྱ་བ་ཡན་ཆད་ཀྱིས་རྒྱུད་ཀྱི་ཡོན་ཏན་བསྟན། བཅོམ་ལྡན་འདས་བརྟག་པའི་རྒྱལ་པོ་འདིས་སེམས་ཅན་གྱི་དོན་བགྱིད་པ་གང་ལགས་པའི་སྐྱེས་བུ་དམ་པ་ཞེས་བྱ་བ་ནས་བཅོམ་ལྡན་འདས་བདག་ཅག་གིས་ཞུ་བ་བཞིན་དུ་བསྐྱང་བར་བགྱིའོ་ཞེས་བྱ་བ་ཡན་ཆད་ཀྱིས་འཆད་བའི་སྐྱེས་བུ་ཇི་ལྟར་བལྟ་བ་དང༌། འཁོར་གྱི་དམ་བཅའ་བ་བསྟན་ཏོ། །ལྷའི་དབང་པོ་ཁྱོད་ཀྱིས་ཇི་ལྟར་སྨྲས་པ་དེ་བཞིན་ཏེ་ཞེས་བྱ་བ་ནས་བག་ཡོད་པར་བྱོས་ལ་སྤྱོད་ཅིག་ཅེས་པ་ཡན་ཆད་ཀྱིས་རྩ་བའི་རྒྱུད་གཏད་པ་བསྟན་ཏོ། །དེ་ཡན་ཆད་ཀྱིས་ནི་རྩ་བའི་རྒྱུད་ཀྱི་དོན་བསྡུས་བའི་བཤད་པ་རྫོགས་སོ།། །།ད་ནི་འདི་ནས་རྒྱུད་ཕྱི་མའི་དོན་སྟོན་ཏེ། དེ་ནས་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ཞེས་བྱ་བ་ནས་ཐུབ་པའི་
གཙོ་བོ་ལ་ཕྱག་འཚལ་ནས་ཞེས་བྱ་བའི་བར་གྱིས་ནི་རྒྱུད་ཀྱི་འཆད་པ་པོའི་མཚན་ཉིད་བསྟན་ཏོ། །དེ་ནས་སྒྲིབ་པ་ཐམས་ཅད་རྣམ་པར་དག་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཞེས་བྱ་བ་ནས་བི་ན་ཤ་ནི་ཧཱུཾ་ཕཊ་ཅེས་བྱ་པ་ཡན་ཆད་ཀྱི་སྦྱོར་བ་དང་པོ་དང༌། ནང་སེམས་ཀྱི་ཏིང་ངེ་འཛིན་དང༌། དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་བསྟན་ཏོ། །དེ་ནས་དཀྱིལ་འཁོར་བཤད་དེ་ཞེས་བྱ་བ་ནས་མཆོད་པ་བྱས་ཏེ་ཞེས་བྱ་བ་ཡན་ཆད་ཀྱིས་སློབ་དཔོན་གྱི་ལས་ཀྱི་རིམ་པའི་ཆོ་ག་རྒྱས་པར་བསྟན་ཏོ། །དེ་བཞིན་དུ་བཅུ་སྟེ་ཞེས་བྱ་བ་ནས་ལས་ཐམས་ཅད་བྱེད་པར་འགྱུར་རོ་ཞེས་བྱ་བ་ཡན་ཆད་ཀྱིས་སློབ་མ་འཇུག་པའི་རིམ་པ་དང་དེའི་ཡོན་ཏན་བསྟན་ཏོ། །ལྷ་དང་ཀླུ་དང་ཞེས་བྱ་བ་ནས་ངན་སོང་ཐམས་ཅད་ལས་གྲོལ་བར་བྱེད་དོ་ཞེས་བྱ་བ་ཡན་ཆད་ཀྱིས་ཤི་བ་ལ་ཕན་གདགས་པ་བསྟན་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་ཞེས་བྱ་བ་ནས་དེ་ཉིད་ལས་བསྐྱོད་པ་ནི་མཉེས་པའོ་ཞེས་བྱ་བ་ཡན་ཆད་ཀྱིས་ཕྱགས་རྒྱ་བསྟན་ཏོ། །སྐུ་གཟུགས་ཀྱི་ཆོ་ག་ཡང་དེ་བཞིན་དུ་བྱ་བ་སྟེ་ཞེས་བྱ་བ་ནས་ལས་ཐམས་ཅད་བྱའོ་ཞེས་བྱ་བ་ཡན་ཆད་ཀྱིས་རས་ཀྱི་བསྒྲུབ་པ་བསྟན་ཏོ། །དེ་ནས་ཚངས་པ་ལ་སོགས་པའི་ལྷ་རྣམས་ཀྱིས་ཞེས་བྱ་བ་ནས་ལྷའི་འཁོར་འདི་ཉིད་ཡིན་ནོ་ཞེས་བྱ་བ་ཡན་ཆད་ཀྱི་ལྷའི་བུ་ནོར་བུ་དྲི་མ་མེད་པ་དེའི་སྔོན་གྱི་ལས་གྱི་རྣམ་པར་སྨིན་པ་དང༌། ད་ལྟར་གར་སྐྱེས་པའི་ལུང་བསྟན་པ་དང༌། སྔོན་དང་ད་ལྟར་གྱི་རྒྱུ་མཐུན་གྱི་སྨོན་ལམ་གྱིས་ཐར་བའི་ཚུལ་བསྟན་ཏོ། །ད་ནི་ཚེ་དཔག་མེད་ཀྱི་དཀྱིལ་འཁོར་བསྟན་ཏེ། དེ་ནས་བརྒྱ་བྱིན་དང་ཞེས་བྱ་བ་ནས་ལེགས་པར་སྒྲུབས་ཤིག་བཤད་པར་བྱའོ་ཞེས་བྱ་བ་ཡན་ཆད་ཀྱིས་མིང་བཅུ་པས་བསྟོད་པ་དང༌། གསོལ་བ་གདབ་པ་དང༌། གནང་བ་བསྟན་ཏོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་ཞེས་བྱ་བ་ནས་རྨད་ཀྱི་ཡ་མཚན་དུ་མ་འཇིག་རྟེན་དུ་འབྱུང་ངོ་ཞེས་བྱ་བ་ཡན་ཆད་ཀྱིས་སྦྱོར་བ་དང་བོ་དང༌། ནང་སེམས་ཀྱི་དཀྱིལ་འཁོར་དང༌། དཀྱིལ་འཁོར་རྒྱལ་པོ་མཆོག་དང༌། སྔགས་ཀྱི་ཆོ་འཕྲུལ་བསྟན་ཏོ། །དེ་ནས་དཀྱིལ་འཁོར་ནི་འདི་ཡིན་ཏེ། ཞེས་བྱ་བ་ནས། མདོར་ན་མཆོད་པ་བྱས་ནས་ཀྱང༌། །ཞེས་བྱ་བ་ཡན་ཆད་ཀྱིས་སློབ་དཔོན་གྱི་ལས་ཀྱི་ཆོ་ག་རྒྱས་པར་བསྟན་ཏོ། །འཆི་བདག་
སྦྲུལ་གྱི་འཇིགས་པ་རྣམས། །ཞེས་བྱ་བ་ནས་དེ་ལྟར་དབང་སྐུར་ནས་ཞེས་བྱ་བ་ཡན་ཆད་ཀྱིས་སློབ་མ་གཞུག་པ་དང༌། དབང་བསྐུར་བའི་ཆོ་ག་རྒྱས་པའོ། །ཚེ་བསྲིང་བའི་རིག་པ་འདི་སྦྱིན་ཞེས་བྱ་བ་ནས་ཐེ་ཚོམ་མེད་དོ་ཞེས་བྱ་བ་ཡན་ཆད་ཀྱིས་རས་ཀྱི་སྒྲུབ་པ་དང༌། མཚན་མ་དང༌། ཡོན་ཏན་བསྟན་ཏོ། །ད་ནི་འཇིག་རྟེན་བའི་དཀྱིལ་འཁོར་དྲུག་གི་དོན་བཤད་དེ། དེ་ལ་རྒྱལ་པོ་ཆེན་པོ་བཞིའི་དཀྱིལ་འཁོར་ནི་འཇིག་རྟེན་པའི་དྲི་ཟ་དང༌། གྲུལ་བུམ་དང༌། གནོད་སྦྱིན་དང༌། ཀླུའི་གདོན་གྱི་འཁོར་ཞི་བར་བྱ་བའི་ཕྱིར་རྒྱལ་པོ་ཆེན་པོ་བཞིའི་དཀྱིལ་འཁོར་གསུངས་ཏེ། དེ་ནས་རྒྱལ་པོ་ཆེན་པོ་བཞི་ཞེས་བྱ་བ་ནས་བྱིན་གྱིས་བརླབ་པར་བྱའོ་ཞེས་བྱ་བ་ཡན་ཆད་ཀྱིས་གསོལ་བ་གདབ་པ་དང་གནང་བ་བསྟན་ཏོ། །དེ་ནས་གནོད་སྦྱིན་གྱི་རྒྱལ་པོ་ངལ་བསོ་པོས་ཞེས་བྱ་བ་ནས་དེ་ནས་ཀླུའི་རྒྱལ་པོ་མིག་མི་བཟང་གིས་ཀྱང་སྙིང་པོ་འདི་བཤད་དོ་ཞེས་བྱ་བ་ཡན་ཆད་ཀྱིས་སྦྱོར་བ་དང་པོ་དང༌། དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་བསྟན་ཏོ། །དེ་ནས་དེ་དག་གིས་དཀྱིལ་འཁོར་བཤད་དེ་ཞེས་བྱ་བ་ནས་སྒོ་བ་རྣམས་ཀྱང་དེ་བཞིན་ནོ་ཞེས་བྱ་བ་ཡན་ཆད་ཀྱིས་དཀྱིལ་འཁོར་གྱི་ལྷ་བསྟན་ལ། དེ་ནས་ཕྱག་རྒྱ་དང་ལྡན་པས་ཞེས་བྱ་བ་ནས། ཆོ་ག་བཞིན་དུ་མཆོད་པ་དབུལ། །ཞེས་བྱ་བ་ཡན་ཆད་ཀྱིས་སློབ་དཔོན་ཀྱི་ལས་རྒྱལ་མཆོག་གི་རིམ་པ་བསྟན་ཏོ། །དེ་ནས་སྔགས་མཁན་སྔགས་འདི་དང༌། །ཞེས་བྱ་བ་ནས། ཕྱག་ན་རྡོ་རྗེ་ཁྲོས་པར་འགྱུར། །ཞེས་བྱ་བ་ཡན་ཆད་ཀྱིས་སློབ་མ་གཞུག་པ་དང་དབང་བསྐུར་བའི་ཆོ་ག་རྒྱས་པ་དང༌། དེ་རྣམས་ཀྱི་དམ་བཅའ་བ་བསྟན་ཏོ། །དེ་ནས་ཕྱོགས་སྐྱོང་བའི་དཀྱིལ་འཁོར་ནི་གདོན་སྟོང་ཕྲག་བརྒྱད་ཅུ་ཞི་བར་བྱ་བའི་ཕྱིར་གསུངས་ཏེ། དེ་ནས་ཕྱོགས་བཅུ་སྐྱོང་བ་རྣམས་ཀྱིས་ཞེས་བྱ་བ་ནས། ལེགས་ཀྱིས་ཕུལ་ཅིག་ཅེས་བྱ་བ་ཡན་ཆད་ཀྱིས་གསོལ་བ་གདབ་པ་གནང་བ་བསྟན་ཏོ། །དེ་ནས་འབྱུང་པོ་རྣམས་ཀྱི་བདག་པོ་དབང་ལྡན་ལ་སོགས་པས་ཞེས་བྱ་བ་ནས་ཨོཾ་བྲ་ཞེས་བྱ་བ་ཡན་ཆད་ཀྱིས་སྦྱོར་བ་དང་པོ་དང༌། དཀྱིལ་འཁོར་རྒྱལ་པོ་མཆོག་བསྟན་ཏོ། །དེ་ནས་དེ་དག་གི་དཀྱིལ་འཁོར་བཤད་དེ་ཞེས་བྱ་བ་ནས། མཆོད་པ་ཀུན་གྱིས་མཆོད་པ་བྱ། །ཞེས་པ་ཡན་ཆད་ཀྱིས་སློབ་དཔོན་གྱི་ལས་རྒྱལ་མཆོག་གི་རིམ་པ་རྒྱས་པར་བསྟན་ཏོ། །དེ་ནས་བདག་ཉིད་ཞུགས་ནས་
ཀྱང༌། ཞེས་བྱ་བ་ནས། བརྟག་མི་དགོས་པར་གྲུབ་པར་འགྱུར་ཏེ་ཞེས་བྱ་བ་ཡན་ཆད་ཀྱིས་སློབ་མ་གཞུག་པ་དང༌། དབང་བསྐུར་བའི་ཆོ་ག་རྒྱས་པར་བསྟན་ཏོ། །དེ་ནས་དེ་དག་མགུ་ནས་ནི། །ཞེས་བྱ་བ་ནས་བདག་ཉིད་ཀྱིས་ཀྱང་ཡོངས་སུ་བསྐྱབ་པར་བགྱིའོ་ཞེས་བྱ་བ་ཡན་ཆད་ཀྱིས་བསྲུང་ཞིང་བསྐྱབ་པར་དམ་བཅའ་བ་བསྟན་ཏོ། །དེ་ནས་གཟའ་བརྒྱད་ཀྱི་དཀྱིལ་འཁོར་ནི་གཟའ་དང་དུས་ཚིགས་དང་སྐར་མའི་རླུང་ཞི་བར་བྱ་བའི་ཕྱིར་གསུངས་ཏེ། དེ་ནས་གཟའ་ཆེན་པོ་བརྒྱད་དང་ཞེས་བྱ་བ་ནས། ཨོཾ་ར་ཞེས་བྱ་བ་ཡན་ཆད་ཀྱིས་གསོལ་བ་གདབ་པ་དང༌། གནང་བ་དང༌། སྦྱོར་བ་དང་པོ་དང། དཀྱིལ་འཁོར་རྒྱལ་མཆོག་བསྟན་ཏོ། །དེ་ནས་དེ་དག་གི་དཀྱིལ་འཁོར་བཤད་དེ་ཞེས་བྱ་བ་ནས་གཟའ་རྣམས་ཐམས་ཅད་བསྒྲུབ་པར་བྱའོ་ཞེས་བྱ་བ་ཡན་ཆད་ཀྱིས་སློབ་དཔོན་གྱི་ལས་ཀྱི་རིམ་པ་དང༌། སློབ་མ་འཇུག་པའི་རིམ་པ་རྒྱས་པར་བསྟན་ཏོ། །དེ་ནས་གཟའ་ཆེན་པོ་དེ་དག་གིས་ཞེས་བྱ་བ་ནས་གདོན་མི་ཟ་བར་འཇིགས་པ་མི་འབྱུང་ངོ་ཞེས་བྱ་བ་ཡན་ཆད་ཀྱིས་དམ་བཅའ་བསྟན་ཏོ། །ད་ནི་ཀླུ་ཆེན་པོ་བརྒྱད་ཀྱི་དཀྱིལ་འཁོར་ཀླུའི་གདུག་པ་ཞི་བར་བྱ་བའི་ཕྱིར་གསུངས་ཏེ། དེ་ནས་ཀླུ་ཆེན་པོ་བརྒྱད་ཀྱིས་ཕུ་ཞེས་བྱ་བའི་སྒྲ་ཞེས་བྱ་བ་ནས་ཨོཾ་ཕུ་ཞེས་བྱ་བ་ཡན་ཆད་ཀྱིས་གསོལ་བ་དང༌། གནང་བ་དང་སྦྱོར་བ་དང་པོ་དང༌། དཀྱིལ་འཁོར་རྒྱལ་མཆོག་གི་ཏིང་ངེ་འཛིན་བསྟན་ཏོ། །དེ་ནས་དེ་དག་གི་དཀྱིལ་འཁོར་བཤད་དེ་ཞེས་བྱ་བ་ནས་ཛཿ་ཧཱུཾ་བོཾ་ཧོཿ་ཞེས་བརྗོད་དེ་ཞེས་བྱ་བ་ཡན་ཆད་ཀྱིས་སློབ་དཔོན་གྱིས་ལས་དང༌། ལས་རྒྱལ་མཆོག་གི་ཏིང་ངེ་འཛིན་བསྟན་ཏོ། །དེ་ནས་བུམ་པའི་རྒྱལ་པོ་དང༌། །ཞེས་བྱ་བ་ནས། ཀླུ་རྣམས་དེ་དག་ཐམས་ཅད་འགྲུབ། །ཅེས་བྱ་བ་ཡན་ཆད་ཀྱིས་སློབ་མ་དབང་བསྐུར་བའི་རིམ་པ་བསྟན་ཏོ། །དེ་ནས་དེ་དག་ཀུན་མགུ་ནས། །ཞེས་བྱ་བ་ནས་རྒྱལ་བའི་བཀའ་དང་རྡོ་རྗེ་འཛིན་པའི་བཀའ་རབ་ཏུ་བསྒྲུབ་པར་བགྱི། ཞེས་བྱ་བ་ཡན་ཆད་ཀྱིས་དམ་བཅའ་བསྟན་ཏོ། །དེ་ནས་བསྒྲུབ་པ་བཤད་དེ་ཞེས་བྱ་བ་ནས། །སྦྲུལ་མགོའི་ཕྱག་རྒྱ་སྨོས་ཅི་དགོས། །ཞེས་བྱ་བ་ཡན་ཆད་ཀྱིས་བསྒྲུབ་པ་དང་ཕན་ཡོན་བསྟན་ཏོ། །ད་ནི་འཇིག་རྟེན་པའི་ལྷའི་མི་དགའ་བ་ཞི་བའི་ཕྱིར་ལྷ་ཆེན་པོ་བརྒྱད་ཀྱི་དཀྱིལ་འཁོར་གསུངས་ཏེ། དེ་ནས་ལྷ་ཆེན་པོ་རྣམས་ཀྱི་བདག་པོ་འཇིགས་པར་བྱེད་པ་ཆེན་པོ་བུད་མེད་བརྒྱད་
ཀྱིས་བསྐོར་ནས་ཞེས་བྱ་བ་ནས། ཨོཾ་བ་སྭཱ་ཧཱ། ཞེས་བྱ་བ་ཡན་ཆད་ཀྱིས་གསོལ་བ་གདབ་པ་དང༌། རྗེས་སུ་གནང་བ་དང༌། སྦྱོར་བ་དང་པོ་དང༌། དཀྱིལ་འཁོར་རྒྱལ་མཆོག་གི་ཏིང་ངེ་འཛིན་བསྟན་ཏོ། །བཅོམ་ལྡན་འདས་འཇིགས་པར་བྱེད་པས་ཞེས་བྱ་བ་ནས་དེ་ལྟར་བརྒྱད་ཀྱིས་དབང་བསྐུར་རོ་ཞེས་བྱ་བ་ཡན་ཆད་ཀྱིས་དམ་བཅའ་དང༌། སློབ་དཔོན་གྱི་ལས་རྒྱལ་མཆོག་དང༌། སློབ་མ་གཞུག་པའི་ལས་ཀྱི་རིམ་པ་རྒྱས་པར་བསྟན་ཏོ། །དེ་ནས་ལས་རྣམས་སྦྱིན་བྱེད་དེ། །ཞེས་བྱ་བ་ནས། སྐྲག་ནས་དེ་མ་ཐག་ཏུ་གསོད། །ཞེས་བྱ་བ་ཡན་ཆད་ཀྱིས་སྒྲུབ་པ་དང༌། དངོས་གྲུབ་བླང་པ་དང༌། ཉེས་པའི་སྐྱོན་བསྟན་ཏོ། །ད་ནི་ལྷ་མི་དགའ་བ་ཞི་བར་བྱ་བའི་ཕྱིར་ལྷ་ཆེན་པོ་བརྒྱད་ཀྱི་དཀྱིལ་འཁོར་གསུངས་ཏེ། དེ་ནས་ཚངས་པ་ལ་སོགས་པ་ཞེས་བྱ་བ་ནས། ཨོཾ་ཀ་ཞེས་བྱ་བ་ཡན་ཆད་ཀྱིས་གསོལ་བ་གདབ་པ་དང༌། སྦྱོར་བ་དང་པོ་དང༌། དཀྱིལ་འཁོར་རྒྱལ་མཆོག་བསྟན་ཏོ། །དེ་ནས་དེ་དག་གི་དཀྱིལ་འཁོར་བཤད་དེ་ཞེས་བྱ་བ་ནས། བུམ་པའི་ཆུ་ཡིས་དབང་བསྐུར་རོ། །ཞེས་བྱ་བ་ཡན་ཆད་ཀྱིས་སློབ་དཔོན་གྱི་ལས་ཀྱི་རིམ་པ་དང༌། ལས་རྒྱལ་མཆོག་དང༌། སློབ་མ་གཞུག་པའི་རིམ་པ་བསྟན་ཏོ། །དེ་ནས་ལྷ་རྣམས་དགའ་བའི་ཞེས་བྱ་བ་ནས་དབང་ཕྱུག་ཆེན་པོ་ཉིད་ཀྱང་གསལ་བར་བགྱིའོ་ཞེས་བྱ་བ་ཡན་ཆད་ཀྱིས་སྒྲུབ་པ་དང་གསོལ་བ་གདབ་ཅིང་དངོས་གྲུབ་བླང་བ་དང༌། དམ་བཅའ་བ་བསྟན་ཏོ། །འཇིག་རྟེན་པའི་དཀྱིལ་འཁོར་གྱི་དོན་བསྡུས་པ་རྫོགས་སོ།། །།ད་ནི་ཚེ་དཔག་མེད་ལས་ཀྱི་སྒྲིབ་པ་རྒྱུན་གཅོད་པའི་དོན་བཤད་དེ། དེ་ནས་བཅོམ་ལྡན་འདས་ཕྱག་ན་རྡོ་རྗེ་ཉིད་ཀྱིས་དཀྱིལ་འཁོར་ལ་ཀུན་ཏུ་གཟིགས་ནས་འཛུམ་པ་མཛད་པ་དང་ཞེས་བྱ་བ་ནས་ཨོཾ་ཏྲི་གསང་བའི་སྙིང་པོའོ་ཞེས་བྱ་བ་ཡན་ཆད་ཀྱིས་ངོ་མཚར་གྱི་ཆོ་འཕྲུལ་བསྟན་པ་དང༌། གསོལ་བ་གདབ་པ་དང༌། སྦྱོར་བ་དང་པོ་དང༌། ནང་སེམས་ཀྱི་ཏིང་ངེ་འཛིན་དང༌། དཀྱིལ་འཁོར་རྒྱལ་མཆོག་གི་ཏིང་ངེ་འཛིན་བསྟན་ཏོ། །དེ་ནས་དེ་དག་གི་དཀྱིལ་འཁོར་བཤད་དོ་ཞེས་བྱ་བ་ནས་སྒོ་ཐམས་ཅད་ཀྱང་དེ་བཞིན་ནོ་ཞེས་བྱ་བ་ཡན་ཆད་ཀྱིས་སློབ་དཔོན་གྱི་ལས་ཀྱི་རིམ་པ་བསྟན་ཏོ། །དེ་ནས་སྔགས་མཁན་བདག་ཉིད་ཞུགས། །ཞེས་བྱ་བ་ནས་ལས་ཐམས་ཅད་ནུས་པར་འགྱུར་རོ་ཞེས་བྱ་བ་ཡན་ཆད་ཀྱིས་ལས་རྒྱལ་མཆོག་གི་ཏིང་ངེ་འཛིན་བསྟན་
ཏོ། །དེ་ནས་རྡོ་རྗེ་འཛིན་མའི་ཕྱག་རྒྱ་བཅིངས་ལ་ཞེས་བྱ་བ་ནས། སངས་རྒྱས་རྣམས་ཀྱིས་དབང་བསྐུར་རོ། །ཞེས་བྱ་བ་ཡན་ཆད་ཀྱིས་སློབ་མ་འཇུག་པའི་ཆོ་ག་རྒྱས་པར་བསྟན་ཏོ། །དེ་ནས་ང་རྒྱལ་བསྐྱེད་ནས་ཀྱང༌། །ཞེས་བྱ་བ་ལ་སོགས་པའི་ཚིགས་སུ་བཅད་པས་ནི་སྒྲུབ་པ་བསྟན་ཏོ། །དེ་ནས་ཚངས་པ་ལ་སོགས་པའི་ལྷ་ཆེན་པོ་རྣམས་ཀྱི་ཞེས་བྱ་བ་ནས་བཅོམ་ལྡན་འདས་རྡོ་རྗེ་འཛིན་པ་སྤྲོའོ་ཞེས་བྱ་བ་ཡན་ཆད་ཀྱིས་དཀྱིལ་འཁོར་འདིར་ཞུགས་པའི་རྣམ་པར་སྨིན་བ་ཅིར་འགྱུར་ཞུས་པ་དང༌། དེའི་ལན་དང༌། སྤྲོ་བ་བསྐྱེད་པ་བསྟན་ཏོ། །དེ་ནས་དེ་དག་གིས་དེ་བཞིན་དུ་ཕྱག་བཙལ་ནས་ཞེས་བྱ་བ་ནས་སྡིག་པ་ཆུང་ངུ་བྱས་པ་རྣམས་ལྟ་སྨོས་ཀྱང་ཅི་དགོས་ཞེས་བྱ་བ་ཡན་ཆད་ཀྱིས་ངན་སོང་དུ་འགྲོ་བ་དང༌། སྐྱེས་ཟིན་པའི་སེམས་ཅན་རྣམས་ལ་ཕན་གདགས་པའི་རིམ་པ་བསྟན་ཏོ། །དེ་ནས་དུག་གསུམ་གྱི་ལས་དང་ཉོན་མོངས་པའི་བག་ཆགས་སྦྱངས་པའི་ཕྱིར་སྦྱིན་སྲེག་གསུངས་ཏེ། དེ་ཡང་ལྷའི་བུ་རྣམས་ཞི་བའི་ཞེས་བྱ་བ་ནས། ཡང་ན་མིང་ནས་སྨོས་ཏེ་བྱ། །ཞེས་བྱ་བ་ཡན་ཆད་ཀྱིས་ངན་སོང་དུ་སྐྱེ་བའམ། སྐྱེས་པའི་ལས་དང་ཉོན་མོངས་པ་བསྟན་ཏོ། །དེ་ནས་བདེ་འགྲོར་སྐྱེས་ནས་ཀྱང༌། །ཞེས་བྱ་བ་ནས། གཟི་བརྗིད་བདེ་བའི་ལོངས་སྤྱོད་འཕེལ། །ཞེས་བྱ་བ་ཡན་ཆད་ཀྱིས་རྒྱས་པའི་སྦྱིན་སྲེག་གིས་བསོད་ནམས་འཕེལ་བ་བསྟན་ཏོ། །དེ་ནས་ཕན་ཕྱིར་ངེས་པར་ཡང༌། །ཞེས་བྱ་བ་ནས། ཐམས་ཅད་དེ་ཡི་དབང་དུ་འགྱུར། །ཞེས་བྱ་བ་ཡན་ཆད་ཀྱིས་དབང་དུ་བསྡུས་པའི་ལས་བསྟན། དེ་ལ་གདོན་རྣམས་གཞོམ་པའི་ཕྱིར། །ཞེས་བྱ་བ་ནས། མྱུར་དུ་བདེ་སྐྱིད་གནས་པར་འགྱུར། །ཞེས་བྱ་བ་ཡན་ཆད་ཀྱིས་ལྷན་ཅིག་སྐྱེས་པའི་ཡི་དགས་ལ་སོགས་པ་ཚར་བཅད་ཅིང་ཕན་ཡོན་བསྟན་ཏོ། །དེ་ནས་ཚངས་པ་ལ་སོགས་པ་ཡིད་མགུ་ནས་ཞེས་བྱ་བ་ནས་ལེགས་སོ་ལེགས་སོ་ལེགས་བར་སྒྲུབས་ཤིག་བྱ་བ་ཡན་ཆད་ཀྱིས་དམ་བཅའ་བ་དང༌། ཇི་ལྟར་བལྟ་བ་དང༌། རྗེས་སུ་གཏད་པ་བསྟན་ཏོ། །རྒྱུད་ཕྱི་མའི་དོན་བསྡུས་པའི་འགྲེལ་པ་སློབ་དཔོན་ཀུན་དགའ་སྙིང་པོས་མཛད་པ་རྫོགས་སོ།། །།འདི་ནས་ནི་བརྟག་པ་ཕྱི་མའི་ཡང་ཕྱི་མའི་དོན་བཤད་པར་བྱ་སྟེ། དེ་ནས་བཅོམ་ལྡན་འདས་ཞེས་བྱ་བ་ནས། ཨོཾ་བཛྲ་ཧཱུཾ་ཨཱཿ་ཞེས་བའི་བར་གྱིས་སྦྱོར་བ་དང་པོ་དང༌། དཀྱིལ་འཁོར་རྒྱལ་པོ་མཆོག་དང༌། ནང་སེམས་ཀྱི་ཏིང་ངེ་འཛིན་
གྱི་རིམ་པ་བསྟན་ཏོ། །དེ་ནས་དེ་དག་གི་དཀྱིལ་འཁོར་བཤད་དེ་ཞེས་པ་ནས་འདོད་པའི་ཡོན་ཏན་ལྔས་གང་ངོ་ཞེས་བྱ་བ་ཡན་ཆད་ཀྱིས་སློབ་དཔོན་གྱི་ལས་ཀྱི་རིམ་པ་དཀྱིལ་འཁོར་བྲི་བའི་རིམ་པ་བསྟན་ཏོ། །དེ་ནས་སྔགས་མཁན་ཉིད་ཀྱིས་ནི། །ཞེས་བྱ་བ་ནས་པྲ་སིདྡྷ་ཡེ་ཧཱུཾ་ཞེས་པའི་བར་གྱིས་ནི་སློབ་དཔོན་འཇུག་པ་དང་སློབ་མ་དབང་བསྐུར་བའི་ཕྱིར་རིམ་པ་བསྟན་ཏོ། །དེ་ནས་ལས་ཐམས་ཅད་བྱེད་དུ་གཞུག་ཅིང་ཞེས་པ་ནས། རྡོ་རྗེ་ལས་དང་མཉམ་པར་འགྱུར། །ཞེས་པ་ཡན་ཆད་ཀྱིས་ནི་སེམས་དཔའི་ལྷའི་བཟླས་པ་བསྟན་ཏོ། །དེ་ནས་ལས་རྣམས་བཤད་བྱ་སྟེ། །ཞེས་པ་ནས། འདོད་པ་ཀུན་ཏུ་དབང་བྱེད་འགྱུར། ཞེས་པའི་བར་གྱིས་ནི་རིགས་བཞི་འཁོར་ལོས་སྒྱུར་བའི་ཕྲིན་ལས་བཞིའི་ལས་བསྟན་ཏོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་ལ་ཕྱག་འཚལ་ནས་ཞེས་པ་ནས། ཨུཏྤ་ལ་ནི་སྒྲོལ་མར་དགོངས། །ཞེས་བའི་བར་གྱིས་ནི་ལེགས་བར་གསོལ་བ་དང༌། འཇིག་རྟེན་པའི་དཀྱིལ་འཁོར་དྲུག་དང༌། རིགས་བཞི་འཁོར་ལོས་སྒྱུར་བའི་དཀྱིལ་འཁོར་དང༌། ཉི་མ་མེའི་དཀྱིལ་འཁོར་གྱི་ཕྱག་རྒྱ་རྣམས་བསྟན་ཏོ། །ས་ས་ས་ས་ཞེས་བྱ་བ་ནས། ཁ་ཊཾ་ཁ་ཊཾ་ཞེས་བྱ་བའི་བར་གྱིས་ནི་སེམས་དཔའ་བཅུ་དྲུག་གི་ཕྲིན་ལས་བཞིའི་སྔགས་དང་རྩ་བའི་སྔགས་བསྟན་ཏོ། །དེ་ནས་ལྷ་རྣམས་ཀུན་མགུ་ནས། །ཞེས་བྱ་བ་ནས་ཨོཾ་ཀཱ་ལ་ཡཀྵ་སི་ཧཱུཾ་ཕཊ་ཅེས་པའི་བར་གྱིས་ནི་ཁྲོ་བོ་ཉི་མ་མེའི་གསོལ་བ་གདབ་པ་དང༌། སྦྱོར་བ་དང་པོ་དང༌། ནང་སེམས་ཀྱི་དཀྱིལ་འཁོར་དང༌། དཀྱིལ་འཁོར་རྒྱལ་པོ་མཆོག་བསྟན་ཏོ། །དེ་ནས་དཀྱིལ་འཁོར་མི་ཟད་བ། །ཞེས་བྱ་བ་ནས། དཀྱིལ་འཁོར་དུ་ནི་མང་དུ་བཞག །ཅེས་བྱ་བ་ཡན་ཆད་ཀྱིས་སློབ་དཔོན་གྱི་ལས་ཀྱི་དཀྱིལ་འཁོར་དང་མཆོད་པ་དགྲམ་པ་བསྟན་ཏོ། །དེ་ནས་སློབ་དཔོན་བདག་ཉིད་ཀྱང༌། །ཞེས་བྱ་བ་ནས་དེ་བཞིན་དུ་དབང་བསྐུར་བར་བྱའོ་ཞེས་པའི་བར་གྱིས་ནི། སློབ་དཔོན་འཇུག་ཅིང་སྒོ་བཞིར་བསྒྲུབ་པ་དང༌། དབང་བསྐུར་བའི་རིམ་པ་བསྟན་ཏོ། །དེ་ནས་ངག་གི་བསྒྲུབ་པ་བཤད་དེ་ཞེས་པ་ནས། བསམས་ནས་ངེས་པར་བརླབ་བར་འགྱུར། །ཞེས་པའི་བར་གྱིས་ནི་བསྒྲུབ་པ་བསྟན་པའོ། །ཁྲོ་བོ་འཇིག་རྟེན་གསུམ་སྣང་ཞེས་པ་ནས། བཟླས་པ་ཚུལ་བཞིན་བསམ་པར་བྱ། །ཞེས་པའི་བར་གྱིས་ནི་བསྲུང་བ་བྱ་བའི་རིམ་པ་
བསྟན་ཏོ། །དེ་ནས་ཐབ་ཁུང་གསུམ་ལས་རྣམ་གཅིག་ནི་ཞེས་པ་ནས་ཞི་བའི་ལས་སོ་ཞེས་པའི་བར་གྱིས་ནི་ཉི་མ་མེའི་ཞི་བའི་སྦྱིན་སྲེག་བསྟན་ཏོ། །འབྲས་བུ་ལྡན་པའི་ནགས་ཚལ་ལམ། །ཞེས་བྱ་བ་ནས་རྒྱས་པའི་ལས་སོ་ཞེས་བྱ་བ་ཡན་ཆད་ཀྱིས་ཉི་མ་མེའི་རྒྱས་པའི་ལས་བསྟེན་ཏོ། །དབང་ནི་ཆགས་པའི་སེམས་ཀྱིས་ཀྱང༌། །ཞེས་བྱ་བ་ནས་དབང་གི་ལས་སོ་ཞེས་བྱ་བའི་བར་གྱིས་ཉི་མ་མེའི་དབང་གི་རིམ་པ་བསྟན་ཏོ། །དེ་ནས་བརྒྱ་བྱིན་ཚངས་སོགས་ལྷ། །ཞེས་བྱ་བ་ནས། མཆོད་པ་སྣ་ཚོགས་བྱས་ནས་ཀྱང༌། །ཞེས་བྱ་བའི་བར་གྱིས་མཆོད་པ་བསྟན་ཏོ། །དགའ་བའི་སེམས་ཀྱིས་སྟོད་བྱེད་པ། །ཞེས་བྱ་བ་ནས། ཐམས་ཅད་རྡོ་རྗེའི་བདག་ཉིད་གཙོ། །ཞེས་བྱ་བའི་བར་གྱིས་ནི་ཕྱག་ན་རྡོ་རྗེ་ལ་བསྟོད་པ་བསྟན་ཏོ། །གང་གིས་འདི་བྲིས་བཀླག་གྱུར་ཏམ། །ཞེས་བྱ་བ་ནས། ཕྱག་ན་རྡོ་རྗེ་འདྲ་བར་འགྱུར། །ཞེས་པའི་བར་གྱིས་ནི་བསྟོད་པའི་ཡོན་ཏན་ཤཱཀྱ་ཐུབ་པས་གསུངས་པ་བསྟན་ཏོ། །བཅོམ་ལྡན་འདས་ཀྱིས་ཞེས་བྱ་བ་ནས་ཡི་རང་ངོ་ཞེས་པའི་བར་གྱིས་ནི་རྒྱུད་ཀྱི་གཏད་པ་དང་ཡིད་འཇུག་པ་བསྟན་ཏོ། །རྒྱུད་ཕྱི་མའི་ཡང་ཕྱི་མའི་བཤད་པ་སློབ་དཔོན་ཀུན་དགའ་སྙིང་པོས་མཛད་པ་རྫོགས་སོ།། །།ཇི་སྐད་བཤད་པའི་བསྡུས་པའི་དོན་ཐམས་ཅད་ཀྱི་དོན་བསྟན་པས། བཅོམ་ལྡན་འདས་ཤཱཀྱ་ཐུབ་པ་ཀུན་རིག་རྣམ་པར་སྣང་མཛད་ལ་སོགས་པའི་རང་བཞིན་ནི་བརྗོད་པར་བྱ་བ་བཤད་པ་ཡིན་ལ། དེ་སྟོན་པར་བྱེད་པའི་སྒྲའི་ཚོགས་ནི་རྒྱུད་ཡིན་ནོ། །རྒྱུད་དང༌། བརྗོད་པར་བྱ་བ་གཉིས་བརྗོད་པར་བྱ་བ་དང་རྗོད་པར་བྱེད་པའི་མཚན་ཉིད་དུ་འབྲེལ་བ་ནི་འབྲེལ་ལོ། །ཐབས་དང་ཤེས་རབ་ཀྱི་ངོ་བོ་རྣམ་པར་སྣང་མཛད་དང་ཤཱཀྱ་ཐུབ་པ་བརྗོད་བྱར་བསྟན་པས། གདུལ་བྱ་རྣམས་ཀྱིས་མངོན་པར་འདོད་པ་བསྐྱེད་པ་དེ་ནི་དགོས་པའོ། །མངོན་པར་འདོད་པ་བསྐྱེད་པ་དེ་རྣམས་དཀྱིལ་འཁོར་དུ་འཇུག་པ་ལ་སོགས་པ་དེའི་རང་བཞིན་མངོན་སུམ་དུ་བྱེད་པ་ནི་དགོས་པའི་ཡང་དགོས་པ་ཡིན་ནོ། །རྒྱུད་འདི་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངན་སོང་ཐམས་ཅད་ཡོངས་སུ་སྦྱོང་བའི་རྒྱུད་ཅེས་བྱའོ་ཞེས་གསུངས་སོ། །དེ་ལ་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་འཇིག་རྟེན་གྱི་
ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་སེམས་དང་སེམས་ལས་བྱུང་བ་རྣམས་གཉིས་སུ་མེད་པའི་དེ་བཞིན་གཤེགས་པ་ཐམས་ཅད་དོ། །རྒྱུ་དང༌། འབྲས་བུ་དང༌། རྐྱེན་སྦྱོང་བར་བྱེད་པས་ན་ངན་སོང་སྦྱོང་བའོ། །དེ་སྟོན་པར་བྱེད་པའི་དེ་ཁོ་ན་ཉིད་བཅུའི་མིང་གི་ཚོགས་ནི་རྒྱུད་ཅེས་བྱ་བ་སྟེ། རྒྱུད་ནི་རྒྱུད་ཅེས་བྱ་བར་བཤད། །ཅེས་གསུངས་པའི་ཕྱིར་རོ། །དེ་ཁོ་ན་ཉིད་བཅུ་ནི་འདི་ལྟ་སྟེ། དཀྱིལ་འཁོར་དང༌། སྔགས་དང༌། ཕྱག་རྒྱ་དང༌། བདག་དང༌། གནས་ལ་སོགས་པ་བསྲུང་བ་དང༌། ལྷ་རྣམས་སྤྱན་དྲངས་པའི་ཆོ་ག་དང༌། བཟླས་བརྗོད་དང༌། བསྒོམ་པ་དང༌། ཕྱི་དང་ནང་གི་བདག་ཉིད་ཅན་གྱི་སྦྱིན་སྲེག་དང༌། སློབ་དཔོན་གྱི་ལས་དང༌། སློབ་མ་གཞུག་པའི་རིམ་པ་དང༌། ཉེ་བར་བསྡུ་བ་དང༌། མཆོད་ནས་གཤེགས་སུ་གསོལ་བའོ། །དེ་ལ་དཀྱིལ་འཁོར་གྱི་གྲངས་བརྗོད་པར་བྱ་སྟེ། རྩ་བའི་དཀྱིལ་འཁོར་ལ་གཉིས་སོ། །རྒྱུད་ཕྱི་མ་ལ་འཇིག་རྟེན་ལས་འདས་པའི་གསུམ་མོ། །འཇིག་རྟེན་པའི་དཀྱིལ་འཁོར་དྲུག་གོ །འཇིག་རྟེན་པའི་བསྒྲུབ་པའི་དཀྱིལ་འཁོར་གསུམ་མོ། །རྒྱུད་ཕྱི་མའི་ཕྱི་མ་ལ་གཉིས་སོ། །རས་ཀྱི་བསྒྲུབ་པའི་དཀྱིལ་འཁོར་བཞིའོ། །སྦྱིན་སྲེག་གི་དཀྱིལ་འཁོར་བཞིའོ། །སྤྱི་རུ་ དྲིལ་བས་དཀྱིལ་འཁོར་དེ་རྣམས་ཀྱང་རྒྱུ་དང་འབྲས་བུ 
་དང་དོན་དམ་པའི་དེ་ཁོ་ན་ཉིད་བཅུ་པོར་གྱུར་པ་དེ་དག་ཉིད་རྣམ་པ་གསུམ་གསུམ་དུ་ཡང་འགྱུར་རོ། །གཞན་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐབས་ཀྱི་ཕ་རོལ་ཏུ་ཕྱིན་པའི་དབྱེ་བས་དེ་ཁོ་ན་ཉིད་བཅུ་པོ་དེ་དག་ཉིད་རྣམ་པ་གཉིས་སུ་འཇོག་པ་ཡིན་ནོ། །ཡང་ཇི་སྐད་དུ་བཤད་པ་དེ་ཁོ་ན་ཉིད་བཅུ་ལས་ཐོས་པ་དང་བསམས་པའི་ཤེས་རབ་གཉིས་ཀྱིས་རབ་ཏུ་ཕྱེ་ནས་སུམ་ཅུ་རྩ་བདུན་དུ་ཡང་གནས་ཤིང་བསྡུས་པར་ཡང་འདོད་དོ། །དེ་ཉིད་ནི་ཐེག་པ་ཆེན་པོའོ། །དེ་ཁོང་དུ་ཆུད་པ་ནི་མངོན་པར་རྟོགས་པ་སྟེ་མངོན་སུམ་དུ་བྱེད་པའོ། །དེ་སྟོན་པར་བྱེད་པའི་སྒྲའི་ཚོགས་ནི་རྒྱུད་ཅེས་བྱ་བར་བཤད་དོ། །ངན་སོང་ཐམས་ཅད་ཡོངས་སུ་སྦྱོང་བའི་རྒྱུད་ཀྱི་བསྡུས་པའི་དོན་བསྟན་པ་རྫོགས་སོ།། །།དེ་ལྟ་བུའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངན་སོང་ཐམས་ཅད་ཡོངས་སུ་སྦྱོང་བའི་མདོ་
བློ་ལ་གནས་པར་བྱས་ནས་སྡུད་པར་བྱེད་པས་བཅུའི་དབང་ཕྱུག་ལྕང་ལོ་ཅན་གྱི་ཕོ་བྲང་ན་བཞུགས་པའི་རྡོ་རྗེ་འཛིན་པས་བློ་ལ་བཞག་ནས། འདི་སྐད་ཅེས་བྱ་བ་ལ་སོགས་པ་སྨྲས་པ་ཡིན་ཏེ། འདི་སྐད་ཅེས་བྱ་བ་འདི་ནི་ཡང་དག་པའི་སྡུད་པར་བྱེད་པས་མདོའི་དོན་འོག་ནས་འབྱུང་བ་མཐའ་དག་རང་གི་སེམས་ལ་བཀོད་ནས། བཅོམ་ལྡན་འདས་ལ་བསྐྱེད་པར་སྒྲོ་འདོགས་པ་དང༌། དབྲི་བ་སྐུར་བ་སྤངས་པའི་ཕྱིར་འདི་སྐད་ཅེས་བྱའོ། །བདག་གིས་ཞེས་བྱ་བས་ནི་བཅོམ་ལྡན་འདས་ལ་མངོན་སུམ་དུ་ཐོས་པར་བསྟན་པ་སྟེ། བདག་ཉིད་ཀྱིས་བཅོམ་ལྡན་འདས་ལ་ཐོས་ཀྱི་ཐོས་པ་གཅིག་ནས་གཅིག་ཏུ་བརྒྱུད་པ་ལས་འོངས་པ་ནི་མ་ཡིན་ནོ། །ཐོས་པ་ཞེས་བྱ་བ་འདིས་ནི་བདག་གིས་མ་རྟོགས་ཞེས་བསྟན་པ་སྟེ། ཐོས་པར་ཟད་ཀྱི་རྟོགས་པ་མེད་པར་རྣམ་པར་བཅད་པའོ། །འདིས་ནི་བདག་ཉིད་ཀྱིས་མངོན་སུམ་དུ་ཐོས་པ་དང༌། མ་ཡེངས་པ་ཉིད་དུ་སྟོན་པ་ཡིན་ནོ། །ཡང་ན་བཅོམ་ལྡན་འདས་ཀྱིས་བཤད་ཅིང་སྤྲུལ་པའི་ཆོས་རྣམས་མངོན་སུམ་དུ་སྤྱོད་ཡུལ་དུ་གྱུར་པ་ཡང་ཡིན་ཏེ། བཅོམ་ལྡན་འདས་ཀྱིས་བཤད་པའི་དབང་གིས་བདག་ཉིད་ཀྱི་ཡེ་ཤེས་ཀྱི་ཡུལ་ལ་ཡང་སྣང་ངོ༌། །དེ་ལྟར་ནང་གིས་ཀྱང་བདག་ཉིད་སྟོན་པ་ནི་མ་ཡིན་ནོ། །དེ་ལྟར་མངོན་སུམ་དུ་གྱུར་པས་བསྡུས་པ་དག་ཁ་ཅིག་ལས་ནི་འདི་སྐད་བདག་གིས་ཞེས་བྱ་བར་མི་གླེང་བར། སྣང་མཛད་མངོན་པར་བྱང་ཆུབ་གསང་བ་བཤད། ཅེས་བྱ་བ་སྨོས་སོ། །ཡང་དེ་ལྟར་ཡིན་གྱིས་ཀྱང་འདི་ནི་སྤྲུལ་སྐུས་གསུངས་པ་ཡིན་པས། འདི་སྐད་བདག་གིས་ཐོས་པ་ཞེས་རིགས་ཏེ། དེ་ཡང་ཕྱག་ན་རྡོ་རྗེ་དབང་བསྐུར་བའི་རྒྱུད་ལས་ཀྱང་ལོངས་སྤྱོད་རྫོགས་པའི་སྐུ་མྱ་ངན་ལས་འདས་པ་མེད་པས། དུས་ཕུན་སུམ་ཚོགས་པ་མེད་པས་ཇི་ལྟར་འགྱུར་བ་རྣམས་སྟོན་ལ། སྦྲུལ་པའི་སྐུ་མྱ་ངན་ལས་འདའ་བ་ཡོད་པས་འདི་སྐད་བདག་གིས་ཐོས་པ་དུས་གཅིག་ན་ཞེས་བྱ་བ་སྨོས་སོ། །ཡང་ན་ཐོས་པ་ཞེས་བྱ་བ་འདིས་ནི་འཆད་པ་པོ་མ་ཡིན་པ་དགག་པ་སྟེ། །རྒྱུད་འདི་ནི་ཡིད་བརྟན་དུ་རུང་བའི་ཚད་མས་བསྡུས་ཀྱི་བདག་ནི་དེའི་ཚེ་ན་ཉན་པར་ཟད་ཀྱིས་འཆད་པ་པོ་ནི་བཅོམ་ལྡན་འདས་ཡིན་ནོ་ཞེས་སྟོན་པའི་ཕྱིར་རོ། །དུས་གཅིག་ན་ཞེས་
བྱ་བ་འདིས་ནི་དུས་གཅིག་གི་ཚེ་སྟེ། འཁོར་འདུས་པའི་དུས་ལྷའི་དབང་པོ་བརྒྱ་བྱིན་གྱི་གནས་དགའ་བའི་ཚལ་དུ་འདི་ཐོས་སོ་ཞེས་བྱ་བ་དང་སྦྱར་རོ། །དེ་ལྟར་དུས་གཅིག་ཅེས་བྱ་བ་འདིས་ནི་ཆོས་འདི་ཐོས་པར་དཀའ་བ་སྟོན་ཏོ། །དུས་ཐམས་ཅད་དུ་འཁོར་དང་གནས་ཐམས་ཅད་ནི་འདི་འདྲ་བའི་ཆོས་ཐོས་པར་མི་འགྱུར་རོ་ཞེས་བསྟན་པའོ། །ཡང་ན་སྡུད་པ་པོ་བདག་ཉིད་མང་དུ་ཐོས་པའི་ཡོན་ཏན་དུ་བསྟན་ཏེ། དུས་གཞན་ན་ནི་ཆོས་གཞན་ཡང་ཐོས་སོ། །ཡང་ན་དུས་གཅིག་ནི་འདི་སྐད་ཅིག་མ་ཅིག་ཉིད་དེ། འདིས་ཀྱང་རྣམ་པར་ཐར་པ་བསམ་གྱིས་མི་ཁྱབ་པ་ཐོབ་པ་ཉིད་ཀྱིས་སྐད་ཅིག་མ་ཅིག་ཉིད་ལ་དུས་གསུམ་གྱི་བསྐལ་པ་སོ་སོར་སྣང་བས་བདག་ཉིད་ཚད་མའི་སྐྱེས་བུ་ཉིད་ཡིན་པར་བསྟན་ཏོ། །ཅིའི་ཕྱིར་འདི་སྐད་བདག་བཀའ་སྩལ་པ་ཞེས་མི་བྱ་བར་འདི་སྐད་ཐོས་པ་ཞེས་ཡང་དག་པར་སྡུད་པར་བྱེད་ཅེས་སྨྲ། སླར་ལན་བཏབ་པ། ཐོས་པ་ཞེས་བྱ་བ་ལ་ལྷག་པར་བསྐྱེད་པར་ཅིའི་ཕྱིར། སྨྲས་པ་ཐོས་པ་ཞེས་བྱ་བ་ཏ་ཞིག་སུ་ལས་ཐོས་སུས་ཤེས། འདི་སྐད་གསུངས་ཞེས་སྨྲས་པ་དང༌། ཞལ་ནས་གསུངས་པ་ཉིད་དུ་བསྟན་པར་འགྱུར་རོ་ཞེ་ན། མ་ཡིན་ཏེ། བདག་གིས་ཐོས་པ་ཞེས་བྱ་བ་འདིས་ཀྱང་བཅོམ་ལྡན་འདས་ཀྱིས་གསུངས་པ་ཉིད་དུ་འགྱུར་ཏེ། འདི་སྐད་ཐོས་པ་ཞེས་བྱ་བའི་སྐབས་གོང་དུ་བཤད་པ་ཡིན་ནོ། །ཡང་བཅོམ་ལྡན་འདས་ཀྱིས་བཀའ་སྩལ་པ་ཞེས་བྱ་བ་སྨྲས་པ་ནི་ཡོན་ཏན་ལྷག་པར་ཡོད་པར་མ་ཟད་ཀྱི། སྐྱོན་འདི་ལྟ་བུ་ཡོད་པར་འགྱུར་རོ། །གང་ཞེ་ན། བདག་ཉིད་ཀྱིས་མངོན་སུམ་དུ་ཐོས་པ་མ་ཡིན་པར་བསྟན་པར་འགྱུར་ཏེ། དེའི་ཕྱིར་ཐོས་པ་གཅིག་ནས་གཅིག་ཏུ་བརྒྱུད་པ་ལ་སོགས་པའི་ཚིག་ཡིན་པར་གཞན་དག་དོགས་ཤིང་སྡུད་པར་བྱེད་པའི་ཚིག་ལ་སུ་ཡང་ཡིད་ཆེས་པར་མི་འགྱུར་རོ། །འོན་ཏེ་ཡང་བདག་གིས་ཐོས་པ་ཞེས་བྱ་བ་འདི་དང༌། བཅོམ་ལྡན་འདས་ཀྱིས་འདི་སྐད་བདག་གིས་བཀའ་སྩལ་པ། ཞེས་བྱ་བའི་ཚིག་གཉིས་ཀ་སྨོས་ན་ནི་ཚིག་མང་བར་འགྱུར་རོ། །དེ་བས་ན་འདི་སྐད་བདག་གིས་ཐོས་པ་དེ་ཙམ་གྱིས་ཀྱང་བཅོམ་ལྡན་འདས་ཀྱིས་བཀའ་སྩལ་བར་མངོན་ཏེ་དེའི་ཁོངས་སུ་འདུས་པའི་ཕྱིར་བཅོམ་ལྡན་འདས་ཀྱིས་བཀའ་སྩལ་པ་ཞེས་བྱ་
བའི་ཚིག་ལྷག་པར་འགྱུར་རོ། །དེ་བས་ན་བཅོམ་ལྡན་འདས་ཀྱིས་ཀྱང་ཡོངས་སུ་མྱ་ངན་ལས་འདས་པ་ཆེན་པོ་ལ་སོགས་པའི་མདོ་ལས་ཀྱང༌། འདི་སྐད་བདག་གིས་ཐོས་པ་ཞེས་བྱ་བ་ལ་སོགས་པའི་ཚིག་རྣམས་ཀྱིས་མགོ་དྲོངས་ལ། མཇུག་ཏུ་མངོན་པར་བསྟོད་དོ་ཞེས་བྱ་བ་དག་གིས་ཡང་དག་པར་བསྡུ་བར་བྱོས་ཤིག་ཅེས་ལུང་ཕོག་གོ །དེ་བས་ན་བཅོམ་ལྡན་འདས་ཀྱིས་ལུང་དང་མཐུན་པར་ཡང་དག་པར་བྱེད་པས་བཅོམ་ལྡན་འདས་ཀྱིས་ལུང་བཞིན་བསྡུ་བ་བྱས་པས་རྒོལ་བ་འདི་ནི་མི་རུང་ངོ༌། གང་སྐད་ཅིག་ཏུ་རྒོལ་བའི་ལན་སློབ་དཔོན་གཞན་དག་གིས་ཀྱང་བཏབ་པ། བཅོམ་ལྡན་འདས་ཀྱི་གསུང་གཅིག་ལ་སེམས་ཅན་གྱི་མོས་པ་སྣ་ཚོགས་པའི་དབང་གིས་རྣམ་པ་དུ་མར་བཤད་པ་སྐྱེས་པ་སྐྱེ་བས་བཅོམ་ལྡན་འདས་ཀྱིས་བཀའ་སྩལ་པ་ཞེས་བྱར་མི་རུང་ངོ༌། །དེ་བས་ན་བདག་གིས་ཐོས་པ་ཞེས་བྱ་བ་འདིས་ཡང་དག་པར་སྡུད་པར་བྱེད་པས་བདག་ཉིད་ཀྱི་རྣ་བའི་དབང་པོས་ཐོས་པའི་ལམ་ནས་འོང་བའི་རིམ་པ་སྟོན་པས་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་ཞེས་བརྗོད་དེ། ཅིའི་ཕྱིར་ཞེ་ན། བཅོམ་ལྡན་འདས་ཀྱིས་བཤད་པ་ཀུན་ཡང་དག་པར་སྡུད་པར་བྱེད་པ་དེའི་ཡུལ་མ་ཡིན་པའི་ཕྱིར་རོ། །འདིར་བརྒལ་བ་དང༌། འོ་ན་ཁྱོད་ཀྱིས་མཇུག་ན་དེ་སྐད་བཀའ་སྩལ་པ་དང་འགལ་ལོ་ཞེས་པ་དང༌། དེ་ནི་འོག་ཏུ་ཐལ་བའི་རྗེས་སུ་སྨྲས་པ་ཡིན་པས་འགལ་བ་མ་ཡིན་ནོ། །དུས་གཅིག་ན་བྱ་བ་འདིས་ནི་བར་ཆད་མེད་པར་བསྟན་ཏེ། ནམ་བཅོམ་ལྡན་འདས་དགའ་བའི་ཆལ་ན་ལྷའི་བུ་ནོར་བུ་དྲི་མ་མེད་པའི་འོད་ངན་སོང་གི་སྡུག་བསྔལ་ལས་བཏོན་པའི་དུས་དེ་ན་ཞེས་པའོ། །དེས་ནི་མ་འདྲེས་པའི་དོན་བསྟན་ཏོ། །ཁྱོད་ཀྱིས་གང་ལས་གང་དུ་ཐོས་ཤེ་ན། །དེ་གསལ་བར་བྱ་བའི་ཕྱིར་ཅོམ་ལྡན་འདས་ཞེས་བྱ་བ་ལ་སོགས་པ་སྨོས་ཏེ། འདིར་བཅོམ་ལྡན་འདས་དགའ་བའི་ཚལ་ན་བཞུགས་ཏེ་ཞེས་བྱ་བ་དང་སྦྱར་རོ། །བཅོམ་ལྡན་འདས་དགའ་བའི་ཚལ་དུ་བཞུགས་ཏེ། དེ་ལས་དེར་བདག་གིས་ཐོས་ཞེས་བྱ་བ་སྟེ། ཉོན་མོངས་པ་དང༌། ལྷའི་བུ་དང༌། ཕུང་པོ་དང༌། འཆི་བདག་གི་མཚན་ཉིད་ཅན་གྱི་བདུད་བཞི་བཅོམ་པས་བཅོམ་ལྡན་འདས་སོ། །ཡང་ན་ཤེས་བྱ་དང་ཉོན་མོངས་བའི་སྒྲིབ་པ་བཅོམ་པ་ཉིད་
བཅོམ་ལྡན་འདས་ཀྱི་མཚན་བཅོམ་ལྡན་འདས་ཀྱི་སྒྲའི་ནང་ནས་ཡི་གེ་ཨས་ཁྱབ་ལ། ཨས་ནི་ཆོས་ཐམས་ཅད་ཐོག་མ་ནས་བྱུང་བའི་སྟོང་པ་ཉིད་ཀྱི་མཚན་ཉིད་དུ་བསྟན་པ་སྟེ། དེ་ལྟར་ཡང་གསུངས་པ། ཨ་ཞེས་བྱ་བའི་ཆོས་རྣམས་ནི་སྐྱེ་བ་མེད་པར་དགོངས་པ་སྟེ་ཞེས་གསུངས་པའོ། །དེ་ལྟར་ཡི་གེ་ཨའི་སྒོ་ནས་སྒྲིབ་པ་བཅོམ་པ་དང༌། ཆོས་ཀྱི་སྐུ་སྟོང་པ་ཉིད་དང་ལྡན་པས་བཅོམ་ལྡན་འདས་སོ། །ཡོན་ཏན་གྱི་ཁྱད་པར་དེ་ལྟ་བུ་དང་ལྡན་པའི་བཅོམ་ལྡན་འདས་དེ་གནས་གང་ན་བཞུགས་སྙམ་པ་ལ། ལྷའི་མཆོག་ཅེས་པ་སྟེ། ལྷ་ཐམས་ཅད་ཀྱི་མཆོག་ཏུ་གྱུར་པ་ལྷའི་དབང་པོ་བརྒྱ་བྱིན་ཏེ། འདི་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ལ་བསྐལ་པ་དཔག་ཏུ་མེད་པར་སྦྱངས་བས་ན་ལྷའི་མཆོག་གོ །ལྷ་དང་མི་ལ་སོགས་པ་ཐམས་ཅད་ཀྱི་ཡང་ཡིད་ཀྱི་དབང་པོ་རྟས་པར་བྱེད་པས་ན་ཐམས་ཅད་ཀྱི་དགའ་བའི་ཚལ་ཡིད་དུ་འོང་བའོ། །ལྷ་དེ་དག་གིས་ལོངས་སྤྱོད་ཀྱི་རྐྱེན་ཚལ་ཆེན་པོ་བཞི་ཡང་ཡོད་དེ། བྱང་ཕྱོགས་དགའ་བའི་ཚལ་དང༌། ཤར་ཕྱོགས་ཤིང་རྟ་སྣ་ཚོགས་དང༌། ལྷོ་ཕྱོགས་རྩུབ་འགྱུར་དང༌། ནུབ་ཕྱོགས་འདྲེས་པའི་ཚལ་དང༌། གཞན་ཡང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་བརླབས་པ་ན་ཞེས་བྱ་བ་དང་སྦྱར་ཏེ། དུས་གསུམ་གྱི་སངས་རྒྱས་ཐམས་ཅད་ཀྱིས་སྔར་བྱིན་གྱིས་བརླབས་པ་བྱས་པའོ། །དེ་བས་ན་ནོར་བུ་དང་ཞེས་བྱ་བ་ལ་སོགས་པ་སྨོས་ཏེ། ནོར་བུ་ནི་སྟོན་པའི་ཆེ་བའི་ཡོན་ཏན་ལས་བྱུང་བ་སྟེ། གསེར་གྱི་ཤིང་ཡལ་ག་དང་ལྕུག་མར་བཅས་པ་ཞེས་བྱ་བ་ནི་དྲན་པ་ཉེ་བར་གཞག་པ་བཞི་དང༌། ཡང་དག་པར་སྤོང་བ་བཞི་དང༌། རྫུ་འཕྲུལ་གྱི་རྐང་པ་བཞི་རྣམ་པར་དག་པ་ལས་བྱུང་བའོ། །ཤིང་གེལ་པ་ནི་དབང་པོ་ལྔ་རྣམ་པར་དག་པ་ལས་བྱུང་བའོ། །སྨན་ནི་སྟོབས་ལྔ་རྣམ་པར་དག་པའོ། །མེ་ཏོག་ཀ་མ་ལ་ལ་སོགས་པ་བདུན་ནི་རིམ་གྱིས་བྱང་ཆུབ་ཀྱི་ཡན་ལག་བདུན་རྣམ་པར་དག་པ་ལས་བྱུང་བའི། །དཔག་བསམ་གྱི་ཤིང་ནི་རྣམ་པར་ཐར་པ་བརྒྱད་རྣམ་པར་དག་པ་ལས་བྱུང་བའོ། །རྒྱན་སྣ་ཚོགས་ཀྱིས་བརྒྱན་པ་ནི་དཔའ་བར་འགྲོ་བའི་ཏིང་ངེ་འཛིན་ལ་སོགས་པའི་ཏིང་ངེ་འཛིན་འབུམ་ཕྲག་རྣམ་པར་དག་པའོ། །བྱ་རྣམ་པ་སྣ་ཚོགས་སྐད་འབྱིན་པ་ནི་ཚངས་པའི་
གསུང་དབྱངས་ཀྱི་གསུང་རབ་ཡན་ལག་བཅུ་གཉིས་ཀྱི་སྒྲ་སྒྲོགས་པའོ། །རྡ་དང་ཅང་ཏེའུ་ལ་སོགས་པའི་སྒྲ་གྲག་པ་ནི། ཕ་རོལ་ཏུ་ཕྱིན་པ་བརྒྱད་ཀྱི་མཆོད་པ་སྒེག་མོ་ལ་སོགས་པ་རྣམ་པར་དག་པའོ། །བརྒྱ་བྱིན་དང་ཚངས་པ་ལ་སོགས་པ་ནི་ཐབས་དང་ཤེས་རབ་ཀྱི་འབྲས་བུ་ལས། ཐབས་སྦྱིན་པ་ལ་སོགས་པ་རྣམ་པར་སྨིན་པའི་འབྲས་བུའོ། །རྩེན་པ་ཞེས་བྱ་བ་ནི་བསྟོད་པའོ། །དེ་ལྟ་བུ་གནས་སུ་བྱིན་གྱིས་བརླབས་པས་ན་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་བརླབས་པའོ། །ན་ཞེས་བྱ་བས་ནི་བཞུགས་པ་དང་འབྲེལ་ཏོ། །དེ་འདྲ་བའི་གནས་དེ་ན་འཁོད་པའི་འཁོར་ཕུན་སུམ་ཚོགས་པ་ནི་གང་དང་གང་ཞེ་ན། བརྒྱ་བྱིན་དང་ཞེས་བྱ་བ་ལ་སོགས་པ་སྨོས་ཏེ། བརྒྱ་བྱིན་ནི་ས་དང་པོའི་བདེན་པ་མཐོང་བས་སྐད་ཅིག་མ་ཅིག་ལ་ཞིང་ཁམས་བརྒྱ་དང༌། ཏིང་ངེ་འཛིན་བརྒྱ་ལ་དབང་བྱེད་པས་ན་བརྒྱ་བྱིན་ནོ། །ས་དང་པོ་འཁོར་བ་གཏན་ནས་སྤངས་ནས། འཇིག་རྟེན་པའི་བདག་པོའི་ཚུལ་གཟུང་བས་ཚངས་པའོ། །རིག་འཛིན་དང་ཞེས་པས་ནི་སོ་སོའི་སྐྱེ་བོ་ལས་བླ་ན་མེད་པའི་བྱང་ཆུབ་ཏུ་སེམས་བསྐྱེད་དེ་ཚོགས་རྣམ་པ་གཉིས་བསགས་ནས་སྦྱོར་བའི་ལམ་ནོན། དེར་གཟུང་འཛིན་རགས་པ་སྤངས་ནས་མཐོང་བའི་ལམ་ནོན་ཏེ། མི་རྟོག་པའི་ས་ལ་གནས་པས་རིག་འཛིན་ནོ། །གནོད་སྦྱིན་ནི་རྣམ་ཐོས་སྲས་དང༌། ས་སྲུང་ལ་སོགས་པའོ། །སྲིན་པོ་ནི་བདེན་བྲལ་དང༌། བུམ་སྣ་ལ་སོགས་པའོ། །དྲི་ཟ་ནི་ཡུལ་འཁོར་སྲུང་དང༌། ཟུར་ཕུད་ལྔ་པ་ལ་སོགས་པའོ། །ལྷམ་ཡིན་ནི་རབ་སིམ་དང། སྣང་བྱེད་ལ་སོགས་པའོ། །ལྟོ་འཕྱེ་ནི་རབ་བརྟན་ལ་སོགས་པའོ། །མི་འམ་ཅི་ནི་ལྗོན་པ་ལ་སོགས་པའོ། །ཀླུ་ནི་དགའ་བོ་ལ་སོགས་པའོ། །དུ་མ་ནི་སོ་སོ་ནས་མང་པོས་བསྐོར་བའོ། །དེ་ལྟར་འཇིག་རྟེན་པའི་འཁོར་ལ་སྨོས་པ་ནི་དེ་དག་སྣོད་དུ་རུང་བར་བྱ་དགོས་པ་དང༌། ཕྱིས་འབྱུང་བ་གཞན་དག་ཀྱང་དད་པ་བསྐྱེད་པ་དགོས་པའི་བྱ་བའི་ཕྱིར་རོ། །དེ་ལ་འཇིག་རྟེན་ལས་འདས་པའི་འཁོར་ཕུན་སུམ་ཚོགས་པ་གང་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཁྲག་ཁྲིག་ཕྲག་བརྒྱད་ལ་འདི་ལྟ་སྟེ། ཞེས་པ་སྟེ་དེ་ལས་བྱང་ཆུབ་སེམས་
དཔའ་ཞེས་བྱ་བ་ནི་བདག་གི་དོན་ཕུན་སུམ་ཚོགས་པ་ལ། །སེམས་དཔའ་ཆེན་པོ་ནི་གཞན་གྱི་དོན་ཕུན་སུམ་ཚོགས་པ་སྟེ། དེ་ལ་བྱང་ཆུབ་ནི་ཟང་པ་མི་སྐྱེ་བའོ། །སེམས་དཔའ་ནི་ཐོབ་པར་འདོད་པའོ། །སེམས་དཔའ་ཆེན་པོ་ནི་སེམས་ཅན་གྱི་དོན་བྱ་བ་ལ་མི་འཇིགས་ཤིང་མི་སྐྱོ་བ་མེད་པར་དམ་བཅའ་ཞིང་གནས་པ་སྟེ། དོན་དུ་ན་བདག་གིས་བླ་ན་མེད་པའི་བྱང་ཆུབ་ཏུ་བྱས་ལ་སེམས་ཅན་ཐམས་ཅད་འཁོར་བའི་བཙོན་ར་ཤིན་ཏུ་དམ་པ་དག་ལས་གདོན་པར་བྱའོ་ཞེས་སོ། །རྣམ་པ་གཅིག་ཏུ་བྱང་ཆུབ་ནི་དོན་དམ་པ་འོད་གསལ་བ་ལ་བྱ་སྟེ། དེ་ཡང༌། བྱང་ཆུབ་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ཅེས་སོ། །བྱང་ཆུབ་སེམས་དཔའ་དག་གིས་མཚན་འདིར་བློ་གྲོས་ཞེས་མིང་གི་དོན་གཙོར་སྨོས་ཤེ་ན། དེ་ནི་ཐབས་ཐུགས་རྗེ་ཆེན་པོ་དང༌། ཤེས་རབ་སྟེ་སོ་སོར་བརྟགས་པའི་དབང་གིས་འགྲོ་བ་དག་ངན་སོང་ལས་འདྲེན་པའི་སྒོར་གྱུར་པས་ན་དེ་ལ་དེ་སྐད་ཅེས་བྱའོ། །བྱང་ཆུབ་སེམས་དཔའ་ཕྱག་ན་རྡོ་རྗེ་ལ་ནི་བློ་གྲོས་ཚད་མེད་པ་ཞེས་བྱའོ། །དེ་ཅིའི་ཕྱིར་ཞེ་ན། འདིའི་མཐུ་སྟོབས་ནི་ཚད་མེད་དོ་ཞེས་བྱ་བའི་རྒྱུད་ལས་གསུངས་སོ། །ཡང་ན་འདི་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་སེམས་དང་བའི་བདག་ཉིད་ཅན་གྱི་རང་བཞིན་ཡིན་པས་དང་པོར་སྨོས་ལ་སྡུད་པ་པོ་འཁོར་གྱི་དང་པོ་ཡིན་པས་ཀྱང་དང་པོར་སྨོས་སོ། །སྤྱན་རས་གཟིགས་དབང་ཕྱུག་ལ་ནི་བློ་གྲོས་མི་གཡོ་བ་ཞེས་བྱའོ། །ཅིའི་ཕྱིར་ཞེ་ན། འཇིགས་པ་ཆེན་པོ་བརྒྱད་ཀྱིས་ཟོས་པའི་སེམས་ཅན་ཐམས་ཅད་སྤྱན་རས་གཟིགས་ཀྱིས་སོ་སོར་རྟོག་པ་མཛད་པ་དང༌། གཟིགས་ཤིང་སྐྱོབ་པར་མཛད་པ་ལ་གཞན་གྱིས་ཐུགས་མི་གཡོ་བར་མཛད་པའི་ཕྱིར་རོ། །བྱང་ཆུབ་སེམས་དཔའ་ནམ་མཁའི་སྙིང་པོ་ལ་ནི་བློ་གྲོས་ཡངས་པ་ཞེས་བྱ་སྟེ། །ཅིའི་ཕྱིར་ཞེ་ན། བསོད་ནམས་དང་ཡེ་ཤེས་ཀྱི་ཚོགས་ཀྱིས་ནམ་མཁའི་དབྱིངས་ལ་མཉམ་པ་ཉིད་ཀྱི་ཡེ་ཤེས་ལ་ལོངས་སྤྱོད་པའི་ཕྱིར་ན་ཡངས་པ་ཞེས་བྱའོ། །རྡོ་རྗེ་ཁུ་ཚུར་ལ་ནི་ཀུན་དུ་བློ་གྲོས་ཞེས་བྱའོ། །ཅིའི་ཕྱིར་ཞེ་ན། ཆོས་ཐམས་ཅད་རང་བཞིན་གྱིས་འོད་གསལ་བའོ་ཞེས་བྱ་བ་འདིས། ཆོས་ཐམས་ཅད་གཅིག་ཏུ་བྱེད་པ་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་སྒོ་ཐམས་ཅད་གཉིས་སུ་དབྱེར་མི་ཕྱེད་པས་
ཆོས་ཉིད་ཀྱི་ཁུར་གང་ལ་མངའ་བ་དེའོ། །དེ་ཡང༌། གང་ཞིག་མི་སླུ་བདེན་དེ་ཉིད། །རྡོ་རྗེ་ཁུ་ཚུར་ཞེས་བཤད་དོ། །ཞེས་ལུང་ལས་གསུངས་པ་ཡིན་ནོ། །འཇམ་དཔལ་ལ་ནི་བློ་གྲོས་མཐའ་ཡས་ཞེས་བྱ་སྟེ། ཅིའི་ཕྱིར་ཞེ་ན། འདི་ནི་གཉིས་སུ་མེད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པའི་རྒྱུ་ལས་ངེས་པར་འབྱུང་བའི་དེ་ཁོ་ན་ཉིད་ཀྱི་ཆོས་ཀྱི་དབྱིངས་ལ་མཐའ་ཡས་པའི་ཕྱིར་རོ། །རྡོ་རྗེ་ལས་ལ་ནི་བློ་གྲོས་ཀ་མ་ལ་ཞེས་བྱའོ། །ཅིའི་ཕྱིར་ཞེ་ན། བྲན་གྱི་ཚུལ་དུ་དེ་འཕགས་པ་ཐམས་ཅད་ལ་མཆོད་པའི་རྣམ་པ་ཐམས་ཅད་སྟོབས་པ་དང༌། སེམས་ཅན་ཐམས་ཅད་ལ་སྦྱིན་པའི་ལས་བྱེད་པ་ལ་གཙོར་གྱུར་པས་ནའོ། །ནམ་མཁའ་མཛོད་ལ་ནི་བློ་གྲོས་ཆེན་པོ་ཞེས་བྱའོ། །ཅིའི་ཕྱིར་ཞེ་ན། མཉམ་པ་ཉིད་ཀྱི་ཡེ་ཤེས་ཀྱི་མཛོད་འདི་ལ་མངའ་བས་སྦྱིན་པའི་ཕ་རོལ་ཏུ་ཕྱིན་པ་ལས་བྱུང་བའི་ནམ་མཁའ་མཛོད་ཀྱི་ཏིང་ངེ་འཛིན་གྱིས་འགྲོ་བ་ཡོངས་སུ་ཚིམ་པས་ནའོ། །རྡོ་རྗེ་ལེགས་བ་ནི་བློ་གྲོས་ལྷ་རྫས་ཞེས་བྱའོ། །ཅིའི་ཕྱིར་ཞེ་ན། རྡོ་རྗེ་ཐམས་ཅད་བདག་ལ་འཇུག་པའི་ལས་བྱེད་པས་ལྷ་རྫས་ཀྱི་དགྱེས་པ་སྦྲེལ་བར་བྱེད་དོ་ཞེས་པའོ། །བློ་གྲོས་སྣ་ཚོགས་ནི་བདུད་ཀྱི་སྟོབས་ཐམས་ཅད་རབ་ཏུ་འཇོམས་པའོ། །ཅིའི་ཕྱིར་ཞེ་ན། ཕུང་པོ་དང་ཉོན་མོངས་པ་དང༌། འཆི་བདག་དང༌། ལྷའི་བུའི་བདུད་ཐམས་ཅད་དེ། དེའི་སྟོབས་ནི་ནུས་པའོ། །དེ་རབ་ཏུ་འཇོམས་ཤིང་ཟློག་པར་མཛད་པའི་ངང་ཚུལ་གང་ལ་མངའ་བ་དེའོ། །ཕྱིར་མི་ལྡོག་པ་ནི་ས་བཅུ་ལ་གནས་པའོ། །བྱང་ཆུབ་སེམས་དཔའ་འདི་རྣམས་ནི་བ་སྒྲུབ་པའི་ཡན་ལག་ཏུ་གྱུར་པ་ཡིན་ཏེ། ལུང་ལས་དམ་པའི་ཆོས་ཀྱི་གྲོང་ཁྱེར་སྐྱོང་བར་བྱེད་པའི་བྱང་ཆུབ་སེམས་དཔའ་རྣམས་ཞེས་གསུངས་པ་ཡིན་ནོ། །དེ་ལྟ་བུའི་འཇིག་རྟེན་དང་འཇིག་རྟེན་ལས་འདས་པའི་དབུས་ན་བཅོམ་ལྡན་འདས་ཚངས་པ་ཆེན་པོ་པདྨའི་གདན་ལ་ཚངས་པའི་བཞུགས་ཐབས་ཀྱིས་བཞུགས་ཞེས་བྱའོ། །འདི་ལྟ་སྟེ་པདྨ་ཆུ་ལས་སྐྱེས་ཀྱང་རང་བཞིན་གྱིས་དག་ཅིང་ཆུ་དང་འདམ་གྱི་ཉེས་པས་མ་གོས་པ་བཞིན་དུ་སེམས་ཅན་གྱི་དོན་བསྒྲུབ་པའི་ཕྱིར་འཁོར་བ་ན་གནས་ཀྱང་དེའི་ཉེས་པས་མི་གོས་པའོ། །ཚངས་པ་ཞེས་པས་པདྨ་བཀྲ་ཤིས་
པའི་གནས་པས་ན། ས་ཕྱོགས་གང་དུ་སྐྱེས་པའི་ས་ཕྱོགས་དེ་གཙང་མར་གྱུར་པ་ཇི་ལྟ་བ་བཞིན་དུ་བཅོམ་ལྡན་འདས་ཚངས་པ་ཆེན་པོ་གང་དུ་བཞུགས་པའི་གནས་དེ་ཡང་གཙང་ཞིང་བཀྲ་ཤིས་པའོ། །དེ་ཡང་ལུང་ལས། ཡོན་ཏན་ཡང་དག་རྒྱན་གྱི་དམ་པ་དག །གང་ན་གནས་པར་གྱུར་པ་དེ་དག་ཏུ། །བཀྲ་ཤིས་བཀྲ་དང་ལྡན་པ་གྱུར་པ་སྟེ། །འབབ་སྟེགས་དེ་ཡིན་དཀའ་ཐུབ་ཚལ་ཡིན་ནོ། །ཞེས་གསུངས་སོ། །དེའི་ཕྱིར་ན་པདྨ་དེ་ཡང་ཚངས་པ་ཞེས་གདགས་སོ། །ཚངས་པའི་གདན་དེ་ལ་བཅོམ་ལྡན་འདས་ཚངས་པ་ཆེན་པོ་དེ་བཞུགས་སོ། །ཅིའི་ཕྱིར་ན་བཅོམ་ལྡན་འདས་ལ་ཚངས་པ་ཆེན་པོ་ཞེས་བྱ་ཞེ་ན། མ་རིག་པ་ལ་སོགས་པའི་ཉོན་མོངས་པའི་དྲི་མ་ཐམས་ཅད་དག་པར་མཛད་པས་ན། ཚངས་པ་ཞེས་བྱའོ། །དེའི་ཕྱིར་ཡང་ལུང་ལས་གསུངས་པ། མ་རིག་འཇོམས་པའི་ཚངས་པ་སྟེ། །འདོད་ཆགས་ཞེ་སྡང་དྲི་མཐར་མཛད།། ཅེས་བྱའོ། །བཞུགས་ཞེས་བྱ་བ་ནི་རྣམ་པ་གསུམ་སྟེ། སྤྱོད་ལམ་གྱིས་བཞུགས་པ་དང༌། ཆོས་འཆད་ཅིང་བཞུགས་པ་དང༌། ནང་དུ་ཡང་དག་འཇོག་གིས་བཞུགས་པའོ། །སྤྱོད་ལམ་གྱིས་བཞུགས་པ་ནི་འཆག་པ་དང༌། འགྲེང་བ་དང༌། འདུག་པ་ལ་སོགས་པ་ཡིས་སོ། །ཆོས་འཆད་ཅིང་བཞུགས་པ་ནི་མཉམ་པའི་སྐྱིལ་མོ་ཀྲུང་གིས་བཞུགས་ནས་ཕྱག་གཡོན་པ་བྲམ་ཟེ་སྨྲང་འདོན་པ་ལྟ་བུ་ལ། ཕྱག་གཡས་པ་སྐྱབས་སྦྱིན་མཛད་པས་བཞུགས་པའོ། །ནང་དུ་ཡང་དག་འཇོག་གིས་བཞུགས་པ་ལ་ཡང་རྣམ་པ་གསུམ་གྱིས་བཞུགས་ཏེ། ཚད་མེད་ཚངས་པའི་བཞུགས་ཐབས་དང༌། བསམ་གཏན་ལྷའི་བཞུགས་ཐབས་དང༌། རྣམ་ཐར་འཕགས་པའི་བཞུགས་ཐབས་ལས། འདིར་ནི་ཚད་མེད་ཚངས་པའི་བཞུགས་ཐབས་སོ། །བཞུགས་པ་ཞེས་བྱ་བ་ནི་རབ་ཏུ་རྣམ་པར་གནས་སོ་ཞེས་བྱའོ། །དེ་ཡང་གང་གི་ཚེ་ན་ལྷའི་བུ་ནོར་བུ་དྲི་མ་མེད་པ་དེ་ཤི་བའི་དུས་བྱས་པ་དེའི་ཚེའོ། །གང་ཞིག་བཞུགས་ན་སྟོན་པ་ཕུན་སུམ་ཚོགས་པ་དེའོ། །གང་ན་བཞུགས་ན་དགའ་བའི་ཚལ་ནའོ། །གང་དང་བཞུགས་ན་འཁོར་འཇིག་རྟེན་དང་འཇིག་རྟེན་ལས་འདས་པ་དང་བཞུགས་ཞེས་བྱའོ། །དེ་ཡན་ཆད་ཀྱིས་ནི་གླེང་གཞི་བསྟན་པའོ། །དེ་ཡན་ཆད་ཀྱིས་ཐུན་
མོང་གི་གླེང་གཞི་བསྟན་ནས། ད་ནི་རྒྱུད་ཀྱི་དོན་འབྱུང་བ་ཁྱད་པར་གྱི་གླེང་གཞི་བཤད་པར་བྱ་སྟེ། དེ་ཡང་ལྷའི་བུ་ནོར་བུ་དྲི་མ་མེད་པའི་འོད་མཚམས་མེད་པའི་དམྱལ་བར་ལྟུང་བ་དེ་ལས་ཡོངས་སུ་བསྐྱབ་པའི་ཕྱིར་བཅོམ་ལྡན་འདས་ཀྱིས་ཡེ་ཤེས་དྲི་མ་མེད་པའི་འོད་ཟེར་གྱིས་གླེང་བསླང་བའོ། །དེ་ཡང་གང་ལ་སྙོམས་པར་ཞུགས་ཤེ་ན། ངན་སོང་གི་རྒྱུད་ཐམས་ཅད་ཡོངས་སུ་སྦྱོང་བ་ཞེས་བྱ་བའི་ཏིང་ངེ་འཛིན་ཏེ། ནང་སེམས་ཀྱི་དཀྱིལ་འཁོར་ནི་འོག་ནས་སྟོན་ཏོ། །ཏིང་ངེ་འཛིན་དེའི་མིང་གང་ཞེ་ན། ངན་སོང་གི་རྒྱུད་ལས་རྣམ་པར་གྲོལ་བ་ཞེས་བྱའོ། །གནས་གང་ནས་བྱུང་ཞེ་ན། ནང་སེམས་ཀྱི་དཀྱིལ་འཁོར་གྱི་ཐུགས་ཀ་ལ་ཉིད་ཀྱི་དཔྲལ་བའི་མཛོད་སྤུ་ནས་ཞེས་བྱའོ། །ལས་གང་དུ་བྱེད་ཅེ་ན། འོད་ཟེར་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་སྣང་བར་བྱས་སོ་ཞེས་སོ། །ཇི་ལྟར་དོན་བྱས་ན། ནང་སེམས་ཀྱི་དཀྱིལ་འཁོར་དུ་བཅུག་ནས་དྲི་མ་མེད་པ་ལ་སོགས་པ་བདེ་བ་སོ་སོར་ཐོབ་པར་བྱས་ཏེ། དྲིན་ལ་ལན་གྱིས་བླན་ཏེ་བསྟོད་པས་བསྟོད་དེ། དེ་ཡང་ཇི་ལྟར་བསྟོད་སྙམ་པ་ལ། ཨེ་མ་སངས་རྒྱས་ཨེ་སངས་རྒྱས། །ཞེས་བྱ་བ་ལ་སོགས་པ་སྟེ། ཨེ་མ་ནི་ངོམ་ཞིང་ངོ་མཚར་བ་སྟེ། གང་ལ་ངོམ་ཞིང་ངོ་མཚར་ན། ནང་སེམས་ཀྱི་དཀྱིལ་འཁོར་གྱི་འོད་ཟེར་དང༌། སྔགས་ཀྱི་ཕྲེང་བའི་འོད་ཟེར་གྱིས་སེམས་ཅན་གྱི་ལས་དང་ཉོན་མོངས་པའི་བག་ཆགས་དག་བར་བྱས། ནང་སེམས་ཀྱི་དཀྱིལ་འཁོར་དུ་བཅུག་ཅིང་དབང་བསྐུར་བས་དྲི་མ་མེད་པར་གྲགས་པ་ལ་སོགས་པ་དགའ་ལྡན་གྱི་ལྷའི་ལུས་ཐོབ་པར་བྱས་པས་ངོམ་ཞིང་ངོ་མཚར་བའོ། །སངས་རྒྱས་ནི་བོད་པའི་ཚིག་གོ །ཀྱེ་སངས་རྒྱས་འགྲོ་བའི་དོན་སྣ་ཚོགས་པར་མཛད་པ་ནི་རེ་བཟང་ཞེས་བྱ་བའོ། །ཀྱེ་མ་སངས་རྒྱས་ནི་འགྲོ་བའི་དོན་ཇི་ལྟར་མཛད་ཀྱང་ཐུགས་ཆོས་ཉིད་ལས་མ་གཡོས་པས་རེ་བཟང་ཞེས་བྱའོ། །མཛད་པ་ལེགས་པ་ནི་སྐུ་གསུང་ཐུགས་ཀྱི་ཕྲིན་ལས་སྐུ་གསེར་བཙོ་མ་ལྟ་བུ་སྟོན་པའི་ཆ་བྱད་དང༌། གསང་སྔགས་ཚིག་མང་པོ་དང༌། ཐུགས་ནང་སེམས་ཀྱི་དཀྱིལ་འཁོར་གྱིས་འགྲོ་བའི་དོན་མཛད་པའོ། །གང་ཕྱིར་ངན་སོང་བདག་ཅག་སྦྱངས། །ཞེས་
བྱ་བ་ནི་ཐབས་དང་ཤེས་རབ་ཟུང་དུ་འབྲེལ་བའི་ཐུགས་རྗེས་འཁོར་བའི་རྒྱུ་འབྲས་རྐྱེན་གསུམ་སྦྱངས་པའོ། །བྱང་ཆུབ་སྤྱོད་པ་ཉིད་ལ་བཞག །ཅེས་བྱ་བ་ནི་སེམས་ཅན་དེ་རྣམས་འཁོར་བ་ལས་བཏོན་ནས་བྱང་ཆུབ་ཏུ་སེམས་བསྐྱེད་དེ་དགའ་ལྡན་གྱི་གནས་སུ་སྐྱེ་བར་བྱ་བའི་ཕྱིར་ན་བསྟོད་པ་དེས་བསྟོད་པའོ། །ད་ནི་བཅོམ་ལྡན་འདས་ཀྱིས་དེ་ལྟར་མཛད་པ་ལ་ངོ་མཚར་བསྐྱེད་པ་དེ་ལ་ངོ་མཚར་མི་ཆེ་བའི་རྒྱུ་སྟོན་ཏེ། དེ་ཡང་ལྷའི་དབང་པོ་བརྒྱ་བྱིན་འདི་ནི་ངོ་མཚར་མི་ཆེ་སྟེ་ཞེས་བྱ་བ་ལ་སོགས་པ་སྨོས་ཏེ། དེ་ཡང་དང་པོ་སྦྱིན་པའི་ཕ་རོལ་ཏུ་ཕྱིན་པའི་སྒོ་ནས་བསྟན་པ་ནི་ཚད་མེད་པའི་བསོད་ནམས་ཀྱི་ཚོགས་ཞེས་བྱ་བ་ལ་སོགས་པ་སྟེ། དེ་ལ་ཚད་མེད་ཅེས་བྱ་བས་ནི་རྒྱ་ཆེ་བའི་ཕྱིར་དང༌། གཏིང་དཔག་དཀའ་བའི་ཕྱིར་ཏེ། དེ་ཡང་སེམས་ཅན་བསོད་ནམས་ཀྱི་ཕུང་པོ་བཅུ་འགྱུར་གྱིས་ནི་དེ་བཞིན་གཤེགས་པའི་བ་སྤུའི་བུ་ག་གཅིག་འགྲུབ་པོ་ཞེས་བྱ་བ་ནས། གཙུག་ཏོར་དུ་གཏོགས་པའི་བསོད་ནམས་ཀྱི་ཕུང་པོ་བྱེ་བ་འབུམ་གྱིས་ནི་ཆོས་ཀྱི་དུང་འགྲུབ་བོ་ཞེས་བྱ་བའི་བར་དུ་སྟེ། དེ་ནི་འབྲས་བུའི་སྒོ་ནས་སོ། །རྒྱུ་ནི་སྦྱིན་པའི་ཕ་རོལ་ཏུ་ཕྱིན་པ་དང་བྱང་ཆུབ་ཀྱི་ཕྱོགས་ལ་ནི་བསོད་ནམས་ཀྱི་ཚོགས་ཞེས་བྱའོ། །འཇིག་རྟེན་ལས་འདས་པའི་ཡོན་ཏན་རིན་པོ་ཆེ་ཐམས་ཅད་འབྱུང་བའི་ཕྱིར་ན་བཟོད་པའི་ཕ་རོལ་ཏུ་ཕྱིན་པ་རྣམ་པར་དག་པའོ། །ཐབས་ཚད་མེད་པ་ནི་ཇི་ལྟ་ཇི་ལྟར་འདུལ་བའི་ཐབས་དེ་ལ་རྒྱུ་འབྲས་གཉིས་ཀྱིས་སྟོན་ཏེ། རྒྱུ་ཆུང་དུ་ལས་འབྲས་བུ་མང་དུ་སྟོན་ལ། འབྲས་བུའི་ཐབས་ནི་སེམས་ཅན་ཐམས་ཅད་ཇི་ལྟར་མོས་པ་བཞིན་དུ་སྟོན་པས་ན་ཐབས་ཀྱི་ཕ་རོལ་ཏུ་ཕྱིན་པ་རྫོགས་པའོ། །གཉིས་སུ་མེད་པའི་ཤེས་རབ་ཀྱི་སྤྱི་དང་རང་གི་མཚན་ཉིད་འབྱེད་པའི་ཕྱིར་ན་ཤེས་རབ་ཚད་མེད་པའོ། །སྤྱོད་པ་ཚད་མེད་པ་ནི་སངས་རྒྱས་དང་བྱང་ཆུབ་སེམས་དཔའི་སྤྱོད་པ་ནི་ཚུལ་ཁྲིམས་གསུམ་སྟེ། དེ་ལ་གནས་པ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །བསམ་གཏན་གྱི་ཕ་རོལ་ཏུ་ཕྱིན་པ་ལས་བྱུང་བའི་ཕྱིར་བྱམས་པ་དང༌། སྙིང་རྗེ་དང་དགའ་བ་དང༌། བཏང་སྙོམས་བཞིས་འདུལ་བའི་སྐྱེ་བོ་ཚད་མེད་པ་རྣམས་སྣོད་དུ་གྱུར་པར་མཛད་པའོ། །ཐམས་ཅད་མཁྱེན་པའི་ཡེ་ཤེས་ཀྱིས་བརྒྱན་པའི་ཕྱིར། ཐེག་པ་གཞན་དང་མི་མཉམ་ཞིང་ཐེག་པ་ཆེན་པོ་དང་
མཉམ་པའི་ཡེ་ཤེས་དང་ལྡན་པའོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལས་བྱུང་བའི་རྫུ་འཕྲུལ་གྱི་རྐང་པ་བཞི་དང་ལྡན་པའི་ཕྱིར་ལྷ་ཆེན་པོ་དག་དང༌། རང་སངས་རྒྱས་དག་དང་མི་མཉམ་ཞིང༌། ས་བཅུའི་བྱང་ཆུབ་སེམས་དཔའ་དག་དང་མཉམ་པའི་རྫུ་འཕྲུལ་དང་ལྡན་པའོ།། ལྷ་ཆེན་པོ་དང༌། གནོད་སྦྱིན་དང༌། སྟོབས་པོ་ཆེ་དང༌། རང་སངས་རྒྱས་དག་དང་མི་མཉམ་ཞིང༌། ས་བཅུ་པའི་བྱང་ཆུབ་སེམས་དཔའ་དེ་དག་དང༌། སངས་རྒྱས་བཅོམ་ལྡན་འདས་དག་དང་མཉམ་པའི་ཞིང་ཉིད་ཀྱིས་ཐེག་པ་འོག་མ་དག་སྨོན་པར་བྱེད་པའི་སྨོན་ལམ་གྱི་ཕ་རོལ་ཏུ་ཕྱིན་པ་དང་ལྡན་པའི་ཕྱིར་རོ། །ལྷ་དང་སྟོབས་པོ་ཆེ་དང༌། རང་སངས་རྒྱས་དག་དང༌། གནོད་སྦྱིན་དག་གིས་སྟོབས་དང་མི་མཉམ་ཞིང་སངས་རྒྱས་དང༌། བྱང་ཆུབ་སེམས་དཔའ་དེ་དག་དང་མཉམ་པའི་སྟོབས་བཅུ་དང་ལྡན་པ་སྟེ། རྒྱུ་དང་རྐྱེན་དེའི་ཕྱིར་ན་ལྷའི་དབང་པོ་ངོ་མཚར་མི་ཆེའོ་ཞེས་བྱའོ། །འདི་ལ་ཐེ་ཚོམ་དང་སོམ་ཉི་ཡིད་གཉིས་མ་བྱེད་ཅིག་ཅེས་པ་ནི། ཐེ་ཚོམ་ནི་ཡིད་མ་ཆེས་པས་རྟོག་པ་ཞུགས་པའོ། །སོམ་ཉི་ནི་བྱ་བའམ་མི་བྱ་བའམ་སྙམ་པའི་སོམ་ཉིའོ། །ཡིད་གཉིས་ནི་རེས་བློ་གཏོད་རེས་བློ་མི་གཏོད་པའོ། །དེ་ནི་སྟོན་པས་གླེང་བསླང་བས་ངོ་མཚར་གྱི་རྒྱུ་བསྟན་པའོ། །ད་ནི་འཁོར་གྱིས་ཞུས་པ་སྟོན་ཏེ། དེ་ནས་ལྷའི་དབང་པོ་བརྒྱ་བྱིན་གྱིས་རང་གིས་སྟན་ལས་ལངས་ནས་ཞེས་བྱ་བ་ལ་སོགས་པ་ལ། འདོད་ཁམས་ཀྱི་ལྷ་ལ་དབང་བྱེད་པ་དང༌། སྦྱིན་པ་དང༌། སྤྲུལ་པ་དང༌། ཏིང་ངེ་འཛིན་དང༌། ཞིང་ཁམས་བརྒྱ་ལ་དབང་བྱེད་པས་ན་བརྒྱ་བྱིན་ནོ། །རང་གི་སྟན་ནི་རིན་པོ་ཆེའི་ཁྲིའོ། །ཆོས་རག་ལུས་པ་དང༌། རིམ་གྲོ་བསྐྱེད་པ་དང༌། གུས་པ་བསྐྱེད་པའི་ཕྱིར་རོ། །མཆོད་པ་ནི་རྫས་རྒྱ་ཆེ་བ་དང༌། ཡིད་ཀྱིས་སྤྲུལ་པའི་ལྷ་མོའི་ཚོགས་ཀྱིས་མཆོད་པ་ནི་རྒྱ་ཆེ་ཞིང་ཆེ་བའོ། །ཕྱག་ནི་ལུས་ངག་ཡིད་གསུམ་མོ། །བཅོམ་ལྡན་འདས་ལ་འདི་སྐད་ཅེས་གསོལ་ཏོ་ཞེས་བྱ་བ་ནི་བློ་ལ་གནས་པ་སྟེ། འོག་གི་ཚིག་གོ །ཕན་པ་ཞེས་བྱ་བ་ནི་སེམས་ཅན་ཐམས་ཅད་ལ་སེམས་བསྐྱེད་པའོ། །སྙིང་རྗེ་བ་ནི་ཕན་འདོགས་པའོ། །སྙིང་རྗེ་ཅན་ནི་སྡིག་པ་ཆེན་པོ་བྱས་པའོ། །སྙིང་བརྩེ་
བ་ཆེན་པོ་ཅན་ནི་ངན་སོང་དུ་ལྷུང་བའི་དོན་ཏོ། །སྤོབས་པ་བསྐྱེད་པ་ཞེས་བྱ་བ་ནི་བསོད་ནམས་ཀྱི་ཚོགས་དང༌། མོས་པའི་མཐུ་དང༌། རྒྱུ་དང་འབྲས་བུ་ཞུ་བའི་སྤོབས་པ་བསྐྱེད་དུ་གསོལ་ཞེས་པའོ། །བཅོམ་ལྡན་འདས་སུམ་ཅུ་རྩ་གསུམ་གྱི་གནས་འདི་ཉིད་ནས་ཞེས་བྱ་བ་ནས། བཤད་པར་བྱ་བ་ཡན་ཆད་ཀྱིས་གསོལ་བ་དང༌། ལུང་བསྟན་པ་དང༌། འཇིགས་ཤིང་སྐྲག་པ་བསྟན་ནས་གསོལ་བ་གདབ་པ་བསྟན་ཏེ་དཀྱུས་ནས་གསལ་བའོ། །དེ་ཡན་ཆད་གླེང་གཞི་དང༌། གླེང་བརྗོད་འབྱུང་བ་ཁྱད་པར་གྱི་དོན་བསྟན་ནས། ད་ནི་གཞུང་བསྟན་པར་བྱ་བ་ལས། དང་པོར་རྩ་བའི་དཀྱིལ་འཁོར་སྦྱོར་བ་དང་པོ་དང༌། དཀྱིལ་འཁོར་རྒྱལ་བོ་མཆོག་དང༌། ནང་སེམས་ཀྱི་དཀྱིལ་འཁོར་དང༌། སློབ་མའམ་འཁོར་སྣོད་དུ་རུང་བར་བྱ་བ་བསྟན་ཏེ། དེ་ལ་དང་པོར་སློབ་མ་སྣོད་དུ་རུང་བར་བྱ་བའི་ཕྱིར་དང༌། དམ་ཚིག་ཅན་དུ་བྱིན་གྱིས་བརླབས་པ་བསྟན་ཏོ། །དེ་ནས་ཞེས་བྱ་བ་ནི་སྐབས་སོ། །དེ་ཡང་གང་གིས་བྱིན་གྱིས་བརླབས་ན་བཅོམ་ལྡན་འདས་ཀྱིས་སོ། །གང་ལ་བྱིན་གྱིས་བརླབས་ན་བརྒྱ་བྱིན་དང་ཚངས་པ་ལ་སོགས་པའི་ལྷའི་བུ་དེ་དག་སྟེ། བྱིན་གྱིས་བརླབས་པའི་ཏིང་ངེ་འཛིན་གང་ལ་སྙོམས་པར་ཞུགས་ན་གདོན་མི་ཟ་བའི་རྡོ་རྗེ་བྱིན་གྱིས་བརླབས་པའི་ཏིང་ངེ་འཛིན་ཏོ། །ཉིད་ཀྱི་ཐུགས་ཀ་ནས་འོད་ཟེར་སྤུད་པའི་ཕྲེང་བ་སྤྲོས་པས། དེ་ན་གནས་པའི་སེམས་ཅན་རྣམས་རྒྱུ་ལས་དང་ཉོན་མོངས་པའི་བཅིངས་པ་ཐམས་ཅད་བཀྲོལ་ཞིང་བཅད། འབྲས་བུ་སྡུག་བསྔལ་གྱིས་བཅིངས་པ་ཐམས་ཅད་ནི་བཅོམ་ཞིང་སྦྱངས་ཏེ། སླར་འདུས་པ་ལས་བརྒྱ་བྱིན་དང་ཚངས་པ་ལ་སོགས་པ་འཇིག་རྟེན་པའི་འཁོར་རྣམས་ཀྱི་ཉོན་མོངས་པ་ཐམས་ཅད་སྦྱངས་ནས་བཀའི་སྣོད་དུ་རུང་བའམ། དམ་ཚིག་ཅན་དུ་བྱིན་གྱིས་བརླབས་སོ། །དེ་ནས་བརྒྱ་བྱིན་དང་ཚངས་པ་ལ་སོགས་པའི་སྙིང་གར་ཟླ་བའི་དཀྱིལ་འཁོར་གང་ཞིང་ཡོངས་སུ་རྫོགས་པའི་སྟེང་དུའོ། །སྔགས་གང་གིས་ཤེ་ན། ཨོཾ་བཛྲ་ཨ་དྷི་ཏིཥྛ་ཛྙཱ་ན་ས་མ་ཡེ་ཧཱུཾ་ཞེས་པའི་སྔགས་ཀྱི་ཕྲེང་བ་བཀོད་ནས་དམ་ཚིག་ཅན་དུ་བྱིན་གྱིས་བརླབས་སོ། །དེ་ནི་དཀྱིལ་འཁོར་བྱིན་གྱིས་བརླབས་པའོ། །ད་ནི་སྦྱོར་བ་དང་པོ་ཏིང་ངེ་འཛིན་སྟོན་ཏེ། གདོན་མི་ཟ་བར་མི་ཆོམས་པའི་རྡོ་རྗེས་བྱིན་
གྱིས་བརླབས་ནས་ཞེས་བྱ་བ་སྨོས་ཏེ། གདོན་མི་ཟ་བར་ཞེས་བྱ་བ་ནི་རང་གི་སེམས་སོ་སོར་རིག་བ་སྟེ། ཕྱིའི་ཡུལ་དུ་གྱུར་པའི་སྣོད་ཀྱི་འཇིག་རྟེན་རྡུལ་ཕྲ་རབ་འདུས་པ་ལས་གྲུབ་པ་ནི་ཕྱོགས་ཆ་དྲུག་གི་ཆས་གཞིགས་ན་རྡུལ་ཕྲ་རབ་ཙམ་དུ་ཡང་མ་གྲུབ་པ་སྟོང་པ་ཆེན་པོའི་དང་དུ་བསྒོམས་ལ། དེ་ལ་ནང་འཛིན་པའི་སེམས་ལ་བརྟགས་ན་ནི་སེམས་ཅིར་ཡང་མ་གྲུབ་སྟེ། རང་བཞིན་གྱིས་འོད་གསལ་བའི་ཡི་གེ་ཨའི་དངོས་པོར་གནས་པར་བསྒོམ་མོ། །དེ་ནས་ཨ་དེ་ལས་སངས་རྒྱས་ཐམས་ཅད་ཀྱི་ཡོན་ཏན་རྣམས་འདིར་གཟུགས་བརྙན་གྱི་རྣམ་བའི་ཚུལ་གྱིས། །ཨ་ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨཾ་ཨཿ་རབ་ཏུ་ཞུགས་ཏེ་ཤེལ་དང་ཟླ་བ་ལྟ་བུའོ། །དེ་ཡང༌། དག་པ་ཆེན་པོའི་སྙིང་པ་དག །ནམ་མཁའ་བཞིན་དུ་དྲི་མ་མེད། །གནས་ངན་ལེན་པ་ཀུན་ལས་གྲོལ། །རྣམ་རྟོག་སེལ་བའི་མཆོག་ཡིན་ནོ། །ཉོན་མོངས་དྲི་མ་ཀུན་དག་ཅིང༌། །ཟླ་བ་བཞིན་དུ་སྔ་མའི་སྟེང༌། །ཞེས་སོ། །དེ་ལ་ནི་གདོན་མི་ཟ་བར་ཞེས་བརྗོད་དོ། །དེ་ནས་རང་གི་གསང་སྔགས་ཟླ་བའི་དཀྱིལ་འཁོར་ལ་གནས་པ་བཀོད་ནས་སངས་རྒྱས་ཀྱི་ཡོན་ཏན་ཐམས་ཅད་སྐར་མའི་རྣམ་པ་ལྟ་བུས་གཟུགས་བརྙན་ལ་སོགས་པའི་ཚུལ་གྱིས་ཡི་གེ་ཀ་ལ་སོགས་པ་རབ་ཏུ་ཞུགས་ཏེ་ཟླ་བའི་དཀྱིལ་འཁོར་གཉིས་པར་གྱུར་ཏེ། ཉམ་ཐག་རྣམས་ལ་རྗེས་བརྩེ་བས། །སེམས་ཅན་ཡོངས་སུ་འཛིན་པས་ནི། །དགེ་བའི་ཆོས་རྣམས་རྫོགས་པ་སྟེ། །ཉོན་མོངས་ཐམས་ཅད་ངེས་འདུའོ། །ཟླ་བའི་དཀྱིལ་འཁོར་དབུས་སུ་ནི། །བྱང་ཆུབ་སེམས་ནི་གཉིས་པའོ། །ཞེས་གསུངས་སོ། །དེ་ལ་ནི་མི་ཆོམས་པ་ཞེས་བྱའོ། །དེ་ནས་དེ་ལྟ་བུའི་ཟླ་བའི་དཀྱིལ་འཁོར་གྱི་སྟེང་དུ་དབུས་སུ་ཧཱུཾ་ཐ་མ་ན་ཚུར་ཨོཾ་ཤོདྷ་ནེ་ཤོ་དྷ་ནེ། སརྦ་པཱ་པཾ་བི་ཤོ་དྷ་ནི། ཤུདྡྷེ་བི་ཤུདྡྷེ་སརྦ་ཀརྨ་ཨཱ་བ་ར་ཎ་བི་ཤུདྡྷེ་སྭཱ་ཧཱ། །ཞེས་པའི་སྔགས་ཀྱི་ཕྲེང་བ་དེ་རྣམས་ཀྱང་མར་མེའི་ཕྲེང་བ་བསྐོར་བ་ལྟར་གཡོ་བ་དང༌། ལྡེམ་པ་དང་འོད་དང་ཟེར་དུ་བཅས་པ་རྣམས་དང༌། རྣམ་པར་ཤེས་པ་མི་གནས་ན་ཡང་གནས་པར་གནས་བཞིན་དུ་བསྒོམ་མོ། །དེ་ལས་འོད་ཟེར་སྤྲོ་བ་དང༌། བསྡུ་བས་རྡོ་རྗེ་རྩེ་ལྔ་བར་བསྒོམ་སྟེ། དེ་ཡང་གསུངས་
པ། བྱང་ཆུབ་བསྐལ་པ་གྲངས་མེད་གསུམ། །བསྡུས་པ་དག་ནི་ཆོས་ཉིད་ད། དམ་ཆོས་མཆོག་གི་གྲངས་མེད་པའི། །སྤྱད་པ་སྤྱོད་པའི་མཆོག་ཡིན་ནོ། །ས་དང་ས་མིན་ལེགས་རྟོགས་ཤིང༌། །ཟག་མེད་ཡེ་ཤེས་དག་པའོ། །ཟླ་བའི་དཀྱིལ་འཁོར་དབུས་སུ་ནི། །རྡོ་རྗེ་ཆོས་ཅན་གྱིས་བརྟགས་པ། །ཞེས་བཅོམ་ལྡན་འདས་རྡོ་རྗེ་འཆང་ཆེན་པོས་གསུངས་སོ། །དེ་ལ་ནི་རྡོ་རྗེ་ཞེས་བྱའོ། །བྱིན་གྱིས་བརླབས་ནས་ཞེས་བྱ་བ་ནི། དེ་ལས་འོད་ཟེར་སྤྲོ་བ་དང་བསྡུ་བའི་སྦྱོར་བས་ཡེ་ཤེས་ལྔ་ལ་སོགས་པ་སྤྲོས་པ་ཐམས་ཅད་དང་བྲལ་བའི་ཡེ་ཤེས་ཐམས་ཅད་དང༌། ལྷ་ཐམས་ཅད་ཀྱི་སྐུ་རྡོ་རྗེ་དབྱིངས་དང༌། གསུང་དང་ཐུགས་ཐམས་ཅད་ཀྱི་རྡོ་རྗེ་དབྱིངས་ཐམས་ཅད་སྙིང་གར་བསྡུས་ཏེ་གཅིག་ཏུ་བརྟན་པར་བྱའོ། །དེ་ཡང་གསུངས་པ། །སངས་རྒྱས་ཀུན་གྱི་སྐུ་ཡང་ཡིན། །སྐྱོན་མེད་སྣང་བ་མེད་པ་སྟེ། །བཅོས་མིན་མ་སྐྱེས་དག་པ་དང༌། །དངོས་མེད་ལ་སོགས་རྣམ་སྤངས་པ། །རྫས་མེད་ཆོས་ཀྱི་སྐུ་ཉིད་ནི། །འདི་ནི་མི་ཆོད་མི་ཤིག་པའོ། །རྡོ་རྗེ་བདག་ཉིད་ལེགས་འབྱུང་པའི། །རྡོ་རྗེ་སྐུ་ནི་བླ་མེད་པའོ། །ཞེས་གསུངས་སོ། །ངན་སོང་ཐམས་ཅད་ཡོངས་སུ་སྦྱོང་བའི་རྒྱལ་པོ་ཞེས་བྱ་བ་ཀུན་རིག་རྣམ་པར་སྣང་མཛད་ཀྱི་སྐུར་ཕྱག་རྒྱ་ཆེན་པོར་གྱུར་ཏེ། ལུས་དང་དེ་བཞིན་སྦྱོང་བ་དང༌། །སྦྱོང་དང་དེ་བཞིན་རྟོགས་པ་དང༌། །མངོན་པར་བྱང་ཆུབ་རྣམ་པ་ལྔ། །སངས་རྒྱས་ཀུན་བདག་བཟང་པོའོ། །ཞེས་སོ། །སྐུ་མདོག་ནི་དུང་ལྟར་དཀར་བ། མེ་ཏོག་ཀུན་ད་ལྟར་སྣུམ་ལ་འདྲིལ་བ། ཟླ་བ་ལྟར་འོད་དང་ལྡན་པ་ཞལ་བཞི་པ་ལ་དབུ་མཐོན་མཐིང་ལྕང་ལོར་འཁྱིལ་བ། །རྡོ་རྗེ་མཚན་པའི་སེང་གེའི་གདན་པདྨ་ཁ་དོག་སྣ་ཚོགས་པའི་དབུས་སུ་ཟླ་བའི་དཀྱིལ་འཁོར་གྱི་སྟེང་ན་རྡོ་རྗེ་སྐྱིལ་ཀྲུང་དུ་བཞུགས་པ། རྒྱན་ཐམས་ཅད་ཀྱིས་བརྒྱན་པ། ཏིང་ངེ་འཛིན་གྱི་ཕྱག་རྒྱ་དང་ལྡན་པར་བསྒོམས་ཏེ་དེ་ལྟར་འདི་ཉིད་ལས། །དབུས་ཀྱི་ཕྱོགས་སུ་ཀུན་རིག་ནི། དུང་དང་ཀུན་ད་ཟླ་འདྲ་ལ། །ཞལ་བཞི་བ་ལ་རྡོ་རྗེ་ཡིས། །སེང་གེའི་གདན་ལ་བཞུགས་པ་དང༌། །ཏིང་འཛིན་ཕྱག་རྒྱ་ལྡན་པ་དང༌། །རྒྱན་རྣམས་ཀུན་གྱིས་བརྒྱན་པར་བྲི། །ཞེས་པའོ། །དེ་ནས་ནམ་མཁའ་ལས་བྱུང་པའི་རིན་པོ་ཆེའི་དབང་
བསྐུར་བ་དང༌། སྤྱན་རས་གཟིགས་ཀྱི་ཆོས་ཀྱི་ཡེ་ཤེས་བསྐྱེད་པ་དང༌། ཆོ་འཕྲུལ་བཞིས་ཀྱང་བྱིན་གྱིས་བརླབས་ཏེ། སྙིང་གར་རྡོ་རྗེ་བསྒོམས་པ་དང༌། དབྲལ་བར་རིན་པོ་ཆེ་བསྒོམ་པ་དང༌། ཁར་པདྨ་བསྒོམ་པ་དང༌། སྤྱི་བོར་རྒྱ་གྲམ་བསྒོམ་པ་ནི་བྱིན་གྱིས་བརླབས་པ་དང། དབང་བསྐུར་བ་དང༌། ཏིང་ངེ་འཛིན་དང༌། མཆོད་པའི་ཆོ་འཕྲུལ་ལོ་ཞེས་སློབ་དཔོན་ལ་ལ་དག་བཞེད་དོ། །བདག་གིས་ནི་རིགས་པར་མ་མཐོང་སྟེ། སེམས་མ་བཞིས་གནས་བཞིར་བྱིན་གྱིས་བརླབ་པར་འདོད་དོ། །ཇི་ལྟར་སྔོན་གྱི་སངས་རྒྱས་དང༌། །སྔགས་ཀྱི་ཚུལ་གྱིས་སངས་རྒྱས་པ། །དེ་ལྟར་བདག་ཀྱང་སངས་རྒྱས་སོ། །ཞེས་པའོ། །རིག་པ་ཆེན་མོ་ཞེས་བྱ་བ་ལ་སོགས་པས་ནི་སྔགས་ཀྱི་མཐུས་བཅོམ་པ་སྟེ། ད་ལྟར་ཤོ་དྷ་ནེའི་སྔགས་ཀྱི་ཕྲེང་བ་ཡེ་ཤེས་ཀྱི་འོད་ཟེར་དང་བཅས་པའི་འཕྲོ་འདུ་ལས་སེམས་ཅན་ཐམས་ཅད་ཀྱི་ངན་སོང་གི་རྒྱུད་ཀྱི་འཆིང་བ་འདོད་ཆགས་ཞེ་སྡང་གཏི་མུག་ཐམས་ཅད་རྣམ་པར་ཆད་ནས་སྐྱེ་བོ་ལྷ་དང་མི་ཕུན་སུམ་ཚོགས་པར་འགྱུར་རོ། །དམྱལ་བ་ཡི་དགས་བྱོལ་སོང་གི་ངན་སོང་ཐམས་ཅད་རྣམ་པར་སྦྱངས་ནས་ཚ་གྲང་ལ་སོགས་པའི་སྡུག་བསྔལ་མི་བཟད་བ་རྣམས་རབ་ཏུ་ཞི་སྟེ། སྐྱེ་བོ་རྣམས་བདེ་བ་དང་ལྡན་པར་གྱུར་ཏོ་ཞེས་བྱའོ། །དེ་ལྟར་བསྐྱེད་པ་དེའི་ཐུགས་ཀར་ཟླ་བའི་དཀྱིལ་འཁོར་བསྒོམས་པའི་དབུས་སུ་ཧཱུཾ་གི་མཐའ་མ་ན་ཚུར་ཤོ་དྷ་ནེའི་སྔགས་ཀྱི་ཕྲེང་བ་སྔ་མ་བཞིན་དུ་བཀོད་པ་དང༌། གཞན་ཡང་འོག་ནས་འབྱུང་བའི་སྔགས་རྣམས་ལས་སྐད་ཅིག་མས་སམ། སྤྲོ་བ་དང་བསྡུ་བའི་སྦྱོར་བས་དཀྱིལ་འཁོར་གྱི་ལྷ་རྣམས་བསྐྱེད་ལ། ལྷ་དེ་དག་གི་ཐུགས་ཀར་ཡང་ཤོ་དྷ་ནེའི་སྔགས་ལ་སོགས་པ་བཀོད་ལ། དེ་དག་ཀྱང་གཡོ་བའི་འོད་ཟེར་དང་ལྡན་པའོ། །དེ་ནས་སྔགས་དེ་དག་ལས་འོད་ཟེར་འཕྲོས་པས་དཀྱིལ་འཁོར་གྱི་ལྷ་གསལ། དེ་ནས་བདག་ཉིད་ཀྱི་ཁོང་པའི་ནང་གསལ་བར་འགྱུར། དེ་ནས་ཐུགས་དཔལ་བེའུ་དང༌། སྤྱན་དང་མཛོད་སྤུ་དང༌། བ་སྤུའི་བུ་གནས་ཡེ་ཤེས་ཀྱི་འོད་ཟེར་འཕྲོས་པས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྟེང་འོག་མིན་གྱི་གནས་མན་ཆད་ནས། འོག་དམྱལ་བ་ཚ་གྲངས་ཡན་ཆད་དུ་ཁྱབ་པས་འོད་
ཟེར་དེ་ལས་སྔགས་ངན་སོང་གསུམ་གཞོམ་པའི་སྔགས་རྒྱུད་ཕྱི་མ་ནས་འབྱུང་བས་སེམས་ཅན་རྣམས་ཀྱི་ཉོན་མོངས་པའི་བཅིང་བ་ལྔས་བཅིངས་བ་བཀྲོལ་ཞིང་བཅད་ནས་སྐུ་གསུང་ཐུགས་ཀྱི་སྔགས་ཀྱིས་ལུས་ངག་ཡིད་གསུམ་སྦྱངས། སླར་འདུས་པས་སེམས་ཅན་ཐམས་ཅད་བདག་ཉིད་ཀྱི་ཉེ་འཁོར་དུ་བཀུག་གོ །བཀུག་ནས་གོང་གི་བྱིན་གྱིས་བརླབས་པའི་སྔགས་ཀྱིས་གནས་ཉི་ཤུ་རུ་སྣོད་དུ་རུང་བར་བྱིན་གྱིས་བརླབས་སོ། །དེ་ནས་ཁམས་གསུམ་གྱི་སེམས་ཅན་དེ་དག་ནང་སེམས་ཀྱི་དཀྱིལ་འཁོར་དུ་བཅུག་སྟེ་གནས་སོ། །དེ་ནས་ཡང་ཡེ་ཤེས་ཀྱི་འོད་ཟེར་གོང་མ་ལྟར་འཕྲོས་པས་ཡེ་ཤེས་ཀྱི་འོད་ཟེར་དང་སྐུ་གསུང་ཐུགས་སྤྱན་དྲངས་ཏེ་བསྟིམས་པས་དབང་བསྐུར་བའི་ནུས་པ་དང་ལྡན་པར་བྱས་སོ། །བདག་ཉིད་ཀྱང་དེའི་བྱིན་གྱིས་བརླབས་སོ། །དེ་ནས་རིག་པའི་དབང་དང༌། རྡོ་རྗེ་བརྟུལ་ཞུགས་དང༌། དམ་ཚིག་གསུམ་དང༌། རྗེས་སུ་གནང་བ་དང༌། དབུགས་དབྱུང་བ་དང༌། ལུང་བསྟན་པ་དང༌། རིན་པོ་ཆེ་སྣ་བདུན་ལ་སོགས་པ་བསྐུར་བས་སེམས་ཅན་ཐམས་ཅད་ཀྱི་བཅིངས་པ་ཐམས་ཅད་རྣམ་པར་བཅད་དོ་ཞེས་པ་ལ་སོགས་པའོ། །དེ་ནས་ཕྱིར་བྱུང་སྟེ་ནོར་བུ་དྲི་མ་མེད་པའི་སྟེང་དུ་འཁོད་དེ། ཀྱེ་མ་སངས་རྒྱས་ཀྱེ་སངས་རྒྱས། །ཞེས་བྱ་བའི་བསྟོད་པས་ཀྱང་བསྟོད་དོ། །དེ་ནས་ནང་སེམས་ཀྱི་དཀྱིལ་འཁོར་ལ་བདག་གིས་ཀྱང་མཆོད་ཅིང་བསྟོད་དེ། ཞིབ་ཏུ་མཆོག་སྡེབས་ལས་ཤེས་པར་བྱའོ། །དེས་ནི་སྦྱོར་བ་དང་པོ་དང་ནང་སེམས་ཀྱི་ཏིང་ངེ་འཛིན་བསྟན་ཏོ། །ད་ནི་དཀྱིལ་འཁོར་རྒྱལ་མཆོག་གི་ཏིང་ངེ་འཛིན་སྟོན་ཏེ། དེ་ལྟར་བདག་བསྐྱེད་ནས་དཀྱིལ་འཁོར་རྒྱལ་མཆོག་བསྟན་ཏོ། །དེ་ཡང་དང་པོ་སྟོང་པའི་དོན་ཤེས་པར་བྱ་བ་དང༌། འབྱུང་བ་རིམ་གྱིས་བསྐྱེད་ནས་བྷྲཱུཾ་ལས་གཞལ་ཡས་ཁང་སློབ་དཔོན་གྱིས་ལས་ཀྱི་རིམ་བ་ལས་འབྱུང་བ་བཞིན་དུ་བསམས་ལ། དེའི་ནང་དུ་སེང་གེའི་གདན་ལ་སོགས་པ་བསམས་ཏེ་གདན་གྱི་སྟེང་དུ་སེམས་དཔའི་སྐྱིལ་ཀྲུང་ལ་སོགས་མངོན་པར་བྱང་ཆུབ་པ་བསྟན་པས་གནས་པའམ། ཐབས་དང་ཤེས་རབ་ཞུ་བའི་ཚུལ་གྱིས་བསྐྱེད་པ་བྱིན་གྱིས་བརླབས་པ་དང༌། དབང་བསྐུར་བ་ཡང་བྱས་ནས། བཅོམ་ལྡན་འདས་ཀུན་རིག་རྣམ་པར་སྣང་མཛད་ཀྱི་ཐུགས་གནས་ལྷ་རྣམས་གདོན་པར་
བྱའོ། །དེ་ཡང་ཐུགས་ཀ་ནས་ཟླ་བའི་དབུས་སུ། ཨོཾ་ཤོ་དྷ་ནེ་ཤོ་དྷ་ཡ་སརྦ་ཨ་བཱ་ཡ་སརྦ་སྟྭེ་བྷྱཿ། ཧཱུཾ་ཞེས་པའི་སྔགས་དེ་རྣམས་དབུས་ནས་ཤར་ཕྱོགས་སུ་རིམ་པས་སྔགས་ཀྱི་ཕྲེང་བའི་ཚུལ་དུ་བསྐོར་ཏེ། ཕྱོགས་བཞིར་བཀོད་པ་བསྒོམ་མོ། །དེ་ལས་འོད་ཟེར་འཕྲོས་པས། སེམས་ཅན་གྱི་རྒྱུ་ལས་དང་ཉོན་མོངས་པའི་འཆིང་བ་དང༌། འབྲས་བུ་སྡུག་བསྔལ་བཀྲོལ་ཞིང་བཅད་ནས་སླར་འདུས་བ་ལས་སྔགས་ཀྱི་ཕྲེང་བའི་ཡིག་འབྲུ་རྣམས་ལ་ཐིམ་པ་ལས་འོད་དུ་ཞུ་བ་ལས་རིན་པོ་ཆེ་སྔོན་པོ་ཟུར་གསུམ་པ་ཅིག་ཏུ་གྱུར་ཏོ། །དེ་ལས་སྤྲོ་བ་དང་བསྡུ་བ་ལས་རིགས་ལྔའི་སྐུ་གསུང་ཐུགས་ཐམས་ཅད་འདུས་ནས་རིན་པོ་ཆེ་ལ་ཐིམ་བས་བརྟན་པར་བྱས་སོ། །དེ་ལས་སྐུ་ཕྲ་མོ་མང་བོ་སྤྲོ་བ་དང་བསྡུ་བས་མཛད་པ་བཅུ་གཉིས་ཀྱི་ཚུལ་གྱིས་འགྲོ་བའི་དོན་བྱས་ནས་སླར་འདུས་བ་རིན་པོ་ཆེ་ལ་ཐིམ་བས་བཅོམ་ལྡན་འདས་རིན་ཆེན་ཏོག་མཉམ་པ་ཉིད་ཀྱི་ཡེ་ཤེས་ཀྱི་ངོ་བོའི་སྐུར་གྱུར་ཏེ། བཅོམ་ལྡན་འདས་ཀྱི་ཐུགས་ཀ་ནས་བཏོན་ནས་བཀའ་ནོད་པའི་ཚུལ་དུ་གནས་བ་ལས་ནམ་མཁའ་ལས་བྱུང་བའི་རིན་པོ་ཆེའི་དབུ་རྒྱན་གྱིས་དབང་བསྐུར་རོ། །དེ་ནས་རྡོ་རྗེ་སེམས་དཔའ་ལ་སོགས་པས་ཀྱང་བྱིན་གྱིས་གནས་བཞིར་བརླབ་པོ། །དམ་ཚིག་གི་ཕྱག་རྒྱ་ལག་ཏུ་བྱིན་ནས་མིང་རིན་ཆེན་ཏོག་ཅེས་ལན་གསུམ་བོས་ཏེ་དབང་བསྐུར་ནས། རང་གི་ལས་ལ་གཞག་སྟེ། ལྷོ་ཕྱོགས་སུ་རེའུ་མིག་ལ་སྣ་ཚོགས་པདྨ་དང་ཟླ་བའི་དཀྱིལ་འཁོར་ལ་བཞུགས་སུ་གསོལ་ལོ། །དེ་བཞིན་དུ་ཐམས་ཅད་འོག་ནས་འབྱུང་བ་ལ་ཡང་ཤེས་པར་བྱའོ། །དེ་ཡང་ཀུན་ཏུ་བཟང་པོ་བྱང་ཆུབ་སེམས་ལ་གནས་པ་དང༌། དེ་དག་གི་འཕྲོ་འདུ་ལས་དམ་ཚིག་གི་ཕྱག་རྒྱར་གྱུར་པ་དང༌། དེ་ལ་སྐུ་གསུང་ཐུགས་ཀྱི་དབྱིངས་སུ་བསྡུ་བ་དང༌། དེ་ནས་སོ་སོའི་སྐུར་གྱུར་ཏེ་དཀྱིལ་འཁོར་དུ་དགོད་པ་དང༌། དེ་ལ་དབང་བསྐུར་བ་དང༌། བྱིན་གྱིས་བརླབས་པ་དང༌། མིང་གདགས་ཤིང་ལས་བཅོལ་བ་ནི་གོང་ལྟར་རོ། །ཨོཾ་སརྦ་ཨ་པཱ་ཡ་བི་ཤོ་དྷ་ནི་ཧཱུཾ་ཕཊ་ཅེས་པས་སྤྲོ་བ་དང་བསྡུ་བ་ལས་རྡོ་རྗེ་པདྨར་གྱུར་ཏོ། །དེའི་སྐུ་འཕྲོ་འདུ་ལས་ནི་ཤཱཀྱ་ཐུབ་པའི་སྐུར་གྱུར་ཏོ། །དེ་ལ་ཡང་བྱིན་གྱིས་བརླབས་པ་དང་དབང་བསྐུར་བ་དང་མིང་བཏགས་ནས་
ནུབ་ཀྱི་རྡོ་རྗེ་པདྨས་མཚན་པའི་སྟེང་དུ་དགོད་དོ། །ཡང་ཨོཾ་བཛྲ་ཏྲཊ་ཅེས་བའི་སྔགས་ཀྱི་ཡི་གེ་ལས་འཕྲོ་བ་དང་འདུ་བ་ལས་རྡོ་རྗེ་རྒྱ་གྲམ་དུ་གྱུར། དེའི་འཕྲོ་འདུ་ལས་བརྟན་པར་གྱུར་ཏོ། །དེའི་འཕྲོ་འདུ་ལས་མེ་ཏོག་ཆེར་རྒྱས་ཀྱི་སྐུར་གྱུར་ཏེ། བཀའ་ནོད་པ་དང༌། དབང་བསྐུར་བ་དང༌། བྱིན་གྱིས་བརླབས་པ་དང༌། ཕྱག་རྒྱ་སྦྱིན་པ་ལ་སོགས་པ་བྱས་ནས་བྱང་ཕྱོགས་ཀྱི་རྡོ་རྗེ་རྒྱ་གྲམ་གྱིས་མཚན་པའི་པདྨ་དང་ཟླ་བའི་སྟེང་ན་བཞུགས་སོ། །དེ་ནས་ཡང་ཐུགས་ཀའི་ཧཱུཾ་ལས་སྤྲོས་ཤིང་འདུས་པ་ལ་རྡོ་རྗེ་དེའི་སྤྲོ་བསྡུ་བརྟན་པར་གྱུར། དེའི་འཕྲོ་འདུས་ངན་སོང་སྦྱོང་བའི་སྐུར་བསྐྱེད། དེ་སྤྲོ་བ་དང་བསྡུ་བས་འགྲོ་བའི་དོན་བྱས། བཀའ་ནོད་པ་དང༌། དབང་བསྐུར་བ་དང༌། བྱིན་གྱིས་བརླབས་ཏེ། དམ་ཚིག་བྱིན་ནས་མིང་བཏགས་ཏེ་རྡོ་རྗེས་མཚན་བའི་པདྨ་དང་ཟླ་བའི་དཀྱིལ་འཁོར་གྱི་སྟེང་དུ་བཞུགས་སུ་གསོལ་ལོ། །སངས་རྒྱས་བཞི་པོ་དེ་ཡང་རིན་ཆེན་འབྱུང་ལྡན་ལ་སོགས་པའི་ཡེ་ཤེས་ཀྱི་ངོ་བོ་དང༌། །མཉམ་པ་ཉིད་ཀྱི་ཡེ་ཤེས་ལ་སོགས་པའི་ངོ་བོ་ལས་བྱུང་བ་ཐམས་ཅད་སེང་གེའི་གདན་རིན་པོ་ཆེ་ལ་སོགས་པ་རིགས་ཀྱི་མཚན་མས་བརྒྱན་པའི་སྟེང་ན་བཞུགས་སོ། །སྔགས་དེ་རྣམས་ནི་བསྐྱེད་བའི་རྐྱེན་ཡང་ཡིན་ལ་དེ་དག་ཐུགས་ཀར་དགོད་པ་ཡང་ཡིན་ལ། སྐུའི་ཙ་ཀ་ལི་དགོད་པ་ཡང་ཡིན་ནོ། །བཅོམ་ལྡན་འདས་ཀྱི་སྔགས་འདིས་ནི་སྐུ་དེ་དག་གི་སྐྱེད་པ་ཡང་བྱེད་ལ། ཕྱི་མ་ནས་ལྷ་མོ་དང་བསྐལ་བཟང་ནས་འགྲོ་བ་རིགས་དྲུག་པ་བསྐྱེད་པ་ལ་སོགས་པ་བྱའོ་ཞེས་འབྱུང༌། ཡང་ན་སྔགས་རིང་པོ་འདི་དང་ཧཱུཾ་གིས་ནི་གཙོ་བོའི་སྐུ་བསྐྱེད་ལ། ཤོ་དྷ་ནེའི་སྔགས་ཀྱིས་ནི་ཤར་ཕྱོགས་ཀྱི་ངན་སོང་སྦྱོང་བ་བསྐྱེད་དོ་ཞེས་འབྱུང་སྟེ་ཉེས་པ་མེད་དོ། །གཞན་ཡང་སྙིང་པོ་དང་ཉེ་བའི་སྙིང་པོ་ཞེས་འབྱུང་བ་ནི་སྙིང་པོ་ནི་སྐུ་བསྐྱེད་པའོ། །ཉེ་བའི་སྙིང་པོ་ནི་ཐུགས་ཀར་དགོད་པའོ། །ད་ནི་ཡེ་ཤེས་ཀྱི་སེམས་དཔའ་བཅུ་དྲུག་བསྐྱེད་པར་བྱ་སྟེ། དེ་ཡང་བསྐྱེད་པའི་སྙིང་པོ་ནི་སརྦ་བཏི་བཅུ་གཉིས་ཀྱིས་བསྐྱེད་པར་བྱ་སྟེ། སརྦ་བཏི་ཅེས་པ་ནི་ཐམས་ཅད་རིག་པ་ཞེས་ཟེར་ཏོ། དེ་ཉིད་ཡེ་ཤེས་ཉིད་ཡིན་པས་ཡེ་ཤེས་ཀྱི་སེམས་དཔའ་བཅུ་དྲུག་བསྐྱེད་དོ། །དེ་ཡང་བསྐྱེད་པའི་ཐབས་ནི་བཛྲ་ས་ཏྭ་ཞེས་པ་ལ་སོགས་པའི་སྔགས་བཅུ་དྲུག་དང༌། སྒྲ་ཡིག་བཅུ་གཉིས་དང༌། སརྦ་བཏི་བཅུ་
གཉིས་སོ། །དེ་ལ་སྒྲ་ཡིག་བཅུ་གཉིས་སངས་རྒྱས་ཀྱི་ས་བཅུ་གཉིས་ཀྱི་རང་བཞིན་ཏེ། དེ་ཡང་དཔལ་རྡོ་རྗེ་སྙིང་པོའི་རྒྱན་གྱི་རྒྱུད་ལས་དེ་བཞིན་གཤེགས་བས་ས་བཅུ་གཉིས་གསུངས་ཏེ། ཀུན་དུ་འོད་ཀྱིས་ཆེན་པོ། །དེ་ནི་ཉི་མའི་དཀྱིལ་འཁོར་འདྲ། །བདུད་རྩིའི་འོད་ནི་གཉིས་པ་སྟེ། །ཤིན་ཏུ་འོད་གསལ་ཟླ་བ་འདྲ། །ནམ་མཁའི་འོད་ནི་གསུམ་པ་སྟེ། །ནམ་མཁའ་ཇི་བཞིན་སོ་སོར་གནས། །རྡོ་རྗེ་འདི་ནི་ཞི་བ་སྟེ། །ས་དེ་ཉིད་ནི་ཡིད་དགའ་བའོ། །བསམ་པ་ནང་གི་བརྟན་སྦྱོར་བས། །རྡོ་རྗེ་ཞེས་ནི་ཡོངས་སུ་བཏགས། །ལྔ་པ་རིན་ཆེན་འོད་ཅེས་བྱ། །དབང་བསྐུར་བ་ལ་རབ་ཏུ་གནས། །པདྨའི་འོད་ཅེས་དྲུག་པ་ལ། །པདྨ་བཞིན་དུ་རབ་ཏུ་སྐྱེ། །རང་བཞིན་དག་པ་ཆོས་ཉིད་ཕྱིར། །དྲི་མ་མེད་པ་ཡོངས་སུ་བཟུང༌། །བདུན་པ་ལས་ཀྱི་འོད་ཅེས་པ། །སངས་རྒྱས་ཕྲིན་ལས་བྱེད་པར་འདོད། །བརྒྱད་པ་དཔེ་མེད་བྱ་བ་ནི། །དེ་ལ་དཔེ་ནི་ཡོད་མ་ཡིན། །དཔེ་ལྡན་ཞེས་པ་དགུ་པ་སྟེ། །ཐམས་ཅད་དཔེ་ནི་སོ་སོར་འབིགས། །བཅུ་པ་ཤེས་རབ་འོད་ཅེས་པ། །སངས་རྒྱས་ས་ནི་བླ་ན་མེད། །བཅུ་གཅིག་ཐམས་ཅད་མཁྱེན་པ་ཉིད། །ས་ཆེན་རབ་ཏུ་འོད་གསལ་བ། །བཅུ་གཉིས་སོ་སོ་རང་རིག་པ། །རྣལ་འབྱོར་ཡེ་ཤེས་རབ་ཏུ་རྫོགས། །ཞེས་སོ། །དེ་ཡང་ཨ་ལ་སོགས་པས་བསྐྱེད་པའོ། །བཛྲ་སཏྭ་ཞེས་པ་སྔགས་བཅུ་དྲུག་དང༌། བཏི་བཅུ་གཉིས་དང༌། སྟོང་པ་བཅུ་དྲུག་ནི་ཐ་དད་པ་མ་ཡིན་ཏེ་ཡེ་ཤེས་བཅུ་དྲུག་གོ །ཡེ་ཤེས་དེའི་རང་བཞིན་སེམས་དཔའ་བཅུ་དྲུག་གོ །དེ་ལ་སྒྲ་ཡིག་བཅུ་གཉིས་དང༌། སརྦ་བཏི་བཅུ་གཉིས་དང༌། །ཨོཾ་བཛྲ་སཏྭ་ཞེས་པའི་སྔགས་བཅུ་དྲུག་དང༌། རྩ་བའི་སྙིང་པོ་འབྲུ་རེ་བ་ལས་ཡེ་ཤེས་ཀྱི་སེམས་དཔའ་བསྐྱེད་དོ། །དེ་ཡང་ཡེ་ཤེས་ལས་བསྐྱེད་པ་དང༌། ཕ་རོལ་ཏུ་ཕྱིན་པ་ལས་བསྐྱེད་པའོ། །ཡེ་ཤེས་ཀྱི་ཆ་ལས་སྐྱེས་པ་ནི་རྡོ་རྗེ་སེམས་དཔའ་ལ་སོགས་པའོ། །ཕ་རོལ་ཏུ་ཕྱིན་པ་ལས་བྱུང་བ་ནི་བྱམས་པ་ལ་སོགས་པའོ། །དེ་ལ་ཡེ་ཤེས་སེམས་དཔའ་རྣམས་ནི་སྒྲ་ཡིག་ལ་སོགས་པ་ལས་སྐྱེས་པའོ། །དེ་ལ་ཡང་སྒྲ་ཡིག་ནི། ཨ་ཨཱ་ཨི་ཨཱི་ཨུ་ཨཱུ་ཨེ་ཨཻ་ཨཽ་ཨཽ་ཨཾ་ཨཿ་ཞེས་པ་ལ་སོགས་པའི་སྔགས་དང༌། ཨོཾ་སརྦ་བཏི་སརྦ་ཨཱ་བ་ར་
ཎ་བི་ཤོ་དྷ་ཡ་ཧ་ན་ཧཱུཾ་ཕཊ་ཅེས་པ་ལ་སོགས་པ་དཀྱུས་ན་ཡོད་པ་རྣམས་སོ། །དེ་ཡང་བཅོམ་ལྡན་འདས་ཀུན་རིག་རྣམ་པར་སྣང་མཛད་ཀྱི་ཐུགས་ཀའི་ཟླ་བའི་དཀྱིལ་འཁོར་གྱི་དབུས་སུ་སྒྲ་ཡིག་དང་པོ་ཨ་དེའི་མཐའ་མན་ཚུར་ཨོཾ་བཛྲ་སཏྭ་ཧཱུཾ་ཞེས་པའི་སྔགས་ཀྱི་ཕྲེང་བས་བསྐོར་བའོ། །དེའི་ཕྱི་རིམ་ན་ཚུར་ཨོཾ་སརྦ་བཏི་སརྦ་ཨཱ་བ་ར་ཎ་བི་ཤོ་དྷ་ཡ་ཧ་ན་ཧཱུཾ་ཕཊ་ཅེས་པའི་སྔགས་ཀྱི་ཕྲེང་བའི་ཚུལ་དུ་བསྐོར་བ་སྟེ། དེ་རྣམས་ཀྱང་ཡེ་ཤེས་ཀྱི་འོད་ཟེར་འཕྲོ་བ་དང་གཡོ་འགུལ་ལ་སོགས་པ་ནི་སྔ་མ་བཞིན་དུ་ཕྱི་མ་རྣམས་ཀྱང་དེ་ལྟར་རོ། །དེ་ནས་སྔགས་ཀྱི་ཡི་གེའི་ཕྲེང་བ་དེ་རྣམས་ལས་ཡེ་ཤེས་ཀྱི་འོད་ཟེར་འཕྲོས་ཤིང་འདུས་པ་ལས་རིམ་པ་བཞིན་དུ་ཨ་ལ་ཐིམ། ཨ་འོད་དུ་ཞུ་སྟེ་ཧཱུཾ་དུ་གྱུར་ཏོ། །ཧཱུཾ་འཕྲོས་ཤིང་འདུས་པ་ལས་རྡོ་རྗེ་རྩེ་ལྔ་པར་གྱུར་ཏོ། །དེའི་བུམ་པ་ལ་ཡང་ཡི་གེ་ཧཱུཾ་གིས་བྱིན་གྱིས་བརླབས་པའོ། །དེ་ལ་ཡེ་ཤེས་ཀྱི་འོད་འཕྲོས་པས་དེ་བཞིན་གཤེགས་པ་དང༌། རྡོ་རྗེ་དང་རིན་པོ་ཆེ་དང༌། པདྨ་དང། ལས་ཀྱི་རིགས་སུ་བཞུགས་པ་རྣམས་ཀྱི་སྐུ་གསུང་ཐུགས་རྡོ་རྗེའི་དབྱིངས་ཇི་སྙེད་པ་ཐམས་ཅད་བསྡུས་ནས་སླར་རྡོ་རྗེ་ལ་ཐིམ་པ་ལས་ཤིན་ཏུ་བརྟན་ཞིང་མི་འགྱུར་བའམ་མི་གཡོ་བར་གྱུར་ཏོ། །དེ་ནས་ཡང་རྡོ་རྗེ་ལས་དེ་བཞིན་གཤེགས་པའི་སྐུ་ཕྲ་མོ་མང་པོ་འཕྲོས་པས་གདུལ་བྱའི་སྣོད་ཇི་ལྟ་བ་བཞིན་དུ་སངས་རྒྱས་ཀྱི་མཛད་པས་འགྲོ་བའི་དོན་མཛད་ནས་སླར་འདུས་ཏེ་རྡོ་རྗེ་ལ་ཐིམ་པ་ལས་རྡོ་རྗེ་སེམས་དཔའི་སྐུ་ཕྱག་རྒྱ་ཆེན་པོར་གྱུར་ཏེ། བཅོམ་ལྡན་འདས་ཀྱི་ཐུགས་ཀ་ན་བཞུགས་སོ། །ཡང་དེའི་ཐུགས་ཀར་ཟླ་བའི་དཀྱིལ་འཁོར་ལ་སྔགས་སྔ་མ་བཞིན་དུ་བཀོད་དེ། སྔགས་དེ་བརྗོད་དེ་བསྐུལ་བའི་ཚུལ་གྱིས་ཐུགས་ཀ་ནས་བཏོན་ཏེ། ཕྱོགས་བཅུར་འཕྲོས་པའི་ཕྱོགས་བཅུའི་འཇིག་རྟེན་གྱི་ཁམས་སུ་ལྷུམས་ནས་བལྟམས་པ་དང༌། གཞོན་ནུ་རོལ་རྩེད་མཛད་པ་ལ་སོགས་པ། སངས་རྒྱས་ཀྱི་མཛད་པ་བཅུ་གཉིས་ཀྱི་ཚུལ་གྱིས་འགྲོ་བའི་དོན་མཛད་ནས་སླར་འདུས་ཏེ། བདག་གིས་མདུན་ན་བཀའ་སྔོད་པའི་ཚུལ་དུ་གནས་པ་ལས་གནས་བཞིར་རང་གི་ཕྱག་རྒྱར་བྱིན་གྱིས་བརླབས་པ་དང༌། དབང་བསྐུར་བ་དང༌། ལག་ཏུ་རྡོ་རྗེ་བྱིན་པ་དང༌། རྡོ་རྗེ་སེམས་དཔའ་ཞེས་མིང་གི་དབང་བསྐུར་བ་དང༌། རང་གི་ལས་ལ་བཀོད་དེ་འཁོར་ལོ་ཆེན་པོ་རྩིབས་བཅུ་དྲུག་ཤར་ཕྱོགས་ཀྱི་རྩིབས་དང་པོ་
༄༅།།ལ་གདན་སྣ་ཚོགས་པདྨ་དང་ཟླ་བའི་དཀྱིལ་འཁོར་ལ་བཞུགས་སུ་གསོལ་ལོ། །དེ་བཞིན་དུ་འོག་མ་རྣམས་ཀྱང་ཤེས་པར་བྱ་སྟེ། ཛཿདང་ཧོཿལ་སོགས་པ་སྔགས་ཀྱི་ཡི་གེ་འབྲུ་རེ་རེ་བ་དང༌། ཨ་ལ་སོགས་པ་བཅུ་གཅིག་དང༌། །དེའི་ཕྱི་རིམ་ནས། ཨོཾ་བཛྲ་རཱ་ཛཱ་ཞེས་བྱ་བ་དང། ཨོཾ་སརྦ་བཏི་ཧཱུཾ་ཞེས་བྱ་བ་ལས་སྔགས་ཀྱི་འོད་འཕྲོས་པ་ལས་སངས་རྒྱས་ཀྱི་མཛད་པ་བྱས་ནས་སླར་ཟླ་བ་ལ་འཁོད་དེ་དམ་ཚིག་གི་ཕྱག་རྒྱར་གྱུར་པ་དང༌། དེ་དག་ཡང་འཕྲོ་པ་དང་འདུ་བ་ལས་སྐུ་གསུང་ཐུགས་ཀྱི་རྡོ་རྗེ་དབྱིངས་ཐམས་ཅད་ཞུགས་པས་བརྟན་པར་གྱུར་པ་དང༌། ཡང་དེ་ལས་སོ་སོའི་སྐུར་གྱུར་ཏེ། དེའི་ཐུགས་ཀར་ཡང་མཚན་གྱི་སྔགས་ཀྱི་དབུས་སུ་རང་བཞིན་ཛ་དང་ཧོ་ལ་སོགས་པ་སྔགས་ཀྱི་ཡི་གེ་འབྲུ་རེ་རེ་བའམ། རིགས་ཀྱི་ཡི་གེ་བཀོད་པ་ལས་སྔགས་བརྗོད་པས་སྤྱན་དྲངས་པས་ཕྱིར་བྱུང་ནས་སངས་རྒྱས་ཀྱི་མཛད་པ་བྱས་ནས་སླར་བྱོན་པ་ལས་ཕྱིར་འཁོར་ལོའི་རྩིབས་གཉིས་ལ་སོགས་པ་ཀུན་བཞག་ལ། དེ་ལ་བྱིན་གྱིས་བརླབས་པ་དང༌། དབང་དང༌། མིང་གདགས་པ་དང༌། ལག་ཏུ་དམ་ཚིག་སྦྱིན་པ་ལ་སོགས་ཀུན་ལ་ཤེས་པར་བྱའོ། །སྒྲ་ཡིག་གང་དང་གང་ལས་སེམས་དཔའ་གང་དང་གང་བསྐྱེད་པ་ནི་ཨ་ལས་རྡོ་རྗེ་སེམས་དཔའོ། །ཨཱ་ལས་རྡོ་རྗེ་རྒྱལ་པོའོ། །ཨི་ལས་རྡོ་རྗེ་ཆགས་པའོ། །ཨཱི་ལས་རྡོ་རྗེ་ལེགས་པའོ། །ཨུ་ལས་རྡོ་རྗེ་རིན་ཆེན་ནོ། །ཨཱུ་ལས་རྡོ་རྗེ་གཟི་བརྗིད་དོ། །ཨེ་ལས་རྡོ་རྗེ་རྒྱལ་མཚན་ནོ། །ཨཻ་ལས་རྡོ་རྗེ་བཞད་པའོ། །ཨོ་ལས་རྡོ་རྗེ་ཆོས་སོ། །ཨཽ་ལས་རྡོ་རྗེ་རྣོན་པོའོ། །ཨཾ་ལས་རྡོ་རྗེ་འཁོར་ལོའོ། །ཨཿ་ལས་རྡོ་རྗེ་སྨྲ་བའོ། །ཨུ་ལས་རྡོ་རྗེ་ལས་སོ། །ཨཱུ་ལས་རྡོ་རྗེ་བསྲུང་བའོ། །ཨེ་ལས་རྡོ་རྗེ་གནོད་སྦྱིན་ནོ། །ཨེ་ལས་རྡོ་རྗེ་ཁུ་ཚུར་རོ། །རིན་པོ་ཆེའི་རིགས་དང་ལས་ཀྱི་རིགས་ནི་བསྐྱེད་པའི་ཡི་གེ་འདྲ་སྟེ། ཡོ་ག་ལ་རིགས་བཞིར་འདོད་དེ། ཅིའི་ཕྱིར་ཞེ་ན། ལས་དང་བྱེད་པ་གཉིས་གཅིག་པའི་ཕྱིར་རོ། །ལ་ལ་དག་ནི་འདི་བཅུ་གཉིས་ལས་ཟླ་བ་བསྐྱེད་ལ། ཨཱ་ལི་བཅུ་གཉིས་ལས་སེམས་དཔའ་བཅུ་དྲུག་བསྐྱེད་ལ། རྩ་བའི་རིག་སྔགས་ནི་དཀྱིལ་འཁོར་དུ་དགོད་ལ། ཡི་གེ་འབྲུ་རེ་ལ་ནི་དེ་དག་གི་སྙིང་གར་ཟླ་བའི་སྟེང་དུ་བསམ་མོ་ཞེས་སོ། །ལ་ལ་དག་ནི་ཨཱ་ལི་སྟོང་པ་བཅུ་དྲུག་
གི་རང་བཞིན་བས་ཟླ་བའི་དཀྱིལ་འཁོར་ལ། ཡི་གེ་འབྲུ་རེ་བ་ནི་རང་རང་གི་མཚན་མ་རྡོ་རྗེ་ལ་སོགས་པ་བསྐྱེད་ལ། རྩ་བའི་སྔགས་བཛྲ་སཏྭ་ལ་སོགས་པས་ནི་སྐུར་གྱུར་ལ། བཏི་བཅུ་གཉིས་ཀྱིས་ནི་ལྷ་དེ་དག་གི་ཐུགས་ཀར་ཟླ་བའི་སྟེང་ན་གནས་ནས་ངན་སོང་ལ་སོགས་པ་སྦྱོང་ངོ་ཞེས་གསུངས་སོ། །སྟོང་བ་བཅུ་དྲུག་དང་སེམས་དཔའ་དང༌། དབྱངས་ཡིག་ཏུ་སྦྱར་བ་ནི་འོག་ནས་འབྱུང་བས་འདིར་མ་བྲིས་ཏེ། ཅིའི་ཕྱིར་ཞེ་ན། མངས་པས་སྐྲག་པའི་ཕྱིར་རོ། །བཏི་ནི་རིག་པ་ཡིན་ལ་རིག་པ་ནི་ཡེ་ཤེས་ཏེ། ཡེ་ཤེས་ལས་བསྐྱེད་པ་ནི་སེམས་དཔའ་བཅུ་དྲུག་གོ །དེ་ཡིས་རྒྱུའི་སྒོ་ནས་འབྲས་བུ་ཡང་དེ་བཞིན་ཏེ། སེམས་དཔའ་བསྐྱེད་པའི་སྔགས་ལ་ཡང་བཏི་རིག་པ་ཞེས་གདགས་སོ། །འོ་ན་བསྐལ་བཟང་ནས་འགྲོ་བ་རིགས་དྲུག་ཡན་ཆད་ཀུན་ནི་རྣམ་པར་སྣང་མཛད་ཀྱི་ཐུགས་ལས་སྐྱེ་ན་ཞེའོ། དེ་ཡང་བདེན་ཏེ་ཐུགས་ཡེ་ཤེས་ལས་སྐྱེས་པ་ཡང་འདིར་དཀྱིལ་འཁོར་གྱི་དབང་དུ་བྱ་སྟེ་ཐམས་ཅད་འབྱུང་དུ་འདྲ་ན་ཡང་སེམས་དཔའ་ལ་གཉིས་ཏེ། སྔགས་ཀྱི་ཡེ་ཤེས་ལས་སྐྱེས་པའི་ཡེ་ཤེས་སེམས་དཔའ་དང༌། ཕ་རོལ་ཏུ་ཕྱིན་པའི་སེམས་དཔའོ། །འོན་ཀྱང་བཏི་བཅུ་གཉིས་ནི་སྔགས་ཀྱི་སེམས་དཔར་ངེས་སོ། །སྔགས་ཀྱི་སེམས་དཔའ་དེ་དག་ལ་གནས་བཞིར་བྱིན་གྱིས་བརླབ་ཅིང༌། ཡེ་ཤེས་ཆེན་པོ་ལྔའི་དབུ་རྒྱན་གྱི་དབང་བསྐུར་བར་བྱའོ། །ད་ནི་ཡུམ་བཞི་བསྐྱེད་པར་བྱ་སྟེ། དེ་ཡང་རྣམ་པར་སྣང་མཛད་ཀྱི་ཐུགས་ཀའི་ཟླ་བའི་དཀྱིལ་འཁོར་ལ་ཡི་གེ་ཡ་ར་ལ་ཝ་བཞི་བཀོད་པའི་མཐའ་མན་ཚུར་སཏྭ་བཛྲི། རཏྣ་བཛྲི། དྷརྨ་བཛྲི། ཀརྨ་བཛྲི། ཞེས་སྔགས་ཀྱི་ཕྲེང་བ་བཀོད་པའི་འཕྲོ་འདུ་ལས་དམ་ཚིག་གི་ཕྱག་རྒྱ་རྡོ་རྗེ་དང༌། རིན་པོ་ཆེ་དང༌། པདྨ་དང༌། རྒྱ་གྲམ་དང་བཞིར་གྱུར་ཏོ། །དེའི་འཕྲོ་འདུ་ལས་ཡུམ་བཞིའི་སྐུ་བསྐྱེད་དེ། སྤྱན་མ་དང༌། མཱ་མ་ཀཱི་དང༌། གོས་དཀར་མོ་དང༌། སྒྲོལ་མ་བཞིར་གྱུར་ཏེ་ཐུགས་ཀ་ན་གནས་སོ། །ཡང་དེ་དག་གི་སོ་སོའི་ཐུགས་ཀར་རང་རང་གི་སྔགས་ཀྱི་ཡི་གེའི་ཕྲེང་བ་བཀོད་ནས་སྔགས་བརྗོད་དེ་བསྐུལ་བའི་ཚུལ་གྱིས་ཕྱི་རོལ་དུ་འཕྲོས་ཏེ། སངས་རྒྱས་ཀྱི་མཛད་པ་མཛད་ནས་སླར་འདུས་པ་ཉིད་ལ་བྱིན་གྱིས་བརླབས་པ་དང༌། དབང་བསྐུར། དམ་ཚིག་གི་ཕྱག་རྒྱ་ལག་
ཏུ་བྱིན་ཏེ། མིང་གི་དབང་བསྐུར་ནས་ལས་ལ་བཞག་སྟེ་ནང་གི་རེའུ་མིག་གི་གྲ་བཞིར་བཞུགས་སོ། །ཁ་ཅིག་ན་རེ་ཡུམ་བཞི་པོ་འདི་དག་ནི་རྩ་བའི་རྒྱུད་ཆེན་པོ་ལས་ཀྱང་སྐུའི་ཕྱག་རྒྱ་མ་བྱུང་སྟེ། དམ་ཚིག་གི་ཕྱག་རྒྱར་རམ། རང་གི་རིགས་ཀྱི་མཚན་མར་ཏེ། །འདི་ཉིད་ལས་ཀྱང༌། །སངས་རྒྱས་སྤྱན་དང་མཱ་མ་ཀཱི། །དེ་བཞིན་གོས་དཀར་སྒྲོལ་མ་རྣམས། །རང་གི་རིགས་ཀྱི་མཚན་མ་བཞིན། །གྲྭ་ཡི་ཕྱོགས་ནི་ཀུན་དུ་བྲི། །ཞེས་གསུངས་སོ། །ནང་གི་ལྷ་མོ་རྣམས་ནི་ཡི་གེ་ཤ་ལས་ནི་སྒེག་མོ་མའོ། །ཡི་གེ་ཥ་ལས་ནི་ཕྲེང་བ་མའོ། །ཡི་གེས་ཡིས་ནི་དབྱངས་མཁན་མའོ། །ཡི་གེ་ཧ་ཡིས་ནི་གར་མཁན་མའོ། །ཡི་གེ་ཀཥ་ཡིས་ནི་སྤོས་མེ་མའོ། །ཡི་གེ་ར་ཡིས་ནི་མེ་ཏོག་མའོ། །ཡི་གེ་ལ་ཡིས་ནི་མར་མེ་མའོ། །ཡི་གེ་ཝ་ཡིས་ནི་དྲི་ཆབ་མའོ། །ཡི་གེ་ཙ་ཡིས་ནི་ལྕགས་ཀྱུ་མའོ། །ཡི་གེ་ཚ་ཡིས་ནི་ཞགས་པ་མའོ། །ཡི་གེ་ཛ་ཡིས་ནི་ལྕགས་སྒྲོག་མའོ། །ཡི་གེ་ཛྷ་ཡིས་ནི་
དྲིལ་བུ ་མའོ། །ངན་སོང་སྦྱོང་བའི་སྔགས་རིང་ལས་ནི་བྱམས་པ་ནས། འགྲོ་བ་རིགས་དྲུག་ཡན་ཆད་བསྐྱེད་པར་བྱ་སྟེ་རང་གི་རྩ་བའི་སྔགས་དབུས་སོ། །དེ་རྣམས་ལས་ཇི་ལྟ་བར་དབྱིབས་དང་ཁ་དོག་བསྐྱེད་པར་བྱ་སྟེ་རྡུལ་ཚོན་དུའོ། །དེས་ནི་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་བསྟན་ཏོ། །ད་ནི་ཕན་ཡོན་བསྟན་ཏོ། །དེ་ལ་གཉིས་ཏེ། གསོན་པོ་ལ་ཇི་ལྟར་བྱས་ན་ཕན་ཡོན་ཆེ་བ་དང༌། ཚའི་དུས་བྱས་པ་ལ་ཇི་ལྟར་བྱས་ན་ཕན་ཡོན་ཆེ་བ་བསྟན་ཏེ། ལྷའི་དབང་པོ་ཞེས་བྱ་བ་ལ་སོགས་པ་གསུངས་ཏེ། ཕྱི་མ་དཀྱུས་ན་གསལ་བསམ་བྲིས་སོ། །དུས་མ་ཡིན་པར་འཆི་བ་བརྒྱད་ནི་ས་གཉན་དྲལ་བ་དང༌། བུད་མེད་རྒན་མོ་དང་ཉལ་བ་དང༌། མིན་བཞིན་དུ་སྨན་ཟ་བ་དང༌། ཁོང་སྟེང་ན་ཉལ་བ་དང༌། གདོན་འབྱུང་པོ་ཡོད་པའི་ས་ཕྱོགས་སུ་གཅིག་པུར་འགྲོ་བ་དང༌། ནད་པས་སྨན་པའི་ངག་མི་ཉན་པ་དང༌། འཐབ་མོའི་གཡུལ་དུ་འཇུག་པ་དང༌། མི་ཐུབ་པ་ལ་སོགས་པ་དགྲར་ལེན་པ་ནི་དུས་མ་ཡིན་བར་འཆི་བའོ། །དུས་མ་ཡིན་པར་འཆི་བ་དང་འབྲེལ་པ་ནི། ཆུ་ཆེན་པོ་བརྒལ་བ་དང༌། རྦབ་སར་འདུག་པ་དང༌། མཚོན་ལ་རྩེ་བ་དང༌། དུག་འཐུང་བ་རྣམས་ནི་འཆི་བ་དང་འབྲེལ་པའོ། །
རྨི་ལམ་གྱི་རྣམ་པ་ནི་སུམ་ཅུ་རྩ་གཅིག་སྟེ། གང་ཞེ་ན། དགྲས་དེད་པ་དང༌། སྐྱབས་དང་བྲལ་བ་དང༌། སྡུག་བསྔལ་གྱིས་གཟིར་བ་དང༌། ཡི་དགས་གྱིས་མཐུ་འཕྲོགས་པ་དང༌། མིག་ཕྱུང་བ་དང༌། ཁ་ནས་ལྕེ་འཕྲོགས་པ་དང༌། ཉི་ཟླ་ལྷུང་བ་དང༌། ས་གཞི་མི་གཙང་བས་གང་བ་དང༌། །སྐྲ་བྱི་བ་དང༌། སྒྲེན་མོར་འདམ་དུ་འདས་པ་དང༌། གཞན་གྱིས་མགོར་ཕོག་པ་དང༌། ལྕགས་སུ་བཅུག་པ་དང༌། དུག་འཐུང་བ་དང༌། མི་གཙང་བས་ལུས་བྱུགས་པ་དང༌། ཁྱིམ་ལ་མེ་ཤོར་བ་དང༌། མི་གཙང་བའི་སྦུབས་སུ་ལྷུང་བ་དང༌། མི་བསྔགས་པའི་ཞལ་ལྕེས་འདེབས་པ་དང༌། སྒྲ་མི་སྙན་པ་གྲགས་པ་དང༌། གྲོགས་དང་བྲལ་བ་དང༌། ཆུས་ཁྱེར་བ་དང༌། མགོ་ལ་མེ་ཤོར་བ་དང༌། རྒྱལ་པོའི་ཆད་པས་གོ་རར་བཅུག་པ་དང༌། བདོག་པ་གཞན་གྱིས་ཕྲོགས་པ་དང༌། གཅན་གཟན་མཆུ་ཅན་གྱིས་ཤ་ཟ་བ་དང༌། དམྱལ་བར་ལྷུང་བ་དང༌། མུན་ནག་ལ་འདུག་པ་དང༌། ངོ་ཚ་བ་དང༌། མྱ་ངན་གྱི་ནང་ན་འདུག་པ་དང༌། བདུད་ཀྱི་ཞགས་པས་བཟུང་བ་དང༌། སྲིན་པོས་ཁྱེར་བ་དང༌། ཕོངས་པའི་མི་རྣམས་ཤི་བ་དང༌། གཞན་གྱི་འཚེ་བས་འདེགས་པའོ། །ཕྱི་མ་དཀྱུས་ལ་གསལ། ད་ནི་སེམས་ཅན་ཚེའི་དུས་བྱས་པ་ངན་སོང་དུ་སྐྱེས་ན། དཀྱིལ་འཁོར་དུ་བཅུག་ནས་དབང་བསྐུར་ན་ཐར་པའི་ཐབས་སྟོན་ཏེ། སྐྱེས་པའམ་ཞེས་བྱ་བ་ལ་སོགས་པ་འབྱུང་སྟེ། ཤི་བའི་ལུས་ལ་གནས་ཉི་ཤུ་རུ་གོང་གི་སྔགས་ཀྱིས་བྱིན་གྱིས་བརླབས་ནས་དབང་བསྐུར་ན་ཡོན་ཏན་འདི་རྣམས་ཐོབ་པར་འགྱུར་རོ་ཞེས་ཏེ། དཀྱུས་ན་གསལ་ལོ། །ད་ནི་རང་བཞིན་གྱི་དཀྱིལ་འཁོར་བསྟན་ཏེ། དེ་ལ་ཡང་ཞུས་པ་དང༌། ཞུས་པའི་ལན་གཉིས་སོ། །དེ་ནས་ལྷ་རྣམས་ཀྱི་དབང་པོ་ཞེས་བྱ་བ་ནས་བཤད་དུ་གསོལ་ཞེས་བྱ་བའི་བར་གྱིས་ཞུས་པ་སྟོན་ཏེ། དཀྱུས་གསལ་ལོ། །དེ་ནས་ཞུས་པའི་ལན་གསུངས་ཏེ། དེ་ནས་བཅོམ་ལྡན་འདས་ཞེས་བྱ་བ་ལ་སོགས་པའོ། །དེ་ནས་ཞེས་བྱ་བ་ནི་དཀྱིལ་འཁོར་བཤད་པའི་རྗེས་ཐོགས་ལ་བྱའོ། །བཅོམ་ལྡན་འདས་ནི་དབང་ཕྱུག་ལ་སོགས་པའི་ཡོན་ཏན་དང་ལྡན་པས་བཅོམ་ལྡན་འདས་སོ། །ཤཱཀྱ་ནི་དེའི་རིགས་སུ་སྐྱེས་ཤིང་སྐུ་གསུང་ཐུགས་བསྲུང་བ་གསུམ་དང་ལྡན་པས་ཐུབ་པས་ཏེ། དྲན་པ་ཉེ་བར་གཞག་པ་གསུམ་གྱི་ཕྱིར་རོ། །
ཇི་ལྟར་སོང་བ་དེ་བཞིན་གཤེགས་པས་ན། དེ་བཞིན་གཤེགས་པའོ། །ངན་སོང་ནི་བཤད་ཟིན། ཡེ་ཤེས་རྡོ་རྗེ་ཞེས་བྱ་བ་ནི་ཡེ་ཤེས་ནི་རྣམ་པར་མི་རྟོག་པའོ། །དེ་ལས་བྱུང་བའི་ཡེ་ཤེས་ཆེན་པོ་ལྔ་ལ་ནི་རྡོ་རྗེ་ཞེས་བྱའོ། །དེ་བས་ནི་དེ་བཞིན་གཤེགས་པ་དེ་དག་གི་ནང་སེམས་ཀྱི་དཀྱིལ་འཁོར་རང་བཞིན་མེད་པ་དེ་ལ་ནི་ཆེན་པོ་ཞེས་བྱའོ། །འདི་ནི་བློ་ལ་གནས་པ་གསུངས་སོ། །སངས་རྒྱས་ཀུན་གྱི་བྱང་ཆུབ་སེམས། །ཞེས་བྱ་བ་ལ་སོགས་པ་ལ། སངས་རྒྱས་ཀུན་གྱི་ཞེས་བྱ་བ་ནི་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ཀྱི་བདེ་བར་གཤེགས་པ་རྣམས་ཀྱི་བདག་པོ་བདེ་བར་གཤེགས་པ་ལྔ་རྣམས་གཅིག་ཏུ་གྱུར་པ། བདེ་བར་གཤེགས་པ་ཐམས་ཅད་ཀྱི་སྐུ་རྟག་པ་དང༌། ཀུན་གཞི་རྣམ་པར་ཤེས་པ་རྣམ་པར་དག་པ་མེ་ལོང་ལྟ་བུའི་ཡེ་ཤེས་མི་འཁྲུགས་པ་དང༌། ཉོན་མོངས་པ་ཅན་གྱི་ཡིད་རྣམ་པར་དག་པ་མཉམ་པ་ཉིད་ཀྱི་ཡེ་ཤེས་རིན་ཆེན་འབྱུང་བ་དང། ཡིད་ཀྱི་རྣམ་པར་ཤེས་པ་རྣམས་པར་དག་པ་སོ་སོར་ཀུན་རྟོག་པའི་ཡེ་ཤེས་འོད་དཔག་ཏུ་མེད་པ་དང༌། སྒོ་ལྔའི་རྣམ་པར་ཤེས་པ་རྣམ་པར་དག་པ་བྱ་བ་ནན་ཏན་གྱི་ཡེ་ཤེས་དོན་ཡོད་གྲུབ་པ་རྣམས་སོ། །འོ་ན་བདེ་བར་གཤེགས་པ་ནི་མཐའ་ཡས་པའི་གྲངས་ཡོད་ན། འདི་ལྔ་ལ་ཀུན་ཞེས་བྱ་བ་མི་འགལ་ལམ་ཞེ་ན། དེ་བདེན་ཏེ། དེ་བཞིན་གཤེགས་པ་མཐའ་ཡས་པའི་ཕྱིར་དེའི་རིགས་ཀྱང་མཐའ་ཡས་པ་སྟེ། དེ་དག་ཀྱང་བསྡུ་ན་རིགས་ལྡར་འདུས་ཏེ། དེ་ལ་རྒྱུད་ལས་གསུངས་པ། མཐའ་ཡས་རིགས་རྣམས་ཐམས་ཅད་ཀྱང༌། །རིགས་ནི་རྣམ་པ་བརྒྱར་བཤད་པ། །དེ་བཞིན་གཤེགས་དང་རྡོ་རྗེ་དང༌། །པདྨ་རིན་ཆེན་ལས་ཀྱི་རིགས། །མདོར་བསྡུས་ན་ནི་རྣམ་པ་ལྔ། །ཞེས་གསུངས་ཏེ། །དེ་ཡང་ཅིའི་ཕྱིར་ཞེ་ན། ཡེ་ཤེས་ལྔ་ཁོ་ན་དབང་གིས་བསྡུས་ན་རྒྱལ་བ་ཡང་རིགས་ལྔ་ཁོ་ནའོ། །དེ་ལྟར་སངས་རྒྱས་མ་ལུས་པ་དེ་དག་གི་བྱང་ཆུབ་སེམས་ནི་གང་ཞེ་ན། དེ་ནི་སྦྱོང་བའི་རྒྱུད་འདི་ལས་རྒྱུའི་ཡེ་ཤེས་བྱང་ཆུབ་ཀྱི་སེམས་རྣམ་པ་གཉིས་དང༌། འབྲས་བུ་གསུམ་སྟེ་ལྔ་ཡིན་པས། དེ་ནི་གཞན་གྱི་བྱང་ཆུབ་ལས་མཆོག་ཏུ་གྱུར་པའི་ཕྱིར་ན་བླ་ན་མེད་པ་ཞེས་བྱའོ། །དེ་ལྟ་བུའི་བྱང་ཆུབ་ཀྱི་སེམས་དེ་སུའི་ཡུལ་ཡིན་
ཞེ་ན། རྟོག་གྱུར་པ་ཞེས་བྱ་སྟེ། བླ་ཞེས་བྱ་བ་ནི་མདུན་དུའམ་སྔོན་དུ་ཞེས་ཐལ་བ་ལ་བསྙག་པར་བྱའོ། །དེ་ཡང་རྒྱུད་འདིའི་སྔོན་དུ་ནི་རྩ་བའི་རྒྱུད་དེ་ཁོ་ན་ཉིད་བསྡུས་པ་བྱུང་བ་ལས་བྱང་ཆུབ་སེམས་དཔའ་དོན་ཐམས་ཅད་གྲུབ་པས་རྟོགས་པར་གྱུར་པ་གང་ཡིན་པའོ། །གང་རྟོགས་པར་གྱུར་ན་བྱང་ཆུབ་ཀྱི་སེམས་ལྔའོ། །གང་གིས་རྟོགས་པར་བྱས་ཤེ་ན། རྒྱལ་བས་ཞེས་བྱ་སྟེ། སྔོན་དུ་སངས་རྒྱས་པའི་རྒྱལ་བདེ་རྣམས་ཀྱིས་སོ། །གང་དུ་རྟོགས་པར་བྱས་ན་བྱང་ཆུབ་ཀྱི་སྙིང་པོར་རོ། །དེ་ཡང་སྔགས་ཀྱིས་སྒོར་སྤྱོད་པའི་སེམས་དཔའ་རྣམས་ནི་སྔགས་ཀྱི་དོན་སློབ་དཔོན་ལ་རག་ལས་པ་ཡིན་གྱིས། རང་གི་ཐུག་ཐུབ་ཏུ་སྤྱད་པ་ནི་མི་རུང་བའི་ཕྱིར་དོན་ཐམས་ཅད་གྲུབ་པ་ནི་བྱང་ཆུབ་སེམས་དཔའི་བྱང་ཆུབ་ནི་སངས་རྒྱས་སྔ་མ་ལ་རག་ལས་པ་ལྟར་སྣང་ངོ༌། །དེའི་ཕྱིར་རིགས་བཞིའི་སངས་རྒྱས་དེ་དག་གིས་བཏུལ་ཞིང་དགེ་བའི་བཤེས་གཉེན་མཛད་པ་ལས་དགོངས་ཏེ། འདིར་ཡང་བྱང་ཆུབ་ཀྱི་སེམས་དེ་བརྟན་པར་བྱ་བའི་ཕྱིར་གསུངས་ཞེས་བྱའོ། །པའི་ཞེས་བྱ་བའི་དོན་ཡང་སྔོན་དུ་སོང་པ་ལ་སྙེགས་པའི་དོན་ཏེ། འདི་ཡང་སྔོན་དུ་དཔལ་དེ་ཁོ་ན་ཉིད་བསྡུས་པའི་རྒྱུད་དུ་དོན་ཐམས་ཅད་གྲུབ་པའི་བྱང་ཆུབ་སེམས་དཔའ་སེམས་དཔའ་ཆེན་བོ་སྟུག་པོ་བཀོད་པའི་སངས་རྒྱས་ཀྱི་ཞིང་བྱང་ཆུབ་ཀྱི་སྙིང་པོ་ན་བཞུགས་པ་ལས་སྔོན་གྱི་སངས་རྒྱས་ཀྱིས་མངོན་པར་བྱང་ཆུབ་པ་ལྔ་བསྔགས་ཤིང་ཕུལ་བ་ཞེས་བྱའོ། །ཡེ་ཤེས་གང་ཞེས་བྱ་བ་ནི་མ་ལོག་པའི་སྟོང་པ་ཉིད་ཀྱི་ཏིང་ངེ་འཛིན་ལ་སྦྱོར་བ་ལས། ཡུལ་སོ་སོར་རྟོག་པར་རིག་པས་རང་གི་སེམས་རིག་པ་སྟོང་པ་ཆེན་པོ་དང༌། གཉིས་པ་བྱང་ཆུབ་ཏུ་སེམས་བསྐྱེད་པ་མེ་ལོང་ཡེ་ཤེས་དང༌། གསུམ་པ་ཆོས་ཀྱི་སྐུར་གནས་པ་སོ་སོར་རྟོག་པའི་ཡེ་ཤེས་དང༌། བཞི་པ་བརྟན་པར་བྱས་པ་མཉམ་པ་ཉིད་ཀྱི་ཡེ་ཤེས་དང༌། ལྔ་པ་སྐུར་གྱུར་པ་བྱ་བ་ནན་ཏན་གྱི་ཡེ་ཤེས་ཞེས་བྱའོ། །ཡང་སློབ་དཔོན་ལ་ལ་དག་གི་བཞེད་ལུགས་ཀྱིས་བྱང་ཆུབ་ཀྱི་སེམས་རྣམ་པ་ལྔ་ལས་རང་གི་སེམས་སོ་སོར་རིག་པ་དང༌། བྱང་ཆུབ་ཀྱི་སེམས་སྐྱེས་པ་ཟླ་བའི་དཀྱིལ་འཁོར་གཉིས་རྒྱུའི་ཡེ་ཤེས་ཞེས་བྱ་སྟེ། དེ་ལ་ཅིའི་ཕྱིར་རྒྱུའི་ཡེ་ཤེས་ཞེས་བྱ་ཞེ་ན། བྱང་ཆུབ་ཀྱི་སེམས་དང་པོ་ནི་ས་དང་པོ་རབ་ཏུ་དགའ་བའི་
མཚན་ཉིད་དེ། མཐོང་བའི་ལམ་གྱི་ཡེ་ཤེས་ཀྱི་རང་བཞིན་ནོ། །དེའི་འོག་མ་བྱང་ཆུབ་ཀྱི་སེམས་ནི་ས་གཉིས་པ་ནས་ས་བཅུ་པའི་བར་གྱི་ཡེ་ཤེས་ཏེ། བསྒོམ་པའི་ལམ་མོ། །དེའི་ཕྱིར་དེ་གཉིས་ནི་རྒྱུའི་ཡེ་ཤེས་འཕགས་པའི་ལམ་གྱི་རང་བཞིན་ནོ། །དེ་ལྟར་རྒྱུའི་ཡེ་ཤེས་ཏེ་ཟླ་བའི་དཀྱིལ་འཁོར་གྱི་སྟེང་དུ་འབྲས་བུའི་ཡེ་ཤེས་རྡོ་རྗེ་རྩེ་ལྔ་པ་བསྒོམས་ཏེ། ཅིའི་ཕྱིར་ཡེ་ཤེས་ལྔ་ལ་འབྲས་བུ་ཞེས་བྱ་ཞེ་ན། ཡེ་ཤེས་ལྔ་ནི་ཆོས་ཀྱི་སྐུ། ཆོས་ཀྱི་སྐུ་དེ་ཡང་རྣལ་འབྱོར་པའི་ཏིང་ངེ་འཛིན་གྱི་དོན་དང༌། སྐུ་གཉིས་འབྱུང་བ་ལ་མཐུ་ཡོད་པར་བྱ་བའི་ཕྱིར་བརྟག་པར་བྱའོ། །གཞན་གྱི་དོན་ཕུན་སུམ་ཚོགས་པར་བསྒྲུབ་པར་བྱ་བའི་ཕྱིར་ནི་ལོངས་སྤྱོད་རྫོགས་པའི་སྐུ་ཕྱག་རྒྱ་ཆེན་པོར་གྱུར་པའོ། །དེ་ལྟར་བྱང་ཆུབ་སེམས་དཔའི་བསོད་ནམས་དང་ཡེ་ཤེས་ཀྱི་ཚོགས་མ་ལུས་པ་ཐམས་ཅད་ནི་ཡོངས་སུ་རྫོགས་པའི་འབྲས་བུ་དཔག་བསམ་གྱི་ཤིང་དང༌། ཡིད་བཞིན་གྱི་ནོར་བུ་རིན་པོ་ཆེ་ལྟ་བུའི་ངོ་བོ་ཀུན་དུ་བཟང་པོ་བྱང་ཆུབ་ཀྱི་སེམས་ཞེས་བྱ་བ་བྱང་ཆུབ་ཀྱི་སེམས་བླ་ན་མེ་པ་རྡོ་རྗེ་ལྟར་སྲ་ཞིང་བརྟན་པ། ཅིས་ཀྱང་མི་ཤིག་ཅིང་འཇིག་རྟེན་དང་འཇིག་རྟེན་ལས་འདས་པ་ཐམས་ཅད་ཀྱི་སེམས་ཀྱི་རྒྱལ་པོ་རང་གི་སེམས་བྱིན་གྱིས་བརླབས་ནས་བརྟན་པའི་ཡེ་ཤེས་གང་ཡིན་པ་དེ་ནི་སྦྱོར་བའི་རྒྱུད་ཀྱི་དཀྱིལ་འཁོར་ཐམས་ཅད་ཀྱི་ཡང་སྙིང་པོར་དེ་བཞིན་གཤེགས་པ་ཐམས་ཅད་ཀྱི་གསུངས་ཞེས་བྱའོ། །རང་བཞིན་གྱི་དཀྱིལ་འཁོར་དེའི་དོན་ཡང་འདི་ལྟ་སྙེགས་ཏེ། དང་པོར་ཡོན་ཏན་བཅུ་དང་ལྡན་པས་གནས་ཡིད་དུ་འོང་བར་ཁྲུས་ལ་སོགས་པ་བྱ་སྟེ། སྟན་བདེ་བ་ལ་འདུག་ནས་སྔོན་དུ་འགྲོ་བའི་ཡན་ལག་བྱས་ནས། རྡོ་རྗེ་སེམས་དཔའི་སྐུར་བདག་ཉིད། །ཆོས་རྣམས་ཐམས་ཅད་དངོས་མེད་བར། །སེམས་ཀྱི་བསྒོམ་པར་བྱས་པས་ནི། །ཨ་ལས་ཟླ་བའི་དཀྱིལ་འཁོར་བསམ། །ཞེས་བྱ་བ་ལ་སོགས་པ་གསུངས་པའི་དོན་གྱིས་བསམས་ལ། དེ་ལ་བྱིན་གྱིས་བརླབས་པ་དང༌། དབང་དང་མཆོད་པ་ཡན་ཆད་བྱས་ནས། ནང་སེམས་ཀྱི་དཀྱིལ་འཁོར་སྐད་ཅིག་མས་བསྐྱེད་ནས་ངན་སོང་ནས་དྲང་ཞིང་འགུགས་པ་ལ་ཡན་མན་གྱི་དབང་གིས་རྣམ་པར་གྲོལ་བའི་ལམ་ལ་བཞག་ནས། དེས་ངོ་
མཚར་གྱི་སྟོང་པ་ཉིད་གཞལ་ཡས་ཁང་བསྐྱེད་པ་དང་གདན་བསམས་ནས་གོང་གི་མངོན་པར་བྱང་ཆུབ་པ་ལྔས་བདག་རྣམ་པར་སྣང་མཛད་དུ་འོག་མིན་དུ་སངས་རྒྱས་པའི་ཚུལ་གྱིས་སངས་རྒྱས་ནས་རིན་པོ་ཆེ་དབང་བསྐུར་བ་དང༌། སྤྱན་རས་གཟིགས་ཀྱི་ཆོས་ཀྱི་ཡ་ཤེས་བསྐྱེད་ནས་དེ་བཞིན་གཤེགས་པའི་ཕྲིན་ལས་ལ་བཞག་སྟེ། སེང་གེའི་ཁྲིའི་སྟེང་དུ་འདུག་སྟེ། དཀྱིལ་འཁོར་རྒྱལ་པོ་མཆོག་ལྟར་ལྷ་རྣམས་སྐུ་བསྐྱེད་པ་དང༌། འོག་ནས་འབྱུང་བའི་ལས་རྒྱལ་མཆོག་ལྟར་ལས་རྣམ་བྱས་ནས། དེ་ནས་ལས་ལ་རྗེས་སུ་སྦྱོར་བའི་སྤྱན་དྲང་བ་དང༌། བཞུགས་སུ་གསོལ་བ་དང༌། ཕྱག་རྒྱ་བཞིས་རྒྱས་གདབ་བ་དང༌། དབང་བསྐུར་བ་དང༌། བྱིན་གྱིས་བརླབས་ཤིང་མཆོད་པ་དང༌། སྔགས་ཀྱི་དོན་ལ་གནས་པ་ཡན་ཆད་བྱས་ནས་རྡོ་རྗེའི་བཟླས་པ་བྱ་སྟེ། བདག་ཀུན་རིག་རྣམ་པར་སྣང་མཛད་ཀྱི་སྐུར་གསལ་བར་བྱས་པ་ལས། དེའི་ཐུགས་ཀར་རྣམ་པར་སྣང་མཛད་ཆེན་པོ་བསམས་ཏེ། སངས་རྒྱས་དེའི་ཐུགས་ཀར་ཤེས་རབ་ཀྱི་འཁོར་ལོ་བསྒོམ་པར་བྱ་སྟེ། ཅི་འདྲ་བ་ཞེ་ན། རྡོ་རྗེ་རྩེ་མོའི་རྒྱུད་ལས་རྟེན་ཅིང་འབྲེལ་བར་འབྱུང་བའི་དོན་གསུངས་པ། རྩིབས་ཀྱི་ལྟེ་བ་ཡང་དག་འཛིན། །རྩིབས་རྣམས་ལྟེ་བ་ལ་གནས་པ། །རྟེན་ཅིང་འབྲེལ་བར་འབྱུང་སྦྱོར་བས། །འཁོར་ལོར་འདི་ནི་གྱུར་པ་ཡིན། །ཞེས་སོ། །ཡི་གེ་བྷྲཱུཾ་ལས་བསྐྱེད་པའི་འཁོར་ལོ་རྩིབས་བཅུ་དྲུག་པ་མུ་ཁྱུད་བཞི་དང་ལྡན་པ་ཤིན་ཏུ་བཀོད་པའི་ལྟེ་བ་དེའི་དཀྱིལ་དུ་ཡི་གེ་ཧཱུཾ་བསམས་ཏེ། བཅོམ་ལྡན་འདས་ཀུན་རིག་གི་རྩ་བའི་སྔགས་ལ་སོགས་པ་བསམ་པར་བྱ་སྟེ། ཡི་གེའི་ཁ་དོག་ནི་དཀར་བ་བསམ་མོ། །དེ་ལ་འཁོར་ལོའི་ལྟེ་བ་ལ་རེའུ་མིག་དགུར་བྱས་པ་ལ་ཀུན་རིག་རྣམ་པར་སྣང་མཛད་ལ་སོགས་པའི་སྔགས་དང༌། ཡུམ་གྱི་སྔགས་རྣམས་དགོད་དོ། །དེ་ནས་དང་པོའི་མུ་ཁྱུད་ལ་ཨོཾ་ཤོ་དྷ་ནི་ཤོ་དྷ་ནི་སརྦ་པཱ་པཾ་བི་ཤོ་དྷ་ནི་ཤུདྡྷེ་བི་ཤུདྡྷེ་སརྦ་ཀརྨ་ཨཱ་བ་ར་ཎ་བི་ཤུདྡྷེ་སྭཱ་ཧཱ། ཞེས་པའོ། །དེའི་ཕྱིར་མི་མུ་ཁྱུད་གཉིས་པ་ལ། དེ་བཞིན་གཤེགས་པའི་ས་བཅུ་གཉིས་བརྗོད་པ་སྒྲའི་ཡི་གེ་བཅུ་གཉིས་བསྒོམ་པར་བྱའོ། །དེ་ནས་དང་པོ་ལྕེ་ནས་བརྩམས་ནས་ཇི་ཙམ་དུ་བིཏ་བཅུ་གཉིས་བཀོད་པ་ནི་རིགས་ཀྱི་མདོག་དང་སྦྱར་རོ། །
དེའི་ཕྱི་རིམ་གྱི་མུ་ཁྱུད་ལ་རྩ་བའི་སྔགས་ཨོཾ་ན་མོ་བྷ་ག་བ་ཏི་སརྦ་དུརྒ་ཏི་ཞེས་བྱ་བའི་སྔགས་རིང་པོས་བསྐོར་བའོ། །ཕྱི་རོལ་གྱི་མུ་ཁྱུད་གཉིས་པ་ལ་ཀ་ཁ་ལ་སོགས་པ་ནས་ཧའི་མཐར་ཐུག་པའི་ཡི་གེ་དགོད་པར་བྱའོ། །དེ་ནི་འཁོར་ལོའི་སྔགས་དགོད་པའི་རིམ་པའོ། །འཁོར་ལོའི་དབུས་ན་གནས་པའི་ཡི་གེ་ཧཱུཾ་ལས་རྡོ་རྗེ། རྡོ་རྗེའི་ལྟ་བ་ལ་ཐམས་ཅད་མཁྱེན་པའི་རང་བཞིན་ཐམས་ཅད་མཁྱེན་པའི་ཡེ་ཤེས་འབྱུང་བའི་རྐྱེན། ཉན་ཐོས་དང་རང་སངས་རྒྱས་ཐམས་ཅད་སྐྱེད་པའི་དངོས་པོ་བྱང་ཆུབ་སེམས་དཔའ་ཐམས་ཅད་ཀྱི་བསོད་ནམས་དང་ཡེ་ཤེས་ཀྱི་དངོས་པོའོ། །དོན་དམ་པའི་ཡིག་འབྲུ་ཚིག་འབྲུ་ཐམས་ཅད་ཀྱི་རྐྱེན་གྱི་དངོས་པོ་ཡི་གེ་ཧཱུཾ་དགོད་དོ། །དེ་ནས་དེ་ལས་འོད་བྱུང་བས་ནང་གི་སེམས་ཀྱི་དཀྱིལ་འཁོར་གསལ་ལོ། །དེ་ནས་མི་མཛེས་ཀྱི་འཇིག་རྟེན་གྱི་ཁམས་གསལ་ལོ། དེ་ནས་ནམ་མཁའི་ཁམས་ཐམས་ཅད་དུ་ཁྱབ་པར་སངས་རྒྱས་ཀྱི་ཞིང་རྣམ་པ་སྣ་ཚོགས་པ་རྣམས་སུ་སོང་ནས་མ་ལུས་པའི་སེམས་ཅན་གྱི་དོན་བྱས་ནས་དེ་བཞིན་གཤེགས་པ་ཐམས་ཅད་དང༌། བྱང་ཆུབ་སེམས་དཔའ་དང་ཉན་ཐོས་དང་རང་སངས་རྒྱས་ཀྱི་འཁོར་ཡང་སྣང་བར་བྱས་ཏེ། སླར་ཡེ་ཤེས་ཀྱི་རྡོ་རྗེ་ལན་གསུམ་བསྐོར་ནས་ཤེས་རབ་ཀྱི་ཡེ་ཤེས་དེ་དྲངས་ཏེ་ཆོས་བདག་མེད་པ་ཉིད་ཀྱིས་རང་གི་སྒོ་ནས་བཙུད་ནས་རང་གི་སྙིང་གའི་ཟླ་བའི་དཀྱིལ་ན་གནས་པའི་རྡོ་རྗེ་དང་ཧཱུཾ་ལ་ཐིམ་ནས་གནས་པར་བསྒོམ་པར་བྱའོ། །དེ་ལྟར་རྒྱུན་དུ་བསྒོམས་པ་ལ་ཆགས་པའི་རྣལ་འབྱོར་པ་སྔགས་ཀྱི་སྒོ་ནས་སྤྱད་པ་སྤྱོད་པའི་བྱང་ཆུབ་སེམས་དཔའ་བཅོམ་ལྡན་འདས་ཀུན་རིག་རྣམ་པར་སྣང་མཛད་ཀྱི་སྐུའི་སྒོ་ནས་དམིགས་སོ་ཞེས་པ་དང༌། ཟླ་བའི་དཀྱིལ་འཁོར་གྱི་དབྱིབས་ཀྱི་སྒོ་ནས་དེའི་གཟུགས་རྗེས་སུ་བསམ་མོ་ཞེས་པ་དང༌། ཡི་གེ་ཧཱུཾ་གི་གཟུགས་ཀྱི་སྒོ་ནས་དེའི་གཟུགས་རྗེས་སུ་བསྒོམ་མོ་ཞེས་སོ། །དེ་ལྟར་རྣམ་པ་གསུམ་གྱི་ཚུལ་གྱིས་བསྒོམས་པས་དེ་ཉིད་སྤྲུལ་པའི་གཟུགས་ཀྱི་སྐུས་དུས་རིང་མོ་མ་ཡིན་པ་ཁ་ནར་འདུལ་བའི་དབང་ཉེ་བར་བཟུང་སྟེ་མངོན་དུ་བྱས་སོ། །ནམ་མཁའ་བཞི་ལ་གནས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྲུལ་པའི་གཟུགས་ཀྱི་སྐུ་
དང་ལྷན་ཅིག་ཏུ་གནས་པ་ཡང་མངོན་དུ་བྱའོ་ཞེས་སོ། །དེ་ལྟར་བསྒོམ་པའི་དབང་དེ་ལས་ཚེ་འདི་ཁོ་ན་ལ་སངས་རྒྱས་ཉིད་ཀྱི་རྡོ་རྗེ་འཛིན་པ་ཉིད་འཐོབ་པོ་ཞེས་སོ། །དེ་ལྟར་རིམ་པ་འདིས་ངན་སོང་སྦྱོང་བའི་རྫོགས་པའི་རིམ་པ་གསུངས་པ་ཡིན་ནོ། །དེ་ནས་སྤྲུལ་པའི་སྐུ་ཤཱཀྱ་ཐུབ་པའི་སངས་རྒྱས་ཀུན་གྱིས་བྱང་ཆུབ་ཀྱི་སེམས་གསུངས་ཏེ། དེ་ལ་རེ་ཞིག་དང་པོའི་སྦྱོར་བ་ཀུན་སྔོན་དུ་བྱས་ནས། ཤཱཀྱ་ཐུབ་པའི་ཐུགས་ཀར་ཡི་གེ་ཧྲཱིཿ་ལས་བསྐྱེད་པའི་སྣང་བ་མཐའ་ཡས་སྐུ་མདོག་དམར་པོ་ཏིང་ངེ་འཛིན་གྱི་ཕྱག་རྒྱ་དང་ལྡན་པ་བསྒོམས་ཏེ་དེའི་ཐུགས་ཀར་ལྕེ་བརྒྱད་པའི་འཁོར་ལོའི་མུ་ཁྱུད་བཞི་དང་ལྡན་པ་རྩ་བའི་སྔགས་ལ་སོགས་པས་ཡོངས་སུ་བསྐོར་བ་བསྒོམ་པར་བྱའོ། །དེ་ནས་ལྕེ་བརྒྱད་པ་ལ་ས་བོན་རྣམས་ནི་ཨོཾ་སརྦ་ཨཱ་བ་ར་ཎ་བི་ཤོ་དྷ་ན་བཛྲ་ཧཱུཾ་ཕཊ་ཅེས་པ་ལ་སོགས་པ་བཀོད་དེ། འཁོར་ལོའི་ལྟེ་བའི་དབུས་ན་ཡི་གེ་ཧྲཱིཿལས་གྱུར་པའི་པདྨ་རྡོ་རྗེས་མཚན་བ་བསམ་མོ། །དེ་ལ་ཡི་གེ་ཧྲཱིཿས་མཚན་པའོ། །སྤྲོ་བ་དང་བསྡུ་བ་གོང་མ་བཞིན་དུ་རིམ་པས་བྱས་ནས་བསྒོམ་པར་བྱའོ། །དེ་ཁོ་ན་བཞིན་དང་པོའི་སྦྱོར་བ་བྱས་ནས་དཀྱིལ་འཁོར་གྱི་དབུས་སུ་རྡོ་རྗེ་སེམས་དཔའ་དེའི་ཐུགས་ཀར་བཅོམ་ལྡན་འདས་མི་བསྐྱོད་པ་སྐུ་མདོག་སྔོན་པོ་ས་གནོན་གྱི་ཕྱག་རྒྱ་ཅན་བསྒོམས་ནས། དེའི་ཐུགས་ཀར་འཁོར་ལོ་རྩིབས་བཞི་པ་མུ་ཁྱུད་བཞི་དང་ལྡན་པ་བསམས་ལ། མུ་ཁྱུད་དང་པོ་ལ་ཨོཾ་པུཎྱེ་པུཎྱེ་ཞེས་བྱ་བ་ལ་སོགས་པའོ། །ལྕེ་བཞི་ལ། ཨོཾ་ཨ་མི་ཏེ་ཨ་མི་ཏ་ཨ་མི་ཏོད་བྷ་བེ་ཞེས་བྱ་བ་ལ་སོགས་པའོ། །དེའི་ལྟེ་བར་རྡོ་རྗེ་ཧཱུཾ་གིས་མཚན་པའོ།། དེ་ཁོ་ན་བཞིན་དུ་སྤྲོ་བ་ལ་སོགས་པ་བྱའོ། །ཡང་དེ་ཁོ་ན་བཞིན་དུ་ཡི་གེ་བྷྲཱུཾ་ལས་བསྐྱེད་པའི་རྣམ་པར་སྣང་མཛད་དེའི་ཐུགས་ཀར་རྣམ་པར་སྣང་མཛད་ཆེན་པོ་བསམས་ཏེ། དེའི་ཐུགས་ཀར་འཁོར་ལོ་རྩིབས་བཞི་པ་ཅིག་བསམས་ཏེ། ཨོཾ་ཏྲཱཾ་སྭཱ་ཧཱ་ཞེས་བྱ་བ་ལ་སོགས་པ་བཀོད་ལ་དེའི་ལྟེ་བ་ལ་བྷྲཱུཾ་ལས་འཁོར་ལོ་བྷྲཱུཾ་གྱིས་མཚན་པ་བསམ་མོ། །དེ་ཁོ་ན་ཉིད་སྤྲོ་པ་དང་བསྡུ་བ་བྱའོ། །དེ་ཁོ་ན་བཞིན་དུ་སྔོན་དུ་འགྲོ་བ་བྱས་ནས་རྡོ་རྗེ་སེམས་དཔའ་འམ། ཀུན་དུ་བཟང་པོའམ། བདེ་བ་ཆན་པོ་གང་ཡང་རུང་བ་བསྒོམས་པའི་ཐུགས་ཀར་རིགས་ཀྱི་བདག་པོ་མི་བསྐྱོད་པའམ།
རིན་ཆེན་འབྱུང་བའམ། རྣམ་པར་སྣང་མཛད་གང་ཡང་རུང་བ་བསྒོམས་ལ། དེའི་ཐུགས་ཀར་འཁོར་ལོ་རྩིབས་བཞི་པ་བཀོད་ལ། འཁོར་ལོ་ལ་བཛྲ་ཧཱུཾ་ཕཊ་ཅེས་པ་ལ་སོགས་པ་བཀོད་ལ། དབུས་སུ་རིགས་ཀྱི་ཕྱག་རྒྱ་གང་ཡིན་པ་བསམས་ལ། དེ་ལས་འོད་ཟེར་སྤྲོ་བ་དང་བསྡུ་བ་གོང་མ་ལྟར་རོ། །རྡོ་རྗེ་ཉི་མའི་ནི་ལོགས་ནའོ། །དེ་ཡན་ཆད་ཀྱིས་ནི། སངས་རྒྱས་ཀུན་གྱིས་བྱང་ཆུབ་སེམས། །ཞེས་བྱ་བ་ལ་སོགས་པའི་བསྐྱེད་པ་དང་རྫོགས་པའི་རང་བཞིན་གྱི་དཀྱིལ་འཁོར་བསྟན་ཏོ། །ད་འདི་ཡན་ཆད་ནི་སློབ་དཔོན་གྱི་ལས་ཀྱི་རིམ་པའི་ཆོ་ག་རྒྱས་པ་བཤད་དེ། དེ་ལ་ཡང་དཀྱིལ་འཁོར་བྲི་བ་དང༌། ལྷ་ལ་སོགས་པ་དགོད་པ་དང༌། མཆོད་པ་གསུམ་གྱིས་བསྟན་པ་སྟེ། དེ་ལ་ཡང་དཀྱིལ་འཁོར་བྲི་བ་སྟོན་ཏེ། དེ་ལ་ཡང་ཚོན་དགྱེས་བ་དང༌། བྱིན་གྱིས་བརླབས་པའོ། །དེ་ཡང་བྱིན་གྱིས་བརླབས་པ་སྟོན་ཏེ། དེ་ལ་ཡང་སྔོན་དུ་འགྲོ་བའི་ཡན་ལག་བསྙེན་པ་བསྟན་ཏེ། དམ་ཚིག་དང༌། དབང་བསྐུར་བ་ཐོབ་པས་ཟླ་བ་གཅིག་གམ་ལོ་གཅིག་གི་བར་དུ་རིག་པའི་བརྟུལ་ཞུགས་སྤྱད་པར་བྱའོ། །དེ་ལ་དང་པོར་ཁྲུས་བྱས་ལ་དེ་ནས་ཕྱག་འཚལ་བ་ལ་སོགས་པ་སྔོན་དུ་འགྲོ་བས་ཉི་མ་རེ་རེ་ཞིང་སྔོམ་པ་བཟུང་བ་ཡང་ལན་དྲུག་ཏུ་བྱའོ། །དེ་ནས་སྡིག་པ་དྲལ་བ་དང༌། ཕྱག་རྒྱ་ཐམས་ཅད་འགྲོལ་བ་ཇི་ལྟ་བ་བཞིན་དུ་བྱས་ལ་རྣལ་འབྱོར་ཆེན་པོ་བྱའོ། །དེ་ནས་སྙིང་གར་དཀྱིལ་འཁོར་ཇི་ལྟ་བ་བཞིན་བསྒོམ་པར་བྱའོ། །ཡང་ན་རྣལ་འབྱོར་ཆེན་པོ་དང༌། དང་པོ་སྦྱོར་བ་དང༌། དཀྱིལ་འཁོར་རྒྱལ་པོ་མཆོག་རྣམ་པར་བསྒོམས་ནས། བསྡུ་བ་བྱ་བ་དང༌། ཕྱག་འཚལ་བ་དང༌། ཆེད་དུ་བརྗོད་པ་དང༌། དེ་བཞིན་གཤེགས་པ་ཐམས་ཅད་ལ་ཕྲེང་བའི་དབང་བསྐུར་བ་ལ་སོགས་པ་ཐམས་ཅད་བླངས་ལ་དེ་བཞིན་གཤེགས་པ་ཐམས་ཅད་རྡོ་རྗེ་ལྕགས་ཀྱུ་ལ་སོགས་པས་དགུག་པ་དང༌། གཞུག་པ་དང༌། བཅིང་པ་དང༌། དབང་དུ་བྱས་ནས་དམ་ཚིག་གི་ཕྱག་རྒྱ་རྣམས་ཀྱིས་བསྒྲུབ་པར་བྱའོ། །དེ་ནས་ཆོས་དང་ལས་དང༌། ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་པ་དང་དབང་བསྐུར་ཏེ་ལས་རྣམས་ལ་ངེས་པར་སྦྱར་བར་བྱའོ། །དེ་ལ་དང་པོ་རེ་ཞིག་ཀུན་རིག་རྣམ་པར་སྣང་མཛད་ཀྱི་
ཕྱག་རྒྱ་ཆེན་པོ་བཅིངས་ལ་སངས་རྒྱས་ཐམས་ཅད་གཅིག་ཏུ་བསྡུས་པར་མཛོད་ཅིག་ཅེས་རང་གི་ལས་ལ་ངེས་པར་སྦྱར་བར་བྱའོ་ཞེས་པ་ནས། བྱམས་པ་ལ་སོགས་པ་ལ་དམ་པའི་ཆོས་ཀྱི་གྲོང་ཁྱེར་ཡོངས་སུ་སྐྱོངས་ཤིག་ཅེས་བྱ་བ་ཡན་ཆད་ཀྱིས་ཐམས་ཅད་ཀྱི་ཐམས་ཅད་དུ་ཕྱག་རྒྱ་ཆེན་པོ་བཅིངས་ལ་རང་གི་ལས་ལ་མངོན་པར་སྦྱར་བ་ཡིན་པར་ཤེས་པར་བྱའོ། །དེ་ལྟར་ལས་ཀྱི་མཆོག་ངེས་པར་བསྒོམས་ནས། ཡང་རྡོ་རྗེ་སེམས་དཔའི་སྦྱོར་བས་བསྡུ་བ་བྱས་ནས་བསྟོད་པ་དང་དགུག་གཞུག་བཅིང་བ་ལ་སོགས་པ་བྱ་བ་དང༌། ཕྱག་རྒྱ་བཞིས་རྒྱས་གདབ་པ་དང་དབང་བསྐུར་བ་དང༌། མཆོད་ཡོན་སྔོན་དུ་འགྲོ་བ་དང༌། ཕྱིའི་ཡོ་བྱད་ཐམས་ཅད་ཀྱིས་ཡང་དག་པར་མཆོད་པ་དང༌། སྒེག་མོ་ལ་སོགས་པ་དང༌། ལས་ཀྱི་དཀྱིལ་འཁོར་དུ་གསུངས་པའི་མཆོད་པ་བཅུ་དྲུག་དང༌། ཡིད་ཀྱིས་མཆོད་པ་སྟེ། མཆོད་པའི་ཁྱད་པར་ཐམས་ཅད་ཀྱིས་ཀྱང་ལེགས་པར་མཆོད་ལ་ཕྱག་བཞི་བྱས་ནས་སྔགས་གསུམ་གྱི་དོན་གྱིས་ཐམས་ཅད་ཀྱང་བདག་ཉིད་དོ་ཞེས་བསྒོམ་མོ། །དེ་ནས་མཆོད་ཅིང་བསྟོད་དེ་ནང་སེམས་ཀྱི་དཀྱིལ་འཁོར་གྱི་རང་བཞིན་ལ་གནས་ཏེ། ཡང་མཆོད་ཅིང་བསྟོད་ལ་ཕྱག་རྒྱ་བཀྲོལ་ལ་དབང་བསྐུར་ཏེ། གོ་ཆ་བགོས་ནས་མཉམ་པའི་ཐལ་མོས་མཉེས་པར་བྱས་ལ། དགེ་བའི་རྩ་བ་ཡོངས་སུ་བསྔོས་ནས་མཆོད་ཡོན་ཕུལ་ཏེ། སླར་བྱོན་པའི་ཕྱིར་བསྐུལ་ཏེ་གཤེགས་སུ་གསོལ་བར་བྱའོ། །དེ་ནས་རྡོ་རྗེ་བསྲུང་བ་དང༌། །རྡོ་རྗེ་གནོད་སྦྱིན་དང༌། རྡོ་རྗེ་ཁུ་ཚུར་གྱིས་བདག་ཉིད་བསྲུང་བ་བྱས་ནས་མཆོད་རྟེན་གྱི་ལས་ལ་སོགས་པའི་བྱ་བ་བྱའོ། །དེ་ལྟར་ཉིན་རེ་ཞིང་ཐུན་བཞིའི་སྦྱོར་བས་རིག་པའི་བརྟུལ་ཞུགས་རྟོགས་པར་བྱའོ། །དེ་ལྟར་རྫོགས་ནས་དཀྱིལ་འཁོར་བྲི་བ་ནི་གཙུག་ལག་ཁང་ངམ། སྐྱེད་མོས་ཚལ་ལམ། མཆོད་རྟེན་ནམ། ལྷ་ཁང་ངམ། ཀུན་དགའ་ར་བའམ། གྲོང་ངམ། གྲོང་ཁྱེར་གྱི་ཤར་ཕྱོགས་ཀྱི་ཆར་ཡིད་དང་རྗེས་སུ་མཐུན་པ་ཤིན་ཏུ་མཉམ་ཞིང་སྣུམ་པ། ཤར་དུ་གཞོལ་བ་ཤིན་ཏུ་ཚད་དང་ལྡན་པ། ཚ་སྒོ་མེད་པའི་སའི་ཆ་དེར། །ཇི་བཞིན་པ་ཡི་ཆོ་ག་ཡིས། །གནས་ནི་བྱིན་གྱིས་བརླབ་པ་བརྩམས། །བྱིན་གྱིས་བརླབ་པའི་
གནས་དེར་ནི། །ཕྱི་ཡི་དཀྱིལ་འཁོར་བྲི་བར་བྱ། །ཞེས་པ་ལ། ཇི་བཞིན་པའི་ཆོ་ག་ཡིས་ཞེས་བྱ་བས་ནི་རྒྱལ་པོས་ཁྲུ་གང་ལྔ་བཅུའམ་བརྒྱའོ། །བློན་པོ་དང་བློན་པོ་ཆེན་པོས་ནི་ཁྲུ་གང་ལྔ་བཅུའམ་ཉི་ཤུ་རྩ་ལྔའོ། །ཚོང་དཔོན་ནམ་སྡེ་དཔོན་གྱིས་ཁྲུ་ཉི་ཤུ་རྩ་ལྔའམ་དེའི་ཕྱེད་དོ། །སྒྲུབ་པ་པོས་ནི་བཅུ་གཉིས་སམ་དྲུག་པར་བྱའོ། །དེ་ལ་དང་པོར་རེ་ཞིག་མངོན་པར་འདོད་པའི་དཀྱིལ་འཁོར་གྱི་དབུས་སུ་མི་རུས་ཀྱི་ཕྱེ་མ་དང༌། །བྲག་དང་དུག་དང་བཅས་པ་དང༌། མངོན་སྤྱོད་ཀྱི་སྦྱིན་སྲེག་གི་ཆོ་གས་དཀྱིལ་འཁོར་གྱི་བགེགས་བཟློག་ནས་བདག་དང་སློབ་མ་དང་ས་བདག་ལ་སོགས་པ་ཞི་བར་བྱེད་པའི་ཞི་བའི་སྦྱིན་སྲེག་བྱའོ། །དེ་ནས་ས་སྦྱོང་བ་བྱེད་དུ་གཞུག་སྟེ། འདོམ་གང་ཙམ་མམ། ལྐོག་མ་འམ། ལྟེ་བའམ། པུས་མོ་ནུབ་པ་ཙམ་དུ་བརྐོས་ལ་གྱོ་མོ་ལ་སོགས་པ་བསལ་ལ། སྤོས་ཆུ་དྲི་ཞིམ་པས་བྲན་པའི་ལས་བཀང་ནས་རྡོ་རྗེ་རྩེ་མོ་ཡོངས་སུ་བཟླས་པའི་ཆག་ཆག་བཏབ་སྟེ། འཐས་པར་བཅགས་ལ་ཤིན་ཏུ་མཉམ་པར་བྱས་ལ། ཁང་པ་བརྩེགས་པའི་ནང་དུ་ཆུད་པ་རྟ་བབས་བཞིས་མཛེས་པར་བྱས་ལ། སྒོ་བཞི་དང་སྐར་ཁུང་གིས་ཡོངས་སུ་བསྐོར་བ། མཐའ་མ་དྲིལ་བུས་གཏམས་པའི་རྒྱལ་མཚན་དང་བླ་རེ་ལ་སོགས་པ་བྲེས་པས་ཉེ་བར་མཛེས་པར་བྱས་ལ། སངས་རྒྱས་རིན་པོ་ཆེ་ལ་སོགས་པའི་རས་རིས་དང༌། སྐུ་གཟུགས་ལ་སོགས་པའི་རྒྱན་གྱིས་བརྒྱན་པ་གྲྭ་བཞི་ར་གཞག་པའི་སྤོས་སྣོད་རྣམས་ལེགས་པར་བཏུལ་ལ། མེ་ཏོག་དང༌། མར་མེ་དང༌། དགོས་པའི་ཡོ་བྱད་རྣམས་ཀྱིས་མཛེས་པར་བྱས་པའི་ས་དྲིས་ཉེ་བར་བྱུགས་ནས་རྡོ་རྗེ་གནོད་སྦྱིན་ཡོངས་སུ་བཟླས་པའི་སྤོས་ཆུས་ཡོངས་སུ་བསངས་ལ། ས་ལ་ལག་པ་བཞག་སྟེ་རྡོ་རྗེ་སེམས་དཔའི་ཡི་གེ་བརྒྱ་པ་ལན་བདུན་བཟླས་པར་བྱའོ། །ས་སྦྱོང་པ་དང་ཡོངས་སུ་བཟུང་པའི་ཆོ་གའོ། །དེ་ནས་རང་ཉིད་ཁྲུས་བྱས་ཤིང་ལུས་དྲི་ཞིམ་པོས་བྱུགས་ལ། ཇི་སྙེད་པའི་གོས་དང་རྒྱན་གདགས་ཤིང་ཤིན་ཏུ་དམར་བའི་གོས་བགོ་བ་དང༌། མེ་ཏོག་ཕྲེང་བ་གདགས་པ་དང༌། ཤིང་ཐོག་དྲི་ཞིམ་པོ་བཅའ་བ་བྱས་ལ་ཡར་གྱི་ཚེས་བརྒྱད་ནས་
བརྩམས་ཏེ། ཚེས་བཅུའམ། བཅུ་གསུམ་མམ། ཚེས་བཅུ་བཞི་ནས་བརྩམས་ཏེ་བཅོ་ལྔའི་བར་དུའམ། ཚེས་བཅོ་ལྔའི་ཐུན་མཚམས་ནས་བརྩམས་ཏེ་དཀྱིལ་འཁོར་གྱི་ལས་བྱའོ། །དེ་ལ་སྨྱུང་བར་གནས་པའི་སའི་ཆར་ནི་ཕྱག་དར་དང་སྐྱོང་ནུལ་ལ་སོགས་པ་བྱས་ལ། དེ་བཞིན་དུ་ལག་པས་རེག་པ་ལ་སོགས་པ་བྱས་ནས་རྡོ་རྗེ་སེམས་དཔའ་དང༌། ཡི་གེ་བརྒྱ་པ་བཟླ་བར་བྱའོ། །དེ་ནས་དཀྱིལ་འཁོར་གྱི་སའི་དབུས་སུ་འཇུག་ལ། བདག་ཉིད་སྨྱུང་བ་དང༌། བགེགས་གཞོམ་པ་ལ་སོགས་པ་བྱའོ། །དེ་ནས་འཁོར་ལོའི་ཕྱག་རྒྱ་ཀུན་རིག་རྣམ་པར་སྣང་མཛད་ཀྱི་དཀྱིལ་འཁོར་སྤྲུལ་ལ། ཕྱག་བཙལ་བ་སྔོན་དུ་འགྲོ་བ་དང༌། སྡོམ་པ་བཟུང་ལ་རྣལ་འབྱོར་ཆེན་པོ་དང༌། གཞལ་ཡས་ཁང་གདན་དང་བཅས་པ་ཡང་བསྐྱེད་ལ། སེམས་དཔའི་སྐྱིལ་ཀྲུང་དུ་འདུག་སྟེ། དེང་དུ་བདག་ཚེ་འབྲས་བུ་ཡོད། །ཅེས་བྱ་བ་ནས། དིང་བདག་འདུས་པ་མཆོག་ཡིན་ནོ། །ཞེས་བྱ་བའི་བར་གྱིས་བདག་ཉིད་སྤྲོ་བ་བསྐྱེད་པའི་བྱའོ། །དེ་ནས་ཡན་ལག་ཐམས་ཅད་ཀྱིས་ཕྱག་བྱས་ལ་སྤོས་སྣོད་ལག་ཏུ་ཐོགས་ཏེ། མ་ལུས་ཕྱོགས་ན་བཞུགས་པ་ཡི། །ཞེས་བྱ་བ་ལ་སོགས་པས་སངས་རྒྱ་ཐམས་ཅད་སྤྱན་དྲང་ངོ༌། །དེ་ནས་ཡང་དང་པོའི་སྦྱོར་བ་དང༌། དཀྱིལ་འཁོར་རྒྱལ་པོ་མཆོག་རྣམ་པར་བསྒོམས་ལ། རྡོ་རྗེ་སེམས་དཔའི་གནས་ལ་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོས་གནས་ཤིང་ཨོཾ་སརྦ་བཏི་བཛྲ་སཏྭ་ཧཱུཾ་ཞེས་ཟློས་པ་བརྩོན་པའི་རྣལ་འབྱོར་པ་ལ་ཀུན་རིག་རྣམ་པར་སྣང་མཛད་ཀྱི་དཀྱིལ་འཁོར་ཆེན་པོ་བྲི་པའི་ཕྱིར་སྒྲུབ་པའི་གྲོགས་མཆོག་དེ་བཞིན་གཤེགས་པའི་ང་རྒྱལ་དང་ལྡན་པས་མཚན་བརྒྱ་རྩ་བརྒྱད་པས་གསོལ་བ་གབ་པོ། །དེ་ནས་སེམས་དཔའི་སྐྱིལ་མོ་ཀྲུང་འདུག་པ་ལས་ལངས་ཏེ། དེ་བཞིན་གཤེགས་པ་ཐམས་ཅད་ཀྱིས་ནམ་མཁའ་གང་བར་བསམས་ཏེ། དེ་བཞིན་གཤེགས་པ་ཐམས་ཅད་ལ་དཀྱིལ་འཁོར་ལྔ་པས་ཕྱག་བྱས་ལ་འདི་སྐད་བརྗོད་པར་བྱའོ། །བདག་ནི་རང་ཉིད་རྡོ་རྗེ་ཅན། །ཞེས་བྱ་བ་ལ་སོགས་པ་བརྗོད་ལ། དཀྱིལ་འཁོར་ནམ་མཁའ་ལ་བཏེག་སྟེ་ནམ་མཁའ་ལ་བཞག་ལ། བདག་ཉིད་ཡང་བྱིན་གྱིས་བརླབས་ཏེ། ཨོཾ་སརྦ་བིདྟ་དྲྀཥྚ་མ་ཊ། ཞེས་བྱ་བ་མིག་གཉིས་སུ་བཀོད་ལ། ཨ་ཞེས་བྱ་བ་ལས་རྐང་པ་གཉིས་སུ་སྣ་ཚོགས་
རྡོ་རྗེ་བསྐྱེད་ལ། གཡས་བརྐྱད་ལ་སོགས་པ་དང༌། དཀྱིལ་འཁོར་དང༌། ནམ་མཁའ་དང༌། ས་བཅིངས་པ་དང༌། ར་བ་དང༌། དྲ་བ་དང༌། ས་གཞི་རྡོ་རྗེ་རྒྱ་གྲམ་ཡན་ཆད་བྱས་ནས་ཕུར་བུའི་བསྲུང་བ་ཡང་བྱའོ། །ཡང་དཀྱིལ་འཁོར་ཆོ་ག་ལས་བཤད་པའི་ཚུལ་གྱིས་ལྷག་པར་གནས་པའི་ཆོ་ག་རྣམས་རྗེས་སུ་སྤྱད་པར་བྱའོ། །དེ་ལ་ནི་གནས་ནི་བྱིན་གྱིས་བརླབས་པ་ཙམ་ཞེས་བྱའོ། །དེ་ནས་བྱིན་གྱིས་བརླབས་པའི་གནས་དེར་ནི་ནང་པར་ཉི་མ་འཆར་བའི་དུས་སུ་དཀྱིལ་འཁོར་དེའི་དམ་ཚིག་གི་ཕྱག་རྒྱ་དེ་ཉིད་ཀྱིས་ནམ་མཁའ་ལ་བཏེགས་ལ་ཐིག་གདབ་པར་བྱའོ། །དེ་ཡང༌། གྲུ་བཞི་པ་ལ་སྒོ་བཞི་པ། །ཞེས་བྱ་བ་ལ་སོགས་པ་གསུངས་ཏེ། དང་པོ་རས་བལ་རིན་མི་བརྩེག་པར་ཉོས་ལ། བུ་མོ་གཙང་མས་བཀལ་བའི་སྲད་བུ་ཚོན་རྩི་དྲི་ཞིམ་པོ་སྔོན་པོ། དམར་པོ་ལྗང་གུ་སེར་པོ། དཀར་པོས་སོ་སོར་ཁ་དོག་བསྒྱུར་ལ་གོ་རིམས་འདི་ཉིད་ཀྱིས་གཞག་པ་ལ། ཧཱུཾ་ཏྲཱཾ་ཧྲཱིཿ་ཨོཾཿ་ཨ་ཞེས་བྱ་བའི་རང་གི་ས་བོན་གྱིས་མི་བསྐྱོད་པ་ལ་སོགས་པ་སྲད་བུ་ལ་བཀོད་དེ། དཱིཔྟ་དྲྀཥྚཱཾ་ཀུ་ཤི་ཛ་ཞེས་བྱ་བ་མིག་གཉིས་སུ་བཀོད་ལ། །རབ་ཏུ་གཡོ་ཞིང་འབར་པའི་མིག །མིག་གི་རྫི་མ་འདྲེན་པ་ནི། །ཞེས་བྱ་བ་འབར་བའི་ལྟ་བ་དང༌། བཅོམ་ལྡན་འདས་དཀྱིལ་འཁོར་ཆེན་པོ་ཐིག་གདབ་པར་བྱ་བའི་ཕྱིར་རྡོ་རྗེའི་ཐིག་གདབ་པ་བདག་ལ་སྩོལ་ཅིག་ཅེས་བརྗོད་པས་མི་བསྐྱོད་པ་ལ་སོགས་པ་ཡང་དག་པར་བསྐུལ་བར་བྱའོ། །དེ་ནས་མི་བསྐྱོད་པ་ལ་སོགས་པས་རང་རང་གི་ས་བོན་གྱི་འོད་ཀྱིས་སྲད་པུ་བཏང་བ་འབར་བའི་ལྟ་བས་བསྐུལ་ལ་རང་གི་ལག་ན་གནས་པའི་སྲད་བུ་བཀལ་ལ། ཨོཾ་ཨ་ནྱོ་ནྱཱ་ནུ་ཞེས་བྱ་བ་ལ་སོགས་པས་བསྒྲིལ་བར་བྱའོ། །མ་དང་ཊ་གཉིས་ཀྱི་གཡས་པ་དང་གཡོན་པ་ཉི་མ་དང་ཟླ་བར་བསྐྱེད་ལ། །བཛྲ་དྲྀཥྚ་མ་ཊ་ཞེས་བྱ་བས་བརྟན་པར་བྱས་ནས་ཐིག་སྐུད་དེ་གསེར་ལ་སོགས་པའི་སྣོད་དྲིས་བྱུགས་པར་བཞག་ལ། དྲི་དང་མེ་ཏོག་ལ་སོགས་པས་མཆོད་ལ། རྡོ་རྗེ་བསྡམས་པས་བཟུང་ལ། ཨོཾ་བཛྲ་ས་མ་ཡ་སཱུ་ཏྲ་མཱ་ཏི་ཀྲ་མ་ཧཱུཾ་ཞེས་བྱ་བ་ལན་བརྒྱ་རྩ་བརྒྱད་བཟླས་པར་བྱའོ། །དེ་ནས་སརྦ་བཏི་བཅུ་གཉིས་བཟླས་པའི་དྲིས་དཀྱིལ་འཁོར་ཉེ་བར་བྱུགས་ལ་མེ་ཏོག་གིས་ཀུན་ནས་མཛེས་པར་བྱས་ལ། བར་
སྣང་ལ་བཞུགས་པའི་རིགས་ཐམས་ཅད་ལ་མཆོད་པ་བྱས་ཏེ་དཀྱིལ་འཁོར་བཏེག་པར་བྱའོ། །དེ་ནས་ལས་ཀྱི་ཐིག་གདབ་པར་བྱ་སྟེ། དེ་ལ་རེ་ཞིག་ཚོན་དཀར་པོ་ལས་ཐིག་སྦྱར་བར་བྱའོ། །དེ་ནས་ཆོ་ག་ལས་འབྱུང་བ་བཞིན་ཐིག་གདབ་པར་བྱའོ། །གྲུ་བཞི་པ་ལ་སྒོ་བཞི་པ། །ཞེས་འབྱུང་བས། གྲུ་བཞི་པ་ནི་ཤར་དང་ནུབ་དང་བྱང་དང་ལྷོའི་ཐིག་གདབ་པའོ། །དེ་བཞིན་དུ་ཁ་ཁྱེར་གྱི་ཐིག་དག་ཀྱང་ཕྱི་དང་ནང་གི་དཀྱིལ་འཁོར་ཀུན་གྱིས་གདབ་པའོ། །དེ་ལ་ཤར་ལ་སོགས་པའི་སྒོ་བཞིའི་ཐིག་ལ་བྱ་བས་ན། སྒོ་བཞི་པ་ཞེས་བྱ་སྟེ། ནང་གི་སྒོ་ནི་ཕྱིའི་དང་འདྲ་བ་ལ་རྟ་བབས་མེད་པའོ།། ཕྱིའི་ནི་རྟ་བབས་དང་བཅས་པའོ། །རྟ་བབས་བཞི་དང་བཅས་པའོ་ཞེས་པ་ནི་གོ་སླའོ། །ཐེམ་སྐས་ནི་རྟ་བབས་བཞིའོ། །སེང་གེ་ནི་མི་འཇིགས་པ་དང༌། སྟོབས་བཅུ་རྣམ་པར་དག་པའི་གླང་པོ་ཆེས་སྒོའི་གློ་གཉིས་སུ་བརྒྱན་པའོ། །རྣམས་ནི་རྫུ་འཕྲུལ་བཞི་རྣམ་པར་དག་པ་དང༌། ཐོགས་པ་མེད་པ་ནམ་མཁའ་ལྡིང་ངོ༌། །རྟ་བབས་འདེབས་པའི་ཀ་བ་རྣམས་ཀྱི་མགུལ་དང་རྟ་བབས་ཀྱི་སྟེང་དུ་རྡོ་རྗེ་རིན་ཆེན་གྱི་མགུལ་དུ་དར་ཏེ་བ་དང་དང་དོ་ཤལ་གྱི་ཕྲེང་བ་དང༌། དྲིལ་བུ ་དང་རྔ་མས་བརྒྱན་པའོ། །རྡོ་རྗེ་རིན་ཆེན་པདྨ་དང༌། རྒྱ་གྲམ་པའི་ཕྱག་རྒྱས་བཅིངས་པ་ནི་ཟླ་བ་ཕྱེད་པ་ལ་གནས་པའི་རྡོ་རྗེ་དང༌། རིན་པོ་ཆེ་དང༌། པདྨ་དང༌། རྒྱ་གྲམ་གྱིས་བརྒྱན་པའི་རྒྱན་གྱིས་དཀྱིལ་འཁོར་གྱི་གྲྭ་དང༌། །སྒོ་དང་སྒོ་ཁྱུད་རྣམས་སུ་བརྒྱན་པར་ཐིག་གདབ་བོ། །སྲད་བུ་བརྒྱད་དང་ལྡན་པ་ལ། །ཞེས་བྱ་བ་ནི་ཕྱོགས་ཐིག་བཞི་ཚངས་པའི་ཐིག་བཞི་སྟེ། བརྒྱད་དང་ལྡན་པར་བྱས་སོ། །ཕྱིའི་རྟ་བབས་དང་བཅས་པའི་སྒོའོ། །ལ་ལ་དག་སྒོ་གསུམ་པའོ་ཞེས་གསུངས་ཏེ། བདག་གིས་དཀྱུས་ཀྱིས་ཀྱང་སྒོ་གསུམ་པར་མ་མཐོང་སྟེ། སྒོ་གཉིས་པར་བཞེད་དོ། །དགུ་ཡི་ཆར་ནི་བགོས་པ་ལས། །ཞེས་པ་ནི་དཀྱིལ་འཁོར་ཆ་དགུར་བགོས་པ་ལ་ཕྱིའི་སྒོ་ཁྱུད་ལས་སུམ་ཆ་གཅིག་གཏད་ཅེས་འབྱུང་ངོ༌། །དེ་ལྟར་རྡོ་རྗེ་སྲད་བུས་ཕྱིའི་དཀྱིལ་འཁོར་གྱི་ཐིག་གདབ་བ་བོ་ཞེས་གསུངས་སོ། །ད་ནི་དབུས་ཀྱི་རྡོ་རྗེའི་ཐིག་གིས་དཀྱིལ་འཁོར་གྱི་ཐིག་གདབ་པ་སྟོན་ཏེ། དབུས་ཀྱི་དཀྱིལ་འཁོར་ཐིག་གདབ་པ། །ཞེས་བྱ་བས་ནི་སེང་ལྡེང་གི་ཕུར་བུ་སྨད་རྡོ་རྗེ་རྩེ་གཅིག་པ་ལྟ་བུ་སྟོད་རྡོ་རྗེ་རྩེ་
ལྔ་པ་ལྟ་བུ་བྱས་ལ། རྡོ་རྗེ་ཕུར་བུའི་སྔགས་ཡོངས་སུ་བཟླས་ལ། རྡོ་རྗེས་བརྡུངས་པ་དེ་ལ་བརྟོད་པའི་སྲད་བུས་ནང་གི་དཀྱིལ་འཁོར་གྱི་ཕྱི་རོལ་དུ་རྡོ་རྗེ་ཕྲེང་བའི་དབང་ལྡན་ནས་བརྩམས་ཏེ། བསྐོར་ཕྱོགས་སུ་ཐིག་གདབ་པར་བྱའོ། །དེ་ནས་ཕོ་བྲང་གི་རིམ་པ་གསུམ་དུ་བསྐོར་ཕྱོགས་སུ་ཐིག་གདབ་པར་བྱའོ། །ཆོས་ཀྱི་འཁོར་ལོ་ཟླུམ་པོར་བསྐོར་བ་ལ་བྱའོ། །ལྟེ་བ་ནི་རིམ་པ་དགུར་བྱས་པའོ། །བཅས་པ་ནི་རེའུ་མིག་དང་བཅས་པའོ། །རྩིབས་བཅུ་དྲུག་འཁོར་ལོ་རྡོ་རྗེ་འབེབས་པ་ལ་སོགས་པའི་གནས་རྩིབས་བཅུ་དྲུག་ཏུ་བྱས་པའོ། །རིམ་པ་གསུམ་ནི་ཕྱི་རོལ་གྱི་རྡོ་རྗེ་ར་བ་དང༌། འཁོར་ལོ་དང་ལྟེ་བའོ། །འཁོར་ལོའི་རྩིབས་ལ་ནི་རྣམ་པར་སྣང་མཛད་དང༌། ངན་སོང་སྦྱོང་བའི་གནས་ཀྱི་ཉིས་འགྱུར་རོ། །དེ་ལྟར་ཐིག་གདབ་པ་ཡང་རྡོ་རྗེ་རྩེ་མོ་ལས། གྲུ་བཞི་པ་ལ་སྒོ་བཞི་པ། །འཁོར་ལོ་རིམ་པ་རྩིབས་བཅུ་དྲུག །རྡོ་རྗེ་ཕྲེང་བས་ཡོངས་བསྐོར་བར། །དཀྱིལ་འཁོར་དབུས་མ་བྲི་བར་བྱ། །ཞེས་བཅོམ་ལྡན་འདས་ཀྱིས་གསུངས་སོ། །དེ་བས་ན་འདི་ལ་ཐེ་ཚོམ་མི་བྱའོ། །དེ་ཡང་འཁོར་ལོ་ལྟར་བསྐོར་བ་ཁོ་ན་ལ་ཡང་མི་བྱ་སྟེ། སཾ་གྲ་ཧ་ལས། དཀྱིལ་འཁོར་འཁོར་ལོ་ཡིན་པར་བཤད། །ཅེས་གསུངས་པ་ན་སྤྱིར་བཤད་ཀྱི་གཅིག་ཏུ་ནི་ངེས་པ་མེད་དོ། །དེ་ཡང་དེ་ཉིད་ལས། རྡོ་རྗེ་ཐིག་གིས་ཡོངས་བསྐོར་བ། །ཞེས་གསུངས་པ་འདིས་ཀྱང་འདི་ཐ་དད་པར་གྱུར་པ་ཡིན་པར་ཤེས་པར་བྱའོ། །དེ་ནས་དཀྱིལ་འཁོར་གྱི་ལྟེ་བ་ན་གནས་པའི་ཕུར་བུ་ཡི་གེ་ཧཱུཾ་བཞིས་བཏོན་ལ་འོག་ནས་བཤད་པའི་ཚོན་སྣ་ལྔས་ཕུར་བུའི་བུ་ག་བཀང་ལ་མཉམ་པོར་བྱས་ནས་ཧི་ཞེས་བྱ་བས་མིག་གཡས་དང༌། གཡོན་ཉི་མ་དང་ཟླ་བར་བསྐྱེད་ལ། ཁྲོ་བོའི་ལྟ་བས་ཀུན་དུ་བལྟས་ལ་སྒོ་རྣམས་དབྱེ་བར་བྱའོ། །ཐིག་གདབ་པའི་ཆོ་གའོ། །ཐིག་ལེ་ཚོན་གྱིས་དགང་བ་དང༌། ཚོན་གྱི་རིམ་པ་འདི་ལྟར་ཤེས་པར་བྱའོ། །ཨོཾ་བཛྲ་ཙི་ཏྲས་མ་ཡ་ཧཱུཾ་ཞེས་པས་ཕྱག་རྒྱ་དང་ལྡན་པས་ཚོན་ཐམས་ཅད་ལ་ལན་བདུན་བཟླས་ན་རྡོ་རྗེའི་རང་བཞིན་དུ་འགྱུར་རོ་ཞེས་རྡོ་རྗེ་འཆང་ཆེན་པོས་གསུངས་སོ། །དེ་ལ་ཕྱག་རྒྱ་ནི་འདི་ཡིན་ཏེ། རྡོ་རྗེ་ཕྱག་རྒྱ་གཉིས་ལ་ནི། །མཛུབ་མོའི་རྩེ་མོ་མཉམ་སྦྱར་བས། །བྱས་ན་ཚོན་རྩི་ཐམས་
ཅད་ནི། །འབར་བའི་ལྟ་བས་དགུག་པར་བྱ། །ཧི་ཞེས་བྱ་བའི་མཐར་ཁྲོ་བོ་ཏི་རཱིནྟི་རིའི་ཕྱག་རྒྱ་བཅིངས་ལ་སྦར་བར་བྱའོ། །དེ་ལ་ཚོན་རྩི་དཀར་པོ་ནི་དེ་བཞིན་གཤེགས་པ་དཀར་པོའི་རྡུལ་ཕྲ་རབ་རྣམས་གཞུག་པར་བྱའོ། །སེར་པོ་ལ་ནི་སེར་པོའོ། །སྔོན་པོ་ལ་ནི་སྔོན་པོའོ། །ལྗང་གུ་ལ་ནི་ལྗང་གུའོ། །དམར་པོ་ལ་ནི་དམར་པོ་བཅུག་ནས་ཇི་སྐད་དུ་བཤད་པའི་འབར་བའི་ལྟ་བས་མངོན་པར་སྦྱང་བའི་དུས་སུ་ཡང་དང་པོའི་རྡོ་རྗེ་ཐོག་མར་ཚོན་དགྱེ་བ་བརྩམས་པར་བྱས་ལ། ཚོན་ཐམས་ཅད་དབང་ལྡན་གྱི་ཕྱོགས་ནས་བརྩམས་ཏེ། བསྐོར་ཕྱོགས་སུ་ཨོཾ་སརྦ་བཏི་ཀྱི་སྔགས་ཟློས་ཤིང་དགྱེ་ལ། དེའི་འོག་ཏུ་ཇི་ལྟར་དགའ་བར་ཚོན་དགྱེ་བར་བྱའོ། །ཚོན་དགྱེ་བའི་རིམ་པ་ནི་འདི་ཡིན་ཏེ། དང་པོར་དམར་པོ་དང༌། ལྗང་གུ་དང༌། སྔོན་པོ་དང༌། སེར་པོ་དང༌། དཀར་པོ་ནི་ཐམས་ཅད་ཀྱི་ནང་དུའོ། །དབུས་ཀྱི་སའི་ཆ་གཉིས་ནི་དཀར་པོའོ། །ཤར་དུ་དམར་པོའོ། །ལྷོ་རུ་སྔོན་པོའོ། །ནུབ་ཏུ་སེར་པོའོ། །བྱད་དུ་ལྗང་གུའོ། །འཁོར་ལོའི་རྩིབས་ནི་རིགས་ཀྱི་ཁ་དོག་གོ །སྒོ་ཁྱམས་ནི་ཤར་དང་ལྷོ་དང་ནུབ་དང་བྱང་དུ་དཀར་བ་དང༌། སྔོ་བ་དང༌། སེར་བ་དང༌། ལྗང་གུའོ། །ཚོན་གྱི་རིམ་པའོ། །དེས་ནི་དཀྱིལ་འཁོར་བྲི་བའི་རིམ་པ་བསྟན་ཏོ། །ད་ནི་ལྷ་རྣམས་དགོད་པ་བསྟན་ཏེ། དབུས་སུ་མཁས་པས་ཀུན་རིག་ནི། །ཞེས་བྱ་བ་ལ་སོགས་པ་གསུངས་ཏེ། དབུས་སུ་ཀུན་རིག་རྣམ་པར་སྣང་མཛད་སྐུ་མདོག་དཀར་པོ་དུང་དང་ཀུན་ད་ལྟར་དཀར་ཞིང་སྣུམ་པ་ཞལ་བཞི་པ་ནི་ཡེ་ཤེས་བཞི་དང༌། སྐུ་བཞིས་བརྒྱན་པའི་རྟགས་སུ་བསྟན་ཡང་སྐུ་བཞི་ནི་ངོ་བོ་ཉིད་ཀྱི་སྐུ་དང༌། རྣམ་པར་སྨིན་པའི་སྐུ་དང༌། ལོངས་སྤྱོད་རྫོགས་པའི་སྐུ་དང༌། སྤྲུལ་པའི་སྐུའོ། །དེ་ཡང་དུས་གསུམ་དུ་ཀུན་རྫོབ་ཏུ་གཟུགས་སུ་བཞུགས་ཀྱིས་དོན་དམ་པར་ཡོད་པ་མ་ཡིན་ནོ། །དེ་ཡང༌། །གང་འདི་རྒྱ་ཆེན་དུ་མ་ཡི། །ཁ་དོག་དབྱིབས་དང་གདན་རྣམས་དང༌། །ཕྱག་མཚན་བརྒྱད་སོགས་དབྱེ་བ་ནི། །སྐུ་ཡི་གསང་བར་འདི་ཞེས་བྱ། །ཞེས་གསུངས་པའི་ཕྱིར་རོ། །དེ་ལ་དེ་བཞིན་གཤེགས་པ་དང་རྡོ་རྗེའི་རིགས་ནི་ངོ་བོ་ཉིད་ཀྱི་སྐུའོ། །རིན་པོ་ཆེའི་རིགས་ནི་རྣམ་པར་སྨིན་པའི་སྐུའོ། །པདྨའི་རིགས་ཐམས་ཅད་ནི་ལོངས་སྤྱོད་རྫོགས་པའི་སྐུའི་ངོ་བོའོ། །ལས་ཀྱི་རིགས་ཐམས་ཅད་ནི་
སྤྲུལ་པའི་སྐུའི་ངོ་བོ་ཉིད་དོ། །རྒྱུ་དང་ཡེ་ཤེས་དང་སྐུ་བཞིར་སྦྱར་བ་ནི་འདིར་མ་བྲིས་སོ། །དེ་ལ་རྣམ་པར་སྣང་མཛད་ནི་ངོ་བོ་ཉིད་ཀྱི་སྐུའོ། །ངན་སོང་སྦྱོང་བ་ལ་སོགས་པ་ནི་ལོངས་སྤྱོད་རྫོགས་པའོ། །རྡོ་རྗེ་སེམས་དཔའ་ལ་སོགས་པ་ནི་རྣམ་པར་སྨིན་པའི་སྐུའོ། །གཞན་རྡོ་རྗེའི་རིགས་ལ་སོགས་པ་ཐམས་ཅད་ནི་སྤྲུལ་པའི་སྐུའི་རང་བཞིན་ནོ། །དེ་སྐད་དུ་ཚོགས་མཐོ་བ་ལས། རྡོ་རྗེ་སེམས་དཔའི་དབང་བསྐུར་བས། །ཀུན་རིག་ཉིད་ནི་ངོ་པོའི་སྐུ། །རྡོ་རྗེ་རིགས་ཀྱི་དབང་བསྐུར་བས། །ངན་སོང་སྦྱོང་བ་ལོངས་སྤྱོད་རྫོགས། །རྡོ་རྗེ་ཆོས་ཀྱི་དབང་བསྐུར་བས། །རྡོ་རྗེ་སེམས་སོགས་རྣམ་པར་སྨིན། །རྡོ་རྗེ་ལས་ཀྱི་དབང་བསྐུར་བས། །སྤྲུལ་བའི་སྐུ་ནི་སྐུ་ཞེས་ནི། །རྡོ་རྗེ་རིགས་ནི་འདོད་པར་གྲགས། །ཞེས་སོ། །དེ་ཐམས་ཅད་ཀྱི་རང་བཞིན་ནི་ཀུན་རིག་རྣམ་པར་སྣང་མཛད་དེ་རྡོ་རྗེ་ཞེས་བྱའོ། །དེ་ལ་ནི་རྒྱལ་མཆོག་སྐྱེས་བུས་གང་བ་ཞེས་བྱའོ། །མི་འཇིགས་བ་སེང་གེའི་གདན་སྟེང་ན་ཏིང་ངེ་འཛིན་གྱི་ཕྱག་རྒྱ་དང༌། རྒྱན་ཐམས་ཅད་ཀྱིས་བརྒྱན་པར་བཞུགས་སོ། །དེ་ནས་བར་སྣང་གི་ཕྱོགས་ནས་སྤྱན་དྲངས་ལ་གཟུགས་དང་གཅིག་ཏུ་བསྲེ་བར་བྱའོ། །དེ་བཞིན་དུ་ཐམས་ཅད་ལ་ཤེས་པར་བྱའོ། །ཤར་ཕྱོགས་སུ་སེང་གེའི་གདན་ལ་ངན་སོང་སྦྱོང་བ་སྐུ་མདོག་ཟླ་བ་རྒྱས་པ་དང་འདྲ་ཞིང་འཇམ་པ་རྒྱན་ཆ་ལ་སོགས་པས་བརྒྱན་པ་ཕྱག་གཉིས་བསམ་གཏན་གྱི་ཕྱག་རྒྱ་སྟེང་ན་རྡོ་རྗེ་བསྣམས་པའོ། །རྒྱབ་ཏུ་ཤཱཀྱ་ཐུབ་པ་སྐུ་མདོག་གསེར་བཙོ་མ་ལྟ་བུ་ལ་ཕྱག་རྒྱ་བསམ་གཏན་གྱི་ཕྱག་རྒྱ་པདྨ་རྡོ་རྗེས་མཚན་པ་བསྣམས་ཏེ། གདན་སེང་གེ་ལ་བཞུགས་པའོ། །གཡས་ཀྱི་རེའུ་མིག་ལ་རིན་ཆེན་དཔལ་སྐུ་མདོག་སྔོན་པོ་བསམ་གཏན་གྱི་ཕྱག་རྒྱ་རིན་པོ་ཆེའི་མྱུ་གུ་བསྣམས་པ། གདན་སེང་གེའི་ཁྲི་ལ་བཞུགས་པ་བསམ་མོ། །བྱང་ཕྱོགས་སུ་མེ་ཏོག་ཆེར་རྒྱས་སྐུ་མདོག་ལྗང་གུ་ཕྱག་གཉིས་བསམ་གཏན་གྱི་ཕྱག་རྒྱའི་སྟེང་དུ་སྣ་ཚོགས་རྡོ་རྗེ་བསྣམས་པ། གདན་སེང་གེའི་ཁྲི་ལ་བཞུགས་པའོ། །རེའུ་མིག་གི་གྲྭ་རྣམས་སུ་ལོ་ཙ་ན་དང་མཱ་མ་ཀཱི་ཞེས་བྱ་བ་ལ་སོགས་པ་ལ། སངས་རྒྱས་སྤྱན་ལ་ལོ་ཙ་ན་ཞེས་བྱ་བ་སྟེ། སྐུའི་རྣམ་པར་རམ་རང་གི་རིགས་ཀྱི་མཚན་མ་ཞེས་འབྱུང་བས་ན། རྡོ་རྗེ་དང༌། རིན་པོ་ཆེ་དང༌། པདྨ་དང༌། སྣ་
ཚོགས་རྡོ་རྗེ་རྣམས་བཀོད་ཀྱང་རུང་ངོ༌། །དེ་ཡང༌། མུ་སྟེགས་ཅན་ལ་ཕན་གདགས་ཕྱིར། །སངས་རྒྱས་བཙུན་མོ་རབ་ཏུ་གསང༌། །ཞེས་སོ། །ད་ནི་ཡེ་ཤེས་སེམས་དཔའ་རྡོ་རྗེ་སེམས་དཔའ་ལ་སོགས་པ་དགོད་པ་སྟོན་ཏེ། རྩིབས་ཀྱི་ནང་ནི་ཐམས་ཅད་དུ། །ཞེས་བྱ་བ་ལ་སོགས་པ་གསུངས་ཏེ། རྩིབས་ཀྱི་ནང་ནི་འཁོར་ལོ་རྩིབས་བཅུ་དྲུག་གི་ནང་ངོ༌། །རྡོ་རྗེ་སེམས་སོགས་སེམས་དཔའ་མཆོག་གི་རྡོ་རྗེ་སེམས་དཔའ་ལ་སོགས་བཅུ་དྲུག་སྟེ། བཏི་ལས་བསྐྱེད་པས་ན་མཆོག་གོ །མཛད་པ་བཅུ་གཉིས་ཀྱི་ཚུལ་གྱིས་འགྲོ་བའི་དོན་མཛད་པས་ན་རྫུ་འཕྲུལ་ཆེ་བའོ། །གོ་རིམས་བཞིན་དུ་བྲི་བར་བྱ། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པ་ནས་བསྐལ་པ་བཟང་པོའི་བར་དག་ཀྱང་པདྨ་དང་ཟླ་བའི་དཀྱིལ་ན་སེམས་དཔའི་སྐྱིལ་མོ་ཀྲུང་གིས་བཞུགས་པ་ཡིན་ཏེ། དེ་ཡང༌། རྡོ་རྗེ་སེམས་སོགས་སེམས་དཔའི་མགོན། །རྡོ་རྗེ་ཕྱེད་པའི་གདན་ལ་བཞུགས། །ཞེས་བཤད་པའི་ཕྱིར་རོ། །དེ་ལ་རྡོ་རྗེ་སེམས་དཔའ་ནི་སྐུ་མདོག་དཀར་པོ་གཡོན་པ་རྡོ་རྗེ་ཁུ་ཚུར་ དྲིལ་བུ ་དང་བཅས་པའི་བསྙེམས་པའི་ཚུལ་གྱིས་དཀུར་བརྟེན་པ་ཕྱག་གཡས་པས་སྙིང་གར་བསྟོད་པའི་ཚུལ་གྱིས་བཞག་པའི་གུང་མོ་ལ་དང་པོའི་རྡོ་རྗེ་རྩེ་ལྔ་པ་བསྟོད་པའི་ཚུལ་གྱིས་བསྣམས་པ་ཤར་གྱི་འཁོར་ལོའི་རྩིབས་ལ་བཞུགས་སོ། །དེ་ནས་རིམ་པ་བཞིན་དུ་ཐམས་ཅད་དེ་ལྟར་གནས་སོ། །རྡོ་རྗེ་རྒྱལ་པོ་ནི་གསེར་གྱི་མདོག་ཅན་རྡོ་རྗེ་ལྕགས་ཀྱུས་དེ་བཞིན་གཤེགས་པ་ཐམས་ཅད་སྡུད་པར་མཛད་ཅིང་བཞུགས་པའོ། །རྡོ་རྗེ་ཆགས་པ་ནི་སྐུ་མདོག་དམར་པོ་མདའ་དང་གཞུས་དེ་བཞིན་གཤེགས་པ་ཐམས་ཅད་འབིགས་པའི་ཚུལ་དུ་མཛད་པའོ། །རྡོ་རྗེ་ལེགས་པ་ནི་མར་གད་ཀྱི་མདོག་ཅན་ཕྱག་གཉིས་རྡོ་རྗེ་ཁུ་ཚུར་དང་བཅས་པས་ལེགས་སོ་ཞེས་བྱ་བ་སྦྱིན་པའི་ཚུལ་གྱིས་དེ་བཞིན་གཤེགས་པ་ཐམས་ཅད་མཉེས་པར་བྱེད་ཅིང་བཞུགས་པའོ། །རྡོ་རྗེ་རིན་ཆེན་ནི་སྐུ་མདོག་སེར་པོ་གཡོན་པ་རྡོ་རྗེ་ཁུ་ཚུར་གྱིས་རིན་པོ་ཆེའི་ དྲིལ་བུ ་བསྣམས་ཤིང་མཉེས་པའི་ཚུལ་གྱིས་བཞུགས་པ་གཡས་པ་ཁུ་ཚུར་གྱིས་ཡིད་བཞིན་གྱི་ནོར་བུ་རིན་པོ་ཆེ་རྩེ་མོ་རྡོ་རྗེ་རྩེ་ལྔ་པས་མཚན་པ་དཔྲལ་བའི་སྟེང་ན་བསྣམས་པའོ། །རྡོ་རྗེ་ཉི་མ་ནི་ཉི་མའི་མདོག་ཅན་ཕྱག་གཡས་ན་ཉི་མའི་དཀྱིལ་འཁོར་བསྣམས་ཏེ། དེ་བཞིན་གཤེགས་པ་རྣམས་
ཀྱི་སྣང་བར་མཛད་པ། ཕྱག་གཡོན་པ་གདན་ལ་བརྟེན་པས་བཞུགས་པའོ། །རྡོ་རྗེ་རྒྱ་ལ་མཚན་ནམ་མཁའི་མདོག་ཅན་ཕྱག་གཡས་ན་ཡིད་བཞིན་གྱི་ནོར་བུའི་རྒྱལ་མཚན་ཕྱག་གཡོན་གདན་ལ་བརྟེན་ནས་བཞུགས་པའོ། །རྡོ་རྗེ་བཞད་པ་དུང་དང་པདྨའི་རྩ་བ་ལྟར་དཀར་བ་ཕྱག་གཡས་ཀྱིས་སོའི་ཕྲེང་བ་རྩེ་མོ་ན་རྡོ་རྗེ་ཡོད་པ་བསྣམས་ཏེ་དེ་བཞིན་གཤེགས་པ་རྣམས་འཛུམ་པ་ལ་ངེས་པར་སྦྱོར་བ། ཕྱག་གཡོན་གདན་ལ་བརྟེན་ནས་བཞུགས་པའོ། །རྡོ་རྗེ་ཆོས་སྐུ་མདོག་དཀར་དམར་ཕྱག་གཡོན་དཀུར་བརྟེན་ནས་རྡོ་རྗེ་པདྨ་བཟུང་སྟེ། ཕྱག་གཡས་པས་དེའི་འདབ་མ་རང་གིས་ཐུགས་ཀར་འབྱེད་པའོ། །རྡོ་རྗེ་རྣོན་པོ་ནམ་མཁའ་ལྟར་སྔོ་བསངས་ཕྱག་གཡོན་གྱིས་རང་གི་ཐུགས་ཀར་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་བསྣམས་པ། གཡས་ཀྱིས་རལ་གྲི་བསྣམས་ཏེ་དེ་བཞིན་གཤེགས་པ་ཐམས་ཅད་འདེ་བས་པའི་ཚུལ་གྱིས་ཡང་དག་པར་བཞུགས་པའོ། །རྡོ་རྗེ་རྒྱུ་གསེར་གྱི་མདོག་ཅན་ཕྱག་གཡས་ཀྱི་གུང་མོའི་རྩེ་མོ་ན་རྡོ་རྗེ་འཁོར་ལོ་རྩིབས་བརྒྱད་པ་བསྐོར་བར་མཛད་པ། གཡོན་པ་གདན་ལ་བརྟེན་པར་བཞུགས་པའོ། །རྡོ་རྗེ་སྨྲ་བ་བཟངས་ཀྱི་མདོག་ཅན་ཕྱག་གཡས་ཀྱིས་རྡོ་རྗེའི་ལྕེ་བསྣམས་ནས་དེ་བཞིན་གཤེགས་པ་རྣམས་དང་སྨྲ་བར་མཛད་ཅིང༌། གཡོན་སྟན་ལ་བརྟེན་པའི་ཚུལ་གྱིས་བཞུགས་པའོ། །རྡོ་རྗེ་ལས་ཞལ་དཀར་པོ་རྐེད་པའི་བར་དང་ཕྱག་གཉིས་སྔོ་སྐྱ། ལྷག་མ་མདོག་སྔོ་བ། ཞལ་གྱི་འོག་ལོགས་ནས་རྐེད་པའི་བར་དུ་དམར་སྐྱ། བརླ་གཉིས་སེར་སྐྱ། ལྷག་མ་བྱིན་པ་གཉིས་ནས་ཞབས་ཀྱི་བར་དུ་དཀར་པོ། ཕྱག་གཡོན་གྱི་རྡོ་རྗེ་ཁུ་ཚུར་གྱིས་སྣ་ཚོགས་རྡོ་རྗེ་ དྲིལ་བུ ་དང་བཅས་པ་བསྙེམས་པའི་ཚུལ་གྱིས་དཀུར་འཇོག་པ་ཕྱག་གཡས་ཀྱི་གུང་མོ་ལ་སྣ་ཚོགས་རྡོ་རྗེ་རང་གི་ཐུགས་ཀར་བསྟོད་པའི་ཚུལ་གྱིས་བསྣམས་པའོ། །རྡོ་རྗེ་སྲུང་བ་གསེར་གྱི་མདོག་ཅན་ཕྱག་གཉིས་རྡོ་རྗེ་གོ་ཆ་བསྣམས་ཏེ། དེ་བཞིན་གཤེགས་པ་ཐམས་ཅད་ལ་གོ་བསྐོན་པའི་ཚུལ་གྱིས་བཞུགས་པའོ། །རྡོ་རྗེ་གནོད་སྦྱིན་ལྟོ་བ་ཡངས་པ་ནག་པོ་ཞལ་གྱི་མཆེ་བ་གཙིགས་པ། རྡོ་རྗེ་ཁུ་ཚུར་གཉིས་ཀྱིས་ཞལ་གྱི་མཐའ་གཉིས་སུ་མཆེ་བ་གཉིས་འཛིན་ཅིང་བཞུགས་པའོ། །རྡོ་རྗེ་ཁུ་ཚུར་སྐུ་མདོག་སེར་པོ་རྡོ་རྗེའི་ཁུ་ཚུར་གཉིས་ཀྱི་ནང་དུ། རྡོ་རྗེ་ཆུད་པ་དམ་ཚིག་གི་རྡོ་རྗེ་
ཁུ་ཚུར་གཉིས་ཀྱིས་བཙིར་ཞིང་བཞུགས་པའོ། །མཁས་པས་ལཱ་སྱེ་ལ་སོགས་པ། །གྲྭ་བཞིའི་ཕྱོགས་སུ་བྲི་བར་བྱ། །ཞེས་བྱ་བས་ནི་སྒེག་མོ་དཀར་བའི་སྐུ་མདོག་རྡོ་རྗེ་ཁུ་ཚུར་གཉིས་ཀྱིས་རྡོ་རྗེ་རྩེ་ལྔ་བ་རེ་བསྣམས་ཏེ། རྡོ་རྗེ་འགྱིང་པའི་ཚུལ་གྱིས་སྒེག་པ་ལ་གཡོན་དུ་ཅུད་ཟད་འདུད་པའོ། །ཕྲེང་བ་མ་སྐུ་མདོག་སེར་པོ་རིན་པོ་ཆེའི་ཕྲེང་བས་དེ་བཞིན་གཤེགས་པ་རྣམས་ལ་དབང་བསྐུར་བའོ། །གླུ་མ་སྐུ་མདོག་དམར་སྐྱ་པི་ཝང་བརྡུང་པའོ། །གར་མ་སྐུ་མདོག་རྡོ་རྗེ་ལས་ལྟ་བུ་རྡོ་རྗེ་རྩེ་གསུམ་པ་བསྣམས་ཏེ་ཕྱག་གཉིས་ཀྱིས་གར་མཛད་ཅིང་བཞུགས་པའོ། །བདུག་པ་མ་སྐུ་མདོག་དཀར་མོ་རྡོ་རྗེ་སྤོས་སྣོད་ཀྱིས་དེ་བཞིན་གཤེགས་པ་ཐམས་ཅད་ཚིམ་པར་མཛད་པའོ། །མེ་ཏོག་མ་སེར་མོ་ཕྱག་གཡོན་གྱིས་རྡོ་རྗེ་མེ་ཏོག་གི་སྣོད་ཐོགས་ཏེ་ཕྱག་གཡས་ཀྱི་མེ་ཏོག་གི་ཆར་འབེབས་པའོ། །མར་མེ་མ་སྐུ་མདོག་དམར་སྐྱ་མར་མེའི་སྡོང་བུ་བསྣམས་ཏེ་སྣང་བའི་ཚོགས་ཀྱིས་མཆོད་པ་མཛད་པའོ། །བྱུག་པ་མ་གར་མ་ལྟར་སྣ་ཚོགས་པའི་མདོག་ཅན་ཕྱག་གཡོན་ན་དྲིའི་དུང་ཆོས་བསྣམས་པ། ཕྱག་གཡས་ཀྱིས་དྲིའི་སྤྲིན་གྱིས་དེ་བཞིན་གཤེགས་པ་རྣམས་ལ་མཆོད་ཅིང་བཞུགས་པའོ། །སྒོ་ཡི་ཕྱོགས་ནི་ཐམས་ཅད་དུ། །སྒོ་བ་བཞི་པོ་བྲི་བར་བྱ། །ཞེས་བྱ་བ་ནི་རྡོ་རྗེ་ལྕགས་ཀྱུ་སྐུ་མདོག་དཀར་པོ་རྡོ་རྗེ་ལྕགས་ཀྱུས་དེ་བཞིན་གཤེགས་པ་རྣམས་གཞུག་པར་མཛད་པའོ། །རྡོ་རྗེ་ལྕགས་སྒྲོག་སྐུ་མདོག་དམར་སྐྱ་རྡོ་རྗེ་ལྕགས་སྒྲོག་གིས་དེ་བཞིན་གཤེགས་པ་རྣམས་འཆིང་བར་མཛད་པའོ། །རྡོ་རྗེ་འབེབས་པ་སྣ་ཚོགས་པའི་མདོག་ཅ་ན་ཕྱག་གཡས་ཀྱི་ དྲིལ་བུ ་བསྣམས་ཏེ། དེ་བཞིན་གཤེགས་པ་རྣམས་འབེབས་པར་མཛད་པ་ཕྱག་གཡོན་གདན་ལ་བརྟེན་ཏེ་བཞུགས་པའོ། །དེ་བཞིན་གཤེགས་པ་རྣམས་ནི་ཞི་བའི་ཉམས་དང་ལྡན་པ་ཞི་བའི་གཟིགས་སྟངས་དང་འཛུམ་པ་དང་བཅས་པའོ། །རྡོ་རྗེ་སེམས་དཔའ་ལ་སོགས་པ་ནི་རབ་ཏུ་དགྱེས་པས་སྤྱན་གདངས་པ། སྒེག་པའི་ཉམས་དང་འཛུམ་པ་དང་བཅས་པ་སངས་རྒྱས་ལྔའི་ཅོད་པ་ན་དང༌། དར་དབྱངས་ཀྱིས་དབང་བསྐུར་བ་དང་ལྡན་པ་རྒྱན་ཐམས་ཅད་ཀྱིས་བརྒྱན་པའོ། །རྟ་བབས་ཁྱམས་ནི་ཐམས་ཅད་དུ། །བྱམས་པ་ལ་སོགས་བྲི་བར་བྱ། །ཞེས་བྱ་བ་ལ་སོགས་པ་ལ་
རྟ་བབས་ཁྱམས་ནི་རྟ་བབས་དང་བཅས་པའི་ཁང་པ་དང༌། རྟ་བབས་མེད་པའི་ནང་གི་སྒོའི་བར་ལ་ནི་ཁྱམས་ཞེས་བྱའོ། །ལ་ལ་དག་སྒོ་གསུམ་པར་འདོད་དེ། བདག་གིས་ནི་གསུམ་པར་རིག་པར་དཀྱུས་ཀྱིས་ཀྱང་མ་མཐོང་ངོ༌། །འོག་ནས་ཀྱང་སྒོ་ཡོད་པར་མ་མཐོང་ངོ། །ཅིའི་ཕྱིར་ན། ཕྱི་ཡི་དཀྱིལ་འཁོར་ཕྱི་རོལ་དུ། །ཞེས་སོ། །ཁྱམས་དེར་བྱམས་པ་ལ་སོགས་པའི་བྱང་ཆུབ་སེམས་དཔའ་བཅུ་དྲུག་དགོད་ལ། བྱམས་པ་དང༌། མཐོང་བ་དོན་ཡོད་དང༌། ངན་སོང་ཀུན་འདྲེན་དང༌། སྤོབས་པ་བརྩེགས་དང༌། བློ་གྲོས་མི་ཟད་པ་དང༌། མྱ་ངན་མུན་པ་ཀུན་འཛོམས་དང༌། །ནམ་མཁའི་མཛོད་དང༌། ཡེ་ཤེས་ཏོག་དང༌། སྤོས་ཀྱི་གླང་པོ་དང༌། དཔའ་བར་འགྲོ་བ་དང༌། རྡོ་རྗེ་སྙིང་པོ་དང༌། ཟླ་འོད་གཞོན་ནུ་དང༌། ཀུན་དུ་བཟང་པོ་དང༌། སྒྲིབ་པ་ཐམས་ཅད་རྣམ་པར་སེལ་བ་དང༌། བཟང་སྐྱོང་དང༌། དྲ་བ་ཅན་གྱི་འོད་དོ། །དེ་དག་ཀྱང་ཟླ་བ་དང༌། སྣ་ཚོགས་པདྨའི་སྟེང་ན་སེམས་དཔའི་སྐྱིལ་ཀྲུང་གིས་བཞུགས་ལ། ཤར་ཕྱོགས་ཀྱི་རྡོ་རྗེ། ལྷོའི་རིན་པོ་ཆེ། ནུབ་ཀྱི་པདྨ། བྱང་གི་རྣམ་པ་རྡོ་རྗེ་རྒྱ་གྲམ་མོ། །རྒྱལ་བ་ཞེས་བྱ་བ་ནི་བྱང་ཆུབ་སེམས་དཔའ་དཔེ་མེད་པ་སྟེ། གོང་གི་དང་སྤེལ་མར་བྲི་ཞེས་འབྱུང་སྟེ། དེ་ལ་ཤར་དུ་ཐུབ་མཆོག་དཔེ་མེད་བཞི་སྟེ། ཉོན་མོངས་འཇོམས་བྱེད་དང༌། མུན་སེལ་དང༌། སྡུག་བསྔལ་འཇོམས་བྱེད་དང༌། འཁོར་བ་རྒྱུན་གཅོད་དེ་རྣམས་ནི་ལྕགས་ཀྱུའོ། །ལྷོ་ཕྱོགས་སུ་ནི་ཡོན་ཏན་དཔེ་མེད་བཞི་སྟེ་རིན་ཆེན་མཛོད་དང༌། དགེ་བའི་བློ་གྲོས་དང༌། བདེ་བའི་འབྱུང་གནས་དང༌། ལེགས་པའི་ཏོག་རྣམས་བྲིའོ། །དེ་རྣམས་ནི་རིན་པོ་ཆེའི་མཆོད་སྡོང་ཤེ་དག་བསྣམས་པའོ། །ནུབ་ཏུ་གསུང་མཆོག་དཔེ་མེད་བཞི་སྟེ། དེ་ཡང་ང་རོ་སྙན་པ་དང༌། དོན་མཐུན་ཡིད་འོད་དང༌། བདེ་བའི་འབྱུང་གནས་དང༌། ཐེ་ཚོམ་ཡིད་མྱུར་རོ། །དེ་དག་གི་ཕྱག་ན་མེ་ཏོག་ཨུཏྤ་ལ་ཤེ་དག་བསྣམས་པའོ། །བྱང་ཕྱོགས་སུ་ལས་མཆོག་དཔེ་མེད་བཞི་སྟེ། དྲན་པའི་སྟོབས་མཆོག་དང༌། ཚད་མེད་ཡོན་ཏན་དང༌། ཐམས་ཅད་ཀུན་འགྲོལ་དང༌། བརྩོན་འགྲུས་མི་ལྡོག་གོ །དེ་དག་ནི་ཕྱག་ན་མེ་ཏོག་ཤེ་དག་བསྣམས་པའོ། །སྐུ་མདོག་ནི་དཀར་པོ་དང༌། སྔོན་པོ་དང་དམར་པོ་དང༌། ལྗང་གུ་རིམ་བཞིན་དུ་ཤར་དང་ལྷོ་ལ་སོགས་པའོ། །ཉན་ཐོས་
ནི་སྟོན་པའི་ཞབས་འབྲིང་སྤྲུལ་པའི་སྐུའི་འཁོར་ཡིན་པས་སྣམ་བུ་གཉིས་པ་ལ་ཤེས་རབ་ཅན་གྱི་མཆོག་ཤཱ་རིའི་བུ་དང༌། རྫུ་འཕྲུལ་ཅན་གྱི་མཆོག་མོད་གལ་གྱི་བུ་དང༌། འདྲི་ཞིང་ལན་ལྡོན་པའི་མཆོག་རབ་འབྱོར་དང༌། རྫུ་འཕྲུལ་གྱི་སྤྱན་མངའ་བའི་མཆོག་མ་འགགས་པ་དང༌། ཁྱིམ་པ་དད་པ་བསྐྱེད་པའི་མཆོག་ནག་པོ་འཆར་ཀ་དང༌། སྟོན་པ་ལ་དམ་པའི་ཆོས་ཐོས་པ་ལྔ་བ་ཀཽ་ཌི་ནྱ་དང༌། བདུད་ཀྱི་གཙོ་བོ་དད་པ་བསྐྱེད་པ་སྔ་བས་ན་རྟ་ཐུལ་དང༌། འདུལ་བ་འཛིན་བར་བྱེད་པས་ན་ཉེ་བ་འཁོར་དང༌། འགོག་པའི་ཏིང་ངེ་འཛིན་ལ་དབང་ཐོབ་པས་ན་བ་ལང་བདག་དང༌། སྲས་སུ་གྱུར་པའི་སྒྲ་གཅན་འཛིན་དང༌། ཞམ་འབྲིང་གཉུག་མར་མཛད་པའི་ཀུན་དགའ་བོ་དང༌། ཉིད་ཀྱི་གཅུང་པོས་ན་དགའ་བོ་དང༌། ཤཱཀྱ་རྣམས་ཀྱི་སྐྲ་འདྲེག་མཁན་ཡིན་པས་ན་མིང་ཆེན་དང༌། བསླབ་པ་ལ་གུས་པའི་ནོར་སྦྱིན་དང༌། སྦྱངས་པའི་ཡོན་ཏན་ལ་གནས་པའི་གང་པོ་དང༌། ཞལ་ཏ་བ་སྐུ་བགྲེས་པའི་འོད་སྲུངས་རྣམས་ནི་སྐུ་མདོག་སེར་པོ་ཆོས་གོས་དང་ལྡན་པ་ཕྱག་ན་པར་པུ་དང་བསིལ་ཡབ་དང༌། རིན་པོ་ཆེ་དང༌། མར་མེ་རིམ་པ་བཞིན་དུ་ཤར་ལ་སོགས་པ་ནས་བསྐོར་ཕྱོགས་སུ་བསྣམས་པའོ། །ཉན་ཐོས་ཀྱི་སྣམ་བུ་ལ་རང་སངས་རྒྱས་རྣམས་ཀྱང་སྤེལ་མར་བྲི་བར་བྱའོ། །དེ་ཡང༌། དེ་བཞིན་རང་རྒྱལ་གཙོ་བོ་རྣམས། །ཞེས་གསུངས་ལྟེ། དེ་ཡང་བཅུ་གཉིས་ཏེ། འཇིགས་པར་བྱེད་པ་དང༌། སྣང་བ་བརྩེགས་དང༌། དཔའ་བོ་འདུལ་བ་དང༌། ཉོན་མོངས་གདུང་སེལ་དང༌། ཤེས་རབ་མགྱོགས་ཆེན་དང༌། རྫུ་འཕྲུལ་ཆེར་སྟོན་དང༌། འཁོར་བ་དུག་སེལ་དང༌། སྒྲ་ཆེན་དང༌། བསེ་སུ་ལྟ་བུ་དང༌། རི་བོའི་རྒྱལ་པོ་དང༌། སེང་གེ་ལྟ་བུ་དང༌། ཡིད་མྱུར་ཏེ། དེ་རྣམས་ནི་བསིལ་ཡབ་དང༌། ཟླ་ཚེས་དང༌། མེ་འབར་བ་དང༌། དྲང་སྲོང་རྣམས་བསྣམས་ཏེ། དེ་ཡང་ཤར་ལ་སོགས་པ་རིམ་པ་བཞིན་ནོ། །སྒོ་དེ་སྒོ་ཁྱམས་གཡས་གཡོན་དུ། ཁྲོ་བོ་བརྒྱད་བྲི་བར་བྱ་སྟེ། །དེ་ཡང༌། ཁྲོ་བོ་མངག་པ་ཕོ་ཉ་སོགས། །བྲི་བའམ་ཡང་ན་མིང་ཡང་རུང༌། །ཞེས་གསུངས་སོ། །བཅས་བཅོས་གཉིས་དང་ལྡན་པས་སམ་ཁྲོ་བའི་ཚུལ་དགུ་དང་ལྡན་པས་ཁྲོ་བོའོ། །རྣམ་པར་སྣང་མཛད་ལ་སོགས་པ་པའི་ལས་མཛད་པས་མངག་པའོ། །སྤྲུལ་པའི་
ཁྲོ་བོ་མང་པོ་འབྱུང་བས་ཕོ་ཉ་སྟེ། དེའི་ཕྱིར་ན་བརྒྱད་དེ། འཇིག་རྟེན་གསུམ་སྣང་དང༌། འཇིག་རྟེན་གསུམ་འཆིང་དང༌། འཇིག་རྟེན་གསུམ་འཇིགས་དང༌། འཇིག་རྟེན་མཐར་བྱེད་དང༌། བདུད་རྩི་ཐབ་སྦྱོར་དང༌། བེ་ཅོན་སྡོན་པོ་དང༌། མི་གཡོ་མགོན་པོ་དང༌། རྟ་མགྲིན་ཏེ་དེ་རྣམས་ནི་ཤར་ལ་སོགས་པའི་སྒོ་ཁྱམས་གཡས་གཡོན་དུ་རིམ་པ་བཞིན་ནོ། །དེ་རྣམས་ཀྱང་ཡང་ན་མིང་ངམ་སྟེ། སྙིང་པོ་འམ། བརྡའམ་སྟེ་ཕྱག་མཚན་ནམ། ཐིག་ལེ་སྟེ་གདན་ནམ་གང་ཡང་རུང་བ་བྲི་ཞེས་བྱ་བའི་ཐ་ཚིག་གོ །དེ་རྣམས་ནི་རབ་མཆོག་དང་པོ་ཡོངས་སུ་དག་པའི་འཁོར་ཏེ། ལྷ་བརྒྱ་ལྔ་བཅུ་པའོ།། །།ད་ནི་འཇིག་རྟེན་པའི་དཀྱིལ་འཁོར་གྱི་དོན་ཏེ། ཕྱི་ཡི་དཀྱིལ་འཁོར་ཕྱི་རོལ་དུ། །ཞེས་སྨོས་ཏེ། ཕྱིའི་དཀྱིལ་འཁོར་ནི་རྟ་བབས་དང་བཅས་པའི་དཀྱིལ་འཁོར་ཏེ་སྒོ་གཉིས་པའོ། །དེའི་ཕྱི་རོལ་དུ་ནི་རྡོ་རྗེ་ར་བའི་ནང་ལོགས་ཀྱི་ཁོར་ཡུག་གི་དཀྱིལ་འཁོར་ལ་བྱའོ། །གླིང་བཞི་པོ་ནི་བྲི་བར་བྱ། །ཞེས་འབྱུང་སྟེ། གླིང་བཞི་པ་ནི་ཁོར་ཡུག་གི་དཀྱིལ་འཁོར་ལ་ལྷོར་འཛམ་བུ་གླིང་གི་གཟུགས་སུ་བྲི་བ་དང༌། ནུབ་ཏུ་བ་ལང་སྤྱོད་ཀྱི་དབྱིབས་སུ་བྲི་བ་དང༌། བྱང་དུ་སྒྲ་མི་སྙན་གྱི་དབྱིབས་སུ་བྲི་བ་དང༌། ཤར་དུ་ལུས་འཕགས་པོའི་གླིང་གི་དབྱིབས་བྲི་བར་བྱའོ། །འཛམ་བུའི་གླིང་དུ་ཚངས་པ་བྲི། །ཞེས་པ་ནི་གླིང་དེའི་སྟེང་དུ་ཚངས་པའི་གཟུགས་ཕྱག་ན་གུནྡྡྷེ་བསྣམས་པ། བཙུན་མོ་ཚངས་མ་པི་ཝང་འཛིན་པ། འཁོར་དང་བཅས་ཏེ་བྲི་བར་བྱ། །ཞེས་འབྱུང་བས་ཕོ་ཉ་མངག་པ་སྟེ། ཕོ་ཉ་པདྨ་བསྣམས་པ་དང༌། མངག་གཞུག་ཡིད་དུ་འོང་བ་རོལ་གྲི་བསྣམས་པའོ། །བྱང་ཕྱོགས་སུ་ནི་དབང་ཕྱུག་ཆེ། །ཞེས་པ་ནི་བྱང་གི་གླིང་དུ་དབང་ཕྱུག་ཆེན་པོ་ཕྱག་ན་ཏྲི་ཤཱུ་ལ་བསྣམས་པ། ཡུམ་དཀའ་ཐུབ་བཟློག་མ་ཕྱག་ན་པདྨ་ཁ་བྱེ་བ་བསྣམས་པའོ། །ཕོ་ཉ་རྣམ་པར་སྣང་བ་མདའ་གཞུ་དང༌། མངག་གཞུག་སྡེ་དཔོན་ནག་པོ་མདུང་བསྣམས་པ་བྲིའོ། །ཤར་དང་ནུབ་ཀྱི་གླིང་དག་ཏུ། །བརྒྱ་བྱིན་གཏོགས་འདོད་ཐམས་ཅད་ཀྱང༌། །ཞེས་པ་ནི་ཤར་གྱི་གླིང་གི་སྟེང་དུ་བརྒྱ་བྱིན་ཏེ་རྡོ་རྗེ་གདེངས་པ་བསྣམས་པའོ། །བཙུན་མོ་བདེ་སོགས་དགུ་པོ་རྒྱུད་མང་འདྲེན། མངག་པ་ཡིད་དུ་འོང་བ་དང༌། ཕོ་ཉ་ཀུན་དུ་སྣང་བ་རལ་གྲི་བསྣམས་པ་ཞེས་པའོ། །གཏོགས་འདོད་ནི་ཁྱབ་འཇུག་སྟེ། ཕྱག་ན་འཁོར་ལོ་
བསྣམས་པ་དང༌། བཙུན་མོ་དཔལ་གྱིས་ལྷ་མོ་ཕྱག་ན་གསལ་ཤིང་བསྣམས་པ། མངག་གཞུག་རྡོ་རྗེ་བདེ་བ་ཕྱག་ན་མཚོན་ཆ་བསྣམས་པ་བྲེའོ། །ཕོ་ཉ་བ་རྡོ་རྗེ་སྡེ་དཔོན་ཕྱག་ན་འཁོར་ལོ་བསྣམས་པ་བྲིའོ། །གཞན་དག་ཀྱང་ནི་དེ་བཞིན་ཏེ། །ཞེས་པ་ནི་འོག་ནས་འབྱུང་བ་ལ་ཡང་བཙུན་མོ་དང༌། མངག་གཞུག་པ་དང༌། ཕོ་ཉ་པ་ལ་སོགས་པ་ཤེས་པར་བྱའོ་ཞེས་པའོ། །ལྷ་མིན་དྲི་ཟ་ནམ་མཁའ་ལྡིང༌། །ཞེས་པ་ནི་ལྷ་མ་ཡིན་གྱི་རྒྱལ་པོ་རྣམ་པར་སྣང་བྱེད་མདའ་གཞུ་བསྣམས་པ་དང༌། སྒྲ་གཅན་འཛིན་ཟླ་བ་བསྣམས་པ་དང༌། སུམ་བརྩེགས་རི་རབ་བསྣམས་པ་དང༌། རབ་སིམ་བདུད་རྩི་བསྣམས་པ་དང༌། ཀཽ་ཤི་ཀ་རྡོ་རྗེ་བསྣམས་པ་དེ་རྣམས་བཙུན་མོ་དང་བཅས་པའོ། །དྲི་ཟ་ནི་ཟུར་ཕུད་ལྔ་པ་མེ་ཏོག་བསྣམས་པ་དང༌། ཡུལ་འཁོར་སྲུངས་པི་ཝང་བསྣམས་པ་དེ་ནི་བཙུན་མོ་དང་བཅས་པའོ། །ནམ་མཁའ་ལྡིང་ནི་གསེར་མིག་ལྕགས་ཀྱུ་བསྣམས་པ་དང༌། གཡོག་དུ་མ་ཅན་རྡོ་རྗེ་བསྣམས་པ་དང༌། བྱ་ཁྱུང་ཀ་རུ་ཎ་སྦར་ཞགས་བསྣམས་བ་དེ་རྣམས་ཀྱང་བཙུན་མོ་དང་བཅས་པའོ། །དེ་རྣམས་ནི་བྱང་ཤར་ནས་བརྩམས་ཏེ་ཤར་དྲང་པོར་བྲི་བར་བྱའོ། །གནོད་སྦྱིན་སྲིན་པོ་ལྟོ་འཕྱེ་ཆེ། །ཞེས་པ་ནི་གནོད་སྦྱིན་བརྒྱད་དེ། ཤར་དུ་ཡང་དག་ཤེས་ཟླ་ཚེས་བསྣམས་པ། ཤར་ལྷོར་གང་བ་བཟང་པོ་བུམ་པ་བསྣམས་པ། ལྷོ་རུ་འབྲོག་གནས་རིན་པོ་ཆེའི་སྒྲོམ་བསྣམས་པ། ལྷོ་ནུབ་ཏུ་ཀུ་བེ་ར་བེ་ཅོན་བསྣམས་པ། ནུབ་ཏུ་ནོར་བུ་བཟང་པོ་ནོར་བུ་བསྣམས་པ། ནུབ་བྱང་དུ་པཉྩི་ཀ་རིན་པོ་ཆེའི་མཛོད་བསྣམས་པ། བྱང་དུ་ཛཾ་བྷ་ལ་ནེའུ་ལེའི་རྐྱལ་བུ་བསྣམས་པ། བྱང་ཤར་དུ་ནོར་ལྷའི་རྒྱལ་པོ་ཤིང་ཐོག་བསྣམས་པ་དེ་རྣམས་བཙུན་མོ་དང་བཅས་པའོ། །སྲིན་པོ་ནི་འཇིགས་ཤིང་གསོད་པ་སྟེ། ལད་ཀ་མགྲིན་བཅུ་མདའ་གཞུག །ཨུ་པ་ཀརྞི་རལ་གྲི། བུམ་རྣ་དབྱུག་ཏོ། བཙུན་མོ་དང་བཅས་པའོ། །ལྟོ་འཕྱེ་ཆེ་ནི་ལྟོས་འགྲོ་བ་སྟེ། རབ་བརྟན་རྡོ་རྗེ་བསྣམས་པ། ཁྱུས་འགྲོ་རིན་པོ་ཆེ་བསྣམས་པ། དེ་ཡང་བཙུན་མོ་དང་བཅས་པའོ། །འབྱུང་པོ་ཡི་དགས་འདྲེ་རྣམས་དང༌། །ཞེས་པ་ནི་དབང་ལྡན་ཏྲི་ཤཱུ་ལ་བསྣམས་པ་བཙུན་མོ་དང་བཅས་པའོ། །ཡི་དགས་ནི་ཕྱིའི་སྒྲིབ་པ་ཅན་དང༌། ནང་གི་སྒྲིབ་པ་ཅན་དང༌། རང་བཞིན་གྱི་སྒྲིབ་པ་ཅན་དང༌། མེ་ལྕེའི་འཁོར་ལོ་ཅན་དང་བཞིའོ། །འདྲེ་ནི་བར་དུ་གཅོད་པར་བྱེད་པའོ། །
ལོག་འདྲེན་ནག་པོ་ཆུ་ལྟར་གཡོ་བ་སྤྲུལ་ཏེ། གཉེ་འུ་ཐུང་རྣ་རྣོན་མེ། སྤྱིའུ་ཚུགས་ཐུར་བལྟ་བྱ། སེའུ་མེན་ཏ་ག་སྙིང་དུ་འཇུག་པའི་འདྲེ་དང༌། དར་དབྱངས་དེ་ཏ་ཀ་ལྕེ་ལ་འཇུག་པ་དང༌། མུར་རྒད་ཏ་ཀ་མྱུར་བར་འཇུག་པ་རལ་གྲི་བསྣམས་པ་དང་དྲུག་གོ །ཀླུ་དང་སྦྲུལ་དང་རིགས་རྣམས་དང༌། །ཞེས་པ་ནི་ཀླུ་ནི་བྱོལ་སོང་གི་རིགས་རྣམས་ཏེ། རིགས་བ་ཞིར་གནས་སོ། །མཐའ་ཡས་ཨུཏྤལ་བསྣམས་པ་དང༌། འཇོག་པོ་དགྲ་སྟ་བསྣམས་པ་དང༌། ཆུ་ལྷ་པདྨ་བསྣམས་པ་དང༌། དུང་སྐྱོང་འབུད་དུང་བསྣམས་པ་དང༌། ནོར་རྒྱས་བུམ་པ་བསྣམས་པ་དང༌། སྟོབས་ཀྱི་རྒྱུ་གཤོལ་མདའ་བསྣམས་པ་དང༌། པདྨ་ཆེན་པོ་པདྨ་ཁ་ཕྱེ་བ་བསྣམས་པ་དང༌། རིགས་ལྡན་རིན་པོ་ཆེའི་རྒྱལ་བུ་བསྣམས་པ་དང༌། དགའ་བོ་སྤྲིན་ཕུང་བསྣམས་པ་དང༌། ཉེ་དགའ་བོ་རིན་ཆེན་ཕྱག་རྒྱ་བསྣམས་པའོ། །སྤྲུལ་ནི་རིགས་བཞིའོ། །རིགས་རྣམས་དང་ཞེས་པ་ནི་ཕྱོགས་སྐྱོང་བ་བཅུ་ནི་བགེགས་ཀྱི་རིགས་སུ་གཏོགས་པས་རིགས་རྣམས་སོ། །བརྒྱ་བྱིན་རྡོ་རྗེ། གཤིན་རྗེ་ཐོད་དབྱུག །ཆུ་ལྷ་སྤྲུལ་ཞགས། གནོད་སྦྱིན་བེ་ཅོན། མེ་ལྷ་བགྲང་ཕྲེང༌། བདེན་བྲལ་རལ་གྲི། རླུང་ལྷ་བ་དན། དབང་ལྡན་རྩེ་གསུམ། ས་བདག་མཆེ་ཞགས། སའི་ལྷ་མོ་བུམ་པ། ཉི་མ་པདྨ། ཟླ་བ་ཨུཏྤལ། བཙུན་མོ་སོ་སོ་ནས་འཁྱུད་ནས་གནས་པའོ། །དེ་ལྟར་ལྷ་ཆེན་པོ་ཉི་ཤུ་རྩ་བརྒྱད་སོ་སོའི་ཕྱོགས་སུ་བྲི་བར་བྱའོ། །རྒྱལ་པོ་བཞི་རྣམས་བྲི་བར་བྱ། །ཞེས་པ་ནི་ཡུལ་འཁོར་སྲུང་པི་ཝང་ཐོགས་པ་ཤར་དུའོ། །ལྷོར་འཕགས་སྐྱེས་པོ་རལ་གྲི་ཐོགས་པ། ནུབ་ཏུ་མིག་མི་བཟང་སྤྲུལ་ཞགས་ཐོགས་པ། བྱང་དུ་རྣམ་ཐོས་སྲས་རིན་ཆེན་རྐྱལ་བུ་ཐོགས་པ། བཙུན་མོ་དང་བཅས་པའོ། །གཟའ་དང་སྐར་མ་རྒྱུ་སྐར་ཞེས་པ་ནི་གཟའ་ནི་འཕེལ་བ་དང་འགྲིབ་པར་བྱེད་པ་སྟེ། པ་བ་སངས་མེ་ཏོག །ཕུར་བུ་པོ་ཏི། ལག་པ་མཆོག་སྦྱིན། ཟླ་བ་ཀུ་མུ་ཏ། མིག་དམར་བདུད་རྩི་བུམ་པ། སྒྲ་གཅན་འཛིན་པདྨའི་སྡོང་བུ། ཉི་མ་པདྨ། སྤེན་པ་དབྱུག་ཏོ་བསྣམས་པ་བཙུན་མོ་དང་བཅས་པའོ། །རྒྱུ་སྐར་ནི་ཉི་ཤུ་རྩ་བརྒྱད་དེ། དབང་ལྡན་ནས་བརྩམས་ཏེ།
ཤར་དུ་བྲི་བ་ནི་སྨིན་དྲུག་མདོག་དམར་བུམ་པའི་སྟེང་ན་བཞུགས། སྣར་མ་མདོག་ལྗང་གུ་བ་དཀར་པོ་ཞོན། མགོ་སེར་པོ་ཤ་བ་ཞོན། ལག་དམར་པོ་སྦྲུལ་ལ་ཞོན། ནབ་སོ་སེར་པོ་པདྨ་ལ་འདུག །སྐག་ལྗང་གུ་བྱ་རོག་ལ་འདུག །ཕྱག་ན་རིན་པོ་ཆེའི་སྙན་ཆ་དང༌། གདུ་བུ་ཤེ་དག་བསྣམས་པའོ། །མེ་ནས་བརྩམས་ཏེ་ལྷོའི་ཕྱོགས་སུ་དངར་བ་ལ། མཆུ་སེར་པོ་མ་ཧེ་ལ་ཞོན། གྲེ་ལྗང་གུ་ཁྲི་ལ་འདུག །དབོ་སེར་པོ་གསེར་ཁྲེ་ལ་འདུག །མེ་བཞི་སེར་པོ་གླང་པོ་ཆེ་ལ་འདུག །ནག་པ་ལྗང་གུ་རྨ་བྱ་ལ་འདུག །ས་རི་དམར་པོ་འཕྱང་མོ་ཉུག །ས་ག་དཀར་པོ་རྟ་ཞོན་པ་ཕྱག་མཚན་རིན་པོ་ཆེའི་མེ་ཏོག་ཤེ་དག་བསྣམས་པའོ། །བདེན་བྲལ་ནས་ནུབ་ཏུ་དངར་བ་ལ་ལྷ་མཚམས་མདོག་སེར་ཁྱིམ་བྱ་ལ་ཞོན། སྣྲོན་དམར་པོ་སྟན་ནང་ཚངས་ཅན་ལ་འདུག །སྣྲུབས་མདོག་ལྗང་གུ་ས་བདག་ལ་འདུག །ཆུ་སྟོད་མདོག་སེར་ཕུབ་ལ་འདུག། ཆུ་སྨད་མདོག་ལྗང་གུ་མི་ལ་ཞོན། བྱི་བཞིན་མདོག་སྔོ་སྲེ་མོ་ལ་ཞོན། གྲོ་བཞིན་མདོག་དམར་ཀུརྨ་ལ་འདུག་བའོ། །ཕྱག་མཚན་ནི་པདྨའི་སྡོང་བུ་ཤེ་དག་བསྣམས་པའོ། །རླུང་གི་ཕྱོགས་ནས་བྱང་ཕྱོགས་སུ་བྲི་བར་བྱ་སྟེ། མོན་དྲེ་ལྗང་གུ་གླང་ཁྱུ་བ་ལ་འདུག །མོན་གྲུ་དམར་པོ་སྟན་བར་ཚངས་ཅན་ལ་འདུག །ཁྲུམས་སྟོད་ལྗང་སེར་ཁྲི་ལ་འདུག །ཁྲུམས་སྨད་སེར་པོ་རིན་པོ་ཆེའི་ཁྲི་ལ་འདུག །ནམ་གྲུ་མདོག་དམར་ངང་པ་ལ་ཞོན། ཐ་སྐར་མདོག་དམར་མི་ལ་ཞོན། བྲ་ཉེ་མདོག་སྔོ་འཁོར་ལོའི་སྟེང་ལ་འདུག །ཕྱག་མཚན་ཨུཏྤལ་ཤེ་དག་བསྣམས་པའོ། །དེ་ལྟར་ཉིས་བརྒྱ་བདུན་ཅུ་རྩ་བཞིའོ། །ཁྲོ་བ་མ་རུངས་འཚེ་བ་ཡི། །ཞེས་པ་ནི་དམྱལ་བ་སྲུང་ཆེན་པོ་རྣམས་ལ་བྱ་སྟེ། ཡང་སོས་དང་ཐིག་ནག་ལ་སོགས་པ་བརྒྱད་དང༌། ཆུ་བུར་དང༌། ཆུ་བུར་རྡོལ་བ་ལ་སོགས་པ་བརྒྱད་ན་གནས་ཤིང་གྲང་བའི་བརྒྱད་དེ་བཅུ་དྲུག་པོ་ལ་བྱའོ། །འཚེ་བའི་ཞེས་བྱ་བ་ནི་ལས་ཀྱིས་སྐྱེས་པའི་སེམས་ཅན་དེ་རྣམས་ལ་སྲུང་མ་དེ་རྣམས་ཀྱིས་འཚེ་བར་བྱེད་པས་ནའོ། །བགེགས་བི་ན་ཡ་ག་ནི་ཞེས་པ་ལ་བགེགས་ནི་ཕར་དུ་གཅོད་པ་སྟེ། ཚངས་པ་དང་སྲིན་པོའི་གདོན་དང༌། བརྗེད་བྱེད་ཀྱི་གདོན་
དང། གནོན་པོ་དང༌། སྐེམ་བྱེད་དང༌། གྲིབ་གནོན་དང༌། མ་མོའི་གདོན་དང༌། བི་ན་ཡ་ག་བཙུན་མོ་དང་བཅས་པ་སྟེ་བརྒྱད་དོ། །སེམས་ཅན་ཀུན་ལ་ཕན་སེམས་པའི། །དྲང་སྲོང་སྐལ་བ་ཆེན་པོ་རྣམས། །ཞེས་པ་ནི་དྲང་སྲོང་ནི་བརྒྱད་དེ། མེ་བཞི་རིན་པོ་ཆེ་འབར་བ་བསྣམས་པའོ། །ནག་པ་འཁོར་ལོ། ཡང་དག་ཤེས་རྡོ་རྗེ་འཁོར་ལོ། །མདུན་བདར་རྩེ་གསུམ། གྱ་གྱུ་རིན་པོ་ཆེའི་སྒྲོམ། གྱུར་མིད་དགྲ་སྟ། ཨ་གུར་མེ་དཔུང༌། གཡོག་འདོར་འཁོར་ལོ་བསྣམས་པ་སྟེ། མེ་ལྷའི་འཁོར་ཡིན་པས་ཤར་ལྷོ་མཚམས་ནས་བྲིའོ། །མཁའ་འགྲོ་མ་དང་བུད་མེད་བྲི། །ཞེས་པ་ནི་ལས་དང་རྫུ་འཕྲུལ་གྱིས་མཁའ་ལ་འགྲོ་ལ། མཐུ་དང་རྫུ་འཕྲུལ་གྱིས་མཁའ་ལ་འགྲོ་བ་སྟེ། དྲག་མོ་དང༌། བདུད་རྩི་མོ་དང༌། ཟ་བ་མོ་དང༌། རྡོ་རྗེའི་མཆུའི་ཆུང་མ་དང༌། ནོར་ལྷའི་ཆུང་མ་དང༌། ཕག་མགོ་མའོ། །བུད་མེད་ནི་རྒྱལ་བར་བྱེད་པ་དང༌། སྦྲང་རྩིར་བྱེད་པ་དང༌། དོན་ཀུན་གྲུབ་པར་བྱེད་པའི་སྲིང་མོ་གསུམ་སྟེ། དགའ་བ་མོ་དང༌། འཇོམས་པར་བྱེད་པ་མོ་དང༌། སྦྲང་རྩིར་འཛིན་པ་མོའོ། །དེ་བཞིན་སྲིད་མོ་རྣལ་འབྱོར་མ། །ཞེས་པ་ནི་སྲིད་མོ་ནི་བཞི་སྟེ། རྒྱལ་མ་དང༌། རྣམ་པར་རྒྱལ་མ་དང༌། མི་ཕམ་མ་དང༌། རིག་སྔགས་འཆང་མ་རྣམས་སོ། །དེ་ནི་ནུབ་ནས་བྱང་ལོགས་སུའོ། །རྣལ་འབྱོར་མ་ནི་པདྨ་ཅན་དང༌། འཇིགས་བྱེད་མ་དང༌། རྣམ་རྒྱལ་མ་དང༌། མདངས་ཅན་མ་དང༌། འོད་ལྡན་མ་དང༌། དྲི་མེད་མ་དང༌། ཡིད་བཟང་མ་སྟེ་བརྒྱད་དོ། །འབྱུང་བ་བཞིའི་ལྷ་ཆེན་པོ། །ཞེས་པ་ནི་མེ་ལྷ་དང༌། ཆུ་ལྷ་དང༌། རླུང་ལྷ་དང༌། སའི་ལྷ་རྣམས་སོ། །ཁྱིམ་དང་རི་ལ་གནས་པ་དང༌། ཞེས་པ་ནི་ཁྱིམ་གྱི་ལྷ་ཀུན་སྣང་བ་དང༌། རིའི་ལྷ་རབ་ཏུ་བརྟན་པའི་བློ་གྲོས་སོ། །ཤིང་དང་ཀུན་དགའ་གནས་ལ་སོགས། །ཞེས་པ་ནི་ཤིང་གི་ལྷ་ཀུན་ནས་འོད་ཟེར་དང༌། ཀུན་དགའ་ར་བའི་ལྷ་ཀུན་དུ་སྣང་བའི་བློ་གྲོས་དང༌། གནས་ཀྱི་ལྷ་ཚོགས་སྒོའོ། །དུར་ཁྲོད་ཀྱི་ལྷ་འབྱུང་པོ་དགེ་བ་དང༌། གྲོང་ཁྱེར་གྱི་ལྷ་བསོད་ནམས་དགེ་བའི་བློ་གྲོས་སོ། །མིང་ངམ་བརྡ་འམ་ཡང་ན་ནི། ཐིག་ལེ་རྣམས་ཀྱང་བྲི་བར་བྱ། །ཞེས་པ་ནི་མིང་ནི་སྙིང་པོའོ། །བརྡ་ནི་ཕྱག་མཚན། ཐིག་ལེ་ནི་གདན་ཙམ་བྱས་པ་ལ་བཞག་པའོ། །དེ་ལ་རྡོ་རྗེར་བའི་ཕྱི་རོལ་དུ་ཤིང་སྣ་ཚོགས་ཀྱི་ནང་དུ་ཤར་ལྷོ་
མཚམས་སུ་ཁྲོ་བོ་མ་རུངས་འཚེ་བ་སྟེ་དམྱལ་བ་རྣམས་བྲི་བར་བྱའོ། །ལྷོ་ནུབ་མཚམས་སུ་འབྱུང་པོ་ཡི་དགས་འདྲེ་རྣམས་དང་ཞེས་པ་སྟེ། ཡི་དགས་རྣམས་བྲི་བར་བྱའོ། །ནུ་བ་བྱང་དུ་བ་གེགས་དང་བི་ན་ཡ་ག་སྟེ་བགེགས་དང་བྱོལ་སོང་རྣམས་བྲི་བར་བྱའོ། །བྱང་ཤར་དུ་མིའི་འགྲོ་རིས་རྣམས་བྲི་བར་བྱའོ། །དེ་རྣམས་ཀྱང་མིང་ངམ་བརྡའམ་ཐིག་ལེར་བྲི་བར་བྱའོ། །གཞན་རྣམས་ནི་ཁོར་ཡུག་ལ་ཅི་རིགས་སུ་བྲི་བར་བྱའོ་ཞེས་སློབ་དཔོན་རྒྱལ་བ་འོད་ཀྱང་བཞེད་དོ། །དེ་ཡན་ཆད་དུ་དཀྱིལ་འཁོར་བྲི་བ་དང་ལྷ་དགོད་པར་བྱའོ།། །།ད་ནི་དཀྱིལ་འཁོར་གྱི་རྒྱན་དགོད་པའི་རིམ་པ་འབྱུང་སྟེ། དེ་ལ་འང་འཕགས་པའི་དཀྱིལ་འཁོར་མཆོད་པ་དང༌། སློབ་མ་དབང་བསྐུར་བ་དང༌། སྤྱིན་གཏོར་བསྔོ་བའོ། །དེ་ནས་མཁས་པས་དཀྱིལ་འཁོར་ལ། །བླ་རེ་རྒྱལ་མཚན་ལྷབ་ལྷུབ་དང༌། །གདུགས་དང་རྔ་མ་ལྡ་ལྡི་དང༌། །འཕན་དང་སྣ་ཚོགས་ན་བཟའ་མཆོད། །ཅེས་པ་ནི་རྒྱན་དགྲམ་ཞིང་འཕགས་པ་མཆོད་པའོ། །གསེར་ལས་བྱས་པའི་བྱ་རྣམས་ནི། །བརྒྱད་དམ་བཅུ་དྲུག་ལྷག་ཀྱང་རུང༌། །ཞེས་པ་ནི་འཕགས་པ་མཆོད་པའི་བུམ་པ་གང་བ་རྒྱུ་གསེར་ལ་སོགས་པ་ལས་བྱས་པ་བརྒྱའམ་ལྔ་བཅུའམ་བཅུ་དྲུག་གམ་བརྒྱད་ལས་ཉུང་བར་མི་བྱའོ། །དབང་བསྐུར་རིན་ཆེན་ཆུས་བཀང་བའི། །བུམ་པ་ལྔ་ནི་གཞག་པར་བྱ། །ཞེས་པ་ནི་རྣམ་པར་རྒྱལ་བ་ལ་སོགས་པར་བྱིན་གྱིས་བརླབས་པའི་བུམ་པ་སློབ་མ་དབང་བསྐུར་བའི་བུམ་པ་ལྔ་འོག་ནས་འབྱུང་བ་བཞིན་བྱིན་གྱིས་བརླབས་ལ་གཞག་པར་བྱའོ། །གཞན་ཡང་མཆོད་པའི་ཁྱད་པར། །མར་མེ་གཏོར་མ་བུམ་པ་དང༌། །མཛེས་པའི་བཤོས་རྣམས་གཞག་པར་བྱ། །ཞེས་པ་ནི་ཕྱི་མ་ནི་གོ་སླའོ། །བུམ་པ་ནི་གསང་བའི་བུམ་པ་སྟེ། རྡོ་རྗེ་གནོད་སྦྱིན་གྱི་བྱིན་གྱིས་བརླབས་པའི་ལས་ཐམས་ཅད་པའི་བུམ་པའོ། །གཞན་ཡང་བཟའ་བ་དང་བཅའ་བ་ལ་སོགས་པ་སྣ་ཚོགས་པ་དང༌། གཏོར་མ་ཆ་བཅུ་གཉིས་ལ་སོགས་པ་སྣ་ཚོགས་པ་ལས་བྱས་པ་གཞག་གོ །མེ་ཏོག་དྲི་རྣམས་སྣ་ཚོགས་དང༌། །ཞེས་པ་ལ་སོགས་པ་ནི་ཁྲོ་བོ་རྣམ་པར་རྒྱལ་བའི་བུམ་པ་སྟེ། བྱིན་གྱིས་བརླབས་པ་ཚུལ་ལྟར་བྱས་ལ་ཤི་བའི་
རུས་པ་དང་མིང་བཀྲུ་བ་དང༌། སློབ་མ་སྣད་དུ་རུང་བར་བྱ་བའི་ཆེད་དུ་བསྟན་པའོ། །བུམ་པ་ལ་ཡང་དབྱེ་བ་བུམ་པ་གང་བ་མཆོད་ཅིང་དབང་བསྐུར་བ་བྱེད་པ་དང༌། དབང་བསྐུར་བའི་བུམ་པ་རྣམ་པར་སྣང་མཛད་ལ་སོགས་པར་བྱིན་གྱིས་བརླབས་བ་དང༌། གསང་བའི་བུམ་པ་ལས་ཐམས་ཅད་པར་བྱིན་གྱིས་བརླབས་པ་དང༌། རྡོ་རྗེ་སེམས་དཔའི་བུམ་པ་བདག་ཉིད་དང་སློབ་མ་དབང་བསྐུར་བ་དང༌། ཁམས་གསུམ་རྣམ་པར་རྒྱལ་བའི་བུམ་པ་ཁྲུས་ཀྱི་བུམ་པ་དང་ལྔ་རུ་ཤེས་པར་བྱའོ། །དེ་ཡང་ཡོ་བྱད་ནི་རིན་པོ་ཆེ་སྣ་ལྔ་ལས་བྱས་པ་མཆུ་འཕྱང་པ་ནག་པོར་རི་མེད་པ་མགྲིན་པ་རིང་བའོ། །ལས་ཐམས་ཅད་པ་དང་ཁྲོ་བོ་ཁམས་གསུམ་རྣམ་པར་རྒྱལ་བའི་བུམ་པ་གཉིས་ནི་ལྕེའུ་དང་བཅས་པའོ། །སྨན་ལྔ་དང༌། སྙིང་པོ་ལྔ་དང༌། འབྲུ་ལྔ་དང༌། དྲི་ལྔ་དང༌། སྤོས་ལྔ་དང༌། རིན་པོ་ཆེ་སྣ་ལྔ་ལ་སོགས་པ་འབྱོར་ཚད་དུ་བཤམས་ལ་བྱིན་གྱིས་བརླབས་པ་ནི། ལས་བུམ་བསྐྱེད་ལ་དེའི་ནང་དུ་ཏིང་ངེ་འཛིན་ནི་བྱེ་བྲག་གིས་ཤེས་པར་བྱའོ། །བུམ་པ་བཞག་པ་ནི་དགོངས་ཀའི་དུས་སུ་འཇུག་པ་ལ་སོགས་པ་འོག་ནས་འབྱུང་བ་བཞིན་བྱས་ལ་གཞག་པར་བྱའོ། །དེ་ལྟར་དཀྱིལ་འཁོར་ལེགས་པར་བཀོད་ནས་གནས་པར་བྱའོ། །དེ་ནས་ཁྲུས་ལ་སོགས་བྱས་ལ། །ཞེས་བྱ་བ་ལ་སོགས་པ་གསུངས་པ་ལ། དེ་ནས་ནི་བཀྲ་ཤིས་པའི་དོན་ཏེ། དཀྱིལ་འཁོར་བྲིས་པའི་རྟིང་ཐོགས་སོ། །ཁྲུས་བྱས་ལ་ཞེས་པ་ནི་དང་པོར་རེ་ཞིག་རང་གི་སྡོམ་པ་ལ་གནས་པའི་ནང་གི་བདག་ཉིད་ཅན་ནི་ཁྲུས་དང༌། ཕྱིའི་ཡང་ཅི་ནུས་པར་བྱའོ། །དེ་ལ་སྡོམ་པ་གསུམ་ལ་རབ་ཏུ་གནས་ཤིང་སྐྱོང་བ་ནི་ཁྲུས་གཅིག་པའོ། །བཤགས་པ་དང་གསོལ་བ་འདེབས་པ་ལ་སོགས་པ་ནི་གཉིས་པའོ། །ཕྱག་རྒྱ་དགྲོལ་བ་ནི་གསུམ་པའོ། །ཆུའི་ཁྲུས་ནི་བཞི་པ་སྟེ། འདི་དག་དང་གོས་གསུམ་བརྗེ་བར་ཡང་བྱའོ། །དེ་ལ་སྡོམ་པ་གསུམ་ལ་གནས་པ་ནི་གོས་དང་པོའོ། །ངོ་ཚ་ཤེས་པ་དང་ཁྲེལ་ཡོད་པ་ནི་གཉིས་པའོ། །ཕྱིའི་གོས་གཙང་མ་ནི་གསུམ་པ་ཞེས་བཤད་དོ། །ཆུ་དང་སའི་ཁྲུས་ལ་སོགས་པ་བྱས་ལ། ལུས་དྲི་ཞིམ་པོས་བྱུགས་ལ། ཇི་སྙེད་པའི་གོས་དང༌། རྒྱན་གདགས་ཤིང་ཤིན་ཏུ་སེར་བའི་གོས་བགོ་བ་དང༌། མེ་ཏོག་གི་ཕྲེང་བ་གདགས་པ་དང༌། ཤིང་ཐོག་དྲི་ཞིམ་པོས་ཁ་བཀང་སྟེ་དབུ་རྒྱན་ལ་སོགས་པས་
མཛེས་པར་བྱས་ལ་གནས་པའོ། །རྡོ་རྗེ་འཛིན་མས་ཞུགས་ནས་ཀྱང༌། །མེ་ཏོག་ཐོགས་ཏེ་སྒོ་ཕྱོགས་འདུག །ཅེས་པ་ནི་དཀྱིལ་འཁོར་བྲིས་པའི་རྟིང་ལ་ཕྱི་རོལ་ཀུན་དུ་སྤོས་ཆུས་བྱུག་ཅིང་མེ་ཏོག་སིལ་མ་བཀྲམ་ལ། དགོངས་ཀའི་དུས་སུ་བཛྲ་སཏྭ་ཧཱུཾ་ཞེས་བཟླས་ཤིང་རྡོ་རྗེ་སེམས་མའི་དམ་ཚིག་གི་ཕྱག་རྒྱས་མེ་ཏོག་གི་ཕྲེང་བ་ཐོགས་ལ་རྡོ་རྗེ་ཤུགས་ཀྱི་དཀྱིལ་འཁོར་དུ་ཞུགས་ལ། ཡང་རྡོ་རྗེ་ དྲིལ་བུ ་དཀྲོལ་ཏེ་དཀྱིལ་འཁོར་ལན་བདུན་དུ་བསྐོར་བ་བྱས་ལ། དཀྱིལ་འཁོར་ཐམས་ཅད་ཀྱིས་ལྷག་པ་དང༌། མ་ཚང་བའི་ཉེས་པ་ཞི་བར་བྱ་བའི་ཕྱིར་བལྟས་ལ་བཅོམ་ལྡན་འདས་རྡོ་རྗེ་སེམས་དཔའ་དེ་ལ་ཕུལ་ལ་རྡོ་རྗེ་གར་བྱས་ཏེ་བླངས་ལ་རང་གི་མགོ་ལ་བཅིང་བར་བྱ་ཞིང་བཛྲ་སཏྭ་ཧཱུཾ་ཞེས་བར་མཆད་པར་བཟླ་བར་བྱའོ། །དེ་ཡང་རྡོ་རྗེ་ དྲིལ་བུ ་རབ་བསྐུལ་བས། །མཁས་པས་མ་ཚང་ཡོངས་སུ་བཀང༌། །ལྷག་མ་གང་ཡིན་དོར་བྱེད་དེ། །འགྲུབ་འགྱུར་སྨད་པར་མི་བྱའོ། །ཞེས་གསུངས་པ་ཡིན་ནོ། །དེ་ནས་གོང་གི་བུམ་པ་རྣམས་དཀྱིལ་འཁོར་དུ་དགོད་པར་བྱ་སྟེ། དེ་ནས་ཡི་གེ་ཧཱུཾ་ལས་བདག་ཉིད་རྡོ་རྗེ་ཧཱུཾ་མཛད་དུ་བསམ་པར་བྱའོ། །དེ་ནས་དབུས་སུ་འདུག་ནས་ནི། །རྡོ་རྗེ་སློབ་དཔོན་མཉམ་གཞག་པས། །རྡོ་རྗེ་སྒོ་ནི་རྣམ་བཞིའོ། །ཡིད་ཀྱིས་སུ་ནི་དབྱེ་བར་བྱ། །ཨོཾ་བཛྲོད་གྷ་ཊ་ས་མ་ཡ་པྲ་བེ་ཤ་ཡ་ཧཱུཾ་ཞེས་བྱ་བ་ཕྱག་རྒྱ་དང་ལྡན་པས་དཀྱིལ་འཁོར་གྱི་སྒོ་ཐམས་ཅད་དབྱེ་བར་བྱའོ། །དེ་ནས་རྡོ་རྗེ་སེམས་དཔའ་དང་ལྡན་པའི་རྣལ་འབྱོར་ཆེན་པོ་བྱས་ནས། རྣམ་པར་རྒྱལ་བའི་བུམ་པ་ཇི་སྐད་བཤད་པའི་མཚན་ཉིད་དང་ལྡན་པའི་བུམ་པ་ལ་རྡོ་རྗེ་དང་བཅས་པའི་མེ་ཏོག་གིས་ལྷག་མ་རྡོ་རྗེ་སེམས་དཔས་ཡོངས་སུ་བཟུང་བ་ལས། ཨོཾ་བཛྲས་ཏྭ་ཧཱུཾ་ཞེས་བྱ་བ་འདི་ལན་བརྒྱ་རྩ་བརྒྱད་བཟླས་ལ་ཡང་བཛྲོད་ཏ་ཀ་ཧཱུཾ་གི་སྔགས་སྟོང་རྩ་བརྒྱད་མངོན་པར་བཟླས་ཏེ། བཅོམ་ལྡན་འདས་རྡོ་རྗེ་སེམས་དཔའི་སྤྱན་སྔར་ལེགས་པར་གཞག་གོ །བུམ་པ་ལྷག་མ་རྣམས་ལ་ནི་དེ་བཞིན་གཤེགས་པ་ལ་སོགས་པའི་སྔགས་ཤོ་དྷ་ནི་ལ་སོགས་པ་བརྒྱ་རྩ་བརྒྱད་བཟླས་ཏེ། དཀྱིལ་འཁོར་གྱི་ཕྱི་རོལ་ཀུན་དུ་གཞག་པར་བྱའོ། །དེའི་རྗེས་ལ་བུམ་པ་གང་བ་ལ་རྣམ་པར་སྣང་མཛད་དམ་བཏི་ལ་སོགས་པ་བཟླས་ལ་ཕྱི་རོལ་དུ་གཞག་པར་བྱའོ། །ཡང་བུམ་པ་གཅིག་ལ་རྡོ་རྗེ་སེམས་དཔའ་བརྒྱ་རྩ་བརྒྱད་བཟླས་ཏེ་འཇུག་པའི་སྒོར་མངོན་པར་ཕྱོགས་ཏེ་གཞག་
པར་བྱའོ། །མ་འབྱོར་ན་རྡོ་རྗེ་སེམས་དཔའ་དང༌། དེ་བཞིན་གཤེགས་པ་ལྔ་ལ་བུམ་པ་རེ་རེ་དབུལ་བར་བྱའོ། །ཨོཾ་བཛྲསྟྭ་མུཥྚི་ཨ་ཞེས་པ་ནི་དེ་བཞིན་གཤེགས་པ་མི་བསྐྱོད་པའི་རིགས་ཀྱི་བུམ་པ་ལའོ། །ཨོཾ་རཏྣ་མུཥྚི་ཏཾ་རིན་ཆེན་འབྱུང་ལྡན་ཀྱི་རིགས་ཀྱི་བུམ་པ་ལའོ། །ཨོཾ་བཛྲ་དྷརྨ་མུཥྚི་ཁཾ་ཞེས་བྱ་བ་ནི་ཤཱཀྱ་ཐུབ་པའི་རིགས་ཀྱི་བུམ་པ་ལའོ། །ཨོཾ་ཀརྨ་མུཥྚི་ཧཾ་ཞེས་བ་ནི་མེ་ཏོག་ཆེར་རྒྱས་ཀྱི་རིགས་ཀྱི་བུམ་པ་ལའོ། །དེ་རྣམས་ལན་བརྒྱ་རྩ་བརྒྱད་བཟླས་ལ་རིགས་དེ་ལ་དབུལ་བར་བྱའོ། །དེ་བཞིན་དུ་བུམ་པ་གང་བ་ཡང་དབུལ་བར་བྱ་སྟེ། བཅུ་ལས་ཉུང་བ་མི་བྱའོ། །ལས་ཐམས་ཅད་བའི་བུམ་པ་ལ་ནི་རྡོ་རྗེ་གདོན་སྦྱིན་གྱི་སྔགས་བརྒྱ་རྩ་བརྒྱད་བཟླས་ཏེ། དབང་ལྡན་གྱི་ཕྱོགས་སུ་གཞག་པར་བྱའོ། །ཁྲོ་བོ་ཁམས་གསུམ་རྣམ་པར་རྒྱལ་བའི་བུམ་པ་ལ་ནི་དེ་ཉིད་སྔགས་བརྒྱ་རྩ་བརྒྱ་བཟླས་ཏེ་ལྷོ་སྒོར་བྱ་བའི་ཆོ་ག་ཡིན་ཏེ། སྟེགས་བུ་ཁྲུ་གང་པ་པདྨ་འདབ་མ་བརྒྱད་བྲིས་པའི་སྟེང་དུ་བཞག་ལ་ཁྲུས་ལ་སོགས་པ་བྱའོ། །དེ་ནས་དཀྱིལ་འཁོར་གྱི་ལྷ་ཡིད་ཀྱིས་མངོན་སུམ་ལྟར་བུར་མངོན་དུ་བྱས་ལ། མཆོད་པ་ལྔ་དང་ཁ་ཟས་ཀྱི་བྱེ་བྲག་རྣམས་ཀྱིས་ཅི་ནུས་པས་ཡང་དག་པར་མཆོད་པ་ནས་རང་གི་གདོང་ཇི་ལྟ་བ་བཞིན་དུ་གཡོགས་ཏེ། ཕྱོགས་བཞི་ནས་སྡོམ་པ་བཟུང་བའི་བར་དུ་བྱས་ནས། ཕྱི་རོལ་ན་གནས་པའི་བུམ་པའི་ཆུས་བདག་ཉིད་དབང་བསྐུར་ལ་མཆོད་པ་ལྔས་མཆོད་དེ། ས་མ་ཡ་སྟྭཾ་ཞེས་བརྗོད་ནས་སེམས་མ་རྡོ་རྗེ་མ་བཅིངས་ལ། སློབ་མ་འཇུག་པའི་ཆོ་གས་འཇུག་གོ །གཙོ་བོ་རྒྱལ་བ་སྲས་དང་འཁོར། །མང་པོ་རྣམས་ནི་སྤྱན་དྲངས་ཏེ། །ཞེས་བྱ་བ་ལ་སོགས་པ་གསུངས་པ་སྟེ། དང་པོར་ཁྲུས་ལ་སོགས་པ་བྱས་ནས། དེ་ནས་ཕྱག་འཚལ་བ་ལ་སོགས་པ་སྔོན་དུ་འགྲོ་བས་སྡོམ་པ་བཟུང་ལ། དེ་ནས་སྡིག་པ་དྲལ་བ་དང༌། ཕྱག་རྒྱ་དགྲོལ་བ་ཇི་ལྟ་བ་བཞིན་དུ་བྱས་ལ་རྣལ་འབྱོར་ཆེན་པོ་བྱའོ། །དེ་ནས་སྦྱོར་བ་དང་པོ་དང་དཀྱིལ་འཁོར་རྒྱལ་མཆོག་རྣམ་པར་བསྒོམས་ནས། བསྡུ་བ་བྱས་ལ་ཕྱག་བཙལ་བ་དང་ཆེད་དུ་བརྗོད་པ་བརྗོད་པ་དང༌། རང་གི་སྙིང་གར་གཞུག་པ་དང༌། ཕྱིར་ཕྱུང་ནས་ཆེད་དུ་བརྗོད་པ་ནས་རང་རང་གི་གནས་སུ་གནས་པར་བྱས་ནས། དེ་ནས་རྡོ་རྗེ་སེམས་དཔའ་དང་ལྷན་ཅིག་ཏུ་གྱུར་པའི་རྣལ་འབྱོར་པས་དེ་བཞིན་གཤེ་པ་ཐམས་ཅད་ལས་ཕྲེང་བ་ལ་སོགས་པའི་དབང་བསྐུར་བ་བླངས་ལ་
དེ་བཞིན་གཤེགས་པ་རྣམས་སྤྱན་དྲངས་ཏེ། གཙོ་བོ་རྒྱལ་བ་ནི་ཀུན་རིག་རྣམ་པར་སྣང་མཛད་ལ་སོགས་པའོ། །སྲས་ནི་འཁོར་སེམས་དཔའ་ད་སེམས་མའོ། །འཁོར་ནི་འཇིག་རྟེན་པའོ། །མང་པོར་ནམས་ནི་བརྗོད་ཀྱིས་མི་ལང་བའོ། །སྤྱན་དྲངས་ཏེ་ནི་ཚིགས་བཅད་དང་སྔགས་དང་ཕྱག་རྒྱས་སོ། །དེ་ཡང་འདི་སྐད་སྟོན་ཏེ། དེ་བཞིན་གཤེགས་པ་ཐམས་ཅད་དང༌། རྡོ་རྗེ་སེམས་དཔའ་ལ་སོགས་པ་ནས་འཇིག་རྟེན་པ་ཡན་ཆད་དང་བཅས་པའོ། །དེ་རྡོ་རྗེ་དབྱིངས་ཀྱི་ཁང་པ་བརྩེགས་མ་ན་བཞུགས་པའི་སངས་རྒྱས་ཐམས་ཅད་འདུས་པར་མཛད་དེ། རྡོ་རྗེ་སློབ་དཔོན་གྱིས་བརྟགས་པའི་དཀྱིལ་འཁོར་བྱེ་བ་མཐའ་ཡས་པའི་གཞལ་ཡས་ཁང་དུ་བཞུགས་ཏེ། ཀུན་ནས་ཡོངས་སུ་བསྐོར་བའི་ཚུལ་གྱིས་འདུས་པར་གྱུར་ཅིང་ཚོགས་པར་མཛད་དོ་ཞེས་པའི་བར་དུའོ། །ཕྱག་རྒྱ་སྔགས་དང་བདག་ལྡན་ཞིང༌། །ཞེས་པ་ནི་བདག་དང་དམ་ཚིག་ལ་སོགས་པ་ཕྱག་རྒྱ་བཞི་དང་ལྡན་པའོ། །དེ་ཡང་ཆོས་དང་ལས་དང་ཕྱག་རྒྱ་ཆེན་པོ་དང་ལས་ཀྱི་ཕྱག་རྒྱར་བཤད་པ་གང་ཡིན་པ་དེ་ནི་བདག་ལྡན་ཞིང་ངོ༌། །དེ་ལ་ཡང་བསྒྲུབ་པའི་ཡན་ལག་བཅུ་དྲུག་ཏུ་བསྟན་པ་ནི། ཕྱག་རྒྱ་ཆེན་པོ་དང༌། དམ་ཚིག་དང༌། ཆོས་དང༌། ལས་ཀྱི་ཕྱག་རྒྱ་དང༌། དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱ་བ་དང༌། བྱིན་གྱིས་བརླབས་པ་དང༌། དབང་བསྐུར་བ་དང༌། ཏིང་ངེ་འཛིན་དང༌། མཆོད་པ་དང༌། སྙིང་པོ་དང༌། ཕྱག་རྒྱ་དང༌། སྔགས་དང༌། རིག་པའོ། །འདི་དག་ནི་རྣམ་པར་སྣང་མཛད་ལ་སོགས་པ་རེ་རེ་ཞིང་སོ་སོར་བསྒྲུབ་པར་བྱ་བའི་ཕྱིར་གསུངས་ལ། དཀྱིལ་འཁོར་གྱི་ལྷ་རྣམས་བསྒྲུབས་པ་ནི་ཕྱག་རྒྱ་བཞི་བཞིར་བསྟན་པས་ན་ཕྱག་རྒྱ་ཞེས་བྱའོ། །ལྕགས་ཀྱུ་ལ་སོགས་རྣལ་འབྱོར་གྱིས། །ཞེས་པ་ནི་རྣམ་པར་སྣང་མཛད་ལ་སོགས་པ་ཕྱག་རྒྱ་བཞི་བཞག་པ་དེ་བཞིན་དུ། སེམས་མ་རྡོ་རྗེ་མ་ལ་སོགས་པ་བྱེད་པ་པོར་གྱུར་པ་རྣམས་ཀྱིས་བསྒྲུབ་པར་བྱ་ཞིང་བདག་ཉིད་ཀྱི་དབང་དུ་བྱའོ། །ཅི་ཞིག་སྨྲ་ཞིང་དབང་དུ་བྱེད་ཅེ་ན། ཛཿ་ཧཱུཾ་བཾ་ཧོཿཐུགྶ་རྗེའི་བདག །ཅེས་བྱ་སྟེ། འདིས་ནི་དམ་ཚིག་གི་ཕྱག་རྒྱ་རྣམས་ཀྱི་སྤྱིའི་ཡི་གེ་བཞི་པོ་བསྒྲུབ་པའི་སྙིང་པོར་གསུངས་པ་ཡིན་ནོ། །ལ་ལ་དག་ཛཿཧཱུཾ་བཾ་ཧོཿཞེས་བྱ་བ་འདིས་བདག་
རྡོ་རྗེ་ལྕགས་ཀྱུ་ལ་སོགས་པའི་སྒོ་སྲུང་གི་ཕྱག་རྒྱའི་སྙིང་པོ་ཡིན་པར་འདོད་དོ། །ཡང་ཇི་ལྟར་ཤེས་ཤེ་ན། དགུག་པ་ལ་སོགས་པའི་དོན་གསལ་བར་བྱེད་པའི་ཕྱིར་རོ། །གཞན་དག་ནི་ཛཿ་ཧཱུཾ་བཾ་ཧོཿཞེས་བརྗོད་ལ། ལེགས་པའི་ཆོ་གས་ཡིད་ཀྱིས་ནི། །ལུས་ལ་སངས་རྒྱས་ཀུན་གཞུག་གོ །ཞེས་བྱ་བ་འདིར་ཡང་ཡིན་གྱི། སྒོ་སྲུང་རྣམས་ཀྱི་སྙིང་པོ་ཡི་གེ་བཞི་ཡིན་པར་ཁས་བླངས་ན་ནི་ཨ་ཞེས་བྱ་བ་དབབ་པའི་སྙིང་པོ་ཡིན་པའི་ཕྱིར་དང༌། ཧོཿཞེས་བྱ་བ་རྡོ་རྗེ་ཆགས་པའི་སྙིང་པོ་ཡིན་པའི་ཕྱིར་རོ། །བཅོམ་ལྡན་འདས་ཉིད་ཀྱི་དོན་འདི་བཤད་པར་མཛད་པ་ཡིན་ཏེ། །དེ་ནས་ཀུན་མཆོག་ལ་སོགས་པ། །མངོན་བྲིས་ནས་ནི་ཡང་དག་བསྒྲུབ། །དམ་ཚིག་མཆོག་ནི་བཅིང་ནས་ཀྱང༌། །ཛཿཧཱུཾ་བཾ་ཧོཿཞེས་བརྗོད་དོ། །ཞེས་བྱའོ། །དོན་དེ་དག་ཀྱང་བསྟན་པ་ཙམ་དུ་མཛད་པ་ཡིན་གྱི། བསྒྲུབ་པའི་གོ་རིམས་ནི་འདི་ཡིན་ནོ། །རྡོ་རྗེ་བསྡུ་བའི་ཕྱག་རྒྱ་བཅིང་ལ། །རྡོ་རྗེ་སེ་གོལ་བརྡབ་པའི་སྒྲ་བྱེད་ཅིང༌། །ཨོཾ་ཛཿཧཱུཾ་བཾ་ཧོཿས་མ་ཡ་ཞེས་བརྗོད་ཅིང༌། ཚུར་གཤེགས་ཞེས་ནི་བརྗོད་ནས་ཀྱང༌། །ཞེས་གསུངས་ཏེ། ཚིགས་སུ་བཅད་པ་མང་པོ་ཡང་བརྗོད་དོ། །དེ་ནས་བརྗོད་པ་ཙམ་གྱིས་བསྟི་གནས་ཀྱི་སར་བྱོན་པ་དང༌། པུས་མོ་གཉིས་ཀྱི་ལྷ་ང་ས་ལ་བཙུགས་ལ། རྡོ་རྗེ་ཐལ་མོ་བསྐོར་ནས་ཤིས་པ་བརྗོད་པའི་ཚུལ་དུ་སྙིང་གར་འཇོག་པའི་ཕྱག་རྒྱ་དང༌། ནམ་མཁའ་ལས་བྱུང་མཚན་ལྡན་ཕྱིར། །ཞེས་བྱ་བ་ལ་སོགས་པའི་བསྟོད་པས་མཆོད་པར་བྱའོ། །དེ་ནས་གསང་བ་བཅིངས་ས་ནས་ཀྱང༌། །མཛུབ་གཉིས་ལྕགས་ཀྱུའི་ཚུལ་དུ་བྱ། །ཞེས་པས་ནི་སྒོ་དབྱེ་བ་བྱས་ནས་རྡོ་རྗེ་ལྕགས་ཀྱུའི་ལས་ཀྱི་ཕྱག་རྒྱ་འདིས་རྣམ་པར་སྣང་མཛད་དང༌། ངན་སོང་སྦྱོང་བའི་རིགས་བཀུག་ལ་ཤར་སྒོར་གཞག་པར་བྱའོ། །རིན་ཆེན་དཔལ་གྱི་རིགས་ནི་ལྷོ་སྒོ་དང་ཉེ་བར་རོ། །ཤཱཀྱ་ཐུབ་བའི་རིགས་ནི་ནུབ་སྒོ་དང་ཉེ་བར་རོ། །མེ་ཏོག་ཆེར་རྒྱས་ཀྱི་རིགས་ནི་བྱང་སྒོ་དང་ཉེ་བར་རོ། །དེའི་ཕྱག་རྒྱ་ནི་རྡོ་རྗེ་ཁུ་ཚུར་ལས་མཁྲིག་མ་མདུད་ལ་མཐེའུ་ཆུང་གཉིས་སྦྲེལ་ཏེ། མཛུབ་མོ་གཉིས་ལྕགས་ཀྱུའི་ཚུལ་དུ་བྱས་པའོ། །དེ་ཉིད་ལས་མཛུབ་མོ་ངོས་སྦྱོར་བ་ནི་ཞགས་པའི་ཕྱག་རྒྱ་སྟེ། དེས་རང་རང་གི་སྒོ་ནས་རང་
རང་གི་གནས་སུ་གཞུག་པར་བྱའོ། །དེ་ཉིད་ལས་མཛུབ་མོ་བསྡམས་པ་ནི་ལྕགས་སྒྲོག་གི་ཚུལ་ལོ། །དེས་ནི་ཕྱག་རྒྱ་ཐམས་ཅད་བཅིང་བར་བྱའོ། །དེ་ཉིད་ལས་མཐེ་བོ་གཉིས་ནང་དུ་བཀུག་གནས་ཕྱག་རྒྱ་བསྐོར་བ་ནི་དྲིལ་བུའི་ཕྱག་རྒྱ་སྟེ། རྣམ་པར་སྣང་མཛད་ལ་སོགས་པ་དབང་དུ་བྱའོ། །དེ་ནས་རྡོ་རྗེ་གནོད་སྦྱིན་གྱིས་བགེགས་བསལ་བ་དང༌། རབ་དང་དྲ་བ་བྱས་ནས། རྡོ་རྗེ་ཁུ་ཚུར་གྱིས་སྒོ་བཅད་ལ། རྡོ་རྗེ་གོ་ཆས་བསྲུང་བ་ཐམས་ཅད་ཡང་དག་པར་བསྲུངས་ནས། རྡོ་རྗེ་སེམས་དཔའི་མཆོད་ཡོན་ཕུལ་ལ། དམ་ཚིག་གི་ཕྱག་རྒྱ་རྣམས་ཀྱིས་ཀུན་རིག་རྣམ་པར་སྣང་མཛད་ལ་སོགས་པ་བལྟ་བར་བྱས་ནས་རིམ་པ་འདིས་བསྒྲུབ་པར་བྱའོ། །ཀུན་རིག་རྣམ་པར་སྣང་མཛད་ཀྱི་དམ་ཚིག་གི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དོ། །ཤོདྷ་ནིའི་སྔགས་ཀྱི་རྗེས་ལ་བཛྲ་དྷཱ་ཏུ་དྲྀ་ཤྱ་ཛཿ་ཧཱུཾ་བཾ་ཧོཿ་ས་མ་ཡ་སྟྭཾ། ས་མ་ཡ་སྟྭཾ་ཨ་ཧཾ་བཛྲ་དྷཱ་ཏུ་ཞེས་བྱ་བ་ནས། དེ་བཞིན་དུ་རྡོ་རྗེ་འབེབས་པའི་དམ་ཚིག་གི་ཕྱག་རྒྱ་བཅིངས་ལ། བཛྲ་ཨ་བེ་ཤ་ཛཿ་ཧཱུཾ་བཾ་ཧོཿ་ས་མ་ཡ་སྟྭཾ་ས་མ་ཡ་སྟྭཾ་ཨ་ཧཾ་བཛྲ་ཨ་བེ་ཤ་ཞེས་ལན་གསུམ་བརྗོད་པའི་བར་དུའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོས་གཞག་པར་བགྱི་ཞེས་བྱ་བ་དམ་ཚིག་གི་ཕྱག་རྒྱས་རྣམ་པར་སྣང་མཛད་ལ་སོགས་པར་དག་པར་བསྒྲུབས་ལ་དེའི་འོག་ཏུ་ཆོས་དང་ལས་དང་ཕྱག་རྒྱ་ཆེན་པོས་གཞག་པར་བྱའོ། །འདི་དག་ག་ལས་ཤེས་ཤེ་ན། བཤད་པ་ལས་སྟོན་ཏེ། དཔལ་མཆོག་དང་པོ་ལས། དམ་ཚིག་ཆེན་པོའི་སེམས་དཔའ་ལ་སོགས་པ་རྣམས་ལ་ཡང་རྣལ་འབྱོར་གྱིས་ཚུལ་ཐམས་ཅད་ལས། དམ་ཚིག་གི་ཕྱག་རྒྱ་ཡང་དག་པར་བསྒྲུབས་ནས་དེའི་རྗེས་ལ་ཕྱག་རྒྱ་གཞན་སྦྱར་པར་བྱའོ་ཞེས་དོན་འདི་སྟོན་ལ། དེ་ཁོ་ན་ཉིད་བསྡུས་པའི་རྒྱུད་ལས་ཀྱང༌། རྡོ་རྗེ་དབབ་པ་བྱས་ནས་ནི། །ཕྱག་རྒྱ་ཆེན་པོ་ཆོ་ག་བཞིན། །བཅིངས་ནས་དེ་ཡི་མདུན་ཕྱོགས་སུ། །སེམས་དཔའ་ཆེན་པོ་དེ་བསྒོམ་མོ། །ཡེ་ཤེས་སེམས་དཔའ་དེ་མཐོང་ནས། །རང་གི་ལུས་སུ་བསྒོམ་པར་བྱ། །བཀུག་ཅིང་བཅུག་ལ་བཅིངས་པ་དང༌། །དབང་དུ་བྱས་ཏེ་བསྒྲུབ་པར་བྱའོ། །ཞེས་གསུངས་པས་དང་པོ་ཁོ་ན་དམ་ཚིག་གི་ཕྱག་རྒྱ་བཅིངས་པར་གསུངས་སོ། །དེ་ཡང་རྡོ་རྗེ་སེམས་དཔའི་སྐུར་བསྐྱེད་ནས་དམ་ཚིག་གི་ཕྱག་རྒྱ་བྱིན་གྱིས་རློབ་པར་བྱེད་པའི་ཕྱིར་སྔོན་དུ་འགྲོ་བའོ། །དེ་ནས་ཆོས་དང་ལས་དང༌།
ཕྱག་རྒྱ་ཆེན་པོས་ལྷ་རྣམས་གཞག་པར་བྱའོ། །དེ་ནས་བཛྲ་རཏྣ་ཞེས་བརྗོད་ཅིང་རྡོ་རྗེ་རིན་ཆེན་གྱིས་དམ་ཚིག་གི་ཕྱག་རྒྱ་གང་ཡིན་པ་དེས་དེ་བཞིན་གཤེགས་པ་རྣམས་དབང་བསྐུར་བ་དང༌། བྱམས་པ་ལ་སོགས་པ་དང༌། དཔེ་མེད་པ་ཡང་དེ་ཉིད་ཀྱིས་དབང་བསྐུར་བར་བྱའོ།། རྡོ་རྗེ་སེམས་དཔའ་ལ་སོགས་པ་ནི་རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པའི་སངས་རྒྱས་ལྔའི་ཕྱག་རྒྱས་དབང་བསྐུར་བར་བྱའོ། །ཨརྒྷ་མཆོག་བཏགས་བསང་ལ་སོགས་པ་ཡི། །དབྱངས་སྙན་པ་ཡིས་བསྟོད་པ་ལྷ་རྫས་ཀྱི། །མཆོག་གི་དམ་པ་རྣམས་ཀྱིས་ལེགས་པར་མཆོད། །ཅེས་པ་ནི་དེ་ནས་ཨརྒ་ནི་དཔལ་རྡོ་རྗེ་སེམས་དཔའི་དཀྱིལ་འཁོར་གྱི་ལྷ་ཐམས་ཅད་ལ་མཆོད་ཡོན་ཕུལ་བའོ། །མཆོད་པ་བཏགས་ནས་སྥ་ར་ཎ་ཁཾ་ཞེས་པས་མེ་ཏོག་གི་ཤིང་བརྒྱའམ་ཤིང་བཞིའམ་མེ་ཏོག་ཐམས་ཅད་ལ་ཡང་རྡོ་རྗེ་མེ་དང་མེ་ཏོག་གི་སྔགས་མངོན་བར་བཟླས་པ་དང༌། དྲི་ཞིམ་པོ་ཐམས་ཅད་དང༌། ཁ་ལ་བསྒོ་བའི་དྲི་རྣམས་ལ་ཡང་རྡོ་རྗེ་མེ་དང་དྲིའི་རིག་པར་བཟླས་པ་དང༌། ག་པུར་དང༌། ཨ་ག་རུ་དང༌། དུ་རུ་ཀ་དང༌། ཙནྡན་ལ་སོགས་པ་དང་བཅས་པ། བདུག་སྤོས་ཀྱི་སྣོད་དུ་སྦྱར་བའི་སྤོས་སྣོད་འབུམ་མམ། ཁྲིའམ་སྟོང་ངམ་བརྒྱའམ། མ་འབྱོར་ན་སྤོས་སྣོད་བཅུ་ལ་རྡོ་རྗེ་མ་དང༌། བདུག་པའི་རིམ་པ་མངོན་པར་བཟླས་ཏེ། ལྷ་ཐམས་ཅད་ལ་དབུལ་བར་བྱའོ། །སྭ་ཏི་ཀ་ལ་སོགས་པ་ཡོན་ཏན་འབུམ་དང་ལྡན་པ། ཤིན་ཏུ་ལེགས་པར་སྦྱར་བའི་ཁ་ཟས་བཟའ་བ་དང༌། བཅའ་བའི་བྱེ་བྲག་རྣམ་པ་སྣ་ཚོགས་ཀྱིས་གང་བའི་སྣོད་འབུམ་མམ། ཁྲིའམ་སྟོང་ངམ་བརྒྱའམ་བཅུ་ལ་རྡོ་རྗེ་མེ་མངོན་པར་བཟླས་ཤིང༌། ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུཏྤནྣ་ཏྭཱ་ཏ་ཅེས་བྱ་བ་བཟླས་ལ་དབུལ་བར་བྱའོ། །མར་ལ་སོགས་པའི་མར་མེ་གྲངས་སྟོང་ངམ་ཐ་ན་སྣོད་ཆེན་པོ་བཞི་གཏམས་བ་ལ་རྡོ་རྗེ་མེ་དང་མར་མེའི་རིག་པ་བཟླས་ཤིང་ལྷའི་ཁྱད་པར་ཐམས་ཅད་ལ་དབུལ་བར་བྱའོ། །རོལ་མོའི་ཆ་བྱད་བཅུ་ལ་དཔལ་འཇིག་རྟེན་གསུམ་ལས་རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་ལས་གསུངས་པའི་རོལ་མོའི་རིག་པ་མངོན་པར་བཟླས་ལ། བཛྲ་སྥ་ར་ཎ་ཁཾ་ཞེས་བྱ་བས་དབུལ་བར་བྱའོ། །གར་མཁན་དང་རོལ་མོ་ལ་སོགས་པའི་མཆོད་པ་རྣམས་ཀྱང་ཨོཾ་དང་ཧཱུཾ་མངོན་པར་བཟླས་པ་དབུལ་བར་བྱའོ།།
གཞན་ཡང་རས་ཟུང་རེ་འབུམ་མམ་ཁྲིའམ་སྟོང་ངམ་རྣམ་པར་སྣང་མཛད་ལ་སོགས་པ་ལ་རེ་རེ་ཞིང་རས་ཟུང་རེའམ། སོ་སོར་མ་འབྱོར་ན་ཐམས་ཅད་སྤྱི་ལ་རས་ཟུང་གཅིག་དང༌། བླ་རེ་རྣམ་པ་སྣ་ཚོགས་པ་གཅིག་དང༌། གྲྭ་བཞིར་བ་དན་སྣ་ཚོགས་གདགས་པ་དང༌། གདུགས་དང་རྒྱལ་མཚན་དང༌། བ་དན་རྣམས་ཀྱང་རྡོ་རྗེ་གནོད་སྦྱིན་དང༌། རྡོ་རྗེ་སེམས་དཔའ་དང༌། ཡི་གེ་ཨོཾ་ལན་བདུན་བཟླས་ཏེ། ལྷ་ཐམས་ཅད་ལ་དབུལ་བར་བྱའོ། །གདུ་བུ་དང༌། རྣ་ཆ་དང༌། དཔུང་རྒྱན་དང༌། ཅོད་པན་ལ་སོགས་པ་ཡང་ངོ༌། །རྡོ་རྗེ་རིན་ཆེན་གྱི་དར་དབྱངས་སྦྱང་པར་བྱའོ།། མེ་ཏོག་གི་ཆུན་འཕྱང་སྤྲོས་ཤིང་བརྒྱན་པ་དང༌། དྲ་བ་དང༌། དྲ་བ་ཕྱེད་པས་བརྒྱན་པ་དང༌། ཟླ་བ་ཕྱེད་པས་ཉེ་བར་མཛེས་པར་བྱས་པའི་རྟ་བབ་ཡིད་དུ་འོང་བའི་དྲི་ལ་བུ་ལ་སོགས་པ་དང་བཅས་པ་དང༌། རྟ་དང་གླང་པོ་ཆེ་དང༌། བ་ལང་གི་ཁྱུ་ཤིན་ཏུ་བརྟགས་པ་རྣམས་ཀྱང་ཡི་གེ་ཧཱུཾ་དང་ཨོཾ་མངོན་པར་བཟླས་ཤིང་བཛྲ་སྥ་ར་ཎ་ཁཾ་ཞེས་བྱ་བས་དེ་བཞིན་གཤེགས་པ་ཐམས་ཅད་ལ་དབུལ་བར་བྱའོ། །གསང་བ་ལ་སོགས་པའི་ཞེས་བྱ་བ་ནི་ལས་ཀྱི་དཀྱིལ་འཁོར་ལས་གསུངས་པའི་མཆོད་པ་བཅུ་དྲུག་དང༌། སྒེག་མོ་ལ་སོགས་པ་གསང་བའི་མཆོད་པ་བཞིས་དཀྱིལ་འཁོར་གྱི་ལྷ་ཐམས་ཅད་མཉེས་པར་བྱེད་པའོ། །དབྱངས་སྙན་པ་ཡིས་བསྟོད་པ་དང༌། །ལྷ་རྫས་ཀྱིས་ཞེས་བྱ་བ་ནི་ལཱ་སྱེ་ལ་སོགས་པའི་མཆོད་པ་བརྒྱད་དང༌། མཚན་བརྒྱ་རྩ་བརྒྱད་པའི་བསྟོད་པ་དབྱངས་དང་བཅས་པས་བསྟོད་དོ། །མཆོག་གི་དམ་པ་རྣམས་ཀྱིས་ལེགས་པར་མཆོད། །ཅེས་པ་ནི་གོང་གི་དོན་བསྡུས་པ་སྟེ། གོང་གི་མཆོད་པ་དེ་རྣམས་ཀྱིས་མཆོད་པའི་དོན་ཏོ། །དེ་ནས་དེ་བཞིན་གཤེགས་པ་ཐམས་ཅད་ལ་སློབ་དཔོན་གྱིས་དངོས་གྲུབ་ཐམས་ཅད་བསྒྲུབ་པའི་ཕྱིར། སེམས་ཅན་གྱི་དོན་མཛོད་ཅིག་པར་གསོལ་བ་གདབ་པར་བྱའོ། །ད་ནི་གཏོར་མའི་མཆོད་པ་བསྟན་པའི་ཕྱིར། དེ་ནས་འབྱུང་པོ་རྣམས་ཀྱིས་གཏོར་མ་བྱ། །སེམས་ཅན་བཀྲེས་ཤིང་སྐོམ་ལ་བཏུང་བ་དང༌། །ཕྱོགས་སྐྱོང་གནས་པ་རྣམས་ལ་རྣམ་པར་བརྟག །དེ་ཡི་གཏོར་མ་ཇི་ལྟར་མཐུན་པར་བྱ། །ཞེས་པ་ནི་རྒྱུད་གཞན་ལས་འབྱུང་བ་བཞིན་ཡོ་བྱད་ཚོགས་པར་བསགས་ལ། ཚངས་པ་ལ་སོགས་པ་གླིང་བཞིན་གནས་པ་
ལ་གཅིག །ལྷ་མིན་དྲི་ཟ་ལ་གཅིག །གནོད་སྦྱིན་སྲིན་པོ་ལ་གཅིག །འབྱུང་པོ་ཡི་དགས་ལ་གཅིག །ཀླུ་སྦྲུལ་རིགས་ལ་གཅིག །རྒྱལ་པོ་བཞི་ལ་གཅིག །གཟའ་དང་རྒྱུ་སྐར་ལ་གཅིག །དམྱལ་སྲུང་བཅུ་དྲུག་ལ་གཅིག །བགེགས་ཀྱི་རིགས་ལ་གཅིག །དྲང་སྲོང་ཆེན་པོ་རྣམས་ལ་གཅིག །མཁའ་འགྲོ་མ་རྣམས་ལ་གཅིག །འབྱུང་བ་བཞི་ལ་སོགས་པ་རྣམས་ལ་གཅིག་དབུལ་བར་བྱའོ། །ཡང་ན་མགོན་པོ་རྣམས་ལ་གཅིག །འགྲོ་བ་རིས་དྲུག་རྣམས་ལ་སྤྱིར་གཅིག །ཀླུ་རྣམས་ལ་ཀླུ་སྨན་སྣ་ཚོགས་ལ་སྦྱར་བ་གཅིག་མཁའ་འགྲོ་མ་དང་སྲིན་པོ་ལ་ཤ་ཁྲག་སྣ་ཚོགས་ལས་བྱས་པ་གཅིག །བགེགས་ཀྱི་རིགས་ཐམས་ཅད་ལ་གཅིག་གོ །དེའི་ཕྱིར་ན། གཏོར་མ་ཇི་ལྟར་མཐུན་པར་བྱ། །ཞེས་སོ། །དེ་རྣམས་ལ་ཡང་དང་པོ་རྒྱུ་བསྟན་པ་དང༌། བྱིན་གྱིས་བརླབས་པ་དང༌། སྨོན་ལམ་གྱི་སྟོབས་བརྗོད་པ་དང༌། མགྲོན་རྣམས་བསམ་པ་དང༌། སྤྱན་དྲངས་པ་དང༌། དམ་ཚིག་གི་ཕྱག་རྒྱ་བསྟན་པ་དང༌། མཆོད་པ་དང༌། བསྟོད་པ་དང༌། གཏོར་མ་བསྔོ་བ་དང༌། སྨོན་ལམ་གདབ་པ་དང༌། ཕྲིན་ལས་བཅོལ་བ་དང༌། གཤེགས་སུ་གསོལ་བ་དང༌། དེ་ལྟར་རྒྱུད་གཞན་ལས་གསུངས་པའི་ཆོ་གས་ཕྱི་རོལ་དུ་གཏོར་མ་སྦྱིན་ནོ། །དེ་ནས་སྦྱིན་སྲེག་གི་ཆོགས་དཔལ་རྡོ་རྗེ་སེམས་དཔའི་སྔགས་སམ་སརྦ་བིཏ་ཀྱིས་ཞི་བའི་སྦྱིན་སྲེག་བརྒྱ་རྩ་བརྒྱད་བྱས་ལ། དཔལ་ཀུན་རིག་ལ་སོགས་པའི་སྙིང་པོས་ཀྱང་སྲེག་བླུགས་བདུན་བདུན་དབུལ་བར་བྱའོ། །དེའི་རྗེས་ལ་ཇི་སྲིད་དཀྱིལ་འཁོར་ཐོག་མ་དང་ཐ་མ་མེད་པར་མཐོང་བར་གྱུར་པའི་སྒྲའམ་གཟུགས་ལ་སོགས་པའི་མཚན་མ་ཐོབ་པར་གྱུར་པ་དེ་སྲིད་ཀྱི་བར་དུ་བཟླས་བརྗོད་དང་བསྒོམ་པ་བྱའོ། །དེའི་ཕྱིར་ན། དེ་ནས་མཚན་མ་སྐྱེས་ཏེ་མགུ་ནས་ནི། །ཐོག་མ་ཐ་མ་མེད་པར་མངོན་སུམ་མཐོང༌། ཞེས་སོ། །ད་ནི་སློབ་མ་དབང་བསྐུར་བ་སྟོན་ཏེ། དེ་ལ་ཡང་སྟ་གོན་ལ་གནས་པ་དང༌། དབང་བསྐུར་བ་གཉིས་ཀྱིས་བསྟན་ཏེ། དེ་ནས་སྔགས་པ་བླ་མེད་བྱང་ཆུབ་ཀྱི། །གནས་སུ་སློབ་མ་ཡོངས་སུ་སྨིན་པར་བྱ། །ཞེས་པ་ལ་སོགས་གསུངས་པ་ནི་དེ་ནས་ཞེས་བྱ་བ་ནི་དཀྱིལ་འཁོར་མཆོད་པའི་རྗེས་ཐོགས་ལ་བྱའོ། །སྔགས་པ་ནི་སློབ་དཔོན་ནོ། །བླ་མེད་བྱང་ཆུབ་ཀྱི་གནས་ནི་དཀྱིལ་འཁོར་ཆེན་པོའོ། །སློབ་
མི་ཡོངས་སུ་སྨིན་པར་བྱ་བ་ནི་སྔོམ་པ་ལ་གནས་ཤིང་དབང་བསྐུར་བར་བྱའོ། །འགྲོ་ལ་ཕན་ཕྱིར་ཞེས་པ་ནི་སློབ་དཔོན་གྱིས་སློབ་མ་དེ་ལ་ཕན་པར་བྱ་བའི་ཕྱིར་ཏེ། མྱུར་དུ་བྱང་ཆུབ་ཐོབ་པར་བྱ་བའི་ཆེད་དུ་བྱང་ཆུབ་ཏུ་སེམས་བསྐྱེད་དུ་གཞུག་གོ །དེའི་དོན་ཡང་འདི་ཡིན་ཏེ་བྱང་ཆུབ་སེམས་བསྐྱེད་པ་ལ་ཡང་དོན་དམ་པ་དང་ཀུན་རྫོབ་བྱང་ཆུབ་ཀྱི་སེམས་བསྐྱེད་དུ་གཞུག་གོ །དེ་ཡང་གསོལ་བ་གདབ་པ་ནི། །དགའ་ཆེན་ཁྱོད་བདག་སྟོན་པ་བས། །སློབ་དཔོན་ཁྱོད་ནི་དགོངས་སུ་གསོལ། །ཞེས་བྱ་བ་ནས། །མགོན་པོ་བདག་ནི་འཇུག་པར་འཚལ། །ཞེས་བྱ་བ་ཡན་ཆད་དང༌། །ཇི་ལྟར་དུས་གསུམ་མགོན་པོ་རྣམས།། ཞེས་བྱ་བ་ནས། སེམས་ཅན་མྱ་ངན་འདས་ལ་དགོད། །ཅེས་བྱ་བ་ཡན་ཆད་ཀྱིས་སྡོམ་པ་བཟུང་བ་དང༌། བདག་བྱང་ཆུབ་སྙིང་པོ་ལ་མཆིས་ཀྱི་བར་དུ་ཞེས་བྱ་བ་ནས། སེམས་ཅན་གྱི་དོན་བྱེད་པར་གྱུར་ཅིག་ཅེས་པ་ཡན་ཆད་ཀྱིས་སེམས་བསྐྱེད་པར་བྱའོ། །དེ་ནས་བྱིན་གྱིས་བརླབ་པར་བྱ་བ་ནི་སློབ་མ་དེ་ཉིད་རྡོ་རྗེ་སེམས་དཔའི་གཟུགས་སུ་བསྐྱེད་ནས། གནས་བཞིར་བྱིན་གྱིས་རྡོ་རྗེ་སེམས་མའི་ཕྱག་རྒྱས་བརླབ་པར་བྱས་ནས། རྡོ་རྗེ་བཞད་པས་བྱིན་གྱིས་བརླབས་པའི་ཆོ་གས་སོ་ཤིང་སྦྱིན་པ་དང༌། རྡོ་རྗེ་གནོད་སྦྱིན་གྱིས་བྱིན་གྱིས་བརླབས་པའི་སྲུང་སྐུད་གདགས་པ་དང༌། རྡོ་རྗེ་སེམས་དཔའ་དང་རྡོ་རྗེ་རྣོན་པོས་བྱིན་གྱིས་བརླབས་པའི་ཀུ་ཤ་སྦྱིན་པ་དང༌། རྡོ་རྗེ་བསྲུང་བའི་ཆུས་ཁ་བཀྲུ་བ་དང༌། སྨོན་ལམ་གདབ་པའོ། །ཟབ་ཅིང་རྒྱ་ཆེ་བའི་ཆོས་བསྒྲགས་ལ་ཞེས་པ་ནི་ཟབ་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་བསྟན། རྒྱ་ཆེ་བ་ནི་སྡོང་པོས་བརྒྱན་པའི་དོན་བསྟན་པའོ། །བསྲུང་བ་བྱས་ནས་ཞེས་པ་ནི་རྡོ་རྗེ་གོ་ཆ་དང༌། རྡོ་རྗེ་གནོད་སྦྱིན་དང༌། རྡོ་རྗེ་ཁུ་ཚུར་གྱིས་བསྲུང་པ་བྱས་ལ། ཤེས་ལྡན་ནང་པར་དཀྱིལ་འཁོར་མཐོང་བར་འགྱུར་རོ་ཞེས་བྱ་བ་ནས་གནས་སུ་གཏོང་བའོ། །དེས་ནི་སློབ་མ་སྟ་གོན་ལ་གནས་པའོ། །ད་ནི་སློབ་མ་ལ་དབང་བསྐུར་བར་བྱ་སྟེ། དེ་ཡང་བརྟུལ་ཞུགས་སྡོམ་གནས་པ། ཞེས་པ་ནི་འོག་ནས་འབྱུང་བའི་དམ་ཚིག་དང༌། རིགས་ལྔའི་སྡོམ་པ་ལ་གནས་པ་དེ་ལ་དེ་སྐད་ཅེས་བྱའོ། །རབ་ཞི་ཁ་ནས་སྔགས་བརྗོད་ཅེས་བྱ་བ་ནི་ལས་ཀྱི་རྡོ་རྗེ་སློབ་དཔོན་གྱིས་སོ། །གཞུག་པར་བྱ་ཞེས་པ་ནི་སློབ་མ་སེམས་རྣམ་པར་དག་པ་དེའོ། །དར་ལ་སོགས་པས་མིག་གཉིས་གཡོགས་
ནས་ནི། །ཞེས་པ་ནི་ལེ་བརྒ་ན་རྩིའི་ཁ་དོག་དམར་པོས་གདོང་གཡོགས་བྱས་ལ། སོགས་པས་ནི་སྟོད་གཡོགས་དང༌། སྨད་གཡོགས་རྡོ་རྗེ་འཛིན་མའི་སྔགས་སམ་རྡོ་རྗེ་གནོད་སྦྱིན་བཟླས་པའི་ཆུས་བསང་ངོ༌། །རྡོ་རྗེ་འཛིན་མ་དཔལ་གྱི་པདྨར་ལག་གཉིས་བྱ། །ཞེས་པ་ནི་རིགས་ཀྱི་དམ་ཚིག་གི་ཕྱག་རྒྱ་ལ་འདིར་སེམས་མ་རྡོ་རྗེ་མའི་དམ་ཚིག་གི་ཕྱག་རྒྱའོ། །རྡོ་རྗེ་སེམས་དཔའ་ནི་མ་ཡིན་ནོ། །རིན་ཆེན་མེ་ཏོག་ལ་སོགས་དེ་བརྒྱན་ལ། །གཡོན་གྱི་ལག་པ་བཀང་སྟེ་གཞུག་པར་བྱ། །ཞེས་པ་ནི་ཕྱག་རྒྱ་དེ་རིན་པོ་ཆེ་སྣ་ལྔའམ། མེ་ཏོག་གམ། སློབ་དཔོན་མཉེས་པར་བྱེད་པའི་ཡོན་གྱིས་བཀང་ལ་གཞུག་པར་བྱའོ། །ཨོཾ་བཛྲ་ཨ་དྷི་ཏིཥྛ་ཧཱུཾ་གིས་རྡོ་རྗེ་སེམས་དཔར་སློབ་མ་བྱིན་གྱིས་བརླབས་པའོ། །ཨོཾ་བཛྲ་ས་མ་ཡ་ཧཱུཾ་ནི་ཕྱག་རྒྱ་བཅིང་བའོ། །ཨོཾ་བཛྲ་པྲ་བེ་ཤ་ཡ་བཛྲ་ཧཱུཾ་ནི་མིག་གདབ་བའོ། །ཨ་ས་མེ་ཏྲི་ས་མེ་མ་ཧཱ་ས་མ་ཡེ་ཧཱུཾ་ནི་ཆོས་གོས་གསུམ་བསྐོན་ཞིང་སེམས་དཔའ་ཆེན་པོར་བྱའོ། །ཡང་སློབ་དཔོན་གྱིས་དེ་བཞིན་གཤེགས་པ་ཐམས་ཅད་ལ་ཕྱག་བྱས་ཏེ། བདག་མིང་འདི་ཞེས་བགྱི་བ་ཡི། །རྡོ་རྗེ་སློབ་དཔོན་དཀའ་ཐུབ་ཆེ། །སེམས་ཅན་ཀུན་ལ་སྨན་སླད་དུའོ། །སློབ་མ་རྣམས་ནི་གཞུག་པར་བགྱི། །ཞེས་བས་རྗེས་སུ་གནང་བ་ནོད་བར་བྱའོ། །དེ་ནས་སློབ་མས་གསོལ་བ་གདབ་པ་དང༌། ཕྱག་བྱ་བ་དང༌། བཤགས་པ་དང༌། རྗེས་སུ་ཡི་རང་བ་དང༌། བསྐུལ་བ་དང༌། གསོལ་བ་གདབ་པ་དང༌། སློབ་དཔོན་ལ་གསོལ་བ་གདབ་པ་དང༌། རྡོ་རྗེ་སློབ་དཔོན་གྱིས་རིགས་ཐམས་ཅད་ལ་གསོལ་བ་གདབ་པ་དང༌། རྡོ་རྗེ་སློབ་དཔོན་གྱིས་སློབ་མ་ལ་བསྐུར་བ་དང༌། སྡོམ་པ་སྦྱིན་པ་དང༌། སློབ་མས་སྡོམ་པ་བླང་བ་དང༌། བྱིན་གྱིས་བརླབ་པ་དང༌། དཀྱིལ་འཁོར་དུ་འཇུག་པ་དང༌། ཡེ་ཤེས་དབབ་པ་དང༌། འོག་ནས་འབྱུང་བས་དམ་ཚིག་བསྒྲགས་པ་དང༌། སྣང་བ་དྲི་བ་བྱས་ནས། དེ་ནས། སངས་རྒྱས་དངོས་གྲུབ་ཐེབ་བྱའི་ཕྱིར། །ཞེས་པ་ནི་སངས་རྒྱས་ཀྱི་དངོས་གྲུབ་ནི་བླ་ན་མེད་པའི་བྱང་ཆུབ་པོ། །དེ་ཐོབ་པར་བྱ་བའི་ཕྱིར་ཀུན་རིག་རྣམ་པར་སྣང་མཛད་ལ་སོགས་པ་བདག་ལ་ཐུགས་བརྩེ་བར་དགོངས་ནས་གཙོ་བོ་ཁྱེད་རྣམས་ཀྱིས་བཞེས་སུ་གསོལ་ཞེས་པའི་དོན་ཏོ། །ཨོཾ་བཛྲ་པྲ་ཏི་གྲྀཧྞ་ཞེས་པ་ལ་སོགས་ཀྱིས་མེ་ཏོག་དོར་རོ། །ཨོཾ་པྲ་ཏཱིཙྪ་བཛྲ་ས་མ་ཡ་སྟྭཾ་གྱིས་མེ་ཏོག་བླངས་ལ་སློབ་མའི་
མགོ་ལ་བཅིང་པའོ། །མེ་ཏོག་རིན་ཆེན་ལ་སོགས་པ་དེ་བསྒྱུར་བར་མེ་ཏོག་གང་ལ་བབ་པ་དེ་རིགས་ཀྱི་བུ་ཁྱོད་ཀྱི་ཡི་དམ་གྱི་ལྷ་ཡིན་གྱིས་གཙོ་བོའམ་རིགས་ཏེ་སེམས་དཔའ་གང་ལ་བབ་པ་དེ་ཁྱོད་ཀྱིས་བསྒྲུབ་པར་གྱིས་ཤིག་དེ་བསྒྲུབས་ན་ཁྱོད་ཀྱིས་ཐུན་མོང་དང་ཁྱད་པར་གྱི་དངོས་གྲུབ་འགྲུབ་པར་འགྱུར་ཏེ་ཐེ་ཚོམ་མེད་དོ། དེ་ནས་སྔགས་ལ་མཁས་པ་ཡིས། །ཞེས་པ་ནི་རྡོ་རྗེ་སློབ་དཔོན་ནོ། །དེས་སློབ་མ་ལ་སྔགས་འདིས་དམ་ཚིག་སྦྱིན་པར་བྱའོ། །ཨོཾ་བཛྲ་ས་མ་ཡ་ཧཱུཾ་ཕཊ་ཅེས་པ་ལ་སོགས་པས་ནི་དམ་ཚིག་སྦྱིན་པ་དང༌། བསྟན་པ་དང༌། ཐོབ་པར་བྱ་བའོ། །དེ་ནས་འདིས་དམ་ཚིག་བསྒྲག་པར་བྱའོ། །ཞེས་པ་ནི་དམ་ཚིག་ནི་མི་འདའ་བའོ། །གང་ལས་མི་འདའ་ཞེན། བསྒྲགས་པ་འདི་ལས་སོ། །འདི་ནི་ཁྱོད་ཀྱི་དམྱལ་བའི་ཆུ། །ཞེས་པ་ནི་རྡོ་རྗེ་ཆུ་འདི་ནི་རྡོ་རྗེ་སེམས་དཔའ་འོད་དུ་ཞུ་བར་བྱས་པའི་ཆུ་འདིས་སློབ་མ་རྡོ་རྗེ་འཛིན་པར་བསྒོམས་པ་ལ་བླུད་པས་སྐུ་གསུང་ཐུགས་ཀྱི་དམ་ཚིག་ཆུ་འདིས་གྲུབ་པར་གྱུར་ཅིག །ཅི་སྟེ་དམ་ཚིག་འདི་ལས་འདས་ན་ནི་རྡོ་རྗེ་འཛིན་པའི་ཆུ་འདིས་སྙིང་ལ་རེག་ནས་དེ་མ་ཐག་ཏུ་རྡོ་རྗེ་འཛིན་པས་སྙིང་བཀས་ནས་དམྱལ་བར་བསྒྱུར་རོ། །དེར་མ་ཟད་དེ་བདུན་རྒྱུད་ཀྱི་རིགས་ཀུན་ཀྱང་རླག་པར་བྱེད་དོ། །གཏན་ཚིགས་དེ་བས་ན་བུ་ཁྱོད་ཀྱིས་ཞེས་པ་ནི་བོད་བར་བྱའོ། །རྒྱལ་བས་ཏེ་ཤཱཀྱ་ཐུབ་པས་སོ། །དེས་གསུངས་པའི་སྡོམ་པ་དང་དམ་ཚིག་ནི་བསྲུང་བར་བྱ་བའོ། །དེ་ལ་སྡོམ་པ་ནི་ཐུན་མོང་དང་ཁྱད་པར་རོ། །དམ་ཚིག་ནི་སྐུ་གསུང་ཐུགས་སོ། །དེ་ལྟར་བླ་མས་ཕོག་པའི་བཀའ་ལས་མ་འདའ་བར་བསྲུང་བར་གྱིས་ཤིག་པའོ། །སྡོམ་པ་ཕྱི་མ་ནི་དཀྱུས་ན་གསལ་བས་མ་བཀྲོལ་ལོ། །བདག་གི་དེ་ཉིད་དང་ནི་སྔགས་སོགས་དེ་བཞིན་ནོ། །ཞེས་བྱ་བ་ལ་སོགས་པ་ལ། དེ་ལྟར་འཇུག་པའི་རིམ་པ་བྱས་ནས་བདག་གི་དེ་ཁོ་ན་ཉིད་དེ་རིགས་ཀྱི་ལྷ་གང་བསྒོམ་པའི་རིམ་པའི་མན་ངག་མེ་ཏོག་གང་ལ་བབ་པའི་བསྒོམ་པའི་རིམ་པ་བསྟན་པ་དང་སྔགས་ཀྱི་དེ་ཁོ་ན་ཉིད་བཟླས་པའི་རིམ་བ་དང༌། དཀྱིལ་འཁོར་གྱི་དེ་ཁོ་ན་ཉིད་དང༌། ལྷའི་དེ་ཁོ་ན་ཉིད་བཞི་དེ་བཞིན་དུ་བསྟན་ནོ། །མོས་པ་བརྟན་དང་ལྡན་པར་དམ་བཅས་ནས། །ཞེས་པ་ནི་མོས་པ་ནི་གསང་སྔགས་རྡོ་རྗེའི་ཐེག་པ་ལ་མོས་པའོ། །བརྟན་པ་ནི་ལས་དང་འབྲས་བུ་
བདེན་པ་དང༌། དཀོན་མཆོག་ལ་མངོན་པར་ཡིད་ཆེས་པའི་དད་པ་དང་བརྩོན་འགྲུས་ལ་ལྡོག་པ་མེད་པའོ། །དམ་བཅས་ནས་ཞེས་པ་ནི་སྡོམ་པ་དང་ཚུལ་ཁྲིམས་ལ་གནས་པ་སྟེ། ཐུན་མོང་དང་ཁྱད་པར་གྱི་དམ་ཚིག་ལ་གནས་པ་དང༌། སྐུ་གསུང་ཐུགས་ཀྱི་དམ་ཚིག་ལ་གནས་པའོ། །སརྦ་བིཏ་ཀྱིས་ཇི་ལྟར་དབང་བསྐུར་ཏེ། །ཞེས་བ་ནི་དབང་ལ་རྣམ་པ་བཞི་སྟེ། རིག་པའི་དབང་དང༌། སློབ་དཔོན་གྱི་དབང་བཅུ་དང༌། རིན་པོ་ཆེ་སྣ་བདུན་ལ་སོགས་པའི་དབང་དང་གསང་བའི་དབང་སྟེ་བཞིའོ། །དེ་ལ་སརྦ་བི་ཏ་ཀྱིས་ཇི་ལྟར་བསྐུར་བ་དེ་ནི་སརྦྦ་བིཏ་ནི་རྡོ་རྗེ་སེམས་དཔའི་བུམ་པ་སྟེ། རིག་པའི་དབང་བསྐུར་བར་བྱ་སྟེ། སརྦྦ་བིཏ་ཀྱིས་བུམ་པའི་དབང་དང༌། ཅོད་པན་དང༌། དར་དཔྱངས་ཀྱི་དབང་དང༌། རྡོ་རྗེའི་དབང་དང༌། དྲིལ་བུའི་དབང་དང༌། བདག་པོའི་དབང་དང༌། མིང་གི་དབང་བསྐུར་བའོ། །ཏེ་ཞེས་པ་ནི་ལྷག་མ་དང་བཅས་པའི་ཚིག་དང༌། སློབ་དཔོན་གྱི་དབང་བཅུ་ལ་སོགས་པ་དང་འབྲེལ་ཏོ། །ཡང་ན་རིགས་རྣམས་ཀྱི་བུམ་པའི་དབང་དང་འབྲེལ་ཏོ། །སློབ་དཔོན་གྱི་དབང་བཅུ་ནི་དཀྱིལ་འཁོར་ཆེན་པོའི་ཤར་གྱི་སྒོར་ཁྲུ་གཉིས་དོར་བར་དཀྱིལ་འཁོར་དབུས་མའི་ཕྱེད་ཀྱི་ཚད་ཙམ་གྱི་ཟུར་བཞི་པ་སྒོ་ནུབ་ཏུ་བཏོད་ལ་འོག་ནས་འབྱུང་བ་བཞེན་བྲིས་པར་དབང་བསྐུར་བར་བྱའོ། །དེ་བཞིན་དུ་ལྷོ་དང༌། ནུབ་དང་བྱང་དུ་ཡང་དེ་བཞིན་དུ་བྲིས་ལ་དབང་བསྐུར་བར་བྱའོ། །དེ་ཡང༌། བུམ་པ་ལ་སོགས་ཇི་སྙེད་མང་ཐོགས་པས། །བཅུ་པོ་རྣམས་ཀྱིས་དབང་བཅུ་ཅི་དགར་བསྐུར། །ཞེས་གསུངས་ཏེ། ཉོན་མོངས་པ་ལྔ་འཇོམས་པ་རིགས་ལྔའི་བུམ་པའི་དབང་དང༌། ཐབས་མཁས་པ་ཕྲེང་བའི་དབང་དང༌། བྱང་ཆུབ་ཀྱི་སེམས་ཀྱི་ཆོས་པན་གྱི་དབང་བ་དང༌། མི་འདའ་བ་ཕྱག་རྒྱའི་དབང་དང༌། རྒྱལ་བའི་སྲས་ཀྱི་མིང་གི་དབང་དང༌། དེ་བཞིན་གཤེགས་པའི་ཕྲིན་ལས་ལ་བཞག་པ་ལས་ཀྱི་དབང་དང༌། འཁོར་བ་གཏིང་ནས་འཇོམས་པ་འཁོར་ལོའི་དབང་དང༌། གཉིས་སུ་མེད་པ་གཟུངས་ཀྱི་དབང་དང༌། ཆོས་ཉིད་ཀྱི་དོན་མཐོང་བ་གསང་བའི་དབང་དང༌། བདེ་བ་ཆེན་པོ་ཐབས་དང་ཤེས་རབ་ཀྱི་དབང་དང་བཅུའོ། །དེ་བཅུས་ནི་སློབ་དཔོན་དུ་འོས་པ་རྣམས་ལ་ཅི་དགའ་སྟེ་རིགས་ཀྱི་དབྱེ་བས་གཅིག་གམ། ལྔ་ཆར་ལ་སོགས་པ་ཇི་ལྟར་དགའ་བར་བསྐུར་རོ། །དེ་ནས་གསང་བ་ཤེས་རབ་
ཡེ་ཤེས་ཀྱི་དབང་སྦྱིན་ཏེ། དེ་ཡང་རིགས་ཀྱིས་ཤེས་པར་བྱའོ། །དེ་ནས་ལག་ཏུ་དྲིལ་དང་རྡོ་རྗེ་སྦྱིན། །ཞེས་པ་ནི་དེ་བཞིན་གཤེགས་པའི་རིགས་ལ་ནི་དེ་བཞིན་གཤེགས་པའི་རྡོ་རྗེ་དང་ དྲིལ་བུ ་སྦྱིན་ནོ། །རྡོ་རྗེའི་རིགས་ལ་ནི་ཁྲོ་བོའི་རྡོ་རྗེ་དང་ དྲིལ་བུ ་སྦྱིན་ནོ། །རིན་པོ་ཆེའི་རིགས་ལ་ནི་རྡོ་རྗེ་རིན་པོ་ཆེ་དང་ དྲིལ་བུ ་སྦྱིན་ནོ། །པདྨའི་རིགས་ལ་ནི་རྡོ་རྗེ་པདྨ་དང་ དྲིལ་བུ ་སྦྱིན་ནོ། །ལས་ཀྱི་རིགས་ལ་ནི་རྡོ་རྗེ་སྣ་ཚོགས་དང་ དྲིལ་བུ ་སྦྱིན་ནོ། །དེ་རྣམས་ཀྱིས་རྡོ་རྗེའི་དེ་ཁོ་ན་ཉིད་དང༌། དྲིལ་བུའི་དེ་ཁོ་ན་ཉིད་དང༌། ཕྱག་རྒྱའི་དེ་ཁོ་ན་ཉིད་བསྟན་ཏོ། །འདིར་རྡོ་རྗེ་དྲིལ་བུའི་ནི་སྨོས་ལ་ཕྱག་རྒྱ་ཆེན་པོ་ནི་མ་སྨོས་ན་དགོས་པ་ཅི་ཡོད་ཅེ་ན། རིགས་ཀྱི་སྐུ་གསུངས་ཐུགས་ལས་ཐུགས་དང་གསུང་སྨོས་པས་སྐུ་མ་སྨོས་ཀྱང་རྒྱུད་གཞན་ལས་གསུང་སྨོས་པས་ཉེས་པ་མེད་དོ། །འཁོར་ལོ་ལ་སོགས་རིན་ཆེན་བདུན་ཐོགས་ལ། །མི་དབང་དབང་ཕྱུག་འཁོར་ལོ་ཐོབ་པ་དང༌། །སྡིག་པ་གཞོམ་ཕྱིར་དབང་རྣམས་བསྐུར་བར་བྱ། །ཞེས་པ་ནི་ས་དང་བོ་ལ་སོགས་པའི་ས་ལ་གནས་པར་བྱ་བའི་ཕྱིར། རིན་པོ་ཆེ་སྣ་བདུན་དང༌། བཀྲ་ཤིས་བརྒྱད་དང༌། ཉེ་བའི་རིན་པོ་ཆེ་སྣ་བདུན་དང༌། བརྟུལ་ཞུགས་དང༌། ལུང་བསྟན་པ་དང༌། གཟེངས་བསྟོད་པ་ལ་སོགས་པ་ཐམས་ཅད་ཀྱང་བསྐུར་རོ། །དེ་ལ། མི་ཡི་དབང་ཕྱུག་འཁོར་ལོ་ཐོབ་པ་དང༌། །ཞེས་པ་ནི་མིའི་དབང་ཕྱུག་ནི་གསུམ་སྟེ། ས་དང་པོ་དང༌། བརྒྱད་པ་དང༌། བཅུ་པའོ། །དེ་ཐོབ་པར་བྱ་བའི་ཕྱིར་ཤར་གྱི་སྒོར་ནི་མིག་གི་ཐུར་དང༌། མདའ་གཞུ་དང་རྡོ་རྗེ་སེམས་པའི་དབང་དང༌། བརྟུལ་ཞུགས་སྦྱིན་པར་བྱའོ། །ལྷོ་སྒོར་ནི་རིན་པོ་ཆེ་སྣ་དུན་ནོ། །ནུབ་ཏུ་བཀར་ཤིས་བརྒྱད་དོ། །བྱང་དུ་ཤེས་རབ་ཡེ་ཤེས་ཀྱི་དབང་བསྐུར་རོ། །དེའི་ཕྱིར་ན་ཉོན་མོངས་པའི་སྒྲིབ་པ་དང༌། ཤེས་བྱའི་སྒྲིབ་པ་སྦྱངས་པའི་ཕྱིར་དབང་ནི་བསྐུར་པར་བྱའོ། །ཡང་སློབ་མ་འཇུག་པའི་ཆོ་ག་དབང་བསྐུར་བའི་ཆོ་ག་འདིའི་དོན་བཅོམ་ལྡན་འདས་ཀྱིས་ཇི་སྐད་གསུངས་པ་དེ་ལྟར་བརྗོད་པར་བྱ་སྟེ། ཇི་ལྟར་བ་བཞིན་དུ་ནི་དབང་བསྐུར་བར་འོས་པའི་སློབ་མ་བསླབ་པ་ཡོངས་སུ་བཟུང་བའམ། དགེ་སྦྱོང་ངམ། དགེ་སློང་གི་སྡོམ་པ་ཡོངས་སུ་བཟུང་བ་ལྷག་པར་གནས་པའི་ཆོ་ག་ཇི་ལྟ་བ་བཞིན་བྱས་པས། སློབ་དཔོན་གྱི་ཞབས་ལ་མངོན་པར་ཕྱག་བྱས་ནས། སེམས་ཅན་ལུས་པ་རྣམས་ཀྱི་ཕན་པ་དང༌། བདེ་བ་དམ་པ་འགྲུབ་པར་བྱ་བའི་རྒྱུར་
བདག་དེ་བཞིན་གཤེགས་པའི་རིགས་དང༌། རྡོ་རྗེའི་རིགས་དང༌། རྡོ་རྗེའི་རིགས་ཀྱི་བདག་པོ་ལ་སོགས་བར་འགྱུར་བར་བྱའོ་ཞེས་བྱ་བ་ནི། བསམ་པ་མངོན་དུ་བྱས་ལ་སློབ་དཔོན་གྱི་ཞབས་གཉིས་ལ་ཕྱག་བྱས་ཏེ། འདི་སྐད་བརྗོད་པར་བྱའོ། །དགའ་ཆེན་ཁྱོད་བདག་སྟོན་བབས། སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་སྩལ་དུ་གསོལ། །སྡོམ་པ་རྣམས་ཀྱང་བདག་ལ་སྩོལ། །དེ་ནས་ཡོལ་བའི་མཐར་སློབ་མ་རྡོ་རྗེ་བསྲུང་བ་ཡོངས་སུ་བཟླས་པའི་རས་ཤིན་ཏུ་དམར་བའི་སྟོད་གཡོགས་དང༌།། སྨད་གཡོགས་བསྐོན་ཞིང༌། ཡང་སྒོ་སྲུང་རྣམས་ཀྱི་སྔགས་བཟླས་པའི་དར་གྱིས་གདོང་གཡོགས་བཅིངས་ནས་སློབ་མ་ཕྱག་བཞི་བྱེད་དུ་གཞུག་གོ །དེ་ནས་ལག་ན་མེ་ཏོག་ཐོགས་བས་སློབ་དཔོན་ལ་ཕྱག་བྱས་ནས། བཤགས་པ་དང༌། རྗེས་སུ་ཡི་རང་བ་དང༌། བསྐུལ་བ་དང༌། གསོལ་བ་ཡང་བྱས་ལ་འདི་སྐད་ཅེས་བརྗོད་པར་ཡང་བྱའོ། །གཙོ་བོས་བདག་ལ་སྡོམ་པ་སྩོལ། །ཐུབ་པ་ཉི་མ་མ་ལུས་པ། །སངས་རྒྱས་བདག་ལ་དགོངས་སུ་གསོལ། །བདག་མིང་འདི་ཞེས་བགྱི་བ་ནི། །སློབ་དཔོན་དབང་དུ་གནས་པ་ལ། །སངས་རྒྱས་རོལ་མོ་ལས་བྱུང་བའི། །མི་ལྡོག་འཁོར་ལོའི་འབྱོར་པར་ལྡན།། ཐར་བ་ཆེན་པོའི་གྲོང་ཁྱེར་མཆོག །གསང་བ་ཆེན་པོར་འཇུག་པར་བགྱི། །གསང་བའི་རིགས་མཆོག་ཐམས་ཅད་དུ། །སློབ་དཔོན་ཆེན་པོ་བདག་འཇུག་མཛོད། །མི་ལྡོག་པ་ཡི་དབང་བསྐུར་བ། །སྐལ་བ་ཆེན་པོ་བདག་ལ་སྩོལ། །མཚན་རྣམས་ཀུན་གྱིས་རྒྱས་བཏབ་ཅིང༌། །དཔེ་བྱད་རྣམས་དང་ཡང་དག་ལྡན། །སངས་རྒྱས་སྐུ་ནི་ཡིད་འོང་བ། །སློབ་དཔོན་ཆེན་པོ་བདག་ལ་སྩོལ། །དབང་ཕྱུག་ཆེན་པོ་རྨད་བྱུང་བ། །སེམས་ཅན་ཀུན་གྱི་དོན་བགྱིད་ཕྱིར། །བདག་ནི་རྟག་ཏུ་སློབ་དཔོན་འགྱུར། །སློབ་དཔོན་ཆེན་པོ་བདག་ལ་སྩོལ། །དེ་ནས་སློབ་དཔོན་གྱིས་རིགས་ཐམས་ཅད་ལ་གསོལ་བ་གདབ་པར་བྱ་སྟེ། ཆེ་གེ་ཞེས་བྱ་འདི་ཉིད་ནི། །བྱང་ཆུབ་སེམས་ནི་ཡོངས་འཛིན་པ། །དམ་ཚིག་མཆོག་དང་གསང་བ་ཡིས། །འཁོར་ལོ་ལ་ཡང་འཇུག་པར་འཚལ། །དེ་ནས་ཡང་སློབ་དཔོན་གྱིས་འདི་སྐད་ཅེས་བརྗོད་པར་བྱ་སྟེ། གསང་བ་ཆེན་པོའི་རིགས་དག་པ། །གསང་བ་ཡོངས་སུ་འཛིན་པར་ནི། །
བདག་ཉིད་ཆེན་པོ་ཁྱོད་འདོད་དམ། །དེས་ཀྱང་འཚལ་ཞེས་བརྗོད་པར་བྱའོ། །དེ་ནས་སྡོམ་པ་དཔོག་པ། །སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་སོང༌། །ཞེས་བྱ་བ་ནས། འདི་ནི་དམ་ཚིག་ཡིན་པར་བཤད། །ཁྱོད་ཀྱིས་རྟག་ཏུ་བསྲུང་བར་བྱ། །ཞེས་བྱ་བ་ཡན་ཆད་ཀྱིས་དཔོག་གོ །དེས་ཀྱང་འདི་སྐད་བརྗོད་པར་བྱ་སྟེ། སློབ་དཔོན་འདིར་ནི་བདག་ལ་གསོན། །གཙོ་བོས་ཇི་ལྟར་བཀའ་སྩལ་པ། །དེ་ལྟར་བདག་ནི་བགྱིད་པར་འཚལ། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པ། །ཞེས་བྱ་བ་ལ་སོགས་པ་ནས། སེམས་ཅན་མྱ་ངན་འདས་ལ་འགོད། །ཅེས་བྱ་བའི་བར་དུ་བརྗོད་པར་བྱའོ། །གང་ཞིག་སྡོམ་པ་འཛིན་པར་མི་བྱེད་བ་དེ་ལ་དེང་ཁྱོད་ཅེས་བྱ་བ་ལ་སོགས་པ་བརྗོད་པར་མི་བྱ་སྟེ། སློབ་དཔོན་དུ་རྗེས་སུ་གནང་བ་དང༌། དབང་བསྐུར་བར་མི་བྱའི་འཇུག་པ་ཙམ་གྱིས་བྱེད་དུ་གཞུག་གོ །དེ་ནས་བྱང་ཆུབ་སེམས་བསྐྱེད་ནས། །དེ་ཡི་སྙིང་གར་སྙིང་པོས་ནི། །རྡོ་རྗེ་རབ་ཏུ་གཞག་པར་བྱ། །སུ་ར་ཏ་ས་མ་ཡ་སྟྭཾ་ཧོ་བཛྲ་སིདྡྷི་ཡ་ཐཱ་སུ་ཁཾ། ཨོཾ་བཛྲ་ས་ཏྭ་ས་མ་ཡ་ཧཱུཾ་ཞེས་ཟློས་ཤིང༌། རྡོ་རྗེ་སེམས་དཔའི་དམ་ཚིག་གི་ཕྱག་རྒྱས་དེ་རྡོ་རྗེ་སེམས་དཔར་བསྐྱེད་ལ། རིགས་ཀྱི་དམ་ཚིག་བཞིས། ཨོཾ་བཛྲ་ཨ་དྷི་ཏིཥྛ་ཧཱུཾ་ཞེས་པ་དང༌། སྙིང་ག་དང༌། དཔྲལ་བ་དང༌། ལྐོག་མ་དང༌། སྤྱི་བོར་རྡོ་རྗེ་དང༌། རིན་པོ་ཆེ་དང༌། པདྨ་དང༌། སྣ་ཚོགས་རྡོ་རྗེ་བསྐྱེད་དེ། དྲི་དང་མེ་ཏོག་ལ་སོགས་པས་མཆོད་ནས། ཡོན་གྱི་མཆོག་བླངས་ཏེ། དེ་ནས་ཕྱི་རོལ་ན་གནས་པའི་བུམ་པའི་ཆུས་དབང་བསྐུར་ལ། ཨོཾ་བཛྲ་ས་མ་ཡ་སྟྭཾ་ཞེས་བྱ་བ་འདིས་སེམས་མ་རྡོ་རྗེ་མའི་ཕྱག་རྒྱ་འཆིང་དུ་བཅུག་ནས། གུང་མོ་གཉིས་ཀྱིས་ཕྲེང་བ་འཛིན་དུ་བཅུག་སྟེ། ས་མ་ཡ་ཧཱུཾ་ཞེས་བྱ་བ་འདིས་གཞུག་པར་བྱ་ཞིང༌། བཛྲ་ཨཾ་ཀུ་ཤ་ཛཿ། ཞེས་བྱ་བ་དང༌། རྡོ་རྗེ་ལྕགས་ཀྱུའི་ཕྱག་རྒྱས་དགུག་པར་བྱའོ། །ཡང་དེ་བཞིན་དུ་ལྷོ་ནས་བཅུག་ལ་བཛྲ་པཱ་ཤ་ཧཱུཾ་ཞེས་བྱ་བ་དང༌། རྡོ་རྗེ་ཞགས་བའི་ལས་ཀྱི་ཕྱག་རྒྱས་གཞུག་པར་བྱའོ། །ཡང་དེ་བཞིན་དུ་ནུབ་ཀྱི་སྒོ་ནས་བཅུག་ལ་བཛྲ་སྥོ་ཊ་བཾ་ཞེས་བྱ་བ་དང༌། རྡོ་རྗེ་ལྕགས་སྒྲོག་གི་ཕྱག་རྒྱས་བཅིང་བར་བྱའོ། །དེ་ནས་དེ་བཞིན་དུ་བྱང་ཕྱོགས་ཀྱི་སྒོ་ནས་བཅུག་ལ་བཛྲ་ཨཱ་བེ་ཤ་ཨཿཞེས་པ་དང༌། རྡོ་རྗེ་འབེབས་པའི་ཕྱག་རྒྱས་གདབ་པར་བྱའོ། །དེ་ནས་ཡང་ཤར་ཕྱོགས་ཀྱི་སྒོ་ནས། དེ་བཞིན་དུ་
བཅུག་ལ་འདི་སྐད་དུ། དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱིས་ཞེས་བྱ་བ་ལ་སོགས་པ་བརྗོད་པར་བྱའོ། །དེ་ནས་སྒོ་དབྱེ་བའི་ཕྱག་རྒྱས་རང་གི་སྙིང་ག་ཕྱེ་ལ། རང་གི་སྙིང་ག་ན་གནས་པའི་རྡོ་རྗེའི་དབུས་ན་ཡི་གེ་ཨ་རྡོ་རྗེ་དམར་པོའི་འོད་ཟེར་གྱི་ཕྲེང་བ་དང་ལྡན་པ་བསམས་ནས། དེ་ནས་སློབ་མའི་སྙིང་ག་ན་གནས་པའི་རྡོ་རྗེའི་དབུས་སུ་བློས་བཅུག་ལ། དེའི་ལུས་ཐམས་ཅད་གང་བར་བསམས་ཤིང༌། འདི་སྐད་དུ་དེ་བཞིན་གཤེགས་པ་ཐམས་ཅད་ཀྱིས་ཞེས་བྱ་བ་ལ་སོགས་པ་སྨོས་ཤིག་ཅེས་བརྗོད་དོ། །དེ་ནས་སེམས་མ་རྡོ་རྗེ་མའི་ཕྱག་རྒྱ་བཅིངས་ལ། འདི་ནི་རྡོ་རྗེ་དམ་ཚིག་སྟེ། ཞེས་བྱ་བ་ལ་སོགས་པ་བརྗོད་དུ་བཅུག་ལ། བཛྲ་ཨཱ་བེ་ཤ་ཨཿཞེས་བྱ་བ་ལན་བརྒྱའི་བར་དུ་ཟློས་ཤིང་དབབ་པར་བྱའོ། །དབབ་པའི་ཆོ་ག་དེ་ལྟ་བུ་དང༌། གཞན་དག་ཀྱང་ཤེས་པར་བྱའོ། །དེ་ནས་དེ་ལ་བབས་པར་ཤེས་པ་དང༌། སློབ་དཔོན་གྱིས་དཔལ་རྡོ་རྗེ་སེམས་དཔའི་དམ་ཚིག་གི་ཕྱག་རྒྱ་བཅིངས་ཏེ། ཀྱེ་རྡོ་རྗེ་སེམས་དཔའ། ཀྱེ་རྡོ་རྗེ་རིན་ཆེན། ཀྱེ་རྡོ་རྗེ་ཆོས། ཀྱེ་རྡོ་རྗེ་ལས། པྲིཏྟས་ཏྭ་བཏི་བཛྲ་ཞེས་བརྗོད་པར་བྱའོ། །གལ་ཏེ་བབས་པ་དེ་དཔལ་རྡོ་རྗེ་སེམས་དཔའི་ཕྱག་རྒྱ་བཅིངས་ལ། སློབ་དཔོན་གྱིས་རྡོ་རྗེ་ཁུ་ཚུར་གྱི་ཕྱག་རྒྱ་བཅིང་བར་བྱའོ། །གང་གི་ཚེ་རྡོ་རྗེ་རྒྱལ་པོའི་ཕྱག་རྒྱ་འཆིང་ན་དེའི་ཚེ་རྡོ་རྗེ་གནོད་སྦྱིན་གྱི་ཕྱག་རྒྱའོ། །གང་གི་ཚེ་རྡོ་རྗེ་ཆགས་པའི་འཆིང་ན། དེའི་ཚེ་རྡོ་རྗེ་བསྲུང་བའི་འོ། །གང་གི་ཚེ་རྡོ་རྗེ་ལེགས་པའི་འཆིང་ན་དེའི་ཚེ་རྡོ་རྗེ་ལས་ཀྱིའོ། །གང་གི་ཚེ་རྡོ་རྗེ་རིན་ཆེན་གྱི་ཕྱག་རྒྱ་འཆིང་ན་དེའི་ཚེ་རྡོ་རྗེ་སྨྲ་བའི་ཕྱག་རྒྱའོ། །གང་གི་ཚེ་རྡོ་རྗེ་ཉི་མའི་འཆིང་བ་དེའི་ཚེ་རྡོ་རྗེ་རྒྱུའོ། །གང་གི་ཚེ་རྡོ་རྗེ་རྒྱལ་མཚན་གྱི་འཆིང་པ་དེའི་ཚེ་རྡོ་རྗེ་རྣོན་པོའིའོ། །གང་གི་ཚེ་རྡོ་རྗེ་བཞད་བའི་ཕྱག་རྒྱ་འཆིང་པ་དེའི་ཚེ་སློབ་དཔོན་གྱིས་རྡོ་རྗེ་ཆོས་ཀྱི་ཕྱག་རྒྱ་བཅིང་པར་བྱའོ། །དེ་ལྟ་བུ་ནི་དཔལ་རྡོ་རྗེ་སེམས་དཔའ་ལ་སོགས་པའི་སེམས་དཔའ་དེ་རྣམས་དགོངས་པར་མཛད་པར་འགྱུར་རོ། །དེ་ནས་བབས་པ་དེའི་ལྕེ་ལ་ཡི་གེ་ཧཱུཾ་ལས་རྡོ་རྗེ་དཀར་པོ་རྩེ་ལྔ་བ་བསམས་ལ་སྨྲོས་ཤིག་རྡོ་རྗེ་ཞེས་བརྗོད་པར་བྱའོ། །དེ་ནས་མངོན་པར་འདོད་པ་ཐམས་ཅད་སྨྲ་བར་འགྱུར་རོ། །དེ་ནས་ཕྲེང་བ་དོར་ཏེ། སངས་རྒྱས་དངོས་གྲུབ་ཐོབ་བྱའི་ཕྱིར། །བདག་ལ་ཐུགས་བརྩེར་དགོངས་ནས་ནི། །འགྲོ་ལ་ཕན་ཕྱིར་གཙོ་ཆེན་གྱིས། །སྨན་བར་དགོངས་ཏེ་
བཞེས་སུ་གསོལ། །ཨོཾ་བཛྲ་པྲ་ཏི་གྲིཧྞ་ཧཱུཾ་ཞེས་པའོ། །དེ་ནས་བླངས་ལ་མགོ་ལ་བཅིང་ངོ༌། །དེ་ནས། རིན་ཆེན་མེ་ཏོག་ལ་སོགས་པ། །ཞེས་པའི་ཚིགས་བཅད་བརྗོད། ཨོཾ་པྲ་ཏཱིཙྪ་བཛྲ་ས་མ་ཡ་སྟྭཾ་ཞེས་པས་བཅིང་ངོ༌། །དེ་ནས་གདོང་གཡོགས་བཀྲོལ་བ། དཀྱིལ་འཁོར་བཟང་པོ་འདི་ལ་ལྟོས། །ཞེས་པ་ལ་སོགས་པའི་དཀྱིལ་འཁོར་བསྟན་ཏོ། །ཕྱིའི་དཀྱིལ་འཁོར་གྱི་ཕྱི་རོལ་དུ་ཟླ་བའི་དཀྱིལ་འཁོར་བྲིས་ལ། སློབ་མ་རྡོ་རྗེ་སེམས་དཔར་བསྐྱེད་ནས་བྱིན་གྱིས་བརླབས་ལ་ཟླ་བའི་དཀྱིལ་འཁོར་གྱི་སྟེང་དུ་བཞག་སྟེ། དྲིལ་བུ ་དཀྲོལ་ཞིང་མཆོད་པ་རྣམ་པ་ལྔས་མཆོད་ལ། བཀྲ་ཤིས་འདོན་ཅིང་རྣམ་པར་རྒྱལ་བའི་བུམ་པའམ། སརྦ་བིཏ་ཀྱིས་བྱིན་གྱིས་བརླབས་པའི་རྡོ་རྗེ་སེམས་དཔའི་བུམ་པ་ལས་རྡོ་རྗེ་ཁུ་ཚུར་གྱིས་ཆུ་བླངས་པ་དེ་དང༌། ཨོཾ་བཛྲ་ཨ་བྷི་ཥིཉྩ་ཞེས་བྱ་བའི་སྔགས་འདིས་སྤྱི་བོ་ནས་དབང་བསྐུར་བར་བྱའོ། །དེ་ནས་དབུ་རྒྱན་གྱི་དབང་དང༌། མེ་ཏོག་གི་ཕྲེང་བའི་དབང་བསྐུར་བ་དང༌། །ཕྱག་རྒྱའི་ཕྲེང་བའི་དབང་དང༌། རྡོ་རྗེའི་དབང་བསྐུར་བ་དང༌། དྲིལ་བུའི་དབང་བསྐུར་བ་དང༌། བདག་པོའི་དབང་བསྐུར་བ་དང༌། མིང་གི་དབང་བསྐུར་བ་ཐམས་ཅད་ལ་མེ་ཏོག་ལ་སོགས་པའི་མཆོད་པ་ལྔ་པོ་རེ་དང་དབང་རེར་སྦྱར་བར་བྱའོ། །མིང་གི་དབང་ལ་སོགས་པ་བསྐུར་བར་བསྲུང་པ་འདི་ཐམས་ཅད་ཀྱིས་ཀྱང་ཕྱིར་མི་ལྡོག་པའི་ས་བོན་བསྐྱེད་པའི་ཕྱིར་ཡིན་པས་སྡོམ་པ་གཟུང་བ་དང༌། སྡོམ་པ་གཟུང་བའི་སྤྱིའི་དབང་བསྐུར་བ་ཡིན་ནོ། །སློབ་དཔོན་དུ་དབང་བསྐུར་བར་འོས་པ་རྣམས་ཀྱིས་ནི་ཁྱད་པར་ཡོད་པར་བཤད་དེ། སློབ་དཔོན་དུ་དབང་བསྐུར་བར་འོས་པ་དཀྱིལ་འཁོར་ཆེན་པོར་བཅུག་ལ་དཀྱིལ་འཁོར་གྱི་དེ་ཁོ་ན་ཉིད་དང༌། ལྷའི་དེ་ཁོ་ཉིད་དང། སློབ་དཔོན་གྱི་ལས་ཐམས་ཅད་བསླབ་པར་བྱ་སྟེ། འདི་ཙམ་གྱིས་ནི་གསང་བའི་དབང་བསྐུར་བ་ཡིན་ནོ་ཞེས་བཅོམ་ལྡན་འདས་རྡོ་རྗེ་འཛིན་པས་གསུངས་ཏེ། དེ་ལ་དཀྱིལ་འཁོར་གྱི་དེ་ཁོ་ན་ཉིད་འདི་ཡིན་ཏེ། མི་མཉམ་མེད་པས་ཟུར་བཞི་སྟེ། །དྲན་དང་དབང་པོ་སྒོ་བཞི་སྟེ། །བསམ་གཏན་རྣམས་ཀྱི་རྟ་བབས་བཞི། །ཁ་ཁྱེར་ལ་བརྟེན་རྡོ་རྗེའི་མཆོག །ལྷ་མོས་མཆོད་པ་བཟུང་རྣམས་ཡིན། །སྣ་ཚོགས་པ་ཡི་རྒྱན་རྣམས་ཀུན། །བསམ་པ་ཐམས་ཅད་རྫོགས་བྱེད་པའོ། །རྡུལ་ཡབ་བསྐྱོད་པ་སྣ་ཚོགས་མཆོག །དམ་ཆོས་མཆོག་ནི་ཀུན་དུ་འཕྲོ། །རླུང་གིས་བསྐྱོད་པ་སྣ་ཚོགས་མཆོག །དར་འཕན་དྲིལ་བུའི་སྒྲ་
སྒྲོགས་ཡིན། །མེ་ལོང་ཡེ་ཤེས་དག་མེ་ཏོག །བྱང་ཆུབ་ཡན་ལག་མེ་ཏོག་ཕྲེང༌། །དྲ་བ་དྲ་ཕྱེད་རིན་ཆེན་མཆོག་ཉི་མ་ཟླ་བ་ཡང་དག་ལྡན། །ཀུན་གྲུབ་མི་ཟད་བདེ་བ་སྟེ། །བདེ་བ་ཆེན་པོ་ཞེས་བཤད་དོ། །ཕྱིའི་དཀྱིལ་འཁོར་གྱི་དེ་ཁོ་ན་ཉིད་དོ། །འདི་ནི་ནང་རིམ་དག་གི་ཐིག ། དཀྱིལ་འཁོར་བརྒྱད་པ་འདྲ་བ་ནི། །འདི་ནི་རྣམ་པར་ཐར་པ་བརྒྱད། །དངོས་གྲུབ་ཀུན་གྱིས་བདེ་བ་སྟེར། །ཐེག་པ་ཆེན་པོའི་བྱང་ཆུབ་སེམས། །འཁོར་ལོ་བཅུ་དྲུག་བསྐོར་བ་ནི། །སྡེ་སྣོད་འཁོར་ལོ་བསྐོར་བས་ནའོ། །ཐེག་ཆེན་བྱང་ཆུབ་སེམས་དང་ནི། །ལྡན་ཕྱིར་རྡོ་རྗེ་ཐིག་གིས་བསྐོར། །རྣམ་པར་སྣང་མཛད་དང༌། ངན་སོང་ཐམས་ཅད་སྦྱོང་བ་དང༌། རིན་ཆེན་དཔལ་དང༌། ཤཱཀྱ་ཐུབ་པ་དང༌། མེ་ཏོག་ཆེར་རྒྱས་ཀྱི་དཀྱིལ་འཁོར་ནི་ཐབས་རྣམ་པ་ལྔ་བསྟན་པའི་ཕྱིར། ཤེལ་དང༌། བཻ་ཌཱུཪྻ་དང༌། གསེར་དང༌། པདྨ་རཱ་ག་དང༌། མརྒད་ཀྱི་མདོག་ཅན་ལྟ་བུ་སྟེ། སྐབས་འདི་ནི་ལྷག་མའོ། །དབུས་མ་ཤེལ་ལྟ་བུའི་མདོག་ཅན་ནི་བཅོམ་ལྡན་འདས་ཀུན་རིག་གི་དཀྱིལ་འཁོར་ཏེ། བྱང་ཆུབ་སེམས་དཔའ་རྣམས་རྣམ་པར་བསྟན་པ་ཡིན་ནོ། །གཉིས་པ་བཻ་ཌཱུཪྻའི་མདོག་ཅན་ནི་ངན་སོང་ཐམས་ཅད་སྦྱོང་པའི་དཀྱིལ་འཁོར་ཏེ། བསྡུ་བའི་དངོས་པོ་སྟོན་པ་ཡིན་ནོ། །གསུམ་བ་གསེར་གྱི་མདོག་ཅན་ནི་རིན་ཆེན་དཔལ་གྱི་དཀྱིལ་འཁོར་ཏེ། བསོད་ནམས་དང་ཡེ་ཤེས་ཀྱི་ཚོགས་སྟོན་པར་བྱེད་པ་ཡིན་ནོ། །བཞི་པ་པདྨ་རཱ་གའི་མདོག་ཅན་ནི་ཤཱཀྱ་ཐུབ་པའི་དཀྱིལ་འཁོར་ཏེ། མི་དམིགས་པའི་ཐུགས་རྗེ་ཆེན་པོ་དང༌། ཏིང་ངེ་འཛིན་དང། གཟུངས་དང་རྣམ་པར་ཐར་པ་ལ་སོགས་པ་སྟོན་པར་བྱེད་པ་ཡིན་ནོ། །ལྔ་པ་མརྒད་ཀྱི་མདོག་ཅན་ནི་མེ་ཏོག་ཆེར་རྒྱས་ཀྱི་དཀྱིལ་འཁོར་ཏེ། སེམས་ཅན་སྨིན་པ་དང་གྲོལ་བར་བྱེད་པའི་བྱང་ཆུབ་སེམས་དཔའི་ལམ་འབྲས་བུ་དང་བཅས་པའི་ཐོབ་པ་ལས་བྱུང་པ་ཐེག་པ་ཆེན་པོ་གཞན་གྱི་ལྟ་བ་དང་བྲལ་བ་ཡིན་ནོ་ཞེས་བྱ་བ་ནི་དཀྱིལ་འཁོར་རོ། །འཁོར་ལོ་རྩིབས་བཅུ་དྲུག་པར་འབྱུང་བ་ནི་རྟེན་འབྲེལ་བཅུ་གཉིས་དང༌། དྲན་པ་ཉེ་བར་གཞག་པ་བཞི་དང༌། །སྟོད་པ་བཅུ་དྲུག་རྣམ་པར་དག་པ་ཡིན་ནོ། །ཁ་དོག་ལྔ་པོ་ནི་དེ་བཞིན་གཤེགས་པ་རྣམས་སེམས་ཅན་གྱི་
ཁམས་ལ་ཕ་རོལ་ཏུ་ཕྱིན་པ་དྲུག་གིས་ཆགས་པ་ཡིན་ནོ་ཞེས་དེ་སྟོན་པར་བྱེད་པའོ། །བུམ་པ་ནི་གང་གི་ཚེ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ལ་གཉིས་སུ་མེད་པའི་ཡེ་ཤེས་ཀྱི་བདུད་རྩི་གསོལ་བར་བསྟན་པ་ཡིན་ལ། བུམ་པ་གང་བ་ནི་བྱང་ཆུབ་ཐོབ་པར་བྱེད་པའི་བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པ་ཡིན་ནོ་ཞེས་པའི་དོན་སྟོན་པའོ། །གང་དུ་བཟླས་པ་ཡང་དག་བཤད། །དེ་ཉིད་གསལ་བར་སྟོན་པ་ཡིན། །གང་ཕྱིར་འདི་ནི་ཡང་དག་བཤད། །གྲགས་པའི་དྲི་ནི་བླ་ན་མེད། །རྫུ་འཕྲུལ་འཇུག་པ་གང་ཡིན་པ། །ཚུལ་ཁྲིམས་དྲི་ནི་བླ་ན་མེད། །བཟའ་བ་རྣམ་པ་སྣ་ཚོགས་ནི། །ཆོས་ཀྱི་ཟས་ནི་བླ་ན་མེད། །ལྷ་ཡི་གར་བཤད་སྣ་ཚོགས་པ། །རྟོག་པ་ཐམས་ཅད་རྣམ་འཕེལ་བའོ། །གྲོང་ཁྱེར་དུ་ནི་གང་བཤད་པ། །དེ་ཉིད་ཐར་པའི་གྲོང་ཁྱེར་བཟང༌། །དཀྱིལ་འཁོར་དུ་ནི་གང་བཤད་པ། །ཆོས་ཀྱི་རང་བཞིན་གྲོང་ཁྱེར་ཡིན། །ཞེས་བཅོམ་ལྡན་འདས་ཀྱིས་གསུངས་སོ། །ཡང་མིའུ་ཐུང་ལྟ་བུ་ཞལ་བཞི་པ་གསུས་ཁྱིམ་ཆེ་བ་རལ་པ་ཅན་དཀྱིལ་འཁོར་ཀྱི་བདག་པོའི་ཡོན་ཏན་དང་ལྡན་པའི་ཚོགས་ལྟ་བུ་ཞལ་བཞི་པོ་དེ་དཀྱིལ་འཁོར་གྱི་སྒོར་ཡོངས་སུ་གྱུར། གདུལ་བྱ་རྣམས་རང་གི་སྐུར་ཞུགས་པར་མཛད་པའི་ཕྱིར། དེ་རྣམས་ཀྱང་སྡིག་པ་སེལ་ཅིང་སངས་རྒྱས་ཀྱི་ཡོན་ཏན་བསྐྱེད་པར་མཛད་པས་བཞུགས་པར་གསང་བའི་དཀྱིལ་འཁོར་གྱི་གཟུགས་ཅན་བསྒོམ་པར་བྱའོ། །དེ་རྣམས་ལ་ལྷ་རྣམས་ཀྱི་དེ་ཁོ་ན་ཉིད་སུམ་ཅུ་རྩ་བདུན་ཏེ་དེ་བརྗོད་པར་བྱའོ། དཀྱིལ་འཁོར་ཐམས་ཅད་ཀྱི་དབུས་ན་བཞུགས་བ་ནི་བཅོམ་ལྡན་འདས་རྣམ་པར་སྣང་མཛད་དེ། སངས་རྒྱས་ཐམས་ཅད་གཅིག་ཏུ་བསྡུས་པར་གྱུར་པ་ལ་སོགས་པའི་ཚུལ་མཛེས་པར་སྣང་བ་ཡིན་ནོ། །བཅོམ་ལྡན་འདས་རྣམ་པར་སྣང་མཛད་ཀྱི་བྱང་ཆུབ་ཀྱི་མཚན་ཉིད་ཅན་གྱི་ཐུགས་གང་ཡིན་པ་དེ་ནི་ངན་སོང་ཐམས་ཅད་ཡོངས་སུ་སྦྱོང་བའོ། །བཅོམ་ལྡན་འདས་ངན་སོང་སྦྱོང་བ་དེ་ཉིད་རྣམ་པ་བཞིར་འདོད་དེ། དེའི་རྒྱུའི་གནས་སྐབས་ཀྱི་བྱང་ཆུབ་ཀྱི་ཐུགས་དང༌། འབྲས་བུར་གྱུར་པའི་ཐུགས་གང་ཡིན་པ་དེ་ནི་རྡོ་རྗེ་སེམས་དཔའོ། །དེ་ཉིད་ཀྱི་བསྡུ་བའི་དངོས་པོ་བཞིའི་སྤྱོད་པ་དང་འབྲས་བུའི་ཐུགས་ནི་རྡོ་རྗེ་རྒྱལ་པོའོ། །དེ་ཉིད་ཀྱི་སེམས་ཅན་སྨིན་པ་དང་གྲོལ་
བར་མཛད་པའི་ཐུགས་གང་ཡིན་པ་དང༌། དེ་བཞིན་དུ་ལམ་བསྒོམས་པ་དང༌། འབྲས་བུའི་རང་བཞིན་གྱི་ཐུགས་གང་ཡིན་པ་དེ་ནི་རྡོ་རྗེ་ཆགས་པའོ། །དེ་ཉིད་ཀྱི་ཕྱིར་ཕ་རོལ་ཏུ་ཕྱིན་པ་དྲུག་གི་སྤྱོད་བ་དང༌། འབྲས་བུའི་ཐུགས་གང་ཡིན་པ་དེ་ནི་རྡོ་རྗེ་ལེགས་བའོ། །བཅོམ་ལྡན་འདས་རྣམ་པར་སྣང་མཛད་ཀྱི་སྦྱིན་པའི་ཕ་རོལ་ཏུ་ཕྱིན་པ་གང་ཡིན་པ་དེ་ནི་དེ་བཞིན་གཤེགས་པ་རིན་ཆེན་དཔལ་ལོ། །རིན་ཆེན་དཔལ་དེ་ཡང་ནོར་དང་མི་འཇིགས་པ་དང༌། བྱམས་པ་དང༌། ཆོས་སྦྱིན་པའི་ཚུལ་གྱིས་རྣམ་པ་བཞིར་འགྱུར་རོ། །དེ་ལ་ནོར་སྦྱིན་པའི་སྤྱོད་པ་དང༌། ནོར་སྦྱིན་པའི་འབྲས་བུ་གང་ཡིན་པ་དེ་ནི་རྡོ་རྗེ་རིན་ཆེན་ནོ། །མི་འཇིགས་པ་སྦྱིན་པའི་སྤྱོད་པ་དང༌། མི་འཇིགས་པ་སྦྱིན་པའི་འབྲས་བུ་གང་ཡིན་པ་དེ་ནི་རྡོ་རྗེ་ཉི་མའོ། །བྱམས་པའི་སྦྱིན་པའི་སྤྱོད་བ་དང༌། དེའི་འབྲས་བུ་གང་ཡིན་པ་དེ་ནི་རྡོ་རྗེ་དཔལ་ལོ། །ཆོས་སྦྱིན་པའི་སྤྱོད་པའོ། །ཆོས་སྦྱིན་པའི་འབྲས་བུ་གང་ཡིན་པ་དེ་ནི་རྡོ་རྗེ་བཞད་པའོ། །བཅོམ་ལྡན་འདས་རྣམ་པར་སྣང་མཛད་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་གང་ཡིན་པ་དེ་ནི་དེ་བཞིན་གཤེགས་པ་ཤཱཀྱ་ཐུབ་པའོ། །བཅོམ་ལྡན་འདས་ཤཱཀྱ་ཐུབ་པའི་ཆོས་ཐམས་ཅད་རང་བཞིན་གྱིས་དག་པའོ་ཞེས་ཐུགས་རྩེ་གཅིག་པ་ཉིད་ཀྱི་རྣམ་པའི་ཤེས་རབ་ཀྱི་སྤྱོད་པ་དང༌། དེའི་འབྲས་བུ་གང་ཡིན་པ་དེ་ནི་རྡོ་རྗེ་ཆོས་སོ། །ཉོན་མོངས་པ་དང་ཤེས་བྱའི་སྒྲིབ་པ་སྤོང་བར་བྱེད་པའི་ཕྱིར་ཤེས་རབ་བསྒོམས་པ་དང༌། དེའི་འབྲས་བུ་གང་ཡིན་པ་དེ་ནི་རྡོ་རྗེ་རྣོན་པོའོ། །རྡོ་རྗེ་དབྱིངས་ལ་སོགས་པའི་དཀྱིལ་འཁོར་སྤྲུལ་པའི་རྣམ་པའི་ཤེས་རབ་དང༌། དེའི་འབྲས་བུ་གང་ཡིན་པ་དེ་ནི་རྡོ་རྗེ་རྒྱུའོ། །ཤཱཀྱ་ཐུབ་པའི་དེ་ཉིད་ཀྱི་སོ་སོ་ཡང་དག་པའི་རིག་པ་བཞི་རང་བཞིན་གྱིས་སྤྱོད་པ་གང་ཡིན་པ་དང༌། དེའི་འབྲས་བུ་གང་ཡིན་པ་དེ་ནི་རྡོ་རྗེ་སྨྲ་བའོ། །བཅོམ་ལྡན་འདས་རྣམ་པར་སྣང་མཛད་ཀྱི་བརྩོན་འགྲུབ་ཀྱི་ཕ་རོལ་ཏུ་ཕྱིན་པ་གང་ཡིན་པ་དེ་ནི་མེ་ཏོག་ཆེར་རྒྱས་སོ། །བཅོམ་ལྡན་འདས་མེ་ཏོག་ཆེར་རྒྱས་དེ་ཡང་རྣམ་པ་བཞི་སྟེ། མེ་ཏོག་ཆེར་རྒྱས་དེས་སངས་རྒྱས་སྤྲུལ་པའི་ཕྱིར་བརྩོན་འགྲུས་གང་བསྒོམས་པའི་སྤྱོད་པ་དང༌། སེམས་ཅན་སྨིན་པར་བྱ་བའི་སྤྱོད་པ་དང༌། དེ་དག་གི་འབྲས་བུ་གང་ཡིན་པ་དེ་ནི་རྡོ་རྗེ་ལས་སོ། །ཐེག་པ་གཞན་འདོད་པའི་སེམས་ཀྱིས་འཇིགས་པ་ལས་སེམས་
བསྲུང་བའི་བརྩོན་འགྲུས་གང་ཡིན་པ་དང༌། དེའི་འབྲས་བུ་གང་ཡིན་པ་དེ་ནི་རྡོ་རྗེ་བསྲུང་བའོ། །ཆོས་རྣམས་རང་བཞིན་གྱིས་འོད་གསལ་བ་གདོད་ནས་དག་པ་ནམ་མཁའ་དང་མཉམ་པ་ཞེས་བྱ་བར་སོ་སོར་རྟོག་པའི་བརྩོན་འགྲུས་བསྒོམས་པ་འདིས་འདོད་ཆགས་ལ་སོགས་པའི་ཉོན་མོངས་པ་དང༌། ཉེ་བའི་ཉོན་མོངས་པ་ཟ་བ་དང༌། གདུག་པ་ཐམས་ཅད་ཟ་བ་དང༌། དེའི་འབྲས་བུ་གང་ཡིན་པ་དེ་ནི་རྡོ་རྗེ་གནོད་སྦྱིན་ནོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང༌། གསུང་དང༌། ཐུགས་རྡོ་རྗེའི་རང་བཞིན་དུ་བསྒོམས་པའི་བརྩོན་འགྲུས་དང༌། དེའི་འབྲས་བུ་གང་ཡིན་པ་དེ་ནི་རྡོ་རྗེ་ཁུ་ཚུར་རོ། །བཅོམ་ལྡན་འདས་རྣམ་པར་སྣང་མཛད་ཀྱི་བྱང་ཆུབ་ཀྱིས་ཐུགས་བསྡུས་པར་གྱུར་པ་གང་ཡིན་པ་དེ་ནི་རྡོ་རྗེ་སེམས་མ་དང་སངས་རྒྱས་སྤྱན་ནོ། །སྦྱིན་པའི་ཕ་རོལ་ཏུ་ཕྱིན་པ་བསྡུས་པར་གྱུར་པ་གང་ཡིན་པ་དེ་ནི་རིན་ཆེན་སེམས་མ་དང་མཱ་མ་ཀཱིའོ། །ཤེས་རབ་ཀྱི་ཕ་རོལ་ཏུ་ཕྱིན་པ་བསྡུས་པར་གྱུར་པ་གང་ཡིན་པ་དེ་ནི་ཆོས་མ་དང་གོས་དཀར་མོའོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པ་བསྡུས་པར་གྱུར་པ་གང་ཡིན་པ་དེ་ནི་ལས་མ་དང་དམ་ཚིག་སྒྲོལ་མའོ། །དེ་ཉིད་ཀྱི་སྦྱིན་པ་དང༌། ཚུལ་ཁྲིམས་དང༌། བཟོད་པ་དང༌། བརྩོན་འགྲུས་དང༌། བསམ་གཏན་དང། ཤེས་རབ་དང༌། སྨོན་ལམ་དང༌། ཐབས་ཀྱི་ཕ་རོལ་ཏུ་ཕྱིན་པ་གང་ཡིན་པ་དེ་ནི་ལྷ་མོ་ལས་སྒེག་མོ་དང༌། ཕྲེང་བ་མ་དང༌། གླུ་མ་དང༌། གར་མ་དང༌། བདུག་པ་མ་དང༌། མེ་ཏོག་མ་དང༌། མར་མེ་མ་དང༌། བྱུག་པ་མ་ཡིན་ནོ། །བཅོམ་ལྡན་འདས་རྣམ་པར་སྣང་མཛད་ཀྱིས་བྱང་ཆུབ་ཀྱི་ཐུགས་བསྐྱེད་ནས། ཐར་པའི་གྲོང་ཁྱེར་ཆེན་པོར་སེམས་ཅན་རྣམས་འདྲེན་པར་མཛད་པའི་ཕྲིན་ལས་གང་ཡིན་པ་དེ་ནི་རྡོ་རྗེ་ལྕགས་ཀྱུའོ། །བྱང་ཆུབ་ཀྱི་སྤྱོད་པའི་ཞགས་པས་སེམས་ཅན་གཞུག་པར་མཛད་པ་གང་ཡིན་པ་དེ་ནི་རྡོ་རྗེ་ཞགས་པའོ། །བྱང་ཆུབ་ཀྱི་བསམ་གཏན་གྱིས་ཐེག་པ་གཞན་ལ་འདོད་པ་ལས་སེམས་རབ་ཏུ་དྲལ་ཏེ། འཆིང་བར་མཛད་པ་གང་ཡིན་པ་དེ་ནི་རྡོ་རྗེ་ལྕགས་སྒྲོག་གོ །བཅིང་པ་འབེབས་པས་རྗེས་སུ་ཆགས་པར་མཛད་པ་གང་ཡིན་པ་དེ་ནི་རྡོ་རྗེ་འབེབས་པ་ཡིན་ནོ། །དེ་ཡང་རྡོ་རྗེ་ལྕགས་ཀྱུ་ལ་སོགས་པའི་དབང་དུ་
མཛད་ནས། འདི་ཉིད་ཀྱི་རྒྱུད་ཆེན་པོ་ལས། །བྱང་ཆུབ་སེམས་དང་དེ་བཞིན་སྦྱིན། །བསམ་གཏན་སངས་རྒྱས་རྗེས་སུ་བརྙེས། །ཞེས་གསུངས་པ་ཡིན་ནོ། །བྱམས་པ་ལ་སོགས་པའི་བྱང་ཆུབ་སེམས་དཔའ་སུམ་ཅུ་རྩ་གཉིས་པོ་རྣམས་ནི། དམ་པའི་ཆོས་ཀྱི་གྲོང་ཁྱེར་ཆེན་པོ་ཡོངས་སུ་སྐྱོང་བའོ། །ཉན་ཐོས་དང་རང་སངས་རྒྱས་ནི་བདེན་པ་བཞི་དང༌། རྟེན་འབྲེལ་བཅུ་གཉིས་ཀྱི་སྒོ་ནས་ཐེག་པ་ཆུང་ངུའི་གྲོང་ཁྱེར་ཡོངས་སུ་སྐྱོང་བའོ། །འཇིག་རྟེན་གསུམ་སྣང་ལ་སོགས་པའི་ཁྲོ་བོ་རྣམས་ནི་རྣམ་པར་ཐར་པ་བརྒྱད་རྣམ་པར་དག་པ་ལས་བྱུང་བའོ། །འཇིག་རྟེན་པ་ལ་སོགས་པ་རྣམས་ནི་ཐེག་པ་ཆེ་ཆུང་སྣོད་ཇི་ལྟ་བ་བཞིན་དུ། ངན་སོང་ལས་དྲངས་ཏེ་གནས་པར་བྱ་བའི་དོན་ཏོ། །དེ་ལ་འདི་དག་ཐམས་ཅད་ནི། །སློབ་དཔོན་གྱི་ལས་ཡིན་ཏེ། སེམས་དཔའ་ཆེན་པོ་ཕྱག་རྒྱ་ཆེར། །བསྒོམ་ཞིང་བྱིན་གྱིས་རློབ་བགྱིད་ཅིང༌། །དཀྱིལ་འཁོར་གྱི་ནི་དབུས་ཉིད་དུ། །ཅི་རིགས་པར་ནི་མཆིས་ནས་ཀྱང༌། །ཕྱག་རྒྱལ་གནས་དེ་བཞིན་ལངས། །ཀུན་དུ་རྣམ་པར་བལྟས་ནས་ནི། །རྡོ་རྗེ་སེམས་དཔའ་ཞེས་བརྗོད་ནས། །བསྒྱིངས་པའི་ཚུལ་གྱིས་ཡོངས་སུ་བསྐོར། །ཞེས་བྱ་བ་ནས། །བདག་མིང་འདི་ཞེས་བགྱི་བ་ཡི། །རྡོ་རྗེ་སློབ་དཔོན་དཀའ་ཐུབ་ཆེས། །སེམས་ཅན་ཀུན་ལ་སྨན་སླད་དུ། །སློབ་མ་རྣམས་ནི་གཞུག་པར་བགྱི། །ཞེས་བྱ་བ་གང་བཤད་པ་འདི་དག་ཐམས་ཅད་ནི་སློབ་དཔོན་གྱི་ལས་ཡིན་ནོ། །ད་ནི་དབང་བསྐུར་བའི་ཆོ་ག་བརྗོད་པར་བྱ་སྟེ། རྩ་བའི་དཀྱིལ་འཁོར་ལས་ཁྲུ་གཉིས་དོར་བར་ཤར་སྒོར་བལྟས་པ་དང༌། དཀྱིལ་འཁོར་དབུས་མའི་ཕྱེད་ཀྱི་ཚད་ཙམ་ཟུར་བཞི་པ་སྒོ་ནུབ་ཏུ་བསྟོད་པའི་དཀྱིལ་འཁོར་ཚོན་སྣ་ལྔས་བྲིས་ལ། དེའི་དབུས་སུ་པདྨ་འདབ་མ་བརྒྱད། དེའི་སྟེང་དུ་དཔལ་རྡོ་རྗེ་སེམས་དཔའི་རྡོ་རྗེ་རྩེ་ལྔ་པ་ཁ་དོག་དམར་པོ་འོད་དམར་པོའི་ཕྲེང་བ་དང་ལྡན་པ་བྲི་བར་བྱའོ། །དེ་བཞིན་དུ་ལྷོ་དང༌། ནུབ་དང༌། བྱང་སྒོར་བལྟས་པ་ཀུན་ནས་ཟླུམ་པར་དཀྱིལ་འཁོར་གཞན་དག་བྲིས་ལ། དེའི་དབུས་སུ་པདྨ་འདབ་མ་བརྒྱད་པ། དེའི་སྟེང་དུ་རྡོ་རྗེ་རིན་པོ་ཆེ་དང༌། རྡོ་རྗེ་པདྨ་དང༌། སྣ་ཚོགས་རྡོ་རྗེ་གོ་རིམས་ཇི་ལྟ་བ་བཞིན་བྲིས་ལ། དཀྱིལ་འཁོར་དེ་རྣམས་རྩ་བའི་དཀྱིལ་འཁོར་ཇི་ལྟ་བ་བཞིན་མཆོད་ནས། དེ་
རྣམས་ལ་རྡོ་རྗེ་གནོད་སྦྱིན་ཡོངས་སུ་བཟླས་པའི་སེང་གེའི་གདན་ནམ་ཁྲི་ལ་ཟླ་བའི་དཀྱིལ་འཁོར་དར་གྱིས་གཡོགས་པ་གཞག་པར་བྱའོ། །དེ་ནས་སློབ་མ་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པར་བྱིན་གྱིས་བརླབས་ལ། ཤར་ཕྱོགས་ཀྱི་སྒོའི་དབང་བསྐུར་བའི་དཀྱིལ་འཁོར་དུ་རྣམ་པར་སྣང་མཛད་ཀྱི་ཕྱག་རྒྱ་ཆེན་པོས་སེང་གེའི་གདན་ལ་བཞག་ལ། སེང་གེའི་གདན་གྱི་སྟེང་དུ་བླ་རེ་བྲེ་བ་དང༌། གཡས་ལོགས་སུ་དར་དང་མེ་ཏོག་གི་ཕྲེང་བས་བརྒྱན་པ་དང༌། གདུགས་དཀར་པོ་རིན་པོ་ཆེའི་ཏོག་ཅན་ལ། ཨོཾ་མངོན་པར་བཟླས་པ་བཞག་པ་དང༌། གཡོན་དུ་དར་སྣ་ཚོགས་ཀྱི་རྒྱལ་མཚན་དང༌། བ་དན་སྣ་ཚོགས་པ་ནམ་མཁའ་མཛོད་ཀྱི་སྔགས་བཟླས་ལ་གཞག་པར་བྱའོ། །དེ་ནས་སློབ་མ་ལ་མཆོད་ཡོན་བྱིན་ལ་མཆོད་པ་ལྔས་ཀྱང་མཆོད་དེ། དུང་དང༌། རྡ་རིངས་དང༌། རྔ་བོ་ཆེ་དང༌། ཟངས་དུང་ལ་སོགས་པའི་རོལ་མོའི་ཕྱག་རྒྱས་བྱིན་གྱིས་བརླབས་ནས། གར་དང༌། གླུ་དང༌། རྩེད་མོས་ཀྱང་དེ་ཡང་དག་པར་མཆོད་ལ་བཀྲ་ཤིས་ཀྱི་ཚིགས་སུ་བཅད་པ་བརྗོད་པར་བྱའོ། །དེ་ནས་སྦྱོར་བ་འདིས་ངན་སོང་སྦྱོང་བ་ལ་སོགས་པའི་བུམ་པ་བཞིས་དབང་བསྐུར་བར་བྱའོ། །ཨོཾ་བཛྲ་ཀ་ལ་ཤ་ཨ་བྷི་ཥིཉྩ་ཧཱུཾ། ཨོཾ་བུདྡྷ་ཀ་ལ་ཤ་ཨ་བྷི་ཥིཉྩ་ཨོཾ། ཨོཾ་རཏྣ་ཀ་ལ་ཤ་ཨ་བྷི་ཥིཉྩ་ཏྲཱཾ། ཨོཾ་པདྨ་ཀ་ལ་ཤ་ཨ་བྷི་ཥིཉྩ་ཧྲཱིཿ། ཨོཾ་ཀརྨ་ཀ་ལ་ཤ་ཨ་བྷི་ཥིཉྩ་ཨཿ་ཨོཾ་བཛྲ་བིདྱཱ་སྭཱ་ཧཱ་ཞེས་བྱ་བ་དམ་ཚིག་གི་ཕྱག་རྒྱས་ཡོངས་སུ་བཟུང་བའི་མེ་ཏོག་གི་ལྕུག་མ་ལ་སྟོང་རྩ་བརྒྱད་བཟླས་པའི་རྣམ་པར་སྣང་མཛད་ཀྱི་བུམ་པ་དེས། ཨོཾ་སརྦ་བཏི་སྭཱ་ཧཱ། ཨོཾ་བཛྲ་ཨ་བྷི་ཥིཉྩ་ཞེས་བྱ་བ་བརྗོད་དེ་དབང་བསྐུར་རོ།། དེ་ནས་དབུ་རྒྱན་གྱི་དབང་བསྐུར་ཏེ། ཨོཾ་བཛྲ་ཨ་བྷི་ཥིཉྩ་ཧཱུཾ། ཨོཾ་བུདྡྷ་ཨ་བྷི་ཥིཉྩ་ཨོཾ། ཨོཾ་རཏྣ་ཨ་བྷི་ཥིཉྩ་ཏྲཱཾ། ཨོཾ་པདྨ་ཨ་བྷི་ཥིཉྩ་ཧྲཱིཿ། ཨོཾ་ཀརྨ་ཨ་བྷི་ཥིཉྩ་ཨཿ། དེ་ནས་ཕྲེང་བའི་དབང་བསྐུར་བ་བླང་བར་བྱ་སྟེ། ཨོཾ་རཏྣ་མཱ་ལ་ཨ་བྷི་ཥིཉྩ་ཏྲཱཾ་ཏྲཱཾ་ཏྲཱཾ་ཏྲཱཾ་ཏྲཱཾ། ཨོཾ་བཛྲ་པ་ཊྚ་ཨ་བ་ལཾ་བ་ན་ཨ་བྷི་ཥིཉྩ་ཏྲཱཾ། དེ་ནི་ཅོད་པན་གྱི་དབང་ངོ༌། །དེ་ནས་ཕྱག་རྒྱའི་དབང་བསྐུར་བར་བླང་བར་བྱ་སྟེ། ཨོཾ་བཛྲ་མུ་དྲ་ཨ་བྷི་ཥིཉྩ་ཧཱུཾ། ཨོཾ་བུདྡྷ་མུ་དྲ་ཨ་བྷི་ཥིཉྩ་ཨོཾ། ཨོཾ་རཏྣ་མུ་དྲ་ཨ་བྷི་ཥིཉྩ་ཏྲཱཾ། ཨོཾ་པདྨ་མུ་དྲ་ཨ་བྷི་ཥིཉྩ་ཧཱིཿ། ཨོཾ་ཀརྨ་མུ་དྲ་ཨ་བྷི་ཥིཉྩ་ཨཿ། དེ་ནས་མིང་གི་དབང་བསྐུར་བ་སྦྱིན་པར་བྱ་སྟེ། ཨོཾ་བཛྭ་ནཱ་མ་ཨ་བྷི་
ཥིཉྩ་ཧཱུཾ། ཨོཾ་ཧཱུཾ་ཏྲཱཾ་ཧྲཱི་ཨཿ། ཀྱེ་རྡོ་རྗེ་སེམས་དཔའ་ཀྱེ་རྡོ་རྗེ་རིན་ཆེན། ཀྱེ་རྡོ་རྗེ་ཆོས། ཀྱེ་རྡོ་རྗེ་ལས་ཆེ་གེ་མོ་ཞེས་བྱ་བ་འདི་ཡང་ཨ་དྷི་ཏིཥྛ་སརྦ་ཏ་ཐཱ་ག་ཏ་ཡ་ཙཱཪྻ་ཏྲ་སྭཱ་ཧཱ། དེ་ནས་ལས་ཀྱི་དབང་བསྐུར་ཏེ། ཨོཾ་བཛྲ་ཀརྨ་ཨ་བྷི་ཥིཉྩ་ཧཱུཾ་ཨཿ། དེ་ནས་འཁོར་ལོའི་དབང་བསྐུར་ཏེ། ཨོཾ་བཛྲ་ཙ་ཀྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་ཨོཾ། ཨོཾ་ཨོཾ་ཨོཾ། ཧཱུཾ་ཧཱུཾ་ཧཱུཾ། ཏྲཱཾ་ཏྲཱཾ་ཏྲཱཾ། ཧྲཱིཿ་ཧྲཱིཿ་ཧྲཱིཿ། ཨཿ་ཨཿ་ཨཿ། དེ་ནས་གཟུངས་ཀྱི་དབང་བསྐུར་བར་བྱ་སྟེ། ཨོཾ་བཛྲ་དྷ་ར་ཎ་ཨ་བྷི་ཥིཉྩ་ཧཱུཾ། ཨོཾ་བུདྡྷ་དྷ་ར་ཎ་ཨ་བྷི་ཥིཉྩ་ཨོཾ། ཨོཾ་རཏྣ་དྷ་ར་ཎ་ཨ་བྷི་ཥིཉྩ་ཏྲཱཾ། ཨོཾ་པདྨ་དྷ་ར་ཎ་ཨ་བྷི་ཥིཉྩ་ཧྲཱིཿ། ཨོཾ་ཀརྨ་དྷ་ར་ཎ་ཨ་བྷི་ཥིཉྩ་ཨཿ། ཨོཾ་སརྦ་ཏ་ཐཱ་ག་ཏཱ་གུ་ཧྱ་ཨ་བྷི་ཥིཉྩ་ཨོཾ། ཨོཾ་བཛྲ་གུ་ཧྱ་ཨ་བྷི་ཥིཉྩ་ཧཱུཾ། ཨོཾ་བུདྡྷ་གུ་ཧྱ་ཨ་བྷི་ཥིཉྩ་ཨོཾ། ཨོཾ་རཏྣ་གུ་ཧྱ་ཨ་བྷི་ཥིཉྩ་ཏྲཱཾ། ཨོཾ་པདྨ་གུ་ཧྱ་ཨ་བྷི་ཥིཉྩ་ཧྲཱིཿ། ཨོཾ་ཀརྨ་གུ་ཧྱ་ཨ་བྷི་ཥིཉྩ་ཨཿ། དེ་ནས་མཆོད་པ་རྣམ་པ་ལྔས་ཡང་དག་པར་མཆོད་ལ། ལྷག་མ་ནི་རྡོ་རྗེ་སེམས་དཔའི་དབང་བསྐུར་བའི་སྐབས་སུ་ཤེས་པར་བྱའོ། །ཡང་དེ་ཉིད་དུ་རྡོ་རྗེ་སེམས་དཔར་བྱིན་གྱིས་བརླབས་ལ་རྣལ་འབྱོར་ཆེན་པོ་བཤད་པའི་ཚུལ་གྱིས་རྣམ་པར་སྣང་མཛད་ལ་སོགས་པ་དེའི་ལུས་ལ་བཀོད་ལ་རྡོ་རྗེ་སེམས་དཔའི་ཕྱག་རྒྱ་ཆེན་པོས་དེ་སེང་གེའི་ཁྲི་སྟེང་དུ་བཞག་ལ་བླ་རེ་བྲེ་བ་ནས་བཀྲ་ཤིས་གདོན་པ་ཡན་ཆད་བྱས་ནས། དེ་ནས་ཤར་སྒོའི་བུམ་པ་དང༌། བུམ་པ་གང་བས་ཀྱང་དབང་བསྐུར་བར་བྱའོ། །དེ་ནས་དེ་བཞིན་གཤེགས་པ་དང༌། དབུ་རྒྱན་ལ་སོགས་པའི་དབང་བསྐུར་བར་བྱའོ། །དེ་ནས་མེ་ཏོག་ལ་སོགས་པ་དང༌། སྒེག་མོ་ལ་སོགས་པས་སློབ་མ་མཆོད་ལ་གསེར་གྱི་ཐུར་མ་ཡི་གེ་པྲཾ་གྱིས་བྱིན་གྱིས་བརླབས་པ་ཐོགས་ལ་མདུན་དུ་འདུག་སྟེ། དེའི་མིག་གཡས་པ་འབྱེད་པ་ལྟར་བྱེད་ཅིང་འདི་སྐད་ཅེས་བརྗོད་པར་བྱའོ། ཇི་ལྟར་མིག་མཁན་རྒྱལ་པོ་ཡིས།། འཇིག་རྟེན་ལིང་ཏོག་བསལ་བ་ལྟར། །བུ་ཁྱོད་ཀྱིས་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཨོཾ་ནཻ་ཏྲ་ཨ་པ་ཧ་ར་པ་ཊ་ལཾ་ཧྲཱིཿ། དེ་ནས་མེ་ལོང་ལ་ཨོཾ་བཛྲ་ཏྭ་ཞེས་བྱ་བའི་སྔགས་མངོན་པར་བཟླས་པ་བསྟན་ཅིང་ཆོས་ཀྱི་མཚན་ཉིད་བཤད་པར་བྱའོ། །ཆོས་
རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་ཏུ་བྱུང༌། །ངོ་བོ་ཉིད་མེད་གནས་མེད་པར། །དེ་ལྟར་ཆོས་འདི་ཤེས་ནས་སུ། །སེམས་ཅན་དོན་ནི་མཉམ་མེད་བྱོས། །འོན་ཀྱང་སངས་རྒྱས་སྲས་སུ་སྐྱེ། །ཡི་གེ་ཧོཿ་ས་མདའ་དྲུག་དང་བཅས་པའི་གཞུ་བྱིན་ལ། འདི་སྐད་ཅེས་བརྗོད་པར་བྱ་སྟེ། མདའ་དྲུག་གཞུ་དང་བཅས་པ་འདིས། །ཚད་མེད་མདའ་དང་བྱམས་པའི་གཞུས། །ཕྱོགས་བཅུའི་དེ་བཞིན་གཤེགས་པ་རྣམས། །ཐམས་ཅད་མ་ལུས་མཉེས་པར་གྱིས། །ཞེས་བསྒོས་ལ་ཧོཿ་ཞེས་བྱ་བའི་སྙིང་པོ་འདིས། ཕྱོགས་བཞི་དང་སྟེང་དང་འོག་ཏུ་མདའ་འཕེན་དུ་གཞུག་གོ །དེ་ནས་བཛྲ་སཏྭ་ཞེས་བྱ་བ་མེ་ལོང་ལ་བཟླས་པ་ཉེ་བར་བསྟན་ཅིང་འདི་སྐད་ཅེས་བརྗོད་པར་བྱའོ། རྡོ་རྗེ་སེམས་དཔའ་མེ་ལོང་བཞིན། །དག་ཅིང་གསལ་ལ་རྙོག་པ་མེད། །སངས་རྒྱས་ཀུན་བདག་རང་ཉིད་ནི། །བུ་ཁྱོད་ཀྱི་ནི་སྙིང་ལ་ཞུགས། །གང་འདི་དེ་བཞིན་གཤེགས་པ་ཐམས་ཅད་ཀྱི་བདག་པོ་བྱང་ཆུབ་ཀྱི་སེམས་འདི་ཡིན་པར་ཤེས་པར་བྱའོ་ཞེས་བརྗོད་པར་བྱའོ། །བཛྲ་ཧེ་ཏུ་མཾ་ཞེས་བྱ་བས་དེའི་རྐང་པ་གཉིས་ཀྱི་བར་དུ་འཁོར་ལོ་བཞག་པ་དང༌། བཛྲ་བྷཱ་ཥ་རཾ་ཞེས་བྱ་བས་དེའི་ལག་པ་གཡས་པར་དུང་བྱིན་ལ་འདི་སྐད་ཅེས་བརྗོད་པར་བྱའོ། །དེང་ནས་བརྩམས་ཏེ་སེམས་བསྐྱེད་པ། །ཙམ་གྱིས་ཆོས་ཀྱི་འཁོར་ལོ་བསྐོར། །དེ་རིང་ཕན་ཆད་འཇིག་རྟེན་ལ། །སྐྱོབས་རྣམས་ཀྱིས་འཁོར་ལོ་བསྐོར། །ཆོས་ཀྱི་དུང་ནི་བླ་མེད་བས། །ཀུན་དུ་མ་ལུས་གང་བར་གྱིས། །སོམ་ཉི་ཡིད་གཉིས་མི་བྱ་ཞིང༌། །དོགས་པ་མེད་པའི་སེམས་ཀྱིས་སུ། །གསང་སྔགས་སྤྱོད་པ་ཚུལ་གྱི་མཆོག །འཇིག་རྟེན་འདི་ལ་རབ་ཏུ་སྒྲོགས། །དེ་ལྟར་བྱས་ན་སངས་རྒྱས་ལ། །ཕན་བཏགས་དྲིན་དུ་གཟོ་ཞེས་བྱ། །རྡོ་རྗེ་འཛིན་པ་དེ་ཀུན་ཀྱང༌། །ཀུན་དུ་ཁྱོད་ལ་བསྲུང་བར་མཛད། །དེ་ནས། འཇིག་རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །ཆོས་ཀྱི་འཁོར་ལོ་རབ་ཏུ་བསྐོར། །འཇིག་རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་
ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །རྡོ་རྗེའི་འཁོར་ལོ་རབ་ཏུ་བསྐོར། །དེ་ནས་ཤེས་རབ་ཡེ་ཤེས་ཀྱི་དབང་བསྐུར་རོ། །ཡང་འཕགས་པ་ནམ་མཁའི་སྙིང་པོར་བྱིན་གྱིས་བརླབས་ལ། །དེའི་ཕྱག་རྒྱ་ཆེན་པོས་ལྷོ་ཕྱོགས་ཀྱི་དབང་བསྐུར་བའི་དཀྱིལ་འཁོར་དུ་བཞག་ལ། རིན་ཆེན་འབྱུང་ལྡན་གྱི་བུམ་པས་དེ་བཞིན་དུ་དབང་བསྐུར་བར་བྱའོ། །དེ་ནས་རྣམ་པར་རྒྱལ་བའི་བུམ་པའི་ཆུས་དེ་བཞིན་དུ་དབང་བསྐུར་རོ། །དེ་ནས་རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱ་བཅིངས་ལ་དབང་བསྐུར་བའི་གནས་སུ་བཞག་ལ། སྙིང་པོ་ནི་ཨོཾ་བཛྲ་རཏྣ་ནཱ་མ་ཨ་བྷི་ཥིཉྩ་ཏྲཱཾ་ཨ་དྷི་པ་ཏི་སྟྭཾ། དེ་ནས་དེར་གོས་སེར་པོ་དང༌། རྒྱན་ཐམས་ཅད་ལ་བཛྲ་རཏྣ་ཞེས་བཟླས་པ་བྱིན་ལ། རྡོ་རྗེ་རིན་ཆེན་མྱུ་གུའི་ཕྱག་རྒྱས་ཕྱག་རྒྱའི་དབང་བསྐུར་བ་བྱིན་ལ། རིན་པོ་ཆེ་ལས་བྱས་པའི་རིན་པོ་ཆེའི་ཅོད་པན་གྱི་སྔགས་བཟླས་པ་དེས་རིན་པོ་ཆེའི་ཅོད་པན་དང༌། དར་དབྱངས་ཀྱིས་དབང་བསྐུར་ལ། །ནོར་བུ་རིན་པོ་ཆེའི་བདག་པོ་དང༌། མིང་གི་དབང་བསྐུར་བ་དང༌། གསང་བའི་དབང་ཡན་ཆད་བསྐུར་ལ། ཡང་དེ་བཞིན་དུ་མཆོད་པ་རྣམ་པ་ལྔ་དང༌། སྒེག་མོ་ལ་སོགས་པས་ཡང་དག་པར་མཆོད་ལ། རྡོ་རྗེ་སེམས་དཔའི་དབང་བསྐུང་བའི་ཆོ་ག་ཐམས་ཅད་རྗེས་སུ་སྤྱད་ནས། འཇིག་རྟེན་ཁམས་ནི་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །ནོར་བུའི་འཁོར་ལོ་རབ་ཏུ་བསྐོར། །ཞེས་དེ་ལ་རྗེས་སུ་གནང་བ་སྦྱིན་ནོ། །དེ་ནས་རིན་པོ་ཆེ་སྣ་བདུན་དང༌། གསང་བ་དང་ཤེས་རབ་ཡེ་ཤེས་དང་སྦྱིན་པར་བྱའོ། །དེ་ནས་རྡོ་རྗེ་ཆོས་སུ་བྱིན་གྱིས་བརླབས་ལ་ཕྱག་རྒྱ་ཆེན་པོ་དང༌། ནུབ་ཕྱོགས་ཀྱི་དབང་བསྐུར་བའི་དཀྱིལ་འཁོར་དུ་ཇི་ལྟ་བ་བཞིན་བཞག་ལ། ཤཱཀྱ་ཐུབ་པའི་རིགས་ཀྱི་བུམ་པས་དེ་བཞིན་དུ་དབང་བསྐུར་བར་བྱ་སྟེ། བཛྲ་སྥོ་ཊ་བཛྲ་ཨ་བྷི་ཥིཉྩ་ཞེས་པ་ནས། བཛྲ་དྷརྨ་ཨོཾ་བཛྲ་ཨ་བྷི་ཥིཉྩ་ཞེས་བྱ་བ་ཡན་ཆད་ཀྱིས་སོ། །དེ་ནས་རྣམ་པར་རྒྱལ་བའི་བུམ་པའི་ཆུས་ཀྱང་དེ་བཞིན་དུ་དབང་བསྐུར་རོ། །དེ་ནས་རྡོ་རྗེ་པདྨ་བཟླས་པའི་གོས་དཀར་པོ་དང་རྒྱན་ཐམས་ཅད་དེ་ལ་བྱིན་ལ་དྲི་ལ་སོགས་པས་མཆོད་དེ། རྡོ་རྗེ་ཆོས་ཀྱི་དམ་ཚིག་གི་ཕྱག་རྒྱ་བཅིངས་ལ་འོད་དཔག་ཏུ་མེད་པའི་དབང་བསྐུར་
པས་དབང་བསྐུར་རོ། །དེ་ནས་དེ་བཞིན་གཤེགས་པ་ཤཱཀྱ་ཐུབ་པ་དང་ལྡན་ཞིང་པདྨའི་ཕྲེང་བ་དང་བཅས་པའི་ཅོད་པན་དང༌། དར་དབྱངས་ཀྱིས་དབང་བསྐུར་ལ། ཕྱག་རྒྱའི་རྡོ་རྗེ་པདྨའི་དབང་བསྐུར་བ་དང༌། བདག་པོའི་དབང་བསྐུར་བ་དང༌། ཕྲེང་བའི་པདྨའི་ཕྲེང་བ་ནས། པདྨའི་རིགས་ཀྱི་གསང་བའི་དབང་བསྐུར་བ་ཡན་ཆད་བསྐུར་ལ། མཆོད་པ་རྣམ་པ་ལྔ་དང༌། སྒེག་མོ་ལ་སོགས་པ་མཆོད་པ་བརྒྱད་ཀྱིས་ཡང་དག་བར་མཆོད་ལ། རིན་པོ་ཆེའི་ཐུར་མ་ལ་སོགས་པ་ཆོ་ག་ཐམས་ཅད་རྗེས་སུ་སྤྱད་པར་བྱའོ། །དེ་ནས། །འཇིག་རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །པདྨའི་འཁོར་ལོ་རབ་ཏུ་བསྐོར། །ཞེས་དེ་ལ་རྗེས་སུ་གནང་བ་སྦྱིན་པར་བྱའོ། །དེ་ནས་བཀྲ་ཤིས་ཀྱི་རྫས་བརྒྱད་དང༌། གསང་བ་ཤེས་རབ་ཡེ་ཤེས་ཀྱི་དབང་ལ་སོགས་པ་སྦྱིན་པར་བྱའོ། །དེ་ནས་རྡོ་རྗེ་ལས་སུ་བྱིན་གྱིས་བརླབས་ལ་ཕྱག་རྒྱ་ཆེན་པོ་དང༌། བྱང་ཕྱོགས་ཀྱི་དབང་བསྐུར་བའི་དཀྱིལ་འཁོར་དུ་ཇི་ལྟ་བ་བཞིན་བཞག་ལ། མེ་ཏོག་ཆེར་རྒྱས་ཀྱི་བུམ་པས། ཨོཾ་བཛྲ་ཨོཾ་ཨ་བྷི་ཥིཉྩ་ཞེས་པ་ནས། དེ་བཞིན་དུ་བཛྲ་ཀརྨ་ཨཾ་ཨ་བྷི་ཥིཉྩ་ཞེས་པའི་བར་གྱིས་དབང་བསྐུར་རོ། །ཡང་རྣམ་པར་རྒྱལ་བའི་བུམ་པའི་ཆུས་ཀྱང་དེ་བཞིན་དུ་དབང་བསྐུར་ནས། རྡོ་རྗེ་ལས་ཀྱི་དམ་ཚིག་གི་ཕྱག་རྒྱས་སྣ་ཚོགས་རྡོ་རྗེའི་ཕྲེང་བས་དེ་བཞིན་དུ་དབང་བསྐུར་ལ། རིན་པོ་ཆེ་ཐམས་ཅད་ལས་བྱས་པའི་སྣ་ཚོགས་རྡོ་རྗེའི་ཕྲེང་བའི་ཅོད་པན་དང༌། དར་དབྱངས་ཀྱི་དབང་ཨོཾ་པ་ཊ་ཨ་བ་ལཾ་བ་ན་ཨ་བྷི་ཥིཉྩ་ཏྲཱཾ་ཞེས་བཟླས་པ་དེའི་མགོ་བོར་བཞག་སྟེ་སྣ་ཚོགས་རྡོ་རྗེའི་དབང་བསྐུར་བ་དང༌། བདག་པོའི་དབང་བསྐུར་བ་དང༌། མིང་གི་དབང་བསྐུར་བ་དེ་ལ་སྦྱིན་པར་བྱའོ། །དེ་ནས་མཆོད་པ་རྣམ་པ་ལྔ་དང་སྒེག་མོ་ལ་སོགས་པས་ཡང་དག་པར་མཆོད་དེ། དཔལ་རྡོ་རྗེ་སེམས་དཔའི་ཆོ་ག་ཐམས་ཅད་རྗེས་སུ་སྤྱད་པར་བྱའོ། །འཇིག་རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་པ། །སྣ་ཚོགས་འཁོར་ལོ་རབ་ཏུ་བསྐོར། །ཞེས་དེ་ལ་རྗེས་སུ་གནང་བ་སྦྱིན་པར་བྱའོ། །དེ་ནས་ཉེ་བའི་རིན་པོ་ཆེ་སྣ་བདུན་དང༌། གསང་བའི་དབང་ཡང་སྦྱིན་པར་བྱའོ། །དེ་ལ་དེ་བཞིན་
གཤེགས་པའི་དབང་བསྐུར་བའི་དུས་སུ་གསུངས་པའི་སྔགས་ཀྱི་དབྱེ་བས་ཕྱེ་ལ་དབང་བསྐུར་བའམ། རིམ་གྱིས་དབང་བསྐུར་བ་བྱས་ཀྱང་འགལ་བ་མེད་དོ། །དེ་ནས་གསང་བ་ཤེས་རབ་ཡེ་ཤེས་ཀྱི་དབང་གི་དམ་ཚིག་དང༌། བརྟུལ་ཞུགས་སྦྱིན་པར་བྱ་སྟེ། དེ་ཡང་དེ་ཁོ་ན་ཉིད་བསྡུས་བའི་རྒྱུད་ལས། དེ་ཉིད་ཀྱིས་ནི་རྡོ་རྗེ་ཟུངས། །ཆོས་ཀྱི་ དྲིལ་བུ ་དཀྲོལ་བར་བྱ། །དམ་ཚིག་གིས་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླས། །ཞེས་བྱ་བས་བྱིན་གྱིས་བརླབ་པར་བྱའོ། །དེ་ལ་ཤར་གྱི་སྒོར་ནི་དེ་བཞིན་གཤེགས་པ་དང་རྡོ་རྗེ་རིགས་ཀྱིའོ། །ཕྱི་མ་ནི་རང་རང་གི་སྒོར་རོ། །དེ་ལ་འདིར་ནི་དེ་བཞིན་གཤེགས་པའི་རྡོ་རྗེའི་གཟུང་བའི་དེ་ཁོ་ན་ཉིད་ཡིན་ཏེ། དེ་ཉིད་ཀྱིས་ནི་བཅོམ་ལྡན་འདས། །བྱང་ཆུབ་སེམས་དཔའ་དེ་བཞིན་གཤེགས། །ལྟ་ངན་རྣམས་ལ་ཕན་པའི་ཕྱིར། །མྱ་ངན་འདས་འདི་སྟོན་པར་མཛད། །མ་ལུས་འདུལ་བ་ལ་བརྩོན་པ། །བརྟན་ཞིང་ངེས་པའི་གོ་ཆ་བགོས། །ཤིན་ཏུ་སྲིད་པ་གནས་ཀྱི་མཆོག །གོ་ཆ་ལ་སོགས་བགོས་པས་ན། །སངས་རྒྱས་ཆོས་དང་ཚོགས་ཞེས་པའི། །དཀོན་མཆོག་གསུམ་བོ་ཉིད་དུ་འགྱུར། །སྲིད་པ་ཤིན་ཏུ་ཡང་དག་འགྲུབ། །རྣམ་དག་དཔལ་དུ་བྱེད་པའི་མཆོག །ཅེས་བྱ་བའི་དེ་ཁོ་ན་ཉིད་འདིས་དེ་བཞིན་གཤེགས་པའི་རྡོ་རྗེ་གཟུང་བར་བྱའོ། །ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ནི་མཚན་ཉིད་མེད། །ནམ་མཁའ་དང་ནི་མཉམ་སྦྱོར་བའི། །ཀུན་མཆོག་མཉམ་པ་ཉིད་དུ་གསལ། །ཞེས་བྱ་བ་འདིས་ནི་ཆོས་ཀྱི་ དྲིལ་བུ ་དཀྲོལ་བར་བྱའོ། །ལོངས་སྤྱོད་ཐམས་ཅད་ཉེར་སྤྱོད་པ། །བདག་ཉིད་ཁོ་ན་རྟེན་བྱེད་ཅིང༌། །དཀོན་མཆོག་གསུམ་མཆོད་དམ་པ་ནི། །བགྱིའོ་ཞེས་དེ་བརྗོད་དེ་མཆོད། །ཅེས་བྱ་བའི་དམ་ཚིག་འདིས། །དེ་བཞིན་གཤེགས་པའི་སྐུའི་གསང་བས་བྱིན་གྱིས་བརླབ་པར་བྱའོ། །དེ་ནས་དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱང་སྦྱིན་པར་བྱའོ། །དེ་ལ་འདི་ནི་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པའི་རིགས་ཀྱི་རྡོ་རྗེ་བཟུང་བའི་དེ་ཁོ་ན་ཉིད་དེ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་
བསྙེམས་ཚུལ་བདག་པོའི་བདག །བཅོམ་ལྡན་འདས་དཔལ་མཆོག་དང་པོའི་སྐྱེས་བུའི་ཞེས་བྱ་བ་ནི། དེ་ཁོ་ན་ཉིད་འདིས་རྡོ་རྗེ་གཟུང་ངོ༌། །བཅོམ་ལྡན་འདས་དེ་བཞིན་གཤེགས་པ་སྲིད་པའི་བདག་པོ་དམ་པ་ཀུན་གྱི་མཆོག །དབང་ཕྱུག་ཉིད་ཀྱི་དམ་པ་དེ་ཉིད་ཀྱི་མཆོག་གི་བཀའ་ཡང་དག་པར་སྩོལ་བར་མཛད་པ་ནི། སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་དཔའ་མཆོག །སྲིད་པའི་མཆོག་ནི་བྱེད་པ་ཡིན། །མཆོག་ཏུ་གསང་བའི་ཆོས་ཉིད་འབེབས་པའི་དྲིལ་བུས་དེ་བཞིན་གཤེགས་པ་ཐམས་ཅད་མཆོད་པར་བྱས་ལ། ལྷ་རྣམས་ཡང་དག་པར་བསྒྲུབས་ཏེ་དཀྲོལ་ལ། །དེ་ནས་ཆོས་ཐམས་ཅད་ཀྱི་དེ་ཁོ་ན་ཉིད་རབ་ཏུ་རྟོགས་པ་འབེབས་པས་སྒྲིབ་པ་ཐམས་ཅད་རྣམ་པར་དག་པར་བྱེད་དོ། །རྡོ་རྗེ་ཐམས་ཅད་འབེབས་པ་རབ་ཏུ་བསྒྲུབས་པ་དབང་དུ་བྱས་པ་ཡང་རབ་ཏུ་སྒྲུབ་པར་བྱེད་པ་འགྲུབ་སྟེ། ཆོས་ཉིད་ དྲིལ་བུ ་དཀྲོལ་བར་བྱའོ། །སྲིད་པའི་བདེ་བ་ཤིན་ཏུ་ཆུང། །སྡུག་བསྔལ་ཆེན་པོ་དག་བྱའི་ཕྱིར། །ཤིན་ཏུ་བདེ་བ་དམ་པའི་ཐབས། །དམ་ཚིག་འདི་ནི་རྟག་ཏུ་བསྐྱེད། །འདོད་པའི་ལོངས་སྤྱོད་ཐམས་ཅད་ནི། །ཅི་འདོད་པར་ནི་བསྟེན་བཞིན་དུ། །རང་གི་ལྷ་ཡི་སྦྱོར་བ་ཡིས། །བདག་དང་གཞན་ལ་མཆོད་པར་བྱ། །དེ་བཞིན་གཤེགས་པ་ཐམས་ཅད་ཀྱི་བླ་ན་མེད་པའི་མཆོག་ཏུ་གསང་བའི་ཐེག་པ་ཆེན་པོའི་དམ་ཚིག་གི་སྦྱོར་བ་ནི་བཅོམ་ལྡན་འདས་ཀྱི་དམ་ཚིག་གོ །ཅིའི་ཕྱིར་ཞེ་ན། འདི་ལྟར། དེ་བཞིན་གཤེགས་པ་ཐམས་ཅད་ཀྱིས། །འདའ་བ་རུ་ནི་མི་མཛད་པས། །ཕྱག་རྒྱ་དམ་ཚིག་ཅེས་སུ་གྲགས། །ཡིད་ཀྱིས་གཟུགས་ནི་བརྟན་ཕྱིར་རོ། །དེ་ལ་འདི་སྐད་ཅེས་ཀྱང་བརྗོད་པར་བྱ་སྟེ། ཇི་སྲིད་འཁོར་བའི་གནས་སུ་ནི། །མཁས་མཆོག་འདུག་པར་འགྱུར་བའི་ཚེ། །དེ་སྲིད་མཚུངས་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །ཤེས་རབ་ཕ་རོལ་ཕྱིན་ཐབས་དང༌། །ཡེ་ཤེས་གནས་སུ་བསྒྲུབས་པས་ན། །ཆོས་ཀུན་རྣམ་པར་དག་པའི་ཕྱིར། །འཁོར་བ་ཡོངས་སུ་དག་པར་འགྱུར། །ཞེས་བྱ་བ་འདིའི་དམ་ཚིག་གིས་དེ་བཞིན་གཤེགས་པའི་རིགས་ཀྱི་སྐུའི་གསང་བ་བྱིན་གྱིས་བརླབ་པར་བྱའོ། །དེ་ལ་འདི་ནི་རིན་པོ་ཆེའི་རིགས་ཀྱི་འཁོར་ལོས་སྒྱུར་བ་དང༌། དེའི་རིགས་ཀྱི་རྡོ་རྗེ་རིན་ཆེན་
གཟུང་བའི་ང་ཁོ་ན་ཉིད་དོ། །ཉི་མ་འདི་ནི་དམ་པ་སྟེ། །ཀུན་གཟིགས་དེ་བཞིན་གཤེགས་པ་ཡིན། །ནམ་མཁའི་སྙིང་པོ་བཅོམ་ལྡན་འདས། །བསམ་པ་ཐམས་ཅད་རྫོགས་མཛད་པ། །ཞེས་བྱ་བ་དེ་ཁོ་ན་ཉིད་འདིས་རྡོ་རྗེ་རིན་ཆེན་གཟུང་བར་བྱའོ། །བསམ་པ་ཐམས་ཅད་གྲུབ་རྣམས་ཀྱིས། །བསམ་པ་འགྲུབ་པ་དམ་པ་ཡིན། །དེ་ཡང་འདོད་པ་རབ་བསྒྲུབ་ཕྱིར། །འདོད་དང་ཐར་པའི་བདེ་བ་ཆེ། །ཞེས་བྱ་བ་ཆོས་ཀྱི་རིན་པོ་ཆེ་ཆེན་པོའི་ དྲིལ་བུ ་དཀྲོལ་བར་བྱའོ། མི་ཕམ་པ་ཡང་སྦྱིན་བྱ་ཞིང༌། །འདོད་དང་བདེ་བ་ཐམས་ཅད་ཀྱི། །བདག་ཉིད་དང་ནི་གཞན་རྣམས་ཀྱི། །བསམ་པ་ཐམས་ཅད་རྫོགས་པར་བ། །ཞེས་བྱ་བ་ནི་དམ་ཚིག་གི་མཆོག་སྟེ། འདིར་རིན་པོ་ཆེའི་རིགས་ཀྱི་སྐུའི་གསང་བར་བྱིན་གྱིས་བརླབ་པར་བྱའོ། །དེ་ནས་དངོས་གྲུབ་ཀྱི་བརྟུལ་ཞུགས་སྦྱིན་པར་བྱའོ། །དེ་ལ་འདི་ནི་པདྨའི་རིགས་ཀྱི་འཁོར་ལོས་སྒྱུར་བ་དང༌།། དེའི་རིགས་ཀྱི་རྡོ་རྗེ་པདྨ་གཟུང་བ་དེ་ཁོ་ན་ཉིད་དོ། །དེ་ཉིད་ཀྱིས་ནི་བཅོམ་ལྡན་འདས། །སངས་རྒྱས་སྤྱན་རས་གཟིགས་དབང་ཕྱུག །གདུལ་བྱ་ཡི་ནི་ཐབས་མཛད་པ། །དག་པའི་རོལ་མོ་གར་མཛད་དོ། །ཞེས་བྱ་བ་འདིས་རྡོ་རྗེ་པདྨ་གཟུང་བར་བྱའོ། །ཇི་ལྟར་པདྨ་དམར་པོ་འདི། །ཚོན་གྱི་ཉེས་པས་མི་གོས་པས། །དེ་བཞིན་སྲིད་གསུམ་དག་པ་ནི། །གནས་ཀྱི་ཉེས་པས་མི་གོས་སོ། །ཞེས་བྱ་བའི་ཆོས་འདིས་པདྨའི་ དྲིལ་བུ ་དཀྲོལ་བར་བྱའོ། །བྱ་བ་གང་དང་གང་གིས་ནི། །འགྲོ་བ་རྣམས་ནི་འདུལ་འགྱུར་བར། །པདྨ་དག་མཆོག་སྦྱོར་བའི་བདག །དེས་ཀྱང་དེ་ནི་སྤྱད་བར་བྱ། །ཞེས་བྱ་བ་ནི་དམ་ཚིག་སྟེ། །འདིས་པདྨའི་རིགས་ཀྱི་སྐུའི་གསང་བ་བྱིན་གྱིས་བརླབ་པར་བྱའོ། །དེ་ནས་བརྟུལ་ཞུགས་སྦྱིན་པར་བྱ་སྟེ། །ཨོཾ་པདྨ་མ་ཧཱ་ཧ་སྟ་བཛྲ་དྷརྨ་ཧཾ་པ་ལཱ་ཡ། དེས་ཀྱང་འདི་སྐད་དུ་རྡོ་རྗེ་ཆོས་ཉིད་ཇི་ལྟ་བུ་ལགས་ཞེས་དྲི་བར་བྱའོ། །དེ་ནས་དེ་ལ་འདི་སྐད་ཅེས་བརྗོད་པར་བྱ་སྟེ། ཇི་ལྟར་པདྨ་དམར་པོ་འདི། །རིགས་ཀྱི་ཉེས་པས་མི་གོས་བཞིན། །ཐམས་ཅད་དག་པར་བསྒོམས་ན་ནི། །དེ་བཞིན་སྡིག་པ་ཆགས་མི་འགྱུར། །དེ་ལ་འདིའི་སྐབས་སུ་ཆོས་ཉིད་ནི་འདི་ཡིན་ནོ། །རྡོ་རྗེ་ལས་ཀྱི་དེ་ཁོ་ན་ཉིད་དང༌། ཆོས་དང་དམ་ཚིག་དང༌། དངོས་གྲུབ་ཀྱི་རྡོ་རྗེའི་
བརྟུལ་ཞུགས་ནི་དེ་བཞིན་གཤེགས་པའི་རིགས་སུ་བཤད་པ་ཡིན་ནོ། །དེ་ནས་སློབ་མས་མཚན་བརྒྱ་རྩ་བརྒྱད་པས་བསྟོད་ལ་མཆོད་པ་ཐམས་ཅད་ཀྱིས་ཡང་དག་པར་མཆོད་པར་བྱའོ། །དེ་ནས་རིན་ཆེན་དཔལ་གྱི་ཕྱག་རྒྱ་དང་གཟེངས་བསྟོད་པའི་ཕྱག་རྒྱས་སློབ་མ་ཐམས་ཅད་ལུང་བསྟན་པར་བྱའོ། །ཨོཾ་འདི་ནི་ངས་ཁྱོད་ལུང་བསྟན་བ། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པ་ཀུན་ཏུ་བསྒྲུབ་པའི་ཕྱིར། །སྲིད་པའི་ངན་འགྲོ་རྣམས་ལས་བཏོན། །ཀྱེ་རྡོ་རྗེའི་དེ་བཞིན་གཤེགས་པ་ཆེ་གེ་མོ་སིདྡྷི་ས་མ་ཡ་སྟྭཾ་བྷུརྦྷུ་ཝ་སྤཿ། དེ་ནས་དེ་བཞིན་གཤེགས་པའི་ཁུ་ཚུར་བཅིངས་ཏེ། གཡོན་པས་ཆོས་གོས་འཛིན་པའི་ཚུལ་དུ་བྱས་ལ། གཡས་པས་མཆོག་སྦྱིན་པའི་ཚུལ་དུ་བྱའོ། །འདི་ནི་གཟེངས་བསྟོད་པའི་ཕྱག་རྒྱའོ། །དབུགས་དབྱུང་བའི་ཆོ་ག་ནི་དཔལ་མཆོག་གམ་གཞན་ལས་ཤེས་པར་བྱའོ། །དེའི་ཕྱིར་ན། །སྡིག་པ་གཞོམ་ཕྱིར་དབང་ནི་བསྐུར་བར་བྱ། །ཞེས་སོ། །དེ་ཡན་ཆད་ཀྱིས་ནི་སློབ་མ་དཀྱིལ་འཁོར་ཐམས་ཅད་དུ་འཇུག་པའི་ཆོ་ག་རྒྱས་པའོ། །སྔགས་སྒྲུབ་ཕྱིར་ནི་མོས་ལྡན་སློབ་མ་ལ། །སྔགས་པས་བཀའ་ནི་རབ་ཏུ་བསྒོ་བར་བྱ། །ཞེས་པ་ནི་དབང་མཆོག་ཐོབ་པར་བྱ་བའི་ཡོན་མཆོག་ཅི་ཡོད་ཅེས་བསྒོ་བའོ། །དེས་ཀྱང་མོས་པས་སྤྱི་བོས་ཕྱག་འཚལ་ཏེ། །ཞེས་བྱ་བ་ནས། རང་གི་ལུས་ཀྱང་དབུལ་བ་ཉིད་དུ་བྱ། །ཞེས་པ་ཡན་ཆད་ནི་ཡོན་དབུལ་བའི་རིམ་པ་བསྟན་ཏེ་དཀྱུས་གསལ། །ཚེ་འདིའི་བདེ་བ་མ་ལུས་དང༌། ཞེས་བྱ་བ་ནས། ལྷ་ཡི་བདེ་བ་སྨོས་ཅི་དགོས། །ཞེས་པའི་བར་གྱིས་ནི་ཕན་ཡོན་བསྟན། སངས་རྒྱས་ཀུན་དང་བླ་མར་མཉམ། །ཞེས་པ་ལ་སོགས་པས་ནི་སློབ་དཔོན་ལ་ཇི་ལྟ་བུར་བལྟ་བའི་ཐབས་བསྟན་ཏེ། སངས་རྒྱས་ནི་དུས་གསུམ་གྱི་དེ་བཞིན་གཤེགས་པའོ། །དེ་དང་སློབ་དཔོན་ཐ་མི་དད་པའི་ངོ་བོར་བལྟ་བས་ན་བླ་མར་མཉམ་མོ། །རྡོ་རྗེ་སློབ་དཔོན་བརྙས་ན་ནི་ཇི་ལྟ་བུ་ཐོབ་སྙམ་པ་ལ། རྟག་ཏུ་ངན་སོང་གསུམ་གྱི་སྡུག་བསྔལ་འཐོབ་པར་འགྱུར་བས། དེའི་ཕྱིར་ན་སློབ་དཔོན་ལ་བརྙས་པར་མི་བྱའོ། །དེར་མ་བས་ཏེ་རྡོ་རྗེ་སྤུན་ཏེ་དབང་དུས་གཅིག་ཏུ་མནོས་པ་དང༌། སྲིང་མོ་སྟེ་གྲོགས་དང༌། རྡོ་རྗེ་མ་སྟེ་སློབ་དཔོན་མ་ལ་སོགས་པ་རྣམས་ལ་བརྙས་པ་དང་འཁོན་ཞུགས་པར་
མི་བྱའོ། །འོ་ན་ཐམས་ཅད་ལ་མཉམ་ཞིང་སྙོམས་པར་བྱའམ་ཞེ་ན། དེ་མི་བྱ་སྟེ། དཀོན་མཆོག་གསུམ་ལ་གནོད་བྱེད་ལ། །ཞེས་པ་ལ་སོགས་པ་དེ་དག་ལ་བཟོད་པ་བསྒོམ་པར་མི་བྱའོ། །དེ་ལ་ཉེས་པ་བྱས་ཀྱང་བླ་ན་མེད་པའི་བྱང་ཆུབ་འགྲུབ་པར་འགྱུར་ཞེས་ནི་ཀུན་རིག་རྣམ་པར་སྣང་མཛད་གསུངས་སོ། །དེ་དག་ཀྱང་ཞེ་སྡང་གི་སེམས་ཀྱིས་གསད་དམ་སྙམ་པ་ལ། དེ་ལྟ་མ་ཡིན་ཏེ། སེམས་ཅན་ཀུན་ལ་སྙིང་བརྩེ་ཆགས། །གྲུབ་པ་མྱུར་དུ་འགྲུབ་པར་འགྱུར། །ཞེས་སོ། །དེ་ཡན་ཆད་ཀྱིས་དཀྱིལ་འཁོར་གྱི་རིམ་པ་བསྟན་ནས། ད་ནི་བསྒྲུབ་པའི་རིམ་པ་བསྟན་ཏེ། རས་ལ་ཞེས་བྱ་བ་ལ་སོགས་པ་སྨོས་ཏེ། རས་ནི་གསོ་རས་སམ། ཤིང་བལ་གྱི་རས་སྡིག་པས་མ་གོས་པ་ལ་ཁྲུ་བརྒྱད་པའི་ཚད་ཙམ་ལ་སྡོམ་པ་ལ་རབ་ཏུ་གནས་པ་རྣམས་ཀྱིས་བསྒྲུབ་པའི་དཀྱིལ་འཁོར་བྲི་བར་བྱ་སྟེ། དེ་ཡང་འདིར་སྐུ་གསུམ་གྱི་རྒྱུད་ཅེས་གསུངས་པས་ལས་རྣམ་པ་གསུམ་བྱེད་དེ། དེ་ཡང་གང་ཞེ་ན། སྐུའི་དངོས་གྲུབ་བསྒྲུབ་པ་དང༌། །གསུང་གི་དངོས་གྲུབ་བསྒྲུབ་པ་དང༌། །ཐུགས་ཀྱི་དངོས་གྲུབ་བསྒྲུབ་པའོ། །དེ་ཡང་ཇི་ལྟར་བསྒྲུབ་པར་བྱ་སྙམ་པ་ལ། དེ་ཡང་རི་མོའི་སྒོ་ནས་བསྒྲུབ་པར་བྱ་སྟེ། དེ་ཡང་དེ་བཞིན་གཤེགས་པ་དང༌། །དེ་ཡི་རིགས་ཀྱི་སེམས་དཔའ་དང༌། རིགས་ཀྱི་ཁྲོ་བོ་དང༌། རིགས་ཀྱི་ཡུམ་རྣམས་བྲི་བར་བྱའོ། །རས་ཀྱི་སྟོད་ཀྱི་དབུས་སུ་བཅོམ་ལྡན་འདས་ཐམས་ཅད་རིག་པ་སྐུ་མདོག་དཀར་པོ་ལོངས་སྤྱོད་རྫོགས་པའི་ཆ་བྱད་དུ་བཞུགས་པ་ཕྱག་གཉིས་བསམ་གཏན་གྱི་ཕྱག་རྒྱ་ཅན་སེང་གེའི་གདན་ལ་བཞུགས་པ་བྲིའོ། །གཡས་ཕྱོགས་སུ་ཐུགས་ཀྱི་བདག་པོ་ངན་སོང་ཐམས་ཅད་ཡོངས་སུ་སྦྱོང་བའི་རྒྱལ་པོ་སྐུ་མདོག་དཀར་པོ་གླང་པོ་ཆེའི་གདན་ལ་བཞུགས་པ། བསམ་གཏན་གྱི་ཕྱག་རྒྱའི་སྟེང་ན་རྡོ་རྗེ་བསྣམས་པ་བྲི་བར་བྱའོ། །གཡོན་ཕྱོགས་སུ་ནི་ཤཱཀྱ་ཐུབ་པ་གསུང་གི་རིགས་ཏེ། སྐུ་མདོག་དམར་སེར་བསམ་གཏན་གྱི་ཕྱག་རྒྱའི་སྟེང་ན་པདྨ་འདབ་མ་བརྒྱད་པ་ཁ་མ་བྱེ་བའི་ནང་ནག་རྡོ་རྗེ་གནས་པ་བྲི་བར་བྱའོ། །ཤཱཀྱ་ཐུབ་པའི་འོག་ཏུ་ནི་ཀུན་དུ་སྤྱན་རས་གཟིགས་དབང་ཕྱུག་སྐུ་མདོག་ཟླ་
བ་ལྟ་བུ་ཕྱག་ན་པདྨ་བསྣམས་པ་བྲི་བར་བྱའོ། །ངན་སོང་སྦྱོང་བའི་འོག་ཏུ་ནི་ཕྱག་ན་རྡོ་རྗེ་སྐུ་མདོག་ལྗང་གུ་རྡོ་རྗེ་ དྲིལ་བུ ་བསྣམས་པ་བྲི་བར་བྱའོ། །དེ་གཉིས་ཀྱི་དབུས་སུ་ནི་སྨན་གྱི་བླ་སྐུ་མདོག་སྔོན་པོ་ཕྱག་གཅིག་ན་འབྲས་བུ་ཨ་རུ་ར་བསྣམས་པ་ཕྱག་གཅིག་མཆོག་སྦྱིན་པའི་ཚུལ་དུ་བཞུགས་པ་བྲི་བར་བྱའོ་ཞེས་རིགས་བསྣུར་བ་ནི་རྡོ་རྗེ་གཙུག་ཏོར་གྱི་རྒྱུད་ལས་གསུངས་སོ། །རྟ་མགྲིན་དང་འཇིག་རྟེན་གསུམ་ལས་རྣམ་པར་རྒྱལ་བ་གཉིས་ནི་རང་གི་ལྷ་ལ་བརྟེན་པར་བྲིའོ། །དེ་གཉིས་ཀྱི་བར་དུ་ནི་ཡུམ་བཞི་བྲི་སྟེ་ལོ་ཙ་ན་དང༌། ན་བཟའ་དཀར་མོ་དང༌། མཱ་མ་ཀཱི་དང༌། སྒྲོལ་མ་རྣམས་ནི་རང་རང་གི་མཚན་མ་ཕྱག་ན་བསྣམས་པ་བྲི་བར་བྱའོ། །གཞན་རྣམས་ནི་དཀྱུས་ན་གསལ་ལོ། །དེ་ནས་རི་མོ་སྐུ་གཟུགས་མངོན་པར་མཆོད་དེ་སྤྱན་དབྱེ་བར་བྱའོ་ཞེས་པ་ལ་སོགས་པ་སྤྱན་དབྱེ་བ་ནི་དང་པོར་སྔགས་པ་ཡོན་ཏན་བཅུ་དང་ལྡན་པས་རབ་ཏུ་གནས་པར་བྱས་ཏེ་བྱིན་གྱི་རླབས་དང་ལྡན་པར་བྱས་ནས་གཟོད་གནས་དབེན་པར་བསྒྲུབ་པ་བརྩམ་པར་བྱའོ། །དེ་ནས་རྟགས་དང་མཚན་མ་བྱུང་ནས་གདོད་དངོས་གྲུབ་བླང་བར་བྱའོ། །དེའི་དོན་ཡང་འདི་ལྟར་ཤེས་པར་བྱ་སྟེ། དང་པོར་སློབ་དཔོན་ཡོན་ཏན་བཅུ་དང་ལྡན་པ་ནི་འདི་ཡིན་ཏེ། རིགས་བཙུན་པ། སེམས་བརྟན་པ། སྤྱོད་པ་དུལ་བ། ཤེས་རབ་ཆེ་བ། བཟོད་པ་དང་ལྡན་པ། དྲང་བ། གཡོ་སྒྱུ་མེད་པ། སྔགས་དང་རྒྱུད་ཀྱི་སྦྱོར་བ་ཤེས་པ། དཀྱིལ་འཁོར་བྲི་བའི་ལས་ལ་མཁས་པ་དེ་ཁོ་ན་ཉིད་བཅུ་ལ་མཁས་པ། དེ་ལྟ་བུ་ནི་སློབ་དཔོན་དུ་གཟུང་ངོ༌། །དེ་ལྟ་བུ་དང་ལྡན་པའི་རྣལ་འབྱོར་པ་དེས་ནི་རབ་ཏུ་གནས་པར་བྱའོ་ཞེས་ལུང་ལས་ཀྱང་གསུངས་ཏེ། ཇི་སྐད་དུ། བརྟན་ཞིང་དུལ་ལ་བློ་གྲོས་ལྡན། །བཟོད་ལྡན་དྲང་ལ་གཡོ་སྒྱུ་མེད། །སྔགས་དང་རྒྱུད་ཀྱི་སྦྱོར་བ་ཤེས། །དཀྱིལ་འཁོར་བྲི་བའི་ལས་ལ་མཁས། །དེ་ཉིད་བཅུ་ནི་ཡོངས་ཤེས་པ། །འདི་ནི་སློབ་དཔོན་ཡིན་ཞེས་བྱ། །དེ་ཡིས་བསྟན་པའི་གསང་སྔགས་རྣམས། །འགྲུབ་འགྱུར་འདི་ལ་ཐེ་ཚོམ་མེད། །ཅེས་གསུངས་སོ། །དེ་ཁོ་ན་ཉིད་བཅུ་ནི་ཚོགས་མཐོ་བའི་ནང་ནས་ཀྱང༌། །དཀྱིལ་འཁོར་དང་ནི་ཏིང་ངེ་འཛིན་མཆོག །ཕྱག་རྒྱ་སྟང་སྟབས་བདུན་དང་ནི། །བཟླས་བརྗོད་མཆོད་པ་སྦྱིན་སྲེག་དང༌། ལས་ཀྱི་སྦྱོར་བ་ཉེར་བསྡུ་བ། །
དེ་ལྟར་དེ་ཉིད་བཅུ་ཤེས་ཤིང༌། །དམན་པའི་སེམས་ནི་སྨོད་བྱེད་པའོ། །ཞེས་གསུངས་སོ། །དེ་ནས་ཡིད་དང་མཐུན་པའི་གནས་ཡིད་དུ་འོང་བར་ཚེས་གྲངས་དང་རྒྱུ་སྐར་བཟང་པོ་དང༌། གཟའ་བཟང་པོ་རྒྱུ་བའི་དུས་ཚོད་བཟང་པོ་ལ་སྤྱན་དབྱེ་བའི་མགོ་གཟུགས་པར་བྱའོ། །གང་ནས་རབ་ཏུ་གནས་པའི་ཡོ་བྱད་ཐམས་ཅད་དང་ལྡན་པར་བྱ་སྟེ། རབ་ཏུ་གནས་པའི་ཁྲུས་ཀྱི་སྟེགས་བུ་དང༌། རབ་ཏུ་གནས་པ་དང་འཚམ་པའི་དཀྱིལ་འཁོར་ལ་སོགས་པ་ཡང་ལེགས་པར་རབ་ཏུ་བརྟག་པར་བྱའོ། །དེ་ནས་བའི་རྣམ་པ་ལྔ་དང༌། སྔོས་ཆབ་ལ་རྡོ་རྗེ་གནོད་སྦྱིན་ཡོངས་སུ་བཟླས་པས་གནས་ཉེ་བར་བྱུག་པར་བྱའོ། །དེ་ནས་དྲི་དང་སྦྱར་བའི་ཆུས་ཀྱང་ཉེ་བར་བྱུགས་ལ། བསོད་ནམས་དང་དཔལ་འཕེལ་བར་བྱེད་པའི་གདུགས་དང་རྒྱལ་མཚན་དང༌། བླ་རྗེ་དང་བ་དན་ལ་སོགས་པས་བརྒྱན་པར་བྱའོ། །དེ་རྣམས་ལ་ཡང་རྡོ་རྗེ་གནོད་སྦྱིན་གྱི་སྔགས་བཛྲ་ཡཀྵ་ཧཱུཾ་ཞེས་པ་བཟླས་སོ། །དེ་ནས་ནང་པར་གྱི་དུས་སུ་ལེགས་པར་ཁྲུས་བྱས་ལ་གོས་གཙང་མ་བགོས་ཏེ། གཙུག་ཏོང་དང་ཅོད་པན་བཅིངས་ནས་རྒྱན་ཐམས་ཅད་ཀྱིས་བརྒྱན་པར་བྱས་པ་འམ། ཡང་ན་ཆ་ལུགས་རིགས་དང་མཐུན་པ་ཇི་བཞིན་པས་བྱའོ། །རང་གི་རིགས་ཀྱི་འཁོར་ལོས་སྒྱུར་བའི་སྦྱོར་བའམ་རྣལ་འབྱོར་ཆེན་པོ་བྱའོ། །དེ་ཡང༌། །ཆོ་ག་ཉམས་པས་མི་བྱ་སྟེ། །རས་གནས་རྟག་ཏུ་སྨད་པ་དང༌། །ཚེ་འདིར་སྡུག་བསྔལ་ཆེན་པོ་དང༌། །འཇིག་རྟེན་གཞན་དུ་འཇིག་རྟེན་འབྱུང༌། །དེ་བས་དངོས་གྲུབ་འདོད་པ་ཡིས། །བདག་ཉིད་ཀྱིས་ནི་ཅི་ནུས་དང༌། །དེ་བཞིན་ཆོ་གར་གསུངས་ཚུལ་དུ། །ཀུན་ནས་རབ་ཏུ་འབད་དེ་བྱ། །ཞེས་སོ། །དེ་ལ་དང་པོར་རྡོ་རྗེ་གནོད་སྦྱིན་གྱིས་བགེགས་གཞོམ་པ་ལ་སོགས་པ་བྱས་ལ། དེ་ལ་སྔོན་དུ་འགྲོ་བ་དང་སྦྱོར་བ་དང་པོ་དང༌། དཀྱིལ་འཁོར་རྒྱལ་མཆོག་དང༌། ལས་རྒྱལ་མཆོག་གི་ཏིང་ངེ་འཛིན་བྱས་ལ། དེ་ནས་བུམ་པ་སྟ་གོན་ལ་གནས་པ་བྱ་སྟེ། དུམ་པའི་སྟེགས་བུ་གྲུ་བཞི་པ་འམ་སྒོ་བཞི་པ་དཀྱིལ་འཁོར་པདྨ་འདབ་མ་བརྒྱད་པ་འམ། བཅུ་དྲུག་པ་ལ་བུམ་པ་ཇི་ཙམ་འབྱོར་པ་གཞག་པར་བྱའོ། །དེར་ཕྱོགས་དང་མཚམས་སུ་བུམ་པ་བརྒྱད་ལ་རང་གི་མཚན་མ་བྲིས་པ་དང༌། རྡོ་རྗེ་ལྕགས་ཀྱུ་ལ་སོགས་པ་སྒོ་བའི་མཚན་མ་དང༌། རྡོ་རྗེ་མེ་ཏོག་ལ་སོགས་པ་
བྲིས་པའི་བུམ་པ་གང་བ་འབྱོར་ཚད་ཀྱང་ཕྱོགས་དང་མཚམས་རྣམས་སུ་གཞག་པར་བྱའོ། །དབུས་སུ་ཡང་རྣམ་པར་རྒྱལ་བའི་བུམ་པ་རིགས་ལྔའི་མཚན་མས་མཚན་པ་གཞག་པར་བྱའོ། །དེ་དག་གི་ནང་དུ་འབྲུ་ལྔ་དང༌། སྨན་ལྔ་དང་རིན་པོ་ཆེ་ལྔ་ལ་སོགས་པ་བཅུག་ལ་དྲིས་སྦྱར་བའི་ཆུ་བླུགས་ནས། རས་ཟུང་གིས་མགུལ་པ་བཅིངས་ལ་འདབ་མ་དྲི་ཞིམ་པོས་ཁ་བརྒྱན་པར་བྱ་བ་དང༌། སྟེང་དུ་བླ་རེ་བྲེ་བ་དང༌། གདུགས་དང་རྒྱལ་མཚན་གྱིས་ཉེ་འཁོར་བརྒྱན་པར་བྱའོ། །དེ་ནས་བུམ་པ་བྱིན་གྱིས་བརླབ་པར་བྱ་སྟེ། ཁཾ་ལས་བུམ་པ་ནག་པོ་ར་རི་མེད་པ་མཆུ་འཕྱང་བ་མགྲིན་པ་རིང་པ་གསུས་པ་ཆེ་བ་མི་གང་པར་བྱིན་གྱིས་བརླབས་ཏེ། ཨོཾ་སརྦ་བཏི་བཛྲ་ཡཀྵ་ཧཱུཾ་ཞེས་བྱ་བ་ཕྱག་རྒྱ་དང་བཅས་པས་གཞལ་ཡས་ཁང་གདན་དང་བཅས་པའི་སྟེང་དུ་རྣམ་པར་སྣང་མཛད་ལ་སོགས་པའི་ལྷ་རྣམས་བསྐྱེད་ལ། ཡེ་ཤེས་སེམས་དཔའ་རྡོ་རྗེ་ལྕགས་ཀྱུ་ལ་སོགས་པའི་སྔགས་དང་ཕྱག་རྒྱས་དགུག་པ་ལ་སོགས་པ་བྱ་སྟེ། ཕྱག་རྒྱ་བཞིས་རྒྱས་བཏབ་ནས་རང་རང་གི་སྙིང་པོ་དང་སྔགས་བརྗོད་ཅིང་མཆོད་ཡོན་ལ་སོགས་པས་མཆོད་ལ་བསྟོད་དེ། ཐུན་གསུམ་གྱི་རིམ་པས་བཟླས་བརྗོད་བྱའོ། །དེ་ནས་དཀྱིལ་འཁོར་གྱི་བགེགས་བསྲུང་བ་དང་སྟ་གོན་ཡང་བྱའོ། །དེ་ནས་རབ་ཏུ་གནས་པར་བྱ་བའི་སྐུའི་སྟ་གོན་བྱ་སྟེ་སྐུ་དེ་ཉིད་གང་དང་གང་ཡིན་བསྐུའི་རྣམ་པར་བསྐྱེད་དེ། མཆོད་པ་ལྔས་མཆོད་ལ། དེ་ནས་སྦྱང་བར་བྱ་སྟེ་ཏིལ་དང་ཡུངས་ཀར་གྱིས་བསྐོར་ཞིང་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ་ཞེས་བྱ་བ་དང༌། རུ་རུ་སྥུ་རུའི་སྔགས་ཀྱིས་མེ་ལ་སྦྱིན་སྲེག་བྱ་ཞིང་སྦྱང་ངོ༌། །དེ་ནས་བཀྲ་ཤིས་ཀྱི་ཚིགས་སུ་བཅད་པ་ཡང་བརྗོད་པར་བྱའོ།། དེ་ནས་བསྟོད་པས་ཀྱང་བསྟོད་དེ། མཆོད་པར་བྱའོ། །དེ་ནས་སྙིང་པོ་དང་སྔགས་ཀྱང་གདོན་ནོ། །ལས་ཐམས་ཅད་པའི་བུམ་པས་ཁྲུས་བྱས་པ་ལས་ཐམས་ཅད་པའི་སྔགས་བཟླས་པའི་སྟན་ཡང་གདིང་བར་བྱའོ། །དེ་ནས་དེར་བཞུགས་སུ་གསོལ་ཏོ། །དེ་ནས་བྲིས་སྐུ་ལ་སོགས་པ་དེ་མི་དམིགས་པར་བྱས་ཏེ། ཏིང་ངེ་འཛིན་གྱིས་སྐུ་དེ་གང་དང་གང་ཡིན་པ་དེར་བསྐྱེད་ལ་རྡོ་རྗེ་བསྡུ་བའི་ཕྱག་རྒྱས་སྤྱན་དྲངས་ནས་མཚན་བརྒྱ་རྩ་བརྒྱད་པས་བསྟོད་པ་བྱས་ལ་མཆོད་པ་བྱས་ཏེ། ཡང་ཕྱག་རྒྱ་བཞིས་རྒྱས་བཏབ་ལ་སྔགས་རྣམས་མངོན་པར་བཟླས་ཏེ། དེ་ནས་ཡང་རིགས་
ཐམས་ཅད་ཀྱི་བདག་པོའི་སྔགས་ཨོཾ་བཛྲ་སཏྭ་ཧཱུཾ་ཞེས་པའོ། །ཨོཾ་བྷ་ག་བ་ཏི་རུ་རུ་སྥུ་རུ་ཛྭ་ལ་ཏིཥྛ་སིདྡྷི་ལོ་ཙ་ནེ་སརྦ་ཨརྠ་སཱ་དྷ་ནི་སྭཱ་ཧཱ་ཞེས་བྱ་བ་ནི་རིགས་ཀྱི་ཡུམ་རྣམས་ཀྱི་རིག་པའོ། །ཨོཾ་ཛི་ན་ཛི་ཀ་ཅེས་བྱ་བ་ནི་རིགས་ཀྱི་སྙིང་པོའོ། །དེ་བཞིན་དུ་ཨོཾ་ཤཾ་ཀ་རེ་ཤཱནྟིཾ་ཀ་རེ། གྷུཊྚ་གྷུཊྚ་གྷུཊྚི་ནི། གྷ་ཊ་ཡ། གྷ་ཊ་ཡ། གྷུཊྚི་ནི་སྭཱ་ཧཱ། ཨོཾ་བཛྲ་དྷྲྀ་ཀ་སྭཱ་ཧཱ། ཨོཾ་བི་ཀ་ཊེ། ནི་ཀ་ཊེ། ཀ་ཊཾ་ཀ་ཊེ། ཀ་རོ་ཊ་བཱིཪྻ་སྭཱ་ཧཱ། ཨོཾ་ཨཱ་རོ་ལྀ་ཀ་སྭཱ་ཧཱ། ཨོཾ་རཏྣ་དྷྲྀཀ་སྭཱ་ཧཱ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཨོཾ་པྲཛྙཱ་དྷྲྀཀ་སྭཱ་ཧཱ། ཞེས་བྱ་བ་ནི་རིགས་སོ་སོའི་སྙིང་པོ་དང་རིག་པའོ། །ཡང་རྒྱུད་འདི་ཉིད་ཀྱི་སྔགས་དང་རིག་པ་བརྗོད་དོ། །དེ་ནས་ཅོད་པ་ན་དང་དར་དཔྱངས་བཅིངས་པ་དང་གོ་ཆ་བསྐོན་པ་ལ་སོགས་པ་བྱས་ལ། མེ་ཏོག་ལ་སོགས་པ་མཆོད་པ་བརྒྱད་ཀྱིས་ཡང་དག་པར་མཆོད་ལ་ཕྱག་བྱས་ཏེ། ཕྱི་དེ་ཉིན་པར་རབ་ཏུ་གནས་པར་བྱའོ། །དེ་ནས་རྩ་བའི་དཀྱིལ་འཁོར་ཆེན་པོ་ལ་མཆོད་པས་མཆོད་དེ། བསྟོད་པས་བསྟོད་ནས་ཕྱག་བྱ་སྟེ། རྣམ་པར་སྣང་མཛད་བཅོམ་ལྡན་འདས། །རིག་སྔགས་རྒྱལ་ལ་ཕྱག་འཚལ་ལོ། །བདག་ནི་བརྩེ་བར་གྱུར་ནས་སུ། །སློབ་མ་རྣམས་ལ་བརྩེ་བ་དང༌། །ཁྱེད་རྣམས་ལ་ཡང་མཆོད་པའི་ཕྱིར། །ཐུགས་རྗེའི་བདག་ཉིད་ཁྱེད་རྣམས་ཀྱིས། །སྐུ་འདི་རབ་ཏུ་གནས་པར་ནི། །མགོན་པོ་བདག་ནི་བགྱིད་པར་འཚལ། །བཅོམ་ལྡན་བདག་ནི་གུས་པ་ལ། །དེ་བས་གནང་བར་མཛད་པའི་རིགས། །བདག་མིང་འདི་ཞེས་བྱ་བ་ཡིས། །རིག་པའི་རྒྱལ་པོ་འདི་ཞེས་པ། །ཡོ་བྱད་འབྱོར་བ་འདི་ཡིས་ནི། །ནང་པར་རབ་གནས་བགྱིད་པར་འཚལ། །བདག་དང་སློབ་མར་བཅས་པ་ལ། །ཐུགས་ནི་བརྩེ་བར་དགོངས་ནས་སུ། །ཚོགས་པ་ཐམས་ཅད་རབ་གནས་ལ། །བྱིན་གྱིས་བརླབ་པར་མཛད་དུ་གསོལ། །ཞེས་བྱ་བ་ལན་གསུམ་དུ་བརྗོད་དོ། །དེ་ནས་ཕྱི་རོལ་དུ་གཏོར་མ་བྱིན་ནས་སྦྱིན་སྲེག་བྱ་སྟེ། །དང་པོར་བགེགས་ཞི་བར་བྱ་བའི་ཕྱིར་རྡོ་རྗེ་མེས་སྦྱིན་སྲེག་བྱའོ། །ཚིམ་པར་བྱ་བའི་ཕྱིར་ནི་རང་གི་སྔགས་ཀྱིས་སོ། །དགོངས་པར་བྱ་བའི་ཕྱིར་ནི་རིགས་ཀྱི་རིག་པས་སོ། །འབྱོར་པར་བྱ་བའི་ཕྱིར་ནི་རིགས་ཀྱི་བདག་པོའི་སྙིང་པོས་བྱའོ། །དེ་ནས་མཆོད་པ་སྣ་ཚོགས་ཀྱིས་མཆོད་ལ་མངོན་པར་འདོད་པའི་དངོས་
གྲུབ་ཀྱི་ཕྱིར་གསོལ་བ་གདབ་སྟེ། རང་གི་དགེ་བའི་རྩ་བ་བསྔོས་ལ། ཡེ་ཤེས་ཀྱི་ལྷ་ནི་གཤེགས་སུ་གསོལ་བར་བྱ་བའི་ཕྱིར་འདིས་བསྐུལ་བར་བྱའོ། །ཨོཾ་ཁྱོད་ཀྱིས་སེམས་ཅན་དོན་ཀུན་མཛད། །དངོས་གྲུབ་ཚུལ་བཞིན་སྩལ་ལགས་ཀྱི། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། །དེ་ནས་དམ་ཚིག་གི་ལྷ་རྣམས་མདུན་གྱི་ན་མཁའ་ལ་གཞལ་ཡས་ཁང་ཁ་སྦྱོར་བྱས་ཏེ་སྒྲ་ཡིག་དབྱངས་ཡིག་གིས་སྲུབས་དཀྲིས་ཏེ། ཡི་གེ་འབྲུ་ལྔས་ཕྱོགས་མཚམས་བསྲུངས་ཏེ་བཞུགས་སུ་གསོལ་ལོ། །དེ་ནས་བདག་ཉིད་བསྲུང་བའི་ཕྱིར་ཡི་གེ་བརྒྱ་པ་བཟླས་སོ། །དེ་ནས་དེ་ཉིད་དུ་ཀུ་ཤ་བཏིང་བའི་སྟེང་དུ་ཉལ་བར་བྱའོ། །དེ་ནས་ནང་པར་མལ་ནས་ལངས་ནས་བའི་རྣམ་པ་ལྔ་དང༌། སྤོས་ཆུས་ལྷའི་ཁང་པ་བྱུགས་ལ། །དེ་ནས་འཇུག་པའི་དཀྱིལ་འཁོར་ནི་སྐུ་གསུང་ཐུགས་ཀྱི་དཀྱིལ་འཁོར་གང་ལྕོགས་པ་ཅིག་བྲི་བར་བྱ་སྟེ། རྣམ་པར་སྣང་མཛད་སྐུའི་དཀྱིལ་འཁོར་རམ། ཤཱཀྱ་ཐུབ་པ་གསུང་གི་དཀྱིལ་འཁོར་རམ། རྡོ་རྗེ་སེམས་དཔའ་ཐུགས་ཀྱི་དཀྱིལ་འཁོར་གང་གྲུབ་པ་གཞུང་ལས་འབྱུང་བ་བཞིན་བྲི་བར་བྱའོ། །དེ་ནས་དགོངས་ཀའི་དུས་སུ་འཇུག་པའི་རིམ་པས་ཞུགས་ཏེ། སྦྱོར་བ་གསུམ་བསྒོམས་ཏེ་བགེགས་ལ་སོགས་པ་བསྐྲད་པར་བྱའོ། །དེ་ནས་བདག་ཉིད་ཀྱིས་གཞལ་ཡས་ཁང་པ་བསྐྱེད་པ་དང༌། དཀྱིལ་འཁོར་རྒྱལ་པོ་མཆོག་དང༌། ལས་རྒྱལ་པོ་མཆོག་བྱས་ཏེ། བཟླས་པ་ཡན་ཆད་རྫོགས་པ་དང༌། གདོད་རབ་ཏུ་གནས་པ་ལ་འཇུག་པར་བྱ་སྟེ། དང་པོ་བདག་ཉིད་འཇུག་པའི་རིམ་པས་ཞུགས་ལ། དེ་ནས་འཇུག་པའི་རིམ་པས་བཅུག་སྟེ། ཟངས་མའི་སྣོད་ལ་སོགས་པ་སྤྱན་འབྱེད་ཀྱི་རྫས་རྣམས་བཤམས་ཏེ་ཆུ་རྣམ་པ་བདུན་དང༌། དུང་གི་སོ་མངས་དང༌། གསེར་གྱི་མིག་ཐུར་དང༌། སྤབས་བཞར་དང༌། ཆན་གྲི་དང༌། ཟངས་ཐུར་དང༌། རྨང་ཚེར་ལ་སོགས་པ་ཡོ་བྱད་ཚོགས་པར་བཤམས་པ་དང༌། མཆོད་པའི་ཡོ་བྱད་འབྱོར་ཚད་དང༌། རས་དཀར་ཁ་ཚར་མ་ཉམས་པ་དང༌། མེ་ལོང་ལ་སོགས་པ་འབྱོར་ཚད་དང༌། རིན་པོ་ཆེ་སྣ་བདུན་དང༌། རྫས་བརྒྱད་ལ་སོགས་པ་རྣལ་འབྱོར་གྱི་རྒྱུད་ལས་གསུངས་པ་རྣམས་བསོགས་ལ། དེ་རྣམས་ལ་སྔགས་ཀྱིས་བསང་ངོ༌། །དེ་ནས་སྐུའི་རྣམ་པ་གང་དང་གང་ཡིན་པ་བདག་ཉིད་ཀྱིས་གསལ་བར་བརྟགས་
ལ། དེ་ནས་ཡེ་ཤེས་ཀྱི་ལྷ་རྣམས་དགུག་པ་དང༌། གཞུག་པ་དང༌། བཅིངས་པ་དང༌། དབང་དུ་བྱས་པས་བསྒྲུབ་པར་བྱའོ། །མཛུབ་མོ་ལྕགས་ཀྱུ་བཅིངས་པ་ནི། །མཐེའུ་ཆུང་ལས་ཏེ་ལྕགས་ཀྱུ་ཆེ། །མཁྲིག་མ་མདུད་པས་མཛུབ་གཉིས་གདུབ། །རྒྱབ་གཉིས་ཀྱང་ནི་བསྙམས་ཏེ་མནན། །ཛཿ་ཧཱུཾ་བཾ་ཧོཿ་ཞེས་བརྗོད་དོ། །དེ་ལྟར་སྤྱན་དྲངས་ནས་མཆོད་ཡོན་དང༌། ཞབས་བསིལ་ཕུལ་ཏེ། སྔར་བཤད་པའི་སྔགས་ཀྱིས་སྦྱང་བ་བྱས་ཏེ། དེའི་འོག་ཏུ་དཱུར་བའི་ཆུན་པོ་དང༌། ཏིལ་མར་གྱིས་སྦྱང་བ་བྱ་སྟེ་དེའི་སྔགས་ནི་ཨོཾ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ནེ་སྭཱ་ཧཱ། དེ་ནས་ལས་ཐམས་ཅད་པའི་བུམ་པས་ཁྲུས་གསོལ་ལོ། །དེ་ནས་ཆུ་བདུན་གྱིས་སྐུ་ཁྲུས་གསོལ་ལོ། །དེ་ནས་རས་ཀྱིས་སྐུ་ཕྱིའོ། །དེ་ནས་སྤྱན་དབྱེ་བ་ལ་སོགས་པ་བྱ་སྟེ། ཆོ་ག་ཞིབ་མོ་ལས་ཤེས་པར་བྱའོ། །དེ་ནས་དབང་བསྐུར་བའི་ཆོ་གས་ཁྲུས་ཀྱང་གསོལ་བར་བྱ་སྟེ། ཇི་ལྟར་བལྟམས་པ་ཙམ་གྱིས་ཀྱང༌། །ལྷ་རྣམས་ཀྱིས་ནི་ཁྲུས་གསོལ་བ། །དེ་བཞིན་བདག་གིས་ལྷ་ཡི་ཆུས། །དག་པར་བདག་གིས་ཁྲུས་གསོལ་ལོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ་སྭཱ་ཧཱ། དེ་ནས་ན་བཟའ་དབུལ་བར་བྱ་སྟེ། ཨོཾ་བཛྲ་བ་ས་སེ་སྭཱ་ཧཱ། ཨོཾ་བཛྲ་གནྡྷེ་སྭཱ་ཧཱ། བྱུག་པ་དབུལ་ལོ། །ཨོཾ་བཛྲ་ཨཱ་ཧཱ་ར་ན་བྷཱུ་ཥ་ནེ་སྭཱ་ཧཱ། མཆོད་ཡོན་དབུལ་ལོ། །ཨོཾ་བཛྲ་པུཥྤེ་ཧཱུཾ་ཞེས་བྱ་བ་ལ་སོགས་པས་མཆོད་པ་ལྔ་དབུལ་ལོ། །དེ་ནས་དབུ་རྒྱན་གྱི་དབང་བསྐུར་བར་བྱ་སྟེ། མཐེ་བོང་གཉིས་ནི་བསྣོལ་བྱས་ཏེ། །གུང་མོ་བསྙམས་པའི་ཚིགས་དང་སྦྱར། །རྡོ་རྗེ་དབྱིངས་ཀྱི་དབང་མོར་བཤད། །ཨོཾ་བྷྲཱུཾ་ཁཾ་ཞེས་བྱ་བ་དང༌། ཨ་བྷི་ཥིཉྩ་སྟྭཾ་ཞེས་བྱ་བ་དང༌། ཨོཾ་སཏྭ་བཛྲི། རཏྣ་བཛྲི། དྷརྨ་བཛྲི། ཀརྨ་བཛྲི། ཞེས་བྱ་བ་ལ་ཨ་བྷི་ཥིཉྩ་སྟྭཾ་ཞེས་བྱ་བ་བསྣན་ལ། རྡོ་རྗེ་བསྡམས་པའི་གུང་མོ་བསྒྲེང་བ་ནི་སེམས་མ་རྡོ་རྗེ་མའིའོ། །དེ་ཉིད་རིན་ཆེན་འདྲ་བར་བྱས་པ་ནི་རིན་ཆེན་སེམས་མའིའོ། །དེ་ཉིད་པདྨ་འདྲ་བར་བྱས་པ་ནི་པདྨ་སེམས་མའི་འོ། །དེ་ཉིད་ལས་ཐལ་མོ་སྦྱར་བ་ཕྲལ་བ་ནི་རྡོ་རྗེ་ལས་མའི་འོ། །དེ་ནི་རིགས་ཀྱི་དབང་བསྐུར་བའོ། །དེ་བཞིན་གཤེགས་པ་ལ་ནི་རིན་པོ་ཆེའི་མྱུ་གུས་དབང་བསྐུར་བ་སྟེ། རིན་ཆེན་མྱུ་གུའི་ཕྱག་རྒྱ་བཅིངས་ལ་
བཛྲ་རཏྣ་ཨ་བྷིཥིཉྩ་མཱཾ་ཞེས་པས་དབང་བསྐུར་རོ། །དེ་ནས་ཨོཾ་ཧཱུཾ་ཞེས་བྱ་བ་དང༌། རྡོ་རྗེ་ཁུ་ཚུར་གཉིས་སོ་སོར་བཅིངས་ཏེ། མཛུབ་མོ་གཉིས་བཀུག་ལ་གོ་ཆ་བྱས་ཏེ་སྙིང་གར་མདུད་པ་ལྟར་བྱས་ལ། ཡང་མགྲིན་པ་དང༌། རྒྱན་དང༌། དཔྲལ་བའི་སྟེང་དུ་མདུད་པར་བྱ་ཞིང༌། དེ་ནས་ཕྲེང་བ་བཅིང་པའི་ཚུལ་གྱིས་མདུད་པ་བྱ་བ་དར་དཔྱངས་བཅིངས་པའི་ཚུལ་ཡང་བྱས་ལ་ངོས་གཉིས་སུ་མཐའ་མ་ལ་སོགས་པ་ནས་སོར་མོ་ཐམས་ཅད་བཀྲོལ་ལ། དེ་ནས་མཉམ་པའི་ཐལ་མོས་མཉེས་པར་བྱ་སྟེ། ཨོཾ་བཛྲ་ཏུ་ཥྱ་ཧོཿ་།དེ་ནས་སྒེག་མོ་ལ་སོགས་པས་མཆོད་པར་བྱའོ། །ཡང་ན་སྐབས་འདིར་རྡོ་རྗེ་དང་ དྲིལ་བུ ་ལ་སོགས་པའི་དབང་རྣམས་སྦྱིན་པར་བྱའོ། །དེ་ནས་མིག་ཐུར་ལ་སོགས་པའི་བྱ་བའི་ལས་རྣམས་སྐབས་འདིར་བྱའོ། །ཨོཾ་ཙཀྵུ་ཙཀྵུ་ས་མནྟ་ཙཀྵུ་བི་ཤོ་དྷ་ནེ་སྭཱ་ཧཱ། དེ་ནས་སྤབས་བཞར་བ་ལ་སོགས་པ་བྱའོ། །དེ་ནས་ཕྱིར་མི་ལྡོག་པ་ལ་སོགས་པ་ཐམས་ཅད་དབང་སྟེགས་ཀྱི་སྟེང་དུ་བསྐུར་བར་བྱའོ། །དེ་ནས་སྔགས་འདིས་བཀྲ་ཤིས་ཀྱི་བཤོས་དབུལ་བར་བྱ་སྟེ། ཨོཾ་དི་བྱ་ཨགྣི་ས་མཱ་དྷྱ་ན་པྲི་ཎ་ཡེ་སྭཱ་ཧཱ། དེ་ནས་མེ་ལོང་དང་བཤོས་གཞན་དག་དང་མཆོད་པའི་ཡོ་བྱད་འབྱོར་ཚད་ཀྱིས་མཆོད་པ་དང༌། བདག་དབུལ་བ་ལ་སོགས་པའི་མཆོད་པ་བཅུ་དྲུག་གིས་མཆོད་པ་དང༌། བསྟོད་པ་ལ་སོགས་པས་བསྟོད་དོ། དེ་ལྟར་བྱས་ནས་ཡང་དེའི་འོག་ཏུ་ཡང་སློབ་མ་གཞུག་པར་བྱ་སྟེ། ཁྱོད་ཀྱིས་ང་ལ་གསོལ་བཏབ་པའི། །སྐུ་གཟུགས་དག་ནི་ཁྱད་པར་དུ། །ཇི་སྐད་གསུངས་བཞིན་རབ་གནས་པའི། །དེ་ནི་བྱ་བ་བྱེད་དུ་བཅུག །ཅི་བདེ་བར་ནི་མཆོད་པར་གྱིས། །ཞེས་བསྒོ་སྟེ། དེ་ནས་གོང་ནས་བྱུང་བའི་དབང་གིས་སློབ་མ་ལ་དབང་བསྐུར་རོ། །དེ་ནས་སྦྱིན་སྲེག་གི་ལས་བྱའོ། །དེ་ལྟར་སྤྱན་དབྱེ་བའི་ལས་བྱས་ནས་འཇུག་པའི་དཀྱིལ་འཁོར་གཤེགས་སུ་གསོལ་བ་ལ་སོགས་པ་བྱའོ། །དེ་ནས་སྒྲུབ་པ་པོས་གནས་དབེན་པར་བསྒྲུབ་པ་བྱ་སྟེ། ཁམས་གསུམ་རྣམ་པར་རྒྱལ་བར་བདག་ཉིད་བསམས་ལ་བསྲུང་བ་ལ་སོགས་པ་བྱས་ལ། བདག་ལྷའི་ཏིང་ངེ་འཛིན་དུ་ཞུགས་ལ་དངོས་གྲུབ་ཀྱི་མཚན་མ་བྱུང་བྱུང་དུ་བཟླས་པར་བྱའོ། །དེ་ནས་གལ་ཏེ་མཚན་མ་ཞིག་མཐོང་ན་ནི་དངོས་གྲུབ་མྱུར་དུ་ཐོབ་པར་འགྱུར་རོ་ཞེས་པ་ནི་འོག་ནས་འབྱུང་བ་འདིའོ། །འོན་ཏེ་མ་མཐོང་ན་ནི་རིང་པོ་ཞིག་ན་དངོས་
གྲུབ་ཏུ་འགྱུར་ཏེ་ཞེས་པ་ནི་སྐྱེ་བ་བརྒྱུད་ནས་སོ། །དངོས་གྲུབ་ཀྱི་མཚན་མ་ནི་འདི་ཡིན་ཏེ། བཞད་པ་དང་ནི་རྔ་སྒྲ་དང༌། །ཞེས་པ་ལ་སོགས་པ་གསུངས་ཏེ། བཞད་པ་ནི་རིས་སུ་བྲིས་པའི་སྐུའོ། །རྔ་སྒྲ་ལ་སོགས་པ་ནི་ནམ་མཁའི་འོ། །དགེ་སློང་དང་བྲམ་ཟེ་ལ་སོགས་པ་ནི་རྨི་ལམ་གྱི་རྣམ་པར་རོ། །འབྲས་བུ་མཐོང་ན་མྱུར་དུ་ནི། །ཞེས་བྱ་བ་ནི་རྟགས་ཏེ་གང་ཡིན་པ་དེ་མཐོང་ན་མཆོག་སྟེ་སྐུ་དང་བར་མ་སྟེ་གསུང་དང་ཐ་མ་སྟེ། བྱང་ཆུབ་སེམས་དཔའི་དངོས་གྲུབ་ཐོབ་བོ། །ཡང་ན་འཇིག་རྟེན་ལས་འདས་པ་དང༌། འཇིག་རྟེན་པ་དང༌། ཕྲིན་ལས་བཞི་པོ་དག་གི་དངོས་གྲུབ་འགྲུབ་པའི་རྟགས་སོ། །དེ་ནས་མཚན་མ་བྱུང་བ་དང༌། །དཀྱིལ་འཁོར་སྔ་མ་བཞིན་བྲིས་ལ། །ཞེས་པ་ནི་དངོས་གྲུབ་བླང་བར་བྱ་བའི་ཐབས་ཏེ། འཇུག་པའི་དཀྱིལ་འཁོར་བཞིན་དུ་བྲིས་ལ་བྱའོ། །ཕྱི་ནང་གི་མཆོད་པ་མང་པོས་མཆོད་པར་བྱ་བའི་ཕྱིར། མཆོད་པ་རྒྱ་ཆེར་བྱས་ནས་ཀྱང༌། །ཞེས་སོ། །གང་དུ་གསུངས་པའི་སྔགས་ཀྱི་གྲངས་ཙམ་ཞིག་བཟླས་པར་བྱའོ། །ཡང་ན་རྟགས་ཕྲ་མོ་བྱུང་བྱུང་དུ་བཟླས་པའི་ཕྱིར་ན། མཚན་གཅིག་ཐོག་ཐག་མི་ཉལ་བར་བཟླས་ཞེས་སོ། །ཅི་སྟེ་གཙོ་བོའམ་དེའི་སྲས་ནི་སངས་རྒྱས་དང་བྱང་ཆུབ་སེམས་དཔའོ།། ཡང་ན་ལྷ་རྣམས་མཐོང་འགྱུར་ན། །ཞེས་བྱ་བ་ནི་ཚངས་པ་དང་བརྒྱ་བྱིན་ལ་སོགས་པའོ། །དེ་ལྟ་བུའི་དངོས་གྲུབ་རབ་འབྲིང་ཇི་ལྟ་བུ་ཡིན་པ་སྟེར་བའི་ཕྱིར་ན། བསོད་ནམས་སྣོད་ལས་ཅི་དགའ་བར། །ཞེས་བྱ་བ་ལ་སོགས་པའོ། །དེ་ལ་དངོས་གྲུབ་བླང་པ་ནི། །ཕྱག་འཚལ་དངོས་གྲུབ་ལ་སོགས་བླང༌། །ཞེས་པའོ། །ཕྱི་མ་ནི་དཀྱུས་ན་གསལ་ལོ། །སེམས་ཅན་ཀུན་ལ་ཕན་བརྩོན་པས། །ཞེས་བྱ་བ་ནས། དྲན་བཞིན་ལས་ཀུན་བྱེད་པར་འགྱུར། །ཞེས་བྱ་བའི་བར་གྱིས་ནི་གྲུབ་པར་སྒྲུབ་པ་པོའི་ཡོན་ཏན་བསྟན་པའོ། །དེས་ནི་རས་ལ་སྐུ་གསུང་ཐུགས་བསྒྲུབས་པའི་ཏིང་ངེ་འཛིན་བསྟན་ཏོ། །ད་འདི་ནས་མ་འོངས་པའི་སེམས་ཅན་ཚེའི་དུས་བྱས་པ་རྣམས་ལ་ཕན་གདགས་པའི་རིམ་པ་བསྟན་ཏེ། དེ་ནས་ལྷ་རྣམས་ཀྱི་དབང་པོ་ཞེས་བྱ་བ་ནས། ཉོན་ཅིག་ཅེས་བྱ་བའི་བར་གྱིས་ནི་ཞུས་པ་དང་གནང་བ་བསྟན་ཏོ། །དེ་ལ་ཡང་དང་པོར་དབང་གིས་ཕན་གདགས་པ་
བསྟན་ཏེ། དེ་བཞིན་དཀྱིལ་འཁོར་བྲིས་ནས་ནི། །ཞེས་པ་ལ་སོགས་པ་སྟེ། དེ་བཞིན་དཀྱིལ་འཁོར་བྲིས་ནས་ནི། ཞེས་བྱ་བ་དེ་ནི་དེ་བཞིན་ནི་གོང་མ་ལ་སྙེགས་པ་སྟེ་རྩ་བའི་དཀྱིལ་འཁོར་ཆེན་པོ་བྲིས་ལ། དེར་སློབ་མ་འཇུག་པའི་རིམ་པ་བཞིན་དུ་གཞུག་ཅིང་དབང་བསྐུར་བ་ནི་གོང་མ་བཞིན་དུ་བུམ་པ་དང༌། ཕྱིར་མི་ལྡོག་པའི་དབང་རྣམས་བསྐུར་ན་སྡིག་པ་ཆེན་པོ་བྱས་པ་དེ་དམྱལ་བ་ལ་སོགས་པའི་སྡུག་བསྔལ་ལས་ཐར་ཏེ། དགའ་ལྡན་ལ་སོགས་པའི་ལྷའི་རིགས་སུ་སྐྱེས་ནས་རིམ་གྱིས་བྱང་ཆུབ་ཏུ་སེམས་བསྐྱེད་དེ་ཕྱིར་མི་ལྡོག་པའི་ས་ལ་འགོད་པར་འགྱུར་རོ། །ཤི་བའི་རོ་མེད་ན་མིང་ལ་དབང་བསྐུར་ན་ཡང་ངན་སོང་ལས་ཐར་བར་འགྱུར་ཏེ། དེའི་ཐབས་ཀྱང་དེའི་གཟུགས་བརྙན་བྲི་བའམ་ཞེས་བྱ་བ་ནས། སྙིང་རྗེ་ཅན་གྱིས་དབང་བསྐུར་རོ། །ཞེས་བྱ་བའི་བར་གྱིས་བསྟན་ཏོ། །གཉིས་པ་ལྷར་བརྟགས་པའི་རང་བཞིན་བསྟན་པ་ནི་ཤི་བདེ་ཉིད་རང་དད་པའི་ལྷའི་རང་བཞིན་དུ་བརྟགས་ནས། མཆོད་རྟེན་གྱི་དབུས་སུ་གཞག་པའམ། རང་གི་ཁྱིམ་དུ་བཞག་ན་ཡང་གྲོལ་བར་འགྱུར་རོ། །མཆོད་རྟེན་གྱིས་ཕན་གདགས་པར་བྱ་བ་ནི་རང་གི་མིང་ནས་བརྗོད་ལ་གུར་གུམ་ལ་སོགས་པ་སྔགས་དང་སྤེལ་ཏེ་མཆོད་རྟེན་གྱི་ནང་དུ་བཅུག་ནས། ཁྲི་འམ་འབུམ་ཙམ་དུ་བཏབ་ན་ཡང་སྡིག་པའི་ལས་ཟད་པར་འགྱུར་རོ། །སྡིག་པ་ཆེན་པོ་བྱས་པ་ཡང་བྱེ་བར་མཆོད་རྟེན་གྱི་ལས་བྱས་ན་ཡང་དམྱལ་བ་ལ་སོགས་པའི་སྡུག་བསྔལ་ལས་ཐར་བར་འགྱུར་ཏེ་ལྷའི་གནས་སུ་སྐྱེའོ། །ཡང་ཐབས་གཞན་ཡང་བཟླས་པས་ཕན་གདགས་པ་ཡང་ཡོད་དེ། དེའི་མིང་ནས་བརྗོད་ནས་ངན་སོང་སྦྱོང་བའི་སྔགས་འབུམ་ཕྲག་སྟོང་ངམ་བྱེ་བ་ཡན་ཆད་བཟླས་ན་ངན་སོང་ལས་ཐར་ནས་ལྷའི་གནས་སུ་སྐྱེའོ། །ཡང་ཐབས་གཞན་དག་ཡོད་དེ། དེའི་མིང་ནས་བརྗོད་ཅིང་རྣལ་འབྱོར་པ་མཁས་པས་འབུམ་ཕྲག་བརྒྱའམ། བརྒྱ་ཕྲག་སྟོང་དུ་སྡིག་པ་བསྲེག་པའི་སྦྱིན་སྲེག་ཏིལ་ལམ་ཡུངས་ཀར་དང༌། ར་དཀར་མོའི་འོ་མ་དང༌། འབྲས་དང་གུར་གུམ་ལ་སོགས་པས་བསྒོས་པའི་ཡམ་ཤིང་དང༌། བའི་མར་ལ་སོགས་པས་སྦྱིན་སྲེག་བྱས་ན་ཡང་ངན་སོང་ལས་ཐར་ནས་ལྷའི་གནས་སུ་སྐྱེའོ། །དེ་ངན་སོང་ལས་ཐར་ནས་ལྷའི་གནས་སུ་སྐྱེས་པའི་མཚན་
ལྟས་ནི། དེ་ཡི་མཚན་མ་སྟོན་པར་བྱེད། །ཅེས་བྱ་བ་ནས། སྐྱེས་པ་ཡིན་པར་ཤེས་པར་བྱ། །ཞེས་པ་ཡན་ཆད་ཀྱིས་བསྟན་ཏོ། །ཡང་ཐབས་གཞན་རོ་དེ་བསྲེགས་པས་ཕན་གདགས་པ་ཡོད་དེ། དེ་ནི་འདི་ཡིན་ཏེ། ཁྲུ་བཞི་བ་ཡི་ཚད་དུ་ནི། །ཞེས་བྱ་བ་ལ་སོགས་པ་གསུངས་ཏེ། ཁྲུ་བཞི་པ་ནི་ནང་གི་ཚད་དེ་དེའི་ཕྱི་རོལ་ཁྲུ་བརྒྱད་པར་བྱ་སྟེ། དེའི་ནང་དུ་ཁྲུ་དོ་ཁོར་ཡུག་གི་ཁ་ཁྱེར་ལ་བཏང་ལ། ཁྲུ་དོ་ནི་མེ་ཐབ་ཀྱི་རྒྱར་བཏང་ཞིང་ཟབས་སུ་ནི་ཁྲུ་གང་བརྐོ་བར་བྱའོ། །དེ་ལ་ནང་གི་ཁ་ཁྱེར་ལ་སོར་བརྒྱད་དོ། །དེའི་ཕྱིར་བསྐྱེད་ལ་དེ་ནས་ཁ་ཁྱེར་ལ་སོར་བརྒྱད་དཔངས་དང་རྒྱར་མཉམ་པར་གཏང་བར་བྱའོ། །དེའི་ཕྱིར་ཁ་ཁྱེར་དཔངས་དང་ཞེང་དུ་ཡང་སོར་བརྒྱད་དོ། །ཆོ་ག་བཞིན་དུ་ཞེས་བྱ་བའི་སྒྲ་ནི་འདི་ལྟར་དོན་ལ་སྙེགས་ཏེ། དང་པོར་ས་བརྟག་པ་དང༌། དེ་ནས་ཡུལ་གྱི་རྒྱལ་པོ་ལ་སོགས་པ་ལས་ས་དེ་བསླད་བ་དང༌། ས་བདག་དང་ཀླུ་ལ་སོགས་པ་ལ་གཏོར་མ་བྱིན་ཏེ་ས་བསླང་ཞིང་བརྟག་པ་དང༌། ཕྱི་སྦྱང་སྟེ་རོ་ལྔ་དབྱུང་བ་དང༌། ནང་སྦྱང་སྟེ་ཏིང་ངེ་འཛིན་གྱིས་སྤྱོད་པ་དང༌། ས་གཏེར་དུ་གཞུག་པ་དང༌། སྟེགས་བུ་འཐས་པར་བརྩིགས་པ་དང༌། སྒོ་དང་ལྷའི་གནས་ཀྱི་ཐིག་གདབ་པ་ལ་སོགས་པ་བྱའོ། །ཁུང་བརྐོས་ལ་ཞེས་བྱ་བ་ནི་ཟབས་སུ་ཁྲུ་གང་པར་བྱའོ། །རྡོ་རྗེས་མཐའ་མ་བསྐོར་བ་ཡི། །ཞེས་པ་ནི་ཁ་ཁྱེར་ལ་གྲྭ་བཞིར་རྡོ་རྗེ་གསུམ་པ་བཞི་བཏང་བ་དང༌། གཞན་ཡང་རྡོ་རྗེ་དང་མེ་ཏོག་གི་ཕྲེང་བས་བསྐོར་བའོ། །འཁོར་ལོ་དབུས་སུ་བྲི་བར་བྱ། །ཞེས་བྱ་བ་ནི་ཐབ་ཀྱི་དབུས་སུ་འཁོར་ལོ་རྩིབས་བརྒྱད་པ་ཅིག་བྲིས་ལ། དེ་ལ་རིགས་ལྔའི་ཕྱག་རྒྱ་རྡོ་རྗེ་དང༌། པདྨ་དང༌། རིན་པོ་ཆེ་དང༌། རྒྱ་གྲམ་དང༌། དབུས་སུ་འཁོར་ལོ་དེ་རྣམས་འཇིམ་པ་ལ་འབུར་དུ་དཔངས་སོར་གཅིག་པའི་ཚད་དུ་བྱས་ལ། ཤར་དང་ནུབ་དང་ལྷོ་དང་བྱང་དང༌། དབུས་སུ་རིམ་པ་བཞིན་གཞག་པར་བྱའོ། །ཕྱིའི་ཁ་ཁྱེར་ལ་འཁོར་ལོའམ་པདྨ་འདབ་མ་བཅུ་དྲུག་པར་བྲིས་ལ། སེམས་དཔའ་ནི་རྡོ་རྗེ་སེམས་དཔའ་ལ་སོགས་པ་བཅུ་དྲུག་གི་མཚན་མ་རྡོ་རྗེ་དང་ལྕགས་ཀྱུ་ལ་སོགས་པ་བྲི་བར་བྱའོ། །དེའི་ཕྱིར་སྣམ་བུ་ལ་ཕྱག་རྒྱ་ཉི་ཤུ་བྲི་བར་བྱ་བ་ནི། ཤར་ཕྱོགས་ནས་བརྩམས་
ནས། ནགས་ཀྱི་ལྕུག་མ་དང༌། བགྲང་ཕྲེང་དང༌། རིལ་བ་སྤྱི་བླུགས་དང༌། གླིང་བུ་དང༌། ཏྲི་ཤཱུ་ལ་དང༌། ཟླ་བ་ཕྱེད་པ་དང༌། རལ་པ་མིག་དང༌། རྒྱལ་མཚན་དང༌། དུང་དང༌། འཁོར་ལོ་དང༌། བེ་ཅོན་དང༌། རལ་གྲི་དང༌། ཕུབ་དང༌། ཕག་དང༌། སེང་གེ་དང༌། མདུང་དང། དྲིལ་བུ ་དང༌། བ་དན་དང༌། རྨ་བྱ་དང༌། ར་སྐྱེས་དང༌། ཁྱིམ་བྱ་རྣམས་ནི་ཤར་ཕྱོགས་ནས་བརྩམས་ཏེ་བྲི་བར་བྱའོ། །དེ་ལ་འཇིག་རྟེན་གཙོ་བོ་རྣམས་ཀྱི་ཕྱག་རྒྱ་ཇི་ལྟ་བ་བཞིན་དུ་བྲི་བར་བྱ་ཞེས་སོ། །དེ་ནས་སྒོ་དང༌། རྟ་བབས་དང་བཅས་པ་བྲི་བར་བྱའོ། །མཆོད་པའི་ཡོ་བྱད་མེ་ཏོག་ལ་སོགས་པ་དང༌། ལཱ་སྱེ་མ་ལ་སོགས་པ་དང༌། །སྒོ་བ་བཞི་ཡན་ཆད་ཀྱི་ཕྱག་རྒྱ་དགོད་པར་བྱའོ། །བྱ་དང་བུམ་པ་གང་བ་དང༌། །ཞེས་བྱ་བ་ནས། གདུགས་མཆོག་རྣམས་ནི་ལེགས་པར་གཞག །ཅེས་བྱ་བ་ཡན་ཆད་ཀྱིས་ནི་དཀྱིལ་འཁོར་གྱི་རྒྱན་དུ་བྱ་བ་དང༌། །རོ་ལ་དབང་བསྐུར་བའི་རྫས་སུ་བྱ་བའི་ཆེད་དུའོ། །དེ་ནི་དཀྱིལ་འཁོར་བྲི་བའི་རིམ་པའོ། །དེ་ལྟར་དམ་པའི་བསྲེག་ཁུང་དུ། །སྦྱིན་སྲེག་ཐམས་ཅད་ཡང་དག་བྱ། །ཞེས་པ་ནི་སྦྱིན་སྲེག་འོག་ནས་འབྱུང་བ་བཞིན་བྱའོ་ཞེས་པའི་དོན་ཏོ། །དེ་ལྟར་ཆོ་ག་ཤེས་པ་ཡིས། །ཞེས་པ་ལ། །དེ་ལྟར་ཞེས་བྱ་བ་ནི་གོང་མ་ལ་སྙེགས་པའོ། །ཆོ་ག་ཤེས་པས་ཞེས་བྱ་བ་ནི་ས་བརྟག་པ་ལ་སོགས་པ་གོང་མ་ལྟར་ཤེས་པའོ། །གཞན་ཡང་བདག་ཉིད་ལྷའི་རྣལ་འབྱོར་དུ་བྱས་ནས་གོང་མ་ལྟར་བྲིས་ནས་དཀྱིལ་འཁོར་གྱི་ཡོ་བྱད་དང་བུད་ཤིང་ལ་སོགས་པ་ལ་ལས་ཐམས་ཅད་པ་འམ་རྡོ་རྗེ་རྩེ་མོའི་སྔགས་ཀྱིས་བཏབ་སྟེ། དེ་ནས་ལས་ཐམས་ཅད་པའང༌། འཕགས་པ་མི་གཡོ་བས་བགེགས་བསྐྲད་ཅིང་མཚམས་བཅད་དོ། །དེ་ནས་བདག་ཉིད་ལྷར་བྱས་ཏེ་དབང་བསྐུར་བ་དང་ལུས་བསྲུང་པ་ལ་སོགས་པ་བྱས་ཏེ། བདག་ཉིད་ཀྱིས་ཕྱག་རྒྱ་བཅིངས་ཤིང་སྔགས་བརྗོད་པ་དང༌། ཐུགས་ཀ་ནས་འོད་འཕྲོས་པ་ལས་ཁྲོ་བོའི་སྐུར་གྱུར་པས་ཕྱོགས་མཚམས་ཀྱི་བགེགས་བསྐྲད་པར་བྱ་སྟེ། སྟེང་དུ་རྡོ་རྗེ་འཇིགས་བྱེད་སྐུ་མདོག་ནག་པོ་ཧཱུཾ་ཞེས་བྱ་བའི་ཕྱག་རྒྱ་དང་ལྡན་པས་བསྲུངས་སོ། །ཞབས་ནི་བརྐྱང་བསྐུམ་གྱི་ཚུལ་དུ་བཞུགས་པའོ། །ཤར་དུ་རྡོ་རྗེ་གཙུག་ཏོར་གྱིས་བསྲུངས་ཏེ། སྐུ་མདོག་དཀར་
པོ་ཕྱག་གཉིས་རང་གི་ཕྱག་རྒྱ་དང་ལྡན་པ་སྤྱན་གསུམ་པ། གཡས་བརྐྱང་གཡོན་བསྐུམ་གྱིས་བཞུགས་པའོ། །བྱང་དུ་ནི་ཁྲོ་བོ་རྡོ་རྗེ་དུས་ཞེས་བྱ་བས་བསྲུངས་ཏེ། སྐུ་མདོག་ནི་ཆར་སྤྲིན་ལྟ་བུ་ཞབས་གཉིས་ནི་ཟླུམ་པོའི་འདུག་སྟངས་ཅན། ཕྱག་གཉིས་རྡོ་རྗེ་མཆེ་བ་བསྣམས་པའོ། །ནུབ་ཏུ་ནི་རྟ་མགྲིན་རྡོ་རྗེ་བ་དན་བྱ་བས་བསྲུངས་ཏེ། སྐུ་མདོག་ནི་དམར་པོར་བཞུགས་པ་ཞབས་གཉིས་ས་གའི་འདུག་སྟངས་སུ་གནས་པ་ཕྱག་གཉིས་ན་རྡོ་རྗེའི་བ་དན་ལྕེ་བརྒྱད་པ་བསྣམས་པའོ། །ལྷོར་རྡོ་རྗེ་རྩེ་མོ་སྟེ་གཤིན་རྗེ་གཤེད་ཀྱིས་བསྲུངས་ཏེ། སྐུ་མདོག་ནག་པོར་གནས་པ་ཞབས་གཉིས་ནི་གཡོན་བརྐྱང་བས་བཞུགས་པ་ཕྱག་ན་ནི་རྡོ་རྗེ་རྩེ་མོའི་བ་དན་བསྣམས་པའོ། །མཚམས་བཞིར་ནི་འཇིགས་བྱེད་ཞགས་པས་བསྲུངས་ཏེ། སྐུ་མདོག་ནི་ངོས་གཉིས་པའོ། ཕྱག་ན་ནི་རྡོ་རྗེ་མཆེ་བ་དང་ཞགས་པ་བསྣམས་པའོ། །འོག་ཏུ་ནི་ཁྲོ་བོ་རྡོ་རྗེ་གནོད་སྦྱིན་གྱིས་བསྲུང་ངོ༌། །ཕྱག་གཉིས་རི་བོ་འདེགས་པ་སྐུ་མདོག་ནག་པོའོ། །ཁྲོ་བོ་དེ་རྣམས་ནི་གྱད་ཀྱི་འདོར་སྟབས་ཅན་ནོ། །ཁྲོ་བོ་དེ་དག་ཐམས་ཅད་ཀྱང་ཞལ་གདངས་པ་མཆེ་བ་གཙིགས་པ་སྐྲ་ཁམ་པ་གྱེན་དུ་འགྲེང་བ། སྟོད་གླང་ཆེན་གྱི་ཀོ་བ་རློན་པ་གསོལ་བ། སྐུ་སྨད་སྟག་གི་པགས་པས་སྨད་དཀྲིས་པ། སྤྱན་གསུམ་པ་སྨ་ར་སེར་པོའི་མེ་ཆེན་པོ་འབར་བ་ཞལ་ནས་རང་གི་སྔགས་ཀྱི་སྒྲ་སྒྲོགས་པ་རིགས་བཞིའི་སྦྲུལ་གྱིས་སྐུ་ལ་བརྒྱན་པར་བསྒོམ་མོ། །དེ་ནས་པཾ་ལས་རྡོ་རྗེ་ར་བ་བསམ་པར་བྱ་བ་དང༌། ཀརྨས་དཀྱིལ་འཁོར་བཅིང་བ་དང༌། ཕུར་བུས་སྔ་ནས་གནས་པ་བསྐྲད་པ་དང༌། ཕྱིས་མི་འོད་པར་བྱས་ཏེ་གདབ་པར་བྱའོ། །དེ་ནས་བདག་ཉིད་ཀྱིས་ཚོགས་ཀྱི་ཡན་ལག་བྱ་སྟེ། སྟོང་པར་བསྒོམས་ལ། རིམ་གྱིས་རྟེན་དང་བརྟེན་ཅན་གྱི་ལྷ་དང༌། གཞལ་ཡས་ཁང་བསྐྱེད་པ་ཡན་ཆད་བྱའོ། །བྲིས་ནས་ཀྱང་ཞེས་བྱ་བའི་སྒྲ་ནི་བསྒོམས་ནས་ཞེས་པའི་དོན་ཏོ། །ལྷ་རྣམས་མང་པོ་སྤྱན་དྲངས་ལ། །ཞེས་བྱ་བ་ནི་ཡེ་ཤེས་ཀྱི་དཀྱིལ་འཁོར་གྱི་ལྷ་ཚོགས་རྣམས་སོ། །སྤྱན་དྲངས་པ་ནི་ཏིང་ངེ་འཛིན་གྱི་དཀྱིལ་འཁོར་དུའོ། །དེ་ཡང་གང་དུ་གང་གི་གང་ཕྱིར་ཞེས་པའི་དོན་ཏོ། །སྔགས་ཤེས་སྔགས་དང་
ཕྱག་རྒྱ་ཡིས། །ཞེས་བྱ་བ་ལ་སྔགས་ཤེས་ནི་རྣལ་འབྱོར་པ་ལྷའི་ཏིང་ངེ་འཛིན་དང་ལྡན་པ་དེའོ། །སྔགས་དང་ནི་རྩ་བའི་སྔགས་རྣམས་སོ། །ཕྱག་རྒྱ་ནི་ཕྱག་རྒྱ་བཞི་སྟེ། དམ་ཚིག་དང༌། ཆོས་དང༌། ལས་དང་ཕྱག་རྒྱ་ཆེན་པོའོ། །ཡང་ན་སྔགས་དང་ཕྱག་རྒྱ་ཕྱི་ནང་གི་ལྷ་མོ་རྣམས་ཀྱི་སྔགས་དང་ཕྱག་རྒྱའོ། །ཕྱི་ནང་གི་མཆོད་པ་དབུལ་བར་བྱའོ། །མདོར་ན་མཆོད་པ་བྱས་ནས་ནི། །ཞེས་བྱ་བས་ནི་རོ་ལ་རིག་པའི་དབང་དང་ཕྱིར་མི་ལྡོག་པའི་དབང་བསྐུར་རོ་ཞེས་བྱ་བར་འབྲེལ་ཏོ། །དེ་ནས་གཏོར་མ་རྣམས་ཚུལ་བཞིན་དུ་བྱིན་གྱིས་བརླབས་ནས་དམ་ཚིག་ཅན་ལ་གཏོར་མ་ཕུལ་ཏེ། མིང་འདི་ཞེས་བྱ་བའི་སྒྲིབ་པ་བྱང་བར་གྱུར་ཅིག །བདག་གིས་འགྲོ་བའི་དོན་བརྩམས་པའི་སྟོང་གྲོགས་མཛད་དུ་གསོལ་ཞེས་བརྗོད་དོ། །དེ་ནས་འགྲོ་བ་སྦྱོར་བ་ཡང་གཅིག་བསྔོས་ལ་མིང་འདི་ཞེས་བྱ་བའི་ལས་ཀྱི་བག་ཆགས་བྱང་ཞིང་བསོད་ནམས་ཀྱི་ཚོགས་སུ་གྱུར་ཅིག་ཅེས་བརྗོད་དེ་གཏང་ངོ༌། །དེ་ནས། ལྷ་ཡི་སྦྱོར་བ་རབ་གནས་ལ། །ཞེས་བྱ་བ་ལ་སོགས་པས་ནི་སྔགས་མཁན་གཞན་ཞིག་ཡོད་ན་ལྷའི་ཏིང་ངེ་འཛིན་དང་ལྡན་པར་བྱས་ཏེ། བུམ་པ་ལ་རིགས་ལྔའི་སྙིང་པོ་ཤི་བའི་མིང་དང་སྤེལ་ནས་སྔགས་ཟློས་སུ་གཞུག་གོ །དེ་ནས་ངན་སོང་སྦྱོང་བའི་སྔགས་ཅི་མང་དུ་ཟློས་སུ་གཞུག་གོ་།གཞན་མེད་ན་བདག་ཉིད་ཀྱིས་བྱའོ། །ག་བུར་གུར་གུམ་ཞེས་པས་ན། །ཡམ་ཤིང་དང་ནི་དེ་བཞིན་ཏེ། །ཞེས་པའི་བར་གྱིས་ནི་རྫས་ཀྱི་རིམ་པ་བསྟན་ཏོ། །ད་ནི་ཤིང་བརྩིག་པའི་རིམ་པ་བསྟན་ཏེ། རང་གི་སྔགས་ཀྱིས་བཏབ་པའི་ཤིང༌། །ཁུང་བུའི་ནང་དུ་གཞུག་པར་བྱ། །ཞེས་པ་ནི་བུད་ཤིང་ལ་ངན་སོང་སྦྱོང་བའི་སྔགས་ཀྱིས་བཏབ་སྟེ་བརྩིགས་པ་ནི་ཤིང་དྲང་ཞིང་དྲི་དང་ལྡན་པ་རིང་བའི་གདུང་ཀ་བ་བཞི་ཐབ་ཀྱི་ཟུར་བཞི་ལ་བཙུགས་ལ་དེའི་སྟེང་དུ་གདུང་གཉིས་བཞག་ལ་སྔས་བྱ། ཕྱི་མ་དེ་གཉིས་ཀྱི་སྟེང་དུ་ཕྱམ་ཐ་མ་བ་དགོད། དེ་ནས་དེའི་སྟེང་དུ་ཡང་དཀྱིལ་འཁོར་ཞལ་ཞལ་ལེགས་པར་བྱ། དེའི་སྟེང་དུ་ཁང་པ་རིམ་པ་གསུམ་པ་མཆོད་རྟེན་གྱི་ཚུལ་དུ་བརྩིག་པར་བྱའོ། །དེ་ནས་ཕྲག་གནོན་དང་སྟེང་གནོན་ནི་རོ་བཞག་ལ་བརྩིག་པར་བྱའོ། །ད་ནི་རོ་བྱིན་གྱིས་བརླབ་པར་བྱ་སྟེ། རོ་ལ་སྔགས་ཀྱིས་བཏབ་ནས་སུ། །ཞེས་བྱ་བ་ལ་སོགས་པ་གསུངས་ཏེ།
དེའི་དོན་ཡང་འདི་ལྟར་ཤེས་པར་བྱ་སྟེ། དེ་ཡང་དང་པོར་བདག་ཉིད་ལྷའི་རྣལ་འབྱོར་དུ་བྱས་ཏེ། ཤི་བའི་ལུས་ལ་གནས་པ་དང༌། ཁོག་སྲུང་ལ་སོགས་པར་དུ་གཅོད་པའི་བགེགས་བསྐྲད་པ་ནི་རྡོ་རྗེ་གསོར་ཞིང༌། ན་མོ་བཛྲ་སཏྭ་ཀྲོ་དྷ་ཨ་ན་ལཱརྐ། མ་ཧཱ་བཛྲ་ཀྲོ་དྷ་དྲ་བ་དྲ་བ། བི་དྲ་བ་བི་དྲ་བ། སརྦ་ཨརྠ་ཡ་ནཱ་ཤ་ཡ་ནཱ་ཤ་ཡ། ཧ་ར་ཧ་ར། པྲཱ་ཎཾ་ཧཱུཾ་ཕཊ། ཅེས་བརྗོད་ལ་བསྐྲད་དོ། །དེ་ནས་ལྕགས་ཀྱུའི་ཕྱག་རྒྱ་བཅས་ལ། ཨོཾ་བཛྲ་ཨཾ་ཀུ་ཤ་ཆེ་གེ་མོ་ཛཿ་ཛཿ། ཞེས་བརྗོད་པས་ཚེ་འདས་པ་དེ་གང་ན་གནས་ཀྱང་རུང་སྟེ། རང་དབང་མེད་བར་ལྕགས་ཀྱུ་ཅན་གྱིས་བཀུག་པར་བསམ། བཛྲ་པཱ་ཤ་ཧཱུཾ་ཞེས་པས་རོ་ལ་ཤེས་པ་གཞུག །བཛྲ་སྥོ་ཊ་བཾ་གྱིས་བསྡམས། བཛྲ་གྷཎྜེ་ཧོཿ་ས་སེམས་མ་འཁྲུགས་པར་དག་པར་བྱའོ། །དེ་ནས་ངན་སོང་སྦྱང་བའི་སྔགས་ཀྱིས་རོལ་བཏབ་ལ། སྔོན་དུ་བཟླས་པའི་བུམ་པའི་ཆུའི་མཆོག་དེས་བཀྲུ་བར་བྱའོ། །དེས་བཀྲུས་པས་ཀུན་གཞིའི་ལས་དང་ཉོན་མོངས་པ་གངས་ཀྱི་རིམ་པ་བཞིན་དུ་གནས་པ་དག་པར་བསམ་མོ། །དེ་ནས་སྔགས་བཟླས་པའི་དྲི་གུར་གུམ་ལ་སོགས་པས་ལུས་དེ་ལ་བྱུག་པར་བྱ་བ་ནི། བཟླས་པའི་དྲི་ཡིས་བྱུག་པར་བྱ། །ཞེས་སོ། །གོས་རྒྱན་གྱིས་ནི་བཀླུབས་ནས་ནི། ཞེས་པས་ནི་སྔགས་བཏབ་པའི་རས་དཀར་པོ་ཡུག་ཁ་ཚར་མ་ཉམས་པས་དཀྲི་བར་བྱའོ། །སྔགས་ཀྱིས་བཏབ་པའི་བདུག་པས་ཀྱང་བདུག་པར་བྱའོ། །མེ་ཏོག་གི་ཕྲེང་བས་ཀྱང་རོལ་གདགས་པར་བྱའོ། །ད་ནི་རོལ་སྔགས་གདབ་ཅིང་བྱིན་གྱིས་བརླབ་པར་བྱའོ། །གཙུག་ཕུད་དབུང་པ་དེ་བཞིན་དུ། །སྔགས་བྲིས་ནས་ནི་གདགས་པར་བྱ། །ཞེས་པ་ལ་སོགས་པ་དེ་ནས་གུར་ཀུམ་བཟང་པོས་སྔགས་བྲིས་པ་ནི་ཨོཾ་བྷྲི་ཏ་བྷྲི་ཏ་སརྦ་ཨཱ་བ་ར་ཎཱ་ནཻ་ཧཱུཾ་ཕཊ། ཁ་ནི་ལུས་ཏེ་མགོ་བོར་གདགས། ཨོཾ་ཏྲ་ཊ་ཏྲ་ཊ་སརྦ་ཨཱ་བར་ཎཱ་ནི་ཧཱུཾ་ཕཊ། ལྐོག་མ་ནི་ངག་སྟེ་ལྕེ་རྩར་གདགས་སོ། །ཨོཾ་ཙྪིནྡ་ཙྪིནྡ་སརྦ་ཨཱ་བ་ར་ཎཱ་ནི་ཧཱུཾ་ཕཊ། སྙིང་ག་སྟེ་ཡིད་ཀྱི་དེར་གདགས་སོ། །དེ་གསུམ་གྱིས་ནི་ལུས་ངག་ཡིད་གསུམ་གྱི་མི་དགེ་བ་བཅུའི་བག་ཆགས་དག་པར་དམིགས་སོ། །ད་ནི་གནས་བཅོ་བརྒྱད་དུ་གདགས་པར་བྱ་སྟེ། ཨོཾ་ཤོ་དྷ་ནེ་ཤོ་དྷ་ནེ། སརྦ་པཱ་པཾ་བི་ཤོ་དྷ་ནེ། ཤུདྡྷེ་བི་ཤུདྡྷེ་
སརྦ་ཀརྨ་ཨཱ་བ་ར་ཎཱ་བི་ཤུདྡྷེ་སྭཱ་ཧཱ། ཀུན་རིག་དཔྲལ་བར་རོ། །ཨོཾ་ཤོ་དྷ་ནེ་ཤོ་དྷ་ཡ། སརྦ་ཨ་པཱ་ཡ་བི་ཤོ་དྷ་ནི་ཧཱུཾ་ཕཊ་ཧཱུཾ་ངན་སོང་སྦྱོང་བ་སྟེ་མཛོད་སྤུ་ལའོ། །ཨོཾ་ཤོ་དྷ་ནེ་ཤོ་དྷ་ཡ། སརྦ་ཨ་བཱ་ཡ། སརྦ་སཏྭེ་བྷྱོ་ཧཱུཾ་ཏྲཱཾ། རིན་ཆེན་མེ་ཏོག་སྟེ་རྣ་བ་གཡས་པ་ལའོ། །ཨོཾ་ཤོདྷ་ནི་ཤོ་དྷ་ཡ། སརྦ་ཨ་པཱ་ཡ་བི་ཤོ་དྷ་ནི་ཧྲཱིཿ། ཤཱཀྱ་ཐུབ་པ་སྟེ་རྣ་བ་གཡོན་པ་ལའོ། །ཨོཾ་ཤོ་དྷ་ནི་ཤོ་དྷ་ཡ་སརྦ་སཏྭ་ཡ་ཏྲཱ་ཊ་ཨཿ། མེ་ཏོག་ཆེར་རྒྱས་ཏེ་མགོ་བའི་གཙུག་ཕུད་ལའོ། །ན་མོ་བྷ་ག་ཝ་ཏི་སརྦ་དུ་རྒ་ཏི་བ་རི་ཤོ་དྷ་ནི་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀ་སཾ་བུདྡྷཱ་ཡ། ཏདྱ་ཐཱ། ཨོཾ་ཤོ་དྷ་ནེ་ཤོ་དྷ་ནེ། སརྦ་པཱ་པཾ་བི་ཤོ་དྷ་ནི་ཤུདྡྷེ་བི་ཤུདྡྷེ། སརྦ་ཀརྨ་ཨཱ་བ་ར་ཎཱ་བི་ཤོ་དྷ་ནི་སྭཱ་ཧཱ། རྩ་བའི་རིག་པ་སྟེ་དཔུང་པ་གཡས་པ་ལའོ། །ཨོཾ་སརྦ་ཨཱ་བ་ར་ཎཱ་བི་ཤོ་དྷ་ནི་ཧ་ན་ཧཱུཾ་ཕཊ། རྡོ་རྗེ་སེམས་དཔའ་སྟེ་དཔུང་པ་གཡས་པ་ལའོ། །ཨོཾ་སརྦ་བིཏ་ཧཱུཾ་རྡོ་རྗེ་རྒྱལ་པོ་སྟེ་སྣ་ལའོ། །ཨོཾ་སརྦ་བིཏ་ཕཊ། རྡོ་རྗེ་ཆགས་པ་སྟེ་རྐང་པ་ལའོ། །ཨོཾ་སརྦ་བིད་ཨཱཿ། རྡོ་རྗེ་ལེགས་པ་སྟེ་པུས་མོ་གཡས་པ་ལའོ། །ཨོཾ་སརྦ་བི་ཏ་ཏྲ། རྡོ་རྗེ་རིན་ཆེན་ཏེ་པུས་མོ་གཡོན་པ་ལའོ། །ཨོཾ་སརྦ་བིཏ་ཨོཾ། རྡོ་རྗེ་ཉི་མ་སྟེ་བོ་ལ་གོང་གཡས་པ་ལའོ། །ཨོཾ་སརྦ་བིཏ་སྭ། རྡོ་རྗེ་རྒྱལ་མཚན་ཏེ་བོ་ལ་གོང་གཡོན་པ་ལའོ། །ཨོཾ་སརྦ་བིཏ་ཨཱཿ། རྡོ་རྗེ་བཞད་པ་སྟེ་ལོང་བུ་གཡས་པ་ལའོ། །ཨོཾ་སརྦ་བིཏ་ཧཱུཾ་རྡོ་རྗེ་ཆོས་ཏེ་ལོང་བུ་གཡོན་པ་ལའོ། །ཨོཾ་སརྦ་བིཏ་ཏྲ་ཐ། འཇམ་དཔལ་ཏེ་མིག་གཡས་པ་ལའོ། །ཨོཾ་ཀྵ་རྡོ་རྗེ་འཁོར་ལོ་མིག་གཡོན་པ་ལའོ། །ཨོཾ་བྷ་རྡོ་རྗེ་སྨྲ་བ་སྟེ་མདོམས་སུའོ། །དེ་ལྟར་དབང་པོ་རྣམས་སུ་ཡི་གེ་དེ་རྣམས་བཞག་ནས། ཏིང་ངེ་འཛིན་གྱིས་ཀྱང་སྔགས་དེ་དག་གི་འོད་ཟེར་གྱིས་སྒྲིབ་པ་རྣམས་སྦྱོང་བར་བསམ་པར་བྱའོ། །དེ་ནས་སྐབས་འདིར་རིག་པའི་དབང་དང་ཕྱིར་མི་ལྡོག་པའི་དབང་རྣམས་བསྐུར་བར་བྱའོ། །དེ་ནས་གསང་སྔགས་ཀྱིས་བཏབ་པའི་དར་ལ་སོགས་པའི་གོས་ཀྱིས་གཡོགས་ནས་རྒྱན་ཐམས་ཅད་ཀྱིས་བཀླུབས་ནས་བཞག་པ་ལ་ནི། །སྔགས་ཀྱིས་བཏབ་པའི་གོས་ཀྱིས་གཡོགས། །ཞེས་སོ། །སྟན་དང་བཅས་ཏེ་ཐབ་ཏུ་བཞག །ཅེས་པ་ནི་སྟན་པདྨ་འདབ་མ་བརྒྱད་པ་ཅིག་རས་ལ་བྲིས་ཏེ། དེ་དང་བཅས་པར་ཐབ་ཀྱི་དབུས་སུ་ཁ་ནུབ་ཕྱོགས་
སུ་བསྟན་ལ་གཞག་གོ །དེ་ནས་ཕྲག་གནོན་བཏང་ལ་སྟེང་དུ་ཤིང་བརྩིག་གོ །དེ་ནས་རྣལ་འབྱོར་པ་སྦྱིན་སྲེག་གི་ལས་ལ་འཇུག་པར་བྱ་སྟེ། དེ་ཡང་སྔགས་པ་བདག་ཉིད་ཁ་ཤར་ཕྱོགས་སུ་བལྟས་ལ་ལས་བྱའོ། །དེ་ནས་རྫས་ཀྱི་རིམ་པ་མར་ཁུ་དང༌། འོ་མ་དང། ཏིལ་དང༌། ཡུངས་ཀར་དང༌། འབྲས་ཆན་དང༌། འབྲས་ཡོས་དང༌། དཱུཪྺ་དང༌། ཡམ་ཤིང་དང༌། མེ་འབར་བའི་ཤིང་ལ་སོགས་པ་ལ་གུར་གུམ་ལ་སོགས་པ་དྲི་ཞིམ་པོ་དག་གིས་བསྒོས་ཤིང་བྱུག་པ་དག་དགྲམ་མོ། །དེ་ནས་ཡོ་བྱད་རྣམས་ལ་ལས་ཐམས་ཅད་པ་རྡོ་རྗེ་གནོད་སྦྱིན་ནོ། །རྡོ་རྗེ་རྩེ་མོའི་སྔགས་ཀྱིས་གདབ་བོ། །དེ་ནས་རང་རེའི་སྔགས་ཀྱིས་བྱིན་གྱིས་བརླབ་བོ། །དེ་ནས་བྱིན་ཟ་དགེ་བ་ལེགས་སྦར་ལ། །ཞེས་བྱ་བ་ལ་སོགས་པ་གསུངས་ཏེ། །དེའི་དོན་ཡང་འདི་ལྟར་ཤེས་པར་བྱ་སྟེ། ཤིན་ཏུ་གཙང་བའི་རྩྭ་ཀུ་ཤའི་ཁྲེས་ལ་བདག་ཉིད་བཟང་པོའི་འདུག་སྟངས་ཀྱིས་འདུག་གོ །ཆོས་ཐམས་ཅད་སྟོང་པ་ཉིད་དུ་བསྒོམ་མོ། །དེ་ནས་ཁྲོ་བོ་བགེགས་ལས་རྣམ་པར་རྒྱལ་བར་བདག་ཉིད་བསྐྱེད་ལ། བསྲུང་བའི་ཆོག་གོང་ནས་འབྱུང་བ་བཞིན་དུ་བྱས་ལ། དེ་ནས་སྔོན་དུ་འགྲོ་བའི་ཡན་ལག་རྫོགས་པར་བྱས་ཏེ། བདག་ཉིད་མངོན་པར་བྱང་ཆུབ་པས་ལྷའི་སྐུའི་རྣམ་པར་བསྒོམ་མོ། །དེ་ཡང་རྒྱུ་འདི་ཉིད་ལས་ཆོས་ཐམས་ཅད་དངོས་པོ་མེད་པར་སེམས་ཀྱིས་བསྒོམ་པར་བྱ་བ་ནི། ཨ་ལས་ཟླ་བའི་དཀྱིལ་འཁོར་བསམ། །ཞེས་པ་ལ་སོགས་པའི་གསུང་ལས། བདག་རྣམ་པར་སྣང་མཛད་དུ་དེ་དང་སྔགས་འདིས་བསྐྱེད་དོ། །ཨོཾ་ཤོ་དྷ་ནེ་ཤོ་དྷ་ནེ་སརྦ་པཱ་པཾ་བི་ཤོ་དྷ་ནི། ཤུདྡྷེ་བི་ཤུདྡྷེ་སརྦ་ཀརྨ་ཨཱ་བ་ར་ཎཱ་བི་ཤུདྡྷེ་སྭཱ་ཧཱ། སྐུ་གོང་ལྟར་བསྐྱེད་དོ། །དེ་ནས་རྡོ་རྗེ་དབྱིངས་ཀྱི་དབང་ཕྱག་མའི་ཕྱག་རྒྱས་བྱིན་གྱིས་བརླབ་པོ། །དེའི་སྔགས་དང་ཕྱག་རྒྱ་ནི་འདི་ཡིན་ཏེ། མཐེ་བོང་གཉིས་ནི་སྐྱིལ་མོ་ཀྲུང༌། །མཛུབ་མོ་གཉིས་ནི་རྩེ་མོ་དགུག །གུང་མོའི་རྩེ་མོ་མཉམ་པ་སྟེ། །རྡོ་རྗེ་དབྱིངས་ཀྱི་དབང་མོར་བཤད། །ཅེས་པ་དང༌། ཨོཾ་བཛྲི་དྷཱ་ཏྭཱི་ཤྭ་རི་ཧཱུཾ། ཨོཾ་བཛྲ་ཎཱི་ཨ་དྷི་ཏིཥྛ་མཾ་ཞེས་བརྗོད་ཅིང་སྙིང་ག་དང་སྨིན་མཚམས་དང་ལྐོག་མ་དང་སྤྱི་བོར་བྱིན་གྱིས་བརླབ་པོ། །དེ་ནས་དབང་
བསྐུར་ཏེ། རྡོ་རྗེ་བཅིང་བ་ལས་མཐེ་བོང་གཉིས་རྩེ་མོ་ཅན་དུ་བྱས་ཏེ། དེའི་སྟེང་དུ་མཛུབ་མོ་ཕན་ཚུན་ངོས་སྤྲད་དེ། རིན་པོ་ཆེའི་རྩེ་མོ་འདྲ་བར་བྱས་པ་ནི་རིན་པོ་ཆེའི་ཕྱག་རྒྱ་སྟེ། ཨོཾ་བཛྲ་རཏྣ་ཞེས་བྱ་བའི་སྙིང་པོ་དང་བཅས་པས་དབང་བསྐུར་རོ། །དེ་ནས་རང་གི་ལྕེ་ལ་རྡོ་རྗེ་རྩེ་ལྔ་པ་ཆོས་ཀྱི་ཕྱག་རྒྱ་ཧཱུཾ་ལས་བསྐྱེད་དེ། དེའི་དབུས་སུ་ཆོས་ཀྱི་ཡི་གེ་སྐུ་བསྐྱེད་པའི་སྙིང་པོ་བསམ་མོ། །དེ་ནས་ལས་ཀྱི་ཕྱག་རྒྱ་རང་གི་སྙིང་གར་རྡོ་རྗེ་རྒྱ་གྲམ་ཡི་གེ་ཨ་ལས་བསམ་མོ། །དེ་ལྟར་བདག་དམ་ཚིག་སེམས་དཔའི་སྐུ་རྫོགས་པར་བསྐྱེད་པ་དེས་རྡོ་རྗེ་ར་བ་དང་དྲ་བ་ལ་སོགས་པ་བསམ་པར་བྱ་སྟེ། ལས་ཐམས་ཅད་པའི་བུམ་པའི་ཆུ་དང༌། ཨོཾ་བཛྲ་ཡཀྵ་ཧཱུཾ་ཞེས་བྱ་བས་མེ་བསངས་ཏེ། མཆོད་ཡོན་ལ་སོགས་པ་མཆོད་པ་རྣམ་པ་ལྔ་ནི་གཡོན་དུ་བཞག །རྡོ་རྗེ་ དྲིལ་བུ ་མདུན་དུ་བཞག །མར་ཁུ་དང་དགང་བླུགས་མདུན་དུ་བཞག །སྲེག་རྫས་རྣམས་གཡས་སུ་གཞག་གོ །དེ་ནས་བདག་གིས་རྫས་དེ་རྣམས་སྟོབས་དང་ལྡན་པར་བྱ་བ་དང༌། ཆོ་ག་ཐམས་ཅད་ལ་ནུས་པ་ཡོད་པའི་ཆེད་དུ་ཁ་དང་ལག་པ་བྱིན་གྱིས་བརླབ་པར་བྱའོ། །དེ་ནས་སྐུ་གསུང་ཐུགས་ཀྱི་དམ་ཚིག་གསུམ་དང་ལྡན་པར་བྱ་བའི་ཆེད་དུ་རྡོ་རྗེ་ དྲིལ་བུ ་གཟུང་བར་བྱ་སྟེ། དེ་ཡང་ཧཱུཾ་དང་ཨཿ་ལས་རྡོ་རྗེ་ དྲིལ་བུ ་བསྐྱེད་དེ། དེ་ཁོ་ན་ཉིད་ཀྱིས་གཟུང་བར་བྱའོ། །དེ་ནས་བདག་ཉིད་མཆོད་པ་བརྒྱད་ཀྱིས་མཆོད་དོ། །དེ་ནས་གསང་བའི་ཐབ་ཁུང་མི་དམིགས་པ་ལས་ཡི་གེ་ཧཱུཾ་ངམ་ལྷའི་ཆོས་ཀྱི་ཡི་གེ་ལས་ཐབ་ཁུང་སྔར་བྲིས་པ་བཞིན་བསྐྱེད་ལ། དེ་ནས་པདྨ་འདབ་མ་བརྒྱད་པ་ཅིག་བསམས་ཏེ། དེའི་དབུས་ཀྱི་ལྟེ་བ་ལ་ཡི་གེ་རཾ་འབར་བ་ལས་གྱུར་པའི་གྲུ་གསུམ་བསྐྱེད་ལ། གྲུ་གསུམ་དེའི་ཤར་ལ་སོགས་པའི་ཟུར་ལ་ཨོཾ་ཨཱཿ་ཧཱུཾ་གསུམ་ཁམས་གསུམ་གྱི་བདག་པོར་བསྒོམས་པ་ལས། འཁོར་ལོ་དང་པདྨ་དང་རྡོ་རྗེ་རང་རང་གི་ཡི་གེས་མཚན་པ་བསྐྱེད་ལ། དེའི་དབུས་སུ་རཾ་ལས་བྱུང་པའི་འབར་བའི་མེ་རཾ་དང་བཅས་པ་མཐོང་སྟེ། གོང་གི་ཕྱག་མཚན་རཾ་དང་བཅས་པ་འོད་དུ་ཞུ་བ་ལས་མེ་འབར་བར་བསམ་ཞིང༌། དམ་ཚིག་གི་གསང་སྔགས་ཧཱུཾ་བཛྲ་ཨ་ན་ལ་མ་ཧཱ་བྷཱུ་ཏ་ཛྭལ་ཡ་བྷ་སྨིཾ་ཀུ་རུ་སརྦ་དུཥྚཱཾ་ཧཱུཾ་ཕཊ་ཅེས་བརྗོད་པས། རྡོ་རྗེ་མེ་ལྷའི་གཟུགས་སུ་གྱུར་ཏེ། དེ་ཡང་སྐུ་མདོག་དཀར་པོ་ཞལ་
གཅིག་ཕྱག་བཞི་པ། སྤྱན་གསུམ་པ་རལ་པའི་ཐོར་ཚུགས་དང་ལྡན་པ། གཡས་གཉིས་ན་དབྱུག་པ་དང༌། མི་འཇིགས་པ། གཡོན་གཉིས་ན་ཕྲེང་བ་དང་གུནྡྷེ་འཛིན་པའོ། །གོས་དང་རྒྱན་དང་མཆོད་ཕྱིར་ཐོགས་དཀར་པོ་དང་ལྡན་པ། ལུས་ཀྱི་ཡན་ལག་ཐམས་ཅད་ལ་མེ་ལྕེ་སྟོང་གིས་དཀྲིས་ཤིང་འོད་འབར་བར་བསམས་ནས། དེ་ལྟར་མེ་ལྷ་དམ་ཚིག་སེམས་དཔའ་བསྐྱེད་ནས་དེ་ནས་མེ་ལྷ་དེའི་ཐུགས་ཀར་ཁྲོ་བོ་རྣམ་པར་རྒྱལ་བ་ཡི་གེ་ཧཱུཾ་ལས་བསྐྱེད། དེ་ལ་ཡེ་ཤེས་ཀྱི་ཁྲོ་བོ་ལྕགས་ཀྱུ་ལ་སོགས་པས་བསྟིམས་ལ། དེ་ནས་ཞལ་བསིལ་ལ་སོགས་པ་དབུལ་ལོ། །དེ་ནས་སྒེག་མོ་ལ་སོགས་པས་མཆོད་དོ། །དེ་ནས་རྫས་རྣམས་རང་རང་གི་སྔགས་དང༌། ཨོཾ་ཏྲཻ་ལོ་ཀྱ་བི་ཛ་ཡ་སྭཱ་ཧཱ་ཞེས་པས་དབུལ་ལོ། །དེ་ནས་བསྟོད་དེ་ཕྲིན་ལས་བཅོལ། །དེ་ནས་བྱིན་ཟ་དགེ་བ་ལེགས་སྦར་ལ། །ཞེས་པ་ནི་མེ་རྒྱུན་བཞག་གི་མེའམ། ཤིང་འོ་མ་ཅན་ལས་བྱུང་བ་འམ། བྲམ་ཟེ་ཐ་མལ་བའི་མེ་ལ་སོགས་པ་བླངས་ཏེ། ལས་ཐམས་ཅད་པའི་ཆུས་བསང་གཏོར་བྱའོ། །དེ་ནས་ཤིང་སྐམ་ཞིང་གཙང་བའི་བུད་ཤིང་བཅུག་ལ། ཨོཾ་ཛྭ་ལ་ཛྭ་ལ་ཧཱུཾ་ཞེས་བཟླས་ཤིང་རླུང་ཡབ་ཀྱིས་མེ་སྦར་བར་བྱའོ།། དེ་ནས་འབར་བ་དང་གོང་གི་དམ་ཚིག་གི་མེ་དང་ཐ་མི་དད་པར་བསམས་ལ། ཡེ་ཤེས་ཀྱི་མེ་སྤྱན་དྲང་བར་བྱའོ། །མེ་ལྕེ་སྟོང་གིས་དཀྲིས་ཤིང་འབར་བ་ཡི། །ཟླ་དཀར་ཀུནད་བཞིན་ལ་ཞི་བའི་ལུས། །མཐའ་ཡས་པ་ཡི་གཟུགས་ཀྱི་མེ་བཀུག་ལ། །ཞེས་བྱ་བ་ནི་ཡེ་ཤེས་ཀྱི་མེ་སྔགས་དང་ཕྱག་རྒྱ་འདིས་སྤྱན་དྲང་བར་བྱ་སྟེ། ལག་པ་གཡས་པ་མི་འཇིགས་པའི་ཕྱག་རྒྱ་བྱས་ལ་མཐེ་བོང་གི་རྩེ་མོ་སྲིན་ལག་གི་དྲུང་དུ་བཙུགས་ལ་དགུག་པའི་ཚུལ་གྱིས་ཡང་ནས་ཡང་དུ་བསྐྱོད་དེ། མངོན་པར་འདོད་པའི་ཚིག་འདི་བརྗོད་ཅིང་སྤྱན་དྲང་ངོ༌། །ཨོཾ་གཟི་བརྗིད་ཆེན་པོ་མེ་ཡི་ལྷ། །འདོད་པ་ཐམས་ཅད་སྒྲུབ་བྱེད་ཅིང༌། །ཐུགས་རྗེས་སེམས་ཅན་དོན་ཀུན་མཛད། །འདི་ཉིད་དུ་ནི་གཤེགས་སུ་གསོལ། །ཞེས་སོ། །སྤྱན་དྲངས་པའི་མེ་ལྷ་དེ་ཡང་སྐུ་ལ་མེ་ལྕེ་སྟོང་གིས་དཀྲིགས་པའི་འོད་འབར་བ། སྐུ་མདོག་དཀར་པོ་ཞི་བའི་ཆ་ལུགས་སུ་བཞུགས་པ་དེ་ལ་འཐོར་འཐུང་བྱ་སྟེ།
རྡོ་རྗེ་ལྕགས་ཀྱུ་ལ་སོགས་པས་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱས་ཏེ། དམ་ཚིག་སེམས་དཔའ་དང་གཉིས་སུ་མེད་པར་བསྟིམ་པར་བྱའོ། །དེ་ནས་གདན་བསྟབ་པར་བྱའོ། །ཨརྒྷཾ་དབུལ་བར་བརྟགས་ནས་དེ་བཞིན་དུ་ཞེས་བྱ་བ་ནི་མཆོད་ཡོན་དབུལ་བར་བྱ་སྟེ། ལག་པ་གཡས་བའི་སོར་མོ་ཐམས་ཅད་བཀུག་ལ་མཐེ་བོང་དང་མཛུབ་མོ་གཉིས་སྦྱར་བས་མེ་ཏོག་བླངས་ཏེ་ཞབས་བསིལ་ཕུལ་ཏེ་སོར་མོ་རྣམས་བརྐྱང་བ་ནི་ཞབས་བསིལ་གྱི་ཕྱག་རྒྱ་སྟེ། ཨོཾ་པྲ་བ་ར་ས་ཏྐཱ་ར་ཏྱཾ་པྲ་ཏཱིཙྪ་སྭཱ་ཧཱ་ཞེས་བྱའོ། །དེ་ནས་མཆོད་ཡོན་ཕྱག་ཏུ་དབུལ་བར་བྱའོ། །ཨི་མཾ་ཨརྒྷཾ་མ་ཡ་ཏྲ་ཏ་མ་ཀྲི་ཧ་ན་སིདྡྷིམྨེ་པྲ་ཡཙྪ་སྭཱ་ཧཱ། མཆོད་ཡོན་ལེན་གསུམ་དབུལ་བར་བྱའོ། །དེ་ནས་ལྕེ་ལ་རྡོ་རྗེ་དཀར་པོ་རྣམ་པར་བསམས་ལ། ཨོཾ་བཛྲ་ཛྭ་ལ་ཛྭ་ལ་ཧཱུཾ་ཕཊ་ཅེས་པས་མེའི་ཆོས་ཀྱི་ཕྱག་རྒྱ་དགོད་དེ། དེ་ལ་སོགས་པ་ལས་ཀྱི་ཕྱག་རྒྱ་དང། དབང་བསྐུར་བ་དང༌། དམ་ཚིག་བསྒྲགས་པ་དང༌། བརྟན་པར་བྱ་བ་དང༌། ལས་བཅོལ་བ་དང༌། ཕྱི་ནང་གི་མཆོད་པས་མཆོད་པ་དང༌། དེ་ནས་མེ་ལྷའི་ལྕེ་དང་དགང་གཟར་དང༌། བླུགས་གཟར་གྱི་ཁ་ལ་རཾ་བསམས་ཏེ། བུས་མོ་གཉིས་ཀྱི་བར་དུ་ལག་པ་བཞག་སྟེ་སྲེག་རྫས་ཀྱིས་མཆོད་པ་དང་བསྟོད་པ་ལ་སོགས་པ་བྱའོ། །བློ་མཆོག་ལྡན་པའི་མདུན་དུ་གཟུགས་སོགས་བཞག །ཅེས་པ་ནི་མེ་ལྷ་དེ་མཆོད་པས་མཆོད་པའི་རྟེན་ལ་དབང་པོར་མདུན་དུ་བཞུགས་སུ་གསོལ་བའོ། །ཇི་སྐད་གསུངས་པའི་ཡོན་ཏན་འདོད་པ་ཡིས། །ཞེས་བྱ་བ་ནི་ཀུན་རིག་རྣམ་པར་སྣང་མཛད་ལ་སོགས་པ་མཆོད་དེ། དེའི་དོན་ཡང་འདི་ལྟར་ཤེས་པར་བྱ་སྟེ། དེ་ནས་མེ་ལྷ་དམ་ཚིག་སེམས་དཔའ་དེའི་ཐུགས་ཀར་རྡོ་རྗེ་འཁོར་ལོའི་སྔགས་དང་ཕྱག་རྒྱས་རིན་པོ་ཆེའི་གཞལ་ཡས་ཁང་རེ་མིག་དགུ་ལྟེ་བ་དང་བཅས་པའི་འཁོར་ལོ་རྩིབས་བཅུ་དྲུག་པ་གྲུ་ཆད་དང༌། ཁྱམས་དང༌། སྒོ་ཁྱུད་དང༌། རྟ་བབས་དང༌། ཐེམ་སྐས་ལ་སོགས་པས་བརྒྱན་པར་བསམས་ལ། མེ་ལྷའི་ཐུགས་ཀའི་ཟླ་བ་དང་པདྨའི་སྟེང་དུ་ལྷ་རྣམས་རེ་རེ་ས་བོན་ན་གྱི་ཡི་གེ་ཡོངས་སུ་གྱུར་པའི་མཚན་མ་ལས་བྱུང་པ་ལས་དང་རྗེས་སུ་མཐུན་པའི་རྒྱན་དང༌།
ཁ་དོག་ལ་སོགས་པ་དང་ལྡན་པའི་ཀུན་རིག་རྣམ་པར་སྣང་མཛད་ལ་སོགས་པ་དམིགས་ཏེ་གསལ་བར་བསམ་མོ། །དེ་བཞིན་གཤེགས་པ་ཚོགས་དེ་ལྟར་སྤྱན་དྲངས་ལ་ཞེས་བྱ་བ་ནི་སྒོ་དབྱེ་བ་བྱས་ནས། བདག་གི་སྙིང་གར་སྣ་ཚོགས་རྡོ་རྗེ་བསམས་པ་ལས་རྡོ་རྗེ་བསྡུ་བའི་སྙིང་པོ་ཨོཾ་བཛྲ་ས་མཱ་ཛཿ་ཛཿ་ཞེས་བརྗོད་ཅིང་རྡོ་རྗེ་ཁུ་ཚུར་གཉིས་བསྣོལ་ཏེ་དཔུང་མགོར་བཞག་ལ་མཛུབ་མོ་གཉིས་ལྕགས་ཀྱུ་ལྟར་བྱས་ལ་གུང་མོ་དང་མཐེ་བོང་གཉིས་གཏོགས་ཤིང་དེ་བཞིན་གཤེགས་པ་འཁོར་དང་བཅས་པ་རྣམས་རང་རང་གི་གནས་ནས་བསྐུལ་ཏེ། ཇི་ལྟར་བསམ་པའི་གནས་ཀྱི་ཁོ་ར་ཁོར་ཡུག་དུ་བཞུགས་པར་བསམ་མོ། །དེ་ནས་མཆོད་ཡོན་ཕུལ་ཏེ་བསྟོད་པས་བསྟོད་ལ། རྡོ་རྗེ་གནོད་སྦྱིན་གྱིས་རང་བཞིན་གྱིས་ཕྱི་ནས་འོང་བའི་བགེགས་བསྐྲད་པར་བྱའོ། །དེ་ནས་ཤར་ཕྱོགས་ཀྱི་སྒོར་རྡོ་རྗེ་ལྕགས་ཀྱུའི་ལས་ཀྱི་ཕྱག་རྒྱ་བཅིངས་ཏེ་ཕྱག་རྒྱ་དེ་ཉིད་ཤར་ཕྱོགས་ཀྱི་སྒོར་ལྕགས་ཀྱུ་ལྟར་གྱུར་པར་བསམས་ལ། ཨོཾ་བཛྲ་ཨོཾ་ཀུ་ཤ་ཛཿ་ཛཿ་ཞེས་བརྗོད་པས་ལྕགས་ཀྱུས་དགུག་པའི་ཚུལ་གྱིས་དེ་བཞིན་གཤེགས་པ་རྣམས་སོ་སོའི་སྒོ་དྲུང་དུ་བྱོན་པར་བསམ་མོ། །ཕྱག་རྒྱ་དེ་ཉིད་བཀྲོལ་ནས་ལྷོ་ཕྱོགས་ཀྱི་སྒོར་ཞགས་པའི་ལས་ཀྱི་ཕྱག་རྒྱ་བཅིངས་ཏེ། ཕྱག་རྒྱ་དེ་ཉིད་ལྷོ་ཕྱོགས་ཀྱི་སྒོར་ཞགས་པར་གྱུར་པར་བསམས་ལ་ཨོཾ་བཛྲ་པཱ་ཤ་ཧཱུཾ་ཞེས་བརྗོད་པས་ཞགས་པས་དྲངས་པའི་ཚུལ་གྱིས་དེ་བཞིན་གཤེགས་པ་རྣམས་སོ་སོའི་སྒོའི་ནང་དུ་ཞུགས་པར་བསམ་མོ། །ཕྱག་རྒྱ་དེ་ཉིད་བཀྲོལ་ནས་ནུབ་ཕྱོགས་ཀྱི་སྒོར་ལྕགས་སྒྲོག་གི་ཕྱག་རྒྱ་བཅིངས་ཏེ། ཕྱག་རྒྱ་དེ་ཉིད་ནུབ་ཕྱོགས་ཀྱི་སྒྲོ་ལྕགས་སྒྲོག་ཏུ་གྱུར་པར་བསམས་ལ། ཨོཾ་བཛྲ་སྤོ་ཊ་བཾ་ཞེས་བརྗོད་པས་ལྕགས་སྒྲོག་གིས་བསྡམ་པའི་ཚུལ་གྱིས་དེ་བཞིན་གཤེགས་པ་རྣམས་སོ་སོའི་སྒོའི་ནང་དུ་ཞུགས་པར་བསམ་མོ། །ཕྱག་རྒྱ་དེ་ཉིད་བཀྲོལ་ནས་བྱང་ཕྱོགས་ཀྱི་སྒོར་རྡོ་རྗེ་འབེབས་པའི་ལས་ཀྱི་ཕྱག་རྒྱ་བཅིངས་ཏེ། ཕྱག་རྒྱ་དེ་ཉིད་བྱང་ཕྱོགས་ཀྱི་སྒོར་དྲིལ་བུར་གྱུར་པར་བསམས་ལ། ཨོཾ་བཛྲ་ཨཱ་བེ་ཤ་ཧོཿ་ཞེས་བརྗོད་ཅིང་ དྲིལ་བུ ་བསྐྱོད་པའི་ཚུལ་གྱིས་དེ་བཞིན་གཤེགས་པ་རྣམས་མཉེས་པར་བསམས་ཏེ་ཕྱག་རྒྱ་དེ་ཉིད་དགྲོལ་
ལོ། །དེ་ནས་དཀྱིལ་འཁོར་གྱི་ལྷ་དེ་རྣམས་ལ་དབང་བསྐུར་བ་དང་བྱིན་གྱིས་བརླབ་པ་དང༌། ཕྱག་རྒྱ་བཞིས་རྒྱས་གདབ་པ་རྣམས་བྱའོ། །ཨརྒྷཾ་ལ་སོགས་དབུལ་ཞིང་དེ་བཞིན་དུ། །བདེ་གཤེགས་གསུངས་པའི་མཆོད་པ་གང་ཡིན་བྱ། །ཞས་བྱ་བ་ནི་ཕྱག་བཙལ་བ་དང༌། མཆོད་པ་རྣམ་པ་ལྔས་མཆོད་པ་དང༌། ཕྱི་ནང་གི་མཆོད་པ་བརྒྱད་ཀྱིས་མཆོད་པ་དང༌། མཆོད་པ་ཉི་ཤུས་མཆོད་པ་བྱ་སྟེ་ཡེ་ཤེས་སེམས་དཔའི་ཐུགས་ཀའི་མཚན་མའི་དབུས་སུ་རང་གི་ཆོས་ཀྱི་ཡི་གེས་དཀྱིལ་འཁོར་གྱི་ལྷ་ཐམས་ཅད་ཀྱི་ངོ་བོ་ཉིད་དུ་མཐོང་སྟེ། ཡང་མཆོད་ཡོན་ཕུལ། འཐོར་འཐུང་གིས་སྔ་མ་བཞིན་དུ་སྦྱིན་སྲེག་གི་ཡོ་བྱད་ཐམས་ཅད་བསང་གཏོར་བྱས་ལ། དགང་གཟང་དང་བླུགས་གཟར་ལག་ཏུ་ཐོགས་ཏེ། དེ་ནས་བྱིན་ཟ་ལ་ནི་བརྟག་པར་བྱ། །ཞེས་པ་ནི་བྱིན་ཟ་བརྟག་སྟེ། དབྱིབས་དང་ཁ་དོག་ལེགས་པར་བསམ་པའོ། །བསྲེག་བྱས་བཀང་སྟེ་སྦར་བར་བྱ་བའི་ཕྱིར། །ཞེས་པ་ནི་དགང་གཟར་མར་གྱིས་བཀང་སྟེ་སྦར་བར་བྱའོ། །སྲེག་རྫས་ཀྱིས་མཆོད་པར་བྱའོ། །དེ་ནས་བསྲེག་བྱས་བཀང་སྟེ་རིམ་གྱིས་ནི། །རྒྱལ་ལ་སོགས་པ་ལ་བརྒྱ་རྩ་བརྒྱད་དུ་བཏགས། །ཞེས་པ་ནི་དེ་ལས་དང་པོར་གཙོ་བོ་ལ་དབུལ་ལོ། །དེ་ནས་རྒྱལ་བ་རིགས་ལྔ་དང༌། སེམས་དཔའ་བཅུག་དྲུག་ལ་བརྒྱ་རྩ་བརྒྱད་དབུལ་ལོ། །དེ་ནས་སྦྱོང་བའི་སྔགས་ཀྱི་རྒྱལ་པོ་ལ། །བསྲེག་པར་བྱ་བ་ཉི་ཤུ་རྩ་གཅིག་དབུལ། །ཞེས་པ་ནི་རྫས་དེ་རྣམས་ནི་མེའི་ཞལ་དུ་བསྟབ་བོ། །ལྷག་མ་རྣམས་ལ་ནི་ཉི་ཤུ་རྩ་གཅིག་གིས་མཆོད་དོ། །དེ་ནས་བསྟོད་པས་བསྟོད་དོ། །དེ་ནས་གང་འདོད་པའི་དངོས་གྲུབ་རྣམས་གསོལ་བ་གདབ་བོ། །དེ་ནས་བཟོད་པར་གསོལ་ཏེ་ཡི་གེ་བརྒྱ་པས་བྱའོ། །དེ་ནས་སྤྱན་དྲངས་པ་གཤེགས་སུ་གསོལ་ལོ། །དམ་ཚིག་སེམས་དཔའ་ལུས་ལ་བསྡུའོ། །དེ་ནས་སྤྱན་དྲངས་ཡོ་བྱད་ལན་གསུམ་དང༌། །མཆོད་ཡོན་ལ་སོགས་པདྨའི་དཀར་ཞལ་མཆོད། །ཅེས་བྱ་བ་དེ་ལས་ཡེ་ཤེས་ཀྱི་མེ་ལྷ་དེ་ཤར་ལྷོ་མཚམས་ནས་ཐབ་ནང་གི་རང་གི་ལུས་ལ་ཞུགས་པའི་ཕྱིར་སྤྱན་དྲངས་ཏེ། མེ་ལྷ་དེ་ལ་མཆོད་ཡོན་ལ་སོགས་པ་ཕུལ་ཏེ། ཡོ་བྱད་ལྷག་མ་རྣམས་ཀྱིས་ལན་གསུམ་གསུམ་དུ་སྦྱིན་སྲེག་བྱའོ། །དེའི་མཐའ་མར་ཡོན་བདག་གཡོན་དུ་བཞག་ལ་
སྒྲུབ་པ་པོས་དངོས་གྲུབ་གང་འདོད་པ་གསོལ་བ་གདབ་བོ། །དེ་ནས་བདག་གི་དོན་དང་གཞན་གྱི་དོན། །བྱིན་ཟ་ཁྱོད་ནི་གྲུབ་ལགས་ཀྱིས། །ཇི་བཞིན་དོན་དུ་སླར་གཤེགས་ལ། །སླར་ཡང་སེམས་ཅན་དོན་ལ་གཤེགས། །ཞེས་པས་གཤེགས་སུ་གསོལ་ལོ། །ཕྱག་ན་རྡོ་རྗེ་པདྨའི་ཞགས་པ་བསྣམས། །ཞེས་བྱ་བ་ལ་སོགས་པ་ནི་ཡང་མེ་ཐབ་དང་ཡོ་བྱད་རྣམས་བསངས་ལ། བདག་དམ་ཚིག་སེམས་དཔར་བསྒོམས་པའི་ཐུགས་ཀར་ཡི་གེ་ཧཱུཾ་བསམས་པ་ལས། བདག་ཉིད་ཁྲོ་བོ་ཕྱག་ན་རྡོ་རྗེ་ཧཱུཾ་ཞེས་བྱ་བར་གྱུར་ཏེ་བཞིན་དང་ཆ་ལུགས་ཁྲོ་བོའི་ཚུལ་ཅན་དུ་བསམ་མོ། །མདུན་དུ་མེ་ཐབ་ཏུ་ཡང་ཡི་གེ་ཧཱུཾ་ལས་རྡོ་རྗེ་སེམས་དཔར་གྱུར་ནས། རྡོ་རྗེ་སེམས་དཔའི་ཐུགས་ཀ་ནས་ཨོཾ་བཛྲ་སཏྭ་ཀྲོ་དྷ་ཨ་ན་ལཱརྐ་མ་ཧཱ་བཛྲ་ཀྲོ་དྷ་དྲ་བ་དྲ་བ་བི་དྲ་བ་བི་དྲ་བ། སརྦ་པཱ་པཾ་ནཱ་ཤ་ཡ་ནཱ་ཤ་ཡ་ཧ་ར་ཧ་ར་པྲཱ་ཎཱ་ན་ཧཱུཾ་ཕཊ་ཅེས་བརྗོད་པས་ཁྲོ་བོ་ཁམས་གསུམ་རྣམ་པར་རྒྱལ་བའི་གཟུགས་སུ་གྱུར་ཏེ། སྐུ་མདོག་སྔོན་པོ་ཞལ་བགྲང་ཅིང་མཆེ་བ་གཙིགས་པ། ཕྱག་ན་རྡོ་རྗེ་དང་པདྨ་དང་རལ་གྲི་དང་ཞགས་པ་བསྣམས་པའོ། །ཞབས་ཀྱི་པདྨས་སྡིག་མནན་ཅིང༌། །ཞེས་པ་ནི་ཁམས་གསུམ་རྣམ་པར་རྒྱལ་བའི་ཞབས་ཀྱི་པདྨས་མ་ཧཱ་དེ་བ་མནན་པའོ། །སྐུ་ལ་སྤྲུལ་གྱིས་བརྒྱན་པ། སྐུ་སྨད་སྟག་གི་པགས་པས་དཀྲིས་བ་འཁོར་ཁྲོ་བོ་མང་པོས་བསྐོར་བ་ནི། །རྒྱན་རྣམས་ཀུན་གྱིས་ལེགས་བརྒྱན་པ། །ཞེས་པའོ། །རྫོགས་སངས་རྒྱས་ནི་དབུ་རྒྱན་མཐོ། །ཞེས་པ་ནི་རིགས་ལྔའི་སངས་རྒྱས་ཀྱིས་དབུ་ལ་བརྒྱན་པའོ། །བསམས་སམ་ནི་ཏིང་ངེ་འཛིན་ནོ། །བྲིས་པ་ནི་མིག་གི་རྟེན་ཏོ། །དེ་ལྟར་ཁྲོ་བོ་དེ་བསྐྱེད་ལ་ཡེ་ཤེས་ཀྱི་ཁྲོ་བོ་ཡང་སྤྱན་དྲངས་ཏེ། བསྟིམས་ལ་མཆོད་ཡོན་དང་ཞབས་བསིལ་ལ་སོགས་པ་དབུལ་ལོ། །དེ་ཡི་སྙིང་པོས་དེ་བཞིན་དུ། །ཞེས་བྱ་བ་ནི་དང་པོར་ཁྲོ་བོའི་སྔགས་གོང་མས་མར་དང་ཡམ་ཤིང་ཕུལ་ལ། དེ་ནས་རྫས་རྣམས་གཅིག་ཏུ་བསྲེས་ཏེ་བདུད་རྩི་འཁྱིལ་པའི་སྔགས་ཀྱིས་བཏབ་ལ། ལག་པ་གཡོན་པ་ཁུ་ཚུར་བཅངས་ནས། བྲང་ལ་དཔུང་པ་དམ་དུ་བཅུམ་ལ་ལག་པ་གཡས་པས་སྦྱིན་སྲེག་བྱའོ། །རྣམ་པར་རྒྱལ་བའི་སྔགས་དང་
ཤི་བའི་མིང་སྤེལ་ལ་བརྒྱའམ་སྟོང་ངམ་བྱེ་བའི་ཚད་དུ་སྦྱིན་སྲེག་བྱའོ། །བར་བར་དུ་མིང་འདི་ཞེས་བྱ་བའི་ཉོན་མོངས་པའི་སྒྲིབ་པ་ཐམས་ཅད་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ། ཞེས་བརྗོད་ཅིང་ཏིལ་བསྲེག་གོ །ཕྱི་མ་དཀྱུས་ན་གསལ་ལོ། །དེ་ནས་ཁྲོ་བོ་གཤེགས་སུ་གསོལ་ལ་བདག་ཉིད་ཕྱག་རྒྱ་བཀྲོལ་ཞིང་ལུས་བསྲུང་བ་ལ་སོགས་པ་བྱའོ། །དེ་ནས་ཐལ་བར་གྱུར་པ་དང༌། །ཞེས་བྱ་བ་ལ་སོགས་པ་ནི་དེ་ལྟར་བསྲེགས་ནས་ཐལ་བར་གྱུར་པ་དང༌། རྡོ་རྗེ་བསྡུ་བའི་སྔགས་སཾ་ཧ་ར་ཎ་བཛྲ་ཧཱུཾ་ཞེས་པའི་ཆོ་གས་བསྡུ་བར་བྱའོ། །དེ་ལྟར་རུས་པ་དང་ཐལ་བ་དེ་བསྡུས་ནས་སྣོད་གཙང་མར་བཅུག་སྟེ། མཆོད་རྟེན་གདབ་པའི་ཕྱོགས་སུ་གཞག་གོ །སྔགས་ཀྱིས་བཏབ་པའི་དྲི་ཆུ་དང༌། །ཞེས་པ་ལ་སོགས་པ་ནི་ག་བུར་ལ་སོགས་པའི་དྲི་ཆུ་དང༌། བ་སྐྱེས་འོ་མ་ལ་སོགས་ཏེ་བའི་རྣམ་ལྔ་དང༌། རུས་པ་ལ་ངན་སོང་སྦྱོང་བའི་སྔགས་འབུམ་ཡན་ཆད་བཟླས་ལ། གཟུགས་སུ་བྱ་བའམ་ཞེས་པ་ནི་དཀྱིལ་འཁོར་གྱི་ལྷ་གང་ཡང་རུང་བར་བྱ་བའམ། ཡང་ན་ནི། མཆོད་རྟེན་གྱི་ནི་ལྷར་བྱས་ལ། །ཞེས་བྱ་བ་ནི་ཡང་ན་མཆོད་རྟེན་གྱི་གཟུགས་སུ་བྱས་ཏེ། གཅིག་གམ་གཉིས་སམ་གསུམ་མམ་ལྔའམ་ཡང་ན་བརྒྱ་རྩ་བརྒྱད་ཀྱི་བར་དུ་གདབ་བོ། །སྔགས་དང་ཕྱག་རྒྱས་གདབ་པར་བྱ།། ཞེས་པ་ནི་ངན་སོང་སྦྱོང་བའི་སྔགས་དང་ཕྱག་རྒྱས་གདབ་བོ། །ཇི་ཙམ་དུ་སྔགས་གདབ་པ་ན་འབུམ་ཕྲག་གཉིས་ཀྱི་བར་དུ་བཟླས་ཞེས་སོ། །དེ་ནས་མཆོད་རྟེན་ལ་སོགས་པ་ལ་འབར་བར་གྱུར་ཏམ་ཡང་ན་སྐུའི་ཞལ་འཛུམ་པ་ལ་སོགས་པའི་མཚན་མ་བྱུང་བྱུང་དུ་བཟླས་སོ། །མཚན་མ་ནི་དཀྱུས་ན་གསལ་ལོ། །ཅི་སྟེ་མཚན་མ་དེ་དག་ནི། །སྡིག་ཅན་བློ་ཡིས་མ་མཐོང་ན། །ཞེས་བྱ་བ་ལ་སོགས་པ་གསུངས་ཏེ། མཚན་མ་དེ་དག་མ་ཐོབ་ན་འབུམ་ཕྲག་སྟོང་མན་ཆད་བཟླས་ཤིང༌། ཇི་སྲིད་མཚན་མ་དགེ་བ་མ་བྱུང་གི་བར་དུ་དེ་བཞིན་གཤེགས་པ་རྣམས་མཆོད་ཅིང་རྩེ་གཅིག་པའི་སེམས་ཀྱིས་མཉམ་པར་གཞག་ཅིང་བཟླས་བརྗེད་བྱའོ། །དེ་ལྟར་བཟླས་པའི་མཐར་མཚན་གཅིག་བཟླས་པ་རབ་ཏུ་བྱས་ན་ཤི་བ་དེ་ངེས་པར་སྡིག་པ་ལས་གྲོལ་ཞིང་མཚན་མ་བཟང་པོ་རྣམས་འབྱུང་བར་འགྱུར་རོ། །དེ་དག་ནི་རོའི་དབང་དུ་བྱས་པའི་རིམ་པ་སློབ་དཔོན་ཀུན་དགའ་སྙིང་པོས་
མཛད་པ་རྫོགས་སོ།། །།ཡང་ན་མེད་པར་གྱུར་ན་ཡང༌། །ཞེས་བྱ་བ་ལ་སོགས་པས་ནི་རོ་མེད་པར་གྱུར་ན་མིང་ཙམ་གྱིས་རྣམ་པ་བཟུང་ནས། སྔགས་ལ་སོགས་པ་བཟླས་པ་དང་བདག་ལྷའི་སྐུར་བསྐྱེད་པ་དེས་ན་སྦྱོང་བའི་སྔགས་བཟླས་ཤིང་ཤི་བའི་མིང་དམ་རུས་པ་དང་སྤེལ་ཏེ་བཟླས་པའི་ཕྱིར་ན། ཟློས་ཤིང་བསྒོམས་པའི་ཚུལ་གྱིས་ནི། །མིང་ཙམ་ལེགས་པར་བྲིས་ནས་ཀྱང༌། །ཞེས་བྱ་བ་ལ་སོགས་པ་གསུངས་ཏེ། སྔགས་ཀྱི་འོད་ཟེར་གྱིས་དམིགས་པར་བྱ་བའི་རྟེན་ཤོག་བུའམ་གྲོ་ག་ལ་བྲིས་ཏེ་དེ་ལ་བསྟིམས་པས་དེ་ལས་དང་ཉོན་མོངས་པའི་བག་ཆགས་དག་པར་བྱེད་དེ། འཇིམ་པ་དང་བསྲེས་ཏེ་མཆོད་རྟེན་གྱི་ཕྲེང་བ་བྱ་བའམ། ཡང་ན་ལྷའི་གཟུགས་སུ་བྲིས་ཀྱང་རུང་སྟེ། སྡིག་པ་བསྲེག་པའི་སྦྱིན་སྲེག་གམ། །དབང་རྣམས་རྫོགས་པར་བསྐུར་ན་ཡང༌། །གདོན་མི་ཟ་བར་མཐོ་རིས་སུ་སྐྱེའོ། །ཡང་ན་ཐལ་བ་ཉིད་དམ་རུས་པ་ལ། ཡུངས་ཀར་རམ་བྱེ་མ་ལ་སོགས་པ་ལ་མིང་ནས་བརྗོད་ཅིང་སྔགས་བཟླས་ན་ཡང་རྒྱ་མཚོར་འབབ་པའི་ཆུ་ཀླུང་དུ་དོར་རོ། །དེ་ལྟ་བུ་བྱས་པས་ཀྱང་ངན་སོང་ལས་ཐར་ཏེ་མཐོ་རིས་སུ་སྐྱེའོ། །ད་ནི་དགེ་བ་དང་ལྡན་པའི་ཇི་ལྟ་བུར་བྱས་པ་དེ་ཐམས་ཅད་ལས་བར་འགྱུར་བའི་གང་ཟག་གི་རིམ་པ་སྟོན་ཏེ། དགེ་བའི་མཆོག་ནི་བསྐྱེད་པ་དང༌། །བྱང་ཆུབ་ས་བོན་བསྐྱེད་པའི་བདག །ཅེས་གསུངས་ཏེ། དགེ་བ་ནི་ཆོས་སྤྱོད་བཅུའོ། །མཆོག་ནི་ཇི་ལྟར་དགེ་བ་བྱས་ཀྱང་དམིགས་པ་མེད་པར་བྱས་པའོ། །ཡང་ན་དོན་དམ་པ་དང་ཀུན་རྫོབ་ཀྱི་བྱང་ཆུབ་སེམས་ནི་མཆོག་སྟེ་དེ་བསྐྱེད་པའོ། །དེ་གང་དང་ལྡན་པ་དེ་ནི་སངས་རྒྱས་འབྲས་བུ་རྒྱུར་ལྡན་པ་སྟེ་སངས་རྒྱས་ནི་རིགས་ལྔའོ། །འབྲས་བུ་ནི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའོ། །རྒྱུ་ནི་རང་གི་རྟོག་པའི་ཁྱད་པར་རོ། །དེ་གང་སྙམ་པ་ལ། སྦྱིན་པའི་ཕ་རོལ་ཕྱིན་པར་ལྡན། །ཞེས་བྱ་བ་ལ་སོགས་པས་བསྟན་ཏེ། སྦྱིན་བ་ནི་ཡོངས་སུ་གཏོང་བའི་མཚན་ཉིད་དེ། དེ་ཡང་རྣམ་པ་བཞི་སྟེ། ཟང་ཟིང་དང༌། མི་འཇིགས་པ་དང༌། ཆོས་དང༌། བྱམས་པའོ། །ཚུལ་ཁྲིམས་ནི་ཡང་དག་པའི་དོན་ལ་མི་འདའ་བའོ། །བསླབ་པའི་ཚུལ་ཁྲིམས་དང༌། དགེ་བའི་ཆོས་སྡུད་པའི་ཚུལ་ཁྲིམས་དང༌། སེམས་ཅན་གྱི་དོན་བྱ་བའི་ཚུལ་ཁྲིམས་སོ། །བཟོད་པ་ནི་མི་འཁྲུགས་པའི་མཚན་ཉིད་དོ། །
དེ་ལ་ཡང་གཉིས་ཏེ། ཐེག་པ་ཆེན་པོའི་ཆོས་ཟབ་མོ་ལ་ཡིད་ཆེས་པའི་བཟོད་པ་དང༌། གནོད་པ་བྱེད་པ་ལ་ཅི་མི་སྙམ་པའི་བཟོད་པའོ། །བརྩོན་འགྲུས་ནི་སྐྱོ་དུ་བ་མེད་པའི་མཚན་ཉིད་དེ། གོ་ཆའི་བརྩོན་འགྲུས་དང༌། སྦྱོར་བའི་བརྩོན་འགྲུས་སོ། །བསམ་གཏན་ནི་ཆོས་ཉིད་ཀྱི་དོན་ལ་མཉམ་པར་འཇོག་པའི་མཚན་ཉིད་དོ། །དེ་ལ་ཡང་གཉིས་ཏེ། ཆོས་ཉིད་ཀྱི་བསམ་གཏན་དང་ཏིང་ངེ་འཛིན་གྱི་བསམ་གཏན་ནོ། །ཤེས་རབ་ནི་སྤྱི་དང་རང་གི་མཚན་ཉིད་འབྱེད་པའི་མཚན་ཉིད་དོ། །དེ་ལ་ཡང་གཉིས་ཏེ་ཟག་པ་དང་བཅས་བའི་ཤེས་རབ་དང༌། ཟག་པ་མེད་པའི་ཤེས་རབ་བོ། །དེ་ནི་རྒྱུ་སྟེ་རྒྱུ་ཕ་རོལ་ཏུ་ཕྱིན་པ་དྲུག་གིས་འབྲས་བུ་བསོད་ནམས་དང་ཡེ་ཤེས་ཀྱི་ཚོགས་སྐྱེ་བའི་ཕྱིར་རོ། །དེ་ལྟ་བུའི་སེམས་ནི་འཇིག་རྟེན་འདིའི་བདེ་བ་དང་ཡང་ལྡན་ལ། ཕྱི་མར་ཡང་མྱུར་དུ་ངན་སོང་ལས་ཐར་ཏེ་བྱང་ཆུབ་ཐོབ་པར་ཐེ་ཚོམ་མེད་དོ། །ད་ནི་དགེ་བའི་རྩ་བ་མ་བསྐྱེད་པས་མི་འགྲུབ་པའི་དོན་སྟོན་ཏེ། དགེ་བའི་རྩ་བ་མ་བསྐྱེད་ལ། །མེད་པར་ལྟ་བ་གང་ཡིན་དང༌། །ཞེས་བྱ་བ་ལ་སོགས་པ་གསུངས་ཏེ། དགེ་བ་ནི་རྣམ་པར་དཀར་བའོ། །རྩ་བ་ནི་བྱང་ཆུབ་ཀྱི་སེམས་སོ། །མ་བསྐྱེད་པ་ནི་མ་སྤེལ་བའོ། །མེད་པར་ལྟ་བ་ནི་རྒྱུ་དགེ་སྡིག་གཉིས་མེད་པར་ལྟ་པ་དང༌། འབྲས་བུ་བདེ་སྡུག་གཉིས་མེད་པར་ལྟ་བའོ། །བྱང་ཆུབ་ལམ་ལས་རྣམ་ལོག་པ་ནི་དོན་དམ་པ་དང་ཀུན་རྫོབ་ཀྱི་བྱང་ཆུབ་ཀྱི་སེམས་ལས་ལོག་པའོ། །སངས་རྒྱས་ཀྱི་བསྟན་པ་ལ་ཞེ་སྡང་བྱེད་ཅིང་སྡིག་པའི་རང་བཞིན་དུ་མཐོང་བ་དང༌། ཕ་དང་མ་ལ་སྙིང་རིང་ཞིང་བྱང་ཆུབ་ཀྱི་སེམས་དང་མ་འབྲེལ་པ་རྣམས་ཀྱིས་འགྲུབ་པར་མི་འགྱུར་རོ་ཞེས་རྣམ་པར་སྣང་མཛད་ཀྱིས་གསུངས་སོ། །དེ་ཡན་ཆད་དུ་སྦྱིན་སྲེག་གི་དོན་བསྟན་ཟིན་ཏོ། །ད་ནི་གོ་ཆའི་ཕན་ཡོན་སྟོན་ཏེ། དེ་ནས་བརྒྱ་བྱིན་ལ་སོགས་ལྷ། །ཞེས་བྱ་བ་ལ་སོགས་པ་གསུངས་ཏེ། དེས་ནི་སྦྱིན་སྲེག་གི་མཇུག་བསྡུ་བར་གསུངས་ཏེ། དེ་ནས་ནི་ཕན་ཡོན་གྱི་མགོ་འདྲེན་ཏོ། །བརྒྱ་བྱིན་ནི་ཡོན་བདག་ཡིན་པའི་ཕྱིར་དང་ལ་སྨོས་སོ། །ལྷ་ཐམས་ཅད་ནི་ནོར་བུ་དྲི་མ་མེད་པའི་འོད་ཐར་པ་ལས་སྔ་བའི་ཕྱིར་སྨོས་སོ། །དེ་ནས་དབང་པོར་བཅས་པ་ཡི། །ཞེས་པ་ནས། སྣ་ཚོགས་བྱུང་བ་འདི་ཅི་
ལགས། །ཞེས་བྱ་བའི་བར་གྱིས་ནི་ཡོན་ཏན་ལ་ངམ་སྟེ། མཆོད་པ་དུ་མས་མཆོད་ཅིང་བསྟོད་དོ། །བཅོམ་ལྡན་འདས་ཀྱིས་བཀའ་སྩལ་པ་ཞེས་པ་ནས། བདེ་བར་གཤེགས་པ་ངོ་མཚར་ཆེ་ལགས་སོ་ཞེས་པའི་བར་གྱིས་ནི། ནོར་བུ་དྲི་མ་མེད་པའི་འོད་ཀྱི་རྣམ་པར་ཐར་པ་བསྟན་ལ།། འཁོར་ངོ་མཚར་ཆེ་བ་ལ་དམ་པར་བསྟན་ཏོ། །དེ་ནས་བརྒྱ་བྱིན་ལ་སོགས་ལྷ། །ཞེས་པ་ནས། སྔགས་དང་འདྲ་བའི་འདྲེན་པ་མེད། །ཅེས་བྱ་བའི་བར་དཀོན་མཆོག་གསུམ་ལ་ཡོན་ཏན་གྱི་སྒོ་ནས་བསྟོད་པ་བསྟན་ཏོ། །དེ་ནས་ལྷའི་བུ་དེ་དག་གིས་ཞེས་པ་ནས། བལྟ་བར་འཚལ་ལོ་ཞེས་བྱ་བའི་བར་གྱིས་ནོར་བུ་དྲི་མ་མེད་པའི་རྫུ་འཕྲུལ་དང་རྣམ་པར་འཕྲུལ་པ་བལྟ་བར་འཚལ་ལོ་ཞེས་གསོལ་བ་བསྟན་ཏོ། །དེ་ནས་བཅོམ་ལྡན་འདས་ཞེས་པ་ནས། དེ་ཉིད་དུ་མི་སྣང་བར་གྱུར་ཏོ་ཞེས་པའི་བར་གྱིས་ནི་དེ་བཞིན་གཤེགས་པས་ནོར་བུ་དྲི་མ་མེད་པ་འོད་ཟེར་གྱི་ཕྲེང་བས་བསྐུལ་ནས་འོངས་པ་བསྟན་ཏོ། །དེ་ནས་ལྷའི་བུ་དེ་ཉིད་ཅེས་པ་ནས། ཟིལ་གྱིས་མནན་ཏོ་ཞེས་པའི་བར་གྱིས་ནོར་བུ་དྲི་མ་མེད་པའི་འོང་ཀྱི་རྣམ་པར་འཕྲུལ་པ་ཐམས་ཅད་ཟིལ་གྱིས་མནན་པར་བསྟན་ཏོ། །དེ་ནས་ལྷའི་བུ་དེ་ཞེས་པ་ནས་མྱུར་དུ་བཀྲོལ་ཞེས་པའི་བར་གྱིས་ནི་ཡ་མཚན་ཆེ་ནས་ཐུགས་རྗེ་ལ་ངམ་ནས་བསྟོད་པ་བསྟན་ཏོ། །དེ་ནས་སྐད་ཅིག་མ་དེ་ཉིད་ཀྱི་ཚེ་ཞེས་པ་ནས། ཡ་མཚན་སྐྱེས་ཏེ་ཞེས་པའི་བར་གྱིས་ནི་རྣམ་པར་འཕྲུལ་པ་སྣ་ཚོགས་མཐོང་བ་བསྟན་ཏོ། །འདི་སྐད་ཅེས་སྨྲས་སོ་ཞེས་པ་ནས། ཚངས་སྤྱོད་ཚུལ་ཁྲིམས་དྲི་མེད་སྐྱེ་བསམ་ཡས། །ཞེས་པའི་བར་གྱིས་ནི་དེ་བཞིན་གཤེགས་པའི་ཡོན་ཏན་གྱི་ཁྱད་པར་བསམ་གྱིས་མི་ཁྱབ་པའི་དོན་ལ་ངམ་པ་བསྟན་ཏོ། །དེ་ནས་ལྷའི་བུ་དེ་དག་གིས་ཞེས་པ་ནས་བལྟ་བར་འཚལ་ལོ་ཞེས་བྱ་བའི་བར་གྱིས་ཞུ་བ་བསྟན་ཏེ། གསོལ་བ་གདབ་པ་བསྟན་ཏོ། །དེ་ནས་བཅོམ་ལྡན་འདས་ཀྱིས་ཡང་ཞེས་པ་ནས་མི་སྣང་བར་གྱུར་ཏོ་ཞེས་བྱ་བའི་བར་གྱིས་ནི། སྣང་བར་བྱས་པའི་ཏིང་ངེ་འཛིན་བསྟན་ཏོ། །དེ་ནས་ནོར་བུ་དྲི་མ་མེད་པའི་འོད་ཅེས་པ་ནས། འདི་སྐད་གསོལ་ཏོ་ཞེས་པའི་བར་གྱིས་ནི་དེ་བཞིན་གཤེགས་པའི་སྤྱན་སྔར་འོངས་ནས་ཐམས་ཅད་ཟིལ་གྱིས་མནན་པ་བསྟན་ཏོ། །ཀྱེ་མ་སངས་རྒྱས་ཞེས་པ་ནས། སེམས་
ཅན་ལྷ་གནས་མྱུར་དུ་སྐྱེས། །ཞེས་པའི་བར་གྱིས་སྔགས་ཀྱི་ཡོན་ཏན་ཀུན་ལ་བསྟོད་པ་བསྟན་ཏོ། །དེ་ནས་ལྷའི་བུ་ནོར་བུ་དྲི་མ་མེད་པའི་འོད་ཅེས་བྱ་བ་དང་ཞེས་པ་ནས། དེ་བཞིན་དུ་སླར་སོང་ངོ་ཞེས་པའི་བར་གྱིས་དྲིན་ལ་ལན་གྱིས་བླན་པའི་ཕྱིར་མཆོད་པའི་ཁྱད་པར་གྱིས་མཆོད་ནས་རང་གི་གནས་སུ་འགྲོ་བ་བསྟན་ཏོ། །དེ་ནས་བརྒྱ་བྱིན་དང་ཞེས་པ་ནས་བཤད་དུ་གསོལ་ཞེས་པའི་བར་གྱིས་ནི་ཕྱི་རབས་ཀྱི་སེམས་ཅན་ལ་ཕན་གདགས་པའི་ཕྱིར་ཞུ་བ་གསོལ་བ་བསྟན་ཏོ། །བརྒྱ་བྱིན་དང་ཞེས་པ་ནས་འགྲོ་བར་འགྱུར་རོ་ཞེས་པའི་བར་གྱིས་ནི་སྔགས་ཀྱི་དོན་འདི་ཐོས་པར་དཀའ་བའི་ཆེ་བའི་ཡོན་ཏན་བསྟན་ཏོ། །དེ་ནས་བརྒྱ་བྱིན་དང་ཞེས་པ་ནས་རྣམ་པར་སྨིན་པ་ནི་ཅིར་འགྱུར་ཞེས་པའི་བར་གྱིས་ནི་སྣོད་དུ་གྱུར་པའི་ཐེག་པ་ཆེན་པོ་ལ་དད་པའི་རྣམ་པ་ཅིར་འགྱུར་བ་ཞུས་པ་བསྟན་ཏོ། །བཅོམ་ལྡན་འདས་ཀྱིས་ཞེས་པ་ནས་སྨོས་ཀྱང་ཅི་དགོས་ཞེས་པའི་བར་གྱིས་ནི་ཐེག་པ་ཆེན་པོའི་རིགས་ཅན་གྱི་ཆེ་བའི་ཡོན་ཏན་གྱི་ཁྱད་པར་བསྟན་ཏོ། །དེ་ནས་བརྒྱ་བྱིན་དང་ཞེས་པ་ནས། བསྐྱབ་པར་བགྱི་ཞེས་པའི་བར་གྱིས་ནི་འཇིག་རྟེན་པའི་དཀྱིལ་འཁོར་རྣམས་ཀྱིས་ཐེག་བ་ཆེན་པོའི་ཆོས་འདི་གང་ན་སྤྱོད་པ་དེ་བསྲུང་ཞིང་བསྐྱབ་པའི་ཐབས་སྟོན་ཏོ། །ལྷའི་དབང་པོ་ཞེས་པ་ནས། བག་ཡོད་པར་བྱོས་ལ་སྒྲུབས་ཤིང་ཅེས་པའི་བར་གྱིས་ནི་ཕྱི་རབས་ཀྱི་སེམས་ཅན་ལ་ཕན་པའི་གདམས་དག་སྦྱིན་པ་སྟོན་ཏོ། །དེ་ཡན་ཆད་ཀྱིས་ནི་སྐུ་གསུམ་གྱི་གཙུག་ཏོར་གྱི་རྒྱུད་ལས་རྩ་བའི་རྒྱུད་དུ་གྱུར་པ་རྣམ་པར་སྣང་མཛད་ཀྱི་སྐུའི་རྒྱུད་བཤད་པའོ། །དཔལ་རྣམ་པར་སྣང་མཛད་ཀྱི་རྩ་བའི་རྒྱུད་ཀྱི་བཤད་པ་གསལ་བའི་སྒྲོན་མ་ཞེས་བྱ་བ་སློབ་དཔོན་ཆེན་པོ་ཀུན་དགའ་སྙིང་པོས་མཛད་པ་རྫོགས་སོ།། །།ད་ནི་རྐྱེན་སྦྱོང་བར་བྱེད་པའི་བཤད་པའི་རྒྱུད་ཕྱི་མའི་དོན་བཤད་པར་བྱ་སྟེ། དེ་ལ་ཡང་འཆད་པ་པོའི་མཚན་ཉིད་དམ་རང་བཞིན་བསྟན་པ་འབྱུང་སྟེ། དེ་ཡང་དང་པོར་གླེང་གཞི་ནི་ཇི་ལྟ་བུ་ཡིན་ཞེ་ན། རྒྱུད་ཕྱི་མ་འདིའི་སྟོན་པ་ནི་གང་བདག་པོའི་སྐྱེས་བུ་ནི་གང་སྙམ་པ་ལ། འདིའི་འཆད་པ་པོའི་སྟོན་པ་ནི་དཔལ་ཕྱག་ན་རྡོ་རྗེའོ། །བདག་པོ་ནི་ཤཱཀྱ་ཐུབ་པ་དེ་ཉིད་དོ། །དེའི་དོན་བསྟན་པར་བྱ་
སྟེ། དེ་ཡང་དང་པོ་སྟོན་པ་བསྟན་པའི་ཕྱིར། དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་ཏེ། བཅོམ་པ་ནི་ཡང་དག་བའི་ཡེ་ཤེས་ཀྱིས་ཉོན་མོངས་པ་ཕྱིན་ཅི་ལོག་གི་སྐྱོན་བཅོམ་པ་ཡིན་ལ། ལྡན་པ་ནི་ཕ་རོལ་ཏུ་ཕྱིན་པ་དྲུག་གིས་སྟོབས་དང་ལྡན་པའོ། །འདས་པ་ནི་མཐའ་གཉིས་ལས་འདས་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་ཞེས་པ་ནི། བྱང་ཆུབ་ནི་གཟུང་འཛིན་གཉིས་སྤངས་ལ་མཁྱེན་པའི་ཡེ་ཤེས་དང་ལྡན་པའོ། །སེམས་ནི་གཉིས་སུ་མེད་པའི་དོན་ལ་སེམས་པའོ། །དཔའ་ནི་དེའི་དོན་ལ་སྲན་ཚུགས་པའོ། །སེམས་ནི་ཐུགས་རྗེ་ཆེན་པོས་འགྲོ་བའི་དོན་ལ་སེམས་ལ། དཔའ་ནི་འགྲོ་བའི་དོན་ལས་མི་ལྡོག་པའོ། །ཆེན་པོ་ནི་ཁྱད་པར་དུ་གྱུར་པའི་དོན་དང་ལྡན་པའོ། །ཕྱག་ན་རྡོ་རྗེ་ཞེས་ནི་དུས་གསུམ་གྱི་རྒྱལ་བ་ཐམས་ཅད་ཀྱི་ཐུགས་ལས་སྐྱེས་པའི་སེམས་དཔའ་དེས་སོ། །ཡང་ན་ཕྱག་ན་རྡོ་རྗེ་ནི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་གསང་བའི་མཛོད་འཛིན་པ་དང༌། བདུད་དང་དྲེགས་པ་ཅན་ཐམས་ཅད་འདུལ་བར་བྱེད་པའི་རྡོ་རྗེ་དེ་ཕྱག་ན་བསྣམས་པས་ན་ཕྱག་ན་རྡོ་རྗེའོ། །ཡང་ན་དེ་བཞིན་གཤེགས་པ་ཐམས་ཅད་ཀྱིས་མིང་གི་དབང་བསྐུར་བའོ། །དེ་ཇི་ལྟར་ཐུགས་ལས་བྱུང་ཞིང་དབང་བསྐུར་སྙམ་པའི་རྟོག་པ་བསལ་བའི་ཕྱིར། དེ་བཞིན་གཤེགས་པ་རྣམ་པར་སྣང་མཛད་ནམ་མཁའི་དབྱིངས་ཀྱི་རང་བཞིན་ལས་སྙིང་རྗེ་ཆེན་པོའི་ཐབས་ཁྲོ་བོའི་དམ་ཚིག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་རྡོ་རྗེ་དམ་ཚིག་ཅེས་བྱ་བའི་སྙིང་པོ་འདི་ཕྱུང་ངོ༌། །ཧཱུཾ་དེ་ཕྱུང་མ་ཐག་ཏུ་བཅོམ་ལྡན་འདས་ཐམས་ཅད་པའི་སྙིང་པོ་རིག་པ་མཆོག་འདི་སྨྲས་སོ། །ཨོཾ་སུམྦྷ་ནི་སུམྦྷ་ཧཱུཾ། གྲྀཧྣ་གྲྀཧྣ་ཧཱུཾ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ་ཨཱ་ན་ཡ་ཧོ་བྷ་ག་བཱན་བཛྲ་རཱ་ཛ་ཧཱུཾ་ཕཊ། དེ་ནས་དེ་བཞིན་གཤེགས་པ་ཐམས་ཅད་ཀྱི་བདག་པོ་ཕྱག་ན་རྡོ་རྗེར་གྱུར་ཏེ། བཅོམ་ལྡན་འདས་ཀྱི་སྤྱན་སྔ་ན་བཀའ་ནོད་ཅིང༌། ཟླ་བའི་དཀྱིལ་འཁོར་ལ་གནས་སོ། །དེ་ནས་ཐམས་ཅད་
འཇོམས་པའི་དབང་དང༌། མིང་གི་དབང་བསྐུར་ཏེ། ཕྱག་ན་རྡོ་རྗེ་ཞེས་བཏགས་སོ། །བཅོམ་ལྡན་འདས་ཀྱི་མཐུས་བརྟག་བའི་རྒྱལ་པོ་བརྟག་པ་ཕྱི་མ་འདི་བཤད་དོ་ཞེས་བ་ནི། བཅོམ་ལྡན་འདས་ནི་བཤད་ཟིན་ཏོ། །མཐུས་ཞེས་བྱ་བ་ནི་བྱིན་གྱིས་བརླབས་པས་སོ། །བརྟག་པ་ཕྱི་མ་འདིས་ཞེས་བྱ་བ་ནི་བརྟག་པ་དང་པོ་རྩ་བའི་དཀྱིལ་འཁོར་ལས་མ་ཚང་བ་དང༌། ཤཱཀྱ་ཐུབ་པའི་དཀྱིལ་འཁོར་ལ་འཇིག་རྟེན་ལས་འདས་བ་དང༌། འཇིག་རྟེན་པའི་དཀྱིལ་འཁོར་རྩ་བའི་དཀྱིལ་འཁོར་གྱི་ཁྱད་པར་ལས་བྱུང་བའི་བཤད་པ་བསྟན་པའི་ཕྱིར་ན་དེ་བསྟན་པར་བྱའོ། །དཔའ་བོ་གདན་ལས་བཞེངས་ནས་ནི། །ཞེས་བྱ་བ་ནི་དཔའ་བས་ན་དཔའ་བའོ། །ཇི་ལྟར་དཔའ་ཞེ་ན། ཁྲོ་བོ་འདོད་པའི་རྒྱལ་པོ་རྣམ་པར་སྣང་མཛད་ཀྱི་ཐུགས་ཀ་ནས་ཕྱུང་སྟེ། འཇིག་རྟེན་གསུམ་གྱི་བདག་པོ་དབང་ཕྱུག་ཆེན་པོ་ལ་སོགས་པ་འཇིག་རྟེན་ཐམས་ཅད་ན་གནས་པའི་ཚོགས་ཀྱིས་བསྐོར་བའི་དམ་ཚིག་གི་རྡོ་རྗེས་བཀུག་ནས་རི་རབ་རིའི་རྩེ་མོ་ན་རྡོ་རྗེ་དང་ནོར་བུ་རིན་པོ་ཆེ་ལས་བྱས་པ་ཁང་བུ་བརྩེགས་པ་དེའི་ཉེ་འཁོར་དུ་འཁོད་པར་གྱུར་ཏོ། །དེ་ནས་ཕྱག་ན་རྡོ་རྗེ་རང་གི་ཐུགས་ཀ་ནས་རྡོ་རྗེ་བླངས་ཏེ་གསོར་ཞིང་འདི་སྐད་ཅེས་བཀའ་སྩལ་ཏོ། །གྲོགས་པོ་རྣམས་དེ་བཞིན་གཤེགས་པ་ཐམས་ཅད་ཀྱི་བསྟན་པ་ལ་ཞུགས་ལ་ངའི་བཀའ་ཉོན་ཅིག །དེ་ནས་དེ་དག་གིས་འདི་སྐད་ཅེས་གསོལ་ཏོ་བདག་ཅག་གིས་ཇི་ལྟར་བསྒྲུབ་པར་བགྱི། ཕྱག་ན་རྡོ་རྗེས་གསུངས་པ། ཀུན་མཁྱེན་ཡེ་ཤེས་ཐོབ་བྱའི་ཕྱིར། །གྲོགས་པོ་རྣམས་ཀྱིས་བསྒྲུབ་པར་གྱིས། །དེ་ནས་འཇིག་རྟེན་གསུམ་གྱི་བདག་པོ་ལྷ་ཆེན་པོ་དྲེགས་ཏེ་ཆེས་ཁྲོས་པར་སྟོན་ཞིང་འདི་སྨྲས་སོ། །ང་འཇིག་རྟེན་གསུམ་གྱི་བདག་པོ་ཡིན་ལ། །གནོད་སྦྱིན་ཁྱོད་ཀྱི་ངག་ཅིའི་ཕྱིར་ཉན། དེ་ནས་ཡང་ཕྱག་ན་རྡོ་རྗེས་རྡོ་རྗེ་གསོར་ཞིང་བཀའ་སྩལ་པ། སེམས་ཅན་མ་རུངས་པ་རྣམས་དཀྱིལ་འཁོར་དུ་མྱུར་དུ་ཞུགས་ལ་ངའི་དམ་ཚིག་ལ་གནས་པར་གྱིས་ཤིག །དེ་ནས་ལྷ་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟ་བུའི་སེམས་ཅན་དབང་ཕྱུག་ལ་འདི་སྐད་ཅེས་བཀའ་སྩོལ་བ་འདི་སུ་ཞིག །དེ་ནས་
བཅོམ་ལྡན་འདས་ཀྱིས་དབང་ཕྱུག་ཆེན་པོ་ལ་སོགས་པ་འཇིག་རྟེན་གསུམ་གྱི་ཚོགས་ཐམས་ཅད་ལ་བོས་ནས་འདི་སྐད་གསུངས་སོ། །གྲོགས་པོ་རྣམས་དཀོན་མཆོག་གསུམ་ལ་སྐྱབས་སུ་འགྲོ་བ་དང༌། དམ་ཚིག་དང་སྡོམ་པ་ལ་གནས་པར་གྱིས་ཤིག །ཕྱག་ན་རྡོ་རྗེ་ནི་གནོད་སྦྱིན་ཁྲོ་བོ་མ་རུངས་པའི་བྱང་ཆུབ་སེམས་དཔའ་ཆེན་པོ་སྟེ། རྡོ་རྗེ་འབར་བས་ཁྱེད་རྣམས་བརླག་པར་བྱས་ས་རེ། དེ་ནས་དབང་ཕྱུག་ཆེན་པོ་འཁོར་མང་པོ་དང་བཅས་པས་འཇིགས་པའི་གཟུགས་དང༌། མ་རུངས་པའི་རྟ་གད་དུ་དགོད་པ་རྣམས་བསྟན་ནས་འདི་སྐད་སྨྲས་སོ། །ཀྱེ་ང་ནི་འཇིག་རྟེན་གསུམ་གྱི་བདག་པོ་ཡིན་ན་ང་ལ་ཁྱོད་ཅིའི་ཕྱིར་བཀའ་སྩལ། དེ་ནས་ཕྱག་ན་རྡོ་རྗེས་རྡོ་རྗེ་སྙེམས་པ་དང་བཅས་པས་གསོར་ཞིང་འཛུམ་སྟེ་འདི་སྐད་ཅེས་སྨྲས་སོ། །ཀྱེ་ལུས་སྲུལ་པོ་མིའི་ཤ་ཟ་བ་ཟས་སུ་རོ་བསྲེགས་པའི་ཐལ་བ་ཟ་ཞིང་ཁ་ཟས་དང་མལ་ཆ་དང་གོས་ཀྱང་དེ་ལ་བྱེད་པ་ཁྱེད་རྣམས་ངའི་བཀའ་བཞིན་བྱོས་ཤིག །དེ་ནས་དབང་ཕྱུག་ཆེན་པོས་འཇིག་རྟེན་གྱི་ཁམས་ཁྲོ་བོ་ཆེན་པོས་བཀང་སྟེ་འདི་སྐད་ཅེས་སྨྲས་སོ། ཁྱོད་ངའི་བཀའ་ཉོན་ལ་དམ་ཚིག་ཀྱང་ལོང་ཤིག་ཅེས་སོ། །དེ་བཅོམ་ལྡན་འདས་ཀྱིས་དེ་བཞིན་གཤེགས་པའི་ཐུགས་ཀ་ནས་བྱུང་བའི་རྡོ་རྗེ་ཆེན་པོས་དམ་ཚིག་དྲན་པར་བྱས་སོ། །ཨོཾ་ནི་སུམྦྷ་བཛྲ་ཧཱུཾ་ཕཊ། དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་རྡོ་རྗེའི་སྙིང་པོ་འདི་བརྗོད་དོ། །ཧཱུཾ་དེ་ནས་དེ་བརྗོད་མ་ཐག་ཏུ་ཁམས་གསུམ་པ་ཐམས་ཅད་ཁ་སྤུབ་ཏུ་འགྱེལ་ཏེ་ཉམ་ཐག་པའི་ཚིག་འབྱིན་ཅིང་ཕྱག་ན་རྡོ་རྗེ་ལ་སྐྱབས་སུ་དོང་ངོ༌། །ལྷ་ཆེན་པོ་ཞེས་བྱ་བའི་ལྷ་དེ་དེ་ནས་ས་ལ་འགྱེལ་ཏེ་དྲན་པ་མེད་པར་གྱུར་ནས་ཤིའོ། །དེ་ནས་བཅོམ་ལྡན་འདས་ཀྱིས་མཁྱེན་བཞིན་དུ་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ཁམས་གསུམ་གྱི་བདག་པོ་འདི་ལ་སྐྱབས་སྦྱིན་པར་བྱོས་ལ་མ་བསད་ཅིག །དེ་སྐད་ཅེས་བཀའ་སྩལ་པ་ཐོས་ནས། ཕྱག་ན་རྡོ་རྗེས་འདི་སྐད་གསུངས་སོ། །ལྷ་རྣམས་སྲོག་འདོད་ན་དཀོན་མཆོག་གསུམ་ལ་སྐྱབས་སུ་དོང་ལ་ངའི་བཀའ་ཉོན་ཅིག །དེ་དག་གིས་གསོལ་པ། དཀོན་མཆོག་གསུམ་
ལ་སྐྱབས་སུ་མཆིའོ། །ཁྱོད་ཀྱིས་བསྟན་པའི་བཀའ་ནི་བདག་ཅག་གིས་འཚལ་ཏོ། །དེ་ནས་རྣམ་པར་སྣང་མཛད་ཀྱིས་དེ་དག་ལ་བོས་ནས་འདི་སྐད་ཅེས་བཀའ་སྩལ་ཏོ། །ཀྱེ་ལྷ་རྣམས་འདི་ནི་དེ་བཞིན་གཤེགས་པ་ཐམས་ཅད་ཀྱི་བདག་པོའོ། །དེ་བཞིན་གཤེགས་པ་ཐམས་ཅད་ཀྱི་ཡབ་པོ། །དེ་བཞིན་གཤེགས་པ་ཐམས་ཅད་ཀྱི་བཀའ་བཞིན་དུ་བྱེད་པའོ། །དེ་བཞིན་གཤེགས་པའི་སྲས་ཀྱི་ཐུ་བོའོ། །སེམས་ཅན་འདུལ་བའི་ཁྲོ་བོའི་རྒྱལ་པོའོ། །དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་ཞིང་བྱིན་གྱིས་བརླབས་པའོ། །དེ་བས་ན་ཁྱེད་རྣམས་འདིའི་དམ་ཚིག་ལ་གནས་པར་བྱོས་ཤིག་ཅེས་སོ། །དེ་ནས་དེ་དག་གིས་འདི་སྐད་ཅེས་གསོལ་ཏོ། །བདག་ཅག་གི་སྲོག་ཡལ་བ་ལས་བསྐྱབ་ཏུ་གསོལ། །བདག་ཅག་ཀྱང་དེ་བཞིན་དུ་བགྱིད་ཅིང་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀྱེ་གྲོགས་པོ་རྣམས་འདི་ཉིད་ལ་སྐྱབས་སུ་དོང་ཤིག །འདི་ཉིད་ཀྱིས་ཀུན་དུ་སྐྱོབས་ཀྱི་གཞན་གྱིས་ནི་མ་ཡིན་ནོ། །དེ་ནས་སྲིད་པ་གསུམ་གྱི་བདག་པོ་དེ་རྣམས་བཅོམ་ལྡན་འདས་ཕྱག་ན་རྡོ་རྗེ་འཛིན་པ་དེ་ག་ལ་བ་དེར་ལོགས་སུ་བལྟས་ནས་ཉམ་ཐག་པའི་སྒྲ་ཆེན་པོ་མགྲིན་གཅིག་ཏུ་བྱུང་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་འཆི་བའི་སྡུག་བསྔལ་འདི་ལས་ཀུན་དུ་བསྐྱབ་ཏུ་གསོལ། དེ་ནས་ཕྱག་ན་རྡོ་རྗེས་ཀྱེ་མ་རུངས་པ་རྣམས་ངའི་བསྟན་པ་ལ་ཞུགས་ཤིག །རྡོ་རྗེ་འབར་བ་འདིས་གཅིག་ཏུ་འབར་བར་བྱས་ནས་ཐམས་ཅད་བརླག་པར་བྱས་ས་རེ། དེ་དག་གིས་ཀྱང་འདི་སྐད་ཅེས་གསོལ་ཏོ།། ཁྱོད་ནི་ཀུན་དུ་བཟང་པོ་དེ་བཞིན་གཤེགས་པ་ཐམས་ཅད་ཀྱིས་སེམས་བསྐྱེད་པ་ཀུན་དུ་དུལ་བ། སེམས་ཅན་ཐམས་ཅད་ལ་ཕན་པར་བཞེད་པ། སེམས་ཅན་ཐམས་ཅད་ལ་མི་འཇིགས་པ་སྩོལ་བ་ལགས་ན། ཅིའི་སླད་དུ་བཅོམ་ལྡན་འདས་ཀྱིས་བདག་ཅག་བསྲེག་པར་འགྱུར། དེ་ནས་ཕྱག་ན་རྡོ་རྗེས་བོས་ནས་ཁྱེད་ལྟ་བུའི་སེམས་ཅན་མ་རུངས་པ་རྣམས་སེམས་སྦྱང་པའི་ཕྱིར་ངའི་དམ་ཚིག་ལ་མནོས་ཤིག །གལ་ཏེ་མི་གནས་ན་ད་དུང་གནས་པར་བྱའོ། །གསོལ་བ་དེ་བཞིན་དུ་བགྱིའོ། །དེ་ནས་ཕྱག་ན་རྡོ་རྗེས་དབང་ཕྱུག་ཆེན་པོ་མ་གཏོགས་པ་གཞན་དག་དབུགས་
དབྱུང་ཞིང་བསླང་བའི་སྙིང་པོ་འདི་སྨྲས་སོ། །ཨོཾ་ཏིཥྛ་བཛྲ་དེ་སྨྲས་མ་ཐག་ཏུ་དབང་ཕྱུག་ཆེན་པོ་མ་གཏོགས་པ་དེ་ཐམས་ཅད་བརྒྱལ་བ་ལས་སེམས་དབུགས་ཕྱུང་སྟེ། ལྷའི་བདེ་བ་མྱོང་ཞིང་བག་ཚ་བ་དང་བ་སྤུ་ལོངས་པ་མེད་པར་གྱུར་ནས་བཅོམ་ལྡན་འདས་ཕྱག་ན་རྡོ་རྗེ་ལ་བལྟ་ཞིང་ལོངས་སོ། །དེ་ནས་བཅོམ་ལྡན་འདས་ཀྱིས་ཕྱག་ན་རྡོ་རྗེ་ལ་བཀའ་སྩལ་པ། སེམས་དཔའ་ཆེན་པོ་ལྷའི་བདག་པོ་ལྷ་ཆེན་པོ་འདི་མ་བསླངས་པར་འདིའི་སྲོག་ཆུད་གསན་ན་ཅི་རུང༌། འདི་གསོས་ན་འདི་ཡང་སྐྱེས་བུ་དམ་པར་འགྱུར་རོ། །དེ་ནས་ཕྱག་ན་རྡོ་རྗེས་དེ་བཞིན་དུ་བྱའོ་སྙམ་ནས་ཤི་བ་སློང་བའི་སྙིང་པོ་འདི་སྨྲས་སོ། ཨོཾ་བཛྲ་ཨཱ་ཡུ་དེ་ནས་འདི་སྨྲས་མ་ཐག་ལྷ་ཆེན་པོའི་བདག་པོ་ཤི་བ་ལས་སོས་ཏེ་ལྡང་བར་འདོད་ན་ལྡང་བར་མ་ནུས་སོ། དེ་ནས་ལྷ་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཅི་བདག་ཅག་འདི་ལྟ་བུས་འདུལ་ལམ། བཅོམ་ལྡན་འདས་ཀྱིས་བཀའ་སྩལ་པ། ཁྱོད་སྐྱེས་བུ་ཆེན་པོ་འདིའི་བཀའ་ཉན་པར་མི་འཇུག་ན། ཁྱོད་འདུལ་བ་འདི་ཉིད་ཡིན་གྱི་ང་ནི་མ་ཡིན་ནོ། །དབང་ཕྱུག་ཆེན་པོས་གསོལ་པ། ཅི་བཅོམ་ལྡན་འདས་ཁྱེད་ཀྱིས་མ་རུངས་པའི་སེམས་ཅན་འདི་ལས་སྐྱབས་མཛད་མི་སྤྱོད་དམ། བཀའ་སྩལ་པ། ངས་འདི་ལ་བསྐྱབ་པར་མི་ནུས་སོ། །གསོལ་བ་ཅིའི་སླད་དུ། བཀའ་སྩལ་པ། དེ་བཞིན་གཤེགས་པ་ཐམས་ཅད་ཀྱི་བདག་པོ་ཡིན་པའི་ཕྱིར་རོ། །གསོལ་པ། བཀའ་སྩལ་པའི་དོན་དེ་མ་འཚལ་ཏེ། ཁམས་གསུམ་པའི་བདག་པོ་དེ་བཞིན་གཤེགས་པ་རྣམས་ལས་གཞན་པའི་བདག་པོ་མཆིས་པར་མ་འཚལ་ན་འདི་སུ་ལགས། དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་ཡང་ལྷ་ཆེན་པོ་ལ་བོས་ཏེ་འདི་སྐད་གསུངས་སོ། །ཀྱེ་མ་རུངས་པ་ངའི་བཀའ་མི་ཉན་ནམ། དེ་ནས་ལྷ་ཆེན་པོས་རྡོ་རྗེ་སེམས་དཔའི་ཚིག་ཐོས་ནས་འཁྲུག་ཅིང་ཁྲོས་པར་གྱུར་ཏེ། དེ་ལྟར་འགྱེལ་བཞིན་དུ་ཡང་འཇིགས་པ་ཆེན་པོའི་གཟུགས་བསྟན་ཏེ། འདི་སྐད་ཅེས་སྨྲས་སོ། །ང་ཤི་བ་བཟོད་ཀྱི་ཁྱོད་ཀྱི་ངག་མི་ཉན་ཏོ། །དེ་ནས་ཕྱག་ན་རྡོ་རྗེས་རབ་ཏུ་ཁྲོས་པར་གྱུར་པར་བསྟན་ཅིང་རང་གི་རྐང་པའི་མཐིལ་ནས་རྗེས་སུ་སྤྱོད་པ་འདི་ཕྱུང་ངོ༌། །ཨོཾ་ཏ་ཀ་རི་ཤ་ན་བཛྲ་ཧཱུཾ་དེ་
ནས་བཅོམ་ལྡན་འདས་ཀྱི་ཞབས་ཀྱི་མཐིལ་ནས་ཀུན་དུ་འབར་བའི་སྙིང་པོ་ཁྲོ་གཉེར་བྱས་ལ་མཆེ་བ་ལྷག་གེར་བྱས་པ། གདོང་ཆེན་པོ་རྡོ་རྗེའི་རྗེས་སུ་སྤྱོད་པ་བྱུང་ནས་བཅོམ་ལྡན་འདས་ཕྱག་ན་རྡོ་རྗེའི་སྤྱན་སྔ་ན་བཀའ་ནོད་ཅིང་འདུག་བར་གྱུར་ཏོ། །དེ་ནས་ཕྱག་ན་རྡོ་རྗེས་དབང་ཕྱུག་ཆེན་པོ་སྦྱང་བ་འདི་སྐད་ཅེས་གསུངས་སོ། །ཨོཾ་པ་ཏ་ཀ་རི་ཤ་ཡ། སརྦ་དྷ་ར་བཛྲ་དྷ་ར། ཨ་ནུ་ཙ་ར་ཀ་ཏ་ཀ་ཏ་བཛྲ་ཧཱུཾ་ཛཿ་དེ་ནས་དེ་སྐད་སྨྲས་པ་དང༌། ལྷ་ཆེན་པོ་དང་ཨུ་མར་བཅས་ཏེ་རྐང་པ་གྱེན་ཀར་གཅེར་བུར་ཕྱུང་སྟེ། སྐྱེ་བོ་ཐམས་ཅད་ཀྱིས་གད་མོ་བགད་ཅིང་རྐང་པས་བཀུག་པས་རྡོ་རྗེའི་རྗེས་སུ་སྤྱོད་པ་བཀུག་སྟེ། བཅོམ་ལྡན་འདས་ཕྱག་ན་རྡོ་རྗེའི་སྤྱན་སྔར་ཞབས་ཀྱི་དྲུང་དུ་གཞག་གོ །དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །སེམས་ཅན་མ་རུངས་པ་མཆིས་བྲང་དུ་བཅས་པ་འདི་ལ་ཅི་ལྟར་བགྱི་བཅོམ་ལྡན་འདས་ཀྱིས་བཛྲ་ཀརྨ་ཧོ་ཞེས་བཀའ་སྩལ་པ་དང༌། དེ་ནས་ཕྱག་ན་རྡོ་རྗེས་ལྷ་ཆེན་པོ་ཞབས་གཡོན་པས་མནན། ཞབས་གཡས་པས་ཨུ་མའི་སྟེང་དུ་མནན་ནས། རང་གི་སྙིང་པོ་སྨྲས་པ། ཨོཾ་བཛྲ་ཨཱ་བེ་ཤ་ཧ་ན་པྲ་ཊ་ན་ཏྲཊ། དེ་ནས་དེ་སྨྲས་མ་ཐག་ཏུ་ལྷ་ཆེན་པོ་ལ་བབས་ནས་རང་གི་ལག་པ་སྟོང་གིས་རང་གི་གདོང་པ་སྟོང་འཚོག་གོ །དེ་ནས་རྡོ་རྗེ་ནོར་བུ་ལས་གྲུབ་པའི་ལྷའི་ཁང་ཁྱིམ་ཕྱི་རོལ་ན་གནས་པའི་སྲིད་པ་གསུམ་ཐམས་ཅད་ཀྱིས་ངེད་ཀྱི་དབང་པོ་འདི་བདག་ཉིད་ཆེན་པོ་དེས་བཏུལ་ལོ་ཞེས་སྒྲ་ཆེར་ཕྱུང་ངོ༌། །དེ་ནས་བཅོམ་ལྡན་འདས་ཀྱིས་ལྷ་ཆེན་པོ་ལ་ཐུགས་རྗེ་ཆེན་པོ་བསྐྱེད་དེ། ཨོཾ་བུདྡྷ་མཻ་ཏྲི་བཛྲ་རཀྵ་ཧཾ་ཞེས་གསུངས་སོ། །དེ་གསུངས་མ་ཐག་ཏུ་ལྷ་ཆེན་པོ་ལ་བབས་པའི་སྡུག་བསྔལ་དེ་ཀུན་ཞི་སྟེ། ཡང་ཕྱག་ན་རྡོ་རྗེའི་ཞབས་མཐིལ་གྱིས་རེག་པས་ན་བདེ་བ་དང༌། བླ་ན་མེད་པ་གྲུབ་པའི་དབང་དང༌། ཏིང་ངེ་འཛིན་དང༌། རྣམ་པར་ཐར་པ་དང༌། གཟུངས་དང༌། མངོན་པར་ཤེས་པ་རྣམས་ཐོབ་ནས། དེ་བཞིན་གཤེགས་པ་ཉིད་དུ་གྲུབ་པའི་བར་དུ་གྱུར་ཏོ། །དེ་ནས་ལྷ་ཆེན་པོ་ལ་བཅོམ་ལྡན་འདས་ཀྱི་ཞབས་མཐིལ་གྱིས་རེག་པས་དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་དང༌། གཟུངས་ཀྱི་སྒོ་དང༌། རྣམ་པར་ཐར་པའི་བདེ་བ་མྱོང་སྟེ། ལྷ་ཆེན་པོའི་ལུས་ཞབས་ལ་ཕུལ་བས་ན་དཔའ་བོའི་གདན་ནོ། །ལྷ་ཆེན་པོ་དེས་ཡང་འོག་གི་འཇིག་རྟེན་གྱི་
ཁམས་གངཱའི་ཀླུང་སུམ་ཅུ་རྩ་གཉིས་ཀྱི་བྱེ་མ་སྙེད་ཀྱི་འཇིག་རྟེན་ཁམས་ལས་འདས་པ་ན་ཐལ་བས་ཁེབས་པ་ཞེས་བྱ་བའི་འཇིག་རྟེན་གྱི་ཁམས་དེར་ཐལ་བའི་དབང་པོའི་དབྱངས་ཞེས་བྱ་བའི་དེ་བཞིན་གཤེགས་པར་སྐྱེས་སོ། །གདན་དེ་ལས་བཞེངས་ནས་ནི། །ཞེས་བྱ་བ་ནི་རྒྱུད་འདི་བཤད་པར་བཞེད་པའོ། །དགྱེས་ཤིང་རྡོ་རྗེ་གསོར་ནས་ཀྱང༌། །ཞེས་བྱ་བ་ནི་དགྱེས་ཤིང་ནི་དེ་བཞིན་གཤེགས་པས་བྱིན་གྱིས་བརླབས་ཏེ། རྒྱུད་འདིའི་དོན་སྟོན་པར་དགྱེས་པའོ། །རྡོ་རྗེ་ནི་རིག་པ་སྟེ་ཡེ་ཤེས་ལྔའི་རང་བཞིན་ནོ། །གསོར་བ་ནི་ཕྲིན་ལས་སོ། །རྒྱུད་ཕྱི་མ་འདིའི་དོན་སྟོན་པར་བྱེད་ཅེས་པའི་ཐ་ཚིག་གོ །ཤཱཀྱ་ནི་ཤཱཀྱ་དབང་པོའི་ཉི་མའི་རིགས་ཅན་ཡིན་ལ། བདག་པོ་ནི་ཁམས་གསུམ་གྱི་བདག་པོའི་ཐ་ཚིག་གོ །དགྱེས་མཛད་པ་ནི་རྒྱུད་ཀྱི་དོན་སྟོན་པའི་ཕྱིར་རོ། །ཐུབ་པའི་གཙོ་ལ་ཕྱག་འཚལ་ནས། །ཞེས་པ་ལ། ཐུབ་པ་ནི་ལུས་ངག་ཡིད་གསུམ་མོ། །གཙོ་ལ་ནི་རྐང་གཉིས་ཐམས་ཅད་ཀྱིའོ། །དེ་ཡང་གསུངས་པ། རྐང་གཉིས་གཙོ་བོ་ཁྱོད་གཤེགས་འཚལ། ཞེས་པའོ། །ཕྱག་འཚལ་ནས་ཞེས་བ་ནི་ཡ་རབས་གོང་མའི་ཚུལ་དང་སྐུ་གསུང་ཐུགས་ཀྱི་ཡོན་ཏན་བསྐྱེད་པའི་ཕྱིར་རོ། །དེས་ནི་སྟོན་པའི་རང་བཞིན་དང་གླེང་གཞི་བསྟན་པའོ། །ད་འདི་ནས་ནང་སེམས་ཀྱི་དཀྱིལ་འཁོར་དང༌། སྦྱོར་བ་དང་པོ་དང༌། ལས་རྒྱལ་པོ་མཆོག་གི་ཏིང་ངེ་འཛིན་བསྟན་ཏེ། སྒྲིབ་པ་ཐམས་ཅད་རྣམ་པར་དག་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཞེས་བྱ་བ་ལ་སྒྲིབ་པ་ནི་ལྔ་སྟེ། ཉོན་མོངས་པའི་སྒྲིབ་པ་རྣམ་པར་རྟོག་པའི་བག་ཆགས་ཏེ། དེ་ཡང་ལས་ཀྱི་སྒྲིབ་པ་དང༌། ཆོས་ཀྱི་སྒྲིབ་པ་དང༌། རྣམ་པར་སྨིན་པའི་སྒྲིབ་པ་དང༌། སྐྱེ་བའི་སྒྲིབ་པ་དང༌། ཤེས་བྱའི་སྒྲིབ་པ་དང་ལྔ་ནི་ཐམས་ཅད་དོ། །རྣམ་པར་དག་པ་ནི་གཉེན་པོ་ཡེ་ཤེས་ཀྱི་སྟོབས་ཀྱིས་མི་མཐུན་པ་ཟིལ་གྱིས་གནོན་པ་སྟེ། ཅིའི་ཕྱིར་ཞེ་ན། རྡོ་རྗེས་ཐམས་ཅད་འཇོམས་པ་དང་འདྲ་བས་ན་ཉོན་མོངས་པའི་མཚན་མ་ཐམས་ཅད་འཇོམས་པའི་ཕྱིར་རོ། །ཏིང་ངེ་འཛིན་ནི་དེའི་ངང་ལས་མི་ལྡན་ཞིང་འཛིན་པའི་ཕྱིར་རོ། །སྙོམས་པར་ཞུགས་པ་ནི་གཉིས་སུ་མེད་པར་ཞུགས་པ་དང༌། མི་མངའ་བར་སྙོམས་པར་ཞུགས་པའོ། །དེའི་དོན་ཡང་འདི་ལྟར་སྙེགས་ཏེ།
བཅོམ་ལྡན་འདས་ཕྱག་ན་རྡོ་རྗེས་ཐུགས་ཀར་ནང་སེམས་ཀྱི་འཁོར་ལོ་བསྐྱེད་ནས་སྤྲོ་བར་བྱའོ། །དེ་ཡང་ཀུན་དུ་བཟང་པོ་བྱང་ཆུབ་ཀྱི་སེམས་ཟླ་བའི་དཀྱིལ་འཁོར་གྱི་དབུས་སུ། ཨོཾ་སརྦ་པཱ་པཾ་ད་ཧ་ན་བཛྲ་ཧཱུཾ་ཕཊ་ཅེས་པ་ལ་སོགས་པའི་སྔགས་ལས་རྫོགས་པའི་ཚུལ་དུ་ཤཱཀྱ་ཐུབ་པའི་དཀྱིལ་འཁོར་བསྐྱེད་ནས། སྟོང་གསུམ་གྱི་འཇིག་རྟེན་དུ་ཁྱབ་པས་སེམས་ཅན་གྱི་ཁམས་གསུམ་གྱི་སྒྲིབ་པ་སྔ་མ་བཞིན་དུ་སྦྱངས་ནས་བྱིན་གྱིས་བརླབས་ཏེ། ནང་སེམས་ཀྱི་དཀྱིལ་འཁོར་དུ་དབང་བསྐུར་ནས་རྣམ་པར་གྲོལ་བའི་ལམ་ལ་བཞག་པས་ཏིང་ངེ་འཛིན་དེ་ལ་སྙོམས་པར་ཞུགས་པས་ན་དེ་ལ་དེ་སྐད་ཅེས་བྱའོ། །ད་ནི་མ་འོངས་པའི་སེམས་ཅན་གྱི་དོན་དུ་ངན་སོང་སྦྱོང་བ་ཞེས་པའི་རང་གི་སྙིང་པོ་འདི་ཉིད་ཀྱི་ཐུགས་ཀ་ནས་བྱུང་ངོ་ཞེས་བྱ་བ་ནི་གསུངས་སོ་ཞེས་བྱ་བའི་དོན་ཏོ། །ད་ནི་སྦྱོར་བ་དང་པོའི་ཏིང་ངེ་འཛིན་གྱི་དོན་སྟོན་ཏེ། རྗེས་སུ་འཇུག་པའི་རྣལ་འབྱོར་པས་ནི་དང་པོར་སྤྲུལ་པའི་སྐུའི་རིགས་བཅོམ་ལྡན་འདས་གསུང་ཤཱཀྱ་ཐུབ་པའི་བཟླས་པ་དང༌། བསྒྲུབ་པར་འདོད་པ་དེས་ཇི་ལྟར་བརྟག་པའི་ཡིད་དུ་འོང་བའི་གནས་དེར་སྡོམ་པ་གསུམ་ལ་གནས་པས་ཁྲུས་བྱས་ལ་འདུག་སྟེ། དང་པོར་མཚམས་ཀྱི་ཏིང་ངེ་འཛིན་ལ་གནས་པར་བྱ་སྟེ། དེ་བཞིན་གཤེགས་པ་རྣམས་མདུན་དུ་དམིགས་ནས་དེ་དག་ལ་རིགས་ཀྱི་ཕྱག་བཞི་བྱས་ཏེ། མཆོད་པ་དང་སྡོམ་པ་ལ་སོགས་པ་ལ་གནས་པར་བྱས་པས་དང་པོར་ཆོས་ཉིད་རྣམ་པར་དག་པའི་སྔགས་ཀྱིས་སྟོང་པར་བྱིན་གྱིས་བརླབས་ནས། དེ་ནས་རྡོ་རྗེ་དྲིལ་བུའི་སྔགས་དང་ཕྱག་རྒྱས་སྡིག་པ་དྲལ་ཏེ། དེ་ནས་ཡེ་ཤེས་དབབ་པར་བྱའོ། །དེ་ནས་མངོན་པར་བྱང་ཆུབ་པ་ལྔ་བསྒོམ་པར་བྱ་སྟེ། དེ་ཡང་ཇི་ལྟར་བསྒོམ་པར་བྱ་ཞེ་ན་སེམས་སོ་སོར་རིག་པ་ལས་མངོན་པར་བྱང་ཆུབ་པ་དང༌། སེམས་བསྐྱེད་པ་ལས་མངོན་པར་བྱང་ཆུབ་པ་དང༌། ཆོས་ཀྱི་སྐུ་ལས་མངོན་པར་བྱང་ཆུབ་པ་དང༌། དེ་ཉིད་བརྟན་པར་བྱས་པ་ལས་མངོན་པར་བྱང་ཆུབ་པ་དང༌། སྐུ་ཕྱག་རྒྱ་ཆེན་པོ་ལས་མངོན་པར་བྱང་ཆུབ་པའོ། །དེ་ལ་སེམས་སོ་སོར་རིག་པ་ལས་མངོན་པར་བྱང་ཆུབ་པ་ནི། འདི་ཉིད་ལས་ཀྱང༌། ཆོས་རྣམས་ཐམས་ཅད་དངོས་མེད་པར། །སེམས་ཀྱིས་བསྒོམ་པར་བྱ་བ་ནི། །ཨ་ལས་ཟླ་བའི་དཀྱིལ་འཁོར་བསམ། །ཞེས་
གསུངས་པའི་ཕྱིར་ན། དང་པོར་སྟོང་པ་ལས་སེམས་སོ་སོར་རིག་པ་སྟེ་ཕྱིའི་ཡུལ་དུ་གྱུར་པ་འདི་དག་དབང་པོ་ལས་འདས་པ་ཕུང་པོ་རྣམ་པར་དག་པ་གཟུང་འཛིན་སྤངས་པ་དབང་པོ་དྲུག་གི་སྤྱོད་ཡུལ་དུ་ཡང་མ་གྱུར་པ་སྟོང་པ་ཉིད་ཀྱི་མཚན་ཉིད་དུ་བསྒོམ་མོ། །ནང་འཛིན་པའི་སེམས་ཀྱི་མཚན་ཉིད་ནི་དངོས་པོའི་མཚན་མ་དང་བྲལ་བ་རང་བཞིན་གྱིས་འོད་གསལ་བའི་ངོ་བོ། ཨ་ཞེས་པ་ལས་ཨཱ་ལི་ཡི་གེ་བཅུ་གཉིས་སུ་སྣང་བ་དེ་བཞིན་གཤེགས་པའི་ས་བཅུ་གཉིས་ཀྱི་རང་བཞིན་སྟོང་པ་བཅུ་དྲུག་གི་རང་བཞིན་ལས་ཟླ་བའི་དཀྱིལ་འཁོར་གྱི་རྣམ་པར་བསྒོམ་མོ། །དེ་ཡང་རྒྱུད་ཆེན་པོ་ལས། གང་འདི་ཟླ་བ་རྫོགས་པ་ནི། །དག་ཅིང་གསལ་ལ་རྙོག་པ་མེད། །དེ་བཞིན་ཚོགས་ནི་རྫོགས་པའི་ཕྱིར། །སེམས་ནི་ཟླ་བ་རྒྱས་པ་འདྲ། །ཞེས་གསུངས་པ་ཡིན་ནོ། །དེ་སྐྱེད་པར་བྱེད་པའི་སྔགས་ནི། ཨོཾ་ཙིཏྟ་པྲ་ཏི་བེ་དྷཾ་ཀ་རོ་མི་ཞེས་པའོ། །དེ་ནས་བྱང་ཆུབ་ཀྱི་སེམས་བསྐྱེད་པར་བྱ་སྟེ། ཨོཾ་བོ་དྷི་ཙིཏྟ་ཨུཏྤཱ་ད་ཡཱ་མི་ཞེས་བརྗོད་པས། ཨ་དེ་ལས་འོད་ཟེར་ཕྱོགས་བཅུར་འཕྲོས་པས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་རྣམས་ཀྱི་རྒྱུ་འབྲས་ཀྱི་ཉོན་མོངས་པ་རྣམས་བཅོམ་སྦྱངས་ཏེ། སླར་འདུས་ནས་ཨ་ལ་ཐིམ་པས་དེ་ཉིད་དང་ཀཱ་ལི་སུམ་ཅུ་སྐར་མའི་རྣམ་པ་ལས་ཟླ་བའི་དཀྱིལ་འཁོར་ཆེན་པོའི་གཟུགས་གཉིས་པ་ཉིད་དུ་གྱུར་ཏོ། །དེ་ཡང་གསུངས་པ། ཟླ་བའི་དབུས་སུ་ཟླ་བ་ཡི། །དཀྱིལ་འཁོར་གཉིས་པ་མཐོང་བ་ཡིན། །ཞེས་སོ། །དེ་ནས་ཟླ་བའི་དཀྱིལ་འཁོར་དེའི་དབུས་སུ་ཆོས་ཀྱི་ཡི་གེ་ཧྲཱིཿ་ཞེས་བྱ་བ་བཞག་སྟེ། དེའི་མཐའ་མ་ན་ཚུར་ཨོཾ་སརྦ་པཱ་པཾ་ད་ཧ་ན་བཛྲ་ཧཱུཾ་ཕཊ་དེའི་མཐའ་ན་གོང་གི་སྒྲ་དབྱངས་ཀྱི་ཡི་གེ་དང་ལྡན་པའོ། །ཨོཾ་ཏིཥྛ་བཛྲ་པདྨ་ཞེས་བརྗོད་པས་དེ་འཕྲོས་འདུས་པ་ལས་ཡི་གེའི་ཕྲེང་བ་འོད་དུ་ཞུ་སྔགས་ལ་ཐིམ། སྔགས་ཀྱི་ཕྲེང་བ་འོད་དུ་ཞུ་བས་དབུས་ཀྱི་ཧྲཱིཿ་ལ་ཐིམ། ཧྲཱིཿ་འོད་དུ་ཞུ་ནས་འདུས་ཤིང་ལྡེམ་པར་གྱུར་པ་ལས། རྡོ་རྗེ་དང་པདྨར་གྱུར་པར་བསྒོམ་མོ། །དེ་ཡང་ཐབས་དང་ཤེས་རབ་ཀྱི་རང་བཞིན་རྡོ་རྗེ་དང་པདྨའོ། །པདྨ་ནི་གསུང་གི་རིགས་ཀྱི་རྟགས་ཀྱི་ཕྱག་རྒྱ་སྟེ་ཐབས་སོ། །རྡོ་རྗེར་བསྒོམས་པས་ཀྱང་རྣམ་པར་སྣང་མཛད་ལ་སོགས་པའི་དམིགས་སུ་མེད་པས་གསུངས་ཏེ། དེ་
ཡང། །པདྨ་ཐབས་ཀྱི་རང་བཞིན་ཏེ། །སྟོང་པ་ཉིད་ནི་རྡོ་རྗེར་བཤད། །ཅེས་སོ། །དེ་ནས་ཡང་ཡེ་ཤེས་ཀྱི་འོད་ཟེར་འཕྲོས་པས་ཕྱོགས་བཅུའི་འཇིག་རྟེན་གྱི་ཁམས་ཀྱི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་དབྱིངས་ཐམས་ཅད་བསྡུས་ནས་རྡོ་རྗེ་པདྨ་ལ་ཐིམ་པར་བྱ་སྟེ། ཨོཾ་བཛྲ་ཨཱཏྨ་ཀོ྅ཧཾ་ཞེས་བརྗོད་པས་བརྟན་པར་བྱས་སོ། །དེ་ཡང༌། །དཀྱིལ་འཁོར་གཉིས་པའི་དབུས་སུ་ནི། །རྡོ་རྗེ་ཆེན་པོ་རྣམ་བསམས་ལ། །ཡུད་ཙམ་སོ་སོར་བརྟགས་པ་ནི། །ཐེག་པ་ཆེན་པོར་བརྟགས་པ་ཡིན། །ཞེས་གསུངས་པས་བརྟག་པར་བྱས་པའོ། །ཡང་དེ་ལས་དེ་བཞིན་གཤེགས་པའི་སྐུ་ཕྲ་མོ་འཕྲོས་འདུས་པ་ལས་ཨོཾ་ཡ་ཐཱ་སརྦ་ཏ་ཐཱ་ག་ཏཱ་སྟ་ཐ་ཧཾ་ཞེས་བརྗོད་པ་ལས། བཅོམ་ལྡན་འདས་ཤཱཀྱ་ཐུབ་པའི་སྐུ་ཕྱག་རྒྱ་ཆེན་པོར་གྱུར་ཏེ་བཞུགས་སོ། །ཡང་དེ་ཉིད་ཀྱི་ཐུགས་ཀར་ཀུན་དུ་བཟང་པོ་བྱང་ཆུབ་ཀྱི་སེམས་ཟླ་བའི་དཀྱིལ་འཁོར་གྱི་སྟེང་དུ་གོང་གི་སྔགས་དེ་ཉིད་ཕྲེང་བའི་ཚུལ་དུ་བཀོད་ལ། དེ་ལས་འོད་འཕྲོས་པས་རིགས་བཞིའི་དེ་བཞིན་གཤེགས་པ་རྣམས་ཀྱི་བྱིན་རླབས་བསམ་གྱིས་མི་ཁྱབ་པ་བསྡུས་ནས་སླར་འདུས་པ་ལས་གནས་བཞིར་ཐིམ་སྟེ་སྙིང་གར་ནི་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ལས་རྡོ་རྗེ་ཁར་ནི་ཧྲཱིཿ་ལས་པདྨ། དཔྲལ་བར་སྭ་ལས་རིན་པོ་ཆེ་ཟུར་གསུམ་པ། སྤྱི་བོར་ཧཾ་ལས་རྡོ་རྗེ་རྒྱ་གྲམ་བསྒོམ་མོ། །ཡང་འཕྲོ་འདུ་བྱས་པས་ནམ་མཁའ་ལས་ཡིད་བཞིན་གྱི་ནོར་བུ་རིན་པོ་ཆེ་དབུ་ལ་བསྐོན་པ་ལས་དབུས་སུ་རྣམ་པར་སྣང་མཛད་བྱང་ཆུབ་མཆོག་གི་ཕྱག་རྒྱ་ཅན་ཐིམ། ཤར་དུ་མི་བསྐྱོད་པ་གླང་པོ་ཆེའི་སྟེང་ནས་གནོན་གྱི་ཕྱག་རྒྱ་ཅན་ཐིམ། རིགས་ཕྱི་མ་ཡང་དེ་བཞིན་ཐིམ་མོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་ཤཱཀྱའི་རྒྱལ་པོ་ཞེས་བདག་ལ་རྡོ་རྗེའི་མིང་གི་དབང་བསྐུར་བར་བསམ་མོ། །ཤཱཀྱ་ཐུབ་པ་དེ་ཡང་སེམས་དཔའི་སྐྱིལ་མོ་ཀྲུང་གིས་བཞུགས་པ། ཕྱག་གཡོན་ན་པདྨ་དམར་པོ་བསྣམས་པ་གཡས་བསྟོད་པས་འབྱེད་པ་ཁ་དོག་གསེར་བཙོ་མའི་མདོག་ལྟ་བུར་གནས་པ། རྡོ་རྗེ་དང་པདྨ་འདབ་མ་གྱེས་པའི་ཚུལ་གྱིས་འདོད་ཆགས་རྣམ་པར་དག་ཅིང་མི་ཆགས་པའི་ངོ་བོ་ཉིད་དུ་བལྟ་བས་ལྟ་བར་བདག་ཉིད་བསྒོམས་ཏེ། སྔགས་ཡ་ཐཱ་བཛྲ་དྷརྨཱཥྚ་ཨ་ཧཾ་དེ་ནས་བྱིན་གྱིས་བརླབས་ཏེ་ས་མ་ཡ་སྟྭཾ་ཞེས་པ་འདི་བརྗོད་
པས་རྒྱབ་ཏུ་ཟླ་བའི་དཀྱིལ་འཁོར་གྱི་འོད་ཀྱི་དཀྱིལ་འཁོར་བསམ་མོ། །དེ་ནས་དེའི་དབུས་སུ་ཉི་མའི་དཀྱིལ་འཁོར་བསྒོམས་ཏེ། སྔགས་ནི་ཨོཾ་བཛྲ་སཱུཪྻ་ཨོཾ་དེ་ནས་རང་ཉིད་ཀྱི་སྙིང་གར་ཨ་ལས་ཟླ་བའི་དཀྱིལ་འཁོར་དེའི་སྟེང་དུ་ལྷ་ཉི་ཤུ་རྩ་གཅིག་རྫོགས་པའི་ཚུལ་གྱིས་བསྐྱེད་དེ། ཡང་དེའི་དབུས་སུ་ཤཱཀྱ་ཐུབ་པ་བདག་ཉིད་ཅི་འདྲ་བ་ཞིག་བསྐྱེད་ནས་དེ་རྣམས་ཀྱི་ཐུགས་ཀར་ཟླ་བའི་དཀྱིལ་འཁོར་དེའི་སྟེང་དུ་བྷ་ག་ཝ་ཏེའི་སྔགས་རིང༌། དེའི་སྟེང་དུ་རང་རང་གི་རྩ་བའི་སྔགས་རྣམས་བསམས་པ་ལ། དེ་ལས་འོད་འཕྲོས་པས་ཕྱོགས་བཅུའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ལ་ཕོག་པས་སྡིག་སྒྲིབ་ཐམས་ཅད་སྦྱངས་ཁྱད་པར་དུ་ཡང་ངན་སོང་གསུམ་ལ་ཕོག་པས། ངན་སོང་གསུམ་པོའི་ཨོཾ་ད་ཧ་ད་ཧ་ཞེས་པ་ལ་སོགས་པ་དང༌། ཨོཾ་པ་ཙ་པ་ཙ་ཞེས་པ་དང༌། ཨོཾ་མ་ཐ་མ་ཐ་ཞེས་པ་ལ་སོགས་པས་སྡིག་པ་སྦྱངས་སོ། །ཨོཾ་བྷྲི་ཏ་བྷྲི་ཏ་དང༌། ཨོཾ་ཏྲཱ་ཊ་ཏྲཱ་ཊ་ཞེས་བྱ་བ་དང༌། བི་དྲ་བ་བི་དྲ་བ་ཞེས་བྱ་བ་ལ་སོགས་པའི་སྔགས་ཀྱིས་ནི་ལུས་ངག་ཡིད་གསུམ་གྱི་སྒྲིབ་པ་སྦྱངས་ནས་སྐུ་གསུང་ཐུགས་སུ་བྱིན་གྱིས་བརླབས་པའོ། །དེ་ནས་དེ་དག་ཉེ་འཁོར་དུ་བཀུག་ནས། །ཨོཾ་བཛྲ་ཨ་དྷི་ཏིཥྛ་ཛྙཱ་ན་ས་མ་ཡ་ཧཱུཾ་གིས་གནས་ཉི་ཤུར་བྱིན་གྱིས་བརླབས་སོ། །དེ་ནས་ནང་སེམས་ཀྱི་དཀྱིལ་འཁོར་དུ་བཅུག་སྟེ། དབང་བསྐུར་བས་རྣམ་པར་གྲོལ་བའི་ལམ་ཐོབ་པར་བྱས་ཏེ། ཕྱིར་སྙིང་ག་ནས་ཕྱུང་སྟེ་ནོར་བུ་དྲི་མ་མེད་པའི་སྟེང་དུ་འཁོད་དེ་མཆོད་པ་བསམ་ཀྱིས་མི་ཁྱབ་པས་མཆོད་དོ། །དེ་ནས་ཁམས་གསུམ་གྱི་ལྷ་ཀླུས་ཀྱང་མཆོད་ནས་བསྟོད་པ་དང༌། ཡོན་ཏན་བསྔགས་པ་གོང་ལྟར་བརྗོད་དོ། །དེ་ནས་དེ་དག་གནས་སུ་དོང་ངོ། །དེ་ནས་ནང་སེམས་ཀྱི་དཀྱིལ་འཁོར་དེ་ལ་བསྟོད་པས་བསྟོད་དེ་ཕྱག་འཚལ་ལོ། །དེ་ནས་རང་གི་ལུས་ལ་གནས་ཉི་ཤུ་རྩ་གཅིག་ཏུ་ལྷ་ཉི་ཤུ་རྩ་གཅིག་པོ་ལུས་ལ་གསལ་བར་བལྟ་ཞིང་བརྟག་གོ །དེ་ནི་སྦྱོར་བ་དང་པོ་དང་ནང་སེམས་ཀྱི་དཀྱིལ་འཁོར་གྱི་རིམ་པའོ།། །།ད་ནི་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་སྟོན་ཏོ། །དེ་ཡང་དང་པོར་ཆོས་ཉིད་སྟོང་པ་ཉིད་བསྒོམ་པའི་ངང་ལས། དང་པོར་འོག་གི་ཕྱོགས་སུ་ཡཾ་ལས་རླུང་གི་དཀྱིལ་འཁོར། དེའི་སྟེང་དུ་ལཾ་ལས་གསེར་གྱི་ས་གཞི། དེའི་སྟེང་དུ་བཾ་ལས་ཆུའི་རྒྱ་མཚོ། །དེའི་སྟེང་དུ་པཾ་ལས་པདྨ་འདབ་མ་བརྒྱད་པ་རྩ་བ་གསེར་གྱིས་གཞི་ལ་ཟུག་པ།
གསེར་གྱི་རུས་སྦལ་ལ་བརྟེན་ནས་རྩ་བ་ཆུ་སྲིན་ཆེན་པོའི་སོས་བཟུང་བ། དེའི་པདྨའི་སྡོང་པོ་ལ་ཡི་གེ་བྲ། དེའི་པདྨའི་གེ་སར་ལ་སུཾ་ལས་རིན་པོ་ཆེའི་རི་རབ་རྩེ་མོ་བཞི་པར་གྱུར། དེའི་སྟེང་དུ་ཧཱུཾ་ལས་རྡོ་རྗེ་རྒྱ་གྲམ་རྩེ་མོ་གཉིས་དང་ལྡན་པ། དེ་ཡང་ཤར་དཀར་པོ། ལྷོ་སྔོན་པོ། ནུབ་དམར་པོ། བྱང་ལྗང་གུ། དབུས་རིན་པོ་ཆེའི་མིག་མང་རིས་སུ་བྲིས་པ། སངས་རྒྱས་ཀྱི་ཞིང་བསམ་གྱིས་མི་ཁྱབ་པ་དང་མཉམ་པ་ཞིག་བསྒོམ་པའི་སྟེང་དུ། བྷྲཱུཾ་ལས་གཞལ་ཡས་ཁང་གྲུ་བཞི་པ་བསྒོ་བཞི་པ་རྟ་བབས་དང་སྒོ་ཁྱུང་དུ་ལྡན་པ་ལ། ཏྭ་ར་ཎ་དང་ཆུ་སྲིན་གྱིས་བརྒྱན་པ་ལ། དེའི་དབུས་སུ་གསར་གྱི་འཁོར་ལོ་རྩིབས་བརྒྱད་པ། འཁོར་ལོ་ཡང་ལྟེ་བ་དང༌། རྩིབས་དང་མུ་ཁྱུད་གསུམ་ཡོད་དེ། ལྟེ་བས་ནི་ཉོན་མོངས་པ་སྦྱངས། རྩིབས་བརྒྱད་ཀྱིས་ནི་སྡུག་བསྔལ་རྣམས་སྦྱོང༌། མཐའ་མའི་མུ་ཁྱུད་ཀྱིས་ནི་ལས་རྣམས་སྦྱོང་བ་སྟེ། དེ་ཡང་དབུས་འཁོར་ལོར་འདུག་པ་ནི་རྟེན་འབྲེལ་བཅུ་གཉིས་སྦྱོང་བའོ། །དེ་ཇི་ལྟར་སྦྱོང་ཞེ་ན། རྟེན་འབྲེལ་ཡང་ཉོན་མོངས་པ་དང༌། སྡུག་བསྔལ་དང་ལས་གསུམ་དུ་འདུས་ལ། འཁོར་ལོ་ཡང་ལྟེ་བ་དང་མུ་ཁྱུད་དང་རྩིབས་གསུམ་དུ་འདུས་སོ། །དེ་ལྟ་བུའི་འཁོར་ལོ་དེའི་ལྟེ་བའི་དབུས་སུ་སེང་གེ་བཞིའི་ཁྲི། དེའི་སྟེང་དུ་སྣ་ཚོགས་པདྨ། དེའི་སྟེང་དུ་ཟླ་བའི་དཀྱིལ་འཁོར། དེའི་སྟེང་དུ་ཧཱུཾ་དང་ཧྲཱིཿ་དེའི་མཐའ་མ་ན་ཚུར་ཨོཾ་སརྦ་པཱ་པཾ་ད་ཧ་ན་བཛྲ་ཧཱུཾ་ཕཊ། ཅེས་བྱ་བས་བསྐོར་བ། དེ་ལས་འོད་འཕྲོ་བ་དང་བསྡུ་བ་ལས་པདྨ་དང་རྡོ་རྗེ་སྟེ་པདྨ་འདབ་མ་བརྒྱད་གྱེན་དུ་བལྟས་པ་བརྒྱད་ཐུར་དུ་བལྟས་པ། རིགས་དང་ཐབས་དང་སྙིང་རྗེའི་ཆ་འཛིན་པ། དེའི་སྟེང་དུ་རྡོ་རྗེ་སྟེ་སོ་སོར་བརྟགས་པའི་ཤེས་རབ་ཀྱི་རང་བཞིན་སྟོང་པ་ཉིད་ཀྱི་ཆ་འཛིན་པ་སྟེ། དེ་ལས་འོད་ཟེར་སྤྲོས་པས་ཕྱོགས་བཅུ་དུས་གསུམ་གྱི་སྐུ་གསུང་ཐུགས་ཀྱི་དབྱིབས་ཐམས་ཅད་བསྡུས་ནས་ཐིམ་པས་དེ་ལ་སྐུར་གྱུར་པའི་རྐྱེན་ཨོཾ་སརྦ་པཱ་པཾ་ད་ཧ་ན་བཛྲ་ཧཱུཾ་ཕཊ་ཅེས་བརྗོད་པ་དང༌། ཕྱག་ན་རྡོ་རྗེ་འཁོར་ལོའི་ཕྱག་རྒྱ་ལས་ཤཱཀྱ་ཐུབ་པའི་སྐུར་གྱུར་ཏོ། །འདིར་ནི་སྔགས་འདིས་བསྐྱེད་དོ། །རྡོ་རྗེ་གཙུག་ཏོར་གྱི་རྒྱུད་ཀྱི་སྒྲུབ་ཐབས་སུ་ནི་མུ་ནེ་མུ་ནེ་ཞེས་བྱ་བ་ལ་སོགས་པ་ལས་བསྐྱེད་དོ། །ད་ནི་འཁོར་གྱི་སྐུ་བསྐྱེད་དེ། དེ་ཡང་བདག་གིས་ནི་རྡོ་རྗེ་གཙུག་ཏོར་གྱི་རྒྱུད་ཀྱི་སྒྲུབ་ཐབས་
སུ་ནི་ཨོཾ་བཛྲ་ཧཱུཾ་ཕཊ་ཅེས་བྱ་བ་དང༌། ཨོཾ་རཏ་ནོཏ་ཏྲ་ཏ་མ་ཏྲཾ་ཞེས་བྱ་བ་ལ་སོགས་པ་ལས་བསྐྱེད་དོ། །འདིར་ནི་འདི་ཉིད་ཀྱི་སྔགས་རྣམས་ལས་བསྐྱེད་པར་བྱའོ། །ཅིའི་ཕྱིར་རྒྱུད་མི་མཐུན་པའི་ཕྱིར་ན་སོམ་ཉི་ཟ་བར་མི་བྱའོ། །བདག་ཉིད་ཀྱི་ཐུགས་ཀར་ཀུན་དུ་བཟང་པོ་བྱང་ཆུབ་ཀྱི་སེམས་ཟླ་བའི་དཀྱིལ་འཁོར་གྱི་དབུས་སུ་ཨོཾ་སརྦ་ཨ་པཱ་ཡ་བི་ཤོ་དྷ་ནི་བཛྲ་ཧཱུཾ་ཕཊ་ཅེས་པའི་སྔགས་ཕྲེང་བའི་ཚུལ་དུ་བཀོད་ལ་འཕྲོས་ཤིང་འདུས་པ་ལས་རྡོ་རྗེ་རྩེ་ལྔ་པར་གྱུར་དེ་ལས་འོད་འཕྲོས་པས་ཕྱོགས་བཅུའི་འཇིག་རྟེན་གྱི་ཁམས་ཀྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་དབྱིངས་ཇི་སྙེད་པ་ཐམས་ཅད་བསྡུས་ནས་རྡོ་རྗེ་ལ་ཐིམ་པས་བརྟན་པར་གྱུར་ཏོ། །ཡང་དེ་ལས་སྐུ་ཕྲ་མོ་མང་པོ་འཕྲོས་ཤིང་འདུས་པ་ལས་རྡོ་རྗེ་སེམས་དཔའི་སྐུ་ཕྱག་རྒྱ་ཆེན་པོར་གྱུར་ཏེ། བཅོམ་ལྡན་འདས་ཤཱཀྱ་ཐུབ་པའི་ཐུགས་ཀན་ཞུགས་སོ། །ཡང་དེ་ཉིད་ཀྱི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་སྔགས་ཀྱི་ཕྲེང་བ་རྣམས་སྔ་མ་བཞིན་དུ་བཀོད་ལ་སྔགས་དེ་ཉིད་བརྗོད་པ་ལས་བསྐུལ་ཞིང་སྤྱན་དྲངས་པའི་ཚུལ་གྱིས་ཕྱིར་བཏོན་ཏེ། ཕྱོགས་བཅུར་སྤྲོས་པས་མཛད་པ་བཅུ་གཉིས་ཀྱི་ཚུལ་གྱིས་འགྲོ་བའི་དོན་མཛད་ནས་སླར་འདུས་པ་ལས་བདག་གི་མདུན་ན་བཀའ་ནོད་ཅིང་བཞུགས་པ་ལ། དེ་ལ་ཆོ་འཕྲུལ་ཆེན་པོ་བཞིས་བྱིན་གྱིས་བརླབས་ཏེ། སྙིང་གར་རྡོ་རྗེ། ཁར་པདྨ། དཔྲལ་བར་རིན་པོ་ཆེ། སྤྱི་བོར་རྒྱ་གྲམ་བསམ་མོ། །དེ་ལ་ཡང་དབང་བསྐུར་ཏེ་ཡིད་བཞིན་གྱི་ནོར་བུ་རིན་པོ་ཆེའི་དབུ་རྒྱན་ནམ་མཁའ་ལས་བྱུང་བ་མགོ་ལ་བསྐོན་ཏེ། བདག་གི་རྡོ་རྗེ་དང་ དྲིལ་བུ ་གཉིས་སྲི་ཞུའི་ཚུལ་གྱིས་ལག་པར་བྱིན་ལ། རྡོ་རྗེ་སེམས་དཔའ་ཞེས་ལན་གསུམ་བརྗོད་དེ་མིང་གི་དབང་བསྐུར་ནས་ཉིད་ཀྱི་ཕྲིན་ལས་ཀྱིས་བཞུགས་ནས་འཁོར་ལོའི་ཤར་གྱི་རྩིབས་སུ་པདྨ་ཟླ་བའི་སྟེང་དུ་བཞུགས་སུ་གསོལ་ལོ། །གཞན་རྣམས་ལ་ཡང་དང་པོའི་ཐུགས་ཀའི་སྔགས་ཀྱི་ཕྲེང་བ་བཀོད་པའི་འཕྲོ་འདུ་ལས་ཕྱག་མཚན་དུ་གྱུར་པ་དང༌། དེ་བརྟན་པར་བྱས་པ་དང༌། དེ་ལས་སྐུ་ཕྱག་རྒྱར་གྱུར་པ་དང༌། དེ་སེམས་ཅན་གྱི་དོན་ལ་སྤྲོས་ནས་སླར་བྱོན་ཏེ་བདག་གི་མདུན་ན་གནས་པ་ལ་ཆོ་འཕྲུལ་ཆེན་པོ་བཞིས་བྱིན་གྱིས་བརླབས་པ་དང༌། ནམ་མཁའ་ལས་བྱུང་པ་རིན་པོ་ཆེའི་དབུ་རྒྱན་མགོ་ལ་བསྐོན་པ་དང༌།
ཕྱག་མཚན་ལག་ཏུ་བྱིན་པ་དང༌། མིང་གི་དབང་བསྐུར་བ་བྱས་ལ་ཉིད་ཀྱི་ཕྲིན་ལས་ཀྱི་བཞུགས་ས་གང་ཡིན་པར་བཞུགས་སུ་གསོལ་ལོ། །དེ་དག་གིས་བསྐྱེད་ཅིང་སྐུ་འདོན་པའི་སྔགས་ནི་ཨོཾ་སརྦ་ཀརྨ་ཨཱ་བ་ར་ཎ་ནི་བྷསྨིཾ་ཀུ་རུ་ཧཱུཾ་ཕཊ་ཅེས་པ་ལས་རྒྱལ་བའི་གཙུག་ཏོར་སྐུ་མདོག་མཐིང་ག་ཕྱག་དྲུག་པ་དང་པོ་གཉིས་རིན་པོ་ཆེའི་རྒྱལ་མཚན། གཡས་དབུས་མ་ན་ཞགས་པ་གཡོན་རྡོ་རྗེ་ཁུ་ཚུར་སྟ་ཟུར་དུ་བསྟན་པ་སྟེ། ཞགས་པ་བེ་ཅོན་འཛིན་པ། གཡས་ཐ་མ་ན་རྡོ་རྗེ། གཡོན་ཐ་མ་ན་པདྨའི་སྟེང་ན་གཙུག་ཏོར་བསྣམས་པ་སྟེ། ལྷོའི་རྩིབས་སྟེང་དུའོ། །ཡང་གཙོ་བོའི་ཐུགས་ཀར་ཨོཾ་བྷྲཱུཾ་བི་ནཱ་ཤ་ཡ་ཨཱ་པ་ར་ཎ་ནི་ཧཱུཾ་ཕཊ། དེ་ལས་ཕྱག་རྒྱ་འཁོར་ལོ། དེ་ལས་བརྟན་པ། དེ་ལས་སྐུ་ཕྱག་རྒྱའོ། །དེ་ཉིད་ཀྱི་ཐུགས་ཀར་སྔགས་བཀོད་པ་དང༌། སྤྱན་དྲངས་པ་དང༌། བཀའ་ནོད་པའི་ཚུལ་དུ་ཞུགས་པ་ལ་དབུ་རྒྱན་དང་དབང་བསྐུར་བ་ཡང་བྱ། ཕྱག་རྒྱ་བྱིན་པ་ནི་འཁོར་ལོ་བྱིན་ཏེ། གཙུག་ཏོར་འཁོར་ལོས་སྒྱུར་བ་ཞེས་སོ། །དེ་ནས་ནུབ་ཀྱི་འཁོར་ལོའི་རྩིབས་ཀྱི་པདྨ་དང་ཟླ་བའི་སྟེང་དུ་སྐུ་མདོག་དམར་པོ་བཞུགས་སོ། །ཨོཾ་དྲུཾ་བི་ཤོ་དྷ་ཡ་སརྦ་ཨཱ་བ་ར་ཎཱ་ནི་ཧཱུཾ་ཕཊ་ཅེས་པ་ལས་རྣམ་པར་རྒྱལ་བའི་གཙུག་ཏོར་སྐུ་མདོག་སེར་པོ་ཕྱག་བཞི་གཡས་ཀྱི་དང་པོ་ན་རྒྱལ་མཚན་གྱི་མགུལ་བ་དན་གྱིས་མཚན་པ་བསྣམས། གཡོན་དང་པོ་ན་དབུ་རྒྱན། དེའི་འོག་མ་གཉིས་ཀྱི་གཡས་པས་ནི་དམ་པ་སྦྱིན་པའོ། །གཡོན་པས་ནི་པདྨའི་སྟེང་ན་གཙུག་ཏོར་བསྣམས་པའོ། །དེ་ནི་བྱང་གི་འཁོར་ལོའི་རྩིབས་སྟེངས་སུ་གནས་པའོ། །ཡང་ན་གཡོན་ནས་བསྐོར་བའོ། །ཨོཾ་ཛྭ་ལ་ཛྭ་ལ་དྷ་ཀ་དྷ་ཀ་ཧ་ན་ཧ་ན་སརྦ་ཨ་བ་ར་ཎཱ་ནི་ཧཱུཾ་ཕཊ་ཅེས་པ་ལས་གཟི་བརྗིད་གཙུག་ཏོར་སྐུ་མདོག་དམར་སྐྱ་ཕྱག་གཉིས་ན་ཉི་མ་རིན་པོ་ཆེས་མཚན་པ་བསྣམས་པ་མེའི་མཚམས་སྣ་བཞུགས་པའོ། །ཨོཾ་སུཾ་ས་ར་ས་ར་པྲ་ས་ར་པྲ་ས་ར་སརྦ་ཨཱ་ཝ་ར་ཎཱ་ནི་ཧཱུཾ་ཕཊ་ཅེས་པ་ལས་གཙུག་ཏོར་གདུགས་དཀར་པོ་སྐུ་མདོག་དཀར་པོ་ཕྱག་ན་གདུགས་དཀར་པོ་བསྣམས་པ་དབང་ལྡན་གྱི་ཕྱོགས་སུའོ། །ཨོཾ་ཧཱུཾ་ཧ་ར་ཧ་ར་སརྦ་ཨཱ་བ་ར་ཎཱ་ནི་ཧཱུཾ་ཕཊ་ཅེས་པ་ལས་གཙུག་ཏོར་རྣམ་པར་མཐོང་བ་སྐུ་མདོག་དམར་སྐྱ་ཕྱག་གཡོན་སྙིང་གར་མཛུབ་མོ་བསྒྲེང༌། གཡས་རལ་གྲི་བསྣམས་པ་ནུབ་བྱང་མཚམས་སུའོ། །ཨོཾ་ཧཱུཾ་ཕཊ་སརྦ་ཨཱ་བ་ར་ཎཱ་ནི་སྥོ་ཊ་ཡ་ཧཱུཾ་ཕཊ་ཅེས་པ་ལས།
གཙུག་ཏོར་རྣམ་པར་འཇོམས་པ་སྐུ་མདོག་ནག་པོ་གཡོན་མཛུབ་མོ་བསྒྲེངས། གཡས་བེ་ཅོན་བསྣམས་པ་ཡིད་ཙམ་ཁྲོས་པའོ། །དེ་ནས་དེ་དག་གི་ཡོ་བྱད་བཤད་ཅེས་པ་ནི་མཆོད་པའི་ལྷ་མོའོ། །ཨོཾ་སརྦྦ་ཨ་པཱ་ཡ་བི་ཤོ་དྷ་ནི་དྷ་མ་དྷ་མ་དྷུ་པ་ཡ་ཧཱུཾ་ཕཊ། ཅེས་པ་བདུག་པ་མའོ། །ཨོཾ་སརྦ་དུ་རྒ་ཏི་བི་ཤོ་དྷ་ནི་པུཥྤ་བི་ལོ་ཀ་ནི་ཧཱུཾ་ཕཊ་ཅེས་པ་ལས་མེ་ཏོག་མའོ། །ཨོཾ་སརྦ་ཨ་པཱ་ཡ་བི་ཤོ་དྷ་ནི་ཛྙཱ་ཨཱ་ལོ་ཀ་ཀ་རི་ཧཱུཾ་ཕཊ་ཅེས་པ་ལས་མར་མེ་མའོ། །ཨོཾ་སརྦ་ཨ་པཱ་ཡ་ག་ཏི་བི་ན་ཤ་ནི་གནྡྷེ་པ་ཏི་ཧཱུཾ་ཕཊ་ཅེས་པ་ལས་དྲི་ཆབ་མའོ། །ཨོཾ་སརྦྦ་ན་ར་ཀ་ག་ཏི་ཨཱ་ཀཪྵ་ནི་ཧཱུཾ་ཛཿ་ཕཊ་ཅེས་པ་ལས་ལྕགས་ཀྱུའོ། །ཨོཾ་སརྦྦ་ན་ར་ཀ་ག་ཏི་ཨུཏྟ་ར་ནི་ཧཱུཾ་ཧཱུཾ་ཕཊ་ཅེས་པ་ལས་ཞགས་པའོ། །ཨོཾ་སརྦྦ་ཨ་པཱ་ཡ་བནྡྷ་མོ་ཙ་ནི་ཧཱུཾ་བཾ་ཕཊ་ཅེས་པ་ལས་ལྕགས་སྒྲོག་གོ །ཨོཾ་སརྦ་ཨ་པཱ་ཡ་ག་ཏི་ག་ཧ་ན་བི་ནཱ་ཤ་ནི་ཧཱུཾ་ཧོཿ་ཕཊ་ཅེས་པ་ལས་དྲིལ་བུའོ། །དེ་དག་ཐམས་ཅད་ཀྱང་སྐུ་མདོག་རྩ་བའི་རྒྱུད་དུ་བསྟན་པ་བཞིན་ནོ། །དེ་ནས་ཕྱག་རྒྱ་ཆེན་པོ་བསྒྲུབ་པར་བྱ་སྟེ། དེ་ནས་སྒོ་ཕྱེ་ལ་སྤྱན་དྲང་སྟེ། ཨོཾ་སརྦ་པཱ་བཾ་ད་ཧ་ན་བཛྲ་ཡ། བཛྲ་དྷརྨ་དྲྀ་ཤྱ་ཧོ་ཞེས་བྱ་བས་སོ། །དེ་ནས་མདུན་དུ་དམིགས་ལ། པདྨོ་སེམས་དཔའ་སེམས་དཔའ་ཆེ། །ཞེས་པ་ནས། ཐུབ་པ་ཆེན་པོ་བཤད་དུ་གསོལ། །ཞེས་བྱ་བའི་བར་གྱིས་བསྟོད་དོ། །དེ་ནས་དགུག་གཞུག་དམ་ཚིག་གི་དཀྱིལ་འཁོར་ལ་བྱ། དེ་ནས་ཕྱག་རྒྱ་བཞིས་རྒྱས་གདབ་དབང་བསྐུར་བསྲུང་བ་བྱ། དེ་ནས་མཆོད་པས་མཆོད་ལ་ཡང་བསྟོད་པས་བསྟོད་དེ་འཛུབ་བྱའོ། །དེ་ནས་ཀྱེ་བཅོམ་ལྡན་འདས་ཤཱཀྱ་ཐུབ་པ་ཆེན་པོ་རྡོ་རྗེ་ཆོས། མ་ཧཱ་སུ་ཁ་བཛྲ་དྷརྨ་བཛྲ་ཛཿ་ཧཱུཾ་བཾ་ཧོཿ་སུ་ར་ཏ་སྟྭཾ་ཞེས་བརྗོད་དོ། །རྡོ་རྗེ་ དྲིལ་བུ ་བཟུང་ལ་བསྟོད་པ་བྱའོ། །དེ་ནས་དཀྱིལ་འཁོར་འོག་ནས་འབྱུང་བ་བཞིན་བསྡུའོ། །དེ་ནི་སྔོན་དུ་བསྙེན་པ་བྱ་བའི་ཆོ་གའོ།། །།ད་འདི་ནས་སློབ་དཔོན་གྱི་ལས་ཀྱི་རིམ་པའི་ཆོ་གའི་དོན་བསྟན་ཏེ། དེ་ནས་དཀྱིལ་འཁོར་བཤད་དེ་ཞེས་བྱ་བ་ལ། དཀྱིལ་འཁོར་ནི་གཙུག་ཏོར་དགུའོ། །བཤད་དེ་ཞེས་བྱ་བས་ནི་དེའི་དོན་སྟོན་པ་སྟེ། འདིར་ཡང་དེའི་དོན་ནི་འདི་ལྟར་ཤེས་པར་བྱ་སྟེ་དང་པོར་གཙུག་ལག་ཁང་ལ་སོགས་པའི་གནས་ཀྱི་བྱང་ཤར་མཚམས་སམ། ཤར་དུ་གཞོལ་བར་དང་པོར་ས་བརྟགས་པ་དེར། ས་སྣང་པ་ལ་སློང་པ་དང༌། མི་སྣང་བ་ལ་
སློང་བ་བྱས་ལ། དེ་ནས་རྒྱལ་པོ་ལ་སོགས་པའི་ཁྲུ་ཚང་བརྟགས་པ་དེར། སའི་ལྟོ་འཕྱེ་བརྟག་པ་དང༌། ལས་དང་བྱ་བས་སྦྱང་བ་དང༌། ཏིང་ངེ་འཛིན་གྱིས་སྦྱང་བ་དང༌། ས་གཞི་ཡོངས་སུ་བཟུང་བ་དང༌། རྒྱས་པར་གཟུང་བ་ལ་སོགས་པ་བྱའོ། །དེ་ནས་སྟ་གོན་ལ་གནས་པ་ཡང་བྱའོ། །དེ་ནས་ནང་པར་ཉི་མ་ཤར་ནས་ཐིག་གདབ་པར་བྱའོ། །འཁོར་ལོ་འདྲ་བའི་དཀྱིལ་འཁོར་ལ། །ཞེས་བྱ་བ་ལ་སོགས་པ་གསུངས་ཏེ། ཐིག་ཀྱང་ཡེ་ཤེས་ཀྱི་ཐིག་དང་ལས་ཀྱི་ཐིག་གོ །དེ་ལ་ཡེ་ཤེས་ཀྱི་ཐིག་ནི་ཚོན་སྣ་ལྔ་རུ་བཙོས་པ་ཤིན་ཏུ་ལེགས་པར་བྱས་པ། དཀྱིལ་འཁོར་གཞན་དུ་ལོངས་མ་སྤྱད་པ་འཇུར་མདུད་མེད་པ་དེ་བྱིན་གྱིས་བརླབས་ལ་ཐིག་གདབ་པར་བྱའོ། །ལས་ཀྱི་ཐིག་ནི་ཚོན་སྣ་ཚོགས་པ་དཀར་པོར་སྦངས་པ་དེས་ཐིག་གདབ་པར་བྱའོ། །དང་པོར་བཛྲ་དྷཱ་ཏུ་ཞེས་བྱ་བས་རྡོ་རྗེའི་ཚིག་གིས་བཟླས་ལ་བདག་ཤཱཀྱ་ཐུབ་པའི་གཟུགས་སུ་གྱུར་པར་བྱས་ནས། སྒྲུབ་པའི་གྲོགས་མཆོག་གཙུག་ཏོར་རྣམ་པར་རྒྱལ་བའི་བཛྲ་ཀརྨ་ཞེས་བྱ་བས་སྤྲུལ་ལ་ཡང་བདག་ཉིད་བཛྲ་སཏྭ་ཞེས་བྱ་བས་རྡོ་རྗེ་གཙུག་ཏོར་དུ་བདག་ཉིད་བསམ་སྟེ་སྲད་བུ་བྲེ་བར་བྱའོ། །གཡོན་པའི་རྡོ་རྗེ་ཁུ་ཚུར་གྱིས་སྲད་བུ་བཟུང་ལ་ཛཿ་ཞེས་བྱ་བས་སྒྲུབ་པའི་གྲོགས་མཆོག་གཙུག་ཏོར་རྣམ་པར་རྒྱལ་བའི་གཟུགས་ཅན་གྱི་ལག་ཏུ་གཏད་ལ་ཕྱོགས་ཐམས་ཅད་མཉམ་ཉིད་དུ་བསྒོམ་ཞིང༌། ཤར་ཕྱོགས་སུ་བལྟས་ཏེ་རྡོ་རྗེ་སྲད་བུས་གདབ་པར་བྱའོ། །ཡང་སློབ་དཔོན་ལྷོ་རུ་འདུག་པས་བྱང་དུ་བལྟས་ཏེ་གཉིས་པ་གདབ་པར་བྱའོ། །དེ་ནས་མེའི་ཕྱོགས་ཆར་འདུག་ལ་བྱང་དུ་བལྟས་ཏེ་དཀྱིལ་འཁོར་གྱི་ཤར་དུ་ཐིག་གདབ་པར་བྱའོ། །རླུང་གི་ཕྱོགས་སུ་གནས་ལ་ལྷོའི་ཕྱོགས་སུ་བལྟས་ཏེ་ནུབ་ཀྱི་ཐིག་གདབ་བོ། །དེ་ཉིད་དུ་འདུག་སྟེ་བྱང་གི་ཐིག་གདབ་བོ། །ཡང་མེའི་ཕྱོགས་སུ་འདུག་སྟེ། ལྷོའི་ཕྱོགས་ཀྱི་ཐིག་གདབ་པར་བྱའོ། །དེ་ནས་ཁ་ཁྱེར་གྱི་ཐིག་གདབ་པར་བྱ་སྟེ། དེ་ལ་རེ་ཞིག་སྒྲུབ་པའི་གྲོགས་མཆོག་བསྐོར་ཕྱོགས་སུ་འགྲོ་བར་བྱའོ། །སྲད་བུའི་སྔགས་ནི་ཨོཾ་བཛྲ་ས་མ་ཡ་སཱུ་ཏྲ་མཱ་ཏི་ཀྲ་མ་ཧཱུཾ་ཞེས་བྱ་བ་དང༌། ཛྫཿ་ཛྫཿ་ཞེས་བྱ་བ་དང༌། ཛྫཿ་གསུམ་གྱིས་སྒྲུབ་པའི་གྲོགས་མཆོག་གིས་དྲང་བར་བྱའོ། །དེ་ལ་སྒོ་ནི་ཆ་བརྒྱད་པའོ། །སྒོ་ཁྱུད་ནི་སྒོའི་ཕྱེད་ཀྱི་ཚད་དོ། །ཁ་ཁྱེར་ནི་
དེའི་ཕྱེད་ཀྱི་ཚད་དོ། །ཚོན་སྣ་ལྔ་ཡིས་ནི་ཁ་ཁྱེར་གྱི་ཕྱེད་དོ། །རྟ་བབས་ནི་སྒོའི་སུམ་འགྱུར་རོ། །འཁོར་ལོ་དྲ་བའི་དཀྱིལ་འཁོར་ལ། །ཞེས་བྱ་བ་ནི་ནང་གི་ཐིག་སྟེ། སེང་ལྡེང་གི་ཕུར་བུ་འོག་རྡོ་རྗེ་རྩེ་གཅིག་པ་ལྟ་བུ་ལ་སྟེ་རྡོ་རྗེ་རྩེ་ལྔ་པའི་དབྱིབས་ཅན་གྱི་ཕུར་བུའི་སྔགས་བཟླས་པས་བཏབ་ལ། དེ་ལ་བསྟོད་པའི་སྲད་བུས་ནང་གི་དཀྱིལ་འཁོར་དང༌། ཕྱིའི་རྡོ་རྗེ་ཕྲེང་བ་དབང་ལྡན་གྱི་ཕྱོགས་ནས་བརྩམས་ཏེ་གཡས་ནས་བསྐོར་བས་ཐིག་གདབ་པར་བྱའོ། །དབུས་ཀྱི་ནི་ལྟེ་བ་དང་རྩིབས་སུ་བཅས་པ་རྩིབས་རྡོ་རྗེ་ར་བས་བསྐོར་བ་འཁོར་ལོའི་ནང་དུ་སྣ་ཚོགས་པདྨ་དང་ཟླ་པའི་དཀྱིལ་འཁོར་དང་བཅས་པའོ། །རྡོ་རྗེ་གཙུག་ཏོར་གྱི་རྒྱུད་ཀྱི་སྒྲུབ་ཐབས་ཀྱི་སྐབས་སུ་ནི་རྒྱན་གྱི་ལྷ་རྡོ་རྗེ་སེམས་མ་ལ་སོགས་པ་དང༌། རྡོ་རྗེ་སེམས་དཔའ་ལ་སོགས་པའི་མཚན་མ་ཡང་དགོད་པར་བྱའོ། །འཁོར་ལོའི་རྩིབས་ཀྱང་སྔོན་པོར་བྱའོ་ཞེས། རྒྱུད་ལས་འབྱུང་བས་སོམ་ཉི་ཟ་པར་མི་བྱའོ། །སྐབས་འདིར་ནི་སེར་པོར་བྱའོ། །དེའི་སྟེང་དུ་སྣ་ཚོགས་པདྨ་དང་ཟླ་བའི་དཀྱིལ་འཁོར་དང་བཅས་པའོ། །དེ་ལ་ནི། ནང་གི་རིམ་པ་བྲིས་ནས་ཀྱང༌། །ཞེས་སོ། །དེ་ནས་ཆོན་དགྱེ་བ་བརྩམ་པར་བྱ་སྟེ། ཚོན་རྣམས་ལ་ཡང་ཨོཾ་ཧཱུཾ་ཏྲཱཾ་ཧྲཱིཿ་ཨཿ་ཞེས་པ་བསམས་ལ་དེ་ལས་འོད་སྤྲོ་བ་དང་བསྡུ་བའི་བྱེ་བྲག་གིས་ཡེ་ཤེས་ཀྱི་ཚོན་བསྟིམ་པར་བྱའོ། །དེ་ནས་དབང་ལྡན་ནས་བརྩམས་ནས་དཀར་པོ་དང་དམར་པོ་དང་སྔོན་པོ་དང་ལྗང་གུ་དང༌། ནང་དུ་སེར་པོར་ཤེས་པར་བྱའོ། །གཞན་རྣམས་ནི་རྩ་བའི་དཀྱིལ་འཁོར་ལྟར་རོ། །དེ་ནས་ལྷ་དགོད་པར་བྱ་སྟེ། ལྟེ་བའི་ནང་དུ་ཤཱཀྱ་ཡི། །བདག་པོ་ཐུབ་པ་གཞག་པར་བྱ། །ཞེས་བྱ་བ་ལ་སོགས་པ་ནི་ལྟེ་བ་ནི་དབུས་ཀྱི་ལྟེ་བའོ། །བདག་པོ་སྟེ་གཙུག་ཏོར་དགུ་པའི་བདག་པོ་ཤཱཀྱའི་རིགས་སུ་སྐྱེས་པའི་ཤཱཀྱ་ཐུབ་པ་གཞག་པར་བྱའོ། །དེ་ནི་ཆོས་ཀྱི་དབྱིངས་ཀྱི་ཡེ་ཤེས་ཀྱི་རང་བཞིན་ནོ། །ཕྱག་ན་རྡོ་རྗེ་སྟོབས་ཆེན་ནི་གང་དུ་བཤད་ཟིན་ཏོ། །དཔའ་བོ་དེ་ཡི་སྤྱན་སྔར་བྲི། །ཞེས་བྱ་བ་ནི་ཤར་དུ་བྲི་བ་སྟེ། མེ་ལོང་ལྟ་བུའི་ཡེ་ཤེས་ཀྱི་རང་བཞིན་ནོ། །རྒྱབ་ཏུ་འཁོར་ལོས་སྒྱུར་བ་ནི། །ཞེས་བྱ་བ་ནི་ནུབ་ཕྱོགས་ཏེ། སོ་སོར་རྟོག་པའི་ཡེ་ཤེས་ལས་སྐུ་སྤྲུལ་ཏེ་དམ་པའི་ཆོས་ཀྱི་འཁོར་ལོ་ནི་འགྲོ་བའི་རྒྱུད་ལ་བསྐོར་ལ།
ཐུགས་རྗེ་ཐབས་ཀྱི་འཁོར་ལོ་ནི་ཁམས་གསུམ་གྱི་ནང་དུ་སྒྱུར་བའི་ཕྱིར་རོ། །གཡས་སུ་རྒྱལ་བའི་གཙུག་ཏོར་ཏེ། །ཞེས་བྱ་བ་ནི་བཅོམ་ལྡན་འདས་ཀྱི་གཡས་ནི་ལྷོ་ཕྱོགས་ཏེ། མཉམ་པ་ཉིད་ཀྱི་ཡེ་ཤེས་ཀྱི་ཁྱད་པར་ལས་ཉོན་མོངས་པའི་བདུད་ལས་རྒྱལ་བས་ན་རྒྱལ་བའི་གཙུག་ཏོར་རོ། །གཡོན་དུ་རྣམ་པར་རྒྱལ་བ་བྲི། །ཞེས་པ་ནི་གཡོན་ནི་བཅོམ་ལྡན་འདས་ཀྱི་བྱང་ཕྱོགས་ཏེ། བྱ་བ་ནན་ཏན་གྱི་ཡེ་ཤེས་ནས་ཐུགས་རྗེས་སྐུ་སྤྲུལ་ཏེ། ཉོན་མོངས་པའི་མཚན་མའི་ཕྲག་དོག་ལས་རྒྱལ་བས་ན་རྣམ་པར་རྒྱལ་བའོ། །གཟི་བརྗིད་ཕུང་པོའི་མེ་ཡི་ཕྱོགས། །ཞེས་པ་ནི་ཐུགས་ཆོས་ཉིད་ཞི་བའི་ངོ་བོ་ལས་བྱང་ཆུབ་སེམས་ཀྱི་ཡེ་ཤེས་ཀྱི་གཟི་བརྗིད་སྤུངས་པས་ཁམས་གསུམ་གྱི་ཉོན་མོངས་པ་བསྲེག་པའོ། །དབང་ལྡན་ཕྱོགས་སུ་གདུགས་དཀར་པོ། །ཞེས་པ་ནི་བྱང་ཤར་དུ་ཁམས་གསུམ་གྱི་ཉོན་མོངས་པའི་གདུང་བ་ཐུགས་རྗེ་ཆེན་པོའི་འོད་ཀྱིས་སེལ་བས་ན་གདུགས་དཀར་པོའོ། །རྣམ་པར་འཐོར་བ་རླུང་གི་ཕྱོགས། །ཞེས་པ་ནི་རྣམ་པར་འཐོར་བ་ནི་རྣམ་པར་གཅོད་པ་སྟེ་ཉོན་མོངས་པ་དང་ཉེ་བའི་ཉོན་མོངས་པ་གཅོད་པར་བྱེད་པས་རྣམ་པར་འཐོར་བའོ། །རྣམ་པར་འཇོམས་པ་བདེན་བྲལ་ཕྱོགས། །ཞེས་བྱ་བ་ནི་ལས་དང་ཉོན་མོངས་པའི་བག་ཆགས་ཐམས་ཅད་ཡང་དག་པའི་ཡེ་ཤེས་ཆེན་པོས་འཇོམས་པས་ན་དེ་སྐད་དོ། །གྲུ་བཞི་པ་ལ་སྒོ་བཞི་པ། །ཞེས་བྱ་བ་ལ་སོགས་པ་ནི་ཕྱིའི་དཀྱིལ་འཁོར་བྲི་བར་བྱ་བ་ལ་སོགས་པ་སྟེ། རྩ་བའི་དཀྱིལ་འཁོར་དང་འདྲ་བའོ། །དཔའ་བོ་ལྕགས་ཀྱུ་ཞགས་པ་དང༌། །ཞེས་བྱ་བ་ལ་སོགས་པ་ནི་སྒོ་བ་བཞི་བྲི་བར་བྱའོ། །གྲྭ་ཡི་ཕྱོགས་ནི་ཞེས་བྱ་བ་ལ་སོགས་པས་ནི་ཚུལ་ཁྲིམས་ཀྱི་བདུག་སྤོས་དང༌། ཏིང་ངེ་འཛིན་གྱི་མེ་ཏོག་དང༌། ཤེས་རབ་ཀྱི་མར་མེ་དང༌། བྱང་ཆུབ་སེམས་ཀྱི་བདེ་བའི་དྲི་ཆབ་རྣམས་ནི་གྲུ་ཆད་ལ་བྲི་བར་བྱའོ། །དེ་ནི་དཀྱིལ་འཁོར་བྲི་བའི་ལས་སོ། །དེ་ནས་ཕྱོགས་བཞིར་ཡང་རྟ་བབས་བཞི་དང༌། ཀ་བ་བརྒྱད་ཁྲུ་དྲུག་གམ་བདུན་གྱི་ཚད་ཙམ་མམ། རིན་པོ་ཆེ་ལ་སོགས་པའི་རྒྱུ་ལས་བྱས་པའི་མེ་ཏོག་གི་ཕྲེང་བ་དང༌། དར་ལ་སོགས་པས་བརྒྱན་པ་དགྲམ་མོ། །དཀྱིལ་འཁོར་གྱི་ཕྱི་རིམ་ཤར་ལ་སོགས་པའི་ཕྱོགས་ཀྱི་ཆར་འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། སྡོང་པོས་བརྒྱན་པ་དང༌། དེ་བཞིན་གཤེགས་པའི་
གསང་བ་དང༌། གསེར་འོད་དམ་པ་ཀློག་ཏུ་གཞུག་གོ །ཆོས་སྨྲ་བ་འདི་དག་ཀྱང་སངས་རྒྱས་ལྟར་ཅི་ནུས་པས་མཆོད་པར་བྱའོ། །དེ་ལྟ་བུས་ནི་བགེགས་ཐམས་ཅད་ཉེ་བར་ཞི་བ་དང་དཀྱིལ་འཁོར་ཉེ་བར་གྲུབ་པར་འགྱུར་རོ། །ཕྱོགས་དང་མཚམས་སུ་སྦོས་སྣོད་བརྒྱད་དང༌། མར་མེ་ལ་སོགས་པ་ཡང་གཞག་པར་བྱའོ། །དེ་ནས་དགོངས་ཀའི་དུས་སུ་འཇུག་པར་བྱ་སྟེ། དེ་ནས་དྲི་ཞིམ་དྲི་ལ་སོགས། །རང་གི་ལུས་ནི་བཀྲུས་ནས་ཀྱང༌། །རྡོ་རྗེ་འཛིན་མས་ཞུགས་ནས་ནི། །ཞེས་པ་ནི་དེ་ནས་དྲི་ཞིམ་དྲི་ནི་ཙནད་ན་དང༌། གུར་གུམ་ལ་སོགས་པའོ། །སྒྲུབ་པ་པོ་རང་གི་ལུས་བཀྲུས་ནས་རྡོ་རྗེ་སེམས་མའི་དམ་ཚིག་གི་ཕྱག་རྒྱས་མེ་ཏོག་གི་ཕྲེང་བ་བླངས་ལ། རྡོ་རྗེ་ཤུགས་ཀྱི་དཀྱིལ་འཁོར་དུ་འཇུག་པར་བྱ་ཞིང་བཛྲ་སཏྭ་ཧཱུཾ་ཞེས་ཀྱང་བརྗོད་པར་བྱའོ། །ཡང་དཀྱིལ་འཁོར་ཐམས་ཅད་ཀྱི་ལྷག་པ་དང་མ་ཚང་བའི་ཉེས་པ་ཐམས་ཅད་ཞི་བར་བྱ་བའི་ཕྱིར་བལྟས་ལ་རྡོ་རྗེ་ དྲིལ་བུ ་དཀྲོལ་ཞིང་དཀྱིལ་འཁོར་ལན་བདུན་བསྐོར་བ་བྱས་ནས་བཅོམ་ལྡན་འདས་ཕྱག་ན་རྡོ་རྗེ་ལ་ཕྲེང་བ་དེ་ཕུལ་ནས་ཕྲེང་བ་དེ་གར་བྱས་ལ། བླངས་ལ་རང་གི་མགོ་ལ་བཅིང་བར་བྱའོ། །དེ་ནས་བུམ་པ་རྣམས་དཀྱིལ་འཁོར་དུ་བཞག་སྟེ་བུམ་པ་ཡང་རིགས་མི་མཐུན་པ་ལྔའོ། །ལས་ཐམས་ཅད་པའི་བུམ་པས་དཀྱིལ་འཁོར་གྱི་ཡོ་བྱད་བསང་བ་དང༌། ཁྲོ་བོ་རྣམ་པར་རྒྱལ་བས་སྡིག་པ་བཀྲུ་བར་བྱ་བ་དང༌། ཁམས་གསུམ་རྣམ་པར་རྒྱལ་བའི་བུམ་པ་ལ་སོགས་པའི་བུམ་པས་དབང་བསྐུར་བ་དང༌། བུམ་པ་གང་བས་མཆོད་པ་དང་རྡོ་རྗེ་སེམས་དཔའི་བུམ་པས་བདག་ཉིད་དབང་བསྐུར་བའོ། དེ་ནས་བདག་ཉིད་ཀྱི་སྲུང་བའི་འཁོར་ལོས་བསྲུང་བ་བྱ་སྟེ། དཀྱིལ་འཁོར་མངོན་སུམ་ལྟར་དམིགས་ལ་མཆོད་པ་རྣམས་ཀྱིས་མཆོད་པ་དང༌། ཕྱག་བཞི་ལ་སོགས་པ་སྔོན་དུ་འགྲོ་བ་དང༌། སྡོམ་པ་གཟུང་བ་ལ་སོགས་པ་ལ་འཇུག་པར་བྱ་ཞིང་དབང་རྣམས་བླང་ངོ༌། །དེ་ནས་སྡིག་པ་དྲལ་བ་དང༌། ཡེ་ཤེས་དབབ་པ་དང༌། མངོན་པར་བྱང་ཆུབ་པ་ལ་སོགས་པས་སྐུ་བསྐྱེད་པ་དང༌། ཆོ་འཕྲུལ་བཞིས་བྱིན་གྱིས་བརླབ་པ་ལ་སོགས་པ་སྔ་མ་བཞིན་དུ་བསྐྱེད་པ་དང༌། དཀྱིལ་འཁོར་རྒྱལ་པོ་མཆོག་ཀྱང་སྔ་མ་བཞིན་དུ་བསྐྱེད་པར་བྱའོ། །བསྐལ་པ་བཟང་པོའི་སེམས་དཔའ་བཅུ་དྲུག་ནི་ངན་སོང་སྦྱོང་བའི་རྩ་བའི་
སྔགས་དང༌། སརྦ་སཾ་སྐཱ་ར་ཞེས་པ་ལ་སོགས་པས་བསྐྱེད་པར་བྱའོ། །དེ་ནས་རྡོ་རྗེ་སེ་གོལ་གྱི་ཕྱག་རྒྱ་དང༌། ཨོཾ་ཛཿ་ཧཱུཾ་བཾ་ཧོཿ་བྷ་ག་བཱན་ཨེ་ཧྱེ་ཧི་མ་ཧཱ་ཀ་རུ་ཎི་ཀ་དྲྀ་ཤྱ་ཧོཿ། ས་མ་ཡ་སྟྭཾ་ཞེས་པས་ལྷ་ཐམས་ཅད་སྤྱན་དྲང་ངོ༌། །དེ་ནས་མདུན་གྱི་ནམ་མཁའ་ལ་གཤེགས་པར་མོས་པ་བསྐྱེད་དེ། དེ་ནས་སྒོ་དབྱེ་བའི་སྔགས་དང་ཕྱག་རྒྱས་སྒོ་ཕྱེ་ལ། ལྕགས་ཀྱུ་ལ་སོགས་པས་དགུག་པ་ལ་སོགས་པ་བྱའོ། །དེ་ནས་རྡོ་རྗེ་སེམས་དཔས་བསྲུངས་ལ། འོག་ནས་འབྱུང་བའི་ཕྱག་རྒྱ་བཞིས་རྒྱས་གདབ་བོ། །དེ་ནས་བྱིན་གྱིས་བརླབ་ཅིང་དབང་བསྐུར་བ་བྱ་ལ་ཕྱི་ནང་གི་མཆོད་པས་མཆོད་པའི་ཕྱིར་ན། མཆོད་པ་བྱས་ནས་ཞེས་སོ། །དེའི་དོན་ཡང་འདི་ལྟར་སྙེག་སྟེ། རས་ཟུང་ཁྲིའམ་སྟོང་ངམ། འབུམ་མམ། བརྒྱའམ། བཅུའམ། ཡང་ན་སྤྱིར་ཐམས་ཅད་ལ་ཡང་ཟུང་གཅིག་དབུལ་ལོ། །གཞན་ཡང་མེ་ཏོག་དང༌། སྤོས་དང༌། མར་མེ་དང༌། སྭ་ཏི་ཀའི་ལྷ་བཤོས་ལ་སོགས་པ་རང་རང་གི་སྔགས་ཀྱིས་བཏབ་པ་བརྒྱའམ། སྟོང་ངམ་ཁྲིའམ་བཅུ་ལས་ཉུང་བར་མི་བྱ་བར་དབུལ་ལོ། །གཞན་ཡང་རོལ་མོའི་ཆ་བྱད་སྟོང་ཕྲག་ཇི་སྙེད་ལ་ཡི་གེ་ཧཱུཾ་དང་རྡོ་རྗེ་ཁུ་ཚུར་གྱིས་བརྡུང་བའི་ཚུལ་གྱིས་དབུལ་བར་བྱའོ། །བཅུ་པོ་འདི་ལྟ་སྟེ། པི་ཝང་དང༌། གླིང་བུ་དང༌། རྔ་དང༌། ཅང་ཏེའུ་དང༌། ཆ་ལོང་དང༌། རྔ་བོ་ཆེ་དང༌། རྫ་རྔ་དང༌། རྔ་རིངས་དང༌། གུན་རྫ་དང༌། ཏི་མི་ལི་ལ་སོགས་པ་བརྡུང་བའི་ཚུལ་གྱིས་དབུལ་བར་བྱ་སྟེ། ཏིང་ངེ་འཛིན་གྱིས་ལཱ་སྱ་ལ་སོགས་པ་རྔ་བརྡུང་བའི་ཚུལ་གྱིས་མཆོད་པ་དང༌། དྷཱུ་པེ་ལ་སོགས་པས་པི་ཝང་ལ་སོགས་པ་འབུད་པའི་ཚུལ་གྱིས་མཆོད་དོ། །དེ་ནས་བསྟོད་པས་ཀྱང་བསྟོད་ད། །དེ་ནས་སྦྱིན་སྲེག་བྱ་སྟེ། གཙོ་བོ་ལ་ནི་སྦྱིན་སྲེག་བརྒྱ་རྩ་བརྒྱད་ཀྱིས་མཆོད་དོ། །ཕྱག་ན་རྡོ་རྗེ་ལ་སོགས་པ་ལ་ནི། བདུན་བདུན་གྱི་སྲེག་བླུགས་གྱིས་མཆོད་དོ། །དེ་ནས་ཕྱག་བྱས་ཏེ། བདག་ཉིད་འཇུག་པར་བྱ་བ་དེ་བཞིན་དུ་བྱས་པ་ནི། སློབ་དཔོན་གྱི་ལས་ཀྱི་རིམ་པའོ། །དེ་བཞིན་དུ་བཅུག་སྟེ། དབང་བསྐུར་ན་ཞེས་བྱ་བས་ནི། སློབ་མ་གཞུག་ཅིང་དབང་བསྐུར་བའི་རིམ་པ་སྟོན་ཏེ། དེའི་དོན་ཡང་འདི་ལྟར་ཤེས་པར་བྱའོ། །དང་པོ་སློབ་དཔོན་གྱིས་དེ་བཞིན་གཤེགས་པ་
རྣམས་ལ་ཕྱག་འཚལ་ནས། །བདག་མིང་འདི་ཞེས་བགྱི་བ་ཡི། །རྡོ་རྗེ་སློབ་དཔོན་དཀའ་ཐུབ་ཆེ། །སེམས་ཅན་ཀུན་ལ་ཕན་པའི་ཕྱིར། །སློབ་མ་རྣམས་ནི་གཞུག་པར་བགྱི། །ཞེས་པས་ཞུགས་ལ་དབང་གི་བཀའ་ནོད་བར་བྱའོ། །དེ་ནས་སློབ་མས་ཀྱང་འདི་སྐད་གསོལ་བ་གདབ་པར་བྱའོ། །དགའ་ཆེན་ཁྱོད་བདག་སྟོན་པ་བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །ཞེས་སོ། །གང་དེའི་ཚེ་དུས་བྱས་པ་ཞིག་ཡིན་ན་ནི་དམ་ཚིག་སྦྱིན་པར་མི་བྱའོ། །སྡིག་བ་བཤགས་པ་དང༌། རྗེས་སུ་ཡི་རང་བ་དང༌། སྐྱབས་སུ་འགྲོ་བ་དང༌། ལམ་ལ་གནས་པ་དང༌། ལུས་དབུལ་བ་ལ་སོགས་པ་བྱའོ། །དེ་ཡང་བར་མདོའི་ཤེས་པ་དེ་ལ་བཅུག་སྟེ། མེ་ཏོག་དོར་བ་དང༌། དཀྱིལ་འཁོར་གྱི་ལྷ་རྣམས་ལྕགས་ཀྱུ་ནས་བརྩམས་ཏེ་བསྟན་པར་བྱའོ། །དབང་བསྐུར་ན་ཞེས་བྱ་བ་ནི་རྩ་བའི་དཀྱིལ་འཁོར་དུ་དབང་བསྐུར་བ་བཞིན་དུ་འདིར་ཡང་དབང་བསྐུར་བ་ན་ཞེས་བྱ་བའི་དོན་ཏོ། །དེ་ཡང་ཤི་བ་ལས་ནི་དང་པོར་ཁྲོ་བོ་རྣམ་པར་རྒྱལ་བའི་བུམ་པས་སྡིག་པའི་དྲི་མ་དག་པར་བཀྲུ་བ་དང༌། རྩ་བའི་སྔགས་དང་ཡུངས་ཀར་རམ་བྱེ་མས་བྲབ་པ་དང༌། ཕྱག་རྒྱས་དབྲོག་པ་བྱས་ནས་གདོད་དབང་བསྐུར་བའི་ལས་བྱའོ། །དེ་ཡང་སྡིག་པ་བཀྲུ་བའི་དཀྱིལ་འཁོར་ནི་ལྷོའི་སྒོ་རུ་པདྨའམ་ཟླ་བའི་དཀྱིལ་འཁོར་ཁྲུ་གང་པའོ། །དབང་ནི་རྩ་པའི་དཀྱིལ་འཁོར་ཕྱེད་ལ་འཇུག་པའི་སྒོ་ལ་མངོན་དུ་ཕྱོགས་པས་ཚོན་སྣ་ལྔས་བྲིས་པར་དབང་བསྐུར་རོ། །དེ་ནི་ལྷོའི་སྒོར་རོ། །གསོན་པོའི་དབང་ནི་ཤར་གྱི་སྒོ་ལ་སོགས་པར་རོ། །དབང་ནི་རྩ་པའི་དཀྱིལ་འཁོར་དུ་གསུངས་པས་བསྐུར་རོ། །ད་ནི་དབང་གི་ཕན་ཡོན་བསྟན་ཏེ་དཀྱུས་ན་གསལ་ལོ། །འདི་ནས་ཕྱག་རྒྱའི་ཚོགས་སྟོན་པར་བྱེད་དེ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་སེང་གེའི་ལྟ་སྟངས་ཀྱིས་བཅོམ་ལྡན་འདས་ཀྱི་ཞལ་དུ་བལྟས་ཏེ་ཞེས་བྱ་བ་ནི་ཞུམ་པ་མེད་པས་མི་འགྱུར་བར་བལྟ་བའོ། །ཕྱི་མ་ནི་གོ་སླའོ། །བཅོམ་ལྡན་ཕྱག་རྒྱ་དམ་པ་ཡི། །མཚན་ཉིད་དམ་པ་བཤད་པར་བགྱི། །ཞེས་པ་ནི་མི་འདའ་བའི་ཕྱིར་དང་འཁོར་དགར་གཞུག་པའི་ཕྱིར་རོ། །དེ་ཡང་ཆོས་
ཉིད་དེ་རྟོགས་པར་བྱ་བའི་ཕྱིར་དང༌། ཕྱག་རྒྱས་དོན་མཚོན་པར་བྱེད་པའི་ཕྱིར་རོ། །བཤད་པར་བགྱིས་ཞེས་པ་ནི་དམ་བཅའོ། །ཐུགས་རྗེས་བསྐུལ་བའི་ཐུགས་མངའ་བའི། །རྒྱལ་བ་ཀུན་གྱིས་བྱིན་གྱིས་རློབས། །ཞེས་བྱ་བ་ནི་ཐུགས་རྗེས་བསྐུལ་བའི་ཐུགས་མངའ་བ་ནི་བཅོམ་ལྡན་འདས་ཤཱཀྱ་ཐུབ་པས་ཕྱག་ན་རྡོ་རྗེ་ལ་ཕྱག་རྒྱ་འདི་བཤད་པར་བྱོས་ཤིག་པར་ཐུགས་དགོངས་ལ་མངའ་བའོ། །རྒྱལ་བ་ཀུན་གྱིས་ཞེས་པ་ནི་ཤཱཀྱ་ཐུབ་པ་དང་རྣམ་པར་སྣང་མཛད་ལ་སོགས་པ་མ་ལུས་པ་ཀུན་ནོ། །བདག་གིས་ཇི་ལྟར་བསྟན་ཅིང་བཤད་པ་འདི་ལ་བྱིན་གྱིས་རློབ་ལ་ངེས་པར་གྲུབ་པར་མཛོད་ཅིག་པའོ། །མཉམ་པར་གཞག་པས་དཔྲལ་བར་ནི། །ཞེས་བྱ་བ་ལ་སོགས་པ་ནི་སྐུ་བྱིན་གྱིས་བརླབས་པའི་ཕྱག་རྒྱ་སྟེ་ཐལ་མོ་སྤྱི་བོར་བཞག་པའོ། །དེར་འཁོར་ལོ་བསམ་མོ། །ཐལ་མོ་སྙིང་གར་སྦྱར་བ་ནི་མགྲིན་པར་བཞག་སྟེ། པདྨ་མགྲིན་ཕྱོགས་སུ་བསམ་པ་ནི་ངག་བྱིན་གྱིས་བརླབས་པའོ། །རྡོ་རྗེ་ཐལ་མོ་སྦྱར་ནས་སྙིང་གར་གུང་མོ་བསྒྲེངས་ནས་བཞག་པ་ནི་ཐུགས་བྱིན་གྱིས་བརླབས་པ་སྟེ་སྙིང་གར་བསམ་པའོ། །ལག་པ་གཡོན་པ་ཐལ་མོ་པང་དུ་གན་རྒྱལ་དུ་བཞག་པ་དེའི་སྟེང་དུ་གཡས་པ་བཞག་སྟེ་མཐེ་བོང་ངོས་གཉིས་སྤྲད་པ་དེ་ལ་ཞི་བའི་ལྟ་བས་བལྟ་བ་འདི་ནི་ཀུན་རིག་གི་དམ་ཚིག་གི་ཕྱག་རྒྱ་ཡིན་པར་བཤད་དོ། །འོག་མ་འདི་གཉིས་ནི་སྐུ་གསུམ་དུ་བསྡུ་བའི་ཕྱག་རྒྱ་འོ། །དེ་ཉིད་ལས་བཟློག་སྟེ་བྱ་པ་ཅན་ནི་ཐུགས་ཀྱི་རིགས་ཏེ། ཐལ་མོ་རྫོགས་པར་སྦྱར་བ་ལས་ཞེས་པ་ལ་སོགས་པ་ནི་གསུང་གིའོ། །དེ་གསུམ་ནི་སྐུ་གསུང་ཐུགས་ཀྱི་ཕྱག་རྒྱ་སྟེ། རྒྱུད་འདི་ཡང་སྐུ་གསུང་ཐུགས་ཀྱི་རྒྱུད་དོ། །སྤྱིའི་ཕྱག་རྒྱའོ། །རྡོ་རྗེ་བསྡམས་པ་ལས་གུང་མོ་གཉིས་རྡོ་རྗེ་འདྲ་བར་བསྙམས་ལ་མཐེ་ཆུང་གཉིས་བརྐྱང་བ་ནི་ཕྱག་ན་རྡོ་རྗེ་ཕྱག་རྒྱ་སྟེ་རྡོ་རྗེ་གཙུག་ཏོར་གྱི་ཤར་ཕྱོགས་ཀྱིའོ། །དེ་ཉིད་ལས་མཐེ་བོང་མཐེ་ཆུང་དེ་བཞིན་དུ་བྱས་ལ་ཞེས་པ་ལ་སོགས་པ་ནི་རྩ་བའི་དཀྱིལ་འཁོར་གྱི་ངན་སོང་སྦྱོང་བ་ལ་སོགས་པའི་འོ། །ཕྱག་རྒྱ་ནི་དཀྱུས་གསལ་ལོ། །སྙིམ་པ་བཟེད་པ་གྱེན་དུ་འཐོར་བ་ནི་བདུག་པ་མའིའོ་ཞེས་པ་ལ་སོགས་པ་མཆོད་པ་རྣམ་པ་དྲུག་གི་ཕྱག་རྒྱ་སྟེ་དཀྱུས་གསལ་ལོ། །རྡོ་རྗེ་བཅིང་བ་ལས་གུང་མོ་གཉིས་བསྙམས་པའི་ཚིགས་དང་པོ་བཅག་ལ་སོར་མོ་
ཐམས་ཅད་བརྐྱང་པ་ནི་རྣམ་པར་འཐོར་བའི་ཕྱག་རྒྱའོ་ཞེས་བྱ་བ་ནས། །གཡོན་པ་མི་འཇིགས་པ་སྦྱིན་པ་ནི་དེ་བཞིན་གཤེགས་པའི་ཕྱག་རྒྱའོ་ཞེས་བྱ་བ་ཡན་ཆད་ཀྱིས་གཙུག་ཏོར་བརྒྱད་ཀྱི་ཕྱག་རྒྱ་བསྟན་པ་ཡིན་ནོ། །རྡོ་རྗེ་བསྡམས་པ་ལས་མཛུབ་མོ་གཉིས་བརྐྱང་སྟེ། རྡོ་རྗེ་འདྲ་བར་བྱས་པ་ནི་རྡོ་རྗེའི་ཕྱག་རྒྱའོ་ཞེས་པ་ལ་སོགས་པ་ནི་རྩ་པའི་དཀྱིལ་འཁོར་གྱི་སེམས་དཔའ་བཅུ་དྲུག་དང༌། རྡོ་རྗེ་བདུག་པ་ལ་སོགས་པའི་གཉི་གའི་སྤྱིའི་ཕྱག་རྒྱ་བསྟན་ཏོ། །ལྷ་དེ་དག་ཐམས་ཅད་ཀྱི་ཐུགས་ཀར་རྡོ་རྗེ་ཟླ་བའི་དཀྱིལ་འཁོར་གྱི་སྟེང་དུ་བསམ་པ་ནི་དམ་ཚིག་གི་ཕྱག་རྒྱའོ། །སྔགས་ནི་དཀྱིལ་འཁོར་གང་དང་གང་གིས་རྩ་བའི་སྔགས་དེ་ལས་ས་མ་ཡ་སྟྭཾ་ཞེས་གདགས་པར་བྱའོ། །ལས་ཀྱི་ཕྱག་རྒྱ་ཐམས་ཅད་ལ་ནི་རྩ་པའི་སྔགས་ཀྱི་རྗེས་སུ་བཛྲ་ཀརྨ་ཞེས་གདགས་པར་བྱའོ། །ལྷ་དེ་དག་ཐམས་ཅད་ཀྱི་སྤྱི་བོར་རྡོ་རྗེ་རྒྱ་གྲམ་རེ་བསམ་པར་བྱའོ། །ད་ནི་རས་ཀྱི་སྒྲུབ་པའི་རིམ་པ་བསྟན་ཏེ། །སྐུ་གཟུགས་ཀྱི་ཆོ་ག་ཡང་འདིར་དེ་བཞིན་དུ་བྱ་སྟེ་ཞེས་པ་ནི། རྩ་བའི་རྒྱུད་དུ་གསུངས་པ་དེ་བཞིན་དུ་འདིར་ཡང་ཤེས་པར་བྱའོ། །ཅུང་ཟད་དུ་ནི་བཅོམ་ལྡན་འདས་འཇིག་རྟེན་གསུམ་ལས་རྣམ་པར་རྒྱལ་བའི་གཟུགས་བྲིའོ་ཞེས་པ་ནི་དབུས་ཀྱི་རྣམ་པར་སྣང་མཛད་གཟུགས་སྒྱུར་བའོ། །ཡང་ན་སྐུ་གཟུགས་ནི་དཀྱིལ་འཁོར་གྱི་ཚུལ་དུ་བྲིས་པ་ནི་ཤཱཀྱ་ཐུབ་པའི་དཀྱིལ་འཁོར་གྱི་ཚུལ་དུ་བྲིས་ལ། རྩ་པའི་རྒྱུད་དུ་གསུངས་པ་ལྟར་རབ་ཏུ་གནས་པ་བྱས་ལ་མེ་ཏོག་ལ་སོགས་པའི་མཆོད་པས་མཆོད་དེ། དེའི་སྤྱན་སྔར་འབུམ་ཙམ་ཞིག་སྔར་བསྙེན་པ་བྱས་ནས། ཕྲིན་ལས་བཞིའི་ལས་ཐམས་ཅད་བྱའོ། །དེ་ནས་ཚངས་པ་ལ་སོགས་པའི་ལྷ་རྣམས་ཞེས་བྱ་པ་ནས། སྡུག་བསྔལ་གྱི་དབང་དུ་གྱུར་ཞེས་པའི་བར་གྱིས་ནི། ནོར་བུ་དྲི་མ་མེད་པའི་འོད་ཀྱིས་སྔོན་ལས་ཅི་བྱས་ཞུས་པའོ། །དེ་ནས་བཅོམ་ལྡན་འདས་ཞེས་པ་ནས། ཡང་དུས་ལས་འདས་སོ་ཞེས་པའི་བར་གྱིས་ནི། ལས་ཀྱི་རྣམ་པར་སྨིན་པའི་རྒྱུ་བསྟན། ལན་ཅིག་ཅི་ཞིག་གི་རྐྱེན་གྱིས་ཞེས་པ་ནས། རང་རང་བདེ་བ་དང་ལྡན་པར་སྐྱེས་ཞེས་པའི་བར་གྱིས་ནི་མ་ངེས་པའི་དོན་བསྟན་ཏེ། འབྲས་བུ་ངན་སོང་དུ་སྐྱེ་པའི་རྒྱུ་ལས་རྐྱེན་དྲང་སྲོང་དང་ཕྲད་ནས་ལྷར་སྐྱེས་པའི་དོན་བསྟན་ཏོ། །ལྷའི་དབང་
པོ་ཉོན་ཅིག་ཅེས་པ་ནས། ལྷའི་འཁོར་འདི་དག་ཡིན་ནོ་ཞེས་པའི་བར་གྱིས་ནི་སྔོན་ལས་མཐུན་པའི་ཕྲིན་ལས་ཀྱི་འབྲེལ་པ་བསྟན་ཏོ། །དེས་ནི་གླེང་གཞི་འམ་རྒྱུ་བསྟན་པའོ།། །།ད་ནི་ཚེ་དཔག་མེད་ལས་ཀྱི་སྒྲིབ་པ་རྒྱུན་གཅོད་པའི་དོན་བསྟན་ཏེ། དེ་ལ་ཆོ་ནི་ཡེ་ཤེས་སོ། །དཔག་མེད་ནི་དངོས་པོ་ཐམས་ཅད་དང་བྲལ་བའོ། །ལས་ནི་དགེ་སྡིག་རྣམ་པ་གཉིས་སོ། །སྒྲིབ་པ་ནི་ནམ་མཁའ་དངས་པ་ལ་སྤྲིན་གྱིས་གཡོགས་པ་དང་འདྲ་བར་ཀུན་གཞི་ལ་རྟོག་པ་གློ་བུར་བས་སྒྲིབ་པའོ། །རྒྱུན་གཅོད་པ་ནི་གཉེན་པོ་ལས་ཀྱི་ཡེ་ཤེས་ཀྱིས་མི་མཐུན་པའི་ཕྱོགས་རྒྱུན་གཅོད་པའོ། །དཀྱིལ་ནི་དཔག་མེད་དེ་ཆོས་ཉིད་དོ། །འཁོར་ནི་ཚེ་སྟེ་ཡེ་ཤེས་བཞིའི་འཁོར་རོ། །དེ་བཤད་པའི་ཕྱིར་ཞུ་བ་ལ་སོགས་པ་སྟོན་ཏོ། །དེ་ནས་བརྒྱ་བྱིན་དང་ཚངས་པ་ལ་སོགས་པ་ལྷའི་བུ་རྣམས་ཞེས་བྱ་བའི་དོན་བཤད་ཟིན་ཏོ། །ཡིད་རབ་ཏུ་མགུ་ནས་ཞེས་པ་ནི་རྒྱུད་འདིའི་དོན་ཉིད་ལའོ། །རངས་པ་ནི་སེམས་ལ་བདེ་བ་ཐོབ་པའོ། །བ་སྤུའི་བུ་གནས་སྤུ་རྣམས་ལངས་པ་ཞེས་པ་ནི་ལུས་སེམས་བདེ་བའི་རྟགས་ཏེ། འབྲས་བུ་སངས་རྒྱས་ཀྱི་ས་ལ་དགའ་བ་བསྐྱེད་པའོ། །སྐྱེས་ནས་འདི་སྐད་ཅེས་རྒྱལ་བ་རྒྱལ་བ་ཞེས་པ་ལ་རྒྱལ་བ་ནི་ཆོས་ཉིད་དེ་ཡེ་ཤེས་ཀྱིས་རྟོགས་ནས་མཚན་མ་ལས་རྒྱལ་བས་ན་རྒྱལ་བའོ། །ཐུགས་རྗེས་འགྲོ་བའི་དོན་མཛད་པས་འཁོར་བ་ལས་སྤྱོད་ལམ་གྱིས་རྒྱལ་བའོ། །ཕྱག་ན་རྡོ་རྗེ་ལ་མིང་བཅུས་མངོན་པར་བསྟོད་དེ་ཞེས་པ་ནི་ཕྱག་ན་རྡོ་རྗེ་གནོད་སྦྱིན་ཀུན་དུ་བཟང་པོ་ཡིན་པའི་ཕྱིར་ན་གནོད་སྦྱིན་གྱི་རིགས་ཀྱི་ཕ་རོལ་ཏུ་ཕྱིན་པ་བཅུའི་ཡོན་ཏན་གྱི་སྒོ་ནས་བསྟོད་པའོ། །གསོལ་བ་གདབ་པོ་ཞེས་པ་ནི་ཚེ་དཔག་མེད་ཀྱི་དཀྱིལ་འཁོར་བཤད་པར་གསོལ་བ་བཏབ་པའོ། །ཀོ་ཊ་ཀ་ཥ་ཞེས་པ་ནི་བཅོམ་ལྡན་འདས་མགོན་པོ་རྡོ་རྗེ་འཛིན་ཞེས་པ་སྟེ། ཁྱོད་ཐབས་ཀྱི་ཕ་རོལ་ཏུ་ཕྱིན་བ་ལ་མངའ་བརྙེས་པའི་རང་བཞིན་ནོ་ཞེས་པའི་དོན་ཏོ། །ཀོ་ཊ་བྷ་ཞེས་པ་ནི་ཁྱོད་ནི་གླང་པོའི་རྣ་བ་ཅན་ཞེས་པ་སྟེ། ཁྱོད་ཀྱི་ཤེས་རབ་ཀྱི་སྤྱི་དང་རང་གི་མཚན་ཉིད་འབྱེད་པའི་དོན་ཏོ། །ཀོ་ཊ་ཀོ་ཊ་ཞེས་པ་ནི་ཁྱོད་ནི་བཟང་པོའི་རྒྱན་དང་ལྡན་པ་ཞེས་པ་སྟེ། ཁྱོད་ནི་ཐབས་དང་ལྡན་པས་འཁོར་བར་མི་གཏོང་པའི་དོན་ཏོ། །ཀོ་ལ་བཤྩ་ཞེས་པ་ནི་ཁྱོད་ནི་རྣམ་པར་གནོན་པའི་ཞེས་པ་སྟེ། ཁྱོད་ཀྱི་བཟོད་པ་ནི་གནོད་པས་མི་འཁྲུག་ཅིང་སྲན་ཚུགས་པའི་དོན་ཏོ། །ཀ་ཏི་ར་ག་ཞེས་
པ་ནི་ཡོན་ཏན་རིན་ཆེན་འབྱུང་གནས་ཁྱོད་ཅེས་པ་སྟེ། སྦྱིན་པའི་ཕ་རོལ་ཏུ་ཕྱིན་པ་ནི་ཡོངས་སུ་གཏོང་བའི་མཚན་ཉིད་དང་ལྡན་པའོ། །ཀོ་ལ་ཀྵ་ཞེས་པ་ནི་ཁྱོད་ནི་བདེན་པའི་སྤྲིན་ཡིན་ཏེ། ཁྱོད་ཀྱི་བདེན་པའི་སྟོབས་ཀྱིས་ཕ་རོལ་ཏུ་ཕྱིན་པ་ནི་གཞན་གྱི་ཟིལ་གྱིས་མི་ནོན་པའི་རྟགས་སོ། །ཀོ་ལ་བ་ཞེས་པ་ནི་ཁྱོད་ནི་གཟུགས་སྡུག་པ་ཡིད་ཀྱི་རྒྱན་ཞེས་པ་སྟེ། ཁྱོད་ཀྱི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ནི་ཡོངས་སུ་མི་ཉམས་པའི་དོན་ཏོ། །ཀོ་ལ་ཀོ་ལ་ཞེས་པ་ནི་ཁྱོད་ནི་མེ་ལྕེ་འབར་བ་ཅན་ཞེས་པ་སྟེ། ཁྱོད་ནི་ཡེ་ཤེས་ཀྱི་ཕ་རོལ་ཏུ་ཕྱིན་པ་སྟེ་ཡེ་ཤེས་པའི་རང་བཞིན་ཅན་ནོ། །ཀོ་ལ་པཉྩ་ཞེས་པ་ནི་ཁྱོད་ནི་ཡིད་བཞིན་ནོར་བུ་སྟེ་ཞེས་པ་སྟེ། ཁྱོད་ཀྱི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་སྐྱོ་དུབ་མེད་པའི་མཚན་ཉིད་དོ། །ཀ་ལི་སྟོ་ཐ་ཞེས་པ་ནི་ཁྱོད་ནི་གཟུགས་མཛེས་པ་ཡིན་ཞེས་པ་སྟེ། སྨོན་ལམ་གྱི་ཕ་རོལ་ཏུ་ཕྱིན་པའི་མཐུན་པའི་ཡེ་ཤེས་ལ་དམིགས་པའོ། །ཨ་ཏི་ཞེས་བྱ་བ་ནི་ཡོན་ཏན་བཅུས་བསྟོད་པ་རྫོགས་པར་བྱ་བའོ། །དེ་ནས་གསོལ་བ་གདབ་པ་དང་རྗེས་སུ་གནང་བ་ནི་གོ་སླའོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་ཐམས་ཅད་ཀྱི་ཚེ་དཔག་ཏུ་མེད་པས་ཁྱད་པར་འབྱུང་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཞེས་བྱ་བ་ནི་ནང་སེམས་ཀྱི་ཏིང་ངེ་འཛིན་ལ་ཞུགས་པའོ། །དེ་ཡང་ཇི་ལྟར་ཡིན་ཞེན་ཐམས་ཅད་ཀྱི་ཚེ་དཔག་ཏུ་མེད་པས་ཁྱབ་པས་ཞུགས་སོ། །ཇི་ལྟར་ཞུགས་སྙམ་པ་ལ་སྔགས་འདི་རྣམས་ཀྱིས་ཉིད་ཀྱི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཉིད་ཀྱི་དཀྱིལ་འཁོར་འདི་བསྐྱེད་དོ། །བསྐྱེད་ནས་དེ་ལ་འོད་འཕྲོས་པས་སེམས་ཅན་ཐམས་ཅད་ལ་ཕོག་པས་སེམས་ཅན་ཐམས་ཅད་ཀྱི་སྡུག་བསྔལ་ཐམས་ཅད་ད་བར་དུ་ཞབ་བྱས་ནས་ནང་སེམས་ཀྱི་དཀྱིལ་འཁོར་དུ་བཅུག་སྟེ། འོག་གི་དབང་རྣམས་བསྐུར་བས་བདེ་འགྲོ་ལྷའི་འཇིག་རྟེན་ལ་སོགས་པར་སྐྱེས་སོ། །སེམས་ཅན་ཚེ་ཟད་པ་རྣམས་ཚེ་འཕེལ་བར་བྱས་སོ། །དེ་ནས་མ་འོངས་པའི་རྗེས་སུ་འཇུག་པའི་རྣལ་འབྱོར་པ་ལ་ཕན་གདགས་པའི་ཕྱིར་དང༌། སེམས་ཅན་ཐམས་ཅད་ལ་ཕན་གདགས་པའི་ཕྱིར་འདིའི་ཆོ་འཕྲུལ་དང་སྔགས་ཀྱི་དོན་ཡང་སྟོན་ཏོ། །དེའི་དོན་ཡང་འདི་ལྟར་ཤེས་པར་བྱ་སྟེ། དང་པོར་བདག་གི་གནས་ཡིད་དུ་འོང་བར་བདེ་བའི་སྟན་ལ་འདུག་སྟེ་ཁྲུས་བྱས་ལ་ཆོས་ཐམས་ཅད་བདག་མེད་པར་བསྒོམས་ཏེ། ཁྲོ་བོ་མེ་ལྟར་འབར་བ་
ཡི་གེ་ཧཱུཾ་ལས་བསྐྱེད་དེ་ཁ་ལ་བྱིན་གྱིས་བརླབས་ནས། རྡོ་རྗེ་ཕྲེང་བའི་དབང་བླང་སྟེ། བགེགས་བསྐྲད་པ་ནི་ཧཱུཾ་བཞི་པས་བྱ་སྟེ། ཕྱོགས་བཅུའི་བགེགས་བསྲུང་བ་ལ་སོགས་པ་ཁྲོ་བོ་རྣམས་ཀྱིས་བྱའོ། །དེ་ནས་སྔགས་དང་ཕྱག་རྒྱ་ལས་ཁྲོ་བོའི་སྐུ་བྱུང་སྟེ། ཀུན་ཀྱང་ནག་པོར་འདུག་པ་ཕྱག་གཉིས་པ་རང་གི་ཕྱག་རྒྱ་བཅིང་བ་དང་ལྡན་པར་བསྒོམ་པའམ། ཡང་ན་ཞལ་གསུམ་ཕྱག་དྲུག་པ་རང་རང་ཕྱོགས་ཀྱི་ཁ་དོག་དང་ལྡན་པ། ཕྱག་དང་པོ་གཉིས་རང་གི་ཕྱག་རྒྱ་འཛིན་པ་ཕྱག་བཞིན་ཐོད་དབྱུག་དང་རྡོ་རྗེ་དང་དབྱུག་པ་དང༌། བ་དན་དང་མཆེ་བ་དང༌། རྡོ་རྗེ་ དྲིལ་བུ ་ལ་སོགས་པ་བསྣམས་པ། ཕྱག་རྒྱ་ཐམས་ཅད་འཆོལ་བར་བསྣམས་པའོ། །སྤྲུལ་པའི་ཁྲོ་བོ་ཡིན་པས་མ་ངེས་པར་ཇི་ལྟ་བ་བཞིན་བསྣམས་པའོ། །ཐ་མ་གཉིས་ན་ཕུར་པ་དང་ཐོ་བའོ། །དེ་ནས་རྡོ་རྗེ་དང་དྲ་བ་དང་ར་བ་ཡང་བྱའོ། །དེ་ནས་སྔོན་དུ་འགྲོ་བའི་ཡན་ལག་བྱས་ལ་སྡིག་པ་དྲལ་ཞིང་ཡེ་ཤེས་དབབ་པ་བྱས་ནས་མངོན་པར་བྱང་ཆུབ་པ་ལྔས་དབུས་ཀྱི་གཙོ་བོའི་སྐུ་བསྐྱེད་པར་བྱ་སྟེ། ཨོཾ་ཙིཏྟ་པྲ་ཏི་བེ་དྷཾ་ཀ་རོ་མི་ཞེས་བརྗོད་པས་ཆོས་ཐམས་ཅད་ཟག་པ་མེད་པའི་གཏན་ཚིགས་ཀྱིས་སྟོང་པ་ཉིད་ནམ་མཁའ་དང་འདྲ་བ་བསྒོམས་ལ། སེམས་ཀྱི་མཚན་ཉིད་ཟླ་བ་ཚེས་གཅིག་པ་ལྟ་བུའི་རྣམ་པར་མོས་པར་བྱའོ། །དེ་ནས་བྱང་ཆུབ་ཀྱི་སེམས་བསྐྱེད་པར་བྱའོ། །ཨོཾ་བོ་དྷི་ཙིཏྟ་ཨུཏྤཱ་ད་ཡཱ་མི་ཞེས་བརྗོད་པས་ཟླ་བའི་དཀྱིལ་འཁོར་དེ་ཉིད་འོད་འཕྲོ་བ་དང་འདུ་བའི་སྦྱོར་བས། ས་དང་ཕ་རོལ་ཏུ་ཕྱིན་པ་ལ་སོགས་པའི་ཡོན་ཏན་རྣམས་ཀྱི་ཇི་ལྟར་ལས་སུ་བྱས་པ་བཞིན་བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པའི་བྱང་ཆུབ་ཀྱི་མཚན་མ་སྟོན་ཀའི་ཟླ་བ་ཉ་བའི་དཀྱིལ་འཁོར་ཡོངས་སུ་རྫོགས་པ་ལྟར་དང་ཞིང་རྙོག་པ་མེད་པར་མོས་པར་བྱ་སྟེ། ཡུན་རིང་དུ་བསྒོམ་པར་བྱའོ། །དེ་ནས་ཟླ་བའི་དཀྱིལ་འཁོར་དེའི་སྟེང་དུ། ཨོཾ་པུཎྱེ་པུཎྱེ་མ་ཧཱ་པུཎྱེ་ཨ་པ་རི་མི་ཏ་ཨཱ་ཡུར་པུཎྱེ་ཛྙཱ་ན་སཾ་བྷཱ་རོ་པ་ཙི་ཏ་པྲ་ཙ་ཡ་ཀ་ནི་སྭཱ་ཧཱ། ཞེས་པའི་སྔགས་ཀྱི་ཡི་གེ་གཡས་ཕྱོགས་ནས་ཕྲེང་བའི་ཚུལ་དུ་བཀོད་པ་ལས། ཡེ་ཤེས་ཀྱི་འོད་ཟེར་འཕྲོ་བ་དང༌། འདུ་བའི་ཚུལ་གྱིས་ཏིཥྛ་བཛྲ་ཞེས་བརྗོད་པ་ལས་ཡེ་ཤེས་ཀྱི་རྡོ་རྗེ་རྩེ་ལྔ་པར་གྱུར་ནས་ཟླ་བའི་དཀྱིལ་འཁོར་ལ་གནས་པར་བསྒོམ་སྟེ། དེའི་བུམ་པའི་དཀྱིལ་དུ་ཡང་ཡི་གེ་ཧཱུཾ་གིས་མཚན་པ་སྟེ་
དེ་ནི་ཡེ་ཤེས་ལྔའི་རང་བཞིན་གྱིས་བྱང་ཆུབ་ཀྱི་སེམས་བདག་གིས་རྟོགས་པའོ། །དེ་ནས་བཛྲ་ཨཱཏྨ་ཀོ྅ཧཾ་ཞེས་བརྗོད་པས་རྡོ་རྗེ་དེ་ལས་ཡེ་ཤེས་ཀྱི་རྡོ་རྗེའི་འོད་ཟེར་ལྕགས་ཀྱུ་ལྟ་བུ་མང་པོ་འཕྲོས་པས་ཕྱོགས་བཅུའི་དེ་བཞིན་གཤེགས་པའི་རིགས་དང༌། རྡོ་རྗེའི་རིགས་དང༌། རིན་པོ་ཆེའི་རིགས་དང༌། པདྨའི་རིགས་དང༌། ལས་ཀྱི་རིགས་སུ་བཞུགས་པ་རྣམས་ཀྱི་སྐུ་དང༌། གསུང་དང་ཐུགས་ཀྱི་རྡོ་རྗེ་ཐམས་ཅད་བསྡུས་ཏེ་རྡོ་རྗེ་ལ་ཐིམ་པས་བརྟན་པར་བྱས་སོ། །དེ་ནས་ཨོཾ་ཡ་ཐཱ་བཛྲ་སཏྭ་ཏ་ཐཱ་ཨ་ཧཾ་ཞེས་བརྗོད་པས་ཡེ་ཤེས་རྡོ་རྗེ་དེ་ལས་དེ་བཞིན་གཤེགས་པའི་སྐུ་ཕྲ་མོ་མང་པོ་འཕྲོས་བས་ཕྱོགས་བཅུར་སངས་རྒྱས་ཀྱི་མཛད་པ་མ་ལུས་པར་རྫོགས་པར་མཛད་ནས། སླར་འདུས་ནས་རྡོ་རྗེ་ལ་ཐིམ་པས་བཅོམ་ལྡན་འདས་ཕྱག་ན་རྡོ་རྗེའི་སྐུ་ཕྱག་རྒྱ་ཆེན་པོར་གྱུར་ཏེ། སྐུ་མདོག་དཀར་པོ་ཟླ་བ་རྒྱས་པ་ལྟ་བུའི་ཞལ་འཛུམ་པའི་མདངས་དང་ལྡན་པར་བསྒོམ་མོ། །དེ་ནས་ཡང་ཐུགས་ཀར་ཟླ་བའི་སྟེང་དུ། ཧཱུཾ་ཧྲཱཾ་ཧྲཱིཿ་ཨཿ་བཀོད་པ་ལས་རྡོ་རྗེ་ལ་སོགས་པས་བྱིན་གྱིས་བརླབ་པོ། །དེ་ལྟར་བདག་ཉིད་བསྐྱེད་ནས་ནང་སེམས་ཀྱི་དཀྱིལ་འཁོར་ནི་འོག་གིས་སྔགས་རྣམས་ལས་ཚེ་དཔག་ཏུ་མེད་པའི་དཀྱིལ་འཁོར་བསྐྱེད་དེ། དེ་རྣམས་ཀྱི་ཐུགས་ཀར་ཡང་ཟླ་བའི་དཀྱིལ་འཁོར་གྱི་སྟེང་དུ་སྔགས་ཀྱི་ཕྲེང་བ་རྣམས་བསམས་ཏེ། འོད་ཟེར་འཕྲོ་བ་དང་འདུ་བའི་ཚུལ་གྱིས་སེམས་ཅན་ཐམས་ཅད་ལ་ཕོག་པས་སེམས་ཅན་ཐམས་ཅད་ཀྱི་ལས་དང་ཉོན་མོངས་པ་དག་པར་བྱས་ཏེ། ཁྱད་པར་དུ་ཡང་ངན་སོང་གསུམ་གྱི་རྟོག་སྒྲིབ་སྦྱངས་ནས་ནང་སེམས་ཀྱི་དཀྱིལ་འཁོར་དུ་བཅུག་ནས་དབང་བསྐུར་བས་རྣམ་པར་གྲོལ་བའི་ལམ་ལ་བཞག་སྟེ། ཁྱད་པར་དུ་ཡང་སེམས་ཅན་ཚེ་ཐུང་བ་རྣམས་ཚེ་བསྲིངས་ནས་རིམ་གྱིས་སངས་རྒྱས་ཀྱི་ས་ལ་གནས་པར་བྱས། དེ་ནས་སེམས་ཅན་ཐམས་ཅད་དང་ལྷ་དང་ཀླུ་ལ་སོགས་པས་ཀྱང་མཆོད་ཅིང་བསྟོད་ནས་དེ་ཉིད་དུ་མི་སྣང་བར་གྱུར། དེ་ནས་ལྷ་དེ་དག་དང་སྔགས་ཀྱི་ཕྲེང་བ་དེ་ཐུགས་ཀའི་རྡོ་རྗེ་ལ་འདུས་པས་བརྟན་ཞིང་མི་གཡོ་བར་བསམ་མོ། །དེ་ནི་སྦྱོར་བ་དང་པོ་དང་སེམས་ཀྱི་ཏིང་ངེ་འཛིན་ནོ།། །།ད་ནི་དཀྱིལ་འཁོར་རྒྱལ་པོ་མཆོག་བསྐྱེད་པར་བྱ་སྟེ། གཞལ་ཡས་ཁང་བསྐྱེད་པའི་ཐབས་ནི་ཤཱཀྱ་ཐུབ་པའི་དཀྱིལ་འཁོར་ལས་ཤེས་པར་བྱའོ། །དེ་ཡང་ཁྱད་པར་ནི་ནང་གི་འཁོར་ལོའི་རྩིབས་བཞི་བ་རིམ་པ་གསུམ་དང་ལྡན་
བར་ཤེས་པར་བྱའོ། །གདན་ནི་སེང་གེ་དང་གླང་པོ་ཆེ་ལ་སོགས་པ་དེའི་སྟེང་ན་པདྨ་དང་ཟླ་བའི་དཀྱིལ་འཁོར་རོ། །དེའི་དབུས་སུ་བདག་ཉིད་བཅོམ་ལྡན་འདས་ཕྱག་ན་རྡོ་རྗེ་ཐབས་ཀྱི་བདག་པོ་བསམ་སྟེ། བཅོམ་ལྡན་འདས་ཀྱི་ཐུགས་ཀའི་ཀུན་དུ་བཟང་པོ་བྱང་ཆུབ་ཀྱི་སེམས་ཟླ་བའི་དཀྱིལ་འཁོར་གྱི་སྟེང་དུ་ཨོཾ་ཨ་མི་ཏེ་ཨ་མི་ཏ་ཨ་མི་ཏོང་བྷ་བེ། ཨ་མི་ཏ་སམྦྷ་ཝེ། ཨ་མི་ཏ་བིཀྲཱནྟེ། ཨ་མི་ཏ་བི་ཀྲཱནྟ་ག་མི་ནི། སརྦ་ཀརྨ་ཀླེ་ཤ་ཀྵ་ཡཾ་ཀ་རི་སྭཱ་ཧཱ། ཞེས་པའི་སྔགས་ཀྱི་ཡི་གེ་རྣམས་ཕྲེང་བའི་ཚུལ་དུ་བཀོད་ལ། དེ་ལས་ཡེ་ཤེས་ཀྱི་འོད་ཟེར་འཕྲོ་ཞིང་འདུ་བའི་ཚུལ་གྱིས་ཡི་གེའི་ཕྲེང་བ་ལ་ཐིམ་པ་ལས་པདྨ་དམར་པོར་གྱུར། དེ་ནས་ཡང་འོད་ཟེར་འཕྲོ་བ་དང་འདུ་བའི་ཚུལ་གྱིས་རིགས་བཞིའི་སྐུ་དང་གསུང་དང་ཐུགས་རྡོ་རྗེའི་དབྱིངས་ཐམས་ཅད་འདུས་ཏེ། པདྨ་ལ་ཐིམ་པས་པདྨ་བརྟན་པར་བྱས་སོ། །དེ་ནས་སྐུ་ཕྲ་མོ་མང་དུ་འཕྲོས་པས་སངས་རྒྱས་ཀྱི་མཛད་པས་འགྲོ་བའི་དོན་བྱས་ཏེ། སླར་འདུས་པ་ལས་པདྨ་ལ་ཐིམ་པས་བཅོམ་ལྡན་འདས་ཚེ་དཔག་མེད་ཀྱི་སྐུ་ཕྱག་རྒྱ་ཆེན་པོར་གྱུར་ཏེ་ཐུགས་ཀར་བཞུགས་པར་བསམ། ཡང་དེའི་ཐུགས་ཀར་སྔགས་ཀྱི་ཕྲེང་བ་སྔ་མ་བཞིན་དུ་བཀོད་པ་ལས། སྔགས་བརྗོད་པ་ཙམ་གྱིས་བསྐུལ་བའི་ཚུལ་དུ་ཐུགས་ཀ་ནས་སྤྱན་དྲངས་ཏེ་ཕྱོགས་བཅུར་འཕྲོས་པས་མཛད་པ་བཅུ་གཉིས་ཀྱི་ཚུལ་དུ་འགྲོ་བའི་དོན་མཛད་དེ་ལྷར་འདུས་ནས་བཅོམ་ལྡན་འདས་ཀྱི་སྤྱན་སྔར་བཀའ་ནོད་པའི་ཚུལ་དུ་བཞུགས་པ་ལ། ཆོ་འཕྲུལ་ཆེན་པོ་བཞིས་བྱིན་གྱིས་བརླབས། ཡེ་ཤེས་ཀྱི་དབུ་རྒྱན་གྱིས་དབང་བསྐུར་ཏེ་ཚེ་དཔག་ཏུ་མེད་པ་ཞེས་ལན་གསུམ་བོས་ཏེ། མིང་གི་དབང་བསྐུར་ནས་ལས་ལ་དགོད་པ་ནི་འཁོར་ལོའི་ནུབ་ཕྱོགས་ཀྱི་རྩིབས་ལ་བཞུགས་སོ། །དེ་ནས་ཡང་བཅོམ་ལྡན་འདས་ཀྱི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ། ཨོཾ་ཀཾ་ཀ་ནི་ཀཾ་ཀ་ནི། རོ་ཙ་ནི་རོ་ཙ་ནི། ཏྲོ་ཊ་ནི་ཏྲོ་ཊ་ནི། ཏཱ་ས་ནི་ཏྲཱ་ས་ནི། པྲ་ཏི་ཧ་ན། པྲ་ཏི་ཧ་ན། སརྦ་ཀརྨ་ཨཱ་པ་ར་ཎ་པ་རི་པ་ར་ཎི་མེ་སརྦ་སཏྭཱ་ནཱཾ་སྭཱ་ཧཱ་ཞེས་པས་སྔགས་ཀྱི་ཕྲེང་བའི་ཚུལ་དུ་བཀོད་པ་ལས། ཡེ་ཤེས་ཀྱི་འོད་ཟེར་འཕྲོས་པ་ལས་སེམས་ཅན་ཐམས་ཅད་ཀྱི་སྒྲིབ་པ་དང་སྡུག་བསྔལ་སྦྱངས་ཤིང་ཞི་བར་བྱས་ཏེ། སླར་འདུས་པ་ལས་ཡིག་འབྲུ་རྣམས་ལ་ཐིམ་པས་རྡོ་རྗེ་དམར་པོ་ལ་ཧཱུཾ་གིས་
མཚན་པར་གྱུར་ཏེ། དེ་ལས་འཕྲོས་ཤིང་འདུས་པའི་ཚུལ་གྱིས་ཚེ་བརྟན་པར་བྱས་སོ། །དེ་ལས་སྐུ་ཕྲ་མོ་མང་པོ་འཕྲོས་ཤིང་འདུས་པའི་ཚུལ་དུ་ཐིམ་པ་ལས་མགོན་པོ་མི་འཁྲུགས་པའི་སྐུ་ཕྱག་རྒྱ་ཆེན་པོར་གྱུར་ཏེ་ཐུགས་ཀ་ནས་བཞུགས་སོ། །ཡང་དེའི་ཐུགས་ཀར་ཟླ་བ་ལ་ཡི་གེའི་ཕྲེང་བ་སྔ་མ་བཞིན་དུ་བཀོད་པ་ལས། བརྗོད་པ་ཙམ་གྱིས་བསྐུལ་བར་ཕྱོགས་བཅུར་འཕྲོས་ཏེ། སླར་འདུས་པ་ལས་བདག་གི་མདུན་ན་བཀའ་ནོད་པའི་ཚུལ་དུ་གནས་པ་ལ། ཆོ་འཕྲུལ་ཆེན་པོ་བཞིས་བྱིན་གྱིས་བརླབས་པ་དང༌། ཡེ་ཤེས་ལྔའི་དབུ་རྒྱན་གྱི་དབང་བསྐུར་བ་དང༌། མི་འཁྲུགས་པ་ཞེས་ལན་གསུམ་པོས་ཏེ། མིང་གི་དབང་བསྐུར་ནས་ཉིད་ཀྱི་ལས་ཀྱི་བཞུགས་གནས་དཀྱིལ་འཁོར་གྱི་ཤར་ཕྱོགས་ཀྱི་རྩིབས་སྟེང་དུ་སྣ་ཚོགས་པདྨ་དང་ཟླ་བའི་དཀྱིལ་འཁོར་གྱི་གདན་ལ་བཞུགས་སུ་གསོལ་ལོ། །དེ་ནས་ཡང་བཅོམ་ལྡན་འདས་ཀྱི་ཐུགས་ཀའི་ཟླ་བའི་དཀྱིལ་འཁོར་ལ་ཨོཾ་རཏྣེ་རཏྣེ། མ་ཧཱ་རཏྣེ། རཏྣ་ཀི་ར་ཎེ། རཏྣ་མཱ་ལཱ་བི་ཤུདྡྷེ་ཤོདྷ་ཡ་སརྦ་པཱ་པཾ་ཧཱུཾ་ཏྲཱ་ཊ་ཅེས་པའི་སྔགས་ཀྱི་ཡི་གེའི་ཕྲེང་བ་བཀོད་པ་ལས་འོད་འཕྲོས་པས་སེམས་ཅན་ཐམས་ཅད་ཀྱི་ལས་དང་ཉོན་མོངས་པའི་སྡུག་བསྔལ་ཐམས་ཅད་སྦྱངས་ཤིང་བསལ་ནས་སླར་འདུས་པ་ལས་རིན་པོ་ཆེ་འབར་བ་ཁ་དོག་སྔོན་པོར་གནས་པར་གྱུར་ཏེ། དེ་ལས་འོད་འཕྲོས་ཤིང་འདུས་པ་ལས་བརྟན་པར་གྱུར། དེ་ལས་དེ་བཞིན་གཤེགས་པའི་སྐུ་ཕྲ་མོ་མང་པོ་འཕྲོས་པས་འགྲོ་བའི་དོན་མཛད། བདུད་ཀྱི་གནས་ཐམས་ཅད་བཅོམ་ནས་སླར་འདུས་པ་ལས་བཅོམ་ལྡན་འདས་རིན་ཆེན་འབྱུང་ལྡན་ཀྱི་སྐུ་ཕྱག་རྒྱ་ཆེན་པོར་གྱུར་ཏེ། ཐུགས་ཀར་བཞུགས་སོ། །ཡང་དེའི་ཐུགས་ཀའི་ཟླ་བ་ལ་སྔགས་ཀྱི་ཕྲེང་བ་སྔ་མ་བཞིན་དུ་བཀོད་པ་ལས་བརྗོད་པའི་ཚུལ་གྱིས་བསྐུལ་བས་ཕྱོགས་བཅུར་འཕྲོས་ཏེ། སངས་རྒྱས་ཀྱི་མཛད་པས་འགྲོ་བའི་དོན་མཛད་ནས་སླར་འདུས་ཏེ། བདག་གི་མདུན་ན་བཀའ་ནོད་པའི་ཚུལ་དུ་གནས་པ་ལ་ཆོ་འཕྲུལ་ཆེན་པོ་བཞིས་བྱིན་གྱིས་བརླབས། དབུ་རྒྱན་གྱི་དབང་བསྐུར་རིན་པོ་ཆེ་འབར་བ་ལག་ཏུ་བྱིན་ཏེ། རིན་ཆེན་འབྱུང་ལྡན་ཞེས་བོས་ནས་མིང་གི་དབང་བསྐུར་ནས་ཉིད་ཀྱི་བཞུགས་གནས་འཁོར་ལོའི་ལྷོ་ཕྱོགས་ཀྱི་རྩིབས་ལ་རྟའི་གདན་སྟེང་ན་སྣ་ཚོགས་པདྨ་དང་ཟླ་བའི་གདན་ལ་བཞུགས་སུ་གསོལ་ལོ།།
ཡང་བཅོམ་ལྡན་འདས་ཀྱི་ཐུགས་ཀའི་ཟླ་བའི་དཀྱིལ་འཁོར་གྱི་སྟེང་དུ། ཨོཾ་ཨ་མོ་གྷ་ཨ་པྲ་ཏི་ཧ་ཏ་སརྦ་ཨཱ་བ་ར་ཎ་བི་ན་ཤ་ནི་ཧ་ར་ཧ་ར་ཧཱུཾ་ཕཊ་ཅེས་པས་སྔགས་ཀྱི་ཕྲེང་བའི་ཚུལ་དུ་བཀོད་པ་ལས་འོད་ཟེར་ཕྱོགས་བཅུར་འཕྲོས་པས་ཕྱི་སྣོད་ཀྱི་འཇིག་རྟེན་གཡོ་བ་དང༌། ནང་བཅུད་ཀྱི་འཇིག་རྟེན་འགུལ་བ་དང༌། ལས་དང་ཉོན་མོངས་པ་ཐམས་ཅད་ཞི་བར་བྱས་ཏེ། རྨད་ཀྱི་ཡ་མཚན་དུ་འཇིག་རྟེན་དུ་སྣང་བར་བྱས་ནས་སླར་འདུས་པ་ཡི་གེ་ལ་ཐིམ་པ་ལས་རྡོ་རྗེ་རྒྱ་གྲམ་དུ་གྱུར་ཏེ། དེ་འཕྲོ་འདུ་ལས་བརྟན་པར་གྱུར་ཏོ། །དེ་འཕྲོ་འདུ་ལས་བཅོམ་ལྡན་འདས་གདོན་མི་ཟ་བའི་སྐུ་ཕྱག་རྒྱ་ཆེན་པོར་གྱུར་ཏེ་ཐུགས་ཀ་ན་བཞུགས་པར་བསམ་མོ། །ཡང་དེའི་ཐུགས་ཀར་ཟླ་བའི་སྟེང་དུ་སྔགས་ཀྱི་ཡི་གེ་ཕྲེང་བ་རྣམས་སྔ་མ་བཞིན་དུ་བཀོད་པ་ལས་བརྗོད་པ་ཙམ་གྱིས་བསྐུལ་པའི་ཚུལ་གྱིས་སྤྱན་དྲངས་ནས་ཐུགས་ཀ་ནས་བཏོན་ཏེ། ཕྱོགས་བཅུར་འཕྲོས་པས་སངས་རྒྱས་ཀྱི་མཛད་པ་མཛད་དེ། སླར་བྱོན་ནས་བཀའ་ནོད་པའི་ཚུལ་དུ་བཞུགས་པ་ལ་བྱིན་གྱིས་བརླབས་པ་དང༌། དབང་བསྐུར་བ་དང༌། མིང་ནས་བོས་པ་ལ་སོགས་པ་བྱས་ནས། ཉིད་ཀྱི་ལས་ཀྱི་བཞུགས་གནས་བྱང་ཕྱོགས་ཀྱི་འཁོར་ལོའི་རྩིབས་ཐོག་ཏུ་ནམ་མཁའ་ལྡིང་གི་སྟེང་ན་སྣ་ཚོགས་པདྨ་དང་ཟླ་བའི་གདན་སྟེང་ན་བཞུགས་པར་བསམ་མོ། །དེ་ལ་ཁ་ཅིག་ན་རེ་རྒྱུད་དཀྲུགས་བས་སྔགས་ཀྱི་རིམ་པ་ལྟར་མི་བསྐྱེད་དེ། ལྷའི་རིམ་པ་ལྟར་བསྐྱེད་པར་བྱའོ་ཞེས་ཀྱང་ཟེར་རོ། །འོ་ན་འདིར་ཕྱག་ན་རྡོ་རྗེའི་འཁོར་དུ་རིགས་བཞིའི་སངས་རྒྱས་བྱ་བ་མི་འགལ་ལམ་ཞེ་ན། འདིའི་སྐབས་སུ་ཕྱག་ན་རྡོ་རྗེ་ནི་དེ་བཞིན་གཤེགས་པ་ཐམས་ཅད་ཀྱི་ཀུན་དུ་བཟང་པོ་བྱང་ཆུབ་ཀྱི་སེམས་ཀྱི་རང་བཞིན་དེ་བཞིན་གཤེགས་པའི་ས་བཅུ་གཉིས་སུ་བྱིན་གྱིས་བརླབས་ཤིང་དབང་བསྐུར་བས་བདུད་དང་འཆི་བདག་ཐམས་ཅད་འཇོམས་པར་བྱེད་པའི་མཐུ་དང་ལྡན་པ་ཡིན་པས་འགལ་བ་མེད་དོ། །དཀྱིལ་འཁོར་འདིའི་དྷཱུ་པེ་ལ་སོགས་པ་ནི་གཞན་དུ་ཤེས་པར་བྱའོ། །དེ་ནི་དཀྱིལ་འཁོར་རྒྱལ་པོ་མཆོག་གོ །དེ་ནས། །རྡོ་རྗེ་སློབ་དཔོན་སེམས་དཔའ་ཆེ། །རྡོ་རྗེ་ལྕགས་ཀྱུ་བཅིངས་ནས་ནི། །སེ་གོལ་མང་པོ་གདབ་བྱས་ནས། །སངས་རྒྱས་ཐམས་ཅད་བསྡུ་བར་བྱ། །ཨོཾ་བཛྲ་ས་མ་ཡ་ཛ་ཛཿ་ཧཱུཾ་བཾ་ཧོཿ་ཞེས་བརྗོད་དོ། །དེ་ནས་ཕྱག་ན་རྡོ་རྗེ་ཡིས། །ཕྱག་རྒྱ་ཆེན་པོ་སྒོམ་བྱེད་ཅིང༌། །མིང་བརྒྱ་རྩ་བརྒྱད་
དམ་པ་ནི། །ལན་ཅིག་རབ་ཏུ་བརྗོད་པར་བྱ། །དེ་བཞིན་དུ་རྡོ་རྗེ་ལྕགས་ཀྱུ་ལ་སོགས་པས་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱས་ཤིང་རྡོ་རྗེ་གནོད་སྦྱིན་གྱིས་བགེགས་བསྐྲད་པ་དང་རབ་དང་དྲ་བ་བྱས་ཏེ། དམ་ཚིག་གི་ཕྱག་རྒྱ་རྡོ་རྗེ་ཁུ་ཚུར་གྱིས་དཀྱིལ་འཁོར་གྱི་སྒོ་བཅད་ནས་ཡི་གེ་གཉིས་ཀྱིས་བསྲུང་བ་ཐམས་ཅད་ཡང་དག་པར་བསྲུང་ལ་མཆོད་ཡོན་དབུལ་བ་སྔོན་དུ་འགྲོ་བ་དང༌། ཛཿ་ཧཱུཾ་བཾ་ཧོཿ་བྷ་ག་བཱན་བཛྲ་ཨེ་ཧྱེ་ཧི་ས་མ་ཡ་སྟྭཾ་ཞེས་བརྗོད་པར་བྱ་ཞིང་རང་རང་གི་སྔགས་ཀྱི་མཐར་ཡང་དག་པར་བསྐུལ་ལ་དམ་ཚིག་གི་ཕྱག་རྒྱ་དང་ཆོས་ཀྱི་ཕྱག་རྒྱ་རང་རང་གི་ལྕེ་ལ་རྡོ་རྗེ་བསམ་པ་དང༌། ལས་ཀྱི་ཕྱག་རྒྱ་དང་ཕྱག་རྒྱ་ཆེན་པོས་ཀྱང་རྒྱས་གདབ་བོ། །དེ་ནས་མཆོད་པས་མཆོད་པ་དང༌། ཕྱི་ནང་གསང་བའི་མཆོད་པས་ཀྱང་མཆོད་དོ། །དེ་ནས་བཟླས་པ་ལ་སོགས་པ་བྱ་སྟེ། དེ་འདྲ་ཟླ་བའམ་ལོའི་བར་དུ་ཇི་སྲིད་གནང་བ་ཐོབ་ཀྱི་བར་དུ་བྱའོ། །དེ་ནི་གཉེན་པའི་ལས་སོ། །ད་ནི་དཀྱིལ་འཁོར་གྱི་ལས་ལ་འཇུག་པར་བྱ་སྟེ། ས་སྦྱང་ཞིང་གཟུང་བ་དང༌། གཉིས་པ་སྟ་གོན་ལ་གནས་པ་ཀུན་བྱས་ལ། དེ་ཡང་ཐིག་གདབ་པ་དང༌། ཚོན་བྱིན་གྱིས་བརླབས་པ་ཀུན་གོང་ལྟར་བྱས་ལ། དེ་ནས་དཀྱིལ་འཁོར་གྱི་དབྱིབས་ནི། དེ་ནས་དཀྱིལ་འཁོར་འདི་ཡིན་ཏེ། །ཞེས་བྱ་བ་ལ་སོགས་པ་བརྟན་ཏེ། དཀྱུས་གསལ་ལོ། །དེ་ཡི་དབུས་སུ་གཙོ་བོ་ནི། །ཕྱག་ན་རྡོ་རྗེ་སྟོབས་ཆེན་ཏེ། །ཞེས་པ་ལ་སོགས་པ་ནི་ལྷ་དགོད་པའི་རིམ་པ་སྟོན་ཏེ་དཀྱུས་གསལ་ལོ། །དེ་ནས་རྣལ་འབྱོར་ཅན་ཉིད་ཞུགས། །ཞེས་པས་ནི་རྣལ་འབྱོར་པ་བདག་ཉིད་ཞུགས་པར་བྱས་ཏེ་སྔ་མ་བཞིན་ནོ། །སྔགས་ཀྱི་ལྷ་རྣམས་སྤྱན་དྲངས་ཏེ། །ཞེས་པ་ལ་སོགས་པ་ནི་སྔོན་དུ་འགྲོ་བ་ནས་དཀྱིལ་འཁོར་རྒྱལ་པོ་མཆོག་ཡན་ཆད་བྱས་ནས་སྤྱན་དྲངས་པའོ། །དེ་ནས་གོང་ལྟར་ལས་ལ་སྤྱོར་བ་བཞིན་དུ་བཟླས་པ་ཡན་ཆད་བྱའོ། །འདི་ནས་སློབ་མ་གཞུག་པར་བྱ་བ་སྟོན་ཏེ། འཆི་བདག་སྦྲུལ་གྱི་འཇིགས་པ་རྣམས། །ཞེས་པ་ལ་སོགས་པ་སྟེ། འཆི་བདག་ནི་གཤིན་རྗེའི་དབང་དུ་བྱ་བའོ། །སྦྲུལ་ནི་ལུས་གཟུང་བའོ། །རྣམས་ནི་ཤུ་བ་དང༌། གཡན་པ་ལ་སོགས་པའོ། །དེས་ནི་ཟིན་པའི་སེམས་ཅན་རྣམས་ནི་འཆི་བདག་ལ་སོགས་པ་གཞོམ་པར་བྱ་བའི་
ཕྱིར་དཀྱིལ་འཁོར་དེར་གཞུག་པར་བྱའོ། །དེ་ནས་སློབ་མ་ཁྲུས་བྱས་ཏེ། གོ་ཆ་བསྐོན་ཏེ། ཨོཾ་བཛྲ་ས་མ་ཡ་ཧཱུཾ་ཞེས་པ་དང་རྡོ་རྗེ་ཏི་རཱིནྟི་རིའི་ཕྱག་རྒྱ་སོར་མོ་རྣམས་ནང་དུ་བསྣོལ་ལ་མཐེ་བོང་གཉིས་གཤིབས་ཏེ་མནན་པའི་ཕྱག་རྒྱ་དེས་རིན་པོ་ཆེའི་ཏོག་གམ། མེ་ཏོག་གི་ཕྲེང་བ་ཐོགས་པའི་སློབ་མས་དང་པོར་སློབ་དཔོན་ལ་ཕྱག་བཙལ་ཏེ། གསོལ་བ་གདབ་བོ། །དེ་ནས་སྡིག་པ་བཤགས་པ་དང༌། རྗེས་སུ་ཡི་རང་བ་དང༌། སྐྱབས་སུ་འགྲོ་བ་དང༌། བྱང་ཆུབ་ཏུ་སེམས་བསྐྱེད་པ་དང༌། གསོལ་བ་གདབ་པ་དང༌། སྡོམ་པ་གཟུང་བ་ལ་སོགས་པ་བྱས་ཏེ། དེ་ནས་སློབ་དཔོན་གྱིས་སློབ་མ་དེ་རྡོ་རྗེ་སེམས་དཔའི་རང་བཞིན་དུ་བསྐྱེད་དེ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུང་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །ཨོཾ་བཛྲ་ས་མཱ་ཡ་ཧཱུཾ་ཞེས་པ་ལ་སོགས་པས་སོ། །དེ་ནས་ཡེ་ཤེས་དབབ། དེ་ལ་ཡང་སློབ་དཔོན་གྱི་དབབ་པ་དང༌། རིགས་ཀྱི་དབབ་པ་དང༌། དེ་བཞིན་གཤེགས་པས་དབབ་པ་དང༌། སྦྱིན་སྲེག་གི་དབབ་པའོ། །དེས་ཀྱང་དབབ་པར་མ་གྱུར་ན་དབང་བསྐུར་བར་མི་བྱའོ། །དེ་ནས་མིག་གི་སྣང་པ་དྲིས་ཏེ། དེ་ནས་འདིས་གདོང་གཡོགས་དགྲོལ་བར་བྱ་སྟེ། སྔོན་གྱི་མིག་མཁན་རྒྱལ་པོ་ཡིས། །ཞེས་པ་ལ་སོགས་པ་བརྗོད་ལ། ཨོཾ་བཛྲ་ཧཱ་སྱོད་གྷ་ཊ་ཡ་ཧཱུཾ་ཞེས་སོ། །དེ་ནས་དཀྱིལ་འཁོར་བསྟན་ཏེ། དཀྱིལ་འཁོར་བཟང་པོ་འདི་ལ་ལྟོས། །ཞེས་པ་ལ་སོགས་པ་དང༌། ཨོཾ་བཛྲ་པཱ་ཤྱཧོ་ཞེས་པས་རྡོ་རྗེ་ལྕགས་ཀྱུ་ནས་ཕྱག་ན་རྡོ་རྗེའི་བར་བསྟན་ཏོ། །དེ་ནི་འཇུག་པའི་རིམ་པའོ།། །། དེ་ནས་འདིས་དབང་བསྐུར་བར་བྱ་སྟེ། དང་པོར་སློབ་དཔོན་གྱིས་སློབ་མ་དེ་ཟླ་བའི་དཀྱིལ་འཁོར་དུ་གཞག་སྟེ། དང་པོར་ནི་བུམ་པའི་དབང་ངོ༌། །དེ་ནས་དབུ་རྒྱན་གྱི་དབང་ངོ༌། །དེ་ནས་ཅོད་པན་དང་ཕྲེང་བའི་དབང་ངོ༌། །དེ་ནས་རྡོ་རྗེའི་དབང་ངོ༌། །དེ་ནས་དྲིལ་བུའི་དབང་ངོ༌། །དེ་ནས་མིང་གི་དབང་པོ།། དེ་རྣམས་ནི་རིག་པའི་དབང་སྟེ། དེ་ནས་ཕྱིར་མི་ལྡོག་པའི་དབང་བསྐུར་བར་བྱ་སྟེ། རྩ་བའི་དཀྱིལ་འཁོར་ལས་ཁྲུ་དོ་དོར་བར་དཀྱིལ་འཁོར་ཕྱོགས་བཞིར་བྱ་བ་དང༌། དབང་བསྐུར་བ་ལ་སོགས་པ་ནི་རྩ་བའི་དཀྱིལ་འཁོར་དུ་དྲངས་པས་འདིར་སྨོས་དབང་བསྐུར་བའི་ཆོ་གའོ། །དེ་ནས་སྒྲུབ་པ་སྦྱིན་ཏེ། ལྷའི་རྣལ་འབྱོར་
ཀྱི་རིམ་པ་སྦྱོར་བ་དང་པོ་དང༌། དཀྱིལ་འཁོར་རྒྱལ་པོ་མཆོག་དང༌། ལས་རྒྱལ་པོ་མཆོག་ཇི་ལྟར་བྱ་བའི་རིམ་པ་དང༌། ཚེ་བསྲིང་པའི་རིམ་པ་འདིར་བྱིན་ནོ། །ཨོཾ་བྷྲཱུཾ་བཛྲ་ཨཱ་ཡུ་ཥེ་ཧཱུཾ་ཨ་ཞེས་པས་སྦྱིན་ནོ། །ད་ནི་འདི་ནས་རས་རིས་ཀྱི་སྒྲུབ་པ་བསྟན་ཏེ། རས་ལེགས་པར་བྱས་པ་ལ་བཅོམ་ལྡན་འདས་རྡོ་རྗེ་ཚེ་དཔག་མེད་ཟླ་བའི་འོད་ཅན་ཟླ་བའི་དཀྱིལ་འཁོར་ལ་བཞུགས་པ། འཁོར་ལོས་སྒྱུར་བའི་ཆ་བྱད་ཅན། རྒྱན་ཐམས་ཅད་ཀྱིས་བརྒྱན་པ་སྟེ། རྣ་རྒྱན་དང༌། མགུལ་རྒྱན་དང༌། སེ་མོ་དོ་དང༌། དོ་ཤལ་དང༌། རིན་པོ་ཆེའི་ཟེའུ་དང༌། དར་དབྱངས་ཀྱིས་བཅིངས་ལ། ཕྱག་གཉིས་པ་གཡོན་མི་འཇིགས་པ་དང༌། གཡས་མཆོག་སྦྱིན་པའི་ཚུལ་ལས་བདུད་རྩི་འཛག་པ་བྲི། །དེའི་འོག་ཏུ་སྒྲུབ་པ་པོ་ཐལ་མོ་སྦྱར་བ་གདོང་གྱེན་དུ་བལྟ་བ། བཅོམ་ལྡན་འདས་ཀྱི་ཕྱག་གི་བདུད་རྩི་ལས་དངོས་གྲུབ་ནོད་པའོ། །དེ་ལ་རབ་ཏུ་གནས་པ་ལ་སོགས་པ་གོང་ལྟར་བྱས་ནས་མཆོད་པ་བྱ་སྟེ། བསྙེན་པ་དེའི་སྤྱན་སྔར་འབུམ་བཟླས་ལ་བཟོད་པ་བསྒྲུབ་པ་ལ་འཇུག་པར་བྱའོ། །སྒྲུབ་པ་ནི་གནས་ཡིད་དུ་འོང་བར་དང་པོ་ཉ་ལ་མགོ་བཙུགས་ལ་སྒྲུབ་པ་པོ་འདོན་པ་ཡང་ཕྱི་དེ་ཉའི་བར་དུ་བསྒྲུབ་པར་བྱའོ། །མཆོད་པ་ཆེན་པོ་བྱས་ལ་ཞེས་པ་ནི་ཕྱི་ནང་གསང་པའི་མཆོད་པ་བྱས་པའོ། །དེ་ནས་རྫས་ནི་བ་དམར་སེར་གྱི་འོ་མའམ། མར་སར་པའམ། ཏིལ་མར་རམ། ཆུའམ། ཞོའམ། འོ་མའམ། ཆང་ངམ། ཁྲག་གམ། ཞག་གམ། ཀླད་པ་ལ་སོགས་པ་ལ་བསྒྲུབ་པར་བྱའོ། །དེ་ནས་རྡོ་རྗེ་དང་བཅས་པའི་ལག་པ་གཡོན་པས་མནན་ལ་བཟླས་པ་མཚན་མ་བྱུང་བྱུང་དུ་བཟླས་པར་བྱའོ། །མཚན་མ་ནི་དཀྱུས་གསལ་ལོ། །མཚན་མ་བྱུང་བ་དང་དངོས་གྲུབ་བརྟག་པར་བྱ་བའི་ཕྱིར་མཚན་ཅིག་ཐོག་ཐག་བཟླས་པར་བྱའོ། །དེ་ནས་དངོས་གྲུབ་བླང་བར་བྱ་སྟེ། ནང་པར་སྔར་བསྲུང་པ་ལ་སོགས་པ་བྱས་ན་ཞེས་པ་ནི། གཞན་གྱིས་དབྲོག་པར་མི་ནུས་པར་བྱ་བའི་ཆེད་དུ་ཁྲོ་བོ་མེ་ལྟར་འབར་བས་བསྲུང་བར་བྱའོ། །དེ་ནས་དངོས་གྲུབ་བླང་བར་བྱ་བ་ནི་བདག་ཉིད་ལྷའི་སྐུར་གསལ་པ་དང༌། རྫས་བདུད་རྩིར་སྦྱང་བའོ། །དེ་འཐུངས་སམ་ཟོས་ན་འོག་གི་ཡོན་ཏན་རྣམས་འབྱུང་ངོ༌། །ཡོན་ཏན་ནི་དཀྱུས་གསལ་ལོ། །དེ་ནི་ཚེ་དཔག་མེད་ལས་ཀྱི་སྒྲིབ་པ་རྒྱུན་གཅོད་པའི་བཤད་པའོ།། །།ད་ནི་འཇིག་རྟེན་པའི་དཀྱིལ་འཁོར་དྲུག་གི་དོན་བསྟན་ཏེ། དེ་ལ་རྒྱལ་
པོ་ཆེན་པོ་བཞིའི་དཀྱིལ་འཁོར་ནི། འཇིག་རྟེན་པའི་དྲི་ཟ་དང༌། གྲུལ་བུམ་དང༌། ཀླུ་དང༌། གནོད་སྦྱིན་གྱི་འཁོར་ཞི་བར་བྱ་བའི་ཕྱིར་གསུངས་ཏེ། དེ་ནས་རྒྱལ་པོ་ཆེན་པོ་བཞིས་ཞེས་པ་ནི་དེ་ནས་ནི་ཚེ་དཔག་མེད་ཀྱི་རྟིང་ཐོགས་སུ་འབྱུང་བ་ལ་བྱའོ། །རྒྱལ་པོ་ཆེན་པོ་བཞི་ནི་ལྷའི་རྒྱལ་པོ་ཡིན་པའི་ཕྱིར་རོ། །བཅོམ་ལྡན་འདས་ཕྱག་ན་རྡོ་རྗེ་ལ་ཕྱག་འཚལ་ནས་ཞེས་པ་ལ་སོགས་པ་ནི་ཞུ་བ་དང་གནང་བ་བསྟན་ཏེ། དཀྱུས་གསལ་ལོ། །བྱིན་གྱིས་བརླབས་ཞེས་བྱ་བ་ནི་ཕྱག་ན་རྡོ་རྗེའི་སྐབས་སུ་དབང་བསྐུར་བ་དང༌། མིང་བཏགས་པའོ། །གནང་བ་ནི་ཕུལ་ཅིག་པའོ། །དེ་ནས་སྙིང་པོ་ཕུལ་བ་ནི་དཀྱུས་སུ་གསལ་ལོ། །ད་ནི་རྒྱལ་པོ་ཆེན་པོ་བཞིའི་བསྐྱེད་ཐབས་ནི་འདིར་འདི་ལྟར་ཤེས་པར་བྱ་སྟེ། དེ་ཡང་དང་པོར་སྔོན་དུ་འགྲོ་བའི་ཡན་ལག་དང༌། རྡོ་རྗེ་བཅིངས་པ་དང༌། རྡོ་རྗེ་དྲལ་བ་ལ་སོགས་པ་སྔོན་དུ་བྱས་པ་ལྟར་བྱས་ལ། མངོན་པར་བྱང་ཆུབ་པ་ལྔས་དབུས་ཀྱི་གཙོ་བོ་བསྐྱེད་པར་བྱ་སྟེ། ཨོཾ་ཙིཏྟ་པྲ་ཏི་བེ་དྷཾ་ཀ་རོ་མི་ཞེས་བརྗོད་དེ། གཟུང་བ་དང་འཛིན་པར་བརྟགས་པའི་ཕྱི་ནང་གི་དངོས་པོ་ཐམས་ཅད་རྣམ་པར་དག་པ་ཕུང་པོ་དང་ཁམས་དང་སྐྱེ་མཆེད་ལ་ཇི་ལྟ་བུའི་དངོས་པོ་ཡང་མ་གྲུབ་སྟེ། སེམས་ཉིད་འོད་གསལ་བའི་ངོ་བོ་ཟླ་བ་ཚེས་གཅིག་པ་ལྟ་བུའི་ངོ་བོར་བསྒོམ་པར་བྱའོ། །དེ་ནས་ཨོཾ་བོདྷི་ཙིཏྟ་ཨུཏྤཱ་ད་ཡཱ་མི་ཞེས་བརྗོད་པས་ཟླ་བའི་དཀྱིལ་འཁོར་དེ་འཕྲོ་བ་དང་འདུ་བའི་ཚུལ་གྱིས་སྟོང་པ་ཉིད་ཀྱི་དོན་ལ་འདྲིས་ཤིང་གོམས་པའི་རྟགས་ཟླ་བའི་དཀྱིལ་འཁོར་ཉ་གང་བ་ཞིག་རྫོགས་པར་བསྒོམ་མོ། །དེ་ནས་ཟླ་བའི་དཀྱིལ་འཁོར་དེའི་དབུས་སུ་ཡི་གེ་ཧཱུཾ་བཀོད་ལ། ཨོཾ་བཛྲ་ཏིཥྛ་ཞེས་བརྗོད་པས་ཧཱུཾ་དེ་ལས་འོད་འཕྲོས་པ་དང་འདུ་བའི་ཚུལ་གྱིས་ཡེ་ཤེས་ཀྱི་རྡོ་རྗེ་རྩེ་ལྔ་པར་གྱུར་ཏོ། །དེའི་འཕྲོ་འདུ་ལས་རིགས་བཞིའི་དེ་བཞིན་གཤེགས་པ་རྣམས་ཀྱི་སྐུ་གསུང་ཐུགས་ཀྱི་བྱིན་རླབས་འདུས་ཏེ། རྡོ་རྗེ་དེ་ལ་ཐིམ་པར་གྱུར་པས་བརྟན་པར་བྱས་སོ། །ཨོཾ་བཛྲ་ཨཱཏྨ་ཀོ྅ཧཾ་ཞེས་བརྗོད་དེ། དེ་ནས་ཡང་བརྟན་པར་གྱུར་པའི་རྡོ་རྗེ་དེ་ལས་དེ་བཞིན་གཤེགས་པའི་སྐུ་ཕྲ་མོ་མང་དུ་འཕྲོས་ཤིང་འདུས་པ་ལས་བཅོམ་ལྡན་འདས་ཕྱག་ན་རྡོ་རྗེའི་སྐུ་ཕྱག་རྒྱ་ཆེན་པོར་གྱུར་ཏེ། སྐུ་མདོག་དཀར་པོ་ཕྱག་གཡས་རྡོ་རྗེ་རྩེ་ལྔ་པ་འགྱེད་པའི་ཚུལ་གྱིས་ཐུགས་ཀར་འཛིན་པ། གཡོན་ དྲིལ་བུ ་དཀུར་བརྟེན་པར་གྱུར་ཏོ། །དེ་ནས་དེའི་གནས་བཞི་པོ་དག་ཏུ་བྱིན་གྱིས་བརླབས་
ནས་དབང་བསྐུར་རོ། །དེ་ནས་རྒྱལ་བོ་ཆེན་པོ་བཞི་བསྐྱེད་པར་བྱ་སྟེ། དེ་ཡང་དང་པོར་སྟོང་པ་ཉིད་དུ་བསྒོམས་ནས། དེ་ནས་གཞལ་ཡས་ཁང་གྲུ་བཞི་པ་སྒོ་བཞི་པ། ནང་ལེའུ་ཚེ་གནས་པ་འམ། འཁོར་ལོ་རྩིབས་བཞི་པ་བསམས་ལ་དེའི་དབུས་སུ་བདག་ཉིད་ཕྱག་ན་རྡོ་རྗེའི་ཐུགས་ཀའི་ཟླ་བའི་དཀྱིལ་འཁོར་གྱི་སྟེང་དུ་ཨོཾ་བཻ་ཞེས་པའོ། །དེའི་མཐའ་མར་ཨོཾ་བཻ་ཤྲ་བ་ཎ་ཡེ་སྭཱ་ཧཱ། ཞེས་པའི་སྔགས་ཀྱི་ཕྲེང་བ་བཀོད་ལ། དེ་ལས་འོད་ཟེར་འཕྲོས་པས་ཚད་མེད་པ་བཞི་དང༌། བསྡུ་བ་རྣམ་པ་བཞིའི་སྒོ་ནས་སེམས་ཅན་གྱི་དོན་བྱས་ནས་སླར་འདུས་ཏེ། སྔགས་ཀྱི་ཡི་གེ་ལ་ཐིམ་པས་རིན་པོ་ཆེའི་བེ་ཅོན་དུ་གྱུར་ཏོ། །དེ་འཕྲོ་འདུ་ལས་རྒྱལ་པོ་ཆེན་པོ་རྣམ་ཐོས་སྲས་ཀྱི་སྐུར་གྱུར་ཏེ། སྐུ་མདོག་སེར་པོ། ཕྱག་གཡས་ན་བེ་ཅོན། གཡོན་ན་རིན་པོ་ཆེས་གང་བའི་ནེའུ་ལེའི་རྐྱལ་བུ་ཐོགས་པ། རིན་པོ་ཆེའི་རྒྱན་གྱིས་བརྒྱན་པ། སྐུ་ལུས་སྦོམ་ཞིང་གསུས་པ་ཆེ་བ་སྟེ། བཅོམ་ལྡན་འདས་ཀྱི་གཡོན་ལོགས་སུ་སེང་གེའི་ཁྲི་སྟེང་ན་པདྨའི་གདན་ལ་བཞུགས་པའོ། །གཡས་གཡོན་ན་བུམ་པ་མཛེས་པ་རེ་ཡང་བསམ་མོ། །དེ་ནས་རིན་པོ་ཆེའི་ཆུ་འབབ་པའོ། །ཡང་བཅོམ་ལྡན་འདས་ཀྱི་ཐུགས་ཀའི་ཟླ་བའི་སྟེང་དུ། ཨོཾ་ཌྷི་ཞེས་པའི་མཐའ་མ་ན་ཚུར་ཨོཾ་ཌྷཱི་ཏ་རཱཥྚ་ཡེ་སྭཱ་ཧཱ་ཞེས་པའི་སྔགས་ཀྱི་ཡི་གེའི་ཕྲེང་བས་བསྐོར་བ་བསྒོམས་ལ། དེའི་འཕྲོ་འདུ་ལས་པི་ཝང་དུ་གྱུར་ཏོ། །དེ་ལས་ཡུལ་འཁོར་སྲུང་གི་སྐུར་གྱུར་ཏེ། ལུས་རན་ཞིང་མཛེས་པ་སྐུ་མདོག་ནི་ལྗང་གུ་སྟ། རྒྱན་ཐམས་ཅད་ཀྱིས་བརྒྱན་པ། ཕྱག་ན་པི་ཝང་བརྡེབས་པ་ལ་བརྩོན་པ་སྟེ། བཅོམ་ལྡན་འདས་ཀྱི་མདུན་དུ་སེང་གེའི་ཁྲི་སྟེང་དུ་བཞུགས་སུ་གསོལ་ལོ། །ཡང་བཅོམ་ལྡན་འདས་ཀྱི་ཐུགས་ཀའི་ཟླ་བའི་སྟེང་དུ་ཨོཾ་བི་ཞེས་པའི་མཐའ་མ་ན་ཚུར་ཨོཾ་བི་རུ་ཌྷ་ཀ་ཡེ་སྭཱ་ཧཱ་ཞེས་པའི་སྔགས་ཀྱི་ཕྲེང་བས་བསྐོར་བར་བསྒོམ་མོ། །དེའི་འཕྲོ་འདུ་ལས་རལ་གྲི། དེ་ལས་འཕགས་སྐྱེས་པོའི་སྐུར་གྱུར་ཏེ། སྐུ་མདོག་སྔོན་པོ་ཡིད་ཙམ་ཁྲོས་པས་ཕྱག་ན་རལ་གྲི་ཐོགས་པ་བཅོམ་ལྡན་འདས་ཀྱི་གཡས་ལོགས་ཀྱི་སེང་གེའི་ཁྲི་སྟེང་དུ་བསམ་མོ། །ཡང་བཅོམ་ལྡན་འདས་ཀྱི་ཐུགས་ཀའི་ཟླ་བར་ཨོཾ་ཀྵཿ་དེའི་མཐའ་མ་ན་ཚུར་ཨོཾ་བི་རུ་པཱ་ཀྵ་ཡེ་སྭཱ་ཧཱ་ཞེས་པའི་སྔགས་ཀྱི་ཕྲེང་བས་བསྐོར་
བར་བསམ་མོ། །དེའི་འཕྲོ་འདུ་ལས་ཞགས་པ་རྡོ་རྗེས་མཚན་པའོ། །དེ་ལས་རྒྱལ་པོ་མིག་མི་བཟང་གི་སྐུར་གྱུར་ཏེ། སྐུ་མདོག་ནི་དམར་སྐྱ་ལ་ཕྱག་ན་རྡོ་རྗེས་མཚན་པའི་ཞགས་པ་བསྣམས་པ་སྤྲུལ་མགོ་བདུན་གྱིས་དབུ་ལ་ཐོད་ཐབས་སུ་བརྒྱན་པའོ། །མིག་རྩ་དམར་ཞིང་འབུར་བ་སྟེ། བཅོམ་ལྡན་འདས་ཀྱི་རྒྱ་བ་ཏུ་གདན་སེང་གེའི་ཁྲི་ལ་བཞུགས་པར་བསྒོམ་མོ། །དེ་ནས་དྷཱུ་པེ་ལ་སོགས་པ་དང༌། སྒོ་བ་ཡང་གོང་ལྟར་བསྐྱེད་ལ། དེ་ལ་ལ་ལ་དག་འཇིག་རྟེན་པའི་འཁོར་དུ་འཇིག་རྟེན་ལས་འདས་པ་མི་རིགས་སོ་ཞེ་ན། དེ་ནི་འཇིག་རྟེན་པའི་དབུས་ཀྱི་གཙོ་བོ་འཇིག་རྟེན་ལས་འདས་པས་མཛད་པས་འདི་ཡང་འགལ་པ་མེད་དོ་ཞེས་སོ། །དེ་ནས་བཅོམ་ལྡན་འདས་སྤྱན་དྲང་ངོ༌། །སྤྱན་དྲང་པའི་སྔགས་ནི་ཨོཾ་ཨེ་ཧྱེ་ཧི་བྷ་ག་བཱན་ས་མཱ་ཛ་ཛཿ་ཧཱུཾ་བཾ་ཧོཿ་ཞེས་པས་སོ། །དེ་ནས་རྒྱལ་པོ་བཞི་སྤྱན་དྲང་ངོ༌། །དེ་ནི་རང་གི་རྩ་བའི་སྔགས་ཀྱིས་སོ། །དེ་ནས་འོག་ནས་འབྱུང་བའི་དམ་ཚིག་གི་ཕྱག་རྒྱ་བསྟན་ཏོ། །དེ་ནས་མཆོད་པ་ལྔ་ལ་སོགས་པས་མཆོད་པའི་ཕྱིར། ཆོ་ག་བཞིན་དུ་མཆོད་པར་བྱ། །ཞེས་སོ། །མཆོད་པའི་སྒྲས་བསྟོད་པ་དང་བཟླས་པ་ཡན་ཆད་བྱའོ། །བཟླས་པ་ནི་གཙོ་བོའི་དང་པོ་རང་རང་གི་རྩ་སྔགས་སོ། །དཀྱིལ་འཁོར་བྲི་བ་དང༌། དབང་བསྐུར་བ་དང༌། དེའི་ཡོན་ཏན་ནི་དཀྱུས་ཉིད་གསལ་ལོ། །འོན་ཀྱང་དབང་བསྐུར་བ་ནི་འཇིག་རྟེན་དང་འཇིག་རྟེན་ལས་འདས་པའི་དབང་ངོ༌། །འཇིག་རྟེན་ལས་འདས་པའི་དབང་ནི་ཕྱག་ན་རྡོ་རྗེའི་བུམ་པ་ལ་སོགས་པས་དབང་བསྐུར་བའོ། །བུམ་པའི་ཟླས་དྲངས་པས་རིག་པའི་དབང་དང༌། ཕྱིར་མི་ལྡོག་པའི་དབང་རྣམས་སོ། །འཇིག་རྟེན་པའི་དབང་ནི་རྒྱལ་པོའི་བུམ་པ་ལ་སོགས་པའོ། །བུམ་པས་སྣ་དྲངས་ལ་རྒྱལ་པོ་བཞིའི་རྫས་ཀྱིས་ཀྱང་དབང་རྣམས་བསྐུར་རོ། །དེ་ལྟར་ནི་འཇིག་རྟེན་པའི་དཀྱིལ་འཁོར་དྲུག་ཀ་ལ་ཤེས་པར་བྱའོ། །རྒྱལ་པོ་བཞིའི་སྒྲུབ་པ་བཤད་ཟིན་ཏོ། །དེ་ནས་འདི་ནས་ཕྱོགས་སྐྱོང་བའི་དཀྱིལ་འཁོར་བཤད་དེ། དེ་ནས་ཕྱོགས་བཅུ་སྐྱོང་བ་རྣམས་ཀྱིས་ཞེས་པ་ལ་སོགས་པ་གསུངས་ཏེ། དེ་ནས་ཞེས་པ་ནི་རྒྱལ་པོ་བཞིའི་དཀྱིལ་འཁོར་ཞེས་པ་ནས་བར་ཅིས་ཀྱང་མཆོད་པའོ། །ཕྱོགས་སྐྱོང་བ་རྣམས་ཀྱིས་
ཀྱང་སྙིང་པོ་ཕུལ་ཞིང་དཀྱིལ་འཁོར་བཤད་དོ། །བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ་ཞེས་བྱ་བ་ནས་སྙིང་པོ་ཕུལ་ཅིག་ཅེས་བྱ་བའི་བར་ནི་གསོལ་བ་གདབ་པ་དང་རྗེས་སུ་གནང་བའོ། །སྙིང་པོ་ཕུལ་བ་ཡང་འདིར་གོ་སླའོ། །དེའི་དོན་ཡང་འདི་ལྟར་ཤེས་པར་བྱ་སྟེ། ཕྱོགས་སྐྱོང་བཅུའི་དཀྱིལ་འཁོར་བསྐྱེད་པར་བྱ་སྟེ། གཙོ་བོའི་བསྐྱེད་ཐབས་སྔོན་དུ་འགྲོ་བའི་ཆོ་ག་དང་སྡིག་པ་དྲལ་བ་དང༌། ཡེ་ཤེས་དབབ་པ་དང༌། མངོན་པར་བྱང་ཆུབ་པས་དབུས་ཀྱི་གཙོ་བོ་ཕྱག་ན་རྡོ་རྗེའི་སྐུ་བསྐྱེད་པ་དང༌། བྱིན་གྱིས་བརླབས་པ་དང༌། དབང་བསྐུར་བ་བྱས་ལ། སྟོང་པ་ཉིད་ཀྱི་རང་བཞིན་ལས་འབྱུང་བ་རིམ་གྱིས་བསྐྱེད་དེ། དེའི་སྟེང་དུ་ཡི་གེ་བྷྲཱུཾ་ལས་གཞལ་ཡས་ཁང་བསྐྱེད་པ་ནི་གྲུ་བཞི་པ་ལ་སྒོ་བཞི་པ་ནང་རེའུ་མིག་དགུ་རུ་བྱས་ལ། ལྷའི་སྣམ་བུ་དང་ལྡན་པ། རྟ་བབས་བཞི་ས་བརྒྱན་པ་བསྐྱེད་པར་བྱའོ། །དེའི་དབུས་སུ་ཕྱག་ན་རྡོ་རྗེ་ཉིད་གནས་པར་བྱས་ནས་དཀྱིལ་འཁོར་གྱི་ལྷ་རྣམས་བསྐྱེད་པར་བྱའོ། །དེ་ལ་དབུས་ཀྱི་གཙོ་བོའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཨོཾ་ཨཱི་ཞེས་པའོ། །དེའི་ཕྱི་རིམ་དུ་ཨོཾ་ཨཱི་ཤྭ་ན་ཡེ་སྭཱ་ཧཱ། ཞེས་པའི་སྔགས་རྣམས་ཕྲེང་བའི་ཚུལ་དུ་བསྐོར་བར་བྱའོ། །དེ་ནས་སྤྲོ་བ་དང་བསྡུ་བའི་སྦྱོར་བས་ཏྲི་ཤཱུ་ལ་རྩེ་གསུམ་དུ་གྱུར་ཏོ། །དེ་སྤྲོ་བ་དང་བསྡུ་བས་བརྟན་པར་བྱའོ། །དེ་འཕྲོ་ཞིང་འདུ་བའི་ཚུལ་གྱིས་སྐུར་གྱུར་ཏེ། བྱང་ཤར་གྱི་རེའུ་མིག་ལ་གདན་གླང་ཁྱུ་བའི་སྟེང་དུ་བཞུགས་སོ། །དེ་བཞིན་དུ་ཨོཾ་ཨིཿ་ཨོཾ་ཨ། ཨོཾ་ཡ། ཨོཾ་རཾ། ཨོཾ་བཾ། ཨོཾ་ཡཾ། ཨོཾ་ཨ། ཨོཾ་ཀུཿ། ཨོཾ་བྲ་ཞེས་པའི་སྙིང་པོ་ལ་སོ་སོའི་སྔགས་ཀྱིས་བསྐོར་བ་དེའི་འཕྲོ་འདུ་ལས་དམ་ཚིག་གི་ཕྱག་རྒྱ་རྡོ་རྗེ་གདེངས་པ་དང༌། བགྲང་ཕྲེང་དང༌། ཐོད་དབྱུག་དང༌། རལ་གྲི་དང༌། ཞགས་པ་དང༌། བ་དན་དང༌། དབྱུག་ཏོ་དང༌། བུམ་པ་དང༌། པདྨར་གྱུར་ཏོ། །དེ་དག་གི་འཕྲོ་འདུ་ལས་བརྟན་པར་གྱུར་ཏོ། །དེ་ཉིད་ཀྱི་འཕྲོ་འདུ་ལས་སྐུར་གྱུར་ཏེ། ཤར་ཕྱོགས་སུ་བརྒྱ་བྱིན་མདོག་སེར་པོ་གླང་པོ་ཆེའི་གདན་ལ་བཞུགས་པ་ཕྱག་ན་རྡོ་རྗེ་གདེངས་པ་བསྣམས་པའོ། །ཤར་ལྷོར་མེ་ལྷ་དམར་སེ་རང་སྐྱེས་ཀྱི་གདན་ལ་བཞུགས་པ་ཕྱག་བཞིན་སྐྱབས་སྦྱིན་དང༌། བགྲང་ཕྲེང་དང༌།
གུནྡྷེ་དང༌། ཞུགས་གླིང་བསྣམས་པའོ། །ལྷོར་གཤིན་རྗེ་ནག་པོ་མ་ཧེའི་གདན་ལ་བཞུགས་པ་ཕྱག་ན་ཐོད་དབྱུག་བསྣམས་པའོ། །ལྷོ་ནུབ་ཏུ་བདེན་བྲལ་དམར་ནག་ཡི་དགས་ཀྱི་གདན་ལ་བཞུགས་པ་རལ་གྲི་ཐོགས་པའོ། །ནུབ་ཏུ་ཆུ་བདག་མདོག་དམར་སྦྲུལ་གྱི་གདེངས་ཀ་ཅན་སྦྲུལ་ཞགས་བསྣམས་པ་ཆུ་སྲིན་གྱི་གདན་ཅན་ནོ། །ནུབ་བྱང་དུ་རླུང་ལྷ་ཐལ་བའི་མདོག་ཅན་ཤ་བའི་གདན་ཅན་བ་དན་བསྣམས་པའོ། །བྱང་དུ་ནོར་སྦྱིན་མདོག་ལྗང་གུ་དབྱུག་ཏོ་བསྣམས་པ་རྟའི་གདན་ཅན་ནོ། །གཙོ་བོའི་མདུན་དུ་ཉི་མ་མདོག་དམར་རྟ་བདུན་གྱིས་འདྲེན་པའི་ཁྲི་ལ་བཞུགས་པ་ཕྱག་ན་པདྨ་བསྣམས་པའོ། །རྒྱབ་ཏུ་ཕག་གི་གཟུགས་ཅན་མདོག་སེར་པོ་བྱི་བའི་ཁྲི་ལ་འདུག་པ་བུམ་པ་བསྣམས་པའོ། །གཞན་ཡང་སྒོ་བ་ལ་སོགས་པ་རྣམས་ནི་སྔ་མ་བཞིན་ནོ། །དེ་ནས་སྤྱན་དྲངས་ཏེ་ཀུན་ལ་ཞེས་པ་ནི་རང་རང་གི་རྩ་བའི་སྔགས་དང་ཕྱག་རྒྱས་སྤྱན་དྲང་ངོ༌། །མཆོད་པ་ཀུན་གྱིས་མཆོད་པར་བྱ། །ཞེས་པ་ནི་མཆོད་པ་ལྔ་ལ་སོགས་པ་སྟེ། དེ་ནས་བསྟོད་པར་བྱ་ཞིང་རང་གི་སྔགས་ཀྱང་བཟླ་བར་བྱའོ། །དེ་ནས་དཀྱིལ་འཁོར་ཡང་ཇི་ལྟར་གྲགས་པ་བཞིན་དུ་བྲིས་ལ་དབུས་སུ་ཕྱག་ན་རྡོ་རྗེའོ། །དཀྱིལ་འཁོར་དེར་དབང་བསྐུར་ནས་སྙིང་པོ་བྱིན་ན་འཇིག་རྟེན་འདིའི་དགོས་པ་རྣམས་འགྲུབ་པར་འགྱུར་རོ། །བསྲུང་ཞིང་བསྐྱབ་པ་དང༌། དམ་བཅས་པ་ནི། །དེ་ནས་དེ་དག་མགུ་ནས་ནི། །ཞེས་བྱ་བ་ལ་སོགས་པས་བསྟན་ཏེ། དཀྱུས་གསལ་ལོ། །ཕྱོགས་སྐྱོང་བའི་བཤད་པའི་འགྲེལ་པའོ། །དཀྱིལ་འཁོར་དེ་ནི་གདོན་སྟོང་ཕྲག་བརྒྱད་ཅུ་ཞི་བར་བྱ་བའི་ཕྱིར་གསུངས་སོ། །ད་ནི་འདི་ནས་གཟའ་བརྒྱད་ཀྱི་དཀྱིལ་འཁོར་གསུངས་ཏེ། དེ་ཡང་གཟའ་དང་དུས་ཚིགས་དང་སྐར་མའི་སླུང་ཞི་བར་བྱ་བའི་ཕྱིར་བཤད་དོ། །དེ་ནས་གཟའ་ཆེན་པོ་བརྒྱད་དང་འཁོར་རྒྱུ་སྐར་དུ་བཅས་པ་རྣམས་ཀྱིས་ཀྱང་འདི་སྐད་ཅེས་གསོལ་ཏོ་ཞེས་བྱ་བ་ནི་དེ་ནས་ཞེས་བྱ་བ་ནི་ཕྱོགས་སྐྱོང་བའི་དཀྱིལ་འཁོར་བཤད་པའི་རྟིང་ཐོགས་ནས་སོ། །ཕྱི་མ་དཀྱུས་གསལ་ལོ། །བྱིན་གྱིས་བརླབས་པ་ནི་དབང་བསྐུར་བ་དང་མིང་བཏགས་པར་རོ། །ཤོད་ཅིག་པ་ནི་གནང་བའོ། །དེ་ནས་སྙིང་པོ་རྣམས་ཕུལ་ལོ། །དེའི་དོན་ཡང་འདི་ལྟར་ཤེས་པར་བྱ་སྟེ། འདིར་ཡང་གནས་ཡིད་དང་མཐུན་
པར་བདེ་བའི་སྟན་ནང་ཚངས་ཅན་ལ་འདུག་སྟེ། དང་པོར་བགེགས་བསྐྲད་པ་དང༌། །རྡོ་རྗེ་སེམས་དཔའ་འམ་འཇིག་རྟེན་གསུམ་ལས་རྣམ་པར་རྒྱལ་བ་མདུན་དུ་དམིགས་ནས་མཆོད་པ་དང༌། ཕྱག་འཚལ་བ་དང༌། སྡིག་པ་བཤགས་པ་དང༌། སྐྱབས་སུ་འགྲོ་བ་དང༌། །གསོལ་བ་གདབ་པ་ལ་སོགས་པ་བྱས་ནས། དེ་ནས་སྡིག་པ་དྲལ་བ་དང་ཡེ་ཤེས་དབབ་པ་བྱས་ཏེ། དེ་ནས་སེམས་སོ་སོར་རིག་པ་ལ་སོགས་པའི་མངོན་པར་བྱང་ཆུབ་པ་ལྔའི་རིམ་པས་ཕྱག་རྒྱ་སྐུ་མདོག་དང་ཕྱག་མཚན་གོང་དུ་བསྟན་པ་ལྟ་བུ་འམ། ཡང་ན་ཨོཾ་བཛྲ་སཏྭ་ཀྲོ་དྷཱ་ན་ལཱརྐ་མ་ཧཱ་བཛྲ་ཀྲོ་དྷ་དྲ་བ་དྲ་པ་བི་དྲ་བ་བི་དྲ་བ། སརྦ་ཨ་བ་ཡ་ནཱ་ཤ་ཡ་ནཱ་ཤ་ཡ། ཧ་ར་ཧ་ར་པྲཱ་ཎཱཾ་ཧཱུཾ་ཞེས་བརྗོད་པས་ཁྲོ་བོ་ཁམས་གསུམ་རྣམ་པར་རྒྱལ་བའི་སྐུར་གྱུར་ཏེ། སྐུ་མདོག་སྔོན་པོ་ཞལ་བགྲད་ཅིང་མཆེད་པ་གཙིགས་པ་ཕྱག་ན་རྡོ་རྗེ་དང༌། པདྨ་དང༌། རལ་གྲི་དང༌། བེ་ཅོན་བསྣམས་པ། སྤྲུལ་གྱིས་བརྒྱན་པ། སྟག་ལྤགས་ཀྱི་སྨད་བརྒྱན་པ། འཁོར་ཁྲོ་བོ་མང་པོས་བསྐོར་བ། རིགས་ལྔས་དབུ་བརྒྱན་པ། ཞབས་པདྨ་ལྟ་བུས་རོ་མནན་ནས། ཐབས་མཁས་པའི་ཐུགས་རྗེས་ངན་སོང་སྦྱང་བར་མཛད་པ་བསམ་མོ། །དེ་ནས་གཞལ་ཡས་ཁང་ནི་གྲུ་བཞི་པ་སྒོ་བཞི་པ། རྟ་བབས་དང་མུ་ཁྱུད་དུ་བཅས་པ་ནང་དཀྱིལ་འཁོར་དགུ་པ་སྣམ་བུ་རིམ་པ་གཉིས་པ་བསྒོམ་མོ། །དེའི་དབུས་སུ་གནས་པར་བྱ་སྟེ། འཁོར་གཟའ་ཆེན་པོ་རྣམས་རིམ་པར་བསྐྱེད་པར་བྱའོ། །དེ་ལ་དབུས་ཀྱི་གཙོ་བོའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཨོཾ་ཨཱ་ཞེས་པས་སྔགས་བསྐྱེད་པར་བྱའོ། །དེའི་འཕྲོ་འདུ་ལས་པདྨར་གྱུར་ཏེ། དེའི་འཕྲོ་འདུ་ལས་གཟའ་ཉི་མའི་སྐུར་བསྐྱེད་དེ། སྐུ་མདོག་དམར་སེར་ལ་གསེར་གྱི་ཡ་ལད་དམ་འཐབ་བེར་གསོལ་བ་ཕྱག་ན་པདྨ་བསྣམས་པའོ། །དེའི་སྙིང་གར་ཨོཾ་ཨཱ་དི་ཏྱ་སྭཱ་ཧཱ། ཞེས་བཀོད་པ་དེ་བརྗོད་པའི་ཚུལ་གྱིས་ཕྱིར་ཕྱུང་སྟེ། རླུང་གི་ཕྱོགས་སུ་རྟའི་སྟེང་དུ་བྱའོ། །ཡང་དབུས་ཀྱི་གཙོ་བོའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཨོཾ་སྭ། ཨོཾ་ཨཾ། ཨོཾ་བུ། ཨོཾ་བྲི། ཨོཾ་ཤུ། ཨོཾ་ས། ཨོཾ་ར། ཞེས་པས་སོ་སོའི་སྔགས་རྣམས་རིམ་པ་བཞིན་བཀོད་ལ། དེ་རྣམས་འཕྲོ་ཞིང་འདུ་བའི་ཚུལ་གྱིས་རང་རང་གི་དམ་ཚིག་གི་ཕྱག་རྒྱ་མེ་ཏོག་ཀུན་མུ་ད་དང༌། མགལ་མེ་དང༌། ཨུཏྤལ་དང༌། པོ་ཏི་དང༌། ཤིང་ཐོག་དང་
དབྱུག་པ་དང༌། སྡིགས་མཛུབ་བམ་ཟླ་བ་རྣམས་སུ་གྱུར་ཏོ། །དེ་རྣམས་ཀྱི་འཕྲོ་འདུ་ལས་སོ་སོར་སྐུ་རྣམས་སུ་གྱུར་ཏོ། །དེ་ནས་ལྷ་རྣམས་ཀྱི་ཐུགས་ཀར་ཨོཾ་སྭ་མོཾ་སྭཱ་ཧཱ། ཨོཾ་བུ་དྷ་སྭཱ་ཧཱ། ཨོཾ་བྲི་ཧ་ཡ་སྭཱ་ཧཱ། ཨོཾ་ཤཱུ་རཾ་ག་མེ་སྭཱ་ཧཱ། ཨོཾ་ས་ནཻ་ཤྩ་ར་སྭཱ་ཧཱ། ཨོཾ་རཱ་ཧུ་ལ་སྭཱ་ཧཱ། ཞེས་པ་བསམས་ལ། རང་རང་གི་སྔགས་བརྗོད་པས་སོ་སོའི་གདན་སྟེངས་སུ་གཞག་པར་བྱ་སྟེ། ཟླ་བ་ནི་མདོག་དཀར་པོ་ཕྱག་ན་ཀུ་མུ་ད་བསྣམས་པ་ནུབ་ཏུ་དང་པའི་སྟེང་དུའོ། །མིག་དམར་ནི་མདོག་དམར་པོ་བྱིས་པའི་གཟུགས་འདྲ་བ་ཕྱག་ན་མགལ་མེ་བསྣམས་པ་མེའི་ཕྱོགས་སུའོ། །གཟའ་ལག་པ་ནི་མདོག་སེར་པོ། གཡས་དམ་ཚིག་སྦྱིན་པ། གཡོན་ཨུཏྤ་ལ་བསྣམས་པ་བྱང་དུ་བསམ་མོ། །དེ་ཡང་སྟན་ནང་ཚངས་ཅན་ནམ་པདྨའི་གདན་ལའོ། །ཕུར་བུ་ནི་མདོག་དཀར་བ་གཡས་པ་པོ་ཏི། གཡོན་པ་ཆོས་འཆད་པའམ། ཚིག་འདྲེན་པའི་ཚུལ། བ་ཏི་སེར་པོའི་སྟོད་གཡོགས་མནབས་པ། ཟླ་བའི་དཀྱིལ་འཁོར་ལ་བསམས་ཏེ་ལྷོ་ན་བཞུགས་སོ། །པ་བ་སངས་ནི་མདོག་དཀར་བ་རྒྱན་ཐམས་ཅད་ཀྱིས་བརྒྱན་པ་ཕྱག་ན་ཤིང་ཐོག་བསྣམས་པ་སྟེ། མདུན་དུ་སྟན་ནང་ཚངས་ཅན་གྱི་སྟེང་དུའོ། །སྤེན་པ་མདོག་གནག་ལ་རྒྱན་མེད་པ་སྐྲ་བཤིག་པ། ལག་ན་དབྱུག་པ་བསྣམས་པ། དབང་ལྡན་གྱི་མཚམས་སུ་སྟན་ནང་ཚངས་ཅན་ལ་གནས་པའོ། །སྒྲ་གཅན་མདོག་དུང་ཁ་མིའི་མགོ་ཅན་ཡིད་ཙམ་ཁྲོས་པ་མཆེ་བ་གཙིགས་པ་སྐྲ་སེར་པོ་གྱེན་དུ་འགྲེང་བ། མགྲིན་པ་མན་ཆད་སྤྲུལ་གྱིས་དཀྲིས་པ་འམ། རྣམ་པ་གཅིག་ཏུ་ན་སྤྲིན་གྱི་ནང་ན་འདུག་པ་སྡིགས་མཛུབ་བསྒྲེང་པ་སྟེ། །སྲིན་པོའི་ཕྱོགས་སུ་དགོད་པར་བྱའོ། །དཀྱིལ་འཁོར་གྱི་ཕྱི་རིམ་གྱི་ཁོར་ཡུག་ཏུ་ནི་རྒྱུ་སྐར་ཉི་ཤུ་རྩ་བརྒྱད་དགོད་དོ། །དབང་ལྡན་གྱི་ཕྱོགས་ནས་བརྩམས་ཏེ་ཤར་དུ་དགོད་པར་བྱ་བ་ནི་སྨིན་དྲུག་མདོག་དམར་བུམ་པའི་སྟེང་ན་འདུག་པ་མེ་ལྕེ་འབར་བས་འཁོར་བ་བྲི། སྣར་མ་ནི་མདོག་ལྗང་གུ་གླང་ཁྱུ་བ་དཀར་པོ་ལ་ཞོན་པ། མགོན་ནི་མདོག་སེར་པོ་ཤ་བ་ལ་ཞོན་པ་བྲི། །ལག་པ་མདོག་དམར་སྦྲུལ་འཁྱིལ་པ་ལ་ཞོན་པ། ནབ་སོ་ནི་མདོག་སེར་པོ་པདྨ་ལ་འདུག་པ། རྒྱལ་ནི་མདོག་ལྗང་གུ་བུམ་པའི་སྟེང་ནའོ། །སྐག་ནི་མདོག་ལྗང་གུ་བྱ་རོག་ལ་འདུག་པའོ། །
ལྷོ་ཕྱོགས་སུ་བྲི་བ་ནི་མཆུ་མདོག་སེར་མ་ཧེ་ལ་ཞོན་པ། གྲེ་ནི་མདོག་དཀར་པདྨ་ལ་འདུག་པ། སྦོ་ནི་ལྗང་གུ་གསེར་གྱི་ཁྲི་ལ་འདུག་པ། མེ་བཞི་ནི་མདོག་སེར་པོ་གླང་པོ་ཆེ་ལ་འདུག་པ། ནག་པ་ནི་མདོག་ལྗང་གུ་རྨ་བྱ་ལ་ཞོན་པ། ས་རི་ནི་མདོག་ལྗང་གུ་སྤྱང་མོ་ཉུག་པའོ། །ས་ག་ནི་མདོག་ལྗང་གུར་སྐྱེས་ལ་ཞོན་པ་བྲི། བདེན་བྲལ་ནས་བརྩམས་ཏེ་ནུབ་ཏུ་བྲི་བ་ལྷ་མཚམས་ནི་མདོག་སེར་ལག་ན་འབྲས་བུ་ཐོགས་པ་བྱ་དཀར་ལ་ཞོན་པ། སྣྲོན་ནི་མདོག་དམར་སྟན་ནང་ཚངས་ཅན་ལ་འདུག་པ་བྲི། སྣྲུབས་ནི་མདོག་ལྗང་གུ་རུས་སྦལ་ལ་ཞོན་པ་བྲི། ཆུ་སྟོད་ནི་མདོག་སེར་ལ་ཕུབ་ཀྱི་སྟན་ལ་འདུག་པ། ཆུ་སྨད་མདོག་ལྗང་གུ་མི་ལ་ཞོན་པ། བྱི་བཞིན་ནི་མདོག་སེར་འཁོར་ལོ་ཐོགས་ནས་ནམ་མཁའ་ལྡིང་ལ་འདུག་པ། གྲོ་བཞིན་ནི་མདོག་སེར་པོ་ཀུར་མ་ལ་འདུག་པའོ། །རླུང་གི་ཕྱོགས་ནས་བརྩམས་ཏེ་བྱང་དུ་བྲི་བ། མོན་གྲུ་ནི་མདོག་དམར་སྟན་ནང་ཚངས་ཅན་ལ་འདུག་པའོ། །མོན་དྲེ་ནི་མདོག་ལྗང་གུ་གླང་ཁྱུ་བ་ལ་འདུག་པ་བྲི། ཁྲུམས་སྟོད་ནི་མདོག་ལྗང་གུ་གསེར་གྱི་ཁྲི་ལ་འདུག་པ་བྲི། ཁྲུམས་སྨད་ནི་མདོག་དམར་པོ་གསེར་ཁྲི་ལ་འདུག་པའོ། །ནམ་གྲུ་ནི་མདོག་དམར་པོ་རྟ་ལ་ཞོན་པ་བྲི། ཐ་སྐར་ནི་མདོག་ལྗང་གུ་མི་ལ་ཞོན་པ་བྲི། བྲ་ཉེ་ནི་མདོག་སྔོ་ནག་འཁོར་ལོའི་སྟེང་དུ་འདུག་པ་བྲི་བར་བྱའོ། །རྒྱུ་སྐར་དེ་དག་ཀྱང་བུད་མེད་ཀྱི་རྒྱན་གྱིས་བརྒྱན་པའོ། །སྒོ་བཞིར་ཡང་སྒོ་བ་བཞི་བྲི་བར་བྱའོ། །དེ་ནས་ནི་སྤྱན་དྲང་བ་དང༌། མཆོད་པ་དང༌། ཕྱག་རྒྱ་བཞིས་རྒྱས་གདབ་པ་དང༌། སྔགས་བཟླས་པ་ལ་བརྩོན་པ་ཐུན་བཞིར་བྱའོ། །དེ་ནས་དཀྱིལ་འཁོར་བྲི་བ་ཡང་བྱ་སྟེ། དབུས་སུ་ཕྱག་ན་རྡོ་རྗེའམ། འཇིག་རྟེན་གསུམ་རྒྱལ་བྲིའོ། །གཞན་གོང་མ་ལྟར་རོ། །དེ་ནས་རྣལ་འབྱོར་པ་བདག་རྡོ་རྗེ་འཛིན་པའི་ཕྱག་ཏུ། མེ་ཏོག་ཐོགས་ལ་འདུག་པའི་རིམ་པས་འཇུག་པར་བྱའོ། །དེ་ནས་དཀྱིལ་འཁོར་མཆོད་དེ། སློབ་མ་གཞུག་པར་བྱའོ། །དེ་ཡང་དང་པོར་སློབ་མ་བྱིན་གྱིས་བརླབ་པ་ནི་ཨོཾ་བཛྲ་གྲ་ཧ་ཎ་ཧཱུཾ་ཕཊ་ཅེས་བྱ་བས་ཕྱག་ན་རྡོ་རྗེར་བྱིན་གྱིས་བརླབས་ལ། དེ་ནས་སྡིག་པ་ལ་སོགས་པ་འཆགས་སུ་གཞུག་གོ །དེ་ནས་ཨོཾ་བཛྲ་གྲཱ་ཧཱ་ས་མ་ཡེ་ཧཱུཾ་ཞེས་པས་དཀྱིལ་འཁོར་དུ་དྲངས་ཏེ། དབབ་པ་དང་སྣང་བ་
དྲིས་ནས། ཨོཾ་བཛྲ་གྲ་ཧ་པྲ་ཏཱིཙྪ་ས་མ་ཡེ་ཧཱུཾ་ཞེས་པས་མེ་ཏོག་དོར་བར་བྱའོ། །དེ་ནས་གཟའ་བརྒྱད་ཀྱི་བུམ་པས་དབང་བསྐུར་རོ། །དེ་ནས་འཇིག་རྟེན་ལས་འདས་པའི་དབང་ཡང་བསྐུར་རོ། །དེ་ནས་གཟའ་ཐམས་ཅད་བསྒྲུབ་པར་བྱའོ་ཞེས་བྱ་བ་ནི་ཟླ་བ་ཡར་གྱི་ངོའི་ཚེས་བརྒྱད་ནས་བརྩམས་ཏེ། དཀྱིལ་འཁོར་ཚུལ་བཞིན་དུ་བྲིས་ལ་བདག་ཉིད་ཀྱིས་གང་དང་གང་བསྒྲུབས་པའི་རྫས་ཀྱིས་མཆོད་པར་བྱ་སྟེ། དེ་ཡང་ཉི་མ་དང༌། མིག་དམར་དང༌། གཟའ་ལག་པ་དང༌། སྒྲ་གཅན་སྒྲུབ་ན་ནི་མེ་ཏོག་དམར་པོ་དང་བུ་རམ་གྱི་ཆུ་ལ་སོགས་པས་མཆོད་ལ། སྔགས་རྫས་དེ་ཉིད་ལ་འབུམ་ལ་སོགས་པ་མཚན་མ་བྱུང་བྱུང་དུ་བཟླས་པར་བྱའོ། །དེ་ནས་ཙནྡན་དམར་པོའི་ཤིང་གི་མེ་སྦར་ལ་འབྲས་ཐུག་དང༌། ནས་དང༌། སྟར་ཀའི་ཤིང་དང༌། སྦྲང་རྩི་དང་བསྲེས་ལ་ལན་ཉི་ཤུ་རྩ་གཅིག་ཏུ་དབུལ་བར་བྱའོ། །འབྲས་སཱ་ལུ་དམར་པོ་དང༌། བུ་རམ་དང༌། རྒུན་འབྲུམ་ཡང་དབུལ་ལོ། །ལྕེ་པོག་གི་བདུག་པས་བདུག་གོ །ལས་གང་འདོད་པའི་དངོས་གྲུབ་བླང་ངོ༌། །ཟླ་བ་དང༌། པ་བ་སངས་དང༌། ཕུར་བུ་བསྒྲུབ་པར་འདོད་པ་དེས། དུས་དང་སྐར་མ་གོང་མ་དང་འདྲ་བ་ལ་དཀྱིལ་འཁོར་གོང་མ་ལྟ་བུ་ལ། དབུས་དཀར་པོ་ཙནྡན་དཀར་པོས་བྲིས་ལ་མེ་ཏོག་དཀར་པོ་དང༌། རྫས་དཀར་པོས་མཆོད་ལ་བཟླས་པ་མཚན་མ་བྱུང་བྱུང་དུ་བྱའོ། །དེ་ནས་མཚན་མ་བྱུང་བ་དང་སྦྱིན་སྲེག་གི་དངོས་གྲུབ་བླང་བར་བྱའོ། །དེ་ཡང་ཙནྡན་དཀར་པོའི་ཤིང་ལ་མེ་སྦར་ཏེ་འབྲས་ཐུག་དང་ཏིལ་བསྲེས་ལ་ཏིལ་དེས་སྦྱིན་སྲེག་བརྒྱ་རྩ་བརྒྱད་བྱའོ། །གཟའ་བརྒྱད་ཀྱི་མཐུན་པའི་རྫས་ནི་རིན་པོ་ཆེ་དང༌། ཏིལ་དང༌། སྦྲང་རྩི་དང༌། སཱ་ལུ་དཀར་པོ་དང༌། བུ་རམ་དང༌། གུ་གུལ་དང༌། སྤོས་དང༌། གུར་གུམ་བསྲེས་ལ་སྒྲུབ་པའམ་ཡང་ན་སོ་སོར་བསྒྲུབ་པར་བྱའོ། །དམ་བཅའ་ནི་དཀྱུས་གསལ་ལོ། །སྐད་ཅིག་དང༌། ཡུད་ཙམ་ལ་སོགས་པ་ནི་གནས་སྐབས་དེ་ལ་དབང་བྱེད་པའི་གཟའ་དང་སྐར་མའོ། །ཡང་ན་གཟའ་བརྒྱད་དང༌། སྐད་ཅིག་མ་བརྒྱད་རིམ་གྱིས་སྦྱར་བར་བྱའོ། །གཟའ་ཆེན་པོ་བརྒྱད་ཀྱི་དཀྱིལ་འཁོར་གྱི་བཤད་པའོ།། །།ད་ནི་ཀླུ་གདོན་ཞི་བར་བྱ་བའི་ཕྱིར་ཀླུ་ཆེན་པོ་བརྒྱད་ཀྱི་དཀྱིལ་འཁོར་བཤད་པར་བྱ་སྟེ། དེ་ནས་ཀླུ་ཆེན་པོ་བརྒྱད་ཀྱིས་ཕུཊ་
ཅེས་བྱ་བའི་སྒྲས་ཞེས་པས་ནི་དེ་ནས་ཞེས་བྱ་བ་ནི་གཟའ་ཆེན་པོ་བརྒྱད་ཀྱི་དཀྱིལ་འཁོར་བསྟན་པ་དེ་ནས་སོ། །ཀླུ་ཆེན་པོ་བརྒྱད་ནི་འོག་ནས་འབྱུང་བའི་གྲངས་སོ། །ཕུཊ་ཅེས་བྱ་བའི་སྒྲས་ཞེས་པ་ནི་ཀླུ་ཆེན་པོ་བརྒྱད་ཀྱི་སྙིང་པོ་སྤྱིར་དྲིལ་བ་སྟེ། ཀླུ་ཐམས་ཅད་དེ་ལས་མི་འདའ་བས་དེ་སྐད་ཅེས་བྱའོ། །དེ་ཡང་གསོལ་བ་གདབ་པ་དང༌། རྗེས་སུ་གནང་བ་དང༌། སྙིང་པོ་ཕུལ་བ་ནི་དཀྱུས་གསལ་ལོ། །ད་ནི་དེའི་སྦྱོར་བ་དང་དཀྱིལ་འཁོར་རྒྱལ་པོ་མཆོག་དང༌། ལས་རྒྱལ་མཆོག་བསྟན་ཏེ། དེ་ཡང་སྔོན་དུ་འགྲོ་བ་ནས་མངོན་པར་བྱང་ཆུབ་པས་ཕྱག་ན་རྡོ་རྗེའི་སྐུ་ཕྱག་རྒྱ་ཆེན་པོར་ཡོངས་སུ་རྫོགས་པར་བསྐྱེད་དེ། སྐུ་མདོག་ལྗང་གུ་ཡིད་ཙམ་ཁྲོས་པ། ཞབས་བརྐྱང་བསྐུམ་དུ་བཞུགས་པ། ཕྱག་གཡས་ན་རྡོ་རྗེ་གསོར་བ། གཡོན་ཁྲོ་བོའི་ཁུ་ཚུར་སྙིང་གར་བསྟན་པ། དབུ་ལ་སྦྲུལ་མགོ་བརྒྱད་ཀྱི་གདེངས་ཀས་འོད་ཀྱི་ཕྲེང་བའི་ཚུལ་དུ་བརྒྱན་པར་བྱ་སྟེ། དེ་ལ་ཡང་བྱིན་གྱིས་བརླབས་པ་དང་དབང་བསྐུར་བ་བྱས་ནས། དེ་ནས་སྟོང་པ་ཉིད་ཀྱི་ཏིང་ངེ་འཛིན་ལ། འབྱུང་བ་རིམ་གྱིས་བསྐྱེད་དེ། བྷྲུཾ་ལས་གཞལ་ཡས་ཁང་གྲུ་བཞི་པ་སྒོ་བཞི་པ། དབུས་པདྨ་དཀར་པོ་འདབ་མ་བརྒྱད་པ་ལ། དེའི་དབུས་སུ་བདག་ཉིད་གནས་པར་བསམ་མོ། །དེ་ལྟར་ཡང་གསུངས་པ། པདྨ་ཆེན་པོ་འདབ་བརྒྱད་པ། །ཁ་དོག་དཀར་པོ་བྲི་བར་བྱ། །དེ་ཡི་དབུས་སུ་གཙོ་བོ་ཡི། །ཕྱག་ན་རྡོ་རྗེ་རབ་གནས་པ། །སྦྲུལ་མགོ་མཐའ་ཡས་གདེངས་པ་ཡི། །ལྟོས་འགྲོ་ཆེན་པོ་སྡིགས་པ་བྲི། །ཞེས་པས་དེ་ལྟར་གསུངས་ཏེ། གཟུགས་བརྙན་གྱི་དཀྱིལ་འཁོར་ལ་ཡང་དེ་ལྟར་ཤེས་པར་བྱ་སྟེ། དེ་ནས་དབུས་ཀྱི་གཙོ་བོ་དེའི་ཐུགས་ཀར་ཟླ་བའི་དཀྱིལ་འཁོར་གྱི་དབུས་སུ་རྩ་བའི་སྔགས་ཀྱི་ཡི་གེ་ཨོཾ་ཕུ་དེའི་མཐའ་མ་ན་ཕར་ཨོཾ་ཨ་ནནད་སྭཱ་ཧཱ་ཞེས་པས་བསྐོར་བ་བཀོད་ལ་དེའི་འཕྲོ་བ་དང་འདུ་བས་རིན་པོ་ཆེ་འབར་བར་འགྱུར་ཏེ། དེའི་འཕྲོ་འདུ་ལས་ཀླུའི་རྒྱལ་པོ་མཐའ་ཡས་སྐུ་མདོག་སེར་པོ་ལ་ཕྱག་ན་རིན་པོ་ཆེ་འབར་བ་བསྣམས་པར་གྱུར་ཏེ་ཐུགས་ཀ་ན་གནས་སོ། །ཡང་དེའི་ཐུགས་ཀར་ཟླ་བའི་སྟེང་དུ་རིན་པོ་ཆེ་འབར་བ་ལ་ཡི་གེ་ཕུས་བྱིན་གྱིས་བརླབས་པར་བསྒོམས་ནས་དེ་ལས་སྔགས་བརྗོད་པ་ཙམ་གྱིས་ཕྱིར་སྟོན་ཏེ། ཤར་ཕྱོགས་
ཀྱི་པདྨའི་འདབ་མ་ལ་བཀོད་དོ། །དེ་ཡང་དབུས་ཀྱི་གཙོ་བོའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་རྩ་བའི་སྔགས། ཨོཾ་ཕཱུ། ཨོཾ་ཕཱུ། ཨོཾ་ཕོ། ཨོཾ་ཕཱི། ཨོཾ་ཕཻ། ཨོཾ་ཕཻ། ཨོཾ་ཕཻ། ཞེས་པ་ལ། ཨོཾ་ཏཀྵ་ཀཱ་ལ་སྭཱ་ཧཱ། ཨོཾ་ཀརྐོ་ཊཱ་ཡ་སྭཱ་ཧཱ། ཨོཾ་ཀུ་ལི་ཀཱ་ཡ་སྭཱ་ཧཱ། ཨོཾ་བཱ་སུ་ཀི་ཡེ་སྭཱ་ཧཱ། ཨོཾ་ཤཾ་ཁ་པཱ་ལཱ་ཡ་སྭཱ་ཧཱ། ཨོཾ་པདྨཱ་ཡ་སྭཱ་ཧཱ། ཨོཾ་བ་རུ་ཎཱ་ཡ་སྭཱ་ཧཱ། ཞེས་པས་བསྐོར་བའོ། །དེ་དག་རིམ་པར་བཀོད་ལ་དེ་རྣམས་ཀྱི་འཕྲོ་འདུ་ལས་སོ་སོའི་ཕྱག་མཚན་ཨུཏྤ་ལ་དང༌། སྤྲིན་དང་རིན་པོ་ཆེའི་སྡོང་བུ་དང༌། རིན་པོ་ཆེའི་ཕྲེང་བ་དང༌། དུང་དང༌། པདྨ་དང༌། ཞགས་པ་རྣམས་སུ་གྱུར་ཏེ། དེ་འཕྲོས་ཤིང་འདུས་པ་ལས། ཀླུ་ཆེན་པོ་བརྒྱད་ཀྱི་སོ་སོའི་སྐུར་གྱུར་ཏེ། ཐུགས་ཀ་ན་གནས་པ་ལས། རང་རང་གི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་སོ་སོའི་སྔགས་ཀྱི་ཡིག་འབྲུ་རྣམས་བཀོད་ལ། དེ་ཉིད་བརྗོད་པའི་ཚུལ་གྱིས་ཐུགས་ཀ་ནས་བཏོན་ནས་རང་རང་གི་གནས་པདྨོ་རྣམས་ལ་རིམ་པར་བཞུགས་སུ་གསོལ་ཏེ། འཇོག་པོ་མདོག་དམར་སྐྱ་ཕྱག་ན་ཨུཏྤལ་བསྣམས་པ། སྟོབས་ཀྱི་རྒྱུ་མདོག་སྔོན་པོ་ཕྱག་ན་སྤྲིན་བསྣམས་པ། རིགས་ལྡན་མདོག་དཀར་པོ་ཕྱག་ན་རིན་པོ་ཆེའི་སྡོང་བུ་བསྣམས་པ། ནོར་རྒྱས་མདོག་སེར་པོ་ཕྱག་ན་རིན་པོ་ཆེའི་ཕྲེང་བ་བསྣམས་པ། དུང་སྐྱོང་མདོག་ལྗང་གུ་ཕྱག་ན་དུང་བསྣམས་པ། པདྨ་མདོག་དཀར་པོ་ཕྱག་ན་པདྨ་བསྣམས་པ། ཆུ་ལྷ་མདོག་དཀར་པོ་ཕྱག་ན་ཞགས་པ་བསྣམས་པ། ཀླུའི་རྒྱལ་པོ་འདི་དག་རྣམས་སོ་སོའི་བཙུན་མོ་རྣམས་ཀྱི་མགུལ་ནས་འཁྱུད་པ་སྤྲུལ་མགོ་བདུན་བདུན་གྱི་གདེངས་ཀས་བརྒྱན་པའོ། །རིན་པོ་ཆེའི་རྒྱན་སྣ་ཚོགས་པ་དང་ལྡན་པ། གདན་པདྨའི་སྟེང་ན་བཞུགས་པར་བསམ་མོ། །དེ་ལྟར་དཀྱིལ་འཁོར་བསྐྱེད་ནས་མཆོད་པ་བྱ་སྟེ། ཀླུའི་རྒྱལ་པོ་རྣམས་མཆོད་པ་དང༌། །འཁོར་རིགས་བཞི་མཆོད་པའོ། །རྒྱལ་པོ་ཆེན་པོ་མཆོད་པ་ནི་མཆོད་པ་ལྔ་ལ་སོགས་པས་མཆོད་པའོ། །འཁོར་རིགས་བཞི་ནི་གཟུགས་སྣ་ཚོགས་ལ་མངར་གསུམ་དང༌། ཀླུ་སྨན་སྣ་ཚོགས་ཀྱིས་མཆོད་པའོ། །དེ་ཡང་སྦྲུལ་མགོའི་ཕྱག་རྒྱ་དང༌། ཛཿ་ཧཱུཾ་བཾ་ཧོཿ་ཞེས་པས་སྤྱན་དྲང་ངོ༌། །དེ་ནས་ཕྱག་རྒྱ་བསྟན་ནས་དམ་ལ་གནས་པར་བྱས་ཏེ་མཆོད། དེ་ནས་བསྟོད་པས་བསྟོད་དོ། །ཕུཊ་ཅེས་པའི་སྙིང་པོ་ནུས་
ཚད་དུ་བཟླས་སོ། །དེ་ནས་འཁོར་རིགས་བཞི་སྤྱན་དྲངས་ལ་གཟུགས་ལ་བསྟིམས་ཏེ། བྱ་ཁྱུང་གི་ཕྱག་རྒྱས་བསྡིགས་ལ་གདན་ལ་ཕབ་སྟེ། མངར་གསུམ་དང་ཀླུ་སྨན་སྣ་ཚོགས་པས་མཆོད་དོ། །དེ་ནས་དཀྱིལ་འཁོར་དུ་ཀླུའི་རྒྱལ་པོ་ལ་སོགས་པ་བཅུག་ནས་ཕུཊ་ཅེས་བྱ་བ་བཟླས་པའི་བུམ་པས་དབང་བསྐུར་རོ། །དེ་ནས་ཀླུའི་སྙིང་པོ་ལ་སོགས་པ་བྱིན་ན་དུག་གིས་ཟིན་པའི་མི་དེ་དུག་གི་ཉེས་པའི་སྐྱོན་སྤངས་པར་འགྱུར་རོ། །དེ་ནས་དུག་གིས་ཟིན་པའི་དུག་གི་རིམ་པ་བརྟགས་ཏེ། འོག་ནས་འབྱུང་བ་བཞིན་བསྒྲུབ་པར་བྱས་ན་དུག་ནད་ཞི་བར་འགྱུར་རོ། །ཀླུ་རྣམས་དམ་བཅའ་བ་ནི་དཀྱུས་གསལ་ལོ། །དེ་ནས་སྒྲུབ་པ་བཤད་དེ་ཞེས་བྱ་བ་ལ་སོགས་པ་ནི་སྔ་མའི་མཇུག་བསྡུ་བ་སྟེ། གོང་གི་དཀྱིལ་འཁོར་ལ་གནས་པའི་རྣལ་འབྱོར་པ་དེས་ཕུཊ་ཅེས་བྱ་བ་སྔོན་དུ་འབུམ་བཟླས་སོ། །དེ་ལ་མཚན་མ་བྱུང་བ་དང༌། དེ་ནས་དུག་བླང་ཕུཊ་ཅེས་བྱ་བ་ལ་སོགས་པ་ནི་བདག་གིས་ལག་གཡོན་པར་ཀླུ་ཆེན་པོ་བརྒྱད་ཀྱི་དཀྱིལ་འཁོར་གསལ་བར་བསམས་ལ། ནད་པ་དཀྱིལ་འཁོར་གྱི་དབུས་སུ་བཞག་ནས་ལག་མཐིལ་གྱི་དཀྱིལ་འཁོར་ལའོད་བྱུང་བས་ནད་པའི་དུག་གི་ཉེས་པ་ཐམས་ཅད་དྲངས་ནས་ཕུཊ་ཅེས་བྱ་བ་ལས་རླུང་བྱུང་ནས་གཏོར་བར་བསམ་མོ། །གཡས་སྦྲུལ་མགོའི་ཕྱག་རྒྱས་ཀྱང་དྲངས་ཤིང་གཏོར་བར་བསམ་མོ། །དེ་ལྟར་བྱས་ན་བགས་པ་དང༌། ཤ་དང༌། རུས་པ་ལ་གནས་པའི་དུག་རྣམས་ཀྱང་དྲངས་ལ་འཁོར་རིགས་བཞིས་བྱིན་པར་བསམ་མོ། །དུག་རྣམས་ཐམས་ཅད་མ་ལུས་པར། །ཞེས་བྱ་བ་ནི་དེ་ལ་རྣམས་ཀྱི་སྒྲ་ནི་མང་པོ་ལ་བྱ་སྟེ། དང་པོར་རྣལ་འབྱོར་པས་དུག་བརྟག་པར་བྱ་སྟེ། དེ་ལ་འདུས་པའི་ནད་ནི་ལྕི་སྟེ། སའི་ཁམས་ཀྱི་ནད་ཡིན་པས་དེ་ལ་དཀྱིལ་འཁོར་ཡང་དམར་པོར་བསམ། འོད་ཀྱང་དམར་པོར་གཏོར་རོ། །སྤུ་ཟིང་བྱེད་དང༌། ཁ་ཆུ་འཛག་ཅིང་ལྐོག་མ་འཛག་པ་ནི་ཆུའི་ཁམས་ཤས་ཆེ་བའི་དུག་ཡིན་པས་དཀྱིལ་འཁོར་དང་འོད་དཀར་པོར་གཏོར་རོ། །ཁ་སྐམས་པ་དང་ཁྲག་འབྲོས་པ་ནི་མེའི་ཁམས་ཀྱི་ཤས་ཆེ་བའི་དུག་ཡིན་པས་སྦྲུལ་དང་འོད་ནག་པོས་བྱའོ། །སྐམ་ཞིང་ལྕེ་བསྐྱོད་པ་དང༌། མདོག་ངན་པར་འདུག་པ་དང༌། ནག་པོར་
འཇུག་པ་ནི་རླུང་གི་ཁམས་ཀྱི་དུག་ཡིན་པས་ལག་པའི་དཀྱིལ་འཁོར་ཡང་སེར་པོར་བསམས་ནས་འོད་ཀྱང་སེར་པོས་དུག་གཏོར་ཞིང་རིགས་བཞིའི་གཟུགས་སྣ་ཚོགས་ལ་འཕང་བར་བྱའོ། །རིགས་བཞིས་ཀྱང་རང་རང་གི་དུག་རྣམས་བླངས་པར་བསམ་མོ། །ཕུཊ་ཅེས་བྱ་བའི་ལག་པས་བླང༌། །ཞེས་པ་ནི་བླངས་པ་ནི་འཕང་པའི་དོན་ཏེ་གཏོར་བའོ། །དེ་ནས་ལས་རྣམས་ཀུན་བྱེད་ཅིང༌། །ཞེས་པ་ནི་ཀླུ་རིགས་བཞིའི་གཟུགས་སྣ་ཚོགས་པས་རང་རང་གི་དུག་ལེན་པའོ། །གཞན་ཡང་རིགས་ལས་གྱུར་པ་དང༌། དབྱིག་དུག་དང༌། སྦྱར་བ་ལ་སོགས་པ་ཀུན་ཁུ་ཚུར་གྱིས་ཀྱང་འབྱིན་ན། སྦྲུལ་མགོའི་ཕྱག་རྒྱས་ལྟ་སྨོས་ཀྱང་ཅི་དགོས་ཞེས་པའོ། །ཀླུ་ཆེན་པོ་བརྒྱད་ཀྱི་དཀྱིལ་འཁོར་བཤད་པའོ། །ད་ནི་འཇིགས་བྱེད་བརྒྱད་ཀྱི་དཀྱིལ་འཁོར་བཤད་དེ། དེ་ཡང་ལྷ་གདོན་ལ་སོགས་པ་ཞི་བར་བྱ་བའི་ཕྱིར་བཤད་དོ། །དེ་ནས་ལྷ་ཆེན་པོ་རྣམས་ཀྱི་བདག་བོ་འཇིགས་པར་བྱེད་པ་ཆེན་པོ་བརྒྱད་བུད་མེད་ཆེན་པོ་བརྒྱད་ཀྱིས་བསྐོར་བས་ཞེས་གསུངས་ཏེ། ད་ནི་གོང་གི་ཀླུ་ཆེན་པོ་བརྒྱད་ཀྱི་མཇུག་སྡུད་པའོ། །ནས་ནི་འཇིགས་བྱེད་ཆེན་པོ་བརྒྱད་ཀྱི་མགོ་འདྲེན་པའོ། །ལྷ་ཆེན་པོ་རྣམས་ཀྱིས་ཞེས་པ་ནི། །ལྷ་ཆེན་པོ་ཉི་ཤུ་རྩ་གཅིག་རྣམས་སོ། །དེ་ལ་གཙོ་བོ་སྨོས་པ་ནི་བརྒྱད་དོ། །བུད་མེད་ནི་རང་གི་བཙུན་མོ་ཆེན་མོ་བརྒྱད་ནི་མ་ཧཱ་དེ་བའི་ཆུང་མ་བྷཻ་ར་མ་དང༌། ཚངས་པའི་ཆུང་མ་རུག་མིག་དང༌། བིཥྞུའི་ཆུང་མ་ཀུ་བེ་ར་མ་དང༌། བརྒྱ་བྱིན་གྱི་ཆུང་མ་བི་ར་བི་དང༌། ཀཱ་མ་དེ་བའི་ཆུང་མ་བ་ཀ་ར་མི་ཀི་ཏ་དང༌། ཀ་ལ་བེ་རའི་ཆུང་མ་ཙཱ་མུཎྜཱི་དང༌། བྷྲྀདྒི་རི་ཏིའི་ཆུང་མ་ཧ་རི་ཀ་དང༌། ངལ་བསོས་པོའི་ཆུང་མ་ཀུ་བེ་ར་མ་དང༌། ག་ཎ་པ་ཏིའི་ཆུང་མ་རེ་བ་ཏི་རྣམས་སོ། །བཅོམ་ལྡན་འདས་ཕྱག་ན་རྡོ་རྗེ་ལ་རང་རང་གི་འཇིགས་པའི་ཚུལ་གྱིས་སེམས་ཅན་སྐྲག་པ་ལ་ཕན་གདགས་པའི་ཕྱིར་སྙིང་པོ་འབུལ་བར་ཞུ་བ་དང་རྗེས་སུ་གནང་བ་དཀྱུས་གསལ་ལོ། །དེ་ནས་དེའི་དོན་ཡང་འདི་ལྟར་ཤེས་པར་བྱ་སྟེ། འཇིགས་བྱེད་ཆེན་པོ་བརྒྱད་པོ་འདི་དག་ཀྱང་ལྷ་ཆེན་པོ་བརྒྱད་ཁྲོ་བོའི་ཆ་བྱད་དུ་བྱས་པ་ཡིན་ཏེ། དེ་ཡང་སྦྱོར་བ་དང་པོ་དང༌། དཀྱིལ་འཁོར་རྒྱལ་པོ་མཆོག་དང༌། སློབ་དཔོན་གྱི་ལས་དང༌། སློབ་མ་གཞུག་
པའི་རིམ་པར་ཤེས་པར་བྱ་སྟེ། དེ་ཡང་དང་པོ་སྦྱོར་བ་དགོས། །སྔོན་དུ་འགྲོ་བའི་ལས་རྣམས་བྱས་ནས་རྡོ་རྗེ་ཐལ་མོ་དང་རྡོ་རྗེ་བཅིངས་པ་དང༌། ཡེ་ཤེས་དབབ་པ་དང༌། བརྟན་པ་ལ་སོགས་པ་བྱས་ནས། དེ་ནས་རང་གི་སེམས་སོ་སོར་བརྟག་པ་དང༌། ཅིར་ཡང་མི་རྟོག་པའི་ངང་ལས་ཟླ་བའི་དཀྱིལ་འཁོར་དུ་བྱིན་གྱིས་བརླབས་པ་དང༌། ཟླ་བའི་དཀྱིལ་འཁོར་དེ་ལ་དབུས་ཀྱི་གཙོ་བོའི་ཆོས་ཀྱི་ཡི་གེ་བཞག་པ་ལས། ཡེ་ཤེས་ལྔའི་རང་བཞིན་རྡོ་རྗེ་རྩེ་ལྔ་བར་བསམ་པ་དང༌། དེ་ལས་བྱིན་གྱིས་བརླབས་པའི་ཚུལ་གྱིས་བརྟན་པར་བྱ་བ་དང༌། དེ་ལས་འོད་ཟེར་འཕྲོས་ཤིང་འདུས་པ་ལས་ཁྲོ་བོ་ཆེན་པོ་འཇིག་རྟེན་གསུམ་ལས་རྣམ་པར་རྒྱལ་བའི་སྐུར་བསྐྱེད་དེ། ཕྱག་གཉིས་ཧཱུཾ་གི་ཕྱག་རྒྱ་བཅིངས་ལ་མཛུབ་མོ་བསྒྲེང་སྟེ། གཡས་རྡོ་རྗེ་མདའ་གཞུ། ཞབས་གཡས་བསྐུམ། གཡོན་བརྐྱང་བ། དབུ་ལ་རིགས་ལྔའི་སངས་རྒྱས་བཞུགས་པ། དར་ལའི་སྟོད་གཡོགས་པ་དང༌། བ་ཏའི་སྨད་གཡོགས་ཅན་རྒྱན་ཀུན་གྱིས་བརྒྱན་པ། ཞལ་གསུམ་པ། གཡས་ཞི་བ། གཡོན་ཁྲོ་བོ། དབུས་མ་ཡང་ཕྱེད་ཁྲོ་བོ་ཕྱེད་ཞི་བ། ཁྲོ་འཛུམ་མཆེ་བ་ལྷག་གེ་བྱུང་བ་བསྒོམས་ལ། དེ་ཉིད་ལ་ཆོ་འཕྲུལ་ཆེན་པོ་བཞི་དང་ལྡན་པར་བྱིན་གྱིས་བརླབས་ནས་གནས་སོ། །དེའི་བྱིན་གྱི་རླབས་ཀྱིས་འོག་གི་ཕྱོགས་ནས་དབང་ཆེན་གྱི་དཀྱིལ་འཁོར་རི་རབ་གླིང་བཞི་དང་བཅས་པ་རིམ་གྱིས་བསྐྱེད་པའི་སྟེང་དུ་དཀྱིལ་འཁོར་གྲུ་བཞི་པ་ལ་ནང་འཁོར་ལོ་རྩིབས་བརྒྱད་པ་སྒོ་བཞི་ཡོད་པ་ལ་རྟ་བབས་ལ་སོགས་པས་བརྒྱན་པ་གསལ་བར་བསྒོམས་ལ་དེའི་དབུས་སུ་ལྷ་ཆེན་པོ་མ་ཧཱ་དེ་བ་དང༌། ཨུ་མ་དེ་བ་གཉིས་བསྣོལ་བའི་སྟེང་དུ་བདག་ཉིད་བརྐྱང་བསྐུམ་དུ་བཞུགས་པར་བསམས་ལ། འཁོར་འཇིགས་བྱེད་ཆེན་པོ་བརྒྱད་གཙོ་བོ་དང་དགུ་པོ་དག་བསྐྱེད་ཅིང༌། དཀྱིལ་འཁོར་དུ་དགོད་པར་བྱའོ། །དེ་ལ་བསྐྱེད་ཐབས་ནི་ཁྲོ་བོ་ཆེན་པོའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཨོཾ་བྷཻ་ར་བ་སྭཱ་ཧཱ། ཨོཾ་བྷ་བི་སྭཱ་ཧཱ། ཨོཾ་བྷ་སྭཱ་ཧཱ། ཨོཾ་བྷི་སྭཱ་ཧཱ། ཨོཾ་བྷུ་སྭཱ་ཧཱ། ཨོཾ་བྷཻ་སྭཱ་ཧཱ། ཨོཾ་བྷཻ་སྭཱ་ཧཱ། ཨོཾ་བྷོ་སྭཱ་ཧཱ། ཨོཾ་བྷཾ་སྭཱ་ཧཱ། ཨོཾ་བྷཿ་སྭཱ་ཧཱ། ཞེས་བྱ་བའི་སྔགས་རྣམས་རིམ་གྱིས་བཀོད་པ་ལ། ཕྱག་མཚན་ཁ་ཊྭཱཾ་ག་དང༌། པདྨ་དང༌། །
འཁོར་ལོ་དང༌། མདུང་རྩེ་གསུམ་པ་དང༌། རྡོ་རྗེ་གདེངས་པ་དང༌། མདའ་གཞུ་དང༌། དགྲ་སྟ་དང༌། སྙིམ་པ་བཀན་ཏེ་བརྐྱང་བ་དང༌། མདུང་ཐུང་རྣམས་སུ་གྱུར་ཏོ། །དེ་ལས་སྤྲོ་བ་དང༌། བསྡུ་བས་སྐུ་ཕྱག་རྒྱར་གྱུར་ཏེ་གནས་པ་ལས་རང་རང་གི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་རང་རང་གི་སྔགས་བཀོད་པ་ལས་སྔགས་བརྗོད་པ་ཙམ་གྱིས་འགྲོ་བའི་དོན་ལ་སྤྲོས་ནས་ལྷར་འདུས་པ་དག་རང་རང་གི་གནས་སུ་དགོད་པར་བྱའོ། །དེ་ལ་དགོད་པའི་ཐབས་ནི་འཇིགས་བྱེད་ཆེན་པོའི་གཙོ་བོ་ཁྲོ་བོ་ཆེན་པོ་ནི་བཅོམ་ལྡན་འདས་འཇིག་རྟེན་གསུམ་ལས་རྣམ་པར་རྒྱལ་བའི་དྲུང་དུ་འཁོར་ལོའི་དབུས་སུ་དགོད་དེ། མདོག་ནག་པོ་མིག་གསུམ་པ། མཆེ་བ་གཙིགས་ཤིང་ཕོ་མཚན་བསྒྲེང་བ་བཙུན་མོ་ལ་སྟོན་པ། གླང་པོ་ཆེའི་ཀོ་རློན་རྐང་ལག་བཞི་བརྒྱངས་ཏེ་གྱོན་པ། མགོ་ལ་ཐོད་པ་དང་ཟླ་ཚེས་ཀྱིས་བརྒྱན་པ། བཙུན་མོ་དང་ལྷན་ཅིག་གནས་པར་བརྟག་གོ ། གཞན་ཡང་ཤར་གྱི་རྩིབས་ལ་འཇིགས་བྱེད་བྲི་མི་ཏ་སྐུ་མདོག་དཀར་པོ་ཕྱག་ན་འཁོར་ལོ་བསྣམས་པ་བཙུན་མོ་ཚངས་མ་དང་ལྷན་ཅིག་པའོ། །ལྷོའི་རྩིབས་ལ་འཇིགས་བྱེད་བྷཻ་ར་བ་སྟེ་སྐུ་མདོག་སེར་པོ་ཕྱག་ན་རྩེ་གསུམ་གདེངས་པ་བསྣམས་པ། བཙུན་མོ་བདེ་སྩོལ་མ་དང་ལྡན་པའོ། །ནུབ་ཀྱི་རྩིབས་ལ་འཇིགས་བྱེད་ཀ་ལ་བེ་ར་བ་སྟེ། སྐུ་མདོག་དམར་ནག་ཕྱག་ན་མདའ་གཞུ་བསྣམས་པ་ཆུང་མ་རཽ་དྲ་དང་ལྡན་པའོ། །བྱང་གི་རྩིབས་ལ་འཇིགས་བྱེད་ཡ་ཤེ་བྷཻ་ར་བ་སྟེ། སྐུ་མདོག་ལྗང་ནག་ཕྱག་ན་འཁོར་ལོའམ་དགྲ་སྟ་བསྣམས་པ་བཙུན་མོ་ཀུ་མཱ་རི་དང་ལྡན་པའོ། །ཤར་ལྷོའི་རྩིབས་ལ་འཇིགས་བྱེད་བྷི་ཤཱནྟ་བྷཻ་ར་བ་སྟེ་སྐུ་མདོག་དམར་པོ་ཕྱག་ན་འཁོར་ལོའམ་མདའ་གཞུ་བསྣམས་པ་བཙུན་མོ་བཻཥྞ་བེ་དང་ལྷན་ཅིག་པའོ། །ལྷོ་ནུབ་ཀྱི་རྩིབས་ལ་འཇིགས་བྱེད་བི་ཏི་བྷཻ་ར་བ་སྟེ། སྐུ་མདོག་སྡོ་ནག་ཕྱག་ན་དགྲ་སྟ་བསྣམས་པ་བཙུན་མོ་མ་ཧཱ་རི་ཀེ་དང་ལྷན་ཅིག་པའོ། །ནུབ་བྱང་གི་རྩིབས་ལ་འཇིགས་བྱེད་ཀཱ་ལ་བྷཻ་ར་བ་སྟེ། མདོག་ངུད་ཀ་ཕྱག་ན་རལ་གྲི་བསྣམས་པའམ། སྙིང་པ་བཀན་ཏེ་བཙུན་མོ་མ་ནུ་ཧ་ར་དང་བཅས་པའོ། །བྱང་ཤར་གྱི་རྩིབས་ལ་འཇིགས་བྱེད་ག་ན་པ་ཏི་སྐུ་མདོག་སྡོ་ནག་ཕྱག་ན་མདུང་ཐུང་ངམ་རྡོ་རྗེ་འབར་བ་བསྣམས་པ། བཙུན་མོ་ཙ་མུཎྜཱི་དང་ལྡན་པར་བསམ་མོ། །ལྷ་
དེ་དག་ཀྱང་ཁྲོས་པའི་ཆ་བྱད་དོ། །ཕྱི་རོལ་གྱི་གྲུ་ཆད་ལ་དུས་བཞི་བྲི། སྒོ་བཞིར་ཡང་སྒོ་སྐྱོང་ཁྲོས་པའི་ཆ་བྱད་དུ། ཛཿ་ཧཱུཾ་བཾ་ཧོཿ་ལས་བསྐྱེད་དོ། །དེ་ནས་ཡེ་ཤེས་ཀྱི་དཀྱིལ་འཁོར་དང༌། འཇིགས་བྱེད་ཆེན་པོ་བརྒྱད་སྤྱན་དྲངས་ཏེ། གཉིས་སུ་མེད་པར་བྱས་ནས་ཕྱག་རྒྱ་རྣམས་བསྟན་ལ། དེ་ནས་ཐོད་པ་ཁྲག་དང་ཆང་གིས་བཀང་བས་མཆོད་པར་བྱའོ། །དེ་ནས་ལྷ་དེ་དག་གི་སྔགས་སམ་ཁྲོ་བོའི་སྔགས་ཀྱི་བཟླས་པ་ཇི་སྲིད་ནུས་པ་དེ་ཙམ་དུ་བྱའོ། །དེ་ནས་སྐྱོ་ན་ཕྱག་རྒྱ་བཀྲོལ་ལ་གཤེགས་སུ་གསོལ་ལོ། །བསྐྱེད་པ་ལུས་ལ་བསྡུའོ། །དེ་ལྟ་བུའི་བསམ་གཏན་མཚན་མ་བྱུང་བྱུང་དུ་བྱའོ། །དེ་ནས་གདོད་དཀྱིལ་འཁོར་གྱི་ལས་རྣམས་སོ། །དཀྱིལ་འཁོར་བྲི་བ་དང༌། ལྷ་དགོད་པ་ནི་ཏིང་ངེ་འཛིན་གྱི་དཀྱིལ་འཁོར་ལྟར་རོ། །དེ་ནས་སློབ་དཔོན་འཇུག་པའི་རིམ་པས་སློབ་དཔོན་ཞུགས་ནས། སློབ་མ་དབང་བསྐུར་བར་བྱ་སྟེ། མཛེས་པའི་བུམ་པ་བརྒྱད་དམ། མགོ་ཐོང་ཁྲག་གིས་བཀང་པ་བརྒྱད་ཀྱིས་དབང་བསྐུར་རོ། །དེ་ནས་ཁྲོ་བོ་ཁམས་གསུམ་རྣམ་པར་རྒྱལ་བས་དབང་བསྐུར་རོ། །དེ་ནས་སྒྲུབ་པ་བཤད་དེ། དེ་ནས་ལས་རྣམས་སྦྱིན་བྱས་ཏེ། །ཞེས་པ་ནི་གོང་དུ་བསྟན་པའི་སྒྲུབ་པའི་ཐབས་སོ། །བུད་མེད་ཁྱིམ་མམ་མཆན་གཅིག་པར་ཞེས་བྱ་བ་ནི་མ་མོའི་གནས་སམ། མ་ཧཱ་དེ་བའི་རྟེན་ཡོད་པའི་ས་ལ་ནི་གནས་ཞེས་བྱའོ། །ཡང་ན་དུར་ཁྲོད་ལ་སོགས་པ་ཡིད་དང་མཐུན་པར་རོ། །འཇིག་རྟེན་གསུམ་ནི་འདུལ་བའི་མཆོག །ཚུལ་བཞིན་དུ་ནི་མཆོད་ནས་ཀྱང༌། །ཞེས་པ་ནི་གོང་ལྟར་ཏིང་ངེ་འཛིན་གསུམ་གྱི་རིམ་པས་བྱེད་པའོ། །འབུམ་ཕྲག་བཞིར་ནི་བཟླས་པར་བྱ། །ཞེས་པ་ནི་སྔགས་ཀྱི་གྲངས་ཏེ་གཙོ་བོ་དང༌། འཁོར་གཉིས་ཀ་ཡིའོ། །དེ་ཡང་སྔགས་རེ་རེ་ལ་དེ་ཙམ་རེ་བཟླས་པར་བྱའོ། །དེ་ཙམ་བཟླས་པ་བྱས་ན་ཅི་འདོད་སྙམ་པ་ལ། དེ་ནས་འཇིགས་པར་བྱེད་པ་ཡིས། །བདག་ཉིད་ཆེན་པོའི་སྒྲ་ཐོས་ནས། །ཞེས་པ་སྟེ། དེ་ཡང་འཇིགས་བྱེད་ཆེན་པོའི་སྐུའམ། སྒྲ་དྲག་པོ་སྒྲོགས་ན་བདག་ཉིད་མི་འཇིགས་པར་ཐོད་པའི་ཁྲག་བཀང་སྟེ། མཆོད་ཅིང་ཨརྒྷ་དབུལ་ལོ། །དེ་ཕུལ་བས་ཅི་སྟོན་སྙམ་པ་ལ། །དེ་ནས་ཁྲོ་བོ་འཇིགས་བྱེད་པ། །མ་རུངས་ཡིད་ཅན་བུད་མེད་ཀྱི། །ཚོགས་ཀྱིས་
བསྐོར་ཅིང་འཇིགས་བྱེད་པ། །བརྒྱད་ཀྱིས་བསྐོར་བ་མཐོང་བར་འགྱུར། །ཞེས་སོ། །དེ་མཐོང་འཇིགས་པར་བྱེད་གྱུར་པ། །ཞེས་པ་ནི་ལྷ་ལ་སོགས་པའོ། །ཧཱུཾ་ཞེས་བྱ་བ་དྲན་བྱེད་ཅིང༌། །ཞེས་པ་ནི་བདག་ཉིད་ཁྲོ་བོ་ཁམས་གསུམ་རྣམ་པར་རྒྱལ་བར་དྲན་པར་བྱས་ནས། འཇིགས་བྱེད་ཆེན་པོ་ལ་ཆང་དང་ཁྲག་གིས་མཆོད་པར་བྱའོ། །དེ་ནས་དེ་དག་ཀུན་མགུ་ནས། །ཅི་འདོད་ཅེས་ནི་སྨྲས་ནས་ཀྱང༌། །མགུ་བའི་ཡིད་ཀྱིས་དེ་སྦྱིན་བྱེད། །ཅེས་པས་ནི་འོག་ནས་འབྱུང་བ་རྣམས་སྟེར་བར་བྱེད་པའོ། །ས་རྣམས་སྦྱིན་པ་མ་གཏོགས་པར། །ཞེས་པ་ནི་འཇིག་རྟེན་ལས་འདས་པའི་དངོས་གྲུབ་མ་གཏོགས་པའོ། །དངོས་གྲུབ་དེ་གང་གིས་སྩོལ་ན། བདེ་ཆེན་ཧཱུཾ་གིས་དངོས་གྲུབ་སྩོལ། །ཞེས་པ་སྟེ། འཇིག་རྟེན་ལས་འདས་པའི་དངོས་གྲུབ་དེ་ནི་ཁྲོ་བོ་ཆེན་པོ་ཁམས་གསུམ་རྣམ་པར་རྒྱལ་བས་སྩལ་ལོ། །འཇིག་རྟེན་པའི་དངོས་གྲུབ་ནི། ཁུ་བ་བྲོ་བཏུང་དངོས་གྲུབ་དང༌། །ཞེས་པ་ལ་སོགས་པ་སྟེ། །ཁུ་བ་ནི་དངུལ་ཆུའི་རིགས་གསེར་དུ་སྣང་བ་སྟེ། ལྕགས་སྲང་སྟོང་གསེར་དུ་བསྒྱུར་བ་ལྟར་དངོས་གྲུབ་ཀྱི་རྫས་བྱང་ཆུབ་སེམས་ཀྱི་ཁུ་པ་དང་ལྡན་ཞིང་ཟངས་གསེར་དུ་བྱ་བ་དང༌། སྨན་བཅུད་ཀྱིས་ལེན་གྱི་འདེ་གུ་སྟེ་བྲོ་བཏུང་གི་དངོས་གྲུབ་དང༌། སྲོ་ཏ་ཡ་ཛ་ན་ལ་སོགས་པ་གྲུབ་པས་ལིག་བུ་མིག་ཅེས་བྱ་བ་དེ་དག་ཐམས་ཅད་ཐོགས་པ་མེད་པ་དང༌། གཞན་ཡང་རལ་གྲི་དང༌། འཁོར་ལོ་དང༌། རྩེ་གསུམ་པ་ལ་སོགས་པའི་ཕྱག་མཚན་བརྒྱད་ཀྱི་དངོས་གྲུབ་དང༌། མི་དང་ས་འོག་གི་རྒྱལ་པོ་ཐོབ་པ་དང༌། གཞན་ཡང་གླིང་གཅིག་པ་ནས། གླིང་བཞི་པ་ལ་དབང་བྱེད་པའི་བར་གྱིས་རྒྱལ་པོ་དང༌། གཞན་ཡང་བརྒྱ་བྱིན་དང༌། གནོད་སྦྱིན་གྱི་རྒྱལ་པོ་དབང་ཕྱུག་ཆེན་པོ་དང༌། སྲིན་པོའི་རྒྱལ་པོ་དང༌། རིག་འཛིན་ཏེ་རླུང་ལྷའི་འཁོར་དང༌། རིག་འཛིན་གྱི་རྒྱལ་པོ་སྟེ་རླུང་ལྷ་དེ་ཉིད་དང༌། འཁོར་ལོས་སྒྱུར་བ་སྟེ་ལྷ་དང༌། ཀླུ་དང། མིའི་འཁོར་ལོས་སྒྱུར་བ་དང༌། འཇིག་རྟེན་གསུམ་གྱི་བདག་པོ་སྟེ་ས་བླ་ས་སྟེང་ས་འོག་གི་བདག་པོར་གྱུར་ནས་བདག་གི་བཀའ་ཉན་པར་བྱེད་པའོ། །དེ་རྣམས་གང་གིས་སྟེར་ན། རང་གི་འཁོར་དང་བུད་མེད་ཀྱི། །དངོས་གྲུབ་གང་ཡང་རུང་བ་ནི། །ཅི་དགའ་བར་ནི་སྦྱིན་པར་བྱེད། །ཅེས་སོ། །
དངོས་གྲུབ་དེ་བྱིན་ནས་ཇི་ལྟར་འགྲོ་ན། བྱིན་ནས་དགོད་ཅིང་འགྲོ་བར་བྱེད། །ཅེས་སོ། །གལ་ཏེ་རྣལ་འབྱོར་པ་སྐྲག་ན་ནི་དེ་མ་ཐག་ཏུ་གསོད་པར་བྱེད་དོ། །དེ་བས་ན་མི་སྐྲག་པར་བླང་བར་བྱའོ། །འཇིགས་བྱེད་བརྒྱད་ཀྱི་བཤད་པའོ།། །།ད་འདི་ནས་ལྷ་ཆེན་པོ་བརྒྱད་ཀྱི་དཀྱིལ་འཁོར་བཤད་དེ། །དེ་ནི་འཇིག་རྟེན་པའི་ལྷ་མི་དགའ་བ་ཞི་བར་བྱ་བའི་ཕྱིར་གསུངས་སོ། །དེ་ནས་ཚངས་པ་ལ་སོགས་པ་ལྷ་ཆེན་པོ་རྣམས་ཀྱིས་ཞེས་བྱ་བ་ལ་སོགས་པ་གསུངས་ཏེ། དེ་ཡང་གསོལ་བ་གདབ་པ་དང༌། གནང་པ་སྦྱིན་པ་སྟེ། དཀྱུས་གསལ་ལོ། །དེ་ནས་ཚངས་པ་ལ་སོགས་པས་ཀྱང་སྙིང་པོ་ཕུལ་ལོ། །དེའི་དོན་ཡང་སྦྱོར་བ་དང་པོ་དང༌། དཀྱིལ་འཁོར་རྒྱལ་པོ་མཆོག་དང༌། ལས་རྒྱལ་པོ་མཆོག་གསུམ་གྱིས་བསྟན་ཏོ། །དེ་ཡང་དང་པོར་གནས་ཡིད་དུ་འོང་བར་བདེ་བའི་སྟན་ལ་འདུག་སྟེ། བདག་མེད་པས་ནང་གི་ཁྲུས་བྱས་ཏེ། བདག་བསྲུང་བ་བྱས་ནས། དེ་ནས་སྲུང་བའི་འཁོར་ལོ་རྡོ་རྗེ་ར་བ་དང་དྲ་བ་བྱས་ཏེ། །མདུན་གྱི་དཀྱིལ་འཁོར་གྱི་ལྷ་དམིགས་ཏེ། ཕྱག་བྱ་བ་དང༌། མཆོད་པ་དང༌། སྡིག་པ་བཤགས་པ་དང༌། རྗེས་སུ་ཡི་རང་བ་དང༌། སྐྱབས་སུ་འགྲོ་བ་དང༌། བྱང་ཆུབ་ཀྱི་སེམས་གཟུང་བ་དང༌། སྡོམ་པ་ལ་གནས་པར་བྱས་ནས། དེ་ནས་ལག་པ་འོག་ནས་འབྱུང་བས་བྱིན་གྱིས་བརླབས་ཏེ། སྡིག་པ་དྲལ་བ་དང༌། ཡེ་ཤེས་དབབ་པ་དང༌། དེ་བརྟན་པར་བྱ་བ་དང༌། ངན་སོང་གཞོམ་པ་དང༌། མངོན་པར་བྱང་ཆུབ་པ་ལྔས་ཁྲོ་བོ་ཁམས་གསུམ་རྣམ་པར་རྒྱལ་བར་བསྐྱེད་དེ། སྐུ་མདོག་དཀར་ལྗང་ཞལ་གསུམ་པ་ལ་གཡས་ཞི་བ། གཡོན་ཁྲོ་བོ། དབུས་ཁྲོ་འཛུམ་དུ་འདུག་པ། ཕྱག་གཉིས་ཧཱུཾ་གི་ཕྱག་རྒྱ་བཅིངས་ནས་མཛུབ་མོ་བསྒྲེངས་ཏེ་གཡས་རྡོ་རྗེ། གཡོན་མདའ་གཞུ་བསྣམས་པ། དབུ་ལ་རིགས་ལྔའི་སངས་རྒྱས་ཀྱིས་བརྒྱན་པ། ཞབས་གཡས་བསྐུམ། གཡོན་བརྐྱང་དུ་བཞུགས་པ། དར་ལའི་སྟོད་གཡོགས་དང༌། བཏིའི་ཤམ་ཐབས་ཀྱིས་བརྒྱན་པར་བསྒོམས་ལ། དེའི་ཐུགས་ཀྱི་སྤྲུལ་པ་ལས་གཞལ་ཡས་ཁང་གྲུ་བཞི་པ་རྟ་བབས་བཞིས་བརྒྱན་པ། ནང་འཁོར་ལོ་རྩིབས་བརྒྱད་པ་མུ་ཁྱུད་དང་བཅས་པ་བསམ་པར་བྱའོ། །དེའི་དབུས་དང་འཁོར་ལོའི་རྩིབས་ལ་སྣ་ཚོགས་པདྨ་དང༌།
ཟླ་བའི་དཀྱིལ་འཁོར་བསམ་མོ། །དེའི་དབུས་སུ་བདག་ཉིད་བསམས་ཏེ། །དེ་ནས་བདག་གི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཨོཾ་ཨོཾ་ཞེས་པའི་སྔགས་བཀོད་ལ། དེའི་མཐའ་མ་ན་ཚུར་ཨོཾ་པྲཧྨཱ་ཡ་སྭཱ་ཧཱ་ཞེས་པས་བསྐོར་བ་དེ་ལས་འོད་ཟེར་འཕྲོ་བ་དང་འདུ་བའི་ཚུལ་གྱིས་པདྨར་གྱུར། དེ་འཕྲོ་འདུས་བརྟན་པར་གྱུར། དེའི་འཕྲོ་འདུས་ཚངས་པ་ཆེན་པོ་མདོག་སེར་པོ་ཕྱག་ན་པདྨ་བསྣམས་པར་གྱུར་ཏེ། ཡང་དེའི་ཐུགས་ཀར་ཟླ་བའི་དཀྱིལ་འཁོར་ལ་སྔགས་གོང་མ་བཀོད་ནས་བརྗོད་པ་ཙམ་གྱིས་བཏོན་ཏེ་དབུས་ཀྱི་གཙོ་བོའི་རྒྱ་བ་ཀྱི་རྩིབས་ཀྱི་སྟེང་དུ་པདྨ་དང་ཟླ་བའི་གདན་ལ་བཞུགས་སོ། །དེ་ནས་ཡང་དབུས་ཀྱི་གཙོ་བོའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ། ཨོཾ་བི། ཨོཾ་རུ། ཨོཾ་ཨི། ཨོཾ་ཀཾ། ཨོཾ་ག །ཨོཾ་བྷི། ཨོཾ་ཀཱ་ཞེས་པའི་སྔགས་ཀྱི་མཐའ་མ་ན་ཚུར། ཨོཾ་བིཥྞུ་ར་ཛཱ་ཡ་སྭཱ་ཧཱ། ཨོཾ་བི་རུ་ཌྷ་ཀཱ་ཡཱ་སྭཱ་ཧཱ། ཨོཾ་ཨི་ནྡྲཱ་ཡ་སྭཱ་ཧཱ། ཨོཾ་མ་ཧཱ་ཀཾ་ཀ་སྭཱ་ཧཱ། ཨོཾ་ག་ཎ་པ་ཏི་སྭཱ་ཧཱ། ཨོཾ་བྷྲྀཾ་གི་རི་ཏི་སྭཱ་ཧཱ། ཨོཾ་ཀཱརྟི་ཀ་སྭཱ་ཧཱ། ཞེས་པས་བསྐོར་བ་དེ་རྣམས་ཀྱི་འཕྲོ་འདུ་ལས་སོ་སོའི་ཕྱག་མཚན་འཁོར་ལོ་དང༌། མདུང་རྩེ་གསུམ་པ་དང༌། རྡོ་རྗེ་གདེངས་པ་དང༌། མདའ་གཞུ་དང༌། དགྲ་སྟ་དང༌། རལ་གྲི་དང༌། མདུང་ཐུང་རྣམས་སུ་གྱུར་ཏེ་དེ་ལས་འཕྲོས་ཤིང་འདུས་པ་ལས། ལྷ་ཆེན་རྣམས་ཀྱིས་སོ་སོའི་སྐུར་གྱུར་ཏེ། ཐུགས་ཀ་ན་གནས་སོ། །དེ་དག་སོ་སོའི་ཐུགས་ཀར་རང་རང་གི་སྔགས་བཀོད་ནས་བརྗོད་པ་ཙམ་གྱིས་ཐུགས་ཀ་ནས་བཏོན་ནས་སོ་སོའི་གནས་སུ་འཁོར་ལོ་རྩིབས་བརྒྱད་པོ་རྣམས་ཀྱི་རྩིབས་སྟེང་དུ་རིམ་པར་བཞུགས་སུ་གསོལ་ལོ། །དེ་ལ་གཙོ་བོའི་གཡོན་ཏེ། བྱང་དུ་ཁྱབ་འཇུག་མདོག་སྔོན་པོ་གཡོན་འཁོར་ལོ། གཡས་དབྱུག་པ་དང་བཅས་པའི་ལག་པ་བརྐྱང་བའོ། །གཙོ་བོའི་མདུན་ཤར་དུ་དྲག་པོ་མ་ཧཱ་དེ་བ་ཁྲོས་པ་སྟེ། མདོག་ནག་པོ་མདུང་རྩེ་གསུམ་ཐོགས་པ། སྟག་ལྤགས་ཀྱི་སྨད་གཡོགས་ཀྱིས་བརྒྱན་པ་མཚན་མ་བསྒྲེང་པའོ། །གཙོ་བོའི་གཡས་ཏེ་ལྷོར་བརྒྱ་བྱིན་མདོག་དཀར་སེར་རྡོ་རྗེ་གདེངས་པ་ཐོགས་པ་མིག་གསུམ་པའོ། །བྱང་ཤར་དུ་འདོད་པའི་དབང་པོ་མདོག་དམར་པོ་མདའ་གཞུ་ཐོགས་པའོ། །ཤར་ལྷོ་མཚམས་སུ་ནི་ཚོགས་ཀྱི་བདག་པོ་གླང་པོ་ཆེའི་མགོ་ཅན་མདོག་དཀར་པོ་དགྲ་སྟ་ཐོགས་པའོ། །ལྷོ་ནུབ་ཏུ་བྷྲྀདྒི་རི་ཏི་རུས་པའི་མདོག་ཅན་ལ་སྙིམ་པ་བཀན་ཏེ་གོང་དུ་རལ་གྲི་བྱུང་བརྐྱང་མཆན་བརྐྱང་
པའོ། །ནུབ་བྱང་དུ་གཞོན་ནུ་སྨིན་དྲུག་བྱིས་པའི་མདོག་ཅན་མགོ་དྲུག་ལག་ན་མདུང་ཐོགས་པ་སྟེ་རྨ་བྱའི་སྟེང་དུའོ། །གཞན་ཡང་དཀྱིལ་འཁོར་གྱི་སྒོ་བཞིར་ལྕགས་ཀྱུ་དང༌། ཞགས་པ་དང༌། ལྕགས་སྒྲོག་དང༌། དྲིལ་བུ ་རྣམས་དགོད་དོ། །ཕྱི་རོལ་གྱི་ཁོར་ཡུག་ལ་ཤར་དུ་སྟོབས་བཟངས་མདོག་ལྗང་གུ་ལག་ན་གཤོལ་བསྣམས་པ། ནུབ་ཏུ་དགའ་བའི་དབང་ཕྱུག་མདོག་དམར་པོ་ཕྱག་ན་གཤོལ་ཐུང་བསྣམས་པའོ། །ནག་པོ་ཆེན་པོ་མདོག་གནག་ཅིང་མི་སྡུག་པ་ཕྱག་ན་མདུང་རྩེ་གསུམ་པ་བསྣམས་པ་རྒྱན་དང་ཆ་ལུགས་ཀྱིས་བརྒྱན་པ་ལྷོར་བྲིའོ། །གཤིན་རྗེ་ནི་མདོག་གནག་ཅིང་སེང་གེའི་ཐོག་ཏུ་ཕྱག་ན་ཐོད་པ་ཁྲག་གིས་བཀང་བ་ཐོགས་པ་བྱང་དུ་བཞུགས་པའོ། །དེ་ལྟར་དཀྱིལ་འཁོར་བསྐྱེད་ནས། ད་ནི་སྤྱན་དྲང་བར་བྱ་སྟེ། ཛཿ་ཧཱུཾ་བཾ་ཧོཿ་ཞེས་པའི་སྔགས་ཀྱིས་གཙོ་བོ་དང་ལྷ་ཆེན་པོ་འཁོར་དང་བཅས་པ་སྤྱན་དྲངས་ཏེ། དེ་ནས་མདུན་དུ་བསམས་ནས་དམ་ཚིག་གི་ཕྱག་རྒྱས་བརྟན་པར་བྱ་བ་དང༌། དབང་བསྐུར་བ་དང༌། བྱིན་གྱིས་བརླབ་པ་ཡང་བྱའོ། །དེ་ནས་མཆོད་པས་མཆོད་དེ་གཙོ་བོའི་སྔགས་ལ་སོགས་པ་རྒྱུད་ལས་གསུངས་པའི་གྲངས་ཚད་ཙམ་བཟླས་པར་བྱའོ། །དེ་ནས་དཀྱིལ་འཁོར་ལ་བདག་ཉིད་འཇུག་པ་དང༌། སློབ་མ་དབང་བསྐུར་བ་དང༌། བསྒྲུབ་པ་ལ་སོགས་པ་མཆོད་རྟེན་ནམ་རིང་བསྲེལ་གྱི་དྲུང་དུ་བསྒྲུབ་པ་བྱ་བ་དང༌། འགྲུབ་པའི་མཚན་མ་མཐོང་ནས་དངོས་གྲུབ་བླང་བ་དང༌། དམ་བཅའ་བ་ཚང་བ་ལ་སོགས་པ་བྱས་པ་རྣམས་དཀྱུས་གསལ་ལོ། །ལ་ལ་དག་ལྷ་ཆེན་པོ་བརྒྱད་ཀྱི་དཀྱིལ་འཁོར་གྱི་རིམ་པ་ལ་སོགས་པ་འཇིག་རྟེན་པའི་དཀྱིལ་འཁོར་དྲུག་པོ་འདི་དག་བཟླས་པའི་སྔགས་ཀྱི་ཕྲེང་བ་མི་དགོད་པར་རྩ་བའི་སྔགས་འཕྲོ་འདུ་ལས་སྐུར་བསྐྱེད་ལ་བཟླས་པའི་སྔགས་བརྗོད་པས་ནི་ཕྱིར་བཏོན་ཏེ་རང་རང་གི་གནས་སུ་དགོད་ཅེས་ཟེར་རོ། །ཁ་ཅིག་ནི་སྔགས་རྣམས་ཐུགས་ཀ་ནས་བཏོན་ནས་རང་རང་གི་གནས་སུ་བཀོད་པ་ལས་སྐུར་བསྐྱེད་པ་ཡོད་ཅེས་ཟེར་རོ། །ལ་ལ་ན་རེ་འཇིག་རྟེན་པའི་ལྷ་འདི་དག་བསྐྱེད་པའི་ཐབས་ཡི་གེ་ཀཱ་ལས་ཁྱབ་འཇུག་གི་གཟུགས་བསྐྱེད་དོ། །ཡི་གེ་ཁ་ལས་ལྷ་གཞོན་ནུའོ། །ཡི་གེ་ག་ལས་ནི་བརྒྱ་བྱིན་ནོ། །ཡི་གེ་གྷ་ཡིས་ནི་ཚངས་པའོ། །ཡི་གེ་ཏ་ཡིས་ཉི་མའོ། །ཐ་ཡིས་ཟླ་བའོ། །ད་ཡིས་སྤེན་པའོ། །དྷ་ཡིས་མིག་དམར་རོ། །ཊ་ཡིས་སྟོབས་བཟངས་སོ། །
ཋ་ཡིས་ནི་ལེགས་གནས་སོ། །ཌ་ཡིས་ནི་བརྩོན་པའོ། །ཌྷ་ཡིས་ནི་རྒྱལ་བའོ། །པ་ཡིས་ནི་ནོར་སྦྱིན་ནོ། །ཕ་ཡིས་ནི་ཆུ་ལྷའོ། །བ་ཡིས་ནི་མེའོ། །བྷ་ཡིས་ནི་ཀུ་བེ་རའོ། །ར་ཡིས་ནི་ཕག་མགོ་ཅན་ནོ། །ཟླ་ཚེས་དང་ཐིག་ལེར་ལྡན་པས་ནི་གཤིན་རྗེའོ། །ཀ་ཡིས་ནི་ཆུའོ། །ཁ་ཡིས་ནི་ཚོགས་བདག་གོ །ཤ་དང་ཙ་དང་ཚ་དང༌། ཛ་དང༌། ཉ་ཡིས་ནི་ཕྱག་བརྙན་ལྔའོ། །ཏ་ཐ་ད་དྷ་ནས་ཕྱག་བརྙན་མ་ལྔའོ། །མ་ཡིས་ནི་དྲག་མོའོ། །ར་ཡིས་ནི་བདུད་རྩི་མའོ། །ལ་ཡིས་ནི་ཟ་མའོ། །རྡོ་རྗེ་མཆུའི་ཆུང་མ་ཡང་ངེས་སོ། །ཡི་གེ་བ་ཡིས་ནི་ཕོ་ཉ་མོ་ནོར་ལྷའི་ཆུང་མའོ། །ཀྵ་ཡིས་ནི་ཕག་མགོ་མའོ། །ཕ་ཡིས་ནི་རྒྱལ་བར་བྱེད་མ། ཤ་ཡིས་ནི་སྦྲང་རྩིར་བྱེད་མ། ས་ཡིས་དོན་རྣམས་ཐམས་ཅད་གྲུབ་པར་བྱེད་མ། ཧ་ཡིས་དགའ་བ་མོ། ལ་ཡིས་ལྷ་མོ་འཇོམས་མའོ། །ཟླ་ཚེས་དང་ཐིག་ལེར་ལྡན་པ་རྣམས་ཀྱིས་བསྐྱེད་དོ། །དེ་དག་གི་འཁོར་ནི་གཙོ་བོའི་ཡི་གེ་འབྲུ་ལས་སོ་ཞེས་གླེང་ངོ༌། །ལྷ་ཆེན་པོ་བརྒྱད་ཀྱི་ཁོར་ཡུག་ལའང་དེ་རྣམས་བྲི་བ་འམ། མདའ་འམ་ཐིག་ལེའོ། །ལྷ་ཆེན་པོའི་བཤད་པ་ངེས་པའོ།། །།ད་ནི་འདི་ནས་ཚེ་དཔག་མེད་འཆི་བདག་འཇོམས་པའི་དཀྱིལ་འཁོར་བཤད་དེ། དེ་ཡང་སེམས་ཅན་དུས་མ་ཡིན་པར་འཆི་བས་འཇིགས་པའི་ཕྱིར་དཀྱིལ་འཁོར་གསུངས་ཏེ། དེ་ནས་བཅོམ་ལྡན་འདས་ཕྱག་ན་རྡོ་རྗེ་ཉིད་ཀྱི་འཁོར་གྱི་དཀྱིལ་འཁོར་ལ་ཀུན་དུ་གཟིགས་ནས། འཛུམ་པ་མཛད་པ་དང་ཞེས་པ་ནི་ཐུགས་ཡང་དག་པའི་ཡེ་ཤེས་ལས་སྐྱེས་པའི་ཕྱག་ན་རྡོ་རྗེ་ཉིད་ཀྱི་འཁོར་གྱི་དཀྱིལ་འཁོར་སྣ་ཚོགས་པ་ལ། ཚེ་དཔག་མེད་ཀྱི་དཀྱིལ་འཁོར་བཤད་པར་བཞེད་ནས་གླང་པོ་ཆེ་ཆེན་པོའི་སྟ་སྟངས་ཀྱིས་ཀུན་དུ་གཟིགས་ནས་ཞལ་འཛུམ་པ་གསེར་གྱི་ཁ་དོག་ལྟ་བུ་མཛད་པའི་འོད་ཀྱིས་འཇིག་རྟེན་གྱི་ཁམས་ཐམས་ཅད་སྣང་བར་མཛད། སྣང་བར་མཛད་པ་དེ་ལས་ཅི་བྱས་སྙམ་པ་ལ། འཁོར་གྱི་དཀྱིལ་འཁོར་དེ་དག་གཡོས་ཞེས་གསུངས་ཏེ། འཁོར་གྱི་དཀྱིལ་འཁོར་ནི་ཚངས་པ་ལ་སོགས་པའི་འཇིག་རྟེན་པའི་འཁོར་ལོ། གཡོས་པ་ནི་དྲོད་དེ་སྔོན་གྱི་དགེ་བའི་རྩ་བའི་ཚོགས་གཡོས་པའོ། །ཡང་དག་པར་གཡོས་ཞེས་པ་ནི་རྩེ་མོ་སྟེ་དགེ་བ་རྣམ་པར་འཕེལ་བའི་རྩེ་མོར་གྱུར་པས། ཕྱི་གཟུང་བའི་ཡུལ་སྤངས་པ་དེ་ཡང་དག་པར་གཡོས་པའོ། །འགུལ་ཡང་དག་པར་འགུལ་ཞེས་པ་ནི་བཟོད་པ་སྟེ། ཕྱི་གཟུང་བར་བྱ་བའི་
ཡུལ་སྤངས་པས་འགུལ་བའོ། །ནང་འཛིན་པར་བྱེད་པའི་སེམས་སྤོང་བར་བྱེད་པ་ལ་ཡང་དག་པར་རབ་ཏུ་འགུལ་བའོ། །འབར་རབ་ཏུ་འབར་བ་ཞེས་པ་ནི་འཇིག་རྟེན་ཆོས་ཀྱི་མཆོག་སྟེ། ནང་འཛིན་པའི་སེམས་སྤངས་པས་ནི་འབར་བ་ཞེས་བྱའོ། །ས་དང་པོ་བདེན་པ་མཐོང་བས་ནི་རབ་ཏུ་འབར་བ་ཞེས་བྱའོ། །ཡང་དག་པར་རབ་ཏུ་འབར་ཞིང་ཞེས་པ་ནི་ས་དང་པོ་མཐོང་བའི་ལམ་སྟེ། འཇིག་རྟེན་པའི་མཚན་མ་རབ་ཏུ་བཅོམ་པས་ཡང་དག་པར་རབ་ཏུ་འབར་བ་ཞེས་བྱའོ། །དགོང་རབ་ཏུ་དགོད་ཡང་དག་པར་རབ་ཏུ་དགོད་ཅེས་པ་ནི་ཡེ་ཤེས་ཀྱི་ས་བསྒོམ་པའི་ལམ་ལ་དགོད་པར་བྱེད་པའོ། །དེའི་གྲོགས་སུ་གྱུར་པ་ནི་བྱང་ཆུབ་ཀྱི་ཡན་ལག་བདུན་དང༌། འཕགས་པའི་ལམ་ཡན་ལག་བརྒྱད་ཀྱི་ས་རབ་ཏུ་དགོད་པར་བྱེད་དོ། །སྤྱོད་པ་ཕ་རོལ་ཏུ་ཕྱིན་པ་བཅུས་ཡང་དག་པར་རབ་ཏུ་དགོད་ཅེས་བྱའོ། །རྩེ་རབ་ཏུ་རྩེ་ཡང་དག་པར་རབ་ཏུ་རྩེ་ཞེས་པ་ནི་ས་བཅུ་པ་ཆོས་ཀྱི་སྤྲིན་རབ་ཏུ་ཐོབ་པས་ན་རྩེ་ཞིང་རབ་ཏུ་རྩེ་བའོ། །འབྲས་བུ་སངས་རྒྱས་ཀྱི་ས་རབ་ཏུ་ཐོབ་པར་བྱེད་པའི་མངོན་པར་བྱང་ཆུབ་པ་ལ་རབ་ཏུ་བཞག་པས་ན་ཡང་དག་པར་རབ་ཏུ་རྩེ་ཞེས་བྱའོ། །དེ་ལྟར་སངས་རྒྱས་བས་སྟོབས་དང་མི་འཇིགས་པ་ལ་སོགས་པ་འབྲས་བུའི་ཆོས་མཐར་ཕྱིན་པས་ན་རྨད་ཀྱི་ཡ་མཚན་དུ་མ་འཇིག་རྟེན་དུ་སྣང་བར་གྱུར་ཏོ་ཞེས་པ་ནི་དགའ་ལྡན་གྱི་གནས་ནས་མིའི་ཡུལ་དུ་བབས་ཏེ། མཛད་པ་བཅུ་གཉིས་ཀྱི་ཚུལ་མངོན་པར་སངས་རྒྱས་པའི་ཐ་ཚིག་གིས་སེམས་ཅན་གྱི་དོན་བྱས་པའོ། །དེ་དག་ནི་བཅོམ་ལྡན་འདས་ཀྱི་ཆོ་འཕྲུལ་བསྟན་པའོ། །ད་ནི་ཞུ་བ་དང༌། དམ་པའི་ཚིག་བསྟན་ཏེ། དེ་ཡང་འཛུམ་པའི་རྒྱུའི་ཞུ་བ་དང༌། སྔགས་ཀྱི་ཡོན་ཏན་གསུངས་པ་དང༌། བཤད་པར་གསོལ་བ་གདབ་པ་གསུམ་ནི་དཀྱུས་གསལ་བསམ་བཀྲོལ་ལོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་ཚངས་པ་ལ་སོགས་པའི་ལྷ་རྣམས་ཀྱིས་གསོལ་བའི་ཚིག་གསན་ནས་དེ་བཞིན་གཤེགས་པ་ཐམས་ཅད་ཀྱི་སྙིང་པོ་རིག་སྔགས་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་ཞེས་པ་ནི་ནང་སེམས་ཀྱི་དཀྱིལ་འཁོར་བསྟན། དེའི་དོན་ཡང་ཕྱག་ན་རྡོ་རྗེའི་ཐུགས་ཀར་ཟླ་བའི་དཀྱིལ་འཁོར་དེའི་སྟེང་དུ་རྡོ་རྗེ་ཆེ། ཕྱག་ན་རྡོ་རྗེའི་གཡོན་དུ་ཁྲོ་བོ་ལས་སྣ་ཚོགས་པ་དང༌། ནམ་མཁའི་སྙིང་པོ་དང༌། སྤྱན་རས་གཟིགས་ཀྱི་དབང་པོ་ལ་སོགས་པའི་སྐུར་གྱུར་ཏེ། དེ་རྣམས་ཀྱི་ཐུགས་ཀར་ཡང་སྔགས་པུཎྱེ་ཞེས་
པ་ལ་སོགས་པའི་རིམ་པ་བཀོད་པ་ལས། འོད་ཟེར་སྤྲོས་པས་འགྲོ་བ་སེམས་ཅན་ཐམས་ཅད་ལ་ཕོག་པས་སེམས་ཅན་ཐམས་ཅད་ཀྱི་ལས་དང་ཉོན་མོངས་པ་ཐམས་ཅད་སྦྱངས། ཁྱད་པར་དུ་ཡང་སེམས་ཅན་ཚེ་ཟད་པ་ཐམས་ཅད་ཚེ་བསྲིངས་ཏེ། ནང་སེམས་ཀྱི་དཀྱིལ་འཁོར་དུ་བཅུག་ནས་དབང་བསྐུར་བས་ཚོགས་ཀྱི་ལམ་ལ་སོགས་པ་ལམ་ལྔ་རིམ་གྱིས་ཐོབ་ནས་སངས་རྒྱས་ཀྱི་ས་ལ་བཞག་གོ །དེ་ནས་མ་འོངས་པའི་སེམས་ཅན་གྱི་དོན་དུ་སྙིང་པོ་དང་སྔགས་གསུངས་སོ། །དེའི་དོན་ཡང་འདི་ལྟར་ཤེས་པར་བྱ་སྟེ། དང་པོར་གནས་ཡིད་དུ་འོང་བར་བདེ་བའི་སྟན་ལ་ཁྲུས་ཀྱི་ཡན་ལག་དང༌། རྣལ་འབྱོར་གྱིས་དོན་དུ་གཉེར་བར་བྱས་ནས་འདུག་སྟེ། སྔོན་དུ་འགྲོ་བའི་ཡན་ལག་བྱས་ནས་གོང་དུ་གསུངས་པ་བཞིན་སྡིག་པ་དྲལ་བ་ལ་སོགས་པ་བྱས་ལ་ཨོཾ་ཙིཏྟ་པྲ་ཏི་བེ་དྷཾ་ཀ་རོ་མི་ཞེས་བརྗོད་དེ། ཆོས་རྣམས་རྡུལ་ཕྲ་མོ་བཞིན་བཤིག་པའམ། ཐོག་མ་ནས་མ་བྱུང་མ་སྐྱེས་པས་ན། རང་གི་སེམས་ཇི་བཞིན་པ་ལ་བརྟགས་ཏེ། གློ་བུར་གྱི་བག་ཆགས་རབ་ཏུ་བསལ་ནས་རང་བཞིན་གྱིས་འོད་གསལ་བའི་ངོ་བོ་ཟླ་ཚེས་གཅིག་པ་ལྟ་བུར་བསྒོམ་པར་བྱའོ། །དེ་ལས་ཨོཾ་བོ་དྷི་ཙིཏྟ་ཨུཏྤཱ་ད་ཡཱ་མི་ཞེས་བཟླས་པས་དེ་ལས་འོད་ཟེར་འཕྲོ་བ་དང་འདུ་བའི་ཚུལ་གྱིས་ཚོགས་རྣམ་པ་གཉིས་རྫོགས་པའི་ངོ་བོ་ཟླ་བའི་དཀྱིལ་འཁོར་ཉ་གང་ཞིང་ཡོངས་སུ་རྫོགས་པར་སྒོམ་མོ། །དེའི་སྟེང་ཨོཾ་བྷྲཱུཾ་སྭཱ་ཧཱ། དེའི་ཕྱི་རིམ་ན་ཚུར་ཨོཾ་པུཎྱེ་པུཎྱེ་མ་ཧཱ་པུཎྱེ། ཨ་པ་རི་མི་ཏ་ཨཱ་ཡུ་པུཎྱེ། ཛྙཱ་ན་སཾ་བྷཱ་རོ་པ་ཙི་ཏེ་སྭཱ་ཧཱ་ཞེས་པའི་སྔགས་ཀྱི་ཡི་གེ་གཡས་ནས་ཕྲེང་པའི་ཚུལ་དུ་བཀོད་ལ། ཨོཾ་ཏིཥྛ་བཛྲ་ཞེས་བརྗོད་པས། དེ་ལས་འོད་ཟེར་འཕྲོ་བ་དང་འདུ་བའི་ཚུལ་གྱིས་ཡེ་ཤེས་ཀྱི་རྡོ་རྗེ་རྩེ་ལྔ་པ་ཅིག་ཏུ་གྱུར་ཏོ།། དེ་ནས་ཨོཾ་བཛྲ་ཨཱཏྨ་ཀོ྅ཧཾ་ཞེས་བརྗོད་པས་ཡེ་ཤེས་ཀྱི་རྡོ་རྗེ་རྩེ་ལྔ་པ་དེ་ལས་འོད་ཟེར་ལྕགས་ཀྱུ་ལྟ་བུ་འཕྲོས་པས་རིགས་བཞིའི་དེ་བཞིན་གཤེགས་པའི་སྐུ་གསུང་ཐུགས་རྡོ་རྗེའི་དབྱིངས་ཇི་སྙེད་པ་ཐམས་ཅད་བསྡུས་ཏེ། སླར་རྡོ་རྗེ་ཉིད་ལ་ཐིམ་པས་མི་གཡོ་བར་གྱུར་པར་བསྒོམ་མོ། །ཨོཾ་ཡ་ཐཱ་བཛྲ་སརྦ་ཏ་ཐཱ་ག་ཏ་ཨ་ཧཾ་ཞེས་བརྗོད་པས་བརྟན་པར་གྱུར་པའི་རྡོ་རྗེ་དེ་ལས་སྐུ་ཕྲ་མོ་མང་བོ་འཕྲོས་པས་སངས་རྒྱས་ཀྱི་མཛད་པ་མ་ལུས་པར་མཛད་ནས་ལྷར་འདུས་ཏེ་རྡོ་རྗེ་ལ་ཐིམ་པ་ལས་བཅོམ་ལྡན་འདས་ཚེ་དང་བསོད་ནམས་དང་ཡེ་ཤེས་ཀྱི་ཚོགས་དང་གཟི་བརྗིད་ཚད་མེད་པའི་རྒྱལ་པོའི་སྐུ་ཕྱག་རྒྱ་ཆེན་པོར་གྱུར་ཏེ། སྐུ་མདོག་ནི་གསེར་བསྲེགས་
བ་ལྟ་བུ་རྒྱན་ཐམས་ཅད་ཀྱིས་བརྒྱན་པ་ཕྱག་གཡས་པས་ཆོས་འཆད་པའི་ཚུལ་ལ་གཡོན་སྐྱབས་སྦྱིན་མཛད་པའོ། །ཡང་དེའི་ཐུགས་ཀར་ཟླ་བའི་དཀྱིལ་འཁོར་ལ་སྔགས་ཀྱི་ཡི་གེ་རྣམས་ཕྲེང་བའི་ཚུལ་དུ་བཀོད་པ་ལས། རྡོ་རྗེ་རྩེ་ལྔ་པ་ཡི་གེ་ཧཱུཾ་གིས་བསྐྱེད་པ་འཕྲོ་བ་དང་འདུ་བས་བརྟན་པར་བྱས་པར་གྱུར་ཏེ། དེའི་འཕྲོ་འདུ་ལས་རིགས་བཞིའི་དེ་བཞིན་གཤེགས་པའི་སྐུ་གསུང་ཐུགས་འདུས་ནས་རྡོ་རྗེ་ལ་བསྟིམས་པས་ཤིན་ཏུ་མི་གཡོ་ཞིང་བརྟན་པར་གྱུར་ཏོ། །དེ་ནས་བཅོམ་ལྡན་འདས་དེ་ལ་དབང་བསྐུར་བའི་ཏིང་ངེ་འཛིན་དང་མཆོད་པ་ཡང་བྱས་ནས། ཡང་ཉིད་ཀྱི་ཐུགས་གར་ཟླ་བའི་དཀྱིལ་འཁོར་གྱི་སྟེང་དུ་ལྷ་རྣམས་ཀྱི་སྙིང་པོ་བྷྲཱུམ་དང༌། ཛྲཱིཾ་དང༌། ཀྲཾ་དང༌། ཏྲཱཾ་དང༌། ཧྲཱིཿ་རྣམས་ལས་རྫོགས་པའི་ཚུལ་གྱིས་དཀྱིལ་འཁོར་གྱི་ལྷ་རྣམས་དང༌། ཡོ་བྱད་བཞི་དང༌། འཇུག་བྱེད་བཞི་བསྐྱེད་དོ། །ཡང་ལྷ་དེ་དག་གི་ཐུགས་ཀར་རིག་པའི་སྔགས་རྣམས་དང༌། རྩ་བའི་སྙིང་པོ་ལས་འོད་ཟེར་འཕྲོས་པས་སྟོང་གསུམ་པའི་འཇིག་རྟེན་གྱི་ཁམས་ཐམས་ཅད་དུ་ཁྱབ་པས་དེ་དག་ཐམས་ཅད་ཀྱི་ལས་དང་ཉོན་མོངས་པའི་བག་ཆགས་དག་པར་བྱས་ཤིང་ཁྱད་པར་དུ་ཡང་སེམས་ཅན་ཚེ་ཐུང་བའི་བག་ཆགས་ཐམས་ཅད་དག་པར་བྱས་ཏེ། དུས་མ་ཡིན་པར་འཆིབ་ལ་སོགས་པ་ཐམས་ཅད་ལས་ཐར་བར་བྱས་ནས་ཉེ་བར་བཀུག་སྟེ། སྐུ་གསུང་ཐུགས་སུ་བྱིན་གྱིས་བརླབས་ནས། ནང་སེམས་ཀྱི་དཀྱིལ་འཁོར་དུ་དབང་བསྐུར་བ་སེམས་ཅན་ཐམས་ཅད་རྣམ་པར་གྲོལ་བའི་ལམ་ལ་བཞག་ནས་རིམ་གྱིས་སངས་རྒྱས་ཀྱིས་ཐོབ་པར་བྱས། དེ་ནས་དེ་དག་གི་དྲིན་ལན་གྱི་ཕྱིར་མཆོད་པ་དང་བསྟོད་པས་ཀྱང་བསྟོད་དེ། དེ་ནས་དེ་ཉིད་ན་གནས་པ་རྣམས་རང་རང་གི་གནས་སུ་དོང་བར་བསམ། དེ་ནས་སྟོང་པ་ཉིད་ཀྱི་ཏིང་ངེ་འཛིན་བྱས་ལ་གཞལ་ཡས་ཁང་རིམ་གྱིས་བསྐྱེད་དེ། གྲུ་བཞི་པ་སྒོ་བཞི་པ། རྟ་བབས་བཞིས་མཛེས་པར་བྱས་ལ། ནང་འཁོར་ལོ་རྩིབས་བཞི་པ་མུ་ཁྱུད་དང་བཅས་པའོ། །དེའི་སྟེང་དུ་སེང་གེའི་གདན། དེའི་སྟེང་དུ་སྣ་ཚོགས་པདྨ། དེའི་སྟེང་དུ་ཟླ་བའི་དཀྱིལ་འཁོར། དེའི་སྟེང་དུ་བདག་ཉིད་བསམ་སྟེ་གནས་པ་ལས། ཡང་བྱིན་གྱིས་བརླབས་ནས་འཁོར་གྱི་ལྷ་རྣམས་བསྐྱེད་པར་བྱའོ། །དབུས་སུ་གཙོ་བོའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ། ཨོཾ་ཛི་ཞེས་བྱ་བའི་
མཐའ་མ་ནས་ཨོཾ་ཛྲིཾ་སྭཱ་ཧཱ། ཞེས་པའི་སྔགས་ཀྱི་ཕྲེང་བ་བཀོད་ལ། དེ་ལས་ཡེ་ཤེས་ཀྱི་འོད་ཟེར་འཕྲོས་ཤིང་འདུས་པའི་ཚུལ་གྱིས་རྡོ་རྗེ་རྩེ་ལྔ་པར་གྱུར་ཏོ། །དེ་ལས་ཡང་ཡེ་ཤེས་ཀྱི་འོད་འཕྲོས་པས་རིགས་བཞིའི་དེ་བཞིན་གཤེགས་པ་དང༌། རྡོ་རྗེ་དང༌། རིན་པོ་ཆེ་དང་པདྨ་དང༌། ལས་ཀྱི་རིགས་ཀྱི་སྐུ་དང༌། གསུང་དང་ཐུགས་ཇི་སྙེད་ཐམས་ཅད་འདུས་ཏེ་རྡོ་རྗེ་ལ་ཐིམ་པས་བརྟན་པར་བྱས་སོ། །དེ་ནས་དེ་བཞིན་གཤེགས་པའི་སྐུ་ཕྲ་མོ་མང་པོ་འཕྲོས་ཤིང་འདུས་པས་སྐུ་ཡོངས་སུ་རྫོགས་པའོ། །ཡང་དེའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་སྔགས་ཀྱི་ཡི་གེའི་ཕྲེང་བ་བཀོད་ནས། ཨོཾ་ཛི་སྭཱ་ཧཱ། ཞེས་བརྗོད་པས་བསྐུལ་བའི་ཚུལ་གྱིས་ཐུགས་ཀ་ནས་སྤྱན་དྲངས་ཏེ། ཕྱོགས་བཅུར་འཕྲོས་པས་མཛད་པ་བཅུ་གཉིས་ཀྱི་ཚུལ་དུ་འགྲོ་བའི་དོན་མཛད་ནས་སླར་འདུས་ཏེ། བདག་ཉིད་ཀྱི་སྤྱན་སྔ་ནས་བཀའ་ནོད་པའི་ཚུལ་དུ་གནས་པ་ལ་ཆོ་འཕྲུལ་ཆེན་པོ་བཞིས་བྱིན་གྱིས་བརླབས་ཏེ། རིན་པོ་ཆེའི་དབུ་རྒྱན་དབུལ་བསྐོན་ཏེ། དམ་ཚིག་གི་ཕྱག་རྒྱ་རྡོ་རྗེ་རྩེ་ལྔ་པ་ལག་ཏུ་བྱིན་ཏེ། ཕྱག་ན་རྡོ་རྗེ་ཞེས་མིང་གི་དབང་བསྐུར་ནས་ཉིད་ཀྱི་ལས་ཀྱི་བཞུགས་གནས་ཤར་ཕྱོགས་ཀྱི་རྩིབས་སྟེང་དུ་པདྨ་དང་ཟླ་བའི་སྟེང་དུ་བཞུགས་སུ་གསོལ། ཡང་དབུས་ཀྱི་གཙོ་བོའི་ཐུགས་ཀར་ཀཾ་ཞེས་བྱ་བའི་སྙིང་པོ་དེའི་ཕྱི་རིམ་ན་ཚུར་ཨོཾ་ཀྲཾ་སྭཱ་ཧཱ་ཞེས་པས་བསྐོར་བར་བསམས་ལ། དེའི་འཕྲོ་འདུ་ལས་རྡོ་རྗེ་རྒྱ་གྲམ་དེའི་འཕྲོ་འདུ་ལས་རྡོ་རྗེ་བརྟན་པར་བྱས་སོ། །དེའི་འཕྲོ་འདུ་ལས་ཁྲོ་བོ་ལས་སྣ་ཚོགས་པ་ཞེས་བྱ་བར་གྱུར་ཏེ། མདོག་ལྗང་གུ་ཁྲོ་གཉེར་ཅན། ཕྱག་གཡོན་པ་སྡིགས་མཛུབ་བསྒྲེང་ནས་སྙིང་ག་ན་གནས་པར་འགྱུར་རོ། །ཡང་དེའི་ཐུགས་ཀར་ཟླ་བ་ལ་སྔགས་ཀྱི་ཡི་གེའི་ཕྲེང་བ་སྔ་མ་བཞིན་དུ་བཀོད་ལ་བརྗོད་པས་བསྐུལ་བའི་ཚུལ་གྱིས་ཐུགས་ཀ་ནས་སྤྱན་དྲངས་ཏེ། ཕྱོགས་བཅུར་འཕྲོས་ནས་སངས་རྒྱས་ཀྱི་མཛད་པ་མཛད་ནས་སླར་བྱོན་ནས་བདག་གི་མདུན་དུ་བཀའ་ནོད་པའི་ཚུལ་དུ་གནས་པ་ལ་ཆོ་འཕྲུལ་ཆེན་པོས་བྱིན་གྱིས་བརླབས་ཏེ། རིན་པོ་ཆེའི་དབུ་རྒྱན་མགོ་ལ་བསྐོན། །དམ་ཚིག་གི་ཕྱག་རྒྱ་ལག་ཏུ་བྱིན་ནས་སྣ་ཚོགས་རྡོ་རྗེ་ཞེས་མིང་ནས་ལན་གསུམ་བོས་ནས་ལས་ལ་དགོད་པ་ནི་བྱང་གི་རྩིབས་ལ་བཞུགས་སུ་གསོལ་ལོ། །ཡང་གཙོ་བོའི་ཐུགས་ཀར་ཏྲཱཾ་ཞེས་པའི་མཐའ་མར་ཨོཾ་ཏྲཱཾ་སྭཱ་ཧཱ་ཞེས་པས་བསྐོར་བ་དེའི་འཕྲོ་འདུ་ལས་རིན་པོ་ཆེ། དེ་ལས་བརྟན་པ།
དེ་ལས་ནམ་མཁའི་སྙིང་པོའི་སྐུར་གྱུར་ཏེ། སྐུ་མདོག་མཐིང་གར་གནས་སོ། །དེའི་ཐུགས་ཀར་སྔ་མ་བཞིན་དུ་སྔགས་ཀྱི་ཡི་གེ་བཀོད་དེ་བརྗོད་པ་དང་འཕྲོས་ཤིང་འདུས་ནས་མདུན་ན་བཞུགས་པ་ལ་བྱིན་གྱིས་བརླབས་པ་དང༌། དབང་བསྐུར་བ་དང༌། ཕྱག་མཚན་རིན་བོ་ཆེ་སྦྱིན་པ་དང༌། ནམ་མཁའི་སྙིང་པོ་ཞེས་མིང་གི་དབང་བསྐུར་བ་བྱས་ནས། ལས་ལ་དགོད་པ་ནི་བྱང་གི་རྩིབས་ལ་བཞུགས་སུ་གསོལ་ལོ། །དེ་ནས་ཡང་གཙོ་བོའི་ཐུགས་ཀར་ཧྲཱིཿ་ཞེས་པའི་མཐའ་མ་ནས་ཚུར་ལ་ཨོཾ་ཧྲཱིཿ་སྭཱ་ཧཱ་ཞེས་པའི་སྔགས་ཀྱིས་བསྐོར་བ་བཀོད་ལ། དེ་ལས་པདྨ། དེ་ལས་བརྟན་པ། དེ་ལས་སྤྱན་རས་གཟིགས་ཀྱི་སྐུར་གྱུར་ཏེ། སྐུ་མདོག་དམར་པོར་གནས་པའི་ཐུགས་ཀར་ཟླ་བ་ལ་སྔགས་བཀོད་ནས། དེའི་འཕྲོ་འདུ་ལས་མདུན་ན་གནས་པ་ལ་བྱིན་གྱིས་བརླབས་པ་དང༌། རིན་པོ་ཆེའི་དབང་དང༌། པདྨ་སྦྱིན་པ་དང༌། མིང་གདགས་པ་དང༌། ལས་ལ་དགོད་པ་སྟེ་ནུབ་ཕྱོགས་ཀྱི་རྩིབས་ལ་བཞུགས་སོ། །དེ་ལ་ཕྱག་ན་རྡོ་རྗེ་ནི་མེ་ལོང་ལྟ་བུའི་ཡེ་ཤེས་ཀྱི་ཆོས་ཉིད་ཀྱིས་བྱིན་གྱིས་བརླབས་པ། ཤེས་རབ་དང༌། ཏིང་ངེ་འཛིན་དང༌། རྣམ་པར་ཐར་པ་དང༌། རྣམ་པར་གྲོལ་བའི་ཡེ་ཤེས་མཐོང་བའི་རང་བཞིན་གྱི་ཡེ་ཤེས་ལྔའི་མཚན་ཉིད་ཀྱི་རྡོ་རྗེ་ཕྱག་ན་བསྣམས་པས་ཕྱག་ན་རྡོ་རྗེའོ། །རྡོ་རྗེ་སྣ་ཚོགས་ནི་བྱ་བ་ནན་ཏན་གྱི་ཡེ་ཤེས་ཀྱིས་དེ་བཞིན་གཤེགས་པ་ཐམས་ཅད་མཉེས་པར་བྱ་བ་དང༌། སེམས་ཅན་ཡོངས་སུ་སྨིན་པ་ལ་སོགས་པའི་ལས་སྣ་ཚོགས་པ་མཛད་པས་སོ། །ནམ་མཁའི་སྙིང་པོ་ནི་མཉམ་པ་ཉིད་ཀྱི་ཡེ་ཤེས་ཆོས་ཐམས་ཅད་ནམ་མཁའི་མཚན་ཉིད་དུ་རྟོགས་པའི་ཆོས་ཉིད་དེ་རྡོ་རྗེ་རིན་ཆེན་མཉེས་པར་མཛད་པའོ། །སྤྱན་རས་གཟིགས་ནི་སོ་སོར་རྟོག་པའི་ཡེ་ཤེས་རྣམ་པར་དག་པ་ལས་ཆོས་ཐམས་ཅད་རྣམ་པར་གཟིགས་པ་དང༌། དེའི་དོན་ལ་ཆགས་པ་དང༌། སེམས་ཅན་གྱི་དོན་ལ་རྡོ་རྗེ་ཆོས་མཉེས་པར་བྱས་པ་ལས་ཡོངས་སུ་རྫོགས་པར་བྱང་ཆུབ་བའོ། །གཞན་ཡང་དུས་བཞི་དང༌། ལྕགས་ཀྱུ་ལ་སོགས་པ་ཡང་རིམ་བཞིན་དུ་བསམ་མོ། །དེ་ནི་སྤྱོར་བ་དང་པོ་དང༌། དཀྱིལ་འཁོར་རྒྱལ་པོ་མཆོག་གོ །དེ་ནས་མཆོད་པ་བྱིན་གྱིས་བརླབས་པ་བྱས་
ནས་བསང་བ་བྱས་ཏེ། ཚེ་དཔག་ཏུ་མེད་པའི་དཀྱིལ་འཁོར་འདིར་ཕྱག་འཚལ་ཏེ་ཞུགས་ན་ངན་སོང་ཐམས་ཅད་ལས་དྲང་བ་དང༌། དུས་མ་ཡིན་པར་འཆི་བ་བརྒྱད་ལས་བཟློག་པ་ནི་ལྷའི་ལས་རྒྱལ་པོ་མཆོག་གི་ཏིང་ངེ་འཛིན་ཡིན་ནོ། །ངན་སོང་སྦྱོང་བའི་ལྷ་ཐམས་ཅད་ལ་ཡང་ངན་སོང་ལས་སེམས་ཅན་ཐམས་ཅད་དྲད་བ་ལས་གཞན་མི་མངའོ། །དེ་ནི་ལས་རྒྱལ་པོའོ། །ལས་ལ་རྗེས་སུ་སྦྱོར་བ་ནི་འོག་ནས་འབྱུང་བ་ལས་ཤེས་པར་བྱའོ། །བཟླས་པ་ནི་སྤགས་རྩ་བའི་རིགས་སོ། །དེ་ལས་ཐུན་བཞིར་འབུམ་འབུམ་མམ་མཚན་མ་བྱུང་བྱུང་དུའམ། གནང་བ་ཐོབ་ཐོབ་དུའམ། གྲངས་ཀྱི་བསྙེན་པ་བྱའོ། །དེ་ནས་གདོད་དཀྱིལ་འཁོར་གྱི་ལས་ལ་འཇུག་པར་བྱ་སྟེ། གནས་ཡིད་དང་མཐུན་པར་ས་སྤྱང་བ་དང་གཟུང་བ་རིམ་པ་བཞིན་དུ་བྱས་ནས་དཀྱིལ་འཁོར་བྱིན་གྱིས་བརླབ་ཅིང༌། བསྲུང་བ་དང༌། བདག་དབང་ཡོད་པར་བྱ་བ་དང༌། དྲིའི་ཐིག་ལེ་བྱས་ནས་ལྷ་སྟ་གོན་ལ་གནས་པ་དང༌། བུམ་པ་བརྒྱད་དམ་ལྔ་བྱིན་གྱིས་བརླབས་པ་དང༌། སློབ་མ་སྣོད་དུ་རུང་བར་བྱ་བ་དང༌། ནང་བར་ཐིག་བྱིན་གྱིས་བརླབས་པ་དང༌། ཚོན་བྱིན་གྱིས་བརླབ་ཅིང་དགྱེ་བ་ནི། གོང་འོག་ནས་ཤེས་པར་བྱའོ། །དེ་ཡང་ཚོན་ནི་དབང་ལྡན་གྱི་ཕྱོགས་ནས་བརྩམས་ལ་དང་པོ་ནི་དཀར་པོའོ། །དེ་ནས་ནི་སྔོན་པོའོ། །དེ་ནས་ནི་དམར་པོའོ། །དེ་ནས་ནི་ལྗང་གུའོ། །ཀུན་གྱི་ནང་དུ་ནི་སེར་པོ་ཤེས་པར་བྱའོ། །འཁོར་ལོ་ནི་རྩིབས་བཞི་པ། དཀར་པོའམ་ཡང་ན་སེར་པོར་བྱའོ། །དེའི་དབུས་སུ་བཅོམ་ལྡན་འདས་ཚེ་དང་བསོད་ནམས་ཡེ་ཤེས་ཀྱི་ཚོགས་དང་གཟི་བརྗིད་ཚད་མེད་པ་བཞུགས་སུ་གསོལ་ལོ། །ཤར་ཕྱོགས་ཀྱི་འཁོར་ལོའི་རྩིབས་ལ་ནི་ཕྱག་ན་རྡོ་རྗེ། གཡོན་པར་ནི་ཁྲོ་བོ་ཆེན་པོ་དགོད་དོ། །གཡས་པར་ནི་ནམ་མཁའི་སྙིང་པོ་དགོད་དོ། །རྒྱབ་ཏུ་ནི་སྤྱན་རས་གཟིགས་དབང་པོ་དགོད་པར་བྱའོ། །དེ་བཞིན་གཤེགས་པའི་འོད་ཀྱི་དཀྱིལ་འཁོར་ལ་རིག་པ་རྣམས་བྲིའོ་ཞེས་བྱ་བ་ནི། རྩ་བ་དང་སྙིང་པོ་དགེ་བའི་སྙིང་པོ་རྣམས་བྲི་བར་བྱའོ། །དབང་བསྐུར་བའི་བུམ་པ་ལྔ་དང༌། མཆོད་པའི་བུམ་པ་བརྒྱད་ཀྱང་བཞག་གོ །དབང་གི་བུམ་པ་ནི་འཁོར་ལོས་
སྒྱུར་བ་སྟེ། གཙོ་བོ་ལ་སོགས་པའི་སྔགས་ཀྱིས་བཏབ་ལ་བཞག་གོ །མཆོད་པའི་བུམ་པ་བརྒྱད་ལ་ནི་ལྕགས་ཀྱུ་ལ་སོགས་པའི་སྔགས་ཀྱིས་གདབ་བོ། །བདུག་པ་ལ་སོགས་པའི་མཆོད་པ་ལྔ་དང༌། བསང་བའི་བུམ་པ་ལས་ཐམས་ཅད་པའི་སྔགས་བཛྲ་ཡཀྵ་ཧཱུཾ་ཞེས་པ་བཏབ་པ་དབང་ལྡན་གྱི་མཚམས་སུ་གཞག་པར་བྱའོ། །གཞན་ཡང་མཆོད་པ་ལ་སོགས་པ་བླ་རེ་དང༌། བ་དན་དང༌། རྒྱལ་མཚན་དང༌། རྔ་ཡབ་དང༌། དྲ་བ་དང༌། དྲ་བ་ཕྱེད་པ་དང༌། རིན་པོ་ཆེ་ལས་བྱས་པའམ། རིས་སུ་བྲིས་པའམ། ཤིང་ལ་སོགས་པ་ལས་བྱས་པའི་རྟ་བབས་ཁྲུ་དྲུག་གམ་བདུན་པས་བརྒྱན་པར་བྱའོ། །སྒོ་བ་ཐམས་ཅད་ཀྱང་དེ་བཞིན་ནོ་ཞེས་པའི་སྒོ་བ་རྣམས་དང༌། མཚམས་བཞི་རུ་དྷཱུ་པེ་ལ་སོགས་པ་དང༌། ཁྱམས་སུ་བྱམས་བ་ལ་སོགས་པ་དང༌། རྟ་བབས་ཀྱི་གློ་གཉིས་སུ་བཀྲ་ཤིས་རྫས་བརྒྱད་དང༌། ཁོར་ཡུག་ལ་ཕྱོགས་སྐྱོང་ཀུན་དགོད་པར་བྱའོ། །དེ་ནས་དགོངས་ཀའི་དུས་སུ་རྣལ་འབྱོར་པ་དེ་ཉིད་རྡོ་རྗེ་འཛིན་མའི་ཕྱག་རྒྱ་བཅིངས་ཏེ་མེ་ཏོག་ཐོགས་ནས་དཀྱིལ་འཁོར་དུ་འཇུག་ཅིང་མེ་ཏོག་དོར་བ་བླངས་ཏེ། རང་གི་མགོ་ལ་བཅིང་བ་དང༌། ལྷག་ཆད་ཁ་བསྐང་བ་དང༌། །དབང་བླང་བ་བསྟན་པ་ནི་དེ་ནས་སྔགས་མཁན་དེ་ཉིད་ཞུགས་ལ་ཞེས་པའོ། །དེ་ནས་སྦྱོར་བ་དང་པོ་དང༌། དཀྱིལ་འཁོར་རྒྱལ་པོ་མཆོག་བསྐྱེད་དེ། དེ་ཡང་སྒོ་བ་བཞི་ནི་ཛཿ་ཧཱུཾ་བཾ་ཧོཿ་ལས་སོ། །ཧཱུཾ་ཏྲཱཾ་ཧྲཱིཿ་ཨ་ལས་ནི་དྷཱུ་པེ་ལ་སོགས་པའོ། །ཨོཾ་སརྦ་སཾ་སྐཱ་ར་ཞེས་པ་ལ་སོགས་པ་ལ་ལས་ནི་བསྐལ་པ་བཟང་པོའི་བྱང་ཆུབ་སེམས་དཔའ་བཅུ་དྲུག་གོ །ཕྱོགས་སྐྱོང་ལ་སོགས་པ་ནི་རང་རང་གི་རྩ་བའི་སྔགས་ལས་སོ། །དེ་ནས་སྤྱན་དྲང་བ་ནི་དཀྱུས་གསལ་ལོ། །དེ་ནས་མདུན་གྱི་ནམ་མཁའ་ལ་བྱོན་པ་དེ་རང་གི་རྟོག་པ་ཞི་བར་བྱ་བའི་ཕྱིར་བགེགས་བསྐྲད་དོ། །དེ་ནས་མཆོད་ཡོན་ཕུལ་བ་དང་བསྟོད་པས་བསྟོད་དེ། དེ་ནས་ལྕགས་ཀྱུ་ལ་སོགས་པས་དགུག་པ་ལ་སོགས་པ་བྱས་ནས་ཕྱག་རྒྱ་བཞིས་རྒྱས་གདབ་པ་དང་དབང་བསྐུར་པ་བྱས་ནས་མཆོད་པས་མཆོད་དེ། དེ་ནས་བཟླས་པ་ལ་བརྩོན་པའི་རྣལ་འབྱོར་པས་སློབ་མ་དབང་བསྐུར་བ་ཡང་བྱའོ། །ཡང་ན་བཟླས་པ་
ལ་བརྩོན་པས་མཚན་མ་བྱུང་བྱུང་དུ་བསྒྲུབ་པ་ལ་གནས་པར་བྱའོ། །མཚན་མ་ནི་དཀྱུས་གསལ་ལོ། །དེ་ནས་སློབ་མ་དབང་བསྐུར་བར་བྱ་སྟེ། དེ་ཡང་དང་པོར་སློབ་མ་གཞུག་པའི་ལས་བྱ་སྟེ། དེ་ཡང་རྒྱུད་ན་དཀྲུགས་པའི་མཚན་ཉིད་དེ། །ལག་ན་མེ་ཏོག་ཐོགས་པས་དང་པོར་གསོལ་བ་གདབ་བོ། །དེ་ནས་དམ་ཚིག་དབོག་གོ །དམ་ཚིག་གིས་དཀོན་མཆོག་གསུམ་དང་བྱང་ཆུབ་སེམས་ཞེས་པ་ལ་སོགས་པ་སྟེ་གོ་སླའོ། །དེ་ནས་དབབ་པའི་སྦྱོར་བ་བྱ་བ་ནས་མིག་གི་སྣང་བར་དྲི་བར་བྱའོ། །དེ་ནས་མེ་ཏོག་དོར་བར་བྱ་སྟེ། ཨོཾ་སརྦ་ཏ་ཐཱ་ག་ཏ་པྲ་ཏཱིཙྪ་ཧོཿ་ས་མ་ཡ་སྟྭཾ་ཞེས་པས་སོ། །དེ་ནས་ཕྲེང་བ་དེ་ཉིད་མགོ་ལ་བཅིངས་ཏེ་དབང་བསྐུར་བར་བྱའ་ཞེས་པ་ནི། མེ་ཏོག་གང་ལ་བབ་པའི་ཕྲེང་བ་དེ། ལྷ་དེས་དབང་བསྐུར་ནས་མཐར་དེ་ཉིད་ལ་ཐིམ་ནས་བྱིན་གྱིས་བརླབ་བོ། །དེ་ནས་མིག་ཕྱེ་སྟེ། དེའི་སྔགས་དཀྱིལ་འཁོར་གྱི་ལྷ་རྣམས་རྡོ་རྗེ་ལྕགས་ཀྱུ་ནས་བརྩམས་ཏེ། དཀྱིལ་འཁོར་བསྟན་པར་བྱའོ། །དེ་ནས་མེ་ཏོག་གང་ལ་བབས་པ་དེ་སློབ་མ་བསམས་ལ། དང་པོར་བུམ་པའི་དབང་བསྐུར་ཏེ། ཨོཾ་བཛྲ་དྷ་ར། རཏྣ་དྷ་ར་ཞེས་པ་ལ་སོགས་པའོ། །དེ་ནས་ནི་དབུ་རྒྱན་གྱི་དབང་བསྐུར་རོ། །དེའི་སྔགས་ནི་ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་བཛྲ་དྷ་ར་ཨཱ་ཛྙཱ་པ་ཡ་ཧཱུཾ་བྷྲཱུཾ་ཞེས་པ་ལ་སོགས་པས་སོ། །དེ་ནས་བཀའི་དབང་བསྐུར་བར་བྱ་སྟེ། ཨོཾ་སརྦ་ཏ་ཐཱ་ག་ཏ་ཨཱ་ཛྙཱ་ཏེ་དཱ་སྱ་མི་གྲི་ཧ་ན་བཛྲ་སུ་སིདྡྷ་ཡེ་ཞེས་པ་ལ་སོགས་པས་ནི་ དྲིལ་བུ ་སྦྱིན་ནོ། །ཨོཾ་བཛྲ་ཏིཥྛ་ཧཱུཾ་ཞེས་པས་རྡོ་རྗེ་སྦྱིན་ནོ། །དེ་ནས་ལས་རྣམ་བཞིའི་དབང་བསྐུར་ཏེ། རྡོ་རྗེ་རྒྱ་གྲམ་ལག་ཏུ་བྱིན་ལ་ཨོཾ་སརྦ་ཀརྨ་ཎི་ཀུ་རུ་བུདྡྷ་ནཱཾ་ཧཱུཾ་ཞེས་པས་སོ། །དེ་ནས་ཕྱིར་མི་ལྡོག་པའི་དབང་ཡང་གོང་ནས་འབྱུང་བ་བཞིན་དུ་སྦྱིན་པར་བྱའོ། །དེ་ནས་སློབ་མས་དབང་རྣམས་བརྟན་པར་བྱ་བའི་ཕྱིར་ཡོན་དབུལ་བར་བྱ་སྟེ། དཀྱུས་གསལ་ལོ། །དེ་ནས་སློབ་དཔོན་གྱིས་བུ་ལ་ཕན་པར་བྱ་བའི་ཕྱིར་སྒྲུབ་པའི་དཀྱིལ་འཁོར་སྦྱིན་པར་བྱ་སྟེ། དེ་ཡང་ཇི་ལྟ་བུ་ཞིག་སྦྱིན་སྙམ་པ་ལ། ཆོས་རྣམས་ཐམས་ཅད་དངོས་མེད་པར། །སེམས་ཀྱིས་བསྒོམ་པར་བྱ་བ་ནི། །ཨ་ལས་ཟླ་བའི་དཀྱིལ་འཁོར་བསམ།
ཞེས་པ་ནི་ཆོས་རྣམས་ནི་རྒྱུ་བ་དང་མི་རྒྱུ་བ་མེད་པའི་ཆོས་རྣམས་སོ། །དངོས་མེད་ཅེས་པ་ནི་ཕྱིའི་དངོས་པོ་མི་རྒྱུ་བ་ཡང་གཅིག་དང་དུ་མའི་རང་བཞིན་དང་བྲལ་བ། ནང་གི་རྒྱུ་བའི་དངོས་པོ་འཛིན་མའི་མཚན་ཉིད་ཅན་ཐམས་ཅད་ཀྱང་དུས་རྣམ་པ་གསུམ་གྱིས་མ་གྲུབ་བོ། །དེ་ལྟར་སེམས་ཀྱིས་བསྒོམ་པར་བྱ་བ་ནི་རྣལ་འབྱོར་བས་སྟོང་པར་བསྒོམ་པའོ། །ཨ་ལས་ཟླ་བའི་དཀྱིལ་འཁོར་བསམ། །ཞེས་བ་ནི་ཨོཾ་ཙིཏྟ་པྲ་ཏི་བེ་དྷཾ་ཀ་རོ་མི་ཞེས་པས་དེ་ལས་ཨ་ལས་ཟླ་བའི་དཀྱིལ་འཁོར་དུ་གྱུར་པར་བསྒོམས་ནས། རང་གི་ས་བོན་དེའི་དབུས་སུ། །བསམས་ནས་རང་གི་ཕྱག་རྒྱ་ཡང༌། །བསམ་ཞིང་དེ་བཞིན་དེ་ཉིད་དུ། །སྒྲུབ་པ་པོས་ནི་བསྒྲུབ་པར་བྱ། །ཞེས་བྱ་བ་ལ་རང་གི་ས་བོན་དེའི་དབུས་སུ་ཞེས་པ་ནི་ཟླ་བའི་དཀྱིལ་འཁོར་དེའི་དབུས་སུ་ལྷ་གང་དང་གང་སྒོམ་པ་དེའི་ས་བོན་བསྒོམ་པའོ། །དེའི་སྤྲོ་བསྡུ་ལས་རང་རང་གི་ཕྱག་མཚན་དུ་གྱུར་ཏེ། དེའི་སྤྲོ་བསྡུ་ལས་ལྷ་གང་དང་གང་བསྒོམ་པར་རྣལ་འབྱོར་བ་སྒྲུབ་པ་པོས་བསྒྱུར་བར་བྱའོ། །དེ་ཡང་ཇི་ལྟར་བསྒྱུར་སྙམ་པ་ལ། ལྷའི་རྣལ་འབྱོར་ཚུལ་དུ་བསྒྱུར་ཞེས་པ་སྟེ། དེ་བཞིན་གཤེགས་པ་དང༌། །བྱང་ཆུབ་སེམས་དཔའ་གང་འདོད་པའི་ལྷའི་རྣམ་པར་བསྒྱུར་རོ། །དེ་ནས་རང་གི་ས་བོན་དང༌། །ཞེས་པ་ནི་ལྷ་གང་དང་གང་སྒོམ་པའི་ས་བོན་རང་གི་སྙིང་གར་བསམས་ལ་སྐུ་གསུང་ཐུགས་ཀྱི་སྔགས་དང་ཕྱག་རྒྱས་ལྷའི་སྐུ་ཕྱག་རྒྱ་དེ་བྱིན་གྱིས་བརླབས་སོ། །དེ་ནས་གོང་འོག་ཏུ་བསྟན་པ་ཇི་ལ་པ་བཞིན་དུ་དབང་བསྐུར་བ་བསྟན་ཏེ། དེ་ཡང་བྱང་ཆུབ་སེམས་དཔའི་དབང་དང་སངས་རྒྱས་ཀྱི་དབང་གཉིས་སུ་ཤེས་པར་བྱ་སྟེ། སེམས་དཔའ་རྣམས་ལ་ནི་རིགས་ལྔའི་དབང་བསྐུར་རོ། །སངས་རྒྱས་རྣམས་ལ་ནི་རིན་པོ་ཆེའི་ཅོད་པན་གྱི་དབང་བསྐུར་རོ།། དེ་ནས་ལྷའི་ང་རྒྱལ་གྱིས་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་བསྒྲུབ་པར་བྱའོ། །དམ་བཅའ་བ་དང༌། རྒྱུད་ཀྱི་ཡོན་ཏན་བསྟན་པ་ནི་དཀྱུས་གསལ་ལོ། །ལྷའི་བུ་རྣམས་ཞེས་པ་ལ་སོགས་པས་ནི་སྦྱིན་སྲེག་གི་ལས་སྟོན་ཏེ། སྦྱིན་པ་ནི་
བདེ་བ་དམ་པ་དེའོ། །སྲེག་པ་ནི་ལས་དང་ཉོན་མོངས་པ་རྣམས་སོ། །དེ་ལ་ཡང་དཀྱིལ་འཁོར་སྤྱིའི་དབང་དུ་བྱས་པ་དང༌། རིགས་བཞིའི་འཁོར་ལོས་སྒྱུར་བའི་དབང་དུ་བྱས་པ་དང༌། ཁྲོ་བོའི་ཉི་མ་མེའི་དབང་དུ་བྱས་པ་རྣམས་སོ། །དེ་ལ་འདི་ནི་སྤྱིའི་དབང་དུ་བྱས་པ་སྟེ་དེ་ཡང་ལྷའི་བུ་རྣམས་ཞེས་པ་ནི་འཇིག་རྟེན་པའི་འཁོར་རྣམས་ལ་སྤྱིའི་མིང་ནས་པོས་པའོ། །ཞི་བ་ཞེས་པ་ནི་ཕྲིན་ལས་བཞི་ལས་དཀར་བའོ། །ཐུགས་རང་བཞིན་གྱིས་ཉོན་མོངས་པའི་མཚན་མ་འཇོམས་ཤིང་མགོ་གནོན་པས་ནི་ཞི་བའོ། །དེ་ལ་ཞི་བར་བྱ་བའི་ཐབས་ནི་ཕྲིན་ལས་འདིས་སོ། །དེ་ཡང་ཇི་ལྟ་བུ་ཞིག་སྙམ་པ་ལ། ཧོཾ་ཁུང་ཐ་མ་བར་མ་མཆོག །ཁྲུ་གང་ཁྲུ་དོ་ཁྲུ་བཞི་པ། །ཟླུམ་པོ་ཉིད་དུ་བྱས་ནས་ནི། །ཞེས་པ་ནི་ཐབ་ཁུང་ཐ་མ་ཁྲུ་གང་བ་དང༌། འབྲིང་ཁྲུ་དོ་བ་དང༌། རབ་ཁྲུ་བཞི་པ་སྟེ། གཟུང་འཛིན་གཉིས་སྤངས་ནས་གནས་པའི་ཕྱིར་ན་ཁྲུ་གང་པའོ། །ཐབས་དང་ཤེས་རབ་གཉིས་ཀྱི་ཚོགས་ཀྱི་ལམ་དང་སྦྱོར་བའི་ལམ་ལ་གནས་པའི་རྟགས་སུ་ཁྲུ་དོའོ། །སྦྱོར་བའི་ལམ་གྱི་ཡེ་ཤེས་བཞི་དང་ལྡན་པའི་རྟགས་སུ་ཁྲུ་བཞིའོ། །བདེན་པའི་དོན་དེ་ཉིད་མཐོང་བའི་རྟགས་སུ་ནི་ཟླུམ་པོར་བྱས་པའོ། །དེ་ལྟ་བུའི་དབུས་སུ་སྦྱིན་སྲེག་མིང་ངམ་ཤའམ་རུས་བ་ལས་བྱས་ན་རྣམ་པར་གྲོལ་བ་དབང་དུ་བྱ་བའི་གྲངས་ནི་དཀྱུས་གསལ་ལོ། །ཐབ་ཁུང་གི་དབུས་སུ་ཕྱག་མཚན་དགོད་པ་ནི་དེའི་དབུས་སུ་འཁོར་ལོ་ནི་ཞེས་པ་ལ་སོགས་པ་ནི་ཐབ་དེའི་དབུས་སུ་འཁོར་ལོ་རྩིབས་བརྒྱད་པ་དཀར་པོ་ཅིག་བྲི། ཐབ་ཀྱི་ཁོར་ཡུག་གི་མུ་རན་ལ་ཁ་ཁྱེར་སོར་བཞི་པ་དང་བརྒྱད་པ་དང་བཅུ་དྲུག་པ་བྱའོ། །དེ་ལ་རྡོ་རྗེའི་ར་བ་རྡོ་རྗེ་རྩེ་ལྔ་པ་དཀར་པོ་བྲིའོ། །འཁོར་ལོའི་དབུས་སུ་ཡང་རྡོ་རྗེ་དཀར་པོ་རྩེ་ལྔ་པ་བྲིའོ། །འཁོར་ལོའི་རྩིབས་ལ་ཤར་ལ་སོགས་པའི་རིམ་པར་རྡོ་རྗེ་དང༌། རིན་པོ་ཆེ་དང༌། པདྨ་དང་རྒྱ་གྲམ་བྲིའོ། །ཁ་ཁྱེར་གྱི་ཕྱི་རོལ་གྱི་རིམ་པ་ལ་པདྨ་འདབ་མ་བཅུ་དྲུག་ལ་སྡིག་པ་ཐམས་ཅད་འཇོམས་པར་བྱེད་པའི་མིང་བཅུ་གཉིས་ལས་སེམས་དཔའ་བཅུ་དྲུག་བསྐྱེད་པའི་ཕྱག་རྒྱ་སྣ་ཚོགས་གཞག་པར་བྱའོ། །ཕྱི་ཡི་རྡོ་རྗེ་རིགས་རྣམས་ཀྱི། །ཕྱག་
རྒྱ་རྣམས་ནི་ཕྱི་རོལ་བྲི། །ཞེས་པ་ནི་ཕྱི་རོལ་ལྷའི་སྣམ་བུ་རིམ་པ་གཉིས་པར་བྱས་པ་ལ་ཕྱོགས་སྐྱོང་བ་རྣམས་དང༌། ལྷ་ཆེན་པོ་བརྒྱད་ལ་སོགས་པ་བྲི། དེའི་ཕྱི་རིམ་གྱི་སྣམ་བུ་ལ་གཟའ་བརྒྱད་དང༌། རྒྱུ་སྐར་ཉི་ཤུ་རྩ་བརྒྱད་མིང་ངམ་ཐིག་ལེར་བྲིའོ། །དེ་ནས་སྒོ་དང་རྟ་བབས་ལ་སོགས་པ་བྲིའོ། །ད་ནི་མཆོད་པའི་ཁྱད་པར་སྟོན་ཏེ། བྱ་དང་བུམ་པ་གང་བ་དང༌། ཞེས་པ་ལ་སོགས་པ་གསུངས་ཏེ། སྡིག་པ་བཀྲུ་བའི་བུམ་པ་ཁྲོ་བོ་རྣམ་པར་རྒྱལ་བའི་བུམ་པ་དང༌། དབང་བསྐུར་བའི་བུམ་པ་དང༌། གཞན་ཡང་མཆོད་པ་རྣམ་པ་ལྔ་དང༌། གཏོར་མ་མང་པོ་དང༌། སེམས་ཅན་ཤི་བའི་མིང་གདགས་པའི་གཞི་སྟེ་ཡུངས་ཀར་དང༌། འབྲས་ཆེན་དང༌། མངར་གསུམ་དང༌། མར་དང༌། འོ་མ་དང༌། ལག་པན་དང༌། རྣམ་གཅིག་ཏུ་ཤ་དང༌། རུས་པ་དང༌། རྐང་ལ་སོགས་པ་དང༌། ཡམ་ཤིང་དང༌། དཱུར་བ་དང༌། ཀུ་ཤ་ལ་སོགས་པ་ཙནྡན་དཀར་པོས་ཁ་དོག་བསྒྱུར་ལ་སྦྱིན་སྲེག་བྱའོ། །ད་ནི་ཆས་གོས་བསྟན་ཏེ། དཀར་པོའི་གོས་ནི་བགོས་ནས་ཀྱང༌། །ཞེས་པས་ནི་ཆས་གོས་རྣམ་པ་ལྔ་དཀར་པོར་བྱ་བའོ། །སངས་རྒྱས་གཟུགས་ཅན་མི་འཇིགས་པས། །ཞེས་པ་ནི་རྣལ་འབྱོར་པ་རྣམ་པར་སྣང་མཛད་དམ། །བཅོམ་ལྡན་འདས་རྡོ་རྗེ་ཆེར་བསྒོམས་ལ་སྦྱིན་སྲེག་བྱའོ། །ཅིའི་ཕྱིར་སྙམ་པ་ལ། ངན་སོང་རྒྱུད་ན་གནས་པ་ཡི། །ཞེས་པ་ལ་སོགས་པའོ། །ཅིས་བྱ་བ་ནི་མར་དང༌། འོ་མས་ཞེས་པ་ལ་སོགས་པས་སོ། །ཅི་ཙམ་དུ་སྙམ་པ་ལ། དེ་ནི་བདེ་འགྲོར་ཞེས་པའི་བར་དུའོ། །དེ་ནི་ཞི་བའི་ལས་སོ། །ད་ནི་རྒྱས་པའི་ལས་བྱ་སྟེ། ཚེ་འདས་པ་ངན་སོང་ལས་ཐར་ནས་དེའི་བསོད་ནམས་དང༌། ཡེ་ཤེས་སྤེལ་བའི་ཕྱིར་རྒྱས་པའི་ལས་བྱའོ། །མཁས་པས་རྒྱས་པ་བྱ་དགོས་ཏེ། །ཞེས་པས་མཁས་པ་ནི་སྒྲུབ་པ་པོ་ལས་དང་བྱ་བ་ལ་མཁས་པའོ། །རྒྱས་པ་ནི་དཔལ་དང་འབྱོར་པ་འཕེལ་བར་རོ། །ཇི་ལྟར་འཕེལ་བར་བྱ་བ་བསྟན་པའི་ཕྱིར། ཁྲུ་དོའམ་ནི་ཁྲུ་བཞི་པ། །དེ་ལྟར་མཆོག་ནི་ཁྲུ་བརྒྱད་པར། བྱས་ནས་ཞེས་པ་ནི་མེ་
ཐབ་ཀྱི་ཚད་དོ། །དཀྱིལ་འཁོར་གྱི་ཕྱིར་ཚད་ནི་རབ་ལ་ཁྲུ་སུམ་ཅུ་རྩ་གཉིས་པའོ། །གཞན་གྱིས་ནི་དེ་ལས་བརྩམས་ནས་ཤེས་པར་བྱའོ། །དབྱིབས་ཇི་ལྟར་སྙམ་པ་ལ། ཧོམ་ཁུང་གྲུ་བཞི་པ། ཀུན་དུ་མུར་ན་ལྡན་པར་བྱ། །ཞེས་པ་ནི་མུ་རན་ནི་ཁ་ཁྱེར་ཏེ། ཐ་མལ་སོར་བརྒྱད་ཕྱིར་བསྐྱེད། སོར་བརྒྱད་ཁ་ཁྱེར་དུ་ལྷག་པར་བརྩིག །སོར་བརྒྱད་ཕྱིའི་ཁ་ཁྱེར་ལའོ། །དེའི་ཕྱི་རོལ་གྱི་དཀྱིལ་འཁོར་ལ་ལྷའི་སྣམ་བུ་དང༌། སྒོ་དང༌། རྟ་བབས་དང་བཅས་པར་བྲི་བར་བྱའོ། །འབྲིང་དང་རབ་ཀྱིས་ཉིས་འགྱུར་དུ་བསྐྱེད་པར་བྱའོ། །དེ་དབུས་པདྨ་རིན་ཆེན་ཅན། །འོད་ཟེར་སེར་པོ་ལྡན་པར་བྲི། །ཞེས་པ་ནི་ནང་དུ་པདྨའི་སྟེང་དུ་རིན་པོ་ཆེ་ཁ་དོག་སེར་པོར་བྲི་བར་བྱའོ། །ནང་གི་ཁ་ཁྱེར་ལ་རིན་པོ་ཆེ། སྟེང་གི་ཁ་ཁྱེར་ལ་པདྨ་བྲི་བར་བྱའོ། །ཕྱི་རོལ་དུ་ནི་རིགས་ལྔ་སོ་སོའི་ཕྱག་མཚན་བྲི་བར་བྱ་ཞེས་པ་ནི་དབུས་ཀྱི་རིན་པོ་ཆེའི་ཕྱི་རོལ་པདྨའི་སྟེང་དུ་རིགས་ལྔའི་ཕྱག་རྒྱ་འཁོར་ལོ། རྡོ་རྗེ། རིན་པོ་ཆེ། པདྨ། རྒྱ་གྲམ་རྣམས་བྲི་བར་བྱའོ། །དེ་ལྟར་ཕྱི་ཡི་ལྷ་རྣམས་དང༌། །ལྕགས་ཀྱུ་ལ་སོགས་བྲི་བར་བྱ། །ཞེས་པ་ནི་གོང་གི་ཞི་བ་ལྟར་ཤེས་པར་བྱའོ། །གོས་རྣམས་སེར་པོར་བསྒྱུར་ནས་ཀྱང༌། །ཞེས་པ་ལ་སོགས་པ་གོ་སླའོ། །རྒྱས་པའི་ལས་སོ། །ད་ནི་མཐོ་རིས་ཐོབ་པ་དེའི་དབང་དུ་ཐམས་ཅད་བསྡུ་ཞིང་དགའ་བར་བྱ་བའི་ཕྱིར་དབང་གི་ལས་བསྟན་ཏེ། ཧོམ་ཁུང་གཞུ་ཡི་དབྱིབས་འདྲ་ལ། །ཁྲུ་གང་བའམ་ཁྲུ་དོ་པ། །ཁྲུ་བཞིར་བྱས་པ་དེ་ཡི་དབུས། །ཞེས་པ་ལ་སོགས་པ་ལ། ཧོམ་ཁུང་ཟླ་བ་ཁམ་པ་ལྟ་བུར་བྱ་སྟེ། ཆུང་བ་ནི་ཁྲུ་གང་བའོ། །འབྲིང་ནི་ཁྲུ་དོ་བའོ། །རབ་ནི་ཁྲུ་བཞི་པའོ། །དེའི་དབུས་སུ་པདྨ་དམར་པོ་དེའི་དབུས་སུ་མདའ་དང་བཅས་པའི་གཞུ་བྲིའོ། །ཁོར་ཡུག་ལ་ནི་མདའ་དང་བཅས་པའི་གཞུ་ཁ་དོག་དམར་པོ་བྲི་བར་བྱའོ། །སྔགས་རྫོགས་པ་ནི་བརྟན་པར་ཡང༌། །ཕྱི་རོལ་དེ་དང་འདྲ་བར་བྱ། །ཞེས་པ་ནི་ཕྱི་རོལ་ལ་སོགས་པ་དང༌། ལྷ་དགོད་པ་ནི་ཞི་བ་ལྟར་བྲི་བར་བྱའོ། །དམར་པོར་བསྒྱུར་བའི་གོས་བགོས་ལ། །ཞེས་པ་ནི་ཆས་གོས་དམར་པོར་བྱའོ། །མེ་ཏོག་དམར་པོའམ་པདྨ་ཞེས་པ་ལ་སོགས་པ་ནི་རྫས་ཏེ་གོ་སླའོ། །དབང་གི་སྦྱིན་སྲེག་བྱའོ།། །།
ད་ནི་ཚར་གཅོད་པའི་དྲག་པོའི་ལས་བསྟན་ཏེ། དེ་ལ་གདོན་རྣམས་གཞོམ་པའི་ཕྱིར། དྲག་པོའི་ལས་ནི་བརྩམ་པར་བྱ། །ཞེས་པ་ནི་བར་ཆད་ཀྱི་བགེགས་ཚར་བཅད་པའི་ཕྱིར་ཞེས་པའོ། །ཕྱེད་དམ་གསུམ་མམ་ཁྲུ་གསུམ་མམ། །དེ་ལྟར་དམ་པ་ཁྲུ་དགུ་བྱ། །ཞེས་པ་ནི་རབ་འབྲིང་གི་ཚད་དོ། ཟུར་གསུམ་དང་ནི་ལྡན་པ་ལ། །ཞེས་པ་ནི་དབྱིབས་ཏེ་གྲུ་གསུམ་དུ་བྱའོ། །དབུས་སུ་རྡོ་རྗེ་རྩེ་དགུ་པ། །རྩེ་གསུམ་པ་དང་རྒྱ་གྲམ་པའི། །ཞེས་པ་ལ་སོགས་པ་ལ། དབུས་སུ་རྡོ་རྗེ་རྩེ་དགུ་པ་དེའི་ཕྱོགས་བཞིར་རྡོ་རྗེ་རྩེ་གསུམ་པ་དང༌། རྡོ་རྗེ་རྒྱ་གྲམ་དང༌། རྡོ་རྗེ་དབྱུག་པ་དང༌། རྩེ་གསུམ་པ་སྟེ། ཏྲི་ཤཱུ་ལའི་མགུལ་དུ་མི་མགོས་མཚན་པ་རྡོ་རྗེ་དང་ལྡན་པར་བྱས་པའོ། །མུ་ཁྱུད་ལ་ནི་དགྲ་སྟ་དང༌། རྡོ་རྗེ་རྩེ་གཅིག་པས་བསྐོར་བའོ། །གཞན་ཡང་ཞི་བ་ལྟར་ཐམས་ཅད་བྲི་བར་བྱའོ། །རྫས་ནི་གོ་སླའོ། །གོས་ནག་བགོས་ཤིང་ཁྲོས་ནས་ཀྱང༌། །ཞེས་པ་ནི་ཆས་གོས་བསྟན་པའོ། །འཇིག་རྟེན་གསུམ་ལས་རྣམ་རྒྱལ་བསྒྱུར་བ་ཞེས་པ་ནི་ཏིང་ངེ་འཛིན་བསྟན་པའོ། །དེ་ནས་དེ་ཡི་སྡིག་བཅོམ་ལུས། །ཞེས་པ་ལ་སོགས་པ་ནི་གོ་སླའོ། །དྲག་པོའི་སྦྱིན་སྲེག་གོ །མཆོད་བ་དང་ཏིང་ངེ་འཛིན་གྱི་རིམ་པ་ནི་འོག་ནས་འབྱུང་བ་ཉི་མ་མེའི་ལས་ཤེས་པར་བྱའོ། །དེ་ནས་ཚངས་པ་ལ་སོགས་པ། །ཞེས་པ་ནས། སྨོས་ཀྱང་ཅི་འཚལ་ཞེས་པའི་བར་གྱིས་ནི་འཁོར་བསྲུང་བར་དམ་བཅས་པ་སྟོན། གང་གིས་བརྟག་པའི་རྒྱལ་པོ་ཞེས་པ་ནས། དེ་བཞིན་གཤེགས་པ་ལགས་པར་འཚལ་བར་བགྱིའོ་ཞེས་པ་ནི་རྒྱུད་ཀྱི་དོན་འདི་གདན་སྤྱོད་པར་བཀུར་བར་བསྟན་པར་བགྱིའོ་ཞེས་པའོ། །དེ་ནས་བཅོམ་ལྡན་འདས་ཞེས་པ་ནས། ལེགས་པར་སྒྲུབས་ཤིག་ཅེས་པའི་བར་གྱིས་ནི་བཅོམ་ལྡན་འདས་ཀྱིས་གཏད་ནས་བསྒྲུབ་པར་བསྟན་ཏོ། །དེ་ནི་རྒྱུད་ཀྱི་ཕན་ཡོན་བསྟན་པའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངན་སོང་ཐམས་ཅད་ཡོངས་སུ་སྦྱོང་བའི་གཟི་བརྗིད་ཀྱི་རྒྱལ་པོ་སྐུ་གསུམ་གྱི་གཙུག་ཏོར་གྱི་རྒྱུད་ལས་རྒྱུད་ཕྱི་མའི་བཤད་པ་གསལ་བའི་སྒྲོན་མ་ཞེས་བྱ་བ་སློབ་དཔོན་ཀུན་དགའ་སྙིང་པོས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཀུ་མཱ་ར་ཀ་ལ་ཤ་དང༌། བོད་ཀྱི་ལོ་ཙཱ་བ་ཁྱུང་པོ་ཆོས་བརྩོན་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།