གནོད་སྦྱིན་གྱི་རྒྱལ་པོ་སྒྲུབ་པའི་ཐབས།
དགའ་རབ་རྡོ་རྗེ།
རྒྱ་གར་སྐད་དུ། ཡཀྵ་རཱ་ཛ་སཱ་དྷ་ནཾ། བོད་སྐད་དུ། །གནོད་སྦྱིན་རྒྱལ་པོ་སྒྲུབ་པའི་ཐབས། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །རྣམ་དག་ཡེ་ཤེས་དངོས་རང་བཞིན། །སྐྱོབ་པའི་སྟོབས་ཆེན་ལ་ཕྱག་འཚལ། །བསྟན་པ་དམ་པའི་གནས་འཆང་བའི། །དེ་ཡི་དགོས་པ་བསྒྲུབ་པའི་ཕྱིར། །གནོད་སྦྱིན་ཀུན་བདག་སྒྲུབ་ཐབས་བྲི། །དེ་ལ་དབེན་ཞིང་ཉམས་དགའ་བའི་གནས་སུ་སྡིག་བཤགས་ལན་ཆགས་སྦྱང༌། དེ་ནས་ཕན་གནོད་གང་གི་ལས་ཀྱང་གྲུབ་ཅིང་བདག་གིར་སྒྲུབ་སྟེ་སྟེགས་བུ་ཁྲུ་གང་པ་ལ་རིན་པོ་ཆེའི་གཞལ་ཡས་ཁང་བྲིས་ཏེ། དེ་རུ་རྒྱལ་པོ་སྐུ་དམར་ནག །གཡས་པ་ན་མདུང་དམར་རམ་དབྱུག་ཏོ། །གཡོན་པ་དབྱིག་གི་རྐྱལ་པ། དབུ་ཅོད་པན་གྱི་དབུས་ན་རིན་པོ་ཆེ་ཡོད་པ། སེང་གེ་དང་སྤྲིན་གྱི་གདན་ལ་བཞུགས་པ། རིན་པོ་ཆེའི་ཕྲེང་བས་ཕྱག་དང་ཞབས་བརྒྱན་པ། གཡས་ཀྱི་དཔུང་རྒྱན་རིན་པོ་ཆེ་དང་སེང་ཐོད་ཀྱིས་བརྒྱན་པའོ། །གཡས་ གཡོན་དུ 
་དུང་རྣ། བུམ་རྣ། རྣ་གསུམ། རྣ་བ་ཆེ། སེར་ལྗང༌། དམར་ལྗང༌། ལྗང་
ནག །དཀར་ལྗང་གསུས་པ་ལྡིར་བ་མདུང་དམར་དང༌། རྒྱལ་མཚན་དང་མདུང་དང་དབྱིག་ཏོ་བཅས་པ་དང་ནེའུ་ལེའོ། །མདུན་དུ་ཡུམ་རྒྱལ་པོ་དང་མཐུན་པ་ལ་ཕྱག་གཡས་པ་བུམ་པ། ཞབས་བརྐྱང་བསྐུམ་མོ། །དེ་ལྟ་བུ་ལེགས་པར་བྲིས་པ་བཞུགས་པར་བྱའོ། །དེ་ལ་དར་སེར་པོའམ་ཟ་འོག་གི་གདུགས། །དར་དམར་པོའི་ཡོལ་བ། དཀར་པོའི་རྒྱལ་མཚོན། ལྗང་གུ་དང་མཐིང་གའི་རུ་མཚོན་བྲི་བར་བྱའོ། །སྤོས་དང་མེ་ཏོག་གི་ཕྲེང་བ་ལ་སོགས་པ་དགྲམ་པར་བྱའོ། །དེ་ནས་དྲི་དང་ལྡན་པའི་སྟེང་དུ་མཆོད་ཡོན་དང༌། མེ་ཏོག་དང༌། སྤོས་དང༌། མར་མེ་དང། དྲི་ཆབ་དང༌། ལྷ་བཤོས་དང༌། ལྷ་བཤོས་ཁྲུ་གང་བ་གཅིག་ལ་སྨྱུག་མ་གཙང་མ་ལ་རྩེ་མོ་རྩི་ཏྲ་ཀ་དང་སྙིང་ཞོ་ཤ་།དེའི་འོག་ཏུ་ཆུ་སྲིན་གྱི་རྒྱལ་མཚན། དེའི་འོག་ཏུ་རིན་པོ་ཆེ་སྣ་ལྔ། སྤོས་ལྔ། ཟ་འོག་དང༌། དར་སྣ་དང༌། སྟག་རས་དང༌། བསེའི་མེ་ལོང༌། དེའི་སྟེང་དུ་བུ་རམ་དང། སྦྲང་རྩི་དང༌། སྨན་སྣ་ཚོགས་དང༌། མར་དང་ཐུད་དང༌། ལུག་དང་གཡག་གི་སྙིང་དང་དཀོར་ཆ་རྣམས་ཀྱིས་བརྒྱན་ཏེ་ཐད་དུ་གཞག་གོ །དེའི་རྩར་ཆང་ལ་རིན་པོ་ཆེ་དང་ལྡན་པར་བྱའོ། །དེ་ནས་བྱང་དུ་ཁ་བལྟས་ཏེ་སྟན་ལ་འདུག་ནས། བདག་ཉིད་ཕྱག་ན་རྡོ་རྗེ་སྐུ་གསུང་ཐུགས་སུ་བསྐྱེད་དོ། །མཆོད་པ་རྣམས་བྱིན་གྱིས་བརླབས་ཏེ། སྦོས་ལ་སོགས་པ་རང་རང་གི་སྔགས་ཀྱིས་རྒྱ་ཆེ་བར་བྱིན་གྱིས་བརླབ་བོ། །རྟེན་གྱི་དཀོར་ཆ་སྭ་ཡོངས་སུ་གྱུར་པ་ལས་རྟེན་རྣམས་མང་ཞིང་མཛེས་པར་བྱའོ། །ཆང་ཨ་ཡོངས་སུ་གྱུར་པ་ལས་བདུན་རྩིར་བྱའོ། །དེ་ནས་རང་གི་མཆོད་པ་དང་བསྟོད་པ་ཡན་ཆད་ཡོངས་སུ་རྫོགས་པར་བྱའོ། །དེ་ནས་ཉམས་དགའ་བ་ཉིད་ཀྱིས་ཆོས་སྐྱོང་བ་མཉེས་པར་བྱ་བའི་ཕྱིར་བསྙེན་པ་བྱས་ཏེ་དེ་ལ་འཇུག་པ་ནི། ཨོཾ་སརྦ་དེ་ཝ་མཎྜལ་ཡེ་ཛཿཧཱུཾ་བཾ་ཧོཿ། ཨེ་མ་ཧོ་ས་ན་ཀ་ག་ན་ནྟ་པ་ཀ་རེ་སླེ་ཛཿཧཱུཾ་བཾ་ཧོཿས་མ་ཡ་སྭཱ་ཧཱ། །མཆོད་པའི་དུས་སུ་གདགས་སོ་ཞེས་བརྗོད་པའི་དོན་ཏོ། །ཐུགས་ཀའི་ཧཱུཾ་ལས་བརྗོད་པའི་ཉི་ཟེར་ལྟར་འཐོན་ནས་རྒྱལ་པོའི་ཐུགས་ཀར་ཐིམ་པས། དེས་ཆོས་སྐྱོང་བའི་ཐུགས་སྔོན་བཞིན་དུ་གཡོས་ནས་གདན་སེང་གེའི་ཤུགས་ཀྱིས་རིན་པོ་ཆེའི་ཁང་པ་དང་ཉིད་ལ་སོ་སོར་ཐིམ་པར་བསམས་ཏེ་སྟོང་བརྗོད་དོ། །དེ་ནས་མཆོད་པ་
དབུལ་ཏེ། རྩ་བའི་སྔགས་སྦྱར་བ་དང་བཅས་པས་དབུལ་ཏེ། ཨོཾ་ནི་རི་ཏེ་ཧཱུཾ་ཁཾ། ཞལ་དུའོ། །བཛྲ་པུཥྤེ་ཧཱུཾ་སྭཱ་ཧཱ། མེ་ཏོག་སྤྱི་བོར་རོ། །ཨོཾ་བཛྲ་དྷཱུ་པེ་ཧཱུཾ་སྭཱ་ཧཱ། དྲི་ཐུགས་ཀར་རོ། །ཨོཾ་བཛྲ་དཱི་པྤེ་ཧཱུཾ་སྭཱ་ཧཱ། མར་མེ་རྒྱབ་ཏུའོ། ཨོཾ་བཛྲ་གནྡྷེ་ཧཱུཾ་སྭཱ་ཧཱ། དྲི་ཆབ་མདུན་དུའོ། །ཨོཾ་བཛྲ་ནཻ་བི་བྱེ་ཧཱུཾ་སྭཱ་ཧཱ། ལྷ་བཤོས་ཕྱག་ཏུའོ། །དཀོར་ཆ་དག་ཐོགས་ཏེ་སྔགས་ཀྱི་ཚིག་བརྗོད། རང་གི་ལུས་ཞིང་གི་རྡུལ་སྙེད་དུ་སྤྲུལ་ཏེ་ཉེས་པ་མ་ལུས་པ་དང་བས་མཐོལ་ཞིང་རྫས་གཅིག་ཀྱང་འཇིག་རྟེན་གང་བར་སྤྲུལ་ཏེ། ཉེས་པ་བྱང་ཞིང་རྗེས་སུ་མཐུན་པའི་ཚིག་གིས་གསོལ་བ་གད་བ་པོ། །དེ་ནས་བསྟོད་ཅིང་བསྐུལ་བ་ནི། །སྔོན་ཚེ་གསང་བདག་སྤྱན་སྔ་རུ། །དམ་ཆོས་བསྲུང་པར་ཞལ་བཞེས་བཞིན། །སྐུ་གསུང་ཐུགས་ཀྱི་གདུང་འཚོབ་པའོ། །སེམས་བསྐྱེད་ལྡན་པའི་རྣལ་འབྱོར་བའི། །གནོད་པའི་བར་ཆོད་མང་པོ་རྣམས། །སྟོབས་ལྡན་རྒྱལ་ཆེན་ཡབ་ཡུམ་ཡང༌། །གནོད་སྦྱིན་ཕོ་མོ་སྡེ་བརྒྱད་བཅས། །བསྟན་པ་བསྲུང་བར་གཉེར་གཏད་བཞིན། །རྫུ་འཕྲུལ་བྱེ་བ་སྣ་ཚོགས་ཀྱིས། །གནོད་པ་ཐམས་ཅད་རྔུལ་དུ་རློག །དམ་བཅས་ལས་ལ་མ་བརྩོན་ན། །སངས་རྒྱས་ཀུན་གྱི་སེམས་གྱུར་བའི། །རང་གི་བྱང་སེམས་གཉེན་པོར་འགྱུར། །དེ་དྲན་བྱོས་ལ་ལས་རྣམས་གྱིས། །ཞེས་བརྗོད་ལ། དམ་ཚིག་རྩ་བའི་སྔགས་ཀྱིས་བདུད་རྩིའི་ཞལ་དུ་དབུལ་ལོ། །དེ་ནས་དགོངས་པ་སྔགས་ཞལ་དུ་ཐིམ་པས་ཉིད་ཀྱི་དམ་ཚིག་དེ་ཐུགས་ཀ་ནས་ཕྱུང་ལ་བདག་ལ་ཐིམ་པས་རྒྱལ་པོ་དང་དབྱེར་མེད་པར་བསྒོམས་པས་བརྟན་པར་བྱའོ། །མཆོད་པ་རྣམས་སྟོང་ངམ་ལྔ་སྟོང་ཞིང་དབུལ་ལོ། །དེ་ལྟར་བྱས་པས་ཉེས་པ་བྱང་བའི་རྟགས་རིམ་བར་འབྱུང་སྟེ། འཁྲུ་བ་དང༌། བསྐུར་བ་དང༌། དབང་བསྐུར་བ་དང༌། སེམས་ལ་དོགས་པ་མེད་པ་ལ་སོགས་པ་འབྱུང་ངོ༌། །དེ་ལྟར་འབུ་མ་ཚོ་གཅིག་བཟླས་པར་བྱའོ། །དེ་དེ་ལ་ཡིད་བརྟན་པ་དང༌། ཆང་གི་ནང་དུ་ཤ་དང་བདུད་རྩི་དང༌། མི་རྟའི་དངས་མའི་ཁྲག་བླུགས་ལ་བསྒྲུབ་པར་བྱ་སྟེ། ཉེ་བར་དགུག་པ་ལ། ན་མོ་རཏྣ་ཏྲ་ཡཱ་ཡ། ན་མོ་བཻ་ཤྲ་བ་ཎ་ཡེ་མ་ཧཱ་ཡཀྵ་ཀུ་བེ་ར་པ་ར་མཱ་རྠ་ནི་ཛཿཛ་ཧེ་ཛ་ཧི་ཞེས་བརྗོད་པའི་དོན་ནི་བདག་ལ་རྒྱལ་པོ་བསྟིམས་ལ། འཁོར་གནོད་སྦྱིན་ཕོ་མོ་སྡེ་བརྒྱད་ཁུགས་པར་བཀུག་ལ་
དྲང། རྒྱལ་པོ་ཡང་མདུན་དུ་བཞུགས་ཏེ་འཁོར་དང་བཅས་པའི་དགུག་པ་གཉིས་ནི་བསྙེན་པའི་ཉམས་ལས་རིག་པར་བྱའོ། །དགོངས་པ་ནི་སྔགས་ཉིད་དགུག་བྱའི་སྲོག་ཡིན་པའི་ནུས་པ་དང་ལྡན་པའི་ཕྱིར་འཁོར་ལོ་ཕྲེང་བ་ལྟ་བུ་སོ་སོར་བསྟིམས་པས། རབ་ཏུ་དང་བས་མང་པོ་དངུལ་ཞིང་གུས་པས་བདག་གིར་གྱུར་པའི་རྩེ་གཅིག་པའི་བསམ་གཏན་གྱིས་བཟླས་ཏེ། དེ་ལ་མ་བརྟེན་ན་ནུས་པ་འགའ་བྱུང་ཡང་དབང་དུ་མི་འགྱུར། མཆོད་པ་སྔགས་དང་བསྡོམས་ལ་དབུལ་ལ་བཟླས་པ་དྲུག་འབུམ་དུ་བྱའོ། །རྟགས་རབ་སྐུ་འབྱུང་བ་དང༌། འབྲིང་ས་དང་བར་སྣང་ལ་སྒྲ་དང་འོད་འབྱུང༌། ཐ་མ་དམག་ཚོགས་དང་འགྲོ་བ་ལ་དབང་བྱེད་པའོ། །ཆོ་འཕྲུལ་ནི་ཐ་དད་དོ། །ཕན་པ་ནི་བཟླས་པའི་འདི་རྫོགས་པ་དང་རྫས་ཅི་འབྱོར་པ་ཕུལ་ལ་གཤེགས་སུ་གསོལ། རྫས་རི་རྩེ་ལ་བསྐྱལ་ལོ། །དུས་ཀྱི་མཆོད་པ་བྱའོ། །དེས་ནི་ཆད་པ་དང་བྲལ་བར་འགྱུར་རོ། །ཆད་པས་གནོད་པའི་སྦྱོར་བ་ནི། །སྦྱོར་བའི་རིམ་པ་ནུས་པ་རྫོགས་པ་དང་ཁྲུ་གང་པའི་བྲུབ་ཁུང་གྱེན་ཐུར་དུ་ཕྱེད་ཕྱེད་བརྩིག་ཅིང་བྲུས་ལ་ར་ཁྱི་ཕག་གི་བྲུས་པ་དུར་ཁྲོད་ཀྱི་སོལ་བས་བྱུགས་ལ། དེའི་ནང་དུ་འབྲུ་སྣ་ལྔའི་ལིངྒ་བྱས་ལ། མིང་རུས་བ་མ་ཆད་པའི་རྒྱུ་གྲོ་ག་ལ་བྲིས་ལ་སྙིང་གར་བཅུག་ལ་མར་གས་གདབ། ཤའི་གཏོར་མ་དང༌། རགྟ་དང༌། བདུད་རྩི་དང༌། ལྷ་བཤོས་གྲུ་གསུམ་མཐོང་ནག་གོ །ཨ་ནུ་རུ་ཀི་པི་ཁཱ་ཏི། སུ་རུ་པ་ན་ཁཱ་ཧི། ཀུ་བེ་ར་ཙནྡྲ་ཁཱ་ཧི། ཀུ་བེ་ར་མརྟ་ཁཱ་ཏི་ཞེས་དབུལ་ཞིང་བསྟབས་སོ། །དེ་ནས་ཁྲག་གསུམ་དང་ཚ་གསུམ་དང་པདྨའི་ཤ་ཁྲག་ལ་ཐུན་སྔགས་ལ། དུན་དུན་རྨུགས་ཤང་ཧ་ལ་ཧ་ལ། ཙལ་ཙལ། པ་ཙ་པ་ཙ། ཧི་མ་ཧི་མ། རྦད་ན་རྦད་ན། རྦད་པུ་ལེ་རྦད་མེ་ཤ་ཡ་མཱ་ར་ཡ་མཱ་ར་ཡ་ཕཊ་ཅེས་ཞག་བདུན་པར་དུ་མ་ཆད་པར་བརྡེག་གོ །ཐ་མ་བེ་ཅོན་དང་གྲིས་བཏུབ་ཅིང་བརྡུང་ངོ༌། །དེའི་དོན་ནི་རླུང་ལ་སྔགས་ཞོན་ནས་སྲོག་གི་གནས་སུ་ཐིམ་པས་སེམས་འཁྲུལ་ནས་གནོད་སྦྱིན་ཕོ་མོས་སྒོ་ཀུན་ནས་བཅུད་བསྲེག་ཅིང་བཞུ་བར་བྱའོ། །དེ་ནས་གཟུགས་ཀྱང་མཆོད་པར་དབུལ་ཞིང་བསྟབས་ལ་གཏོར་མ་དུག་ཟོར་དུ་འཕང་བར་བྱའོ། །དེ་ནས་མཆོད་པའི་རིང་ལུགས་ཀྱིས་བཤགས་པ་
ཕུལ་ལ་གཤེགས་སུ་གསོལ་ལོ། །ལས་རྗེས་སྣང་བ་མེད་པར་བྱ། །འགྲུབ་ན་མིང་དང་རྗེས་ལ་བཏབ་པ་ཆད་པ་འབྱུང་ངོ༌། །རྒྱུན་དུ་མཆོད་ཅིང་བསྙེན་པ་བྱས་ན་ཅི་ཡང་འགྲུབ་ངེས་པས་ཡལ་བར་མི་གནས་སོ། །རྣལ་འབྱོར་དགེ་སྦྱོར་བརྟན་པ་ཡིས། །དངོས་གྲུབ་བརྟན་པའི་རྒྱས་བསྟན་ཕྱིར། །སྟོབས་ལྡན་རྒྱལ་ཆེན་ཉེར་སྒྲུབ་བྱས། །མི་མཐུན་ཀུན་གྱི་གཉེན་པོར་ཤོག །རྒྱལ་པོ་རྣམ་ཐོས་སྲས་ཀྱི་གསང་བའི་སྒྲུབ་ཐབས་སློབ་དཔོན་དགའ་རབ་རྡོ་རྗེས་མཛད་པ་རྫོགས་སོ།།