བྱང་ཆུབ་སེམས་དཔའི་སྤྱོད་པ་ལ་འཇུག་པའི་ལེགས་པར་སྦྱར་བ།
དགེ་བའི་ལྷ།
རྒྱ་གར་སྐད་དུ། བོ་དྷི་སཏྭ་ཙཱ་ཪྻ་ཨ་བ་ཏཱ་ར་སང་ཀཱ་ར། བོད་སྐད་དུ། བྱང་ཆུབ་སེམས་དཔའི་སྤྱོད་པ་ལ་འཇུག་པའི་ལེགས་པར་སྦྱར་བ། བཅོམ་ལྡན་འདས་གསུང་གི་མངའ་བདག་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ངོ་བོ་ཉིད་ནི་བྱང་ཆུབ་པའི། །རྒྱ་མཚོ་དེ་ལ་ཕྱག་འཚལ་ཏེ། །བདག་འདྲའི་སྤྱོད་པའི་ཡན་ལག་ལ། །འཇུག་ཕྱིར་ལེགས་སྦྱར་བཤད་ཙམ་བྱ། །དམ་པ་རྣམས་ཀྱིས་ནི་ཐོག་མ་དང་བར་དང་ཐ་མར་དགེ་བ་མངོན་པར་འཕེལ་བར་བྱ་བ་ཡིན་པས། བདེ་གཤེགས་ཞེས་བྱ་བ་ལ་སོགས་པ་སྨོས་པ་ཡིན་ཏེ། འདིར་ཕྱག་འཚལ་བ་ནི་དང་པོར་དགེ་བའོ། །ཆོས་བསྟན་པ་ནི་བར་དུ་དགེ་བའོ། །དགེ་བའི་རྩ་བ་ཡོངས་སུ་བསྔོ་བ་ནི་དགེ་བའི་རྩ་བ་མངོན་པར་འཕེལ་བ་ཡིན་པས་ཐ་མར་དགེ་བ་ཡིན་ནོ། །དེ་ལ་བདེ་བར་གཤེགས་པ་ནི་རྟོགས་པར་བྱ་བའི་ལྷག་མ་མི་མངའ་བས་ན་ཡོངས་སུ་རྫོགས་པར་ཐུགས་སུ་ཆུད་པའི་ཕྱིར་བདེ་བར་གཤེགས་པའོ། །ཆོས་ཀྱི་སྐུ་མངའ་བ་ནི་ལུང་དང་རྟོགས་པའི་བདག་ཉིད་ཅན་གྱི་དམ་པའི་ཆོས་ཀྱི་ཚོགས་ནི་ཆོས་ཀྱི་སྐུ་སྟེ་དེ་དང་བཅས་པའོ། །སྲས་བཅས་ནི་ཉིད་ལས་འཁྲུངས་པའི་སྲས་ཏེ། བྱང་ཆུབ་སེམས་དཔའ་དང་བཅས་པའོ། །
ལ་ལ་ལས་ནི་བདེ་གཤེགས་དམ་པའི་ཆོས་དང་དགེ་འདུན་བཅས་ཞེས་ཟེར་རོ། །བཙུན་པ་ནི་ཉན་ཐོས་ཆེན་པོ་བརྒྱད་ལ་སོགས་པ་ལ་བྱ་སྟེ། དེ་དག་མ་ལུས་པ་ཀུན་ལ་ཕྱག་འཚལ་བའོ། །དཀོན་མཆོག་གསུམ་པོ་གཙོ་བོར་གྱུར་པས་སོ་སོར་སྨོས་པ་ཡིན་ལ། ད་དག་ཀྱང་ཕྱག་བྱ་བར་འོས་པ་ཡིན་པས་གུས་པས་ཕྱག་འཚལ་ཏེ། ཞེས་བྱ་བ་སྨོས་ཏེ། འདིར་ཡོན་ཏན་དམ་པའི་བསྟོད་པ་རྒྱ་ཆེ་བ་དང༌། མཆོད་པ་ཁྱད་པར་དུ་འཕགས་པའི་དམིགས་པ་ཡིད་ལ་བྱེད་པ་ལས་བྱུང་བའི་མོས་པའི་བསམ་པ་ཤིན་ཏུ་ཕུལ་དུ་བྱུང་བའི་དགའ་བ་རྒྱ་ཆེ་བའི་མཆོད་པ་དང་བཅས་པས་ལུས་ཞིང་ཐམས་ཅད་ཀྱི་རྡུལ་སྙེད་ཀྱིས་བཏུད་ཅིང་ཕྱག་འཚལ་ལོ། །དེ་ལྟར་ཕྱག་བཙལ་ནས་ཅི་ཞིག་བྱེད་ཅེ་ན། བདེ་གཤེགས་སྲས་ཀྱི་ཞེས་བྱ་བ་ལ་སོགས་པ་སྨོས་ཏེ། བདེ་བར་གཤེགས་པའི་བདག་ཉིད་ནི་ཆོས་ཀྱི་སྐུ་སྟེ། དེའི་དབང་དུ་བྱས་པ་ལས་སྐྱེས་པས་ཆེན་པོ་ཐོབ་པ་དང༌། རྒྱལ་གནས་པ་རྣམས་སོ། །དེ་རྣམས་ཀྱི་སྡོམ་པ་ནི་མི་དགེ་བ་སྤོང་བ་དང༌། དགེ་བ་ལ་འཇུག་པ་དང༌། སེམས་ཅན་གྱི་དོན་བྱ་བའོ། །དེ་ཡང་བཅོམ་ལྡན་འདས་ཀྱིས་ཤིན་ཏུ་ཟབ་ཅིང་རྒྱ་ཆེ་བའི་བདག་ཉིད་ཅན་དུ་གསུངས་ལ། དེར་བྱང་ཆུབ་ཏུ་སེམས་བསྐྱེད་པའི་ཕན་ཡོན་ལ་སོགས་པའི་དོན་རྣམ་པ་བཅུ་པོ་གང་ཡིན་པ་དེས་འཇུག་པའི་བདེ་བར་གཤེགས་པའི་སྲས་ཀྱི་སྡོམ་པ་ལ་འཇུག་པ་བསྟན་པར་བྱའོ། །དེ་ཡང་ལུང་བཞིན་ཞེས་བྱ་བ་སྟེ། ལུང་གི་དོན་དང་མི་འགལ་བར་རོ། །ལུང་ལས་ནི་བཅོམ་ལྡན་འདས་ཀྱིས་རྒྱ་ཆེར་གསུངས་སོ་ཞེ་ན། མདོར་བསྡུས་ནས་ནི་ཞེས་བྱ་བ་སྨོས་སོ། །དེ་ལྟ་ཡིན་དུ་ཆུག་ན། ཅི་འདིར་སྔོན་ཆད་མ་བྱུང་བ་གཞན་འགའ་ཞིག་སྨས་སམ། ལུང་ཇི་ལྟ་བ་ཡིན་ཞེ་ན། སྔོན་ཆད་ཅེས་བྱ་བ་ལ་སོགས་པ་སྨོས་སོ། །སྡེབ་སྦྱོར་མཁས་པས་སྔོན་མ་ཡིན་ནམ་ཞེ་ན། སྡེབ་སྦྱོར་ཞེས་བྱ་བ་ལ་སོགས་པ་སྨོས་སོ། །གང་གི་ཕྱིར་འདིར་སྡེབ་སྦྱོར་ལ་མཁས་པ་མེད་པ་ཉིད་ཀྱི་ཕྱིར་གཞན་གྱི་དོན་དུ་བདག་གིས་འདི་གཞུང་དུ་ཉེ་བར་སྦྱར་བ་མ་བྱས་སོ་ཞེས་བྱ་བར་དགོངས་སོ། །དེ་ལྟར་གལ་ཏེ་གཞན་གྱི་དོན་དུ་མ་བྱས་ན་ཅིའི་ཕྱིར་བྱེད་ཅེ་ན།
དེའི་ཕྱིར་རང་གི་ཞེས་བྱ་བ་ལ་སོགས་པ་སྨོས་ཏེ། ཡིད་ལ་འདིར་བྱང་ཆུབ་ཀྱི་སེམས་ཏེ། དེ་བསྒོམ་པའི་ཕྱིར་ཞེས་བྱ་བ་ནི་བསླབ་པའི་ཕྱིར་རོ། །བཅོམ་ལྡན་འདས་ཀྱིས་ལུང་ལས་ཚིག་གི་དོན་རྒྱ་ཆེར་གསུངས་པ་དེ་ལས་མདོར་བསྡུས་ཏེ་རང་གི་ཡིད་ལ་བསྒོམ་པར་བྱ་བའི་ཕྱིར་བདག་གིས་འདི་བྱས་སོ་ཞེས་པའོ། །དེ་ཡང་ཇི་ལྟར་ཞེ་ན་དགེ་བ་བསྒོམ་ཕྱིར་ཞེས་བྱ་བ་ལ་སོགས་པ་སྨོས་ཏེ། ཡིད་ལ་དགེ་བ་བསྒོམ་པར་བྱ་བ་ནི་བདག་གིས་དད་པའི་ཤུགས་ཤིན་ཏུ་དག་པ་དང་འཕེལ་བར་འགྱུར་བའི་ཕྱིར་བྱས་པའོ། །རེ་ཞིག་ཅེས་བྱ་བའི་སྒྲས་ནི་གཞན་གྱི་དོན་ལ་ཡང་ལྟོས་པ་སྟེ། འདི་ནི་གཞན་གྱི་དོན་དུ་འགྱུར་ཏེ། རྒྱུད་ཤིན་ཏུ་དག་པའི་ཡིད་དང་ལྡན་པ་རྣམས་ཀྱི་གོམས་པ་ཕུལ་དུ་བྱུང་བར་འགྱུར་རོ། །དེ་བས་ན་གཞན་གྱི་དོན་དུ་ཡང་འགྱུར་བ་ཡིན་པས་དེའི་ཕྱིར་བདག་དང་ཞེས་བྱ་བ་ལ་སོགས་པ་སྨོས་ཏེ། བདག་དང་སྐལ་པ་མཉམ་ཞིང་རིགས་མཚུངས་པ་གང་ཡིན་པ་གཞན་དག་ཀྱང་ཡོད་པས་དེའི་དོན་དུ་ཡང་འགྱུར་བ་མཐོང་བས་བདེ་བར་གཤེགས་པའི་སྲས་ཀྱི་སྡོམ་པ་ལ་འཇུག་པ་བརྩམས་པ་འདི་ནི་དོན་ཡོད་པ་ཡིན་ནོ། །སྡེབ་སྦྱོར་བྱེད་པའི་དོན་ནི་ཁོ་བོ་མི་འདྲིའི། བརྗོད་པར་བྱ་བ་འདྲི་སྟེ། བརྗོད་པར་བྱ་བ་ནི་འཇུག་པའི་དོན་དུ་འགྱུར་བ་ཡིན་ནོ་ཞེ་ན། དེ་ནི་བདེན་མོད་ཀྱི། གཞུང་རྩོམ་པ་ལ་ནི་རྟོག་པ་དང་ལྡན་པ་དག་བརྗོད་པར་བྱ་བའི་གཏམ་ལ་བརྟེན་པ་ཉིད་ཀྱིས་ན་གཏམ་ཡང་བདེ་བར་གཤེགས་པའི་སྲས་ཀྱི་སྡོམ་པ་ལ་འཇུག་པ་ཡིན་པས་དེ་ལྟར་ན་བདག་དང་གཞན་གྱི་གཏམ་གྱི་དགོས་པ་ཡིན་ལ། དེ་གཉིས་ཐབས་དང་ཐབས་ལས་བྱུང་བའི་ཚུལ་དུ་འབྱུང་བ་ཉིད་ནི་འབྲེལ་བ་ཡིན་ནོ། །དེ་བས་ན་བདེ་བར་གཤེགས་པའི་སྲས་ཀྱི་སྡོམ་པ་ལ་འཇུག་པ་ནི་བརྗོད་པར་བྱ་བ་ཡིན་ནོ་ཞེས་བསྟན་པར་འགྱུར་རོ། །གླེགས་བམ་ལ་ལ་ལ་ཚིག་འདི་མེད་དེ། བསླབ་པ་ཀུན་ལས་བཏུས་པ་ཉིད་ཡིན་མོད་ཀྱི། དེར་རིགས་པ་མ་ཡིན་ཏེ། བསླབ་པ་ཀུན་ལས་བཏུས་པ་ཉིད་ཡིན་པའི་ཕྱིར་བདེ་བར་གཤེགས་པའི་སྲས་ཀྱི་སྡོམ་པ་ལ་འཇུག་པ་མ་ཡིན་ལ། འདིར་ནི་བདག་གིས་བྱང་ཆུབ་སྤྱོད་པ་ལ། །འཇུག་པ་རྣམ་པར་བསམས་
པ་ཞེས་བཤད་པའི་ཕྱིར་དང༌། བྱེད་པ་པོ་གཅིག་ཡིན་པའི་ཕྱིར་རིགས་པ་ཡིན་ཏེ། གཞན་དུ་ན་ཉན་པ་པོའི་འཇུག་པའི་ཡན་ལག་ཏུ་འགྱུར་བའི་འབྲེལ་པ་ལ་སོགས་པ་མ་སྨྲས་པར་འགྱུར་བས་འདི་ནི་འདིར་རིགས་ལ། སངས་རྒྱས་དང་ནི་བྱང་ཆུབ་སེམས་དཔའ་དག །ཅེས་བྱ་བ་ལ་སོགས་པའི་ཚིགས་སུ་བཅད་པ་ནི་དེར་སྨོས་པའི་རིགས་སོ། །ཅི་ཚེ་འདི་ཉིད་དུ་དགེ་བ་ལ་འབད་པར་ཅི་ལྟར་ནུས་ཤེ་ན། དེའི་ཕྱིར་དལ་འབྱོར་འདི་ནི་ཞེས་བྱ་བ་ལ་སོགས་པ་སྨོས་ཏེ། དལ་བ་ཞེས་བྱ་བ་ནི་མི་ཁོམ་པ་ལས་ལོག་པ་སྟེ། འདིར་ནི་སྡོམ་པ་འཆགས་པ་ལ་དལ་བ་ཞེས་བྱའོ། །དེའི་འབྱོར་བ་ནི་ཕུན་སུམ་ཚོགས་པ་སྟེ། འདི་ནི་ཤིན་ཏུ་རྙེད་པར་དཀའ་བའོ། །དེ་ཡང་བཅོམ་ལྡན་འདས་ཀྱིས་རྒྱལ་བའི་དྲོད་ཀྱི་སྐྱེ་མཆེད་ཀྱི་རྣམ་པར་ཐར་པ་ལ་སོགས་པ་གསུངས་པ་ཡིན་ལ། དེ་ནི་ཁོ་བོ་ཅག་རྣམས་ཀྱིས་ཐོབ་པར་འགྱུར་བ་ཡིན་ནོ། །སྐྱེས་བུའི་དོན་སྒྲུབ་ནི་སེམས་ཅན་གྱི་དོན་བྱེད་པར་ནུས་ཤིང་སྐལ་བ་ཡོད་དེ། དེ་ཐོབ་པར་འགྱུར་བ་ཡིན་ནོ། །གལ་ཏེ་དལ་འབྱོར་ཕུན་སུམ་ཚོགས་པའི་དུས་འདིར་ཕན་པ་ཞེས་བྱ་བ་བདག་དང་གཞན་ལ་ཡུན་རིང་དུ་ཕན་ཞིང་བདེ་བར་འགྱུར་བ་རྣམ་པར་མ་བསམས་ནའོ། །ཕྱིས་འདི་ཡང་དག་འབྱོར་པར་ག་ལ་འགྱུར། །ཞེས་བྱ་བ་ནི། ཤིན་ཏུ་རྙེད་པར་དཀའོ་ཞེས་བྱ་བའི་ཐ་ཚིག་གོ །ཕན་པ་དེ་ཡང་བྱང་ཆུབ་ཏུ་སེམས་བསྐྱེད་པའི་ཕན་ཡོན་དང༌། དེ་བཞིན་དུ་སྡིག་པ་བཤགས་པར་གཏོགས་པ་བདུན་དང༌། བྱང་ཆུབ་ཀྱི་སེམས་ཡང་དག་པར་བླང་བ་དང༌། བྱང་ཆུབ་ཀྱི་སེམས་ལ་བག་ཡོད་པར་བྱ་བ་དང༌། ཤེས་བཞིན་ལ་སོགས་པ་བསྲུང་བ་དང༌། བཟོད་པ་དང༌། བརྩོན་འགྲུས་དང༌། བསམ་གཏན་དང༌། ཤེས་རབ་དང༌། ཡོངས་སུ་བསྔོ་བ་སྟེ། བྱང་ཆུབ་ཀྱི་སེམས་རྣམ་པ་བཅུ་ལ་བྱའོ། །དེ་ལ་བྱང་ཆུབ་ཀྱི་ཕན་ཡོན་གྱི་དབང་དུ་བྱས་ནས། ཇི་ལྟར་མཚན་མོ་ཞེས་བྱ་བ་ལ་སོགས་པ་སྨོས་ཏེ། ཇི་ལྟར་མཚན་མོ་སྤྲིན་སྟུག་པོ་མང་པོས་ཁེབས་པས་མུན་པ་ཤིན་ཏུ་གནག་པ་ན་སྤྲིན་དང་མུན་ནག་གི་ཐིབས་པོ་གང་ཡིན་པ་དེར་གློག་འགྱུ་སྐད་ཅིག་སྟེ། དུས་ཤིན་ཏུ་ཡུན་ཐུང་བས་རབ་ཏུ་སྣང་བ་
སྟོན་ཏེ་གསལ་བར་བྱེད་པ་དེ་བཞིན་དུ་ཤིན་ཏུ་ཡུན་རིང་བའི་འཁོར་བའི་བཙོན་ར་མུན་རུམ་དུ་སྡིག་པའི་སྟོབས་ཅན་གྱི་སྤྲིན་མང་པོས་མུན་ནག་ཏུ་གྱུར་པའི་འཇིག་རྟེན་སྡུག་བསྔལ་གྱི་མུན་གནག་འབའ་ཞིག་ཡོད་པའོ། །སངས་རྒྱས་ཀྱི་མཐུས་ཞེས་བྱ་བ་ལ་སངས་རྒྱས་གློག་ལྟ་བུའི་དབང་གིས་བསོད་ནམས་ལ་བློ་གྲོས་ཏེ། བློའི་ཁྱད་པར་གྱི་སྣང་བ་ཐང་འགའ་ཞིག་འབྱུང་བར་འགྱུར་ལ། དེ་ནི་ཤིན་ཏུ་རྙེད་དཀའ་བ་ཡིན་པས་ན་ལན་འགའ་ཞེས་བྱ་བ་སྨོས་པ་ཡིན་ནོ། །གང་གི་ཕྱིར་དེ་ལྟར་ཡིན་པ་དེས་ན་དེས་ལྟས་ཞེས་བྱ་བ་ལ་སོགས་པ་སྨོས་པ་ཡིན་ཏེ། འདིར་དགེ་བ་ནི་རྒྱུ་ལ་འབྲས་བུ་བཏགས་པའི་ཚུལ་གྱི་དགེ་བའི་ས་བོན་ལྷན་ཅིག་བྱེད་པའི་རྒྱུའི་གྲོགས་དང་བཅས་པ་ལ་བྱའོ། །དེ་ཉིད་ནི་ཉམ་ཆུང་ཞིང་སྟོབས་ཞན་པ་ཉིད་དུ་རྒྱུན་གྱིས་རྟག་པ་ཡིན་ནོ། །སྡིག་པའི་ས་བོན་ནི་སྟོབས་ཆེན་པོ་དང་ལྡན་པ་ཡིན་ཏེ། ལྷན་ཅིག་བྱེད་པའི་རྒྱུའི་གྲོགས་དང་བཅས་པར་ཆེ་བ་ཡིན་པས་ཤིན་ཏུ་ཞེས་བྱ་བ་ལྷག་པར་མི་བཟད་པ་སྟེ། འཇིགས་སུ་རུང་བ་ཡིན་ནོ། །དེ་ནི་ཞེས་བྱ་བ་སྟོབས་སམ་སྡིག་པ་དེ་ལས་རྒྱལ་བར་འདོད་ན། གལ་ཏེ་རྫོགས་པའི་བྱང་ཆུབ་ཀྱི་སེམས་འཚང་རྒྱ་བར་བྱ་བ་ཡིན་པའི་ཕྱིར་དད་པས་ཉེ་བར་བསྟན་པར་བྱས་པའི་ཤེས་རབ་དང་སྙིང་རྗེ་གཉིས་དང་ལྡན་ཞིང་ཡོད་པ་དང་མེད་པ་ལས་འདས་པའི་སེམས་ནི་རྫོགས་པའི་བྱང་ཆུབ་ཀྱི་སེམས་ཡིན་པས་རྫོགས་པའི་བྱང་ཆུབ་ཀྱི་སེམས་མ་ཡིན་པ་དགེ་བ་གཞན་གང་གིས་ཟིལ་གྱིས་གནོན་པར་འགྱུར་ཞིང་རྒྱལ་བར་བྱེད་པར་འགྱུར་ཏེ། སེམས་དེ་ཉིད་ནི་ཉེས་པ་ཐམས་ཅད་སེལ་བར་བྱེད་པའི་གཞི་ཡིན་ནོ། །དེ་ཡང་འདི་ཉིད་དང༌། ཤེས་རབ་ཀྱི་ཕ་རོལ་ཏུ་ཕྱིན་པའི་ལེའུ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལ་སོགས་པ་ལས་འདི་ཉིད་གསུངས་པ་ཡིན་ནོ། །བསྐལ་པ་དུ་མར་ཞེས་བྱ་བ་ལ་སོགས་པ་ལ། ཐུབ་པའི་དབང་པོ་སངས་རྒྱས་བཅོམ་ལྡན་འདས་རྣམས་ཀྱིས་བསྐལ་པ་གྲངས་མེད་པ་གསུམ་དུ་རབ་ཏུ་དགོངས་ཤིང་དཔྱད་པར་མཛད་པས་ཀྱང་ཡང་དག་པར་རྫོགས་པའི་བྱང་ཆུབ་ཀྱི་སེམས་འདི་ཕན་པ་ཡིན་པར་གཟིགས་སོ། །དེ་ཡང་གང་གི་ཕྱིར་རང་དང་གཞན་གྱི་བདེ་བའི་རྒྱུར་འགྱུར་བ་ཉིད་ཀྱིས་ན་ལུས་དང་
སེམས་ཚིམ་པར་བྱེད་པའི་བདེ་བ་ཉིད་ཀྱིས་བདེ་བ་རབ་ཏུ་འཕེལ་ཞིང་རྒྱས་པར་གྱུར་པ་བདེ་བླག་ཏུ་ཐོབ་པར་འགྱུར་བའམ་ཚད་མེད་ཅིང་གྲངས་མེད་པ་འདས་པའི་སྐྱེ་བོའི་ཚོགས་ཏེ། སེམས་ཅན་གྱི་ཚོགས་རྣམས་འཁོར་བའི་རྒྱ་མཚོ་ལས་སྒྲོལ་བར་བྱེད་པ་ཡིན་ནོ། །བྱང་ཆུབ་ཀྱི་སེམས་ལ་གནས་པ་དག་བརྟེན་པར་བྱ་བའི་ཕྱིར། སྲིད་པའི་ཞེས་བྱ་བ་ལ་སོགས་པ་སྨོས་ཏེ། བདག་ཉིད་ཀྱི་སྲིད་པའི་སྡུག་བསྔལ་བརྒྱ་ཕྲག་སྟེ། གཞོམ་པར་འདོད་ཅིང་སེལ་བར་འདོད་པས་སོ། །གླེགས་བམ་ལ་ལ་ལས། སྲིད་པའི་སྡུག་བསྔལ་བརྒྱ་ཕྲག་ལས་སྒྲོལ་འདོད། །ཅེས་ཟེར་ཏེ། དེར་ཡང་དོན་ནི་འདི་ཡིན་ནོ། །གཞན་ཡང༌། སེམས་ཅན་གྱི་མི་བདེ་བསལ་བར་འདོད་པ་དང༌། ཞེས་བྱ་བ་ནི་གཞན་དག་གི་ཕོངས་པའི་སྡུག་བསྔལ་གཞོམ་པར་འདོད་པས་སོ། །བདེ་མང་བརྒྱ་ཕྲག་ནི་བདེ་བ་ཅན་གྱི་བདེ་བ་ལ་སོགས་པའོ། །སྤྱོད་པར་འདོད་པས་ཞེས་བྱ་བ་ནི་ལོངས་སྤྱོད་པར་འདོད་པས་སོ། །ཀྱང་ཞེས་བྱ་བའི་སྒྲས་ནི་གཞན་དག་སྤྱོད་པར་འདོད་པས་ཀྱང་ཞེས་སྟོན་ཏོ། །དེས་ནི། བྱང་ཆུབ་སེམས་ཉིད་རྟག་ཏུ་གཏང་མི་བྱ། །ཞེས་བྱ་བ་སྟེ་དེ་དོར་བར་མི་བྱའོ། །ཕན་ཡོན་འདི་ནི་དེའི་ཚེ་གཞན་གྱི་ཡིན་ནོ། །ཚེ་འདིའི་ཕན་ཡོན་ནི། བྱང་ཆུབ་སེམས་སྐྱེས་གྱུར་ན་ཞེས་བྱ་བ་ལ་སོགས་པ་སྨོས་པ་ཡིན་ནོ། །འཁོར་བའི་བཙོན་ར་ནི་སྲེད་པས་བཅིངས་པའི་ཁྱིམ་སྟེ། འདོད་ཆགས་ལ་སོགས་པས་བསྡམས་པ་གང་ཡིན་པ་དེ་ནི་འཁོར་བའི་བཙོན་རར་བསྡམས་པའོ། །ཉམ་ཐག་རྣམས་ཞེས་བྱ་བ་ནི་མྱ་ངན་བྱ་བར་འོས་པའི་ཉོན་མོངས་པ་རྣམས་སོ། །དེ་ནི་སྐད་ཅིག་གིས་ཞེས་བྱ་བ་སྐད་ཅིག་ཙམ་གྱིས་བདེ་བར་གཤེགས་པ་རྣམས་ཀྱི་སྲས་ཞེས་བརྗོད་པར་བྱ་ཞིང༌། ལྷ་དང་མིར་བཅས་པའི་འཇིག་རྟེན་གྱིས་ཕྱག་བྱ་བར་འོས་པར་འགྱུར་རོ། །སྐད་ཅིག་གང་གིས་ཞེ་ན། བྱང་ཆུབ་སེམས་སྐྱེས་གྱུར་ནས་ཞེས་བྱ་བ་སྨོས་ཏེ། བྱང་ཆུབ་ཀྱི་སེམས་སྐྱེས་ཤིང་བྱུང་བར་གྱུར་པ་ཉིད་ཀྱིས་འགྱུར་ཏེ། དེ་ཡང་བཅོམ་ལྡན་འདས་ཀྱིས་འཕགས་པ་དཀོན་མཆོག་བརྩེགས་པ་ལ་སོགས་པ་ལས་ཇི་སྐད་གསུངས་པ་ལྟ་བུ་ཡིན་ནོ། །དྲིས་པ། བྱང་ཆུབ་སེམས་དཔའི་ས་རབ་ཏུ་དགའ་བར་
དང་པོ་བྱང་ཆུབ་ཀྱི་སེམས་སྐྱེ་བར་འགྱུར་པ་ཡིན་ལ། དེ་ནི་འཕགས་པའི་ཡིན་པས་འཕགས་པ་ལ་ནི་ཉམ་ཐག་རྣམས་ཞེས་མི་བྱའོ་ཞེ་ན། བདེན་མེད་ཀྱི་དེ་ནི་ཆོས་ལ་དམིགས་པ་ཅན་ཡིན་ལ། འདི་ནི་ཡང་དག་པར་བླངས་པ་བརྡ་ཅན་ལ་དགོངས་ནས་དེ་སྐད་བཤད་པ་ཡིན་པས་ཡང་དག་པར་བླངས་པ་བརྡ་ཅན་ནི་འཕགས་པ་མ་ཡིན་པ་ལ་ཡང་སྐྱེ་བར་མདོ་སྡེ་རྣམས་ལས་ཤེས་པར་བྱ་སྟེ། ཆོས་ཐམས་ཅད་འབྱུང་བ་མེད་པར་བསྟན་པ་ལས། བྱང་ཆུབ་སེམས་དཔའ་རྒྱལ་བའི་བློ་གྲོས་ལ་སས་བར་མཐོང་ས་ཕྱེ་ནས་དེ་འཆི་བའི་དུས་བྱས་པ་དང༌། སེམས་ཅན་དམྱལ་བ་ཆེན་པོར་ལྷུང་སྟེ། དེ་ནི་སྟོང་པ་ཉིད་ལ་མ་དད་ཅིང་སྟོང་པ་ཉིད་སྨྲ་བ་ལ་ཁོང་ཁྲོ་བ་བྱས་པ་ཡིན་ནོ་ཞེས་གསུངས་པ་དང༌། ངེས་པ་དང་མ་ངེས་པ་ལ་འཇུག་པའི་ཕྱག་རྒྱའི་མདོ་ལས་ཀྱང༌། གང་ལ་ལ་ཞིག་བྱང་ཆུབ་ཀྱི་སེམས་བསྐྱེད་ལ་རྟག་པར་ཐེག་པ་ཆེན་པོ་མི་འཛིན་མི་ཀློག་པར་ཉན་ཐོས་ཀྱི་ཐེག་པ་པ་རྣམས་ལ་བརྟེན་ཅིང་ཞེས་བྱ་བ་ནས། འདི་ནི་ཕྱུགས་ཀྱི་ཤིང་རྟ་ལྟ་བུས་འགྲོ་བའི་བྱང་ཆུབ་སེམས་དཔའ་ཞེས་བྱ་སྟེ། ཉན་ཐོས་ཀྱི་ཐེག་པའི་ཕྱུགས་ཀྱི་ཤིང་རྟས་སངས་རྒྱས་ཉིད་ཀྱི་སར་བགྲོད་པར་འགྲོ་བ་ཡིན་ནོ་ཞེས་གསུངས་པ་དང༌། ཆོས་བཅུ་པའི་མདོ་ལས་ཀྱང༌། བྱང་ཆུབ་སེམས་དཔའི་རིགས་ལ་གནས་པ་བྱང་ཆུབ་ཏུ་སེམས་མ་བསྐྱེད་ན། དེ་བཞིན་གཤེགས་པའི་ཉན་ཐོས་ཀྱིས་བསྐུལ་ཞིང་སྐྱོ་བར་བྱས། ཡང་དག་པར་འཛིན་དུ་བཅུག་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་འདི་ནི་བྱང་ཆུབ་ཀྱི་སེམས་ལ་མོས་པའི་རྒྱུ་དང་པོའོ། །ཡང་དག་པར་རྫོགས་པའི་བྱང་ཆུབ་བམ། བྱང་ཆུབ་ཀྱི་སེམས་ཀྱི་བསྔགས་པ་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་འདི་ནི་རྒྱུ་གཉིས་པའོ། །སེམས་ཅན་མགོན་མེད་པ་དང༌། སྐྱབས་མེད་པ་དང༌། དཔུང་གཉེན་མེད་པ་རྣམས་མཐོང་ནས་སྙིང་རྗེའི་སེམས་ཉེ་བར་གཞག་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་འདི་ནི་རྒྱུ་གསུམ་པའོ། །དེས་དེ་བཞིན་གཤེགས་པའི་རྣམ་པ་ཐམས་ཅད་ཡོངས་སུ་རྫོགས་པ་མཐོང་ནས་དགའ་བ་བསྐྱེད་ནས་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཏུ་སེམས་བསྐྱེད་པ་འདི་ནི་རྒྱུ་བཞི་པའོ་ཞེས་གསུངས་པ་ཡིན་ནོ། །བྱང་ཆུབ་ཀྱི་སེམས་དེ་ལྷ་དང་བཅས་པའི་འཇིག་རྟེན་གྱི་མཆོད་རྟེན་དུ་གྱུར་པར་ནི་སྡོང་པོ་བཀོད་པ་ལས་ཀྱང་གསུངས་པས་ལྷ་དང་མིར་བཅས་པའི་འཇིག་རྟེན་གྱིས་ཕྱག་བྱ་བར་འོས་པར་གྱུར་པ་ཡིན་ལ། བདེ་བར་གཤེགས་པའི་དབང་དུ་བྱས་ནས་སངས་རྒྱས་ཀྱི་ཆོས་རྣམས་ཐོབ་པར་ལྷག་པར་མོས་པའི་རང་བཞིན་ཅན་གྱི་བྱང་ཆུབ་ཀྱི་སེམས་ཀྱི་ས་བོན་སྐད་ཅིག་མ་གང་ལ་སྐྱེས་པའི་སྐད་ཅིག་མ་དེ་ལ་བདེ་བར་གཤེགས་པ་རྣམས་ཀྱི་སྲས་ཞེས་བརྗོད་པར་བྱ་སྟེ། དེ་བས་ན་ལྷ་དང་མིར་བཅས་པའི་འཇིག་རྟེན་གྱིས་ཕྱག་བྱ་བར་འོས་པ་ཡིན་ནོ་ཞེས་བྱ་བ་བརྒལ་བའི་ལན་གདབ་པར་བྱའོ། །གསེར་འགྱུར་རྩི་ཞེས་བྱ་བ་ལ་སོགས་པའི་ཚིགས་སུ་བཅད་པ་ལ། གསེར་འགྱུར་རྩི་ནི་རྩིའི་ཁྱད་པར་རོ། །མཆོག་ལྟ་བུ་ཞེས་བྱ་བ་ནི་རིན་པོ་ཆེ་ཉིད་དུ་བྱེད་ནུས་པ་སྟེ། དེ་ལྟར་བསྒྱུར་ནུས་པའོ། །མི་གཙང་ལུས་འདི་བླངས་ནས་ཞེས་བྱ་བ་ནི། ད་ལྟར་གྱི་ལུས་འདི་གཟུང་ནས་སོ། །རྒྱལ་བའི་སྐུ། རིན་ཆེན་རིན་ཐང་མེད་པར་བསྒྱུར་བས་ན། །ཞེས་བྱ་བ་ནི་སངས་རྒྱས་བཅོམ་ལྡན་འདས་ཀྱི་སྐུ་ཡིད་བཞིན་གྱི་ནོར་བུ་རིན་པོ་ཆེ་དང་འདྲ་བར་དོན་ཆེན་པོ་ཉིད་དུ་བསྒྱུར་ནུས་པ་དེ་ལྟ་བུའི་བྱང་ཆུབ་ཀྱི་སེམས་ཞེས་བྱ་བར་མིང་བཏགས་པའི་གསེར་འགྱུར་གྱི་རྩི་དེ་རབ་ཏུ་བརྟན་ཅིང་མ་ཉམས་པ་ཉིད་དུ་གཟུང་ཞིང་བླང་བར་བྱའོ། །ཞེས་བྱ་བའི་དོན་ཏོ། །དེ་ལྟར་ན་གསེར་འགྱུར་རྩི་དང་འདྲ་བར་བཤད་ནས། རིན་པོ་ཆེ་དང་འདྲ་བ་ཉིད་བཤད་པའི་ཕྱིར། འགྲོ་བའི་དེད་དཔོན་ཞེས་བྱ་བ་ལ་སོགས་པ་སྨོས་ཏེ། འགྲོ་བའི་དེད་དཔོན་གཅིག་པུ་ཞེས་བྱ་བ་ནི་འགྲོ་བའི་སྟེ། འཇིག་རྟེན་ཐམས་ཅད་སྐལ་བ་ཇི་ལྟ་བ་བཞིན་དུ་མྱ་ངན་ལས་འདས་པའི་གྲོང་ཁྱེར་དུ་ཁྲིད་པར་མཛད་པས་སོ། །ཚད་མེད་བློ་ཞེས་བྱ་བ་ནི་ཕྲ་ཞིང་ཚད་མེད་པའི་ཡུལ་ཡིན་པ་ཉིད་ཀྱིས་གཞན་དག་གིས་གཞལ་བར་མི་ནུས་པས་ཚད་མེད་པའི་བློ་གང་ལ་མངའ་བའི་སངས་རྒྱས་བཅོམ་ལྡན་འདས་ཚད་མེད་པའི་བློ་མངའ་ཞིང་རང་གི་དོན་ཕུན་སུམ་ཚོགས་པ་ཡང་བརྙེས་པ་དེས་ལེགས་པར་ཡོངས་སུ་བརྟགས་པ་སྟེ། རིན་པོ་ཆེ་
རྟོག་པ་ན་དེའི་མཚན་ཉིད་ལ་རྨོངས་པའམ། གཞན་སླུ་བདག་ལ་ལོག་པར་རྟོག་པར་བྱེད་ན། སངས་རྒྱས་ལ་གཉིས་པོ་འདི་དག་མི་མངའ་བས་དེས་ལེགས་པར་ཡོངས་སུ་བརྟགས་པ་ཡིན་ནོ། །ཅི་ལྟ་བུ་ཞེ་ན། རིན་ཆེ་བས་ཞེས་བྱ་བ་སྟེ། ཡིད་བཞིན་གྱི་ནོར་བུ་རིན་པོ་ཆེ་ལྟར་དཔལ་འབྱོར་ཕུན་སུམ་ཚོགས་པ་ཡང་རྙེད་པར་དཀའ་བ་ཡིན་ན། བྱང་ཆུབ་ཀྱི་སེམས་རིན་པོ་ཆེ་འདི་ལྟ་སྨོས་ཀྱང་ཅི་དགོས། དེས་ན་འགྲོ་བའི་གནས་དང་བྲལ་བར་འདོད་པ་རྣམས་ཏེ། དམྱལ་བ་ལ་སོགས་པའི་འགྲོ་བར་རྒྱུ་བའི་སྐལ་བ་ཅན་གྱི་སེམས་ཚོང་བ་རྣམས་ཀྱི་བྱང་ཆུབ་ཀྱི་སེམས་དེ་ལེགས་པར་ཤིན་ཏུ་བརྟན་པར་ཟུང་ཤིག་པའོ། །ཡང་གཟེངས་བསྟོད་པར་བྱ་བའི་ཕྱིར། དགེ་བ་གཞན་ཀུན་ཞེས་བྱ་བ་ལ་སོགས་པ་སྨོས་པ་ཡིན་ཏེ། བྱང་ཆུབ་ཀྱི་སེམས་ལས་གཞན་པའི་དགེ་བ་ཐམས་ཅད་ནི་ཞི་བའི་འབྲས་བུ་མེད་པར་ཆུ་ཤིང་དང་འདྲ་བར་འཛད་པ་ཡིན་ལ། བྱང་ཆུབ་ཀྱི་སེམས་ཀྱི་ལྗོན་ཤིང་ནི་རྟག་པར་ཡང་འབྲས་བུ་འབྱིན་པ་ཡིན་ཏེ། སྐད་ཅིག་མ་རེ་རེ་ཞིང་རྒྱུ་མཐུན་པའི་འབྲས་བུ་འབྱིན་པར་བྱེད་པ་ཉིད་ཡིན་པའི་ཕྱིར་རོ། །དེ་ཡང་འོག་ནས། དེང་ནས་བརྩམས་ཏེ་གཉིད་ལོག་གམ། །ཞེས་བྱ་བ་ལ་སོགས་པ་ཇི་སྐད་བཤད་པ་ལྟ་བུ་ཡིན་པས་སྐྱེ་བ་རེ་རེ་ཞིང་རྣམ་པར་སྨིན་པ་ཕུལ་དུ་བྱུང་བ་བསྐྱེད་དུ་ཟིན་ཀྱང༌། འགྲོ་བ་ཇི་སྲིད་གནས་ཀྱི་བར་དུ་རྒྱུ་མཐུན་པའི་འབྲས་བུ་རྒྱུན་མི་འཆད་པས་ཟད་པར་མི་འགྱུར་བ་ཡིན་ནོ། །དེ་ལྟར་ན་རང་གི་དོན་ཕུན་སུམ་ཚོགས་པ་དང་ལྡན་པ་ལས་གཞན་གྱི་དོན་ཕུན་སུམ་ཚོགས་པ་ཡང་འབྱུང་བར་འགྱུར་བ་ཉིད་ཡིན་ནོ། །གཞི་དེ་ལས་གཞན་རྣམས་ལ་ཡང་བྱང་ཆུབ་ཀྱི་སེམས་ཀྱི་ལྗོན་ཤིང་སྐྱེ་བའི་ཕྱིར་རོ། །དེ་ལྟར་དགེ་བ་ལ་མངོན་པར་འཇུག་པ་བཤད་པས་ལེགས་པར་གཟེངས་བསྟོད་ནས། མི་དགེ་བ་ལས་ལྡོག་པའི་རྒྱུ་ཉིད་ཡིན་པར་སྦྱར་བའི་ཕྱིར་དཔའ་བོ་དང་འདྲ་བར་བཤད་པ་ནི། སྡིག་པ་ཤིན་ཏུ་ཞེས་བྱ་བ་ལ་སོགས་པ་སྨོས་པ་ཡིན་ཏེ། སྡིག་པ་མི་བཟད་པ་སྟེ། དཀོན་མཆོག་གསུམ་ལ་གནོད་པ་བྱེད་པ་ལ་སོགས་པ་འཇིགས་པ་ཆེན་པོ་དང་འདྲ་བ་བྱས་ཀྱང་དཔའ་བོ་ལ་བརྟེན་པ་དང་འདྲ་བར་གང་ཞིག་ལ་བརྟེན་ཅིང་གནས་
བཅས་ན། ཡུད་ཀྱིས་ཞེས་བྱ་བ་རིང་པོ་མི་ཐོགས་པར་སྒྲོལ་ཞིང་སྐྱོབ་པར་ནུས་པའི་བྱང་ཆུབ་ཀྱི་སེམས་དེ་ལ་སེམས་ཅན་བག་དང་ལྡན་པ་རྣམས་ཀྱིས་ཅིའི་ཕྱིར་བརྟེན་པར་མི་བྱེད་དེ། ཤིན་ཏུ་ཡང་རྟེན་བཅའ་བའི་རིགས་སོ། །བཅོམ་ལྡན་འདས་ཀྱིས་ཀྱང་སྡིག་པ་བྱས་ཤིང་བསགས་པ་རྣམས་རྟེན་གྱི་སྟོབས་ཀྱིས་ཟིལ་གྱིས་གནོན་པར་འགྱུར་རོ། །དེ་ལ་རྟེན་གྱི་སྟོབས་ནི་དཀོན་མཆོག་གསུམ་ལ་སྐྱབས་སུ་འགྲོ་བ་དང༌། བྱང་ཆུབ་ཀྱི་སེམས་མི་གཏོང་བའོ་ཞེས་ཆོས་བཞི་བའི་མདོ་ལས་གསུངས་པ་ཡིན་ནོ། །དེ་ལྟར་དགེ་བ་ལ་འཇུག་པ་དང༌། མི་དགེ་བ་ལས་ལྡོག་པའི་ཁྱད་པར་གྱི་གཞི་ནི་བྱང་ཆུབ་ཀྱི་སེམས་ཡིན་ནོ་ཞེས་ཡང་དག་པར་གདམས་ནས། མེའི་ཁྱད་པར་དང་འདྲ་བར་བསྟན་ཅིང༌། ཕན་ཡོན་དཔག་ཏུ་མེད་པ་ཉིད་ཡོད་པས་ཡང་དག་པར་གཟེངས་བསྟོད་པའི་ཕྱིར། དེས་ནི་དུས་མཐའི་ཞེས་བྱ་བ་ལ་སོགས་པ་སྨོས་པ་ཡིན་ཏེ། བྱང་ཆུབ་ཀྱི་སེམས་གང་ཡིན་པ་དེ་ནི་འཇིག་རྟེན་འཇིག་པའི་དུས་ཀྱི་མེའི་ཕུང་པོ་དང་འདྲ་བ་ཡིན་པས་དུས་མཐའི་མེ་སྟེ། དེ་དང་འདྲ་བར་མཚམས་མེད་པ་ལ་སོགས་པའི་སྡིག་པ་ཆེན་པོ་རྣམས་སྐད་ཅིག་གཅིག་གིས་ཞེས་བྱ་བ། ལྷག་པར་མོས་པའི་བཟོད་པ་ཆེན་པོའི་སྐད་ཅིག་མ་གཅིག་གིས་གཟུང་བར་བྱ་བ་ཉེ་བར་མི་དམིགས་པ་ན། ངེས་པར་སྲེག་པར་བྱེད་པ་ཉིད་ཡིན་ནོ། །བྱང་ཆུབ་ཀྱི་སེམས་གང་ཡིན་པ་དེའི་ཕན་ཡོན་དཔག་ཏུ་མེད་པའི་གྲངས་མེད་པ་དག་མགོན་པོ་བྱམས་པ་ཞེས་བྱ་བ་བློ་དང་ལྡན་ཞིང་ཤེས་རབ་ཆེ་བས་ཚོང་དཔོན་གྱི་བུ་ཕོ་ནོར་བཟངས་ཞེས་བྱ་བ་ལ་བཤད་ཅིང་བཀའ་སྩལ་ཏོ། །རིགས་ཀྱི་བུ་བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་ཀྱི་ས་བོན་ལྟ་བུའོ། །འགྲོ་བ་ཐམས་ཅད་ཀྱི་ཆོས་དཀར་པོ་རྣམ་པར་འཕེལ་བར་བྱེད་པས་ཞིང་ལྟ་བུ་ཞེས་བྱ་བ་ལ་སོགས་པ་དང༌། ཡོན་ཏན་གྱི་ཁྱད་པར་གཞན་དག་དང་ཡང་དག་པར་ལྡན་པ་ཡིན་པར་འཕགས་པ་སྡོང་པོ་བཀོད་པ་ལས་ཀྱང་གསུངས་པ་ཡིན་ནོ། །དེ་ལྟར་དེ་ཡན་ཚད་ཀྱི་ཚིགས་སུ་བཅད་པས་ནི་བྱང་ཆུབ་ཀྱི་སེམས་ལ་གོམས་པར་བྱས་པ་ཙམ་གྱི་ཕན་ཡོན་བཤད་པ་ཡིན་ལ། ད་འདི་མན་ཆད་ཀྱིས་
གནས་སྐབས་ཀྱི་དབྱེ་བ་ལ་དགོངས་ནས་བཤད་པ་ཡིན་པར་ཤེས་པར་བྱའོ། །དེའི་ཕྱིར་བྱང་ཆུབ་སེམས་དེ་ཞེས་བྱ་བ་ལ་སོགས་པ་སྨོས་ཏེ། བྱང་ཆུབ་ཀྱི་སེམས་དེ་ལས་བྱང་ཆུབ་ཏུ་མོས་པའི་སེམས་ནི་བདག་སངས་རྒྱས་སུ་གྱུར་ནས་སེམས་ཅན་རྣམས་ཀྱི་དོན་བྱའོ་ཞེས་དད་པས་ཉེ་བར་བསྟན་པར་བྱ་བའི་བློ་དང༌། བྱ་བ་དག་གིས་ཟབ་ཅིང་རྒྱ་ཆེ་བའི་དོན་ཐོབ་པར་འདོད་པའི་སེམས་དེ་ཉིད་བྱང་ཆུབ་ཏུ་སྨོན་པའི་སེམས་ཡིན་ནོ། །བྱང་ཆུབ་ཀྱི་སྤྱོད་པ་ཡང་དག་པར་བླང་བ་ལ་སོགས་པས་དེ་ལ་འཇུག་པ་ནི་བྱང་ཆུབ་ཏུ་འཇུག་པ་ཉིད་ཡིན་ཏེ། དེ་ལྟ་ན་རྣམ་པ་གཉིས་སོ། །དེ་ཡང་བློ་དང་ལྡན་པས་ནོར་བཟངས་ལ་རིགས་ཀྱི་བུ་སེམས་ཅན་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ་ནི་རྙེད་པར་དཀའོ། །དེ་བས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་པ་དེ་ཡང་ཆེས་རྙེད་པར་དཀའོ་ཞེས་གསུངས་པ་ཡིན་ནོ། །བཅོམ་ལྡན་འདས་ཀྱིས་ནི་ས་དང་ཕ་རོལ་ཏུ་ཕྱིན་པ་ལ་སོགས་པ་དབྱེ་བ་མང་དུ་གསུངས་ལ་འདིར་ནི་རྣམ་པ་བཅུར་བཤད་ལ། དེ་ཇི་ལྟར་ན་རྣམ་པ་གཉིས་ཡིན་ཞེ་ན། དེའི་ཕྱིར་མདོར་བསྡུ་ན། རྣམ་པ་གཉིས་སུ་ཤེས་བྱ་སྟེ། །ཞེས་བྱ་བ་སྨོས་པ་ཡིན་ཏེ། རྣམ་པ་བཅུ་ཡིན་དུ་ཟིན་ཀྱང་ཕན་ཡོན་གྱི་སྐབས་སུ་མདོར་བསྡུ་ན། རྣམ་པ་གཉིས་སུ་གནས་ཏེ། ཡང་དག་པར་བླང་བ་དང༌། འཇུག་པའི་ཁྱད་པར་གྱིས་གཉིས་ཡིན་པར་ཤེས་པར་བྱའོ། །གལ་ཏེ་དེ་ལྟ་ན་སྨོན་པ་བྱང་ཆུབ་ཀྱི་སེམས་ཀྱང་སྤྱོད་པའི་བདག་ཉིད་ཀྱང་ཡིན་ན་འདི་གཉིས་ལ་དབྱེ་བ་ཅི་ཞིག་ཡོད་ཅེ་ན། དེའི་ཕྱིར་འགྲོ་བར་འདོད་དང་ཞེས་བྱ་བ་ལ་སོགས་པ་སྨོས་ཏེ། འགྲོ་བར་འདོད་པ་ནི་ཡུལ་དུ་འགྲོ་འདོད་པ་ཉིད་ཡིན་གྱིས་འགྲོ་བ་མ་ཡིན་ནོ། །འགྲོ་བ་ནི་དེར་འགྲོ་བ་སྟེ། དེ་གཉིས་ཀྱི་བྱེ་བྲག་ཅི་ལྟར་ཤེས་པ་དེ་བཞིན་དུ། འདི་གཉིས་ཀྱི་བྱེ་བྲག་ཀྱང་རིམ་པ་ཇི་ལྟ་བ་བཞིན་དུ་ཤེས་པར་བྱ་སྟེ། སྨོན་པའི་སེམས་ནི་འགྲོ་བར་འདོད་པ་ལྟ་བུ་ཡིན་ལ། འཇུག་པ་ནི་འགྲོ་བ་ལྟ་བུ་ཡིན་ནོ་ཞེས་བྱ་བའི་དོན་ཏོ། །གང་གིས་ཤེས་པར་བྱ་ཞེ་ན། མཁས་པས་ཏེ། ལུས་ལ་སོགས་པའི་ལས་ལ་ཡང་དག་པར་བརྟགས་ནས། བདག་དང་གཞན་ལ་ཕན་པའི་
ཐབས་ཤེས་ནས་རྟག་ཏུ་བྱེད་པ་གང་ཡིན་པ་དེ་ནི་ལྟུང་བའི་ཉེས་པ་མི་འབྱུང་བས་དེ་ནི་ཤེས་རབ་ཡིན་ལ། དེ་འདི་ལ་ཡོད་པས་ན་མཁས་པ་ཞེས་བྱ་སྟེ། མཁས་པ་དེས་ཤེས་པར་བྱའོ། །སྨོན་པ་ནི་མངོན་པར་འདོད་པ་ཙམ་ཉིད་ཡིན་ལ། འཇུག་པ་ནི་ཡང་དག་པར་བླངས་པ་ལ་སོགས་པས་འཇུག་པའི་རང་བཞིན་ཡིན་ལ། འདིར་སྡོམ་པ་ཡང་དག་པར་ལེན་པ་འམ། འདིས་བྱང་ཆུབ་ཏུ་འཇུག་པས་ན་ཡང་དག་པར་ལེན་པ་དང༌། འཇུག་པའི་བྱང་ཆུབ་ཀྱི་སེམས་ཡིན་པ་ལྟར་སྨོན་པ་ཡང་དེ་དང་འདྲའོ། །དེ་བས་ན་འཁོར་བའི་ཚེ་འབྲས་བུ་ཆེན་པོ་འབྱུང་བར་འཇུག་པ་ལས་སྨོན་པ་དང་དབྱེ་བ་ཡོད་པ་མ་ཡིན་ནོ་ཞེ་ན། དེ་ནི་བདེན་མོད་ཀྱི། །ཡང་ཞེས་བྱ་བའི་སྒྲས་བྱང་ཆུབ་ཏུ་སྨོན་པའི་སེམས་ནི་འཁོར་བ་བདག་དང་གཞན་གྱི་བྱང་ཆུབ་ཀྱི་དོན་དུ་འགྱུར་བ་འབྲས་བུ་ཆེ་བ་ཉིད་འབྱུང་བ་ཡིན་མོད་ཀྱི། ཇི་ལྟར་འཇུག་པའི་སེམས་ཀྱིས་དེར་འཇུག་པ་བཞིན་དུ་བསོད་ནམས་རྒྱུན་མི་ཆད་པར་རྒྱུན་ཆགས་སུ་འབྱུང་བ་མ་ཡིན་པས། འདིར་འཇུག་པའི་སེམས་ནི་སྔ་མ་ལས་ཁྱད་པར་ཡོད་དོ། །དེ་ཉིད་ཇི་ལྟར་བསོད་ནམས་ཀྱི་རྒྱུན་མི་འཆད་པར་འབྱུང་བ་ཡིན་ཞེ་ན། དེའི་ཕྱིར་གང་ནས་བཟུང་སྟེ་ཞེས་བྱ་བ་ལ་སོགས་པ་སྨོས་ཏེ། སྐད་ཅིག་མ། གང་ནས་བཟུང་སྟེ་སེམས་ཅན་ཁམས། །མཐའ་ཡས་རབ་ཏུ་དགྲོལ་བའི་ཕྱིར། །ཞེས་བྱ་བ་ལ་སོགས་པ་སེམས་ཅན་གྱི་ཁམས་འདི་ཙམ་ཞེས་མཐའ་གཟུང་བར་ནི་མི་ནུས་པའི་མཐའ་ཡས་པ་སྟེ། སེམས་ཅན་དེ་རྣམས་ཀྱང་རང་གི་མཚན་ཉིད་འཛིན་པས་ན་ཁམས་ཏེ། ཉོན་མོངས་པ་དང་ལས་དང་རྐྱེན་སྐྱེ་བའི་རྒྱུན་གྱི་རང་བཞིན་ནོ། །དེ་རྣམས་ནི་ཉོན་མོངས་པའི་འཆིང་བ་དང༌། འཁོར་བའི་བཙོན་ར་ལས་རབ་ཏུ་དགྲོལ་བར་བྱ་བ་དེའི་དོན་གྱི་ཕྱིར། འཁོར་བ་ཇི་སྲིད་གནས་ཀྱི་བར་དུ་མི་ལྡོག་ཅིང་ཕྱིར་བཟློག་པར་མི་ནུས་པའི་སེམས་ཀྱིས་འཇུག་པའི་སེམས་དེ་ནི་མངོན་པར་འཕེལ་ཞིང་རྣམ་པར་དག་པར་བྱ་བ་ཡང་དག་པར་བླངས་པའི་སེམས་དེ་ཉིད་ཀྱིས་བྱ་བ་མཐར་ཕྱིན་པར་བྱ་བའི་ཕྱིར་ལེན་པར་གྱུར་པའོ། །དུས་དེང་ནས་བཟུང་ནས་ཏེ་གཉིད་ལོག་པར་གྱུར་ཏམ། བག་མེད་པ་ཉིད་དུ་
གྱུར་ཀྱང་མི་དགེ་བ་ལས་ལྡོག་པ་དང༌། དགེ་བ་ལ་འཇུག་པ་དང༌། སེམས་ཅན་ཐམས་ཅད་ཀྱི་དོན་བྱ་བ་རྣམས་ལ་བྱམས་པ་དང༌། སྙིང་རྗེ་ཆེན་པོ་དག་གིས་བསོད་ནམས་ཀྱི་ཤུགས་ཏེ། དགེ་བའི་རྒྱུན་བར་མི་འཆད་པ་དང༌། དེ་ཁོ་ན་ཉིད་ལ་ལྷག་པར་མོས་པའི་དབང་གིས་ཟད་མི་ཤེས་པའི་བསོད་ནམས་ཀྱི་རྒྱུན་རེ་རེ་ཞིང་ཡང་རྣམ་པ་ཐ་དད་དུ་མ་ཞིག་འབྱུང་བར་འགྱུར་ལ། དེ་ལྟར་ཤིན་ཏུ་རྒྱ་ཆེ་བ་དང༌། ཟད་མི་ཤེས་པ་ཉིད་ཀྱིས་ནམ་མཁའ་དང་མཉམ་པར་རབ་ཏུ་འབྱུང་བར་འགྱུར་ཏེ། དཔའ་སྦྱིན་གྱིས་ཞུས་པ་ལས་ཀྱང༌། བྱང་ཆུབ་སེམས་དཔའི་བསོད་ནམས་གང༌། །དེ་ལ་གལ་ཏེ་གཟུགས་ཡོད་ན། །ནམ་མཁའི་ཁམས་ནི་ཀུན་བཀང་སྟེ། །དེ་ནི་དེ་བས་ལྷག་པར་འགྱུར། །ཞེས་གསུངས་པ་ལྟ་བུའོ། །འདིར་རིགས་པ་གང་ཞིག་ཡིན་ཞེ་ན། དེའི་ཕྱིར་འདི་ནི་ཞེས་བྱ་བ་ལ་སོགས་པ་སྨོས་ཏེ། བྱང་ཆུབ་ཀྱི་སེམས་ཕན་ཡོན་ཆེན་པོ་དང་བཅས་པ་ཡིན་པ་འདི་ཉིད་ནི། འཐད་པ་དང་བཅས་པར་ཞེས་བྱ་བར་རིགས་པ་དང་ལྡན་པ་ཡིན་པར་དེ་བཞིན་གཤེགས་པ་ཉིད་ཀྱིས་གསུངས་པ་ཡིན་ནོ། །ཅིའི་ཕྱིར་གསུངས་ཤེ་ན། དམན་མོས་སེམས་ཅན་དོན་གྱི་ཕྱིར། །ཞེས་གསུངས་ཏེ། འགྲོ་བ་དམན་པ་ལ་མོས་པ་དག་གི་དོན་དུ་བྱའོ།། གང་ལས་གསུངས་ཤེ་ན། ལག་བཟངས་ཀྱིས་ནི་ཞུས་པ་ལས། །ཞེས་བྱ་བ་སྨོས་སོ། །ལག་བཟངས་ཀྱིས་ཞུས་པ་ལས་འཐད་པ་དང་བཅས་པར་ཇི་ལྟར་གསུངས་ཤེ་ན། དེའི་ཕྱིར་སེམས་ཅན་ཞེས་བྱ་བ་ལ་སོགས་པ་སྨོས་ཏེ། སེམས་ཅན་རྣམས་ཀྱི་གླད་ནད་ཙམ། །བསལ་ལོ་སྙམ་དུ་སེམས་པ་ཡང༌། །ཕན་འདོགས་བསམ་པ་དང་ལྡན་ཏེ། །སྨན་པ་ལ་སོགས་པས་རང་གི་འདོད་པའི་དོན་གྱི་སྲིད་པ་མེད་པའི་སེམས་དང་ལྡན་ན། བསོད་ནམས་སུ་བྱ་བ་དཔག་ཏུ་མེད་པ་དག་འཛིན་པར་འགྱུར་ན། སེམས་ཅན་རེ་རེའི་མི་བདེ་བའི་སྡུག་བསྔལ་དཔག་ཏུ་མེད་ཅིང་གྲངས་མེད་པའི་དབྱེ་བ་སྙེད་ཀྱི་བྱ་བ་ལ་དམིགས་པ་གསལ་བར་འདོད་ཅིང་གཞོམ་པར་འདོད་པ་དང༌། སེམས་ཅན་རེ་རེའང་ཡོན་ཏན་དཔག་ཏུ་མེད་པ་འགྲུབ་ཅིང་སྐྱེད་བར་འདོད་པ་དག་ནི་སྨོས་ཅི་དགོས་ཏེ། ཤིན་ཏུ་ཡང་ཚད་མེད་པའི་བསོད་ནམས་སུ་འགྱུར་རོ་ཞེས་བྱ་བར་
དགོངས་སོ། །དེ་ཡང་སུ་ལ་ཞེ་ན། འདི་འདྲ་བའི་ཕན་སེམས་སུ་ཞིག་ལ་ཡོད་ཅེས་སྤྱིར་ཉེ་བར་བརྟགས་ནས་ཁྱད་པར་བསྟན་པའི་ཕྱིར་ཕ་འམ་ཞེས་བྱ་བ་ལ་སོགས་པ་སྨོས་ཏེ། ཕ་འམ་ཡང་ནམ་ཡང་རུང༌། །ཞེས་བྱ་བའི་ཡང་གི་སྒྲས་ནི་མི་རྣམས་ཀྱི་སྤུན་ཟླ་འམ་མཛའ་བོ་ལ་སོགས་པའོ། །ལྷ་དང་ཞེས་བྱ་བ་ནི་འཇིག་རྟེན་སྐྱོང་བ་ལ་སོགས་པ་རྣམས་སོ། །དྲང་སྲོང་རྣམས་ཞེས་བྱ་བ་ནི་ཤེད་ལས་སྐྱེས་ལ་སོགས་པའི་སྐྱེས་བུ་རྣམས་སོ། །ཚངས་པ་ནི་འབྱིན་པ་པོ་ཉིད་ཡིན་པར་གཞན་དག་མངོན་པར་འདོད་པ་སྟེ། དེ་རྣམས་ལ་བྱང་ཆུབ་སེམས་དཔའ་དག་སེམས་ཅན་རྣམས་ཕན་པར་དགོངས་པ་ལྟ་བུའི་ཕན་པའི་སེམས་འདི་ཡོད་པ་མ་ཡིན་ཏེ་མི་སྲིད་པ་ཉིད་ཡིན་ནོ། །གཞན་ཡང་སེམས་ཅན་དེ་དག་ཉིད་དེ། ཕ་ལ་སོགས་པ་དང་དེས་རྗེས་སུ་གཟུང་བར་བྱ་བའི་སེམས་ཅན་རྣམས་ལ། སྔོན་ཆད་རང་གི་དོན་དུ་ཡང་འདི་འདྲ་བའི་ཡིད་ལ་མངོན་པར་འདོད་པའི་སེམས་རྨི་ལམ་དུ་ཡང་མ་རྨིས་ཤིང་སྔར་སྐྱེས་པ་མ་མཐོང་ན། གཞན་དག་གི་དོན་དུ་འདི་འདྲ་བའི་སེམས་པར་ག་ལ་འགྱུར། དེ་བཞིན་དུ་སྡུག་བསྔལ་བའི་ནད་ཀྱི་རྩི་སྨན་དུ་གྱུར་པ་ནི་ཐར་པ་ཐོབ་པའི་དོན་དུ་གྱུར་པའི་ཕྱིར། འགྲོ་བ་ཀུན་གྱི་དགའ་བའི་རྒྱུར་གྱུར་པ་དང༌། སྐྱེ་དགུའི་སྡུག་བསྔལ་གྱི་སྨན་དུ་གྱུར་པའི་སེམས་རིན་པོ་ཆེའི་བསོད་ནམས་གང་ཡིན་པ་ཞེས་སྒྲ་བ་ཅན་ཟིན་གྱི་མགོ་དང་འདྲ་བར་དབྱེ་བ་མེད་ཀྱང་ཕྱེ་སྟེ་བཤད་པ་ཡིན་ནོ། །འདིར་བསོད་ནམས་ནི་འགྲོ་བའི་དོན་གྱི་རྒྱུར་གྱུར་པ་ཉིད་ཡིན་པས། བསོད་ནམས་དེ་ལས་ཇི་ལྟར་གཞལ་གྱིས་ལང༌། །དེ་བས་ཤིན་ཏུ་ཡང་ཚད་མེད་པ་ཡིན་ནོ་ཞེས་དེ་ལྟར་འདིར་ནི་ལག་བཟངས་ཀྱིས་ཞུས་པ་ལས་འཐད་པ་དང་བཅས་པར་གསུངས་པ་ཡིན་ནོ། །གཞན་ཡང༌། ཕན་པར་བསམས་པ་ཙམ་གྱིས་ཀྱང༌། །སངས་རྒྱས་མཆོད་ལས་ཁྱད་འཕགས་ན། །ཞེས་བྱ་བ་སྟེ། ཟླ་བ་སྒྲོན་མའི་མདོ་ལས། མཆོད་པ་ཚད་མེད་རྣམས་མང་ཇི་སྙེད་པ། །ཞིང་ནི་བྱེ་བ་ཁྲག་ཁྲིག་གཏམས་རྙེད་དུ། །སྐྱེས་བུ་མཆོག་ལ་མཆོད་པ་དེ་བྱས་པས། །བྱམས་པའི་སེམས་ལ་གྲངས་དང་ཆར་མི་ཕོད། །ཅེས་ཇི་སྐད་གསུངས་པ་ལྟ་བུའོ། །སེམས་
ཅན་ཀུན་གྱི་བདེ་བ་ནི། །ཀུན་དོན་བརྩོན་པ་སྨོས་ཅི་དགེས། །ཞེས་བྱ་བ་ནི་སེམས་ཅན་ཐམས་ཅད་ཀྱིས་བདེ་བ་ཐམས་ཅད་ཐོབ་པའི་དོན་དུ་བརྩོན་པས་འཇུག་པ་དག་ནི་ཅིའི་ཕྱིར་ཁྱད་པར་དུ་འཕགས་པ་ཉིད་མ་ཡིན་ཏེ། ཁྱད་པར་དུ་འཕགས་པ་ཉིད་ཡིན་ནོ། །དེ་བཞིན་དུ་བྱང་ཆུབ་ཏུ་སྨོན་པ་དག་གི་བསོད་ནམས་ཚད་མེད་པ་ཡིན་ཡང༌། སེམས་ཅན་ཐམས་ཅད་ཀྱི་དོན་དུ་འཇུག་པས། ཁྱད་པར་དུ་འཕགས་པ་ཉིད་མ་ཡིན་པར་བསྟན་པའི་ཕྱིར་སྡུག་བསྔལ་ཞེས་བྱ་བ་ལ་སོགས་པ་སྨོས་ཏེ། སྡུག་བསྔལ་འདོར་ཞིང་དེ་ལས་ངེས་པར་འབྱུང་བའི་ཐར་པ་སྟེ། དེ་འདོད་པའི་ཕྱིར་བརྟུལ་ཞུགས་ཅན་ཁ་ཅིག་སྐྲ་འབལ་བ་ལ་སོགས་པ་བྱེད་ཅིང་སྡུག་བསྔལ་ཉིད་ལ་མངོན་པར་བརྒྱུག་གོ །དེ་བཞིན་དུ་གཞན་ནི་བདེ་བ་འཐོབ་པར་འདོད་ཀྱང་མཐོ་རིས་དང་ཐར་པའི་ལམ་མི་ཤེས་ཤིང༌། ཀུན་ཏུ་གཏི་མུག་པས་ཤིན་ཏུ་སྡུག་བསྔལ་བའི་རྒྱུ་དག་ལ་བདེ་བའི་རྒྱུ་ཡིན་ནོ་སྙམ་པས་མངོན་པར་བརྒྱུག་ཅིང་རང་གི་བདེ་བ་དག་ནི་དགྲ་བོ་ལྟར་འཇོམས་པར་བྱེད་པ་སྟེ་མཐོང་བ་དང་མ་མཐོང་བའི་བདེ་བའི་རྒྱུ་མི་ཤེས་ཤིང༌། དེ་ལ་ཀུན་ཏུ་རྨོངས་པས་སྦྱིན་པ་ལ་སོགས་པ་ནི་བདེ་བའི་རྒྱུ་ཡིན་ལ། དེ་ཁོ་ན་ཉིད་ཤེས་པའི་བློ་ནི་ཐར་པའི་རྒྱུ་ཡིན་ནོ་ཞེས་མི་ཤེས་པས་དེ་དང་མི་མཐུན་པ་འབའ་ཞིག་སྟོན་པར་བྱེད་དོ། །གང་ཞིག་ཅེས་བྱ་བ་ལ་སོགས་པ་ལ་སྡོམ་བརྩོན་ཅན་དང༌། ཁྱིམ་པ་གང་ཞིག་བདེ་བས་མི་ངོམས་པའི་ཕྱིར་བདེ་བས་ཕོངས་པར་གྱུར་པ་དང༌། དམྱལ་བ་ལ་སོགས་པའི་སྡུག་བསྔལ་མང་པོ་དང་ལྡན་བས་ལན་དུ་མར་གཟིར་བར་གྱུར་པ་དེ་དག་ལ་བྱམས་པ་ཆེན་པོ་ལས་བྱུང་བའི་བདེ་བ་ཀུན་གྱིས་ནི་ཚིམ་པར་བྱེད་དོ། །སྙིང་རྗེ་ཆེན་པོས་སྡུག་བསྔལ་ཐམས་ཅད་ནི་གཅོད་པར་བྱེད་ཅིང་འགོག་པར་བྱེད་དོ། །ཤེས་རབ་ཀྱིས་གཏི་མུག་ཀྱང་ནི་སེལ་ཞིང་འཇིག་པར་བྱེད་དོ། །བྱང་ཆུབ་སེམས་དཔའི་རིགས་དང་ལྡན་པ་དག་ནི་རང་བཞིན་གྱིས་སྙིང་རྗེ་ཆེན་པོ་ལ་སོགས་པ་དང་ལྡན་པའི་ཕྱིར་གསོལ་བ་མ་བཏབ་ཏུ་ཟིན་ཀྱང་གཞན་གྱི་དོན་འཇུག་པ་ཡིན་ནོ། །དེ་བས་ན་སེམས་ཅན་གྱི་དོན་གྱི་འཇུག་པའི་བྱང་ཆུབ་སེམས་དཔའ་དེ་དང་དགེ་ཞིང་ལེགས་པ་མཚུངས་ཤིང་མཉམ་པ་ག་
ལ་ཡོད་དེ། སྨོན་པ་ལ་གནས་སུ་ཟིན་ཀྱང་དེ་དང་མཉམ་པ་མ་ཡིན་ཏེ། ག་ལ་ཡོད་ཅེས་བྱ་བས་ནི་མི་སྲིད་པ་ཉིད་ཡིན་པར་སྟོན་ཏོ། །དེ་བས་ན་འཕགས་པ་བྱམས་པས་ཀྱང་རིགས་ཀྱི་བུ་བྱང་ཆུབ་ཏུ་སྨོན་པ་འདི་ཡང་རྙེད་པར་དཀའོ། །དེ་བས་ཀྱང་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཇུག་པ་དེ་ཡང་ཆེས་རྙེད་པར་དཀའོ་ཞེས་གསུངས་པ་ཡིན་ནོ། །དེ་ལྟར་ན་བྱང་ཆུབ་ཏུ་འཇུག་པའི་བསོད་ནམས་ནི་ཤིན་ཏུ་ཡང་རྙེད་པར་དཀའ་བ་ཡིན་ནོ་ཞེས་བསྟན་པའི་ཕྱིར། དེ་འདྲའི་བཤེས་ཀྱང་ག་ལ་ཡོད། །ཅེས་བྱ་བ་ནི་སྨོན་པ་ལ་གནས་སུ་ཟིན་ཀྱང་འཇུག་པའི་སེམས་ལྟ་བུ་མ་ཡིན་ཏེ། འཇུག་པ་ནི་ཤིན་ཏུ་ཡང་བསྔགས་པར་བྱ་བ་ཡིན་པས་འདི་ནི་ཁྱད་པར་ཡིན་ནོ། །དེ་ཉིད་ཀྱི་ཕྱིར་ཕན་བཏགས་ཞེས་བྱ་བ་ལ་སོགས་པ་སྨོས་པ་ཡིན་ཏེ། གང་གིས་ཕན་འདོགས་པར་བྱེད་པ་འདིར་ཕན་འདོགས་པ་ཞེས་བཤད་ལ། ཕན་བཏགས་པ་དེ་ལ་སླར་ལན་ལོན་པ་དེ་གང་ཡིན་པ་དེ་ནི་ལན་ལྡོན་པ་ཞེས་བྱ་བ་སྟེ། དེ་ཡང་རེ་ཞིག་བསྔགས་པར་འོས་པ་ཉིད་ཡིན་ན། མ་བཅོལ་ཕན་པར་བྱེད་པ་ཡི། །ཞེས་བྱ་བ་གསོལ་བ་མ་བཏབ་ཏུ་ཟིན་ཀྱང་ཐམས་ཅད་དུ་ཕན་འདོགས་པར་བྱེད་པ་ཉིད་ཡིན་ན། གང་བྱང་ཆུབ་སེམས་དཔའ་ཡོད་པ་དེ་ནི་བྱང་ཆུབ་སེམས་དཔའ་སྟེ། དེ་ནི་སྨོས་ཅི་དགོས་པས་ཤིན་ཏུ་ཡང་བསྔགས་པར་བྱ་བ་ཡིན་ནོ་ཞེས་བྱ་བའི་ཐ་ཚིག་གོ །བསྟོད་པའི་ཚིག་དག་གིས་བསྔགས་པར་འོས་པ་ཡིན་པ་འབའ་ཞིག་ཏུ་མ་ཟད་དེ། ཕྱག་འཚལ་བ་དང༌། མེ་ཏོག་ལ་སོགས་པས་མཆོད་པ་བྱ་བ་ཡང་ཡིན་ནོ། །དེ་ཡང་གང་གི་ཕྱིར་འགྲོ་བ་ཉུང་ཟད་ཅིག་ལ་ནར་མ་ཙམ་གྱིས་ཁ་ཟས་སྦྱོར་ཞིང་སྦྱིན་པར་བྱེད་པ་གང་ཡིན་པ་དེ་ལ་ཡང་འདི་ནི་འགྲོ་བ་ལ་ཟས་སྦྱིན་པར་བྱེད་པ་ཡིན་པས། དགེ་བ་བྱེད་པ་ཡིན་ནོ་ཞེས་སྐྱེ་བོ་རྣམས་ཀྱིས་བཀུར་ཞིང་མངོན་པར་མཆོད་པར་བྱེད་པ་ཡིན་ནོ། །ནར་མའི་ཟས་ཅི་ཙམ་ཞིག་སྦྱོར་བར་བྱེད་ཅེ་ན། སྐད་ཅིག་ཙམ་གྱིས་དུས་ཐམས་ཅད་དུ་མ་ཡིན་པ་དང༌། ཟས་ཙམ་སྦྱིན་པ་དེ་ཡང་བརྙས་པ་དང་བཅས་པ་ཉིད་དུ་བསྟེན་པར་བྱེད་པ་ཉིད་ཡིན་པའོ། །ཇི་ལྟར་ན་བརྙས་པ་དང་བཅས་པར་བྱིན་དུ་ཟིན་ཀྱང་དགེ་བ་ཡིན་ཞེ་ན། ཉིན་ཕྱེད་
འགྲངས་པར་བྱེད་པ་ཞེས་བྱ་བ་སྨོས་ཏེ། འགྲོ་བ་ཉུང་ཟད་ཅིག་གི་ཉི་མ་ཕྱེད་ཀྱི་འཚོ་བ་ཡིན་པའི་ཕྱིར་རོ། །བྱང་ཆུབ་སེམས་དཔའ་དག་ནི་སེམས་ཅན་གྲངས་ངེས་པ་མེད་པ་མཐའ་ཡས་ཞེས་བྱ་བས་ཉེ་བར་མཚོན་པ་རྣམས་ལ། དུས་རིང་དུ་སྟེ་དུས་ཆད་པ་མེད་པར་སྦྱིན་ཞིང་སྟེར་བར་བྱེད་པའོ། །ཅི་ཞིག་སྦྱིན་པར་བྱེད་ཅེ་ན། མཁའ་དང་འགྲོ་བ་ཟད་ཀྱང་གང་ཡིན་ལ་བསམས་པ་མ་ལུས་པ་མཐའ་དག་ཡོངས་སུ་རྫོགས་པར་བྱེད་པ་དང༌། ནམ་མཁའ་དང་འགྲོ་བ་རྣམས་ཟད་པར་གྱུར་ཀྱང་མི་ཟད་པ་གང་ཡིན་པ་དེ་ནི། ཡིད་ལ་བསམས་པ་མཐའ་དག་རྫོགས་བྱེད་ཅིང༌།། མཁའ་དང་འགྲོ་བ་ཟད་ཀྱང་མི་ཟད་པ། །ཞེས་བྱ་བ་སྟེ། དུས་གསུམ་ཐམས་ཅད་དུ་དགེ་བའི་བདག་ཉིད་ཅན་གྱི་དངོས་པོའི་ངོ་བོ་ཉིད་ཡིན་པའི་ཕྱིར་རོ། །འདི་སྐད་སྟོན་ཏེ། ཡང་དག་པར་སྦྱིན་པར་བྱས་པའི་སེམས་ཅན་གྲངས་མཐའ་ཡས་ཉེ་བར་མཚོན་པའི་ཕྱིར་ཆད་པ་མེད་པ་དང༌། ཐམས་ཅད་ཀྱི་ཡིད་ལ་རེ་བ་མ་ལུས་པ་ཡོངས་སུ་རྫོགས་པར་བྱེད་པ་དང༌། ནམ་མཁའ་དང་འགྲོ་བ་རྣམས་ཡོངས་སུ་ཟད་ཀྱང་ཟད་པ་མེད་པ་ཉིད་ཀྱིས་དུས་ཀྱི་རྒྱུན་ཆད་པ་མེད་པར་རྗེས་སུ་སྦྱིན་པར་བྱེད་པ་དག་ཅིའི་ཕྱིར་མཆོད་པར་བྱེད་པ་ཉིད་དུ་མི་འགྱུར་ཏེ། གཞན་དུ་ན་དེ་ནི་ཤིན་ཏུ་མཆོད་པར་བྱེད་པ་ཡིན་ནོ་ཞེས་བསྟན་པའི་དོན་ཏོ། །དེ་ལྟ་ན་གང་ཞིག་དེ་འདྲའི་རྒྱལ་སྲས་ནར་མའི་སྦྱིན་བདག་ཆེན་པོའི་ཡུལ་ལ་འགྲོ་བ་གང་ཞིག་གལ་ཏེ་རང་གི་སེམས་རྙོག་པ་དང་བཅས་ཤིང༌། དད་པ་མེད་པའི་ངན་སེམས་སྐྱེད་པར་བྱེད་པ་དེ། ངན་སེམས་བསྐྱེད་པའི་གྲངས་བཞིན་བསྐལ་པར་ནི། །ཞེས་པ་རྙོག་པའི་ངན་སེམས་སྐྱེས་པའི་སྐད་ཅིག་མའི་གྲངས་ཇི་སྙེད་པའི་སྐད་ཅིག་མ་དེ་དང་མཉམ་པའི་བསྐལ་པའི་གྲངས་དེ་སྙེད་དུ་དམྱལ་བར་གནས་པར་འགྱུར་རོ་ཞེས་རྒྱལ་བས་ཏེ་སངས་རྒྱས་བཅོམ་ལྡན་འདས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལ་སོགས་པ་ལས་གསུངས་པ་ཡིན་ནོ། །འོན་ཏེ་རྒྱལ་བའི་སྲས་ལ་ཡིད་རབ་ཏུ་དང་བར་བྱེད་ཅིང་དང་བར་བྱེད་པ་ན་སྐྱེས་བུ་དེའི་འབྲས་བུ་སྔར་བཤད་པའི་འབྲས་བུ་ཡིད་དུ་མི་འོང་བའི་དུས་དེ་ལས་ལྷག་པར་ཡིད་དུ་འོང་བའི་འབྲས་བུ་བདེ་འགྲོ་ལ་སོགས་པ་སྐྱེད་པར་འགྱུར་རོ། །དེ་བཞིན་དུ་རྒྱལ་བའི་སྲས་
རྣམས་ལ་དོ་གལ་ལམ་སྟོབས་ཆེན་པོས་ཀྱང་སྡིག་པ་མི་འབྱུང་སྟེ། རྐྱེན་གྱི་སྟོབས་དང་ལྡན་པ་དག་ཉེ་བར་གནས་པས་ཀྱང༌། སེམས་ཅན་གྱི་སྡིག་པའི་ལས་དང་འབྲེལ་པར་མི་མཛད་ལ། སེམས་ཅན་མགུ་བ་ལ་མཆོག་ཏུ་བརྩོན་པས་དགེ་བ་ནི་ངང་གིས་འཕེལ་བར་གྱུར་པ་ཡིན་ནོ། །དེ་བས་ན་གང་གི་སྐུ་ལ་རྒྱལ་བའི་སྲས་ཀྱི་སེམས་ཀྱི་ཕན་ཡོན་ཆེན་པོ་དེ་ལྟ་བུ་དང་ལྡན་པའི་མཆོག་དམ་པ་སེམས་ཀྱི་རིན་པོ་ཆེ་འདི་སྐྱེས་ཤིང་འཁྲུངས་པར་གྱུར་པ་དེ་རྣམས་ཀྱི་སྐུ་ལུས་ལ་ཕྱག་འཚལ་ཞིང་འདུད་པར་བྱེད་དོ། །དེ་བཞིན་དུ་གང་ལ་གནོད་པ་བྱས་ཀྱང་བདེ་བ་དང་རྗེས་སུ་འབྲེལ་པར་འགྱུར་བ་ཡིན་ཏེ། བཅོམ་ལྡན་འདས་ཀྱིས་ཀྱང་སངས་རྒྱས་ཀྱི་ཆོས་རྣམས་ལ་གནོད་པར་བྱེད་པ་གང་ཡིན་པ་དེ་རྣམས་ཀྱང་མཐོ་རིས་སུ་ཉེ་བར་འགྲོ་བའོ་ཞེས་ཇི་སྐད་གསུངས་པ་ལྟ་བུའོ། །དམྱལ་བར་གནས་པར་འགྱུར་ཞེས་མ་གསུངས་སམ་ཞེ་ན། དེ་ནི་བདེན་མོད་ཀྱིས། དེ་རྣམས་ལ་གནོད་པ་བྱས་པའི་དབང་གིས་དམྱལ་བ་རྣམས་སུ་གནས་པར་གྱུར་ཀྱང་དེ་གཞི་དེ་ལས་གནས་སྐབས་གཞན་དུ་སེམས་དད་ཅིང་དང་བས་སླར་ཡང་སྣོད་དུ་གྱུར་པ་ན། དེ་དད་པ་ལ་སོགས་པའི་རིམ་པས་མཐོ་རིས་སུ་འགྲོ་བའི་ཐབས་ཀྱང་དེ་ཉིད་ཡིན་པར་དེ་རྣམས་ཀྱིས་གཟིགས་ཏེ། དཔེར་ན་འཕགས་པ་མེ་ཏོག་ཟླ་མཛེས་ཀྱིས་རྒྱལ་པོ་དཔའ་བྱིན་ལ་བྱས་པ་ལྟ་བུའོ། །འདིར་ཕན་པ་ནི་ཐར་པའི་ས་བོན་ཡིན་ལ། བདེ་བ་དང་སྡུག་བསྔལ་ཡང་དེ་དང་འབྲེལ་པའི་ངང་ཚུལ་ཡིན་པས་དེ་ལྟར་ན་བརྒྱུད་པའི་སྒོ་ནས་གནོད་པར་བྱེད་པ་ལ་ཡང་བདེ་ཞིང་ཕན་པ་དང་འབྲེལ་པ་ཡིན་ནོ། །སངས་རྒྱས་དང་བྱང་ཆུབ་སེམས་དཔའ་ལས་ནི་ཕན་པ་དང་བདེ་བ་ཉིད་འབྱུང་བའི་ཕྱིར་བདེ་བའི་འབྱུང་གནས་ཞེས་བྱ་བ་སྨོས་ཏེ། བདེ་བའི་འབྱུང་གནས་ནི་བདེ་བའི་ཞིང་གྱུར་པ་ཡིན་པས། བྱང་ཆུབ་སེམས་དཔའ་སྐྱོབ་པ་དེ་ལ་སྐྱབས་སུ་མཆི་ཞེས་པའོ། །བྱང་ཆུབ་ཀྱི་སེམས་ཀྱི་ཕན་ཡོན་ནི་དེའི་འབྲས་བུ་འམ་ཡོན་ཏན་གྱི་བདག་ཉིད་ཆེ་བའོ། །བྱང་ཆུབ་སེམས་དཔའི་སྤྱོད་པ་ལ་འཇུག་པའི་ལེགས་པར་སྦྱར་བ་ལས་ལེའུ་དང་པོའོ།། །།དེ་ལྟར་ཕན་ཡོན་ཆེན་པོ་དང་ལྡན་ཞིང་བདེ་བའི་འབྱུང་གནས་སུ་གྱུར་པ་ཉིད་ཡིན་པའི་ཕྱིར། སེམས་རིན་
པོ་ཆེ་དེ་ངེས་པར་གཟུང་ཞིང་བླང་དགོས་པས་དེའི་ཕྱིར་རིན་ཆེན་སེམས་དེ་ཞེས་བྱ་བ་ལ་སོགས་པ་སྨོས་ཏེ། རིན་པོ་ཆེ་ལྟ་བུའི་སེམས་དེ་ཡང་དག་པར་ལེགས་པར་གཟུང་བར་བྱ་བའི་ཕྱིར། མཆོད་པ་ཡང་དག་པར་བྱའོ། །དེ་ཡང་དད་པའི་ཤུགས་ཆེན་པོས་ཕྱག་འཚལ་བ་དང༌། སྐྱབས་སུ་འགྲོ་བ་ལ་སོགས་པས། དེ་བཞིན་གཤེགས་པ་སྟེ། སངས་རྒྱས་བཅོམ་ལྡན་འདས་རྣམས་དང༌། དམ་པའི་ཆོས་དཀོན་མཆོག་དྲི་མ་མེད་པ་དངོས་པོ་དང་དངོས་པོ་མེད་པར་རྣམ་དཔྱད་ན་དྲི་མའི་ནག་ནོག་དང་བྲལ་བ་དག་དང༌། སངས་རྒྱས་ཀྱི་སྲས་ཡོན་ཏན་མཐའ་ཡས་པ་སྟེ་རྒྱ་མཚོ་སྙེད་མངའ་བ་རྣམས་ལ་ལེགས་པར་མཆོད་པར་བྱ་སྟེ། མཆོད་པ་དང༌། བསྟོད་པ་དང༌། ཕྱག་འཚལ་བ་དང༌། སྐྱབས་སུ་འགྲོ་བ་ལ་སོགས་པ་བྱས། བསམ་པ་ཡང་དག་པར་སྦྱངས་ནས་སྡིག་པ་རྣམས་ཀྱང་བཤགས་ལ། དེའི་རྗེས་ལ་བྱང་ཆུབ་ཏུ་སྨོན་པར་བྱ་སྟེ། དེ་ནས་ནི་འཇུག་པར་བྱའོ། །དེ་ལྟར་སྦྱོར་བ་དང༌། དངོས་གཞི་དང༌། མཇུག་གིས་རྒྱས་པ་དང༌། ཡོངས་སུ་དག་པ་ཉིད་ཀྱིས་སེམས་རིན་པོ་ཆེ་དེ་ཡང་དག་པར་འཛིན་པ་ཉིད་དུ་འགྱུར་རོ། །དེ་ལ་མཆོད་པ་ནི་མེ་ཏོག་དབུལ་བ་དང༌། དེའི་རྐྱེན་དུ་གྱུར་པའི་ལས་རྣམས་སོ། །དེ་ཡང་བླ་ན་ཡོད་པ་དང་བཅས་པ་དང༌། བླ་ན་མེད་པའོ། །དེ་ལས་ཀྱང་རེ་ཞིག་དང་པོ་བསྟན་པ་ནི་མེ་ཏོག་འབྲས་བུ་ཞེས་བྱ་བ་ལ་སོགས་པ་ཡིན་ཏེ། ཇི་སྙེད་ཡོད་པ་དང་ཞེས་བྱ་བ་ནི་ཁྱད་པར་སྨྲས་པ་ཡིན་ནོ། །སྨན་གྱི་རྣམ་པ་ཞེས་བྱ་བ་ནི་སྨན་གྱི་རིགས་སུ་གཏོགས་པ་སྟེ། སྨན་གྱི་མེ་ཏོག་ལ་སོགས་པའི་མཆོག་གང་དག་ཇི་སྙེད་ཡོད་པ་དང༌། དེ་བཞིན་དུ་འཇིག་རྟེན་དག་ན་རིན་པོ་ཆེའི་རྣམ་པ་མཆོག་ཏུ་གྱུར་པ་གང་དག་ཇི་སྙེད་ཡོད་པ་སྟེ། འདིར་འཇིག་རྟེན་ཞེས་བྱ་བ་ལྷ་ལ་སོགས་པ་སྟེ། འཇིག་རྟེན་ན་ཇི་སྙེད་ཡོད་པ་ཞེས་ཐམས་ཅད་ལ་ཡང་སྦྱར་བའི་ཕྱིར་ཟློས་པའི་ཚིག་ཏུ་སྨོས་པ་ཡིན་ནོ། །གཙང་མ་ཡང་ཡིན་ལ་ཡིད་དུ་འོང་བ་ཡང་ཡིན་པས་ཆུ་གཙང་ཡིད་དུ་འོང་བའོ། །རི་བོ་ནི་ས་འཛིན་ནོ། །དབེན་ཞིང་ཉམས་དགའ་བ་ནི་དབེན་ཞིང་ཉམས་དགའ་བའོ། །ལྗོན་ཤིང་རང་གི་མེ་ཏོག་གིས་བརྒྱན་ཅིང་འབར་བར་སྣང་བ་ནི་བརྒྱན་པས་
སྤུད་པའོ། །དེ་བཞིན་དུ་ཤིང་གང་འབྲས་བུ་བཟང་ཞིང་མཆོག་ཏུ་གྱུར་པས་ཡལ་ག་དུད་ཅིང་གཡུར་ཟ་བའི་ངང་ཚུལ་གང་ལ་ཡོད་པ་དེ་ནི་ཤིང་གང་འབྲས་བཟང་ཡལ་ག་དུད་པ་ཞེས་བྱའོ། །དྲི་ནི་བཞི་པོ་ཆ་མཉམ་དུ་སྦྱར་བ་ལ་སོགས་པའོ། །སྤོས་ནི་ཨ་ཀ་རུ་ནག་པོ་ལ་སོགས་པའོ། །དེ་ཡང་ཕྱོགས་ལ་སོགས་པ་སྟོང་པར་ལྷ་ལ་སོགས་པས་ལེགས་པར་སྦྱར་ཏེ་བཏང་བའོ། །དཔག་བསམ་ཤིང་ནི་ཇི་ལྟར་མངོན་པར་འདོད་པའི་འབྲས་བུ་འབྱུང་བའི་ཤིང་ངོ༌། །ཆུ་ལས་སྐྱེས་པའི་མེ་ཏོག་པདྨ་ལ་སོགས་པས་བརྒྱན་པ་གང་ཡིན་པ་དེ་ནི་པདྨས་བརྒྱན་པའོ། །དེ་བཞིན་དུ་ངང་པའི་སྒྲ་སྐད་ཤིན་ཏུ་སྙན་པ་དང་ལྡན་པ་གང་ཡིན་པ་དེ་ནི་ངང་པ་ཤིན་ཏུ་སྐད་སྙན་ཡིད་འོང་ཞེས་བྱའོ། །གཞན་ཡང་ཞེས་བྱ་བ་ནི་རེ་རེ་ནས་བརྗོད་པར་ཇི་ཙམ་ཞིག་ནུས་ཏེ། ཁྱད་པར་ཅན་གྱི་དངོས་པོ་གང་དག་ཡོད་པ་དེ་དག་ཐམས་ཅད་དབུལ་བར་བྱའོ་ཞེས་བྱ་བར་དགོངས་ཏེ། སངས་རྒྱས་ལ་སོགས་པ་མཆོད་པར་འོས་པའི་སངས་རྒྱས་བཅོམ་ལྡན་འདས་རྣམས་ཀྱི་རྒྱན་དུ་གྱུར་པ་མེ་ཏོག་ལ་སོགས་པ་འདི་དག་ནི། ནམ་མཁའ་རབ་འབྱམ་ཁམས་ཀྱི་མཐས་གཏུགས་པ། །ཞེས་བྱ་བ་ནི་ནམ་མཁའ་མ་ལུས་པ་ཁྱབ་པར་བྱེད་པ་ཡོངས་སུ་གཟུང་བ་མེད་པ་སྟེ། དཔེར་ན་བྱང་གི་སྒྲ་མི་སྙན་ལྟ་བུའོ། །དཔག་བསམ་གྱི་ཤིང་ལ་སོགས་པ་དེ་དག་ཀུན་བློ་ཡིས་བླངས་ཤིང་ཀུན་ནས་བཟུང་ནས་ཐུབ་པ་སྐྱེས་བུ་རྣམས་ཀྱི་མཆོག་སྲས་དང་བཅས་པ་རྣམས་ལ་ལེགས་པར་དབུལ་བ་བགྱི་ཞིང་འདི་དག་བདག་གིས་ལེགས་པར་བསྟབ་པར་བྱའོ། །དེ་ནས་ཡོན་གནས་ཀྱི་དམ་པ་ཐུགས་རྗེ་ཆེན་པོ་དང་ལྡན་པ་ཁྱེད་རྣམས་ཀྱིས་བདག་ལ་རྗེས་སུ་བརྩེ་བར་དགོངས་པས་བདག་གི་མེ་ཏོག་ལ་སོགས་པ་གནས་གང་ན་གནས་པ་དེ་དག་ཐམས་ཅད་བཞེས་པར་མཛོད་ཅིག །དེ་ཅིའི་ཕྱིར་ཞེ་ན། བསོད་ནམས་མི་ལྡན་ཞེས་བྱ་བ་སྨོས་ཏེ། བསོད་ནམས་ཉེ་བར་མ་བསགས་པས་སོ། །དེ་ཉིད་ཀྱིས་ན་བཀྲེན་ཆེན་ཏེ་ཤིན་ཏུ་དབུལ་པོར་གྱུར་པའོ། །དེའི་ཕྱིར་མཆོད་པའི་ནོར་དུ་རུང་བ་ནི་ཇི་སྐད་དུ་བཤད་པའི་མེ་ཏོག་ལ་སོགས་པ་ལས་གཞན་པ་བདག་ལ་ཅང་ཡང་མ་མཆིས་སོ། །དེ་བས་ན་གཞན་
གྱི་དོན་ལ་དགོངས་པར་མཛད་པའི་མགོན་པོ་ཁྱེད་ཀྱིས་མེ་ཏོག་ལ་སོགས་པ་འདི་རྣམས་རང་རང་གི་གནས་ན། ཇི་ལྟ་བ་གནས་སུ་ཟིན་ཀྱང་བདག་གི་བློ་ལ་གནས་པ་སྟེ། ཉིད་ཀྱི་མཐུས་བཞེས་པར་མཛོད་ཅིག་ཅེས་པའོ། །དྲིས་པ། ཁྱེད་ལ་རང་གི་བདག་ཉིད་ལ་སོགས་པ་ཡང་ཡོད་བཞིན་དུ། བདག་ལ་ཅི་ཡང་མ་མཆིས་སོ་ཞེས་སྨྲ་ཞེ་ན། དེའི་ཕྱིར་རྒྱལ་དང་ཞེས་བྱ་བ་ལ་སོགས་པ་སྨོས་ཏེ། རྒྱལ་བ་ནི་བདུད་བཞི་ལས་རྒྱལ་བའི་སངས་རྒྱས་ཏེ། དེ་སྲས་དང་བཅས་པ་རྣམས་ལ་བདག་གིས་ནི་དུས་གསུམ་གྱི་དགེ་བ་ཐམས་ཅད་དང་བཅས་པ་དང་དངོས་པོ་ཐམས་ཅད་གཏན་དུ་དབུལ་བར་བགྱིའོ། །དེས་ན་སེམས་དཔའི་མཆོག་ཁྱེད་རྣམས་ཀྱིས་བདག་ཡོངས་སུ་བཞེས་ཤིག །བདག་གིར་མཛོད་ཅིག །ཀྱེ་སེམས་དཔའི་མཆོག་མཆོག་ཏུ་གུས་པས་ཁྱེད་ཀྱི་འབངས་སུ་མཆི་བར་བགྱི་ཞིང་འབངས་ཀྱི་དངོས་པོ་ཉིད་བགྱིད་དོ་ཞེས་པའོ།། བདག་ཉིད་ལ་སོགས་པ་ནི་སེམས་ཅན་ཐམས་ཅད་ལ་སྦྱིན་པར་བྱེད་པ་ཡིན་ལ། དེས་གདུལ་བྱ་དེ་རྣམས་ཀྱི་དོན་ནི་ཁྱེད་ཀྱིས་བྱ་དགོས་པ་ཡིན་ན། དེ་བདག་ཅག་རྣམས་ལ་ཅིའི་ཕྱིར་དབུལ་བར་བྱེད་ཅེ་ན། དེའི་ཕྱིར་བདག་ནི་ཁྱེད་ཀྱིས་ཞེས་བྱ་བ་ལ་སོགས་པ་སྨོས་ཏེ། བདག་ཁྱེད་ཀྱིས་ཡོངས་སུ་གཟུང་ཞིང་བཞེས་པར་མཛད་ན། སྲིད་པ་སྟེ་འཁོར་བ་ན་མི་འཇིགས་ཤིང་སྐྲག་པ་མེད་པས་སེམས་ཅན་རྣམས་ལ་ཕན་པར་གྱུར་པའི་དོན་བགྱིད་པ་དང༌། སྔོན་གྱི་སྡིག་ལས་ཡང་དག་འདའ་བགྱིད་ཅིང༌། །སྡིག་པ་གཞན་ཡང་སླན་ཆད་མི་བགྱིད་དོ། །ཡང་དེ་ལྟར་གྱུར་ན་ཆོས་དང་མི་འཇིགས་པ་དང༌། ཟང་ཟིང་གི་སྦྱིན་པས་སེམས་ཅན་རྣམས་ལ་ཕན་པ་བགྱིད་པར་རྔོ་ཐོགས་ཀྱི་གཞན་དུ་ནི་མ་ཡིན་ནོ། །ཆེན་པོ་རྣམས་ལ་བརྟེན་བཅས་ན་དོན་ཆེན་པོར་འགྱུར་བའི་ཕྱིར་རོ། །གཞན་ཡང་ཁྱེད་རྣམས་ཀྱིས་བཞེད་པའི་དོན་ནི་འགྲོ་བའི་དོན་ཉིད་ཡིན་པས་ཁྱེད་རྣམས་ལ་ཕུལ་བས་སེམས་ཅན་ཐམས་ཅད་ལ་སྩལ་བར་གྱུར་པ་ལགས་ཏེ། ཁྱེད་ཀྱི་བཀའ་ཉིད་ཀྱིས་དེ་རྣམས་ལ་ཡང་སྩལ་བར་བགྱིའོ་ཞེས་སྦྱིན་པར་བཤད་པ་ཡིན་ནོ། །ཡང་དེའི་རྐྱེན་དུ་གྱུར་པ་དག་བསྟན་པར་བྱ་བའི་ཕྱིར། ཁྲུས་ཀྱི་ཁང་པ་ཞེས་བྱ་བ་ལ་སོགས་
པ་སྨོས་ཏེ། ཁྲུས་ཀྱི་ཁང་པ་ཤིན་ཏུ་དྲི་ཞིམ་པ་དག་ནི་ཤེལ་གྱི་རང་བཞིན་ཅན་གྱིས་གཞི་ཀུན་ཏུ་གསལ་ཞིང་དང་ས་ལ་འཚེར་བག་དང་བཅས་པ་ཉིད་དུ་བསྟར་ཞིང་བྱི་དོར་བྱས་པ་དེ་ནི་རིན་པོ་ཆེ་སྣ་ཚོགས་འོད་ཟེར་འབར་བ་དང་ལྡན་པའི་ཀ་བས་ཡིད་དུ་འོང་ཞིང་ཉམས་དགའ་བར་གྱུར་པར་མུ་ཏིག་གི་རྒྱུ་ལས་བྱས་པའི་བློ་རེ་འོད་ཀྱི་མདངས་ཆགས་པ་བྲེས་པ་གང་ཡིན་པ་དེར། དེ་དག་དང་དེ་ལས་གཞན་པའི་རྒྱན་རྣམས་ཀྱིས་ཀྱང་བརྒྱན་པ་དག་ཏུ། དེ་བཞིན་གཤེགས་པ་རྣམས་དང༌། དེའི་སྲས་རྣམས་ལ་རིན་པོ་ཆེའི་རང་བཞིན་ལས་བྱས་པའི་བུམ་པ་གྲངས་མང་པོ་དུ་མ་དག་སྤོས་དྲི་ཞིམ་པོ་སྣ་ཚོགས་པ་དང་སྦྱར་བའི་ཆུ་ཡིད་དུ་འོང་བ་དང༌། མེ་ཏོག་གིས་ཀྱང་ལེགས་པར་བཀང་བ་བྱས་པ་དང༌། དེ་བཞིན་དུ་གླུ་སྙན་པ་དང༌། རོལ་མོ་སྙན་པ་དང་བཅས་པ་དུ་མ་དག་གིས་སྐུ་ཁྲུས་གསོལ་བར་བགྱིའོ། །དེ་ནས་དེའི་རྗེས་ལ་ཁྲུས་གསོལ་བ་དེ་དག་གི་སྐུ་ལ་ན་བཟའི་རྣམ་པ་མཚུངས་པ་མེད་པའི་གོས་གཙང་ཞིང་དྲི་ཞིམ་པོའི་བདུག་པས་རབ་ཏུ་བསྒོས་ཤིང་བདུག་པས་མཛེས་པར་བྱ་བའི་ཕྱིར་སྐུ་ཕྱི་བར་བགྱིའོ། །དེ་ནས་ནི་དེ་དག་ལ་ཁ་དོག་ཚོན་གྱིས་ལེགས་པར་བསྒྱུར་ཞིང་མཛེས་པར་བྱ་བ་དང༌། དྲི་ཤིན་ཏུ་ཞིམ་པོས་བསྒོས་པའི་ན་བཟའ་དམ་པ་བདག་གིས་དབུལ་བ་འམ་དབུལ་དུ་གཞུག་པར་བྱའོ། །ན་བཟའ་དག་ལ་དྲི་དང་སྤོས་ཀྱིས་བསྒོས་ཤིང་བྱུགས་པ་ནི་རྒྱན་དང་འདྲ་བར་དྲེགས་པའི་རྒྱུ་ཡིན་པའི་ཕྱིར་བཀག་པ་ཡིན་ལ། ཆོས་ཀྱི་བདག་པོ་ཡང་རང་ཉིད་ལ་གནས་པར་མཛད་པས་སློབ་མ་རྣམས་རྗེས་སུ་འཇུག་ཅིང་སློབ་པར་མཛད་པ་མ་ཡིན་ནམ། དེ་ནི་བདེན་མོད་ཀྱི། དད་པས་བྱིན་པའི་སྤོས་དང་མེ་ཏོག་ལ་སོགས་པས་མིག་ལ་ཕན་པ་ལ་སོགས་པའི་བློས་དེ་ལ་སྤྱོད་པར་ནི་མངོན་སུམ་སྣང་བ་ཡིན་གྱི། བརྒྱན་པ་འམ་ཆགས་པའི་བློས་ནི་མ་ཡིན་ལ། སངས་རྒྱས་ཀྱི་སྐུ་གཟུགས་ལ་སོགས་པ་ལ་ནི་དེ་ལྟར་བྱས་པ་ཉིད་ཀྱང་ཉེས་པ་ཡོད་པ་མ་ཡིན་པས་བརྩད་པ་འདིས་ཅི་ཞིག་བྱ། ཁྱིམ་པའི་རྟགས་ཅན་གྱི་བྱང་ཆུབ་སེམས་དཔའ་རྣམས་ནི་གོས་བཟང་པོ་མཐོ་རིས་ན་ལྷ་ལ་ཡོད་པ་ལྟ་བུ་སྲབ་ཅིང་ཤིན་ཏུ་ཕྲ་བ་སྣ་ཚོགས་ཤིང་ཁ་དོག་དུ་མས་
ཉེ་བར་བསྒྱུར་བས་མཛེས་པ་གང་ཡིན་པ་དེ་ནི་སྲབ་ལ་འཇམ་པ་སྣ་ཚོགས་མཛེས། །ཞེས་བྱ་བ་སྟེ། དེ་ལྟ་བུའི་ན་བཟའ་དང་རྒྱན་མཆོག་བརྒྱ་ཕྲག་དེ་དང་དེ་དག་གིས་ཞེས་བྱ་བ་གདུ་བུ་དང༌། དཔུང་རྒྱན་དང༌། སྙན་ཆ་དང༌། ཅོད་པ་ན་ལ་སོགས་པ་བཟང་པོ་རྣམས་ཀྱིས་མ་ཕམ་པ་ལ་སོགས་པ་ལ་མཆོད་ཅིང་བརྒྱན་པར་བགྱིའོ། །དེ་ལ་མ་ཕམ་པ་ནི་བདུད་ཐམས་ཅད་ཀྱིས་ཕམ་པར་མི་ནུས་པས་ནམ་ཕམ་པ་སྟེ། འཕགས་པ་བྱམས་པའོ། །ཀུན་ནས་བཟང་བས་ན་ཀུན་ཏུ་བཟང་པོ་སྟེ། འདི་ནི་བྱང་ཆུབ་སེམས་དཔའ་ཡིན་ནོ། །འཇམ་ཞིང་སྙན་པའི་དབྱངས་མངའ་ཞིང་བྱིས་པ་འདྲ་བས་ན་འཇམ་དབྱངས་སོ། །འཇིག་རྟེན་ཐམས་ཅད་ཀྱི་དབང་ཕྱུག་བཟང་བ་ཡིན་ཞིང་དེའི་རྣམ་པ་འདྲ་བའི་ཕྱིར་དང༌། འགྲོ་བ་སྡུག་བསྔལ་དང་ལྡན་པ་རྣམས་ལ་སྤྱན་རས་ཀྱིས་འཚོ་ཞིང་གཟིགས་པར་མཛད་པས་ན་འཇིག་རྟེན་དབང་ཕྱུག་སྟེ། འཕགས་པ་སྤྱན་རས་གཟིགས་དབང་ཕྱུག་གོ །སོགས་པའི་སྒྲས་ནི་ཕྱག་ན་རྡོ་རྗེ་ལ་སོགས་པ་བསྡུ་སྟེ། དེ་ལྟར་ན། མི་ཕམ་ཀུན་ཏུ་བཟང་དང་འཇམ་དབྱངས་དང༌། །འཇིག་རྟེན་དབང་ཕྱུག་སོགས་ལ་འང་བརྒྱན་པར་བགྱི། །ཞེས་བྱ་སྟེ། དེ་རྣམས་ནི་གདུལ་བྱ་རྣམས་ཀྱི་དབང་དུ་མཛད་ནས་ཁྱིམ་པའི་རྟགས་འཛིན་པར་མཛད་པ་ཡིན་ནོ། །འང་ཞེས་བྱ་བའི་སྒྲས་གདུལ་བྱའི་དབང་གིས་སངས་རྒྱས་དེ་ལྟ་བུར་སྟོན་པར་མཛད་པ་ལ་ཡང་བརྒྱན་པར་བགྱིའོ་ཞེས་སྟོན་ཏོ། །གླིང་བཞི་པ་དང༌། ཉི་མ་དང་ཟླ་བ་ལ་སོགས་པ་རེ་རེ་ཞིང་སྟོང་སྟོང་ཡོད་པ་ལ་ནི་སྟོང་སྤྱི་ཕུད་ཅེས་བྱའོ། །དེ་སྟོང་ལ་ནི་སྟོང་གཉིས་པའོ། །སྟོང་གཉིས་པ་སྟོང་ལ་ནི་སྟོང་གསུམ་གྱི་འཇིག་རྟེན་གྱི་ཁམས་ཏེ། སངས་རྒྱས་ཀྱི་ཞིང་གཅིག་ཡིན་ལ་ཞིང་རྣམས་ལ་ནི་ཕྱོགས་བཅུ་དག་ཏུ་མཐའ་ཡོད་པ་མ་ཡིན་ཏེ། སྟོང་གསུམ་དེ་ཐམས་ཅད་དུ་དྲིའི་དད་ལྡང་ཞིང་འགྲོ་བ་ཁྱབ་པར་འབྱུང་བའི་ངང་ཚུལ་གང་ལ་ཡོད་པ་དེ་ནི། སྟོང་གསུམ་ཀུན་ཏུ་རི་དང་ལྡང་བ་ཡི། །དྲི་མཆོག་ཅེས་བྱ་བ་སྟེ། དེ་རྣམས་ཀྱིས་ཐུབ་དབང་ཀུན་གྱི་སྐུ་ཞེས་བྱ་བ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྐུ་ལ་བྱུག་པར་བགྱིའོ། །ཇི་ལྟ་བུའི་སྐུ་ལ་བྱུག་པར་བྱ་ཞེ་ན། ཐུབ་པ་རྣམས་ཀྱི་
སྐུ་གང་ཡིན་པ་དེ་གསེར་དེ་མདོག་བཟངས་ཀྵ་ར་དང༌། སའི་སྐྱོང་དུ་ཁ་སྦྱར་ནང་དུ་ལེགས་པར་བསྲེགས་ཤིང་བཙོས་ལ་ཤིན་ཏུ་སྦྱངས་ཤིང་དག་པར་བྱས་ནས་བྱི་དོར་བྱས་ཏེ་ཕྱིས་པ་ལྟ་བུའི་འོད་ཆགས་ཤིང་ཤིན་ཏུ་འབར་བར་གྱུར་པ་དེ་དག་ལ་བདག་ཉིད་རང་གིས་བྱུག་པར་བགྱི་པ་འམ་གཞན་དག་ཉེ་བར་བྱུག་ཏུ་གཞུག་པར་བྱའོ། །གཞན་ཡང་ཐུབ་པའི་དབང་པོ་མཆོག་མཆོད་པར་བྱ་བའི་གནས་ཀྱི་མཆོག་ལ་དྲི་དང་དབྱིབས་ལ་སོགས་པ་ཡིད་དུ་འོང་པའི་མེ་ཏོག་ལྷ་ཡུལ་ན་ཡོད་པའི་མེ་ཏོག་དྲི་ཞིམ་པ་མནྡཱ་ར་བ་ཞེས་བྱ་བ་དང༌། པདྨ་དང༌། ཨུཏྤལ་ལ་སོགས་པ་ཞེས་བྱ་བ་དེ་དག་ཐོག་མར་གྱུར་པ་སྣ་མ་དང༌། ཙམ་པ་དང༌། ནཱ་ག་གེ་སར་ལ་སོགས་པའི་མེ་ཏོག་གང་ཡིན་པ་དེ་ཐམས་ཅད་ཀྱིས་ཐུབ་པའི་དབང་པོ་ལ་མཆོད་པ་དང༌། ཕྲེང་བས་ཀྱང་མཆོད་པར་བགྱིའོ། །ཇི་ལྟ་བུས་ཤེ་ན། སྤེལ་ལེགས་ཡིད་འོང་རྣམས་ཀྱིས་ཞེས་བྱ་བ་སྟེ། སྣ་ཚོགས་པ་སྤེལ་ལེགས་པར་བྱས་པས་དབྱིབས་ཡིད་དུ་འོང་ཞིང་སྙིང་དུ་སྡུག་པར་གྱུར་པ་རྣམས་ཀྱིས་མཆོད་པར་བགྱིའོ། །དེ་བཞིན་དུ་སྤོས་ཀྱི་དྲིའི་ངད་ཀྱིས་འགྲོ་བ་ཐམས་ཅད་ཁྱབ་པར་བྱེད་པས་རྒྱ་ཆེར་སྤྲོས་པར་གྱུར་པ་སྟེ། དེ་ཉིད་ཀྱིས་ནི་ཡིད་དུ་འོང་བས། སྤོས་མཆོག་ཡིད་འཕྲོག་དྲི་ངད་ཁྱབ་པ་ཡི། །ཞེས་བྱ་བ་སྟེ། དེ་ལྟ་བུའི་བདུག་པའི་སྤྲིན་ཚོགས་ཞེས་བདུག་སྤོས་ཀྱི་ཚོགས་རྣམས་ཀྱིས་ཐུབ་པའི་དབང་པོ་དེ་ལ་དབུལ་བར་བགྱི་ཞིང་བདུག་པར་བགྱིའོ། །དེ་བཞིན་དུ་ཞལ་ཟས་ཀྱི་རྣམ་པ་འབྲས་ཆན་ལ་སོགས་པ་དང༌། ཁ་ར་དཀར་པོ་ལ་སོགས་པ་སྣ་ཚོགས་པ་དང་བཅས་པ་དང༌། བཏུང་བ་ཡིད་དུ་འོང་བ་དང༌། རྒྱ་སྟར་གྱི་འབྲས་བུའི་ཁུ་བ་ལ་སོགས་པས་ཉེ་བར་མཚོན་པའི་ལྷ་བཤོས་རྣམས་ཀྱང་ཐུབ་པ་དེ་རྣམས་ལ་དབུལ་བར་བགྱི་ཞིང་བསྟབ་པར་བགྱིའོ། །དེ་བཞིན་དུ་མར་མེའི་རྣམ་པ་གསེར་གྱི་པདྨ་རྣམས་ལ་ཚར་དུ་དངར་ནས་གནས་པའི་རིན་པོ་ཆེ་སྒྲོན་མ་སྟེ། ཡིད་བཞིན་གྱི་ནོར་བུ་རིན་པོ་ཆེ་ལ་སོགས་པ་གསལ་ཞིང་སྣང་བར་བྱེད་པ་རྣམས་ཀྱང་དེ་རྣམས་ལ་དབུལ་བར་བགྱིའོ། །གཞན་ཡང་ས་གཞི་ལེགས་པར་བསྟར་ཞིང་བྱི་དོར་བྱས་པ་དྲི་ཞིམ་པས་ཉེ་བར་བྱུགས་པ་གང་ཡིན་པ་དེར་མེ་ཏོག་གི་སིལ་མ་ཁ་དོག་དང་དབྱིབས་
སྣ་ཚོགས་པ་ཡིད་དུ་འོང་བས་སྤེལ་བ་དགྲམ་ཞིང་དགོད་པར་བགྱིའོ། །གཞལ་ཡས་ཁང་གི་ཁྱད་པར་དབུལ་བ་ནི་སྔར་ཕུལ་བའི་གཞལ་ཡས་ཁང་གི་ཁྱད་པར་གྱི་ཚོགས་ཀྱི་སྤྲིན་མང་པོ་ལ་དེ་ན་གནས་པའི་ལྷའི་བུ་མོ་རྣམས་ཀྱིས་སྦྱར་ཞིང་ཉེ་བར་བླངས་པའི་བསྟོད་པ་དང༌། གླུ་ཤིན་ཏུ་ཡིད་དུ་འོང་ཞིང་སྙན་པ་དང་ལྡན་པ་དང༌། གཞན་ཡང་མུ་ཏིག་དང༌། ནོར་བུ་རྣམས་ཀྱི་ཆུན་འཕྱང་གིས་དེ་ལ་མཛེས་པར་བྱས་པ་འམ། དེས་མཛེས་པར་བྱས་པས་མུ་ཏིག་ཆུན་འཕྱང་མཛེས་པ་འབར། །ཞེས་བྱ་བ་ལ་དེ་དག་ཐམས་ཅད་ཀུན་ནས་འབར་ཞིང་འོད་དང་ལྡན་པ་དང༌། རིན་པོ་ཆེའི་གདུགས་དང༌། རྒྱལ་མཚན་དང༌། བ་དན་དང༌། བླ་རེ་ལ་སོགས་པ་འོད་དང་བཅས་ཤིང་སྣང་བའི་རང་བཞིན་ཅན་རྣམས་ཀྱིས་ཕྱོགས་བཅུ་པ་ཐམས་ཅད་ཀྱི་མཐའ་ཡས་པའི་ནམ་མཁའ་བརྒྱན་ཅིང་འོད་ཀྱིས་ཁྱབ་པར་གྱུར་ལ་དེ་དག་ཀྱང༌། བྱམས་པ་ཆེན་པོའི་རང་བཞིན་ཅན་བྱམས་པ་ཆེན་པོ་གང་ལ་གོམས་ཤིང་མངོན་དུ་མཛད་པ་རྣམས་ལ་ཁྱབ་པར་དབུལ་བ་སྟེ། སེམས་ཅན་ཐམས་ཅད་ལ་ཕན་ཞིང་བདེ་བར་འདོད་པས་བསྡུས་པ་ནི་བྱམས་པ་སྟེ། དེའི་རང་བཞིན་ཅན་གྱི་ཐུབ་པ་རྣམས་ལ་བསྟབ་པར་བྱའོ་ཞེས་བྱ་བའི་དོན་ཏོ། །གཞན་ཡང་གདུགས་ཀྱི་མཆོད་པ་ནི་གང་འདི་རིན་པོ་ཆེའི་རྒྱུ་ལས་བྱས་པའི་གདུགས་སྡུག་ཅིང་ཡིད་དུ་འོང་བས་མཛེས་པར་གྱུར་པ་དེ་ནི་རིན་ཆེན་གདུགས་མཛེས་ཞེས་བྱ་བ་ཡང་དེའི་ཁྱད་པར་ནི་གསེར་གྱི་ཡུ་བ་ཅན་དུ་བྱས་པས་ཉེ་བར་མཚོན་པ་དང༌། ཁོར་ཁོར་ཡུག་ཏུ་མུ་ཏིག་གི་རྒྱན་གྱི་རྣམ་པ་ལ་སོགས་པ་ཡིད་དུ་འོང་བ་བཏགས་པས་བརྒྱན་ཅིང་མཛེས་པ་དང༌། དབྱིབས་ལེགས་ཤིང་བལྟ་ན་སྡུག་པར་སྣང་བ་དེ་གྱེན་དུ་བསྒྲེང་བ་འདི་ཡང་རྟག་ཏུ་ཐུབ་པའི་དབང་པོ་རྣམས་ཀྱི་ཐད་དུ་བཟུང་ལ་དབུལ་བར་བགྱིའོ། །དེ་ལྟར་མཆོད་པའི་དབྱེ་བ་ཕྱོགས་ཙམ་ཞིག་སྨྲས་ནས། གཞུང་མངས་ཀྱིས་ དོགས་པས་སྤྱིར་མཆོད་པའི་སྤྲིན་ཇི་སྙེད་པ 
་སོ་སོར་གནས་པ་འབྱུང་བ་ཉིད་དུ་བསྟན་པའི་ཕྱིར། དེ་ལས་གཞན་ཡང་ཞེས་བྱ་བ་ལ་སོགས་པ་སྨོས་ཏེ། མཆོད་པའི་ལས་ཀྱི་རྟེན་དུ་གྱུར་པ་དེ་དག་ལས་མཆོག་སྟེ། སྔ་མ་ལས་ཕུལ་དུ་བྱུང་བ་ཉིད་དུ་སོ་སོར་གནས་ཤིང་འབྱུང་བར་བྱིན་གྱིས་
རློབ་པར་གྱུར་ཅིག་པའོ། །ཅི་ཞིག་ཅེ་ན། མཆོད་པའི་ཚོགས་ཏེ་མཆོད་པའི་སྤྲིན་གྱི་ཕུང་པོའོ། །རོལ་མོ་ནི་རྔ་བོ་ཆེ་ལ་སོགས་པའོ། །དབྱངས་སྙན་པ་ནི་རྫ་རྔ་ལ་སོགས་པའི་རོལ་མོ་དང༌། གར་དང་བཅས་པའི་དབྱངས་སྙན་པའི་གླུ་ལེན་པ་ཡིད་དུ་འོང་བ་སྟེ། དེ་རྣམས་ཀྱིས་སེམས་ཅན་སྡུག་བསྔལ་བ་རྣམས་ཀྱང་ཚིམ་པར་བྱེད་པ་ཉིད་དོ། །དམ་པ་ནི་སངས་རྒྱས་ཏེ། དེའི་ཆོས་ནི་ལུང་དང་རྟོགས་པའི་བདག་ཉིད་ཅན་ནོ། །དེ་ནི་དཀོན་མཆོག་ཡིད་བཞིན་གྱི་ནོར་བུ་རིན་པོ་ཆེ་དང་འདྲ་བར་དལ་འབྱོར་ཕུན་སུམ་ཚོགས་པ་ཉིད་ཐོབ་ཀྱང་རྙེད་དཀའ་བ་དང༌། དོན་ཆེ་བ་ཉིད་ཡིན་པའི་ཕྱིར་རོ། །དམ་ཆོས་དཀོན་མཆོག་ཀྱང་ཡིན་ལ་ཐམས་ཅད་ཀྱང་ཡིན་པས་དེ་སྐད་ཅེས་བྱ་སྟེ། དམ་པའི་ཆོས་དཀོན་མཆོག་དེ་ལ། དེའི་གླེགས་བམ་ལ་སོགས་པ་མཆོད་པའི་སྒོ་ནས་མཆོད་པ་དང༌། དེའི་གླེགས་བམ་ལ་སོགས་པ་དང་ལྡན་པ་འམ་སངས་རྒྱས་ཀྱི་སྐུ་གདུང་ཆུད་པར་བྱས་པའི་མཆོད་རྟེན་རྣམས་དང༌། སྐུ་གཟུགས་རྣམས་ལ་རིན་པོ་ཆེ་དང༌། མེ་ཏོག་ལ་སོགས་པ་གང་ཡིན་པ་དེའི་ཆར་རྒྱུན་མི་འཆད་ཅིང་བར་མཚམས་མེད་པ་ཉིད་དུ་འབབ་པར་ཤོག་ཅིག་ཅེས་པའོ། །དེ་ལྟར་བླ་ན་ཡོད་པ་དང་བཅས་པའི་མཆོད་པ་བཤད་ནས། བླ་ན་མེད་པའི་མཆོད་པ་བསྟན་པའི་ཕྱིར། ཇི་ལྟར་ཞེས་བྱ་བ་ལ་སོགས་པ་སྨོས་ཏེ། བགྲོད་པར་བྱ་བ་ཇི་སྙེད་པ་ཐུགས་སུ་ཆུད་པས་ན། དེ་བཞིན་གཤེགས་པ་སྟེ། ཡང་དག་པར་རྫོགས་པའི་སངས་རྒྱས་སོ། །བསྟོད་པ་བཤད་པ་ནི་ཡོན་ཏན་རྒྱ་མཚོ་ཞེས་བྱ་བ་ལ་སོགས་པ་སྨོས་པ་ཡིན་ཏེ། དབྱངས་ཀྱི་ཡན་ལག་ནི་སོ་རིང་ཞེས་བྱ་བ་ལ་སོགས་པ་ལྔ་པོ་རེ་རེ་ཞིང་ཡང་ཡན་ལག་ནི་དབྱེ་བ་མཐའ་ཡས་པ་ཡོད་པས་རྒྱ་མཚོ་ཇི་སྙེད་པ་གང་བའི་བསྟོད་པའི་ཚོགས་རྣམས་ཀྱིས། ཡོན་ཏན་རྒྱ་མཚོ་དེ་སྙེད་མངའ་བ་རྣམས་ལ་བདག་གིས་བསྟོད་པ་བགྱིའོ་ཞེས་པའོ། །བསྟོད་པའི་བྱིན་གྱིས་བརླབ་པ་སྨྲས་པ་ནི། བསྟོད་དབྱངས་ཞེས་བྱ་བ་ལ་སོགས་པ་སྨོས་པ་ཡིན་ཏེ། བསྟོད་པའི་དབྱངས་གླུར་ཡང་དག་པར་བླངས་པའི་ཚོགས་ནི་བསྟོད་དབྱངས་སྙན་པའི་སྤྲིན་ཏེ། དེ་དག་ཀྱང་ཡོན་ཏན་རྒྱ་མཚོ་དང་
ལྡན་པའི་སྤྱན་སྔར་ངེས་པར་ཀུན་དུ་འབྱུང་བ་འམ་རྣམ་པ་ཐམས་ཅད་དུ་འབྱུང་བར་གྱུར་ཅིག་པའོ། །ཕྱག་འཚལ་བ་སྨྲས་པ་ནི། དུས་གསུམ་ཞེས་པ་ལ་སོགས་པ་སྨོས་པ་ཡིན་ཏེ། དུས་གསུམ་གཤེགས་པའི་སངས་རྒྱས་ཀུན། །ཞེས་བྱ་བ་ནི་འདས་པ་ལ་སོགས་པའི་དུས་གསུམ་པོའི་སྤྱིར་བསྡུས་པ་ནི་དུས་གསུམ་སྟེ། དེ་དག་ཏུ་གཤེགས་ཤིང་བཞུགས་པའོ། །སུ་ཞིག་ཅེ་ན། སངས་རྒྱས་ཏེ། ཤེས་བྱ་མཐར་ཐུག་པ་མེད་ན་ཡང་ཡེ་ཤེས་མཐའ་ཡས་པའི་སྟོབས་མངའ་བ་ཉིད་ཀྱིས་ན། ཤེས་བྱའི་དཀྱིལ་འཁོར་མ་ལུས་པ་ཁྱབ་པར་མཛད་པའི་བློ་གང་ལ་མངའ་བ་དེ་ནི་སངས་རྒྱས་ཏེ་དེ་རྣམས་ཀུན་ལའོ། །དེ་འབའ་ཞིག་ཏུ་མ་ཟད་ཀྱི། ཆོས་དང་ཚོགས་ཀྱི་མཆོག་བཅས་ལ། །ཞེས་བྱ་བ་སྟེ། དམ་པའི་ཆོས་དང་ཚོགས་ཀྱི་མཆོག་དང་བཅས་པ་ནི་ལུང་དང་རྟོགས་པའི་བདག་ཉིད་དང༌། གང་ཟག་ཆེན་པོ་བརྒྱད་ལ་སོགས་པའི་དགེ་འདུན་དང་བཅས་པ་ལ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཕྲ་རབ་ཀྱི་གྲངས་སྙེད་ཀྱི་ལུས་ཐམས་ཅད་ཀྱིས་རབ་ཏུ་བཏུད་པས་ནི་བདག་ཕྱག་འཚལ་ལོ་ཞེས་པའོ། །གཞན་ཡང་ཕྱག་བྱ་བའི་གནས་སུ་གྱུར་པ་བྱང་ཆུབ་སེམས་དཔའ་རྣམས་ཀྱི་གཞི་སྐུའི་གཟུགས་བརྙན་རྣམས་དང༌། བང་རིམ་དང༌། བུམ་པ་དང༌། ཁ་ཁྱེར་དང༌། སྲོག་ཤིང་དང༌། འཁོར་ལོ་དང༌། གདུགས་ལ་སོགས་པའི་གཟུགས་སོ་ཕག་ལ་སོགས་པ་ལས་བརྩིགས་ཤིང་བསགས་པ་ལས་བསྒྲུབས་པ་ཉིད་ནི་མཆོད་རྟེན་ནོ། །མཆོད་རྟེན་དེ་ལ་རྟེན་ཅིང་འབྲེལ་པར་འབྱུང་བའི་ཚིགས་སུ་བཅད་པ་ལ་སོགས་པའི་སྙིང་པོ་དང་ལྡན་པར་བྱས་པའི་བཅོམ་ལྡན་འདས་ཀྱི་རྟེན་ནི་འདི་ལ་ཕྱག་བྱ་བ་ལ་སོགས་པས་བསོད་ནམས་བསྐྱེད་པའི་དོན་དུ་བྱིན་གྱིས་བརླབས་པ་ཡིན་པས་དེ་ལ་ཕྱག་འཚལ་བའོ། །འདིར་ཕྱག་འཚལ་བའི་སྒྲའི་དོན་ནི་ཡན་ལག་གི་དམ་པ་ས་ལ་བཏུད་པ་ཡིན་པ། ཡན་ལག་གི་དམ་པ་ཡང་མགོ་བོ་ཡིན་པས་དེ་བཏུད་པ་ཞེས་བྱ་བའི་དོན་ཏོ། །ཆེད་དུ་སོང་སྟེ་འདི་ལས་ལུང་ནོད་པས་ན་མཁན་པོའོ། །ཐར་པའི་དོན་དུ་འབད་ཅིང་བརྩལ་བས་ན་བརྟུལ་ཞུགས་ཅན་ཏེ། དེ་དག་མངོན་དུ་དམིགས་ནས་ཕྱག་འཚལ་ལོ་ཞེས་པའོ། །
དེ་བཞིན་དུ་སྐྱབས་སུ་འགྲོ་བ་སྨྲས་པ་ནི། བྱང་ཆུབ་སྙིང་པོར་ཞེས་པ་ལ་སོགས་པ་སྨོས་པ་ཡིན་ཏེ། སངས་རྒྱས་རྣམས་ལ་སྐྱབས་སུ་མཆིའོ། །ཇི་སྲིད་ཀྱི་བར་དུ་ཞེ་ན། བྱང་ཆུབ་སྙིང་པོར་མཆིས་ཀྱི་བར། །ཞེས་བྱ་སྟེ། སྙིང་པོར་གྱུར་པ་བྱང་ཆུབ་ཀྱི་མཆོག་ཐོབ་ཀྱི་བར་དུའོ། །ཆོས་ནི་མྱ་ངན་ལས་འདས་པ་སྟེ། དེ་ལ་སྐྱབས་སུ་མཆིའོ་ཞེས་པའོ། །བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །ཞེས་བྱ་བ་ལ། སྔར་བདེ་བའི་འབྱུང་གནས་དེ་ལ་སྐྱབས་སུ་མཆིའོ་ཞེས་བྱ་བ་ནི་བྱང་ཆུབ་ཀྱི་སེམས་བསྐྱེད་པ་རྣམས་ལ་དད་པ་སྐྱེས་པའི་ཤུགས་ཀྱིས་དེ་སྐད་སྨྲས་པ་ཡིན་ལ། ད་ལྟར་ནི་སྡོམ་པ་ལེན་པའི་དོན་དུ་སྐྱབས་སུ་འགྲོ་བ་ཡིན་ནོ། །སྡིག་པ་བཤགས་པ་བསྟན་པར་བྱ་བའི་ཕྱིར། ཕྱོགས་རྣམས་ཞེས་བྱ་བ་ལ་སོགས་པ་སྨོས་ཏེ། ཡང་དག་པར་རྫོགས་པར་ཀུན་ལ་སངས་རྒྱས་པས་ན་རྫོགས་པའི་སངས་རྒྱས་སོ། །སྡུག་བསྔལ་དང་སྡུག་བསྔལ་གྱི་རྒྱུ་ལས་ཀུན་དུ་གདོན་པར་བཞེད་པ་ཉིད་ནི་ཐུགས་ཏེ། དེས་གཞན་གྱི་དོན་དུ་སྤྱོད་པར་མཛད་པས་གཞན་གྱི་དོན་ཕུན་སུམ་ཚོགས་པ་ཉིད་བརྙེས་པར་གྱུར་པས་ན། ཐུགས་རྗེ་ཆེན་པོ་མངའ་བ་སྟེ། དེ་ལྟ་བུའི་བྱང་ཆུབ་སེམས་དཔའ་རྣམས་ལ་ཡང་ཐལ་མོ་སྦྱར་ཏེ་གསོལ་བར་བགྱིའོ། །ཐོག་མ་མེད་ལྡན་ཞེས་བྱ་བ་ནི་རྒྱུ་མེད་པར་སྐྱེ་བ་དང༌། གཙོ་བོ་ལས་སྐྱེ་བར་འདོད་པ་ལ་སོགས་པ་དགག་པའི་ཕྱིར་འཁོར་བ་ནི་ཐོག་མ་མེད་པར་བསྟན་པ་ཡིན་ཏེ། འཁོར་བ་ལ་ཐོག་མ་ཡོད་པ་མ་ཡིན་ཏེ། ཐོག་མ་མེད་ལྡན་འཁོར་བ་སྟེ། །དེས་ན་ཚེ་རབས་འདི་འམ་སྔོན་གྱི་སྐྱེ་བ་གཞན་དག་ལ་གང་བདག་གིས་མ་འཚལ་ཞིང་ཕྱུགས་ལྟར་རྨོངས་པས་སྡིག་པའི་རྣམ་པ་བདག་ཉིད་ཀྱིས་བགྱིས་པ་འམ། གཞན་བགྱིད་དུ་སྩལ་བ་ཉིད་དང༌། རྗེས་སུ་ཡི་རང་བ་གང་བགྱིས་པ་ཅི་ཡང་རུང་བའོ། །དེ་ཅིའི་ཕྱིར་དེ་ལྟར་བྱེད་ཅེ་ན། གཏི་མུག་འཁྲུལ་པས་ཞེས་བྱ་བ་ལ་སོགས་པ་སྨོས་ཏེ། དེའི་འབྲས་བུ་མི་ཤེས་པའོ། །ཅི་ཞིག་ཏུ་འགྱུར་ཞེ་ན། བདག་ནོན་ཏེ་ཞེས་བྱ་བ་ལ་སོགས་པ་སྨོས་ཏེ། དམྱལ་བ་ལ་སོགས་པའི་འགྲོ་བར་རང་ཉིད་གནས་པའི་ཕྱིར་རོ། །དེ་ལྟར་ཁྱེད་ཀྱི་དཀའ་བ་ལས་འདས་
པའི་ནོངས་པ་དེ་ནི་རྗེས་སུ་འགྱོད་པའི་སྒོ་ནས་དེའི་ཉེས་པ་མཐོང་བར་བགྱིས་ནས་བསམ་པ་ཐག་པས་ཡང་དག་པར་བཤགས་པར་བགྱིད་དོ། །དེ་ལྟར་བྱས་པ་ལ་སོགས་པའི་སྒོ་ནས་བཤད་ནས། ཡུལ་དང་བསམ་པ་དང༌། སྦྱོར་བའི་དབྱེ་བས་དེ་བཤགས་པ་བསྟན་པའི་ཕྱིར། བདག་གིས་ཞེས་བྱ་བ་ལ་སོགས་པ་སྨོས་ཏེ། བྱང་ཆུབ་ཀྱི་སྤྱོད་པ་སྤྱད་པ་མཐར་ཐུག་པ་ལས་བྱུང་བའི་སངས་རྒྱས་ཀྱི་ཡེ་ཤེས་ནི་སངས་རྒྱས་སོ། །དེ་ཁོ་ན་ཉིད་དུ་སྐྱེ་བ་མེད་པ་ནི་འདིར་དེའི་ཆོས་ཡིན་ནོ། །དེ་མཐོང་བ་ནི་དགེ་འདུན་ཞེས་བྱ་སྟེ། འདི་ནི་མངོན་པར་རྟོགས་པའི་ཀུན་རྫོབ་ཀྱི་དཀོན་མཆོག་གསུམ་མོ། །འཇིག་རྟེན་པའི་ཀུན་རྫོབ་ནི་སངས་རྒྱས་ཀྱི་གཟུགས་ཀྱི་སྐུ་སྒྱུ་མ་ལྟ་བུར་བསྟན་པ་དེའི་སྐུའི་གཟུགས་བརྙན་ལ་སོགས་པ་ནི་སངས་རྒྱས་སོ། །གཞི་དེ་ལས་བྱུང་བའི་དེའི་ལུང་གི་གླེགས་བམ་ལ་སོགས་པ་ནི་ཆོས་སོ། །དགེ་སློང་གཞིའི་ཚོགས་ལ་སོགས་པའི་འདུས་པ་ནི་དགེ་འདུན་ཡིན་ནོ། །འདིར་མངོན་པར་རྟོགས་པའི་དཀོན་མཆོག་གསུམ་ལ་ནི་གནོད་པར་བྱ་བར་ནུས་པ་མ་ཡིན་པས། དཀོན་མཆོག་གསུམ་པོ་ཅིག་ཤོས་ཀྱི་ཡུལ་ལ། ཤས་ཆེ་བའི་སེམས་ཀྱིས་གནོད་པ་བགྱིས་པའམ། ཕ་མ་དག་གམ། བླ་མ་སྟེ། མཁན་པོ་དང༌། སློབ་དཔོན་ལ་སོགས་པའམ། གཞན་གང་ཡང་རུང་བ་དག་ལ་ཉོན་མོངས་ཀྱི་སྒོ་ནས་ཏེ། གནོད་པའི་བསམ་པས་ལུས་དང༌། ངག་དང༌། ཡིད་ཀྱི་སྦྱོར་བའི་བདག་ཉིད་ཅན་གྱིས་གནོད་པ་བགྱིས་པ་གང་ལགས་པ་དང༌། མདོར་ན། ཉེས་པ་དུ་མའི་སྐྱོན་ཆགས་པའི། །སྡིག་ཅན་བདག་གིས་སྡིག་པ་གང༌། །ཤིན་ཏུ་མི་བཟད་བགྱིས་པ་དེ། །ཐམས་ཅད་འདྲེན་པ་རྣམས་ལ་འཆགས། །ཞེས་བྱ་བ་སྤྱིར་བསྡུས་ཏེ་བཤགས་པའོ། །ཅིའི་ཕྱིར་འབད་པས་འཆགས་ཤེ་ན། གལ་ཏེ་བདག་ནི་སྡིག་པ་བགྱིས་པ་མ་བྱང་ཞིང་མ་ཟད་པར་མྱུར་དུ་འགུམ་པར་འགྱུར་དུ་མཆི་ཞིང་འོང་བར་འགྱུར་བས། །ཇི་ལྟར་ན་སྡིག་པ་འདི་དག་ལས་སམ། ཐོག་མ་མེད་པ་དང་ལྡན་པའི་འཁོར་བ་ལས་ངེས་པར་ཐར་ཅིང་འབྱུང་བར་འགྱུར་བ། མྱུར་བའི་ཚུལ་གྱིས་ཏེ། རིངས་པ་ཉིད་དུ་མགོན་པོས་ཡོངས་སུ་བསྐྱབ་ཏུ་གསོལ་ཞིང་བདེ་བ་དམ་བར་ངེས་པར་འབྱུང་བའི་
ཐབས་བསྟན་དུ་གསོལ་ཞེས་པའོ། །འདི་ལྟར་འཆི་བདག་འདིས་ནི་བྱ་བ་འདི་བྱས་ཟིན་ལ། འདིས་ནི་ད་རུང་མ་བྱས་སོ་ཞེས་སྡོད་པར་མི་བྱེད་པས་ན། ཡིད་བརྟན་མི་རུང་འཆི་བདག་འདི། །བྱས་དང་མ་བྱས་མི་སྡོད་པས། །ཞེས་བྱ་སྟེ། ནད་མེད་ཅིང་བདེ་བར་བྱས་པས་ཡིད་བརྟན་དུ་རུང་བ་ཡིན་ན་ཡང༌། 
དོགས་པ ་མེད་ཀྱང་འཇོམས་པར་བྱེད་པས། ཡིད་བརྟན་དུ་མི་རུང་བ་ཡིན་པས་དེ་བས་ན། ན་དང་མི་ན་ཀུན་གྱིས་ཀྱང༌། །གློ་བུར་ཚེ་ལ་ཡིད་མི་བརྟན། །ཞེས་བྱ་བ་སྟེ་ དོགས་པ ་མེད་ཀྱང་གློ་བུར་ཉིད་དུ་འབྱུང་བས། སྤྲིན་མེད་པའི་ནམ་མཁའ་ལས་ཐོག་ཆེན་པོ་འབབ་པ་དག་སྲིད་པ་དང་འདྲ་བར་གློ་བུར་དུ་གནོད་པ་ཆེན་པོ་འབྱུང་ངོ༌། །དེ་བཞིན་དུ་ཐམས་ཅད་བོར་ཏེ་ཆ་དགོས་པར། །བདག་གིས་དེ་ལྟར་མ་ཤེས་ནས། །ཞེས་བྱ་བ་སྡུག་པ་ལ་སོགས་པའི་དངོས་པོ་ཐམས་ཅད་བོར་ཞིང་སྤངས་ནས། རང་གི་ལས་ཀྱི་ལམ་འགའ་ཞིག་དང་ཆས་ཤིང་འགྲོ་དགོས་པ་ཡིན་པས་བདག་གིས་དེ་ལྟ་བུ་འདི་མི་ཤེས་ན། མཛའ་དང་མི་མཛའ་ཀུན་གྱི་ཕྱིར། །སྡིག་པ་རྣམ་པ་སྣ་ཚོགས་བྱས། །ཞེས་བྱ་བ་ནི་རྒྱུ་དེས་མི་དགེ་བ་དུ་མ་ཞིག་བྱས་སོ་ཞེས་པའོ། །ཤེ་བར་གྱུར་ནས་ནི་བདག་དང་མི་མཛའ་བའི་དགྲ་བོ་རྣམས་ཀྱང་མེད་པར་འགྱུར་ཞིང༌། གཞན་དག་ཀྱང་མེད་པར་འགྱུར་ལ། མཛའ་བ་སྟེ་སྡུག་པ་རྣམས་ཀྱང་མེད་པར་འགྱུར་བ་དང༌། བདག་ཉིད་ཀྱང་ནི་མེད་པར་འགྱུར་རོ། །དེ་ལྟ་ན་སུ་ཞིག་ཆ་དགོས་པར་འགྱུར། །སེམས་ཀྱི་རྒྱུན་རྒྱུན་ཉིད་འགྲོའོ། །དེ་ལྟ་ན་ནི་དེ་ཉིད་བདག་ཅེ་ན། དེ་ནི་བདེན་མོད་ཀྱི། ཚེ་འདིའི་ཕུང་པོའི་སྡུག་བསྔལ་ལ་སོགས་པ་འམ། དེ་ལས་གཞན་པ་དག་ལ་རྣམ་པ་ཐམས་ཅད་དུ་འཕོ་བར་བྱེད་པ་མ་ཡིན་གྱི། འཆི་བའི་སྐད་ཅིག་མའི་རྐྱེན་དང་ཕྲད་པ་ལས་སྐྱེ་བ་གཞན་དུ་འགྲོ་བ་ན་དྲན་པའི་ཚུལ་ཉིད་ཀྱིས་དེ་དང་དེ་དྲན་པའི་ཡུལ་དུ་དེ་འགྱུར་བ་ཡིན་པས་ན་དེ་དྲན་པར་བྱེད་དེ། དེ་བས་ན། དངོས་པོ་གང་དང་གང་དག་རྗེས་སུ་སྤྱད་པ་དེ་དང་དེ་གོམས་པའི་སེམས་ཀྱིས་ཉམས་སུ་མྱོང་བར་འགྱུར་ལ། དེ་ཡང་རྨི་ལམ་ཉམས་སུ་མྱོང་བ་བཞིན་དུ་ཚེ་འདི་འདས་ཤིང་སོང་བར་གྱུར་པ་དེ་དག་ཐམས་ཅད་ནི་སླར་མཐོང་བར་མི་འགྱུར་
ཞིང༌། ཉམས་སུ་མྱོང་བར་མི་འགྱུར་རོ། །སྐྱེ་བ་གཞན་དག་ཏུ་ཉམས་སུ་མྱོང་བ་ལྟ་སྨོས་ཀྱང་ཅི་དགོས་ཀྱི། རེ་ཞིག་གསོན་པའི་དུས་ཀྱི་ད་ལྟར་གྱི་ཚེ་འདི་ཉིད་ལ་མཛའ་བ་དང་མི་མཛའ་བ་དུ་མ་ཞིག་འདས་པར་གྱུར་ཀྱང༌། རྨི་ལམ་ཉམས་སུ་མྱོང་བ་བཞིན་དུ། དྲན་པའི་ཡུལ་དུ་གྱུར་པ་ཡིན་གྱི། སླར་མཐོང་བར་མི་འགྱུར་རོ། །དེ་དག་གི་དོན་དུ་བྱས་པའི་སྡིག་པ་མི་བཟད་ཅིང་རྣམ་པར་སྨིན་པ་ཡིད་དུ་མི་འོང་བ་འབྱིན་པའི་དྲག་པོ་གང་ཡིན་པ་དེ་ནི་མདུན་ན་གནས་པ་ཡིན་ནོ། །དེ་ལ་ཐམས་ཅད་བོར་ཏེ་ཞེས་བྱ་བ་ལ་སོགས་པ་ནི་མཛའ་བ་དང་མི་མཛའ་བ་དང་བྲལ་བ་སྔོན་བྱུང་བ་བཤད་པ་ཡིན་ནོ། །མི་མཛའ་རྣམས་ཀྱང་ཞེས་བྱ་བ་ལ་སོགས་པས་ཕྱིས་འབྱུང་བར་འགྱུར་བ་བཤད་པ་ཡིན་ནོ། །རྨི་ལམ་ཉམས་སུ་མྱོང་བ་བཞིན་དུ་ཞེས་བྱ་བ་ལ་སོགས་པ་ནི་ད་ལྟར་བ་ཡིན་ཏེ། ཚེ་འདིར་ཡང་མི་མཛའ་བ་ལ་སོགས་པའི་དངོས་པོ་གང་དང་གང་ལས་འཇིགས་པ་ལ་སོགས་པ་ཉམས་སུ་མྱོང་བར་གྱུར་པ་དེ་དང་དེར་ནི་སྐད་ཅིག་མ་རེ་རེ་ཞིང་དྲན་པ་ཉིད་ཀྱིས་དྲན་པའི་ཡུལ་དུ་གྱུར་པ་ཡིན་པས་དེ་ནི་རྨི་ལམ་ཉམས་སུ་མྱོང་བ་བཞིན་དུ་འདས་པར་གྱུར་པ་ཐམས་ཅད་སླར་མཐོང་བར་མི་འགྱུར་ཏེ། རྣམ་པ་ཐམས་ཅད་དུ་འཇིགས་པ་ཡིན་པའི་ཕྱིར་རོ། །ཇི་ལྟར་ན་དྲན་པ་དང༌། སླར་ངོ་ཤེས་པར་འགྱུར། ལས་དང་འབྲས་བུ་ཡང་འབྲེལ་པར་མི་འགྱུར་རོ་ཞེ་ན། དེ་ནི་མ་ཡིན་ཏེ། དེ་ཉམས་སུ་མྱོང་བའི་སྐད་ཅིག་མ་རེ་རེ་ལས་མངོན་སུམ་མམ། གཅིག་ནས་གཅིག་ཏུ་བརྒྱུད་པའི་ཚུལ་གྱིས་དྲན་པ་ལ་སོགས་པ་སྐྱེ་བར་འགྱུར་བ་དེའི་ས་བོན་དང་རྐྱེན་དུ་གྱུར་པ་ཡིན་པས། དེ་ལྟར་ཚེ་སྔ་མ་ནས་འོངས་པ་དང༌། ཐམས་ཅད་བོར་ཏེ་སྐྱེ་བ་གཞན་དག་ཏུ་འགྲོ་དགོས་པས་བདག་ནི་གློ་བུར་བ་ཡིན་ནོ་ཞེས་བདག་གིས་སོ་སོར་རྟོགས་ཤིང་ཤེས་པར་མ་གྱུར་པས། རྒྱུ་དེས་ན་མཛའ་བ་འམ་མི་མཛའ་བ་རྣམས་ལ། རྗེས་སུ་ཆགས་པ་དང་ཞེ་སྡང་བའི་དབང་གིས་སྡིག་པ་རྣམ་པ་དུ་མ་ཞིག་བྱས་པར་གྱུར་པ་འདི་ལ་གལ་ཏེ་བདག་འཆི་བར་གྱུར་པན་སླར་བཅོས་པའི་ཐབས་ལས་བརྩོན་པར་མ་བྱས་ན་མྱུར་དུ་འཆི་བར་འགྱུར་རོ། །ཅིའི་ཕྱིར་ཞེ་ན། ཉིན་མཚན་སྡོད་པ་ཡོང་མེད་པར། །ཚེ་འདི་རྟག་ཏུ་འགོད་འགྱུར་ཞིང༌། །
སྣོན་པ་གུད་ནས་འོང་མེད་ན། །ཞེས་བྱ་བ་སྟེ། ཚེ་མ་ཉམས་པ་འམ། འཕེལ་བ་འམ། སླར་འོང་བར་གྱུར་པའི་ཐབས་ཡོད་པ་མ་ཡིན་པས། བདག་ལྟ་འཆི་བར་ཅིས་མི་འགྱུར་ཏེ་ངེས་པར་འཆི་བར་འགྱུར་ཏེ། འཆི་བའི་ཚེ་ན་ཡང་བདག་ཉིད་ཀྱི་མལ་དུ་འདུག་པ་བཞིན་དུ་འམ། གཉེན་བཤེས་རྣམས་ཀྱིས་མཐའ་ནས་ཉེ་བར་བསྐོར་དུ་ཟིན་ཀྱང༌། སྲོག་ཆད་པའི་ཚོར་བ་དག་སྲོག་གཅོད་པ་ལ་སོགས་པའི་སྡུག་བསྔལ་ནི་བདག་ཉིད་གཅིག་པུས་རྗེས་སུ་མྱོང་བར་འགྱུར་གྱི། ཉེ་དུ་དང་མལ་སྟན་ལ་སོགས་པ་སྡུག་བསྔལ་བ་ནི་མ་ཡིན་ནོ། །དེ་ལྟ་ན་ཡང་དེ་རྣམས་ནི་སྐྱོབ་པར་བྱེད་དོ་ཞེ་ན། དེ་རྣམས་ནི་ཚེ་འདི་ཉིད་ལ་སྐྱོབ་པར་བྱེད་པ་ཡིན་གྱི། འཆི་བའི་ཚེ་ན། གཤིན་རྗེའི་ཕོ་ཉས་ཟིན་པ་ལ། །གཉེན་པས་ཅི་ཕན་བཤེས་ཅི་ཕན། །དེ་ཚེ་བསོད་ནམས་གཅིག་སྐྱབས་ན། །བསོད་ནམས་དེ་ཡང་བདག་གིས་མ་བསྟེན་ཏོ། །དེ་བས་ན་མགོན་པོ་བག་མེད་པར་གྱུར་པ་བདག་གིས་ནི་སྡིག་པ་མང་པོ་ཞིག་ཉེ་བར་བསྒྲུབས་ཤིང་བསགས་པར་གྱུར་ཏོ། །ཅིའི་ཕྱིར་ཇི་ལྟར་བྱེད་ཅེ་ན། འཆི་བའི་འཇིགས་པ་འདི་འདྲ་བ་ཉིད་མ་འཚལ་བས། མི་རྟག་ཚེ་འདི་ཉིད་ཀྱི་ཆེད་དུ་བདག་དང་བདག་གིར་ལྷག་པར་ཆགས་པའི་རྒྱུས་སྡིག་པ་རྣམས་བསགས་སོ་ཞེས་པའོ། །དེ་བས་ན་བདག་ཉིད་ནི་གཤིན་རྗེའི་ཕོ་ཉས་ངེས་པར་ཁྲིད་པར་འགྱུར་རོ། །དེ་ལྟར་ན་དེ་ཉིད་ཀྱི་ཚེ་ཀུན་ནས་སྐྱོབ་པས་བསོད་ནམས་དག་བྱའོ་ཞེ་ན། སྐྱེ་བོ་ཞེས་བྱ་བ་ལ་སོགས་པ་སྨོས་ཏེ། སྐྱེ་བོ་དག་ཡན་ལག་བཅད་པའི་ཕྱིར་དེའི་སར་ཉེས་པའི་དབང་གིས་དེ་རིང་ཁྲིད་པར་གྱུར་པ་ཡང་འཇིགས་པས་བྲེད་པར་འགྱུར་ཞིང་སྐོམ་པས་ཤིན་ཏུ་གདུངས་པས་ཁ་སྐམས་པ་དང༌། མིག་རྩ་ངན་པ་ལ་སོགས་པ་རང་བཞིན་སྔ་མ་ལས་གཞན་དུ་གྱུར་པ་སྣང་ཞིང༌། དེ་ཕྱོགས་བཞིར་སྐྱབས་དག་ཚོལ་བར་བྱེད་པ་ན། སྐྱབས་བྱེད་པ་དག་མེད་པ་ན། ལྷག་པར་ཞུམ་པར་བྱེད་པ་ཡིན་ན། འཆི་བའི་དུས་བྱེད་པའི་གཤིན་རྗེའི་ཕོ་ཉ་ཤིན་ཏུ་འཇིགས་འཇིགས་ལྟ་བུའི་ཤ་ཚུགས་ཅན་གྱིས་བཟུང་ཞིང༌། བདག་གིར་བྱས་པར་གྱུར་ལ་འཇིགས་པ་ཆེན་པོས་སྐྲག་པར་བྱེད་པའི་རིམས་ནད་ཀྱིས་ཐེབས་པར་
གྱུར་ཅིང༌། རབ་ཏུ་ཉམ་ཐག་བྱེད་པ་སྟེ། བཤང་གཅི་འབྱུང་བར་ལུས་ལ་གོས་པར་འགྱུར་བའི་གནས་སྐབས་སུ་ལྟ་སྨོས་ཀྱང་ཅི་དགོས། དེ་ནས་སྔར་བས། བྲེད་ཤ་འཐོན་པའི་མིག་བགྲད་ནས། །ཕྱོགས་བཞིར་སྐྱབས་དག་ཚོལ་བར་བྱེད། །ཇི་ལྟ་ཞེ་ན། སུ་ཞིག་འཇིགས་ཆེན་འདི་ལས་བདག །ལེགས་པར་སྐྱོབ་པར་བྱེད་འགྱུར་ཞེས། །དེ་ལྟར་སྐྱབས་ཚོལ་བས། ཕྱོགས་བཞིར་སྐྱབས་མེད་མཐོང་ནས་ནི་སྟེ་བསོད་ནམས་མེད་པའི་ཕྱིར་རོ། །བསོད་ནམས་ལས་ནི་སངས་རྒྱས་ལ་སོགས་པ་དེའི་ཚེ་ཡང་སྐྱབས་མཛད་པར་སྣང་ངོ༌། །བསོད་ནམས་ཀྱང་སངས་རྒྱས་ཀྱིས་བྱིན་གྱིས་བརླབས་ཀྱིས་དེ་ལ་སྐྱབས་སུ་འགྲོ་བ་ལ་སོགས་པ་སྟེ། བདག་ཉིད་རང་བཞིན་དུ་གནས་པར་གྱུར་པ་ཡང་དེ་ལྟར་འགྱུར་གྱི། སྡིག་པ་ཤིན་ཏུ་དྲག་པ་ཡང་དེའི་ཚེ་རང་བཞིན་དུ་གནས་པར་མི་འགྱུར་རོ། །དེ་ནས་ཀུན་ཏུ་ཡི་མུག་འགྱུར། །སྐྱོབ་པར་གྱུར་པས་ཀྱང༌། གནས་དེར་སྐྱབས་ཡོད་མ་ཡིན་ན། །དེ་ཚེ་བདག་གིས་ཇི་ལྟར་བྱ། །དེའི་ཕྱིར། དེ་བས་རྒྱལ་བ་འགྲོ་བའི་མགོན། །འགྲོ་བ་བསྐྱབ་པའི་དོན་བརྩོན་པ། །སྟོབས་ཆེན་འཇིགས་པ་ཀུན་སེལ་ལ། །དེ་རིང་ཉིད་ནས་སྐྱབས་སུ་མཆི། །རྒྱལ་བ་དེ་ཡིས་ཐུགས་སུ་ཆུད་པའི་ཆོས། །དེ་ཁོ་ན་ཉིད། འཁོར་བའི་འཇིགས་པ་སེལ་བ་དང༌། །བྱང་ཆུབ་སེམས་དཔའི་ཚོགས་ལ་ཡང༌། །དེ་བཞིན་ཡང་དག་སྐྱབས་སུ་མཆི། །བདག་ནི་འཇིགས་པས་རྣམ་སྐྲག་ནས། །ཀུན་ཏུ་བཟང་ལའང་བདག་ཉིད་དབུལ། །འཇམ་པའི་དབྱངས་ལའང་བདག་ཉིད་ཀྱིས། །བདག་གི་ལུས་ནི་དབུལ་བར་བགྱི། །དེ་ལ་ལྷག་པར་མོས་པ་ཉིད་ཀྱི་ཕྱིར་རོ། །མོས་པའི་བདག་ཉིད་སྣ་ཚོགས་པའི་སྟོབས་ཀྱིས་དེ་ལ་ཡང་དང་ཡང་བདག་ཉིད་ཀྱི་ལུས་དབུལ་བར་བགྱིའོ། །འཇམ་པའི་དབྱངས་ནི་དེ་བཞིན་གཤེགས་པའི་རིགས་ཉེ་བར་མཚོན་པ་ཡིན་ཏེ། དེ་ལ་མངོན་པར་བརྩོན་པ་ཉིད་ཀྱི་ཕྱིར་བདག་ཉིད་ཕུལ་ནས། པདྨའི་རིགས་གང་ལ་ཐུགས་རྗེས་སྤྱོད་པ་མ་འཁྲུལ་པའི་ངང་ཚུལ་མངའ་བའི། ཐུགས་རྗེས་སྤྱོད་པ་མ་འཁྲུལ་བའི། །སྤྱན་རས་གཟིགས་མགོན་དེ་ལ་ནི། །ཉམ་ཐག་ང་རོས་འོ་དོད་འབོད། །སྡིག་
ལྡན་བདག་ལ་བསྐྱབ་ཏུ་གསོལ། །འཕགས་པ་ནམ་མཁའི་སྙིང་པོ་དང༌། །ས་ཡི་སྙིང་པོ་དག་དང་ནི། །ཐུགས་རྗེ་ཆེ་མགོན་ཐམས་ཅད་ལའང༌། །སྐྱབས་ཚོལ་སྙིང་ནས་འོ་དོད་འབོད། །རྡོ་རྗེ་རིགས་ཀྱི་བདག་པོ་ལའང༌། །གང་ཞིག་མཐོང་ནས་གཤིན་རྗེ་ཡི། །ཕོ་ཉ་ལ་སོགས་སྡང་བ་རྣམས། །སྐྲག་ནས་ཕྱོགས་བཞིར་འབྱེར་བྱེད་པའི། །རྡོ་རྗེ་ཅན་ལ་སྐྱབས་སུ་མཆི། །དེ་ཡང་བློས་མངོན་སུམ་དུ་བྱས་ནས་བདག་ནི། སྔོན་ཆད་ཁྱེད་ཀྱི་བཀའ་ལས་འདས། །ད་ལྟར་ཉིད་ནི་ད་ལྟར་ཏེ། །ད་ནི་འཇིགས་པ་ཆེ་མཐོང་ནས། །ཁྱེད་ལ་སྐྱབས་སུ་མཆི་ལགས་ཀྱིས། །སྐྲག་པར་གྱུར་པའི་འཇིགས་པ་མྱུར་དུ་བསལ་དུ་གསོལ། ཁྱེད་ཀྱི་བཀའ་ལས་འདས་པ་ལས། །བདག་ཤིན་ཏུ་སྨད་པར་འགྱུར་རོ་ཞེས་བསྟན་པའི་ཕྱིར། ཐ་མལ་ཞེས་བྱ་བ་ལ་སོགས་པ་སྨོས་ཏེ། ཐ་མལ་ནད་ཀྱིས་ཞེས་བྱ་བ་ནི་ལུས་ལ་བྱུང་བ་སྟེ། དེ་དག་ནི་སྨན་གྱིས་བཅོས་ན་ལེགས་པར་མྱུར་དུ་ཞི་ཞིང་དུས་ཐུང་དུས་སེལ་བའི་ངང་ཚུལ་ཅན་ཉིད་ཡིན་པའི་ཕྱིར་རོ། །དེ་དག་ཀྱང་རིམས་དང་མཛེ་ལ་སོགས་པའི་དབྱེ་བས་སྟོང་ཕྲག་ཉི་ཤུ་ཡོད་དེ། དེས་འཇིགས་པ་ལ་ཡང་བདག་ཉིད་ཤེས་པས་སྨན་པའི་ངག་བཞིན་དུ་བྱ་དགོས་ན། ཅི་ཡིད་ཀྱིས་ཐོག་མ་མེད་པའི་དུས་ནས་བསགས་པ་ཡིན་པའི་ཕྱིར་ཐ་མལ་པ་མ་ཡིན་པ། འདོད་ཆགས་ལ་སོགས་ཉེས་བརྒྱ་ཡི། །ནད་ཀྱིས་རྟག་བཏབ་སྨོས་ཅི་དགོས། །འདོད་ཆགས་ལ་སོགས་པའི་ནད་བཞི་བརྒྱ་རྩ་བཞི་པོ་དེ་དག་ཀྱང་སྤྱོད་པ་སྟོང་ཕྲག་བརྒྱད་ཅུ་རྩ་བཞི། མདོར་བསྡུ་ན་བཞི་བརྒྱ་དག་ཡིན་ཏེ། བག་ལ་ཉལ་བ་ཐ་དད་པ་ལས་བཤད་པ་ཡིན་ནོ། །བག་ལ་ཉལ་དེ་དག་ཀྱང་འདོད་པའི་འདོད་ཆགས་ཀྱི་བག་ལ་ཉལ་བ་ལ་སོགས་པ་དགུ་བཅུ་རྩ་བརྒྱད་ཡིན་ན། ཁ་ཅིག་གིས་ནི་བརྒྱ་བཞི་བཅུ་ཡིན་ཏེ། ཟག་པ་བཞི་དང༌། ཆུ་བོ་བཞི་དང༌། སྦྱོར་བ་བཞི་དང༌། ཉེ་བར་ལེན་པ་བཞི་དང༌། འཆིང་བ་གསུམ་དང༌། ཀུན་ནས་སྦྱོར་བ་དགུ་དང༌། སྲིད་པའི་ཀུན་ཏུ་སྤྱོད་པ་བཅོ་བརྒྱད་དང༌། ཀུན་ནས་དཀྲིས་པ་བཅུ་དང༌། ཉོན་མོངས་པའི་ས་མང་པོ་པ་དྲུག་དང༌། ཉོན་མོངས་པའི་དྲི་མ་དྲུག་དང༌། སྒྲིབ་པ་ལྔ་དང༌། ཐ་མའི་ཆ་དང་མཐུན་པ་ལྔ་དང༌། གོང་
མའི་ཆ་དང་མཐུན་པ་ལྔ་དང༌། ས་མང་པོ་པ་བཅུ་དང༌། མི་དགེ་བའི་ས་མང་པོ་པ་གཉིས་དང༌། རྣལ་འབྱོར་རྣམས་ཀྱི་གཞི་ཕྲན་ཚེགས་ཀྱི་མིང་ཅན་ལྔ་བཅུ་རྩ་བདུན་དག་ཡིན་ནོ། །ཉེ་བའི་ཉོན་མོངས་པ་དག་ནི་མང་དུ་ཡོད་དེ་གཙོ་བོ་ཇི་ལྟ་བ་བཞིན་དུ་བརྒྱ་ལྔ་བཅུ་རྩ་དྲུག་ཡིན་ནོ། །དེ་གཅིག་གིས་ཀྱང་ཞེས་བྱ་བ། །ནད་བརྒྱ་པོ་གང་ཡིན་པ་དག་ལས་ཁྲོས་པ་གཅིག་གིས་ཀྱང་འཛམ་གླིང་ན། གནས་པའི་མི་ཀུན་རླག་བྱེད་ལ། །དཔེར་ན་གཞན་དག་ཏུ་དྲང་སྲོང་ཁྲོས་པས་ཞེས་བཤད་པ་ལྟ་བུའོ། །དེ་དག་སྲེད་པའི་འཚེ་བས་ཁྲོས་པས་འཕེལ་བར་འགྱུར། རྨོངས་པས་ཁ་ན་མ་ཐོ་བ་ཆེན་པོ་ཐོབ་པར་འགྱུར་ཞིང༌། དཔེར་ན་གཞན་དག་ཏུ་ཡིད་གཉིས་ཁ་ན་མ་ཐོ་ཆེར་ཞེས་བྱ་བ་ལ་སོགས་པ་ལྟ་བུའོ། །དེ་དག་ཅེས་བྱ་བ་ནད་བརྒྱ་པོ་ལུས་ལ་བྱུང་བའི་ནད་ཀྱི་རྒྱུ་དག་གི་གསོ་བའི་སྨན་གཞན་ཏེ། ཕྱི་རོལ་དག་གི་སྨན་ནི། ཕྱོགས་རྣམས་ཀུན་ནས་བཙལ་ནའང་མི་རྙེད་ན། རིམས་ལ་སོགས་པ་གསོ་བར་མི་ནུས་པ་དང༌། གློ་བུར་བ་མ་ཡིན་པ་གང་ཡིན་པ་དེ་དག་གི་ནང་ནས། རླུང་ལས་གྱུར་པ་བརྒྱ་རྩ་གཅིག་དག་དང༌། དེ་བཞིན་བད་ཀན་ལས་གྱུར་པ་དང༌། མཁྲིས་པ་ལས་གྱུར་པ་དང༌། འདུས་པ་ལས་གྱུར་པ་དག་ཡིན་ནོ། །ནད་བཞི་བརྒྱ་རྩ་བཞི་པོ་དེ་དག་ནི་འཕགས་པ་དཔའ་སྦྱིན་གྱིས་ཞུས་པ་ལས། འཕགས་པ་ཕལ་ཆེན་གྱི་འདུལ་བ་ལས་བཤད་པ་དག་ཡིན་ནོ། །གང་གི་ཕྱིར་ནད་འགའ་པོ་གཅིག་གིས་ཀྱང་འཛམ་བུའི་གླིང་ན་གནས་པའི་མི་ཐམས་ཅད་རྣམ་པར་འགྱུར་བར་བྱེད་ཅིང་འཇིག་བར་བྱེད་པ་ན། ཡུལ་ཀ་ཤི་ཀའི་བདག་པོར་གྱུར་པ་ནི་བཅོམ་ལྡན་འདས་ཀྱིས་གང་ཉམས་པར་གཟིགས་ཤིང་སྨན་པ་ལ་དྲིས་ནས། ཕྱོགས་ཐམས་ཅད་དུ་དེའི་སྨན་མི་རྙེད་པས་ན་དེ་མི་སྲིད་དོ་སྙམ་པ་ཉིད་ཀྱིས་སྨན་པས་གསོན་པའི་ཤ་ཆེན་པོ་བསྟན་པ་ན། བདེན་པའི་ཕྱིན་གྱི་རླབས་བསྒྲུབས་ནས་གསོ་བར་མཛད་དོ། །ནད་བཞི་བརྒྱ་རྩ་བཞི་པོ་དེ་དག་གིས་གཟིར་བ་ནི་དེའི་རྒྱུ་དག་གིས་གཟིར་བའི་ཕྱིར་རོ། །དེ་ལ་སྟེ་ངེ་དག་གི་སྨན་པ་ཐམས་ཅད་མཁྱེན་པ་ཉིད་ཡིན་ཏེ། སྨན་པ་ཐམས་ཅད་མཁྱེན་པས་ལུས་ཀྱི་ཟུག་རྡུའི་རྒྱུ་འབྱིན་ཅིང་ཟུག་རྡུ་འབྱིན་པར་མཛད་པའི་ཕྱིར། གང་ལ་
ཟུག་རྡུ་ཐམས་ཅད་འབྱིན་པའི་ངང་ཚུལ་མངའ་བ་དེ་ནི། ཟུག་རྔུ་ཐམས་ཅད་འབྱིན་པའིའོ། །བཀའ་སྟེ་དམ་པའི་ཆོས་ཀྱི་སྨན་གྱི་མན་ངག་ལྟར་མི་བྱེད་མི་སེམས་པ་ནི། །ཤིན་ཏུ་གཏི་མུག་སྨད་པའི་གནས། །ཤིན་ཏུ་རྨོངས་པ་ཀུན་ནས་སྐྱེས་པ་ཡིན་ནོ། །དེ་ལྟར་ནི་གཡང་ས་ཐ་མལ་ཆུང་དུ་ལའང༌། །བག་ཡོད་གནས་པར་བྱ་དགོས་ན། །ཚེགས་ཆུང་དུས་བགྲོད་པར་བྱ་བ་ཐ་མལ་པའི་ནད་པ་ཡང་སྨན་པའི་ངག་ལས་འདས་པར་བྱ་བ་མ་ཡིན་ན། དཔག་ཚད་སྟོང་དུ་ལྟུང་བ་ཡི། །ཡུན་རིངས་གཡང་སར་ཏེ། ཡིད་ཀྱི་ནད་སྨན་པ་ཐམས་ཅད་མཁྱེན་པའི་བཀའ་ལས་འདས་པ་ལྟ་སྨོས་ཅི་དགོས་བག་མེད་པས་གནས་པར་བྱ་བ་མ་ཡིན་ནོ། །གཡང་ས་ཆུང་ངུ་ལ་ཡང་བག་མེད་པ་གང་ཡིན་པ་དེ་ནི་ཤིན་ཏུ་ཉེས་པ་ཆེན་པོར་འགྱུར་རོ་ཞེས་དགོས་སོ། །དེ་ལྟ་ནི་འགྱུར་མོད་ཀྱིས། དེ་རིང་ཁོ་ན་མི་འཆི་ཞེས། །རེ་ཞིག་བདེ་བར་གནས་ལ། དེ་ནས་སྡིག་པ་བཤགས་པ་ལ་སོགས་པ་དགེ་བའི་ལས་བྱའོ་ཞེ་ན། དེ་རིང་ཁོ་ན་མི་འཆི་ཞེས་བྱ་བ་སྨོས་ཏེ། མེད་དོ་ཞེས་བདེ་བར་འདུག་པའི་རིགས་མ་ཡིན། གང་ཚེ་བདག་མེད་འགྱུར་པའི་དུས། །དེ་ནི་གདོན་མི་ཟ་བར་འབྱུང༌། །སྡིག་པ་ལས་འཇིགས་པར་མི་བྱ་བ་མ་ཡིན་ཏེ། ངེས་པར་འབྱུང་བ་དང་བཅས་པ་ཉིད་ཀྱི་ཕྱིར་རོ་ཞེས་བསྟན་པའི་ཕྱིར། བདག་ལ་མི་འཇིགས་སུ་ཡིས་བྱིན། །འདི་ལས་ཇི་ལྟར་དེས་ཐར་འགྱུར། །གདོན་མི་ཟ་བར་མེད་གྱུར་ན། །ཅི་ཕྱིར་བདག་ཉིད་བདེ་བར་འདུག །ཅེས་བྱ་བ་སྨོས་སོ། །ལོངས་སྤྱོད་ཀྱིས་བདེ་བར་གནས་པ་ཡིན་ནོ་ཞེ་ན་སྨྲས་པ། སྔོན་ཆད་མྱོང་སྟེ་ཞིག་པ་ལས་ཏེ་ལོངས་སྤྱོད་དག་ལས། ལྷག་པར་གནས་པ་ཅི་ཡོད་ན། །བདག་ནི་ལོངས་སྤྱོད་ལ་མངོན་པར་ཞེན་ནས། བླ་མའི་བཀའ་དང་འགལ་བར་བྱས། །འོན་ཀྱང་ཡིད་གཉེན་མ་ཤེས་ཀྱིས་བདེ་བར་གནས་པ་ཡིན་ནོ་ཞེ་ན། སྨྲས་པ། གསོན་ཚེ་འདི་དང་དེ་བཞིན་དུ། །གཉེན་དང་བཤེས་པ་རྣམས་སྤངས་ནས། །གཅིག་པུ་ག་ཤེས་འགྲོ་དགོས་ན། །མཛའ་དང་མི་མཛའ་ཀུན་ཅི་རུང༌། །དེ་དག་གི་དོན་བྱེད་པར་ནུས་པ་མ་ཡིན་ནོ་ཞེས་དགོངས་སོ། །མི་དགེ་བ་ལས་སྡུག་བསྔལ་འབྱུང༌། །དེ་ལས་ཇི་ལྟར་ངེས་ཐར་ཞེས། །ཉིན་མཚན་རྟག་ཏུ་བདག་གིས་
ནི། །འདི་ཉིད་འབའ་ཞིག་བསམ་པའི་རིགས། །ཞེས་བྱ་བ་སྨོས་ཏེ། ཐབས་གང་གིས་ཞེས་བྱ་བའི་ཐ་ཚིག་གོ །བདག་གོལ་བ་མེད་པར་གཞན་གྲོལ་བར་མི་ནུས་སོ་ཞེས་བྱ་བར་དགོངས་སོ། །སྡིག་པ་བཤགས་པ་ལ་སོགས་པ་སྡུག་བསྔལ་ལས་ཐར་པའི་ཐབས་ཡིན་ནོ་ཞེས་བསྟན་པའི་ཕྱིར། །སྨྲས་པ། བདག་ནི་མི་ཤེས་པའི་སོ་སོའི་སྐྱེ་བོ་ཉིད་ཡིན་པའི་ཕྱིར་རོ། །གཏི་མུག་པས་ཞེས་བྱ་བ་ནི་ཕན་པ་དང་ཕན་པ་མ་ཡིན་པ་ཐོབ་པ་དང་དོར་བ་མི་ཤེས་པ་ཉིད་ཀྱི་ཕྱིར། ལུས་དང་ངག་དང་ཡིད་ཀྱིས་སྡིག་པ་གང་ཡང་རུང་བ་བགྱིས་པ་རྣམས་ཡང་དང་ཡང་དུ་བྱས་པ་དང༌། རྗེས་སུ་ཡི་རང་བའི་བར་དུའོ། །རང་བཞིན་ནི་ངོ་བོ་ཉིད་ཀྱིས་གང་ཉོན་མོངས་པ་ཅན་ཉིད་ཡིན་པའི་ཕྱིར་ཁ་ན་མ་ཐོ་བའམ། གང་ཡང་ཉེས་དམིགས་སུ་གཟིགས་པ་ལས་ཉོན་མོངས་པ་ཅན་མ་ཡིན་དུ་ཟིན་ཀྱང༌། བཅོམ་ལྡན་འདས་ཀྱིས་ཁ་ན་མ་ཐོ་བ་དང་བཅས་པར་མཛད་པ་དེ་ལྟ་ན། བཅས་པའི་ཁ་ན་མ་ཐོ་བ་ཉིད་ཡིན་ནོ། །དེ་དག་ཐམས་ཅད་བཤགས་པར་བགྱི། །གང་ལ་ཞེ་ན། ཐམས་ཅད་དུ་ཐོགས་པ་མེད་པར་གཟིགས་པའི་མགོན་པོའི་སྤྱན་སྔར་མངོན་སུམ་དུ་འདུག་ནས། ཐལ་སྦྱར་སྡུག་བསྔལ་འཇིགས་སེམས་ཀྱིས། །ཡང་དང་ཡང་དུ་ཕྱག་འཚལ་ཏེ། །ཡང་དང་ཡང་དུ་བཤགས་པར་བྱ། །འདྲེན་པ་རྣམས་ཀྱིས་བདག་གི་སྡིག །ནོངས་པ་ལགས་པར་གཟུང་དུ་གསོལ། །ཐུགས་ཀྱིས་བཟོད་པར་མཛད་ནས་ཀྱང༌། །ཐུགས་རྗེས་བདག་ལ་ནོངས་པ་བསལ་དུ་གསོལ། །ཡང་བྱེད་པ་ལ་བརྟེན་པའི་ཕྱིར། མགོན་པོ་འདི་ནི་བཟང་པོ་མ་ལགས་པས། །སླན་ཅད་བདག་ནི་ཡོང་མི་བགྱིད། །ཡང་དང་ཡང་དུ་མི་བགྱིད་དོ། །སྡིག་པ་བཤགས་པ་ཕལ་ཆེ་བ་ཉིད་ཀྱི་ཕྱིར་སྡིག་པ་བཤགས་པའོ། །བྱང་ཆུབ་སེམས་དཔའི་སྤྱོད་པ་ལ་འཇུག་པའི་ལེགས་པར་སྦྱར་བ་ལས་ལེའུ་གཉིས་པའོ།། །།དེ་ལྟར་བདག་ཉིད་ལ་སྨད་ཅིང་བཤགས་ནས་ཀྱང་བྱ་བ་འདོད་པའི་སྒོ་ནས་བསམ་པ་དང་སྦྱོར་བ་ཡོངས་སུ་སྦྱངས་ནས་མཆོད་པ་ལ་སོགས་པ་རྒྱས་སུ་ཟིན་ཀྱང༌། ཡང་དགེ་བའི་རྗེས་སུ་ཡི་རང་བ་ལ་སོགས་པ་འཕེལ་བར་བྱེད་པ་གང་ཡིན་པ། སེམས་ཅན་ཀུན་གྱི་ངན་སོང་གི །ཞེས་བྱ་བ་ལ་སོགས་པ་སྨོས་ཏེ།
འདིས་ནི་ངལ་སོ་བར་བྱེད་པས་ན་ངལ་བསོ་བའོ། །ངན་སོང་གི་སྡུག་བསྔལ་གྱིས་ངལ་བསོ་བ་ནི། ངན་སོང་གི་སྡུག་བསྔལ་ངལ་བསོ་བའོ། །སེམས་ཅན་རྣམས་ཀྱིས་བྱས་པའི་དགེ་བ་སྟེ། བསོད་ནམས་ཀྱི་ཚོགས་དེ་དང༌། སྡུག་བསྔལ་ཅན་རྣམས་བདེར་གནས་ལ། །མགུ་ཞིང་དགའ་བས་རྗེས་སུ་ཡི་རང་ངོ༌། །བྱང་ཆུབ་རྒྱུར་གྱུར་དགེ་བསགས་པ། །དེ་ལ་རྗེས་སུ་ཡི་རང་ངོ༌། །ལུས་ཅན་ཏེ། ལུས་དང་ལྡན་པ་དག །འཁོར་བའི་སྡུག་བསྔལ་ལས་ངེས་པར་ཐར་ལ་སྟེ། ཡེ་ཤེས་ཀྱི་ཚོགས་ལ་རྗེས་སུ་ཡི་རང་ངོ༌། །སྐྱོབ་པ་རྣམས་ཀྱིས་ཏེ། དགེ་རྒྱུད་སྐྱོང་བར་མཛད་པའི་བྱང་ཆུབ་དང༌། རྒྱལ་སྲས་ཉིད་དང༌། ཚོགས་གཉིས་ལ་ཡང་རྗེས་སུ་ཡི་རང་ངོ༌། །གོང་ནས་གོང་ན་ཁྱད་པར་དུ་འཕགས་པ་ནི་ཁྱད་པར་དུ་འཕགས་པ་བརྗོད་པའི་དོན་དུ། བྱང་ཆུབ་སེམས་དཔའ་དག་གིས་སྔར་བཤད་པ་སེམས་ཅན་ལ་ཕན་པ་མཛད་པ་སྟེ། བྱང་ཆུབ་ཏུ་སྨོན་པའོ། །བདེ་བ་མཛད་པ་ཞེས་བྱ་བའི་གཞུང་ཡང་བདེ་བ་ཉིད་ཕན་པ་ཡིན་ཏེ། སེམས་ཅན་ཐམས་ཅད་ལ་ཕན་པ་བྱེད་པར་འཇུག་པའི་སེམས་ཡིན་ནོ། །ཐུགས་བསྐྱེད་དགེ་བ་རྒྱ་མཚོ་དང༌། །ཞེས་བྱ་བ་སྟེ། ཚོགས་ཉིད་ཀྱི་རྒྱུ་ལ་དགའ་བས་རྗེས་སུ་ཡི་རང་ངོ༌། །ཇི་ལྟར་བརྒྱད་སྟོང་པ་ལས་རྗེས་སུ་ཡི་རང་བ་དེ་ལྟར་རྗེས་སུ་ཡི་རང་བར་བྱའོ། །རྗེས་སུ་ཡི་རང་བཤད་ནས། ཆོས་ཀྱི་འཁོར་ལོ་བསྐོར་བར་བསྐུལ་བ་ནི། ཕྱོགས་རྣམས་ཀུན་གྱི་སངས་རྒྱས་ལ། །ཐལ་མོ་སྦྱར་ཏེ་གསོལ་བ་ནི། །ཞེས་བྱ་བ་ལ་སོགས་པ་སྨོས་ཏེ། སེམས་ཅན་རྨོངས་པས་དམྱལ་བ་ལ་སོགས་པའི། སེམས་ཅན་སྡུག་བསྔལ་མུན་འཐོམས་ལ། །ཆོས་ཀྱི་སྒྲོན་མ་སྤར་དུ་གསོལ། །གསོལ་བ་གདབ་པ་ནི། རྒྱལ་བ་མྱ་ངན་འདའ་བཞེད་ལ། །ཐལ་མོ་སྦྱར་ཏེ་གསོལ་བ་ནི། །འགྲོ་ནི་ལྡོངས་པར་མི་དགོད་ཅིང༌། །བསྐལ་པ་གྲངས་མེད་བཞུགས་པར་གསོལ། །ཞེས་བྱ་བ་སྨོས་སོ། །ཡོངས་སུ་བསྔོ་བ་ནི། དེ་ལྟར་ཀུན་བྱས་ཏེ་ཞེས་བྱ་བ་སྨོས་ཏེ། སྙིང་རྗེ་ཆེན་པོ་དང༌། བྱམས་པ་དག་གིས་བདག་ཉིད་ཐམས་ཅད་སྦྱིན་པ་ཆེན་པོ་ཡིན་ནོ། །བྱང་ཆུབ་ཏུ་སྨོན་པའི་སེམས་ཀྱང་དེ་ཡིན་ཏེ། འཇུག་པའི་སེམས་ནི་དེ་སྔོན་དུ་འགྲོ་བ་ཅན་
ཉིད་ཡིན་པའི་ཕྱིར་རོ། །སྨོན་པ་དང་སྦྱིན་པ་ནི་ཡོངས་སུ་བསྔོ་བ་ཡང་ཡིན་ཏེ། སྨོན་པ་ཡོངས་སུ་བསྔོ་བར་མི་འགྱུར་བ་མ་ཡིན་ནོ། །གང་ཅུང་ཟད་མ་བྱས་པ་ཉིད་བྱས་པ་ཡིན་ནོ། །དེ་ལྟར་འདི་དག་ཀུན་བྱས་ཏེ་ཞེས་བྱ་བ་མཆོད་པ་ལ་སོགས་པ་ནས། གསོལ་བ་གདབ་པའི་མཐར་ཐུག་པ། །དགེ་བ་བདག་གིས་བསགས་པ་གང༌། །ཐོབ་པ་གང་ཡིན་པ་དང༌། དེས་ནི་སེམས་ཅན་ཐམས་ཅད་ཀྱི། །སྡུག་བསྔལ་ཐམས་ཅད་བསལ་བར་ཤོག །ཅི་ལྟ་ཞེ་ན། འགྲོ་བ་ནད་པ་ཇི་སྙེད་ཀུན། །ནད་སོས་གྱུར་གི་བར་དུ་ནི། །སྨན་དང་སྨན་པ་ཉིད་དག་དང༌། །དེ་ཡི་ནད་གཡོག་བྱེད་པར་ཤོག །གཞན་དག་ལ་ཡང༌། ཟས་དང་སྐོམ་གྱི་ཆར་ཕབ་སྟེ། །བཀྲེས་དང་སྒོམ་པའི་གནོད་པ་བསལ། །མུ་གེའི་བསྐལ་པ་བར་མའི་ཚེ། །བདག་ནི་ཟས་དང་སྐོམ་དུ་གྱུར། །ཟས་དང་སྐོམ་དེའི་རྒྱུར་གྱུར་ཅིག་པའོ། །བསྐལ་པ་འཇིག་པ་ན། མུ་གེའི་བསྐལ་པ་བར་མར་གྱུར་པ་ནི་དེ་ལ་ཉེ་བར་མཚོན་པ་ཡིན་ཏེ། མཚོན་གྱི་བསྐལ་པ་བར་མའི་ཚེ། །མེ་ཏོག་གི་ཆར་དུ་གྱུར་ཅིག་ཅེས་བརྗོད་པར་བྱའོ། །སེམས་ཅན་ཕོངས་ཤིང་དབུལ་བ་ལ། །བདག་ནི་མི་ཟད་གཏེར་གྱུར་ཏེ། །ཡོ་བྱད་མཁོ་དགུ་སྣ་ཚོགས་སུ། །སྤྲུལ་པས་མདུན་ན་ཉེ་བར་གནས་གྱུར་ཅིག །བདག་གི་ལུས་ནི་བདག་གི་དངོས་པོའི་དེ་བཞིན་ལོངས་སྤྱོད་པ་དང་ཞེས་བྱ་བ་ནི་ལོངས་སྤྱོད་པར་བྱ་བ་ཡིན་པས་ན་ལོངས་སྤྱོད་དེ། ཆུང་མ་དང༌། བྲན་དང༌། ཕྱུགས་དང༌། གསེར་དང༌། ཁང་ཁྱིམ་ལ་སོགས་པའོ། །དུས་གསུམ་དགེ་བ་ཐམས་ཅད་ཀྱང༌། །སེམས་ཅན་ཀུན་གྱི་དོན་སྒྲུབ་ཕྱིར། །ཕོངས་པ་མེད་པར་བཏང་བ་ནི་ཡང་ཕྱིར་ལེན་པའི་བསམ་པ་མེད་པ་དང༌། ལན་ལ་རེ་བའི་བསམ་པ་མེད་པས་ཁོ་བོས་གཏང་བར་བྱའོ། །ཅིའི་ཕྱིར་ཞེ་ན། སེམས་ཅན་ཀུན་གྱི་དོན་སྒྲུབ་པའི་ཕྱིར་རོ། །ཐམས་ཅད་གཏང་བས་མྱ་ངན་འདའ། །བདག་བློ་མྱ་ངན་འདས་པ་བསྒྲུབ། །རང་དང་གཞན་མྱ་ངན་ལས་འདས་པ་དོན་དུ་གཉེར་བ་ཉིད་ཀྱི་ཕྱིར་རོ། །གལ་ཏེ་བདག་གིས་ཐམས་ཅད་གཏང་བར་ཆབས་གཅིག་ལ། སེམས་ཅན་རྣམས་ལ་གཏང་བ་མཆོག །དེ་ལྟར་སྙིང་རྗེ་བསྟན་ནས་བྱམས་པ་ཡང༌། །བདག་གིས་ལུས་ཅན་ཐམས་ཅད་
ལ། །ཞེས་བྱ་བ་ལ་སོགས་པ་སྨོས་པ་ལ་བདག་སྟེ། ཉེ་བར་མཁོ་བ་སྦྱིན་པ་ཅན་གྱི་ཡིད་དང༌། བདག་གི་ལུས་འདི་དག་གིས་ལུས་ཅན་ཐམས་ཅད་ལ། ཅི་བདེར་བྱིན་ཟིན་གྱིས་བདག་གི་ལུས་རྟག་ཏུ་གསོད་པ་སྟེ་བསྣུན་པའམ། བདག་ལ་སྨོད་པའམ་བདག་ལ་བརྡེག་བཙོག་ཅི་དགར་བྱེད་པ་ལ་རག །ཕྱག་དར་གྱི་རྡུལ་ལ་སོགས་པས་འགོད་པར་བྱེད་པ་ལ་རག་གོ །བདག་གི་ལུས་ལ་གཙེ་བྱེད་དམ། །ཅོ་འདྲི་ག་ཞའི་རྒྱུ་བྱེད་ཀྱང༌། །དེ་ལ་བདག་ལུས་བྱིན་ཟིན་གྱིས། །འདི་ཡི་ཁ་དས་ཅི་ཞིག་བྱ། །བདག་ཉིད་ཀྱིར་གྱུར་པས་སོ། །གཞན་ཡང་དེ་ལ་གནོད་པར་མི་འགྱུར་བའི། །ལས་གང་ཡིན་པ་བྱེད་དུ་ཆུག །གང་དེ་དག་འཆི་བ་ལ་སོགས་པའི་འཇིགས་པ་ཆེན་པོ་ཉེ་བར་གནས་པ་ཡོད་ན། དེ་བཟློག་པའི་ཕྱིར་སྡུག་བསྔལ་གྱི་རྒྱུ་ཁ་ན་མ་ཐོ་བ་མེད་པའི་ལས་བདག་ལ་བྱེད་དུ་ཆུག་ཅིག་ཅེས་བྱ་བའི་དོན་ཏོ། །བདག་ལ་དམིགས་ནས་ནམ་དུ་ཡང༌། །འགའ་ཡང་དོན་མེད་མ་གྱུར་ཅིག །འགའ་ཞིག་གི་ཚེ་ཡང་འགའ་ཞིག་ཀྱང་བདག་ལ་བརྟེན་ནས། དྲན་པ་ཙམ་དུ་ཡང་དོན་མེད་པར་མ་གྱུར་ཅིག །བདག་ལ་དམིགས་ནས་གང་དག་གི །ཁྲོ་བ་འམ་དད་པའི་སེམས་བྱུང་བ། །དེ་ཉིད་རྟག་ཏུ་དེ་དག་གི །དོན་ཀུན་གྲུབ་པའི་རྒྱུར་གྱུར་ཅིག །གང་དག་བདག་ལ་ཁ་ཟེར་རམ། །བདག་ལ་གང་བརྫུན་གྱིས་སུན་འབྱིན་པར་བྱེད་པ་འམ། གཞན་གང་གནོད་པར་བྱེད་པ་འམ། དེ་བཞིན་ཕྱར་ཁ་གཏོང་བའང་རུང༌། །སྐྱོན་གསལ་བར་བྱེད་པའང་རུང༌། གཞན་དེ་དག་ཐམས་ཅད་བྱང་ཆུབ་སྐལ་ལྡན་གྱུར། །གཞན་ཡང་བདག་ནི་མགོན་མེད་རྣམས་ཀྱི་མགོན། །བདག་ནི་མགོན་པོ་སྐྱབས་ཉིད་དེ། །བདག་ནི་མགོན་མེད་རྣམས་ཀྱི་མགོན་ཏེ། ལམ་ཞུགས་རྣམས་དེ། ལམ་ལ་གནས་པ་རྣམས་ཀྱི་དེད་དཔོན་དང༌། ཆུ་བོ་ལ་སོགས་པ་རྣམས་ཀྱི་ཕ་རོལ་ཏུ་ཕྱིན་པར་འདོད་ཅིང༌། རྒལ་འདོད་རྣམས་ཀྱི་གྲུ་དང་ནི། །གཟིངས་དང་ཟམ་པ་ཉིད་དུ་གྱུར། །གླིང་དོན་གཉེར་ལ་བདག་གླིང་དང༌། །གནས་མལ་འདོད་ལ་གནས་མལ་དང༌། །བདག་ནི་ལུས་ཅན་བྲན་འདོད་པ། །ཀུན་གྱི་བྲན་དུ་འགྱུར་བར་ཤོག །འདོད་པ་
ཐམས་ཅད་ཡོངས་སུ་རྫོགས་པར་བྱེད་པའི་ནོར་བུ་དང་བུམ་པ་ནི། ཡིད་བཞིན་ནོར་བུ་བུམ་པ་བཟང་པོའོ། །ཀླག་པ་ཉིད་ལས་དོན་བྱེད་པ་ནི་རིག་སྔགས་གྲུབ་པའོ། །སྨན་དོན་ཆེན་པོ་བྱེད་པ་ནི། སྨན་ཆེན་དུ་གྱུར་ཅིག་པའོ། །ཇི་ལྟར་ཡོངས་སུ་བསམས་པའི་འབྲས་བུ་འབྱིན་པའི་ཤིང་ནི། དཔག་བསམ་གྱི་ནི་ཤིང་དག་དང༌། །ཇི་ལྟར་འདོད་པའི་དངོས་པོ་ཐམས་ཅད་འདོད་འཇོར་གྱུར་པ་དེ་ལྟར་ན། ལུས་ཅན་རྣམས་ལ་འདོད་འཇོར་གྱུར། །མདོར་བསྡུ་ན་ཇི་ལྟར་ས་སོགས་འབྱུང་བ་ཆེན་པོ་དང༌། །ནམ་མཁའ་མ་ལུས་པ་ན་གནས་པ་ཡི། །སེམས་ཅན་དཔག་ཏུ་མེད་པ་ཡི། །རྣམ་མང་ཉེར་འཚོའི་གཞིར་ཡང་ཤོག །རྣམ་པ་མང་པོ་དག་གིས་སོ། །དེ་བཞིན་དུ་བདག་པོའི་དབང་གིས་སོ། །ནམ་མཁའི་མཐས་གཏུགས་པའི་རྒྱུན་རིངས་ཤིང་རྒྱ་ཆེ་བས་མཐའ་ཡས་པའི་སེམས་ཅན་ཁམས་ལ་རྣམ་ཀུན་དུ། རྣམ་པ་དུ་མས་སེམས་ཅན་ཐམས་ཅད་མྱ་ངན་འདས་བར་དུ། བདག་ནི་ཉེར་འཚོའི་རྒྱུར་ཡང་ཤོག །སངས་རྒྱས་སུ་གྱུར་ནས་སེམས་ཅན་ཐམས་ཅད་ཀྱི་དོན་བྱའོ་ཞེས་བྱ་བའི་ཐ་ཚིག་གོ །དེ་ལྟར་མཆོད་པ་ལ་སོགས་པ་དང༌། བྱང་ཆུབ་ཏུ་སྨོན་པའི་སེམས་ཀྱི་མཐར་ཐུག་པ་དཀའ་བ་དག་གིས་སྦྱོར་བ་རྣམ་པར་དག་ཅིང་བསམ་པ་ཡོངས་སུ་རྒྱས་པ་ཡིན། སྡོམ་པ་ཡང་དག་པར་ལེན་པ་ནི་གང༌། ཇི་ལྟར་སྔོན་གྱི་བདེ་གཤེགས་ཀྱིས། །ཞེས་བྱ་བ་ལ་སོགས་པ་སྨོས་ཏེ། བྱང་ཆུབ་ཀྱི་སེམས་ནི་འདིར་བྱང་ཆུབ་སེམས་དཔའི་སྡོམ་པ་ཡིན་ནོ། །དེ་ལྟར་ནི། བླ་མ་སྡོམ་ལ་གནས་ཤིང་མཁས། །ནུས་དང་ལྡན་ལས་བླང་བར་བྱ། །དེ་འདྲ་བ་མི་རྙེད་ན་སངས་རྒྱས་དང་བྱང་ཆུབ་སེམས་དཔའ་སྡོམ་པ་མ་ལུས་པ་དང་ལྡན་པ། བྱང་ཆུབ་ཀྱི་མཐར་བྱོན་པ་ཐམས་ཅད་ལ། ཐོགས་པ་མེད་པའི་སྤྱན་མངའ་བས་མདུན་དུ་བལྟས་ལ། དེ་དག་ལས་དད་པའི་བྱ་བ་དྲག་པོ་དང༌། དེ་ཁོ་ན་ཉིད་ལ་ལྷག་པར་མོས་པ་དག་གིས་ཡང་དག་པར་བླང་བར་བྱའོ། །ཇི་སྐད་དུ་བཤད་པའི་མཆོད་པ་ལ་སོགས་པ་བྱས་ནས། ཚིགས་སུ་བཅད་པ་གཉིས་པོ་འདི་བརྗོད་པར་བྱའོ། །བླ་མ་རྙེད་ནས་ཡང་དེ་དང་དེ་དག་ལས་དེ་བཞིན་དུ་བྱས་ཏེ། ཚུལ་ཁྲིམས་ཀྱི་
ལེའུ་ལས་བཤད་པ་འམ། བསླབ་པ་ཀུན་ལས་བཏུས་ལས་བཤད་པའི་ཚོགས་ཡང་དག་པར་བླང་བར་བྱའོ། །དེ་ནི་ཙནྡན་གྱིས་བརླན་པའི་ཡན་ལག་དྲུག་དང་བཅས་པའི་ཟླ་བའི་ཟེར་དག་གིས་སྟོན་ཀའི་བསིལ་བའི་ཟླ་བའི་ཟེར་འབའ་ཞིག་བཞིན་ནོ། །ཇི་ལྟར་རྣམ་པ་གང་གིས་སྔོན་གྱི་བདེ་གཤེགས་ཀྱི་བྱང་ཆུབ་ཐུགས་ནི་བསྐྱེད་པ་དང༌། བདག་གི་གནས་སྐབས་འདི་ལྟ་བུར་གྱུར་པས་ཞེས་བྱ་བའི་ཐ་ཚིག་གོ །བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །ཞེས་བྱ་བ་ལ་གནས་པ་ནི་རབ་ཏུ་ཞུགས་པའོ། །དེ་བཞིན་འགྲོ་ལ་ཕན་དོན་དུ། །དེའི་རྒྱུ་མཚན་དུ་འཇུག་པའི་བྱང་ཆུབ་སེམས་ནི་བསྐྱེད་བགྱི་ཞིང༌། །དེ་བཞིན་དུ་ནི་བསླབ་པ་ལའང༌། །རིམ་པ་བཞིན་དུ་སྟེ་མཐར་གྱིས་བསླབ་པར་བགྱི། དེ་ལྟར་མཆོད་པ་ལ་སོགས་པའི་སྦྱོར་བ་དང༌། དངོས་གཞིའི་རྣམ་པ་དག་ཅིང་རྒྱས་པ་དག་གིས་སྟོང་པ་ཉིད་དང༌། སྙིང་རྗེའི་སྙིང་པོ་ཅན་བཟུང་བས་བློ་སྙིང་རྗེས་ནོན་པའོ། །འདི་ལ་ཡོད་པ་དང་མེད་པ་ལས་འདས་པའི་བློ་ཡོད་པས་ན་བློ་དང་ལྡན་པའོ། །ཅི་ཞིག་བཟུང་ནས་ཤེ་ན། བྱང་ཆུབ་སེམས་སོ། །ཅི་ལྟར་ཞེ་ན། རབ་དང་སྟེ་བསམ་པ་དག་པས་སོ། །མཇུག་ཀྱང་རྒྱས་པ་སྟེ། སྦྱོར་བ་དང་དངོས་གཞི་རྒྱས་པ་ཉིད་ཡོད་པ་དེ་ལྟ་ན་ཡང༌། ཡང་རྒྱས་པར་བྱ་བའི་ཕྱིར། སེམས་ནི་འདི་ལྟར་གཟེངས་བསྟོད་དོ། །ཇི་ལྟར་གཟེངས་བསྟོད་པར་བྱ་ཞེ་ན། དེང་དུ་ཞེས་བྱ་བ་ལ་སོགས་པ་སྨོས་ཏེ། དེང་དུ་བདག་ཚེ་འབྲས་བུ་ཡོད། །འདི་ལྟར་ཚུལ་ཁྲིམས་ཡང་དག་པར་བླངས་པས། མི་ཡི་སྲིད་པ་ལེགས་པར་ཐོབ། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་ད་གྱུར་ཏོ། །ས་བཅུ་ལས་ས་དང་པོ་ལ་གནས་པ་དེ་བཞིན་གཤེགས་པའི་རིགས་སུ་སྐྱེས་པ་ཡིན་ནོ་ཞེས་བཤད་པ་མ་ཡིན་ནམ་ཞེ་ན། བདེན་ཏེ་དེར་ནི་ས་ཆེན་པོའི་རིགས་ལ་དགོངས་པ་ཡིན་ལ། སྔར་ནི་སངས་རྒྱས་ཉིད་ལ་མོས་པའི་རིགས་ལ་བརྡ་ཡང་དག་པར་ལེན་པ་བྱང་ཆུབ་ཏུ་སེམས་བསྐྱེད་པ་ལས་སྐྱེས་པར་འགྱུར་རོ་ཞེས་བཤད་པ་ཡིན་ནོ། །ནམ་མཁའི་སྙིང་པོའི་མདོ་ལས། བྱང་ཆུབ་སེམས་དཔའི་
སྡོམ་པ་ཡང་དག་པར་ལེན་པ་ནི་འཕགས་པ་མ་ཡིན་པ་དག་ལ་ཡང་ཡོད་དོ་ཞེས་འབྱུང་སྟེ། རྙེད་པ་ལ་སོགས་པ་ལ་ཆགས་པ་ལ་རྒྱབ་ཀྱིས་ཕྱོགས་པའི་ཕྱིར་རོ། །ས་བཅུ་ལས་ཀྱང་ས་དང་པོ་ལས་འགའ་ཞིག་ཀྱང་རྙེད་པ་དང་བཀུར་སྟི་ལྷག་པ་མི་འདོད་ཅེས་གསུངས་པའི་ཕྱིར་རོ། །འཕགས་པ་ལ་ཡང་ལོག་པའི་འཚོ་བ་མི་མངའ་བའི་ཕྱིར་རོ་ཞེས་ཤེས་པར་བྱའོ། །བྱང་ཆུབ་སེམས་དཔའི་སོ་སོར་ཐར་པ་ལས་ཀྱང་རིགས་ཡི་བུ་མོ་ཞེས་གསུངས་ཏེ། བུད་མེད་ཉོན་མོངས་པའི་ཤས་ཆུང་བ་བྱང་ཆུབ་དོན་དུ་གཉེར་བ་བྱང་ཆུབ་སེམས་དཔའི་བསླབ་པ་ལ་སློབ་པར་འདོད་པ་དག་ལ་ཡང་བྱང་ཆུབ་ཀྱི་བར་དུ་སྡོམ་པ་འདི་སྐྱེ་བར་འགྱུར་ཞིང༌། སྐྱེ་བ་གཞན་དག་ཏུ་ཡང་འགྱུར་རོ། །རྩ་བའི་ལྟུང་བ་འམ་འདིའི་སྡོམ་པ་ཞིག་ན་ཡང་དྲན་པ་སད་པར་བྱ་བའི་དོན་དུ་ཉིན་རེ་ཞིང་ལན་གསུམ་དུ་ཐུགས་རྗེ་ཆེན་པོ་དང་ལྡན་པ་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བའི་སྡིག་པ་ཐམས་ཅད་སོ་སོར་བཤགས་པར་བགྱིའོ། །ཡང་མི་བགྱིད་དོ་ཞེས་བྱ་བའི་བསམ་པས་ཡང་དག་པར་བླང་བར་བྱའོ། །སྤྱིར་སྡིག་པ་ཐམས་ཅད་བཤགས་པས་གཞན་ཡང་སྐྱེ་བ་གཞན་དུ་བྱས་པ་དང༌། ལྟུང་བ་གཞན་དག་ལས་ཀྱང་གྲོལ་ན་དྲི་མ་མེད་པར་འགྱུར་རོ་ཞེས་བསྟན་པའི་ཕྱིར་ད་ནི་ཞེས་བྱ་བ་ལ་སོགས་པ་སྨོས་ཏེ། ད་ནི་བདག་གིས་ཅི་ནས་ཀྱང་རིགས་དང་མཐུན་པའི་ལས་བརྩམས་ཏེ། སྐྱོན་མེད་བཙུན་པའི་རིགས་འདི་ལ། །རྙོག་པར་མི་འགྱུར་དེ་ལྟར་བྱ། །བྱང་ཆུབ་སེམས་དེ་རྙེད་པར་དཀའོ། །ཞེས་བསྟན་པའི་ཕྱིར། ལོང་བས་ཕྱག་དར་ཕུང་པོ་ལས། །ཕྱག་དར་ཁྲོད་ཀྱི་ཕུང་པོ་དག་ལས། །ཇི་ལྟར་རིན་ཆེན་རྙེད་པ་ལྟར་དེ་བཞིན་ཇི་ཞིག་ལྟར་སྟེས་ནས། བྱང་ཆུབ་སེམས་ནི་བདག་ལ་སྐྱེས། །འདི་དོན་ཆེན་པོ་ཡིན་ནོ་ཞེས་བསྟན་པའི་ཕྱིར། འགྲོ་བའི་འཆི་བདག་འཇོམས་བྱེད་པའི། །བདུད་རྩི་མཆོག་ཀྱང་འདི་ཡིན་ཏེ། །ཐ་དད་པའི་དོན་ཅན་ཉིད་ཡིན་པའི་ཕྱིར་རོ། །འགྲོ་བའི་དབུལ་བ་སེལ་བ་ཡི། །མི་ཟད་གཏེར་ཡང་འདི་ཡིན་ནོ། །ལོངས་སྤྱོད་ཆེན་པོ་མི་ཟད་པའི་དོན་ཅན་ཉིད་ཡིན་པའི་ཕྱིར་རོ། །འགྲོ་བའི་ནད་རབ་ཞི་བྱེད་པའི། །
སྨན་གྱི་མཆོག་ཀྱང་འདི་ཡིན་ཏེ། །འདོད་པའི་ཁམས་སུ་བདག་ཉིད་ཀྱི་འདོད་པ་ཁྱད་པར་དུ་འཕགས་པའི་དོན་ཅན་ཉིད་ཡིན་པའི་ཕྱིར་རོ། །སྲིད་པ་ཉིད་ལ་མ་ཡིན་ཏེ། དེ་ལ་འཁྱམས་པ་ནི་རྒྱུ་བའོ། །དེས་དུབ་པ་ནི་འགྲོ་བའི་ངལ་བསོ་ལྗོན་ཤིང་ཡིན། །ལམ་ཀའི་གྲིབ་མ་ཅན་གྱི་ཤིང་ཡིན་ཏེ། །གཟུགས་དང་གཟུགས་མེད་པ་དག་གི་ཁམས་དག་ཏུ་བདག་ཉིད་ཀྱི་དངོས་པོ་ཁྱད་པར་དུ་འཕགས་པའི་དོན་ཅན་ཉིད་ཡིན་པའི་ཕྱིར་རོ། །སྔར་བཤད་པའི་ཐར་པ་ལ་སོགས་པ་ཐམས་ཅད་དུ་འགྲོ་བའི་ངང་ཚུལ་ཅན་དུ་གང་ལ་ཡོད་པ་དེ་དག་ནི། འགྲོ་བ་ཐམས་ཅད་ངན་འགྲོ་ལས། །གྲོལ་བར་བྱེད་པའི་སྤྱི་སྟེགས་ཡིན། །སྤྱི་ནི་ཐུན་མོང་གིའོ། །འགྲོ་བའི་ཉོན་མོངས་གདུང་སེལ་བའི། །དེའི་ཉོན་མོངས་པའི་སྒྲིབ་པ་སྤོང་བར་བྱེད་པའི་དོན་ཅན་ཉིད་ཡིན་པའི་ཕྱིར། སེམས་ཀྱི་ཟླ་བ་ཤར་བ་ཡིན། །འགྲོ་བའི་མི་ཤེས་རབ་རིབ་དག ། དཔྱིས་འབྱིན་ཉི་མ་ཆེན་པོ་ཡིན། །ཤེས་བྱའི་སྒྲིབ་པ་སྤོང་བར་བྱེད་པའི་དོན་ཅན་ཉིད་ཡིན་པའི་ཕྱིར་རོ། །དེ་ཉིད་རིགས་ཡོངས་སུ་སྨིན་པ་དང༌། ཐར་པ་སངས་རྒྱས་ཉིད་ཀྱི་རྒྱུ་ཉིད་ཡིན་པའི་ཕྱིར་ཕན་པ་དང༌། བདེ་བ་དང༌། གཉི་གའི་དོན་དུ་ཞེས་བརྗོད་པར་འགྱུར་རོ། །དེ་བས་ན་དམ་ཆོས་འོ་མ་སྟེ། འོ་མའི་རྒྱ་མཚོ་བསྲུབས་པ་ལས། །མར་གྱི་སྙིང་ཁུ་སྟེ། བྱང་ཆུབ་ཀྱི་སེམས་ཀྱི་བདུད་རྩི་འདི་འབྱུང་བ་ཡིན་ནོ། །དེ་ལྟར་བདེ་བ་དང༌། ཐར་པའི་རྒྱུ་ཉིད་ཡིན་ན་ཡང༌། རེ་ཞིག་དང་པོར་བདེ་བ་ཉིད་དང་ལྡན་ནོ་ཞེས་གསུངས་པའི་ཕྱིར། འགྲོ་བའི་འགྲོན་པ་སྲིད་པའི་ལམ་རྒྱུ་ཞིང༌། །ཞེས་བྱ་བ་ལ་སོགས་པ་སྨོས་ཏེ། བདེ་བ་ཉིད་ལོངས་སྤྱོད་ཀྱི་འབྲས་བུ་ཉིད་ཡིན་པའི་ཕྱིར། བདེ་བའི་ལོངས་སྤྱོད་དོ། །དེ་ལོངས་སྤྱོད་པར་འདོད་པ་ནི་དེ་ལོངས་སྤྱོད་པར་འདོད་པའོ། །འདི་ནི་བདེ་བའི་མཆོག་ཏུ་ཉེར་གནས་ཏེ། །སེམས་ཅན་མགོན་ཆེན་ཚིམ་པར་བྱེད་པ་ཡིན། །གཏོང་བ་ཐམས་ཅད་ནི་ལོངས་སྤྱོད་མི་ཟད་པའི་དོན་ཉིད་ཡིན་པའི་ཕྱིར་རོ། །ད་ནི་གཟེངས་བསྟོད་པ་བསྐྱེད་ནས་མ་ལུས་པའི་མཇུག་སྡུག་པར་བྱེད་དོ། །བདག་གིས་དེ་རིང་སྐྱོབ་པ་ཐམས་ཅད་ཀྱི། །སྤྱན་སྔར་འགྲོ་བ་བདེ་གཤེགས་ཉིད་དང་ནི། །བར་དུ་བདེ་ལ་མགྲོན་དུ་བོས་ཟིན་གྱིས། །ལྷ་དང་
ལྷ་མིན་ལ་སོགས་དགའ་བར་གྱིས། །འདི་ནི་ཡང་དག་པར་ལེན་པ་དངོས་སུ་ཡིན་ནོ་།བྱང་ཆུབ་སེམས་དཔའི་སྤྱོད་པ་ལ་འཇུག་པའི་ལེགས་པར་སྦྱར་བ་ལས་ལེའུ་གསུམ་པའོ།། །།རྒྱལ་བའི་སྲས་ཀྱིས་དེ་ལྟ་བུར། །མཆོད་པ་ལ་སོགས་པའི་ཚོགས་བྱང་ཆུབ་པའི་བར་དུ་འཆི་བ་ན་ཡང་དོར་བ་མེད་པར། །བྱང་ཆུབ་སེམས་རབ་བརྟན་བཟུང་ནས། ཅི་ཞིག་བྱ་ཞེ་ན། བསླབ་པར་བྱ་བ་ཡིན་པས་ན་བསླབ་པ་སྟེ། ཚུལ་ཁྲིམས་ཀྱི་ཕུང་པོ་རྣམ་པ་གསུམ་ལན་ན་ཏན་དུ་བྱ་བའོ། །དེའི་གནས་ལ་འདིར་བསླབ་པའི་ཚིག་གི་དོན་གྱིས་བསྟན་ཏོ། །དེ་ལ་གཡེལ་བ་མེད་པར་རྟག་ཏུ་ཡང༌། །བག་ཡོད་པས། བསླབ་ལས་མི་འདའ་འབད་པར་བྱ། །གཡོལ་བ་ནི་ལུས་ཀྱི་སྙོམ་ལས་ཀུན་ནས་བསླང་བའི་ལེ་ལོ་སྟེ་གཡེལ་བའོ། །འདི་ལ་གཡེལ་བ་སྐྱེ་བ་མེད་པས་ན། །གཡེལ་བ་མེད་པའོ། །འདི་ལ་སྤྱོད་པ་མི་འཇུག་ན་ཡང་རིགས་པ་མ་ཡིན་ནོ་ཞེས་བསྟན་པའི་ཕྱིར། བབ་ཅོལ་ཞེས་བྱ་བ་ལ་སོགས་པ་སྨོས་ཏེ། བབ་ཅོལ་ཏེ་མ་དཔྱད་པར་བརྩམས་པ་གང་ཡིན་པ་འམ། དཔྱད་དུ་ཟིན་ཀྱང༌། གང་ཞིག་ལེགས་པར་མ་བརྟགས་པ། །དེ་ནི་དམ་བཅའ་བྱས་གྱུར་ཀྱང༌། །ཐེ་ཚོམ་ཟ་བས་ཁས་བླངས་སུ་ཟིན་ཀྱང༌། །བྱ་འམ་གཏང་ཞེས་བརྟག་པའི་རིགས། འབད་པས་བརྩམ་པར་བྱ་བ་ཡིན་ནོ། །སངས་རྒྱས་རྣམས་དང་དེ་ཡི་སྲས། །ཤེས་རབ་ཆེན་པོས་གང་བརྟགས་ཤིང༌། །བློ་གཞལ་དུ་མེད་པ་དང༌། བྱམས་པ་ལ་སོགས་པ་བདག་གིས་ལེགས་པར་ཡོངས་སུ་བརྟགས་པ་དང༌། བདག་ཉིད་ཀྱིས་ཀྱང་བརྟག་བརྟག་པ། །ཕན་པར་བསམས་པ་ཙམ་གྱིས་ཀྱང༌། །ཞེས་བྱ་བ་ལ་སོགས་པས་སོ། །དེ་ལ་བཤོལ་དུ་ཅི་ཞིག་ཡོད། །གལ་ཏེ་དེ་ལྟར་དམ་བཅས་ནས། །ཇི་སྐད་དུ་བཤད་ཇི་སྐད་དུ་བཟུང་བ་ཞེས་བྱ་བ་ལ་སོགས་པས་ལས་ཀྱིས་སྒྲུབ་པ་མ་བྱས་ན། དེ་དག་ཐམས་ཅད་ཀུན་བསླུས་ན། །སངས་རྒྱས་དང་བྱང་ཆུབ་སེམས་དཔའ་དང༌། སེམས་ཅན་ཐམས་ཅད་ཀུན་བསླུས་ན། །བདག་གི་འགྲོ་བ་ཅི་འདྲར་འགྱུར། །གཞན་འགའ་ཞིག་ཏུ་ཡང་མི་འགྱུར་རོ། །ཞེས་བྱ་བར་དགོངས་སོ། །དངོས་པོ་ཕལ་པ་ཅུང་ཟད་ལའང༌། །ཡིད་ཀྱིས་སྦྱིན་ཞེས་བསམ་བྱས་ནས། །མི་གང་སྦྱིན་པར་མི་བྱེད་པ། །
བསམས་པ་ཉིད་ཀྱིས་དམྱལ་བར་འགྱུར་རོ་ཞེས་བསྟན་པའི་དོན་ཏེ། དེ་དེ་ལྟར་ན་དངོས་པོ་ཉུང་ངུ་སྦྱིན་པར་བསམས་ནས་སྦྱིན་པར་མི་བྱེད་པ་དེ་ཡང༌། ཡི་དགས་རྒྱུར་གསུངས་ན། བླ་ན་མེད་པའི་བདེ་བ་ལ་སྟེ། བདེ་བར་གཤེགས་པ་ཉིད་དང༌། བར་དུ་བདེ་བ་ཐམས་ཅད་ལ་འགྲོ་བ་མ་ལུས་པ་ལ་སོགས་པ། བསམ་པ་ཐག་པས་མགྲོན་གཉེར་ནས། །ཁྱད་པར་ཅན་གྱི་ཚིག་གིས་མགྲོན་དུ་བོས་ནས། གདོན་མི་ཟ་བར་བྱ་བ་ཉིད་ཀྱིས། །འགྲོ་བ་ཐམས་ཅད་བསླུས་བྱས་ན། །བདེ་འགྲོར་ཅིག་འགྲོ་འགྱུར་རམ། །བདག་སྨད་པའི་འགྲོ་བ་མནར་མེད་པར་འགྲོ་བར་འགྱུར་རོ། །ཆོས་སྡུད་པའི་མདོ་ལས། དངོས་པོ་ཕལ་པ་ཅུང་ཟད་ཙམ་ཆུང་དུ་ཟིན་ཀྱང་དེ་ཡང་ཡི་དགས་སུ་འགྱུར་བར་གསུངས་སོ། །བསམ་པ་ཞེས་བྱ་བརྗོད་ཟིན་ཀྱང༌། །ཡིད་ཀྱིས་ཞེས་བྱ་བ་སྨོས་པ་ནི། ལུས་དང་ངག་དང་བཅས་པ་ཡང་མནར་མེད་པའི་འགྲོ་བ་ལས་འགའ་ཞིག་ཀྱང་ཡོད་པ་མ་ཡིན་ཏེ། བྱང་ཆུབ་རིང་དུ་བསྲིངས་པ་ཡིན་ནོ་ཞེས་བྱ་བར་དགོངས་སོ། །འོ་ན་ཇི་ལྟར་ཆོས་སྡུད་པའི་མདོ་ལས། བྱང་ཆུབ་ཀྱི་སེམས་གཏོང་བ་ཡིན་ཞེ་ན། བྱང་ཆུབ་ཀྱི་སེམས་གཏོང་བ་བདེན་ཏེ། ཐབས་ཀྱིས་བཏང་དུ་ཟིན་ཀྱང་ཡང་དག་པར་ལེན་པས། སེམས་ཅན་གྲོལ་བར་བྱེད་པ་ཡིན་ནོ་ཞེས་བསྟན་པར་བྱ་བའི་ཕྱིར། མི་གང་ཞེས་བྱ་བ་ལ་སོགས་པ་སྨོས་ཏེ། ལས་ཚུལ་བསམ་གྱིས་ནི་ཁྱབ་སྟེ། །རིགས་སྣ་ཚོགས་པ་ནི། ཐམས་ཅད་མཁྱེན་པ་ཁོ་ནས་མཁྱེན། །མི་གང་བྱང་ཆུབ་སེམས་གཏང་ཡང༌། །སེམས་ཅན་དེ་དག་ཐར་པར་མཛད་པ་སྟེ། །བྱང་ཆུབ་ཀྱི་སེམས་གཏང་ཡང༌། སེམས་ཅན་གྲོལ་བར་བྱེད་པའི་ལས་ཀྱི་ཚུལ་བསམ་གྱིས་མི་ཁྱབ་པ་དེ་ནི་ཐམས་ཅད་མཁྱེན་པ་ཁོ་ནས་མཁྱེན་གྱི་ཁོ་བོས་ཤེས་པ་ནི་མ་ཡིན་ནོ། །དཀོན་མཆོག་བརྩེགས་པ་ལས། གང་ལས་འདིའི་བློ་ནི་ནུས་པ་མེད་པ་དེ་ལ་དེ་བཞིན་གཤེགས་པ་ཉིད་ཚད་མར་གྱུར་པ་དེ་བཞིན་གཤེགས་པ་ཉིད་མཁྱེན་གྱི། ངན་ནི་མི་ཤེས་ཞེས་གསུངས་པ་ཡིན་ནོ། །འགྲོ་བ་ཐམས་ཅད་བསླུས་ན་ཁ་ན་མཐོ་བར་འགྱུར་རོ་ཞེས་བསྟན་པའི་ཕྱིར། དེ་ནི་བྱང་ཆུབ་སེམས་དཔའ་ཞེས་བྱ་བ་སྨོས་ཏེ། བྱང་ཆུབ་སེམས་
དཔའ་ལ་དེ་ཉིད་ཀྱིས། ལྟུང་བའི་ནང་ན་ལྕི་བ་སྟེ། །འདི་ལྟར་དེ་ནི་བྱུང་གྱུར་ན། །སེམས་ཅན་ཀུན་གྱི་དོན་ལ་དམན། །གང་གཞན་འགའ་ཞིག་འདི་ཡི་ནི། །བྱང་ཆུབ་སེམས་དཔའི་བསོད་ནམས་བར་ཆད་བགེགས་བྱེད་པ། སྒྲ་ལས་ཀྱང་སེམས་ཅན་ཐམས་ཅད་ཀྱི་དོན་གྱི་བགེགས་བྱེད་པ་ལྟུང་བས་དེའི་གཞན། །དེ་ཡི་ངན་འགྲོ་མུ་མཐའ་མེད། །ངན་འགྲོ་དག་ཏུ་སྐྱེ་བ་བརྒྱུད་པའི་མཐའ་ཡོད་པ་མ་ཡིན་ནོ། །སེམས་ཅན་གཅིག་གི་བདེ་བ་ཡང༌། །བཤིག་ན་བདག་ཉིད་ཉམས་འགྱུར་ན། །ངན་འགྲོའི་སྡུག་བསྔལ་གྱིས། ནམ་མཁའ་མ་ལུས་མཐའ་ཀླས་པའི། །ལུས་ཅན་བདེ་བཤིག་སྨོས་ཅི་དགོས། །བདེ་བ་བཤིག་ན་ཆེས་ཉམས་པར་འགྱུར་རོ་ཞེས་བྱ་བའི་ཐ་ཚིག་གོ ། །བསོད་ནམས་ཀྱི་བགེགས་བྱེད་པས་ཀྱང༌། སེམས་ཅན་ཐམས་ཅད་ཀྱི་དོན་ཉམས་པར་འགྱུར་བར་བྱས་པ་དེ་བས་ན། སེམས་ཅན་གྱི་དོན་གྱི་བགེགས་བྱེད་པ་དེའི་ངན་འགྲོ་བ་མཐའ་ཡོད་པ་མ་ཡིན་ནོ། །དེ་ལྟ་ན་ཡང་གང་ལྷུང་བར་འགྱུར་བ་ཡིན་ནོ། །ལྷག་པའི་བསམ་པས་བཤགས་པ་བྱས་ཤིང་སྡོམ་པ་གཏང་ནས་ཀྱང་ལེན་པར་བྱེད་པ་ཡིན་ཏེ། སངས་རྒྱས་པའི་ཆོས་འདུལ་བ་ནི་ངེས་པར་འབྱིན་པ་དང་བཅས་པ་ཉིད་ཡིན་པའི་ཕྱིར་རོ། །ངན་སོང་གི་དེ་ལྟར་ལྟུང་བའི་སྟོབས་ལྡན་དང༌། བདེ་བར་གཤེགས་པའི། བྱང་ཆུབ་སེམས་སྟོབས་ལྡན་པ་དག །ལྟུང་བ་དང་ཀུན་ནས་ལྡང་བ་དག་གིས། འཁོར་བར་རེས་ཀྱིས་སྤྱོད་པ་ནི་རེས་ཀྱིས་འདྲེ་བར་བྱེད་ནའོ། །ས་ཐོབ་པ་ལ་སྟེ། བྱང་ཆུབ་སེམས་དཔའ་ས་རབ་ཏུ་དགའ་བ་ལ་སོགས་པ་ཐོབ་པ་ལ། ཡུན་རིང་ཐོགས་པར་འགྱུར་རོ། །ཐ་ན་དམ་བཅས་པ་མོས་པས་སྤྱོད་པའི་ས་ཐོབ་པ་ལ་ཡང་ངོ༌། །དེ་ཐོབ་ན་ཡང་ངན་སོང་དུ་འགྲོ་བར་མི་འགྱུར་རོ། །དེའི་ཕྱིར་དེ་བཞིན་དུ་བསླབ་པ་དེ་དག་ལ་བསླབ་པར་བྱ་བ་ཡིན་པ་དེ་ལྟར་ན། ཅི་ལྟར་དམ་བཅས་པ་ཡིན་པ་བཞིན་དུ། བདག་གིས་གུས་པར་བསྒྲུབ་པར་བྱའོ། །གཡེལ་བ་མེད་པར་རྟག་ཏུ་བསླབ་པ་ལས་མི་འདའ་བར་བྱའོ་ཞེས་བྱ་བའི་ཐ་ཚིག་གོ །དེ་ལྟར་ནི་དེ་བས་བརྩོན་པར་མ་བྱས་ན། དེའི་འོག་ནས་ཏེ་ངན་སོང་ནས་སོ། །འོག་ཏུ་སྟེ་ངན་སོང་དུ་འགྲོ་བར་འགྱུར་ཏེ། ངན་འགྲོ་ཁོ་ནར་བརྒྱུད་པར་འགྱུར་རོ་ཞེས་བྱ་བའི་ཐ་ཚིག་གོ།
སངས་རྒྱས་བཞུགས་པ་མ་ཡིན་ནམ་དེ་འོག་ནས་འོག་ཏུ་འགྲོ་བར་མི་འགྱུར་རོ་ཞེ་ན། སེམས་ཅན་ཐམས་ཅད་ཕན་མཛད་པའི། །ཞེས་བྱ་བ་ལ་སོགས་པ་སྨོས་ཏེ། གནས་གཞན་དྲུག་ཅུས་ཕྱིན་པ་ནི་གྲངས་ཡིན་ལ། བགྲང་བར་མི་ནུས་པ་ནི་གྲངས་མེད་པ་སྟེ། སེམས་ཅན་ཕན་པར་མཛད་པ་ཡི། །སངས་རྒྱས་གྲངས་མེད་འདས་གྱུར་ཀྱང༌། །བདག་ནི་རང་གི་ཉེས་པ་དེའི། །གསོ་བའི་སྤྱོད་ཡུལ་མ་གྱུར་ཏོ། །བདག་དེ་དག་གིས་གསོ་བར་མ་གྱུར་ཏོ་ཞེས་བྱ་བའི་ཐ་ཚིག་གོ །ད་དུང་དེ་བཞིན་བདག་བྱེད་ན། །ཇི་ལྟར་བདག་སྔོན་གྱི་སྐྱེ་བར་བག་མེད་པར་གྱུར་པས་ཡང་དང་ཡང་དུ་དེ་བཞིན་ཏེ། ངན་འགྲོ་དང༌། བདེ་འགྲོ་དང་ནད་ལ་སོགས་པ་མྱོང་བར་འགྱུར་ཞིང་ཐོབ་པར་འགྱུར་རོ། །སངས་རྒྱས་བཞུགས་ན་ཡང་ཚོགས་པ་རྙེད་པར་དཀའོ་ཞེས་བསྟན་པའི་ཕྱིར། དེ་བཞིན་གཤེགས་པ་འབྱུང་བ་དང༌། །དད་དང་མི་ལུས་ཐོབ་པ་དང༌། །མིའི་འགྲོ་བ་ཉིད་དང༌། དགེ་གོམས་རུང་བ་དེ་ལྟ་བུར། །དཀོན་པ་ནམ་ཞིག་ཐོབ་པར་འགྱུར། །ཞེས་བྱ་བ་སྨོས་ཏེ། གཞན་ཡང་ནད་མེད་ཉི་མ་འདི་ལྟ་བུ་ཞེས་བྱ་བ་ནི་མིའི་ལུས་ཉིད་དེ། འདི་ནད་མེད་པའི་ཉི་མ་ཡིན་པས་ན་ནད་མེད་ཉི་མའོ། །ཟས་བཅས་འཚོ་བ་མེད་ཀྱང་ནི། །ཚེ་ནི་སྐད་ཅིག་སླུ་བ་སྟེ། །ལུས་ནི་ཐང་ཅིག་བརྙན་པོ་བཞིན། །བརྙན་པོ་བྱས་པའང་རྙེད་པར་འགྱུར་གྱིས། ཉེས་པར་སྤྱོད་པ་འང་མ་ཡིན་ནོ་ཞེས་བསྟན་པའི་ཕྱིར། བདག་གི་སྤྱོད་པ་འདི་འདྲས་ནི། །མི་ཡི་ལུས་ཀྱང་འཐོབ་མི་འགྱུར། །མི་ལུས་ཐོབ་པར་མ་གྱུར་ན། །སྡིག་པ་འབའ་ཞིག་ཅེས་བྱ་བ་སྨོས་ཏེ། དགེ་བ་ལས་ཀྱང་ངན་འགྲོ་འབྱུང་བར་འགྱུར་བ་མ་ཡིན་ཞེ་ན། དགེ་བ་མེད་ཅེས་བྱ་བ་སྨོས་ཏེ། མི་ལ་ཡང་དགེ་བ་གོམས་པ་ལས་བདེ་འགྲོར་འགྱུར་གྱི་རྣམ་པ་གཞན་དུ་ནི་མ་ཡིན་ནོ། །དེ་ཉིད་ཀྱི་ཕྱིར། གང་ཚེ་དགེ་སྤྱད་སྐལ་ལྡན་ཡང༌། །དགེ་བ་བདག་གིས་མ་བྱས་ན། །ངན་སོང་སྡུག་བསྔལ་ཀུན་རྨོངས་པ། །དེ་ཚེ་བདག་གིས་ཅི་བྱར་ཡོད། །ངན་སོང་དག་ཏུའོ། །དགེ་བ་དག་ཀྱང་མ་བྱས་ལ། །སྡིག་པ་དག་ཀྱང་སྟེ། གཅིག་ལ་གཅིག་ཟ་ཞིང་དམྱལ་བའི་སྲུང་མ་སྡང་བ་ལ་སོགས་པ་འཕེལ་ཞིང་ཉེར་བསགས་ན། རེ་ཞིག་འདི་གཉིས་ཀྱིས་
ཀྱང་བདེ་འགྲོར་མི་འགྱུར་རོ། །བསྐལ་པ་བྱེ་བ་བརྒྱར་ཡང་ནི། །བདེ་འགྲོའི་སྒྲ་ཡང་ཐོས་མི་འགྱུར། །དེ་ཉིད་ཕྱིར་ན་བཅོམ་ལྡན་གྱིས། །རྒྱ་མཚོ་ཆེར་གཡེངས་གཉའ་ཤིང་གི །བུ་གར་རུས་སྦལ་མགྲིན་ཆུད་ལྟར། །མི་ཉིད་ཤིན་ཏུ་ཐོབ་དཀར་གསུངས། །དཔེར་ན་དགེ་སློང་དག་ས་ཆེན་པོ་འདི་རྒྱ་མཚོ་ཆེན་པོར་གྱུར་ཞིང༌། དེ་ལ་གཉའ་ཤིང་བུ་ག་གཅིག་ཡོད་པ་རླུང་གིས་གཡེངས་ཤིང་འདི་ནས་བསྐྱོད་པ་དང༌། རུས་སྦལ་ལོང་བ་གཅིག་ཅིག་ཡོད་ལ། རུས་སྦལ་དེ་ཡང་ལོ་བརྒྱ་བརྒྱ་ཞིང་མགྲིན་པ་འདོགས་པར་འགྱུར་ན། དགེ་སློང་དག་ཇི་སྙམ་དུ་སེམས། རྒྱ་མཚོ་ཆེན་པོའི་གཉའ་ཤིང་གི་བུ་གར་རུས་སྦལ་མགྲིན་པ་ཆུད་པ་རྙེད་པར་སླ་བ་ཡིན་ནམ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་བཞིན་དུ་མི་ཉིད་ཤིན་ཏུ་ཐོབ་པར་དཀའ་བ་ཡིན་ནོ་ཞེས་གསུངས་པ་ལྟ་བུའོ། །རྣམ་པ་འདི་དང་འདི་ཞེས་བསྟན་པའི་ཕྱིར། །སྐད་ཅིག་གཅིག་བྱས་སྡིག་པས་ཀྱང༌། །ཞེས་བྱ་བ་སྨོས་ཏེ། མཚམས་མེད་པ་ལ་སོགས་པས། བསྐལ་པར་མནར་མེད་གནས་འགྱུར་ན། འདུག་པར་འགྱུར་ན། ཐོག་མེད་འཁོར་བར་བསགས་སྡིག་གིས། །བདེ་འགྲོར་མི་འགྲོ་སྨོས་ཅི་དགོས། །སྒྲ་མི་ཐོས་པར་སྨོས་ཀྱང་ཅི་དགོས། དེ་ལྟར་ནི་འགྱུར་མོད་ཀྱི། སྡིག་པ་ཟད་པ་ལས་མནར་མེད་པ་ལས་ཐར་བར་འགྱུར་རོ་ཞེ་ན། སྡིག་པ་དེ་ཙམ་ཁོ་ན་མྱོང་གྱུར་ནས། །ཉམས་སུ་མྱོང་བ་མནར་མེད་པ་ལ་སོགས་པ་ལས་སེམས་དེ་ནི་རྣམ་ཐར་མི་འགྱུར་ཏེ། འདི་ལྟར་དེ་ནི་སྡིག་པ་མྱོང་བཞིན་དུ། སྡིག་པ་གཞན་དག་རབ་ཏུ་སྐྱེ། །དེའི་ཕྱིར་དེ་ཉིད་ལས་དགེ་བ་བྱའོ། །དེ་ལྟ་མ་ཡིན་ན་འདི་ལས་བསླུས་པ་གཞན་མེད་དེ། འདི་ལས་རྨོངས་པའང་གཞན་མེད་དོ། །གང་ལས་ཤེ་ན། གལ་ཏེ་འདི་འདྲའི་དལ་བ་རྙེད་གྱུར་ནས། བདག་གིས་དགེ་གོམས་མ་བྱས་པ་ལས་སོ། །དེའི་ཕྱིར་གལ་ཏེ་བདག་གིས་དེ་རྟོགས་ནས། རྨོངས་པས་ཕྱིས་ཀྱང་སྒྱིད་ལུག་ནའོ། །བསླབ་པ་འབད་རྩོལ་མི་བྱེད་ན། དེའི་ཚེ་འཆི་བར་འགྱུར་བའི་དུས་ཀྱི་ཚེ། མྱ་ངན་ཆེན་པོ་ལྡང་བར་འགྱུར། །ཅིའི་ཕྱིར་ཁྱོད་འདི་འདྲའི་ལས་བྱེད་ཅེས་ཡོངས་སུ་སྨྲ་བར་བྱེད་པ་ནའོ། །དམྱལ་བ་དག་ཏུ་ཡང༌།
དམྱལ་མེ་བཟོད་དཀའ་ཡུན་རིང་དུ། །བདག་གི་ལུས་ནི་བསྲེགས་གྱུར་ན། །ཞེས་བྱ་བ་ནི་ཉེ་བར་མཚོན་པ་ཡིན་ཏེ། ལུས་ཅན་གཞན་དང་དུད་འགྲོ་དག་ན་དུད་འགྲོ་རྣམས་ཟ་བར་བྱེད་པ་ན་ངན་སོང་དེ་ལ་རྣམ་པ་འགའ་ཞིག་ལྷར་འཕོས་ཤིང་བདེ་འགྲོར་སྐྱེ་ན་ནི། སྡིག་པའི་རྒྱུ་མཐུན་པའི་ཤེས་པས་གདུངས་ཤིང་ཕྱིས་འགྱོད་པ་མི་བཟོད་མེ་འབར་བས། དུས་ཕྱིས་མི་བཟད་པའི་མེས། ཡུན་རིང་སེམས་གདུངས་གདོན་མི་ཟ། །བདག་དེང་བསླབ་པ་དག་ལ་མི་སློབ་པའོ། །གཞན་ཡང་ཤིན་ཏུ་རྙེད་དཀའ་ཕན་པའི་ས། །བདེ་འགྲོ་དག་གིས་ཅི་ཞིག་ལྟར་སྟེས་རྙེད་གྱུར་ནས་སོ། །དེ་ལྟར་ཐོས་པ་ལས་བྱུང་བ་ལ་སོགས་པའི་ཤེས་པས། བདག་ཉིད་ཤེས་དང་ལྡན་བཞིན་དུ། །སྡིག་པས་སྤྱིར་ཡང་དམྱལ་བ་དེར་ཁྲིད་ནའོ། །རྨོངས་པས་སྡིག་པ་བྱེད་པ་ཡིན་ནོ་ཞེས་བསྟན་པའི་ཕྱིར། སྔགས་ཀྱིས་ཞེས་བྱ་བ་ལ་སོགས་པ་སྨོས་ཏེ། བདག་ལ་འདིར་ཏེ། ཕན་པའི་སར་བསླབ་པ་དག་ལ་སློབ་པའོ། །སེམས་མེད་དུ་ཟད་དེ། འདི་ལྟར་བདག་འགའ་ཞིག་སྔགས་ཀྱིས་རྨོངས་པར་བྱེད་པ་བཞིན། རྒྱུ་ཅིས་རྨོངས་པ་བདག་ཀྱང་མ་ཤེས་ཏེ། བདག་གི་ལུས་ཀྱི་ཁོང་ན་ཅི་ཞིག་ཡོད། སྲེད་པ་ལ་སོགས་པ་ཞེས་བྱ་བའོ། །ཞེ་སྡང་སྲེད་སོགས་དགྲ་རྣམས་ལ། །རྐང་ལག་ལ་སོགས་ཡོད་མིན་ཏེ། །གཟུགས་ཅན་མ་ཡིན་པའི་ཕྱིར་རོ། །དཔའ་མིན་ཏེ་བརྩོན་འགྲུས་ནི་དགེ་བའི་ས་ཆེན་པོ་པ་ཡིན་པའི་ཕྱིར་རོ། །སྲེད་པ་ལ་སོགས་པ་ནི་མི་དགེ་བ་ཉིད་ཡིན་པའི་ཕྱིར་ཏེ། བརྩོན་འགྲུས་དང་མཚུངས་པར་ལྡན་པ་ཉིད་མེད་པའི་ཕྱིར་རོ། །མཛངས་མིན་ཏེ། རྨོངས་པ་དང་མཚུངས་པར་ལྡན་པའི་ཕྱིར་རོ། །ཅི་ཞིག་ལྟར་དེ་དག་བདག་བྲན་བཞིན་བྱས། སྲེད་པ་དང་ཞེ་སྡང་ལ་སོགས་པའི་དགྲ་རྣམས་ཀྱིས་སོ། །དེ་དག་ནི་རྨོངས་པའི་རྒྱུ་ཡིན་ལ། སྔར་སྐྱེས་པའི་རྨོངས་པ་ཡང་དེ་དག་གི་རྒྱུ་ཡིན་ནོ། །སྔར་སྐྱེས་པ་དེ་ལྟ་ན་བདག་བྲན་དུ་བྱས་པ་ཡིན་ནོ། །འདི་ལྟར་བདག་གི་སེམས་ལ་གནས་བཞིན་དུ། དགའ་མགུར་བདག་ལ་གནོད་བྱེད་པ། །དེ་ལ་མི་ཁྲོ་བཟོད་པ་ནི། །འདིར་བཟོད་པ་ཤིན་ཏུ་སྨད་པ་བསྟན་པའི་ཕྱིར། གནས་མིན་
བཟོད་པ་སྨད་པའི་གནས། །ཞེས་བྱ་བ་སྨོས་སོ། །དེང་ནི་མཚོན་ལ་སོགས་པས་གནོད་པ་ལྟར་བཟོད་པར་ནུས་ཞེས་བསྟན་པའི་ཕྱིར། གལ་ཏེ་ལྷ་དང་ལྷ་མིན་རྣམས། །ཐམས་ཅད་བདག་ལ་དགྲར་ལངས་ཀྱང༌། །དེ་དག་གིས་ཀྱང་མནར་མེད་པའི། །མེ་ནང་འཇུག་ཅིང་འཁྲིད་མི་ནུས། །མེ་ཅི་འདྲ་བ་ཞིག་ཅེ་ན། ཉོན་མོངས་སྟོབས་ཅན་དགྲ་འདིས་ནི། །གང་དང་ཕྲད་ན་སྟེ། གང་དང་འབྲེལ་པ་ལས། རི་རབ་ཀྱང་ཐལ་བ་ཡང་ནི་མི་ལུས་པ། །དེར་བདག་སྐད་ཅིག་གཅིག་ལ་འདོར། །དེ་ལྟར་ཉོན་མོངས་པའི་དགྲ་སྟོབས་དང་ལྡན་པ་ཡིན་ནོ། །སྟོབས་དང་ལྡན་པ་འབའ་ཞིག་དུ་མ་ཟད་དེ། ཡུན་ཡང་ཤིན་ཏུ་རིང་བ་ཡིན་ཏེ། བདག་གི་ཉོན་མོངས་དགྲ་བོ་གང༌། །དུས་རིང་ཐོག་མཐའ་མེད་པ་ལྟར། །དགྲ་གཞན་ཀུན་ཀྱང་དེ་ལྟ་བུར། །ཚེ་རིང་ཐུབ་པ་མ་ཡིན་ནོ། །འོན་ཀྱང་དེ་དག་རྗེས་སུ་མཐུན་པར་བརྟེན་པར་བྱ་བ་ཡིན་ནོ་སྙམ་ན། སྨྲས་པ། མཐུན་པར་རིམ་གྲོ་བསྟེན་བྱས་ན། །ཐམས་ཅད་ཕན་དང་བདེ་བྱེད་ནའོ། །ཉོན་མོངས་འདི་རྣམས་བསྟེན་བྱས་ན། །ཕྱིར་ཞིང་སྡུག་བསྔལ་གནོད་པ་བྱེད། །འཁོར་བར་དགའ་བ་དང་བདེ་བའི་རྒྱུ་ཡང་ཡིན་ལ། འདི་ལ་མཐུན་པར་བསྟེན་པར་བྱ་བ་མ་ཡིན་ནོ་ཞེ་ན། དེ་ལྟར་ཡུན་རིང་ཞེས་བྱ་བ་ལ་སོགས་པ་སྨོས་ཏེ། དེ་ལྟར་བཤད་པའི་ཚུལ་གྱིས། །ཡུན་རིངས་རྒྱུན་ཆགས་ཏེ། ཐོག་མ་མེད་པའི་དུས་ནས་དགྲར་གྱུར་པ་དག་ནི། དེ་ལྟར་ཡུན་རིང་རྒྱུན་ཆགས་དགྲར་གྱུར་པའོ། །གནོད་པའི་ཚོགས་ནི་གནོད་པའི་ཚོགས་སོ། །དེ་རབ་ཏུ་འཕེལ་བའི་ཕྱིར། དེ་རྒྱུ་གཅིག་པུ་ཡིན་པ་དེ་ལྟ་ན། གནོད་པའི་ཚོགས་རྣམས་འཕེལ་བའི་རྒྱུ་གཅིག་པུའོ། །བདག་གི་སྙིང་ལ་ངེས་པར་གནས་འཆའ་ན། བསྟེན་པར་བྱེད་ན་ཡིད་བདེ་བར་ཇི་ལྟར་འགྱུར། ཇི་ལྟར་བདེ་བར་འགྱུར་ཞེས་བསྟན་པའི་ཕྱིར། འདི་ནི་ཞེས་བྱ་བ་ལ་སོགས་པ་སྨོས་ཏེ། དེ་ནི་འཁོར་བའི་བཙོན་རའི་སྲུང་མ་སྟེ། དམྱལ་སོགས་སུ་གསོད་པར་བྱེད་པའི་གཤེད་མ་ཡིན། སྡོམ་བརྩོན་སེང་གེ་འཚོར་བའི་ལྕགས་གཟེབ་ལྟ་བུར་སེམས་ཀྱི་ཁང་པ་ལྕགས་ཀྱི་གཟེབ་ལྟ་བུར་སེམས་ནི་བློ་ཡིན་ལ་ཁང་པ་ནི་ཁྱིམ་ཡིན་ཏེ། དེར་གལ་ཏེ་གནས་ན་ག་ལ་བདེ། ལུས་ཀྱི་ཡང་ངོ༌། །དེ་བས་ན་དེ་དག་ནི་རྣམ་པ་ཐམས་ཅད་དུ་དོན་མེད་
པའི་རྒྱུ་ཡིན་ནོ། །དེ་ལྟར་ཇི་སྲིད་བདག་གིས་དགྲ་འདི་མངོན་སུམ་དུ། ཤིན་ཏུ་ངེས་པར་མ་བཅོམ་བདག་དེ་སྲིད་བདག་འདིར་ཏེ། འདི་འགྲོ་འམ་ཉོན་མོངས་པ་བཅོམ་པ་ལའོ། །བརྩོན་མི་འདོར་ཞེས་བྱ་བ་ནི་བརྩོན་པ་སྤོང་བར་མི་བྱེད་པའོ། །རེ་ཞིག་གནོད་བྱེད་ཆུང་ངུ་ལའང་ཁྲོས་གྱུར་པའི། །ང་རྒྱལ་བདོ་རྣམས་དེ་མ་བཅོམ་པར་གཉིད་མི་འོང༌། །འཇིག་པ་ལ་རྒྱུ་མེད་པའི་ཕྱིར། །རང་བཞིན་ཏེ་ངོ་བོ་ཉིད་ཀྱིས་སྡུག་བསྔལ་འགྱུར་བའི་ཉོན་མོངས་དག །གཡུལ་ངོར་དངར་ཚེ་ནན་གྱིས་གཞོམ་པར་འདོད་པ་ཡང༌། གཏུམ་ཞིང་དྲག་པ་ཡང༌། མདའ་མདུང་མཚོན་གྱིས་ཕོག་པའི་སྡུག་བསྔལ་ཁྱད་བསད་ནས། །དོན་མ་གྲུབ་པར་ཕྱིར་ཕྱོགས་འབྱེར་བར་མི་བྱེད་ན། །རྟག་ཏུ་སྡུག་བསྔལ་ཀུན་གྱི་རྒྱུར་གྱུར་པ། །རང་བཞིན་དགྲ་སྟེ། ཉོན་མོངས་པ་དག་ངེས་གཞོམ་བརྩོན་པ་བདག་ལ་དེང༌། །སྡུག་བསྔལ་བརྒྱ་ཕྲག་རྒྱུར་གྱུར་གང་གིས་ཀྱང༌། །ཡི་ཆད་སྒྱིད་ལུག་མི་འགྱུར་སྨོས་ཅིང་དགོས། །སྡུག་བསྔལ་གྱི་རྒྱུ་དེ་དག་གིས་སྒྱིད་ལུག་པར་འགྱུར་རོ་སྙམ་ན། སྨྲས་པ། དོན་མེད་པ་ནི་འབྲས་བུ་མེད་པ་ཉིད་ཡིན་ཏེ། འབྲས་བུ་ཆུང་བ་ཉིད་ཀྱི་ཕྱིར་རོ། །དགྲ་ཡིས་རྨ་སྲོལ་བཏོད་པའི་དགྲ་བོས་རྨ་སྲོལ་ཞིང་བཏོད་པ་ཡང༌། ལུས་ལ་རྒྱན་དང་འདྲ་བར་སྲེལ་བྱེད་ན། །དོན་ཆེན་བསྒྲུབ་ཕྱིར་ཡང་དག་བརྩོན་གྱུར་པ། །བདག་ལ་སྡུག་བསྔལ་ཅི་ཕྱིར་གནོད་བྱེད་ཡིན། །དེ་བཞིན་ཉ་བ་གདོལ་པ་ཞིང་པ་ལ་སོགས་པ། །རང་གི་འཚོ་བ་ཙམ་ཞིག་སེམས་པ་ཡང༌། །གྲང་དང་ཚ་ལ་སོགས་པའི་གནོད་བཟོད་ན། །འགྲོ་བ་བདེ་ཕྱིར་བདག་ལྟ་ཅིས་མི་བཟོད། །འོན་ཀྱང་བཟོད་པ་ཁོ་ནའི་དེ་ལྟ་མ་ཡིན་ན། ཕྱོགས་བཅུ་ནམ་མཁའི་མཐས་གཏུགས་པ་ནི། ཕྱོགས་བཅུ་ནམ་མཁའི་མཐས་གཏུགས་པའི་འགྲོ་བ་སྟེ། སེམས་ཅན་གྱི་ཁམས་མཐའ་མེད་པ་སྟེ། ཉོན་མོངས་དགྲ་ལས་གྲོལ་བར་དམ་བཅའ་གང་ཚེ་བདག་ཉིད་ཀྱང༌། །ཉོན་མོངས་རྣམས་ལས་མ་གྲོལ་བར། །བདག་གི་ཚོད་ཀྱང་མི་ཤེས་པར་དེའི་ཚེ། སྨྲ་བ་ཇི་ལྟར་སྨྱོན་པ་མིན། །དེ་ཕྱིར་ཉོན་མོངས་གཞོམ་བ་ལ། །རྟག་ཏུ་ཕྱིར་མི་ལྡོག་པར་བྱ། །ཉོན་མོངས་པ་སྤོང་བ་འདི་ལ་རྟག་ཏུ་ཞེན་པར་བྱའོ། །ཕྱིར་ལྡོག་ན་ཞེན་པར་མི་འགྱུར་
ཞིང༌། སྐད་ཅིག་ཞེན་པ་ཡང་ཕྱིར་མི་ལྡོག་པར་འགྱུར། གཡུལ་འགྱེད་པ་ན་ཉོན་མོངས་པ་སྤོང་བར་ནུས་པ་སྟེ། གཉེན་པོའི་ཕྱོགས་རྣམས་ཀྱིས་རེ་རེ་ཞིང་རྣམ་པ་དགུ་པོ་དེ་དག་ལ་བག་ཡོད་པ་མ་ཡིན་ནོ། །སྣུན་པར་བྱེད་པ་དག་དབང་དུ་བྱེད་པ་ལ། ལེགས་པར་བསླབས་པ་ཉིད་ཀྱི་ཕྱིར། སྐད་ཅིག་གཡུལ་འགྱེད་པར་གྱུར་པ་ཡིན་གྱི། འཁོན་དུ་བཟུང་བའི་མ་ཡིན་ནོ། །ཁོ་བོ་འདིར་འཁོན་དུ་བཟུང་བ་དང༌། གཡུལ་སྤྲོད་པར་འདོད་པར་འགྱུར་རོ། །རྒྱུད་གཞན་གྱི་ཉོན་མོངས་པ་བཅོམ་པ་ལ་ཡང་འཁོར་བ་ལ་འཁོན་དུ་བཟུང་བས། ཉོན་མོངས་པ་ཐམས་ཅད་བཅོམ་པ་མ་ཡིན་གྱི། འོན་ཀྱང་དེ་དང་གཡུལ་སྤྲོད་པ་ན། ཉོན་མོངས་པ་དང་འདྲེ་བས་ཉོན་མོངས་པའི་ནང་ནས་ང་རྒྱལ་ལ་སོགས་པ་འཚང་པར་འགྱུར་བའི་ཉོན་མོངས་པ་ལས་གཞན་དུ་སྟེ། གཞན་དུ་ཉོན་མོངས་པ་གཞོམ་པ་ལ་ཉོན་མོངས་པ་འཇོམས་པར་བྱེད་པ་གཞག །གང་དག་ང་རྒྱལ་དགྲ་ལས་རྒྱལ་བར་བྱ་ཕྱིར་ང་རྒྱལ་བརྟེན་ཅེས་བྱ་བ་དང༌། དེ་བཞིན་དུ་ཉིས་ན་ཞེ་སྡང་ལ་ཁྲོ་རིགས་ཞེས་བྱ་བས་འཆད་པར་འགྱུར་རོ། །དེ་ནི་བདག་ནི་བསྲེགས་ཏེ་བསད་གྱུར་ཏམ། །བདག་གི་མགོ་བོ་བཅད་ཀྱང་བླའི། །རྣམ་པ་ཀུན་ཏུ་ཉོན་མོངས་པའི། །དགྲ་ལ་འདུད་པར་མི་བྱའོ། །ཞེས་བྱ་བ་སྨོས་ཏེ། ཉོན་མོངས་པའི་དགྲ་རྣམས་ལའོ། །ཉོན་མོངས་པ་དག་ལ་ཁྲོ་བར་གྱུར་པ་ན། ཉོན་མོངས་པ་འདི་ནི་དེ་འདྲ་བའི་དགྲ་མ་ཡིན་ནོ་ཞེས་བསྟན་པའི་ཕྱིར། ཐ་མལ་དགྲ་བོ་ཡུལ་ནས་ཕྱུང་ཡང་ནི། །ཡུལ་གཞན་དག་ཏུ་གནས་ཤིང་ཡོངས་བཟུང་ནས། །གནས་གང་ནས་ནུས་པ་བརྟས་ནས་དེ་ནས་ཕྱིར་ལྡོག་གི །ཉོན་མོངས་དགྲ་ཚུལ་དེ་དང་འདྲ་བ་མ་ཡིན། ཞེས་སྨོས་སོ། །སེམས་ནི་འདི་ལྟར། བདག་ཡིད་ལས་བསལ་གང་དུ་འགྲོ་བར་འགྱུར། །གང་དུ་གནས་ནས་བདག་གནོད་བྱ་ཕྱིར་འོང༌། །བློ་ཞན་བདག་ལ་བརྩོན་པ་མེད་པར་ཟད། །ཉོན་མོངས་ཉོན་མོངས་ཤེས་རབ་མིག་གིས་སྤང༌། །ཤེས་རབ་ཉིད་མིག་ཡིན་ཏེ། དེས་སྤང་བར་བྱ་བ་ཡིན་པས་ན། ཤེས་རབ་ཀྱི་མིག་ཉིད་མིག་ཡིན་ཏེ། ཉོན་མོངས་པ་ཞེས་བྱ་བའི་དོན་ཏོ། །དེ་ལྟར་ཤེས་རབ་ཀྱིས་བལྟས་ནས་སྤང་བར་བྱ་ཞེ་ན། ཉོན་མོངས་རྣམས་ནི་ཞེས་བྱ་བ་ལ་སོགས་པ་སྨོས་ཏེ།
ཉོན་མོངས་པ་རྣམས་ནི་ཡུལ་ན་མི་གནས་ཏེ། ཀུན་ཏུ་རྟོག་པ་ལས་སྐྱེས་པ་ཉིད་ཀྱི་ཕྱིར་དང༌། ཀུན་ཏུ་རྟོག་པ་ལ་ཡང་ཡུལ་མེད་པ་ཉིད་ཀྱི་ཕྱིར་དང་ཉོན་མོངས་པ་རྣམས་ནི་གཟུགས་ཅན་མ་ཡིན་པ་ཉིད་ཀྱི་ཕྱིར་དང༌། རྟེན་དང་བརྟེན་པ་ཉིད་མི་རུང་བའི་ཕྱིར་རོ། །དེ་ཉིད་ཀྱི་དབང་ཚོགས་ལ་མིན་ཏེ། མིག་ལ་སོགས་པ་མ་ཡིན་ནོ། །བར་ན་ཡང་མིན་ཏེ། བར་ན་གནས་པ་ཡང་མ་ཡིན་ནོ། །དེ་ལས་གཞན་ན་མིན་ན། འདི་དག་གལ་ཏེ་གང་དུ་གནས་ཤིང་འགྲོ་བ་ཀུན་གནོད་བྱེད། དེ་ཡོད་པ་ཉིད་ནི་སྐད་ཅིག་ཉིད་ཡིན་པའི་ཕྱིར་རོ། །སྐད་ཅིག་གཅིག་པར་བདག་ཉིད་ཐམས་ཅད་འཇིག་པ་མེད་པ་ཡིན་ལ། མེད་པ་སྐྱེ་བར་བྱེད་པའི་རྒྱུ་ཉིད་མ་ཡིན་ནོ་ཞེས་བྱ་བར་དགོངས་སོ། །དེ་ཉིད་ཀྱི་ཕྱིར་འདི་ནི་སྒྱུ་འདྲ་ཞེས་བྱ་བ་སྨོས་སོ། །འདི་ཐམས་ཅད་ནི་བརྫུན་པ་ཡིན་པ་དེའི་ཕྱིར། ཉོན་མོངས་པ་ལས། སྙིང་ལ་འཇིགས་པ་སྤོངས་ཤེས་ཕྱིར། ཀུན་རྫོབ་ཏུ་ཡང་བརྩོན་པ་བསྟེན་ཞེས་བྱ་བ་ནི། བསླབ་པ་ལས་མི་འདའ་བར་བརྩོན་པའོ། །ཤེས་ཕྱིར་ནི་ཤེས་རབ་ཕུལ་དུ་བྱུང་བའི་དོན་དུའོ། །དོན་མེད་ཉིད་དུ་ཞེས་བྱ་བ་ནི་སྐབས་མེད་པ་ཉིད་དུ་སྟེ། བདག་ལ་ནི་དམྱལ་བ་ནི་མི་ཆུང་བ་རྣམས་སུ་ཅི་སྟེ་གནོད་པ་བྱེད། ཐབས་དང་ཤེས་རབ་དང་སྙིང་རྗེ་ཆེན་པོ་དང་ལྡན་པའི་བྱང་ཆུབ་སེམས་དཔའ་ནི་པདྨའི་ནགས་ཀྱི་ངང་པ་བཞིན་དུ་མནར་མེད་པར་སྐྱེ་བ་ཞེས་པ་ལྟ་བུའོ། །དེ་ལྟར་རྣམ་བསམས་ཞེས་བྱ་བ་ལ་སོགས་པས་མཇུག་བསྡུ་བའི་ཕྱིར་སྨྲས་པ། དེ་ལྟར་ནི་བབ་ཅོལ་བརྩམ་པ་གང་ཡིན་པའམ་ཞེས་བྱ་བ་ལ་སོགས་པའི་ཚུལ་གྱིས་རྣམ་པར་བསམས་པ་ལ། ཅི་སྐད་བཤད་པའི་བསླབ་པ་བསྒྲུབ་པའི་ཆེད་དུ་འབད་པར་བྱ་སྟེ། ཇི་ལྟར་སངས་རྒྱས་བཅོམ་ལྡན་འདས་ཀྱིས་གསུངས་པའི་བསླབ་པ་དེ་ལ་བསྒྲུབ་པ་དེའི་དོན་དུ་ཇི་སྐད་བཤད་པའི་བསླབ་པ་ནི་བསླབ་པ་བསྒྲུབ་པའི་ཆེད་དུ་བག་ཡོད་པས་འབད་པར་བྱའོ། །འཇིག་རྟེན་ན་ཡང་སྨན་པའི་ཚིག་མ་མཉན་ན་སྨན་དག་གིས། །བཅོས་དགོས་ནད་པ་སོས་པ་ག་ལ་ཡོད། །ནད་མེད་པ་ཉིད་ཅེས་པའོ། །བྱང་ཆུབ་སེམས་དཔའི་སྤྱོད་པ་ལ་འཇུག་པའི་ལེགས་པར་སྦྱར་བ་ལས། བྱང་ཆུབ་ཀྱི་སེམས་ལ་བག་ཡོད་པ་བསྟན་པ་སྟེ་ལེའུ་བཞི་པའོ།། །།འབད་པས་ཅི་ཞིག་བྱ་ཞེ་ན། བསླབ་པ་
བསྲུང་བར་འདོད་པ་ཡིས། །རབ་ཏུ་བསྒྲིམས་ནས་སེམས་བསྲུང་སྟེ། ཞེས་བྱ་བ་སྨོས་ཏེ། དྲན་པ་དང་ཤེས་བཞིན་དག་གིས་རབ་ཏུ་བསྒྲིམས་ནས་བསྲུང་བར་བྱའི་དེ་ལྟ་མ་ཡིན་ན། སེམས་འདི་བསྲུང་བར་མ་བྱས་ན། །བསླབ་པ་བསྲུང་བར་ཡོང་མི་ནུས། །འདི་ལྟར་སེམས་ཀྱི་གླང་པོ་ཡན་བཏང་བས། །མནར་མེད་གནོད་པ་བྱེད་པ་ལྟར། །དམྱལ་བ་དེའི་རྒྱུས་ངན་སོང་དུ་འཇུག་པར་བྱེད་པ་ལྟར། །གླང་ཆེན་མ་དུལ་མྱོས་པ་ཡིས། །གླང་པོ་ཆེ་མྱོས་པ་འདུལ་སྦྱོང་མ་བྱས་པ་བཏང་བས་ཀྱང་སྐྱེ་བ་འདི་ལ་མི་རྣམས་ལ། དེ་འདྲའི་གནོད་པ་མི་བྱེད་དོ། །ཀུན་ནས་དྲན་པའི་ཐག་པ་ཡིས། །སེམས་ཀྱི་གླང་ཆེན་དམ་བཏགས་ན། །འཇིགས་པ་ཐམས་ཅད་མེད་འགྱུར་ཞིང༌། །དགེ་བ་ཐམས་ཅད་ལག་ཏུ་འོང༌། །གང་གི་ཕྱིར། སྟག་དང་སེང་གེ་གླང་ཆེན་དྲེད། །སྦྲུལ་དང་དགྲ་རྣམས་ཐམས་ཅད་དང༌། །དམྱལ་བའི་སྲུང་མ་ཐམས་ཅད་དང༌། །བྱེད་མ་དེ་བཞིན་སྲིན་པོ་རྣམས། །དྲན་པས་སེམས་འདི་གཅིག་པུ་བཏགས་པ་ཡིས། །དེ་དག་ཐམས་ཅད་བཏགས་པར་འགྱུར། །སེམས་ནི་གཅིག་པུ་འདུལ་བ་ཡིས། །ཤེས་བཞིན་གྱིས་དེ་དག་ཐམས་ཅད་ཐུལ་བར་འགྱུར། དེ་ཡང་ཅིའི་ཕྱིར་ཞེ་ན། འདི་ལྟར་འཇིགས་པ་ཐམས་ཅད་དང༌། །སྡུག་བསྔལ་དཔག་ཏུ་མེད་པ་ཡང༌། །སེམས་ལས་བྱུང་བ་ཡིན་ནོ་ཞེས། །ཡང་དག་གསུང་པ་ཉིད་ཀྱིས་བསྟན། །སངས་རྒྱས་བཅོམ་ལྡན་འདས་ཀྱིས་འཕགས་པ་དཀོན་མཆོག་སྤྲིན་ལས། རིགས་ཀྱི་བུ་ཆོས་ཐམས་ཅད་ནི་སེམས་སྔོན་དུ་སོང་བ་ཙམ་དུ་ཡིན་ནོ་ཞེས་བྱ་བ་ནས། འོན་ཀྱང་སེམས་ཉིད་དབང་དུ་གྱུར་ན་ཆོས་ཐམས་ཅད་དབང་དུ་འགྱུར་རོ་ཞེས་བྱ་བའི་བར་དང༌། ཆོས་སྡུད་པའི་མདོ་ལས་ཀྱང༌། ཆོས་ཐམས་ཅད་ནི་སེམས་ལ་རག་ལས་པ་ཡིན་ནོ་ཞེས་བྱ་བ་དང༌། དེ་བཞིན་དུ་འཕགས་པ་སྡོང་པོ་བཀོད་པ་ལས་ཀྱང༌། བྱང་ཆུབ་སེམས་དཔའི་སྤྱོད་པ་ཐམས་ཅད་ནི་རང་གི་སེམས་ཀྱིས་བྱིན་གྱིས་བརླབས་པ་ཡིན་ནོ་ཞེས་བྱ་བ་དང༌། འཇིག་རྟེན་སྣ་ཚོགས་ནི་ལས་ལས་སྐྱེས་པ་ཡིན་ཞིང༌། ལས་ཀྱང་དངོས་སུ་སེམས་པ་ཡིན་ནོ་ཞེས་གསུངས་སོ། །ས་བཅུ་པ་ལས་ཀྱང་ཁམས་གསུམ་པོ་ནི་སེམས་ཞེས་འབྱུང་ངོ༌། །འདི་དེ་དེ་ལྟ་བུའི་རྣམ་པ་ཅན་ཡིན་གྱི། གཞན་དུ་ནི་སྤུ་གྲིའི་ནགས་ལ་སོགས་པ།
སེམས་ཅན་དམྱལ་བའི་མཚོན་ཆ་རྣམས། །སུ་ཞིག་གིས་ནི་ཆེད་དུ་བྱས། །དབང་ཕྱུག་ལ་སོགས་པ་ནི་འགོག་པར་འགྱུར་བ་ཉིད་ཀྱི་ཕྱིར་རོ། །དེ་བཞིན་དུ་ལྕགས་བསྲེགས་ས་གཞི་སྟེ། ལྕགས་ཀྱི་ས་གཞི་བསྲེགས་པར་གྱུར་པ་འབད་རྩོལ་དག་གིས་སུ་ཡིས་བྱས། །རབ་ཏུ་ཚ་ཞིང་ཆུ་ལན་ཚྭ་ཅན་གྱི་ཆུ་བོ་རབ་མེད་ན་བུད་མེད་ལྕགས་ཀྱི་ལུས་ཅན་གྱིས་གཞན་གྱི་ཆུང་མ་ལ་འཇུག་པ་ལ་འཁྱུད་ཅིང་བསྣུན་ཅིང་ཟ་བར་བྱེད་པ་འམ། སེན་མོས་གཏུབས་པར་བྱེད་པ་གང་ཡིན་པ་འམ། ཡང་འཚོ་བ་ལ་འཕོ་བར་བྱེད་བྱེད་ཀྱི། འོན་ཀྱང་སྡུག་བསྔལ་དྲག་པོ་མྱོང་བར་བྱེད་པའི་མེ་ཚོགས་དེ་དག་ཅི་ལས་སྐྱེས། བུད་མེད་དེ་དག་ཅི་ལས་སྐྱེས། །དེ་འདྲ་དེ་དག་ཐམས་ཅད་ཀྱང༌། །སྡིག་སེམས་ཡིན་པར་ཐུབ་པས་གསུངས། །ཞེས་པ་ཐུབ་པ་སངས་རྒྱས་བཅོམ་ལྡན་འདས་ཀྱིས་གསུངས་པ་ཡིན་ནོ། །དེའི་ཕྱིར་འཇིག་རྟེན་གསུམ་པོ་ན། སེམས་ལས་འཇིགས་པ་གཞན་གང་མེད། །སེམས་ཉིད་འཇིགས་པ་དང་འཇིགས་པར་བྱེད་པ་ཡིན་ནོ། །དེ་བཅིངས་ན་འཇིགས་པ་ཐམས་ཅད་མེད་པར་འགྱུར་རོ། །ཇི་ལྟར་ཐམས་ཅད་དགེ་བར་འགྱུར་ཞེ་ན། གལ་ཏེ་འགྲོ་བ་དབུལ་བོར་ནས། །ཞེས་བྱ་བ་ལ་སོགས་པ་སྨོས་ཏེ། ཕ་རོལ་ཏུ་ཕྱིན་པས་ན་ཕ་རོལ་ཏུ་ཕྱིན་པ་སྟེ། དེའི་དངོས་པོ་ནི་ཕ་རོལ་ཏུ་ཕྱིན་པ་ཉིད་དོ། །དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་ཀྱི་བར་དུའོ། །དེ་ལ་གལ་ཏེ་འགྲོ་བ་དབུལ་བོར་ནས། །སྦྱིན་པའི་ཕ་རོལ་ཕྱིན་ཡིན་ནའོ། །འོ་ན་དེ་ལྟ་ན་ནི་ད་རུང་འགྲོ་བཀྲེན་ཡོད་ན་སྔོན། །སྐྱོབ་པ་ཇི་ལྟར་ཕ་རོལ་ཕྱིན། །འོ་ན་དེ་ཅིའི་ཕྱིར་ཞེ་ན། བདོག་པ་ཞེས་བྱ་བ་ལ་སོགས་པ་སྨོས་ཏེ། བདོག་པ་ཐམས་ཅད་འབྲས་བཅས་ཏེ། །དུས་གསུམ་གྱི་ཆོས་དང༌། མི་འཇིགས་པ་དང༌། ཟང་ཟིང་གི་སྦྱིན་པ་ཐམས་ཅད་ཀྱིས་སེམས་ནི་གཏོང་བ་ཐམས་ཅད་ཀྱི་སེམས་ཡིན་ནོ། །དེའི་ཕྱིར་སྐྱེ་བོ་ཀུན་ལ་གཏང་སེམས་ཀྱིས། །འབྲས་བུ་དང་བཅས་པར་འཇུག་པའི་ཕྱིར། འཕགས་པ་བློ་གྲོས་མི་ཟད་པ་ལས། སྦྱིན་པའི་ཕ་རོལ་ཕྱིན་གསུངས་ཏེ། །དེ་ཕྱིར་དེ་ནི་སེམས་ཉིད་དོ། །ཆོས་སེམས་པའི་ཀ་བ་ཆེན་པོ་ལ་དྲན་པའི་ཐག་པས་ཀུན་ནས་བཏགས་ན་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་སོགས་པ་ཡང་དགེ་བའི་སེམས་
ཉིད་ཡིན་པའི་ཕྱིར། ཉ་པ་ལ་སོགས་པ་ཞེས་བྱ་བ་སྨོས་ཏེ། ཉ་ནི་སྲོག་ཆགས་ཉེ་བར་མཚོན་པའོ། །སོགས་པའི་སྒྲས་ནི་གཞན་གྱི་བུད་མེད་དང་ནོར་ལ་སོགས་པ་གཟུང་ངོ༌། །ཐག་ཉེ་བ་ན་ཡོད་ན་ཡང་གང་ཞིག་ཏུ། །དེ་དག་གསོད་མི་འགྱུར་བར་བསྐྲད། །དེ་དག་ཉ་པ་ལ་སོགས་པའི་སྲོག་ཆགས་སོ། །ཐམས་ཅད་ཀྱང་ལས་ཀྱི་དབང་གིས་ཡུལ་ལ་སོགས་པ་ངེས་པ་ཡིན་གྱི། འགའ་ཞིག་ཏུ་ཡང་བསྐྲད་པར་ནུས་པ་མ་ཡིན་ནོ། །གསོད་པ་ཞེས་བྱ་བ་ནི་འཕྲོག་པ་དང༌། ལེན་པ་ཞེས་བྱ་བ་ལ་སོགས་པ་ནི་ཉེ་བར་མཚོན་པ་ཡིན་ནོ། །གཞན་ལས་ཡང་དག་པར་བླངས་པའི་ཕྱིར། འཚེ་བ་ལ་སོགས་པ་ཐམས་ཅད་ལས་སྤོང་བའི་སེམས་ནི་ཐོབ་པ་ལས་ཞེས་བྱ་བ་ནི་ཉེ་བར་མཚོན་པ་ཡིན་ཏེ། དགེ་བ་ཆོས་སྡུད་པ་དང༌། སེམས་ཅན་གྱི་དོན་བྱེད་པ་ལ་འཇུག་པའི་སེམས་ཀྱི་དྲན་པས་བཅིངས་ན། ཚུལ་ཁྲིམས་ཕ་རོལ་ཕྱིན་པར་བཤད། །སྦྱིན་པ་སྔོན་དུ་སོང་བ་ཅན་ནི། ཚུལ་ཁྲིམས་ཡང་དག་པར་ལེན་པ་ཡིན་ལ། དེ་ནས་བཟོད་པ་ཡིན་པ་དེ་ལྟར་ན། བཟོད་པའི་ཕ་རོལ་ཏུ་ཕྱིན་པ་ཉིད་ནི། སེམས་ཅན་མི་སྲུན་ནམ་མཁའ་བཞིན། །དེ་དག་གཞོམ་གྱིས་ཡང་མི་ལང༌། །ཞེས་བྱ་བ་ལ་སོགས་པ་སྨོས་ཏེ། དྲན་པ་དང་ཤེས་བཞིན་དག་གི་ཞགས་པ་དང་རལ་གྲི་དག་གིས་ཁྲོ་བའི་སེམས་དགྲ་བོ་དྲངས་ཏེ་བསྣུན་ཅིང་བཅོམ་ན། དགྲ་བོ་ཐམས་ཅད་ཆོམས་དང་འདྲ། །ཀུན་ཏུ་རྟོག་པ་ལས་སྐྱེས་པའི་དགྲ་བོ་ཞེ་སྡང་དེ་མེད་པའི་ཕྱིར་མེད་པར་འགྱུར་རོ། །འདིར་དཔེ་ནི། ས་སྟེངས་འདི་དག་ཀོས་གཡོགས་སུ། །དེ་སྙེད་ཀོ་བས་ག་ལ་ལང༌། །ལྷམ་མཐིལ་ཙམ་གྱི་ཀོ་བས་ནི། །ས་སྟེངས་སྟེ་ས་གཞི་ཐམས་ཅད་གཡོགས་དང་འདྲ། །ཞེས་བྱ་བ་སྨོས་སོ། །གཞན་གྱི་དོན་ལ་བཟོད་པའི་བཟོད་པ་བཤད་ནས། མི་སྐྱེ་བའི་ཆོས་ལ་བཟོད་པ་བསྟན་པའི་ཕྱིར། དེ་བཞིན་ཞེས་བྱ་བ་ནི་ནམ་མཁའ་བཞིན་དུའོ། །ཕྱི་རོལ་དངོས་པོའི་གཟུགས་ལ་སོགས་པའོ། །གང་གི་ཕྱིར་ས་ཐམས་ཅད་བཅིངས་ནས་བདག་གིས་ཕྱིར་བཟློག་མི་ལོང་བ་དེའི་ཕྱིར་ཆོས་ལ་སྤྱོད་པའི་བཟོད་པས་དེ་བཞིན་ཏེ། ལྷམ་མཐིལ་ཙམ་གྱི་ཀོ་བ་བཞིན་དུ། བདག་གི་སེམས་འདི་ཕྱིར་བཟློག་བྱའི། །གཞན་རྣམས་བཟློག་པ་ཅི་ཞིག་དགོས། བཅོམ་
ལྡན་འདས་ཀྱིས་སྡོང་དུམ་ཚིག་པ་ལ་ཡང་ལས་ཀྱི་བགོ་སྐལ་ལ་དམིགས་ནས་སེམས་སྡང་བར་མི་བྱའོ་ཞེས་བྱ་བ་དང༌། དེ་བཞིན་དུ་ནད་ཀྱི་དགོན་པའི་ནང་དུ་ཞུགས་པས་སྟོང་པ་ཉིད་ལ་སོ་སོར་དཔྱད་པས་སྐྲག་པར་མི་བྱའོ་ཞེས་གསུངས་སོ། །བཟོད་པ་དང་ལྡན་པས་བརྩོན་འགྲུས་བསྐྱེད་པར་བྱ་བ་དེ་ལྟ་བས་ན། བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཉིད་ནི་སེམས་གསལ་དེ་ནི་བརྩོན་འགྲུས་དྲག་པོའི་གཅིག །ཅེས་བྱ་བ་ནི་ལུས་དང་ངག་མེད་ན་ཡང༌། གང་ཚངས་པ་ཡིན་པ་ལྟར། ལུས་ངག་བཅས་པའི་འབྲས་བུ་ཡང༌། །ལུས་དང་ངག་གི་སྤྱོད་པ་ཞན་པས་དེ་ལྟར་མིན་ནོ། །བརྩོན་འགྲུས་ཀྱང་བསམ་གཏན་གྱི་ཕྱིར་ཡིན་པ་དེ་ལྟར་ན། བསམ་གཏན་གྱི་ཕ་རོལ་ཏུ་ཕྱིན་པ་ཉིད་བསྟན་པ་ནི་བཟླས་བརྗོད་ནི་ནང་དུ་མི་སྨྲ་བར་བཟླ་བའོ། །དཀའ་ཐུབ་ཀུན་ཏེ། བཟླས་པ་ལས་གཞན་དང་གཞན་པའི་བསོད་ནམས། ཡུན་རིང་དུས་སུ་སྤྱད་བྱས་ཀྱང༌། །སེམས་གཞན་སེམས་གཡེངས་པས་བྱས་པ་ནི། དྲན་པ་དང་བསམ་གཏན་མེད་པའི་ཕྱིར་དང༌། དམན་པ་ཤེས་བཞིན་མེད་པའི་ཕྱིར། དོན་མེད་ཅེས་བསྒོམས་པ་འབྲས་བུ་ཅན་ཡིན་ཞེས་སངས་རྒྱས་བཅོམ་ལྡན་འདས་ཐམས་ཅད་མཁྱེན་པ་སྟེ་དེ་ཉིད་རིག་པས་གསུངས་པ་ཡིན་ནོ། །བསམ་གཏན་ནི་འདིར་སེམས་འདོད་པ་སྤྱོད་པ་ཡིན་ཡང་ཉོན་མོངས་པ་ཅན་མ་ཡིན་ཞིང་རྩེ་གཅིག་པ་ཡིན་ནོ། །དེ་ནས་ཁོ་ན་ཉིད་ཀྱི་བློ་ཡིན་པ་དེ་ལྟར་ན། ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་ནི་གང་གིས་ཆོས་ཀྱི་ཞེས་བྱ་བ་ལ་སོགས་པ་སྨོས་ཏེ། ཤེས་རབ་ཀྱི་ཉོན་མོངས་པ་སྤངས་པ་ན་ཡང་སྐྱེ་བ་ལ་སོགས་པའི་སྡུག་བསྔལ་མེད་པ་དེ་ཉིད་ཀྱི་ཕྱིར་མྱ་ངན་ལས་འདས་པ་ནི་མཆོག་ཏུ་བདེ་བ་ཐོབ་པའོ། །དེ་དག་དོན་མེད་ཀྱི་ན་འཁྱམ། །ཆོས་ཐམས་ཅད་ངོ་པོ་ཉིད་ཀྱིས་མྱ་ངན་ལས་འདས་པ་ཉིད་ཡིན་པའི་ཕྱིར་རོ། །དེ་སྐད་དུ་ཡང་དེ་བཞིན་གཤེགས་པ་རྟག་ཏུ་སྐྱེ་མེད་ཆོས། །ཆོས་རྣམས་ཀུན་ཀྱང་བདེ་བར་གཤེགས་དང་འདྲ། །བྱིས་པའི་བློ་ཅན་མཚན་མར་འཛིན་པ་ཡིས། །འཇིག་རྟེན་དག་ན་མེད་པའི་ཆོས་ལ་སྤྱོད། །ཅེས་བྱ་བ་དང༌། གང་འདི་ཆོས་རྣམས་ཐམས་ཅད་སྒྱུ་མ་ལྟ་བུར་ཤེས། སྒྱུ་མ་འང་
གཞན་མིན་ཆོས་རྣམས་དག་ཀྱང་གཞན་མ་ཡིན། །ཡོད་མེད་མིང་དང་བྲལ་བ་ཉེ་བར་ཞི་སྤྱོད་པ། །དེ་འདི་ཤེས་རབ་ཕ་རོལ་ཕྱིན་མཆོག་ལ་སྤྱོད་ཡིན། །ཞེས་གསུངས་སོ། །གང་གི་དེ་དེ་ལྟར་ཟབ་ཅིང་རྒྱ་ཆེ་བའི་བདག་ཉིད་ཅན་རྣམ་པ་བཅུ་འམ། ཕ་རོལ་ཏུ་ཕྱིན་པ་དྲུག་གི་བདག་ཉིད་ཅན་གྱི་བྱང་ཆུབ་ཀྱི་སེམས་ཡིན་ནོ། །རང་གི་མཚན་ཉིད་དེ་འཛིན་པའི་ཕྱིར་དང༌། ཆོས་མ་ཡིན་པའི་འགོག་པ་འཛིན་པའི་ཕྱིར་དེ་ཙམ་ཉིད་ནི་ཆོས་ཡིན་ནོ། །ཆོས་ཀྱི་དོན་པོ་མཆོག་སེམས་ཀྱི་གསང་འདི་སྐྱེ་བོ་སྣོད་མ་ཡིན་པ་ལ་བསྟན་པར་བྱ་བ་མ་ཡིན་པ་དེ་དང་དེ་མ་ཤེས་ཤིང་གོམས་པར་མ་བྱས་པའོ། །ཆོ་ག་འདིས་གྲོལ་བར་མི་འགྱུར་རོ་ཞེས་ཟེར་བ་དེ་དག་དོན་མེད་ཀྱི་ན་འཁྱམ་མོ། །ཐབས་ཀྱི་ཕ་རོལ་ཏུ་ཕྱིན་པའི་ཆོས་ཀྱང་ཡོད་པ་མ་ཡིན་ནམ་ཞེ་ན། བདེན་ཏེ། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་ཀྱི་རབ་ཏུ་དབྱེ་བ་ཉིད་ཡིན་ནོ། །ཐབས་ནི་སྙིང་རྗེ་ཆེན་པོ་དང་དད་པས་བསྡུས་པའི་དེ་ཁོ་ན་ཉིད་ཀྱི་བློའོ། །རང་གི་དོན་དང་གཞན་གྱི་དོན་དུ་གཉེར་བའི་སྨོན་ལམ་ཡང་དེ་ཉིད་ཡིན་ནོ། །སྟོབས་ནི་མི་མཐུན་པའི་ཕྱོགས་རྩ་ནས་འདོན་པ་གནས་དང་གནས་མ་ཡིན་པ་ལ་སོགས་པ་ལ་ཐོགས་པ་མེད་དོ། །ཡེ་ཤེས་ནི་ངེས་པར་བདག་ཉིད་ཅན་ཡིན་ནོ། །དེ་ལྟར་ན་སྦྱིན་པ་ལ་སོགས་པའི་ཀ་བ་ལ་དྲན་པའི་ཐག་པས་སེམས་ཀྱི་གླང་པོ་དམ་དུ་བཅིངས་ན་ཐམས་ཅད་དགེ་བར་འགྱུར་རོ། །དེ་ཕྱིར་བདག་གི་སེམས་དེ་ནི། །དྲན་པས་ལེགས་པར་གཟུང་ཤེས་བཞིན་གྱིས་ལེགས་པར་བསྲུང་བར་བྱའོ། །བདག་གི་སེམས་བསྲུང་བརྟུལ་ཞུགས་མ་གཏོགས་པར། །བརྟུལ་ཞུགས་མང་པོས་ཅི་ཞིག་བྱ། །སྐྱེ་བོ་ངན་པའི་ནང་ན་གནས་པས། ཇི་ལྟར་སེམས་བསྲུང་བར་བྱ་ཞེ་ན། དཔེར་ན་གྲོལ་བའི་ཁྲོད་གནས་ན། །བསྒྲིམས་ཏེ་རྨ་ཡི་བག་བྱེད་བཞིན། །སྐྱེ་བོ་ངན་ཁྲོད་གནས་པས་ཀྱང༌། །སེམས་ཀྱི་རྨ་ནི་རྟག་ཏུ་བསྲུང༌། །སྡུག་བསྔལ་གྱི་འཇིགས་པ་བསྲུང་བ་ཡིན་གྱི། ཤིག་ལ་སོགས་པ་གསོད་པ་ལ་སོགས་པ་ལས་སེམས་བསྲུང་བ་མི་བྱེད་དེ། རང་ལ་སྡུག་བསྔལ་མེད་པའི་ཕྱིར་ཞེ་ན། རྨའི་སྡུག་བསྔལ་ཆུང་ངུ་ཡིས། །སྐྲག་པའང་བདག་རྨའི་བསྒྲིམས་ཏེ་བག་བྱེད་ན། རི་བོ་
བསྡུས་འཇོམས་བཅོམ་སྐྲག་པས། །བསྡུས་འཇོམས་ཞེས་བྱ་བའི་དམྱལ་བ་ན། ལུག་ལྟ་བུའི་རི་བོ་དག་ཕྱོགས་གཉིས་ནས་འོངས་པས་ཤིག་ལ་སོགས་པ་སེན་མོས་བཅར་བ་ལྟར་དེ་དག་འཇོམས་པས་སྐྲག་པ་དག །སེམས་ཀྱི་རྨ་ལྟ་ཅིས་མི་བསྲུང་བ་ཞེས་བྱ་བ་ནི་ཅིས་མི་བསྲུང་སྟེ། འོན་ཀྱང་བསྲུང་བ་ཉིད་ཡིན་ནོ་ཞེས་སྦྱར་རོ། །ཅིའི་ཕྱིར་ཞེ་ན། སྤྱོད་པ་འདི་འདྲས་ཞེས་བྱ་བ་ལ་སོགས་པ་སྨོས་ཏེ། སྤྱོད་པ་འདི་འདྲས་གནས་བྱེད་ན། །སེམས་བསྲུང་པའི་བདག་ཉིད་ཀྱིས། སྐྱེ་བོ་ངན་པའི་ཁྲོད་གནས་སམ། །བུད་མེད་ཁྲོད་གནས་ཀྱང་རུང་བ། །བུད་མེད་ཀྱི་ནང་ན་འདུག་ན་ཡང༌། སྡོམ་བརྩོན་བརྟན་པ་སྟེ། བག་ཡོད་པས་ཉམས་པར་མི་འགྱུར་རོ། །དེ་ལྟར་ནི་འགྱུར་མོད་ཀྱི། གནས་པ་འདིས་གནས་པ་ན། བདག་ལ་བསྟོད་པ་ལ་སོགས་པ་མེད་པའི་ཕྱིར། འགའ་ཞིག་གི་ཚེ་ཡང་རྙེད་པ་ལ་སོགས་པ་མེད་པར་འགྱུར་རོ་ཞེ་ན། བདག་གི་རྙེད་དང་བཀུར་སྟི་དང༌། །ལུས་དང་འཚོ་བ་མེད་བླ་ཞིང༌། །མེད་དུ་ཟིན་ཀྱང་ངོ༌། །གང་བདག་གི་དོན་ཉིད་ཀྱིས། དགེ་བ་གཞན་ཡང་ཉམས་བླ་ཡི། །སེམས་ནི་ནམ་ཀྱང་ཉམས་མི་བྱ། །བྱང་ཆུབ་ཀྱི་སེམས་རྣམས་རྣམ་པ་བཅུ་འགའ་ཞིག་གི་ཚེ་ཡང་ཉམས་པར་མི་འགྱུར་ཏེ། བྱང་ཆུབ་ཀྱི་སེམས་ནམ་ཡང་ཞིག་པར་མ་གྱུར་ཅིག་ཅེས་བྱ་བའི་ཐ་ཚིག་གོ །ཇི་ལྟ་ཞེ་ན། སེམས་བསྲུང་འདོད་པ་རྣམས་ལ་ནི། །བདག་གིས་ཐལ་མོ་སྦྱར་བྱས་ནས། །དྲན་པ་དང་ནི་ཤེས་བཞིན་དག །སྲོག་ལ་བབ་ཀྱང་སྲུངས་ཤིག་ཅེས། །བདག་ནི་དེ་སྐད་འདོམ་པར་བྱེད། །དྲན་པ་ནི་དམིགས་པ་མ་བརྗེད་པའོ། །ཤེས་བཞིན་ནི་ཡང་དག་པར་རབ་ཏུ་ཤེས་པའི་སྒྲའི་ཚིག་བྱ་བ་དང་ཕྱི་བ་དང་བཅས་པ་ཡིན་ནོ། །ཤེས་བཞིན་ནི་ཤེས་རབ་སྟེ། གང་གིས་ལུས་དང་ངག་དང་ཡིད་ཀྱི་ལས་ཐམས་ཅད་ཡང་དག་པར་བརྟགས་ཤིང༌། བདག་དང་གཞན་ལ་ཕན་པ་ཤེས་ནས་རྟག་ཏུ་བྱེད་པ་དང༌། འབད་རྩོལ་ཐམས་ཅད་ཀྱིས་བག་ཡོད་པ་ཕུལ་དུ་བྱུང་བས་སྲུངས་ཤིག་ཅེས་སོ། །ཀྱེ་སེམས་བསྲུང་བར་ནི་འདོད་རྣམས་ལ། །ཞེས་རྣམ་པར་བསྒྱུར་ནས་སྦྱར་བར་བྱའོ། །ཅིའི་ཕྱིར་འདི་བསྲུང་ཞེ་ན། འདི་ལྟར་
ནད་ཀྱིས་དཀྲུགས་པའི་མི་དག་ནི། །ལས་རྣམས་ཀུན་ལ་མཐུ་མེད་པ། །དེ་བཞིན་དུ་སྐྱེས་བུ་ཤེས་བཞིན་མེད་པའི་སེམས་ལྡན་པའི། །ཐོས་དང་བསམ་དང་བསྒོམ་པ་ཡང༌། །གློ་རྡོལ་བུམ་པའི་ཆུ་བཞིན་དུ། །དྲན་པ་ལ་ནི་དེ་མི་གནས། །ཤེས་བཞིན་མེད་པར་ཐོས་པ་ལ་སོགས་པ་ཤིན་ཏུ་གསལ་བར་ཉམས་སུ་མྱོང་བ་མེད་པའི་ཕྱིར་རོ། །ཐོས་པ་ལ་སོགས་པ་དང་ལྡན་པའི་དོན་ཤེས་བཞིན་མ་ཡིན་ནམ་ཞེ་ན། སྨྲས་པ། རང་བཞིན་གྱི་ཐོས་ལྡན་དད་པ་ཅན་དང་ནི། །བརྩོན་པ་ལྷུར་ལེན་དུ་མ་ཡང༌། །རྣམ་པ་འགའ་ཞིག་གིས་རྣམ་པ་འགའ་ཞིག་གི་ཚེ། ཤེས་བཞིན་མེད་པའི་སྐྱོན་ཆགས་པས། །ཤེས་བཞིན་མེད་པའི་ཉེས་པས། ལྟུང་བའི་རྙོག་དང་བཅས་པར་འགྱུར། །ཐོས་པ་ལ་སོགས་པ་ལས་བྱུང་བའི་ཤེས་རབ་ཀྱིས་ཉེས་པ་མ་སྤངས་པ་དེ་དག་གི་ཡང་མི་མཐུན་པའི་ཕྱོགས་ཀྱིས་བཅོམ་པ་ཡིན་པ་དེས་ན་དེ་དག་ནི་ཤེས་བཞིན་མེད་པའི་ཆོམ་རྐུན་དག །དྲན་པ་ཉམས་པའི་རྗེས་འབྲངས་པས། །བསོད་ནམས་དག་ནི་ཉེར་བསགས་ཀྱང༌། །རྐུན་པོས་ཕྲོགས་བཞིན་ངན་འགྲོར་འགྲོ། །དྲན་པ་ཉམས་པ་སྟེ། ཞིག་པའི་རྗེས་སུ་འབྲངས་པའི་ངང་ཚུལ་ཡོད་པ་ནི་དྲན་པ་ཉམས་པའི་རྗེས་སུ་འབྲངས་པ་ཅན་ཏེ། ཤེས་བཞིན་མེད་པའི་ཆོམ་རྐུན་དེ་དག་གིས་བསོད་ནམས་ཉེ་བར་བསགས་སུ་ཟིན་ཀྱང༌། ཕྲོགས་ནས་ངན་འགྲོར་འགྲོ་བར་འགྱུར་རོ། །འདི་ལྟར་ཉོན་མོངས་ཆོམ་རྐུན་ཚོགས་འདི་ནི། །གླགས་སྐབས་ཚོལ་བར་བྱེད་པ་སྟེ། །གླགས་ཏེ། སྐབས་རྙེད་གྱུར་ནས་དགེ་འཕྲོག་ཅིང༌། །དྲན་པ་རྨོངས་པས་འཕྲོག་པར་བྱེད་པ་དེ། །བསོད་ནམས་ཀྱི་འབྲས་བུའི་སྐབས་འཕྲོག་པར་བྱེད་པའི་ཕྱིར་རོ། །དེ་བཞིན་དུ་བདེ་འགྲོའི་སྲོག་ཀྱང་འཕྲོག་པར་བྱེད། དེ་བས་དྲན་པ་ཡིད་སྒོ་ནས། །གུད་དུ་ནམ་ཡང་མི་གཏང་ངོ༌། །ཡིད་ནི་བྱང་ཆུབ་ཀྱི་སེམས་ཡིན་ལ་དེ་ཉིད་སྒོ་ཡིན་ཏེ། བྱང་ཆུབ་པའི་ཐབས་ཡིན་ནོ།། དེ་ལས་ནམ་ཡང་བཟློག་པར་མི་བྱའོ། །ཡུལ་གཞན་དུ་སོང་ན་ཡང༌། རྣམ་པ་འགའ་ཞིག་གིས་ཉེ་བར་གཞག །ཡུལ་གཞན་ལས་ཡིད་ལ་བྱེད་པས་བཞག་ལ། ཡིད་ཀྱི་སྒོ་ལས། ངན་སོང་གནོད་པ་དག་དྲན་པར་བྱས་ཏེ་ཉེ་བར་གཞག་པར་བྱའོ། །ཇི་ལྟར་གཞག་པར་བྱ་ཞེ་ན། བླ་མ་
དང་ནི་འགྲོགས་པ་ལས། །མཁན་པོས་རྗེས་སུ་བསྟན་པ་དང༌། །སློབ་མ་དག་ལ་མཁན་པོས་བསླབ་པ་ལས་འདས་པ་ན། བསྐུལ་ཞིང་རྗེས་སུ་སྟོན་པ་ནི་དྲན་པར་བྱེད་པ་ཞེས་བྱ་བ་ལ་སོགས་པ་ལྔ་ཡིན་ཏེ། མཁན་པོས་རྗེས་སུ་བསྟན་པ་དེས། །འཇིགས་པས་སྐལ་ལྡན་གུས་བྱེད་ལ། །དྲན་པ་ཤིན་ཏུ་སྐྱེ་བར་འགྱུར་རོ། །གཞན་ཡང་སངས་རྒྱས་བྱང་ཆུབ་སེམས་དཔའ་དག །ཤེས་བྱ་ཐམས་ཅད་ལ་ཐོགས་པ་མེད་པའི་གཟིགས་པ་སྟེ། སྤྱན་གང་ལ་མངའ་བ་དེ་དག་ནི། ཀུན་ཏུ་ཐོགས་མེད་གཟིགས་པར་ལྡན། །ཐམས་ཅད་མཁྱེན་པ་ཉིད་དོ། །དེའི་ཕྱིར་དེ་དག་ཐམས་ཅད་ཀྱི་སྤྱན་སྔ་ན། དེ་དག་གི་མདུན་ན་བཞུགས་སོ་ཞེས། དེ་ལྟར་བསམས་ནས། དེ་དག་གི་སྤྱན་སྔར་ངོ་ཚ་དང༌། གུས་པ་དང་འཇིགས་བཅས་དྲན་པ་རབ་ཏུ་གཞག །སྡིག་པ་དག་ལས་ཁྲེལ་ཡོད་པ་དང༌། །དད་པ་ལས་གུས་པར་གཞག་པའོ། །དེ་ལ་སངས་རྒྱས་དྲན་པ་ཡང༌། །ཡང་དང་ཡང་དུ་འབྱུང་བར་འགྱུར། །དེ་ལྟར་སྤྱན་སྔར་གནས་པ་དེ་ལ་སྐད་ཅིག་མ་རེ་རེ་གཟུགས་དང་ཆོས་ཀྱི་སྐུ་ལ་དམིགས་པའི་སངས་རྒྱས་རྗེས་སུ་དྲན་པ་ཡང་རྗེས་སུ་འབྱུང་བར་འགྱུར་ཞིང༌། དེའི་ཚེ་ཡིད་ཀྱི་སྒོ་འབའ་ཞིག་ཏུ་མ་ཟད་ཀྱི་གང་ཚེ་དྲན་པའི་ཡིད་སྒོ་ནས། །བསླབ་པ་དག་བསྲུང་བའི་དོན་དུ་གནས་གྱུར་ལ། དེ་ཚེ་ཤེས་བཞིན་འོང་འགྱུར་ཞིང༌། །སོང་བ་དག་ཀྱང་ཕྱིར་འོང་བར་འགྱུར་རོ། །དྲན་པ་དང་ཤེས་བཞིན་དག་གིས་ཇི་ལྟར་སེམས་བསྲུང་བར་བྱ་བ་ཡིན་ཞེ་ན། རེ་ཞིག་དང་པོ་སྦྱོར་བའི་མཇུག་ཐོགས་སུ་སྡོམ་པ་ཡང་དག་པར་ལེན་པའི་དེ་མ་ཐག་ཏུ་འདི་འདྲ་བའི་སེམས་ཏེ། བྱང་ཆུབ་ཀྱི་སེམས་སོ་སོའི་སྐྱེ་བོ་ཉིད་ཡིན་པའི་ཕྱིར་འབད་པས། འདི་ནི་སྐྱོན་བཅས་ཤས་བྱས་ནས་ཏེ། དྲན་པ་དང་ཤེས་བཞིན་ལེགས་པར་བཞག་ནས་སོ། །གླེགས་བམ་ལ་ལ་ལས་ནི་དེ་ནི་ཡུལ་གཞན་བྱས་ནས་ཞེས་འབྱུང་སྟེ། ཁོང་དུ་ཆུད་པར་སླའོ། །དེ་བས་ན་འདི་ལྟར་བསམ་བར་བྱ་སྟེ། ལྟུང་བའི་སྒོ་ཐམས་ཅད་ལ། དེ་ཚེ་བདག་གིས་ཤིང་བཞིན་དུ། །ཟུངས་ཐུབ་པར་ནི་གནས་པར་བྱ། །ཤིང་ཡང་རླུང་གིས་གཡེངས་པའི་རྩེ་མོའི་ཆ་དབང་པོ་དང་བཅས་པ་བཞིན་དུ། སྒྲ་འབྱིན་པ་དེ་ལྟར་ན་ཟུངས་ཐུབ་
པ་ཞེས་སྨོས་ཏེ། ཡིད་ཀྱི་དབང་པོ་མེད་པ་ན་བརྗོད་པར་འདོད་པའི་དོན་མེད་པ་ཡིན་ནོ། །དབང་པོ་མེད་པའི་རླུང་ཡང་གཡོ་བ་ཡིན་པ་དེ་ལྟར་ན་གཡོ་བ་མེད་པའི་དོན་དུ་ཤིང་ཞེས་བྱ་བ་སྨོས་སོ། །དེ་ལྟར་ཡིན་ན་སློབ་པ་ཡང་སྤྱོད་པ་ཡང་མེད་པ་མ་ཡིན་ནམ་ཞེ་ན། སྨྲས་པ། དོན་མེད་གཡེངས་པར་བལྟ་བ་ནི། ནམ་ཡང་བདག་གིས་མི་བྱ་སྟེ། །འབྲས་བུ་དང་བཅས་པར་བྱ་བ་ཡིན་ནོ། །དེ་ལ་ཡང་ངེས་པར་སེམས་པ་སྟེ། ཅུང་ཟད་དཔྱོད་པའི་འབད་རྩོལ་གྱིས་རྟག་ཏུ་ནི། མིག་ནི་ཕབ་སྟེ་བལྟ་བར་བྱ། །བལྟ་བ་ངལ་བསོའི་ཆེད་དུ་ནི། །རེས་འགའ་ཕྱོགས་སུ་བལྟ་བར་བྱ། །སྐྱེས་བུ་འགའ་ཞིག་མིག་ལམ་སྣང་གྱུར་ན། །ལེགས་འོངས་དོན་དུ་བལྟ་བར་བྱ། །ལེགས་པར་འོངས་སམ་ཞེས་བརྗོད་པའི་དོན་དུ་བལྟ་བར་བྱའོ། །ལམ་ལ་སོགས་ཞེས་བྱ་བ་འདིས་འཇིགས་པ་སྟེ། རྐུན་པོ་ལ་སོགས་པའོ། །དེ་བརྟག་པ་ནི་ཡོངས་སུ་ཤེས་པ་དེའི་ཕྱིར་ཡང་དང་ཡང་དུ་སྟེ། སྐད་ཅིག་སྐད་ཅིག་ཕྱོགས་བཞིར་བལྟ་བར་བྱ་བ་ནི་འགྲོ་བའི་ཚེ་མ་ཡིན་གྱི། འོན་ཀྱང་ངལ་བསོ་བ་ན་ཕྱོགས་སུ་བལྟ་བར་བྱའོ། །ངལ་བསོ་ཁ་ནི་ཕྱིར་བལྟས་ནས། ལུས་ཐམས་ཅད་ཕྱིར་བསྒྱུར་ནས་བལྟ་བར་བྱའོ། །མདུན་དང་རྒྱབ་ཏུ་བརྟག་བྱས་ནས། འགྲོ་བ་འམ་ཡང་ན་འོང་བྱ་སྟེ། །མདུན་བརྟགས་ནས་འགྲོ་བ་དང་རྒྱབ་བརྟགས་ནས་འོང་བར་བྱའོ་ཞེས་བྱ་བའི་དོན་ཏོ། །དེ་ལྟར་ཕྱོགས་འདིས་གནས་སྐབས་ཐམས་ཅད་དུ། །སྤྱོད་ལམ་རྣམ་པ་བཞི་དག་ལ། །དགོས་པ་ཤེས་ནས་སྤྱད་པར་བྱ། གནས་སྐབས་ཐམས་ཅད་བཤད་ན་ནི་སྤྲོས་པ་ཐམས་ཅད་སྐྱེ་བར་འགྱུར་རོ་ཞེས་བྱ་བར་དགོངས་སོ། །དེ་ལྟར་ཕྱིའི་རྣམ་པའི་སྤྱོད་པ་བཤད་ནས། ནང་གི་སྤྱོད་པ་ནི། ལུས་ཀྱིས་འདི་ལྟར་གནས་བྱས་ཏེ། །ཞེས་བྱ་བ་སྨོས་ཏེ། འདི་ལྟར་གནས་པར་བྱའོ་ཞེས་ཤིང༌། དེ་ལྟར་བྱས་ནས་མཉན་པ་ལ་སོགས་པ་བྱ་བ་བསྡོགས་པས། དེ་ནས་ནི་སྐབས་སུ་ལུས་འདི་སྟེ་བྱ་བའི་བར་དུ་ཇི་ལྟ་བུར། གནས་པ་ཡིན་ཞེས་བལྟ་བར་བྱ། །བལྟས་ནས་བདག་གིས་བྱའོ། །བདག་གིས་བྱས་ནས་ཡང་འགའ་ཞིག་གི་ཚེ། ཡང་དག་པར་སེམས་པར་མི་འགྱུར་རོ་ཞེ་ན། ཆོས་ལ་སེམས་པའི་ཀ་ཆེན་ལ། །དགེ་བ་ཡང་སེམས་པའི་
ཀ་བ་ལ་བཅིངས་པ་གྲོལ་བར་མི་འགྱུར་ལྟར། །སེམས་ཀྱི་གླང་ཆེན་སྨྱོན་པ་དག །འབད་པ་ཀུན་གྱིས་དཔྱད་པར་བྱ། །ཇི་ལྟར་དཔྱད་པར་བྱ་ཞེ་ན། །ཅི་ནས་ཞེས་བྱ་བ་ལ་སོགས་པ་སྨོས་སོ། །ཅི་ནས་ཡང་དག་བླངས་པའི་གཙོ། །ཡང་དག་པར་བླངས་པའི་གཙོ་བོ་འདིའི། སྐད་ཅིག་གཅིག་ཀྱང་མི་འཚོར་བར། །དགེ་བ་འམ་གཞན་དག་ལ། བདག་གི་ཡིད་འདི་གར་དཔྱོད་ཅེས། །དེ་ལྟར་ཡིད་ལ་སོ་སོར་བརྟག །གལ་ཏེ་དགེ་བ་ལ་ཡིན་ན་གོང་ནས་གོང་དུ་དགེ་བ་དག་ལ་ཡང་ཡང་དག་པར་སྦྱར་བར་བྱའོ། །གལ་ཏེ་གཞན་ལ་ཡིན་ན་མི་དགེ་བ་དེ་ལས་བཟློག་ཅིང༌། ལུང་དུ་མ་བསྟན་པ་དང༌། དེ་ནས་དགེ་བ་ལ་སྦྱར་བར་བྱ་སྟེ། གོ་རིམས་འདིས་དགེ་བ་འདི་ལ་གཞག་པར་བྱ་ཞིང་དེ་ལྟར་སོ་སོར་བརྟག་པར་བྱའོ། །འཇིགས་དང་དགའ་སྟོན་སོགས་བྱུང་བས་ཕྱིའི་འཇིགས་པ་ལ་ཡང་འདིས་འཇིགས་པས་ན་འཇིགས་པ་སྟེ་སྦྲུལ་ལ་སོགས་པའོ། །དགའ་སྟོན་ནི་རིགས་ཀྱི་མེ་སྐོར་ལ་སོགས་པའམ། གཙུག་ལག་ཁང་དུ་ནི་སངས་རྒྱས་ཀྱི་མཆོད་པ་ལ་སོགས་པའོ། །ལ་སོགས་པའི་སྒྲས་ནི་གཉིད་ལོག་པ་གཟུང་ངོ༌། །དེ་དག་དང་འབྲེལ་ཅིང་ལྡན་པར་འགྱུར་བས་ན། སྙོམས་པར་འཇུག་པའི་ཚེ། གལ་ཏེ་ཅི་བདེར་མི་ནུས་ན། །འདི་ལ་འགྱོད་པར་བྱ་བ་མ་ཡིན་ནོ། །ཅིའི་ཕྱིར་ཞེ་ན། གང་ཕྱིར་སྦྱིན་པའི་དུས་དག་ཏུ། །ཚུལ་ཁྲིམས་བཏང་སྙོམས་གཞག་པར་གསུངས། །ཞེས་བྱ་བ་སྨོས་ཏེ་སྦྱིན་པ་ནི་འདིར་ནུས་པ་ཉེ་བར་མཚོན་པའོ། །ཏུའི་སྒྲས་ནི་ངེས་པར་བཟུང་བ་སྟེ། སྦྱིན་པའི་དུས་ན་ཚུལ་ཁྲིམས་ཉོན་མོངས་པ་ཅན་ཉིད་མ་ཡིན་པ། བདག་གིར་མ་བྱས་པ་ཉིད་ལ་སོགས་པ་ལས་ལྡོག་པ་དང༌། ཉོན་མོངས་པ་ཅན་བདག་གིར་མ་བྱས་པ་ལ་སོགས་པ་ཡང་རྣམ་པ་ཐམས་ཅད་རྗེས་སུ་གནང་བ་མེད་པ་ལས་སྙིང་རྗེའི་བསམ་པ་དག་པ་ཡིན་ཞིང་མངོན་པར་ཤེས་པ་ཐོབ་པ་ཡིན་ན། འཚེ་བ་ལ་སོགས་པ་ཡང་ཉོན་མོངས་པ་མ་ཡིན་ནོ་ཞེས་རྗེས་སུ་གནང་བ་ཡིན་ནོ། །སོ་སོའི་སྐྱེ་བོ་ནི་ཉོན་མོངས་པ་ཅན་མ་ཡིན་ན་ཡང་ཉོན་མོངས་པ་བྱེད་པའི་ཕྱིར་དཀའ་བར་བྱེད་པའོ། །དེ་མི་ནུས་པ་ནི་བཏང་སྙོམས་སུ་གཞག་པ་ནི། འཕགས་པ་བློ་གྲོས་མི་ཟད་པའི་མདོ་ལས།
སྦྱིན་པའི་དུས་སུ་ཚུལ་ཁྲིམས་བསྲུང་བ་བཏང་སྙོམས་སུ་གཞག་པར་བྱའོ་ཞེས་རྗེས་སུ་གནང་བ་ཡིན་ནོ། །གལ་ཏེ་རྣམ་པ་འགའ་ཞིག་གིས་འཇིགས་པ་དང༌། དགའ་སྟོན་ལ་སོགས་པ་དང་འབྲེལ་བ་ལས་ནུས་པ་མེད་པ་ལ་ཉོན་མོངས་པ་ཅན་གྱི་རྩ་བའི་ལྟུང་བ་འབྱུང་བར་འགྱུར་ན། འཕགས་པ་ནམ་མཁའི་སྙིང་པོའི་མདོ་ལས་གསུངས་པའི་ཆོ་ག་བཞིན་དུ་བཤགས་པ་བྱས་ནས། རྒྱལ་པོ་ལ་སོགས་པས་ཡང་སྡོམ་པ་གཟུང་བར་བྱའོ། །གལ་ཏེ་རྣམ་པ་གཞན་དུ་གཞན་འབྱུང་བ་ན་ཡང༌། ཚུལ་ཁྲིམས་ཀྱི་ལེའུ་ལ་སོགས་པའི་ཆོ་ག་བཞིན་དུ་བཤགས་པར་བྱའོ། །ཇི་ལྟར་ན་བྱ་བ་ཐམས་ཅད་ཡང་དག་པར་བྱས་པར་འགྱུར་ཞེ་ན། གང་ཞིག་ཞེས་བྱ་བ་ལ་སོགས་པ་སྨོས་ཏེ། གང་ཞིག་བསམས་ཏེ་བྱར་བརྩམས་པ། །དེ་ལས་གཞན་དུ་མི་བསམ་སྟེ། །དེར་གཏད་པ་ཡི་བསམ་པ་ཡིས། །སེམས་ཀྱིས་དེ་ཉིད་རེ་ཞིག་བསྒྲུབ་པར་བྱ། །དེ་ལྟ་ན་ནི་ཀུན་ལེགས་བྱ། །གཞན་དུ་གཉི་གར་མི་འགྱུར་རོ། །བསམ་པ་དང་དེ་ལས་གཞན་པ་འབའ་ཞིག་ཏུ་མ་ཟད་ཀྱི་གཉིས་ཀར་མི་འགྱུར་རོ། །ཤེས་བཞིན་མ་ཡིན་ཉེ་ཉོན་མོངས་པ་དག་ཀྱང༌། དེ་ལྟ་ན་ནི་འཕེལ་མི་འགྱུར། །འཕེལ་བ་ཉིད་ཐོབ་པར་མི་འགྱུར་རོ། །དེའི་ཕྱིར་དེ་ལས་གཞན་པ་བསམ་པར་མི་བྱའོ། །ཡང་ཅི་ཞིག་བྱ་ཞེ་ན། བྲེ་མོའི་གཏམ་ཞེས་བྱ་བ་སྨོས་ཏེ། བྲེ་མོའི་གཏམ་ནི་སྣ་ཚོགས་དང༌། །རྒྱལ་བའི་གཏམ་ལ་སོགས་པ་དང༌། །ངོ་མཚར་ལྟད་མོ་སྟེ་མིག་འཕྲུལ་སོགས་པ་རྣམ་པ་མང་པོས་ཀུན་ལ་སྟེ། དཔུང་གི་བཀོད་པ་དང༌། ཤི་བའི་རོ་འདེགས་པ་ལ་སོགས་པ་དང༌། འཇིག་རྟེན་གྱི་ཚོགས་པ་ལ་འཇུག་པར་གྱུར་པ་ན། དེ་ལ་ཆགས་པ་སྤང་བར་བྱའོ། །དེ་བཞིན་དུ་དོན་མེད་ས་རྐོ་རྩྭ་གཅོད་དང༌། །ས་རིས་འདྲི་སོགས་བྱེད་གྱུར་ན་སྟེ། །དགོས་པ་མེད་པ་བྱེད་པ་ན། །བདེ་གཤེགས་བསླབ་པ་དྲན་བྱས་ནས། །སྐྲག་པས་དེའི་མོད་ལ་གཏང་བར་བྱས་སོ། །གང་ཚེ་བསྐྱོད་པར་འདོད་གྱུར་ཏམ། །སྨྲ་བར་འདོད་པར་གྱུར་ན་ཡང༌། དེའི་ཚེ་རེ་ཞིག་དང་པོར་རང་གི་སེམས་བརྟགས་ནས། དེ་ནས་བརྟན་པས་གཡོ་བ་དང༌། བསྐྱོད་པ་དང་སྨྲ་བ་རིགས་པར་ལྡན་པར་བྱའོ། །གང་ཚེ་རང་ཡིད་ལ་སོ་སོར་རྟོག་པ་དང་ཆགས་པ་དང༌། ཁྲོ་བའམ་རྣམ་པར་སྡང་བ་མཐོང་བ་དེའི་ཚེ་ལས་སུ་མི་བྱ་སྟེ། སྐྱོབ་པར་མི་བྱ་ཞིང་
སྨྲ་བར་མི་བྱའོ། །འོན་ཀྱང་བཏང་སྙོམས་སུ་ཤིང་བཞིན་དུ་ནི་གནས་པར་བྱ། །དེ་ལྟར་ན་གང་གི་ཚེ་དགོད་དང་གཞར་བཅས་པའམ། གལ་ཏེ་ང་རྒྱལ་ཏེ་ཁེངས་པ་དང༌། རྒྱགས་ཤིང་དྲེགས་པ་དང་ལྡན་ཞིང་འབྱོར་བ་ནི་ང་རྒྱལ་རྒྱགས་དང་ལྡན་པའོ། །མཚང་འདྲུ་བ་ཡི་བསམ་པ་དང། །ཞེས་བྱ་བ་ནི་གཞན་དག་གི་སྐྱོན་རྣམ་པར་བརྗོད་པའོ། །གལ་ཏེ་སྐྱོར་འབྱིན་སླུ་སེམས་དང༌། །ཞེས་བྱ་བ་ནི་གཡོ་སྒྱུའོ། །གང་གི་ཚེ་བདག་ལ་བསྟོད་པ་ལྷུར་ལེན་པས་ན། བདག་བསྟོད་ལྷུར་ལེན་པའོ། །གཞན་ལ་སྨོད་པ་ཉིད་དང་ནི་སྟེ། གཞན་ལ་ཚིགས་སུ་བཅད་པ་མ་ཡིན་པ་རྗོད་པར་བྱེད་པ་ཉིད་དོ། །གཤེ་བཅས་ནི་གཞན་དག་ལ་བརྙས་པ་དང་བཅས་པའོ། །འགྱོད་དང་བཅས་གྱུར་པ་སྟེ། ཁྲོ་བས་འཁྲུགས་པར་འགྱུར་བ་དང་བཅས་ནའོ། །དེའི་ཕྱིར་ཤིང་བཞིན་གནས་པར་བྱའོ། །འདི་ལྟར་ཡང་བསམ་པར་བྱ་སྟེ། རྙེད་དང་བཀུར་སྟི་གྲགས་འདོད་པའམ། །གཡོག་འཁོར་དོན་དུ་གཉེར་བའམ། །བདག་སེམས་རིམ་གྲོ་འདོད་གྱུར་ན། །དེ་ཚེ་ཤིང་བཞིན་གནས་པར་བྱ། །དེ་བཞིན་དུ་གཞན་གྱི་དོན་ཡལ་བར་འདོར་ཞིང་སྤོང་བ་ནི་གཞན་དོན་ཡལ་བར་འདོར་བའོ། །རང་དོན་གཉེར་བར་འདོད་པ་དག །ཡང་ནི་འཁོར་ནི་འདོད་འགྱུར་བ་འམ་སློབ་པ་ལ་སོགས་པ་དོན་དུ་གཉེར་བའམ། སྨྲ་བར་འདོད་པའི་སེམས་བྱུང་ན། །དེ་ལྟར་གྱུར་བས་བདག་གི་སེམས་གཡོ་ཞིང་སྨྲ་བར་བྱེད་པར་འདོད་པ་དེས་ནི་ཤིང་བཞིན་གནས་པར་བྱ། དེ་བཞིན་དུ་བཟོད་པར་མི་ནུས་པའི་ངང་ཚུལ་ནི་མི་བཟོད་ལེ་ལོའོ། །འཇིགས་པ་ནི་དང་ང་བའོ། །དེ་བཞིན་སྤྱི་བརྟོལ་ནི་ཕོད་པ་ཅན་ནོ། །མུ་ཅོར་ནི་ཚིག་འཁྱལ་པའོ། །དེ་བཞིན་དུ་རང་གི་ཕྱོགས་ཞེན་སེམས་བྱུང་ན། དེས་ནི་ཤིང་བཞིན་གནས་པར་བྱ། །ཇི་ལྟར་ཆགས་པ་ནས་རང་གི་ཕྱོགས་ལ་མངོན་པར་ཞེན་པའི་བར་དེ་ལྟར་འཆབ་པ་ལ་སོགས་པའི་ཀུན་ནས་ཉོན་མོངས་པ་གཞན་དག་ཀྱང་བརྟགས་ནས་སམ། དོན་མེད་བརྩོན་པའི་ཡིད་བརྟགས་ནས་ཏེ། ས་རྐོ་བ་ལ་སོགས་བྱུང་ན་ཡིད་ལུང་དུ་མ་བསྟན་པ་བལྟས་ཤིང་བརྟགས་ནས་སོ། །དེ་ཚེ་དཔའ་བོས་གཉེན་པོ་ཡིས། །བག་ཡོད་པར་གྱུར་པས་ཤེས་བཞིན་གྱི་ཡིད་དེ་བརྟན་པར་བྱ་གཟུང་བར་བྱའོ། །ངེས་པར་གཟུང་བས་བརྟན་པ་རིགས་པ་དང་ལྡན་པས། ལུས་ཀྱི་གཡོ་འགུལ་དང་སྨྲ་བ་ལ་འཇུག་པར་བྱའོ། །
སྡོམ་པ་དང་དགེ་བ་ཆོས་སྡུད་པའི་ཚུལ་ཁྲིམས་ཀྱི་དབང་དུ་མཛད་ནས་དེ་ལྟར་སེམས་སྦྱོར་བ་ཡིན་ནོ། །སེམས་ཅན་དོན་བྱེད་པའི་ཚུལ་ཁྲིམས་ལ་ཅི་འདྲ་བ་གཟུང་བར་བྱ་ཞེ་ན། ཤིན་ཏུ་ངེས་དང་ཞེས་བྱ་བ་ལ་སོགས་པ་སྨོས་ཏེ། ཤིན་ཏུ་ངེས་པར་ནི་བརྟན་པོར་དམ་བཅས་པས་སོ། །རབ་ཏུ་དང་བ་ནི་ཤེས་རབ་དང་བག་ཡོད་ཅན་དང༌། ཡོན་ཏན་དག་ལ་དད་པའོ། །བསྟན་པ་ནི་དཀའ་བ་ལ་སྔར་བ་མེད་པའོ། །ཟབ་ཅིང་རྒྱ་ཆེ་བ་མོས་པས་དཀོན་མཆོག་གསུམ་དང༌། བླ་མ་རྣམས་དང་ཆོས་འཛིན་པ་ལ་གུས་པ་སྟེ། བསྙེན་བཀུར་བྱེད་པ་ཞེས་ནི་གཞོན་རབས་དག་ལ་ཡང་བླ་མ་ཉིད་དུ་འདུ་ཤེས་པའོ། །དེ་དག་དང་བཅས་པར་འཇུག་པས་ན་གུས་དང་ཞེ་སར་བཅས་པའོ། །རང་དང་གཞན་ལ་ལྟོས་ནས་ཉེས་པས་ངོ་ཚ་བ་ནི་ངོ་ཚ་བ་སྟེ་དེ་དང་བཅས་པ་ནི་ངོ་ཚ་དང་བཅས་པའོ། །ཉེས་པ་དག་ལས་འཇིགས་པས་འཇིགས་པ་སྟེ། དེ་དང་བཅས་པ་ནི་འཇིགས་པ་དང་བཅས་པའོ། །རྒོད་པའི་རྐྱེན་ཡོད་ན་ཡང་ཞི་བའོ། །སྦྱིན་པ་ལ་སོགས་པ་བསྡུ་བའི་དངོས་པོ་བཞི་པོ་དག་གིས་གཞན་དགའ་བར་བྱེད་པ་ལ་བརྩོན། ཕན་ཚུན་མི་མཐུན་བྱིས་པ་ཡིས། །འདོད་པ་རྣམས་ཀྱིས་མི་སྐྱོ་ཞིང་བཟོད་པས་སོ། །བྱིས་པ་སྡུག་བསྔལ་མི་འདོད་ཅིང༌། །སྡུག་བསྔལ་གྱི་རྒྱུ་གཞན་ལ་འཚེ་བ་ཡང་འདོད་པར་བྱེད་དོ། །ཉོན་མོངས་སྐྱེས་པས་འདི་དག་གི །སེམས་འདི་བྱུང་སྙམ་བརྩེར་ལྡན་དང༌། ཁ་ན་མ་ཐོ་མེད་དངོས་ལ། །བདག་དང་སེམས་ཅན་དབང་བྱས་ཤིང་རྟག་ཏུ་དབང་དུ་བྱའོ། །སྤྲུལ་པ་བཞིན་དུ་ང་མེད་པར། །ཡིད་འདི་རྟག་ཏུ་གཟུང་བར་བྱ། །དེ་རིང་འདི་འདྲ་བའི་སེམས་ཤིན་ཏུ་ལེགས་པར་གཟུང་བར་བྱའོ་ཞེས་བསྟན་པའི་ཕྱིར། རིང་ཞིག་ལོན་ནས་དལ་བའི་མཆོག །ཐོབ་པ་ཡང་དང་ཡང་བསམས་ནས། །ཤིན་ཏུ་ངེས་པ་ནས་མེད་པའི་བར་གྱི་སེམས་དེ་ལྟ་བུར་རི་རབ་ལྟར་བདུད་ཐམས་ཅད་ཀྱིས་རབ་ཏུ་མི་གཡོ་བ་གཟུང་བར་བྱའོ། །སེམས་དེ་འདྲ་བ་གཟུང་བར་བྱའོ། །ལུས་ནི་མ་ཡིན་ཏེ། དེ་ནི་སེམས་མེད་པར་རང་གི་དོན་ལ་ཡང་ནུས་པ་མེད་པའི་ཕྱིར་རོ། །དེ་ལྟ་མ་ཡིན་ན། བྱ་རྒོད་ཤ་ལ་ཆགས་པ་ཡིས། །ཤ་ལ་བརྐམ་པས་བདག་གི་ལུས། །ཕན་ཚུན་ཀུན་ཏུ་བཤལ་ཁྲིད་ཀྱང༌། །གཞན་དུ་ལུས་འདི་ཕྱིར་འཆོས་པར། །ཅི་ཡི་ཕྱིར་ན་དེང་མི་བྱེད། །བྱེད་པ་མེད་པའི་གསོན་པོའི་ལུས་ལ་ཡང༌། བྱམས་པ་ལ་སོགས་པའི་
སེམས་ཉིད་འདི་ལྟར་སྲུང་བར་བྱེད་དོ། །སྲུང་བ་དེ་ཡང་བདག་གིས་བྱས་པས་རིགས་པ་མ་ཡིན་ཏེ། མི་རིགས་སོ་ཞེས་བསྟན་པའི་ཕྱིར། ལུས་ནི་ཞེས་བྱ་བ་ལ་སོགས་པ་སྨོས་ཏེ། ཀྱེ་ལུས་འདི་བདག་གིར་གཟུང་བྱས་ནས། ཡིད་ཁྱོད་ཅིའི་ཕྱིར་སྲུང་བར་བྱེད། །བདག་ཏུ་བཟུང་བ་ཡང་འདིར་མི་རིགས་སོ་ཞེས་བསྟན་པའི་ཕྱིར་ཁྱོད་དང་ཞེས་བྱ་བ་ལ་སོགས་པ་སྨོས་ཏེ། ཁྱོད་དང་འདི་གཉིས་སོ་སོ་ན། ལུས་འདི་མ་བསྲུངས་ན། དེས་ཀོ་ཁྱོད་ལ་ཅི་ཞིག་གནོད། །གལ་ཏེ་གཟུང་བ་ཡོད་པ་མ་ཡིན་ན། ཀྱེ་རྨོངས་པའི་ཡིད་ཁྱོད་ཅི་ཡི་ཕྱིར། །ཤིང་གཟུགས་གཙང་མ་གཟུང་མི་བྱེད། །བྱེད་པར་ནུས་པ་མ་ཡིན་ནོ་ཞེ་ན། མི་གཙང་ཚོགས་ཀྱི་འཁྲུལ་འཁོར་འདི། །ཞེས་སྨོས་སོ། །དེ་བས་ན་བཟའ་བར་བྱ་བ་ཉིད་མ་ཡིན་པའི་ཕྱིར་བསྲུང་བར་བྱ་བ་མ་ཡིན་ནོ་ཞེ་ན། ཅིའི་ཕྱིར་རུལ་པ་སྲུང་བར་བྱེད་ཅེས་བྱ་བ་སྨོས་ཏེ། ཉེ་བར་མཁོ་བ་མ་ཡིན་པར་འགྱུར་རོ། །འདི་ལ་ནི་སྙིང་པོ་ཅུང་ཟད་ཡོད་པ་ཡིན་པ་དེ་ལྟར་ན་བསྲུང་བ་ཡིན་ནོ་ཞེ་ན། ཐོག་མ་ཞེས་བྱ་བ་ལ་སོགས་པ་སྨོས་ཏེ། པགས་པ་ཉིད་རིམ་པ་ཡིན་པས་ན། པགས་པའི་རིམ་པ་འདིའོ། །རང་གི་བློ་ཡིས་ཐ་དད་དབྱེ་བར་བྱའོ། །ཤ་ཡང་རུས་པའི་དྲ་བ་ལས། །ཤེས་རབ་མཚོན་གྱིས་གུད་དུ་ཕྱེ། །རུས་པ་རྣམས་ཀྱང་དབྱེ་བྱས་ནས། །རྐང་གི་བར་དུ་བལྟ་བྱ་ཞིང༌། །རྐང་མཐར་ཐུག་པའི་བར་དུའོ། །འདི་ལ་སྙིང་པོ་ཅི་ཡོད་ཅེས། །བདག་ཉིད་ཀྱིས་ནི་བརྟག་པར་གྱིས། །དེ་ལྟར་པགས་པ་ཐ་དད་པར་བྱ་བ་ལ་སོགས་པའི་རིམ་གྱིས་འབད་དེ་བཙལ་ཀྱང་དེར། ཁྱོད་ཀྱི་སྙིང་པོ་མ་མཐོང་ན། །ད་དུང་ཅི་ཡི་ཕྱིར་ན་ཁྱོད། །ལུས་འདི་སྲུང་བར་བྱེད་པ་སྨོས། །དེ་བཞིན་དུ། ཁྱོད་ཀྱིས་མི་གཙང་བཟར་མི་རུང༌། །ཁྲག་ཀྱང་བཏུང་དུ་མི་རུང་ལ། །བཏུང་བར་བྱ་བ་མ་ཡིན་ནོ། །རྒྱུ་ལྟོའང་གཞིབ་ཏུ་མི་རུང་ན། །ལུས་ཀྱིས་ཁྱོད་ལ་ཅི་ཞིག་བྱ། །ཉིས་ན་ཝ་དང་བྱ་རྒོད་ཀྱིས། །ཟས་ཀྱི་དོན་དུ་འདི་བསྲུང་རིགས། །མིའོ་ཅོག་གི་ལུས་འདི་ནི། །གསོན་པོ་དག་གིས་ཡང༌། བཀོལ་བར་བྱ་བ་ཉིད་དུ་ཟད། །དེ་ལྟར་ཡང་གལ་ཏེ་བསོད་ནམས་བྱེད་དམ་ཞེ་ན། འདི་ལྟར་ཁྱོད་ཀྱིས་བསྲུངས་ཀྱང་ནི། །འཆི་བདག་བརྩེ་བ་མེད་པ་ཡིས། །ལུས་ཕྲོགས་ཏེ་བྱ་དང་ཁྱིར་བྱིན་ན། དེ་ཚེ་ཁྱོད་ཀྱིས་ཅི་བྱར་ཡོད། །གལ་
ཏེ་དེང་འདི་ལྟར་དགེ་བ་བྱེད་པ་མ་ཡིན་ན། འདི་ལ་ཅུང་ཟད་ཀྱང་སྦྱིན་པར་མི་བྱའོ་ཞེས་བསྟན་པའི་ཕྱིར། བྲན་གཡོག་ཅེས་བྱ་བ་ལ་སོགས་པ་སྨོས་ཏེ། བྲན་གཡོག་བཀོལ་དུ་མི་བཏུབ་ལའང༌། །མི་འདུག་གོ་ཞེས་ངེས་པར་བྱས་ནས། གོས་ལ་སོགས་པ་མི་བྱིན་ལྟར། །ལུས་འདི་བསྙོད་ཀྱང་གཞན་འགྲོ་ན། །ཤི་བར་འགྱུར་ནའོ། །བསྙོད་ཀྱང་ཞེས་བྱ་བ་ནི། གོས་ལ་སོགས་པ་བསྐོན་པ་ཞེས་བྱ་བ་ལ་སོགས་པ་ཉེ་བར་མཚོན་པ་ཡིན་ནོ། །སེམས་ཁྱོད་ཀོ་ཅིའི་ཕྱིར་ཤ་ཐང་གསོ། ལུས་གསོ་བས་ཅི་ཞིག་བྱ། དེའི་ཕྱིར་འདི་ལ་གླ་རྔན་བྱིན་ནས་ནི། །ལུས་ལ་གོས་ལ་སོགས་པའི་གླ་རྔན་བྱིན་ནས་ནི་ཀྱེ་ཡིད་ད་ནི་སྟེ། དེང་རང་གི་དོན་བྱེད་ཆུག །ཅིའི་ཕྱིར་ཞེ་ན། ཕན་པ་མེད་པ་ཞེས་བྱ་བ་ལ་སོགས་པ་སྨོས་ཏེ། ཕན་པ་མེད་པ་འདི་ལ་ནི། །འདི་ལྟར་བྲན་ཏེ། བྲན་གཡོག་བཀོལ་དུ་མི་བཏུབ་པའང་གླ་རྔན་གྱིས་འཚོ་བ་ལ་སོགས་པ་བཏགས་པའི་གོས་ལ་སོགས་པའོ། །ཐམས་ཅད་སྦྱིན་པར་མི་བྱའོ། །དེའི་ཕྱིར་གླ་རྔན་ཙམ་བྱིན་ནས་འདི་རང་གི་དོན་བྱེད་དུ་གཞུག་པར་བྱའོ། །རང་གི་དོན་ཡང་བྱང་ཆུབ་སེམས་དཔའ་རྣམས་ཀྱི་སེམས་ཅན་གྱི་དོན་བསྒྲུབ་པར་བྱ་བ་ཉིད་ཡིན་ནོ་ཞེས་བསྟན་པའི་ཕྱིར། འགྲོ་དང་ཞེས་བྱ་བ་ལ་སོགས་པ་སྨོས་ཏེ། འགྲོ་དང་འོང་བའི་རྟེན་ཡིན་ཕྱིར་རྒྱུ་ཡིན་པའི་ཕྱིར། ལུས་ལ་གྲུ་ཡི་བློ་གཞག་སྟེ། །སེམས་ཅན་རྣམས་དོན་བསྒྲུབ་པའི་ཕྱིར། །ཡིད་བཞིན་གྱི་ནི་ལུས་སུ་བསྒྱུར། །འགྲོ་དང་འོང་བའི་རྟེན་ཙམ་དུ་ཞེས་བྱ་བའི་གཞུང་ནི་ལུས་སོ། །འགྲོ་བ་དང་འོང་བའི་རྟེན་དུ་རག་ལུས་པ་གང་ལ་ཡོད་པ་དེ་ནི། འགྲོ་བ་དང་འོང་བའི་རྟེན་ཙམ་དུ། ལུས་ལ་གྲུའི་བློར་སྒྲོ་བཏགས་ནས་ཞེས་བྱ་བའི་ཐ་ཚིག་གོ །ལྷག་མ་ནི་སྔ་མ་བཞིན་ནོ། །དེ་ལྟར་བསླབ་པ་བསྲུང་བར་འདོད་པ་ཡིས། །ཞེས་བྱ་བ་ནས་བརྩམས་པ་འདི་ཙམ་གྱིས་སེམས་སྦྱོང་བའི་སྤྱོད་པ་བཤད་ནས་ད་ནི་སྤྱོད་པ་སྟེ་དེ་ལྟར་ཞེས་བྱ་བ་ལ་སོགས་པ་སྟོན་པར་བྱེད་དོ། །འཛུམ་པའི་བཞིན་ཡང་འགའ་ཞིག་གི་ཚེ་ཁྲོ་གཉེར་གྱི་ངོ་འཛུམ་དུ་བྱར་མེད་དོ་ཞེས་བསྟན་པའི་ཕྱིར། ཁྲོ་གཉེར་ཞེས་བྱ་བ་ལ་སོགས་པ་སྨོས་ཏེ། ཕན་པ་མ་ཡིན་ཞེས་བྱ་བའི་དོན་ཏོ། །འགྲོ་བའི་དོན་བྱེད་པར་འདོད་པའི་མཛའ་བཤེས་ནི་འགྲོ་བའི་བཤེས་སོ། །གཞན་གྱི་སྨྲ་བའི་
དོན་དུ་ལེགས་པར་འོངས་པ་ལ་སོགས་པའི་ངང་ཚུལ་གང་ལ་ཡོད་པ་དེ་ལ་དེ་སྐད་ཅེས་བྱའོ། །ཁྲི་ལ་སོགས་པ་སྟེ་མ་ལ་སྟན་ལ་སོགས་པའོ། །སྒྲ་དང་བཅས་པ་མི་དོར་རོ། །ཞེས་བྱ་བ་འདིར་སྒྲ་དང་བཅས་པར་འདོར་ཞིང་གཞག་པར་མི་བྱ་སྟེ། མི་ཆགས་པ་ལ་སོགས་པའི་དོན་དུའོ། །བབ་ཅོལ་ནི་སྲོག་ཆགས་ལ་གནོད་པ་ལ་སོགས་པ་ཡོངས་སུ་སྤང་བའི་དོན་ཏེ་ཡང་དག་པར་བརྟགས་ནས་བྱའོ། །དེ་བཞིན་དུ་སྒོ་ཡང་དྲག་ཏུ་མི་དབྱེ་སྟེ། རྟག་ཏུ་བཅོམ་བསྐྱུངས་དགའ་བར་བྱ། །དེ་ལྟ་ནི་ཆུ་སྐྱར་བྱི་ལ་ཆོམ་རྐུན་དག །སྒྲ་མེད་འཇབ་ཅིང་འགྲོ་བ་ཡིས། །མངོན་པར་འདོད་པའི་དོན་སྒྲུབ་ལྟར། །ཉ་དང་བྱི་བ་དང་རྐུན་མ་ལ་སོགས་པའི་བྱ་བའོ། །དེའི་ཕྱིར་འདི་ལྟར་ཆུ་སྐྱར་ལ་སོགས་པ་བཞིན་དུ་མངོན་པར་འདོད་པའི་དགེ་བ་ཐོབ་པར་བྱ་བ་ལ། ཐུབ་པས་རྟག་ཏུ་སྟེ། ཡང་རྒྱུན་དེ་བཞིན་དུ་སྤྱད་པར་བྱའོ། །དེ་བཞིན་དུ་དགའ་བའི་སེམས་ཀྱིས་ཕན་འདོགས་པར་བྱེད་པའི་ངང་ཚུལ་གང་ལ་ཡོད་ཅིང་གཞན་གྱི་སྐྱོན་གྱི་བཞིན་སྐུལ་བྱེད་པའི་མཚན་ཉིད་ཅན་དག་ནི། གཞན་ལ་བཞིན་སྐུལ་འདེབས་མཁས་ཤིང༌། །མ་བཅོལ་ཕན་པ་བྱེད་པའི་ངག །ཉེས་པ་ཡོད་ན་དེའི་ཕྱིར་འཆོས་པར་བྱེད་འདོད་ཅིང༌། རྣམ་པ་གཞན་དུ་བྱེད་པར་མི་འདོད་པ་ཡང༌། གུས་པས་སྤྱི་བོས་བླང་བྱས་ནས། །དེའི་ཕྱིར་ཀུན་གྱི་སློབ་མར་གྱུར། །དེ་བཞིན་དུ། ལེགས་པར་སྨྲས་པ་ཐམས་ཅད་ལ། །དགེ་བར་གསུངས་ཞེས་བརྗོད་པར་བྱའོ། །ཀུན་ནས་ཉོན་མོངས་པའི་གཉེན་པོའི་ཕྱོགས་ཀྱི་དོན་དུ་བརྗོད་པར་ནི་ལེགས་པར་སྨྲས་ཏེ། དེ་ཐམས་ཅད་སངས་རྒྱས་ཀྱི་བྱིན་གྱི་རླབས་ལས་བྱུང་བའི་ཕྱིར་སངས་རྒྱས་ཀྱིས་གསུངས་པ་ཡིན་ནོ། །དེ་བཞིན་དུ། བསོད་ནམས་བྱེད་པ་མཐོང་གྱུར་ན། །མངོན་སུམ་དུ་བསྟོད་པས་ལེགས་པར་དགའ་བ་བསྐྱེད། ལྐོག་ནས་ཡོན་ཏན་བརྗོད་བྱ་ཞིང་སྟེ། བསྟོད་པའི་དོན་དུའོ། །གཞན་གྱིས་བརྗོད་པར་གྱུར་པ་ན། །ཡོན་ཏན་བརྗོད་ན་རྗེས་སུ་བརྗོད། །བྱང་ཆུབ་སེམས་དཔའི་རང་གི་ཡོན་ཏན་གཞན་གྱིས་བརྗོད་པ་ན། ཡོན་ཏན་ཤེས་པ་དེ་དག་ནི་ཡོན་ཏན་ཤེས་པར་རིག་པར་བྱ། བྱང་ཆུབ་སེམས་དཔའ་ཡིད་ལ་བྱའོ། །ཡང་གི་སྒྲས་ནི་གཞན་གྱི་ཡོན་ཏན་གྱིས་མགུ་བར་ཡང་བྱའོ། །ཇི་ལྟ་ཞེ་ན། རྩོམ་པ་ཐམས་ཅད་ཅེས་བྱ་བ་ལ་སོགས་པ་སྨོས་ཏེ། འདི་ལྟར་རྩོམ་པ་ཐམས་ཅད་དེ། །བྱ་བ་
ཐམས་ཅད་ནིའོ། །དགའ་ཕྱིར་སྟེ་དགའ་བ་དེ་ནི་རིན་གྱིས་ཉོ་ནའང་དཀོན། དེ་ཕྱིར་གཞན་བྱས་ཡོན་ཏན་གྱིས། གཞན་གྱིས་ཉེ་བར་བསགས་པའི་ཡོན་ཏན་དག་གིས། དགའ་བའི་བདེ་བ་སྤྱད་པར་བྱ། བདག་ལ་འདིར་གོད་ཡོད་མེད་ལ་འདིར་ནི་བསོད་ནམས་ཡིན་ཏེ། ཕ་རོལ་ལ་ཡང་བདེ་བ་ཆེ། །གཞན་གྱི་ཡོན་ཏན་དེ་དག་ལ་ཞེ་སྡང་བའི། ཉེས་པས་མི་དགའ་སྡུག་བསྔལ་ཞིང༌། །ཕ་རོལ་དུ་ཡང་སྡུག་བསྔལ་ཆེ། །ལུས་ཀྱི་ཡང་ངོ༌། །དེ་ལྟར་ན་དགའ་བ་བསྐྱེད་པར་བྱའོ། །ཇི་ལྟར་སྨྲ་བར་བྱ་ཞེ་ན། སྨྲ་ན་ཞེས་བྱ་བ་ལ་སོགས་པ་སྨོས་ཏེ། ཡིད་ཕེབས་པ་སྟེ། ཡིད་ཆེས་སུ་རུང་བའི་འབྲེལ་བའི་ཚིག་གོ །གང་ལ་དོན་གསལ་བར་བྱེད་པ་དང༌། དེ་བཞིན་དུ་ཡིད་འཕྲོག་པར་བྱེད་པས་ཡིད་དུ་འོང་བ་སྟེ། སེམས་ཀྱིས་གཟུང་བར་བྱ་བ་རྣ་བའི་རྣམ་པར་ཤེས་པ་ལ་སྙན་པར་བྱ་བའོ། །གང་གི་ཕྱིར་གང་ལ་བརྩེ་བ་སྡུག་བསྔལ་དང་བྲལ་བར་འདོད་པ་ཐམས་ཅད་ལ་ཞེ་སྡང་མེད་པའི་དགེ་བའི་རྩ་བ་སྟེ། རྒྱུ་ཡོད་པའོ། །གང་འཇམ་པ་ནི་མཉེན་པ་སྟེ། རང་ཅིང་ཐོན་པ་མ་ཡིན་པའི་སྒྲ་ཡོད་པའོ། །སྒྲ་ཡོད་པ་དེས་ནི་དེ་ལྟར་སྨྲ་བར་བྱའོ། །ཇི་ལྟར་བལྟ་བར་བྱ་ཞེ་ན། མིག་གིས་ཞེས་བྱ་བ་ལ་སོགས་པ་སྨོས་ཏེ། རྟག་ཏུ་མིག་གིས་སེམས་ཅན་བལྟ་ན་ཡང་ཞེས་བྱ་བ་ནི་གཙོ་བོ་ཡིན་པའི་ཕྱིར་གཞན་དག་ཀྱང་དེ་ལྟར་བྱའོ། །འཛུམ་པའི་གདོང་ཅན་ཁྲོ་གཉེར་གྱི་ངོ་འཛུམ་སྤངས་པས་ཀྱང་འགའ་ཞིག་གི་ཚེ་འགྱུར་བར་མཐོང་བ་དེ་ལྟ་ན། དེ་སྐད་དུ་བསྟན་ཏེ། ལེགས་པ་ཕུལ་དུ་བྱུང་བའི་དོན་ཡིན་ནོ། །དེ་ཉིད་ཀྱི་ཕྱིར། དྲང་ཞིང་བྱམས་པའི་ཚུལ་གྱིས་བལྟ་ཞེས་བྱ་བ་སྨོས་ཏེ། དྲང་བ་ནི་འཁྱོགས་པ་མེད་པར་བལྟ་བའོ། །ཅིའི་ཕྱིར་དེ་ལྟར་བལྟ་ཞེ་ན། འདི་ལྟར་སེམས་ཅན་འདི་དག་ཉིད་ལ་བརྟེན་ནས་བདག །སངས་རྒྱས་ཉིད་དུ་འགྱུར་ཕྱིར་རོ། །དེ་དག་ཉིད་ཅེས་བྱ་བ་ལ་སོགས་པའི་གཞུང་ནི་སེམས་ཅན་དེ་དག་གང་ལ་བརྟེན་ནས་བདག །སངས་རྒྱས་ཉིད་དུ་འགྱུར་བའི་ཕྱིར། །ཞེས་བྱ་བའི་བློ་འདིས། དྲང་ཞིང་བྱམས་པའི་སེམས་ཀྱིས་བལྟ། །རྟག་ཏུ་སེམས་ཅན་རྣམས་ལ་དྲང་པོར་བལྟ་བར་བྱའོ་ཞེས་བྱ་བའི་ཐ་ཚིག་གོ །དེ་དག་ལ་ཡང་རྟག་ཏུ་མངོན་པར་ཆགས་པས་གནས་པར་བྱའོ། །དེ་བཞིན་དུ་ཞེ་སྡང་ལ་སོགས་པའི་གཉེན་པོའི་ཕྱོགས་ཀྱི་
དོན་དུ་རབ་ཏུ་དང་བ་བསྐྱེད་པར་བྱའོ། །ཡོན་ཏན་ནི་ཆགས་པ་མེད་པ་ལ་སོགས་པ་ཡིན་ལ། ཕན་འདོགས་པ་སྟེ། ཡང་དག་པར་སྐྱོང་བ་ལ་སོགས་པ་གང་ཡིན་པ་དེ་ནི་ཡོན་ཏན་ཕན་འདོགས་བྱེད་པའི་ཞིང་ཡིན་ནོ། །དེ་ལ་སྡུག་བསྔལ་བ་དང༌། ནད་པ་ལ་སོགས་པ་ལ་འདི་ལྟར་མཐོང་བ་ལ་སོགས་པ་གང་ཡིན་པ་དེ་ཡང་དགེ་བ་ཆེན་པོ་ཡིན་ནོ། །བྱང་ཆུབ་ཀྱི་སེམས་ཐམས་ཅད་དུ་དགེ་བ་ཆེན་པོ་ཉིད་མ་ཡིན་ནམ་ཞེ་ན། བདེན་ཏེ་མོས་པ་བརྟན་པོ་མེད་པ་དག་ལ་དེ་སྐད་དུ་བཤད་པ་ཡིན་ནོ། །དེ་ཉིད་ཀྱི་ཕྱིར་བརྩོན་ཞིང་ཞེས་བྱ་བ་ལ་སོགས་པ་སྨོས་པ་སྟེ། བརྩོན་པ་ནི་དོན་ལ་ལེ་ལོ་མེད་པའོ། །ལྡང་དང་ལྡན་ནས་ཞེས་བྱ་བ་ནི། རང་གི་དོན་ལ་རྟག་ཏུ་ལྡང་བའོ། །གཞན་གྱི་བྱ་བ་བདག་གིས་བརྗེད་པ་མེད་པར་བྱེད་པའི་ངང་ཚུལ་གང་ལ་ཡོད་པ་དེ་ནི། ལས་རྣམས་བདག་གིས་རྟག་ཏུ་བྱ། །དེའི་ཡང་ལས་འགའ་ཞིག་གི་ཚེ། །སློབ་མ་ལ་སོགས་པ་འགའ་ཞིག་གིས་བྱས་པ་ཡིན་ནོ་སྙམ་པ་ལ། ལས་རྣམས་ཞེས་བྱ་བ་ལ་སོགས་པ་སྨོས་ཏེ། ལྟོས་པར་བྱ་བ་སྟེ། སྐབས་སྦྱིན་པར་བྱ་བའོ། །དེ་ལྟར་ནི་འགྱུར་མོད་ཀྱི་རྟག་ཏུ་ལྡང་ནས། སྒོ་ལ་སོགས་པ་དབྱེ་བ་ལ་སོགས་པར་འགྱུར་བ་དེ་ཡང་བཀག་པ་ཡིན་པ་དེ་ལྟར་ན། ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་དོན་དང་ལྡན་པས་མི་བྱའོ་ཞེ་ན། སྦྱིན་པའི་ཞེས་བྱ་བ་ལ་སོགས་པ་སྨོས་ཏེ། གཞན་གྱི་དོན་ལ་རྟག་ཏུ་ལྡང་བ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡིན་ཏེ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལས་མཆོག་ཡིན་ནོ། །འོ་ན་ཇི་ལྟར་ན་སྦྱིན་པའི་དུས་སུ་ཚུལ་ཁྲིམས་བཏང་སྙོམས་སུ་བཞག་ཅེ་ན། ཆུང་ངུའི་ཕྱིར་ནི་ཞེས་བྱ་བ་ལ་སོགས་པ་སྨོས་ཏེ། སྤྱོད་པ་ནི་ཆུ་ལོན་བཞིན་དུ། སྟེང་དུ་འགྲོ་བའི་རྟེན་ཡིན་པས་ན། དེ་ལྟར་ན་གཞན་སྤྱོད་པའི་ཆུ་ལོན་ཏེ་མ་གཏོགས་པ་སྟེ། དེ་ཡང་ནམ་དུ་ཡང་དོར་བར་མི་བྱའོ་ཞེས་བྱ་བའི་ཐ་ཚིག་གོ །འཚེ་བ་ལ་སོགས་པ་བཀག་པ་མ་ཡིན་ནམ་ཞེ་ན། དེ་ལྟར་ཞེས་བྱ་བ་ལ་སོགས་པ་སྨོས་ཏེ། ཐུགས་རྗེ་མངའ་བ་རིང་གཟིགས་པ་སྟེ། སྙིང་རྗེའི་བསམ་པ་དག་པ་ལ་འཚེ་བ་ལ་སོགས་པ་ཡང་དོན་མཐོང་བ་ལ་རྗེས་སུ་གནང་བ་ཡིན་ནོ། གཞན་ལྟ་ཅི་སྨོས་ཞེས་བྱ་བའི་ཐ་ཚིག་གོ །དེ་ལྟར་རིག་བྱས་གཞན་དོན་ལ། །རྟག་ཏུ་བརྩོན་པར་གནས་པར་བྱ། །དེ་ལྟར་མི་
འཇིགས་པ་སྦྱིན་པའི་རྣམ་པ་སྤྱོད་པ་དག་ཏུ་འཛུམ་པ་ཞེས་བྱ་བ་ལ་སོགས་པ་སྨོས་ནས། ཟང་ཟིང་གི་སྦྱིན་པའི་རྣམ་པ་ཅན་བསྟན་པའི་ཕྱིར། ལོག་པར་ལྷུང་དང་ཞེས་བྱ་བ་ལ་སོགས་པ་སྨོས་ཏེ། ལོག་པར་ལྷུང་བ་ནི་ཡི་དགས་ལ་སོགས་པའོ། །མགོན་མེད་ནི་ཕ་ལ་སོགས་པ་དང་བྲལ་བའི་ནད་པ་ལ་སོགས་པའོ། །བརྟུལ་ཞུགས་གནས་ནི་དཀའ་ཐུབ་པ་སྟེ། དེ་དག་ལ་བགོ་བཤའ་བྱས་ནས་བཟའ་བར་བྱའོ། །མང་པོ་ཡང་མ་ཡིན་ཞིང་ཉུང་དུ་ཡང་མ་ཡིན་པར་རིན་པ་ཙམ་དུ་བཟའ་བྱས་ཏེའོ། །ཆོས་གོས་གསུམ་པོ་སྣམ་སྦྱར་དང་བླ་གོས་དང་མཐང་གོས་སོ། །ཚིགས་ལ་གཙོ་བོར་གྱུར་པ་ནི་ཆོས་གོས་གསུམ་མོ། །དེའི་ཕྱིར་དེ་འདྲ་བ་སློང་བ་གཞན་ལ་ལྷག་པར་སྦྱིན་པར་བྱ་ཞིང་གཏང་བར་བྱའོ། །གལ་ཏེ་མེད་ན་དེ་ལས་གཞན་པ་སྦྱིན་པར་བྱའོ། །དེ་དེ་ལྟར་སྦྱིན་པའི་དོན་དུ་ཚུལ་ཁྲིམས་ཉིད་དབུལ་བར་ཁྱད་པར་ཅན་ཉིད་ཡིན་པའི་ཕྱིར། བཅས་པའི་ཁ་ན་མ་ཐོ་བ་ལས་ལྡོག་པ་ལས་ཚུལ་ཁྲིམས་གཞན་གཏང་བར་མི་བྱའོ་ཞེས་བསྟན་པར་འགྱུར་རོ། །འོ་ན་སྡོམ་པ་གཏོང་བ་ལས་ཡང་བཅས་པའི་ཁ་ན་མ་ཐོ་བ་ཉིད་ཡིན་པའི་ཕྱིར་བྱ་འམ་ཞེ་ན། དམ་པའི་ཆོས་ནི་ཞེས་བྱ་བ་ལ་སོགས་པ་སྨོས་ཏེ། དམ་པའི་ཆོས་ནི་སྤྱོད་པའི་དགེ་སློང་གི་ལུས་བསོད་ནམས་ཐམས་ཅད་ཀྱི་འབྱུང་ཁུངས་ཉིད་ཡིན་པའི་ཕྱིར་རོ། །ཚུལ་ཁྲིམས་དེ་ཅིག་ཤོས་ཆེད་དུ་སྟེ། སྦྱིན་པའི་དོན་དུ་སྦྲང་མ་དང༌། མཆུ་སྙུང་དང༌། གྲང་ལྷགས་ལ་སོགས་པས་གནོད་པར་མི་བྱའོ། །དེ་ལྟར་བྱས་ན་སྟེ། ལུས་ལ་གནོད་པ་མ་བྱས་ན་སེམས་ཅན་གྱི་བསམ་པ་མྱུར་དུ་རྫོགས་པར་འགྱུར་ཏེ། བདེ་བ་དང་ཏིང་ངེ་འཛིན་དང༌། དེ་ལས་དེ་ཁོ་ན་ཉིད་ཀྱི་བློ་དང༌། དེ་ལས་སྙིང་རྗེའི་བསམ་པ་རྣམ་པར་དག་པ་ཡོད་ན་སེམས་ཅན་གྱི་དོན་ཞེས་བྱའོ། །སོ་སོའི་སྐྱེ་བོ་དག་གིས་ཆོས་གོས་གསུམ་ཡང་གཏང་བར་བྱ་བ་མ་ཡིན་ན། སྲོག་ལ་སྨོས་ཀྱང་ཅི་དགོས་ཞེས་བསྟན་པའི་ཕྱིར། སྙིང་རྗེའི་ཞེས་བྱ་བ་ལ་སོགས་པ་སྨོས་ཏེ། དམ་པའི་ཆོས་ནི་སྤྱོད་པའི་ལུས། །ཅིག་ཤོས་ཆེད་དུ་གནོད་པར་མི་བྱ་བ་ཡིན་པ་དེའི་ཕྱིར། སྙིང་རྗེའི་བསམ་པ་མ་དག་པར། །ལུས་འདི་གཏང་བར་མི་བྱ་སྟེ། །མོས་པས་སྤྱོད་པའི་སའི་སོ་སོའི་སྐྱེ་བོ་འགའ་ཞིག་ཀྱང༌། བདག་དང་གཞན་མཉམ་པ་ཉིད་བསམ་པ་མཚུངས་པར་འགྱུར་བ་དེ་
ཡོད་ན། དེས་ཀྱང་སྲོག་བཏང་བ་ན་རྣམ་པ་འདིས་དེས་ཁྱད་པར་རྟོགས་པའི་ཕྱིར། ཉམས་ཤིང་ཞིག་པར་མི་འགྱུར་རོ། །དེ་དེ་ལྟར་མི་འཇིགས་པ་དང༌། ཟང་ཟིང་གི་སྦྱིན་པའི་སྤྱོད་པ་རྣམ་པར་བཤད་ནས། ཆོས་ཀྱི་སྦྱིན་པའི་རྣམ་པ་བསྟན་པའི་ཕྱིར་མ་གུས་པ་ལ་ཞེས་བྱ་བ་ལ་སོགས་པ་སྨོས་ཏེ། མ་གུས་པ་ལ་ཆོས་མི་བཤད། །གུས་པ་དང་བཅས་པ་ཡིན་ན་ཡང༌། །མིན་བཞིན་དུ་སྟེ་རང་བཞིན་དུ་གནས་པ་ཡིན་པ་མགོ་བོ་གཡོགས་པ་ལ་སོགས་པ་ལ་བཤད་པར་མི་བྱའོ། །ནད་པ་ལ་ནི་བཤད་པར་བྱ་བ་ཡིན་ནོ། །དམན་ལ་སྟེ་སེམས་ཆུང་བདག་ལ་ཐེག་པ་ཆེན་པོ་ཟབ་པ་དང༌། རྒྱ་ཆེ་པའི་ཆོས་བཤད་པར་མི་བྱའོ། །རིག་པའི་སྐྱེས་པ་མེད་པར་བུད་མེད་ལ་ཡང་ཐེག་པ་ཆེན་པོ་དང་ཆོས་གཞན་བཤད་པར་མི་བྱའོ། །དམན་པ་དང་མཆོག་གི་ཆོས་རྣམས་དང༌། ཐེག་པ་ཆེན་པོ་དང་གཞན་ལ་ཡང་གུས་པ་དང་བཅས་པར་སྤྱད་པར་བྱའོ། །རྒྱ་ཆེན་ཆོས་ཀྱི་སྣོད་གྱུར་པ་སྟེ། སངས་རྒྱས་ཀྱི་རིགས་ཅན་དམན་པའི་ཆོས་ལ་སྦྱར་བར་མི་བྱའོ། །སྤྱོད་པ་ཡོངས་སུ་སྤངས་ནས་ནི། །མདོ་དང་སྔགས་ཀྱིས་འདྲིད་མི་བྱ། །སྡོམ་པ་ནི་སྤྱོད་པའི་གཙོ་བོ་ཉིད་ཡིན་པའི་ཕྱིར་རོ། །དེ་དག་གིས་སྤྱོད་པ་བརྟན་པོ་ལ་སྦྱར་བར་བྱའོ་ཞེས་བྱ་བའི་ཐ་ཚིག་གོ །ཚུལ་ཁྲིམས་ལ་གནས་པའི་སྤྱོད་པ་བསྟན་པའི་ཕྱིར། སོ་ཤིང་ཞེས་བྱ་བ་ལ་སོགས་པ་སྨོས་ཏེ། མཆིལ་མ་ནི་ཁ་ཆུའོ། །དོར་བ་ན་ནི་དགབ་པར་བྱ། །ལག་པ་ལ་སོགས་པས་དགབ་པར་བྱའོ། །དེ་ཡང་མི་འདོད་པ་ན་གཅིག་ལ་སོགས་པའང་ལོངས་སྤྱོད་པའི། ཆུ་དང་ཐང་ལ་དོར་བ་སྨད། །ཁ་བཀང་བ་དང་སྒྲ་བཅས་དང༌། །ཁ་གདངས་ནས་ནི་བཟའ་མི་བྱ་སྟེ། །ཁ་བཀང་བ་མེད་པ་ཡང་སྒྲ་བཅས་དང༌། །སྒྲ་མེད་ན་ཡང་ཁ་གདངས་ནས་ནི་སྟེ་ཁ་རབ་ཏུ་ཕྱེ་ནས་བཟའ་བར་མི་བྱའོ། །རྐང་པ་བརྐྱང་སྟེ། རྐང་པ་རབ་ཏུ་བརྐྱང་བ་ཉིད་ཀྱིས་མི་འདུག་ཅིང་གནས་པར་མི་བྱའོ། །རང་གི་ལག་པ་མཉམ་པར་མི་མཉེའོ། །བཞོན་པ་མལ་སྟན་གནས་དག་ཏུ། །བུད་མེད་གཞན་དང་གཅིག་མི་བྱ། །གཉིས་འགྲོགས་ནས་ཁྱིམ་དུ་འཇུག་པ་དང་མལ་སྟན་དང་སྟན་གཅིག་ལ་འཇུག་པ་དང་གནས་དབེན་པའི་ནང་ངམ་དགོན་པ་དག་ཏུ་ཡང་གཉིས་འགྲོགས་པར་མི་བྱའོ། །བརྟུལ་ཞུགས་ཅན་གྱིས་ཆུང་མར་འཚེ་བར་བྱེད་པ་གང་ཡིན་པ་དེ་ཡང༌། ཆོས་ཀྱི་རྒྱལ་པོ་ལ་སོགས་པ་ལས་བསྲུང་བར་བྱའོ། །བུད་
མེད་གཞན་ཐམས་ཅད་ནི་མདོར་བསྡུས་པ་ཡིན་པའི་ཕྱིར། འཇིག་རྟེན་མ་དད་འགྱུར་བ་ཀུན། །མཐོང་དང་འདྲིས་པས་སྤང་བར་བྱ། །འདི་ལྟར་འགའ་ཞིག་གིས་ཀྱང༌། སོར་མོས་བརྡ་ནི་མི་བྱ་སྟེ། གུས་དང་བཅས་པའི་གཡས་པ་ནི། །ལག་པ་དག་ནི་ཀུན་གྱིས་ཀྱང༌། །བརྡ་བྱ་ཞིང༌། ལམ་ཡང་གུས་པ་དང་བཅས་པའི་ལག་པ་མ་ལུས་པས་དེ་ལྟར་བསྟན་པར་བྱའོ། །ལག་པ་ཤས་ཆེར་བསྐྱོད་མིན་ཏེ། །ལག་པ་ཀུན་ནས་བསྐྱོད་པས་ནིའོ། །ཅུང་ཟད་བསྐྱོད་ཅིང་སྒྲ་བསྒྲགས་ལ། །སེ་གོལ་ལ་སོགས་བརྡ་བྱ་སྟེ། །སོགས་པའི་སྒྲས་ནི་ལག་པ་གཡས་པའི་བརྡའི་བརྡ་ལ་སོགས་པ་གཟུང་ངོ༌། །གཞན་མ་བསྡམས་པར་འགྱུར་རོ། །བཅས་པའི་ཁ་ན་མ་ཐོ་བའི་ཡན་ལག་གང་དང་གང་གིས་སློབ་པར་མི་འགྱུར་བ་དེ་དང་དེ་ཚུལ་ཁྲིམས་འཆལ་བར་འགྱུར་རོ། །ཇི་ལྟར་ཉལ་བར་བྱ་ཞེ་ན། མགོན་པོ་ཞེས་བྱ་བ་ལ་སོགས་པ་སྨོས་ཏེ། མགོན་པོ་མྱ་ངན་འདས་གཟིམས་ལྟར། །མགོན་པོ་སྟེ་སྟོན་པ་མྱ་ངན་ལས་འདས་པའི་ཕྱིར། སྐུའི་གཡས་ཀྱི་ལོགས་པ་བཅིང་ཞབས་ཀྱིས་ཞབས་མནན་པས་སེང་གེ་བཞིན་དུ་ཀུན་ནས་མཐོ་བ། སེམས་དང་ཆོས་གོས་དང་ཡན་ལག་དང་ཐུགས་རྣམ་པར་མི་གཡེངས་པ། བདག་གིར་གྱུར་པ་གཟིམས་པ་དེ་བཞིན་དུའོ། །འདོད་པའི་ཕྱོགས་སུ་སྔས་བསྟན་བྱ། །ཤེས་བཞིན་ཏེ་ཇི་ལྟར་དགེ་བ་བཙལ་བར་བྱ། །ཞེས་སྣང་བ་ལ་སོགས་པའི་འདུ་ཤེས་ཀྱི་མྱུར་དུ་ལྡང་བ་ནི་ཐུན་ཕྱི་མ་ལ་དགེ་བའི་དོན་དུ་མྱུར་དུ་ལྡང་བའི་འདུ་ཤེས་ཐོག་མ་ཉིད་དུ་ངེས་པར་སྦྱར། རེ་ཞིག་དང་པོ་དེ་ལྟར་གྱུར་པས་གདོན་མི་ཟ་བར་ཉལ་བར་བྱའོ། །ཕྱིས་ནུས་པ་མེད་པ་ན་ཇི་ལྟར་འདོད་པ་ཅུང་ཟད་ཀྱང༌། ཐོག་མར་གདོན་མི་ཟ་བར་ཞེས་བྱ་བ་དེ་ཅིའི་ཕྱིར་ཞེ་ན། ངེས་པར་སྦྱར་ཞེས་བྱ་བ་སྨོས་ཏེ། སྟོན་པའི་བཀའ་ཡིན་ནོ། །སྟོན་པས་དག་ཕ་འཕེལ་བར་བྱ་བའི་དོན་དུ་ངེས་པར་སྦྱར་བ་དེ་གནས་པ་ཡིན་ནོ། །བཟོད་པ་ལ་སོགས་པ་ལ་གནས་པ་ལ་སྤྱོད་པ་བཤད་པར་བྱའོ་སྙམ་པའི་དགོངས་པ་དང་ལྡན་པས་སྦྱིན་པ་དང་ཚུལ་ཁྲིམས་ལ་གནས་པའི་སྤྱོད་པ་དཔེར་མཛད་ནས། བྱང་ཆུབ་སེམས་དཔའི་ཞེས་བྱ་བ་ལ་སོགས་པས་མཇུག་བསྡུས་པ་ཡིན་ཏེ། སྤྱོད་པ་སྟེ། ལེགས་པར་སྤྱོད་པ་དང༌། ཀུན་སྤྱོད་བཞེས་བྱ་བའི་བར་དུའོ། །བྱང་ཆུབ་སེམས་དཔའ་རྣམས་ཀྱི་སྤྱོད་པ་སྟེ། ཚད་མེད་པར་ནི་སྟེ། བཅོམ་ལྡན་འདས་
ཀྱིས་རབ་ཏུ་དབྱེ་བ་གྲངས་མེད་པའི་དཔེས་གསུངས་པ་ལས། གལ་ཏེ་དེ་ཐམས་ཅད་ནན་ཏན་དུ་བྱ་བར་མི་ནུས་ན། སེམས་སྤྱོད་པའི་སྤྱོད་པ་ནི་བཤད་པ། ངེས་པར་དེ་སྲིད་སྦྱར་བར་བྱ། །གཞན་པ་ཉིན་མོ་དང་མཚན་མོ་ནི་ཉིན་མོ་དང་མཚན་མོ་སྟེ། རྟག་ཏུ་མ་ཡིན་གྱི། འོན་ཀྱང་ལན་གསུམ་དུ་ཞེས་བྱ་བ་ནི་ཐུན་གསུམ་དང་དུས་གསུམ་དུའོ། །ཐུན་པར་ལ་ཡང་ཉལ་བའི་སྔས་དང༌། ཟས་ཀྱི་འོག་ཏུ་སེམས་སྦྱོང་བ་ལ་རྒྱུན་གྱི་འཇུག་པས་རབ་ཏུ་འཇུག་པར་བྱ་ཞིང་སྤྱད་པར་བྱའོ། །ཕུང་པོ་གསུམ་པ་སྟེ། སྡིག་པ་བཤགས་པ་དང༌། བསོད་ནམས་ཀྱི་རྗེས་སུ་ཡི་རང་བ་དང༌། ཡོངས་སུ་བསྔོ་བའོ།། དེ་ལ་དུས་གསུམ་ལ་ཡང་ལན་གསུམ་འདོན་པ་ལ་འཇུག་པར་བྱའི། ཉིན་མོ་དང་མཚན་མོ་སེམས་སྤྱོད་པ་འབའ་ཞིག་མ་ཡིན་ནོ་ཞེས་བྱ་བའི་ཐ་ཚིག་གོ །རེ་ཞིག་སེམས་སྦྱོང་བའི་ཐབས་དེས་ཡིད་ཀྱིས་ལྟུང་བར་མི་འགྱུར་རོ། །ལྷག་མ་ལུས་དང་ངག་གི་ལྟུང་བ་དག་ཀྱང་མཚུངས་པར་མི་འགྱུར་བ་དང༌། བྱུང་བ་དག་ཀྱང་ཕྱིར་བཅོས་པར་བྱའོ། །དེ་བས་ན། རྒྱལ་དང་བྱང་ཆུབ་སེམས་བརྟེན་པ་སྟེ། དེ་ནི་བྱང་ཆུབ་སེམས་དཔའ་དང་རྒྱལ་པ་ལ་བརྟེན་པ་དེའི་ཕྱིར། ཆོས་བཞི་པའི་མདོ་ལས། རྟེན་གྱི་སྟོབས་ཀྱིས་སྡིག་པ་བྱས་ཤིང་བསགས་པ་ཟིལ་གྱིས་གནོན་པར་འགྱུར་རོ་ཞེས་གསུངས་སོ། །གནས་སྐབས་ཐམས་ཅད་དུ་བསླབ་པ་ཐམས་ཅད་ལ་བསླབ་པར་བྱའོ། །འོན་ཀྱང་རང་ངམ་གཞན་གྱི་ཞེས་བྱ་བ་ལ་སོགས་པ་སྨོས་སོ། །ཀུན་ནས་ཉོན་མོངས་པས་ཀྱང་བསླབ་པར་བྱ་ཞེ་ན། འཁོར་བ་ལ་གཞོལ་བའི་ཡིད་ཀྱིས་མི་བྱའོ་ཞེས་བསྟན་པའི་ཕྱིར། རྒྱལ་སྲས་རྣམས་ཀྱིས་མི་བསླབ་པ། །ཞེས་བྱ་བ་ལ་སོགས་པ་སྨོས་སོ། །དངོས་སམ་ཡང་ན་བརྒྱུད་ཀྱང་རུང༌། །ཞེས་བྱ་བའི་སྡོམ་པ་དང༌། དགེ་བ་ཆོས་སྡུད་པ་དག་གིས་སེམས་ཅན་གྱི་དོན་བྱེད་པ་ལས་གཞན་མི་སྤྱད། སེམས་ཅན་གྱི་དོན་སྤྱོད་པ་དེ་ཉིད། །སེམས་ཅན་ཁོ་ནའི་དོན་གྱི་ཕྱིར། །ཐམས་ཅད་བྱང་ཆུབ་ཕྱིར་ཏེ། སངས་རྒྱས་པའི་ཆེད་དུ་བསྔོའོ། །བྱང་ཆུབ་ནི་དགེ་བའི་བཤེས་གཉེན་ལ་རག་ལས་པ་ཡིན་ནོ་ཞེས་བསྟན་པའི་ཕྱིར། རྟག་པར་ཞེས་བྱ་བ་ལ་སོགས་པ་སྨོས་སོ། །དགེ་བའི་བཤེས་གཉེན་ཅི་འདྲ་བ་ཞིག་ཅེ་ན། ཐེག་ཆེན་ཞེས་བྱ་བ་སྨོས་ཏེ། འདིས་འགྲོ་བར་བྱེད་པས་ན་ཐེག་པ་སྟེ། ཟབ་པ་དང་རྒྱ་ཆེ་བ་དག་གིས་སོ། །ཐེག་པ་ཡང་ཡིན་ལ་
ཆེན་པོ་ཡང་ཡིན་པས་ན་ཐེག་ཆེན་སྟེ། ས་དང་ཕ་རོལ་ཏུ་ཕྱིན་པ་དེ་དག་གསལ་བར་བྱེད་པའི་བཀའོ། །དེའི་དོན་ལ་མཁས་པ་ནི་རིག་པའོ། །བྱང་ཆུབ་སེམས་དཔའི་བརྟུལ་ཞུགས་ནི་སྤྱོད་པ་སྟེ། སེམས་སྤྱོད་པའི་སྤྱོད་པའོ། །དེ་མ་ཉེས་པར་བྱའོ་ཞེས་བསྟན་པའི་ཕྱིར། དཔལ་འབྱུང་བ་ཡི་རྣམ་ཐར་ལས་ཀྱང་ཞེས་བྱ་བ་སྨོས་ཏེ། ཀྱང་གི་སྒྲས་ནི་སངས་རྒྱས་ཀྱིས་གསུངས་པ་གཞན་ལ་ཡང་བསླབ་པར་བྱའོ། །དཔལ་འབྱུང་བའི་རྣམ་པར་ཐར་པ་ཞེས་བྱ་བ་འདི་དང༌། སངས་རྒྱས་བཀའ་སྩལ་གཞན། མདོ་སྡེ་བཀླགས་ནས་ཤེས་པར་བྱ། །མདོ་སྡེ་རྣམས་ལ་བསླབ་པར་སྣང༌། །དེ་བས་མདོ་སྡེ་བཀླག་པར་བྱ། །ནམ་མཁའི་སྙིང་པོའི་མདོ་སྡེ་ནི། །ཐོག་མ་ཉིད་དུ་བལྟ་བྱ་སྟེ། །རྩ་བའི་ལྟུང་བ་བརྟག་པར་བྱའོ། །སྡོམ་པ་འཇིག་པར་བྱེད་པའི་ལྟུང་བ་དག་ནི། ནམ་མཁའི་སྙིང་པོའི་མདོ་ལས་ཕལ་ཆེར་གསུངས་པ་ཡིན་ན་དེ་ལྟར་ན་བལྟ་བར་བྱའོ།། གང་ཕྱིར་རྟག་ཏུ་སྤྱོད་པ་ནི། །དེ་བས་རྒྱ་ཆེར་རབ་སྟོན་པས། །བསླབ་པ་ཀུན་ལས་བཏུས་པ་ཡང༌། །དེས་པར་ཡང་དང་ཡང་དུ་བལྟ། །འཕགས་པ་ནཱ་གཱ་རྫུན་དང༌། ཁོ་བོའི་མདོར་བསྡུས་པའི་འདུལ་བ་བསྟན་པའི་ཕྱིར། གང་ལས་ཞེས་བྱ་བ་ལ་སོགས་པ་སྨོས་ཏེ། གང་ལ་མཆོད་རྟེན་གྱི་ལས་དང་ཐེག་པ་ཆེན་པོ་ལ་སོགས་པ་ཡུལ་དང་དུས་དང་གནས་སྐབས་གང་ལ་བླ་མ་དང༌། གཞན་དག་གིས་འདི་འདིར་མི་བྱའོ་ཞེས་བཀག་པ་དང༌། འབབ་སྟེགས་ཀྱི་ཁྲུས་ལ་སོགས་པའི་རིགས་པ་མ་ཡིན་པ་ལ་ངེས་པར་སྦྱར་བ་དག་འདིར་འདི་ཡིན་ནོ་ཞེས་ཏེ། འཇིག་རྟེན་སེམས་ནི་བསྲུང་བའི་ཕྱིར། །དེ་ལ་བསླབ་པ་མཐོང་ནས་ཡང་དག་པར་སྤྱད། ཤེས་བཞིན་གྱིས་སེམས་སྦྱང་བ་བཤད་ཟིན་ཏོ། །ཤེས་བཞིན་གྱི་མདོར་བསྡུས་ནས་མཚན་ཉིད་དང་རྒྱུ་གང་ཡིན་ཞེ་ན། ལུས་དང་སེམས་ཀྱི་ཞེས་བྱ་བ་ལ་སོགས་པ་སྨོས་ཏེ། འོ་ན་མདོ་ལ་སོགས་པ་བརྗོད་པར་བྱ་བ་ཉིད་ཡིན་ནམ་ཞེ་ན། ལུས་ཀྱིས་འདི་དག་སྤྱད་པར་བྱ། །ཞེས་བྱ་བ་ལ་སོགས་པ་སྨོས་པ་ཡིན་ནོ། །བྱང་ཆུབ་སེམས་དཔའི་སྤྱོད་པ་ལ་འཇུག་པའི་ལེགས་པར་སྦྱར་བ་ལས་ཤེས་བཞིན་བསྲུང་བ་ཞེས་བྱ་བ་སྟེ་ལེའུ་ལྔ་པའོ།། །།
ཚུལ་ཁྲིམས་ཀྱི་དེ་མ་ཐག་ཏུ་བཟོད་པ་བསྟན་པའི་ཕྱིར། བསྐལ་པ་སྟོང་དུ་ཞེས་བྱ་བ་ལ་སོགས་པ་སྨོས་ཏེ། བསྐལ་པ་སྟོང་དུ་བསགས་པ་ཡི། །སྔར་བསྟན་པའི། སྦྱིན་དང་བདེ་གཤེགས་མཆོད་ལ་སོགས། །བདེ་བར་གཤེགས་པ་ནི་དཀོན་མཆོག་གསུམ་གྱི་ཉེ་བར་མཚོན་པའོ། །མཆོད་པ་ནི་ཀུན་ཏུ་སྤྱད་པའོ། །དེ་ཡང་བསྟོད་པ་ནི་ཕྱག་འཚལ་བ་དང་སྐྱབས་སུ་འགྲོ་བ་ལ་སོགས་པའི་ཉེ་བར་མཚོན་པ་ཡིན་ནོ། །ལེགས་སྤྱད་ནི་ཚུལ་ཁྲིམས་ཏེ་གང་ཡིན་དེ་ཀུན་ཀྱང༌། ཁོང་ཁྲོ་གཅིག་གིས་འཇོམས་པར་བྱེད། །བཅོམ་ལྡན་འདས་ཀྱིས་ཁོང་ཁྲོ་ཞེས་བྱ་བས་ནི་བསྐལ་པ་སྟོང་དུ་བསགས་པའི་བསོད་ནམས་དག་ཀྱང་འཇོམས་པར་བྱེད་ཅིང་འབྲས་བུ་མེད་པར་བྱེད་དོ། །རྟེན་བསྲེགས་ནས་གཞན་སྲེག་པར་བྱེད་དོ། །དེ་བས་ན་ཞེ་སྡང་ལ་ཁོང་ཁྲོ་བ་ཞེས་བྱའོ་ཞེས་གསུངས་སོ། །ཞེ་སྡང་ནི་ཉེ་བར་མཚོན་པ་ཡིན་ཏེ། དེའི་རྒྱུ་མཐུན་པ་ནི་ཁྲོ་བ་ཡིན་ལ། དེའི་གཉེན་པོའི་ཕྱོགས་ནི་བཟོད་པ་ཡིན་ཏེ། དེ་ལྟར་ན་ཀུན་རྫོབ་དང༌། དོན་དམ་པའི་བདེན་པ་འཆད་པར་འགྱུར་བའི་ཚུལ་དམིགས་པ་ལ་བརྟེན་པ་བསྒོམ་པ། སྣ་ཚོགས་ཚུལ་གྱིས་བསྒོམ་པར་བྱ། །ཇི་ལྟར་ན་ཞེ་སྡང་ལྟ་བུའི་ཁོང་ཁྲོ་མེད་པ་ཡིན་ཞེ་ན། འདི་ལྟར་རེ་ཞིག་སྐྱེ་བ་འདི་ལ་ཡང༌། ཞེ་སྡང་ཟུག་རྔུའི་སེམས་འཆང་ན། །ཡིད་ནི་ཞི་བའི་ཉམས་མི་མྱོང༌། །ཞི་བ་དང་བདེ་བ་མི་མྱོང་བ་དེའི་ཕྱིར། ཡིད་ལུས་ངག་དགའ་བ་དང་བདེ་བའང་མི་མཐོང་ལ། གཉིད་མི་འོང་ཞིང་བརྟན་མེད་འགྱུར་རོ། །དེ་ལྟར་ན་གང་དག་ནོར་དང་བཀུར་སྟི་ཡིས། །རྙེད་པ་དང་བཀུར་སྟི་དག་གིས། དྲིན་བྱིན་དེ་ལ་བརྟེན་གྱུར་པ། །དེ་དག་ཀྱང་ནི་སྡང་ལྡན་པའི། །ཞེ་སྡང་གདུལ་དཀའ་བ། རྗེ་དཔོན་དེ་ལ་གསོད་པར་རྒོལ་བར་འདོད་པ། དེའི་མཛའ་བ་ཤེས་ཞེས་བྱ་བ་ལ་སོགས་པ་ནི་རྟོགས་སླའོ། །ཁྲོ་བའི་དག་ཡིས་དེ་ལ་སོགས། །སྡུག་བསྔལ་དག་ནི་འདི་དང་གཞན་དུ་བྱེད་པར་འགྱུར་དེའི་ཕྱིར་དགྲ་བོའི་འདུ་ཤེས་ཀྱིས། གང་ཞིག་བསྒྲིམས་ཏེ་ཁྲོ་བར་ཏེ། ཞེ་སྡང་འཇོམས་པ། དེ་ནི་འདི་དང་གཞན་དུ་བདེ། །འདིའི་རྒྱུ་མ་བཅོས་པར་འདི་གཞོམ་པར་ནུས་པ་མ་ཡིན་ལ། འདིའི་རྒྱུ་ཡང་སྡུག་བསྔལ་
ཡིན་ལ། དེ་ཡང་ཞེ་སྡང་བག་ལ་ཉལ་བ་ཡིན་ནོ་ཞེས་བསྟན་པའི་ཕྱིར། མི་འདོད་བྱས་དང་འདོད་པ་ཡི། །གེགས་བྱས་པ་ལས་བྱུང་གྱུར་པ། །ཡིད་མི་བདེ་བར་གྱུར་པའི་ཟས་ཏེ། ཡིད་མི་བདེ་བའི་ཟས་རྙེད་ནས། །ཞེ་སྡང་བརྟས་ཏེ་བདག་འཇོམས་སོ། །གང་གི་ཕྱིར་དེ་ལྟར་ཡིན་པ་དེའི་ཕྱིར། བདག་གིས་དགྲ་བོ་དེའི་ཞེས་བྱ་བ་ལ་སོགས་པའི་ལས་སུ་བྱ་བ་དག་གོ །ཇི་ལྟར་དེའི་ཟས་གཞོམ་པར་བྱ་བ་ཡིན་ཞེ་ན། ཅི་ལ་བབ་ཀྱང་བདག་གིས་ནི། །ཞེས་བྱ་བ་ལ་སོགས་པ་སྨོས་ཏེ། དགའ་བ་ནི་ཡིད་བདེ་བའོ། །དེ་འཁྲུགས་པ་ནི་ཡིད་མི་བདེ་བའོ། །དེ་ལ་ཡང༌། མི་དགའ་བྱས་ཀྱང་འདོད་མི་འགྲུབ། །འོན་ཀྱང་དགེ་བ་དག་ནི་ཉམས་པར་འགྱུར་རོ། །ཡིད་མི་བདེ་བར་རིགས་པ་མ་ཡིན་ནོ་ཞེས་བསྟན་པའི་ཕྱིར། གལ་ཏེ་བཅོས་སུ་ཡོད་ན་ནི། །ཞེས་བྱ་བ་ལ་སོགས་པ་སྨོས་ཏེ། རྟོགས་པར་སླའོ། །མི་འདོད་པ་ཞེས་བཤད་པ་དེ་ལ། མི་འདོད་པ་ཉིད་གང་ཞེ་ན། བདག་དང་བདག་གི་བཤེས་རྣམས་ལ། །སྡུག་བསྔལ་ཞེས་བྱ་བ་ལ་སོགས་པ་སྨོས་ཏེ། བརྙས་པ་ནི་ཁྱད་དུ་གསོད་པའོ། །བདག་གམ་བཤེས་ལ་སོགས་པ་ལ་སྡུག་བསྔལ་ལ་སོགས་པ་ནི་མི་འདོད་པའོ། །དགྲ་དང་འབྲེལ་པ་ནི་སྡུག་བསྔལ་ལ་སོགས་པ་དེ་ལས་བཟློག་པ་འབྱུང་སྟེ། བཟློག་པ་དེ་ལས་བདེ་བ་ལ་སོགས་པ་ལ་མི་འདོད་པ་འབྱུང་ངོ༌། །དེ་ལ་བཟོད་པ་ནི་རྣམ་པ་གསུམ་སྟེ། སྡུག་བསྔལ་བརྣག་པར་ནུས་པ་དང༌། །གཞན་གྱི་དོན་ལ་བཟོད་པ་དང༌། །ཆོས་ལ་སྤྱོད་པའོ། །དེ་ལ་སྡུག་བསྔལ་བརྣག་པར་ནུས་པའི་དབང་དུ་བྱས་ནས། བདེ་བའི་རྒྱུ་ནི་རེས་འགའ་འབྱུང༌། །ཞེས་བྱ་བ་ལ་སོགས་པ་སྨོས་ཏེ། མཁྲིས་པ་ལ་སོགས་པའི་བར་དུའོ། །དེ་ལ་ངེས་འབྱུང་ནི་སྡུག་བསྔལ་ལས་གྲོལ་བ་སྟེ། སྡུག་བསྔལ་མེད་པར་མ་ཡིན་ནོ། །དེ་བས་ན་ཀྱེ་སེམས་ཁྱོད་སྡུག་བསྔལ་ཐམས་ཅད་བརྣག་པའི་ཕྱིར་བརྟན་པར་མནོས་སོ། །དེ་ལྟར་བསམས་ནས། དཀའ་བཟློག་དད་པའི་མི་དག་ཀྱང༌། །ཞེས་བྱ་བ་ནི་ལག་པ་ལ་སོགས་པ་ཐར་པའི་དོན་དུ་བསྲེགས་པ་དང༌། བཅད་སོགས་སྡུག་བསྔལ་དོན་མེད་གནོད། །དོན་ཆུང་བ་ཉིད་ཀྱི་
ཕྱིར་དང༌། སྡིག་པའི་དོན་ཉིད་ཡིན་པའི་ཕྱིར་རོ། །རང་དང་གཞན་གྲོལ་བར་བྱ་བའི་དོན་དུ་དོན་ཆེན་པོ་ལ་བརྟན་པར་བྱ་བའི་ཕྱིར། བདག་ནི་དེ་ལ་ཅི་ཞིག་སྔར། །གནོད་པ་ཆེན་པོ་ཉིད་ཡོད་པའི་ཕྱིར་རོ་ཞེ་ན། གོམས་པ་ཞེས་བྱ་བ་ལ་སོགས་པ་སྨྲོས་ཏེ། མི་བཟོད་པ་ནི་ཆེས་ཤིན་ཏུ་སྡུག་བསྔལ་བར་འགྱུར་རོ་ཞེས་བསྟན་པའི་ཕྱིར། སྦྲུལ་དང་ཞེས་བྱ་བ་ལ་སོགས་པ་སྨོས་ཏེ། ཇི་ལྟར་བཟོད་པར་བྱ་ཞེ་ན། ཚ་གྲང་ཞེས་བྱ་བ་ལ་སོགས་པ་སྨོས་སོ། །དེའི་ཕྱིར་སེམས་ཉིད་བརྟན་པོར་བྱའོ་ཞེས་བྱ་བ་ལ་སོགས་པ་བསྟན་པའི་ཕྱིར། ལ་ལ་བདག་གི་ཁྲག་མཐོང་ན། །ཞེས་བྱ་བ་ལ་སོགས་པ་སྨོས་ཏེ། སྡུག་བསྔལ་གྱི་སྡུག་བསྔལ་དང༌། གཡུལ་འགྱེད་ཅིང་རྒྱལ་བདེ་ལྟར་ན། དེ་བས་སྡུག་བསྔལ་ཁྱད་བསད་ཅིང༌། །སྡུག་བསྔལ་རྣམས་ཀྱིས་མི་ཚུགས་བྱའོ། །ཇི་ལྟར་བྱ་ཞེ་ན། མཁས་པས་སྡུག་བསྔལ་བྱུང་ཡང་ནི། །ཞེས་བྱ་བ་ལ་སོགས་པ་སྨོས་ཏེ། སེམས་ཀྱི་དང་སྟེ་རབ་ཏུ་དང་བའོ། །བྱང་ཆུབ་སེམས་དཔའི་འཐབ་མོ་དང་ནི་ཉོན་མོངས་དང་སྟེ་ཞེ་སྡང་ལ་སོགས་པ་དང༌། གཡུལ་འགྱེད་ཚེ་ན་གནོད་པ་མང༌། །དེ་བཞིན་དུ་སྡུག་བསྔལ་ཐམས་ཅད་ཁྱད་བསད་ནས། །ཞེས་བྱ་བ་ལ་སོགས་པ་དང༌། ཞེ་སྡང་ལ་སོགས་པ་དགྲ་བོ་སྟེ། དགྲ་བོ་དག་འཇོམས་པ་ནི་རེ་ཞིག་དེ་དག་རྒྱལ་བྱེད་དཔའ་བོ་སྟེ། ལྷག་མ་རོ་ལ་གསོང་པའོ། །སྡུག་བསྔལ་བཟོད་པའི་ཕྱིར་ཡོན་ཏན་ཏེ། ཡོན་ཏན་གཞན་དང་གཞན་དག་སྟེ། གང་ལ་སྐྱོ་བས་དྲེགས་བས་སེལ་བར་བྱེད་པར་འགྱུར་རོ། །དེ་ལྟར་སྡུག་བསྔལ་བརྣག་པར་ནུས་པ་ཀུན་རྫོབ་ཀྱི་བདེན་པའི་ཚུལ་གྱིས་བསྒོམས་ནས། གཞན་གྱི་དོན་ལ་བཟོད་པ་བསྒོམ་པར་བྱ་བའི་ཕྱིར། མཁྲིས་པ་ཞེས་བྱ་བ་ལ་སོགས་པ་ལ། མཁྲིས་པ་དང༌། བད་ཀན་དང༌། རླུང་ལ་སོགས་པ་དང༌། ཡུལ་དང་དུས་ཀྱི་ནད་ཆེན་པོ་སྡུག་བསྔལ་གྱི་རྒྱུ་ཉིད་ཡིན་པའི་ཕྱིར། སྡུག་བསྔལ་འབྱུང་གནས་ཆེ་ལ་མི་ཁྲོ་བར། སེམས་ཡོད་རྣམས་ལ་སྟེ། བདག་ལ་གནོད་པ་བྱེད་པ་རྣམས་ལའོ། །ཅི་སྟེ་ཁྲོ་ཞེས་བྱ་བ་ནི། །རྒྱུ་ཅིའི་ཕྱིར་ཁྲོ་བའོ། །མཁྲིས་པ་ལ་སོགས་པ་ནི་སེམས་ཡོད་པ་མ་ཡིན་ཏེ།
རྐྱེན་ལས་བྱུང་བ་ཉིད་ཡིན་པའི་ཕྱིར། གནོད་པའི་བསམ་པ་མེད་པ་ཡིན་ནོ། །ཡུལ་ལ་སོགས་པ་ཡང་གནོད་པའི་བསམ་པ་མེད་པ་ཉིད་ཀྱི་ཕྱིར། སེམས་དང་ལྡན་པ་མ་ཡིན་ཏེ་རྐྱེན་ལས་བྱུང་བ་ཡིན་པ་དེ་ལྟར་ན། དེ་དག་ལ་ཁྲོ་བར་མི་འགྱུར་གྱི། གནོད་པའི་བསམ་པ་ཡོད་པ་དག་ལ་ཇི་ལྟར་ནི་མི་འགྱུར་ཞེ་ན། དེ་དག་ཀུན་ཀྱང་རྐྱེན་གྱིས་བསྐུལ། །ཞེས་བྱ་བ་ལ་སོགས་པ་སྨོས་ཏེ། བྱེད་པ་པོ་འགོག་པར་འགྱུར་བ་ཉིད་ཀྱི་ཕྱིར་རོ། །ལྷག་མ་ནི་ཆོས་ལ་སྤྱོད་པའི་བཟོད་པ་ཡིན་ནོ། །རྐྱེན་ལས་བྱུང་བ་ཉིད་ཀྱི་ཚུལ་ལ་བརྟེན་པ་ཇི་ལྟར་རྐྱེན་གྱིས་བསྐུལ་བ་ཡིན་ཞེ་ན། དཔེར་ན་མི་འདོད་བཞིན་དུ་ཡང༌། །ཞེས་བྱ་བ་ལ་སོགས་པ་སྨོས་ཏེ། ནད་འདི་མཁྲིས་པ་ལས་འབྱུང་བར་འགྱུར་ཞིང༌། ཉོན་མོངས་པ་ནི་རང་གི་ས་བོན་ལས་འབྱུང་བར་འགྱུར་རོ། །ཁྲོ་བར་བྱ་ཞེས་མ་བསམས་ཏེ། མངོན་པར་མི་འདོད་ཀྱང་རང་དབང་ནི་བྱེད་པ་པོ། རྐྱེན་རྣམས་ཏེ་ས་ལ་སོགས་པ་ཚོགས་པར་གྱུར་པ་ནི་རྐྱེན་རྣམས་ཚོགས་པའོ། །དེ་བཞིན་དུ་དམིགས་པ་ལ་སོགས་པ་དག་ཀྱང་སྟེ། རྐྱེན་རྣམས་ཀྱི་ཚོགས་པ་དེ་དག་མྱུ་གུ་དང༌། རྣམ་པར་ཤེས་པ་ལ་སོགས་པ་དེ་དག་བསྐྱེད་པར་བྱ་ཞེས་པ་སེམས་པ་མེད། མྱུ་གུ་ལ་སོགས་པ་དེས་བསྐྱེད་དེ་ཡང་བདག་བསྐྱེད་ཅེས། སེམས་པ་ཡོད་པ་མ་ཡིན་ནོ། །གྲངས་ཅན་གྱི་གཙོ་བོར་བྱས་ཏེ། བྱེད་པ་སེམས་པ་མེད་པ་གང་ཡིན་པ་དེ་ལ་བདག་ཅེས་བརྟགས་མོད་ཀྱི་གཟེགས་ཟན་ལ་སོགས་པས་སོ། །རེ་ཞིག་དེ་ཉིད་བདག་གིས་འདི་འདྲའོ་ཞེས་སེམས་པ་ཉིད་མེད་པའི་ཕྱིར་ཆེད་དུ་བསམས་ཤིང་འབྱུང་བ་མེད་པ་ཡིན་ན། གཞན་ལྟ་སྨོས་ཀྱང་ཅི་དགོས། དེ་ལྟར་མི་འགྱུར་མོད་ཀྱི། སེམས་ཡོད་པ་ཉིད་དང་ལྡན་པ་ཉིད་ཀྱི་ཕྱིར། ཆེད་དུ་བསམས་ནས་འབྱུང་བར་འགྱུར་ལ། ཡོངས་སུ་གྱུར་ཅིང་འཁོར་བར་འགྱུར་གྱི། དེ་ཁོ་ན་ཉིད་དུ་ནི་རྟག་པ་ཉིད་ཀྱི་ཕྱིར་སྐྱེ་བ་མ་ཡིན་ནོ་ཞེ་ན། མ་སྐྱེས་པར་ནི་དེ་མེད་ན་ཞེས་བྱ་བ་སྨོས་ཏེ། གང་མ་སྐྱེས་པ་དེ་ནི་ཡོད་པ་མ་ཡིན་ཏེ། དཔེར་ན་ནམ་མཁའ་ལྟ་བུའོ། །གཙོ་བོ་ལ་སོགས་པ་ཡང་དེ་བཞིན་ནོ། །འདི་ནི་གང་གི་ཕྱིར་ཏེ། དེའི་ཚེ་སྐྱེ་བར་འདོད་པ་གང་སྟེ། འཁོར་བ་འམ་ཡོངས་སུ་གྱུར་པའམ།
དེ་སྟེ་མ་སྐྱེས་པའི་གནས་སྐབས་སུ་སྐྱེ་བ་ཡིན་པ་དེའི་ཚེ་ཡུལ་ལ་སྟེ། དགྲའི་ལུས་ལ་སོགས་པ་སྟེ། བྱེད་པ་པོ་ཉིད་དུ་རྟག་ཏུ་གཡེངས་གྱུར་པ་དང༌། དེ་ཁོ་ན་ཉིད་དུ་མེད་པ་ཉིད་ཀྱི་ཕྱིར་འགག་པར་འགྱུར་བའང་མ་ཡིན་ནོ། །འང་གི་སྒྲས་ནི་འབྱུང་བ་ཉིད་དུ་འགྱུར་བ་འང་མ་ཡིན་ཞིང་བྱེད་པའང་མ་ཡིན་ནོ། །བདེན་ཏེ་རྟག་པ་ཉིད་ཀྱི་ཕྱིར་ཡིན་གྱི། མེད་པ་ཉིད་ཀྱི་ཕྱིར་ནི་མ་ཡིན་ནོ་ཞེ་ན། ཅི་སྟེ་བདག་དེ་རྟག་ན་ཡང༌། །ཞེས་བྱ་བ་སྨོས་ཏེ། ཡང་གི་སྒྲས་ནི་གཙོ་བོ་ཡང་ངོ༌། །ནམ་མཁའ་ནི་ནམ་མཁའོ། །རྐྱེན་གཞན་དང་ལྡན་པ་ན་དེ་བྱེད་པ་དང་བཅས་པར་འགྱུར་རོ་ཞེ་ན། རྐྱེན་རྣམས་གཞན་དང་ཕྲད་ན་ཡང༌། །ཞེས་བྱ་བ་སྨོས་ཏེ། དེ་ལྟར་ན་གང་ཞིག་འགྱུར་བ་མེད་ལ་ཅི་བྱར་ཡོད། །ངོ་བོ་སྔོན་བཞིན་དུ་འཕོ་བ་མེད་པར། བྱེད་པའི་ཚེ་ཡང་སྔོན་བཞིན་ན། །དེས་བྱེད་པོ་ཅི་ཞིག་བྱས། འོན་ཀྱང་དེའི་བྱེད་པ་ནི་རྐྱེན་གཞན་གྱིས་བྱས་པ་ཡིན་ནོ་ཞེ་ན། དེའི་བྱེད་པ་ཞེས་བྱ་བ་ལ་སོགས་པ་སྨོས་ཏེ། དེའི་བྱེད་པ་འདི་ཡིན་ཞེས། །འབྲེལ་པའི་རྒྱུ་ནི་གང་ཞིག་ཡོད། །དེའི་བདག་ཉིད་དེ་ལས་བྱུང་བ་མ་ཡིན་ཏེ། དེའི་བྱེད་པ་དེའི་བདག་ཉིད་དམ། འབྲས་བུ་མ་ཡིན་ནོ། །དངོས་པོར་གྱུར་པའི་འབྲེལ་པ་གང་ཡང་ཡོད་པ་མ་ཡིན་ཏེ། རྗེ་བོ་བྲན་ལ་སོགས་པའི་བྱ་ཞེས་བྱ་བ་ལ་སོགས་པ་སྨོས་ཏེ། རྟོག་པ་ཙམ་ཉིད་ཡིན་པ་དེའི་ཕྱིར་དེའི་འབྲེལ་པ་ཞེས་བྱ་བ་ཡང་ཡོད་པ་མ་ཡིན་ནོ། །དེ་ལྟར་དེ་བཤད་པའི་ཚུལ་གྱིས་ཐམས་ཅད་གཞན་གྱི་དབང་ཞེས་བྱ་བ་ནི་རྒྱུ་ལས་སྐྱེས་པའོ། །དེ་ཡི་དབང་གིས་དེ་དབང་མེད། །ཅེས་བྱ་བ་སྟེ་རྒྱུ་དེ་ཡང་གཞན་གྱི་དབང་སྐད་ཅིག་མ་ཡིན་པ་ན་ཆ་དང་བཅས་པ་བཞིན་དུ། རིམ་དང་རིམ་པ་མ་ཡིན་པ་བྱེད་པ་ཉིད་ཀྱི་ཕྱིར་རོ། །སྐད་ཅིག་མ་ཡིན་པས་བྱ་བ་ལས་སྔར་ཅིག་ཅར་བདག་ཉིད་ཐམས་ཅད་ཞིག་པས་མེད་པ་ཉིད་ཀྱི་ཕྱིར་རོ། །དེའི་ཕྱིར་སྤྲུལ་པ་ལྟ་བུའི་བྱེད་པ་མེད་པའི། །དངོས་པོ་ཀུན་ལ་ཁྲོ་མི་འགྱུར། །གང་གི་སྒོ་ནས་ཀྱང་ངོ༌། །འདི་ནི་དོན་དམ་པའི་ཚུལ་ལ་བརྟེན་པའི་ཆོས་ལ་སྤྱོད་པའི་བཟོད་པ་ཡིན་ཏེ། མོས་པས་སྤྱོད་པའི་ས་ལ་ནི་སྒྲའི་རྗེས་སུ་འགྲོ་བ་དང༌། ས་བདུན་པ་ལ་ནི་རྗེས་
སུ་མཐུན་པ་དང༌། ས་བརྒྱད་པ་ལ་སོགས་པ་ལ་ནི་མི་སྐྱེ་བའི་ཆོས་ལ་བཟོད་པའོ། །གལ་ཏེ་འོ་ན་སྤྲུལ་པ་བཞིན་དངོས་པོ་ཐམས་ཅད་བྱེད་པ་མེད་པ་ཡིན་པ་དེ་ལྟ་ན། གང་གི་ཕྱིར། གང་གིས་གང་ཞིག་བཟློག་བྱ་སྟེ། །ཁྲོ་བ་ལ་བཟློག་པའང་རིགས་པ་མིན་ཞེ་ན། དེ་ལ་བརྟེན་པའི་དངོས་པོ་ནི་དེ་ལ་བརྟེན་པ་ཉིད་དེ། སྒྱུ་མ་དང་འདྲ་བ་ནི་ཀུན་རྫོབ་ཀྱི་བདེན་པའི་ཚུལ་དེ་ལ་བརྟེན་ནས། ད་འདི་ལྟར་སྡུག་བསྔལ་རྣམས་རྒྱུ་ན་ཆད་འགྱུར་འདོད་མི་རིགས་ཏེ། །དེ་ལྟ་མ་ཡིན་ན། སྡུག་བསྔལ་ཡོད་པ་གང་གིས་རྒྱུན་ཆད་པར་འགྱུར་ཏེ། ཁྲོ་བ་ལས་ཀྱང་སྡུག་བསྔལ་མྱོང་བར་འགྱུར་རོ། །དེ་བས་དགྲ་འམ་ཞེས་བྱ་བ་ལ་སོགས་པ་ཚིགས་སུ་བཅད་པ་ནི་རྟོགས་པར་སླའོ། །དེ་ནི་འདོད་པ་ཡིན་ཏེ། འདི་ལྟར་ཚེར་མ་ལ་སོགས་པས་བདག་ཉིད་བདག་ཉིད་ཀྱིས་གནོད་པ་བྱེད་པ་མ་ཡིན་ནམ་ཞེ་ན། བག་མེད་པ་ཞེས་བྱ་བ་ལ་སོགས་པ་སྨོས་ཏེ། འདི་ནི་ཉོན་མོངས་པའི་དབང་དུ་གྱུར་པ་ཉིད་ཀྱི་ཚུལ་ལམ། རང་བཞིན་གྱི་ཚུལ་ཡིན་ནོ། །བག་མེད་པ་ལས་ནི་གཏི་མུག་ལ་སོགས་པ་དང༌། ཁྲོ་བ་ལས་ནི་ཞེ་སྡང་ལ་སོགས་པ་ཡིན་ནོ། །བུད་མེད་ལ་སོགས་ཐོབ་བྱའི་ཕྱིར། །རྔམ་ཞིང་ཟས་གཅོད་ལ་སོགས་བྱེད། །ཡུལ་ལ་ཆགས་པས་འགག་ཅིང་གཡང་ས་དག་ཏུ་འང་མཆོང༌། །ཡང་གི་སྒྲས་ནི་སྔར་བསྟན་པ་དང༌། གཞན་དུག་ལ་སོགས་པ་དག་གིས་གནོད་པར་བྱེད་ཅིང་འཇོམས་པར་བྱེད་པ་སྡུད་པའོ། །བསོད་ནམས་མ་ཡིན་པ་སྟེ། གཞན་ལ་འཚེ་བ་བདག་ལ་སྡུག་བསྔལ་འདོད་ནས་སྤྱོད་པ་ཡིས། །གང་ཚེ་དེ་ལྟར་བག་མེད་པ་ལ་སོགས་པ་ཉོན་མོངས་དབང་གྱུར་པས་གཞན་གྱི་དབང་དུ་གྱུར་པ་ཉིད་ཀྱི་ཕྱིར། བདག་སྡུག་ཉིད་ཀྱང་གསོད་བྱེད་པ། དེ་ཚེ་དེ་དག་གཞན་ལུས་ལ། །གཞན་དག་གིས་གཟུགས་ཕུང་དག་ལ་གནོད་པ་བྱེད་པ། །གནོད་མི་བྱེད་པར་ཇི་ལྟར་འགྱུར། །འོ་ན་ནི་དེ་དག་ལ་ཁྲོ་བར་རིགས་སོ་ཞེ་ན། ཉོན་མོངས་སྐྱེས་པས་ཞེས་བྱ་བ་ལ་སོགས་པ་སྨོས་ཏེ། རང་བཞིན་གྱི་ཚུལ་བསྟན་པའི་ཕྱིར། གཞན་ལ་འཚེ་བར་བྱེད་པ་འདི་ནི་ཉེས་པ་ཡིན་ཏེ། གློ་བུར་བ་ནི་རང་གི་ཚོགས་པའི་ཚོགས་
ལས་བྱུང་ནས་གཉེན་པོའི་ཚོགས་སྐྱེས་པར་གྱུར་ན་རྒྱུན་ཆད་པའི་ཕྱིར་རོ། །སེམས་ཅན་རང་བཞིན་ཏེ། ངོ་བོ་ཉིད་ཀྱིས་ངེས་པ་ནའང༌། འོ་ནའང་དེ་དག་ལ་ཁྲོ་བར་མི་རིགས་ཏེ། མཁའ་ལ་དུད་འཐུལ་དཀོན་པ་བཞིན། །ནམ་མཁའ་འམ་གོས་ལའོ། །ནམ་མཁའ་རང་བཞིན་གྱིས་དག་པ་ཡིན་ལ་དེའི་སྐྱོན་དུབ་ལ་སོགས་པ་གློ་བུར་བ་ཡིན་པའི་ནམ་མཁའ་ལ་ཁྲོ་བར་བྱ་བ་མ་ཡིན་པ་དེ་བཞིན་དུ་སེམས་ཅན་ལ་ཁྲོ་བར་བྱ་བར་རིགས་པ་མ་ཡིན་གྱི་ཉེས་པ་བྱེད་པ་ཡིན་ནོ་ཞེས་བསྟན་པའི་ཕྱིར། དབྱུག་པ་ཞེས་བྱ་བ་ལ་སོགས་པ་སྨོས་ཏེ། འཕེན་པར་བྱེད་པ་ཉིད་ཀྱི་ཚུལ་ཡིན་ན་སྡུག་བསྔལ་སྐྱེ་བའི་རྒྱུའི་གཙོ་བོ་དབྱུག་པ་ལ་སོགས་པ་བཀག་ཅིང་བོར་ནས་དེ་གལ་ཏེ་འཕེན་པ་ལ་ཁྲོ་ན་ཞེས་བྱ་བའི་ཚུལ་གྱིས་དེའི་ཚེ་དབྱུག་པ་ལ་སོགས་པ་འཕེན་པར་བྱེད་པ་དེ་ཡང་ཞེ་སྡང་གིས་སྦད་པས། དེ་ལྟར་ན་ཉིས་ན་ཞེ་སྡང་ལ་ཁྲོ་བར་རིགས་སོ། །དེ་ལྟར་ཉོན་མོངས་པའི་དབང་དུ་གྱུར་པ་ཉིད་ཀྱི་ཚུལ་གྱིས་དེའི་ནང་དུ་འདུས་པ་རང་བཞིན་དང་འཕེན་པར་བྱེད་པ་དག་ལ་ཁྲོ་བ་ལ་སོགས་པ་རིགས་པ་མ་ཡིན་གྱི། རང་གི་ལས་ལས་སྐྱེས་པའི་ཚུལ་གྱིས་ཀྱང་སྡུག་བསྔལ་བཟོད་པར་རིགས་པ་ཡིན་ནོ་ཞེས་བསྟན་པའི་ཕྱིར། བདག་གིས་སྔོན་ཆད་སེམས་ཅན་ལ། །ཞེས་བྱ་བ་ལ་སོགས་པ་སྨོས་ཏེ། ཅི་སྟེ་མ་མཐོང་མི་འདོད་འོན་ཀྱང་དེ་ཞེས་བྱ་བ་ནི་རྒྱུ་ཉིད་ཀྱི་ཚུལ་ཡིན་ནོ། །མ་མཐོང་བ་མི་འདོད་པ་མ་ཡིན་ནམ་ཞེ་ན། དེའི་མཚོན་དང་ཞེས་བྱ་བ་ལ་སོགས་པ་སྨོས་ཏེ། རང་ལ་གནོད་པའི་ཚུལ་ཡིན་ནོ། །ཤུ་འདི་ཞེས་བྱ་བ་ལ་སོགས་པ་སྨོས་པ་ལ། འདི་ཞེས་བྱ་བའི་སྐབས་ཀྱི་ལུས་ཡིན་ནོ། །རེག་པར་མི་བཟོད་པ་ནི་རེག་ཏུ་མི་བཟོད་པའོ། །སྐྱེས་བ་སྔ་མ་ལས་སྐྱེས་པའི་སྲེད་མདོངས་ཏེ། རིགས་པ་དང་རིགས་པ་མ་ཡིན་པ་མི་ཤེས་པ་སྟེ། ལུས་ཀྱི་རྒྱུ་དེ་ཚེ་འདི་ཉིད་ཀྱི་མ་ཡིན་གྱི། རྒྱུ་དེ་འདྲ་བ་དེ་ཉིད་ནི་འགའ་ཞིག་གིས་སྐྱེ་བ་སྔ་མའི་སྲེད་པ་ནི་འདིའི་རྒྱུ་ཡིན་ནོ། །དེའི་སྔོན་དུ་སོང་བ་ཅན་ལས་ཡིན་པ་དེ་ལྟར་ན། སྲེད་མདོངས་ཞེས་བསྟན་ཏོ། །ཇི་ལྟར་ན་བདག་སྲེད་པའི་མུན་པ་ཡིན་ཞེ་ན། འདི་ལྟར་རྨོངས་པ།
བྱིས་པ་སྡུག་བསྔལ་མི་བཟོད་ཅིང༌། །སྡུག་བསྔལ་རྒྱུ་ལ་སྟེ། ཁྲོ་བ་དང་བཅས་པའི་ལུས་ལ་བརྐམ་པས་ན། དེའི་ཕྱིར་རང་གི་ཉེས་པས་གནོད་གྱུར་པ། །གཞན་ལ་དཀོན་དུ་ཅི་ཞིག་ཡོད། །ཅིའི་ཕྱིར་རང་ལ་ཁྲོ་བར་མི་བྱེད། དཔེར་ན་དམྱལ་བའི་སྲུང་མ་དང༌། །ཞེས་བྱ་བ་ལ་སོགས་པ་ལ། རལ་གྲི་ལོ་མ་ཞེས་བྱ་བ་ནི་ལས་ཀྱིས་འཕངས་པའི་རླུང་གིས་བདས་པས་ལྟུང་བར་གྱུར་པའི་རལ་གྲིའི་ལོ་མ་རྣོན་པོ་ཅན་གྱི་ཤིང་གི་ནགས་སུ་དམྱལ་བ་རྣམས་སྐྱེ་བ་ནི་རལ་གྲིའི་ལོ་མའི་ནགས་ཚལ་ལྟར་རོ། །དེ་བཞིན་དུ་དམྱལ་བ་རྣམས་སུ་འབྱུང་བའི་བུད་མེད་ཤལ་མ་ལིའི་ནགས་ལ་སོགས་པར་དམྱལ་བའི་བྱ་རྡོ་རྗེའི་མཆུ་ཅན་ཨེ་མའོ། །རང་གི་ལས་ཀྱིས་འདི་བསྐྱེད་པ། །རལ་གྲིའི་ལོ་མའི་ནགས་ཚལ་ལ་སོགས་པ་ནི་བདག་གི་སྡུག་བསྔལ་གྱི་རྒྱུ་ཉིད་ཡིན་པའི་ཕྱིར་རོ། །དེ་ལྟར་ན་སྡུག་བསྔལ་འདི་རང་གི་ཉེས་པ་ལས་བྱུང་བ་ཡིན་ན་བདག་ལས་གཞན་པ་འགའ་ཞིང་ལས་ནི་ཁྲོ་བར་བྱེ། གལ་ཏེ་གནོད་པར་བྱེད་པོ་ལ་མ་ཡིན་ནམ་ཞེ་ན། བདག་གི་ལས་ཀྱིས་ཞེས་བྱ་བ་ལ་སོགས་པ་སྨོས་ཏེ། བཟློག་པའི་ཚུལ་སྡིག་པ་མང་པོ་ཡིན་ནོ། །ཀྱེ་མ་རུང་སེམས་སོ། །གལ་ཏེ་ཁྱོད་ཉིད་དེ་དག་ལ་གནོད་པར་བྱེད་པ་ཡིན་ན་ཅི་དེ་དག་དམྱལ་བར་འགྲོ་ཞིང་ཁྱོད་མི་འགྲོ་འམ་ཞེ་ན། བདག་གི་བསམ་པའི་ཡོན་ཏན་གྱིས་ཞེས་བྱ་བ་ལ་སོགས་པ་སྨོས་ཏེ། བརྩེ་བའི་བསམས་པའི་ཚུལ་ཡིན་ནོ། །འོན་ཏེ་ལན་དུ་གནོད་བྱས་ན་ཞེས་བྱ་བ་ནི་ལན་དུ་གནོད་པར་བྱེད་པ་ནི་བརྩེ་བ་མེད་པ་ཞེས་བྱ་བའི་ཐ་ཚིག་གོ །དེས་ན་དཀའ་ཐུབ་ཅེས་བྱ་བ་ནི་རང་ཉིད་ཀྱིས་བྱ་བ་སྟོན་པའོ། །དེ་དེ་ལྟར་རྒྱུ་ཉིད་ཅེས་བྱ་བ་ལ་སོགས་པའི་ཚུལ་ཡིན་ནོ། །ཕལ་ཆེར་ལས་ལས་སྐྱེས་པའི་ཚུལ་གྱིས་ནང་དུ་འདུས་པ་བཤད་པ་ཡིན་ནོ། །དེ་ལྟར་མི་འདོད་པ་ཉིད་ཀྱིས་ཀྱང་ཁྲོ་བར་མི་རིགས་པས་སྙམ་པ་ལ་སོགས་པས་ཀྱང་རིགས་པ་མ་ཡིན་ནོ་ཞེ་ན། ཡིད་ནི་ཞེས་བྱ་བ་ལ་སོགས་པ་སྨོས་ཏེ། ལུས་ཀྱང་བེམས་པོ་ཉིད་ཡིན་པའི་ཕྱིར་གནོད་པར་བྱ་བ་མ་ཡིན་ནོ་ཞེ་ན། བདེན་ཏེ་ལུས་ལ་མངོན་པར་ཞེན་པས་ན་ཡིད་ནི་འདི་ལྟར་ལུས་ཡིན་ནོ། །ལུས་ལ་གནོད་པའི་ཕྱིར་ཡིད་
ལ་གནོད་པར་འགྱུར་བ་ཡིན་གྱི། གཞན་དགའ་བར་ནི་གཞོམ་པར་མི་ནུས་སོ་ཞེས་བསྟན་ཏོ། །སེམས་དང་བཅས་པའི་སྡུག་བསྔལ་གྱིས་གནོད་ནུས་པར་འགྱུར་གྱི། བརྙས་པ་ལ་སོགས་པའི་ཡོན་ཏན་གྱིས་ལུས་ལ་གནོད་པར་མི་འགྱུར་ན། ཡིད་ལ་སྨོས་ཀྱང་ཅི་དགོས། དེའི་ཕྱིར་ཀྱེ་མ་ཡོན་ཏན་དེས། །སེམས་ཁྱོད་ཅིའི་ཕྱིར་རབ་ཏུ་ཁྲོ། །གལ་ཏེ་དེས་ན་ཁོ་བོ་ལ་འགའ་ཞིག་མ་དད་པའི་ཕྱིར་རོ་ཞེ་ན། གཞན་དག་བདག་ལ་མི་དགའ་བ་ཞེས་བྱ་བ་ལ་སོགས་པ་སྨོས་སོ། །རྙེད་པའི་ཞེས་བྱ་བ་ལ་སོགས་པ་འཚོ་བའི་བར་གྱི་ཚུལ་ལོ། །འདོར་གྱིས་ཞེས་བྱ་བ་ནི་ལོག་པའི་འཚོ་བ་ཅན་རྙེད་པས་འཚོ་བའི་དོན་དུ་ཁྲོ་བ་འཇུག་པར་འགྱུར་གྱིའོ། །འཆི་བའི་དུས་དང༌། ཡུན་རིང་དུ་འཚོ་བ་དང༌། ཡུན་ཐུང་ངུར་འཚོ་བ་དག་ལས་ཁྱད་པར་ཡོད་པ་མ་ཡིན་ནོ་ཞེས་བསྟན་པའི་ཕྱིར། རྨི་ལམ་ལོ་བརྒྱལ་བདེ་མྱོང་ནས། །སད་པར་གྱུར་པ་གང་ཡིན་དང༌། །གཞན་ཞིག་ཡུད་ཙམ་པ་དེ་མྱོང་ནས། །སད་པར་གྱུར་པ་གང་ཡིན་པ། །སད་པ་དེ་དག་གཉི་ག་ལའང༌། །རྨི་ལམ་ཉམས་སུ་མྱོང་བ་ཡི། །བདེ་བ་དེ་ནི་ཕྱིར་འོང་མེད་ཅིང་འབྱུང་བ་མེད་དོ། །ཚེ་རིང་ཚེ་ཐུང་གཉི་ག་ཡང༌། །འཆི་བའི་དུས་ན་དེ་འདྲར་ཟད། །ཅེས་བྱ་བ་སྨོས་ཏེ། དཔེར་ན་རྨི་ལམ་ཉམས་སུ་མྱོང་བ་བཞིན། །དངོས་པོ་གང་དང་གང་དཔྱད་པ། །དེ་དེ་དྲན་པའི་སྤྱོད་ཡུལ་འགྱུར། །འདས་པ་ཐམས་ཅད་མཐོང་མི་འགྱུར། །ཞེས་བྱ་བ་ལྟ་བུའོ། །དེའི་ཕྱིར་རྙེད་པ་མང་པོ་ཐོབ་གྱུར་ཏེ། ཡུན་རིང་དུས་སུ་བདེ་སྤྱད་ཀྱང༌། །ཆོམ་པོས་ཕྲོགས་པ་ཇི་བཞིན་དུ། །སྒྲེན་མོ་ལག་པ་སྟོང་པར་འགྲོ་བར་འགྱུར་ཏེ། དེ་ལྟར་འཇིག་རྟེན་ཕ་རོལ་དུ་འགྲོ་བར་འགྱུར་རོ། །གལ་ཏེ་བརྙས་པ་ལ་སོགས་པ་མེད་པའི་ཕྱིར་འཆི་བ་ན་སྡིག་པས་ངན་སོང་འགྲོ་བར་བྱེད་པས་འཚོ་བས་སྡིག་པ་ཟད་པ་དང་བསོད་ནམས་བྱ་བ་ཡིན་ནོ་ཞེ་ན། །རྙེད་པའི་དོན་དུ་ཁྲོས་གྱུར་ན། །བསོད་ནམས་ཟད་སྡིག་མི་འགྱུར་རམ། །དེ་བས་ན་གང་གི་དོན་དུ་བདག་གསོན་བ། །བསོད་ནམས་དེ་ཉིད་གལ་ཏེ་མེད་གྱུར་ན། །སྡིག་པ་འབའ་ཞིག་བྱེད་པ་ཡི། །གསོན་པས་དེ་ཀོ་ཅི་ཞིག་བྱའོ། །
བརྙས་པ་ལ་སོགས་པ་བྱེད་པ་རྙེད་པའི་བར་ཆད་བྱེད་པ་ཡིན་ན་ཡང་ཁྲོ་བར་རིགས་པ་མ་ཡིན་པ་དེ་ལྟར་ན་རིགས་པའི་ཚུལ་ནི། གལ་ཏེ་བརྟན་པ་ཉམས་བྱེད་པ། །ཞེས་བྱ་བ་ལ་སོགས་པ་སྨོས་པ་ལ། མི་སྙན་པར་ཞེས་བྱ་བ་ནི་བརྙས་པ་ལ་སོགས་པས་དངོས་པོར་སྨྲ་བ་དང་བྱེད་པའི་ཚུལ་གང་ལ་ཡོད་པ་དེ་ནི་མི་སྙན་སྨྲ་བར་ཁྲོ་ཞེ་ན། སེམས་ཁྱོད་ཅིའི་ཕྱིར་མི་སྙན་པར་སྨྲ་བ་དེ་འཇོམས་པར་བྱེད། གལ་ཏེ་རྙེད་པ་དང་བདེ་ལ་ལས་ཉམས་པ་ཡིན་ནོ་ཞེ་ན། སྔོན་ཆད་གྲགས་མིན་སྨྲ་བ་ལ་ཡང་མི་སྙན་པར་སྨྲ་བ་ལ། ཡིད་ཁྱོད་ཅིའི་ཕྱིར་ཁྲོ་མི་སྐྱེ། །གང་ནི་སྙན་པར་སྨྲ་བ་ཡིན་པ་དེ་ལ་ཁྱོད་ཁྲོ་བར་བྱ་བ་ཡིན་ཏེ། དཔེར་ན་བདག་ལ་མི་སྙན་པར་སྨྲ་བ་ལྟ་བུའོ། །གཞན་གྲགས་པ་མ་ཡིན་པ་བྱེད་པ་ཡང་མི་སྙན་པར་སྨྲ་བ་ཡིན་ནོ། །འོན་ཏེ་ལོག་པར་མི་སྙན་པར་སྨྲ་བ་དེ་ལྟར་ན་མ་དད་པ་གཞན་ལ་རག་ལས་པས་གཞན་གྲགས་པ་མ་ཡིན་པ་བྱེད་པ། དད་པ་མེད་ལ་ཁྱོད་བརྩེ་དང༌། །གྲགས་པ་ལ་སོགས་པ་ལའོ། །གལ་ཏེ་དེ་ལྟ་ཡིན་ན། ཉོན་མོངས་སྐྱེ་ལ་རག་ལས་པའི། །མི་སྙན་སྨྲ་ལ་ཅིས་མི་བརྩེ། །ཕྱོགས་འདི་ཡང་རིགས་སོ་ཞེས་བསྟན་པར་འགྱུར་རོ། །གང་མ་དད་པ་གཞན་ལ་རག་ལས་པ་གང་ཡིན་པ་དེ་ལ་བཟོད་པ་ནི་དཔེར་ན་དད་པ་མེད་པ་ལ་སོགས་པ་ལྟ་བུའོ། །མ་དད་པ་གཞན་ལ་རག་ལས་པ་ཡང་མི་སྙན་པར་སྨྲ་བ་ཡིན་ནོ། །དེ་ལྟར་ན་གནོད་པར་བྱེད་པ་བཟོད་པ་བསྟན་ནས། ཡོད་དུ་འོང་བ་ལ་གནོད་པ་བྱེད་པ་ལ་བཟོད་པ་བཤད་པའི་ཕྱིར། སྐུ་གཟུགས་ཞེས་བྱ་བ་ལ་སོགས་པ་སྨོས་སོ། །གཉེན་ནི་ཉེ་དུའོ། །སྔ་མའི་ཚུལ་གྱིས་སྔར་བཤད་པའི་ཚུལ་གྱིས་རྐྱེན་དེ་དག་ལས་ཉོན་མོངས་པའི་ཕྱོགས་གནོད་པ་བྱེད་པ། འབྱུང་བ་མྱོང་བས་ཁྲོ་བ་བཟློག །གནོད་པ་བྱེད་པ་དག་ལ་ཁྲོ་བར་མི་བྱའོ་ཞེས་བྱ་བའི་ཐ་ཚིག་གོ །དེ་ལྟར་གནོད་པ་ཡང་རྐྱེན་ལས་བྱུང་བ་ཡིན་ནོ་ཞེས་བསྟན་པའི་ཕྱིར་ལུས་ཅན་རྣམས་ལ་སེམས་ཡོད་དང༌། །ཞེས་བྱ་བ་ལ་སོགས་པ་སྨོས་ཏེ། སེམས་པར་བྱེད་པས་ན་སེམས་ཡོད་པའོ། །དེ་དང་སེམས་མེད་གཉི་ག་གནོད་བྱེད་ན། །བརྟེན་ནས་འབྱུང་བ་ཡིན་ཏེ། ལུས་ཅན་རྣམས་ཀྱི་སྒྲ་དང༌། སེན་མོ་ལ་སོགས་པ་
དང། སེམས་ཡོད་པ་དང༌། སེམས་མེད་པ་གཉི་གས་གནོད་པར་བྱེད་པ་ནི་འདོད་པའི་ཁམས་ཀྱི་ལས་ལས་སྐྱེས་པ་ཉིད་ཀྱི་ཕྱིར། ངེས་པར་གདོན་མི་ཟ་བར་འབྱུང་བར་འགྱུར་རོ། །དེ་ཡང་སེམས་ཡོད་པ་སྟེ། ལུས་དང་སེམས་ལ་ཉམས་སུ་མྱོང་བར་མཐོང་བ། དེ་བས་གནོད་པ་བཟོད་པར་གྱིས། །དེ་ལྟར་ནི་འགྱུར་མོད་ཀྱི། སེམས་མེད་པས་བྱས་པ་གཟོ་བར་བྱ་བ་ཡིན་ཏེ། དེ་དག་ལ་བློ་སྔོན་དུ་འགྲོ་བ་མེད་པ་ཉིད་ཀྱི་ཕྱིར་གནོད་པ་ཉིད་མེད་པའི་ཕྱིར་རོ། །སེམས་ཡོད་པ་ནི་སྐྱོན་མེད་པ་ཡིན་ན་ཡང་དེའི་བློ་སྔོན་དུ་བྱེད་པས་གནོད་པ་བྱེད་པས་དེ་ལྟར་ན་དེ་དག་ལ་ཁྲོ་བར་བྱ་བ་ཡིན་ནོ་ཞེ་ན། ལ་ལ་རྨོངས་པས་ཉེས་པ་བྱེད་ཅེས་བྱ་བ་ལ་སོགས་པ་སྨོས་ཏེ། གཞན་དག་གིས་གཞན་དག་ལ་གནོད་པར་བྱས་པ་ལ་རྨོངས་པའི་སྐྱོན་གྱིས་ཁྲོ་བ་ལ་སོགས་པ་འབྱུང་བ་ཡིན་པ་དེ་ལྟར་ན་གཅིག་དང་གཞན་པ་དེ་དག་གི་ནང་ནས། དེ་ལ་སྐྱོན་མེད་གང་ཡིན་སྨོས། །གནོད་པ་བྱེད་པ་གང་ཞིག་ཡིན་སྨྲ་བར་བྱའོ། །བདག་གིས་སྔོན་ཆད་སེམས་ཅན་ལ། །འདི་འདྲ་བའི་གནོད་པ་བྱས་ཞེས་བཤད་པ་གང་ཡིན་པ་ལྟ་བུའོ། །དེ་ལ་གནས་སྐབས་འགའ་ཞིག་རྙེད་པ་ནི། གང་གིས་གཞན་དག་གནོད་བྱེད་པ། །ཞེས་བྱ་བ་ལ་སོགས་པ་སྨོས་སོ། །འདིར་ཐམས་ཅད་ཅེས་བྱ་བ་ལ་སོགས་པ་སྨོས་ཏེ། ཚོགས་པ་ལ་ངེས་པའི་ལས་ནི་རྣམ་པ་གཉིས་ཏེ། བྱ་བ་དང༌། འབྲས་བུ་ཡིན་པ་དེ་ལྟར་ན། ཐམས་ཅད་ལས་ལ་རག་ལས་ན། ངས་འདི་ཅི་ཞིག་གཞན་དུ་བྱེད། །ཚོགས་པ་ལ་ངེས་པ་ནི་རྣམ་པ་གཞན་དུ་བྱ་བར་མི་རུང་བའི་ཕྱིར་འཇིག་རྟེན་སྣ་ཚོགས་པ་ལས་ལས་སྐྱེས་པ་ཡིན་ནོ། །དེ་ལྟར་མཐོང་ནས་ཅི་ནས་ཀྱང་ཞེས་བྱ་བ་ལ་སོགས་པ་ནི་ཁོང་དུ་ཆུད་པར་སླའོ། །ཅི་ལྟར་འབད་རྩོལ་བྱ་ཞེ་ན། །དཔེར་ན་ཁྱིམ་ཚིག་གྱུར་པའི་མེ་ཞེས་བྱ་བ་ལ་སོགས་པ་སྨོས་ཏེ། འབད་རྩོལ་བྱེད་པའི་ཚུལ་ཡིན་ནོ། །དངོས་པོ་གང་ལ་སེམས་ཆགས་ནས། ཁང་པ་བཞིན་དུ་ཚིག་པ་ན། རྩྭ་ལ་སོགས་པ་བཞིན་དུ་དེ་ནི་དེའི་མོད་ལ་དོར། །གང་གིས་ཤེ་ན། དེའི་ཡུལ་ལམ་མངོན་པར་འདོད་པ་ཡུལ་
གྱིས། ཞེ་སྡང་མེ་ནི་མཆེད་གྱུར་པ། །བསོད་ནམས་ཀྱི་བདག་ཉིད་ཅན་གྱི་སེམས་ཀྱི་ཁང་པ་ཚིག་པར་ དོགས་པ ་ཡིས་སོ། །དོར་བ་ན་སྡུག་བསྔལ་འབྱུང་བ་ནི་དགེ་བ་ཉིད་ཡིན་ནོ་ཞེས་བསྟན་པའི་ཕྱིར། བསད་པའི་མི་ཞིག་ལག་བཅད་དམ། །ཞེས་བྱ་བ་ལ་སོགས་པ་སྨོས་ཏེ། དེ་ནི་བཟོད་པར་བྱ་བ་ཡིན་ནོ། །དེ་ལྟ་མ་ཡིན་ན། གལ་ཏེ་ད་ལྟའི་སྡུག་བསྔལ་འདི་ཙམ་ལའང་ཞེས་བྱ་བ་ལ་སོགས་པ་ནི་ལྕི་བ་དང་ཡང་པ་ལ་མ་རྨོངས་པའི་ཚུལ་ཡིན་ནོ། །དེས་ན་ཞེས་བྱ་བ་ནི་དེ་དག་ཉེ་བར་བཀོད་པ་ཡིན་ནོ། །དམྱལ་བའི་གནོད་པ་དྲག་པོ་དེའི་རྒྱུ་ཁྲོ་བ་དང༌། འཁྲུགས་པ་ཡིན་ཏེ། དེའི་དོན་འབྲས་བུ་མེད་པར་འགྱུར་རོ། །དམྱལ་བའི་སྡུག་བསྔལ་ཅི་ཙམ་པ་འདོད་པའི་དངོས་པོ་དོར་བ་ལས་སྐྱེས་པའི་སྡུག་བསྔལ་འདི་ནི་དེ་ཙམ་གནོད་མིན་ལ། འདི་ནི་བྱང་ཆུབ་ཀྱིས་གཟུང་བ་ཉིད་གང་ཡིན་པ་དེའི་ཕྱིར། དོན་ཆེན་དག་ཀྱང་བྱེད་འགྱུར་བས། །དེ་ཕྱིར་འགྲོ་བའི་གནོད་སེལ་སྡུག་བསྔལ་ལ། །དགའ་བ་འབའ་ཞིག་འདིར་ནི་བྱ་རིགས་སོ། །དེ་ལྟར་ཡིད་དུ་འོང་བ་འམ་བདག་ལ་སྡུག་བསྔལ་དང་བརྙས་པ་ལ་སོགས་པའི་བཟོད་པ་བསྟན་ནས། འགྲོ་བའི་བདེ་བ་ལ་སོགས་པ་མཐོང་བ་དང་མ་མཐོང་བ་ལ་སོགས་པའི་བཟོད་པ་ནི། གཞན་གྱིས་ཡོན་ཏན་ལྡན་བསྟོད་ནས། །ཞེས་བྱ་བ་ལ་སོགས་པ་སྨོས་ཏེ། ཡོན་ཏན་གྱིས་བསྐྱེད་ཅིང་སྟོབས་དང་ལྡན་པར་དགྲ་བོ་བསྟོད་པ་དང༌། ཕྲག་དོག་གིས་ཅིའི་ཕྱིར་དེ་དག་དགའ་མི་བྱེད། ཁྱོད་ཀྱི་དགའ་བའི་བདེ་བ་འདི། །བདེ་འབྱུང་ཁ་ན་མ་ཐོ་མེད། །ཉམ་ང་བ་ན་རང་དང་གཞན་ལ་འདི་ལས་བདེ་བ་འབྱུང་བས་ན་བདེ་བ་འབྱུང་ངོ༌། །དགྲའི་ཐར་པའི་རྒྱུ་ཉིད་ཡིན་པའི་ཕྱིར་ཁ་ན་མ་ཐོ་བ་མེད་པའོ། །བྱང་ཆུབ་སེམས་ཀྱིས་ཡང་དག་པར་ཟིན་པ་ཉིད་ཀྱི་ཕྱིར་སངས་རྒྱས་ལ་སོགས་པ་ཡོན་ཏན་དང་ལྡན་པ་རྣམས་ཀྱིས་གནང་ངོ༌། །བདེ་བ་ལས་ཐར་པའི་དོན་མ་ཡིན་པ་གང་ཡིན་པ་དེ་ནི་སངས་རྒྱས་ཀྱིས་མ་གནང་བ་ཡིན་ལ། འདི་ནི་མ་ཡིན་པ་དེའི་ཕྱིར། གཞན་སྡུད་པ་ཡི་མཆོག་ཀྱང་ཡིན། །དགྲ་བོ་དེ་ཉིད་ལ་བདེ་བ་དང་དགའ་བ་སྐྱེས་པ་འདི་ཡང་དེའི་ཚེ་
དེའི་ཡོན་ཏན་བསགས་པ་ཉིད་ཡིན་པའི་ཕྱིར་དེ་ལྟར་བདེ་འགྱུར་ཞེས། གལ་ཏེ་ཁྱོད་བདེ་མི་འདོད་པའོ། །འོན་ཏེ་དེ་ལྟར་བྲན་ལ་གླ་བྱིན་པ་ལ་སོགས་པར་མི་འགྱུར་ཞིང་དེས་བསགས་པའི་ནོར་དང༌། ཁྲུས་དང༌། དྲིལ་ཕྱིས་དང༌། ཡན་ལག་གི་བསྐུ་མ་ཉེ་ལ་སོགས་པའི་བདེ་བ་ཉིད་ཀྱི་ཡིན་ལ། དེའི་ཕྱིར་སྤོངས་པ་དང་གླ་རྔན་ལ་སོགས་ཀྱིས་འདི་རང་གཞན་གྱི་བདེ་བ་འབྲས་བུ་མཐོང་དང་མ་མཐོང་བ་ཉམས་ཤིང་ཞིག་པར་འགྱུར་ཏེ། གླ་རྔན་མེད་པར་གླ་བ་ལས་བྱེད་པ་ལ་གླའི་དོན་དུ་དེ་མེད་པ་ཡིན་པ་ལས་སྡིག་པར་འགྱུར་བའི་ཕྱིར་རོ། །གཞན་ཡང༌། རང་གི་ཡོན་ཏན་བརྗོད་པའི་ཚེ། །བདག་གི་ཡོན་ཏན་བརྗོད་པ་ན། །གཞན་གྱི་བདེ་བ་ནི་གཞན་ལ་བདེ་བ་སྟེ། དེ་ཡང་འདོད་པར་བྱེད། གཞན་གྱི་ཡོན་ཏན་བརྗོད་པའི་ཚེ། །རང་ལའང་བདེ་བ་མི་འདོད་དེ། དེ་ནི་ལེགས་པ་མ་ཡིན་ནོ་ཞེས་བསྟན་པར་འགྱུར་རོ། །དེ་ཉིད་ཀྱི་ཕྱིར། སེམས་ཅན་ཐམས་ཅད་བདེར་འདོད་པས། །ཞེས་བྱ་བ་ལ་སོགས་པ་སྨོས་སོ། །བསྟོད་པའི་ཡུལ་གྱིས་ཕྲག་དོག་ལ་བཟོད་པ་བཤད་ནས། རྙེད་པ་དང་བཀུར་སྟིའི་ཡུལ་གྱིས་ཕྲག་དོག་བསྟན་པའི་ཕྱིར། འཇིག་རྟེན་གསུམ་ཞེས་བྱ་བ་ལ་སོགས་པ་སྨོས་ཏེ། སེམས་ཅན་དེ་དག་གི་བསྙེན་བཀུར་ངན་དོན་ཙམ་སྟེ། ཉུང་ཟད་ཙམ་མཐོང་ནས། ཅིའི་ཕྱིར་དེ་ལ་གདུང་བར་བྱེད། གལ་ཏེ་འགའ་ཞིག་ཁྱོད་ལ་གནོད་པ་བྱེད་པ་དེ་ལ་ཡང་ཁྱོད་ཀྱིས་དེ་གསོ་བར་བྱ་བ་ཡིན་ཏེ། འགྲོ་བ་ཐམས་ཅད་ནི་སྐལ་བ་ཆུང་བ་བཞིན་དུ་སྡུག་པ་ཉིད་ཡིན་པའི་ཕྱིར་རོ། །གསོ་བྱ་གང་ཞིག་ཁྱོད་གསོ་བ། །ཁྱོད་ཉིད་ཀྱིས་ནི་སྦྱིན་བྱ་སྟེ། །དེ་ཅི་གཉེན་གྱིས་འཚོ་བ་རྙེད་འགྱུར་ན། །དགར་མི་འགྱུར་བར་སླར་ཁྲོ་འམ། །དེ་དེ་ལྟར་ནི་འགྱུར་མོད་ཀྱི། ཐམས་ཅད་བྱང་ཆུབ་ནི་འདོད་པ་ཡིན་གྱི་དགྲ་ལ་བདེ་བ་མ་ཡིན་ནོ་ཞེ་ན། དེ་ཅི་ཞེས་བྱ་བ་ལ་སོགས་པ་སྨོས་པ་ལ། འགྲོ་ལ་ཞེས་བྱ་བ་ནི་དགྲ་བོ་དག་ལ་ཡང་ངོ༌། །དེས་ཞེས་བྱ་བ་ནི་དགྲ་བོས་སོ། །དེང་ཞེས་བྱ་བ་ནི་དེ་སྦྱིན་པར་བྱ་བའི་དངོས་པོའོ། །དངོས་པོ་དེ་དང་བསོད་ནམས་ལ་སོགས་པ་དག་གིས་རྙེད་པར་འགྱུར་རོ། །དེ་དག་མི་ཁྲོ་བའི་དོན་
དུ་བཟློག་པར་མི་ནུས་སོ་ཞེས་བསྟན་པའི་ཕྱིར། བསོད་ནམས་དང་ནི་ཞེས་བྱ་བ་ལ་སོགས་པ་སྨོས་ཏེ། བསོད་ནམས་ནི་སྐྱེ་བ་སྔ་མ་ལ་བྱས་པའི་དགེ་བའོ། །དད་པ་ནི་སྦྱིན་པ་སྦྱིན་པར་བྱེད་པའོ། །ཡོན་ཏན་ནི་ཚེ་འདིའི་བཟོ་ལ་སོགས་པ་ལུང་དུ་མ་བསྟན་པ་ལ་སོགས་པའི་རང་གི་ཡོན་ཏན་ཅི་ཕྱིར་འདོར། །རྙེད་པ་འགྱུར་བ་མི་འཛིན་ལ། །གང་གིས་ཁྲོ་བར་མི་བྱེད་སྨྲོས། །ངའི་རྙེད་པ་ལས་ཁྲོ་བར་མི་བྱའོ་ཞེས་བསྟན་པའི་ཕྱིར། ཁྱོད་ནི་རང་གི་སྡིག་བྱས་པ། །ཞེས་བྱ་བ་ལ་སོགས་པ་སྨོས་ཏེ། བསོད་ནམས་ལ་ཕྱོགས་པ་དགེ་བ་ཡིན་ནོ་ཞེས་བྱ་བར་དགོངས་སོ། །གཞན་ཡང་བདག་ཡིད་སྨོན་པ་ཙམ་གྱིས་དགྲ་བོ་མི་དགའ་བ་སྐྱེ་བ་ན་བདག་དགའ་བར་འགྱུར་རོ་ཞེ་ན། གལ་ཏེ་དགྲ་ཞིག་མི་དགའ་ནའང༌། །ཞེས་བྱ་བ་ལ་སོགས་པ་སྨོས་ཏེ། གལ་ཏེ་རྣམ་པ་འགའ་ཞིག་གིས་དགྲ་བོ་མི་དགའ་བར་གྱུར་པ་ན་དེ་ལ་ཁྱོད་དགའ་སྟེ། ཁྱོད་དགའ་བའི་རྒྱུ་མཚན་ཁྱོད་ཀྱི་ཡིད་སྨོན་ཙམ་ཡིན་པར་འགྱུར་བ་དེ་ལྟར་ན་ཡང་དེ་ལ་ཁྱོད་དགར་ཅི་ཞིག་ཡོད་ཅེས་བྱ་བ་ལ་སོགས་པ་སྨོས་ཏེ། ཁྱོད་ཀྱི་ཡིད་སྨོན་ཙམ་གྱིས་ནི། །དེ་ལ་གནོད་པའི་རྒྱུར་མི་འགྱུར་རོ། །དེ་ལྟར་རྒྱུ་ལ་རག་ལུས་པའི་ཚུལ་བཤད་ནས། དོན་མེད་པ་ཉིད་ཀྱི་ཚུལ་ཁྱོད་ཀྱི་འདོད་པས་སྡུག་བསྔལ་དེ་ཞེས་བྱ་བ་ལ་སོགས་པ་སྨོས་ཏེ། གང་གི་ཚེ་ཁྱོད་ཀྱི་འདོད་པ་ཡང་དགྲ་བོའི་སྡུག་བསྔལ་གྱི་རྒྱུ་ཡིན་པ་དེའི་ཚེ། ཁྱོད་ཀྱི་འདོད་པས་སྡུག་བསྔལ་དེ། །གྲུབ་ནའང་ཁྱོད་དགར་ཅི་ཞིག་ཡོད། །གལ་ཏེ་འཚོངས་པར་འགྱུར་ཞེ་ན། དེ་ལྟར་བདེ་བའམ་གཞན་ཡང་རུང༌། །དེ་ལས་ཕུང་བའང་གཞན་ཅི་ཡོད། །དེའི་སྡུག་བསྔལ་ཡོད་ན་བདེ་བའམ་དོན་གཞན་དུ་འགྱུར་ན་ངེས་པར་དོན་ཆེན་པོ་བྱེད་པར་འགྱུར་རོ་ཞེས་བྱ་བའི་ཐ་ཚིག་གོ །དེ་ཅིའི་ཕྱིར་ཞེ་ན། ཉོན་མོངས་ཞེས་བྱ་བ་ལ་སོགས་པ་སྨོས་ཏེ། གང་གི་ཕྱིར་སྡུག་བསྔལ་དེ་ཡོད་ན། ཉོན་མོངས་ཉ་པས་བཏབ་པ་ཡི། །ཞེས་བྱ་བ་ནི་མཆིལ་པ་དང་འཚེ་བས་ཉེ་བ་སྟེ། རིགས་ངན་ལ་སོགས་པའོ། །སེམས་ཀུན་ནས་ཉོན་མོངས་པར་བྱེད་པས་ན། ཀུན་ནས་ཉོན་མོངས་པ་སྟེ། འདོད་ཆགས་དང་ཞེ་སྡང་དང་གཏི་མུག་ལ་སོགས་པ་
མཆིལ་པ་བཞིན་དུ་བཏབ་པས་ན་ཉོན་མོངས་ཉ་པས་བཏབ་པའོ། །བདེ་བའི་མཆིལ་པ་སྟེ། གནོད་པའི་དོན་གྱི་ཟང་ཟིང་དེ་དང་འདྲ་བར་རོ། །མི་བཟད་པ་ནི་དྲག་པ་སྟེ། འདི་ལྟར་དམྱལ་བའི་སྲུང་མས་ཁྱོད། །དམྱལ་བ་བཞིན་དུ་ཉོན་མོངས་པའི་མཆིལ་པ་དང༌། བདེ་འགྲོའི་ཆུ་བོ་ལས་ཕྱུང་ནས། སྲིད་པ་བར་དོའི་སྐམ་སར་ཁྲིད་དོ། །སེམས་དམྱལ་བུམ་པ་ཡང་སྟེ། ཏིལ་མར་གྱིས་བཀང་བའི་ཟངས་ཆེན་ཤིན་ཏུ་ཁོལ་བ་དེ་དག་གི་ནང་དུའོ། །དམྱལ་བའི་སྲུང་མས་བདག་འཚེད་དེས། །ངེས་པར་སྲེག་པར་འགྱུར་རོ། །བསྟོད་པ་ལ་སོགས་པ་ཡང་འབྲས་བུ་མེད་པ་ཉིད་དོ་ཞེས་བསྟན་པའི་ཕྱིར། བསྟོད་དང་ཞེས་བྱ་བ་ལ་སོགས་པ་སྨོས་ཏེ། གཞན་གྱི་དོན་ཤེས་པ་ནི་རང་གི་དོན་ཡིན་ལ། དེ་ནི་བློ་དང་ལྡན་པ་མཁས་པ་གཞན་གྱི་དོན་ཉིད་རང་གི་དོན་ཉིད་ཡིན་ནོ། །དེ་དག་གིས་རང་གི་དོན་ཤེས་པ་བློ་དང་ལྡན་པ་མ་ཡིན་པའི་ཡིད་བདེ་བར་འགྱུར་རོ་ཞེ་ན། ཡིད་བདེ་འབའ་ཞིག་འདོད་ན་ནི་ཞེས་བྱ་བ་ལ་སོགས་པ་སྨོས་ཏེ། བསྟོད་པ་ལ་སོགས་པ་བདག་གིས་བྱ་བ་ཙམ་ཡང་བསྟོད་པ་མ་ཡིན་ནོ་ཞེས་བྱ་བའི་ཐ་ཚིག་གོ །དེ་བཞིན་དུ་གྲགས་པའི་དོན་དུ་ཞེས་བྱ་བ་ལ་སོགས་པ་ལ། ཚིག་འབྲུ་ནི་གྲགས་པའི་ཐ་ཚིག་གོ །བསྟོད་པ་ལ་སོགས་པ་བཅོམ་པ་ན་བྱིས་པའི་སྤྱོད་པའི་ཚུལ་གྱིས་མི་བཟོད་པ་ནི། དཔེར་ན་བྱེ་མའི་ཁང་བུ་རྡིབ་པ་ན་ཞེས་བྱ་བ་ལ་སོགས་པའོ། །འདི་ལྟར་རེ་ཞིག་སྒྲ་ལ་ཞེས་བྱ་བ་ལ་སོགས་པ་ལ། རེ་ཞིག་གི་སྒྲ་ནི་ལུས་དང་སེམས་ལ་ལྟོས་པ་ཡིན་ནོ། །ལུས་ནི་རྡོས་པ་ཅན་ཡིན་ན་ཡང་བེམས་པོ་ཡིན་པས་ན་བསྟོད་པ་མ་ཡིན་ནོ། །ཡིད་ནི་ལུས་ཅན་མ་ཡིན་པ་ཉིད་ཀྱི་ཕྱིར་དང་བྱེད་པ་པོ་ཉིད་དུ་མི་རུང་བའི་ཕྱིར་རོ། །འོ་ན་གང་ལས་བདག་ལ་བསྟོད་དོ་ཞེས་བྱ་བའི་དགའ་བ་རང་ལ་སྐྱེ་བར་འགྱུར་ཞེ་ན། བདག་ལ་གཞན་དགའ་ཞེས་གྲགས་པ། །ཞེས་བྱ་བ་སྨོས་ཏེ། དགའ་བའི་རྒྱུ་ཡིན་ནོ་ཞེས་བྱ་བ་དེ་ནི་བཏགས་པ་ཙམ་ཡིན་ནོ། གཞན་གྱི་དགའ་བ་མེད་པ་ཡང་དགྲ་ཡོད་པ་ཡིན་ནོ་ཞེས་བསྟན་པའི་ཕྱིར། གཞན་ནམ་ཡང་ན་བདག་ལའང་རུང༌། །ཞེས་བྱ་བ་སྨོས་ཏེ། ཅི་ཞིག་ཅེས་བྱ་བ་མངོན་པར་འདོད་པ་མ་ཡིན་ནོ། །བདག་
ལ་གཞན་གྱི་དགའ་བ་ཡོད་ན་ཡང་དེ་བདག་ལ་ཕན་པའི་མ་ཡིན་ནོ། །གང་གི་ཕྱིར་གཞན་དེ་དག་པོའམ། བདག་ལ་གཞན་གྱི་བསྟོད་པ་དང་འབྲེལ་པ་གཞན་གྱི་དགའ་བས་བདག་ལ་འབྲས་བུ་ཅི་ཞིག་ཏུ་འགྱུར་ཞེས་བསྟན་པའི་ཕྱིར། དགའ་བདེ་ཞེས་བྱ་བ་ལ་སོགས་པ་སྨོས་ཏེ། དེ་ཉིད་ཀྱི་སྟེ་བསྟོད་པ་བྱེད་པ་ཉིད་ཀྱིའོ། །བདག་གིས་དེ་ལས་ཤས་མི་འཐོབ། །བདེ་བ་ནི་རང་གི་ཡིན་པའི་ཕྱིར་དང༌། གཟུགས་ཅན་མ་ཡིན་པ་ཉིད་ཀྱིས་བགོ་བར་བྱ་བ་མ་ཡིན་པའི་ཕྱིར་རོ། །གཞན་བསྟོད་པ་བྱེད་པའི་དགའ་བ་དེ་ལ་བརྟེན་ནས་བདག་ཀྱང་དགའ་བར་འགྱུར་རོ་ཞེ་ན། བདག་བདེ་བ་ཡིས་ཞེས་བྱ་བ་ལ་སོགས་པ་སྟེ། ཀུན་ལའང་སྟེ་གཞན་དག་ལའང་བདེ་བ་དེ་ཡོད་པར་འགྱུར་ན། དེ་བདེ་བ་ཡིས་བདག་ལ་བདེ་བར་འགྱུར། །ཅི་ཕྱིར་གཞན་ལ་དགའ་བ་ཡིས། །ཁྲོ་བའི་དགྲ་ལ་དགའ་བ་བས། །གཞན་དག་བདེ་བར་འགྱུར་བ་ལ། །དེ་བདེ་འགྱུར་བར་བདག་མི་བདེར། དེ་བས་བདག་ནི་བསྟོད་དོ་ཞེས་བྱ་བ་འདི་ལྟ་བུ་ནི་ལོག་པའི་རྟོག་པ་ཙམ་ཉིད་ཡིན་པའི་ཕྱིར་ངའོ་སྙམ་པའི་ང་རྒྱལ་གྱིས་གཟུང་བའི་སེམས་ཀྱི་རྒྱུད་སྐྱེ་བར་འགྱུར་རོ། །དེ་ཡང་དེ་ལྟར་གཞན་གྱི་དགའ་བ་དང་བདག་འབྲེལ་མེད་ཕྱིར། བྱིས་པའི་སྤྱོད་པ་ཁོ་ནར་ཟད་དོ། །ཕན་འདོགས་པར་བྱེད་པའི་ཚུལ་གྱིས་དགྲ་བོ་དག་ལ་སྡང་བར་རིགས་པ་མ་ཡིན་ནོ་ཞེས་བསྟན་པའི་ཕྱིར། བསྟོད་སོགས་ཞེས་བྱ་བ་ལ་སོགས་པ་སྨོས་ཏེ། གཡེངས་པའི་རྒྱུ་ཉིད་ཡིན་པའི་ཕྱིར་གཡེངས་པར་བྱེད་པའོ། །དེས་ནི་སྐྱོ་པའང་འཇིག་པར་བྱེད། །བདག་ཡོན་ཏན་ལྡན་ལ་ཕྲག་དོག་དང་སྟེ། སྦྱིན་པར་མི་འདོད་པ་ཉིད་དུ་བྱེད་པའོ། །བདག་ལ་བྱིན་པ་དེ་དག་ལ་བྱིན་ཞིང་གཞན་གྱིས་ཀྱང་དེ་དག་བསྟོད་པ་སྦྱིན་པ་ལ་སོགས་པ་ནི་ཕུན་སུམ་ཚོགས་པའོ། དེ་དག་ལ་བདག་ཁྲོ་བར་ནི་ཕུན་སུམ་ཚོགས་པ་ཡང་འགྲོ་བ་སྟེ། བསྟོད་པ་ལ་སོགས་པ་དེས་དེ་ཡང་ཁྲོ་བར་བྱེད་པར་འགྱུར་རོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་བསྟོད་པ་དག་ལ་སོགས། གཞོམ་ཕྱིར་ཞེས་བྱ་བ་ལ་སོགས་པའི་ཚིགས་སུ་བཅད་པ་ནི་རྟོགས་པར་སླའོ། །སྡུག་བསྔལ་འཇུག་འདོད་ལ་ཞེས་བྱ་བ་ལ་སོགས་པ་ལ། སྡུག་བསྔལ་ཉིད་ཅེས་
ངེས་པར་གཟུང་བར་བྱ་བའི་ཕྱིར། མནར་མེད་པར་སྐྱེ་བ་ལེན་པ་ལ་སོགས་པའི་སྒོ་ནས་ཞུགས་པར་འདོད་པ་ལ། གང་དག་སྒོ་འཕར་ཉིད་གྱུར་པ་སྟེ། བསྟོད་པ་ལ་སོགས་པ་གཞོམ་པའི་ཕྱིར་ཉེ་བར་གནས་པའོ། །བསོད་ནམས་ཀྱི་གེགས་བྱེད་ན་ཡང་གེགས་མ་ཡིན་ནོ་ཞེས་བསྟན་པའི་ཕྱིར། འདི་ནི་བསོད་ནམས་ཞེས་བྱ་བ་ལ་སོགས་པ་སྨོས་ལ། བཟོད་མཚུངས་དཀའ་ཐུབ་ཡོད་མིན་ཏེ། །བསོད་ནམས་ཡོད་པ་མ་ཡིན་ནོ། །དེ་དང་དེར་དམ་པ་རྣམས་ཀྱིས་གསུངས་པ་གང་ཡིན་པ། དེ་ལ་བདག་ནི་མི་གནས་སམ། །གལ་ཏེ་བདག་ནི་ཞེས་བྱ་བ་ལ་སོགས་པ་ལ། བསོད་ནམས་རྒྱུ་ནི་ཞེས་བྱ་བ་ནི་སྦྱིན་པ་ལ་སོགས་པའི་བསོད་ནམས་ཀྱི་གེགས་བྱེད་པ་ཡིན་ཡང་བཟོད་པའི་རྒྱུ་ཡིན་ནོ། །གཞན་ལ་ཕན་པ་བྱེད་པའི་རྒྱུ་ནི་དགྲ་ཉིད་དོ་ཞེས་བསྟན་པའི་ཕྱིར། གང་ཞིག་གང་མེད་མི་འབྱུང་ལ། །ཞེས་བྱ་བ་ལ་སོགས་པ་ལ། དེ་ཉིད་དེ་ཡི་རྒྱུ་ཡིན་པ། །ཞེས་བྱ་བ་ནི་ཅི་ལྟར་མེས་བསྲེགས་པ་ཉིད་ཀྱིས་ཡིན་པ་དེ་ལྟར་བཟོད་པའི་དགྲ་ཡིན་ན་ཇི་ལྟར་དེ་ལ་སྟེ། རྒྱུ་ལ་གེགས་ཞེས་བྱ། ཇི་ལྟར་མ་ཡིན་ཞེ་ན། དུས་སུ་ཞེས་བྱ་བ་ལ་སོགས་པ་སྨོས་སོ། །འདི་ཡང་འདོད་པར་བྱ་བ་ཡིན་ནོ་ཞེས་བསྟན་པའི་ཕྱིར། འཇིག་རྟེན་ན་ནི་ཞེས་བྱ་བ་ལ་སོགས་པ་སྨོས་ཏེ། ཁོང་དུ་ཆུད་པར་སླའོ། །མཆོད་པར་བྱ་བ་ཉིད་ཀྱི་ཚུལ་ནི། འདི་དང་བདག་གི་ཞེས་བྱ་བ་ལ་སོགས་པ་སྨོས་སོ། དེ་ཅིའི་ཕྱིར་ཞེ་ན། བྱང་ཆུབ་ཀྱི་སྤྱོད་པའི་གྲོགས་སུ་གྱུར་པ་ཉིད་ཡིན་པའི་ཕྱིར། དགྲ་བོ་འདི་དང་བདག་གིས་བསྒྲུབས་པས་ན། དེའི་ཕྱིར་དགྲ་བོ་དེ་ལ་བཟོད་པ་དེའིའོ། །དེའི་འབྲས་བུ་ནི་དམ་པའི་ཆོས་ཀྱི་བདུད་རྩིའོ། །སྤྱོད་པའི་གནས་སྐབས་སུ་སེམས་ཅན་ཐམས་ཅད་ལ་མོས་པ་ཙམ་དུ་བྱིན་དུ་ཟིན་ཀྱང་འབྲས་བུའི་གནས་སྐབས་སུ་ཡང་ཆེས་ཤིན་ཏུ་གསལ་བར་བྱས་ལ་དང་པོ་དེ་ཉིད་ལ་སྦྱིན་པར་བྱའོ། །དེ་སྔོན་དུ་སོང་བ་ཅན་ནི་དགྲ་བོའི་རྒྱུ་ཅན་ཡིན་ནོ། །གྲུབ་པའི་རྒྱུར་རུང་བ་དང་ཞེས་བྱ་བའི་ཚིག་གཉིས་གསུངས་པ་ནི། བཟོད་པ་འགྲུབ་པའི་རྒྱུ་ཡིན་ནོ་ཞེས་བྱ་བའི་ཐ་ཚིག་གོ །གཞན་དུ་སྨན་པ་བཞིན་དུ་ཕན་བརྩོན་ན། །ཞེས་བྱ་བ་ནི་གལ་ཏེ་གནོད་
པའི་བསམ་པ་མེད་པར་འགྱུར་བ་དེའི་ཚེ་སྨན་པ་བཞིན་ཏེ། སྨན་པ་བཞིན་དུ་ཕན་པ་ལ་བརྩོན་པ་ཡིན་ན་གནོད་པ་བྱེད་པ་མ་ཡིན་པ་ལ་བདག་གིས་བཟོད་པའང་ཅི་ལྟར་འགྲུབ། དེ་བས་ན་དགྲ་བོ་དེའི་རབ་ཏུ་སྡང་སེམས་ལ། བརྟེན་ནས་བཟོད་པ་སྐྱེ་བས་དེ་ཕྱིར་དེ་ནི་བཟོད་པའི་རྒྱུ་ཡིན་པས་ན་བཟོད་པ་བསྒྲུབ་བའི་བསམ་པ་མེད་ན་ཡང་བདག་གི་དམ་པའི་ཆོས་བཞིན་མཆོད་པར་འོས་པ་དམ་པའི་ཆོས་ཞེས་བྱ་བ་ནི། འདིར་དགྲའི་བདག་ཉིད་ཅན་གྱི་ལུས་སེམས་མེད་པ་ཡིན་ན་ཡང་བརྙས་པ་ལ་སོགས་པ་ན་བཟོད་པའི་རྒྱུ་ཡིན་པ་དེའི་ཕྱིར། ཇི་ལྟར་བཟོད་པ་འགྲུབ་པའི་རྒྱུ་ཡིན་པས་དམ་པའི་ཆོས་ཡང་དག་པར་མཆོད་པ་བཞིན་དུ་དགྲ་བོ་ཡང་བཟོད་པ་འགྲུབ་པའི་རྒྱུ་ཡིན་ནོ། །སེམས་ཅན་ཐམས་ཅད་ཀྱང་རྒྱལ་བ་བཞིན་དུ་མཆོད་པར་བྱ་བ་ཡིན་ནོ་ཞེས་བསྟན་པའི་ཕྱིར། དེའི་ཕྱིར་ཞེས་བྱ་བ་ལ་སོགས་པ་སྨོས་ཏེ། སེམས་ཅན་ནི་རྒྱལ་བའི་ཞིང་སྟེ། སྐྱེ་བའི་གནས་ཡིན་ནོ། །སེམས་ཅན་ཞིང་ནི་དེ་སྔོན་དུ་སོང་བ་ཅན་གྱི་རྒྱལ་བ་རྣམས་ཏེ། སེམས་ཅན་རྣམས་ཀྱི་འབྲུའི་ས་གཞི་ཐུབ་པས་གསུངས་སོ། །ཅིའི་ཕྱིར་ཞེ་ན། འདི་དག་ཅེས་བྱ་བ་ལ་སོགས་པ་སྨོས་ཏེ། གཞན་ཡང་སེམས་ཅན་རྣམས་ཏེ། སེམས་ཅན་གྱི་ཞིང་གི་དབང་དུ་བྱས་པ་དང༌། རྒྱལ་བ་ལས་ཏེ། རྒྱལ་བའི་དབང་དུ་བྱས་པ་ལས་སོ། །སངས་རྒྱས་ཆོས་ཏེ། སྟོབས་དང་མི་འཇིགས་པ་ལ་སོགས་པའི་འབྲས་བུ་འགྲུབ་ཅིང་འོངས་པ། སངས་རྒྱས་ཆོས་འགྲུབ་འདྲ་བ་ལ། །རྒྱལ་ལ་གུས་བྱ་དེ་བཞིན་དུ། སེམས་ཅན་ལ་མིན་ཅི་ཡི་ཚུལ། །ཇི་ལྟར་ན་རིགས་སོ། །དེ་ལྟར་ནི་འགྱུར་མོད་ཀྱི་སེམས་ཅན་བསམ་པ་ཞན་པའི་ཕྱིར་གུས་པར་བྱ་བ་མ་ཡིན་ནོ་ཞེ་ན། བསམ་པའི་ཞེས་བྱ་བ་ལ་སོགས་པ་སྨོས་པ་ལ། དེ་ཞེས་བྱ་བ་ནི་སངས་རྒྱས་ཀྱི་ཆོས་ཐོབ་པའོ། །འབྲས་བུ་རྒྱལ་བ་དང་མཚུངས་པ་དང༌། སེམས་ཅན་རྣམས་ལའང་ཡོན་ཏན་ཡོད། །རྒྱུ་དེའི་ཕྱིར་སེམས་ཅན་རྣམས་དང་མཉམ་པ་ཡིན་ནོ། །གཞན་ཡང་བྱམས་སེམས་ལྡན་ལ་ཞེས་བྱ་བ་ལ་སོགས་པ་ལ། སེམས་ཅན་དག་མེད་པར་བྱམས་པ་མེད་ཅིང༌། སངས་རྒྱས་མེད་པར་ཡང་བསོད་ནམས་ཡོད་པ་
མ་ཡིན་ནོ། །གང་གི་ཕྱིང་དེ་ལྟ་ཡིན་པ་དེའི་ཕྱིར་སངས་རྒྱས་ཀྱི་ཆོས་འདི་ལས་འབྱུང་ཞིང་འགྲུབ་པས་ན། སངས་རྒྱས་ཆོས་འགྲུབ་ཆ་ཡོད་པ་སྟེ། རྒྱུ་དང་རྐྱེན་གྱི་ཚོགས་དེའི་ཆ་ན་སེམས་ཅན་ཡོད་པ་སངས་རྒྱས་ཀྱི་ཆོས་འགྲུབ་པའི་ཆ་དེས་ནི་དེ་དག་མཉམ་པར་འདོད་ཀྱི། སངས་རྒྱས་དང་འགའ་མི་མཉམ། ཇི་ལྟ་བུར་གྱུར་པ་དག་དང་ཞེ་ན། ཡོན་ཏན་རྒྱ་མཚོ་མཐའ་ཡས་པ་སྟེ། ཡོན་ཏན་རྒྱ་མཚོ་གང་ལ་གྲངས་དང་མཐུ་དག་གི་ཆ་མཐའ་ཡས་པ་མངའ་བའི་ཡོན་ཏན་རྒྱ་མཚོ་སྟེ། སྟོབས་ལ་སོགས་པའི་ཡོན་ཏན་གྱི་ཚོགས་དག་གིས་ཉེ་བར་མཚོན་པ་རྣམས་དེ་ལྟ་བུར་གྱུར་པའིའོ། །ཡོན་ཏན་མཆོག་ཚོགས་གཅིག་པུ་སྟེ། གང་དག་ལ་ཚོགས་གཉིས་ཚད་མེད་པ་མངའ་པ་དེ་དག་ནི། ཡོན་ཏན་མཆོག་ཚོགས་གཅིག་པའོ། །ཡོན་ཏན་ཤས་ཆུང་བ་དང་འདྲ་བ་ནི་ཡོན་ཏན་ཤས་ཙམ་སྟེ། དེ་ཡང་སེམས་ཅན་འགའ་ཞིག་ལ། །སྣང་བའང་དེ་ལ་མཆོད་དོན་དུ། །ཁམས་གསུམ་ཕུལ་ཡང་ཆུངས་པར་འགྱུར། །འོ་ན་ཇི་ལྟར་ན་སེམས་ཅན་ལ་མཆོད་པ་བྱས་པ་ཡིན་ཞེ་ན། སངས་རྒྱས་ཆོས་མཆོག་སྐྱེ་བའི་ཤས། །ཞེས་བྱ་བ་ལ་སོགས་པ་སྨོས་སོ། །གཞན་ཡང་ཞེས་བྱ་བ་ནི་ལན་དུ་ཕན་པ་བྱེད་པའི་ཚུལ་ཡིན་ནོ། །གཡོ་མེད་གཉེན་འགྱུར་ཞིང༌། །གཡོ་མེད་པའི་གཉེན་རྣམས་སེམས་ཅན་དག་ལ་ཕན་པ་དཔག་ཏུ་མེད་པ་མཛད་པ་གང་ལ་མངའ་བ་དེ་དག་ནི། ཕན་པ་དཔག་མེད་མཛད་རྣམས་ལ་སྟེ། སངས་རྒྱས་རྣམས་ལ། སེམས་ཅན་མགུ་བར་བྱ་བ་མ་གཏོགས་པ། གཞན་གང་ཞིག་གིས་ལན་ལོན་འགྱུར། །ཞེས་བྱ་བ་ལན་ལྡོན་པ་ནི་ལན་དུ་ཕན་འདོགས་པར་བྱེད་པ་སྟེ། སེམས་ཅན་མགུ་བར་བྱ་བ་ཉིད་ལས་གཞན་ཅུང་ཟད་ཀྱང་ཡོད་པ་མ་ཡིན་ནོ། །དེ་དག་སེམས་ཅན་ཉིད་དེ་ཤིན་ཏུ་སྡུག་པ་ཉིད་ཡིན་པའི་ཕྱིར། གང་ཕྱིར་སྐུ་གཏོང་ཞེས་བྱ་བ་ལ་སོགས་པ་སྨོས་ཏོ། གང་གི་ཕྱིར་ནི་སེམས་ཅན་གྱི་དོན་གྱི་ཕྱིར་རོ། །སེམས་ཅན་འདི་དག་གནོད་ཆེན་བྱེད་པ་ན། །ཐམས་ཅད་བཟང་དགུ་ཞིག་ཏུ་སྤྱད་པ་ན། །རེ་ཞིག་བདག་གི་རྗེར་གྱུར་ཉིད་ཀྱང་ནི། །སངས་རྒྱས་དང་བྱང་ཆུབ་སེམས་དཔའ་ཉིད་ཀྱང་ནི། གང་ཕྱིར་ནི་
གང་དག་གི་དོན་དུའོ། །སེམས་ཅན་དེ་དག་ལ་དགྱེས་ཤིང་སྟེ། དགྱེས་པ་མཉེས་པར་གྱུར་པའོ། །ཇི་ལྟར་ལུས་ལ་ཀུན་ནས་མེ་འབར་བ། །ལུས་ཀུན་ནས་ཚིག་པར་གྱུར་པ་འདོད་པ་ཀུན་གྱིས་ཡིད་བདེར་མི་འགྱུར་བའོ། །དེ་བས་ཞེས་བྱ་བ་ལ་སོགས་པ་ནི་ཁོང་དུ་ཆུད་བར་སླའོ། །བྲན་དུ་སྡེ་བྲན་ཉིད་དུ་མཆི་སྟེ། དེ་དག་ནི་སེམས་ཅན་གྱི་ངོ་བོ་ཉིད་ཡིན་པའི་ཕྱིར་དེ་ལྟར་ན་དེ་དག་གིས་སེམས་ཅན་རྣམས་བདག་གིར་མཛད་པ་ཉིད་ཀྱི་ཕྱིར་རོ། །འདི་ཉིད་ཅེས་བྱ་བ་ནི་དགྱེས་པར་བྱེད་པ་ཉིད་དོ། །འདི་ལ་སྟོབས་ཀྱི་ཚུལ་ནི་དཔེར་ན་རྒྱལ་པོ་ཞེས་བྱ་བ་ལ་སོགས་པ་སྨོས་ཏེ། སྐྱེ་བོ་མང་ལ་གནོད་བྱེད་ཀྱང༌། །སྐྱེ་བོ་མིག་རྒྱང་རིང་པོ་དག་དུས་རིང་པོར་མཐོང་བ་ལ་ཞེས་བྱ་བའི་ཐ་ཚིག་གོ །ནུས་ཀྱང་ཕྱིར་གནོད་མི་བྱེད་དེ། །རྣམ་པར་འགྱུར་བ་མི་བྱེད་དོ། །དེ་ཅིའི་ཕྱིར་ཞེ་ན། འདི་ལྟར་ཞེས་བྱ་བ་ལ་སོགས་པ་སྨོས་ཏེ། དེ་ནི་རྒྱལ་པོའི་སྐྱེས་བུའོ། །ཅིའི་ཕྱིར་ཁྱད་དུ་གསད་པར་མི་བྱ་བ་ཡིན་ཞེ་ན། འདི་ལྟར་དམྱལ་བའི་སྲུང་མ་དང༌། །ཐུགས་རྗེ་ལྡན་རྣམས་ནི་སངས་རྒྱས་དང་བྱང་ཆུབ་སེམས་དཔའོ། །ཁྱད་དུ་བསད་པ་དེའི་དཔུང་ནི་དེའི་སྟོབས་ཡིན་ནོ། །སེམས་ཅན་ནི་རྒྱལ་པོ་གཏུམ་པོ་དག་པས་ཀྱང༌། །ཚར་གཅོད་པ་དང་ཕན་འདོགས་པའི་རྒྱུ་ཡིན་ནོ་ཞེས་བསྟན་པའི་ཕྱིར། རྒྱལ་པོ་ལྟ་ཞིག་ཁྲོས་ན་ཡང༌། །ཞེས་བྱ་བ་ལ་སོགས་པ་སྨོས་སོ། །གང་ཡིན་པ་ཞེས་བྱ་བ་ནི་སྡུག་བསྔལ་ལོ། །རྒྱལ་པོ་ལྟ་ཞིག་མགུ་ན་ཡང༌། །ཞེས་བྱ་བ་ལ་སོགས་པ་ནི་རྟོགས་པར་སླའོ། །ཕན་ཡོན་བསྟན་པའི་ཕྱིར། སེམས་ཅན་ཞེས་བྱ་བ་ལ་སོགས་པ་སྨོས་ཏེ། གང་ལས་བྱུང་བ་ཡིན་པས་ན་བྱུང་སྟེ། སེམས་ཅན་མགུ་ལས་བྱུང་བ་ཡི། །རེ་ཞིག་བཟོད་པའི་འབྲས་བུ་ནི། །མ་འོངས་སངས་རྒྱས་འགྲུབ་ལྟ་ཞོག །མ་འོངས་པའི་སངས་རྒྱས་ཉིད་ཀྱི་འབྲས་བུའོ། །ཚེ་འདི་ཉིད་ལ་དཔལ་ཆེ་བ་ལ་སོགས་པའི་འབྲས་བུ་ཅིས་མ་མཐོང་ངོ༌། སངས་རྒྱས་ཉིད་ལས་སྔར་ཡང་མཛེས་བ་ཞེས་བྱ་བ་ལ་སོགས་པའོ། །བྱང་ཆུབ་སེམས་དཔའི་སྤྱོད་པ་ལ་འཇུག་པའི་ལེགས་པར་སྦྱར་བ་ལས་བཟོད་པའི་ཕ་རོལ་ཏུ་ཕྱིན་པ་བསྟན་པ་སྟེ་ལེའུ་དྲུག་པའོ།།
དེ་ལྟར་བཟོད་པས་ཅི་ཞིག་བྱ་ཞེ་ན། དེ་ལྟར་བཟོད་པས་བརྩོན་འགྲུས་བརྩམ། །ཞེས་བྱ་བ་ལ་སོགས་པ་སྨོས་ཏེ། དེ་སྐད་དུ་བཤད་པའི་བཟོད་པའི་ཚུལ་གང་ལ་ཡོད་པ་དེ་ནི། དེ་ལྟར་བཟོད་པས་བརྩོན་འགྲུས་བརྩམས་ཏེ། བརྩོན་འགྲུས་ནི་དགའ་བར་བྱང་ཆུབ་པའི་ཕྱིར་རོ། །ཞེས་བཅོམ་ལྡན་འདས་ཀྱིས་གསུངས་པ་ཉིད་ཀྱི་ཕྱིར་རོ། །འདི་ལྟར་བརྩོན་ལ་བྱང་ཆུབ་གནས། དེ་ཅིའི་ཕྱིར་ཞེ་ན། རླུང་མེད་ཅེས་བྱ་བ་ལ་སོགས་པ་སྨོས་ཏེ། དཔེར་ན་རླུང་མེད་གཡོ་བ་མེད་པ་བཞིན། །རླུང་ནི་སྐྱོད་པར་བྱེད་པའི་ལས་ཅན་ཡིན་པའི་ཕྱིར་རོ། །བསོད་ནམས་བརྩོན་འགྲུས་མེད་མི་འབྱུང༌། །བརྩོན་འགྲུས་ནི་དགེ་བའི་ས་ཆེན་པོ་པ་ཉིད་ཡིན་པའི་ཕྱིར་རོ། །བྱང་ཆུབ་ནི་བསོད་ནམས་ལ་རག་ལས་པ་ཡིན་པ་དེ་ལྟར་ན། འཇིག་རྟེན་ལ་རབ་ཏུ་གྲགས་པའི་བརྩོན་འགྲུས་ནི་འདིར་མི་རུང་བ་ཡིན་པའི་ཕྱིར་བརྩོན་འགྲུས་གང་ཡིན་ཞེ་ན། བརྩོན་གང་དགེ་ལ་སྦྲོ་བའོ། །དེ་ཡི་མི་མཐུན་ཕྱོགས་བཤད་བྱ། །ལེ་ལོ་གང་ལ་ངན་ལ་ཞེན་པ་དང་སྟེ། དམན་པ་ལ་དགའ་བ་ནི་ངན་པ་ལ་ཞེན་པའོ། །སྒྱིད་ལུག་པས་བདག་ཉིད་ལ་སྨོད་པ་ནི། སྒྱིད་ལུག་བདག་ཉིད་བརྙས་པའོ། །ལེ་ལོའི་རྒྱུ་ནི་མི་རྩོལ་བ་དང་བདེ་ཉམས་ལེན། གཉིད་ལ་བརྟེན་པའི་སྲེད་པ་དང༌། །འཁོར་བའི་སྡུག་བསྔལ་མི་སྐྱོ་ལས། །བདག་ཉིད་ཁོ་ན་ལེ་ལོ་དང་ལྡན་པ་ཡིན་ནོ། །དེ་ལྟར་ཡོངས་སུ་བརྗོད་པར་བྱ་ཞེ་ན། ཉོན་མོངས་རྒྱ་པས་བཤོར་ནས་ནི། །ཞེས་བྱ་བ་ལ་སོགས་པ་སྨོས་ཏེ། ཉོན་མོངས་པ་ཉིད་རྒྱ་པ་སྟེ། རྔོན་པ་བཞིན་དེས་བཤོར་ཞིང་ཟིན་པར་གྱུར་པ་ན། སྐྱེ་བའི་རྒྱར་ནི་ཆུད་གྱུར་ན་ནི། སྐྱེ་བའི་རྒྱར་ཅི་སྟེ་ད་རུང་མི་ཤེས་སམ། འདོད་པར་བྱ་བ་མ་ཡིན་པས་སྐྱོ་བ་མེད་དམ། རང་དང་རིགས་མཐུན་བསད་པ་ན། །སྲོག་ཆགས་དགེ་བསད་པར་གྱུར་པ་ན། རིམ་གྱིས་མཐོང་བར་མ་གྱུར་ན། །འོན་ཀྱང་གཉིད་ལ་བརྟེན་པ་གང༌། རང་དང་རིགས་མཐུན་པའི་རིམས་ཀྱིས་བསད་པར་གྱུར་པ་ན། །གདོལ་པ་དང་ནི་མ་ཧེ་བཞིན། །ལམ་ནི་ཀུན་ནས་བཀག་ནས་སུ། །འཆི་བདག་གིས་ནི་བལྟས་བཞིན་དུ། །ཇི་ལྟར་ཁྱོད་བདེར་སྤྱོད་སྲིད་ཅི་སྟེ། ཉམས་སུ་
མྱོང་བར་རོ། །དགའ་བའི་རྟེན་སྲེད་ཡིན་ན། དེ་ནས་བརྩོན་འགྲུས་བརྩམ་པར་བྱའོ་ཞེ་ན། མྱུར་བ་ཉིད་དུ་འཆི་འགྱུར་བས། ཞེས་བྱ་བ་ལ་སོགས་པ་སྨོས་ཏེ། འདི་ནི་མ་བྱས་བརྩམས་པ་དང༌། །འདི་བྱེད་བྱས་པར་གནས་པ་དང༌། །གློ་བུར་འཆི་བདག་འོངས་ནས་ནི།། ཀྱི་ཧུད་བཅོམ་ཞེས་སེམས་པར་འགྱུར། །མྱ་ངན་ཅི་ཞིག་བྱའོ། །མྱ་ངན་ཤུགས་ཀྱིས་སྐྲངས་པ་ཡི། །མིག་དམར་གདོང་ལ་མཆི་མ་འཛག་པ་གང་ཡིན་པའི་ཉེ་དུ་དེ་དག་ཁྱོད་འཚོ་བ་ལ་རེ་ཐག་ཆད་པ་མཐོང་ནས་དེ་ལྟར་བྱེད་པ་ན་ཁོ་བོས་ངན་སོང་གི་སྡིག་པ་བྱས་ནས་དེ་དག་སྐྱབས་མ་ཡིན་ནོ་ཞེས་རང་གི་སྡིག་དྲན་བས་གདུང་བ་དང༌། ཕྱིས་གདུང་བའི་མེས་ཚིག་པར་གྱུར་པའི་སེམས་ཀྱིས་ཅི་ཞིག་བྱའོ། །གཤིན་རྗེ་ཡི་ནི་བཞིན་བལྟས་ནས། སྐྲག་པས་མི་གཙང་ལུས་གོས་ཚེ། །ཅི་ཞིག་བྱའོ། །དམྱལ་བའི་སྒྲ་ནི་ཐོས་པ་ཡིས། སྲིད་པ་བར་དོའི་གནས་སྐབས་སུ་གདུངས་ཤིང་སྔར་འཆི་ལྟས་ཀྱིས་མྱོས་པར་གྱུར་ཚེ་ཅི་ཞིག་བྱ། དེའི་ཚེ་ལྷའི་བཞིན་དུ་ལས་ལས་སྐྱེས་པའི་རྣ་བས་ཐོས་པར་འགྱུར་རོ། །ཚེ་འདིར་ཏེ། དེ་ཉིད་ཁྱོད་ཡིས་སྡིག་པ་མ་བྱས་སུ་ཟིན་ཀྱང༌། འཇིགས་པ་དང་ལྡན་འགྱུར་ན། སྡིག་བྱས་དམྱལ་བའི་མི་བཟད་པའི་སྡུག་བསྔལ་ལྡན་པ་ནི་སྨོས་ཅི་དགོས། ཁྱོད་བརྩོན་མེད་པས་གནས་པས་སམ། །བརྩོན་མེད་འབྲས་བུ་འདོད་པ་དང༌། །གཞོན་ཤ་ཅན་ལ་གནོད་མང་བ། །དེ་ཉིད་ཀྱི་ཕྱིར། འཆི་བདག་གིས་ཟིན་པ་ལྟ་བུར་ནི། །འཆི་བདག་ཉེ་བར་གྱུར་པའི་ལྷ་བཞིན་དུ་ལུས་རྙིང་པར་བྱས་པའི་སེམས་ཅན་གང་ཡིན་པ་དེ་བཞིན་དུའོ། །གཉིད་དང་བྱ་བ་མི་བྱེད་པ་ལ་སོགས་པ་ནི་སྲེད་པ་ཉེ་བར་མཚོན་པ་ཉིད་ཡིན་ན། ལེ་ལོ་དང་ལྡན་པ་སྨད་པ་ལ་ཞེན་པའང་རིགས་པ་མ་ཡིན་ནོ། །ཞེས་བསྟན་པའི་ཕྱིར། དགའ་བའི་རྒྱུ་ནི་ཞེས་བྱ་བ་ལ་སོགས་པ་སྨོས་ཏེ། དགའ་བའི་རྒྱུ་ནི་མཐའ་ཡས་པའི། །ཞེས་བྱ་བ་ནི་འདི་ལ་དགའ་བའི་རྒྱུ་ཡོད་པ་དེ་ལྟར་ན་དགའ་བའི་རྒྱུ་མཐའ་ཡས་པ་ཅན་ནོ། །དམ་ཆོས་དགའ་བའི་མཆོག་སྤངས་ནས། །སྡུག་བསྔལ་རྒྱུ་སྟེ། སྡིག་པས་གཡེང་བ་དང༌། རྒོད་ལ་སོགས་ལ་ཁྱོད་ཅིའི་ཕྱིར་
དགའ། སྒྱིད་ལུག་པ་དང་བདག་ལ་བརྙས་པའི་གཉེན་པོའི་ཕྱོགས་ནི། སྒྱིད་ལུག་ཅེས་བྱ་བ་ལ་སོགས་པ་སྨོས་ཏེ། སྒྱིད་ལུག་པ་དང་སྙོམས་པའི་སྟོབས་ཀྱིས་ཚོགས་བཅོམ་པ་ནི་སྟོབས་ཀྱིས་བཀོད་པའོ། །བདག་ཉིད་དབང་དུ་གྱུར་པ་དང༌། བདག་དང་གཞན་དུ་བརྗེ་བར་གྱིས། །དེ་ལ་སྒྱིད་ལུག་པ་མེད་པ་ནི། །བདག་གིས་ཞེས་བྱ་བ་ལ་སོགས་པ་སྨོས་ཏེ། བདག་གིས་བྱང་ཆུབ་ག་ལ་ཞེས། །སྒྱིད་ལུག་པར་ནི་མི་བྱ་སྟེ། །འདིར་སྒྱིད་ལུག་པས་བདག་ལ་བརྙས་པ་དེ་ལྟ་བུའི་ཚུལ་དུ་དེ་མི་བྱའོ། །དེ་ཅིའི་ཕྱིར་ཞེ་ན། འདི་ལྟར་དེ་བཞིན་གཤེགས་པ་ནི། །བདེན་པར་གསུང་བས་བདེན་འདི་གསུངས། །དེའི་ཕྱིར་ཅི་ཞིག་གསུངས་ཤེ་ན། སྦྲང་བུ་ཞེས་བྱ་བ་ལ་སོགས་པ་སྨོས་སོ། །བྱང་ཆུབ་སྤྱོད་པ་མ་བཏང་ན། །ཞེས་བྱ་བ་ནི། བྱང་ཆུབ་ཀྱི་སེམས་སོ། །གཅེས་དང་མི་གཅེས་མ་དཔྱད་པར།། རྨོངས་པས་བདག་ནི་འཇིགས་པར་ཟད། །གཅེས་པ་དང་མི་གཅེས་པ་རྨོངས་པ་ཉིད་ཀྱིས་སོ། །གཅེས་པ་དང་མི་གཅེས་པ་ཡང་གང་ཞེ་ན། བསྐལ་པ་བྱེ་བ་གྲངས་མེད་དུ། །ཞེས་བྱ་བ་ལ་སོགས་པ་སྨོས་ཏེ། མི་གཅེས་པ་ཡིན་ནོ། །བདག་གིས་བྱང་ཆུབ་སྒྲུབ་པ་ཡི། །ཞེས་བྱ་བ་ལ་སོགས་པ་ནི་གཅེས་པ་ཡིན་ཏེ། ལག་པ་ལ་སོགས་པའི་སྦྱིན་པ་བཏང་བའི་སྡུག་བསྔལ་ཡང་དག་པའི་བྱང་ཆུབ་སྒྲུབ་པ་དེ་དག་ནི་ཚོད་ཡོད་པ་སྟེ། ཆུང་བ་ཡིན་ནོ། །ཅི་དང་འདྲ་བར་ཞེ་ན། །ཟུག་རྔུ་ཞེས་བྱ་བ་ལ་སོགས་པ་སྨོས་ཏེ། ཟུག་རྔུ་ཁོང་བརླག་གནོད་བསལ་ཕྱིར་ནི་དེ་བསལ་བའི་རྒྱུ་མཚན་ནོ། །ཟུག་རྔུ་བརླག་པ་དེ་གདོན་པའི་སྡུག་བསྔལ་ལོ། །དེ་དང་འདྲ་བར་གཅེས་པ་དང་དོན་ཆེ་བ་ཡིན་ནོ། །རེ་ཞིག་གདོན་པ་ནི་གཞག་གོ །སྨན་པ་ཀུན་ཀྱང་ཞེས་བྱ་བ་ལ་སོགས་པ་ལ། དེ་བས་སྡུག་བསྔལ་མང་པོ་དག །རང་དང་གཞན་གྱི་རྒྱུད་ལ་སྐྱེས་པ་སྐྱེ་བ་བརྒྱུད་པ་རྣམས་སུ། གཞོམ་ཕྱིར་མི་བདེ་ཆུད་བཟོད་བྱ་སྟེ། ལག་པ་ལ་སོགས་པ་སྦྱིན་པར་བཏང་བ་ལས་སྐྱེས་པའི་སྡུག་བསྔལ་ལོ། །གསོ་དཔྱད་ཕལ་པ་འདི་འདྲ་བའམ། འདི་ལྟར་འདི་ཡང༌། སྨན་པའི་མཆོག་གིས་མཛད་དེ། ཐམས་ཅད་མཁྱེན་པས་སོ། །འོན་
ཀྱང་ཆོག་ཤིན་ཏུ་འཇམ་པོ་ཡིས། མགུ་བར་བྱེད་པས་ནད་ཆེན་དཔག་མེད་གསོ་བར་མཛད། ནད་བརྒྱ་རྩ་བཞིས་ཟིན་པ་ལས་ཇི་ལྟར་དཔྱོད་པ་འཇམ་པོས་གསོ་བར་མཛད་པ་ཡིན་ནོ་སྙམ་དུ་སེམས་པ་ལ། ཚོད་མ་ཞེས་བྱ་བ་ལ་སོགས་པ་སྨོས་ཏེ། །དེ་ལ་ཞེས་བྱ་བ་ནི་ཚོད་མ་ལ་སོགས་པ་སྦྱིན་པ་ལའོ། །གང་ཞིག་རིམ་གྱིས་གོམས་པར་གྱུར་པ་ན་ཕྱིས་ཐུགས་རྗེའི་བསམ་པ་རྣམས་པར་གྱུར་པས། རང་གི་ཤ་ཡང་གཏོང་བར་མཛད་པར་འགྱུར་རོ། །དེ་ནི་དཀའ་བར་མཛད་པ་ཡིན་ནོ་ཞེ་ན། གང་ཚེ་ཞེས་བྱ་བ་ལ་སོགས་པ་སྨོས་སོ། དེ་ལྟར་ནི་སྡིག་པ་ཞེས་བྱ་བ་ལ་སོགས་པ་དང༌། མཁས་པའི་ཕྱིར་ན་ཞེས་བྱ་བ་ནི་ཕྱིན་ཅི་ལོག་གི་རྟོག་པ་སྤངས་པའི་ཕྱིར་རོ། །དེ་ལྟར་ཡང་འཁོར་བ་ན་བཞུགས་པས་སྐྱོ་བ་འམ་ཞེ་ན། བསོད་ནམས་ཀྱིས་ནི་ཞེས་བྱ་བ་ལ་སོགས་པ་སྨོས་སོ། །དུས་རིང་པོས་སྐྱོ་འམ་ཞེ་ན། འདི་ནི་བྱང་ཆུབ་སེམས་སྟོབས་ཀྱིས། །ཞེས་བྱ་བ་ལ་སོགས་པ་སྨོས་སོ། །ཐར་པའི་ཆ་དང་མཐུན་པའི་དགེ་བ་བྱས་པ་ཅན་གྱི་ཉན་ཐོས་ནི་བསྐལ་པ་བྱེ་བ་གྲངས་མེད་པར་གནས་པ་ཡིན་ཏེ། འཕགས་པ་ཤྭ་རིའི་བུས་རབ་ཏུ་བྱུང་བའི་དོན་དུ་མ་རྟོགས་པ་ལྟ་བུའོ། །མྱུར་བ་སྲིད་པ་གསུམ་གྱིས་ཐར་བར་འགྱུར་རོ། །འདི་ནི་བྱང་ཆུབ་ཀྱི་སེམས་ཀྱི་སྟོབས་ཀྱིས་ཉན་ཐོས་དག་ལས་ཀྱང་བྱང་ཆུབ་སེམས་དཔའ་ཐ་ན་བསྐལ་བ་གྲངས་མེད་པ་བཞི་བཅུར་མྱུར་བར་འགྱུར་རོ། །དེ་ལྟ་ན་ཡང་སྐྱོ་འམ་ཞེ་ན། དེ་བས་སྐྱོང་ལ་ཀུན་སེལ་བའི། །ཞེས་བྱ་བ་ལ་སོགས་པ་སྨོས་སོ། །སྟོབས་ཀྱི་ཚོགས་ནི། སེམས་ཅན་དོན་ནི་བསྒྲུབ་བྱའི་ཕྱིར། །ཞེས་བྱ་བ་ལ་སོགས་པ་སྨོས་ཏེ། འདུན་པ་ནི་འདི་དགེ་བའི་འདོད་པའོ། །བསྟན་པ་ནི་སྟོབས་སུ་གྱུར་པའོ། །དགའ་བ་ནི་ཆགས་པའོ། །གྲོལ་བ་ནི་སྤངས་པའོ། །འདུན་པ་ལ་སོགས་པ་ནི་དེ་དང་དེའི་དཔུང་ཡིན་ནོ། །བྱང་ཆུབ་ཀྱི་སེམས་ཀྱི་ཕན་ཡོན་ནི་སྔར་བཤད་ཟིན་ཏོ། །བརྩོན་འགྲུས་ཀྱི་མི་མཐུན་པའི་ཕྱོགས་ནི་ལེ་ལོ་ལ་སོགས་པའོ། །ཇི་བཞིན་དུ་འདུན་པའི་སྟོབས་དང༌། དབང་དུ་གྱུར་པའི་སྟོབས་ཀྱིས། དེ་སྲིད་མི་མཐུན་ཕྱོགས་སྤངས་ཏེ། །སྤངས་པའི་ཁྱད་པར་གཙོ་བོ་ཡིན་པའི་ཕྱིར་ལོགས་ཤིག་ཏུ་
བསྟན་ཏོ། །བརྩོན་འགྲུས་འཕེལ་ཕྱིར་འབད་པར་བྱའོ། །དེ་ལ་འདུན་པའི་དབང་དུ་མཛད་ནས། འབད་ལ་དབང་སྒྱུར་སྟོབས་ཀྱིས་ནི། །ཞེས་བྱ་བ་ལ་སོགས་པ་སྨོས་ཏེ། བྱང་ཆུབ་པ་བརྩམ་པར་བྱའོ། །གཞན་ཡང་བདག་དང་གཞན་གྱི་ཡོན་ཏན་ནི། །ཞེས་བྱ་བ་ལ་སོགས་པ་ལ། མང་པོ་བདག་གིས་ནི་ཞེས་བྱ་བ་ནི་གལ་ཏེ་རང་དང་གཞན་གྱིས་བདག་ཉིད་ཆུང་བས་དེ་དག་བདེ་བས་བསྒྲུབ་པར་བྱ་བ་ཡིན་ན། དེ་ལྟར་ཡང་མ་ཡིན་ནོ་ཞེས་བྱ་བའི་ཚིག་གོ །དེ་དག་ཅི་འདྲ་བ་ཞིག་ཅེ་ན། གང་དུ་ཡོན་ཏན་གང་བདག་གི་ནང་ནས་ཡོན་ཏན་རེ་རེ་ཞིང་བསྐལ་པ་རྒྱ་མཚོས་ལོབས་ནའང་རུང༌། བདག་ཉིད་དུ་གྱུར་ན་རུང་སྟེ་མི་འགྱུར་རོ། །དེ་ལྟ་ན་ཡོན་ཏན་དང་ལྡན་པ་ལོག་བར་མི་འགྱུར་ཞེ་ན། ཡོན་ཏན་ཅུང་ཟད་མི་སློབ་ན་ཞེས་བྱ་བ་སྨོས་ཏེ། ལྷ་གང་བྱེད་པ་ལ་སོགས་པ་ལོགས་པ་འབའ་ཞིག་ཏུ་ཟད་དོ། །ཅི་འདྲ་བ་ཞིག་ཅེ་ན། བསྟན་ལ་བྱ་བ་མ་བྱས་དང༌། །དབུལ་བའི་ཞེས་བྱ་བ་ལ་སོགས་པ་སྨོས་སོ། །དེ་ཡང་ཞེས་བྱ་བ་ནི་འདུན་པའི་ཡང་ངོ༌། །རྣམ་སྨིན་འབྲས་བུ་ནི་ཉེ་བར་མཚོན་པ་ཡིན་ཏེ། རྒྱུ་མཐུན་པའི་འབྲས་བུ་རྟག་ཏུ་བསྒོམས་པས་ཀྱང་ངོ༌། །དེའི་དབང་དུ་མཛད་ནས། སྡུག་བསྔལ་ཡིད་མི་བདེ་བ་དང་ཞེས་བྱ་བ་ལ་སོགས་པ་སྨོས་པ་ལ། སྡུག་བསྔལ་ནི་རྣམ་པར་སྨིན་པའོ། །ཡིད་མི་བདེ་བ་དང༌། དགེ་བ་དང་མི་དགེ་བ་ནི་རྒྱུ་མཐུན་པའོ། །གང་ལས་འཇིགས་པ་དེ་དག་ནི་འཇིགས་པའོ། །འདོད་པ་རྣམས་དང་བྲལ་བ་ནི་བདག་པོའི་འབྲས་བུའོ། །དེ་ལྟར་ནི་ཡིད་ལ་བསམ་པ་ཞེས་བྱ་བ་ལ་སོགས་པ་ལ། འབྲས་བུའི་རིམ་གྱིས་མངོན་མཆོད་འགྱུར། །ཞེས་བྱ་བའི་ཐ་ཚིག་གོ །སྡིག་པ་བྱེད་པ་ཞེས་བྱ་བ་ནི་ཁོང་དུ་ཆུད་པར་སླའོ། །རེ་ཞིག་འདི་ནི་མཐོང་བའི་ཆོས་ལ་མི་འདོད་པ་མཐོང་བའི་ཆོས་ཀྱི་འབྲས་བུ་ཡིན་ནོ། །མ་མཐོང་བ་ནི། རྒྱ་ཆེ་ཞེས་བྱ་བ་ལ་སོགས་པ་ལ། པདྨ་ནི་ཆུ་སྐྱེས་སོ། །གསུང་སྙན་རྒྱལ་བའི་གདན་བྱས་འདི་ནི་ཉེར་བསགས་ཤིང༌། གསལ་བ་གང་ལ་མངའ་བ་དེ་ནི། གསུང་སྙན་རྒྱལ་བའི་གདན་བྱས་འདི་ནི་ཉེ་བར་བསགས་པ་ཅན་གྱིའོ། །ཐུབ་པ་སྟེ་
འཕགས་པ་སྣང་བ་མཐའ་ཡས་ཀྱི་ཕྱག་གི་པདྨ་རྒྱས་པ་སྟེ། ཆུ་སྐྱེས་ཁ་ཕྱེ་བ་ལས་སོ། །འབྱུང་བའི་ལུས་ཀྱི་མཆོག་གང་མངའ་བ་དེ་དག་ལ་དེ་སྐད་ཅེས་བྱའོ། །བདེ་བར་གཤེགས་པ་སྟེ། འཕགས་པ་སྣང་བ་མཐའ་ཡས་ཀྱི་སྤྱན་སྔར་སྔོན་གྱི་དགེ་བས་འགྱུར་རོ། །མི་དགེ་བ་ནི་གཤིན་རྗེའི་ཞེས་བྱ་བ་ལ་སོགས་པ་སྨོས་ཏེ། གཤིན་རྗེའི་སྐྱེས་བུས་པགས་པ་མ་ལུས་ཏེ། །ལུས་པ་མེད་པར་བཤུས་པས་ཤིན་ཏུ་ཉམ་ཐག་པ་འདི་ལ་ཡོད་པས་ཞེས་ཚིག་རྣམ་པར་སྦྱར་རོ། །རབ་ཏུ་ཚ་བའི་མེ་ཡིས་ཏེ། །སྲེག་ཟ་དག་གིས་བཞུས་པའི་ཟངས་ཞུན་ལུས་ལ་བླུགས་པར་གྱུར་པ་གནག་ལ་ཡོད་པ་དེ་ལ་དེ་ལ་དེ་སྐད་ཅེས་བྱའོ། །འབར་བ་ཡང་དེ་ཡིན་ལ་རལ་གྲི་དང་མདུང་ཐུང་ཡང་ཡིན་པས་ན་འབར་བའི་རལ་གྲི་མདུང་ཐུང་དག་གོ །དེ་དག་གིས་བསྣུན་ཤ་ཡི་དུམ་བུ་བརྒྱར་ལྷགས་ཅན་ཏེ། དེས་བསྣུན་པའི་ཤའི་བུ་གང་ལ་ཡོད་དེ་ལ་དེ་སྐད་ཅེས་བྱའོ། །ཤིན་ཏུ་འབར་བའི་ལྕགས་ཀྱིས་གཞིར་ཏེ། ཡང་སོས་ལ་སོགས་པའི་དམྱལ་བར་ལྷུང་བར་མི་དགེ་མང་པོས་འགྱུར་ཏེ་རྣམས་པ་དུ་མར་རོ། །དེ་བས་ན་འདི་ལྟར་དགེ་བ་དང་མི་དགེ་བའི་འབྲས་བུ་ལ་གུས་པ་ཉིད་དུ་བསྒོམ་པར་བྱའོ། །དགེ་བ་ལ་འདུན་པར་སྐྱེད་པར་བྱ་ཞིང། གོ་ཆའི་བརྩོན་འགྲུས་བསྐྱེད་པར་བྱའོ། །བརྟན་པའི་དཔུང་གི་དབང་དུ་མཛད་ནས། རྡོ་རྗེ་རྒྱལ་མཚན་ཞེས་བྱ་བ་ལ་སོགས་པ་སྨོས་ཏེ། བྱང་ཆུབ་སེམས་དཔའ་རྡོ་རྗེ་རྒྱལ་མཚན་ཆོ་ག་ཡིས། །རྟག་ཏུ་བརྟན་པར་བསྒོམ་པར་བྱའོ། །བརྟན་པར་བརྩམ་ཞིང་ཞེས་བྱ་བའི་གཞུང་ནི་བརྟན་པར་བརྩམ་པ་སྟེ། ལྷག་པར་བྱས་ནས་རྡོ་རྗེ་རྒྱལ་མཚན་གྱི་ཚོགས་བསྒོམ་པར་བྱའོ་ཞེས་བྱ་བའི་ཐ་ཚིག་གོ །བརྩམ་པའམ་ཞེས་བྱ་བ་ནི། སྦྱོར་བའི་བརྩོན་འགྲུས་སོ། །བརྩམས་ལས་ལྡོག་པར་མི་བྱའོ། །ཞེས་བྱ་བ་ནི་ལྡོག་པའི་བརྩོན་འགྲུས་སོ། །ལོག་པའི་ནི་སྐྱེ་བ་གཞན་དུ་དེ་གོམས་ནས། དེ་ལས་སྡིག་པ་དང༌། སྡིག་ལས་སྡུག་བསྔལ་འཕེལ་འགྱུར་ཏེ། །གཞན་སྤྱོད་པ་ཉིད་ཀྱི་ཕྱིར་རོ། །གཞན་ཡང་རྒྱུའི་དུས་སུ་ནི་ཞེས་བྱ་བ་ནི་རྒྱུ་སྤྱོད་པའི་དུས་སུ་ཡང་དམན་པ་སྟེ། དོར་བར་བྱ་བ་དེ་ནི་བསྒྲུབ་མི་བྱ། །དེ་ཕྱིར་བརྩམས་བ་
ལས་ལྡོག་པར་མི་བྱའོ། །བརྟན་པའི་དཔུང་གཞན་ཡང༌། ལས་དང་ཉོན་མོངས་ནུས་པ་དང༌། །ཞེས་བྱ་བ་ལ་སོགས་པ་སྨོས་ཏེ། ཉོན་མོངས་པ་ཡང་འདིར་ཉེ་བའི་ཉོན་མོངས་པ་ཡིན་ནོ། །ཅིའི་ཕྱིར་བདག་ཉིད་ཀྱིས་ཤེ་ན། བདག་ཉིད་གཅིག་པུས་ཞེས་བྱ་བ་ལ་སོགས་པ་སྨོས་ཏེ། ནུས་པའི་ང་རྒྱལ་དག་ལས་བརྗོད་པར་བྱ་བ་མ་ཡིན་པ་ཉིད་ཀྱི་ཕྱིར་རོ། །འདི་ལ་ཞེས་བྱ་བ་ནི་སྨད་པའི་ལས་སོ། །འཆི་བའི་རྔ་ནི་བརྡུང་བ་དང༌། །ཝ་བཞིན་དུ་ཡིད་ནུས་པ་མེད་པ་ནི་ཉམ་ཆུང་བ་ནའོ། །ཞུམ་བྱས་རྩོལ་བ་དོར་བ་ཡིས། །ཕོངས་ལས་བདེ་བར་འགྱུར་རམ་ཅི། །ཞེས་བྱ་བ་ནི་ཡུལ་དུ་བྱེད་པར་འགྱུར་རམ་བདེ་བར་བྱེད་པ་མ་ཡིན་ནོ། །འདི་ལྟར་ཕོངས་པ་ལས་རྒྱལ་བ་ནི་བདག་ཕོངས་པ་ལས་རྒྱལ་བ་སྟེ། ཁམས་གསུམ་ལས་ནི་རྒྱལ་འདོད་པས། །བྱང་ཆུབ་སེམས་ལས་དགའ་བར་བྱེད་པ། དེ་བས་སེམས་ནི་བརྟན་པ་ཡིས། །ཕོངས་པ་རྣམས་ནི་གཞོམ་བྱ་སྟེ། །རྒོད་ཅིང་ཕོངས་ལས་ཐར་བར་བྱ། །བདག་གིས་ཀུན་ལས་རྒྱལ་བྱས་ཏེ། །ཞེས་བྱ་བ་ལ་སོགས་པ་སྟེ། རྟོགས་པར་སླའོ། །རྒྱལ་བའི་འབྲས་བུ་ནི་སངས་རྒྱས་ཉིད་དོ། །རྫོགས་པར་བྱེད་པར་ནི་མཐར་ཕྱིན་པར་བྱེད་པའོ། །ཉེ་བའི་ཉོན་མོངས་པ་དང༌། ང་རྒྱལ་བ་ནི་ཉོན་མོངས་ཚོགས་ཀྱིས་ཞེས་བྱ་བ་ལ་སོགས་པ་སྨོས་ཏེ། སྲན་གཟུགས་པ་ནི་དཔའ་བའོ། །ཉོན་མོངས་པའི་ཚོགས་སྟོང་གིས་སྡུག་བསྔལ་གྱི་གཡུལ་བཟློག་པར་མི་ནུས་པས་ན། ཉམ་ང་ཆེ་ཐང་བྱུང་གྱུར་ཀྱང༌། །རོ་ལ་མིག་ནི་མི་བལྟ་ལྟར་ཞེས་བྱ་བ་ནི་ལྕེའི་དབང་པོས་གཟུང་བར་བྱ་བ་ཉིད་ཡིན་པའི་ཕྱིར་རོ། །དགའ་བའི་དཔུང་གི་དབང་དུ་མཛོད་ནས། རྩེད་མོའི་བདེ་འབྲས་འདོད་པ་ལྟར་ཞེས་བྱ་བ་ལ་སོགས་པ་སྨོས་ཏེ། དཔེར་ན་བྱིས་པ་རྩེད་མོ་ལ་ཞེན་པ་མི་ངོམས་པ་བཞིན་དུ་དེ་དག་བྱ་བ་ཡིན་ནོ། །ཞེན་པ་ནི་འདིར་ཀུན་ནས་ཆགས་པའོ། །མི་ངོམས་པ་ནི་དགའ་བ་སྟེ་ཀུན་ནས་ཞེན་པར་གྱུར་ལས་མི་ངོམས་པར་བྱ་བའོ། །བདེ་བའི་ཡིན་པ་དེ་ལྟར་ན་ཅི་ལྟར་ལས་དེ་ལས་ཞན་པར་འགྱུར་ཞེ་ན། བདེ་བའི་དོན་དུ་ལས་བྱས་ཀྱང་ཞེས་བྱ་བ་ལ་སོགས་པ་སྨོས་
པ་ལ། བདེར་འགྱུར་མི་འགྱུར་གཏོལ་མེད་ཀྱིས། །ཞེས་བྱ་བ་ནི། སྤུ་གྲི་སོར་ཆགས་སྦྲང་རྩི་ལྟའི། །འདོད་པ་རྣམས་ཀྱིས་མི་ངོམས་ནའོ། །གླང་པོ་ཆེ་མཚོ་དང་ཕྲད་པ་ནི་གླང་ཆེན་མཚོ་ཕྲད་དེ། ཇི་ལྟར་མངོན་པར་འདོད་པ་ཕུལ་དུ་བྱུང་བས་དང་པོར་མཚོར་འཇུག་པ་དེ་བཞིན་དུ། འདིར་བསོད་ནམས་ཀྱི་བདུད་རྩི་ལས་དེ་ལ་ཡང་འཇུག་པར་བྱའོ། །སྟོབས་ཀྱི་དབང་དུ་མཛད་ནས། རྗེས་སུ་མི་བདེར་གྱུར་པའི་ལས་ཞེས་བྱ་བ་ལ་སོགས་པ་སྨོས་ཏེ། རྗེས་སུ་མི་བདེ་བར་འགྱུར་བའི་ལས་ནི་ཡོངས་སུ་སྐྱོ་བར་གྱུར་པ་ཡིན་ལ། ཡང་བྱ་བའི་ཕྱིར་ལས་བརྩམ་པ་ཡང༌། རིགས་འགྱུར་ཞེས་དེ་མ་ཐག་ཏུ་གཏང༌། བསྙེམས་པའི་སྟོབས་ཀྱི་དབང་དུ་མཛད་ནས། འཐབ་རྙིང་ཞེས་བྱ་བ་ལ་སོགས་པ་སྨོས་ཏེ། འདིར་ཉོན་མོངས་པ་ནི་ཉེ་བའི་ཉོན་མོངས་པ་མཚོན་པ་ཡིན་ནོ། །དྲན་པས་གཟུང་བར་བྱ་ཞིང༌། ཤེས་བཞིན་གྱིས་བརྟག་པར་བྱའོ། །འཇིགས་པས་མྱུར་དུ་ལེན་པ་ལྟར་རོ། །དྲན་པ་དང་བཅས་པའི་ཤེས་རབ་ནི་འདིར་དྲན་པའི་མཚོན་ནོ། །ཉུངས་མར་ཞེས་བྱ་བ་ལ་སོགས་པའི་ཚིགས་སུ་བཅད་པ་གསུམ་ནི་ཁོང་དུ་ཆུད་པར་སླའོ། །དགེ་བཤེས་ཕྲད་དང་ཞེས་བྱ་བ་ནི་གལ་ཏེ་ཁྱིམ་པ་དག་གམ། གལ་ཏེ་སྦྱིན་པ་ལ་སོགས་པ་ལ་ཐོབ་པར་འདོད་པའི་རྒྱུ་འདིས་སོ། །དེ་དག་གང་ཞེ་ན། ཇི་ལྟར་ཞེས་བྱ་བ་ལ་སོགས་པ་སྨོས་སོ། །དབང་དུ་གྱུར་པའི་སྟོབས་ཀྱི་དབང་དུ་མཛད་ནས་བག་ཡོད་གཏམ་ནི་ཞེས་བྱ་བ་ལ་སོགས་པ་སྨོས་ཏེ། བག་ཡོད་གཏམ་ནི་བྱང་ཆུབ་ཀྱི་སེམས་ལ་བག་ཡོད་པའི་ལེའུར་བཤད་པ་ནི། བག་ཡོད་གཏམ་ནི་དྲན་བྱས་ནས། །ཅི་ནས་ལས་བྱུང་སྔོན་རོལ་ནས་ཏེ། ཇི་ལྟར་ལས་ལ་སོགས་པའི་སྔོན་རོལ་ནས་ཤེས་བཞིན་ཐམས་ཅད་ལ་འཇུག་པར་བྱ་བ་དེ་བཞིན་དུ། བདག་ཉིད་ཟོ་མདོག་བདེ་བྱ་ཞིང་ལྡང་བ་ཡང་བར་བྱའོ། །གཞན་ཡང་ཇི་ལྟར་དུག་གིས་ཁྲག་གྱུར་ནས། ལུས་ཀྱི་མཚོན་གྱིས་རྨ་ལ་འཇུག་པ་ལྟར་ཏེ། ལུས་ཐམས་ཅད་ལ་ཁྱབ་པར་བྱེད་དེ། །དེ་བཞིན་བུ་ག་རྙེད་ནས་ནི། །སེམས་ཅན་ཉོན་མོངས་འཇུག་པར་བྱེད། །བུ་ག་ནི་
དྲན་པ་རྨོངས་པའོ། །ཇི་ལྟར་ཤིང་བལ་འགྲོ་བའམ། །འོང་བ་རླུང་གིས་དབང་གྱུར་ནས། །དེ་བཞིན་འབྱོར་པ་བརྩོན་པའི་དབང་དུ་གྱུར་ནས་མྱུར་དུ་འགྲུབ། བརྩོན་འགྲུས་ནི་དབང་དུ་འགྱུར་རོ། །དེ་ལྟར་ན་བློ་འམ་གཞན་གྱི་ཡོན་ཏན་གྱི་ཚོགས་འབྱོར་བར་འགྱུར་རོ། །བསམ་གཏན་དང་ཤེས་རབ་གཙོ་བོར་གྱུར་པ་བདག་དང་གཞན་མཉམ་པ་ཉིད་དང༌། བདག་དང་གཞན་བརྗེ་བ་ཞེས་བྱ་བ་ནི་འདིར་མ་བཤད་དོ། །བྱང་ཆུབ་སེམས་དཔའི་སྤྱོད་པ་ལ་འཇུག་པའི་ལེགས་པར་སྦྱར་བ་ལས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་སྟེ་ལེའུ་བདུན་པའོ།། །།དེ་ལྟར་བཤད་པའི་ཚུལ་གྱིས་བརྩོན་འགྲུས་བསྐྱེད་ནས་ནི་ཅི་ཞིག་བྱ་ཞེ་ན། ཡིད་ནི་ཏིང་ངེ་འཛིན་ལ་གཞག །འདི་ལྟར་སེམས་ནི་རྣམ་པར་གཡེངས་པའི་མི། །ཉོན་མོངས་མཆེ་བའི་ཕྲག་ན་སྟེ། །ཏིང་ངེ་འཛིན་ལ་རྣམ་པར་གཡེངས་པ་ལ་གནས་སོ། །ཏིང་ངེ་འཛིན་ནི་རྩེ་གཅིག་པ་ཡིན་ནོ། །དེ་ཡང་རྣམ་པ་གསུམ་སྟེ། ནང་དུ་ཡང་དག་འཇོག་དང༌། ཀུན་ནས་ནང་དུ་ཡང་དག་འཇོག་གི་དང༌། བྱ་བ་ནན་ཏན་གྱི་ནང་དུ་ཡང་དག་འཇོག་ཅེས་བྱའོ། །གསུམ་པོ་དག་ལ་ཡང་འདིར་གཡེང་བ་མེད་པའི་ཏིང་ངེ་འཛིན་ཅེས་བྱའོ།། དེ་ལ་ནང་དུ་ཡང་དག་འཇོག་གི་དབང་དུ་བྱས་ནས། ལུས་དབེན་པ་ལ་གནས་ནས་རྣམ་པར་གཡེང་བ་སྟེ། འདོད་པའི་རྣམ་པར་རྟོག་པ་ལ་སོགས་པ་ཡོངས་སུ་སྤང་ཞིང་དོར་བར་བྱའོ། །སེམས་དབེན་པ་སྟེ་འདོད་པ་ནས་བསམ་གཏན་བཞིའི་བར་ལ་དབེན་པར་བྱ་ཞིང་འདུ་ཤེས་མེད་འདུ་ཤེས་མེད་མིན་དང༌། འགོག་པའི་བར་དུ་རྫོགས་པར་བྱས་ཏེ་གནས་པར་བྱའོ་ཞེས་བྱ་བའི་ཐ་ཚིག་གོ །བསམ་གཏན་བཞི་པ་ནི་བྱང་ཆུབ་སེམས་དཔའ་སེམས་ཅན་གྱི་དོན་སྒྲུབ་པའི་རྟེན་ཡིན་ནོ། །བསྟོད་པའི་ཁམས་ཀྱིས་ཡོངས་སུ་གྱུར་པ་ལས་ཐམས་ཅད་ལས་སུ་རུང་བ་ཡིན་ནོ། །དབྱེ་བ་ཡང་མཐའ་ཡས་པའི་ཡིན་པ་དེ་ལྟར་ན་དེ་རབ་ཀྱི་མཐར་གྱུར་པས་ས་ལྔ་པ་ལ་བསམ་གཏན་གྱི་ཕ་རོལ་ཏུ་ཕྱིན་པ་ཆེས་ཤིན་ཏུ་ལྷག་པར་འགྱུར་རོ། །དེ་ལྟར་ན་ལུས་དང་སེམས་ནི་དབེན་པ་ཡིས། །རྣམ་པར་གཡེང་བ་མི་འབྱུང་ངོ༌། །ཆགས་པ་ལ་སོགས་པ་ལས་འཇིག་རྟེན་གྱི་མི་སྤོང་བ་
དེའི་ཕྱིར་དེ་ཡོངས་སུ་སྤངས་པའི་དོན་དུ་ཇི་ལྟར་དཔྱད་པར་བྱ་ཞེ་ན། ཞི་གནས་ཞེས་བྱ་བ་ལ་སོགས་པ་སྨོས་ཏེ། ཞི་གནས་རབ་ཏུ་ལྡན་པའི་ཞེས་བྱ་བ་ནི་ཏིང་ངེ་འཛིན་གྱིས་སོ། །ཁྱད་པར་དུ་མཐོང་བ་ངེས་པའི་ཚིག་གི་རྣམ་པས་ལྷག་མཐོང་ཞེས་བྱ་སྟེ་ཤེས་རབ་ཡིན་ནོ། །དེས་ཤེས་བྱས་ཏེ་རྟོགས་པར་བྱས་ནས་སོ། །ཞི་གནས་དེ་ཡང་ཇི་ལྟར་བཙལ་བར་བྱ་ཞེ་ན། འཇིག་རྟེན་ཆགས་པ་མེད་པ་མངོན་དགས་འགྲུབ། །འཇིག་རྟེན་ལ་ལྟོས་པ་མེད་པའི་མངོན་པར་དགའ་ཞེས་བྱ་བའི་ཐ་ཚིག་གོ །དེ་ཡང་རིགས་སོ་ཞེས་བསྟན་པའི་ཕྱིར། མི་རྟག་ཅེས་བྱ་བ་ལ་སོགས་པ་སྨོས་ཏེ། མ་མཐོང་ན་ནི་དགའ་མི་འགྱུར། །ཡིད་ཀྱང་མཉམ་འཇོག་མི་འགྱུར་ལ། །མཐོང་ཡང་ངོམས་པར་མི་འགྱུར་བས། །འོན་ཀྱང་སྔ་མ་བཞིན་ཏེ། མ་མཐོང་བའི་དུས་བཞིན་དུ། སྲེད་པས་ཞེས་བྱ་བ་དེ་རྙེད་པ་ལ་སོགས་པ་ལ་སྲེད་པས་གདུང་བར་འགྱུར་རོ། །དེའི་ཕྱིར། སེམས་ཅན་རྣམས་ལ་ཆགས་བྱས་ན། །ཡང་དག་ཉིད་ལ་ཀུན་ནས་སྒྲིབ་སྟེ། དེ་ཁོ་ན་ཉིད་ལའོ། །སྐྱོ་བའི་སེམས་ཀྱང་འཇིག་པར་བྱེད། །སྐྱོ་བ་འབྱུང་བར་མི་འགྱུར་རོ། །ཡང་ན་བྲལ་བར་གྱུར་བས་ན། །མྱ་ངན་གྱིས་ནི་གདུང་བར་འགྱུར། །གང་གིས་ཤེ་ན། སྡུག་པ་དང་ཕྲད་པར་འདོད་པ་གང་ཡིན་པའི་མྱ་ངན་དེས་སོ། །དེ་ལ་སེམས་པ་འབའ་ཞིག་གིས་ཞེས་བྱ་བ་ནི་སྡུག་བསྔལ་དང་ཡང་དང་ཡང་དུ་སེམས་པས། ཚེ་འདི་དོན་མེད་འདའ་བར་འགྱུར། །གལ་ཏེ་འགའ་ཞིག་གིས་ཚེ་རིང་པོར་འགྱུར་རམ་ཞེ་ན། དེ་ལྟ་མ་ཡིན་ནོ་ཞེས་བྱ་བར་དགོངས་སོ། །ཇི་ལྟར་དོན་མེད་པར་འགྱུར་ཞེ་ན། རྟག་པ་མེད་པའི་མཛའ་བཤེས་ཀྱིས་ཞེས་བྱ་བ་སྨོས་ཏེ། དུས་རྟག་ཏུ་མེད་པས་དེ་མི་བརྟན་པ་ཉིད་ཀྱི་ཕྱིར་རྟག་པ་མེད་པའི་སྡུག་པའི་མཛའ་བཤེས་ཀྱི་རྒྱུ་དེས་སོ། །གཡུང་དྲུང་གི་ཐར་པ་ཡིན་ལ་ཆོས་ནི་ཐར་པའི་རྒྱུ་ཡིན་ཏེ། ཐར་པ་ནི་དངོས་པོ་དང་དངོས་པོ་མེད་པ་དཔྱོད་པའི་མཚན་ཉིད་ཟད་པ་ཉིད་ཡིན་པའི་ཕྱིར་རོ། །དེའི་རྒྱུ་ཉིད་ཡིན་པའི་ཕྱིར་ཉེ་བར་བརྟགས་ནས་གཡུང་དྲུང་ཆོས་ཡིན་ཏེ། ཀུན་རྫོབ་ཉིད་ཡིན་པའི་ཕྱིར་འཇིག་ཅིང་ཉམས་པར་འགྱུར་རོ་ཞེས་བྱ་བའི་དོན་ཏོ། །ཇི་ལྟར་འཇིག་པར་འགྱུར་ཞེ་ན། །བྱིས་དང་སྐལ་པ་
མཉམ་སྤྱོད་ན། །ཞེས་བྱ་བ་ལ་སོགས་པ་སྨོས་ཏེ། སྐལ་མཉམ་སྤྱོད་པ་ནི་ལས་འདྲ་བ་ལ་སྤྱོད་པའོ། །བྱིས་པ་ནི་བྱིས་པ་མ་ཡིན་པ་དང་སྐལ་པ་མི་མཉམ་པར་འདོད་དེ། བྱིས་པ་དེ་དང་དེ་ལ་སྡུག་པ་མ་ཡིན་ཞེས་བྱ་བའི་ཐ་ཚིག་གོ །དེ་ལྟར་ན་བྱིས་པ་བསྟེན་པས་ཅི་ཞིག་བྱས་ཏེ། དོན་ཅི་ཞིག་ཐོབ་པར་འགྱུར། བྱིས་པ་རྣམས་ལ་ཆགས་པས་ཅིར་ཡང་མི་རུང་སྟེ། རྣམ་པ་ཐམས་ཅད་དུ་ཡང་དོན་མེད་པའི་ཕྱིར་རོ། །དེ་ལྟར་ན་སྐད་ཅིག་གཅིག་གིས་མཛའ་འགྱུར་ལ། །ཞེས་བྱ་བ་ལ་སོགས་པ་ཚིགས་སུ་བཅད་པའི་དོན་ཁོང་དུ་ཆུད་པར་སླའོ། །མཐོ་ལ་ཕྲག་དོག་སྟེ། གཞན་གྱི་ཕུན་སུམ་ཚོགས་པ་ལ་ཕྲག་དོག་པ་ནི། ཁྱད་པར་གྱི་ཡོན་ཏན་གྱིས་བྱིས་པའི་སེམས་ལ་བཟོད་པ་མེད་དོ། །མཉམ་དང་འགྲན་པ་ནི་ཁྲོ་བ་ལས་བྱུང་བའི་རྩོད་པའོ། །མི་སྙན་པ་ནི་སྨད་པའོ། །འཁོར་བར་དགའ་བའི་གཏམ་ལ་སོགས། །ཞེས་བྱ་བ་ལ་སོགས་པ་ལ། སོགས་པའི་སྒྲས་ནི་བརྫུན་ལ་སོགས་པ་གཟུང་ངོ༌། །དེ་ལྟར་ཞེས་བྱ་བ་ནི་ཕན་ཚུན་ནོ། །འདྲིས་ཆེན་ཉིད་དུ་མི་འགྱུར་བ་སྟེ། འདྲིས་པ་ལས་འཇུག་པར་བྱ་བ་མ་ཡིན་ནོ། །འོན་ཀྱང་ཐ་མལ་པ་ཙམ་ལེགས་པར་བྱ། དགའ་བར་བྱའོ། །བུད་བས་མེ་ཏོག་སྦྲང་རྩི་བཞིན། །སྦྲང་མས་མེ་ཏོག་ལ་སྦྲང་རྩི་སྔ་ན་མེད་བཞིན་དུ། འདྲིས་པ་མེད་པར་ཆགས་མེད་པར། །ལེན་ཅིང་ཐམས་ཅད་དུ་སྦྲང་མ་སྤྱོད་པ་བཞིན་དུ། ཆོས་དང་དོན་ནི་ཆོས་ཀྱི་དོན་ཏེ། ལུང་གི་ཆོས་ལེགས་པར་བཤད་པའི་དོན་ཙམ་བླངས་ནས་ནི་ཞེས་བྱ་བ་ལ་ཆགས་པ་ལ་སོགས་པ་མ་ཡིན་པས་བླངས་ནས། འདྲིས་པ་མེད་པར་གནས་པར་བྱའོ། །དེ་ལྟར་ཆགས་པ་སྤངས་ནས་རྙེད་པ་ལ་སོགས་པ་ལ་སྲེད་པ་སྤང་བའི་ཕྱིར། བདག་ནི་རྙེད་མང་ཞེས་བྱ་བ་ལ་སོགས་པ་སྨོས་ཏེ། དེ་ལྟར་ཤི་བའི་འོག་ཏུ་འཇིགས་པ་སྐྱེའོ། །དེ་དེ་ལྟར་སྤྱད་ནས་མི་འགྱུར་རོ་སྙམ་ན། དེ་བས་རྣམ་པར་རྨོངས་པའི་ཡིད་ཅེས་བྱ་བ་ལ་སོགས་པ་སྨོས་ཏེ། རྙེད་པ་ལ་སོགས་པ་གང་དང་གང་ལ་ཡིད་བདེ་བ་ལ་རྨོངས་པར་གྱུར་པ་ན། ཆགས་པར་གྱུར་པའི་རྙེད་པ་ལ་སོགས་པ་དེ་དང་དེ་བསྡོངས་པ་སྟོང་འགྱུར་དུ་སྡུག་བསྔལ་གྱི་རྒྱུ་ཉིད་དུ་གྱུར་ཅིང་
ལྡང་ངོ། །གང་གི་ཕྱིར་དེ་ལྟ་ཡིན་ན། དེ་བས་མཁས་པས་རྙེད་པ་ལ་སོགས་པ་དེ་ལ་ཆགས་མི་བྱ། སྲེད་པའི་ཆགས་པ་གང་ཡིན་པ་ལ་འཇིགས་པ་སྐྱེའོ། །ཆགས་པ་ཡོད་ན་ཤི་བ་ལས་འཇིགས་པར་འགྱུར་གྱིས་གཞན་དུ་ནི་མ་ཡིན་པ་དེའི་ཕྱིར་མཁས་པས་དེ་འདོད་པར་བྱ་བ་མ་ཡིན་ནོ། །མི་རྟག་པ་དག་ལ་མི་རྟག་པའི་འདོད་པ་རིགས་པ་མ་ཡིན་པར་བསྟན་པའི་ཕྱིར་འདི་དག་ཅེས་བྱ་བ་ལ་སོགས་པ་སྨོས་ཏེ། རྙེད་པ་ལ་སོགས་པ་འདི་དག་རང་ཉིད་འདོར་འགྱུར་བར་འཇིག་པར་འགྱུར་ཏེ་འཇིག་པའི་རྒྱུ་མེད་པ་ཉིད་ཀྱི་ཕྱིར་རོ། །རྒྱུ་དང་འབྲེལ་པའི་འཇུག་པ་བརྟན་པར་གྱིས་ཏེ་རབ་ཏུ་རྟོགས་པར་བྱའོ། །འདི་ལྟར་རྙེད་པ་དག་ནི་མང་བྱུང་ཞིང་ཞེས་བྱ་བ་ལ་སོགས་པ་སྨོས་སོ། །མོས་པ་ནི་དེ་ཉིད་འདི་ཡིན་ནོ་ཞེས་ལྷག་པར་མོས་པའོ། །དེ་དག་གིས་ཞེས་བྱ་བ་ནི་བྱིས་པ་དག་དང་ལྷན་ཅིག་གོ །འདི་ལྟར་བྱིས་པ་དང་འདྲིས་པ་སྨད་ཅིང་དབེན་པའི་ཕན་ཡོན་བསྟན་པའི་ཕྱིར། ནགས་ན་ཞེས་བྱ་བ་ལ་སོགས་པ་སྨོས་ཏེ། ཤིང་རྣམས་ཞེས་བྱ་བ་ལ་སོགས་པ་ནི་དགོན་པའི་ཤིང་དག་གོ །བརྒྱད་སྟོང་པ་ལ་སོགས་པར་བྱང་ཆུབ་སེམས་དཔའི་དབེན་པ་ནི་མ་ཡིན་ནོ་ཞེས་བཤད་པ་མ་ཡིན་ནམ་ཞེ་ན། བདེན་ཏེ། འོན་ཀྱང་ལས་དང་པོ་པ་ཆགས་པ་དང་སྲེད་པས་བཅོམ་པ་ལ་དཀོན་མཆོག་སྤྲིན་ལ་སོགས་པར་འདི་ཡང་གསུངས་མོད་ཀྱི། གཞན་ནི་ཐེག་པ་དམན་པ་ལ་དབེན་པ་དེ་མི་འདོད་ཅིང་ལྟས་པ་མ་ཡིན་ནོ། །ཕུག་གམ་ལྷ་ཁང་སྟོང་པའམ་ཞེས་བྱ་བ་ལ་སོགས་པ་ལ། ཆགས་པ་མེད་པར་འགྱུར་ཞིག་གུ། །ས་ཕྱོགས་བདག་གིར་བཟུང་མེད་པ། །བདག་གིར་བྱས་པ་མ་ཡིན་པར། །རང་བཞིན་གྱིས་ནི་ཡངས་རྣམས་སུ། །བཅོས་མ་མ་ཡིན་བདེ་བ་དེ་དག་ཏུ། རང་དབང་སྤྱོད་ཅིང་ཆགས་མེད་པར་ཏེ། བདག་གིར་མ་བྱས་པའི་གནས་དག་ཏུ། །ནམ་ཞིག་བདག་ནི་གནས་པར་འགྱུར་རོ། །སྦ་བ་མ་བྱས་པ་ནི་བསྲུང་བ་མ་བྱས་པའོ། །དུར་ཁྲོད་ནི་རོའི་གནས་སོ། །འཇིགས་པ་ནི་རུལ་ཞིང་རྣགས་པ་སྟེ། དེ་ཉིད་ཀྱི་ཆོས་ཅན་དག་ཏུ་སྟེ། རང་བཞིན་དེ་འདི་ལ་ཡོད་པས་ན་འདི་ནི། འཇིག་པའི་ཆོས་ཅན་དག་ཏུ་ནི། །བདག་གི་ལུས། ནམ་ཞིག་མགོ་སྙོམས་བྱེད་པར་འགྱུར། །བདག་
གི་ལུས་ནི་འདི་ཉིད་ཀྱང་ཞེས་བྱ་བ་ལ་སོགས་པ་སྨོས་ཏེ། གང་ཞེས་བྱ་བ་ནི་ཚིག་ཕྲད་ཡིན་ཏེ། གང་གིས་ཞེས་བྱ་བའི་དོན་ཏོ། །དྲུང་དུ་ཞེས་བྱ་བ་ནི་ཐག་ཉེ་བའོ། །སྡུག་པ་དང་བྲལ་བ་མི་རིགས་པ་མ་ཡིན་ནོ་ཞེས་བསྟན་པའི་ཕྱིར་ལུས་འདི་ཞེས་བྱ་བ་ལ་སོགས་པ་སྨོས་ཏེ། དེའི་ལུས་གྱེས་པར་གྱུར་པ་ནི་དེ་གྱེས་པར་གྱུར་པའོ། །མཛའ་བ་གཞན་ལྟ་སྨོས་ཅི་དགོས། །དབེན་པའི་བདེ་བ་འཇོམས་པར་བྱེད་པ་གཞན་ལྟ་ཞོག་གོ །ཅི་ཞིག་ཅེས་བྱ་བ་ནི་སྨོས་ཀྱང་ཅི་དགོས་ཞེས་བྱ་བའི་དོན་ཏོ། །སྡུག་པ་འབའ་ཞིག་ཀྱང་ཡོད་པ་མ་ཡིན་ནོ། །ལམ་དག་ཏུ་ཞེས་བྱ་བ་ལ་སོགས་པ་ལ། སྐྱེ་བའི་གནས་དེ་ལ་ཁྲི་འདེགས་པར་བྱེད་པའོ། །ཇི་སྲིད་སྐྱེས་བུ་བཞི་ཡིས་ནི། །སྲིད་པའི་ལམ་དེ་ལས་དེ་ནི་མ་བཏེག་པ། །ཀུན་ནས་འཇིག་རྟེན་མྱ་ངན་དུ་གྱུར་པས། དེ་སྲིད་དུ་ནི་ནགས་སུ་སོང༌། །དེ་ལྟར་ཡང་ཤི་བར་གྱུར་པ་ལ་མྱ་ངན་བྱེད་པ་ཡིན་ནམ་ཞེ་ན། བཤེས་མེད་ཅེས་བྱ་བ་ལ་སོགས་པ་སྨོས་ཏེ། འགའ་ཞིག་དང་འདྲིས་པ་མེད་ཅིང་ཁོན་པ་ཡང་མེད་པ་དེ་ལྟར་ན་ཤི་བ་ལས་སྔར། ལུས་འདི་གཅིག་པུ་དབེན་གནས་ཏེ། །སྔ་ནས་ཤི་དང་འདྲར་བརྩིས་ནས། །ཤི་ནའང་མྱ་ངན་བྱེད་པ་མེད། །དྲུང་ན་འཁོད་པ་ནི་གཉེན་ལ་སོགས་པའོ། །འདིའི་སངས་རྒྱས་རྗེས་དྲན་སོགས་ཞེས་བྱ་བ་ལ་སོགས་པའི་སྒྲས་ནི་ཆོས་དང་དགེ་འདུན་དང༌། གཏོང་བ་དང་ལྷ་རྗེས་སུ་དྲན་པ་གཟུང་ངོ༌། །དེ་བས་ན་ཤིན་ཏུ་ཞེས་བྱ་བ་ལ་སོགས་པ་ནི། མཇུག་སྡུད་པ་སྟེ། རྟོགས་པར་སླའོ། །དེ་ལྟར་ཚོགས་པ་དང་རྙེད་པ་ལ་སོགས་པའི་སྲེད་པ་སྤངས་པས་འཇིག་རྟེན་ཡོངས་སུ་སྤངས་ནས་རྣམ་པར་རྟོག་པ་ཡང་དོར་བར་བྱ་བའི་ཕྱིར། བསམ་པ་གཞན་ནི་ཀུན་བཏང་སྟེ། །ཞེས་བྱ་བ་ལ་སོགས་པ་སྨོས་པ་ལ། བསམ་པ་གཞན་ནི་ཕ་རོལ་ལ་སེམས་པ་སྟེ། དཔེར་ན་གཞན་དག་ཏུ་གཞན་དག་གིས་ནི་འཁྲུལ་པའམ། གཞན་གྱིས་བྱས་པའམ་མ་བྱས་པ་ལ། རྟག་པར་མི་བྱ་བདག་ཉིད་ཀྱི། །མཉམ་དང་མི་མཉམ་ཡང་དག་བརྟག །ཅེས་བཤད་པ་ལྟ་བུའོ། །བདག་ལ་སེམས་པ་ནི་བྱང་ཆུབ་ཀྱི་སེམས་ལ་སེམས་པའོ། །གཅིག་པུ་དེ་
ཉིད་དེ། དམིགས་པ་ལ་རྩེ་གཅིག་པ་གང་ལ་ཡོད་པ་དེ་ནི། བདག་ལ་སེམས་པ་གཅིག་པུ་ཡིས། །སེམས་ནི་མཉམ་གཞག་ཕྱིར་ཡོད་པ་དེ་ལ་དེ་སྐད་ཅེས་བྱའོ། །ཞི་གནས་ཀྱིས་མཉམ་པར་གཞག་པའི་ཕྱིར་རོ། །ལྷག་མཐོང་གིས་དུལ་བར་བྱ་ཕྱིར་བརྩོན་ཏེ་བྱ། །དྲན་པ་དང༌། བརྩོན་འགྲུས་དང༌། བག་ཡོད་པ་དག་གིས་སོ། །གཞན་ལ་སེམས་པ་ཡང་བྱང་ཆུབ་སེམས་དཔའ་དག་གིས་བྱ་བ་མ་ཡིན་ནམ། དཔེར་ན་གཞན་དག་ཏུ། བདག་གམ་ཡང་ན་གཞན་དག་ལ། །སྡུག་བསྔལ་ཡིན་ཡང་གང་ཕན་ལ། །ཕན་དང་བདེ་བ་རྣམས་བྱ་སྟེ། བདེ་ཡང་མི་ཕན་མི་བྱའོ། །ཞེས་གསུངས་པ་ལྟ་བུའོ། །བྱང་ཆུབ་ཀྱི་སེམས་འདིར་ཡང་གཞན་ལ་སེམས་པ་གཙོ་བོར་གྱུར་པ་བཤད་པ་ཡིན་ནོ་ཞེ་ན་བདེན་ཏེ། ལས་དང་པོའི་གཞན་གྱི་དོན་གྱི་གོ་རིམས་འདི་ཉིད་ཡིན་ཏེ། འགའ་ཞིག་བདག་ཉིད་དུལ་བར་མ་བྱས་པར་གཞན་གདུལ་བར་ནུས་པ་མ་ཡིན་ནོ། །དེ་ཉིད་ཀྱི་ཕྱིར་སེམས་ཅན་གྱི་དོན་བྱེད་པའི་ཚུལ་ཁྲིམས་ནི་སྡོམ་པའི་ཚུལ་ཁྲིམས་དང༌། དགེ་བའི་ཆོས་སྡུད་པའི་ཚུལ་ཁྲིམས་ཀྱི་ཕྱིར་བསྟན་པ་ལྟར། བྱ་བ་ནན་ཏན་གྱི་བསམ་གཏན་ཡང་ཕྱིས་འཆད་པར་འགྱུར་རོ། །འདི་ནི་ནང་དུ་ཡང་དག་འཇོག་པ་ཡིན་པ་དེ་ལྟར་ན་ཏིང་ངེ་འཛིན་ལ་རྩོད་པ་ཅིར་ཡང་མི་རུང་ངོ༌། །དེ་ལ་འདོད་པའི་རྟོག་པ་སྤང་བའི་དབང་དུ་མཛད་ནས། འཇིག་རྟེན་འདི་དང་ཞེས་བྱ་བ་ལ་སོགས་པ་སྨོས་སོ། །བདག་ལ་འདོད་པ་ཡང་སྨོད་པ་ནི་གང་ཕྱིར་ཞེས་བྱ་བ་ལ་སོགས་པ་སྨོས་ཏེ། གང་གི་ཕྱིར་དགའ་བའི་དོན་དུའོ། །སྔོན་ནི་སྔར་རོ། །རྫས་ནི་ནོར་ཏེ། བདག་དང་གཞན་གྱིས་ཕན་ཚུན་བདག་གིས་བྱས་པའོ། །གང་ཞིག་སྟེ་གདོང་འབད་དེ་བཏེག་པ་ནིའོ་བྱེད་པའི་དོན་དུའོ། །དྲང་ཀྱང་ངོ་ཚ་ས་འོག་ཏུ་བལྟས། །སྔོན་ནི་མཐོང་ངམ་མ་མཐོང་ཡང༌། །གོས་ཀྱིས་གདོང་ཡང་གཡོགས་པར་འགྱུར། །གཡོགས་སམ་མ་གཡོགས་པ་ཉིད་ཀྱི་ཕྱིར་ཁྱོད་ཉོན་མོངས་པའི་བུད་མེད་ཀྱི་གདོང་དེ་ནི། འདེགས་པར་བྱེད་པའི་འབད་རྩོལ་གྱིས། །ད་ལྟ་མངོན་སུམ་གྱུར་པ་བཞིན། །བརྣག་པར་མི་བཟོད་པ་ནི། བྱ་རྒོད་ཀྱིས་བསལ་བྱས་མཐོང་ན་ཏེ། །དུར་ཁྲོད་ལ་སོགས་པར་རོ། །
བུད་མེད་ཀྱི་ལུས་འཇིགས་སུ་རུང་བ་འཇིགས་པ་དང༌། སྐྱོ་བར་བྱེད་པ་དེས་མཐོང་ནས། །ད་ལྟར་ཅིའི་ཕྱིར་འབྱེར་བར་བྱེད། །གཞན་གང་གིས་ཤེ་ན། གཞན་གྱི་ཟས་ལ་སོགས་པ་སྨོས་ཏེ། མེ་ཏོག་གི་ཕྲེང་བ་ནི་ཕྲེང་བའོ། །རྒྱན་ནི་གདུ་བུ་ལ་སོགས་པའོ། །དེ་དག་གི་ཅེ་སྤྱང་ལ་སོགས་པ་གང་དག་གི་ཟས་བུད་མེད་ཀྱི་ལུས་ཤའི་ཕུང་པོ་ལ་མཆོད་པར་བྱེད་དེ། དེ་དག་དང་གཞན་དག་གི་བཟའ་བ་ཡིན་ནོ། །ཇི་སྲིད་དེ་ནི་འདི་ལྟར་ཡང་ཤའི་ཕུང་པོ་སྟེ། བུད་མེད་ཀྱི་ལུས་ཀྱི་ཤའི་ཚོགས་ཤ་མང་པོ་ཉིད་ཀྱི་ཕྱིར་དེ་ལྟ་བུར་གྱུར་པ་འདི་མཐོང་ནས། སེར་སྣ་ཅན་ཁྱོད་ཅིས་མི་སྲུང༌། །རུས་གོང་ཉིད་དུ་མཐོང་ནས་ནི། །བུད་མེད་ཀྱི་ལུས་བདག་མེད་པ། །མི་འགུལ་ཡང་ནི་ཁྱོད་སྐྲག་ན། །རོ་ལངས་བཞིན་དུ་འགའ་ཡིས་ཀྱང༌། །བསྐྱོད་པར་གྱུར་ན་ཅིས་མི་འཇིགས། །བཤད་པ་དང་ནི་མི་གཙང་བའོ། །སྔས་ལའང་དགའ་བར་མི་བྱེད་པ། །དྲི་ང་འཛག་པ་མ་ཡིན་ཞེས། །དེའི་ཕྱིར། འདོད་ལྡན་མི་གཙང་བ་ལ་རྨོངས། །མི་གཙང་བ་ཉིད་ལ་རྨོངས་པ་ནི་ཆགས་པའོ། །དེ་ལྟར་ན། གང་ལ་ཞེས་བྱ་བ་ལ་སོགས་པ་ལ་མི་གཙང་བའི་ལུས་གང་ལ་གཡོགས་ནའང་སྟེ། དེའི་རྣག་གི་པགས་པས་གཡོགས་པ་ལ་ཆགས་པར་གྱུར་པ་བྱ་རྒོད་ཀྱིས་བསལ་བར་བྱ་ཞིང་དེས་བཤུས་ན་ཡང་ཅི་སྟེ། ཅིའི་ཕྱིར་མི་སྡུད། མི་གཙང་བ་ལ་ཆགས་པ་ནི་མ་ཡིན་གྱི། འོན་ཀྱང་བུད་མེད་ལ་ཡིན་ནོ་ཞེ་ན། གལ་ཏེ་ཞེས་བྱ་བ་ལ་སོགས་པ་སྨོས་ཏེ། དེ་ནི་ཁྱོད་དོ། །རུས་པའི་གཟེབ་རྒྱུས་པས་འབྲེལ་པའི་འཁྲུལ་འཁོར་གང་ལ་ཡོད་པ་དེ་ནི། རུས་གཟེབ་རྒྱུས་པས་འབྲེལ་པ་ལ། །གཞན་ཁྱོད་ཅིའི་ཕྱིར་པང་དུ་འཁྱུད། །དེའི་ཕྱིར་མི་གཙང་བ་ལ་ཁྱོད་ཀྱི་ཆགས་པ་འབྱུང་བ་ཡིན་ནོ། །དེ་ལྟར་ན་ཡང་གཞན་གྱིས་འཁྱུད་པར་བྱ་བ་མ་ཡིན་ནོ་ཞེ་ན། ཁྱོད་ཉིད་ཅེས་བྱ་བ་ལ་སོགས་པ་སྨོས་ཏེ། མི་གཙང་བ་དུ་མ་ཡོད་ཅིང་མི་གཙང་བའི་ཕུང་པོ་ཐམས་ཅད་ཟ་བར་འདོད་པའི་ངང་ཚུལ་ཅན་ནི། མི་གཙང་བརྐམ་པས་འདོད་པར་བྱེད། །འོན་ཏེ་བདག་ནི་འདི་དང་གཞན་ལ་དགའ་བ་ཡིན་ནོ་ཞེས་
འདིའི་ཤ་ལ་རེག་ཅིང་བལྟ་བར་འདོད་པ་ཡིན་པ་དེ་ལྟ་ན་ཡང་རིགས་པ་མ་ཡིན་ནོ་ཞེས་བསྟན་པའི་ཕྱིར། བདག་ནི་ཤ་འདི་ལ་དགའ་ཞེས། །རེག་དང་ལྟ་བར་འདོད་ན་ཀོ། །སེམས་མེད་པ་ཞེས་བྱ་བ་ལ་སོགས་པ་སྨོས་ཏེ། འོན་ཏེ་སེམས་འདོད་པ་ཡིན་ནོ་ཞེ་ན། གང་དེའི་སེམས་ནི་འདོད་མིན་ན། །ཞེས་བྱ་བ་ལ་སོགས་པ་སྨོས་ཏེ། དེ་དང་རེག་དང་བལྟ་བར་མི་ནུས་ཏེ། །ལུས་ཅན་མ་ཡིན་པ་ཉིད་ཀྱི་ཕྱིར་རོ། །རེག་པ་དང་མཐོང་བར་ནུས་པའི་ལུས་གང་ཡིན་པ་དེ་ནི་སེམས་མ་ཡིན་ན། དོན་མེད་འཁྱུད་དེ་ཅི་ཞིག་བྱ། །གཞན་གྱི་མི་གཙང་བའི་རང་བཞིན་གྱི་ལུས་ཤེས་པ་ནི་མ་ཡིན་ནོ་ཞེ་ན། མི་གཙང་རང་བཞིན་གཞན་གྱི་ལུས། །ཞེས་བྱ་བ་ལ་སོགས་པ་སྨོས་ཏེ། མི་རྟོགས་པ་ནི་མི་ཤེས་པའོ། །རང་ཉིད་མི་གཙང་བ་ཉིད་ཡིན་པར་ཁོང་དུ་མ་ཆུད་ཅིང་རྟོགས་པར་མི་འགྱུར་བ་ངོ་མཚར་ཆེའོ། །དེ་ལྟར་ནི་འགྱུར་མོད་ཀྱི་ཡིད་དུ་འོང་བའི་ལུས་ཁ་དོག་དང༌། དབྱིབས་དང༌། དྲི་དང་རེག་བྱར་ལྡན་པ་ལ་ཆགས་པར་རིགས་པ་ཡིན་ནོ་ཞེ་ན། སྤྲིན་བྲལ་ཞེས་བྱ་བ་ལ་སོགས་པ་སྨོས་ཏེ། སྤྲིན་དང་བྲལ་ཞིང་སྒྲིབ་པ་མེད་པའི་ཉི་ཟེར་ཏེ། ཉི་མའི་འོད་ཀྱིས་ཕྱེ་བའི་པདྨ་དེ། །ཆུ་སྐྱེས་གཞོན་ནུ་མངོན་པར་གསར་པའི་པདྨ་སྤངས་ནས་མི་གཙང་པ་ལ་ཞེན་ཅིང་ཆགས་པའི་སེམས་གང་ལ་ཡོད་པ་དེ་ནི་མི་གཙང་ཞེན་པའི་སེམས་ལྡན་པ་སྟེ། འདོད་ལྡན་འདིས་མི་གཙང་གཟེབ་སྟེ། ལུས་ལ་ཅིའི་ཕྱིར་དགའ། མི་གཙང་བའི་གཟེབ་ལས་བྱུང་བའི་མི་གཙང་བ་ཡང་ཁྲུས་ལ་སོགས་པས་མངོན་པར་འདུས་བྱས་པ་ལ་ཆགས་པར་རིགས་པ་ཡིན་ནོ་ཞེ་ན། ས་སོགས་ཞེས་བྱ་བ་ལ་སོགས་པ་སྨོས་ཏེ། ས་ལ་སོགས་པ་ནི་བོང་བ་ལ་སོགས་པའོ། །གལ་ཏེ་མི་གཙང་བས་གོས་པར་གྱུར་པ་དེའི་ཚེ་མི་གཙང་བ་ཉིད་ཀྱིས་གོས་པ་ཉིད་ཀྱི་ཕྱིར་རེག་པར་མི་འདོད་པ་ན། གལ་ཏེ་འདི་ལྟར་ལུས་གང་ལས་དེ་ནི་བྱུང་བའི་མི་གཙང་བ་དེའི་ལུས་ལ་ཅི་སྟེ་ཁྱོད་རེག་འདོད། ཕྱི་རོལ་ལ་གཙང་བ་ནི་ཡོད་པ་མ་ཡིན་པས་དེས་ན། དེའི་རྒྱུ་མཐུན་པ་ཉིད་ཡིན་པའི་ཕྱིར་ལུས་ནི་གཙང་བ་ཉིད་ཡིན་ནོ་ཞེ་ན། གལ་ཏེ་མི་གཙང་ཞེས་བྱ་བ་ལ་སོགས་
པ་སྨོས་ཏེ། མི་གཙང་ཞིང་ལས་བྱུང་གྱུར་ཅིང༌། །དེ་ཡི་ས་བོན་དེས་བསྐྱེད་པ་སྟེ། མི་གཙང་བའི་ས་བོན་གྱིས་ཏེ། ཁུ་བ་དང་ཁྲག་འདྲེས་པ་ས་བོན་ཉིད་ཡིན་པའི་ཕྱིར་རོ། །མི་གཙང་བ་དེས་བསྐྱེད་པ་ནི་མི་གཙང་བའི་ཚོགས་ཀྱིས་འཕེལ་བར་བྱས་པ་ཉིད་ཀྱི་ཕྱིར་རོ། །མི་གཙང་བ་ལ་སོགས་བྱུང་བ་ཡིན་ན་ཡང་མི་གཙང་བ་མང་པོ་མ་ཡིན་པ་དེ་ཡང་རེ་ཞིག་མི་འདོད་ན། ལུས་ནི་སྨོས་ཀྱང་ཅི་དགོས་ཞེས་བསྟན་པའི་ཕྱིར། མི་གཙང་ལས་བྱུང་ཞེས་བྱ་བ་ལ་སོགས་པ་སྨོས་ཏེ། མི་གཙང་སྲིན། ཆུང་ངུ་ཡང་མི་གཙང་བ་ལས་བྱུང་བ་ཡིན་ན་ཁྱོད་འདོད་མི་བྱེད་ན། མི་གཙང་མང་གི་རང་བཞིན་ལུས། །མི་གཙང་སྐྱེས་པ་འདོད་པར་བྱེད། །ཁྱོད་ནི་ཞེས་བྱ་བ་ལ་སོགས་པ་ལ། འདི་ལྟར་ལུས་ནི་ཤིན་ཏུ་མི་གཙང་བ་ཡིན་ནོ། །ག་པུར་ལ་སོགས་པ་ཞེས་བྱ་བ་དང༌། གལ་ཏེ་མི་གཙང་འདི་འདྲ་བ་ཞེས་བྱ་བ་ལ་སོགས་པ་ནི་ཁོང་དུ་ཆུད་པར་སླའོ། །དགེ་སློང་འདོད་ཆགས་ལ་སྤྱོད་པ་མི་གཙང་བ་ལ་མོས་པའི་དོན་དུ་མཁན་པོས་དུར་ཁྲོད་དུ་ཁྲིད་པ་བས་ཤི་བའི་མོ་མཚན་འབུས་གཞིགས་པ་མཐོང་བ་ན་མཁན་པོ་བཟང་བ་ལ་གཟིགས་ཞེས་ཆགས་པར་འགྱུར་ན། རང་བཞིན་དུ་གནས་པའི་མཚན་མཐོང་ན་ལུས་ལ་ཆགས་པར་ཅིའི་ཕྱིར་མི་འགྱུར་ཞེ་ན། གང་ཞིག་པགས་པ་ཁ་ཕྱེ་ན་ཞེས་བྱ་བ་ལ་སོགས་པ་སྨོས་ཏེ། མཚན་གྱི་པགས་པ་ཙམ་ནི་ལུས་ཐམས་ཅད་ཀྱི་ཉེ་བར་མཚོན་པ་ཡིན་ནོ། །དེ་ནི་ཁ་ཕྱེ་ཞིང་གཅེར་བུར་བྱས་ནས་ལུས་གང་ལ་འཇིགས་པ་ཆེན་པོ་སྐྱེ་བར་འགྱུར་ཏེ། དེའི་གཟུགས་དང་སྒྲ་ལ་སོགས་པ་ནི་ཡི་དྭགས་ལ་སོགས་པ་འཁྲུལ་པ་བསྐྱེད་པའི་ཕྱིར། ཤེས་ཀྱང་ཇི་ལྟར་དེ་ཉིད་ལ། །ལུས་དེ་འདི་ཉིད་ཡིན་ནོ་ཞེས་ཤེས་སུ་ཟིན་ཀྱང་རང་བཞིན་དུ་གནས་པའི་ལུས་ལ་ཡང༌། ཕྱིར་ཞིང་དགའ་བ་སྐྱེ་བར་འགྱུར། །ཇི་ལྟར་ན་འདི་སྲིད་པ་མ་ཡིན་ཏེ། ཤིན་ཏུ་ངོ་མཚར་ཆེའོ། །མོ་མཚན་གྱི་པགས་པ་ཁ་ཕྱེ་ཞིང་གསལ་བར་བྱས་པའམ། མཚོན་གྱིས་གཏུབས་པའི་ཕྱེ་མ་དེ་ལ་དགའ་བར་འགྱུར་ཞིང༌། ལུས་ཐམས་ཅད་ལ་ཡང་ཞེས་བྱ་བ་འདིར་མི་འགྱུར་རོ། །དྲི་ང་བ་ལ་སོགས་པས་འཇིགས་སུ་རུང་བ་མེ་ཏོག་གི་ཕྲེང་བ་དང་ཙནྡན་ལ་སོགས་པས་འདུས་
བྱས་པ་དེ་ལ་ཡང་དགའ་བར་རིགས་སམ་ཞེ་ན། ལུས་ལ་བསྐུས་པའི་ཞེས་བྱ་བ་ལ་སོགས་པ་སྨོས་ཏེ། དྲི་དང་ཙནྡན་ནི་ཁ་དོག་དང༌། མེ་ཏོག་གི་ཕྲེང་བ་དང༌། གོས་ལ་སོགས་པ་ཉེ་བར་མཚོན་པ་ཡིན་ནོ། །གཞན་མིན་ན་ཞེས་བྱ་བ་ལ་སོགས་པ་ལས་གཞན་མ་ཡིན་པའོ། །ཆགས་པ་དང་བྲལ་བ་ཉིད་དོན་ཡིན་ནོ་ཞེས་བསྟན་པའི་ཕྱིར་གལ་ཏེ་ཞེས་བྱ་བ་ལ་སོགས་པ་སྨོས་ཏེ། འདི་ལ་ནི་ལུས་ལའོ། །ལུས་དེ་དྲི་ཞིམ་པའི་དོན་དུ་སྐུད་པ་ཡིན་ནོ་ཞེ་ན། འཇིག་རྟེན་དོན་མེད་ཅེས་བྱ་བ་ལ་སོགས་པ་སྨོས་སོ། །རྟོགས་པ་དང་ལྡན་པ་འདི་ལ་སྐུད་པར་རིགས་པ་ཡིན་ནོ་ཞེས་བསྟན་པའི་ཕྱིར་འོན་ཏེ་དྲི་ཞིམ་ཙནྡན་ཞེས་བྱ་བ་ལ་སོགས་པ་སྨོས་ཏེ། རྨོངས་པ་ནི་མངོན་པར་འཕེལ་བ་ཡིན་ནོ། །དེ་ལྟར་ནི་རུས་གོང་ཞེས་བྱ་བ་ལ་སོགས་པ་ལ། གྲོང་གི་དུར་ཁྲོད་ལ་སྟེ། གཡོ་བའི་རུས་གོང་གི་ལུས་ཀྱི་ཁྱད་པར་གྱི་དུར་ཁྲོད་དང་འདྲའི་ཁྱོད་དེ་ལ་དགའ་འམ། གཞན་ཡང་དེ་ལྟར་ཞེས་བྱ་བ་ལ་སོགས་པ་སྨོས་སོ། །དེ་ལྟར་ཡང་འདོད་ལྡན་ངན་པ་ཁ་ཅིག་ནི་ཞེས་བྱ་བ་ལ་སོགས་པ་ལ། འདོད་ལྡན་ནི་བྲན་ནོ། །ཁྱུད་ཀོར་ལོས་ཀྱང་ཞེས་བྱ་བ་ནི་ལོ་མང་པོ་དག་ཀྱང་ངོ༌། །བུད་སྨད་འདོད་བཞིན་ཞེས་བྱ་བ་ནི་བུ་དང་བུ་མོ་ལ་སོགས་པ་དོན་དུ་གཉེར་བའོ། །གང་དོན་ཉིད་ནི་བུ་ལ་སོགས་པ་ཉིད་དོ། །ཚོང་པ་བསྟེན་པས་རང་གི་ལུས་བཙོངས་པ་སྟེ། རང་གི་ལུས་འཚོང་བ་གང་ལ་ཡོད་པ་དེ་དག་ནི་ལ་ལ་རང་གིས་ལུས་བཙོངས་ཤིང་ངོ༌། །གཡུལ་དུ་འཇུག་པ་ནི་རབ་ཏུ་འཇུག་པའོ། །འདོད་ལྡན་པ་ནི་འདི་ང་རྒྱལ་ཡིན་པར་དགོངས་སོ། །ལུས་ཀྱང་བཅད་ཅེས་བྱ་བ་ལ་སོགས་པ་ནི་ཁོང་དུ་ཆུད་པར་སླའོ། །དོན་ཕུན་སུམ་ཚོགས་པ་ཡོད་ན་འདོད་པ་རྙེད་སླ་བ་མ་ཡིན་ནམ་ཞེ་ན། མ་ཡིན་ཏེ། བྱིས་པ་ནོར་སྤེལ་མི་ནུས་པས། །དར་ལ་བབ་ནས་འདིས་ཅི་བདེ། །བསགས་པས་གཞོམ་པར་གྱུར་ན་ནི། །རྒས་ནས་འདོད་པས་ཅི་ཞིག་བྱ། །དེའི་ཕྱིར་བསག་པར་བྱ་བ་མ་ཡིན་ནོ་ཞེས་བསྟན་པའི་ཕྱིར། བསག་དང་བསྲུང་དང་ཞེས་བྱ་བ་ལ་སོགས་པ་སྨོས་ཏེ། རེ་ཞིག་དོན་འཇིག་པར་མཐོང་བ་འདི་ནི་དོན་མེད་པར་མཐོང་བ་ཡིན་ནོ། །དོན་མེད་པར་མཐོང་བ་ནི་ནོར་ལ་ཆགས་པ་ཞེས་བྱ་བ་ལ་
སོགས་པ་སྨོས་སོ། །འདོད་ལྡན་རྣམས་ལ་དེ་ལ་སོགས། །ཞེས་བྱ་བ་ནི་མཇུག་བསྡུ་བ་ཡིན་ནོ། །ཉེས་དམིགས་ནི་སྐྱོན་ཡིན་ཏེ། གང་ཞིང་ཆེས་མང་ལ་མནོག་ཆུང་བ་སྟེ། ཉམས་སུ་མྱོང་བ་ཆུང་བ་ཡིན་ནོ། །མནོག་ཆུང་བ་གང་ཡིན་པ་དེ་ཞེས་བྱ་བ་ནི་འདོད་པའི་བདེ་བ་མནོག་ཆུང་བ་གང་ཡིན་པ་དེའོ། །གང་ཞེ་ན། ཕྱུགས་ཀྱིས་སྒྲུབ་ནའང་མི་དཀོན་པའིའོ། །དེའི་དོན་དུ་དལ་འབྱོར་ཕུན་སུམ་ཚོགས་པ་རྙེད་དཀའ་འདི་བཅོམ་པ་ཡིན་ནོ། །གང་གིས་བཅོམ་ཞེ་ན། ལས་ཀྱིས་མནར་བ་རྣམས་ཀྱིས་ཏེ། །ལས་ནི་ལས་དང་ཉོན་མོངས་པའོ། །དེས་མནར་བ་ནི་འདོད་ལྡན་ཉེ་བར་བཅོམ་པ་སྟེ། བདག་ཉིད་ཀྱིས་བདག་བཅོམ་པ་ཞེས་བྱ་བའི་ཐ་ཚིག་གོ །དེ་ལྟར་ནི་འགྱུར་མོད་ཀྱིས། བྱང་ཆུབ་ཀྱི་སྤྱོད་པ་ལ་ཡང་སྡུག་བསྔལ་ཆེན་པོ་ཡིན་ནོ་ཞེ་ན། །འདོད་པ་ངེས་པར་འཇིག་འགྱུར་ཞིང༌། །དམྱལ་བ་ལ་སོགས་ལ་ལྟུང་བྱེད་པ།། ཆུང་བ་ཉིད་ཀྱི་ཕྱིར། ཆེན་པོ་མིན་ཕྱིར་དུས་ཀུན་ཏུ་ཞེས་བྱ་བ་ནི་སྐྱེ་བོ་སོ་སོར་ཏེ། འདོད་པ་དང་ལྡན་པ་འཁོར་བར་རོ། །དེ་ཡང་འདོད་ལྡན་བྱང་ཆུབ་སྤྱོད་པ་བས་སྡུག་བསྔལ་ཆེ་བ་ཡིན་ལ། བླ་ན་མེད་པའི་བྱང་ཆུབ་སྟེ། སངས་རྒྱས་ཡོད་པ་མ་ཡིན་ནོ། །ཇི་ལྟར་ཆེན་པོ་ཡིན་ཞེ་ན། དམྱལ་བ་ལ་སོགས་པ་ཞེས་བྱ་བ་ལ་སོགས་པ་སྨོས་ཏེ། འདོད་ལྡན་རྣམས་ཀྱིས། དམྱལ་སོགས་སྡུག་བསྔལ་བསམ་བྱས་ན། །དམྱལ་བ་ལ་སོགས་པའི་དུས་ཀྱིའོ། །འདོད་པ་རྣམས་ལ་མཚོན་ལ་སོགས་པའི་སྡུག་བསྔལ་གྱིས་ཀྱང་དཔེར་མི་ཕོད་དོ། །འདི་སྐད་དུ། འཇིག་རྟེན་འདི་དང་ཕ་རོལ་ཏུ། །ཞེས་བྱ་བ་ལ་སོགས་པའི་ཚུལ་གྱིས་འདོད་པ་པོ་ལས་སྐྱོ་བ་སྐྱེད་ཅིང༌། འདོད་པའི་རྣམ་པར་རྟོག་པ་སྤངས་ནས་གནོད་སེམས་ལ་སོགས་པའི་རྣམ་པར་རྟོག་པ་ཡོངས་སུ་སྤང་བའི་ཆེད་དུ། དེ་ལྟར་འདོད་ལས་སྐྱོ་བ་སྟེ། །དབེན་པ་ལ་ནི་དགའ་བ་སྐྱེད་ཅེས་སྟོན་པར་འགྱུར་རོ། །དེ་ལྟར་ཞེས་བྱ་བ་ལ་སོགས་པ་སྨོས་ཏེ། ཞི་བ་ནི་འཇིགས་པ་མེད་པའོ། །ཟླ་འོད་ནི་ཟླ་བའི་ཟེར་ཉིད་དོ། །དགའ་བར་བྱེད་པ་ཉིད་ཀྱི་ཕྱིར་ཙནྡན་ཏེ། དེས་བསིལ་བའིའོ། །ཁང་བཟངས་ཏེ། གཞལ་ཡས་ཁང་བཞིན་ཡངས་ཤིང་རྒྱ་ཆེ་བར། །གཞན་ལ་ཕན་དོན་
སེམས་ཤིང་འཆག་པར་བྱེད། །གང་ཞེ་ན། སྐལ་ལྡན་ཏེ་དམ་པའོ། །ཅི་འདྲ་བ་ཞིག་གིས་ཤེ་ན། སྒྲ་མེད་ཞི་བའི་ནགས་རླུང་གཡོབ་པ་ཡིས་སོ། །ཁང་སྟོང་ལ་སོགས་པ་གང་དུ་སྟེ། ལ་ལར་ཅི་སྲིད་འདོད་གནས་ཤིང་སྟེ། འདུག་ནས་ཡོངས་འཛིན་སྲུང་བའི་སྡུག་བསྔལ་སྤངས། །ཞེས་བྱ་བ་ནི་ལྷུང་བཟེད་ལ་སོགས་པ་ཡོངས་སུ་འཛིན་པ་བསྲུང་བའི་སྡུག་བསྔལ་དེ་དང་བྲལ་བར་བྱ་སྟེ། སའི་ལྷུང་བཟེད་ལ་སོགས་པའི་ཡོ་བྱད་ནི་རྐུན་པོས་དེ་བྲོག་པར་བྱ་བ་ཉིད་ཡིན་པའི་ཕྱིར་རོ། །སའི་ལྷུང་བཟེད་ལ་སོགས་པའི་ཡོ་བྱད་དང༌། བྲང་ཁང་སྟོང་པ་དེ་ལ། ལྟོས་པ་མེད་པར་བག་ཡངས་སྤྱོད། །ལྟོས་པ་མེད་པར་སྤྱོད་པས་གནས་པར་བྱའོ། །དེ་ལྟར་ནི་གྱ་ནོམ་པའི་ཡོ་བྱད་མེད་པའི་ཕྱིར་སྡུག་བསྔལ་གྱིས་གནོད་པར་འགྱུར་ཞིང་བདེ་བ་ལས་ཀྱང་ཏིང་ངེ་འཛིན་སྐྱེ་བ་མ་ཡིན་ནམ་ཞེ་ན། རང་དབང་སྤྱོད་ཅིང་ཅེས་བྱ་བ་ལ་སོགས་པ་སྨོས་ཏེ། གང་དང་ཡང་འབྲེལ་མེད་པ་སྟེ། གཞན་གྱི་རྣམ་པར་རྟོག་པ་ལ་སོགས་པ་མེད་པའི་ཕྱིར་རོ། །ཆོག་ཤེས་བདེ་སྤྱོད་གང་ཡིན་པ། །ཞེས་བྱ་བ་ནི་གཞན་གྱི་རྣམ་པར་རྟོག་པ་ལ་སོགས་པ་མེད་པའི་ཕྱིར་རོ། །དེ་ལྟར་རྣམ་པར་རྟོག་པ་གཞན་སྤང་བར་བྱའོ་ཞེས་བསྟན་པའི་ཕྱིར་དེ་ལ་སོགས་པའི་རྣམ་པ་ཡིས་ཞེས་བྱ་བ་ལ་སོགས་པ་སྨོས་ཏེ། མཇུག་བསྡུ་བ་ཡིན་ནོ། །དེ་ལ་སོགས་པའི་རྣམ་པ་ཡིས། །ཞེས་བྱ་བ་ནི་རྣམ་པར་རྟོག་པའི་རྒྱུན་དང་མཚུངས་པར་ལྡན་པའི་རྣམ་པར་རྟོག་པ་ལ་སོགས་པ་དམིགས་པ་དང་འཛིན་པའི་རྣམ་པ་ཡོངས་སུ་སྤང་བར་བྱ་བ་ཡིས་སོ། །དེ་ལ་རྣམ་པར་རྟོག་པའི་རྒྱུན་དང་མཚུངས་པར་ལྡན་པའི་རྣམ་པར་རྟོག་པ་ནི། ཇི་ལྟར་ན་གཞན་གྱི་ཡོན་ཏན་གྱི་རྣམ་པ་མེད་པར་བླ་མ་བྱེད། །ཅེས་བྱ་བའོ། །དེ་ལྟར་སྤོང་བར་བྱེད་པའི་རྣམ་པ་ཇི་ལྟར་བདག་གིས་འགྲོ་བའི་བླ་མར་བྱ་བ་ཡིན་ན་དེ་འདྲ་བའི་ཡོན་ཏན་བདག་ལ་མེད་པའི་དབེན་པའི་ཡོན་ཏན་གོམས་པར་བྱས་ན་རིམ་གྱིས་འབྱུང་བར་འགྱུར་རོ། །དབེན་པ་མེད་པར་ལས་དང་པོ་པའི་སེམས་ལས་སུ་རུང་བར་མི་འགྱུར་ཏེ། བསླབ་པ་འདོད་པའི་དགེ་སློང་རྣམས། །དབེན་པ་དག་ཀྱང་མཐོང་བར་ཤོག །གཡེང་བ་ཐམས་ཅད་སྤངས་ནས་ནི། །སེམས་ནི་ལས་རུང་བསྒོམ་གྱུར་ཅིག །ཅེས་འཆད་པ་ལྟ་བུའོ། །དེ་ལྟར་ན་དབེན་པའི་ཡོན་ཏན་བསམ་བྱས་ནས།།
རྣམ་རྟོག་ཉེ་བར་ཞི་བ་དང༌། །བྱང་ཆུབ་སེམས་ནི་བསྒོམ་པར་བྱའོ། །དེ་ལྟར་ནང་དུ་ཡང་དག་འཇོག་པའི་བསམ་གཏན་གྱིས་བྱང་ཆུབ་སེམས་ཀྱི་རྣམ་པ་བཅུ་བསྒོམས་ནས་ཀུན་ནས་ནང་དུ་ཡང་དག་འཇོག་གིས་བདག་དང་གཞན་མཉམ་པ་ཉིད་དང་པོར་བསྒོམ་པར་བྱ་བ་ཡིན་པ་དེ་ལྟར་ན་འཆད་པར་འགྱུར་བའི་ཚུལ་གྱིས། བདག་དང་གཞན་དུ་མཉམ་པ་ནི། །དང་པོ་ཉིད་དུ་འབད་དེ་བསྒོམ་པར་བྱ་སྟེ། བདག་དང་གཞན་མཉམ་པ་ཉིད་ལ་སོགས་པ་ནི་ཁྱད་པར་ཅན་གྱི་ཡོན་ཏན་གྱི་བདག་ཉིད་ཡིན་པའི་ཕྱིར་རོ། །ཇི་ལྟར་བསྒོམ་པར་བྱ་ཞེ་ན། བདེ་དང་ཞེས་བྱ་བ་ལ་སོགས་པ་སྨོས་ཏེ། བདེ་བ་དང་བདེ་བ་མ་ཡིན་པའི་བདག་ཉིད་བདེ་བ་དང་སྡུག་བསྔལ་གང་ཡིན་པ་དེ་དག་མཚུངས་ཤིང་མཉམ་པས་ན། ཐམས་ཅད་བདག་བཞིན་བསྲུང་བར་བྱ། །ཇི་ལྟར་བདག་སྡུག་བསྔལ་ལས་བཟློག་ནས་བདེ་བ་ལ་སྦྱོར་ཞིང་བསྲུང་བར་བྱ་བ་ཡིན་པ་དེ་ལྟར་བསྲུང་བར་བྱའོ། །ཇི་ལྟར་ཞེ་ན་ལག་པ་ལ་སོགས་ཞེས་བྱ་བ་ལ་སོགས་པ་སྨོས་ཏེ། ཇི་ལྟར། ལག་པ་ལ་སོགས་དབྱེ་བ་རྣམ་མང་ཡང༌། །དུ་མ་ཡིན་ན་ཡང་དེ་བདེ་བ་དང་སྡུག་བསྔལ་གྱི་བདག་ཉིད་ཅན་དུ་ཐ་དད་པའི་ཕྱིར་རོ། །ཡོངས་སུ་བསྲུང་བྱའི་ལུས་སུ་གཅིག་པ་ལྟར། །དུ་མའི་བདག་ཉིད་ཅན་ཡིན་པའི་ཕྱིར། དེ་བཞིན་འགྲོ་བའི་སྡུག་བསྔལ་ཐ་དད་ཀྱང༌། །འགྲོ་བ་ཐམས་ཅད་བདག་བཞིན་བདེ་བ་འདོད་མཉམ་གཅིག །དེ་ལྟར་ཡོངས་སུ་བསྐྱང་བར་བྱ། །གཞན་གྱི་ལུས་ལ་བདག་གི་སྡུག་བསྔལ་གནོད་པར་བྱེད་པ་མ་ཡིན་ན་དེ་ཇི་ལྟར་ན་འདི་ཐམས་ཅད་སྡུག་བསྔལ་དང་བདེ་བའི་བདག་ཉིད་དུ་ཐ་དད་པ་མེད་པ་ཡིན་ཞེ་ན། བདག་ནི་ཞེས་བྱ་བ་ལ་སོགས་པ་སྨོས་ཏེ། བདག་ཉིད་ཀྱི་སྡུག་བསྔལ་ནི་བདག་ཉིད་ཀྱི་སྡུག་བསྔལ་ལོ། །བདག་ཉིད་ལ་ཆགས་པས་མི་བཟོད་པ་སྟེ། བདེ་བ་མ་ཡིན་པ་ལ་བདག་ལ་ཆགས་པས་བརྣག་པར་དཀའ་བའོ། །དེ་བཞིན་གཞན་གྱི་སྡུག་བསྔལ་དག །གལ་ཏེ་བདག་ལ་བབ་པར་མི་འགྱུར་ཡང་གཞན་དེ་འདི་ལས་ཅིར་འགྱུར་ཞེ་ན། བདག་གིས་གཞན་གྱི་སྡུག་བསྔལ་བསལ། །ཞེས་བྱ་བ་ལ་སོགས་པ་སྨོས་ཏེ། ཕན་པར་བྱ་བ་ནི་བདེ་བར་བྱ་བའོ། །གཞན་
ལས་བཟློག་པའི་ལུས་དང་སེམས་ཀྱི་རྒྱུད་ནི་འདིར་བདག་ཡིན་ནོ། །དེ་ཡང་ཡིན་ལ་སེམས་ཅན་ཡང་དེ་ཡིན་པས་ན་སེམས་ཅན་དེ་ཡིན་པའི་ཕྱིར་ཏེ། སེམས་ཅན་མ་ཡིན་པ་ལས་བཟློག་པ་སྟེ། སེམས་ཅན་བཞིན་ནོ། །བདག་ཉིད་ཁོ་ན་བདེ་བ་ལ་བརྩོན་པར་བྱ་བ་མ་ཡིན་ནམ་གཞན་ལ་སེམས་ཅི་ཞིག་བྱ་སྟེ། དེའི་བདེ་བ་ཁྱོད་ཀྱིས་ཉམས་སུ་མྱོང་བ་མེད་པ་ཉིད་ཀྱི་ཕྱིར་རོ་ཞེ་ན། གང་ཚེ་བདག་དང་ཞེས་བྱ་བ་ལ་སོགས་པ་སྨོས་ཏེ། འདིར་བདག་ཉིད་ཁོ་ན་ལ་ཡིན་གྱི་གཞན་དག་ལ་ཡང་མ་ཡིན་ནམ། དེ་དག་གིས་བདེ་བ་ལ་བརྩོན་པར་བྱའོ་ཞེས་བྱ་བའི་ཐ་ཚིག་གོ །གང་ཚེ་བདག་དང་ཞེས་བྱ་བ་ལ་སོགས་པ་སྨོས་ཏེ། གཞན་ནི་ཅིག་ཤོས་སོ། །གལ་ཏེ་དེ་ལས་ཅིག་ཤོས་ཀྱི་སྡུག་བསྔལ་ནི་དེ་ལ་སྡུག་བསྔལ་ལོ། །དེས་བདག་ལ་མི་གནོད་པ་དེའི་ཕྱིར་མི་སྲུང་ནའོ། །འོ་ན་དེ་ལྟར་ན་ནི་མ་འོངས་པའི་ལུས་ཀྱི་སྡུག་བསྔལ་ཡང་བདག་ལ་གནོད་པ་མེད་པ་དེའི་ཕྱིར་མ་འོངས་པའི་ལུས་ཀྱི་སྡུག་བསྔལ་ལས་དོན་ཅིས་བདག་སྲུང་བར་བྱེད་པར་འགྱུར་ཞིང༌། གང་གིས་ན་དེའི་དོན་དུ་བསླབ་པ་བསྲུང་བར་བྱ། །དེ་ལྟར་ནི་འགྱུར་མོད་ཀྱི། མ་འོངས་པའི་ལུས་གཞན་ཡིན་གྱི་འོན་ཀྱང་མ་འོངས་པའི་དུས་སུ་དེའི་ཚེ་ཡང་བདག་ཉིད་ཡིན་པ་དེས་ནམ་འོངས་པའི་ལུས་ཀྱི་སྡུག་བསྔལ་གྱིས་ཀྱང་བདག་ལ་གནོད་པ་ཡིན་ནོ་ཞེ་ན། བདག་གིས་དེ་ནི་ཞེས་བྱ་བ་ལ་སོགས་པ་སྨོས་སོ། །ཅིའི་ཕྱིར་ཞེ་ན། །འདི་ལྟར་ཤི་བའང་གཞན་ཡིན་ལ། །ཞེས་བྱ་བ་ལ་སོགས་པ་སྨོས་སོ། །འོ་ན་དེ་ལྟར་ན་ནི་མ་འོངས་པའི་ལུས་ཀྱི་སྡུག་བསྔལ་ལས་ཀྱང་བསླབ་པ་བསྲུང་བ་ལ་སོགས་པས་བདག་མི་བསྲུང་ངམ་ཞེ་ན། བསྲུང་བ་ཡང་ཡིན་པ་དེའི་ཕྱིར་བདག་ཉིད་དེའི་ཚེ་ཡོད་པ་ཡིན་ནོ་ཞེས་བྱ་བ་ནི་ཀུན་ཏུ་རྟོགས་པ་ལོག་པ་ཡིན་ནོ་ཞེས་བསྟན་པའི་ཕྱིར་གང་གིས་ཞེས་བྱ་བ་ལ་སོགས་པ་སྨོས་ཏེ། དེ་ནི་དེ་ཉིད་ཀྱིས་བསྲུངས་ན། །ཞེས་བྱ་བ་ནི་སྡུག་བསྔལ་གྱི་རྒྱུ་ཉིད་ཡིན་པའི་ཕྱིར་བདག་སྡུག་བསྔལ་ཡིན་ཏེ། ཐ་དད་པ་མེད་པ་ལ་ཉེ་བར་བཏགས་ནས་དེ་སྐད་དུ་སྟོན་ཏོ། །རྐང་པ་ནི་ཉེ་བར་མཚོན་པ་ཡིན་ཏེ། མགོ་བོའི་སྡུག་བསྔལ་ཡང་ལག་པ་མ་ཡིན་ནོ། །
ཅིའི་ཕྱིར་ཐ་དད་པ་མེད་པ་ལ་ཉེ་བར་བཏགས་ནས་རྐང་པའི་སྡུག་བསྔལ་ཏེ་ལག་པས་སྲུང་བར་བྱེད་ཅེ་ན། དེ་དག་གཅིག་པ་ཉིད་མ་ཡིན་ཏེ། ཡན་ལག་ཅན་མེད་པའི་ཕྱིར་དང༌། ལག་པ་ལ་སོགས་པ་བསྐྱོད་པ་ན་ཐམས་ཅད་བསྐྱོད་པར་འགྱུར་རོ། ཞེས་བྱ་བ་ལ་སོགས་པས་གཞན་དུ་བཀག་ཟིན་པའི་ཕྱིར་དང༌། བདག་རྟག་པ་གཅིག་པུ་ནི་དགག་པར་བྱ་བ་ཡིན་པའི་ཕྱིར་རོ། །གལ་ཏེ་གཞན་གྱིས་བསྲུངས་པ་དེ་ལྟར་མི་རིགས་གྱུར་ཀྱང་ནི། བདག་གིར་འཛིན་པ་ཞེས་བྱ་བ་ནི་ཉེ་བར་མཚོན་པ་ཡིན་ཏེ། བདག་ཏུ་འཛིན་པ་ལ་སོགས་པ་ཕྱིན་ཅི་ལོག་ལས་འཇུག་པར་འགྱུར་རོ། །གལ་ཏེ་དེ་ལྟར་སྡུག་བསྔལ་ཡང་མི་རིགས་པ་ཡིན་པ་དེ་ལྟར་ན་བདག་གིར་འཛིན་པ་ལས་བྱུང་བའི་ལས་ལས་འཇུག་པར་འགྱུར་རོ། །དེའི་ཕྱིར་དེ་དག་རང་གིས་བཟློག་པར་བྱ་ཞིང༌། གཞན་དག་གི་སྟོབས་ཇི་ལྟ་བ་བཞིན་དུ་བདག་གིར་བྱས་ནས་བཟློག་པར་བྱའོ་ཞེས་བཤད་པ་གང་ཡིན་པ་ལྟ་བུའོ། །དེ་དེ་ལྟར་གྱུར་མོད་ཀྱི་ལུས་དང་སེམས་ཀྱི་རྒྱུན་རྟེན་ཉིད་ཡིན་པའི་ཕྱིར་རྟེན་ཉིད་སྡུག་བསྔལ་ཡིན་པར་རིགས་པ་མ་ཡིན་ཏེ། དགྲ་བོའི་སྡུག་བསྔལ་ཉིད་འདོད་པ་ཡིན་པའི་ཕྱིར་རོ། །སྡུག་པ་དག་ཀྱང་དགྲ་པོ་མེད་པ་ལ་སོགས་པ་ཡང་ཡིན་ནོ། །བདག་ཉིད་ཀྱི་སྡུག་བསྔལ་དེ་བདག་གིར་འཛིན་པ་ལ་སོགས་པས་སྤང་བར་བྱ་བ་ཡིན་ནོ་ཞེ་ན། ཇི་ལྟར་ཞེས་བྱ་བ་ལ་སོགས་པ་སྨོས་སོ། །ལུས་དང་སེམས་ཀྱི་རྒྱུད་ལ་ལྟོས་ནས་ཀྱང་དེ་ཁོ་ན་ཉིད་དུ་སྡུག་བསྔལ་ཡོད་པ་མ་ཡིན་ནོ་ཞེས་བསྟན་པའི་ཕྱིར་རྒྱུད་ཅེས་བྱ་བ་ལ་སོགས་པ་སྨོས་ཏེ། འབྲེལ་པའི་རྒྱུད་ནི་རྒྱུན་ཡིན་ཏེ། །ཚོགས་ནི་འདུས་པ་སྟེ། ལག་པ་ལ་སོགས་པའི་ཕུང་པོ་ལྟ་བུའོ། །སོགས་པའི་སྒྲས་ནི་ཆུའི་རྒྱུན་ལ་སོགས་པ་བཞིན་དུ་བརྫུན་ཏེ་ལོག་པ་ཡིན་ནོ། །དེའི་ཕྱིར་གཞན་ཡང༌། གང་གི་སྡུག་བསྔལ་མེད་པ་འདིས། །ཞེས་བྱ་བ་ལ་སོགས་པ་སྨོས་ཏེ། བདག་དེ་ནི་གཞན་ལ་མེད་པའི་རྒྱུ་དེའི་ཕྱིར་སྡུག་བསྔལ་གང་དང་འབྲེལ་པ་ཡིན་ནོ། །དེ་ནི་སུའི་བདག་གིར་འགྱུར། དེ་ལྟར་ན་མི་སྲིད་པ་དེའི་ཕྱིར། སྡུག་བསྔལ་བདག་པོ་མེད་པ་ནི་ཞེས་བྱ་བ་ལ་སོགས་པ་
རྟོགས་པར་སླའོ། །གལ་ཏེ་སྡུག་བསྔལ་ཡིན་ན་ཡང༌། །དེ་ལྟར་བརྫུན་ཡིན་པ་དེ་ལྟར་ན་གང་གིས་བཟློག་པར་བྱ། ཅིའི་ཕྱིར་ཀུན་གྱི་སྡུག་བསྔལ་ནི་རང་དང་གཞན་གྱི་སྡུག་བསྔལ་རང་གི་སྡེ་པས་ཇི་ལྟར་མཐོང་བ་བཞིན་དུ་བཟློག་པར་བྱ་ཞེས་བརྩད་དུ་མེད་དོ། །རང་ཉིད་ཀྱང་བརྫུན་ཡིན་པ་དེ་ལྟར་ན། བཟློག་པར་བྱ་བ་མ་ཡིན་ལ། གལ་ཏེ་བཟློག་པར་བྱ་བ་ཡིན་ན་ཐམས་ཅད་བཟློག་པ་སྟེ། བདག་ཉིད་ཀྱི་བཞིན་དུ་གཞན་དག་གི་ཡང་བཟློག་པར་བྱ་བ་ཡིན་ནོ། །གལ་ཏེ་མ་ཡིན་ན་ཐམས་ཅད་ཀྱང་བཟློག་པར་བྱ་བ་མ་ཡིན་ནོ། །འོ་ན་དེ་ལྟར་ན་སྡུག་བསྔལ་སྣ་ཚོགས་ཀྱི་བདག་ཉིད་འདིར་ཐ་དད་པ་མེད་པ་ལ་ཉེ་བར་བཏགས་ནས་བདག་ཡིན་ལ། དེ་ཡང་ཐམས་ཅད་བཟློག་པར་བྱ་བ་ཡིན་ནོ། །སྙིང་རྗེས་དེ་གཞན་སྡུག་བསྔལ་དང་བྲལ་བར་འདོད་པས་སོ། །བདག་གི་སྡུག་བསྔལ་དང་སེམས་ཅན་གཞན་གྱི་སྡུག་བསྔལ་དུ་མར་གྱུར་པ་བཟློག་པར་བྱ་བ་ཡིན་ན། དེ་ཅིའི་ཕྱིར་འབྱུང་བ་ཡིན། གལ་ཏེ་སྟོབས་ཀྱིས་ཡིན་ནོ་ཞེ་ན། འགྲོ་བའི་སྡུག་བསྔལ་བསམ་བྱས་ནས། །ཇི་ལྟར་སྙིང་རྗེའི་སྡུག་བསྔལ་མང་བ་མ་ཡིན་ནམ། གལ་ཏེ་ཞེས་བྱ་བ་ལ་སོགས་པ་ནི་ཁོང་དུ་ཆུད་པར་སླའོ། །དེས་ན་མེ་ཏོག་ཟླ་མཛེས་ཀྱིས་ཏེ། བྱང་ཆུབ་ལ་སེམས་ཅན་གདུལ་བའི་ཕྱིར། རྒྱལ་པོའི་གནས་སུ་ཞུགས་པ་ན། །མངོན་པར་ཤེས་པ་བརྙེས་པ་ཉིད་ཀྱིས་ཤེས་ཀྱང་རྒྱལ་པོའི་གནོད་པ་ལ་སྟེ། རྒྱལ་པོ་དཔས་བྱིན་དེ་ལས་བྱུང་བའི་གནོད་པ་ནི་རྒྱལ་པོའི་གནོད་པའོ། །བདག་གི་སྡུག་བསྔལ་ཏེ། བདག་ཉིད་འཆི་བའི་སྡུག་བསྔལ་མ་བསལ་བར་ཞེས་བྱ་བ་ནི་སྤྱོད་དུ་ཟིན་ཀྱང་མ་སྤངས་པར་རོ། །གདུལ་བྱ་མང་པོའི་དོན་སྡུག་བསྔལ་ཟད་པར་བྱས་པའི་ཕྱིར་རོ། །དེ་དག་གི་སྡུག་བསྔལ་ཟད་པ་ཞེས་བྱ་བའི་དོན་ཡིན་ཞིང་དེ་ལ་ས་བོན་བསྐྲུན་པ་དང༌། ཡོངས་སུ་སྨིན་པ་ལ་སོགས་པ་ཡང་ངོ༌། །དེ་ཡང་དེའི་ཚེ་བདག་ཉིད་སྡུག་བསྔལ་ཉིད་ཀྱིས་གཟིགས་པ་ཡིན་པ་དེ་ལྟར་ན། དེའི་བདག་ཉིད་ཀྱིས་སྡུག་བསྔལ་མ་ཡིན་ནོ་ཞེས་བསྟན་པའི་ཕྱིར། དེ་ལྟར་ཡིད་ནི་བསྒོམས་གྱུར་པ། །ཞེས་བྱ་བ་ལ་སོགས་པ་སྨོས་ཏེ། དེ་ལྟར་བདག་དང་གཞན་མཉམ་པ་
ཉིད་དུ་བསྒོམས་པས་གོམས་པར་འགྱུར་བའི་རྒྱུད་གང་ལ་མངའ་བ་དེ་དག་གིས་གཞན་གྱི་སྡུག་བསྔལ་ཞི་བར་དགའ་བས་སོ། །ཅིའི་ཕྱིར་བདག་ཉིད་ཀྱི་སྡུག་བསྔལ་ཞི་བ་ལ་བྱང་ཆུབ་སེམས་དཔའ་དགའ་བར་མི་འགྱུར་ཞེས་བསྟན་པའི་ཕྱིར། སེམས་ཅན་གྲོལ་བར་བྱེད་པ་ཞེས་བྱ་བ་ལ་སོགས་པ་སྨོས་ཏེ། རོལ་སྲེད་པ་མེད་ཅིང་འདུས་མ་བྱས་པས་རྒྱུད་གོམས་པར་བྱས་པ་དེ་ཉིད་ཀྱི་ཕྱིར་གཞན་གྱི་དོན་ལ་གཅིག་ཏུ་སྲེད་པ་བདག་ཉིད་ཁྱད་པར་ཅན་གྱིས། རྣམ་སྨིན་འབྲས་བུའི་རེ་བ་མེད། །དེ་དག་ལ་ནི་གཞན་གྱི་སྡུག་བསྔལ་ཞི་བ་ལ་དགའ་བ་ཡིན་ནོ། །གང་གི་ཕྱིར་དེ་ལྟར་ཡིན་པ་དེ་བས་ན། ཇི་ལྟར་ཞེས་བྱ་བ་ལ་སོགས་པ་སྨོས་ཏེ། ཇི་ལྟར་ན་གཞན་གྱི་ལུས་ལ་ཡང་བདག་ཅེས་འཛིན་པར་བྱེད་ཅེ་ན། གོམས་པ་ཡིས་ནི་ཞེས་བྱ་བ་ལ་སོགས་པ་སྨོས་ཏེ། གཞན་གྱིས་ཞེས་བྱ་བ་ནི་མ་དང་ཕའི་འབྲེལ་པ་ལས། ཁུ་བ་ཁྲག་གི་ཐིགས་པ་ལ་སྟེ། རིམ་གྱིས་ཕའི་ཁུ་བ་དང་མའི་ཁྲག་དང་ལས་ཀྱི་དབང་གིས་འཕེལ་བ་ཕལ་ཆེར་མིའི་ལུས་དེ་ལ། བདག་གོ་ཞེས་ནི་ཤེས་པ་ལྟར་ཏེ། ཐོག་མ་མེད་པ་ནས་ཕྱིན་ཅི་ལོག་ཏུ་གོམས་པའི་ཕྱིར་རོ། །ཅིའི་ཕྱིར་གོམས་པ་མེད་པར་མ་ཡིན་ཞེ་ན། དངོས་པོ་མེད་པར་གྱུར་ཀྱང་ནི་ཞེས་བྱ་བ་ལ་སོགས་པ་སྨོས་ཏེ། འདི་ལྟར་རྒྱུད་དང་མཚུངས་པ་དང་ནི་བརྫུན་པ་ཉིད་ཀྱི་ཕྱིར་དང༌། བདག་རྟག་པ་གཅིག་པུ་ལ་སོགས་པ་ནི་དགག་པར་བྱ་བ་ཉིད་ཡིན་པའི་ཕྱིར་དངོས་པོ་མེད་པ་ཡིན་དུ་ཟིན་ཀྱང་བདག་ཅེས་བྱ་བ་ཤེས་པ་ཉིད་ནི་སྒྱུ་མ་ལྟ་བུ་འབའ་ཞིག་ཏུ་འགྱུར་རོ། །དེའི་ཕྱིར་གོམས་པ་མེད་པར་ཡང་སྒྱུ་མ་ལྟ་བུ་ཡོད་པ་མ་ཡིན་ནོ། །ཀྱང་གི་སྒྲས་ནི་དངོས་པོ་བདེན་པ་ཉིད་ཀྱང་ཇི་ལྟར་མཐོང་བ་བཞིན་དུ་གསལ་བར་སྣང་བ་ནི་གོམས་པ་ཉིད་ཀྱི་ཕྱིར་རོ་ཞེས་སྟོན་པར་བྱེད་དོ། །དེ་དག་ནི་གཞན་དག་གིས་ཀྱང༌། དེ་ཕྱིར་ཡང་དག་ཡང་དག་མིན། །གང་གང་ཞིག་ཏུ་བསྒོམས་པ་ལས། །བསྒོམས་པའི་སྟོབས་ནི་རྫོགས་པ་ན། །དེ་གསལ་མི་རྟོག་བློ་འབྲས་ཅན། །ཞེས་གསུངས་པ་ཡིན་ནོ། །དེ་བཞིན་གཞན་གྱི་ལུས་ལ་ཡང༌། །བདག་ཅེས་ཅི་ཡི་ཕྱིར་མི་གཟུང༌། །ཞེས་བྱ་བ་དེ་བཞིན་ནི་གོམས་པ་ཉིད་ཀྱི་ཕྱིར་རོ། །དེ་ལྟར་བདག་
དང་གཞན་མཉམ་པ་ཉིད་ཀྱི་ཀུན་ནས་ནང་དུ་ཡང་དག་འཇོག་གི་བསམ་གཏན་བཤད་ནས། བདག་དང་གཞན་བརྗེ་བ་ལ་སོགས་པས་བྱ་བ་ནན་ཏན་གྱི་བསམ་གཏན་བསྟན་པའི་ཕྱིར། བདག་གི་ལུས་ནི་ཞེས་བྱ་བ་ལ་སོགས་པ་སྟེ། ཡིད་ལས་གཞན་ཉིད་ནི་གཞན་དག་ཏུ་འང་རང་གི་ལུས་ལ་རྨོངས་པས་ཡིད་ཀྱིས་བདག་གིར་བྱས་པ་བཞག་པ་དེ་ལྟར་བཀག་པ་མེད། རྟོགས་དཀའ་བ་མ་ཡིན་ནམ། གཟུགས་ཅན་དང་གཟུགས་ཅན་མ་ཡིན་པ་རྟོགས་པ་དང་རྟོགས་པའི་བདག་ཉིད་མ་ཡིན་པ་དག་འགལ་བའི་ཕྱིར་ལོག་པར་གོམས་པ་ལས་ཡིད་ཀྱིས་བདག་གིར་བྱས་པ་ཡིན་ནོ། །བདག་ཉིད་སྐྱོན་བཅས་ཤེས་ནས་ནི། །གཞན་ལ་ཡང༌། ཡོན་ཏན་རྒྱ་མཆོར་ཤེས་བྱས་ནས། །བདག་འཛིན་ཡོངས་སུ་དོར་བ་དང༌། །གཞན་བླང་བ་ནི་བསྒོམ་པར་བྱ། །ཇི་ལྟར་ན་གཞན་དག་བདག་ཉིད་དུ་བླང་བ་ཡིན་ཞེ་ན། ཇི་ལྟར་ལག་པ་ལ་སོགས་པ། །ཞེས་བྱ་བ་ལ་སོགས་པ་སྨོས་ཏེ། ཚིགས་སུ་བཅད་པ་གསུམ་པོ་དག་གི་དོན་ཁོང་དུ་ཆུད་པར་སླའོ། །བདག་བསྲུང་བ་ནི་བདག་སྦེད་པར་འདོད་པའོ། །བྱིན་གྱིས་བརླབ་པར་མཛད་པ་དེ་བས་ཏེ། གོམས་པའི་ཕྱིར་མགོན་པོ་སྤྱན་རས་གཟིགས། །འགྲོ་ལ་ཐུགས་རྗེས་མངའ་བས་སོ།། ཅི་ཞིག་བྱིན་གྱིས་བརླབ་པར་མཛད་ཅེ་ན། །སྤྱན་རས་གཟིགས་ཞེས་བྱ་བ་དེའི་རང་གི་མཚན་ཡང་སྟེ། རེ་ཞིག་སེམས་ལྟ་སྨོས་ཀྱང་ཅི་དགོས་ཞེས་བྱ་བ་ནི་ཡང་གི་སྒྲའི་དོན་ཡིན་ནོ། །ཅིའི་ཕྱིར་བྱིན་གྱིས་བརླབ་ཅེ་ན། འཁོར་གྱི་འཇིགས་པ་སྟེ། སྤོབས་པ་མེད་པ་དེ་ལས་འཇིགས་པ་ནི་འཁོར་གྱིས་འཇིགས་པའོ། །འང་གི་སྒྲས་ནི་སྐྱེ་བོ་གཞན་གྱིས་ཡང་འཇིགས་པའི་སྡུག་བསྔལ་བསྐྱབ་པའི་ཕྱིར་ཏེ། འཕགས་པ་སྡོང་པོ་བཀོད་པའི་མདོ་ལ་སོགས་པ་དག་ལས་ཇི་སྐད་བཤད་པ་ལྟ་བུའོ། །གང་གི་ཕྱིར། དེ་བཞིན་འགྲོ་ལ་བསྲུང་སེམས་དང༌། །སྙིང་རྗེའི་སེམས་ནི་གོམས་པར་བྱས། སེམས་དེ་ནི་དཀའ་བས་བྱེད་ཅིང་གྲུབ་པ་ཡིན་པ་དེ་ལྟ་ན་དཀའ་བར་བྱེད་པ་ཡིན་ནོ་ཞེ་ན། དཀའ་ལས་ཕྱིར་ལྡོག་མི་བྱ་སྟེ། །ཞེས་བྱ་བ་ལ་སོགས་པ་སྨོས་ཏེ། འདི་ལྟར། མཛའ་བར་གོམས་པའི་མཐུ་ཡིས་ནི། །གང་གི་མིང་སྟེ། སྒྲ་ཐོས་
པ་འམ་འཇིགས་པ་ཡང༌། དེ་ཉིད་མེད་ནའང་མི་དགར་འགྱུར་རོ། །དགའ་བར་སྤྱོད་པ་འདི་མེད་པར་ཡང་བདག་དང་གཞན་བསྐྱབ་པ་ཡོད་པ་མ་ཡིན་ནོ་ཞེས་བསྟན་པའི་ཕྱིར། གང་ཞིག་བདག་དང་གཞན་རྣམས་ནི་ཞེས་བྱ་བ་ལ་སོགས་པ་སྨོས་ཏེ། བྱང་ཆུབ་དམ་པ་སྒྲུབ་པར་བྱེད་པ་ཉིད་ཀྱི་ཕྱིར་རོ། །གསང་བ་ནི་དམན་པ་དག་ལས་སྦ་བར་བྱ་བ་ཉིད་ཡིན་པའི་ཕྱིར་རོ། །ཇི་ལྟར་བདག་སྐྱོན་དང་བཅས་པ་ཉིད་ཡིན་པར་ཤེས་ནས་སྤང་བར་བྱ་ཞེ་ན། བདག་ལུས་གང་ལ་ཞེས་བྱ་བ་ལ་སོགས་པ་སྨོས་ཏེ། གང་ལ་འཇིགས་པ་དེ་ལ་འཇིགས་གནས་ཆུང་ལ་སྟེ། ཚེར་མ་ལ་སོགས་པའི་འཇིགས་པ་ལ་འཇིགས་པ་སྐྱེ་བ། འཇིགས་པ་སྐྱེ་བའི་ལུས་དེ་ལ། །སུ་ཞིག་དགྲ་བཞིན་སྡང་མི་བྱེད། །ལུས་གང་བཀྲེས་དང་སྐོམ་སོགས་ནད། །གསོ་བའི་ཆོ་ག་བྱེད་འདོད་པས། །ཉ་ལ་སོགས་པ་གསོད་པར་བྱེད་ཅིང་ལམ་སྒུགས་བྱེད་པ་སྟེ། གཞན་ལ་འཚེ་བའི་དོན་དུ་ལམ་སྒུགས་བྱེད་ཅིང་གནས་སོ། །བརྐུས་ནས་ཞེས་བྱ་བ་ནི་ལེན་པར་བྱེད་པས་སོ། །ཕ་གསོད་པའི་མཚམས་མེད་པའི་ལས་དང༌། དཀོན་མཆོག་གསུམ་གྱི་དཀོར་ཕྲོགས་པ་མཚམས་མེད་པ་དང་ཉེ་བ་གང་ཡིན་པ་དེས་ནི་མནར་མེད་བསྲེག་འགྱུར་ན། མནར་མེད་པའི་བུད་ཤིང་དུ་གྱུར་ན་བདག་ཉིད་ཀྱིས་མེ་ཏོག་ལ་སོགས་པས་མཆོད་པར་བྱེད་ཅིང་གཞན་དག་གིས་གུས་པར་བྱེད་པའོ། །གལ་ཏེ་བྱིན་ན་ཞེས་བྱ་བ་ལ་སོགས་པའི་ཚིགས་སུ་བཅད་པ་བཅུ་གཉིས་ནི་ཁོང་དུ་ཆུང་པར་སླའོ། །དེ་ལྟར་ནི་ལུང་དང་རིགས་པ་དག་གིས་བརྗེས་པར་རབ་ཏུ་བསྒྲུབས་ནས། རང་གི་ཡིད་བརྟན་པར་བྱ་བའི་ཕྱིར་རྗེས་སུ་སྟོན་པ་ནི། བདག་ཉིད་གཞན་ལ་གཏད་བྱ་དང༌། །ཞེས་བྱ་བ་ལ་སོགས་པ་སྨོས་སོ། །བདག་གི་ལུས་ལ་ཅི་མཐོང་ལ་སོགས་པ་ཞེས་བྱ་བ་ལ་སོགས་པའི་སྒྲས་ནི་རང་གི་དོན་གྱི་སྒྲ་ལ་སོགས་པ་བཟུང་ངོ༌། །གང་གི་ཕྱིར་དེ་ལྟ་ཡིན་པ་དེས་ན་སེམས་ཅན་གཅར་བྱས་ཏེ། སེམས་ཅན་ཐམས་ཅད་གཙོར་བྱས་པ་གང་ཡིན་པ་ལ། མིག་ལ་སོགས་པ་དག་གིས་མཐོང་བ་གང་ཡིན་པ་དེ་དང་དེ་ནི་བདག་གི་ལུས་ལ་ཕྲོགས་ནས་ཀྱང་ཡིད་བརྟན་པས་བླངས་ནས་དེ་དང་དེས་གཞན་དག་ལ་ནི་ཕན་པར་སྤྱོད་ཅིང་བྱ་བ་ཡིན་ནོ། །
གཞན་གྱི་དོན་ལ་སྦྱོར་བར་བྱེད། །ཅེས་བྱ་བའི་གཞུང་ནི་རྟོགས་པར་སླའོ། །ཡང་ཇི་ལྟར་ཞེ་ན། དམན་སོགས་ཞེས་བྱ་བ་ལ། དམན་པ་དང༌། བར་མ་དང༌། མཆོག་ལ་རྣམ་རྟོག་མེད་པ་ཞེས་བྱ་བ་ལ། རྣམ་པར་རྟོག་པ་ནི་འདིར་ཐེ་ཚོམ་ཡིན་ཏེ། ཐེ་ཚོམ་མེད་པའི་སེམས་ཀྱིས་བདག་ཉིད་ཀྱིས་སོ། །ཇི་ལྟར་བསྒོམ་པར་བྱ་ཞེ་ན། ང་རྒྱལ་ཞེས་བྱ་བ་ལ་སོགས་པ་སྨོས་ཏེ། བདག་ཉིད་དེ་དམན་པ་དག་ལས། གཞན་ཉིད་ནི་བདག་མ་ཡིན་ནོ་ཞེ་ན། དེ་བཞིན་འོག་མ་དག་ལ་ཡང་བརྗེ་བ་ལ་རྗེས་སུ་འབྲང་བར་བྱའོ། །འདི་ནི་བསྟོད་བྱས་ཞེས་བྱ་བ་ལ་སོགས་པ་ནི་ཁོང་དུ་ཆུད་པར་སླའོ། །མཐོ་བ་དང་དམའ་བ་ལ་ཡང་ལྟོས་པ་ཅན་ཡིན་ནོ་ཞེས་བསྟན་པའི་ཕྱིར། ཚུལ་ཁྲིམས་ལྟ་བ་ཕོངས་ལ་སོགས། །ཞེས་བྱ་བ་ལ་སོགས་པ་སྨོས་ཏེ། ལྟ་བ་ནི་འདིར་སྦྱིན་པ་ཞེས་བྱ་བ་ལ་སོགས་པའི་རྣམ་པ་ཡོད་པ་ནི་ཡང་དག་པའི་ལྟ་བའོ། །ལྟ་བ་དང་ཚུལ་ཁྲིམས་རྒུད་པ་ནི་ལོག་པར་ལྟུང་བ་ཉིད་དང༌། ཚུལ་ཁྲིམས་འཆལ་པའིའོ། །སོགས་པའི་སྒྲས་ནི་འཚོ་བ་རྒུད་པ་ལ་སོགས་པ་གཟུང་ངོ༌། །ཉོན་མོངས་པའི་ནད་ཀྱི་དབང་གྱུར་དེའི་ཕྱིར་བདག་ཉིད་གསོ་བྱ་ཡིན་པས་ན། ཅི་ནུས་བདག་གིས་གསོ་བྱ་སྟེ། །གནོད་ཀྱང་དེ་ནི་དང་དུ་བླང༌། །འོན་ཏེ་བདག་འདི་བྱ་བ་ལ་སོགས་པ་ནི་རྟོགས་པར་སླའོ། །ངན་འགྲོ་གདུག་པ་སྟེ། སྟག་ལ་སོགས་པའི་ཁར་གནས་པ་སྟེ། ངན་འགྲོའི་གདུག་པའི་ཁར་གནས་པ་ལས་རྒྱལ་ཞིང་ཟིལ་གྱིས་གནོན་པར་འདོད་དོ། །དེ་བཞིན་དུ་དམན་པ་དག་ལ་བདག་ཉིད་ཀྱིས་བདག་ཉིད་ལ་ཕྲག་དོག་དང་ང་རྒྱལ་བསམ་པར་བྱ་བ་ཡིན་ནོ། །བདག་དང་མཉམ་པར་བལྟས་ནས་ནི། །དེ་ཡིས་ལྷག་པར་བྱ་བའི་ཕྱིར། །འདི་ལྟར་ཅི་ཞིག་ལྟར་བྱས་ནས། །བདག་གིས་རྙེད་དང་བཀུར་སྟི་ནི། །གཞན་དང་ལྷན་ཅིག་རྩོད་པ་ཡིས་ཀྱང་ངེས་པར་བསྒྲུབ། །དེ་བཞིན་ལུས་དང་ངག་གི་རྩོད་པ་ཡང་ཡིད་སྔོན་དུ་སོང་བ་ཅན་ཡིན་ནོ་ཞེས་དེ་ལྟར་བསམ་པར་བྱའོ། །འོན་ཏེ་བདག་ནི་ཞེས་བྱ་བ་ལ་སོགས་པ་ལ། འགྲོ་བ་ཀུན་ལ་ཇི་ལྟར་ཡོན་ཏན་གསལ་བར་བསྒྲགས་པས་ཏེ། །འཇིག་རྟེན་ཐམས་ཅད་ལ་འདིའི་ཡོན་ཏན་དེ་དག་གསལ་བར་སུས་ཀྱང་ཐོས་པར་མི་འགྱུར་ཞེས་བྱའོ། །འོན་ཀྱང་གསང་བར་
བྱའོ། །འཇིག་རྟེན་ཡང་ཞེས་བྱ་བའི་གཞུང་ནི་གལ་ཏེ་བདག་གི་ཡོན་ཏན་གསལ་བར་མི་འགྱུར་ན་སུས་ཀྱང་ཐོས་པར་མི་འགྱུར་ཏེ། དོན་མེད་པ་ཡིན་པས་ཡོན་ཏན་གསལ་བར་མི་འགྱུར་རོ་ཞེས་བྱ་བའི་ཐ་ཚིག་གོ །མི་འགྱུར་ཞེས་བྱ་བ་དེ་ནི་རྣམ་པར་དབྱེ་བས་བསྒྱུར་ནས་གཞན་དག་ལ་སྦྱར་བར་བྱ་སྟེ། རེ་ཞིག་མེད་པ་གསལ་བར་སུས་ཀྱང་ཐོས་པར་མི་འགྱུར་བར་བྱའོ། །བདག་གི་སྐྱོན་ཡང་སྦ་བྱ་ཞིང༌། །ཇི་ལྟར་གསལ་བར་མི་འགྱུར་བ་དེ་ལྟར་རོ། །བདག་ནི་མཆོད་འགྱུར་འདི་ལ་མིན། །ཡུན་རིང་ཞེས་བྱ་བ་ནི་དུས་རིང་པོའོ། །ངག་གི་རྩོད་པ་ནི་འགྲོ་བ་ཀུན་གྱི་ཞེས་བྱ་བ་ལ་སོགས་པ་སྨོས་སོ། །ཇི་ལྟར་བདག་གིས་རྩོད་པ་ཡིན་པ་དེ་ལྟར་བསྟན་ནས། དེ་བཞིན་དུ་ལུས་ཀྱི་རྩོད་པ་ནི། འདི་ལས་བདག་གིས་ཞེས་བྱ་བ་ལ་སོགས་པ་སྟེ། ཁོང་དུ་ཆུད་པར་སླའོ། །རྩོད་པ་ནི་བརྫུན་པ་ཉིད་ནི། ཡིད་ཁྱོད་རང་དོན་བྱེད་འདོད་པས། །ཞེས་བྱ་བ་ལ་སོགས་པ་སྨོས་ཏེ། རང་གི་དོན་བྱེད་འདོད་པ་ནི་ཤེས་པར་བྱེད་འདོད་པའི་སྡུག་བསྔལ་འབའ་ཞིག་ནི། ཞེས་བྱ་བ་ནི་དེ་ཉིད་ཀྱིས་ཁོ་བོས་དེ་ལྟར་གནོད་པར་བྱས་པ་ཡིན་ནོ། །དེ་ལྟར་ངེས་པར་ཞེས་བྱ་བ་ནི་རང་གི་དོན་བཞིན་དུ་གཞན་དག་གི་དོན་ལ་སྟེ། བདག་དང་གཞན་བརྗེ་བ་ལ་ཡང་ངོ༌། །རྩོད་པ་ལ་སོགས་པ་སྤོང་བ་ནི་རྣམ་པས་བདག་གི་དོན་ཉིད་མ་ཡིན་པ་ཡིན་ནམ་ཞེ་ན། དེའི་ཕྱིར་ཐུབ་པའི་བཀའ་ནི་ཞེས་བྱ་བ་ལ་སོགས་པ་སྨོས་ཏེ། དེའི་ཡོན་ཏན་ནི་གཞན་གྱི་དོན་ལ་འཇུག་པའི་ཡོན་ཏན་བདག་དང་གཞན་བརྗེ་བའི་ཡོན་ཏན་ལས་སོ། །ཕྱིས་ཞེས་བྱ་བ་ནི་བྱང་ཆུབ་སེམས་དཔའི་སའམ། སངས་རྒྱས་ཀྱི་ས་ལའོ། །མི་སླུ་བའི་བདེན་པ་འདི་ཞེས་བྱ་བ་ནི་བདག་དང་གཞན་བརྗེ་བར་བྱེད་འདོད་པའོ། །གལ་ཏེ་སྔོན་བྱས་པར་གྱུར་ན་ནི། སངས་རྒྱས་དང་འབྲེལ་བའི་ཕུན་སུམ་བདེ་མིན་པ། འདི་འདྲ་གནས་སྐབས་སྲིད་མི་འགྱུར། །གཞན་གྱི་དོན་ལ་ཆགས་པའོ། །འོན་ཀྱང་སངས་རྒྱས་ཉིད་ཀྱི་བདེ་བ་ཕུན་སུམ་ཚོགས་པའི་བདེ་བ་དང་རང་དང་གཞན་གྱི་དོན་དུ་ཡང་དག་པར་གྱུར་ན། ཀྱེ་ཡིད་ཁྱོད་ཇི་ལྟར་དེ་མི་བྱེད། །དེ་བས་འདི་ལྟར་གཞན་དག་གི །ཞེས་བྱ་བ་ལ་སོགས་
པ་སྨོས་ཏེ། ཚིགས་སུ་བཅད་པ་དེ་དག་ནི་རྟོགས་པར་སླའོ། །མཆོག་དང་པར་མ་ལ་བལྟས་ནས། །གཞན་གྱི་གྲགས་པ་ལྷག་བརྗོད་པས། །ཞེས་བྱ་བ་ནི་གཞན་གྱི་གྲགས་པ་ལྷག་པར་བརྗོད་པ་ཡིས། །བདག་གྲགས་དྲི་མ་ཅན་དུ་གྱིས། །དེ་ཅིའི་ཕྱིར་ཞེ་ན། དེ་དག་ནི་ཐོས་པ་ལ་སོགས་པའི་ཡོན་ཏན་དང་ལྡན་པའི་ཕྱིར་རོ། །དེ་དག་མཉམ་པ་མ་ཡིན་ནོ་ཞེས་བསྟན་པའི་ཕྱིར། འདི་ནི་སྐྱོན་ཅན་རང་བཞིན་གྱིས། །ཞེས་བྱ་བ་ལ་སོགས་པ་སྨོས་ཏེ། སོ་སོའི་སྐྱེ་བོའི་ཡོན་ཏན་ནི་ཕལ་ཆེར་རྒྱུན་ཆད་པ་ཉིད་ཀྱི་ཕྱིར་གློ་བུར་བ་ཡིན་ནོ། །གློ་བུར་བའི་ཡོན་ཏན་དེ་དག་གི་ཆ་སྟེ། ཕྱོགས་གཅིག་གིས་བདག་ལ་ཁྱོད་ཀྱིས་མི་བསྟོད་དོ། །སོ་སོ་སྐྱེ་བོ་ནི་སྐྱོན་གྱི་རང་བཞིན་ཡིན་པས་ན། འདི་ནི་སྐྱོན་ཅན་རང་བཞིན་ནོ། །ཡོན་ཏན་གང་དག་གཞན་ལ་ཡོད་དོ་ཞེས་བསྟན་པའི་ཕྱིར། འདིའི་ཡོན་ཏན་ཅི་ནས་ཀྱང༌། །ཞེས་བྱ་བ་ལ་སོགས་པ་སྨོས་སོ། །གནོད་བྱས་ནི་སྡུག་བསྔལ་བར་བྱས་པའོ། །གནོད་དེ་སྟེ། སྡུག་བསྔལ་བདག་ཉིད་ལ་ནི་འབབ་པར་གྱིས། །སེམས་ཅན་གྱི་དོན་ནི་རྒྱུ་མཚན་ནོ། །ཇི་ལྟར་གཞོལ་བར་བྱ་ཞེ་ན། །བག་མ་སར་པའི་ཚུལ་བཞིན་དུ། །ཞེས་བྱ་བ་ལ་སོགས་པ་སྨོས་ཏེ། །ངོ་ཚ་ནི་འཛོམ་ཞིང་བག་འཁུམས་པའོ། །ཇི་ལྟ་ཞེ་ན། འདི་ནི་གཉའ་གྲག་འགྱུར་ཚུལ་དུ། །ཤེད་བསྐྱེད་པར་ནི་མི་བྱའོ། །འདི་ལྟར་བྱ་སྟེ། ཁྱོད་ཀྱིས་དེ་ལྟར་གཉེན་པོའི་ཕྱོགས་ཀྱིས་བདག་དབང་དུ་གྱུར་པར་གཞག་པར་བྱའོ། །ཇི་སྐད་སྨྲས་ནས་ཤེ་ན། འོན་ཏེ་དེ་ལྟར་བརྟགས་ཀྱང་ནི། །ཞེས་བྱ་བ་སྨོས་ཏེ། ཀྱེ་གལ་ཏེ་སེམས་ཁྱོད་དེ་ལྟར་མི་བྱེད་ན། །ཁྱོད་ལ་ཉེས་པ་ཀུན་བསྟེན་པས། །ཁྱོད་ནི་ཚར་གཅད་བྱ་བར་ཟད། །ཅེས་པ་ནི་རྟོགས་པར་སླའོ། །མི་ནུས་པ་ནི་བསྒྲུབ་པར་དཀའ་བའོ། །ཉོན་མོངས་པ་ནི་དུབ་པའོ། །བསམ་པ་ཉམས་པ་ནི་བསམ་པ་ཆད་པའོ། །རེ་ཐག་ཆད་པ་ནི་འདོད་པ་མེད་པ་སྟེ། ནུས་པ་དང་མི་ནུས་བའི་དངོས་པོ་ཐམས་ཅད་དོ། །དེ་ཡི་ཕུན་ཚོགས་མ་སྤྱད་པ། །ཞེས་བྱ་བ་ནི། ཕུན་སུམ་ཚོགས་པ་ལྷག་པར་གྱུར་པའོ། །ལུས་ཀྱི་ཞེས་བྱ་བ་ནི་སེམས་དང་བཅས་པའི་སྟེ། །
གཞན་གྱི་འདོད་པ་འཕེལ་བར་མི་རུང་བའི་ཕྱིར་རོ། །དངོས་པོ་ནུས་པ་བཟང་པོ་ལ་ཇི་ལྟར་རེ་ཐག་ཆད་པར་འགྱུར་ཞེ་ན། གང་ཞིག་ཅེས་བྱ་བ་ལ་སོགས་པ་སྨོས་ཏེ། དེ་ནི་དངོས་པོ་བཟང་པོ་ཡིན། །གང་གི་ཚེ་ཞེ་ན། གང་ཞིག་ཡིད་འོང་ཞེས་བྱ་བ་ཡིད་དུ་འོང་བ་ཡུལ་དུ་བྱས་ནས་མི་འཇིགས་པའོ། །ཏིང་ངེ་འཛིན་ནི་འཛིན་པ་དོན་མེད་པར་དོན་མེད་པའི་རྒྱུ་ཉིད་ཡིན་པའི་ཕྱིར་བཟང་པོ་ཉིད་ཡིན་པས་སོ། །ནུས་པའི་དངོས་པོ་བཟང་པོ་གཞན་དག་ལ་འཛིན་པའམ་ཞེན་པར་མི་འགྱུར་ན་ཡང་རང་བཞིན་གྱི་ལུས་ལ་ཡང་ཅིའི་ཕྱིར་མི་འཛིན་ཞེ་ན། ཐ་མར་ཐལ་བའི་ཞེས་བྱ་བ་ལ་སོགས་པ་སྨོས་ཏེ། ལུས་ཚིག་པ་དེ་རླུང་ལ་སོགས་པས་ཐ་མར་ཐལ་བའི་མཐར་གཏུགས་ཤིང་བཅོམ་པར་གྱུར་པ་དེ་ཉིད་ཡང་སྲིད་པར་མི་འབྱུང་བ་དེ་ལ་དེ་སྐད་ཅེས་བྱའོ། །གཞན་གྱིས་བསྐྱོད་བྱ་བ་ནི་སྤྱིས་སོ། །འདིར་གསོན་པོ་ལ་ཀུན་ནས་འཛིན་པར་རིགས་སམ་ཞེ་ན། མི་གཡོ་ཕན་ཚུན་ཞེས་བྱ་བ་ལ་སོགས་པ་སྨོས་སོ། །དེ་ལྟར་ཡང་འདི་ལ་བདག་ཅེས་བྱ་བ་ཞེན་པའི་ངར་འཛིན་པ་ནི་ཐམས་ཅད་དུ་དོན་མེད་པའི་རྒྱུ་ཡིན་ནོ་ཞེས་བསྟན་པའི་ཕྱིར། ཅིའི་ཕྱིར་ན་འཁྲུལ་འཁོར་འདི་ཞེས་བྱ་བ་ལ་སོགས་པ་སྨོས་སོ། །ཀྱི་ཧུད་ཅེས་བྱ་བ་ནི་སྐྱེ་བོ་སྟེ། ང་རྒྱལ་སེལ་མི་བྱེད། འོན་ཀྱང་རང་གི་ས་བོན་གྱི་རྒྱུན་རྒྱུན་ཆད་པས་བསལ་བར་བྱའོ། །འདིར་ཇི་ལྟར་ན་འཛིན་པ་དོན་མེད་པའི་རྒྱུ་ཡིན་ཞེ་ན། ལུས་ཀྱི་ཁ་ཏ་བྱས་པ་ཡིས། །ཞེས་བྱ་བ་ལ་སོགས་པ་སྨོས་ཏེ། ཕྱོགས་འཛིན་པ་མེད་ན་ཡང་རླུང་ལ་སོགས་པ་འཁྲུགས་པས་ཁྲོ་བར་འགྱུར་རོ་ཞེ་ན། རྗེས་སུ་ཆགས་དང་ཁོང་ཁྲོ་བ། །ཞེས་བྱ་བ་ལ་སོགས་པ་སྨོས་སོ། །འདི་ལ་རྗེས་སུ་ཆགས་པ་དང་ཁོང་ཁྲོ་བ་དེ་དག་ཅི་ཞིག་བྱ་སྟེ། ལས་ཀྱི་རླུང་ལ་སོགས་པ་འཁྲུགས་པ་ཡིན་ནོ་ཞེས་བྱ་བར་དགོངས་སོ། །དེ་ལྟར་བདག་གིས་ཞེས་བྱ་བ་ནི་བདག་གི་ལུས་འདིའི་དོན་དུའོ། །སྐྱེ་བོ་གང་ལ་རྗེས་སུ་ཆགས་པ་དང་ཁོང་ཁྲོ་བ་བྱེད་ན་ཡང་འདི་ལ་བྱས་པ་ཡིན་ནོ་ཞེ་ན། གང་ཞིག་སྨོད་པས་ཁྲོ་བ་དང་ཞེས་བྱ་བ་ལ་སོགས་པ་སྨོས་ཏེ། ཁོང་དུ་ཆུད་པར་སླའོ། །དེ་ལྟར་བདག་དང་གཞན་བརྗེ་བ་བྱ་བ་ནན་ཏན་གྱི་རྣམ་པ་
དཔེར་བྱས་པ། དེ་བས་བདག་གིས་དཔེར་བྱས་པའང༌། །ཞེས་བྱ་བ་ལ་སོགས་པ་མཇུག་སྡུད་པར་བྱེད་དེ། གང་ཕྱིར་དེ་ལྟར་ཡིན་པར་རྒྱུ། །དེ་བས་བྱིས་པའི་སྤྱོད་པས་ཆོག །བདག་གིས་མཁས་པའི་རྗེས་བསྙེགས་ཏེ། །རྗེས་སུ་འཇུག་པར་བྱ་སྟེ། དེའི་སྤྱོད་པའི་རྗེས་སུ་འཇུག་པའི་ཕྱིར་རོ། །ཅི་ཞིག་བྱས་ནས་ཤེ་ན། སྔར་བསྟན་པའི། བག་ཡོད་གཏམ་ནི་དྲན་བྱས་ནས། །གཉིད་དང་རྨུགས་པ་བཟློག་པར་བྱ། །གཉིད་ནི་ལུས་དང་སེམས་ལས་སུ་མི་རུང་བ་ཡིན་ལ། རྨུགས་པ་ནི་སེམས་བློང་བ་ཡིན་ཏེ། དེ་དག་བཟློག་པ་སྟེ། མཁས་པའི་རྗེས་སུ་འབྲང་བ་ཡིན་ནོ། །གདམས་ངག་མེད་ཅིང་གཉིད་དང་རྨུགས་པ་ཡོད་ན་བསྒོམ་ནུས་པར་མི་འགྱུར་རོ། །དེ་ཉིད་ཀྱི་ཕྱིར་བཅོམ་ལྡན་འདས་ཀྱིས་བྱང་ཆུབ་ནི་དགེ་བའི་བཤེས་གཉེན་ལ་རག་ལུས་པ་ཡིན་ནོ་ཞེས་གསུངས་སོ། །དེ་ལྟར་བསམ་གཏན་གྱི་སྦྱོར་བ་རྣམ་པ་གསུམ་གྱི་རྣམ་པ་དཔེར་བྱས་པ། དེ་པས་སྒྲིབ་པ་བསལ་བའི་ཕྱིར། །ཞེས་བྱ་བ་ལ་སོགས་པ་མཇུག་སྡུད་པར་བྱེད་དེ། སྒྲིབ་པ་དེ་ཉོན་མོངས་པའི་སྒྲིབ་པ་དང༌། ཤེས་བྱའི་སྒྲིབ་པ་བསལ་བའི་ཕྱིར། །ལོག་པའི་ལམ་ལས་སེམས་བླན་ཏེ། །ཚུལ་བཞིན་ཡིད་ལ་བྱེད་པའི་ཞགས་པས་དྲང་ཞིང་དྲན་པའི་ཐག་པས་ཀུན་ནས་དམ་པར་བཏགས་ལ། ཡང་དག་དམིགས་ལ་རྟག་པར་ཡང༌། །རྒྱུན་མི་འཆད་པར་བདག་ཉིད་མཉམ་པར་གཞག་པར་བྱ། མཉམ་པར་གཞག་པ་ལ་དེ་ཁོ་ན་ཉིད་ཀྱི་བློ་འབྱུང་ཞིང་དེས་སྒྲིབ་པ་རྣམས་སྤོང་བར་འགྱུར་རོ། །བྱང་ཆུབ་སེམས་དཔའི་སྤྱོད་པ་ལ་འཇུག་པའི་ལེགས་པར་སྦྱར་བ་ལས་བསམ་གཏན་གྱི་ཕ་རོལ་ཏུ་ཕྱིན་པ་བསྟན་པ་སྟེ་ལེའུ་བརྒྱད་པའོ།། །།མཉམ་པར་འཇོག་པ་ལས་དེ་ཁོ་ན་ཉིད་ཀྱི་བློ་སྐྱེ་བར་འགྱུར་བས་དེའི་རྗེས་ཐོགས་ལ་ཤེས་རབ་བསྟན་པར་བྱ་བའི་ཕྱིར། བསྡོགས་ཞེས་བྱ་བ་ལ་སོགས་པ་སྨོས་ཏེ། བྱང་ཆུབ་ཏུ་སེམས་བསྐྱེད་པའི་ཕན་ཡོན་དང༌། བདེ་བར་གཤེགས་པ་ལ་སོགས་པ་མཆོད་པའི་དོན་དུ། སྦྱིན་པ་ལ་སོགས་རྒྱུར་བསྡོགས་པའི། །ཚོགས་འདི་དག་ཐམས་ཅད་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་འདིར་བཤད་དོ། །ཅིའི་ཕྱིར་ཞེ་ན། ཕུན་སུམ་ཚོགས་པ་ཐམས་ཅད་ཀྱི་
ཀྱི་གཞི་ཡིན་པའི་ཕྱིར་རོ། །ཡང་ན་ཤེས་རབ་ནི་བླ་ན་མེད་པའི་བྱང་ཆུབ་ཡིན་ལ། དེའི་དོན་དུ་བསྐྱེད་པར་བྱའོ་ཞེས་གསུངས་སོ། །གསུངས་ཞེས་བྱ་བ་ནི་བྱང་ཆུབ་འདོད་པའི་དོན་དུ་གཉེར་བ་ལ་ནི་གོ་རིམས་འདི་ཉིད་ཀྱིས་ཡིན་གྱི་གཞན་མ་ཡིན་ནོ་ཞེས་ངེས་པ་བསྐྱེད་པར་བྱ་བའི་ཕྱིར། ཡང་དང་ཡང་དུ་བཀའ་སྩལ་པའོ། །སུ་ཞིག་གིས་གསུངས་ཤེ་ན། ཐུབ་པས་སོ། །དེ་ཡང་འདི་ལྟར་བྱང་ཆུབ་ཀྱི་སེམས་ཀྱི་ཕན་ཡོན་རྟོགས་ནས་དེ་དག་ཡང་དག་པར་བླང་བ་ལ་སོགས་པའི་བསོད་ནམས་ཀྱིས་སྐྱེ་བ་བརྒྱུད་པ་ཐམས་ཅད་དུ་བདེ་བ་དང་ལྡན་པར་འགྱུར་ལ། བདེ་བར་འགྱུར་བའི་སེམས་ནི་མཉམ་པར་འཇོག་པར་འགྱུར་ལ། བསམ་གཏན་ལ་མཉམ་པར་བཞག་པ་དེ་ལས་ནི་དེ་ཁོ་ན་ཉིད་ཀྱི་བློ་སྐྱེ་བར་འགྱུར་བ་དང༌། གཞན་ཡང་སངས་རྒྱས་ལ་སོགས་པ་དང་ཕྲད་པར་གྱུར་པ་ལ། གདམས་ངག་འཐོབ་པར་འགྱུར་བ་ནི་ཐོས་པའི་རང་བཞིན་ཅན། དེའི་རྗེས་ལ་ནི་བསམ་པའི་རང་བཞིན་ནོ། །དེ་ནས་མོས་པས་སྤྱོད་པའི་ས་ལ་སྦྱངས་པ་ནི་བསྒོམ་པའི་རང་བཞིན་ལ། དེའི་རྗེས་ལ་ནི་ས་དང་པོ་ཐོབ་སྟེ། ཆོས་ཀྱི་དབྱིངས་ཀུན་ཏུ་འགྲོ་བ་རྟོགས་པ་ན་མཐོང་བས་སྤང་བར་བྱ་བའི་ཉོན་མོངས་པ་མ་ལུས་པ་སྤོང་བར་བྱེད་མོད་ཀྱི། དེ་འབྲས་བུ་མངོན་སུམ་དུ་ནི་མི་བྱེད་དེ། འདིར་བྱམས་པའི་བྱ་བ་དང༌། ས་དང་འདྲ་བའི་སྨོན་ལམ་ཆེན་པོ་གཉིས་ཀྱི་ཡོན་ཏན་མངོན་པར་བསྒྲུབས་ཏེ་གནས་སོ། །དེ་ཡན་ཆད་ཀྱིས་གཞན་གྱིས་ནི་ས་ལ་བསྒྲིབས་པའི་བསྒོམ་པས་སྤང་བར་བྱ་བ་རྣམས་མ་ལུས་པར་སྤངས་པ་དང༌། སྟོབས་དང༌། མི་འཇིགས་པ་ལ་སོགས་པའི་ཡོན་ཏན་མ་ལུས་པ་ཡོངས་སུ་རྫོགས་པའི་མཚན་ཉིད་ཅན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པ་ན། ཉོན་མོངས་པའི་ཉེས་པ་བག་ཆགས་དང་བཅས་པ་མ་ལུས་པར་ཟད་པས་མྱ་ངན་ལས་འདས་པ་ཡིན་ཡང་སྔོན་གྱི་སྨོན་ལམ་དང་ཐུགས་རྗེ་ཆེན་པོ་ལ་སོགས་པའི་འཕེན་ཤུགས་ཀྱིས་སེམས་ཅན་གྱི་དོན་མ་ལུས་པ་ལ་དབང་ཐོབ་པ་ཉིད་ཀྱིས་ཡོངས་སུ་མྱ་ངན་ལས་མི་འདའ་སྟེ། གང་གི་ཕྱིར་དེ་མེད་པ་གཞན་རྣམས་ཀྱིས་སྡུག་བསྔལ་ཟད་པའི་མྱ་ངན་ལས་འདས་པར་མི་འགྱུར་རོ། །དེ་བས་ན་
དེ་ཁོ་ན་ཉིད་ཀྱི་ཡེ་ཤེས་ཀྱི་བདག་ཉིད་ཅན་ལམ་གྱི་བདེན་པ་དང༌། དེའི་རྒྱུར་གྱུར་པ་ཐོས་པ་དང༌། བསམ་པ་དང་བསྒོམ་པ་རྣམ་པ་གསུམ་གྱིས་ཤེས་རབ་བསྐྱེད་པར་བྱའོ། །དེ་ཡང་བཟོད་བྱ་ཐོས་པ་བཙལ་པར་བྱ། །དེ་ནས་ནགས་སུ་གནས་པར་བྱ། །མཉམ་པར་གཞག་ལ་བརྩོན་བྱ་ཞིང༌། །མི་སྡུག་ལ་སོགས་བསྒོམ་པར་བྱ། །ཞེས་བྱ་བ་འདི་ནི་ལས་དང་པོ་པ་རྣམས་ཀྱིས་ཚེ་གཅིག་ལ་བྱ་བའི་རིམ་པའི་དབང་དུ་བྱས་ནས་བཤད་པ་ཡིན་ནོ། །དེ་བས་ན་དེ་ཡང་ཤེས་རབ་བསྐྱེད་པས་དམ་པ་རྣམས་དང་ཕྲད་ཅིང་གདམས་ངག་ཐོས་པ་ལ་སོགས་པ་ནི་དེའི་རྒྱུ་ཡིན་ནོ། །རྒྱུ་ཅིའི་ཕྱིར་བསྐྱེད་པར་བྱ་ཞེ་ན། སྡུག་བསྔལ་ཏེ་ཉེ་བར་ལེན་པའི་ཕུང་པོ་ལྔའི་བདག་ཉིད་ཅན་ནི་དེའི་རྒྱུ་མ་ཟད་པར་མི་འགྱུར་ལ། ཀུན་འབྱུང་འགོག་པར་འགྱུར་ན་ནི་མྱ་ངན་ལས་འདས་པ་ཡིན་ཏེ། ཕུང་པོ་ལྷག་མ་དང་བཅས་པ་དང༌། ལྷག་མ་མེད་པ་དང༌། གནས་པ་དང་མི་གནས་པའི་མྱ་ངན་ལས་འདས་པ་ཐོབ་པས། དེ་འདོད་པ་རྣམས་ཀྱིས་འདི་ལྟར་བདེན་པ་བཞིར་གསུངས་པས་གཙོ་བོ་ཡང་ཤེས་རབ་ཡིན་ནོ། །ཡང་མདོར་བསྡུས་ནས་ནི་ཤེས་རབ་བསྡོགས་པ་དང་བཅས་པ་གང་ཡིན་པ་དེ་ཐམས་ཅད་ནི་ཀུན་རྫོབ་དང་དོན་དམ་པ་ཞེས་བྱ་བ་བདེན་པ་གཉིས་སུ་འདོད་པ་དེ་འདིར་དེ་རྣམས་ནི་དེའི་ཁོངས་སུ་ཆུད་པ་ཡིན་ནོ། །ཡང་ན་ཤེས་རབ་ནི་བདེན་པ་རྣམས་རྣམ་པར་འབྱེད་པ་ཡིན་ཏེ། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་བརྟེན། །ཅེས་བཤད་པ་ཡིན་ནོ། །དེ་ན་འདིར་བདེན་པ་གཉིས་ཀྱི་རང་བཞིན་བཤད་པའི་ཕྱིར། དོན་དམ་དང་ནི་ཞེས་བྱ་བ་ལ་སོགས་པ་སྨོས་ཏེ། འདིར་དེ་ཞེས་བྱ་བའི་སྒྲ་ནི་ཐམས་ཅད་པའི་མིང་ཡིན་ཡང་ཤིན་ཏུ་ལྐོག་ཏུ་གྱུར་པ་དངོས་པོ་རྣམས་དབྱེར་མི་ཕྱེད་པའི་རང་བཞིན་ལ་བྱ་བར་བཤད་ལ། དེ་ཉིད་ནི་དོན་དམ་པ་སྟེ། དེ་ཁོ་ན་ཉིད་ཡིན་གྱི་ལྟོས་པ་ཙམ་གྱི་དེ་ཁོ་ན་ཉིད་ནི་བཏགས་པ་ཙམ་དུ་ཟད་པ་མ་ཡིན་ཏེ། རྟོག་པའི་ཡུལ་ཡིན་པའི་ཕྱིར་རོ། །དེ་གཞན་ཡང་རྣམ་པ་དང་བཅས་པ་དང༌། རྣམ་པ་མེད་པའི་མངོན་སུམ་ལ་སོགས་པའི་བློ་ནི་ཀུན་རྫོབ་ཅེས་བྱ་སྟེ། འདིས་དོན་དམ་པ་ཐོབ་པ་ལ་སྒྲིབ་པའི་ཕྱིར་རོ། །གང་འདི་ཡོན་ཏན་དང་ཉེས་པ་འཕེལ་བ་དང་འབྲི་བར་བྱེད་པའི་མཐར་ཐུག་པར་བྱེད་པའི་རྣལ་འབྱོར་
པ་རང་རིག་པའི་མངོན་སུམ་དེ་ཡང་སྐད་ཅིག་མ་རེ་རེ་ཞིང་གཞན་དང་གཞན་ཡིན་གྱི། དེ་ཉིད་མ་ཡིན་པ་དེ་ཡང་དོན་དམ་པ་ཡིན་ཏེ། དེ་བཞིན་ཉིད་འདི་སྐད་ཅིག་མིན། །ཞེས་བྱ་བ་འོག་གནས་བཤད་པའི་ཕྱིར་རོ། །དེ་བས་དེ་ཡང་འཇིག་རྟེན་ལས་འདས་པའི་དེ་ཁོ་ན་ཉིད་བླ་ན་མེད་པ་རྟོགས་པར་བྱེད་པའི་ཀུན་རྫོབ་ཡིན་ཏེ། མཐོང་བ་མེད་པ་ཉིད་དེ་ཁོ་ན་མཐོང་བའི་བླ་ན་མེད་པའི་ལམ་གྱི་བདེན་པ་ཡིན་ནོ། །བདེན་བཞི་རྟོགས་པར་བྱེད་པའི་ཀུན་རྫོབ་ཀྱང་ལམ་གྱི་བདེན་པ་ཡིན་ཏེ། འཇིག་རྟེན་པའི་ལམ་སོགས་ལ་ལྟོས་པ་ཡིན་པའི་ཕྱིར་རོ། །དེ་ཡང༌། འཇིག་རྟེན་ལ་ལྟོས་དེ་ཉིད་མཐོང༌། །ཞེས་འོག་ནས་ཇི་སྐད་བཤད་པ་ལྟ་བུའོ། །དེ་ཡང་འཇིག་རྟེན་པས་འཇིག་རྟེན་ནོ། །འདིར་ནི་བློའི་ཡུལ་གཙོ་བོར་བྱས་པར་སེམས་ཅན་ལ་བྱའོ། །རྣམ་གཉིས་མཐོང་བ་ནི་འཇིག་རྟེན་ཐ་མལ་པ་དང༌། རྣལ་འབྱོར་པའོ། །རྣལ་འབྱོར་པ་ཞེས་བྱ་བ་ནི་ཞི་གནས་དང་ལྷག་མཐོང་ཟུང་དུ་འབྲེལ་པར་འཇུག་པ་དྲན་པའི་ཐག་པས་བཏགས་པ་དང་ལྡན་པའི་ནི་རྣལ་འབྱོར་པ་སྟེ། ཏིང་ངེ་འཛིན་ཡིན་ཏེ། དེ་གང་ལ་ཡོད་པ་ནི་རྣལ་འབྱོར་པའོ། །ཐ་མལ་པ་ནི་རྣལ་འབྱོར་པ་ལས་ཕྱི་རོལ་དུ་གྱུར་པའོ། །དེ་ལ་དེ་ལྟར་རྣམ་པར་གནས་པའི་འཇིག་རྟེན་ལ་རྣལ་འབྱོར་པས་ཕལ་པ་སུན་འབྱིན་པ་ནི་གང་མི་གཙང་བ་ཉིད་ཡིན་ཏེ། དཔེར་ན་བུམ་པ་མི་གཙང་བ་བུག་རྡོལ་ཅན་དང་འདྲའོ། །མི་གཙང་བ་ནི་འདིར་བུད་མེད་དོ། །བྱ་བའི་དོན་ནི་བསྒྲུབ་པར་བྱ་བའི་དོན་ཏོ། །དཔེ་ཡིས་ཞེས་བྱ་བ་ནི་ཕྱོགས་དང་བཅས་པའི་དོན་མཚོན་པའི་ཚུལ་གྱིས་ནི་དཔྱད་མི་དགོས་པ་སྟེ། གཉི་ག་འདོད་པ་ཡིན་པའི་ཕྱིར་དཔྱད་མི་དགོས་སོ། །དེ་ལ་འཇིག་རྟེན་ཐ་མལ་པ་རྣམས་ནི་བུད་མེད་ལ་ཁྲུས་ལ་སོགས་པ་བྱས་པས་གཙང་བ་ཡིན་ནོ་ཞེས་སྨྲ་བ་ན་རྣལ་འབྱོར་པའི་འཇིག་རྟེན་མི་གཙང་བར་མོས་པའི་ཚུལ་གྱིས་སུན་འབྱིན་པར་བྱེད་དོ། །དེ་ཡང་ཕྲ་རབ་ཏུ་མཐོང་བས་སུན་འབྱིན་ཏེ། ཆ་ཤས་དང་བྲལ་བ་གང་ཡིན་པ་དེ་ནི་མི་གཙང་བ་མ་ཡིན་ཏེ་བློ་དང་འདྲའོ། །རྡུལ་ཕྲ་རབ་ནི་ཆ་ཤས་མེད་པ་ཡིན་ལ་དེའི་ཚོགས་པ་ནི་བུད་མེད་ཡིན་པས་ཆ་ཤས་ཅན་ནི་དངོས་པོ་གཅིག་ཏུ་མི་འགྲུབ་སྟེ་ནགས་དང་འདྲའོ། །དེ་ཡང་སེམས་ཙམ་པས་སུན་
འབྱིན་ཏེ། ཕྱོགས་ཀྱི་ཆ་ཡོད་པའི་ཕྱིར་ཕྲ་རབ་ནི་ཆ་ཤས་མེད་པ་མ་ཡིན་ཏེ་བུམ་པ་ལ་སོགས་པ་དང་འདྲའོ། །དེ་ཡང་དབུ་མ་པས་སུན་འབྱིན་ཏེ་ཡོད་པ་གང་ཡིན་པ་དེ་ནི་དེ་ཁོ་ན་ཉིད་མ་ཡིན་ཏེ་སྒྱུ་མ་དང་འདྲའོ། །དབུ་མ་པའི་ནི་བསྒྲུབ་པར་བྱ་བ་མེད་པ་ཙམ་ཡིན་ཏེ། གང་འདིར་ཡོད་པར་ཁས་ལེན་པ་དེ་ཡང་མ་བཏགས་ན་ཉམས་དགའ་བ་ཙམ་དུ་ཐ་སྙད་ལ་བརྟེན་ནས་སྨྲ་སྟེ། བྱ་བ་བྱེད་པའི་ཕྱིར་སྒྱུ་མ་ཡང་ཡོད་པར་སྨྲ་བ་ལ། ཁྱོད་ཉིད་ཀྱིས་སེམས་གཞན་སུས་ཀྱང་མ་མཐོང་ཡང་ཡོད་པར་ཁས་ལེན་པ་དང་འདྲའོ། །གཞན་ཡང་ཁྱོད་ཀྱིས་སེམས་མེད་དུ་ཟིན་ཀྱང་གཟུང་བ་དང༌། འཛིན་པ་པོ་དང༌། ཡང་དག་པར་རིག་པ་ཞེས་བྱ་བ་གཞལ་བར་བྱ་བ་དང༌། འཇལ་བ་པོ་དང༌། འབྲས་བུར་གནས་པ་མེད་དུ་ཟིན་ཀྱང་མཐོང་བ་ལྟ་བུར་བྱེད་པ་དང་འདྲའོ། །བུམ་པ་ལ་སོགས་པའི་དངོས་པོ་ཡང་རིམ་པའམ་ཅིག་ཅར་བྱ་བ་བྱེད་པར་སྣང་བས་ཡང་དག་པར་ཡོད་པའི་ཕྱིར་སྒྱུ་མ་ལྟ་བུར་མི་རིགས་སོ་ཞེ་ན། དངོས་པོ་རྣམས་འབྱུང་བ་སྐད་ཅིག་གམ་སྐད་ཅིག་མ་ཡིན་པར་སྐྱེད་པར་བྱེད་ན། རིམ་མ་མ་རིམ་པ་མ་ཡིན་པར་བྱེད་པ་མེད་པའི་སྐད་ཅིག་མ་མ་ཡིན་པ་ནི་ནམ་མཁའི་མེ་ཏོག་དང་འདྲའོ། །གང་སྐད་ཅིག་མ་ཡིན་པ་དེ་ནི་སྐད་ཅིག་མ་ཉིད་ཀྱིས་ལན་ཅིག་ཀྱང་མི་སྡོད་ན། གང་ལས་ཅི་ཞིག་འབྱུང༌། རྒྱུ་དང་འབྲས་བུ་ལྷན་ཅིག་འབྱུང་བ་མ་ཡིན་ཏེ། བ་ལང་གི་རྭ་གཡས་གཡོན་གཅིག་གི་རྒྱུ་གཅིག་མ་ཡིན་པ་བཞིན་ནོ། །མེད་པ་ཡང་དེ་ཁོ་ན་ཉིད་མ་ཡིན་ཏེ། མེད་པ་ནི་དེ་ལ་ལྟོས་པ་ཡིན་ན་དངོས་པོ་ཉིད་དུ་མ་གྲུབ་པའི་ཕྱིར་རོ། །དེ་ལྟར་ན་བློའི་ཁྱད་པར་ཞེས་པ་ཤེས་རབ་ཀྱི་བྱེ་བྲག་གིས་གོང་མ་གོང་མས་རྣལ་འབྱོར་པ་སུན་འབྱིན་ནོ། །དེ་ཡང་གཉི་ག་འདོད་ཅིང་ཀུན་ལ་གྲགས་པའི་དཔེས་བསྒྲུབ་པར་བྱ་བསྒྲུབ་པའི་དོན་དུ་དཔྱད་མི་དགོས་ཤིང་སུན་འབྱིན་པར་བྱེད་པ་ཡིན་ནོ། །དེ་ལྟ་ཡིན་དུ་ཟིན་ཀྱང་དབུ་མ་པ་ཡང་འཇིག་རྟེན་པ་ལྟར་སུན་འབྱིན་དུ་རུང་ངོ་ཞེ་ན། དེའི་ཕྱིར་འཇིག་རྟེན་པའི་ས་ཞེས་བྱ་བ་སྨོས་ཏེ། གཟུགས་ལ་སོགས་པའི་དངོས་པོ་འཇིག་རྟེན་ན་མངོན་སུམ་གྱིས་མཐོང་བ་ཡིན་ལ། རྗེས་སུ་དཔག་པ་ལ་སོགས་པས་ཀྱང་དཔག་ཏུ་རུང་བ་ཡིན་ནོ། །དེ་བས་ན་ཐམས་
ཅད་དུ་རྩོད་པའི་གཞིར་གྱུར་པར་སྲིད་དོ་སྙམ་ན། སྒྱུ་མ་ལ་སོགས་པའི་དཔེ་འདི་ལ་ནི་འཇིག་རྟེན་པ་དང་རྣལ་འབྱོར་པ་དག་ཕན་ཚུན་མི་མཐུན་པའི་རྩོད་པ་ཡོད་པ་མ་ཡིན་ནོ། །དེ་བས་ན་དཔེ་འདིས་ནི་གཟུགས་ལ་སོགས་པ་ཚོགས་པ་ཙམ་ལ་སྣང་བའི་རྒྱུ་སླུ་བའི་རང་བཞིན་ཡིན་པའི་ཕྱིར་སྒྱུ་མ་ཡིན་ནོ། །གཟུགས་ལ་སོགས་པ་རང་གི་མཚན་ཉིད་མངོན་སུམ་ལ་སོགས་པའི་ཚད་མས་གྲུབ་ཏུ་ཟིན་ན་ཇི་ལྟར་ན་ཡང་དག་པ་ཉིད་མ་ཡིན་ཞེ་ན། དེའི་ཕྱིར་གཟུགས་སོགས་ཞེས་བྱ་བ་ལ་སོགས་པའི་སྒྲས་ནི་ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་ལ་སོགས་པ་བསྡུའོ། །དེ་ལ་གཟུགས་ནི་དབང་པོ་ལྔ་པོ་མིག་དང༌། རྣ་བ་དང༌། སྣ་དང༌། ལྕེ་དང་ལུས་ཞེས་བྱ་སྟེ། དེ་དག་ནི་རང་རང་གི་རྣམ་པར་ཤེས་པའི་ཚོགས་ལས་རྗེས་སུ་དཔག་པར་བྱ་བ་ཡིན་དུ་ཟིན་ཀྱང་མངོན་སུམ་གྱི་རྒྱུ་ཡིན་པའི་ཕྱིར་ཉེ་བར་བཏགས་པས་མངོན་སུམ་ཞེས་བཤད་དོ། །དེ་བཞིན་དུ་ཡུལ་ནི་ལྔ་སྟེ། གཟུགས་དང༌། སྒྲ་དང༌། དྲི་དང༌། རོ་དང༌། རེག་བྱ་སྟེ། མངོན་སུམ་དུ་བཅད་པར་བྱ་བ་ཡིན་པས་ན་མངོན་སུམ་མོ། །ཚོར་བ་ལ་སོགས་པ་ནི་སེམས་དང་སེམས་ལས་བྱུང་བས་ཐམས་ཅད་བདག་ཉིད་ཀྱི་རང་རིག་པའི་མངོན་སུམ་ཡིན་པ་དེ་ཉིད་ནི་གཙོ་བོ་ཡིན་ནོ། །ཡང་གཟུགས་ལ་སོགས་པ་མངོན་སུམ་ཡིན་པས་སྔོན་པོ་ལ་སོགས་པའི་དམིགས་པ་ངེས་པ་བཅས་པས་སྔོན་པོ་ལ་སོགས་པའི་ཤེས་པ་དང་ཁྱད་པར་མེད་པས་མངོན་སུམ་ནི་གཙོ་བོ་ཡིན་ནོ། །དེ་བས་ན་རབ་ཏུ་གྲགས་ཞེས་སྨོས་ཏེ། བློ་ཞེས་བྱ་བའི་ཐ་ཚིག་གོ །དེ་ཡང་ཀུན་རྫོབ་ཏུ་བརྫུན་པའི་སྣང་བ་ཙམ་ཡིན་ཏེ། དེའི་ཕྱིར་ཚད་མས་མིན་ཞེས་བྱ་བ་སྨོས་ཏེ། སླུ་བ་མེད་པ་མ་ཡིན་ནོ་ཞེས་བྱ་བའི་ཐ་ཚིག་གོ །ཅིའི་ཕྱིར་གཟུགས་ལ་སོགས་པ་རབ་ཏུ་གྲགས་སུ་ཟིན་ཀྱང་བརྫུན་ཡིན་ཞེ་ན། དེའི་ཕྱིར་དེ་ནི་མི་གཙང་ཞེས་བྱ་བ་ལ་སོགས་པ་སྨོས་ཏེ། །མི་གཙང་ལ་སོགས་ཞེས་བྱ་བ་ནི་མི་གཙང་བ་དང༌། མི་རྟག་པ་དང༌། སྡུག་བསྔལ་བ་དང༌། བདག་མེད་པ་ཡིན་ལ། གཙང་སོགས་གྲགས་པ་བཞིན་ཞེས་བྱ་བ་གཙང་བ་དང༌། བདེ་བ་དང༌། བདག་ཡོད་པར་གྲགས་པ་བཞིན་དུ་གཟུགས་ལ་སོགས་པ་མངོན་སུམ་དུ་གྲགས་པ་དེ་ནི་བརྫུན་ཡིན་ཏེ་སླུ་བ་ཡིན་ནོ། །
དེ་ལྟར་ན་གཟུགས་ལ་སོགས་པའི་དངོས་པོ་མེད་པ་རྣམས་ལ་འཇིག་རྟེན་མགོན་པོ་སངས་རྒྱས་བཅོམ་ལྡན་འདས་ཀྱིས་སྐད་ཅིག་མ་ལ་སོགས་པར་ཅིའི་ཕྱིར་སྟོན་པར་མཛད་ཅེ་ན། དེའི་ཕྱིར་འཇིག་རྟེན་ཞེས་བྱ་བ་ལ་སོགས་པ་སྨོས་ཏེ། ཐར་པ་འདོད་པའི་འཇིག་རྟེན་པ་རྣམས་དེ་ཁོ་ན་ཉིད་ལ་འདིར་འཛུད་ཅིང་གཞུག་པར་བྱ་བའི་ཕྱིར་རོ། །ཡང་ཞེས་བྱ་བའི་དོན་ནི་ཡོངས་སུ་སྨིན་པར་བྱ་བའི་དོན་དུ་ཡང་དངོས་པོ་རྣམས་སྐད་ཅིག་མར་མགོན་པོས་བསྟན་པར་མཛད་པ་ཡིན་གྱི་ཡང་དག་པར་ནི་མ་ཡིན་ནོ། །དེ་ལྟ་ཡིན་ན་ནི་ཀུན་རྫོབ་འདིས་དོན་དམ་པ་དང༌། དོན་གྱི་ཤུགས་ཀྱིས་འགལ་བར་འགྱུར་རོ་ཞེ་ན། གང་དུ་ཐ་དད་པའི་བློ་གཞན་སེལ་བར་བྱེད་པའི་ཡུལ་དེ་ནི་ཀུན་རྫོབ་ཀྱི་བདེན་པ་ཡིན་ལ། དོན་དམ་པའི་བདེན་པ་དེ་ལས་གཞན་དུ་གྱུར་པ་ཡིན་པས་སྐད་ཅིག་མ་ཡང་དེ་བཞིན་ཉིད་དམ། ཡང་དག་པ་ཉིད་དུ་རུང་སྟེ། ཆ་ཤས་མེད་པའི་ཕྱིར་བདག་མེད་པ་དང་འདྲའོ། །ཅིའི་ཕྱིར་ཀུན་རྫོབ་ཏུ་མི་འགྱུར་ཞེ་ན། རྣལ་འབྱོར་ཀུན་རྫོབ་ཉེས་མེད་དེ། །ཞེས་བྱ་བ་སྨོས་ཏེ། སྐྱེ་བ་དང་འཇིག་པ་གཉི་ག་དེ་ཁོ་ན་ཉིད་ཀྱི་བློས་བརྟགས་པ་ན་རང་བཞིན་མེད་པའི་ཕྱིར་སྐད་ཅིག་མ་དང༌། བདག་མེད་པ་ལ་སོགས་པའི་བློ་ཡོད་པ་མ་ཡིན་ལ། གཞན་དུ་ན་སྐད་ཅིག་མ་ལ་སོགས་པ་རྣལ་འབྱོར་པའི་བློས་མཐོང་བ་ནི་མིག་ཡོར་ཙམ་དུ་ཟད་དོ། །དེའི་ཕྱིར་རྣལ་འབྱོར་པའི་ཀུན་རྫོབ་ནི་དོན་དམ་པར་ཡང་འགྱུར་བས་སྐད་ཅིག་མ་ལ་སོགས་པ་དང་འགལ་བའི་ཉེས་པ་མེད་དོ། །འོ་ན་དེ་ཉིད་མཐོང་བ་ཞེས་ཅིའི་ཕྱིར་ཞེ་ན། དེ་ཡང་འཇིག་རྟེན་ལ་ལྟོས་ཞེས་བྱ་བ་ཐ་མལ་པའི་འཇིག་རྟེན་པ་ལ་ལྟོས་ནས་རྣལ་འབྱོར་པ་དེ་ཁོ་ན་ཉིད་མཐོང་བ་ཞེས་བཤད་དོ། །གཞན་དུ་ན་གལ་ཏེ་ཐ་མལ་པ་ཉིད་རྣལ་འབྱོར་པའི་འཇིག་རྟེན་ལ་ལྟོས་ནས་དེ་ཁོ་ན་ཉིད་མཐོང་བར་འགྱུར་ན་དེའི་ཚེ་ཐ་མལ་པའི་འཇིག་རྟེན་པས་འགལ་བར་བྱས་པས་རྣལ་འབྱོར་པའི་འཇིག་རྟེན་ལས་འགལ་བར་འགྱུར་ཏེ། མི་གཙང་བའི་བུད་མེད་རྟོགས་པས་མི་གཙང་བ་ལ་སོགས་པར་རྟོགས་པའི་ཚེ་འགལ་བར་བྱས་པར་འགྱུར་ན། དེ་ལྟ་བུར་ནི་མི་འགྱུར་རོ། །དེ་བས་ན་དེ་ནི་འཇིག་རྟེན་པ་ལ་ལྟོས་ནས་དེ་ཉིད་མཐོང་བ་ཡིན་ནོ། །དེའི་ཕྱིར་རྣལ་འབྱོར་པའི་འཇིག་རྟེན་གྱིས་ཐ་
མལ་པའི་འཇིག་རྟེན་སུན་འབྱིན་པར་བྱེད་དོ། །དེ་ཁོ་ན་ཉིད་མཐོང་བ་ལ་ལྟོས་པ་ཡིན་པས་གོང་མ་གོང་མའི་ཁྱད་པར་གྱིས་རྣལ་འབྱོར་པ་ཡང་སུན་འབྱིན་ནོ་ཞེས་བྱ་བར་གནས་སོ། །ཅི་སྟེ་འདིར་རྣལ་འབྱོར་པ་དང་འཇིག་རྟེན་པ་གཉིས་ཀྱིས་ཐམས་ཅད་སྒྱུ་མ་ལྟ་བུར་བརྟགས་ན་དེ་ལྟ་ན་ནི་རྒྱལ་བ་ཡང་སྒྱུ་མ་དང་མཚུངས་པར་འགྱུར་ལ། དེས་ན་སྒྱུ་མ་དང་འདྲ་ཞིང་བརྫུན་ཡིན་པའི་རྒྱལ་བ་ལ་མཆོད་པ་ལ་སོགས་པ་བྱས་པ་ལ་བསོད་ནམས་ཇི་ལྟར་སྐྱེད་པར་འགྱུར་ཞེ་ན། དབུ་མ་པས་སྒྱུ་མ་ལྟ་བུ་ཞེས་བྱ་བ་ལ་སོགས་པ་སྨོས་ཏེ། ཇི་ལྟར་རྒྱལ་བ་ཡོད་དུ་ཟིན་ཀྱང་མཆོད་པ་ལ་སོགས་པ་ལས་བསོད་ནམས་ཇི་ལྟར་འབྱུང༌། དེ་ནི་ཇི་ལྟར་ཡོད་དུ་ཟིན་ཀྱང་འདི་ནི་རྐྱེན་ཙམ་ཡིན་པ་དེ་བཞིན་དུ། སྒྱུ་མ་ཙམ་ཡིན་ཡང་བསོད་ནམས་སྐྱེ་བར་མཚུངས་སོ་ཞེས་བྱ་བའི་དོན་ཏོ། །གལ་ཏེ་ཞེས་བྱ་བ་ལ་སོགས་པ་ནི་གཞན་གྱི་དྲི་བའོ། །ཅི་སྲིད་ཅེས་བྱ་བ་ལ་སོགས་པ་ནི་དབུ་མ་པའི་ལན་ཡིན་ནོ། །དེ་ལྟར་ཡིན་དུ་ཆུག་ན་ཡང་སེམས་ཅན་རྣམས་ཡུན་རིང་དུ་གནས་པ་ཡིན་པས་ཡང་དག་པར་ཡོད་པ་ཡིན་ནོ་ཞེ་ན། དེའི་ཕྱིར་རྒྱུན་རིང་བ་ཙམ་གྱིས་ཞེས་བྱ་བ་ལ་སོགས་པ་སྨོས་ཏེ། རྒྱུན་རིང་ཞེས་བྱ་བ་ཐོག་མ་མེད་པའི་དུས་དང་འབྲེལ་པའི་སྐད་ཅིག་མ་གཅིག་ཏུ་བརྒྱུད་པའི་རྒྱུན་དེ་ནི་ཡང་དག་པར་ཡོད་པ་མ་ཡིན་ཏེ། རྒྱུན་ཙམ་ཉིད་སྨོས་པའི་ཕྱིར་རོ། །གནས་པའི་རྒྱུན་སྐད་ཅིག་མ་ནི་སྒྱུ་མ་ཡང་ཡིན་ནོ་ཞེས་བྱ་བར་ཡང་དགོངས་སོ། །དེ་བས་ན་སྒྱུ་མ་ནི་རྒྱུན་ཡུན་རིངས་སུ་གནས་སུ་ཟིན་ཀྱང་བརྫུན་པ་ཡིན་པར་འདྲའོ། །གལ་ཏེ་དེ་ལྟར་འདྲ་ན་ནི་སྒྱུ་མའི་སྐྱེས་བུ་བསད་སོགས་ཞེས་སྨོས་པས། དེའི་རྫས་དབྲོག་པ་ལ་སོགས་པ་བྱས་ན་སྡིག་པར་ཅིའི་ཕྱིར་མི་འགྱུར་ཞེ་ན། དེའི་ཕྱིར་སེམས་མེད་ཕྱིར་ན་ཞེས་བྱ་བ་སྨོས་ཏེ། སྒྱུ་མའི་སེམས་ནི་བསོད་ནམས་དང་བསོད་ནམས་མ་ཡིན་པ་གཉི་གའི་རྒྱུ་ཡིན་ན། སྒྱུ་མའི་སྐྱེས་བུ་ལ་སྒྱུ་མའི་སེམས་ཡོད་པ་མ་ཡིན་ནོ། །དེས་ན་གལ་ཏེ་ཁྱེད་ཀྱི་སྒྱུ་མའི་སྐྱེས་བུ་དེ་དང་འདྲ་ན་ནི་བསོད་ནམས་དང་བསོད་ནམས་མ་ཡིན་པ་འབྱུང་བ་དེ་ཉིད་སྲིད་ན་དེ་ཡིན་ནོ། །ཅིའི་ཕྱིར་སྒྱུ་མའི་སྐྱེས་བུ་ལ་སེམས་མེད་ཅེ་ན། སྔགས་ལ་སོགས་པ་ཞེས་བྱ་བ་ལ་སོགས་པ་སྨོས་ཏེ།
སོགས་པའི་སྒྲས་ནི་རྣལ་འབྱོར་གྱི་མཐུ་ལ་སོགས་པ་ལ་ཡང་སེམས་བསྐྱེད་པའི་མཐུ་ཡོད་པ་མ་ཡིན་ནོ། །བདེ་བར་གཤེགས་པའི་སྤྲུལ་བའི་སྒྱུ་མ་ནི་སེམས་དང་བཅས་པ་ཡིན་དུ་ཟིན་ཀྱང་བསམ་གྱིས་མི་ཁྱབ་པ་ཡིན་ནོ། །དེ་ལྟར་ན་ནི་སེམས་ཅན་དང་སྒྱུ་མ་འདྲ་བ་མ་ཡིན་ཏེ། སེམས་དང་ལྡན་པའི་ཕྱིར་རོ་ཞེ་ན། དེའི་ཕྱིར་སྣ་ཚོགས་ཞེས་བྱ་བ་སྨོས་ཏེ། གང་གི་ཕྱིར་སྒྱུ་མའི་རྐྱེན་གྱི་དངོས་པོ་གཅིག་ལས་འབྲས་བུ་དངོས་པོ་ཐམས་ཅད་བསྐྱེད་པར་ནུས་པ་ཡོད་པ་ནི་གང་ཡང་མེད་དོ། །དེ་བས་སྒྱུ་མ་ལ་དེ་དག་ཀྱང་རྐྱེན་སྣ་ཚོགས་པ་ལས་བྱུང་བའི་ཕྱིར་རྣམ་པ་སྣ་ཚོགས་སུ་གནས་པ་ཡིན་ནོ། །ཤེས་རབ་ཀྱི་ཕ་རོལ་ཏུ་ཕྱིན་པ་ལས་དོན་དམ་པར་ཆོས་ཐམས་ཅད་མྱ་ངན་ལས་འདས་པ་ཡིན་པར་གསུངས་ལ། དེ་རྣམས་ཀུན་རྫོབ་ཏུ་ནི་འཁོར་བར་འདོད་པས། དེ་ལྟར་ན་སངས་རྒྱས་ཀྱང་འཁོར་བར་ཐལ་བར་འགྱུར་བས། དེ་ཉིད་ཀྱི་ཕྱིར་གལ་ཏེ་ཞེས་བྱ་བ་ལ་སོགས་པའི་ཚིགས་སུ་བཅད་པས་བརྒལ་བ་ཡིན་ནོ། །འདིར་དེའི་ལན་ནི་རྐྱེན་རྣམས་ཞེས་བྱ་བ་ལ་སོགས་པའི་ཚིགས་སུ་བཅད་པ་ཡིན་ཏེ། སོ་སོའི་སྐྱེ་བོ་དོན་དམ་པར་མྱ་ངན་ལས་འདས་པའི་རང་བཞིན་ཡིན་ཡང་བག་ཆགས་ཀྱི་རྒྱུན་མ་ཆད་པས་ཀུན་རྫོབ་ཏུ་འཁོར་བ་ཡིན་གྱི། བཅོམ་ལྡན་འདས་ཀྱིས་ནི་བག་ཆགས་ཞེས་བྱ་བའི་རྐྱེན་རྒྱུན་བཅད་ནས་ཀུན་རྫོབ་ཏུ་ཡང་འབྱུང་བར་མི་འགྱུར་རོ། །ཡང་ཞེས་བྱ་བའི་སྒྲས་ནི་དོན་དམ་པར་ལྟ་སྨོས་ཀྱང་ཅི་དགོས་ཞེས་བྱ་བའི་དོན་ཏོ། །ཡང་ན་སངས་རྒྱས་བཅོམ་ལྡན་འདས་ཀྱིས་བག་ཆགས་མ་ལུས་པ་སྤངས་པའི་ཕྱིར། འཇིག་རྟེན་གྱི་ཁམས་དེ་དང་དེར་འབྱུང་བར་སྟོན་ཅིང༌། རྫུ་འཕྲུལ་དང་ཆོ་འཕྲུལ་ལ་སོགས་པའི་ཁྱད་པར་དེ་དང་དེར་སྟོན་པར་མཛད་ཅིང་སེམས་ཅན་སྣ་ཚོགས་པའི་བསམ་པ་ཐམས་ཅད་ཡོངས་སུ་རྫོགས་པར་མཛད་པ་ནི་འཁོར་བ་མ་ཡིན་ཏེ། སྔོན་གྱི་སྨོན་ལམ་གྱི་འཕེན་པའི་ཤུགས་ཀྱིས་འབྱུང་བ་ཡིན་གྱི། རྐྱེན་མ་སྤངས་པར་འབྱུང་བ་མ་ཡིན་པས་འགལ་བར་འགྱུར་རོ་ཞེས་སྟོན་ཏོ། །འདིར་སེམས་ཙམ་པ་ན་རེ་གང་འདི་བུམ་པ་དང་སྣམ་བུ་ལ་སོགས་པའི་མཚན་ཉིད་ཅན་གྱིས་སྒྱུ་མ་དེ་དམིགས་པ་མེད་ན་ནི་སྒྱུ་མ་ཉིད་དུ་འཁྲུལ་པ་ཡང་མི་
འཐད་ལ། འཁྲུལ་པར་གནས་པའི་སེམས་ཀྱིས་དེ་རྟོགས་པ་ཡིན་ནོ་ཞེས་སྨྲ་བར་ནུས་པ་ཡང་མ་ཡིན་ཏེ། ཁྱེད་དབུ་མ་པའི་འཁྲུལ་པ་ནི་སེམས་ཉིད་མེད་པར་འགྲུབ་པའི་ཕྱིར་རོ། །དེ་བས་ན་གང་འདི་སྐད་དུ། གང་ཚེ་འཁྲུལ་པའང་མེད་ན་ཞེས་བྱ་བ་སྨོས་ཏེ། དེའི་ལན་ནི་གང་ཚེ་ཞེས་བྱ་བ་ལ་སོགས་པ་སྨོས་པ་ཡིན་ཏེ། གང་ཁྱེད་ཀྱི་བུམ་པ་དང་སྣམ་བུ་ལ་སོགས་པའི་མཚན་ཉིད་ཅན་དུ་བཤད་པའི་སྒྱུ་མ་ཡང་ཡོད་པ་མ་ཡིན་ཏེ། གལ་ཏེ་དེ་ཡོད་པར་ཁས་ལེན་ན་ཐམས་ཅད་ཡོད་པར་སྨྲ་བའི་གཞུང་དང་འདྲ་བར་ཐལ་བར་འགྱུར་རོ། །དེ་བས་ན་སྒྱུ་མ་དེ་ཡོད་པ་ཇི་ལྟར་དམིགས། དེའི་ཕྱིར་སེམས་ཙམ་པའི་ལྟར་སྒྱུ་མ་མེད་པ་དག་ནི་དམིགས་པ་ཇི་ལྟར་འགྱུར། ཁོ་བོ་ཅག་དབུ་མ་པ་རྣམས་ཀྱི་ནི་མེད་པའི་མཚན་ཉིད་ཅན་གྱིས་འཁྲུལ་པ་ཡང་དམིགས་པར་བྱར་རུང་བ་ཡིན་ནོ། །གལ་ཏེ་སེམས་ཙམ་པ་དག་སེམས་ཉིད་སྒྱུ་མའི་རྣམ་པ་དེ་ཡིན་མོད་ཅེས་ཟེར་ན། དེ་ལྟ་ཡིན་དུ་ཆུག་ན་གལ་ཏེ་སྒྱུ་མ་འམ་གཞན་པའི་དོན་ཁྱད་པར་ཅན་ཡིན་ཡང་ཡང་དག་པར་ཡོད་ན་དེ་ལྟར་རུང་ན། སྐྱེ་བ་དང་བྲལ་བའི་སེམས་ཉིད་སྒྱུ་མ་ཡིན་ན་དེའི་ཚེ་གང་གིས་གང་ལ་དམིགས་ཏེ་མཐོང་བར་འགྱུར་ཏེ། སུས་ཀྱང་ཅི་ཡང་མི་མཐོང་ངོ༌། །དེ་ཡང་འཇིག་རྟེན་གྱི་ནི་མགོན་པོ་ཞེས་བྱ་བ་ལ་སོགས་པ་སྨོས་པ་ཡིན་ཏེ། ཅི་ཞིག་གསུངས་ཤེ་ན། སེམས་བྱེད་པ་པོས་དེ་ལས་གཞན་པའི་སེམས་གཉིས་པ་མི་མཐོང་ངོ་ཞེས་གསུངས་སོ། །དེ་ནི་འདིར་ལུང་ཡིན་ལ། རིགས་པ་ནི་རལ་གྲིའི་སོ་ནི་ཞེས་བྱ་བ་ལ་སོགས་པ་སྨོས་པ་ཡིན་ཏེ། གང་ཞིག་བདག་ཉིད་གང་ཡིན་པ་དེ་ནི་དེས་གཅོད་པར་མི་བྱེད་དོ། །དཔེར་ན་རལ་གྲིའི་ཁོ་རང་གིས་རང་ལ་མི་གཅོད་པ་དང་འདྲ་བར། ཡིད་ཀྱང་དེ་བཞིན་ཏེ་རང་གིས་རང་ལ་དམིགས་པར་མི་ནུས་ཏེ། རང་ལ་རང་བྱེད་པ་འགལ་བའི་ཕྱིར་རོ། །དེ་བས་ན་ཉེ་བར་མི་དམིགས་པའི་སེམས་དེ་ཇི་ལྟར་ཡོད་པ་ཡིན། རལ་གྲི་གཞན་གྱིས་མི་ཆོད་པ་དང་འདྲ་བར་ཤེས་པ་གཞན་གྱིས་གཞན་ཤེས་པ་མེད་དོ། །རང་རིག་པ་མེད་ན་རིག་པར་མི་རུང་བའི་ཕྱིར་རོ། །འདིར་འཁྲུལ་པའི་དབང་གིས་ དོགས་པ ་གཞན་སྐྱེ་བ་གསལ་བའི་ཕྱིར། བདག་
གིས་ཞེས་བྱ་བ་ལ་སོགས་པ་སྨོས་ཏེ། དེ་ལྟ་ཡིན་ན་ཡང་ཡིད་ནི་རང་ཉིད་རང་ལ་རིག་པར་རུང་ངོ༌། །དཔེར་ན་མར་མེ་རང་ལ་རང་གསལ་བར་སྣང་བ་དང་འདྲ་བ་དེ་བཞིན་དུ། སེམས་ཀྱང་རང་ལ་རང་སྣང་དུ་རུང་བ་ཡིན་ནོ་ཞེ་ན། འདིར་དཔེ་མ་གྲུབ་པར་བསྟན་པའི་ཕྱིར། མར་མེ་ཞེས་བྱ་བ་ལ་སོགས་པ་སྨོས་ཏེ། མུན་པས་བསྒྲིབས་པའི་བུམ་པ་ལ་སོགས་པ་ནི་གསལ་བར་བྱེད་དུ་རུང་གི །མར་མེ་ནི་བདག་ཉིད་བུམ་པ་ལྟར་མུན་པས་བསྒྲིབས་པ་མེད་པས་གསལ་བར་བྱེད་པ་མ་ཡིན་ཏེ། གང་གི་རང་བཞིན་གང་ཡིན་པ་དེ་ནི་དེའི་རང་བཞིན་གྱི་བདག་ཉིད་རྒྱུར་འགྱུར་རོ་ཞེས་བྱ་བའི་ཚིག་ནི་རིགས་པ་མ་ཡིན་པས་གསོག་ཡིན་ནོ། །དེ་ཡང་འདི་ལྟར་དེའི་རང་བཞིན་མ་ཡིན་པ་རང་བཞིན་གཞན་དང་ཕྲད་ནས་དེའི་རང་བཞིན་དུ་འགྱུར་བ་ནི་རིགས་ཏེ། དཔེར་ན་ཤེལ་དེ་དང་མི་མཐུན་པའི་སས་སྔོན་པོ་དེ་དང་ཕྲད་ན་དེ་སྔོན་པོར་འགྱུར་བར་རུང་གི །སྔོན་པོ་ཉིད་གཞན་ལ་ལྟོས་ནས་རང་ལ་སྔོན་པོར་མི་བྱེད་དོ། །དེ་ལྟར་བུམ་པ་ལ་སོགས་པ་གཞན་དག་ནི་མར་མེ་ལ་སོགས་པ་ལ་ལྟོས་ནས་སྣང་བ་མར་མེ་ལ་སོགས་པ་གཞན་འགའ་ནི་སྣང་བ་གཞན་ལ་མི་ལྟོས་པར་སྣང་བ་བདག་ཉིད་སྣང་བར་བྱེད་དོ་ཞེས་བྱ་བ་ནི་རིགས་སོ། །སྔོན་པོ་ཉིད་སྔོན་པོ་མ་ཡིན་ན་ནི་དེ་ཤེལ་དང་འདྲ་བར་བདག་ཉིད་སྔོན་པོར་བྱེད་ཀྱི། སྔོན་པོ་ཉིད་དུ་གནས་པ་ནི་སྔོན་པོར་བྱེད་པར་མི་རིགས་སོ། །གལ་ཏེ་མར་མེ་རང་ཉིད་ཀྱང་གསལ་བར་མི་བྱེད་ལ། གཞན་གྱིས་ཀྱང་གསལ་བར་མི་བྱེད་ན་ནི་རྣམ་པ་ཐམས་ཅད་དུ་སྣང་བའི་རྒྱུན་ཆད་པར་འགྱུར་ན། དེ་ལྟར་མི་རུང་བས་སྣང་བ་གཞན་ལ་མི་ལྟོས་པའི་ཕྱིར་རང་ལ་རང་གསལ་བར་བྱེད་དོ་ཞེས་བཤད་པ་ཡིན་ནོ། །དེ་བཞིན་དུ་སེམས་ཀྱང་གཟུང་བ་དང་འཛིན་པ་དང་བྲལ་བ་ཡིན་པའི་ཕྱིར་རང་ཉིད་གསལ་བར་བྱེད་པ་ཡིན་ནོ་ཞེ་ན། དེའི་ཕྱིར་མར་མེ་ཞེས་བྱ་བ་ལ་སོགས་པ་སྨོས་ཏེ། མར་མེ་ནི་གསལ་བར་བྱེད་པ་ཡིན་པར་ཤེས་པས་དེ་ལྟར་རྟོགས་པའི་ཕྱིར་སྒྲོ་བཏགས་པའི་ཚུལ་གྱིས་ལན་འགའ་ཞིག་བརྗོད་དུ་རུང་གི་ཤེས་པ་ལ་ནི་དེ་ལས་གཞན་པའི་ཤེས་པ་པོ་མེད་པས་དེ་ལ་རང་གསལ་བར་བྱེད་དོ་ཞེས་ཤེས་པ་རྒྱུ་གང་གིས་ཤེས་ནས་རྗོད་པར་བྱེད། ཡང་བློ་ནི་གཞན་གྱི་སེམས་ཤེས་པས་
ཀྱང་ཇི་ལྟ་བ་བཞིན་དུ་མི་མཐོང་བས་དེའི་ཕྱིར་སུས་ཀྱང་ཇི་ལྟ་བ་བཞིན་དུ་མི་མཐོང་བས་གསལ་བའམ་མེ་གསལ་བ་ཞེས་བརྗོད་དུ་རུང་བ་མ་ཡིན་ནོ། །བློ་ནི་བརྗོད་དུ་མེད་པ་ཡིན་དུ་ཟིན་ཀྱང་སྒྲོ་བཏགས་པ་ཙམ་གྱིས་ཡོད་པར་བཤད་པ་དེ་བདེན་པ་མ་ཡིན་ནོ། །དེའི་ཕྱིར་གསལ་ལམ་མི་གསལ་ཞེས་བྱ་བ་ལ་སོགས་པ་སྨོས་ཏེ། སུས་ཀྱང་ཞེས་བྱ་བ་ལ་སོགས་པས་སངས་རྒྱས་ཀྱིས་ཀྱང་མ་གཟིགས་པ་སྟེ། འོད་སྲུངས་སེམས་ནི་སངས་རྒྱས་ཐམས་ཅད་ཀྱིས་མ་གཟིགས་མི་གཟིགས་གཟིགས་པར་མི་འགྱུར་རོ་ཞེས་བྱ་བ་ལ་སོགས་པ་ཇི་སྐད་བཤད་པ་ལྟ་བུའོ། །དེ་བས་ན་མོ་གཤམ་གྱི་བུའི་ཚུལ་སྤྱོད་དང་འདྲ་བར་གསལ་བ་དང་མི་གསལ་བ་ལ་སོགས་པ་ཇི་སྐད་དུ་བརྗོད་དུ་ཟིན་ཀྱང་དོན་མེད་བརྫུན་ཡིན་ནོ། །དེ་ལྟར་རང་རིག་པ་རྣམ་པར་བསལ་བ་ན་རྒོལ་བ་རྩོད་པ་ལ་བརྩོན་པས་བརྒལ་བ་ནི་གལ་ཏེ་ཞེས་བྱ་བ་ལ་སོགས་པ་ཡིན་ཏེ། གཞན་དག་གི་རྣམ་པར་ཤེས་པས་རྗེས་སུ་མྱོང་བར་རབ་ཏུ་གསལ་བར་གྱུར་པ་ནི་དྲན་པའི་རྒྱུ་ཡིན་ནོ། །གལ་ཏེ་དེ་ལྟར་ཡིན་ན་སེམས་གཞན་གྱི་རྗེས་སུ་མྱོང་བའི་དོན་སྐྱེས་བུས་ཇི་ལྟར་དྲན་པར་འགྱུར་དུ་རུང་ཞེས་དྲིས་པ་དང༌། གཞན་དག་གིས་འབྲེལ་པ་ལས་ཞེས་བྱ་བ་སྨོས་ཏེ། རྒྱུ་དང་འབྲས་བུའི་མཚན་ཉིད་ཅན་གཅིག་ནས་གཅིག་ཏུ་བརྒྱུད་པ་ལ་སོགས་ཞེས་བྱ་བའི་ཐ་ཚིག་གོ །འདི་ལ་བྱི་བའི་དུག་ཇི་ལྟར་དྲན་པར་འགྱུར་ཞེས་དྲི་བར་སྦྱར་ཏེ། དེ་ཡང་དབྱར་གྱི་ཚེ་བྱི་བ་དུག་དང་བཅས་པར་འགྱུར་ལ། དེ་དག་ཡོད་པར་རྟོགས་པ་ན་སྦྲུལ་གྱི་མཆེ་བས་ཟིན་པའི་རྗེས་ཐོགས་ལ་སྦྲུལ་ནི་མ་མཐོང་བར་གྱུར་པ་དང་ལུས་ལ་གནོད་པའི་འགྱུར་བ་མཐོང་བས་བྱི་བའི་དུག་མེད་བཞིན་དུ་དེའི་དུག་གིས་ཟིན་པའི་དྲན་པ་འབྱུང་མོད་ཀྱི། སྦྲུལ་གྱི་དུག་ནི་དེ་ལས་གཞན་པ་ཉིད་ཡིན་ནོ། །དེ་བཞིན་དུ་རྨའམ་ལུས་ཀྱི་ནང་གཞན་ལས། བྱི་བའི་དུག་གི་ཤེས་པ་མེད་པ་བཞིན་དུ་དྲན་པ་དང་འདྲ་བར་རང་རིག་པ་མེད་པ་ཉིད་དུ་བརྗོད་པ་རྣམ་པར་ཤེས་པའི་དྲན་པ་འབྱུང་བ་ཡིན་ནོ། །ཡང་འདི་སྐད་དུ་བདག་ཉིད་མི་འབྱུང་མོད་ཀྱི། འོན་ཀྱང་མིག་གི་རྣམ་པར་ཤེས་པ་ལ་སོགས་པ་འབྱུང་བ་ན་གཟུགས་ལ་སོགས་པའི་རྐྱེན་གཞན་དང་ལྡན་པར་སྣང་བའི་
རང་བཞིན་ཅན་ཡིན་ནོ་ཞེ་ན། དེ་མི་རིགས་པར་བསྟན་པའི་ཕྱིར། རྐྱེན་གཞན་ཞེས་བྱ་བ་ལ་སོགས་པ་སྨོས་ཏེ། དཔེར་ན་གྲུབ་པའི་མིག་སྨན་མེད་པར་ཡང་བུམ་པ་ལ་སོགས་པ་མི་མཐོང་བ་དང་འདྲ་བར་རྐྱེན་ཉིད་དང་ལྡན་པ་ཙམ་གྱིས་ཤེས་པ་ཡིན་དུ་མི་རུང་ངོ༌། །དེ་ལྟར་ན་རང་རིག་པ་མེད་པར་བུམ་པ་ལ་སོགས་པ་མཐོང་བ་ཡང་མེད་པར་ཐལ་བར་འགྱུར་རོ་ཞེ་ན། དེའི་ཕྱིར་འདི་ལྟར་ཞེས་བྱ་བ་ལ་སོགས་པ་སྨོས་ཏེ། མཐོང་བ་ཞེས་བྱ་བ་ནི་འདིར་མངོན་སུམ་གྱི་ཚད་མས་ངེས་པར་བྱས་པའོ། །ཐོས་པ་ནི་སྒྲ་ལས་བྱུང་བའོ། །ཤེས་པ་ནི་རྗེས་སུ་དཔག་པས་སོ། །ཇི་ལྟར་མཐོང་བ་ལ་སོགས་པ་གང་ཡིན་པ་དེ་ནི་འདིར་དབུ་མ་པས་ཀྱང་བཀག་པ་མེད་ཀྱང་གཞན་དུ་ཚད་མས་ཡང་དག་པ་ཉིད་ཡིན་པ་གཞན་དུ་མི་རུང་སྟེ། དེ་ཅིའི་ཕྱིར་ཞེ་ན། འདིར་མཐོང་བ་ལ་སོགས་པ་བདེན་པ་ཉིད་དུ་རྟོགས་པ་ནི་སྡུག་བསྔལ་གྱི་རྒྱུར་གྱུར་པའི་གཏི་མུག་ཡིན་པས་དེ་བཟློག་པ་ཡིན་ནོ། །གལ་ཏེ་སེམས་ལས་སྒྱུ་མ་གཞན་ཡང་མ་ཡིན། གཞན་མ་ཡིན་པ་ཡང་མ་ཡིན་ན། དཔེར་ཇི་ལྟར་རུང་ཞེས་རྟོག་པས་དེའི་ཕྱིར། སེམས་ལས་ཞེས་བྱ་བ་ལ་སོགས་པ་སྨོས་ཏེ། གལ་ཏེ་སྒྱུ་མ་དངོས་པོ་ཡིན་ན་ནི་སེམས་ལས་ཇི་ལྟར་གཞན་པ་མ་ཡིན་ཏེ། བུམ་པ་ལ་སོགས་པ་དང་འདྲ་བར་གཞན་ཡིན་ནོ། །གལ་ཏེ་མཚན་མིན་ཞེས་པ་སེམས་ལས་སྒྱུ་མ་གཞན་མ་ཡིན་ན་ནི་ཡང་དག་པར་དངོས་པོར་མ་གྲུབ་སྟེ་ཡོད་པ་མ་ཡིན་ནོ། །སེམས་མེད་དུ་ཟིན་ན་སྒྱུ་མ་ཇི་ལྟར་མཐོང་ཞེས་རྟོག་པ་དེའི་ཕྱིར། ཇི་ལྟར་ཞེས་བྱ་བ་ལ་སོགས་པ་སྨོས་ཏེ། ཇི་ལྟར་སྒྱུ་མ་མི་བདེན་ཞིང་མེད་དུ་ཟིན་ཀྱང་སྣང་བ་དང་འདྲ་བར་སེམས་གཞན་རང་བཞིན་མེད་ཀྱང་ཀུན་རྫོབ་ཏུ་བལྟ་བར་བྱ་བའི་ཡུལ་དང༌། ལྟ་བ་པོར་སྣང་བ་ལ་ཉེས་པ་ཅི་ཞིག་ཡོད། འདིར་སེམས་ཙམ་པ་ན་རེ་གལ་ཏེ་དངོས་པོ་ལ་བརྟེན་ན་ནི་དེ་ཉིད་ཀྱིས་འཁོར་བར་འགྱུར་ལ། དེ་ལ་མ་བརྟེན་ན་ནི་འཁོར་བ་ཉིད་ནམ་མཁའ་དང་འདྲ་བར་འགྱུར་རོ་ཞེས་རྟོག་པས་དེའི་ཕྱིར། དངོས་པོ་ལ་བརྟེན་ནས་ཞེས་བྱ་བ་ལ་སོགས་པ་སྨོས་ཏེ། དོན་དམ་པར་དངོས་པོ་མེད་པའི་འཁོར་བ་སྐྱེ་བའི་བྱ་བ་དང་ལྡན་པར་ཇི་ལྟར་འགྱུར་ཏེ་མི་འགྱུར་རོ། །འཁོར་བ་
དངོས་པོ་མེད་ཀྱང་ཡང་དག་པ་མ་ཡིན་པའི་ཀུན་ཏུ་རྟོག་པ་ཞེས་བྱ་བའི་གཞན་དབང་ཡོད་དོ་ཞེ་ན། དེའི་ཕྱིར་གྲོགས་པོ་ཞེས་བྱ་བ་ལ་སོགས་པ་སྨོས་ཏེ། གལ་ཏེ་འཁོར་བ་མེད་ཀྱི་སེམས་ཀྱི་རྣམ་པ་མ་ཡིན་པར་ཀུན་ཏུ་རྟོག་ན་འདི་ནི་གྲོགས་མེད་པ་ཆ་ཤས་དང་བྲལ་བ་མ་ཡིན་ནོ། །དེ་ལྟར་ཡིན་ན་ཅི་ཉེས་ཤེས་ན། གང་ཚེ་ཞེས་བྱ་བ་ལ་སོགས་པ་སྨོས་ཏེ། གལ་ཏེ་སེམས་གཅིག་པུ་གཟུང་བ་དང་བྲལ་བར་གནས་པ་དེའི་ཚེ་འཛིན་པ་པོ་ཡང་མེད་ལ། དེ་གཉི་ག་དང་བྲལ་ན་ནི་སེམས་ཅན་ཐམས་ཅད་ཀྱང་དེ་བཞིན་གཤེགས་པར་འགྱུར་རོ།། དེ་ལྟར་ན་ཁྱོད་ཀྱི་སེམས་ཙམ་དུ་བསྟན་པ་དེས་ཡོན་ཏན་ཅི་ཞིག་ཐོབ་སྟེ། བཏགས་པ་ཙམ་ཉིད་ཉོན་མོངས་པ་ཡིན་པས་ཉོན་མོངས་པ་ལས་ལྡོག་པར་མི་འགྱུར་རོ་ཞེས་དགོངས་སོ། །འདི་ལྟར་གཞན་དག་གིས་དབུ་མ་པ་ལ་དྲིས་པ་ནི། སྒྱུ་མ་ཞེས་བྱ་བ་ལ་སོགས་པ་སྨོས་ཏེ། ཁྱོད་ཀྱིས་བཤད་པའི་སྒྱུ་མ་ལྟ་བུར་ཤེས་པས་ཀྱང༌། འདོད་ཆགས་ལ་སོགས་པ་ཉོན་མོངས་པ་ལྡོག་པར་ཇི་ལྟར་འགྱུར་ཏེ། གང་གི་ཚེ་སྒྱུ་མའི་བུད་མེད་སྤྲུལ་པ་ལ་སྒྱུ་མ་དེ་བྱེད་པ་དེ་ཉིད་ཀྱང་འདོད་ཆགས་སྐྱེ་བར་འགྱུར་བས་དེ་ལྟར་ཤེས་སུ་ཟིན་ཀྱང་ཉོན་མོངས་པ་མི་ལྡོག་གོ །དེ་ལྟར་བརྒལ་བའི་ལན་གདབ་པའི་སྒོ་ནས་ཉོན་མོངས་པ་སྤང་བའི་རིམ་པ་བསྟན་པའི་ཕྱིར། དེ་བྱེད་ཅེས་བྱ་བ་ལ་སོགས་པ་སྨོས་ཏེ། སྒྱུ་མ་དེའི་བྱེད་པ་པོ་ནི་དེ་བྱེད་པ་སྟེ། དེ་ཞེས་བྱ་བ་བུད་མེད་ལ་སོགས་པ་ཀུན་ནས་ཉོན་མོངས་པ་སྐྱེ་བའི་ས་བོན་མ་སྤངས་པ་ལས་སྒྱུ་མའི་བུད་མེད་དེ་མཐོང་བའི་དུས་སུ་ཉོན་མོངས་པ་སྐྱེ་བ་ནི་སྟོང་པ་ཉིད་ཀྱི་བག་ཆགས་བསྒོམ་པ་ཉམ་ཆུང་བ་ཉིད་ཡིན་ནོ། །འོ་ན་ཇི་ལྟར་ཉོན་མོངས་པ་སྤོང་ཞེ་ན། དེའི་ཕྱིར་སྟོང་པ་ཉིད་ཅེས་བྱ་བ་ལ་སོགས་པ་སྨོས་ཏེ། འདིར་སྟོང་པ་ཉིད་ནི་དེ་ཁོ་ན་ཉིད་ཀྱི་ཡེ་ཤེས་སོ། །དེའི་ས་བོན་ནི་བག་ཆགས་སོ། །དེ་བསྒོམ་པས་ནི་བསྒོམ་པ་ཤིན་ཏུ་གོམས་པ་སྐྱེས་པ་སྟེ། དེ་ནི་དངོས་པོའི་བག་ཆགས་གཟུགས་ལ་སོགས་པའི་རྟོག་པའི་ས་བོན་སྤོང་ཞིང་སེལ་བར་བྱེད་དོ། །ཅུང་ཟད་མེད་ཅེས་བྱ་བ་ནི་དངོས་པོ་མེད་པ་དག་གོ །མེད་དོ་ཞེས་སྟོང་པ་ཉིད་ལ་བསླབ་པའི་བག་ཆགས་ཇི་ལྟར་སྤོང་བར་འགྱུར་ཞེ་ན། དེའི་ཕྱིར་
གང་ཚེ་ཞེས་བྱ་བ་ལ་སོགས་པ་སྨོས་ཏེ། དོན་དམ་པར་ན་སྟོང་པ་ཉིད་ནི་ཡོད་པ་མ་ཡིན་ཏེ། དངོས་པོ་མེད་པ་ནི་དངོས་པོ་རྣམས་ལྡོག་པ་ལ་ལྟོས་པ་མ་ཡིན་པས། དངོས་པོ་ལ་བརྟེན་ཞེས་བྱ་བའི་དངོས་པོ་མེད་ན་ནི་རྟེན་མེད་པ་ཡིན་ན་བློ་ཞེས་བྱ་བ་ཤེས་པ་སྟེ། མདུན་ན་དམིགས་པ་མེད་པའི་དོན་གྱིས་ན་ཇི་ལྟར་གནས་པར་འགྱུར་ཏེ་མི་གནས་སོ། །དེ་ལྟར་ན་དངོས་པོ་མེད་པར་རྟོགས་པའི་བག་ཆགས་ཀྱི་ས་བོན་ཡང་ཚུལ་འདི་ལྟར་སྤང་བར་བྱའོ་ཞེས་བྱ་བའི་ཐ་ཚིག་གོ །དེ་ལྟར་ལྷག་པ་དང་བཅས་པའི་མྱ་ངན་ལས་འདས་པ་བཤད་ནས། ལྷག་མ་མེད་པ་བསྟན་པའི་ཕྱིར། གང་ཚེ་ཞེས་བྱ་བ་ལ་སོགས་པ་སྨོས་ཏེ། དམིགས་པ་མེད་པ་ནི་ཡུལ་མེད་པའམ་ཉེ་བར་ལེན་པ་མེད་པའོ། །བློ་ནི་སེམས་སོ། །རབ་ཏུ་ཞེས་བྱ་བ་ནི་མྱ་ངན་ལས་འདས་པའོ། །དེ་ལྟར་ན་རྒྱལ་བའི་སྐུ་ཇི་ལྟར་སྣང་བས་བལྟ་ཞེ་ན། དེའི་ཕྱིར་ཡིད་བཞིན་ཞེས་བྱ་བ་ལ་སོགས་པ་སྨོས་ཏེ། གདུལ་བྱ་ནི་འགྲོ་བ་རྣམས་ཀྱི་དོན་གྱི་རྐྱེན་དང་སྨོན་ལམ་གྱི་རྒྱུ་དེ་གཉིས་ཇི་སྲིད་ཡོད་པ་དེ་སྲིད་དུ། སྐལ་པ་ཇི་བཞིན་དུ་འདོད་པ་ཡོངས་སུ་སྐོང་བར་མཛད་པར་སྣང་སྟེ། དེ་ཡང་ཡིད་བཞིན་གྱི་ནོར་བུ་ལ་སོགས་པ་དང་འདྲ་བར་རྟོག་པ་མི་མངའ་ཡང་རེ་བ་ཡོངས་སུ་སྐོང་བར་མཛད་དོ། །ཇི་ལྟར་ན་སེམས་མེད་དུ་ཟིན་ཀྱང་བྱ་བ་དེ་བྱེད་ཅེས་རྟོག་པ་དེའི་ཕྱིར། མཁའ་ལྡིང་ཞེས་བྱ་བ་ལ་སོགས་པ་སྨོས་ཏེ། དཔེར་ན་ནམ་མཁའ་ལྡིང་གི་དུག་སྔགས་གྲུབ་པའི་སྐྱེས་བུས་མཆོད་སྡོང་གི་ཀ་བ་བསྒྲུབས་ཏེ་བཙུགས་པ་དེས་སྐྱེས་བུ་སྦྲུལ་ལ་སོགས་པའི་དུག་གིས་ཟིན་པ་སེལ་བར་བྱེད་པའི་མཐུ་ཡོད་ལ། དེའི་གྲུབ་པ་པོ་དེ་མེད་ནས་ཡུན་རིང་པོར་ལོན་ན་ཡང་མཆོད་སྡོང་དུ་བཙུགས་པའི་ཤིང་གིས་དུག་སེལ་བར་ནུས་པ་ཡིན་ནོ། །དེ་བཞིན་དུ་བྱང་ཆུབ་ཀྱི་སྤྱོད་པའི་རྗེས་སུ་མཐུན་པའི་སྤྱོད་པས་སྙིང་པོར་བྱ་བ་ཐམས་ཅད་ཚུལ་བཞིན་སྤྱོད་དེ། བྱང་ཆུབ་ཀྱི་སྤྱོད་པ་ཡོངས་སུ་རྫོགས་པར་བྱེད་པ་དེས། རྒྱལ་བའི་མཆོད་སྡོང་ཞེས་བྱ་བ་རྒྱལ་བའི་སྐུ་སྤྲུལ་པར་གྱུར་ནས་བྱང་ཆུབ་སེམས་དཔའ་སེམས་དང་བཅས་པ་འདས་པར་གྱུར་ནས་ཀྱང་གདུལ་བྱ་རྣམས་དང་སྨོན་ལམ་གྱི་རྣམ་པའི་ཤུགས་གཉིས་ཀྱིས་སེམས་ཅན་ཐམས་ཅད་ཀྱི་དོན་མཛད་པར་འགྱུར་གྱི། ཉན་ཐོས་ལྟར་ཡོངས་སུ་མྱ་ངན་ལས་འདའ་
བར་མི་འགྱུར་རོ། །གལ་ཏེ་མྱ་ངན་ལས་འདས་སུ་ཟིན་ཀྱང་ཡིད་བཞིན་གྱི་ནོར་བུ་དང་འདྲ་བར་འགྲོ་བའི་དོན་མཛད་པ་ནི་ཀྱང་ཞེས་བྱ་བའི་སྒྲའི་དོན་ཡིན་ནོ། །དེ་ཉིད་ཀྱི་ཕྱིར། སེམས་མེད་ཅེས་བྱ་བ་སྨོས་ཏེ། སངས་རྒྱས་ལ་མཆོད་པ་བྱས་པའི་བསོད་ནམས་ནི་འབྲས་བུ་ལས་འདྲ་བ་ཉིད་ཡིན་ཏེ། ཇི་ལྟར་འདྲ་ཞེས་རྟོག་ན་དེའི་ཕྱིར། གང་ཡང་ཞེས་བྱ་བ་ལ་སོགས་པ་སྨོས་ཏེ། སངས་རྒྱས་བཞུགས་པ་ན་མཆོད་པ་བྱས་པ་ཅི་ལྟ་བར་འདིར་ཡང་དེ་དང་འདྲའོ་ཞེས་བྱ་བའི་ཐ་ཚིག་གོ །སྔར་ནི་སྒྱུ་མ་དང་འདྲ་བའི་སེམས་དེ་ལས་བསོད་ནམས་སྐྱེ་བར་བཤད་ལ། ད་ལྟར་ནི་དེ་མེད་དུ་ཟིན་ཀྱང་ཞེས་བྱ་བ་ནི་འདིར་ཁྱད་པར་རོ། །བསོད་ནམས་ཀྱི་འབྲས་བུ་འདིར་མཚུངས་པ་དེ་ཡང་ལུང་གི་ཚད་མ་ལས་གྲུབ་པ་ཡིན་པས་ཀུན་རྫོབ་བམ་དོན་དམ་པ་གང་ཡིན་ཡང་སངས་རྒྱས་བཞུགས་པ་ལ་མཆོད་པ་བྱས་པ་དང་འདྲ་བར་འབྲས་བུ་དང་བཅས་པ་ཡིན་ནོ། །དེ་ལྟར་དེ་ཁོ་ན་ཉིད་རྟོགས་པ་དེའི་རིམ་པ་བཤད་པ་ན་ཐེག་པ་དམན་པ་དག་ཐེག་པ་ཆེན་པོ་མི་བཟོད་པས་ཕྱིར་རྒོལ་བར་བྱེད་པ་ནི། བདེན་པ་ཞེས་བྱ་བ་ལ་སོགས་པ་སྨོས་པ་ཡིན་ཏེ། སྡུག་བསྔལ་ལ་སོགས་པའི་བདེན་པ་མཐོང་ན་གང་ཟག་ལ་བདག་མེད་པ་རྟོགས་པའི་ཡེ་ཤེས་ཡང་སྲིད་པར་འགྲོ་བར་བྱེད་པའི་ལས་རྣམས་མི་བྱེད་པས་མྱ་ངན་ལས་འདས་ཤིང་གྲོལ་བར་འགྱུར་གྱི། སྟོང་པ་ཉིད་མཐོང་བས་ཡོད་པ་བཀག་ཅིང་མེད་པར་ལྟ་བར་མི་ཤེས་པ་དེས་འབྲས་བུ་ཅི་ཞིག་འགྲུབ་པ་ཡོད་དེ། ཅི་ཡང་མེད་དོ་ཞེས་རྟོག་པ་ལ། དེའི་ཁྱད་པར་ཆེན་པོ་ཡོད་པེ་ལ་ཁྱེད་ཀྱིས་མ་ཤེས་པ་ཡིན་ནོ་ཞེས་སྟོན་ཏེ། དེའི་ཕྱིར་གང་ཕྱིར་ཞེས་བྱ་བ་ལ་སོགས་པ་སྨོས་ཏེ། གང་གི་ཕྱིར་ལུང་ཡང་དག་པ་ལས་འདི་ལྟ་བུའི་སྟོང་པ་ཉིད་མ་མཐོང་བས་བྱང་ཆུབ་ཏུ་ནི་མི་འགྱུར་བར་གསུངས་ལ། དེ་བས་ན་སྟོང་པ་ཉིད་མཐོང་བ་ནི་དོན་ཆེན་པོ་ཡིན་པར་སྨྲའོ་ཞེས་བྱ་བའི་ཐ་ཚིག་གོ །འོན་ཏེ་ཞེས་བྱ་བ་ལ་སོགས་པ་ནི་གཞན་ཞིག་ལ་སྨྲ་བ་སྟེ། ཐེག་ཆེན་ཞེས་བྱ་བ་ལ་སོགས་པ་ནི་ཐེག་པ་ཡང་ཡིན་ལ་ཆེན་པོ་ཡང་ཡིན་པས་ན་ཐེག་པ་ཆེན་པོ་སྟེ། ས་བཅུ་འབྲས་བུ་དང་བཅས་པ་དེ་ཐོབ་པར་བྱེད་པའི་ཕྱིར་ཐེག་པའོ། །འབྲས་བུ་དང༌། དུས་དང༌། དམིགས་
པ་དང། བསམ་པ་དང༌། འབྱོར་བ་དང༌། བརྩོན་འགྲུས་དང༌། ཚོགས་ཀྱི་ཆེ་བ་ཉིད་ཡིན་པའི་ཕྱིར་ཆེན་པོ་སྟེ། ཐོས་པ་ལ་སོགས་པའི་རང་བཞིན་གྱི་ཤེས་རབ་དང་དེ་སྟོན་པའི་བསྟན་བཅོས་ས་བཅུ་པ་ལ་སོགས་པའོ། །དེ་ནི་མི་འགྲུབ་པར་གཞན་སྨྲ་ནའོ། །ཁྱེད་ཀྱི་ལུང་ནི་ཇི་ལྟར་འགྲུབ་ཅེས་བྱ་བ་ནི་ཐེག་པ་ཆེན་པོ་བས་དྲིས་པའོ། །གང་ཕྱིར་འདིར་ནི་གཉི་གའང་འགྲུབ། །ཅེས་བྱ་བ་ནི་ཉན་ཐོས་པའི་སྟེ། གཉི་ག་སངས་རྒྱས་པ་ཡིན་པའི་ཕྱིར་རོ་ཞེས་བྱ་བར་དགོངས་སོ། །དང་པོ་ཁྱོད་ཀྱི་འདི་མི་འགྲུབ། །ཅེས་བྱ་བ་ཐེག་པ་ཆེན་པོའི་ཚིག་སྟེ། དང་པོར་ཞེས་བྱ་བ་ཐེག་པ་ཆེན་པོ་མེད་པར་འཚང་རྒྱ་བར་མི་འགྱུར་ལ། དེ་མེད་པར་ཁྱེད་ཀྱི་ལུང་གྲུབ་པ་མ་ཡིན་ནོ་ཞེས་པའོ། །འདིར་གཞན་ཡང་རྒྱུ་གང་གིས་ཞེས་བྱ་བ་ལ་སོགས་པས་ནི་འདི་སྐད་སྟོན་ཏེ། གང་ལ་དེ་རྒྱུ་གང་གིས་ཁྱེད་ཀྱི་ལུང་གིས་དེར་སངས་རྒྱས་ཀྱིས་གསུངས་པ་ཡིན་པར་ཡིད་ཆེས་པར་འཇོག་ན། ཡིད་ཆེས་པ་ཐེག་པ་ཆེན་པོ་ལ་ཡང་གྱིས་ཤིག་ཅེས་པའོ། །འོན་ཏེ་གཉི་ག་འདོད་པ་ཉིད་ཡིན་པས་ཁྱེད་ཀྱི་ལུང་ལ་ནི་ཡིད་ཆེས་ཀྱི། སངས་རྒྱས་ཀྱིས་གསུངས་པ་ལས་ནི་མ་ཡིན་ཏེ། སངས་རྒྱས་ཀྱིས་གསུངས་པ་ལས་གཞན་པ་གཉི་ག་འདོད་པ་དེ་ལ་བདེན་པར་ཁས་ལེན་ན་རིག་བྱེད་ལ་སོགས་པ་འགའ་ཞིག་ཀྱང་གཉི་ག་འདོད་པ་ཡོད་པས་བདེན་པར་འགྱུར་རོ། །འོན་ཏེ་སངས་རྒྱས་ཀྱིས་གསུངས་པ་ཉིད་བདེན་མོད་ཀྱི་ཐེག་པ་ཆེན་པོ་རྩོད་པ་དང་བཅས་པའི་ཕྱིར་མི་འདོད་དོ་ཞེ་ན། ཁྱེད་ཀྱི་ལུང་ཡང་མུ་སྟེགས་པ་རྣམས་དང་རྩོད་པ་དང་བཅས་པའི་ཕྱིར་དོར་དགོས་སོ། །གཞན་གྱི་ལུང་གཞན་དག་ཀྱང་དོར་དགོས་སོ། །རང་གི་སྡེ་པ་དང༌། གཞན་འགའ་ཞིག་དང་རྩོད་པ་དང་བཅས་པའི་ཕྱིར་རོ། །གཞན་ཡང་སངས་རྒྱས་ཀྱི་བསྟན་པའི་རྩ་བ་ནི་དགེ་སློང་ཉིད་ཡིན་ཏེ། དགེ་སློང་གི་སྡོམ་པའི་རྩ་བ་གཞི་གང་ལ་ཡོད་པ་དགེ་སློང་ཉིད་དོ། །དེ་ཉིད་ཀྱང་དཀའ་བས་གནས་པ་ནི་མུ་སྟེགས་པ་དང་རྩོད་པ་དང་བཅས་པའི་ཕྱིར་རོ། །རེ་ཞིག་དགེ་སློང་ཉིད་ལྟ་སྨོས་ཀྱང་ཅི་དགོས་ཀྱི། སེམས་དམིགས་པ་དང་བཅས་པ་སྟེ། ཉེ་བར་དམིགས་པ་ཡོད་པ་རྣམས་ཀྱིས་ཇི་སྲིད་ཕུང་པོའི་འཛིན་པ་ཡོད་པ་དེ་སྲིད་ཀྱི་བར་ངའོ་ཞེས་ཀྱང་ང་
རྒྱལ་བྱེད་པར་འགྱུར་ཞིང༌། ཡང་ལས་དང་སྐྱེ་བ་ཡོད་ལ། དེ་ལྟར་ན་མྱ་ངན་ལས་འདས་པ་ཡང་དཀའ་བས་གནས་པ་ཡིན་ནོ། །བདེན་པ་མཐོང་བས་ཉོན་མོངས་པ་སྤོང་བའི་ཕྱིར་དཀའ་བས་གནས་པ་མ་ཡིན་ནོ་ཞེས་ཟེར་བ་དེའི་ཕྱིར། ཉོན་མོངས་པ་ཞེས་བྱ་བ་ལ་སོགས་པ་སྨོས་ཏེ། ཉོན་མོངས་པ་སྤངས་པའི་རྗེས་ཐོགས་ལ་ཡང་སྟོང་པ་ཉིད་མ་བསྒོམས་པར་དེ་མི་འབྱུང་སྟེ། དམིགས་པ་དང་བཅས་པའི་སེམས་དང་ལྡན་པ་ལ་གནོད་པ་དང་བཅས་པར་སྣང་ངོ༌། །དཔེར་ན་འཕགས་པ་མཽད་གལ་གྱི་བུ་ལུས་ཀྱི་སྡུག་བསྔལ་གྱིས་གཟིར་ཞིང་རྨོངས་པའི་ལས་ཀྱི་ནུས་པ་ཡོད་པར་སྣང་བ་ཡིན་ནོ། །དེ་ལྟར་ཡིན་ན་ཡང་རེ་ཞིག་སྲེད་པ་ནི་སྲིད་པའི་རྩ་བར་གྱུར་ན་དེ་དེ་རྣམས་ལ་མེད་དོ་ཞེ་ན། དེ་ངེས་པར་གཟུང་ཞིང་དཔྱད་པས་ངེས་པར་བྱ་དགོས་ལ། ཅི་ཞིག་ངེས་པར་བྱ་དགོས་ཤེ་ན། ཇི་ཙམ་ཞེས་བྱ་བ་ལ་སོགས་པ་སྨོས་ཏེ། འདིར་གཞན་དག་ན་རེ་ཉོན་མོངས་པ་ཅན་དང༌། ལུང་དུ་མ་བསྟན་པའི་སྲེད་པ་དང༌། འདོད་པའི་ཁམས་ཀྱི་མི་དགེ་བ་ནི་འདིར་ཡང་སྲིད་པ་འབྱུང་བའི་དབང་དུ་བྱས་པ་ཡིན་ཏེ། དེ་ཡང་དགའ་བའི་འདོད་ཆགས་དང་བཅས་པ་ནི་ཉོན་མོངས་པ་ཅན་ཡིན་ན། ཉོན་མོངས་མེད་ཀྱང་ཞེས་ཅིའི་ཕྱིར་སྨྲ་ཞེས་འདི་ལྟར་དགོངས་ཏེ། གཏི་མུག་ཀྱང་ཉོན་མོངས་པ་ཆེན་པོ་ཡིན་པས་ཉོན་མོངས་པ་ཅན་ཡིན་ལ། དེའི་བག་ཆགས་ཀྱང་ནི་ཀུན་ཏུ་རྨོངས་པ་ཅན་མ་ཡིན་པའི་མི་ཤེས་པའི་སེམས་དམིགས་པ་དང་བཅས་པ་འདི་ལ་ཡོད་པར་འདོད་དོ། །དེ་བཞིན་དུ་ཉོན་མོངས་པ་ཅན་མ་ཡིན་པའི་སྲེད་པ་ལ་བག་ཆགས་ཉོན་མོངས་པ་ཅན་མ་ཡིན་པ་ཡོད་དོ། །དེ་ཡང་ཚོར་བ་ཡིན་ནོ། །དེ་ཡང་དཔྱད་པར་བྱ་སྟེ། ཉོན་མོངས་པ་ཅན་མ་ཡིན་ཡང་ལྷན་ཅིག་བྱེད་པའི་རྒྱུ་དང་ཕྲད་ནས་ཉོན་མོངས་པ་ཅན་བསྐྱེད་དོ་ཞེས་བྱ་བ་ཡང་ཞེས་བྱ་བའི་སྒྲས་སྟོན་ཏོ། །དེ་བས་ན་སྲེད་འདི་ཞེས་བྱ་བ་ལ་སོགས་པ་སྨོས་པ་ཡིན་ནོ། །རྒྱུ་རྣམས་འབྲས་བུ་ངེས་པར་སྐྱེད་པ་ནི་མ་ཡིན་ནོ་ཞེ་ན། དེའི་ཕྱིར་དམིགས་པ་ཞེས་བྱ་བ་ལ་སོགས་པ་སྨོས་ཏེ། གང་ཡང་རུང་བ་དེར་འཇོག་པར་འགྱུར་རོ་ཞེས་བྱ་བ་ནི། སེམས་དམིགས་པ་དང་བཅས་པ་ཡིན་ན། སྲིད་པའམ་ཟག་པ་མེད་པའི་
དབྱིངས་གང་ཡིན་པ་དེར་ངེས་པར་འགྱུར་རོ། །དེ་ཡང་ཅིའི་ཕྱིར་ཞེ་ན། སྟོང་པ་ཉིད་ཅེས་བྱ་བ་ལ་སོགས་པ་སྨོས་ཏེ། སྟོང་པ་ཉིད་རྟོགས་པ་དང་བྲལ་བའི་སེམས་དེའི་དངོས་པོའི་བག་ཆགས་ཀྱིས་བཅིངས་པ་ཡིན་པའི་ཕྱིར་གྲོལ་བར་མི་འགྱུར་ཏེ། སླར་ཡང་སྐྱེ་བར་འགྱུར་རོ། །དེ་ཡང་ཅི་དང་འདྲ་ཞེ་ན། དེའི་ཕྱིར་འདུ་ཤེས་ཞེས་བྱ་བ་ལ་སོགས་པ་སྨོས་ཏེ། འདུ་ཤེས་ནི་སྔོན་པོ་ལ་སོགས་པ་མཚན་མར་འཛིན་པའི་སེམས་ཀྱི་འདུ་ཤེས་སོ། །དེ་གང་ལ་མེད་པ་དེ་འདུ་ཤེས་མེད་པ་སྟེ། འདུ་ཤེས་མེད་པ་དེ་ཡང་ཡིན་ལ། །ལུས་དང་སེམས་ཀྱི་རྣམ་པར་གཡེང་བ་བཀག་པ་བསྐྱེད་པས་སྙོམས་པར་འཇུག་པ་ཡང་ཡིན་པའི་ཕྱིར་འདུ་ཤེས་མེད་པར་སྙོམས་པར་འཇུག་པ་སྟེ། དེ་ཡང་བསམ་གཏན་བཞི་པའི་འབྲས་བུ་ཆེན་པོ་ནམ་ཞིག་ཐོབ་པ་ན་སྲིད་པ་ལ་ཐར་པར་འདུ་ཤེས་པས་འགའ་ཞིག་གིས་འདུ་ཤེས་བཀག་སྟེ་སྙོམས་པར་འཇུག་པར་བྱེད་པའོ། །དེའི་སེམས་ནི་ཕྱིན་ཅི་ལོག་གི་བག་ཆགས་ཀྱིས་བཅིངས་པའི་ཕྱིར་འདུ་ཤེས་བཀག་ཏུ་ཟིན་ཀྱང་དུས་ཇི་སྲིད་དུ་སྔ་མའི་འཕན་ཤུགས་ཟད་པ་དང༌། ལུས་ཀྱི་དབང་པོ་དེ་ལས་སྐྱེ་བར་འགྱུར་རོ། །འབྲས་བུ་ཆེ་བའི་ལྷ་འདུ་ཤེས་མེད་པའི་སེམས་ཅན་དུ་སྐྱེ་བའི་རྣམ་པར་སྨིན་པ་དེ་ནི་མི་ཁོམ་པ་ཡིན་ནོ། །དེས་ན་སྟོང་པ་ཉིད་བསྒོམ་པར་བྱའོ། །གལ་ཏེ་ཁྱོད་ཀྱི་ལུང་སངས་རྒྱས་ཀྱིས་གསུངས་པའི་མཚན་ཉིད་ཅན་མ་ཡིན་ནོ་ཞེས་ཟེར་ན། དེའི་ཕྱིར་གང་ཞིག་ཅེས་བྱ་བ་ལ་སོགས་པ་སྨོས་ཏེ། སངས་རྒྱས་ཀྱི་གསུང་ཡིན་པར་ཅིའི་ཕྱིར་མི་འདོད་དེ། འདོད་པར་བྱ་བ་ཡིན་ནོ། །ཕལ་ཆེར་ཞེས་བྱ་བ་ནི་རྣམ་པ་ཐམས་ཅད་དུ་མི་མཉམ་ཡང་ཞེས་བྱ་བའོ། །ཡང་སྟོང་པ་ཉིད་ལ་སོགས་པའི་ཕྱོགས་འགའ་ཞིག་མི་མཐུན་པས་སངས་རྒྱས་ཀྱིས་གསུངས་པ་མ་ཡིན་ནོ་ཞེས་རྟོག་ན། དེའི་ཕྱིར་གལ་ཏེ་ཞེས་བྱ་བ་ལ་སོགས་པ་སྨོས་ཏེ། ཐེག་པ་ཆེན་པོ་དང་ཁྱེད་ཀྱི་མདོ་ཚིག་འགའ་ཞིག་མི་མཐུན་པ་མི་རུང་ངོ་སྙམ་ན། ཁྱེད་ཀྱི་མདོ་ཡང་ཡང་དག་པར་ལྡན་པའི་ལུང་ལ་སོགས་པ་ལས་སྟོང་པ་ཉིད་ཆེན་པོ་དང་མཚུངས་པར་སྟོན་པ་དོན་ཡོད་ལ། དེ་ལྟར་མཉམ་པའི་ཚིག་གིས་ཀྱང་ཐེག་པ་ཆེན་པོ་ཐམས་ཅད་རྒྱལ་བས་གསུངས་པ་ཅི་སྟེ་མ་ཡིན་ཏེ། སངས་རྒྱས་ཀྱིས་
གསུངས་པ་ཉིད་ཡིན་ནོ། །འོད་སྲུངས་ཆེན་པོ་ཞེས་བྱ་བས་ནི་གསུང་རབ་ཟབ་མོ་མ་རྟོགས་པ་ཉིད་ཀྱི་ཉེས་པ་ཡིན་ནོ་ཞེས་སྟོན་ཏོ། །གཞན་ཡང་སྟོང་པ་ཉིད་མ་རྟོགས་སུ་ཟིན་ཀྱང་གྲོལ་བར་གདགས་སུ་རུང་བ་ནི་སྲིད་ཀྱིས། དེ་མེད་པར་འཚང་རྒྱ་བར་ནི་མི་འགྱུར་ཏེ། དེ་ཅིའི་ཕྱིར་ཆགས་དང་ཞེས་བྱ་བ་ལ་སོགས་པ་སྨོས་ཏེ། ཆགས་དང་འཇིག་པ་གཉིས་དེ་ལྟར་མི་གནས་པའི་མྱ་ངན་ལས་འདས་པ་ཐོབ་པ་འདི་ནི་སྟོང་པ་ཉིད་དུ་རྟོགས་པའི་འབྲས་བུ་ཡིན་ནོ། །དེ་ལྟར་ཞེས་བྱ་བ་ལ་སོགས་པ་དེ་ནི་ཉེ་བར་སྡུད་པ་ཡིན་ནོ། །འདོད་ཆགས་ལ་སོགས་པའི་ཉོན་མོངས་པའི་སྒྲིབ་པ་དང༌། ཤེས་ཤིང་ཁོང་དུ་ཆུད་པར་བྱ་བ་དེ་ཐམས་ཅད་ལ་འགེབས་ཤིང་སྒྲིབ་པའི་མི་ཤེས་པ་ཉིད་ནི་མུན་པ་དང་འདྲ་བས་མུན་པ་སྟེ། དེ་གཉིས་སྤང་བའི་གཉེན་པོ་ནི་སྟོང་པ་ཡིན་ནོ། །དེ་ལྟར་ཡིན་ན་ཡང་བདག་མེད་དོ་ཞེས་བྱ་བའི་རྣམ་པ་འདི་ལ་འཇིགས་པས་ཁོ་བོ་མི་བསྒོམ་མོ་ཞེ་ན། དེའི་ཕྱིར་སྡུག་བསྔལ་ཞེས་བྱ་བ་ལ་སོགས་པ་སྨོས་སོ། །དེ་ལྟར་ཟེར་བ་དེ་ཅི་ལས་འཇིགས་པའི་གཞི་མེད་དོ་ཞེས་བསྟན་པའི་ཕྱིར་བདག་ཅེས་བྱ་བ་ལ་སོགས་པ་སྨོས་སོ། །ཅི་ལྟར་ན་ཅི་ཡང་མེད་ཅེས་རྟོག་ན། དེའི་ཕྱིར་སོ་དང་ཞེས་བྱ་བ་ལ་སོགས་པ་སྨོས་ཏེ། བུ་ག་དགུ་ཞེས་བྱ་བ་ནི་མིག་དང༌། རྣ་བ་དང༌། སྣ་དང༌། ཁ་སྟེ་བདུན་དང༌། བཤང་བ་དང༌། གཅི་བའི་ལམ་སྟེ་དགུའོ། །རྣམ་ཤེས་དྲུག་ནི་མིག་དང༌། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ཀྱི་རྣམ་པར་ཤེས་པའོ། །དེ་ལྟར་རེ་ཞིག་བད་སའི་བུ་ལ་སོགས་པ་བདག་དང་སྲོག་ལས་གང་ཟག་ཅེས་བྱ་བ་ཡོད་པར་འདོད་པ་སུན་ཕྱུང་བ་དང༌། གྲངས་ཅན་དག་ཀྱང་ཤེས་པ་ལ་བདག་ཅེས་འདོགས་པས་དེ་ཡང་ཤེས་པ་དང་བཅས་པའི་སྐྱེས་བུའི་རང་གི་ངོ་བོ་ཡིན་པ་ལས་དེའི་འདོད་པ་ལས། སྙིང་སྟོབས་དང༌། རྡུལ་དང༌། མུན་པ་ཆ་མཉམ་པའི་གནས་སྐབས་སུ་རང་བཞིན་རྟག་པ་དང་འདྲེས་པར་གྱུར་པ་ལས་ཆེན་པོ། དེ་ལས་ང་རྒྱལ། དེ་ལས་སྒྲ་ལ་སོགས་པ་དེ་ཙམ་ལྔ་འབྱུང་ལ། སྒྲ་ལ་སོགས་པའི་ཤེས་པ་དེ་ཡང་སྐྱེས་བུ་ལ་སྒྲ་ལ་སོགས་པ་གཟུགས་བརྙན་གྱི་ཚུལ་དུ་སྣང་ངོ་ཞེས་ཟེར་བས། དེའི་ཕྱིར་གལ་ཏེ་སྒྲའི་ཞེས་བྱ་བ་ལ་སོགས་པ་སྨོས་
ཏེ། གལ་ཏེ་སྒྲ་ལ་སོགས་པའི་ཤེས་པ་ནི་སེམས་དེ་ནི་སྐྱེས་བུ་རྟག་པ་ཡིན་ལ། སྒྲ་ཡང་རྟག་པར་དུས་ཐམས་ཅད་དུ་འཛིན་ཅིང་ཐོས་པར་འགྱུར་ན། རྟག་ཏུ་མི་ཐོས་པས་ཤེས་པ་དེ་མི་རྟག་པ་ཡིན་ནོ་ཞེས་སྟོན་ཏོ། །འདིར་གཞན་དག་ན་རེ་སྒྲ་ལ་སོགས་པ་རྟག་ཏུ་མི་གནས་པས་དུས་ཐམས་ཅད་དུ་མི་ཐོས་པ་ཡིན་ནོ་ཞེ་ན། དེའི་ཕྱིར་གང་གིས་ཞེས་བྱ་བ་ལ་སོགས་པ་སྨོས་ཏེ། གལ་ཏེ་དེ་ལྟ་ཡིན་ན་རྒྱུ་གང་གིས་ཤེས་པ་ཞེས་བརྗོད་ཅིང་མིང་དུ་བཏགས་པ་དེ་ཤེས་པར་བྱ་བའི་ཡུལ་མེད་པར་ཅི་ཞིག་དེས་ཤེས་པར་མ་གྱུར་པས་ཤེས་པ་ཇི་ལྟར་ཡིན་ཏེ་མི་རུང་ངོ༌། །དེ་ཉིད་ཀྱི་ཕྱིར་གལ་ཏེ་ཞེས་བྱ་བ་ལ་སོགས་པ་སྨོས་ཏེ་དེ་ནི་གོ་སླའོ། །སྒྲའི་ཤེས་པ་དེ་ཉིད་སྒྲ་ཉེ་བར་མི་གནས་པ་ན་གཟུགས་དང་ཉེ་བས་གཟུགས་ཤེས་པ་ཡིན་ཏེ། དེའི་ཕྱིར་ཡོད་དོ་ཞེས་ཟེར་ན། གལ་ཏེ་དེ་ལྟར་ཡིན་ན་གང་གི་ཚེ་གཟུགས་ཤེས་པ་དེའི་ཚེ་རྒྱུ་གང་གིས་ཅི་སྟེ་ཐོས་པར་ཡང་མ་གྱུར། སྒྲ་དྲུང་ན་མེད་པའི་ཕྱིར་རོ་ཞེ་ན། དེས་ན་སྒྲའི་ཤེས་པ་ཡོད་པ་ཡིན་ནོ། །མེད་པ་མ་ཡིན་ཏེ་དེའི་བདག་ཉིད་ཅན་ཡིན་པའི་ཕྱིར་རོ་ཞེ་ན། རྒྱུ་དེས་ན་ཤེས་བྱ་དྲུང་ན་མེད་ཅིང་རྒྱང་རིང་ན་ཤེས་པ་ཡང་མེད་པ་ཁོ་ནར་ངེས་པ་ཡིན་ནོ། །གཞན་ཡང་གང་ཚེ་ཞེས་བྱ་བ་ལ་སོགས་པ་སྨོས་ཏེ། གལ་ཏེ་སྒྲའི་ཤེས་པ་དང༌། གཟུགས་ཀྱི་ཤེས་པ་གཉིས་སྐྱེས་བུའི་རྣམ་པས་གཅིག་ཡིན་ལ། གང་གི་གཟུགས་ཤེས་པ་དེའི་ཚེ་སྒྲ་ཐོས་པར་ཡང་ཅིའི་ཕྱིར་མི་འགྱུར། འོན་ཏེ་གཟུགས་འཛིན་པའི་དུས་ན་སྒྲ་མེད་པས་མ་ཐོས་པ་ཡིན་ནོ་ཞེ་ན། དེ་ལྟ་ན་ནི་ཤེས་བྱ་མེད་པའི་ཤེས་པའང་མེད་པ་ཁོ་ནར་འགྱུར་བས་ཤེས་པ་རྟག་པར་མི་འགྱུར་རོ། །གཞན་ཡང་སྒྲ་འཛིན་པར་བྱེད་པའི་རང་བཞིན་གྱི་ཤེས་པ་གང་ཡིན་པ་དེ་གཟུགས་འཛིན་པར་ནུས་པར་ཇི་ལྟར་འགྱུར། དེ་གཉིས་གཅིག་ན་ནི་དབང་པོ་ལྔར་བརྟག་པ་ཡང་དོན་མེད་དོ། །གཞན་ཡང་རང་བཞིན་ལས་སྐྱེས་བུ་འབྱུང་བར་བརྟག་པ་ཡང་རིགས་པ་མ་ཡིན་པའི་ཕྱིར་པ་དང་ཞེས་བྱ་བ་ལ་སོགས་པ་སྨོས་ཏེ། སྙིང་སྟོབས་དང༌། རྡུལ་དང་མུན་པ་ཆ་མཉམ་པའི་གནས་སྐབས་སུ་རང་བཞིན་ཞེས་བརྟགས་པ་ལ་སོགས་པ་སྐྱེ་བར་བཤད་པ་ཡང་རྟོག་པ་ཉིད། གཅིག་པུ་ཡིན་ན་ཡང་མི་རུང་ངོ༌། །དེ་བས་ན་སྒྲ་
འཛིན་པའི་རང་བཞིན་ཡོད་པར་འདོད་པའི་ངོ་བོ་ཉིད་མ་མཐོང་བར་གྲུབ་པ་རིགས་པ་མ་ཡིན་ནོ། །དེའི་ཕྱིར་སྒྲ་འཛིན་ཞེས་བྱ་བ་ལ་སོགས་པ་སྨོས་ཏེ། སྒྲ་འཛིན་པའི་ཤེས་པའི་ངོ་བོ་གང་ཡིན་པ་དེ་ནི་གཟུགས་འཛིན་པར་ཇི་ལྟར་འགྱུར་ཏེ། ཅི་ནས་ཀྱང་མི་འགྱུར་རོ། །དེ་ཡང་གཅིག་པ་དུ་མ་ཉིད་དུ་འགྱུར་བ་ནི་འགལ་བའི་ཕྱིར་རོ། །གཅིག་པུ་ཉིད་ཡིན་ན་ཡང་དུ་མར་གདགས་སུ་རུང་སྟེ། སྐྱེས་བུ་གཅིག་ལ་ཡང་བུ་ལ་ལྟོས་ནས་ཕ་ཞེས་བྱ་ལ་ཕ་ལ་ལྟོས་ནས་བུ་ཞེས་བྱ་བས་དུ་མའི་བདག་ཉིད་ཅན་ཡིན་པ་དང་འདྲ་བར་ཤེས་པ་ཡང་དེ་དང་འདྲ་བར་ཡོད་མོད་ཅེ་ན། དེ་ནི་ཕ་དང་ཞེས་བྱ་བ་ལ་སོགས་པ་སྨོས་སོ། །ཅིའི་ཕྱིར་ཞེ་ན། སྙིང་སྟོབས་ཞེས་བྱ་བ་ལ་སོགས་པ་སྨོས་ཏེ། སྙིང་སྟོབས་ནི་བདེ་བའོ། །རྡུལ་ནི་སྡུག་བསྔལ་བའོ། །མུན་པ་ནི་གཏི་མུག་སྟེ། སྙིང་སྟོབས་ལ་སོགས་པ་དེ་དག་ཀྱང་གཅིག་པུ་བརྟན་པ་ཡིན་པའི་ཕྱིར་རྣམ་པར་འགྱུར་བ་ཙམ་དུ་བརྟགས་ཀྱི། འགྲོ་བ་ནི་དེ་ལས་སྐྱེས་པ་མ་ཡིན་པས་ཡང་དག་པར་ན་སྙིང་སྟོབས་ལ་སོགས་པ་ནི་ཕ་ཡང་མ་ཡིན་བུ་ཡང་མ་ཡིན་ནོ། །གང་གི་ཕྱིར་ད་ལྟར་ཡིན་པ་དེས་ན་ཡང་དག་པ་ཉིད་དུ་མ་ཡིན་ནོ། །དེ་བཞིན་དུ་སྒྲ་ཉེ་བར་མི་གནས་པའི་ཚེ་ན་ཡང་སྒྲ་འཛིན་པའི་ཤེས་པ་གཟུགས་ཀྱི་ཤེས་པའི་རང་བཞིན་ལྡན་པར་ཡང་མ་མཐོང་ཞིང་མི་སྣང་ངོ༌། །དེ་བས་ན་སྒྲའི་ཤེས་པ་དེ་ཡོད་པ་མ་ཡིན་ནོ། །འོན་ཏེ་དེ་ཉིད་ཅེས་བྱ་བའི་སྒྲའི་ཤེས་པ་དེ་ཉིད་གར་མཁན་དང་འདྲ་བར་ཚུལ་གཞན་གྱིས་གཟུགས་ཀྱི་ཤེས་པར་སྣང་བ་ཡིན་ཏེ། དཔེར་ན་གར་མཁན་གཟུགས་གཞན་གྱིས་འཇིགས་སྡེར་སྟོན་ལ་གཞན་གྱིས་ནི་སྲིད་སྒྲུབ་ཏུ་སྟོན་ཏེ། དེ་ཡང་དེ་དང་འདྲའོ་ཞེ་ན། དེ་ལྟ་ན་ནི་ཤེས་པ་དེ་ཡང་གར་མཁན་དང་འདྲ་བར་རྟག་ཅིང་ཐེར་ཟུག་པ་མ་ཡིན་ནོ། །གལ་ཏེ་དེ་ཉིད་རང་བཞིན་གཞན་ཡིན་ནོ་ཞེས་རྟོག་ན། དེའི་གཅིག་པ་ཉིད་འདི་ནི་སྔོན་ཆད་མེད་པ་ཡིན་ཏེ། གཞན་པ་དང་གཞན་གཅིག་པ་ཉིད་འདི་ནི་ཕན་ཚུན་འགལ་བའི་ཕྱིར་རོ། །དེ་ལྟ་གཅིག་པ་བཀག་པ་ན་རང་བཞིན་གཞན་ཡིན་པ་ནི་བརྫུན་པ་ཡིན་ཏེ། དེ་ལྟར་མེད་དོ་ཞེས་ཟེར་བ་ནི་དེ་ལྟར་ན་བདག་དེའི་རང་གི་རང་བཞིན་ནམ། ངོ་བོ་ཇི་ལྟ་བུ་ཡིན་པ་སྨོས་ཤིག་ཅེས་དྲིས་པའོ། །
གལ་ཏེ་དེའི་རང་གི་ངོ་བོ་ཤེས་པ་ཉིད་ཡིན་ནོ་ཞེ་ན། དེ་ལྟ་ན་ནི་སྐྱེས་བུ་ཐམས་ཅད་གཅིག་ཏུ་ཐལ་བར་འགྱུར་ཏེ། གྲོལ་བ་དང་མ་གྲོལ་བའི་སྐྱེས་བུ་རྣམས་གཅིག་ཁོ་ནར་འགྱུར་བའི་སྐྱོན་ཡོད་དོ། །གཞན་ཡང་སེམས་དང་བཅས་པའི་སྐྱེས་བུ་དང༌། སེམས་མེད་པའི་རང་བཞིན་དེ་གཉིས་གཅིག་པ་ཁོ་ནར་ཐལ་བར་འགྱུར་རོ། །ཡང་གྲངས་ཅན་གྱིས་དེ་ཤེས་པ་དང་རང་བཞིན་ནི་ཡོད་པ་ཉིད་དུ་མཉམ་ཞིང་མཚུངས་ཏེ། དེའི་ཕྱིར་གཅིག་པ་ཉིད་དུ་འདོད་དོ་ཞེ་ན། དབུ་མ་པས་གང་ཚེ་ཞེས་བྱ་བ་ལ་སོགས་པ་སྨོས་ཏེ། གང་གི་ཚེ་སྐྱེས་བུ་དང་རང་བཞིན་གཉིས་སེམས་དང་སེམས་མེད་པའི་བྱེ་བྲག་གི་ཁྱད་པར་གང་ཡིན་པ་དེ་མེད་ཅིང་རིམ་དང་རིམ་མ་ཡིན་པར་བྱེད་པ་དང་བྲལ་བས་རི་བོང་གི་ར་ལྟར་མེད་པས་ཕྱིན་ཅི་ལོག་ཡིན་ན། དེའི་ཚེ་འདྲ་བའི་རྐྱེན་གང་ཞིག་ཡིན་ཏེ་ཅི་ཡང་མེད་དོ། །དེ་བས་ན་གཅིག་པ་ཡང་མ་ཡིན་ནོ་ཞེས་བྱ་བའི་ཐ་ཚིག་གོ །འདི་དག་གིས་ནི་རྒྱུ་ལ་སོགས་པ་སྤྱི་དང་རིས་མཐུན་པ་དག་ཀྱང་གསལ་བ་ཡིན་ནོ། །དེ་ལྟར་རེ་ཞིག་བདག་སེམས་དང་ལྡན་པ་ཡིན་པར་ཚད་མས་བཀག་པ་དང༌། སེམས་མེད་པ་ཉིད་ཡིན་ནོ་ཞེས་ཟེར་ན། དེའི་ཕྱིར་སེམས་མེད་པ་ཡང་ཞེས་བྱ་བ་ལ་སོགས་པ་སྟེ། ཡང་གཞན་དག་ན་རེ་བདག་དེར་སྔར་སེམས་མེད་པ་ཡིན་ཡང་བདག་ཉིད་ཀྱི་ཡོན་ཏན་ཤེས་པ་ཞེས་བྱ་བ་ཡོད་པ་དེ་དང་ཕྲད་པ་ལས་ཀྱང་ཤེས་པ་ཅན་དུ་འགྱུར་རོ་ཞེས་ཟེར་ན། དེ་ལྟ་ན་ནི་སྔ་མའི་མི་ཤེས་པ་དེ་འཇིག་ཅིང་མེད་པས་མི་རྟག་པར་ཐལ་བར་འགྱུར་རོ། །འོན་ཏེ་རྟག་པ་ཡིན་པར་འགྱུར་བས་མེད་པ་ཡིན་ནོ་ཞེ་ན། དེའི་ཚེ་བདག་འདི་ལ་ཤེས་པ་ཡོད་པའི་སེམས་དང་ཕྲད་དུ་ཟིན་ཀྱང་ཅི་ཞིག་བྱ་སྟེ། ཅི་ཡང་མ་བྱས་སོ་ཞེས་བྱ་བའི་ཐ་ཚིག་གོ །དེ་ལྟར་བྱ་བ་མེད་པ་ཞིག་ཡོད་དུ་ཡང་མི་རུང་སྟེ། ཤེས་པ་མེད་ཅིང་བྱ་བ་མེད་པ་ནི་ནམ་མཁའ་དང་འདྲ་བས་དེ་ལ་བདག་ཏུ་སྒྲོ་བཏགས་པས་བདག་ཏུ་བྱས་པ་ཡང་རིགས་པ་མ་ཡིན་ནོ། །གལ་ཏེ་ཞེས་བྱ་བ་ལ་སོགས་པ་ལ་གཟེགས་ཟན་པ་ཡང་འདི་སྐད་དུ་དེ་ལྟར་བདག་མེད་ན་དགེ་བ་དང་མི་དགེ་བའི་ལས་ཀྱིས་ཡིད་དུ་འོང་བ་དང༌། འབྲས་བུ་ཡིད་དུ་མི་འོང་བ་དང་འབྲེལ་བ་ཡོད་པར་མི་རིགས་ཏེ། ལས་བྱས་
ནས་སེམས་ཀྱི་སྐད་ཅིག་མ་སྔ་མ་འཇིག་པའི་རྗེས་ལ། སེམས་ཀྱི་སྐད་ཅིག་མ་གཞན་ཉིད་འབྱུང་བར་འགྱུར་ལ། ལས་དེ་ནི་གཞན་པ་དེའི་ནི་མ་ཡིན་པས་དེའི་འབྲས་བུ་མྱོང་ན་ཤིན་ཏུ་ཐལ་ཆེས་པར་འགྱུར་པའི་ཕྱིར་རོ། །ལས་དེ་གང་གི་ཡིན་པ་འཇིག་པར་འགྱུར་བས་འབྲས་བུ་གང་གི་ཡིན་ཞེས་སྨྲ་ན། དེའི་ཕྱིར་ཡུ་བུ་ཅག་གཉིས་ཞེས་བྱ་བ་ལ་སོགས་པ་སྨོས་ཏེ། འདི་དང་ཕྱི་མའི་གཞི་ཐ་དད་པ་གང་ལ་ཡོད་པ་དེ་ནི་གཞི་ཐ་དད་པ་ཞེས་བྱ་སྟེ། ལས་འདིར་བྱས་པའི་འབྲས་བུ་ཕལ་ཆེར་ནི་ཕྱི་མར་འབྱུང་ལ། བྱ་བ་དང་འབྲས་བུ་དེ་དག་ལ་བདག་གང་ཡིན་པ་དེ་ནི་རྟག་པ་ཡིན་པའི་ཕྱིར་བྱ་བ་མེད་ཅིང་བྱ་བ་དང་བྲལ་བ་ཡིན་ནོ། །དེ་བས་ན་འདིར་བདག་བྱེད་པ་པོ་དང་ཚོར་བ་པོ་ཡིན་པ་ལ་སོགས་པའི་སྨྲ་བ་དེ་ནི་ལོག་པ་ཡིན་པས་དོན་མེད་པ་ཉིད་ཡིན་ཏེ། རིགས་པ་དང་མི་ལྡན་པའི་ཕྱིར་རོ། །གཞན་དག་ན་རེ་སེམས་ཅན་གཅིག་གི་རྒྱུད་ཁོ་ན་ལ་ཁ་ཟས་མི་མཐུན་པ་ལ་སོགས་པའི་རྒྱུ་དང་ལྡན་ན་ནད་ལ་སོགས་པའི་འབྲས་བུ་དང་ལྡན་པ་ཚེ་འདི་ཉིད་ལ་སྣང༌། ཚེ་ཕྱི་མ་ལ་ཡང་བདག་དེ་དང་འདྲ་མོད་ཅེ་ན། དེའི་ཕྱིར་རྒྱུར་བཅས་ཞེས་བྱ་བ་ལ་སོགས་པ་སྨོས་ཏེ། ཚེ་འདི་ཉིད་ལ་ཡང་སེམས་ཅན་རྣམས་བྱ་བ་དང་ལྡན་པའི་སེམས་ཅན་ཡིན་པའི་ཕྱིར་སྐད་ཅིག་མ་ཡིན་གྱི། སྐད་ཅིག་མ་ཡིན་པ་དག་ནི་རིམ་དང་རིམ་མ་ཡིན་པས་མི་བྱེད་པས་མེད་པ་ཡིན་པའི་ཕྱིར། རྒྱུ་དང་བཅས་ཤིང་ལྡན་པ་གང་ཡིན་པ་དེ་འབྲས་བུ་དང་ལྡན་པར་སྣང་ངོ་ཞེས་བྱ་བ་འདི་ནི་མི་སྲིད་དོ། །འོ་ན་སངས་རྒྱས་བཅོམ་ལྡན་འདས་ཀྱིས་བྱེད་པ་པོ་དང་ལོངས་སྤྱོད་པ་པོར་གསུངས་པ་ཡོད་དོ་ཞེ་ན། དེའི་ཕྱིར་རྒྱུན་ཞེས་བྱ་བ་ལ་སོགས་པ་སྟེ། ད་ནི་སེམས་སྐད་ཅིག་མའི་རྒྱུན་དུ་གནས་པ་སྔ་ཕྱིའི་འབྲེལ་བ་ལ་དགོངས་ནས་ལས་ཆུད་མི་ཟ་བར་སྟོན་པར་མཛད་པ་ཡིན་ནོ། །དེ་ལྟར་ཡིན་ན་ཡང་འདས་པ་ལ་སོགས་པའི་སེམས་གང་ཡིན་པ་དེ་བདག་ཅེས་བྱ་བའི་ང་རྒྱལ་གྱི་གཞི་ཡིན་པའི་ཕྱིར་བདག་ཉིད་ཡིན་ནོ་ཞེ་ན། དེའི་ཕྱིར་འདས་དང་ཞེས་བྱ་བ་ལ་སོགས་པ་སྨོས་ཏེ། དེ་ལ་རེ་ཞིག་འདས་པ་དང་མ་འོངས་པའི་སེམས་མེད་པ་ཡིན་པའི་ཕྱིར་གཞིར་མི་རུང་བས་བདག་མ་ཡིན་ལ་འོན་ཏེ་ད་ལྟར་བྱུང་བའི་སེམས་བདག་ཡིན་པར་
འདོད་ན་ད་ལྟར་གྱི་ཡང་བྱུང་མ་ཐག་འཇིག་པ་ཡིན་པས་གཞིར་མི་རུང་སྟེ། སེམས་དེ་མེད་ལ། དེ་མེད་པས་བདག་ཀྱང་མེད་དོ། །གལ་ཏེ་ལུས་དང་སེམས་དང་སེམས་ལས་བྱུང་བའི་ཚོགས་བསྡུས་པ་ལ་སྤྱིར་བདག་ཅེས་བྱ་བར་འདོད་དོ་ཞེ་ན། དེའི་ཕྱིར་ཇི་ལྟར་ཞེས་བྱ་བ་ལ་སོགས་པ་སྨོས་ཏེ། དཔེར་ན་འདི་ན་ཆུ་ཤིང་གི་ཕུང་པོ་ལ་ཆ་ཤས་སུ་ཕྱེ་ཞིང་ཕྱོགས་ཆར་རྣམ་པར་བསལ་ན་ཆ་ཤས་ཅན་གྱི་དངོས་པོ་ཅི་ཡང་མེད་པ་དང་འདྲ་བར་ཕུང་པོ་རྣམས་ལ་བདག་ཅེས་བྱ་ཡང་རྣམ་པར་དཔྱད་ཅིང་བཙལ་ན་ཡང་དག་པ་མ་ཡིན་པས་ཡོད་པ་མ་ཡིན་ནོ། །དེ་ཡང་འཕགས་པ་ཀླུ་སྒྲུབ་ཀྱི་ཞལ་སྔ་ནས། རིན་པོ་ཆེའི་ཕྲེང་བ་ལས། བདག་ཡོད་མ་ཡིན་ཞེས་བྱ་བ་ལ་སོགས་པས་ང་རྒྱལ་བསལ་བ་མཛད་པ་ཡིན་ནོ། །དེ་བས་ན་རྣམ་པར་དཔྱད་ཅིང་ཀུན་ཏུ་བཙལ་ན་ཡང་དག་པ་མ་ཡིན་པ་ཁོ་ནར་མཐོང་ངོ༌། །འོ་ན་ཁྱེད་འདོད་པའི་འགྲོ་བའི་དོན་བྱེད་པར་མི་འགྲུབ་པོ་ཞེ་ན། དེའི་ཕྱིར་གལ་ཏེ་ཞེས་བྱ་བ་ལ་སོགས་པ་སྨོས་ཏེ། དགོས་པའི་དོན་དུ་སྡུག་བསྔལ་ཉེ་བར་ཞི་བར་བྱ་བའི་དོན་དུའོ། །ཁས་བླངས་པ་ཞེས་བྱ་བ་ནི་འདོད་པས་སམ། བདག་གིས་བྱས་པས་བདག་ཉིད་དུ་ནི་རབ་བརྟགས་གང༌། །ཞེས་བྱ་བ་ནི་གཏི་མུག་གིས་སེམས་ཅན་དུ་རབ་ཏུ་བརྟགས་པ་སྒྲོ་བཏགས་པ་གང་ཡིན་པ་དེ་ལ་སྙིང་རྗེ་བྱེད་དོ་ཞེས་བྱ་བའི་ཐ་ཚིག་གོ །གཞན་དག་ན་རེ་སེམས་ཅན་མེད་ན་དགོས་པ་ཉིད་སུའི་དོན་དུ་བྱ་སྟེ་མི་རུང་ངོ་ཞེ་ན། དེའི་ཕྱིར་སེམས་ཅན་ཞེས་བྱ་བ་ལ་སོགས་པ་སྨོས་ཏེ། སེམས་ཅན་མེད་ན་དགོས་པ་དེ་སུའི་དགོས་པ་ཡིན་ཏེ། སུའི་ཡང་མ་ཡིན་ནོ། །བདེན་ཡང་ཞེས་བྱ་བ་ནི་བདེན་མོད་ཀྱི་ཞེས་ཁས་བླངས་པའོ། །དོན་དུ་ཞེས་བྱ་བ་ནི་བདག་དང་གཞན་གྱི་དོན་བྱ་བའོ། །བདག་བཏགས་ཞེས་བྱ་བ་འདི་འདོད་པའམ་འགྲོ་བའི་དོན་གྱིས་ལ་བྱ་བའོ། །བྱ་བ་དེ་ནི་སྒྲོ་འདོགས་པའི་དབང་གིས་སྡུག་བསྔལ་ཉིད་ཡིན་ན་ཡང་སྡུག་བསྔལ་རྣམས་ཉེ་བར་ཞི་བའི་དོན་ཉིད་དུ་བྱ་བའི་རྨོངས་པ་འདི་ནི་དགག་ཅིང་བཟློག་པར་བྱ་བ་མ་ཡིན་ནོ། །དེ་ཡང་རྟག་པ་དང་བདག་ལ་སོགས་པ་རྨོངས་པ་ལས་ནི་ང་རྒྱལ་འབྱུང་ལ། དེ་ནི་སྡུག་བསྔལ་འཕེལ་བའི་རྒྱུ་ཡིན་པས། དེ་ཉིད་ནི་བཟློག་པར་བྱ་དགོས་སོ། །དེ་སྐད་དུ་
སྨྲས་པ་དང༌། གཞན་དག་ན་རེ་སེམས་ཅན་ཙམ་དུ་སྒྲོ་འདོགས་པའི་ཁྱེད་ཀྱི་རྨོངས་པ་དེས་ཀྱང་ང་རྒྱལ་བཟློག་པར་མི་འགྱུར་ཏེ། བྱ་བའི་རྨོངས་པ་ཡང་རྨོངས་པ་ཉིད་ཡིན་པའི་ཕྱིར་སྡུག་བསྔལ་གྱི་རྒྱུ་བཟློག་པར་མི་ནུས་ལ། དེ་མི་ནུས་པས་ན་ཐར་པ་མེད་དོ་ཞེ་ན། བྱང་ཆུབ་འདོད་པ་རྣམས་ཀྱིས་ནི་སྒྱུ་མ་ལྟ་བུ་ལ་སྙིང་རྗེ་བྱ་ཞིང་བདག་མེད་པ་ཤེས་པ་ཁོ་ན་བསྒྲུབ་པར་བྱ་བ་ཡིན་པའི་ཕྱིར། བདག་མེད་བསྒོམ་པ་མཆོག་ཡིན་ནོ་ཞེས་བྱ་བ་སྨོས་སོ། །ཡང་ན་སྡུག་བསྔལ་གྱི་རྒྱུ་སྔ་མའི་ཚུལ་དེ་ལས་ཀྱང་བཟློག་པར་མི་འགྱུར་ཞེས་ཁྱེད་སྨྲ་ན། དེ་ལྟར་ན་བདག་མེད་པ་བསྒོམས་ཏེ། སེལ་བས་དེ་མཆོག་ཡིན་མོད་ཅེས་བྱ་བར་སྦྱར་རོ། །སེམས་ཡོད་པ་དང་མེད་པ་དགག་པའི་ཚུལ་གྱིས་བདག་མེད་པར་སུན་བྱུང་བ་ན་ཡན་ལག་ཅན་གྱི་མཚན་ཉིད་དང་ལྡན་པའི་ལུས་ཞེས་བྱ་བ་སེམས་དང་འབྲེལ་པ་ཡོད་བས་བདག་ཡོད་དོ་ཞེ་ན། དེའི་ཕྱིར་ལུས་ནི་ཞེས་བྱ་བ་ལ་སོགས་པ་སྨོས་པས་ནི་ལུས་རྗེས་སུ་དྲན་པ་ཡང་སྟོན་ཏོ། །ཐམས་ཅད་ལ་ཞེས་བྱ་བ་ནི་ཡན་ལག་ལ་སོགས་པའོ། །ཆ་ནི་ལག་པ་ལ་སོགས་པའོ། །ཆ་རེ་ནི་སོར་མོ་ལ་སོགས་པའོ། །ཡན་ལག་དང་ཉིད་ལག་དེ་ལྟར་གནས་པར་གྱུར་པ་ཡིན་ན་དེ་ལྟ་བུ་མ་ཡིན་པའི་ཡན་ལག་ཅན་གདགས་པའི་ལུས་དེ་ཡན་ལག་ལས་ལོགས་ཤིག་ན་བདག་ཉིད་གང་ན་གནས། དེ་བཞིན་དུ་ལུས་ནི་གཅིག་པུའམ་ཕྲ་རབ་ཙམ་གྱི་ཆ་ཤས་སུ་ཡང་བརྟག་པར་བྱ་བ་མ་ཡིན་པས། དེའི་ཕྱིར་དེ་བཞིན་ཕྱི་ནང་ཞེས་བྱ་བ་སྨོས་སོ། །དེ་བས་ན་དེའི་དབྱིབས་སུ་བཀོད་པའི་ཁྱད་པར་གྱི་ཞེས་བྱ་བ་ལ་སོགས་པའི་དབྱིབས་ཀྱི་ཚོགས་པའི་ཁྱད་པར་གྱིས་སྡོང་དུམ་གྱི་ཤིང་ལ་འདྲ་བའི་ཚུལ་གྱིས་མིའི་བློ་སྐྱེ་བ་ལྟ་བུ་ཡིན་ནོ། །སྡོང་དུམ་ལ་དུས་ཅུང་ཟད་ཅིག་ཐག་རིང་པོ་ནས་སྐྱེས་བུའི་བློ་འབྱུང་བ་ཡིན་ལ། ལག་པ་ལ་སོགས་པ་ལ་གམ་དུ་ཉེ་བ་འམ། དུས་ཡུན་རིང་པོར་ཡང་ལུས་ཀྱི་བློ་འབྱུང་བར་འགྱུར་བས་མི་འདྲའོ་ཞེ་ན། དེའི་ཕྱིར་ཇི་སྲིད་རྐྱེན་ནི་ཞེས་བྱ་བ་ལ་སོགས་པ་སྨོས་ཏེ། སྡོང་དུམ་གྱི་ཤིང་རྒྱང་རིང་བ་ལ་སོགས་པའི་རྐྱེན་གྱི་ཚོགས་པས་མིག་དང་པ་གང་ཡིན་པ་དེ་ནི་རྐྱེན་གྱི་ཚོགས་པ་ཡིན་ལ། འདིར་ལག་པ་ལ་
སོགས་པ་ལ་ཡང་དེ་དང་འདྲའོ། །གླེགས་བམ་ལ་ལས་ཇི་སྲིད་ལུས་ལ་སོགས་ཞེས་སྨོས་ཏེ། དེ་ནི་གཞན་དུ་བཤད་པར་བྱ་སྟེ། ཅི་སྲིད་དུ་གཏི་མུག་གི་རྐྱེན་གྱི་ཚོགས་པ་ཡོད་པ་དེ་སྲིད་དུ་ལུས་ལ་སྐྱེས་བུ་མེད་དུ་ཟིན་ཀྱང་སྐྱེས་བུ་ལྟར་སྣང་ངོ༌། །དེ་བཞིན་དུ་ལག་པ་ལ་སོགས་པ་ལ་ཡང་རྐྱེན་གྱི་ཚོགས་པ་ཡོད་པ་དེ་སྲིད་ཀྱི་བར་དུ་འདིར་ལག་པ་ལ་སོགས་པ་ལུས་སུ་རྨོངས་པའི་དབང་གིས་སྣང་ངོ༌། །ཕྱོགས་སྔ་མ་ནི་སྡོང་དུབ་དང་ལུས་དེ་གཉིས་མེད་པ་ཡིན་པར་བྱེ་བྲག་མེད་པར་སྟོན་ཏོ། །དེ་ལྟར་ལུས་མེད་པར་བཀག་ན་དེ་དང་མཚུངས་པ་ཉིད་ཀྱི་རྐང་པ་ལ་སོགས་པ་ལ་བསྒྲེ་བ་བསྟན་པའི་ཕྱིར། དེ་བཞིན་ཞེས་བྱ་བ་ལ་སོགས་པ་སྨོས་ཏེ། སོར་མོ་དེ་ཡང་ཚིགས་ཀྱི་ཚོགས་ཡིན་པས་དེ་མེད་པའི་སོར་མོ་གཞན་ག་ལ་ཡོད། ཚིགས་ཀྱང་ཆ་ཤས་ཀྱིས་ཕྱེ་ན་དེ་ལས་གཞན་ཅི་ཞིག་ཡོད། ཆ་ཤས་ཀྱང་རྡུལ་ཕྲ་རབ་དབྱེ་བས་ཕྱེ་ན། དེ་ལས་གཞན་པ་ཅི་ཞིག་ཡོད། རྡུལ་ཕྲ་རབ་དེ་ཡང་ཕྱོགས་ཀྱི་ཆ་ཤས་དྲུག་ཏུ་ཕྱེ་ན་གང་ཞིག་ཡོད། ཕྱོགས་ཀྱི་ཆ་ཤས་དེ་ཡང་ཆ་ཤས་མེད་པ་ཡིན་པས་ནམ་མཁའ་དང་མཚུངས་ཤིང་འདྲ་བ་ཡིན་ནོ། །རྒྱུ་གང་གིས་དེ་ལྟར་གཞིགས་པ་དེས་ན་རྡུལ་ཕྲན་ཡང་ཡོད་པ་མ་ཡིན་ནོ། །ཚུལ་དེ་ལྟར་གཟུགས་ཞེས་བྱ་བ་ནི་གཟུགས་ཀྱི་ཕུང་པོ་ལ་སུ་ཞིག་ཆགས་ཤིང་ཞེན་པར་བྱེད་དེ། ཆགས་པའི་གནས་མེད་དོ། །དེ་ལྟར་རེ་ཞིག་ལུས་དྲན་པ་ཉེ་བར་གཞག་པ་བཤད་ནས། ཚོར་བ་དྲན་པ་ཉེ་བར་གཞག་པ་བཤད་པའི་ཕྱིར་གལ་ཏེ་ཞེས་བྱ་བ་ལ་སོགས་པ་སྨོས་སོ། །གལ་ཏེ་ཚོར་བ་སྡུག་བསྔལ་ཡང་དག་པར་རམ། དོན་དམ་པར་ངེས་པར་ཡོད་ན་ཡིད་རབ་ཏུ་དགའ་བ་ལ་སོགས་པ་དེ་དང་མི་མཐུན་པའི་ཕྱོགས་ཅིའི་ཕྱིར་འགོག་ཅིང་སེལ་བར་མི་བྱེད། དེ་མི་བྱེད་པ་ལས་ན་སྡུག་བསྔལ་ཡང་དག་པར་ཡོད་པ་མ་ཡིན་ནོ། །དེ་བཞིན་དུ་གལ་ཏེ་བདེ་བ་ཡང་དག་པར་ཡོད་ན་མྱ་ངན་ལ་སོགས་པའི་སྡུག་བསྔལ་གྱིས་གདུངས་པ་ན་གོས་དང་མལ་སྟན་ལ་སོགས་པ་བདེ་བའི་རྒྱུར་འགྱུར་བ་ཡིན་ན། བདེ་བ་དེ་ཅིའི་ཕྱིར་འདོད་པ་ལས་ན་བདེ་བ་ཡང་དག་པར་མེད་དོ། །གལ་ཏེ་བདེ་བ་འམ་སྡུག་བསྔལ་ལམ་རྒ་བ་དང་མྱ་ངན་ལ་སོགས་པ་མངའ་བའི་སྟོབས་ཀྱིས་
ཟིལ་གྱིས་མནན་པའི་ཕྱིར་དེ་མ་མྱང་བ་ཡིན་ནོ་ཞེ་ན། བདེ་བའམ་སྡུག་བསྔལ་གང་ཡང་རུང་བ་ཞིག་ཉམས་སུ་མྱོང་བའི་བདག་ཉིད་ཅན་མེད་ན་དེའི་ཚོར་བ་ཉིད་ཇི་ལྟ་བུ་ཡིན་ཏེ། ཚོར་བར་བཞག་ཏུ་མི་རུང་ངོ༌། །ཚོར་བ་ཉམས་སུ་མྱོང་བ་ནི་རྣམ་པ་གསུམ་སྟེ། བདེ་བ་དང་སྡུག་བསྔལ་བ་དང༌། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པའོ། །དེ་དག་ནི་འདོད་པ་ཡིན་མོད་ཀྱི། འོན་ཀྱང་སྐྱེས་བུ་དགའ་བ་དང་ལྡན་པ་རྣམས་ལ་ནི་སྡུག་བསྔལ་ཉམས་སུ་མྱོང་བ་ཕྲ་བའི་བདག་ཉིད་ཅན་དུ་ཡོད་དོ་ཞེ་ན། དེ་ལྟ་ཡིན་ན་སྡུག་བསྔལ་འདིའི་རིགས་པ་ཉིད་ནི་ཡང་དག་པ་ཉིད་དུ་ཡོད་པ་མ་ཡིན་ནོ། །སྡུག་བསྔལ་ཕྲ་བ་དེ་ཡང་དེ་ལས་གཞན་པའི་རབ་ཏུ་དགའ་བ་རྣམས་ཀྱིས་བདེ་བ་ཉམས་སུ་མྱོང་བ་ཅུང་ཟད་ཀྱང་འགོག་པར་མི་ནུས་བས་མེད་པ་ཡིན་ནོ་ཞེས་བྱ་བར་དགོངས་སོ། །ཡང་གཞན་པ་ཞེས་བྱ་བ་བདེ་བའི་ཚོར་བ་ནི་དགའ་བ་ཙམ་དུ་གྱུར་པ་ཡིན་ན། དེའི་ཕྱིར་དགའ་བ་ཙམ་དེ་ལ་སྡུག་བསྔལ་གྱི་ཕྲ་བ་ཉིད་ཀྱིས་བདེ་བའི་ཚོར་བ་ལ་མི་གནོད་པས་སྡུག་བསྔལ་ཡང་ཕྲ་བ་ཉིད་ཡིན་པའི་ཕྱིར་ཚོར་བ་མྱོང་བར་མི་འགྱུར་རོ། །གལ་ཏེ་སྡུག་བསྔལ་དང་མི་མཐུན་པ་དགའ་བའི་རྐྱེན་བྱུང་བ་ན་སྡུག་བསྔལ་འབྱུང་བར་མི་འགྱུར་ཞིང་སྐྱེ་བར་མི་འགྱུར་བ་ཡིན་ལ། དེ་བཞིན་དུ་མྱ་ངན་ལ་སོགས་པའི་རྐྱེན་དང་ཕྲད་པར་གྱུར་པ་ན་བདེ་བ་མི་འབྱུང་སྟེ། གཉིས་པོ་འདི་དག་ཕན་ཚུན་ལྟོས་པ་ཡིན་པའི་ཕྱིར་བདེ་བ་དང་སྡུག་བསྔལ་མི་འབྱུང་བ་ཡིན་ནོ་ཞེ་ན། དེ་ལྟར་ན་རྐྱེན་ཕན་ཚུན་འདྲེས་པས་ཚོར་བ་ཡང་མེད་པ་ཡིན་པས་བརྟགས་པ་ལ་མངོན་པར་ཞེན་པ་ཙམ་ཡིན་ནོ་ཞེས་དེ་དང་དེར་བཤད་པ་དེ་ནི་རིགས་པ་ཉིད་དེ། མྱ་ངན་དང་དགའ་བ་ལ་སོགས་པ་ནི་བརྟགས་པ་ཙམ་ཡིན་པའི་ཕྱིར་ཡང་དག་པར་ན་རྒྱུ་དང་འབྲས་བུ་ཉིད་ཀྱང་ཕྲད་པ་མེད་པའི་ཕྱིར་རོ། །དེ་ལྟར་ན་མ་གྲུབ་ཅིང་རྣམ་པར་མི་རྟོག་པ་ཡིན་དུ་ཟིན་ཀྱང་ཐོག་མ་མེད་པའི་དུས་ནས་ཤིན་ཏུ་མངོན་པར་ཞེན་པའི་སྟོབས་ཀྱིས་བདེ་བ་ལ་སོགས་པ་སྒྱུ་མ་ལྟ་བུ་ཉིད་ཉམས་སུ་མྱོང་བར་སྣང་བ་ཡིན་ནོ། །དེ་བས་ན་བརྟགས་པ་ལ་མངོན་པར་ཞེན་པ་འདི་ནི་བརྫུན་པ་ཉིད་ཡིན་པའི་ཕྱིར་རྣམ་པར་དཔྱད་པ་གང་ཡིན་པ་འདི་
ཉིད་འདིའི་གཉེན་པོ་ཡིན་པའི་ཕྱིར་ཚོར་བ་དྲན་པ་ཉེ་བར་གཞག་པའི་བདག་ཉིད་ཅན་བསྒོམ་པར་བྱ་ཞིང་གོམས་པར་བྱ་སྟེ། ལོག་པར་མངོན་པར་ཞེན་པའི་ཀུན་ནས་ཉོན་མོངས་པ་འདི་གཞོམ་པར་བྱ་བའི་ཕྱིར། མངོན་པར་ཞེན་པའི་རང་བཞིན་ལ་རྣམ་པར་དཔྱད་པ་ཉིད་ཡིད་ལ་བྱ་བ་བྱའོ་ཞེས་བྱ་བའི་ཐ་ཚིག་གོ །ཅི་ལྟར་ན་གཉེན་པོ་ཡིན་ཞེ་ན། དེའི་ཕྱིར་རྣམ་པར་རྟོག་ཅེས་བྱ་བ་ལ་སོགས་པ་སྨོས་ཏེ། འདི་ལྟར་རྣམ་པར་རྟོག་པ་ཞེས་བྱ་བ་ནི། དེ་ཁོ་ན་ཉིད་ལ་རྣམ་པར་དཔྱོད་པ་ལ་མངོན་པར་ཞེན་ཅིང་དགའ་བའི་མཚན་ཉིད་ཅན་གྱི་རྟོག་པ་སྟེ། དེ་ཁོ་ན་ཉིད་མ་ཡིན་པར་རྟོག་པ་ལ་མངོན་པར་ཞེན་པའི་གཉེན་པོར་གྱུར་ཅིང་དེ་ལས་བྱུང་བའི་རྣམ་པར་རྟོག་པའི་བསམ་གཏན་ཏེ། དེ་ནི་ཟག་པ་མེད་པའི་ཟས་ཏེ། དེ་ཁོ་ན་ཉིད་རྟོགས་པའི་མཚན་ཉིད་ཅན་དེ་གང་ལ་ཡོད་པ་དེ་ནི་རྣལ་འབྱོར་བར་འགྱུར་ཏེ། ཐོས་པ་ལས་བསམ་པ། དེ་ལས་བསྒོམ་པ། དེ་ལས་དེ་ཁོ་ན་ཉིད་ཀྱི་ཡེ་ཤེས་སྐྱེ་བ་ཡིན་པའི་ཕྱིར་ཏེ། འདི་ལྟར་སྒྱུ་མའི་སེང་གེས་སྒྱུ་མའི་གླང་པོ་ཆེ་བསད་པ་ནི་ཡང་དག་པ་ཉིད་དུ་མ་ཡིན་ནོ། །དེ་བཞིན་དུ་དེ་ཁོ་ན་ཉིད་རྣམ་པར་དཔྱོད་པས་ལོག་པ་རྣམ་པར་རྟོག་པ་ཡང་དག་པར་མེད་བཞིན་དུ་འཇོམས་པ་ཡིན་ནོ། །དེ་ལྟ་ཡིན་དུ་ཆུག་ན། དེ་ཁོ་ན་ཉིད་ཀྱི་རྣམ་པར་རྟག་པ་ལ་མངོན་པར་ཞེན་པ་རེག་པའི་རྐྱེན་གྱིས་ཚོར་བ་ཡིན་པར་བཅོམ་ལྡན་འདས་ཀྱིས་གསུངས་སོ་ཞེ་ན། དེའི་ཕྱིར་དབང་དོན་ཞེས་བྱ་བ་ལ་སོགས་པ་སྨོས་ཏེ། དབང་པོ་ནི་མིག་ལ་སོགས་པའོ། །དེའི་དམིགས་པར་བྱ་བའི་དོན་ཡིན་པས་ན་དོན་ཏེ། གཟུགས་ལ་སོགས་པའོ། །དེ་གཉིས་བར་མཚམས་དང་བཅས་པའི་ནི་རྡུལ་ཕྲ་རབ་མ་འདྲེས་པར་འགྱུར་ཏེ། དེ་ལྟར་གྱུར་ན་ནི་དབང་པོ་དང་ཡུལ་འདི་དག་འདུས་ཕྲད་པ་མེད་ན་རེག་པ་མེད་པའི་ཕྱིར་ཚོར་བ་ཡང་ག་ལ་ཡོད་ཅེས་བྱ་བ་སྟེ། དེ་ལྟར་སྨྲས་པ་དེ་ཡང་ཡང་དག་པར་ན་རྡུལ་ཕྲ་རབ་ཡོད་པ་མ་ཡིན་མོད་ཀྱི། སུན་ཕྱུང་བའི་ཕྱོགས་ཀྱི་དབང་དུ་བྱས་ནས་རྡུལ་ཕྲ་རབ་ཁས་བླངས་པ་ཡིན་ནོ། །གཞན་དག་ན་རེ་དེ་ནི་བར་མཚམས་མེད་པའི་ཚུལ་གྱིས་གནས་སོ་ཞེན་མི་རུང་སྟེ། གཅིག་པུ་ཡིན་པ་ལ་གཞན་དང་འདུ་ཞིང་ཕྲད་པའི་ཐ་སྙད་མི་འཇུག་པའི་ཕྱིར་རོ། །དེ་བཞིན་དུ་རྡུལ་ཕྲ་རབ་ཀྱི་ནང་དུ་རྡུལ་ཕྲ་རབ་འཇུག་པ་ཡང་
མེད་དེ། གལ་ཏེ་དེ་ལ་འཇུག་པའི་གོ་སྐབས་ཀྱིས་ནམ་མཁའ་ཡོད་ན་ལྟ་འཇུག་ཏུ་རུང་ན། དེ་མེད་པའི་ཕྱིར་དེས་ན་དེ་དག་མཉམ་པ་ཉིད་མཚུངས་པ་ཡིན་ལ། དེ་ཉིད་ཀྱི་ཕྱིར་འདྲེ་བར་འདུ་བ་ཡང་མེད་པའི་ཕྱིར་རོ། །དེ་མེད་པས་ཆ་ཤས་མེད་པ་ལ་འདུ་བ་དང་ཕྲད་པར་ཇི་ལྟ་བུའི་ཚུལ་གྱིས་ཀྱང་རིགས་པ་དང་འཐད་པས་སྒྲུབ་ཏུ་རུང་བ་མ་ཡིན་ནོ། །དེའི་ཕྱིར་ཕན་ཚུན་གཉིས་འདུས་པ་དང་ཆ་ཤས་མེད་པ་གཉིས་པ་ཉིད་གཅིག་ཏུ་སྒྲུབ་པ་ནི་ཡོད་པ་མ་ཡིན་ལ། གལ་ཏེ་དེ་ལྟ་བུ་ཡོད་པ་མཐོང་ན། ཡོད་པའི་དཔེ་དང་གཏན་ཚིགས་བསྟན་པར་གྱིས་ཤིག་ཅེས་སུན་དབྱུང་བ་སྟེ། བསྟན་དུ་མི་རུང་ངོ་ཞེས་བྱ་བའི་དོན་ཏེ། །དེ་བཞིན་དུ་གལ་ཏེ་ཤེས་པའི་རང་བཞིན་ཡིན་ན་ཡང་འདུ་བའི་ཐ་སྙད་དུ་རུང་བ་མ་ཡིན་སྟེ། གཟུགས་ཅན་གྱི་ལུས་མེད་ཅིང་རང་རིག་པར་འདོད་པ་དེ་ལ་འདུ་པར་མི་འཐད་དོ། །རྐྱེན་ཚོགས་པར་ཡང་བརྟགས་པ་ཙམ་དུ་ཟད་པས་དངོས་པོ་མེད་པའི་ཕྱིར་མི་འགྲུབ་སྟེ། སྔར་ཕྱོགས་ཆ་དྲུག་གིས་དཔྱད་ནས་ནམ་མཁའ་དང་མཚུངས་པ་འདྲའོ། །དེ་ལྟར་ཞེས་བྱ་བ་ལ་སོགས་པ་ནི་ཉེ་བར་བསྡུས་པས་སོ། །རེག་པས་ན་རེག་པ་སྟེ། ཡུལ་དང༌། དབང་པོ་དང༌། རྣམ་པར་ཤེས་པ་འདུས་པའམ། དེ་ལས་བྱུང་བའི་སེམས་ལས་བྱུང་བའི་ཆོས་སོ། །དེ་ཡང་འདུས་པ་མེད་པར་ཡོད་པ་མེད་པ་ཡིན་ནོ། །དེ་ལྟར་མེད་ན་གོ་ཚོར་བ་ཞེས་བྱ་བའི་རྒྱུ་གང་ལས་ཀུན་ཏུ་འབྱུང་བར་འགྱུར་ཏེ་མི་འགྱུར་རོ། །ཉོན་མོངས་པ་ནི་བདེ་བ་དང་ཕྲད་པ་དང༌། སྡུག་བསྔལ་པ་དང་བྲལ་བར་འདོད་པའི་སྲེད་པས་ནོར་ལ་སོགས་པ་དེ་ལའོ། །ཅིའི་ཕྱིར་ཞེས་བྱ་བ་ནི་བདེ་བ་མེད་པའོ། །གནོད་པ་ཞེས་བྱ་བ་ནི་སྡུག་བསྔལ་ཡང་མེད་པའོ། །དེ་ལྟར་ན་ནི་ཐར་པའི་དོན་དུ་ཡང་དཀའ་བ་བྱས་པ་ལ་དགོས་པ་མེད་པར་འགྱུར་རོ་ཞེས་དེ་ལྟར་རྟོག་པ་དེའི་ཕྱིར། གང་ཕྱིར་ཞེས་བྱ་བ་ལ་སོགས་པ་སྨོས་ཏེ། ཚོར་བའི་རྐྱེན་གྱིས་སྲེད་པ་འབྱུང་བ་ཡིན་ལ། དེ་དེ་ལྟར་ཡོད་པ་མ་ཡིན་ན་དེ་ཟད་པའི་མཐའ་ནི་ཐར་པ་ཡིན་པས་ཆོས་ཐམས་ཅད་ནི་རང་བཞིན་གྱིས་མྱ་ངན་ལས་འདས་པ་ཡིན་མོད་ཀྱིས། འོན་ཀྱང་གནོད་པའི་རྒྱུ་ཡིན་པས། །སྲིད་པ་ཅི་སྟེ་འཇོམས་མི་བྱེད། །ཅེས་བྱ་བ་སྨོས་ཏེ། མངོན་པར་ཞེན་པས་སེད་པའི་སྲེད་པ་བསལ་བ་ཉིད་ཐར་པ་ཡིན་
ནོ་ཞེས་བསྟན་ཏོ། །འདི་དག་གིས་ནི་གཟེགས་ཟན་ལ་སོགས་པ་ཡང་སུན་ཕྱུང་བ་ན་དེ་རྣམས་འདི་སྐད་དུ་སྨྲ་སྟེ། རྫས་ནི་རྣམ་པ་གཉིས་ཡོད་དེ། མཐོང་བར་བྱ་བ་དང་རེག་པར་བྱ་བའོ། །དབང་པོ་དང་དོན་ཕྲད་པ་ལས་བྱུང་བའི་ཤེས་པ་ནི་མངོན་སུམ་ཞེས་བྱའོ་ཞེས་ཟེར་ན། རྣམ་པར་དཔྱད་པའི་ཚུལ་གྱིས་རྫས་སམ་ཕྲད་པ་ཡོད་པ་མ་ཡིན་ནོ། །ཡང་གཟུགས་ལ་སོགས་པའི་རྫས་བུམ་པ་ལ་སོགས་པ་དང་འདྲ་བར་མཐོང་བའམ་རེག་ཏུ་ཟིན་ཀྱང་ཡོད་པ་མ་ཡིན་ནོ། །ཀྱང་ཞེས་བྱ་བའི་སྒྲ་ནི་ཀུན་རྫོབ་ཏུ་ཁས་ལེན་པ་སྟེ། དོན་དམ་པར་མཐོང་བའམ་རེག་པ་གང་ཡང་མེད་པའོ། །འདི་ནི་རྨི་ལམ་དང་སྒྱུ་མ་ལ་དཔེར་བྱས་པའི་བསོད་ནམས་དང༌། བསོད་ནམས་མ་ཡིན་པ་དང་ལྡན་པའི་སེམས་གང་ཡིན་པ་དེ་ལྟ་བུའི་རང་བཞིན་བདག་ཉིད་གང་ལ་ཡོད་པའི་སེམས་ཏེ། རྨི་ལམ་དང་སྒྱུ་མ་དང་འདྲ་བ་དེ་ནི་རང་བཞིན་རྟག་པ་མ་ཡིན་ཏེ། ཀུན་རྫོབ་ཏུ་ཡང་ཚད་མས་གཞིག་ཅིང་བཅོམ་ན། མེད་པ་མ་ཡིན་ནོ། །དེ་ལྟར་ན་ཡང་སེམས་དང་ལྷན་ཅིག་ཡོད་པར་སྣང་ངོ༌། །སེམས་དང་ཞེས་བྱ་བ་ལ་སོགས་པ་སྨོས་ཏེ། སེམས་དང་ཚོར་བ་དུས་གཅིག་བྱུང་བ་ནི་ལྷན་ཅིག་སྐྱེས་པ་ཡིན་པའི་ཕྱིར་སེམས་དེས་ཚོར་བ་མི་མཐོང་སྟེ། ཉམས་སུ་མྱོང་བ་མ་ཡིན་ནོ་ཞེས་བྱ་བའི་ཐ་ཚིག་གོ །ཕྱི་ནས་སྐྱེས་པའི་སེམས་ཀྱིས་སྔར་ཚོར་བ་འགགས་མ་ཐག་ཏུ་མྱོང་བ་ཡིན་དུ་ཟིན་ཀྱང་དེ་ནི་དྲན་པ་ཡིན་གྱིས་མྱོང་བ་མ་ཡིན་ནོ། །གཟུགས་ལ་སོགས་པའི་ལྷན་ཅིག་སྐྱེས་པ་ཡང་མཐོང་བའམ་རེག་པ་མེད་ཀྱི། གཟུང་བར་བྱ་བའི་རྒྱུ་ཉིད་ཙམ་དུ་གནས་ཀྱི་སྐད་ཅིག་མ་འགགས་པ་ན་བྱི་བའི་དུག་བཞིན་དུ་དྲན་པར་བྱེད་པ་ཡིན་མོད་ཀྱི། འོན་ཀྱང་གཟུགས་ལ་སོགས་པ་ནི་རེ་ཞིག་སེམས་ལས་ཐ་དད་པར་སྣང་བ་ཡིན་ལ། ཚོར་བ་ལ་སོགས་པ་ནི་མ་ཡིན་པས་དེ་སྐད་དུ་སྨྲས་པ་ཡིན་ནོ། །དེ་ཉིད་ཀྱི་ཕྱིར་བདག་གིས་བདག་ཉིད་ཅེས་བྱ་བ་ལ་སོགས་པ་སྨོས་ཏེ། རང་གིས་བདག་ཉིད་ལ་མྱོང་བར་མི་བྱེད་དེ། དེ་འགལ་བའི་ཕྱིར་རོ། །གཞན་གྱིས་ཞེས་བྱ་བ་ནི་སེམས་གཞན་གྱིས་སོ། །ཚོར་བ་པོ་ནི་བདག་དང་གང་ཟག་ལ་སོགས་པའོ། །བདག་མེད་པའི་ཚོགས་འདི་ལ་ཞེས་བྱ་བ་ནི་ཇི་སྐད་བཤད་པའི་ཚུལ་འདིས་རང་བཞིན་མེད་པའི་ཚོགས་འདི་
ལའོ། །འདི་ལ་སུ་ཡིས་གནོད་ཅེས་བྱ་བ་ནི་གནོད་པ་དང༌། གནོད་པ་བྱེད་པ་པོ་རང་བཞིན་མེད་པས་ཚོར་བ་འདིས་སུ་ལ་གནོད་པར་འགྱུར་ཏེ། གནོད་པར་མི་འགྱུར་རོ། །དེ་ལྟར་ཚོར་བ་དྲན་པ་ཉེ་བར་གཞག་པ་བཤད་ནས། སེམས་དྲན་པ་ཉེ་བར་གཞག་པ་བཤད་པའི་ཕྱིར་སེམས་ནི་ཞེས་བྱ་བ་ལ་སོགས་པ་སྨོས་ཏེ། གཟུགས་ལ་སོགས་པ་ལ་ལྷག་པར་དབང་བྱེད་ཅིང་རང་གི་རྣམ་པར་ཤེས་པ་སྐྱེད་པར་བྱེད་པས་ན་དབང་པོ་སྟེ། མིག་དང༌། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ཀྱི་དབང་པོ་སྟེ། དེ་རྣམས་ལ་ཡང་མི་གནས་སོ། །འདིར་འདི་ནི་རྟག་ཅིང་བརྟན་པ་དང༌། གནོད་པར་བྱར་རུང་བས་གཟུགས་ཏེ། སྔོན་པོ་ལ་སོགས་པའོ། །སོགས་པའི་སྒྲས་ནི་སྒྲ་དང༌། དྲི་དང༌། རོ་དང༌། རེག་བྱ་དང༌། ཆོས་རྣམས་བསྡུ་སྟེ། དེར་ཡང་མི་གནས་སོ། །བར་ནའང་མིན་ཞེས་བྱ་བ་ནི་དབང་པོ་དང་དོན་གཉིས་ཀྱི་བར་ན་ཡང་མེད་པའོ། །དེ་ཡང་གང་གི་ཕྱིར་ནང་ཞེས་བྱ་བ་ལུས་ཀྱི་ནང་ན་ཡང་མེད་ལ། ལུས་ལས་ཕྱི་རོལ་ནའང་མེད་པའོ། །གཞན་ནའང་མེད་ཅེས་བྱ་བ་ནི་ལུས་ཀྱི་ནང་དང་ཕྱི་རོལ་མ་ཡིན་པ་གཞན་དག་ན་ཡང་ཡོད་པ་མ་ཡིན་པའོ། །ཡུལ་དང་དབང་པོ་གཞན་ལ་མི་གནས་པ་ནི་རུང་ན་ཡིད་ཀྱི་དབང་པོ་ནི་སེམས་ཉིད་ཡིན་ན་དབང་པོ་ལ་མི་གནས་ཞེས་བྱ་བ་ལ་སོགས་པར་སྨྲར་ཅི་ལྟར་རུང༌། ཡིད་དང་སེམས་གཉིས་བློའི་རང་བཞིན་ཅན་ཡིན་པས་ཡིད་ཀྱང་དྲན་པ་ཉེ་བར་གཞག་པ་ཡིན་པར་ཐལ་བར་འགྱུར་རོ་ཞེ་ན། དེའི་ཕྱིར་དེའི་ཁྱད་པར་ཡང་ཇི་སྐད་དུ་སྨྲས་པ་ཡིན་ཏེ། དེ་ཉིད་ཀྱིས་ན་ལུས་གང་ལ་གང་མེད་ཅེས་བྱ་བ་ལ་སོགས་པ་སྨོས་ཏེ། འདྲེས་མིན་ཞེས་བྱ་བ་ནི་ལུས་དང་ངོ༌། །ཐ་དད་པ་མ་ཡིན་ནས་བྱ་བ་ནི་ལུས་ལས་ལོགས་ཤིག་ན་གཞི་མེད་པར་གནས་པ་ཡང་མ་ཡིན་ནོ། །སེམས་ནི་གཟུགས་མེད་པའི་ཕྱིར་ལ་ལར་སེམས་འདྲེས་ཏེ་ཡང་གནས་ལ། ལུས་ལས་ཐ་དད་པ་ཡང་ཡིན་ནོ་ཞེ་ན་དེའི་ཕྱིར་ཞེས་བྱ་བ་ལས་ཞེས་བྱ་བ་ལ་སོགས་པ་སྨོས་ཏེ། ག་ལ་ཡོད་ཅེས་བྱ་བ་ནི་གཟུགས་ལ་སོགས་པའི་ཤེས་བྱ་རྣམས་སྐད་ཅིག་མ་ཡིན་པའི་ཕྱིར་ཆ་ཤས་མེད་དེ། ཅིག་ཅར་འཇིག་ཅིང་མེད་པའི་ཕྱིར་དང༌། ཆ་ཤས་དང་བཅས་ན་ཡང་དངོས་པོ་མེད་པའི་ཕྱིར་སེམས་ཀྱི་སྐད་ཅིག་མ་སྔ་མ་མེད་པ་
ཡིན་ནོ། །ཤེས་པ་དང་ཤེས་བྱ་ལྷན་ཅིག་སྲང་གི་མདའ་ལྟར་ཡོད་དུ་ཟིན་ཀྱང་གཅིག་གི་རྒྱུ་གཅིག་མ་ཡིན་པས་ཡང་དག་པར་དེ་གཉི་ག་ཡང་མེད་པ་ཉིད་མ་ཡིན་ནོ། །དེ་ཉིད་ཀྱི་ཕྱིར་དེ་ལྟར་ཞེས་བྱ་བ་སྨོས་ཏེ། འདིས་ནི་ཆོས་དྲན་པ་ཉེ་བར་གཞག་པ་བཤད་པ་ཡིན་ཏེ། དེ་ལྟར་ཇི་སྐད་བཤད་པའི་ཚུལ་གྱིས་ཆོས་ཐམས་ཅད་སྐྱེ་བ་ཡོད་པར་ནི་ཤེས་ཤིང་བསྒྲུབ་ཏུ་མི་རུང་ངོ༌། །ཡང་དེའི་ཀུན་རྫོབ་ཏུ་བློ་རང་བཞིན་ཡོད་པར་བཤད་པ་དེ་ཡང་ངེས་པར་བརྟགས་ན་རང་རིག་པ་མ་གྲུབ་པས་དེ་ཡང་ཡོད་པ་མ་ཡིན་ལ། དེའི་ཕྱིར་བདེན་པ་གཉི་ག་ཡང་དག་པར་ཡོད་པ་མ་ཡིན་ནོ། །ཡང་ན་ཀུན་རྫོབ་རྒྱུ་གཞན་གྱིས་སམ་ཕྱི་མའི་དབང་གིས་ཀུན་རྫོབ་ཏུ་འགྱུར་ན། ལོགས་སུ་གྲུབ་པའི་ཕྱིར་སེམས་ཅན་རྣམས་མྱ་ངན་ལས་འདས་པར་མི་འགྱུར་ཏེ། ཀུན་རྫོབ་གཞན་པར་བརྟགས་པས་མྱ་ངན་ལས་ག་ལ་འདའ། གླེགས་བམ་ལ་ལ་ལས་ནི། དེ་བས་མྱ་ངན་འདས་པ་མེད། །ཅེས་ཟེར་རོ། །དེ་ཡང་འོན་ཏེ་ཀུན་རྫོབ་གཞན་ཡིན་པར་འགྲུབ་ན། གཞན་དུ་བྱས་པ་ཡིན་པས་སེམས་ཅན་མྱ་ངན་ལས་འདས་པ་ཡིན་པར་ཡང་མི་འགྱུར་རོ་ཞེས་པ་ཡང་དོན་དེ་ཉིད་ཡིན་ནོ། །དེ་ལྟར་གཞན་གྱིས་བརྒལ་བའི་ལན་བཤད་པའི་ཕྱིར་འདི་ནི་ཞེ་བྱ་བ་ལ་སོགས་པ་སྨོས་ཏེ། གཞན་སེམས་ཀྱི་རྣམ་རྟོག་ཅེས་བྱ་བ་ནི་གཞན་གྱི་འམ་གཞན་པ་སྟེ། གཞན་གྱི་རྒྱུད་དུ་འམ་ཕྱི་མའི་ཚུལ་དུ་སེམས་ཡོད་པར་རྟོག་པའི་ཀུན་རྫོབ་བོ། །སེམས་སྨོས་པ་ནི་བརྡ་སྤྲོད་པ་རྣམས་ཀྱི་རྟོག་པ་པ་ལས་དགར་བའོ། །དེ་ཡང་ཕྱོགས་གཞན་གྱི་སེམས་སུ་བརྟགས་པ་དེ་ནི་འདིར་གཟུང་བར་མི་བྱ་སྟེ། རབ་ཏུ་བྱེད་པ་འདི་ལ་ནི་སྒྲུབ་པ་སྙིང་པོར་བྱ་བ་ཡིན་པའི་ཕྱིར་རོ། །རྣམ་པར་རྟོག་པ་སྨོས་པ་ནི་སེམས་དེ་ཡང་རྫུན་པ་ཙམ་དུ་བསྟན་པའི་ཕྱིར་རོ། །དེ་ཉིད་ཀྱི་ཕྱིར་རང་གིས་ཞེས་བྱ་བ་ལ་སོགས་པ་སྨོས་པ་ཡིན་ནོ། །དེ་ལྟར་གཞན་སུ་ཞིག་ཡིན་ཞེ་ན། དེའི་ཕྱིར་དེ་ནི་ཞེས་བྱ་བ་ལ་སོགས་པ་སྨོས་ཏེ། གང་རང་གི་ཀུན་རྫོབ་ཏུ་མེད་པ་དེ་ནི་དེའི་འོག་ཏུ་རྣམ་པར་དཔྱོད་པ་ཉིད་ཀྱིས་མེད་པ་ཁོ་ནར་ངེས་པ་ཡིན་ལ། སྔར་རྣམ་པར་མ་བཤིག་པའི་མ་བརྟགས་ན་ཉམས་དགའ་བའི་རྣམ་པར་ཡོད་པ་ཡིན་ནོ། །དེ་ཡང༌། དེ་ཉིད་ཚོལ་བ་
ཐོག་མར་ནི། །ཐམས་ཅད་ཡོད་ཅེས་བརྗོད་པར་བྱ། །དོན་རྣམས་རྟོགས་ཤིང་ཆགས་མེད་ནས། །དེ་ཡི་འོག་ཏུ་དབེན་པའོ། །ཞེས་ཇི་སྐད་བཤད་པ་ལྟ་བུའོ། །མ་བརྟགས་པའི་གོང་དུ་དེ་ཡོད་ན་ཕྱིས་བརྟགས་པས་ཀྱང་རྣམ་པར་བསལ་བར་ནུས་པ་མ་ཡིན་ཏེ། གཞན་དག་ནས་ཀྱང༌། འདི་ལ་བསལ་བྱ་ཅི་ཡང་མེད་ཅེས་བྱ་བ་ལ་སོགས་པ་ཇི་སྐད་བཤད་པ་ལྟ་བུའོ་ཞེས་ཟེར་ན། དེའི་ཕྱིར་དེ་མེད་ཅེས་བྱ་བ་ལ་སོགས་པ་སྨོས་ཏེ། དེའི་ཚེ་རང་ངམ་གཞན་པའི་ཀུན་རྫོབ་མེད་པ་ཉིད་ཡིན་ནོ། །དེ་རྣམ་པར་མི་རྟོག་པ་ཡིན་དུ་ཟིན་ཀྱང་རྟོག་པས་རྒྱུ་དང་འབྲས་བུར་བརྟགས་པ་ཡིན་ནོ། །དེ་ལྟར་ན་རྟོག་པས་བརྟགས་པས་གཉིས་པོ་འདི་དག་ནི་ཕན་ཚུན་གཅིག་ལ་གཅིག་བརྟེན་པ་ཡིན་ཏེ། བརྟག་པར་བྱ་བ་མེད་པར་ནི་རྟོག་པ་མེད་ལ། དེ་མེད་པར་ནི་བརྟག་པར་བྱ་བ་ཡང་ཡོད་པ་མ་ཡིན་ནོ། །དེ་ལྟར་ཅི་ལྟར་རྣམ་པར་དཔྱད་ཅེ་ན། ཇི་ལྟར་གྲགས་པ་ཞེས་བྱ་བ་ལ་སོགས་པ་སྨོས་ཏེ། རྒོལ་བ་དང༌། ཕྱིར་རྒོལ་བ་གཉི་ག་ལ་གྲགས་པའི་ཆོས་དང་ཆོས་ཅན་གཟུགས་ལ་སོགས་པ་ཇི་ལྟར་གྲགས་པ་གང་ཡིན་པ་དེ་ལ་བརྟེན་ནས། དབུ་མ་པ་དེ་ནི་ཡོད་པའི་ཕྱིར་ཡང་དག་པ་མ་ཡིན་པས་སྒྱུ་མ་དང་འདྲའོ། །ཞེས་བྱ་བ་ལ་སོགས་པ་གྲགས་པར་རྣམ་པར་དཔྱད་པ་ཐམས་ཅད་བརྗོད་པ་ཡིན་ནོ། །དཔྱོད་པར་བྱེད་པར་ཡང་རྣམ་པར་བྱ་བ་ཉིད་མ་ཡིན་ནམ་ཞེ་ན། དེའི་ཕྱིར་གང་ཚེ་ཞེས་བྱ་བ་ལ་སོགས་པ་སྨོས་ཏེ། རྣམ་པར་དཔྱོད་པ་ནི་ཁོ་བོ་ཅག་གིས་དགོས་པའི་དོན་དུ་ཁས་བླངས་པ་ཡིན་ཏེ། དཔྱད་པར་བྱ་བ་དེ་ཁོ་ན་ཉིད་ལ་སོགས་པ་ལ་རྣམ་པར་དཔྱོད་ཅིང་བརྟག་པ་ན་བརྟག་པའི་གནས་མེད་ལ། གནས་མེད་པ་ཉིད་ཀྱིས་ན་དེ་མི་སྐྱེ་ཞིང་འབྱུང་བར་མི་འགྱུར་ཏེ། རྣམ་པར་དཔྱོད་པ་ཡང་རང་བཞིན་གྱིས་མ་སྐྱེས་པ་ཡིན་ལ། མ་སྐྱེས་པ་དེ་ནི་མྱ་ངན་ལས་འདས་པར་བཤད་དོ། །ཡང་རྟོག་པ་པོ་དང་བརྟག་པར་བྱ་བ་གཉིས་པོ་འདི་དག་དེ་ཁོ་ན་ཉིད་དམ་བདེན་པར་ཡོད་པའམ་མེད་པར་སྨྲ་བ་དེ་ཉིད་ནི་ཤིན་ཏུ་འགལ་བ་དང་བཅས་པ་ཡིན་པས་སྡུག་བསྔལ་བ་ཡིན་ནོ། །ཅི་ལྟར་དཀའ་བས་གནས་ཤེ་ན། གལ་ཏེ་ཞེས་བྱ་བ་ལ་སོགས་པ་སྨོས་
ཏེ། རྟོག་པར་བྱེད་པ་ནི་ཤེས་པའོ། །བརྟག་པར་བྱ་བ་ནི་དོན་ཏོ། །དེ་ལྟར་ན་ཤེས་པ་དང་ཤེས་བྱ་མེད་ན་ཤེས་པ་ཡོད་པར་ག་ལ་འགྱུར་ཏེ། འདིས་ནི་རྟོག་དང་བརྟག་པར་བྱ་བ་དག །གཉིས་པོ་ཕན་ཚུན་བརྟེན་པ་ཡིན་ཞེས་གང་བཤད་པ་གསལ་བར་བྱེད་པ་ཡིན་ནོ། །ཕན་ཚུན་གཅིག་ལ་གཅིག་བརྟེན་དུ་ཟིན་ཀྱང་ཤེས་པ་དང་ཡུལ་དག་ཕ་དང་བུའི་ཚུལ་དུ་ཡོད་ཅེ་ན། དེའི་ཕྱིར་ཕ་ནི་ཞེས་བྱ་བ་ལ་སོགས་པ་སྨོས་ཏེ། འདི་ལྟར་ཕ་དང་བུ་གཉིས་ཕན་ཚུན་ལྟོས་པ་ཡིན་པ་ཉིད་ཀྱིས་ཡང་དག་པར་ན་མེད་ཅིང་མ་གྲུབ་པ་ཡིན་པ་དེ་བཞིན་དུ་ཤེས་པ་དང་དོན་གཉིས་ཀྱང་བསྐྱེད་པ་པོ་དང༌། སྐྱེད་པར་བྱེད་པ་གཉིས་ཀྱི་ཚུལ་དུ་ཕན་ཚུན་ལྟོས་པ་ཉིད་ཡིན་པས་དེས་ན། དེ་གཉིས་མེད་པ་ཡང་དེ་བཞིན་དུ་བལྟའོ། །མྱུ་གུ་ཞེས་བྱ་བ་ལ་སོགས་པ་ནི་གཞན་དག་གི་ཚིག་གོ །མྱུ་གུ་ལས་གཞན་ཞེས་བྱ་བ་ལ་སོགས་པ་ནི་ལན་ཏེ། མྱུ་གུ་ལས་གཞན་པའི་ཤེས་པས་མྱུ་གུ་ཤེས་ནས་ས་བོན་ཡོད་དོ་ཞེས་རྟོག་པར་བྱེད་པ་ཡིན་ན། ཤེས་བྱ་ལ་ཤེས་བྱར་ཤེས་པ་ཉིད་ཀྱང་ག་ལ་ཡོད་དེ། རང་རིག་པ་མེད་པའི་ཕྱིར་ཤེས་པ་དེ་མེད་དོ་ཞེས་བྱ་བའི་དོན་ཏོ། །དེ་ལྟར་ཤེས་པ་ལས་ས་བོན་ཡོད་དོ་ཞེས་ཀྱང་ཇི་ལྟར་རྟོགས་ཤེ་ན། དེའི་ཕྱིར་རེ་ཞིག་ཅེས་བྱ་བ་ལ་སོགས་པ་སྨོས་ཏེ། རེ་ཞིག་ཅེས་བྱ་བའི་སྒྲ་ནི་རྗེས་སུ་དཔག་པ་ལ་སོགས་པ་ལ་ལྟོས་པའོ། །ཐམས་ཅད་ཅེས་བྱ་བ་ནི་རྒྱུ་རྐྱེན་གྱི་ཚོགས་པ་ཇི་ལྟར་སྣང་བའི་ནུས་པ་ལས་དགག་པ་མེད་པ་ཞེས་བྱ་བར་དགོངས་སོ། །དེ་ཉིད་ཀྱི་ཕྱིར་པདྨ་ཞེས་བྱ་བ་ལ་སོགས་པ་སྨོས་ཏེ། དེ་སྐད་ཅེས་སྨྲས་པ་དང༌། རྒྱུ་མེད་པར་སྨྲ་བ་དག་ན་རེ། པདྨའི་སྡོང་བུ་ལ་སོགས་པ་དེ་ནི་སུ་ཞིག་གིས་བྱས་པ་ཞེས་སྨྲ་བ་ལ། དེའི་ཕྱིར་རྒྱུའི་དབྱེ་བ་ཞེས་བྱ་བ་ལ་སོགས་པ་སྨོས་ཏེ། སྔ་མའི་རྒྱུའི་དབྱེ་བ་ཉིད་ཀྱིས་སོ་ཞེས་བྱ་བ་ནི་ལས་མས་སྐྱེས་པའི་འཇིག་རྟེན་སྣ་ཚོགས་པའི་རབ་ཏུ་དབྱེ་བ་ལས་གྱུར་པ་ཡིན་གྱི། རྒྱུ་མེད་པ་ཉིད་ནི་ཡུལ་དང་དུས་ལ་སོགས་པའི་དབྱེ་བ་མེད་པའི་ཕྱིར་མི་རིགས་སོ། །རྒྱུའི་དབྱེ་བ་ལས་འབྲས་བུའི་དབྱེ་བ་འབྱུང་བ་ཡིན་དུ་ཆུག་ན། རྒྱུས་འབྲས་བུ་བསྐྱེད་པར་ཇི་ལྟར་འགྱུར་ཞེས་རྟོག་ན། ཐམས་ཅད་རྒྱུའི་མཐུ་ལས་
འབྱུང༌། །ཞེས་བྱ་སྟེ། རྒྱུ་གཅིག་ནས་གཅིག་ཏུ་བརྒྱུད་པ་ལས་འབྲས་བུ་སྐྱེ་བའི་ནུས་པའི་མཐུ་གང་ལ་ཡོད་པ་དེ་ལས་འབྱུང་བ་ཡིན་ནོ། །འདིར་དབང་ཕྱུག་རྒྱུར་སྨྲ་བ་དག་ན་རེ་རྒྱུ་དེ་ཡོད་དུ་ཆུག་ན་དེ་ནི་དབང་ཕྱུག་གི་བློ་སྔོན་དུ་བཏང་བ་དེ་ཉིད་ཀྱིས་ལུས་ཅན་དང་གནས་ལ་སོགས་པ་ཐམས་ཅད་བྱས་པ་ཡིན་ནོ་ཞེས་རྟོག་པས། དེའི་ཕྱིར་འགྲོ་བའི་རྒྱུ་ནི་ཞེས་བྱ་བ་ལ་སོགས་པ་སྨོས་སོ། །རེ་ཞིག་དབང་ཕྱུག་གང་ཡིན་སྨྲོས། །ཞེས་བྱ་བ་ནི། དེ་ལྟར་དབང་ཕྱུག་འགྲོ་བའི་རྒྱུ་ཞེས་བྱ་བ་ཡིན་ན། དབང་ཕྱུག་ཉིད་གང་ཡིན་སྨྲོས་ཤིག་ཅེས་དྲི་བའོ། །གལ་ཏེ་དེ་དག་ན་རེ་འབྱུང་བ་རྣམས་ཡིན་ནོ་ཞེས་ཟེར་ན། དེ་ལྟར་ཡིན་པར་ནི་ཟད་དེ། གང་གི་ཕྱིར་ཁོ་བོ་ཅག་ཀྱང་དེ་རྣམས་ལ་སྔ་མ་སྔ་མ་ལས་ཕྱི་མ་ཕྱི་མ་འབྲས་བུའི་ཚུལ་གྱིས་འགྲོ་བའི་རྒྱུ་ཉིད་དུ་འདོད་པས་དེ་ཡིན་དུ་ནི་ཆུག་ན། དེ་རྣམས་ལ་ཁྱེད་ཀྱིས་དབང་ཕྱུག་ཅེས་མིང་བཏགས་པ་ཙམ་དུ་ཟད་ན། མིང་ཙམ་ལས་མེད་དུ་ཟིན་ན་ངལ་བས་ཅི་ཞིག་བྱ་སྟེ། ཅིའི་ཕྱིར་ཁྱོད་དེ་ཙམ་དུབ་ཅིང་ཉོན་མོངས་པར་བྱེད། འོན་ཀྱང་ས་ལ་སོགས་པ་འདི་དག་ནི་དུ་མ་ཡིན་པ་དང༌། སྐྱེ་བ་དང་འཇིག་པ་དག་གིས་མི་རྟག་པ་ཡིན་པ་དང༌། སེམས་མེད་པ་ཡིན་པའི་ཕྱིར་ལྷ་མ་ཡིན་ཏེ། ལིང་ག་ལ་སོགས་པ་དང་འདྲའོ། །དེ་བཞིན་དུ་འགོམ་པར་བྱ་བ་གང་ཡིན་པ་དང༌། མི་གཙང་བ་ཉིད་ཀྱང་ཡིན་ཞིང༌། མི་གཙང་བ་དང་འདྲེས་པས་ས་ལ་སོགས་པ་དེ་དག་དབང་ཕྱུག་མ་ཡིན་ཏེ། ཁྱོད་ནི་འདི་ལྟར་གཅིག་པ་ཉིད་དང་རྟག་པ་དང༌། བློ་གྲོས་བཟང་པོ་དང་ལྡན་པ་དང༌། ལྷ་ཉིད་ཡིན་པ་དེས་ན། ལིང་ས་ལ་སོགས་པ་དེ་ཡང་འགོམ་པར་བྱ་བ་མ་ཡིན་པར་གཙང་མ་ཡིན་པར་འདོད་པའི་ཕྱིར་རོ། །གལ་ཏེ་ཁྱོད་དབང་ཕྱུག་ནམ་མཁའ་ཡིན་པར་འདོད་ན། དེ་ཡང་བྱ་བ་དང་འདོད་པའི་སྤྱོད་པ་དང་བྲལ་བས་དབང་ཕྱུག་མ་ཡིན་ནོ། །ཉི་མ་དང་ཟླ་བ་མཆོད་པ་བྱེད་པ་ལ་སོགས་པའི་བདག་ཉིད་ཅན་གྱི་བདག་ཉིད་ཀྱང་དབང་ཕྱུག་དེ་མ་ཡིན་ཏེ། དེ་ནི་སྔར། །སོ་དང་སྐྲ་སེན་བདག་མ་ཡིན། ཞེས་བྱ་བ་ལ་སོགས་པས་བཀག་པ་ཡིན་པའི་ཕྱིར་རོ། །གལ་ཏེ་དབང་ཕྱུག་དེ་བསམ་གྱིས་མི་ཁྱབ་པ་ཡིན་ནོ་ཞེས་འདོད་ན། དེ་བྱེད་
པ་ཉིད་ཀྱང་བསམ་གྱིས་མི་ཁྱབ་པ་ཡིན་པས་ཅི་ཞིག་བརྗོད་དུ་ཡོད་དེ། བསམ་གྱིས་མི་ཁྱབ་པ་དེ་བརྗོད་པའི་ཡུལ་ཇི་ལྟར་ཡིན། གལ་ཏེ་དེ་ལྟར་ཡིན་ན་དེས་ན་དངོས་པོ་ཅི་ཞིག་འབྱིན་ཅིང་སྐྱེད་པར་འདོད། །གལ་ཏེ་བདག་ཅེས་བྱ་བ་འབྱིན་པར་འདོད་ན། དེ་ནི་རྟག་ཅིང་བརྟན་པར་ཁྱེད་སྨྲ་བས་དབང་ཕྱུག་དང་འདྲ་བ་མ་ཡིན་ནོ། །ས་ལ་སོགས་པ་གང་འབྱིན་པ་མ་ཡིན་ཏེ། དབང་ཕྱུག་ཉིད་དེའི་རང་བཞིན་ཡིན་པའི་ཕྱིར་རོ། །ཤེས་པ་ཡང་འབྱུང་བ་མ་ཡིན་ཏེ། དེ་ནི་ཤེས་པ་ལས་འབྱུང་བ་མ་ཡིན་པའི་ཕྱིར་དང༌། ཐོག་མ་མེད་པ་ཅན་ཉིད་ཡིན་པའི་ཕྱིར་རོ། །ཤེས་བྱ་ཡང་རང་གི་རྒྱུ་ཐོག་མ་མེད་པ་ཅན་རང་བཞིན་ཡིན་པའི་ཕྱིར་དེ་ལས་འབྱུང་བར་མི་འདོད་དོ། །གལ་ཏེ་བདེ་བ་དང་སྡུག་བསྔལ་སྤྲུལ་ཏོ་ཞེ་ན། དགེ་བ་དང་མི་དགེ་བའི་ལས་རྣམས་ལས་བདེ་བ་དང་སྡུག་བསྔལ་སྐྱེས་པ་ཡིན་པའི་ཕྱིར་དང༌། ལས་དེ་ཡང་ཐོག་མ་མེད་པའི་དུས་ཅན་ཡིན་པའི་ཕྱིར་མི་རུང་ངོ༌། །དེ་ལྟ་ཡིན་ན་དབང་ཕྱུག་དེས་དངོས་པོ་ཅི་ཞིག་སྤྲུལ་ཞིང་འབྱིན་པར་བྱེད་པ་ཡིན་པ་སྨྲོས་ཤིང༌། །ཡང་གཞན་དག་ན་རེ་ཤེས་པ་ལ་སོགས་པ་ཐོག་མ་མེད་པ་ཉིད་མ་ཡིན་གྱི། དབང་ཕྱུག་ཐོག་མ་མེད་པ་ཉིད་ཡིན་ནོ་ཞེ་ན། དེའི་ཕྱིར་རྒྱུའི་ཞེས་བྱ་བ་ལ་སོགས་པ་སྨོས་ཏེ། ཁྱེད་གལ་ཏེ་རྒྱུ་དབང་ཕྱུག་ཐོག་མ་ཡོད་པ་མ་ཡིན་པར་འདོད་ན། འབྲས་བུ་ཡང་ཐོག་མ་མེད་པར་འགྱུར་རོ། །དེ་ལྟར་ཡིན་དུ་ཟིན་ཀྱང་རྟག་ཏུ་མི་བྱེད་དེ། དེ་ལྟོས་ནས་ཡང་བྱེད་པ་ཡིན་ནོ་ཞེ་ན། དེའི་ཕྱིར་དེ་ནི་ཞེས་བྱ་བ་ལ་སོགས་པ་སྨོས་ཏེ། འབྱིན་པ་ནི་དེ་དངོས་པོ་གཞན་ལ་མི་ལྟོས་པ་ཡིན་ན་རྟག་པར་དུས་ཐམས་ཅད་དུ་ཅིའི་ཕྱིར་མི་བྱེད། དེ་མ་བྱས་པའི་དངོས་པོ་ཞིག་ལ་ལྟོས་ནས་རྟག་ཏུ་མི་བྱེད་དོ་ཞེ་ན། དེའི་ཕྱིར་དེ་མ་བྱས་སོ་ཞེས་བྱ་བ་ལ་སོགས་པ་སྨྲོས་ཏེ། གལ་ཏེ་མ་བྱས་པའི་དངོས་པོ་ཞིག་ཡོད་ན་ནི་དེ་ལ་ལྟོས་སུ་རུང་ན། ཐམས་ཅད་འདིས་བྱས་པར་ཁྱེད་འདོད་པ་དང༌། ལྟོས་པ་ཡོད་པར་འདོད་པ་ནི་མི་རིགས་སོ། །གལ་ཏེ་འགའ་ཞིག་ལ་ལྟོས་པར་འདོད་ན་ནི་དེའི་ཚེ་ཚོགས་པ་ཉིད་རྒྱུ་ཡིན་གྱི། དབང་ཕྱུག་མ་ཡིན་ནོ། །དེ་ཡང་གལ་ཏེ་ཚོགས་པ་ཡོད་ན་ནི་དབང་ཕྱུག་དེ་མི་བྱེད་ཅིང་བྱ་བ་བཤོལ་བར་ཡང་མི་ནུས་ལ་དེ་མེད་པ་སྟེ།
ཚོགས་པ་དེ་མེད་ན་ནི་དབང་ཕྱུག་གིས་བྱེད་པ་མེད་དེ། ཚོགས་པ་ལས་བྱུང་བ་ཡིན་ནོ། །གལ་ཏེ་ཚོགས་པ་ཡོད་པར་གྱུར་ནས་དབང་ཕྱུག་མི་འདོད་བཞིན་དུ་བྱེད་པར་འགྱུར་རོ་ཞེ་ན། དེ་ལྟ་ན་ནི་དབང་ཕྱུག་དེ་གཞན་གྱི་དབང་དུ་ཐལ་བར་འགྱུར་བས་ཁྱོད་ཀྱི་རང་དབང་དུ་ཡོད་པར་འདོད་པ་དང་མི་མཐུན་ནོ། །འོན་ཏེ་འདོད་པ་ལ་རག་ལས་པར་བྱེད་དོ་ཞེ་ན། དེའི་ཕྱིར་འདོད་པ་ཞེས་བྱ་བ་ལ་སོགས་པ་སྨོས་ཏེ། འདོད་པ་ཡང་འདོད་པ་ཉིད་ལ་རག་ལས་པར་འགྱུར། དབང་ཕྱུག་དེ་བྱེད་པ་པོ་ཡིན་པར་རྣམ་པ་ཐམས་ཅད་དུ་ག་ལ་ཡོད་དེ་མེད་དོ། །དེས་ན་རང་དགར་དབང་བྱེད་པ་ག་ལ་ཡིན། གང་ཡང་གཟེགས་ཟན་ལ་སོགས་པ་རྡུལ་ཕྲ་རབ་རྟག་པར་སྨྲ་བ་དག་གིས་འདུ་བ་དང་ཆ་ཤས་སུ་དབྱེ་བ་དག་གི་འབྲས་བུ་སྐྱེད་པར་འདོད་པ་དེ་ཡང༌། ཕྱོགས་ཆ་རྣམས་ཀྱང་ཆ་མེད་པ་ཞེས་བྱ་བས་རྣམ་པར་དཔྱད་དེ་བཟློག་པ་ཡིན་ནོ། །དེ་ལྟར་དབང་ཕྱུག་རྒྱུར་འདོད་པ་ལ་སོགས་པ་བཀག་ནས། འདི་མན་ཆད་གྲངས་ཅན་དག་གཙོ་བོ་ཞེས་བྱ་བ་ནི་རྒྱུ་ཡིན་པར་འདོད་པའི་ཕྱིར་གཙོ་བོ་ཞེས་བྱ་བ་ལ་སོགས་པ་སྨོས་ཏེ། མཉམ་དུ་གནས་ཞེས་བྱ་བ་ནི་ཆེན་པོ་ལ་སོགས་པ་འགྱུར་བ་མེད། དེ་དག་ལ་ནི་གཙོ་བོ་ཞེས་བྱ་ལ། འགྱུར་བ་ལས་མི་མཉམ་པར་གྱུར་པ་དེའི་ཚེ་ནི་འགྲོ་བ་ཞེས་ཟེར་རོ། །དེ་ལ་དབུ་མ་པས་གཙོ་བོ་ཞེས་བྱ་བ་གཅིག་པུ་ལ་རང་བཞིན་གསུམ་ཡོད་པ་ནི་མི་རིགས་པ་ཡིན་ལ། དེས་ན་གཙོ་བོ་ཞེས་བྱ་བ་དེ་མེད་དོ། །དེ་བཞིན་དུ་ཡོན་ཏན་ཡང་ཡོད་པ་མ་ཡིན་ཏེ། ཡོན་ཏན་གསུམ་པོ་དེ་དག་རེ་རེ་ཞིང་ཡང་སྙིང་སྟོབས་དང༌། རྡུལ་དང་མུན་པ་གསུམ་དང་ལྡན་པར་འགྱུར་རོ། །གསུམ་པོ་དེ་དག་ཀྱང་བདེ་བ་དང༌། སྡུག་བསྔལ་དང༌། གཏི་མུག་གི་བདག་ཉིད་ཅན་ཡིན་པར་འདོད་ལ། དེ་དག་ནི་ཕན་ཚུན་འགལ་ཏེ། བདེ་བ་མྱོང་བའི་སྐབས་སུ་ཡང་སྡུག་བསྔལ་མི་མྱོང་བའི་ཕྱིར། ཡོན་ཏན་མ་གྲུབ་ཅིང་མེད་པ་ཡིན་པས་དེ་དེ་ལས་བྱུང་བའི་སྒྲ་ལ་སོགས་པའི་གཞན་དག་ཡོད་པ་ཉིད་ནི་ཤིན་ཏུ་ཡང་ཐག་རིང་བ་ཡིན་ཏེ། ཚད་མ་གཞན་གྱིས་མི་བཟོད་པའི་ཕྱིར་རོ། །དེ་ལྟར་ན་ཡང་གྲངས་ཅན་དག་གོས་ལ་སོགས་ལས་བྱུང་བའི་བདེ་བ་ཡང་དེའི་འགྱུར་བ་ཡིན་པར་
འདོད་པ་དེ་ཐམས་ཅད་འདོད་པ་ཡང་མ་ཡིན་པས་མི་རུང་ངོ༌། །དེའི་ཕྱིར་སེམས་མེད་ཅེས་བྱ་བ་ལ་སོགས་པ་སྨོས་ཏེ། སེམས་མེད་པ་དང་སེམས་ཡོད་པ་དག་ཕན་ཚུན་འགལ་བ་ཡིན་པས་དེ་ནི་མི་སྲིད་དོ། །འོན་ཏེ་བདེ་བ་ལ་སོགས་པ་རྒྱུའི་རང་བཞིན་ནམ་ངོ་བོ་ཉིད་ཡིན་པ་གོས་ལ་སོགས་པའི་དངོས་པོ་གང་ཡིན་པ་དེ་ནི་རྒྱུའི་རང་བཞིན་དུ་གྱུར་པས་རྒྱུ་ཡིན་ལ། དེའི་འབྲས་བུ་ནི་གོས་ལ་སོགས་པ་ཡིན་པས་དེ་ལ་བདེ་བ་ལ་སོགས་པ་ཡོད་པ་ཡིན་གྱི། གཞན་དུ་ན་དེ་ལས་འབྱུང་བར་མི་འགྱུར་རོ་ཞེ་ན། དངོས་པོ་རྣམས་དཔྱད་མ་ཟིན་ནམ་ཞེས་བྱ་བ་སྨོས་ཏེ། དྲན་པ་ཉེ་བར་གཞག་པ་རྣམས་ཀྱིས་དེ་མ་གྲུབ་པར་དཔྱད་ཟིན་ཏེ་ཞེས་བྱ་བའི་དོན་ཏོ། །གྲངས་ཅན་ཁྱོད་ཀྱིས་དངོས་པོ་རྣམས་ཀྱི་རྒྱུ་བདེ་བ་ལ་སོགས་པ་ཉིད་ཡིན་པར་འདོད་ན། དེ་ནི་མ་ཡིན་ཏེ། བདེ་བ་ལ་སོགས་པ་ཉམས་སུ་མྱོང་བ་དེ་ལས་ཀྱང་སྣམ་བུ་ལ་སོགས་པའི་དངོས་པོ་རྣམས་ཀྱང་སྐྱེ་བར་མ་མཐོང་ངོ༌། །གཞན་དུ་ན་གོས་ལ་སོགས་པ་ལས་བདེ་བ་ལ་སོགས་པ་འགྱུར་བ་ཡིན་ལ། ཡང་དག་པར་ན་གོས་ལ་སོགས་པ་དེ་མེད་ཅིང་མ་གྲུབ་པས་ན་བདེ་བ་ལ་སོགས་པ་ཡང་མེད་པ་ཡིན་ནོ། །བདེ་བ་ལ་སོགས་པ་ནི་རྟག་པ་ཡིན་པས་ངེས་པར་ཡོད་དོ་ཞེ་ན། བདེ་སོགས་ཞེས་བྱ་བ་ལ་སོགས་པ་སྨོས་ཏེ། བདེ་བ་ལ་སོགས་པ་རྟག་པ་ཉིད་མ་ཡིན་ནོ། །དུས་ནམ་ཡང་རྙེད་ཅིང་དམིགས་པར་མི་འགྱུར་རོ། །གལ་ཏེ་རྟག་པར་ཡང་ཡོད་མོད་ཀྱི། གལ་ཏེ་དེ་གསལ་བའི་ཚེ་ན་བདེ་བར་སྣང་གི །ནུས་པའི་ཚུལ་དུ་མི་གསལ་བའི་ཚེ་ན་ནི་མ་ཡིན་ནོ་ཞེས་ཟེར་ན། དེའི་ཕྱིར་བདེ་བ་ཞེས་བྱ་བ་ལ་སོགས་པ་སྨོས་ཏེ། གལ་ཏེ་རང་རིག་པའི་མངོན་སུམ་གྱིས་བདེ་བ་ལ་སོགས་པ་ཉིད་ཡོད་དོ་ཞེས་སྨྲ་ན། དེས་བདེ་བ་ལ་སོགས་པ་ཅིའི་ཕྱིར་མི་འཛིན། དེ་ནི་ཕྲ་བ་ཉིད་ཀྱི་ཕྱིར་མི་འཛིན་ནོ་ཞེས་ཟེར་ན། གལ་ཏེ་རགས་པ་ཡིན་ན་ཕྲ་བར་ཡང་ཇི་ལྟར་འགྱུར་ཏེ། རགས་པ་དང་ཕྲ་བ་གཉིས་ནི་ཕན་ཚུན་འགལ་བ་ཡིན་ནོ། །དེ་ལྟར་ཡིན་མོད་ཀྱི་བདེ་བ་དེས་རགས་པ་སྤངས་ནས་ཕྲ་བར་གྱུར་པ་ཡིན་པས། དེ་ཕྲ་བ་དང་རགས་པའི་གནས་སྐབས་ཐ་དད་པ་ཡིན་གྱི་གནས་ཀྱི་གཞི་
བདེ་བ་ལ་ནི་ཐ་དད་པ་མེད་དོ་ཞེ་ན། དེའི་ཕྱིར་རགས་པ་ཞེས་བྱ་བ་ལ་སོགས་པ་སྨོས་སོ། །གལ་ཏེ་གནས་སྐབས་མི་རྟག་པ་ཡིན་གྱི་དེའི་གཞི་རྟག་པས་ཐ་དད་དོ་སྙམ་ན། དེའི་ཕྱིར་དེ་ལས་ཞེས་བྱ་བ་ལ་སོགས་པ་སྨོས་ཏེ། ཡང་དག་པར་ན་བདེ་བ་ལས་རགས་པ་དེ་གཞན་མ་ཡིན་པས། བདེ་བ་དེ་མི་རྟག་པ་ཉིད་ཡིན་པར་ཤིན་ཏུ་གསལ་བ་ཡིན་ནོ། །ཡང་གཞན་དག་ན་རེ་བདེ་བ་རགས་པའི་ཟླ་ལ་མི་འཇིགས་ཏེ། ཞིག་ཅིང་མི་རྟག་ན་ཅི་ཡང་མེད་པ་ཡིན་པས་མེད་པ་ལས་མི་སྐྱེའོ་ཞེ་ན། དེའི་ཕྱིར་མེད་པ་ཞེས་བྱ་བ་ལ་སོགས་པ་སྨོས་ཏེ། ཁྱོད་འདོད་པ་དེ་ནི་མི་རུང་ངོ༌། །ཡོད་པར་ཁས་ལེན་པ་རགས་པར་ཡོད་དགོས་ལ། དེ་ནི་གསལ་བར་ཡིན་ཏེ། དེ་ལས་སྐྱེ་བར་འགྱུར་བས་ན་ཁྱེད་རགས་པའི་ཚུལ་དུ་མེད་དོ་ཞེས་ཟེར་ཏེ། གསལ་བར་མི་འདོད་ཀྱང་མེད་ཅིང་མི་གསལ་བ་ལས་མི་སྐྱེའི་ཡོད་པ་ལས་སྐྱེས་པ་ཉིད་ཀྱིས་རགས་པར་གནས་པར་འགྱུར་རོ། །གལ་ཏེ་འབྲས་བུ་གསལ་བར་རྒྱུ་ལ་གནས་ན་ནི་རྒྱུ་ཟས་ལ་སོགས་པ་ལ་འབྲས་བུ་མི་གསལ་བར་གནས་པས་དེ་ཟ་བ་ནི་མི་གཙང་བ་ཟ་བར་འགྱུར་རོ། །གཞན་ཡང་རྒྱུ་ལ་འབྲས་བུ་གསལ་བར་གནས་ན་ནི་རས་ཀྱི་རིན་གང་ཡིན་པ་དེས་རས་བལ་གྱི་ས་བོན་ཉོས་ལ་གོས་སུ་བགོ་བར་གྱིས་ཤིག་པའོ། །གལ་ཏེ་རས་བལ་གྱི་ས་བོན་ལས་རས་ཡོད་མོད་ཀྱི། འཇིག་རྟེན་པ་རྣམས་རྨོངས་པས་མ་མཐོང་བར་ཟད་དོ་ཞེས་ཟེར་ན་ནི། དེ་ཁོ་ན་ཉིད་ཤེས་ཤིང་མ་རྨོངས་པ་ལ་ཡང་རྨོངས་པ་དེ་གནས་ཤིང་ཡོད་པ་མ་ཡིན་ཏེ། གལ་ཏེ་མེད་ན་རས་བལ་གྱི་ས་བོན་གོས་སུ་ཅིའི་ཕྱིར་མི་གྱོན་ཡང་གལ་ཏེ་དེ་ཁོ་ན་ཉིད་ཀྱི་ཤེས་པ་གང་ཡིན་པ་དེ་འཇིག་རྟེན་པ་ལ་ཡང་ཡོད་དོ། །རྒྱུ་དང་འབྲས་བུ་ཡོད་པས་མཐོང་བ་ཉིད་ཡིན་ན་ནི་འཇིག་རྟེན་པ་ཡང་དེ་ཁོ་ན་ཉིད་མཐོང་བ་ཡིན་ན་ཅིའི་ཕྱིར་དེ་མ་མཐོང༌། དེ་བཞིན་དུ་བདེ་བ་ལ་སོགས་པའི་རྒྱུ་དང་འབྲས་བུས་འཇིག་རྟེན་པ་ཅིའི་ཕྱིར་མ་མཐོང༌། འཇིག་རྟེན་པ་རྣམས་ནི་ཚད་མ་དང་ལྡན་པ་མ་ཡིན་པས་རྒྱུ་ལ་འབྲས་བུ་མ་མཐོང་ངོ་ཞེ་ན། དེའི་ཕྱིར་འཇིག་རྟེན་གསལ་བར་ཞེས་བྱ་བ་ལ་སོགས་པ་སྨོས་ཏེ། དེ་ལྟ་ན་ནི་སྒྲ་ལ་སོགས་པ་ཡོད་པར་དོན་གྱི་ཚད་མས་གསལ་བར་
མཐོང་བ་དང༌། འང་ཞེས་བྱ་བའི་སྒྲས་རྗེས་སུ་དཔག་པ་དང༌། ལུང་ལ་ཡོད་པ་ཡང་བདེན་པ་མ་ཡིན་ཞིང་མེད་པར་འགྱུར་རོ། །དེ་ཁོ་ན་ཉིད་དུ་སྒྲ་ལ་སོགས་པ་བརྟགས་པའི་དངོས་པོ་རྣམས་ལས་སྟོང་པ་ཉིད་ཡིན་ན་གསལ་བར་མཐོང་བ་གང་ཞིག་ཡོད། དེ་མེད་ན་ཚད་མ་ཡང་ཚད་མ་ཡིན་པར་འགྱུར་བར་དེའི་ཕྱིར་ཚད་མ་ཞེས་བྱ་བ་ལ་སོགས་པ་སྨོས་ཏེ། སྟོང་པ་ཉིད་ནི་ཚད་མ་གཞལ་བ་ཡིན་གྱི་གཞན་དུ་ན་ཇི་ལྟར་ཤེས་པར་འགྱུར། དེ་ཡང་ཚད་མ་དག་ཚད་མ་མ་ཡིན་ཞིང་བརྫུན་ན་ནི་དེས་གཞལ་བའི་སྟོང་པ་ཉིད་ལ་སོགས་པ་ཐམས་ཅད་བརྫུན་པར་འགྱུར་བ་དེ་བས་ན་དངོས་པོ་རྣམས་ཀྱི་སྟོང་པ་ཉིད་མི་འཐད་པར་འགྱུར་རོ། །གླེགས་བམ་ལ་ལ་ལས་ནི་ཁྱོད་ཀྱིས་འཐད་པ་མ་ཡིན་ནོ་ཞེས་ཟེར་ཏེ། གྲངས་ཅན་ཁྱོད་ཀྱིས་སྟོང་པ་ཉིད་སྨྲ་བར་ཡང་དག་པར་འཐད་ཅིང་རིགས་པ་མ་ཡིན་ཏེ། སངས་རྒྱས་རྣམས་ནི་ཀུན་རྫོབ་ཏུ་ཐམས་ཅད་ཡོད་པར་འདོད་པ་རིགས་པ་ཡིན་ནོ། །གང་གི་ཕྱིར་བརྟགས་པའི་དངོས་པོ་རྣམས་ཀྱིས་བཙལ་ཞིང་ཡོངས་སུ་མ་དཔྱད་པར་དེ་མེད་པ་ཉིད་ཅེས་བརྟགས་པའི་དངོས་པོ་མེད་པ་ཉིད་འཛིན་པར་མི་ནུས་ཀྱི། དེའི་རང་བཞིན་སྟོང་པ་ཉིད་དུ་ཤེས་ཤིང་འཛིན་པ་དེ་ལས་དངོས་པོ་རྣམས་བརྫུན་པར་ཤེས་པར་འགྱུར་རོ། །དེ་བས་ན་བརྟགས་པའི་དངོས་པོ་རྣམས་བརྫུན་པ་མ་ཡིན་པས་དེའི་དངོས་པོ་མེད་པ་ཉིད་ནི་ཤིན་ཏུ་གསལ་བར་བརྫུན་པ་ཡིན་ཏེ། མེད་པ་ནི་ཡོད་པ་ལ་ལྟོས་པ་ཡིན་པས་དངོས་པོ་མ་གྲུབ་པས་ན་དེའི་མེད་པ་ཡང་མི་འགྲུབ་བོ། །གྲངས་ཅན་ལ་དཔེ་བསྟན་པའི་སྒོ་ནས་ཉེ་བར་བསྡུ་བ་སྨྲས་པ་ནི། དེ་བས་ཞེས་བྱ་བ་ལ་སོགས་པ་སྨོས་སོ། །དཔེར་ན་རྨི་ལམ་གྱི་ནང་ན་བུ་སྐྱེས་པ་རྨིས་ལ་རྨི་ལམ་ན་དེ་ཤི་བ་རྨི་ལ་དེའི་མེད་དོ་ཞེས་བྱ་བ་ནི་རྣམ་པར་བརྟགས་པ་ཙམ་ཡིན་པའི་རྟོག་པ་དེས་བུ་ཡོད་པའི་རྟོག་པ་སྐྱེས་པ་གང་ཡིན་པ་དེ་རྗེས་སུ་ཟློག་པར་བྱེད་ཅིང་འགོག་པར་བྱེད་དོ། །དེ་བཞིན་དུ་གལ་ཏེ་དངོས་པོར་བརྟགས་པ་ཡོད་ན་དེ་མེད་དོ་ཞེས་བྱ་བ་རྣམ་པར་རྟོག་པར་འགྱུར་ཏེ། དེ་ཉིད་ཀྱང་བརྫུན་པ་ཡིན་ནོ། །དེ་ལྟར་རྒྱུ་མེད་པར་སྨྲ་བ་དང་མི་མཐུན་པ་རྒྱུར་སྨྲ་བ་རྣམ་པར་བསལ་ནས། གཞུང་ཉེ་བར་བསྡུ་བའི་ཕྱིར་དེ་ལྟར་ཞེས་བྱ་བ་ལ་
སོགས་པ་སྨོས་ཏེ། རྐྱེན་རྣམས་སོ་སོ་འམ་འདུས་པ་ཞེས་བྱ་བ་ལ། དབང་ཕྱུག་དང་གཙོ་བོ་ལ་སོགས་པ་རྟག་པ་རྣམས་ལའམ། ས་བོན་ལ་སོགས་པ་རང་སྣང་བ་མི་རྟག་པ་ཉིད་དང་འདུས་པ་ཞེས་བྱ་བ་ཉེ་བར་ལེན་པའི་རྒྱུ་ལ་སོགས་པ་མི་རྟག་པ་རྣམས་དང༌། བདག་དང་ས་བོན་ལ་སོགས་པ་རྟག་པ་དང༌། མི་རྟག་པ་ལ་སོགས་པ་རྣམས་ལའང༌། མཐོང་བ་དང་མ་མཐོང་བའི་རྒྱུ་དང་རྐྱེན་ལ་རྣམ་པ་བཞི་པོ་དག་ལ་ཡང་གནས་པ་མ་ཡིན་ནོ། །གཞན་ནས་ཞེས་བྱ་བ་ནི་རྐྱེན་རྣམས་ལས་གཞན་པ་ལས་ཀྱང་འོང་བ་མ་ཡིན་ནོ། །དེ་ལྟར་མ་འོངས་སུ་ཟིན་ཀྱང་ཡོད་པར་གནས་པ་ཡིན་ནོ་ཞེ་ན། གནས་པ་མེད་ཅེས་བྱ་བ་སྨོས་ཏེ། སྐད་ཅིག་ཀྱང་སྡོད་པ་མེད་དོ། །དེ་ཉིད་ཀྱི་ཕྱིར་འགྲོ་བ་ཡང་མེད་དེ། མེད་པ་ཉིད་ཡིན་པའི་ཕྱིར་རོ། །དེ་བས་སྒྱུ་མ་ཉིད་དང་འདི་ལ་ཁྱད་པར་དུ་བྱ་བ་ཅི་ཞིག་ཡོད་ན། རྨོངས་པ་རྣམས་ཀྱིས་བདེན་པ་ཁོ་ནར་བརྟགས་ཤིང་སྒྲོ་བཏགས་པའི་གཟུགས་ལ་སོགས་པ་གང་ཞིག་ཡོད་དེ་མེད་དོ། །གཟུགས་ལ་སོགས་པ་ནི་རྒྱུས་བསྐྱེད་པ་ཡིན་ནོ། །སྒྱུ་མའི་སྒྱུ་མས་བྱས་པ་ཁྱད་པར་ཅི་ཡོད་ཅེ་ན། དེའི་ཕྱིར་སྒྱུ་མ་ཞེས་བྱ་བ་ལ་སོགས་པ་སྨོས་ཏེ། དེ་དག་ནི་འགྲོ་བ་དང་འོང་བ་མེད་པས་གཉི་ག་ཡང་ལོག་པར་ཡིན་ནོ་ཞེས་བྱ་བའི་ཐ་ཚིག་གོ །དེ་ལྟར་ཡིན་ཡང་རྐྱེན་ལས་བྱུང་བ་ནི་བདེན་པ་ཡིན་ནོ་ཞེ་ན། དེའི་ཕྱིར་གང་ཞིག་ཅེས་བྱ་བ་ལ་སོགས་པ་སྨོས་ཏེ། དངོས་པོ་གང་གཞན་གང་ཞིག་དང་ཉེ་བ་ན་ངེས་པར་མཐོང་ཞིང་སྣང་ལ། དེ་མེད་ན་ནི་མི་མཐོང་བས་དེ་ནི་ཡོད་པ་མ་ཡིན་ཏེ་གཟུགས་བརྙན་དང་འདྲའོ། །དེ་ཡང་གཟུགས་བརྙན་ནི་མེ་ལོང་ལ་སོགས་པ་བཞིན་དང་ཉེ་བ་ན་སྣང་གི །དེ་མེད་པར་ནི་མ་ཡིན་ནོ། །དེ་བཞིན་དུ། གཞན་དག་ལ་ཡང་རང་གི་རྒྱུ་དང་ཉེ་བ་ལས་ཡིན་གྱི། དེ་མེད་པར་མ་ཡིན་པའི་ཕྱིར། གཟུགས་བརྙན་ཞེས་བྱ་བ་ལ་སོགས་པ་སྨོས་ཏེ། གང་རྒྱུ་དང་རྐྱེན་ལ་ལྟོས་ཤིང་རག་ལས་པས་བསྐྱེད་པ་ནི་བཅོས་མ་དང་འདྲ་བ་ཡིན་ན། དེ་བདེན་ཞིང་ཡང་དག་པ་ཉིད་དུ་ཇི་ལྟར་ཡོད་པ་ཡིན། དེ་ལྟར་ན་རྒྱུ་ནི་ཡོད་དོ་ཞེ་ན་དེའི་ཕྱིར་དངོས་པོ་ཞེས་བྱ་བ་ལ་སོགས་པ་སྨོས་ཏེ། གསེར་ལ་སོགས་པའི་དངོས་པོ་རྣ་ཆ་ལ་སོགས་པ་བྱས་པར་གྱུར་པའི་
རྒྱུ་ཡོད་དོ་ཞེ་ན། བྱེ་བ་བརྒྱ་ཕྲག་ཅེས་བྱ་བ་ལ་སོགས་པ་སྨོས་ཏེ། དངོས་པོ་མེད་པའི་ཕྱིར་ཆ་ཤས་མེད་པར་འགྱུར་བ་ཡིན་ལ། དེ་ལྟར་དངོས་པོ་མེད་ཅིང་བསྒྱུར་དུ་མེད་པའི་གནས་སྐབས་དེའི་དངོས་པོ་ཅི་ཞིག་ཏུ་གྱུར་ནས་དངོས་པོ་ཞེས་སྨྲ་སྟེ། དེ་ལྟ་བུའི་གནས་སྐབས་དེ་དངོས་པོ་མེད་པ་ལས་གཞན་པའི་དངོས་པོ་ཇི་ལྟ་བུ་ཞིག་ཏུ་འགྱུར་བ་ཡིན། ཡང་དག་པར་ནི་རྒྱུ་དང་འབྲས་བུ་མེད་པའི་ཕྱིར་དེ་ལས་འདིར་སྐད་ཅིག་མར་ཡོད་པར་སྨྲ་བ་དག་འདི་སྐད་ཅེས་དངོས་པོ་མེད་པའི་དུས་སུ་འགའ་ཡང་དངོས་པོར་མི་འགྱུར་བ་ནི་བདེན་མོད་ཀྱི། སྐད་ཅིག་མར་ཡོད་དོ་ཞེས་རྟོག་པ་དེའི་ཕྱིར། མེད་པའི་ཚེ་ན་ཞེས་བྱ་བ་ལ་སོགས་པ་སྨོས་ཏེ། དངོས་པོ་མེད་པའི་ཚེ་ན་ནི་དངོས་པོ་མེད་པ་ཉིད་ཡིན་ལ། དངོས་པོ་དེ་དུས་ནམ་ཞིག་ན་འབྱུང་བར་འགྱུར་ཏེ། ནམ་ཡང་འབྱུང་བར་མི་འགྱུར་རོ། །ཅིའི་ཕྱིར་ཞེ་ན། དངོས་པོ་ཞེས་བྱ་བ་ལ་སོགས་པ་སྨོས་ཏེ། དངོས་པོ་རྣམས་ལ་སྐྱེ་བ་མེད་པ་ཉིད་ཀྱི་དངོས་པོ་མེད་ཅིང་མ་སྐྱེས་པ་དང་ནི་བྲལ་ཞིང་ཐ་དད་པར་མི་འགྱུར་ཏེ། དེ་དངོས་པོ་རྣམས་མེད་པ་དང་མ་བྲལ་བ་ཉིད་ཀྱིས་དངོས་པོ་རྣམས་ཡོད་ཅིང་འབྱུང་བའི་སྐབས་ཡོད་པར་མི་འགྱུར་རོ། །དེ་ལྟར་རེ་ཞིག་འགའ་ཡང་དངོས་པོ་ཉིད་དུ་མི་འགྱུར་བ་ཡིན་མོད་ཀྱི། དེ་ལྟར་ན་ཁས་ལེན་པར་བྱེད་པ་དག་གི་ཕྱིར་རང་བཞིན་ཞེས་བྱ་བ་ལ་སོགས་པ་སྨོས་སོ། །དངོས་པོ་གང་ཡིན་པ་དེ་ནི་དངོས་པོ་མེད་པ་ཉིད་དུ་མི་འགྱུར་རོ། །ཅིའི་ཕྱིར་ཞེ་ན། རྫས་གཅིག་ལ་དངོས་པོ་དང་དངོས་པོ་མེད་པའི་རང་བཞིན་ཉིད་ཀྱི་རྣམ་པར་འགྱུར་བ་དེར་ཐལ་བར་འགྱུར་ཏེ། དངོས་པོ་གཅིག་ལ་དངོས་པོ་མེད་པ་མི་མཐུན་པའི་ཆོས་གཉིས་སུ་འགྱུར་བ་ན་འགལ་བ་ཡིན་པའི་ཕྱིར་རོ། །དེ་ལྟར་ཞེས་བྱ་བ་ལ་སོགས་པས་ནི་ཉེ་བར་སྡུད་པ་ཡིན་ནོ། །དེ་སྐྱེད་པར་མ་གྲུབ་ན་འགག་པ་ཡང་ཡོད་པ་མ་ཡིན་ནོ། །དེ་བཞིན་དུ་རྣམ་པ་ཐམས་ཅད་དུ་རྟག་པར་གྱུར་པའི་དངོས་པོ་ཡང་མི་དམིགས་ཤིང་ཡོད་པ་མ་ཡིན་ནོ། །རྒྱུ་དེ་བས་ན་འགྲོ་བའི་སྐྱེ་བོ་དེ་དག་ཐམས་ཅད་སྐྱེ་བ་མེད་པ་དང༌། འགག་པ་མེད་པའི་རང་བཞིན་ཅན་ཡིན་ནོ། །འགྲོ་བ་རྣམས་ཞེས་བྱ་བ་དམྱལ་བ་དང༌། དུད་འགྲོ་དང༌། ཡི་དྭགས་དང༌། མི་དང༌། ལྷ་སྟེ་འགྲོ་བ་ལྔ་འམ་དྲུག་གོ །ཆུ་ཤིང་བཞིན་དུ་སྙིང་པོ་མེད་ཅེས་
བྱ་བ་ནི་ཆུ་ཤིང་ལ་རལ་གྲི་ལ་སོགས་པས་གཤེགས་ཤིང་རྣམ་པར་ཕྱེ་ནས་བལྟས་ན་སྲ་བའི་སྙིང་པོ་ཅི་ཡང་མི་རྙེད་པ་དང་འདྲ་བར་ཆོས་ཉིད་འདི་དག་ཀྱང་དེ་དང་འདྲའོ། །དེ་ཉིད་ཀྱི་ཕྱིར། མྱ་ངན་འདས་དང་ཞེས་བྱ་བ་ལ་སོགས་པ་སྨོས་སོ། །དེ་བས་ན་རྙེད་པ་ལ་སོགས་པ་འཇིག་རྟེན་པའི་ཆོས་བརྒྱད་དང༌། སྲེད་པ་ལ་སོགས་པ་ཐམས་ཅད་བརྫུན་ཡིན་ནོ་ཞེས་བསྟན་པའི་ཕྱིར་རོ། །དེ་ལྟར་ཞེས་བྱ་བ་ལ་སོགས་པ་སྨོས་ཏེ། དེ་ལྟ་བུའི་རང་བཞིན་རྙེད་པར་བྱ་བ་ཡང་ཅི་ཞིག་ཡོད། དེ་བཞིན་དུ་བསྟོད་པ་ལ་སོགས་པས་རིམ་གྲོ་བྱ་བ་འམ། སྨད་པ་ལ་སོགས་པས་བརྙས་པར་གྱུར་པ་དང༌། གྲགས་པ་མ་ཡིན་པ་ལ་སོགས་པས་མི་དགའ་བ་དང༌། གྲགས་པ་ལ་སོགས་པས་དགའ་བ་ཡང་ཅི་ཞིག་ཡོད། འཇིག་རྟེན་གྱི་ཆོས་བརྒྱད་པོ་འདི་ནི་སྲེད་པ་ལས་བྱུང་བས་དེའི་ཕྱིར་སྲེད་པ་ཞེས་བྱ་བ་ལ་སོགས་པ་སྨོས་ཏེ། སྲེད་པ་ནི་འདོད་པའོ། །འོ་ན་མི་འཆི་བ་ལ་སོགས་པ་ལ་སྲེད་པ་དགོས་སོ་ཞེ་ན། གསོན་གྱིས་ཞེས་བྱ་བ་ལ་སོགས་པ་སྨོས་སོ། །ཡང་འདི་ན་བྱུང་བར་འགྱུར་བའི་ལུས་རྣམས་ལ་སྲེད་དོ་ཞེ་ན། དེའི་ཕྱིར་སུ་ཞིག་ཅེས་བྱ་བ་ལ་སོགས་པ་སྨོས་སོ། །དེ་ལྟར་ན་ཡང་གཉེན་འདུན་དང་མཛའ་བཤེས་ལ་སོགས་པ་དང་ཕྲད་པར་མངོན་པར་འདོད་པ་ལ་སྲེད་དོ་ཞེ་ན་གཉེན་གང་ཞེས་བྱ་བ་ལ་སོགས་པ་སྨོས་ཏེ། གཉེན་ནི་ཉེ་དུ་རྣམས་སོ། །བཤེས་ནི་མཛའ་བོ་རྣམས་སོ། །དེ་དག་ཐམས་ཅད་ནི་ཡང་དག་པར་ན་མ་སྐྱེས་པ་ཡིན་པའི་ཕྱིར་ནམ་མཁའ་དང་འདྲ་བར་དངོས་པོ་མེད་པ་ཡིན་པས། བདག་དང་འདྲ་བ་ཡིས་ཞེས་བྱ་བ་ནི་གཞུང་འདི་བདག་དང་སྐལ་པ་མཉམ་པའི་དོན་དུ་བྱས་པས་དེས་འདི་ལྟར་སྒྱུ་མ་ལྟ་བུར་བརྟགས་པས་ཡོངས་སུ་ཤེས་པར་གྱིས་ཤིག་པའོ། །དེ་ལྟར་ཡིན་ན་ཡང་བདེ་བ་དང༌། སྡུག་བསྔལ་གྱི་སེམས་ནི་ཡོད་དོ་ཞེ་ན། དེའི་ཕྱིར་བདག་ཉིད་ཅེས་བྱ་བ་ལ་སོགས་པ་སྨོས་ཏེ། འཐབ་པ་དང་རྩོད་པ་ལ་སོགས་པའི་རྒྱུས་སོ། །སྤྲོ་བ་ནི་དགའ་སྟོན་ལ་སོགས་པའི་རྒྱུས་སོ། །ཤིན་ཏུ་མི་བདེར་འཚོ་བར་བྱེད། །ཅེས་བྱ་བ་ནི་མྱ་ངན་ལ་སོགས་པས་ཤིན་ཏུ་ཉམ་ཐག་པ་ཡིན་ནོ། །རྡེག་པ་ནི་གཞན་ལ་འཁུ་ཞིང་གནོད་པ་བྱས་པ་ལ་སོགས་པའོ། །ངན་འགྲོ་ནི་དམྱལ་བ་ལ་སོགས་
པར་ཡང་ནས་ཡང་དུ་ལྟུང་ནས་སླར་བདེ་འགྲོར་ལྷའི་འཇིག་རྟེན་དུ་སྐྱེ་ཞིང་འབྱུང་བའི་ཚུལ་གྱིས་སྲིད་པ་ན་འཁོར་བ་དང༌། གཡང་ས་མང་པོ་སྟེ། གྲང་བ་དང་ཚ་བའི་དམྱལ་བ་བཅུ་དྲུག་དང༌། དེའི་ཉེ་འཁོར་བ་རྣམས་དང༌། དུད་འགྲོ་དང༌། ཡི་དྭགས་ཀྱང་དབྱེ་བས་ཤིན་ཏུ་མང་བར་སྐྱེ་བ་ནས་སྲིད་པ་དེར་དེ་ཁོ་ན་མ་ཡིན་པ་འདི་ནི་སྒྱུ་མ་དང་འདྲ་བ་ཉིད་ཡིན་ནོ། །དེར་ཡང་ཕན་ཚུན་འགལ་བར་འགྱུར་པ་དག་སྟེ། ཚ་བ་དང༌། གྲང་བ་ལ་སོགས་པ་དང༌། སེམས་ཅན་གཞན་དག་ཀྱང་ཕན་ཚུན་གྱི་མི་མཐུན་པར་གྱུར་པས་གནས་པ་དང༌། སྲེད་མིན་ཞེས་པ་སྲེད་པ་མེད་པར་འགྱུར་བ་དེ་སྲིད་ཀྱི་བར་དུ་དེ་ཁོ་ན་ཉིད་མ་ཡིན་པ་འདི་མེད་པར་མི་འགྱུར་གྱི། སྲེད་པ་མེད་ན་འགྱུར་རོ། །དེ་ལྟར་གཡང་ས་མང་པོ་ཡོད་པའི་སྲིད་པ་དེར་ཡང་ཉམ་ཆུང་ཞིང་སྟོབས་ཞན་པར་གྱུར་པ་དང༌། དེར་ཡང་ཚེ་ཐུང་ཞིང་ནད་མང་བ་དང༌། ཡང་དེར་ཡང་གསོན་ཞིང་འཚོ་བ་དང༌། ནད་མེད་པའི་དོན་དང་བྱ་བ་རྣམས་ཀྱིས་བྱིས་པ་འདྲེས་པའི་རྒྱུས་འབྲས་བུ་མེད་པ་ཁོ་ནར་མྱུར་དུ་དུས་འདའ་བར་བྱེད་པ་ཡིན་ལ། དེར་ཡང་སྔོན་ནས་གོམས་པའི་རྣམ་པར་གཡེང་བ་བཟློག་ཅིང་དབེན་པར་བྱ་བ་དང༌། སེམས་མཉམ་པར་འཇོག་པའི་དུས་ག་ལ་ཡོད་དེ། ཤིན་ཏུ་རྙེད་པར་དཀའོ་ཞེས་བྱ་བའི་ཐ་ཚིག་གོ །དེར་ཡང་བྱ་བ་དེ་རྣམས་ལ་བརྩོན་པར་ཞུགས་པར་གྱུར་ཀྱང་འདོད་པའི་ཁམས་ཀྱི་དབང་ཕྱུག་གི་བདུད་དམ། ཐམས་ཅད་དུ་སོང་བའི་བདུད་ཀྱིས་ལམ་ལོག་པར་འཇུག་པར་བྱེད་པ་འམ། ཐེ་ཚོམ་སྐྱེད་པར་བྱེད་པས་རྣམ་པ་འདི་འདྲ་བས་དེ་ཁོ་ན་ཉིད་རྟོགས་པར་མི་འགྱུར་ཞིང་སྡུག་བསྔལ་བས་འཚོ་བས། ཐུབ་པར་དཀའ་བས་ཞེས་བྱའོ། །དེ་ལྟར་བདུད་ཀྱིས་བྱིན་གྱིས་བརླབས་པས་སྡིག་པ་ཆེན་པོ་ལ་འཇུག་པས་ཡང་ནས་ཡང་དུ་ངན་འགྲོ་རྣམས་སུ་སྐྱེ་བར་འགྱུར་བས་དེའི་ཕྱིར་དེས་སླར་དལ་འབྱོར་ཐོབ་པ་ནི་ཤིན་ཏུ་རྙེད་པར་དཀའ་ཞིང་འཁོར་བ་ལས་འབྱུང་བ་ཡང་རྙེད་པར་དཀའ་བ་ཡིན་པ་དང༌། དེར་ཡང་སངས་རྒྱས་འབྱུང་བ་དང༌། དམ་པའི་ཆོས་སེམས་ཤིང་སེམས་མཉམ་པར་འཇོག་པ་ཤིན་ཏུ་ཡང་རྙེད་པར་དཀའ་བས་འདོད་ཆགས་པའི་ཚོགས་ཀྱི་ཆུ་བོ་རྣམས་ནི་སྡུག་བསྔལ་བས་ཀྱང་ཤིན་ཏུ་བཟློག་པར་དཀའ་བ་ཡིན་ནོ། །ཨེ་མའོ་ཞེས་པ་ནི་
ངོ་མཚར་དུ་གྱུར་པའོ། །སྡུག་བསྔལ་རྒྱུད་ཅེས་བྱ་བ་ནི་གང་གི་ཕྱིར་ཉོན་མོངས་པ་ལས་ལས། དེ་ལས་སྡུག་བསྔལ། དེ་ལས་ཀྱང་ཉོན་མོངས་པའི་ཆུ་བ་བཟློག་དཀའ་བ་འབྱུང་བའི་ཕྱིར་རོ། །དེ་ཡང་འགྲོ་བ་ཐོག་མཐའ་དབུས་མེད་པར། །འཁོར་བའི་འཁོར་ལོས་འཁོར་གྱུར་པ། །མགལ་མེ་བསྐོར་བ་ལྟ་བུར་ནི། །ཕན་ཚུན་རྒྱུ་ཅན་འཁོར་བར་འགྱུར། །ཞེས་བཤད་པ་ལྟ་བུའོ། །འདི་ཞེས་བྱ་བ་ལ་དེ་སུ་ཞིག་ཅེ་ན། གང་འདི་ལྟར་ཤིན་ཏུ་སྡུག་བསྔལ་བར་གནས་ཀྱང་རང་སྡུག་བསྔལ་བར་གནས་པར་མི་མཐོང་གི །གཞན་དུ་ན་རང་ཤིན་ཏུ་བདེ་བར་གནས་པ་ཡིན་སྙམ་དུ་སེམས་སོ། །དེ་ལྟར་སྡུག་བསྔལ་བར་གནས་པ་ཡིན་ཞེ་ན། དཔེར་ན་རྔ་མོ་ཚེར་མ་ཟ་ཞིང་འཚོ་ཡང་བདེ་བར་གནས་སྙམ་དུ་སེམས་པ་དེ་བཞིན་དུ་ཐམས་ཅད་ཀྱང་བདེ་བར་རློམ་པ་ཙམ་ཡིན་པའི་ཕྱིར་དེ་ལ་གཞན་ཅི་ཡང་མེད་དོ། །བསོད་ནམས་སྤྲིན་ནི་བསོད་ནམས་ཀྱི་ཕུང་པོའོ། །དམིགས་པ་ལ་མངོན་པར་ཞེན་པ་ལ་གནས་པས་དམིགས་པ་ལ་སྤྱོད་པའོ། །སོགས་པ་ནི་ཉེ་བར་བསྡུས་པའོ། །བྱང་ཆུབ་སེམས་དཔའི་སྤྱོད་པ་ལ་འཇུག་པའི་ལེགས་པར་སྦྱར་བ་ལས་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་སྟེ་ལེའུ་དགུ་པའོ།། །།བསྔོ་བའི་དབང་དུ་མཛད་ནས། བདག་གིས་བྱང་ཆུབ་སྤྱད་པ་ལ། །ཞེས་བྱ་བ་ལ་སོགས་པ་སྨོས་པ་ལ། བྱང་ཆུབ་ནི་ཡོན་ཏན་དང་སྐྱོན་ཐམས་ཅད་འཕེལ་བ་དང་སྒྲིབ་པའི་མཐར་ཐུག་པ་ལ་གནས་པའི་དེ་ཁོ་ན་ཉིད་ཀྱི་བློ་སྟེ། ཐམས་ཅད་མཁྱེན་པ་ཉིད་དོ། །དེའི་སྤྱོད་པ་ནི་བྱང་ཆུབ་ཀྱི་སྤྱོད་པ་བྱང་ཆུབ་སེམས་ཀྱི་ཕན་ཡོན་ལ་སོགས་པ་དོན་རྣམ་པ་བཅུ་པོ་གང་ཡིན་པས་ས་དང་ཕ་རོལ་ཏུ་ཕྱིན་པ་དག་ལ་འཇུག་པ་ནི་ཇི་སྐད་དུ་བཤད་པ་དེ་བསྔོ་བ་དང་བཅས་པ། རྣམ་པར་བསམས་པའི་ཞེས་བྱ་བ་བརྩམས་ནས་ཡོངས་སུ་མ་རྫོགས་པ་དེ་ལྟར་གྱིས་ཡོངས་སུ་བསྔོ་བའི་དོན་ཡིན་ནོ། །དགའ་བ་ཞེས་བྱ་བ་ནི་ཡིད་བདེ་བའོ། །ཉམས་པ་ནི་འཇིག་པའོ། །རྒྱུན་མི་འཆད་ཅེས་བྱ་བ་ནི་རྟག་ཏུའོ། །དེ་ལྟར་སྤྱིར་འགྲོ་བའི་དོན་དུ་ཚིགས་སུ་བཅད་པ་གསུམ་གྱིས་དགེ་བ་ཡོངས་སུ་བསྔོ་བ་བསྟན་ནས་འགྲོ་བ་དབྱེ་བའི་སྒོ་ནས་བསྟན་པའི་ཕྱིར། འཇིག་རྟེན་ཁམས་ན་
དམྱལ་བ་དག །ཅེས་བྱ་བ་ལ་སོགས་པ་སྨོས་ཏེ། བདག་གི་དགེ་བའི་སྟོབས་ཀྱིས་ལྷ་ཡི་ལུས་ཐོབ་ནས། །ལྷ་མོ་རྣམས་དང་ལྷན་ཅིག་དལ་གྱིས་འབབ་གནས་ཤོག །ཅེས་བྱ་བ་དེ་ཡན་ཆད་དང་སྦྱར་བར་བྱའོ། །དམྱལ་བ་ནི་ཡང་སོས་ལ་སོགས་པ་ཚ་བ་དང༌། ཆུ་བུར་ཅན་ལ་སོགས་པ་གྲང་བ་དག་གོ །འཕགས་པ་སངས་རྒྱས་བཅོམ་ལྡན་འདས་སྣང་བ་མཐའ་ཡས་ཀྱི་སྐྱེ་བ་ལ་སོགས་པ་ཡང་དག་པ་སྟོན་པའི་ས་རྟག་ཏུ་བདེ་བ་ཉིད་དང་ལྡན་པའི་ཕྱིར་བདེ་བ་ཅན་ཞེས་བྱ་བ་ལ། བདེ་བ་ཅན་དེ་ལ་བདེ་དགས་དགའ་བར་ཤོག །བྱང་ཆུབ་སེམས་དཔའི་སྤྲིན་ཆེན་ལས་ཏེ། གང་ལ་དེ་ལས་བྱུང་བའི་ཆུ་བོ་མཚོ་མཐའ་ཡས་ཀྱི་ཆུ་བོའི་ཚོགས་ཀྱིས་སོ། །རལ་གྲི་ལོ་མའི་ནགས་ཚལ་ཡང༌། །ཞེས་བྱ་བ་སྤུ་གྲིའི་སོ་འཕེལ་བའི་དམྱལ་བའི་ལམ་མོ། །དེ་ཉིད་ལ་ཤལ་མ་ལིའི་སྡོང་པོ་དག །ཅེས་བྱ་བ་ལས་ཀྱི་སྒྱུ་མས་རྡོ་རྗེའི་ཚེར་མ་ཁ་ཐུར་དུ་བལྟས་ཤིང་རྣོ་བ་ཅན་གྱི་རིའི་ཤིང་ནི་ཤལ་མ་ལིའི་སྡོང་པོའོ། །བརྒྱ་བྱིན་གྱི་སྐྱེད་མོས་ཚལ་དགའ་བའི་ཚལ་དེར། དཔག་བསམ་ཤིང་དུ་འཁྲུངས་པར་ཤོག །མཐོང་རིལ་ལ་སོགས་པའི་བྱ་དེ་དག་ནི་སྐད་སྙན་འབྱིན་པ་སྟེ། སྐད་སྙན་སྒྲོགས་པས་མཛེས་འགྱུར་ཤོག །ཤིན་ཏུ་རིང་དུ་སོང་བ་ཉིད་ཀྱི་ཕྱིར་པདྨ་སྟེ། ཆུ་སྐྱེས་དྲི་བསུང་ཆེ་ལྡན་གང་ལ་ཡོད་པའི་མཚོ་དེ་དག་གིས། དམྱལ་བའི་ས་ཕྱོགས་དག་ནི་ཉམས་དགར་ཤོག །སོལ་ཕུང་ནི་མེ་མ་མུར་གྱི་དམྱལ་བའི་ལམ་མོ། །ས་བསྲེགས་ནི་ཚ་བ་ལ་སོགས་པའི་དམྱལ་བའིའོ། །བསྡུས་འཇོམས་རི་བོ་རྣམས་ཀྱང་ནི། །ཞེས་བྱ་བ་ལ་བསྡུས་འཇོམས་ཞེས་བྱ་བ་ནི་དམྱལ་བ་ཆེན་པོ་ན་ལུག་ལྟ་བུའི་རི་ཆེན་པོ་རྣམས་ཀྱང་ངོ༌། །མདག་མེ་ལ་སོགས་པའི་ཆར་ནི་གཤིན་རྗེའི་སྐྱེས་བུ་ལ་སོགས་པས་ཕབ་པའོ། །བསྐལ་པ་ཟད་པའི་ད་ལྟར་ཡང་མཚོན་གྱིས་འཐབ་པ་དམྱལ་བ་རྗེས་སུ་བྱེད་པ་ཉིད་ཀྱི་ཕྱིར་བསྟན་ཏོ། །ཆུ་བོ་རབ་མེད་ནི་དམྱལ་བའི་ལམ་མོ། །ལྷ་མོ་རྣམས་ནི་ལྷའི་བུད་མེད་དག་གོ །དལ་གྱིས་འབབ་པ་ནི་མཐོ་རིས་ཀྱི་ཆུ་བོ་གངྒཱ་སྟེ། དེ་ལ་གནས་པར་ཤོག་ཅེས་བྱ་བ་ལ་སོགས་པ་ནི་དམྱལ་བ་རྣམས་ལ་རྣམ་པར་རྟོག་པའོ། །ཅིའི་ཕྱིར་ཞེས་བྱ་བ་ལ་སོགས་པ་ལ། །ཀུན་ནས་མུན་པ་ནི་ཀུན་ནས་
སྨག་ཏུ་གྱུར་པའོ། །དེ་ཀོ་སུའི་མཐུ་སྙམ་སྟེ། །གྱེན་དུ་བལྟས་ན་ནམ་མཁའི་དཀྱིལ་ན་ཕྱག་ན་རྡོ་རྗེ་འབར་བ་བཞུགས་མཐོང་ནས། རབ་ཏུ་དགའ་བའི་ཤུགས་ཀྱིས་སྡིག་དང་བྲལ་ནས་ཏེ། སྡིག་པ་སྤངས་པར་གྱུར་ནས། བདག་ནི་དགེ་བའི་སྟོབས་ཀྱིས་ཕྱག་ན་རྡོ་རྗེ་དེ་དང་ལྷན་ཅིག་འགྲོ་བར་ཤོག །ཅེས་བཤད་ཟིན་པ་དང་སྦྱར་རོ། །མེ་ཏོག་ཆར་པ་སྤོས་ཆུ་དང་འདྲེས་འབབ་པ་ཡིས། །དམྱལ་བའི་མེ་མདག་ཆིལ་ཆིལ་གསོད་པ་མཐོང་གྱུར་ནས། །ཞེས་རྣམ་པར་རྟོག་པར་འགྱུར་བ་ན། གློ་བུར་བདེ་བས་ཚིམ་པ་འདི་ཅི་སྙམ་ན། སེམས་ཅན་དམྱལ་བ་རྣམས་ཀྱིས་ལག་ན་པདྨ་སྟེ། སྤྱན་རས་གཟིགས་དབང་ཕྱུག་མཐོང་བར་ཤོག །དེ་ལྟར་རྡོ་རྗེ་དང་པདྨའི་རིགས་བསྟན་ནས། དེ་བཞིན་གཤེགས་པའི་རིགས་བསྟན་པའི་ཕྱིར། གྲོགས་པོ་དག་འཇིགས་པ་བོར་ལ་ཞེས་བྱ་བ་ལ་སོགས་པ་སྨོས་ཏེ། སྡུག་བསྔལ་ནི་ཕོངས་པའོ། །བརྩེ་བ་ཡང་བདག་ལ་སྐྱེས་པར་གྱུར་པའོ། །གང་ལ་དབུའི་ཟུར་ཕུད་མངའ་བ་དེ་ནི་གཞོན་ནུ་ཟུར་ཕུད་ཅན་ནོ། །ཞབས་ཀྱི་པདྨ་ནི་ཞབས་སོ། །ཐུགས་རྗེས་བརླན་པའི་སྤྱན་གང་ལ་མངའ་བ་དེ་ནི་ཐུགས་རྗེས་བརླན་སྤྱན་ནོ། །དབུ་ལ་མེ་ཏོག་དུ་མའི་ཚོགས་ཀྱིས་ཆར་ཕབ་པ་གང་ལ་མངའ་བ་དེ་ལ་དེ་སྐད་ཅེས་བྱའོ། །ཁང་བརྩེགས་ཡིད་འོང་ལྷ་མོ་སྟོང་ཕྲག་བསྟོད་དབྱངས་སྒྲོགས་ལྡན་ཏེ། དེ་ལྟ་བུར་ནི་མཚན་ཉིད་རྣམ་པར་གྱུར་པའི་མཚན་ཉིད་ཅན་གྱིས་འཇམ་པའི་དབྱངས་དེ་འདྲ་མཐོང་ནས། གྲོགས་དག་འཇིགས་པ་བོར་ལ་ཚུར་ཤེག་ཅེས་བྱ་བ་ལ་སོགས་པ་སྨྲ་བ་ལ། ད་ནི་སེམས་དམྱལ་ཀུ་ཅོ་འདོན་པར་ཤོག །དམྱལ་བའི་འགྲོ་བའི་མཇུག་བསྡུ་བ་ནི། །དེ་ལྟར་བདག་གིས་ཞེས་བྱ་བ་ལ་སོགས་པ་སྨོས་སོ། །དུད་འགྲོའི་འགྲོ་བ་ནི་དུད་འགྲོ་རྣམས་ནི་གཅིག་ལ་གཅིག་ཅེས་བྱ་བ་ལ་སོགས་པ་སྨོས་ཏེ། འདི་མན་ཆད་བདག་གི་བསོད་ནམས་འདི་ཡིས་ནི་ཞེས་བྱ་བ་འཆད་པར་འགྱུར་བ་དང་སྦྱོར་རོ། །ཡི་དྭགས་ཀྱི་འགྲོ་བ་ནི། སྒྲ་མི་སྙན་པའི་མི་བཞིན་དུ་ཞེས་བྱ་བ་ལ་སོགས་པ་སྨོས་ཏེ། འཕགས་པ་སྤྱན་རས་གཟིགས་དབང་གི །ཞེས་བྱ་བ་ནི་ཁོང་དུ་ཆུད་པར་སླའོ། །
མིའི་འགྲོ་བ་ནི། ལོང་བ་རྣམས་ཀྱིས་མིག་མཐོང་ཤོག །ཅེས་བྱ་བ་ལ་སོགས་པ་སྨོས་ཏེ། ཕན་པ་དང༌། བཅས་པས་ཁ་ན་མ་ཐོ་བ་མེད་པའོ། །སྐྲག་པ་རྣམས་ནི་ཞེས་བྱ་བ་ལ་སོགས་པ་ཚིགས་སུ་བཅད་པ་ལྔ་ནི་རྟོགས་སླའོ། །ལྷའི་འགྲོ་བ་ནི། །མི་དལ་ཀུན་ལས་ཐར་པ་དང༌། །ཞེས་བྱ་བ་ལ་སོགས་པ་སྨོས་ཏེ། ཇི་སྲིད་དུ་ཐམས་ཅད་ནམ་མཁའི་མཛོད་བཞིན་དུ་འམ། འཕགས་པ་ནོར་བཟངས་བཞིན་དུ་ལོངས་སྤྱོད་ཆད་པ་མེད་པར་ཤོག །ནམ་མཁའ་མ་ལུས་པའི་མཛོད་གང་ལ་མངའ་བ་དེ་ནི་བྱང་ཆུབ་སེམས་དཔའ་ནམ་མཁའི་མཛོད་དོ། །དེས་གང་དང་གང་དོན་དུ་གཉེར་བ་དེ་དང་དེ་ནམ་མཁའ་ལས་བླངས་ནས་སྦྱིན་པར་མཛད་དོ། །རྩོད་པ་མེད་ཅིང་ཅ་ཅོ་མེད་པ་ནི་རྩོད་པ་མེད་པའོ། །རང་དབང་དུ་སྤྱོད་ཅིང་འཇུག་པ་གང་ལ་ཡོད་པ་དེ་དག་ནི་རང་དབང་དུ་སྤྱོད་པར་ཤོག །གཟི་བརྗིད་ཆུང་བ་ནི་གཟི་མདངས་ཆུང་བའོ། །ང་རྒྱལ་དག་ཀྱང་བཅོམ་པར་ཤོག །ཅེས་བྱ་བ་ནི་ང་རྒྱལ་བྱེད་པར་མ་གྱུར་ཅིག་ཅེས་པའོ། །ཇི་ལྟར་ཞེ་ན། བདག་གི་བསོད་ནམས་ཀྱིས་སེམས་ཅན་རྣམས་འདི་ལྟ་བུའི་རྣམ་པར་གྱུར་ཏེ། དེ་དག་གི་འབྲས་བུ་ཉིད་ནི་འདི་ཉིད་ཡོད་ན་ཡང༌། རྒྱུ་མཐུན་པ་དང༌། རྣམ་པར་སྨིན་པའི་འབྲས་བུ་ཉིད་དུ་འགྱུར་རོ། །བདག་པོ་དང་སྐྱེས་བུ་བྱེད་པའི་འབྲས་བུ་ནི་རྒྱུད་གཞན་ལ་ཡོད་ཅེས་བསྟན་པའི་ཕྱིར། བདག་གི་བསོད་ནམས་འདི་ཡིས་ནི་ཞེས་བྱ་བ་ལ་སོགས་པ་སྨོས་ཏེ། བདག་གི་བསོད་ནམས་ཀྱིས་བདག་གི་གཙོ་བོའི་སྟོབས་ཀྱིས་སྡིག་པ་ཐམས་ཅད་དེ་མ་ལུས་པར་སྤངས་ནས་ནིའོ། །བྱང་ཆུབ་སེམས་དཔའ་ཞེས་བྱ་བ་ལ་སོགས་པ་ཚིགས་སུ་བཅད་པ་ནི་ཁོང་དུ་ཆུད་པར་སླའོ། །དེ་ལྟར་དམྱལ་བ་ལ་སོགས་པའི་འགྲོ་བའི་དབྱེ་བས་གཞན་དག་གི་མངོན་པར་མཐོང་བའི་དོན་དུ་ཡོངས་སུ་བསྔོས་ནས། སངས་རྒྱས་དང༌། བྱང་ཆུབ་སེམས་དཔའ་ཡང་དག་པར་དགོངས་པའི་དོན་དང༌། ཆོས་ཡང་དག་པར་ལོངས་སྤྱོད་པའི་དོན་དུ། སངས་རྒྱས་ཀྱི་མཆོད་པ་དག་གིས་དེ་ལྟར་སྔོ་བར་བྱེད་དོ། །དཔག་བསམ་གྱི་ཤིང་ཇི་ལྟ་བུར་གྱུར་པ་ཞིག་ཅེ་ན། སངས་རྒྱས་དང་ནི་སངས་རྒྱས་སྲས། །ཡིད་དུ་འོང་བའི་ཆོས་སྙན་
སྒྲོགས་པས་གང་བ་ཡིས་སོ། །གསེག་མ་ལ་སོགས་པ་ཞེས་བྱ་བ་ལ་སོགས་པའི་སྒྲས་ནི་ཚེར་མ་ལ་སོགས་པ་གཟུང་ངོ༌། །བཻ་ཌཱུཪྻའི་རང་བཞིན་ནི་རིན་པོ་ཆེ་བཻ་ཌཱུཪྻའི་ཁང་པའོ། །འཇམ་པ་ནི་མཉེན་པ་སྟེ། ཀ་ཙ་ལིན་དའི་གོས་ལྟར་རེག་ན་འཇམ་པའོ། །བྱང་ཆུབ་སེམས་དཔའ་མང་པོ་ཡིས། །འཁོར་གྱི་དཀྱིལ་འཁོར་ཆེན་པོ་དག །ཀུན་ནས་ལེགས་པར་ས་སྟེངས་དག །བརྒྱན་པར་མཛད་པས་བཞུགས་གྱུར་ཅིག །ལུས་ཅན་ཀུན་གྱིས་བྱ་དང་ནི། །ཞེས་བྱ་བ་ལ་སོགས་པ་ནི་ཁོང་དུ་ཆུད་པར་སླའོ། །ཡང་མི་རྣམས་ནི་གཙོ་བོར་གྱུར་པ་ཡིན་པའི་ཕྱིར་མཐོང་བའི་ཆོས་ཀྱི་བདེ་བའི་དོན་དུ། ལྷ་ཡང་དུས་སུ་ཆར་འབེབས་ཤིང་ཞེས་བྱ་བ་ལ་སོགས་པའི་ཚིགས་སུ་བཅད་པ་གསུམ་གྱིས་སྔོ་བར་བྱེད་པ་ཡིན་ཏེ། ཁོང་དུ་ཆུད་པར་སླའོ། །ཀློག་པ་དང་ཁ་ཏོན་གྱིས་རྒྱས་ཤིང༌། དར་བ་གང་ཡིན་པ་དེ་ལ་དེ་སྐད་ཅེས་བྱའོ། །དགེ་འདུན་མཐུན་པ་དང༌། དགེ་འདུན་མཉམ་པ་ཉིད་དང༌། དགེ་འདུན་དོན་ཡང་འགྲུབ་པར་ཤོག །འགྲུབ་པར་འདོད་པའི་དགེ་སློང་རྣམས་ཞེས་བྱ་བ་ལ་སོགས་པའི་ཚིགས་སུ་བཅད་པ་ལྔ་ནི་རྟོགས་སླའོ། །གང་གཙོ་བོར་གྱུར་པ་ཡིན་པའི་ཕྱིར་སེམས་ཅན་ཐམས་ཅད་ཀྱིས་སངས་རྒྱས་ཀྱི་མཆོད་པ་སྔོན་དུ་སོང་བའི་སངས་རྒྱས་ཉིད་ཐོབ་པར་བྱེད་པའི་ཕྱིར། སེམས་ཅན་ཀུན་གྱིས་ལན་མང་དུ་ཞེས་བྱ་བའི་ཚིགས་སུ་བཅད་པས་སྔོ་བར་བྱེད་པ་ཡིན་ཏེ། རྟོགས་སླའོ། །རང་སངས་རྒྱས་དང་ཉན་ཐོས་གཟུང་བར་བྱ་བའི་ཕྱིར་དེ་བཞིན་ཞེས་བྱ་བ་ལ་སོགས་པ་སྨོས་སོ། །དེ་ལྟར་གཞན་གྱི་དོན་གྲུབ་པའི་ཕྱིར་དགེ་བ་ཡོངས་སུ་བསྔོས་ནས། ད་ནི་རང་གི་དོན་སྒྲུབ་པའི་ཕྱིར། བདག་ཀྱང་ཞེས་བྱ་བ་ལ་སོགས་པ་ཚིགས་སུ་བཅད་པ་དྲུག་གིས་ཡོངས་སུ་སྔོ་བར་བྱེད་པ་ཡིན་ཏེ། ཁོང་དུ་ཆུད་པར་སླའོ། །གཞན་དོན་ཕུན་སུམ་ཚོགས་པའི་རང་གི་དོན་ཕུན་སུམ་ཚོགས་པ་སྔོན་དུ་སོང་བ་ཅན་ཡིན་པས། གཙོ་བོ་ཉིད་ཡིན་པའི་ཕྱིར་གཞན་གྱི་དོན་དུ་ཡོངས་སུ་བསྔོ་བ་སྔར་བསྟན་ནས། བསྟན་པ་གནས་པའི་ཕྱིར། འགྲོ་བའི་སྡུག་བསྔལ་སྨན་གཅིག་པུ། །ཞེས་བྱ་བ་ལ་སོགས་པ་ཡོངས་སུ་སྔོ་
བར་བྱེད་པ་ཡིན་ཏེ། ཐམས་ཅད་དུ་བདག་གི་བསོད་ནམས་འདི་ཡིས་ནི། །ཞེས་བྱ་བ་དང་སྦྱར་རོ། །གཞན་གྱི་དོན་དུ་ལེགས་པར་ཡོངས་སུ་བསྔོ་བ་རྫོགས་ནས། དད་པ་མངོན་པར་འཕེལ་བ་ཅན་གྱིས་དགེ་བའི་བཤེས་གཉེན་ལ། གང་གི་དྲིན་གྱིས་དགེ་བློ་འབྱུང༌། །ཞེས་བྱ་བ་ལ་སོགས་པས་ཕྱག་འཚལ་བ་ཡིན་ཏེ། དགེ་བའི་བློ་སྟེ། བྱང་ཆུབ་ཀྱི་སེམས་འབའ་ཞིག་ཡོད་པར་མ་ཟད་ཀྱི། འབྱུང་ཞིང་འཕེལ་བར་བྱེད་པར་ཡང་འགྱུར་རོ། །བྱང་ཆུབ་སེམས་དཔའི་སྤྱོད་འཇུག་གི །ལེགས་པར་སྦྱར་བའི་དགེ་བ་ཡིས། །འགྲོ་བ་འདུལ་དང་ལྡན་བཞིན་དུ། །བྱང་ཆུབ་སེམས་གྱུར་དགའ་བར་ཤོག །དཔལ་ལྡན་བཀྲ་ཤིས་རྣ་བས་གསོལ་བཏབ་ནས། །བདག་གིས་འདི་ཡི་ལེགས་སྦྱར་བྱས་པ་ལ། །མཁས་པ་རྣམས་ཀྱིས་དཔྱད་འཁྲུལ་ཡོད་ན་ནི། །ཡོན་ཏན་དམ་པའི་བློ་ཅན་གྱིས་བཟོད་མཛོད། །ཤོ་ལོ་ཀ་སྟོང་ཕྲག་གཅིག་དང་ནི། །དགུ་བརྒྱ་བདུན་ཅུ་རྩ་ལྔ་ཞེས། །གྲངས་ཉིད་ཀྱིས་ནི་ལེགས་བགྲངས་ནས། །དགེ་བའི་ལྷ་ཡིས་བྱས་པ་ཡིན། །བྱང་ཆུབ་སེམས་དཔའི་སྤྱོད་པ་ལ་འཇུག་པའི་ལེགས་པར་སྦྱར་བ་ལས་ཡོངས་སུ་བསྔོ་བ་བསྟན་པ་སྟེ་ལེའུ་བཅུ་པའོ།། །།རྒྱ་གར་གྱི་མཁན་པོ་ཤྲཱི་ཀུ་མཱ་ར་དང༌། །ཞུ་ཆེན་གྱི་ལོ་ཙཱ་བ་དགེ་བའི་བློ་གྲོས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ། །