འཇིག་རྟེན་གཞགས་པ།

---

^{[མ་དཔེ་གཟིགས་ན་འདིར་གནོན།]}

རྒྱ་གར་སྐད་དུ། ལོ་ཀ་པྲ་ཛྙཱ། བོད་སྐད་དུ། འཇིག་རྟེན་གཞག་པ། བམ་པོ་དང་པོ། བཅོམ་ལྡན་འདས་ཤཱཀྱ་ཐུབ་པ་ལ་ཕྱག་འཚལ་ལོ། །དེ་ནས། སྟོང་རྣམས་དང་ནི་རོལ་མཚོ་དང༌། །ངན་སོང་གསུམ་དང་གླིང་དང་ཤིང༌། །དགའ་ཚལ་དང་ནི་མཁའ་ལྡིང་དང༌། །རྒྱལ་ཆེན་གྲོང་དང་འདུས་པ་རྣམས། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་འཇིག་རྟེན་གྱི་ཁམས་ནི་གསུམ་པོ་འདི་དག་ཡིན་ཏེ། གང་དག་ཡིན་ཞེ་ན། འདི་ལྟ་སྟེ། སྟོང་ཆུང་དུའི་འཇིག་རྟེན་གྱི་ཁམས་དང༌། སྟོང་གཉིས་པ་བར་མའི་འཇིག་རྟེན་གྱི་ཁམས་དང༌། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སོ། །སྟོང་ཆུང་དུའི་འཇིག་རྟེན་གྱི་ཁམས་གང་ཞེ་ན། སྟོང་གསུམ་གྱི་འཇིག་རྟེན་གྱི་ཁམས་ན་ཉི་མ་རྣམ་པར་སྣང་བ་རྣམས་ཀུན་དུ་འཁོར་ཞིང་ཕྱོགས་སྣང་བར་

---

^{[མ་དཔེ་གཟིགས་ན་འདིར་གནོན།]}

བྱེད་པ་ཅི་ཡོད་པ་དེ་ཉིད་ཀྱི་ཡིན་ཏེ། ཟླ་བ་སྟོང་དང༌། ཉི་མ་སྟོང་དང༌། རིའི་རྒྱལ་པོ་རི་རབ་སྟོང་དང༌། ཤར་གྱི་ལུས་འཕགས་པོ་སྟོང་དང༌། །ལྷོའི་འཛམ་བུའི་གླིང་སྟོང་དང༌། །ནུབ་ཀྱི་བ་ལང་སྤྱོད་སྟོང་དང༌། །བྱང་གི་སྒྲ་མི་སྙན་སྟོང་དང༌། །རྒྱལ་ཆེན་བཞི་པའི་ལྷའི་རིས་སྟོང་དང༌། །སུམ་ཅུ་རྩ་གསུམ་པ་སྟོང་དང༌། །འཐབ་བྲལ་བ་སྟོང་དང༌། དགའ་ལྡན་པ་སྟོང་དང༌། འཕྲུལ་དགའ་བ་སྟོང་དང༌། གཞན་འཕྲུལ་དབང་བྱེད་པ་སྟོང་དང༌། ཚངས་པའི་འཇིག་རྟེན་སྟོང་སྟེ། དགེ་སློང་དག་འདི་ནི་སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ཞེས་བྱའོ། །སྟོང་གཉིས་པ་བར་མའི་འཇིག་རྟེན་གྱི་ཁམས་གང་ཞེ་ན། སྟོང་ཆུང་དུའི་འཇིག་རྟེན་གྱི་ཁམས་སྟོང་གང་ཡིན་པ་དེ་ནི་སྟོང་གཉིས་པ་བར་མའི་འཇིག་རྟེན་གྱི་ཁམས་ཞེས་བྱའོ། །སྟོང་གསུམ་གྱི་སྟོང་ཆེན་པོའི་ཁམས་གང་ཞེ་ན། དགེ་སློང་དག་སྟོང་གཉིས་པ་བར་མའི་འཇིག་རྟེན་གྱི་ཁམས་སྟོང་གང་ཡིན་པ་དེ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཞེས་བྱའོ།། དགེ་སློང་དག་དེ་ལྟ་བུའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྣམས་ཤར་ཕྱོགས་སུ་མཐའ་མེད་ཅིང་མུ་མེད་ལ། འཇིག་པའམ། ཞིག་པར་གནས་ཤིང༌། ཆགས་པའམ་ཆགས་པར་གནས་ཏེ། གཞན་འཇིག་ཅིང་

---

^{[མ་དཔེ་གཟིགས་ན་འདིར་གནོན།]}

གཞན་ཞིག་པར་གནས་ལ། གཞན་ཆགས་ཤིང་གཞན་འཆགས་པར་གནས་སོ། །དགེ་སློང་དག་འདི་ལྟ་བུར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལྷོ་དང༌། ནུབ་དང༌། བྱང་གི་ཕྱོགས་སུ་མཐའ་མེད་ཅིང་མུ་མེད་ལ། འཇིག་པའམ། ཞིག་པར་གནས་ཤིང༌། ཆགས་པ་འམ་འཆགས་པར་གནས་ཏེ། གཞན་འཇིག་ཅིང་གཞན་ཞིག་པར་གནས་ལ། གཞན་ཆགས་ཤིང་གཞན་འཆགས་པར་གནས་སོ། །དགེ་སློང་དག་ནམ་མཁའ་ལ་ཆར་པའི་འབྲུ་ཤིང་རྟའི་སྲོག་ཤིང་ཙམ་འབབ་སྟེ། ཆུའི་རྒྱུན་རྣམས་རབ་ཏུ་འབབ་པ་ན་བར་ཆད་མེད་པ་དེ་བཞིན་དུ། དགེ་སློང་དག་ངས་ལྷའི་མིག་རྣམ་པར་དག་པ་མི་ལས་འདས་པས་ཤར་ཕྱོགས་སུ་དེ་ལྟ་བུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་མཐའ་མེད་ཅིང་མུ་མེད་པ། གཞན་འཇིག་པའམ་ཞིག་པར་གནས་ཤིང༌། ཆགས་པའམ་འཆགས་པར་གནས་ལ། གཞན་འཇིག་ཅིང་གཞན་ཞིག་པར་གནས་ལ། གཞན་ཆགས་ཤིང་གཞན་འཆགས་པར་གནས་པ་དང༌། དེ་བཞིན་དུ་ལྷོ་དང༌། ནུབ་དང༌། བྱང་ཕྱོགས་སུ་དེ་སྙེད་ཀྱི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྣམས་མཐའ་མེད་ཅིང་མུ་མེད་ལ་འཇིག་པའམ། ཞིག་པར་གནས་ཤིང༌། ཆགས་པའམ་འཆགས་པར་གནས་ཏེ། གཞན་འཇིག་ཅིང་གཞན་ཞིག་པར་གནས་ལ། གཞན་འཆགས་ཤིང་གཞན་ཆགས་པར་གནས་པ་དག་ཀྱང་མཐོང་ངོ་ཞེས་བཀའ་སྩལ་ནས། བཅོམ་ལྡན་འདས་ནང་དུ་ཡང་དག་འཇོག་པའི་ཕྱིར་གནས་ཁང་དུ་གཤེགས་སོ། །དེའི་ཚེ་ན། ཚེ་དང་ལྡན་པ་མཽད་གལ་ཡ་ན་ཆེན་པོ་འཁོར་དེ་ཉིད་ཀྱི་ནང་དུ་འདུས་པར་གྱུར་ཏེ་འདུག་གོ །དེ་ནས་ཚེ་དང་ལྡན་པ་མཽད་གལ་ཡ་ན་ཆེན་པོས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་ཇི་ཙམ་དུ་བཅོམ་ལྡན་འདས་ཀྱིས་ལེགས་པར་བསྟན་པ་དང༌། འདི་ལྟར་ཤིང་རྟའི་སྲོག་ཤིང་གི་དཔེས་བསྟན་པ་ལ་ནི་ལེགས་ཏེ་ངོ་མཚར་ཏོ། །དེ་ལ་སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་རི་ཆེན་པོ་ཉིས་སྟོང་ཡོད་དེ། རིའི་རྒྱལ་པོ་རི་རབ་སྟོང་དང༌། ཁོར་ཡུག་གི་རི་སྟོང་རྣམས་སོ། །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་རྒྱ་མཚོ་ཆེན་པོ་ཉིས་སྟོང་ཡོད་དེ། ནང་གི་རྒྱ་མཚོ་ཆེན་པོ་སྟོང་དང༌།

---

^{[མ་དཔེ་གཟིགས་ན་འདིར་གནོན།]}

ཕྱི་རོལ་གྱི་རྒྱ་མཚོ་ཆེན་པོ་སྟོང་རྣམས་སོ། །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་རི་སུམ་སྟོང་ཡོད་དེ། སེམས་ཅན་དམྱལ་བ་སྟོང་དང༌། དུད་འགྲོ་སྟོང་དང༌། ཡི་དྭགས་སྟོང་རྣམས་སོ། །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་གླིང་ཆེན་པོ་བཞི་སྟོང་ཡོད་དེ། ཤར་གྱི་ལུས་འཕགས་པོ་སྟོང་དང༌། ལྷོའི་འཛམ་བུ་གླིང་སྟོང་དང༌། ནུབ་ཀྱི་བ་ལང་སྤྱོད་སྟོང་དང༌། བྱང་གི་སྒྲ་མི་སྙན་སྟོང་རྣམས་སོ། །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་ཤིང་ཆེན་པོ་བཞི་སྟོང་ཡོད་དེ། འཛམ་བུའི་གླིང་པའི་ཤིང་རྒྱ་མཚོའི་འགྲམ་གྱི་ཤལ་མ་ལི་ཆེན་པོ་སྟོང་དང༌། ལྷ་མ་ཡིན་གྱི་རིས་ཀྱི་ཙི་ཏྲ་པ་ཏ་ལི་སྟོང་དང༌། སུམ་ཅུ་རྩ་གསུམ་པའི་ས་བརྟོལ་སྟོང་རྣམས་སོ། །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་ཀླུའི་རིགས་བཞི་སྟོང་ཡོད་དེ། རིགས་སྒོ་ང་ལས་སྐྱེ་བ་སྟོང་དང༌། མངལ་ནས་སྐྱེ་བ་སྟོང་དང༌། དྲོད་གཤེར་ལས་སྐྱེ་བ་སྟོང་དང༌། རྫུས་ཏེ་སྐྱེ་བ་སྟོང་རྣམས་སོ། །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་ནམ་མཁའ་ལྡིང་གི་རིགས་བཞི་སྟོང་ཡོད་དེ། ནམ་མཁའ་ལྡིང་གི་རིགས་སྒོ་ང་ལས་སྐྱེ་བ་སྟོང་དང༌། མངལ་ནས་སྐྱེ་བ་སྟོང་དང༌། དྲོད་གཤེར་ལས་སྐྱེ་བ་སྟོང་དང༌། རྫུས་ཏེ་སྐྱེ་བ་སྟོང་རྣམས་སོ། །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་རྒྱལ་པོ་ཆེན་པོ་བཞི་སྟོང་ཡོད་དེ། ཡུལ་འཁོར་སྲུང་སྟོང་དང༌། འཕགས་སྐྱེས་པོ་སྟོང་དང༌། མིག་མི་བཟང་སྟོང་དང༌། རྣམ་ཐོས་ཀྱི་བུ་སྟོང་རྣམས་སོ། །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་འགྲོ་བ་ལྔ་སྟོང་ཡོད་དེ། སེམས་ཅན་དམྱལ་བའི་འགྲོ་བ་སྟོང་དང༌། དུད་འགྲོ་དང། ཡི་དགས་དང༌། ལྷ་དང་མིའི་འགྲོ་བ་སྟོང་རྣམས་སོ། །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་འདུན་ས་ཆེན་པོ་ཉིས་སྟོང་ཡོད་དེ། ལྷའི་འདུན་ས་ཆོས་བཟངས་སྟོང་དང༌། ལྷ་མ་ཡིན་གྱི་འདུན་ས་ནོར་བཟངས་ཞེས་བྱ་བ་སྟོང་རྣམས་སོ། །འཇིག་རྟེན་གཞག་པ་ལས་ཚིགས་དང་པོའོ། །མདོ་ལས། སྐྱེ་གནས་རི་དང་རོལ་མཚོ་དང༌། །དེ་བཞིན་སེམས་ཅན་དམྱལ་བརྒྱད་གཞན། །སེམས་ཅན་གནས་དགུ་རབ་བཤད་དེ། །ལས་ལམ་བཅུ་པོ་དེ་བཞིན་ནོ། །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་འདོད་པའི་སྐྱེ་གནས་གསུམ་ཡོད་དེ། གསུམ་གང་

---

^{[མ་དཔེ་གཟིགས་ན་འདིར་གནོན།]}

གང་ཞེ་ན། སེམས་ཅན་འདོད་པ་ཉེ་བར་གནས་པ་དག་ཡོད་དེ། གང་དག་འདོད་པ་ཉེ་བར་གནས་པ་རྣམས་ལ་དབང་ཕྱུག་གིས་དབང་བྱེད་པ་དག་སྟེ། འདི་ལྟ་སྟེ། མི་ཁ་ཅིག་དང༌། ལྷ་རྣམས་སོ། །འདི་ནི་འདོད་པའི་སྐྱེ་གནས་དང་པོའོ། །སེམས་ཅན་འདོད་པས་སྤྲུལ་པ་དག་ཡོད་དེ། གང་དག་འདོད་པས་སྤྲུལ་པ་དག་ལ་དབང་ཕྱུག་གིས་དབང་བྱེད་པ་དག་སྟེ། འདི་ལྟ་སྟེ། འཕྲུལ་དགའི་ལྷ་རྣམས་སོ། །འདི་ནི་འདོད་པའི་སྐྱེ་གནས་གཉིས་པའོ། །སེམས་ཅན་འདོད་པའི་སྤྲུལ་པ་གཞན་དག་ཡོད་དེ། །གང་དག་འདོད་པ་གཞན་གྱིས་སྤྲུལ་པ་རྣམས་ལ་དབང་ཕྱུག་གིས་དབང་བྱེད་པ་དག་སྟེ། འདི་ལྟ་སྟེ། གཞན་འཕྲུལ་དབང་བྱེད་ཀྱི་ལྷ་རྣམས་སོ། །འདི་ནི་འདོད་པའི་སྐྱེ་གནས་གསུམ་པའོ། །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་བདེ་བའི་སྐྱེ་གནས་གསུམ་ཡོད་དེ། སེམས་ཅན་གང་དག་ལུས་འདི་ཉིད་ལ་དབེན་པ་ལས་སྐྱེས་པའི་དགའ་བ་དང་བདེ་བ་ལས་བརླན་པར་བྱེད་ཅིང་ཡོངས་སུ་བརླན་པར་བྱེད་དེ། ཡོངས་སུ་ཚིམ་པར་བྱེད་ཅིང་ཡོངས་སུ་ཁྱབ་པར་བྱེད་པ་དག་ཡོད་དོ། །དེ་དག་ལུས་འདི་ཉིད་ལ་དབེན་པ་ལས་སྐྱེས་པའི་དགའ་བ་དང༌། བདེ་བས་བརླན་པར་བྱས་ཤིང་ཡོངས་སུ་བརླན་པར་བྱས་ཏེ། ཡོངས་སུ་ཚིམ་པར་བྱས་ཤིང་ཡོངས་སུ་ཁྱབ་པར་བྱས་ནས་བདེ་བར་རེག་པ་ལ་གནས་སོ། །དེ་དག་བདེ་བ་དེ་དང༌། བདེ་བ་ལ་གནས་པ་དེས་ཚེ་རིང་ཞིང་ཡུན་རིང་པོར་གནས་ཏེ། འདི་ལྟ་སྟེ། ཚངས་རིས་ཀྱི་ལྷ་རྣམས་སོ། །འདི་ནི་བདེ་བའི་སྐྱེ་གནས་དང་པོའོ། །སེམས་ཅན་གང་དག་ལུས་འདི་ཉིད་ལ་ཏིང་ངེ་འཛིན་ལས་སྐྱེས་པའི་དགའ་བ་དང༌། བདེ་བས་བརླན་པར་བྱེད་ཅིང་ཡོངས་སུ་བརླན་པར་བྱེད་དེ་ཡོངས་སུ་ཚིམ་པར་བྱེད་ཅིང་ཡོངས་སུ་ཁྱབ་པར་བྱེད་པ་དག་ཡོད་དོ། །དེ་དག་ལུས་འདི་ཉིད་ལ་ཏིང་ངེ་འཛིན་ལས་སྐྱེས་པའི་དགའ་བ་དང༌། བདེ་བས་བརླན་པར་བྱས་ཤིང་ཡོངས་སུ་བརླན་པར་བྱས་ཏེ། ཡོངས་སུ་ཚིམ་པར་བྱས་ཤིང་ཡོངས་སུ་ཁྱབ་པར་བྱས་ནས་བདེ་བར་རེག་པ་ལ་གནས་སོ། །དེ་དག་བདེ་བ་དེ་དང་བདེ་བ་ལ་གནས་པ་དེས་ཚེ་རིང་ཞིང་ཡུན་རིང་པོར་གནས་ཏེ། འདི་ལྟ་སྟེ། འོད་གསལ་གྱི་ལྷ་རྣམས་སོ། །འདི་ནི་བདེ་བའི་སྐྱེ་གནས་གཉིས་པའོ། །སེམས་ཅན་

---

^{[མ་དཔེ་གཟིགས་ན་འདིར་གནོན།]}

གང་དག་ལུས་འདི་ཉིད་ལ་དགའ་བ་མེད་པའི་བདེ་བས་བརླན་པར་བྱེད་པ་དང༌། ཡོངས་སུ་བརླན་པར་བྱེད་དེ། ཡོངས་སུ་ཚིམ་པར་བྱེད་ཅིང་ཡོངས་སུ་ཁྱབ་པར་བྱེད་པ་དག་ཡོད་དོ། །དེ་དག་ལུས་འདི་ཉིད་ལ་དགའ་བ་མེད་པའི་བདེ་བས་བརླན་པར་བྱས་ཤིང་ཡོངས་སུ་བརླན་པར་བྱས་ཏེ། ཡོངས་སུ་ཚིམ་པར་བྱས་ཤིང་ཡོངས་སུ་ཁྱབ་པར་བྱས་ནས་བདེ་བར་རེག་པ་ལ་གནས་སོ། །དེ་དག་བདེ་བ་དེ་དང་བདེ་བ་ལ་གནས་པ་དེས་ཚེ་རིང་ཞིང་ཡུན་རིང་དུ་གནས་ཏེ་འདི་ལྟ་སྟེ། དགེ་རྒྱས་ཀྱི་ལྷ་རྣམས་སོ། །འདི་ནི་བདེ་བའི་སྐྱེ་གནས་གསུམ་པའོ། །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་གསེར་གྱི་རི་ཆེན་པོ་བདུན་སྟོང་ཡོད་དེ། རིའི་རྒྱལ་པོ་གཉའ་ཤིང་འཛིན་སྟོང་དང༌། གཤོལ་མདའ་འཛིན་སྟོང་དང༌། སེང་ལྡེང་ཅན་སྟོང་དང༌། བལྟ་ན་སྡུག་སྟོང་དང༌། རྟ་རྣ་རི་སྟོང་དང༌། མུ་ཁྱུད་འཛིན་སྟོང་དང༌། རིའི་རྒྱལ་པོ་རྣམ་པར་འདུད་སྟོང་རྣམས་སོ། །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་རོལ་མཚོ་ཆེན་པོ་བདུན་སྟོང་ཡོད་དེ། གཉའ་ཤིང་འཛིན་གྱི་རོལ་མཚོ་སྟོང་དང༌། གཤོལ་མདའ་འཛིན་གྱི་སྟོང་དང༌། སེང་ལྡེང་ཅན་གྱི་སྟོང་དང༌། བལྟ་ན་སྡུག་གི་སྟོང་དང༌། རྟ་རྣ་རིའི་སྟོང་དང༌། མུ་ཁྱུད་འཛིན་གྱི་སྟོང་དང༌། རྣམ་པར་འདུད་ཀྱི་རོལ་མཚོ་སྟོང་རྣམས་སོ། །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་སེམས་ཅན་དམྱལ་བ་ཆེན་པོ་བརྒྱད་སྟོང་ཡོད་དེ། སེམས་ཅན་དམྱལ་བ་ཆེན་པོ་ཡང་སོས་སྟོང་དང༌། ཐིག་ནག་སྟོང་དང༌། བསྡུས་གཞོམ་སྟོང་དང༌། ངུ་འབོད་སྟོང་དང༌། ངུ་འབོད་ཆེན་པོ་སྟོང་དང༌། ཚ་བ་སྟོང་དང༌། རབ་ཏུ་ཚ་བ་སྟོང་དང། སེམས་ཅན་དམྱལ་བ་མནར་མེད་པ་སྟོང་རྣམས་སོ། །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་སེམས་ཅན་གྱི་གནས་དགུ་སྟོང་ཡོད་དོ། །སེམས་ཅན་གཟུགས་ཡོད་པ་ལུས་ཐ་དད་ཅིང་འདུ་ཤེས་ཐ་དད་པ་དག་ཡོད་དེ། འདི་ལྟ་སྟེ། མི་རྣམས་དང༌། ལྷ་ཁ་ཅིག་གོ །འདི་ནི་སེམས་ཅན་གྱི་གནས་དང་པོའོ། །སེམས་ཅན་གཟུགས་ཡོད་པ་ལུས་ཐ་དད་ཅིང་འདུ་ཤེས་གཅིག་པ་དག་ཡོད་དེ། འདི་ལྟ་སྟེ། ཚངས་རིས་ཀྱི་ལྷ་དང་པོ་བྱུང་བ་གང་ཡིན་པ་དེ་དག་གོ །འདི་ནི་སེམས་ཅན་གྱི་གནས་གཉིས་པའོ། །སེམས་ཅན་གཟུགས་ཡོད་པ་ལུས་གཅིག་ལ་འདུ་ཤེས་ཐ་དད་པ་

---

^{[མ་དཔེ་གཟིགས་ན་འདིར་གནོན།]}

དག་ཡོད་དེ། འདི་ལྟ་སྟེ། འོད་གསལ་གྱི་ལྷ་རྣམས་སོ། །འདི་ནི་སེམས་ཅན་གྱི་གནས་གསུམ་པའོ། །སེམས་ཅན་གཟུགས་ཡོད་པ་ལུས་གཅིག་ཅིང་འདུ་ཤེས་གཅིག་པ་དག་ཡོད་དེ། འདི་ལྟ་སྟེ། དགེ་རྒྱས་ཀྱི་ལྷ་རྣམས་སོ། །འདི་ནི་སེམས་ཅན་གྱི་གནས་བཞི་པའོ། །སེམས་ཅན་གཟུགས་ཡོད་པ་འདུ་ཤེས་མེད་ཅིང་འདུ་ཤེས་དང་བྲལ་བ་དག་ཡོད་དེ། འདི་ལྟ་སྟེ། འདུ་ཤེས་མེད་པའི་ལྷ་རྣམས་སོ། །འདི་ནི་སེམས་ཅན་གྱི་གནས་ལྔ་པའོ། །སེམས་ཅན་གཟུགས་མེད་པ་རྣམ་པ་ཐམས་ཅད་དུ་གཟུགས་ཀྱི་འདུ་ཤེས་རྣམས་ལས་ཡང་དག་པར་འདས་ཏེ། ཐོགས་པའི་འདུ་ཤེས་རྣམས་ནུབ་པར་གྱུར་ཅིག་སྣ་ཚོགས་ཀྱི་འདུ་ཤེས་རྣམས་ཡིད་ལ་མི་བྱེད་པས་ནམ་མཁའ་མཐའ་ཡས་སོ་སྙམ་ནས་ནམ་མཁའ་མཐའ་ཡས་སྐྱེ་མཆེད་རྫོགས་པར་བྱས་ཏེ་གནས་པ་དག་ཡོད་དེ། འདི་ལྟ་སྟེ། ནམ་མཁའ་མཐའ་ཡས་སྐྱེ་མཆེད་དུ་སྐྱེས་པའི་ལྷ་རྣམས་སོ། །འདི་ནི་སེམས་ཅན་གྱི་གནས་དྲུག་པའོ། །སེམས་ཅན་གཟུགས་མེད་པ་རྣམ་པ་ཐམས་ཅད་དུ་ནམ་མཁའ་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ། རྣམ་པར་ཤེས་པ་མཐའ་ཡས་སོ་སྙམ་ནས་རྣམ་ཤེས་མཐའ་ཡས་སྐྱེ་མཆེད་རྫོགས་པར་བྱས་ཏེ་གནས་པ་དག་ཡོད་དེ། འདི་ལྟ་སྟེ། རྣམ་ཤེས་མཐའ་ཡས་སྐྱེ་མཆེད་དུ་སྐྱེས་པའི་ལྷ་རྣམས་སོ། །འདི་ནི་སེམས་ཅན་གྱི་གནས་བདུན་པའོ། །སེམས་ཅན་གཟུགས་མེད་པ་གང་དག་རྣམ་པ་ཐམས་ཅད་དུ་རྣམ་ཤེས་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ། ཅི་ཡང་མེད་དོ་སྙམ་ནས་ཅི་ཡང་མེད་པའི་སྐྱེ་མཆེད་རྫོགས་པར་བྱས་ཏེ་གནས་པ་དག་ཡོད་དེ། འདི་ལྟ་སྟེ། ཅི་ཡང་མེད་པའི་སྐྱེ་མཆེད་དུ་སྐྱེས་པའི་ལྷ་རྣམས་སོ། །འདི་ནི་སེམས་ཅན་གྱི་གནས་བརྒྱད་པའོ། །སེམས་ཅན་གཟུགས་མེད་པ་རྣམ་པ་ཐམས་ཅད་དུ་ཅི་ཡང་མེད་པའི་སྐྱེ་མཆེད་ལས་ཡང་དག་པར་འདས་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་རྫོགས་པར་བྱས་ཏེ་གནས་པ་དག་ཡོད་དེ། འདི་ལྟ་སྟེ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དུ་སྐྱེས་པའི་ལྷ་རྣམས་སོ། །འདི་ནི་སེམས་ཅན་གྱི་གནས་དགུ་པའོ། །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན། མི་དགེ་བ་བཅུའི་ལས་

---

^{[མ་དཔེ་གཟིགས་ན་འདིར་གནོན།]}

ཀྱི་ལམ་དག་ཡོད་དེ། སྲོག་གཅོད་པ་དང༌། མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་འཁྱལ་པ་དང༌། བརྣབ་སེམས་དང༌། གནོད་སེམས་དང༌། ལོག་པར་ལྟ་བ་རྣམས་སོ། །སྲོག་གཅོད་པ་ཤས་ཆེར་ཀུན་དུ་བསྟེན་ཅིང་བསྒོམས་ཏེ། ལན་མང་དུ་བྱས་པས་སེམས་ཅན་དམྱལ་བ་ཆེན་པོ་མནར་མེད་པར་སྐྱེ་བར་འགྱུར་རོ། །དེ་བས་ཆེས་ཤས་ཆུང་བ་དང༌། དེ་བས་ཆེས་ཡང་བས་ནི་ཚ་བར་རོ། །དེ་བས་ཆེས་ཤས་ཆུང་བ་དང༌། དེ་བས་ཆེས་ཡང་བས་ནི་དུ་འབོད་ཆེན་པོར་རོ། །དེ་བས་ཆེས་ཤས་ཆུང་བ་དང༌། དེ་བས་ཆེས་ཡང་བས་ནི་དུ་འབོད་དུའོ། །དེ་བས་ཆེས་ཤས་ཆུང་བ་དང༌། དེ་བས་ཆས་ཡང་བས་ནི་བསྡུས་གཞོམ་དུའོ། །དེ་བས་ཆེས་ཤས་ཆུང་བ་དང༌། དེ་བས་ཆེས་ཡང་བས་ནི་ཐིག་ནག་ཏུའོ། །དེ་བས་ཆེས་ཤས་ཆུང་བ་དང༌། དེ་བས་ཆེས་ཡང་བས་ནི་སེམས་ཅན་དམྱལ་བ་ཆེན་པོ་ཡང་སོས་སུ་སྐྱེ་བར་འགྱུར་རོ། །མ་བྱིན་པར་ལེན་པ་ཤས་ཆེར་ཀུན་ཏུ་བསྟེན་ཅིང་བསྒོམས་ཏེ། ལན་མང་དུ་བྱས་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་འཁྱལ་པ་དང༌། བརྣབ་སེམས་དང༌། གནོད་སེམས་དང༌། ལོག་པར་ལྟ་བ་ཤས་ཆེར་ཀུན་ཏུ་བསྟེན་ཅིང་བསྒོམས་ཏེ། ལན་མང་དུ་བྱས་པས་ནི་སེམས་ཅན་དམྱལ་བ་ཆེན་པོ་མནར་མེད་པར་སྐྱེ་བར་འགྱུར་རོ། །དེ་བས་ཆེས་ཤས་ཆུང་བ་དང༌། དེ་བས་ཆེས་ཡང་བས་ནི་རབ་ཏུ་ཚ་བར་རོ། །དེ་བས་ཤས་ཆུང་བ་དང༌། དེ་བས་ཆེས་ཡང་བས་ནི་ཚ་བར་རོ། །དེ་བས་ཆེས་ཤས་ཆུང་བ་དང༌། དེ་བས་ཆེས་ཡང་བས་ནི་དུ་འབོད་ཆེན་པོར་རོ། །དེ་བས་ཆེས་ཤས་ཆུང་བ་དང༌། དེ་བས་ཆེས་ཡང་བས་ནི་དུ་འབོད་དུའོ། །དེ་བས་ཆེས་ཤས་ཆུང་བ་དང༌། དེ་བས་ཆེས་ཡང་བས་ནི་བསྡུས་གཞོམ་དུའོ། །དེ་། བས་ཆེས་ཤེས་ཆུང་བ་དང༌། དེ་བས་ཆེས་ཡང་བས་ནི་ཐིག་ནག་ཏུའོ། །དེ་བས་ཆེས་ཤས་ཆུང་བ་དང༌། དེ་བས་ཆེས་ཡང་བས་ནི་སེམས་ཅན་དམྱལ་བ་ཆེན་པོ་ཡང་སོས་སུ་སྐྱེ་བར་འགྱུར་རོ། །འཇིག་རྟེན་གཞག་པ་ལས་ཚིགས་གཉིས་པའོ། །མདོ་ལ། མཁའ་ལྡིང་ལས་

---

^{[མ་དཔེ་གཟིགས་ན་འདིར་གནོན།]}

ལམ་བཅུ་པོ་དང༌། །མྱོང་བ་དང་ནི་བཀྲེས་དང་ཟས། །བདུད་རྩི་ཕྱིས་ཆར་པ་དང༌། །མུ་གེ་བདེ་དང་བཅུ་ཚན་ནོ། །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་ཀླུའི་རིགས་བཞི་སྟོང་རྒྱ་མཚོ་ཆེན་པོ་ན་གནས་སོ། །ནམ་མཁའ་ལྡིང་གི་རིགས་བཞི་སྟོང་ཤིང་ཤལ་མ་ལི་མཐོན་པོ་ལ་གནས་ཏེ། སྒོ་ང་ལས་སྐྱེ་བ་སྟོང་དང༌། མངལ་ནས་སྐྱེ་བ་སྟོང་དང༌། དྲོད་གཤེར་ལས་སྐྱེ་བ་སྟོང་དང༌། རྫུས་ཏེ་སྐྱེ་བ་སྟོང་རྣམས་སོ། །ནམ་མཁའ་ལྡིང་སྒོ་ང་ལས་སྐྱེ་བ་ནི་བཟའ་བའི་ཕྱིར་ཀླུ་སྒོ་ང་ལས་སྐྱེ་བ་འབྱིན་པར་བྱེད་དེ། མངལ་ནས་སྐྱེ་བ་མ་ཡིན། དྲོད་གཤེར་ལས་སྐྱེ་བ་མ་ཡིན། རྫུས་ཏེ་སྐྱེ་བ་མ་ཡིན་ནོ། །དེ་ཅིའི་ཕྱིར་ཞེ་ན། ཅི་སྟེ་དེ་ལེན་ན། དེ་ཉིད་ཐལ་བ་བཞིན་དུ་བྱེད་པར་འགྱུར་བའི་ཕྱིར་རོ། །ནམ་མཁའ་ལྡིང་མངལ་ནས་སྐྱེས་པ་ནི་བཟའ་བའི་ཕྱིར་ཀླུ་སྒོ་ང་ལས་སྐྱེ་བ་དང༌། མངལ་ནས་སྐྱེ་བ་འབྱིན་པར་བྱེད་དེ། དྲོད་གཤེར་ལས་སྐྱེ་བ་མ་ཡིན། །རྫུས་ཏེ་སྐྱེ་བ་མ་ཡིན་ནོ། །དེ་ཅིའི་ཕྱིར་ཞེ་ན། ཅི་སྟེ་དེ་ལེན་ན། དེ་ཉིད་ཐལ་བ་བཞིན་དུ་བྱེད་པར་འགྱུར་བའི་ཕྱིར་རོ། །ནམ་མཁའ་ལྡིང་དྲོད་གཤེར་ལས་སྐྱེ་བ་ནི་བཟའ་བའི་ཕྱིར་ཀླུ་སྒོ་ང་ལས་སྐྱེ་བ་དང༌། མངལ་ནས་སྐྱེ་བ་དང༌། དྲོད་གཤེར་ལས་སྐྱེ་བ་འབྱིན་པར་བྱེད་དེ། རྫུས་ཏེ་སྐྱེ་བ་མ་ཡིན་ནོ། །དེ་ཅིའི་ཕྱིར་ཞེ་ན། ཅི་སྟེ་དེ་ལེན་ན་དེ་ཉིད་ཐལ་བ་བཞིན་དུ་བྱེད་པར་འགྱུར་བའི་ཕྱིར་རོ། །ནམ་མཁའ་ལྡིང་རྫུས་ཏེ་སྐྱེ་བ་ནི་བཟའ་བའི་ཕྱིར་ཀླུ་སྒོ་ང་ལས་སྐྱེ་བ་དང༌། མངལ་ནས་སྐྱེ་བ་དང༌། དྲོད་གཤེར་ལས་སྐྱེ་བ་དང༌། རྫུས་ཏེ་སྐྱེ་བ་འབྱིན་པར་བྱེད་དོ། །ཀླུ་ལ་ཀླུ་ཆེན་པོ་བསྐལ་པར་གནས་ཤིང་ས་འཛིན་པ་དག་ཡོད་དོ། །དེ་དག་ཀྱང་གང་ཞེ་ན། འདི་ལྟ་སྟེ། ཀླུའི་རྒྱལ་པོ་དགའ་བོ་དང༌། ཉེ་དགའ་གཉིས་དང༌། ཀླུའི་རྒྱལ་པོ་རྟས་རྒྱལ་དང༌། ཀླུའི་རྒྱལ་པོ་བཏང་བཟུང་དང༌། ཀླུའི་རྒྱལ་པོ་གཟི་ཅན་དང༌། ཀླུའི་རྒྱལ་པོ་ཡུལ་འཁོར་སྲུང་དང༌། ཀླུའི་རྒྱལ་པོ་ནག་པོ་ཆེན་པོ་དང༌། ཀླུའི་རྒྱལ་པོ་ཨེ་ལེའི་འདབ་མ་རྣམས་ཏེ། འདི་དག་གཞན་ཡང་ཀླུ་ཆེན་པོ་བསྐལ་པར་གནས་ཤིང་ས་འཛིན་པ་ནམ་མཁའ་ལྡིང་དག་གིས་དབྱུང་བར་མི་ནུས་པ་གང་ཡིན་པ་འདི་དག་ནི་ལྷ་དང་ལྷ་མ་ཡིན་གྱི་གཡུལ་མྱོང་བར་བྱེད་ཅིང་སོ་སོར་མྱོང་བར་བྱེད་དེ། ཤེས་ཤིང་རབ་ཏུ་ཤེས་ལ། ཀུན་

---

^{[མ་དཔེ་གཟིགས་ན་འདིར་གནོན།]}

དུ་རབ་ཏུ་ཤེས་སོ། །ཇི་སྐད་དུ། ཤིན་ཏུ་མཐུ་ཆེ་བ་ཡི་ཀླུ་དག་ཡོད། །མ་མཐའ་སྲུང་ཞིང་ཆུ་ན་གནས་པ་སྟེ། །དེ་དག་ལྷ་མིན་དག་དང་གཡུལ་འགྱེད་པས། །འདི་དག་བརྒྱ་བྱིན་གྱི་ནི་དཔུང་ཡང་ཡིན། །སྟོབས་ཀྱང་ཆེ་ཞིང་དུག་ཆེ་ཀླུ་ཡིན་ཏེ། །ཤིན་ཏུ་དྲག་པོ་དགྲ་ཐབས་སྣ་ཚོགས་ཅན། །ལྷ་མིན་རྣམས་དང་ལྷན་ཅིག་གཡུལ་འགྱེད་པས། །དེ་དག་བརྒྱ་བྱིན་གྱི་ནི་དཔུང་ཡང་ཡིན། །ཞེས་ཀྱང་བྱའོ། །བར་གྱི་མདོ་ལ། དགའ་བོ་ཉེར་དགའ་རྟས་རྒྱལ་དང༌། །བཏང་བཟུང་དང་ནི་གཟི་ཅན་དང༌། །ཡུལ་འཁོར་སྲུང་དང་ནག་པོ་ཆེ། །ཨེ་ལེའི་འདབ་མ་ཕྱི་མ་ཡིན། །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་དགེ་བ་བཅུའི་ལས་ཀྱི་ལམ་དག་ཡོད་དེ། སྲོག་གཅོད་པ་སྤོང་བ་དང༌། མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་འཁྱལ་པ་སྤོང་བ་དང༌། བརྣབ་སེམས་མེད་པ་དང༌། གནོད་སེམས་མེད་པ་དང༌། ཡང་དག་པར་ལྟ་བ་རྣམས་སོ། །སྲོག་གཅོད་པ་སྤོང་བ་ཤས་ཆེར་ཀུན་དུ་བསྟེན་ཅིང་བསྒོམས་ཏེ་ལན་མང་དུ་བྱས་པས་ནི་གཞན་འཕྲུལ་དབང་བྱེད་ཀྱི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །དེ་བས་ཆེས་ཤས་ཆུང་བ་དང་དེ་བས་ཆེས་ཡང་བས་ནི་འཕྲུལ་དགའ་བ་རྣམས་སོ། །དེ་བས་ཆེས་ཤས་ཆུང་བ་དང༌། དེ་བས་ཆེས་ཡང་བས་ནི་དགའ་ལྡན་པ་རྣམས་སུའོ། །དེ་བས་ཆེས་ཤས་ཆུང་བ་དང༌། དེ་བས་ཆེས་ཡང་བས་ནི་འཐབ་བྲལ་བ་རྣམས་སུའོ། །དེ་བས་ཆེས་ཤས་ཆུང་བ་དང༌། དེ་བས་ཆེས་ཡང་བས་ནི་སུམ་ཅུ་རྩ་གསུམ་པ་རྣམས་སུའོ། །དེ་བས་ཆེས་ཤས་ཆུང་བ་དང༌། དེ་བས་ཆེས་ཡང་བས་ནི་རྒྱལ་ཆེན་བཞི་པ་རྣམས་སུའོ། །དེ་བས་ཆེས་ཤས་ཆུང་བ་དང༌། དེ་བས་ཆེས་ཡང་བས་ནི་མི་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་འཁྱལ་པ་སྤོང་བ་དང༌། ཆགས་སེམས་མེད་པ་དང༌། གནོད་སེམས་མེད་པ་དང༌། ཡང་དག་པར་ལྟ་བ་ཤས་ཆེར་ཀུན་ཏུ་བསྟེན་ཅིང་བསྒོམས་ཏེ་ལན་མང་དུ་བྱས་པས་ནི་གཞན་འཕྲུལ་དབང་བྱེད་ཀྱི་ལྷ་

---

^{[མ་དཔེ་གཟིགས་ན་འདིར་གནོན།]}

རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །དེ་བས་ཆེས་ཤས་ཆུང་བ་དང༌། དེ་བས་ཆེས་ཡང་བས་ནི་འཕྲུལ་དགའ་བ་རྣམས་སོ། །དེ་བས་ཆེས་ཤས་ཆུང་བ་དང༌། དེ་བས་ཆེས་ཡང་བས་ནི་དགའ་ལྡན་པ་རྣམས་སུའོ། །དེ་བས་ཆེས་ཤས་ཆུང་བ་དང༌། དེ་བས་ཆེས་ཡང་བས་ནི་འཐབ་བྲལ་བ་རྣམས་སུའོ། །དེ་བས་ཆེས་ཤས་ཆུང་བ་དང༌། དེ་བས་ཆེས་ཡང་བས་ནི་སུམ་ཅུ་རྩ་གསུམ་པ་རྣམས་སུའོ། །དེ་བས་ཆེས་ཤས་ཆུང་བ་དང༌། དེ་བས་ཆེས་ཡང་བས་ནི་རྒྱལ་ཆེན་བཞི་པ་རྣམས་སུའོ། །དེ་བས་ཆེས་ཤས་ཆུང་བ་དང༌། དེ་བས་ཆེས་ཡང་བས་ནི་མི་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །ཇི་སྟེ་མི་རྣམས་དང་སྐལ་བ་མཉམ་པར་སྐྱེ་ན་ཡང་སྲོག་གཅོད་པ་སྤོང་བས་ནི་ཚེ་རིང་པོར་འགྱུར་རོ། །མ་བྱིན་པར་ལེན་པ་སྤོང་བས་ནི་ལོངས་སྤྱོད་ཆེན་པོར་འགྱུར་རོ། །འདོད་པ་ལ་ལོག་པར་གཡེམ་བ་སྤོང་བས་ནི་ཆུང་མ་འགྲན་ཟླ་མེད་པར་འགྱུར་རོ།། བརྫུན་དུ་སྨྲ་བ་སྤོང་བས་ནི་སྐུར་པ་མང་བར་མི་འགྱུར་རོ། །ཕྲ་མ་སྤོང་བས་ནི་མཛའ་བོ་དང་འབྱེ་བར་མི་འགྱུར་རོ། །ཚིག་རྩུབ་པོ་སྤོང་བས་ནི་ཡིད་དུ་མི་འོང་བའི་སྒྲ་ཐོས་པར་མི་འགྱུར་རོ། །ཚིག་འཁྱལ་པ་སྤོང་བས་ནི་ཚིག་མཉན་པར་འགྱུར་རོ། །ཆགས་སེམས་མེད་པས་ནི་འདོད་ཆགས་ཆེ་བར་མི་འགྱུར་རོ། །གནོད་སེམས་མེད་པས་ནི་ཞེ་སྡང་ཆེ་བར་མི་འགྱུར་རོ། །ཡང་དག་པའི་ལྟ་བས་ནི་གཏི་མུག་ཆེ་བར་མི་འགྱུར་རོ། །སེམས་ཅན་དམྱལ་བར་མྱོང་བར་འགྱུར་བའི་ལས་རྣམས་ཀྱི་ནང་ན་ནི་ལས་གང་གི་རྣམ་པར་སྨིན་པས་མནར་མེད་པའི་སེམས་ཅན་དམྱལ་བ་ཆེན་པོའི་ཚེའི་ཚད་བསྐལ་པར་ལེན་པ་འདི་མཆོག་ཡིན་ནོ། །དུད་འགྲོ་མྱོང་བར་འགྱུར་བའི་ལས་རྣམས་ཀྱི་ནང་ན་ནི་ལས་གང་གི་རྣམ་པར་སྨིན་པས་ས་སྲུང་གི་བུས་ས་སྲུང་གི་བུ་ཉིད་དང༌། རབ་ཏུ་བརྟན་པས་རབ་ཏུ་བརྟན་པ་ཉིད་ཐོབ་པ་འདི་མཆོག་ཡིན་ནོ། །ཡི་དགས་ཀྱི་སྐྱེ་གནས་སུ་སྐྱེ་བར་འགྱུར་བའི་ལས་རྣམས་ཀྱི་ནང་ན་ནི་ལས་གང་གི་རྣམ་པར་སྨིན་པས་རྒྱལ་པོ་གཤིན་རྗེས་གཤིན་རྗེའི་འཇིག་རྟེན་གྱི་སེམས་ཅན་རྣམས་ཀྱི་རྒྱལ་སྲིད་ཀྱི་དབང་ཕྱུག་ལ་དབང་བྱེད་པ་འདི་ནི་མཆོག་ཡིན་ནོ། །མིའི་སྐྱེ་གནས་མྱོང་བར་འགྱུར་བའི་ལས་རྣམས་ཀྱི་ནང་ན་ནི་ལས་གང་གི་རྣམ་པར་སྨིན་པས་ང་ལས་ནུས་པ་

---

^{[མ་དཔེ་གཟིགས་ན་འདིར་གནོན།]}

ལས་ནུ་ཉིད་དུ་ཐོབ་པ་འདི་མཆོག་ཡིན་ནོ། །རྒྱལ་ཆེན་བཞིའི་རིས་མྱོང་བར་འགྱུར་བའི་ལས་རྣམས་ཀྱི་ནང་ན་ནི་ལས་གང་གི་རྣམ་པར་སྨིན་པས་རྒྱལ་པོ་ཆེན་པོ་བཞི་རྣམས་རྒྱལ་སྲིད་ཀྱི་དབང་ཕྱུག་ལ་དབང་བྱེད་པ་འདི་མཆོག་ཡིན་ནོ། །སུམ་ཅུ་རྩ་གསུམ་མྱོང་བར་འགྱུར་བའི་ལས་རྣམས་ཀྱི་ནང་ན་ནི་ལས་གང་གི་རྣམ་པར་སྨིན་པས་བརྒྱ་བྱིན་གྱིས་བརྒྱ་བྱིན་ཉིད་ཐོབ་པ་འདི་མཆོག་ཡིན་ནོ། །འཐབ་བྲལ་མྱོང་བར་འགྱུར་བའི་ལས་རྣམས་ཀྱི་ནང་ན་ནི་ལས་གང་གི་རྣམ་པར་སྨིན་པས་རབ་འཐབ་བྲལ་ཉིད་ཐོབ་པ་འདི་མཆོག་ཡིན་ནོ། །དགའ་ལྡན་མྱོང་བར་འགྱུར་བའི་ལས་རྣམས་ཀྱི་ནང་ན་ནི་ལས་གང་གི་རྣམ་པར་སྨིན་པས་ཡོངས་སུ་དགའ་ལྡན་གྱིས་ཡོངས་སུ་དགའ་ལྡན་ཉིད་ཐོབ་པ་འདི་མཆོག་ཡིན་ནོ། །འཕྲུལ་དགའ་མྱོང་བར་འགྱུར་བའི་ལས་རྣམས་ཀྱི་ནང་ན་ནི་ལས་གང་གི་རྣམ་པར་སྨིན་པས་རབ་སྤྲུལ་ཉིད་ཐོབ་པ་འདི་མཆོག་ཡིན་ནོ།། གཞན་འཕྲུལ་དབང་བྱེད་མྱོང་བར་འགྱུར་བའི་ལས་རྣམས་ཀྱི་ནང་ན་ནི་ལས་གང་གི་རྣམ་པར་སྨིན་པས་དབང་བྱེད་ཀྱི་དབང་ཉིད་ཐོབ་པ་འདི་མཆོག་ཡིན་ནོ། །ཇི་ལྟར་འཛམ་བུའི་གླིང་གི་མི་རྣམས་ལ་བཀྲེས་པ་དང༌། སྐོམ་པ་ཡོད་པ་བཞིན་དུ་ཤར་གྱི་ལུས་འཕགས་པོ་རྣམས་དང༌། ནུབ་ཀྱི་བ་ལང་སྤྱོད་པ་རྣམས་དང༌། བྱང་གི་སྒྲ་མི་སྙན་པ་རྣམས་དང༌། རྒྱལ་ཆེན་བཞིའི་རིས་ཀྱི་ལྷ་རྣམས་དང༌། སུམ་ཅུ་རྩ་གསུམ་པ་རྣམས་དང༌། འཐབ་བྲལ་བ་རྣམས་དང༌། དགའ་ལྡན་པ་རྣམས་དང༌། འཕྲུལ་དགའ་བ་རྣམས་དང༌། གཞན་འཕྲུལ་དབང་བྱེད་པ་རྣམས་ལ་ཡང་ཡོད་དོ། །དེ་ཕན་ཆད་ལ་ནི་བཀྲེས་པ་དང་སྐོམ་པ་མེད་དོ། །དེ་ལྟར་འཛམ་བུའི་གླིང་གི་མི་རྣམས་ལ་ཁ་ཟས་འདི་ལྟ་སྟེ། འབྲས་ཆན་དང༌། ཟན་དང༌། ཕྱེ་དང༌། ཤ་དང༌། ཁུར་བ་རྣམས་ཡོད་པ་བཞིན་དུ་ཤར་གྱི་ལུས་འཕགས་པོ་དང༌། ནུབ་ཀྱི་བ་ལང་སྤྱོད་ལ་ཡང་ཡོད་དོ། །བྱང་གི་སྒྲ་མི་སྙན་གྱི་མི་རྣམས་ནི་མ་རྨོས་མ་བཏབ་པའི་འབྲས་སཱ་ལུའི་འབྲུ་ཟའོ། །རྒྱལ་ཆེན་བཞིའི་རིས་ཀྱི་ལྷ་རྣམས་ནི་དྲི་ཟའི་ཟས་དང་བདུད་རྩིའི་ཟས་ཟའོ། །རྒྱལ་ཆེན་བཞིའི་ལྷ་རྣམས་ཇི་ལྟ་བ་བཞིན་དུ་སུམ་ཅུ་རྩ་གསུམ་པ་རྣམས་དང༌། འཐབ་བྲལ་བ་རྣམས་དང༌། དགའ་ལྡན་པ་རྣམས་དང༌། འཕྲུལ་

---

^{[མ་དཔེ་གཟིགས་ན་འདིར་གནོན།]}

དགའ་བ་རྣམས་དང༌། གཞན་འཕྲུལ་དབང་བྱེད་ཀྱི་ལྷ་རྣམས་ཀྱང་དེ་བཞིན་ནོ། །དེ་ཡན་ཆད་ལ་ནི་ཁམ་གྱི་ཟས་མེད་དོ། །རྒྱལ་ཆེན་བཞིའི་ལྷ་རྣམས་ཀྱི་བདུད་རྩི་ནི་རྣམ་པ་བཞི་སྟེ། སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམས་སོ། །རྒྱལ་ཆེན་བཞིའི་ལྷ་རྣམས་ཇི་ལྟ་བ་བཞིན་དུ་སུམ་ཅུ་རྩ་གསུམ་པ་རྣམས་དང༌། འཐབ་བྲལ་བ་རྣམས་དང༌། དགའ་ལྡན་བ་རྣམས་དང༌། འཕྲུལ་དགའ་བ་རྣམས་དང༌། གཞན་འཕྲུལ་དབང་བྱེད་པ་རྣམས་ཀྱང་དེ་བཞིན་ནོ། །ཚངས་རིས་པ་རྣམས་ལ་ནི་མེད་དོ། །དེ་ཡན་ཆད་ལ་ཡང་མེད་དོ། །ཇི་ལྟར་འཛམ་བུའི་གླིང་པ་རྣམས་ལ་བཤང་བ་དང་གཅི་བ་ཡོད་པ་བཞིན་དུ་ཤར་གྱི་ལུས་འཕགས་པོ་རྣམས་དང༌། ནུབ་ཀྱི་བ་ལང་སྤྱོད་པ་རྣམས་དང༌། བྱང་གི་སྒྲ་མི་སྙན་པ་རྣམས་ལ་ཡང་ཡོད་དོ། །རྒྱལ་ཆེན་བཞིའི་ལྷ་རྣམས་ལ་ནི་མེད་དོ། །དེ་ཡན་ཆད་ལ་ཡང་མེད་དོ། །ཇི་ལྟར་འཛམ་བུའི་གླིང་གི་མི་རྣམས་ལ་ཆར་འབབ་མཁས་པ་དང༌། ཆར་འབབ་མི་མཁས་པ་ཡོད་པ་བཞིན་དུ་ཤར་གྱི་ལུས་འཕགས་པ་རྣམས་དང༌། ནུབ་ཀྱི་བ་ལང་སྤྱོད་པ་རྣམས་ལ་ཡང་ཡོད་དོ། །བྱང་གི་སྒྲ་མི་སྙན་པ་རྣམས་དང༌། རྒྱལ་ཆེན་བཞིའི་ལྷ་རྣམས་ལ་ནི་མེད་དོ། །དེ་ཡན་ཆད་ལ་ཡང་མེད་དོ། །ཇི་ལྟར་འཛམ་བུའི་གླིང་གི་མི་རྣམས་ལ་ལོ་ལེགས་པ་དང༌། མུ་གེ་ཡོད་པ་བཞིན་དུ་ཤར་གྱི་ལུས་འཕགས་པོ་དང༌། ནུབ་ཀྱི་བ་ལང་སྤྱོད་པ་རྣམས་ལ་ཡང་ཡོད་དོ། །བྱང་གི་སྒྲ་མི་སྙན་པ་རྣམས་དང༌། རྒྱལ་ཆེན་བཞིའི་ལྷ་རྣམས་ལ་ནི་མེད་དོ། །དེ་ཡན་ཆད་ལ་ཡང་མེད་དོ། །ཇི་ལྟར་འཛམ་བུའི་གླིང་གི་མི་རྣམས་ལ་འཇིགས་པ་དང༌། བདེ་བ་ཡོད་པ་བཞིན་དུ་ཤར་གྱི་ལུས་འཕགས་པོ་རྣམས་དང༌། ནུབ་ཀྱི་བ་ལང་སྤྱོད་པ་རྣམས་ལ་ཡང་ཡོད་དོ། །བྱང་གི་སྒྲ་མི་སྙན་གྱི་མི་རྣམས་ལ་ནི་མེད་དོ། །རྒྱལ་ཆེན་བཞིའི་ལྷ་རྣམས་དང༌། སུམ་ཅུ་རྩ་གསུམ་པ་རྣམས་དང༌། འཐབ་བྲལ་བ་རྣམས་དང༌། དགའ་ལྡན་པ་རྣམས་དང༌། འཕྲུལ་དགའ་བ་རྣམས་དང༌། གཞན་འཕྲུལ་དབང་བྱེད་པ་རྣམས་ལ་ཡོད་དོ། །ཚངས་རིས་པ་རྣམས་ལ་ནི་མེད་དོ། །དེ་ཡན་ཆད་ལ་ཡང་མེད་དོ། །འཇིག་རྟེན་གཞག་པ་ལས་ཚིགས་གསུམ་པའོ། །མདོ་ལ། ཉོ་ཚོང་

---

^{[མ་དཔེ་གཟིགས་ན་འདིར་གནོན།]}

མདོག་དང་ཁང་པ་དང༌། །གདིང་བ་དང་ནི་གཞག་གོས་དང༌། །ཡང་བ་རྡུལ་རབ་བསྒྲེ་བ་དང༌། །ཐ་དད་བག་མ་ལེན་དང་བཅུ། །ཇི་ལྟར་འཛམ་བུའི་གླིང་གི་མི་རྣམས་ལ་ནོར་རམ། འབྲུ་འམ། གསེར་རམ་དངུལ་ཉོ་ཚོང་བྱ་བ་ཡོད་པ་བཞིན་དུ་ཤར་གྱི་ལུས་འཕགས་པ་རྣམས་དང་ནུབ་ཀྱི་བ་ལང་སྤྱོད་པ་རྣམས་ལ་ཡང་ཡོད་དོ། །བྱང་གི་སྒྲ་མི་སྙན་གྱི་མི་རྣམས་དང༌། རྒྱལ་ཆེན་བཞིའི་ལྷ་རྣམས་ལ་ནི་མེད་དོ། །དེ་ཡན་ཆད་ལ་ཡང་མེད་དོ། །འདི་སྙམ་དུ། འཛམ་བུའི་གླིང་གི་མི་རྣམས་ལ་ནོར་དང་འབྲུ་རྣམས་ཀྱི་ཉོ་ཚོང་བྱེད་དོ། །ཤར་གྱི་ལུས་འཕགས་པོ་རྣམས་ནི་རས་དང་བེའུ་རས་རྣམས་ཀྱིས་སོ། །ནུབ་ཀྱི་བ་ལང་སྤྱོད་པ་རྣམས་ནི་བ་ལང་དང་ནོར་བུ་རྣམས་ཀྱིས་སོ་ཞེས་ཟེར་བ་ཡང་ཡོད་དོ། །ཇི་ལྟར་འཛམ་བུའི་གླིང་གི་མི་རྣམས་ཀྱི་མདོག་ནག་པོ་དང༌། དཀར་པོ་དང༌། སྔོ་བསངས་དང༌། མདོག་སྐྱ་སྣར་རྣམ་པ་བཞི་ཡོད་པ་བཞིན་དུ་ཤར་གྱི་ལུས་འཕགས་པ་རྣམས་དང༌། ནུབ་ཀྱི་བ་ལང་སྤྱོད་པ་རྣམས་ཀྱང་དེ་བཞིན་ནོ། །བྱང་གི་སྒྲ་མི་སྙན་གྱི་མི་རྣམས་ནི་མདོག་གཅིག་པ་སྟེ་དཀར་པོའོ། །རྒྱལ་ཆེན་བཞིའི་ལྷ་རྣམས་ཀྱི་མདོག་ནི་རྣམ་པ་བཞིའོ། །སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམས་སོ། །རྒྱལ་ཆེན་བཞི་པ་རྣམས་ཀྱི་ཇི་ལྟ་བ་བཞིན་དུ་སུམ་ཅུ་རྩ་གསུམ་པ་རྣམས་དང༌། འཐབ་བྲལ་བ་རྣམས་དང༌། དགའ་ལྡན་བ་རྣམས་དང༌། འཕྲུལ་དགའ་བ་རྣམས་དང༌། གཞན་འཕྲུལ་དབང་བྱེད་པ་རྣམས་ཀྱང་དེ་བཞིན་ནོ། །ཚངས་རིས་ཀྱི་ལྷ་རྣམས་ཀྱང་མདོག་གཅིག་པ་སྟེ་དཀར་པོའོ། །ཚངས་རིས་ཀྱི་ལྷ་རྣམས་ཇི་ལྟ་བ་བཞིན་དུ་ཚངས་པའི་མདུན་ན་འདོན་པ་རྣམས་དང༌། ཚངས་པ་ཆེན་པོ་པ་རྣམས་དང༌། འོད་ཆུང་བ་རྣམས་དང༌། ཚད་མེད་འོད་པ་རྣམས་དང༌། འོད་གསལ་བ་རྣམས་དང༌། དགེ་ཆུང་བ་རྣམས་དང༌། ཚད་མེད་དགེ་བ་རྣམས་དང༌། དགེ་རྒྱས་པ་རྣམས་དང༌། སྤྲིན་མེད་པ་རྣམས་དང༌། བསོད་ནམས་སྐྱེས་པ་རྣམས་དང༌། འབྲས་བུ་ཆེ་བ་རྣམས་དང༌། མི་ཆེ་བ་རྣམས་དང༌། མི་གདུང་བ་རྣམས་དང༌། གྱ་ནོམ་སྣང་བ་རྣམས་དང༌། ཤིན་ཏུ་མཐོང་བ་རྣམས་དང༌། འོག་མིན་གྱི་ལྷ་རྣམས་ཀྱང་དེ་བཞིན་ནོ། །ནམ་མཁའ་མཐའ་ཡས་སྐྱེ་མཆེད་དང༌། རྣམ་ཤེས་མཐའ་ཡས་སྐྱེ་

---

^{[མ་དཔེ་གཟིགས་ན་འདིར་གནོན།]}

སྐྱེ་མཆེད་དང༌། ཅི་ཡང་མེད་པའི་སྐྱེ་མཆེད་དང༌། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལ་ནི་ཁ་དོག་མེད་དོ། །འདི་ལྟར་འཛམ་བུའི་གླིང་གི་མི་རྣམས་ཀྱི་ཁང་པ་ཆེད་དུ་བྱས་པ་དང༌། ཆེད་དུ་བྱས་པ་མ་ཡིན་པ་དང༌། ཁང་བཟངས་དང༌། ས་ཁང་རྣམས་ཡོད་པ་བཞིན་དུ་ཤར་གྱི་ལུས་འཕགས་པ་རྣམས་དང༌། ནུབ་ཀྱི་བ་ལང་སྤྱོད་པ་རྣམས་ལ་ཡང་ཡོད་དོ། །བྱང་གི་སྒྲ་མི་སྙན་གྱི་མི་རྣམས་ཀྱི་ཁང་པ་ནི་ཆེད་དུ་བྱས་པ་མ་ཡིན་པའི་ས་ཁང་ངོ༌། །རྒྱལ་ཆེན་བཞི་པ་རྣམས་ཀྱི་གཞལ་མེད་ཁང་ནི་ཆེད་དུ་བྱས་པ་དང་ཆེད་དུ་བྱས་པ་མ་ཡིན་པའོ། །རྒྱལ་ཆེན་བཞི་པའི་ལྷ་རྣམས་ཀྱི་འཇིག་རྟེན་པ་བཞིན་དུ་སུམ་ཅུ་རྩ་གསུམ་པ་རྣམས་དང༌། འཐབ་བྲལ་བ་རྣམས་དང༌། དགའ་ལྡན་པ་རྣམས་དང༌། འཕྲུལ་དགའ་བ་རྣམས་དང༌། གཞན་འཕྲུལ་དབང་བྱེད་པ་རྣམས་ཀྱི་ཡང་དེ་བཞིན་ནོ། །ཚངས་རིས་པ་རྣམས་ཀྱི་གཞལ་མེད་ཁང་རྣམས་ནི་ཆེད་དུ་བྱས་པ་མ་ཡིན་པའོ། །ཚངས་རིས་པ་རྣམས་ཀྱི་ཇི་ལྟ་བ་བཞིན་དུ་ཚངས་པའི་མདུན་ན་འདོན་པ་དང༌། ཚངས་པ་ཆེན་པོ་པ་རྣམས་དང༌། འོད་ཆུང་བ་རྣམས་དང༌། ཚད་མེད་འོད་པ་རྣམས་དང༌། འོད་གསལ་བ་རྣམས་དང༌། དགེ་ཆུང་རྣམས་དང༌། ཚད་མེད་དགེ་བ་རྣམས་དང༌། དགེ་རྒྱས་པ་རྣམས་དང༌། སྤྲིན་མེད་པ་རྣམས་དང༌། བསོད་ནམས་སྐྱེས་པ་རྣམས་དང༌། འབྲས་བུ་ཆེ་བ་རྣམས་དང༌། མི་ཆེ་བ་རྣམས་དང༌། མི་གདུང་བ་རྣམས་དང༌། གྱ་ནོམ་སྣང་བ་རྣམས་དང༌། ཤིན་ཏུ་མཐོང་བ་རྣམས་དང༌། འོག་མིན་པ་རྣམས་ཀྱི་གཞལ་མེད་ཁང་ཡང་ཆེད་དུ་བྱས་པ་མ་ཡིན་ནོ། །གཟུགས་མེད་པ་རྣམས་ལ་ནི་ཁང་པ་མེད་པའོ། །ཇི་ལྟར་འཛམ་བུའི་གླིང་གི་མི་རྣམས་ལ་གདིང་བ་དང་བགོ་བ་འདི་ལྟ་སྟེ། བལ་གོས་དང༌། ཤ་ནའི་རས་དང༌། གསོ་མའི་རས་དང༌། ཟར་མའི་རས་དང༌། རས་གོས་དང༌། ཟབ་དར་དང༌། ཀོ་ཏམ་པའི་རས་དང༌། རྩྭ་དུ་ཀུ་ལའི་གོས་དང༌། ཨ་པ་རན་ཏི་ཀའི་གོས་དང༌། རས་དང༌། བེའུ་རས་ཡོད་པ་བཞིན་དུ་ཤར་གྱི་ལུས་འཕགས་པ་རྣམས་དང༌། ནུབ་ཀྱི་བ་ལང་སྤྱོད་པ་རྣམས་ལ་ཡང་ཡོད་དོ། །བྱང་གི་སྒྲ་མི་སྙན་གྱི་མི་རྣམས་ནི་དཔག་བསམ་ཤིང་ལས་བྱུང་བའི་གོས་གྱོན་ནོ། །ཇི་ལྟར་བྱང་གི་སྒྲ་མི་སྙན་གྱི་མི་རྣམས་དཔག་བསམ་གྱི་

---

^{[མ་དཔེ་གཟིགས་ན་འདིར་གནོན།]}

ཤིང་ལས་བྱུང་བའི་གོས་གྱོན་པ་བཞིན་དུ་རྒྱལ་ཆེན་བཞིའི་ལྷ་རྣམས་དང༌། སུམ་ཅུ་རྩ་གསུམ་པ་རྣམས་དང༌། འཐབ་བྲལ་བ་རྣམས་དང༌། དགའ་ལྡན་པ་རྣམས་དང༌། འཕྲུལ་དགའ་བ་རྣམས་དང༌། གཞན་འཕྲུལ་དབང་བྱེད་ཀྱི་ལྷ་རྣམས་ཀྱང་དེ་བཞིན་ནོ། །ཚངས་རིས་ཀྱི་ལྷ་རྣམས་ནི་གོས་གྱོན་བཞིན་དུ་སྐྱེའོ། །ཚངས་རིས་ཀྱི་ལྷ་རྣམས་ཇི་ལྟ་བ་བཞིན་དུ་ཚངས་པའི་མདུན་ན་འདོན་པ་རྣམས་དང༌། ཚངས་པ་ཆེན་པོ་པ་རྣམས་དང༌། འོད་ཆུང་བ་རྣམས་དང༌། ཚད་མེད་འོད་པ་རྣམས་དང༌། འོད་གསལ་བ་རྣམས་དང༌། དགེ་ཆུང་བ་རྣམས་དང༌། ཆད་མེད་དགེ་རྣམས་དང༌། དགེ་རྒྱས་པ་རྣམས་དང༌། སྤྲིན་མེད་པ་རྣམས་དང༌། བསོད་ནམས་སྐྱེས་པ་རྣམས་དང༌། འབྲས་བུ་ཆེ་བ་རྣམས་དང༌། མི་ཆེ་བ་རྣམས་དང༌། མི་གདུང་བ་རྣམས་དང༌། གྱ་ནོམ་སྣང་བ་རྣམས་དང༌། ཤིན་ཏུ་མཐོང་བ་རྣམས་དང༌། འོག་མིན་གྱི་ལྷ་རྣམས་ཀྱང་དེ་གོས་གྱོན་བཞིན་དུ་སྐྱེའོ། །བྱང་གི་སྒྲ་མི་སྙན་གྱི་མི་རྣམས་ཀྱི་དཔག་བསམ་ཤིང་ལས་བྱུང་བའི་གོས་ཀྱང་རྣམ་པ་བཞི་སྟེ། སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམས་སོ། །གཞན་གོས་ཀྱང་རྣམ་པ་བཞི་སྟེ། སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམས་སོ། །དཔག་བསམ་ཤིང་ལས་བྱུང་བའི་གོས་ཀྱང་རྣམ་པ་བཞི་སྟེ། སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམས་ཏེ། དཔག་བསམ་ཤིང་ལས་བྱུང་བའི་གོས་ཇི་ལྟ་བུ་འདོད་པ་དེ་ལྟ་བུ་སྐྱེས་པའམ། བུད་མེད་དག་གིས་སེམས་བསྐྱེད་མ་ཐག་ཏུ་དེ་ལ་ཡལ་ག་འདུད་པར་བྱེད་དོ། །རྒྱལ་ཆེན་བཞིའི་ལྷ་རྣམས་ཀྱི་དཔག་བསམ་ཤིང་ལས་བྱུང་བའི་གོས་ཀྱི་ཤིང་རྣམས་ཀྱང་རྣམ་པ་བཞི་སྟེ། སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམས་དང༌། གཞན་གོས་ཀྱང་རྣམ་པ་བཞི་སྟེ། སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམས་སོ། །དཔག་བསམ་གྱི་ཤིང་ལས་བྱུང་བའི་གོས་ཀྱང་རྣམ་པ་བཞི་སྟེ། སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམས་ཏེ། དཔག་བསམ་ཤིང་ལས་བྱུང་བའི་གོས་ཇི་ལྟ་བུ་འདོད་པ་དེ་ལྟ་བུ་ལྷའི་བུའམ། ལྷའི་བུ་མོ་དག་གིས་སེམས་བསྐྱེད་མ་ཐག་ཏུ་ཡལ་ག་འདུད་

---

^{[མ་དཔེ་གཟིགས་ན་འདིར་གནོན།]}

པར་བྱེད་དོ། །དེའི་ལག་ཏུ་འོང་བར་འགྱུར་རོ། །རྒྱལ་ཆེན་བཞི་པ་རྣམས་ཀྱི་ཇི་ལྟ་བ་བཞིན་དུ་སུམ་ཅུ་རྩ་གསུམ་པ་དང༌། འཐབ་བྲལ་བ་རྣམས་དང༌། དགའ་ལྡན་བ་རྣམས་དང༌། འཕྲུལ་དགའ་བ་རྣམས་དང༌། གཞན་འཕྲུལ་དབང་བྱེད་པ་རྣམས་ཀྱི་ཡང་དེ་བཞིན་ནོ། །ཚངས་རིས་ཀྱི་ལྷ་རྣམས་ལ་ནི་དཔག་བསམ་ཤིང་ལས་བྱུང་བའི་གོས་མེད་དོ། །དེ་ཡན་ཆད་ལ་ཡང་མེད་དོ། །ཇི་ལྟར་འཛམ་བུའི་གླིང་གི་མི་རྣམས་ལ་གདིང་བ་དང༌། བགོ་བ་ལྕི་བ་དང༌། ཡང་བ་ཡོད་པ་བཞིན་དུ་ཤར་གྱི་ལུས་འཕགས་པོ་རྣམས་དང༌། ནུབ་ཀྱི་བ་ལང་སྤྱོད་པ་རྣམས་ལ་ཡང་ཡོད་དོ། །བྱང་གི་སྒྲ་མི་སྙན་པ་རྣམས་ཀྱི་དཔག་བསམ་གྱི་ཤིང་ལས་བྱུང་བའི་གོས་ལ་ནི་སྲང་གཅིག་ཡོད་དོ། །རྒྱལ་ཆེན་བཞིའི་ལྷ་རྣམས་ཀྱི་ནི་སྲང་ཕྱེད་དོ། །སུམ་ཅུ་རྩ་གསུམ་པའི་ལྷ་རྣམས་ཀྱི་ནི་སྲང་གི་བཞི་ཆ་གཅིག་གོ །འཐབ་བྲལ་བ་རྣམས་ཀྱི་ནི་སྲང་གང་གི་བརྒྱད་ཆ་གཅིག་གོ །དགའ་ལྡན་བ་རྣམས་ཀྱི་ནི་སྲང་གི་བཅུ་དྲུག་ཆ་གཅིག་གོ །འཕྲུལ་དགའ་བ་རྣམས་ཀྱི་ནི་སུམ་ཅུ་རྩ་གཉིས་ཀྱི་སྲང་གི་ཆ་གཅིག་གོ །གཞན་འཕྲུལ་དབང་བྱེད་པ་རྣམས་ཀྱི་དཔག་བསམ་གྱི་ཤིང་ལས་བྱུང་བའི་གོས་ནི་སྲང་གི་དྲུག་ཅུ་རྩ་བཞིའི་ཆ་གཅིག་ལས་མེད་དོ། །ཚངས་རིས་ཀྱི་ལྷ་རྣམས་ཀྱི་ནི་གཞལ་དུ་མེད་བའི་གོས་ཡིན་ནོ། །ཚངས་རིས་པ་རྣམས་ཀྱི་ཇི་ལྟ་བ་བཞིན་དུ་ཚངས་པའི་མདུན་ན་འདོན་པ་རྣམས་དང༌། ཚངས་པ་ཆེན་པོ་པ་རྣམས་དང༌། འོད་ཆུང་བ་རྣམས་དང༌། ཚད་མེད་འོད་པ་རྣམས་དང༌། འོད་གསལ་བ་རྣམས་དང༌། དགེ་ཆུང་བ་རྣམས་དང༌། ཚད་མེད་དགེ་བ་རྣམས་དང༌། དགེ་རྒྱས་པ་རྣམས་དང༌། སྤྲིན་མེད་པ་རྣམས་དང༌། བསོད་ནམས་སྐྱེས་པ་རྣམས་དང༌། འབྲས་བུ་ཆེ་བ་རྣམས་དང༌། མི་ཆེ་བ་རྣམས་དང༌། མི་གདུང་བ་རྣམས་དང༌། གྱ་ནོམ་སྣང་བ་རྣམས་དང༌། ཤིན་ཏུ་མཐོང་བ་རྣམས་དང༌། འོག་མིན་གྱི་ལྷ་རྣམས་ཀྱི་ཡང་གཞལ་དུ་མེད་པའི་གོས་ཡིན་ནོ། །ཉི་ཟེར་གྱི་རྡུལ་བཞི་བཅུ་རྩ་དགུའི་ཆ་གཅིག་ནི་རྡུལ་ཕྲ་རབ་ཡིན་ནོ། །རྡུལ་ཕྲ་རབ་བདུན་ནི་རྡུལ་ཕྲ་མོ་གཅིག་གོ །རྡུལ་ཕྲ་མོ་བདུན་ལ་ནི་ཉི་ཟེར་གྱི་རྡུལ་གཅིག་གོ །ཉི་ཟེར་གྱི་རྡུལ་བདུན་ལ་ནི་རི་བོང་གི་རྡུལ་གཅིག་གོ །རི་བོང་གི་རྡུལ་བདུན་ལ་ནི་ལུག་རྡུལ་གཅིག་གོ །ལུག་རྡུལ་བདུན་ལ་ནི་གླང་རྡུལ་

---

^{[མ་དཔེ་གཟིགས་ན་འདིར་གནོན།]}

གཅིག་གོ །གླང་རྡུལ་བདུན་ལ་ནི་སྲོ་མ་གཅིག་གོ །སྲོ་མ་བདུན་ལ་ནི་ཨ་བ་ག་ན་གཅིག་གོ །ཨ་བ་ག་ན་བདུན་ལ་ནི་བ་ཏི་ཀ་གཅིག་གོ །བ་ཏི་ཀ་བདུན་ལ་ནི་ནས་འབྲུ་གཅིག་གོ །ནས་འབྲུ་བདུན་ལ་ནི་སོར་གཅིག་གོ །སོར་ཉི་ཤུ་རྩ་བཞི་ལ་ནི་ཁྲུ་གང་ངོ༌། །འཛམ་བུའི་གླིང་གི་མི་རྣམས་ཁ་ཅིག་ནི་ཁྲུ་ཚད་དེ་ལྟར་བརྩིས་པའི་ཁྲུ་ཕྱེད་དང་བཞི་པའོ། །ཁ་ཅིག་ནི་ཁྲུ་བཞི་པའོ། །ཤར་གྱི་ལུས་འཕགས་པོ་རྣམས་ནི་ཁྲུ་བརྒྱད་པའོ། །ནུབ་ཀྱི་བ་ལང་སྤྱོད་པ་རྣམས་ནི་ཁྲུ་བཅུ་དྲུག་པའོ། །བྱང་གི་སྒྲ་མི་སྙན་གྱི་མི་རྣམས་ནི་ཁྲུ་སུམ་ཅུ་རྩ་གཉིས་པའོ། །རྒྱལ་ཆེན་བཞིའི་ལྷ་རྣམས་ཀྱི་ལུས་ཐོབ་པ་ནི་རྒྱང་གྲགས་ཀྱི་བཞི་ཆ་གཅིག་གོ །སུམ་ཅུ་རྩ་གསུམ་པ་རྣམས་ཀྱི་ནི་རྒྱང་གྲགས་ཀྱི་ཕྱེད་དོ། །འཐབ་བྲལ་བ་རྣམས་ཀྱི་ནི་རྒྱང་གྲགས་ཀྱི་བཞི་ཆ་གསུམ་པའོ། །དགའ་ལྡན་པ་རྣམས་ཀྱི་ནི་རྒྱང་གྲགས་གཅིག་གོ །འཕྲུལ་དགའ་བ་རྣམས་ཀྱི་ནི་རྒྱང་གྲགས་གཅིག་དང༌། རྒྱང་གྲགས་ཀྱི་བཞི་ཆ་གཅིག་གོ །གཞན་འཕྲུལ་དབང་བྱེད་རྣམས་ཀྱི་ནི་རྒྱང་གྲགས་ཕྱེད་དང་གཉིས་སོ། །ཚངས་རིས་པ་རྣམས་ཀྱི་ནི་དཔག་ཚད་ཕྱེད་དོ། །ཚངས་པ་མདུན་ན་འདོན་པ་རྣམས་ཀྱི་ནི་དཔག་ཚད་གཅིག་གོ །ཚངས་པ་ཆེན་པོ་པ་རྣམས་ཀྱི་ནི་དཔག་ཚད་ཕྱེད་དང་གཉིས་སོ། །འོད་ཆུང་བ་རྣམས་ཀྱི་ནི་དཔག་ཚད་གཉིས་སོ། །ཚད་མེད་འོད་པ་རྣམས་ཀྱི་ནི་དཔག་ཚད་བཞིའོ། །འོད་གསལ་བ་རྣམས་ཀྱི་ནི་དཔག་ཚད་བརྒྱད་དོ། །དགེ་ཆུང་བ་རྣམས་ཀྱི་ནི་དཔག་ཚད་བཅུ་དྲུག་གོ །ཚད་མེད་དགེ་བ་རྣམས་ཀྱི་ནི་དཔག་ཚད་སུམ་ཅུ་རྩ་གཉིས་སོ། །དགེ་རྒྱས་པ་རྣམས་ཀྱི་ནི་དཔག་ཚད་དྲུག་ཅུ་རྩ་བཞིའོ། །སྤྲིན་མེད་པ་རྣམས་ཀྱི་ནི་དཔག་ཆད་བརྒྱ་ཉི་ཤུ་རྩ་བཞིའོ། །བསོད་ནམས་སྐྱེས་པ་རྣམས་ཀྱི་ནི་དཔག་ཚད་ཉིས་བརྒྱ་ལྔ་བཅུའོ། །འབྲས་བུ་ཆེ་བའི་ལྷ་རྣམས་ཀྱི་ནི་དཔག་ཚད་ལྔ་བརྒྱའོ། །འདུ་ཤེས་མེད་པའི་སེམས་ཅན་རྣམས་ཀྱི་ཡང་དེ་དང་འདྲའོ། །མི་ཆེ་བའི་ལུས་ཐོབ་པ་ནི་དཔག་ཚད་སྟོང་ངོ༌། །མི་གདུང་བ་རྣམས་ཀྱི་ནི་དཔག་ཚད་ཉིས་སྟོང་ངོ༌། །གྱ་ནོམ་སྣང་བ་རྣམས་ཀྱི་ནི་དཔག་ཚད་བཞི་སྟོང་ངོ༌། །ཤིན་ཏུ་མཐོང་བ་པ་རྣམས་ཀྱི་ནི་དཔག་ཚད་བརྒྱད་སྟོང་ངོ༌། །འོག་མིན་གྱི་ལྷ་རྣམས་

---

^{[མ་དཔེ་གཟིགས་ན་འདིར་གནོན།]}

ཀྱི་ལུས་ཐོབ་པ་རྣམས་ཀྱི་ནི་དཔག་ཚད་ཁྲི་དྲུག་སྟོང་ངོ༌། །གཟུགས་མེད་པ་རྣམས་ལ་ནི་བསགས་པའི་ལུས་མེད་དོ། །ཉི་ཟེར་གྱི་རྡུལ་བཞི་བཅུ་རྩ་དགུའི་ཆ་གཅིག་གི་ནི་རྡུལ་ཕྲ་རབ་ཡིན་ནོ། །རྡུལ་ཕྲ་རབ་བདུན་ལ་ནི་རྡུལ་ཕྲ་མོ་གཅིག་གོ །རྡུལ་ཕྲ་མོ་བདུན་ལ་ནི་ཉི་ཟེར་གྱི་རྡུལ་གཅིག་གོ །ཉི་ཟེར་གྱི་རྡུལ་བདུན་ལ་ནི་རི་བོང་གི་རྡུལ་གཅིག་གོ །རི་བོང་གི་རྡུལ་བདུན་ལ་ནི་ལུག་རྡུལ་གཅིག་གོ །ལུག་རྡུལ་བདུན་ལ་ནི་གླང་རྡུལ་གཅིག་གོ །གླང་རྡུལ་བདུན་ལ་ནི་སྲོ་མ་གཅིག་གོ །སྲོ་མ་བདུན་ལ་ནི་ཨ་བ་ག་ན་གཅིག་གོ །ཨ་བ་ག་ན་བདུན་ལ་ནི་བ་ཏི་ཀ་གཅིག་གོ།། བ་ཏི་ཀ་བདུན་ལ་ནི་ནས་འབྲུ་གཅིག་གོ །ནས་འབྲུ་བདུན་ལ་ནི་སོར་གཅིག་གོ །སོར་ཉི་ཤུ་རྩ་བཞི་ལ་ཁྲུ་གང་ངོ༌། །འཛམ་བུའི་གླིང་གི་མི་རྣམས་ཁ་ཅིག་གོས་ཁྲུ་ཚད་འདི་ལྟ་བུར་བརྩིས་པའི་ཁྲུ་བརྒྱད་པ་གྱོན་ནོ། །ཁ་ཅིག་ནི་ཁྲུ་བཅུ་པའོ། །ཤར་གྱི་ལུས་འཕགས་པ་རྣམས་ཀྱི་ནི་ཁྲུ་ཉི་ཤུ་པའོ། །ནུབ་ཀྱི་བ་ལང་སྤྱོད་པ་རྣམས་ཀྱི་ནི་ཁྲུ་བཞི་བཅུ་པའོ། །བྱང་གི་སྒྲ་མི་སྙན་པ་རྣམས་ཀྱི་ནི་དཔག་བསམ་ཤིང་ལས་བྱུང་བའི་གོས་ཁྲུ་བརྒྱད་ཅུ་པ་གྱོན་ནོ། །རྒྱལ་ཆེན་བཞི་པའི་ལྷ་རྣམས་ཀྱང་ལུས་ལ་ཅི་རན་པའི་གོས་གྱོན་ནོ། །རྒྱལ་ཆེན་བཞི་པ་ལྷ་རྣམས་ཀྱི་ཇི་ལྟ་བ་བཞིན་དུ་སུམ་ཅུ་རྩ་གསུམ་པ་རྣམས་དང༌། འཐབ་བྲལ་བ་རྣམས་དང༌། དགའ་ལྡན་པ་རྣམས་དང༌། འཕྲུལ་དགའ་བ་རྣམས་དང༌། གཞན་འཕྲུལ་དབང་བྱེད་པ་རྣམས་དང༌། ཚངས་རིས་པ་རྣམས་དང༌། ཚངས་པའི་མདུན་ན་འདོན་པ་རྣམས་དང༌། ཚངས་པ་ཆེན་པོ་པ་རྣམས་དང༌། འོད་ཆུང་བ་རྣམས་དང༌། ཚད་མེད་འོད་བ་རྣམས་དང༌། འོད་གསལ་བ་རྣམས་དང༌། དགེ་ཆུང་བ་རྣམས་དང༌། ཚད་མེད་དགེ་བ་རྣམས་དང༌། དགེ་རྒྱས་པ་རྣམས་དང༌། སྤྲིན་མེད་པ་རྣམས་དང༌། བསོད་ནམས་སྐྱེས་པ་རྣམས་དང༌། འབྲས་བུ་ཆེ་བ་རྣམས་དང༌། མི་ཆེ་བ་རྣམས་དང༌། མི་གདུང་བ་རྣམས་དང༌། གྱ་ནོམ་སྣང་བ་རྣམས་དང༌། ཤིན་ཏུ་མཐོང་བ་རྣམས་དང༌། འོག་མིན་པ་རྣམས་ཀྱི་ཡང་དེ་བཞིན་ནོ། །ཇི་ལྟར་འཛམ་བུའི་གླིང་གི་མི་རྣམས་དབང་པོ་ཐ་དད་དོ། །ཁ་ཅིག་ལ་ནི་མོའི་དབང་པོ་དང༌། ཁ་ཅིག་ལ་ནི་ཕོའི་དབང་པོ་ཡོད་པ་བཞིན་དུ་ཤར་གྱི་ལུས་འཕགས་པ་རྣམས་དང༌། ནུབ་ཀྱི་

---

^{[མ་དཔེ་གཟིགས་ན་འདིར་གནོན།]}

བ་ལང་སྤྱོད་པ་རྣམས་དང༌། བྱང་གི་སྒྲ་མི་སྙན་པ་རྣམས་དང༌། རྒྱལ་ཆེན་བཞི་པའི་ལྷ་རྣམས་དང༌། སུམ་ཅུ་རྩ་གསུམ་པའི་ལྷ་རྣམས་དང༌། འཐབ་བྲལ་བ་རྣམས་དང༌། དགའ་ལྡན་པ་རྣམས་དང༌། འཕྲུལ་དགའ་བ་རྣམས་དང༌། གཞན་འཕྲུལ་དབང་བྱེད་པ་རྣམས་ལ་ཡང་ཡང་ཡོད་དོ། །ཚངས་རིས་ཀྱི་ལྷ་རྣམས་ལ་ནི་མོའི་དབང་པོ་ཡང་མེད། ཕོའི་དབང་པོ་ཡང་མེད་དོ། །ཚངས་རིས་པ་རྣམས་ཇི་ལྟ་བ་བཞིན་དུ་ཚངས་པའི་མདུན་ན་འདོན་པ་རྣམས་དང༌། ཚངས་པ་ཆེན་པོ་རྣམས་དང༌། འོད་ཆུང་བ་རྣམས་དང༌། ཚད་མེད་འོད་པ་རྣམས་དང༌། འོད་གསལ་བ་རྣམས་དང༌། དགེ་ཆུང་བ་རྣམས་དང༌། ཚད་མེད་དགེ་བ་རྣམས་དང༌། དགེ་རྒྱས་པ་རྣམས་དང༌། སྤྲིན་མེད་པ་རྣམས་དང༌། བསོད་ནམས་སྐྱེས་པ་རྣམས་དང༌། འབྲས་བུ་ཆེ་བ་རྣམས་དང༌། མི་ཆེ་བ་རྣམས་དང༌། མི་གདུང་བ་རྣམས་དང༌། གྱ་ནོམ་སྣང་བ་རྣམས་དང༌། ཤིན་ཏུ་མཐོང་བ་རྣམས་དང༌། འོག་མིན་གྱི་ལྷ་རྣམས་ཀྱང་དེ་བཞིན་ནོ། །ཇི་ལྟར་འཛམ་བུའི་གླིང་གི་མི་རྣམས་ལ་བག་མ་གཏོང་བ་དང༌། བག་མ་ལེན་པ་ཡོད་པ་བཞིན་དུ་ཤར་གྱི་ལུས་འཕགས་པ་རྣམས་དང༌། ནུབ་ཀྱི་བ་ལང་སྤྱོད་པ་རྣམས་ལ་ཡང་ཡོད་དོ། །བྱང་གི་སྒྲ་མི་སྙན་པ་རྣམས་ལ་ནི་མེད་དོ། །རྒྱལ་ཆེན་བཞི་པའི་ལྷ་རྣམས་དང༌། སུམ་ཅུ་རྩ་གསུམ་པ་རྣམས་དང༌། འཐབ་བྲལ་བ་རྣམས་དང༌། དགའ་ལྡན་པ་རྣམས་དང༌། འཕྲུལ་དགའ་བ་རྣམས་དང༌། གཞན་འཕྲུལ་དབང་བྱེད་པ་རྣམས་ལ་ཡང་ཡོད་དོ། །ཚངས་རིས་ཀྱི་ལྷ་རྣམས་ལ་ནི་བག་མ་གཏོང་བ་ཡང་མེད་ལེན་པ་ཡང་མེད་དོ། །ཚངས་རིས་ཀྱི་ལྷ་རྣམས་ལ་ཇི་ལྟ་བ་བཞིན་དུ་ཚངས་པའི་མདུན་ན་འདོན་པ་རྣམས་དང༌། ཚངས་པ་ཆེན་པོ་པ་རྣམས་དང༌། འོད་ཆུང་བ་རྣམས་དང༌། ཚད་མེད་འོད་པ་རྣམས་དང༌། འོད་གསལ་བ་རྣམས་དང༌། དགེ་ཆུང་བ་རྣམས་དང༌། ཚད་མེད་དགེ་རྣམས་དང༌། དགེ་རྒྱས་པ་རྣམས་དང༌། སྤྲིན་མེད་པ་རྣམས་དང༌། བསོད་ནམས་སྐྱེས་པ་རྣམས་དང༌། འབྲས་བུ་ཆེ་བ་རྣམས་དང༌། མི་ཆེ་བ་རྣམས་དང༌། མི་གདུང་བ་རྣམས་དང༌། གྱ་ནོམ་སྣང་བ་རྣམས་དང༌། ཤིན་ཏུ་མཐོང་བ་རྣམས་དང༌། འོག་མིན་གྱི་ལྷ་རྣམས་ལ་ཡང་དེ་བཞིན་ནོ། །འཇིག་རྟེན་གཞག་པ་ལས་ཚིག་

---

^{[མ་དཔེ་གཟིགས་ན་འདིར་གནོན།]}

བཞི་པའོ།། །།འཇིག་རྟེན་གཞག་པ། བམ་པོ་གཉིས་པ། མདོ་ལ། གྲང་དང་ཚ་དང་དུས་ཚིགས་མཚན་མོ་དང༌། །ཕ་མ་དང་ནི་རྗེ་ཁོལ་དང༌། །ནོར་དང་འབྲུ་དང་མངོན་བར་ཞེ་ན། །བཅུ་ཚན་ཡོངས་སུ་བརྗོད་པ་ཡིན། །ཇི་ལྟར་འཛམ་བུའི་གླིང་གི་མི་རྣམས་ལ་ཤིན་ཏུ་གྲང་བ་དང༌། ཤིན་ཏུ་ཚ་བ་ཡོད་པ་བཞིན་དུ་ཤར་གྱི་ལུས་འཕགས་པ་རྣམས་དང༌། ནུབ་ཀྱི་བ་ལང་སྤྱོད་པ་རྣམས་ལ་ཡང་ཡོད་དོ། །བྱང་གི་སྒྲ་མི་སྙན་པ་རྣམས་ལ་ནི་མེད་དོ། །རྒྱལ་ཆེན་བཞིའི་ལྷ་རྣམས་ལ་ཡང་མེད་དོ། །དེ་ཡན་ཆད་ལ་ཡང་མེད་དོ། །ཇི་ལྟར་འཛམ་བུའི་གླིང་གི་མི་རྣམས་ལ་དུས་ཚིགས་འདི་ལྟ་སྟེ། དགུན་དང་དཔྱིད་དང་དབྱར་ཡོད་པ་བཞིན་དུ་ཤར་གྱི་ལུས་འཕགས་པ་རྣམས་དང༌། ནུབ་ཀྱི་བ་ལང་སྤྱོད་པ་རྣམས་དང༌། བྱང་གི་སྒྲ་མི་སྙན་པ་རྣམས་དང༌། རྒྱལ་ཆེན་བཞིའི་ལྷ་རྣམས་དང༌། སུམ་ཅུ་རྩ་གསུམ་པ་རྣམས་དང༌། འཐབ་བྲལ་བ་རྣམས་དང༌། དགའ་ལྡན་བ་རྣམས་དང༌། འཕྲུལ་དགའ་བ་རྣམས་དང༌། གཞན་འཕྲུལ་དབང་བྱེད་ཀྱི་ལྷ་རྣམས་ལ་ཡང་ཡོད་དོ། །ཚངས་རིས་ཀྱི་ལྷ་རྣམས་ལ་ནི་དུས་ཚིགས་མེད་དོ། །ཚངས་རིས་ཀྱི་ལྷ་རྣམས་ལ་ཇི་ལྟ་བ་བཞིན་དུ་ཆངས་པའི་མདུན་ན་འདོན་པ་རྣམས་དང༌། ཚངས་པ་ཆེན་པོ་རྣམས་དང༌། འོད་ཆུང་བ་རྣམས་དང༌། ཚད་མེད་འོད་པ་རྣམས་དང༌། འོད་གསལ་བ་རྣམས་དང༌། དགེ་ཆུང་བ་རྣམས་དང༌། ཚད་མེད་དགེ་བ་རྣམས་དང༌། དགེ་རྒྱས་པ་རྣམས་དང༌། སྤྲིན་མེད་པ་རྣམས་དང༌། བསོད་ནམས་སྐྱེས་པ་རྣམས་དང༌། འབྲས་བུ་ཆེ་བ་རྣམས་དང༌། མི་ཆེ་བ་རྣམས་དང༌། མི་གདུང་བ་རྣམས་དང༌། གྱ་ནོམ་སྣང་བ་རྣམས་དང༌། ཤིན་ཏུ་མཐོང་བ་རྣམས་དང༌། འོག་མིན་གྱི་ལྷ་རྣམས་ལ་ཡང་དེ་བཞིན་ནོ། །ཇི་ལྟར་འཛམ་བུའི་གླིང་གི་མི་རྣམས་ལ་མཚན་མོ་དང༌། ཉིན་མོ་ཡོད་པ་བཞིན་དུ་ཤར་གྱི་ལུས་འཕགས་པ་རྣམས་དང༌། ནུབ་ཀྱི་བ་ལང་སྤྱོད་པ་རྣམས་དང༌། བྱང་གི་སྒྲ་མི་སྙན་པ་རྣམས་དང༌། རྒྱལ་ཆེན་བཞིའི་ལྷ་རྣམས་དང༌། སུམ་ཅུ་རྩ་གསུམ་པ་རྣམས་དང༌། འཐབ་བྲལ་བ་རྣམས་དང༌། དགའ་ལྡན་པ་རྣམས་དང༌། འཕྲུལ་དགའ་བ་རྣམས་དང༌། གཞན་འཕྲུལ་དབང་བྱེད་ཀྱི་ལྷ་རྣམས་ལ་ཡང་ཡོད་དོ། །ཚངས་རིས་ཀྱི་ལྷ་རྣམས་ལ་ནི་མཚན་མོ་ཡང་མེད།

---

^{[མ་དཔེ་གཟིགས་ན་འདིར་གནོན།]}

ཉིན་མོ་ཡང་མེད། ཚངས་རིས་པ་རྣམས་ཇི་ལྟ་བ་བཞིན་དུ་ཚངས་པའི་མདུན་ན་འདོན་དང༌། ཚངས་པ་ཆེན་པོ་པ་རྣམས་དང༌། འོད་ཆུང་བ་རྣམས་དང༌། ཚད་མེད་འོད་པ་རྣམས་དང༌། འོད་གསལ་བ་རྣམས་དང༌། དགེ་ཆུང་བ་རྣམས་དང༌། ཚད་མེད་དགེ་བ་རྣམས་དང༌། དགེ་རྒྱས་པ་རྣམས་དང༌། སྤྲིན་མེད་པ་རྣམས་དང༌། བསོད་ནམས་སྐྱེས་པ་རྣམས་དང༌། འབྲས་བུ་ཚ་བ་རྣམས་དང༌། མི་ཆེ་བ་རྣམས་དང༌། མི་གདུང་བ་རྣམས་དང༌། གྱ་ནོམ་སྣང་བ་རྣམས་དང༌། ཤིན་ཏུ་མཐོང་བ་རྣམས་དང༌། འོག་མིན་གྱི་ལྷ་རྣམས་ལ་ཡང་དེ་བཞིན་ནོ། །ཇི་ལྟ་བ་འཛམ་བུའི་གླིང་གི་མི་རྣམས་ལ་ཕ་དང་མ་ཡོད་པ་བཞིན་དུ་ཤར་གྱི་ལུས་འཕགས་པ་རྣམས་དང༌། ནུབ་ཀྱི་བ་ལང་སྤྱོད་པ་རྣམས་དང༌། བྱང་གི་སྒྲ་མི་སྙན་པ་རྣམས་དང༌། རྒྱལ་ཆེན་བཞིའི་ལྷ་རྣམས་དང༌། སུམ་ཅུ་རྩ་གསུམ་པ་རྣམས་དང༌། འཐབ་བྲལ་བ་རྣམས་དང༌། དགའ་ལྡན་བ་རྣམས་དང༌། འཕྲུལ་དགའ་བ་རྣམས་དང༌། གཞན་འཕྲུལ་དབང་བྱེད་ཀྱི་ལྷ་རྣམས་ལ་ཡང་ཡོད་དོ། །ཚངས་རིས་པ་ལྷ་རྣམས་ལ་ནི་མ་ཡང་མེད་ཕ་ཡང་མེད་དོ། །ཚངས་རིས་ཀྱི་ལྷ་རྣམས་ཇི་ལྟ་བ་བཞིན་དུ་ཚངས་པའི་མདུན་ན་འདོན་པ་རྣམས་དང༌། ཚངས་པ་ཆེན་པོ་པ་རྣམས་དང༌། འོད་ཆུང་བ་རྣམས་དང༌། ཚད་མེད་འོད་པ་རྣམས་དང༌། འོད་གསལ་བ་རྣམས་དང༌། དགེ་ཆུང་བ་རྣམས་དང༌། ཆད་མེད་དགེ་བ་རྣམས་དང༌། དགེ་རྒྱས་པ་རྣམས་དང༌། སྤྲིན་མེད་པ་རྣམས་དང༌། བསོད་ནམས་སྐྱེས་པ་རྣམས་དང༌། འབྲས་བུ་ཆེ་བ་རྣམས་དང༌། མི་ཆེ་བ་རྣམས་དང༌། མི་གདུང་བ་རྣམས་དང༌། གྱ་ནོམ་སྣང་བ་རྣམས་དང༌། ཤིན་ཏུ་མཐོང་བ་རྣམས་དང༌། འོག་མིན་གྱི་ལྷ་རྣམས་ལ་ཡང་དེ་བཞིན་ནོ། །ཇི་ལྟར་འཛམ་བུའི་གླིང་གི་མི་རྣམས་ལ་རྗེ་བོ་དང་བྲ་ན་ཡོད་པ་བཞིན་དུ་ཤར་གྱི་ལུས་འཕགས་པ་རྣམས་དང༌། ནུབ་ཀྱི་བ་ལང་སྤྱོད་པ་རྣམས་ལ་ཡོད་དོ། །བྱང་གི་སྒྲ་མི་སྙན་བ་རྣམས་ལ་ནི་རྗེ་བོ་ཡང་མེད་བྲན་ཀྱང་མེད་དོ། །རྒྱལ་ཆེན་བཞིའི་ལྷ་རྣམས་ལ་ནི་རྗེ་བོ་དང་བྲན་ཀྱང་ཡོད་དོ། །རྒྱལ་ཆེན་བཞིའི་ལྷ་རྣམས་ཇི་ལྟ་བ་བཞིན་དུ་སུམ་ཅུ་རྩ་གསུམ་པ་རྣམས་དང༌། འཐབ་བྲལ་བ་རྣམས་དང༌། དགའ་ལྡན་པ་རྣམས་དང༌། འཕྲུལ་དགའ་བ་རྣམས་དང༌། གཞན་

---

^{[མ་དཔེ་གཟིགས་ན་འདིར་གནོན།]}

འཕྲུལ་དབང་བྱེད་པ་རྣམས་ལ་ཡང་དེ་བཞིན་ནོ། །ཚངས་རིས་ཀྱི་ལྷ་རྣམས་ལ་ནི་རྗེ་བོ་ཡང་མེད་བྲན་ཡང་མེད་དོ། །ཚངས་རིས་པ་རྣམས་ལ་ཇི་ལྟ་བ་བཞིན་དུ་ཚངས་པའི་མདུན་ན་འདོན་པ་རྣམས་དང༌། ཚངས་པ་ཆེན་པོ་པ་རྣམས་དང༌། འོད་ཆུང་བ་རྣམས་དང༌། ཚད་མེད་འོད་པ་རྣམས་དང༌། འོང་གསལ་བ་རྣམས་དང༌། དགེ་ཆུང་བ་རྣམས་དང༌། ཚད་མེད་དགེ་བ་རྣམས་དང༌། དགེ་རྒྱས་པ་རྣམས་དང༌། སྤྲིན་མེད་པ་རྣམས་དང༌། བསོད་ནམས་སྐྱེས་པ་རྣམས་དང༌། འབྲས་བུ་ཆེ་བ་རྣམས་དང༌། མི་ཆེ་བ་རྣམས་དང༌། མི་གདུང་བ་རྣམས་དང༌། གྱ་ནོམ་སྣང་བ་རྣམས་དང༌། ཤིན་ཏུ་མཐོང་བ་རྣམས་དང༌། འོག་མིན་གྱི་ལྷ་རྣམས་ལ་ཡང་དེ་བཞིན་ནོ། །ཇི་ལྟར་འཛམ་བུའི་གླིང་གི་མི་རྣམས་ལ་ནོར་དང་འབྲུ་ཡོད་པ་བཞིན་དུ་ཤར་གྱི་ལུས་འཕགས་པ་རྣམས་དང༌། ནུབ་ཀྱི་བ་ལང་སྤྱོད་པ་རྣམས་ལ་ཡང་ཡོད་དོ། །བྱང་གི་སྒྲ་མི་སྙན་གྱི་མི་རྣམས་ལ་ནི་འབྲུ་ནི་ཡོད། ནོར་ནི་མེད་དོ། །རྒྱལ་ཆེན་བཞིའི་ལྷ་རྣམས་ལ་ནོར་ནི་ཡོད་འབྲུ་ནི་མེད་དོ། །རྒྱལ་ཆེན་བཞིའི་ལྷ་རྣམས་ཇི་ལྟ་བ་བཞིན་དུ་སུམ་ཅུ་རྩ་གསུམ་པ་རྣམས་དང༌། འཐབ་བྲལ་བ་རྣམས་དང༌། དགའ་ལྡན་བ་རྣམས་དང༌། འཕྲུལ་དགའ་བ་རྣམས་དང༌། གཞན་འཕྲུལ་དབང་བྱེད་པ་རྣམས་ལ་ཡང་དེ་བཞིན་ནོ། །ཚངས་རིས་ཀྱི་ལྷ་རྣམས་ལ་ནི་ནོར་ཡང་མེད་འབྲུ་ཡང་མེད་དོ། །ཚངས་རིས་ཀྱི་ལྷ་ཇི་ལྟ་བ་བཞིན་དུ་ཚངས་པ་མདུན་ན་འདོན་པ་རྣམས་དང༌། ཚངས་པ་ཆེན་པོ་པ་རྣམས་དང༌། འོད་ཆུང་བ་རྣམས་དང༌། ཚད་མེད་འོད་པ་རྣམས་དང༌། འོད་གསལ་བ་རྣམས་དང༌། དགེ་ཆུང་བ་རྣམས་དང༌། ཚད་མེད་དགེ་བ་རྣམས་དང༌། དགེ་རྒྱས་པ་རྣམས་དང༌། སྤྲིན་མེད་པ་རྣམས་དང༌། བསོད་ནམས་སྐྱེས་པ་རྣམས་དང༌། འབྲས་བུ་ཆེ་བ་རྣམས་དང༌། མི་ཆེ་བ་རྣམས་དང༌། མི་གདུང་བ་རྣམས་དང༌། གྱ་ནོམ་སྣང་བ་རྣམས་དང༌། ཤིན་ཏུ་མཐོང་བ་རྣམས་དང༌། འོག་མིན་གྱི་ལྷ་རྣམས་ལ་ཡང་དེ་བཞིན་ནོ། །ཇི་ལྟར་འཛམ་བུའི་གླིང་གི་མི་རྣམས་ལ་ཕ་འམ་མའམ། བུ་ཕོ་འམ་བུ་མོ་འམ། རྗེ་བོ་འམ། བྲན་ནམ། ནོར་རམ། འབྲུ་ལ་མངོན་པར་ཞེན་པ་ཡོད་པ་བཞིན་དུ་ཤར་གྱི་ལུས་འཕགས་པ་རྣམས་དང༌། ནུབ་ཀྱི་

---

^{[མ་དཔེ་གཟིགས་ན་འདིར་གནོན།]}

བ་ལང་སྤྱོད་པ་རྣམས་ལ་ཡོད་དོ། །བྱང་གི་སྒྲ་མི་སྙན་གྱི་མི་རྣམས་ལ་ནི་ཅི་ལ་ཡང་མངོན་བར་ཞེན་པ་མེད་དོ། །རྒྱལ་ཆེན་བཞིའི་ལྷ་རྣམས་ལ་ནི་འབྲུ་མ་གཏོགས་པ་རྣམས་ལ་མངོན་བར་ཞེན་པ་ཡོད་དོ། །རྒྱལ་ཆེན་བཞིའི་ལྷ་རྣམས་ཇི་ལྟ་བ་བཞིན་དུ་སུམ་ཅུ་གསུམ་པ་རྣམས་དང༌། འཐབ་བྲལ་བ་རྣམས་དང༌། དགའ་ལྡན་བ་རྣམས་དང༌། འཕྲུལ་དགའ་བ་རྣམས་དང༌། གཞན་འཕྲུལ་དབང་བྱེད་པ་རྣམས་ཀྱི་ཡང་དེ་བཞིན་ནོ། །ཚངས་རིས་ཀྱི་ལྷ་རྣམས་ལ་ཡང་མངོན་བར་ཞེན་པ་མེད་དོ། །ཚངས་རིས་པ་རྣམས་ཇི་ལྟ་བ་བཞིན་དུ་ཚངས་པའི་མདུན་ན་འདོན་པ་རྣམས་དང༌། ཚངས་པ་ཆེན་པོ་པ་རྣམས་དང༌། འོད་ཆུང་བ་རྣམས་དང༌། ཚད་མེད་འོད་པ་རྣམས་དང༌། འོད་གསལ་བ་རྣམས་དང༌། དགེ་ཆུང་བ་རྣམས་དང༌། ཚད་མེད་དགེ་བ་རྣམས་དང༌། དགེ་རྒྱས་པ་རྣམས་དང༌། སྤྲིན་མེད་པ་རྣམས་དང༌། བསོད་ནམས་སྐྱེས་པ་རྣམས་དང༌། འབྲས་བུ་ཆེ་བ་རྣམས་དང༌། མི་ཆེ་བ་རྣམས་དང༌། མི་གདུང་བ་རྣམས་དང༌། གྱ་ནོམ་སྣང་བ་རྣམས་དང༌། ཤིན་ཏུ་མཐོང་བ་རྣམས་དང༌། འོག་མིན་གྱི་ལྷ་རྣམས་ཀྱང་དེ་བཞིན་ནོ། །འཇིག་རྟེན་གཞག་པ་ལས་ཚིགས་ལྔ་པའོ། །མདོ་ལ། ཟླ་མཚན་འཁྲིག་དང་ཁུ་ཆུ་དང༌། །ཚེག་བསྒྱུར་དང་ནི་ཆུ་ཀླུང་བྲག །ས་ལ་རྫིང་བུ་གླང་པོ་དང༌། །སྲུང་མ་འཁོར་ལོས་སྒྱུར་བའི་ལམ། །ཇི་ལྟར་འཛམ་བུའི་གླིང་གི་མི་རྣམས་ལ་བུད་མེད་ཟླ་མཚན་ཅན་དང༌། སྦྲུམ་མ་དང༌། བུ་བཙའ་བ་ཡོད་པ་བཞིན་དུ་ཤར་གྱི་ལུས་འཕགས་པ་རྣམས་དང༌། ནུབ་ཀྱི་བ་ལང་སྤྱོད་པ་རྣམས་དང༌། བྱང་གི་སྒྲ་མི་སྙན་པ་རྣམས་ལ་ཡང་ཡོད་དོ། །རྒྱལ་ཆེན་བཞིའི་ལྷ་རྣམས་ཀྱི་ནི་འཛམ་བུའི་གླིང་གི་མི་རྣམས་ཀྱི་ཁྱེའུ་འམ་བུ་མོ་ལོ་ལྔ་ལོན་པ་ཇི་ཙམ་པ་དེ་བཞིན་ནོ། །ལྷའམ་ལྷའི་བུ་མོ་ཕྲག་པ་འམ་ཕང་པར་སེམས་ཅན་རྫུས་ཏེ་སྐྱེ་བར་འགྱུར་ཏེ། དེ་ལ་ལྷ་འམ་ལྷའི་བུ་མོ་དག་འདི་སྙམ་དུ་འདི་ནི་བདག་གི་བུ་འམ་བུ་མོ་སྙམ་དུ་སེམས་སོ། །ཁྱེའུ་འམ་བུ་མོ་དེ་དག་ཀྱང་འདི་སྙམ་དུ་འདི་ནི་བདག་ཅག་གི་མ་འམ་ཕའོ་སྙམ་དུ་སེམས་སོ། །སུམ་ཅུ་རྩ་གསུམ་པ་རྣམས་དང་ནི་ལོ་དྲུག་ལོན་པ་ཇི་ཙམ་པ་བཞིན་ནོ། །འཐབ་བྲལ་བ་རྣམས་ཀྱི་ནི་ལོ་བདུན་ལོན་པ་ཇི་ཙམ་པ་བཞིན་ནོ། །དགའ་ལྡན་

---

^{[མ་དཔེ་གཟིགས་ན་འདིར་གནོན།]}

ལྡན་བ་རྣམས་ཀྱི་ནི་ལོ་བརྒྱད་ལོན་པ་ཇི་ཙམ་པ་བཞིན་ནོ། །འཕྲུལ་དགའ་བ་རྣམས་ཀྱི་ནི་ལོ་དགུ་ལོན་པ་ཇི་ཙམ་པ་བཞིན་ནོ། །གཞན་འཕྲུལ་དབང་བྱེད་པ་རྣམས་ཀྱི་ནི་འཛམ་བུའི་གླིང་གི་བུ་ཕོ་དང་བུ་མོ་ལོ་བཅུ་ལོན་པ་ཇི་ཙམ་པ་དེ་བཞིན་དུ་ལྷ་འམ་ལྷའི་བུ་མོའི་ཕྲག་པ་འམ་ཕང་པར་རྫུས་ཏེ་སྐྱེ་བའི་སེམས་ཅན་འབྱུང་བར་འགྱུར་ཏེ། དེ་ན་ལྷ་འམ་ལྷའི་བུ་མོ་དག་འདི་སྙམ་དུ་འདི་ནི་བདག་གི་བུ་འམ་བུ་མོ་སྙམ་དུ་སེམས་སོ། །ཁྱེའུ་དང་བུ་མོ་དག་ཀྱང་འདི་སྙམ་དུ་འདི་ནི་བདག་ཅག་གི་མ་འམ་ཕའོ་སྙམ་དུ་སེམས་སོ། །ཚངས་རིས་ཀྱི་ལྷ་རྣམས་ནི་ཐོག་མ་ནས་ལུས་ཀྱི་ཡན་ལག་དང་ཉིད་ལག་ཐམས་ཅད་རྫོགས་པར་སྐྱེ་ཞིང་འཆི་བ་ན་ཡང་དེ་ཁོ་ན་ཉིད་དོ། །ཚངས་རིས་ཀྱི་ལྷ་རྣམས་ཇི་ལྟ་བ་བཞིན་དུ་ཚངས་པའི་མདུན་ན་འདོན་པ་རྣམས་དང༌། ཚངས་པ་ཆེན་པོ་པ་རྣམས་དང༌། འོད་ཆུང་བ་རྣམས་དང༌། ཚད་མེད་འོད་པ་རྣམས་དང༌། འོད་གསལ་བ་རྣམས་དང༌། དགེ་ཆུང་བ་རྣམས་དང༌། ཚད་མེད་དགེ་བ་རྣམས་དང༌། དགེ་རྒྱས་པ་རྣམས་དང༌། སྤྲིན་མེད་པ་རྣམས་དང༌། བསོད་ནམས་སྐྱེས་པ་རྣམས་དང༌། འབྲས་བུ་ཆེ་བ་རྣམས་དང༌། མི་ཆེ་བ་རྣམས་དང༌། མི་གདུང་བ་རྣམས་དང༌། གྱ་ནོམ་སྣང་བ་རྣམས་དང༌། ཤིན་ཏུ་མཐོང་བ་རྣམས་དང༌། འོག་མིན་པ་རྣམས་ཀྱང་དེ་བཞིན་ནོ། །གཟུགས་མེད་པ་རྣམས་ལ་ལུས་ཀྱི་གཟུགས་མེད་དོ། །དེ་བས་ན་དེ་དག་གི་སྐྱེ་བ་ཡང་མི་མངོན། འཆི་བ་ཡང་མི་མངོན་ནོ། །ཇི་ལྟར་འཛམ་བུའི་གླིང་གི་མི་རྣམས་མི་ཚངས་པར་སྤྱོད་པ་འཁྲིག་པའི་ཆོས་བསྟེན་པ་ནི་གཉིས་ཀྱིས་གཉིས་སྦྱོར་བ་ཡོད་པ་བཞིན་དུ་ཤར་གྱི་ལུས་འཕགས་པ་རྣམས་དང༌། ནུབ་ཀྱི་བ་ལང་སྤྱོད་པ་རྣམས་དང༌། བྱང་གི་སྒྲ་མི་སྙན་པ་རྣམས་དང༌། རྒྱལ་ཆེན་བཞིའི་ལྷ་རྣམས་དང༌། སུམ་ཅུ་རྩ་གསུམ་པ་རྣམས་དང་དེ་བཞིན་ནོ། །འཐབ་བྲལ་བ་རྣམས་ནི་འཁྱུད་པ་ཙམ་གྱིས་གདུང་བ་ཞི་པར་འགྱུར་རོ། །དགའ་ལྡན་པ་རྣམས་ཀྱི་ནི་ལག་པ་ནས་བཟུང་བ་ཙམ་གྱིས་སོ། །འཕྲུལ་དགའ་བ་རྣམས་ཀྱི་ནི་བགད་པ་ཙམ་གྱིས་སོ། །གཞན་འཕྲུལ་དབང་བྱེད་པ་རྣམས་ཀྱི་ནི་བལྟས་པ་ཙམ་གྱིས་གདུང་བ་ཞི་བར་འགྱུར་རོ། །ཚངས་རིས་པ་རྣམས་ལ་ནི་འདོད་ཆགས་

---

^{[མ་དཔེ་གཟིགས་ན་འདིར་གནོན།]}

མེད་དོ། །ཚངས་རིས་པ་རྣམས་ཇི་ལྟ་བ་བཞིན་དུ་ཚངས་པའི་མདུན་ན་འདོན་པ་རྣམས་དང༌། ཚངས་པ་ཆེན་པོ་པ་རྣམས་དང༌། འོད་ཆུང་བ་རྣམས་དང༌། ཚད་མེད་འོད་པ་རྣམས་དང༌། འོད་གསལ་བ་རྣམས་དང༌། དགེ་ཆུང་བ་རྣམས་དང༌། ཚད་མེད་དགེ་བ་རྣམས་དང༌། དགེ་རྒྱས་པར་ནམས་དང༌། སྤྲིན་མེད་པ་རྣམས་དང༌། བསོད་ནམས་སྐྱེས་པ་རྣམས་དང༌། འབྲས་བུ་ཆེ་བ་རྣམས་དང༌། མི་ཆེ་བ་རྣམས་དང༌། མི་གདུང་བ་རྣམས་དང༌། གྱ་ནོམ་སྣང་བ་རྣམས་དང༌། ཤིན་ཏུ་མཐོང་བ་རྣམས་དང༌། འོག་མིན་གྱི་ལྷ་རྣམས་ཀྱང་དེ་བཞིན་ནོ།། ཇི་ལྟར་འཛམ་བུའི་གླིང་གི་མི་རྣམས་ལ་ཁུ་ཆུ་མི་གཙང་བ་ཡོད་པ་བཞིན་དུ་ཤར་གྱི་ལུས་འཕགས་པ་རྣམས་དང༌། ནུབ་ཀྱི་བ་ལང་སྤྱོད་པ་རྣམས་དང༌། བྱང་གི་སྒྲ་མི་སྙན་གྱི་མི་རྣམས་ལ་ཡང་དེ་བཞིན་ནོ། །རྒྱལ་ཆེན་བཞིའི་ལྷ་རྣམས་ལ་རླུང་འབྱུང་ངོ༌། །རྒྱལ་ཆེན་བཞིའི་ལྷ་རྣམས་ཇི་ལྟ་བ་བཞིན་དུ་སུམ་ཅུ་རྩ་གསུམ་པ་རྣམས་དང༌། འཐབ་བྲལ་བ་རྣམས་དང༌། དགའ་ལྡན་པ་རྣམས་དང༌། འཕྲུལ་དགའ་བ་རྣམས་དང༌། གཞན་འཕྲུལ་དབང་བྱེད་པ་རྣམས་ཀྱི་ཡང་དེ་བཞིན་ནོ། །ཚངས་རིས་ཀྱི་ལྷ་རྣམས་ལ་ནི་འདོད་ཆགས་མེད་དོ། །ཚངས་རིས་པ་རྣམས་ཇི་ལྟ་བ་བཞིན་དུ་ཚངས་པའི་མདུན་ན་འདོན་པ་རྣམས་དང༌། ཚངས་པ་ཆེན་པོ་པ་རྣམས་དང༌། འོད་ཆུང་བ་རྣམས་དང༌། ཚད་མེད་འོད་པ་རྣམས་དང༌། འོད་གསལ་བ་རྣམས་དང༌། དགེ་ཆུང་བ་རྣམས་དང༌། ཚད་མེད་དགེ་བ་རྣམས་དང༌། དགེ་རྒྱས་པ་རྣམས་དང༌། སྤྲིན་མེད་པ་རྣམས་དང༌། བསོད་ནམས་སྐྱེས་པ་རྣམས་དང༌། འབྲས་བུ་ཆེ་བ་རྣམས་དང༌། མི་ཆེ་བ་རྣམས་དང༌། མི་གདུང་བ་རྣམས་དང༌། གྱ་ནོམ་སྣང་བ་རྣམས་དང༌། ཤིན་ཏུ་མཐོང་བ་རྣམས་དང༌། འོག་མིན་གྱི་ལྷ་རྣམས་ཀྱང་དེ་བཞིན་ནོ། །སེམས་ཅན་དམྱལ་བའི་སེམས་ཅན་གྱི་ཚེའི་ཚད་ཀྱི་མཐའ་ནི་བསྐལ་པ་གཅིག་སྟེ། བར་མ་དོར་འཆི་བ་ནི་ཡོད་དོ། །དུད་འགྲོའི་སྐྱེ་གནས་སུ་སྐྱེས་པའི་སེམས་ཅན་རྣམས་ཀྱི་ཚེའི་ཚད་ནི་མཐའི་བསྐལ་པ་གཅིག་སྟེ། བར་མདོའི་འཆི་བ་ནི་ཡོད་དོ། །མི་རྣམས་ཀྱི་ཉིན་ཞག་སུམ་ཅུ་གང་ཡིན་པ་དེ་ནི་ཡི་དགས་རྣམས་ཀྱི་ཉིན་གཅིག་སྟེ། ཉིན་ཞག་

---

^{[མ་དཔེ་གཟིགས་ན་འདིར་གནོན།]}

དེ་སུམ་ཅུ་ལ་ཟླ་བ་གཅིག །ཟླ་བ་བཅུ་གཉིས་ལ་ལོ་གཅིག་སྟེ། ཡི་དགས་རྣམས་ཀྱི་ཚེའི་ཚད་ཀྱི་མཐའ་ནི་ལོ་དེ་ལྟ་བུར་བརྩིས་པའི་ལོ་ལྔ་བརྒྱ་སྟེ། བར་མ་དོར་འཆི་བ་ནི་ཡོད་དོ། །དེ་མིའི་ལྟར་བརྩིས་ན་ལོ་ཁྲི་ལྔ་སྟོང་ཡོད་དོ། །ཤར་གྱི་ལུས་འཕགས་ཀྱི་མི་རྣམས་ཀྱི་ཚེའི་ཚད་ཀྱི་མཐའ་ནི་ལོ་ཉིས་བརྒྱ་ལྔ་བཅུ་སྟེ། བར་མ་དོར་འཆི་བ་ནི་ཡོད་དོ། །ནུབ་ཀྱི་བ་ལང་སྤྱོད་ཀྱི་མི་རྣམས་ཀྱི་ཚེའི་ཆད་ཀྱི་མཐའ་ནི་ལོ་ལྔ་བརྒྱ་སྟེ། བར་མ་དོར་འཆི་བ་ནི་ཡོད་དོ། །བྱང་གི་སྒྲ་མི་སྙན་གྱི་མི་རྣམས་ཀྱི་ཚེའི་ཚད་ཀྱི་མཐའ་ནི་ལོ་སྟོང་སྟེ། བར་མ་དོར་འཆི་བ་མེད་དོ། །ཅིའི་ཕྱིར་བྱང་གི་སྒྲ་མི་སྙན་གྱི་མི་རྣམས་ནི་བར་མ་དོར་འཆི་བ་མེད་ཅེ་ན། །དེ་དག་ལ་བདག་གི་མེད་ཅིང་ཡོངས་སུ་འཛིན་པ་མེད་དེ། ཚེ་ངེས་ཤིང་ཁྱད་པར་དུ་འགྲོ་བ་ཡིན་པས་དེའི་ཕྱིར་བྱང་གི་སྒྲ་མི་སྙན་གྱི་མི་རྣམས་ལ་བར་མདོར་འཆི་བ་མེད་དོ། །འཛམ་བུའི་གླིང་གི་མི་རྣམས་ལ་ནི་ཡར་སྐྱེ་བ་དང༌། མར་འགྲོ་བ་ཡོད་དེ། འཛམ་བུའི་གླིང་གི་མི་རྣམས་རེས་འགའ་ནི་ཚེ་དཔག་ཏུ་མེད་པར་འགྱུར་ལ། རེས་འགའ་ནི་ཚེ་ལོ་བཅུ་པར་འགྱུར་ལ། མི་རྣམས་ཀྱི་ཚེ་ལོ་ལྔ་བཅུ་གང་ཡིན་པ་དེ་ནི། རྒྱལ་ཆེན་བཞིའི་ལྷ་རྣམས་ཀྱི་ཉིན་ཞག་གཅིག་གོ །ཉིན་ཞག་དེ་སུམ་ཅུ་ལ་ཟླ་བ་གཅིག་གོ ། ཟླ་བ་བཅུ་གཉིས་ལ་ལོ་གཅིག་སྟེ། རྒྱལ་ཆེན་བཞིའི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་ལོ་དེ་ལྟ་བུར་བརྩིས་པའི་ལྷའི་ལོ་ལྔ་བརྒྱ་སྟེ། བར་མ་དོར་འཆི་བ་ནི་ཡོད་དོ། །དེ་མིའི་ལྟར་བརྩིས་ན་ལོ་ས་ཡ་ཕྲག་དགུ་ཡོད་དོ། །དེ་ནི་སེམས་ཅན་དམྱལ་བ་ཆེན་པོ་ཡང་སོས་ཀྱི་ཉིན་ཞག་གཅིག་གོ །ཉིན་ཞག་དེ་སུམ་ཅུ་ལ་ཟླ་བ་གཅིག །ཟླ་བ་བཅུ་གཉིས་ལ་ལོ་གཅིག་སྟེ། སེམས་ཅན་དམྱལ་བ་ཡང་སོས་ཀྱི་སེམས་ཅན་རྣམས་ཀྱི་ཚེའི་ཚད་ཀྱི་མཐའ་ནི་དེ་ལོ་ལྟ་བུར་བརྩིས་པའི་སེམས་ཅན་དམྱལ་བ་པའི་ལོ་ལྔ་བརྒྱ་སྟེ། བར་མ་དོར་འཆི་བ་ནི་ཡོད་དོ། །དེ་མིའི་ལྟར་བརྩིས་ན་ལོ་བྱེ་བ་ཕྲག་འབུམ་དྲུག་ཁྲི་ཉིས་སྟོང་ཡོད་དོ། །མི་རྣམས་ཀྱི་ལོ་བརྒྱ་གང་ཡིན་པ་དེ་ནི་སུམ་ཅུ་རྩ་གསུམ་གྱི་ཉིན་ཞག་གཅིག་གོ །ཉིན་ཞག་དེ་སུམ་ཅུ་ལ་ཟླ་བ་གཅིག །ཟླ་བ་བཅུ་གཉིས་ལ་ལོ་གཅིག་སྟེ། སུམ་ཅུ་རྩ་གསུམ་གྱི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་དེ་ལྟ་བུར་བརྩིས་

---

^{[མ་དཔེ་གཟིགས་ན་འདིར་གནོན།]}

པའི་ལྷའི་ལོ་སྟོང་སྟེ། བར་མ་དོར་འཆི་བ་ནི་ཡོད་དོ། །དེ་མིའི་ལྟར་བརྩིས་ན་ལོ་བྱེ་བ་ཕྲག་གསུམ་དང་ས་ཡ་ཕྲག་དྲུག་ཡོད་དོ། །དེ་ནི་སེམས་ཅན་དམྱལ་བ་ཆེན་པོ་ཐིག་ནག་གི་ཉིན་ཞག་གཅིག་གོ །ཉིན་ཞག་དེ་སུམ་ཅུ་ལ་ཟླ་བ་གཅིག་གོ །ཟླ་བ་བཅུ་གཉིས་ལ་ལོ་གཅིག་སྟེ། སེམས་ཅན་དམྱལ་བ་ཆེན་པོ་ཐིག་ནག་གི་ཚེའི་ཚད་ཀྱི་མཐའ་ནི་ལོ་དེ་ལྟ་བུར་བརྩིས་པའི་སེམས་ཅན་དམྱལ་བའི་ལོ་སྟོང་སྟེ། བར་མདོར་འཆི་བ་ནི་ཡོད་དོ། །དེ་མིའི་ལྟར་བརྩིས་ན་ལོ་བྱེ་བ་ཕྲག་འབུམ་ཕྲག་བཅུ་གཉིས་དང༌། བྱེ་བ་ཕྲག་དགུ་ཁྲི་དྲུག་སྟོང་ཡོད་དོ། །མི་རྣམས་ཀྱི་ལོ་ཉིས་བརྒྱ་གང་ཡིན་པ་དེ་ནི་འཐབ་བྲལ་གྱི་ལྷ་རྣམས་ཀྱི་ཉིན་ཞག་གཅིག་གོ །ཉིན་ཞག་དེ་སུམ་ཅུ་ལ་ཟླ་བ་གཅིག །ཟླ་བ་བཅུ་གཉིས་ལ་ལོ་གཅིག་སྟེ། འཐབ་བྲལ་བའི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་ལོ་དེ་ལྟ་བུར་བརྩིས་པའི་ལྷའི་ལོ་ཉིས་སྟོང་སྟེ། བར་མ་དོར་འཆི་བ་ནི་ཡོད་དོ། །དེ་མིའི་ལྟར་བརྩིས་ན་ལོ་བྱེ་བ་ཕྲག་བཅུ་བཞི་དང་ས་ཡ་ཕྲག་བཞི་ཡོད་དོ། །དེ་ནི་སེམས་ཅན་དམྱལ་བ་ཆེན་པོ་བསྡུས་གཞོམ་གྱི་ཉིན་ཞག་གཅིག་གོ །ཉིན་ཞག་དེ་སུམ་ཅུ་ལ་ཟླ་བ་གཅིག །ཟླ་བ་བཅུ་གཉིས་ལ་ལོ་གཅིག་སྟེ། སེམས་ཅན་དམྱལ་བ་ཆེན་པོ་བསྡུས་གཞོམ་གྱི་སེམས་ཅན་རྣམས་ཀྱི་ཚེའི་ཚད་ཀྱི་མཐའ་ནི་ལོ་དེ་ལྟ་བུར་བརྩིས་པའི་སེམས་ཅན་དམྱལ་བའི་ལོ་ཉིས་སྟོང་སྟེ། བར་མ་དོར་འཆི་བ་ནི་ཡོད་དོ། །དེ་མིའི་ལྟར་བརྩིས་ན་ལོ་བྱེ་བ་ཕྲག་གཅིག་དང༌། བྱེ་བ་ཕྲག་སུམ་འབུམ་དྲུག་ཁྲི་བརྒྱད་སྟོང་ཡོད་དོ། །མི་རྣམས་ཀྱི་ལོ་བཞི་བརྒྱ་གང་ཡིན་པ་དེ་ནི་དགའ་ལྡན་གྱི་ལྷ་རྣམས་ཀྱི་ཉིན་ཞག་གཅིག་གོ །ཉིན་ཞག་སུམ་ཅུ་ལ་ཟླ་བ་གཅིག །ཟླ་བ་བཅུ་གཉིས་ལ་ལོ་གཅིག་སྟེ། དགའ་ལྡན་གྱི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་ལོ་དེ་ལྟ་བུར་བརྩིས་པའི་ལོ་བཞི་སྟོང་ཡོད་དོ། བར་མ་དོར་འཆི་བ་ནི་ཡོད་དོ། །དེ་མིའི་ལྟར་བརྩིས་ན་ལོ་བྱེ་བ་ལྔ་བཅུ་རྩ་བདུན་དང༌། ལོ་ས་ཡ་ཕྲག་དྲུག་ཡོད་དོ། །དེ་ནི་སེམས་ཅན་དམྱལ་བ་ཆེན་པོ་ངུ་འབོད་ཀྱི་ཉིན་ཞག་གཅིག་གོ །ཉིན་ཞག་དེ་སུམ་ཅུ་ལ་ཟླ་བ་གཅིག །ཟླ་བ་བཅུ་གཉིས་ལ་ལོ་གཅིག་སྟེ། སེམས་ཅན་དམྱལ་བ་ཆེན་པོ་ངུ་འབོད་ཀྱི་སེམས་ཅན་རྣམས་ཀྱི་ཚེའི་

---

^{[མ་དཔེ་གཟིགས་ན་འདིར་གནོན།]}

ཚད་ཀྱི་མཐའ་ནི་ལོ་དེ་ལྟ་བུར་བརྩིས་པའི་ལོ་བཞི་སྟོང་སྟེ། བར་མ་དོར་འཆི་བ་ནི་ཡོད་དོ། །དེ་མིའི་ལྟར་བརྩིས་ན་ལོ་བྱེ་བ་ཕྲག་བྱེ་བ་བརྒྱ་དང༌། བྱེ་བ་ཕྲག་ས་ཡ་གཉིས་དང༌། བྱེ་བ་ཕྲག་དགུ་འབུམ་བཞི་ཁྲི་བཞི་སྟོང་ཡོད་དོ། །མི་རྣམས་ཀྱི་ལོ་བརྒྱད་བརྒྱ་གང་ཡིན་པ་དེ་ནི་འཕྲུལ་དགའ་ལྷ་རྣམས་ཀྱི་ཉིན་ཞག་གཅིག་གོ །ཉིན་ཞག་དེ་སུམ་ཅུ་ལ་ཟླ་བ་གཅིག་གོ །ཟླ་བ་བཅུ་གཉིས་ལ་ལོ་གཅིག་སྟེ། འཕྲུལ་དགའི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་ལོ་དེ་ལྟ་བུར་བརྩིས་པའི་ལྷའི་ལོ་བརྒྱད་སྟོང་སྟེ། བར་མདོའི་འཆི་བ་ནི་ཡོད་དོ། །དེ་མིའི་ལྟར་བརྩིས་ན་ལོ་བྱེ་བ་ཕྲག་ཉིས་བརྒྱ་སུམ་ཅུ་དང༌། ལོ་ས་ཡ་ཕྲག་བཞི་ཡོད་དོ། །དེ་ནི་སེམས་ཅན་དམྱལ་བ་ཆེན་པོ་ངུ་འབོད་ཆེན་པོའི་ཉིན་ཞག་གཅིག་གོ །ཉིན་ཞག་དེ་སུམ་ཅུ་ལ་ཟླ་བ་གཅིག །ཟླ་བ་བཅུ་གཉིས་ལ་ལོ་གཅིག་སྟེ། སེམས་ཅན་དམྱལ་བ་ཆེན་པོ་ངུ་འབོད་ཆེན་པོའི་ཚེའི་ཚད་ཀྱི་མཐའ་ནི་ལོ་དེ་ལྟ་བུར་བརྩིས་པའི་སེམས་ཅན་དམྱལ་བའི་ལོ་བརྒྱད་སྟོང་ཡོད་དེ། བར་མ་དོར་འཆི་བ་ནི་ཡོད་དོ། །དེ་མིའི་ལྟར་བརྩིས་ན་ལོ་བྱེ་བ་ཕྲག་དྲུག་ཅུ་རྩ་དྲུག་དང༌། བྱེ་བ་ཕྲག་ས་ཡ་གསུམ་དང་བྱེ་བ་ཕྲག་ལྔ་འབུམ་ལྔ་ཁྲི་ཉིས་སྟོང་ཡོད་དོ། །མི་རྣམས་ཀྱི་ལོ་སྟོང་དྲུག་བརྒྱ་གང་ཡིན་པ་དེ་ནི་གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་ཉིན་ཞག་གཅིག་གོ །ཉིན་ཞག་དེ་སུམ་ཅུ་ལ་ཟླ་བ་གཅིག །ཟླ་བ་བཅུ་གཉིས་ལ་ལོ་གཅིག་སྟེ། གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་ལོ་དེ་ལྟ་བུར་བརྩིས་པའི་ལྷའི་ལོ་ཁྲི་དྲུག་སྟོང་སྟེ། བར་མ་དོར་འཆི་བ་ནི་ཡོད་དོ། །དེ་མིའི་ལྟར་བརྩིས་ན་ལོ་བྱེ་བ་ཕྲག་དགུ་བརྒྱ་ཉི་ཤུ་རྩ་གཅིག་དང༌། ལོ་ས་ཡ་དྲུག་ཡོད་དེ། དེ་ནི་སེམས་ཅན་དམྱལ་བ་ཆེན་པོ་ཚ་བའི་ཉིན་ཞག་གཅིག་གོ །ཉིན་ཞག་དེ་སུམ་ཅུ་ལ་ཟླ་བ་གཅིག །ཟླ་བ་བཅུ་གཉིས་ལ་ལོ་གཅིག་སྟེ། སེམས་ཅན་དམྱལ་བ་ཆེན་པོ་ཚ་བའི་སེམས་ཅན་དམྱལ་བ་པའི་སེམས་ཅན་རྣམས་ཀྱི་ཚེའི་ཚད་ཀྱི་མཐའ་ནི་ལོ་དེ་ལྟ་བུར་བརྩིས་པའི་སེམས་ཅན་དམྱལ་བ་པའི་ལོ་ཁྲི་དྲུག་སྟོང་སྟེ། བར་མ་དོར་འཆི་བ་ནི་ཡོད་དོ། །དེ་མིའི་ལྟར་བརྩིས་ན་ལོ་བྱེ་བ་ཕྲག་ལྔ་བརྒྱ་དང༌། ལོ་བྱེ་བ་ཕྲག་བྱེ་བ་སུམ་ཅུ་དང༌། ལོ་བྱེ་བ་ཕྲག་ས་ཡ་བརྒྱད་དང༌། བཞི་འབུམ་དང༌། ལོ་བྱེ་བ་

---

^{[མ་དཔེ་གཟིགས་ན་འདིར་གནོན།]}

ཕྲག་ཁྲི་དྲུག་སྟོང་ཡོད་དོ། །བར་གྱི་མདོ་ལ། དགུ་དང་གསུམ་དང་བཅུ་བཞི་དང་ནི་ལྔ་བཅུ་རྩ་བདུན་དང༌། །ཉིས་བརྒྱ་དགུ་བརྒྱ་རྣམས་ནི་མི་ཡི་གྲངས་ཀྱི་ལྷ་ཚེར་བཤད། །དེ་བཞིན་གཅིག་དང་བཅུ་གཉིས་གཅིག་དང་བརྒྱད་དང་དྲུག་བཅུ་དང༌། །ལྔ་བརྒྱ་དག་ནི་སེམས་ཅན་དམྱལ་བ་པ་ཡི་ཚེར་བཤད་དོ། །ཚངས་རིས་ཀྱི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་བསྐལ་པ་ཕྱེད་དེ། བར་མ་དོར་འཆི་བ་ནི་ཡོད་དོ། །སེམས་ཅན་དམྱལ་བ་ཆེན་པོ་རབ་ཏུ་ཚ་བའི་ཚེའི་ཚད་ཀྱི་མཐའ་ནི་བསྐལ་པ་ཕྱེད་དེ། བར་མ་དོར་འཆི་བ་ནི་ཡོད་དོ། །ཚངས་པའི་མདུན་ན་འདོན་པའི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་བསྐལ་པ་གཅིག་ཡིན་ཏེ། བར་མ་དོར་འཆི་བ་ནི་ཡོད་དོ། །སེམས་ཅན་དམྱལ་བ་ཆེན་པོ་མནར་མེད་པའི་ཚེའི་ཚད་ཀྱི་མཐའ་ནི་བསྐལ་པ་གཅིག་སྟེ། བར་མ་དོར་འཆི་བ་ནི་ཡོད་དོ། །ཚངས་པ་ཆེན་པོ་པའི་ལྷ་རྣམས་ཀྱི་ཚེའི་ཆད་ཀྱི་མཐའ་ནི་བསྐལ་པ་ཕྱེད་དང་གཉིས་ཏེ། བར་མ་དོར་འཆི་བ་ནི་ཡོད་དོ། །འོད་ཆུང་གི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་བསྐལ་པ་གཉིས་ཏེ། བར་མ་དོར་འཆི་བ་ནི་ཡོད་དོ། །ཚད་མེད་འོད་ཀྱི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་བསྐལ་པ་བཞི་སྟེ། བར་མ་དོར་འཆི་བ་ནི་ཡོད་དོ། །འོད་གསལ་གྱི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་བསྐལ་པ་བརྒྱད་དེ། བར་མ་དོར་འཆི་བ་ནི་ཡོད་དོ། །དགེ་ཆུང་གི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་བསྐལ་པ་བཅུ་དྲུག་སྟེ། བར་མ་དོར་འཆི་བ་ནི་ཡོད་དོ། །ཚད་མེད་དགེ་བའི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་བསྐལ་པ་སུམ་ཅུ་རྩ་གཉིས་ཏེ། བར་མ་དོར་འཆི་བ་ནི་ཡོད་དོ། །དགེ་རྒྱས་ཀྱི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་བསྐལ་པ་དྲུག་ཅུ་རྩ་བཞི་སྟེ། བར་མ་དོར་འཆི་བ་ནི་ཡོད་དོ། །སྤྲིན་མེད་ཀྱི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་བསྐལ་པ་བརྒྱ་ཉི་ཤུ་རྩ་ལྔ་སྟེ། བར་མ་དོར་འཆི་བ་ནི་ཡོད་དོ། །བསོད་ནམས་སྐྱེས་ཀྱི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་བསྐལ་པ་ཉིས་བརྒྱ་ལྔ་བཅུ་སྟེ། བར་མ་དོར་འཆི་བ་ནི་ཡོད་དོ། །འབྲས་བུ་ཆེ་བའི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་བསྐལ་པ་ལྔ་བརྒྱ་སྟེ། བར་མ་དོར་འཆི་བ་ནི་ཡོད་དོ། །འདུ་ཤེས་མེད་པའི་ལྷ་རྣམས་ཀྱང་དེ་དང་འདྲའོ། །མི་ཆེ་བའི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་བསྐལ་པ་སྟོང་སྟེ།

---

^{[མ་དཔེ་གཟིགས་ན་འདིར་གནོན།]}

བར་མ་དོར་འཆི་བ་ནི་ཡོད་དོ། །མི་གདུང་བའི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་བསྐལ་པ་ཉིས་སྟོང་སྟེ། བར་མ་དོར་འཆི་བ་ནི་ཡོད་དོ། །གྱ་ནོམ་སྣང་བའི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་བསྐལ་པ་བཞི་སྟོང་སྟེ། བར་མ་དོར་འཆི་བ་ནི་ཡོད་དོ། །ཤིན་ཏུ་མཐོང་བའི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་བསྐལ་པ་བརྒྱད་སྟོང་སྟེ། བར་མ་དོར་འཆི་བ་ནི་ཡོད་དོ། །འོག་མིན་གྱི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་བསྐལ་པ་ཁྲི་དྲུག་སྟོང་སྟེ། བར་མ་དོར་འཆི་བ་ནི་ཡོད་དོ། །ནམ་མཁའ་མཐའ་ཡས་སྐྱེ་མཆེད་པའི་ཚེའི་ཚད་ཀྱི་མཐའ་ནི་བསྐལ་པ་ཉིད་ཁྲི་སྟེ། བར་མ་དོར་འཆི་བ་ནི་ཡོད་དོ། །རྣམ་ཤེས་མཐའ་ཡས་སྐྱེ་མཆེད་པའི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་བསྐལ་པ་བཞི་ཁྲི་སྟེ། བར་མ་དོར་འཆི་བ་ནི་ཡོད་དོ། །ཅི་ཡང་མེད་པའི་སྐྱེ་མཆེད་ཀྱི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་བསྐལ་པ་དྲུག་ཁྲི་སྟེ། བར་མ་དོར་འཆི་བ་ནི་ཡོད་དོ། །འདུ་ཤེས་མེད་འདུ་ཤེས་མེད་མིན་སྐྱེ་མཆེད་པའི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་བསྐལ་པ་བརྒྱད་ཁྲི་སྟེ། བར་མ་དོར་འཆི་བ་ནི་ཡོད་དོ། །འདི་ནས་བྱང་ཕྱོགས་ན་རི་ནག་པོ་གསུམ་ཡོད་དོ། །རི་ནག་པོ་གསུམ་པོ་དེ་དག་གི་བྱང་ཕྱོགས་ན་རི་ནག་པོ་གསུམ་ཡོད་དོ། །རི་ནག་པོ་གཞན་གསུམ་པོ་དེ་དག་གི་བྱང་ཕྱོགས་ན་ཡང་རི་ནག་པོ་གཞན་གསུམ་ཡོད་དོ། །རི་ནག་པོ་གཞན་གསུམ་པོ་དེ་དག་གི་བྱང་ཕྱོགས་ན་རིའི་རྒྱལ་པོ་གངས་ཞེས་བྱ་བ་ཡོད་དོ། །རིའི་རྒྱལ་པོ་གངས་ཀྱི་བྱང་ཕྱོགས་ན། རིའི་རྒྱལ་པོ་སྤོས་ཀྱི་ངད་ལྡང་ཞེས་བྱ་བ་ཡོད་དོ། །རིའི་རྒྱལ་པོ་སྤོས་ཀྱི་ངད་ལྡང་ནས་དཔག་ཚད་བཅུའི་ཚུ་རོལ་ན་མཚོ་ཆེན་པོ་ཆུ་ཞེས་བྱ་བ་ཞིག་ཡོད་དེ། མ་དྲོས་པ་ཞེས་ཀྱང་བྱའོ། །མཚོ་ཆེན་པོ་ཆུ་ཞེས་བྱ་བ་དེ་ལ་ཆུར་དཔག་ཚད་ལྔ་བཅུ་ཞེང་དུ་དཔག་ཚད་ལྔ་བཅུ་ཡོད་དོ། །མཐའ་སྐོར་དུ་ནི་དཔག་ཚད་ཉིས་བརྒྱ་ཡོད་དོ། །དབྱིབས་ལེགས་ཤིང་བལྟ་ན་སྡུག་ལ་མཛེས་པ་ཆུ་བསལ་ཞིང་ཆུ་སྦྲང་རྩི་ལྟ་བུས་གང་ལ། མེ་ཏོག་ཨུཏྤ་ལ་དང༌། པདྨ་དང༌། ཀུ་མུ་ཏ་དང༌། པདྨ་དཀར་པོས་ཀུན་དུ་ཁེབས་པར་འདུག་གོ །དེའི་ནང་ནས་ཆུ་ཀླུང་ཆེན་པོ་བཞི་འདི་ལྟ་སྟེ། གངྒཱ་དང༌། སིནྡྷུ་དང༌། སི་ཏ་དང༌། པཀྵུ་དང༌། འདི་རྣམས་འབབ་སྟེ། གངྒཱ་ནི་ཤར་

---

^{[མ་དཔེ་གཟིགས་ན་འདིར་གནོན།]}

ཕྱོགས་ནས་གླང་པོ་ཆེའི་ཁ་ནས་འབབ་སྟེ། མཚོ་ཆེན་པོ་ཆུ་ཞེས་བྱ་བའི་གཡས་ཕྱོགས་སུ་བསྐོར་ནས། ཀླུང་ལྔ་བརྒྱ་དང་ལྷན་ཅིག་ཏུ་ཤར་ཕྱོགས་གྱི་རྒྱ་མཚོ་ཆེན་པོར་འགྲོའོ། །སིནྡྷུ་ནི་ལྷོ་ཕྱོགས་ནས་ཁྱུ་མཆོག་གི་ཁ་ནས་འབབ་སྟེ། དེ་ནི་མཚོ་ཆེན་པོ་ཆུ་ཞེས་བྱ་བའི་གཡས་ཕྱོགས་སུ་བསྐོར་ནས་ཀླུང་ལྔ་བརྒྱ་དང་ལྷན་ཅིག་ཏུ་ལྷོ་ཕྱོགས་ཀྱི་རྒྱ་མཚོ་ཆེན་པོར་འགྲོའོ། །པཀྵུ་ནི་ནུབ་ཕྱོགས་ནས་རྟའི་ཁ་ནས་འབབ་སྟེ། དེ་ནི་མཚོ་ཆེན་པོ་ཆུ་ཞེས་བྱ་བའི་གཡས་ཕྱོགས་སུ་བསྐོར་ནས། ཀླུང་ལྔ་བརྒྱ་དང་ལྷན་ཅིག་ཏུ་ནུབ་ཕྱོགས་ཀྱི་རྒྱ་མཚོ་ཆེན་པོར་འགྲོའོ། །སི་ཏ་ནི་བྱ་ཕྱོགས་ནས་སེང་གེའི་ཁ་ནས་འབབ་སྟེ། དེ་ནི་མཚོ་ཆེན་པོ་ཆུ་ཞེས་བྱ་བའི་གཡས་ཕྱོགས་སུ་བསྐོར་ནས། ཀླུང་ལྔ་བརྒྱ་དང་ལྷན་ཅིག་ཏུ་བྱང་ཕྱོགས་ཀྱི་རྒྱ་མཚོ་ཆེན་པོར་འགྲོའོ། །འདི་སྐད་དུ། བྱང་ཕྱོགས་ཁ་དགུར་འགྱུར་བ་ཡི། །ཆུ་མཚོ་ཡོད་དེ་གཞན་དག་ཀྱང༌། །དེ་ནི་མཚོ་ཆེན་ཆུ་ཞེས་བྱ། །ཐ་དད་རྒྱུ་རྣམས་འབྱུང་གནས་ཡོད། །ཆུ་ཀླུང་གངྒཱ་སིནྡྷུ་པཀྵུ་དང༌། །སི་ཏ་དཔའ་རླབས་ལྦུ་བའི་ཕྲེང་བ་ཅན། །འབབ་ཅིང་ཐམས་ཅད་གསལ་བའི་ཆུ་ཡིན་ཏེ། །ཕྱོགས་བཞི་ཁོར་ཁོར་ཡུག་དག་ནས་འབྱུང༌། །གངྒཱ་ཤར་ཕྱོགས་རྒྱ་མཚོ་ར་འགྲོ་བ་སྟེ། །སིནྡྷུ་ལྷོ་ཕྱོགས་རྒྱ་མཚོར་འགྲོ་བ་ཡིན། །པཀྵུ་ཡང་ནི་ནུབ་ཕྱོགས་རྒྱ་མཚོར་འགྲོ། །དེ་ཡི་བྱང་ཕྱོགས་རྒྱ་མཚོར་སི་ཏ་འགྲོ། །ཆུ་ཀླུང་རབ་མཆོག་བཞི་པོ་འདི་དག་ནི། །མཆོག་ཏུ་བཟང་ཞིང་སོ་སོར་འབབ་པ་སྟེ། །རེ་རེ་ཞིང་ཡང་ལྔ་བརྒྱ་ཁྱེར་ནས་ནི། །ཆུ་ཡི་རྒྱུན་རྣམས་རྒྱ་མཚོ་ཆེན་པོར་འགྲོ། །ཞེས་ཀྱང་བྱའོ། །རི་སྤོས་ཀྱི་ངད་ལྡང་དེའི་བྱང་ཕྱོགས་དཔག་ཚད་ཉི་ཤུ་ན་གསེར་གྱི་བྲག་བྱ་སྐྱིབས་ལྷ་མ་ཡིན་གྱི་ངོས་ཞེས་བྱ་བ་ཡོད་དེ། ཆུར་དཔག་ཚད་ལྔ་བཅུ་ཞིང་དུ་ཡང་དཔག་ཚད་ལྔ་བཅུ། མཐའ་སྐོར་དུ་དཔག་ཚད་ཉིས་བརྒྱ་འཕང་དུ་དཔག་ཚད་ཕྱེད་དང་བཞི་ཡོད་པ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་ཞིག་ཡོད་དོ། །དེའི་ནང་གིས་གཞི་ཡང་དབྱིབས་ལེགས་ཤིང་བལྟ་ན་སྡུག་ལ། མཛེས་པ་གསེར་གྱི་བྱེ་མ་བདལ་ཞིང་ཙནྡན་གྱི་ཆུས་ཆག་ཆག་བཏབ་པ་སྟེ། དེར་ཡིད་དུ་མི་འོང་བ་ཤིང་ངམ། །གསེག་མ་འམ། གང་ཅི་ཡང་རུང་བ་དག་ལྷུང་ན་དེ་མི་མ་ཡིན་པ་

---

^{[མ་དཔེ་གཟིགས་ན་འདིར་གནོན།]}

རྣམས་ཀྱི་རླུང་གི་མཐུས་ཕྱི་རོལ་དུ་གཏོར་རོ། །དེའི་ཁོར་ཁོར་ཡུག་ན་གསེར་གྱི་བྲག་བྱ་སྐྱིབས་ཅན་བརྒྱ་སྟོང་ཡོད་དོ། །དེ་དག་ཐམས་ཅད་ཀྱང་དབྱིབས་ལེགས་ཤིང་བལྟ་ན་སྡུག་ལ་མཛེས་པ་སྟེ། དེ་དག་གི་ནང་ནས་གཞི་རྣམས་ཀྱང་དབྱིབས་ལེགས་ཤིང་བལྟ་ན་སྡུག་ལ། མཛེས་པ་གསེར་གྱི་ཕྱེ་མ་བདལ་ཞིང་ཙནྡན་གྱི་ཆུས་ཆག་ཆག་བཏབ་པ། དེ་དག་ཏུ་ཡང་ཡིད་དུ་མི་འོང་བ་ཤིང་ངམ། གསེག་མ་འམ། གང་ཅི་ཡང་རུང་བ་དག་ལྷུང་ན། དེ་མི་མ་ཡིན་པ་རྣམས་ཀྱི་རླུང་གི་མཐུས་ཕྱི་རོལ་དུ་འདོར་རོ། །དེའི་ལམ་སྲིད་དུ་དཔག་ཚད་ཉི་ཤུ། ཞེང་དུ་དཔག་ཚད་ཕྱེད་དང་གཉིས་ཡོད་པ་དབྱིབས་ལེགས་ཤིང་བལྟ་ན་སྡུག་ལ་མཛེས་པ་གསེར་གྱི་ཕྱེ་མ་བདལ་ཞིང་ཙནྡན་གྱི་ཆུས་ཆག་ཆག་བཏབ་པ་ཞིག་ཡོད་དེ། དེ་ཡང་ཡིད་དུ་མི་འོང་བ་ཤིང་ངམ་གསེག་མའམ། གང་ཅི་ཡང་རུང་བ་དག་ལྷུང་ན་དེ་མི་མ་ཡིན་པ་རྣམས་ཀྱི་རླུང་གི་མཐུས་ཕྱི་རོལ་དུ་འདོར་རོ། །བྲག་བྱ་སྐྱིབས་ལྷ་མ་ཡིན་གྱི་ངོས་དེའི་བྱང་ཕྱོགས་དཔག་ཚད་ཉི་ཤུ་ན་ཤིང་སཱ་ལའི་རྒྱལ་པོ་ཆེན་པོ་རབ་ཏུ་བརྟན་པ་ཞེས་བྱ་བ་སཱ་ལའི་ཕྲེང་བ་རིམ་པ་བདུན་གྱིས་བསྐོར་བ་ཞིག་ཡོད་དོ། །སཱ་ལའི་རྒྱལ་པོ་རབ་ཏུ་བརྟན་པ་དེའི་རྩ་བ་ནི་འདོམ་བཅུ་བཞི་ཐུར་དུ་ཟུག་གོ །སཱ་ལའི་ཕྲེང་བ་དང་པོའི་རྩ་བ་ནི་འདོམ་བཅུ་གསུམ་ཐུར་དུ་ཟུག་གོ །གཉིས་པའི་ནི་བཅུ་གཉིས་སོ། །གསུམ་པའི་ནི་བཅུ་གཅིག་གོ །བཞི་པའི་ནི་བཅུའོ། །ལྔ་པའི་ནི་དགུའོ། །དྲུག་པའི་ནི་བརྒྱད་དོ། །སཱ་ལའི་ཕྲེང་བ་བདུན་པའི་རྩ་བ་ནི་འདོམ་བདུན་ཐུར་དུ་ཟུག་གོ །སཱ་ལའི་རྒྱལ་པོ་རབ་ཏུ་བརྟན་པ་དེའི་ཡལ་ག་དང༌། ལོ་མ་དང་ཡལ་ག་རྣམས་གང་ཡིན་པ་དེ་ནི་སཱ་ལའི་ཕྲེང་བ་དང་པོ་ལ་ཐུག་གོ །སཱ་ལའི་ཕྲེང་བ་དང་པོ་ནི་ཡལ་ག་དང་ལོ་མ་དང་ཡལ་ག་གང་ཡིན་པ་དེ་ནི་གཉིས་པ་ལའོ། །གཉིས་པའི་གང་ཡིན་པ་དེ་ནི་གསུམ་པ་ལའོ། །གསུམ་པའི་གང་ཡིན་པ་དེ་ནི་བཞི་པ་ལའོ། །བཞི་པའི་གང་ཡིན་པ་དེ་ནི་ལྔ་པ་ལའོ། །ལྔ་པའི་གང་ཡིན་པ་དེ་ནི་དྲུག་པ་ལའོ། །དྲུག་པའི་གང་ཡིན་པ་དེ་ནི་བདུན་པ་ལའོ། །སཱ་ལའི་ཕྲེང་བ་བདུན་པའི་ཡལ་ག་དང༌། ལོ་མ་དང་ཡལ་ག་གང་ཡིན་པ་དེ་ནི་ནམ་མཁའ་ཁྱབ་པར་འདུག་གོ །དེའི་ནང་གི་ས་གཞི་ཡང་

---

^{[མ་དཔེ་གཟིགས་ན་འདིར་གནོན།]}

དབྱིབས་ལེགས་ཤིང་བལྟ་ན་སྡུག་ལ། མཛེས་པ་གསེར་གྱི་ཕྱེ་མ་བདལ་ཞིང་ཙནྡན་གྱི་ཆུས་ཆག་ཆག་བཏབ་པ་སྟེ། དེ་ཡང་ཡིད་དུ་མི་འོང་བ་ཤིང་ངམ་གསེག་མ་འམ། གང་ཅི་ཡང་རུང་བ་དག་ལྷུང་ན་ནི་དེ་མི་མ་ཡིན་པ་རྣམས་ཀྱི་རླུང་གི་མཐུས་ཕྱི་རོལ་ཏུ་འདོར་རོ། །དེའི་ལམ་སྲིད་དུ་དཔག་ཆད་ཉི་ཤུ། ཞེང་དུ་དཔག་ཚད་ཕྱེད་དང་གཉིས་ཡོད་པ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་ཞིག་ཡོད་དོ། །དེར་ཡང་ཡིད་དུ་མི་འོང་བ་ཤིང་ངམ་གསེག་མའམ་གང་ཅི་ཡང་རུང་བ་དག་ལྷུང་ན་དེ་མི་མ་ཡིན་པ་རྣམས་ཀྱི་རླུང་གི་མཐུས་ཕྱི་རོལ་དུ་འདོར་རོ། །སཱ་ལའི་རྒྱལ་པོ་རབ་ཏུ་བརྟན་པའི་ཤར་ཕྱོགས་དཔག་ཚད་ཉི་ཤུ་ན། རྫིང་བུ་དལ་གྱིས་འབབ་ཅེས་བྱ་བ་ཆུར་དཔག་ཚད་ལྔ་བཅུ། ཞེང་དུ་ཡང་དཔག་ཚད་ལྔ་བཅུ་སྟེ། མཐའ་སྐོར་དུ་དཔག་ཚད་ཉིས་བརྒྱ་ཡོད་པ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་ཆུ་བསིལ་ཞིང་ཆུ་སྦྲང་རྩི་ལྟ་བུས་གང་བ། མེ་ཏོག་ཨུཏྤ་ལ་དང༌། པདྨ་དང༌། ཀུ་མུ་ཏ་དང༌། པདྨ་དཀར་པོས་ཁེབས་པ་ཞིག་ཡོད་དོ། །རྫིང་བུ་ངལ་གྱིས་འབབ་པ་དེའི་ནང་གི་པདྨའི་ལོ་མ་རྣམས་ཆེ་ཞིང་མཆོག་ཏུ་ཆེ་སྟེ། འདི་ལྟ་སྟེ། བ་ལང་གི་ཀོ་བ་ཙམ་མོ། །པདྨའི་སྡོང་བུ་རྣམས་ཆེ་ཞིང་མཆོག་ཏུ་ཆེ་སྟེ། འདི་ལྟ་སྟེ། གཤོལ་མདའ་ཙམ་མོ། །པདྨའི་མེ་ཏོག་རྣམས་ཆེ་ཞིང་མཆོག་ཏུ་ཆེ་སྟེ། འདི་ལྟ་སྟེ། ཤིང་རྟའི་འཕང་ལོ་ཙམ་མོ། །པདྨའི་རྩ་བ་རྣམས་ཆེ་ཞིང་མཆོག་ཏུ་ཆེ་སྟེ། འདི་ལྟ་སྟེ། སྐྱེས་བུ་ཆེན་པོའི་བརླ་ཙམ་མོ། །རོ་མངར་ཞིང་མཆོག་ཏུ་མངར་སྟེ། འདི་ལྟ་སྟེ། སྦྲང་བུའི་སྦྲང་རྩི་མ་བསྐོལ་བ་བཞིན་ནོ། །བཅད་ན་ཡང་འོ་མ་འཛག་གོ །རྫིང་བུ་དལ་གྱིས་འབབ་ཀྱི་ཁོ་ར་ཁོར་ཡུག་ན་རྫིང་བུ་བརྒྱད་སྟོང་ཡོད་དེ། དེ་དག་ཐམས་ཅད་ཀྱང་དབྱིབས་ལེགས་ཤིང་བལྟ་ན་སྡུག་ལ་མཛེས་པ་ཆུ་བསིལ་ཞིང་སྦྲང་རྩི་ལྟ་བུས་གང་ངོ༌། །དེ་དག་གི་ནང་གི་པདྨའི་ལོ་མ་རྣམས་ཀྱང་ཆེ་ཞིང་མཆོག་ཏུ་ཆེ་སྟེ། འདི་ལྟ་སྟེ། བ་ལང་གི་ཀོ་བ་ཙམ་མོ། །པདྨའི་སྡོང་བུ་རྣམས་ཆེ་ཞིང་མཆོག་ཏུ་ཆེ་སྟེ། འདི་ལྟ་སྟེ། གཤོལ་མདའ་ཙམ་མོ། །པདྨའི་མེ་ཏོག་རྣམས་ཆེ་ཞིང་མཆོག་ཏུ་ཆེ་སྟེ། འདི་ལྟ་སྟེ། ཤིང་རྟའི་འཕང་ལོ་ཙམ་མོ། །པདྨའི་རྩ་བ་རྣམས་ཆེ་ཞིང་

---

^{[མ་དཔེ་གཟིགས་ན་འདིར་གནོན།]}

མཆོག་ཏུ་ཆེ་སྟེ། འདི་ལྟ་སྟེ། སྐྱེས་བུ་ཆེན་པོའི་བརླ་ཙམ་མོ། །རོ་མངར་ཞིང་མཆོག་ཏུ་མངར་ཏེ། འདི་ལྟ་སྟེ། སྦྲང་བུའི་སྦྲང་རྩི་མ་བསྐོལ་བ་བཞིན་ནོ། །བཅད་ན་ཡང་འོ་མ་འཛག་གོ །དེའི་ལམ་སྲིད་དུ་དཔག་ཚད་ཉི་ཤུ། ཞིང་དུ་དཔག་ཚད་ཕྱེད་དང་གཉིས་ཡོད་པ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་གསེར་གྱི་ཕྱེ་མ་བདལ་ཞིང་ཙནྡན་གྱི་ཆུས་ཆག་ཆག་བཏབ་པ་ཞིག་ཡོད་དེ། དེར་ཡང་ཡིད་དུ་མི་འོང་བ་ཤིང་ངམ། གསེག་མ་འམ། གང་ཅི་ཡང་རུང་བདག་ལྷུང་ན་དེ་མི་མ་ཡིན་པ་རྣམས་ཀྱི་རླུང་གི་མཐུས་ཕྱི་རོལ་དུ་འདོར་རོ།། སུམ་ཅུ་རྩ་གསུམ་པའི་ལྷ་རྣམས་ཀྱི་གླང་པོ་ཆེའི་རྒྱལ་པོ་གཡུལ་དོར་ཆས་པ་རབ་ཏུ་བརྟན་པ་ཞེས་བྱ་བ་གཟུགས་བཟང་ཞིང་བལྟ་ན་སྡུག་ལ་མཛེས་པ་ཞིག་ཡོད་དེ། མེ་ཏོག་ཀུ་མུ་ཏའི་མདོག་ལྟར་ཐལ་ཀར་དུ་འདུག་ལ། ཡན་ལག་བདུན་ཤིན་ཏུ་ལེགས་པར་གནས་པ་སྟེ། དེ་མགོ་བོ་ཡང་དབྱིབས་ལེགས་ཤིང་བལྟ་ན་སྡུག་ལ་མཛེས་པ་སྟེ། སྔོ་ཞིང་སྲོག་ཆགས་ལྷམ་བུ་ཆུག་ཤེར་གྱི་མདོག་ལྟར་དབུས་དམར་ལ་མཆེ་བ་དྲུག་ཡོད་དེ། གླང་པོ་ཆེ་རབ་ཏུ་བརྟན་པ་སྲིད་དུ་དཔག་ཚད་ཕྱེད་དང་གསུམ། ཞེང་དུ་དཔག་ཚད་གཅིག་འཕང་དུ་དཔག་ཚད་ཕྱེད་དང་གཉིས། མཐའ་སྐོར་དུ་དཔག་ཚད་བདུན་ཡོད་དོ། །དེའི་འཁོར་གླང་པོ་ཆེ་བརྒྱད་སྟོང་ཡོད་དོ། །དེ་ཐམས་ཅད་ཀྱང་གཟུགས་བཟང་ཞིང་བལྟ་ན་སྡུག་པ་མཛེས་པ། མེ་ཏོག་ཀུ་མུ་ཏའི་མདོག་ལྟར་ཐལ་ཀར་དུ་འདུག་ཅིང་ཡན་ལག་བདུན་ཤིན་ཏུ་ལེགས་པར་གནས་པ་སྟེ། དེ་དག་གི་མགོ་བོ་ཡང་དབྱིབས་ལེགས་ཤིང་བལྟ་ན་སྡུག་ལ་མཛེས་པ་སྟེ། སྔོ་ཞིང་སྲོག་ཆགས་ལྷམ་བུ་ཆུ་གཤེར་གྱི་མདོག་ལྟར་དབུས་དམར་ལ་མཆེ་བ་དྲུག་ཡོད་པ་ཤ་སྟག་སྟེ། གླང་པོ་ཆེའི་རྒྱལ་པོ་རབ་ཏུ་བརྟན་པ་དེ་འཁོར་དང་བཅས་པ་དགུན་ཟླ་བ་བཞི་ནི་བྲག་བྱ་སྐྱིབས་ལྷ་མ་ཡིན་གྱི་ངོས་ཀྱི་ནང་ན་གནས་ཤིང་འཁོད་དོ། །དཔྱིད་ཟླ་བ་བཞི་ནི་ཤིང་སཱ་ལའི་རྒྱལ་པོ་རབ་ཏུ་བརྟན་པའི་ནང་ན་གནས་ཤིང་འཁོད་དོ། །དབྱར་ཟླ་བ་བཞི་ནི་རྫིང་བུ་དལ་གྱིས་འབབ་ཀྱི་ནང་ན་གནས་ཤིང་འཁོད་དོ། །གང་གི་ཚེ་གླང་པོ་ཆེའི་རྒྱལ་པོ་རབ་ཏུ་བརྟན་

---

^{[མ་དཔེ་གཟིགས་ན་འདིར་གནོན།]}

པ་བྲག་བྱ་སྐྱིབས་ལྷ་མ་ཡིན་གྱི་ངོས་ཀྱི་ནང་ན་གནས་ཤིང་འདུག་པ་དེའི་ཚེ་ནི་གླང་པོ་ཆེ་བརྒྱད་སྟོང་པོ་རྣམས་འདི་ལྟ་སྟེ། གླང་པོ་ཆེའི་རྒྱལ་པོ་རབ་ཏུ་བརྟན་པ་སྲུང་བ་དང་སྦ་བ་དང་མཛེས་པར་བྱ་བའི་ཕྱིར་བྲག་བྱ་སྐྱིབས་བརྒྱད་སྟོང་གི་ནང་ན་ཉེ་བར་གནས་ཤིང་འཁོད་དོ། །གང་གི་ཚེ་གླང་པོ་ཆེའི་རྒྱལ་པོ་རབ་ཏུ་བརྟན་པ་བྲག་བྱ་སྐྱིབས་ལྷ་མ་ཡིན་གྱི་ངོས་ཀྱི་ནང་ན་གནས་ཤིང་སཱ་ལའི་རྒྱལ་པོ་རབ་ཏུ་བརྟན་པའི་ནང་དུ་འགྲོ་བ་ན། རེས་འགའ་ནི་ཐ་མལ་པའི་ཚུལ་གྱིས་འགྲོའོ། །རེས་འགའ་ནི་འདི་ལྟ་སྟེ། ལྷ་དང་ལྷའི་བུ་རྫུ་འཕྲུལ་ཆེ་ཞིང་གང་ཡང་རུང་བ་དང་འདྲ་བར་བདག་ཉིད་མངོན་པར་སྤྲུལ་ནས་གླང་པོ་ཆེ་ཐམས་ཅད་ཀྱི་ནང་ན་དབང་ཆེ་བར་གྲགས་པ་གང་ཡིན་པ་དེ་ཉིད་ཀྱི་མགོ་བོ་འམ། རྒྱབ་ཏུ་ཞོན་ཏེ་སིལ་སྙན་དང་ཕེག་རྡོབ་པ་དག་ཆེར་བྱེད་ཅིང་འགྲོའོ། །གང་གི་ཚེ་གླང་པོ་ཆེའི་རྒྱལ་པོ་རབ་ཏུ་བརྟན་པའི་ནང་ན་གནས་ཤིང་འདུག་པ་དེའི་ཚེ་ནི་གླང་པོ་ཆེ་བརྒྱད་སྟོང་པོ་འདི་དག་ཀྱང་འདི་ལྟ་སྟེ། གླང་པོ་ཆེའི་རྒྱལ་པོ་རབ་ཏུ་བརྟན་པ་སྲུང་བ་དང༌། སྤ་བ་དང༌། མཛེས་པར་བྱ་བའི་ཕྱིར་ཤིང་སཱ་ལའི་ཕྲེང་བ་རིམ་པ་བདུན་པོ་དག་གི་ནང་ན་ཁ་ནང་དུ་བལྟས་ཤིང་འཁོད་དོ། །ཤིང་སཱ་ལའི་ཕྲེང་བ་དང་པོའི་ནང་ན་འདུག་པ་གང་ཡིན་པ་དེ་དག་ཀྱང་ཁ་ནང་དུ་བལྟས་ཏེ་འཁོད་དོ། །གཉིས་པའི་ནང་ན་འདུག་པ་གང་ཡིན་པ་དེ་དག་ཀྱང་ཁ་ནང་དུ་ལྟའོ། །གསུམ་པའི་ནང་དུ་འདུག་པ་གང་ཡིན་པ་དེ་དག་ཀྱང་ཁ་ནང་དུ་ལྟའོ། །བཞི་པའི་ནང་དུ་འདུག་པ་དེ་དག་ཀྱང་ཁ་ནང་དུ་ལྟའོ། །ལྔ་པའི་ནང་ན་འདུག་པ་གང་ཡིན་པ་དེ་དག་ཀྱང་ཁ་ནང་དུ་ལྟའོ། །དྲུག་པའི་ནང་ན་འདུག་པ་གང་ཡིན་པ་དེ་དག་ཀྱང་ཁ་ནང་དུ་ལྟའོ། །བདུན་པའི་ནང་ན་འདུག་པ་གང་ཡིན་པ་དེ་དག་ཀྱང་ཁ་ནང་དུ་བལྟས་ཏེ་འཁོད་དོ། །གང་གི་ཚེ་གླང་པོ་ཆེའི་རྒྱལ་པོ་རབ་ཏུ་བརྟན་པ་ཤིང་སཱ་ལའི་རྒྱལ་པོ་རབ་ཏུ་བརྟན་པ་ནས་རྫིང་བུ་དལ་གྱིས་འབབ་པར་འགྲོ་བ་ན། རེས་འགའ་ནི་ཐ་མལ་པའི་ཚུལ་གྱིས་འགྲོའོ། །རེས་འགའ་ནི་འདི་ལྟ་སྟེ། ལྷ་འམ་ལྷའི་བུ་རྫུ་འཕྲུལ་ཆེ་ཞིང་མཐུ་ཆེ་བ་གང་ཡང་རུང་བ་དང་འདྲ་བར་བདག་ཉིད་མངོན་བར་སྤྲུལ་ནས་གླང་པོ་ཆེ་དེ་དག་ཐམས་ཅད་ཀྱི་ནང་ན་དབང་ཆེ་བར་གྲགས་པ་གང་ཡིན་པ་དེ་ཉིད་ཀྱི་མགོ་

---

^{[མ་དཔེ་གཟིགས་ན་འདིར་གནོན།]}

འམ། རྒྱབ་ཏུ་ཞོན་ཏེ་སིལ་སྙན་དང་ཕེག་རྡོབ་པ་དག་རྒྱ་ཆེར་བྱེད་ཅིང་འགྲོའོ། །གང་གི་ཚེ་གླང་པོ་ཆེའི་རྒྱལ་པོ་རབ་ཏུ་བརྟན་པ་རྫིང་བུ་དལ་གྱིས་འབབ་ཀྱི་ནང་དུ་ཞུགས་ནས་རྩེ་ཞིང་དགའ་ལ་དགའ་དགུར་སྤྱོད་པ་དེའི་ཚེ་གླང་པོ་ཆེ་བརྒྱད་སྟོང་པོ་དེ་དག་འདི་ལྟ་སྟེ། གླང་པོ་ཆེའི་རྒྱལ་པོ་རབ་ཏུ་བརྟན་པ་དེ་སྲུང་བ་དང༌། སྦ་བ་དང༌། མཛེས་པར་བྱ་བའི་ཕྱིར་རྫིང་བུ་དལ་གྱིས་འབབ་ཀྱི་མཐའ་ཁོར་ཁོར་ཡུག་ནས་བསྐོར་ཏེ་ཁ་ནང་དུ་བལྟས་ཤིང་འཁོད་དོ། །གང་གི་ཚེ་གླང་པོ་ཆེའི་རྒྱལ་པོ་རབ་ཏུ་བརྟན་པ་རྫིང་བུ་དལ་གྱིས་འབབ་ཀྱི་ནང་ནས་རྩེ་ཞིང་དགའ་ལ་དགའ་མགུར་སྤྱད་ནས་ཕྱིར་བྱུང་བ་དེའི་ཚེ་ནང་ན་གླང་པོ་ཆེ་དབང་ཆེ་བར་གྲགས་པ་གང་ཡིན་པ་དེ་རྫིང་བུ་དལ་གྱིས་འབབ་ཀྱི་ནང་དུ་ཞུགས་ནས་པདྨའི་རྩ་བ་རྣམས་བླངས་ཏེ། ཤིན་ཏུ་བཀྲུས་ཤིང་རབ་ཏུ་བཤལ་ནས་གླང་པོ་ཆེའི་རྒྱལ་པོ་རབ་ཏུ་བརྟན་པ་ལ་འབུལ་ལོ། །གང་གི་ཚེ་གླང་པོ་ཆེའི་རྒྱལ་པོ་རབ་ཏུ་བརྟན་པས་ཟོས་ཤིང་འཐུངས་ཏེ་འགྲངས་པར་གྱུར་པ་དེའི་ཚེ་གླང་པོ་ཆེ་གཞན་བརྒྱད་སྟོང་པོ་དེ་དག་ཀྱང་རྫིང་བུ་བརྒྱད་སྟོང་གི་ནང་ན་རྫིང་བུ་རེ་རེ་ཞུགས་ན་རྩེ་ཞིང་དགའ་ལ་དགའ་དགུར་སྤྱོད་དོ། །པདྨའི་རྩ་བ་དག་བླངས་ནས་ཤིན་ཏུ་བཀྲུས་ཤིང་རབ་ཏུ་བཤལ་ཏེ་ཟའོ། །སུམ་ཅུ་རྩ་གསུམ་པའི་ལྷ་རྣམས་ཀྱི་གླང་པོ་ཆེ་རྒྱལ་པོ་གཡུལ་ངོར་སྤྱད་པ་རབ་ཏུ་བསྟན་པའི་མཐུ་ནི་དེ་ཙམ་མོ། །སེམས་ཅན་ཐམས་ཅད་ནི་སྲུང་མ་དང་བཅས་ཤིང་སྲུང་བ་དང༌། སྐྱོབ་པ་དང་སྦེད་པ་དང༌། མི་འབྲལ་སྟེ། སེམས་ཅན་གང་དབང་ཆུང་བར་གྲགས་ཤིང་བསོད་ནམས་ཆུང་ལ། གཟི་བརྗིད་ཆུང་བ་དེ་དག་ནི་བརྒྱ་ཕྲག་མང་པོ་དང༌། སྟོང་ཕྲག་མང་པོ་ལ་གཅིག་སྲུང་སྟེ། དཔེར་ན་བ་ལང་ངམ་ལུག་བརྒྱ་ཕྲག་མང་པོ་དང་སྟོང་ཕྲག་མང་པོ་ལ་གཅིག་སྲུང་བ་དེ་བཞིན་དུ། སེམས་ཅན་གང་དབང་ཆུང་བར་གྲགས་ཤིང་བསོད་ནམས་ཆུང་ལ། གཟི་བརྗིད་ཆུང་བ་དེ་དག་ནི་བརྒྱ་ཕྲག་མང་པོ་དང༌། སྟོང་ཕྲག་མང་པོ་ལ་གཅིག་བསྲུང་ངོ༌། །སེམས་ཅན་གང་དབང་ཆེ་བར་གྲགས་ཤིང་བསོད་ནམས་ཆེ་ལ་གཟི་བརྗིད་ཆེ་བ་དེ་དག་ནི་བརྒྱ་ཕྲག་མང་པོ་དང༌། སྟོང་ཕྲག་མང་པོ་དག་གིས་གཅིག་ཏུ་བསྲུང་སྟེ། དཔེར་ན་འཁོར་ལོས་སྒྱུར་བའི་རྒྱལ་པོ་འམ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་

---

^{[མ་དཔེ་གཟིགས་ན་འདིར་གནོན།]}

ལ་བརྒྱ་ཕྲག་མང་པོ་དང༌། སྟོང་ཕྲག་མང་པོ་དག་གིས་གཅིག་ཏུ་སྲུང་བ་དེ་བཞིན་དུ་སེམས་ཅན་གང་དབང་ཆེ་བར་གྲགས་ཤིང་བསོད་ནམས་ཆེ་ལ་གཟི་བརྗིད་ཆེ་བ་དེ་དག་ལ་བརྒྱ་ཕྲག་མང་པོ་དང༌། སྟོང་ཕྲག་མང་པོ་དག་གིས་གཅིག་ཏུ་སྲུང་ངོ༌། །འདིར་སྨྲས་པ། ཇི་སྟེ་སེམས་ཅན་ཐམས་ཅད་སྲུང་མ་དང་བཅས་ཤིང་སྲུང་བ་དང༌། སྐྱོབ་པ་དང༌། སྦེད་པ་དང་མི་འབྲལ་ན་ཅིའི་ཕྱིར་འཚེ་བ་ཡོད་པར་འགྱུར། སྨྲས་པ། སྲུང་མ་མཐུ་ཆུང་བ་ཞིག་ཡིན་ན་དེ་ལ་ཟིལ་གྱིས་གནོན་པ་ལ་འཚེ་བ་ཡོད་དོ། །སྲུང་མ་བག་མེད་ཅིང་བག་མེད་པར་གནས་པ་ཞིག་ཡིན་ན་ནི་བག་མེད་པའི་རྒྱུ་ལས་ཀྱང་འཚེ་བ་རྣམས་ཡོད་དོ། །སྲུང་མ་གཉིས་ལྷན་ཅིག་མཐུན་པར་གྱུར་པས་ཀྱང་ཟིལ་གྱིས་མནན་ནས་འཚེ་བར་བྱེད་དོ། །མི་རྣམས་ཆོས་མ་ཡིན་པ་སྤྱོད་ཅིང་མི་རིགས་པ་སྤྱོད་པ་ཞིག་ཡིན་ན་དེ་དག་གིས་ཆོས་མ་ཡིན་པ་སྤྱོད་པ་དང༌། མི་རིགས་པ་སྤྱོད་པ་ལས་ཀྱང་འཚེ་བ་ཡོད་དོ།། །།འཇིག་རྟེན་གཞག་པ། བམ་པོ་གསུམ་པ། སུམ་ཅུ་རྩ་གསུམ་པའི་ལྷ་རྣམས་ཀྱི་མི་རྣམས་ཀྱི་སྲུང་མ་འདི་ལྟ་སྟེ། ལམ་པོ་ཆེ་དང༌། སྲང་དང༌། བཞི་མདོ་དང༌། སུམ་མདོ་དང༌། དྲི་འཚོང་བའི་གནས་རྣམས་དང༌། མེ་ཏོག་ཕྲེང་བ་འཚོང་བའི་གནས་རྣམས་དང༌། ཟོང་དགྲམ་པའི་གནས་རྣམས་དང༌། བཏུང་བ་འཚོང་བའི་གནས་རྣམས་དང༌། རྟག་ཏུ་མྱོས་པའི་གནས་རྣམས་དང༌། གསོད་བྱེད་ཀྱི་གནས་སུ་བཀོད་པ་དག་ཡོད་དེ། ཟླ་བ་ཕྱེད་ཀྱི་ཚེས་བརྒྱད་ལ་རྒྱལ་པོ་ཆེན་པོ་བཞི་པོ་དག་གི་གཡོག་ཞོ་ཤས་འཚོ་བ་རྣམས་ཀྱིས་ལམ་པོ་ཆེ་དང༌། སྲང་དང༌། བཞི་མདོ་དང༌། སུམ་མདོ་དང༌། དྲི་འཚོང་བའི་གནས་རྣམས་དང༌། མེ་ཏོག་གི་ཕྲེང་བ་འཚོང་བའི་གནས་རྣམས་དང༌། ཟོང་དགྲམ་པའི་གནས་རྣམས་དང༌། བཏུང་བ་འཚོང་བའི་གནས་རྣམས་དང༌། རྟག་ཏུ་མྱོས་པའི་གནས་རྣམས་དང༌། གསོད་བྱེད་ཀྱི་གནས་རྣམས་ན་སུ་ཞིག་འདུག་ཅེས་འཇིག་རྟེན་འདི་ཐམས་ཅད་བྱུལ་ཏེ། ཅི་སྟེ་དེ་དག་གིས་སྐྱེན་པར་ཚོར་ན་ནི་དེ་དག་གནས་མཐོན་པོ་ལ་འགོད་དོ། །ཇི་སྟེ་དེ་དག་གིས་སྐྱེན་པར་མ་ཚོར་བ་ན་ནི་དེ་དག་གནས་དམའ་བ་ལ་འགོད་དོ། །ཟླ་བ་ཕྱེད་ཀྱི་ཚེས་བཅུ་བཞི་ལ་ནི་རྒྱལ་པོ་ཆེན་

---

^{[མ་དཔེ་གཟིགས་ན་འདིར་གནོན།]}

པོ་བཞི་པོ་དེ་དག་གི་བུ་རྣམས་ཀྱི་ལམ་པོ་ཆེ་དང༌། སྲང་དང༌། བཞི་མདོ་དང༌། སུམ་མདོ་དང༌། དྲི་འཚོང་བའི་གནས་རྣམས་དང༌། མེ་ཏོག་གི་ཕྲེང་བ་འཚོང་བའི་གནས་རྣམས་དང༌། ཟོང་དགྲམ་པའི་གནས་རྣམས་དང༌། བཏུང་བ་འཚོང་བའི་གནས་རྣམས་དང༌། རྟག་ཏུ་མྱོས་པའི་གནས་རྣམས་དང༌། གསོད་བྱེད་ཀྱི་གནས་རྣམས་ན་སུ་ཞིག་འདུག་ཅེས་འཇིག་རྟེན་འདི་ཐམས་ཅད་བྱུལ་ཏེ། ཅི་སྟེ་དེ་དག་གིས་སྐྱེན་པར་ཚོར་ན་ནི། དེ་དག་གནས་མཐོན་པོ་ལ་འགོད་དོ། །ཅི་སྟེ་དེ་དག་གིས་སྐྱེན་པར་མཚོར་ན་ནི་དེ་དག་གནས་དམའ་བ་ལ་འགོད་དོ། །ཟླ་བ་ཕྱེད་ཀྱི་ཚེ་བཅྭ་ལྔ་ལ་ནི་རྒྱལ་པོ་ཆེན་པོ་བཞི་པོ་དེ་དག་ཉིད་ཀྱི་ལམ་པོ་ཆེ་དང༌། སྲང་དང༌། བཞི་མདོ་དང༌། སུམ་མདོ་དང༌། དྲི་འཚོང་བའི་གནས་རྣམས་དང༌། མེ་ཏོག་གི་ཕྲེང་བ་འཚོང་བའི་གནས་རྣམས་དང༌། ཟོང་དགྲམ་པའི་གནས་རྣམས་དང༌། བཏུང་བ་འཚོང་བའི་གནས་རྣམས་དང༌། རྟག་ཏུ་མྱོས་པའི་གནས་རྣམས་དང༌། གསོད་བྱེད་ཀྱི་གནས་རྣམས་ན་སུ་ཞིག་འདུག་ཅེས་འཇིག་རྟེན་འདི་ཐམས་ཅད་བྱུལ་ཏེ། ཅི་སྟེ་དེ་དག་གིས་སྐྱེན་པར་ཚོར་ན་ནི། དེ་དག་གནས་མཐོན་པོ་ལ་འགོད་དོ། །ཅི་སྟེ་དེ་དག་གིས་སྐྱེན་པར་མཚོར་ན་ནི་དེ་དག་གནས་དམའ་བ་ལ་འགོད་དོ། །བཅོམ་ལྡན་འདས་ཀྱིས་ཀྱང་འདི་སྐད་དུ་དགེ་སློང་དག་ཟླ་བ་ཕྱེད་ཀྱི་ཚེས་བརྒྱད་ལ་ནི་རྒྱལ་པོ་ཆེན་པོ་བཞི་པོ་དག་གི་ཞོ་ཤས་འཚོ་བ་རྣམས་ནི་ཅི་མི་དང་མི་མ་ཡིན་པའི་འཇིག་རྟེན་ན་མར་འཛིན་པ་དང༌། ཕར་འཛིན་པ་དང༌། དགེ་སྦྱོང་དུ་འཛིན་པ་དང༌། བྲམ་ཟེར་འཛིན་པ་དང༌། རིགས་ཀྱི་ནང་ན་རྒན་རབས་ལ་རིམ་གྲོ་བྱེད་པ་དང༌། དོན་བྱེད་པ་དང༌། བྱ་བའི་རིགས་པ་བྱེད་པ་དང༌། བསོད་ནམས་བྱེད་པ་དང༌། ཚེ་འདི་དང་ཚེ་ཕྱི་མ་ལ་ཁ་ན་མ་ཐོ་བ་རྣམས་ཀྱིས་འཇིགས་པར་ལྟ་བ་དང༌། སྦྱིན་པ་དག་སྦྱིན་ཞིང་བསོད་ནམས་དག་བྱེད་པ་དང༌། གསོ་སྦྱོང་ལ་ཉེ་བར་གནས་པ་དང༌། ཚུལ་ཁྲིམས་ཡང་དག་པར་བླངས་ནས་འདུག་པ་དག་མང་ངམ་ཞེས་འཇིག་རྟེན་འདི་ཐམས་ཅད་དུ་ཉུལ་ལོ། །ཟླ་བ་ཕྱེད་ཀྱི་ཚེས་བཅུ་བཞི་ལ་ནི་རྒྱལ་པོ་ཆེན་པོ་བཞི་པོ་དག་གི་བུ་རྣམས་ཅི་མི་དང་མི་མ་ཡིན་པའི་འཇིག་རྟེན་ན་མར་འཛིན་པ་དང༌། ཕར་འཛིན་པ་དང༌། དགེ་སྦྱོང་དུ་འཛིན་པ་དང༌། བྲམ་ཟེར་འཛིན་པ་དང༌། རིགས་ཀྱི་

---

^{[མ་དཔེ་གཟིགས་ན་འདིར་གནོན།]}

ནང་ན་རྒན་རབས་ལ་རིམ་གྲོ་བྱེད་པ་དང༌། དོན་བྱེད་པ་དང༌། བྱ་བའི་རིགས་པ་བྱེད་པ་དང༌། བསོད་ནམས་བྱེད་པ་དང༌། ཚེ་འདི་དང་ཚེ་ཕྱི་མ་ལ་ཁ་ན་མ་ཐོ་བ་རྣམས་ཀྱིས་འཇིགས་པར་ལྟ་བ་དང༌། སྦྱིན་པ་དག་སྦྱིན་ཞིང༌། བསོད་ནམས་དག་བྱེད་པ་དང༌། གསོ་སྦྱོང་ལ་ཉེ་བར་གནས་པ་དང༌། ཚུལ་ཁྲིམས་ཡང་དག་པར་བླངས་ནས་འདུག་པ་དག་མང་ངམ་ཞེས་འཇིག་རྟེན་འདི་དག་ཐམས་ཅད་ཉུལ་ལོ། །ཟླ་བ་ཕྱེད་ཀྱི་ཚེས་བཅྭ་ལྔ་ལ་ནི་རྒྱལ་བོ་ཆེན་པོ་བཞི་པོ་དེ་དག་ཉིད་ཅི་མི་དང་མི་མ་ཡིན་པའི་འཇིག་རྟེན་ན་མར་འཛིན་པ་དང༌། ཕར་འཛིན་པ་དང༌། དགེ་སྦྱོང་དུ་འཛིན་པ་དང༌། བྲམ་ཟེར་འཛིན་པ་དང༌། རིགས་ཀྱི་ནང་ན་རྒན་རབས་ལ་རིམ་གྲོ་བྱེད་པ་དང༌། དོན་བྱེད་པ་དང༌། བྱ་བའི་རིགས་པ་བྱེད་པ་དང༌། བསོད་ནམས་བྱེད་པ་དང༌། ཚེ་འདི་དང་ཚེ་ཕྱི་མ་ལ་ཁ་ན་མ་ཐོ་བ་རྣམས་ཀྱིས་འཇིགས་པར་ལྟ་བ་དང༌། སྦྱིན་པ་དག་སྦྱིན་ཞིང་བསོད་ནམས་དག་བྱེད་པ་དང༌། གསོ་སྦྱོང་ལ་ཉེ་བར་གནས་པ་དང༌། ཚུལ་ཁྲིམས་ཡང་དག་པར་བླངས་ནས་འདུག་པ་དག་མང་ངམ་ཞེས་འཇིག་རྟེན་འདི་ཐམས་ཅད་ཉུལ་ལོ། །ཅི་སྟེ་མི་དང་མི་མ་ཡིན་པའི་འཇིག་རྟེན་ན་མར་མི་འཛིན་པ་དང༌། ཕར་མི་འཛིན་པ་དང༌། དགེ་སྦྱོང་དུ་མི་འཛིན་པ་དང༌། བྲམ་ཟེར་མི་འཛིན་པ་དང༌། རིགས་ཀྱི་ནང་ན་རྒན་རབས་ལ་རིམ་གྲོ་མི་བྱེད་པ་དང༌། དོན་མི་བྱེད་པ་དང༌། བྱ་བའི་རིགས་པ་དག་མི་བྱེད་པ་དང༌། བསོད་ནམས་མི་བྱེད་པ་དང༌། ཚེ་འདི་དང་ཚེ་ཕྱི་མ་ལ་ཁ་ན་མ་ཐོ་བ་རྣམས་ཀྱིས་འཇིགས་པར་མི་ལྟ་བ་དང༌། སྦྱིན་པ་དག་མི་སྦྱིན་ཞིང་བསོད་ནམས་དག་མི་བྱེད་པ་དང༌། གསོ་སྦྱོང་ལ་ཉེ་བར་མི་གནས་པ་དང༌། ཚུལ་ཁྲིམས་ཡང་དག་པར་བླངས་ཏེ། མི་འདུག་པ་དག་མང་ན་ནི་རྒྱལ་པོ་ཆེན་པོ་བཞི་པོ་རྣམས་སུམ་ཅུ་རྩ་གསུམ་པའི་ལྷ་རྣམས་ལྷའི་འདུན་ས་ཆོས་བཟངས་སུ་འདུས་ཤིང་འཁོད་པའི་ནང་དུ་སོང་ནས་འདི་སྐད་དུ་གྲོགས་པོ་དག་འདི་ཤེས་པར་གྱིས་ཤིག །མི་དང་མི་མ་ཡིན་པའི་འཇིག་རྟེན་ན་མར་མི་འཛིན་པ་དང༌། ཕར་མི་འཛིན་པ་དང༌། དགེ་སྦྱོང་དུ་མི་འཛིན་པ་དང༌། བྲམ་ཟེར་མི་འཛིན་པ་དང༌། རིགས་ཀྱི་ནང་ན་རྒན་རབས་ལ་རིམ་གྲོ་མི་བྱེད་པ་དང༌། དོན་མི་བྱེད་བ་དང༌། བྱ་བའི་རིགས་

---

^{[མ་དཔེ་གཟིགས་ན་འདིར་གནོན།]}

པ་དག་མི་བྱེད་པ་དང༌། བསོད་ནམས་མི་བྱེད་པ་དང༌། ཚེ་འདི་དང་ཚེ་ཕྱི་མ་ལ་ཁན་མཐོ་བ་རྣམས་ཀྱིས་འཇིགས་པར་མི་ལྟ་བ་དང༌། སྦྱིན་པ་དག་མི་སྦྱིན་ཞིང་བསོད་ནམས་དག་མི་བྱེད་པ་དང༌། གསོ་སྦྱོང་ལ་ཉེ་བར་མི་གནས་པ་དང༌། ཚུལ་ཁྲིམས་ཡང་དག་པར་བླངས་ཏེ་མི་འདུག་པ་དག་མང་ངོ་ཞེས་བསྙད་དོ། །དེ་དག་ལས་ཐོས་ནས་སུམ་ཅུ་རྩ་གསུམ་པའི་ལྷ་རྣམས་ཡི་མ་རངས་ཤིང་མི་མགུ་བར་གྱུར་ནས་ཡི་མ་རངས་པ་ཉིད་ཀྱང་ཕྱིར་ཟློག་པར་བྱེད་དེ། །ཀྱེ་མ་གྲོགས་པོ་དག་འདི་ལྟར་མི་དང་མི་མ་ཡིན་པའི་འཇིག་རྟེན་ན་མར་མི་འཛིན་པ་དང༌། ཕར་མི་འཛིན་བ་དང༌། དགེ་སྦྱོང་དུ་མི་འཛིན་པ་དང༌། བྲམ་ཟེར་མི་འཛིན་པ་དང༌། རིགས་ཀྱི་ནང་ན་རྒན་རབས་ལ་རིམ་གྲོར་མི་བྱེད་པ་དང༌། དོན་མི་བྱེད་པ་དང༌། བྱ་བའི་རིགས་པ་མི་བྱེད་པ་དང༌། བསོད་ནམས་མི་བྱེད་པ་དང༌། ཚེ་འདི་དང་ཚེ་ཕྱི་མ་ལ་ཁ་ན་མ་ཐོ་བ་རྣམས་ཀྱིས་འཇིགས་པར་མི་ལྟ་བ་དང༌། སྦྱིན་པ་དག་མི་སྦྱིན་ཞིང་བསོད་ནམས་དག་མི་བྱེད་པ་དང༌། གསོ་སྦྱོང་ལ་ཉེ་བར་མི་གནས་པ་དང༌། ཚུལ་ཁྲིམས་ཡང་དག་པར་བླངས་ཏེ། མི་འདུག་པ་མང་བ་ནི་མི་རྣམས་ཀྱི་ཆོས་མཛེས་པ་མ་ཡིན་ནོ། །རྐྱེན་དུ་བབ་པ་མ་ཡིན་ནོ། །ལེགས་པ་མ་ཡིན་ནོ། །དགེ་བ་མ་ཡིན་ནོ། །དེ་ལྟར་ན་ལྷ་རྣམས་ཀྱི་ཚོགས་ནི་ཡོངས་སུ་འགྲིབ་པར་འགྱུར་ལ། ལྷ་མ་ཡིན་རྣམས་ཀྱི་ཚོགས་ནི་མངོན་པར་འཕེལ་བར་འགྱུར་རོ་ཞེས་ཟློས་སོ། །ཇི་སྟེ་མི་དང་མི་མ་ཡིན་པའི་འཇིག་རྟེན་ན་མར་འཛིན་པ་དང༌། ཕར་འཛིན་པ་དང༌། དགེ་སྦྱོང་དུ་འཛིན་པ་དང༌། བྲམ་ཟེར་འཛིན་པ་དང༌། རིགས་ཀྱི་ནང་ན་རྒན་རབས་ལ་རིམ་གྲོ་བྱེད་པ་དང༌། དོན་བྱེད་པ་དང༌། བྱ་བའི་རིགས་པ་བྱེད་པ་དང༌། བསོད་ནམས་བྱེད་པ་དང༌། ཚེ་འདི་དང་ཚེ་ཕྱི་མ་དང་ཁ་ན་མ་ཐོ་བ་རྣམས་ཀྱིས་འཇིགས་པར་ལྟ་བ་དང༌། སྦྱིན་པ་དག་སྦྱིན་ཞིང་བསོད་ནམས་དག་བྱེད་པ་དང༌། གསོ་སྦྱོང་ལ་ཉེ་བར་གནས་པ་དང༌། ཚུལ་ཁྲིམས་ཡང་དག་པར་བླངས་ནས་འདུག་པ་དག་མང་ན་ནི་རྒྱལ་པོ་ཆེན་པོ་བཞི་པོ་རྣམས་སུམ་ཅུ་རྩ་གསུམ་པའི་ལྷ་རྣམས་ལྷའི་མདུན་ས་ཆོས་བཟངས་དུ་འདུས་ཤིང་འཁོད་པའི་ནང་དུ་སོང་ནས་འདི་སྐད་དུ་གྲོགས་པོ་དག་འདི་ཤེས་པར་གྱིས་ཤིག །མི་དང་མི་མ་ཡིན་པའི་འཇིག་རྟེན་ན་མར་འཛིན་པ་དང་

---

^{[མ་དཔེ་གཟིགས་ན་འདིར་གནོན།]}

ཕར་འཛིན་པ་དང༌། དགེ་སྦྱོང་དུ་འཛིན་པ་དང༌། བྲམ་ཟེར་འཛིན་པ་དང༌། རིགས་ཀྱི་ནང་ན་རྒན་རབས་ལ་རིམ་གྲོ་བྱེད་པ་དང༌། དོན་བྱེད་པ་དང༌། བྱ་བའི་རིགས་པ་བྱེད་པ་དང༌། བསོད་ནམས་བྱེད་པ་དང༌། ཚེ་འདི་དང་ཚེ་ཕྱི་མ་ལ་ཁ་ན་མ་ཐོ་བ་རྣམས་ཀྱིས་འཇིགས་པར་ལྟ་བ་དང༌། སྦྱིན་པ་དག་སྦྱིན་ཞིང་བསོད་ནམས་དག་བྱེད་པ་དང༌། གསོ་སྦྱོང་ལ་ཉེ་བར་གནས་པ་དང༌། ཚུལ་ཁྲིམས་ཡང་དག་པར་བླངས་ནས་འདུག་པ་དག་མང་ངོ་ཞེས་བསྙད་ན་ནི་དེ་དག་ལས་ཐོས་ནས་སུམ་ཅུ་རྩ་གསུམ་པའི་ལྷ་རྣམས་ཡི་རངས་ཤིང་མགུ་བར་གྱུར་ནས་ཡི་རངས་བ་ཉིད་ཀྱང་ཟློས་པར་བྱེད་དེ། ཀྱེ་མའོ་གྲོགས་པོ་དག་འདི་ལྟར་མི་དང་མི་མ་ཡིན་པའི་འཇིག་རྟེན་ན་མར་འཛིན་པ་དང༌། ཕར་འཛིན་པ་དང༌། དགེ་སྦྱོང་དུ་འཛིན་པ་དང༌། བྲམ་ཟེར་འཛིན་པ་དང༌། རིགས་ཀྱི་ནང་ན་རྒན་རབས་ལ་རིམ་གྲོ་བྱེད་པ་དང༌། དོན་བྱེད་པ་དང༌། བྱ་བའི་རིགས་པ་བདེ་བ་དང༌། བསོད་ནམས་བྱེད་པ་དང༌། ཚེ་འདི་དང་ཚེ་ཕྱི་མ་ལ་ཁ་ན་མ་ཐོ་བ་རྣམས་ཀྱིས་འཇིགས་པར་ལྟ་བ་དང༌། སྦྱིན་པ་དག་སྦྱིན་ཞིང་བསོད་ནམས་དག་བྱེད་པ་དང༌། གསོ་སྦྱོང་ལ་ཉེ་བར་གནས་པ་དང༌། ཚུལ་ཁྲིམས་ཡང་དག་པར་བླངས་ནས་འདུག་པ་དག་མང་བ་ནི་མི་རྣམས་ཀྱི་ཆོས་མཛེས་སོ། །རྐྱེན་དུ་བབ་བོ། །ལེགས་སོ། །དགེའོ། །དེ་ལྟར་ན་ལྷ་རྣམས་ཀྱི་ཚོགས་ནི་མངོན་བར་འཕེལ་བར་འགྱུར་ལ། ལྷ་མ་ཡིན་གྱི་ཚོགས་ནི་ཡོངས་སུ་འགྲིབ་པར་འགྱུར་རོ་ཞེས་ཟློས་སོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་ལྷའི་འཁོར་རབ་ཏུ་དགའ་ལ་བདེ་ཞིང་ཡིད་བདེ་བ་སྐྱེས་པར་རིག་ནས། དེའི་ཚེ་ཚིགས་སུ་བཅད་དེ་སྨྲས་པ། འདི་ནི་ཟླ་ཕྱེད་ཚེས་བརྒྱད་དང༌། །དེ་བཞིན་བཅུ་བཞི་བཅོ་ལྔ་དང༌། །ཆོ་འཕྲུལ་གྱི་ནི་ཟླ་ཕྱེད་ལའང༌། །གསོ་སྦྱོང་ཡན་ལག་བརྒྱད་པ་ལ། །ཤིན་ཏུ་མཉམ་གཞག་གནས་བྱེད་འདིར། །ང་ཅི་འདྲ་བར་དེ་བཞིན་འགྱུར།། དགེ་སློང་དག་ལྷ་རྣམས་ཀྱི་དབང་པོ་བརྒྱ་བྱིན་གྱིས་གང་འདི་སྐད་དུ། འདིར་ནི་ཟླ་ཕྱེད་ཚེས་བརྒྱད་དང༌། །དེ་བཞིན་བཅུ་བཞི་བཅོ་ལྔ་དང༌། །ཆོ་འཕྲུལ་གྱི་ནི་ཟླ་ཕྱེད་ལའང༌། །གསོ་སྦྱོང་ཡན་ལག་བརྒྱད་པ་ལ། །ཤིན་ཏུ་མཉམ་གཞག་གནས་བྱེད་འདིར། །ང་ཅི་འདྲ་བར་དེ་བཞིན་འགྱུར། །ཞེས་

---

^{[མ་དཔེ་གཟིགས་ན་འདིར་གནོན།]}

ཚིགས་སུ་བཅད་པ་སྨྲས་པ་དེ་ནི་ཉེས་པར་སྨྲས་པ་ཡིན་གྱི་ལེགས་པར་སྨྲས་པ་མ་ཡིན་ནོ། །ཉེས་པར་བསྟོད་པ་ཡིན་གྱི། ལེགས་པར་བསྟོད་པ་མ་ཡིན་ནོ། །ཉེས་པར་བརྗོད་པ་ཡིན་གྱི་ལེགས་པར་བརྗོད་པ་མ་ཡིན་ནོ། །དགེ་སློང་དག་དེ་ཅིའི་ཕྱིར་ཞེ་ན། ལྷའི་དབང་པོ་བརྒྱ་བྱིན་དེ་ནི་འདོད་ཆགས་དང་བཅས་པ། ཞེ་སྡང་དང་བཅས་པ། གཏི་མུག་དང་བཅས་པ་སྟེ། སྐྱེ་བ་དང༌། རྒ་བ་དང༌། ན་བ་དང༌། འཆི་བ་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུགས་པ་རྣམས་ལས་ཡོངས་སུ་མ་གྲོལ་ཞིང་སྡུག་བསྔལ་ལས་ཡོངས་སུ་མ་གྲོལ་ལོ་ཞེས་ང་སྨྲའོ། །དེ་བས་ན་དེས་གང་འདི་སྐད་དུ། འདིར་ནི་ཟླ་ཕྱེད་ཚེས་བརྒྱད་དང༌། །དེ་བཞིན་བཅུ་བཞི་བཅོ་ལྔ་དང༌། །ཆོ་འཕྲུལ་གྱི་ནི་ཟླ་ཕྱེད་ལའང༌། །གསོ་སྦྱོང་ཡན་ལག་བརྒྱད་པ་དང༌། །ཤིན་ཏུ་མཉམ་གཞག་གནས་བྱེད་འདིར། །ང་ཅི་འདྲ་བ་དེ་བཞིན་འགྱུར། །ཞེས་ཚིགས་སུ་བཅད་པས་སྨྲས་པ་འདི་ཉེས་པར་སྨྲས་པ་ཡིན་གྱི་ལེགས་པར་སྨྲས་པ་མ་ཡིན་ནོ། །ཉེས་པར་བསྟོད་པ་ཡིན་གྱི་ལེགས་པར་བསྟོད་པ་མ་ཡིན་ནོ། །ཉེས་པར་བརྗོད་པ་ཡིན་གྱི་ལེགས་པར་བརྗོད་པ་མ་ཡིན་ནོ། །དགེ་སློང་དག་དགེ་སློང་གང་དགྲ་བཅོམ་པ་ཡིན་ཞིང་ཟག་པ་ཟད་པ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པ་ཀུན་ཏུ་སྦྱོར་བ། ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ་དེས་ནི་གང་འདི་སྐད་དུ། འདིར་ནི་ཟླ་ཕྱེད་ཚེས་བརྒྱད་དང༌། །དེ་བཞིན་བཅུ་བཞི་བཅོ་ལྔ་དང༌། ཆོ་འཕྲུལ་གྱི་ནི་ཟླ་ཕྱེད་ལའང༌། །གསོ་སྦྱོང་ཡན་ལག་བརྒྱད་པ་ལ། །ཤིན་ཏུ་མཉམ་གཞག་གནས་བྱེད་འདིར། །ང་ཅི་འདྲ་བར་དེ་བཞིན་འགྱུར། །ཞེས་ཚིགས་སུ་བཅད་པ་འདི་སྨྲས་ན་ལོགས་པར་སྨྲས་པ་ཡིན་ཏེ་ཉེས་པར་སྨྲས་པ་མ་ཡིན་ནོ། །ལེགས་པར་བསྟོད་པ་ཡིན་ཏེ། །ཉེས་པར་བསྟོད་པ་མ་ཡིན་ནོ། །ལེགས་པར་བརྗོད་པ་ཡིན་ཏེ་ཉེས་པར་བརྗོད་པ་མ་ཡིན་ནོ། །དགེ་སློང་དག་དེ་ཅིའི་ཕྱིར་ཞེ་ན། དགེ་སློང་དེ་ནི་འདོད་ཆགས་དང་བྲལ་བ། ཞེ་སྡང་དང་བྲལ་བ། གཏི་མུག་དང་བྲལ་བ་སྟེ། སྐྱེ་བ་དང༌། རྒ་བ་དང༌། ན་བ་དང༌། འཆི་བ་དང༌། མྱ་

---

^{[མ་དཔེ་གཟིགས་ན་འདིར་གནོན།]}

ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་རྣམས་ལས་ཡོངས་སུ་གྲོལ་ཞིང་སྡུག་བསྔལ་ལས་ཡོངས་སུ་གྲོལ་བའོ་ཞེས་སྨྲ་སྟེ། དེ་བས་ན་དེས་ནི་གང་འདི་སྐད་དུ། འདིར་ནི་ཟླ་ཕྱེད་ཚེས་བརྒྱད་དང༌། །དེ་བཞིན་བཅུ་བཞི་བཅོ་ལྔ་དང༌། །ཆོ་འཕྲུལ་གྱི་ནི་ཟླ་ཕྱེད་ལའང༌། །གསོ་སྦྱོང་ཡན་ལག་བརྒྱད་པ་ལ། །ཤིན་ཏུ་མཉམ་གཞག་གནས་བྱེད་འདིར། །ང་ཅི་འདྲ་བར་དེ་བཞིན་འགྱུར། །ཞེས་ཚིགས་སུ་བཅད་པ་འདི་སྨྲས་ན་ལེགས་པར་སྨྲས་པ་ཡིན་ཏེ། ཉེས་པར་སྨྲས་པ་མ་ཡིན་ནོ། །ལེགས་པར་བསྟོད་པ་ཡིན་ཏེ་ཉེས་པར་བསྟོད་པ་མ་ཡིན་ནོ། །ལེགས་པར་བརྗོད་པ་ཡིན་ཏེ་ཉེས་པར་བརྗོད་པ་མ་ཡིན་ནོ་ཞེས་གསུངས་སོ། །འཛམ་བུའི་གླིང་གི་ཁོར་ཁོར་ཡུག་ན། འཁོར་ལོས་སྒྱུར་བའི་རྒྱལ་པོའི་ལམ་དཔག་ཚད་གཅིག་ཏུ་གསེར་གྱི་བྱེ་མ་བདལ་ཏེ། རྒྱ་མཚོ་ཆེན་པོའི་ཆུས་པུས་མོ་ནུབ་པ་ཙམ་དུ་ཡོངས་སུ་ཁྱབ་པོ། །གང་གི་ཚེ་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་འབྱུང་བའི་ཚེ་རྒྱ་མཚོ་ཆེན་པོ་དཔག་ཚད་གཉིས་ཀྱི་བར་དུ་ཆུ་སྐམ་ཞིང་མེད་པར་འགྱུར་ཏེ། འཁོར་ལོས་སྒྱུར་བའི་རྒྱལ་པོ་གང་ནས་གླིང་དུ་འགྲོ་བ་དེ་ནི་འཁོར་ལོས་སྒྱུར་བའི་ལམ་ཡིན་ནོ། །བཅོམ་ལྡན་འདས་ཀྱིས་ཀྱང་འདི་སྐད་དུ། དགེ་སློང་དག་སྔོན་བྱུང་བ་མ་ཤར་བའི་དུས་ཀྱི་ཚེ་རྟ་རིན་པོ་ཆེ་ལ་ཞོན་ནས་ས་ཆེན་པོ་འདོད་པས་ཉི་མ་ཤར་བའི་དུས་ཀྱི་ཚེ་གླང་པོ་རིན་པོ་ཆེ་ལ་ཞོན་ནས་ས་ཆེན་པོ་རྒྱ་མཚོ་ལ་ཐུག་པ་འདི་ཉིད་བསྐོར་ཏེ། རྒྱལ་པོའི་ཕོ་བྲང་ནས་འཁོར་དེ་ཉིད་དུ་སོང་ནས་ཁྱེའུ་སུས་ཀྱི་བྱ་བ་བྱེད་དོ། །དགེ་སློང་དག་གཞན་ཡང་འཁོར་ལོས་སྒྱུར་བའི་རྒྱལ་པོས་རྟ་རིན་པོ་ཆེ་བརྟག་པར་འདོད་པས་ཉི་མ་ཤར་བའི་དུས་ཀྱི་ཚེ་རྟ་རིན་པོ་ཆེ་ལ་ཞོན་ནས་ས་ཆེན་པོ་རྒྱ་མཚོ་ལ་ཐུག་པ་འདི་ཉིད་བསྐོར་ཏེ། རྒྱལ་པོའི་ཕོ་བྲང་འཁོར་དེ་ཉིད་དུ་སོང་ནས་ཁྱེའུ་སུས་ཀྱི་བྱ་བ་བྱེད་དོ།། ཞེས་གསུངས་སོ། །བསྡུས་པའི་མདོ་ལ། རི་དང་སྐྱེ་གནས་དག་དང་ནི། །ནམ་མཁའ་ལྡིང་དང་ཉོ་ཚོང་དང༌། །གྲང་བ་དག་ནི་ལྔ་པར་བྱས། །དུས་ཚིགས་ཀྱང་ནི་ཐ་མ་ཡིན། །འཇིག་རྟེན་གཞག་པ་ལས་ཚིགས་དྲུག་པའོ། །མདོ་ལ། །སྲུང་མ་ལྷའི་གྲོང་ཁྱེར་སྲང་རྣམས་རྒྱལ་

---

^{[མ་དཔེ་གཟིགས་ན་འདིར་གནོན།]}

བྱེད་པ། །ཆོས་བཟངས་རྒྱུ་བའི་ལམ་དང་འོབས་དང་སྐྱེད་མོས་ཚལ། །ས་གཞི་དང་ནི་ཡོངས་འདུ་རྡོ་དང་གླང་ཆེན་རྣམས། །ལྷ་མ་ཡིན་རྣམས་ཀྱི་ཡང་དེ་དང་འདྲ་བ་ཡིན། །ལྷའི་གྲོང་ཁྱེར་དང་ལྷ་མ་ཡིན་གྱི་གྲོང་གི་བར་དུ་སུམ་ཅུ་རྩ་གསུམ་པའི་ལྷ་རྣམས་ཀྱི་སྲུང་མ་རྣམ་པ་ལྔ་བཀོད་པ་ལ་འདི་ལྟ་སྟེ། ཆུ་ན་གནས་པའི་ཀླུ་རྣམས་དང༌། ལག་ན་གཞོང་ཐོགས་ཀྱི་ལྷ་རྣམས་དང༌། ཕྲེང་ཐོགས་ཀྱི་ལྷ་རྣམས་དང༌། རྟག་ཏུ་མྱོས་ཀྱི་ལྷ་རྣམས་དང༌། རྒྱལ་པོ་ཆེན་པོ་བཞི་རྣམས་སོ། །གང་གི་ཚེ་ལྷ་མ་ཡིན་རྣམས་སུམ་ཅུ་རྩ་གསུམ་པའི་ལྷ་རྣམས་དང༌། ལྷན་ཅིག་ཏུ་གཡུལ་འགྱེད་པར་འདོད་པར་གྱུར་པ་དེའི་ཚེ། དཔུང་གི་ཚོགས་ཡན་ལག་བཞི་པ་འདི་ལྟ་སྟེ། གླང་པོ་ཆེའི་ཚོགས་དང༌། རྟའི་ཚོགས་དང༌། ཤིང་རྟའི་ཚོགས་དང༌། དཔུང་བུ་ཆུང་གི་ཚོགས་རྣམས་གོ་ཆ་གྱོན་ནོ། །གོ་ཆ་རྣམ་པ་བཞི་གྱོན་པ་ལ་འདི་ལྟ་སྟེ། གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པ་རྣམས་སོ། །གོ་ཆ་རྣམ་པ་བཞི་གསེར་ལས་བྱས་པ་དང༌། དངུལ་ལས་བྱས་པ་དང༌། བཻཌཱུཪྻ་ལས་བྱས་པ་དང༌། ཤེལ་ལས་བྱས་པ་རྣམས་བགོས་ནས། མཚོན་ཆ་བཞི་ལ་འདི་ལྟ་སྟེ། རལ་གྲི་དང༌། མདུང་དང༌། འཕང་མདུང་དང༌། གཞུ་རྣམས་སོ། །མཚོན་ཆ་རྣམ་པ་བཞི་རལ་གྲི་དང༌། མདུང་དང༌། འཕང་མདུང་དང༌། གཞུ་རྣམས་བླངས་ནས་སུམ་ཅུ་རྩ་གསུམ་པའི་ལྷ་རྣམས་དང་འགྱེད་པའི་ཕྱིར་ལྷ་མ་ཡིན་གྱི་གྲོང་ཁྱེར་ནས་བྱུང་ངོ༌། །ལྷ་མ་ཡིན་དེ་དག་གི་དཔུང་གི་ཚོགས་ཡན་ལག་བཞི་པ་གླང་པོ་ཆེའི་ཚོགས་དང༌། རྟའི་ཚོགས་དང༌། ཤིང་རྟའི་ཚོགས་དང༌། དཔུང་བུ་ཆུང་གི་ཚོགས་རྣམས་ཀྱིས་གོ་ཆ་བགོས་ཏེ། གོ་ཆ་རྣམ་པ་བཞི་གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པ་རྣམས་བགོས་ནས། མཚོན་ཆ་རྣམ་པ་བཞི་རལ་གྲི་དང༌། མདུང་དང༌། འཕང་མདུང་དང༌། གཞུ་རྣམས་བླངས་ཏེ། སུམ་ཅུ་རྩ་གསུམ་པའི་ལྷ་རྣམས་དང་འགྱེད་པའི་ཕྱིར་ལྷ་མ་ཡིན་གྱི་གྲོང་ཁྱེར་ནས་བྱུང་བ་དེ་དག་ཆུ་ན་གནས་པའི་ཀླུ་རྣམས་ཀྱིས་མཐོང་ངོ༌། །མཐོང་ནས་ཆུ་ན་གནས་པའི་ཀླུ་རྣམས་ཀྱང་དཔུང་གི་

---

^{[མ་དཔེ་གཟིགས་ན་འདིར་གནོན།]}

ཚོགས་ཡན་ལག་བཞི་པ་འདི་ལྟ་སྟེ། གླང་པོ་ཆེའི་ཚོགས་དང༌། རྟའི་ཚོགས་དང༌། ཤིང་རྟའི་ཚོགས་དང༌། དཔུང་བུ་ཆུང་གི་ཚོགས་རྣམས་ཀྱང་གོ་ཆ་བགོས་ཏེ་གོ་ཆ་རྣམ་པ་བཞི་གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པ་རྣམས་བགོས་ནས། མཚོན་ཆ་རྣམ་པ་བཞི་རལ་གྲི་དང༌། མདུང་དང༌། འཕང་མདུང་དང༌། གཞུ་རྣམས་བླངས་ཏེ། ལྷ་མ་ཡིན་རྣམས་དང༌། ལྷན་ཅིག་ཏུ་གཡུལ་འགྱེད་དོ། །དེར་ཇི་སྟེ་ཀླུ་རྣམས་རྒྱལ་ཏེ། ལྷ་མ་ཡིན་རྣམས་ཕམ་པར་གྱུར་ན་ནི་ཀླུ་རྣམས་ཀྱིས་ལྷ་མ་ཡིན་ཐུབ་ཅིང་རྡུགས་པར་བྱས་ཏེ་ཕམ་པར་བྱས་ཤིང་རྒྱབ་ཀྱིས་ཕྱོགས་པར་བྱས་ནས་ལྷ་མ་ཡིན་གྱི་གྲོང་ཁྱེར་དུ་འགྲོ་བར་འགྱུར་རོ། །ཇི་སྟེ་ལྷ་མ་ཡིན་རྣམས་རྒྱལ་ཏེ། ཀླུ་རྣམས་ཕམ་ན་ནི་ལྷ་མ་ཡིན་རྣམས་ཀྱིས་སུམ་ཅུ་རྩ་གསུམ་པའི་ལྷ་རྣམས་ཀྱི་སྲུང་མ་དང་པོ་ཀླུ་རྣམས་ཐུབ་ཅིང་རྡུགས་པར་བྱས་ཏེ། ཕམ་པར་བྱས་ནས་རྒྱབ་ཀྱིས་ཕྱོགས་པར་བྱས་ནས། རྒྱ་མཚོ་ཆེན་པོ་ནས་རིའི་རྒྱལ་པོ་རི་རབ་ཀྱི་བར་རིམ་དང་པོ་གང་ན་ལག་ན་གཞོང་ཐོགས་ཀྱི་ལྷ་རྣམས་འཁོད་པར་བརྗེ་ཞིང་འགྲོའོ། །དེ་ནས་ལག་ན་གཞོང་ཐོགས་ཀྱི་ལྷ་རྣམས་དང༌། ཆུ་ན་གནས་པའི་ཀླུ་རྣམས་དང༌། སྲུང་མ་གཉིས་གཅིག་ཏུ་འདུས་པར་གྱུར་ནས། ལྷ་མ་ཡིན་དང་ལྷན་ཅིག་ཏུ་གཡུལ་འགྱེད་དོ། །དེར་ཇི་སྟེ་སྲུང་མ་གཉིས་རྒྱལ་ཏེ། ལྷ་མ་ཡིན་རྣམས་ཕམ་ན་ནི། སྲུང་མ་གཉིས་ཀྱིས་ལྷ་མ་ཡིན་རྣམས་ཐུབ་ཅིང་རྡུགས་པར་བྱས་ཏེ། ཕམ་པར་བྱས་ཤིང་རྒྱབ་ཀྱིས་ཕྱོགས་པར་བྱས་ནས་ལྷ་མ་ཡིན་གྱི་གྲོང་ཁྱེར་དུ་འགྲོ་བར་འགྱུར་རོ། །ཇི་སྟེ་ལྷ་མ་ཡིན་རྣམས་རྒྱལ་ཏེ། སྲུང་མ་གཉིས་ཕམ་ན་ནི་སུམ་ཅུ་རྩ་གསུམ་པའི་ལྷ་རྣམས་ཀྱི་སྲུང་མ་གཉིས་ལྷ་མ་ཡིན་རྣམས་ཀྱིས་ཐུབ་ཅིང་རྡུགས་པར་བྱས་ཏེ། ཕམ་པར་བྱས་ཤིང་རྒྱབ་ཀྱིས་ཕྱོགས་པར་བྱས་ནས། རིའི་རྒྱལ་པོ་རི་རབ་ཀྱི་བང་རིམ་དང་པོ་ནས་བར་རིམ་གཉིས་པ་ལག་ན་ཕྲེང་ཐོགས་ཀྱི་ལྷ་རྣམས་འཁོད་པར་བརྗེ་ཞིང་འགྲོའོ། །དེ་ནས་ཕྲེང་ཐོགས་ཀྱི་ལྷ་རྣམས་དང༌། ལག་ན་གཞོང་ཐོགས་ཀྱི་ལྷ་རྣམས་དང༌། ཆུ་ན་གནས་པའི་ཀླུ་རྣམས་དང༌། སྲུང་མ་གསུམ་པོ་རྣམས་

---

^{[མ་དཔེ་གཟིགས་ན་འདིར་གནོན།]}

གཅིག་ཏུ་འདུས་པར་གྱུར་ནས་ལྷ་མ་ཡིན་རྣམས་དང་ལྷན་ཅིག་ཏུ་གཡུལ་འགྱེད་དོ། །དེར་ཇི་སྟེ་སྲུང་མ་གསུམ་པོ་རྣམས་རྒྱལ་ཏེ། ལྷ་མ་ཡིན་རྣམས་ཕམ་ན་ནི་སྲུང་མ་གསུམ་པོ་དག་གིས་ལྷ་མ་ཡིན་རྣམས་ཐུབ་ཅིང་རྡུགས་པར་བྱས་ཏེ། ཕམ་པར་བྱས་ཤིང་རྒྱབ་ཀྱིས་ཕྱོགས་པར་བྱས་ནས་ལྷ་མ་ཡིན་གྱི་གྲོང་ཁྱེར་དུ་འགྲོ་བར་འགྱུར་རོ། །ཇི་སྟེ་ལྷ་མ་ཡིན་རྣམས་རྒྱལ་ཏེ། སྲུང་མ་གསུམ་པོ་རྣམས་ཕམ་ན་ནི་སུམ་ཅུ་རྩ་གསུམ་པའི་ལྷ་རྣམས་ཀྱི་སྲུང་མ་གསུམ་པོ་རྣམས་ལྷ་མ་ཡིན་རྣམས་ཀྱིས་ཐུབ་ཅིང་རྡུགས་པར་བྱས་ཏེ། ཕམ་པར་བྱས་ཤིང་རྒྱབ་ཀྱིས་ཕྱོགས་པར་བྱས་ནས། རིའི་རྒྱལ་པོ་རི་རབ་ཀྱི་བང་རིམ་གཉིས་པ་ནས་བང་རིམ་གསུམ་པ་གང་ན་རྟག་ཏུ་མྱོས་པའི་ལྷ་རྣམས་འཁོད་པར་བརྗེ་ཞིང་འགྲོའོ། །དེ་ནས་རྟག་ཏུ་མྱོས་པའི་ལྷ་རྣམས་དང༌། ཕྲེང་ཐོགས་ཀྱི་ལྷ་རྣམས་དང༌། ལག་ན་གཞོང་ཐོགས་ཀྱི་ལྷ་རྣམས་དང༌། ཆུ་ན་གནས་པའི་ཀླུ་རྣམས་དང༌། སྲུང་མ་རྣམ་པ་བཞི་པོ་རྣམས་གཅིག་ཏུ་འདུས་པར་གྱུར་ནས་ལྷ་མ་ཡིན་རྣམས་དང་ལྷན་ཅིག་ཏུ་གཡུལ་འགྱེད་དོ། །དེར་ཇི་སྟེ་སྲུང་མ་བཞི་པོ་རྣམས་རྒྱལ་ཏེ། ལྷ་མ་ཡིན་རྣམས་ཕམ་ན་ནི་སྲུང་མ་བཞི་པོ་རྣམས་ཀྱིས་ལྷ་མ་ཡིན་རྣམས་ཐུབ་ཅིང་རྡུགས་པར་བྱས་ཏེ། ཕམ་པར་བྱས་ཤིང་རྒྱབ་ཀྱིས་ཕྱོགས་པར་བྱས་ནས་ལྷ་མ་ཡིན་གྱི་གྲོང་ཁྱེར་དུ་འགྲོ་བར་འགྱུར་རོ། །ཇི་སྟེ་ལྷ་མ་ཡིན་རྣམས་རྒྱལ་ཏེ། སྲུང་མ་བཞི་པོ་རྣམས་ཕམ་ན་ནི་སུམ་ཅུ་རྩ་གསུམ་གྱི་ལྷ་རྣམས་ཀྱི་སྲུང་མ་བཞི་པོ་དག་ལྷ་མ་ཡིན་རྣམས་ཀྱིས་ཐུབ་ཅིང་རྡུགས་པར་བྱས་ཏེ། ཕམ་པར་བྱས་ཤིང་རྒྱབ་ཀྱིས་ཕྱོགས་པར་བྱས་ནས། རིའི་རྒྱལ་པོ་རི་རབ་ཀྱི་བང་རིམ་གསུམ་པ་ནས་བང་རིམ་བཞི་པ་གང་ན་རྒྱལ་པོ་ཆེན་པོ་བཞི་རྣམས་འཁོད་པར་བརྗེ་ཞིང་འགྲོའོ། །དེ་ནས་རྒྱལ་པོ་ཆེན་པོ་བཞི་པོ་རྣམས་དང༌། རྟག་ཏུ་མྱོས་པའི་ལྷ་རྣམས་དང༌། ཕྲེང་ཐོགས་ཀྱི་ལྷ་རྣམས་དང་ལག་ན་གཞོང་ཐོགས་ཀྱི་ལྷ་རྣམས་དང༌། ཆུ་ན་གནས་པའི་ཀླུ་རྣམས་དང༌། སྲུང་མ་ལྔ་པོ་རྣམས་གཅིག་ཏུ་འདུས་པར་གྱུར་ནས་ལྷ་མ་ཡིན་རྣམས་དང་ལྷན་ཅིག་ཏུ་གཡུལ་འགྱེད་དོ། །དེ་ཇི་སྟེ་སྲུང་མ་ལྔ་པོ་རྣམས་རྒྱལ་ཏེ། ལྷ་མ་ཡིན་རྣམས་ཕམ་ན་ནི་སྲུང་མ་ལྔ་པོ་རྣམས་ཀྱིས་ལྷ་མ་ཡིན་

---

^{[མ་དཔེ་གཟིགས་ན་འདིར་གནོན།]}

རྣམས་ཐུབ་ཅིང་རྡུགས་པར་བྱས་ཏེ། ཕམ་པར་བྱས་ཤིང་རྒྱབ་ཀྱིས་ཕྱོགས་པར་བྱས་ནས་ལྷ་མ་ཡིན་གྱི་གྲོང་ཁྱེར་དུ་འགྲོ་བར་འགྱུར་རོ། །ཇི་སྟེ་ལྷ་མ་ཡིན་རྣམས་རྒྱལ་ཏེ་སྲུང་མ་ལྔ་པོ་རྣམས་ཕམ་ན་ནི་སུམ་ཅུ་རྩ་གསུམ་པའི་ལྷ་རྣམས་ཀྱི་སྲུང་མ་ལྔ་པོ་རྣམས་ལྷ་མ་ཡིན་རྣམས་ཀྱིས་ཐུབ་ཅིང་རྡུགས་པར་བྱས་ཏེ། ཕམ་པར་བྱས་ཤིང་རྒྱབ་ཀྱིས་ཕྱོགས་པར་བྱས་ནས། རིའི་རྒྱལ་པོ་རི་རབ་ཀྱི་བང་རིམ་བཞི་པ་ནས་སྟེང་གི་གཞི་གང་ན་སུམ་ཅུ་རྩ་གསུམ་པའི་ལྷ་རྣམས་འཁོད་པར་བརྗེ་ཞིང་འགྲོའོ། །དེ་ནས་རྒྱལ་པོ་ཆེན་པོ་བཞི་ལྷ་རྣམས་ཀྱིས་ལྷའི་དབང་པོ་བརྒྱ་བྱིན་གང་ན་བ་དེར་སོང་སྟེ་ཕྱིན་ནས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ཀཽ་ཤི་ཀ་གང་བདག་ཅག་སྲུང་མ་ལྔ་པོ་རྣམས་ལྷ་མ་ཡིན་རྣམས་ཀྱིས་ཐུབ་ཅིང་རྡུགས་པར་བྱས་ཏེ། ཕམ་པར་བྱས་ཤིང་རྒྱབ་ཀྱིས་ཕྱོགས་པར་བྱས་ནས་རིའི་རྒྱལ་པོ་རི་རབ་ཀྱི་བང་རིམ་གྱི་སྟེང་གི་གཞིར་བརྗེས་ཏེ་མཆིས་པར་མཁྱེན་པར་མཛོད་ཅིག །ཀཽ་ཤི་ཀ་ད་ལྟར་གང་གི་དུས་ལ་བབ་པར་དགོངས་ཤིག །དེ་ནས་ལྷའི་དབང་པོ་བརྒྱ་བྱིན་གྱིས་རྒྱལ་པོ་ཆན་པོ་བཞི་རྣམས་ཀྱི་ལྟར་མཉན་ནས་སུམ་ཅུ་རྩ་གསུམ་པའི་ལྷ་རྣམས་ལ་སྨྲས་པ། གྲོགས་པོ་དག་གང་སྲུང་མ་ལྔ་པོ་རྣམས་ལྷ་མ་ཡིན་རྣམས་ཀྱིས་ཐུབ་ཅིང་རྡུགས་པར་བྱས་ཏེ། ཕམ་པར་བྱས་ཤིང་རྒྱབ་ཀྱིས་ཕྱོགས་པར་བྱས་ཤིང་རིའི་རྒྱལ་པོ་རི་རབ་ཀྱི་སྟེང་གི་གཞིར་བརྗེས་ཏེ། འོངས་པ་ཤེས་པར་གྱིས་ཤིག །གྲོགས་པོ་དག་ད་ལྟར་གང་གི་དུས་ལ་བབ་པ་སོམས་ཤིག་དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་གླང་པོ་ཆེའི་རྒྱལ་པོ་རབ་ཏུ་བརྟན་པ་ལ་བསམས་སོ། །དེ་ནས་གླང་པོ་ཆེའི་རྒྱལ་པོ་རབ་ཏུ་བརྟན་པས་ལྷའི་དབང་པོ་བརྒྱ་བྱིན་གྱི་མཚན་མོ་རྟོགས་ནས། དཔེར་ན་སྐྱེས་བུ་སྟོབས་དང་ལྡན་པ་ལག་པ་བསྐུམ་པ་ལས་བརྐྱང་པ་འམ། བརྐྱང་བ་ལས་བསྐུམ་པ་བཞིན་དུ་གླང་པོ་ཆེའི་རྒྱལ་པོ་རབ་ཏུ་བརྟན་པ་འཛམ་བུའི་གླིང་ནས་མི་སྣང་བར་བྱས་ཏེ། སུམ་ཅུ་རྩ་གསུམ་པའི་ལྷ་རྣམས་ཀྱི་ནང་དུ་སོང་ངོ༌། །སོང་ནས་མགོ་སུམ་ཅུ་རྩ་གཉིས་མངོན་པར་སྤྲུལ་ཏེ། མགོ་རེ་རེ་ལ་མ་ཆེ་བ་དྲུག་དྲུག །མཆེ་བ་རེ་རེ་ལ་རྫིང་བུ་བདུན་བདུན། རྫིང་བུ་

---

^{[མ་དཔེ་གཟིགས་ན་འདིར་གནོན།]}

རེ་རེ་ལ་པདྨ་བདུན་བདུན། པདྨ་རེ་རེ་ལ་སྡོང་བུ་བདུན་བདུན། སྡོང་བུ་རེ་རེ་ལ་ལྷའི་བུ་མོ་བདུན་བདུན། ལྷའི་བུ་མོ་རེ་རེ་ལ་གཡོག་མོ་བདུན་བདུན། གཡོག་མོ་ར་རེ་ལ་སིལ་སྙན་བདུན་བདུན་མངོན་བར་སྤྲུལ་ཏེ། མགོ་དེ་དག་ཐམས་ཅད་ཀྱི་ནང་ན་ཁྱད་པར་དུ་འཕགས་པ་གང་ཡིན་པ་དེ་ལ་ལྷའི་དབང་པོ་བརྒྱ་བྱིན་ཞོན་ནོ། །དེ་ལས་གཞན་པའི་མགོ་ལྷག་མ་རྣམས་ལ་ནི་ཉེ་བའི་དབང་པོ་སུམ་ཅུ་རྩ་གཉིས་པོ་རྣམས་ཞོན་ནོ། །དེ་ལས་གཞན་པའི་གླང་པོ་ཆེ་རྣམས་ལ་ནི་དེ་ལས་གཞན་པའི་སུམ་ཅུ་རྩ་གསུམ་པའི་ལྷ་རྣམས་ཞོན་ནོ། །དེ་ཤིན་ཏུ་མགྱོགས་ཏེ། དཔེར་ན་འཇིག་པའི་རླུང་ངམ། འཆགས་པའི་རླུང་བཞིན་ཏེ། དེ་ལྟར་ན་ལྷ་འམ་ལྷའི་བུ་མོ་སུ་ཡང་འདི་སྐད་དུ་འདི་ནི་བདག་གི་མདུན་དུ་འགྲོའོ་ཞེ་འམ་ཕྱི་ནས་འོང་ངོ་སྙམ་དུ་སེམས་པ་མེད་དོ། །དེ་ནས་གླང་པོ་ཆེའི་རྒྱལ་པོ་རབ་ཏུ་བརྟན་པ་སུམ་ཅུ་རྩ་གསུམ་པའི་ལྷ་རྣམས་ཀྱི་གྲོང་ཁྱེར་ལྷོ་ཕྱོགས་ཀྱི་སྒོ་ནས་བྱུང་སྟེ། དེ་ནས་སྐྱེད་མོས་ཚལ་རྩུབ་འགྱུར་ཚལ་དུ་ཕྱིན་ནས། རྫུ་འཕྲུལ་མངོན་བར་འདུ་བྱེད་པ་དེ་བཏང་སྟེ། འདི་ལྟ་སྟེ་ལྷ་འམ། ལྷའི་བུ་རྫུ་འཕྲུལ་ཆེ་ཞིང་མཐུ་ཆེ་བ་གང་ཡང་རུང་བ་དང་འདྲ་བར་བདག་ཉིད་མངོན་བར་སྤྲུལ་ཏེ། སུམ་ཅུ་རྩ་གསུམ་པའི་ལྷ་རྣམས་དང་ལྷན་ཅིག་ཏུ་ལྷའི་འདོད་པའི་ཡོན་ཏན་ལྔ་ལ་འབྱོར་ཅིང་ལྡན་བར་འགྱུར་ཏེ། རྩེ་ཞིང་དགའ་ལ་དགའ་དགུར་སྤྱོད་དོ། །རང་གི་ལས་ཀྱི་འབྲས་བུ་ཉམས་སུ་མྱོང་ངོ༌། །ཇི་ཙམ་དུ་སུམ་ཅུ་རྩ་གསུམ་པའི་ལྷ་རྣམས་སྐྱེད་མོས་ཚལ་རྩུབ་འགྱུར་ཚལ་དུ་རྩེ་ཞིང་དགའ་ལ་དགའ་དགུར་སྤྱོད་པ་དེ་ཙམ་དུ་ལུས་ཀྱང་རྩུབ་པར་འགྱུར་ལ། སེམས་ཀྱང་རྩུབ་བར་འགྱུར་ཏེ། དེ་དག་ལུས་རྩུབ་པ་དང༌། སེམས་རྩུབ་པ་དང༌། གཡུལ་འགྱེད་པ་ལ་མངོན་བར་མོས་པར་གྱུར་ནས་དཔུང་གི་ཚོགས་ཡན་ལག་བཞི་པ་འདི་ལྟ་སྟེ། གླང་པོ་ཆེའི་ཚོགས་དང༌། རྟའི་ཚོགས་དང༌། ཤིང་རྟའི་ཚོགས་དང༌། དཔུང་བུ་ཆུང་གི་ཚོགས་རྣམས་གོ་ཆ་གྱོན་ཏེ། དཔུང་གི་ཚོགས་ཡན་ལག་བཞི་པ་གླང་པོ་ཆེའི་ཚོགས་དང༌། རྟའི་ཚོགས་དང༌། ཤིང་རྟའི་ཚོགས་དང༌། དཔུང་བུ་ཆུང་གི་ཚོགས་རྣམས་ཀྱི་གོ་ཆ་རྣམ་པ་བཞི་འདི་ལྟ་སྟེ། གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་

---

^{[མ་དཔེ་གཟིགས་ན་འདིར་གནོན།]}

ལས་བྱས་པ་རྣམས་བགོས་སོ། །མཚོན་ཆ་རྣམ་པ་བཞི་འདི་ལྟ་སྟེ། རལ་གྲི་དང༌། མདུང་དང༌། འཕང་མདུང་དང༌། གཞུ་རྣམས་སོ། །མཚོན་ཆ་རྣམ་པ་བཞི་རལ་གྲི་དང༌། མདུང་དང༌། འཕང་མདུང་དང༌། གཞུ་རྣམས་བླངས་ནས་ལྷ་མ་ཡིན་རྣམས་དང་ལྷན་ཅིག་ཏུ་གཡུལ་འགྱེད་དོ། །ཇི་སྟེ་ལྷ་མ་ཡིན་རྣམས་རྒྱལ་ཏེ། ལྷ་རྣམས་ཕམ་ན་ནི་ལྷ་མ་ཡིན་རྣམས་ཀྱིས་ལྷ་རྣམས་ཐུབ་ཅིང་རྡུགས་པར་བྱས་ཏེ། ཕམ་པར་བྱས་ཤིང་རྒྱབ་ཀྱིས་ཕྱོགས་པར་བྱས་ནས་ཤིང་རྟ་བྱང་ཕྱོགས་སུ་ལྷའི་གྲོང་ཁྱེར་གང་ན་བ་དེར་ཕྱིར་ལྡོག་གོ །འོན་ཀྱང་ལྷ་མ་ཡིན་རྣམས་ལྷ་རྣམས་ཀྱི་ཕྱི་བཞིན་དུ་སྙེགས་པར་བྱེད་ནས་དེར་ལྷ་རྣམས་འདི་སྙམ་དུ་སེམས་ཏེ། འདི་ལྟར་ལྷ་མ་ཡིན་འདི་དག་བདག་ཅག་གི་ཕྱི་བཞིན་དུ་སྙེགས་པ་ལས་ན་ཡང་ལན་གཉིས་སུ་གཡུལ་འགྱེད་པར་འདོད་དོ་སྙམ་དུ་ཤེས་ནས་ལྷ་རྣམས་ཕྱིར་ལོག་སྟེ། ལྷམ་ཡིན་རྣམས་དང་ལྷན་ཅིག་ཏུ་གཡུལ་འགྱེད་དོ། །ཇི་སྟེ་ལན་གཉིས་སུ་ཡང་ལྷ་མ་ཡིན་རྣམས་རྒྱལ་ཏེ། ལྷ་རྣམས་ཕམ་ན་ནི་ལྷ་མ་ཡིན་རྣམས་ཀྱིས་ལྷ་རྣམས་ཐུབ་ཅིང་རྡུགས་པར་བྱས་ཏེ། ཕམ་པར་བྱས་ཤིང་རྒྱབ་ཀྱིས་ཕྱོགས་པར་བྱས་ནས་ཤིང་རྟ་བྱང་ཕྱོགས་སུ་ལྷའི་གྲོང་ཁྱེར་གང་ན་བར་ཕྱིར་ལྡོག་གོ །འོན་ཀྱང་ལྷ་མ་ཡིན་རྣམས་ལྷ་རྣམས་ཀྱི་ཕྱི་བཞིན་དུ་སྙེགས་པར་བྱེད་ན་ནི་དེར་ལྷ་རྣམས་འདི་སྙམ་དུ་སེམས་ཏེ། འདི་ལྟར་ལྷ་མ་ཡིན་འདི་དག་བདག་ཅག་གི་ཕྱི་བཞིན་དུ་སྙེ་གས་ཕ་ལས་ན་ཡང་ལན་གསུམ་དུ་གཡུལ་འགྱེད་པར་འདོད་དོ་སྙམ་དུ་ཤེས་ནས་ལྷ་རྣམས་ཕྱིར་ལོག་སྟེ། ལྷ་མ་ཡིན་རྣམས་དང་ལྷན་ཅིག་ཏུ་གཡུལ་འགྱེད་དོ། །ཇི་སྟེ་ལྷ་མ་ཡིན་རྣམས་འབའ་ཞིག་རྒྱལ་ཏེ། ལྷ་རྣམས་ཕམ་ན་ནི་ལྷ་མ་ཡིན་རྣམས་ཀྱིས་ལྷ་རྣམས་ཐུབ་ཅིང་རྡུགས་པར་བྱས་ཏེ། ཕམ་པར་བྱས་ཤིང་རྒྱབ་ཀྱིས་ཕྱོགས་པར་བྱས་ནས་ལྷའི་གྲོང་ཁྱེར་དུ་འཇུག་གོ།། ལྷའི་གྲོང་ཁྱེར་དུ་ཞུགས་ནས་སྒོ་རྣམས་བཅད་དེ། ལྷ་རྣམས་ལ་ལྷ་མ་ཡིན་རྣམས་ཀྱིས་མི་ཚུགས་ཀྱང་འཇིགས་ཤིང་སྐྲག་པ་དང་ལྡན་པའི་སེམས་ཀྱིས་ཤས་ཆེར་གནས་སོ། །འོན་ཀྱང་ལྷ་མ་ཡིན་རྣམས་ཀྱིས་དེར་མི་བརྫི་བཞིན་དུ་ལྷ་མ་ཡིན་རྣམས་ཀྱང་འདི་ལྟར་ལྷ་རྣམས་ནི་ལྷའི་གྲོང་ཁྱེར་ན་

---

^{[མ་དཔེ་གཟིགས་ན་འདིར་གནོན།]}

འདུག་ཀྱང་འཇིགས་ཤིང་སྐྲག་པ་དང་ལྡན་པའི་སེམས་ཀྱིས་ཤས་ཆེར་གནས་མོད་ཀྱི། བདག་ཅག་གིས་དེར་མི་བརྫིའོ་སྙམ་དུ་ཤེས་པའི་མཐོང་བ་འཇུག་གོ །ཇི་སྟེ་ལྷ་རྣམས་རྒྱལ་ཏེ། ལྷ་མ་ཡིན་རྣམས་ཕམ་ན་ནི་ལྷ་རྣམས་ཀྱིས་ལྷ་མ་ཡིན་རྣམས་ཐུབ་ཅིང་རྡུགས་པར་བྱས་ཏེ། ཕམ་པར་བྱས་ཤིང་རྒྱབ་ཀྱིས་ཕྱོགས་པར་བྱས་ནས་ཤིང་རྟ་ལྷོ་ཕྱོགས་སུ་ལྷ་མ་ཡིན་གྱི་གྲོང་ཁྱེར་གང་ན་བར་ཕྱིར་ལྡོག་གོ །འོན་ཀྱང་ལྷ་རྣམས་ལྷ་མ་ཡིན་རྣམས་ཀྱི་ཕྱི་བཞིན་དུ་སྙེགས་པར་བྱེད་ན་ནི། དེ་ལྟར་ལྷ་མ་ཡིན་རྣམས་འདི་སྙམ་དུ་སེམས་ཏེ། འདི་ལྟར་ལྷ་འདི་དག་བདག་ཅག་གི་ཕྱི་བཞིན་དུ་སྙེགས་པ་ལས་ན་ཡང་ལན་གཉིས་སུ་གཡུལ་འགྱེད་པར་འདོད་དོ་སྙམ་དུ་ཤེས་ནས་ལྷ་མ་ཡིན་རྣམས་ཕྱིར་ལྡོག་ཏེ། ལྷ་རྣམས་དང་ལྷན་ཅིག་གཡུལ་འགྱེད་དོ། །ཇི་སྟེ་ལན་གཉིས་སུ་ཡང་ལྷ་རྣམས་རྒྱལ་ཏེ། ལྷམ་ཡིན་རྣམས་ཕམ་ན་ནི་ལྷ་རྣམས་ཀྱིས་ལྷ་མ་ཡིན་རྣམས་ཐུབ་ཅིང་རྡུགས་པར་བྱས་ཏེ། ཕམ་པར་བྱས་ཤིང་རྒྱབ་ཀྱིས་ཕྱོགས་པར་བྱས་ནས། ཤིང་རྟ་ལྷོ་ཕྱོགས་སུ་ལྷ་མ་ཡིན་གྱི་གྲོང་ཁྱེར་གང་ན་བར་ཕྱིར་ལྡོག་གོ །འོན་ཀྱང་ལྷ་རྣམས་ལྷ་མ་ཡིན་རྣམས་ཀྱི་ཕྱི་བཞིན་དུ་སྙེགས་པར་བྱེད་ན་ནི། དེར་ལྷ་མ་ཡིན་རྣམས་འདི་སྙམ་དུ་སེམས་ཏེ། འདི་ལྟར་ལྷ་འདི་དག་བདག་ཅག་གི་ཕྱི་བཞིན་དུ་སྙེགས་པ་ལས་ན་ལན་གསུམ་དུ་གཡུལ་འགྱེད་པར་འདོད་དོ་སྙམ་དུ་ཤེས་ནས་ལྷ་མ་ཡིན་རྣམས་ཕྱིར་ལོག་སྟེ། ལྷ་རྣམས་དང་ལྷན་ཅིག་ཏུ་གཡུལ་འགྱེད་དོ། །ཇི་སྟེ་ལན་གསུམ་དུ་ལྷ་རྣམས་འབའ་ཞིག་རྒྱལ་ཏེ། ལྷ་མ་ཡིན་རྣམས་ཕམ་ན་ནི་ལྷ་རྣམས་ཀྱིས་ལྷ་མ་ཡིན་རྣམས་ཐུབ་ཅིང་རྡུགས་པར་བྱས་ཏེ། ཕམ་པར་བྱས་ཤིང་རྒྱབ་ཀྱིས་ཕྱོགས་པར་བྱས་ནས། ལྷ་མ་ཡིན་གྱི་གྲོང་ཁྱེར་དུ་འཇུག་གོ །ལྷ་མ་ཡིན་གྱི་གྲོང་དུ་ཞུགས་ནས་སྒོ་རྣམས་བཅད་དོ། ལྷ་མ་ཡིན་རྣམས་ལ་ལྷ་རྣམས་ཀྱིས་མི་ཚུགས་ཀྱང་འཇིགས་ཤིང་སྐྲག་པ་དང་ལྡན་པའི་སེམས་ཀྱིས་ཤས་ཆེར་གནས་སོ། །འོན་ཀྱང་ལྷ་རྣམས་ཀྱིས་དེར་མི་བརྫི་བཞིན་དུ་ལྷ་རྣམས་ཀྱང་འདི་ལྟར་ལྷ་མ་ཡིན་རྣམས་ནི་ལྷམ་ཡིན་གྱི་གྲོང་ཁྱེར་ན་འདུག་ཀྱང༌། འཇིགས་ཤིང་སྐྲག་པ་དང་ལྡན་པའི་སེམས་ཀྱིས་ཤས་ཆེར་གནས་མོད་ཀྱི། བདག་ཅག་གིས་ནི་དེར་མི་

---

^{[མ་དཔེ་གཟིགས་ན་འདིར་གནོན།]}

བརྫིའོ་སྙམ་དུ་ཤེས་པའི་མཐོང་བ་འཇུག་གོ །བཅོམ་ལྡན་འདས་ཀྱིས་ཀྱང་འདི་སྐད་དུ། དགེ་སློང་དག་སྔོན་བྱུང་བ་ལྷ་དང་ལྷ་མ་ཡིན་གཡུལ་དུ་ཞུགས་པ་ལྷ་མ་ཡིན་རྣམས་རྒྱལ་ཏེ། ལྷ་རྣམས་ཕམ་ན་ནི་ལྷ་མ་ཡིན་རྣམས་ཀྱིས་ལྷ་རྣམས་ཐུབ་ཅིང་རྡུགས་པར་བྱས་ཏེ། ཕམ་པར་བྱས་ཤིང་རྒྱབ་ཀྱིས་ཕྱོགས་པར་བྱས་ནས། ཤིང་རྟ་བྱང་ཕྱོགས་སུ་ལྷའི་གྲོང་ཁྱེར་གང་ན་བར་ཕྱིར་ལྡོག་གོ །འོན་ཀྱང་ལྷ་མ་ཡིན་རྣམས་ལྷ་རྣམས་ཀྱི་ཕྱི་བཞིན་དུ་སྙེགས་བར་བྱེད་ན་ནི། དེར་ལྷ་རྣམས་འདི་སྙམ་དུ་སེམས་ཏེ། འདི་ལྟར་ལྷ་མ་ཡིན་འདི་དག་བདག་ཅག་གི་ཕྱི་བཞིན་དུ་སྙེགས་པ་ལས་ན་ཡང་ལན་གཉིས་སུ་གཡུལ་འགྱེད་པར་འདོད་དོ་ཤེས་ནས་ལྷ་རྣམས་ཕྱིར་ལོག་སྟེ། ལྷ་མ་ཡིན་རྣམས་དང་ལྷན་ཅིག་ཏུ་གཡུལ་འགྱེད་དོ། །ཇི་སྟེ་ལན་གཉིས་སུ་ཡང་ལྷ་མ་ཡིན་རྣམས་རྒྱལ་ཏེ། ལྷ་རྣམས་ཕམ་ན་ནི་ལྷ་མ་ཡིན་རྣམས་ཀྱིས་ལྷ་རྣམས་ཐུབ་ཅིང་རྡུགས་པར་བྱས་ཏེ། ཕམ་པར་བྱས་ཤིང་རྒྱབ་ཀྱིས་ཕྱོགས་པར་བྱས་ནས། ཤིང་རྟ་བྱང་ཕྱོགས་སུ་ལྷའི་གྲོང་ཁྱེར་གང་ན་བར་ཕྱིར་ལྡོག་གོ །འོན་ཀྱང་ལྷ་མ་ཡིན་རྣམས་ཀྱིས་ཕྱི་བཞིན་དུ་སྙེགས་པར་བྱེད་ན་ནི་དེར་ལྷ་རྣམས་འདི་སྙམ་དུ་སེམས་ཏེ། འདི་ལྟར་ལྷམ་ཡིན་འདི་དག་བདག་ཅག་གི་ཕྱི་བཞིན་དུ་སྙེགས་པ་ལས་ན་ཡང་ལན་གསུམ་དུ་གཡུལ་འགྱེད་པར་འདོད་དོ་སྙམ་དུ་ཤེས་ནས་ལྷ་རྣམས་ཕྱིར་ལྡོག་སྟེ། ལྷ་མ་ཡིན་རྣམས་དང་ལྷན་ཅིག་ཏུ་གཡུལ་འགྱེད་དོ། །དགེ་སློང་དག་ཇི་སྟེ་ལྷ་མ་ཡིན་རྣམས་འབའ་ཞིག་རྒྱལ་ཏེ། ལྷ་རྣམས་ཕམ་ན་ནི་ལྷ་མ་ཡིན་རྣམས་ཀྱིས་ལྷ་རྣམས་ཐུབ་ཅིང་རྡུགས་པར་བྱས་ཏེ། ཕམ་པར་བྱས་ཤིང་རྒྱབ་ཀྱིས་ཕྱོགས་པར་བྱས་ནས། ལྷའི་གྲོང་ཁྱེར་མཆོག་ཏུ་འཇུག་གོ །ལྷའི་གྲོང་ཁྱེར་དུ་ཞུགས་ནས་སྒོ་རྣམས་བཅད་དོ། ལྷ་རྣམས་ལ་ལྷ་མ་ཡིན་རྣམས་ཀྱིས་མི་ཚུགས་ཀྱང་འཇིགས་ཤིང་སྐྲག་པ་དང་ལྡན་པའི་སེམས་ཀྱིས་ཤས་ཆེར་གནས་སོ། །འོན་ཀྱང་ལྷ་མ་ཡིན་རྣམས་ཀྱིས་དེར་མི་བརྫི་བཞིན་དུ་ལྷ་མ་ཡིན་རྣམས་ཀྱང་འདི་ལྟར་ལྷ་རྣམས་ནི་ལྷའི་གྲོང་ཁྱེར་ན་འདུག་ཀྱང་འཇིགས་ཤིང་སྐྲག་པ་དང་ལྡན་པའི་སེམས་ཀྱིས་ཤས་ཆེར་གནས་མོད་ཀྱི།

---

^{[མ་དཔེ་གཟིགས་ན་འདིར་གནོན།]}

བདག་ཅག་གིས་ནི་དེར་མི་བརྫིའོ་སྙམ་དུ་ཤེས་པའི་མཐོང་བ་འཇུག་གོ །དགེ་སློང་དག་འདི་ལྟར་སྔ་མ་འདས་པའི་དུས་ན། ལྷ་དང་ལྷ་མ་ཡིན་གཡུལ་དུ་ཞུགས་པ་ན་ལྷ་རྣམས་རྒྱལ་ཏེ། ལྷ་མ་ཡིན་རྣམས་ཕམ་ན་ནི་ལྷ་རྣམས་ཀྱིས་ལྷ་མ་ཡིན་རྣམས་ཐུབ་ཅིང་རྡུགས་པར་བྱས་ཏེ། ཕམ་པར་བྱས་ཤིང་རྒྱབ་ཀྱིས་ཕྱོགས་པར་བྱས་ནས། ཤིང་རྟ་ལྷོ་ཕྱོགས་སུ་ལྷ་མ་ཡིན་གྱི་གྲོང་ཁྱེར་གང་ན་བར་ཕྱིར་ལྡོག་གོ །འོན་ཀྱང་ལྷ་རྣམས་ལྷ་མ་ཡིན་རྣམས་ཀྱི་ཕྱི་བཞིན་དུ་སྙེགས་པར་བྱེད་ན་ནི་དེར་ལྷ་མ་ཡིན་རྣམས་འདི་སྙམ་དུ་སེམས་ཏེ། འདི་ལྟར་ལྷ་འདི་དག་བདག་ཅག་གི་ཕྱི་བཞིན་དུ་སྙེགས་པ་ལས་ན་ཡང་ལན་གཉིས་སུ་གཡུལ་འགྱེད་པར་འདོད་དོ་སྙམ་དུ་ཤེས་ནས། ལྷ་མ་ཡིན་རྣམས་ཕྱིར་ལྡོག་སྟེ། ལྷ་རྣམས་དང་ལྷན་ཅིག་ཏུ་གཡུལ་འགྱེད་དོ། །ཇི་སྟེ་ལན་གཉིས་སུ་ཡང་ལྷ་རྣམས་རྒྱལ་ཏེ། ལྷ་མ་ཡིན་རྣམས་ཕམ་ན་ནི་ལྷ་རྣམས་ཀྱིས་ལྷ་མ་ཡིན་རྣམས་ཐུབ་ཅིང་རྡུགས་པར་བྱས་ཏེ་ཕམ་པར་བྱས་ཤིང༌། རྒྱབ་ཀྱིས་ཕྱོགས་པར་བྱས་ནས་ཤིང་རྟ་ལྷོ་ཕྱོགས་སུ་ལྷ་མ་ཡིན་གྱི་གྲོང་ཁྱེར་གང་ན་བར་ཕྱིར་ལྡོག་གོ །འོན་ཀྱང་ལྷ་རྣམས་ལྷ་མ་ཡིན་རྣམས་ཀྱི་ཕྱི་བཞིན་དུ་སྙེགས་པར་བྱེད་ན་ནི་དེར་ལྷ་མ་ཡིན་རྣམས་འདི་སྙམ་དུ་སེམས་ཏེ། འདི་ལྟར་ལྷ་འདི་དག་བདག་ཅག་གི་ཕྱི་བཞིན་དུ་སྙེགས་པ་ལས་ན་ཡང་ལན་གསུམ་དུ་གཡུལ་འགྱེད་པར་འདོད་དོ་སྙམ་དུ་ཤེས་ནས། ལྷ་མ་ཡིན་རྣམས་ཕྱིར་ལོག་སྟེ་ལྷ་རྣམས་དང་ལྷན་ཅིག་ཏུ་གཡུལ་འགྱེད་དོ། །ཇི་སྟེ་ལན་གསུམ་དུ་ལྷ་རྣམས་འབའ་ཞིག་རྒྱལ་ཏེ། ལྷ་མ་ཡིན་རྣམས་ཕམ་ན་ནི་ལྷ་རྣམས་ཀྱིས་ལྷ་མ་ཡིན་རྣམས་ཐུབ་ཅིང་རྡུགས་པར་བྱས་ཏེ། ཕམ་པར་བྱས་ཤིང་རྒྱབ་ཀྱིས་ཕྱོགས་པར་བྱས་ནས་ལྷ་མ་ཡིན་གྱི་གྲོང་ཁྱེར་དུ་འཇུག་གོ །ལྷ་མ་ཡིན་གྱི་གྲོང་ཁྱེར་དུ་ཞུགས་ནས་སྒོ་རྣམས་བཅད་དེ། ལྷ་མ་ཡིན་རྣམས་ལ་ལྷ་རྣམས་ཀྱིས་མི་ཚུགས་ཀྱང་འཇིགས་ཤིང་སྐྲག་པ་དང་ལྡན་པའི་སེམས་ཀྱིས་ཤས་ཆེར་གནས་སོ། །འོན་ཀྱང་ལྷ་རྣམས་ཀྱིས་དེར་མི་བརྫི་བཞིན་དུ་ལྷ་རྣམས་ཀྱང་འདི་ལྟར་ལྷ་མ་ཡིན་རྣམས་ནི་ལྷ་མ་ཡིན་གྱི་གྲོང་ཁྱེར་ན་འདུག་ཀྱང་འཇིགས་ཤིང་སྐྲག་པ་དང་ལྡན་པའི་སེམས་ཀྱིས་ཤས་ཆེར་གནས་མོད་ཀྱི། བདག་ཅག་གིས་

---

^{[མ་དཔེ་གཟིགས་ན་འདིར་གནོན།]}

ནི་དེར་མི་བརྫིའོ་སྙམ་དུ་ཤེས་པའི་མཐོང་བ་འཇུག་གོ །དགེ་སློང་དག་སྔོན་བྱུང་བ་འདས་པའི་དུས་ན་དེ་ལྟ་བུར་གྱུར་པའི་ཚེ། འདི་སྐད་དུ། གང་ཚེ་ལྷ་དང་ལྷ་མིན་ལྷན་ཅིག་ཏུ། །གཉི་ག་འདུས་ཤིང་གཡུལ་ནི་འགྱེད་པ་ན། །ཤིང་རྟ་པ་ནི་ཉི་ཟླ་མཚུངས་མེད་དེ། །ལྷ་ཡི་ཤིང་རྟ་པ་ནི་མཆོག་ཡིན་ནོ། །ཞེས་ཀྱང་བྱའོ། །རིའི་རྒྱལ་པོ་རི་རབ་ཀྱི་སྟེང་གི་གཞི་ནི་སུམ་ཅུ་རྩ་གསུམ་པའི་ལྷ་རྣམས་ཀྱི་གྲོང་ཁྱེར་བལྟ་ན་སྡུག་ཅེས་བྱ་བ་ཆུར་དཔག་ཚད་ཉིས་སྟོང་ལྔ་བརྒྱ། ཞེང་དུ་ཡང་ཉིས་སྟོང་ལྔ་བརྒྱ། མཐའ་སྐོར་དུ་དཔག་ཚད་ཁྲི་ཡོད་པ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་ཞིག་ཡོད་དེ། གསེར་གྱི་ར་བས་བསྐོར་ཏེ་ར་བའི་འཕང་དུ་ནི་དཔག་ཚད་ཕྱེད་དང་གསུམ་ཡོད་དོ། །རབ་དེ་ལ་རྩིག་སྐྱབས་རྣམས་པ་བཞི་ལས་བྱས་པ་ཡོད་དེ། གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པ་རྣམས་སོ། །གྱེན་དུ་འཕང་བའི་མདའ་ཡབ་དང༌། ཐུར་དུ་འཕང་བའི་མདའ་ཡབ་དང༌། ཟམ་པ་བརྒྱུད་མ་རྣམས་པ་བཞི་ཡོད་དེ། །གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པ་རྣམས་སོ། །དེའི་ནང་གི་ས་གཞི་དབྱིབས་ལེགས་ཤིང་བལྟ་ན་སྡུག་ལ་མཛེས་ཏེ། བྲིས་ཤིང་ལེགས་པར་བྲིས་པ་ཚོན་སྣ་བརྒྱ་རྩ་གཅིག་གིས་བྲིས་པ་སྟེ། འཇམ་ཞིང་ཤིན་ཏུ་འཇམ་པ་ནི་དཔེར་ན་ཤིང་བལ་གྱི་འདབ་མ་འམ་རས་བལ་ཀྱི་འདབ་མ་བཞིན་དུ། རྐང་པ་བཞག་ན་ནི་ནེམས་ཞེས་བྱེད་དེ། རྐང་པ་བཏེག་ན་ནི་པར་ཞེས་བྱེད་དེ། མེ་ཏོག་མན་དར་བ་མང་པོས་པུས་མོ་ནུབ་པ་ཙམ་དུ་ཡོངས་སུ་ཁེབས་ཏེ། རླུང་གི་མཐུས་མེ་ཏོག་རྙིང་པ་རྣམས་ནི་འཐོར། མེ་ཏོག་གསར་པ་རྣམས་ནི་ལེགས་པར་བཀྲམ་སྟེ། འདི་སྐད་དུ། ལྷ་རྣམས་བསོད་ནམས་དབང་གི་མཐུ་སྟོབས་ཀྱིས། །ལྷ་ཡི་གྲོང་ཁྱེར་དག་ན་རླུང་ཆེན་ལྡང༌། །མེ་ཏོག་རྙིང་པ་རྣམས་ནི་འདོར་བར་བྱེད། །མེ་ཏོག་གསར་པ་རྣམས་ནི་ལེགས་པར་དགྲམ། །ཞེས་ཀྱང་བྱའོ། །ལྷའི་གྲོང་ཁྱེར་དེ་ནི་སྒོ་སྟོང་དུ་གཅིག་གིས་མ་ཚང་བ་ཡོད་དོ། །སྒོ་གཅིག་གི་ཡང་འཕང་དུ་ནི་དཔག་ཚད་ཕྱེད་དང་གསུམ།

---

^{[མ་དཔེ་གཟིགས་ན་འདིར་གནོན།]}

ཞེང་དུ་ནི་དཔག་ཚད་ཕྱེད་དང་གཉིས་ཡོད་དོ། །སྒོ་རེ་རེ་ལ་ཡང་སྐར་མའི་གཟུགས་སུ་བྱས་པ་བཞི་བཞི་ཡོད་དེ། གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པ་རྣམས་སོ། །ཟླ་བ་ཕྱེད་པ་ལྟ་བུར་ཡོངས་སུ་གྲུབ་པ་དང༌། བ་ལང་གི་མགོ་ལྟ་བུ་དང༌། མེ་ལོང་རྣམས་ཀྱང་གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པ་བཞི་ཡོད་དེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་ཡིན་ནོ། །སྒོ་རེ་རེ་ལ་ཡང་སུམ་ཅུ་རྩ་གསུམ་པའི་ལྷ་རྣམས་སྲུང་བའི་ཕྱིར་དང༌། བསྒྲུབ་པའི་ཕྱིར་དང༌། མཛེས་པར་བྱ་བའི་ཕྱིར་སྲུང་མ་གོ་ཆ་བགོས་ཤིང་མཚོན་ཆ་ཐོགས་པ་ལྔ་བརྒྱ་བཀོད་དོ། །སུམ་ཅུ་རྩ་གསུམ་པའི་ལྷ་རྣམས་ཀྱི་ལམ་སྲིང་སྲིད་དུ་དཔག་ཚད་ཉིས་སྟོང་ལྔ་བརྒྱ་ཡོད་ལ་ཞེང་དུ་དཔག་ཚད་བཅུ་གཉིས་ཡོད་དོ། །དབྱིབས་ལེགས་ཤིང་བལྟ་ན་སྡུག་པ་མཛེས་པ་གསེར་གྱི་བྱེ་མ་བདལ་ཞིང་ཙནྡན་གྱི་ཆུས་ཆག་ཆག་བཏབ་པ་ཞིག་ཡོད་དོ། །སྲང་དེའི་གློ་གཡས་གཡོན་ན་རྫིང་བུ་བྱས་པའི་རྫིང་བུ་དེ་དག་གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པའི་ཕ་གུ་རྣམ་པ་བཞི་བརྩིགས་སོ། །རྫིང་བུ་དེ་དག་གི་ཕྱོགས་བཞི་ན་ཐེམ་སྐས་བྱས་པ་ཡོད་དེ། ཐེམ་སྐས་དེ་དག་འདི་ལྟ་སྟེ། གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པའི་ཕ་གུ་རྣམས་པ་བཞི་བརྩིགས་སོ། །རྫིང་བུ་དེ་དག་གི་ལན་ཀན་གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པ་བཞི་ཀུན་ནས་བསྐོར་ཏེ། གསེར་གྱི་ལན་ཀན་གྱི་གཏན་མ་དང༌། གདང་བུ་དང་གཟུངས་གཟེར་ནི་དངུལ་ལས་བྱས་སོ། །དངུལ་གྱི་ནི་གསེར་ལས་བྱས་སོ། །བཻ་ཌཱུཪྻའི་ཤེལ་ལས་བྱས་སོ། །ཤེལ་གྱི་ལན་ཀན་གྱི་གཏན་མ་དང༌། གདོང་བུ་དང༌། གཟུངས་གཟེར་ནི་བཻ་ཌཱུཪྻ་ལས་བྱས་ཏེ། དབྱིབས་ལེགས་ཤིང་བལྟ་ན་སྡུག་ལ་མཛེས་སོ། །རྫིང་བུ་དེ་དག་ཀྱང་ཆུ་བསིལ་ཞིང་ཆུ་སྦྲང་རྩི་ལྟ་བུས་གང་སྟེ། མེ་ཏོག་ཨུཏྤ་ལ་དང༌། པདྨ་དང༌། ཀུ་མུ་ཏ་དང༌།

---

^{[མ་དཔེ་གཟིགས་ན་འདིར་གནོན།]}

པདྨ་དཀར་པོས་ཡོངས་སུ་ཁེབས་ཏེ། དེ་དག་ལ་ནི་ཆུ་ནས་སྐྱེས་པའི་བྱ་སྣ་ཚོགས་སྐད་སྙན་ཅིང་འཇེབས་པ་དང༌། སྐད་ཡིད་དུ་འོང་བ་དང༌། སྐད་མཉེན་པ་དང༌། འདོད་དགུར་སྒྱུར་བའི་གཟུགས་ཅན་རྣམས་སྐད་སྙན་པ་འབྱིན་ནོ། །རྫིང་བུ་དེ་དག་གི་ཉེ་འཁོར་ན་མེ་ཏོག་གི་ཤིང་དང༌། འབྲས་བུའི་ཤིང་སྣ་ཚོགས་པ་རྣམས་ལེགས་པར་སྐྱེས་ཤིང་དབྱིབས་ལེགས་ལ་ཡོངས་སུ་གྲུབ་སྟེ། མེ་ཏོག་ཕྲེང་བར་བཀོད་པ་བཞིན་དུ་གྱུར་པ་ནི་དཔེར་ན་མེ་ཏོག་ཕྲེང་རྒྱུད་དང༌། མེ་ཏོག་ཕྲེང་རྒྱུད་ཀྱི་སློབ་མ་མཁས་པས་མེ་ཏོག་གི་ཕྲེང་བ་ཐ་གུ་ལ་བརྒྱུས་པ་དང༌། མེ་ཏོག་གི་རྣ་རྒྱན་ལེགས་པར་བྱས་པ་བཞིན་ཏེ། ཐང་ལས་སྐྱེས་པའི་བྱ་སྣ་ཚོགས་སྐད་སྙན་ཅིང་འཇེབས་པ་དང༌། སྐད་ཡིད་དུ་འོང་བ་དང༌། སྐད་མཉེན་པ་དང༌། འདོད་དགུར་སྒྱུར་བའི་གཟུགས་ཅན་རྣམས་སྐད་སྙན་པ་འབྱིན་ཏོ། །དེ་དག་གི་ཉེ་འཁོར་ན་དཔག་བསམ་གྱི་ཤིང་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམས་པ་བཞི་ཡོད་དོ། །གཞག་གོས་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམས་པ་བཞི་ཡོད་དོ། །དཔག་བསམ་ཤིང་ལས་བྱུང་བའི་གོས་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དོ། །རྒྱན་སྣ་ཚོགས་ལག་རྒྱན་དང༌། རྐང་རྒྱན་དང༌། རྒྱན་སྣང་བ་དང༌། མི་སྣང་བ་རྣམས་འབྱུང་བའི་ཤིང་དག་ཡོད་དོ། །ལྷའམ་ལྷའི་བུ་མོ་དག་གིས་ཇི་ལྟ་བུར་འདོད་པའི་སེམས་བསྐྱེད་མ་ཐག་ཏུ་དེ་ལྟ་བུར་དེ་དག་གི་ལག་ཏུ་འོང་བར་འགྱུར་རོ། །རོལ་མོའི་ཆ་བྱད་སྣ་ཚོགས་པི་ཝང་དང༌། གླིང་བུ་དང༌། པི་ཝང་རྒྱུད་གསུམ་པ་དང༌། འཁར་རྔ་དང༌། ཧམ་ཤང་རྣམས་འབྱུང་བའི་ཤིང་དག་ཡོད་དེ། ལྷ་འམ་ལྷའི་བུ་མོ་རྣམས་ཀྱིས་ཇི་ལྟ་བུར་འདོད་པར་སེམས་བསྐྱེད་མ་ཐག་ཏུ་དེ་ལྟ་བུར་དེ་དག་གི་ལག་ཏུ་འོང་བར་འགྱུར་རོ། །བདུད་རྩི་རྣམ་པ་བཞི་དང༌། སྦྲང་རྩི་དང༌། སྦྲང་ཆང་གི་བཏུང་བ་དག་ཀྱང་ཡོད་དོ། །ཡང་ཐོག་རྣམས་དང༌། ཁང་པ་བརྩེགས་པ་རྣམས་དང༌། ཁྱིམ་རྣམས་དང༌། ཁང་བཟངས་རྣམས་དང༌། བསིལ་ཁང་རྣམས་དང༌། །ལྟད་མོ་ལྟ་བའི་ས་རྣམས་དང༌། ཟམ་པ་རྣམས་བུད་མེད་ཀྱི་ཚོགས་

---

^{[མ་དཔེ་གཟིགས་ན་འདིར་གནོན།]}

ཀྱིས་མཛེས་པར་བྱས་ཤིང་ལྷའི་བུ་མོ་མང་པོས་བརྟེན་པ་དང༌། སིལ་སྙན་དང༌། ཕེག་རྡོབ་པ་དག་གི་སྒྲ་སྙན་པ་སྒྲོགས་པ་དང༌། དྲི་སྣ་ཚོགས་ཀྱིས་ལེགས་པར་བསྒོས་པ་དང༌། ཁ་ཟས་དང་བཏུང་བ་དག་ཀྱང་ཡོད་དོ། །དེ་ན་སུམ་ཅུ་རྩ་གསུམ་པའི་ལྷ་རྣམས་འཁོར་དང་བཅས་པ་རྩེ་ཞིང་དགའ་ལ་དགའ་དགུར་སྤྱོད་དོ། །རང་གི་ལས་ཀྱི་འབྲས་བུ་ཉམས་སུ་མྱོང་ངོ༌།། །།འཇིག་རྟེན་གཞག་པ། བམ་པོ་བཞི་པ། ལྷའི་གྲོང་ཁྱེར་གྱི་ནང་ན་ལྷ་རྣམས་ཀྱི་དབང་པོ་བརྒྱ་བྱིན་གྱི་ཁང་བཟངས་རྣམས་པར་རྒྱལ་བ་ཞེས་བྱ་བ་ཆུར་དཔག་ཚད་ཉིས་བརྒྱ་ལྔ་བཅུ། ཞེང་དུ་ཡང་དཔག་ཚད་ཉིས་བརྒྱ་ལྔ་བཅུ། །མཐའ་སྐོར་དུ་དཔག་ཚད་སྟོང་ཡོད་པ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་ཞིག་ཡོད་དོ། །ལྷའི་གྲོང་ཁྱེར་ལས་དཔག་ཚད་ཕྱེད་དང་ལྔས་གྱེན་དུ་འཕགས་སོ། །ཁང་བཟངས་རྣམས་པར་རྒྱལ་བ་དེའི་རྨང་རྟེན་རྣམ་པ་བཞི་ལས་བྱས་པ་ལ་འདི་ལྟ་སྟེ། གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པ་རྣམས་སོ། །ཁང་བཟང་རྣམ་པར་རྒྱལ་བའི་ཐེམ་པ་རྣམ་པ་བཞི་བཀོད་པ་ལ་འདི་ལྟ་སྟེ། གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པ་རྣམས་སོ། །ཁང་བཟངས་རྣམ་པར་རྒྱལ་བའི་ཀ་བ་རྣམ་པ་བཞི་གཙུགས་པ་ལ་འདི་ལྟ་སྟེ། གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པ་རྣམས་སོ། །གསེར་ལས་བྱས་པའི་ཀ་ཏན་དང༌། ཀ་ཞུ་དང༌། བྲེ་ཕུལ་དང༌། གདུང་རྣམས་དངུལ་ལས་བྱས་སོ། །དངུལ་གྱི་ནི་གསེར་ལས་བྱས་སོ། །བཻ་ཌཱུཪྻའི་ནི་ཤེལ་ལས་བྱས་སོ། །ཤེལ་གྱི་ཀ་ཏན་དང༌། ཀ་ཞུ་དང༌། བྲེ་ཕུལ་དང་གདུང་རྣམས་བཻ་ཌཱུཪྻ་ལས་བྱས་སོ། །ཁང་བཟངས་རྣམ་པར་རྒྱལ་པ་དེའི་ཕྱམ་རྟེན་རྣམ་པ་བཞི་ལས་བྱས་པ་དག་ཡོད་དོ། །འདི་ལྟ་སྟེ། གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པ་རྣམས་སོ། །ཁང་བཟངས་རྣམ་པར་རྒྱལ་བ་ལ་ཐེམ་སྐས་རྣམ་པ་བཞི་ལས་བྱས་པ་དག་ཡོད་དོ། །འདི་ལྟ་སྟེ།

---

^{[མ་དཔེ་གཟིགས་ན་འདིར་གནོན།]}

གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པའི་ཕ་གུ་རྣམ་པ་བཞི་བརྩིགས་སོ། །ཁང་བཟངས་རྣམ་པར་རྒྱལ་བ་ལ་ལན་ཀ་ན་གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པ་རྣམ་པ་བཞིས་ཀུན་ནས་བསྐོར་ཏེ། གསེར་གྱི་ལན་ཀན་གྱི་གཏན་མ་དང༌། གདང་བུ་དང༌། གཟུངས་གཟེར་ནི་དངུལ་ལས་བྱས་སོ། །དངུལ་གྱི་ཉི་གསེར་ལས་བྱས་པ་དང༌། བཻ་ཌཱུཪྻའི་ནི་ཤེལ་ལས་བྱས་སོ། །ཤེལ་གྱི་གཏན་མ་དང༌། གདང་བུ་དང༌། གཟུངས་གཟེར་ནི་བཻ་ཌཱུཪྻ་ལས་བྱས་སོ། །བར་གྱི་མདོ་ལ། རྨང་རྟེན་ཐེམ་པ་ཀ་བ་དང༌། །ཕྱམ་རྟེན་དང་ནི་སྟོབས་ལྡན་ཕྱམ། །འཁོར་ས་དང་ནི་སྤང་ལེབ་ཁང༌། །ཡ་ཕུབས་དག་ནི་ཐ་མ་ཡིན། །ཁང་བཟངས་རྣམ་པར་རྒྱལ་བ་ལ་བ་གམ་བརྒྱད་ཡོད་དོ། །བ་གམ་རེ་རེ་ལ་ཡང་ཁང་བ་བརྩེགས་པ་བདུན་བདུན་ཡོད་དོ། །ཁང་པ་བརྩེགས་པ་རེ་རེ་ལ་ཡང་གནས་ཁང་བདུན་བདུན། གནས་ཁང་རེ་རེ་ལ་ཡང་ལྷའི་བུ་མོ་བདུན་བདུན། ལྷའི་བུ་མོ་རེ་རེ་ལ་ཡང་གཡོག་མོ་བདུན་བདུན། གཡོག་མོ་རེ་རེ་ལ་སིལ་སྙན་བདུན་བདུན་ཡོད་དོ། །ཁང་བཟངས་རྣམ་པར་རྒྱལ་བའི་ནང་ན་རྫིང་བུ་བྱས་པ་ཡོད་དོ། །རྫིང་བུ་དེ་ལ་ཆུར་དཔག་ཚད་ལྔ་བཅུ། ཞེང་དུ་ཡང་དཔག་ཚད་ལྔ་བཅུ། མཐའ་སྐོར་དུ་དཔག་ཚད་ཉིས་བརྒྱ་ཡོད་དོ། །རྫིང་བུ་དེའི་ཕྱོགས་བཞིན་ཐེམ་སྐས་བྱས་པ་དག་ཡོད་དོ། །ཐེམ་སྐས་དེ་དག་ཀྱང༌། འདི་ལྟ་སྟེ། གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པའི་ཕ་གུ་རྣམ་པ་བཞི་བརྩིགས་སོ། །རྫིང་བུ་དེའི་ཕྱོགས་བཞི་ཡང་ལན་ཀན་གྱིས་ཀུན་ནས་བསྐོར་ཏེ། ལན་ཀན་རྣམ་པ་བཞི་དག་གིས་སྔ་མ་བཞིན་དུ། དབྱིབས་ལེགས་ཤིང་བལྟ་ན་སྡུག་ལ་མཛེས་པ། བསིལ་ཞིང་ཆུ་སྦྲང་རྩི་ལྟ་བུས་གང་སྟེ་མེ་ཏོག་ཨུཏྤ་ལ་དང༌། པདྨ་དང༌། ཀུ་མུ་ཏ་དང༌། པདྨ་དཀར་པོས་ཡོངས་སུ་ཁེབས་ལ། ཆུ་ནས་སྐྱེས་པའི་བྱ་སྣ་ཚོགས་སྐད་སྙན་ཅིང་འཇེབས་པ་དང༌། སྐད་ཡིད་དུ་འོང་བ་དང༌། སྐད་མཉེན་པ་དང༌། འདོད་དགུར་སྒྱུར་བའི་གཟུགས་ཅན་རྣམས་སྐད་སྙན་

---

^{[མ་དཔེ་གཟིགས་ན་འདིར་གནོན།]}

པ་འབྱིན་ཏོ། །རྫིང་བུ་དེའི་ཉེན་འཁོར་ན་མེ་ཏོག་གི་ཤིང༌། འབྲས་བུའི་ཤིང་རྣམ་པ་སྣ་ཚོགས་ཡོད་པ་རྣམས་ལེགས་པར་སྐྱེས་ཤིང་དབྱིབས་ལེགས་ལ་ཡོངས་སུ་གྲུབ་པ་སྟེ། མེ་ཏོག་ཕྲེང་བས་བཀོད་བ་བཞིན་དུ་གྱུར་པ་ནི་དཔེར་ན་མེ་ཏོག་ཕྲེང་རྒྱུད་དམ། མེ་ཏོག་ཕྲེད་རྒྱུད་ཀྱི་སློབ་མ་མཁས་པས་མེ་ཏོག་ཕྲེང་བ་ཐ་གུ་ལ་བརྒྱུས་པ་དང༌། མེ་ཏོག་གི་རྣ་རྒྱན་ལེགས་པར་བྱས་པ་བཞིན་ཏེ། ཐང་ལས་སྐྱེས་པའི་བྱ་སྣ་ཚོགས་སྐད་སྙན་ཅིང་འཇེབས་པ་དང༌། སྐད་ཡིད་དུ་འོང་བ་དང༌། སྐད་མཉན་པ་དང༌། འདོད་དགུར་སྒྱུར་བའི་གཟུགས་ཅན་རྣམས་སྐད་སྙན་ཅིང་འབྱིན་ཏོ། །དཔག་བསམ་གྱི་ཤིང་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དོ། །གཞག་གོས་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དོ། །དཔག་བསམ་ཤིང་ལས་བྱུང་བའི་གོས་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དོ། །རྒྱན་སྣ་ཚོགས་ལག་རྒྱན་དང༌། རྐང་རྒྱན་དང༌། རྒྱན་སྣང་བ་དང༌། མི་སྣང་བ་དག་འབྱུང་བའི་ཤིང་རྣམས་ཡོད་དོ། །རོལ་མོའི་ཆ་བྱད་སྣ་ཚོགས་འདི་ལྟ་སྟེ། པི་ཝང་དང༌། གླིང་བུ་དང༌། པི་ཝང་རྒྱུད་གསུམ་པ་དང༌། འཁར་རྔ་དང༌། ཧམ་ཤང་རྣམས་འབྱུང་བའི་ཤིང་དག་ཡོད་དེ། ལྷ་དང་ལྷའི་བུ་མོ་རྣམས་ཀྱིས་ཇི་ལྟ་བུར་འདོད་པར་སེམས་བསྐྱེད་མ་ཐག་ཏུ་དེ་ལྟ་བུར་དེ་དག་གི་ལག་ཏུ་འོང་བར་འགྱུར་རོ། །བདུད་རྩི་རྣམ་པ་བཞི་དང༌། སྦྲང་རྩི་དང་སྦྲང་ཆང་གི་བཏུང་བ་དག་ཀྱང་ཡོད་དོ། །ཡང་ཐོག་རྣམས་དང༌། ཁང་པ་བརྩེགས་པ་རྣམས་དང༌། ཁྱིམ་རྣམས་དང༌། ཁང་བཟངས་རྣམས་དང༌། བསིལ་ཁང་རྣམས་དང༌། ལྟད་མོ་ལྟ་བའི་ས་རྣམས་དང༌། ཟམ་པ་རྣམས་བུད་མེད་ཀྱི་ཚོགས་ཀྱིས་མཛེས་པར་བྱས་ཤིང་ལྷའི་བུ་མོ་མང་པོས་བརྟེན་པ་དང༌། སིལ་སྙན་དང༌། ཕེག་རྡོབ་པ་དག་གི་སྒྲ་སྙན་པ་སྒྲོགས་པ་དང༌། དྲི་སྣ་ཚོགས་ཀྱིས་ལེགས་པར་བསྒོས་པ་དང༌། ཁ་ཟས་དང༌། བཏུང་བ་དང་ལྡན་པ་དག་ཀྱང་ཡོད་དོ། །དེ་ནས་ལྷའི་དབང་པོ་བརྒྱ་བྱིན་འཁོར་དང་བཅས་པ་རྩེ་ཞིང་དགའ་ལ་དགའ་དགུར་སྤྱོད་དོ། །རང་གི་ལས་ཀྱི་འབྲས་བུ་ཉམས་

---

^{[མ་དཔེ་གཟིགས་ན་འདིར་གནོན།]}

སུ་མྱོང་ངོ༌། །ལྷའི་གྲོང་ཁྱེར་གྱི་ཤར་ལྷོའི་མཚམས་ན་སུམ་ཅུ་རྩ་གསུམ་པའི་ལྷ་རྣམས་ཀྱི་ལྷའི་འདུན་ས་ཆོས་བཟངས་ཞེས་བྱ་བ་ཡོད་དེ། ཆུར་དཔག་ཚད་སུམ་བརྒྱ། ཞེང་དུ་དཔག་ཚད་སུམ་བརྒྱ་མཐའ་སྐོར་དུ་དཔག་ཚད་དགུ་བརྒྱ་ཡོད་དེ། ལྷའི་གྲོང་ཁྱེར་ལས་དཔག་ཚད་ཕྱེད་དང་བཞིས་འཕགས་སོ། །ལྷའི་མདུན་ས་ཆོས་བཟངས་ཀྱི་ས་གཞི་དང༌། ཡང་ཐོག་དང༌། ཀ་བ་དང༌། སྤྱི་འདུས་ཀྱི་གདུང་དང༌། ཡང་ཐོག་གི་རྩེ་བཞི་དང༌། ཕྱམ་གཟུམ་དང༌། ཕྱམ་དགུ་པོ་ཐམས་ཅད་ཤེལ་ལས་བྱས་པ་དབྱིབས་ལེགས་ཤིང་བལྟ་ན་སྡུག་ལ་མཛེས་པ་སྟེ། ལན་ཀན་གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པ་རྣམ་པ་བཞིས་ཀུན་ནས་བསྐོར་ཏེ། །དེ་ལ་སྒོ་དང༌། ཡ་ཕུབས་དང༌། གྷ་ན་དང༌། ཡང་ཐོག་གི་རྩེ་བཞི་དང༌། ལུ་ན་དང༌། ཕྱམ་དགུ་པོ་ཡོད་དེ། ཕུམ་དགུ་པོ་རེ་རེ་ལ་ཡང་ཀ་བ་བཅུ་དྲུག་གིས་བརྟེན་ཏོ། །རྒྱུ་བའི་ལམ་ནི་རིམ་པ་བདུན་ཡོད་དོ། །དེའི་དབུས་སུ་བཻ་ཌཱུཪྻ་ལས་བྱས་པའི་ཀ་བ་ཟུར་བརྒྱད་པ། གསལ་ཞིང་འཕན་མེད་ལ་རིགས་དང་ལྡན་པ་ཞིག་ཡོད་དེ། སྐྲའི་རྩེ་མོ་ཙམ་གྱི་ཁང་བ་བརྩེགས་པའི་སྤྱི་འདུས་ཀྱི་རྟེན་ལ་མི་རེག་གོ །དེའི་འོག་ན་ལྷའི་དབང་པོ་བརྒྱ་བྱིན་གྱི་གསེར་གྱི་ཁྲི་བཟང་པོ་དང༌། སུམ་ཅུ་རྩ་གསུམ་པའི་ལྷ་ལྷག་མ་རྣམས་ཀྱི་ཁྲི་བཤམས་པ་ཡོད་དོ། །དེར་སུམ་ཅུ་རྩ་གསུམ་པའི་ལྷ་རྣམས་འདུས་ཤིང་འཁོད་ནས་ལྷ་རྣམས་དང༌། མི་རྣམས་ཀྱི་དོན་དང༌། ཆོས་སེམས་ཤིང་སྤྱོད་དེ། ཡོངས་སུ་རྟོགས་པར་བྱེད་དོ། །ལྷའི་གྲོང་ཁྱེར་ནས་རྒྱུ་བའི་ལམ་སྲིད་དུ་དཔག་ཚད་བཅུ་གཉིས། ཞེང་དུ་ཡང་དཔག་ཚད་བཅུ་གཉིས་པ་དབྱིབས་ལེགས་ཤིང་བལྟ་ན་སྡུག་ལ་མཛེས་པ། གསེར་གྱི་བྱེ་མ་བདལ་ཞིང་ཙནྡན་གྱི་ཆུས་ཆག་ཆག་བཏབ་པ་ཞིག་ཡོད་དེ། དེའི་གློ་གཡས་གཡོན་ན་མེ་ཏོག་གི་ཤིང་དང༌། འབྲས་བུའི་ཤིང་སྣ་ཚོགས་ཡོད་པ་རྣམས་ལེགས་པར་སྐྱེས་ཏེ། དབྱི་བས་ལེགས་ལ་ཡོངས་སུ་གྲུབ་པ་སྟེ། མེ་ཏོག་ཕྲེང་བར་བཀོད་པ་བཞིན་དུ་གྱུར་པ་ནི་དཔེར་ན་མེ་ཏོག་ཕྲེང་རྒྱུད་དམ། མེ་ཏོག་ཕྲེང་རྒྱུད་ཀྱི་སློབ་མ་མཁས་པས་མེ་ཏོག་གི་ཕྲེང་བ་ཐ་གུ་

---

^{[མ་དཔེ་གཟིགས་ན་འདིར་གནོན།]}

ལ་བརྒྱུས་པ་དང༌། མེ་ཏོག་གི་རྣ་རྒྱན་ལེགས་པར་བྱས་པ་བཞིན་ཏེ། ཐང་ལས་སྐྱེས་པའི་བྱ་སྣ་ཚོགས་སྐད་སྙན་ཅིང་འཇེབས་པ་དང༌། སྐད་ཡིད་དུ་འོང་བ་དང༌། སྐད་སྙན་པ་དང༌། འདོད་དགུར་སྒྱུར་བའི་གཟུགས་ཅན་རྣམས་སྐད་སྙན་པ་འབྱིན་ཏོ། །ལྷའི་གྲོང་ཁྱེར་འོབས་བདུན་རིམ་གྱིས་ཀུན་ནས་བསྐོར་ཏེ། འོབས་ད་དག་ཀྱང་ཟབས་དང༌། རྒྱར་དཔག་ཚད་གཅིག་ཙམ་ཡོད་དེ། ཕ་གུ་གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པ་རྣམ་པ་བཞིས་བརྩིགས་པ་ན། ཆུ་བསིལ་ཞིང་ཆུ་སྦྲང་རྩི་ལྟ་བུས་གང་སྟེ། མེ་ཏོག་ཨུཏྤ་ལ་དང༌། པདྨ་དང༌། ཀུ་མུ་ཏ་དང༌། པདྨ་དཀར་པོས་ཡོངས་སུ་ཁེབས་ལ། ཆུ་ལས་སྐྱེས་པའི་བྱ་སྣ་ཚོགས་སྐད་སྙན་ཅིང་འཇེབས་པ་དང༌། སྐད་ཡིད་དུ་འོང་བ་དང༌། སྐད་སྙན་པ་དང༌། འདོད་དགུར་སྒྱུར་བའི་གཟུགས་ཅན་རྣམས་སྐད་སྙན་པ་འབྱིན་ཏོ། །འོབས་དེ་དག་ན་ཆུ་ཀ་དང༌། རྒྱུ་མོ་གུང་དང༌། འབྲུ་སྣ་ཚོགས་རྣམས་བྱས་པ་དག་ཡོད་དེ། སུམ་ཅུ་རྩ་གསུམ་པའི་ལྷ་རྣམས་ཆུའི་རྩེ་མོ་ལ་རྩེ་ཞིང་དགའ་ལ་དགའ་དགུར་སྤྱོད་དོ། །འོབས་དེ་དག་གི་ཉེ་འཁོར་ན་མེ་ཏོག་གི་ཤིང་དང༌། འབྲས་བུའི་ཤིང་སྣ་ཚོགས་ཡོད་པ་རྣམས་ལེགས་པར་ཡོངས་སུ་གྲུབ་པ་སྟེ། མེ་ཏོག་ཕྲེང་བར་བཀོད་པ་བཞིན་དུ་གྱུར་པ་ནི་དཔེར་ན་མེ་ཏོག་ཕྲེང་རྒྱུད་དམ། མེ་ཏོག་ཕྲེང་རྒྱུད་ཀྱི་སློབ་མ་མཁས་པས་མེ་ཏོག་ཕྲེང་བ་ཐ་གུ་ལ་བརྒྱུས་པ་དང༌། མེ་ཏོག་གི་རྣ་རྒྱན་ལེགས་པར་བྱས་པ་བཞིན་ཏེ། ཐང་ལས་སྐྱེས་པའི་བྱ་སྣ་ཚོགས་སྐད་སྙན་ཅིང་འཇེབས་པ་དང༌། སྐད་ཡིད་དུ་འོང་བ་དང༌། སྐད་མཉེན་པ་དང༌། འདོད་དགུར་སྒྱུར་བའི་གཟུགས་ཅན་རྣམས་སྐད་སྙན་པ་འབྱིན་ཏོ། །དེ་ན་སུམ་ཅུ་རྩ་གསུམ་པའི་ལྷ་རྣམས་འཁོར་དང་བཅས་པ་རྩེ་ཞིང་དགའ་ལ་དགའ་དགུར་སྤྱོད་དེ། རང་གི་ལས་ཀྱི་འབྲས་བུ་ཉམས་སུ་མྱོང་ངོ༌། །ལྷའི་གྲོང་ཁྱེར་གྱི་ཤར་ཕྱོགས་དཔག་ཚད་ཉི་ཤུ་ན་སུམ་ཅུ་རྩ་གསུམ་པའི་ལྷ་རྣམས་ཀྱི་སྐྱེད་མོས་ཚལ་ཤིང་རྟ་སྣ་ཚོགས་ཅན་ཞེས་བྱ་བ་ཞིག་ཡོད་དེ། ཆུར་དཔག་ཚད་ཉིས་བརྒྱ་ལྔ་བཅུ། ཞེང་དུ་ཡང་དཔག་ཚད་ཉིས་བརྒྱ་ལྔ་བཅུ། མཐའ་སྐོར་དུ་དཔག་ཚད་སྟོང་ཡོད་པ། དབྱིབས་ལེགས་

---

^{[མ་དཔེ་གཟིགས་ན་འདིར་གནོན།]}

ཤིང་བལྟ་ན་སྡུག་ལ་མཛེས་པ། གསེར་གྱི་ར་བས་ཀུན་ནས་བསྐོར་ཏེ། ར་བ་དེའི་འཕང་དུ་དཔག་ཚད་གཅིག་ཡོད་ལ། ར་བ་དེ་ལ་རྩིག་སྐྱབས་གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པ་རྣམ་པ་བཞི་ཡོད་དོ། །གྱེན་དུ་འཕང་བ་དང༌། མཐུར་དུ་འཕང་བའི་མདའ་ཡབ་དང༌། ཟམ་པ་རྒྱུ་བ་རྣམ་པ་བཞི་ཡོད་དེ། གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པ་རྣམས་སོ། །དེའི་ནང་གི་ས་གཞི་ནི་དབྱི་བས་ལེགས་ཤིང་བལྟ་ན་སྡུག་ལ་མཛེས་པར་བྲིས་ཤིང་ལེགས་པར་བྲིས་པ། ཚོན་སྣ་བརྒྱ་རྩ་གཅིག་གིས་བྲིས་པ་སྟེ། འཇམ་ཤིང་ཤིན་ཏུ་འཇམ་པ་ནི་དཔེར་ན་ཤིང་བལ་གྱི་འདའ་པ་འམ། རས་བལ་གྱི་འདའ་བ་བཞིན་དུ། རྐང་པ་བཞག་ན་ནི་ནེམས་ཞེས་བྱེད་རྐང་པ་བཏེག་ན་པར་ཞེས་བྱེད་ལ། མེ་ཏོག་མན་ད་ར་བ་མང་པོས་པུས་མོ་ནུབ་པ་ཙམ་དུ་ཡོངས་སུ་ཁེབས་ཏེ། རླུང་གི་མཐུས་མེ་ཏོག་རྙིང་པ་རྣམས་ནི་འཐོར། མེ་ཏོག་གསར་པ་རྣམས་ནི་ལེགས་པར་འགྲེམས་ཏེ། འདི་སྐད་དུ། ལྷ་རྣམས་བསོད་ནམས་དབང་གི་རྐྱེན་གྱིས་ན། །ཤིང་རྟ་སྣ་ཚོགས་ཅན་ན་རླུང་ཆེན་ལྡང༌།། མེ་ཏོག་རྙིང་པ་རྣམས་ནི་འཐོར་བར་བྱེད། །མེ་ཏོག་གསར་པ་རྣམས་ནི་ལེགས་པར་འགྲེམས། །ཞེས་ཀྱང་བྱའོ། །སྐྱེད་མོས་ཚལ་ཤིང་རྟ་སྣ་ཚོགས་ཅན་གྱི་ནང་ན་རྫིང་བུ་ཞིག་ཡོད་དེ། ཆུར་དཔག་ཚད་ལྔ་བཅུ། ཞེང་དུ་ཡང་དཔག་ཚད་ལྔ་བཅུ། མཐའ་སྐོར་དུ་དཔག་ཚད་ཉིས་བརྒྱ་ཡོད་དེ། རྫིང་བུ་དེ་ཡང་གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པའི་ཕ་གུ་རྣམ་པ་བཞིས་བརྩིགས་སོ། །རྫིང་བུ་དེའི་ཕྱོགས་བཞི་ན་ཐེམ་སྐས་བྱས་པ་ཡོད་དེ། ཐེམ་སྐས་དེ་དག་ཀྱང་གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པའི་ཕ་གུ་རྣམ་པ་བཞིས་བརྩིགས་སོ། །རྫིང་བུ་དེའི་ལན་ཀན་གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པ་རྣམ་པ་བཞིས་ཀུན་ནས་བསྐོར་ཏེ། ཆུ་བསིལ་བ་དང༌། ཆུ་

---

^{[མ་དཔེ་གཟིགས་ན་འདིར་གནོན།]}

སྦྲང་རྩི་ལྟ་བུས་གང་ཞིང༌། མེ་ཏོག་ཨུཏྤ་ལ་དང༌། པདྨ་དང༌། ཀུ་མུ་ཏ་དང༌། པདྨ་དཀར་པོས་ཡོངས་སུ་ཁེབས་ལ། ཆུ་ནས་སྐྱེས་པའི་བྱ་སྣ་ཚོགས་སྐད་སྙན་ཅིང་འཇེབས་པ་དང༌། སྐད་ཡིད་དུ་འོང་བ་དང༌། སྐད་མཉེན་པ་དང༌། འདོད་དགུར་སྒྱུར་བའི་གཟུགས་ཅན་རྣམས་སྐད་སྙན་པ་འབྱིན་ཏོ། །རྫིང་བུ་དེའི་ཉེ་འཁོར་ན་མེ་ཏོག་གི་ཤིང་དང༌། འབྲས་བུའི་ཤིང་ཡོད་པ་རྣམས་ལེགས་པར་སྐྱེས་ཤིང་དབྱིབས་ལེགས་ལ་ཡོངས་སུ་གྲུབ་པ་སྟེ། མེ་ཏོག་ཕྲེང་བར་བཀོད་པ་བཞིན་དུ་གྱུར་པ་ནི་དཔེར་ན་མེ་ཏོག་ཕྲེང་རྒྱུད་དམ། མེ་ཏོག་ཕྲེང་རྒྱུད་ཀྱི་སློབ་མ་མཁས་པས་མེ་ཏོག་གི་ཕྲེང་བ་ཐ་གུ་ལ་བརྒྱུས་པ་དང་མེ་ཏོག་གི་རྣ་རྒྱན་ལེགས་པར་བྱས་པ་བཞིན་ཏེ། ཐང་ལས་སྐྱེས་པའི་བྱ་སྣ་ཚོགས་སྐད་སྙན་ཅིང་འཇེབས་པ་དང༌། སྐད་ཡིད་དུ་འོང་བ་དང༌། སྐད་སྙན་པ་དང༌། འདོད་དགུར་སྒྱུར་བའི་གཟུགས་ཅན་རྣམས་སྐད་སྙན་པ་འབྱིན་ཏོ། །དཔག་བསམ་གྱི་ཤིང་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དོ། །གཞག་གོས་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དོ། །དཔག་བསམ་ཤིང་ལས་བྱུང་བའི་གོས་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དོ། །རྒྱན་སྣ་ཚོགས་ལག་རྒྱན་དང༌། རྐང་རྒྱན་དང༌། རྒྱན་སྣང་བ་དང༌། མི་སྣང་བ་དག་འབྱུང་བའི་ཤིང་དག་ཡོད་དོ། །རོལ་མོའི་ཆ་བྱད་སྣ་ཚོགས་འདི་ལྟ་སྟེ། པི་ཝང་དང༌། གླིང་བུ་དང༌། པི་ཝང་རྒྱུད་གསུམ་པ་དང༌། འཁར་རྔ་དང༌། ཧམ་ཤང་རྣམས་འབྱུང་བའི་ཤིང་དག་ཡོད་དོ། །ལྷ་འམ་ལྷའི་བུ་མོ་རྣམས་ཀྱིས་ཇི་ལྟ་བུར་འདོད་པར་སེམས་བསྐྱེད་མ་ཐག་ཏུ་དེ་ལྟ་བུར་དེ་དག་གི་ལག་ཏུ་འོང་བར་འགྱུར་རོ། །བདུད་རྩི་རྣམ་པ་བཞི་དང༌། སྦྲང་རྩི་དང༌། སྦྲང་ཆང་གི་བཏུང་བ་དག་ཀྱང་ཡོད་དོ། །ཡང་ཐོག་རྣམས་དང་ཁང་པ་བརྩེགས་པ་རྣམས་དང༌། ཁྱིམ་རྣམས་དང་ཁང་བཟངས་རྣམས་དང༌། བསིལ་ཁང་རྣམས་དང༌། ལྟད་མོ་ལྟ་བའི་ས་རྣམས་དང༌། ཟམ་པ་རྣམས་བུད་མེད་ཀྱི་ཚོགས་ཀྱིས་མཛེས་པར་བྱས་ཤིང༌། ལྷའི་བུ་མོ་མང་པོས་བརྟེན་པ་དང༌། སིལ་སྙན་དང༌། ཕེག་རྡོབ་པ་དག་གི་སྒྲ་སྙན་པ་སྒྲོགས་པ་དང༌། དྲི་སྣ་ཚོགས་ཀྱིས་ལེགས་པར་

---

^{[མ་དཔེ་གཟིགས་ན་འདིར་གནོན།]}

བསྒོས་པ་དང༌། ཁ་ཟས་དང༌། བཏུང་བ་དང་ལྡན་པ་དག་ཡོད་དེ། དེ་ན་སུམ་ཅུ་རྩ་གསུམ་པའི་ལྷ་རྣམས་འཁོར་དང་བཅས་པ་རྩེ་ཞིང་དགའ་ལ་དགའ་དགུར་སྤྱོད་དོ། །རང་གི་ལས་ཀྱི་འབྲས་བུ་ཉམས་སུ་མྱོང་ངོ༌། །དེའི་ལམ་ཆུར་དཔག་ཚད་ཉི་ཤུ། ཞེང་དུ་དཔག་ཚད་ཕྱེད་དང་གཉིས་པ་དབྱིབས་ལེགས་ཤིང་བལྟ་ན་སྡུག་ལ་མཛེས་པ་གསེར་གྱི་ཕྱེ་མ་བདལ་ཞིང་ཙནྡན་གྱི་ཆུས་ཆག་ཆག་བཏབ་པ་ཡོད་དེ། དེའི་གློ་གཡས་གཡོན་ན་མེ་ཏོག་གི་ཤིང་དང༌། འབྲས་བུའི་ཤིང་སྣ་ཚོགས་ཡོད་པ་རྣམས་ལེགས་པར་སྐྱེས་ཤིང་དབྱིབས་ལེགས་ལ་ཡོངས་སུ་གྲུབ་པ་སྟེ། མེ་ཏོག་ཕྲེང་བར་བཀོད་པ་བཞིན་དུ་གྱུར་པ་ནི་དཔེར་ན། མེ་ཏོག་ཕྲེང་རྒྱུད་དམ། མེ་ཏོག་ཕྲེང་རྒྱུད་ཀྱི་སློབ་མ་མཁས་པས་མེ་ཏོག་གི་ཕྲེང་བ་ཐ་གུ་ལ་བརྒྱུས་པ་དང༌། མེ་ཏོག་རྣ་རྒྱན་ལེགས་པར་བྱས་པ་བཞིན་ཏེ། ཐང་ལས་སྐྱེས་པའི་བྱ་སྣ་ཚོགས་སྐད་སྙན་ཅིང་འཇེབས་པ་དང༌། སྐད་ཡིད་དུ་འོང་བ་དང༌། སྐད་སྙན་པ་དང༌། འདོད་དགུར་སྒྱུར་བའི་གཟུགས་ཅན་རྣམས་སྐད་སྙན་པ་འབྱིན་ཏོ། །དཔག་བསམ་གྱི་ཤིང་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དོ། །གཞག་གོས་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དོ། །དཔག་བསམ་ཤིང་ལས་བྱུང་བའི་གོས་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དོ། །རོལ་མོའི་ཆ་བྱད་སྣ་ཚོགས་པི་ཝང་དང༌། གླིང་བུ་དང༌། པི་ཝང་རྒྱུད་གསུམ་པ་དང༌། འཁར་རྔ་དང༌། ཧམ་ཤང་རྣམས་འབྱུང་བའི་ཤིང་དག་ཡོད་དོ།། རྒྱན་སྣ་ཚོགས་ལག་རྒྱན་དང༌། རྐང་རྒྱན་དང༌། རྒྱན་སྣང་བ་དང༌། མི་སྣང་བ་རྣམས་འབྱུང་བའི་ཤིང་དག་ཡོད་དོ། །ལྷ་འམ་ལྷའི་བུ་མོ་རྣམས་ཀྱིས་ཇི་ལྟ་བུར་འདོད་པར་སེམས་བསྐྱེད་མ་ཐག་ཏུ་དེ་ལྟ་བུར་དེ་དག་ལག་ཏུ་འོང་བར་འགྱུར་རོ། །ལམ་དེ་ན་བཞོན་པ་སྣ་ཚོགས་བཀོད་པ་འདི་ལྟ་སྟེ། གླང་པོ་ཆེའི་བཞོན་པ་དང༌། རྟའི་བཞོན་པ་དང༌། ཤིང་རྟའི་བཞོན་པ་དང༌། ཁྱོགས་ཀྱི་བཞོན་པ་དག་ཡོད་དེ། ལྷ་འམ་ལྷའི་བུ་མོ་རྣམས་ཀྱི་བཞོན་པ་ཇི་ལྟ་བུར་འདོད་པར་སེམས་བསྐྱེད་མ་ཐག་ཏུ་དེ་ལྟ་བུའི་བཞོན་པ་ལ་ཞོན་པར་གྱུར་ཏེ། སྐྱེད་མོས་ཚལ་ཤིང་རྟ་སྣ་ཚོགས་ཅན་དུ་དོང་ནས་རྩེ་ཞིང་

---

^{[མ་དཔེ་གཟིགས་ན་འདིར་གནོན།]}

དགའ་ལ་དགའ་དགུར་སྤྱོད་དོ། །རང་གི་ལས་ཀྱི་འབྲས་བུ་ཉམས་སུ་མྱོང་ངོ༌། །ཅིའི་ཕྱིར་སྐྱེད་མོས་ཚལ་གྱི་མིང་ཤིང་རྟ་སྣ་ཚོགས་ཅན་ཞེས་བྱ་ཞེ་ན། སྨྲས་པ། སྐྱེད་མོས་ཚལ་ཤིང་རྟ་སྣ་ཚོགས་ཅན་ན་རྫིང་བུ་སྣ་ཚོགས་ཞེས་བྱ་བ་དང༌། ཤིང་སྣ་ཚོགས་དང༌། ལོ་མ་སྣ་ཚོགས་དང༌། མེ་ཏོག་དང༌། འབྲས་བུ་སྣ་ཚོགས་དང༌། གོས་དང་རྒྱན་སྣ་ཚོགས་དང༌། ལྷའི་བུ་མོ་སྣ་ཚོགས་ཡོད་ལ། གང་གི་ཚེ་སུམ་ཅུ་རྩ་གསུམ་པའི་ལྷ་རྣམས་སྐྱེད་མོས་ཚལ་ཤིང་རྟ་སྣ་ཚོགས་ཅན་ན་རྩེ་ཞིང་དགའ་ལ་དགའ་དགུར་སྤྱོད་དེ། དེའི་ཚེ་ཡང་རྣམ་པ་སྣ་ཚོགས་ཀྱིས་ཤིན་ཏུ་རྩེ་ཞིང་དགའ་ལ་དགའ་དགུར་སྤྱོད་དོ། །རང་གི་ལས་ཀྱི་འབྲས་བུ་ཉམས་སུ་མྱོང་བས་ན་དེའི་སྐྱེད་མོས་ཚལ་གྱི་མིང་ཤིང་རྟ་སྣ་ཚོགས་ཅན་ཞེས་བྱའོ། །སྐྱེད་མོས་ཚལ་ཤིང་རྟ་སྣ་ཚོགས་ཅན་གྱི་ཤར་ཕྱོགས་དཔག་ཚད་ཉི་ཤུ་ན་ས་གཞི་བཟང་པོ་སྣ་ཚོགས་ཞེས་བྱ་བ་ཞིག་ཡོད་དེ། ཆུར་དཔག་ཚད་ཉིས་བརྒྱ་ལྔ་བཅུ། ཞེང་དུ་ཡང་དཔག་ཚད་ཉིས་བརྒྱ་ལྔ་བཅུ། མཐའ་སྐོར་དུ་དཔག་ཚད་སྟོང་ཡོད་པ་དབྱིབས་ལེགས་ཤིང་བལྟ་ན་སྡུག་ལ་མཛེས་པ། ལན་ཀན་གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པ་རྣམ་པ་བཞིས་ཀུན་ནས་བསྐོར་ཏེ། གསེར་གྱི་ལན་ཀན་གྱི་གཏན་མ་དང༌། གདང་བུ་དང༌། གཟུངས་གཟེར་ནི་དངུལ་ལས་བྱས་སོ། །དངུལ་གྱི་ནི་གསེར་ལས་བྱས་སོ། །བཻ་ཌཱུཪྻའི་ནི་ཤེལ་ལས་བྱས་སོ། །ཤེལ་གྱི་ནི་གཏན་མ་དང༌། གདང་བུ་དང༌། གཟུངས་གཟེར་ནི་བཻ་ཌཱུཪྻ་ལས་བྱས་སོ། །དེའི་ནང་གི་ས་གཞི་དབྱིབས་ལེགས་ཤིང་བལྟ་ན་སྡུག་ལ་མཛེས་པར་བྲིས་པ་ཚོན་སྣ་བརྒྱ་རྩ་གཅིག་གིས་བྲིས་པ་སྟེ། འཇམ་ཞིང་ཤིན་ཏུ་འཇམ་པ་ནི་དཔེར་ན་ཤིང་བལ་གྱི་འདའ་བ་འམ། རས་བལ་གྱི་འདའ་བ་བཞིན་ཏེ། རྐང་པ་བཞག་ན་ནི་ནེམས་ཞེས་བྱེད། རྐང་པ་བཏེག་ན་ནི་པར་ཞེས་བྱེད་ལ། མེ་ཏོག་མན་ང་ར་བ་མང་པོས་པུས་མོ་ནུབ་བཙམ་དུ་ཡོངས་སུ་ཁེབས་ཏེ། དེ་ན་མི་མ་ཡིན་པ་རྣམས་རླུང་གི་མཐུས་མེ་ཏོག་རྙིང་པ་རྣམས་ནི་འདོར། མེ་ཏོག་གསར་པ་རྣམས་ནི་ལེགས་པར་འགྲེམས་ཏེ། འདི་སྐད་དུ། ལྷ་རྣམས་ལས་ཀྱི་དབང་གི་རྐྱེན་གྱིས་ན། །ས་གཞི་སྣ་ཚོགས་ཅན་ན་

---

^{[མ་དཔེ་གཟིགས་ན་འདིར་གནོན།]}

རླུང་ཆེན་ལྡང༌། །མེ་ཏོག་རྙིང་པ་རྣམས་ནི་འཐོར་བར་བྱེད། །མེ་ཏོག་གསར་པ་རྣམས་ནི་ལེགས་པར་འགྲེམས། །ཞེས་ཀྱང་བྱའོ། །དེའི་ལམ་སྲང་དུ་དཔག་ཚད་ཕྱེད་དང་གཉིས་ཡོད་དེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ། གསེར་གྱི་བྱེ་མ་བདལ་ཞིང་ཙནྡན་གྱི་ཆུས་ཆག་ཆག་བཏབ་པ་ཞིག་ཡོད་དེ། དེའི་གློ་གཡས་ན་མེ་ཏོག་གི་ཤིང་དང༌། འབྲས་བུའི་ཤིང་སྣ་ཚོགས་ཡོད་པ་རྣམས་ལེགས་པར་སྐྱེས་ཤིང་དབྱིབས་ལེགས་ལ་ཡོངས་སུ་གྲུབ་པ་སྟེ། མེ་ཏོག་ཕྲེང་བར་བཀོད་པ་བཞིན་དུ་གྱུར་པ་ནི་དཔེར་ན། མེ་ཏོག་ཕྲེང་རྒྱུད་དམ། མེ་ཏོག་ཕྲེང་རྒྱུད་ཀྱི་སློབ་མ་མཁས་པས་མེ་ཏོག་གི་ཕྲེང་བ་ཐ་གུ་ལ་བརྒྱུས་པ་དང༌། མེ་ཏོག་གི་རྣ་རྒྱན་ལེགས་པར་བྱས་པ་བཞིན་ཏེ། ཐང་ལས་སྐྱེས་པའི་བྱ་སྣ་ཚོགས་སྐད་སྙན་ཅིང་འཇེབས་པ་དང༌། སྐད་སྙན་ཡིད་དུ་འོང་བ་དང༌། སྐད་མཉེན་པ་དང༌། འདོད་དགུར་སྒྱུར་བའི་གཟུགས་ཅན་རྣམས་སྐད་སྙན་པར་འབྱིན་ཏོ། །དཔག་བསམ་གྱི་ཤིང་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དོ། །གཞག་གོས་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དོ། །དཔག་བསམ་གྱི་ཤིང་ལས་བྱུང་བའི་གོས་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དོ། །རོལ་མོའི་ཆ་བྱད་སྣ་ཚོགས་པི་ཝང་དང༌། གླིང་བུ་དང༌། པི་ཝང་རྒྱུད་གསུམ་པ་དང༌། འཁར་རྔ་དང༌། ཧམ་ཤང་རྣམས་འབྱུང་བའི་ཤིང་དག་ཡོད་དོ། །རྒྱན་སྣ་ཚོགས་ལག་རྒྱན་དང༌། རྐང་རྒྱན་དང༌། རྒྱན་སྣང་བ་དང༌། མི་སྣང་བ་རྣམས་འབྱུང་བའི་ཤིང་དག་ཡོད་དོ། །ལྷ་འམ་ལྷའི་བུ་མོ་རྣམས་ཀྱིས་ཇི་ལྟ་བུར་འདོད་པར་སེམས་བསྐྱེད་མ་ཐག་ཏུ་དེ་ལྟ་བུར་དེ་དག་གི་ལག་ཏུ་འོང་བར་འགྱུར་རོ། །ལམ་དེ་ནི་བཞོན་པ་སྣ་ཚོགས་བཀོད་པ་འདི་ལྟ་སྟེ། གླང་པོའི་བཞོན་པ་དང༌། རྟའི་བཞོན་པ་དང༌། ཤིང་རྟའི་བཞོན་པ་དང༌། ཁྱོགས་ཀྱི་བཞོན་པ་དག་ཡོད་དོ། །ལྷ་འམ་ལྷའི་བུ་མོ་རྣམས་ཀྱི་བཞོན་པ་ཇི་ལྟ་བུར་འདོད་པར་སེམས་བསྐྱེད་མ་ཐག་ཏུ་དེ་ལྟ་བུའི་བཞོན་བ་འོང་བར་འགྱུར་ཏེ། དེ་ལ་ཞོན་ནས་ས་གཞི་སྣ་ཚོགས་ཅན་དུ་དོང་ཞིང་ཅི་བདེར་གནས་པར་མངོན་པར་དགའ་བར་བྱེད་དོ། །དེ་ན་ལྷའི་དྲང་སྲོང་རྣམས་རང་

---

^{[མ་དཔེ་གཟིགས་ན་འདིར་གནོན།]}

དགར་ཚངས་པར་སྤྱད་པ་སྤྱོད་དོ། །དེ་བཞིན་དུ་ལྷའི་གྲོང་ཁྱེར་གྱི་ལྷོ་ཕྱོགས་དཔག་ཚད་ཉི་ཤུ་ན། སྐྱེད་མོས་ཚལ་རྩུབ་འགྱུར་ཚལ་ཞེས་བྱ་བ་ཞིག་ཡོད་དོ། །ཆུར་དཔག་ཚད་ཉིས་བརྒྱ་ལྔ་བཅུ། ཞེང་དུ་ཡང་དཔག་ཚད་ཉིས་བརྒྱ་ལྔ་བཅུ། མཐའ་སྐོར་དུ་དཔག་ཚད་སྟོང་ཡོད་ལ་དབྱིབས་ལེགས་ཤིང་བལྟ་ན་སྡུག་ལ་མཛེས་པ། གསེར་གྱི་ར་བས་ཀུན་ནས་བསྐོར་ཏེ། ར་བའི་འཕང་དུ་དཔག་ཚད་གཅིག་ཡོད་དེ། ཤིང་རྟ་སྣ་ཚོགས་ཅན་ཇི་ལྟ་བ་བཞིན་དུ་རྒྱས་པར་བརྗོད་པར་བྱའོ། །ཁྱད་པར་ནི་འདི་ཡོད་དེ། ཅིའི་ཕྱིར་སྐྱེད་མོས་ཚལ་གྱི་མིང་རྩུབ་འགྱུར་ཚལ་ཞེས་བྱ་ཞེ་ན། སྨྲས་པ། སྐྱེད་མོས་ཚལ་རྩུབ་འགྱུར་ཚལ་ན་རྫིང་བུ་རྩུབ་འགྱུར་ཚལ་ཞེས་བྱ་བ་དང༌། ཤིང་རྣམས་དང༌། ལོ་མ་རྣམས་དང༌། མེ་ཏོག་རྣམས་དང༌། འབྲས་བུ་རྣམས་དང༌། རྒྱན་རྣམས་རྩུབ་པར་འགྱུར་བ་དང༌། ལྷའི་བུ་མོ་རྩུབ་པར་འགྱུར་བ་རྣམས་ཡོད་ལ། གང་གི་ཚེ་སུམ་ཅུ་རྩ་གསུམ་པའི་ལྷ་རྣམས་སྐྱེད་མོས་ཚལ་རྩུབ་འགྱུར་ཚལ་དུ་རྩེ་ཞིང་དགའ་ལ་དགའ་དགུར་སྤྱོད་པ་དེའི་ཚེ་ལུས་ཀྱང་རྩུབ་པར་འགྱུར་ཞིང༌། སེམས་ཀྱང་རྩུབ་པར་འགྱུར་ཏེ། གཡུལ་ལ་མོས་པར་འགྱུར་བས་ན་དེའི་ཕྱིར་སྐྱེད་མོས་ཚལ་གྱི་མིང་རྩུབ་འགྱུར་ཚལ་ཞེས་བྱའོ། །སྐྱེད་མོས་ཚལ་རྩུབ་འགྱུར་ཚལ་གྱི་ལྷོ་ཕྱོགས་དཔག་ཚད་ཉི་ཤུ་ན། ས་གཞི་བཟང་པོ་རྩུབ་འགྱུར་ཚལ་བྱ་བ་ཡོད་དེ། ཆུར་དཔག་ཚད་ཉིས་བརྒྱ་ལྔ་བཅུ། ཞེང་དུ་ཡང་དཔག་ཚད་ཉིས་བརྒྱ་ལྔ་བཅུ། མཐའ་སྐོར་དུ་དཔག་ཚད་སྟོང་ཡོད་དེ། ས་གཞི་བཟང་པོ་སྣ་ཚོགས་ཅན་ན་ཇི་ལྟ་བ་བཞིན་དུ་རྒྱས་པར་བརྗོད་པར་བྱའོ། །ལྷའི་གྲོང་ཁྱེར་གྱི་ནུབ་ཕྱོགས་དཔག་ཚད་ཉི་ཤུ་ན་སྐྱེད་མོས་ཚལ་འདྲེས་པའི་ཚལ་ཞེས་བྱ་བ་ཞིག་ཡོད་དེ། ཆུར་དཔག་ཚད་ཉིས་བརྒྱ་ལྔ་བཅུ། ཞེང་དུ་ཡང་དཔག་ཚད་ཉིས་བརྒྱ་ལྔ་བཅུ། མཐའ་སྐོར་དཔག་ཚད་སྟོང་ཡོད་ལ། གསེར་གྱི་ར་བས་ཀུན་ནས་བསྐོར་བ། ར་བའི་འཕང་དུ་དཔག་ཚད་གཅིག་ཡོད་དེ། སྔ་མ་རྣམས་ན་ཇི་སྐད་བཤད་པ་བཞིན་དུ་རྒྱས་པར་བརྗོད་པར་བྱའོ། །ཁྱད་པར་ནི་འདི་ཡོད་དེ། ཅིའི་ཕྱིར་སྐྱེད་མོས་ཚལ་གྱི་མིང་འདྲེས་པའི་ཚལ་ཞེས་བྱ་ཞེ་ན། སྨྲས་པ། སྐྱེད་མོས་ཚལ་འདྲེས་པའི་ཚལ་ནི་རྫིང་བུ་

---

^{[མ་དཔེ་གཟིགས་ན་འདིར་གནོན།]}

འདྲེས་པ་ཞེས་བྱ་བ་དང༌། ཤིང་རྣམས་དང༌། མེ་ཏོག་རྣམས་དང༌། འབྲས་བུ་རྣམས་དང༌། གོས་རྣམས་དང༌། རྒྱན་རྣམས་འདྲེས་པ་དང༌། ལྷའི་བུ་མོ་རྣམས་འདྲེས་པ་ཡོད་ལ། གང་གི་ཚེ་སུམ་ཅུ་རྩ་གསུམ་པའི་ལྷ་རྣམས་སྐྱེད་མོས་ཚལ་འདྲེས་པའི་ཚལ་ན་རྩེ་ཞིང་དགའ་ལ་དགའ་དགུར་སྤྱོད་པ་དེའི་ཚེ་ཡང་འཆོལ་པར་འདྲེས་ཏེ། ཤིན་ཏུ་རྩེ་ཞིང་དགའ་ལ་དགའ་དགུར་སྤྱོད་དེ། རང་གི་ལས་ཀྱི་འབྲས་བུ་རྣམས་ཉམས་སུ་མྱོང་བས་ན་དེའི་ཕྱིར་སྐྱེད་མོས་ཚལ་གྱི་མིང་འདྲེས་བའི་ཚལ་ཞེས་བྱའོ། །སྐྱེད་མོས་ཚལ་འདྲེས་པའི་ཚལ་གྱི་ནུབ་ཕྱོགས་དཔག་ཚད་ཉི་ཤུ་ན་ས་གཞི་བཟང་པོ་འདྲེས་པ་ཞེས་བྱ་བ་ཡོད་དེ། ཆུར་དཔག་ཚད་ཉིས་བརྒྱ་ལྔ་བཅུ། ཞེང་དུ་ཡང་དཔག་ཚད་ཉིས་བརྒྱ་ལྔ་བཅུ། མཐའ་སྐོར་དུ་དཔག་ཚད་སྟོང་ཡོད་དེ། ས་གཞི་བཟང་པོ་སྔ་མ་རྣམས་ན་ཇི་ལྟ་བ་དེ་བཞིན་དུ་རྒྱས་པར་བརྗོད་པར་བྱའོ། །ལྷའི་གྲོང་ཁྱེར་གྱི་བྱང་ཕྱོགས་དཔག་ཚད་ཉི་ཤུ་ན། སྐྱེད་མོས་ཚལ་དགའ་བའི་ཚལ་ཞེས་བྱ་བ་ཞིག་ཡོད་དེ། ཆུར་དཔག་ཚད་ཉིས་བརྒྱ་ལྔ་བཅུ། ཞེང་དུ་ཡང་དཔག་ཚད་ཉིས་བརྒྱ་ལྔ་བཅུ། མཐའ་སྐོར་དུ་དཔག་ཚད་སྟོང་ཡོད་ལ། གསེར་གྱི་ར་བས་ཀུན་ནས་བསྐོར་ཏེ། ར་བའི་འཕང་དུ་དཔག་ཚད་གཅིག་ཡོད་དེ། སྔ་མ་རྣམས་ན་ཇི་སྐད་བཤད་པ་དེ་བཞིན་དུ་བརྗོད་པར་བྱའོ། །ཁྱད་པར་ནི་འདི་ཡོད་དེ། ཅིའི་ཕྱིར་སྐྱེད་མོས་ཚལ་གྱི་མིང་དགའ་བའི་ཚལ་ཞེས་བྱ་ཞེ་ན། སྨྲས་པ། སྐྱེད་མོས་ཚལ་དགའ་བའི་ཚལ་ན་རྫིང་བུ་དགའ་བ་ཞེས་བྱ་བ་དང༌། ཤིང་རྣམས་དང༌། ལོ་མ་རྣམས་དང༌། མེ་ཏོག་རྣམས་དང༌། འབྲས་བུ་རྣམས་དང༌། གོས་རྣམས་དང༌། རྒྱན་རྣམས་དགའ་བ་དང༌། ལྷའི་བུ་མོ་དགའ་བ་རྣམས་ཡོད་ལ། གང་གི་ཚེ་སུམ་ཅུ་རྩ་གསུམ་པའི་ལྷ་རྣམས་སྐྱེད་མོས་ཚལ་དགའ་བའི་ཚལ་དུ་རྩེ་ཞིང་དགའ་ལ་དགའ་དགུར་སྤྱོད་པ་དེའི་ཚེ་ཡང་ཀུན་དུ་དགའ་ཞིང་རབ་ཏུ་དགའ་ལ། དགའ་ཞིང་ཡིད་བདེ་བར་གྱུར་ནས་རྩེ་ཞིང་དགའ་ལ་དགའ་དགུར་སྤྱོད་དེ། རང་གི་ལས་ཀྱི་འབྲས་བུ་ཉམས་སུ་མྱོང་བས་ན་དེའི་ཕྱིར་སྐྱེད་མོས་ཚལ་གྱི་མིང་དགའ་བའི་ཚལ་ཞེས་བྱའོ། །སྐྱེད་མོས་ཚལ་དགའ་བའི་ཚལ་གྱི་བྱང་ཕྱོགས་དཔག་ཚད་ཉི་ཤུ་ན་ས་གཞི་བཟང་པོ་དགའ་བ་ཞེས་བྱ་བ་ཞིག་

---

^{[མ་དཔེ་གཟིགས་ན་འདིར་གནོན།]}

ཡོད་དོ། །ཆུར་དཔག་ཚད་ཉིས་བརྒྱ་ལྔ་བཅུ། ཞེང་དུ་ཡང་དཔག་ཚད་ཉིས་བརྒྱ་ལྔ་བཅུ། མཐའ་སྐོར་དུ་དཔག་ཚད་སྟོང་ཡོད་ལ་དབྱིབས་ལེགས་ཤིང་བལྟ་ན་སྡུག་ལ་མཛེས་པ་སྟེ། ས་གཞི་བཟང་པོ་སྔ་མ་རྣམས་ན་ཇི་ལྟ་བ་བཞིན་དུ་རྒྱས་པར་བརྗོད་པར་བྱའོ། །ལྷའི་གྲོང་ཁྱེར་གྱི་བྱང་ཤར་གྱི་མཚམས་ན་སུམ་ཅུ་རྩ་གསུམ་པའི་ལྷ་རྣམས་ཀྱི་ཤིང་ཡོངས་སུ་འདུ་ས་བརྟོལ་ཞེས་བྱ་བ་ཡོད་དེ། ཡོངས་འདུ་ལས་བརྟོལ་གྱི་རྩ་བ་ནི་དཔག་ཚད་ལྔ་བཅུ་ཐུར་དུ་ཟུག་གོ །འཕང་དུ་ནི་དཔག་ཚད་བརྒྱ་ཡོད་དོ། །ཡལ་ག་ཕྱིར་གྱེས་པ་ནི་དཔག་ཚད་ལྔ་བཅུ་ཡོད་དོ། །ཡོངས་འདུ་ས་བརྟོལ་གྱི་ཡལ་ག་ལྔ་ཡོད་དེ། ཡལ་ག་གཅིག་ནི་ཤར་ཕྱོགས་དཔག་ཚད་ལྔ་བཅུར་འདུད་དོ། །ཡལ་ག་གཉིས་པ་ནི་ལྷོ་ཕྱོགས་སུ་དཔག་ཚད་ལྔ་བཅུར་འདུད་དོ། །ཡལ་ག་གསུམ་པ་ནི་ནུབ་ཕྱོགས་སུ་དཔག་ཚད་ལྔ་བཅུར་འདུད་དོ། །ཡལ་ག་བཞི་པ་ནི་བྱང་ཕྱོགས་སུ་དཔག་ཚད་ལྔ་བཅུར་འདུད་དོ། །ཡལ་ག་སྟེང་མ་ནི་དཔག་ཚད་ལྔ་བཅུར་སྟེང་གི་ནམ་མཁའ་ཁྱབ་པར་འདུག་གོ །ཡོངས་འདུ་ས་བརྟོལ་གྱི་ཆུར་དཔག་ཚད་བརྒྱ་ལྔ་བཅུ་ཡོད་དོ། །ཞེང་དུ་ཡང་དཔག་ཚད་བརྒྱ་ལྔ་བཅུ་ཡོད་དོ། །མཐའ་སྐོར་དུ་ཡང་དཔག་ཚད་སུམ་བརྒྱ་ལྔ་བཅུ་ཡོད་དོ། །ཡོངས་འདུ་ས་བརྟོལ་གྱི་དྲི་རྫི་ཕྱོགས་སུ་ནི་དཔག་ཚད་བརྒྱར་ངད་ལྡང་ངོ༌། །རྫི་ཕྱོགས་མ་ཡིན་པར་དཔག་ཚད་ལྔ་བཅུར་ངད་ལྡང་ངོ༌། །དཔག་ཚད་བརྒྱད་ཅུར་ནི་འོད་དང་ཁ་དོག་གིས་ལྷམ་མེ་ལྷན་ནེ་ལྷང་ངེར་འདུག་གོ །སུམ་ཅུ་རྩ་གསུམ་པའི་ལྷ་རྣམས་ཀྱི་ཤིང་ཡོངས་འདུ་ས་བརྟོལ་གྱི་ལོ་མ་སེར་བ་ན་དེའི་ཚེ་སུམ་ཅུ་རྩ་གསུམ་པའི་ལྷ་རྣམས་ཀྱེ་མ། ཡོངས་འདུ་ས་བརྟོལ་འདི་ལོ་མ་སེར་བ་ལས་ན་ད་ནི་རིང་པོ་མི་ཐོགས་པར་འདབ་མ་ལྷགས་པར་འགྱུར་རོ་ཞེས་ནས་ཀུན་ཏུ་དགའ་ཞིང་རབ་ཏུ་དགའ་བས་གནས་པ་གང་ཡིན་པ་དེའི་དུས་ཀྱང་ཡོད་ལ། དེའི་སྐབས་ཀྱང་ཡོད་དོ། །སུམ་ཅུ་རྩ་གསུམ་པའི་ལྷ་རྣམས་ཀྱི་ཤིང་ཡོངས་འདུ་ས་བརྟོལ་གྱི་འདབ་མ་ལྷགས་པ་ན་དེའི་ཚེ་སུམ་ཅུ་རྩ་གསུམ་པའི་ལྷ་རྣམས་ཀྱེ་མ་ཡོངས་འདུ་ས་བརྟོལ་འདི་འདབ་མ་ལྷགས་པ་ལས་ན་རིང་པོ་མི་ཐོགས་པར་སྦལ་མིག་འཐོན་པར་འགྱུར་རོ་ཞེས་ནས་ཀུན་ཏུ་དགའ་ཞིང་རབ་ཏུ་དགའ་བས་གནས་པ་གང་ཡིན་པ་དེའི་

---

^{[མ་དཔེ་གཟིགས་ན་འདིར་གནོན།]}

དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །སུམ་ཅུ་རྩ་གསུམ་པའི་ལྷ་རྣམས་ཀྱི་ཤིང་ཡོངས་འདུ་ས་བརྟོལ་སྦལ་མིག་འཐོན་པ་ན་དེའི་ཚེ་སུམ་ཅུ་རྩ་གསུམ་པའི་ལྷ་རྣམས་ཀྱེ་མ་ཡོངས་འདུ་ས་བརྟོལ་འདི་སྦལ་མིག་འཐོན་པ་ལས་ན་ད་ནི་རིང་པོར་མི་ཐོགས་པར་སྦལ་མིག་བྱེ་བར་འགྱུར་རོ་ཞེས། ཀུན་དུ་དགའ་ཞིང་རབ་ཏུ་དགའ་བས་གནས་པ་གང་ཡིན་པ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །སུམ་ཅུ་རྩ་གསུམ་པའི་ལྷ་རྣམས་ཀྱི་ཤིང་ཡོངས་འདུ་ས་བརྟོལ་སྦལ་མིག་བྱེ་བ་ན་དེའི་ཚེ་སུམ་ཅུ་རྩ་གསུམ་པའི་ལྷ་རྣམས་ཀྱེ་མ་ཡོངས་འདུས་བཏོལ་འདི་སྦལ་མིག་བྱེ་བ་ལས་ན་ད་ནི་རིང་པོ་མི་ཐོགས་པར་མེ་ཏོག་ཁ་འབུ་བར་འགྱུར་རོ་ཞེས་ནས་ཀུན་ཏུ་དགའ་ཞིང་རབ་ཏུ་དགའ་བས་གནས་པ་གང་ཡང་ཡིན་པ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །སུམ་ཅུ་རྩ་གསུམ་པའི་ལྷ་རྣམས་ཀྱི་ཤིང་ཡོངས་འདུས་བརྟོལ་གྱི་མེ་ཏོག་ཁ་འབུས་ན་དེའི་ཚེ་སུམ་ཅུ་རྩ་གསུམ་པའི་ལྷ་རྣམས་ཀྱེ་མ་ཡོངས་འདུ་ས་བརྟོལ་འདི་མེ་ཏོག་གི་ཁ་འབུས་པ་ལས་ན་ད་ནི་རིང་པོ་མི་ཐོགས་པར་མེ་ཏོག་ཁ་འབྱེ་བར་འགྱུར་རོ་ཞེས་ནས་ཀུན་དུ་དགའ་ཞིང་རབ་ཏུ་དགའ་བས་གནས་པ་གང་ཡིན་པ་དེའི་དུས་ཡང་ཡོད་ལ་དེའི་སྐབས་ཀྱང་ཡོད་དོ། །སུམ་ཅུ་རྩ་གསུམ་པའི་ལྷ་རྣམས་ཀྱི་ཤིང་ཡོངས་འདུས་བརྟོལ་གྱི་མེ་ཏོག་ཁ་བྱེ་བ་ན་དེའི་ཚེ་སུམ་ཅུ་རྩ་གསུམ་པའི་ལྷ་རྣམས་ཀྱེ་མ་ཡོངས་འདུས་བརྟོལ་འདི་ཁ་འབྱེ་བ་ལས་ནད་ནི་རིང་པོ་མི་ཐོགས་པར་མེ་ཏོག་གི་འདབ་མ་ཐམས་ཅད་ཡོངས་སུ་རྒྱས་པར་འགྱུར་རོ་ཞེས་ནས་ཀུན་ཏུ་དགའ་ཞིང་རབ་ཏུ་དགའ་བས་གནས་པ་གང་ཡིན་པ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །སུམ་ཅུ་རྩ་གསུམ་པའི་ལྷ་རྣམས་ཀྱི་ཤིང་ཡོངས་འདུ་ས་བརྟོལ་གྱི་མེ་ཏོག་འདབ་མ་ཐམས་ཅད་ཡོངས་སུ་རྒྱས་པ་ན་ཡོངས་འདུ་ས་བརྟོལ་གྱི་མེ་ཏོག་འདབ་མ་ཐམས་ཅད་ཡོངས་སུ་རྒྱས་པའི་དྲིའི་རྫི་ཕྱོགས་སུ་ནི་དཔག་ཚད་བརྒྱར་ངད་ལྡང་ངོ༌། །རྫི་ཕྱོགས་མ་ཡིན་པར་ནི་དཔག་ཚད་ལྔ་བཅུར་ལྡང་ངོ༌། །དཔག་ཚད་བརྒྱད་ཅུར་ནི་འོད་དང་ཁ་དོག་གིས་ལྷམ་མེ་ལྷན་ནེ་ལྷང་ངེར་འདུག་གོ །བཅོམ་ལྡན་འདས་ཀྱིས་ཀྱང་འདི་སྐད་དུ། དགེ་སློང་དག་

---

^{[མ་དཔེ་གཟིགས་ན་འདིར་གནོན།]}

སུམ་ཅུ་རྩ་གསུམ་པའི་ལྷ་རྣམས་ཀྱི་ཤིང་ཡོངས་འདུ་ས་བརྟོལ་གྱི་རྩ་བ་ནི་དཔག་ཚད་ལྔ་བཅུར་ཐུར་དུ་ཟུག་གོ །འཕང་དུ་ནི་དཔག་ཚད་བརྒྱད་ཡོད་དོ། །ཡལ་ག་དང༌། ལོ་མ་དང༌། ཡན་ལག་རྣམས་ནི་དཔག་ཚད་ལྔ་བཅུར་གྱེས་སོ། །དགེ་སློང་དག་སུམ་ཅུ་རྩ་གསུམ་པའི་ལྷ་རྣམས་ཀྱི་ཤིང་ཡོངས་འདུ་ས་བརྟོལ་གྱི་ལོ་མ་སེར་བ་ན་དེའི་ཚེ་སུམ་ཅུ་རྩ་གསུམ་པའི་ལྷ་རྣམས་ཀྱེ་མ་ཡོངས་འདུ་ས་བརྟོལ་འདི་ལོ་མ་སེར་བ་ལས་ན་ད་ནི་རིང་པོ་མི་ཐོགས་པར་འདབ་མ་ལྷགས་པར་འགྱུར་རོ་ཞེས་ནས་ཀུན་དུ་དགའ་ཞིང་རབ་ཏུ་དགའ་བས་གནས་པ་གང་ཡིན་པ་དེའི་དུས་ཀྱང་ཡོད་དོ། །དགེ་སློང་དག་སུམ་ཅུ་རྩ་གསུམ་པའི་ལྷ་རྣམས་ཀྱི་ཤིང་ཡོངས་འདུ་ས་བརྟོལ་གྱི་འདབ་མ་ལྷགས་པ་ན་དེའི་ཚེ་སུམ་ཅུ་རྩ་གསུམ་པའི་ལྷ་རྣམས་ཀྱེ་མ་ཡོངས་འདུས་བརྟོལ་འདི་འདབ་མ་ལྷགས་པ་ལས་ན་ད་ནི་རིང་པོ་མི་ཐོགས་པར་སྦལ་མིག་འཐོན་པར་འགྱུར་རོ་ཞེས་ནས་ཀུན་ནས་དགའ་ཞིང་རབ་ཏུ་དགའ་བས་གནས་པ་གང་ཡིན་པས་དེའི་དུས་ཀྱང་ཡོད་དོ། །དགེ་སློང་དག་སུམ་ཅུ་རྩ་གསུམ་པའི་ལྷ་རྣམས་ཀྱི་ཤིང་ཡོངས་འདུས་བརྟོལ་སྦལ་མིག་འཐོན་པ་དེའི་ཚེ་སུམ་ཅུ་རྩ་གསུམ་པའི་ལྷ་རྣམས་ཀྱེ་མ་ཡོངས་འདུས་བརྟོལ་འདི་སྦལ་མིག་འཐོན་པ་ལས་ན་ད་ནི་རིང་པོ་མི་ཐོགས་པར་སྦལ་མིག་འབྱ་བར་འགྱུར་རོ་ཞེས་ནས་ཀུན་དུ་དགའ་ཞིང་རབ་ཏུ་དགའ་བས་གནས་པ་གང་ཡིན་པ་དེའི་དུས་ཀྱང་ཡོད་དོ། །དགེ་སློང་དག་སུམ་ཅུ་རྩ་གསུམ་པའི་ལྷ་རྣམས་ཀྱི་ཤིང་ཡོངས་འདུ་ས་བརྟོལ་སྦལ་མིག་བྱེ་བ་ན་དེའི་ཚེ་སུམ་ཅུ་རྩ་སུམ་པའི་ལྷ་རྣམས་ཀྱེ་མ་ཡོངས་འདུ་ས་བརྟོལ་འདི་སྦལ་མིག་བྱེ་བ་ལས་ན་ད་ནི་རིང་པོ་མི་ཐོགས་པར་མེ་ཏོག་ཁ་འབུ་བར་འགྱུར་རོ་ཞེས་ནས་ཀུན་དུ་དགའ་ཞིང་རབ་ཏུ་དགའ་བས་གནས་པ་གང་ཡིན་པ་དེའི་དུས་ཀྱང་ཡོད་དོ། །དགེ་སློང་དག་སུམ་ཅུ་རྩ་གསུམ་པའི་ལྷ་རྣམས་ཀྱི་ཤིང་ཡོངས་འདུ་ས་བརྟོལ་གྱི་མེ་ཏོག་ཁ་འབུས་པ་ནས་དེའི་ཚེ་སུམ་ཅུ་རྩ་གསུམ་པའི་ལྷ་རྣམས་ཀྱེ་མ་ཡོངས་འདུ་ས་བརྟོལ་འདི་མེ་ཏོག་ཁ་འབུས་པ་ལས་ན་ད་ནི་རིང་པོ་མི་ཐོགས་པར་མེ་ཏོག་ཁ་འབྱེ་བར་འགྱུར་རོ་ཞེས་ནས་ཀུན་དུ་དགའ་ཞིང་རབ་ཏུ་དགའ་བས་གནས་པ་གང་ཡིན་པ་དེའི་དུས་ཀྱང་ཡོད་དོ། །དགེ་སློང་དག་སུམ་ཅུ་རྩ་གསུམ་པའི་ལྷ་རྣམས་ཀྱི་

---

^{[མ་དཔེ་གཟིགས་ན་འདིར་གནོན།]}

ཤིང་ཡོངས་འདུས་བརྟོལ་གྱི་མེ་ཏོག་ཁ་ཕྱེ་བ་ན་དེའི་ཚེ་སུམ་ཅུ་རྩ་གསུམ་པའི་ལྷ་རྣམས་ཀྱེ་མ་ཡོངས་འདུ་ས་བརྟོལ་འདི་མེ་ཏོག་ཁ་བྱེ་བ་ལས་ན་ད་ནི་རིང་པོ་མི་ཐོགས་པར་མེ་ཏོག་གི་འདབ་མ་ཐམས་ཅད་ཡོངས་སུ་རྒྱས་པར་འགྱུར་རོ་ཞེས་ནས་ཀུན་དུ་དགའ་ཞིང་རབ་ཏུ་དགའ་བས་གནས་པ་གང་ཡིན་པ་དེའི་དུས་ཀྱང་ཡོད་དོ། །དགེ་སློང་དག་གསུམ་ཅུ་རྩ་གསུམ་པའི་ལྷ་རྣམས་ཀྱི་ཤིང་ཡོངས་འདུ་ས་བརྟོལ་གྱི་མེ་ཏོག་འདབ་མ་ཐམས་ཅད་ཡོངས་སུ་རྒྱས་པ་ན་ཡོངས་འདུ་ས་བརྟོལ་གྱི་མེ་ཏོག་ཐམས་ཅད་ཡོངས་སུ་རྒྱས་པའི་དྲི་རྫི་ཕྱོགས་སུ་དཔག་ཚད་བརྒྱར་ངད་ལྡང་ངོ༌། །རྫི་ཕྱོགས་མ་ཡིན་པར་ནི་དཔག་ཚད་ལྔ་བཅུར་ངད་ལྡང་ངོ༌། །དཔག་ཚད་བརྒྱད་ཅུར་ནི་འོད་དང་ཁ་དོག་གིས་ལྷམ་མེ་ལྷན་ནི་ལྷང་ངེར་འདུག་གོ །ཤིང་ཡོངས་འདུ་ས་བརྟོལ་ཐམས་ཅད་ཡོངས་སུ་རྒྱས་པའི་འོག་ན་སུམ་ཅུ་རྩ་གསུམ་པའི་ལྷ་རྣམས་དབྱར་ཟླ་བ་བཞི་ལྷའི་འདོད་པའི་ཡོན་ཏན་ལྔ་ལ་འབྱོར་ཅིང་ལྡན་པར་འགྱུར་ཏེ། རྩེ་ཞིང་དགའ་ལ་དགའ་དགུར་སྤྱོད་དེ། རང་གི་ལས་ཀྱི་འབྲས་བུ་ཉམས་སུ་མྱོང་ངོ༌། །དགེ་སློང་དག་སུམ་ཅུ་རྩ་གསུམ་པའི་ལྷ་རྣམས་ཀྱི་ཤིང་ཡོངས་འདུ་ས་བརྟོལ་གྱི་མཐུ་ནི་དེ་ཙམ་མོ་ཞེས་གསུངས་སོ།། །། བར་གྱི་མདོ་ལ། དང་པོར་ལོ་མ་སེར་བ་དང༌། །དེ་ནས་འདབ་ལྷགས་སྦལ་མིག་འཐོན། །སྦལ་མིག་བྱེ་དང་མེ་ཏོག་འབུས། །མེ་ཏོག་ཁ་འབྱེ་ཐམས་ཅད་རྒྱས། །ཤིང་ཡོངས་འདུས་བརྟོལ་གྱི་དྲུང་ན་སུམ་ཅུ་རྩ་གསུམ་པའི་ལྷ་རྣམས་ཀྱི་ཨར་མོ་ནིག་ལྟ་བུའི་རྡོ་ལེབ་ཡོད་དེ། ཆུར་དཔག་ཚད་ལྔ་བཅུ། ཞེང་དུ་དཔག་ཚད་ལྔ་བཅུ། མཐའ་སྐོར་དུ་དཔག་ཚད་ཉིས་བརྒྱ། འཕང་དུ་དཔག་ཚད་ཕྱེད་དང་དྲུག་དང་དཔག་ཚད་བཅོ་བརྒྱད་ཀྱི་ཆ་གཅིག་ཡོད་དེ། དབྱིབས་ལེགས་ཤིང་བལྟ་ན་སྡུག་ལ་མཛེས་པར་བྲིས་ཤིང་ལེགས་པར་བྲིས་པ་ཆོན་སྣ་བརྒྱ་རྩ་གཅིག་གིས་བྲིས་ཏེ། འཇམ་ཞིང་ཤིན་ཏུ་འཇམ་པ་ནི་དཔེར་ན་ཤིང་བལ་གྱི་འདབ་མའམ། རས་བལ་གྱི་འདབ་མ་བཞིན་ཏེ། རྐང་པ་བཞག་ན་ནི་ནེམས་ཞེས་བྱེད། རྐང་པ་བཏེག་ན་ནི་པར་ཞེས་བྱེད་ལ། མེ་ཏོག་མན་ད་རབ་མང་པོས་པུས་མོ་ནུབ་པ་ཙམ་དུ་ཡོངས་སུ་ཁེབས་ཏེ། དེའི་དབུས་ན་ལྷའི་དབང་པོ་བརྒྱ་

---

^{[མ་དཔེ་གཟིགས་ན་འདིར་གནོན།]}

བྱིན་གྱི་སེང་གེའི་ཁྲི་བཟང་པོ་དང༌། སུམ་ཅུ་རྩ་གསུམ་པའི་ལྷ་ལྷག་མ་རྣམས་ཀྱི་ཁྲི་བཤམས་པ་ཡོད་དོ། །དེ་ན་སུམ་ཅུ་རྩ་གསུམ་པའི་ལྷ་རྣམས་དབྱར་ཟླ་བ་བཞིར་ལྷའི་འདོད་པའི་ཡོན་ཏན་ལྔ་དག་ལ་འབྱོར་ཅིང་ལྡན་པར་གྱུར་ཏེ། རྩེ་ཞིང་དགའ་ལ་དགའ་དགུར་སྤྱོད་དེ། རང་གི་ལས་ཀྱི་འབྲས་བུ་ཉམས་སུ་མྱོང་ངོ༌། །ཨར་མོ་ནིག་ལྟ་བུའི་རྡོ་ལེབ་ཀྱི་ཁོ་ར་ཁོར་ཡུག་ན་མེ་ཏོག་གི་ཤིང་དང་འབྲས་བུའི་ཤིང་སྣ་ཚོགས་ཡོད་པ་དག་ལེགས་པར་སྐྱེས་ཤིང་དབྱིབས་ལེགས་ལ་ཡོངས་སུ་གྲུབ་པ་སྟེ། མེ་ཏོག་ཕྲེང་བར་བཀོད་པ་བཞིན་དུ་གྱུར་པ་ནི། དཔེར་ན་མེ་ཏོག་ཕྲེང་རྒྱུད་དམ། མེ་ཏོག་ཕྲེང་རྒྱུད་ཀྱི་སློབ་མ་མཁས་པས་མེ་ཏོག་གི་ཕྲེང་བ་ཐ་གུ་ལ་བརྒྱུས་པ་དང༌། མེ་ཏོག་གི་རྣ་རྒྱན་ལེགས་པར་བྱས་པ་བཞིན་ཏེ། ཐང་ལས་སྐྱེས་པའི་བྱ་སྣ་ཚོགས་སྐད་སྙན་ཅིང་འཇེབས་པ་དང༌། སྐད་ཡིད་དུ་འོང་བ་དང༌། སྐད་མཉེན་པ་དང༌། འདོད་དགུར་སྒྱུར་བའི་གཟུགས་ཅན་རྣམས་སྐད་སྙན་པ་འབྱིན་ཏོ། །དེའི་ཉེ་འཁོར་ན་དཔག་བསམ་གྱི་ཤིང་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དེ། གཞག་གོས་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དོ། །དཔག་བསམ་གྱི་ཤིང་ལས་བྱུང་བའི་གོས་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དོ། །རོལ་མོའི་ཆ་བྱད་སྣ་ཚོགས་འདི་ལྟ་སྟེ། པི་ཝང་དང༌། གླིང་བུ་དང༌། པི་ཝང་རྒྱུད་གསུམ་པ་དང༌། འཁར་རྔ་དང༌། ཧམ་ཤར་རྣམས་འབྱུང་བའི་ཤིང་དག་ཡོད་དོ། །རྒྱན་སྣ་ཚོགས་ལག་རྒྱན་དང༌། རྐང་རྒྱན་དང༌། རྒྱན་སྣང་བ་དང༌། མི་སྣང་བ་རྣམས་འབྱུང་བའི་ཤིང་དག་ཡོད་དོ། །ལྷ་འམ་ལྷའི་བུ་མོ་རྣམས་ཀྱིས་ཇི་ལྟ་བུར་འདོད་པ་སེམས་བསྐྱེད་མ་ཐག་ཏུ་དེ་ལྟ་བུར་དེ་དག་གི་ལག་ཏུ་འོང་བར་འགྱུར་རོ། །བདུད་རྩི་རྣམ་པ་བཞི་དང༌། སྦྲང་རྩི་དང་སྦྲང་ཆང་གི་བཏུང་བ་དག་ཀྱང་ཡོད་དོ། །ཡང་ཐོག་རྣམས་དང༌། ཁང་པ་བརྩེགས་པ་རྣམས་དང༌། ཁྱིམ་རྣམས་དང༌། ཁང་བཟངས་རྣམས་དང༌། བསིལ་ཁང་རྣམས་དང༌། ལྟད་མོ་ལྟ་བའི་ས་རྣམས་དང༌། ཟམ་པ་རྣམས་དང༌། པྲ་སྐནད་ན་ཀ་རྣམས་དང༌། པྲ་ཙ་ར་ཀ་རྣམས་དང༌། གྷརྒ་ར་ཀ་

---

^{[མ་དཔེ་གཟིགས་ན་འདིར་གནོན།]}

རྣམས་དང༌། བུད་མེད་ཀྱི་ཚོགས་ཀྱིས་མཛེས་པར་བྱས་ཤིང་ལྷའི་བུ་མོ་མང་པོས་བརྟེན་པ་དང༌། སིལ་སྙན་དང༌། ཕེག་རྡོབ་པ་དག་གི་སྒྲ་སྙན་པ་སྒྲོགས་པ་དང༌། དྲི་སྣ་ཚོགས་ཀྱིས་ལེགས་པར་བསྒོས་པ་དང༌། ཁ་ཟས་དང༌། བཏུང་བ་དང་ལྡན་ཏེ། དེ་ན་སུམ་ཅུ་རྩ་གསུམ་པའི་ལྷ་རྣམས་འཁོར་དང་བཅས་པ་རྩེ་ཞིང་དགའ་ལ་དགའ་དགུར་སྤྱོད་དེ། རང་གི་ལས་ཀྱི་འབྲས་བུ་ཉམས་སུ་མྱོང་ངོ༌། །སུམ་ཅུ་རྩ་གསུམ་པའི་ལྷ་རྣམས་ཀྱི་གླང་པོ་ཆེའི་རྒྱལ་པོ་སྐྱེད་མོས་ཚལ་དུ་སྤྱད་པས་སྲུང་གི་བུ་ཞེས་བྱ་བ་གཟུགས་བཟང་ཞིང་བལྟ་ན་སྡུག་ལ་མཛེས་པ་ཞིག་ཡོད་དོ། མེ་ཏོག་ཀུ་མུ་ཏའི་མདོག་ལྟ་བུར་ཐལ་ཀར་དུ་འདུག་ལ། ཡན་ལག་བདུན་ལེགས་པར་གནས་པ་སྟེ། དེའི་མགོ་བོ་དབྱིབས་ལེགས་ཤིང་བལྟ་ན་སྡུག་ལ་མཛེས་པ་སྟེ། སྔོ་ཞིང་སྲོག་ཆགས་ལྷམ་བུ་ཆུ་གཤེར་གྱི་མདོག་ལྟར་དབུས་དམར་ལ་མཆེ་བ་དྲུག་ཡོད་དེ། གླང་པོ་ཆེའི་རྒྱལ་པོ་ས་སྲུང་གི་བུའི་སྲིད་དུ་དཔག་ཚད་ཕྱེད་དང་གསུམ། ཞེང་དུ་དཔག་ཚད་གཅིག །འཕང་དུ་དཔག་ཚད་ཕྱེད་དང་གཉིས། མཐའ་སྐོར་དུ་དཔག་ཚད་བདུན་ཡོད་དོ། །གླང་པོ་ཆེའི་རྒྱལ་པོ་ས་སྲུང་གི་བུའི་འཁོར་གླང་པོ་ཆེ་བརྒྱད་སྟོང་ཡོད་དོ། །དེ་དག་ཐམས་ཅད་ཀྱང་གཟུགས་བཟང་ཞིང་བལྟ་ན་སྡུག་ལ་མཛེས་པ་མེ་ཏོག་ཀུ་མུ་ཏའི་མདོག་ལྟར་ཐལ་ཀར་དུ་འདུག་ཅིང་ཡན་ལག་བདུན་ཤིན་ཏུ་ལེགས་པར་གནས་ཏེ། དེ་དག་གི་མགོ་བོ་ཡང་དབྱིབས་ལེགས་ཤིང་བལྟ་ན་སྡུག་ལ་མཛེས་ཏེ། སྔོ་ཞིང་སྲོག་ཆགས་ལྷམ་བུ་ཆུ་གཤེར་གྱི་མདོག་ལྟར་དབུས་དམར་ལ་མཆེ་བ་དྲུག་ཡོད་པ་ཤ་སྟག་སྟེ། གང་གི་ཆེ་སུམ་ཅུ་རྩ་གསུམ་པའི་ལྷ་རྣམས་སྐྱེད་མོས་ཚལ་གྱི་སར་འགྲོ་བར་འདོད་པ་དེའི་ཚེ་གླང་པོ་ཆེའི་རྒྱལ་པོ་ས་སྲུང་གི་བུས་མགོ་སུམ་ཅུ་རྩ་གཉིས་མངོན་པར་སྤྲུལ་ཏེ། མགོ་རེ་རེ་ལ་མཆེ་བ་དྲུག་དྲུག །མཆེ་བ་རེ་རེ་ལ་རྫིང་བུ་བདུན་བདུན། རྫིང་བུ་རེ་རེ་ལ་པདྨ་བདུན་བདུན། པདྨ་རེ་རེ་ལ་སྡོང་བུ་བདུན་བདུན། སྡོང་བུ་རེ་རེ་ལ་ལྷའི་བུ་མོ་བདུན་བདུན། ལྷའི་བུ་མོ་རེ་རེ་ལ་གཡོག་མོ་བདུན་བདུན། གཡོག་མོ་རེ་རེ་ལ་སིལ་སྙན་བདུན་བདུན་མངོན་པར་སྤྲུལ་ཏེ། མགོ་བོ་དེ་དག་ཐམས་ཅད་ཀྱི་ནང་ན་ཁྱད་

---

^{[མ་དཔེ་གཟིགས་ན་འདིར་གནོན།]}

པར་དུ་འཕགས་པ་གང་ཡིན་པ་དེ་ལ་ལྷ་རྣམས་ཀྱི་དབང་པོ་བརྒྱ་བྱིན་ཞོན་ནོ། །མགོ་བོ་ལྷག་མ་རྣམས་ལ་ནི་ཉེ་བའི་དབང་པོ་སུམ་ཅུ་རྩ་གཉིས་པོ་རྣམས་ཞོན་ནོ། །གླང་པོ་ཆེ་ལྷག་མ་རྣམས་ལ་ནི་སུམ་ཅུ་རྩ་གསུམ་པའི་ལྷ་རྣམས་ཞོན་ནོ། །དེ་ཤིན་ཏུ་མགྱོགས་ཏེ་དཔེར་ན་འཇིག་པའི་རླུང་ངམ་འཆགས་པའི་རླུང་བཞིན་ཏེ། དེ་ན་ལྷའམ་ལྷའི་བུ་མོ་སུ་ཡང་འདི་ནི་བདག་གི་མདུན་དུ་འགྲོའོ་ཞེ་འམ། ཕྱི་ནས་འོང་ངོ་སྙམ་དུ་སེམས་པ་མེད་དོ། །དེ་ནས་གླང་པོ་ཆེའི་རྒྱལ་པོས་སྲུང་གི་བུས་སུམ་ཅུ་རྩ་གསུམ་པའི་ལྷ་རྣམས་སོ་སོར་གྲོང་ཁྱེར་གྱི་སྒོ་ནས་བཏོན་ཏོ། །བཏོན་ནས་སོ་སོར་སྐྱེད་མོས་ཚལ་དུ་ཕྱིན་པར་བྱས་ཏེ། རྫུ་འཕྲུལ་མངོན་པར་འདུ་བྱེད་པ་དེ་བཏང་ནས་འདི་ལྟ་སྟེ། ལྷ་འམ་ལྷའི་བུ་མོ་རྫུ་འཕྲུལ་ཆེ་ཞིང་མཐུ་ཆེ་བ་གང་ཡང་རུང་བ་དང་འདྲ་བར་བདག་ཉིད་མངོན་པར་སྤྲུལ་ནས། ལྷའི་འདོད་པ་ལྔ་དག་ལ་འབྱོར་ཅིང་ལྡན་པར་གྱུར་ཏེ། རྩེ་ཞིང་དགའ་ལ་དགའ་དགུར་སྤྱོད་དོ། །ཇི་ལྟར་བརྒྱ་བྱིན་ལྷའི་དབང་པོ་སུམ་ཅུ་རྩ་གསུམ་པའི་ལྷ་རྣམས་ཀྱི་རྒྱལ་སྲིད་ཀྱི་དབང་ཕྱུག་ལ་དབང་བྱེད་པ་དེ་བཞིན་དུ། ལྷ་མ་ཡིན་གྱི་དབང་པོ་ཐགས་ཟངས་རིས་ལྷ་མ་ཡིན་རྣམས་ཀྱི་རྒྱལ་སྲིད་ཀྱི་དབང་ཕྱུག་ལ་དབང་བྱེད་དོ། །སུམ་ཅུ་རྩ་གསུམ་པའི་ལྷ་རྣམས་ཀྱི་རྒྱལ་པོའི་ཕོ་བྲང་འཁོར་གྲོང་ཁྱེར་བལྟ་ན་སྡུག་ཇི་ལྟ་བ་བཞིན་དུ། ལྷ་མ་ཡིན་རྣམས་ཀྱི་རྒྱལ་པོའི་ཕོ་བྲང་འཁོར་ཡང་གྲོང་ཁྱེར་གསེར་ལྡན་ཞེས་བྱའོ། །ལྷའི་དབང་པོ་བརྒྱ་བྱིན་གྱི་ཁང་བཟངས་རྣམ་པར་རྒྱལ་བ་ཇི་ལྟ་བ་དེ་བཞིན་དུ། ལྷ་མ་ཡིན་གྱི་དབང་པོ་ཐགས་ཟངས་རིས་ཀྱི་ཁང་བཟངས་ཀྱང་གཏམས་པ་ཅན་ཞེས་བྱའོ། །སུམ་ཅུ་རྩ་གསུམ་པའི་ལྷ་རྣམས་ཀྱི་ལྷའི་འདུན་ས་ཆོས་བཟངས་ཞེས་བྱ་བ་ཇི་ལྟ་བ་དེ་བཞིན་དུ། ལྷ་མ་ཡིན་རྣམས་ཀྱི་ལྷ་མ་ཡིན་གྱི་འདུན་ས་ཡང་ནོར་བཟངས་ཞེས་བྱའོ། །སུམ་ཅུ་རྩ་གསུམ་པའི་ལྷ་རྣམས་ཀྱི་སྐྱེད་མོས་ཚལ་བཞི་འདི་ལྟ་སྟེ། ཤིང་རྟ་སྣ་ཚོགས་ཚལ་དང༌། རྩུབ་འགྱུར་ཚལ་དང༌། འདྲེས་པའི་ཚལ་དང༌། དགའ་བའི་ཚལ་ཇི་ལྟ་བ་དེ་བཞིན་དུ་ལྷ་མ་ཡིན་རྣམས་ཀྱི་སྐྱེད་མོས་ཚལ་བཞི་ཡང་འདི་ལྟ་སྟེ། ཀུན་དགའ་བ་དང༌། རབ་ཏུ་དགའ་བ་དང༌། དགའ་བ་དང༌། དགའ་བའི་ཀུན་དགའ་ར་བ་རྣམས་ཡིན་ནོ། །སུམ་ཅུ་

---

^{[མ་དཔེ་གཟིགས་ན་འདིར་གནོན།]}

རྩ་གསུམ་པའི་ལྷ་རྣམས་ཀྱི་ས་གཞི་བཟང་པོ་བཞི་འདི་ལྟ་སྟེ། སྣ་ཚོགས་དང༌། རྩུབ་འགྱུར་དང༌། འདྲེས་པ་དང༌། དགའ་བ་ཇི་ལྟ་བ་དེ་བཞིན་དུ་ལྷ་མ་ཡིན་རྣམས་ཀྱི་ས་གཞི་བཟང་པོ་བཞི་ཡང་ཀུན་ཏུ་དགའ་བ་མ་དང༌། རབ་ཏུ་དགའ་བ་མ་དང༌། དགའ་བ་མ་དང༌། དགའ་བའི་ཀུན་དགའ་ར་བ་མ་རྣམས་སོ། །སུམ་ཅུ་རྩ་གསུམ་པའི་ལྷ་རྣམས་ཀྱི་ཤིང་ཡོངས་འདུ་ས་བརྟོལ་ཇི་ལྟ་བ་དེ་བཞིན་དུ་ལྷ་མ་ཡིན་རྣམས་ཀྱི་ཤིང་ཡང་ཙི་ཏྲ་པ་ཏ་ལ་ཞེས་བྱའོ། །སུམ་ཅུ་རྩ་གསུམ་པའི་ལྷ་རྣམས་ཀྱི་ཨར་མོ་ནིག་ལྟ་བུའི་རྡོ་ལེབ་ཇི་ལྟ་བ་དེ་བཞིན་དུ་ལྷ་མ་ཡིན་རྣམས་ཀྱི་ཡང་ལྷ་མ་ཡིན་གྱི་རྡོ་ལེབ་ཅེས་བྱའོ། །སུམ་ཅུ་རྩ་གསུམ་པའི་ལྷ་རྣམས་ཀྱི་གླང་པོ་ཆེའི་རྒྱལ་པོ་སྐྱེད་མོས་ཚལ་དུ་སྤྱད་པ་ས་སྲུང་གི་བུ་ཇི་ལྟ་བ་དེ་བཞིན་དུ་ལྷ་མ་ཡིན་རྣམས་ཀྱི་གླང་པོ་ཆེའི་རྒྱལ་པོ་སྐྱེད་མོས་ཚལ་དུ་སྤྱད་པ་ཡང་ཏི་སེའི་གངས་བརྩེགས་ཞེས་བྱའོ། །སུམ་ཅུ་རྩ་གསུམ་པའི་ལྷ་རྣམས་ཀྱི་གླང་པོ་ཆེའི་རྒྱལ་པོ་གཡུལ་ངོར་སྤྱད་པ་རབ་ཏུ་བརྟན་པ་ཇི་ལྟ་བ་དེ་བཞིན་དུ་ལྷ་མ་ཡིན་རྣམས་ཀྱི་གླང་པོ་ཆེའི་རྒྱལ་པོ་གཡུལ་ངོར་སྤྱད་པ་ཡང་བཟོད་པར་དཀའ་བ་ཞེས་བྱའོ། །སུམ་ཅུ་རྩ་གསུམ་པའི་ལྷ་རྣམས་ཀྱི་རྟའི་རྒྱལ་པོ་སྤྲིན་གྱི་ཤུགས་ཅན་ཞེས་བྱ་བ་ཇི་ལྟ་བ་དེ་བཞིན་དུ། ལྷ་མ་ཡིན་རྣམས་ཀྱི་རྟའི་རྒྱལ་པོ་ཡང་བྲག་འཛིན་ཞེས་བྱའོ། །སུམ་ཅུ་རྩ་གསུམ་པའི་ལྷ་རྣམས་ཀྱི་ལྷའི་གྲོང་ཁྱེར་ཇི་ལྟར་འཁོར་དང་ལྡན་པ་དེ་བཞིན་དུ་ལྷ་མ་ཡིན་རྣམས་ཀྱི་གྲོང་ཁྱེར་ཡང་འཁོར་དང་ལྡན་པ་ཡིན་ནོ། །ལྷ་མ་ཡིན་རྣམས་ཀྱི་ལྷ་མ་ཡིན་གྱི་རྒྱལ་སྲིད་ཀྱང་སུམ་ཅུ་རྩ་གསུམ་པའི་ལྷ་རྣམས་ཀྱི་ཇི་ལྟ་བ་བཞིན་དུ་རྒྱས་པར་བརྗོད་པར་བྱའོ། །འཇིག་རྟེན་གཞག་པ་ལས་ཚིགས་བདུན་པའོ།། །།འཇིག་རྟེན་གཞག་པ། བམ་པོ་ལྔ་པ། མདོ་ལ། ཕྱེད་དང་དྲུག་དང་ཐང་ཅིག་མཐའ། །ཐུང་དང་གྲང་དང་འགྲིབ་པ་དང༌། །རློག་པ་དང་ནི་བསྡུ་བ་དང༌། །ཕྱོགས་དང་ཤར་ཕྱོགས་འདུ་ཤེས་པ། །ཟླ་བ་དྲུག་ཏུ་ཉི་མ་ལྷོ་ཕྱོགས་སུ་འགྲོ་སྟེ། ལྷོ་ཕྱོགས་སུ་འགྲོ་བ་ན་དཔག་ཚད་ཕྱེད་དང་དྲུག་དང་དཔག་ཚད་ཀྱི་བཅོ་བརྒྱད་ཆ་

---

^{[མ་དཔེ་གཟིགས་ན་འདིར་གནོན།]}

གཅིག་ཏུ་འཛམ་བུའི་གླིང་ལས་ཡོལ་ཏེ། རྒྱ་མཚོ་ཆེན་པོ་དཔག་ཚད་ཕྱེད་དང་དྲུག་དང་དཔག་ཚད་ཀྱི་བཅོ་བརྒྱད་ཆ་གཅིག་ཁྱབ་པར་བྱེད་དོ། །ཟླ་བ་དྲུག་ཏུ་ཉི་མ་བྱང་ཕྱོགས་སུ་འགྲོ་སྟེ། བྱང་ཕྱོགས་སུ་འགྲོ་བ་ན་དཔག་ཚད་ཕྱེད་དང་དྲུག་དང་དཔག་ཚད་ཀྱི་བཅོ་བརྒྱད་ཆ་གཅིག་ཏུ་རྒྱ་མཚོ་ཆེན་པོ་ལས་ཡོལ་ཏེ། འཛམ་བུའི་གླིང་དུ་དཔག་ཚད་ཕྱེད་དང་དྲུག་དང་དཔག་ཚད་ཀྱི་བཅོ་བརྒྱད་ཆ་གཅིག་ཁྱབ་པར་བྱེད་དོ། །ཟླ་བ་དྲུག་ཏུ་ཉི་མ་ལྷོ་ཕྱོགས་སུ་འགྲོ་སྟེ། ལྷོ་ཕྱོགས་སུ་འགྲོ་བ་ན་ཉིན་མོ་ལས་ཐང་ཅིག་རེ་རེ་འགྲིབ་ཅིང༌། མཚན་མོ་ལས་ཐང་ཅིག་རེ་རེ་སྐྱེའོ། །ཟླ་བ་དྲུག་ཏུ་ཉི་མ་བྱང་ཕྱོགས་སུ་འགྲོ་སྟེ། བྱང་ཕྱོགས་སུ་འགྲོ་བ་ན་མཚན་མོ་ལས་ཐང་ཅིག་རེ་རེ་འགྲིབ་ཅིང་ཉིན་མོ་ལས་ཐང་ཅིག་རེ་རེ་སྐྱེའོ། །ཟླ་བ་དྲུག་ཏུ་ཉི་མ་ལྷོ་ཕྱོགས་སུ་འགྲོ་སྟེ། ལྷོ་ཕྱོགས་སུ་འགྲོ་བ་ན་འཛམ་བུའི་གླིང་གི་མཐའ་མྱུར་དུ་སྤོང་ངོ༌། །ཟླ་བ་དྲུག་ཏུ་ཉི་མ་བྱང་ཕྱོགས་སུ་འགྲོ་སྟེ། བྱང་ཕྱོགས་སུ་འགྲོ་བ་ན་འཛམ་བུའི་གླིང་གི་དབུས་ཡུན་རིང་མོ་ཞིག་གིས་སྤོང་ངོ༌། །ཅིའི་ཕྱིར་དགུན་མཚན་མོ་རིང་ལ་ཉིན་མོ་ཐུང་ཞེ་ན། སྨྲས་པ། ཟླ་བ་དྲུག་ཏུ་ཉི་མ་ལྷོ་ཕྱོགས་སུ་འགྲོ་སྟེ། ལྷོ་ཕྱོགས་སུ་འགྲོ་བ་ན་འཛམ་བུའི་གླིང་གི་མཐའ་མྱུར་དུ་སྤོང་བ་དེའི་ཕྱིར་ན་དགུན་མཚན་མོ་རིང་ལ་ཉིན་མོ་ཐུང་ངོ༌། །ཅིའི་ཕྱིར་ན་དཔྱིད་དང་དབྱར་ཉིན་མོ་རིང་ལ་མཚན་མོ་ཐུང་ཞེ་ན། སྨྲས་པ། ཟླ་བ་དྲུག་ཏུ་ཉི་མ་བྱང་ཕྱོགས་སུ་འགྲོ་སྟེ། བྱང་ཕྱོགས་སུ་འགྲོ་བ་ན་འཛམ་བུའི་གླིང་གི་དབུས་ཡུན་རིང་དུ་སྤོང་བས་དེའི་ཕྱིར་ན་དཔྱིད་དང་དབྱར་ཉིན་མོ་རིང་ལ་མཚན་མོ་ཐུང་ངོ༌། །ཅིའི་ཕྱིར་དགུན་གྲང་བར་འགྱུར་ཞེ་ན། སྨྲས་པ། ཟླ་བ་དྲུག་ཏུ་ཉི་མ་ལྷོ་ཕྱོགས་སུ་འགྲོ་སྟེ། ལྷོ་ཕྱོགས་སུ་འགྲོ་བ་ན་དཔག་ཚད་བཞི་ཁྲི་ནས་ཉི་མའི་འོད་ཟེར་འབྱུང་བ་རྣམས་རྒྱ་མཚོ་ཆེན་པོར་འབབ་པས་གླིང་རྣམས་གྲང་བར་འགྱུར་ཏེ། དེའི་ཕྱིར་ན་དགུན་གྲང་ངོ༌། །ཅིའི་ཕྱིར་ན་དཔྱིད་དང་དབྱར་དྲོ་བར་འགྱུར་ཞེ་ན། སྨྲས་པ། ཟླ་བ་དྲུག་ཏུ་ཉི་མ་བྱང་ཕྱོགས་སུ་འགྲོ་སྟེ། བྱང་ཕྱོགས་སུ་འགྲོ་བ་ན་དཔག་ཚད་བཞི་ཁྲི་ནས་ཉི་མའི་འོད་ཟེར་བྱུང་བ་རྣམས་གླིང་རྣམས་སུ་འབབ་པས་གླིང་རྣམས་དྲོ་བར་འགྱུར་ཏེ། དེའི་ཕྱིར་ན་དཔྱིད་དང་དབྱར་དྲོ་བར་འགྱུར་རོ། །ཅིའི་ཕྱིར་ཟླ་

---

^{[མ་དཔེ་གཟིགས་ན་འདིར་གནོན།]}

བའི་དཀྱིལ་འཁོར་མར་གྱི་ངོ་ཚེས་བརྒྱད་དག་ཕན་ཆད་འོད་འགྲིབ་ཅིང་ཁ་དོག་དང་དཀྱིལ་འཁོར་ཆུ་ཞིང་དུ་འགྲིབ་ཅེ་ན། སྨྲས་པ། ཉི་མ་དང་ཉེ་བར་འགྲོ་ཞིང་འཕྲད་པར་གྱུར་ཏོ། །འགྲོ་བ་དེ་རང་གི་དཀྱིལ་འཁོར་ལས་དེའི་གྲིབ་མ་བྱུང་སྟེ། དེས་དེའི་དཀྱིལ་འཁོར་ཁེབས་ཤིང་དེའི་དཀྱིལ་འཁོར་གཡོགས་པར་གྱུར་ཏེ། མི་སྣང་བས་དེའི་ཕྱིར་ན། ཟླ་བའི་དཀྱིལ་འཁོར་མར་གྱི་ངོ་ཚེས་བཅུ་དྲུག་ཕན་ཆད་འོད་འགྲིབ་ཅིང་མདོག་དང་དཀྱིལ་འཁོར་དང་ཆུ་ཞིང་དུ་འགྲིབ་པོ། །ཅིའི་ཕྱིར་ཟླ་བའི་དཀྱིལ་འཁོར་མར་གྱི་ངོ་གནམ་སྟོང་ལ་རྣམ་པ་ཐམས་ཅད་དུ་མི་སྣང་ཞེ་ན། སྨྲས་པ། ཉི་མ་དང་རྣམ་པ་ཐམས་ཅད་དུ་འཕྲད་ཅིང་འགྲོགས་ཏེ། དེའི་རང་གི་དཀྱིལ་འཁོར་ལས་གྲིབ་མ་འབྱུང་བ་དེའི་དཀྱིལ་འཁོར་ཁེབས་ཤིང་དེས་དེའི་དཀྱིལ་འཁོར་གཡོགས་པར་མི་འགྱུར་ཏེ་མི་སྣང་བས་དེའི་ཕྱིར་ན་ཟླ་བའི་དཀྱིལ་འཁོར་མར་གྱི་ངོ་གནམ་སྟོང་ལ་རྣམ་པ་ཐམས་ཅད་དུ་མི་སྣང་ངོ༌། །ཅིའི་ཕྱིར་ཟླ་བའི་དཀྱིལ་འཁོར་ཡར་གྱི་ངོ་ཚེས་གཅིག་ཕན་ཆད་འོད་སྐྱེ་ཞིང་ཁ་དོག་དང་དཀྱིལ་འཁོར་དང་ཆུ་ཞིང་དུ་སྐྱེ་ཞེ་ན། སྨྲས་པ། ཉི་མ་དང་འབྲལ་ཞིང་འགྲོ་སྟེ། ཉི་མ་དང་འབྲལ་ཞིང་འགྲོ་བ་དེ་རང་གི་དཀྱིལ་འཁོར་ལས་གྲིབ་མ་ཆུང་ངུར་འགྱུར་ཏེ་གྲིབ་མ་ཆུང་དུར་གྱུར་པས་དེའི་དཀྱིལ་འཁོར་གྱི་ཕྱོགས་སྣང་བར་གྱུར་ཏེ། དེའི་ཕྱིར་ན་ཟླ་བའི་དཀྱིལ་འཁོར་ཡར་གྱི་ཚེས་གཅིག་ཕན་ཆད་འོད་སྐྱེ་ཞིང་ཁ་དོག་དང་དཀྱིལ་འཁོར་དང་ཆུ་ཞིང་དུ་སྐྱེའོ། །ཅིའི་ཕྱིར་ཟླ་བའི་དཀྱིལ་འཁོར་ཡར་གྱི་ངོ་ཚེས་བཅོ་ལྔ་ལ་རྣམ་པ་ཐམས་ཅད་དུ་ཡོངས་སུ་རྫོགས་པར་འགྱུར་ཞེ་ན། སྨྲས་པ། ཉི་མ་དང་རྣམ་པ་ཐམས་ཅད་དུ་བྲལ་ཏེ་འགྲོ་བས་བྲལ་བའི་དཀྱིལ་འཁོར་དེ་ལས་ཉི་མའི་འོད་ཟེར་ལས་གྱུར་པའི་གྲིབ་མ་གང་དེའི་དཀྱིལ་འཁོར་ལ་བསྒྲིབས་པ་དེ་མེད་པར་འགྱུར་ཏེ། དེས་དེའི་དཀྱིལ་འཁོར་སྣང་བར་འགྱུར་བས་དེའི་ཕྱིར་ན་ཟླ་བའི་དཀྱིལ་འཁོར་ཡར་གྱི་ངོ་ཚེས་བཅོ་ལྔ་ལ་རྣམ་པ་ཐམས་ཅད་དུ་ཡོངས་སུ་རྫོགས་པར་འགྱུར་རོ། །ཅིའི་ཕྱིར་ཟླ་བའི་དཀྱིལ་འཁོར་གྱི་དབུས་རྙོག་ལ་མཐའ་རྣམ་པར་དང་ཞིང་རྙོག་པ་མེད་ཅེ་ན། སྨྲས་པ། གླིང་གི་རྟེན་གྱིས་དེའི་དབུས་

---

^{[མ་དཔེ་གཟིགས་ན་འདིར་གནོན།]}

རྙོག་ལ། ཆུའི་རྟེན་གྱིས་དེའི་མཐའ་རྣམ་པར་དང་ཞིང་རྙོག་པ་མེད་དོ། །གླིང་རྣམས་ཀྱི་གཟུགས་བརྙན་གང་ཡིན་པ་དེས་ནི་དབུས་རྙོག་ལ། ཆུའི་གཟུགས་བརྙན་གང་ཡིན་པ་དེས་ནི་མཐའ་རྣམ་པར་དང་ཞིང་རྙོག་པ་མེད་དོ། །གཞན་ཡང་ཟླ་བའི་དཀྱིལ་འཁོར་གྱི་སྟེང་ན་ཀུན་དགའ་ར་བ་དང་སྐྱེད་མོས་ཚལ་དང༌། ཁྱིམ་རྣམས་དང༌། ཁང་པ་བརྩེགས་པ་རྣམས་ཡོད་པས་དེའི་ཕྱིར་ཡང་ཟླ་བའི་དཀྱིལ་འཁོར་གྱི་དབུས་རྙོག་ལ་མཐའ་རྣམས་པར་དང་ཞིང་རྙོག་པ་མེད་དོ། །གང་གི་ཚེ་འཛམ་བུའི་གླིང་དུ་ཉི་མ་ཤར་བ་དེའི་ཚེ་ཤར་གྱི་ལུས་འཕགས་སུ་ནི་ཉི་མ་ཕྱེད་དོ། །བྱང་གི་སྒྲ་མི་སྙན་ན་ནི་ཉི་མ་ནུབ་པོ། །ནུབ་ཀྱི་བ་ལང་སྤྱོད་ན་ནི་ནམ་ཕྱེད་དོ། །གང་གི་ཚེ་འཛམ་བུའི་གླིང་དུ་ཉི་མ་ཕྱེད་དུ་གྱུར་པ་དེའི་ཚེ་ཤར་གྱི་ལུས་འཕགས་སུ་ནི་ཉི་མ་ནུབ་པོ། །བྱང་གི་སྒྲ་མི་སྙན་ན་ནི་ནམ་ཕྱེད་དོ། །ནུབ་ཀྱི་བ་ལང་སྤྱོད་ཀྱི་གླིང་ན་ནི་ཉི་མ་འཆར་རོ། །གང་གི་ཚེ་འཛམ་བུའི་གླིང་ན་ཉི་མ་ནུབ་པ་དེའི་ཚེ། ཤར་གྱི་ལུས་འཕགས་གླིང་ན་ནི་ནམ་ཕྱེད་དོ། །བྱང་གི་སྒྲ་མི་སྙན་ན་ནི་ཉི་མ་འཆར་རོ། །ནུབ་ཀྱི་བླང་སྤྱོད་ཀྱི་གླིང་ན་ནི་ཉི་མ་ཕྱེད་དོ། །གང་གི་ཚེ་འཛམ་བུའི་གླིང་ན་ནམ་ཕྱེད་དུ་གྱུར་པ་དེའི་ཚེ་ཤར་གྱི་ལུས་འཕགས་ཀྱི་གླིང་ན་ནི་ཉི་མ་འཆར་རོ། །བྱང་གི་སྒྲ་མི་སྙན་ན་ནི་ཉི་མ་ཕྱེད་དོ། །ནུབ་ཀྱི་བ་ལང་སྤྱོད་ཀྱི་གླིང་ན་ནི་ཉི་མ་ནུབ་པོ། །ཇི་ལྟར་འཛམ་བུའི་གླིང་ཐོག་མར་བྱས་ཏེ་བཤད་པ་དེ་བཞིན་དུ་ཤར་གྱི་ལུས་འཕགས་དང༌། བྱང་གི་སྒྲ་མི་སྙན་དང༌། ནུབ་ཀྱི་བ་ལང་སྤྱོད་ཀྱང་ཐོག་མར་བྱས་ཏེ་ཐམས་ཅད་བརྗོད་པར་བྱའོ། །འཛམ་བུའི་གླིང་གི་ཤར་ཕྱོགས་གང་ཡིན་པ་དེ་ཤར་གྱི་ལུས་འཕགས་ཀྱི་ནི་ལྷོ་ཕྱོགས་སོ། །བྱང་གི་སྒྲ་མི་སྙན་གྱི་ནི་ནུབ་ཕྱོགས་སོ། །ནུབ་ཀྱི་བ་ལང་སྤྱོད་ཀྱི་ནི་བྱང་ཕྱོགས་སོ། །འཛམ་བུའི་གླིང་གི་ལྷོ་ཕྱོགས་གང་ཡིན་པ་དེ་ཤར་གྱི་ལུས་འཕགས་ཀྱི་ནི་ནུབ་ཕྱོགས་སོ། །བྱང་གི་སྒྲ་མི་སྙན་གྱི་ནི་བྱང་ཕྱོགས་སོ། །ནུབ་ཀྱི་བ་ལང་སྤྱོད་ཀྱི་ནི་ཤར་ཕྱོགས་སོ། །འཛམ་བུའི་གླིང་གི་ནུབ་ཕྱོགས་གང་ཡིན་པ་དེ་ཤར་གྱི་ལུས་འཕགས་ཀྱི་ནི་བྱང་ཕྱོགས་སོ། །བྱང་གི་སྒྲ་མི་སྙན་གྱི་ནི་ཤར་ཕྱོགས་སོ། །ནུབ་ཀྱི་བ་ལང་སྤྱོད་ཀྱི་ནི་ལྷོ་ཕྱོགས་སོ། །འཛམ་བུའི་གླིང་གི་བྱང་ཕྱོགས་གང་ཡིན་པ་དེ་ཤར་གྱི་ལུས་འཕགས་ཀྱི་ནི་

---

^{[མ་དཔེ་གཟིགས་ན་འདིར་གནོན།]}

ཤར་ཕྱོགས་སོ། །བྱང་གི་སྒྲ་མི་སྙན་གྱི་ནི་ལྷོ་ཕྱོགས་སོ། །ནུབ་ཀྱི་བ་ལང་སྤྱོད་ཀྱི་ནི་ནུབ་ཕྱོགས་སོ། །ཇི་ལྟར་འཛམ་བུའི་གླིང་ཐོག་མར་བྱས་ཏེ་བཤད་པ་དེ་བཞིན་དུ་བྱང་གི་སྒྲ་མི་སྙན་དང༌། ནུབ་ཀྱི་བ་ལང་སྤྱོད་དང༌། ཤར་གྱི་ལུས་འཕགས་ཀྱང་ཐོག་མར་བྱས་ཏེ་ཐམས་ཅད་བརྗོད་པར་བྱའོ། །ཕྱོགས་ནི་བཞི་ཡོད་དེ། ཤར་ཕྱོགས་དང༌། ལྷོ་ཕྱོགས་དང༌། ནུབ་ཕྱོགས་དང༌། བྱང་ཕྱོགས་སོ། །ཤར་ཕྱོགས་ལ་སེམས་ཅན་ཤར་ཕྱོགས་སུ་འདུ་ཤེས་པ་དག་ཀྱང་ཡོད། སེམས་ཅན་ལྷོ་ཕྱོགས་སུ་འདུ་ཤེས་པ་དག་ཀྱང་ཡོང༌། སེམས་ཅན་ནུབ་ཕྱོགས་སུ་འདུ་ཤེས་པ་དག་ཀྱང་ཡོད། སེམས་ཅན་བྱང་ཕྱོགས་སུ་འདུ་ཤེས་པ་དག་ཀྱང་ཡོད་དོ། །ལྷོ་ཕྱོགས་ལ་སེམས་ཅན་ལྷོ་ཕྱོགས་སུ་འདུ་ཤེས་པ་དག་ཀྱང་ཡོད། སེམས་ཅན་ཤར་ཕྱོགས་སུ་འདུ་ཤེས་པ་དག་ཀྱང་ཡོད། སེམས་ཅན་ནུབ་ཕྱོགས་སུ་འདུ་ཤེས་པ་དག་ཀྱང་ཡོད། སེམས་ཅན་བྱང་ཕྱོགས་སུ་འདུ་ཤེས་པ་དག་ཀྱང་ཡོད་དོ། །ནུབ་ཕྱོགས་ལ་སེམས་ཅན་ཤར་ཕྱོགས་སུ་འདུ་ཤེས་པ་དག་ཀྱང་ཡོད། སེམས་ཅན་ལྷོ་ཕྱོགས་སུ་འདུ་ཤེས་པ་དག་ཀྱང་ཡོད། སེམས་ཅན་ནུབ་ཕྱོགས་སུ་འདུ་ཤེས་པ་དག་ཀྱང་ཡོད། སེམས་ཅན་བྱང་ཕྱོགས་སུ་འདུ་ཤེས་པ་དག་ཀྱང་ཡོད་དོ། །བྱང་ཕྱོགས་ལ་སེམས་ཅན་ཤར་ཕྱོགས་སུ་འདུ་ཤེས་པ་དག་ཀྱང་ཡོད། སེམས་ཅན་ལྷོ་ཕྱོགས་སུ་འདུ་ཤེས་པ་དག་ཀྱང་ཡོད། །སེམས་ཅན་ནུབ་ཕྱོགས་སུ་འདུ་ཤེས་པ་དག་ཀྱང་ཡོད། སེམས་ཅན་བྱང་ཕྱོགས་སུ་འདུ་ཤེས་པ་དག་ཀྱང་ཡོད་དེ། ཕྱོགས་དེ་དང་དེ་དག་ལ་དེ་ལྟར་ཐ་སྙད་འདོགས་སོ། །འཇིག་རྟེན་གཞག་པ་ལས་ཚིགས་བརྒྱད་པའོ།། །།མདོ་ལ། ཟླ་བ་ཉི་མ་གཉིས་ཀྱི་ཚད། །སྐར་མ་རྣམས་ཀྱང་དེ་བཞིན་ཏེ། །ཟླ་དྲུག་ཉི་མ་འགྲོ་བ་དང༌། །གནོད་པར་བྱེད་པ་ཐ་མ་ཡིན། །ཟླ་བའི་དཀྱིལ་འཁོར་གྱི་ཚད་ཇི་ཙམ་ཞེ་ན། སྨྲས་པ། ཟླ་བའི་དཀྱིལ་འཁོར་ནི་ཆུར་དཔག་ཚད་ལྔ་བཅུ། ཞེང་དུ་ཡང་དཔག་ཆད་ལྔ་བཅུ། མཐའ་སྐོར་དུ་དཔག་ཚད་བརྒྱ་ལྔ་བཅུ། རྔམས་སུ་དཔག་ཚད་ཕྱེད་དང་དྲུག་དང་དཔག་ཚད་ཀྱི་བཅོ་བརྒྱད་ཆ་གཅིག་ཡོད་དེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་ཤེལ་

---

^{[མ་དཔེ་གཟིགས་ན་འདིར་གནོན།]}

ལས་གྲུབ་པ་སྟེ། གསེར་གྱི་ར་བས་ཀུན་ནས་བསྐོར་རོ། །ར་བ་དེའི་འཕང་དུ་ཡང་དཔག་ཚད་ཕྱེད་དོ། །ར་བ་དེ་ལ་རྩིག་སྐྱབས་འདི་ལྟ་སྟེ། གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པ་རྣམས་པ་བཞི་དང༌། གྱེན་དུ་འཕང་པའི་མདའ་ཡབ་དང༌། ཐུར་དུ་འཕང་བའི་མདའ་ཡབ་དང༌། ཐམ་པ་བརྒྱུད་མ་རྣམ་པ་བཞི་དག་ཡོད་དོ། །དེའི་ནང་གི་ས་གཞི་དབྱིབས་ལེགས་ཤིང་བལྟ་ན་སྡུག་ལ་མཛེས་པ་སྟེ། བྲིས་ཤིང་ལེགས་པར་བྲིས་པ་ཚོན་སྣ་བརྒྱ་རྩ་གཅིག་གིས་བྲིས་ཏེ། འཇམ་ཞིང་ཤིན་ཏུ་འཇམ་པ་ནི་དཔེར་ན་ཤིང་བལ་གྱི་འདབ་མ་འམ། རས་བལ་གྱི་འདབ་མ་བཞིན་དུ། རྐང་པ་བཞག་ན་ནི་ནེམས་ཞེས་བྱེད། རྐང་པ་བཏེག་ན་པར་ཞེས་བྱེད་ལ་མེ་ཏོག་མན་ང་ར་བ་དག་གིས་པུས་མོ་ནུབ་པ་ཙམ་དུ་ཁེབས་ཏེ། དེ་ནི་མི་མ་ཡིན་པ་རྣམས་ཀྱི་རླུང་གི་མཐུས་མེ་ཏོག་རྙིང་པ་རྣམས་ནི་འཐོར་གསར་པ་རྣམས་ནི་ལེགས་པར་འགྲེམས་ཏེ་འདི་སྐད་དུ། ཟླ་བའི་བསོད་ནམས་དབང་གི་རྐྱེན་གྱིས་ན། །ཟླ་བའི་གྲོང་ཁྱེར་དག་ན་རླུང་ཆེན་ལྡང༌། །མེ་ཏོག་རྙིང་པ་རྣམས་ནི་འཐོར་བར་བྱེད། །མེ་ཏོག་གསར་པ་རྣམས་ནི་ལེགས་པར་འགྲེམས། །ཞེས་ཀྱང་བྱའོ། །ཟླ་བའི་དཀྱིལ་འཁོར་གྱི་ནང་ན་ལམ་སྲང་ཆུར་དཔག་ཚད་ལྔ་བཅུ། ཞེང་དུ་དཔག་ཚད་ཕྱེད་དང་གཉིས་པ་ཅིག་ཡོད་དེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ། གསེར་གྱི་བྱེ་མ་བདལ་ཞིང་ཙནྡན་གྱི་ཆུས་ཆག་ཆག་བཏབ་པ། དེའི་གློ་གཡས་གཡོན་ན་རྫིང་བུ་བྱས་པ་དག་ཡོད་དེ། རྫིང་བུ་དེ་དག་ཀྱང་གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པའི་ཕ་གུ་རྣམ་པ་བཞིས་བརྩིགས་སོ། །རྫིང་བུ་དེ་དག་གི་ཕྱོགས་བཞི་ན་ཡང་ཐེམ་སྐས་བྱས་པ་དག་ཡོད་དོ། །ཐེམ་སྐས་བྱས་པ་དག་ཀྱང་གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པའི་ཕ་གུ་རྣམ་པ་བཞིས་བརྩིགས་སོ། །རྫིང་བུ་དེ་དག་ཀྱང་གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པའི་ལན་ཀན་རྣམ་པ་བཞིས་ཀུན་ནས་བསྐོར་ཏེ། གསེར་

---

^{[མ་དཔེ་གཟིགས་ན་འདིར་གནོན།]}

གྱི་ལན་ཀན་གྱི་གཏན་མ་དང༌། གདང་བུ་དང༌། གཟུངས་གཟེར་ནི་དངུལ་ལས་བྱས་པ་དང༌། དངུལ་གྱི་ནི་གསེར་ལས་བྱས་སོ། །བཻ་ཌཱུཪྻའི་ནི་ཤེལ་ལས་བྱས་སོ། །ཤེལ་གྱི་ནི་གཏན་མ་དང༌། གདང་བུ་དང༌། གཟུངས་གཟེར་ནི་བཻ་ཌཱུཪྻ་ལས་བྱས་ཏེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ། ཆུ་བསིལ་བ་དང༌། ཆུ་སྦྲང་རྩི་ལྟ་བུས་གང་བ་སྟེ། མེ་ཏོག་ཨུཏྤ་ལ་དང༌། པདྨ་དང༌། ཀུ་མུ་ཏ་དང༌། པདྨ་དཀར་པོས་ཡོངས་སུ་ཁེབས་ཤིང་ཆུ་ནས་སྐྱེས་པའི་བྱ་སྣ་ཚོགས་སྐད་སྙན་ཅིང་འཇེབས་པ་དང༌། སྐད་ཡིད་དུ་འོང་བ་དང༌། སྐད་སྙན་པ་དང༌། འདོད་དགུར་སྒྱུར་བའི་གཟུགས་ཅན་རྣམས་སྐད་སྙན་པ་འབྱིན་ཏོ། །དེ་དག་གི་ཉེ་འཁོར་ན་མེ་ཏོག་གི་ཤིང་དང༌། འབྲས་བུའི་ཤིང་སྣ་ཚོགས་ཡོད་པ་རྣམས་ལེགས་པར་སྐྱེས་ཤིང་དབྱིབས་ལེགས་ལ་ཡོངས་སུ་གྲུབ་པ་སྟེ། མེ་ཏོག་ཕྲེང་བར་བཀོད་པ་བཞིན་དུ་གྱུར་པ་ནི་དཔེར་ན་མེ་ཏོག་ཕྲེང་རྒྱུད་དམ། མེ་ཏོག་ཕྲེང་རྒྱུད་ཀྱི་སློབ་མ་མཁས་པས་མེ་ཏོག་གི་ཕྲེང་བ་ཐ་གུ་ལ་བརྒྱུས་པ་དང༌། མེ་ཏོག་གི་རྣ་རྒྱན་ལེགས་པར་བྱས་པ་བཞིན་ཏེ། ཐང་ལས་སྐྱེས་པའི་བྱ་སྣ་ཚོགས་སྐད་སྙན་ཅིང་འཇེབས་པ་དང༌། སྐད་ཡིད་དུ་འོང་བ་དང༌། སྐད་སྙན་པ་དང༌། འདོད་དགུར་སྒྱུར་བའི་གཟུགས་ཅན་རྣམས་སྐད་སྙན་པ་འབྱིན་ཏོ། །དཔག་བསམ་གྱི་ཤིང་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དོ། །གཞག་གོས་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དོ། །དཔག་བསམ་གྱི་ཤིང་ལས་བྱུང་བའི་གོས་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དོ། །རོལ་མོའི་ཆ་བྱད་སྣ་ཚོགས་པི་ཝང་དང༌། གླིང་བུ་དང༌། པི་ཝང་རྒྱུད་གསུམ་པ་དང༌། འཁར་རྔ་དང༌། ཧམ་ཤང་རྣམས་འབྱུང་བའི་ཤིང་དག་ཡོད་དོ། །རྒྱན་སྣ་ཚོགས་ལག་རྒྱན་དང༌། རྐང་རྒྱན་དང༌། རྒྱན་སྣང་བ་དང༌། མི་སྣང་བ་རྣམས་འབྱུང་བའི་ཤིང་དག་ཡོད་དོ། །ལྷ་དང་ལྷའི་བུ་མོ་རྣམས་ཀྱིས་ཇི་ལྟ་བུར་འདོད་པ་སེམས་བསྐྱེད་མ་ཐག་ཏུ་དེ་ལྟ་བུར་དེ་དག་གི་ལག་ཏུ་འོང་བར་འགྱུར་རོ། །བདུད་རྩི་རྣམ་པ་བཞི་དང༌། སྦྲང་རྩི་དང་སྦྲང་ཆང་གི་བཏུང་བ་

---

^{[མ་དཔེ་གཟིགས་ན་འདིར་གནོན།]}

དག་ཀྱང་ཡོད་དོ། །ཡང་ཐོག་རྣམས་དང༌། ཁང་པ་བརྩེགས་པ་རྣམས་དང༌། ཁྱིམ་རྣམས་དང༌། ཁང་བཟངས་རྣམས་དང༌། བསིལ་ཁང་རྣམས་དང༌། ལྟད་མོ་བལྟ་བའི་གནས་རྣམས་དང༌། ཟམ་པ་རྣམས་བུད་མེད་ཀྱི་ཚོགས་ཀྱིས་མཛེས་པར་བྱས་ཤིང་ལྷའི་བུ་མོ་མང་པོས་བརྟེན་པ་དང༌། སིལ་སྙན་དང༌། ཕེག་རྡོབ་པ་རྣམས་ཀྱི་སྒྲ་སྙན་པར་སྒྲོགས་པ་དང༌། དྲི་སྣ་ཚོགས་ཀྱིས་ལེགས་པར་བསྒོས་པ་དང༌། ཁ་ཟས་དང༌། བཏུང་བ་དང་ལྡན་པ་དག་ཡོད་དོ། །དེ་ནི་ལྷའི་བུ་ཟླ་བ་འཁོར་དང་བཅས་པ་རྩེ་ཞིང་དགའ་ལ་དགའ་དགུར་སྤྱོད་དེ། རང་གི་ལས་ཀྱི་འབྲས་བུ་ཉམས་སུ་མྱོང་ངོ༌། །ཉི་མའི་དཀྱིལ་འཁོར་གྱི་ཚད་ནི་ཇི་ཙམ་ཞེ་ན། སྨྲས་པ། ཉི་མའི་དཀྱིལ་འཁོར་ནི་ཆུར་དཔག་ཚད་ལྔ་བཅུ་རྩ་གཅིག །ཞེང་དུ་ཡང་དཔག་ཚད་ལྔ་བཅུ་རྩ་གཅིག །མཐའ་སྐོར་དུ་དཔག་ཚད་ལྔ་བཅུ་རྩ་གསུམ། རྔམས་སུ་དཔག་ཚད་ཕྱེད་དང་དྲུག་དང་དཔག་ཚད་ཀྱི་བཅོ་བརྒྱད་ཆ་གཅིག་ཡོད་དེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་ཤེལ་ལས་གྲུབ་པ་སྟེ། གསེར་གྱི་རབས་ཀུན་ནས་བསྐོར་ཏེ། ར་བ་དེའི་འཕང་དུ་ཡང་དཔག་ཚད་ཕྱེད་ཡོད་ལ་ར་བ་དེའི་རྩིག་སྐྱབས་འདི་ལྟ་སྟེ། གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པ་རྣམ་པ་བཞི་དང༌། གྱེན་དུ་འཕང་བའི་མདའ་ཡབ་དང༌། ཐུར་དུ་འཕང་བའི་མདའ་ཡབ་དང༌། ཟམ་པ་བརྒྱུད་མ་རྣམ་པ་བཞི་དག་ཡོད་དོ། །དེའི་ནང་གིས་གཞི་དབྱིབས་ལེགས་ཤིང་བལྟ་ན་སྡུག་ལ་མཛེས་པ་སྟེ། བྲིས་ཤིང་ལེགས་པར་བྲིས་པ་ཚོན་སྣ་བརྒྱ་རྩ་གཅིག་གིས་བྲིས་ཏེ། འཇམ་ཞིང་ཤིན་ཏུ་འཇམ་པ་ནི་དཔེར་ན་ཤིང་བལ་གྱི་འདབ་མ་འམ། རས་བལ་གྱི་འདབ་མ་བཞིན་ཏེ། རྐང་པ་བཞག་ན་ནི་ནེམས་ཞེས་བྱེད། རྐང་པ་བཏེག་ན་ནི་པར་ཞེས་བྱེད་ལ། མེ་ཏོག་མན་ད་ར་བ་དག་གིས་པུས་མོ་ནུབ་པ་ཙམ་དུ་ཁེབས་ཏེ། དེ་ན་མི་མ་ཡིན་པ་རྣམས་ཀྱི་རླུང་གི་མཐུས་མེ་ཏོག་རྙིང་པ་རྣམས་ནི་འདོར། མེ་ཏོག་གསར་པ་རྣམས་ནི་ལེགས་པར་འགྲེམས་ཏེ། འདི་སྐད་དུ། ཉི་མའི་དཀྱིལ་འཁོར་དབང་གི་རྐྱེན་གྱིས་ན། །ཉི་མའི་གྲོང་ཁྱེར་དག་ན་རླུང་ཆེན་ལྡང༌། །མེ་ཏོག་རྙིང་པ་རྣམས་ནི་འདོར་

---

^{[མ་དཔེ་གཟིགས་ན་འདིར་གནོན།]}

བར་བྱེད། །མེ་ཏོག་གསར་པ་རྣམས་ནི་ལེགས་པར་འགྲེམས། །ཞེས་ཀྱང་བྱའོ། །ཉི་མའི་དཀྱིལ་འཁོར་གྱི་ནང་ན་ལམ་སྲང་ཆུར་དཔག་ཚད་ལྔ་བཅུ་རྩ་གཅིག །ཞེང་དུ་དཔག་ཚད་ཕྱེད་དང་གཉིས་པ་ཞིག་ཡོད་དེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་གསེར་གྱི་བྱེ་མ་བདལ་ཞིང་ཙནྡན་གྱི་ཆུས་ཆག་ཆག་བཏབ་པ། དེའི་གློ་གཡས་གཡོན་ན་རྫིང་བུ་བྱས་པ་དག་ཡོད་དེ། རྫིང་བུ་དེ་དག་ཀྱང་གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པའི་ཕ་གུ་རྣམ་པ་བཞིས་བརྩིགས་སོ། །རྫིང་བུ་དེ་དག་གི་ཕྱོགས་བཞིན་ཡང་ཐེམ་སྐས་བྱས་པ་དག་ཡོད་དེ། ཐེམ་སྐས་དེ་དག་ཀྱང་གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པའི་ཕ་གུ་རྣམ་པ་བཞིས་བརྩིགས་སོ། །རྫིང་བུ་དེ་དག་ཀྱང་གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པའི་ལན་ཀན་རྣམ་པ་བཞིས་ཀུན་ནས་བསྐོར་ཏེ། གསེར་གྱི་ལན་ཀན་གྱི་གཏན་མ་དང༌། གདང་བུ་དང༌། གཟུངས་གཟེར་ནི་དངུལ་ལས་བྱས་སོ། །དངུལ་གྱི་ནི་གསེར་ལས་བྱས་སོ། །བཻ་ཌཱུཪྻའི་ཤེལ་ལས་བྱས་སོ། །ཤེལ་གྱི་ནི་གཏན་མ་དང༌། གདང་བུ་དང༌། གཟུངས་གཟེར་ནི་བཻ་ཌཱུཪྻ་ལས་བྱས་སོ། །དབྱིབས་ལེགས་ཤིང་བལྟ་ན་སྡུག་ལ་མཛེས་པ། ཆུ་བསིལ་བ་དང༌། ཆུ་སྦྲང་རྩི་ལྟ་བུས་གང་བ་སྟེ། མེ་ཏོག་ཨུཏྤ་པ་ལ་དང༌། པདྨ་དང༌། ཀུ་མུ་ཏ་དང༌། པདྨ་དཀར་པོས་ཡོངས་སུ་ཁེབས་ཏེ། ཆུ་ལས་སྐྱེས་པའི་བྱ་སྣ་ཚོགས་སྐད་སྙན་ཅིང་འཇེབས་པ་དང༌། སྐད་ཡིད་དུ་འོང་བ་དང༌། སྐད་སྙན་པ་དང༌། འདོད་དགུར་སྒྱུར་བའི་གཟུགས་ཅན་རྣམས་སྐད་སྙན་པ་འབྱིན་ཏོ། །དེ་དག་གི་ཉེ་འཁོར་ན་མེ་ཏོག་གི་ཤིང་དང་འབྲས་བུའི་ཤིང་སྣ་ཚོགས་ཡོད་པ་རྣམས་ལེགས་པར་སྐྱེས་ཤིང་དབྱིབས་ལེགས་ལ་ཡོངས་སུ་གྲུབ་པ་སྟེ། མེ་ཏོག་ཕྲེང་བར་བཀོད་པ་བཞིན་དུ་གྱུར་པ་ནི་དཔེར་ན་མེ་ཏོག་ཕྲེང་རྒྱུད་དམ། མེ་ཏོག་ཕྲེང་རྒྱུད་ཀྱི་སློབ་མ་མཁས་པས་མེ་ཏོག་གི་ཕྲེང་བ་ཐ་གུ་ལ་བརྒྱུས་པ་དང༌། མེ་ཏོག་གི་རྣ་རྒྱན་ལེགས་པར་བྱས་པ་བཞིན་ཏེ། ཐང་ལས་

---

^{[མ་དཔེ་གཟིགས་ན་འདིར་གནོན།]}

སྐྱེས་པའི་བྱ་སྣ་ཚོགས་སྐད་སྙན་ཅིང་འཇེབས་པ་དང༌། སྐད་ཡིད་དུ་འོང་བ་དང༌། སྐད་སྙན་པ་དང༌། འདོད་དགུར་སྒྱུར་བའི་གཟུགས་ཅན་རྣམས་སྐད་སྙན་པ་འབྱིན་ཏོ། །དཔག་བསམ་གྱི་ཤིང་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དོ། །གཞག་གོས་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམས་པ་བཞི་ཡོད་དོ། །དཔག་བསམ་གྱི་ཤིང་ལས་བྱུང་བའི་གོས་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དོ། །རོལ་མོའི་ཆ་བྱད་རྣམ་པ་སྣ་ཚོགས་པའི་པི་ཝང་དང༌། གླིང་བུ་དང༌། པི་ཝང་རྒྱུད་གསུམ་པ་དང༌། འཁར་རྔ་དང༌། ཧམ་ཤང་རྣམས་འབྱུང་བའི་ཤིང་དག་ཡོད་དོ། །རྒྱན་སྣ་ཚོགས་ལག་རྒྱན་དང༌། རྐང་རྒྱན་དང༌། རྒྱན་སྣང་བ་དང༌། མི་སྣང་བ་རྣམས་འབྱུང་བའི་ཤིང་དག་ཡོད་དོ། །ལྷ་འམ་ལྷའི་བུ་མོ་རྣམས་ཀྱིས་ཇི་ལྟ་བུར་འདོད་པ་སེམས་བསྐྱེད་མ་ཐག་ཏུ། དེ་ལྟ་བུར་དེ་དག་གི་ལག་ཏུ་འོང་བར་འགྱུར་རོ། །བདུད་རྩི་རྣམ་པ་བཞི་དང༌། སྤྲང་རྩི་དང་སྦྲང་ཆང་གི་བཏུང་བ་དག་ཀྱང་ཡོད་དོ། །ཡང་ཐོག་རྣམས་དང༌། ཁང་པ་བརྩེགས་པ་རྣམས་དང༌། ཁྱིམ་རྣམས་དང༌། ཁང་བཟངས་རྣམས་དང༌། བསིལ་ཁང་རྣམས་དང༌། ལྟད་མོ་ལྟ་བའི་ས་དང༌། ཟམ་པ་རྣམས་དང༌། བུད་མེད་ཀྱི་ཚོགས་ཀྱིས་མཛེས་པར་བྱས་ཤིང་ལྷའི་བུ་མོ་མང་པོས་བརྟེན་པ་དང༌། སིལ་སྙན་དང༌། ཕེབ་རྡོབ་པ་དག་གི་སྒྲ་སྙན་པ་སྒྲོགས་པ་དང༌། དྲི་སྣ་ཚོགས་ཀྱིས་ལེགས་པར་བསྒོས་པ་དང༌། ཁ་ཟས་དང་བཏུང་བ་དང་ལྡན་བ་དག་ཡོད་དེ། དེ་ན་ལྷའི་བུ་ཉི་མ་འཁོར་དང་བཅས་པ་རྩེ་ཞིང་དགའ་ལ་དགའ་དགུར་སྤྱོད་དེ། རང་གི་ལས་ཀྱི་འབྲས་བུ་ཉམས་སུ་མྱོང་ངོ༌། །སྐར་མའི་གཟུགས་རྣམས་ཀྱི་ཚད་ནི་ཇི་ཙམ་ཞེ་ན། སྨྲས་པ། སྐར་མའི་གཟུགས་རྣམས་ལ་ཐམས་ཅད་ཀྱི་ནང་ན་ཆེ་བ་གང་ཡིན་པ་དེ་ནི་རྒྱང་གྲངས་བཅོ་བརྒྱད་པའོ། །ཐམས་ཅད་ཀྱི་ནང་ན་ཆུང་པ་གང་ཡིན་པ་དེ་དག་ནི་རྒྱང་གྲགས་གསུམ་མོ། །ཕལ་ཆེར་ནི་རྒྱང་གྲགས་བཅུ་དང་བཅུ་གཉིས་པ་ཡིན་ཏེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་ཤེལ་ལས་གྲུབ་པ་སྟེ། གསེར་གྱི་ར་བས་ཀུན་ནས་བསྐོར་ཏོ། །ར་བ་དེ་ལ་རྩིག་སྐྱབས་གསེར་ལས་བྱས་པ་དང༌། དངུལ་ལས་བྱས་པ་

---

^{[མ་དཔེ་གཟིགས་ན་འདིར་གནོན།]}

དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པ་རྣམ་པ་བཞི་དང༌། མདའ་ཡབ་དང༌། ལྟད་མོ་ལྟ་བའི་ས་རྣམ་པ་བཞི་ཡོད་དོ། །དེའི་ནང་གིས་གཞི་ཡང་དབྱིབས་ལེགས་ཤིང་བལྟ་ན་སྡུག་ལ་མཛེས་པར་བྲིས་ཤིང་ལེགས་པར་བྲིས་པ་ཚོན་སྣ་བརྒྱ་རྩ་གཅིག་གིས་བྲིས་ཏེ། འཇམ་ཞིང་ཤིན་ཏུ་འཇམ་པ་ནི་དཔེར་ན་ཤིང་བལ་གྱི་འདབ་མ་འམ། རས་བལ་གྱི་འདབ་མ་བཞིན་ཏེ། རྐང་པ་བཞག་ན་ནི་ནེམས་ཞེས་བྱེད། རྐང་པ་བཏེག་ན་ནི་པར་ཞེས་བྱེད་ལ། མེ་ཏོག་མན་ད་ར་བ་དག་གིས་པུས་མོ་ནུབ་པ་ཙམ་དུ་ཁེབས་ཏེ། རླུང་གི་མཐུས་མེ་ཏོག་རྙིང་པ་རྣམས་ནི་འཐོར། མེ་ཏོག་གསར་པ་རྣམས་ནི་ལེགས་པར་འགྲེམས་ཏེ་འདི་སྐད་དུ། ལྷ་རྣམས་བསོད་ནམས་དབང་གི་རྐྱེན་གྱིས་ན། །གཞལ་མེད་ཁང་མཆོག་དག་ན་རླུང་ཆེན་ལྡང༌། །མེ་ཏོག་རྙིང་པ་རྣམས་ནི་འཐོར་བར་བྱེད། །མེ་ཏོག་གསར་པ་རྣམས་ནི་ལེགས་པར་འགྲེམས། །ཞེས་ཀྱང་བྱའོ། །དེ་དག་གི་ནང་ན་རྫིང་བུ་བྱས་པ་དག་ཡོད་དེ། རྫིང་བུ་དེ་དག་ཀྱང་གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པའི་ཕ་གུ་རྣམ་པ་བཞིས་བརྩིགས་སོ། །རྫིང་བུ་དེ་དག་གི་ཕྱོགས་བཞིན་ཡང་ཐེམ་སྐས་བྱས་པ་དག་ཡོད་དེ། ཐེམ་སྐས་དེ་དག་ཀྱང་གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པའི་ཕ་གུ་རྣམ་པ་བཞིས་བརྩིགས་སོ། །རྫིང་བུ་དེ་དག་ཀྱང་གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པའི་ལན་ཀན་རྣམ་པ་བཞིས་ཀུན་ནས་བསྐོར་ཏེ། གསེར་གྱི་ལན་ཀན་གྱི་གཏན་མ་དང༌། གདང་བུ་དང༌། གཟུངས་གཟེར་ནི་དངུལ་ལས་བྱས་སོ། །དངུལ་གྱི་ནི་གསེར་ལས་བྱས་སོ། །བཻ་ཌཱུཪྻའི་ནི་ཤེལ་ལས་བྱས་སོ། །ཤེལ་གྱི་གཏན་མ་དང༌། གདང་བུ་དང༌། གཟུངས་གཟེར་ནི་བཻ་ཌཱུཪྻ་ལས་བྱས་ཏེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ། ཆུ་བསིལ་བ་དང༌། ཆུ་སྦྲང་རྩི་ལྟ་བུས་གང་བ་སྟེ། མེ་ཏོག་ཨུཏྤ་ལ་དང༌། པདྨ་དང༌། ཀུ་མུ་དང༌། པདྨ་དཀར་པོས་ཡོངས་སུ་ཁེབས་ཤིང༌། ཆུ་ནས་སྐྱེས་པའི་བྱ་སྣ་ཚོགས་སྐད་སྙན་ཅིང་འཇེབས་པ་

---

^{[མ་དཔེ་གཟིགས་ན་འདིར་གནོན།]}

དང། སྐད་ཡིད་དུ་འོང་བ་དང༌། སྐད་སྙན་པ་དང༌། འདོད་དགུར་སྒྱུར་བའི་གཟུགས་ཅན་རྣམས་སྐད་སྙན་པ་འབྱིན་ཏོ། །དེ་དག་གི་ཉེ་འཁོར་ན་མེ་ཏོག་གི་ཤིང་དང་འབྲས་བུའི་ཤིང་སྣ་ཚོགས་ཡོད་པ་རྣམས་ལེགས་པར་སྐྱེས་ཤིང་དབྱིབས་ལེགས་པ་ཡོངས་སུ་གྲུབ་པ་སྟེ། མེ་ཏོག་ཕྲེང་བར་བཀོད་པ་བཞིན་དུ་གྱུར་པ་ནི་དཔེར་ན་མེ་ཏོག་ཕྲེང་རྒྱུད་དམ། མེ་ཏོག་ཕྲེང་རྒྱུད་ཀྱི་སློབ་མ་མཁས་པས་མེ་ཏོག་གི་ཕྲེང་བ་ཐ་གུ་ལ་བརྒྱུས་པ་དང༌། མེ་ཏོག་གི་རྣ་རྒྱན་ལེགས་པར་བྱས་པ་འབྱིན་ཏེ། ཐང་ལས་སྐྱེས་པའི་བྱ་སྣ་ཚོགས་སྐད་སྙན་ཅིང་འཇེབས་པ་དང༌། སྐད་ཡིད་དུ་འོང་བ་དང༌། སྐད་སྙན་པ་དང༌། འདོད་དགུར་སྒྱུར་བའི་གཟུགས་ཅན་རྣམས་སྐད་སྙན་པ་འབྱིན་ཏོ། །དཔག་བསམ་གྱི་ཤིང་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་སྟེ། རྒྱས་པར་སྔ་མ་བཞིན་ནོ། །དེ་དག་ན་གཞལ་མེད་ཁང་ན་གནས་པའི་ལྷའི་བུ་རྣམས་རྩེ་ཞིང་དགའ་ལ་དགའ་དགུར་སྤྱོད་དེ། རང་གི་ལས་ཀྱི་འབྲས་བུ་ཉམས་སུ་མྱོང་ངོ༌། །ཉི་མས་ཟླ་བ་དྲུག་ཏུ་བགྲོད་པ་གང་ཡིན་པ་དེ་ནི་ཟླ་བས་ཟླ་བ་གཅིག་ལ་འགྲོ་བ་དང་འོང་བར་བྱེད་དོ། །ཅིའི་ཕྱིར་ཉི་མའི་དཀྱིལ་འཁོར་ལ་བལྟས་ན་མིག་ལ་གནོད་པར་འགྱུར་ལ། ཟླ་བའི་དཀྱིལ་འཁོར་ལ་བལྟས་ན་ནི་མིག་ལ་གནོད་པར་མི་འགྱུར་ཞེ་ན། སྨྲས་པ། ཟླ་བའི་དཀྱིལ་འཁོར་ནི་ཆུ་ཤེལ་ཡང་ཡིན་ཞིང༌། ཤེལ་དང་བ་ཡང་ཡིན་ལ། ཉི་མའི་དཀྱིལ་འཁོར་ནི་མེ་ཤེལ་ཡིན་པས་དེའི་ཕྱིར་ན་ཉི་མའི་དཀྱིལ་འཁོར་ལ་བལྟས་ན་ནི་མིག་ལ་གནོད་པར་འགྱུར་ལ། ཟླ་བའི་དཀྱིལ་འཁོར་ལ་བལྟས་ན་ནི་གནོད་པར་མི་འགྱུར་རོ། །འཇིག་རྟེན་གཞག་པ་ལས་ཚིགས་དགུ་པའོ།། །།མདོ་ལ། འབྱུང་བ་ཆེན་པོར་འདུ་ཤེས་དང༌། །བདག་ཏུ་ཡང་ནི་འདུ་ཤེས་པ། །ནམ་མཁའ་ལ་ནི་སར་འདུ་ཤེས། །དུས་ནི་གཉིས་སུ་བྱས་པ་དང༌། །སྐད་ཅིག་པ་ནི་ཐ་མ་ཡིན། །འབྱུང་བ་ཆེན་པོ་བཞི་ནི་སའི་ཁམས་དང༌། ཆུའི་ཁམས་དང༌། མེའི་ཁམས་དང༌། རླུང་གི་ཁམས་དང༌། སེམས་ཅན་ས་ལ་སར་འདུ་ཤེས་པ་དག་ཀྱང་ཡོད། ཆུར་འདུ་ཤེས་པ་དག་ཀྱང་ཡོད། མེར་འདུ་ཤེས་པ་དག་ཀྱང་ཡོད། རླུང་དུ་འདུ་ཤེས་པ་དག་ཀྱང་ཡོད། སེམས་ཅན་ཆུ་ལ་སར་འདུ་ཤེས་པ་དག་ཀྱང་ཡོད། ཆུར་འདུ་ཤེས་

---

^{[མ་དཔེ་གཟིགས་ན་འདིར་གནོན།]}

པ་དག་ཀྱང་ཡོད། མེར་འདུ་ཤེས་པ་དག་ཀྱང་ཡོད། རླུང་དུ་འདུ་ཤེས་པ་དག་ཀྱང་ཡོད་དོ། །སེམས་ཅན་མེ་ལ་སར་འདུ་ཤེས་པ་དག་ཀྱང་ཡོད། ཆུར་འདུ་ཤེས་པ་དག་ཀྱང་ཡོད། མེར་འདུ་ཤེས་པ་དག་ཀྱང་ཡོད། རླུང་དུ་འདུ་ཤེས་པ་དང་ཀྱང་ཡོད་དོ། །སེམས་ཅན་རླུང་ལ་སར་འདུ་ཤེས་པ་དག་ཀྱང་ཡོད། ཆུར་འདུ་ཤེས་པ་དག་ཀྱང་ཡོད། མེར་འདུ་ཤེས་པ་དག་ཀྱང་ཡོད། རླུང་དུ་འདུ་ཤེས་པ་དག་ཀྱང་ཡོད་དོ། །སེམས་ཅན་ས་ལ་བདག་ཏུ་འདུ་ཤེས་པ་དག་ཀྱང་ཡོད། ཆུར་འདུ་ཤེས་པ་དག་ཀྱང་ཡོད། མེར་འདུ་ཤེས་པ་དག་ཀྱང་ཡོད། རླུང་དུ་འདུ་ཤེས་པ་དག་ཀྱང་ཡོད་དོ། །སེམས་ཅན་ས་ལ་བདག་ཏུ་འདུ་ཤེས་པ་དག་ཀྱང་ཡོད་དེ། སའི་ཁམས་གང་ཡིན་པ་དེ་ནི་བདག་ཡིན་ལ། བདག་གང་ཡིན་པ་དེ་ནི་ས་ཡིན་ཏེ། དེ་ལྟར་ས་དང་བདག་གཉིས་སུ་དབྱེར་མེད་ཅིང་ཐ་དད་པ་མ་ཡིན་ཏེ། བདག་གི་བདག་ནི་རྫོགས་པ་ཡིན་ནོ་ཞེས་ནས་དེ་དག་ས་ལ་བཀུར་སྟིར་བྱེད། བཙུན་པར་བྱེད། རི་མོར་བྱེད། མཆོད་པར་བྱེད་དོ། །དེ་དག་གིས་བཀུར་སྟིར་བྱས། བཙུན་པར་བྱས། རི་མོར་བྱས་སོ། །མཆོད་པར་བྱས་ནས། དགའ་ཞིང་མགུ་ལ་ཡི་རངས་ཏེ། བཀུར་སྟིར་བྱེད་ཅིང་ཉེ་བར་བརྟེན་ཏེ། གནས་ལ་སེམས་ཀྱིས་ལུང་བསྟན་པ་ཡིན་ནོ། །སེམས་ཅན་ཆུ་དང་མེ་དང་རླུང་ལ་བདག་ཏུ་འདུ་ཤེས་པ་དག་ཀྱང་ཡོད་དེ། རླུང་གང་ཡིན་པ་དེ་ནི་བདག་ཡིན་ལ། བདག་གང་ཡིན་པ་དེ་ནི་རླུང་ཡིན་ཏེ། དེ་ལྟར་རླུང་དང་བདག་གཉིས་སུ་དབྱེར་མེད་ཅིང་ཐ་དད་པ་མ་ཡིན་ཏེ། བདག་གིས་བདག་ནི་རྫོགས་པ་ཡིན་ནོ་ཞེས་ནས་དེ་དག་རླུང་ལས་བཀུར་སྟིར་བྱེད། བཙུན་པར་བྱེད། རི་མོར་བྱེད། མཆོད་པར་བྱེད་དོ། །དེ་དག་གིས་བཀུར་སྟིར་བྱས། བཙུན་པར་བྱས། རི་མོར་བྱས། མཆོད་པར་བྱས་ནས་དགའ་ཞིང་མགུ་ལ་ཡི་རངས་ཏེ། བཀུར་སྟིར་བྱེད་ཅིང་ཉེ་བར་བརྟེན་ཏེ་གནས་ལ་སེམས་ཀྱིས་ལུང་བསྟན་པ་ཡིན་ནོ། །སེམས་ཅན་ས་ལ་ནམ་མཁར་འདུ་ཤེས་པ་དག་ཀྱང་ཡོད་དོ། །ས་ལ་ནམ་མཁར་འདུ་ཤེས་པ་ཇི་ལྟར་བུ་ཞེ་ན། །ས་ལ་ནམ་མཁར་འདུ་ཤེས་པ་ཇི་ལྟར་བུ་ཞེ་ན། ཏིལ་རྨེད་པའི་མི་ལ་ལ་ཞིག་གིས་ཁྲོན་པ་བརྐོ་བའི་མི་འགའ་ཞིག་ལ་འདི་སྐད་དུ། ཀྱེ་སྡོང་པོ་མེ་རེག་མ་དང་འདྲ་

---

^{[མ་དཔེ་གཟིགས་ན་འདིར་གནོན།]}

བའི་མི་གླང་མཐོང་ངམ་ཞེས་སྨྲས་སོ། །དེས་སྨྲས་པ། མ་མཐོང་ངོ༌། །ཏིལ་ཟ་འམ་མི་ཟ། སྨྲས་པ་མི་ཟའོ་ཞེས་སོ། །དེ་ལྟར་ན་ས་ལ་ནམ་མཁར་འདུ་ཤེས་པ་ཡིན་ནོ། །ཇི་ལྟར་ན་ནམ་མཁའ་ལ་སར་འདུ་ཤེས་ཤེ་ན། སྨྲས་པ། ཇི་ལྟར་བྲམ་ཟེ་ལ་ལ་ཞིག་བོང་བུའི་ཤིང་རྟས་སོང་ནས་བོང་བུའི་ཤིང་རྟ་ལས་བབས་ཏེ། བོང་བུའི་ཤིང་རྟ་ཕུར་བུ་ལ་བཏགས་ནས་ཕུར་བུ་ནམ་མཁའ་ལ་བཏབ་ཏེ། བཙུགས་ནས་མགོ་ལ་བས་དཀྲིས་ཏེ། ས་ལ་གན་རྐྱལ་དུ་ཉལ་བ་དེ་བཞིན་དུ་ནམ་མཁའ་ལ་སང་འདུ་ཤེས་པ་ཡིན་ནོ། །ལོ་གཅིག་ལ་དུས་གཅིག་ཏུ་མཚན་མོ་ནི་ཡུད་ཙམ་བཅོ་བརྒྱད། ཉིན་མོ་ནི་ཡུད་ཙམ་བཅུ་གཉིས་ཡོད་དོ། །ལོ་གཅིག་ལ་དུས་གཅིག་ཏུ་མཚན་མོ་ནི་ཡུད་ཙམ་བཅོ་བརྒྱད། ཉིན་མོ་ནི་ཡུད་ཙམ་བཅུ་གཉིས་པ་དེ་གང་ཞེ་ན། དགུ་ན་ཟླ་ཐ་ཆུངས་ཡར་གྱི་ངོ་ཚེས་བརྒྱད་ལ་མཚན་མོ་ནི་ཡུད་ཙམ་བཅོ་བརྒྱད། ཉིན་མོ་ནི་ཡུད་ཙམ་བཅུ་གཉིས་ཡོད་དོ། །ཚེས་དགུ་ཕན་ཆད་ནི་མཚན་མོ་ནི་འབྲི། ཉིན་མོ་ནི་སྐྱེ་སྟེ། མཚན་མོ་ནི་ཐང་ཅིག་རེ་རེས་འབྲིའོ། །ཉིན་མོ་ནི་ཐང་ཅིག་རེ་རེས་སྐྱེའོ། །ལོ་གཅིག་ལ་དུས་གཅིག་ཏུ་ཉིན་མོ་ནི་ཡུད་ཙམ་བཅོ་བརྒྱད། མཚན་མོ་ནི་ཡུད་ཙམ་བཅུ་གཉིས་ཡོད་དེ། ལོ་གཅིག་ལ་དུས་གཅིག་ཏུ་ཉིན་མོ་ནི་ཡུད་ཙམ་བཅོ་བརྒྱད། མཚན་མོ་ནི་ཡུད་ཙམ་བཅུ་གཉིས་པ་དེ་གང་ཞེ་ན། སྨྲས་པ། སྟོན་ཟླ་བ་ཡར་གྱི་ངོ་ཚེས་བརྒྱད་ལ་ཉིན་མོ་ནི་ཡུད་ཙམ་བཅོ་བརྒྱད། མཚན་མོ་ནི་ཡུད་ཙམ་བཅུ་གཉིས་ཡོད་དོ། །ཚེས་དགུ་པན་ཆད་ནི་ཉིན་མོ་འབྲི། མཚན་མོ་ནི་སྐྱེ་སྟེ། ཉིན་མོ་ནི་ཐང་ཅིག་རེ་རེས་འབྲིའོ། །མཚན་མོ་ནི་ཐང་ཅིག་རེ་རེས་སྐྱེའོ། །ལོ་གཅིག་ལ་དུས་གཉིས་སུ་མཚན་མོ་ཡང་ཡུད་ཙམ་བཅོ་ལྔ། ཉིན་མོ་ལ་ཡང་ཡུད་ཙམ་བཅོ་ལྔ་པ་ཡོད་དེ། ལོ་གཅིག་ལ་དུས་གཉིས་སུ་མཚན་མོ་ཡང་ཡུད་ཙམ་བཅོ་ལྔ། ཉིན་མོ་ཡང་ཡུད་ཙམ་བཅོ་ལྔ་པ་དེ་དག་གང་ཞེ་ན། སྨྲས་པ། དཔྱིད་ཟླ་ཐ་ཆུངས་ཡར་གྱི་ངོ་ཚེས་བརྒྱད་དང་སྟོན་ཟླ་ཐ་ཆུངས་ཡར་གྱི་ངོ་ཚེས་བརྒྱད་ལ་མཚན་མོ་ཡང་ཡུད་ཙམ་བཅོ་ལྔ། ཉིན་མོ་ཡང་ཡུད་ཙམ་བཅོ་ལྔ་ཡོད་དོ། །ཆོས་བཞི་ཡོད་དེ། བཞི་གང་ཞེ་ན། སྐད་ཅིག་དང༌། དེའི་སྐད་ཅིག་དང༌། ཐང་ཅིག་དང༌། ཡུད་ཙམ་རྣམས་སོ། །སྐད་ཅིག་བརྒྱ་

---

^{[མ་དཔེ་གཟིགས་ན་འདིར་གནོན།]}

ཉི་ཤུ་ལ་ནི་དེའི་སྐད་ཅིག་གོ །དེའི་སྐད་ཅིག་དྲུག་ཅུ་ལ་ནི་ཐང་ཅིག་གོ །ཐང་ཅིག་སུམ་ཅུ་ལ་ནི་ཡུད་ཙམ་ཅིག་གོ །ཡུད་ཙམ་སུམ་ཅུ་ལ་ནི་ཉིན་ཞག་གཅིག་གོ །ཉིན་ཞག་སུམ་ཅུའི་ཆ་གཅིག་ནི་ཡུད་ཙམ་གཅིག་གོ །ཡུད་ཙམ་གྱི་སུམ་ཅུ་ཆ་གཅིག་ནི་ཐང་ཅིག་གོ །ཐང་ཅིག་གི་དྲུག་ཅུ་ཆ་གཅིག་ནི་དེའི་སྐད་ཅིག་གོ །དེའི་སྐད་ཅིག་གི་བརྒྱ་ཉི་ཤུའི་ཆ་གཅིག་གི་སྐད་ཅིག་གོ །སྐད་ཅིག་གི་ཚད་ཇི་ཙམ་ཞེ་ན། འདི་ལྟ་སྟེ། བུད་མེད་བལ་འཁལ་བ་འབྲིང་གིས་ཧ་ཅང་མི་རིང་ཧ་ཅང་མི་ཐུང་བར་བལ་བསྙད་པ་དེ་ཙམ་གྱི་ཡུན་ནི་སྐད་ཅིག་གི་ཚད་ཡིན་ནོ། །དེ་ལྟ་བུའི་སྐད་ཅིག་བརྒྱ་ཉི་ཤུ་ལ་དེའི་སྐད་ཅིག་གོ །དེའི་སྐད་ཅིག་དེ་ལྟ་བུ་དྲུག་ཅུ་ལ་ཐང་ཅིག་གོ །ཐང་ཅིག་དེ་ལྟ་བུ་སུམ་ཅུ་ལ་ཡུད་ཙམ་གཅིག་གོ །ཡུད་ཙམ་དེ་ལྟ་བུ་སུམ་ཅུ་ལ་ཉིན་ཞག་གཅིག་གོ །ཉིན་ཞག་དེ་སུམ་ཅུ་ལ་ཟླ་བ་གཅིག་གོ །ཟླ་བ་བཅུ་གཉིས་ལ་ལོ་གཅིག་གོ །འཇིག་རྟེན་གཞག་པ་ལས་ཚིགས་བཅུ་པའོ།། །།གླེང་གཞི་ནི་ཡུལ་མཉན་དུ་ཡོད་པ་སྟེ། བཅོམ་ལྡན་འདས་ཀྱིས་འདི་སྐད་དུ། བསྐལ་པ་ནི་གྲངས་མེད་པ་བཞི་སྟེ། གྲངས་མེད་པ་དག་གིས་བསྐལ་པ་འཇིག་གོ །གྲངས་མེད་པ་དག་གིས་བསྐལ་པ་ཞིག་པར་གནས་སོ། །གྲངས་མེད་པ་དག་གིས་འཆགས་སོ། །གྲངས་མེད་པ་དག་གིས་བསྐལ་པ་འཆགས་པར་གནས་སོ་ཞེས་གསུངས་སོ། །བར་གྱི་བསྐལ་པ་བརྒྱད་ཅུ་ལ་ནི་བསྐལ་པ་ཆེན་པོ་གཅིག་སྟེ། བར་གྱི་བསྐལ་པ་ཉི་ཤུས་ནི་འཇིག་རྟེན་འཇིག་གོ །བར་གྱི་བསྐལ་པ་ཉི་ཤུས་ནི་འཇིག་རྟེན་ཞིག་པར་གནས་སོ། །བར་གྱི་བསྐལ་པ་ཉི་ཤུས་ནི་འཇིག་རྟེན་འཆགས་སོ། །བར་གྱི་བསྐལ་པ་ཉི་ཤུས་ནི་འཇིག་རྟེན་འཆགས་པར་གནས་སོ། །འཇིག་པ་ནི་རྣམ་པ་གསུམ་སྟེ། མེས་འཇིག་པ་དང༌། ཆུས་འཇིག་པ་དང༌། རླུང་གིས་འཇིག་པའོ། །འཇིག་པ་གསུམ་གྱི་རྩེ་མོ་ནི་འོད་གསལ་བ་དང༌། དགེ་རྒྱས་དང༌། འབྲས་བུ་ཆེ་བ་རྣམས་ཏེ། གང་གི་ཚེ་མེས་འཇིག་པ་འབྱུང་བ་དེའི་ཚེ་འོད་གསལ་གྱི་ལྷ་རྣམས་ལ་འཇིག་པའི་རྩེ་མོ་ཐུག་གོ །གང་གི་ཚེ་ཆུས་འཇིག་པ་འབྱུང་བ་དེའི་ཚེ། དགེ་རྒྱས་ཀྱི་ལྷ་རྣམས་ལ་འཇིག་པའི་རྩེ་

---

^{[མ་དཔེ་གཟིགས་ན་འདིར་གནོན།]}

མོ་ཐུག་གོ །གང་གི་ཚེ་རླུང་གིས་འཇིག་པ་འབྱུང་བ་དེའི་ཚེ་འབྲས་བུ་ཆེ་བའི་ལྷ་རྣམས་ལ་འཇིག་པའི་རྩེ་མོ་ཐུག་གོ །མེས་འཇིག་པ་ལན་བདུན་ཞིང་ཆུས་འཇིག་པ་ལན་གཅིག །ཆུས་འཇིག་པ་ལན་བདུན་ཞིང་རླུང་གིས་འཇིག་པ་ལན་བདུན་འབྱུང་ངོ༌། །བར་གྱི་བསྐལ་པ་ནི་གསུམ་སྟེ། མཚོན་གྱི་བར་གྱི་བསྐལ་པ་དང༌། ནད་ཀྱི་བར་གྱི་བསྐལ་པ་དང༌། མུ་གེའི་བར་གྱི་བསྐལ་པ་སྟེ། བསྐལ་པ་ནི་མཚོན་དང་ནད་དང་མུ་གེ་གསུམ་གྱིས་མཐའ་ཐུག་པར་འགྱུར་རོ། །གང་གི་ཚེ་མཚོན་གྱི་བར་གྱི་བསྐལ་པ་འོང་དུ་ཆ་ཞིང་འབྱུང་དུ་ཉེ་བར་གྱུར་པ་དེའི་ཚེ་མི་རྣམས་ཀྱི་ཚེ་ལོ་བཅུ་ཐུབ་པར་གྱུར་ཏེ། ཚེ་ལོ་བཅུ་པའི་མི་རྣམས་ཀྱི་ནང་ན་གང་ཡུན་རིང་དུ་འཚོ་བ་དེས་ལོ་བཅུ་ཐུབ་སྟེ་དཔེར་ན་ད་ལྟར་གྱི་མི་རྣམས་ཀྱི་ནང་ན་གང་ཡུན་རིང་དུ་འཚོ་ཞིང་ཅི་ལེགས་ཅི་བདེར་རིམ་གྲོ་བྱེད་པ་དེས་ལོ་བརྒྱ་འམ། ཅུང་ཟད་ལྷག་པར་ཐུབ་པ་དེ་བཞིན་དུ་ཚེ་ལོ་བཅུ་པའི་མི་རྣམས་ཀྱི་ནང་ན་ཡང་ཡུན་རིང་དུ་འཚོ་བ་དེས་ལོ་བཅུ་ཐུབ་པོ། །ཚེ་ལོ་བཅུ་པའི་མི་རྣམས་ཀྱི་བུ་གཅིག་པ་སྡུག་ཅིང་ཡིད་དུ་འོང་བ་ལ་མས་ལེགས་སུ་སྨོན་པ་ན་བདག་གི་བུ་ལོ་བཅུ་པའི་བར་དུ་ཡུན་རིང་དུ་འཚོ་བར་གྱུར་ཅིག་ཅེས་ལེགས་སུ་སྨོན་པར་བྱེད་དེ། དཔེར་ན་ད་ལྟར་གྱི་མི་རྣམས་ཀྱི་བུ་གཅིག་པ་སྡུག་ཅིང་ཡིད་དུ་འོང་བ་ལ་མས་ལེགས་སུ་སྨོན་པ་ན་འདི་སྐད་དུ། བདག་གི་བུ་ལོ་བརྒྱའི་བར་དུ་ཡུན་རིང་དུ་འཚོ་བར་གྱུར་ཅིག་ཅེས་ལེགས་སུ་སྨོན་པར་བྱེད་པ་དེ་བཞིན་དུ། ཚེ་ལོ་བཅུ་པའི་མི་རྣམས་ཀྱི་བུ་གཅིག་པ་སྡུག་ཅིང་ཡིད་དུ་འོང་བ་ལ་མས་ལེགས་སུ་སྨོན་པ་ན་འདི་སྐད་དུ། བདག་གི་བུ་ལོ་བཅུ་པའི་བར་དུ་ཡུན་རིང་དུ་འཚོ་བར་གྱུར་ཅིག་ཅེས་ལེགས་སུ་སྨོན་པར་བྱེད་དོ། །ཚེ་ལོ་བཅུ་པའི་མི་རྣམས་ཀྱི་བུ་མོ་བཙས་ནས་ཟླ་བ་ལྔ་ལོན་པ་ན་ཁྱིམ་ཐབ་ལ་གཏོང་བར་འགྱུར་ཏེ། དཔེར་ན་ད་ལྟར་གྱི་མི་རྣམས་ཀྱི་བུ་མོ་ལོ་བཅོ་ལྔ་འམ། ལོ་བཅུ་དྲུག་ལོན་པ་ན་ཁྱིམ་ཐབ་ལ་གཏོང་བ་དེ་བཞིན་དུ། ཚེ་ལོ་བཅུ་པའི་མི་རྣམས་ཀྱི་བུ་མོ་བཙས་ནས་ཟླ་བ་ལྔ་ལོན་པ་ན་ཁྱིམ་ཐབ་ལ་གཏོང་བར་འགྱུར་རོ། །ཚེ་ལོ་བཅུ་པའི་མི་རྣམས་ཀྱི་གོས་ཀྱི་ནང་ན་སྐྲའི་ལ་བ་མཆོག་ཏུ་གྱུར་ཏེ། དཔེར་ན་ད་ལྟར་གྱི་མི་རྣམས་ཀྱི་གོས་ཀ་ཤི་ཀའི་རས་ཕྲ་མོ་འམ། ཟར་

---

^{[མ་དཔེ་གཟིགས་ན་འདིར་གནོན།]}

མའི་རས་ཕྲ་མོ་འམ། དུ་གུ་ལའི་རས་ཕྲ་མོ་འམ། ཀོ་ཏམ་པའི་རས་ཕྲ་མོ་མཆོག་ཡིན་པ་དེ་བཞིན་དུ། ཚེ་ལོ་བཅུ་པའི་མི་རྣམས་ཀྱི་གོས་ཀྱི་ནང་ན་སྐྲའི་ལ་བ་མཆོག་ཏུ་འགྱུར་རོ། །ཚེ་ལོ་བཅུ་པའི་མི་རྣམས་ཀྱི་ཁ་ཟས་ཀྱི་ནང་ན་ཀོ་ཊ་བ་མཆོག་ཏུ་འགྱུར་ཏེ། དཔེར་ན་ད་ལྟར་གྱི་མི་རྣམས་ཀྱི་ནང་ན་འབྲས་སཱ་ལུའི་ཆན་ནག་པོའི་བག་གསལ་བ་ཚོད་མ་དང༌། ཞུ་བ་དང༌། བྱ་ན་སྣ་ཚོགས་དང་ལྡན་བ་མཆོག་ཡིན་པ་དེ་བཞིན་དུ། ཚེ་ལོ་བཅུ་པའི་མི་རྣམས་ཀྱི་ཟས་ཀྱི་ནང་ན་ཀོ་ཊ་བ་མཆོག་ཏུ་འགྱུར་རོ། །ཚེ་ལོ་བཅུ་པའི་མི་རྣམས་ཀྱི་རོ་རྣམ་པ་ལྔ་ནུབ་པར་འགྱུར་ཏེ། ལྔ་གང་ཞེ་ན། འོ་མ་ཡང་ཡོད་ཞོ་ཡང་ཡོད་མོད་ཀྱི་མར་མི་འབྱུང་ངོ༌། །ཏིལ་ཡང་ཡོད་ཏིལ་གྱི་ཕྱེ་མ་ཡང་ཡོད་མོད་ཀྱི་ཏིལ་མར་མི་འབྱུང་ངོ༌། །སྦྲང་བུ་ཡང་ཡོད་སྤྲ་ཚིལ་ཡང་ཡོད་མོད་ཀྱི་སྦྲང་རྩི་མི་འབྱུང་ངོ༌། །བུ་རམ་ཤིང་ཡང་ཡོད་ཁུ་བ་ཡང་ཡོད་མོད་ཀྱི་བུ་རམ་དུ་མི་འགྱུར་རོ། །ལན་ཚྭ་ནི་གཏན་མེད་པར་འགྱུར་རོ། །ཚེ་ལོ་བཅུ་པའི་མི་རྣམས་ལ་མཚོན་ཆས་བརྒྱན་པར་འགྱུར་ཞིང་མཚོན་ཆས་བཞག་པར་འགྱུར་ཏེ། དཔེར་ན་ད་ལྟར་གྱི་མི་རྣམས་ཀྱི་རྒྱན་མགུལ་གདུབ་བམ། གདུ་བུ་རྒྱན་ཅན་ནམ། རྣ་ཆ་གདུབ་འཁོར་རྣམས་སམ། དཔུང་རྒྱན་རྣམས་སམ། ལག་པའི་རྒྱན་རྣམས་སམ། རྐང་པའི་རྒྱན་རྣམས་སམ། སོར་གདུབ་ཀྱི་རྒྱན་རྣམས་སམ། གསེར་དངུལ་གྱི་ཕྲེང་བ་ཐོགས་པ་དེ་བཞིན་དུ་ཚེ་ལོ་བཅུ་པའི་མི་རྣམས་མཚོན་ཆས་བརྒྱན་ཅིང་མཚོན་ཆས་བཞག་པར་འགྱུར་རོ། །ཚེ་ལོ་བཅུ་པའི་མི་རྣམས་ཀྱི་ནང་ན་གང་མར་མི་འཛིན་པ་དང༌། ཕར་མི་འཛིན་པ་དང༌། དགེ་སྦྱོང་དུ་མི་འཛིན་པ་དང༌། བྲམ་ཟེར་མི་འཛིན་པ་དེ་དག་བཀུར་བ་དང༌། གཅེས་སུ་བྱས་པ་དང༌། རབ་ཏུ་བསྔགས་པར་འགྱུར་ཏེ། དཔེར་ན་ད་ལྟར་གྱི་མི་རྣམས་ཀྱི་ནང་ན་གང་མར་འཛིན་པ་དང༌། ཕར་འཛིན་པ་དང༌། དགེ་སྦྱོང་དུ་འཛིན་པ་དང༌། བྲམ་ཟེར་འཛིན་པ་དེ་དག་བཀུར་ཞིང་གཅེས་པར་བྱ་བ་དང༌། རབ་ཏུ་བསྔགས་པ་དེ་བཞིན་དུ། ཚེ་ལོ་བཅུ་པའི་མི་རྣམས་ཀྱི་ནང་ན་གང་མར་མི་འཛིན་པ་དང༌། ཕར་མི་འཛིན་པ་དང༌། དགེ་སྦྱོང་དུ་མི་འཛིན་པ་དང༌། བྲམ་ཟེར་མི་འཛིན་པ་དེ་དག་བཀུར་ཞིང་གཅེས་སུ་བྱ་བ་དང༌། རབ་ཏུ་བསྔགས་པར་འགྱུར་རོ། །ཚེ་ལོ་བཅུ་པའི་མི་རྣམས་

---

^{[མ་དཔེ་གཟིགས་ན་འདིར་གནོན།]}

སེམས་ཅན་གཅིག་གིས་གཅིག་མཐོང་ན་ཤས་ཆེར་ཞེ་སྡང་བའི་སེམས་དང༌། གསད་པའི་སེམས་ཉེ་བར་གནས་པར་འགྱུར་ཏེ། དཔེར་ན་ད་ལྟར་གྱི་མི་རྣམས་ལ་རི་དགས་ཀྱི་རྔོན་པས་དགོན་པའི་རི་དགས་མཐོང་ན་ཤས་ཆེར་ཞེ་སྡང་བའི་སེམས་དང༌། གསད་པའི་སེམས་ཉེ་བར་གནས་པར་འགྱུར་བ་དེ་བཞིན་དུ་ཚེ་ལོ་བཅུ་པའི་མི་རྣམས་གཅིག་གིས་གཅིག་མཐོང་ན། ཤས་ཆེར་ཞེ་སྡང་བའི་སེམས་དང༌། གསད་པའི་སེམས་ཉེ་བར་གནས་པར་འགྱུར་རོ། །ཚེ་ལོ་བཅུ་པའི་མི་རྣམས་ཀྱི་གནས་རྣམས་སུ་ཞག་བདུན་དུ་མཚོན་འབྱུང་བར་འགྱུར་ཏེ། དེ་དག་གིས་ཤིང་ངམ། གསེག་མ་འམ། གྱོ་མོའང་རུང་སྟེ། གང་དང་གང་ལ་ནོམ་པ་དེ་དག་ཐམས་ཅད་མཚོན་ཆ་ཤིན་ཏུ་རྣོ་ཞིང་འཇེབས་པར་འགྱུར་ཏེ། ཤིན་ཏུ་རྣོ་ཞིང་འཇེབས་པ་དེ་དང༌། དེ་དག་གིས་གཅིག་ལ་གཅིག་སྲོག་དང་བྲལ་བར་བྱེད་དེ། གཉེན་འདུན་ཟད་པ་དང༌། ལོངས་སྤྱོད་ཟད་པ་དང༌། ནོར་ཟད་པར་འགྱུར་རོ། །མཚོན་གྱི་བར་གྱི་བསྐལ་པ་དེ་ཡང་ཞག་བདུན་ཁོ་ནར་ཟད་དེ། ཞག་བདུན་འདས་ནས་མཐར་ཐུག་པར་བརྗོད་པར་བྱའོ། །དེའི་ཚེ་གང་སུ་ཡང་རུང་སྟེ། ཤི་བ་དེ་དག་ཐམས་ཅད་ལུས་དང་བྲལ་ནས་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །དེ་ན་མི་གང་དག་མཚོན་གྱི་བར་གྱི་བསྐལ་པ་དེས་ལྡོག་ཅིང་འཛེམ་པར་འགྱུར་ལ། སྨོད་ཅིང་རྣམ་པར་སྨོད་པ་དེ་དག་ལས་ཁ་ཅིག་ནི་ཆུའི་རྫོང་དང༌། རིའི་རྫོང་དང༌། རྫ་སྟུག་པོ་དང༌། ནགས་ཚལ་སྟུག་པོ་དག་ཏུ་ཞུགས་ཏེ། དེར་ཞག་བདུན་གྱི་བར་དུ་རྩ་བ་དང༌། ཆུས་འཚོ་ཞིང་འདུག་ནས་གྲོང་དང༌། གྲོང་རྡལ་དང༌། ཡུལ་འཁོར་དང༌། རྒྱལ་པོའི་ཕོ་བྲང་འཁོར་དག་ཏུ་ཕྱིར་ལོག་སྟེ། སེམས་ཅན་དེ་དག་གཅིག་གིས་གཅིག་མཐོང་ན་ཤས་ཆེར་བྱམས་པ་དང༌། སྡུག་པ་དང༌། གུས་པ་དང༌། སྙིང་བརྩེ་བའི་སེམས་ཉེ་བར་གནས་པར་འགྱུར་ཏེ། འདི་སྐད་དུ། ཀྱེ་མ་སེམས་ཅན་གསོན་པོ་མཐོང་ངོ༌། །ཀྱེ་མ་སེམས་ཅན་གསོན་པོ་མཐོང་ངོ་ཞེས་འཛེར་ཏོ། །དཔེར་ན་ད་ལྟར་གྱི་མི་རྣམས་ཀྱི་མ་ལ་བུ་གཅིག་པ་སྡུག་པ་ཡིད་དུ་འོང་བ་ཞིག་ཡོད་ལ། ཟླ་བ་བརྒྱད་དམ་ཟླ་བ་དགུ་ལོན་ཏེ་ཕྲད་ན་ཤས་ཆེར་བྱམས་པ་དང༌། སྡུག་པ་དང༌། གུས་པ་དང༌། སྙིང་བརྩེ་བའི་སེམས་ཉེ་བར་གནས་པ་འདི་སྐད་དུ་

---

^{[མ་དཔེ་གཟིགས་ན་འདིར་གནོན།]}

ཀྱེ་མ་བུ་གསོན་པོ་མཐོང་ངོ་ཀྱེ་མ་བུ་གསོན་པོ་མཐོང་ངོ་ཞེས་ཟེར་བ་དེ་བཞིན་དུ། སེམས་ཅན་དེ་དག་གཅིག་མཐོང་ན་ཤས་ཆེར་བྱམས་པ་དང༌། སྡུག་པ་དང༌། གུས་པ་དང༌། སྙིང་བརྩེ་བའི་སེམས་ཉེ་བར་གནས་བར་འགྱུར་ཏེ། འདི་སྐད་དུ། ཀྱེ་མ་སེམས་ཅན་གསོན་པོ་མཐོང་ངོ༌། །ཀྱེ་མ་སེམས་ཅན་གསོན་པོ་མཐོང་ངོ་ཞེས་ཀྱང་འཛེར་ཏོ།། །།བར་གྱི་མདོ་ལ། རིང་དུ་གང་འཚོ་མ་དང་བུ་མོ་དང༌། །གོས་དང་ཟས་དང་ནུབ་པར་འགྱུར་བ་དང༌། །རྒྱན་རྣམས་དང་ནི་བཀུར་དང་སྡང་བ་དང༌། །ཞག་བདུན་གནས་རྣམས་སུ་ནི་མཚོན་ཆ་འབྱུང༌། །སེམས་ཅན་དེ་དག་འདི་སྐད་དུ། བདག་ཅག་མཚོན་ཆས་སྲོག་གཅོད་པ་འདིས་གཅིག་ལ་གཅིག་རྣམ་པར་བརླག་པ་ལ་ཞུགས་པས་གཉེན་འདུན་ཟད་པར་གྱུར་ཅིང་ལོངས་སྤྱོད་ཟད་པ་དང་ནོར་ཟད་པར་གྱུར་གྱི་བདག་ཅག་གིས་དགེ་བའི་ཆོས་འགའ་ཞིག་ཡང་དག་པར་བླངས་ཏེ་འཁོད་པར་བྱ་ན་བདག་ཅག་གི་དགེ་བའི་ཆོས་གང་ཞིག་ཡང་དག་པར་བླངས་ཏེ་འཁོད་པར་བྱ་སྙམ་དུ་སེམས་སོ། །དེ་དག་འདི་སྙམ་དུ་ཀྱེ་མ་བདག་ཅག་ནི་སྲོག་གཅོད་པ་ཡིན་གྱི་བདག་ཅག་གིས་མཚོན་ཆས་སྲོག་གཅོད་པ་སྤང་བར་བྱའོ་ཞེས་ནས་དེ་དག་མཚོན་ཆས་སྲོག་གཅོད་པ་སྤང་ངོ༌། །ཚེ་ལོ་བཅུ་པའི་མིས་མཚོན་ཆས་སྲོག་གཅོད་པ་སྤོང་བ་དེ་དག་གི་བུ་དང་བུ་མོ་བཙས་པ་རྣམས་ཚེ་ལོ་ཉི་ཤུ་ཐུབ་པར་གྱུར་ཏོ། །ཚེ་ལོ་ཉི་ཤུ་པའི་མི་རྣམས་འདི་སྙམ་དུ། ཀྱེ་མ་དགེ་བའི་ཆོས་རྣམས་ཡང་དག་པར་བླངས་པའི་ཕྱིར་ཚེ་ཡང་ནུར་ལ་ཁ་དོག་དང་སྟོབས་དང༌། བདེ་བ་དང་ལོངས་སྤྱོད་དག་ཀྱང་འཕེལ་བར་སྣང་གི །ཡང་ལྷག་པར་དགེ་བའི་ཆོས་འགའ་ཞིག་ཡང་དག་པར་བླངས་ཏེ། འཁོད་པར་བྱ་ན་བདག་ཅག་གིས་དགེ་བའི་ཆོས་གང་ཞིག་ཡང་དག་པར་བླངས་ཏེ་འཁོད་པར་བྱ་སྙམ་དུ་སེམས་སོ། །དེ་དག་འདི་སྙམ་དུ་ཀྱེ་མ་བདག་ཅག་ནི་མ་བྱིན་པར་ལེན་པ་ཡིན་གྱི། བདག་ཅག་གིས་མ་བྱིན་པར་ལེན་པ་སྤང་བར་བྱའོ་ཞེས་ནས་དེ་དག་མ་བྱིན་པར་ལེན་པ་སྤོང་ངོ༌། །ཚེ་ལོ་ཉི་ཤུ་བའི་མི་མ་བྱིན་པར་ལེན་པ་སྤོང་བ་དེ་དག་གི་བུ་དང་བུ་མོ་བཙས་པ་རྣམས་ཚེ་ལོ་བཞི་བཅུ་ཐུབ་པར་གྱུར་ཏེ། དེ་དག་ལས་ཁ་ཅིག་ནི་ཚེ་ལོ་ལྔ་བཅུ་ཐུབ་པར་གྱུར་ཏོ། །ཚེ་ལོ་ལྔ་

---

^{[མ་དཔེ་གཟིགས་ན་འདིར་གནོན།]}

བཅུ་པའི་མི་རྣམས་འདི་སྙམ་དུ་ཀྱེ་དགེ་བའི་ཆོས་རྣམས་ཡང་དག་པར་བླངས་པའི་ཕྱིར་ཚེ་ཡང་ནུར་ལ་ཁ་དོག་དང་སྟོབས་དང་བདེ་བ་དང་ལོངས་སྤྱོད་དག་ཀྱང་འཕེལ་བར་སྣང་གི །བདག་ཅག་གིས་ཡང་ལྷག་པར་དགེ་བའི་ཆོས་འགའ་ཞིག་ཡང་དག་པར་བླངས་ཏེ་འཁོད་པར་བྱ་ན། བདག་ཅག་གིས་དགེ་བའི་ཆོས་གང་ཞིག་ཡང་དག་པར་བླངས་ཏེ་འཁོད་པར་བྱ་སྙམ་དུ་སེམས་སོ། །དེ་དག་འདི་སྙམ་དུ་ཀྱེ་མ་བདག་ཅག་ནི་འདོད་པ་ལ་ལོག་པར་གཡེམ་པ་ཡིན་གྱི། བདག་ཅག་གིས་འདོད་པ་ལ་ལོག་པར་གཡེམ་པ་སྤང་བར་བྱའོ་ཞེས་ནས་དེ་དག་འདོད་པ་ལ་ལོག་པར་གཡེམ་པ་སྤོང་ངོ༌། །ཚེ་ལོ་ལྔ་བཅུ་པའི་མི་འདོད་པ་ལ་ལོག་པར་གཡེམ་པ་སྤོང་བ་དེ་དག་གི་བུ་དང་བུ་མོ་བཙས་པ་རྣམས་ཚེ་ལོ་བརྒྱ་ཐུབ་པར་གྱུར་ཏོ། །ཚེ་ལོ་བརྒྱ་པའི་མི་རྣམས་འདི་སྙམ་དུ་དགེ་བའི་ཆོས་རྣམས་ཡང་དག་པར་བླངས་པའི་ཕྱིར་ཚེ་ཡང་ནུར་ལ། ཁ་དོག་དང༌། སྟོབས་དང་བདེ་བ་དང༌། ལོངས་སྤྱོད་དག་ཀྱང་འཕེལ་བར་སྣང་གི །བདག་ཅག་གིས་ཡང་ལྷག་པར་དགེ་བའི་ཆོས་འགའ་ཞིག་ཡང་དག་པར་བླངས་ཏེ་འཁོད་པར་བྱ་ན། བདག་ཅག་གིས་དགེ་བའི་ཆོས་གང་ཞིག་ཡང་དག་པར་བླངས་ཏེ། འཁོད་པར་བྱ་སྙམ་དུ་སེམས་སོ། །ད་དག་འདི་སྙམ་དུ་ཀྱེ་བདག་ཅག་ནི་བརྫུན་དུ་སྨྲ་བ་ཡིན་གྱི། བདག་ཅག་གིས་བརྫུན་དུ་སྨྲ་བ་སྤང་བར་བྱའོ་ཞེས་ནས་དེ་དག་བརྫུན་དུ་སྨྲ་བ་སྤོང་ངོ༌། །ཚེ་ལོ་བརྒྱ་པའི་མི་བརྫུན་དུ་སྨྲ་བ་སྤོང་བ་དེ་དག་གི་བུ་དང་བུ་མོ་བཙས་པ་རྣམས་ཚེ་ལོ་ཉིས་བརྒྱ་ཐུབ་པར་གྱུར་ཏེ། དེ་དག་ལས་ཁ་ཅིག་ནི་ཚེ་ལོ་ཉིས་བརྒྱ་ལྔ་བཅུ་ཐུབ་པར་གྱུར་ཏོ།། ཚེ་ལོ་ཉིས་བ་རྒྱ་ལྔ་བཅུ་པའི་མི་རྣམས་འདི་སྙམ་དུ་ཀྱེ་དགེ་བའི་ཆོས་རྣམས་ཡང་དག་པར་བླངས་པའི་ཕྱིར་ཚེ་ཡང་ནུར་ལ། ཁ་དོག་དང་སྟོབས་དང་བདེ་བ་དང་ལོངས་སྤྱོད་ཀྱང་འཕེལ་བར་སྣང་གི་བདག་ཅག་གིས་ཡང་ལྷག་པར་དགེ་བའི་ཆོས་འགའ་ཞིག་ཡང་དག་པར་བླངས་ཏེ་འཁོད་པར་བྱ་ན། བདག་ཅག་གིས་དགེ་བའི་ཆོས་གང་ཞིག་ཡང་དག་པར་བླངས་ཏེ་འཁོད་པར་བྱ་སྙམ་དུ་སེམས་སོ། །དེ་དག་འདི་སྙམ་དུ་ཀྱེ་བདག་ཅག་ནི་ཕྲ་མ་ཅན་ཡིན་གྱི། བདག་ཅག་གིས་ཕྲ་མ་སྤང་བར་བྱའོ་ཞེས་ནས་དེ་དག་ཕྲ་མ་སྤོང་ངོ༌། །ཚེ་ལོ་ཉིས་བརྒྱ་ལྔ་བཅུ་པའི་མི་ཕྲ་མ་སྤོང་བ་དེ་དག་གི་བུ་དང་བུ་མོ་

---

^{[མ་དཔེ་གཟིགས་ན་འདིར་གནོན།]}

བཙས་པ་རྣམས་ཚེ་ལོ་ལྔ་བརྒྱ་ཐུབ་པར་གྱུར་ཏེ། ཚེ་ལོ་ལྔ་བརྒྱ་པའི་མི་རྣམས་ཀྱེ་དགེ་བའི་ཆོས་རྣམས་ཡང་དག་པར་བླངས་པའི་ཕྱིར་ཚེ་ཡང་ནུར་ལ། ཁ་དོག་དང་སྟོབས་དང་བདེ་བ་དང་ལོངས་སྤྱོད་ཀྱང་འཕེལ་བར་སྣང་གི །བདག་ཅག་གིས་ཡང་ལྷག་པར་དགེ་བའི་ཆོས་འགའ་ཞིག་ཡང་དག་པར་བླངས་ཏེ་འཁོད་པར་བྱ་ན། བདག་ཅག་གིས་དགེ་བའི་ཆོས་གང་ཞིག་ཡང་དག་པར་བླངས་ཏེ་འཁོད་པར་བྱ་སྙམ་དུ་སེམས་སོ། །དེ་དག་འདི་སྙམ་དུ་ཀྱེ་བདག་ཅག་ནི་ཚིག་རྩུབ་པོ་སྨྲ་བ་ཡིན་གྱི། བདག་ཅག་གིས་ཚིག་རྩུབ་པོ་སྤང་བར་བྱའོ་ཞེས་ནས་དེ་དག་ཚིག་རྩུབ་པོ་སྤོང་ངོ༌། །ཚེ་ལོ་ལྔ་བརྒྱ་པའི་མི་ཚིག་རྩུབ་པོ་སྤོང་བ་དེ་དག་གི་བུ་དང་བུ་མོ་བཙས་པ་རྣམས་ཚེ་ལོ་སྟོང་ཐུབ་པར་གྱུར་ཏོ། །ཚེ་ལོ་སྟོང་ཐུབ་པའི་མི་རྣམས་འདི་སྙམ་དུ་ཀྱེ་དགེ་བའི་ཆོས་རྣམས་ཡང་དག་པར་བླངས་པའི་ཕྱིར་ཚེ་ཡང་ནུར་ལ། ཁ་དོག་དང་སྟོབས་དང་བདེ་བ་དང་ལོངས་སྤྱོད་དག་ཀྱང་འཕེལ་བར་སྣང་གི །བདག་ཅག་གིས་ཡང་ལྷག་པར་དགེ་བའི་ཆོས་འགའ་ཞིག་ཡང་དག་པར་བླངས་ཏེ་འཁོད་པར་བྱ་ན། བདག་ཅག་གིས་དགེ་བའི་ཆོས་གང་ཞིག་ཡང་དག་པར་བླངས་ཏེ་འཁོད་པར་བྱ་སྙམ་དུ་སེམས་སོ། །དེ་དག་འདི་སྙམ་དུ་ཀྱེ་བདག་ཅག་ནི་ཚིག་འཁྱལ་པ་ཅན་ཡིན་གྱི། བདག་ཅག་གིས་ཚིག་འཁྱལ་པ་སྤོང་ངོ༌། །ཚེ་ལོ་སྟོང་པའི་མི་ཚིག་འཁྱལ་པ་སྤོང་བ་དེ་དག་གི་བུ་དང་བུ་མོ་བཅས་པ་རྣམས་ཚེ་ལོ་ཉིས་སྟོང་ཐུབ་པར་འགྱུར་ཏེ། དེ་དག་ལས་ཁ་ཅིག་ནི་ཚེ་ལོ་ཉིས་སྟོང་ལྔ་བརྒྱ་ཐུབ་པར་གྱུར་ཏོ། །ཚེ་ལོ་ཉིས་སྟོང་ལྔ་བརྒྱ་པའི་མི་རྣམས་འདི་སྙམ་དུ་ཀྱེ་དགེ་བའི་ཆོས་རྣམས་ཡང་དག་པར་བླངས་པའི་ཕྱིར་ཚེ་ཡང་ནུར་ལ། ཁ་དོག་དང་སྟོབས་དང་བདེ་བ་དང་ལོངས་སྤྱོད་དག་ཀྱང་འཕེལ་བར་སྣང་གི །བདག་ཅག་གིས་ཡང་ལྷག་པར་དགེ་བའི་ཆོས་འགའ་ཞིག་ཡང་དག་པར་བླངས་ཏེ་འཁོད་པར་བྱ་ན། བདག་ཅག་གིས་དགེ་བའི་ཆོས་གང་ཞིག་ཡང་དག་པར་བླངས་ཏེ་འཁོད་པར་བྱ་སྙམ་དུ་སེམས་སོ། །དེ་དག་འདི་སྙམ་དུ་ཀྱེ་བདག་ཅག་ནི་བརྣབ་སེམས་ཅན་ཡིན་གྱི། བདག་ཅག་གིས་བརྣབ་སེམས་སྤང་བར་བྱའོ་ཞེས་ནས་དེ་དག་བརྣབས་སེམས་སྤོང་ངོ༌། །ཚེ་ལོ་ཉིས་སྟོང་ལྔ་བརྒྱ་བའི་མི་བརྣབ་སེམས་

---

^{[མ་དཔེ་གཟིགས་ན་འདིར་གནོན།]}

སྤོང་བ་དེ་དག་གི་བུ་དང་བུ་མོ་བཙས་པ་རྣམས་ཚེ་ལོ་ལྔ་སྟོང་ཐུབ་པར་འགྱུར་ཏེ། ཚེ་ལོ་ལྔ་སྟོང་པའི་མི་རྣམས་འདི་སྙམ་དུ་ཀྱེ་དགེ་བའི་ཆོས་རྣམས་ཡང་དག་པར་བླངས་པའི་ཕྱིར་ཚེ་ཡང་ནུར་ལ། ཁ་དོག་དང་སྟོབས་དང་བདེ་བ་དང༌། ལོངས་སྤྱོད་དག་ཀྱང་འཕེལ་བར་སྣང་གི །བདག་ཅག་གིས་ཡང་ལྷག་པར་དགེ་བའི་ཆོས་འགའ་ཞིག་ཡང་དག་པར་བླངས་ཏེ་འགོད་པར་བྱ་ན། བདག་ཅག་གིས་དགེ་བའི་ཆོས་གང་ཞིག་ཡང་དག་པར་བླངས་ཏེ་འཁོད་པར་བྱ་སྙམ་དུ་སེམས་སོ། །དེ་དག་འདི་སྙམ་དུ་ཀྱེ་བདག་ཅག་ནི་གནོད་སེམས་ཅན་ཡིན་གྱི། བདག་གིས་གནོད་སེམས་སྤང་བར་བྱའོ་ཞེས་ནས་དེ་དག་གནོད་སེམས་སྤོང་ངོ༌། །ཚེ་ལོ་ལྔ་སྟོང་པའི་མི་གནོད་སེམས་སྤོང་བ་དེ་དག་གི་བུ་དང་བུ་མོ་བཙས་པ་རྣམས་ཚེ་ལོ་ཁྲི་ཐུབ་པར་གྱུར་ཏོ།། །།འཇིག་རྟེན་གཞག་པ། བམ་པོ་དྲུག་པ། ཚེ་ལོ་ཁྲི་པའི་མི་རྣམས་འདི་སྙམ་དུ་ཀྱེ་དགེ་བའི་ཆོས་རྣམས་ཡང་དག་པར་བླངས་པའི་ཕྱིར་ཚེ་ཡང་ནུར་ལ། ཁ་དོག་དང་སྟོབས་དང་བདེ་བ་དང༌། ལོངས་སྤྱོད་དག་ཀྱང་འཕེལ་བར་སྣང་གི །བདག་ཅག་གིས་ཡང་ལྷག་པར་དགེ་བའི་ཆོས་འགའ་ཞིག་ཡང་དག་པར་བླངས་ཏེ་འཁོད་པར་བྱ་ན། བདག་ཅག་གིས་དགེ་བའི་ཆོས་གང་ཞིག་ཡང་དག་པར་བླངས་ཏེ་འཁོད་པར་བྱ་སྙམ་དུ་སེམས་སོ། །དེ་དག་འདི་སྙམ་དུ་བདག་ཅག་ནི་ལོག་པར་ལྟ་བ་ཅན་ཡིན་གྱི། བདག་གིས་ལོག་པར་ལྟ་བ་སྤང་བར་བྱའོ་ཞེས་ནས་དེ་དག་ལོག་པར་ལྟ་བ་སྤོང་ངོ༌། །ཚེ་ལོ་ཁྲི་པའི་མི་ལོག་པར་ལྟ་བ་སྤོང་བ་དེ་དག་གི་བུ་དང་བུ་མོ་བཙས་པ་རྣམས་ཚེ་ལོ་ཉི་ཁྲི་ཐུབ་པར་གྱུར་ཏོ། །ཚེ་ལོ་ཉི་ཁྲི་པའི་མི་རྣམས་འདི་སྙམ་དུ་ཀྱེ་དགེ་བའི་ཆོས་རྣམས་ཡང་དག་པར་བླངས་པའི་ཕྱིར་ཚེ་ཡང་ནུར་ལ། ཁ་དོག་དང་སྟོབས་དང་བདེ་བ་དང་ལོངས་སྤྱོད་དག་ཀྱང་འཕེལ་བར་སྣང་གི །བདག་ཅག་གིས་ཡང་ལྷག་པར་དགེ་བའི་ཆོས་འགའ་ཞིག་ཡང་དག་པར་བླངས་ཏེ་འཁོད་པར་བྱ་ན། བདག་ཅག་གིས་དགེ་བའི་ཆོས་གང་ཞིག་ཡང་དག་པར་བླངས་ཏེ་འཁོད་པར་བྱ་སྙམ་དུ་སེམས་སོ། །དེ་དག་འདི་སྙམ་དུ་ཀྱེ་བདག་ཅག་ནི་ཆོས་མ་ཡིན་པའི་ཆགས་པས་ཆགས་པ་དང༌། མི་རིགས་པའི་འདོད་པས་ཟིལ་གྱིས་ནོན་པ་དང༌། ལོག་པའི་ཆོས་དང་

---

^{[མ་དཔེ་གཟིགས་ན་འདིར་གནོན།]}

ལྡན་བ་ཡིན་གྱི། བདག་ཅག་གིས་ཆོས་འདི་གསུམ་སྤང་བར་བྱའོ་ཞེས་ནས་དེ་དག་ཆོས་གསུམ་སྤོང་ངོ༌། །ཚེ་ལོ་ཉི་ཁྲི་པའི་མི་རྣམས་གསུམ་པོ་དེ་དག་སྤོང་བ་དེ་དག་གི་བུ་དང་བུ་མོ་བཙས་པ་རྣམས་ཚེ་ལོ་བཞི་ཁྲི་ཐུབ་པར་གྱུར་ཏོ། །ཚེ་ལོ་བཞི་ཁྲི་བའི་མི་རྣམས་འདི་སྙམ་དུ་ཀྱེ་དགེ་བའི་ཆོས་རྣམས་ཡང་དག་པར་བླངས་པའི་ཕྱིར་ཚེ་ཡང་ནུར་ལ། ཁ་དོག་དང་སྟོབས་དང་བདེ་བ་དང་ལོངས་སྤྱོད་དག་ཀྱང་འཕེལ་བར་སྣང་གི །བདག་ཅག་གིས་ཡང་ལྷག་པར་དགེ་བའི་ཆོས་འགའ་ཞིག་ཡང་དག་པར་བླངས་ཏེ་འཁོད་པར་བྱ་ན། བདག་ཅག་གིས་དགེ་བའི་ཆོས་གང་ཞིག་ཡང་དག་པར་བླངས་ཏེ་འཁོད་པར་བྱ་སྙམ་དུ་སེམས་སོ། །དེ་དག་འདི་སྙམ་དུ་ཀྱེ་བདག་ཅག་ནི་མར་མི་འཛིན་པ། ཕར་མི་འཛིན་པ། དགེ་སྦྱོང་དུ་མི་འཛིན་པ། བྲམ་ཟེར་མི་འཛིན་པ། རིགས་ཀྱི་ནང་ན་རྒན་རབས་ལ་རིམ་གྲོ་མི་བྱེད་པ་ཡིན་གྱི། བདག་ཅག་གིས་མར་འཛིན་པ་དང༌། ཕར་འཛིན་པ་དང༌། དགེ་སྦྱོང་དུ་འཛིན་པ་དང༌། བྲམ་ཟེར་འཛིན་པ་དང༌། རིགས་ཀྱི་ནང་ན་རྒན་རབས་ལ་རིམ་གྲོ་བྱའོ་ཞེས་ནས་དེ་དག་མར་འཛིན་པ་དང༌། ཕར་འཛིན་པ་དང༌། དགེ་སྦྱོང་དུ་འཛིན་པ་དང༌། བྲམ་ཟེར་འཛིན་པ་དང༌། རིགས་ཀྱི་ནང་ན་རྒན་རབས་ལ་རིམ་གྲོ་བྱེད་པ་དེ་དག་གི་བུ་དང་བུ་མོ་བཙས་པ་རྣམས་ཚེ་ལོ་བརྒྱད་ཁྲི་ཐུབ་པར་གྱུར་ཏོ། །ཚེ་ལོ་བརྒྱད་ཁྲི་པའི་མི་རྣམས་འཛམ་བུའི་གླིང་འདི་ཉིད་ན་འབྱོར་པ་དང་རྒྱས་པ་དང་བདེ་བ་དང་ལོ་ལེགས་པར་འགྱུར་ཞིང་སྐྱེ་བོ་དང་མི་མང་པོས་གང་ངོ༌། །ཚེ་ལོ་བརྒྱད་ཁྲི་བའི་མི་རྣམས་ཀྱི་གྲོང་དང་གྲོང་རྡལ་དང་ཡུལ་འཁོར་དང་རྒྱལ་པོའི་ཕོ་བྲང་འཁོར་རྣམས་ཀྱི་བར་བྱ་གག་འཕུར་བས་སླེབས་པ་ཙམ་དུ་འགྱུར་རོ། །ཚེ་ལོ་བརྒྱད་ཁྲི་པའི་མི་རྣམས་ཀྱི་བུ་མོ་བཙས་ནས་ལོ་ལྔ་བརྒྱ་ལོན་ན་ཁྱིམ་ཐབས་ལ་བཏོང་སྟེ། དཔེར་ན་ད་ལྟར་གྱི་མི་རྣམས་ཀྱི་བུ་མོ་བཙས་ནས་ལོ་བཅོ་ལྔ་འམ་བཅུ་དྲུག་ལོན་ན་ཁྱིམ་ཐབ་ལ་གཏོང་བ་དེ་བཞིན་དུ། ཚེ་ལོ་བརྒྱད་ཁྲི་བའི་མི་རྣམས་ཀྱི་བུ་མོ་བཙས་ནས་ལོ་ལྔ་བརྒྱ་ལོན་ན་ཁྱིམ་ཐབ་ལ་གཏོང་ངོ༌། །ཚེ་ལོ་བརྒྱད་ཁྲི་བའི་མི་རྣམས་ཀྱི་ནང་ནི་རྣམ་པ་གསུམ་ཡོད་དེ་འདོད་པ་དང༌། ཟས་མི་ཟ་བ་དང༌། རྒ་བ་རྣམས་ཡིན་ནོ། །ཚེ་ལོ་བརྒྱད་ཁྲི་བའི་མི་

---

^{[མ་དཔེ་གཟིགས་ན་འདིར་གནོན།]}

རྣམས་ཀྱི་འབྲུ་རྣམས་ནི་ཆེ་ཞིང་མཆོག་ཏུ་ཆེ་སྟེ། དཔེར་ན་ཨིནྡྲ་བེ་ནུའི་འབྲས་བུ་བཞིན་ཏེ། རྒྱལ་ཞིང་མཆོག་ཏུ་རྒྱལ་ལ་སྙེ་མ་གཅིག་པུ་ལས་ཀྱང་བྲེ་བོ་བཞི་འབྱུང་ངོ༌། །བཅོམ་ལྡན་འདས་ཀྱིས་ཀྱང་མུ་ཁྱུད་བརྟན་ལུང་བསྟན་པ་ལས་འདི་སྐད་དུ། དགེ་སློང་དག་མི་རྣམས་ནི་སྡིག་པ་མི་དགེ་བའི་ཆོས་འདི་དག་ཉིད་ཡང་དག་པར་འཛིན་པའི་ཕྱིར་ཚེ་ལོ་བཅུ་པར་འགྱུར་རོ། །ཚེ་ལོ་བཅུ་པའི་མི་རྣམས་ཀྱི་ནང་ན་གང་ཡུན་རིང་དུ་འཚོ་བ་དེས་ལོ་བཅུ་ཐུབ་སྟེ་སྔ་མ་བཞིན་དུ། ཚེ་ལོ་བརྒྱད་ཁྲི་ཐུབ་པའི་མི་རྣམས་ནི་འཛམ་བུའི་གླིང་འདི་ཉིད་ན་འབྱོར་པ་དང་རྒྱས་པ་དང་བདེ་བ་དང་ལོ་ལེགས་པར་འགྱུར་ཞིང་སྐྱེ་བོ་དང་མི་མང་པོས་གང་ངོ༌། །ཚེ་ལོ་བརྒྱད་ཁྲི་བའི་མི་རྣམས་ཀྱི་གྲོང་དང་གྲོང་རྡལ་དང་ཡུལ་འཁོར་དང༌། རྒྱལ་པོའི་ཕོ་བྲང་འཁོར་རྣམས་ཀྱི་བར་བྱ་གག་འཕུར་བས་སླེབས་པ་ཙམ་དུ་འགྱུར་རོ། །ཚེ་ལོ་བརྒྱད་ཁྲི་བའི་མི་རྣམས་ཀྱི་བུ་མོ་བཙས་ནས་ལོ་ལྔ་བརྒྱ་ལོན་པ་ཡང་སྔ་མ་བཞིན་ནོ། །ཚེ་ལོ་བརྒྱད་ཁྲི་བའི་མི་རྣམས་ཀྱི་ནད་རྣམ་པ་གསུམ་ཡོད་དེ། འདོད་པ་དང༌། ཟས་མི་ཟ་བ་དང༌། རྒ་བ་རྣམས་ཡིན་ནོ་ཞེས་གསུངས་སོ། །གང་གི་ཚེ་ནད་ཀྱི་བར་གྱི་བསྐལ་པ་འོང་དུ་ཆ་ཞིང་འབྱུང་དུ་ཉེ་བར་གྱུར་པ་དེའི་ཚེ་མི་རྣམས་ཀྱི་ཚེ་ལོ་བཅུ་ཐུབ་པར་འགྱུར་ཏེ། ཚེ་ལོ་བཅུ་པའི་མི་རྣམས་ཀྱི་ནང་ན་གང་ཡུན་རིང་དུ་འཚོ་བ་དེས་ལོ་བཅུ་ཐུབ་སྟེ། རྒྱས་པར་རིང་དུ་གང་འཚོ་བ་དང་བུ་མོ་དང༌། །གོས་དང་ཟས་དང་ནུབ་པར་འགྱུར་བ་དང༌། །རྒྱན་རྣམས་དང་ནི་བཀུར་དང་སྡང་བ་དང༌། །ཞེས་མདོའི་ཚིགས་སུ་བཅད་པ་སྨོས་པར་བྱའོ། །ཚེ་ལོ་བཅུ་པའི་མི་རྣམས་ཆོས་མ་ཡིན་པ་སྤྱོད་ཅིང་མི་རིགས་པར་བྱེད་དོ། །དེ་དག་ཆོས་མ་ཡིན་པ་སྤྱོད་ཅིང་མི་རིགས་པ་བྱེད་པས་མི་མ་ཡིན་པ་རྣམས་འཁྲུགས་ནས་ནད་དང༌། གནོད་པ་དང༌། ནད་འགོ་བ་རྣམས་གཏོང་སྟེ། དེར་འདི་ལྟ་སྟེ་མི་མང་པོ་ནད་ཀྱིས་འཆི་བར་འགྱུར་རོ། །དེའི་ཚེ་གང་སུ་ཡང་རུང་སྟེ་ཤི་བ་དེ་དག་ཐམས་ཅད་ལུས་དང་བྲལ་ནས་སེམས་ཅན་དམྱལ་བར་སྐྱེ་བར་འགྱུར་རོ། །ནད་ཀྱི་བར་གྱི་བསྐལ་པ་དེ་ཡང་ཟླ་བ་བདུན་དང་ཉིན་ཞག་བདུན་ཁོ་ནར་ཟད་དེ། ཟླ་བ་བདུན་དང་ཉིན་ཞག་བདུན་གྱིས་མཐར་ཐུག་པར་བརྗོད་པར་བྱའོ། །དེ་ནས་མི་དེ་དག་འདི་སྙམ་དུ་བདག་ཅག་ཆོས་མ་ཡིན་པར་སྤྱོད་ཅིང་

---

^{[མ་དཔེ་གཟིགས་ན་འདིར་གནོན།]}

མི་རིགས་པར་བྱེད་པ་འདི་དང༌། སྡུག་བསྔལ་ལ་ཞུགས་པ་འདིས་གཉེན་འདུན་ཟད་ཅིང་ནོར་ཟད་ལ་ལོངས་སྤྱོད་ཟད་པར་གྱུར་གྱི། བདག་ཅག་གིས་དགེ་བའི་ཆོས་འགའ་ཞིག་ཡང་དག་པར་བླངས་ཏེ་འཁོད་པར་བྱ་ན། དགེ་བའི་ཆོས་གང་ཞིག་ཡང་དག་པར་བླངས་ཏེ་འཁོད་པར་བྱ་སྙམ་དུ་སེམས་སོ། །དེ་དག་འདི་སྙམ་དུ་ཀྱེ་བདག་ཅག་ནི་སྲོག་གཅོད་པ་ཡིན་གྱི། བདག་ཅག་གིས་སྲོག་གཅོད་པ་སྤོང་བར་བྱའོ་ཞེས་ནས་དེ་དག་སྲོག་གཅོད་པ་སྤོང་ངོ༌། །ཚེ་ལོ་བཅུ་པའི་མི་སྲོག་གཅོད་པ་སྤང་བ་དེ་དག་གི་བུ་དང་བུ་མོ་བཙས་པ་རྣམས་ཚེ་ལོ་ཉི་ཤུ་ཐུབ་པར་གྱུར་པ་ནས་རྒྱས་པར་ཚེ་ལོ་བརྒྱད་ཁྲི་བའི་མི་རྣམས་འཛམ་བུའི་གླིང་འདི་ཉིད་ན་འབྱོར་པ་དང༌། རྒྱས་པ་དང༌། བདེ་བ་དང་ལོ་ལེགས་པར་འགྱུར་ཞིང་སྐྱེ་བོ་དང་མི་མང་པོས་གང་བ་དང༌། བུ་མོ་ལོ་ལྔ་བརྒྱ་ལོན་པའི་བར་དུ་སྔ་མ་བཞིན་ནོ། །ནད་རྣམ་པ་གསུམ་ཡོད་པ་ནས་འབྲུ་རྣམས་ཆེ་ཞིང་མཆོག་ཏུ་ཆེ་སྟེ། དཔེར་ན་ཨིནྡྲ་བེ་ནུའི་འབྲས་བུ་བཞིན་ཏེ། རྒྱལ་ཞིང་མཆོག་ཏུ་རྒྱལ་ལ་སྙེ་མ་གཅིག་པུ་ལས་ཀྱང་བྲེ་བོ་བཞི་འབྱུང་བའི་བར་དུ་རྒྱས་པར་བྱའོ། །གང་གི་ཚེ་མུ་གེའི་བར་གྱི་བསྐལ་པ་འོང་དུ་ཆ་ཞིང་འབྱུང་དུ་ཉེ་བར་གྱུར་པ་དེའི་ཚེ་མི་རྣམས་ཀྱི་ཚེ་ལོ་བཅུ་ཐུབ་པར་འགྱུར་ཏེ། ཚེ་ལོ་བཅུ་པའི་མི་རྣམས་ཀྱི་ནང་ན་གང་ཡུན་རིང་དུ་འཚོ་བ་དེས་ལོ་བཅུ་ཐུབ་པ་ན། ཚེ་ལོ་བཅུ་པའི་མི་རྣམས་ཆོས་མ་ཡིན་པ་སྤྱོད་ཅིང་མི་རིགས་པ་བྱེད་པའི་བར་དུ་རྒྱས་པར་བྱའོ། །དེ་དག་ཆོས་མ་ཡིན་པ་སྤྱོད་ཅིང་མི་རིགས་པར་བྱེད་པས་ལྷས་དུས་དུས་སུ་ཆར་གྱི་རྒྱུན་ལེགས་པར་མི་འབེབས་ཏེ། མུ་གེ་དང༌། ཚེགས་ཆེན་པོ་དང༌། དགོན་པ་དང༌། ཐུར་མས་འཚོ་བ་དང༌། རྗུད་པ་དང༌། རུས་པ་དཀར་པོ་འབྱུང་བར་འགྱུར་ཏེ། མུ་གེ་ཞེས་བྱ་བ་ནི་དེའི་ཚེ་སློང་བ་རྣམས་ཀྱིས་སློང་མོ་རྙེད་པར་དཀའ་སྟེ། དེ་བས་ན་མུ་གེ་ཞེས་བྱའོ། །ཚེགས་ཆེན་པོ་ཞེས་བྱ་བ་ནི་དེའི་ཚེ་མི་རྣམས་རྩོལ་བ་ཆེན་པོ་དང༌། འབད་པ་ཆེན་པོ་དང༌། བཤམ་པ་ཆེན་པོ་དང༌། ལུས་གཟེར་བ་ཆེན་པོས་ཟས་དང་གོས་སྒྲུབ་པར་བྱེད་དེ། དེ་བས་ན་ཚེགས་ཆེན་པོ་ཞེས་བྱའོ། །དགོན་པ་ཞེས་བྱ་བ་ནི་ཇི་ལྟར་དེ་ལྟར་འབྲོག་ཆེན་པོའི་དགོན་པ་དང༌། ཆུའི་དགོན་པ་དང༌། ཆོམ་རྐུན་གྱི་དགོན་པ་ཡོད་པ་དེ་བཞིན་དུ། དེའི་ཚེ་བཟའ་བ་དང༌། བཏུང་བ་དང༌།

---

^{[མ་དཔེ་གཟིགས་ན་འདིར་གནོན།]}

བགོ་བའི་དགོན་པ་ཆེན་པོ་ཡོད་དེ། དེ་བས་ན་དགོན་པ་ཞེས་བྱའོ། །རྗུད་པ་ཞེས་བྱ་བ་ནི་ད་ལྟར་གྱི་འགྱེལ་བ་ཞེས་བྱ་བ་ཡིན་པ་དེའི་དུས་ན་རྗུད་པ་ཞེས་བྱ་སྟེ། དེའི་ཚེ་མི་དེ་དག་བཀྲེས་པ་དང༌། ཉམ་ཆུང་བ་དང་ལྡན་པས་ས་ལ་འགྱེལ་ཏོ། །འགྱེལ་ནས་ཀྱང་ལྡང་མི་ནུས་སོ། །གཞན་ཡང་སུ་ཡང་སློང་ནུས་པ་མེད་པ་དེ་དག་དེ་ཉིད་དུ་འཆི་བར་འགྱུར་རོ། །རྗུད་པ་དེས་མི་དེ་ཤི་བས་ན་མིང་རྗུད་པ་རྗུད་པ་ཞེས་བྱ་བར་གྱུར་ཏོ། །གཞན་ཡང་རྗུད་པའི་མིང་ནི་གབ་ཙེ་བ་ལ་ཡང་བྱ་སྟེ། དེའི་ཚེ་མི་དེ་དག་གིས་འབྲུ་སྣ་ཚོགས་དང༌། འབྲས་རྣམས་གབ་ཙེའི་ནང་དུ་བཅུག་སྟེ། འདི་སྐྱེ་བོ་ཕྱི་མ་རྣམས་ཀྱི་འབྲུའི་ས་བོན་དུ་བྱའོ་ཞེས་ནས་འཆི་བར་འགྱུར་རོ། །དེ་བས་ན་རྗུད་པ་ཞེས་བྱའོ། །ཐུར་མས་འཚོ་བ་ཞེས་བྱ་བ་དེའི་ཚེ་ན་མི་རྣམས་ཀྱི་ས་ལས་ས་བོན་གང་སྐྱེད་པ་དེ་དག་འབྲུ་ཆུང་བ་འམ། འབྲས་བུ་གཅིག་པུ་འབྱུང་བར་འགྱུར་བ་དང༌། གཞན་ཡང་ཚེ་ཐུང་བའི་མི་རྣམས་བཟའ་མི་རིམ་གྱིས་ཐུར་མ་འདྲི་མ་སྟེ་དེ་རིང་ནི་ཇོ་བོས་གསོལ་གྱི་སང་ནི་ཇོ་མོས་གསོལ་ལོ། །དེ་རིང་ནི་ཇོ་ཅོས་གསོལ་གྱི་སང་ནི་ཇོ་ཅོ་ལྕམ་གསོལ་ལོ་ཞེས་བྱ་བ་དང༌། གཞན་ཡང་དེའི་ཚེ་མི་རྣམས་འབྲས་ཀྱི་བང་བ་དང༌། འབྲུའི་བང་བ་དག་ནས་འབྲུ་སྣ་ཚོགས་ཀྱི་འབྲུ་ཐུར་མས་བྲུས་ཏེ། ཆུ་མང་པོ་དང་རྫ་མའི་ནང་དུ་བླུགས་ནས་བསྐོལ་ཏེ། འཐུང་བས་དེའི་ཕྱིར་ཐུར་མས་འཚོ་བ་ཞེས་བྱའོ། །རུས་པ་དཀར་པོ་ཞེས་བྱ་བ་ནི་དེའི་ཚེ་མི་རྣམས་བཀྲེས་ཤིང་ཉམ་ཆུང་བ་དང་ལྡན་བཞིན་དུ་འཆི་བ་དེ་དག་གི་རུས་པ་དེ་དག་རྩུབ་ཅིང་སྣུམ་བག་མེད་པ་དང༌། གཞན་ཡང་དེའི་ཚེ་མི་རྣམས་ཀྱིས་རུས་པ་དེ་དག་བསྡུས་ཏེ། ཆུ་མང་པོ་དང་རྫ་མའི་ནང་དུ་བླུགས་ནས་རུས་པའི་ཁུ་བ་བསྐོལ་ཏེ་འཐུང་བས་དེའི་ཕྱིར་རུས་པ་དཀར་པོ་ཞེས་བྱའོ། །དེ་དག་ལ་སོགས་པ་རྣམ་གྲངས་མང་པོ་རྣམས་བརྗོད་པར་བྱའོ། །དེའི་ཚེ་མུ་གེ་ཆེན་པོའི་བར་གྱི་བསྐལ་པ་དེ་དེ་ལྟ་བུར་འགྱུར་ཏེ། དེའི་ཚེ་གང་སུ་ཡང་རུང་སྟེ་ཤི་བ་དེ་དག་ཐམས་ཅད་ཡི་དགས་སུ་སྐྱེ་བར་འགྱུར་རོ། །མུ་གེའི་བར་གྱི་བསྐལ་པ་དེ་ཡང་ལོ་བདུན་དང༌། ཟླ་བ་བདུན་དང༌། ཉིན་ཞག་བདུན་ཁོ་ནར་ཟད་དེ། ལོ་བདུན་དང༌། ཟླ་བ་བདུན་དང་ཉིན་ཞག་བདུན་འདས་ནས་མཐར་ཐུག་པར་བརྗོད་པར་བྱའོ། །དེར་མི་གང་མུ་གེའི་

---

^{[མ་དཔེ་གཟིགས་ན་འདིར་གནོན།]}

བར་གྱི་བསྐལ་པས་འདོག་ཅིང་འཛེམ་པར་གྱུར་ལ་སྨོད་ཅིང་རྣམ་པར་སྨོད་པ་དེ་དག་ལས་ཁ་ཅིག་ཆུ་ཀླུང་ཆེན་པོ་དང༌། མཚོ་ཆེན་པོ་དང༌། རྫིང་ཆེན་པོ་དག་དང༌། ལུ་མ་ཆེན་པོ་དག་དང༌། ལྟེང་ཀ་དག་ཏུ་སོང་ནས་ཁྲེ་རྒོད་དང༌། ཨུཏྤ་ལའི་རྩ་བ་དག་གིས་འཚོ་ཞིང་འདུག་སྟེ། ལོ་བདུན་དང༌། ཟླ་བ་བདུན་དང༌། ཉིན་ཞག་བདུན་ལོན་ནས་གྲོང་དང་གྲོང་རྡལ་དང༌། ཡུལ་འཁོར་དང༌། རྒྱལ་པོའི་ཕོ་བྲང་འཁོར་དག་ཏུ་ཕྱིར་ལྡོག་སྟེ། སེམས་ཅན་དེ་དག་གཅིག་གིས་གཅིག་མཐོང་ནས་ཤས་ཆེར་བྱམས་པ་དང༌། སྡུག་པ་དང༌། གུས་པ་དང༌། སྙིང་བརྩེ་བའི་སེམས་ཉེ་བར་གནས་བར་འགྱུར་ཏེ། འདི་སྐད་དུ་ཀྱེ་མ་སེམས་ཅན་གསོན་པོ་མཐོང་ངོ༌། །ཀྱེ་མ་སེམས་ཅན་གསོན་པོ་མཐོང་ངོ་ཞེས་ཀྱང་འཛེར་ཏོ། །དཔེར་ན་ད་ལྟར་གྱི་མི་རྣམས་ཀྱི་མ་ལ་བུ་ཞེས་བྱ་བ་ནས་དེ་བཞིན་དུ་ཚེ་ལོ་བཅུ་པའི་མི་རྣམས་ཀྱེ་མ་སེམས་ཅན་གསོན་པོ་མཐོང་ངོ་ཞེས་བྱ་བའི་བར་དུ་སྔ་མ་བཞིན་ནོ། །དེ་དག་ནི་འདི་སྙམ་དུ་བདག་ཅག་ཆོས་མ་ཡིན་པ་སྤྱོད་པ་འདི་དང༌། མི་རིགས་པ་བྱེད་པ་དང༌། སྡུག་བསྔལ་ལ་ཞུགས་པ་འདིས་ཞེས་བྱ་བ་སྔ་མ་བཞིན་ནོ། །བདག་ཅག་གིས་དགེ་བའི་ཆོས་འགའ་ཞིག་ཡང་དག་པར་བླངས་ཏེ་འཁོད་པར་བྱ་ན་དགེ་བའི་ཆོས་གང་ཞིག་ཡང་དག་པར་བླངས་ཏེ་འཁོད་པར་བྱ་སྙམ་ནས་དེ་དག་འདི་སྙམ་དུ་ཀྱེ་བདག་ཅག་ནི་སྲོག་གཅོད་པ་ཡིན་གྱི། བདག་ཅག་གིས་སྲོག་གཅོད་པ་སྤང་ངོ་ཞེས་ནས་དེ་དག་སྲོག་གཅོད་པ་སྤོང་ངོ༌། །ཚེ་ལོ་བཅུ་པའི་མི་སྲོག་གཅོད་པ་སྤོང་བ་དེ་དག་གི་བུ་དང་བུ་མོ་བཙས་པ་རྣམས་ཚེ་ལོ་ཉི་ཤུ་ཐུབ་པར་གྱུར་ཏོ་ཞེས་བྱ་བ་ནས། སྔ་མ་བཞིན་དུ་ཚེ་ལོ་བརྒྱད་ཁྲི་བའི་མི་རྣམས་ཀྱི་འབྲུ་རྣམས་ཆེ་ཞིང་མཆོག་ཏུ་ཆེ་བ་ནི་དཔེར་ན། ཨིནྡྲ་བེ་ནུའི་འབྲས་བུ་བཞིན་ཏེ། རྒྱལ་ཞིང་མཆོག་ཏུ་རྒྱལ་བ་སྙེ་མ་གཅིག་པུ་ལས་ཀྱང་བྲེ་བོ་བཞི་འབྱུང་བའི་བར་དུ་རྒྱས་པར་བྱའོ། །གང་གི་ཚེ་མེས་འཇིག་པ་འོང་དུ་ཆ་ཞིང་འབྱུང་དུ་ཉེ་བར་གྱུར་པ་དེའི་ཚེ་མི་རྣམས་ཚེ་ལོ་བརྒྱད་ཁྲི་ཐུབ་པར་འགྱུར་རོ། །ཚེ་ལོ་བརྒྱད་ཁྲི་པའི་མི་རྣམས་འཛམ་བུའི་གླིང་འདི་ཉིད་ན་འབྱོར་བ་དང༌། ལེགས་པར་འགྱུར་ཞིང་སྐྱེ་བོ་དང་མི་མང་པོས་གང་ངོ༌། །ཚེ་ལོ་བརྒྱད་ཁྲི་བའི་མི་རྣམས་ཞེས་བྱ་བ་ནས་སྔ་མ་བཞིན་དུ་སྙེ་མ་

---

^{[མ་དཔེ་གཟིགས་ན་འདིར་གནོན།]}

གཅིག་པུ་ལས་བྲེ་བོ་བཞི་འབྱུང་ཞེས་བྱ་བའི་བར་དུ་རྒྱས་པར་བྱའོ། །སེམས་ཅན་དམྱལ་བ་དག་ནས་སེམས་ཅན་རྣམས་འཆི་འཕོ་ལ་སྐྱེ་བ་ནི་མེད་པ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དེ། གང་གི་ཚེ་སེམས་ཅན་དམྱལ་བ་དག་ནས་སེམས་ཅན་རྣམས་འཆི་འཕོ་ལ་སྐྱེ་བ་མེད་ན་དེ་ཙམ་གྱིས་ན་འཇིག་རྟེན་འདི་བར་གྱི་བསྐལ་པ་ཉི་ཤུར་ཆགས་པར་གནས་པ་དེ་མཐར་ཐུག་པར་བརྗོད་པར་བྱའོ། །སེམས་ཅན་དམྱལ་བར་སེམས་ཅན་འགའ་ཡང་མ་ལུས་པར་འགྱུར་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དེ། གང་གི་ཚེ་སེམས་ཅན་དམྱལ་བར་སེམས་ཅན་འགའ་ཡང་མ་ལུས་པར་གྱུར་ན། དེ་ཙམ་གྱིས་ན་འཇིག་རྟེན་འདི་ལྟ་སྟེ། སེམས་ཅན་དམྱལ་བ་འཇིག་པར་འགྱུར་བ་ཞིག་པར་བརྗོད་པར་བྱའོ། །སེམས་ཅན་དམྱལ་བ་ཇི་ལྟ་བ་དེ་བཞིན་དུ་དུད་འགྲོ་དང༌། ཡི་དགས་སུ་སེམས་ཅན་འགའ་ཡང་མ་ལུས་པར་འགྱུར་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ་ཞེས་བྱ་བའི་བར་དུ་སྔ་མ་བཞིན་ཏེ། དེས་ན་འཇིག་རྟེན་གྱི་བར་གྱི་བསྐལ་པ་ཉི་ཤུར་འཇིག་པ་དེ་བྱུང་བར་བརྗོད་པར་བྱའོ། །འཛམ་བུའི་གླིང་ན་སེམས་ཅན་གང་ཡང་རུང་བ་ཞིག་ལུང་མེད་པར་ཆོས་ཉིད་ཀྱིས་འཐོབ་པའི་བསམ་གཏན་དང་པོ་ལ་མཉམ་པར་འཇོག་སྟེ། དེ་ཏིང་ངེ་འཛིན་དེ་ལས་ལངས་ནས་ཀྱེ་མ་དབེན་པ་ལས་སྐྱེས་པའི་དགའ་བ་དང༌། བདེ་བ་ནི་བདེའོ། །ཀྱེ་མ་དབེན་བ་ལས་སྐྱེས་པའི་དགའ་བ་དང་བདེ་བ་ནི་བདེའོ་ཞེས་སྒྲ་བརྗོད་ཅིང་དབྱངས་སྒྲོགས་པར་བྱེད་དེ། སྒྲ་དེ་ཚིགས་ཆུང་ངུས་འཛམ་བུའི་གླིང་ཐམས་ཅད་དུ་ཁྱབ་པར་འགྲོ་ལ། དེ་ནས་དེ་ལས་གཞན་པའི་སེམས་ཅན་དག་གིས་ཀྱང་སྒྲ་དེ་ཐོས་ནས་ཆོས་ཉིད་ཀྱིས་འཐོབ་པའི་བསམ་གཏན་དང་པོ་ལ་མཉམ་པར་འཇོག་པ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དེ། །འཛམ་བུའི་གླིང་ན་སེམས་ཅན་གང་དགྲ་འཆི་འཕོ་ལ་སྐྱེ་བ་ནི་མེད་པ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །འཛམ་བུའི་གླིང་དུ་སེམས་ཅན་འགའ་ཡང་མ་ལུས་པར་འགྱུར་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དེ། གང་གི་ཚེ་འཛམ་བུའི་གླིང་ན་སེམས་ཅན་འགའ་ཡང་མ་ལུས་པར་ན་དེ་ཙམ་གྱིས་ན་འཇིག་རྟེན་འདི་འདི་ལྟ་སྟེ། སེམས་ཅན་དམྱལ་བ་འཇིག་པར་འགྱུར་བ་དང༌། དུད་འགྲོ་འཇིག་

---

^{[མ་དཔེ་གཟིགས་ན་འདིར་གནོན།]}

པར་འགྱུར་བ་དང༌། ཡི་དགས་འཇིག་པར་འགྱུར་བ་དང༌། འཛམ་བུའི་གླིང་འཇིག་པར་འགྱུར་བ་ཞིག་པར་བརྗོད་པར་བྱའོ། །འཛམ་བུའི་གླིང་ཇི་ལྟ་བ་བཞིན་དུ་ཤར་གྱི་ལུས་འཕགས་དང༌། ནུབ་ཀྱི་བ་ལང་སྤྱོད་ཀྱང་དེ་དང་འདྲའོ། །བྱང་གི་སྒྲ་མི་སྙན་ན་སེམས་ཅན་གང་དག་འཆི་འཕོ་ལ་སྐྱེ་བ་ནི་མེད་པ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །བྱང་གི་སྒྲ་མི་སྙན་གྱི་སེམས་ཅན་འགའ་ཡང་མ་ལུས་པར་འགྱུར་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །གང་གི་ཚེ་བྱང་གི་སྒྲ་མི་སྙན་དུ་སེམས་ཅན་གཅིག་ཀྱང་མ་ལུས་པར་གྱུར་ན། དེ་ཙམ་གྱིས་ན་འཇིག་རྟེན་འདི་འདི་ལྟ་སྟེ། སེམས་ཅན་དམྱལ་བ་འཇིག་པར་འགྱུར་བ་དང༌། ཡི་དྭགས་འཇིག་པར་འགྱུར་བ་དང༌། མི་འཇིག་པར་འགྱུར་བ་ཞིག་པར་བརྗོད་པར་བྱའོ། །རྒྱལ་ཆེན་བཞི་པའི་ལྷ་རྣམས་ཀྱི་ནང་ན་སེམས་ཅན་གང་ཡང་རུང་བ་ཞིག་ལུང་མེད་པར་ཆོས་ཉིད་ཀྱིས་འཐོབ་པའི་བསམ་གཏན་དང་པོ་ལ་མཉམ་པར་འཇོག་སྟེ། དེ་ཏིང་ངེ་འཛིན་དེ་ལས་ལངས་ནས་ཀྱེ་མ་དབེན་པ་ལས་སྐྱེས་པའི་དགའ་བ་དང་བདེ་བ་ནི་བདེའོ། །ཀྱེ་མ་དབེན་པ་ལས་སྐྱེས་པའི་དགའ་བ་དང་བདེ་བ་ནི་བདེའོ། །ཞེས་སྒྲ་བརྗོད་ཅིང་དབྱངས་སྒྲོགས་པར་བྱེད་དེ། སྒྲ་དེ་ཚེགས་ཆུང་ངུས་རྒྱལ་ཆེན་བཞི་པའི་ལྷ་རྣམས་ཀྱི་ནང་དུ་ཁྱབ་པར་འགྲོ་ལ། དེ་ནས་དེ་ལས་གཞན་པའི་སེམས་ཅན་དག་གིས་ཀྱང་སྒྲ་དེ་ཐོས་ནས་ཆོས་ཉིད་ཀྱིས་འཐོབ་པའི་བསམ་གཏན་དང་པོ་ལ་མཉམ་པར་འཇོག་པ་དེའི་དུས་ཀྱང་ཡོད་ལ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །རྒྱལ་ཆེན་བཞི་པའི་ལྷ་རྣམས་འཆི་འཕོ་ལ་སྐྱེ་བ་ནི་མེད་པ་སྟེ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །རྒྱལ་ཆེན་བཞི་བའི་ལྷ་རྣམས་ལ་སེམས་ཅན་འགའ་ཡང་མ་ལུས་པར་འགྱུར་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །གང་གི་ཚེ་རྒྱལ་ཆེན་བཞི་པའི་ལྷ་རྣམས་ལ་སེམས་ཅན་འགའ་ཡང་མ་ལུས་པར་གྱུར་ན་དེ་ཙམ་གྱིས་ན་འཇིག་རྟེན་འདི་ལྟ་སྟེ། སེམས་ཅན་དམྱལ་བ་འཇིག་པར་འགྱུར་བ་དང༌། དུད་འགྲོ་འཇིག་པར་འགྱུར་བ་དང༌། ཡི་དགས་འཇིག་པར་འགྱུར་བ་དང༌། མི་འཇིག་པར་འགྱུར་བ་དང༌། རྒྱལ་ཆེན་བཞི་པའི་ལྷ་རྣམས་འཇིག་པར་འགྱུར་བ་ཞིག་པར་བརྗོད་པར་བྱའོ། །རྒྱལ་ཆེན་བཞི་པའི་ལྷ་

---

^{[མ་དཔེ་གཟིགས་ན་འདིར་གནོན།]}

རྣམས་ཇི་ལྟ་བ་བཞིན་དུ་སུམ་ཅུ་རྩ་གསུམ་པ་དང༌། འཐབ་བྲལ་བ་དང༌། དགའ་ལྡན་པ་དང༌། འཕྲུལ་དགའ་བ་དང༌། གཞན་འཕྲུལ་དབང་བྱེད་པ་རྣམས་ཀྱང་དེ་དང་འདྲའོ། །གང་གི་ཚེ་གཞན་འཕྲུལ་དབང་བྱེད་དུ་སེམས་ཅན་འགའ་ཡང་མ་ལུས་པར་གྱུར་ན། དེ་ཙམ་གྱིས་ན་འཇིག་རྟེན་འདི་འདི་ལྟ་སྟེ། འདོད་པའི་ཁམས་འཇིག་པར་འགྱུར་བ་ཞིག་པར་བརྗོད་པར་བྱའོ། །ཚངས་པའི་འཇིག་རྟེན་དུ་སེམས་ཅན་གང་ཡང་རུང་བ་ཞིག་ལུང་མེད་པར་ཆོས་ཉིད་ཀྱིས་འཐོབ་པའི་བསམ་གཏན་གཉིས་པ་ལ་མཉམ་པར་འཇོག་སྟེ། དེ་ཏིང་ངེ་འཛིན་དེ་ལས་ལངས་ནས་ཀྱེ་མ་ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བ་དང་ཞི་བ་ནི་བདེའོ། །ཀྱེ་མ་ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བ་དང་ཞི་བ་ནི་བདེའོ་ཞེས་སྒྲ་བརྗོད་ཅིང་དབྱངས་སྒྲོགས་པར་བྱེད་དེ། སྒྲ་དེ་ཚེགས་ཆུང་ངུས་ཚངས་པའི་འཇིག་རྟེན་ཐམས་ཅད་དུ་ཁྱབ་པར་འགྲོ་ལ། དེ་ནས་དེ་ལས་གཞན་པའི་སེམས་ཅན་རྣམས་ཀྱིས་སྒྲ་དེ་ཐོས་ནས་བསམ་གཏན་གཉིས་པ་ལ་མཉམ་པར་འཇོག་པ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །ཚངས་པའི་འཇིག་རྟེན་ནས་སེམས་ཅན་རྣམས་འཆི་འཕོ་ལ་སྐྱེ་བ་ནི་མེད་པ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །ཚངས་པའི་འཇིག་རྟེན་དུ་སེམས་ཅན་འགའ་ཡང་མ་ལུས་པར་འགྱུར་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །གང་གི་ཚེ་ཚངས་པའི་འཇིག་རྟེན་དུ་སེམས་ཅན་འགའ་ཡང་མ་ལུས་པར་གྱུར་ན་དེ་ཙམ་གྱིས་ན་འཇིག་རྟེན་འདི་འདི་ལྟ་སྟེ། ཚངས་པའི་འཇིག་རྟེན་འཇིག་པར་འགྱུར་བ་ཞིག་པར་བརྗོད་པར་བྱས་ཏེ་འཇིག་རྟེན་འདི་སྟོངས་པར་འགྱུར་རོ། །ལྷ་ཡང་དུས་དུས་སུ་ཆར་གྱི་རྒྱུན་ལེགས་པར་མི་འབེབས་ཏེ། ལྷ་རྣམས་དུས་དུས་སུ་ཆར་གྱི་རྒྱུན་ལེགས་པར་མི་འབེབས་པས་ས་ཆེན་པོ་འདི་ལ་ས་བོན་གྱི་ཚོགས་དང༌། ཤིང་གི་ཚོགས་དང༌། སྨན་དང༌། རྩྭ་དང༌། འབྲས་བུའི་ཤིང་གང་ཡིན་པ་དེ་དག་ཐམས་ཅད་སྐམ་པར་འགྱུར་ཞིང་མ་རུང་བར་འགྱུར་ཏེ་མེད་པར་འགྱུར་རོ། །ཡུན་རིང་མོ་ཞིག་འདས་ནས་ཉི་མ་གཉིས་པ་འཇིག་རྟེན་དུ་འབྱུང་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །ཉི་མ་གཉིས་པ་འཇིག་རྟེན་དུ་བྱུང་བས་ས་ཆེན་པོ་འདི་ན་ལྟེང་ཀ་ཆུང་ངུ་དང༌། ལྟེང་ཀ་ཆེན་

---

^{[མ་དཔེ་གཟིགས་ན་འདིར་གནོན།]}

པོ་ཡོད་པ་དེ་དག་ཐམས་ཅད་སྐམ་པར་འགྱུར་ཞིང་མ་རུང་བར་འགྱུར་ཏེ་མེད་པར་འགྱུར་རོ། །ཡུན་རིང་མོ་ཞིག་འདས་ནས་ཉི་མ་གསུམ་པ་འཇིག་རྟེན་དུ་འབྱུང་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །ཉི་མ་གསུམ་པ་འཇིག་རྟེན་དུ་འབྱུང་བས་ས་ཆེན་པོ་འདི་ན་ཆུ་ཀླུང་ཆུང་ངུ་དང༌། ཆུ་ཀླུང་ཆེན་པོ་ཡོད་པ་གང་ཡིན་པ་དེ་དག་ཐམས་ཅད་སྐམ་པར་འགྱུར་ཞིང་མ་རུང་བར་འགྱུར་ཏེ་མེད་པར་འགྱུར་རོ། །ཡུན་རིང་མོ་ཞིག་འདས་ནས་ཉི་མ་བཞི་པ་འཇིག་རྟེན་དུ་འབྱུང་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །ཉི་མ་བཞི་པ་འཇིག་རྟེན་དུ་བྱུང་བས་མཚོ་མ་དྲོས་པ་ཞེས་བྱ་བའི་མཚོ་ཆེན་པོ་གང་ནས་ཀླུང་བཞི་ལ་འདི་ལྟ་སྟེ། གང་གཱ་དང༌། སིནྡྷུ་དང༌། སི་ཏ་དང༌། པཀྵུ་རྣམས་འབྱུང་བའི་མཚོ་ཆེན་པོ་དེ་ཡང་དེའི་ཚེ་སྐམ་པར་འགྱུར་ཞིང་མ་རུང་བར་འགྱུར་ཏེ་མེད་པར་འགྱུར་རོ། །ཡུན་རིང་མོ་ཞིག་འདས་ནས་ཉི་མ་ལྔ་པ་འཇིག་རྟེན་དུ་འབྱུང་བར་འགྱུར་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །ཉི་མ་ལྔ་པ་འཇིག་རྟེན་དུ་བྱུང་བས་རྒྱ་མཚོ་ཆེན་པོའི་ཆུ་དཔག་ཚད་བརྒྱ་སྐམ་པར་འགྱུར་ཞིང་མ་རུང་བར་འགྱུར་ཏེ་མེད་པར་འགྱུར་རོ། །ཆུ་དཔག་ཚད་གཉིས་དང༌། གསུམ་དང༌། བཞི་དང༌། ལྔ་དང༌། དྲུག་དང༌། བདུན་དག་ཀྱང་སྐམ་པར་འགྱུར་ཞིང་མ་རུང་བར་འགྱུར་ཏེ་མེད་པར་འགྱུར་རོ། །ཉི་མ་ལྔ་པ་འཇིག་རྟེན་དུ་འབྱུང་བས་རྒྱ་མཚོ་ཆེན་པོའི་ཆུ་དཔག་ཚད་བདུན་སྟོང་ལུས་པར་འགྱུར་ཞིང༌། དཔག་ཚད་དྲུག་སྟོང་དང༌། ལྔ་སྟོང་དང༌། བཞི་སྟོང་དང༌། སུམ་སྟོང་དང༌། ཉིས་སྟོང་དང༌། ཆིག་སྟོང་ལུས་པར་འགྱུར་རོ། །ཉི་མ་ལྔ་པ་འཇིག་རྟེན་དུ་བྱུང་བས་རྒྱ་མཚོ་ཆེན་པོའི་ཆུད་པག་ཚད་བདུན་བརྒྱ་ལུས་པར་འགྱུར་ཞིང༌། དཔག་ཚད་དྲུག་བརྒྱ་དང༌། ལྔ་བརྒྱ་དང༌། བཞི་བརྒྱ་དང༌། སུམ་བརྒྱ་དང༌། ཉིས་བརྒྱ་དང༌། ཚིག་བརྒྱ་ལུས་པར་འགྱུར་རོ། །ཉི་མ་ལྔ་པ་འཇིག་རྟེན་དུ་བྱུང་བས་རྒྱ་མཚོ་ཆེན་པོའི་ཆུ་དཔག་ཚད་བདུན་ལུས་པར་འགྱུར་ཞིང༌། དཔག་ཚད་དྲུག་དང༌། ལྔ་དང༌། བཞི་དང༌། གསུམ་དང༌། གཉིས་དང༌། གཅིག་ལུས་པར་འགྱུར་རོ། །ཉི་མ་ལྔ་པ་འཇིག་རྟེན་དུ་བྱུང་བས་རྒྱ་མཚོ་ཆེན་པོའི་ཆུ་རྒྱང་གྲགས་བདུན་ཙམ་ལུས་པར་འགྱུར་ཞིང་རྒྱང་གྲགས་དྲུག་དང༌། ལྔ་

---

^{[མ་དཔེ་གཟིགས་ན་འདིར་གནོན།]}

དང༌། བཞི་དང༌། གསུམ་དང༌། གཉིས་དང༌། གཅིག་ལུས་པར་འགྱུར་ཞིང༌། ཉི་མ་ལྔ་པ་འཇིག་རྟེན་དུ་བྱུང་བས་རྒྱ་མཚོ་ཆེན་པོའི་ཆུ་ཏཱ་ལ་བདུན་ཙམ་ལུས་པར་འགྱུར་ཞིང་ཏཱ་ལ་དྲུག་དང༌། ལྔ་དང༌། བཞི་དང༌། གསུམ་དང༌། གཉིས་དང༌། གཅིག་ཙམ་ལུས་པར་འགྱུར་རོ། །ཉི་མ་ལྔ་པ་འཇིག་རྟེན་དུ་བྱུང་བས་རྒྱ་མཚོ་ཆེན་པོའི་ཆུ་མི་འགྲེང་བདུན་ཙམ་ལུས་པར་འགྱུར་ཞིང་མི་འགྲེང་དྲུག་དང༌། ལྔ་དང༌། བཞི་དང༌། གསུམ་དང༌། གཉིས་དང༌། གཅིག་ཙམ་ལུས་པར་འགྱུར་རོ། །ཉི་མ་ལྔ་པ་འཇིག་རྟེན་དུ་བྱུང་བས་ཆུ་ལྐོག་མར་ཕྱིན་པ་ཙམ་ལུས་པར་འགྱུར་ཞིང་མཆན་ཁུང་ཙམ་དང༌། ལྟེ་བ་ཙམ་དང༌། སྟ་ཟུར་ཙམ་དང༌། བརླ་ཙམ་དང༌། རྗེ་ངར་ཙམ་དང༌། ལོང་བུ་ཙམ་ནུབ་པའི་ཆུ་ལུས་པར་འགྱུར་རོ། །ཉི་མ་ལྔ་པ་འཇིག་རྟེན་དུ་བྱུང་བས་ཆུ་གཏན་ནས་སྐམ་པར་འགྱུར་ཞིང་མ་ལུས་པར་འགྱུར་ལ་མེད་པར་འགྱུར་ཏེ། མཐར་མཛུབ་མོ་གཤེར་བར་བྱ་བ་ཙམ་ཡང་མེད་དོ། །ཡུན་རིང་མོ་ཞིག་འདས་ནས་ཉི་མ་དྲུག་པ་འཇིག་རྟེན་དུ་འབྱུང་བར་འགྱུར་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །ཉི་མ་དྲུག་པ་འཇིག་རྟེན་དུ་བྱུང་བས་ས་ཆེན་པོ་འདི་དང༌། རིའི་རྒྱལ་པོ་རི་རབ་ལ་དུ་བ་འཐུལ་ཅིང་རབ་ཏུ་འཐུལ་ལ། ཀུན་ཏུ་རབ་ཏུ་འཐུལ་ཏེ་དཔེར་ན་རྫ་མཁན་སོ་བཏང་བ་དེས་ཐོག་མ་མེ་བཏང་བ་ན་དུ་བ་འཐུལ་ཞིང་རབ་ཏུ་འཐུལ་ལ་ཀུན་ཏུ་རབ་ཏུ་འཐུལ་བ་དེ་བཞིན་དུ་ཉི་མ་དྲུག་པ་འཇིག་རྟེན་དུ་བྱུང་བས་ས་ཆེན་པོ་འདི་དང་རིའི་རྒྱལ་པོ་རི་རབ་ལ་དུ་བ་འཐུལ་ཞིང་རབ་ཏུ་འཐུལ་ལ། དུ་བ་ཀུན་ཏུ་རབ་ཏུ་འཐུལ་ལོ། །ཡུན་རིང་མོ་ཞིག་འདས་ནས། ཉི་མ་བདུན་པ་འཇིག་རྟེན་དུ་འབྱུང་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །ཉི་མ་བདུན་པ་འཇིག་རྟེན་དུ་བྱུང་བས་ས་ཆེན་པོ་འདི་དང་རིའི་རྒྱལ་པོ་རི་རབ་འབར་ནས་མེ་ལྕེ་གཅིག་ཏུ་གྱུར་ཅིང་སྲེག་སྟེ། དཔེར་ན་ཤིང་ཁུར་བཅུ་ལ་བརྟེན་ནས། ཉི་ཤུ་འམ། སུམ་ཅུ་འམ། བཞི་བཅུ་འམ། ལྔ་བཅུ་འམ། ཤིང་ཁུར་བརྒྱ་འམ། ཤིང་ཁུར་སྟོང་ངམ། ཤིང་ཁུར་བརྒྱ་སྟོང་ལ་བརྟེན་ཏེ། མེའི་ཕུང་པོ་ཆེན་པོ་རབ་ཏུ་འབར་བ་དེ་བཞིན་དུ་ཉི་མ་བདུན་པ་འཇིག་རྟེན་དུ་བྱུང་བས་ས་ཆེན་པོ་འདི་དག་རིའི་རྒྱལ་པོ་རི་རབ་འབར་ཞིང་རབ་ཏུ་འབར་

---

^{[མ་དཔེ་གཟིགས་ན་འདིར་གནོན།]}

ལ། ཀུན་ཏུ་རབ་ཏུ་འབར་ནས་མེ་ལྕེ་གཅིག་ཏུ་གྱུར་ཅིང་སྲེག་གོ །ས་ཆེན་པོ་འདི་དང་རིའི་རྒྱལ་པོ་རི་རབ་དེ་འབར་ཞིང་རབ་ཏུ་འབར་ལ། ཀུན་དུ་རབ་ཏུ་འབར་ཏེ་མེ་ལྕེ་གཅིག་ཏུ་གྱུར་ཅིང་བསྲེགས་པའི་མེ་ལྕེ་རླུང་གིས་གྱེན་དུ་ཁྱེར་ནས་ཚངས་པའི་གཞལ་མེད་ཁང་སྟོང་པ་རྣམས་ཀྱི་བར་དུ་སྲེག་ཅིང་འགྲོ་སྟེ། འོད་གསལ་གྱི་ལྷའི་རིས་ནས་སེམས་ཅན་གང་སྐྱེས་ནས་རིང་པོར་མ་ལོན་ལ། འཇིག་རྟེན་འདི་འཇིག་པའི་རྒྱུས་ལ་མི་མཁས་ཤིང་འཆགས་པའི་རྒྱུས་ལ་མི་མཁས་པ་དེ་དག་གིས་མེ་ལྕེ་དེ་མཐོང་ནས་མེ་ལྕེ་འདི་ཚངས་པའི་གཞལ་མེད་ཁང་སྟོང་པའི་བར་དུ་བསྲེགས་ནས་འདི་ཉིད་དུ་མི་འོང་གྲང་ཞེས་མི་དགའ་ཞིང་སྐྱོ་བར་འགྱུར་རོ། །དེ་ལ་འོད་གསལ་གྱི་ལྷའི་རིས་ན་སེམས་ཅན་གང་སྔོན་སྐྱེས་པ་འཇིག་རྟེན་འདི་འཇིག་པའི་རྒྱུས་ལ་མཁས་ཤིང་འཆགས་པའི་རྒྱུས་ལ་མཁས་པ་དེ་དག་ནི་སེམས་ཅན་འཇིགས་པ་དེ་དག་གི་གྲོགས་པོ་དག་མ་འཇིགས་ཤིག །མ་འཇིགས་ཤིག །མེ་ལྕེ་འདི་ནི་སྔོན་ཡང་ཚངས་པའི་གཞལ་མེད་ཁང་སྟོང་པའི་བར་དུ་བསྲེགས་ནས་ཕྱིར་དེ་ཉིད་དུ་མི་སྣང་བར་གྱུར་རོ། །ད་ལྟར་ཡང་མེ་ལྕེ་འདི་ནི་ཚངས་པའི་གཞལ་མེད་ཁང་སྟོང་པའི་བར་དུ་བསྲེགས་ནས་དེ་ཉིད་དུ་མི་སྣང་བར་འགྱུར་རོ་ཞེས་དབུགས་འབྱིན་པར་བྱེད་དོ། །ཉི་མ་བདུན་པ་འཇིག་རྟེན་དུ་བྱུང་བས་རིའི་རྒྱལ་པོ་རི་རབ་ཀྱི་རྩེ་མོ་དཔག་ཚད་བརྒྱ་འཇིག་ཅིང་རབ་ཏུ་འཇིག་ལ། མ་རུང་བར་འགྱུར་ཏེ་མེད་པར་འགྱུར་རོ། །རྩེ་མོ་དཔག་ཚད་ཉིས་བརྒྱ་དང༌། སུམ་བརྒྱ་དང༌། བཞི་བརྒྱ་དང༌། ལྔ་བརྒྱ་དང༌། དྲུག་བརྒྱ་དང༌། བདུན་བརྒྱ་ཡང་འཇིག་ཅིང་རབ་ཏུ་འཇིག་ལ་མ་རུང་བར་འགྱུར་ཏེ། ས་ཆེན་པོ་འདི་དང༌། རིའི་རྒྱལ་པོ་རི་རབ་བསྲེགས་ཤིང་ཚིག་བའི་དུ་བ་ཡང་མེད་ལ་ཐལ་བའི་ལྷག་མ་ཡང་མེད་དེ། དཔེར་ན་མར་རམ་འབྲུ་མར་ཡང་རུང་སྟེ། ནམ་ལ་བསྲེགས་ཤིང་ཚིག་པའི་དུ་བ་ཡང་མེད་ཐལ་བའི་ལྷག་མ་ཡང་མེད་པ་དེ་བཞིན་དུ། ས་ཆེན་པོ་འདི་དང༌། རིའི་རྒྱལ་པོ་རི་རབ་བསྲེགས་ཤིང་ཚིག་པའི་དུ་བ་ཡང་མེད། ཐལ་བའི་ལྷག་མ་ཡང་མེད་དོ། །འདི་སྐད་དུ། དུས་ཀྱི་ཚེ་ན་འཚོ་བའི་འཇིག་རྟེན་འདིར། །སྤྲིན་རྣམས་ཆུ་ནི་ཅུང་ཟད་གཏོང་མི་བྱེད། །ཉི་མ་གཅིག་པུས་རྩྭ་དང་གེལ་བ་

---

^{[མ་དཔེ་གཟིགས་ན་འདིར་གནོན།]}

དང། །སྨན་དང་ས་བོན་ཤིང་མང་ཟད་པར་བྱེད། །ཉི་མ་གཉིས་པས་ལྟེང་ཀ་ཆུང་ངུའི་ཚོགས། །དེ་བཞིན་ཆུ་ཀླུང་ཆུང་དུ་སྐམ་པར་འགྱུར། །ལྟེང་ཀ་ཆེན་པོའི་ཚོགས་དང་ཀླུང་ཆེན་གྱི། །ཆུ་རྣམས་ཉི་མ་གསུམ་པས་མེད་པར་བྱེད། །མི་མ་ཡིན་གནས་མཚོ་ནི་རྒྱ་ཆེ་བ། །མ་དྲོས་ཞེས་བྱ་ཤིན་ཏུ་ཡིད་འོང་ཞིང༌། །གཙང་མའི་ཆུ་ཡིས་ཤིན་ཏུ་གང་བ་ནི། །ཉི་མ་བཞི་པ་ཡིས་ནི་སྐམ་པར་འགྱུར། །རིན་ཆེན་མང་པོས་གང་ཞིང་རབ་འཇིགས་ལ། །སེམས་ཅན་ཚོགས་ཆེན་དག་ན་གནས་གྱུར་པ། །རྒྱ་མཚོ་དག་ནི་ཉི་མ་ལྔ་རྣམས་ཀྱིས། །ཡོངས་སུ་གདུངས་པས་མ་ལུས་སྐམ་པར་འགྱུར། །ས་དང་གངས་དང་དེ་བཞིན་རི་རབ་དང༌། །གསེར་གྱི་རི་དབང་རྒྱ་ཆེན་བདུན་པོ་དང༌། །ཉི་མ་དྲུག་པོ་དག་གིས་རབ་གདུངས་པས། །ཀུན་ནས་དུད་པ་ཤིན་ཏུ་མཐོན་པོར་བྱེད། །གང་ཚེ་ཉི་མ་བདུན་པ་ཤར་གྱུར་ཅིང༌། །འདིར་ནི་འོད་ཟེར་དྲ་བ་རབ་གཏོང་བ། །དེ་ཡི་ཚེ་ན་ས་དང་རི་རྣམས་ཀུན། །ཤིན་ཏུ་རབ་ཏུ་འབར་བར་འགྱུར་ཞེའོ། །འོད་ཟེར་དྲ་བ་རབ་མཛེས་ལྡན་པ་ཡི། །ཉི་མ་དེ་བདུན་རྣམ་པར་རྒྱུ་ཞེའོ། །ས་འདི་དང་ནི་དེ་བཞིན་གསེར་གྱི་གཞི། །སེམས་ཅན་དམྱལ་བརྒྱད་རི་རྣམས་ཐམས་ཅད་དང༌། །འོད་ལྡན་ལྷ་རྣམས་ཀྱི་ནི་ཁང་པ་དང༌། །འདོད་པ་ཀུན་གྱི་གནས་སུ་སོང་ནས་ཀྱང༌། །འདོད་པའི་ལྷ་མང་ཤིན་ཏུ་ཡིད་འོང་བྲལ། །ཚངས་པའི་གནས་རྣམས་ཤིན་ཏུ་སྲེག་པར་བྱེད། །ཇི་སྐད་སྨྲས་བཞིན་མ་ལུས་ཀུན་བསྲེགས་ནས། །དུས་མཐའི་ཉི་མ་གཟི་བརྗིད་ཆེ་ལྡན་བ། །དེ་དག་ཉིད་ཀྱང་དབང་ནི་མེད་འགྱུར་ཞིང༌། །མི་རྟག་པས་ནི་བཅོམ་ནས་ཞིག་པར་འགྱུར། །དེ་ལྟར་ལྷུན་པོ་རྒྱ་མཚོ་ཆེ་དང་ས། །དེ་བཞིན་མཐོ་རིས་ཟད་འགྱུར་ཤེས་ནས་ནི། །སྐྱེ་བོ་དམ་པ་དག་གིས་བརྟེན་པའི་ཕྱིར། །འཕགས་པའི་གནས་ལ་རྟག་ཏུ་བློ་ཞོག་ཤིག །ཅེས་ཀྱང་བྱའོ། །བཅོམ་ལྡན་འདས་ཀྱིས་ཀྱང་ཉི་མ་བདུན་ལུང་བསྟན་པ་ལས་འདི་སྐད་དུ། དགེ་སློང་དག་འདུ་བྱེད་ཐམས་ཅད་ནི་མི་རྟག་པ། མི་བརྟན་པ། དབུགས་འབྱིན་པ་མ་ཡིན་པ་སྟེ། འགྱུར་བའི་ཆོས་ཅན་ནོ། །དགེ་སློང་དག་འདུ་བྱེད་ཐམས་ཅད་ཀྱིས་ནི་ཡེ་ཆོག་གོ །སྐྱོ་བར་བྱས་ན་ལེགས་སོ། །མ་ཆགས་པར་བྱས་ན་ལེགས་སོ། །རྣམ་

---

^{[མ་དཔེ་གཟིགས་ན་འདིར་གནོན།]}

ཕར་ཐར་པ་བྱས་ན་ལེགས་སོ། །དགེ་སློང་དག་གང་ཡུན་རིང་མོ་ཞིག་འདས་ན་ཆར་མི་འབབ་པ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །ཆར་མི་འབབ་པས་ས་ཆེན་པོ་འདི་ལ་ས་བོན་གྱི་ཚོགས་དང༌། ཤིང་གི་ཚོགས་དང༌། སྨན་དང་རྩྭ་དང་འབྲས་བུའི་ཤིང་གང་ཡིན་པ་དེ་དག་ཐམས་ཅད་སྐམ་པར་འགྱུར་ཞིང་མ་རུང་བར་འགྱུར་ལ། དགེ་སློང་དག་དེ་ལྟར་ན་འདུ་བྱེད་ཐམས་ཅད་ནི་མི་རྟག་པའོ། །དེ་ལྟར་ན་མི་བརྟེན་པའོ། །དེ་ལྟར་ན་དབུགས་འབྱིན་པ་མ་ཡིན་ནོ། །དེ་ལྟར་ན་འགྱུར་བའི་ཆོས་ཅན་ཡིན་ནོ། །དགེ་སློང་དག་འདུ་བྱེད་ཐམས་ཅད་ཀྱིས་ནི་ཡེ་ཆོག་གོ །སྐྱོ་བར་བྱས་ན་ལེགས་སོ། །མ་ཆགས་པར་བྱས་ན་ལེགས་སོ། །རྣམ་པར་ཐར་པ་བྱས་ན་ལེགས་སོ། །དགེ་སློང་དག་གང་ཡུན་རིང་མོ་ཞིག་འདས་ནས་ཞེས་བྱ་བ་ནས་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ་ཞེས་བྱ་བའི་བར་དུ་གསུངས་ཏེ། སྔ་མ་བཞིན་དུ་མདོ་ཐམས་ཅད་བརྗོད་པར་བྱའོ། །འཇིག་རྟེན་འདི་ཡང་ཚིག་ལ་ནམ་མཁའ་ལ་ཡང་རླུང་ལྡང་བར་འགྱུར་རོ། །དེ་ཙམ་གྱིས་ན་འཇིག་རྟེན་འདི་བར་གྱི་བསྐལ་པ་ཉི་ཤུར་འཇིག་པ་དེ་མཐར་ཐུག་པར་བརྗོད་པར་བྱའོ། །གང་གི་ཚེ་འཇིག་རྟེན་འདི་བར་གྱི་བསྐལ་པ་ཉི་ཤུར་ཞིག་ནས་གནས་པར་འགྱུར་བ་དེ་ཡང་བྱུང་བར་བརྗོད་པར་བྱའོ། །ཡུན་རིང་མོ་ཞིག་འདས་ནས་ནམ་མཁའ་ལ་རླུང་འཇམ་པོ་ལྡང་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དེ། དེ་ཙམ་གྱིས་ན་འཇིག་རྟེན་གྱི་ཁམས་འདི་བར་གྱི་བསྐལ་པ་ཉི་ཤུར་ཞིག་ནས་གནས་པ་སྟེ། མཐར་ཐུག་པར་བརྗོད་པར་བྱའོ། །གང་གི་ཚེ་འཇིག་རྟེན་འདི་བར་གྱི་བསྐལ་པ་ཉི་ཤུར་འཆགས་པ་དེ་ཡང་འབྱུང་བར་བརྗོད་པར་བྱའོ། །དེ་དག་ཀྱང་རྒྱས་པར་གྱུར་ཅིང་སྟུག་པོར་གྱུར་པ་དེ་ནི་རླུང་གི་དཀྱིལ་འཁོར་ཡིན་ཏེ། རྔམས་སུ་དཔག་ཚད་ས་ཡ་གཅིག་དང་དྲུག་འབུམ་ཡོད་དོ། །རྒྱར་ནི་གྲངས་མེད་ཚད་མེད་དེ། ཤིན་ཏུ་བརྟན་ཞིང་སྲ་བ་དེ་ལ་ཚན་པོ་ཆེ་ཆེན་པོ་དང༌། རབ་གནོན་དང༌། སྲེད་མེད་ཀྱི་བུའི་སྟོབས་ཀྱང་བདལ་བར་འགྱུར་ལ་རྡོ་རྗེས་ཀྱང་མི་ཕྱེད་དོ། །ཡུན་རིང་མོ་ཞིག་འདས་ནས་རླུང་གི་དཀྱིལ་འཁོར་དེའི་སྟེང་དུ་ཆུའི་རྒྱུན་ཤིང་རྟའི་སྲོག་ཤིང་ཙམ་གྱི་ཆར་འབབ་པ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །རླུང་གི་དཀྱིལ་འཁོར་གང་ཡིན་

---

^{[མ་དཔེ་གཟིགས་ན་འདིར་གནོན།]}

པ་དེ་དག་གིས་ཆུ་དེ་དག་ཡོངས་སུ་འཛིན་ཅིང་ཀུན་ནས་རྟེན་ལ་མེད་པར་ཡང་མི་བྱེད་པ་དེ་ནི་ཆུའི་དཀྱིལ་འཁོར་ཞེས་བྱ་སྟེ། རྔམས་སུ་དཔག་ཚད་ས་ཡ་གཅིག་དང་དཔག་ཚད་འབུམ་ཉི་ཁྲི་ཡོད་དོ། །རྒྱར་ནི་དཔག་ཚད་ས་ཡ་གཅིག་དང༌། ཉིས་འབུམ་དང༌། དཔག་ཚད་བཞི་བརྒྱ་ལྔ་བཅུ་ཡོད་དོ། །མཐའ་སྐོར་དུ་ནི་དཔག་ཚད་ས་ཡ་ཕྲག་གསུམ་དང༌། དྲུག་འབུམ་དང༌། དཔག་ཚད་སུམ་བརྒྱ་ལྔ་བཅུ་ཡོད་དོ། །ཡུན་རིང་མོ་ཞིག་འདས་ནས་ཆུའི་དཀྱིལ་འཁོར་དེའི་སྟེང་དུ་རླུང་ལྡང་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །དེ་དག་གིས་ཆུ་དེ་དག་ཀུན་དུ་སྡུད་ཅིང་ཀུན་ཏུ་འཐས་པར་བྱེད་དོ། །ཀུན་དུ་བསྡུས་ཤིང་ཀུན་དུ་འཐས་པར་བྱས་ནས་གཅིག་ཏུ་བསྡུས་ཏེ། ཐུར་དུ་ཟུག་པར་བྱེད་ཅིང་སྟེང་ནི་ཆུ་དང་མཉམ་པར་འཇོག་སྟེ། དེ་ནི་གསེར་གྱི་ས་གཞི་ཆེན་པོ་ཡིན་ཏེ། རྔམས་སུ་དཔག་ཚད་སུམ་འབུམ་ཉི་ཁྲི་ཡོད་དོ། །རྒྱར་དཔག་ཚད་ས་ཡ་གཅིག་དང༌། ཉིས་འབུམ་དང༌། དཔག་ཚད་བཞི་འབུམ་བཅུ་ཡོད་དོ། །མཐའ་སྐོར་དུ་ནི་དཔག་ཚད་ས་ཡ་ཕྲག་གསུམ་དང༌། དྲུག་འབུམ་དང༌། སུམ་འབུམ་བཅུ་ཡོད་དོ། །ཡུན་རིང་མོ་ཞིག་འདས་ནས་གསེར་གྱི་ས་གཞི་ཆེན་པོ་དེའི་སྟེང་དུ་ཆུའི་རྒྱུན་ཤིང་རྟའི་སྲོག་ཤིང་ཙམ་གྱི་ཆར་འབབ་པ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །གསེར་གྱིས་གཞི་ཆེན་པོ་དེས་ཆུ་དེ་དག་ཡོངས་སུ་འཛིན་ཅིང་ཀུན་ནས་རྟེན་ལ་མེད་པར་ཡང་མི་བྱེད་པ་དེ་ནི་ཆུའི་རྒྱ་མཚོ་ཆེན་པོ་ཡིན་ནོ། །ཆུའི་རྒྱ་མཚོ་ཆེན་པོ་དེའི་སྟེང་དུ་ནང་དུ་བལྟས་པ་དང་ཕྱི་རོལ་དུ་བལྟས་པའི་རླུང་ཁོར་ཁོར་ཡུག་ནས་གྲུ་བཞིར་ལྡང་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །དེ་དག་གིས་ཆུ་དེ་དག་ཀུན་དུ་སྡུད་ཅིང་ཀུན་ཏུ་འཐས་པར་བྱེད་དོ། །ཀུན་དུ་བསྡུས་ཤིང་ཀུན་དུ་འཐས་པར་བྱས་ནས་གཅིག་ཏུ་འདུས་པར་བྱས་ཏེ། ཐུར་དུ་ཡང་ཟུག་པར་བྱེད་དེ་གྱེན་དུ་ཡང་འབྱུང་བར་བྱེད་དོ། །དེ་ནི་རིའི་རྒྱལ་པོ་རི་རབ་ཅེས་བྱ་བ་ཡིན་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱི་ས་གཞི་ཆེན་པོ་ལ་བརྟེན་ཏོ། །དཔག་ཚད་བརྒྱད་ཁྲི་ནི་ཆུ་ལས་གྱེན་དུ་འཕགས་ཏེ། དེའི་འཕང་དུ་དཔག་ཚད་འབུམ་དྲུག་ཁྲི་ཡོད་དོ། །ཆུར་དཔག་ཚད་བརྒྱད་ཁྲི་ཡོད་ལ་ཞེང་དུ་ཡང་དཔག་ཚད་བརྒྱད་ཁྲི་ཡོད་དོ། །མཐའ་སྐོར་དུ་

---

^{[མ་དཔེ་གཟིགས་ན་འདིར་གནོན།]}

དཔག་ཚད་སུམ་འབུམ་ཉི་ཁྲི་ཡོད་ལ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་སྟེ། རིན་པོ་ཆེ་སྣ་བཞི་ལས་གྲུབ་པ་ཡིན་ནོ། །ཆུའི་རྒྱ་མཚོ་ཆེན་པོ་གང་ཡིན་པ་དེའི་སྟེང་དུ་ནང་དུ་བལྟས་པ་དང༌། ཕྱི་རོལ་དུ་བལྟས་པའི་རླུང་ཁོར་ཁོར་ཡུག་ནས་གྲུ་བཞིར་ལྡང་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དེ། དེ་དག་གིས་ཆུ་དེ་དག་ཀུན་ཏུ་སྡུད་ཅིང་ཀུན་ཏུ་འཐས་པར་བྱེད་དོ། །ཀུན་ཏུ་བསྡུས་ཤིང་ཀུན་དུ་འཐས་པར་བྱས་ནས་ཐུར་དུ་ཡང་ཟུག་པར་བྱེད་ཅིང༌། གྱེན་དུ་ཡང་འབྱུང་བར་བྱེད་དོ། །དེ་ནི་རིའི་རྒྱལ་པོ་གཉའ་ཤིང་འཛིན་ཞེས་བྱ་བ་ཡིན་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱི་ས་གཞི་ཆེན་པོ་ལ་བརྟེན་ཏོ། །དཔག་ཚད་བཞི་ཁྲི་ནི་ཆུ་ལས་གྱེན་དུ་འཕགས་སོ། །ཞེང་དུ་ཡང་དེ་དང་འདྲ་སྟེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་གསེར་ལས་གྲུབ་པ་ཡིན་ནོ། །ཡུན་རིང་མོ་ཞིག་འདས་ནས་ཆུའི་རྒྱ་མཚོ་ཆེན་པོ་དེའི་སྟེང་དུ་ནང་དུ་བལྟས་པ་དང༌། ཕྱི་རོལ་དུ་བལྟས་པའི་རླུང་ཁོར་ཁོར་ཡུག་ནས་གྲུ་བཞིར་ལྡང་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དེ། དེ་དག་གིས་ཆུ་དེ་དག་ཀུན་དུ་སྡུད་པར་བྱེད་ཅིང་ཀུན་དུ་འཐས་པར་བྱེད་དོ། །ཀུན་དུ་བསྡུས་ཤིང་ཀུན་དུ་འཐས་པར་བྱས་ནས་ཐུར་དུ་ཡང་ཟུག་པར་བྱས་ནས་གྱེན་དུ་ཡང་འབྱུང་བར་བྱེད་དོ། །དེ་ནི་རིའི་རྒྱལ་པོ་གཤོལ་མདའ་འཛིན་ཞེས་བྱ་བ་ཡིན་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱིས་གཞི་ཆེན་པོ་ལ་བརྟེན་ཏོ། །དཔག་ཚད་ཉི་ཁྲི་ནི་ཆུ་ལས་གྱེན་དུ་འཕགས་སོ། །ཞེང་དུ་ཡང་དེ་དང་འདྲ་སྟེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་གསེར་ལས་གྲུབ་པ་ཡིན་ནོ། །ཡུན་རིང་མོ་ཞིག་འདས་ནས། ཆུའི་རྒྱ་མཚོ་ཆེན་པོ་དེའི་སྟེང་དུ་ནང་དུ་བལྟས་པ་དང༌། ཕྱི་རོལ་དུ་བལྟས་པའི་རླུང་ཁོར་ཁོར་ཡུག་ན་གྲུ་བཞིར་ལྡང་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །དེ་དག་གི་ཆུ་དེ་དག་ཀུན་དུ་སྡུད་པར་བྱེད་ཅིང་ཀུན་དུ་འཐས་པར་བྱེད་དེ། ཀུན་དུ་བསྡུས་ཤིང་ཀུན་ཏུ་འཐས་པར་བྱས་ནས། ཐུར་དུ་ཡང་ཟུག་པར་བྱེད་ཅིང་གྱེན་དུ་ཡང་འབྱུང་བར་བྱེད་དོ། །དེ་ནི་རིའི་རྒྱལ་པོ་སེང་ལྡེང་ཅན་ཞེས་བྱ་བ་ཡིན་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱི་ས་གཞི་ཆེན་པོ་ལ་བརྟེན་

---

^{[མ་དཔེ་གཟིགས་ན་འདིར་གནོན།]}

ཏོ། །དཔག་ཚད་ཁྲི་ནི་ཆུ་ལས་གྱེན་དུ་འཕགས་སོ། །ཞེང་དུ་ཡང་དེ་དང་འདྲ་སྟེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་གསེར་ལས་གྲུབ་པ་ཡིན་ནོ། །ཡུན་རིང་མོ་ཞིག་འདས་ནས་ཆུའི་རྒྱ་མཚོ་ཆེན་པོ་དེའི་སྟེང་དུ་ནང་དུ་བལྟས་པ་དང༌། ཕྱི་རོལ་དུ་བལྟས་པའི་རླུང་ཁོར་ཁོར་ཡུག་ནས་གྲུ་བཞིར་ལྡང་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དེ། དེ་དག་གིས་ཆུ་དེ་དག་ཀུན་དུ་སྡུད་པར་བྱེད་ཅིང་ཀུན་ཏུ་འཐས་པར་བྱེད་དོ། །ཀུན་དུ་བསྡུས་ཤིང་ཀུན་དུ་འཐས་པར་བྱས་ནས་ཐུར་དུ་ཡང་ཟུག་པར་བྱེད་ཅིང་གྱེན་དུ་ཡང་འབྱུང་བར་བྱེད་དོ། །དེ་ནི་རིའི་རྒྱལ་པོ་བལྟ་ན་སྡུག་ཅེས་བྱ་བ་ཡིན་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱི་ས་གཞི་ཆེན་པོ་ལ་བརྟེན་ཏོ། །དཔག་ཚད་ལྔ་སྟོང་ནི་ཆུ་ལས་གྱེན་དུ་འཕགས་སོ། །ཞེང་དུ་ཡང་དེ་དང་འདྲ་སྟེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་གསེར་ལས་གྲུབ་པ་ཡིན་ནོ། །ཡུན་རིང་མོ་ཞིག་འདས་ནས། ཆུའི་རྒྱ་མཚོ་ཆེན་པོའི་སྟེང་དུ་ནང་དུ་བལྟས་པ་དང༌། ཕྱི་རོལ་ཏུ་བལྟས་པའི་རླུང་ཁོར་ཁོར་ཡུག་ནས་གྲུ་བཞིར་ལྡང་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །དེ་དག་གིས་ཆུ་དེ་དག་ཀུན་དུ་སྡུད་ཅིང་ཀུན་ཏུ་འཐས་པར་བྱེད་དོ། །ཀུན་དུ་བསྡུས་ཤིང་ཀུན་དུ་འཐས་པར་བྱས་ནས་ཐུར་དུ་ཡང་ཟུག་པར་བྱེད་ཅིང་གྱེན་དུ་ཡང་འབྱུང་བར་བྱེད་དོ། །དེ་ནི་རིའི་རྒྱལ་པོ་རྟ་རྣ་རི་ཞེས་བྱ་བ་ཡིན་ཏེ། དཔག་ཚད་བརྒྱད་ཁྲིའི་ནི་ཆུའི་འོག་གསེར་གྱི་ས་གཞི་ཆེན་པོ་ལ་བརྟེན་ཏོ། །དཔག་ཚད་ཉིས་སྟོང་ལྔ་བརྒྱ་ནི་ཆུ་ལས་གྱེན་དུ་འཕགས་སོ། །ཞེང་དུ་ཡང་དེ་དང་འདྲ་སྟེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་གསེར་ལས་གྲུབ་པ་ཡིན་ནོ། །ཡུན་རིང་མོ་ཞིག་འདས་ནས་ཆུའི་རྒྱ་མཚོ་ཆེན་པོ་དེའི་སྟེང་དུ་ནང་དུ་བལྟས་པ་དང༌། ཕྱི་རོལ་དུ་བལྟས་པའི་རླུང་ཁོར་ཁོར་ཡུག་ནས་གྲུ་བཞིར་ལྡང་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །དེ་དག་གི་ཆུ་དེ་དག་ཀུན་ཏུ་སྡུད་ཅིང་ཀུན་ཏུ་འཐས་པར་བྱེད་དོ། །ཀུན་དུ་བསྡུས་ཤིང་ཀུན་དུ་འཐས་པར་བྱས་ནས་ཐུར་དུ་ཡང་ཟུག་པར་བྱེད་ཅིང་གྱེན་དུ་ཡང་འབྱུང་བར་བྱེད་དོ། །དེ་ནི་རིའི་རྒྱལ་པོ་རྣམ་པར་འདུད་ཅེས་བྱ་བ་ཡིན་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་

---

^{[མ་དཔེ་གཟིགས་ན་འདིར་གནོན།]}

གྱིས་གཞི་ཆེན་པོ་ལ་བརྟེན་ཏོ། །དཔག་ཚད་སྟོང་ཉིས་བརྒྱ་ལྔ་བཅུ་ནི་ཆུ་ལས་གྱེན་དུ་འཕགས་སོ། །ཞེང་དུ་ཡང་དེ་དང་འདྲ་སྟེ་དབྱིབས་ལེགས་ཤིང་བལྟ་ན་སྡུག་ལ་མཛེས་པ་གསེར་ལས་གྲུབ་པ་ཡིན་ནོ། །ཡུན་རིང་མོ་ཞིག་འདས་ནས་ཆུའི་རྒྱ་མཚོ་ཆེན་པོའི་སྟེང་དུ་ནང་དུ་བལྟས་པ་དང༌། ཕྱི་རོལ་དུ་བལྟས་པའི་རླུང་ཁོར་ཁོར་ཡུག་ནས་གྲུ་བཞིར་ལྡང་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །དེ་དག་གི་ཆུ་དེ་དག་ཀུན་དུ་སྡུད་ཅིང་ཀུན་དུ་འཐས་པར་བྱེད་དོ། །ཀུན་དུ་བསྡུས་ཤིང་ཀུན་དུ་འཐས་པར་བྱས་ནས། ཐུར་དུ་ཡང་ཟུག་པར་བྱེད་ཅིང་གྱེན་དུ་འབྱུང་བར་བྱེད་དོ། །དེ་ནི་རིའི་རྒྱལ་པོ་མུ་ཁྱུད་འཛིན་ཞེས་བྱ་བ་ཡིན་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱི་ས་གཞི་ཆེན་པོ་ལ་བརྟེན་ཏོ། །དཔག་ཚད་དྲུག་བརྒྱ་ཉི་ཤུ་རྩ་ལྔ་ནི་ཆུ་ལས་གྱེན་དུ་འཕགས་སོ། །ཞེང་དུ་ཡང་དེ་དང་འདྲ་སྟེ་དབྱིབས་ལེགས་ཤིང་བལྟ་ན་སྡུག་ལ་མཛེས་པ་གསེར་ལས་བྱས་པ་ཡིན་ནོ། །ཡུན་རིང་མོ་ཞིག་འདས་ནས་ཆུའི་རྒྱ་མཚོ་ཆེན་པོ་དེའི་སྟེང་དུ་ནང་དུ་བལྟས་པ་དང༌། ཕྱི་རོལ་དུ་བལྟས་པའི་རླུང་ཁོར་ཁོར་ཡུག་ནས་ཟླུམ་པོར་ལྡང་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །དེ་དག་གི་ཆུ་དེ་དག་ཀུན་དུ་སྡུད་ཅིང་ཀུན་དུ་འཐས་པར་བྱེད་དོ། །ཀུན་དུ་བསྡུས་ཤིང་ཀུན་དུ་འཐས་པར་བྱས་ནས་ཐུར་དུ་ཡང་ཟུག་པར་བྱེད་ཅིང་གྱེན་དུ་ཡང་འབྱུང་བར་བྱེད་དོ། །དེ་ནི་རིའི་རྒྱལ་པོ་ཁོར་ཁོར་ཡུག་གི་རི་ཞེས་བྱ་བ་ཡིན་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱི་ས་གཞི་ཆེན་པོ་ལ་བརྟེན་ཏོ། །དཔག་ཚད་སུམ་བརྒྱ་རྩ་ཕྱེད་དང་བཅུ་གསུམ་ནི་ཆུ་ལས་གྱེན་དུ་འཕགས་སོ། །ཞེང་དུ་ཡང་དེ་དང་འདྲ་སྟེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་ལྕགས་ལས་གྲུབ་པ་ཡིན་ནོ། །ཡུན་རིང་མོ་ཞིག་འདས་ན་ཆུའི་རྒྱ་མཚོ་ཆེན་པོ་དེའི་སྟེང་དུ་རིའི་རྒྱལ་པོ་རི་རབ་ཀྱི་ལྷོ་ཕྱོགས་ཀྱི་ཕྱི་རོལ་གྱི་རྒྱ་མཚོ་ཆེན་པོར་ནང་དུ་བལྟས་པ་དང༌། ནང་རྒྱ་ཆེ་བ་དང༌། ཕྱི་རོལ་དུ་བལྟས་པ་དང༌། ཤིང་རྟའི་དབྱིབས་ལྟ་བུའི་རླུང་ཁོར་ཁོར་ཡུག་ནས་ལྡང་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །དེ་དག་གིས་ཆུ་དེ་དག་ཀུན་དུ་སྡུད་ཅིང་ཀུན་ཏུ་འཐས་པར་བྱེད་དོ། །ཀུན་ཏུ་བསྡུས་ཤིང་ཀུན་དུ་འཐས་པར་བྱས་ནས་གཅིག་

---

^{[མ་དཔེ་གཟིགས་ན་འདིར་གནོན།]}

ཏུ་འདུས་པར་བྱས་ཏེ། ཐུར་དུ་ཡང་ཟུག་པར་བྱེད་ཅིང་སྟེང་ནི་ཆུ་དང་མཉམ་པར་འཇོག་སྟེ། དེ་ནི་ལྷོ་འཛམ་བུའི་གླིང་ཞེས་བྱ་བ་ཡིན་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱི་ས་གཞི་ཆེན་པོ་ལ་བརྟེན་ཏོ། །སྟེང་ནི་ཆུ་དང་མཉམ་པར་འདུག་སྟེ། དེའི་ངོས་ནང་གི་རིང་པོ་གང་ཡིན་པ་དེ་ལ་ནི་དཔག་ཚད་ཉིས་སྟོང་ཡོད་དོ། །ངོས་ནང་གི་ཐུང་དུ་གང་ཡིན་པ་དེ་ལ་ནི་དཔག་ཚད་ཕྱེད་དང་བཞི་ཡོད་ལ། མཐའ་སྐོར་དུ་དཔག་ཚད་དྲུག་སྟོང་དང་དཔག་ཚད་ཕྱེད་དང་བཞི་ཡོད་དེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་ས་ལས་གྲུབ་པ་ཡིན་ནོ། །ཡུན་རིང་མོ་ཞིག་འདས་ནས་ཆུའི་རྒྱ་མཚོ་ཆེན་པོ་དེའི་སྟེང་རིའི་རྒྱལ་པོ་རི་རབ་ཀྱི་ཤར་ཕྱོགས་ཀྱི་ཕྱི་རོལ་གྱི་རྒྱ་མཚོ་ཆེན་པོར་ནང་དུ་བལྟས་ཤིང༌། ཕྱི་རོལ་རྒྱ་ཆེ་བའི་རླུང་ཁོར་ཁོར་ཡུག་ན་ཟླ་གམ་ལྟ་བུར་གྲུབ་ཅིང་ལྡང་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །དེ་དག་གིས་ཆུ་དེ་དག་ཀུན་དུ་སྡུད་པར་བྱེད་ཅིང་ཀུན་དུ་འཐས་པར་བྱེད་དོ། །ཀུན་དུ་བསྡུས་ཤིང་ཀུན་དུ་འཐས་པར་བྱས་ནས་གཅིག་ཏུ་འདུས་པར་བྱས་ཏེ། ཐུར་དུ་ཡང་ཟུག་པར་བྱེད་ཅིང་སྟེང་ནི་ཆུ་དང་མཉམ་པར་འཇོག་སྟེ། དེ་ནི་ཤར་གྱི་ལུས་འཕགས་ཀྱི་གླིང་ཞེས་བྱ་བ་ཡིན་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱི་ས་གཞི་ཆེན་པོ་ལ་བརྟེན་ཏོ། །སྟེང་ནི་ཆུ་དང་མཉམ་པར་འདུག་སྟེ། དེའི་ངོས་ནང་གི་རིང་པོ་གང་ཡིན་པ་དེ་ལ་ནི་དཔག་ཚད་ཉིས་སྟོང་ཡོད་དོ། །ངོས་ནང་གི་ཐུང་ངུ་དེ་ལ་ནི་དཔག་ཚད་སུམ་བརྒྱ་ལྔ་བཅུ་ཡོད་ལ། མཐའ་སྐོར་དུ་དཔག་ཚད་དྲུག་སྟོང་དང་དཔག་ཚད་སུམ་བརྒྱ་ལྔ་བཅུ་ཡོད་དོ། །དབྱིབས་ལེགས་ཤིང་བལྟ་ན་སྡུག་ལ་མཛེས་པ་ས་ལས་གྲུབ་པ་ཡིན་ནོ། །ཡུན་རིང་མོ་ཞིག་འདས་ནས་ཆུའི་རྒྱ་མཚོ་ཆེན་པོ་དེའི་སྟེང་རིའི་རྒྱལ་པོ་རི་རབ་ཀྱི་ནུབ་ཕྱོགས་ཀྱི་ཕྱི་རོལ་རྒྱ་མཚོ་ཆེན་པོར་ནང་དུ་བལྟས་པ་དང༌། ཕྱི་རོལ་དུ་བལྟས་པའི་རླུང་ཁོར་ཁོར་ཡུག་ནས་ཟླུམ་པོར་ལྡང་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དེ། དེ་དག་གིས་ཆུ་དེ་དག་ཀུན་དུ་སྡུད་ཅིང་ཀུན་ཏུ་འཐས་པར་བྱེད་དོ། །ཀུན་དུ་བསྡུས་ཤིང་ཀུན་ཏུ་འཐས་པར་བྱས་ནས་གཅིག་ཏུ་འདུས་པར་བྱས་ཏེ། ཐུར་དུ་ཡང་ཟུག་པར་བྱེད་ཅིང་སྟེང་ནི་ཆུ་དང་མཉམ་པར་འཇོག་གོ །དེ་ནི་ནུབ་ཀྱི་བ་ལང་

---

^{[མ་དཔེ་གཟིགས་ན་འདིར་གནོན།]}

སྤྱོད་ཅེས་བྱ་བའི་གླིང་ཡིན་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱི་ས་གཞི་ཆེན་པོ་ལ་བརྟེན་ཏོ། །སྟེང་ནི་ཆུ་དང་མཉམ་པར་འདུག་སྟེ། ཆུར་དཔག་ཚད་ཉིས་སྟོང་ལྔ་བརྒྱ། ཞེང་དུ་ཡང་དཔག་ཚད་ཉིས་སྟོང་ལྔ་བརྒྱ་ཡོད་ལ་མཐའ་སྐོར་དུ་དཔག་ཚད་བདུན་སྟོང་ལྔ་བརྒྱ་ཡོད་དེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་ས་ལས་གྲུབ་པ་ཡིན་ནོ། །ཡུན་རིང་མོ་ཞིག་འདས་ནས་ཆུའི་རྒྱ་མཚོ་ཆེན་པོ་དེའི་སྟེང་རིའི་རྒྱལ་པོ་རི་རབ་ཀྱི་བྱང་ཕྱོགས་ཀྱི་ཕྱི་རོལ་གྱི་རྒྱ་མཚོ་ཆེན་པོར་ནང་དུ་བལྟས་པ་དང༌། ཕྱི་རོལ་དུ་བལྟས་པའི་རླུང་ཁོར་ཁོར་ཡུག་ནས་གྲུ་བཞིར་ལྡང་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །དེ་དག་གི་ཆུ་དེ་དག་ཀུན་དུ་སྡུད་ཅིང་ཀུན་དུ་འཐས་པར་བྱེད་དོ། །ཀུན་དུ་བསྡུས་ཤིང་ཀུན་དུ་འཐས་པར་བྱས་ནས་གཅིག་ཏུ་འདུས་པར་བྱས་ཏེ། ཐུར་དུ་ཟུག་པར་བྱེད་ཅིང་སྟེང་ནི་ཆུ་དང་མཉམ་པར་གཞོག་གོ །དེ་ནི་བྱང་གི་སྒྲ་མི་སྙན་ཞེས་བྱ་བའི་གླིང་ཡིན་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱི་ས་གཞི་ཆེན་པོ་ལ་བརྟེན་ཏོ། །སྟེང་ནི་ཆུ་དང་མཉམ་པར་འདུག་སྟེ། ཆུར་དཔག་ཚད་ཉིས་སྟོང་སྟོང་ཞེང་དུ་ཡང་དཔག་ཚད་ཉིས་སྟོང་ཡོད་ལ། མཐའ་སྐོར་དུ་དཔག་ཚད་བརྒྱད་སྟོང་ཡོད་དོ། །དབྱིབས་ལེགས་ཤིང་བལྟ་ན་སྡུག་ལ་མཛེས་པ་ས་ལས་གྲུབ་པ་ཡིན་ནོ། །ཡུན་རིང་མོ་ཞིག་འདས་ནས་ནམ་མཁའ་ལ་ཚངས་པའི་གཞལ་མེད་ཁང་སྟོང་པར་ལེགས་པར་གནས་པར་འགྱུར་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །དེ་ནས་སེམས་ཅན་ཚེ་ཟད་ཅིང་ལས་ཟད་ལ་བསོད་ནམས་ཟད་ནས་འོད་གསལ་གྱི་ལྷའི་རིས་ནས་ཚེ་འཕོས་ཏེ། ཚངས་པའི་གཞལ་མེད་ཁང་སྟོང་པའི་ནང་དུ་སྐྱེ་བར་འགྱུར་རོ། །དེ་ནས་སེམས་ཅན་གཞན་ཡང་ཚེ་ཟད་ཅིང་ལས་ཟད་ལ་བསོད་ནམས་ཟད་ནས་འོད་གསལ་གྱི་ལྷའི་རིས་ནས་ཤི་འཕོས་ཏེ། ཚངས་པའི་འདུན་ན་འདོན་པའི་ལྷར་སྐྱེ་བར་འགྱུར་རོ། །དེ་ནས་ཚངས་པའི་རིས་སུ་སྐྱེའོ། །དེ་ནས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་བར་དུ་སྐྱེ་བར་འགྱུར་ཏེ། དེ་ཙམ་གྱིས་ན་འཇིག་རྟེན་ནི་བར་གྱི་བསྐལ་པ་ཉི་ཤུར་འཆགས་པ་དེ་མཐར་ཐུག་པར་བརྗོད་པར་བྱའོ། །དེ་ནས་འཇིག་རྟེན་འདི་བར་གྱི་བསྐལ་པ་ཉི་ཤུར་ཆགས་ནས་གནས་པ་དེ་ཡང་འབྱུང་བར་བརྗོད་

---

^{[མ་དཔེ་གཟིགས་ན་འདིར་གནོན།]}

པར་བྱའོ། །ཡུན་རིང་མོ་ཞིག་འདས་ནས་ཆུའི་རྒྱ་མཚོ་ཆེན་པོ་དེའི་སྟེང་དུ་ཆུའི་རྒྱུན་ཤིང་རྟའི་སྲོག་ཤིང་ཙམ་གྱི་ཆར་འབབ་པ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །དེས་རོལ་མཚོ་རྣམས་ཀྱང་གང་བར་བྱེད་ལ་གླིང་རྣམས་ཀྱང་ཆུ་དང་མཉམ་བར་གཞོག་སྟེ། ས་ཆེན་པོ་འདི་ཆུ་གཅིག་ཅིང་རྒྱ་མཚོ་གཅིག་ཏུ་འགྱུར་བར་བྱེད་དོ། །ས་ཆེན་པོ་ཆུ་གཅིག་ཅིང་རྒྱ་མཚོ་གཅིག་ཏུ་གྱུར་པའི་སྟེང་དུ་རླུང་གིས་སྤྲིས་མ་ཀུན་དུ་སྡུད་ཅིང་ཀུན་དུ་འཐས་པར་བྱེད་དོ། །ལེགས་པར་གནས་པར་བྱེད་ཅིང་ཀུན་དུ་བདལ་ཏེ། དཔེར་ན་འོ་མ་བསྐོལ་ཏེ་བསྒྲངས་པའི་སྟེང་དུ་རླུང་གིས་སྤྲིས་མ་ཀུན་དུ་སྡུད་ཅིང་ཀུན་དུ་འཐས་པར་བྱེད་དེ། ལེགས་པར་གནས་པར་བྱེད་ཅིང་ཀུན་དུ་བདལ་བ་དེ་བཞིན་དུ་ས་ཆེན་པོ་ཆུ་གཅིག་ཅིང་རྒྱ་མཚོ་གཅིག་ཏུ་གྱུར་པའི་སྟེང་དུ་རླུང་གིས་སྤྲིས་མ་ཀུན་དུ་སྡུད་ཅིང་ཀུན་དུ་འཐས་པར་བྱེད་དེ། ལེགས་པར་གནས་པར་བྱེད་ཅིང་ཀུན་དུ་བདལ་ཏེ། དེ་ནི་སའི་བཅུད་ཁ་དོག་ཕུན་སུམ་ཚོགས་པ་དང༌། དྲི་ཕུན་སུམ་ཚོགས་པ་དང༌། རོ་ཕུན་སུམ་ཚོགས་པ་ཡིན་ཏེ། ཁ་དོག་ནི་དཔེར་ན་མར་སར་བཞིན་ནོ། །རི་ནི་དཔེར་ན་སྦྲང་བུའི་སྦྲང་རྩི་མ་བསྐོལ་བ་བཞིན་ནོ། །དེ་ནས་སེམས་ཅན་གཞན་ཚེ་ཟད་ཅིང་ལས་ཟད་ལ་བསོད་ནམས་ཟད་པས་འོད་གསལ་གྱི་ལྷའི་རིས་ནས་ཤི་འཕོས་ནས་འཇིག་རྟེན་འདིར་སྐྱེ་བར་འགྱུར་རོ། །དེ་དག་འདིར་གཟུགས་བཟང་བ་དང་ཡིད་ལས་སྐྱེས་པ་དང༌། མ་ཉམས་པ་དང༌། དབང་པོ་ཚང་བ་དང༌། ཡན་ལག་དང་ཉིང་ལག་ཐམས་ཅད་དང་ལྡན་པ་དང༌། བཟང་བ་དང༌། མདོག་སྡུག་པ་དང༌། དགའ་བའི་བཟའ་བ་དང་དགའ་བའི་ཟས་དང༌། རང་ལས་འོད་འབྱུང་བ་དང༌། ནམ་མཁའ་ལ་འགྲོ་བ་དང༌། ཚེ་རིང་ཞིང་ཡུན་རིང་པོར་གནས་སོ། །དེའི་ཚེ་ན་ཉི་མ་དང༌། ཟླ་བ་འདི་གཉིས་འཇིག་རྟེན་དུ་མི་འབྱུང་ངོ༌། །རྒྱུ་སྐར་རྣམས་ཀྱང་མི་འབྱུང་ངོ༌། །དུས་ཚིགས་དང༌། ལོ་རྣམས་ཀྱང་མི་འབྱུང་ངོ༌། །ཟླ་བ་དང་ཟླ་བ་ཕྱེད་རྣམས་མི་འབྱུང་ངོ༌། །མཚན་མོ་དང་ཉིན་མོ་རྣམས་མི་འབྱུང་ངོ༌། །སྐད་ཅིག་དང་ཐང་ཅིག་དང་ཡུད་ཙམ་རྣམས་མི་འབྱུང༌། སྐྱེས་པ་དང༌། བུད་མེད་ཀྱང་མེད་དེ། གཞན་དུ་ན་སེམས་ཅན་སེམས་ཅན་ཞེས་བྱ་བའི་མིང་འབའ་ཞིག་འབྱུང་ངོ༌།། །།འཇིག་རྟེན་གཞག་པ།

---

^{[མ་དཔེ་གཟིགས་ན་འདིར་གནོན།]}

བམ་པོ་བདུན་པ། དེ་ནས་སེམས་ཅན་བསྐལ་པའི་རང་བཞིན་གཞན་ཞིག་གིས་སའི་བཅུད་མཛུབ་མོའི་ཐོར་ཏོས་བླངས་ཏེ་མྱངས་སོ། །ཇི་ཙམ་དུ་མྱོང་བར་བྱེད་པ་དེ་ཙམ་དུ་སྲེད་པར་འགྱུར་རོ། །ཇི་ཙམ་དུ་སྲེད་པར་གྱུར་པ་དེ་ཙམ་དུ་ཁམ་གྱིས་ཟ་བར་བྱེད་དོ། །སེམས་ཅན་གཞན་དག་གིས་ཀྱང་སེམས་ཅན་དེ་དག་སའི་བཅུད་མཛུབ་མོའི་ཐོར་ཏོས་བླངས་ཏེ་མྱོང་བར་བྱེད་པ་མཐོང་ངོ༌། །མཐོང་ནས་སེམས་ཅན་དེ་དག་གིས་ཀྱང་སའི་བཅུད་མཛུབ་མོའི་ཐོར་ཏོས་ས་བླངས་ཏེ་མྱོང་བར་བྱེད་དོ། །ཇི་ཙམ་དུ་མྱོང་བར་བྱེད་པ་དེ་ཙམ་དུ་སྲེད་པར་གྱུར་ཏོ། །ཇི་ཙམ་དུ་སྲེད་པར་གྱུར་པ་དེ་ཙམ་དུ་ཁམ་གྱིས་ཟ་བར་བྱེད་དོ། །སེམས་ཅན་དེ་དག་གིས་སའི་བཅུད་ཁམ་གྱིས་ཟོས་པ་དེས་ན་དེ་དག་གི་ལུས་ལ་མ་ཁྲང་བ་དང་ལྕི་བ་ཞུགས་པར་གྱུར་ཏོ། །འོད་དང་ཁ་དོག་གི་མདོག་གང་ཡིན་པ་དེ་ནི་མེད་པར་གྱུར་ཏེ། འཇིག་རྟེན་དུ་མུན་པ་བྱུང་བར་གྱུར་ཏོ། །ཆོས་ཉིད་ཀྱིས་ན་འཇིག་རྟེན་དུ་མུན་པ་བྱུང་ན་ཉི་མ་དང་ཟླ་བ་འདི་གཉིས་འཇིག་རྟེན་དུ་འབྱུང་བར་འགྱུར་རོ། །རྒྱུ་སྐར་རྣམས་དང༌། མཚན་མོ་དང་ཉིན་མོ་རྣམས་དང༌། དུས་ཚིགས་དང་ལོ་རྣམས་དང༌། སྐད་ཅིག་དང་ཐང་ཅིག་དང་ཡུད་ཙམ་རྣམས་འཇིག་རྟེན་དུ་འབྱུང་བར་འགྱུར་རོ། །དེ་ནས་སེམས་ཅན་དེ་དག་གི་ཤར་ཕྱོགས་ནས་ཉི་མའི་དཀྱིལ་འཁོར་འཆར་བ་ན་དེ་དག་འདི་སྐད་དུ་ལྷའི་འོད་དེ་ཉིད་འདི་རེ། ལྷའི་འོད་དེ་ཉིད་འདི་རེ་ཞེས་ནས་མིང་ཉིན་པར་ཉིན་པར་ཞེས་བྱ་བར་གྱུར་ཏོ། །དེ་ནས་སེམས་ཅན་དེ་དག་གི་ནུབ་ཕྱོགས་སུ་ཉི་མའི་དཀྱིལ་འཁོར་ནུབ་པ་ན་དེ་དག་འདི་སྐད་དུ་ལྷའི་འོད་དེ་ཉིད་དམར་པོར་གྱུར་པ་འདི་རེ། ལྷའི་འོད་དེ་ཉིད་དམར་པོར་གྱུར་པ་འདི་རེ་ཞེས་ནས་མཚན་མོ་མཚན་མོ་ཞེས་བྱ་བའི་གྲངས་སུ་བགྲང་ངོ༌། །དེ་ནས་སེམས་ཅན་དེ་དག་གི་ཤར་ཕྱོགས་ནས་ཟླ་བའི་དཀྱིལ་འཁོར་ཤར་བ་དང་སེམས་ཅན་འདི་སྐད་དུ་མུན་པ་བཀྲ་བར་བྱེད་དོ། །མུན་པ་བཀྲ་བར་བྱེད་དོ་ཞེས་ནས་ཟླ་བ་ཟླ་བ་ཞེས་བྱ་བའི་གྲངས་སུ་བགྲང་ངོ༌། །དེ་ནས་སེམས་ཅན་དེ་དག་གི་ཤར་ཕྱོགས་ནས་ཡང་ཉི་མའི་དཀྱིལ་འཁོར་འཆར་བ་ན། དེ་དག་འདི་སྙམ་དུ་ལྷའི་འོད་དེ་ཉིད་འཁོར་བ་འདི་རེ། ལྷའི་འོད་དེ་ཉིད་འཁོར་བ་འདི་རེ་ཞེས་ནས་ཉི་མ་ཉི་མ་ཞེས་བྱ་བའི་མིང་འབྱུང་ངོ༌། །དེ་དག་བཟའ་བ་

---

^{[མ་དཔེ་གཟིགས་ན་འདིར་གནོན།]}

དང༌། ཁ་ཟས་དེ་ཟ་ལ། ཚེ་རིང་ཞིང་ཡུན་རིང་དུ་གནས་སོ། །དེ་དག་གི་ནང་ན་ཁ་ཟས་ཆེ་ས་མང་དུ་ཟ་བ་དེ་ནི་ཁ་དོག་ངན་པར་འགྱུར་རོ། །གང་ཁ་ཟས་ཆེས་ཉུང་དུ་ཟ་བ་དེ་ནི་ཁ་དོག་བཟང་བར་འགྱུར་རོ། །དེ་ལྟར་ཁ་ཟས་སྣ་ཚོགས་ཀྱི་རྐྱེན་གྱིས་ཁ་དོག་སྣ་ཚོགས་ཡོད་པར་གྱུར་ཏོ། །ཁ་དོག་སྣ་ཚོགས་ཡོད་པར་གྱུར་པས། ཀྱེ་སེམས་ཅན་ང་ནི་ཁ་དོག་བཟང་བ་ཡིན་ནོ། །ཁྱོད་ནི་ཁ་དོག་ངན་པ་ཡིན་ནོ་ཞེས་སེམས་ཅན་གྱིས་སེམས་ཅན་ལ་བརྙས་པར་གྱུར་ཏོ། །ཁ་དོག་གི་མངོན་པའི་ང་རྒྱལ་ཅན་དེ་དག་གིས་སྡིག་པ་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་ཕྱིར་སའི་བཅུད་ནུབ་པར་གྱུར་ཏོ། །དེ་ནས་སེམས་ཅན་དེ་དག་འདུས་ཤིང་ཚོགས་ནས་མྱ་ངན་བྱེད་ཅིང་ཡི་ཆད་ལ་སྨྲེ་སྔགས་འདོན་ཏེ། འདི་སྐད་དུ། ཀྱེ་ཧུ་སའི་བཅུད་ཀྱེ་ཧུད་སའི་བཅུད་ཅེས་ཀྱང་འཛེར་ཏེ། དཔེར་ན་ད་ལྟར་གྱི་མི་རྣམས་ཀྱི་ཁ་ཟས་བཟང་པོ་མངར་བ་འགའ་ཞིག་རྙེད་ན་སྔོན་གྱི་ཡི་གེ་དང༌། ཚིག་དང༌། མིང་དེ་དག་རྗེས་སུ་སློབ་པར་བྱེད་དེ། འདི་སྐད་དུ་ཀྱེ་ཧུད་བྲོ་བ་ཀྱེ་ཧུད་བྲོ་བ་ཞེས་ཟེར་བ་དེ་བཞིན་དུ། སེམས་ཅན་དེ་དག་འདུས་ཤིང་ཚོགས་ནས་མྱ་ངན་བྱེད་ཅིང་ཡི་ཆད་ལ་སྨྲེ་སྔགས་འདོན་ཏེ། འདི་སྐད་དུ་ཀྱེ་ཧུད་སའི་བཅུད་ཀྱི་ཧུད་སའི་བཅུད་ཅེས་འཛེར་ཏེ། འོན་ཀྱང་སྨྲས་པ་འདིའི་དོན་ནི་འདི་ཡིན་ནོ། །སྨྲས་པ་འདིའི་དོན་ནི་འདི་ཡིན་ནོ་ཞེས་སྨྲས་པ་དེའི་དོན་ཡང་མི་ཤེས་སོ། །སའི་བཅུད་ནུབ་པར་གྱུར་པ་ན་སེམས་ཅན་དེ་དག་གིས་སའི་ཞག་ཁ་དོག་ཕུན་སུམ་ཚོགས་པ་དང༌། དྲི་ཕུན་སུམ་ཚོགས་པ་དང༌། རོ་ཕུན་སུམ་ཚོགས་པ་བྱུང་བར་གྱུར་ཏེ། ཁ་དོག་ནི་དཔེར་ན་དོང་ཀའི་མེ་ཏོག་བཞིན་ནོ། །རོ་ནི་དཔེར་ན་སྦྲང་མའི་སྦྲང་རྩི་མ་བསྐོལ་བ་བཞིན་ནོ། །དེ་དག་བཟའ་བ་དེ་དང༌། ཁ་ཟས་དེ་ཟ་ལ་ཚེ་རིང་ཞིང་ཡུན་རིང་མོར་གནས་སོ། །དེ་དག་གི་ནང་ན་གང་ཁ་ཟས་ཆེས་མང་དུ་ཟ་བ་དེ་ནི་ཁ་དོག་ངན་པར་འགྱུར་རོ། །གང་ཁ་ཟས་ཆེས་ཉུང་ངུ་ཟ་བ་དེ་ནི་ཁ་དོག་བཟང་བར་འགྱུར་རོ། །དེ་ལྟར་ཁ་ཟས་སྣ་ཚོགས་ཀྱི་རྐྱེན་གྱིས་ཁ་དོག་སྣ་ཚོགས་ཡོད་པར་འགྱུར་རོ། །ཁ་དོག་སྣ་ཚོགས་ཡོད་པར་གྱུར་པས། ཀྱེ་སེམས་ཅན་ང་ནི་ཁ་དོག་བཟང་བ་ཡིན་ནོ། །ཁྱོད་ནི་ཁ་དོག་ངན་པ་ཡིན་ནོ་ཞེས་སེམས་ཅན་གྱིས་སེམས་

---

^{[མ་དཔེ་གཟིགས་ན་འདིར་གནོན།]}

ཅན་ལ་བརྙས་པར་གྱུར་ཏོ། །ཁ་དོག་གི་མངོན་པའི་ང་རྒྱལ་ཅན་དེ་དག་གིས་ཡང་སྡིག་པ་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་ཕྱིར་སའི་ཞག་ཀྱང་ནུབ་པར་གྱུར་ཏོ། །དེ་ནས་སེམས་ཅན་དེ་དག་འདུས་ཤིང་ཚོགས་ནས་མྱ་ངན་བྱེད་ཅིང་ཡི་ཆད་ལ་སྨྲེ་སྔགས་འདོན་ཏེ། འདི་སྐད་དུ་ཀྱེ་མ་ཀྱི་ཧུད་ཀྱེ་མ་ཀྱི་ཧུད་ཅེས་འཛེར་ཏེ། དཔེར་ན་ད་ལྟར་གྱི་མི་རྣམས་ལས་ལ་ལ་ཞིག་ནང་ཡུན་རིང་པོའི་རིམས་ཀྱིས་བཏབ་པ་ན་སྔོན་གྱི་ཡི་གེ་དང༌། ཚིག་དང་མིང་དེ་དག་རྗེས་སུ་སློབ་སྟེ། འདི་སྐད་དུ་ཀྱེ་མ་ཀྱི་ཧུད་ཀྱེ་མ་ཀྱི་ཧུད་ཅེས་ཟེར་བ་དེ་བཞིན་དུ། སེམས་ཅན་དེ་དག་འདུས་ཤིང་ཚོགས་ཞེས་བྱ་བ་ནས། སྨྲེ་སྔགས་འདོན་པའི་བར་དུ་སྟེ། འོན་ཀྱང་སྨྲས་པ་འདིའི་དོན་ནི་འདི་ཡིན་ནོ། །སྨྲས་པ་འདིའི་དོན་ནི་འདི་ཡིན་ནོ་ཞེས་སྨྲས་པ་དེའི་དོན་ཡང་མི་ཤེས་སོ། །ས་ཞག་ནུབ་པར་གྱུར་པ་ན་སེམས་ཅན་དེ་དག་ལྡུམ་བུའི་ཚལ་ཁ་དོག་ཕུན་སུམ་ཚོགས་པ་དང༌། དྲི་ཕུན་སུམ་ཚོགས་པ་དང༌། རོ་ཕུན་སུམ་ཚོགས་པ་དང༌། ཁ་དོག་ནི་དཔེར་ན་ཀ་དམ་བུ་ཀའི་མེ་ཏོག་བཞིན་ནོ། །རོ་ནི་དཔེར་ན་སྤྲང་མའི་སྦྲང་རྩི་མ་བསྐོལ་བ་བཞིན་ཏེ། དེ་དག་བཟའ་བ་དེ་དང་ཁ་ཟས་དེ་ཟ་ལ་ཆེ་རིང་ཞིང་ཡུན་རིང་དུ་གནས་སོ། །དེ་དག་གི་ནང་ན་ཁ་ཟས་ཆེས་མང་དུ་ཟ་བ་དེ་ནི་ཁ་དོག་ངན་པར་འགྱུར་རོ། །གང་ཁ་ཟས་ཆེས་ཉུང་དུ་ཟ་བ་དེ་ནི་ཁ་དོག་བཟང་བར་འགྱུར་རོ། །དེ་ལྟར་ཁ་དོག་སྣ་ཚོགས་ཀྱི་རྐྱེན་གྱིས་ཁ་དོག་སྣ་ཚོགས་ཡོད་པར་གྱུར་ཏོ། །ཁ་དོག་སྣ་ཚོགས་ཡོད་པར་གྱུར་པས། ཀྱེ་སེམས་ཅན་ང་ནི་ཁ་དོག་བཟང་བ་ཡིན་ནོ། །ཁྱོད་ནི་ཁ་དོག་ངན་པ་ཡིན་ནོ་ཞེས་སེམས་ཅན་གྱིས་སེམས་ཅན་ལ་བརྙས་པར་གྱུར་ཏོ། །ཁ་དོག་གི་མངོན་པའི་ང་རྒྱལ་ཅན་དེ་དག་གིས་ཡང་སྡིག་པ་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་ཕྱིར། ལྡུམ་བུའི་ཚལ་ཡང་ནུབ་པར་གྱུར་ཏེ། ལྡུམ་བུའི་ཚལ་ནུབ་པར་གྱུར་ནས་དེ་ནས་སེམས་ཅན་དེ་དག་འདུས་ཤིང་ཚོགས་ནས། མྱ་ངན་བྱེད་ཅིང་ཡི་ཆད་ལ་སྨྲེ་སྔགས་འདོན་ཏེ། འདི་སྐད་དུ་ཕར་སོང་ཕར་སོང་ཞེས་འཛེར་ཏེ། དཔེར་ན་ད་ལྟར་གྱི་མི་རྣམས་ལ་ལ་ཞིག་ཚིག་དྲག་པོའི་བརྒྱད་བཀག་གིས་སྤྱོ་བར་འདོད་པ་ན་སྔོན་གྱི་ཡི་གེ་དང་ཚིག་དང་མིང་དེ་

---

^{[མ་དཔེ་གཟིགས་ན་འདིར་གནོན།]}

དག་རྗེས་སུ་སློབ་སྟེ། འདི་སྐད་དུ་ཕར་སོང་ཞེས་ཟེར་བ་དེ་བཞིན་དུ། སེམས་ཅན་དེ་དག་འདུས་ཤིང་ཚོགས་ནས་མྱ་ངན་བྱེད་ཅིང་ཡི་ཆད་ལ་སྨྲེ་སྔགས་འདོན་ཏེ། ཕར་སོང་ཕར་སོང་ཞེས་འཛེར་ཏོ། །འོན་ཀྱང་སྨྲས་པ་འདིའི་དོན་ནི་འདི་ཡིན་ནོ། །སྨྲས་པ་འདིའི་དོན་ནི་འདི་ཡིན་ནོ། །ཞེས་སྨྲས་པ་དེའི་དོན་ཡང་མི་ཤེས་སོ། །ལྡུམ་བུའི་ཚལ་ནུབ་པར་གྱུར་པ་ན་སེམས་ཅན་དེ་དག་གིས་མ་རྨོས་མ་བཏབ་པའི་འབྲས་སཱ་ལུའི་འབྲུ་ཁ་དོག་ཕུན་སུམ་ཚོགས་པ་དང༌། དྲི་ཕུན་སུམ་ཚོགས་པ་དང༌། རོ་ཕུན་སུམ་ཚོགས་པ་བྱུང་བར་གྱུར་ཏེ། གཟེགས་མ་མེད་ཅིང་ཕུབ་མ་མེད་པ་དག་ཅིང་གཙང་སྟེ། སོར་བཞི་ཙམ་ལ་ཡོངས་སུ་གཡོགས་པ་མེད་པ་དེ་ན། ནང་བརྔས་ན་ནུབ་སྐྱེ་ནུབ་བརྔས་ན་ནང་སྐྱེའོ། །དེ་ལྟར་བརྔས་ཤིང་བརྔས་ཤིང་སྐྱེ་ལ་བརྡས་པར་ཡང་མི་མངོན་ཏེ། དེ་དག་བཟའ་བ་དེ་དང༌། ཁ་ཟས་དེ་ཟ་ལ་ཚེ་རིང་ཞིང་ཡུན་རིང་དུ་གནས་སོ། །གང་གི་ཕྱིར་སེམས་ཅན་དེ་དག་གིས་མ་རྨོས་མ་བཏབ་པའི་འབྲས་སཱ་ལུའི་འབྲུ་དེ་དག་རིམ་གྱིས་ཡོངས་སུ་ལོངས་སྤྱོད་པས་དེའི་ཕྱིར་དེ་དག་གི་དབང་པོ་ཐ་དད་པ་བྱུང་བར་གྱུར་ཏོ། །ཁ་ཅིག་ནི་མོའི་དབང་པོ་ཁ་ཅིག་ཕོའི་དབང་པོ་བྱུང་སྟེ། དེ་མོའི་དབང་པོ་ཅན་གང་ཡིན་པ་དག་དང༌། ཕོའི་དབང་པོ་ཅན་གང་ཡིན་པ་དེ་དག་གཅིག་ལ་གཅིག་མིག་གིས་མིག་ཚུགས་སུ་ལྟའོ། །ཇི་ཙམ་དུ་མིག་གིས་མིག་ཚུགས་སུ་ལྟ་བ་དེ་ཙམ་དུ་ཀུན་དུ་ཆགས་སོ། །ཇི་ཙམ་དུ་ཀུན་དུ་ཆགས་པ་དེ་ཙམ་དུ་ངོ་ཚ་མི་ཤེས་སོ། །ཇི་ཙམ་དུ་ངོ་ཚ་མི་ཤེས་པ་དེ་ཙམ་དུ་ལོག་པ་ལ་ཞུགས་སོ། །སེམས་ཅན་གཞན་དག་གིས་ཀྱང་སེམས་ཅན་ལོག་པ་ལ་ཞུགས་པ་དེ་མཐོང་ངོ༌། །མཐོང་ནས་ཀྱང་རྡུལ་གྱིས་འཐོར་ཞིང་བོང་བ་དང་གསེག་མ་དང་གྱོ་མོ་དག་ཀྱང་འཕེན་ཏེ། འདི་སྐད་དུ་ངན་ཅིང་བླུན་པའི་སེམས་ཅན་མི་བྱ་བ་བྱེད་པ། ད་སེམས་ཅན་གྱིས་སེམས་ཅན་སུན་འབྱུང་བ་ག་ལ་སྲིད་ཅེས་འཛེར་ཏེ། དཔེར་ན་ད་ལྟར་གྱི་མི་རྣམས་བག་མ་ལེན་པ་དང་གཉེན་འདུན་རྣམས་ཀྱིས་མེ་ཏོག་གམ། འབྲས་ཡོས་སམ། ཙནྡན་གྱི་ཕྱེ་མ་དག་གིས་གཏོར་ཏེ། འདི་སྐད་དུ། སྲུ་སྐྱིད་པར་གྱུར་ཅིག །སྲུ་སྐྱིད་པར་གྱུར་ཅིག་ཅེས་ཀྱང་འཛེར་ཏེ། དེ་བཞིན་དུ་སེམས་ཅན་དེ་དག་གཅིག་ལ་གཅིག་སེམས་ཅན་ལོག་

---

^{[མ་དཔེ་གཟིགས་ན་འདིར་གནོན།]}

པ་ལ་ཞུགས་པ་མཐོང་ནས་སྔ་མ་བཞིན་དུ་སེམས་ཅན་སུན་འབྱུང་བ་ག་ལ་སྲིད་ཅེས་འཛེར་ཏོ། །དེ་ལྟར་ན་སྔོན་ཆོས་མ་ཡིན་པར་གྲགས་པ་གང་ཡིན་པ་དེ་ནི་ད་ལྟར་གྱི་མི་རྣམས་ཀྱི་ཆོས་སུ་གྲགས་སོ། །སྔོན་ཆོས་མ་ཡིན་པར་གྲགས་པ་དེ་ནི་ད་ལྟར་གྱི་བསྔགས་པར་གྱུར་རོ། །གང་གི་ཕྱིར་སེམས་ཅན་དེ་དག་སྡིག་པ་དང༌། དམ་པའི་ཆོས་མ་ཡིན་པ་དེ་ལ་ཞེན་ཅིང་འཛུད་པར་བྱེད་དོ། །ངེས་པར་ཞུགས་པ་དེས་ན་ཕྱོགས་གཅིག་ཏུ་སོང་སྟེ་ཁྱིམ་བྱ་བ་ལ་ཞུགས་ཤིང་རྩོམ་པར་གྱུར་ཏེ། འདིར་བདག་ཅག་གཉིས་ཀྱི་མི་བྱའོ་ཞེས་ཟེར་བ་ལས་ཁྱིམ་ཁྱིམ་ཞེས་བྱ་བའི་མིང་བྱུང་ངོ༌། །དེ་དག་ཕྱེམ་རེད་ཟ་བར་འདོད་པའི་ཕྱིར་ནི་ཕྱེམ་རེད་སཱ་ལུ་ལེན་ཏོ། །ནང་པར་འདོད་པའི་ཕྱིར་ནི་ནང་པར་ལེན་ཏོ། །དེ་དག་སེམས་ཅན་ལེ་ལོ་ཅན་གཞན་དག་གིས། སེམས་ཅན་དེ་ལ་འདི་སྐད་དུ་ཀྱེ་སེམས་ཅན་ཚུར་ཤོག །བདག་ཅག་གཉིས་སཱ་ལུ་ལེན་དུ་འདོང་ངོ༌།། ཞེས་སྨྲས་སོ། །དེས་འདི་སྐད་དུ། ཀྱེ་སེམས་ཅན་ཁྱོད་བདག་ཅག་སཱ་ལུ་བླང་བའི་ཕྱིར་ནན་ཏན་བྱོས་ཤིག །ངས་ནི་ནང་པར་གྱི་སཱ་ལུ་ནུབ་མོ་བླངས་ཟིན་ཏོ་ཞེས་སྨྲས་སོ། །དེ་ནས་སེམས་ཅན་དེ་འདི་སྙམ་དུ་ནང་པར་གྱི་སཱ་ལུ་ཕྱེམ་རེད་ལེན་པ་འདི་ནི་ལེགས་པ་ཡིན་ནོ། །འདི་ནི་ཤིན་ཏུ་ལེགས་པ་ཡིན་གྱི། བདག་ཅག་གིས་ཡང་ཞག་གཉིས་དང་ཞག་གསུམ་དང་བདུན་གྱི་བར་གྱི་སཱ་ལུ་བླང་བར་བྱའོ་སྙམ་ནས་ཞག་བདུན་གྱི་སཱ་ལུ་བླངས་སོ། །གང་གི་ཕྱིར་དེ་དག་གིས་མ་རྨོས་མ་བཏབ་པའི་འབྲས་སཱ་ལུའི་འབྲུ་ཀུན་དུ་བསགས་པའི་ཚུལ་གྱིས་ལོངས་སྤྱད་པས། ལོངས་སྤྱད་པ་དེས་ན་སཱ་ལུ་དེ་ལས་གཟེགས་མ་དང་ཕུབ་མ་ཡང་བྱུང་བར་གྱུར། བརྔས་སོ་ཅོག་ཀྱང་མི་སྐྱེ་ལ་བརྔས་པར་ཡང་མངོན་བར་གྱུར་ཏེ། སཱ་ལུ་རྣམས་ཕུང་པོ་ཕུང་པོར་བཞག་གོ །དེ་ནས་སེམས་ཅན་དེ་དག་འདུས་ཤིང་ཚོགས་ནས་མྱ་ངན་བྱེད་ཅིང་ཡི་ཆད་ལ་སྨྲེ་སྔགས་འདོན་ཏེ། ཀྱེ་བདག་ཅག་སྔོན་གྱི་གཟུགས་བཟང་ཞིང་ཡིད་ལ་སྐྱེས་པ་དང༌། མ་ཉམས་ཤིང་དབང་པོ་ཚང་བ་ཡན་ལག་དང་ཉིད་ལག་ཐམས་ཅད་དང་ལྡན་ཏེ། རང་ལས་འོད་འབྱུང་བ་དང༌། ནམ་མཁའ་ལ་འགྲོ་བ་དང༌། བཟང་ཞིང་མདོག་སྡུག་པ་དང༌། དགའ་བའི་བཟའ་བ་རྣམས་དང་དགའ་བའི་ཟས་རྣམས་ཟ་ལ་

---

^{[མ་དཔེ་གཟིགས་ན་འདིར་གནོན།]}

ཚེ་རིང་ཞིང་ཡུན་རིང་དུ་གནས་ཏེ། བདག་ཅག་ལས་གང་ཁ་ཟས་ཆེས་མང་དུ་ཟ་བ་དེ་ནི་ཁ་དོག་ངན་པར་འགྱུར་ལ། གང་ཁ་ཟས་ཆེས་ཉུང་ངུ་ཟ་བ་དེ་ནི་ཁ་དོག་བཟང་བར་འགྱུར་ཞིང༌། དེ་ལྟར་ཁ་ཟས་སྣ་ཚོགས་ཀྱི་རྐྱེན་གྱིས་ཁ་དོག་ཀྱང་སྣ་ཚོགས་ཡོད་པར་འགྱུར་ཏེ། ཁ་དོག་སྣ་ཚོགས་ཡོད་པར་གྱུར་པས། ཀྱེ་སེམས་ཅན་ང་ནི་ཁ་དོག་བཟང་བ་ཡིན་ནོ། །ཁྱོད་ནི་ཁ་དོག་ངན་པ་ཡིན་ནོ་ཞེས་སེམས་ཅན་གྱིས་སེམས་ཅན་ལ་བརྙས་པར་གྱུར་ལ་བདག་ཅག་ཁ་དོག་གི་མངོན་པའི་ང་རྒྱལ་ཅན་རྣམས་ཀྱིས་སྡིག་པ་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་ཕྱིར་སའི་བཅུད་ནུབ་པར་གྱུར་ནས། ས་ཞག་ཁ་དོག་ཕུན་སུམ་ཚོགས་པ་དང༌། དྲི་ཕུན་སུམ་ཚོགས་པ་དང༌། རོ་ཕུན་སུམ་ཚོགས་པ་བྱུང་བར་གྱུར་ཏེ། ཁ་དོག་ནི་དཔེར་ན་དོང་ཀའི་མེ་ཏོག་བཞིན་ནོ། །རོ་ནི་དཔེར་ན་སྦྲང་མའི་སྦྲང་རྩི་མ་བསྐོལ་བ་བཞིན་ཏེ། བདག་ཅག་བཟའ་བ་དེ་དང་ཁ་ཟས་ངེ་ཟ་ལ་ཚེ་རིང་ཞིང་ཡུན་རིང་དུ་གནས་ཏེ། བདག་ཅག་ལས་ཁ་ཟས་ཆེས་མང་དུ་ཟ་བ་དེ་ནི་ཁ་དོག་ངན་པར་འགྱུར་ལ། གང་ཁ་ཟས་ཆེས་ཉུང་དུ་ཟ་བ་དེ་ནི་ཁ་དོག་བཟང་བར་འགྱུར་རོ། །དེ་ལྟར་ཁ་ཟས་སྣ་ཚོགས་ཀྱི་རྐྱེན་གྱིས་ཁ་དོག་སྣ་ཚོགས་ཡོད་པར་གྱུར་ཏོ། །ཁ་དོག་སྣ་ཚོགས་ཡོད་པར་གྱུར་པས། ཀྱེ་སེམས་ཅན་ང་ནི་ཁ་དོག་བཟང་བ་ཡིན་ནོ། །ཁྱོད་ནི་ཁ་དོག་ངན་པ་ཡིན་ནོ་ཞེས་སེམས་ཅན་གྱིས་སེམས་ཅན་ལ་བརྙས་པར་གྱུར་ཏེ། བདག་ཅག་ཁ་དོག་གི་མངོན་པའི་ང་རྒྱལ་ཅན་རྣམས་ཀྱིས་ཡང་སྡིག་པ་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་ཕྱིར་ས་ཞག་ནུབ་པར་གྱུར་ནས། ལྡུམ་བུའི་ཚལ་ཁ་དོག་ཕུན་སུམ་ཚོགས་པ་དང༌། དྲི་ཕུན་སུམ་ཚོགས་པ་དང༌། རོ་ཕུན་སུམ་ཚོགས་པ་བྱུང་བར་གྱུར་ཏོ། །ཁ་དོག་ནི་དཔེར་ན་ཀ་དམ་བུ་ཀའི་མེ་ཏོག་བཞིན་ལ། རོ་ནི་དཔེར་ན་སྦྲང་བུའི་སྦྲང་རྩི་མ་བསྐོལ་བ་བཞིན་ཏེ། བདག་ཅག་བཟའ་བ་དེ་དང་ཁ་ཟས་དེ་དག་ཟ་ལ་ཚེ་རིང་ཞིང་ཡུན་རིང་དུ་གནས་ཏེ། བདག་ཅག་ལས་གང་ཁ་ཟས་ཆེས་མང་དུ་ཟ་བ་དེ་ནི་ཁ་དོག་ངན་བར་གྱུར་ལ་གང་ཁ་ཟས་ཆེས་ཉུང་དུ་ཟ་བ་དེ་ནི་ཁ་དོག་བཟང་བར་གྱུར་ཏེ། དེ་ལྟར་ཁ་ཟས་སྣ་ཚོགས་ཀྱི་རྐྱེན་ཀྱིས་ཁ་དོག་སྣ་ཚོགས་ཡོད་པར་འགྱུར་ལ། ཁ་དོག་སྣ་

---

^{[མ་དཔེ་གཟིགས་ན་འདིར་གནོན།]}

ཚོགས་ཡོད་པར་གྱུར་པས་ཀྱེ་སེམས་ཅན་ང་ནི་ཁ་དོག་བཟང་བ་ཡིན་ནོ། །ཁྱོད་ནི་ཁ་དོག་ངན་པ་ཡིན་ནོ་ཞེས་སེམས་ཅན་གྱིས་སེམས་ཅན་ལ་བརྙས་པར་གྱུར་ཏེ། བདག་ཅག་ཁ་དོག་གི་མངོན་པའི་ང་རྒྱལ་ཅན་རྣམས་ཀྱིས་སྡིག་པ་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་ཕྱིར་ལྡུམ་བུའི་ཚལ་ནུབ་པར་གྱུར་ཏེ། མ་རྨོས་མ་བཏབ་པའི་འབྲས་སཱ་ལུའི་འབྲུ་ཁ་དོག་ཕུན་སུམ་ཚོགས་པ་དང༌། དྲི་ཕུན་སུམ་ཚོགས་པ་དང༌། རོ་ཕུན་སུམ་ཚོགས་པ་བྱུང་བར་གྱུར་ཏེ། གཟེགས་མ་མེད་ཅིང་ཕུབ་མ་མེད་ལ་དག་ཅིང་གཙང་སྟེ། སོར་བཞི་ཙམ་ལ་ཡོངས་སུ་གཡོགས་པ་མེད་པ་དེ་ནང་བརྔས་ན་ནུབ་སྐྱེ། ནུབ་བརྔས་ན་ནང་སྐྱེ་བ་དང༌། དེ་ལྟར་བརྔས་ཤིང་སྐྱེ་ལ་བརྔས་པར་ཡང་མི་མངོན་ཏེ། བདག་ཅག་བཟའ་བ་དེ་དང་ཁ་ཟས་དེ་ལ་ཟ་ལ་ཚེ་རིང་ཞིང་ཡུན་རིང་དུ་གནས་ཏེ། གང་གི་ཕྱིར་བདག་ཅག་གིས་མ་རྨོས་མ་བཏབ་པའི་འབྲས་སཱ་ལའི་འབྲུ་ཀུན་དུ་བསགས་པའི་ཚུལ་གྱིས་ལོངས་སྤྱོད་པས་ལོངས་སྤྱོད་པ་དེས་ན་སཱ་ལུ་དེ་ལས་གཟེགས་མ་དང་ཕུབ་མ་ཡང་བྱུང་བར་གྱུར། བརྡས་སོ་ཅོག་ཀྱང་མི་སྐྱེ་ལ་བརྡས་པ་ཡང་མངོན་བར་གྱུར་ཏེ། སཱ་ལུ་རྣམས་ཕུང་པོ་ཕུང་པོར་བཞག་གོ །ད་ནི་བདག་ཅག་གིས་འདི་ནི་ཁྱོད་ཀྱིའོ། །འདི་ནི་ངའི་འོ་ཞེས་ཞིང་རྣམས་གཞལ་ཞིང་བགོས་ལ། མུ་ཐུག་བྲིའོ་ཞེས་ནས་དེ་དག་འདི་ནི་ཁྱོད་ཀྱིའོ། །འདི་ནི་ངའི་འོ་ཞེས་ཞིང་རྣམས་འཇལ་ཞིང་བཀྱེད་མུ་ཐུག་འདྲིའོ། །དེ་ནས་སེམས་ཅན་གཞན་ཞིག་གིས་བདག་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་བླངས་སོ། །སེམས་ཅན་གཞན་ཞིག་གིས་སེམས་ཅན་དེ་བདག་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ལེན་པ་མཐོང་ངོ༌། །མཐོང་ནས་ཀྱང་འདི་སྐད་དུ། ངན་ཞིང་བླུན་པའི་སེམས་ཅན་ཁྱོད་ནི་མི་བྱ་བ་བྱེད་པའོ། །ཀྱེ་སེམས་ཅན་བདག་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ལེན་པ་དག་ག་ལ་སྲིད། ཀྱེ་སེམས་ཅན་ཁྱོད་སོང་ལ་ད་ཕྱིན་ཆད་དེ་ལྟར་མ་བྱེད་ཅིག་ཅེས་སྨྲས་སོ། །དེ་ནས་སེམས་ཅན་དེས་བདག་གི་སཱ་ལུ་ཡོད་བཞིན་དུ་ལན་གཉིས་ལན་གསུམ་དུ་གཞན་གྱི་སཱ་ལུ་མ་བྱིན་པར་བླངས་སོ། །སེམས་ཅན་དེ་དག་གི་སཱ་ལུ་ཡོད་བཞིན་དུ་ལན་གཉིས་ལན་གསུམ་དུ་མ་བྱིན་པར་ལེན་པ་སེམས་ཅན་

---

^{[མ་དཔེ་གཟིགས་ན་འདིར་གནོན།]}

དེས་མཐོང་ངོ༌། །མཐོང་ནས་ཀྱང་འདི་སྐད་དུ། ངན་ཞིང་བླུན་པའི་སེམས་ཅན་ཁྱོད་ནི་མི་བྱ་བ་བྱེད་པའོ། །ཀྱེ་སེམས་ཅན་ཁྱོད་བདག་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ལེན་པ་དག་ག་ལ་སྲིད་ཅེས་སྨྲས་ཏེ། དེའི་ལག་པ་གཉིས་ནས་ཀྱང་བཟུང་ནས་དེ་ཚུར་འདྲེན་ཕར་འདྲེན་ལ་དེའི་ཚེ་འཁོར་གྱི་ནང་དུ་ཡང་བཀུག་སྟེ། སེམས་ཅན་དག་གང་སེམས་ཅན་འདིས་བདག་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་བླངས་པ་ཤེས་པར་གྱིས་ཤིག་ཅེས་སྨྲས་སོ། །དེ་ནས་སེམས་ཅན་དེ་དག་གིས་སེམས་ཅན་དེ་ལ་འདི་སྐད་དུ་ངན་ཞིང་བླུན་པའི་སེམས་ཅན་ཁྱོད་ནི་མི་བྱ་བ་བྱེད་པའོ། །ཁྱོད་བདག་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ལེན་བ་དག་ག་ལ་སྲིད། ཀྱེ་སེམས་ཅན་ཁྱོད་སོང་ལ་ཕྱིན་ཆད་དེ་ལྟར་མ་བྱེད་ཅིག་ཅེས་སྨྲས་སོ། །དེ་ནས་དེས་སེམས་ཅན་དག་གང་སེམས་ཅན་འདིས་སཱ་ལུའི་ཕྱིར་བདག་ཚུར་དྲངས་ཕར་དྲངས་ཏེ། འཁོར་གྱི་ནང་དུ་ཡང་བཀུག་པ་ཤེས་པར་གྱིས་ཤིག །དེ་ནས་སེམས་ཅན་དེ་དག་གིས་སེམས་ཅན་དེ་ལ་འདི་སྐད་དུ། ཀྱེ་སེམས་ཅན་ཁྱོད་ཀྱིས་སཱ་ལུའི་ཕྱིར་སེམས་ཅན་ཚུར་དྲངས་ཕར་དྲངས་ལ་འཁོར་གྱི་ནང་དུ་ཡང་བཀུག་སྟེ་ཅི་བྱ། ཀྱེ་སེམས་ཅན་ཁྱོད་སོང་ལ་ཕྱིན་ཆད་དེ་ལྟར་མ་བྱེད་ཅིག་ཅེས་སྨྲས་སོ། །དེ་ནས་སེམས་ཅན་དེ་དག་འདི་སྙམ་དུ་སཱ་ལུའི་ཕྱིར་འདྲེན་པ་དང་འཁོར་གྱི་ནང་དུ་ཡང་འགུགས་པ་དག་སྣང་གི །བདག་ཅག་འདུས་ལ་བདག་ཅག་གིས་ནང་ན་སེམས་ཅན་གང་ཆེས་གཟུགས་བཟང་བ་དང༌། ཆེས་བལྟ་ན་སྡུག་པ་དང༌། ཆེས་མཛེས་པ་དང༌། ཆེས་དབང་ཆེ་བར་གྲགས་པ་དེ་བདག་ཅག་གིས་ཞིང་གི་དཔོན་པོར་བསྐོས་ནས། བདག་ཅག་ལ་དུས་དུས་སུ་ཆད་པས་བཅད་པའི་རིགས་པ་གང་ཡིན་པ་རྣམས་ལ་ནི་ཆད་པས་གཅོད་པར་འགྱུར། ཕན་གདགས་པའི་རིགས་པ་རྣམས་ལ་ནི་ཕན་འདོགས་པར་འགྱུར་ཏེ། གང་བདག་ཅག་གི་ཞིང་རྣམས་ལས་སྐྱེས་པ་དེ་ལས་བདག་ཅག་གིས་དུས་དུས་སུ་ཆོས་བཞིན་བྱེད་ཐོག་ཤས་སྦྱིན་པར་བྱའོ་སྙམ་དུ་བསམས་སོ། །དེ་ནས་སེམས་ཅན་དེ་དག་འདུས་ནས་དེ་དག་གི་ནང་ན་སེམས་ཅན་གང་ཆེས་གཟུགས་བཟང་བ་དང༌། ཆེས་བལྟ་ན་སྡུག་པ་དང༌། ཆེས་མཛེས་པ་དང༌། ཆེས་དབང་ཆེ་བར་གྲགས་པ་གང་ཡིན་པའི་སེམས་ཅན་དེ་ལ་འདི་སྐད་དུ།

---

^{[མ་དཔེ་གཟིགས་ན་འདིར་གནོན།]}

ཀྱེ་སེམས་ཅན་ཁྱོད་ཚུར་ཤོག །བདག་ཅག་གི་ཞིང་གི་བདག་པོ་ལེགས་པ་ཁོ་ནར་བྱོས་ལ། སེམས་ཅན་བདག་ཅག་ལས་ཆད་པས་བཅད་པའི་རིགས་པ་རྣམས་ནི་ཆད་པས་ཆོད་ཅིག །ཕན་གདགས་པའི་རིགས་པ་རྣམས་ལ་ནི་ཕན་ཐོགས་ཤིག །བདག་ཅག་གི་ཞིང་རྣམས་ལས་སྐྱེས་པ་གང་ཡིན་པ་དེ་ལས་ཀྱང་བདག་ཅག་གིས་དུས་སུ་ཆོས་བཞིན་དུ་ཐོག་ཤས་སྦྱིན་ནོ་ཞེས་སྨྲས་སོ། །དེ་ནས་སྐྱེ་བོ་མང་པོས་བཀུར་ཏོ་ཞེས་ནས་མང་པོས་བཀུར་བ་མང་པོས་བཀུར་བ་ཞེས་མིང་དུ་ཆགས་སོ། །ཞིང་རྣམས་ཀྱི་བདག་པོར་གྱུར་པ་དང༌། ཕོངས་པ་ལས་སྐྱོབ་པའི་ཕྱིར་རྒྱལ་རིགས་རྒྱལ་རིགས་ཞེས་བྱ་བར་མིང་དུ་ཆགས་སོ། །ཆོས་དང་ཚུལ་ཁྲིམས་ཀྱི་ཚུལ་ཀུན་དུ་སྤྱོད་པ་དང༌། ཤེས་རབ་ཀྱི་ཚུལ་ཀྱང་ཀུན་ཏུ་སྤྱོད་པས་འཁོར་མགུ་བར་བྱེད་པའི་ཕྱིར་རྒྱལ་པོ་ཞེས་བྱ་བར་མིང་དུ་ཆགས་སོ། །བཅོམ་ལྡན་འདས་ཀྱིས་ཀྱང་གནས་འཇོག་དང་བ་ར་དྷྭ་ཛ་ལུང་བསྟན་པ་ལས་འདི་སྐད་དུ། གནས་འཇོག་ཅིའི་རྒྱུ་དང་ཅིའི་རྐྱེན་གྱིས་རྒྱལ་རིགས་ཀྱི་ཆོ་རིགས་འཇིག་རྟེན་དུ་བྱུང་ཞེ་ན། འཇིག་རྟེན་འདི་འཇིག་ཅིང་འཇིག་པའི་ཚེ་འཇིག་ན་སེམས་ཅན་ཕལ་ཆེར་འོད་གསལ་གྱི་ལྷའི་རིགས་སུ་སྐྱེ་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དེ། དེ་དག་དེར་གཟུགས་བཟང་ཞིང་ཡིད་ལས་སྐྱེས་པ་དང༌། མ་ཉམས་ཤིང་དབང་པོ་ཚང་བ་དང༌། ཡན་ལག་དང་ཉིང་ལག་ཐམས་ཅད་དང་ལྡན་པ་དང༌། བཟང་ཞིང་མདོག་སྡུག་པ་དང༌། རང་ལས་འོད་འབྱུང་བ་དང༌། ནམ་མཁའ་ལ་འགྲོ་བ་དང༌། དགའ་བའི་བཟའ་བ་དང༌། དགའ་བའི་ཟས་ཟ་བ་དང༌། ཚེ་རིང་ཞིང་ཡུན་རིང་དུ་གནས་པར་འགྱུར་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །འཇིག་རྟེན་འདི་ཆགས་ཤིང་འཆགས་པ་ན་འཇིག་རྟེན་དུ་ས་ཆེན་པོ་འདི་ཆུ་གཅིག་ཅིང་རྒྱ་མཚོ་གཅིག་ཏུ་འགྱུར་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དེ། ཆུ་གཅིག་ཅིང་རྒྱ་མཚོ་གཅིག་ཏུ་གྱུར་པའི་ས་ཆེན་པོའི་སྟེང་དུ་རླུང་གིས་སྤྲིས་མ་ཀུན་ཏུ་བསྡུས་ཤིང་ཀུན་ཏུ་འཐས་བར་བྱས་པ་ནས་སྔ་མ་བཞིན་དུ་རྒྱས་པར་སྐྱེ་བོ་མང་པོས་བཀུར་བ་ཞེས་མིང་དུ་ཆགས་པ་དང༌། ཞིང་རྣམས་ཀྱི་བདག་པོར་གྱུར་པ་དང༌། ཕོངས་པ་ལས་སྐྱོབ་པའི་ཕྱིར་རྒྱལ་རིགས་རྒྱལ་རིགས་ཞེས་བྱ་བར་མིང་

---

^{[མ་དཔེ་གཟིགས་ན་འདིར་གནོན།]}

དུ་ཆགས་པ་དང༌། ཆོས་དང་ཚུལ་ཁྲིམས་ཀྱི་ཚུལ་ཀུན་ཏུ་སྤྱོད་པ་དང༌། ཤེས་རབ་ཀྱི་ཚུལ་ཀུན་ཏུ་སྤྱོད་པས་འཁོར་མགུ་བར་བྱེད་པའི་ཕྱིར་རྒྱལ་པོ་རྒྱལ་པོ་ཞེས་བྱ་བར་མིང་དུ་ཆགས་པའི་བར་དུ་ཐམས་ཅད་བརྗོད་པར་བྱ་སྟེ། གནས་འཇོག་འདི་ནི་རྒྱལ་རིགས་ཆོ་རིགས་འཇིག་རྟེན་དུ་བྱུང་བའི་གཏན་ཚིགས་ཀྱི་མཆོག་ཡིན་ཏེ་དེ་ཡང་ཆོས་བཞིན་དུ་བྱེད་པ་ཡིན་ཏེ་ཆོས་མ་ཡིན་པས་ནི་མ་ཡིན་ནོ། །དེ་ལ་འདི་ནི་རྒྱལ་པོའི་དབང་པོ་མཆོག་རྣམས་ཀྱི་ཆོས་སོ། །གང་གི་ཚེ་མང་པོས་བཀུར་བ་རྒྱལ་པོ་ཆེན་པོར་གྱུར་པ་དེའི་ཚེ་ནི་མི་རྣམས་ཀྱི་མིང་སེམས་ཅན་ཞེས་བྱ་བར་གྱུར་ཏོ། །མང་པོས་བཀུར་བའི་བུ་ནི་འོད་མཛེས་ཞེས་བྱ་བར་གྱུར་ཏེ། གང་གི་ཚེ་འོད་མཛེས་རྒྱལ་པོ་ཆེན་པོར་གྱུར་པ་དེའི་ཚེ་ནི་མི་རྣམས་ཀྱི་མིང་ནི་ཆུ་སྟོང་ཆུ་སྟོད་ཅེས་བྱ་བར་གྱུར་ཏོ། །འོད་མཛེས་ཀྱི་བུ་དགེ་བ་ཞེས་བྱ་བར་གྱུར་ཏེ། གང་གི་ཚེ་དགེ་བ་ཞེས་བྱ་བ་རྒྱལ་པོར་གྱུར་པ་དེའི་ཚེ་ནི་མི་རྣམས་ཀྱི་མིང་ཏིལ་ལས་སྐྱེས་ཏིལ་ལས་སྐྱེས་ཞེས་བྱ་བར་གྱུར་ཏོ། །དགེ་བའི་བུ་ནི་དགེ་མཆོག་ཅེས་བྱ་བར་གྱུར་ཏེ། གང་གི་ཚེ་དགེ་མཆོག་རྒྱལ་པོར་གྱུར་པ་དེའི་ཚེ་ནི་མི་རྣམས་ཀྱི་མིང་སྤྲིན་མགྲིན་སྤྲིན་མགྲིན་ཞེས་བྱ་བར་གྱུར་ཏོ། །དགེ་མཆོག་གི་བུ་ནི་གསོ་སྤྱོང་འཕགས་ཞེས་བྱ་བར་གྱུར་ཏེ། གང་གི་ཚེ་གསོ་སྦྱོང་འཕགས་རྒྱལ་པོར་གྱུར་པ་དེའི་ཚེ་ནི་མི་རྣམས་ཀྱི་མིང་ཏ་ལའི་རྗེ་ངར་ཏ་ལའི་རྗེ་ངར་ཞེས་བྱ་བར་གྱུར་ཏོ། །རྒྱལ་པོ་གསོ་སྦྱོང་འཕགས་ཀྱི་སྤྱི་བོར་ཕོལ་མིག་ཅིག་བྱུང་སྟེ། འཇམ་ཞིང་ཤིན་ཏུ་འཇམ་པ་ནི་དཔེར་ན་ཤིང་བལ་གྱི་འདའ་བ་འམ། རས་བལ་གྱི་འདའ་བ་བཞིན་ཏེ། །དེ་ལ་ཆུང་ཟད་ཀྱང་གནོད་པ་མེད་དེ། དེ་སྨིན་ཏེ་རྡོལ་བ་ལས་ཁྱེའུ་གཟུགས་བཟང་ཞིང་བལྟ་ན་སྡུག་ལ་མཛེས་པ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ་ཅིག་བྱུང་སྟེ། མིང་སྤྱི་བོ་སྐྱེས་སྤྱི་བོ་སྐྱེས་ཞེས་བྱ་བ་དང༌། ང་ལས་ནུ་ང་ལས་ནུ་ཞེས་བྱ་བར་གྱུར་ཏེ། གཞོན་ནུ་དེ་རྫུ་འཕྲུལ་ཆེ་ཞིང་མཐུ་ཆེ་བར་གྱུར་ཏེ། དེས་གླིང་བཞི་ཆར་དུ་ཡང་རྒྱལ་སྲིད་ཀྱི་དབང་ཕྱུག་ལ་དབང་བྱེད་དོ། །གང་གི་ཚེ་རྒྱལ་པོ་ང་ལས་ནུ་བྱུང་བ་དེའི་ཚེ་གཞུང་ལུགས་ཆེན་པོ་རྒྱ་ཆེའོ་ཅོག་དཔྱད་ཅིང་བསམས་ཏེ། སློབ་ཅིང་ཉེ་བར་བརྟགས་ནས་བྱས་པས་ན་དེ་ཕྱིན་ཆད་ནས་ད་ལྟར་གྱི་

---

^{[མ་དཔེ་གཟིགས་ན་འདིར་གནོན།]}

བར་དུ་མི་རྣམས་ཀྱི་མིང་དཔྱོད་བ་ཅན་དང༌། སེམས་པ་ཅན་དང༌། ཉེ་བར་རྟོགས་པ་ཅན་དང༌། ཤེད་ལས་སྐྱེས་པ་ཤེད་ལས་སྐྱེས་པ་ཞེས་བྱ་བར་གྱུར་ཏོ། །རྒྱལ་པོ་ང་ལས་ནུའི་བརླ་གཡས་པ་ནས་ཕོལ་མིག་ཅིག་བྱུང་སྟེ། འཇམ་ཞིང་ཤིན་ཏུ་འཇམ་པ་ནི་དཔེར་ན་ཤིང་བལ་གྱི་འདའ་བ་འམ། རས་བལ་གྱི་འདའ་བ་བཞིན་ཏེ། དེ་ལ་ཅུང་ཟད་ཀྱང་གནོད་པ་མེད་དེ། དེ་སྨིན་ཅིང་རྡོལ་བ་ལས་ཁྱེའུ་གཟུགས་བཟང་ཞིང་བལྟ་ན་སྡུག་ལ་མཛེས་པ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ་ཞིག་བྱུང་སྟེ། རྐང་པ་གཡས་པ་ནས་བྱུང་བའི་ཕྱིར་དེའི་མིང་མཛེས་པ་མཛེས་པ་ཞེས་བྱ་བར་གྱུར་ཏོ། །གཞོན་ནུ་དེ་རྫུ་འཕྲུལ་ཆེ་ཞིང་མཐུ་ཆེ་སྟེ། དེས་ཀྱང་གླིང་གསུམ་ དུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །རྒྱལ་པོ་མཛེས་པའི་བརླ་གཡོན ་བ་ནས་ཕོལ་མིག་ཅིག་བྱུང་སྟེ། འཇམ་ཞིང་ཤིན་ཏུ་འཇམ་པ་ནི་དཔེར་ན་ཤིང་བལ་གྱི་འདའ་བའམ། རས་བལ་གྱི་འདའ་བ་བཞིན་ཏེ། དེ་ལ་ཅུང་ཟད་ཀྱང་གནོད་པ་མེད་དོ། །དེ་སྨིན་ཏེ་རྡོལ་བ་ལས་ཁྱེའུ་གཟུགས་བཟང་ཞིང་བལྟ་ན་སྡུག་ལ་མཛེས་པ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ་ཞིག་བྱུང་སྟེ། རྐང་པ་གཡོན་པ་ནས་སྐྱེས་སོ་ཞེས་ནས་མིང་ཉེ་མཛེས་ཉེ་མཛེས་ཞེས་བྱ་བར་གྱུར་ཏོ། །གཞོན་ནུ་དེ་རྫུ་འཕྲུལ་ཆེ་ཞིང་མཐུ་ཆེ་སྟེ། དེས་ཀྱང་གླིང་གཉིས་སུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །རྒྱལ་པོ་ཉེ་མཛེས་ཀྱི་རྐང་པའི་བོལ་ལས་ཕོལ་མིག་གཅིག་བྱུང་སྟེ། འཇམ་ཞིང་ཤིན་ཏུ་འཇམ་པ་ནི་དཔེར་ན་ཤིང་བལ་གྱི་འདའ་བ་འམ། རས་བལ་གྱི་འདའ་བ་བཞིན་ཏེ། དེ་ལ་ཅུང་ཟད་ཀྱང་གནོད་པ་མེད་དོ། །དེ་སྨིན་ཏེ་རྡོལ་བ་ལས་ཁྱེའུ་གཟུགས་བཟང་ཞིང་བལྟ་ན་སྡུག་ལ་མཛེས་པ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ་ཞིག་བྱུང་སྟེ། དེ་རྐང་པའི་བོལ་གྱི་སྟེང་ནས་བྱུང་བའི་ཕྱིར་མིང་མཛེས་ཅན་མིང་མཛེས་ཅན་ཞེས་བྱ་བར་གྱུར་ཏོ། །གཞོན་ནུ་དེ་རྫུ་འཕྲུལ་ཆེ་ཞིང་མཐུ་ཆེ་སྟེ། དེས་ཀྱང་གླིང་གཅིག་ཏུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །རྒྱལ་པོ་མཛེས་ཅན་གྱི་རྐང་པའི་མཐིལ་གྱི་འོག་ནས་ཕོལ་མིག་ཅིག་བྱུང་སྟེ། འཇམ་ཞིང་ཤིན་ཏུ་འཇམ་པ་ནི་དཔེར་ན་ཤིང་བལ་གྱི་འདའ་བ་འམ་རས་བལ་གྱི་འདའ་བ་བཞིན་ཏེ། དེ་ལ་ཅུང་ཟད་ཀྱང་གནོད་པ་མེད་དོ། །དེ་སྨིན་ཏེ་རྡོལ་བ་ལས་

---

^{[མ་དཔེ་གཟིགས་ན་འདིར་གནོན།]}

ཁྱེའུ་གཟུགས་བཟང་ཞིང་བལྟ་ན་སྡུག་ལ་མཛེས་པ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ་ཞིག་བྱུང་སྟེ། རྐང་པའི་མཐིལ་གྱི་འོག་ནས་སྐྱེས་སོ། །རྐང་པའི་མཐིལ་གྱི་འོག་ནས་སྐྱེས་སོ་ཞེས་ནས་མིང་མཛེས་ལྡན་ཞེས་བྱ་བར་གྱུར་ཏོ། །གཞོན་ནུ་དེ་རྫུ་འཕྲུལ་ཆེ་ཞིང་མཐུ་ཆེ་སྟེ། དེས་ཀྱང་གླིང་གཅིག་ཏུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་ཕྱིན་ཆད་ཀྱི་འཁོར་ལོས་སྒྱུར་བའི་རྒྱལ་པོ་རྣམས་ནི་གླིང་གཅིག་ལ་དབང་བ་ཤ་སྟག་ཡིན་པར་རིག་པར་བྱའོ། །མཛེས་ལྡན་གྱི་བུ་ནི་བཏང་བའོ། །བཏང་བའི་བུ་ནི་བཏང་བཟུང་ངོ༌། །བཏང་བཟུང་གི་བུ་ནི་ཤ་ཀུ་ནིའོ། །ཤ་ཀུ་ནིའི་བུ་ནི་ཤ་ཀུ་ནི་ཆེན་པོའོ། །ཤ་ཀུ་ནི་ཆེན་པོའི་བུ་ནི་ཀུ་ཤིའོ། །ཀུ་ཤིའི་བུ་ནི་ཉེ་བའི་ཀུ་ཤིའོ། །ཉེ་བའི་ཀུ་ཤིའི་བུ་ནི་ཀུ་ཤི་ཆེན་པོའོ། །ཀུ་ཤི་ཆེན་པོའི་བུ་ནི་ལེགས་མཐོང་ངོ༌། །ལེགས་མཐོང་གི་བུ་ནི་ལེགས་མཐོང་ཆེན་པོའོ། །ལེགས་མཐོང་ཆེན་པོའི་བུ་ནི་གནོད་སེལ་ལོ། །གནོད་སེལ་གྱི་བུ་ནི་ཤེས་ལྡན་ནོ། །ཤེས་ལྡན་གྱི་བུ་ནི་སྐལ་ལྡན་ནོ། །སྐལ་ལྡན་གྱི་བུ་ནི་ངན་སྤོང་ངོ༌། །ངན་སྤོང་གི་བུ་ནི་ལྷུན་པོའོ། །ལྷུན་པོའི་བུ་ནི་ངེས་འགྲོའོ། །ངེས་འགྲོའི་བུ་ནི་རབ་ཏུ་སྒྲ་གྲགས་སོ། །རབ་ཏུ་སྒྲ་གྲགས་ཀྱི་བུ་ནི་རབ་ཏུ་སྒྲ་གྲགས་ཆེན་པོའོ། །རབ་ཏུ་སྒྲ་གྲགས་ཆེན་པོའི་བུ་ནི་བདེ་བྱེད་དོ། །བདེ་བྱེད་ཀྱི་བུ་ནི་ཕྱོགས་བདག་གོ །ཕྱོགས་བདག་གི་བུ་ནི་འདུལ་བཟང་ངོ༌། །འདུལ་བཟང་གི་བུ་ནི་རྒྱས་བྱེད་དོ། །རྒྱས་བྱེད་ཀྱི་བུ་ནི་ལྷ་ཆེན་པོའོ། །ལྷ་ཆེན་པོའི་བུ་དང་ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་བརྒྱད་ཁྲི་བཞི་སྟོང་གི་འདྲེས་པའི་གྲོང་ཁྱེར་དུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་འོག་ཏུ་རྒྱལ་པོ་མུ་ཁྱུད་ཅེས་བྱ་བ་བྱུང་སྟེ། མུ་ཁྱུད་ཀྱི་བུ་ནི་རྒྱལ་པོའོ། །རྒྱལ་པོའི་བུ་ལྷུན་པོའོ། །ལྷུན་པོའི་བུ་ནི་འཇིགས་བྱེད་ཀྱི་ཤིང་རྟའོ། །འཇིགས་བྱེད་ཀྱི་ཤིང་རྟའི་བུ་ནི་ཤིང་རྟ་བརྒྱ་པའོ། །ཤིང་རྟ་བརྒྱ་པའི་བུ་ནི་ཤིང་རྟ་བཅུ་པའོ། །ཤིང་རྟ་བཅུ་པའི་འོག་ཏུ་ལྔ་ལེན་གྱི་རྒྱལ་པོ་སྟོང་གིས་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །ལྔ་ལེན་གྱི་རྒྱལ་པོ་ལྔ་སྟོང་གི་འོག་ཏུ་ཀ་ལིངྐའི་རྒྱལ་པོ་ལྔ་སྟོང་གིས་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །ཀ་ལིངྐའི་རྒྱལ་པོ་ལྔ་སྟོང་གི་འོག་ཏུ་ཨ་སྨྲ་ཀའི་རྒྱལ་པོ་བདུན་སྟོང་བྱུང་ངོ༌། །ཨ་སྨྲ་ཀའི་རྒྱལ་པོ་བདུན་སྟོང་གི་འོག་ཏུ་སྒྲ་མི་སྙན་གྱི་རྒྱལ་པོ་བརྒྱད་སྟོང་བྱུང་

---

^{[མ་དཔེ་གཟིགས་ན་འདིར་གནོན།]}

ངོ། །སྒྲ་མི་སྙན་གྱི་རྒྱལ་པོ་བརྒྱད་སྟོང་གི་འོག་ཏུ་ཐོད་པ་ཅན་གྱི་རྒྱལ་པོ་དགུ་སྟོང་བྱུང་ངོ༌། །ཐོད་པ་ཅན་གྱི་རྒྱལ་པོ་དགུ་སྟོང་གི་འོག་ཏུ་ཡན་ལག་ཅན་གྱི་རྒྱལ་པོ་ཁྲི་བྱུང་ངོ༌། །ཡན་ལག་ཅན་གྱི་རྒྱལ་པོ་ཁྲིའི་འོག་ཏུ་མ་ག་དྷཱའི་རྒྱལ་པོ་ཁྲི་ཆིག་སྟོང་བྱུང་ངོ༌། །མ་ག་དྷཱའི་རྒྱལ་པོ་ཁྲི་ཆིག་སྟོང་གི་འོག་ཏུ་ཏ་མ་ལིབ་ཏའི་རྒྱལ་པོ་ཁྲི་ལྔ་སྟོང་བྱུང་ངོ༌། །ཏ་མ་ལིབ་ཏའི་རྒྱལ་པོ་ཁྲི་ལྔ་སྟོང་གི་འོག་ཏུ་རྒྱལ་པོ་བུ་རམ་ཤིང་པ་ཞེས་བྱ་བ་བྱུང་ངོ༌། །བུ་རམ་ཤིང་པའི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་བུ་རམ་ཤིང་པའི་རྒྱལ་པོ་སྟོང་ཆིག་བརྒྱས་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་འཕགས་སྐྱེས་པོ་ཞེས་བྱ་བ་བྱུང་སྟེ། འཕགས་སྐྱེས་པོའི་བུ་བཞི་བྱུང་བ་ལ་འདི་ལྟ་སྟེ། བཞིན་འབར་དང༌། ལག་རྣ་དང༌། གླང་ཆེན་འདུལ་བ་དང༌། རྐང་གདུབ་ཅན་ནོ། །དེ་ནས་རྐང་གདུབ་ཅན་གྱི་བུ་རྒྱལ་པོ་རྐང་གདུབ་ཞབས་ཞེས་བྱ་བ་བྱུང་ངོ༌། །རྐང་གདུབ་ཅན་ཞབས་ཀྱི་བུ་ནི་གནས་འཇོག་གོ །གནས་འཇོག་གི་བུ་ནི་བ་ལང་གནས་སོ། །བ་ལང་གནས་ཀྱི་བུ་ནི་སེང་གེ་འགྲམ་སྟེ། སེང་གེ་འགྲམ་ལ་བུ་བཞི་ཡོད་པ་ལ་འདི་ལྟ་སྟེ། ཟས་གཙང་དང༌། ཟས་དཀར་དང༌། བྲེ་བོ་ཟས་དང༌། བདུད་རྩི་ཟས་སོ། །ཟས་གཙང་གི་སྲས་ནི་བཅོམ་ལྡན་འདས་སོ། །བཅོམ་ལྡན་འདས་ཀྱི་སྲས་ནི་སྒྲ་གཅན་ཟིན་ནོ། །འདི་ནི་རེ་ཞིག་ཆོས་མངོན་པ་ལས་འབྱུང་བའི་རྒྱལ་པོའི་རིམ་པ་ཡིན་ཏེ། བདག་ཉིད་ཆེན་པོ་དེ་དག་གིས་ཡི་གེ་རྒྱས་པ་དག་ལས་མདོར་བསྡུས་སོ། །འདུལ་བ་ལས་ཇི་སྐད་དུ་འབྱུང་བ་དེ་བཞིན་དུ་ཡང་བྲི་བར་བྱ་སྟེ། མང་པོས་བཀུར་བ་དང༌། འོད་མཛེས་དང༌། དགེ་བ་དང༌། དགེ་མཆོག་དང༌། གསོ་སྦྱོང་འཕགས་དང༌། ང་ལས་ནུ་དང༌། མཛེས་པ་དང༌། ཉེ་མཛེས་དང༌། མཛེས་ཅན་དང༌། མཛེས་ལྡན་དང༌། རྒྱས་བྱེད་དང༌། སྲེད་བ་དང༌། ཉེ་སྲེད་དང༌། བཏང་བ་དང༌། བཏང་བཟུང་དང༌། ལུས་ཐུལ་དང་ཤེས་ལྡན་དང༌། ངན་སྤོང་དང༌། ཤིང་རྟ་སྡུ་གུ་ཅན་དང༌། དུག་ཅན་དང༌། དུག་ཅན་ཆེན་པོ་དང༌། ཤ་ཀུ་ནི་དང༌། ཤ་ཀུ་ནི་ཆེན་པོ་དང༌། ཀུ་ཤི་དང༌། ཉེ་བའི་ཀུ་ཤི་དང༌། ཀུ་ཤི་ཆེན་པོ་དང༌། རྒྱས་བྱེད་དང༌། རྒྱས་བྱེད་ཆེན་པོ་དང༌། ལེགས་མཐོང་དང༌། ལེགས་མཐོང་ཆེན་པོ་དང༌། གནོད་སེལ་དང༌།

---

^{[མ་དཔེ་གཟིགས་ན་འདིར་གནོན།]}

གནོད་པའི་གནོད་སེལ་དང༌། རྨ་བྱ་དང༌། ངེས་འགྲོ་དང༌། བདེ་བྱེད་དང༌། རབ་འདུལ་དང༌། རབ་ཏུ་སྒྲ་བསྒྲགས་པ་དང༌། རབ་ཏུ་དང་ལྡན་དང༌། འོད་བྱེད་དང༌། ལྷུན་པོ་དང༌། རི་རབ་དང༌། ལྷུན་པོ་ལྡན་དང༌། མེ་ལྕེ་དང༌། མེ་ལྕེ་ཕྲེང་དང༌། མེ་ལྕེ་ལྡན་དང༌། མེ་ལྕེ་ལྡན་གྱི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་འབུམ་གྱིས་གྲོང་ཁྱེར་གྲུ་འཛིན་དུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་དགྲ་འདུལ་ཞེས་བྱ་བ་བྱུང་སྟེ། དགྲ་འདུལ་བའི་ཕྱིར་ན་མིང་དགྲ་འདུལ་ཞེས་བྱའོ། །རྒྱལ་པོ་དགྲ་འདུལ་གྱི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་ལྔ་ཁྲི་བཞི་སྟོང་གིས་གྲོང་ཁྱེར་འཐབ་མེད་དུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་མ་ཕེབས་འབེབས་ཞེས་བྱ་བ་བྱུང་སྟེ། རྒྱལ་པོ་མ་ཕེབས་འབེབས་ཀྱི་བུ་ཚ་རྒྱུད་དང་ཚ་པོ་དང་ཡང་ཚའི་རྒྱུད་ཀྱི་རྒྱལ་བོ་དྲུག་ཁྲི་སུམ་སྟོང་གིས་ཝཱ་རཱ་ཎ་སཱིའི་གྲོང་ཁྱེར་དུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་བཟོད་པར་དཀའ་བ་ཞེས་བྱ་བ་བྱུང་སྟེ། རྒྱལ་པོ་བཟོད་པར་དཀའ་བའི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་བརྒྱད་ཁྲི་བཞི་སྟོང་གིས་གྲོང་ཁྱེར་མདའ་འཛིན་དུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་ཚངས་པས་བྱིན་ཞེས་བྱ་བ་བྱུང་སྟེ། ཚངས་པས་བྱིན་གྱི་བུ་ཚ་རྒྱུད་དང༌། ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་སུམ་ཁྲི་ཉིས་སྟོང་གིས་གྲོང་ཁྱེར་གླང་ཅན་གནས་སུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་གླང་བོས་བྱིན་ཞེས་བྱ་བ་བྱུང་སྟེ། རྒྱལ་པོ་གླང་པོས་བྱིན་གྱི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་ལྔ་སྟོང་གིས་གྲོང་ཁྱེར་རྡོ་འཇོག་ཏུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་བལ་བུ་ཞེས་བྱ་བ་བྱུང་སྟེ། རྒྱལ་པོ་བལ་བུའི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་སུམ་ཁྲི་ཉིས་སྟོང་གིས་གྲོང་ཁྱེར་ཨུ་ར་ཤར་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་ཚན་ཆེན་ཐུབ་ཅེས་བྱ་བ་བྱུང་སྟེ། རྒྱལ་པོ་ཚན་ཆེན་ཐུབ་ཀྱི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་སུམ་ཁྲི་ཉིས་སྟོང་གིས་གྲོང་ཁྱེར་མ་ཕེབས་སུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་རྒྱལ་པོ་ཞེས་བྱ་བ་

---

^{[མ་དཔེ་གཟིགས་ན་འདིར་གནོན།]}

བྱུང་སྟེ། རྒྱལ་པོ་རྒྱལ་པོའི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱལ་པོ་ཁྲི་ཉིས་སྟོང་གིས་ཀ་ནྱ་ཀུབ་ཛའི་གྲོང་ཁྱེར་དུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་རྒྱལ་བའི་སྡེ་ཞེས་བྱ་བ་བྱུང་སྟེ། རྒྱལ་པོ་རྒྱལ་བའི་སྡེའི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་ཁྲི་བརྒྱད་སྟོང་གིས་གྲོང་ཁྱེར་ཙམ་པར་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་ཀླུ་ལྷ་ཞེས་བྱ་བ་བྱུང་སྟེ། རྒྱལ་པོ་ཀླུ་ལྷའི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་ཉི་ཁྲི་ལྔ་སྟོང་གིས་ཏ་མ་ལིབ་ཏའི་གྲོང་ཁྱེར་དུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། དེ་དག་གི་འོག་ཏུ་རྒྱལ་པོ་མིའི་ལྷ་ཞེས་བྱ་བ་བྱུང་སྟེ། རྒྱལ་པོ་མིའི་ལྷའི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་ཁྲི་ཉིས་སྟོང་གིས་ཏ་མ་ལིབ་ཏའི་གྲོང་ཁྱེར་དུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་དུག་ཅན་པའི་ལྷ་ཞེས་བྱ་བ་ཞིག་བྱུང་སྟེ། རྒྱལ་པོ་དུག་ཅན་པའི་ལྷའི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་ཁྲི་བརྒྱད་སྟོང་གིས་གྲོང་ཁྱེར་སོ་ལྡན་དུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་བློ་བཟང་ཞེས་བྱ་བ་བྱུང་སྟེ། རྒྱལ་པོ་བློ་བཟང་གི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་ཉི་ཁྲི་ཆིག་སྟོང་གིས་གྲོང་ཁྱེར་རྒྱལ་པོའི་ཁབ་ཏུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་མུན་སེལ་ཞེས་བྱ་བ་བྱུང་སྟེ། རྒྱལ་པོ་མུན་སེལ་གྱི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་བརྒྱས་གྲོང་ཁྱེར་ཝཱ་རཱ་ཎ་སཱིར་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་དབང་ཆེན་སྡེ་ཞེས་བྱ་བ་བྱུང་སྟེ། རྒྱལ་པོ་དབང་ཆེན་སྡེའི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་བརྒྱད་ཁྲི་བཞི་སྟོང་གིས་གྲོང་ཁྱེར་ཀུ་ཤི་ལྡན་དུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་རྒྱ་མཚོ་ལྷ་ཞེས་བྱ་བ་བྱུང་སྟེ། རྒྱལ་པོ་རྒྱ་མཚོ་ལྷའི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་སྟོང་གིས་ཡང་གྲོང་ཁྱེར་གྲུ་འཛིན་དུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་དཀའ་ཐུབ་སྤྱོད་ཅེས་བྱ་བ་བྱུང་སྟེ། རྒྱལ་པོ་དཀའ་ཐུབ་སྤྱོད་ཀྱི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་བརྒྱད་ཁྲི་བཞི་སྟོང་གིས་ཡང་གྲོང་ཁྱེར་ཀུ་ཤི་ལྡན་དུ་རྒྱལ་སྲིད་ཀྱི་

---

^{[མ་དཔེ་གཟིགས་ན་འདིར་གནོན།]}

དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་ས་གཙོ་ཞེས་བྱ་བ་བྱུང་སྟེ། རྒྱལ་པོ་ས་གཙོའི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་སྟོང་གིས་ཡང་གྲོང་ཁྱེར་ཝཱ་རཱ་ཎ་སཱིར་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོས་བདག་ཅེས་བྱ་བ་བྱུང་སྟེ། རྒྱལ་པོ་ས་བདག་གི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་སྟོང་གིས་ཡང་གྲོང་ཁྱེར་འཐབ་མེད་དུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་ས་འཛིན་ཞེས་བྱ་བ་བྱུང་སྟེ། རྒྱལ་པོ་ས་འཛིན་གྱི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་བརྒྱད་ཁྲི་བཞི་སྟོང་གིས་ཡང་འདྲེས་པའི་གྲོང་ཁྱེར་དུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་ལྷ་ཆེན་པོ་ཞེས་བྱ་བ་བྱུང་སྟེ། རྒྱལ་པོ་ལྷ་ཆེན་པོའི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་བརྒྱད་ཁྲི་བཞི་སྟོང་གིས་ཡང་གྲོང་ཁྱེར་འདྲེས་པར་རྒྱལ་སྲིད་ཀྱི་དབང་ཕྱུག་ལ་དབང་བྱས་ནས་ཐམས་ཅད་དང་འདྲེས་པ་དེ་ཉིད་དང༌། ལྷ་ཆེན་པོའི་ཨ་མྲའི་ཚལ་དེ་ཉིད་དུ་རྒྱལ་པོ་དྲང་སྲོང་དུ་གྱུར་ཏེ། དྲང་སྲོང་གི་ཚངས་པར་སྤྱོད་པ་སྤྱད་དོ། །དེ་དག་གི་འོག་ཏུ་རྒྱལ་པོ་ངེས་འཕེན་ཞེས་བྱ་བ་བྱུང་ངོ༌། །ངེས་འཕེན་གྱི་བུ་ནི་མུ་ཁྱུད་དོ། །མུ་ཁྱུད་ཀྱི་བུ་ནི་མུ་ཁྱུད་བརྟན་ནོ། །མུ་ཁྱུད་བརྟན་གྱི་བུ་ནི་ཚན་བོ་ཆེའོ། །ཚན་པོ་ཆེའི་བུ་ནི་ཟ་བའོ། །ཟ་བའི་བུ་ནི་ཉེ་ཟའོ། །ཉེ་བའི་བུ་ནི་ཟ་བ་ཅན་ནོ། །ཟ་བ་ཅན་གྱི་བུ་ནི་ཟ་ལྡན་ནོ། །ཟ་ལྡན་གྱི་བུ་ནི་གྱ་ནོམ་སྣང་བའོ། །གྱ་ནོམ་སྣང་བའི་བུ་ནི་མཉམ་ལྟའོ། །མཉམ་ལྟའི་བུ་ནི་ཐོས་པའི་སྡེའོ། །ཐོས་པའི་སྡེའི་བུ་ནི་ཆོས་ཀྱི་སྡེའོ། །ཆོས་ཀྱི་སྡེའི་བུ་ནི་རྟོགས་པའོ། །རྟོགས་པའི་བུ་ནི་རྟོགས་ཆེན་ནོ། །རྟོགས་ཆེན་གྱི་བུ་ནི་རྟོགས་སྡེའོ། །རྟོགས་སྡེའི་བུ་ནི་མྱ་ངན་མེད་དོ། །མྱ་ངན་མེད་པའི་བུ་ནི་མྱ་ངན་བྲལ་ལོ། །མྱ་ངན་བྲལ་གྱི་བུ་ནི་མཚམས་བརྟན་ནོ། །མཚམས་བརྟན་གྱི་བུ་ནི་རྒན་མཚམས་སོ། །རྒན་མཚམས་ཀྱི་བུ་ནི་དུན་མ་རའོ། །དུན་མ་རའི་བུ་ནི་སྐྱ་རེངས་སོ། །སྐྱ་རེངས་ཀྱི་བུ་ནི་ཕྱོགས་བདག་གོ །ཕྱོགས་བདག་གི་བུ་ནི་རྡུལ་བཟང་ངོ༌། །རྡུལ་བཟང་གི་བུ་ནི་བདེ་བྱེད་དོ། །བདེ་བྱེད་ཀྱི་བུ་ནི་ཀུན་དགའོ། །ཀུན་དགའི་བུ་ནི་མེ་ལོང་ཞལ་ལོ། །མེ་ལོང་ཞལ་གྱི་བུ་ནི་སྐྱེད་པའོ། །སྐྱེད་པའི་བུ་ནི་རྒྱལ་བ་ཁྱུ་མཆོག་གོ །རྒྱལ་བ་ཁྱུ་མཆོག་གི་བུ་ནི་བཟའ་བཏུང་ལྡན་ནོ། །

---

^{[མ་དཔེ་གཟིགས་ན་འདིར་གནོན།]}

བཟའ་བཏུང་ལྡན་གྱི་བུ་ནི་བཟའ་བཏུང་མོད་དོ། །གཟའ་བཏུང་མོད་ཀྱི་བུ་ནི་ཐུབ་མེད་དོ། །ཐུབ་མེད་ཀྱི་བུ་ནི་གཞན་གྱིས་མི་ཐུབ་པའོ། །གཞན་གྱིས་མི་ཐུབ་པའི་བུ་ནི་བརྟན་པོའོ། །བརྟན་པོའི་བུ་ནི་རབ་ཏུ་བརྟན་ནོ། །རབ་ཏུ་བརྟན་གྱི་བུ་ནི་སྟོབས་པོ་ཆེའོ། །སྟོབས་པོ་ཆེའི་བུ་ནི་བཞོན་པ་མང་ངོ༌། །བཞོན་པ་མང་གི་བུ་ནི་བློ་བཟང་ངོ༌། །བློ་བཟང་གི་བུ་ནི་བརྟན་གཞོན་ནོ། །བརྟན་གཞོན་གྱི་བུ་ནི་གཞུ་བཅུ་པའོ། །གཞུ་བཅུ་པའི་བུ་ནི་གཞུ་བརྒྱ་པའོ། །གཞུ་བརྒྱ་པའི་བུ་ནི་གཞུ་དགུ་བཅུ་པའོ། །གཞུ་དགུ་བཅུ་པའི་བུ་ནི་རྣམ་པར་རྒྱལ་བའི་གཞུའོ། །རྣམ་པར་རྒྱལ་བའི་གཞུའི་བུ་ནི་གཞུ་བཀྲའོ། །གཞུ་བཀྲའི་བུ་ནི་གཞུ་སྲའོ། །གཞུ་སྲའི་བུ་ནི་གཞུ་བརྟན་ནོ། །གཞུ་བརྟན་པའི་བུ་ནི་ཤིང་རྟ་བཅུ་པའོ། །ཤིང་རྟ་བཅུ་པའི་བུ་ནི་ཤིང་རྟ་བརྒྱ་པའོ། །ཤིང་རྟ་བརྒྱ་པའི་བུ་ནི་ཤིང་རྟ་དགུ་བཅུ་པའོ། །ཤིང་རྟ་དགུ་བཅུ་པའི་བུ་ནི་ཤིང་རྟ་སྣ་ཚོགས་པའོ། །ཤིང་རྟ་སྣ་ཚོགས་པའི་བུ་ནི་ཤིང་རྟ་རྣམ་པ་སྣ་ཚོགས་པའོ། །ཤིང་རྟ་རྣམ་པ་སྣ་ཚོགས་པའི་བུ་ནི་ཤིང་རྟ་བརླིང་པའོ། །ཤིང་རྟ་བརླིང་པའི་བུ་ནི་ཤིང་རྟ་བརྟན་ནོ། །རྒྱལ་པོ་ཤིང་རྟ་བརྟན་གྱི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་བདུན་ཁྲི་བདུན་སྟོང་གིས་གྲོང་ཁྱེར་ལེགས་པར་སྣང་དུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་ནམ་མཁའི་བདག་པོ་ཞེས་བྱ་བ་བྱུང་ངོ༌། །རྒྱལ་པོ་ནམ་མཁའི་བདག་པོའི་བུ་ནི་ཀླུས་བསྲུངས་སོ། །རྒྱལ་པོ་ཀླུས་བསྲུངས་ཀྱི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་བརྒྱས་ཡང་གྲོང་ཁྱེར་བཱ་རཱ་ཎ་སཱིར་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་ཀྲཱྀ་ཀི་ཞེས་བྱ་བ་བྱུང་སྟེ། དེའི་ཚེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བ། ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འོད་སྲུངས་འཇིག་རྟེན་དུ་བྱུང་སྟེ། དེར་བྱང་ཆུབ་སེམས་དཔའ་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་སྲུངས་ལས་མ་འོངས་པའི་དུས་སུ་བྱང་ཆུབ་པའི་ཕྱིར་སྨོན་ལམ་བཏབ་ཅིང་ཚངས་

---

^{[མ་དཔེ་གཟིགས་ན་འདིར་གནོན།]}

པར་སྤྱོད་པ་སྤྱོད་ནས་དགའ་ལྡན་གྱི་ལྷའི་རིས་སུ་སྐྱེས་ཏེ། དེ་དེ་ན་ཚེའི་ཚད་ཇི་སྲིད་དུ་གནས་སོ། །རྒྱལ་པོ་ཀྲཱྀ་ཀིའི་བུ་ནི་ལེགས་པར་སྐྱེས་ཞེས་བྱ་བར་གྱུར་ཏེ། རྒྱལ་པོ་ལེགས་པར་སྐྱེས་ཀྱི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་ཀྱི་རྒྱལ་པོ་བརྒྱས་ཡང་གྲོང་ཁྱེར་གྲུ་འཛིན་དུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་རྣ་བ་ཞེས་བྱ་བ་བྱུང་སྟེ། རྒྱལ་པོ་རྣ་བའི་བུ་ནི་གཽ་ཏ་མ་དང་བ་ར་དྷྭ་ཛ་གཉིས་སོ། །དེ་གཉིས་ལས་གཽ་ཏ་མའི་བུ་ནི་བུ་རམ་ཤིང་པ་ཞེས་བྱའོ། །རྒྱལ་པོ་བུ་རམ་ཤིང་པའི་བུ་ཚ་རྒྱུད་དང་ཚ་བོ་དང་ཡང་ཚའི་རྒྱུད་བུ་རམ་ཤིང་པའི་རྒྱལ་པོ་བརྒྱས་ཡང་གྲོང་ཁྱེར་གྲུ་འཛིན་དུ་རྒྱལ་སྲིད་ཀྱི་དབང་ཕྱུག་ལ་དབང་བྱས་སོ། །དེ་དག་གི་འོག་ཏུ་རྒྱལ་པོ་འཕགས་སྐྱེས་པོ་ཞེས་བྱ་བ་བྱུང་སྟེ། རྒྱལ་པོ་འཕགས་སྐྱེས་པོའི་བུ་བཞི་ལ་འདི་ལྟ་སྟེ། བཞིན་འབར་དང༌། ལག་རྣ་དང༌། གླང་ཆེན་འདུལ་དང༌། རྐང་གདུབ་ཅན་རྣམས་ཏེ། རྐང་གདུབ་ཅན་གྱི་བུ་ནི་གནས་འཇོག་གོ །གནས་འཇོག་གི་བུ་ནི་བ་ལང་གནས་སོ། །བ་ལང་གནས་ཀྱི་བུ་ནི་སེང་གེ་འགྲམ་དང༌། སེང་གེ་སྒྲ་གཉིས་སོ། །སེང་གེ་འགྲམ་གྱི་བུ་བཞི་ལ་འདི་ལྟ་སྟེ། ཟས་གཙང་དང༌། ཟས་དཀར་དང༌། བྲེ་བོ་ཟས་དང༌། བདུད་རྩི་ཟས་སོ། །བུ་མོ་ནི་གཙང་མ་དང༌། དཀར་མོ་དང༌། བྲེ་བོ་མོ་དང༌། བདུད་རྩི་མ་རྣམས་སོ། །ཟས་གཙང་གི་བུ་གཉིས་ལ་བཅོམ་ལྡན་འདས་དང་ཚེ་དང་ལྡན་པ་དགའ་བོའོ། །ཟས་དཀར་གྱི་བུ་གཉིས་ལ། ཚེ་དང་ལྡན་པ་རྒྱལ་བ་དང་བཟང་ལྡན་ནོ། །བྲེ་བོ་ཟས་ཀྱི་བུ་གཉིས་ལ་མིང་ཆེན་དང་མ་འགགས་པའོ། །བདུད་རྩི་ཟས་ཀྱི་བུ་གཉིས་ལ། ཚེ་དང་ལྡན་པ་ཀུན་དགའ་བོ་དང་ལྷས་བྱིན་ནོ། །བདུད་རྩི་མའི་བུ་ནི་ཞི་ལེན་ནོ། །བཅོམ་ལྡན་འདས་ཀྱི་སྲས་ནི་སྒྲ་གཅན་ཟིན་ནོ། །དེ་ལྟར་ན་མང་པོས་བཀུར་བའི་རྒྱུད་ནི་སྒྲ་གཅན་ཟིན་ལ་ཐུག་ཅིང་སྒྲ་གཅན་ཟིན་དུ་ཟད་དེ། སྒྲ་གཅན་ཟིན་གྱིས་མཇུག་བཅད་ནས་སྲིད་པའི་ལུགས་ཆད་ཅིང་སྐྱེ་བའི་རྒྱུད་ཟད་དེ། ད་སྲིད་པ་སྐྱེ་བ་མེད་དོ། །འཇིག་རྟེན་གཞག་པ་ལས་ཚིགས་བཅུ་གཅིག་པའོ།། །།མདོ་ལ། རླུང་དང་ཆུ་དང་ས་གཞི་དང༌། །ནང་དང་ཕྱི་ཡི་རྒྱ་མཚོ་དང༌། །རི་རབ་ཀྱི་ནི་ངོས་རྣམས་དང༌། །རྩེ་མོ་བང་རིམ་རི་རྣམས་དང༌། །ས་ནི་ཇི་ལྟར་བྱུང་བ་དང༌། །རླུང་དང་ཆུ་ནི་རབ་

---

^{[མ་དཔེ་གཟིགས་ན་འདིར་གནོན།]}

གནས་ལ། །དེ་དག་ཐམས་ཅད་རིགས་བཞིན་དུ། །རབ་ཏུ་བཤད་ཀྱིས་རྟོགས་པར་གྱིས། །གང་ལ་ཆུ་ནི་རབ་གནས་པའི། །རྫི་རླུང་ཆར་པའི་རླུང་དམར་ནི། །ནམ་མཁའ་ལས་ནི་ལྡང་བར་འགྱུར། །ཆུ་དང་ས་དང་ཆུ་རྣམས་དང༌། །རི་དང་གླིང་དང་བཞི་པོ་རྣམས།། ཆུ་མིག་མཚོ་དང་འབབ་པ་དང༌། །ཉ་མིད་འཛིན་ཁྲིས་གང་བ་ཡིན། །རྒྱ་མཚོ་ཆེན་པོ་ཡངས་པ་དང༌། །འབྱོར་ཅིང་རྒྱས་པའི་ལྗོངས་རྣམས་དང༌། །གྲོང་དག་དང་ནི་གྲོང་ཁྱེར་རྣམས། །དེ་དག་ཐམས་ཅད་ས་ཆེན་ལ། །རིམ་གྱིས་སུ་ནི་རབ་ཏུ་གནས། །ནམ་མཁའ་གང་ལ་རླུང་གི་དཀྱིལ་འཁོར་གནས་པའི་རླུང་གི་དཀྱིལ་འཁོར་དེའི་རྔམས་སུ་ནི་དཔག་ཚད་ས་ཡ་གཅིག་དང་དྲུག་འབུམ་ཡོད་དོ། །རྒྱར་ནི་གྲངས་མེད་ཚད་མེད་དོ། །རླུང་གི་དཀྱིལ་འཁོར་གང་ལ་ཆུའི་དཀྱིལ་འཁོར་གནས་པའི་ཆུའི་དཀྱིལ་འཁོར་དེའི་རྔམས་སུ་ནི་དཔག་ཚད་བརྒྱད་འབུམ་ཡོད་དོ། །རྒྱར་ནི་དཔག་ཚད་ས་ཡ་གཅིག་དང་ཉིས་འབུམ་བཞི་བརྒྱ་ལྔ་བཅུ་ཡོད་དོ། །མཐའ་སྐོར་དུ་ནི་དཔག་ཚད་ས་ཡ་ཕྲག་གསུམ་དང་དྲུག་འབུམ་སུམ་བརྒྱ་ལྔ་བཅུ་ཡོད་དོ། །ཆུའི་དཀྱིལ་འཁོར་གང་ལ་གསེར་གྱི་ས་གཞི་ཆེན་པོ་གནས་པའི་གསེར་གྱི་ས་གཞི་ཆེན་པོ་དེའི་རྔམས་སུ་ནི་དཔག་ཚད་སུམ་འབུམ་ཉི་ཁྲི་ཡོད་དོ། །རྒྱར་ནི་དཔག་ཚད་ས་ཡ་གཅིག་དང་ཉིས་འབུམ་བཞི་བརྒྱ་ལྔ་བཅུ་ཡོད་དོ། །མཐའ་སྐོར་དུ་ནི་དཔག་ཚད་ས་ཡ་ཕྲག་གསུམ་དང་དྲུག་འབུམ་སུམ་བརྒྱ་ལྔ་བཅུ་ཡོད་དོ། །ནང་གི་རྒྱ་མཚོ་ཆེན་པོ་ནི་ཆུར་དཔག་ཚད་ཉིས་འབུམ་བཞི་ཁྲི་ཞེང་དུ་ཡང་དཔག་ཚད་ཉིས་འབུམ་བཞི་ཁྲི་ཡོད་དོ། །མཐའ་སྐོར་དུ་ནི་དཔག་ཚད་དགུ་འབུམ་དྲུག་ཁྲི་ཡོད་དོ། །ཟབས་སུ་ནི་དཔག་ཚད་བརྒྱད་ཁྲི་ཡོད་དོ། །གསེར་གྱི་ས་གཞི་ཆེན་པོ་ལ་བརྟེན་ཏོ། །ཕྱི་རོལ་གྱི་རྒྱ་མཚོ་ཆེན་པོ་ནི་ཞེང་དུ་གླིང་མ་གཏོགས་པར་དཔག་ཚད་སུམ་འབུམ་ཉི་ཁྲི་ཡོད་དོ། །གླིང་གཏོགས་པར་ནི་ཞེང་དུ་ནི་དཔག་ཚད་སུམ་འབུམ་ཉི་ཁྲི་ཉིས་སྟོང་ཡོད་དོ། །ཆུ་ར་ཡང་དེ་དང་འདྲའོ། །མཐའ་སྐོར་དུ་ནི་ཚད་མེད་དོ། །ཟབས་སུ་ནི་དཔག་ཚད་བརྒྱད་ཁྲི་ཡོད་དེ། གསེར་གྱི་ས་གཞི་ཆེན་པོ་ལ་བརྟེན་ཏོ། །རིའི་རྒྱལ་པོ་རི་རབ་ནི་དཔག་ཚད་བརྒྱད་ཁྲི་ནི་ཐུར་དུ་གསེར་གྱི་ས་གཞི་ཆེན་པོ་ལ་བརྟེན་ཏོ། །དཔག་

---

^{[མ་དཔེ་གཟིགས་ན་འདིར་གནོན།]}

ཚད་བརྒྱད་ཁྲི་ནི་ཆུ་ལས་གྱེན་དུ་འཕགས་ཏེ། འཕང་དུ་དཔག་ཚད་འབུམ་དྲུག་ཁྲི་ཡོད་དོ། །ཆུར་ནི་དཔག་ཚད་བརྒྱད་ཁྲི་ཞེང་དུ་ཡང་དཔག་ཚད་བརྒྱད་ཁྲི་ཡོད་དོ། །མཐའ་སྐོར་དུ་ནི་དཔག་ཚད་སུམ་འབུམ་ཉི་ཁྲི་ཡོད་དོ། །དབྱིབས་ལེགས་ཤིང་བལྟ་ན་སྡུག་ལ་མཛེས་པ་རིན་པོ་ཆེ་སྣ་བཞི་ལས་གྲུབ་པ་ཡིན་ཏེ། དེ་ལ་སུམ་ཅུ་རྩ་གསུམ་པའི་ལྷ་རྣམས་གནས་སོ། །རིའི་རྒྱལ་པོ་རི་རབ་ཀྱི་ངོས་ནི་བཞི་ཡོད་དེ། ཤར་གྱི་ངོས་དང༌། ལྷོ་ཕྱོགས་དང༌། ནུབ་ཕྱོགས་དང༌། བྱང་ཕྱོགས་ཀྱི་ངོས་སོ། །ཤར་ཕྱོགས་ཀྱི་ངོས་ནི་ཤེལ་ལས་གྲུབ་པའོ། །ལྷོ་ཕྱོགས་ཀྱི་ངོས་ནི་བཻ་ཌཱུཪྻ་ལས་གྲུབ་པའོ། །ནུབ་ཕྱོགས་ཀྱི་ངོས་ནི་དངུལ་ལས་གྲུབ་པའོ། །བྱང་ཕྱོགས་ཀྱི་ངོས་ནི་གསེར་ལས་གྲུབ་པའོ། །རིའི་རྒྱལ་པོ་རི་རབ་ཀྱི་རྩེ་མོ་ནི་བཞི་ཡོད་དེ། ཤར་ཕྱོགས་ཀྱི་རྩེ་མོ་དང༌། ལྷོ་ཕྱོགས་དང༌། ནུབ་ཕྱོགས་དང༌། བྱང་ཕྱོགས་ཀྱི་རྩེ་མོའོ། །ཤར་ཕྱོགས་ཀྱི་རྩེ་མོ་ནི་ཆུར་དཔག་ཚད་བརྒྱ་ཉི་ཤུ་རྩ་ལྔ། ཞེང་དུ་ཡང་དཔག་ཚད་བརྒྱ་ཉི་ཤུ་རྩ་ལྔ། མཐའ་སྐོར་དུ་དཔག་ཚད་ལྔ་བརྒྱ་ཡོད་དོ། །དཔག་ཚད་ཕྱེད་དང་ལྔ་ནི་རིའི་རྒྱལ་པོ་རི་རབ་ལས་གྱེན་དུ་འཕགས་ཏེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་ཤེལ་ལས་གྲུབ་པ་སྟེ། དེ་ལ་གནོད་སྦྱིན་ལག་ན་རྡོ་རྗེ་རྣམས་གནས་སོ། །ལྷོ་ཕྱོགས་ཀྱི་རྩེ་མོ་ནི་ཆུར་དཔག་ཚད་བརྒྱ་ཉི་ཤུ་རྩ་ལྔ། ཞེང་དུ་ཡང་དཔག་ཚད་བརྒྱ་ཉི་ཤུ་རྩ་ལྔའོ། །མཐའ་སྐོར་དུ་དཔག་ཚད་ལྔ་བརྒྱ་ཡོད་དོ། །དཔག་ཚད་ཕྱེད་དང་ལྔ་ནི་རིའི་རྒྱལ་པོ་རི་རབ་ལས་གྱེན་དུ་འཕགས་ཏེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་བཻ་ཌཱུཪྻ་ལས་གྲུབ་སྟེ། དེ་ན་གནོད་སྦྱིན་ལག་ན་རྡོ་རྗེ་རྣམས་གནས་སོ། །ནུབ་ཕྱོགས་ཀྱི་རྩེ་མོ་ནི་ཆུར་དཔག་ཚད་བརྒྱ་ཉི་ཤུ་རྩ་ལྔ། ཞེང་དུ་ཡང་དཔག་ཚད་བརྒྱ་ཉི་ཤུ་རྩ་ལྔ། མཐའ་སྐོར་དུ་དཔག་ཚད་ལྔ་བརྒྱ་ཡོད་དོ། །དཔག་ཚད་ཕྱེད་དང་ལྔ་ནི་རིའི་རྒྱལ་པོ་རི་རབ་ལས་གྱེན་དུ་འཕགས་ཏེ། དབྱིབས་ལེགས་ཤིང་བལྟ་ན་སྡུག་ལ་མཛེས་བ་དངུལ་ལས་གྲུབ་པ་སྟེ། དེ་ན་གནོད་སྦྱིན་ལག་ན་རྡོ་རྗེ་རྣམས་གནས་སོ། །བྱང་ཕྱོགས་ཀྱི་རྩེ་མོ་ནི་ཆུར་དཔག་ཚད་བརྒྱ་ཉི་ཤུ་རྩ་ལྔ། ཞེང་དུ་ཡང་དཔག་ཚད་བརྒྱ་ཉི་ཤུ་རྩ་ལྔ། མཐའ་སྐོར་དུ་དཔག་ཚད་ལྔ་བརྒྱ་ཡོད་དོ། །དཔག་ཚད་ཕྱེད་དང་ལྔ་ནི་རིའི་རྒྱལ་པོ་རི་རབ་ལས་གྱེན་

---

^{[མ་དཔེ་གཟིགས་ན་འདིར་གནོན།]}

དུ་འཕགས་ཏེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་གསེར་ལས་གྲུབ་པ་སྟེ། དེ་ལ་གནོད་སྦྱིན་ལག་ན་རྡོ་རྗེ་རྣམས་གནས་སོ། །རིའི་རྒྱལ་པོ་རི་རབ་ཀྱི་བང་རིམ་ནི་བཞི་ཡོད་དེ། བང་རིམ་དང་པོ་དང༌། གཉིས་བ་དང༌། གསུམ་པ་དང༌། བཞི་པའོ། །བང་རིམ་དང་པོ་ནི་ཆུ་ལས་དཔག་ཚད་ཁྲིས་གྱེན་དུ་འཕགས་ལ། རིའི་རྒྱལ་པོ་རི་རབ་ལས་དཔག་ཚད་ཁྲི་དྲུག་སྟོང་ཕྱིར་འཕགས་ཏེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་རིན་པོ་ཆེ་སྣ་བཞི་ལས་གྲུབ་པ་སྟེ། དེ་ན་ལག་ན་གཞོང་ཐོགས་ཀྱི་ལྷ་རྣམས་གནས་སོ། །བང་རིམ་གཉིས་པ་ནི་བང་རིམ་དང་པོ་ལས་དཔག་ཚད་ཁྲིས་གྱེན་དུ་འཕགས་ལ། རིའི་རྒྱལ་པོ་རི་རབ་ལས་དཔག་ཚད་བརྒྱད་སྟོང་ཕྱིར་འཕགས་ཏེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་རིན་པོ་ཆེ་སྣ་བཞི་ལས་གྲུབ་པ་སྟེ། དེ་ན་ཕྲེང་ཐོགས་ཀྱི་ལྷ་རྣམས་གནས་སོ། །བང་རིམ་གསུམ་པ་ནི་བང་རིམ་གཉིས་པ་ལས་དཔག་ཚད་ཁྲིས་གྱེན་དུ་འཕགས་ལ། རིའི་རྒྱལ་པོ་རི་རབ་ལས་དཔག་ཚད་བཞི་སྟོང་ཕྱིར་འཕགས་ཏེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་རིན་པོ་ཆེ་སྣ་བཞི་ལས་གྲུབ་སྟེ། དེ་ན་རྟག་ཏུ་མྱོས་པའི་ལྷ་རྣམས་གནས་སོ། །བང་རིམ་བཞི་པ་ནི་བང་རིམ་གསུམ་པ་ལས་དཔག་ཚད་ཁྲིས་གྱེན་དུ་འཕགས་ལ། རིའི་རྒྱལ་པོ་རི་རབ་ལས་དཔག་ཚད་ཉིས་སྟོང་ཕྱིར་འཕགས་ཏེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་རིན་པོ་ཆེ་སྣ་བཞི་ལས་གྲུབ་པ་སྟེ། དེ་ན་རྒྱལ་པོ་ཆེན་པོ་རྣམས་གནས་སོ། །རིའི་རྒྱལ་པོ་གཉའ་ཤིང་འཛིན་ཞེས་བྱ་བ་ནི་རིའི་རྒྱལ་པོ་རི་རབ་ནས་དཔག་ཚད་བརྒྱད་ཁྲི་བོར་ཏེ། དཔག་ཚད་བརྒྱད་ཁྲི་ནི་ཆུའི་འོག་ཏུ་གསེར་གྱི་ས་གཞི་ཆེན་པོ་ལ་བརྟེན་ཏོ། །དཔག་ཚད་བཞི་ཁྲི་ནི་ཆུ་ལས་གྱེན་དུ་འཕགས་སོ། །ཞེང་དུ་ཡང་དེ་དང་འདྲ་སྟེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་གསེར་ལས་གྲུབ་པ་སྟེ། དེ་ནི་རྒྱལ་ཆེན་བཞི་བའི་ལྷ་རྣམས་ཀྱི་གྲོང་དང་གྲོང་ཁྱེར་དང༌། ལྗོངས་གནས་སོ། །ཅིའི་ཕྱིར་རིའི་རྒྱལ་པོ་གཉའ་ཤིང་འཛིན་ཞེས་བྱ་ཞེ་ན། སྨྲས་པ། རིའི་རྒྱལ་པོ་གཉའ་ཤིང་འཛིན་གྱི་རྩེ་མོ་དབྱིབས་ལེགས་ཤིང་བལྟ་ན་སྡུག་ལ་མཛེས་པ་ནི་དཔེར་ན་ཤིང་རྟའི་གཉའ་ཤིང་བཞིན་ཏེ།

---

^{[མ་དཔེ་གཟིགས་ན་འདིར་གནོན།]}

དེ་བས་ན་རིའི་རྒྱལ་པོ་གཉའ་ཤིང་འཛིན་ཞེས་བྱའོ། །རིའི་རྒྱལ་པོ་གཤོལ་མདའ་འཛིན་ཅེས་བྱ་བ་ནི་རིའི་རྒྱལ་པོ་གཉའ་ཤིང་འཛིན་ནས་དཔག་ཚད་བཞི་ཁྲི་བོར་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱི་ས་གཞི་ཆེན་པོ་ལ་བརྟེན་ཏོ། །དཔག་ཚད་ཉི་ཁྲི་ནི་ཆུ་ལས་གྱེན་དུ་འཕགས་སོ།། ཞེང་དུ་ཡང་དེ་དང་འདྲ་སྟེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་གསེར་ལས་གྲུབ་པ་སྟེ། དེ་ན་རྒྱལ་ཆེན་བཞི་པའི་ལྷ་རྣམས་ཀྱི་གྲོང་དང༌། གྲོང་ཁྱེར་དང༌། ལྗོངས་གནས་སོ། །ཅིའི་ཕྱིར་རིའི་རྒྱལ་པོ་གཤོལ་མདའ་འཛིན་ཞེས་བྱ་ཞེ་ན། སྨྲས་པ། རིའི་རྒྱལ་པོ་གཤོལ་མདའ་འཛིན་གྱི་རྩེ་མོ་དབྱིབས་ལེགས་ཤིང་བལྟ་ན་སྡུག་ལ་མཛེས་པ་ནི་དཔེར་ན་གཤོལ་མདའ་བཞིན་ཏེ། དེ་བས་ན་རིའི་རྒྱལ་པོ་གཤོལ་མདའ་འཛིན་ཞེས་བྱའོ། །རིའི་རྒྱལ་པོ་སེང་ལྡེང་ཅན་ཞེས་བྱ་བ་ནི་རིའི་རྒྱལ་པོ་གཤོལ་མདའ་འཛིན་ནས་དཔག་ཚད་ཉི་ཁྲི་བོར་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱི་ས་གཞི་ཆེན་པོ་ལ་བརྟེན་ཏོ། །དཔག་ཚད་ཁྲི་ནི་ཆུ་ལས་གྱེན་དུ་འཕགས་སོ། །ཞེང་དུ་ཡང་དེ་དང་འདྲ་སྟེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་གསེར་ལས་གྲུབ་པ་སྟེ། དེ་ན་རྒྱལ་ཆེན་བཞི་པའི་ལྷ་རྣམས་ཀྱི་གྲོང་དང༌། གོང་ཁྱེར་དང༌། ལྗོངས་གནས་སོ། །ཅིའི་ཕྱིར་རིའི་རྒྱལ་པོ་སེང་ལྡེང་ཅན་ཞེས་བྱ་ཞེ་ན། སྨྲས་པ། རིའི་རྒྱལ་པོ་སེང་ལྡེང་ཅན་གྱི་ཕྱོགས་དེ་དང་དེ་དག་ན་ཇི་ལྟར་གསེར་གྱི་སེང་ལྡེང་ཡོད་པ་བཞིན་དུ་རི་གཞན་དག་ལ་མེད་དོ། །དེ་བས་ན་རིའི་རྒྱལ་པོ་སེང་ལྡེང་ཅན་ཞེས་བྱའོ། །རིའི་རྒྱལ་པོ་བལྟ་ན་སྡུག་ཅེས་བྱ་བ་ནི་རིའི་རྒྱལ་པོ་སེང་ལྡེང་ཅན་ནས་དཔག་ཚད་ཁྲི་བོར་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱི་ས་གཞི་ཆེན་པོ་ལ་བརྟེན་ཏོ། །དཔག་ཚད་ལྔ་སྟོང་ནི་ཆུ་ལས་གྱེན་དུ་འཕགས་སོ། །ཞེང་དུ་ཡང་དེ་དང་འདྲ་སྟེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་གསེར་ལས་གྲུབ་པ་སྟེ། དེ་ན་རྒྱལ་ཆེན་བཞི་པའི་ལྷ་རྣམས་ཀྱི་གྲོང་དང༌། གྲོང་ཁྱེར་དང༌། ལྗོངས་གནས་སོ། །ཅིའི་ཕྱིར་རིའི་རྒྱལ་པོ་བལྟ་ན་སྡུག་ཅེས་བྱ་ཞེ་ན། སྨྲས་པ། རིའི་རྒྱལ་པོ་བལྟ་ན་སྡུག་གི་རྩེ་མོ་ཇི་ལྟར་དབྱིབས་ལེགས་ཤིང་བལྟ་ན་སྡུག་ལ་མཛེས་པ་བཞིན་དུ་རི་གཞན་དག་ལ་མེད་དོ། །དེ་བས་ན་རིའི་རྒྱལ་

---

^{[མ་དཔེ་གཟིགས་ན་འདིར་གནོན།]}

པོ་བལྟ་ན་སྡུག་ཅེས་བྱའོ། །རིའི་རྒྱལ་པོ་རྟ་རྣ་རི་ཞེས་བྱ་བ་ནི་རིའི་རྒྱལ་པོ་བལྟ་ན་སྡུག་ནས་དཔག་ཚད་ལྔ་སྟོང་བོར་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱི་ས་གཞི་ཆེན་པོ་ལ་བརྟེན་ཏོ། །དཔག་ཚད་ཉིས་སྟོང་ལྔ་བརྒྱ་ནི་ཆུ་ལས་གྱེན་དུ་འཕགས་སོ།། ཞེང་དུ་ཡང་དེ་དང་འདྲ་སྟེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་གསེར་ལས་གྲུབ་པ་སྟེ། དེ་ན་རྒྱལ་ཆེན་བཞི་པའི་ལྷ་རྣམས་ཀྱི་གྲོང་དང༌། གྲོང་ཁྱེར་དང༌། ལྗོངས་གནས་སོ། །ཅིའི་ཕྱིར་རིའི་རྒྱལ་པོ་རྟ་རྣ་རི་ཞེས་བྱ་ཞེ་ན། སྨྲས་པ། རིའི་རྒྱལ་པོ་རྟ་རྣ་རིའི་རྩེ་མོ་དབྱིབས་ལེགས་ཤིང་བལྟ་ན་སྡུག་ལ་མཛེས་པ་ནི་དཔེར་ན་རྟའི་རྣ་བ་བཞིན་ཏེ། དེ་བས་ན་རིའི་རྒྱལ་པོ་རྟ་རྣ་རི་ཞེས་བྱའོ། །རིའི་རྒྱལ་པོ་རྣམ་པར་འདུད་ཅེས་བྱ་བ་ནི་རིའི་རྒྱལ་པོ་རྟ་རྣ་རི་ནས་དཔག་ཚད་ཉིས་སྟོང་ལྔ་བརྒྱ་བོར་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱི་ས་གཞི་ཆེན་པོ་ལ་བརྟེན་ཏོ། །དཔག་ཚད་སྟོང་ཉིས་བརྒྱ་ལྔ་བཅུ་ནི་ཆུ་ལས་གྱེན་དུ་འཕགས་སོ། །ཞེང་དུ་ཡང་དེ་དང་འདྲ་སྟེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་གསེར་ལས་གྲུབ་པ་སྟེ། དེ་ན་རྒྱལ་ཆེན་བཞི་པའི་ལྷ་རྣམས་ཀྱི་གྲོང་དང་གྲོང་ཁྱེར་དང༌། ལྗོངས་གནས་སོ། །ཅིའི་ཕྱིར་རིའི་རྒྱལ་པོ་རྣམ་པར་འདུད་ཅེས་བྱ་ཞེ་ན། སྨྲས་པ། རིའི་རྒྱལ་པོ་རྣམ་པར་འདུད་ཀྱི་རྩེ་མོ་དམའ་ཞིང་འདུད་པ་ནི་དཔེར་ན་གཉན་རུ་བཞིན་ཏེ། དེ་བས་ན་རིའི་རྒྱལ་པོ་རྣམ་པར་འདུད་ཅེས་བྱའོ། །རིའི་རྒྱལ་པོ་མུ་ཁྱུད་འཛིན་ཞེས་བྱ་བ་ནི་རིའི་རྒྱལ་པོ་རྣམ་པར་འདུད་ནས་དཔག་ཚད་སྟོང་ཉིས་བརྒྱ་ལྔ་བཅུ་བོར་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱི་ས་གཞི་ཆེན་པོ་ལ་བརྟེན་ཏོ། །དཔག་ཚད་དྲུག་བརྒྱ་ཉི་ཤུ་རྩ་ལྔ་ནི་ཆུ་ལས་གྱེན་དུ་འཕགས་སོ། །ཞེང་དུ་ཡང་དེ་དང་འདྲ་སྟེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་གསེར་ལས་གྲུབ་པ་སྟེ། དེ་ན་རྒྱལ་ཆེན་བཞི་པའི་ལྷ་རྣམས་ཀྱི་གྲོང་དང༌། གྲོང་ཁྱེར་དང༌། ལྗོངས་གནས་སོ། །ཅིའི་ཕྱིར་རིའི་རྒྱལ་པོ་མུ་ཁྱུད་འཛིན་ཞེས་བྱ་ཞེ་ན། སྨྲས་པ། རིའི་རྒྱལ་པོ་མུ་ཁྱུད་འཛིན་གྱི་རྩེ་མོ་དབྱིབས་ལེགས་ཤིང་བལྟ་ན་སྡུག་ལ་མཛེས་པ་ནི་དཔེར་ན་ཤིང་རྟའི་མུ་ཁྱུད་བཞིན་ཏེ། དེ་བས་

---

^{[མ་དཔེ་གཟིགས་ན་འདིར་གནོན།]}

ན་རིའི་རྒྱལ་པོ་མུ་ཁྱུད་འཛིན་ཞེས་བྱའོ། །རིའི་རྒྱལ་པོ་འཁོར་ཡུག་རི་ཞེས་བྱ་བ་ནི་ཕྱི་རོལ་གྱི་རྒྱ་མཚོ་ཆེན་པོ་བོར་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱི་ས་གཞི་ཆེན་པོ་ལ་བརྟེན་ཏོ། །དཔག་ཚད་སུམ་བརྒྱ་རྩ་ཕྱེད་དང་བཅུ་གསུམ་ནི་ཆུ་ལས་གྱེན་དུ་འཕགས་སོ། །ཞེང་དུ་ཡང་དེ་དང་འདྲའོ། །དབྱིབས་ལེགས་ཤིང་བལྟ་ན་སྡུག་ལ་མཛེས་པ་ལྕགས་ལས་གྲུབ་པ་སྟེ། དེ་ན་གནོད་སྦྱིན་གོས་སྔོན་ཅན་རྣམས་གནས་སོ། །ཅིའི་ཕྱིར་རིའི་རྒྱལ་པོ་ཁོར་ཡུག་རི་ཞེས་བྱ་ཞེ་ན། སྨྲས་པ། རིའི་རྒྱལ་པོ་ཁྲོ་ཡུག་རིའི་ཕྱོགས་དེ་དང་དེ་དག་ན་ཇི་ལྟར་གསེར་གྱི་འཁོར་ལོ་ཡོད་པ་བཞིན་དུ་གཞན་དག་ལ་མེད་པ་དང༌། གཞན་ཡང་རིའི་རྒྱལ་པོ་ཁོར་ཡུག་རིས་གླིང་བཞི་པ་འཁོར་ལོའི་ཚུལ་བསྐོར་ཏེ། དེ་བས་ན་རིའི་རྒྱལ་པོ་ཁོར་ཡུག་རི་ཞེས་བྱའོ། །གཉའ་ཤིང་འཛིན་གྱི་འཕང་དུ་ནི། །དཔག་ཚད་བཞི་ཁྲི་ཡོད་པར་བསྟན། །གཤོལ་མདའ་འཛིན་ནི་ཉི་ཁྲི་སྟེ། །ཁྲི་ནི་སེང་ལྡེང་ཅན་གྱི་རི། །བལྟ་ན་སྡུག་གི་འཕང་དུ་ནི། །དཔག་ཚད་ལྔ་སྟོང་ཡོད་པར་བསྟན། །དཔག་ཚད་ཉིས་སྟོང་ལྔ་བརྒྱར་ནི། །རྟ་རྣ་རི་ནི་མངོན་པར་འཕགས། །སྟོང་དང་ཉིས་བརྒྱ་ལྔ་བཅུ་ཡི། །གྲངས་སྙེད་རྣམ་པར་འདུད་ལས་འཕགས། །མུ་ཁྱུད་འཛིན་གྱི་འཕང་དུ་ནི། །དྲུག་བརྒྱ་ཉི་ཤུ་རྩ་ལྔར་བསྟན། །རྒྱ་མཚོ་འདི་ཡི་ཕ་རོལ་ན། །རྒྱ་མཚོ་གང་གིས་བསྐོར་བ་ཡི། །ཁོར་ཡུག་དཔག་ཚད་སུམ་བརྒྱ་དང༌། །དཔག་ཚད་ཕྱེད་དང་བཅུ་གསུམ་ཡོད། །དེ་ནི་ཁོར་ཡུག་རིར་བཤད་དོ། །འཇིག་རྟེན་བར་མཚམས་ཕན་ཅད་དུ། །ཉི་ཟླ་དེ་བཞིན་སྐར་མ་དང༌། །རྒྱུ་སྐར་ཚོགས་ནི་རྒྱ་ཆེན་ཀུན། །ཁོར་ཡུག་མི་འདའ་འཇིག་རྟེན་གྱི། །བར་མཚམས་ཕན་ཅད་མུན་པར་འདུག །མུ་ཁྱུད་འཛིན་དང་རྣམ་པར་འདུད། །དེ་བཞིན་རྟ་རྣ་རི་དང་ནི། །བལྟ་ན་སྡུག་དང་སེང་ལྡེང་ཅན། །གཤོལ་མདའ་འཛིན་དང་གཉའ་ཤིང་འཛིན། །རི་བོ་དེ་དག་བདུན་པོ་རྣམས། །རི་ཡི་མཆོག་སྟེ་གསེར་ལས་གྲུབ། །རི་རབ་ལ་སོགས་རི་བོ་རྣམས། །དེ་དག་གསེར་གྱི་གཞི་ལ་བརྟེན། །འཇིག་རྟེན་གཞག་པ་ལས་ཚིགས་བཅུ་གཉིས་པའོ།། །།འཇིག་རྟེན་གཞག་པ། བམ་པོ་བརྒྱད་པ། མདོ་ལ། རོལ་མཚོ་རྒྱལ་པོའི་ཕོ་བྲང་འཁོར། །

---

^{[མ་དཔེ་གཟིགས་ན་འདིར་གནོན།]}

གླིང་དག་དང་ནི་གླིང་ཕྲན་རྣམས། །སྟེང་དང་འོག་ནི་སྡིག་བྲལ་གྱི། །ཤེས་པས་ཉམས་སུ་མྱོང་བ་ཡོད། །རིའི་རྒྱལ་པོ་གཉའ་ཤིང་འཛིན་དང༌། རིའི་རྒྱལ་པོ་གཤོལ་མདའ་འཛིན་གྱི་བར་དེའི་སྐབས་ན་གཉའ་ཤིང་འཛིན་གྱི་རོལ་མཚོ་ཞེས་བྱ་བ་ཡོད་དེ། ཟབས་སུ་ནི་དཔག་ཚད་བརྒྱད་ཁྲི་ཡོད་ལ། གསེར་གྱི་ས་གཞི་ཆེན་པོ་ལ་བརྟེན་ཏོ། །ཞིང་དུ་ནི་དཔག་ཚད་བཞི་ཁྲི་ཡོད་དོ། །དབྱིབས་ལེགས་ཤིང་བལྟ་ན་སྡུག་ལ་མཛེས་པ། ཆུ་བསིལ་ཞིང་ཆུ་སྦྲང་རྩི་ལྟ་བུས་གང་སྟེ། ཀླུའི་རྒྱལ་པོ་དག་གིས་རྒྱས་པར་འདུག་གོ །རིའི་རྒྱལ་པོ་གཤོལ་མདའ་འཛིན་དང༌། རིའི་རྒྱལ་པོ་སེང་ལྡེང་ཅན་གྱི་བར་དེའི་སྐབས་ན་གཤོལ་མདའ་འཛིན་གྱི་རོལ་མཚོ་ཞེས་བྱ་བ་ཡོད་དེ། ཟབས་སུ་ནི་དཔག་ཚད་བརྒྱད་ཁྲི་ཡོད་ལ། གསེར་གྱི་ས་གཞི་ཆེན་པོ་ལ་བརྟེན་ཏོ། །ཞེང་དུ་ནི་དཔག་ཚད་ཉི་ཁྲི་ཡོད་དོ། །དབྱིབས་ལེགས་ཤིང་བལྟ་ན་སྡུག་ལ་མཛེས་པ། ཆུ་བསིལ་ཞིང་ཆུ་སྦྲང་རྩི་ལྟ་བུས་གང་སྟེ། ཀླུའི་རྒྱལ་པོ་དག་གིས་རྒྱས་པར་འདུག་གོ །རིའི་རྒྱལ་པོ་སེང་ལྡེང་ཅན་དང༌། རིའི་རྒྱལ་པོ་བལྟ་ན་སྡུག་གི་བར་སྐབས་ན་སེང་ལྡེང་ཅན་གྱི་རོལ་མཚོ་ཞེས་བྱ་བ་ཡོད་དེ། ཟབས་སུ་དཔག་ཚད་བརྒྱད་ཁྲི་ཡོད་ལ། གསེར་གྱི་ས་གཞི་ཆེན་པོ་ལ་བརྟེན་ཏོ། །ཞེང་དུ་ནི་དཔག་ཚད་ཁྲི་ཡོད་དེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ། ཆུ་བསིལ་ཞིང་ཆུ་སྦྲང་རྩི་ལྟ་བུས་གང་སྟེ། ཀླུའི་རྒྱལ་པོ་དག་གིས་རྒྱས་པར་འདུག་གོ །རིའི་རྒྱལ་པོ་བལྟ་ན་སྡུག་དང༌། རིའི་རྒྱལ་པོ་རྟ་རྣ་རིའི་བར་དེའི་སྐབས་ན་བལྟ་ན་སྡུག་གི་རོལ་མཚོ་ཞེས་བྱ་བ་ཡོད་དེ། ཟབས་སུ་ནི་དཔག་ཚད་བརྒྱད་ཁྲི་ཡོད་ལ། གསེར་གྱི་ས་གཞི་ཆེན་པོ་ལ་བརྟེན་ཏོ། །ཞེང་དུ་ནི་དཔག་ཚད་ལྔ་སྟོང་ཡོད་ལ། དབྱིབས་ལེགས་ཤིང་བལྟ་ན་སྡུག་ལ་མཛེས་པ། ཆུ་བསིལ་ཞིང་ཆུ་སྦྲང་རྩི་ལྟ་བུས་གང་སྟེ། ཀླུའི་རྒྱལ་པོ་དག་གིས་རྒྱས་པར་འདུག་གོ །རིའི་རྒྱལ་པོ་རྟ་རྣ་རི་དང༌། རིའི་རྒྱལ་པོ་རྣམ་པར་འདུད་ཀྱི་བར་དེའི་སྐབས་ན་རྟ་རྣ་རིའི་རོལ་མཚོ་ཞེས་བྱ་བ་ཡོད་དེ། ཟབས་སུ་ནི་དཔག་ཚད་བརྒྱད་ཁྲི་ཡོད་ལ། གསེར་གྱི་ས་གཞི་ཆེན་པོ་ལ་བརྟེན་ཏོ། །ཞེང་དུ་ནི་དཔག་ཚད་ཉིས་སྟོང་ལྔ་བརྒྱ་ཡོད་དེ། དབྱིབས་ལེགས་ཤིང་

---

^{[མ་དཔེ་གཟིགས་ན་འདིར་གནོན།]}

བལྟ་ན་སྡུག་ལ་མཛེས་པ། ཆུ་བསིལ་ཞིང་ཆུ་སྦྲང་རྩི་ལྟ་བུས་གང་སྟེ། ཀླུའི་རྒྱལ་པོ་དག་གིས་རྒྱས་པར་འདུག་གོ །རིའི་རྒྱལ་པོ་རྣམ་པར་འདུད་དང༌། རིའི་རྒྱལ་པོ་མུ་ཁྱུད་འཛིན་གྱི་བར་དེའི་སྐབས་ན་རིའི་རྒྱལ་པོ་རྣམ་པར་འདུད་ཀྱི་རོལ་མཚོ་ཞེས་བྱ་བ་ཡོད་དོ། །ཟབས་སུ་ནི་དཔག་ཚད་བརྒྱད་ཁྲི་ཡོད་ལ། གསེར་གྱི་ས་གཞི་ཆེན་པོ་ལ་བརྟེན་ཏོ། །ཞེང་དུ་དཔག་ཚད་སྟོང་ཉིས་བརྒྱ་ལྔ་བཅུ་ཡོད་དེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ། ཆུ་བསིལ་ཞིང་ཆུ་སྦྲང་རྩི་ལྟ་བུས་གང་སྟེ། ཀླུའི་རྒྱལ་པོ་དག་གིས་རྒྱས་པར་འདུག་གོ །གཉའ་ཤིང་འཛིན་གྱི་རོལ་མཚོ་ཡི། །མཚམས་ན་གཉའ་ཤིང་འཛིན་གྱི་རི། །གཤོལ་མདའ་འཛིན་གྱི་རོལ་མཚོ་ཡི། །མཚམས་ན་གཤོལ་མདའ་འཛིན་གྱི་རི། །སེང་ལྡེང་ཅན་གྱི་རོལ་མཚོ་ཡི། །ཕ་རོལ་སེང་ལྡེང་ཅན་གྱི་རི། །བལྟ་ན་སྡུག་གི་རོལ་མཚོ་ཡི། །བར་མཚམས་ན་ནི་བལྟ་ན་སྡུག །རྟ་རྣ་རི་ཡི་རོལ་མཚོ་ཡི། །བར་མཚམས་ན་ནི་རྟ་རྣ་རི། །རྣམ་པར་འདུད་ཀྱི་རོལ་མཚོ་ཡི། །ཕ་རོལ་རི་བོ་རྣམ་པར་འདུད། །མུ་ཁྱུད་འཛིན་གྱི་རོལ་མཚོ་ཡི། །བར་མཚམས་ན་ནི་མུ་ཁྱུད་འཛིན། །ཆུ་འཛིན་རོལ་མཚོ་བདུན་པོ་རྣམས། །དང་པོའི་བཻ་ཌཱུཪྻ་མདོག་བཞིན། །རབ་ཏུ་བསིལ་བའི་ཆུ་དག་དང༌། །སྦྲང་རྩི་ལྟ་བུའི་ཆུས་ཀྱང་གང༌། །མེ་ཏོག་དུས་ཀྱི་རྗེས་འབྲང་བས། །རོལ་མཚོ་མཛེས་བྱས་རྒྱ་སྤོས་འཁྲུངས། །དེ་བཞིན་བལ་བུ་སྤང་སྤོས་དང༌། །སྨན་ནི་སྣ་ཚོགས་དག་གིས་གང༌། །དེ་བཞིན་འཇིགས་ཤིང་ལུས་ཆེ་ལ། །དྲག་ཅིང་མི་བཟད་གདུག་པ་ཡི། །ཀླུའི་རྒྱལ་པོ་རྣམས་ཀྱིས་རྒྱས། །རོལ་མཚོ་བདུན་པོ་ཡིད་འོང་བ། །རི་བོ་དག་གི་འོད་རྣམས་དང༌། །ཉི་མའི་འོད་ཟེར་རྣམས་ཀྱིས་ཀྱང༌། །ཉི་མ་འཆར་ཀར་ཐང་ཅིག་ཙམ། །ཕྱོགས་བཅུ་དག་ཏུ་ལམ་མེར་སྣང༌། །གསེར་གྱི་རི་བོ་བདུན་པོ་ཡིས། །རོལ་མཚོ་བདུན་པོ་ཀུན་ནས་བསྐོར། །རི་རྣམས་གཙོ་བོ་རི་རབ་ནི། །རྩེ་མོ་བྲིས་པ་བཞིན་དུ་འཕགས། །རིའི་རྒྱལ་པོ་རི་རབ་ཀྱི་ཤར་ཕྱོགས། རིའི་རྒྱལ་པོ་གཉའ་ཤིང་འཛིན་གྱི་སྟེང་ན། རྒྱལ་པོ་ཡུལ་འཁོར་སྲུང་གི་ཕོ་བྲང་ཡུལ་འཁོར་སྲུང་ཞེས་བྱ་བ་ཞིག་ཡོད་དེ། ཆུར་དཔག་ཚད་ཉིས་བརྒྱ་ལྔ་བཅུ། ཞེང་དུ་ཡང་དཔག་ཚད་ཉིས་བརྒྱ་ལྔ་བཅུ། མཐའ་སྐོར་དུ་

---

^{[མ་དཔེ་གཟིགས་ན་འདིར་གནོན།]}

དཔག་ཚད་སྟོང་ཡོད་ལ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་གསེར་གྱི་རབས་བསྐོར་ཏེ། ར་བའི་འཕང་དུ་དཔག་ཚད་ཕྱེད་ཡོད་དོ། །ར་བ་དེ་ལ་རྩིག་སྐྱབས་གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པ་རྣམ་པ་བཞི་ཡོད་དེ། མདའ་ཡབ་དང་ཟམ་པ་རྣམ་པ་བརྒྱུད་མ་བཞི་ཡོད་དེ། དེའི་ནང་གི་ས་གཞི་དབྱིབས་ལེགས་ཤིང་བལྟ་ན་སྡུག་ལ་མཛེས་པ་སྟེ། བྲིས་ཤིང་ལེགས་པར་བྲིས་པ་ཚོན་སྣ་བརྒྱ་རྩ་གཅིག་གིས་བྲིས་པ་སྟེ། འཇམ་ཞིང་ཤིན་ཏུ་འཇམ་པ་ནི་དཔེར་ན་ཤིང་བལ་གྱི་འདའ་བ་འམ། རས་བལ་གྱི་འདའ་བ་བཞིན་ཏེ། རྐང་པ་བཞག་ན་ནི་ནེམས་ཞེས་བྱེད། རྐང་པ་བཏེགས་ན་ནི་པར་ཞེས་བྱེད་ལ། མེ་ཏོག་མན་དར་བ་དག་གིས་པུས་མོ་ནུབ་པ་ཙམ་དུ་ཡོངས་སུ་ཁེབས་ཏེ། མི་མ་ཡིན་པ་རྣམས་ཀྱི་རླུང་གི་མཐུས་མེ་ཏོག་རྙིང་པ་རྣམས་ནི་འདོར་མེ་ཏོག་གསར་པ་རྣམས་ནི་ལེགས་པར་འགྲེམས་ཏེ། འདི་སྐད་དུ། ཡུལ་འཁོར་སྲུང་གི་བསོད་ནམས་དབང་གི་མཐུས། །ཡུལ་འཁོར་སྲུང་གི་གྲོང་ཁྱེར་རླུང་ཆེན་ལྡང༌། །མེ་ཏོག་རྙིང་པ་རྣམས་ནི་འདོར་བར་བྱེད། །མེ་ཏོག་གསར་པ་རྣམས་ནི་ལེགས་པར་འགྲེམས། །ཞེས་ཀྱང་བྱའོ། །དེའི་ནང་ན་ལམ་སྲང་ཆུར་དཔག་ཚད་ཉིས་བརྒྱ་ལྔ་བཅུ། ཞེང་དུ་ཡང་དཔག་ཚད་ཕྱེད་དང་གཉིས་པ་ཞིག་ཡོད་དེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་གསེར་གྱི་ཕྱེ་མ་བདལ་ཞིང་ཙནྡན་གྱི་ཆུས་ཆག་ཆག་བཏབ་པ། དེའི་གློ་གཡས་གཡོན་ན་རྫིང་བུ་བྱས་པ་དག་ཡོད་དེ། རྫིང་བུ་དེ་དག་འདི་ལྟ་སྟེ། གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པའི་ཕ་གུ་རྣམ་པ་བཞིས་བརྩིགས་སོ། །རྫིང་བུ་དེ་དག་གི་ཕྱོགས་བཞི་ན་ཐེམ་སྐས་བྱས་པ་དག་ཡོད་དེ། ཐེམ་སྐས་དེ་དག་ཀྱང་འདི་ལྟ་སྟེ། གསེར་ལས་བྱས་པ་དང༌། དངུལ་ལས་བྱས་པ་དང༌། བཻ་ཌཱུཪྻ་ལས་བྱས་པ་དང༌། ཤེལ་ལས་བྱས་པའི་ཕ་གུ་རྣམ་པ་བཞིས་བརྩིགས་སོ། །རྫིང་བུ་དེ་དག་ལན་ཀན་རྣམ་པ་བཞིས་བསྐོར་ཏེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ། ཆུ་བསིལ་ཞིང་ཆུ་སྦྲང་རྩི་ལྟ་བུས་གང་སྟེ། མེ་ཏོག་ཨུཏྤལ་དང༌། པདྨ་དང༌། ཀུ་མུ་ཏ་དང༌། པདྨ་དཀར་པོས་

---

^{[མ་དཔེ་གཟིགས་ན་འདིར་གནོན།]}

ཡོངས་སུ་ཁེབས་ལ་ཆུ་ནས་སྐྱེས་པའི་བྱ་སྣ་ཚོགས་སྐད་སྙན་ཅིང་འཇེབས་པ་དང༌། སྐད་སྙན་ཡིད་དུ་འོང་བ་དང༌། སྐད་མཉེན་པ་དང༌། འདོད་དགུར་སྒྱུར་བའི་གཟུགས་ཅན་དག་སྐད་སྙན་པ་འབྱིན་ཏོ། །རྫིང་བུ་དེ་དག་གི་ཉེ་འཁོར་ན་མེ་ཏོག་གི་ཤིང་དང༌། འབྲས་བུའི་ཤིང་ཡོད་པ་རྣམས་ལེགས་པར་སྐྱེས་ཤིང་དབྱིབས་ལེགས་ལ་ཡོངས་སུ་གྲུབ་པ་སྟེ། མེ་ཏོག་ཕྲེང་བར་བཀོད་པ་བཞིན་དུ་གྱུར་པ་ནི། དཔེར་ན་མེ་ཏོག་ཕྲེང་རྒྱུད་དམ། མེ་ཏོག་ཕྲེང་རྒྱུད་ཀྱི་སློབ་མ་མཁས་པས་མེ་ཏོག་ཕྲེང་བ་ཐ་གུ་ལ་བརྒྱུས་པ་དང༌། མེ་ཏོག་གི་རྣ་རྒྱན་ལེགས་པར་བྱས་པ་བཞིན་ཏེ། ཐང་ལས་སྐྱེས་པའི་བྱ་སྣ་ཚོགས་སྐད་སྙན་ཅིང་འཇེབས་པ་དང༌། སྐད་ཡིད་དུ་འོང་བ་དང༌། སྐད་མཉེན་པ་དང༌། འདོད་དགུར་སྒྱུར་བའི་གཟུགས་ཅན་དག་སྐད་སྙན་པ་འབྱིན་ཏོ། །དེ་དག་གི་ཉེ་འཁོར་ན་དཔག་བསམ་གྱི་ཤིང་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དོ། །བཞག་གོས་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དོ། །དཔག་བསམ་ཤིང་ལས་བྱུང་བའི་གོས་སྔོན་པོ་དང༌། སེར་བོ་དང༌། དམར་པོ་དང༌། དཀར་པོ་རྣམ་པ་བཞི་ཡོད་དོ། །ལག་རྒྱན་དང༌། རྐང་རྒྱན་དང༌། རྒྱན་སྣང་བ་དང་མི་སྣང་བ་རྣམས་འབྱུང་བའི་ཤིང་རྣམ་པ་བཞི་ཡོད་དེ། ལྷ་འམ་ལྷའི་བུ་མོ་དག་གིས་ཇི་ལྟ་བུར་འདོད་པར་སེམས་བསྐྱེད་མ་ཐག་ཏུ་དེ་ལྟ་བུར་དེ་དག་གི་ལག་ཏུ་འོང་བར་འགྱུར་རོ། །རོལ་མོའི་ཆ་སྤྱད་སྣ་ཚོགས་པི་ཝང་དང༌། གླིང་བུ་དང༌། པི་ཝང་རྒྱུད་གསུམ་པ་དང༌། ཁར་རྔ་དང༌། ཧམ་ཤང་རྣམས་འབྱུང་བའི་ཤིང་དག་ཡོད་དེ། ལྷ་འམ་ལྷའི་བུ་མོ་རྣམས་ཀྱིས་ཇི་ལྟ་བུར་འདོད་པ་སེམས་བསྐྱེད་མ་ཐག་ཏུ་དེ་ལྟ་བུར་དེ་དག་གི་ལག་ཏུ་འོང་བར་འགྱུར་རོ། །བདུད་རྩི་རྣམ་པ་བཞི་དང༌། སྦྲང་རྩི་དང་སྦྲང་ཆང་གི་བཏུང་བ་དག་ཀྱང་ཡོད་དོ། །ཡང་ཏོག་རྣམས་དང༌། ཁང་པ་བརྩེགས་པ་དང༌། ཁྱིམ་རྣམས་དང༌། ཁང་བཟངས་རྣམས་དང༌། བསིལ་ཁང་རྣམས་དང༌། ལྟད་མོ་ལྟ་བའི་ས་རྣམས་དང༌། ཟམ་པ་རྣམས་བུད་མེད་ཀྱི་ཚོགས་ཀྱིས་མཛེས་པར་བྱས་ཤིང་ལྷའི་བུ་མོ་མང་པོས་བརྟེན་པ་དང༌། སིལ་སྙན་དང༌། ཕེག་རྡོབ་པ་དག་གི་སྒྲ་སྙན་པ་སྒྲོགས་པ་དང༌། དྲི་སྣ་ཚོགས་ཀྱིས་ལེགས་པར་བསྒོས་

---

^{[མ་དཔེ་གཟིགས་ན་འདིར་གནོན།]}

པ་དང༌། ཁ་ཟས་དང་བཏུང་བ་དང་ལྡན་པ་ཡོད་དོ། །དེ་ན་རྒྱལ་པོ་ཆེན་པོ་ཡུལ་འཁོར་སྲུང་འཁོར་དང་བཅས་པ་རྩེ་ཞིང་དགའ་ལ་དགའ་དགུར་སྤྱོད་དེ། རང་གི་ལས་ཀྱི་འབྲས་བུ་ཉམས་སུ་མྱོང་ངོ༌། །རིའི་རྒྱལ་པོ་རི་རབ་ཀྱི་ལྷོ་ཕྱོགས་རིའི་རྒྱལ་པོ་གཉའ་ཤིང་འཛིན་གྱི་སྟེང་ན་རྒྱལ་པོ་ཆེན་པོ་འཕགས་སྐྱེས་པོའི་ཕོ་བྲང་འཁོར་འཕགས་པར་སྐྱེས་ཞེས་བྱ་བ་ཞིག་ཡོད་དེ། ཆུར་དཔག་ཚད་ཉིས་བརྒྱ་ལྔ་བཅུ། ཞེང་དུ་ཡང་དཔག་ཚད་ཉིས་བརྒྱ་ལྔ་བཅུ། མཐའ་སྐོར་དུ་དཔག་ཚད་སྟོང་ཡོད་ལ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་སྟེ། གསེར་གྱི་ར་བས་བསྐོར་ལ། ར་བའི་འཕང་དུ་དཔག་ཚད་ཕྱེད་ཡོད་དེ། སྔ་མ་བཞིན་དུ་རྒྱས་པར་བརྗོད་པར་བྱའོ། །རིའི་རྒྱལ་པོ་རི་རབ་ཀྱི་ནུབ་ཕྱོགས་རིའི་རྒྱལ་པོ་གཉའ་ཤིང་འཛིན་གྱི་སྟེང་ན་རྒྱལ་པོ་ཆེན་པོ་མིག་མི་བཟང་གི་ཕོ་བྲང་འཁོར་སྣ་ཚོགས་གཟུགས་ཞེས་བྱ་བ་ཡོད་དེ། ཆུར་དཔག་ཚད་ཉིས་བརྒྱ་ལྔ་བཅུ། ཞེང་དུ་ཡང་དཔག་ཚད་ཉིས་བརྒྱ་ལྔ་བཅུ། མཐའ་སྐོར་དུ་དཔག་ཚད་སྟོང་ཡོད་ལ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་སྟེ། སྔ་མ་བཞིན་དུ་ཐམས་ཅད་བརྗོད་པར་བྱའོ། །རིའི་རྒྱལ་པོ་རི་རབ་ཀྱི་བྱང་ཕྱོགས་རིའི་རྒྱལ་པོ་གཉའ་ཤིང་འཛིན་གྱི་སྟེང་ན་རྒྱལ་པོ་ཆེན་པོ་རྣམ་ཐོས་ཀྱི་བུའི་ཕོ་བྲང་ལྕང་ལོ་ཅན་ཞེས་བྱ་བ་ཞིག་ཡོད་དེ། ཆུར་དཔག་ཚད་ཉིས་བརྒྱ་ལྔ་བཅུ། ཞེང་དུ་ཡང་དཔག་ཚད་ཉིས་བརྒྱ་ལྔ་བཅུ། མཐའ་སྐོར་དུ་དཔག་ཚད་སྟོང་ཡོད་ལ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་སྟེ། སྔ་མ་བཞིན་དུ་ཐམས་ཅད་བརྗོད་པར་བྱའོ། །དྲི་ཟ་དག་གི་བདག་པོའི་རྒྱལ། །ཤར་ཕྱོགས་རྣམས་ནི་སྐྱོང་བྱེད་པ། །རྒྱལ་པོ་ཆེན་པོ་ཡུལ་འཁོར་སྲུང༌། །གྲོང་ཁྱེར་ཡུལ་འཁོར་སྲུང་ན་གནས། །གྲུལ་བུམ་དག་གི་བདག་པོའི་རྒྱལ། །ལྷོ་ཕྱོགས་པ་རྣམས་སྐྱོང་བར་བྱེད། །རྒྱལ་པོ་ཆེན་པོ་འཕགས་སྐྱེས་པོ། །གྲོང་ཁྱེར་འཕགས་པར་སྐྱེས་ན་གནས། །ཀླུ་རྣམས་ཀྱི་ནི་བདག་པོའི་རྒྱལ། །ནུབ་ཀྱི་ཕྱོགས་རྣམས་སྐྱོང་བར་བྱེད། །རྒྱལ་པོ་ཆེན་པོ་མིག་མི་བཟང༌། །གྲོང་ཁྱེར་སྣ་ཚོགས་གཟུགས་ན་གནས། །གནོད་སྦྱིན་རྣམས་ཀྱི་བདག་པོའི་རྒྱལ། །བྱང་གི་ཕྱོགས་རྣམས་སྐྱོང་བྱེད་པ། །རྒྱལ་པོ་ཆེན་པོ་རྣམ་ཐོས་བུ། །གྲོང་ཁྱེར་

---

^{[མ་དཔེ་གཟིགས་ན་འདིར་གནོན།]}

ལྕང་ལོ་ཅན་ན་གནས། །ཤར་ཕྱོགས་ན་ནི་ཡུལ་འཁོར་སྲུང༌། །ལྷོ་ཕྱོགས་ན་ནི་འཕགས་སྐྱེས་པོ། །ནུབ་ཕྱོགས་ན་ནི་མིག་མི་བཟང༌། །བྱང་ཕྱོགས་ན་ནི་རྣམ་ཐོས་བུ། །རྒྱལ་པོ་ཆེན་པོ་འདི་བཞི་དག །འཇིག་རྟེན་སྐྱོང་བ་གཟི་བརྗིད་ལྡན། །ཕྱོགས་བཞི་དག་ནི་སྐྱོང་བ་སྟེ། །རྫུ་འཕྲུལ་ཆེ་ལ་སྟོབས་ཀྱང་ཆེ། །དེ་དག་ཚོགས་ནི་གསུམ་པོ་རྣམས། །བསྲུང་བའི་ཕྱིར་ནི་སྤྲོ་བ་སྟེ། །སུམ་ཅུ་རྩ་གསུམ་ལྷ་རྣམས་དང༌། །སངས་རྒྱས་བདེ་བ་གཟིགས་རྣམས་དང༌། །འཁོར་ལོ་ཆོས་བཞིན་བསྐོར་བ་ཡི། །ལྗོངས་ཀྱི་བདག་པོ་གང་ཡིན་པ། །འཁོར་ལོས་སྒྱུར་བ་དེ་ལ་ཡང༌། །བསྲུང་བའི་ཕྱིར་ནི་སྤྲོ་བ་ཡིན། །རིའི་རྒྱལ་པོ་རི་རབ་ཀྱི་ཤར་ཕྱོགས་ཀྱི་ཕྱི་རོལ་གྱི་རྒྱ་མཚོ་ཆེན་པོ་ན་ཤར་གྱི་ལུས་འཕགས་ཞེས་བྱ་བའི་གླིང་ནི་རྒྱ་ཆེ་ལ་ཕྱི་རོལ་ཟླ་གམ་ལྟར་གྲུབ་པ་ཡོད་དོ། །དཔག་ཚད་བརྒྱད་ཁྲི་ནི་ཐུར་དུ་གསེར་གྱི་ས་གཞི་ཆེན་པོ་ལ་བརྟེན་ཏོ། །སྟེང་ནི་ཆུ་དང་མཉམ་པར་འདུག་སྟེ། ཤར་གྱི་ལུས་འཕགས་པོའི་གླིང་གི་ངོས་ནང་གི་རིང་པོ་གང་ཡིན་པ་དེ་ལ་དཔག་ཚད་ཉིས་སྟོང་ཡོད་དོ། །ནང་གི་ཐུང་ངུ་གང་ཡིན་པ་དེ་ལ་ནི་དཔག་ཚད་སུམ་བརྒྱ་ལྔ་བཅུ་ཡོད་དོ། །མཐའ་སྐོར་དུ་དཔག་ཚད་དྲུག་སྟོང་སུམ་བརྒྱ་ལྔ་བཅུ་ཡོད་དོ། །དབྱིབས་ལེགས་ཤིང་བལྟ་ན་སྡུག་ལ་མཛེས་པ་ས་ལས་གྲུབ་པ་སྟེ། དེ་ན་ཤར་གྱི་ལུས་འཕགས་པོའི་མི་རྣམས་ཀྱི་གྲོང་དང༌། གྲོང་རྡལ་དང༌། གྲོང་ཁྱེར་དང༌། ཡུལ་འཁོར་དང༌། ཕོ་བྲང་འཁོར་རྣམས་གནས་སོ། །རིའི་རྒྱལ་པོ་རི་རབ་ཀྱི་ལྷོ་ཕྱོགས་ཀྱི་ཕྱི་རོལ་གྱི་རྒྱ་མཚོ་ཆེན་པོ་ན་འཛམ་བུའི་གླིང་ཞེས་བྱ་བའི་གླིང་ནང་རྒྱ་ཆེ་ལ་ཕྱི་རོལ་ཤིང་རྟའི་དབྱིབས་ལེགས་པར་གྲུབ་པ་ཡོད་དེ། དཔག་ཚད་བརྒྱད་ཁྲི་ནི་ཐུར་དུ་གསེར་གྱི་ས་གཞི་ཆེན་པོ་ལ་བརྟེན་ཏོ། །སྟེང་ནི་ཆུ་དང་མཉམ་པར་འདུག་སྟེ། འཛམ་བུ་གླིང་གི་ངོས་ནང་གི་རིང་པོ་གང་ཡིན་པ་དེ་ལ་ནི་དཔག་ཚད་ཉིས་སྟོང་ཡོད་དོ། །ནང་གི་ཐུང་དུ་གང་ཡིན་པ་དེ་ལ་ནི་དཔག་ཚད་ཕྱེད་དང་བཞི་ཡོད་དོ། །མཐའ་སྐོར་དུ་དཔག་ཚད་དྲུག་སྟོང་དང་ཕྱེད་དང་བཞི་ཡོད་དེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་ས་ལས་གྲུབ་པ་སྟེ། དེ་ན་འཛམ་བུའི་གླིང་གི་མི་རྣམས་ཀྱི་གྲོང་དང༌། གྲོང་རྡལ་དང༌། གྲོང་ཁྱེར་དང༌། ཡུལ་འཁོར་དང༌། ཕོ་བྲང་འཁོར་

---

^{[མ་དཔེ་གཟིགས་ན་འདིར་གནོན།]}

རྣམས་གནས་སོ། །རིའི་རྒྱལ་པོ་རི་རབ་ཀྱི་ནུབ་ཕྱོགས་ཀྱི་ཕྱི་རོལ་གྱི་རྒྱ་མཚོ་ཆེན་པོ་ན་ནུབ་བ་ལང་སྤྱོད་ཅེས་བྱ་བའི་གླིང་ནང་རྒྱ་ཆེ་ལ་ཕྱི་རོལ་ཀུན་ནས་ཟླུམ་པོར་གྲུབ་པ་ཡོད་དེ། དཔག་ཚད་བརྒྱད་ཁྲི་ནི་ཐུར་དུ་གསེར་གྱི་ས་གཞི་ཆེན་པོ་ལ་བརྟེན་ཏོ། །སྟེང་ནི་ཆུ་དང་མཉམ་པར་འདུག་སྟེ། ནུབ་ཀྱི་བ་ལང་སྤྱོད་ཀྱི་གླིང་གི་རྒྱར་ནི་དཔག་ཚད་ཉིས་སྟོང་ལྔ་བརྒྱ། མཐའ་སྐོར་དུ་ནི་དཔག་ཚད་བདུན་སྟོང་ལྔ་བརྒྱ་ཡོད་དེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་ས་ལས་གྲུབ་པ་སྟེ། དེ་ན་ནུབ་ཀྱི་བ་ལང་སྤྱོད་པའི་མི་རྣམས་ཀྱི་གྲོང་དང༌། གྲོང་རྡལ་དང༌། གྲོང་ཁྱེར་དང༌། ཡུལ་འཁོར་དང༌། རྒྱལ་པོའི་ཕོ་བྲང་འཁོར་རྣམས་གནས་སོ། །རིའི་རྒྱལ་པོ་རི་རབ་ཀྱི་བྱང་ཕྱོགས་ཀྱི་ཕྱི་རོལ་གྱི་རྒྱ་མཚོ་ཆེན་པོ་ན་བྱང་གི་སྒྲ་མི་སྙན་ཞེས་བྱ་བའི་གླིང་ན་རྒྱ་ཆེ་ལ་ཕྱི་རོལ་གྲུ་བཞི་ལྷམ་པར་གྲུབ་པ་ཡོད་དོ། །དཔག་ཚད་བརྒྱད་ཁྲི་ནི་ཐུར་དུ་གསེར་གྱི་ས་གཞི་ཆེན་པོ་ལ་བརྟེན་ཏོ། །སྟེང་ནི་ཆུ་དང་མཉམ་པར་འདུག་སྟེ། བྱང་གི་སྒྲ་མི་སྙན་གྱི་གླིང་གི་ཆུར་དཔག་ཚད་ཉིས་སྟོང༌། ཞེང་དུ་ཡང་དཔག་ཚད་ཉིས་སྟོང༌། མཐའ་སྐོར་དུ་དཔག་ཚད་བརྒྱད་སྟོང་ཡོད་དེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ་ས་ལས་གྲུབ་པ་སྟེ། དེ་ན་བྱང་གི་སྒྲ་མི་སྙན་པའི་མི་རྣམས་གནས་སོ། །གླིང་ཕྲན་བརྒྱད་ཡོད་པ་ལ་འདི་ལྟ་སྟེ། ལུས་དང་ལུས་འཕགས་དང༌། རྔ་ཡབ་དང་རྔ་ཡབ་གཞན་དང༌། གཡོ་ལྡན་དང་ཉེ་བའི་གཡོ་ལྡན་དང༌། སྒྲ་མི་སྙན་དང་སྒྲ་མི་སྙན་གྱི་ཟླ་རྣམས་སོ། །གླིང་ཕྲན་བརྒྱད་པོ་འདི་དག་གི་ནང་ན་བདུན་ལ་ནི་མི་རྣམས་སོ། །གཅིག་ལ་ནི་མི་མ་ཡིན་པ་རྣམས་གནས་སོ། །རྒྱལ་ཆེན་བཞི་པའི་ལྷ་རྣམས་ནི་འོག་མ་ལ་ཤེས་པའི་མཐོང་བ་འཇུག་གི །གོང་མ་ལ་མ་ཡིན་ཏེ། རྫུ་འཕྲུལ་ལམ་གཞན་གྱི་མཐུ་ནི་མ་གཏོགས་སོ། །དེ་བཞིན་དུ་སུམ་ཅུ་རྩ་གསུམ་པ་རྣམས་དང༌། འཐབ་བྲལ་བ་རྣམས་དང༌། དགའ་ལྡན་པ་རྣམས་དང༌། འཕྲུལ་དགའ་བ་རྣམས་དང༌། གཞན་འཕྲུལ་དབང་བྱེད་པ་རྣམས་དང༌། ཚངས་རིས་པ་རྣམས་དང༌། ཚངས་པའི་འདུན་ན་འདོན་པ་རྣམས་དང༌། ཚངས་པ་ཆེན་པོ་པ་རྣམས་དང༌། འོད་ཆུང་པ་རྣམས་དང༌། ཚད་མེད་འོད་པ་རྣམས་དང༌། འོད་གསལ་བ་རྣམས་

---

^{[མ་དཔེ་གཟིགས་ན་འདིར་གནོན།]}

དང༌། དགེ་ཆུང་བ་རྣམས་དང༌། ཚད་མེད་དགེ་བ་རྣམས་དང༌། དགེ་རྒྱས་པ་རྣམས་དང༌། སྤྲིན་མེད་པ་རྣམས་དང༌། བསོད་ནམས་སྐྱེས་པ་རྣམས་དང༌། འབྲས་བུ་ཆེ་བ་རྣམས་དང༌། མི་ཆེ་བ་རྣམས་དང༌། མི་གདུང་བ་རྣམས་དང༌། གྱ་ནོམ་སྣང་བ་རྣམས་དང༌། ཤིན་ཏུ་མཐོང་བ་བ་རྣམས་ཀྱང་འོག་མ་ལ་ཤེས་པའི་མཐོང་བ་འཇུག་གི །གོང་མ་ལ་མ་ཡིན་ཏེ། རྫུ་འཕྲུལ་ལམ་གཞན་གྱི་མཐུ་ནི་མ་གཏོགས་སོ། །འོག་མིན་གྱི་ལྷ་རྣམས་ནི་ཐམས་ཅད་དུ་ཤེས་པའི་མཐོང་བ་འཇུག་གོ །མནར་མེད་པའི་སེམས་ཅན་དམྱལ་བ་ཆེན་པོའི་འོག་གི་གཞི་ནི་འདི་ནས་ཐུར་དུ་དཔག་ཚད་བཞི་ཁྲི་ལ་འཇུག་གོ །མནར་མེད་པའི་སེམས་ཅན་དམྱལ་བ་ཆེན་པོའི་སྟེང་དི་ངོས་ནི་འདི་ནས་ཐུར་དུ་དཔག་ཚད་ཉི་ཁྲི་ལ་ཐུག་གོ །དེའི་སྟེང་ན་སེམས་ཅན་དམྱལ་བ་ཆེན་པོ་རབ་ཏུ་ཚ་བ་འདུག་གོ །དེའི་སྟེང་ན་སེམས་ན་སེམས་ཅན་དམྱལ་བ་ཆེན་པོ་ངུ་འབོད་ཆེན་པོ་འདུག་གོ །དེའི་སྟེང་ན་སེམས་ཅན་དམྱལ་བ་ཆེན་པོ་ངུ་འབོད་འདུག་གོ །དེའི་སྟེང་ན་སེམས་ཅན་དམྱལ་བ་ཆེན་པོ་བསྡུས་གཞོམ་འདུག་གོ །དེའི་སྟེང་ན་སེམས་ཅན་དམྱལ་བ་ཆེན་པོ་ཐིག་ནག་འདུག་གོ །དེའི་སྟེང་ན་སེམས་ཅན་དམྱལ་བ་ཆེན་པོ་ཡང་སོས་འདུག་སྟེ། སེམས་ཅན་དམྱལ་བ་ཆེན་པོ་བརྒྱད་པོ་འདི་དག་ནི་མཐོན་དམན་དུ་རིམ་པར་གནས་ལ། ལྷག་པའི་འཁོར་བཅུ་དྲུག་བཅུ་དྲུག་ཡོད་དོ། །འདི་ནས་དཔག་ཚད་བཞི་ཁྲིའི་སྟེང་ན་ནི་རྒྱལ་ཆེན་བཞི་པའི་ལྷ་རྣམས་འདུག་གོ །རྒྱལ་ཆེན་པའི་ལྷ་རྣམས་ཡན་ཆད་ནས། དང་པོ་ཡན་ཆད་ཀྱི་ཚད་ཇི་ཙམ་པ་དེ་སྲིད་ན་སུམ་ཅུ་རྩ་གསུམ་པའི་ལྷ་རྣམས་འདུག་གོ །དེ་བཞིན་དུ་རྒྱས་པར་བྱ་སྟེ། དང་པོ་ཡན་ཆད་ཇི་ཙམ་པ་དེ་སྲིད་ན་གྱ་ནོམ་སྣང་གི་ལྷ་རྣམས་འདུག་གོ །གྱ་ནོམ་སྣང་བའི་ལྷ་ཡན་ཆད་ནས་དང་པོ་ཡན་ཆད་ཀྱི་ཚད་ཇི་ཙམ་པ་དེ་སྲིད་ན་ཤིན་ཏུ་མཐོང་བའི་ལྷ་རྣམས་འདུག་གོ །ཤིན་ཏུ་མཐོང་བའི་ལྷ་རྣམས་ཡན་ཆད་ནས་དང་པོ་ཡན་ཆད་ཀྱི་ཚད་ཇི་ཙམ་པ་དེ་སྲིད་ན་འོག་མིན་གྱི་ལྷ་རྣམས་འདུག་གོ །སྤྲིན་ནི་བརྒྱད་ཡོད་དེ། སྤྲིན་ནང་གི་མཐོན་པོ་གང་ཡིན་པ་དེའི་འཕང་དུ་ནི་དཔག་ཚད་ཕྱེད་དང་གཉིས་

---

^{[མ་དཔེ་གཟིགས་ན་འདིར་གནོན།]}

ཡོད་དོ། །གཉིས་པ་ནི་དཔག་ཚད་གཅིག་དང་དཔག་ཚད་བཞི་ཆ་གཅིག་གོ །གསུམ་པ་ནི་དཔག་ཚད་གཅིག་གོ །བཞི་པ་ནི་དཔག་ཚད་གཅིག་ལས་བཞི་ཆ་གཅིག་མེད་པའོ། །ལྔ་པ་ནི་དཔག་ཚད་ཕྱེད་དོ། །དྲུག་པ་ནི་རྒྱང་གྲགས་གཅིག་གོ ། བདུན་པ་ནི་རྒྱང་གྲགས་ཕྱེད་དོ། །བརྒྱད་པ་ནི་རྒྱང་གྲགས་ཀྱི་བཞི་ཆ་གཅིག་གོ །འཇིག་རྟེན་གཞག་པ་ལས་ཚིགས་བཅུ་གསུམ་པའོ།། །།གླེང་གཞི་ནི་མཉན་དུ་ཡོད་པ་ན་སྟེ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་གནོད་པར་འགྱུར་བ་དང༌། གནོད་པར་འགྱུར་བ་མ་ཡིན་པའི་ཆོས་རྣམས་བཤད་ཀྱིས་དེ་ཉོན་ལ་ལེགས་པར་ཤིན་ཏུ་ཡིད་ལ་བྱོས་ཤིག་དང་ངས་བཤད་དོ། །གནོད་པར་འགྱུར་བའི་ཆོས་རྣམས་གང་ཞེ་ན། སྐྱེས་པ་འམ། བུད་མེད་གང་ཡང་རུང་སྟེ། འཆལ་བའི་ཚུལ་ཁྲིམས་དང༌། སྡིག་པའི་ཆོས་ཅན་ལུས་ཀྱི་ཉེས་པར་སྤྱོད་པ་དང་ལྡན་པ་དང༌། ངག་གི་ཉེས་པར་སྤྱོད་པ་དང་ལྡན་པ་དང༌། ཡིད་ཀྱི་ཉེས་པར་སྤྱོད་པ་དང་ལྡན་པ་དེ་ནི་གང་གི་ཚེ་ནད་ཀྱིས་ཐེབས་ཤིང་སྡུག་བསྔལ་བར་གྱུར་ལ་ནད་ཚབས་ཆེན་པོས་བཏབ་ནས་ཁྲིའུ་ལ་འདུག་གམ། ཁྲི་ལ་འདུག་གམ། ས་ལ་འདུག་གམ། ཉལ་ཡང་རུང་སྟེ། ལུས་ཀྱི་ཚོར་བ་སྡུག་བསྔལ་ཞིང་མི་བཟད་ལ་རྩུབ་ཅིང་ཚ་བ་དང་ཡིད་དུ་མི་འོང་བ་སྲོག་གཅོད་པར་བྱེད་པ་རྣམས་ཀྱིས་ཐེབས་ན། དེ་ལ་སྔོན་གྱི་ལུས་ཀྱི་ཉེས་པར་སྤྱོད་པ་འམ། ངག་གི་ཉེས་པར་སྤྱོད་པ་འམ། ཡིད་ཀྱི་ཉེས་པར་སྤྱོད་པ་ཡང་རུང་སྟེ། གང་བྱུང་བ་དེའི་ཚེ་དེ་ལ་དམིགས་པར་འགྱུར་ཞིང་ཆེར་དམིགས་ལ་མངོན་པར་དམིགས་པར་འགྱུར་ཏེ། དཔེར་ན་ཕྱེ་མ་རེད་ཀྱི་དུས་སུ་རི་ཆེན་པོ་རྣམས་སམ། རིའི་ཙེ་མོ་རྣམས་ཀྱི་གྲིབ་མ་ཤོད་དུ་འབབ་ཅིང་ཆེར་འབབ་སྟེ། མངོན་པ་འབབ་པར་འགྱུར་བ་དེ་བཞིན་དུ་དེ་ལ་སྔོན་གྱི་ལུས་ཀྱི་ཉེས་པར་སྤྱོད་པ་འམ། ངག་གི་ཉེས་པར་སྤྱོད་པ་འམ། ཡིད་ཀྱི་ཉེས་པར་སྤྱོད་པ་ཡང་རུང་སྟེ། གང་བྱུང་བ་དེའི་ཚེ་ལ་དམིགས་པར་འགྱུར་ཞིང་ཆེར་དམིགས་ལ་མངོན་བར་དམིགས་པར་འགྱུར་ཏེ། དེ་འདི་སྙམ་དུ། ཀྱི་ཧུད་བདག་གིས་སྡིག་པ་འདི་ལྟ་སྟེ། ལུས་དང་ངག་དང་ཡིད་ཀྱིས་བྱས་

---

^{[མ་དཔེ་གཟིགས་ན་འདིར་གནོན།]}

སོ། །ཀྱི་ཧུད་བདག་གི་བསོད་ནམས་འདི་ལྟ་སྟེ། ལུས་དང་ངག་དང་ཡིད་ཀྱིས་མ་བྱས་སོ། །སྡིག་པ་རྣམས་བྱས་པ་དང༌། བརླང་པོ་རྣམས་བྱས་པ་དང༌། གདུག་པ་རྣམས་བྱས་པ་དང༌། བསོད་ནམས་དག་མ་བྱས་པ་དང༌། དགེ་བ་དག་མ་བྱས་པ་དང༌། འཇིགས་པ་དང་སྐྲག་པ་རྣམས་ཀྱི་སྐྱབས་མ་བྱས་པ་རྣམས་ཀྱི་འགྲོ་བ་གང་ཡིན་པའི་འགྲོ་བ་དེ་དག་ཏུ་ཚེ་ཕྱི་མ་ལ་འགྲོ་བར་འགྱུར་རོ་སྙམ་དུ་སེམས་ཏེ་དེ་འགྱོད་པར་འགྱུར་རོ། །དགེ་སློང་དག་འགྱོད་བཞིན་དུ་འཆི་བ་ནི་ལེགས་པ་མ་ཡིན་ནོ། །དུས་བྱེད་པ་ནི་ལེགས་པ་མ་ཡིན་ནོ། །ཚེ་ཕྱི་མ་ནི་ལེགས་པ་མ་ཡིན་ཏེ། དེས་ལུས་ཀྱི་ཉེས་པར་སྤྱོད་པ་སྤྱད་ཅིང་ངག་དང་ཡིད་ཀྱི་ཉེས་པར་སྤྱོད་པ་སྤྱད་ནས་དེའི་རྒྱུ་དང་དེའི་རྐྱེན་གྱིས་ལུས་དང་བྲལ་ཏེ་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་ཏེ་འདི་ནི་གནོད་པར་འགྱུར་བའི་ཆོས་རྣམས་ཞེས་བྱའོ། །གནོད་པར་འགྱུར་བ་མ་ཡིན་པའི་ཆོས་རྣམས་གང་ཞེ་ན། སྐྱེས་པ་འམ་བུད་མེད་གང་ཡང་རུང་སྟེ། ཚུལ་ཁྲིམས་ཅན་དང༌། དགེ་བའི་ཆོས་ཅན་ལུས་ཀྱི་ལེགས་པར་སྤྱོད་པ་དང་ལྡན་པ་དང༌། ངག་གི་ལེགས་པར་སྤྱོད་པ་དང་ལྡན་པ་དང༌། ཡིད་ཀྱི་ལེགས་པར་སྤྱོད་པ་དང་ལྡན་པ་དེ་ནི་གང་གི་ཚེ་ནད་ཀྱིས་ཐེབས་ཤིང་སྡུག་བསྔལ་བར་གྱུར་ལ། ནད་ཚབས་ཆེན་པོས་བཏབ་ནས་ཁྲིའུ་ལ་འདུག་གམ། ཁྲི་ལ་འདུག་གམ། ས་ལ་འདུག་གམ། ཉལ་ཡང་རུང་སྟེ། ལུས་ཀྱི་ཚོར་བ་སྡུག་བསྔལ་ཞིང་མི་བཟད་ལ་རྩུབ་ཅིང་ཚ་བ་དང་ཡིད་དུ་མི་འོང་ཞིང་སྲོག་གཅོད་པར་བྱེད་པ་རྣམས་ཀྱིས་ཐེབས་ན། དེ་ལ་སྔོན་ལུས་ཀྱི་ལེགས་པར་སྤྱོད་པ་འམ། ངག་གི་ལེགས་པར་སྤྱོད་པ་འམ། ཡིད་ཀྱི་ལེགས་པར་སྤྱོད་པ་ཡང་རུང་སྟེ། གང་བྱུང་བ་དེའི་ཚེ་དེ་ལ་དམིགས་པར་འགྱུར་ཞིང་ཆེར་དམིགས་ལ་མངོན་བར་དམིགས་པར་འགྱུར་ཏེ། དཔེར་ན་ཕྱེམ་རེད་ཀྱི་དུས་སུ་རི་ཆེན་པོ་རྣམས་སམ། རིའི་རྩེ་མོ་རྣམས་ཀྱི་གྲིབ་མ་ཤོད་དུ་འབབ་ཅིང་ཆེར་འབབ་པ་སྟེ། མངོན་པར་འབབ་པར་འགྱུར་བ་དེ་བཞིན་དུ་དེ་ལ་སྔོན་གྱི་ལུས་ཀྱི་ལེགས་པར་སྤྱོད་པ་འམ། ངག་གི་ལེགས་པར་སྤྱོད་པ་འམ། ཡིད་ཀྱི་ལེགས་པར་སྤྱོད་པ་ཡང་རུང་སྟེ། གང་བྱུང་བ་དེའི་ཚེ་དེ་ལ་དམིགས་ཤིང་ཆེར་དམིགས་

---

^{[མ་དཔེ་གཟིགས་ན་འདིར་གནོན།]}

ལ་མངོན་བར་དམིགས་པར་འགྱུར་ཏེ། དེ་འདི་སྙམ་དུ་ཀྱེ་མ་བདག་གིས་བསོད་ནམས་འདི་ལྟ་སྟེ། ལུས་དང་ངག་དང་ཡིད་ཀྱིས་བྱས་སོ། །ཀྱེ་མ་བདག་གི་སྡིག་པ་འདི་ལྟ་སྟེ། ལུས་དང་ངག་དན་ཡིད་ཀྱིས་མ་བྱས་སོ། །བསོད་ནམས་དག་བྱས་པ་དང༌། དགེ་བ་དག་བྱས་པ་དང༌། འཇིགས་པ་དང་སྐྲག་པ་རྣམས་ཀྱི་སྐྱབས་བྱས་ཤིང་སྡིག་པ་རྣམས་མ་བྱས་པ་དང༌། བརླང་པོ་རྣམས་མ་བྱས་པ་དང༌། གདུག་པ་རྣམས་མ་བྱས་པའི་འགྲོ་བའི་གང་ཡིན་པའི་འགྲོ་བ་དེ་དག་ཏུ་ཚེ་ཕྱི་མ་ལ་འགྲོ་བར་འགྱུར་རོ་སྙམ་དུ་སེམས་ཏེ་འགྱོད་པ་མེད་པར་འགྱུར་རོ། །དགེ་སློང་དག་འགྱོད་པ་མེད་པར་འཆི་བ་ནི་ལེགས་སོ། །དུས་བྱེད་པ་ནི་ལེགས་སོ། །ཚེ་ཕྱི་མ་ནི་ལེགས་ཏེ། དེ་ལུས་ཀྱི་ལེགས་པར་སྤྱོད་པ་སྤྱད་ཅིང་ངག་དང་ཡིད་ཀྱི་ལེགས་པར་སྤྱོད་པ་སྤྱད་ནས། དེའི་རྒྱུ་དང་དེའི་རྐྱེན་གྱིས་ལུས་དང་བྲལ་ཏེ་ཤི་བའི་འོག་ཏུ་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་ཀྱི་ནང་དུ་སྐྱེ་བར་འགྱུར་ཏེ། འདི་ནི་གནོད་པར་འགྱུར་བ་མ་ཡིན་པའི་ཆོས་རྣམས་ཞེས་བྱའོ། །དགེ་སློང་དག་གནོད་པར་འགྱུར་བ་དང༌། གནོད་པར་འགྱུར་བ་མ་ཡིན་པའི་ཆོས་རྣམས་བཤད་པར་བྱའོ་ཞེས་ངས་སྨྲས་པ་གང་ཡིན་པ་དེ་ནི་བཤད་པ་འདི་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་ཅེས་གསུངས་ནས། གཞན་ཡང་སྟོན་པས་འདི་སྐད་དུ། མི་རིགས་འཚོ་བའི་མི་རྣམས་ཀྱིས། །འདི་ནི་གནོད་འགྱུར་རྣམས་བྱས་པའི། །འགྲོ་བ་ཕྱི་མ་གང་ཡིན་པའི། །དམྱལ་འགྲོ་དེ་དག་ང་ལས་ཉོན། །ཡང་སོས་དང་ནི་ཐིག་ནག་དང༌། །བདུད་གཞོམ་དང་ནི་ངུ་འབོད་གཉིས། །གཞན་ཡང་མནར་ཆེན་པོ་དང༌། །ཚ་བ་དན་ནི་རབ་ཏུ་ཚ། །དམྱལ་བ་བརྒྱད་པོ་འདི་དག་ནི། །ཐར་བར་དཀའ་བར་བསྟན་པ་སྟེ། །བརླབ་པའི་ལས་བྱས་རྣམས་ཀྱིས་གང༌། །རེ་རེའི་འཁོར་ནི་བཅུ་དྲུག་ཡོད། །ཆ་བཞི་དང་ནི་སྒོ་བཞིར་ལྡན། །ཆ་ཡི་ཚད་ནི་རྣམ་པར་བྱེད། །ལྕགས་ཀྱི་རབས་ཀུན་ནས་བསྐོར། །ལྕགས་ཀྱིས་སུ་ནི་ཤིན་ཏུ་ཁེབས། །ལྕགས་ཀྱི་ས་གཞི་རབ་ཚ་བ། །འབར་ཞིང་གཟི་བརྗིད་ལྡན་པ་སྟེ། །དཔག་ཚད་བརྒྱ་ཕྲག་དུ་མར་ཡང༌། །མེ་ལྕེ་དག་ནི་

---

^{[མ་དཔེ་གཟིགས་ན་འདིར་གནོན།]}

མཆེད་པར་གནས། །འཇུངས་པར་འདུལ་བ་དྲག་པོ་སྟེ། །མེ་ལྕེ་ལྡན་ཞིང་བསྙེན་པར་དཀའ། །དེ་དག་བ་སྤུ་སློང་བའི་གཟུགས། །འཇིགས་ཤིང་འཇིགས་བྱེད་སྡུག་བསྔལ་བ། །དྲང་སྲོང་དག་དང་སྡོམ་ཅན་དང༌། །དཀའ་ཐུབ་ཅན་དང་ཁ་ཟེར་བ། །རྐང་པ་མཐོ་ཞིང་སྤྱིའུ་ཚུགས་སུ། །དམྱལ་བ་དེར་ནི་ལྟུང་བར་འགྱུར། །དབང་པོ་ཉམས་པ་དེ་དག་འཚེད། །ཉ་ནི་སྐམ་ལ་བབ་པ་བཞིན། །དེ་ལྟར་ཉེས་བྱས་ལས་བྱེད་པ། །ཉིན་མཚན་དུ་ནི་ཆོ་ངེས་འདེབས། །དེ་ནི་སྒྲ་ཆེན་རབ་ཏུ་སྒྲོགས། །འཕང་མདུང་གིས་ཕོག་གླང་ཆེན་བཞིན། །ལུས་ཀྱི་ཉེས་པར་སྤྱད་བྱས་ཤིང༌། །ངག་གི་ཉེས་པར་སྤྱོད་རྣམས་དང༌། །ཡིད་ཀྱི་ཉེས་པ་སྤྱད་བྱས་ནས། །སེམས་ཅན་དམྱལ་བ་རྣམས་སུ་སྐྱེ། །ཞེས་གསུངས་སོ། །སེམས་ཅན་དམྱལ་བ་ཆེན་པོ་ཡང་སོས་ཞེས་བྱ་བ་ལ་ཅིའི་ཕྱིར་སེམས་ཅན་དམྱལ་བ་ཆེན་པོ་ཡང་སོས་ཞེས་བྱ་ཞེ་ན། སྨྲས་པ། སེམས་ཅན་དམྱལ་བ་ཆེན་པོ་ཡང་སོས་སུ་སེམས་ཅན་གང་སྐྱེས་པ་དང༌། ཀུན་ཏུ་སྐྱེས་པ་དང༌། བྱུང་བ་དང༌། ཀུན་ཏུ་བྱུང་བ་དང༌། ཕྱིན་པ་དང༌། མངོན་པ་གྲུབ་པ་དང༌། འཐོན་པར་གྱུར་པའི་སེམས་ཅན་དེ་དག་གི་སྡིག་པ་མི་དགེ་བཱ་ལས་དེའི་རྣམ་པར་སྨིན་པས་ལྕགས་ཀྱི་རལ་གྲི་རྣོ་ཞིང་ཤིན་ཏུ་རྣོ་ལ་སྤུ་གྱེན་ཀར་ཆོད་པ་དག་ལག་ཏུ་འོང་བར་འགྱུར་རོ། །སེམས་ཅན་དེ་དག་ཀྱང་སེམས་ཅན་གཅིག་གིས་གཅིག་མཐོང་ན་ཤས་ཆེར་སྡང་བའི་སེམས་དང་གསད་པའི་སེམས་ཉེ་བར་གནས་པར་འགྱུར་ཏེ། དཔེར་ན་རྔོན་པས་དགོན་པའི་རི་དྭགས་མཐོང་ན་ཤས་ཆེར་སྡང་བའི་སེམས་དང་གསད་པའི་སེམས་ཉེ་བར་གནས་པར་འགྱུར་བ་དེ་བཞིན་དུ། སེམས་ཅན་དེ་དག་སེམས་ཅན་གཅིག་གིས་གཅིག་མཐོང་ན་ཤས་ཆེར་སྡང་བའི་སེམས་དང༌། གསད་པའི་སེམས་ཉེ་བར་གནས་པར་འགྱུར་ཏེ། དེ་དག་རལ་གྲི་དེ་དག་གིས་གཅིག་ལ་གཅིག་ཀུན་ཏུ་གཅོད་ཅིང་ཀུན་ཏུ་འབིགས་ཏེ། ཀུན་ཏུ་གཏུབ་ཅིང་ཀུན་ཏུ་གཤེག་པར་བྱེད་དོ། །ཀུན་ཏུ་བཅད་ཅིང་ཀུན་ཏུ་ཕུག་སྟེ། ཀུན་ཏུ་གཏུབ་ཅིང་ཀུན་ཏུ་གཤེགས་ནས་གང་གི་ཚེ་གཅིག་གིས་གཅིག་བསད་དེ། ཤི་བར་གྱུར་པ་དེའི་ཚེ་ཕྱོགས་གཅིག་ཏུ་འདུའོ། །དུས་གཞན་ཞིག་ན་སེམས་ཅན་དམྱལ་བ་ཆེན་པོ་ཡང་སོས་སུ་རླུང་

---

^{[མ་དཔེ་གཟིགས་ན་འདིར་གནོན།]}

བསིལ་བལྡང་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དེ། འདི་སྐད་དུ་སེམས་ཅན་ཁྱེད་རྣམས་ཡང་སོས་པར་གྱུར་ཅིག །སེམས་ཅན་ཁྱེད་རྣམས་ཡང་སོས་པར་གྱུར་ཅིག་ཅེས་སྒྲ་ཡང་གྲགས་པར་འགྱུར་ཏེ། དེ་ནས་སེམས་ཅན་དེ་དག་ཡང་འཚོ་བར་འགྱུར་རོ། །དེ་ནས་ཡང་སེམས་ཅན་དེ་དག་གི་སྡིག་པ་མི་དགེ་བའི་ལས་དེའི་རྣམ་པར་སྨིན་པས་ལྕགས་ཀྱི་རལ་གྲི་དག་ལག་ཏུ་འོང་བར་འགྱུར་རོ། །དེ་ནས་ཡང་སེམས་ཅན་དེ་དག་ཀྱང་སེམས་ཅན་གཅིག་གིས་གཅིག་མཐོང་ན་ཤས་ཆེར་སྡང་བའི་སེམས་དང་གསད་པའི་སེམས་ཉེ་བར་གནས་པར་འགྱུར་ཏེ། དཔེར་ན་རྔོན་པས་དགོན་པའི་རི་དགས་མཐོང་ན་ཤས་ཆེར་སྡང་བའི་སེམས་དག་གསད་པའི་སེམས་ཉེ་བར་གནས་པར་འགྱུར་བ་དེ་བཞིན་དུ། སེམས་ཅན་དེ་དག་སེམས་ཅན་གཅིག་གིས་གཅིག་མཐོང་ན་ཤས་ཆེར་སྡང་བའི་སེམས་དང་གསད་པའི་སེམས་ཉེ་བར་གནས་པར་འགྱུར་ཏེ། དེ་དག་རལ་གྲི་དེ་དག་གཅིག་གིས་གཅིག་ལ་ཀུན་ཏུ་གཅོད་ཅིང་འབིགས་ཏེ། ཀུན་ཏུ་གཏུབ་ཅིང་ཀུན་དུ་གཤེག་པར་བྱེད་དོ། །ཀུན་ཏུ་བཅད་ཅིང་ཀུན་ཏུ་ཕུག་སྟེ། ཀུན་ཏུ་གཏུབ་ཅིང་ཀུན་ཏུ་གཤེགས་ནས་གང་གི་ཚེ་གཅིག་གིས་གཅིག་བསད་དེ་ཤི་བར་གྱུར་པ་དེའི་ཕྱོགས་གཅིག་ཏུ་འདུའོ། །གཞན་ཡང་སེམས་ཅན་དམྱལ་བ་ཆེན་པོ་ཡང་སོས་སུ་སེམས་ཅན་གང་སྐྱེས་པ་དང༌། ཀུན་ཏུ་སྐྱེས་པ་དང༌། བྱུང་བ་དང༌། ཀུན་ཏུ་བྱུང་བ་དང༌། ཕྱིན་པ་དང༌། མངོན་པར་གྲུབ་པ་དང༌། འཐོན་པར་གྱུར་པའི་སེམས་ཅན་དེ་དག་གི་སྡིག་པ་མི་དགེ་བའི་ལས་དེའི་རྣམ་པར་སྨིན་པས་ལྕགས་ཀྱི་ཤང་ལང་རྣོ་ཞིང་ཤིན་ཏུ་རྣོ་ལ་སྤུ་གྱེན་ཀར་ཆོད་པ་དག་ལག་ཏུ་འོང་བར་འགྱུར་རོ། །སེམས་ཅན་དེ་དག་ཀྱང་སེམས་ཅན་གཅིག་གིས་གཅིག་མཐོང་ན་ཤས་ཆེར་སྡང་བའི་སེམས་ཅན་གསད་པའི་སེམས་ཉེ་བར་གནས་པར་འགྱུར་ཏེ་སྔ་མ་བཞིན་ནོ། །དེ་དག་ཤང་ལང་དེ་དག་གིས་གཅིག་གིས་གཅིག་ལ་ཀུན་ཏུ་གཅོད་ཅིང་ཀུན་ཏུ་འབིགས་ཏེ། ཀུན་ཏུ་གཏུབ་ཅིང་ཀུན་ཏུ་གཤེག་པར་བྱེད་དོ། །ཀུན་ཏུ་བཅད་ཅིང་ཀུན་ཏུ་ཕུག་སྟེ། ཀུན་ཏུ་གཏུབས་ཤིང་ཀུན་ཏུ་གཤགས་ནས་སྔ་མ་བཞིན་ཏེ། གང་གི་ཚེ་ཤི་བར་གྱུར་པ་དེའི་ཚེ་ཕྱོགས་གཅིག་

---

^{[མ་དཔེ་གཟིགས་ན་འདིར་གནོན།]}

ཏུ་འདུའོ། །དགེ་སློང་དག་སེམས་ཅན་དམྱལ་བ་ཆེན་པོ་ཡང་སོས་སུ་རླུང་བསིལ་བ་ལྡང་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དེ། འདི་སྐད་དུ་སེམས་ཅན་ཁྱེད་རྣམས་ཡང་སོས་པར་གྱུར་ཅིག །སེམས་ཅན་ཁྱེད་རྣམས་ཡང་སོས་པར་གྱུར་ཅིག་ཅེས་སྒྲ་ཡང་གྲག་བར་འགྱུར་ཏེ། དེ་ནས་སེམས་ཅན་དེ་དག་ཡང་འཚོ་བར་འགྱུར་རོ། །དེ་ནས་ཡང་སེམས་ཅན་དེ་དག་གི་སྡིག་པ་མི་དགེ་བའི་ལས་དེའི་རྣམ་པ་སྨིན་པས་ལྕགས་ཀྱི་ཤང་ལང་རྣོ་ཞིང་ཤིན་ཏུ་རྣོ་ལ། སྤུ་གྱེན་ཀར་ཆོད་པ་དག་ལག་ཏུ་འོང་བར་འགྱུར་རོ། །སེམས་ཅན་དེ་དག་ཀྱང་སེམས་ཅན་གཅིག་གིས་གཅིག་མཐོང་ན་སྔ་མ་བཞིན་དུ་གསད་པའི་སེམས་ཉེ་བར་གནས་པར་འགྱུར་ཏེ། དེ་དག་ཤང་ལང་དེ་དག་གིས་གཅིག་ལ་གཅིག་ཀུན་ཏུ་གཅོད་ཅིང་ཀུན་དུ་འབིགས་ལ། ཀུན་ཏུ་གཏུབས་ཤིང་ཀུན་ཏུ་གཤེག་པར་བྱེད་དེ། སྔ་མ་བཞིན་དུ་ཤི་བར་གྱུར་ནས་ཕྱོགས་གཅིག་ཏུ་འདུའོ། །གཞན་ཡང་སེམས་ཅན་དམྱལ་བ་ཆེན་པོ་ཡང་སོས་སུ་སེམས་ཅན་གང་སྐྱེས་པ་དང༌། ཀུན་ཏུ་སྐྱེས་པ་དང༌། བྱུང་བ་དང༌། ཀུན་ཏུ་བྱུང་བ་དང༌། ཕྱིན་པ་དང༌། མངོན་པར་གྲུབ་པ་དང༌། འཐོན་པར་གྱུར་པའི་སེམས་ཅན་དེ་དག་གི་སྡིག་པ་མི་དགེ་བའི་ལས་དེའི་རྣམ་པར་སྨིན་པས་ལྕགས་ཀྱི་ཆུ་གྲི་ལག་ཏུ་འོང་བར་འགྱུར་རོ། །སེམས་ཅན་དེ་དག་ཀྱང་སེམས་ཅན་གཅིག་གིས་གཅིག་མཐོང་ན་ཤས་ཆེར་སྡང་བའི་སེམས་དང་གསད་པའི་སེམས་ཉེ་བར་གནས་པར་འགྱུར་ཏེ། སྔ་མ་བཞིན་ནོ། །དེ་དག་ཆུ་གྲི་དེ་དག་གིས་གཏུབ་ཅིང་རབ་ཏུ་གཏུབ་ལ་ཀུན་ཏུ་རབ་ཏུ་གཏུབ་པར་བྱེད་དོ། །གཏུབས་ཤིང་རབ་ཏུ་གཏུབས་ལ་ཀུན་ཏུ་རབ་ཏུ་གཏུབས་ནས་གང་གི་ཚེ་གཅིག་གིས་གཅིག་བསད་དེ་ཤི་བར་གྱུར་པ་དེའི་ཚེ་ཕྱོགས་གཅིག་ཏུ་འདུའོ། །དུས་གཞན་ཞིག་ན་སེམས་ཅན་དམྱལ་བ་ཆེན་པོ་ཡང་སོས་སུ་རླུང་བསིལ་བ་ལྡན་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དེ། འདི་སྐད་དུ་སེམས་ཅན་ཁྱེད་རྣམས་ཡང་སོ་སོས་པར་གྱུར་ཅིག །སེམས་ཅན་ཁྱེད་རྣམས་ཡངས་སོ་པར་གྱུར་ཅིག་ཅེས་སྒྲ་ཡང་གྲགས་པ་གྱུར་ཏེ། དེ་ནས་སེམས་ཅན་དེ་དག་ཡང་འཚོ་བར་འགྱུར་རོ། །དེ་ནས་ཡང་སེམས་ཅན་དེ་དག་གི་སྡིག་པ་མི་དགེ་བའི་ལས་དེའི་རྣམ་པར་སྨིན་

---

^{[མ་དཔེ་གཟིགས་ན་འདིར་གནོན།]}

པས་ལྕགས་ཀྱི་ཆུ་གྲི་ལག་ཏུ་འོང་བར་འགྱུར་བ་ནས་གཅིག་གིས་གཅིག་བསད་དེ་དེ་ཤི་བར་གྱུར་པ་དེའི་ཚེ་ཕྱོགས་གཅིག་ཏུ་འདུ་བའི་བར་དུ་རྒྱས་པར་བྱའོ། །གཞན་ཡང་སེམས་ཅན་དམྱལ་བ་ཆེན་པོ་ཡང་སོས་སུ་སེམས་ཅན་གང་སྐྱེས་པ་ནས་སྡིག་པ་མི་དགེ་བའི་ལས་དེའི་རྣམ་པར་སྨིན་པས་ལྕགས་ཀྱི་སེན་མོ་རྣོ་ཞིང་ཤིན་ཏུ་རྣོ་ལ་རལ་གྲིའི་སོ་ལྟ་བུ་དག་ལག་ཏུ་འོང་བར་འགྱུར་བའི་བར་དུ་སྔ་མ་བཞིན་དུ་རྒྱས་པར་བྱའོ། །སེམས་ཅན་དེ་དག་གཅིག་གིས་གཅིག་མཐོང་ན་ཤས་ཆེར་སྡང་བའི་སེམས་དང་གསད་པའི་སེམས་ཉེ་བར་གནས་པར་འགྱུར་ཏེ། སྔ་མ་བཞིན་ནོ། །དེ་དག་སེན་མོ་དེ་དག་གིས་གཤགས་རབ་ཏུ་གསལ་ཏེ། གཅིག་གིས་གཅིག་གཤགས་ཤིང་རབ་ཏུ་གསལ་ནས། གང་གི་ཚེ་གཅིག་གིས་གཅིག་བསད་དེ་ཤི་བར་གྱུར་བ་དེའི་ཚེ་ཕྱོགས་གཅིག་ཏུ་འདུའོ། །དུས་གཞན་ཞིག་ན་སེམས་ཅན་དམྱལ་བ་ཆེན་པོ་ཡང་སོས་སུ་རླུང་བསིལ་བ་ལྡང་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དེ། དེ་ནས་ཡང་སེམས་ཅན་དེ་དག་ཡང་འཚོ་བར་འགྱུར་བའི་བར་དུ་རྒྱས་པ་བྱའོ། །དེ་ནས་ཡང་སེམས་ཅན་དེ་དག་གི་སྡིག་པ་མི་དགེ་པའི་ལས་དེའི་རྣམ་པར་སྨིན་པས་ལྕགས་ཀྱི་སེན་མོ་རྣོ་ཞིང་ཤིན་ཏུ་རྣོ་ལ་རལ་གྲིའི་སོ་ལྟ་བུ་དག་ལག་ཏུ་འོང་བར་འགྱུར་རོ། །སེམས་ཅན་དེ་དག་ཀྱང་སེམས་ཅན་གཅིག་གིས་གཅིག་མཐོང་ན་སྔ་མ་བཞིན་དུ་ཤི་བར་གྱུར་ན་ཕྱོགས་གཅིག་ཏུ་འདུའོ། །གཞན་ཡང་སེམས་ཅན་དམྱལ་བ་ཆེན་པོ་ཡང་སོས་སུ་སེམས་ཅན་གང་སྐྱེས་པ་ནས་འཐོན་པར་འགྱུར་བའི་བར་སུ་སྟེ། སེམས་ཅན་དེ་དག་གི་སྡིག་པ་མི་དགེ་བའི་ལས་དེའི་རྣམ་པར་སྨིན་པས་ལྕགས་ཀྱི་མདུང་ཐུང་རྣོ་ཞིང་ཤིན་ཏུ་རྣོ་ལ་རལ་གྲིའི་སོ་ལྟ་བུ་དག་ལག་ཏུ་འོང་བར་འགྱུར་རོ། །སེམས་ཅན་དེ་དག་ཀྱང་སེམས་ཅན་གཅིག་གིས་གཅིག་མཐོང་ན་ཤས་ཆེར་སྡང་བའི་སེམས་དང༌། གསད་པའི་སེམས་ཉེ་བར་གནས་པར་འགྱུར་ཏེ་སྔ་མ་བཞིན་ནོ། །དེ་དག་མདུང་ཐུང་དེ་དག་གིས་གཅིག་གིས་གཅིག་ཀུན་ཏུ་འབིགས་ཤིང་ངེས་པར་འབིགས་ཏེ། གང་གི་ཚེ་གཅིག་གིས་གཅིག་བསད་ནས་ཤི་བར་འགྱུར་བ་དེའི་ཚེ་ཕྱོགས་གཅིག་ཏུ་འདུའོ། །དུས་གཞན་ཞིག་ན་སེམས་ཅན་དམྱལ་བ་ཆེན་པོ་ཡང་སོས་སུ་

---

^{[མ་དཔེ་གཟིགས་ན་འདིར་གནོན།]}

རླུང་བསིལ་བ་ལྡང་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དོ། །དེ་ནས་སེམས་ཅན་དེ་དག་ཡང་འཚོ་བར་འགྱུར་བའི་བར་དུ་རྒྱས་པར་བྱའོ། །དེ་ནས་ཡང་སེམས་ཅན་དེ་དག་གི་སྡིག་པ་མི་དགེ་བའི་ལས་དེའི་རྣམ་པར་སྨིན་པས་ལྕགས་ཀྱི་མདུང་ཐུང་ལག་ཏུ་འོང་བར་འགྱུར་ནས་ཤི་བར་གྱུར་ནས་ཕྱོགས་གཅིག་ཏུ་འདུ་བའི་བར་དུ་རྒྱས་པར་བྱའོ། །གཞན་ཡང་སེམས་ཅན་དམྱལ་བ་ཆེན་པོ་ཡང་སོས་སུ་སེམས་ཅན་གང་སྐྱེས་པ་ནས་འཐོན་པར་འགྱུར་བའི་བར་དུ་སྔ་མ་བཞིན་ནོ། །སེམས་ཅན་དེ་དག་གི་སྡིག་པ་མི་དགེ་བའི་ལས་དེའི་རྣམ་པར་སྨིན་པས་ལྕགས་ཀྱི་ཐོ་བ་ལག་ཏུ་འོང་བར་འགྱུར་རོ། །སེམས་ཅན་དེ་དག་ཀྱང་སེམས་ཅན་གཅིག་གིས་གཅིག་མཐོང་ན་ཤས་ཆེར་སྡང་བའི་སེམས་དང༌། གསད་པའི་སེམས་ཉེ་བར་གནས་པར་འགྱུར་ཏེ། དཔེར་ན་རྔོན་པ་བཞིན་ཏེ་སྔ་མ་བཞིན་ནོ། དེ་དག་ཐོ་བ་དེ་དག་གིས་གཅིག་གིས་གཅིག་འཇོམས་ཤིང་རབ་ཏུ་འཇོམས་ལ་ཀུན་ཏུ་རབ་ཏུ་འཇོམས་ཏེ། བཅོམ་ཞིང་རབ་ཏུ་བཅོམ་ལ་ཀུན་ཏུ་བཅོམ་ན་གང་གི་ཚེ་གཅིག་གིས་གཅིག་བསད་དེ་ཤི་བར་གྱུར་པའི་ཚེ་ཕྱོགས་གཅིག་ཏུ་འདུའོ། །དུས་གཞན་ཞི་ན་སེམས་ཅན་དམྱལ་བ་ཆེན་པི་ཡང་སོས་སུ་རླུང་བསིལ་པ་ལྡན་བ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དེ། འདི་སྐད་དུ་སེམས་ཅན་ཁྱེད་རྣམས་སོས་པར་གྱུར་ཅིག །སེམས་ཅན་ཁྱེད་རྣམས་ཡང་སོས་པར་གྱུར་ཅིག་ཅེས་སྒྲ་ཡང་གྲག་པར་འགྱུར་ཏེ། དེ་ནས་སེམས་ཅན་དེ་དག་ཡང་འཚོ་བར་འགྱུར་རོ། །དེ་ནས་ཡང་སེམས་ཅན་དེ་དག་གི་སྡིག་པ་མི་དགེ་བའི་ལས་དེའི་རྣམ་པར་སྨིན་པས་ལྕགས་ཀྱི་ཐོ་བ་དག་ལག་ཏུ་འོང་བར་འགྱུར་རོ། །སེམས་ཅན་དེ་དག་ཀྱང་སེམས་ཅན་གཅིག་གིས་གཅིག་མཐོང་བ་དང༌། ཤི་བར་གྱུར་པས་ན་ཕྱོགས་གཅིག་ཏུ་འདུ་བའི་བར་དུ་སྔ་མ་བཞིན་ནོ། །འཁོར་ལོ་དང༌། རྡོ་རྗེ་རྩེ་གཅིག་པ་དང༌། འཕང་མདུང་དང༌། གཞུ་ལ་སོགས་པའི་མཚོན་རྣམས་ཀྱང་དེ་བཞིན་དུ་བརྗོད་པར་བྱ་སྟེ། མི་བཟད་པ་དེ་དག་དང༌། མེ་ཏོག་དེ་དག་དང༌། འབྲས་བུ་དེ་དང༌། རྣམ་པར་སྤྲོས་པ་དེ་དག་གིས་ན་སེམས་ཅན་དམྱལ་བ་ཆེན་པོ་ཡང་སོས་ཞེས་བྱ་སྟེ། དེ་ན་སྡུག་བསྔལ་ཞིང་མི་བཟད་ལ།

---

^{[མ་དཔེ་གཟིགས་ན་འདིར་གནོན།]}

རྩུབ་ཅིང་ཚ་བ་དང་ཡིད་དུ་མི་འོང་ཞིང་སྲོག་གཅོད་པར་བྱེད་པ་ལས་ཀྱི་གནོད་པ་གཞན་དང་གཞན་མང་པོ་དག་ཡོད་དེ། འདི་སྐད་དུ། ཕན་ཚུན་འཁོན་ཞིང་ཞེ་གནོན་ལ། །མི་རྣམས་མི་ལ་གསོད་པ་དག །ལོ་ནི་བྱེ་བ་ཕྲག་སྟོང་དུ། །བསད་ཅིང་བསད་ཅིང་ཕྱིར་ཡང་འཚོ། །ཞེས་ཀྱང་བྱའོ། །གང་བདག་ཕ་མ་སངས་རྒྱས་དང༌། །ཉན་ཐོས་རྣམས་ལ་སྡང་པ་ནི། །དམྱལ་བ་ཆེན་པོ་ཐིག་ནག་ཏུ། །སྡུག་བསྔལ་ཚོར་བ་མྱོང་བར་འགྱུར། །སེམས་ཅན་དམྱལ་བ་ཆེན་པོ་ཐིག་ནག་ཅེས་བྱ་བ་ལ་ཅིའི་ཕྱིར་སེམས་ཅན་དམྱལ་བ་ཆེན་པོ་ཐིག་ནག་ཅེས་བྱ་ཞེ་ན། སྨྲས་པ། སེམས་ཅན་དམྱལ་པ་ཆེན་པོ་ཐིག་ནག་ཏུ་སེམས་ཅན་གང་སྐྱེས་པ་དང་ཀུན་ཏུ་སྐྱེས་པ་དང༌། བྱུང་བ་དང༌། ཀུན་ཏུ་བྱུང་བ་ནས་འཐོན་པར་གྱུར་པའི་བར་དག་གི་སྡིག་པ་མི་དགེ་བའི་ལས་དེའི་རྣམ་པར་སྨིན་པས་སེམས་ཅན་དམྱལ་བའི་སྲུང་མ་དག་གིས་སེམས་ཅན་དག་ལྕགས་ཀྱིས་གཞི་འབར་ཞིང་རབ་ཏུ་འབར་ལ་ཀུན་ཏུ་རབ་ཏུ་འབར་རོ། །འབར་བ་གཅིག་ཏུ་གྱུར་པ་ལ་གན་རྐྱལ་དུ་བཞག་ནས་ལྕགས་ཀྱི་ཐིག་གིས་བཏབ་སྟེ། ལྕགས་ཀྱི་སྟེའུ་འབར་ཞིང་རབ་ཏུ་འབར་ལ་ཀུན་ཏུ་འབར་ཏེ་འབར་བ་གཅིག་ཏུ་གྱུར་པ་དག་གིས་འཇོག་ཅིང་རབ་ཏུ་འཇོག་ལ་ཀུན་ཏུ་རབ་ཏུ་འཇོག་ཏེ། དཔེར་ན་ཤིང་མཁན་གྱིས་ཤིང་ས་ལ་བཞག་ནས། ཐིག་གིས་བཏབ་ཏེ་སྟེ་འུས་འཇོག་ཅིང༌། རབ་ཏུ་འཇོག་ལ་ཀུན་ཏུ་རབ་ཏུ་འཇོག་བ་དེ་བཞིན་དུ། སེམས་ཅན་དམྱལ་བའི་སྲུང་མ་དག་གིས་སེམས་ཅན་དེ་དག་ལྕགས་ཀྱི་ས་གཞི་འབར་ཞིང་རབ་ཏུ་འབར་ལ་ཀུན་དུ་འབར་ལ་འབར་བ་གཅིག་ཏུ་གྱུར་པ་ལ། གན་རྐྱལ་དུ་བཞག་ནས་ལྕགས་ཀྱི་ཐིག་བཏབ་སྟེ། ལྕགས་ཀྱི་སྟེ་འུས་འཇོག་ཅིང་རབ་ཏུ་འཇོག་ལ་ཀུན་དུ་རབ་ཏུ་འཇོག་གོ །གཞན་ཡང་སེམས་ཅན་དམྱལ་བ་ཆེན་པོ་ཐིག་ནག་ཏུ་སེམས་ཅན་གང་སྐྱེས་པ་ནས་འཐོན་པར་གྱུར་པའི་བར་དག་གི་སྡིག་པ་མི་དགེ་བའི་ལས་དེའི་རྣམ་པར་སྨིན་པས་སེམས་ཅན་དམྱལ་བའི་སྲུང་མ་དག་གིས་སེམས་ཅན་དེ་དག་ལྕགས་ཀྱི་ས་གཞི་རབ་ཏུ་འབར་ལ་ཀུན་ཏུ་རབ་ཏུ་འབར་ཏེ། འབར་བ་གཅིག་ཏུ་གྱུར་པ་ལ་གན་རྐྱལ་དུ་བཞག་ནས་ལྕགས་ཀྱི་ཐིག་གིས་བཏབ་སྟེ་ལྕགས་ཀྱི་སྟ་རེ་འབར་ཞིང་རབ་ཏུ་འབར་

---

^{[མ་དཔེ་གཟིགས་ན་འདིར་གནོན།]}

ལ་ཀུན་ཏུ་རབ་ཏུ་འབར་སྟེ། འབར་བ་གཅིག་ཏུ་གྱུར་པས་གསལ་ཏེ། དཔེར་ན་ཤིང་མཁན་གྱིས་ཤིང་ས་ལ་བཞག་ནས་ཐིག་གིས་བཏབ་སྟེ། སྟ་རེས་གསལ་བ་དེ་བཞིན་དུ་སེམས་ཅན་དམྱལ་བའི་སྲུང་མ་དག་གིས། སེམས་ཅན་དེ་དག་ལྕགས་ཀྱི་ས་གཞི་འབར་ཞིང་རབ་ཏུ་འབར་ལ་ཀུན་ཏུ་རབ་ཏུ་འབར་ཏེ། འབར་བ་གཅིག་ཏུ་གྱུར་པ་ལ་སྟ་རེས་གཟས་པའི་བར་དུ་སྔ་མ་བཞིན་ནོ། །གཞན་ཡང་སེམས་ཅན་དམྱལ་བ་ཆེན་པོ་ཐིག་ནག་ཏུ་སེམས་ཅན་གང་སྐྱེས་པ་ནས་འཐོན་པའི་བར་དུ་སྔ་མ་བཞིན་ཏེ། སྡིག་པ་མི་དགེ་བའི་ལས་དེའི་རྣམ་པར་སྨིན་པས་སེམས་ཅན་དམྱལ་བའི་སྲུང་མ་དག་གིས་སེམས་ཅན་དེ་དག་ལྕགས་ཀྱི་ས་གཞི་འབར་ཞིང་རབ་ཏུ་འབར་ལ་ཀུན་ཏུ་རབ་ཏུ་འབར་ཏེ། འབར་བ་གཅིག་ཏུ་གྱུར་བ་ལ་མགོ་ཐུར་དུ་བསྟན་ཏེ་བཞག་ནས་སོག་ལེས་ཁ་གཉིས་སམ། ཁ་གསུམ་མམ། ཁ་མང་དུ་གཤག་པར་བྱེད་དེ། དཔེར་ན་ཤིང་མཁན་གྱིས་ཤིང་ས་ལ་མགོ་ཐུར་དུ་བསྟན་ཏེ་བཞག་ནས་ཁ་གཉིས་སམ། ཁ་གསུམ་མམ། ཁ་མང་དུ་གཤག་པར་བྱེད་པ་དེ་བཞིན་དུ་སེམས་ཅན་དམྱལ་བའི་སྲུང་མ་དེ་དག་གིས་སེམས་ཅན་དེ་དག་ལྕགས་ཀྱི་ས་གཞི་འབར་བ་ལ་མགོ་ཐུར་དུ་བསྟན་ཏེ་བཞག་ནས་ཁ་གཉིས་སམ། གསུམ་མམ། ཁ་མང་དུ་གཤགས་པའི་བར་དུ་སྔ་མ་བཞིན་དུ་རྒྱས་པར་བྱའོ། །གཞན་ཡང་སེམས་ཅན་དམྱལ་བ་ཆེན་པོ་ཐིག་ནག་ཏུ་སེམས་ཅན་གང་སྐྱེས་པ་དང༌། ཀུན་ཏུ་སྐྱེས་པ་དང༌། འཐོན་པར་འགྱུར་བའི་བར་དག་གི་སྡིག་པ་མི་དགེ་བའི་ལས་དེའི་རྣམ་བར་སྨིན་པས་སེམས་ཅན་དམྱལ་བའི་སྲུང་མ་དག་གིས་སེམས་ཅན་དེ་དག་ལྕགས་ཀྱི་རྒྱུད་འབར་ཞིང་རབ་ཏུ་འབར་ལ་ཀུན་ཏུ་རབ་ཏུ་འབར་ཏེ་འབར་བ་གཅིག་ཏུ་གྱུར་པས་མགོ་བོ་དཀྲི་བར་བྱེད་དོ། །མགོ་བོ་དཀྲིས་ནས་མགུལ་བ་དཀྲི་བར་བྱེད་དོ། །མགུལ་པ་དཀྲིས་ནས་ཕྲག་པ་གཉིས་དཀྲི་བར་བྱེད་དོ། །ཕྲག་པ་གཉིས་དཀྲིས་ནས་ལག་པ་གཉིས་དཀྲི་བར་བྱེད་དོ། །ལག་པ་གཉིས་དཀྲིས་ནས་མཆན་གཉིས་དཀྲི་བར་བྱེད་དོ། །མཆན་གཉིས་དཀྲིས་ནས་སྟ་ཟུར་དཀྲི་བར་བྱེད་དོ། །སྟ་ཟུར་དཀྲིས་ནས་བརླ་གཉིས་དཀྲི་བར་བྱེད་དོ། །བརླ་གཉིས་དཀྲིས་ནས་རྗེ་བར་གཉིས་དཀྲི་

---

^{[མ་དཔེ་གཟིགས་ན་འདིར་གནོན།]}

བར་བྱེད་དོ། །རྗེ་ངར་གཉིས་དཀྲིས་ནས་ལོང་བུ་གཉིས་དཀྲི་བར་བྱེད་དོ། །ལོང་བུ་གཉིས་དཀྲིས་ནས་རྐང་པའི་བོལ་གཉིས་དཀྲི་བར་བྱེད་དོ། །རྐང་པའི་བོལ་གཉིས་དཀྲིས་ནས་རྒྱུད་དེའི་ཐོར་ཏོ་ནས་བཟུང་སྟེ། སེན་མོ་ཡན་ཆད་ཀྱང་དཀྲི་བར་བྱེད་དོ། །སེམས་ཅན་དེ་དག་གི་པགས་པ་དང་ཤ་དང་ཁྲག་ཡན་ཆད་ཐམས་ཅད་ཕྱིར་བྱུང་ངོ༌། །དེ་ལ་སོགས་པ་དེ་ལས་གཞན་པའི་གནོད་པ་རྣམས་ཀྱང་བཤད་པར་བྱ་སྟེ། མི་བཟད་པ་དེ་དག་དང༌། མེ་ཏོག་དེ་དག་དང༌། འབྲས་བུ་དེ་དག་དང༌། རྣམ་པར་སྤྲོས་པ་དེ་དག་གིས་ན་སེམས་ཅན་དམྱལ་བ་ཆེན་པོ་ཐིག་ནག་ཅེས་བྱ་བ་སྟེ། དེ་ན་སྡུག་བསྔལ་ཞིང་མི་བཟད་ལ་རྩུབ་ཅིང་ཚ་བ་དང༌། ཡིད་དུ་མི་འོང་ཞིང་སྲོག་གཅོད་པར་བྱེད་པ་ལས་ཀྱི་གནོད་པ་གཞན་དང༌། གཞན་མང་པོ་དག་ཀྱང་ཡོད་དེ། འདི་སྐད་དུ། བྱ་མིན་བྱེད་དུ་འཇུག་པ་དང༌། །མི་རྣམས་མཛའ་བོ་འབྱེད་པ་དང༌། །ཕྲ་མ་བརྫུན་སྨྲ་རྒྱུ་བྱེད་པ། །ཐིག་ནག་ཏུ་ནི་སྐྱེ་བར་འགྱུར། །ཞེས་ཀྱང་བྱའོ། །བར་གྱི་མདོ་ལ། རལ་གྲི་ཤང་ལང་ཆུ་གྲི་དང༌། །སེན་མོ་མདུང་ཐུང་ཐོ་བ་རྣམས། །སྟེའུ་དང་སྟ་རེ་སོག་ལེ་དང༌། །རྒྱུད་བཞི་དག་ནི་ཐིག་ནག་གོ །སྡིག་པ་རྣམ་གསུམ་བྱས་པ་དང༌། །དགེ་བ་རྣམ་གསུམ་མ་བྱས་པའི། །བློ་ངན་བསྡུས་གཞོམ་སོང་ནས་ནི། །སྡུག་བསྔལ་ཚོར་བ་མྱོང་བར་འགྱུར། །སེམས་ཅན་དམྱལ་བ་ཆེན་པོ་བསྡུས་གཞོམ་ཞེས་བྱ་བ་ལ་ཅིའི་ཕྱིར་སེམས་ཅན་དམྱལ་བ་ཆེན་པོ་བསྡུས་གཞོམ་ཞེས་བྱ་ཞེ་ན། སྨྲས་པ། སེམས་ཅན་དམྱལ་བ་ཆེན་པོ་བསྡུས་གཞོམ་དུ་སེམས་ཅན་གང་སྐྱེས་པ་དང༌། ཀུན་ཏུ་སྐྱེས་པ་དང༌། བྱུང་བ་དང༌། ཀུན་ཏུ་བྱུང་བ་དང༌། ཕྱིན་པ་དང༌། མངོན་པར་གྲུབ་པ་དང༌། འཐོན་པར་གྱུར་པའི་སེམས་ཅན་དེ་དག་གི་སྡིག་བ་མི་དགེ་བའི་ལས་དེའི་རྣམ་པར་སྨིན་པས་ལྕགས་ཀྱི་ས་གཞི་དཔག་ཚད་མང་པོ་དང༌། དཔག་ཚད་བརྒྱ་ཕྲག་མང་པོ་དང༌། དཔག་ཚད་སྟོང་ཕྲག་མང་པོ་དང༌། དཔག་ཚད་བརྒྱ་སྟོང་ཕྲག་མང་པོ་ཡོད་པ་བྱུང་ངོ༌། །དེ་ནས་སེམས་ཅན་དེ་དག་གནས་ཚོལ་ཞིང་སྐྱབས་ཚོལ་བ་དང་བྱུང་བའི་ཐབས་ཚོལ་ཏེ། དེར་རྒྱུག་ཅིང་དེར་རབ་ཏུ་རྒྱུག་ལ། དེར་ཀུན་ཏུ་རབ་ཏུ་རྒྱུག་སྟེ། དེ་དག་དེར་ཕྱོགས་

---

^{[མ་དཔེ་གཟིགས་ན་འདིར་གནོན།]}

གཅིག་ཏུ་འདུའོ། །གང་གི་ཚེ་བརྒྱ་ཕྲག་མང་པོ་དང༌། སྟོང་ཕྲག་མང་པོ་དང༌། བརྒྱ་སྟོང་ཕྲག་མང་པོ་འདུས་པར་གྱུར་པ་དེའི་ཚེ། དེ་དག་འཁོད་པའི་སྟེང་དུ་ལྕགས་ཀྱི་དྲ་བ་འབྱུང་བར་འགྱུར་ཏེ། སེམས་ཅན་དེ་དག་འགེབས་ཤིང་རབ་ཏུ་འགེབས་ལ། ཀུན་ཏུ་རབ་ཏུ་འགེབས་སོ།། བཀབ་ཅིང་རབ་ཏུ་བཀབ་ལ་ཀུན་ཏུ་རབ་ཏུ་བཀབ་ནས། དེ་དག་འཁོད་པའི་སྟེང་དུ་ལྕགས་ཀྱི་ཐོ་བ་དག་འབྱུང་པར་འགྱུར་ཏེ། སེམས་ཅན་དེ་དག་ལ་འཇོམས་ཤིང་རབ་ཏུ་འཇོམས་ལ་ཀུན་ཏུ་རབ་ཏུ་འཇོམས་སོ། །བཅོམ་ཞིང་རབ་ཏུ་བཅོམ་ལ་ཀུན་ཏུ་རབ་ཏུ་བཅོམ་ནས། གང་གི་ཚེ་བསད་དེ་ཤི་བར་གྱུར་པ་དེའི་ཚེ་སྟེང་དུ་མི་སྣང་བར་འགྱུར་རོ། །དེ་དག་དེ་ལྟ་བུའི་ཚུལ་གྱིས་ལོ་མང་པོ་དང༌། ལོ་བརྒྱ་ཕྲག་མང་པོ་དང༌། ལོ་སྟོང་ཕྲག་མང་པོ་དང༌། ལོ་བརྒྱ་སྟོང་ཕྲག་མང་པོར་སྡུག་བསྔལ་ཞིང་མི་བཟད་ལ། རྩུབ་ཅིང་ཚ་བ་དང༌། ཡིད་དུ་མི་འོང་ཞིང་སྲོག་གཅོད་པར་བྱེད་པའི་ཚོར་བ་དག་ཉམས་སུ་མྱོང་བར་འགྱུར་ཏེ། དེ་དག་ནམ་སེམས་ཅན་དམྱལ་བ་ཉམས་སུ་མྱོང་བར་འགྱུར་བའི་སྡིག་པ་མི་དགེ་བའི་ལས་དེའི་གཏན་ནས་མ་བྱང་མ་ཟད་ཀྱི་བར་དུ་རེ་ཞིག་དུས་བྱེད་པར་མི་འགྱུར་རོ། །གཞན་ཡང་སེམས་ཅན་དམྱལ་བ་ཆེན་པོ་བསྡུས་གཞོམ་དུ་སེམས་ཅན་གང་སྐྱེས་པ་ནས་འཐོན་པར་འགྱུར་པའི་བར་དུ་སྔ་མ་བཞིན་ཏེ། སེམས་ཅན་དེ་དག་གིས་སྡིག་པ་མི་དགེ་བའི་ལས་དེའི་རྣམ་པར་སྨིན་པས་ལྕགས་ཀྱི་ས་གཞི་དཔག་ཚད་མང་པོ་དང༌། དཔག་ཚད་བརྒྱ་ཕྲག་མང་པོ་དང༌། དཔག་ཚད་སྟོང་ཕྲག་མང་པོ་དང༌། དཔག་ཚད་བརྒྱ་སྟོང་ཕྲག་མང་པོ་ཡོད་པར་འགྱུར་རོ། །དེ་ནས་སེམས་ཅན་དེ་དག་གནས་ཚོལ་ཞིང་སྐྱབས་ཚོལ་ལ་འབྱུང་བའི་ཐབས་ཚོལ་ཏེ། དེར་རྒྱུག་ཅིང་དེར་རབ་ཏུ་རྒྱུག་ལ། དེར་ཀུན་ཏུ་རབ་ཏུ་རྒྱུག་སྟེ། དེ་དག་དེར་ཕྱོགས་གཅིག་ཏུ་འདུ་བ་ནས་བརྒྱ་ཕྲག་མང་པོའི་བར་དུ་སྔ་མ་བཞིན་ཏེ། དེའི་ཚེ་དེ་དག་འཁོད་པའི་སྟེང་དུ་ལྕགས་ཀྱི་དྲ་བ་འབྱུང་བར་འགྱུར་ཏེ། སེམས་ཅན་དེ་དག་འགེབས་ཤིང་རབ་ཏུ་འགེབས་ལ་ཀུན་ཏུ་རབ་ཏུ་འགེབས་སོ། །དེའི་ཚེ་དེ་དག་འཁོད་པའི་སྟེང་དུ་གླང་པོ་ཆེ་དག་འབྱུང་བར་འགྱུར་ཏེ། སེམས་ཅན་དེ་དག་འཆག་ཅིང་རབ་ཏུ་འཆག་ལ་ཀུན་ཏུ་རབ་ཏུ་འཆག་གོ །བཅགས་

---

^{[མ་དཔེ་གཟིགས་ན་འདིར་གནོན།]}

ཤིང་རབ་ཏུ་བཅགས་ལ་ཀུན་ཏུ་རབ་ཏུ་བཅགས་ནས། གང་གི་ཚེ་བསད་དེ་ཤི་བར་གྱུར་པ་དེའི་ཚེ་སྟེང་དུ་མི་སྣང་བར་འགྱུར་རོ། །དེ་དག་དེ་ལྟ་བུའི་ཚུལ་གྱིས་ལོ་མང་པོ་ནས་མ་བྱང་མ་ཟད་ཀྱི་བར་དུ་སྔ་མ་བཞིན་ནོ། །གཞན་ཡང་སེམས་ཅན་དམྱལ་བ་ཆེན་པོ་བསྡུས་གཞོམ་དུ་སེམས་ཅན་གང་སྐྱེས་པ་ནས་འཐོན་པར་འགྱུར་བའི་བར་དུ་སྟེ། སེམས་ཅན་དེ་དག་སྡིག་པ་མི་དགེ་བའི་ལས་དེའི་རྣམ་པར་སྨིན་པས་སེམས་ཅན་དམྱལ་བའི་སྲུང་མ་དག་གིས་བཟུང་ནས་ལྕགས་ཀྱི་གཏུན་གྱི་ནང་དུ་བཅུག་སྟེ། ལྕགས་ཀྱི་གཏུན་བུ་དག་གིས་མྱུར་བ་མྱུར་བར་བརྡུང་ཞིང་རབ་ཏུ་བརྡུང་ལ་ཀུན་ཏུ་བརྡུང་སྟེ། དཔེར་ན་མི་རྣམས་ཀྱིས་གཏུན་གྱི་ནང་དུ་འབྲས་བླུགས་ནས་གཏུན་བུས་མྱུར་བ་མྱུར་བར་བརྡུང་ཞིང་རབ་ཏུ་བརྡུང་ལ་ཀུན་ཏུ་རབ་ཏུ་བརྡུང་བ་དེ་བཞིན་དུ་སེམས་ཅན་དམྱལ་བའི་སྲུང་མ་དེ་དག་གིས། སེམས་ཅན་དེ་དག་ལྕགས་ཀྱི་གཏུན་གྱི་ནང་དུ་བཅུག་སྟེ། ལྕགས་ཀྱི་གཏུན་བུ་ཞེས་བྱ་བ་ནས་ཀུན་ཏུ་རབ་ཏུ་བརྡུང་སྟེ། དེ་དག་དེ་ལྟ་བུའི་ཚུལ་གྱིས་ལོ་མང་པོ་ཞེས་བྱ་བའི་བར་དུ་རྒྱས་པར་བྱའོ། །གཞན་ཡང་སེམས་ཅན་དམྱལ་བ་ཆེན་པོ་བསྡུས་གཞོམ་དུ། སེམས་ཅན་གང་སྐྱེས་པ་ནས་འཐོན་པར་གྱུར་པའི་བར་དུ་རྒྱས་པར་བྱ་སྟེ། སེམས་ཅན་དམྱལ་བའི་སྲུང་མ་དེ་དག་གིས། སེམས་ཅན་དེ་དག་བཟུང་ནས་ལྕགས་ཀྱི་སྒྲོམ་གྱི་ནང་དུ་བཅུག་སྟེ་ལྕགས་ཀྱི་གཏུན་བུ་དག་གིས་བརྡུང་ཞིང་རབ་ཏུ་བརྡུང་ལ་ཀུན་ཏུ་བརྡུང་སྟེ། དཔེར་ན་མི་རྣམས་ཀྱིས་དཀར་སྒྲོམ་གྱི་ནང་དུ་བླུགས་ནས་བརྡུང་ཞིང་རབ་ཏུ་བརྡུང་ལ་ཀུན་ཏུ་རབ་ཏུ་བརྡུང་བ་དེ་བཞིན་དུ། སེམས་ཅན་དམྱལ་བའི་སྲུང་མ་དེ་དག་གིས། སེམས་ཅན་དེ་དག་ལྕགས་ཀྱི་སྒྲོམ་གྱི་ནང་དུ་བཅུག་ནས་ལྕགས་ཀྱི་གཏུན་བུ་དག་གིས་བརྡུང་ཞིང་རབ་ཏུ་བརྡུང་ལ་ཀུན་ཏུ་རབ་ཏུ་བརྡུང་སྟེ། དཔེར་ན་མི་རྣམས་ཀྱིས་དཀར་སྒྲོམ་གྱི་ནང་དུ་བླུགས་ནས་བརྡུང་ཞིང་རབ་ཏུ་བརྡུང་ལ་ཀུན་ཏུ་རབ་ཏུ་བརྡུང་བ་དེ་བཞིན་དུ། སེམས་ཅན་དམྱལ་བའི་སྲུང་མ་དེ་དག་གིས། སེམས་ཅན་དེ་དག་ལྕགས་ཀྱི་སྒྲོམ་གྱི་ནང་དུ་བཅུག་ནས་ལྕགས་ཀྱི་གཏུན་བུ་དག་གིས་ཞེས་བྱ་བ་ནས། མ་བྱང་མ་ཟད་ཀྱི་བར་དུ་སྔ་མ་བཞིན་ནོ།།

---

^{[མ་དཔེ་གཟིགས་ན་འདིར་གནོན།]}

གཞན་ཡང་སེམས་ཅན་དམྱལ་བ་ཆེན་པོ་བསྡུས་གཞོམ་དུ་སེམས་ཅན་གང་སྐྱེས་པ་ནས་འཐོན་པར་གྱུར་པའི་བར་དུ་སྔ་མ་བཞིན་དུ་རྒྱས་པར་བྱ་སྟེ། སེམས་ཅན་དམྱལ་བའི་སྲུང་མ་དག་གིས་བཟུང་ནས་ལྕགས་ཀྱི་འཁྲུལ་འཁོར་གྱི་ནང་དུ་བཅུག་སྟེ། འཚིར་ཞིང་རབ་ཏུ་འཚིར་ལ་ཀུན་ཏུ་རབ་ཏུ་འཚིར་ཏེ། དཔེར་ན་མི་རྣམས་ཀྱིས་བུ་རམ་གྱི་ཤིང་དག་འཁྲུལ་འཁོར་གྱི་ནང་དུ་བཅུག་སྟེ། འཚིར་ཞིང་རབ་ཏུ་འཚིར་ལ་ཀུན་ཏུ་རབ་ཏུ་འཚིར་བ་དེ་བཞིན་དུ། སེམས་ཅན་དམྱལ་བའི་སྲུང་མ་དག་གིས་སེམས་ཅན་དེ་དག་བཟུང་ནས་ལྕགས་ཀྱི་འཁྲུལ་འཁོར་གྱི་ནང་དུ་བཅུག་པ་ནས་ཀུན་ཏུ་རབ་ཏུ་འཚིར་བའི་བར་དུ་དེ་དག་དེ་ལྟ་བུའི་ཚུལ་གྱིས་ལོ་མང་པོ་དང༌། ལོ་བརྒྱ་ཕྲག་མང་པོ་དང༌། ལོ་སྟོང་ཕྲག་མང་པོ་དང༌། ལོ་བརྒྱ་སྟོང་ཕྲག་མང་པོར་སྡུག་བསྔལ་ཞིང་མི་བཟད་ལ། རྩུབ་ཅིང་ཚ་བ་དང༌། ཡིད་དུ་མི་འོང་བའི་ཚོར་བ་དག་མྱོང་བར་འགྱུར་ཏེ། དེ་དག་ནམ་སེམས་ཅན་དམྱལ་བ་ཉམས་སུ་མྱོང་བར་འགྱུར་བའི་སྡིག་པ་མི་དགེ་བའི་ལས་དེ་གཏན་ནས་མ་བྱང་མ་ཟད་ཀྱི་བར་དུ་རེ་ཞིག་དུས་བྱེད་པར་མི་འགྱུར་རོ། །གཞན་ཡང་སེམས་ཅན་དམྱལ་བ་ཆེན་པོ་བསྡུས་གཞོམ་དུ་སེམས་ཅན་གང་སྐྱེས་པ་དང༌། ཀུན་ཏུ་སྐྱེས་པ་དང༌། བྱུང་བ་དང༌། ཀུན་ཏུ་བྱུང་བ་ནས་འཐོན་པར་གྱུར་པའི་བར་དུ་སྟེ། སེམས་ཅན་དེ་དག་གིས་སྡིག་པ་མི་དགེ་བའི་ལས་དེའི་རྣམ་པར་སྨིན་པས་རི་ཆེན་པོ་རྒྱ་ཆེ་བ་དཔག་ཚད་མང་པོ་དང༌། དཔག་ཚད་བརྒྱ་ཕྲག་མང་པོ་དང༌། དཔག་ཚད་སྟོང་ཕྲག་མང་པོ་དང༌། དཔག་ཚད་བརྒྱ་སྟོང་ཕྲག་མང་པོ་དག་ཡོད་དེ། སྟེང་གི་རོས་ནི་མཉམ་ཞིང་སྡུག་ལ་འོག་ན་ནི་ཁྲག་འབྱིན་པར་བྱེད་པའི་ལྕགས་ཡོད་དོ། །དེ་ནས་སེམས་ཅན་དེ་དག་དེར་རྒྱུག་ཅིང་རབ་ཏུ་རྒྱུག་ལ་དེར་ཀུན་ཏུ་རབ་ཏུ་རྒྱུག་སྟེ། གནས་ཚོལ་ཞིང་སྐྱབས་ཚོལ་ལ། འབྱུང་བའི་ཐབས་ཚོལ་ཞིང་དེ་དག་དེའི་ཕྱོགས་གཅིག་ཏུ་འདུ་སྟེ། གང་གི་ཚེ་བརྒྱ་ཕྲག་མང་པོ་ཞེས་བྱ་བ་ནས་རྒྱས་པར་བྱ་སྟེ། དེའི་ཚེ་རི་དེའི་སེམས་ཅན་དེ་དག་གི་སྟེང་དུ་ལྟུང་སྟེ། སེམས་ཅན་དེ་དག་གླེམ་ཞིང་རབ་ཏུ་གླེམ་ལ་ཀུན་ཏུ་རབ་ཏུ་གླེམ་མོ། །གླེམ་ཞིང་རབ་ཏུ་གླེམ་ལ་ཀུན་ཏུ་རབ་ཏུ་གླེམས་ནས། གང་གི་ཚེ་བསད་དེ་ཤི་བར་གྱུར་པ་དེའི་

---

^{[མ་དཔེ་གཟིགས་ན་འདིར་གནོན།]}

ཚེ་སྟེང་དུ་མི་སྣང་བར་འགྱུར་རོ། །དེ་དག་དེ་ལྟ་བུའི་ཚུལ་གྱིས་ལོ་མང་པོ་དང༌། ལོ་བརྒྱ་ཕྲག་མང་པོ་དང་ཞེས་བྱ་བ་ནས་རྒྱས་པར་བྱའོ། །གཞན་ཡང་སེམས་ཅན་དམྱལ་བ་ཆེན་པོ་བསྡུས་གཞོམ་དུ་སེམས་ཅན་གང་སྐྱེས་པ་དང༌། ཀུན་ཏུ་སྐྱེས་པའི་བར་དུ་སྔ་མ་བཞིན་ཏེ། སེམས་ཅན་དེ་དག་གི་སྡིག་པ་མི་དགེ་བའི་ལས་དེའི་རྣམ་པར་སྨིན་པས་རིའི་སུལ་ཆེན་པོ་དཔག་ཚད་མང་པོ་དང༌། དཔག་ཚད་བརྒྱ་ཕྲག་མང་པོའི་བར་དུ་སྔ་མ་བཞིན་ནོ། །དེ་ནས་སེམས་ཅན་དག་དེར་རྒྱུག་ཅིང་དེར་རབ་ཏུ་རྒྱུག་པ་ནས་འབྱུང་བའི་ཐབས་ཚོལ་བའི་བར་དུ་སྔ་མ་བཞིན་ནོ། །དེ་དག་དེར་ཞུགས་པ་ནས་བརྒྱ་ཕྲག་མང་པོ་ནང་དུ་ཞུགས་པའི་བར་དུ་སྟེ། དེའི་ཚེ་རིའི་སུལ་དེ་དག་ཕྱིར་གྱེད་དེ་སེམས་ཅན་དེ་དག་འཇིགས་པ་དང༌། དངང་བ་དང་སྤུ་ལྡང་བར་བྱེད་དོ། །དེ་ནས་སེམས་ཅན་དེ་དག་འཇིགས་ཤིང་སྐྲག་ལ་ཡི་ཆད་དེ་བ་སྤུ་ལངས་ནས་ཕྱོགས་གཅིག་ཏུ་འདུའོ། །གང་གི་ཚེ་བརྒྱ་ཕྲག་མང་པོ་དང༌། སྟོང་ཕྲག་མང་པོ་དང༌། བརྒྱ་སྟོང་ཕྲག་མང་པོ་དག་འདུས་པར་གྱུར་པ་དེའི་ཚེ་རི་དེ་དག་ཕྱོགས་གཉིས་ཀ་ནས་འདུ་སྟེ། སེམས་ཅན་དེ་དག་བཅོམ་ཞིང་རབ་ཏུ་བཅོམ་ལ་ཀུན་ཏུ་རབ་ཏུ་བཅོམ་མོ། །བཅོམ་ཞིང་རབ་ཏུ་བཅོམ་ལ་ཀུན་ཏུ་རབ་ཏུ་བཅོམ་ནས། གང་གི་ཚེ་བསད་དེ་ཤི་བར་གྱུར་པའི་ཚེ་ཕྱིར་གྱེད་དོ། །དེ་དག་དེ་ལྟ་བུའི་ཚུལ་གྱིས་ལོ་མང་པོའི་བར་དུ་རྒྱས་པར་བྱའོ། །གཞན་ཡང་སེམས་ཅན་དམྱལ་བ་ཆེན་པོ་བསྡུས་གཞོམ་དུ་སེམས་ཅན་གང་སྐྱེས་པ་ནས་འཐོན་པར་གྱུར་པའི་བར་དུ་སྟེ། སེམས་ཅན་དེ་དག་གི་སྡིག་པ་མི་དགེ་བའི་ལས་དེའི་རྣམ་པར་སྨིན་པས་ལྕགས་ཀྱི་ས་གཞི་དེའི་ནང་ན་ནགས་ཚལ་དཔག་ཚད་མང་པོ་ནས་སྔ་མ་བཞིན་ནོ། །དེ་ནས་སེམས་ཅན་དེ་དག་དེར་རྒྱུག་ཅིང་དེར་རབ་ཏུ་རྒྱུག་ལ། དེར་ཀུན་ཏུ་རབ་ཏུ་རྒྱུག་པའི་བར་དུ་རྒྱས་པར་བྱ་སྟེ། དེ་དག་དེའི་ནང་དུ་འགྲོའོ། །གང་གི་ཚེ་བརྒྱ་ཕྲག་མང་པོ་དང༌། བརྒྱ་སྟོང་ཕྲག་མང་པོ་ནང་དུ་ཞུགས་པར་གྱུར་པ་དེའི་ཚེ་དེ་དག་འཁོད་པའི་འོག་དང་སྟེང་དང་ཕྱོགས་བཞི་ནས་མེ་བྱུང་སྟེ། སེམས་ཅན་དེ་དག་འཇིགས་པ་དང་དངང་བ་དང་བ་སྤུ་ལྡང་བར་བྱེད་དོ། །དེ་ནས་སེམས་ཅན་དེ་དག་འཇིགས་

---

^{[མ་དཔེ་གཟིགས་ན་འདིར་གནོན།]}

ཤིང་སྐྲག་ལ་ཡི་ཆད་དེ་བ་སྤུ་ལངས་ནས་ཕྱོགས་གཅིག་ཏུ་འདུའོ། །གང་གི་ཚེ་བརྒྱ་ཕྲག་མང་པོ་འདུས་པར་གྱུར་པའི་བར་དུ་རྒྱས་པར་བྱ་སྟེ། དེའི་ཚེ་མེ་དེ་དག་གིས་ས་གཞི་རབ་ཏུ་འབར་བར་བྱེད་དོ། །ས་གཞི་རབ་ཏུ་འབར་བར་བྱས་ནས་ནགས་ཚལ་རབ་ཏུ་འབར་བར་བྱེད་དོ། །ནགས་ཚལ་རབ་ཏུ་འབར་བར་བྱས་ནས། སེམས་ཅན་དེ་དག་རབ་ཏུ་འབར་བར་བྱེད་དོ། །དེ་ནས་སེམས་ཅན་དེ་དག་འབར་ཞིང་རབ་ཏུ་འབར་ལ་ཀུན་ཏུ་རབ་ཏུ་འབར་ཏེ་འབར་བ་གཅིག་ཏུ་གྱུར་ནས་ཇི་སྟེ་ཤར་ཕྱོགས་སུ་འགྲོ་ན་ཡང་མེ་འབའ་ཞིག་མཐོང་ངོ༌། །ཇི་སྟེ་ལྷོ་ཕྱོགས་དང་ནུབ་ཕྱོགས་དང་བྱང་དུ་རྒྱུག་ན་ཡང་མེ་འབའ་ཞིག་མཐོང་ཞིང་ཚིག་སྟེ། དེ་ལྟ་བུའི་ཚུལ་གྱིས་ལོ་མང་པོ་ནས་སེམས་ཅན་དམྱལ་བ་མྱོང་བར་འགྱུར་བའི་ལས་དེ་གཏན་ནས་མ་བྱང་མ་ཟད་ཀྱི་བར་དུ་སྔ་མ་བཞིན་ཏེ། འདི་སྐད་དུ། བ་ལང་ར་ལུག་མ་ཧེ་དང༌། །རི་དགས་ཕག་དང་བྱ་གག་དང༌། །དེ་བཞིན་གཞན་གྱི་སྲོག་བཅད་པས། །བསྡུས་གཞོམ་དུ་ནི་བཅོམ་པར་འགྱུར། །ཞེས་ཀྱང་བྱའོ། །མདོ་ལ། ས་གཞི་དང་ནི་ཐོ་བ་སྒྲོམ། །འཁྲུལ་འཁོར་དང་ནི་འཇོམས་དང་རི། །དེ་ནས་རི་སུལ་ནགས་ཚལ་རྣམས། །བསྡུས་གཞོམ་ན་ནི་གནོད་པ་བརྒྱད། །དེ་ལ་སོགས་པའི་གནོད་པ་དང༌། ཡིད་དུ་མི་འོང་ཞིང་སྲོག་གཅོད་པར་བྱེད་པ་ལས་གྱི་གནོད་པ་གཞན་དང་གཞན་མང་པོ་དག་ཀྱང་ཡོད་དོ།། །།འཇིག་རྟེན་གཞག་པ། བམ་པོ་དགུ་པ་སྟེ་ཐ་མ། སྲོག་གཅོད་པ་ཡི་སེམས་ཅན་རྣམས། །བརླང་ཞིང་ཁྲག་ནི་འཐུང་བ་དང༌། །ངན་བའི་ལས་ནི་ཀུན་སྤྱོད་པ། །དུ་འབོད་ཆུང་ངུར་འགྲོ་བར་འགྱུར། །སེམས་ཅན་དམྱལ་བ་ཆེན་པོ་ངུ་འབོད་ཅེས་བྱ་བ་ལ་ཅིའི་ཕྱིར་སེམས་ཅན་དམྱལ་བ་ཆེན་པོ་ངུ་འབོད་ཅེས་བྱ་ཞེ་ན། སྨྲས་པ། སེམས་ཅན་དམྱལ་བ་ཆེན་པོ་ངུ་འབོད་ཆུང་ངུར་སེམས་ཅན་གང་དག་སྐྱེས་པ་ནས་འཐོན་པར་གྱུར་པའི་བར་དུ་སྟེ། སེམས་ཅན་དེ་དག་གི་སྡིག་པ་མི་དགེ་བའི་ལས་དེའི་རྣམ་པར་སྨིན་པས་ལྕགས་ཀྱི་ས་གཞི་དཔག་ཚད་མང་པོའི་བར་དུ་རྒྱས་པར་བྱའོ། །དེའི་ནང་ན་ནགས་ཐིབས་པོ་ཡོད་དེ། དེ་ནས་སེམས་ཅན་དེ་དག་དེར་རྒྱུག་ཅིང་དེར་རབ་ཏུ་རྒྱུག་ལ། དེར་

---

^{[མ་དཔེ་གཟིགས་ན་འདིར་གནོན།]}

ཀུན་ཏུ་རྒྱུག་སྟེ། གནས་ཚོལ་ཞིང་སྐྱབས་ཚོལ་ལ་འབྱུང་བའི་ཐབས་ཚོལ་ཏེ། དེ་དག་དེར་ཕྱོགས་གཅིག་ཏུ་འདུའོ། །གང་གི་ཚེ་བརྒྱ་ཕྲག་མང་པོ་ནས་འདུས་པར་གྱུར་པའི་བར་དུ་སྔ་མ་བཞིན་ཏེ། དེ་ནས་དེ་དག་གི་འོག་དང་སྟེང་དང་ཕྱོགས་བཞི་ནས་མེ་འབྱུང་སྟེ། སེམས་ཅན་དེ་དག་འཇིགས་པ་དང་སྐྲག་པ་དང་བ་སྤུ་ལྡང་བར་བྱེད་དོ། །དེ་ནས་སེམས་ཅན་དེ་དག་འཇིགས་ཤིང་སྐྲག་ལ་ཡི་ཆད་དེ། བ་སྤུ་ལངས་པར་གྱུར་ནས། ནགས་ཐིབས་བོའི་ནང་དུ་འགྲོའོ། །གང་གི་ཚེ་བརྒྱ་ཕྲག་མང་པོ་ནས་དེ་དག་འདུས་པར་གྱུར་པའི་བར་དུ་སྟེ། དེའི་ཚེ་མེ་དེས་ས་གཞི་རབ་ཏུ་འབར་བར་བྱེད་དོ། །ས་གཞི་རབ་ཏུ་འབར་བར་བྱས་ནས། ནགས་ཐིབས་པོ་རབ་ཏུ་འབར་བར་བྱེད་དོ། །ནགས་ཐིབས་པོ་རབ་ཏུ་འབར་བར་བྱས་ནས། སེམས་ཅན་དེ་དག་རབ་ཏུ་འབར་བར་བྱེད་དོ། །སེམས་ཅན་དེ་དག་དེར་འབར་ཞིང་རབ་ཏུ་འབར་ལ་ཀུན་ཏུ་རབ་ཏུ་འབར་ཏེ། འབར་བ་གཅིག་ཏུ་གྱུར་ནས་ཇི་སྟེ་ཤར་ཕྱོགས་སུ་རྒྱུག་ན་ཡང་མེ་འབའ་ཞིག་མཐོང་བ་ནས། དེ་དག་དེ་ལྟ་བུའི་ཚུལ་གྱིས་མ་བྱང་མ་ཟད་ཀྱི་བར་དུ་སྔ་མ་བཞིན་ཏེ། མི་བཟད་པ་དེ་དག་དང༌། མེ་ཏོག་དེ་དག་དང༌། འབྲས་བུ་དེ་དག་དང༌། རྣམ་པར་སྤྲོས་པ་དེ་དག་གིས་ན། སེམས་ཅན་དམྱལ་བ་ཆེན་པོ་ངུ་འབོད་ཆུང་ངུ་ཞེས་བྱ་སྟེ། དེ་ན་སྡུག་བསྔལ་ཞིང་མི་བཟད་ལ། རྩུབ་ཅིང་ཚ་བ་དང༌། ཡིད་དུ་མི་འོང་ཞིང་སྲོག་གཅོད་པར་བྱེད་པས། ལས་ཀྱི་གནོད་པ་གཞན་དང་གཞན་མང་པོ་དག་ཀྱང་ཡོད་དེ། འདི་སྐད་དུ། མི་རྣམས་བརླང་འདེབས་རྒྱུ་བྱེད་པའི།། སྐྱེ་བོ་དག་ནི་བསྡུས་ནས་ཀྱང༌། །ངུ་འབོད་དུ་ནི་རབ་སྲེག་ཅིང༌། །འཇིགས་པའི་ང་རོས་ཆོ་རེས་འདེབས། །ཞེས་ཀྱང་བྱའོ། །ལྟ་བའི་ཐིབས་པོས་ཁེབས་པ་དང༌། །སྲེད་པའི་འཆིང་བས་བཅིངས་པ་དང༌། །དམའ་བའི་ལས་ནི་ཀུན་སྤྱོད་པ། །དུ་འབོད་ཆེན་པོར་སྐྱེ་བར་འགྱུར། །སེམས་ཅན་དམྱལ་བ་ཆེན་པོ་ངུ་འབོད་ཆེན་པོ་ཞེས་བྱ་བ་ལ་ཅིའི་ཕྱིར་སེམས་ཅན་དམྱལ་བ་ཆེན་པོ་ངུ་འབོད་ཆེན་པོ་ཞེས་བྱ་ཞེ་ན། སྨྲས་པ། སེམས་ཅན་དམྱལ་བ་ཆེན་པོ་ངུ་འབོད་ཆེན་པོར་སེམས་ཅན་གང་དག་སྐྱེས་པ་ནས་འཐོན་པར་གྱུར་པའི་བར་དུ་སྟེ། སེམས་ཅན་དེ་དག་གི་སྡིག་པ་མི་

---

^{[མ་དཔེ་གཟིགས་ན་འདིར་གནོན།]}

དགེ་བའི་ལས་དེའི་རྣམ་པར་སྨིན་པས། ལྕགས་ཀྱི་ས་གཞི་དཔག་ཚད་མང་པོའི་བར་དུ་རྒྱས་པར་བྱའོ། །ནགས་ཐིབས་པོའི་ནང་ན་ཁྱིམ་ཡོད་དེ། དེ་ནས་སེམས་ཅན་དེ་དག་དེར་རྒྱུག་པའི་བར་དུ་རྒྱས་པར་བྱའོ། །དེའི་ཚེ་དེ་དག་གི་འོག་དང་སྟེང་དང་ཕྱོགས་བཞི་ནས་མེ་འབྱུང་སྟེ། སེམས་ཅན་དེ་དག་འཇིགས་པ་དང་སྐྲག་པ་དང་བ་སྤུ་ལྡང་བར་བྱེད་དོ། །དེ་ནས་སེམས་ཅན་དེ་དག་འཇིགས་ཤིང་སྐྲག་ལ་ཡི་ཆད་དེ་བ་སྤུ་ལངས་ནས་ནགས་ཐིབས་པོའི་ནང་དུ་འགྲོའོ། །ནགས་ཐིངས་པོའི་ནང་དུ་ཞུགས་ནས། གང་གི་ཚེ་བརྒྱ་སྟོང་མང་པོར་ཞུགས་པར་གྱུར་པའི་ཚེ་མེ་དེས་ས་གཞི་རབ་ཏུ་འབར་བར་བྱེད་དོ། །ས་གཞི་རབ་ཏུ་འབར་བར་བྱས་ནས་ནགས་ཐིབས་པོ་རབ་ཏུ་འབར་བར་བྱེད་དོ། །ནགས་ཐིབས་པོ་རབ་ཏུ་འབར་བར་བྱས་ནས་ཁྱིམ་རབ་ཏུ་འབར་བར་བྱེད་དོ། །ཁྱིམ་རབ་ཏུ་འབར་བར་བྱས་ནས་སེམས་ཅན་དེ་དག་རབ་ཏུ་འབར་བར་བྱེད་དོ། །དེ་ནས་སེམས་ཅན་དེ་དག་འབར་ཞིང་རབ་ཏུ་འབར་ལ་ཀུན་ཏུ་རབ་ཏུ་འབར་ཏེ། འབར་བ་གཅིག་ཏུ་གྱུར་པ་ནས། ནམ་སེམས་ཅན་དམྱལ་བ་ཉམས་སུ་མྱོང་བར་འགྱུར་བའི་སྡིག་པ་མི་དགེ་བའི་ལས་དེ་གཏན་ནས་མ་བྱང་མ་ཟད་ཀྱི་བར་དུ་སྔ་མ་བཞིན་ནོ། །དེ་ལ་སོགས་པའི་གནོད་པ་རྣམས་བརྗོད་པར་བྱ་སྟེ། མི་བཟད་པ་དེ་དག་དང༌། མེ་ཏོག་དེ་དག་དང༌། འབྲས་བུ་དེ་དག་དང༌། རྣམ་པར་སྤྲོས་པ་དེ་དག་གིས་ན། སེམས་ཅན་དམྱལ་བ་ཆེན་པོ་ངུ་འབོད་ཆེན་པོ་ཞེས་བྱ་སྟེ། དེ་ན་སྡུག་བསྔལ་བ་ནས། སྲོག་གཅོད་པར་བྱེད་པ་ལས་ཀྱི་གནོད་པ་གཞན་མང་པོ་དག་ཀྱང་ཡོད་པའི་བར་རྒྱས་པར་བྱ་སྟེ། འདི་སྐད་དུ། དོར་སྒྱུ་བྱེད་པའི་མི་རྣམས་ནི། །དུ་འབོད་ཆེན་པོར་སོང་གྱུར་ནས། །ཚིག་ཅིང་སྤུ་ཡང་ལྡང་གྱུར་ཞིང༌། །ཁྱིམ་གྱི་ནང་ན་སྲུང་ཞིང་སྲེག །ཅེས་ཀྱང་བྱའོ། །སྐྱེ་བོ་མང་ལ་གནོད་བྱས་ཤིང༌། །ཚ་བར་གྱུར་པའི་ལས་བྱས་པས། །བློ་ངན་ཚ་བར་སོང་ནས་ནི། །སྡུག་བསྔལ་ཚོར་བ་ཉམས་སུ་མྱོང༌། །སེམས་ཅན་དམྱལ་བ་ཆེན་པོ་ཚ་བ་ཞེས་བྱ་བ་ལ་ཅིའི་ཕྱིར་སེམས་ཅན་དམྱལ་བ་ཆེན་པོ་ཚ་བ་ཞེས་བྱ་ཞེ་ན། སྨྲས་པ། སེམས་ཅན་དམྱལ་བ་ཆེན་པོ་ཚ་བར་སེམས་ཅན་གང་སྐྱེས་པ་དང༌། ཀུན་ཏུ་སྐྱེས་པ་ནས་འཐོན་པར་

---

^{[མ་དཔེ་གཟིགས་ན་འདིར་གནོན།]}

གྱུར་པའི་བར་དུ་སྟེ། སེམས་ཅན་དེ་དག་གི་སྡིག་པ་མི་དགེ་བའི་ལས་དེའི་རྣམ་པར་སྨིན་པས། སེམས་ཅན་དམྱལ་བའི་སྲུང་མ་དག་གིས་སེམས་ཅན་དེ་དག་བཟུང་ནས། ལྕགས་ཀྱི་ས་གཞི་ལ་དོང་འབར་ཞིང་རབ་ཏུ་འབར་ལ་ཀུན་ཏུ་རབ་ཏུ་འབར་ཏེ་འབར་བ་གཅིག་ཏུ་གྱུར་པའི་ནང་དུ་རབ་ཏུ་བསྲེགས་ནས་ལྕགས་ཀྱི་སྐམ་པས་ཕྱིར་ཕྱུང་སྟེ། ལྕགས་ཀྱི་ཏི་ཙ་ལ་བཞག་ནས་ཐོ་བས་བརྡུང་ཞིང་རབ་ཏུ་བརྡུང་ལ་ཀུན་ཏུ་རབ་ཏུ་བརྡུང་སྟེ། དཔེར་ན་ལྕགས་མགར་གྱིས་ལྕགས་དང༌། ཚོན་མོ་སྟེང་གི་མགར་བས་ཚོན་མོ་སྟེང་དང༌། ལུགས་མགར་གྱིས་ལུགས་བྱ་བ་དང༌། ཞ་ཉེའི་མགར་བས་ཞ་ཉེ་དང༌། གསེར་མགར་གྱིས་གསེར་དང༌། དངུལ་མགར་གྱིས་དངུལ་མདག་མའི་དོང་དུ་བསྲེགས་ནས། ལྕགས་ཀྱི་སྐམ་པས་ཕྱུང་སྟེ། ལྕགས་ཀྱི་ཏི་ཙ་ལ་བཞག་ནས་ལྕགས་ཀྱི་ཐོ་བས་བརྡུང་ཞིང་རབ་ཏུ་བརྡུང་ལ་ཀུན་ཏུ་རབ་ཏུ་བརྡུང་བ་དེ་བཞིན་དུ། སེམས་ཅན་དམྱལ་བའི་སྲུང་མ་དག་གིས་སེམས་ཅན་དེ་དག་ལྕགས་ཀྱི་དོང་འབར་ཞིང་རབ་ཏུ་འབར་ལ་ཀུན་ཏུ་རབ་ཏུ་འབར་ཏེ། འབར་བ་གཅིག་ཏུ་གྱུར་པའི་ནང་དུ་རབ་ཏུ་བསྲེགས་ནས་ལྕགས་ཀྱི་སྐམ་པས་ཕྱིར་ཕྱུང་སྟེ། ལྕགས་ཀྱི་ཏི་ཙ་ལ་བཞག་ནས། ལྕགས་ཀྱི་ཐོ་བས་བརྡུང་ཞིང་རབ་ཏུ་བརྡུང་ལ་ཀུན་ཏུ་རབ་ཏུ་བརྡུང་སྟེ། དེ་དག་དེ་ལྟ་བུའི་ཚུལ་གྱིས་ཞེས་བྱ་བ་ནས་རྒྱས་པར་བྱའོ། །གཞན་ཡང་སེམས་ཅན་དམྱལ་བ་ཆེན་པོ་ཚ་བར་སེམས་ཅན་གང་སྐྱེས་པ་དང༌། ཀུན་ཏུ་སྐྱེས་པ་ནས་འཐོན་པར་འགྱུར་བའི་བར་དུ་སྔ་མ་བཞིན་ཏེ། དེ་དག་སེམས་ཅན་དམྱལ་བའི་སྲུང་མ་རྣམས་ཀྱིས་བཟུང་ནས་ལྕགས་ཀྱི་མདུང་རྩེ་གསུམ་བའི་སྟན་འབར་ཞིང་རབ་ཏུ་འབར་ལ་ཀུན་ཏུ་རབ་ཏུ་འབར་ཏེ། འབར་བ་གཅིག་ཏུ་གྱུར་པ་ལ་འདུག་དུ་བཅུག་སྟེ། རྩེ་མོ་གཅིག་གིས་ནི་དཀུ་གཡས་ལོགས་སུ་བརྟོལ་ཏེ་ཕྲག་པ་གཡས་པར་འབྱུང་ངོ༌། །རྩེ་མོ་གཉིས་པས་ནི་དཀུ་གཡོན་ལོགས་སུ་བརྟོལ་ཏེ་ཕྲག་པ་གཡོན་པར་འབྱུང་ངོ༌། །རྩེ་མོ་གསུམ་པས་ནི་ལྟོའི་ནང་ནས་བརྟོལ་ཏེ། སྤྱི་བོར་འབྱུང་ངོ༌། །དེའི་མིག་གི་བུ་གུ་གཉིས་ནས་ཀྱང་མེ་འབྱུང་ལ། རྣ་བ་དང་སྣ་དང་ཁའི་ནང་དང་བ་

---

^{[མ་དཔེ་གཟིགས་ན་འདིར་གནོན།]}

སྤུའི་ཁང་བུ་ཐམས་ཅད་ནས་ཀྱང་མེ་འབྱུང་སྟེ། དེ་དག་དེ་ལྟ་བུའི་ཚུལ་གྱིས་ལོ་མང་པོ་ཞེས་བྱ་བའི་བར་དུ་རྒྱས་བར་བྱའོ། །གཞན་ཡང་སེམས་ཅན་དམྱལ་བ་ཆེན་པོ་ཚ་བར་སེམས་ཅན་གང་སྐྱེས་པ་དང༌། ཀུན་ཏུ་སྐྱེས་པ་ནས་འཐོན་པར་གྱུར་པའི་བར་དུ་སྔ་མ་བཞིན་ཏེ། སེམས་ཅན་དེ་དག་སེམས་ཅན་དམྱལ་བའི་སྲུང་མ་རྣམས་ཀྱིས་བཟུང་ནས་དབུག་པའི་གནོད་པ་ཆེན་པོ་བྱེད་དེ། དེའི་མིག་གི་བུ་གུ་གཉིས་ནས་ཀྱང་མེ་འབྱུང་ལ། རྣ་བ་གཉིས་དང་སྣ་དང་ཁའི་ནང་དང་བ་སྤུའི་ཁུང་བུ་ཐམས་ཅད་ནས་ཀྱང་མེ་འབྱུང་སྟེ། དེ་ལྟ་བུའི་ཚུལ་གྱིས་ལོ་མང་པོ་ཞེས་བྱ་བ་ནས་ནམ་སེམས་ཅན་དམྱལ་བ་ཉམས་སུ་མྱོང་བར་འགྱུར་བའི་སྡིག་པ་མི་དགེ་བའི་ལས་དེ་གཏན་ནས་མ་བྱང་མ་ཟད་ཀྱི་བར་དུ་སྔ་མ་བཞིན་ཏེ། དེ་ལ་སོགས་པའི་གནོད་པ་མང་པོ་དག་བརྗོད་པར་བྱ་སྟེ། མི་བཟད་པ་དེ་དག་དང༌། མེ་ཏོག་དེ་དག་དང༌། འབྲས་བུ་དེ་དག་དང༌། རྣམ་པར་སྤྲོས་པ་དེ་དག་གིས་ན་སེམས་ཅན་དམྱལ་བ་ཆེན་པོ་ཚ་བ་ཞེས་བྱ་སྟེ། དེ་ན་སྡུག་བསྔལ་ཞིང་མི་བཟད་ལ། རྩུབ་ཅིང་ཚ་བ་དང༌། ཡིད་དུ་མི་འོང་ཞིང་སྲོག་གཅོད་པར་བྱེད་པ། ལས་ཀྱི་གནོད་པ་གཞན་དང་གཞན་མང་པོ་དག་ཡོད་དེ། འདི་སྐད་དུ། དགེ་སྤྱོང་བྲམ་ཟེ་དགེ་བ་དང༌། །དེ་བཞིན་གང་ཞིག་ཕ་མ་ལ། །འདོད་པ་མིན་པས་གནོད་བྱེད་པ། །དེ་ནི་ཚ་བར་རབ་ཏུ་བསྲེག །ཅེས་ཀྱང་བྱའོ། །བདེ་འགྲོར་འགྲོ་བའི་ལས་དང་ནི། །འདོད་པའི་འབྲས་བུར་འགྱུར་བ་ཡོད། །བློ་ངན་འདོད་མིན་ལས་བྱེད་པ། །དེ་ནི་རབ་ཏུ་ཚ་བར་བསྲེག །སེམས་ཅན་དམྱལ་བ་ཆེན་པོ་རབ་ཏུ་ཚ་བ་ཞེས་བྱ་བ་ལ་ཅིའི་ཕྱིར་སེམས་ཅན་དམྱལ་བ་ཆེན་པོ་རབ་ཏུ་ཚ་བ་ཞེས་བྱ་ཞེན། སྨྲས་པ། སེམས་ཅན་དམྱལ་བ་ཆེན་པོ་རབ་ཏུ་ཚ་བར་སེམས་ཅན་གང་སྐྱེས་པ་དང་འཐོན་པར་གྱུར་པའི་བར་དུ་སྟེ། སེམས་ཅན་དེ་དག་གི་སྡིག་པ་མི་དགེ་བའི་ལས་དེའི་རྣམ་པར་སྨིན་པས་སེམས་ཅན་དམྱལ་བའི་སྲུང་མ་རྣམས་ཀྱིས་བཟུང་སྟེ། ལྕགས་ཀྱི་མཚོན་གྱིས་དུམ་བུ་དུམ་བུར་བཅད་ནས། ལྕགས་ཀྱི་གསལ་ཤིང་ལ་བཙུགས་ཏེ། ལྕགས་ཀྱི་དོང་འབར་ཞིང་རབ་ཏུ་འབར་ལ་ཀུན་ཏུ་རབ་ཏུ་འབར་ཏེ་འབར་བ་གཅིག་ཏུ་གྱུར་པའི་ནང་དུ་སྲེག་ཅིང་ཟློག་པར་བྱེད་དེ།

---

^{[མ་དཔེ་གཟིགས་ན་འདིར་གནོན།]}

དཔེར་ན་གཡོས་མཁན་གྱིས་ཤ་མཚོན་གྱིས་དུམ་བུ་དུམ་བུར་བཅད་ནས་ཐུར་མ་ལ་བཙུགས་ཏེ། མདག་མའི་དོང་དུ་སྲེག་ཅིང་ཟློག་པར་བྱེད་པ་དེ་བཞིན་དུ། སེམས་ཅན་དམྱལ་བའི་སྲུང་མ་ནས། དེ་ལྟ་བུའི་ཚུལ་གྱིས་ཞེས་བྱ་བའི་བར་དུ་ཐམས་ཅད་རྒྱས་པར་བརྗོད་པར་བྱའོ། །གཞན་ཡང་སེམས་ཅན་དམྱལ་བ་ཆེན་པོ་རབ་ཏུ་ཚ་བར་སེམས་ཅན་གང་སྐྱེས་པ་ནས་འཐོན་པར་གྱུར་པའི་བར་དུ་སྔ་མ་བཞིན་ཏེ། སེམས་ཅན་དེ་དག་གི་སྡིག་པ་མི་དགེ་བའི་ལས་དེའི་རྣམ་པར་སྨིན་པས་སེམས་ཅན་དམྱལ་བའི་སྲུང་མ་རྣམས་ཀྱིས་སེམས་ཅན་དེ་དག་བཟུང་ནས་ལྕགས་ཀྱི་མཚོན་གྱིས་དུམ་བུ་དུམ་བུར་བཅད་དེ། ལྕགས་ཀྱི་ས་གཞི་འབར་ཞིང་རབ་ཏུ་འབར་ལ་ཀུན་ཏུ་རབ་ཏུ་འབར་ཏེ་འབར་བ་གཅིག་ཏུ་གྱུར་པ་ལ་རབ་ཏུ་བསྒྲེ་ཞིང་ཤིན་ཏུ་རྔོ་བར་བྱེད་དེ། དཔེར་ན་གཡོས་མཁན་གྱིས་ཤ་ལྕགས་ཀྱི་མཚོན་གྱིས་དུམ་བུ་དུམ་བུར་བཅད་ནས་སྣོད་དུ་བཅུག་སྟེ། རབ་ཏུ་སྒྲེ་ཞིང་ཤིན་ཏུ་རྔོ་བར་བྱེད་དེ། ཁུ་བ་ཡང་སྐམ་པར་བྱེད་པ་དེ་བཞིན་དུ་སེམས་ཅན་དམྱལ་བའི་སྲུང་མ་ནས་དེ་དག་དེ་ལྟ་བུའི་ཚུལ་གྱིས་ཞེས་བྱ་བའི་བར་དུ་རྒྱས་པར་བྱའོ། །གཞན་ཡང་སེམས་ཅན་དམྱལ་བ་ཆེན་པོ་རབ་ཏུ་ཚ་བར་སེམས་ཅན་གང་སྐྱེས་པ་ནས་སྔ་མ་བཞིན་ཏེ། སེམས་ཅན་དེ་དག་སེམས་ཅན་དམྱལ་བའི་སྲུང་མདག་གིས་བཟུང་ནས། ལྕགས་ཀྱི་མཚོན་གྱིས་ཁ་གཉིས་སམ། གསུམ་མམ། ཁ་མང་དུ་གཤགས་ཏེ། ལྕགས་ཀྱི་སླ་ངའི་ནང་དུ་བཅུག་ནས་རྔོ་བར་བྱེད་དེ། དཔེར་ན་ཉ་དུམ་བུ་གཉིས་སམ། གསུམ་མམ། དུམ་བུ་མང་པོར་གཏུབས་ནས་སླ་ངའི་ནང་དུ་བཅུག་སྟེ། རྔོ་བ་དེ་བཞིན་དུ་སེམས་ཅན་དམྱལ་བའི་སྲུང་མ་རྣམས་ཀྱིས་ཞེས་བྱ་བ་ནས། དེ་ལྟ་བུའི་ཚུལ་ཞེས་པའི་བར་དུ་སྔ་མ་བཞིན་དུ་རྒྱས་པར་བྱའོ། །གཞན་ཡང་སེམས་ཅན་དམྱལ་བ་ཆེན་པོ་རབ་ཏུ་ཚ་བར་སེམས་ཅན་གང་དག་སྐྱེས་པ་ནས་སྔ་མ་བཞིན་ཏེ། ལྕགས་ཀྱི་རྫ་བུམ་དགའ་བ་ཞེས་བྱ་བ་དང༌། ཉེ་དགའ་ཞེས་བྱ་བ་གཉིས་ཡོད་པ་ལ། རྫ་བུམ་དགའ་བ་ཞེས་བྱ་བ་ལ་ནི་ཚུར་དཔག་ཚད་ལྔ་བཅུ། ཞེང་དུ་ཡང་དཔག་ཚད་ལྔ་བཅུ། དཔངས་སུ་དཔག་ཚད་དྲུག་ཅུ། སྦོམས་སུ་དཔག་ཚད་

---

^{[མ་དཔེ་གཟིགས་ན་འདིར་གནོན།]}

ལྔ་བཅུ་ཡོད་དོ། །རྫ་བུམ་ཉེ་དགའ་ལ་ནི་ཆུར་དཔག་ཚད་ལྔ་བཅུ་རྩ་གཅིག །ཞེང་དུ་ཡང་དཔག་ཚད་ལྔ་བཅུ་རྩ་གཅིག །དཔངས་སུ་དཔག་ཚད་དྲུག་ཅུ། སྦོམས་སུ་ནི་དཔག་ཚད་བརྒྱ་ལྔ་བཅུ་རྩ་གསུམ་ཡོད་ལ། བ་ཚྭའི་ཆུ་ཁོལ་བས་གང་སྟེ། སེམས་ཅན་དེ་དག་སེམས་ཅན་དམྱལ་བའི་སྲུང་མ་དེ་དག་གིས་བཟུང་ནས། རྫ་བུམ་དགའ་བ་དང༌། ཉེ་དགའ་གཉིས་ཀྱི་ནང་དུ་སྤྱིའུ་ཚུགས་སུ་བོར་ཏེ། དེ་དག་དེ་ན་ཞབས་སུའང་འགྲོ་སྟེ་བསྐོལ་ཞིང་འཚེད་ལ་སྟེང་དུའང་འགྲོ་སྟེ་བསྐོལ་ཞིང་འཚེད་དོ། །ཕྱོགས་དང་ཕྱོགས་མཚམས་སུ་ཡང་འགྲོ་སྟེ། བསྐོལ་ཞིང་འཚེད་དོ། །དབུས་ནི་ལྦུ་བ་འདུས་ཤིང་འདུག་སྟེ། དཔེར་ན་ཏིལ་ལམ། འབྲས་སམ། མོན་སྲན་གྲེའུ་འམ། རྒྱ་ཤུག་གི་འབྲས་བུ་འམ། རྒྱ་སྲན་ཆུ་མང་པོའམ། སྣོད་ཀྱི་ནང་དུ་བླུགས་ཏེ། འོག་ནས་མེ་དྲག་ཏུ་སྦར་ན་འོག་ཏུ་འགྲོ་སྟེ་བསྐོལ་ཞིང་འཚེད་ལ་སྟེང་དུའང་འགྲོ་སྟེ་བསྐོལ་ཞིང་འཚེ་ད་དོ། །དབུས་ན་ནི་ལྦུ་བ་འདུས་ཤིང་འདུག་པ་དེ་བཞིན་དུ། སེམས་ཅན་དམྱལ་བའི་སྲུང་མ་ནས་སེམས་ཅན་དམྱལ་བ་ཉམས་སུ་མྱོང་བར་འགྱུར་བའི་སྡིག་པ་མི་དགེ་བའི་ལས་དེ་གཏན་ནས་མ་བྱང་མ་ཟད་ཀྱི་བར་དུ་རྒྱས་པར་བྱའོ། །དེ་དག་ལ་སོགས་པ་གནོད་པ་མང་པོ་དག་ཀྱང་བརྗོད་པར་བྱ་སྟེ། མི་བཟད་པ་དེ་དག་དང༌། མེ་ཏོག་དེ་དག་དང༌། འབྲས་བུ་དེ་དག་དང༌། རྣམ་པར་སྤྲོས་པ་དེ་དག་གིས་ན། སེམས་ཅན་དམྱལ་བ་ཆེན་པོ་རབ་ཏུ་ཚ་བ་ཞེས་བྱ་སྟེ། དེ་ན་སྡུག་བསྔལ་གཞན་དང་གཞན་མང་པོ་དག་ཀྱང་ཡོད་དེ་སྔ་མ་བཞིན་ནོ། །འདི་སྐད་དུ། དགེ་སྦྱོང་བྲམ་ཟེ་དགེ་བ་དང༌། །དེ་བཞིན་གང་ཞིག་ཕ་མ་དང༌། །གང་ཞིག་བླ་མ་གཞན་གསོད་པ། །དེ་ནི་རབ་ཏུ་ཚ་བར་སྲེག །ཅེས་ཀྱང་བྱའོ། །མདོ་ལ། དོང་དང་ལྕགས་ཀྱིས་དབུག་པ་དང༌། །ཚ་བ་ན་ནི་གནོད་པ་གསུམ། །གསལ་ཤིང་གནོད་དང་སླ་ང་དང༌། །རྫ་བུམ་བཞི་ནི་རབ་ཏུ་ཚ། །ངན་འགྲོར་འགྲོ་བའི་ལས་རྣམས་ལས། །ཤས་ཆེར་བྱས་པར་གྱུར་ན་ནི། །བློ་ངན་མནར་མེད་སོང་ནས་ཀྱང༌། །སྡུག་བསྔལ་ཚོར་བ་མྱོང་བར་འགྱུར། །སེམས་ཅན་དམྱལ་བ་ཆེན་པོ་མནར་མེད་པ་ཞེས་བྱ་བ་ལ། ཅིའི་ཕྱིར་སེམས་ཅན་དམྱལ་བ་ཆེན་པོ་མནར་མེད་པ་ཞེས་

---

^{[མ་དཔེ་གཟིགས་ན་འདིར་གནོན།]}

བྱ་ཞེ་ན། སྨྲས་པ། སེམས་ཅན་དམྱལ་བ་ཆེན་པོ་མནར་མེད་པར་སེམས་ཅན་སྐྱེས་ནས་ཐོན་པའི་བར་དུ་སྟེ་སེམས་ཅན་དམྱལ་བ་ཆེན་པོ་དེ་དག་གི་སྡིག་པ་མི་དགེ་བའི་ལས་དེའི་རྣམ་པར་སྨིན་པས། སེམས་ཅན་དམྱལ་བའི་སྲུང་མ་དག་གིས་བཟུང་ནས། ལྕགས་ཀྱི་ས་གཞི་འབར་ཞིང་རབ་ཏུ་འབར་ལ་ཀུན་ཏུ་རབ་ཏུ་འབར་ཏེ། འབར་བ་གཅིག་ཏུ་གྱུར་པ་ལས་གན་རྐྱལ་དུ་བཞག་ནས་མི་བཟད་པའི་བཅིང་བ་རྣམ་པ་ལྔའི་གནོད་པ་བྱེད་དེ། །ལག་པ་གཉིས་ཀྱང་ལྕགས་ཀྱི་ཕུར་པས་འདེབས་ལ། རྐང་པ་གཉིས་དང་དབུས་སུ་སྙིང་གར་ཡང་ལྕགས་ཀྱི་ཕུར་པས་འདེབས་ཏེ། དེ་དག་དེ་ལྟ་བུའི་ཚུལ་གྱིས་ཞེས་བྱ་བ་ནས་རྒྱས་པར་བྱའོ། །གཞན་ཡང་སེམས་ཅན་དམྱལ་བ་ཆེན་པོ་མནར་མེད་པར་སེམས་ཅན་གང་ཞེས་བྱ་བ་ནས་སྔ་མ་བཞིན་ཏེ། དེ་དག་སེམས་ཅན་དམྱལ་བའི་སྲུང་མ་དག་གིས་བཟུང་ནས་ལྕགས་ཀྱི་ས་གཞི་འབར་ཞིང་རབ་ཏུ་འབར་ལ་ཀུན་ཏུ་རབ་ཏུ་འབར་ཏེ། འབར་བ་གཅིག་ཏུ་གྱུར་པ་ལ་གན་རྐྱལ་དུ་བཞག་ནས་ཁ་ནས་ལྕེ་ཕྱུང་སྟེ། ལྕགས་ཀྱི་ཕུར་པ་བརྒྱས་བརྒྱངས་ནས་སེམས་ཅན་དེ་དག་གི་ལྕེ་དག་ལྕགས་ཀྱི་ཕུར་པ་བརྒྱས་བརྒྱངས་པས་གཉེར་མ་རངས་པར་འགྱུར་ཞིང་ཐང་ཆད་པར་འགྱུར་ཏེ། དཔེར་ན་བ་ལང་གི་ཀོ་བ་ལྕགས་ཀྱི་ཕུར་པ་བརྒྱས་བརྒྱངས་ན་གཉེར་མ་རངས་པར་འགྱུར་ཞིང་ཐང་ཆད་པར་འགྱུར་བ་དེ་བཞིན་དུ། སེམས་ཅན་དམྱལ་བའི་སྲུང་མ་ཞེས་བྱ་བ་ནས་རྒྱས་པར་དེ་དག་དེ་ལྟ་བུའི་ཚུལ་གྱིས་ཞེས་བྱ་བའི་བར་དུ་སྔ་མ་བཞིན་ནོ། །གཞན་ཡང་སེམས་ཅན་དམྱལ་བ་ཆེན་པོ་མནར་མེད་པར་སེམས་ཅན་གང་སྐྱེས་པ་དང༌། ཀུན་ཏུ་སྐྱེས་པ་དེ་དག་སེམས་ཅན་དམྱལ་བའི་སྲུང་མ་དག་གིས་བཟུང་ནས་ལྕགས་ཀྱི་ས་གཞི་འབར་ཞིང་རབ་ཏུ་འབར་ལ་ཀུན་ཏུ་རབ་ཏུ་འབར་ཏེ་འབར་བ་གཅིག་ཏུ་གྱུར་པ་ལ་སྤྱིའུ་ཚུགས་སུ་བཞག་ནས་གློ་གཉིས་ནས་པགས་པ་བཤུས་ཏེ། ལྟག་པ་ལ་ཐུག་པར་བཤུས་ནས་ལྕགས་ཀྱི་ཤིང་རྟ་འདྲེན་དུ་བཅུག་སྟེ། ལམ་གྱི་བརྒྱད་མདོར་གང་དུ་འདོད་པ་དང༌། ཅི་དགའ་བ་དང༌། ཅི་སྲིད་དུ་འདོད་པར་འགྲོར་བཅུག་ཅིང་ཕྱིར་ཡང་ཟློག་པར་བྱེད་དེ། དཔེར་ན་རྟ་གཡུང་པོ་བཞི་དང་སྤྱར་བའི་ཤིང་

---

^{[མ་དཔེ་གཟིགས་ན་འདིར་གནོན།]}

རྟ་སྲབ་མདའ་རིང་པོ་རང་བརྟེད་པ་དང་ལྕགས་དང་སྦྱར་ཏེ་ལམ་གྱི་བཞི་མདོ་ཆེན་པོར་བཞག་པ་དེ་ལ་གཉའ་ཤིང་གིས་འདུལ་བའི་ཁ་ལོ་སྒྱུར་མཁས་པས་མྱུར་ཞིང་མྱུར་བར་ཞོན་ཏེ། ལག་པ་ གཡོན་པས་ནི་སྲབ་མདའ་བཟུང་ལག་པ་གཡས་པས་ནི་གཞུ་བའི་ལྕག་ཐོགས་ཏེ། ལམ་གྱི་བརྒྱད་མདོར་གང་དུ ་འདོད་པ་དང༌། ཅི་དགའ་བ་དང༌། ཇི་སྲིད་དུ་འདོད་པར་འགྲོར་བཅུག་ཅིང་ཕྱིར་ཡང་ཟློག་པར་བྱེད་པ་དེ་བཞིན་དུ། སེམས་ཅན་དམྱལ་བའི་སྲུང་མ་དག་གིས་ཞེས་བྱ་བ་ནས་རྒྱས་པར་དེ་དག་དེ་ལྟ་བུའི་ཚུལ་ཞེས་བྱ་བའི་བར་དུ་སྔ་མ་བཞིན་ནོ། །གཞན་ཡང་སེམས་ཅན་དམྱལ་བ་ཆེན་པོ་མནར་མེད་པར་སེམས་ཅན་གང་དག་སྐྱེས་པ་ནས་འཐོན་པར་གྱུར་པའི་བར་དེ་དག་སེམས་ཅན་དམྱལ་བའི་སྲུང་མ་དག་གིས་བཟུང་ནས་ལྕགས་ཀྱི་ས་གཞི་འབར་ཞིང་རབ་ཏུ་འབར་ལ་ཀུན་ཏུ་རབ་ཏུ་འབར་ཏེ་འབར་བ་གཅིག་ཏུ་གྱུར་པ་ལ་བཞག་ནས། ལྕགས་ཀྱི་ཞིབ་མས་ལྕགས་ཀྱི་མདའ་མེ་འབར་ཞིང་རབ་ཏུ་འབར་ལ་ཀུན་ཏུ་རབ་ཏུ་འབར་ཏེ་འབར་བ་གཅིག་ཏུ་གྱུར་པ་འཁྲབ་ཏུ་འཇུག་ཅིང་གསིག་ཏུ་འཇུག་སྟེ། དེ་དག་དེ་ལྟ་བུའི་ཚུལ་གྱིས་ལོ་མང་པོ་ཞེས་བྱ་བའི་བར་དུ་རྒྱས་པར་བྱའོ། །གཞན་ཡང་སེམས་ཅན་དམྱལ་བ་ཆེན་པོ་མནར་མེད་པར་སེམས་ཅན་གང་སྐྱེས་པ་ནས་འཐོན་པར་གྱུར་པའི་བར་དུ་སྟེ། དེ་དག་སེམས་ཅན་དམྱལ་བའི་སྲུང་མ་དག་གིས་བཟུང་ནས་ལྕགས་ཀྱི་རི་འབར་ཞིང་རབ་ཏུ་འབར་ལ་ཀུན་ཏུ་རབ་ཏུ་འབར་ཏེ་འབར་བ་གཅིག་ཏུ་གྱུར་པ་ལ་འཛེག་ཏུ་འཇུག་ཅིང་ཕྱིར་ཡང་འབབ་ཏུ་འཇུག་སྟེ། དེ་དག་དེ་ལྟ་བུའི་ཚུལ་གྱིས་ལོ་མང་པོ་ཞེས་བྱ་བ་ནས་རྒྱས་པར་བྱ་སྟེ། དེ་ལ་སོགས་པ་དེ་ལས་གཞན་པ་རབ་ཏུ་མང་པོ་དག་ཀྱང་བརྗོད་པར་བྱ་སྟེ། མི་བཟད་པ་དེ་དག་དང༌། མེ་ཏོག་དེ་དག་དང༌། འབྲས་བུ་དེ་དག་དང༌། རྣམ་པར་སྤྲོས་པ་དེ་དག་གིས་ན་སེམས་ཅན་དམྱལ་བ་ཆེན་པོ་མནར་མེད་པ་ཞེས་བྱ་སྟེ། དེ་ན་སྡུག་བསྔལ་ཞིང་མི་བཟད་ལ། རྩུབ་ཅིང་ཚ་བ་དང༌། ཡིད་དུ་མི་འོང་ཞིང་སྲོག་གཅོད་པར་བྱེད་དེ། ལས་ཀྱི་གནོད་པ་གཞན་དང་གཞན་མང་པོ་དག་ཀྱང་ཡོད་ན། འདི་སྐད་དུ། གང་ཞིག་ཆོས་ལ་ཆོས་མིན་དང༌། །ཆོས་མ་ཡིན་ལ་ཆོས་སུ་སྨྲས། །སྐྱེ་བོ་དམ་

---

^{[མ་དཔེ་གཟིགས་ན་འདིར་གནོན།]}

པ་དག་ལ་ལྡང༌། །མེད་པར་ལྟ་བ་མནར་མེད་ལྷུང༌། །མདོ་ལ། མི་བཟད་འཆིང་བའི་གནོད་པ་དང༌། །དེ་ན་ལྕེ་ནི་ཕུར་བརྒྱས་བརྒྱངས། །ཤིང་རྟ་ཁྲི་དང་འཁྲབ་དང་རི། །གནོད་པ་ལྔ་ཚན་སྦྱར་བ་ཡིན། །སེམས་ཅན་དམྱལ་བ་ཆེན་པོ་མནར་མེད་པའི་ཤར་ཕྱོགས་ཀྱི་སྒོ་འབྱེད་པ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དེ། དེ་ནས་སེམས་ཅན་དེ་དག་རྒྱུག་ཅིང་རབ་ཏུ་རྒྱུག་ལ་ཀུན་ཏུ་རབ་ཏུ་རྒྱུག་སྟེ། གནས་ཚོལ་ཞིང་སྐྱབས་ཚོལ་འབྱུང་བའི་ཐབས་ཚོལ་ཏེ། འདི་ནས་ངེས་པར་འབྲོས་པར་བྱའོ་སྙམ་མོ། །དེ་དག་ཕལ་ཆེར་དེར་ཕྱིན་ན་ཤར་ཕྱོགས་ཀྱི་སྒོ་བཅད་པར་གྱུར་ཏེ། དེ་དག་དེར་སྣད་ཅིང་སྨས་ཏེ་འགྱེལ་ནས་གཅིག་གི་སྟེང་དུ་གཅིག་འཕུངས་པར་གྱུར་ཏེ། དཔེར་ན་རྩ་འམ་ཤིང་བཞིན་ལ་ཉམ་ཐག་པའི་སྐད་ཀྱིས་ཆོ་ངེས་འདེབས་ཏེ། སྡུག་བསྔལ་ཞིང་མི་བཟད་ལ་ཚ་ཞིང་རྩུབ་པ་དང་ཡིད་དུ་མི་འོང་བའི་ཚོར་བ་ཉམས་སུ་མྱོང་སྟེ། ནམ་སེམས་ཅན་དམྱལ་བ་ཉམས་སུ་མྱོང་བར་འགྱུར་བའི་སྡིག་པ་མི་དགེ་བའི་ལས་དེ་གཏན་མ་བྱང་མ་ཟད་ཀྱི་བར་དུ་རེ་ཞིག་དུས་བྱེད་པར་མི་འགྱུར་རོ། །ལྷོ་དང་ནུབ་དང་བྱང་ཕྱོགས་སུ་ཡང་དེ་བཞིན་དུ་བརྗོད་པར་བྱའོ། །ཡུན་རིང་མོ་ཞིག་འདས་ནས་ཡང་སེམས་ཅན་དམྱལ་བ་ཆེན་པོ་མནར་མེད་པའི་ཤར་ཕྱོགས་ཀྱི་སྒོ་འབྱེད་པ་དེའི་དུས་ཀྱང་ཡོད་ལ་དེའི་སྐབས་ཀྱང་ཡོད་དེ། སེམས་ཅན་དེ་དག་དེར་རྒྱུག་ཅིང་རབ་ཏུ་རྒྱུག་ལ་ཀུན་ཏུ་རབ་ཏུ་རྒྱུག་སྟེ། གནས་ཚོལ་ཞིང་སྐྱབས་ཚོལ་ལ་འབྱུང་བའི་ཐབས་ཚོལ་ཏེ། འདི་ནས་འབྲོས་པར་བྱའོ་སྙམ་མོ། །དེ་དག་དེ་ནས་བྱུང་ནས་འབྲོས་ཏེ། བྱིས་པ་དེ་དག་ནི་ཐར་པ་མ་ཡིན་པ་ལ་ཐར་པར་འདུ་ཤེས་པ་སྟེ་མི་ཤེས་པའོ། །དེ་ནས་ལྷག་པའི་འཁོར་མྱོང་བར་བྱས་པ་ཡང་ཉམས་སུ་མྱོང་བར་འགྱུར་ཏེ། སེམས་ཅན་དམྱལ་བ་ཆེན་པོ་མནར་མེད་འདབ་དྲུང་ཉིད་ནི་མེ་མ་མུར་པུས་མོ་ནུབ་པ་ཙམ་ལ་དཔག་ཚད་མང་པོ་དང༌། དཔག་ཚད་བརྒྱ་ཕྲག་མང་པོའི་བར་དུ་རྒྱས་པར་བྱ་སྟེ། དེ་དག་དེར་རྒྱུག་ཅིང་རབ་ཏུ་རྒྱུ་ག་ལ་ཀུན་ཏུ་རབ་ཏུ་རྒྱུག་སྟེ། གནས་ཚོལ་ཞིང་སྐྱབས་ཚོལ་ལ་འབྱུང་བའི་ཐབས་ཚོལ་ཏེ། དེ་དག་དེར་རྐང་པ་བཞག་ན་ནི་པགས་པ་དང་ཤ་དང་ཁྲག་ཀུན་ཞིག་

---

^{[མ་དཔེ་གཟིགས་ན་འདིར་གནོན།]}

པར་འགྱུར་ལ། རྐང་པ་བཏེག་ན་ནི་པགས་པ་དང་ཤ་དང་ཁྲག་ཀུན་ཕྱིར་ཡང་སྐྱེ་བར་འགྱུར་ཏེ། དེ་དག་དེ་ལྟ་བུའི་ཚུལ་གྱིས་ལོ་མང་པོར་ཞེས་བྱ་བ་ནས་སྔ་མ་བཞིན་ནོ། །མེ་མ་མུར་པུས་མོར་ཕྱིན་པ་ཙམ་གྱི་འདབ་དྲུང་ཉིད་ན་རོ་མྱགས་པ་དང་ཕྱི་སའི་འདམ་དཔག་ཚད་མང་པོའི་བར་དུ་རྒྱས་པར་བྱ་སྟེ། འཕང་དུ་ནི་མི་ཡས་ལ་བཙོག་ཅིང་དྲི་ང་བ་དང༌། བཤུལ་ཞིང་ཡིད་དང་འཐུན་པ་མ་ཡིན་པ་ཡོད་དེ། དེ་ནས་སེམས་ཅན་དེ་དག་གནས་ཚོལ་ཞིང་སྐྱབས་ཚོལ་ལ་འབྱུང་བའི་ཐབས་ཚོལ་ཏེ། རྒྱུག་ཅིང་རབ་ཏུ་རྒྱུག་ལ་ཀུན་ཏུ་རབ་ཏུ་རྒྱུག་སྟེ། འབོག་པར་བྱེད་དེ། རོ་མྱགས་པ་དང༌། ཕྱི་སའི་འདམ་དེ་ན་འབུ་མཆུ་རྣོན་ཞེས་བྱ་བ་ཐལ་ཀར་དུ་འདུག་ཅིང་མགོ་གནག་ལ་མཆུ་ཁབ་འདྲ་བ་དག་གནས་ཏེ། སེམས་ཅན་དེ་དག་གི་པགས་པ་འབིགས་སོ། །པགས་པ་ཕུག་ནས་ཤ་འབིགས་སོ། །ཤ་ཕུག་ནས་རྒྱུས་པ་འབིགས་སོ། །རྒྱུས་པ་ཕུག་ནས་རུས་པ་འབེགས་སོ། །རུས་པ་ཕུག་ནས་རྐང་འབྲུ་སྟེ། དེ་དག་དེ་ལྟ་བུའི་ཚུལ་གྱིས་ཞེས་བྱ་བ་ནས་རྒྱས་པར་བྱའོ། །རོ་མྱགས་པ་དང༌། ཕྱི་སའི་འདམ་དེའི་འདབ་དྲུང་ཉིད་ན་ལམ་པོ་ཆེ་སྤུ་གྲིའི་སོ་གཏམས་པ་ཞེས་བྱ་བ་ཡོད་དེ། དཔག་ཚད་མང་པོ་ཞེས་བྱ་བ་ནས་རྒྱས་པར་བྱའོ། །དེ་ནས་སེམས་ཅན་དེ་དག་གནས་ཚོལ་ཞིང་སྐྱབས་ཚོལ་ལ་འབྱུང་བའི་ཐབས་ཚོལ་ཏེ། རྒྱུག་ཅིང་རབ་ཏུ་རྒྱུག་ལ་ཀུན་ཏུ་རབ་ཏུ་རྒྱུག་སྟེ། དེ་དག་དེར་རྐང་པ་བཞག་ན་ནི་པགས་པ་དང་ཤ་གཅོད་ཅིང་ཁྲག་འབྱིན་ཏོ། །རྐང་པ་བཏེག་ན་ནི་པགས་པ་དང༌། །ཁྲག་ཀུན་ཕྱིར་ཡང་སྐྱེ་སྟེ། དེ་དག་དེ་ལྟ་བུའི་ཚུལ་གྱིས་ལོ་མང་པོ་ཞེས་བྱ་བ་ནས་རྒྱས་པར་བྱའོ། །ལམ་པོ་ཆེ་སྤུ་གྲིའི་སོ་གཏམས་པ་ཞེས་བྱ་བའི་འདབ་དྲུང་ཉིད་ན་ལོ་མང་པོ་རལ་གྲིའི་སོ་ལྟ་བུའི་ཚལ་ཞེས་བྱ་བ་ཤིང་ཨ་མྲའི་ཚལ་སྔོན་པོ་ལྟར་སྣང་བ་ཡོད་དོ། །དཔག་ཚད་མང་པོ་ཞེས་བྱ་བ་རྣམས་རྒྱས་པར་བྱ་སྟེ། སེམས་ཅན་དེ་དག་གནས་ཚོལ་ཞིང་སྐྱབས་ཚོལ་ལ་འབྱུང་བའི་ཐབས་ཚོལ་ཏེ་ནང་དུ་འཇུག་གོ །དེ་དག་དེར་ཞུགས་པ་ན་དེ་དག་གི་སྔོན་གྱི་ལས་ཀྱི་རྣམ་པར་སྨིན་པ་ལས་བྱུང་བའི་རླུང་ཚ་བ་ལྡང་སྟེ། རལ་གྲི་དེ་དག་རྩ་བ་ནས་བོག་ཅིང་སེམས་ཅན་དེ་དག་

---

^{[མ་དཔེ་གཟིགས་ན་འདིར་གནོན།]}

གི་སྟེང་དུ་ལྷུང་ནས་ལག་པ་དག་ཀྱང་གཅོད་ཅིང༌། རྐང་པ་དག་དང༌། རྣབ་དག་དང༌། སྣ་དག་དང༌། ཡན་ལག་དང༌། ཉིང་ལག་གཞན་དང་གཞན་དག་ཀྱང་གཅོད་དེ། དེ་དག་དེ་ལྟ་བུའི་ཚུལ་གྱིས་ཞེས་བྱ་བ་ནས་སྔ་མ་བཞིན་ནོ། །ལོ་མ་རལ་གྲིའི་སོ་ལྟ་བུའི་ཚལ་དེ་ནི་ཁྱི་ནག་ཁྲ་ཞེས་བྱ་བ་གནས་ཏེ། སེམས་ཅན་དེ་དག་ས་ལ་སྤྱིའུ་ཚུགས་སུ་བརྡབས་ནས་མཆན་གཡས་གཡོན་གྱི་པགས་པ་དང༌། སྒལ་ཚིགས་ཕྱུང་ཞིང་ཟའོ། །ལོ་མ་རལ་གྲིའི་སོ་ལྟ་བུའི་ཚལ་དེའི་འདབ་དྲུང་དེ་ན་ལྕགས་ཀྱི་ཤིང་ཤལ་མ་ལིའི་ཚལ་དཔག་ཚད་མང་པོ་ཞེས་བྱ་བ་ནས་སྔ་མ་བཞིན་ཏེ། མི་འགྲེང་བརྒྱ་ཕྲག་དུ་མའི་སྲིད་ཙམ་ཡོད་ལ། ཚེར་མ་རྣོ་ཞིང་སོར་བཅུ་དྲུག་པ་ལ་ཚལ་སྔོན་པོའི་ཕྲེང་བ་ལྟར་སྣང་བ་ཡོད་དེ། སེམས་ཅན་དེ་དག་དེའི་ནང་དུ་འགྲོ་ཞིང་གནས་ཚོལ་བ་ནས་སྔ་མ་བཞིན་ཏེ། དེ་དག་དེ་ལ་འཛེག་གོ །དེ་དག་དེ་ལ་འཛེག་ན་ཚེར་མ་རྣམས་ཁ་ཐུར་དུ་བལྟ་ལ། ཕྱིར་འབབ་ན་ཚེར་མ་རྣམས་ཁ་གྱེན་དུ་ལྟའོ། །ལྕགས་ཀྱི་ཤལ་མ་ལིའི་ཚལ་དེ་ན་ཁྭ་ལྕགས་ཀྱི་མཆུ་ཅན་ཞེས་བྱ་བ་དག་གནས་ཏེ། སེམས་ཅན་དེ་དག་གི་ཕྲག་པ་འམ། མགོ་ལ་འདུག་ནས་མིག་འབྲུ་ཞིང་འབྲུ་ཞིང་ཟ་བ་མགོ་བོ་བརྟོལ་ཤིང་གླད་ཕ་འབྲུའོ། །ལྕགས་ཀྱི་ཤིང་ཤལ་མ་ལིའི་ཚལ་དེ་ན་ལྕགས་ཀྱི་རྫ་བུམ་དང༌། ཁང་བཟངས་དང༌། བ་ཚའི་ཆུ་ཁོལ་བས་གང་ཞིང་འདུག་པ་དག་ཡོད་དེ། གང་གི་ཚེ་སེམས་ཅན་དེ་དག་ལྕགས་ཀྱི་ཤིང་ཤལ་མ་ལིའི་ཚལ་ལས་སྣད་ཅིང་སྣད་དེ་འབབ་པར་གྱུར་པ་དེའི་ཚེ་སེམས་ཅན་དམྱལ་བའི་སྲུང་མ་དེ་དག་གིས་སེམས་ཅན་དེ་དག་བཟུང་ནས་ལྕགས་ཀྱི་རྫ་བུམ་མམ། ཁང་བཟངས་ཀྱི་ནང་དུ་སྤྱིའུ་ཚུགས་སུ་འདོར་རོ། །དེ་དག་དེའི་ནང་དུ་འང་འགྲོ་སྟེ་བསྐོལ་ཞིང་འཚེད་དོ། །དེ་བཞན་དུ་སྟེང་དང་ཐང་དང་ཕྱོགས་མཚམས་སུ་འང་འགྲོ་སྟེ། བསྐོལ་ཞིང་འཚེད་པ་ནི་དཔེར་ན་ཏིལ་ལམ། མོན་སྲན་གྲེའུ་ཞེས་བྱ་བ་ནས་དེ་ལྟ་བུའི་ཚུལ་ཀྱིས་ཞེས་བྱ་བའི་བར་དུ་རྒྱས་པར་བྱའོ། །ལྕགས་ཀྱི་ཤིང་ཤལ་མ་ལིའི་ཚལ་དེའི་འདབ་དྲུང་ཉིད་ན་ཆུ་ཀླུང་རྣམ་པར་རྒལ་ཞེས་བྱ་བ་ཞིག་ཡོད་དེ། བ་ཚའི་ཆུ་ཁོལ་བས་

---

^{[མ་དཔེ་གཟིགས་ན་འདིར་གནོན།]}

གང་བ་དཔག་ཚད་མང་པོ་ཞེས་བྱ་བ་ནས་རྒྱས་པར་བྱ་སྟེ། སེམས་ཅན་དེ་དག་གིས་རྒྱང་རིང་པོ་ནས་མཐོང་ན་ཆུ་གྲང་མོ་འདྲ་བར་སྣང་ངོ༌། །དེ་ནས་སེམས་ཅན་དེ་དག་གནས་ཚོལ་ཞིང་སྐྱབས་ཚོལ་ལ་འབྱུང་བའི་ཐབས་ཚོལ་ཏེ། རྒྱུག་ཅིང་རབ་ཏུ་རྒྱུག་ལ་ཀུན་ཏུ་རབ་ཏུ་རྒྱུག་སྟེ་འབོག་པར་བྱེད་དོ། །ཆུ་ཀླུང་དེའི་འགྲམ་གཡས་གཡོན་ན་གཤིན་རྗེའི་མི་ལག་ན་རལ་གྲི་ཐོགས་པ་དང༌། ལག་ན་མདུང་ཐུང་ཐོགས་པ་དང༌། ལག་ན་འཕང་མདུང་ཐོགས་པ་དག་འདུག་སྟེ། སེམས་ཅན་དེ་དག་རྒལ་དུ་ཡང་མི་སྟེར་ཕྱིར་འབྱུང་དུ་ཡང་མི་སྟེར་རོ། །དེ་དག་དེའི་ནང་དུ་འོང་སྟེ་བསྐོལ་ཞིང་འཚེད་པ་ནི་དཔེར་ན་ཏི་ལ་འབྲས་སམ་རྒྱ་ཤུག་གི་འབྲས་བུ་ནས་རྒྱས་པར་བྱ་སྟེ། དེ་དག་ཆུ་ཀླུང་རྣམ་པར་རྒལ་ཞེས་བྱ་བ་དེ་ནས་ཆུའི་འབབ་ཕྱོགས་སུ་སྒྲ་ཐམས་ཅད་འབྱིན་ཞིང་བ་སྤུ་ཐམས་ཅད་དང༌། པགས་པ་དང༌། ཤ་དང༌། ཁྲག་ཐམས་ཅད་འཇིབ་པ་སྟེ། ཀེང་རུས་འབའ་ཞིག་ལུས་པར་འགྱུར་རོ། །དེ་དག་ཐམས་ཅད་དམྱལ་བའི་སྲུང་མ་དེ་དག་གིས་ལྕགས་ཀྱི་རྒྱས་ཉ་བཅུ་བ་བཞིན་དུ་བཅུས་ནས་ལྕགས་ཀྱི་ས་གཞི་འབར་བ་ནས་རྒྱས་པར་བྱས་ཏེ། གན་རྐྱལ་དུ་མནན་ནས་ཀྱེ་སེམས་ཅན་དག་ཅི་འདོད་ཅེས་འདྲིའོ། །དེ་དག་གིས་སྨྲས་པ། ཀྱེ་བདག་ཅག་ཉིད་ཀྱང་མི་ཤེས་ལ། བདག་ཅག་ཉིད་ཀྱང་མི་མཐོང་ངོ༌། །འོན་ཀྱང་བདག་ཅག་ནི་བཀྲེས་སོ་ཞེས་ནས་དེ་དག་སེམས་ཅན་དམྱལ་བའི་སྲུང་མ་དག་གིས་ལྕགས་ཀྱི་སྤྱད་ཀྱིས་ཁ་ཕྱེ་ནས། ལྕགས་ཀྱི་སྐམ་པས་ལྕགས་ཀྱི་ཐུ་ལུམ་འབར་ཞིང་རབ་ཏུ་འབར་ལ་ཀུན་ཏུ་རབ་ཏུ་འབར་ཏེ་འབར་བ་གཅིག་ཏུ་གྱུར་པ་དག་ཁར་འཛུད་དེ། སེམས་ཅན་དེ་དག་གི་མཆུ་དག་ཀྱང་ཚིག་ཅིང་ལྕེ་དང༌། རྐན་དང༌། ལྐོག་མ་དང༌། མིད་པའི་སྦུབས་དང༌། སྙིང་དང༌། སྙིང་གི་ཉེ་འཁོར་དང༌། རྒྱུ་མ་དང་གཉེ་མ་རྣམས་ཀྱང་ཚིག་ནས་ཐུར་དུ་འབྱུང་ངོ༌། །གཞན་ཡང་སེམས་ཅན་དམྱལ་བ་ཆེན་པོའི་སྲུང་མ་དེ་དག་གིས་སེམས་ཅན་དེ་དག་མཆིལ་པས་ཉ་དབྱུང་བ་བཞིན་དུ་ཕྱུང་ནས་ལྕགས་ཀྱི་ས་གཞི་འབར་ཞིང་རབ་ཏུ་འབར་ལ་ཀུན་ཏུ་རབ་ཏུ་འབར་ཏེ་འབར་བ་གཅིག་ཏུ་གྱུར་པ་ལ་གན་རྐྱལ་དུ་བཞག་ནས། ཀྱེ་

---

^{[མ་དཔེ་གཟིགས་ན་འདིར་གནོན།]}

སེམས་ཅན་དག་ཅི་འདོད་ཅེས་འདྲིའོ། །དེ་དག་གིས་སྨྲས་པ། ཀྱེ་བདག་ཉིད་ཀྱང་མི་ཤེས་ལ། བདག་ཉིད་ཀྱང་མི་མཐོང་ངོ༌། །འོན་ཀྱང་བདག་ཅག་སྐོམ་མོ་ཞེས་ནས་དེ་དག་སེམས་ཅན་དམྱལ་བའི་སྲུང་མ་དག་གིས་ལྕགས་ཀྱི་སྤྱད་ཀྱིས་ཁ་ཕྱེ་ནས་ཟངས་བསྐོལ་བ་འབར་ཞིང་རབ་ཏུ་འབར་ལ་ཀུན་ཏུ་རབ་ཏུ་འབར་ཏེ་འབར་བ་གཅིག་ཏུ་གྱུར་པ་ཁར་ལྡུགས་ཏེ། སེམས་ཅན་དེ་དག་གི་མཆུ་དག་ཀྱང་ཚིག་པ་ནས་ཐུར་དུ་འབྱུང་བའི་བར་དུ་སྟེ། དེ་དག་དེ་ལྟ་བུའི་ཚུལ་གྱིས་ཞེས་བྱ་བ་ནས་རྒྱས་པར་བྱའོ། །དེ་དག་མཐུ་ཉམས་ཤིང་གཟི་བྱིན་ཉམས་ལ་བརྩོན་འགྲུས་ཉམས་ཏེ། རྣམ་པར་རྒལ་གྱི་འགྲམ་ན་འཁོད་དོ། །རྣམ་པར་རྒལ་དེའི་འགྲམ་ན་ཁྭ་ལྕགས་ཀྱི་མཆུ་ཅན་ཞེས་བྱ་བ་དག་གནས་ཏེ། སེམས་ཅན་དེ་དག་གི་ཞེས་བྱ་བ་ནས་སྔ་མ་བཞིན་ནོ། །དེ་ལ་སོགས་པ་གནོད་པ་མང་པོ་དག་བྱེད་དེ། དེར་ནམ་སེམས་ཅན་དེ་དག་གིས་སེམས་ཅན་དམྱལ་བ་ཉམས་སུ་མྱོང་བར་འགྱུར་བའི་སྡིག་པ་མི་དགེ་བའི་ལས་དེ་གཏན་ནས་ཡོངས་སུ་མ་བྱང་མ་ཟད་ཀྱི་བར་དུ་སྟེ་དེ་དག་ཀྱང་ཆུ་ཀླུང་རྣམ་པར་རྒལ་ལ་འབོག་གོ །ལྕགས་ཀྱི་ཤིང་ཤལ་མ་ལིའི་ཚལ་ལ་འཛེག་གོ །ལོ་མ་རལ་གྲི་ལྟ་བུའི་ཚལ་དུ་འཇུག་གོ །ལམ་པོ་ཆེ་སྤུ་གྲིའི་སོ་གཏམས་པ་ལྟ་བུར་འགྲོའོ། །རོ་མྱགས་པ་དང༌། ཕྱི་སའི་འདམ་དུ་འབོག་གོ །མེ་མ་མུར་བུས་མོར་ཕྱིན་པ་ཙམ་དུ་འགྲོའོ། །དེ་ནས་སེམས་ཅན་དམྱལ་བ་ཆེན་པོ་མནར་མེད་པའི་ཤར་ཕྱོགས་ཀྱི་སྒོར་འཇུག་གོ །ཇི་སྟེ་སེམས་ཅན་དམྱལ་བ་ཆེན་པོ་མནར་མེད་པའི་ཤར་ཕྱོགས་ཀྱི་སྒོའི་སྐབས་སུ་བཤད་པ་དེ་བཞིན་དུ་ལྷོ་དང་ནུབ་དང་བྱང་ཕྱོགས་སུ་འང་བརྗོད་པར་བྱའོ། །ཇི་ལྟར་སེམས་ཅན་དམྱལ་བ་ཆེན་པོ་མནར་མེད་པ་འཁོར་དང་བཅས་པར་བསྟན་པ་དེ་བཞིན་དུ་སེམས་ཅན་དམྱལ་བ་ཆེན་པོ་རབ་ཏུ་ཆ་བ་དང༌། ངུ་འབོད་ཆེན་པོ་དང༌། ངུ་འབོད་དང༌། བསྡུས་གཞོམ་དང༌། ཐིག་ནག་དང༌། ཡང་སོས་རྣམས་ཀྱང་འཁོར་དང་བཅས་པར་བརྗོད་པར་བྱའོ། །དེ་དག་ནས་སེམས་ཅན་དེ་དག་གིས་སེམས་ཅན་དམྱལ་བ་ཉམས་སུ་མྱོང་བར་འགྱུར་བའི་སྡིག་པ་མི་དགེ་བའི་ལས་

---

^{[མ་དཔེ་གཟིགས་ན་འདིར་གནོན།]}

དེ་གཏན་ནས་མ་བྱང་མ་ཟད་པར་གྱུར་པ་ན། དེ་དག་གནས་དེ་དག་ནས་ཤི་འཕོས་ནས་ཁ་ཅིག་ནི་དུད་འགྲོ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །ཁ་ཅིག་ནི་ཡི་དགས་རྣམས་ཀྱི་ནང་དུ། ཁ་ཅིག་ནི་མི་རྣམས་ཀྱི་ནང་དུ། ཁ་ཅིག་ནི་རྒྱལ་ཆེན་བཞི་པའི་ལྷ་རྣམས་ཀྱི་ནང་དུ། ཁ་ཅིག་ནི་སུམ་ཅུ་རྩ་གསུམ་པ་རྣམས་དང༌། འཐབ་བྲལ་བ་རྣམས་དང༌། དགའ་ལྡན་པ་རྣམས་དང༌། འཕྲུལ་དགའ་བ་རྣམས་དང༌། གཞན་འཕྲུལ་དབང་བྱེད་པའི་ལྷ་རྣམས་དང་སྐལ་པ་མཉམ་པར་སྐྱེ་བར་འགྱུར་རོ། །དེ་ལ་སེམས་ཅན་སྔོན་མིར་གྱུར་པའི་ཚེ་ཆོས་མ་ཡིན་པ་སྤྱོད་ཅིང་མི་རིགས་པ་བྱེད་དེ། གཅིག་ཏུ་གནག་པའི་ལས་བྱེད་བྱེད་པ་ལས་སེམས་ཅན་དམྱལ་བ་དག་ཏུ་སྐྱེས་པ་གང་ཡིན་པ་དེ་དག་ནི། སེམས་ཅན་དམྱལ་བ་ནས་ཤི་འཕོས་ནས་སྡུག་བསྔལ་བ་དང་ཡིད་མི་བདེ་བ་དང༌། འཁྲུག་པ་མང་པོ་དག་གི་སྐལ་པ་ཅན་དུ་འགྱུར་རོ། །དེ་ལ་སེམས་ཅན་སྔོན་མིར་གྱུར་པའི་ཚེ། ཆོས་སྤྱོད་ཅིང་རིགས་པ་བྱེད་པ་གཅིག་ཏུ་དཀར་པའི་ལས་བྱེད་བྱེད་པ་ལས་ཉེ་བར་སྤྱོད་པ་འགའ་ཞིག་སེམས་ཅན་དམྱལ་པ་དག་ཏུ་སྐྱེས་པ་གང་ཡིན་པ་དེ་དག་ནི་སེམས་ཅན་དམྱལ་བ་ནས་ཤི་འཕོས་ནས་བདེ་བ་དང་ཡིད་བདེ་བ་མང་བའི་སྐལ་པ་ཅན་དུ་འགྱུར་རོ། །བཅོམ་ལྡན་འདས་ཀྱིས་ཀྱང་ལྷའི་ཕོ་ཉ་ལྔ་ལུང་བསྟན་པའི་མདོ་ལས་འདི་སྐད་དུ། དགེ་སློང་དག་སེམས་ཅན་དམྱལ་བ་ཆེན་པོ་མནར་མེད་པའི་ཤར་ཕྱོགས་ཀྱི་སྒོ་འབྱེད་པ་དེའི་དུས་ཀྱང་ཡོད་ལ། སྐབས་ཀྱང་ཡོད་དེ་ཞེས་བྱ་བ་ནས་གཞན་འཕྲུལ་དབང་བྱེད་པའི་ལྷ་རྣམས་དང༌། སྐལ་བ་མཉམ་པར་སྐྱེ་བར་འགྱུར་རོ་ཞེས་བྱ་བའི་བར་དུ་རྒྱས་པར་བྱའོ། །དགེ་སློང་དག་དེ་ལ་སེམས་ཅན་གང་དག་མར་མི་འཛིན་པ་དང༌། ཕར་མི་འཛིན་པ་དང༌། དགེ་སྦྱོང་དུ་མི་འཛིན་པ་དང༌། བྲམ་ཟེར་མི་འཛིན་པ་དང༌། རིགས་ཀྱི་ནང་ན་རྒན་རབས་ལ་རི་མོ་མི་བྱེད་པ་དང༌། བྱ་བའི་རིགས་པ་མི་བྱེད་པ་དང༌། བསོད་ནམས་མི་བྱེད་པ་དང༌། འཇིག་རྟེན་ཕ་རོལ་ལ་ཁ་ན་མ་ཐོ་བ་རྣམས་ཀྱིས་འཇིགས་པར་མི་ལྟ་བ་དང༌། སྦྱིན་པ་དག་མི་སྦྱིན་ཞིང་བསོད་ནམས་དག་མི་བྱེད་ལ། ཟ་གཅིག་པ་ལ་མི་གནས་ཏེ། ཚུལ་ཁྲིམས་ཡང་དག་པར་བླངས་

---

^{[མ་དཔེ་གཟིགས་ན་འདིར་གནོན།]}

ནས་མི་འདུག་བ་དེ་དག་ནི། ཚུལ་འདི་ལྟ་བུར་སྡུག་བསྔལ་བ་དང༌། ཡིད་མི་བདེ་བའི་སྐལ་བ་ཅན་དུ་འགྱུར་ཏེ། དཔེར་ན་སེམས་ཅན་དམྱལ་བ་ན་འདུག་པའི་སེམས་ཅན་རྣམས་བཞིན་ནོ། །དེ་ལ་སེམས་ཅན་གང་དག་མར་འཛིན་པ་དང༌། ཕར་འཛིན་པ་ནས་སྔ་མ་བཞིན་ནོ། །དེ་དག་ནི་ཚུལ་འདི་ལྟ་བུར་བདེ་བ་དང་ཡིད་བདེ་བའི་སྐལ་བ་ཅན་དུ་འགྱུར་ཏེ། དཔེར་ན་གཞལ་མེད་ཁང་ན་གནས་པའི་ལྷ་རྣམས་བཞིན་ནོ་ཞེས་གསུངས་སོ། །དེ་ལ་གནོད་པར་འགྱུར་བ་ཞེས་བྱ་བ་ནི་མི་དགེ་བ་བཅུའི་ལས་ཀྱི་ལམ་རྣམས་ཏེ་སྲོག་གཅོད་པ་ནས་ལོག་པར་ལྟ་བའི་བར་དག་གོ །བྱས་ནས་ཞེས་བྱ་བ་ནི་ཡང་དག་པར་བླངས་ཏེ་འདུག་ཅེས་བྱ་བ་ཡིན་ནོ། །མི་རིགས་པའི་འཚོ་བའི་མི་རྣམས་ཀྱིས་ཞེས་བྱ་བ་ལ་མི་རིགས་པས་འཚོ་བ་ཞེས་བྱ་བ་ནི་ཤན་པ་དང༌། བྱ་གག་འཚོང་བ་དང༌། ཕག་འཚོང་བ་དང༌། བྱ་བ་དང༌། རི་བོང་རྒྱས་ཤོར་བ་དང༌། ཉ་པ་དང༌། རི་དགས་ཀྱི་རྔོན་པ་དང༌། ཆོམ་རྐུན་དང༌། གཤེད་མ་དང༌། བ་ལང་གསོད་པ་དང༌། སྦྲུལ་ཚོགས་ཅན་དང༌། བཙོན་སྲུང་དང༌། ཕྲ་མ་ཅན་དང༌། གནོད་བྱེད་དང༌། དེ་ལ་སོགས་པ་གཞན་ཡང་གང་ཟག་གང་ཡིན་པ་དེ་དག་ཅེས་བྱ་བའི་བར་དུ་རྒྱས་པར་བྱའོ།། འགྲོ་བ་ཕྱི་མ་གང་ཡིན་པ་ཞེས་བྱ་བ་ནི་མི་རིགས་པ་བྱེད་པ་ལ། མི་རིགས་པས་འཚོ་བ་གང་ཡིན་པ་དེ་དག་ཡང་དག་པར་བླངས་པ་དེ་ལྟ་བུ་དང༌། ཡང་དག་པར་སྤྱད་པ་དེ་ལྟ་བུའི་ལས་དེ་ནི་སེམས་ཅན་དམྱལ་བ་ཆེན་པོ་བརྒྱད་པོ་དག་ཏུ་སྐྱེ་བར་འགྱུར་བའོ། །དམྱལ་བ་བརྒྱད་པོ་འདི་དག་ནི་ཡང་སོས་ནས་བཟུང་སྟེ་མནར་མེད་པའི་བར་རམ། ཡང་ན་མནར་མེད་པ་ནས་བཟུང་སྟེ་ཡང་སོས་ཀྱི་བར་དག་གོ །དེ་བས་ན་དམྱལ་བ་བརྒྱད་པོ་འདི་དག་ནི་ཞེས་བྱའོ། །བསྟན་ཞེས་བྱ་བ་ནི་སངས་རྒྱས་རྣམས་དང༌། སངས་རྒྱས་ཀྱི་ཉན་ཐོས་རྣམས་དང༌། དམ་པ་རྣམས་དང༌། ཡང་དག་པར་ཞུགས་པ་རྣམས་དང༌། སྐྱེས་བུ་དམ་པ་རྣམས་ཀྱིས་ཡང་དག་པར་བསྟན་པས་དེ་བས་ན་བསྟན་ཞེས་བྱའོ། །ཐར་བར་དཀའ་ཞེས་བྱ་བ་ནི་སེམས་ཅན་དམྱལ་བ་ཆེན་པོ་བརྒྱད་པོ་འདི་དག་ཐར་བར་དཀའ་ཞིང་འདའ་བར་དཀའ་བ་སྟེ། དེ་བས་ན་ཐར་བར་དཀའ་

---

^{[མ་དཔེ་གཟིགས་ན་འདིར་གནོན།]}

བ་ཞེས་བྱའོ། །བརླང་བའི་ལས་བྱས་རྣམས་ཀྱིས་གང་ཞེས་བྱ་བ་ནི་ཤན་པ་ནས་གནོད་བྱེད་ཀྱི་བར་དེ་དག་ནི་བརླང་བའི་ལས་ཞེས་བྱ་སྟེ། དེ་བས་ན་དམྱལ་བ་བརྒྱད་པོ་འདི་ནི་ཐར་པར་དཀའ་བར་བསྟན་པ་སྟེ། བརླང་བའི་ལས་བྱས་རྣམས་ཀྱིས་གང་ཞེས་བྱའོ། །རེ་རེའི་འཁོར་ནི་བཅུ་དྲུག་ཡོད་ཅེས་བྱ་བ་ནི་སེམས་ཅན་དམྱལ་བ་ཆེན་པོ་མནར་མེད་པའི་ཤར་ཕྱོགས་ན་ལྷག་པའི་འཁོར་བཞི་ཡོད་དེ། རོ་མྱགས་པ་དང༌། ཕྱི་སའི་འདམ་དང༌། ལོ་མ་རལ་གྲི་ལྟ་བུའི་ཚལ་དང༌། ལྕགས་ཀྱི་ཤལ་མ་ལིའི་ཚལ་དང༌། ཆུ་ཀླུང་རྣམ་པར་རྒལ་ཞེས་བྱ་བ་ཡོད་དེ། ཤར་ཕྱོགས་ཇི་ལྟ་བ་བཞིན་དུ་ལྷོ་དང་ནུབ་དང་བྱང་ཕྱོགས་ཀྱང་དེ་བཞིན་ནོ། །སེམས་ཅན་དམྱལ་བ་ཆེན་པོ་མནར་མེད་པ་ན་ཇི་ལྟ་བ་བཞིན་དུ་སེམས་ཅན་དམྱལ་བ་ཆེན་པོ་ཡང་སོས་ཀྱི་བར་དུ་ཡང་དེ་བཞིན་ཏེ། དེ་བས་ན་རེ་རེའི་འཁོར་ནི་བཅུ་དྲུག་ཡོད་ཅེས་བྱའོ། །ཆ་བཞི་ཞེས་བྱ་བ་ནི་སེམས་ཅན་དམྱལ་བ་ཆེན་པོ་མནར་མེད་པ་ལ་ཆ་བཞི་ཡོད་དོ། །ཤར་དང༌། ལྷོ་དང༌། ནུབ་དང༌། བྱང་ཕྱོགས་ཀྱི་ཆའོ། །མནར་མེད་པ་ལ་ཇི་ལྟ་བ་བཞིན་ཡང་སོས་ཀྱི་བར་ཡང་དེ་བཞིན་ནོ། །དེ་བས་ན་ཆ་བཞི་ཞེས་བྱའོ། །སྒོ་བཞི་ཞེས་བྱ་བ་ནི་སེམས་ཅན་དམྱལ་བ་ཆེན་པོ་མནར་མེད་པ་ལ་སེམས་ཅན་དམྱལ་བའི་སྒོ་བཞི་ཡོད་དེ། ཤར་དང༌། ལྷོ་དང༌། ནུབ་དང༌། བྱང་ཕྱོགས་ཀྱི་སྒོ་རྣམས་སོ། །མནར་མེད་པ་ལ་ཇི་ལྟ་བ་བཞིན་ཡང་སོས་ཀྱི་བར་དུ་ཡང་དེ་བཞིན་ཏེ། དེ་བས་ན་སྒོ་བཞི་ཞེས་བྱའོ། །ཆ་ཡི་ཚད་ནི་རྣམ་པར་ཕྱེ། །ཞེས་བྱ་བ་ནི་སེམས་ཅན་དམྱལ་བ་ཆེན་པོ་མནར་མེད་པ་ལ་ཆུར་ཇི་ལྟ་བ་དེ་བཞིན་དུ་ཞེང་དུ་ཡང་དེ་ཅི་ཙམ་སྟེ། དེ་བས་ན། ཆ་ཡི་ཚད་ནི་རྣམ་པར་ཕྱེ། །ཞེས་བྱའོ། །ལྕགས་ཀྱི་ར་བས་ཀུན་ནས་བསྐོར། །ཞེས་བྱ་བ་ནི་སེམས་ཅན་དམྱལ་བ་ཆེན་པོ་མནར་མེད་པ་ལྕགས་ཀྱི་ར་བས་ཀུན་ནས་བསྐོར་ཏེ། མནར་མེད་པ་ཇི་ལྟ་བ་དེ་བཞིན་དུ་ཡང་སོས་ཀྱི་བར་དུ་ཡང་དེ་བཞིན་ཏེ། དེ་བས་ན། ལྕགས་ཀྱི་ར་བས་ཀུན་ནས་བསྐོར། །ཞེས་བྱའོ། །ལྕགས་ཀྱིས་སུ་ནི་ཀུན་ཏུ་ཁེབས། །ཞེས་བྱ་བ་ནི་སེམས་ཅན་དམྱལ་བ་ཆེན་པོ་མནར་མེད་པ་ལྕགས་ཀྱི་དྲ་བས་ཡོངས་སུ་ཁེབས་ཏེ། མནར་མེད་པ་ཇི་ལྟ་བ་དེ་

---

^{[མ་དཔེ་གཟིགས་ན་འདིར་གནོན།]}

བཞིན་དུ་ཡང་སོས་ཀྱི་བར་དུ་ཡང་དེ་བཞིན་ཏེ། དེ་བས་ན། ལྕགས་ཀྱིས་སུ་ནི་ཀུན་ཏུ་ཁེབས། །ཞེས་བྱའོ། །ལྕགས་ཀྱི་ས་གཞི་རབ་ཚ་བ། །འབར་ཞིང་གཟི་བརྗིད་ལྡན་པ་སྟེ། །དཔག་ཚད་བརྒྱ་ཕྲག་དུ་མར་ཡང༌། །མེ་ལྕེ་རྣམས་ནི་མཆེད་པར་གནས། །ཞེས་བྱ་བ་ནི་སེམས་ཅན་དམྱལ་བ་ཆེན་པོ་མནར་མེད་པ་དཔག་ཚད་མང་པོ་དང༌། དཔག་ཚད་བརྒྱ་ཕྲག་མང་པོ་དང༌། དཔག་ཚད་སྟོང་ཕྲག་མང་པོ་དང༌། དཔག་ཚད་བརྒྱ་སྟོང་ཕྲག་མང་པོར་ལྕགས་འབར་ཞིང་རབ་ཏུ་འབར་ལ་ཀུན་ཏུ་རབ་ཏུ་འབར་ཏེ་འབར་བ་གཅིག་ཏུ་གྱུར་ཅིང་སྲེག་པའོ། །སེམས་ཅན་དམྱལ་བ་ཆེན་པོ་མནར་མེད་པ་ཇི་ལྟ་བ་དེ་བཞིན་དུ་ཡང་སོས་ཀྱི་བར་དུ་ཡང་དེ་བཞིན་ནོ། །དེ་བས་ན། ལྕགས་ཀྱི་ས་གཞི་རབ་ཚ་བ། །འབར་ཞིང་གཟི་བརྗིད་ལྡན་པ་སྟེ། །དཔག་ཚད་བརྒྱ་ཕྲག་དུ་མར་ཡང༌། །མེ་ལྕེ་རྣམས་ནི་མཆེད་པར་གནས། །ཞེས་བྱའོ། །འཇུངས་པ་འདུ་བ་དྲག་པོ་སྟེ། །མེ་ལྕེར་ལྡན་ཞིང་བསྙེན་པར་དཀའ། །དེ་དག་བ་སྤུ་སློང་བའི་གཟུགས། །འཇིགས་ཤིང་སྡུག་བསྔལ་འཇིགས་པར་བྱེད། །ཅེས་བྱ་བ་ལ། འཇུངས་པ་ཞེས་བྱ་བ་གང་ཟག་སེར་སྣ་ཅན་འཆུམས་ཤིང་ཡོ་བྱད་རྣམས་ཀུན་ཏུ་འཛིན་ལ། སྦྱིན་པ་དག་ལ་ཀུན་འགྱེད་པར་མི་བྱེད་པ་གང་ཡིན་པ་དེ་དག་གོ །གཞན་ཡང་གང་ཟག་ཉེས་པར་སྤྱོད་པའི་ལས་རྣམ་པ་སྣ་ཚོགས་བྱེད་པ་དེ་རྣམས་ཡིན་ཏེ། དེ་བས་ན་འཇུངས་པ་ཞེས་བྱའོ། །འཇུངས་པ་དེ་དག་ནི་སེམས་ཅན་དམྱལ་བ་ཆེན་པོ་བརྒྱད་པོ་དེ་དག་ཏུ་ཚ་ཞིང་ཀུན་ཏུ་ཚ་ཡོངས་སུ་ཚ་བར་འགྱུར་ཏེ། དེ་བས་ན། འཇུངས་པའི་འདུལ་བ་དྲག་པོ་སྟེ། །ཞེས་བྱའོ། །མེ་ལྕེར་ལྡན་ཞིང་བསྙེན་པར་དཀའ། །ཞེས་བྱ་བ་ནི་སེམས་ཅན་དམྱལ་བ་ཆེན་པོ་བརྒྱད་པོ་འདི་དག་མེ་འབར་བའི་ཕྲེང་བས་བསྐོར་ཏེ། འཇུངས་པ་དེ་དག་གིས་མི་བཟོད་ཅིང་བརྣག་པར་དཀའ་སྟེ། དེ་བས་ན། མེ་ལྕེར་ལྡན་ཞིང་བསྙེན་པར་དཀའ། །ཞེས་བྱའོ། །དེ་དག་བ་སྤུ་སློང་བའི་གཟུགས། །འཇིགས་ཤིང་འཇིགས་བྱེད་སྡུག་བསྔལ་བ། །ཞེས་བྱ་བ་ནི་སེམས་ཅན་དམྱལ་བ་བརྒྱད་པོ་འདི་དག་འཇུངས་པ་དེ་དག་འཇིགས་པ་དང༌། དངང་པ་དང༌།

---

^{[མ་དཔེ་གཟིགས་ན་འདིར་གནོན།]}

སྐྲག་པ་དང༌། ཡི་ཆད་པ་དེ་བ་སྤུ་སློང་བར་བྱེད་ལ་སྡུག་བསྔལ་སྐྱེད་པར་བྱེད་དེ། དེ་བས་ན། དེ་དག་བ་སྤུ་སློང་བའི་གཟུགས། །འཇིགས་ཤིང་འཇིགས་བྱེད་སྡུག་བསྔལ་བ། །ཞེས་བྱའོ། །དྲང་སྲོང་དག་དང་སྡོམ་ཅན་དང༌། །དཀའ་ཐུབ་ཅན་ལ་ཁ་ཟེར་བ། །ཞེས་བྱ་བ་ལ། དྲང་སྲོང་ཞེས་བྱ་བ་ནི་སངས་རྒྱས་རྣམས་དང༌། སངས་རྒྱས་ཀྱི་ཉན་ཐོས་རྣམས་ཏེ། དེ་རྣམས་དང་མི་མཐུན་པའི་ལུས་ཀྱི་ལས་ཀུན་ཏུ་སྤྱོད་པ་དང༌། མི་མཐུན་པའི་ངག་གི་ལས་དང༌། ཡིད་ཀྱི་ལས་ཀུན་ཏུ་སྤྱོད་པ་སྟེ། དེ་བས་ན་དྲང་སྲོང་དག་ཅེས་བྱའོ། །སྡོམ་ཅན་ཞེས་བྱ་བ་ནི་ལུས་སྡོམ་པ་དང༌། ངག་སྡོམ་པ་དང༌། ཡིད་སྡོམ་པ་རྣམས་ཏེ། དེ་བས་ན་སྡོམ་ཅན་ཞེས་བྱའོ། །དཀའ་ཐུབ་ཅན་ཞེས་བྱ་བ་ནི་སྦྱངས་པའི་ཡོན་ཏན་སྣ་ཚོགས་ཡང་དག་པར་བླངས་པའི་ཕྱིར་དཀའ་ཐུབ་ཅན་ཞེས་བྱ་བ་སྟེ། དེ་བས་ན་དཀའ་ཐུབ་ཅན་ཞེས་བྱའོ། །རྐང་པ་མཐོ་ཞིང་སྤྱིའུ་ཚུགས་སུ། །དམྱལ་བ་དེར་ནི་ལྟུང་བར་འགྱུར། །ཞེས་བྱ་བ་ནི་འཇུངས་པ་དེ་དག་གིས་ཉེས་པར་སྤྱོད་པ་དེ་དག་དེ་ལྟ་བུར་ཡང་དག་པར་བླངས་པ་དང་ཀུན་ཏུ་སྤྱོད་པས་སེམས་ཅན་དམྱལ་བ་ཆེན་པོ་བརྒྱད་པོ་དེ་དག་དུ་འདོར་ཏེ། དེ་བས་ན། རྐང་པ་མཐོ་ཞིང་སྤྱིའུ་ཚུགས་སུ། །དམྱལ་བ་དེར་ནི་ལྟུང་བར་འགྱུར། །ཞེས་བྱའོ། །དབང་པོ་ཉམས་པ་དེ་དག་འཚེད། །ཅེས་བྱ་བ་ནི་དེ་དག་དབང་པོ་མ་ལུས་པའི་ཕྱིར་སེམས་ཅན་དམྱལ་བ་ཆེན་པོ་བརྒྱད་པོ་དེ་དག་ཏུ་སྐྱེ་ཞིང་ཉིན་མཚན་དུ་འཚེད་དེ། དེ་བས་ན། དབང་པོ་ཉམས་པ་དེ་དག་འཚེད། །ཅེས་བྱའོ། །ཉ་ནི་སྐམ་ལ་བོར་བ་བཞིན། །ཞེས་བྱ་བ་ནི་ཇི་ལྟར་ཉ་ཆུ་ལས་བཏོན་ཏེ་སྐམ་སར་བོར་བ་རྣམས་སྡུག་བསྔལ་ཞིང་ཉམ་ཐག་ནས་འདར་བ་དེ་བཞིན་དུ། དེ་དག་འཇིག་རྟེན་འདི་ནས་ཤི་འཕོས་ནས་ནི་སེམས་ཅན་དམྱལ་བ་ཆེན་པོ་བརྒྱད་པོ་དག་ཏུ་བོར་ཏེ། སྡུག་བསྔལ་ཞིང་ཉམ་ཐག་ནས་འདར་ཏེ། དེ་བས་ན་དབང་པོ་ཉམས་པ་དེ་དག་འཚེད་དེ། ཉ་ནི་སྐམ་ལ་བོར་བ་བཞིན། །ཞེས་བྱའོ། །དེ་ལྟར་ཉེས་བྱས་ལས་བྱེད་པ། །ཉིན་མཚན་དུ་ནི་ཆོ་ངེས་འདེབས། །ཞེས་བྱ་བ་ནི་ལས་དཀར་པོ་སྤང་ཞིང་མི་དགེ་

---

^{[མ་དཔེ་གཟིགས་ན་འདིར་གནོན།]}

བའི་ཆོས་ལ་ཞུགས་པ་དེ་དག་སེམས་ཅན་དམྱལ་བ་ཆེན་པོ་བརྒྱད་པོ་དག་ཏུ་སྐྱེས་ནས་རྟག་པར་རྒྱུན་མ་ཆད་པར་ཡུན་དུ་ཉམ་ཐག་པའི་ང་རོས་ཆོ་ངེས་འདབས་ཏ། སྡུག་བསྔལ་ཞིང་མི་བཟད་ལ་རྩུབ་ཅིང་ཚ་བ་དང༌། ཡིད་དུ་མི་འོང་བའི་ཚོར་བ་ཉིན་མཚན་དུ་ཉམས་སུ་མྱོང་སྟེ། དེ་བས་ན། དེ་ལྟར་ཉེས་བྱས་ལས་བྱེད་པ། །ཉིན་མཚན་དུ་ནི་ཆོ་ངེས་འདེབས། །ཞེས་བྱའོ། །དེ་ནི་སྒྲ་ཆེན་རབ་ཏུ་སྒྲོགས། །འཕང་མདུང་གིས་ཕོག་གླང་ཆེན་བཞིན། །ཞེས་བྱ་བ་ནི་དེ་དག་སྡུག་བསྔལ་མི་བཟད་པས་ཟིལ་གྱིས་གནོན་ཏེ། གླང་པོ་ཆེ་དེ་དག་འཕང་མདུང་གིས་ཕོག་པ་དང་ལྕགས་ཀྱུས་དྲངས་པ་བཞིན་དུ་སྐད་ཤིན་ཏུ་ཆེ་བས་སྒྲ་སྒྲོགས་ཏེ། དེ་བས་ན། དེ་ནི་སྒྲ་ཆེན་རབ་ཏུ་སྒྲོགས། །འཕང་མདུང་གིས་ཕོག་གླང་ཆེན་བཞིན། །ཞེས་བྱའོ། །མི་རྣམས་ཀྱི་ལོ་སུམ་ཁྲི་གང་ཡིན་པ་དེ་ནི་སེམས་ཅན་དམྱལ་བ་པ་ཁ་ཅིག་གི་ནམ་གྱི་ཆ་སྟོད་དོ། །ཁ་ཅིག་གི་ནི་ནམ་ཀྱི་གུང་ཐུན་གྱི་བར་རོ། །ཁ་ཅིག་ན་ནི་ནམ་གྱི་ཆ་སྨད་གྱི་བར་རོ། །ལོ་དགུ་ཁྲི་ལ་ནི་མཚན་གཅིག་གོ །ལོ་དགུ་ཁྲི་ལ་ནི་ཉིན་གཅིག་གོ །ལོ་འབུམ་བརྒྱད་ཁྲི་ལ་ནི་ཉིན་ཞག་གཅིག་གོ །མི་རྣམས་ལོ་ནི་འདི་དག་ན། །དགུ་ཁྲི་སྙེད་ནི་གང་ཡིན་ཏེ། །དམྱལ་བ་དག་ན་མཚན་གཅིག་སྟེ། །ཉིན་གཅིག་ཚད་ཀྱང་དེ་ཙམ་མོ། །བྱིས་པ་མི་ཁོམ་སོང་བ་རྣམས། །བརླང་བའི་རི་རབ་འཇིགས་པས། །འདི་ལྟ་བུ་ཡི་ལོ་གྲངས་བར། །ཡུན་རིངས་དག་ཏུ་བརྩམས་པར་གྱུར། །འདི་དག་དང་ནི་གཞན་ཡང་རབ་མང་མཐའ་ཡས་པའི། །སྡུག་བསྔལ་མྱོང་བ་རྣམས་སུ་བྱིས་པ་དག་གིས་མྱོང༌། །དེ་དག་མཐའ་ཡས་པར་ནི་བརྗོད་པར་སླ་བ་མིན། །བདག་གིས་སུ་ནི་ཕྱོགས་ཆ་ཙམ་ཞིག་བརྗོད་པར་ཟད། །འཇིག་རྟེན་གཞག་པ་ལས་ཚིགས་བཅུ་བཞི་པ་སྟེ། འཇིག་རྟེན་གཞག་པ་རྫོགས་སོ།།