ཆོས་མངོན་པའི་མཛོད་ཀྱི་འགྲེལ་བཤད་ཉེ་བར་མཁོ་བ་ཞེས་བྱ་བ།
ཞི་གནས་ལྷ།
སྨན་པའི་རྒྱལ་པོ་ཡན་ལག་རྣམ་པ་བཞི་དང་ལྡན་པ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །ཡན་ལག་རྣམ་པ་བཞི་དང་ལྡན་པའི་སྨན་པ་ཟུག་རྔུ་འབྱིན་པ་ནི་རྒྱལ་པོ་ལ་འོས་ཤིང་རྒྱལ་པོ་ལ་རིགས་པ་རྒྱལ་པོའི་ཡན་ལག་གི་གྲངས་སུ་འགྲོའོ། །བཞི་གང་ཞེ་ན་དགེ་སློང་དག་འདི་ལ་སྨན་པ་ཟུག་རྔུ་འབྱིན་པ་ནད་ལ་མཁས་པར་གྱུར་པ་དང༌། ནད་ཀུན་ནས་སློང་བ་ལ་མཁས་པ་དང༌། ནད་ཀུན་ནས་སྤང་བ་ལ་མཁས་པ་དང༌། ནད་བྱུང་བ་དག་ཕྱིར་མི་ལྡོག་པར་བྱ་བའི་ཐབས་ལ་མཁས་པར་གྱུར་པའོ། །དགེ་སློང་དག་ཇི་ལྟར་ན་སྨན་པ་ཟུག་རྔུ་འབྱིན་པ་ནད་ལ་མཁས་པར་གྱུར་པ་ཡིན་ཞེ་ན། དགེ་སློང་དག་འདི་ལ་སྨན་པ་ཟུག་རྔུ་འབྱིན་པ་ནད་འདི་ནི་འདི་དང་འདི་ལྟ་བུའོ་ཞེས་ནད་ཤེས་པར་གྱུར་པ་ཡིན་ཏེ། དགེ་སློང་དག་འདི་ལྟར་ན་སྨན་པ་ཟུག་རྔུ་འབྱིན་པ་ནད་ལ་མཁས་པར་གྱུར་པ་ཡིན་ནོ། །དགེ་སློང་དག་ཇི་ལྟར་ན་སྨན་པ་ཟུག་རྔུ་འབྱིན་པ། ནད་ཀུན་ནས་སློང་པ་ལ་མཁས་པར་གྱུར་པ་ཡིན་ཞེ་ན། དགེ་སློང་དག་འདི་ལ་སྨན་པ་ཟུག་རྔུ་འབྱིན་པ་
ནད་འདི་ནི་རླུང་གིས་ཀུན་ནས་བསླང་བ། ནད་འདི་ནི་མཁྲིས་པས་ཀུན་ནས་བསླང་བ། ནད་འདི་ནི་བད་ཀན་གྱིས་ཀུན་ནས་བསླང་བ། ནད་འདི་ནི་འདུས་པས་ཀུན་ནས་བསླང་བ། འདི་ནི་གློ་བུར་བ། འདི་ནི་དུས་ཡོངས་སུ་འགྱུར་བ་ཞེས་ནད་ཀུན་ནས་སློང་བ་ཤེས་པར་གྱུར་པ་ཡིན་ཏེ། དགེ་སློང་དག་འདི་ལྟར་ན་སྨན་པ་ཟུག་རྔུ་འབྱིན་པ་ནད་ཀུན་ནས་སློང་བ་ལ་མཁས་པར་གྱུར་པ་ཡིན་ནོ། །དགེ་སློང་དག་ཇི་ལྟར་ན་སྨན་པ་ཟུག་རྔུ་འབྱིན་པ་ནད་བྱང་བའི་ཐབས་ལ་མཁས་པ་ཡིན་ཞེ་ན། དགེ་སློང་དག་འདི་ལ་སྨན་པ་ཟུག་རྔུ་འབྱིན་པ་ནད་འདི་ནི་མིག་སྨན་གྱིས། འདི་ནི་མིག་སྨན་སོ་སོས། འདི་ནི་སྐྱུག་པས། འདི་ནི་འཁྲུ་བས། འདི་ནི་སྟོད་སྦྱངས་ཀྱིས། འདི་ནི་སྨད་སྦྱངས་ཀྱིས། འདི་ནི་སྣ་སྦྱངས་གྱིས། འདི་ནི་དུ་བ་བཏུང་བས། འདི་ནི་རྡུལ་གདོན་པས་ཞེས་དེ་ལྟ་བུའི་རང་བཞིན་གྱི་བྱ་བ་རྣམས་ཀྱིས་ནད་སྐྱེས་པ་རྣམས་སྤང་བའི་བྱ་བ་ཤེས་པར་གྱུར་པ་ཡིན་ཏེ། དགེ་སློང་དག་འདི་ལྟར་ན་སྨན་པ་ཟུག་རྔུ་འབྱིན་པ་ནད་སྤོང་བ་ལ་མཁས་པར་གྱུར་པ་ཡིན་ནོ། །དགེ་སློང་དག་ཇི་ལྟར་ན་སྨན་པ་ཟུག་རྔུ་འབྱིན་པ་ནད་བྱང་བ་ཕྱིར་མི་ལྡོག་པར་བྱ་བའི་ཐབས་ལ་མཁས་པར་གྱུར་པ་ཡིན་ཞེ་ན། དགེ་སློང་དག་འདི་ལ་སྨན་པ་
ཟུག་རྔུ་འབྱིན་པ་ནད་འདི་ནི་འདི་དང་འདི་ལྟ་བུའོ་ཞེས་ཕྱིར་མི་ལྡོག་པར་བྱ་བའི་བྱ་བ་རྣམས་ཀྱིས་སྤོང་ཞིང་ཕྱིས་མི་སྐྱེ་བར་ཤེས་པར་གྱུར་པ་ཡིན་ཏེ། དགེ་སློང་དག་འདི་ལྟར་ན་སྨན་པ་ཟུག་རྔུ་འབྱིན་པ་ནད་བྱང་བ་ཕྱིར་མི་ལྡོག་པར་བྱ་བའི་ཐབས་ལ་མཁས་པར་གྱུར་པ་ཡིན་ནོ། །དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་ཡན་ལག་རྣམ་པ་བཞི་དང་ལྡན་པའི་སྨན་པ་ཟུག་རྔུ་འབྱིན་པ་བླ་ན་མེད་པ་ཞེས་བརྗོད་དེ། བཞི་གང་ཞེ་ན། དགེ་སློང་དག་དེ་བཞིན་གཤེགས་པས་འདི་ནི་སྡུག་བསྔལ་འཕགས་པའི་བདེན་པའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅིང། འདི་ནི་སྡུག་བསྔལ་ཀུན་འབྱུང་བ། འདི་ནི་སྡུག་བསྔལ་འགོག་པ། འདི་ནི་སྡུག་བསྔལ་འགོག་པར་འགྲོ་བའི་ལམ་མོ་ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། དགེ་སློང་དག་སྨན་པ་ཟུག་རྔུ་འབྱིན་པ་སྡུག་བསྔལ་གྱི་རྩ་བ་སྤོང་བའི་སྨན་དག་མི་ཤེས་ལ། སྐྱེ་བ་དང་རྒ་བ་དང་ན་བ་དང་འཆི་བ་དང་མྱ་ངན་དང༌། སྨྲེ་སྔགས་འདོན་བ་དང༌། སྡུག་བསྔལ་བ་དང་ཡིད་མི་བདེ་བ་དང་འཁྲུག་པའི་སྡུག་བསྔལ་གྱི་རྩ་བ་སྤོང་བའི་སྨན་དག་མི་ཤེས་སོ། །དགེ་སློང་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སྡུག་བསྔལ་གྱི་རྩ་བ་སྤོང་བའི་སྨན་མཁྱེན་ཅིང་སྐྱེ་བ་དང༌། རྒ་བ་དང་ན་བ་དང་འཆི་བ་དང༌། མྱ་ངན་དང་སྨྲེ་སྔགས་འདོན་པ་དང༌། སྡུག་བསྔལ་བ་དང་ཡིད་མི་བདེ་བ་དང༌། འཁྲུག་པའི་སྡུག་བསྔལ་གྱི་རྩ་བ་སྤོང་བའི་སྨན་དག་མཁྱེན་ཏེ། དེའི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་སྨན་པ་ཟུག་རྔུ་འབྱིན་པ་བླ་ན་མེད་པ་ཞེས་བརྗོད་དོ་ཞེས་གསུངས་སོ། །འདི་དག་ནི་འཕགས་པ་རྣམས་ལ་བདེན་པ་དེའི་ཕྱིར་འཕགས་པའི་བདེན་པ་ཞེས་བྱའོ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་ཁྱེད་ཅག་གིས་ངས་འཕགས་པའི་བདེན་པ་བཞི་བསྟན་པ་ཁྱེད་ཅག་གིས་གཟུང་ངམ། དེ་ནས་དགེ་སློང་གཞན་ཞིག་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་བྱས་ནས་བཅོམ་ལྡན་འདས་གང་ན་བ་དེར་ཐལ་མོ་སྦྱར་ཏེ་ཕྱག་བྱས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་བ་བཅོམ་ལྡན་འདས་ཀྱིས་གསུངས་
པའི་འཕགས་པའི་བདེན་པ་བཞི་པོ་དག་བདག་གིས་བཟུང་ལགས་སོ། །དགེ་སློང་ཁྱོད་ཀྱིས་ངས་བསྟན་པའི་འཕགས་པའི་བདེན་པ་བཞི་པོ་དག་ཇི་ལྟ་ཇི་ལྟ་བུར་བཟུང༌། བཅོམ་ལྡན་འདས་ཀྱིས་སྡུག་བསྔལ་འཕགས་པའི་བདེན་པའོ་ཞེས་བསྟན་པ་དེ་བདག་གིས་བཟུང་སྟེ། དེ་བཞིན་དང་གཞན་དུ་མི་འགྱུར་བ་དང༌། དེ་ཁོ་ན་ཉིད་དང༌། ཇི་ལྟ་བ་བཞིན་དང༌། ཕྱིན་ཅི་མ་ལོག་ཅིང་འཕགས་པ་རྣམས་ལ་བདེན་བ་དེའི་ཕྱིར་འཕགས་པའི་བདེན་པ་ཞེས་བརྗོད་དོ། །སྡུག་བསྔལ་ཀུན་འབྱུང་བ་དང༌། སྡུག་བསྔལ་འགོག་པ་དང༌། སྡུག་བསྔལ་འགོག་པར་འགྲོ་བའི་ལམ་ཞེས་བསྟན་པ་དེ་བདག་གིས་བཟུང་སྟེ། དེ་བཞིན་དང་གཞན་དུ་མི་འགྱུར་བ་དང༌། དེ་ཁོ་ན་ཉིད་དང༌། ཇི་ལྟ་བ་བཞིན་དང༌། ཕྱིན་ཅི་མ་ལོག་ཅིང་འཕགས་པ་རྣམས་ལ་བདེན་པ་དེའི་ཕྱིར་འཕགས་པའི་བདེན་པ་ཞེས་བརྗོད་དོ། །བཙུན་པ་བཅོམ་ལྡན་འདས་ཀྱིས་བསྟན་པའི་འཕགས་པའི་བདེན་བ་བཞི་རྣམས་བདག་གིས་དེ་ལྟར་བཟུང་ངོ༌། །དགེ་སློང་ངས་བསྟན་པའི་འཕགས་པའི་བདེན་པ་བཞི་བཟུང་བ་ལེགས་སོ་ལེགས་སོ། །དེ་ཅིའི་ཕྱིར་ཞེ་ན། སྡུག་བསྔལ་འཕགས་པའི་བདེན་པའོ་ཞེས་ངས་བསྟན་པ་དགེ་སློང་འདིས་རབ་ཏུ་བཟུང་ཞིང་དེ་བཞིན་ཞེས་བྱ་བ་ནས། སྔ་མ་བཞིན་དུ་འདི་དག་འཕགས་པ་རྣམས་ལ་བདེན་པ་དེའི་ཕྱིར་འཕགས་པའི་བདེན་བ་ཞེས་བརྗོད་དོ་ཞེས་བྱ་བའི་བར་དུའོ། །སྡུག་བསྔལ་ཀུན་འབྱུང་བ་དང༌། སྡུག་བསྔལ་འགོག་པ་དང༌། སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་ཞེས་བསྟན་པ་དེ་དགེ་སློང་འདིས་རབ་ཏུ་བཟུང་ཞིང་དེ་བཞིན་དང་ཞེས་བྱ་བ་ནས། སྔ་མ་བཞིན་དུ་འདི་དག་འཕགས་པ་རྣམས་ལ་བདེན་པ་དེའི་ཕྱིར་འཕགས་པའི་བདེན་པ་ཞེས་བྱའོ་ཞེས་བྱ་བའི་བར་དུའོ། །དགེ་སློང་དག་དེའི་ཕྱིར་འཕགས་པའི་བདེན་པ་བཞི་པོ་སྔོན་མངོན་བར་མ་རྟོགས་པ་རྣམས་མངོན་པར་རྟོགས་པར་བྱ་བའི་ཕྱིར་དྲན་བ་དང་ཤེས་བཞིན་གྱིས་འདུན་པ་དྲག་པོ་དང༌། བརྩོན་འགྲུས་དང༌། འབད་པ་དང༌། རྩོལ་བ་དང༌། མི་གཏོང་བ་དང༌། རབ་ཏུ་འབད་པ་ཆེན་པོ་ཞེས་བྱའོ་ཞེས་གསུངས་སོ། །འཕགས་པས་བདེ་བར་གང་གསུངས་པ། །དེ་ནི་གཞན་གྱིས་སྡུག་བསྔལ་རིག །ཅེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་
སློང་དག་ལྷ་དང་མི་རྣམས་གཟུགས་ལ་དགའ་ཞིང་གནས་ཏེ། གཟུགས་ལ་ཀུན་དུ་དགའ་བ་དང༌། གཟུགས་ལ་རབ་ཏུ་དགའ་བ་དང༌། གཟུགས་ལ་མངོན་པར་དགའ་བ་དང༌། གཟུགས་ལ་འདོད་ཆགས་དང་བྲལ་བ་དང༌། འགགས་ན་ལྷ་དང་མི་རྣམས་སུ་སྡུག་བསྔལ་བར་གནས་སོ། །སྒྲ་ལ་དགའ་བ་དང༌། དྲི་ལ་དགའ་བ་དང༌། རོ་ལ་དགའ་བ་དང༌། རེག་བྱ་ལ་དགའ་བ་དང༌། ཆོས་ལ་དགའ་བ་དང༌། ཆོས་ལ་ཀུན་དུ་དགའ་བ་དང༌། ཆོས་ལ་རབ་ཏུ་དགའ་བ་དང༌། ཆོས་ལ་མངོན་པར་དགའ་བ་དང༌། ཆོས་ལ་འདོད་ཆགས་དང་བྲལ་བ་དང༌། འགགས་ན་ལྷ་དང་མི་རྣམས་སུ་སྡུག་བསྔལ་བར་གནས་སོ། །དགེ་སློང་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ནི་གཟུགས་ཀྱི་ཀུན་འབྱུང་བ་དང༌། མི་སྣང་བ་དང༌། རོ་མྱང་བ་དང༌། ཉེས་དམིགས་དང༌། ངེས་པར་འབྱུང་བ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། གཟུགས་ཀྱི་ཀུན་འབྱུང་བ་དང༌། མི་སྣང་བ་དང༌། རོ་མྱང་བ་དང༌། ཉེས་དམིགས་དང༌། ངེས་པར་འབྱུང་བ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་པས་གཟུགས་ལ་དགའ་ཞིང་གནས་ཏེ། གཟུགས་ལ་ཀུན་དུ་དགའ་བ་དང༌། གཟུགས་ལ་རབ་ཏུ་དགའ་བ་དང༌། གཟུགས་ལ་མངོན་བར་དགའ་བ་མེད་ཅིང་གཟུགས་ལ་འདོད་ཆགས་དང་བྲལ་ཞིང་འགགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྡུག་བསྔལ་བར་མི་གནས་སོ། །དགེ་སློང་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་སྒྲ་དང༌། དྲི་དང། རོ་དང༌། རེག་བྱ་དང༌། ཆོས་རྣམས་ཀྱི་ཀུན་འབྱུང་བ་དང༌། མི་སྣང་བ་དང༌། རོ་མྱང་བ་དང༌། ཉེས་དམིགས་དང༌། ངེས་པར་འབྱུང་བ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་ཆོས་རྣམས་ཀྱི་ཀུན་འབྱུང་བ་དང་མི་སྣང་བ་དང༌། རོ་མྱང་བ་དང༌། ཉེས་དམིགས་དང༌། ངེས་པར་འབྱུང་བ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པས་ཆོས་ལ་མངོན་པར་དགའ་ཞིང་མི་གནས་ཏེ། ཆོས་ལ་ཀུན་དུ་དགའ་བ་དང༌། ཆོས་ལ་རབ་ཏུ་དགའ་བ་དང༌། ཆོས་ལ་མངོན་བར་དགའ་བ་མེད་ཅིང་ཆོས་ལ་འདོད་ཆགས་དང་བྲལ་ཞིང་འགགས་ན་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་སྡུག་བསྔལ་བར་མི་གནས་སོ། །དེ་ཅིའི་ཕྱིར་ཞེ་ན། མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་སྐྱེ་བར་འགྱུར་ཞིང༌། གསུམ་འདུས་པ་ལས་རེག་པ་དང༌། རེག་པའི་རྐྱེན་གྱིས་ཚོར་བ་བདེ་བ་དང༌། སྡུག་བསྔལ་བ་དང་བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པ་སྐྱེ་བར་འགྱུར་རོ་ཞེས་དེས་ཚོར་བ་འདི་རྣམས་ཀྱི་ཀུན་འབྱུང་བ་དང༌། མི་སྣང་བ་དང༌། རོ་མྱང་བ་དང༌། ཉེས་དམིགས་དང༌། ངེས་པར་འབྱུང་བ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། དེས་ཚོར་བ་འདི་དག་གི་ཀུན་འབྱུང་བ་དང༌། མི་སྣང་བ་དང༌། རོ་མྱང་བ་དང༌། ཉེས་དམིགས་དང༌། ངེས་པར་འབྱུང་བ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་པས་གཟུགས་ལ་ཀུན་དུ་སྦྱོར་བ་དེ་དག་ཟད་ཅིང་གཞན་གྱིས་སྦྱོར་བའི་སྦྱོར་བ་དག་ཟད་ལ་མྱ་ངན་ལས་འདས་པ་གྲུབ་པ་དང་བདེ་བ་བླ་ན་མེད་པ་ཞེས་བརྗོད་དོ། །དགེ་སློང་དག་རྣ་བ་དང༌། སྣ་དང་ལྕེ་དང་ལུས་དང་ཡིད་དང་ཆོས་ལ་བརྟེན་ནས་ཡིད་ཀྱི་རྣམ་པར་ཤེས་པ་སྐྱེ་བར་འགྱུར་ཞིང་གསུམ་འདུས་པ་ལས་རེག་པ་དང༌། རེག་པ་ལ་བརྟེན་ཏེ་ཚོར་བ་བདེ་བ་དང་སྡུག་བསྔལ་བ་དང་བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་བ་སྐྱེ་བར་འགྱུར་ཏེ། དེས་ཚོར་བ་འདི་དག་གི་ཀུན་འབྱུང་བ་དང་ཞེས་བྱ་བ་ནས་སྔ་མ་བཞིན་དུ་ངེས་པར་འབྱུང་བ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་པས་ཆོས་ལ་ཀུན་དུ་སྦྱོར་བ་དེ་དག་ཟད་ཅིང་གཞན་གྱིས་སྦྱོར་བའི་སྦྱོར་བ་དག་ཟད་ལ་མྱ་ངན་ལས་འདས་པ་གྲུབ་པ་དང་བདེ་བ་བླ་ན་མེད་པ་ཞེས་བརྗོད་དོ་ཞེས་བྱ་བའི་བར་དུའོ། །སྟོན་པས་གཞན་ཡང་འདི་སྐད་བཀའ་སྩལ་ཏོ། །གཟུགས་དར་སྒྲ་དང་དྲི་དང་རོ། །རེག་དང་ཆོས་རྣམས་འབའ་ཞིག་ལ། །ལྷ་མིར་བཅས་པའི་འཇིག་རྟེན་རྣམས། །འདོད་དང་སྡུག་དང་ཡིད་འོང་དང༌། །ཇི་སྲིད་ཡོད་པ་ཞེས་བརྗོད་ཅིང༌། །དེ་ལ་བདེ་བ་ཉིད་དུ་རིག །གང་ཕྱིར་འདོད་ཆགས་བྲལ་འགགས་ན། །དེ་དག་སྡུག་བསྔལ་ཉིད་དུ་རིག །འཇིག་ཚོགས་ལྟ་བ་འགགས་པ་ནི། །གཞན་གྱིས་བདེ་བ་མཐོང་བ་ཡིན། །རྐྱེན་ལས་འདི་དག་བྱུང་བ་དང༌། །འཇིག་རྟེན་ཀུན་གྱིས་མཐོང་མ་ཡིན། །འཕགས་པས་བདེ་བར་གང་གསུངས་པ། །དེ་ནི་སྡུག་བསྔལ་གཞན་གྱིས་རིག །གཞན་གྱིས་སྡུག་བསྔལ་གང་སྨྲས་པ། །དེ་ནི་འཕགས་པས་བདེ་བར་མཁྱེན། །
གང་ལས་བྱིས་པ་རྨོངས་གྱུར་པ། །མུན་པས་ཀུན་ནས་བསྐོར་བ་དང༌། །མུན་པ་ལྟ་བུར་གྱུར་པ་ཡི། །རྟོགས་པར་དཀའ་བའི་ཆོས་རྣམས་ལྟོས། །སྒྲོན་མ་མཐོང་བ་ཇི་ལྟ་བར། །དེ་དག་སྒྲིབ་པ་མེད་པར་འགྱུར། །ཁ་ཅིག་རྣམ་པར་མི་ཤེས་མི། །ཆོས་རྣམས་ཇི་ལྟར་རིག་པར་འགྱུར། །སྲིད་པའི་འདོད་ཆགས་མཐར་ཕྱིན་པ། །ཆོས་རྣམས་ཡང་དག་རིག་པར་འགྱུར། །གང་ཡང་འདི་དག་འཕགས་པ་ལས། །གཞན་གྱིས་རྟོགས་པར་རིགས་མ་ཡིན། །གོ་འཕང་གང་ཞིག་ཡོངས་ཤེས་ན། །ཡང་སྲིད་དག་ཏུ་འགྲོ་མི་འགྱུར། །ཞེས་གསུངས་སོ། །བདེ་བའི་ཚོར་བ་སྐྱེ་བ་ན་བདེ་བ་ཞེས་བྱ་བ་ལ། ལུང་བར་མའི་སྡོམ་གྱི་ཚིགས་སུ་བཅད་པ་གསུམ་པའི་མཐར་དགེ་སློང་མ་ཆོས་སྦྱིན་གྱི་མདོ་ལས་འདོན་པ་སྡུག་བསྔལ་གྱི་ཚོར་བ་ནི་འགགས་པ་ན་བདེ་ཞེས་མདོ་བྲིས་ཟིན་ཏོ། །གང་མི་རྟག་པ་དེ་ནི་སྡུག་བསྔལ་བའོ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་གཟུགས་མི་རྟག་པ་སྟེ་གང་མི་རྟག་པ་དེ་ནི་སྡུག་བསྔལ་བ། དེ་ནི་བདག་མེད་པ་སྟེ། གང་བདག་མེད་པ་དེ་ཐམས་ཅད་ནི་ངའི་ཞེས་བྱ་བ་དང༌། འདི་བདག་གི་ཞེས་བྱ་བ་དང༌། བདག་འདིའི་ཞེས་བྱ་བ་མེད་དོ་ཞེས་འདི་ལྟར་ཡང་དག་པའི་ཤེས་རབ་ཀྱིས་བལྟ་བར་བྱའོ། །དགེ་སློང་དག་འདི་ལྟར་མཐོང་བའི་འཕགས་པ་ཉན་ཐོས་ཐོས་པ་དང་ལྡན་བ་དག་གཟུགས་ལ་སྐྱོ་བར་འགྱུར་ཞིང་ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་རྣམས་ལ་ཡང་སྐྱོ་བར་འགྱུར་ཏེ། སྐྱོ་ན་འདོད་ཆགས་དང་བྲལ་ཞིང་འདོད་ཆགས་དང་བྲལ་ན་གྲོལ་བར་འགྱུར་ཞིང༌། གྲོལ་ན་རྣམ་པར་གྲོལ་བའི་ཡེ་ཤེས་མཐོང་བ་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་བྱ་བར་འགྱུར་རོ་ཞེས་གསུངས་སོ། །སྐྱེ་མཆེད་དྲུག་གི་ཚོགས་ཀྱི་སྡོམ་གྱི་ཚིགས་སུ་བཅད་པ་གཉིས་པའི་མདོ་ལྔ་པ་ལས་གཟུགས་ལ་སོགས་པའི་གནས་རྣམས་དང༌། མིག་ལ་སོགས་པ་ནང་གི་བདག་ཉིད་ཀྱི་སྐྱེ་མཆེད་རྣམས་སུ་བྱས་ནས་དེ་ལྟར་འདོན་ཏོ།། །།གང་ཅུང་ཟད་ཚོར་བ་དེ་ཐམས་ཅད་སྡུག་བསྔལ་བའོ་ཞེས་བྱ་བ་ལ། གླེང་གཞི་ཡང་དག་པར་ལྡན་པའི་སྒོ་གསུམ་པའི་སྡོམ་གྱི་ཚིགས་སུ་བཅད་
པ་ལྔ་པར་ལྔ་པ་དང་ཡན་ལག་ལྔར་བཞག་པ་ཞེས་བྱ་བའི་མདོ་ལས་གནས་བརྟན་འཆར་བྱེད་ཀྱིས་བཅོམ་ལྡན་འདས་ལ་ཡོངས་སུ་དྲིས་པ་ཇི་སྐད་དུ་བཙུན་པ་བཅོམ་ལྡན་འདས་ལ་བདག་དོན་འདི་ལྟ་བུ་ཡོངས་སུ་འདྲི་སྟེ། བཙུན་བ་ཚོར་བ་རྣམས་དུ་ཞིག་མཆིས་པ་བཅོམ་ལྡན་འདས་ཀྱིས་བཤད་དུ་གསོལ། འཆར་བྱེད་ངས་ཚོར་བ་གཅིག་ཏུ་བཤད་པའི་རྣམ་གྲངས་ཀྱང་ཡོད། ངས་ཚོར་བ་གཉིས་སུ་བཤད་པའི་རྣམ་གྲངས་ཀྱང་ཡོད། ངས་ཚོར་བ་གསུམ་དུ་བཤད་པའི་རྣམ་གྲངས་ཀྱང་ཡོད། ངས་ཚོར་བ་བཞིར་བཤད་པའི་རྣམ་གྲངས་ཀྱང་ཡོད། ངས་ཚོར་བ་ལྔར་བཤད་པའི་རྣམ་གྲངས་ཀྱང་ཡོད། ངས་ཚོར་བ་དྲུག་ཏུ་བཤད་པའི་རྣམ་གྲངས་ཀྱང་ཡོད། ངས་ཚོར་བ་བཅོ་བརྒྱད་དུ་བཤད་པའི་རྣམ་གྲངས་ཀྱང་ཡོད། ངས་ཚོར་བ་སུམ་ཅུ་རྩ་དྲུག་ཏུ་བཤད་པའི་རྣམ་གྲངས་ཀྱང་ཡོད། ངས་ཚོར་བ་བརྒྱ་རྩ་བརྒྱད་དུ་བཤད་པའི་རྣམ་གྲངས་ཀྱང་ཡོད། ངས་ཚོར་བ་ཚད་མེད་པར་བཤད་པའི་རྣམ་གྲངས་ཀྱང་ཡོད་དོ། །འཆར་བྱེད་ངས་ཚོར་བ་གཅིག་ཏུ་བཤད་པའི་རྣམ་གྲངས་གང་ཞེ་ན། གང་ཅུང་ཟད་ཚོར་བ་དེ་ཐམས་ཅད་ནི་སྡུག་བསྔལ་བ་སྟེ། འཆར་བྱེད་རྣམ་གྲངས་འདིས་ན་ངས་ཚོར་བ་གཅིག་ཏུ་བཤད་དོ། །འཆར་བྱེད་ངས་ཚོར་བ་གཉིས་སུ་བཤད་པའི་རྣམ་གྲངས་གང་ཞེ་ན། ལུས་ཀྱི་དང་སེམས་ཀྱི་སྟེ། འཆར་བྱེད་རྣམ་གྲངས་འདིས་ན་ངས་ཚོར་བ་གཉིས་སུ་བཤད་དོ། །འཆར་བྱེད་ངས་ཚོར་བ་གསུམ་དུ་བཤད་པའི་རྣམ་གྲངས་གང་ཞེ་ན། བདེ་བ་དང༌། སྡུག་བསྔལ་བ་དང༌། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་བ་སྟེ། འཆར་བྱེད་ངས་རྣམ་གྲངས་འདིས་ན་ཚོར་བ་གསུམ་དུ་བཤད་དོ། །འཆར་བྱེད་ངས་ཚོར་བ་བཞིར་བཤད་པའི་རྣམ་གྲངས་གང་ཞེ་ན། འདོད་པ་དང་ཡང་དག་པར་ལྡན་པ་དང༌། གཟུགས་དང་ཡང་དག་པར་ལྡན་པ་དང༌། གཟུགས་མེད་པ་དང་ཡང་དག་པར་ལྡན་པ་དང༌། ཟག་པ་མེད་པ་དང་ཡང་དག་པར་ལྡན་བ་སྟེ། འཆར་བྱེད་ངས་རྣམ་གྲངས་འདིས་ན་ཚོར་བ་བཞིར་བཤད་དོ། །འཆར་བྱེད་ངས་ཚོར་བ་ལྔར་བཤད་པའི་རྣམ་གྲངས་གང་ཞེ་ན། བདེ་བའི་དབང་པོ་དང༌། སྡུག་བསྔལ་བའི་དབང་པོ་དང༌། ཡིད་བདེ་བའི་དབང་པོ་དང༌། ཡིད་མི་བདེ་བའི་དབང་པོ་དང༌། བཏང་སྙོམས་ཀྱི་དབང་པོ་སྟེ། འཆར་བྱེད་ངས་
རྣམ་གྲངས་འདིས་ན་ཚོར་བ་ལྔར་བཤད་དོ། །འཆར་བྱེད་ངས་ཚོར་བ་དྲུག་ཏུ་བཤད་པའི་རྣམ་གྲངས་གང་ཞེ་ན། མིག་གི་འདུས་ཏེ་རེག་པ་ལས་སྐྱེས་པའི་ཚོར་བ་དང༌། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ཀྱི་འདུས་ཏེ་རེག་པ་ལས་སྐྱེས་པའི་ཚོར་བ་སྟེ། འཆར་བྱེད་ངས་རྣམ་གྲངས་འདིས་ན་ཚོར་བ་དྲུག་ཏུ་བཤད་དོ། །འཆར་བྱེད་ངས་ཚོར་བ་བཅོ་བརྒྱད་དུ་བཤད་པའི་རྣམ་གྲངས་གང་ཞེ་ན། ཡིད་བདེ་བའི་ཉེ་བར་རྒྱུ་བ་དྲུག་དང༌། ཡིད་མི་བདེ་བའི་ཉེ་བར་རྒྱུ་བ་དྲུག་དང༌། བཏང་སྙོམས་ཀྱི་ཉེ་བར་རྒྱུ་བ་དྲུག་སྟེ། དེ་དག་གཅིག་ཏུ་བསྡམས་ན་ཚོར་བ་བཅོ་བརྒྱད་དུ་འགྱུར་ཏེ། འཆར་བྱེད་ངས་རྣམ་གྲངས་འདིས་ན་ཚོར་བ་བཅོ་བརྒྱད་དུ་བཤད་དོ། །འཆར་བྱེད་ངས་ཚོར་བ་སུམ་ཅུ་རྩ་དྲུག་ཏུ་བཤད་པའི་རྣམ་གྲངས་གང་ཞེ་ན། ཡིད་བདེ་བ་ཞེན་པ་ལ་བརྟེན་པ་དྲུག་དང༌། ཡིད་བདེ་བ་མངོན་པར་འབྱུང་བ་ལ་བརྟེན་པ་དྲུག་དང༌། ཡིད་མི་བདེ་བཞིན་པ་ལ་བརྟེན་པ་དྲུག་དང༌། ཡིད་མི་བདེ་བ་མངོན་པར་འབྱུང་བ་ལ་བརྟེན་པ་དྲུག་དང༌། བཏང་སྙོམས་ཞེན་པ་ལ་བརྟེན་པ་དྲུག་དང༌། བཏང་སྙོམས་མངོན་པར་འབྱུང་བ་ལ་བརྟེན་པ་དྲུག་སྟེ། གཅིག་ཏུ་བསྡུས་ནས་སུམ་ཅུ་རྩ་དྲུག་ཏུ་འགྱུར་རོ། འཆར་བྱེད་ངས་རྣམ་གྲངས་འདིས་ཚོར་བ་སུམ་ཅུ་རྩ་དྲུག་ཏུ་བཤད་དོ། །འཆར་བྱེད་ངས་རྣམ་གྲངས་གང་གིས་ཚོར་བ་བརྒྱ་རྩ་བརྒྱད་དུ་བཤད་ཅེ་ན། འདས་པའི་དུས་སུ་བྱུང་བའི་ཚོར་བ་སུམ་ཅུ་རྩ་དྲུག་དང༌། མ་འོངས་པའི་དུས་ན་འབྱུང་བར་འགྱུར་བའི་ཚོར་བ་སུམ་ཅུ་རྩ་དྲུག་དང༌། ད་ལྟར་བྱུང་བའི་དུས་ན་བྱུང་བའི་ཚོར་བ་སུམ་ཅུ་རྩ་དྲུག་སྟེ། དེ་དག་གཅིག་ཏུ་བསྡུས་ན་ཚོར་བ་བརྒྱ་རྩ་བརྒྱད་དུ་འགྱུར་ཏེ། འཆར་བྱེད་ངས་རྣམ་གྲངས་འདིས་ན་ཚོར་བ་བརྒྱ་རྩ་བརྒྱད་དུ་བཤད་དོ། །འཆར་བྱེད་ངས་ཚོར་བ་དཔག་ཏུ་མེད་པར་བཤད་པའི་རྣམ་གྲངས་གང་ཞེ་ན། ཇི་ལྟར་ཚོར་ཡང་ཚོར་བ་ཞེས་བྱ་བའི་གྲངས་སུ་འགྲོ་སྟེ། འཆར་བྱེད་ངས་རྣམ་གྲངས་འདིས་ན་ཚོར་བ་དཔག་ཏུ་མེད་པར་བཤད་དོ། །འཆར་བྱེད་གང་འབའ་ཞིག་ངས་རྣམ་གྲངས་ཀྱིས་བཤད་པའི་ཆོས་རྣམས་རྣམ་པ་ཐམས་ཅད་ཀྱི་ཐམས་ཅད་དུ་ཐམས་ཅད་ཀྱིས་དོན་ཐམས་ཅད་མི་ཤེས་ན། དེ་དག་འཐབ་པ་དང༌། མཚང་འདྲུ་བ་དང༌། རྩོད་པ་དང༌། རྣམ་པར་སྨྲ་བ་དང༌། རྩོད་པར་སྐྱེ་ཞིང་བྱུང་བ་དག་སྟོན་པའི་ཆོས་འདུལ་བས་ཉེ་བར་མ་ཞི་
བར་གནས་སོ་ཞེས་རེ་བར་བྱའོ། །འཆར་བྱེད་གང་འགའ་ཞིག་ངས་རྣམ་གྲངས་ཀྱིས་བཤད་བའི་ཆོས་རྣམས་རྣམ་པ་ཐམས་ཅད་ཀྱི་ཐམས་ཅད་དུ་ཐམས་ཅད་ཀྱིས་དོན་ཐམས་ཅད་ཤེས་ན། དེ་དག་འཐབ་པ་དང༌། མཚང་འདྲུ་བ་དང༌། རྩོད་པ་དང༌། རྣམ་པར་སྨྲ་བ་དང། རྩོད་པ་སྐྱེས་ཤིང་བྱུང་བ་དག་སྟོན་པའི་ཆོས་འདུལ་བ་ལ་ཉེ་བར་ཞི་ཞིང་གནས་པར་འགྱུར་རོ་ཞེས་རེ་བར་བྱའོ་ཞེས་གསུངས་སོ།། །།ངས་འདུ་བྱེད་མི་རྟག་པ་ཉིད་ལ་དགོངས་ནས་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དེ་ནས་ཚེ་དང་ལྡན་པ་ཀུན་དགའ་བོ་གཅིག་བུ་དབེན་པ་ན་ནང་དུ་ཡང་དག་འཇོག་ལ་གནས་པ་ན་སེམས་ལ་སེམས་ཀྱིས་ཡོངས་སུ་རྟོག་པ་འདི་ལྟ་བུ་དག་སྐྱེས་ཏེ། བཅོམ་ལྡན་འདས་ཀྱིས་བདེ་བ་དང་སྡུག་བསྔལ་བ་དང༌། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པའི་ཚོར་བ་གསུམ་དུ་ཡང་གསུངས་ལ། བཅོམ་ལྡན་འདས་ཀྱིས་ཚོར་བ་གང་ཅི་ཡང་རུང་བ་དེ་ཐམས་ཅད་ནི་སྡུག་བསྔལ་བའོ་ཞེས་ཀྱང་གསུངས། བཅོམ་ལྡན་འདས་ཀྱིས་ཅི་ལ་དགོངས་ནས་ཚོར་བ་གང་ཅི་ཡང་རུང་བ་དེ་ཐམས་ཅད་ནི་སྡུག་བསྔལ་བའོ་ཞེས་གསུངས་སྙམ་དུ་སེམས་ན། དེ་ནས་ཚེ་དང་ལྡན་པ་ཀུན་དགའ་བོ་དགོངས་ཀ་ནང་དུ་ཡང་དག་འཇོག་ལས་ལངས་ཏེ། བཅོམ་ལྡན་འདས་གང་ན་བ་དེར་ཉེ་བར་སོང་སྟེ། ཉེ་བར་སོང་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་བྱས་ནས། ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ཚེ་དང་ལྡན་བ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་བ་བཅོམ་ལྡན་འདས་འདི་ན་བདག་གཅིག་པུ་དབེན་པར་གྱུར་པ་ན་ནང་དུ་ཡང་དག་འཇོག་ལ་གནས་པ་ན་སེམས་ལ་སེམས་ཀྱི་རྣམ་པར་རྟོག་པ་འདི་ལྟ་བུ་དག་སྐྱེས་ཏེ། བཅོམ་ལྡན་འདས་ཀྱིས་ཚོར་བ་འདི་གསུམ་དུ་ཡང་གསུངས་ལ་ཞེས་བྱ་བ་ནས། ཚོར་བ་གང་ཅི་ཡང་རུང་བ་དེ་ཐམས་ཅད་ནི་སྡུག་བསྔལ་བའོ་ཞེས་ཀྱང་གསུངས་ཞེས་བྱ་བའི་བར་དུའོ། །ཀུན་དགའ་བོ་ངས་འདུ་བྱེད་ནི་མི་རྟག་པ་ཉིད་དང་ཡོངས་སུ་འགྱུར་བ་ཉིད་ལ་དགོངས་ནས་ཚོར་བ་གང་ཅི་ཡང་རུང་བ་དེ་ཐམས་ཅད་ནི་སྡུག་བསྔལ་བའོ་ཞེས་གསུངས་སོ། །ཀུན་དགའ་བོ་འོན་ཀྱང་འདུ་བྱེད་རྣམས་རིམ་པ་བཞིན་དུ་ཉེ་བར་ཞི་བར་འགྱུར་ཞིང་རིམ་པ་
བཞིན་དུ་འདུ་བྱེད་རྣམས་ཉེ་བར་ཞི་བར་འགྱུར་ཏེ། རིམ་པ་བཞིན་དུ་འདུ་བྱེད་རྣམས་སོ་སོར་འགག་པར་འགྱུར་ཞིང་རིམ་པ་བཞིན་དུ་འདུ་བྱེད་རྣམས་སོ་སོར་རབ་ཏུ་འགག་པར་འགྱུར་རོ། །བཙུན་བ་ཇི་ལྟ་ཇི་ལྟར་འདུ་བྱེད་རྣམས་རིམ་གྱིས་ཉེ་བར་ཞི་བར་འགྱུར་ཞིང་རིམ་པ་བཞིན་དུ་འདུ་བྱེད་རྣམས་ཉེ་བར་ཞི་བར་འགྱུར་ཞེ་ན། ཀུན་དགའ་བོ་བསམ་གཏན་དང་པོ་ལ་སྙོམས་པར་ཞུགས་ན་ངག་ཉེ་བར་ཞི་བར་འགྱུར་རོ། །བསམ་གཏན་གཉིས་པ་ལ་སྙོམས་པར་ཞུགས་ན་རྟོག་པ་དང་དཔྱོད་པ་ཉེ་བར་ཞི་བར་འགྱུར་རོ། །བསམ་གཏན་གསུམ་པ་ལ་སྙོམས་པར་ཞུགས་ན་དགའ་བ་ཉེ་བར་ཞི་བར་འགྱུར་རོ། །བསམ་གཏན་བཞི་པ་ལ་སྙོམས་པར་ཞུགས་ན་དབུགས་འབྱུང་བ་དང་རྔུབ་པ་ཉེ་བར་ཞི་བར་འགྱུར་རོ། །འདུ་ཤེས་དང་ཚོར་བ་འགོག་པ་ལ་སྙོམས་པར་ཞུགས་ན་འདུ་བྱེད་དང་ཚོར་བ་ཉེ་བར་ཞི་བར་འགྱུར་ཏེ། ཀུན་དགའ་བོ་འདི་ལྟར་འདུ་བྱེད་རྣམས་རིམ་པ་བཞིན་དུ་ཉེ་བར་ཞི་བར་འགྱུར་ཞིང་རིམ་པ་བཞིན་དུ་ཉེ་བར་ཞི་བར་འགྱུར་རོ། །བཙུན་པ་འདི་ལྟར་འདུ་བྱེད་རྣམས་རིམ་གྱིས་ཉེ་བར་ཞི་བར་འགྱུར་ཞིང་རིམ་པ་བཞིན་དུ་འདུ་བྱེད་རྣམས་ཉེ་བར་ཞི་བར་འགྱུར་ན། བཙུན་པ་ཇི་ལྟ་ཇི་ལྟར་རིམ་པ་བཞིན་དུ་འདུ་བྱེད་རྣམས་སོ་སོར་འགག་པར་འགྱུར་ཞིང༌། རིམ་པ་བཞིན་དུ་འདུ་བྱེད་རྣམས་རབ་ཏུ་སོ་སོར་འགག་པར་འགྱུར་ཞེ་ན། ཀུན་དགའ་བོ་བསམ་གཏན་དང་པོ་ལ་སྙོམས་པར་ཞུགས་ན་ངག་སོ་སོར་འགག་པར་འགྱུར་ཞེས་བྱ་བ་ནས། འདུ་ཤེས་དང་ཚོར་བ་འགོག་པ་ལ་སྙོམས་པར་ཞུགས་ན་འདུ་ཤེས་དང་ཚོར་བ་སོ་སོར་འགག་པར་འགྱུར་ཞེས་བྱ་བའི་བར་དུ་སྟེ། ཀུན་དགའ་བོ་འདི་ལྟར་ན་རིམ་པ་བཞིན་དུ་འདུ་བྱེད་རྣམས་སོ་སོར་འགག་པར་འགྱུར་ཞིང་རིམ་པ་བཞིན་དུ་འདུ་བྱེད་རྣམས་སོ་སོར་འགག་པར་འགྱུར་རོ། །ཀུན་དགའ་བོ་སོ་སོར་འགག་པ་དེ་དག་ལས་མཆོག་ཏུ་གྱུར་པའི་སོ་སོར་འགག་པ། ཁྱད་པར་དུ་འཕགས་པའི་སོ་སོར་འགག་པ། བླ་ན་མེད་པའི་སོ་སོར་འགག་པ། གོང་ན་མེད་པའི་སོ་སོར་འགག་པ། སོ་སོར་འགག་པ་གཞན་ལས་སོ་སོར་འགག་པ། བླ་ན་མེད་པར་འཇུག་པ། འདས་པར་འཇུག་པ། གྱ་ནོམ་པར་འཇུག་པ་དྲུག་པ་ཡང་ཡོད་དེ། ཀུན་དགའ་བོ་སོ་སོར་འགག་པ་དེ་དག་ལས་ཞེས་བྱ་བ་ནས། སོ་སོར་འགག་པ་གཞན་ལས་སོ་སོར་འགག་པ། བླ་ན་མེད་པར་འཇུག་པ། འདས་པར་འཇུག་པ། གྱ་ནོམ་པར་འཇུག་པ་དྲུག་པ་དེ་གང་ཞེ་ན། ཀུན་དགའ་བོ་འདི་ན་དགེ་སློང་སེམས་
འདོད་ཆགས་ལས་འདོད་ཆགས་དང་བྲལ་ཞིང་རྣམ་པར་གྲོལ་བར་འགྱུར། ཞེ་སྡང་དང་གཏི་མུག་ལས་སེམས་འདོད་ཆགས་དང་བྲལ་ཞིང་རྣམ་པར་གྲོལ་བར་གྱུར་པ་སྟེ། ཀུན་དགའ་བོ་འདི་ནི་སོ་སོར་འགག་པ་དེ་དག་ལས་ཞེས་བྱ་བ་ནས། སོ་སོར་འགག་པ་གཞན་ལས་སོ་སོར་འགག་པ། བླ་ན་མེད་པར་འཇུག་པ། འདས་པར་འཇུག་པ། གྱ་ནོམ་པར་འཇུག་པ་དྲུག་པའོ། །རྫོགས་པའི་སངས་རྒྱས་རབ་མཁྱེན་པས། །འདུ་བྱེད་མི་རྟག་ཉིད་དང་ནི། །ཡོངས་སུ་འགྱུར་བ་ཉིད་མཁྱེན་ནས། །ཚོར་བ་སྡུག་བསྔལ་ཞེས་གསུངས་སོ། །གང་ཡང་དགེ་སློང་བརྩོན་ལྡན་ཞིང༌། །ཤེས་བཞིན་ཡོངས་སུ་མི་གཏོང་བ། །དེ་ཡིས་ཚོར་བ་འདི་དག་ཀུན། །ཡོངས་སུ་ཤེས་པ་དེ་མཁས་པའོ། །དེ་ཡིས་ཚོར་བ་ཡོངས་ཤེས་ནས། །མཐོང་བའི་ཆོས་ལ་ཟག་པ་མེད། །ཕུང་པོ་ཞིག་པར་གྱུར་པ་ན། །ཤེས་རབ་མྱ་ངན་འདས་གྲངས་འཐོབ། །ཅེས་གསུངས་སོ།། །།བདེ་བའི་ཚོར་བ་ནི་སྡུག་བསྔལ་བ་ཉིད་དུ་བལྟ་བར་བྱའོ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་ཚོར་བ་ནི་གསུམ་པོ་འདི་དག་སྟེ། གསུམ་གང་ཞེ་ན། བདེ་བའི་ཚོར་བ་དང༌། སྡུག་བསྔལ་གྱི་ཚོར་བ་དང༌། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པའི་ཚོར་བའོ། །དགེ་སློང་དག་དེ་ལ་བདེ་བའི་ཚོར་བ་ནི་སྡུག་བསྔལ་དུ་བལྟ་བར་བྱའོ། །སྡུག་བསྔལ་གྱི་ཚོར་བ་ནི་ཟུག་རྔུར་བལྟ་བར་བྱའོ། །བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་བའི་ཚོར་བ་ནི་མི་རྟག་པ་དང༌། ཡོངས་སུ་འགྱུར་བའི་ཆོས་ཅན་དུ་བལྟ་བར་བྱའོ། །དགེ་སློང་དག་དགེ་སློང་གང་ཞིག་བདེ་བའི་ཚོར་བ་སྡུག་བསྔལ་དུ་མཐོང་བར་གྱུར་ཅིང༌། སྡུག་བསྔལ་གྱི་ཚོར་བ་འབྲས་དང༌། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པའི་ཚོར་བ་ནི་མི་རྟག་པ་དང༌། ཡོངས་སུ་འགྱུར་བའི་ཆོས་ཅན་དུ་མཐོང་ན། དགེ་སློང་འདིས་ཡང་དག་པ་ལེགས་པར་མཐོང་བ་ཞེས་བྱའོ། །སྟོན་པས་གཞན་ཡང་འདི་སྐད་བཀའ་སྩལ་ཏོ། །གང་གིས་བདེ་བ་སྡུག་བསྔལ་མཐོང༌། །དེ་བཞིན་སྡུག་བསྔལ་ཟུག་རྔུ་དང༌། །བདེ་མིན་སྡུག་བསྔལ་མ་ཡིན་ལ། །མི་རྟག་ཉིད་དུ་མཐོང་གྱུར་པ། །དགེ་སློང་དེ་ཡིས་ཡང་དག་མཐོང༌། །ཞི་ཞིང་ཞི་བའི་གོ་འཕང་རེག །བདག་ཏུ་འཛིན་པ་བཅོམ་ནས་ནི། །བདུད་ཀྱི་སྡེ་ལས་རྒྱལ་བར་འགྱུར། །
ཞེས་གསུངས་སོ།། །།གང་ཡང་ཇི་སྐད་དུ་སྡུག་བསྔལ་བ་ལ་བདེའོ་ཞེས་འདུ་ཤེས་ཕྱིན་ཅི་ལོག་ཅེས་བྱ་བ་ལ། མུ་བཞི་པའི་ཚོམས་ཀྱི་སྡོམ་གྱི་ཚིགས་སུ་བཅད་པ་བཞི་པའི་མདོ་གཉིས་པ་ལས་འབྱུང་བ། མཛོད་ཀྱི་གནས་ལྔ་པ་འདི་ཉིད་དུ་ཕྱིན་ཅི་ལོག་གི་མདོ་ལས་བྲིས་པ་བལྟ་བར་བྱའོ། །གང་ཡང་བདེ་བའི་དབང་པོ་དང༌། །ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་དབང་པོ་ནི་ལྔ་པོ་འདི་དག་སྟེ། བདེ་བའི་དབང་པོ་དང༌། སྡུག་བསྔལ་གྱི་དབང་བོ་དང༌། ཡིད་བདེ་བའི་དབང་པོ་དང༌། ཡིད་མི་བདེ་བའི་དབང་པོ་དང༌། བཏང་སྙོམས་ཀྱི་དབང་པོའོ། །དེ་ལ་བདེ་བའི་དབང་པོ་གང་ཡིན་བ་དང༌། ཡིད་མི་བདེ་བའི་དབང་པོ་གང་ཡིན་པ་ནི་བདེ་བའི་ཚོར་བར་བལྟ་བར་བྱའོ། །སྡུག་བསྔལ་གྱི་དབང་པོ་གང་ཡིན་བ་དང༌། ཡིད་མི་བདེ་བའི་དབང་པོ་གང་ཡིན་པ་ནི་སྡུག་བསྔལ་གྱི་ཚོར་བར་བལྟ་བར་བྱའོ། །བཏང་སྙོམས་ཀྱི་དབང་པོ་གང་ཡིན་པ་ནི་བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པར་བལྟ་བར་བྱའོ། །གང་གིས་དབང་པོ་ལྔ་པོ་འདི་དག་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་མཐོང་ན་ཀུན་དུ་སྦྱོར་བ་གསུམ་སྤོང་ཞིང་ཡོངས་སུ་ཤེས་པར་འགྱུར་ཏེ། གསུམ་གང་ཞེ་ན་འཇིག་ཚོགས་ལ་ལྟ་བ་དང༌། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང༌། ཐེ་ཚོམ་མོ། །རྒྱུན་དུ་ཞུགས་པ་མི་ལྟུང་བའི་ཆོས་ཅན་རྫོགས་པའི་བྱང་ཆུབ་ཏུ་ངེས་པ་མཆོག་ཏུ་ཐོགས་ན་སྲིད་པ་ལན་བདུན་པ། ལྷ་དང་མི་རྣམས་ཀྱི་ནང་དུ་ལན་བདུན་དུ་ཉིང་མཚམས་སྦྱར་ནས་སྡུག་བསྔལ་མཐར་བྱེད་པར་གྱུར་པ་དག་ཡིན་ནོ་ཞེས་གསུངས་སོ།། །། མིང་ཆེན་གཟུགས་གཅིག་ཏུ་སྡུག་བསྔལ་བ་ཞེས་བྱ་བ་ལ་སོགས་པ་ལ། བཅོམ་ལྡན་འདས་ཡངས་པ་ཅན་ན་སྤྲེའུའི་རྫིང་གི་གཙུག་ལག་ཁང་ན་བཞུགས་ཏེ། དེའི་ཚེ་ན་ལིཙྪ་བཱི་མིང་ཆེན་ཞེས་བྱ་བ་ཉི་མ་རེ་རེ་ཞིང་བཅོམ་ལྡན་འདས་ལ་བལྟ་བ་དང༌། བསྙེན་བཀུར་བའི་ཕྱིར་བརྩོན་བར་བྱེད་པར་གྱུར་ཏོ། །དེ་ནས་ལིཙྪ་བཱི་མིང་ཆེན་འདི་སྙམ་དུ་བདག་བཅོམ་ལྡན་འདས་ལ་བལྟ་བ་དང་བསྙེན་བཀུར་བའི་ཕྱིར་འགྲོ་ན། རེ་ཞིག་ནམ་ནངས་ཀྱི་བར་དུ་བཅོམ་ལྡན་འདས་ཀྱང་ནང་དུ་ཡང་དག་འཇོག་ལས་མ་བཞེངས་ཤིང༌། དགེ་སློང་རྣམས་ཀྱང་ནང་དུ་ཡང་དག་འཇོག་ལས་མ་ལངས་པས་བདག་འཚོ་བ་པའི་ཨ་མྲ་བདུན་པ་དག་
གི་ནང་དུ་ཉེ་བར་འགྲོ་བར་བྱའོ་སྙམ་ནས། དེ་ནས་ལིཙྪ་བཱི་མིང་ཆེན་འཚོ་བ་པའི་ཨ་མྲ་བདུན་པའི་ཀུན་དགའ་རབ་གང་ན་བ་དེར་སོང་ངོ༌། །དེའི་ཚོ་ན་འཚོ་བ་པའི་ཨ་མྲ་བདུན་པའི་ཀུན་དགའ་ར་བ་ན་འོད་སྲུངས་རྫོགས་བྱེད་དགེ་འདུན་གྱི་གྲངས་ཀྱིས་བགྲང་ཞིང་འཕགས་པ་ལྟར་བཅོས་པའི་སྐྱེ་བོ་མང་པོ་དང་ཆེན་པོར་བགྲང་པ་དག་གིས་མདུན་དུ་བྱས་ཏེ། འཚོ་བ་པ་ལྔ་བརྒྱ་ཙམ་གྱིས་གཙོ་བོར་བྱས་ཏེ་འདུག་པར་གྱུར་ཏེ། དེའི་འཁོར་རྣམས་ཀུ་ཅོ་དང་ཅ་ཅོ་དང་སྒྲ་གསང་ཆེན་པོ་དང༌། སྒྲ་གསང་མཐོན་པོ་དག་གིས་སོ་སོ་ནས་སྨྲ་སྟེ། དུད་འགྲོའི་གཏམ་བརྗོད་ཅིང་འདུས་པར་གྱུར་ཅིང་འདུག་པས་འོང་སྲུངས་རྫོགས་བྱེད་ཀྱིས་ལིཙྪ་བཱི་མིང་ཆེན་འོངས་པར་གྱུར་པ་དག་ཐག་རིང་པོ་ནས་སྔར་མཐོང་ནས་རང་གི་འཁོར་རྣམས་ལ་སྒྲ་ཆུང་དུར་བྱེད་དུ་བཅུག་སྟེ། ཁྱེད་ཅག་རེ་ཞིག་སྒྲ་ཆུང་ངུར་གྱིས་ཤིག །ཁྱེད་ཅག་ཁ་རོག་འདུག་ཅིག །དགེ་སྦྱོང་གཽ་ཏ་མའི་ཉན་ཐོས་ལིཙྪ་བཱི་མིང་ཆེན་ཞེས་བྱ་བ་འོང་ཞིང་འདུག་གི །དགེ་སྦྱོང་གཽ་ཏ་མའི་ཉན་ཐོས་ཡངས་པ་ཅན་ན་གནས་པ་ཁྱིམ་པ་གོས་དཀར་པོ་གྱོན་པ་དེ་དག་ལས་ལིཙྪ་བཱི་མིང་ཆེན་ནི་མཆོག་ཏུ་གྱུར་པ་སྟེ། སྒྲ་ཆུང་བར་འདོད་པ། སྒྲ་ཆུང་བ་ལ་དགའ་པ། སྒྲ་ཆུང་བས་འདུལ་བ། སྒྲ་ཆུང་བའི་བསྔགས་པ་བརྗོད་པ། འཁོར་སྒྲ་ཆུང་བར་རིག་ནས་འོང་བར་བྱའོ་སྙམ་དུ་སེམས་སོ། །དེ་སྐད་ཅེས་སྨྲས་པ་དང༌། འཁོར་རྣམས་ཁ་རོག་འདུག་པར་གྱུར་ཏོ། །དེ་ནས་ལིཙྪ་བཱི་མིང་ཆེན་འོད་སྲུངས་རྫོགས་བྱེད་གང་ན་བ་དེར་ཉེ་བར་འོངས་ཏེ། ཉེ་བར་འོངས་ནས་འོད་སྲུངས་རྫོགས་བྱེད་དང་ལྷན་ཅིག་ཡང་དག་པར་དགའ་བ་དང༌། ཡང་དག་པར་བདེ་པར་འགྱུར་བའི་གཏམ་རྣམ་པ་སྣ་ཚོགས་བྱས་ཏེ། ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ལིཙྪ་བཱི་མིང་ཆེན་གྱིས་འོད་སྲུངས་རྫོགས་བྱེད་ལ་འདི་སྐད་ཅེས་སྨྲས་སོ། །འོད་སྲུངས་ཁྱེད་འོད་སྲུང་བ་དག་འདི་སྐད་དུ་སེམས་ཅན་རྣམས་ཀུན་ནས་ཉོན་མོངས་པ་ནི་རྒྱུ་མེད་རྐྱེན་མེད། སེམས་ཅན་རྣམས་ནི་རྒྱུ་མེད་རྐྱེན་མེད་པའི་ཀུན་ནས་ཉོན་མོངས་སོ། །སེམས་ཅན་རྣམས་ཀྱི་རྣམ་པར་བྱང་བ་ནི་རྒྱུ་མེད་རྐྱེན་མེད་དེ། སེམས་ཅན་རྣམས་ནི་རྒྱུ་མེད་རྐྱེན་མེད་པར་རྣམ་པར་བྱང་ངོ་ཞེས་ཉན་ཐོས་རྣམས་ལ་ཆོས་སྟོན་ཏོ་ཞེས་ཐོས་ནས། འོད་སྲུངས་གང་ཁ་ཅིག་འདི་སྐད་སྨྲ་ཞིང་འདི་སྐད་དུ་ལུང་སྟོན་ན་ཁྱེད་ཅག་འོད་སྲུང་བ་དག་སྨོད་པར་བྱེད་
དམ། མི་བདེན་པར་སྨྲ་བ་དང༌། ཁྱེད་ཅག་འོད་སྲུང་བའི་ཆོས་སྨྲ་བ་དང༌། ཆོས་ལ་ཆོས་ཀྱི་རྗེས་སུ་མཐུན་པར་ལུང་སྟོན་པ་ཡིན་ནོ། །འགའ་ཞིག་འོངས་ཏེ་འཁོར་གྱི་ནང་དུ་ཆོས་སྨྲ་བ་དང་རྗེས་སུ་སྨྲ་ན་ཆོས་སྨད་པའི་གནས་སུ་མི་བྱེད་དམ། མིང་ཆེན་དེ་སྐད་དུ་སྨྲ་སྟེ། དེ་ལྟར་ལུང་སྟོན་པ་བདེན་ཏེ། སྨོད་པར་མི་བྱེད་ལ། མི་བདེན་པར་སྨྲ་བ་མ་ཡིན་ལ་ཆོས་སྨྲ་བ་ཡིན་ཞིང༌། ཆོས་ལ་ཆོས་ཀྱི་རྗེས་སུ་མཐུན་པར་ལུང་སྟོན་པ་ཡིན་ཞིང་དེ་དག་ལས་འགའ་ཞིག་འོངས་ཏེ་འཁོར་གྱི་ནང་དུ་ཆོས་སྨྲ་བ་དང་རྗེས་སུ་སྨྲ་ན་ཆོས་དེ་ལྟ་བུ་སྨད་པའི་གནས་སུ་མི་བྱེད་དོ། །དེ་ཅིའི་ཕྱིར་ཞེ་ན། མིང་ཆེན་ང་ཡང་འདི་ལྟར་ལྟ་ཞིང་འདི་སྐད་དུ་སྨྲ་སྟེ། སེམས་ཅན་རྣམས་ཀྱི་ཀུན་ནས་ཉོན་མོངས་པ་ནི་རྒྱུ་མེད་རྐྱེན་མེད་དེ། སེམས་ཅན་རྣམས་ནི་རྒྱུ་མེད་རྐྱེན་མེད་པར་ཀུན་ནས་ཉོན་མོངས་སོ། །སེམས་ཅན་རྣམས་ཀྱི་རྣམ་པར་བྱང་བ་ནི་རྒྱུ་མེད་རྐྱེན་མེད་དེ། སེམས་ཅན་རྣམས་ནི་རྒྱུ་མེད་རྐྱེན་མེད་པར་རྣམ་པར་བྱང་ངོ༌། །དེ་ནས་ལིཙྪ་བཱི་མིང་ཆེན་འོད་སྲུངས་རྫོགས་བྱེད་ཀྱིས་བཤད་པ་ལ་ཁྲོ་བར་ཡང་མི་བྱེད། རྗེས་སུ་ཡི་རང་བར་ཡང་མི་བྱེད་པར་སྟན་ལས་ལངས་ཏེ་སོང་ངོ༌། །དེ་ནས་ལིཙྪ་བཱི་མིང་ཆེན་བཅོམ་ལྡན་འདས་གང་ན་བ་དེར་ཉེ་བར་སོང་སྟེ། ཉེ་བར་སོང་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་བྱས་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ལིཙྪ་བཱི་མིང་ཆེན་འོད་སྲུངས་རྫོགས་བྱེད་དང་ལྷན་ཅིག་གཏམ་གཞན་བརྗོད་པ་དེ་ཐམས་ཅད་རྒྱས་པར་བཅོམ་ལྡན་འདས་ལ་གསོལ་ཏོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ལིཙྪ་བཱི་མིང་ཆེན་ལ་འདི་སྐད་ཅེས་བཀའ་སྩལ་ཏོ། །མིང་ཆེན་འོད་སྲུངས་རྫོགས་བྱེད་ནི་མ་དཔྱད་པར་དེའི་རང་བཞིན་མ་ཡིན་བ་དང༌། སོ་སོར་མ་བརྟགས་པའི་ཆོས་སྨྲ་བ་ཡིན་ཏེ། ཇི་ལྟར་ཡང་བྱིས་པ་རྨོངས་པ་མི་གསལ་བ་མི་མཁས་པ་འདི་སྐད་དུ་སེམས་ཅན་རྣམས་ཀྱི་ཀུན་ནས་ཉོན་མོངས་པ་ནི་རྒྱུ་མེད་རྐྱེན་མེད་དེ། སེམས་ཅན་རྣམས་ནི་རྒྱུ་མེད་རྐྱེན་མེད་པར་ཀུན་ནས་ཉོན་མོངས་སོ། །སེམས་ཅན་རྣམས་ཀྱི་རྣམ་པར་བྱང་བ་ནི་རྒྱུ་མེད་རྐྱེན་མེད་དེ། སེམས་ཅན་རྣམས་ནི་རྒྱུ་མེད་རྐྱེན་མེད་པར་རྣམ་པར་བྱང་ངོ་ཞེས་སྨྲ་སྟེ། དེ་ཅིའི་ཕྱིར་ཞེ་ན། མིང་ཆེན་སེམས་ཅན་རྣམས་ཀྱི་ཀུན་ནས་ཉོན་མོངས་པ་ནི་རྒྱུ་དང་བཅས་ཤིང་རྐྱེན་དང་བཅས་ཏེ། སེམས་ཅན་རྣམས་ནི་རྒྱུ་དང་
བཅས་ཤིང་རྐྱེན་དང་བཅས་པར་ཀུན་ནས་ཉོན་མོངས་སོ། །སེམས་ཅན་རྣམས་ཀྱི་རྣམ་པར་བྱང་བ་ནི་རྒྱུ་དང་བཅས་ཤིང་རྐྱེན་དང་བཅས་པ་སྟེ། སེམས་ཅན་རྣམས་ནི་རྒྱུ་དང་བཅས་ཤིང་རྐྱེན་དང་བཅས་པར་རྣམ་པར་བྱང་ངོ༌། །མིང་ཆེན་སེམས་ཅན་རྣམས་ཀྱི་ཀུན་ནས་ཉོན་མོངས་པ་ནི་རྒྱུ་དང་བཅས་རྐྱེན་དང་བཅས་པ་སྟེ། སེམས་ཅན་རྣམས་རྒྱུ་དང་བཅས་རྐྱེན་དང་བཅས་པར་ཉོན་མོངས་པ་གང་ཞེ་ན། མིང་ཆེན་གཟུགས་གཅིག་ཏུ་སྡུག་བསྔལ་བར་གྱུར་ན། སེམས་ཅན་རྣམས་གཟུགས་ལ་ཆགས་པར་ཡང་མི་འགྱུར་ཞིང༌། བདེ་བར་ཡང་མི་འགྱུར། བདེ་བའི་རྗེས་སུ་འགྲོ་བར་ཡང་མི་འགྱུར། བདེ་བ་དང་ཡིད་བདེ་བ་ཆུང་ངུ་ལས་འདས་ཏེ། བདེ་བའི་རྒྱུ་ཉིད་དུ་ཡང་ཤེས་པར་མི་འགྱུར་བ་ཞིག་ན། མིང་ཆེན་གང་གི་ཕྱིར་གཟུགས་གཅིག་ཏུ་སྡུག་བསྔལ་བ་མ་ཡིན་ཞིང༌། བདེ་བ་དང་ཡིད་བདེ་བ་དང་རྗེས་སུ་འབྲེལ་པ་དང༌། བདེ་བ་དང་ཡིད་བདེ་བ་ཆུང་ངུ་ལས་འདས་ཏེ་བདེ་བར་ཤེས་པ་དེའི་ཕྱིར་ཞེས་ཅན་རྣམས་གཟུགས་ལ་ཡང་དག་པར་ཆགས་ཤིང་ཆགས་ནས་ཡང་དག་པར་སྦྱོར་བ་དང༌། ཡང་དག་པར་སྦྱོར་བས་ཀུན་ནས་ཉོན་མོངས་པར་འགྱུར་ཏེ། ཚོར་བ་དང༌། འདུ་ཤེས་དང༌། འདུ་བྱེད་དང༌། མིང་ཆེན་རྣམ་པར་ཤེས་པ་གཅིག་ཏུ་སྡུག་བསྔལ་བ་ཞིག་ཏུ་གྱུར་ན་སེམས་ཅན་རྣམས་རྣམ་པར་ཤེས་པ་ལ་ཆགས་པར་ཡང་མི་འགྱུར་ཞིང༌། བདེ་བར་ཡང་མི་འགྱུར། བདེ་བའི་རྗེས་སུ་འགྲོ་བར་མི་འགྱུར། བདེ་བ་དང་ཡིད་བདེ་བ་ཆུང་དུ་ལས་འདས་ཏེ། བདེ་བའི་རྒྱུ་ཉིད་དུ་ཤེས་པར་ཡང་མི་འགྱུར་བ་ཞིག་ན། མིང་ཆེན་གང་གི་ཕྱིར་རྣམ་པར་ཤེས་པ་གཅིག་ཏུ་སྡུག་བསྔལ་མ་ཡིན་ཞིང་བདེ་བ་དང་ཡིད་བདེ་བ་དང་རྗེས་སུ་འབྲེལ་པ་དང༌། བདེ་བ་དང་ཡིད་བདེ་བ་ཆུང་དུ་ལས་འདས་ཏེ། བདེ་བར་ཤེས་པ་དེའི་ཕྱིར་སེམས་ཅན་རྣམས་རྣམ་པར་ཤེས་པ་ལ་ཡང་དག་པར་ཆགས་ཤིང་ཡང་དག་པར་ཆགས་པས་ཡང་དག་པར་སྦྱོར་བ་དང༌། ཡང་དག་པར་སྦྱོར་བས་ཀུན་ནས་ཉོན་མོངས་པར་འགྱུར་རོ། །མིང་ཆེན་རྒྱུ་འདི་དང་རྐྱེན་འདིས་སེམས་ཅན་རྣམས་ཀུན་ནས་ཉོན་མོངས་ཤིང༌། སེམས་ཅན་རྣམས་ཀྱི་ཀུན་ནས་ཉོན་མོངས་པ་འདི་དག་གི་རྒྱུ་དང་བཅས་ཤིང་རྐྱེན་དང་བཅས་སོ། །མིང་ཆེན་སེམས་ཅན་
རྣམས་ཀྱི་རྣམ་པར་བྱང་བ་ནི་རྒྱུ་དང་བཅས་ཤིང་རྐྱེན་དང་བཅས་པ་སྟེ། སེམས་ཅན་རྣམས་ནི་རྒྱུ་དང་བཅས་རྐྱེན་དང་བཅས་པར་རྣམ་པར་བྱང་བ་གང་ཞེ་ན། མིང་ཆེན་གཟུགས་གཅིག་ཏུ་བདེ་བ་ཞིག་ཏུ་གྱུར་ན་སེམས་ཅན་རྣམས་གཟུགས་ལ་འདོད་ཆགས་དང་བྲལ་བར་ཡང་མི་འགྱུར་ཞིང་སྡུག་བསྔལ་བར་ཡང་མི་འགྱུར་སྡུག་བསྔལ་གྱི་རྗེས་སུ་འགྲོ་བར་ཡང་མི་འགྱུར། སྡུག་བསྔལ་དང་ཡིད་མི་བདེ་བ་ཆུང་ངུ་ལས་འདས་ཏེ་སྡུག་བསྔལ་གྱི་རྒྱུ་ཉིད་དུ་ཡང་ཤེས་པར་མི་འགྱུར་པ་ཞིག་ན། མིང་ཆེན་གང་གི་ཕྱིར་གཟུགས་གཅིག་ཏུ་བདེ་བ་མ་ཡིན་ཞིང་སྡུག་བསྔལ་དང༌། སྡུག་བསྔལ་དང་རྗེས་སུ་འབྲེལ་བ་དང༌། སྡུག་བསྔལ་ཡིད་མི་བདེ་བ་ཆུང་དུ་ལས་འདས་ནས་སྡུག་བསྔལ་གྱི་རྒྱུ་ཤེས་པ་དེའི་ཕྱིར་སེམས་ཅན་རྣམས་གཟུགས་ལ་ཡང་དག་པར་ཆགས་པ་དང་བྲལ་ཞིང་འདོད་ཆགས་དང་བྲལ་ནས་རྣམ་པར་གྲོལ་བ་དང༌། རྣམ་པར་གྲོལ་ནས་ཡོངས་སུ་དག་པར་འགྱུར་རོ། །ཚོར་བ་དང། འདུ་ཤེས་དང༌། འདུ་བྱེད་དང༌། མིང་ཆེན་རྣམ་པར་ཤེས་པ་གཅིག་ཏུ་བདེ་བ་ཞིག་ཏུ་གྱུར་ན་སེམས་ཅན་རྣམས་རྣམ་པར་ཤེས་པ་ལས་འདོད་ཆགས་དང་བྲལ་བར་ཡང་མི་འགྱུར་ཞིང་སྡུག་བསྔལ་བར་ཡང་མི་འགྱུར། སྡུག་བསྔལ་བའི་རྗེས་སུ་འགྲོ་བར་ཡང་མི་འགྱུར། སྡུག་བསྔལ་བ་དང། ཡིད་མི་བདེ་བ་ཆུང་ངུ་ལས་འདས་ནས་སྡུག་བསྔལ་གྱི་རྒྱུ་ཉིད་དུ་ཡང་ཤེས་པར་མི་འགྱུར་བ་ཞིག་ན། མིང་ཆེན་གང་གི་ཕྱིར་རྣམ་པར་ཤེས་པ་གཅིག་ཏུ་བདེ་བ་མ་ཡིན་ཞིང་སྡུག་བསྔལ་བ་དང༌། སྡུག་བསྔལ་གྱི་རྗེས་སུ་འབྲེལ་པ་དང༌། སྡུག་བསྔལ་བ་དང༌། ཡིད་མི་བདེ་བ་ཆུང་ངུ་ལས་འདས་ཏེ་སྡུག་བསྔལ་བར་ཤེས་པ་དེའི་ཕྱིར་སེམས་ཅན་རྣམས་རྣམ་པར་ཤེས་པ་ལས་འདོད་ཆགས་དང་བྲལ་ཞིང་འདོད་ཆགས་དང་བྲལ་ནས་རྣམ་པར་གྲོལ་བ་དང༌། རྣམ་པར་གྲོལ་ནས་ཡོངས་སུ་དག་པར་འགྱུར་ཏེ། མིང་ཆེན་རྒྱུ་འདི་དང་རྐྱེན་འདིས་སེམས་ཅན་རྣམས་རྣམ་པར་བྱང་ཞིང༌། སེམས་ཅན་རྣམས་ཀྱི་ཀུན་ནས་ཉོན་མོངས་པ་རྒྱུ་འདི་དག་གིས་རྒྱུ་དང་བཅས་ཤིང་རྐྱེན་དང་བཅས་སོ། །དེ་ནས་ལིཙྪ་བཱི་མིང་ཆེན་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་ཞིང་རྗེས་སུ་ཡི་རང་ནས་བཅོམ་ལྡན་འདས་ཀྱི་ཞབས་སུ་སྤྱི་བོས།
ཕྱག་བྱས་ནས། བཅོམ་ལྡན་འདས་ཀྱི་དྲུང་ནས་སོང་ངོ་ཞེས་གསུངས་སོ།། །།མདོ་ལས་སྲེད་པ་གསུངས་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་བཞི་པོ་འདི་དག་ནི་འཕགས་པའི་བདེན་པ་སྟེ། བཞི་གང་ཞེ་ན། སྡུག་བསྔལ་འཕགས་པའི་བདེན་པ་དང༌། སྡུག་བསྔལ་ཀུན་འབྱུང་བ་དང༌། སྡུག་བསྔལ་འགོག་པ་དང༌། སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པའོ། །སྡུག་བསྔལ་འཕགས་པའི་བདེན་པ་གང་ཞེ་ན། སྐྱེ་བའི་སྡུག་བསྔལ་དང༌། རྒ་བའི་སྡུག་བསྔལ་དང༌། ན་བའི་སྡུག་བསྔལ་དང༌། འཆི་བའི་སྡུག་བསྔལ་དང༌། མཛའ་བ་དང་བྲལ་བའི་སྡུག་བསྔལ་དང༌། མི་མཛའ་བ་དང་ཕྲད་པའི་སྡུག་བསྔལ་དང༌། གང་འདོད་པ་བཙལ་ཏེ་མ་རྙེད་པ་དེ་དག་སྡུག་བསྔལ་བ་སྟེ། མདོར་ན་ཉེ་བར་ལེན་པའི་ཕུང་པོ་ལྔ་པོ་དག་ནི་སྡུག་བསྔལ་བའོ། །སྡུག་བསྔལ་ཀུན་འབྱུང་བ་འཕགས་པའི་བདེན་པ་གང་ཞེ་ན། དགའ་བའི་འདོད་ཆགས་དང་ལྷན་ཅིག་པར་གྱུར་པའི་སྲེད་པ་ཡང་སྲིད་པར་ཀུན་འབྱུང་བ་སྟེ། དེ་དང་དེ་ལ་མངོན་པར་དགའོ། །སྡུག་བསྔལ་འགོག་པ་འཕགས་པའི་བདེན་པ་གང་ཞེ་ན། གང་ཡང་དགའ་བའི་འདོད་ཆགས་དང་ལྷན་ཅིག་པར་གྱུར་པའི་སྲེད་པ་ཡང་སྲིད་པར་བྱུང་བ་དེ་དང་དེ་ལ་མངོན་པར་དགའ་བ་ལ་མ་ལུས་པར་སྤངས་པ། སོ་སོར་འགགས་པ། ཟད་པ་འདོད་ཆགས་དང་བྲལ་བ་འགགས་པར་ཉེ་བར་ཞི་བར་ནུབ་པའོ། །སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་གང་ཞེ་ན། འཕགས་པའི་ལམ་ཡན་ལག་བརྒྱད་དེ། འདི་ལྟ་སྟེ། ཡང་དག་པའི་ལྟ་བ་དང༌། ཡང་དག་པའི་རྟོག་པ་དང༌། ཡང་དག་པའི་ངག་དང༌། ཡང་དག་པའི་ལས་ཀྱི་མཐའ་དང༌། ཡང་དག་པའི་འཚོ་བ་དང༌། ཡང་དག་པའི་རྩོལ་བ་དང༌། ཡང་དག་པའི་དྲན་པ་དང༌། ཡང་དག་པའི་ཏིང་ངེ་འཛིན་ཏོ་ཞེས་གསུངས་སོ།། །།བཅོམ་ལྡན་འདས་ཀྱིས་ཇི་སྐད་དུ། ལས་དང་སྲེད་པ་དང་ནི་མ་རིག་པ། །ཕྱི་མའི་ཚེ་ལ་འདུ་བྱེད་རྣམས་ཀྱི་རྒྱུ། །ཞེས་བྱ་བ་ལ། སྐྱེ་མཆེད་དྲུག་གི་ཚོགས་ཀྱིས་བསྡུས་པའི་སྡོམ་གྱི་ཚིགས་སུ་བཅད་པ་གཉིས་པའི་སྡོམ་གྱི་ཚིགས་སུ་
བཅད་པ་གསུམ་པའི་མདོ་བཅུ་གཅིག་པ་མིའི་མདོ་ལས་བསྟན་པ་མཛོད་ཀྱི་གནས་གཉིས་པ་འདི་ཉིད་དུ། འདུས་མ་བྱས་ལ་དེ་དག་མེད། །ཅེས་བྱ་བའི་སྐབས་སུ་མྱ་ངན་ལས་འདས་པ་དངོས་པོ་མེད་པ་ཙམ་དུ་བསྟན་པར་ཤེས་པར་བྱེད་པ་བྲིས་པ་བལྟ་བར་བྱའོ། །ས་བོན་གྱི་རྣམ་པ་ལྔ་ཞེས་བྱ་བ་ལ་གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་ལྔ་པོ་འདི་དག་ནི་ས་བོན་གྱི་རྣམ་པ་ལྔ་སྟེ། ལྔ་གང་ཞེ་ན། འདི་ལྟ་སྟེ། རྩ་བའི་ས་བོན་དང༌། སྡོང་བུའི་ས་བོན་དང༌། མདོའི་ས་བོན་དང༌། གཤེགས་པའི་ས་བོན་དང༌། ས་བོན་གྱིས་བོན་རྣམས་སོ། །དགེ་སློང་དག་གལ་ཏེ་ས་བོན་དེ་དག་མ་ཆག་ཅིང་མ་གྲུགས་ལ། མ་རུལ་ཞིང་རླུང་དང་ཚད་པ་དག་གིས་མ་ཉམས་ལ། སྙིང་པོ་དང་ལྡན་པ་ཚགས་བྱས་པ་དང་ལྡན་པ་ཡང་སའི་ཁམས་ཡོད་ལ་ཆུའི་ཁམས་མེད་ན་ས་བོན་དེ་འཕེལ་ཞིང་རྒྱས་པ་དང་ཡངས་པར་མི་འགྱུར་རོ། །དགེ་སློང་དག་གལ་ཏེ་ས་བོན་དེ་དག་མ་ཆག་ཅིང་མ་གྲུགས་ལ་མ་རུལ་ཞིང་རླུང་དང་ཚད་པ་དག་གིས་མ་ཉམས་ལ་སྙིང་པོ་དང་ལྡན་ཞིང་ཚགས་བྱས་པ་དང་ལྡན་ཡང་ཆུའི་ཁམས་ཡོད་ལ་སའི་ཁམས་མེད་ན་ས་བོན་དེ་འཕེལ་ཞིང་རྒྱས་པ་དང་ཡངས་པར་མི་འགྱུར་རོ། །དགེ་སློང་དག་གང་ཡང་ས་བོན་དེ་དག་མ་ཆག་ཅིང་མ་གྲུགས་ལ་མ་རུལ་ཞིང་རླུང་དང་ཚད་པ་དག་གིས་མ་ཉམས་ལ་སྙིང་པོ་དང་ལྡན་ཞིང་ཚགས་བྱས་པ་དང་ལྡན་ཡང་སའི་ཁམས་དང་ཆུའི་ཁམས་ཀྱང་ཡོད་པར་གྱུར་ན་ས་བོན་དེ་འཕེལ་ཞིང་རྒྱས་པ་དང་ཡངས་པར་འགྱུར་རོ། །དགེ་སློང་དག་འདི་ནི་ཇི་ལྟར་དོན་ཤེས་པར་བྱ་བའི་ཕྱིར་དཔེར་བྱས་པ་སྟེ། དོན་ནི་གཞན་དུ་བལྟ་བར་བྱ་སྟེ། དགེ་སློང་དག་ས་བོན་གྱི་རྣམ་པ་ལྔ་ཞེས་བྱ་བ་ནི་ཉེ་བར་ལེན་པ་དང་བཅས་པའི་རྣམ་པར་ཤེས་པའི་ཚིག་བླ་དགས་སོ། །སའི་ཁམས་ཞེས་བྱ་བ་ནི་རྣམ་པར་ཤེས་པ་གནས་པ་བཞིའི་ཚིག་བླ་དགས་སོ། །ཆུའི་ཁམས་ཞེས་བྱ་བ་ནི་དགའ་བའི་འདོད་ཆགས་ཀྱི་ཚིག་བླ་དགས་སོ། །དགེ་སློང་དག་ཉེ་བར་ལེན་པ་དང་བཅས་པའི་རྣམ་པར་ཤེས་པའི་གནས་ནི་བཞི་སྟེ། བཞི་གང་ཞེ་ན། དགེ་སློང་དག་རྣམ་པར་ཤེས་པ་གཟུགས་ལ་ཉེ་བར་བརྟེན་ཅིང་གནས་ཏེ། གཟུགས་ལ་བརྟེན། གཟུགས་ལ་གནས། གཟུགས་ལ་རབ་ཏུ་གནས་པ་དང༌། དོན་དུ་གཉེར་ཞིང་བ་སྟེན་ནས་འཕེལ་ཞིང་རྒྱས་པ་དང་
ཡངས་པར་འགྱུར་རོ། །ཚོར་བར་ཉེ་བར་འགྲོ་བ་དང༌། འདུ་ཤེས་སུ་ཉེ་བར་འགྲོ་བ་དང༌། དགེ་སློང་དག་རྣམ་པར་ཤེས་པ་འདུ་བྱེད་དུ་ཉེ་བར་འགྲོ་བ་ལ་བརྟེན་ཅིང་གནས་ཏེ། འདུ་བྱེད་ལ་བརྟེན། འདུ་བྱེད་ལ་གནས། འདུ་བྱེད་ལ་རབ་ཏུ་གནས་པ་དང༌། དོན་དུ་གཉེར་ཞིང་བསྟེན་ནས་འཕེལ་ཞིང་རྒྱས་པ་དང༌། ཡངས་པར་འགྱུར་རོ། །དགེ་སློང་དག་འདི་ཙམ་ལས་གཞན་དུ་རྣམ་པར་ཤེས་པ་འགྲོ་བ་འམ། འོང་བ་འམ། གནས་པའམ། འཆི་འཕོ་བ་འམ། སྐྱེ་བ་འམ། འཕེལ་ཞིང་རྒྱས་པ་དང་ཡངས་པར་མི་འགྱུར་བ་མི་གདགས་སོ། །དགེ་སློང་དག་གང་ཞིག་འདི་སྐད་དུ་ངས་གཟུགས་ལས་གཞན་དང༌། ཚོར་བ་དང་འདུ་ཤེས་དང་འདུ་བྱེད་ལས་གཞན་དུ་རྣམ་པར་ཤེས་པ་འགྲོ་བ་འམ་འོང་བ་འམ་གནས་པའམ། འཆི་འཕོ་བ་འམ། སྐྱེ་བ་འམ། འཕེལ་ཞིང་རྒྱས་པ་དང༌། ཡངས་པར་འགྱུར་བ་གདགས་པར་བྱའོ་ཞེས་སྨྲ་ན། དེ་ནི་དེའི་ཚིག་ཙམ་དང་དྲིས་པའི་ལན་ཡོངས་སུ་མི་ཤེས་ཤིང་ལན་ལ་མགོ་རྨོངས་བར་བྱེད་པ་སྟེ། ཇི་ལྟར་ཡང་དེའི་ཡུལ་མ་ཡིན་པའི་ཕྱིར་རོ། །དེ་ཅིའི་ཕྱིར་ཞེ་ན། དགེ་སློང་དག་གཟུགས་ཀྱི་ཁམས་ལ་འདོད་ཆགས་དང་བྲལ་བར་གྱུར་ཏེ། འདོད་ཆགས་དང་བྲལ་ན་གཟུགས་སུ་ཉེ་བར་འགྲོ་པའི་ཡིད་ཀྱི་རང་བཞིན་གྱི་འཆིང་བ་སྤོང་བར་འགྱུར་ཞིང༌། གཟུགས་སུ་ཉེ་བར་འགྲོ་བའི་ཡིད་ཀྱི་རང་བཞིན་འཆིང་བ་སྤངས་ན་དམིགས་པ་ཆད་པར་འགྱུར་ཞིང་རྣམ་པར་ཤེས་པ་གནས་པ་འཕེལ་ཞིང་རྒྱས་པ་དང་ཡངས་པར་མི་འགྱུར་རོ། །ཚོར་བའི་ཁམས་དང༌། འདུ་ཤེས་ཀྱི་ཁམས་དང། དགེ་སློང་དག་འདུ་བྱེད་ཀྱི་ཁམས་ལ་འདོད་ཆགས་དང་བྲལ་བར་འགྱུར་ཏེ། འདུ་བྱེད་ལས་འདོད་ཆགས་དང་བྲལ་ན་འདུ་བྱེད་དུ་ཉེ་བར་འགྲོ་བའི་ཡིད་ཀྱི་རང་བཞིན་གྱི་འཆིང་བ་སྤོང་བར་འགྱུར་ཞིང༌། འདུ་བྱེད་དུ་ཉེ་བར་འགྲོ་བའི་ཡིད་ཀྱི་རང་བཞིན་གྱི་འཆིང་བ་སྤོངས་ན་དམིགས་པ་འཆད་པར་འགྱུར་ཞིང༌། རྣམ་པར་ཤེས་པ་གནས་པ་འཕེལ་ཞིང་རྒྱས་པ་དང༌། ཡངས་པར་མི་འགྱུར་ཏེ། རྣམ་པར་ཤེས་པའི་གནས་པ་འཕེལ་ཞིང༌། མངོན་པར་མ་རྒྱས་ན་མངོན་པར་འདུ་མི་བྱེད་ལ། མངོན་པར་འདུས་མ་བྱས་པའི་ཕྱིར་དེར་གནས་སོ། །དེར་གནས་པའི་
ཕྱིར་དགའ་བར་འགྱུར་རོ། །དགའ་བ་ལས་རྣམ་པར་གྲོལ་བར་འགྱུར་རོ། །རྣམ་པར་གྲོལ་བ་ལས་འཇིག་རྟེན་ཅུང་ཟད་ཀྱང་ཉེ་བར་མི་ལེན་ཏོ། །ཉེ་བར་མ་བླངས་ན་གདུང་བ་མེད་དོ། །གང་ཡོངས་སུ་གདུང་བ་མེད་པ་དེ་ནང་གི་བདག་ཉིད་ཀྱི་མྱ་ངན་ལས་འདས་པ་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་བྱ་བར་འགྱུར་ཏེ། དེའི་རྣམ་པར་ཤེས་པ་ཤར་ཕྱོགས་ཀྱི་ཡུལ་དུ་སོང་ཞེས་ང་མི་སྨྲའོ། །ལྷོ་ཕྱོགས་དང༌། ནུབ་ཕྱོགས་དང༌། བྱང་ཕྱོགས་དང༌། སྟེང་དང༌། འོག་གི་ཕྱོགས་དང༌། ཕྱོགས་མཚམས་སུ་ཡང་མ་ཡིན་ཏེ། གཞན་དུ་ན་མཐོང་བའི་ཆོས་ཉིད་ལ་གྲིབ་མ་མེད་པར་ཡོངས་སུ་མྱ་ངན་ལས་འདས་ཤིང༌། ཞི་ཞིང་བསིལ་བར་གྱུར་པ་ཚངས་པར་སྤྱོད་པའོ་ཞེས་གསུངས་སོ།། །།མདོ་ལས་ཀྱང་རྒྱུར་གསུངས་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་མ་རིག་པ་ནི་ཡང་དག་པར་ཆགས་པའི་རྒྱུ་དང་ཡང་དག་པར་ལྡང་བའི་རྒྱུ་དང༌། ཡང་དག་པར་རྨོངས་པའི་རྒྱུ་སྟེ། མ་རིག་པ་ནི་ཡང་དག་པར་ཆགས་པའི་རྒྱུ་ཡང་དག་པར་སྡང་བའི་རྒྱུ། ཡང་དག་པར་རྨོངས་པའི་རྒྱུའོ། །དགེ་སློང་དག་གང་གི་ཕྱིར་ལས་ནི་སྐྱེ་བའི་རྒྱུ་ཡིན་ལ། སྲེད་པ་ནི་མངོན་པར་གྲུབ་པའི་རྒྱུ་ཡིན་ཏེ། འདིར་བསྒོམ་པའི་རང་བཞིན་དགེ་བ་ཟག་པ་དང་བཅས་པའི་ལས་བྱས་ན། དེར་སྐྱེས་ནས་རྣམ་པར་སྨིན་པ་སོ་སོར་མྱོང་བར་འགྱུར་ཏེ། དེའི་ཕྱིར་སེམས་ཅན་དག་གི་ལས་ལས་གཞན་དུ་མི་འགྲོ་བའོ་ཞེས་ང་སྨྲའོ་ཞེས་གསུངས་སོ།། །།རྒྱུ་དང་བཅས་རྐྱེན་དང་བཅས་གཞི་དང་བཅས་པའི་མདོ་ལས་ཞེས་བྱ་བ་ལ། སྐྱེ་མཆེད་དྲུག་གི་ཚོགས་ཀྱིས་བསྡུས་པའི་སྡོམ་གྱི་ཚིགས་སུ་བཅད་པ་གཉིས་པར་འདས་དང་ཞེས་བྱ་བའི་སྡོམ་གྱི་ཚིགས་སུ་བཅད་པ་བསྡུས་པ་དང༌། སྔར་དོན་དམ་པ་སྟོང་པ་ཉིད་ཀྱི་མདོ་ལས་འབྱུང་བ་མཛོད་ཀྱི་གནས་གསུམ་པ་འདི་ཉིད་དུ་རྟེན་ཅིང་འབྲེལ་པར་འབྱུང་བའི་སྐབས་སུ་མ་རིག་པའི་ཚུལ་བཞིན་མ་ཡིན་པ་ཡིད་ལ་བྱེད་པར་བཤད་པ་ལས། མདོ་གཞན་ལས་ཞེས་བྱ་བར་བྲིས་པ་བལྟ་བར་བྱའོ། །འཕགས་པའི་རིགས་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་བཞི་པོ་འདི་དག་ནི་འཕགས་པའི་
པའི་རིགས་མཆོག་རྒྱལ་པོའི་རིགས་སྔོན་ཉོན་མོངས་པ་མ་ཡིན་ཞིང་ཉོན་མོངས་པ་མེད་པ་དགེ་སློང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་དང་བཅས་པའི་འཇིག་རྟེན་གང་གིས་ཀྱང་ཉོན་མོངས་པར་བྱ་བར་མི་ནུས་པ་དག་སྟེ། བཞི་གང་ཞེ་ན། འདི་ལ་དགེ་སློང་ཆོས་གོས་གང་ཡང་རུང་བས་དགའ་བར་འགྱུར་ཞིང༌། ཆོས་གོས་གང་ཡང་རུང་བས་དགའ་བའི་བསྔགས་པ་བརྗོད་ལ་དེ་ཆོས་གོས་ཀྱི་རྒྱུས་རང་བཞིན་མ་ཡིན་པ་མི་ཚོལ་ལོ། །དེ་རྙེད་པའི་ཆོས་གོས་ཀྱིས་མི་སྙེམས་ཤིང་ཆོས་གོས་རྙེད་པ་དག་ལ་མ་ཆགས་པར་ལོངས་སྤྱོད་དེ་ཆགས་པ་དང་ཞེན་པ་དང༌། འདུན་པ་དང༌། བརྒྱལ་བ་དང༌། ཞེན་པ་དང༌། ལྷག་པར་ཞེན་པར་མི་འགྱུར་ཞིང་ཉེས་དམིགས་མཐོང་ཞིང་ངེས་པར་འབྱུང་བ་ལང་དག་པ་ཇི་ལྟ་བ་བཞིན་དུ་ཤེས་ནས་ཉེ་བར་ལོངས་སྤྱོད་དེ། གང་གི་ཕྱིར་དགེ་སློང་མཁས་ཤིང་དྲན་པ་དང་ཤེས་བཞིན་དང་ལྡན་པར་འགྱུར་ཏེ། འདི་ནི་དགེ་སློང་སྔོན་གྱི་འཕགས་པའི་རིགས་ལ་གཉིས་པ་ཞེས་བརྗོད་དོ། །ཆོས་གོས་ཇི་ལྟ་བ་བཞིན་དུ་བསོད་སྙོམས་དང༌། མལ་ཆ་དང་སྟན་ཡང་དེ་བཞིན་ནོ། །གཞན་ཡང་དགེ་སློང་སྤོང་བ་ལ་དགའ་བར་འགྱུར་ཞིང་སྤོང་བ་ལ་དགའ་བ་དང༌། སྤོང་བ་ལ་དགའ་བའི་རྗེས་སུ་མཐུན་པར་གྱུར་པ་དང༌། སྒོམ་པ་ལ་དགའ་བར་གྱུར་ཅིང་སྒོམ་པ་ལ་དགའ་བ་དང༌། སྒོམ་པ་ལ་དགའ་བའི་རྗེས་སུ་མཐུན་པར་གྱུར་པ་སྟེ། དེ་སྤོང་བ་དང་སྒོམ་པ་ལ་དགའ་བས་བསྙེམས་པར་མི་འགྱུར་ཞིང༌། གང་གི་ཕྱིར་དགེ་སློང་དྲན་པ་དང་ཤེས་བཞིན་དང་ལྡན་པར་འགྱུར་ཏེ། འདི་དགེ་སློང་སྔོན་གྱི་འཕགས་པའི་རིགས་ལ་གནས་པ་ཞེས་བརྗོད་དོ། །འཕགས་པའི་རིགས་བཞི་པོ་འདི་དག་དང་ཡང་དག་པར་ལྡན་པའི་འཕགས་པ་ཉན་ཐོས་ཤར་ཕྱོགས་སུ་ཉེ་བར་བརྟེན་ཅིང་གནས་པ་ན་མི་དགའ་བ་མི་གནོད་དེ། དེ་ཉིད་ཀྱིས་མི་དགའ་བ་ལ་གནོད་དོ། །དེ་གལ་ཏེ་ལྷོ་དང་ནུབ་དང་བྱང་ཕྱོགས་སུ་བརྟེན་ཅིང་ཉེ་བར་གནས་པ་ན་ཡང་མི་དགའ་བས་མི་གནོད་དེ། དེས་མི་དགའ་བ་ལ་གནོད་པར་བྱེད་དོ། །དེ་ཅིའི་ཕྱིར་ཞེ་ན། དགེ་སློང་དག་འཕགས་པ་ཉན་ཐོས་ཐོས་པ་དང་ལྡན་པ་དག་གནང་བ་བཟོད་
ཀྱི། མི་དགའ་བ་ནི་བཟོད་དོ། །བརྟན་རྣམས་མི་དགའ་མི་བཟོད་དོ། །བརྟན་རྣམས་དགའ་བ་བཟོད་པ་ཡིན། །དེ་ཡིས་འདོད་པའི་འདོད་ཆགས་ཀུན། །སྤོང་བ་གང་གིས་བཟློག་པར་ནུས། །འཛམ་བུ་ཆུ་བོའི་གསེར་འོད་ལྟར། །དེ་ལ་གང་གིས་སྨད་པར་ནུས། །ཞེས་གསུངས་སོ།། །།སྲེད་པ་སྐྱེ་བ་ནི་རྣམ་པ་བཞི་སྟེ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་ཆོས་གོས་ཀྱི་རྒྱུས་སྲེད་པ་སྐྱེ་བཞིན་པ་ན་སྐྱེའོ། །གནས་པ་ན་གནས་སོ། །མངོན་པར་ཞེན་པ་ན་མངོན་པར་ཞེན་ཏོ། །བསོད་སྙོམས་ཀྱི་རྒྱུ་དང༌། མལ་ཆ་དང་སྟན་གྱི་རྒྱུ་དང། སྲིད་པ་མི་འབྱུང་བའི་རྒྱུས་སྲེད་པ་སྐྱེ་བཞིན་པ་ན་སྐྱེ་བོ་ཞེས་བྱ་བ་སྔ་མ་བཞིན་དུ་འོ་ཞེས་གསུངས་སོ། །ལུས་ལ་ལུས་ཀྱི་རྗེས་སུ་ལྟ་ཞིང་དྲན་པ་ཉེ་བར་གནས་སོ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་དྲན་པ་ཉེ་བར་གཞག་པ་ནི་བཞི་པོ་འདི་དག་སྟེ། བཞི་གང་ཞེ་ན། ལུས་ལ་ལུས་ཀྱི་རྗེས་སུ་ལྟ་ཞིང་དྲན་པ་ཉེ་བར་གཞག་པ་དང༌། ཚོར་བ་དང༌། སེམས་དང༌། ཆོས་རྣམས་ལ་ཆོས་ཀྱི་རྗེས་སུ་ལྟ་ཞིང་དྲན་པ་ཉེ་བར་གནས་སོ་ཞེས་གསུངས་སོ།། །།ནང་གི་ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་དྲན་པ་ཉེ་བར་གཞག་པ་བཞི་བསྒོམ་པ་དག་བསྟན་པར་བྱ་སྟེ། དེ་ལེགས་པར་ཉོན་ལ་ཡིད་ལ་ཟུང་ཤིག་དང་བཤད་པར་བྱའོ། །དགེ་སློང་དག་དྲན་པ་ཉེ་བར་གཞག་པ་བཞི་བསྒོམ་པ་གང་ཞེ་ན། འདི་ལ་དགེ་སློང་དག་ནང་གི་ལུས་ལ་ལུས་ཀྱི་རྗེས་སུ་ལྟ་ཞིང་བརྟུན་པ་ཤེས་བཞིན་དང་དྲན་པ་ཅན་འཇིག་རྟེན་ཀྱི་བརྣབ་སེམས་དང་ཡིད་མི་བདེ་བ་བསལ་ཅིང་གནས་སོ། །ཕྱིའི་ལུས་དང་ཕྱི་དང་ནང་གི་ལུས་དང༌། ནང་གི་ཚོར་བ་དང༌། ཕྱིའི་ཚོར་བ་དང༌། ཕྱི་ནང་གི་ཚོར་བ་དང༌། ནང་གི་སེམས་དང༌། ཕྱིའི་སེམས་དང༌། ནང་དང་ཕྱིའི་སེམས་དང༌། ནང་གི་ཆོས་རྣམས་དང༌། ཕྱིའི་ཆོས་རྣམས་དང༌། ནང་དང་ཕྱིའི་ཆོས་རྣམས་ལ་ཆོས་ཀྱི་རྗེས་སུ་ལྟ་ཞིང་བརྟུན་པ་ཤེས་བཞིན་ཅན་དྲན་པ་དང་ལྡན་པ་འཇིག་རྟེན་གྱི་བརྣབ་སེམས་དང་ཡིད་མི་བདེ་བ་བསལ་ཏེ་གནས་སོ། །དགེ་སློང་དག་འདི་ལྟར་དྲན་པ་ཉེ་བར་
གཞག་པ་བཞི་བསྒོམ་པ་གོམས་པར་བྱའོ། །དགེ་སློང་དག་དྲན་པ་ཉེ་བར་གཞག་པ་བཞི་བསྒོམ་པ་གོམས་པར་བྱའོ་ཞེས་བསྟན་པར་བྱའོ་ཞེས་ངས་ཇི་སྐད་དུ་བསྟན་པ་དེ་རྒྱས་པར་རབ་ཏུ་བཤད་དོ་ཞེས་གསུངས་སོ།། །།དེ་བཞིན་དུ་ཚེ་དང་ལྡན་པར་མ་འགགས་པས་ཇི་སྐད་དུ་ཞེས་བྱ་བ་ལ་ཚེ་དང་ལྡན་པ་མ་འགགས་པ་གནས་བཅས་ན་ཚེར་མ་གསུམ་པ་ཅན་གྱི་ཚལ་ན་བརྟེན་ཅིང་གནས་སོ། །དེའི་ཚེ་ན་ཚེ་དང་ལྡན་པ་མཽད་གལ་གྱི་བུ་ཆེན་པོ་བརྒ་ན་རི་བོང་གསོད་པ་ཞེས་བྱ་བ་རི་དྭགས་ཀྱི་ནགས་འཇིགས་པའི་སྒྲ་ཅན་གྱི་ནགས་ན་རྟེན་ཅིང་ཉེ་བར་གནས་སོ། །དེ་ནས་ཚེ་དང་ལྡན་པ་མ་འགགས་པ་གཅིག་པུ་དབེན་པར་གྱུར་པ་ན་ནང་དུ་ཡང་དག་འཇོག་ལ་གནས་པ་ན་སེམས་ལ་སེམས་ཀྱི་རྣམ་པར་རྟོག་པ་འདི་ལྟ་བུ་དག་སྐྱེས་ཏེ། སེམས་ཅན་རྣམས་ཡོངས་སུ་དག་པར་བྱེད་ཅིང་མྱ་ངན་དང་ཡོངས་སུ་འཚོ་བ་ལས་འདའ་ཞིང་སྡུག་བསྔལ་བ་དང་ཡིད་མི་བདེ་བ་རྣམས་ནུབ་ནས་རིགས་པའི་ཆོས་རྟོགས་པའི་ཐེག་པ་ནི་གཅིག་ཁོ་ན་སྟེ། འདི་ལྟ་སྟེ་དྲན་པ་ཉེ་བར་གཞག་པ་བཞིའོ། །བཞི་གང་ཞེ་ན། ལུས་དྲན་པ་ཉེ་བར་གཞག་པ་དང༌། ཚོར་བ་དང༌། སེམས་དང༌། ཆོས་དྲན་པ་ཉེ་བར་གཞག་པའོ། །གང་འགའ་ཞིག་དྲན་པ་ཉེ་བར་གཞག་པ་བཞི་ལ་མི་དགའ་བ་དེ་དག་ནི་འཕགས་པའི་ཚུལ་ལ་མི་དགའ་བ་ཡིན་ལ། གང་འཕགས་པའི་ཚུལ་ལ་མི་དགའ་བ་དེ་དག་ནི་འཕགས་པའི་ལམ་ལ་མི་དགའ་བ་ཡིན་ལ། གང་འཕགས་པའི་ལམ་ལ་མི་དགའ་བ་དེ་དག་ནི་ཐར་པ་ལ་མི་དགའ་ལ། གང་ཐར་པ་ལ་མི་དགའ་བ་དེ་དག་ནི་སྐྱེ་བ་དང༌། རྒ་བ་དང༌། ན་བ་དང༌། འཆི་བ་དང༌། མྱ་ངན་དང༌། སྨྲེ་སྔགས་འདོན་པ་དང༌། མ་འོངས་པའི་སྡུག་བསྔལ་བ་དང༌། ཡིད་མི་བདེ་བ་དང༌། འཁྲུགས་པ་ལས་མ་གྲོལ་ཞིང་སྡུག་བསྔལ་བའོ་ཞེས་ང་སྨྲའོ། །གང་འགའ་ཞིག་དྲན་པ་ཉེ་བར་གཞག་པ་བཞི་ལ་དགའ་བ་དེ་དག་ནི་འཕགས་པའི་ཚུལ་ལ་དགའ་ལ། །འཕགས་པའི་ཚུལ་ལ་དགའ་བ་དེ་དག་ནི་འཕགས་པའི་ལམ་ལ་དགའ་ཞིང༌། འཕགས་པའི་ལམ་ལ་དགའ་བ་དེ་དག་ནི་ཐར་པ་ལ་དགའ་ལ། ཐར་པ་ལ་
དགའ་བ་དེ་དག་ནི་རྣམ་པར་གྲོལ་བར་འགྱུར་ཏེ། སྐྱེ་བ་དང༌། རྒ་བ་དང༌། ན་བ་དང༌། འཆི་བ་དང༌། མྱ་ངན་དང༌། སྨྲེ་སྔགས་འདོན་པ་དང༌། མ་འོངས་པའི་སྡུག་བསྔལ་བ་དང༌། ཡིད་མི་བདེ་བ་དང༌། འཁྲུགས་པ་ལས་རྣམ་པར་གྲོལ་ཞིང་སྡུག་བསྔལ་མེད་པའོ་ཞེས་ང་སྨྲའོ།། དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་ཚེ་དང་ལྡན་པ་མ་འགགས་པའི་སེམས་སེམས་ཀྱིས་རྣམ་པར་ཤེས་ནས། དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ། སྐྱེས་བུ་སྟོབས་དང་ལྡན་པའི་ལག་པ་བརྐྱང་བ་ལས་བསྐུམ་པ་འམ། བསྐུམ་པ་ལས་བརྐྱང་བ་ཙམ་གྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་བརྒ་རི་བོང་གསོད་པ་ཞེས་བྱ་བ་ནི་དགས་ཀྱི་ནགས་འཇིགས་པ་ཅན་ནས་མི་སྣང་བར་གྱུར་ཏེ། ཚེར་མ་གསུམ་པ་ཅན་གྱི་ཚལ་དུ་ཚེ་དང་ལྡན་པ་མ་འགགས་པའི་མདུན་དུ་འདུག་ནས་འདི་སྐད་ཅེས་སྨྲས་སོ། །ཚེ་དང་ལྡན་པ་མ་འགགས་པ་ཁྱོད་གཅིག་པུ་དབེན་པར་གྱུར་པ་ན་ནང་དུ་ཡང་དག་འཇོག་ལ་གནས་པ་ན་སེམས་ལ་སེམས་ཀྱི་རྣམ་པར་རྟོག་པ་འདི་ལྟ་བུ་མ་སྐྱེས་སམ། སེམས་ཅན་རྣམས་ཡོངས་སུ་དག་པར་བྱེད་ཅིང༌། མྱ་ངང་དང་ཡོངས་སུ་འཚེ་བ་ཐམས་ཅད་ལས་འདའ་ལ་སྡུག་བསྔལ་དང་ཡིད་མི་བདེ་བ་རྣམས་ནུབ་ནས་རིགས་པའི་ཆོས་རྟོགས་པའི་ཐེག་པ་ནི་གཅིག་ཁོ་ན་སྟེ་ཞེས་བྱ་བ་ནས། རྒྱས་པར་སྡུག་བསྔལ་པ་མེད་པའོ་ཞེས་བྱ་བའི་བར་དུའོ། །ཚེ་དང་ལྡན་པ་མཽད་གལ་གྱི་བུ་ཆེན་པོ་དེ་བཞིན་ནོ། །ཚེ་དང་ལྡན་པ་མ་འགགས་པ་ཇི་ཙམ་གྱིས་ན་དྲན་པ་ཉེ་བར་གཞག་པ་བཞི་བསྒོམ་པ་ལ་དགའ་བར་འགྱུར་ཞིང་རབ་ཏུ་དགའ་བར་འགྱུར། ཚེ་དང་ལྡན་པ་མཽད་གལ་གྱི་བུ་ཆེན་པོ་འདི་ལ་དགེ་སློང་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། དེའི་ལུས་ལ་ལུས་ཀྱི་རྗེས་སུ་ལྟ་ཞིང་དྲན་པ་ཉེ་བར་གནས་པ་ན་ལུས་ལ་དམིགས་ཏེ་དྲན་པ་གནས་པ་དང༌། རབ་ཏུ་གནས་པ་དང༌། ལེགས་པར་གནས་པ་དང༌། ཞི་བ་དང༌། དུལ་བ་དང༌། ཉེ་བར་ཞི་ཞིང་ཏིང་ངེ་འཛིན་དེ་གཅིག་ཏུ་གྱུར་ཅིང་གནས་སོ། །ཚོར་བ་དང༌། སེམས་དང༌། ཆོས་རྣམས་ལ་ཆོས་རྣམས་ཀྱི་རྗེས་སུ་ལྟ་ཞིང་གནས་ཏེ། དེ་ཆོས་རྣམས་ལ་ཆོས་རྣམས་ཀྱི་རྗེས་སུ་ལྟ་ཞིང་དྲན་པ་ཉེ་
བར་གནས་ཏེ། ཆོས་རྣམས་ལ་དམིགས་ནས་དྲན་པ་གནས་པ་དང༌། རབ་ཏུ་གནས་པ་དང༌། ལེགས་པར་གནས་པ་དང༌། ཞི་བ་དང༌། དུལ་བ་དང༌། ཉེ་བར་ཞི་ཞིང་ཏིང་ངེ་འཛིན་དེ་གཅིག་ཏུ་གྱུར་ཅིང་གནས་སོ། །འཕགས་པ་མཽད་གལ་གྱི་བུ་ཆེན་པོ་འདི་ཙམ་གྱིས་དྲན་པ་ཉེ་བར་གཞག་པ་བཞི་བསྒོམ་པ་ལ་དགའ་ཞིང་རབ་ཏུ་དགའ་བར་འགྱུར་རོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་ཚེ་དང་ལྡན་པ་མ་འགགས་པས་བཤད་པ་ལ་མངོན་པར་དགའ་ཞིང་རྗེས་སུ་ཡི་རང་ནས་འདི་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ། ཇི་ལྟར་སེམས་ཏིང་ངེ་འཛིན་ལ་མཉམ་པར་གཞག་ན་ཚེར་མ་གསུམ་པ་ཅན་གྱི་ཚུལ་ནས་མི་སྣང་བར་འགྱུར་ཞིང་བརྒ་བའི་རི་བོང་གསོད་པ་ཞེས་བྱ་བའི་རི་དགས་ཀྱི་ནགས་འཇིགས་སྐྲག་ན་གནས་པར་འགྱུར་བ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་གསུངས་སོ།། །།ཇི་སྐད་དུ་བཅོམ་ལྡན་འདས་ཀྱིས་ཀྱང་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དེ་ནས་དགེ་སློང་གཞན་ཞིག་དགོངས་ཀ་ནང་དུ་ཡང་དག་འཇོག་ལས་ལངས་ཏེ། བཅོམ་ལྡན་འདས་གང་ན་བ་དེར་ཉེ་བར་སོང་སྟེ། ཉེ་བར་སོང་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་དགེ་སློང་དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བྱང་ཆུབ་ཀྱི་ཡན་ལག་བྱང་ཆུབ་ཀྱི་ཡན་ལག་ཅེས་བཤད་པ། འདི་ལྟ་སྟེ། བྱང་ཆུབ་ཀྱི་ཡན་ལག་ཅེས་བྱ་བ་འདི་གང་གི་ཚིག་བླ་དགས་ལགས། དགེ་སློང་བྱང་ཆུབ་ཀྱི་ཡན་ལག་བྱང་ཆུབ་ཀྱི་ཡན་ལག་ཅེས་བཤད་པ་འདི་ལྟ་སྟེ། བྱང་ཆུབ་ཀྱི་ཡན་ལག་ཅེས་བྱ་བ་འདི་ནི་བྱང་ཆུབ་ཀྱི་ཕྱོགས་ཀྱི་ཆོས་སོ་བདུན་གྱི་ཚིག་བླ་དགས་སོ། །དགེ་སློང་འོན་ཀྱང་བྱང་ཆུབ་ཀྱི་ཡན་ལག་རྣམས་གོ་རིམས་བཞིན་དུ་སྐྱེ་ཞིང་བྱང་ཆུབ་ཀྱི་ཡན་ལག་རྣམས་གོ་རིམས་བཞིན་དུ་འཐོབ་བ་དང་བསྒོམ་པ་ཡོངས་སུ་རྫོགས་པར་འགྱུར་རོ། །བཙུན་པ་ཇི་ལྟ་ཇི་ལྟར་བྱང་ཆུབ་ཀྱི་ཡན་ལག་རྣམས་གོ་རིམས་བཞིན་དུས་སྐྱེ་ཞིང་བྱང་ཆུབ་ཀྱི་ཡན་ལག་རྣམས་གོ་རིམས་བཞིན་དུ་འཐོབ་པ་དང་བསྒོམ་པ་ཡོངས་སུ་རྫོགས་པར་འགྱུར་ཞེ་ན། འདི་ན་དགེ་
སློང་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་དེའི་ཚེ་ནི་དྲན་པ་ཉེ་བར་གནས་པར་འགྱུར་ཞིང་ཀུན་དུ་མི་རྨོངས་པ་ཡིན་ཏེ། དེའི་ཚེ་ན་དྲན་པ་ཡང་དག་བྱང་ཆུབ་ཀྱི་ཡན་ལག་མགོ་རྩོམ་པ་ཡིན་ཞིང༌། དེའི་ཚེ་ན་དྲན་པ་ཡང་དག་བྱང་ཆུབ་ཀྱི་ཡན་ལག་བསྒོམ་པར་འགྱུར་ལ་དེའི་ཚེ་ན་དྲན་པ་ཡང་དག་བྱང་ཆུབ་ཀྱི་ཡན་ལག་བསྒོམ་བ་ཡོངས་སུ་རྫོགས་པར་འགྱུར་རོ། །དེ་བཞིན་དུ་དྲན་པ་དང་ཆོས་དེ་སེམས་པ་དང༌། རབ་ཏུ་སེམས་པ་དང༌། ཡོངས་སུ་རྟོག་པ་དང༌། རྣམ་པར་དཔྱོད་པར་བྱེད་ཅིང་ཆོས་རབ་ཏུ་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་དེའི་ཚེ་མགོ་རྩོམ་པ་ཡིན་ཞིང༌། ཆོས་རབ་ཏུ་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་དེའི་ཚེ་བསྒོམ་པར་འགྱུར་ལ། ཆོས་རབ་ཏུ་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་དེའི་ཚེ་བསྒོམ་པ་ཡོངས་སུ་རྫོགས་པར་འགྱུར་རོ། །དེ་ཆོས་དེ་དག་ལ་སེམས་པ་དང༌། ཡོངས་སུ་རྟོག་པ་དང་རྣམ་པར་དཔྱོད་པར་བྱེད་ན། དེ་ལ་མ་ཞུམ་པའི་བརྩོན་འགྲུས་རྩོམ་པར་འགྱུར་ཏེ། དེའི་ཚེ་ན་བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་མགོ་རྩོམ་པ་ཡིན་ཞིང༌། དེའི་ཚེ་བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་བསྒོམ་པ་ཡིན་ལ། དེའི་ཚེ་བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་བསྒོམ་པ་ཡོངས་སུ་རྫོགས་པར་འགྱུར་རོ། །བརྩོན་འགྲུས་བརྩམས་པ་ལ་ཟང་ཟིང་མེད་པའི་དགའ་བ་སྐྱེ་བར་འགྱུར་ཏེ། དེའི་ཚེ་དགའ་བ་ཡང་དག་བྱང་ཆུབ་ཀྱི་ཡན་ལག་མགོ་རྩོམ་པ་ཡིན་ཞིང༌། དེའི་ཚེ་དགའ་བ་ཡང་དག་བྱང་ཆུབ་ཀྱི་ཡན་ལག་བསྒོམ་པ་ཡིན་ལ། དེའི་ཚེ་དགའ་བ་ཡང་དག་བྱང་ཆུབ་ཀྱི་ཡན་ལག་བསྒོམ་པ་ཡོངས་སུ་རྫོགས་པར་འགྱུར་རོ། །ཡིད་དགའ་བ་ལ་ལུས་དང་སེམས་ཤིན་ཏུ་སྦྱངས་པར་འགྱུར་ཏེ། དེའི་ཚེ་ན་ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་མགོ་རྩོམ་པ་ཡིན་ཞིང། དེའི་ཚེ་ན་ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་བསྒོམ་པ་ཡིན་ལ། དེའི་ཚེ་ན་ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་བསྒོམ་པ་ཡོངས་སུ་རྫོགས་པར་འགྱུར་རོ། །ལུས་ཤིན་ཏུ་སྦྱངས་ན་བདེ་བ་མྱོང་ཞིང་དེའི་སེམས་ཏིང་ངེ་འཛིན་ལ་མཉམ་
པར་འཇོག་པར་འགྱུར་ཏེ། དེའི་ཚེ་ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་མགོ་རྩོམ་པ་ཡིན་ཞིང༌། །དེའི་ཚེ་ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་བསྒོམ་པ་ཡིན་ལ། དེའི་ཚེ་ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་བསྒོམ་པ་ཡོངས་སུ་རྫོགས་པར་འགྱུར་རོ། །དེ་བཞིན་དུ་མཉམ་པར་འཇོག་པ་ན་འཇིག་རྟེན་གྱི་བརྣབ་སེམས་དང་ཡིད་མི་བདེ་བ་རྣམ་པར་བསལ་ནས་བཏང་སྙོམས་སུ་འགྱུར་ཏེ། དེའི་ཚེ་བཏང་སྙོམས་ཡང་དག་བྱང་ཆུབ་ཡན་ལག་མགོ་རྩོམ་པ་ཡིན་ཞིང༌། དེའི་ཚེ་བཏང་སྙོམས་ཡང་དག་བྱང་ཆུབ་ཀྱི་ཡན་ལག་བསྒོམ་པ་ཡིན་ལ། དེའི་ཚེ་བཏང་སྙོམས་ཡང་དག་བྱང་ཆུབ་ཀྱི་ཡན་ལག་བསྒོམ་པ་ཡོང་སུ་རྫོགས་པར་འགྱུར་རོ། །འདི་ན་དགེ་སློང་ཚོར་བ་དང་སེམས་དང་ཆོས་རྣམས་ལ་ཆོས་རྣམས་ཀྱི་རྗེས་སུ་ལྟ་ཞིང་གནས་ཏེ། ཆོས་རྣམས་ལ་ཆོས་རྣམས་ཀྱི་རྗེས་སུ་ལྟ་ཞིང་གནས་པ་དེའི་དྲན་པ་ཉེ་བར་གནས་པར་འགྱུར་ཞིང་ཀུན་ཏུ་མི་རྨོངས་པ་ཡིན་ཏེ། དེའི་ཚེ་ན་དྲན་པ་ཡང་དག་བྱང་ཆུབ་ཀྱི་ཡན་ལག་མགོ་རྩོམ་པ་ཡིན་ཞིང་ཞེས་བྱ་བ་ནས། རྒྱས་པར་དེའི་ཚེ་ན་བཏང་སྙོམས་ཡང་དག་བྱང་ཆུབ་ཀྱི་ཡན་ལག་བསྒོམ་པ་ཡོངས་སུ་རྫོགས་པར་འགྱུར་རོ་ཞེས་བྱ་བའི་བར་དུའོ། །དགེ་སློང་དག་འདི་ལྟར་བྱང་ཆུབ་ཀྱི་ཡན་ལག་རྣམས་རྗེས་སུ་འཐོབ་པར་འགྱུར་ཞིང་གོ་རིམས་འདིས་བྱང་ཆུབ་ཀྱི་ཡན་ལག་རྣམས་རབ་ཏུ་འབྱུང་བར་འགྱུར་རོ་ཞེས་གསུངས་སོ།། །།དགེ་སློང་དག་ཇི་ལྟར་ན་ཞེས་བྱ་བ་ལ། དགེ་སློང་དག་དྲན་པ་ཉེ་བར་གཞག་པ་རྣམས་ཀྱི་ཀུན་འབྱུང་བ་དང་ནུབ་པ་དག་བཤད་པར་བྱ་སྟེ། དེ་ལེགས་པར་ཉོན་ལ་ཡིད་ལ་ཟུང་ཤིག་དང་བཤད་པར་བྱའོ། །དགེ་སློང་དག་ཇི་ལྟར་ན་དྲན་པ་ཉེ་བར་གཞག་པ་བཞི་རྣམས་ཀུན་འབྱུང་བ་དང་ནུབ་པ་ཡིན་ཞེ་ན། དགེ་སློང་དག་ཟས་ཀུན་འབྱུང་བས་ལུས་ཀུན་འབྱུང་བ་ཡིན་ལ། ཟས་འགགས་པས་ལུས་འགག་པར་འགྱུར་རོ། །ལུས་ཀུན་འབྱུང་བའི་ཆོས་ཅན་དུ་རྗེས་སུ་མཐོང་ཞིང་གནས་པ་དང༌། ལུས་འཇིག་པའི་ཆོས་ཅན་དུ་རྗེས་སུ་མཐོང་ཞིང་གནས་པ་དང༌། ལུས་ཀུན་འབྱུང་བ་དང་འཇིག་པའི་ཆོས་ཅན་དུ་རྗེས་
སུ་མཐོང་ཞིང་གནས་པ་དང༌། མི་རྟེན་ཅིང་གནས་ན་འཇིག་རྟེན་ཅུང་ཟད་ཀྱང་ཉེ་བར་མི་ལེན་ཏོ། །དགེ་སློང་དག་རེག་པར་ཀུན་འབྱུང་བས་ཚོར་བ་ཀུན་འབྱུང་བ་ཡིན་ལ། རེག་པ་འགགས་པས་ཚོར་བ་ནུབ་པར་འགྱུར་ཏེ། ཚོར་བ་ཀུན་འབྱུང་བའི་ཆོས་ཅན་དུ་རྗེས་སུ་མཐོང་ཞིང་གནས་པ་དང། ཚོར་བ་འཇིག་པའི་ཆོས་ཅན་དུ་རྗེས་སུ་མཐོང་ཞིང་གནས་པ་དང༌། ཚོར་བ་ཀུན་འབྱུང་བ་དང་འཇིག་པའི་ཆོས་ཅན་དུ་རྗེས་སུ་མཐོང་ཞིང་གནས་པ་དང༌། མི་རྟེན་ཅིང་གནས་ན་འཇིག་རྟེན་ཅུང་ཟད་ཀྱང་ཉེ་བར་མི་ལེན་ཏོ། །དགེ་སློང་དག་མིང་དང་གཟུགས་ཀུན་འབྱུང་བས་སེམས་ཀུན་འབྱུང་བ་ཡིན་ལ། མིང་དང་གཟུགས་འགགས་པས་སེམས་ནུབ་པར་འགྱུར་རོ། །སེམས་ཀུན་འབྱུང་བའི་ཆོས་ཅན་དུ་རྗེས་སུ་མཐོང་ཞིང་གནས་པ་དང༌། སེམས་འཇིག་པའི་ཆོས་ཅན་དུ་རྗེས་སུ་མཐོང་ཞིང་གནས་པ་དང༌། སེམས་ཀུན་འབྱུང་བ་དང་འཇིག་པའི་ཆོས་ཅན་དུ་རྗེས་སུ་མཐོང་ཞིང་གནས་པ་དང༌། མི་རྟེན་ཅིང་གནས་ན་འཇིག་རྟེན་ཅུང་ཟད་ཀྱང་ཉེ་བར་མི་ལེན་ཏོ། །དགེ་སློང་དག་ཡིད་པ་བྱེད་པ་ཀུན་འབྱུང་བས་ཆོས་ཀུན་འབྱུང་བ་ཡིན་ཞིང༌། ཡིད་ལ་བྱེད་པ་འགགས་པས་ཆོས་ནུབ་པར་འགྱུར་རོ། །ཆོས་ཀུན་འབྱུང་བའི་ཆོས་ཅན་དུ་རྗེས་སུ་མཐོང་ཞིང་གནས་པ་དང༌། ཆོས་འཇིག་པའི་ཆོས་ཅན་དུ་རྗེས་སུ་མཐོང་ཞིང་གནས་པ་དང༌། ཆོས་ཀུན་འབྱུང་བ་དང་འཇིག་པའི་ཆོས་ཅན་དུ་རྗེས་སུ་མཐོང་ཞིང་གནས་པ་དང༌། མི་རྟེན་ཅིང་གནས་ན་འཇིག་རྟེན་ཅུང་ཟད་ཀྱང་ཉེ་བར་མི་ལེན་ཏོ། །དགེ་སློང་དག་འདི་ལྟར་ན་དྲན་པ་ཉེ་བར་གཞག་པ་རྣམས་ཀུན་འབྱུང་བ་དང་ནུབ་པ་རྣམས་ཏེ། དགེ་སློང་དག་དྲན་པ་ཉེ་བར་གཞག་པ་བཞི་རྣམས་ཀྱི་ཀུན་འབྱུང་བ་དང༌། ནུབ་པ་བཤད་པར་བྱའོ་ཞེས་ངས་ཇི་སྐད་དུ་བསྟན་པ་དེ་རྒྱས་པར་རབ་ཏུ་བཤད་དོ་ཞེས་གསུངས་སོ།། །།མདོ་ལས་ཇི་སྐད་དུ་ཡང་དག་པའི་མྱ་ངན་ལས་འདས་པ་ཞེས་བྱ་བ་ལ་ལམ་གྱི་ཚོགས་དང་ལམ་གྱི་ཡང་ལག་གི་སྒོ་ལས་ཏེ། ལོག་པའི་ཡན་ལག་གི་ལམ་དམྱལ་བ་ལ་བྱེད་དུ་འཇུག་པ་དང༌། དེ་ཉིད་ཀྱི་མཚམས་མེད་པ་ལ་ཡང་དག་པར་སྦྱོར་བ་ཞེས་བྱ་བའི་མདོ་ལས་བལྟ་བར་བྱའོ། །མདོ་འདི་ཡང་མཛོད་ཀྱི་གནས་གསུམ་པར།
འཕགས་དང་མཚམས་མེད་བྱེད་པ་དག །ཡང་དག་ལོག་པ་ཉིད་དུ་ངེས། །ཞེས་བྱ་བ་དེར་བྲིས་ཟིན་ཏོ།། །།ཀུན་འབྱུང་ལ་སོགས་པ་ནི་བྱ་བའི་མངོན་པར་རྟོགས་པ་ཡིན་ཏེ། སྤོང་བ་དང༌། མངོན་དུ་བྱེད་པ་དང༌། བསྒོམ་པའི་ཕྱིར་རོ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་བཞི་པོ་འདི་དག་ནི་འཕགས་པའི་བདེན་པ་བཞི་སྟེ། བཞི་གང་ཞེ་ན། སྡུག་བསྔལ་འཕགས་པའི་བདེན་པ་དང༌། སྡུག་བསྔལ་ཀུན་འབྱུང་བ་འཕགས་པའི་བདེན་པ་དང༌། སྡུག་བསྔལ་འགོག་པ་འཕགས་པའི་བདེན་པ་དང༌། སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པའོ། །དེ་ལ་སྡུག་བསྔལ་འཕགས་པའི་བདེན་པ་མངོན་པར་ཤེས་པས་ཡོངས་སུ་ཤེས་པར་བྱ་ཞིང༌། ཀུན་འབྱུང་བ་འཕགས་པའི་བདེན་པ་མངོན་པར་ཤེས་ནས་ཡོངས་སུ་སྤང་བར་བྱ། འགོག་པ་འཕགས་པའི་བདེན་པ་མངོན་པར་ཤེས་ནས་མངོན་སུམ་དུ་བྱ། ལམ་འཕགས་པའི་བདེན་པ་མངོན་པར་ཤེས་ནས་བསྒོམ་པར་བྱའོ། །དགེ་སློང་དག་གང་ཡང་དགེ་སློང་སྡུག་བསྔལ་འཕགས་པའི་བདེན་པ་མངོན་པར་ཤེས་པས་ཡོངས་སུ་ཤེས་ཤིང༌། སྡུག་བསྔལ་ཀུན་འབྱུང་བ་འཕགས་པའི་བདེན་པ་མངོན་པར་ཤེས་ནས། སྤངས་ལ། འགོག་པ་འཕགས་པའི་བདེན་པ་མངོན་པར་ཤེས་ནས་མངོན་དུ་བྱས་ཏེ། སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་མངོན་པར་ཤེས་ནས་བསྒོམས་པ་ནི་དགེ་སློང་སྲིད་པ་ཆད་པ་ཀུན་དུ་སྦྱོར་བ་སྤངས་པ་ཡང་དག་པའི་ལམ་མངོན་པར་རྟོགས་ནས་སྡུག་བསྔལ་མཐར་བྱེད་པ་ཞེས་བརྗོད་དོ་ཞེས་གསུངས་སོ།། །།འཕགས་པ་ཉན་ཐོས་སྡུག་བསྔལ་ལ་སྡུག་བསྔལ་དུ་ཡིད་ལ་བྱེད་ཅེས་བྱ་བ་ལ། ལམ་གྱི་ཚོམས་ཀྱི་ལམ་གྱི་ཡན་ལག་གི་སྒོའི་སྔོམ་གྱི་ཚིགས་སུ་བཅད་པ་བདུན་པ་ལས། ཡང་དག་ཉིད་ཅེས་བྱ་བ་ལ་སོགས་པའི་མདོ་ལས་བྱུང་བ། མཛོད་ཀྱི་གནས་བཞི་པར། སྤོང་བ་དག་ནི་ཆུ་ལོན་གསུངས། །ཞེས་བྱ་བ་བྲིས་ཏེ། དེ་ལས་འདི་ལྟར་འདོན་ཏེ། ཡང་དག་པའི་ལྟ་བ་འཕགས་པ་འཇིག་རྟེན་ལས་འདས་པ་ཟག་པ་མེད་པ་ཉེ་བར་ལེན་པ་མེད་པ་སྡུག་བསྔལ་ཡང་དག་པར་ཟད་པ། སྡུག་བསྔལ་མཐར་བྱ་བའི་ཕྱིར་འཇུག་
པར་བྱ་བ་གང་ཞེ་ན། འདི་ན་འཕགས་པ་ཉན་ཐོས་སྡུག་བསྔལ་ལ་སྡུག་བསྔལ་དུ་ཡིད་ལ་བྱེད་པ་འམ། ཀུན་འབྱུང་ལ་ཀུན་འབྱུང་དུ་ཡིད་ལ་བྱེད་པ་འམ། འགོག་པ་ལ་འགོག་པར་ཡིད་ལ་བྱེད་པ་འམ། ལམ་ལ་ལམ་དུ་ཡིད་ལ་བྱེད་པའི་ཟག་པ་མེད་པའི་ཡིད་ལ་བྱེད་པ་དང་མཚུངས་པར་ལྡན་པ་ཆོས་རབ་ཏུ་རྣམ་པར་འབྱེད་པ་གང་ཡིན་པ་དང༌། རྣམ་པར་འབྱེད་པ་དང༌། རབ་ཏུ་རྣམ་པར་འབྱེད་པ་དང༌། མཚོན་པ་དང༌། ཡང་དག་པར་མཚོན་པ་དང༌། ཉེ་བར་མཚོན་པ་དང༌། བསྟེན་པ་དང༌། སོ་སོར་རིག་པའི་ཤེས་པ་དང༌། མཐོང་བ་དང༌། བློ་དང༌། རིག་པ་དང༌། རྟོག་པ་གང་ཡིན་པ་སྟེ། འདི་ནི་འཕགས་པའི་འཇིག་རྟེན་ལས་འདས་པའི་ཡང་དག་པའི་ལྟ་བ་ཟག་པ་མེད་པ་ཉེ་བར་ལེན་པ་མེད་པ་སྡུག་བསྔལ་ཡང་དག་པར་ཟད་པ་སྡུག་བསྔལ་མཐར་བྱ་བའི་ཕྱིར་འཇུག་པའོ། །ཁྱིམ་བདག་བདེན་པ་མངོན་པར་རྟོགས་པ་གཅིག་པ་ཉིད་ནི་མེད་པ་ཉིད་དེ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དེ་ནས་ཁྱིམ་བདག་མགོན་མེད་ཟས་སྦྱིན་བཅོམ་ལྡན་འདས་གང་ན་བ་དེར་ཉེ་བར་སོང་སྟེ། ཉེ་བར་སོང་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་འཕགས་པའི་བདེན་པ་བཞི་པོ་རྣམས་གོ་རིམས་བཞིན་དུ་མངོན་པར་རྟོགས་ལགས་སམ། འོན་ཏེ་ཅིག་ཅར། ཁྱིམ་བདག་འཕགས་པའི་བདེན་པ་བཞི་པོ་རྣམས་ནི་གོ་རིམས་བཞིན་དུ་མངོན་པར་རྟོགས། ཅིག་ཅར་མངོན་པར་རྟོགས་པ་ནི་མ་ཡིན་ནོ། །ཁྱིམ་བདག་གང་ཞིག་འདི་སྐད་དུ་བདག་གིས་སྡུག་བསྔལ་འཕགས་པའི་བདེན་པ་མངོན་པར་མ་རྟོགས་པར། ཀུན་འབྱུང་འཕགས་པའི་བདེན་པ་མངོན་བར་རྟོགས་པར་བྱ་ཞིང༌། ཀུན་འབྱུང་འཕགས་པའི་བདེན་པ་མངོན་པར་མ་རྟོགས་པར་འགོག་པ་འཕགས་པའི་བདེན་པ་མངོན་པར་རྟོགས་པར་བྱ། འགོག་པ་འཕགས་པའི་བདེན་པ་མངོན་པར་མ་རྟོགས་པར་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་མངོན་པར་རྟོགས་པར་བྱའོ། །ཞེས་སྨྲ་ན། དེ་སྐད་དུ་མ་སྨྲ་ཤིག་ཅེས་བརྗོད་པར་བྱའོ། །དེ་ཅིའི་ཕྱིར་ཞེ་ན། ཁྱིམ་བདག་འདི་ནི་གནས་མ་ཡིན་ཞིང་གོ་སྐབས་མེད་དེ། གང་
སྡུག་བསྔལ་འཕགས་པའི་བདེན་པ་མངོན་པར་མ་རྟོགས་པར་ཀུན་འབྱུང་བ་འཕགས་པའི་བདེན་པ་མངོན་པར་རྟོགས་པ་དང༌། ཀུན་འབྱུང་འཕགས་པའི་བདེན་པ་མངོན་པར་མ་རྟོགས་པར་འགོག་པ་འཕགས་པའི་བདེན་པ་མངོན་པར་རྟོགས་པ་དང༌། འགོག་པ་འཕགས་པའི་བདེན་པ་མངོན་པར་མ་རྟོགས་པར། ལམ་འཕགས་པའི་བདེན་པ་མངོན་པར་རྟོགས་པ་འདི་ནི་གནས་མེད་དོ། །ཁྱིམ་བདག་འདི་ལྟ་སྟེ། གང་ཞིག་འདི་སྐད་དུ་བདག་གིས་ཤིང་རྟ་འམ། ཤིང་རྟའི་ཁང་པ་དག་གི་རྨང་མ་བརྩིགས་པ་རྩིག་པ་དག་བརྩིག་པར་བྱ་ཞིང༌། རྩིག་པ་མ་བརྩིགས་པར་ཁོང་ཐོག་དང་ཤིང་སྦྲ་དག་བརྩིག་པར་བྱའོ་ཞེས་སྨྲ་ན། དེ་སྐད་དུ་མ་སྨྲ་ཤིག་ཅེས་བརྗོད་པར་བྱའོ། །དེ་ཅིའི་ཕྱིར་ཞེ་ན། འདི་ནི་གནས་མ་ཡིན་ཞིང་གོ་སྐབས་མེད་དེ། ཤིང་རྟ་འམ་ཤིང་རྟའི་ཁང་པ་དག་གི་རྨང་མ་བརྩིགས་པར་རྩིག་པ་བརྩིགས་པ་དང༌། རྩིག་པ་མ་བརྩིགས་པར་ཁང་ཐོག་དང༌། ཤིང་སྦྲ་རྩིག་པར་བྱེད་པ་འདི་ནི་གནས་མེད་དོ། །ཁྱིམ་བདག་དེ་བཞིན་དུ་ཁ་ཅིག་འདི་སྐད་དུ་བདག་གིས་སྡུག་བསྔལ་གྱི་བདེན་པ་མངོན་པར་མ་རྟོགས་པར་ཀུན་འབྱུང་གི་བདེན་པ་མངོན་པར་རྟོགས་པར་བྱ་ཞེས་བྱ་བ་ནས། སྔ་མ་བཞིན་དུ་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་མངོན་པར་རྟོགས་པར་བྱའོ་ཞེས་སྨྲ་ན། འདི་ནི་གནས་མེད་དོ། །ཁྱིམ་བདག་གང་ཞིག་འདི་སྐད་དུ་བདག་གིས་སྡུག་བསྔལ་འཕགས་པའི་བདེན་པ་མངོན་པར་རྟོགས་ནས། ཀུན་འབྱུང་འཕགས་པའི་བདེན་པ་མངོན་པར་རྟོགས་པར་བྱ་ཞིང༌། ཀུན་འབྱུང་འཕགས་པའི་བདེན་པ་མངོན་པར་རྟོགས་ནས། འགོག་པ་འཕགས་པའི་བདེན་པ་མངོན་པར་རྟོགས་པར་བྱ་ཞིང༌། འགོག་པ་འཕགས་པའི་བདེན་པ་མངོན་པར་རྟོགས་ནས། ལམ་འཕགས་པའི་བདེན་པ་མངོན་པར་རྟོགས་པར་བྱའོ་ཞེས་སྨྲ་ན། དེ་བཞིན་ནོ་ཞེས་བརྗོད་པར་བྱའོ། །དེ་ཅིའི་ཕྱིར་ཞེ་ན། འདི་ནི་གནས་ཡིན་ཞིང་གོ་སྐབས་ཡོད་དེ། གང་སྡུག་བསྔལ་འཕགས་པའི་བདེན་པ་མངོན་པར་རྟོགས་ནས། ཀུན་འབྱུང་འཕགས་པའི་བདེན་པ་མངོན་པར་རྟོགས་པ་དང༌། ཀུན་འབྱུང་འཕགས་པའི་བདེན་པ་མངོན་པར་རྟོགས་ནས་འགོག་པའི་བདེན་པ་མངོན་པར་རྟོགས་པ་དང༌། འགོག་པ་འཕགས་པའི་བདེན་པ་མངོན་པར་རྟོགས་ནས་ལམ་འཕགས་
པའི་བདེན་པ་མངོན་པར་རྟོགས་པར་འགྱུར་བ་འདི་ནི་གནས་ཡོད་དོ། །ཁྱིམ་བདག་འདི་ལྟ་སྟེ་ཁ་ཅིག་འདི་སྐད་དུ་བདག་གིས་ཤིང་རྟ་འམ་ཤིང་རྟའི་ཁང་པ་དག་གིར་མང་བརྩིགས་ཏེ་རྩིག་པ་བརྩིག་པར་བྱའོ། །རྩིག་པ་བརྩིགས་ནས་ཁང་ཐོག་དང་ཤིང་སྦྲ་དག་བརྩིག་པར་བྱའོ་ཞེས་སྨྲ་ན། དེ་བཞིན་ནོ་ཞེས་བརྗོད་པར་བྱ་འོ། །དེ་ཅིའི་ཕྱིར་ཞེ་ན། འདི་ནི་གནས་ཡིན་ཞིང་གོ་སྐབས་ཡོད་དེ། ཤིང་རྟའམ་ཤིང་རྟའི་ཁང་པ་དག་གི་རྨང་བརྩིགས་ཏེ། རྩིག་པ་བརྩིགས་པ་དང༌། རྩིག་པ་བརྩིགས་ནས་ཁོང་ཐོག་དང་ཤིང་སྦྲ་དག་བརྩིགས་པ་འདི་ནི་གནས་ཡོད་དོ། །ཁྱིམ་བདག་དེ་བཞིན་དུ་སྡུག་བསྔལ་འཕགས་པའི་བདེན་པ་མངོན་པར་རྟོགས་ནས་ཀུན་འབྱུང་འཕགས་པའི་བདེན་པ་མངོན་པར་རྟོགས་པ་དང༌། ཀུན་འབྱུང་འཕགས་པའི་བདེན་པ་མངོན་པར་རྟོགས་ནས་འགོག་པ་འཕགས་པའི་བདེན་པ་མངོན་པར་རྟོགས་པ་དང༌། འགོག་པ་འཕགས་པའི་བདེན་པ་མངོན་པར་རྟོགས་ནས་ལམ་འཕགས་པའི་བདེན་པ་མངོན་པར་རྟོགས་པ་འདི་ནི་གནས་ཡོད་དོ། །དེ་བས་ན་འཕགས་པའི་བདེན་པ་རྣམས་མངོན་པར་མ་རྟོགས་པ་མངོན་པར་རྟོགས་པར་བྱ་བའི་ཕྱིར་འདུན་པ་དྲག་པོ་དང༌། བརྩོན་འགྲུས་རྩོམ་པ་དང༌། སྤོང་བ་དང་རབ་ཏུ་སྤོང་བ་དང་མི་གཏོང་བར་བྱ་ཞིང༌། དྲན་པ་དང་ཤེས་བཞིན་དང་ལྡན་པར་བྱའོ། །དེ་ནས་ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་ཞིང་རྗེས་སུ་ཡི་རང་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་བྱས་ཏེ། བཅོམ་ལྡན་འདས་ཀྱི་དྲུང་ནས་སོང་ངོ་ཞེས་གསུངས་སོ། །དེ་ནས་དགེ་སློང་གཞན་ཞིག་གིས་ཁྱིམ་བདག་མགོན་མེད་ཟས་སྦྱིན་གྱིས་དྲིས་པ་དེ་ཉིད་ཀྱི་དཔེའི་ཁྱད་པར་དྲིས་པ་དང༌། དགེ་སློང་འདི་ལྟ་སྟེ། གང་ཞིག་འདི་སྐད་དུ་བདག་གིས་བང་རིམ་རིམ་པ་བཞི་པའི་བང་རིམ་དང་པོ་ལ་མ་འཛེགས་པར་གཉིས་པ་དང་གསུམ་པ་དང༌། བཞི་པ་ནས་ཁང་ཐོག་གི་བར་དུ་འཛེག་པར་བྱའོ་ཞེས་སྨྲ་ན། །དེ་སྐད་མ་སྨྲ་ཤིག་ཅེས་བརྗོད་པར་བྱའོ། །དེ་ཅིའི་ཕྱིར་ཞེ་ན། འདི་ནི་གནས་མ་ཡིན་ཞིང་གོ་སྐབས་མེད་དེ། གང་ཞིག་བང་རིམ་རིམ་པ་བཞི་པོའི་རིམ་པ་དང་པོ་ལས་མ་འཛེགས་པར་གཉིས་པ་དང་གསུམ་པ་དང་བཞི་པ་ནས་ཁང་ཐོག་གི་བར་དུ་འཛེག་པར་འགྱུར་བ་འདི་ནི་གནས་མེད་དོ། །དགེ་སློང་དག་དེ་བཞིན་དུ་གང་ཞིག་འདི་སྐད་དུ་ངས་སྡུག་བསྔལ་
འཕགས་པའི་བདེན་པ་མངོན་པར་མ་རྟོགས་པར་ཞེས་བྱ་བ་ནས་སྔ་མ་བཞིན་དུའོ། །དགེ་སློང་དག་གང་ཞིག་འདི་སྐད་དུ་ངས་སྡུག་བསྔལ་འཕགས་པའི་བདེན་པ་མངོན་པར་རྟོགས་ནས་ཞེས་བྱ་བ་ནས་སྔ་མ་བཞིན་དུ་འདི་ནི་གནས་ཡོད་དོ་ཞེས་བྱ་བའི་བར་དུའོ། །དགེ་སློང་དག་དེ་བཞིན་དུ་གང་གིས་འདི་སྐད་དུ་ངས་བང་རིམ་རིམ་པ་བཞི་པའི་ཐེམ་པ་དང་པོ་ལ་འཛེགས་ནས་གཉིས་པ་དང་གསུམ་པ་དང་བཞི་པ་ནས། ཁང་ཐོག་གི་བར་དུ་འཛེག་པར་བྱའོ་ཞེས་སྨྲ་ན་དེ་བཞིན་ནོ་ཞེས་བརྗོད་པར་བྱ་སྟེ། དེ་ཅིའི་ཕྱིར་ཞེ་ན། འདི་ནི་གནས་ཡིན་ཞིང་གོ་སྐབས་ཡོད་དེ། གང་ཞིག་བང་རིམ་རིམ་པ་བཞི་པའི་ཐེམ་པ་དང་པོ་ལ་འཛེགས་ནས་གཉིས་པ་དང༌། གསུམ་པ་དང་བཞི་པ་ནས་ཁོང་ཐོག་གི་བར་དུ་འཛེག་པ་འདི་ནི་གནས་ཡོད་དོ། །དེ་བཞིན་དུ་གང་ཞིག་འདི་སྐད་དུ་ངས་སྡུག་བསྔལ་འཕགས་པའི་བདེན་པ་མངོན་ཕར་རྟོགས་ནས། ཞེས་བྱ་བའི་བར་དུ་སྔ་མ་བཞིན་ནོ། །ཇི་ལྟར་དགེ་སློང་གཞན་བཞིན་དུ་ཆོ་དང་ལྡན་པ་ཀུན་དགའ་བོས་དཔེའི་ཁྱད་པར་དྲིས་པ་དང༌། ཀུན་དགའ་བོ་འདི་ལྟ་སྟེ། གང་ཞིག་འདི་སྐད་དུ་བདག་གིས་ཐེམ་སྐས་རིམ་པ་བཞི་པ་ཅན་གྱི་སྐས་ཐེམ་དང་པོ་ལ་མ་འཛེགས་པར་གཉིས་པ་དང་གསུམ་པ་དང་བཞི་པ་ལ་འཛེག་པར་བྱའོ་ཞེས་སྨྲ་ན། དེ་སྐད་དུ་མ་སྨྲ་ཤིག་ཅེས་བརྗོད་པར་བྱའོ། །དེ་ཅིའི་ཕྱིར་ཞེ་ན། འདི་ནི་གནས་མ་ཡིན་ཞིང་གོ་སྐབས་མེད་དོ། །ཐེམ་སྐས་རིམ་པ་བཞི་པ་ཅན་གྱི་སྐས་ཐེམ་དང་པོ་ལ་མ་འཛེགས་པར་གཉིས་པ་དང་གསུམ་པ་དང་བཞི་པ་ལ་འཛེག་པ་འདི་ནི་གནས་མེད་དོ། །དེ་བཞིན་དུ་གང་ཞིག་འདི་སྐད་དུ་ངས་སྡུག་བསྔལ་གྱི་བདེན་པ་མངོན་པར་མ་རྟོགས་པར་ཞེས་བྱ་བ་ནས། སྔ་མ་བཞིན་ནོ། །ཀུན་དགའ་བོ་གང་ཁ་ཅིག་འདི་སྐད་དུ་ངས་སྡུག་བསྔལ་གྱི་བདེན་པ་མངོན་པར་རྟོགས་ནས་ཞེས་བྱ་བ་ནས་སྔ་མ་བཞིན་དུ་ཀུན་དགའ་བོ་འདི་ལྟ་སྟེ། གང་ཞིག་འདི་སྐད་དུ་ངས་བང་རིམ་བཞི་པའི་ཐེམ་སྐས་ཐེམ་པ་དང་པོ་ལ་འཛེགས་ནས། གཉིས་པ་དང་གསུམ་པ་དང་བཞི་པའི་བར་དུ་འཛེག་པར་བྱའོ་ཞེས་སྨྲ་ན། དེ་བཞིན་ནོ་ཞེས་བརྗོད་པར་བྱའོ། །དེ་ཅིའི་ཕྱིར་ཞེ་ན། འདི་ནི་གནས་ཡིན་ཞིང་གོ་སྐབས་ཡོད་དེ་བང་རིམ་བཞི་པའི་ཐེམ་སྐས་དང་པོ་ལ་འཛེག་ནས་གཉིས་པ་དང་གསུམ་པ་དང་བཞི་པའི་
བར་དུ་འཛེག་པར་འགྱུར་བ་འདི་ནི་གནས་ཡོད་དོ། །དེ་བཞིན་དུ་གང་ཞིག་འདི་སྐད་དུ་ངས་སྡུག་བསྔལ་འཕགས་པའི་བདེན་པ་མངོན་པར་རྟོགས་ནས་ཞེས་བྱ་བ་སྔ་མ་བཞིན་དུའོ་ཞེས་གསུངས་སོ། །གལ་ཏེ་མདོ་ལས་གང་ཞིག་སངས་རྒྱས་ལ་ནེ་མ་ནུར་མེད་ཅིང་ཐེ་ཚོམ་མེད་པ་དེ་ནི་ཞེས་བྱ་བ་ལ་མདོ་དེ་ནི་བདག་གིས་མ་རྙེད་དོ། །གླེང་གཞི་ཡང་དག་པར་ལྡན་པའི་འཕགས་པའི་བདེན་པའི་སྒོའི་སྡོམ་གྱི་ཚིགས་སུ་བཅད་པ་བདུན་པའི་མདོ་ལས་འདི་ལྟར་འདོན་ཏེ། གླེང་གཞི་ནི་མཉན་དུ་ཡོད་པ་ནའོ། །གང་འགའ་ཞིག་སངས་རྒྱས་ལ་ནེམ་ནུར་དང་བཅས་ཤིང་ཐེ་ཚོམ་དང་བཅས་པ་དེ་ནི་སྡུག་བསྔལ་ལ་ཡང་ན་མེ་ནུར་དང་ཐེ་ཚོམ་དང་བཅས་པ་ཡིན་ཞིང༌། ཀུན་འབྱུང་བ་དང་འགོག་པ་དང་ལམ་ལ་ཡང་ནེམ་ནུར་དང་བཅས་ཤིང་ཐེ་ཚོམ་དང་བཅས་པ་ཡིན་ནོ། །གང་འགའ་ཞིག་ཆོས་དང་དགེ་འདུན་ལ་ནེམ་ནུར་དང་བཅས་ཤིང་ཐེ་ཚོམ་དང་བཅས་པ་དེ་ནི་སྡུག་བསྔལ་གྱི་བདེན་པ་ལ་ཡང་ནེམ་ནུར་དང་བཅས་ཤིང་ཐེ་ཚོམ་དང་བཅས་པ་ཡིན་ཞིང༌། ཀུན་འབྱུང་དང་འགོག་པ་དང་ལམ་ལ་ཡང་ནེམ་ནུར་དང་བཅས་ཤིང་ཐེ་ཚོམ་དང་བཅས་པ་ཡིན་ནོ། །གང་འགའ་ཞིག་སངས་རྒྱས་ལ་ནེམ་ནུར་མེད་ཅིང་ཐེ་ཚོམ་མེད་པ་དེ་ནི་སྡུག་བསྔལ་ལ་ཡང་ནེམ་ནུར་མེད་ཅིང་ཐེ་ཚོམ་མེད་པ་ཡིན་ལ། ཀུན་འབྱུང་དང་འགོག་པ་དང་ལམ་ལ་ཡང་ནེམ་ནུར་མེད་ཅིང་ཐེ་ཚོམ་མེད་པ་ཡིན་ནོ། །གང་འགའ་ཞིག་ཆོས་དང་དགེ་འདུན་ལ་ནེམ་ནུར་མེད་ཅིང་ཐེ་ཚོམ་མེད་པ་དེ་ནི་སྡུག་བསྔལ་ལ་ནེམ་ནུར་མེད་ཅིང་ཐེ་ཚོམ་མེད་པ་ཡིན་ལ། ཀུན་འབྱུང་དང་འགོག་པ་དང་ལམ་ལ་ཡང་ནེམ་ནུར་མེད་ཅིང་ཐེ་ཚོམ་མེད་པ་ཡིན་ནོ། །གང་འགའ་ཞིག་སྡུག་བསྔལ་ལ་ནེམ་ནུར་དང་བཅས་ཤིང་ཐེ་ཚོམ་དང་བཅས་པ་དེ་ནི་སངས་རྒྱས་ལ་ཡང་ནེམ་ནུར་དང་བཅས་ཤིང་ཐེ་ཚོམ་དང་བཅས་པ་ཡིན་ལ། ཆོས་དང་དགེ་འདུན་ལ་ཡང་ནེམ་ནུར་དང་བཅས་ཤིང་ཐེ་ཚོམ་དང་བཅས་པ་ཡིན་ནོ། །གང་འགའ་ཞིག་ཀུན་འབྱུང་དང་འགོག་པ་དང་ལམ་ལ་ནེམ་ནུར་དང་བཅས་ཤིང་ཐེ་ཚོམ་དང་བཅས་པ་དེ་ནི་སངས་རྒྱས་ལ་ཡང་ནེམ་ནུར་དང་བཅས་ཤིང་ཐེ་ཚོམ་དང་བཅས་པ་ཡིན་ཞིང་ཆོས་དང་དགེ་འདུན་ལ་ཡང་ནེམ་ནུར་དང་བཅས་ཤིང་ཐེ་ཚོམ་དང་བཅས་པ་ཡིན་ནོ། །གང་འགའ་ཞིག་སྡུག་བསྔལ་ལ་ནེམ་ནུར་མེད་ཅིང་ཐེ་ཚོམ་མེད་པ་དེ་ནི་
སངས་རྒྱས་ལ་ཡང་ནེམ་ནུར་མེད་ཅིང་ཐེ་ཚོམ་མེད་པ་ཡིན་ཞིང་ཆོས་དང་དགེ་འདུན་ལ་ཡང་ནེམ་ནུར་མེད་ཅིང་ཐེ་ཚོམ་མེད་པ་ཡིན་ནོ། །གང་འགའ་ཞིག་ཀུན་འབྱུང་དང་འགོག་པ་དང་ལམ་ལ་ནེམ་ནུར་མེད་ཅིང་ཐེ་ཚོམ་མེད་པ་དེ་ནི་སངས་རྒྱས་ལ་ཡང་ནེམ་ནུར་མེད་ཅིང་ཐེ་ཚོམ་མེད་པ་ཡིན་ཞིང་ཆོས་དང་དགེ་འདུན་ལ་ཡང་ནེམ་ནུར་མེད་ཅིང་ཐེ་ཚོམ་མེད་པ་ཡིན་ནོ་ཞེས་གསུངས་སོ། །གནས་བདུན་ལ་མཁས་པ་དང་འདབ་མ་བདུན་པ་བཞིན་ནོ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་གནས་བདུན་ལ་མཁས་ཤིང་དོན་རྣམ་པ་གསུམ་ཡོངས་སུ་རྟོག་པའི་དགེ་སློང་ནི་ཆོས་འདུལ་བ་འདི་ལ་མྱུར་དུ་ཟག་པ་ཟད་པ་ཐེ་ཚོམ་ཐོབ་པར་འགྱུར་རོ། །དགེ་སློང་དག་ཇི་ལྟར་ན་དགེ་སློང་གནས་བདུན་ལ་མཁས་པར་འགྱུར་བ་ཡིན་ཞེ་ན། དགེ་སློང་དག་འདི་ལ་དགེ་སློང་གཟུགས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཤིང་གཟུགས་ཀུན་འབྱུང་བ་དང༌། གཟུགས་འགོག་པ་དང་གཟུགས་འགོག་པར་འགྲོ་བའི་ལམ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་དང༌། གཟུགས་ཀྱི་རོ་མྱང་བ་དང༌། ཉེས་དམིགས་དང༌། ངེས་པར་འབྱུང་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ལ། ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་ཤེས་ལ། རྣམ་པར་ཤེས་པའི་ཀུན་འབྱུང་བ་དང༌། རྣམ་པར་ཤེས་པ་འགོག་པ་དང༌། རྣམ་པར་ཤེས་པ་འགོག་པར་འགྲོ་བའི་ལམ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་དང༌། རྣམ་པར་ཤེས་པའི་རོ་མྱང་བ་དང༌། ཉེས་དམིགས་དང༌། ངེས་པར་འབྱུང་བ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་གཟུགས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། གཟུགས་གང་ཅི་ཡང་རུང་བ་དེ་ཐམས་ཅད་ནི་འབྱུང་བ་ཆེན་པོ་བཞི་དག་དང་འབྱུང་བ་ཆེན་པོ་བཞི་དག་རྒྱུར་བྱས་པ་ཡིན་ཞེ་ན། གཟུགས་ནི་འདིའོ། །གཟུགས་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་གཟུགས་ཀྱི་ཀུན་འབྱུང་བ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། དགའ་བ་ཀུན་འབྱུང་བས་གཟུགས་ཀུན་འབྱུང་བ་སྟེ། འདི་ལྟར་ན་གཟུགས་ཀུན་འབྱུང་བ་ཡང་དག་པ་ཇི་ལྟ་བ་བཞིན་ཤེས་པར་འགྱུར་པ་ཡིན་ནོ།།
ཇི་ལྟར་ན་གཟུགས་འགོག་པ་ཡང་དག་པ་ཇི་ལྟ་བ་བཞིན་རབ་ཏུ་ཤེས་བར་གྱུར་པ་ཡིན་ཞེ་ན། དགའ་བ་འགགས་པས་གཟུགས་འགག་པ་སྟེ། གཟུགས་འགོག་པ་ནི་འདི་དང༌། གཟུགས་འགོག་པ་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་གཟུགས་འགོག་པར་འགྲོ་བའི་ལམ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། འདི་ལྟར་འཕགས་པའི་ལམ་ཡན་ལག་བརྒྱད་པ་སྟེ། འདི་ལྟ་སྟེ། ཡང་དག་པའི་ལྟ་བ་དང༌། ཡང་དག་པའི་རྟོག་པ་དང༌། ཡང་དག་པའི་ངག་དང༌། ཡང་དག་པའི་ལས་ཀྱི་མཐའ་དང༌། ཡང་དག་པའི་འཚོ་བ་དང༌། ཡང་དག་པའི་རྩོལ་བ་དང༌། ཡང་དག་པའི་དྲན་པ་དང༌། ཡང་དག་པའི་ཏིང་ངེ་འཛིན་ཏེ། འདི་ནི་གཟུགས་འགོག་པར་འགྲོ་བའི་ལམ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པའོ། །ཇི་ལྟར་ན་གཟུགས་ཀྱི་རོ་མྱང་བ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། གཟུགས་ལ་བརྟེན་ནས་བདེ་བ་དང་ཡིད་བདེ་བ་སྐྱེས་ཏེ། གཟུགས་ཀྱི་རོ་མྱང་བ་ནི་འདིའོ། །གཟུགས་ཀྱི་རོ་མྱང་བ་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་གཟུགས་ཀྱི་ཉེས་དམིགས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། གང་ཡང་གཟུགས་ནི་མི་རྟག་པ་སྡུག་བསྔལ་བ་ཡོངས་སུ་འགྱུར་བའི་ཆོས་ཅན་ཏེ། གཟུགས་ཀྱི་ཉེས་དམིགས་ནི་འདིའོ། །གཟུགས་ཀྱི་ཉེས་དམིགས་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་གཟུགས་ཀྱི་ངེས་པར་འབྱུང་བ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། གང་ཞིག་གཟུགས་ལ་འདུན་པའི་འདོད་ཆགས་འདུལ་ཞིང་འདུན་པའི་འདོད་ཆགས་སྤངས་པ་དང༌། འདུན་པའི་འདོད་ཆགས་ལས་ཡང་དག་པར་འདས་པ་སྟེ། གཟུགས་ཀྱི་ངེས་པར་འབྱུང་བ་ནི་འདིའོ། །གཟུགས་ཀྱི་ངེས་པར་འབྱུང་བ་ནི་འདི་ལྟ་བུ་འོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་ཚོར་བ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། གང་ཡང་ཚོར་བའི་ཚོགས་དྲུག་སྟེ། མིག་གི་འདུས་ཏེ་རེག་པ་ལས་བྱུང་བ་དང༌། རྣ་བ་དང་སྣ་དང་ལྕེ་དང་ལུས་དང་ཡིད་ཀྱི་འདུས་ཏེ་རེག་པ་ལས་བྱུང་བའི་ཚོར་བ་སྟེ། ཚོར་བ་ནི་འདིའོ། །
ཚོར་བ་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་ཚོར་བའི་ཀུན་འབྱུང་བ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། རེག་པ་ཀུན་འབྱུང་བ་སྟེ། ཚོར་བའི་ཀུན་འབྱུང་བ་ནི་འདིའོ། །ཚོར་བའི་ཀུན་འབྱུང་བ་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་ཚོར་བ་འགོག་པ་ཡང་དག་པ་ཇི་ལྟར་བཞིན་རབ་ཏུ་ཤེས་པ་ཡིན་ཞེ་ན། རེག་པ་འགགས་པས་ཚོར་བ་འགག་པ་སྟེ། ཚོར་བ་འགོག་པ་ནི་འདིའོ། །ཚོར་བ་འགོག་པ་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་ཚོར་བ་འགོག་པར་འགྲོ་བའི་ལམ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། འཕགས་པའི་ལམ་ཡན་ལག་བརྒྱད་དེ། སྔ་མ་བཞིན་དུ་ཡང་དག་པའི་ཏིང་ངེ་འཛིན་གྱི་བར་དུའོ། །ཚོར་བ་འགོག་པར་འགྲོ་བའི་ལམ་ནི་འདིའོ། །ཚོར་བ་འགོག་པར་འགྲོ་བའི་ལམ་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་ཚོར་བའི་རོ་མྱང་བ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། གང་ཡང་ཚོར་བ་ལ་བརྟེན་ནས་བདེ་བ་དང་ཡིད་བདེ་བ་སྐྱེད་དེ། ཚོར་བའི་རོ་མྱང་བ་ནི་འདིའོ། །ཚོར་བའི་རོ་མྱང་བ་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་ཚོར་བའི་ཉེས་དམིགས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། གང་ཡང་ཚོར་བ་ནི་མི་རྟག་པ་དང༌། སྡུག་བསྔལ་བ་དང༌། ཡོངས་སུ་འགྱུར་བའི་ཆོས་ཅན་ཏེ། ཚོར་བའི་ཉེས་དམིགས་ནི་འདིའོ། །ཚོར་བའི་ཉེས་དམིགས་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་ཚོར་བའི་ངེས་པར་འབྱུང་བ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། གང་ཞིག་ཚོར་བ་ལ་འདུན་པའི་འདོད་ཆགས་འདུལ་ཞིང༌། འདུན་པའི་འདོད་ཆགས་སྤངས་བ་དང་འདུན་པའི་འདོད་ཆགས་ལས་ཡང་དག་པར་འདས་པ་སྟེ། ཚོར་བའི་ངེས་པར་འབྱུང་བ་ནི་འདིའོ། །ཚོར་བའི་ངེས་པར་འབྱུང་བ་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་འདུ་ཤེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། འདུ་ཤེས་ཀྱི་ཚོགས་དྲུག་
སྟེ། མིག་གི་འདུས་ཏེ་རེག་པ་ལས་སྐྱེས་པའི་འདུ་ཤེས་དང༌། རྣ་བ་དང་སྣ་དང་ལྕེ་དང་ལུས་དང་ཡིད་ཀྱི་འདུས་ཏེ་རེག་པ་ལས་སྐྱེས་པའི་འདུ་ཤེས་ཏེ་འདུ་ཤེས་ནི་འདིའོ། །འདུ་ཤེས་ནི་འདི་ལྟ་བུའོ་ཞེས་ཡང་དག་བ་ཇི་ལྟ་བ་བཞིན་དུ་རབ་ཏུ་ཤེས་པའོ། །ཇི་ལྟར་ན་འདུ་ཤེས་ཀུན་འབྱུང་བ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། རེག་པ་ཀུན་འབྱུང་བས་འདུ་ཤེས་ཀུན་འབྱུང་བ་སྟེ། འདུ་ཤེས་ཀུན་འབྱུང་བ་ནི་འདིའོ། འདུ་ཤེས་ཀྱི་ཀུན་འབྱུང་བ་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་འདུ་ཤེས་འགོག་པ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། རེག་པ་འགགས་པས་འདུ་ཤེས་འགག་སྟེ། འདུ་ཤེས་འགོག་པ་ནི་འདིའོ། །འདུ་ཤེས་ཀྱི་འགོག་པ་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་འདུ་ཤེས་འགོག་པར་འགྲོ་བའི་ལམ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། འཕགས་པའི་ལམ་ཡན་ལག་བརྒྱད་དེ། སྔ་མ་བཞིན་དུ་ཡང་དག་པའི་ཏིང་ངེ་འཛིན་གྱི་བར་དུ་སྟེ། འདུ་ཤེས་འགོག་པར་འགྲོ་བའི་ལམ་ནི་འདིའོ། །འདུ་ཤེས་འགོག་པར་འགྲོ་བའི་ལམ་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་འདུ་ཤེས་ཀྱི་རོ་མྱང་བ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། འདུ་ཤེས་ལ་བརྟེན་ནས་བདེ་བ་དང་ཡིད་བདེ་བ་སྐྱེ་སྟེ། འདུ་ཤེས་ཀྱི་རོ་མྱང་བ་ནི་འདིའོ། །འདུ་ཤེས་ཀྱི་རོ་མྱང་བ་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞི་རབ་ཏུ་ཤེས་པའོ། །ཇི་ལྟར་ན་འདུ་ཤེས་ཀྱི་ཉེས་དམིགས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། གང་ཡང་འདུ་ཤེས་ཀྱི་མི་རྟག་པ་དང་སྡུག་བསྔལ་བ་དང༌། ཡོངས་སུ་འགྱུར་བའི་ཆོས་ཅན་ཏེ། འདུ་ཤེས་ཀྱི་ཉེས་དམིགས་ནི་འདིའོ། །འདུ་ཤེས་ཀྱི་ཉེས་དམིགས་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །འདུ་ཤེས་ཀྱི་ངེས་པར་འབྱུང་བ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། གང་ཞིག་འདུ་ཤེས་ལ་འདུན་པའི་འདོད་ཆགས་འདུལ་ཤིང་འདུན་པའི་འདོད་ཆགས་སྤངས་པ་དང༌། འདུན་པའི་འདོད་ཆགས་ལས་ཡང་དག་པར་འདས་པ་སྟེ། འདུ་ཤེས་ཀྱི་ངེས་པར་འབྱུང་བ་ནི་འདིའོ། །འདུ་
ཤེས་ཀྱི་ངེས་པར་འབྱུང་བ་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་འདུ་ཤེས་རྣམས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། སེམས་པའི་ཚོགས་དྲུག་སྟེ། མིག་གི་འདུས་ཏེ་རེག་པ་ལས་སྐྱེས་བའི་སེམས་པ་དང༌། རྣ་བ་དང་སྣ་དང་ལྕེ་དང་ལུས་དང་ཡིད་ཀྱི་འདུས་ཏེ་རེག་པ་ལས་སྐྱེས་པའི་སེམས་པ་རྣམས་ཏེ། འདུ་བྱེད་རྣམས་ནི་འདིའོ། །འདུ་བྱེད་རྣམས་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་འདུ་བྱེད་རྣམས་ཀུན་འབྱུང་བ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། རེག་པ་ཀུན་འབྱུང་བས་འདུ་བྱེད་ཀུན་འབྱུང་པ་སྟེ། འདུ་བྱེད་རྣམས་ཀུན་འབྱུང་བ་ནི་འདིའོ། །འདུ་བྱེད་རྣམས་ཀུན་འབྱུང་བ་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་འདུ་བྱེད་རྣམས་འགོག་པ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། རེག་པ་འགགས་པས་འདུ་བྱེད་རྣམས་འགོག་སྟེ། འདུ་བྱེད་རྣམས་འགོག་པ་ནི་འདིའོ། །འདུ་བྱེད་རྣམས་འགོག་པ་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་འདུ་བྱེད་རྣམས་འགོག་པར་འགྲོ་པའི་ལམ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། གང་ཡང་འཕགས་པའི་ལམ་ཡན་ལག་བརྒྱད་དེ། སྔ་མ་བཞིན་དུ་ཡང་དག་པའི་ལྟ་བ་ནས་ཡང་དག་པའི་ཏིང་ངེ་འཛིན་གྱི་བར་དུ་སྟེ། འདུ་བྱེད་རྣམས་འགོག་པར་འགྲོ་བའི་ལམ་ནི་འདིའོ། །འདུ་བྱེད་རྣམས་འགོག་པར་འགྲོ་བའི་ལམ་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་འདུ་བྱེད་རྣམས་ཀྱི་རོ་མྱང་བ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། གང་ཡང་འདུ་བྱེད་རྣམས་ལ་བརྟེན་ནས་བདེ་བ་དང་ཡིད་བདེ་བ་སྐྱེས་ཏེ། འདུ་བྱེད་རྣམས་ཀྱི་རོ་མྱང་བ་ནི་འདིའོ། །འདུ་བྱེད་རྣམས་ཀྱི་རོ་མྱང་བ་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་འདུ་བྱེད་རྣམས་ཀྱི་ཉེས་དམིགས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། གང་ཡང་འདུ་བྱེད་རྣམས་ནི་མི་རྟག་པ་དང༌། སྡུག་བསྔལ་བ་དང་ཡོངས་སུ་འགྱུར་བའི་
ཆོས་ཅན་ནོ་ཞེས་འདུ་བྱེད་རྣམས་ཀྱི་ཉེས་དམིགས་ནི་འདིའོ། །འདུ་བྱེད་རྣམས་ཀྱི་ཉེས་དམིགས་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་འདུ་བྱེད་རྣམས་ཀུན་འབྱུང་བ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། གང་ཞིག་འདུ་བྱེད་རྣམས་ལ་འདུན་པའི་འདོད་ཆགས་འདུལ་ཞིང༌། འདུན་པའི་འདོད་ཆགས་སྤངས་པ་དང༌། འདུ་བྱེད་རྣམས་ལ་འདུན་པའི་འདོད་ཆགས་ལས་ཡང་དག་པར་འདས་ཏེ། འདུ་བྱེད་རྣམས་ཀྱི་ངེས་པར་འབྱུང་བ་ནི་འདིའོ། །འདུ་བྱེད་རྣམས་ཀྱི་ངེས་པར་འབྱུང་བ་ནི་འདི་ལྟ་བུའོ་ཞེས་ཡང་དག་བ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་རྣམ་པར་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་ཤེས་བ་ཡིན་ཞེ་ན། རྣམ་པར་ཤེས་པའི་ཚོགས་དྲུག་སྟེ། མིག་གི་རྣམ་པར་ཤེས་པ་དང༌། རྣ་བ་དང་སྣ་དང་ལྕེ་དང་ལུས་དང་ཡིད་ཀྱི་རྣམ་པར་ཤེས་པ་སྟེ། རྣམ་པར་ཤེས་པ་ནི་འདིའོ། །རྣམ་པར་ཤེས་པ་ནི་འདི་ལྟ་བུའོ་ཞེས་ཡང་དག་བ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་རྣམ་པར་ཤེས་པའི་ཀུན་འབྱུང་བ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། མིང་དང་གཟུགས་ཀུན་འབྱུང་བས་རྣམ་པར་ཤེས་པ་ཀུན་འབྱུང་བ་སྟེ། །རྣམ་པར་ཤེས་པའི་ཀུན་འབྱུང་བ་ནི་འདིའོ། །རྣམ་པར་ཤེས་པའི་ཀུན་འབྱུང་བ་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་རྣམ་པར་ཤེས་པའི་འགོག་པ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། མིང་དང་གཟུགས་འགགས་པས་རྣམ་པར་ཤེས་པ་འགག་སྟེ། རྣམ་པར་ཤེས་པའི་འགོག་པ་ནི་འདིའོ།། རྣམ་པར་ཤེས་པའི་འགོག་པ་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་རྣམ་པར་ཤེས་པ་འགོག་པར་འགྲོ་བའི་ལམ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། འཕགས་པའི་ལམ་ཡན་ལག་བརྒྱད་དེ་སྔ་མ་བཞིན་དུ་ཡང་དག་པའི་ལྟ་བ་ནས་ཡང་དག་པའི་ཏིང་ངེ་འཛིན་གྱི་བར་དུ་སྟེ། རྣམ་པར་ཤེས་པ་འགོག་པར་འགྲོ་བའི་ལམ་ནི་འདིའོ། །རྣམ་པར་ཤེས་པ་འགོག་པར་འགྲོ་བའི་ལམ་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་རྣམ་པར་ཤེས་པའི་རོ་མྱང་བ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། གང་
ཡང་རྣམ་པར་ཤེས་པ་ལ་བརྟེན་ནས་བདེ་བ་དང་ཡིད་བདེ་བ་སྐྱེ་སྟེ། རྣམ་པར་ཤེས་པའི་རོ་མྱང་བ་ནི་འདིའོ། །རྣམ་པར་ཤེས་པའི་རོ་མྱང་བ་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་རྣམ་པར་ཤེས་པའི་ཉེས་དམིགས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། གང་ཡང་རྣམ་པར་ཤེས་པ་ནི་མི་རྟག་པ། སྡུག་བསྔལ་བ་ཡོངས་སུ་འགྱུར་བའི་ཆོས་ཅན་ཏེ། རྣམ་པར་ཤེས་པའི་ཉེས་དམིགས་ནི་འདིའོ། །རྣམ་པར་ཤེས་པའི་ཉེས་དམིགས་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །ཇི་ལྟར་ན་རྣམ་པར་ཤེས་པའི་ངེས་པར་འབྱུང་བ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ཡིན་ཞེ་ན། གང་ཞིག་རྣམ་པར་ཤེས་པ་ལ་འདུན་པའི་འདོད་ཆགས་འདུལ་ཞིང༌། འདུན་པའི་འདོད་ཆགས་སྤངས་པ་དང༌། འདུན་པའི་འདོད་ཆགས་ལས་ཡང་དག་པར་འདས་པ་སྟེ། རྣམ་པར་ཤེས་པའི་ངེས་པར་འབྱུང་བ་ནི་འདིའོ། །རྣམ་པར་ཤེས་པའི་ངེས་པར་འབྱུང་བ་ནི་འདི་ལྟ་བུའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའོ། །དགེ་སློང་དག་འདི་ལྟར་ན་དགེ་སློང་གནས་བདུན་ལ་མཁས་པར་འགྱུར་རོ། །དགེ་སློང་ཇི་ལྟར་ན་དགེ་སློང་དོན་རྣམ་པ་གསུམ་ཡོངས་སུ་རྟོག་པ་ཡིན་ཞེ་ན། འདི་ནི་དགེ་སློང་དགོན་པ་འམ། ཤིང་དྲུང་ངམ། ཁང་པ་སྟོང་པར་སོང་ནས་ཕུང་པོ་དང་ཁམས་དང་སྐྱེ་མཆེད་རྣམས་ལ་ཚུལ་བཞིན་དུ་ལེགས་པར་རྟོག་པ་སྟེ། དགེ་སློང་དག་འདི་ལྟར་ན་དགེ་སློང་དོན་རྣམ་པ་གསུམ་ཡོངས་སུ་རྟོག་པར་འགྱུར་རོ། །དགེ་སློང་དག་གནས་བདུན་ལ་མཁས་པ་དང༌། དོན་རྣམ་པ་གསུམ་ཡོངས་སུ་རྟོག་པའི་དགེ་སློང་ནི་ཆོས་འདུལ་བ་འདི་ལ་མྱུར་དུ་ཟག་པ་ཟད་པ་རྗེས་སུ་ཐོབ་པར་འགྱུར་རོ་ཞེས་ངས་ཇི་སྐད་དུ་བསྟན་པ་དེ་རྒྱས་པར་རབ་ཏུ་བཤད་དོ་ཞེས་གསུངས་སོ། །གང་ཡང་འདི་སྐད་དུ་མདོ་ལས་གང་ཟག་ལྟ་བ་ཕུན་སུམ་ཚོགས་པ་ཞེས་བྱ་བ་ལ། ཁམས་མང་པོ་པའི་མདོའི་རྣམ་པར་བཤད། པ་བསྟན་པ་ལས་འདི་ལྟར་འདོན་ཏེ། གནས་མ་ཡིན་ཞིང་གོ་སྐབས་མེད་དེ། གང་ཟག་ལྟ་བ་ཕུན་སུམ་ཚོགས་པ་མ་དང་ཕ་དང་དགྲ་བཅོམ་པ་སྲོག་དང་ཕྲལ་བར་བྱེད་པ་དང༌། དགེ་འདུན་གྱི་དབྱེ་ན་བྱེད་པ་དང༌། དེ་བཞིན་གཤེགས་པའི་སྐུ་ལ་ངན་སེམས་ཀྱིས་ཁྲག་འབྱིན་པ་འདི་ནི་གནས་མེད་
དོ། །གང་ཡང་སོ་སོའི་སྐྱེ་བོ་ནི་གནས་ཡོད་དོ། །གནས་མ་ཡིན་ཞིང་གོ་སྐབས་མེད་དེ། གང་ཟག་ལྟ་བ་ཕུན་སུམ་ཚོགས་པས་བསམས་བཞིན་དུ་དུད་འགྲོའི་སྐྱེ་གནས་སུ་གཏོགས་པའི་སྲོག་ཆགས་སྲོག་དང་ཕྲལ་བར་བྱེད་པ་དང༌། བསམས་བཞིན་དུ་བསླབ་པ་ལས་ཡང་དག་པར་འདའ་བ་དང༌། བསླབ་པ་ཉམས་པར་བྱེད་པ་འདི་ནི་གནས་མེད་དོ། །འདི་ལས་ཕྱི་རོལ་དུ་གྱུར་པའི་སྟོན་པ་བསྟེན་པ་དང༌། འདི་ལས་ཕྱི་རོལ་དུ་གྱུར་པའི་གང་ཟག་ཡོན་གནས་སུ་བྱེད་པ་དང༌། དགེ་སྦྱོང་ངམ་བྲམ་ཟེ་འདི་དག་ནི་ཤེས་པར་བྱ་བ་ཤེས་པ། བལྟ་བར་བྱ་བ་མཐོང་བའོ་ཞེས་དགེ་སྦྱོང་དང་བྲམ་ཟེ་དག་གི་ངོར་ལྟ་ཞིང་ངོར་རྟོག་པ་དང༌། དགེ་མཚན་དང་བཀྲ་ཤིས་ཀྱིས་དག་པར་འཛིན་པ་དང༌། སྲིད་བ་བརྒྱད་པ་མངོན་བར་འགྲུབ་པར་འགྱུར་བ་འདི་ནི་གནས་མེད་དོ། །གང་ཡང་སོ་སོའི་སྐྱེ་བོ་ནི་གནས་ཡོད་དོ་ཞེས་གསུངས་སོ། །འོ་ན་གང་མདོ་ལས་སྐྱེས་བུ་དམ་པའི་འགྲོ་བ་བདུན་ཞེས་བསྟན་པ་ཇི་ལྟ་བུ་ཞེ་ན་ཞེས་བྱ་བ་ལ། ལུང་བར་མའི་བདུན་པའི་མདོ་ལྔ་པ་ལས་འབྱུང་བ་མཛོད་ཀྱི་གནས་གསུམ་པ་འདི་ཉིད་དུ་སྲིད་པ་བར་མའི་སྐབས་སུ་འགྲོ་བ་ཡོད་དོ་ཞེས་བྱ་བར་བྲིས་ཟིན་ཏོ། །འོ་ན་མདོ་ལས་སྐྱེས་བུ་དམ་པ་གང་ཡིན་ཞེ་ན་ཞེས་བྱ་བ་ལ། གླེང་གཞི་ནི་མཉན་དུ་ཡོད་བ་ནའོ། །དགེ་སློང་དག་སྐྱེས་བུ་དམ་པ་དང༌། སྐྱེས་བུ་དམ་པ་ལས་ཀྱང་སྐྱེས་བུ་དམ་པ་དག་བསྟེན་པར་བྱ་སྟེ། དེ་ལེགས་པར་ཉོན་ལ་ཡིད་ལ་ཟུང་ཤིག་དང་བཤད་པར་བྱའོ། །སྐྱེས་བུ་དམ་པ་གང་ཞེ་ན། སློབ་པའི་ཡང་དག་པའི་ལྟ་བ་དང་ལྡན་པ་དང༌། སློབ་པའི་ཡང་དག་པའི་རྟོག་པ་དང༌། སློབ་པའི་ཡང་དག་པའི་ངག་དང༌། སློབ་པའི་ཡང་དག་པའི་ལས་ཀྱི་མཐའ་དང༌། སློབ་པའི་ཡང་དག་པའི་འཚོ་བ་དང༌། སློབ་པའི་ཡང་དག་པའི་རྩོལ་བ་དང༌། སློབ་པའི་ཡང་དག་བའི་དྲན་པ་དང༌། སློབ་པའི་ཡང་དག་པའི་ཏིང་ངེ་འཛིན་དང་ཡང་དག་པར་ལྡན་བ་སྟེ་འདི་ནི་སྐྱེས་བུ་དམ་པ་ཞེས་བྱའོ། །སྐྱེས་བུ་དམ་པ་ལས་ཀྱང་སྐྱེས་བུ་དམ་པ་གང་ཞེ་ན། མི་སློབ་པའི་ཡང་དག་པའི་ལྟ་བ་དང་ལྡན་བ་ནས། མི་སློབ་པའི་ཡང་དག་པའི་ཏིང་ངེ་འཛིན་གྱི་བར་དང་ལྡན་པ་སྟེ། འདི་ནི་སྐྱེས་བུ་དམ་པ་ལས་ཀྱང་སྐྱེས་བུ་དམ་པ་ཞེས་བྱའོ། །དགེ་སློང་དག་སྐྱེས་བུ་དམ་པ་དང༌། སྐྱེས་བུ་
དམ་པ་ལས་ཀྱང་སྐྱེས་བུ་དམ་པ་བསྟེན་པར་བྱའོ་ཞེས་ངས་ཇི་སྐད་དུ་བསྟན་པ་དེ་རྒྱས་པར་རབ་ཏུ་བཤད་དོ་ཞེས་གསུངས་སོ། །འོ་ན་བརྒྱ་བྱིན་གྱིས་ཞེས་བྱ་བ་ལ། དབྱངས་དང་བཅས་པའི་སྡོམ་གྱི་ཚིགས་སུ་བཅད་པ་གསུམ་པའི་བརྒྱ་བྱིན་གྱིས་དྲིས་པའི་མདོ་ལས་ཏེ། བཙུན་པ་དེ་ལ་བདག་འདི་སྙམ་དུ་ཀྱེ་མ་བདག་འདི་ནས་ཤི་འཕོས་ཏེ། མི་རྣམས་དང་སྐལ་བ་མཉམ་པར་སྐྱེ་བར་འགྱུར་ཞིང་གང་ཡང་བདག་ཕྱུག་ཅིང་ནོར་མངལ་ལོངས་སྤྱོད་ཆེ་བ་དང༌། རྫས་དང་ཉེ་བར་སྦྱར་བ་མང་བ་དང༌། རང་དབང་བ་མང་བ་དང༌། ནོར་དང་འབྲུ་དང་གསེར་དང་ས་ལེ་སྦྲམ་དང་བང་བ་དང་མཛོད་ཀྱི་ཚོགས་རབ་ཏུ་མང་པོ་དང༌། བྲན་ཕོ་དང་བྲན་མོ་དང་ལས་བྱེད་པའི་སྐྱེས་བུ་མང་པོ་དང༌། གྲོགས་པོ་དང་མཛའ་བོ་དང་ཉེ་དུ་དང་སྣག་གི་གཉེན་མཚམས་རབ་ཏུ་མང་པོ་དེ་ལྟ་བུའི་རིགས་དང་སྐལ་བ་མཉམ་པར་སྐྱེ་ཞིང༌། དེར་ཡང་བདག་ཆེར་སྐྱེས་ཤིང་དབང་པོ་རྣམས་ཡོངས་སུ་སྨིན་པས་སྦྱིན་བ་དག་བྱིན་བསོད་ནམས་དག་བྱས་ནས་སྐྲ་དང་ཁ་སྤུ་བྲེགས་ཤིང་གོས་ངུར་སྨྲིག་བགོས་ནས་དད་པས་ཡང་དག་པ་ཁོ་ནར་ཁྱིམ་མེད་པར་རབ་ཏུ་བྱུང་བ་དང༌། བཙུན་པ་བདག་རིགས་པར་གནས་ཤིང་གལ་ཏེ་ཀུན་ཤེས་པར་འབྱུང་བར་འགྱུར་བ་དང༌། ཀུན་ཤེས་པ་འབྱུང་ནས་སྡུག་བསྔལ་གྱི་མཐར་བྱེད་པ་དེ་ལྟར་བདག་རིགས་བར་གནས་པར་གྱུར་ཅིག །གལ་ཏེ་ཀུན་ཤེས་པར་མ་གྱུར་ཅིང་བདག་ཐ་མར་རྣམ་པར་ཉམས་ན་ལྷ་གཟུགས་ཅན་ཡིད་ལས་བྱུང་བ། དབང་པོ་ཚང་ཞིང་མ་ཉམས་པ། ཡན་ལག་དང་ཉིང་ལག་ཐམས་ཅད་དང་ལྡན་བ། ཁ་དོག་དང་དབྱིབས་མཛེས་པ། རང་གི་འོད་ཅན་ནམ་མཁའ་ལ་ཐོགས་པ་མེད་པར་འགྲོ་བ། དགའ་བ་ཟ་ཞིང་དགའ་བའི་ཟས་ཅན། ཚེ་རིང་ཞིང་ཡུན་རིང་དུ་གནས་པ་དེར་སྐྱེ་བར་གྱུར་ཅིག །བདག་ནི་རིགས་ནས་གལ་ཏེ་ཀུན་ཤེས་འབྱུང་འགྱུར་ཞིང༌། །ཀུན་ཤེས་འབྱུང་བ་དེ་ཉིད་བདག་གི་སྡུག་བསྔལ་མཐར། །བདག་ནི་རིགས་གནས་གལ་ཏེ་ཀུན་ཤེས་མ་གྱུར་ཅིང༌། བདག་ནི་ཐ་མར་ཉམས་ན་ལྟ་གང་འོག་མིན་ཞེས། །རྣམ་པར་གྲགས་པ་དེར་ནི་སྐྱེ་བར་འགྱུར་བར་ཤོག །བཅོམ་ལྡན་བདག་ནི་རྒྱུན་ཞུགས་བདེ་གཤེགས་རྒྱུན་ཞུགས་ཏེ། །མ་ཐོབ་པར་གནས་ལན་ཅིག་ཕྱིར་འོང་བདག་འདོད་
དོ། །ལེགས་སོ་བརྒྱ་བྱིན་བག་ཡོད་པར་ནི་གནས་པར་གྱིས། །གང་གིས་རྒྱུན་ཞུགས་ངེས་པར་རང་བདག་ཉིད་ཀྱིས་ནི། །རྒྱུ་མཚན་གང་ལས་ཁྱད་པར་དང་པོ་རྒྱ་ཆེན་རྟོགས། །བཅོམ་ལྡན་ཉིད་ལས་གཞན་མིན་སྟོན་པ་གཞན་མིན་ཞེས། །གཞན་དང་མི་མཚུངས་ཁྱད་པར་བདག་གིས་མངོན་པར་ཤེས། །དྲང་སྲོང་དག་ནི་ལྷར་གྱུར་འདི་ན་འདུག་བཞིན་དུ། །སླར་ཡང་སྲོག་རྙེད་ལྟ་བུར་བློ་ལྡན་བདག་འཛིན་ཏོ། །ཞེས་གསུངས་སོ། །འགོག་པ་ཐོབ་པ་ཕྱིར་མི་འོངས། །ལུས་ཀྱིས་མངོན་དུ་བྱེད་པར་འདོད། །ཅེས་བྱ་བ་ལ། བཅོམ་ལྡན་འདས་སེར་སྐྱའི་གཞི་ནྱ་གྲོ་དྷའི་ཀུན་དགའ་ར་བ་ན་བཞུགས་ཏེ། དེའི་ཚེ་སེར་སྐྱའི་ཡུལ་མི་ཤཱཀྱ་རབ་ཏུ་མང་པོ་རྣམས་འདུན་མ་འདུས་ཤིང་ཚོགས་ནས་འདུག་བར་གྱུར་པ་དེ་དག་གཏམ་གཞན་བརྗོད་པ་འདི་ལྟ་བུ་གླེང་ལགས་ཏེ། མིང་ཆེན་ད་ལྟར་འདི་ན་གང་གང་གིས་ན་ད་ལྟར་འདི་ན་ཤཱཀྱ་མདའ་ལག་འཆི་པའི་དུས་ན་མྱོས་པར་གྱུར་པ་འཐུངས་ཤིང་བསླབ་པ་དྲལ་བ། དེ་བཅོམ་ལྡན་འདས་ཀྱིས་རྒྱུན་དུ་ཞུགས་པ་མི་ལྟུང་བའི་ཆོས་ཅན་རྫོགས་པའི་བྱང་ཆུབ་ཏུ་ངེས་པ་ཐ་མར་འགྱུར་ཏེ། སྲིད་པ་ལན་བདུན་པ་ལྷ་དང་མི་རྣམས་ཀྱི་ནང་དུ་ལན་བདུན་ཉིང་མཚམས་སྦྱར་ནས་སྡུག་བསྔལ་གྱི་མཐར་བྱེད་པར་འགྱུར་རོ་ཞེས་ལུང་བསྟན་ཏོ། །དེས་མིང་ཆེན་ཁྱོད་བཅོམ་ལྡན་འདས་གང་ན་བ་དེར་ཉེ་བར་སོང་ནས། བཅོམ་ལྡན་འདས་ལ་དོན་འདི་ལྟ་བུ་ཡོངས་སུ་དྲིས་ལ། བཅོམ་ལྡན་འདས་ཀྱིས་ཇི་ལྟར་ལུང་བསྟན་པ་དེ་བཞིན་དུ་ཟུང་ཤིག །དེ་ནས་ཤཱཀྱ་མིང་ཆེན་བཅོམ་ལྡན་འདས་གང་ན་བ་དེར་ཉེ་བར་སོང་སྟེ་ཉེ་བར་སོང་ནས། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ཤཱཀྱ་མིང་ཆེན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་ཅག་སེར་སྐྱའི་གཞིའི་ཡུལ་མི་ཤཱཀྱ་རབ་ཏུ་མང་པོ་རྣམས་འདུན་མ་འདུས་ཤིང་ཚོགས་ཏེ་འདུས་པར་གྱུར་པ་དེ་དག་གཏམ་གཞན་བརྗོད་པ་འདི་ལྟ་བུ་གླེང་ལགས་ཏེ། མིང་ཆེན་ད་ལྟར་འདི་ན་གང་གང་གིས་ཐ་མར་འགྱུར་ཏེ། ད་ལྟ་འདི་ན་ཤཱཀྱ་མདའ་ལག་འཆི་བའི་དུས་ན་མྱོས་པར་འགྱུར་བ་འཐུངས་ཤིང་བསླབ་པ་དྲལ་བ་དེ་ཡང་བཅོམ་ལྡན་འདས་
ཀྱིས་རྒྱུན་དུ་ཞུགས་པ་མི་ལྟུང་བའི་ཆོས་ཅན་རྫོགས་པའི་བྱང་ཆུབ་ཏུ་ངེས་པར་སྲིད་པ་ལན་བདུན་པ། ལྷ་དང་མི་རྣམས་ཀྱི་ནང་དུ་ལན་བདུན་ཉིད་མཚམས་སྦྱར་ནས་སྡུག་བསྔལ་གྱི་མཐར་བྱེད་པར་འགྱུར་རོ་ཞེས་ལུང་བསྟན་ཏོ། །བཙུན་པ་འདི་ཇི་ལྟ་བུ་ཞེས་བཅོམ་ལྡན་འདས་ལ་བདག་དོགས་པ་འདི་ལྟ་བུ་ཡོངས་སུ་འདྲིའོ། །མིང་ཆེན་འཕགས་པ་ཉན་ཐོས་དག་བདེ་བར་གཤེགས་པ་ནི་སྟོན་པ་སྟེ། བདེ་བར་གཤེགས་པ་ནི་སྟོན་པ་ཞེས་སྨྲ་བ་ནི་ལེགས་པར་སྨྲ་བ་ཡིན་ཞིང་སེམས་བསྐྱེད་པ་དང༌། དྲང་པོའི་ལྟ་བ་ཅན་དང༌། ལྟ་བ་ལེགས་པར་འགྱུར་རོ། །མིང་ཆེན་འཕགས་པ་ཉན་ཐོས་དག་བཅོམ་ལྡན་འདས་ཀྱིས་ཆོས་འདི་ལེགས་པར་གསུངས་པ་སྟེ། བཅོམ་ལྡན་འདས་ཀྱིས་ཆོས་ནི་ལེགས་པར་གསུངས་པའི་ཞེས་སྨྲ་བ་ནི་ལེགས་པར་སྨྲ་བ་ཡིན་ཞིང༌། སེམས་བསྐྱེད་པ་དང༌། ལྟ་བ་དྲང་པོ་ཅན་དང༌། ལྟ་བ་ལེགས་པར་འགྱུར་རོ། །མིང་ཆེན་འཕགས་པ་ཉན་ཐོས་དག་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ནི་ལེགས་པར་ཞུགས་པ་སྟེ། བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ནི་ལེགས་པར་ཞུགས་པའོ་ཞེས་སྨྲ་བ་ནི་ལེགས་པར་སྨྲ་བ་ཡིན་ཞིང་སེམས་བསྐྱེད་པ་དང༌། ལྟ་བ་དྲང་པོ་ཅན་དང༌། ལྟ་བ་ལེགས་པར་འགྱུར་རོ། །མིང་ཆེན་འདི་ན་འཕགས་པ་ཉན་ཐོས་སངས་རྒྱས་ལ་དད་པ་མི་ཕྱེད་པ་དང་ཆོས་དང་དགེ་འདུན་ལ་དད་པ་མི་ཕྱེད་པར་འགྱུར་ཞིང༌། ཤེས་རབ་ཆེ་བ་དང༌། ཤེས་རབ་མྱུར་བ་དང༌། ཤེས་རབ་རྣོ་བ་དང༌། ངེས་པར་འབྱུང་བའི་ཤེས་རབ་དང༌། སྐྱོ་བའི་ཤེས་རབ་དང༌། རྣམ་པར་གྲོལ་བའི་ཤེས་རབ་དང་ཡང་དག་པར་ལྡན་བ་དང༌། རྣམ་པར་ཐར་པ་བརྒྱད་ལུས་ཀྱིས་མངོན་སུམ་དུ་བྱས་ནས་གནས་ཤིང་འདིའི་ཤེས་རབ་ཟག་པར་ལྟ་བ་ཡོངས་སུ་ཟད་པ་སྟེ། མིང་ཆེན་འདི་ནི་འཕགས་བ་ཉན་ཐོས་དམྱལ་བར་མི་འགྲོ་བ་ཡི་དགས་དང་དུད་འགྲོར་མི་འགྲོ་བ་ངན་སོང་ངན་འགྲོ་ལོག་པར་མི་ལྟུང་པར་མི་འགྲོ་བ་སྟེ། གང་ཡང་འདི་སྐད་དུ་གཉི་གའི་ཆ་ལས་རྣམ་པར་གྲོལ་བའོ་ཞེས་བརྗོད་པའོ། །གཞན་ཡང་མིང་ཆེན་འཕགས་པ་ཉན་ཐོས་སངས་རྒྱས་ལ་དད་པ་མི་བྱེད་པ་དང་ཞེས་བྱ་བ་ནས་རྣམ་པར་གྲོལ་བའི་ཤེས་རབ་དང་ལྡན་བ་ཞེས་བྱ་བའི་བར་དུ་སྟེ། རྣམ་པར་ཐར་པ་བརྒྱད་ལུས་ཀྱིས་
མངོན་སུམ་དུ་བྱས་ཏེ་གནས་ཤིང་འདིའི་ཤེས་རབ་ཟག་པར་ལྟ་བ་ཡོངས་སུ་ཟད་པ་སྟེ། མིང་ཆེན་འདི་ནི་འཕགས་པ་ཉན་ཐོས་དམྱལ་བར་མི་འགྲོ་ཞེས་བྱ་བ་ནས། ངན་སོང་ངན་འགྲོ་ལོག་པར་མི་ལྟུང་བཞེས་བྱ་བའི་བར་དུའོ། །གང་ཡང་ཇི་སྐད་དུ་ཤེས་རབ་ཀྱིས་རྣམ་པར་གྲོལ་བ་ཞེས་བརྗོད་པའོ།། གཞན་ཡང་མིང་ཆེན་སངས་རྒྱས་ལ་དད་པ་མི་ཕྱེད་པ་དང་ཞེས་བྱ་བ་ནས། རྣམ་པར་གྲོལ་བའི་ཤེས་རབ་དང་ཡང་དག་པར་ལྡན་པ་ཞེས་བྱ་བའི་བར་དུ་སྟེ། རྣམ་པར་ཐར་པ་བརྒྱད་ལུས་ཀྱིས་མངོན་སུམ་དུ་བྱས་ཏེ་གནས་ཤིང་འདིའི་ཤེས་རབ་ཟག་པར་ལྟ་བ་ཡོངས་སུ་ཟད་པ་སྟེ། མིང་ཆེན་འདི་ནི་འཕགས་པ་ཉན་ཐོས་དམྱལ་བར་མི་འགྲོ་ཞེས་བྱ་བ་ནས། ངན་སོང་ངན་འགྲོ་ལོག་པར་མི་ལྟུང་བའོ་ཞེས་བྱ་བའི་བར་དུའོ། །གང་ཡང་ཇི་སྐད་དུ་ལུས་ཀྱིས་མངོན་སུམ་དུ་བྱེད་པ་ཞེས་བརྗོད་པའོ། །གཞན་ཡང་མིང་ཆེན་འཕགས་པ་ཉན་ཐོས་སངས་རྒྱས་ལ་དད་པ་མི་ཕྱེད་པ་དང་ཞེས་བྱ་བ་ནས་རྣམ་པར་གྲོལ་བའི་ཤེས་རབ་དང་ལྡན་པ་ཞེས་བྱ་བའི་བར་དུ་སྟེ། ཐ་མའི་ཆ་དང་མཐུན་པའི་ཀུན་དུ་སྦྱོར་བ་ལྔ་སྤངས་ཤིང་ཡོངས་སུ་ཤེས་པ་སྟེ། འདི་ལྟ་སྟེ། འདོད་པ་ལ་འདུན་པ་དང༌། གནོད་སེམས་དང༌། འཇིག་ཚོགས་ལ་ལྟ་བ་དང༌། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང༌། ཐེ་ཚོམ་སྟེ། མིང་ཆེན་འདི་ནི་འཕགས་པ་ཉན་ཐོས་དམྱལ་བར་མི་འགྲོ་བ་ཞེས་བྱ་བ་ནས། ངན་སོང་ངན་འགྲོ་ལོག་པར་མི་ལྟུང་བའོ་ཞེས་བྱ་བའི་བར་དུ་སྟེ། གང་ཡང་འདི་སྐད་དུ་བར་མདོར་ཡོངས་སུ་མྱ་ངན་ལས་འདའ་བ་དང༌། སྐྱེས་ནས་ཡོངས་སུ་མྱ་ངན་ལས་འདའ་བ་དང༌། མངོན་པར་འདུ་བྱ་བ་མེད་པར་ཡོངས་སུ་མྱ་ངན་ལས་འདའ་བ་དང༌། མངོན་པར་འདུ་བྱ་བ་དང་བཅས་པར་ཡོངས་སུ་མྱ་ངན་ལས་འདའ་བ་དང༌། གང་དུ་འཕོ་བ་ཞེས་བརྗོད་པའོ། །གཞན་ཡང་མིང་ཆེན་འཕགས་པ་ཉན་ཐོས་སངས་རྒྱས་ལ་དད་པ་མི་ཕྱེད་པ་ཞེས་བྱ་བ་ནས། རྣམ་པར་གྲོལ་བའི་ཤེས་རབ་དང་ཡང་དག་པར་ལྡན་བ་ཞེས་བྱ་བའི་བར་དུ་སྟེ། ཀུན་དུ་སྦྱོར་བ་གསུམ་པོ་སྤངས་ཤིང་ཡོངས་སུ་ཤེས་པར་གྱུར་ལ། འདོད་ཆགས་དང་ཞེ་སྡང་དང་གཏི་མུག་སྲབ་པ་སྟེ། མིང་ཆེན་འདི་ནི་འཕགས་པ་ཉན་ཐོས་དམྱལ་བར་མི་
ལྟུང་བ་ཞེས་བྱ་བ་ནས་ངན་སོང་ངན་འགྲོ་ལོག་པར་མི་ལྟུང་བ་ཞེས་བྱ་བའི་བར་དུ་སྟེ། གང་ཡང་ཇི་སྐད་དུ་བར་ཆད་གཅིག་པ་ཅན་ཞེས་བརྗོད་པའོ། །གཞན་ཡང་མིང་ཆེན་འཕགས་པ་ཉན་ཐོས་སངས་རྒྱས་ལ་དད་པ་མི་ཕྱེད་པ་ཞེས་བྱ་བ་ནས། ཆོས་དང་དགེ་འདུན་ལ་དད་པ་མི་ཕྱེད་པ་དང་ལྡན་ཞིང༌། མགྱོགས་པའི་ཤེས་རབ་དང༌། མྱུར་བའི་ཤེས་རབ་དང༌། རྣོ་བའི་ཤེས་རབ་དང༌། ངེས་པར་འབྱུང་བའི་ཤེས་རབ་དང༌། སྐྱོ་བའི་ཤེས་རབ་དང༌། རྣམ་པར་གྲོལ་བའི་ཤེས་རབ་དང་ཡང་དག་པར་ལྡན་པ། ཀུན་དུ་སྦྱོར་བ་གསུམ་སྤངས་ཤིང་ཡོངས་སུ་ཤེས་པར་གྱུར་བ་སྟེ། འདི་ལྟ་སྟེ། འཇིག་ཚོགས་ལ་ལྟ་བ་དང༌། ཚུལ་ཁྲིམས་དང༌། བརྟུལ་ཞུགས་མཆོག་ཏུ་འཛིན་པ་དང༌། ཐེ་ཚོམ་མོ། །འདི་ནི་འཕགས་པ་ཉན་ཐོས་དམྱལ་བར་མི་འགྲོ་ཞིང་ཡི་དགས་དང་དུད་འགྲོར་མི་འགྲོ་བ་ངན་སོང་ངན་འགྲོ་ལོག་པར་མི་ལྟུང་བ་སྟེ། གང་ཡང་འདི་སྐད་དུ་རིགས་ནས་རིགས་སུ་སྐྱེ་བ་དང་སྲིད་པ་ལན་བདུན་པ་ཞེས་བརྗོད་པའོ། །གཞན་ཡང་མིང་ཆེན་འཕགས་པ་ཉན་ཐོས་སངས་རྒྱས་ལ་དད་པ་མི་ཕྱེད་པ་དང༌། ཆོས་དང༌། དགེ་འདུན་ལ་དད་པ་མི་ཕྱེད་པ་དང༌། ཆོས་ལྔ་པོ་རྣམས་ལ་ཤེས་རབ་ཆེན་པོས་རྣམ་པར་དཔྱོད་པར་བཟོད་པ་སྟེ། འདི་ལྟ་སྟེ། དད་པ་དང་བརྩོན་འགྲུས་དང༌། དྲན་པ་དང༌། ཏིང་ངེ་འཛིན་དང༌། ཤེས་རབ་པོ། །འདི་ནི་འཕགས་པ་ཉན་ཐོས་དམྱལ་བར་མི་ལྟུང་ཞེས་བྱ་བ་ནས། ངན་སོང་ངན་འགྲོ་ལོག་པར་མི་ལྟུང་བ་ཞེས་བྱ་བའི་བར་དུ་སྟེ། གང་ཡང་འདི་སྐད་དུ་ཆོས་ཀྱི་རྗེས་སུ་འབྲང་བ་ཞེས་བརྗོད་པའོ། །གཞན་ཡང་མིང་ཆེན་འཕགས་པ་ཉན་ཐོས་སངས་རྒྱས་ལ་དད་པ་མི་ཕྱེད་ཅིང་ཆོས་དང་དགེ་འདུན་ལ་དད་པ་མི་ཕྱེད་པ་དང་ཆོས་ལྔ་པོ་རྣམས་ལ་ཤེས་རབ་ཆུང་དུས་རྣམ་པར་དཔྱོད་པས་བཟོད་པ་སྟེ། འདི་ལྟ་སྟེ། དད་པ་དང༌། བརྩོན་འགྲུས་དང༌། དྲན་པ་དང། ཏིང་ངེ་འཛིན་དང༌། ཤེས་རབ་པོ། །མིང་ཆེན་འདི་ནི་འཕགས་པ་ཉན་ཐོས་དམྱལ་བར་མི་འགྲོ་ཞིང༌། ཡི་དགས་སུ་མི་འགྲོ་བ། དུད་འགྲོར་མི་འགྲོ་བ། ངན་སོང་ངན་འགྲོ་ལོག་པར་མི་ལྟུང་བའོ་ཞེས་བྱ་བའི་བར་དུ་སྟེ། གང་ཡང་ཇི་སྐད་དུ་དད་པའི་རྗེས་སུ་འབྲང་བ་ཞེས་བརྗོད་
པའོ། །མིང་ཆེན་འདི་ནི་གནས་མ་ཡིན་ཞིང་གོ་སྐབས་མེད་དེ། ཤིང་སཱ་ལས་ངས་བཤད་པའི་དོན་འདི་ལྟ་བུ་ཤེས་པ་འདི་ནི་གནས་མེད་པའོ། །འོན་ཀྱང་གནས་ངེས་པར་ཡོངས་སུ་བརྟག་པར་བཟུང་སྟེ་བཤད་པར་བྱའོ། །མིང་ཆེན་སཱ་ལ་འདིས་ངས་བཤད་པའི་དོན་ནི་མི་ཤེས་པས་ང་རྒྱུན་དུ་ཞུགས་པར་ལུང་མི་སྟོན་ཏོ། །ཅིའི་ཕྱིར་ངས་ཤཱཀྱ་མདའ་ལག་རྒྱུན་དུ་ཞུགས་པར་ལུང་བསྟན་ཅེ་ན། མིང་ཆེན་ཤཱཀྱ་མདའ་ལག་འཚོ་བའི་དུས་ཀྱི་ཚེ་མྱོས་པར་འགྱུར་བ་འཐུང་བ་སྤངས་ཤིང་བསླབ་པ་ཡང་དག་པར་བླངས་ཏེ། དེས་ན་ངས་འཆི་བའི་དུས་ན་རྒྱུན་དུ་ཞུགས་པ་མི་ལྟུང་བའི་ཆོས་ཅན་རྫོགས་པའི་བྱང་ཆུབ་ཏུ་ངེས་པ། མཆོག་ཏུ་ཐོགས་ན་སྲིད་པ་ལན་བདུན་ལ། ལྷ་དང་མི་རྣམས་སུ་ལན་བདུན་དུ་ཉིང་མཚམས་སྦྱར་ནས་སྡུག་བསྔལ་མཐར་བྱེད་པ་ཞེས་ངས་ལུད་བསྟན་ཏོ། །དེ་ནས་ཤཱཀྱ་མིང་ཆེན་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་ཞིང་རྗེས་སུ་ཡི་རང་ནས་བཅོམ་ལྡན་འདས་ཀྱི་ཞབས་ལ་སྤྱི་པོས་ཕྱག་བྱས་ཏེ་བཅོམ་ལྡན་འདས་ཀྱི་དྲུང་ནས་སོང་ངོ༌། །རྣམ་པར་ཐར་པ་བརྒྱད་ལུས་ཀྱིས་མངོན་སུམ་དུ་བྱས་ནས་བསྒྲུབས་ཏེ་གནས་སོ་ཞེས་བྱ་བ་ལ། བརྒྱད་པ་ནི་འདུ་ཤེས་དང་ཚོར་བ་འགོག་པའི་རྣམ་པར་ཐར་པ་སྟེ་འགོག་པའི་སྙོམས་པར་འཇུག་པ་ཞེས་བྱ་བ་དང༌། མིང་གཉིས་པ་ལ་ལུས་ཀྱིས་མངོན་སུམ་དུ་བྱེད་པ་ཞེས་བརྗོད་དོ། །མདོ་གང་ལས་འགོག་པ་ལུས་ཀྱིས་མངོན་སུམ་དུ་བྱེད་པ་ཐོབ་པ་ཞེས་བྱ་བ་གསུངས་པའི་མདོ་དེ་ཉིད་ལས་འཕགས་པའི་གང་ཟག་གི་རྣམ་པར་དབྱེ་བ་གཞན་ཡང་ཉེ་བར་བསྡུས་སོ།། །།མདོ་ལས་སློབ་པ་བཅོ་བརྒྱད་ཅེས་གསུངས་པ་ཞེས་བྱ་བ་ལ། བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། དེ་ནས་ཁྱིམ་བདག་མགོན་མེད་ཟས་སྦྱིན་བཅོམ་ལྡན་འདས་གང་ན་བ་དེར་ཉེ་བར་སོང་སྟེ་ཉེ་བར་སོང་ནས་བཅོམ་ལྡན་འདས་ཀྱི་ཞབས་ལ་ཕྱག་བྱས་ཏེ། ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས། ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་འཇིག་རྟེན་གྱི་ཡོན་གནས་སུ་དུ་ཞིག་མཆིས། ཁྱིམ་བདག་གཉིས་ཏེ་
སློབ་པ་དང༌། མི་སློབ་པའོ། །ཁྱིམ་བདག་དེ་ལ་སློབ་པ་བཅོ་བརྒྱད་དང༌། མི་སློབ་པ་དགུའོ། །སློབ་པ་བཅོ་བརྒྱད་གང་ཞེ་ན། རྒྱུན་དུ་ཞུགས་པའི་འབྲས་བུ་མངོན་དུ་བྱ་བའི་ཕྱིར་ཞུགས་པ་དང༌། རྒྱུན་དུ་ཞུགས་པ་དང༌། ལན་ཅིག་ཕྱིར་འོང་བའི་འབྲས་བུ་མངོན་དུ་བྱ་བའི་ཕྱིར་ཞུགས་པ་དང༌། ལན་ཅིག་ཕྱིར་འོང་བ་དང༌། ཕྱིར་མི་འོང་བའི་འབྲས་བུ་མངོན་དུ་བྱ་བའི་ཕྱིར་ཞུགས་པ་དང༌། ཕྱིར་མི་འོང་བ་དང༌། དགྲ་བཅོམ་པའི་འབྲས་བུ་མངོན་དུ་བྱ་བའི་ཕྱིར་ཞུགས་པ་དང༌། དད་པའི་རྗེས་སུ་འབྲང་བ་དང༌། ཆོས་ཀྱི་རྗེས་སུ་འབྲང་བ་དང༌། དད་པས་མོས་པ་དང༌། མཐོང་བས་ཐོབ་པ་དང༌། རིགས་ནས་རིགས་སུ་སྐྱེ་བ་དང༌། བར་ཆད་གཅིག་པ་ཅན་དང༌། བར་མ་དོར་ཡོངས་སུ་མྱ་ངན་ལས་འདའ་བ་དང༌། སྐྱེས་ནས་ཡོངས་སུ་མྱ་ངན་ལས་འདའ་བ་དང༌། མངོན་པར་འདུ་བྱ་བ་དང་བཅས་བར་ཡོངས་སུ་མྱ་ངན་ལས་འདའ་བ་དང༌། མངོན་བར་འདུ་བྱ་བ་མེད་པར་ཡོངས་སུ་མྱ་ངན་ལས་འདའ་བ་དང༌། གང་དུ་འཕོ་བ་སྟེ། འདི་ནི་སློབ་པ་བཅོ་བརྒྱད་ཅེས་བྱའོ། །མི་སློབ་པ་དགུ་གང་ཞེ་ན། ཡོངས་སུ་ཉམས་པའི་ཆོས་ཅན་དང༌། འཆི་བར་སེམས་པའི་ཆོས་ཅན་དང༌། རྗེས་སུ་བསྲུང་བའི་ཆོས་ཅན་དང༌། གནས་པ་ལས་མི་སྐྱོ་བ་དང༌། རྟོགས་པའི་སྐལ་བ་ཅན་དང༌། མི་གཡོ་བའི་ཆོས་ཅན་དང༌། ཤེས་རབ་ཀྱིས་རྣམ་པར་གྲོལ་བ་དང༌། ཕྱོགས་གཅིག་ལས་རྣམ་པར་གྲོལ་བ་དང༌། གཉི་གའི་ཆ་ལས་རྣམ་པར་གྲོལ་བ་སྟེ། འདི་ནི་མི་སློབ་པའི་གང་ཟག་དགུ་ཞེས་བྱའོ། །སློབ་པ་དང་མི་སློབ་པ་འདི་དག་ནི་འཇིག་རྟེན་འདི་ན་སྦྱིན་པ་དང་མཆོད་སྦྱིན་གྱི་འོས་སུ་གྱུར་པའོ། །ལུས་དང་ངག་དང་དེ་བཞིན་དུ། །ཡིད་ཀྱི་དྲང་པོར་གྱུར་པ་ན། །གང་ལ་བྱིན་ན་འབྲས་ཆེ་བ། །མཆོད་སྦྱིན་བྱ་བའི་ཞིང་བཟང་ཡིན། །ཞེས་གསུངས་སོ། །དེ་དག་ནི་ཚུལ་ཁྲིམས་དང་ཏིང་ངེ་འཛིན་དང་ཤེས་རབ་ཀྱི་རང་བཞིན་དག་ཡིན་ནོ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་གསུམ་པོ་འདི་དག་ནི་བསླབ་པ་གསུམ་སྟེ། གསུམ་གང་ཞེ་ན། ལྷག་པའི་ཚུལ་ཁྲིམས་ཀྱི་བསླབ་པ་དང༌། ལྷག་པའི་སེམས་དང༌། ལྷག་པའི་ཤེས་རབ་ཀྱི་བསླབ་
པའོ། །ལྷག་པའི་ཚུལ་ཁྲིམས་ཀྱི་བསླབ་པ་གང་ཞེ་ན། འདི་ནི་དགེ་སློང་ཚུལ་ཁྲིམས་དང་ལྡན་བར་གནས་ཤིང་སོ་སོར་ཐར་པས་བསྡམས་ན་ཆོ་ག་དང་སྤྱོད་ཡུལ་ཕུན་སུམ་ཚོགས་པ་དང་ཁ་ན་མ་ཐོ་བ་ཕྲ་རབ་ཙམ་ལ་ཡང་འཇིགས་པར་ལྟ་ཞིང༌། བསླབ་པ་ཡང་དག་པར་བླངས་པ་ལ་སློབ་པར་བྱེད་པ་སྟེ། འདི་ནི་ལྷག་པའི་ཚུལ་ཁྲིམས་ཀྱི་བསླབ་པ་ཞེས་བྱའོ། །ལྷག་པའི་སེམས་ཀྱི་བསླབ་པ་གང་ཞེ་ན། འདི་ནི་དགེ་སློང་འདོད་པ་ལས་དབེན་པ་ཞེས་བྱ་བ་ནས། བསམ་གཏན་བཞི་པ་བསྒྲུབས་ཏེ་ཉེ་བར་གནས་སོ་ཞེས་བྱ་བའི་བར་དུ་སྟེ། འདི་ནི་ལྷག་པའི་ཏིང་ངེ་འཛིན་གྱི་བསླབ་པ་ཞེས་བྱའོ། །ལྷག་པའི་ཤེས་རབ་ཀྱི་བསླབ་པ་གང་ཞེ་ན། འདི་ནི་དགེ་སློང་སྡུག་བསྔལ་འཕགས་པའི་བདེན་པའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་ཤིང༌། སྡུག་བསྔལ་ཀུན་འབྱུང་བ་དང༌། སྡུག་བསྔལ་འགོག་པ་དང༌། སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་སྟེ། འདི་ནི་ལྷག་པའི་ཤེས་རབ་ཀྱི་བསླབ་པ་ཞེས་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །བཅོམ་ལྡན་ལྷག་པའི་ཚུལ་ཁྲིམས་དང༌། །སེམས་དང་ལྷག་པའི་ཤེས་རབ་ཀྱི། །བསླབ་པ་གསུམ་པོ་ཕུན་ཚོགས་པའི། །དགེ་སློང་གང་དེར་སྤྱོད་པར་བྱེད། །སྟོབས་ལྡན་བརྟན་པའི་བརྩོན་འགྲུས་ཅན། །ཉིན་མོ་ཇི་ལྟར་དེ་བཞིན་མཚན། །མཚན་མོ་ཇི་ལྟར་དེ་བཞིན་ཉིན། །སྔ་མ་ཇི་བཞིན་དེ་བཞིན་ཕྱིས། །ཕྱི་མ་ཇི་བཞིན་དེ་བཞིན་སྔར། །ཇི་ལྟར་འོག་ཏུ་དེ་ལྟར་སྟེང༌། །སྟེང་དུ་ཇི་ལྟར་དེ་བཞིན་འོག །རྟག་ཏུ་དབང་པོ་བསྡམས་ཤིང་སྤྱོད། །ཚད་མེད་པ་ཡི་ཏིང་འཛིན་གྱིས། །ཕྱོགས་ཀུན་ཟིལ་གྱིས་གནོན་བྱེད་པ། །དེ་ནི་བསློབ་ལམ་ཡང་དག་པའི། །དབང་པོ་སློབ་པ་ཞེས་བརྗོད་དོ། །དེ་ཡིས་སེམས་ནི་རྣམ་གྲོལ་ཞིང༌། །རྣམ་པར་ཤེས་ན་སྟོང་བྱེད་པ། །དེ་ནི་བསྟན་པ་ལམ་རྗེས་འགྲོ། །འཇིག་རྟེན་རྫོགས་སངས་རྒྱས་ཞེས་བརྗོད། །རྨོངས་པ་མེད་པར་རབ་གནས་ཤིང༌། །རིག་དང་ཞབས་སུ་ལྡན་པ་དང༌། །
འཆི་བའི་འོག་ཏུ་སྲེད་ཟད་ཅིང༌། །རྣམ་པར་གྲོལ་བ་ཐོབ་པར་འགྱུར། །མར་མེ་ཤི་བར་གྱུར་པ་ལྟར། །དེ་ཡི་སེམས་ནི་རྣམ་པར་ཐར། །ཞེས་གསུངས་སོ། །མདོ་ལས་ཞི་བྱེད་བསླབ་པ་ལ་སློབ་ཅིང་བསླབ་པ་ལ་སློབ་པས་ན་དེའི་ཕྱིར་ཞེས་བྱ་བ་ལ། བཅོམ་ལྡན་འདས་རྒྱལ་པོའི་ཁབ་ཀྱི་འོད་མའི་ཚལ་གྱི་བྱ་ཀ་ལན་ད་ཀ་གནས་པ་ན་བཞུགས་ཏེ། དེས་ན་ཀུན་དུ་རྒྱུ་ཞི་བྱེད་བཅོམ་ལྡན་འདས་གང་ན་བ་དེར་ཉེ་བར་སོང་སྟེ། ཉེ་བར་སོང་ནས་བཅོམ་ལྡན་འདས་དང་ལྷན་ཅིག་ཅེས་བྱ་བ་ནས་ཕྱོགས་གཅིག་ཏུ་འདུག་ནས་ཞེས་བྱ་བའི་བར་དུ་སྟེ། དེ་ནས་ཀུན་དུ་རྒྱུ་ཞི་བྱེད་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གཽ་ཏ་མ་སློབ་པ་སློབ་པ་ཞེས་བརྗོད་པ། ཅིའི་ཕྱིར་སློབ་པ་སློབ་པ་ཞེས་བརྗོད། ཞི་བྱེད་བསླབ་པ་ལ་སློབ་ཅིང་བསླབ་པ་ལ་སློབ་པས་དེའི་ཕྱིར་སློབ་པ་ཞེས་བརྗོད་དོ། །གཽ་ཏ་མ་བསླབ་པ་གང་ལ་སློབ། དུས་དང་དུས་སུ་ལྷག་པའི་ཚུལ་ཁྲིམས་ཀྱི་བསླབ་པ་ལ་སློབ་པ་དང༌། ལྷག་པའི་སེམས་དང༌། ལྷག་པའི་ཤེས་རབ་ཀྱི་བསླབ་བ་ལ་སློབ་པར་བྱེད་པ་སྟེ། ཞི་བྱེད་དེའི་ཕྱིར་བསླབ་པ་ལ་སློབ་ཅིང་བསླབ་པ་ལ་སློབ་པས་ན་དེའི་ཕྱིར་སློབ་པ་ཞེས་བྱའོ། །གཽ་ཏ་མ་གང་ཡང་དགེ་སློང་དགྲ་བཅོམ་པ། ཟག་པ་ཟད་པ། བྱ་བ་བྱས་པ། བྱེད་པ་བྱས་པ། ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པ་ཀུན་དུ་སྦྱོར་བ་ཡོངས་སུ་ཟད་པ། ཡང་དག་པར་ཤེས་པས་སེམས་ཤིན་ཏུ་རྣམ་པར་གྲོལ་བ། དེའི་ཚེ་ན་བསླབ་པ་གང་ཞིག་ལ་སློབ་པར་བྱེད་ཅེ་ན། ཞི་བྱེད་གང་ཡང་དགེ་སློང་དགྲ་བཅོམ་པ་ཟག་པ་ཟད་པ། བྱ་བ་བྱས་པ། བྱེད་པ་བྱས་པ། ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པ་ཀུན་དུ་སྦྱོར་བ། ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ་དེའི་ཚེ་འདོད་ཆགས་མ་ལུས་པར་ཟད་པ་སོ་སོར་མྱོང་བ་དང༌། ཞེ་སྡང་ཟད་པ་དང༌། གཏི་མུག་ཟད་པ་སོ་སོར་མྱོང་བར་བྱེད་དོ། །དེ་འདོད་ཆགས་ཡང་དག་པར་ཟད་བ་དང༌། ཞེ་སྡང་ཡང་དག་པར་ཟད་པ་དང༌། གཏི་མུག་ཡང་དག་པར་ཟད་པས་གང་ཡང་སྡིག་བར་འགྱུར་བ་དེ་མི་བྱེད་ཅིང་དགེ་བ་ལ་བརྟེན་པར་བྱེད་དེ། ཞི་བྱེད་བསླབ་པ་ལ་སློབ་ཅིང༌།
བསླབ་པ་ལ་སློབ་པས་ན་དེའི་ཕྱིར་སློབ་པའི་སློབ་པ་ཞེས་བྱའོ། །དེ་ནས་ཀུན་དུ་རྒྱུ་ཞི་བྱེད་བཅོམ་ལྡན་འདས་ཀྱིས་གསུངས་པ་ལ་ཞེས་བྱ་བ་ནས་ལངས་ཏེ་སོང་ངོ་ཞེས་བྱ་བའི་བར་དུའོ། །ཀུན་དུ་རྒྱུ་ཞི་བྱེད་ཇི་ལྟ་བ་བཞིན་དུ་ཚེ་དང་ལྡན་པ་ཀུན་དགའ་བོ་དང༌། གཞན་ཡང་དགེ་སློང་རྣམས་ལ་བཅོམ་ལྡན་འདས་ཀྱིས་བཤད་པ་ཡང་དེ་བཞིན་ནོ། །འོ་ན་མོད་ལས་འདིས་སྡིག་པ་མི་དགེ་བའི་ཆོས་ཞེས་བྱ་བ་ལ། ལུང་བར་མའི་མདོ་དང་པོའི་མཐར་འདི་སྐད་ཅེས་གསུངས་ཏེ། ཇི་ལྟར་དགེ་སྦྱོང་དུ་འགྱུར་ཞེ་ན། འདིས་སྡིག་པ་མི་དགེ་བའི་ཆོས་ཡང་སྲིད་པར་ཀུན་ནས་ཉོན་མོངས་པ་ཅན། ནད་དང་བཅས་ཤིང་རྣམ་པར་སྨིན་པ་སྡུག་བསྔལ་བ། མ་འོངས་པའི་སྐྱེ་བ་དང་རྒ་བ་དང་ན་བ་དང་འཆི་བ་རྣམས་ཞི་བར་བྱས་པ་སྟེ་འདི་ལྟར་ན་དགེ་སྦྱོང་དུ་འགྱུར་རོ། །ཇི་ལྟར་ན་བྲམ་ཟེར་འགྱུར་ཞེ་ན། འདིས་སྡིག་པ་མི་དགེ་བའི་ཆོས་ཡང་སྲིད་པར་ཀུན་ནས་ཉོན་མོངས་པ་ཅན་ནད་དང་བཅས་ཤིང་རྣམ་པར་སྨིན་པ་སྡུག་བསྔལ་བ་མ་འོངས་པའི་སྐྱེ་བ་དང་རྒ་བ་དང་ན་བ་དང་འཆི་བ་རྣམས་ལ་ཕྱིར་ཕྱོགས་བར་བྱས་པ་སྟེ། འདི་ལྟར་ན་བྲམ་ཟེར་འགྱུར་རོ། །ཇི་ལྟར་ན་འཕགས་པར་འགྱུར་བ་ཡིན་ཞེ་ན། འདིས་སྡིག་པ་མི་དགེ་བའི་ཆོས་ཡང་སྲིད་པར་ཀུན་ནས་ཉོན་མོངས་བ་ཅན་ནད་དང་བཅས་ཤིང་རྣམ་པར་སྨིན་པ་སྡུག་བསྔལ་བ་མ་འོངས་པའི་སྐྱེ་བ་དང་རྒ་བ་དང་ན་བ་དང་འཆི་བ་རྣམས་ལས་རིང་དུ་གྱུར་པ་སྟེ། འདི་ལྟར་ན་འཕགས་པར་འགྱུར་རོ། །ཇི་ལྟར་ན་ཁྲུས་བྱེད་པར་འགྱུར་ཞེ་ན། འདིས་སྡིག་པ་མི་དགེ་བའི་ཆོས་ཡང་སྲིད་པར་ཀུན་ནས་ཉོན་མོངས་པ་ཅན་ནད་དང་བཅས་ཤིང་རྣམ་པར་སྨིན་པ་སྡུག་བསྔལ་བ། མ་འོངས་པའི་སྐྱེ་བ་དང་རྒ་བ་དང་ན་བ་དང་འཆི་བ་རྣམས་དག་པར་བྱས་པ་སྟེ། འདི་ལྟར་ན་ཁྲུས་བྱེད་པར་འགྱུར་རོ་ཞེས་གསུངས་སོ། །དེ་ལྟར་ན་འོ་ན་སངས་རྒྱས་ཀྱིས་གསུངས་ པ་ལ་ཁ་བསྐང་བྱ་དགོས 
་སོ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་དགེ་སྦྱོང་དང་དགེ་སྦྱོང་གི་འབྲས་བུ་དག་བསྟན་པར་བྱ་སྟེ། དེ་ལེགས་པར་ཉོན་ལ་ཡིད་ལ་ཟུང་ཤིག་དང་ངས་བཤད་པར་བྱའོ། །དགེ་སྦྱོང་གང་ཞེ་ན། འཕགས་པའི་ལམ་ཡན་ལག་བརྒྱད་དེ། འདི་ལྟ་སྟེ་ཡང་དག་པའི་ལྟ་བ་ནས། ཡང་དག་པའི་ཏིང་ངེ་འཛིན་
གྱི་བར་དུའོ། །དགེ་སྦྱོང་གི་འབྲས་བུ་གང་ཞེ་ན། དགེ་སྦྱོང་གི་འབྲས་བུ་བཞི་སྟེ། བཞི་གང་ཞེ་ན། རྒྱུན་དུ་ཞུགས་པའི་འབྲས་བུ་དགེ་སྦྱོང་གི་འབྲས་བུ་དང༌། ལན་ཅིག་ཕྱིར་འོང་བའི་འབྲས་བུ་དགེ་སྦྱོང་གི་འབྲས་བུ་དང༌། ཕྱིར་མི་འོང་བའི་འབྲས་བུ་དགེ་སྦྱོང་གི་འབྲས་བུ་དང༌། དགྲ་བཅོམ་པའི་འབྲས་བུ་དགེ་སྦྱོང་གི་འབྲས་བུའོ། །རྒྱུན་དུ་ཞུགས་པའི་འབྲས་བུ་དགེ་སྦྱོང་གི་འབྲས་བུ་གང་ཞེ་ན། ཀུན་དུ་སྦྱོར་བ་གསུམ་སྤངས་པ་གང་ཡིན་པ་དེ་ཡིན་ནོ། །ལན་ཅིག་ཕྱིར་འོང་བའི་འབྲས་བུ་དགེ་སྦྱོང་གི་འབྲས་བུ་གང་ཞེ་ན། ཀུན་དུ་སྦྱོར་བ་གསུམ་སྤངས་ཤིང་འདོད་ཆགས་དང་ཞེ་སྡང་དང་གཏི་མུག་སྲབ་མོར་གྱུར་པ་གང་ཡིན་པ་དེ་ཡིན་ནོ། །ཕྱིར་མི་འོང་བའི་འབྲས་བུ་དགེ་སྦྱོང་གི་འབྲས་བུ་གང་ཞེ་ན། ཐ་མའི་ཆ་དང་མཐུན་པའི་ཀུན་དུ་སྦྱོར་བ་ལྔ་སྤངས་པ་གང་ཡིན་བ་དེ་ཡིན་ནོ། །འབྲས་བུ་རྣམས་ཀྱི་མཆོག་དགྲ་བཅོམ་པ་ཉིད་དགེ་སྦྱོང་གི་འབྲས་བུ་གང་ཞེ་ན། འདོད་ཆགས་གཏན་སྤངས་པ་དང༌། ཞེ་སྡང་གཏན་སྤངས་པ་དང༌། གཏི་མུག་གཏན་སྤངས་པ་དང༌། ཉོན་མོངས་པ་ཐམས་ཅད་སྤངས་པ་གང་ཡིན་པ་དེ་ཡིན་ནོ། །དགེ་སློང་དག་དགེ་སྦྱོང་དང༌། དགེ་སྦྱོང་དག་གི་འབྲས་བུ་དག་བསྟན་པར་བྱའོ་ཞེས་ངས་ཇི་སྐད་དུ་བསྟན་པ་དེ་རྒྱས་པར་རབ་ཏུ་བཤད་དོ་ཞེས་གསུངས་སོ། །མདོ་ལས་བཅོམ་ལྡན་འདས་དེ་ནི་ཚངས་པ་ཞེས་ཀྱང་བྱ་ཞེས་བྱ་བ་ལ། བརྒྱ་བྱིན་གྱི་མདོའི་ཉེ་བར་བསྟན་པ་ལ་བཤད་པ་ལས་ཏེ། དེ་ནས་ལྷའི་དབང་པོ་བརྒྱ་བྱིན་གྱིས་སུམ་ཅུ་རྩ་གསུམ་པའི་ལྷ་རྣམས་ལ་བོས་ཏེ། གྲོགས་པོ་ངག་གང་ཡང་བདག་ཅག་ཆོས་བཟང་ལྷའི་འདུན་ས་ན་འདུས་ཤིང་ཚོགས་ཏེ་འདུག་པ་དེ་དག་ཚངས་པ་ལ་ལན་གསུམ་དུ་འདུད་པ་བྱས་ཏེ། བདག་ཅག་ཚངས་པ་ལ་ལན་གསུམ་དུ་འདུད་པ་བྱས་པ་དེ་སྡུན་དུ་བཅོམ་ལྡན་འདས་ལ་བྱས་པར་འགྱུར་ཏེ། དེ་ཅིའི་ཕྱིར་ཞེ་ན། བཅོམ་ལྡན་འདས་དེ་ནི་ཚངས་པ་ཞེས་ཀྱང་བྱ། ཞི་བ་དང་བསིལ་བར་གྱུར་པ་ཞེས་ཀྱང་བྱའོ་ཞེས་ཀྱང་གསུངས་སོ། །འཕགས་པ་ཀུན་ཤེས་ཀཽ་ཎྜི་ནྱ་ལ་དེ་སྐྱེས་པ་ན་ཞེས་བྱ་བ་ལ་བཅོམ་ལྡན་འདས་ཝཱ་རཱཎ་སཱི་ན་དྲང་སྲོང་སྨྲ་བ་རི་
དགས་ཀྱི་ནགས་ན་བཞུགས་ཏེ། དེ་ནས་བཅོམ་ལྡན་འདས་ཀྱིས་དགེ་སློང་ལྔ་པོ་རྣམས་ལ་བོས་ཏེ། དགེ་སློང་ངག་འདི་ནི་སྡུག་བསྔལ་འཕགས་པའི་བདེན་པའོ་ཞེས་དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་ཚུལ་བཞིན་དུ་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང། རིག་པ་དང༌། བློ་སྐྱེས་སོ། །འདི་ནི་སྡུག་བསྔལ་ཀུན་འབྱུང་བ། འདི་ནི་སྡུག་བསྔལ་འགོག་པ། འདི་ནི་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པའོ་ཞེས་ངས་སྔོན་མ་ཐོས་པའི་ཆོས་རྣམས་ལ་ཚུལ་བཞིན་དུ་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང། རིག་པ་དང༌། བློ་སྐྱེས་སོ། །དགེ་སློང་དག་གང་ཡང་སྡུག་བསྔལ་འཕགས་པའི་བདེན་པ་མངོན་པར་ཤེས་ནས་ཡོངས་སུ་ཤེས་པར་བྱའོ་ཞེས་ངས་སྔོན་མ་ཐོས་པའི་ཆོས་རྣམས་ལ་ཚུལ་བཞིན་དུ་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང༌། རིག་པ་དང༌། བློ་སྐྱེས་སོ། །དགེ་སློང་དག་ཀུན་འབྱུང་འཕགས་པའི་བདེན་པ་དེ་མངོན་པར་ཤེས་ནས་ཡོངས་སུ་སྤང་བར་བྱའོ་ཞེས་ངས་སྔོན་མ་ཐོས་པའི་ཆོས་རྣམས་ལ་ཚུལ་བཞིན་དུ་ཡིད་ལ་བྱེད་པ་ན་ཞེས་བྱ་བ་ནས། སྔ་མ་བཞིན་དུ་བློ་སྐྱེས་སོ་ཞེས་བྱ་བའི་བར་དུའོ། །དགེ་སློང་དག་སྡུག་བསྔལ་འགོག་པ་འཕགས་པའི་བདེན་པ་དེ་མངོན་པར་ཤེས་ནས་མངོན་སུམ་དུ་བྱའོ་ཞེས་བྱ་བ་ནས་སྔ་མ་བཞིན་དུ་བློ་སྐྱེས་སོ་ཞེས་བྱ་བའི་བར་དུའོ། །དགེ་སློང་དག་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་དེ་མངོན་པར་ཤེས་ནས་བསྒོམ་པར་བྱའོ་ཞེས་བྱ་བ་ནས། སྔ་མ་བཞིན་དུ་བློ་སྐྱེས་སོ་ཞེས་བྱ་བའི་བར་དུའོ། །དགེ་སློང་དག་སྡུག་བསྔལ་འཕགས་པའི་བདེན་པ་དེ་མངོན་པར་ཤེས་པར་བྱ་བ་ཤེས་སོ་ཞེས་ངས་སྔོན་མ་ཐོས་པའི་ཆོས་རྣམས་ལ་ཚུལ་བཞིན་དུ་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང༌། རིག་པ་དང༌། བློ་སྐྱེས་སོ། །དགེ་སློང་དག་སྡུག་བསྔལ་ཀུན་འབྱུང་བ་འཕགས་པའི་བདེན་པ་དེ་མངོན་པར་ཤེས་ནས་ཡོངས་སུ་སྤངས་སོ་ཞེས་ངས་སྔོན་མ་ཐོས་པའི་ཆོས་རྣམས་ལ་ཚུལ་བཞིན་དུ་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང༌། རིག་པ་དང༌། བློ་སྐྱེས་སོ། །དགེ་སློང་དག་སྡུག་བསྔལ་འགོག་པ་འཕགས་
པའི་བདེན་པ་དེ་མངོན་པར་ཤེས་ནས་མངོན་སུམ་དུ་བྱས་སོ་ཞེས་བྱ་བ་ནས། སྔ་མ་བཞིན་དུ་བློ་སྐྱེས་སོ་ཞེས་བྱ་བའི་བར་དུའོ། །དགེ་སློང་དག་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་དེ་མངོན་པར་ཤེས་ནས་བསྒོམ་པར་བྱའོ་ཞེས་ངས་སྔོན་མ་ཐོས་པའི་ཆོས་རྣམས་ལ་ཚུལ་བཞིན་དུ་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང༌། རིག་པ་དང༌། བློ་སྐྱེས་སོ། །དགེ་སློང་དག་ངལ་ཅི་སྲིད་དུ་འཕགས་པའི་བདེན་བ་བཞི་པོ་འདི་རྣམས་ལ་ལན་གསུམ་དུ་བཟླས་པ་དང་རྣམ་པ་བཅུ་གཉིས་སུ་མ་བསྐོར་བར་མིག་མ་སྐྱེས་ཤིང༌། ཤེས་པ་དང༌། རིག་པ་དང༌། བློ་མ་སྐྱེས་ལ། དེ་སྲིད་དུ་ལྟ་དང་བཅས་པའི་འཇིག་རྟེན་དང༌། བདུད་དང་བཅས་པ་དང༌། ཚངས་པ་དང་བཅས་པ་དང༌། དགེ་སྦྱོང་དང་བྲམ་ཟེར་བཅས་པའི་སྐྱེ་དགུའི་ལྷ་དང་མི་ལས་མ་གྲོལ་ཞིང་ལྡན་པ་དང༌། རབ་ཏུ་ལྡན་པ་དང༌། སེམས་ཕྱིན་ཅི་ལོག་དང་མ་བྲལ་བར་ལན་མང་དུ་གནས་པ་དེ་སྲིད་དུ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པའོ་ཞེས་ངས་མངོན་པར་མཁྱེན་ཏོ། །དགེ་སློང་དག་ང་ལ་འཕགས་པའི་བདེན་པ་བཞི་པོ་འདི་རྣམས་ལ་ལན་གསུམ་དུ་བཟླས་པ་དང༌། རྣམ་པ་བཅུ་གཉིས་སུ་བསྐོར་བ་ན་མིག་སྐྱེས་ཤིང་ཤེས་པ་དང་རིག་པ་དང་བློ་སྐྱེས་ཏེ་དེ་ནས་བདག་ལྷ་དང་བཅས་པའི་འཇིག་རྟེན་དང༌། བདུད་དང་བཅས་པ་དང༌། ཚངས་པ་དང་བཅས་པ་དང༌། དགེ་སྦྱོང་དང་བྲམ་ཟེར་བཅས་པའི་སྐྱེ་དགུའི་ལྷ་དང་མི་ལས་རྣམ་པར་གྲོལ་ཞིང་མི་ལྡན་པ་དང༌། རབ་ཏུ་མི་ལྡན་པ་དང༌། སེམས་ཕྱིན་ཅི་ལོག་དང་བྲལ་ཞིང་ལན་མང་དུ་གནས་སོ། །དེ་ནས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ་ཞེས་ངས་མངོན་པར་མཁྱེན་ཏོ། །ཆོས་ཀྱི་རྣམ་གྲངས་འདི་བཤད་པ་ན་ཀཽ་ཎྜིནྱ་དང་ལྷ་བརྒྱད་ཁྲི་བཞི་སྟོང་དག་ལ་ཆོས་རྣམས་ལ་ཆོས་ཀྱི་མིག་རྟུལ་མེད་ཅིང་དྲི་མ་དང་བྲལ་བ་རྣམ་པར་དག་པ་སྐྱེས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀཽ་ཎྜིནྱ་ལ་བོས་ཏོ། ཀཽ་ཎྜིནྱ་ཆོས་ཀུན་ཤེས་སམ། བཅོམ་ལྡན་འདས་འཚལ་ལགས་སོ། །ཀཽ་ཎྜི་ནྱ་ཆོས་ཀུན་ཤེས་སམ། བདེ་བར་གཤེགས་
པ་འཚལ་ལགས་སོ། །ཚེ་དང་ལྡན་པ་ཀཽ་ཎྜི་ནྱས་ཆོས་ཀུན་རྣམ་པར་ཤེས་ཏེ། དེའི་ཕྱིར་ཀུན་ཤེས་ཀཽ་ཎྜི་ནྱ་ཞེས་བཏགས་ཏེ། ཚེ་དང་ལྡན་པ་ཀཽ་ཎྜི་ནྱས་ཆོས་ཀུན་ཤེས་སོ་ཞེས་ས་བླ་བའི་གནོད་སྦྱིན་རྣམས་སྒྲ་བརྗོད་ཅིང་དབྱངས་སྒྲོགས་པར་བྱེད་དེ། གྲོགས་པོ་དག་ཝཱ་རཱ་ཎ་སཱི་དྲང་སྲོང་སྨྲ་བ་རི་དགས་ཀྱི་ནགས་སུ་བཅོམ་ལྡན་འདས་ཀྱིས་སྐྱེ་བོ་མང་པོ་ལ་ཕན་པ་དང༌། སྐྱེ་བོ་མང་པོ་ལ་བདེ་བ་དང༌། ལྷ་དང་མི་རྣམས་ལ་ཐུགས་བརྩེ་བས་ཕན་པ་དང་བདེ་བའི་ཕྱིར་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་དང་བཅས་པའི་འཇིག་རྟེན་གང་གིས་ཀྱང་ཆོས་དང་མཐུན་པར་མ་བསྐོར་བ་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་བསྐོར་བའི་ཆོས་ཀྱི་འཁོར་ལོ་ཆོས་དང་མཐུན་པར་བསྐོར་རོ་ཞེས་དབྱངས་སྒྲོགས་སོ། །ས་བླ་པའི་གནོད་སྦྱིན་རྣམས་ལས་བར་སྣང་ལ་གནས་པའི་གནོད་སྦྱིན་རྣམས་དང༌། རྒྱལ་ཆེན་རིས་བཞི་དང༌། སུམ་ཅུ་རྩ་གསུམ་དང༌། འཐབ་བྲལ་དང༌། དགའ་ལྡན་དང༌། འཕྲུལ་དགའ་དང༌། གཞན་འཕྲུལ་དབང་བྱེད་ཀྱི་ལྷ་རྣམས་ཀྱིས་ཐོས་ནས་སྐད་ཅིག་དང་ཐང་ཅིག་དང་ཡུད་ཙམ་གྱིས་ཚངས་པའི་འཇིག་རྟེན་གྱི་བར་དུ་སྒྲ་གྲགས་པར་གྱུར་ཏོ། །ཚངས་རིས་ཀྱི་ལྷ་རྣམས་སྒྲ་བརྗོད་ཅིང་དབྱངས་སྒྲོགས་པར་བྱེད་དེ། གྲོགས་པོ་དག་ཝཱ་རཱ་ཎ་སཱི་དྲང་སྲོང་སྨྲ་བ་རི་དགས་ཀྱི་ནགས་སུ་ཞེས་བྱ་བ་ནས། སྔ་མ་བཞིན་དུ་བསྐོར་ཏོ་ཞེས་བྱ་བའི་བར་དུའོ། །དྲང་སྲོང་སྨྲ་བ་རི་དགས་ཀྱི་ནགས་སུ་བཅོམ་ལྡན་འདས་ཀྱིས་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་ཆོས་དང་མཐུན་པར་ཆོས་ཀྱི་འཁོར་ལོ་བསྐོར་བ་དེའི་ཕྱིར་ཆོས་ཀྱི་རྣམ་གྲངས་འདི་ལ་ཆོས་ཀྱི་འཁོར་ལོ་བསྐོར་བ་ཞེས་བཏགས་སོ་ཞེས་གསུངས་སོ། །གཉིས་པ་གནས་བདུན་ལ་མཁས་པ་བཞིན་ནོ་ཞེས་བྱ་བ་ལ། གཉིས་བསྟན་པ་ནི་སྐྱེ་མཆེད་དྲུག་གི་ཚོགས་ཀྱི་མདོ་ལས་བྱུང་བ་མཛོད་ཀྱི་གནས་ལྔ་པར་གཉིས་ཕྱིར་ཞེས་བྱ་བར་བསྟན་ལ། མཛོད་ཀྱི་གནས་གསུམ་པར། །རེ་དྲུག་འདུས་ཏེ་བྱུང་བ་ཡིན། །ཞེས་བྱ་བར་ཡང་བྲིས་ཟིན་ཏོ། །གནས་བདུན་པ་ལ་མཁས་པ་ནི་མཛོད་ཀྱི་གནས་འདི་ཉིད་དུ་ཤིང་འདབ་མ་བདུན་པ་བཞིན་ནོ་ཞེས་བྱ་བར་བཤད་ཟིན་པས་ཡང་མི་འཆད་དོ། །ལུང་ཡང་བར་མདོར་ཡོངས་སུ་
མྱ་ངན་ལས་འདས་པས་ན་གོང་དུ་འཕོ་བའི་བར་གང་ཟག་ལྔ་པོ་འདི་དག་ནི་ཞེས་བྱ་བ་ལ། བཅུ་ཚན་བཅུ་པའི་ལས་རྒྱལ་གཉིས། །ཞེས་བྱ་བའི་སྡོམ་ལས་ཏེ། གླེང་གཞི་ནི་མཉན་དུ་ཡོད་པ་ནའོ། །གང་ཟག་ནི་བཅུ་སྟེ། བཅུ་གང་ཞེ་ན། རིགས་ནས་རིགས་སུ་སྐྱེ་བ་དང༌། མཆོག་ཏུ་ཐོགས་ན་ལན་བདུན་པ་དང༌། བར་ཆད་གཅིག་པ་ཅན་དང༌། ལན་ཅིག་ཕྱིར་འོང་བ་དང༌། བར་མ་དོར་ཡོངས་སུ་མྱ་ངན་ལས་འདའ་བ་དང༌། སྐྱེས་ནས་ཡོངས་སུ་མྱ་ངན་ལས་འདའ་བ་དང༌། མངོན་པར་འདུ་བྱ་བ་མེད་པར་ཡོངས་སུ་མྱ་ངན་ལས་འདའ་བ་དང༌། མངོན་པར་འདུ་བྱ་བ་དང་བཅས་པར་ཡོངས་སུ་མྱ་ངན་ལས་འདའ་བ་དང༌། གང་དུ་འཕོ་བ་དང༌། དགྲ་བཅོམ་པ་སྟེ། གང་ཟག་བཅུ་པོ་འདི་དག་ལས་གང་ཟག་ལྔ་ནི་འདིར་རྩོམ་ཞིང་འདིར་མཐར་འབྱིན་པར་འགྱུར་ལ། གང་ཟག་ལྔ་ནི་འདིར་རྩོམ་ཞིང་དེར་མཐར་འབྱིན་པར་འགྱུར་རོ། །གང་ཟག་ལྔ་པོ་འདི་རྣམས་ལས་འདིར་རྩོམ་ཞིང་འདིར་མཐར་འབྱིན་པ་གང་ཞེ་ན། རིགས་ནས་རིགས་སུ་སྐྱེ་བ་ནས། དགྲ་བཅོམ་པའི་བར་དུ་སྟེ། གང་ཟག་ལྔ་པོ་འདི་དག་ནི་འདིར་རྩོམ་ཞིང་འདིར་མཐར་འབྱིན་པར་འགྱུར་རོ། །གང་ཟག་ལྔ་པོ་འདི་རྣམས་ལས་འདིར་རྩོམ་ཞིང་དེར་མཐར་འབྱིན་པ་གང་ཞེ་ན། བར་མ་དོར་ཡོངས་སུ་མྱ་ངན་ལས་འདའ་བ་ནས་གོང་དུ་འཕོ་བའི་བར་དུ་སྟེ། གང་ཟག་ལྔ་པོ་འདི་དག་ནི་འདིར་རྩོམ་ཞིང་དེར་མཐར་འབྱིན་པར་འགྱུར་རོ་ཞེས་གསུངས་སོ། །དགྲ་བཅོམ་དྲུག་འདོད་ཅེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་དྲུག་པོ་འདི་དག་ནི་དགྲ་བཅོམ་པ་སྟེ། དྲུག་གང་ཞེ་ན། ཡོངས་སུ་ཉམས་པའི་ཆོས་ཅན་དང༌། འཆི་བར་སེམས་པའི་ཆོས་ཅན་དང༌། རྗེས་སུ་སྲུང་བའི་ཆོས་ཅན་དང༌། གནས་པ་ལས་མི་བསྐྱོད་བ་དང༌། རྟོགས་པའི་སྐལ་བ་ཅན་དང༌། མི་གཡོ་བའི་ཆོས་ཅན་ནོ་ཞེས་གསུངས་སོ། །དགེ་སློང་དག་འཕགས་པའི་ཤེས་རབ་ཀྱིས་སྤངས་པ་གང་ཡིན་པ་དེ་ནི་སྤངས་པ་ཡིན་ནོ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་ཇི་སྲིད་དུ་དགེ་བའི་ཆོས་རྣམས་ལ་དད་པ་ཡོད་པ་དེ་
སྲིད་དུ་སྡིག་པ་མི་དགེ་བའི་ཆོས་རྣམས་ཀུན་དུ་མི་འབྱུང་ངོ་ཞེས་ང་སྨྲའོ། །དད་པ་ནུབ་པར་གྱུར་ཅིང་མ་དད་པས་སེམས་གཏུགས་པ་ནི་སྡིག་པ་མི་དགེ་བའི་ཆོས་རྣམས་སྐྱེ་བར་འགྱུར་རོ་ཞེས་ང་སྨྲའོ། །ཇི་སྲིད་དུ་བརྩོན་འགྲུས་དང༌། ངོ་ཚ་ཤེས་པ་དང༌། ཁྲེལ་ཡོད་པ་དང༌། ཤེས་རབ་ཡོད་པ་དེ་སྲིད་དུ་སྡིག་པ་མི་དགེ་བའི་ཆོས་རྣམས་ཀུན་དུ་མི་འབྱུང་ངོ་ཞེས་ང་སྨྲའོ། །ཤེས་རབ་ནུབ་པར་གྱུར་ཅིང་འཆལ་བའི་ཤེས་རབ་ཀྱིས་སེམས་གཏུགས་པ་ན་སྡིག་པ་མི་དགེ་བའི་ཆོས་རྣམས་སྐྱེ་བར་འགྱུར་རོ་ཞེས་ང་སྨྲའོ། །དགེ་སློང་དག་དང་པ་ལ་བརྟེན་ནས་མི་དགེ་བའི་ཆོས་རྣམས་སྤོང་བར་འགྱུར་ཞིང་དགེ་བའི་ཆོས་རྣམས་བསྒོམ་པར་འགྱུར་ཏེ། སྤངས་པ་ན་དེ་ཉིད་འདིའི་དགེ་བའོ་ཞེས་བརྗོད་པར་བྱའོ། །བརྩོན་འགྲུས་དང་ངོ་ཚ་ཤེས་པ་དང་ཁྲེལ་ཡོད་པ་ལ་བརྟེན་ནས་མི་དགེ་བའི་ཆོས་རྣམས་སྤོང་བར་འགྱུར་ཞིང་དགེ་བའི་ཆོས་རྣམས་བསྒོམ་པར་འགྱུར་ཏེ། སྤོངས་པ་དེ་ཉིད་འདིའི་དགེ་བ་ཞེས་བརྗོད་པར་བྱའོ། །དེ་ཅིའི་ཕྱིར་ཞེ་ན། དགེ་སློང་དག་གང་འཕགས་པའི་ཤེས་རབ་ཀྱིས་སྤངས་པ་གང་ཡིན་བ་དེ་ནི་སྤངས་པ་ཡིན་ནོ་ཞེས་གསུངས་སོ། །སློབ་པ་ལ་བག་ཡོད་པ་ལ་བག་ཡོད་པར་བྱའོ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་དགེ་སློང་ཐམས་ཅད་ནི་བག་ཡོད་པ་ལ་བག་ཡོད་པར་བྱའོ་ཞེས་ང་མི་སྨྲ་ཞིང༌། དགེ་སློང་ཐམས་ཅད་ལ་བག་ཡོད་པ་ལ་བག་ཡོད་པར་བྱའོ་ཞེས་ང་མི་སྨྲའོ། །དགེ་སློང་དག་ཇི་ལྟ་བུའི་དགེ་སློང་ལ་བག་ཡོང་པ་ལ་བག་ཡོད་པར་བྱའོ་ཞེས་སྨྲ་ཞེ་ན། གང་དགེ་སློང་དགྲ་བཅོམ་པ། ཟག་པ་ཟད་པ། བྱ་བ་བྱས་པ། བྱེད་པ་བྱས་པ། ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པ་ཀུན་དུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ་འདི་ལྟ་བུའི་རང་བཞིན་གྱི་དགེ་སློང་ལ་བག་ཡོད་པ་ལ་བག་ཡོད་པར་བྱའོ་ཞེས་ང་མི་སྨྲའོ། །དེ་ཅིའི་ཕྱིར་ཞེ་ན། ཚེ་དང་ལྡན་པ་དེ་དག་གིས་ནི་བག་ཡོད་པ་ལ་བག་ཡོད་པར་བྱས་ཟིན་ཏོ། །ཚེ་དང་ལྡན་པ་དེ་དག་ནི་ཡང་བག་མེད་པའི་སྐལ་བ་ཅན་དུ་མི་འགྱུར་རོ། །ཚེ་དང་ལྡན་པ་དེ་དག་གིས་བག་ཡོད་པ་ལ་བག་ཡོད་པའི་འབྲས་བུ་
འདི་ཡང་དག་པར་རྗེས་སུ་གཟིགས་ནས་བག་ཡོད་པ་ལ་བག་ཡོད་པར་བྱའོ་ཞེས་ང་མི་སྨྲའོ། །དགེ་སློང་ཇི་ལྟ་བུའི་རང་བཞིན་གྱི་དགེ་སློང་བག་ཡོད་པ་ལ་བག་ཡོད་པར་བྱའོ་ཞེས་ང་སྨྲ་ཞེ་ན། དགེ་སློང་དག་དགེ་སློང་སློབ་པ་ཡང་དག་པར་ཐོབ་ཅིང༌། ཕྱིས་མྱ་ངན་ལས་འདས་པ་གྲུབ་པ་དང་བདེ་བ་བླ་ན་མེད་པ་དོན་དུ་གཉེར་ཞིང་ལན་མང་དུ་གནས་པ་སྟེ། དགེ་སློང་དག་འདི་ལྟ་བུའི་རང་བཞིན་གྱི་དགེ་སློང་ལ་བག་ཡོད་པ་ལ་བག་ཡོད་པར་བྱའོ་ཞེས་ང་སྨྲ་སྟེ། །ད་ཅིའི་ཕྱིར་ཞེ་ན། ཚེ་དང་ལྡན་པ་འདི་དབང་པོ་རྣོ་ཞིང་རྗེས་སུ་མཐུན་པའི་མལ་ཆ་དང་སྟན་ལ་བརྟེན་པ་དང༌། དགེ་བའི་བཤེས་གཉེན་ཉེ་བར་བསྟེན་ཅིང་བསྙེན་བཀུར་བ་དང༌། རིམ་གྲོར་བྱེད་པས་རིང་པོ་མི་ཐོགས་པར་ཟག་པ་ཟད་ཅིང་སེམས་རྣམ་པར་གྲོལ་བ་དང༌། ཤེས་རབ་རྣམ་པར་གྲོལ་བས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་མཐོང་བའི་ཆོས་ཉིད་ལ་རང་ཉིད་ཀྱིས་མངོན་པར་ཤེས་པ་ཕུན་སུམ་ཚོགས་པ་མངོན་སུམ་དུ་བྱས་ནས་གནས་སོ། །དེ་ཅིའི་ཕྱིར་ཞེ་ན། དགེ་སློང་དག་མིག་གི་རྣམ་པར་ཤེས་པར་བྱ་བའི་གཟུགས་འདོད་པ་སྡུག་པ་དགའ་བ་ཡིད་དུ་འོང་བ་འདོད་པ་སྡུད་པར་བྱེད་པ། དགའ་བར་བྱེད་པ་དེ་དག་མཐོང་ནས་མངོན་པར་མི་དགའ་ཞིང་མངོན་པར་མི་བརྗོད་ལ་མི་ཞེན་ཅིང་ལྷག་པར་མི་ཞེན་ཅིང་གནས་ཏེ། དེ་དེ་ལ་མི་དགའ་མངོན་པར་མི་དགའ་ཞིང་མངོན་པར་མི་བརྗོད་ལ་མི་ཞེན་ཅིང་ལྷག་པར་མི་ཞེན་ཅིང་གནས་པ་ན་མ་ཞུམ་པའི་བརྩོན་འགྲུས་རྩོམ་པར་འགྱུར་ཞིང་ལུས་ལས་སུ་རུང་ཞིང་ཤིན་ཏུ་སྦྱངས་པ་དང༌། མ་རྨོངས་པའི་དྲན་པ་ཉེ་བར་གནས་པར་འགྱུར་ཞིང་སེམས་མཉམ་པར་གཞག་པ་རྩེ་གཅིག་པར་འགྱུར་ལ། དག་པ་དང་ལྷན་ཅིག་པར་གྱུར་པའི་ཚད་མེད་པ་ལེགས་པར་བསྒོམ་པ་རྒྱས་པར་འགྱུར་ཏེ། འདི་ལྟར་ན་འདིས་ཏིང་ངེ་འཛིན་དང་པོ་མིག་གི་རྣམ་པར་ཤེས་པར་བྱ་བའི་གཟུགས་རྣམས་ལ་སྤངས་པ་ཐོབ་པར་འགྱུར་རོ། །དགེ་སློང་དག་རྣ་བ་དང་སྣ་དང་ལྕེ་དང་ལུས་དང་ཡིད་ཀྱི་རྣམ་པར་ཤེས་པར་བྱ་བའི་ཆོས་འདོད་པ་སྡུག་པ་དགའ་བ་ཡིད་དུ་འོང་བ་འདོད་པ་སྡུད་པར་བྱེད་པ་དགའ་བར་བྱེད་པ་དེ་དག་
རྣམ་པར་ཤེས་ནས་མངོན་པར་མི་དགའ་ཞིང་མངོན་པར་མི་བརྗོད་ལ་མི་ཞེན་ཅིང་ལྷག་པར་མི་ཞེན་ཅིང་གནས་ཏེ། དེ་དེ་ལ་མངོན་པར་མི་དགའ་ཞིང་མངོན་པར་མི་བརྗོད་ལ་མི་ཞེན་ཅིང་ལྷག་པར་མི་ཞེན་པར་གནས་པ་ན་མ་ཞུམ་པའི་བརྩོན་འགྲུས་རྩོམ་པར་འགྱུར་ཞིང་ལུས་ལས་སུ་རུང་ཞིང་ཤིན་ཏུ་སྦྱངས་པ་དང། མ་རྨོངས་པའི་དྲན་པ་ཉེ་བར་གནས་པར་འགྱུར་ཞང་སེམས་མཉམ་པར་གཞག་པ་རྩེ་གཅིག་པར་འགྱུར་ལ། དགའ་བ་དང་ལྷན་ཅིག་པར་གྱུར་པའི་ཚད་མེད་པ་ལེགས་པར་བསྒོམ་པ་རྒྱས་པར་འགྱུར་ཏེ། དེ་ལྟར་འདིས་ཏིང་ངེ་འཛིན་དྲུག་པ་ཡིད་ཀྱི་རྣམ་པར་ཤེས་པར་བྱ་བའི་ཆོས་རྣམས་ལ་སྤངས་པ་ཐོབ་པར་འགྱུར་རོ་ཞེས་གསུངས་སོ། །ཀུན་དགའ་བོ་དགྲ་བཅོམ་པ་ལ་ཡང་རྙེད་པ་དང་བཀུར་སྟིས་བར་ཆད་བྱེད་པ་ཡིན་པར་ང་སྨྲའོ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བོས་ཏེ། ཀུན་དགའ་བོ་དགྲ་བཅོམ་པ་ལ་ཡང་རྙེད་པ་དང་བཀུར་སྟིས་བར་ཆད་བྱེད་པ་ཡིན་པར་ང་སྨྲའོ། །བཅོམ་ལྡན་འདས་ཅིའི་སླད་དུ་འདི་སྐད་གསུངས། ཀུན་དགའ་བོ་དགྲ་བཅོམ་པ་ལ་ཡང་རྙེད་པ་དང་བཀུར་སྟིས་བར་ཆད་བྱེད་པ་ཡིན་པར་ང་སྨྲའོ། །མ་ཐོབ་པ་ཐོབ་པ་དང། མ་རྟོགས་པ་རྟོགས་པ་དང༌། མངོན་སུམ་དུ་མ་བྱས་པ་མངོན་སུམ་དུ་བྱ་བ་ལ་ནི་མ་ཡིན་ཏེ། འོན་ཀྱང་འདི་ནི་མཐོང་བའི་ཆོས་ལ་བདེ་བར་གནས་པ་ལྷག་པའི་སེམས་ལས་བྱུང་བ་བཞི་པོ་གང་ཡང་རུང་བ་ཞིག་རྟོགས་པ་ལས་ཡོངས་སུ་ཉམས་པར་ང་སྨྲའོ། །གང་ཡང་འདིས་གཅིག་པུ་དབེན་པར་བདག་ཉིད་ལ་ཕན་པའི་བག་ཡོད་པ་དང༌། བརྩོན་འགྲུས་ཀྱི་གནས་ཏེ། སེམས་རྣམ་པར་གྲོལ་བ་མི་གཡོ་བ་ལུས་ཀྱིས་མངོན་སུམ་དུ་བྱས་པ་གང་ཡིན་པ་དེ་ལས་ནི་རྣམ་གྲངས་གང་གིས་ཀྱང་ཡོངས་སུ་ཉམས་པར་འགྱུར་བ་ང་མི་སྨྲའོ། །ཀུན་དགའ་བོ་དེ་ལྟ་བས་ན་འདི་ལྟར་བསླབ་པར་བྱ་སྟེ། གང་རྙེད་པ་དང་བཀུར་སྟི་འབྱུང་བར་འགྱུར་བ་དང༌། རྙེད་པ་དང་བཀུར་སྟི་བྱུང་བ་དག་ལ་སེམས་ཡོངས་སུ་གཏུགས་ཏེ་མི་གནས་པ་དེ་ལྟར་བསླབ་པར་བྱའོ་ཞེས་གསུངས་སོ། །དེ་ནས་ཚེ་དང་ལྡན་པ་གནག་ཚོགས་ཅན་ཞེས་བྱ་བ་ལ་སོགས་པ་ལ། བཅོམ་
ལྡན་འདས་རྒྱལ་པོའི་ཁབ་ཀྱི་རི་བོ་ཆ་ཅན་གྱི་ངོས་ཤིང་འདབ་མ་བདུན་པ་ཅན་གྱི་ཕུག་ན་བཞུགས་སོ། །དེའི་ཚེ་ཚེ་དང་ལྡན་པ་གནག་ཚོགས་ཅན་རྒྱལ་པོའི་ཁབ་ཀྱི་དྲང་སྲོང་གི་རིའི་ངོས་རྡོ་ནག་པོ་ཅན་གྱི་རི་ལ་བརྟེན་ཅིང་གནས་སོ། །དེ་ནས་ཚེ་དང་ལྡན་པ་གནག་ཚོགས་ཅན་གཅིག་པུ་དབེན་པས་བདག་ལ་ཕན་པའི་བག་ཡོད་པ་དང༌། བརྩོན་འགྲུས་ཀྱིས་གནས་པ་ན་དུས་ཀྱིས་སེམས་རྣམ་པར་གྲོལ་བ་ཡིད་དུ་འོང་བ་ལུས་ཀྱིས་མངོན་སུམ་དུ་བྱས་སོ། །དེ་དེ་ལས་ཡོངས་སུ་ཉམས་ཏེ། ལན་གཉིས་ལན་གསུམ་དང་བཞི་དང་ལྔ་དང་ལན་དྲུག་ཏུ་དུས་ཀྱིས་སེམས་རྣམ་པར་གྲོལ་བ་ལུས་ཀྱིས་མངོན་སུམ་དུ་བྱས་སོ། །དེ་དེ་ལས་ཡོངས་སུ་ཉམས་སོ། །དེ་ནས་ཚེ་དང་ལྡན་པ་གནག་ཚོགས་ཅན་འདི་སྙམ་དུ་བདག་གཅིག་པུ་དབེན་པས་བདག་ཉིད་ལ་ཕན་པའི་བག་ཡོད་པ་དང་བརྩོན་འགྲུས་ཀྱིས་གནས་པ་ན་དུས་ཀྱིས་སེམས་རྣམ་པར་གྲོལ་བ་ཡིད་དུ་འོང་བ་ལུས་ཀྱིས་མངོན་སུམ་དུ་བྱས་སོ། །བདག་དེ་ལས་ཡོངས་སུ་ཉམས་ཏེ། ལན་གཉིས་དང་གསུམ་དང་བཞི་དང་ལྔ་དང་དྲུག་ཏུ་དུས་ཀྱིས་སེམས་རྣམ་པར་གྲོལ་བ་ཡིད་དུ་འོང་བ་ལུས་ཀྱིས་མངོན་སུམ་དུ་བྱས་སོ། །དེ་ལས་ཀྱང་བདག་ཡོངས་སུ་ཉམས་ཏེ། གང་བདག་གིས་ལན་བདུན་པ་ལ་དུས་ཀྱིས་སེམས་རྣམ་པར་གྲོལ་བ་ཡིད་དུ་འོང་བ་ལུས་ཀྱིས་མངོན་སུམ་དུ་བྱས་པ་ལས་ཡོངས་སུ་ཉམས་པར་མ་གྱུར་ཅིག་ཅེས་མཚོན་ཆ་དག་འཆང་བར་བྱེད་དོ། །དེ་ནས་བདུད་སྡིག་ཅན་འདི་སྙམ་དུ་དགེ་སྦྱོང་གཽ་ཏ་མ་ནི་རྒྱལ་པོའི་ཁབ་ཀྱི་རི་བོ་ཆ་ཅན་གྱི་ངོས་ཤིང་འདབ་མ་བདུན་པ་ཅན་གྱི་ཕུགས་ན་གནས་ལ། དེའི་ཉན་ཐོས་དགེ་སློང་གནག་ཚོགས་ཅན་རྒྱལ་པོའི་ཁབ་ཀྱི་དྲང་སྲོང་གི་རིའི་ངོས་རྡོ་ནག་པོ་ཅན་གྱི་རི་ལ་བརྟེན་ཅིང་གནས་སོ། །དེ་གཅིག་པུ་དབེན་པས་བདག་ཉིད་ལ་ཕན་པའི་བག་ཡོད་པ་དང་བརྩོན་འགྲུས་ཀྱིས་གནས་པ་ན་དུས་ཀྱིས་སེམས་རྣམ་པར་གྲོལ་བ་ཡིད་དུ་འོང་བ་ལུས་ཀྱིས་མངོན་སུམ་དུ་བྱས་སོ། །དེ་ལས་ཡོངས་སུ་ཉམས་ཏེ། ལན་གཉིས་ལན་གསུམ་དང་བཞི་དང་ལྔ་དང་དྲུག་ཏུ་དུས་ཀྱིས་སེམས་རྣམ་པར་གྲོལ་བ་ཡིད་དུ་འོང་བ་ལུས་ཀྱིས་མངོན་སུམ་དུ་བྱས་སོ། །དེ་དེ་ལས་ཀྱང་ཡོངས་སུ་ཉམས་པ་དང༌། དེ་
འདི་སྙམ་དུ་བདག་གཅིག་བུ་དབེན་པས་བདག་ཉིད་ལ་ཕན་པའི་བག་ཡོད་པ་དང་བརྩོན་འགྲུས་ཀྱིས་གནས་བ་ན་དུས་ཀྱིས་སེམས་རྣམ་པར་གྲོལ་བ་ཡིད་དུ་འོང་བ་ལུས་ཀྱིས་མངོན་སུམ་དུ་བྱས་སོ། །བདག་དེ་ལས་ཡོངས་སུ་ཉམས་ཏེ། ལན་གཉིས་དང་ལན་གསུམ་དང་བཞི་དང་ལྔ་དང་དྲུག་ཏུ་དུས་ཀྱིས་སེམས་རྣམ་པར་གྲོལ་བ་ཡིད་དུ་འོང་བ་ལུས་ཀྱིས་མངོན་སུམ་དུ་བྱས་ཏེ། དེ་ལས་ཀྱང་བདག་ཡོངས་སུ་ཉམས་ཏེ་གང་བདག་གིས་ལན་བདུན་པ་ལ་དུས་ཀྱིས་སེམས་རྣམ་པར་གྲོལ་བ་ཡིད་དུ་འོང་བ་ལུས་ཀྱིས་མངོན་སུམ་དུ་བྱས་པ་ལས་ཡོངས་སུ་ཉམས་པར་མ་གྱུར་ཅིག་ཅེས་མཚོན་ཆ་དག་འཆང་བར་བྱེད་དོ། །དགེ་སློང་གནག་ཚོགས་ཅན་དེ་མཚོན་ཆ་འཆང་ཞིང་དུས་ཀྱིས་སེམས་རྣམ་པར་གྲོལ་བ་ཡིད་དུ་འོང་བ་ལུས་ཀྱིས་མངོན་སུམ་དུ་བྱས་ཏེ་ངའི་ཡུལ་ལས་འདའ་བར་འགྱུར་བ་འདི་ནི་གནས་ཡིན་ཞིང་གོ་སྐབས་ཡོད་དོ། །གང་ཡང་བདག་སོང་སྟེ་སྟོན་བ་ལ་སྨྲ་བར་བྱའོ་སྙམ་ནས། དེ་ནས་བདུད་སྡིག་ཅན་བཻ་ཌཱུཪྻའི་དབྱུག་པ་ཅན་གྱི་རྒྱུད་མངས་ཞིག་མཆན་ཁུང་དུ་ཐོགས་ནས་བཅོམ་ལྡན་འདས་གང་ན་བ་དེར་ཉེ་བར་སོང་སྟེ། ཉེ་བར་སོང་ནས་བཅོམ་ལྡན་འདས་ཀྱི་མདུན་དུ་འདུག་སྟེ། བཻ་ཌཱུཪྻའི་དབྱུག་པ་ཅན་གྱི་རྒྱུད་མངས་བརྡུངས་ཤིང་ཚིགས་སུ་བཅད་པ་སྨྲས་པ། དབའ་ཆེན་ཤེས་རབ་ཆེན་པོ་པ། །མཐུ་ཆེན་དབང་དང་གཟི་བརྗིད་འབར། །ཁོན་དང་འཇིགས་པ་ཀུན་ལས་འདས། །སྤྱན་ལྡན་ཁྱོད་ལ་བདག་ཕྱག་འཚལ། །དཔའ་ཆེན་འཆི་བ་ཟིལ་གནོན་པ། །ཉན་ཐོས་འཆི་བར་འདོད་པ་དག །ཐུབ་པ་ཆེན་པོས་མཁྱེན་ནས་ནི།། དེ་དག་བཟློག་པར་མཛད་དུ་གསོལ། །བཅོམ་ལྡན་ནམ་ཞིག་ཉན་ཐོས་དག །བསྟན་ལ་རབ་ཏུ་དགའ་བར་འགྱུར། །སློབ་པ་ཐོབ་པར་གྱུར་པ་ན། །མི་མཆོག་དུས་ནི་བྱེད་པར་འགྱུར། །བདུད་ཀྱིས་དེ་ལྟར་སྨྲས་པ་དང༌། །སྟོན་པས་མ་གྲོལ་བདུད་ལས་གསུངས། །བག་མེད་ལྡན་པའི་སྡིག་ཅན་ཁྱོད། །རང་གི་དོན་ཕྱིར་འོངས་པ་སྟེ། །བརྟན་ཞིང་བརྟན་པ་ཕུན་ཚོགས་ཤིང༌། །བསམ་གཏན་སྒོམ་པར་བྱེད་པ་ལ། །ཉིན་མཚན་རྟག་ཏུ་རྗེས་སྦྱོར་བ། །འཚོ་བ་དག་ལ་ལྟོས་པ་མེད། །སྲིད་པ་འཇིགས་བཅས་ཤེས་ནས་ནི། །སྲིད་པ་ཟད་པར་འགྲོ་བར་འགྱུར།།
མ་གྲོལ་བ་ལས་རྒྱལ་ནས་ནི། །མྱ་ངན་འདས་པ་འགྲོ་བར་འགྱུར། །དེ་ཡི་མྱ་ངན་རབ་གདུང་བས། །འཕྱེན་ན་ཕྱི་མར་ལྟུང་བར་འགྱུར། །དེ་ནས་དེ་ཡིད་མི་བདེ་བས། །དེ་ཉིད་དུ་ནི་མི་སྣང་གྱུར། །དེ་ནས་ཚེ་དང་ལྡན་པ་གནག་ཚོགས་ཅན་དྲང་སྲོང་གི་རིའི་ངོས་རྡོ་ནག་བོ་ཅན་གྱི་རི་ལ་མཚོན་ཆ་འཆང་ཞིང་དུས་ཀྱིས་སེམས་རྣམ་པར་གྲོལ་བ་ལུས་ཀྱིས་མངོན་སུམ་དུ་བྱས་ཏེ། འཆི་བའི་དུས་ན་དབང་པོ་རྣམས་ཡོངས་སུ་དང་ཞིང༌། བཞིན་གྱི་མདོག་ཡོངས་སུ་དག་ནས། པགས་པའི་མདོག་ཀུན་དུ་དཀར་པོར་གྱུར་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་པོས་ཏེ། དགེ་སློང་དག་བདག་ཅག་གང་ན་རིགས་ཀྱི་བུ་གནག་ཚོགས་ཅན་མཚོན་གྱིས་བཏབ་པ་དྲང་སྲོང་གི་རིའི་ངོས་རྡོ་ནག་པོ་ཅན་གྱི་རི་གང་ན་བ་དེར་འགྲོ་བར་བྱའོ། །དགེ་སློང་དེ་དག་བཅོམ་ལྡན་འདས་ཀྱིས་གསུངས་པ་ཐོས་ནས། བཙུན་པ་དེ་བཞིན་ནོ་ཞེས་དེ་ནས་བཅོམ་ལྡན་འདས་དགེ་སློང་རབ་ཏུ་མང་པོ་དེ་དག་དང་ཐབས་ཅིག་ཏུ་དྲང་སྲོང་གི་རི་བོའི་ངོས་རྡོ་ནག་པོ་ཅན་གྱི་རི་གང་ན་བ་དེར་ཉེ་བར་གཤེགས་སོ། །དེའི་ཚེ་ཚེ་དང་ལྡན་པ་གནག་ཚོགས་ཅན་ལུས་ཕུང་པོས་རྣམ་པར་དབེན་པ་ས་ལ་ལྷུང་སྟེ་འདུག་གོ །བཅོམ་ལྡན་འདས་ཀྱིས་ཚེ་དང་ལྡན་པ་གནག་ཚོགས་ཅན་ལུས་ཕུང་པོས་རྣམ་པར་དབེན་བ་ས་ལ་ལྷུང་སྟེ་འདུག་པ་གཟིགས་ནས་དགེ་སློང་རྣམས་ལ་བོས་ཏེ། དགེ་སློང་དག་ཁྱེད་ཅག་གིས་རིགས་ཀྱི་བུ་གནག་ཚོགས་ཅན་ཕུང་པོས་རྣམ་པར་དབེན་པའི་ལུས་ས་ལ་བསྐྱུར་ཏེ་འདུག་པ་དག་མཐོང་ངམ། བཙུན་པ་དེ་བཞིན་ནོ། །དགེ་སློང་དག་ཁྱེད་ཅག་གིས་རིགས་ཀྱི་བུ་གནག་ཚོགས་ཅན་གྱི་ལུས་ལ་དུ་བ་འཐུལ་ཞིང་རབ་རིབ་དང་མུན་པ་ལྟ་བུར་ཤར་ཕྱོགས་དང༌། ལྷོ་དང༌། ནུབ་དང༌། བྱང་ཕྱོགས་སུ་ཁྱབ་ཅིང་འཕྲོས་པ་དག་མཐོང་ངམ། བཙུན་པ་དེ་བཞིན་ནོ། །དགེ་སློང་དག་འདི་ནི་བདུད་སྡིག་ཅན་ཏེ། རིགས་ཀྱི་བུ་གནག་ཚོགས་ཅན་གྱི་ལུས་ལ་རྣམ་པར་ཤེས་པ་ཡང་དག་པར་འཚལ་བའོ། །དགེ་སློང་དག་རིགས་ཀྱི་བུ་གནག་ཚོགས་ཅན་མཚོན་ཆས་བཏབ་སྟེ་འཆི་བའི་ཚེ་དབང་པོ་རྣམས་ཡོངས་སུ་དང་ཞིང་བཞིན་གྱི་མདོག་ཡོངས་སུ་དག་པ་ལས་པགས་པའི་མདོག་ཀུན་དུ་དཀར་པོར་གྱུར་ཏེ། རྣམ་པར་ཤེས་པ་གནས་མེད་
པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་གནག་ཚོགས་ཅན་ལུང་བསྟན་པ་དང༌། དེ་ནས་དེའི་ཚེ་བདུད་སྡིག་ཅན་གྱིས་ཚིགས་སུ་བཅད་པ་འདི་སྐད་ཅེས་སྨྲས་སོ། །སྟེང་དང་འོག་དང་ལོགས་དང་ནི། །ཕྱོགས་དང་ཕྱོགས་འཚམས་རྣམས་སུ་ཡང༌། །གནག་ཚོགས་གང་དུ་སོང་བ་ངག །བདག་གིས་བཙལ་ཀྱང་མ་རྙེད་དོ། །བཅོམ་ལྡན་འདས་ཀྱིས་བཀའ་སྩལ་པ། གང་ཕྱིར་བརྟན་རྣམས་ཅུང་ཟད་ཙམ། །འདོད་པ་ཉིད་དུ་མི་བྱེད་པ། །སྲེད་བ་རྩད་ནས་བཏོན་ནས་ནི། །ཡོངས་སུ་མྱ་ངན་འདས་པར་འགྱུར། །དེ་ནས་སྡིག་ཅན་ཡིད་མི་བདེ་ཞིང་སྡུག་བསྔལ་གྱིས་ཡིད་ལ་གཅགས་བཞིན་དུ་དེ་ཉིད་དུ་མི་སྣང་བར་གྱུར་ཏོ་ཞེས་གསུངས་སོ། །བཅུ་ལས་འཕྲོས་པ་ལས་ཀྱང་ཞེས་བྱ་བ་ལ། མདོ་དྲུག་གི་ཆོགས་ཀྱི་བཅུ་ལས་འཕྲོས་པའི་མདོ་དང་པོ་ལས་འདི་སྐད་དུ། ཚེ་དང་ལྡན་པ་དག་མང་དུ་བྱེད་པའི་ཆོས་ནི་གཅིག་སྟེ། འདི་ལྟར་དགེ་བའི་ཆོས་རྣམས་ལ་བག་ཡོད་པའོ། །བསྒོམ་པར་བྱ་བའི་ཆོས་ནི་གཅིག་སྟེ། ལུས་སུ་གཏོགས་པཱ་དྲན་པའོ། །ཡོངས་སུ་ཤེས་པར་བྱ་བའི་ཆོས་ནི་གཅིག་སྟེ། ཟག་པ་དང་བཅས་པའི་རིག་པའོ། །སྤང་པར་བྱ་བའི་ཆོས་ནི་གཅིག་སྟེ། བདག་ཏུ་ང་རྒྱལ་བའོ། །ཉམས་པའི་ཆ་དང་མཐུན་པའི་ཆོས་ནི་གཅིག་སྟེ། ཚུལ་བཞིན་མ་ཡིན་པ་ཡིད་ལ་བྱེད་པའོ། །ཁྱད་པར་དུ་འགྲོ་བའི་ཆ་དང་མཐུན་པའི་ཆོས་ནི་གཅིག་སྟེ། ཚུལ་བཞིན་ཡིད་ལ་བྱེད་པའོ། །རྟོགས་བར་དགའ་བའི་ཆོས་ནི་གཅིག་སྟེ། བར་ཆད་མེད་པའི་ཏིང་ངེ་འཛིན་ཏོ། །བསྐྱེད་པར་བྱ་བའི་ཆོས་ནི་གཅིག་སྟེ། སེམས་རྣམ་པར་གྲོལ་བ་དུས་དང་སྦྱོར་བ་ཡིད་དུ་འོང་བའོ། །མངོན་པར་ཤེས་པར་བྱ་བའི་ཆོས་ནི་གཅིག་སྟེ། སེམས་ཅན་ཐམས་ཅད་ནི་ཟས་ཀྱིས་གནས་པ་ཞེས་བྱའོ། །མངོན་སུམ་དུ་བྱ་བའི་ཆོས་ནི་གཅིག་སྟེ། སེམས་རྣམ་པར་གྲོལ་བ་མི་གཡོ་བ་ཡིན་ནོ། །ཚེ་དང་ལྡན་པ་དག་ཆོས་བཅུ་པོ་འདི་དག་ནི་དེ་བཞིན་ནོ། །མི་འགྱུར་བའི་དེ་བཞིན་ཉིད་གཞན་མ་ཡིན་པའི་དེ་བཞིན་ཉིད། དབེན་པ་དེ་ཁོ་ན་ཉིད་ཇི་ལྟ་བ་བཞིན་ཕྱིན་ཅི་མ་ལོག་པའོ་ཞེས། འདི་ལྟར་ཡང་དག་པ་ཇི་ལྟ་བ་བཞིན་ཡང་དག་པའི་ཤེས་རབ་ཀྱིས་བ་ལྟ་བར་བྱའོ་ཞེས་གསུངས་སོ། །འོ་
ན་ནི་གང་ལས་འདི་སྐད་དུ་འཕགས་པ་ཉན་ཐོས་ཐོས་པ་དང་ལྡན་པ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་འཕགས་པ་ཉན་ཐོས་ཐོས་པ་དང་ལྡན་པ་དང་ཐམས་ཅད་སྡུག་བསྔལ་བའི་ཆོས་ཅན་དང༌། ཀུན་འབྱུང་བ་དང༌། མི་སྣང་བ་དང༌། རོ་མྱང་བ་དང༌། ཉེས་དམིགས་དང༌། ངེས་པར་འབྱུང་བ་ཡང་དག་པ་ཇི་ལྟ་བ་བཞིན་ཡང་དག་པའི་ཤེས་རབ་ཀྱིས་མཐོང་བར་གྱུར་ཅིང་འདིས་འདོད་པ་རྣམས་སོལ་བའི་ཕུང་པོ་ལྟ་བུར་མཐོང་བར་གྱུར་ཅིང་འདིས་འདོད་པ་རྣམས་དེ་ལྟར་མཐོང་བར་འགྱུར་རོ། །འདོད་པ་རྣམས་ཇི་ལྟ་བ་བཞིན་མཐོང་བ་དང༌། འདོད་པ་རྣམས་མཐོང་བ་ན་འདོད་པ་རྣམས་ལ་འདུན་པ་དང༌། འདོད་པ་ལ་ཞེན་པ་དང༌། འདོད་པ་ལ་དགའ་བ་དང༌། འདོད་བར་བྱིང་བ་དང༌། འདོད་པར་ངེས་པ་དང༌། འདོད་པ་ལ་ཞེན་པ་དང༌། དེ་ལ་སེམས་ཡོངས་སུ་གཏུགས་ཤིང་མི་གནས་ཏེ། སྤྱོད་ལམ་དང་གནས་པ་ལ་མཁས་ཤིང་རབ་ཏུ་མཁས་པར་འགྱུར་རོ། །འདི་དེ་ལྟར་རྒྱུ་སྤྱོད་པ་དང་གནས་པ་ལ་མཁས་ཤིང་རབ་ཏུ་མཁས་པར་གྱུར་ན་ཇི་ལྟར་ན་སྤྱོད་པ་དང་གནས་པ་ན་འཇིག་རྟེན་གྱི་བརྣབ་སེམས་དང་ཡིད་མི་བདེ་བ་སྡིག་པ་མི་དགེ་བའི་ཆོས་རྣམས་ལས་སེམས་ཟག་པ་དང་བྲལ་བར་འགྱུར་རོ། །དགེ་སློང་དག་ཇི་ལྟར་ན་འཕགས་པ་ཉན་ཐོས་ཐོས་པ་དང་ལྡན་པས་ཐམས་ཅད་སྡུག་བསྔལ་བའི་ཆོས་ཅན་དང༌། ཀུན་འབྱུང་བ་དང༌། མི་སྣང་བ་དང༌། རོ་མྱང་བ་དང༌། ཉེས་དམིགས་དང༌། ངེས་པར་འབྱུང་བ་ཡང་དག་པ་ཇི་ལྟ་བ་བཞིན་ཡང་དག་པའི་ཤེས་རབ་ཀྱིས་མཐོང་བར་འགྱུར་ཞེ་ན། དགེ་སློང་དག་འདི་ལ་འཕགས་པ་ཉན་ཐོས་ཐོས་པ་དང་ལྡན་པ་འདི་ནི་སྡུག་བསྔལ་འཕགས་པའི་བདེན་པའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་ཤིང་འདི་ནི་ཀུན་འབྱུང་བ་དང༌། འགོག་པ་དང༌། སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་ཏེ། དགེ་སློང་དག་འདི་ལྟར་ན་འཕགས་པ་ཉན་ཐོས་ཐོས་པ་དང་ལྡན་པས་ཐམས་ཅད་སྡུག་བསྔལ་བའི་ཆོས་ཅན་དང༌། ཀུན་འབྱུང་བ་དང༌། མི་སྣང་བ་དང༌། རོ་མྱང་བ་དང༌། ཉེས་དམིགས་དང༌། ངེས་པར་
འབྱུང་བ་ཇི་ལྟ་བ་བཞིན་ཡང་དག་པའི་ཤེས་རབ་ཀྱིས་མཐོང་བར་འགྱུར་རོ། །དགེ་སློང་དག་ཇི་ལྟར་ན་འཕགས་པ་ཉན་ཐོས་ཐོས་པ་དང་ལྡན་པ་འདོད་པ་རྣམས་ལ་སོལ་བའི་ཕུང་པོ་ལྟ་བུར་མཐོང་བར་འགྱུར་ཞིང་འདིས་འདོད་པ་རྣམས་དེ་ལྟར་མཐོང་བར་འགྱུར་བ་དང༌། འདོད་པ་རྣམས་ཇི་ལྟ་བ་བཞིན་ཤེས་ཤིང་འདོད་པ་རྣམས་མཐོང་བར་འགྱུར་བ་དང༌། འདོད་པ་རྣམས་ལ་འདུན་པ་དང༌། འདོད་པ་ལ་ཞེན་པ་དང༌། འདོད་པ་ལ་དགའ་བ་དང༌། འདོད་པ་ལ་བྱིང་བ་དང༌། འདོད་པར་ངེས་པ་དང༌། འདོད་པ་ལ་ཞེན་པ་དང༌། དེ་ལ་སེམས་ཡོངས་སུ་གཏུགས་ཤིང་མི་གནས་པར་འགྱུར་ཞེ་ན། འདི་ལྟ་སྟེ། གྲོང་ངམ་གྲོང་ཁྱེར་དང་ཐག་མི་རིང་བ་ན་སོལ་བའི་ཕུང་པོ་དུ་བ་དང་མེ་ལྕེ་དང་བྲལ་བའི་སོལ་བའི་ཕུང་པོས་གང་བར་གྱུར་ལ། དེ་ནས་སྐྱེས་བུ་བྱིས་པའི་རང་བཞིན་མ་ཡིན་ཏེ། རྨོངས་པའི་རང་བཞིན་མ་ཡིན་བ། ཤེས་རབ་དང་བཅས་པ། རང་དབང་ཐོབ་པ། བདེ་བ་འདོད་པ། སྡུག་བསྔལ་མི་འདོད་པ། གསོན་པར་འདོད་པ། འཆི་བར་མི་འདོད་པ། འཆི་བ་དང་རྗེས་སུ་མི་མཐུན་པ་འགའ་ཞིག་འོངས་ཏེ་འདི་སྙམ་དུ། དུ་བ་དང་མེ་ལྕེ་དང་བྲལ་བའི་སོལ་བའི་ཕུང་པོ་འདིའི་ནང་དུ་བདག་ལྟུང་བར་གྱུར་ན། གཞི་དེ་ལས་འཆི་བ་འམ་འཆི་བ་ལ་ཐུག་པའི་སྡུག་བསྔལ་མྱོང་བར་འགྱུར་རོ་སྙམ་ནས། དེ་དེ་ལས་ཐག་རིང་དུ་བྱེད་ཅིང་དོན་དུ་གཉེར་བ་དང༌། སྨོན་པ་དག་ཐག་རིང་དུ་བྱེད་དོ། །དགེ་སློང་དག་དེ་བཞིན་དུ་འཕགས་པ་ཉན་ཐོས་ཐོས་པ་དང་ལྡན་པ་འདོད་ཕ་རྣམས་སོལ་བའི་ཕུང་པོ་ལྟ་བུར་མཐོང་བར་འགྱུར་ཞིང་འདིས་འདོད་པ་རྣམས་དེ་ལྟར་མཐོང་བ་ན་འདོད་པ་རྣམས་ཇི་ལྟ་བ་བཞིན་ཤེས་ཤིང་འདོད་བ་རྣམས་མཐོང་བ་ན། འདོད་པ་རྣམས་ལ་འདུན་པ་དང༌། འདོད་པ་ལ་ཞེན་པ་དང༌། འདོད་པ་ལ་དགའ་བ་དང༌། འདོད་པར་བྱིང་བ་དང༌། འདོད་པར་ངེས་པ་དང༌། འདོད་པ་ལ་ཞེན་པ་དང༌། དེ་ལ་སེམས་ཡོངས་སུ་གཏུགས་ཤིང་མི་གནས་པར་འགྱུར་རོ། །དགེ་སློང་དག་ཇི་ལྟར་ན་འཕགས་པ་ཉན་ཐོས་ཐོས་པ་དང་ལྡན་པ་སྤྱོད་པ་དང་གནས་པ་ལ་མཁས་ཤིང་རབ་ཏུ་མཁས་པ་ཡིན་ཞེ་ན། ཇི་ལྟར་སྤྱོད་པ་དང་གནས་པ་ན་འཇིག་རྟེན་གྱི་བརྣབ་སེམས་དང་ཡིད་མི་བདེ་བ་སྡིག་པ་མི་དགེ་བའི་ཆོས་
རྣམས་ལ་སེམས་ཟག་པ་དང་བྲལ་བར་འགྱུར་ཏེ། དེ་བཞིན་དུ་འདིས་སྤྱོད་པ་དང་གནས་པ་ལ་མཁས་ཤིང་རབ་ཏུ་མཁས་པར་འགྱུར་ཏེ། །དགེ་སློང་དག་འདི་ལྟ་སྟེ། གྲོང་ངམ་གྲོང་ཁྱེར་དང་ཐག་མི་རིང་བ་ཞིག་ན་ཚེར་མ་མང་པོས་གང་བར་གྱུར་ལ། སྐྱེས་བུ་འགའ་ཞིག་བྱ་བ་ཅུང་ཟད་ཅིག་གི་ཕྱིར་དེར་ཞུགས་པ་དང༌། མདུན་ན་ཡང་ཚེར་མ། རྒྱབ་ན་ཡང་ཚེར་མ། ལོགས་དང༌། སྟེང་དང༌། འོག་དང༌། ཕྱོགས་དང་ཕྱོགས་མཚམས་ཚེར་མས་གང་བར་གྱུར་ན་དེ་དེ་ན་དྲན་པ་དང་ལྡན་བཞིན་དུ་འགྲོ་བ་དང༌། དྲན་པ་དང་ལྡན་བཞིན་དུ་འོང་བ་དང། རྣམ་པར་ལྟ་ཞིང་དྲན་པ་དང་ལྡན་བཞིན་དུ་སྐུམ་བ་དང་རྐྱོང་བར་བྱེད་དེ། དེ་ཅིའི་ཕྱིར་ཞེ་ན། བདག་ལ་ཚེར་མ་ཟུག་པར་མ་གྱུར་ཅིག་སྙམ་པའི་ཕྱིར་རོ། །དགེ་སློང་དག་དེ་བཞིན་དུ་འཕགས་པ་ཉན་ཐོས་ཐོས་པ་དང་ལྡན་པ་དག་གྲོང་ངམ་གྲོང་ཁྱེར་དག་ན་བརྟེན་ཅིང་ཉེ་བར་གནས་པ། སྔ་དྲོ་ཆོས་གོས་དང་ལྷུང་བཟེད་ཐོགས་ཏེ། གྲོང་ངམ་གྲོང་ཁྱེར་དུ་བསོད་སྙོམས་ཀྱི་ཕྱིར་འཇུག་པ་ན་ལུས་ཀྱིས་ལེགས་བར་བསྲུངས་པ་དང༌། དབང་པོས་ལེགས་པར་བསྡམས་པ་དང༌། དྲན་པ་ཉེ་བར་གཞག་ནས་བསོད་སྙོམས་ལ་འཇུག་པར་བྱེད་ཅིང༌། དེ་དེ་ན་དྲན་བཞིན་དུ་འོང་བ་དང༌། དྲན་བཞིན་དུ་འགྲོ་བ་དང༌། དྲན་བཞིན་དུ་རྣམ་པར་ལྟ་བས་དྲན་བཞིན་དུ་རྣམ་པར་ལྟ་བ་དང༌། དྲན་བཞིན་དུ་སྐུམ་པ་དང༌། དྲན་བཞིན་དུ་རྐྱོང་བར་བྱེད་དེ། དེ་ཅིའི་ཕྱིར་ཞེ་ན། བདག་ལ་ཚེར་མ་མ་ཟུག་ཅིག་སྙམ་པའི་ཕྱིར་རོ། །དགེ་སློང་དག་ཆོས་འདུལ་བ་འདི་ལ་ཚེར་མ་ཞེས་གང་ལ་བརྗོད་ཅེ་ན། གང་འཇིག་རྟེན་ན་དགའ་བའི་རང་བཞིན་དང་ཆགས་པའི་རང་བཞིན་དེ་ནི་ཆོས་འདུལ་བ་འདི་ལ་ཚེར་མ་ཞེས་བརྗོད་དོ། །འཇིག་རྟེན་ན་དགའ་བའི་རང་བཞིན་དང༌། ཆགས་པའི་རང་བཞིན་ཆོས་འདུལ་བ་འདི་ལ་ཚེར་མ་ཞེས་བརྗོད་པ་དེ་གང་ཞེ་ན། འདི་ལྟར་འདོད་པའི་ཡོན་ཏན་ལྔ་པོ་མིག་གིས་ཤེས་པར་བྱ་བའི་གཟུགས་འདོད་པ་དང༌། དགའ་བ་དང༌། ཡིད་དུ་འོང་བ་དང༌། འདོད་པ་ཉེ་བར་སྡུད་པ་དང༌། དགའ་བར་བྱེད་པ་དང༌། རྣ་བས་རྣམ་པར་ཤེས་པར་བྱ་བའི་སྒྲ་དང༌། རྣས་རྣམ་པར་ཤེས་པར་བྱ་བའི་འདྲི་
དང། ལྕེས་རྣམ་པར་ཤེས་པར་བྱ་བའི་རོ་དང༌། ལུས་ཀྱིས་རྣམ་པར་ཤེས་པར་བྱ་བའི་རེག་བྱ་འདོད་པ་དང༌། སྡུག་པ་དང༌། དགའ་བ་དང༌། ཡིད་དུ་འོང་བ་དང༌། འདོད་པ་ཉེ་བར་སྡུད་པ་དང༌། དགའ་བར་བྱེད་པ་རྣམས་ཏེ། དགེ་སློང་དག་འདི་ནི་འཇིག་རྟེན་ལ་དགའ་བའི་རང་བཞིན་དང་ཆགས་པའི་རང་བཞིན་ཆོས་འདུལ་བ་འདི་ལ་ཚེར་མ་ཞེས་བརྗོད་དོ། །དགེ་སློང་དག་དེ་ལྟར་ན་འཕགས་པ་ཉན་ཐོས་ཐོས་པ་དང་ལྡན་པ་དག་སྤྱོད་པ་དང་གནས་པ་ལ་མཁས་ཤིང་རབ་ཏུ་མཁས་པར་གྱུར་ལ། དེ་བཞིན་དུ་སྤྱོད་པ་དང་གནས་པ་ལ་མཁས་ཤིང་རབ་ཏུ་མཁས་པར་འགྱུར་རོ། །ཇི་ལྟར་སྤྱོད་པ་དང་གནས་པ་ན་འཇིག་རྟེན་གྱི་བརྣབ་སེམས་དང་ཡིད་མི་བདེ་བ་སྡིག་པ་མི་དགེ་བའི་ཆོས་རྣམས་ལས་སེམས་ཟག་པ་དང་བྲལ་བར་འགྱུར་ཏེ། དགེ་སློང་དག་འཕགས་པ་ཉན་ཐོས་དེ་ལྟར་སྤྱོད་ཅིང་དེ་ལྟར་གནས་པ་དེ་ལ་བརྒྱ་ལ་རེས་འགའ་ཞིག་དྲན་པ་ཉམས་པ་ལས་སྡིག་པ་མི་དགེ་བའི་རྣམ་པར་རྟོག་པ་འདོད་ཆགས་ཉེ་བར་སྡུད་པ་འམ། ཞེ་སྡང་ཉེ་བར་སྡུད་པ་འམ། གཏི་མུག་ཉེ་བར་སྡུད་པ་དག་སྐྱེ་བར་འགྱུར་རོ། །དགེ་སློང་དག་འཕགས་པ་ཉན་ཐོས་ཐོས་པ་དང་ལྡན་པ་དེ་ལ་དྲན་པ་ཉམས་པ་ཆུང་དུ་བྱུང་ཡང་དེ་ཡང་དེ་མྱུར་དུ་ཟད་པ་དང་ཡོངས་སུ་གཏུགས་པར་གྱུར་ཏེ། དཔེར་ན་ལྕགས་ཀྱི་གོང་བུ་འམ། ལྕགས་ཀྱི་ཚ་ཚ་འབར་ཞིང་མེ་རབ་ཏུ་འབར་བ་དག་ལ་འགའ་ཞིག་གིས་ཆུའི་ཐིགས་པ་ཆུང་ངུ་གཉིས་གསུམ་གཏོར་ན། དགེ་སློང་དག་ཆུའི་ཐིགས་པ་ཆུང་ངུ་ལྟུང་མ་ཐག་ཏུ་ཡང་མྱུར་དུ་ཡོངས་སུ་ཟད་པ་དང་ཡོངས་སུ་གཏུགས་པར་འགྱུར་རོ། །དགེ་སློང་དག་དེ་བཞིན་དུ་འཕགས་པ་ཉན་ཐོས་ཐོས་པ་དང་ལྡན་པ་དེ་ལ་དྲན་པ་ཉམས་བ་ཆུང་ངུ་བྱུང་ཡང་དེ་ཡང་མྱུར་དུ་ཡོངས་སུ་ཟད་ཅིང་གཏུགས་པར་འགྱུར་རོ། །དགེ་སློང་དག་འཕགས་པ་ཉན་ཐོས་ཐོས་པ་དང་ལྡན་པ་དེ་ལྟར་སྤྱོད་ཅིང་དེ་ལྟར་གནས་པ་དེ་ལ་རྒྱལ་པོ་འམ་གཉེན་རྣམས་འོངས་ཏེ། སྐྱེ་སྐྱེས་བུ་དག་ཁྱེད་ཅིའི་ཕྱིར་མགོ་བྲེགས་ཤིང་ལག་ན་ལྷུང་བཟེད་ཐོགས་ནས་ཁྱིམ་ནས་ཁྱིམ་རྣམས་སུ་རྒྱུ་ཞིང་གོས་ངུར་སྨིག་གྲང་མོ་འདིས་ལུས་ཡོངས་སུ་གདུང་བར་བྱེད། ཀྱེ་སྐྱེས་བུ་ཁྱོད་འདོད་པ་རྣམས་ལ་ཡོངས་སྤྱོད་བཞིན་དུ་འདུག་ལ་སྦྱིན་བ་དག་བྱིན།
བསོད་ནམས་དག་གྱིས་ཤིག་ཅེས་འདོད་པ་རྣམས་ལ་འདོད་པར་བྱེད་ན། དགེ་སློང་དག་འདི་ཇི་སྙམ་དུ་སེམས། ཅི་འཕགས་པ་ཉན་ཐོས་ཐོས་པ་དང་ལྡན་པ་དེ་ལ་རྒྱལ་པོ་འམ་གཉེན་རྣམས་ཀྱིས་འདོད་པ་སྤྱད་པའི་ཕྱིར་བོས་པ་ན་དེ་བསླབ་པ་གཏོང་ཞིང་ཉམས་པར་བྱེད་དམ། བཙུན་པ་མ་ལགས་སོ། །འཕགས་པ་ཉན་ཐོས་ཐོས་པ་དང་ལྡན་པ་ཐམས་ཅད་ལ་སྡུག་བསྔལ་བའི་ཆོས་ཅན་དང༌། ཀུན་འབྱུང་བ་དང༌། མི་སྣང་བ་དང༌། རོ་མྱང་པ་དང༌། ཉེས་དམིགས་དང༌། ངེས་པར་འབྱུང་བ་ཇི་ལྟ་བ་བཞིན་ཡང་དག་པའི་ཤེས་རབ་ཀྱིས་མཐོང་བར་འགྱུར་ཏེ། འདིས་འདོད་པ་རྣམས་ལ་སོལ་བའི་ཕུང་པོ་ལྟ་བུར་མཐོང་བར་གྱུར་ཅིང༌། འདིས་འདོད་པ་རྣམས་དེ་ལྟར་མཐོང་བ་དང༌། འདོད་པ་རྣམས་ཇི་ལྟ་བ་བཞིན་ཤེས་པ་དང༌། འདོད་པ་རྣམས་མཐོང་བ་ན། འདོད་པ་རྣམས་ལ་འདུན་པ་དང༌། འདོད་པ་ལ་ཞེན་པ་དང། འདོད་པ་ལ་དགའ་བ་དང༌། འདོད་པར་བྱིང་བ་དང༌། འདོད་པ་ལ་ངེས་པ་དང༌། འདོད་པ་ལ་ཞེན་པ་དང༌། དེ་སེམས་ཡོངས་སུ་གཏུགས་ཤིང་མི་གནས་པ་སྟེ། སྤྱོད་ལམ་དང་གནས་པ་ལ་མཁས་ཤིང་རབ་ཏུ་མཁས་པར་གྱུར་ལ། འདི་དེ་ལྟར་སྤྱོད་པ་དང་གནས་པ་ལ་མཁས་ཤིང་རབ་ཏུ་མཁས་པར་གྱུར་ན། ཇི་ལྟར་སྤྱོད་པ་དང་གནས་པ་ན་འཇིག་རྟེན་གྱི་བརྣབ་སེམས་དང་ཡིད་མི་བདེ་བ་སྡིག་པ་མི་དགེ་བའི་ཆོས་རྣམས་ལས་སེམས་ཟག་པ་དང་བྲལ་བར་གྱུར་པ་དག་རྒྱལ་པོ་འམ་གཉེན་རྣམས་ཀྱིས་འདོད་པ་སྤྱོད་པའི་ཕྱིར་བོས་པ་ན་བསླབ་པ་སོ་སོར་བཏང་ཞིང་ཉམས་པར་བྱེད་པ་འདི་ནི་གནས་མ་མཆིས་སོ། །དགེ་སློང་དག་ལེགས་སོ་ལེགས་སོ། །དགེ་སློང་དག་འཕགས་པ་ཉན་ཐོས་ཐོས་པ་དང་ལྡན་པ་དེའི་སེམས་ཡུན་རིང་པོ་ནས་དབེན་པ་ལ་གཞོལ་བ་དང༌། དབེན་བ་ལ་བབ་པ། དབེན་པ་ལ་འབབ་པ། ཐར་པ་ལ་གཞོལ་བ། ཐར་པ་ལ་བབ་པ། ཐར་པ་ལ་འབབ་པ། མྱ་ངན་ལས་འདས་པ་ལ་གཞོལ་བ། མྱ་ངན་ལས་འདས་པ་ལ་བབ་པ། མྱ་ངན་ལས་འདས་པ་ལ་འབབ་པ། ཞི་བ། ཐག་བསྲིངས་པ། ཐར་པ། ཟག་པའི་གནས་ལྟ་བུའི་ཆོས་རྣམས་ལས་ཞི་བར་གྱུར་པ། བསིལ་བར་གྱུར་པ། ཚངས་པར་གྱུར་པ་དེ་
རྒྱལ་པོ་འམ་གཉེན་རྣམས་ཀྱིས་འདོད་པ་སྤྱད་པའི་ཕྱིར་བོས་པ་ན་བསླབ་པ་སོ་སོར་བཏང་ནས་ཉམས་པར་བྱེད་པ་འདི་ནི་གནས་མེད་དེ། གཞན་དུ་ན་རྒྱལ་པོ་འམ་གཉེན་རྣམས་དུས་ཕྱིས་ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །དགེ་སློང་དག་དཔེར་ན་ཆུ་བོ་གང་གཱའི་ཆུ་ཡུན་རིང་པོར་ཤར་ཕྱོགས་སུ་གཞོལ་བ། ཤར་དུ་བབ་པ། ཤར་དུ་འབབ་པར་གྱུར་བ་ལ། དེ་ནས་ལག་ཏུ་འཇོར་དང་བསྩེལ་པོ་ཐོགས་པའི་སྐྱེ་བོའི་ཚོགས་མང་པོ་འོངས་ནས་འདི་སྐད་དུ་ཆུ་བོ་གང་གཱའི་ཆུ་ཡུན་རིང་པོ་ཤར་དུ་གཞོལ་བ། ཤར་དུ་བབ་པ། ཤར་དུ་འབབ་པ་འདི་བདག་ཅག་གིས་ནུབ་ཏུ་གཞོལ་ཞིང་ནུབ་ཏུ་བབ་པ་དང༌། ནུབ་ཏུ་འབབ་པར་བྱའོ་ཞེས་སྨྲ་ན། དགེ་སློང་དག་ཆུ་བོ་གང་གཱའི་ཆུ་ཡུན་རིང་པོ་ནས་ཤར་དུ་གཞོལ་བ། ཤར་དུ་བབ་པ། ཤར་དུ་འབབ་པར་གྱུར་པ་ལ་འདི་སྟོབས་དང་ལྡན་པ་སྐྱེ་བོའི་ཚོགས་མང་པོ་དེ་དག་གིས་ནུབ་ཏུ་གཞོལ་བ་དང༌། ནུབ་ཏུ་བབ་པ་དང༌། ནུབ་ཏུ་འབབ་པར་བྱ་བར་ནུས་སམ། བཙུན་པ་མ་ལགས་ཏེ། དེ་ཅིའི་སླད་དུ་ཞེ་ན། བཙུན་པ་འདི་ལྟར་ཆུ་བོ་གང་གཱའི་ཆུ་ཡུན་རིང་པོ་ནས་ཤར་དུ་གཞོལ་བ། ཤར་དུ་བབ་པ། ཤར་དུ་འབབ་པ་འདི་སྐྱེ་བོའི་ཚོགས་མང་པོ་དེ་དག་གིས་ནུབ་ཏུ་གཞོལ་བ་དང༌། ནུབ་ཏུ་བབ་པ་དང༌། ནུབ་ཏུ་འབབ་པར་བྱ་བ་སླ་བ་མ་ལགས་ཀྱི། གཞན་དུ་ན་སྐྱེ་བོའི་ཚོགས་མང་པོ་དེ་དག་ཕོངས་ཤིང་དུ་བ་པའི་སྐལ་བ་ཅན་དུ་འགྱུར་རོ། །དགེ་སློང་དག་དེ་བཞིན་དུ་འཕགས་པ་ཉན་ཐོས་ཐོས་པ་དང་ལྡན་པ་དེའི་སེམས་ཡུན་རིང་པོ་ནས་དབེན་པ་ལ་གཞོལ་བ། དབེན་པ་ལ་བབ་པ། དབེན་པ་འབབ་པ། ཐར་པ་ལ་གཞོལ་བ། ཐར་པ་ལ་བབ་པ། ཐར་བ་ལ་འབབ་པ། མྱ་ངན་ལས་འདས་པ་ལ་གཞོལ་བ། མྱ་ངན་ལས་འདས་པ་ལ་བབ་པ། མྱ་ངན་ལས་འདས་པ་ལ་འབབ་པ། ཞི་བ། ཐག་བསྲིངས་པ། ཐར་པ་ལ་མངོན་པར་དགའ་བ་ཟག་པའི་གནས་ལྟ་བུའི་ཆོས་རྣམས་ལས་ཞི་ཞིང་བསིལ་བར་གྱུར་བ་ཚངས་པར་གྱུར་པ་དེ་ལ་རྒྱལ་པོ་འམ་གཉེན་རྣམས་ཀྱིས་འདོད་པ་སྤྱོད་པའི་ཕྱིར་བོས་པ་ན། བསླབ་པ་བཏང་ནས་ཉམས་པར་བྱེད་པ་འདི་ནི་གནས་མེད་དེ། གཞན་དུ་ན་རྒྱལ་པོ་འམ་གཉེན་དེ་དག་ཕོངས་ཤིང་
དུབ་པའི་སྐལ་བ་ཅན་དུ་འགྱུར་རོ་ཞེས་གསུངས་སོ། །མདོ་གཞན་ལས། དེ་ནི་དགྲ་བཅོམ་པའི་སྟོབས་ཡིན་པར་ཡང་གསུངས་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དེ་ནས་ཚེ་དང་ལྡན་པ་ཤཱ་རིའི་བུ་དགོངས་ཀ་ནང་དུ་ཡང་དག་འཇོག་ལས་ལངས་ཏེ། བཅོམ་ལྡན་འདས་གང་ན་བ་དེར་ཉེ་བར་སོང་སྟེ། ཉེ་བར་སོང་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་བྱས་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་དགེ་སླང་དགྲ་བཅོམ་པ་ཟག་པ་ཟད་པ་ལ་སྟོབས་དུ་ཞིག་མཆིས། ཤཱ་རིའི་བུ་རྣམ་པ་བརྒྱད་དེ། བརྒྱད་གང་ཞེ་ན། ཤཱ་རིའི་བུ་དགེ་སློང་དགྲ་བཅོམ་པ་ཟག་པ་ཟད་པ་དེའི་སེམས་ཡུན་རིང་པོ་ནས་དབེན་པ་ལ་གཞོལ་བ། དབེན་པ་ལ་བབ་པ། དབེན་པ་ལ་འབབ་པ་ཡིན། ཐར་པ་ལ་གཞོལ་བ། ཐར་པ་ལ་བབ་པ། ཐར་པ་ལ་འབབ་པ་ཡིན། མྱ་ངན་ལས་འདས་པ་ལ་གཞོལ་བ། མྱ་ངན་ལས་འདས་པ་ལ་བབ་པ། མྱ་ངན་ལས་འདས་པ་ལ་འབབ་པ་ཡིན་ནོ། །འདོད་པ་རྣམས་སོལ་བའི་ཕུང་པོ་ལྟ་བུར་མཐོང་བ་ཡིན་ཏེ། འདིས་འདོད་པ་རྣམས་ཀྱི་དེ་བཞིན་ཉིད་མཐོང་སྟེ། ཇི་ལྟར་འདོད་པ་རྣམས་ཇི་ལྟ་བ་བཞིན་ཤེས་ཤིང་འདོད་པ་རྣམས་ཇི་ལྟ་བ་བཞིན་དུ་མཐོང་ནས། འདོད་པ་ལ་འདུན་པ་དང༌། འདོད་པ་ལ་ཞེན་པ་དང༌། འདོད་པ་ལ་དགའ་བ་དང༌། འདོད་པ་ལ་ངེས་པ་དང༌། འདོད་པ་ལ་ཞེན་པ་དང༌། དེ་ལ་སེམས་ཡོངས་སུ་གཏུགས་ཏེ་མི་གནས་པ་ཡིན། འདིས་དྲན་པ་ཉེ་བར་གཞག་པ་བཞི་ལེགས་པར་བསྒོམས་པ་ཡིན། ཡང་དག་པར་སྤོང་བ་བཞི་ལེགས་པར་བསྒོམས་པ་ཡིན། རྫུ་འཕྲུལ་གྱི་རྐང་པ་བཞི་དང༌། དབང་པོ་ལྔ་དང༌། སྟོབས་ལྔ་དང༌། བྱང་ཆུབ་ཀྱི་ཡན་ལག་བདུན་དང༌། འཕགས་པའི་ལམ་ཡན་ལག་བརྒྱད་བསྒོམས་པ་ལེགས་པར་བསྒོམས་པ་ཡིན་ནོ། །དེ་ནས་ཚེ་དང་ལྡན་པ་ཤཱ་རིའི་བུ་བཅོམ་ལྡན་འདས་ཀྱིས་གསུངས་པ་ལ་ཞེས་བྱ་བ་ནས། ལངས་ཏེ་སོང་ངོ་ཞེས་བྱ་བའི་བར་དུའོ་ཞེས་གསུངས་སོ། །མདོ་ལས་འདི་སྐད་དུ་ཞེས་བྱ་བ་ལ། འདི་ནས་གོ་རིམས་ལས་བཟློག་སྟེ་བརྩིས་པའི་ལྔ་
པ་དང༌། དགེ་སློང་དག་འཕགས་པ་ཉན་ཐོས་ཐོས་པ་དང་ལྡན་པ་ཞེས་བྱ་བ་སོལ་བའི་ཕུང་པོ་ལྟ་བུའི་མདོ་ལས་གོ་རིམས་ལས་བཟློག་སྟེ་བགྲངས་པའི་གསུམ་པ་ལས་འབྱུང་བ་བསྟན་ཟིན་ཏོ། །བཅོམ་ལྡན་འདས་ཀྱིས་ཀྱང་འདི་ལ་གང་ཞིག་ཉོན་མོངས་པ་ལྔ་སྤངས་ཏེ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བོས་ཏེ། དགེ་སློང་དག་གང་ཟག་ནི་རྣམ་པ་བཞི་སྟེ། རྒྱུན་ཕྱོགས་སུ་འགྲོ་བའི་གང་ཟག་དང༌། རྒྱུན་ལས་བཟློག་ཕྱོགས་སུ་འགྲོ་བའི་གང་ཟག་དང༌། བདག་ཉིད་དུ་གནས་པའི་གང་ཟག་དང༌། བརྒལ་ཞིང་ཕ་རོལ་ཏུ་ཕྱིན་པའི་གང་ཟག་གོ །རྒྱུན་ཕྱོགས་སུ་འགྲོ་བའི་གང་ཟག་གང་ཞེ་ན། འདི་ན་འདོད་པ་ལ་བརྟེན་ཞིང་སྡིག་པའི་ལས་བྱེད་པའི་གང་ཟག་རྣམས་ཏེ། འདི་ནི་རྒྱུན་ཕྱོགས་སུ་འགྲོ་བའི་གང་ཟག་ཅེས་བྱའོ། །རྒྱུན་ལས་བཟློག་ཕྱོགས་སུ་འགྲོ་བའི་གང་ཟག་གང་ཞེ་ན། འདི་ནི་འདོད་པ་ལ་བརྟེན་ཀྱང་སྡིག་པའི་ལས་མི་བྱེད་པའི་གང་ཟག་རྣམས་ཏེ། འདི་ནི་རྒྱུན་ལས་བཟློག་ཕྱོགས་སུ་འགྲོ་བའི་གང་ཟག་ཅེས་བྱའོ། །བདག་ཉིད་དུ་གནས་པའི་གང་ཟག་གང་ཞེ་ན། གང་ཟག་འགའ་ཞིག་འདི་ན་དགོན་པ་འམ། ཤིང་དྲུང་ངམ། ཁང་པ་སྟོང་བར་སོང་ནས་འབད་པ་དང༌། སྤངས་པ་དང༌། བསྒོམ་པ་དང༌། ལན་མང་དུ་བྱས་པའི་རྒྱུ་དང༌། ཡང་དག་པའི་ཡིད་ལ་བྱེད་པའི་རྒྱུས་ཇི་ལྟར་སེམས་མཉམ་པར་གཞག་པ་ན་ཐ་མའི་ཆ་དང་མཐུན་པའི་ཀུན་དུ་སྦྱོར་བ་ལྔ་སྤངས་ཤིང་མི་སྐྱེ་བ་དེ་ལྟ་བུའི་ཏིང་ངེ་འཛིན་ཞི་བ་ལ་རེག་པར་གྱུར་ཏེ། དེ་ཡོངས་སུ་མྱ་ངན་ལས་འདའ་ཞིང་འཇིག་རྟེན་འདིར་ཡང་ཕྱིར་མི་ལྡོག་ཅིང་མི་འོང་བ་འདི་ནི་བདག་ཉིད་དུ་གནས་པའི་གང་ཟག་ཅེས་བྱའོ། །བརྒལ་ཞིང་ཕ་རོལ་ཏུ་ཕྱིན་པའི་གང་ཟག་གང་ཞེ་ན། འདི་ལ་གང་ཟག་དགོན་པ་འམ། ཤིང་དྲུང་ངམ། ཁང་པ་སྟོང་པར་སོང་ནས་འབད་པ་དང༌། སྤངས་པ་དང༌། ལན་མང་དུ་བྱས་པ་དང༌། ཡང་དག་པའི་ཡིད་ལ་བྱས་པའི་རྒྱུས་ཇི་ལྟར་སེམས་མཉམ་པར་གཞག་པ་ན་ཟག་པ་ཟད་ཅིང་ཟག་པ་ལས་སེམས་རྣམ་པར་གྲོལ་བ་དང༌། ཤེས་རབ་རྣམ་པར་གྲོལ་བ་སྟེ། བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །བྱེད་པ་བྱས་སོ། །སྲིད་པ་འདི་ལས་གཞན་མི་
ཤེས་སོ་ཞེས་མཐོང་བའི་ཆོས་ཉིད་ལ་རང་ཉིད་ཀྱིས་མངོན་པར་ཤེས་པ་ཕུན་སུམ་ཚོགས་པ་བསྒྲུབས་ཏེ་གནས་པ་དེ་ལྟ་བུའི་ཏིང་ངེ་འཛིན་ཞི་བ་ལ་རེག་པར་གྱུར་པ་སྟེ། འདི་ནི་འགྲོ་ཞིང་ཕ་རོལ་དུ་འགྲོ་བའི་གང་ཟག་ཅེས་བྱའོ། །སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །འདོད་ཁམས་འདི་ན་གང་དག་འགའ་ཞིག་ནི། །འདོད་པས་གཡེངས་ཤིང་འདོད་ལ་ཆགས་མ་བྲལ། །སྲིད་པར་བྱ་ཞིང་ཡང་ཡང་སྐྱེ་བ་དང༌། །དགའ་བར་འགྱུར་བ་རྒྱུན་ཕྱོགས་འགྲོ་བ་ཡིན། །དེ་ཉིད་འདོད་དང་སྡུག་བསྔལ་སྤངས་པ་ནི། །རྒྱུན་ལས་བཟློག་ཕྱོགས་འགྲོ་བའི་གང་ཟག་བརྗོད། །འདི་ན་གང་ཞིག་ཉོན་མོངས་ལྔ་སྤངས་ཏེ། །མི་འཕྲོགས་ཆོས་ལྡན་སློབ་པ་ཡོངས་སུ་རྫོགས། །སེམས་ལ་དབང་ཐོབ་དབང་པོ་མཉམ་གཞག་པ། །ཐམས་ཅད་བདག་ཉིད་གནས་པ་ཞེས་བརྗོད་དོ། །མཆོག་དང་མཆོག་མིན་མཉམ་པའི་ཆོས་རྣམས་ཀུན། །མེད་དང་མི་སྣང་སྐྱོན་བཅས་རིག་གྱུར་ཅིང༌། །ཐམས་ཅད་ཀུན་ལས་དེ་དག་རྣམ་པར་གྲོལ། །འཇིག་རྟེན་མཐར་བྱས་ཕ་རོལ་འགྲོ་ཞེས་བརྗོད། །དེ་ཕྱིར་དགེ་སློང་དྲན་པ་ལེགས་བཞག་སྟེ། །འདོད་དང་སྡུག་བསྔལ་བསྟེན་པ་སྤོང་བར་གྱིས། །ཞེས་གསུངས་སོ། །ལམ་ནི་བཞི་སྟེ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བོས་ཏེ། དགེ་སློང་དག་ལམ་ནི་རྣམ་པ་བཞི་སྟེ། མངོན་པར་ཤེས་པ་བུལ་ལ་དཀའ་བའི་ལམ་ཡང་ཡོད། མངོན་པར་ཤེས་པ་མྱུར་ལ་དཀའ་བའི་ལམ་ཡང་ཡོད། མངོན་པར་ཤེས་པ་བུལ་ལ་སླ་བའི་ལམ་ཡང་ཡོད། མངོན་པར་ཤེས་པ་མྱུར་ལ་སླ་བའི་ལམ་ཡང་ཡོད། མངོན་པར་ཤེས་པ་བུལ་ལ་དཀའ་བའི་ལམ་གང་ཞེ་ན། འདི་ན་ཁ་ཅིག་ཉེ་བར་ལེན་པའི་ཕུང་པོ་ལྔས་འཛེམ་ཞིང་གནོད་ལ། རིང་དུ་བྱེད་ཅིང་སྨོད་པར་བྱེད་དེ། ལྔ་གང་ཞེ་ན། གཟུགས་ཉེ་བར་ལེན་པའི་ཕུང་པོ་དང༌། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་ཉེ་བར་ལེན་པའི་ཕུང་པོ་ལྔས་འཛེམ་ཞིང་གནོད་ལ། རིང་དུ་བྱེད་ཅིང་སྨོད་པར་བྱེད་དེ། དཔེར་ན་སྐྱེས་བུ་གཞོན་ནུ་ལེགས་པར་ཁྲུས་བྱས་ཤིང་ལེགས་པར་བྱུགས་ཤིང་བསྐུས་པ་སྐྲ་དང་ཁ་སྤུ་བཅོས་ཤིང་གོས་དཀར་པོ་གོན་པ་དང༌། སྦྲུལ་གྱི་རོ་འམ། ཁྱིམ་བྱའི་རོ་འམ། མིའི་རོའི་ཁ་འམ།
མགོ་བོ་ལ་རེག་ན་ཤིན་ཏུ་འཛེམ་ཞིང་གནོད་ལ་ཐག་རིང་དུ་བྱེད་ཅིང་སྨོད་པར་བྱེད་དོ། །དེ་བཞིན་དུ་དེ་ཉེ་བར་ལེན་པའི་ཕུང་པོ་ལྔས་འཛེམ་ཞིང་གནོད་པ་དང༌། རིང་དུ་བྱེད་ཅིང་སྨོད་པར་བྱེད་དེ། དེ་ཉེ་བར་ལེན་པའི་ཕུང་པོ་ལྔས་བདག་ཉིད་ཉོན་མོངས་ཤིང་སྙོན་རྨོངས་པར་བྱེད་པ་དང༌། ཁུར་ལྕི་བས་མནན་ནོ་སྙམ་ཞིང༌། ད་ལྟར་བདག་འཆི་བ་ལ་ཐུག་གི་བར་དུ་བྱས་སོ་ཞེས་རིག་ནས། དེ་ཉེ་བར་ལེན་པའི་ཕུང་པོ་ལྔ་རྣམས་ལ་འཛེམ་ཞིང་སྨོད་པ་དང༌། རྗེས་སུ་མི་མཐུན་ཏེ་དེ་ཉེ་བར་ལེན་པའི་ཕུང་པོ་ལྔ་རྣམས་ལ་འཛེམ་ཞིང་གནས་པ་དང༌། སྨོད་པ་དང་རྗེས་སུ་མི་མཐུན་པ་འདི་ནི་དེའི་དཀའ་བ་ཞེས་བྱའོ། །དེའི་དབང་པོ་ལྔ་བུལ་བའི་རང་བཞིན་དུ་གྱུར་ལ། ཆུང་ངུ་དང་བུལ་བར་འཇུག་པ་སྟེ། འདི་ལྟ་སྟེ། དད་པའི་དབང་པོ་དང༌། བརྩོན་འགྲུས་ཀྱི་དབང་པོ་དང༌། དྲན་པའི་དབང་པོ་དང༌། ཏིང་ངེ་འཛིན་གྱི་དབང་པོ་དང༌། ཤེས་རབ་ཀྱི་དབང་པོ་བུལ་བའི་རང་བཞིན་དུ་གྱུར་ཅིང་ཆུང་ངུ་དང་བུལ་བར་འཇུག་པའི་ཕྱིར་འདི་ལྟར་ཟག་པ་ཟད་པའི་བར་ཆད་མེད་པའི་ལམ་ཆེས་བུལ་བར་ཐོབ་པར་འགྱུར་ཏེ། འདི་ནི་མངོན་པར་ཤེས་པ་བུལ་ལ་དཀའ་བའི་ལམ་ཞེས་བྱའོ། །མངོན་པར་ཤེས་པ་མྱུར་ལ་དཀའ་བའི་ལམ་གང་ཞེ་ན། འདི་ན་ཁ་ཅིག་ཉེ་བར་ལེན་པའི་ཕུང་པོ་ལྔས་འཛེམ་ཞིང་གནོད་ལ་རིང་དུ་བྱེད་ཅིང་སྨོད་པར་བྱེད་དེ། དེ་ཉེ་བར་ལེན་པའི་ཕུང་པོ་ལྔས་བདག་ཉིད་ཉོན་མོངས་ཤིང་ཉོན་མོངས་པར་བྱས་པ་དང༌། ཁུར་ལྕི་བས་མནན་པ་དང༌། བདག་ད་ལྟར་འཆི་བ་ལ་ཐུག་གི་བར་དུ་བྱས་སོ་སྙམ་དུ་རི་གནས། དེ་ཉེ་བར་ལེན་པའི་ཕུང་པོ་ལྔ་རྣམས་ལ་འཛེམ་ཞིང་སྨོད་པ་དང་རྗེས་སུ་མི་མཐུན་ཏེ། དེ་ཉེ་བར་ལེན་པའི་ཕུང་པོ་ལྔ་རྣམས་ལ་འཛེམ་ཞིང་སྨོད་པ་དང་རྗེས་སུ་མི་མཐུན་པ་འདི་ནི་དེའི་དཀའ་བ་ཞེས་བྱའོ། །དེའི་དབང་པོ་ལྔ་རྣོན་པོར་གྱུར་ཅིང་མགྱོགས་པར་འཇུག་སྟེ། འདི་ལྟ་སྟེ། དད་པའི་དབང་པོ་དང༌། བརྩོན་འགྲུས་ཀྱི་དབང་པོ་དང༌། དྲན་པའི་དབང་པོ་དང༌། ཏིང་ངེ་འཛིན་གྱི་དབང་པོ་དང༌། ཤེས་རབ་ཀྱི་དབང་པོ་རྣོན་པོར་གྱུར་ཅིང་མྱུར་དུ་འཇུག་པ་དེའི་ཕྱིར་འདི་ལྟར་ཟག་པ་ཟད་པའི་བར་ཆད་མེད་པའི་ལམ་ཆེས་མྱུར་བ་ཐོབ་པར་འགྱུར་ཏེ། འདི་ནི་མངོན་པར་ཤེས་པ་མྱུར་ལ་དཀའ་བའི་ལམ་ཞེས་བྱའོ། །མངོན་པར་ཤེས་པ་བུལ་ལ་སླ་བའི་ལམ་གང་ཞེ་ན། འདི་ན་དགེ་
སློང་འདོད་པ་ལས་དབེན་པ་སྡིག་པ་མི་དགེ་བའི་ཆོས་རྣམས་ལས་དབེན་པ་ཞེས་བྱ་བ་ནས། བསམ་གཏན་བཞི་པ་ཉེ་བར་བསྒྲུབས་ཏེ་གནས་སོ་ཞེས་བྱ་བའི་བར་དུ་སྟེ། དེ་དེའི་ཚེ་ན་རང་ལ་གནོད་པར་བྱ་བར་མི་སེམས། གཞན་ལ་གནོད་པ་དང༌། གཉི་ག་ལ་གནོད་པར་བྱ་བར་མི་སེམས་ཀྱི། བདག་ལ་ཕན་པར་སེམས་པ་དང༌། གཞན་ལ་ཕན་པ་དང༌། སྐྱེ་བོ་མང་པོ་ལ་བདེ་བ་དང༌། ལྷ་དང་མིའི་འཇིག་རྟེན་ལ་སྙིང་བརྩེ་བ་དང༌། ཕན་པ་དང་བདེ་བའི་ཕྱིར་སེམས་ཏེ། གང་གི་ཕྱིར་གནོད་པ་མེད་པ་འདི་ནི་འདིར་སླ་བ་ཞེས་བྱའོ། །དེའི་དབང་པོ་ལྔ་པོ་བུལ་བར་གྱུར་ཅིང་ཆུང་ངུ་དང་བུལ་བར་འཇུག་སྟེ། འདི་ལྟ་སྟེ། དད་པའི་དབང་པོ་དང༌། བརྩོན་འགྲུས་ཀྱི་དབང་པོ་དང༌། དྲན་པའི་དབང་པོ་དང༌། ཏིང་ངེ་འཛིན་གྱི་དབང་པོ་དང༌། ཤེས་རབ་ཀྱི་དབང་པོ་བུལ་བར་གྱུར་ཅིང་ཆུང་ངུ་དང་བུལ་བར་འཇུག་པའི་ཕྱིར་འདི་ལྟར་ཟག་པ་ཟད་པའི་བར་ཆད་མེད་པའི་ལམ་ཆེས་བུལ་བ་འཐོབ་པར་འགྱུར་ཏེ། འདི་ནི་མངོན་པར་ཤེས་པ་བུལ་ལ་སླ་བའི་ལམ་ཞེས་བྱའོ། །མངོན་པར་ཤེས་པ་མྱུར་ལ་སླ་བའི་ལམ་གང་ཞེ་ན། འདི་ན་དགེ་སློང་འདོད་པ་ལས་དབེན་པ་ཞེས་བྱ་བ་ནས། སྔ་མ་བཞིན་དུ་ལྷ་དང་མིའི་འཇིག་རྟེན་ལ་སྙིང་བརྩེ་ཞིང་ཕན་པ་དང་བདེ་བའི་ཕྱིར་སེམས་ཏེ་ཞེས་བྱ་བའི་བར་དུ་སྟེ། གང་གི་ཕྱིར་གནོད་པ་མེད་པ་འདི་ནི་འདི་ལྟར་སླ་བ་ཞེས་བྱའོ། །དེའི་དབང་པོ་ལྔ་པོ་རྣོན་པོར་གྱུར་ཅིང་མྱུར་དུ་འཇུག་སྟེ། འདི་ལྟ་སྟེ། དད་པའི་དབང་པོ་དང༌། བརྩོན་འགྲུས་ཀྱི་དབང་པོ་དང༌། དྲན་པའི་དབང་པོ་དང༌། ཏིང་ངེ་འཛིན་གྱི་དབང་པོ་དང༌། ཤེས་རབ་ཀྱི་དབང་པོ་རྣོ་ཞིང་མྱུར་དུ་འཇུག་པའི་ཕྱིར་འདི་ལྟར་ཟག་པ་ཟད་བའི་བར་ཆད་མེད་པའི་ལམ་ཆེས་མྱུར་བར་ཐོབ་པར་འགྱུར་ཏེ། འདི་ནི་མངོན་པར་ཤེས་པ་མྱུར་ལ་སླ་བའི་ལམ་ཞེས་བྱའོ། །ཉེ་བར་ལེན་པའི་ཕུང་པོ་ལྔ་ཇི་ལྟ་བ་བཞིན་དུ་འདོད་པ་དང༌། ལུས་དང༌། འདུ་བྱེད་དང་ཉོན་མོངས་པས་ཀྱང་དེ་བཞིན་ནོ་ཞེས་གསུངས་སོ། །བྱང་ཆུབ་ཀྱི་ཕྱོགས་དང་མཐུན་པའི་ཆོས་སུམ་ཅུ་རྩ་བདུན་ནི་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་དྲན་པ་ཉེ་བར་གཞག་པ་ནི་བཞི་སྟེ། བཞི་གང་ཞེ་ན། ལུས་དྲན་པ་ཉེ་བར་གཞག་པ་དང༌། ཚོར་བ་དང༌། སེམས་དང༌། ཆོས་དྲན་པ་ཉེ་བར་གཞག་པའོ། །གླེང་
གཞི་ནི་མཉན་དུ་ཡོད་པ་ནའོ། །དགེ་སློང་དག་ཡང་དག་པར་སྤོང་བ་ནི་བཞི་སྟེ། བཞི་གང་ཞེ་ན། འདི་ན་དགེ་སློང་སྡིག་པ་མི་དགེ་བའི་ཆོས་སྐྱེས་པ་རྣམས་སྤོང་བའི་ཕྱིར་འདུན་པ་སྐྱེད་ཅིང་འབད་པ་དང༌། བརྩོན་འགྲུས་རྩོམ་པ་དང༌། སེམས་རབ་ཏུ་འཛིན་ཏོ། །སྡིག་པ་མི་དགེ་བའི་ཆོས་མ་སྐྱེས་བ་རྣམས་མི་སྐྱེ་བར་བྱ་བའི་ཕྱིར་འདུན་པ་སྐྱེད་ཅིང་འབད་པ་དང༌། བརྩོན་འགྲུས་རྩོམ་པ་དང༌། སེམས་རབ་ཏུ་འཛིན་ཏོ། །དགེ་བའི་ཆོས་མ་སྐྱེས་པ་རྣམས་བསྐྱེད་པར་བྱ་བའི་ཕྱིར་འདུན་པ་སྐྱེད་ཅིང་འབད་པ་དང༌། བརྩོན་འགྲུས་རྩོམ་པ་དང༌། སེམས་རབ་ཏུ་འཛིན་ཏོ། །དགེ་བའི་ཆོས་སྐྱེས་པ་རྣམས་གནས་པ་དང༌། མི་བརྗེད་ཅིང་བསྒོམ་པ་ཡོངས་སུ་རྫོགས་པ་དང༌། འཕེལ་ཞིང་རྒྱས་པ་དང༌། ཡོངས་བར་བྱ་བའི་ཕྱིར་འདུན་པ་སྐྱེད་ཅིང་འབད་པ་དང༌། བརྩོན་འགྲུས་རྩོམ་པ་དང༌། སེམས་རབ་ཏུ་འཛིན་བར་བྱེད་དོ་ཞེས་གསུངས་སོ། །གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་རྫུ་འཕྲུལ་གྱི་རྐང་པ་ནི་བཞི་སྟེ། བཞི་གང་ཞེ་ན། འདུན་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་དང༌། བརྩོན་འགྲུས་ཀྱི་ཏིང་ངེ་འཛིན་དང༌། སེམས་ཀྱི་ཏིང་ངེ་འཛིན་དང༌། དཔྱོད་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པའོ་ཞེས་གསུངས་སོ། །གླེང་གཞི་ནི་མཉན་དུ་ཡོད་པ་ནའོ། །དབང་པོ་ནི་ལྔ་སྟེ། ལྔ་གང་ཞེ་ན། དད་པའི་དབང་པོ་དང༌། བརྩོན་འགྲུས་ཀྱི་དབང་པོ་དང༌། དྲན་པའི་དབང་པོ་དང༌། ཏིང་ངེ་འཛིན་གྱི་དབང་པོ་དང༌། ཤེས་རབ་ཀྱི་དབང་པོའོ་ཞེས་གསུངས་སོ། །གླེང་གཞི་ནི་མཉན་དུ་ཡོད་པ་ནའོ། །སྟོབས་ནི་རྣམ་པ་ལྔ་སྟེ། ལྔ་གང་ཞེ་ན། དད་པའི་སྟོབས་དང༌། བརྩོན་འགྲུས་ཀྱི་སྟོབས་དང༌། དྲན་པའི་སྟོབས་དང༌། ཏིང་ངེ་འཛིན་གྱི་སྟོབས་དང༌། ཤེས་རབ་ཀྱི་སྟོབས་སོ་ཞེས་གསུངས་སོ། །གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་བྱང་ཆུབ་ཀྱི་ཡན་ལག་ནི་བདུན་ཏེ། བདུན་གང་ཞེ་ན། དྲན་པ་ཡང་དག་བྱང་ཆུབ་ཀྱི་ཡན་ལག་དང༌། ཆོས་རབ་ཏུ་འབྱེད་པ་དང༌། བརྩོན་འགྲུས་དང༌། དགའ་བ་དང༌། ཤིན་ཏུ་སྦྱངས་པ་དང༌། ཏིང་ངེ་འཛིན་དང༌། བཏང་སྙོམས་ཡང་དག་བྱང་ཆུབ་ཀྱི་ཡན་ལག་གོ་ཞེས་གསུངས་སོ། །གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་འཕགས་པའི་ལམ་ཡན་ལག་བརྒྱད་གང་ཞེ་ན།
ཡང་དག་པའི་ལྟ་བ་དང༌། ཡང་དག་པའི་རྟོག་པ་དང༌། ཡང་དག་པའི་ངག་དང༌། ཡང་དག་པའི་ལས་ཀྱི་མཐའ་དང༌། ཡང་དག་པའི་འཚོ་བ་དང༌། ཡང་དག་བའི་རྩོལ་བ་དང༌། ཡང་དག་པའི་དྲན་པ་དང༌། ཡང་དག་པའི་ཏིང་ངེ་འཛིན་ཏོ་ཞེས་གསུངས་སོ། །དགེ་སློང་དག་ངས་ཁྱེད་ལ་རྫུ་འཕྲུལ་ཡང་བཤད་ཅེས་བྱ་བ་ལ་སོགས་པ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་ངས་ཁྱེད་ལ་རྫུ་འཕྲུལ་ཡང་བཤད། རྫུ་འཕྲུལ་གྱི་རྐང་པ་དང༌། རྫུ་འཕྲུལ་གྱི་རྐང་པ་བསྒོམ་པ་དང༌། རྫུ་འཕྲུལ་གྱི་རྐང་པ་བསྒོམ་པའི་ལམ་ཡང་བཤད་པར་བྱ་སྟེ། དེ་ལེགས་པར་ཉོན་ལ་ཡིད་ལ་ཟུང་ཤིག་དང་བཤད་པར་བྱའོ། །རྫུ་འཕྲུལ་གང་ཞེ་ན། འདི་ན་དགེ་སློང་རྫུ་འཕྲུལ་གྱི་རྣམ་པ་དུ་མ་ཉམས་སུ་མྱོང་བར་བྱེད་པ་སྟེ། འདི་ལྟ་སྟེ། གཅིག་ཏུ་གྱུར་ནས་མང་པོར་འགྱུར་བ་དང༌། མང་པོར་གྱུར་ནས་གཅིག་ཏུ་འགྱུར་བ་དང༌། སྣང་བ་དང་མི་སྣང་བ་ཤེས་ཤིང་མཐོང་བ་ཉམས་སུ་མྱོང་བ་དང༌། རྩིག་པ་ལ་མི་ཐོགས་པ་དང༌། རྡོ་བ་དང༌། ར་བ་ལ་ལུས་ཀྱིས་ཐོགས་པ་མེད་པར་འགྲོ་བར་འགྱུར་ཏེ། དཔེར་ན་ནམ་མཁའ་ལ་བྱ་བ་བཞིན་ནོ། །ས་ལ་ཡང་བྱིའུ་ཟུལ་དུ་བྱེད་དེ། དཔེར་ན་ཆུ་ལ་བྱ་བ་བཞིན་ནོ། །ཆུ་ལ་ཡང་མི་འབྱིང་བར་འགྲོ་སྟེ། དཔེར་ན་ས་ལ་བྱ་བ་བཞིན་ནོ། །ནམ་མཁའ་ལ་ཡང་སྐྱིལ་མོ་ཀྲུང་བཅས་ཤིང་འགྲོ་སྟེ། དཔེར་ན་འདབ་ཆགས་བྱ་བཞིན་ནོ། །ཉི་མ་དང་ཟླ་བ་འདི་ལྟར་རྫུ་འཕྲུལ་ཆེ་ཞིང་མཐུ་ཆེ་བ་འདི་དག་ལ་ལག་པས་ནམ་ཞིང་ཉུག་པར་བྱེད་པ་དང༌། ཚངས་པའི་འཇིག་རྟེན་གྱི་བར་དུ་ལུས་ཀྱིས་དབང་སྒྱུར་བའོ། །རྫུ་འཕྲུལ་གྱི་རྐང་པ་གང་ཞེ་ན། རྫུ་འཕྲུལ་གྱི་རྐང་པ་ནི་བཞི་སྟེ། བཞི་གང་ཞེ་ན། འདུན་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་དང༌། བརྩོན་འགྲུས་ཀྱི་ཏིང་ངེ་འཛིན་དང༌། སེམས་ཀྱི་ཏིང་ངེ་འཛིན་དང༌། དཔྱོད་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པའོ། །རྫུ་འཕྲུལ་གྱི་རྐང་པ་བསྒོམ་པ་གང་ཞེ་ན། འདི་ན་དགེ་སློང་འདུན་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་དབེན་པ་ལ་གནས་པ། འདོད་ཆ་གས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤོང་བས་ཡོངས་སུ་བསྒྱུར་བ་དག་སྒོམ་པར་བྱེད་དོ། །བརྩོན་འགྲུས་ཀྱི་ཏིང་ངེ་འཛིན་
དང། སེམས་ཀྱི་ཏིང་ངེ་འཛིན་དང༌། དཔྱོད་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤོང་བས་ཡོངས་སུ་བསྒྱུར་བ་སྒོམ་པར་བྱེད་དོ། །རྫུ་འཕྲུལ་གྱི་རྐང་པ་བསྒོམ་པའི་ལམ་གང་ཞེ་ན། འདི་ལྟ་སྟེ། འཕགས་པའི་ལམ་ཡན་ལག་བརྒྱད་པོ་ཡང་དག་པའི་ལྟ་བ་དང༌། ཡང་དག་པའི་རྟོག་པ་དང༌། ཡང་དག་པའི་ངག་དང༌། ཡང་དག་པའི་ལས་ཀྱི་མཐའ་དང༌། ཡང་དག་པའི་འཚོ་བ་དང༌། ཡང་དག་པའི་རྩོལ་བ་དང༌། ཡང་དག་པའི་དྲན་པ་དང༌། ཡང་དག་པའི་ཏིང་ངེ་འཛིན་ཏོ། །དགེ་སློང་དག་ངས་ཁྱེད་ལ་རྫུ་འཕྲུལ་ཡང་བཤད་ལ། རྫུ་འཕྲུལ་གྱི་རྐང་པ་དང༌། རྫུ་འཕྲུལ་གྱི་རྐང་པ་བསྒོམ་པ་དང༌། རྫུ་འཕྲུལ་གྱི་རྐང་པ་བསྒོམ་པའི་ལམ་བཤད་པར་བྱའོ་ཞེས་ངས་ཇི་སྐད་དུ་བཤད་པ་དེ་རྒྱས་པར་རབ་ཏུ་བཤད་དོ་ཞེས་གསུངས་སོ། །དྲན་པ་ཉེ་བར་གཞག་པ་བཞི་པོ་འདི་དག་ནི་ཞེས་བྱ་བ་ལ་ལུང་བར་མའི་གོང་བུ་ཞེས་བྱ་བ་ལ་སོགས་པ་སྡོམ་གྱི་ཚིགས་སུ་བཅད་པ་གཉིས་པའི་དུལ་དང་ཞེས་བྱ་བའི་མདོ་ལས་འདོན་ཏེ། གང་ཡང་གནས་འདི་ནི་གདུལ་བྱར་གྱུར་པའི་དགེ་སློང་འགའ་ཞིག་ཡོད་པར་གྱུར་ལ། དེ་དག་དུས་ཕྱིས་དེ་བཞིན་གཤེགས་པས་འདུལ་བར་འགྱུར་ཏེ། དགེ་སློང་དག་ཚུར་ཤོག་མལ་ཆ་དང་སྟན་ལ་མ་ཞེན་ཅིང་རྣམ་པར་དབེན་པ་དང༌། དགོན་པ་འམ། ཤིང་དྲུང་ངམ། ཁང་པ་སྟོང་བར་སོང་ལ། ཁྱོད་དགོན་པའམ། ཤིང་དྲུང་ངམ། ཁོང་པ་སྟོང་པར་འདུག་སྟེ། སྐྱིལ་མོ་ཀྲུང་བཅས་ཏེ་ལུས་དྲང་པོར་བསྲངས་ནས་དྲན་པ་མངོན་དུ་ཕྱོགས་ཏེ་གཞག་པར་གྱིས་ཤིག །ཁྱོད་འཇིག་རྟེན་གྱི་བརྣབ་སེམས་སྤངས་ཤིང་འབྲལ་བར་གྱིས་ཤིག །བརྣབ་སེམས་ཀྱིས་སེམས་ལན་མང་དུ་མི་གནས་པ་དང༌། བརྣབ་སེམས་ཡོངས་སུ་དག་པར་གྱིས་ཤིག །གནོད་སེམས་དང༌། རྨུགས་པ་དང༌། གཉིད་དང༌། རྒོད་པ་དང༌། འགྱོད་པ་དང༌། འཇིག་རྟེན་གྱི་ཐེ་ཚོམ་དང༌། ཡིད་གཉིས་དང༌། སོམ་ཉི་སྤོང་བ་དང༌། དགེ་བའི་ཆོས་རྣམས་ལ་ཐེ་ཚོམ་ལས་སེམས་དག་པར་གྱིས་ཤིག །སྒྲིབ་པ་ལྔ་པོ་སེམས་ཉེ་བར་ཉོན་མོངས་པར་བྱེད་པ། ཤེས་རབ་ཉམ་ཆུང་བར་བྱེད་པ་གེགས་ཀྱི་ཕྱོགས་མྱ་ངན་ལས་འདས་པ་མངོན་པར་མི་སྒྲུབ་པ་སྤངས་ཤིང༌། བརྟུན་
པ་ཤེས་བཞིན་ཅན་དྲན་པ་དང་ལྡན་པ་འཇིག་རྟེན་གྱི་བརྣབ་སེམས་དང་ཡིད་མི་བདེ་བ་བསལ་ཏེ། ནང་གི་ལུས་ལ་ལུས་ཀྱི་རྗེས་སུ་ལྟ་བ་དང༌། བརྟུན་པ་ཤེས་བཞིན་ཅན་དྲན་པ་དང་ལྡན་པ་འཇིག་རྟེན་གྱི་བརྣབ་སེམས་དང་ཡིད་མི་བདེ་བ་རྣམ་པར་བསལ་ཏེ། ཕྱིའི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་དང༌། ནང་གི་ཚོར་བ་དང༌། ཕྱིའི་ཚོར་བ་དང༌། ནང་དང་ཕྱིའི་ཚོར་བ་དང༌། ནང་གི་སེམས་དང༌། ཕྱིའི་སེམས་དང༌། ནང་དང་ཕྱིའི་སེམས་དང༌། བརྟུན་པ་ཤེས་བཞིན་ཅན་དྲན་པ་དང་ལྡན་པ་འཇིག་རྟེན་གྱི་བརྣབ་སེམས་དང་ཡིད་མི་བདེ་བ་རྣམ་པར་སྤངས་ཏེ། ནང་གི་ཆོས་དང། ཕྱིའི་ཆོས་དང༌། ཕྱི་དང་ནང་གི་ཆོས་རྣམས་ལ་ཆོས་ཀྱི་རྗེས་སུ་ལྟ་ཞིང་དྲན་པ་ཉེ་བར་གཞག་པ་བཞི་པོ་འདི་དག་དེའི་སེམས་ཀྱིས་ཉེ་བར་འདོགས་པ་ཡིན་ཏེ། ཞེན་པ་ལ་བརྟེན་པའི་ཚུལ་ཁྲིམས་མངོན་པར་བསལ་བའི་ཕྱིར་དང༌། ཞེན་པ་ལ་བརྟེན་པའི་ཀུན་དུ་རྟོག་པ་རྣམས་བསལ་བར་བྱ་བའི་ཕྱིར་དང༌། ཞེན་པ་ལ་བརྟེན་པའི་རིམས་ནད་དང༌། ངལ་བ་དང་འབད་པ་རྣམས་སོ་སོར་དགག་པར་བྱ་བའི་ཕྱིར་དང༌། དམ་པའི་ཆོས་ལ་མངོན་པར་དགའ་ཞིང་འཕགས་པ་དགྱེས་པའི་ཚུལ་ཁྲིམས་ལ་ཡང་དག་པར་བསྐུལ་བའི་ཕྱིར་སྲུང་བར་འགྱུར་ཏེ། དཔེར་ན་གླང་པོ་མ་དུལ་བ་འདུལ་མཁན་གྱིས་ཤིང་སྡོང་པོ་ཆེན་པོ་རྩ་བ་ས་ལ་བསྣུབས་ཏེ། དགོན་པའི་གླང་པོ་ཆེ་དགོན་པའི་རང་བཞིན་བསལ་བར་བྱ་བའི་ཕྱིར་དང༌། དགོན་པ་དྲན་པའི་རྣམ་པར་རྟོག་པ་བསལ་བར་བྱ་བའི་ཕྱིར་དང༌། དགོན་པའི་ནད་དང་ངལ་བ་དང་འཁྲུག་པ་བསལ་བར་བྱ་བའི་ཕྱིར་དང༌། གྲོང་ལ་མངོན་པར་དགའ་བ་དང་མི་ལ་དགའ་བའི་ངང་ཚུལ་ལ་ཡང་དག་པར་བསྐུལ་བར་བྱ་བའི་ཕྱིར་གྲེ་བ་ལེགས་པར་འཆིང་བར་བྱེད་དོ། །དེ་བཞིན་དུ་དྲན་པ་ཉེ་བར་གཞག་པ་བཞི་པོ་འདི་དག་ནི་དེའི་སེམས་ཀྱི་ཉེ་བར་འདོགས་པ་སྟེ། ཇི་སྲིད་དུ་ཞེན་པ་ལ་བརྟེན་པའི་ཚུལ་ཁྲིམས་མངོན་པར་བསལ་བར་བྱ་བའི་ཕྱིར་དང༌། ཞེན་པ་ལ་བརྟེན་པའི་དྲན་པའི་ཀུན་དུ་རྟོག་པ་རྣམས་བསལ་བར་བྱ་བའི་ཕྱིར་དང༌། ཞེན་པ་ལ་བརྟེན་པའི་རིམས་ནད་དང་ངལ་བ་དང་འཁྲུག་པ་རྣམས་བསལ་བར་བྱ་བའི་ཕྱིར་དང༌། དམ་པའི་ཆོས་ལ་མངོན་པར་དགའ་བ་དང༌། འཕགས་པ་དགྱེས་པའི་ཚུལ་ཁྲིམས་ལ་ཡང་དག་པར་བསྐུལ་བར་བྱ་བའི་ཕྱིར་དྲན་པ་ཉེ་བར་གཞག་པ་བཞི་པོ་འདི་དག་ནི་དེའི་
སེམས་ཀྱིས་ཉེ་བར་འདོགས་པར་འགྱུར་རོ་ཞེས་གསུངས་སོ། །འདི་ལྟར་འཕགས་པའི་ལམ་ཡན་ལག་བརྒྱད་བསྒོམ་པ་ཡོངས་སུ་རྫོགས་པར་གྱུར་ན་ཞེས་བྱ་བ་ལ། སྐྱེ་མཆེད་དྲུག་གི་ཚོགས་ཆེན་པོའི་མདོ་ལས་སྐྱེ་མཆེད་དྲུག་གི་སྡོམ་གྱི་ཚིགས་སུ་བཅད་པ་གཉིས་པ་ལས་འདོན་ཏེ། །དགའ་དང་དགའ་བོ་ལ་གདམས་དང༌། །སྡོམ་དང་ཡོངས་སུ་ཉམས་པ་ཅན། །དབང་པོ་མཐའ་དང་ཐོགས་པ་དང༌། །མཽད་གལ་ཡ་ན་ཕྱི་མ་སྟེ། །དྲུག་ཚན་དྲུག་དང་སྐྱེ་མཆེད་དྲུག །མི་ཉིད་དགའ་བ་ཐ་མ་ཡིན། །ཞེས་བྱ་བའི་སྡོམ་དུ་བསྟན་པ་མཛོད་ཀྱི་གནས་བཞི་པ་འདི་ཉིད་དུ། རྣམ་གསུམ་དྲི་མེད་གཟུགས་གསུངས་དང༌། །འཕེལ་དང་མ་བྱས་ལམ་སོགས་ཕྱིར། །ཞེས་བྱ་བར་བསྟན་ཏེ། འོ་ན་ཇི་སྐད་དུ་འདི་ལྟར་ཤེས་ཤིང་འདི་ལྟར་མཐོང་བ་ཞེས་བྱ་བར་བྲིས་པར་བལྟ་བར་བྱའོ། །ཡང་དགེ་སློང་ཡང་དག་པ་ཇི་ལྟ་བ་བཞིན་གྱི་ཚིག་བརྗོད་པ་ཞེས་བྱ་བ་འདི་ནི་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དེ་ནས་དགེ་སློང་གཞན་ཞིག་གཅིག་པུ་དབེན་པར་གྱུར་པ་ན། ནང་དུ་ཡང་དག་འཇོག་ལ་གནས་པ་ན་སེམས་ལ་སེམས་ཀྱིས་རྣམ་པར་རྟོག་པ་འདི་ལྟ་བུ་དག་སྐྱེས་ཏེ། ཇི་ལྟར་ཤེས་ཤིང་ཇི་ལྟར་མཐོང་ན་དགེ་སློང་མཐོང་བ་རྣམ་པར་དག་པར་འགྱུར། །དེ་ནས་དགེ་སློང་དེ་དགོངས་ཀ་ནང་དུ་ཡང་དག་འཇོག་ལས་ལངས་ཏེ། དགེ་སློང་གཞན་ཞིག་གི་དྲུང་དུ་ཉེ་བར་སོང་སྟེ། ཉེ་བར་སོང་ནས་དེས་དགེ་སློང་དེ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཇི་ལྟར་ཤེས་ཤིང་མཐོང་ན་དགེ་སློང་མཐོང་བ་ཤིན་ཏུ་རྣམ་པར་དག་པར་འགྱུར། ཚེ་དང་ལྡན་པ་དགེ་སློང་རེག་པའི་སྐྱེ་མཆེད་དྲུག་རྣམས་ཀྱི་ཀུན་འབྱུང་བ་དང༌། མི་སྣང་བ་དང༌། རོ་མྱང་བ་དང༌། ཉེས་དམིགས་དང༌། ངེས་པར་འབྱུང་བ་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་མཐོང་བར་འགྱུར་ན། ཚེ་དང་ལྡན་པ་འདི་ལྟར་ཤེས་ཤིང་འདི་ལྟར་མཐོང་ན་དགེ་སློང་མཐོང་བ་ཤིན་ཏུ་རྣམ་པར་དག་པར་འགྱུར་རོ། །དེ་ནས་དགེ་སློང་དེ་དགེ་སློང་དེའི་དྲི་བ་ལུང་བསྟན་པས་མ་མགུ་ནས་དགེ་སློང་གཞན་ཞིག་གི་དྲུང་དུ་ཉེ་བར་སོང་སྟེ། ཉེ་བར་སོང་ནས་དེས་དགེ་སློང་གཞན་དེ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དགེ་སློང་ཇི་ལྟར་ཤེས་ཤིང་ཇི་ལྟར་མཐོང་ན་དགེ་སློང་མཐོང་བ་ཤིན་ཏུ་རྣམ་པར་དག་པར་འགྱུར། ཚེ་དང་ལྡན་པ་གང་ཁམས་དྲུག་པོ་རྣམས་
ཀྱི་ཀུན་འབྱུང་བ་དང༌། མི་སྣང་བ་དང༌། རོ་མྱང་བ་དང༌། ཉེས་དམིགས་དང༌། ངེས་པར་འབྱུང་བ་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པར་གྱུར་པ་སྟེ། འདི་ལྟར་མཐོང་ན་དགེ་སློང་མཐོང་བ་ཤིན་ཏུ་རྣམ་པར་དག་པར་འགྱུར་རོ། །དེ་ནས་དགེ་སློང་དེ་དགེ་སློང་དེའི་དྲིས་པ་ལུང་བསྟན་པས་མ་མགུ་ནས་ཞེས་བྱ་བ་ནས། སྔ་མ་བཞིན་དུ་ཚེ་དང་ལྡན་པ་ཇི་ལྟར་ཤེས་ཤིང་ཇི་ལྟར་མཐོང་ན་དགེ་སློང་མཐོང་བ་ཤིན་ཏུ་རྣམ་པར་དག་པར་འགྱུར། ཚེ་དང་ལྡན་པ་ཟས་རྣམ་པ་བཞི་རྣམས་ཀྱི་ཀུན་འབྱུང་བ་དང༌། མི་སྣང་བ་དང༌། རོ་མྱང་བ་དང༌། ཉེས་དམིགས་དང༌། ངེས་པར་འབྱུང་བ་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་མཐོང་བར་འགྱུར་བ་སྟེ། འདི་ལྟར་མཐོང་ན་དགེ་སློང་མཐོང་བ་ཤིན་ཏུ་རྣམ་པར་དག་པར་འགྱུར་རོ། །དེ་ནས་དགེ་སློང་དེ་དགེ་སློང་དེའི་དྲི་བ་ལུང་བསྟན་པས་ཀྱང་མ་མགུ་ནས་ཞེས་བྱ་བ་ནས། ཚེ་དང་ལྡན་པ་ཇི་ལྟར་ཤེས་ཤིང་ཇི་ལྟར་མཐོང་ན་དགེ་སློང་མཐོང་བ་ཤིན་ཏུ་རྣམ་པར་དག་པར་འགྱུར་ཞེས་བྱ་བའི་བར་དུ་སྟེ། ཚེ་དང་ལྡན་པ་ཉེ་བར་ལེན་པའི་ཕུང་པོ་ལྔ་རྣམས་ལ་ནང་དུ་མཐོང་བར་གྱུར་ཅིང༌། འབྲས་དང༌། ཟུག་རྔུ་དང༌། གནོད་པ་དང༌། མི་རྟག་པ་དང༌། སྡུག་བསྔལ་བ་དང༌། སྟོང་པ་དང༌། བདག་མེད་པར་མཐོང་བར་གྱུར་པ་སྟེ། འདི་ལྟར་མཐོང་ན་དགེ་སློང་མཐོང་བ་ཤིན་ཏུ་རྣམ་པར་དག་པར་འགྱུར་རོ། །དེ་ནས་དགེ་སློང་དེ་དགེ་སློང་དེའི་དྲི་བ་ལུང་བསྟན་པས་ཀྱང་མ་མགུ་ནས་བཅོམ་ལྡན་འདས་གང་ན་བ་དེར་ཉེ་བར་སོང་སྟེ་ཞེས་བྱ་བ་ནས། ཕྱོགས་གཅིག་ཏུ་འདུག་གོ་ཞེས་བྱ་བའི་བར་དུ་སྟེ། དགེ་སློང་དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་འདི་ན་གཅིག་བུ་དབེན་པར་གྱུར་པ་ན་ནང་དུ་ཡང་དག་འཇོག་ལ་གནས་པ་ན་སེམས་ལ་སེམས་ཀྱིས་རྣམ་པར་རྟོག་པ་འདི་ལྟ་བུ་དག་སྐྱེས་ཏེ་ཞེས་བྱ་བ་ནས། སྔ་མ་བཞིན་དུ་ཇི་ལྟར་ཤེས་ཤིང་ཇི་ལྟར་མཐོང་ན་དགེ་སློང་མཐོང་བ་ཤིན་ཏུ་རྣམ་པར་དག་པར་འགྱུར་ཞེས་བྱ་བའི་བར་དུ་སྟེ། བདག་དགོངས་ཀ་ནང་དུ་ཡང་དག་འཇོག་ལས་ལངས་ནས་དགེ་སློང་གཞན་ཞིག་གི་དྲུང་དུ་ཉེ་བར་སོང་སྟེ་ཉེ་བར་སོང་ནས་བདག་གིས་དགེ་སློང་དེ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཇི་ལྟར་ཤེས་ཤིང་ཇི་ལྟར་མཐོང་ན་དགེ་སློང་མཐོང་བ་ཤིན་ཏུ་རྣམ་པར་དག་
པར་འགྱུར། དེས་སྨྲས་པ། ཚེ་དང་ལྡན་པ་གང་ཡང་རེག་པའི་སྐྱེ་མཆེད་དྲུག་པོ་རྣམས་ཀྱི་ཀུན་འབྱུང་བ་དང་ཞེས་བྱ་བ་ནས། སྔ་མ་བཞིན་དུ་རྒྱས་པར་དགེ་སློང་དེའི་དྲི་བ་ལུང་བསྟན་པས་བདག་མ་མགུ་ནས་ཞེས་བྱ་བའི་བར་དུ་སྟེ། བཅོམ་ལྡན་འདས་གང་ན་བ་དེར་ཉེ་བར་འོངས་ཤིང་ཉེ་བར་འོངས་ནས། བཙུན་པ་བཅོམ་ལྡན་འདས་ལ་བདག་དོན་འདི་ཉིད་ཡོངས་སུ་འདྲི་སྟེ། བཙུན་བ་ཇི་ལྟར་ཤེས་ཤིང་ཇི་ལྟར་མཐོང་ན་དགེ་སློང་མཐོང་བ་ཤིན་ཏུ་རྣམ་པར་དག་པར་འགྱུར། དགེ་སློང་སྔོན་བྱུང་བ་ཤིང་མྱ་ངན་འཚང་སྔོན་མཐོང་ཞིང་ཐོས་པར་གྱུར་པའི་སྐྱེས་བུ་ཞིག་ཡོད་པར་གྱུར་ལ། དེ་ནས་སྐྱེས་བུ་དེ་ཤིང་མྱ་ངན་འཚང་མཐོང་བའི་སྐྱེས་བུ་གཞན་ཞིག་གི་དྲུང་དུ་ཉེ་བར་སོང་སྟེ། ཉེ་བར་སོང་ནས་མྱ་ངན་འཚང་མཐོང་བའི་སྐྱེས་བུ་དེ་ལ་འདི་སྐད་ཅེས་སྨྲས་སོ། །ཀྱེ་སྐྱེས་བུ་ཁྱོད་ཀྱིས་མྱ་ངན་འཚང་ཤེས་སམ། ཀྱེ་སྐྱེས་བུ་བདག་གིས་མྱ་ངན་འཚང་ཤེས་སོ། །ཀྱེ་སྐྱེས་བུ་མྱ་ངན་འཚང་ཇི་ལྟ་བུ་ཞིག་ཀྱེ་སྐྱེས་བུ་ཤིང་མྱ་ངན་འཚོང་ནི་སོལ་བ་ལྟར་ཁ་དོག་ནག་པ་སྟེ། དཔེར་ན་ཀ་བ་ཚིག་པ་ལྟ་བུའོ། །དགེ་སློང་དེའི་ཚེ་ན་ཤིང་མྱ་ངན་འཚང་སོལ་བ་ལྟར་ཁ་དོག་གནག་ཅིང་ཀ་བ་ཚིག་པ་ལྟ་བུ་ཡིན་ནོ། །དེ་ནས་སྐྱེས་བུ་དེ་སྐྱེས་བུ་དེའི་མྱ་ངན་འཚང་དྲི་བ་ལུང་བསྟན་པ་ལ་མ་མགུ་ནས། ཤིང་མྱ་ངན་འཚང་མཐོང་བའི་སྐྱེས་བུ་གཞན་ཞིག་གི་དྲུང་དུ་ཉེ་བར་སོང་སྟེ། ཉེ་བར་སོང་ནས་ཞེས་བྱ་བ་ནས་སྔ་མ་བཞིན་དུ་ཀྱེ་སྐྱེས་བུ་ཤིང་མྱ་ངན་འཚང་ཇི་ལྟ་བུ་ཞིག །ཀྱེ་སྐྱེས་བུ་ཤིང་མྱ་ངན་འཚང་ནི་དམར་ཞིང་ཁ་དོག་དམར་བའི་ཡལ་ག་འཕྱང་བ་སྟེ། དཔེར་ན་ཤའི་གོང་བུ་ལྟ་བུའོ། །དེ་ནས་སྐྱེས་བུ་དེ་སྐྱེས་བུ་དེའི་དྲི་བ་ལུང་བསྟན་པས་མ་མགུ་ནས་ཞེས་བྱ་བ་ནས་སྔ་མ་བཞིན་དུ། ཀྱེ་སྐྱེས་བུ་ཤིང་མྱ་ངན་འཚང་ཇི་ལྟ་བུ་ཞིག །ཀྱེ་སྐྱེས་བུ་ཤིང་མྱ་ངན་འཚང་ནི་སེར་ཞིང་སེར་བའི་འདབ་མ་མངོན་པར་གྲུབ་པ་སྟེ། དཔེར་ན་ཤི་རི་ཤ་ལྟ་བུའོ། །དེའི་ཚེ་ན་ཤིང་མྱ་ངན་འཚང་སེར་ཞིང་སེར་བའི་འདབ་མ་མངོན་པར་གྲུབ་པ་སྟེ། དཔེར་ན་ཤི་རི་ཤ་ལྟ་བུ་ཡིན་ནོ། །དེ་ནས་སྐྱེས་བུ་དེ་སྐྱེས་བུ་དེའི་དྲི་བ་ལུང་བསྟན་པས་ཀྱང་མ་མགུ་ནས་ཞེས་བྱ་བ་ནས་སྔ་མ་བཞིན་དུ། ཀྱེ་སྐྱེས་བུ་མྱ་ངན་འཚང་ཇི་ལྟ་བུ་ཞིག །ཀྱེ་སྐྱེས་བུ་ཤིང་མྱ་ངན་འཚང་ནི་འདབ་མ་སྐྱེས་པ་དག་འདབ་མ་དཀར་པོ་དང༌། འདབ་མ་མཉེན་ཞིང་རྒྱ་ཆེ་བ་ཡིན་
ཏེ། དཔེར་ན་ནྱ་གྲོ་དྷ་ལྟ་བུ་ཡིན་ནོ། །དགེ་སློང་དེའི་ཚེ་ན་ཤིང་མྱ་ངན་འཚང་འདབ་མ་སྐྱེས་པ་དག་འདབ་མ་དཀར་པོ་དང་འདབ་མ་མཉེན་ཞིང་རྒྱ་ཆེ་བ་ནྱ་གྲོ་དྷ་ལྟ་བུ་ཡིན་ནོ། །དེ་ནས་སྐྱེས་བུ་དེ་སྐྱེས་བུ་དེའི་ཤིང་མྱ་ངན་འཚང་དྲི་བ་ལུང་བསྟན་པས་ཀྱང་མ་མགུ་ནས་གང་ན་ཤིང་མྱ་ངན་འཚང་མཐོང་བའི་སྐྱེས་བུ་ཡོད་པ་དེ་དང་དེར་དྲི་བ་ལུང་བསྟན་པའི་ཕྱིར་འགྲོ་བར་བྱེད་དོ། །དགེ་སློང་དེ་བཞིན་དུ་རིགས་ཀྱི་བུ་དེ་དག་གིས་གཅིག་པུ་དབེན་པ་བག་ཡོད་པས་གཏུགས་པས་བདག་ལ་ཕན་པའི་བདག་ཉིད་དུ་གནས་ཏེ། ཇི་ལྟ་ཇི་ལྟར་ཉེ་བར་ལེན་པ་མེད་པར་ཟག་པ་ལས་སེམས་རྣམ་པར་གྲོལ་བར་གྱུར་པ་དེ་ལྟ་དེ་ལྟར་ལུང་བསྟན་པར་བྱས་སོ། །དེས་ན་དགེ་སློང་དཔེ་ཉོན་ཅིག་དང༌། སྐྱེས་བུ་མཁས་པ་རྣམས་ལ་དཔེས་རྣམ་པར་བཤད་ན་དོན་ཤེས་པར་འགྱུར་རོ། །དགེ་སློང་དཔེར་ན་འདི་ནས་ཕྱོགས་གཅིག་ན་གྲོང་ཁྱེར་རྩིག་པ་དང༌། ར་བ་བརྟན་པོས་བསྐོར་བ། ཤིན་ཏུ་རྣམ་པར་ཕྱེ་བའི་སྲང་བཞི་དང་ལྡན་པ། སྒོ་བཞིར་སྒོ་སྲུང་གི་སྐྱེས་བུ་མཁས་ཤིང་གསལ་བ་དེར་འགྲོ་བ་དང་འོང་བ་དཔྱོད་པའི་ཤེས་རབ་དང་ལྡན་པ། ངོ་ཤེས་པ་གཏོང་ཞིང་ངོ་མི་ཤེས་པ་འགེགས་པར་བྱེད་པ་དག་གནས་པར་གྱུར་ཅིང༌། སྲང་གི་དབུས་ན་གྲོང་ཁྱེར་གྱི་བདག་པོ་གནས་པར་གྱུར་ལ། ཤར་ཕྱོགས་ནས་ཕོ་ཉ་གཉིས་ཤིག་འོངས་ཏེ་ཤར་ཕྱོགས་ཀྱི་སྒོ་སྲུང་གང་ན་བ་དེར་ཉེ་བར་སོང་སྟེ་ཉེ་བར་སོང་ནས་ཤར་ཕྱོགས་ཀྱི་སྒོ་སྲུང་གི་སྐྱེས་བུ་ལ་འདི་སྐད་དུ། ཀྱེ་སྐྱེས་བུ་གྲོང་ཁྱེར་གྱི་བདག་པོ་གང་ན་འདུག །ཀྱེ་སྐྱེས་བུ་གྲོང་ཁྱེར་གྱི་བདག་པོ་སྲང་གི་དབུས་འདི་ན་འདུག་གོ །དེ་ནས་ཕོ་ཉ་གཉིས་པ་དེ་དག་གྲོང་ཁྱེར་གྱི་བདག་པོ་གང་ན་བ་དེར་ཉེ་བར་སོང་སྟེ། ཉེ་བར་སོང་ནས་གྲོང་ཁྱེར་གྱི་བདག་པོ་ལ་ཡང་དག་པ་ཇི་ལྟ་བ་བཞིན་གྱི་ཚིག་བརྗོད་ཅིང༌། ཇི་ལྟར་རྟོགས་པའི་ལམ་གྱིས་འཇུག་གོ །དེ་བཞིན་དུ་ལྷོ་དང་ནུབ་དང་བྱང་ཕྱོགས་ནས་ཕོ་ཉ་གཉིས་ཤིག་འོངས་ཏེ། བྱང་ཕྱོགས་ཀྱི་སྒོ་སྲུང་གི་སྐྱེས་བུ་གང་ན་བ་དེར་ཉེ་བར་སོང་སྟེ། ཉེ་བར་སོང་ནས་བྱང་ཕྱོགས་ཀྱི་སྒོ་སྲུང་གི་སྐྱེས་བུ་ལ་འདི་སྐད་དུ་ཀྱེ་སྐྱེས་བུ་གྲོང་ཁྱེར་གྱི་བདག་པོ་གང་ན་འདུག །ཀྱེ་སྐྱེས་བུ་གྲོང་ཁྱེར་གྱི་བདག་པོ་སྲང་གི་དབུས་འདི་ན་འདུག་གོ །དེ་ནས་ཕོ་ཉ་གཉིས་པོ་དེ་དག་གྲོང་ཁྱེར་
གྱི་བདག་པོ་གང་ན་བ་དེར་ཉེ་བར་སོང་སྟེ། ཉེ་བར་སོང་ནས་གྲོང་ཁྱེར་གྱི་བདག་པོ་ལ་ཡང་དག་པ་ཇི་ལྟ་བ་བཞིན་གྱི་ཚིག་བརྗོད་ཅིང་ཇི་ལྟར་རྟོགས་པའི་ལམ་གྱིས་འཇུག་གོ །དགེ་སློང་འདི་ནི་དཔེར་བྱས་པ་སྟེ། ཇི་སྲིད་དུ་དོན་ཤེས་པར་བྱ་བའི་ཕྱིར་དཔེར་བྱས་པ་ཡིན་ལ་དོན་ནི་འདི་ལྟར་བལྟ་བར་བྱ་སྟེ། གྲོང་ཁྱེར་ཞེས་བྱ་བ་འདི་ནི་གཟུགས་ཅན་རགས་པ་འབྱུང་བ་ཆེན་པོ་བཞིའི་རྒྱུ་ལས་བྱུང་བ་ཕ་དང་མའི་མི་གཙང་བ་ལས་སྐྱེས་ཤིང་འབྲས་ཆན་དང་ཟན་དྲོན་གྱིས་གསོས་པའི་ལུས་དེའི་ཚིག་བླ་དགས་ཏེ། རྟག་ཏུ་བཀྲུ་བ་དང་ཕྱི་བ་དང་ཡོངས་སུ་འཇིག་པའི་ཆོས་ཅན་གྱི་ཚིག་བླ་དགས་སོ། །རྩིག་པ་དང་ར་བ་ཞེས་བྱ་བ་འདི་ནི་ཡང་དག་པའི་ལྟ་བའི་ཚིག་བླ་དགས་སོ། །ཤིན་ཏུ་རྣམ་པར་ཕྱེ་བའི་སྲང་བཞི་དང་ལྡན་ཞེས་བྱ་བ་འདི་ནི་ནང་དང་ཕྱིའི་སྐྱེ་མཆེད་དྲུག་རྣམས་ཀྱི་ཚིག་བླ་དགས་སོ། །སྒོ་བཞི་ཞེས་བྱ་བ་འདི་ནི་རྣམ་པར་ཤེས་པ་གནས་པ་བཞིའི་ཚིག་བླ་དགས་སོ། །སྒོ་སྲུང་གི་སྐྱེས་བུ་ཞེས་བྱ་བ་ནི་ལུས་སུ་གཏོགས་པའི་དྲན་པའི་ཚིག་བླ་དགས་སོ། །གྲོང་ཁྱེར་གྱི་བདག་པོ་ཞེས་བྱ་བ་འདི་ནི་ཉེ་བར་ལེན་པ་དང་བཅས་པའི་རྣམ་པར་ཤེས་པའི་ཚིག་བླ་དགས་སོ། །ཕོ་ཉ་གཉིས་ཞེས་བྱ་བ་འདི་ནི་ཞི་གནས་དང་ལྷག་མཐོང་གི་ཚིག་བླ་དགས་སོ། །ཡང་དག་པ་ཇི་ལྟ་བ་བཞིན་གྱི་ཚིག་བརྗོད་པ་ཞེས་བྱ་བ་འདི་ནི་འཕགས་པའི་བདེན་པ་བཞིའི་ཚིག་བླ་དགས་སོ། །ཇི་ལྟར་རྟོགས་པའི་ལམ་གྱིས་འཇུག་ཅེས་བྱ་བ་འདི་ནི་འཕགས་པའི་ལམ་ཡན་ལག་བརྒྱད་པའི་ཚིག་བླ་དགས་སོ། །དགེ་སློང་གང་ཡང་སྟོན་པས་ཉན་ཐོས་རྣམས་ལ་བྱ་བ་རྗེས་སུ་བརྩེ་བ་དང༌། སྙིང་བརྩེ་བ་དང༌། དོན་དུ་འདོད་པ་དང༌། ཕན་པར་འདོད་པ་དང༌། སྟོན་པས་ཉན་ཐོས་རྣམས་ལ་བྱ་བ་དེས་ངས་བྱས་ཟིན་གྱི། ད་ནི་ཁྱེད་ཅག་གི་བྱ་བ་དགོན་བ་དང༌། ཤིང་དྲུང་དང༌། ཁང་པ་སྟོང་པ་དང༌། རིའི་ཚང་ཚིང་དང༌། རིའི་ཕུག་དང༌། རྩྭ་དང༌། ལོ་མའི་སྤྱིལ་བུ་དང༌། བླ་གབ་མེད་པ་དང༌། དུར་ཁྲོད་དུ་བས་མཐའི་གནས་མལ་ལ་བརྟེན་ནས་བསྒོམ་པར་བྱ་སྟེ། དགེ་སློང་བག་མེད་པར་མ་གྱུར་ཅིག་ཕྱིས་འགྱོད་པར་གྱུར་ཏ་རེ། འདི་ནི་དའི་རྗེས་སུ་བསྟན་པ་ཡིན་ནོ་ཞེས་གསུངས་སོ། །སློབ་པ་ནི་ཡན་ལག་བརྒྱད་དང་ལྡན་ནོ་ཞེས་བྱ་བ་ལ། བཅོམ་ལྡན་འདས་
ཀོ་རུ་བ་འདུལ་བ་ཞེས་བྱ་བའི་གྲོང་ཁྱེར་ན་བཞུགས་ཏེ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བོས་ཏེ། དགེ་སློང་དག་སེམས་ཅན་རྣམས་ཡོངས་སུ་དག་པར་བྱེད་ཅིང་མྱ་ངན་དང་ཉེ་བར་འཚེ་བ་ཐམས་ཅད་ལས་ཡང་དག་པར་འདའ་བ་དང༌། སྡུག་བསྔལ་དང་ཡིད་མི་བདེ་བ་ནུབ་པར་བྱེད་པའི་ཐེག་པ་ནི་གཅིག་ཁོ་ན་སྟེ། འདི་ལྟར་ཡང་དག་པའི་ཏིང་ངེ་འཛིན་ཏོ། །དགེ་སློང་དག་འཕགས་པའི་ལམ་ཡན་ལག་བདུན་པོ་འདི་དག་ནི་ཡང་དག་པའི་ཏིང་ངེ་འཛིན་གྱི་རྒྱུ་དང་ཡན་ལག་ཏུ་གྱུར་པ་སྟེ། བདུན་གང་ཞེ་ན། འདི་ལྟ་སྟེ། ཡང་དག་པའི་ལྟ་བ་དང༌། ཡང་དག་པའི་རྟོག་པ་དང༌། ཡང་དག་པའི་ངག་དང༌། ཡང་དག་པའི་ལས་ཀྱི་མཐའ་དང༌། ཡང་དག་པའི་འཚོ་བ་དང༌། ཡང་དག་པའི་རྩོལ་བ་དང༌། ཡང་དག་པའི་དྲན་པ་སྟེ། དགེ་སློང་དག་འཕགས་པའི་ལམ་ཡན་ལག་བདུན་པོ་འདི་རྣམ་སྐྱིས་ཡོངས་སུ་སྦྱངས་ཤིང་ཡོངས་སུ་སྦྱང་བ་བྱས་པས་སེམས་རྩེ་གཅིག་པར་གྱུར་པ་འདི་ནི་ཡང་དག་པའི་ཏིང་ངེ་འཛིན་ཞེས་བྱའོ། །རྒྱུ་དང་བཅས་ཡན་ལག་དང་བཅས་པའི་ཡང་དག་པའི་ལྟ་བ་སྔོན་དུ་འགྲོ་བ་ལས་དགེ་བའི་ཆོས་རྣམས་སྐྱེས་པར་གྱུར་ཏེ། ལོག་པར་ལྟ་བ་ལ་ལོག་པར་ལྟ་བ་ཞེས་ཡང་དག་པར་རྗེས་སུ་མཐོང་བར་གྱུར་པ་འདི་ནི་ཡང་དག་པའི་ལྟ་བའོ། །ཡང་དག་པའི་ལྟ་བ་ལ་ཡང་དག་པའི་ལྟ་བའོ་ཞེས་ཡང་དག་པར་རྗེས་སུ་མཐོང་བར་གྱུར་པ་འདི་ནི་ཡང་དག་པའི་ལྟ་བའོ། །ལོག་པར་ལྟ་བ་གང་ཞེ་ན། གང་ཞིག་མེད་པར་ལྟ་བ་སྟེ། སྦྱིན་པ་པོ་མེད་དོ། །ལེན་པ་པོ་མེད་དོ། །མཆོད་སྦྱིན་མེད་དོ། །ལེགས་པར་སྤྱད་པ་མེད་དོ། །ཉེས་པར་སྤྱད་པ་མེད་དོ། །ལེགས་པར་སྤྱད་པ་དང་ཉེས་པར་སྤྱད་པའི་ལས་རྣམས་ཀྱི་འབྲས་བུ་རྣམས་ཀྱི་རྣམ་པར་སྨིན་པ་མེད་དོ། །འཇིག་རྟེན་འདི་མེད་དོ། །འཇིག་རྟེན་ཕ་རོལ་མེད་དོ། །ཕ་མེད་དོ། །མ་མེད་དོ། །སེམས་ཅན་རྫུས་ཏེ་བྱུང་བ་རྣམས་མེད་དོ། །འཇིག་རྟེན་ན་དགྲ་བཅོམ་པ་ཡང་དག་པར་རྟོགས་ཤིང་ཡང་དག་པར་ཞུགས་པ། འཇིག་རྟེན་འདི་ན་སྟོབས་མཆོག་དང་ལྡན་པ་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །བྱེད་པ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་མཐོང་བའི་ཆོས་འདི་ཉིད་ལ་རང་ཉིད་ཀྱིས་མངོན་པར་ཤེས་པ་ཕུན་སུམ་ཚོགས་པ་མངོན་སུམ་དུ་བྱས་ནས་གནས་པ་དེ་དག་མེད་དོ། །
ཞེས་སྨྲ་བ་སྟེ། འདི་ནི་ལོག་པའི་ལྟ་བ་ཞེས་བྱའོ། །ཡང་དག་པའི་ལྟ་བ་གང་ཞེ་ན། གང་ཡང་སྦྱིན་པ་ཡོད་དོ། །ལེན་པ་ཡོད་དོ། །མཆོད་སྦྱིན་ཡོད་དོ། །ལེགས་པར་སྤྱད་པ་ཡོད་དོ། །ཉེས་པར་སྤྱད་པ་ཡོད་དོ། །ལེགས་པར་སྤྱད་པ་དང༌། ཉེས་པར་སྤྱད་པའི་ལས་ཀྱི་འབྲས་བུ་རྣམ་པར་སྨིན་པ་ཡོད་དོ། །འཇིག་རྟེན་འདི་ཡོད་དོ། །འཇིག་རྟེན་ཕ་རོལ་ཡོད་དོ། །ཕ་ཡོད་དོ། །མ་ཡོད་དོ། །སེམས་ཅན་རྫུས་ཏེ་བྱུང་བ་རྣམས་ཡོད་དོ། །འཇིག་རྟེན་ན་དགྲ་བཅོམ་པ་ཡང་དག་པར་རྟོགས་ཤིང་ཡང་དག་པར་ཞུགས་པ། འཇིག་རྟེན་འདི་ན་སྟོབས་མཆོག་དང་ལྡན་པ། བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །བྱེད་པ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་མཐོང་བའི་ཆོས་འདི་ཉིད་ལ་རང་ཉིད་ཀྱིས་མངོན་པར་ཤེས་པ་ཕུན་སུམ་ཚོགས་པ་མངོན་སུམ་དུ་བྱས་ནས་གནས་པ་ཡོད་དོ་ཞེས་ལྟ་བ་སྟེ། འདི་ནི་ཡང་དག་པའི་ལྟ་བ་ཞེས་བྱ་སྟེ། ལོག་པར་ལྟ་བ་ལ་ལོག་པར་ལྟ་བའོ་ཞེས་ཡང་དག་པར་རྗེས་སུ་མཐོང་བར་གྱུར་པ་འདི་ནི་ཡང་དག་པའི་ལྟ་བ་ཡིན་ལ། ཡང་དག་པའི་ལྟ་བ་ལ་ཡང་དག་པའི་ལྟ་བའོ་ཞེས་ཡང་དག་པར་རྗེས་སུ་མཐོང་བ་འདི་ནི་ཡང་དག་པའི་ལྟ་བ་ཡིན་ནོ་ཞེས་སེམས་ཅན་རྣམས་ཀྱི་ལོག་པའི་ལྟ་བ་སྤང་བའི་ཕྱིར་འབད་པར་བྱ་ཞིང༌། ཡང་དག་པའི་ལྟ་བ་སྐྱེད་པའི་ཕྱིར་ཡང་དག་པར་རྩོལ་བར་བྱའོ། །ལོག་པར་ལྟ་བ་སྤང་བ་དང༌། ཡང་དག་པའི་ལྟ་བ་བསྒོམ་པ་ལ་དྲན་པ་དང་ལྡན་པ་འདི་ནི་ཡང་དག་པའི་དྲན་པ་ཞེས་བྱ་སྟེ། ལམ་གྱི་ཡན་ལག་གསུམ་པོ་འདི་དག་ནི་ལྟ་བ་ཉིད་ཀྱི་རྗེས་སུ་འཇུག་པ་སྟེ། འདི་ལྟ་སྟེ། ལྟ་བ་དང༌། རྩོལ་བ་དང༌། དྲན་པའོ། །དགེ་སློང་དག་དེ་ལ་ཡང་དག་པའི་ལྟ་བ་སྔོན་དུ་འགྲོ་བ་ལས་དགེ་བའི་ཆོས་རྣམས་སྐྱེ་བར་འགྱུར་རོ། །ལོག་པའི་རྟོག་པ་ལ་ལོག་པའི་རྟོག་པའོ་ཞེས་ཡང་དག་པར་རྗེས་སུ་མཐོང་བར་གྱུར་པ་འདི་ནི་ཡང་དག་པའི་ལྟ་བ་ཡིན་ལ། ཡང་དག་པའི་རྟོག་པ་ལ་ཡང་དག་པའི་རྟོག་པའོ་ཞེས་ཡང་དག་པར་རྗེས་སུ་མཐོང་བ་འདི་ནི་ཡང་དག་པའི་ལྟ་བ་ཡིན་ནོ། །ལོག་པའི་རྟོག་པ་གང་ཞེ་ན། འདི་ལྟ་སྟེ། འདོད་པའི་རྣམ་པར་རྟོག་པ་དང༌། གནོད་སེམས་ཀྱི་རྣམ་པར་རྟོག་པ་དང༌། རྣམ་པར་འཚེ་བའི་རྣམ་པར་རྟོག་
པ་སྟེ། འདི་ནི་ལོག་པའི་རྟོག་པ་ཞེས་བྱའོ། །ཡང་དག་པའི་རྟོག་པ་གང་ཞེ་ན། ཐར་པའི་རྣམ་པར་རྟོག་པ་དང༌། བརྣབ་སེམས་མེད་པའི་རྣམ་པར་རྟོག་པ་དང༌། རྣམ་པར་མི་འཚེ་བའི་རྣམ་པར་རྟོག་པ་སྟེ། འདི་ནི་ཡང་དག་པའི་རྟོག་པ་ཞེས་བྱའོ། །ལོག་པར་རྟོག་པ་ལ་ལོག་པར་རྟོག་པའོ་ཞེས་ཡང་དག་པར་རྗེས་སུ་མཐོང་བ་འདི་ནི་ཡང་དག་པའི་ལྟ་བ་ཡིན་ལ། ཡང་དག་པའི་རྟོག་པ་ལ་ཡང་དག་པའི་རྟོག་པའོ་ཞེས་མཐོང་བར་གྱུར་པ་འདི་ནི་ཡང་དག་པའི་ལྟ་བ་ཡིན་ནོ་ཞེས་སེམས་ཅན་རྣམས་ཀྱི་ལོག་པའི་ལྟ་བ་སྤང་བའི་ཕྱིར་འབད་པར་བྱ་ཞིང༌། ཡང་དག་པའི་ལྟ་བ་སྐྱེད་པའི་ཕྱིར་ཡང་དག་པའི་རྩོལ་བ་ཞེས་བྱའོ། །ལོག་པར་ལྟ་བ་སྤང་བ་དང་ཡང་དག་པའི་ལྟ་བ་བསྒོམ་པ་ལ་དྲན་པ་དང་ལྡན་པ་འདི་ནི་ཡང་དག་པའི་དྲན་པ་ཞེས་བྱ་སྟེ། ལམ་གྱི་ཡན་ལག་གསུམ་པོ་འདི་དག་ནི་ཡང་དག་པའི་རྟོག་པ་ཉིད་ཀྱི་རྗེས་སུ་འཇུག་སྟེ། འདི་ལྟ་སྟེ། ལྟ་བ་དང༌། རྩོལ་བ་དང༌། དྲན་བའོ། །དགེ་སློང་དག་དེའི་ཡང་དག་པའི་ལྟ་བ་སྔོན་དུ་འགྲོ་བ་ལས་དགེ་བའི་ཆོས་རྣམས་སྐྱེ་བར་འགྱུར་རོ། །ལོག་པའི་ངག་ལ་ལོག་པའི་ངག་གོ་ཞེས་ཡང་དག་པར་རྗེས་སུ་མཐོང་བར་གྱུར་པ་འདི་ནི་ཡང་དག་པའི་ལྟ་བ་ཡིན་ལ། ཡང་དག་པའི་ངག་ལ་ཡང་དག་པའི་ངག་གོ་ཞེས་མཐོང་བར་གྱུར་པ་གང་ཡིན་པ་འདི་ནི་ཡང་དག་པའི་ལྟ་བ་ཡིན་ནོ། །ལོག་པའི་ངག་གང་ཞེ་ན། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་མོ་དང༌། ཚིག་འཁྱལ་པ་སྟེ། འདི་དག་ནི་ལོག་པའི་ངག་ཅེས་བྱའོ། །ཡང་དག་པའི་ངག་གང་ཞེ་ན། བརྫུན་དུ་སྨྲ་བ་སྤོང་བ་དང༌། ཕྲ་མ་དང། ཚིག་རྩུབ་མོ་སྤོང་བ་དང༌། ཚིག་འཁྱལ་པ་སྤོང་བའོ། །འདི་ནི་ཡང་དག་པའི་ངག་ཅེས་བྱ་སྟེ། ལོག་པའི་ངག་ལ་ལོག་པའི་ངག་གོ་ཞེས་ཡང་དག་པར་རྗེས་སུ་མཐོང་བ་འདི་ནི་འདིའི་ཡང་དག་པའི་ལྟ་བར་འགྱུར་ལ། ཡང་དག་པའི་ངག་ལ་ཡང་དག་པའི་ངག་གོ་ཞེས་ཡང་དག་པར་རྗེས་སུ་མཐོང་བ་འདི་ནི་འདིའི་ཡང་དག་པའི་ལྟ་བར་འགྱུར་རོ། །དེ་དེ་ལྟར་ཤེས་ནས་ལོག་པའི་ལྟ་བ་སྤང་བའི་ཕྱིར་འབད་པར་བྱེད་ཅིང༌། ཡང་དག་པའི་ངག་ཉེ་བར་བསྒྲུབ་པའི་ཕྱིར་ཡང་དག་པའི་རྩོལ་བ་བྱེད་དེ། དེ་དྲན་བ་དང་ལྡན་བཞིན་དུ་ལོག་པའི་ངག་སྤང་ཞིང་ཡང་དག་པའི་ངག་སྒོམ་པར་བྱེད་པ་ནི་ཡང་
དག་པའི་དྲན་པ་སྟེ། ལམ་གྱི་ཡན་ལག་གསུམ་པ་འདི་དག་ནི་ཡང་དག་པའི་ངག་གི་རྗེས་སུ་འཇུག་པ་སྟེ། འདི་ལྟ་སྟེ། ལྟ་བ་དང༌། རྩོལ་བ་དང༌། དྲན་པའོ། །དགེ་སློང་དག་དེ་ལ་ཡང་དག་པའི་ལྟ་བ་སྔོན་དུ་འགྲོ་བ་ལས་དགེ་བའི་ཆོས་རྣམས་སྐྱེ་བར་འགྱུར་ཏེ། ལོག་པའི་ལས་ཀྱི་མཐའ་ལ་ལོག་པའི་ལས་ཀྱི་མཐའ་ཞེས་ཡང་དག་པར་རྗེས་སུ་མཐོང་བ་འདི་ནི་འདིའི་ཡང་དག་པའི་ལྟ་བར་འགྱུར་ལ། ཡང་དག་པའི་ལས་ཀྱི་མཐའ་ལ་ཡང་དག་པའི་ལས་ཀྱི་མཐའོ་ཞེས་ཡང་དག་པར་རྗེས་སུ་མཐོང་བ་འདི་ནི་ཡང་དག་པའི་ལྟ་བར་འགྱུར་ཏེ། ལོག་པའི་ལས་ཀྱི་མཐའ་གང་ཞེ་ན། སྲོག་གཅོད་པ་དང༌། མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་སྟེ། འདི་ནི་ལོག་པའི་ལས་ཀྱི་མཐའ་ཞེས་བྱའོ། །ཡང་དག་པའི་ལས་ཀྱི་མཐའ་གང་ཞེ་ན། སྲོག་གཅོད་པ་སྤོང་བ་དང༌། མ་བྱིན་པར་ལེན་པ་སྤོང་བ་དང༌། འདོད་པས་ལོག་པར་གཡེམ་པ་སྤོང་བ་སྟེ། འདི་ནི་ཡང་དག་པའི་ལས་ཀྱི་མཐའ་ཞེས་བྱའོ་ཞེས་ལོག་པའི་ལས་ཀྱི་མཐའ་ལ་ལོག་པའི་ལས་ཀྱི་མཐའོ་ཞེས་ཡང་དག་པར་རྗེས་སུ་མཐོང་བ་འདི་ནི་འདིའི་ཡང་དག་པའི་ལྟ་བར་འགྱུར་ལ། ཡང་དག་པའི་ལས་ཀྱི་མཐའ་ལ་ཡང་དག་པའི་ལས་ཀྱི་མཐའོ་ཞེས་མཐོང་བ་འདི་ནི་འདིའི་ཡང་དག་པའི་ལྟ་བར་འགྱུར་རོ། །དེ་དེ་ལྟར་ཤེས་ནས་ལོག་པའི་ལས་ཀྱི་མཐའ་སྤོང་བའི་ཕྱིར་འདབ་པར་བྱེད་ཅིང༌། ཡང་དག་པའི་ལས་ཀྱི་མཐའ་ཉེ་བར་བསྒྲུབ་པའི་ཕྱིར་ཡང་དག་པའི་རྩོལ་བ་བྱེད་ལ། དེ་དྲན་པ་དང་ལྡན་བཞིན་དུ་ལོག་པའི་ལས་ཀྱི་མཐའ་སྤོང་ཞིང་ཡང་དག་པའི་ལས་ཀྱི་མཐའ་སྒོམ་པར་བྱེད་པ་འདི་ནི་འདིའི་ཡང་དག་པའི་དྲན་པ་སྟེ། ལམ་གྱི་ཡན་ལག་གསུམ་པ་འདི་དག་ནི་ཡང་དག་པའི་ལས་ཀྱི་མཐའི་རྗེས་སུ་འཇུག་སྟེ། འདི་ལྟ་སྟེ། ལྟ་བ་དང༌། རྩོལ་བ་དང༌། དྲན་པའོ། །དགེ་སློང་དག་དེ་ལ་ཡང་དག་པའི་ལྟ་བ་སྔོན་དུ་འགྲོ་བ་ལས་དགེ་བའི་ཆོས་རྣམས་སྐྱེ་བར་འགྱུར་ཏེ། ལོག་པའི་འཚོ་བ་ལ་ལོག་པའི་འཚོ་བའོ་ཞེས་ཡང་དག་པར་རྗེས་སུ་མཐོང་བ་འདི་ནི་འདིའི་ཡང་དག་པའི་ལྟ་བར་འགྱུར་ལ། ཡང་དག་པའི་འཚོ་བ་ལ་ཡང་དག་པའི་འཚོ་བའོ་ཞེས་ཡང་དག་པར་རྗེས་སུ་མཐོང་བ་འདི་ནི་འདིའི་ཡང་དག་པའི་ལྟ་བར་འགྱུར་ཏེ། ལོག་པའི་འཚོ་བ་གང་ཞེ་ན། གང་
འདི་ན་མི་རིགས་པ་ཆོས་མ་ཡིན་པས་ཆོས་གོས་ལ་སོགས་པ་ཚོལ་བར་བྱེད་ཀྱི། ཆོས་ཀྱིས་མ་ཡིན་བ་དང༌། ཆོས་མ་ཡིན་པས་བསོད་སྙོམས་དང༌། མལ་ཆ་དང༌། སྟན་དང༌། ན་བའི་རྐྱེན་སྨན་དང༌། འཚོ་བའི་ཡོ་བྱད་དག་ཚོལ་བར་བྱེད་ཀྱི། ཆོས་ཀྱིས་མ་ཡིན་པ་སྟེ། འདི་ནི་ལོག་པའི་འཚོ་བ་ཞེས་བྱའོ། །ཡང་དག་པའི་འཚོ་བ་གང་ཞེ་ན། གང་འདི་ན་རིགས་ཤིང་ཆོས་ཀྱིས་ཆོས་གོས་ཚོལ་བར་བྱེད་ཀྱི། ཆོས་མ་ཡིན་པས་མ་ཡིན་པ་དང༌། ཆོས་ཀྱིས་བསོད་སྙོམས་དང༌། མལ་ཆ་དང༌། སྟན་དང༌། ན་བའི་རྐྱེན་སྨན་དང༌། འཚོ་བའི་ཡོ་བྱད་དག་ཚོལ་བར་བྱེད་ཀྱི། ཆོས་མ་ཡིན་པས་མ་ཡིན་པ་སྟེ། འདི་ནི་ཡང་དག་པའི་འཚོ་བ་ཞེས་བྱའོ་ཞེས་ལོག་པའི་འཚོ་བ་ལ་ལོག་པའི་འཚོ་བ་ཞེས་ཡང་དག་པར་རྗེས་སུ་མཐོང་བ་འདི་ནི་འདིའི་ཡང་དག་པའི་ལྟ་བར་འགྱུར་ལ། ཡང་དག་པའི་འཚོ་བ་ལ་ཡང་དག་པའི་འཚོ་བའོ་ཞེས་མཐོང་བ་འདི་ནི་འདིའི་ཡང་དག་པའི་ལྟ་བར་འགྱུར་རོ། །དེ་དེ་ལྟར་ཤེས་ནས་ལོག་པའི་འཚོ་བ་སྤང་བའི་ཕྱིར་འབད་པར་བྱེད་ཅིང༌། ཡང་དག་པའི་འཚོ་བ་ཉེ་བར་བསྒྲུབ་པའི་ཕྱིར་ཡང་དག་པའི་རྩོལ་བ་བྱེད་ཅིང༌། དེ་དྲན་པ་དང་ལྡན་བཞིན་དུ་ལོག་པའི་འཚོ་བ་སྤོང་ཞིང་ཡང་དག་པའི་འཚོ་བ་བསྒོམ་པ་འདི་ནི་འདིའི་ཡང་དག་པའི་དྲན་པ་སྟེ། ལམ་གྱི་ཡན་ལག་གསུམ་པ་འདི་དག་ནི་ཡང་དག་པའི་འཚོ་བའི་རྗེས་སུ་འཇུག་པ་སྟེ། འདི་ལྟ་སྟེ། ལྟ་བ་དང༌། རྩོལ་བ་དང༌། དྲན་པའོ། །དགེ་སློང་དག་དེ་ལ་ཡང་དག་པའི་ལྟ་བ་སྔོན་དུ་འགྲོ་བ་ལས་དགེ་བའི་ཆོས་རྣམས་སྐྱེ་བར་འགྱུར་ཏེ། ཡང་དག་པའི་རྩོལ་བ་གང་ཞེ་ན། འདུན་པའི་བརྩོན་འགྲུས་དང༌། མི་འདའ་བ་དང༌། ཕ་རོལ་གནོན་པ་དང༌། སྤོང་བ་དང༌། རྩོལ་བ་དང༌། མི་འགོང་བ་དང༌། ཆོག་པར་མི་འཛིན་པ་འདི་ནི་ཡང་དག་པའི་ཚོལ་བ་ཞེས་བྱའོ། །ཡང་དག་པའི་དྲན་པ་གང་ཞེ་ན། གང་ཡང་དྲན་པ་དང༌། རྗེས་སུ་དྲན་པ་དང། སོ་སོར་དྲན་པ་དང༌། མི་བརྗེད་པའི་དྲན་པ་དང༌། མི་བརྗེད་པ་དང༌། མི་རྨོངས་པ་དང༌། རབ་ཏུ་མ་རྨོངས་པ་དང༌། མ་རྨོངས་པའི་ཆོས་ཅན་དང༌། སེམས་ཀྱི་མངོན་པར་བརྗོད་པ་སྟེ། འདི་ནི་ཡང་དག་པའི་དྲན་པ་ཞེས་བྱའོ། །ཡང་དག་པའི་ཏིང་ངེ་འཛིན་གང་ཞེ་ན། གང་
ཡང་སེམས་གནས་པ་དང༌། རབ་ཏུ་གནས་པ་དང༌། མངོན་པར་གནས་པ་དང༌། རང་བཞིན་དུ་གནས་པ་དང༌། མི་གཡེང་བ་དང༌། ཡང་དག་པར་སྡུད་པ་དང༌། ཞི་གནས་དང༌། ཏིང་ངེ་འཛིན་དང༌། སེམས་རྩེ་གཅིག་པ་སྟེ། འདི་ནི་ཡང་དག་པའི་ཏིང་ངེ་འཛིན་ཞེས་བྱའོ། །དེ་ལ་ཡང་དག་པའི་ལྟ་བ་ལས་ཡང་དག་པའི་རྟོག་པ་སྐྱེ་བར་འགྱུར་ཞིང༌། ཡང་དག་པའི་ངག་དང༌། ཡང་དག་པའི་ལས་ཀྱི་མཐའ་དང༌། ཡང་དག་པའི་འཚོ་བ་དང༌། ཡང་དག་པའི་རྩོལ་བ་དང༌། ཡང་དག་པའི་དྲན་པ་དང༌། ཡང་དག་པའི་ཏིང་ངེ་འཛིན་འབྱུང་བར་འགྱུར་རོ། །དགེ་སློང་དག་སེམས་ཡང་དག་པར་མཉམ་པར་གཞག་པའི་འཕགས་པ་ཉན་ཐོས་ཐོས་པ་དང་ལྡན་པ་འདི་ལྟར་འདོད་ཆགས་དང༌། ཞེ་སྡང་དང༌། གཏི་མུག་ལས་སེམས་ཡང་དག་པར་གྲོལ་བར་འགྱུར་རོ། །དེ་ལྟར་སེམས་རྣམ་པར་གྲོལ་བའི་འཕགས་པ་ཉན་ཐོས་དག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །བྱེད་པ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་ཡང་དག་པའི་ཤེས་པར་འགྱུར་རོ། །དགེ་སློང་དག་དེ་ལ་སློབ་པའི་ལམ་ནི་ཡན་ལག་རྣམ་པ་བརྒྱད་དང་ལྡན་ལ། དགྲ་བཅོམ་པ་ཟག་པ་ཟད་པ་ཀུན་ཤེས་པ་ལ་བསྟན་པའི་མི་སློབ་པ་ནི་ཡན་ལག་བཅུ་དང་ཡང་དག་པར་ལྡན་ནོ། །ཡན་ལག་རྣམ་པ་བརྒྱད་དང་ལྡན་པའི་སློབ་པའི་ལམ་གང་ཞེ་ན། སློབ་པ་ཡང་དག་པའི་ལྟ་པ་དང་ལྡན་བ་དང༌། སློབ་པའི་ཡང་དག་པའི་རྟོག་བ་དང༌། ཡང་དག་པའི་ངག་དང༌། ཡང་དག་པའི་ལས་ཀྱི་མཐའ་དང༌། ཡང་དག་པའི་འཚོ་བ་དང༌། ཡང་དག་པའི་རྩོལ་བ་དང༌། ཡང་དག་པའི་དྲན་པ་དང༌། ཡང་དག་པའི་ཏིང་ངེ་འཛིན་དང་ཡང་དག་པར་ལྡན་པ་སྟེ། སློབ་པའི་ལམ་ནི་ཡན་ལག་བརྒྱད་པོ་འདི་དག་དང་ཡང་དག་པར་ལྡན་ནོ། །དགྲ་བཅོམ་པ་ཟག་པ་ཟད་པ་ཀུན་ཤེས་པ་ལ་བརྟེན་པའི་མི་སློབ་པའི་ཡན་ལག་བཅུ་དང་ཡང་དག་པར་ལྡན་པ་གང་ཞེ་ན། མི་སློབ་པའི་ཡང་དག་པའི་ལྟ་བ་དང་ཡང་དག་པར་ལྡན་པ་དང༌། མི་སློབ་པའི་ཡང་དག་པའི་རྟོག་པ་དང༌། ཡང་དག་པའི་ངག་དང༌། ཡང་དག་པའི་ལས་ཀྱི་མཐའ་དང༌། ཡང་དག་པའི་འཚོ་བ་དང༌། ཡང་དག་པའི་རྩོལ་བ་དང༌།
ཡང་དག་པའི་དྲན་པ་དང༌། ཡང་དག་པའི་ཏིང་ངེ་འཛིན་དང༌། ཡང་དག་པའི་རྣམ་པར་གྲོལ་བ་དང༌། མི་སློབ་པའི་ཡང་དག་པའི་ཤེས་པ་དང་ཡང་དག་པར་ལྡན་པ་སྟེ། དགྲ་བཅོམ་པ་ཟག་པ་ཟད་པ་ཀུན་ཤེས་པ་ལ་བརྟེན་པའི་མི་སློབ་པའི་ལམ་ནི་ཡན་ལག་བཅུ་པོ་འདི་དག་དང་ཡང་དག་པར་ལྡན་ནོ། །དགེ་སློང་དག་དེ་ལ་ཡང་དག་པའི་ལྟ་བས་ལོག་པའི་ལྟ་བ་སྤོང་བར་འགྱུར་ཏེ། ལོག་པའི་ལྟ་བ་ལ་བརྟེན་ནས་སྡིག་པ་མི་དགེ་བའི་ཆོས་རྣམ་པ་དུ་མ་འབྱུང་བར་འགྱུར་རོ། །ཡང་དག་པའི་ལྟ་བ་སྤངས་ནས་ཡང་དག་པའི་ལྟ་བ་ལ་བརྟེན་ནས་དགེ་བའི་ཆོས་རྣམ་པ་དུ་མ་བསྒོམ་པ་ཡོངས་སུ་རྫོགས་པར་འགྱུར་རོ། །ཡང་དག་པའི་རྟོག་པ་དང༌། ཡང་དག་པའི་ངག་དང༌། ཡང་དག་པའི་ལས་ཀྱི་མཐའ་དང༌། ཡང་དག་པའི་འཚོ་བ་དང༌། ཡང་དག་པའི་རྩོལ་བ་དང༌། ཡང་དག་པའི་དྲན་པ་དང༌། ཡང་དག་པའི་ཏིང་ངེ་འཛིན་དང༌། ཡང་དག་པའི་རྣམ་པར་གྲོལ་བ་དང༌། ཡང་དག་པའི་ཤེས་པས་ལོག་པའི་ལྟ་བ་སྤོང་བར་འགྱུར་ཏེ། ལོག་པའི་ལྟ་བ་ལ་བརྟེན་ནས་སྡིག་པ་མི་དགེ་བའི་ཆོས་རྣམ་པ་དུ་མ་འབྱུང་བར་འགྱུར་ཏེ། ཡང་དག་པའི་ཤེས་པས་སྤངས་ནས་ཡང་དག་པའི་ཤེས་པ་ལ་བརྟེན་ནས་དགེ་བའི་ཆོས་རྣམ་པ་དུ་མ་བསྒོམ་པ་ཡོངས་སུ་རྫོགས་པར་འགྱུར་རོ། །དགེ་སློང་དག་དེ་ལ་གང་ཡང་མི་དགེ་བའི་ཕྱོགས་ཀྱི་ཆོས་ཉི་ཤུ་དང༌། གང་ཡང་དགེ་བའི་ཕྱོགས་ཀྱི་ཆོས་ཉི་ཤུ་པོ་དེ་དག་གཅིག་ཏུ་བསྡམས་ནས་བཞི་བཅུ་པ་ཞེས་བྱ་བའི་ཆོས་ཀྱི་རྣམ་གྲངས་ཆེན་པོ་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་དང་བཅས་པའི་འཇིག་རྟེན་གང་གིས་ཀྱང་མ་བསྐོར་བའི་ཚངས་པའི་འཁོར་ལོ་བསྐོར་ཏོ། །དགེ་སློང་དག་གང་ཁ་ཅིག་འདི་ལྟར་ངས་བཞི་བཅུ་པ་ཆེན་པོའི་ཆོས་ཀྱི་རྣམ་གྲངས་ཆེན་པོ་བསྟན་པ་ལ་ཕྱིར་བཟློག་ཅིང་ཁྲོ་བར་བྱའོ་སྙམ་དུ་སེམས་ན་དེ་ལ་གཞན་གྱིས་ཆོས་ཀྱིས་སྨྲ་ཞིང་རྗེས་སུ་སྨྲ་བའི་སྨད་པའི་གནས་ཀྱི་ཆོས་བཅུ་འབྱུང་བར་འགྱུར་ཏེ། བཅུ་གང་ཞེ་ན། ཡང་དག་པའི་ལྟ་བ་སྨད་ཅིང་ལོག་པའི་ལྟ་བ་རྗེས་སུ་བསྔགས་ལ་གང་ཡང་དགེ་སྦྱོང་དང་བྲམ་ཟེ་ལོག་པར་ལྟ་ཞིང་ལོག་པའི་ལམ་དུ་ཞུགས་པ་དེ་དག་ཁྱེད་ཀྱིས་མཆོད་ཅིང་ཁྱེད་ཀྱིས་
བསྔགས་སོ་ཞེས་གཞན་གྱིས་ཆོས་སྨྲ་ཞིང་རྗེས་སུ་སྨྲ་བའི་སྨད་པའི་གནས་ཀྱི་ཆོས་འདི་ལྟ་བུ་དང་པོ་འོང་བར་འགྱུར་རོ། །ཡང་དག་པའི་རྟོག་པ་དང༌། ཡང་དག་པའི་ངག་དང༌། ཡང་དག་པའི་ལས་ཀྱི་མཐའ་དང༌། ཡང་དག་པའི་འཚོ་བ་དང༌། ཡང་དག་པའི་རྩོལ་བ་དང༌། ཡང་དག་པའི་དྲན་པ་དང༌། ཡང་དག་པའི་ཏིང་ངེ་འཛིན་དང༌། ཡང་དག་པའི་རྣམ་པར་གྲོལ་བ་དང༌། ཡང་དག་པའི་ཤེས་པ་སྨད་ཅིང་ལོག་པའི་ཤེས་པ་རྗེས་སུ་བསྔགས་པ་གང་ཡང་དགེ་སྦྱོང་དང་བྲམ་ཟེ་ལོག་པར་ཤེས་ཤིང་ལོག་པར་ཞུགས་པ་དེ་དག་ཁྱེད་ཀྱིས་མཆོད་ཅིང་ཁྱེད་ཀྱིས་རབ་ཏུ་བསྔགས་སོ་ཞེས་གཞན་གྱིས་ཆོས་ཀྱིས་སྨྲ་ཞིང་རྗེས་སུ་སྨྲ་བའི་སྨད་པའི་གནས་ཀྱི་ཆོས་འདི་ལྟ་བུ་བཅུ་པ་འོང་བར་འགྱུར་ཏེ། གང་ཡང་རེ་ཞིག་དགེ་སྦྱོང་དང་བྲམ་ཟེ་དུས་དང་ལོ་བགྲང་བ་མེད་པར་སྨྲ་ཞིང་རྟོག་པ་མི་དགེ་བའི་ཆོས་བྱས་ཤིང་བྱས་པ་དེ་དང་དེ་དག་ཆད་པ་དང༌། འཇིག་པ་དང་ཉམས་པར་དོགས་པ་དེ་དག་ཀྱང་བཞི་བཅུ་པའི་ཆོས་ཀྱི་རྣམ་གྲངས་ཆེན་པོ་བསྟན་པ་ལ་ཞེ་སྡང་དང་འཇིགས་པ་ལ་གཏོགས་པར་ཕྱིར་བཟློག་པ་དང་ཁྲོ་བར་བྱ་བ་མཉམ་དུ་མི་སེམས་སོ་ཞེས་གསུངས་སོ། །རྣམ་གྲོལ་གཉིས་ཞེས་བྱ་བ་ལ། ས་དང་བྱིས་པ་ཐོག་དང་ནི། །རིགས་དང་ཚུལ་ཁྲིམས་སྡུག་བསྔལ་དང༌། །ཕ་ལ་བརྟེན་ནས་འཇོམས་པ་དང༌། །ལོག་པ་ཉིད་ནི་བརྒྱད་པ་ཡིན། །ཞེས་བྱ་བ་སྡོམ་གྱི་ཚིགས་སུ་བཅད་པའི་ཕ་ལ་བརྟེན་ནས་ཞེས་བྱ་བའི་མདོ་ལས་འབྱུང་བ་མཛོད་ཀྱི་གནས་གསུམ་པ་འདི་ཉིད་དུ་རྟེན་ཅིང་འབྲེལ་པར་འབྱུང་བའི་སྐབས་སུ་ཤེས་རབ་ཉོན་མོངས་བསྟན་ཕྱིར་ཞེས་བྱ་བར་བྲིས་ཟིན་ཏོ། །འོ་ན་མདོ་ལས་སྟག་གི་བྱང་ཆུབ་ཀྱི་བུ་དག་ཅེས་བྱ་བ་ལ། ཚེ་དང་ལྡན་པ་ཀུན་དགའ་བོ་ཀྲོན་དྷི་ནས་ལྗོངས་རྒྱུ་ཞིང་རོ་ཅན་པར་ཕྱིན་ཏོ། །རོ་ཅན་གྱི་གྲོང་གི་བྱང་ཕྱོགས་ཀྱི་ཤིང་ཤ་པའི་ཚལ་ན་གནས་སོ། །དེ་ནས་རོ་ཅན་པ་དང་ཀྲོན་དྷི་པ་རྣམས་ཀྱིས་ཐུབ་པ་ཆེན་པོ་འཕགས་པ་ཀུན་དགའ་བོ་ཀྲོན་དྷི་ནས་ལྗོངས་རྒྱུ་ཞིང་རོ་ཅན་དུ་ཕྱིན་ཏོ། །རོ་ཅན་གྱི་གྲོང་གི་བྱང་ཕྱོགས་ཀྱི་ཤིང་ཤ་པའི་ཚལ་ན་གནས་སོ་ཞེས་ཐོས་ཏེ། ཐོས་ནས་འདུས་ཤིང་ཉེ་བར་འདུས། ཚོགས་ཤིང་རབ་ཏུ་ཚོགས་ཏེ་རབ་ཏུ་ཚོགས་ནས་ཚེ་དང་ལྡན་པ་ཀུན་དགའ་བོ་གང་ན་བ་དེར་ཉེ་བར་སོང་སྟེ། ཉེ་བར་སོང་ནས་འཕགས་པ་
ཀུན་དགའ་བོའི་ཞབས་ལ་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་རོ་ཅན་པ་དང་ཀྲོན་དྷི་པ་རྣམས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་སྨྲས་སོ། །སྟག་གི་བྱང་ཆུབ་ཀྱི་བུ་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས་ཡོངས་སུ་དག་པའི་གཙོ་བོ་བཞི་གསུངས་ཏེ། བཞི་གང་ཞེ་ན། ཚུལ་ཁྲིམས་ཡོངས་སུ་དག་པའི་གཙོ་བོ་དང༌། སེམས་ཡོངས་སུ་དག་པའི་གཙོ་བོ་དང༌། ལྟ་བ་ཡོངས་སུ་དག་པའི་གཙོ་བོ་དང༌། རྣམ་པར་གྲོལ་བ་ཡོངས་སུ་དག་པའི་གཙོ་བོའོ། །སྟག་གི་བྱང་ཆུབ་ཀྱི་བུ་དག་ཚུལ་ཁྲིམས་ཡོངས་སུ་དག་པའི་གཙོ་བོ་གང་ཞེ་ན། འདི་ན་འཕགས་པ་ཉན་ཐོས་ཚུལ་ཁྲིམས་དང་ལྡན་པ། སོ་སོར་ཐར་པའི་སྡོམ་པས་བསྡམས་པ། ཆོ་ག་དང་སྤྱོད་ཡུལ་ཕུན་སུམ་ཚོགས་པ། ཁ་ན་མཐོ་བ་ཕྲ་རབ་ཙམ་ལ་ཡང་འཇིགས་པར་ལྟ་བ། བསླབ་པ་ཡང་དག་པར་བླངས་པ་དག་ལ་སློབ་ཅིང་གནས་ཏེ། ཚུལ་ཁྲིམས་ཀྱི་ཕུང་པོ་མ་རྫོགས་པ་ཡོངས་སུ་རྫོགས་པར་བྱ་བ་དང༌། ཡོངས་སུ་རྫོགས་པ་རྗེས་སུ་གཟུང་བར་བྱ་བའི་ཕྱིར་བརྩོན་འགྲུས་དང༌། འབད་པ་དང༌། སྤྲོ་བ་དང༌། རྩོམ་པ་དང༌། མི་གཏོང་པར་སེམས་རབ་ཏུ་འཛིན་ཏེ། འདི་ནི་ཚུལ་ཁྲིམས་ཡོངས་སུ་དག་པའི་གཙོ་བོ་ཞེས་བྱའོ། །སྟག་གི་བྱང་ཆུབ་ཀྱི་བུ་དག་སེམས་ཡོངས་སུ་དག་པའི་གཙོ་བོ་གང་ཞེ་ན། འདི་ན་འཕགས་པ་ཉན་ཐོས་ཐོས་པ་དང་ལྡན་བ་འདོད་པ་ལས་དབེན་པ། སྡིག་པ་མི་དགེ་བའི་ཆོས་ལས་དབེན་པ་ཞེས་བྱ་བ་ནས་བསམ་གཏན་བཞི་པ་ཉེ་བར་བསྒྲུབས་ཏེ་གནས་སོ་ཞེས་བྱ་བའི་བར་དུ་སྟེ། ཏིང་ངེ་འཛིན་གྱི་ཕུང་པོ་ཡོངས་སུ་རྫོགས་པ་ཡོངས་སུ་རྫོགས་པ་དང༌། ཡོངས་སུ་རྫོགས་པ་རྗེས་སུ་གཟུང་བར་བྱ་བའི་ཕྱིར་ཞེས་བྱ་བ་ནས། འདི་ནི་སེམས་ཡོངས་སུ་དག་པའི་གཙོ་བོ་ཡིན་ནོ་ཞེས་བྱ་བའི་བར་དུའོ། །སྟག་གི་བྱང་ཆུབ་ཀྱི་བུ་དག་ལྟ་བ་ཡོངས་སུ་དག་པའི་གཙོ་བོ་གང་ཞེ་ན། འདི་ན་འཕགས་པ་ཉན་ཐོས་སྟོན་པ་འམ་ཚངས་པར་སྤྱོད་པ་བླ་མའི་གནས་ལྟ་བུ་གང་ཡང་རུང་བ་ཆོས་སྟོན་པར་བྱེད་པ་ན། ཇི་ལྟ་ཇི་ལྟར་སྟོན་པ་འམ། ཚངས་པར་སྤྱོད་པ་བླ་མའི་གནས་ལྟ་བུ་གང་ཡང་རུང་
བ་ཆོས་སྟོན་པར་བྱེད་པ་དེ་ལྟ་དེ་ལྟར་ཆོས་རྣམས་ལ་ལྷག་པར་རིག་ཅིང་ལྷག་པར་རིག་པ་དང༌། ཡང་དག་པའི་ཤེས་རབ་ཀྱིས་ཇི་ལྟ་བ་བཞིན་མཐོང་བར་འགྱུར་རོ། །ཇི་ལྟ་ཇི་ལྟར་ཆོས་རྣམས་ལྷག་པར་རིག་ཅིང་ལྷག་པར་རིག་པ་དང༌།། ཡང་དག་པའི་ཤེས་རབ་ཀྱིས་ཇི་ལྟ་བ་བཞིན་དུ་མཐོང་བ་དེ་ལྟ་དེ་ལྟར་དེ་ཆོས་རྣམས་ལ་དོན་གྱི་ཤུགས་རྙེད་པ་དང༌། ཆོས་ཀྱི་ཤུགས་རྙེད་པ་དང༌། སྟོན་པ་ལ་རབ་ཏུ་དད་པར་འགྱུར་རོ། །གཞན་ཡང་འདི་ན་འཕགས་པ་ཉན་ཐོས་སྟོན་པ་འམ་ཚངས་པར་སྤྱོད་པ་བླ་མའི་གནས་ལྟ་བུ་གང་ཡང་རུང་བ་དག་ཆོས་སྟོན་པར་མི་བྱེད་མོད་ཀྱི་ཇི་ལྟར་ཐོས་པ་དང༌། ཇི་ལྟར་བསྟན་པ་དང༌། ཇི་ལྟར་ཁོང་དུ་ཆུད་པའི་ཆོས་རྣམས་ལ་རྒྱས་པར་དབྱངས་ཀྱིས་ཁ་ཏོན་དུ་བྱེད་དོ། །ཇི་ལྟ་ཇི་ལྟར་ཐོས་པ་དང༌། ཇི་ལྟ་བར་ཉེ་བར་བསྟན་པ་དང༌། ཇི་ལྟར་ཁོང་དུ་ཆུད་པའི་ཆོས་རྣམས་ལ་རྒྱས་པར་དབྱངས་ཀྱི་ཁ་ཏོན་དུ་བྱེད་པ་དེ་ལྟ་དེ་ལྟར་ཆོས་རྣམས་ལྷག་པར་རིག་ཅིང་ལྷག་པར་རིག་པ་དང༌། ཡང་དག་པའི་ཤེས་རབ་ཀྱིས་ཇི་ལྟ་བ་བཞིན་མཐོང་བར་འགྱུར་རོ། །ཇི་ལྟ་ཇི་ལྟར་ཆོས་རྣམས་ལྷག་པར་རིག་ཅིང་ལྷག་པར་རིག་པ་དང༌། ཡང་དག་པའི་ཤེས་རབ་ཀྱིས་ཇི་ལྟ་བ་བཞིན་མཐོང་བ་དེ་ལྟ་དེ་ལྟར་ཆོས་རྣམས་ལ་དོན་གྱི་ཤུགས་རྙེད་པ་དང༌། ཆོས་ཀྱི་ཤུགས་རྙེད་པ་དང༌། སྟོན་པ་ལ་རབ་ཏུ་དད་པར་འགྱུར་རོ། །གཞན་ཡང་འདི་ན་འཕགས་པ་ཉན་ཐོས་སྟོན་པ་འམ་ཚངས་པར་སྤྱོད་པ་བླ་མའི་གནས་ལྟ་བུ་གང་ཡང་རུང་བ་ཆོས་སྟོན་པར་ཡང་མི་བྱེད་ལ། ཇི་ལྟར་ཐོས་པ་དང༌། ཇི་ལྟར་ཉེ་བར་བསྟན་པ་དང༌། ཇི་ལྟར་ཁོང་དུ་ཆུད་པའི་ཆོས་རྣམས་རྒྱས་པར་ཁ་ཏོན་དུ་ཡང་མི་བྱེད་ཀྱི། འོན་ཀྱང་ཇི་ལྟར་ཐོས་པ་དང༌། ཇི་ལྟར་ཉེ་བར་བསྟན་པ་དང༌། ཇི་ལྟར་ཁོང་དུ་ཆུད་པའི་ཆོས་རྣམས་རྒྱས་པར་གཞན་དག་ལ་ཡང་དག་པར་གསལ་བར་བྱེད་དེ། ཇི་ལྟ་ཇི་ལྟར་ཐོས་པ་དང༌། ཇི་ལྟར་ཉེ་བར་བསྟན་པ་དང༌། ཇི་ལྟར་ཁོང་དུ་ཆུད་པའི་ཆོས་རྣམས་རྒྱས་པར་གཞན་དག་ལ་རབ་ཏུ་གསལ་བར་བྱེད་པ་དེ་ལྟ་དེ་ལྟར་ཆོས་རྣམས་ལྷག་པར་རིག་ཅིང་ལྷག་པར་རིག་པ་དང༌། ཡང་དག་པའི་ཤེས་རབ་ཀྱིས་ཇི་ལྟ་བ་བཞིན་དུ་མཐོང་བར་འགྱུར་རོ། །ཇི་ལྟ་ཇི་ལྟར་ཆོས་རྣམས་ལྷག་པར་རིག་ཅིང་ལྷག་པར་རིག་པ་དང༌། ཡང་དག་པའི་ཤེས་རབ་
ཀྱིས་ཇི་ལྟ་བ་བཞིན་མཐོང་བ་དེ་ལྟ་དེ་ལྟར་ཆོས་རྣམས་ལ་དོན་གྱི་ཤུགས་རྙེད་པ་དང༌། ཆོས་ཀྱི་ཤུགས་རྙེད་པ་དང༌། སྟོན་པ་ལ་རབ་ཏུ་དད་པར་འགྱུར་རོ། །གཞན་ཡང་འདི་ན་འཕགས་པ་ཉན་ཐོས་སྟོན་པ་འམ་ཚངས་པར་སྤྱོད་པ་བླ་མའི་གནས་ལྟ་བུ་གང་ཡང་རུང་བ་དག་ཆོས་སྟོན་པར་ཡང་མི་བྱེད་ལ། ཇི་ལྟར་ཐོས་པ་དང༌། ཇི་ལྟར་ཉེ་བར་བསྟན་པ་དང༌། ཇི་ལྟར་ཁོང་དུ་ཆུད་པའི་ཆོས་རྣམས་རྒྱས་པར་ཁ་ཏོན་དུ་ཡང་མི་བྱེད་ལ། ཇི་ལྟར་ཐོས་པ་དང༌། ཇི་ལྟར་ཉེ་བར་བསྟན་པ་དང༌། ཇི་ལྟར་ཁོང་དུ་ཆུད་པའི་ཆོས་རྣམས་ལ་རྒྱས་པར་གཞན་དག་ལ་རབ་ཏུ་གསལ་བར་ཡང་མི་བྱེད་ཀྱི། འོན་ཀྱང་ཇི་ལྟར་ཐོས་པ་དང༌། ཇི་ལྟར་ཉེ་བར་བསྟན་པ་དང༌། ཇི་ལྟར་ཁོང་དུ་ཆུད་པའི་ཆོས་རྣམས་གཅིག་པུ་དབེན་པར་སོང་སྟེ། དོན་སེམས་ཤིང་འཇལ་བ་དང་ཉེ་བར་རྟོག་པར་བྱེད་དོ། །ཇི་ལྟ་ཇི་ལྟར་ཐོས་པ་དང༌། ཇི་ལྟར་ཉེ་བར་བསྟན་པ་དང༌། ཇི་ལྟར་ཁོང་དུ་ཆུད་པའི་ཆོས་རྣམས་གཅིག་པུ་དབེན་པར་སོང་སྟེ། དོན་སེམས་ཤིང་འཇལ་བ་དང་ཉེ་བར་རྟོག་པར་བྱེད་པ་དེ་ལྟ་དེ་ལྟར་ཆོས་རྣམས་ལྷག་པར་རིག་ཅིང་ལྷག་པར་རིག་པ་དང༌། ཡང་དག་པའི་ཤེས་རབ་ཀྱིས་ཇི་ལྟ་བ་བཞིན་མཐོང་བར་འགྱུར་རོ། །ཇི་ལྟ་ཇི་ལྟར་ཆོས་རྣམས་ལྷག་པར་རིག་ཅིང་ལྷག་པར་རིག་པ་དང༌། ཡང་དག་པའི་ཤེས་རབ་ཀྱིས་མཐོང་བ་དེ་ལྟ་དེ་ལྟར་ཆོས་རྣམས་ལ་དོན་གྱི་ཤུགས་རྙེད་པ་དང༌། ཆོས་ཀྱི་ཤུགས་རྙེད་པ་དང༌། ཆོས་རྣམས་ལ་ཚུལ་བཞིན་ཡིད་ལ་བྱེད་པར་འགྱུར་ཏེ། གཞན་གྱི་སྒྲ་དང་ནང་གི་བདག་ཉིད་ཀྱི་ཚུལ་བཞིན་ཡིད་ལ་བྱེད་པ་ལས་ཡང་དག་པའི་ལྟ་བ་མ་སྐྱེས་པ་སྐྱེ་བར་འགྱུར་ཞིང༌། སྐྱེས་པ་འཕེལ་ཞིང་རྒྱས་པ་དང༌། ཡངས་པར་འགྱུར་ཞིང༌། ལྟ་བའི་ཕུང་པོ་ཡོངས་སུ་མ་རྫོགས་པ་ཡོངས་སུ་རྫོགས་པར་བྱ་བ་དང༌། ཡོངས་སུ་རྫོགས་པ་རྗེས་སུ་གཟུང་བར་བྱ་བའི་ཕྱིར་འདུན་པ་སྐྱེད་ཅིང་རྩོལ་བ་དང༌། བརྩོན་འགྲུས་དང༌། སྤྲོ་བ་དང༌། རྩོམ་པ་དང༌། མི་གཏོང་བ་དང༌། སེམས་ཡོངས་སུ་འཛིན་ཏེ། འདི་ནི་ལྟ་བ་ཡོངས་སུ་དག་པའི་གཙོ་བོ་ཞེས་བྱའོ། །སྟག་གི་བྱང་ཆུབ་ཀྱི་བུ་དག་རྣམ་པར་གྲོལ་བ་ཡོངས་སུ་དག་པའི་གཙོ་བོ་གང་ཞེ་ན། འདི་ན་འཕགས་པ་ཉན་ཐོས་འདོད་ཆགས་ལས་སེམས་འདོད་ཆགས་དང་རྣམ་པར་བྲལ་ཞིང་རྣམ་པར་གྲོལ་བ་ཡིན། ཞེ་
སྡང་ལས་སེམས་འདོད་ཆགས་དང་རྣམ་པར་བྲལ་ཞིང་རྣམ་པར་གྲོལ་བ་ཡིན། གཏི་མུག་ལས་སེམས་འདོད་ཆགས་དང་རྣམ་བར་བྲལ་ཞིང་རྣམ་པར་གྲོལ་བ་ཡིན། འདི་ནི་རྣམ་པར་གྲོལ་བ་ཡོངས་སུ་དག་པའི་གཙོ་བོ་ཞེས་བྱའོ། །དེ་ནས་རོ་ཅན་པ་ཀྲོན་དྷི་པ་དག་ཚེ་དང་ལྡན་བ་ཀུན་དགའ་བོས་བཤད་པ་ལ་མངོན་པར་དགའ་ཞིང་རྗེས་སུ་ཡི་རངས་ཏེ། ཚེ་དང་ལྡན་པ་ཀུན་དགའ་བོའི་རྐང་པ་ལ་མགོ་བོས་ཕྱག་བྱས་ནས་སོང་ངོ་ཞེས་གསུངས་སོ། །ཆོས་མངོན་པ་མཛོད་ཀྱི་རྣམ་པར་བཤད་པ་ཉེ་བར་མཁོ་བ་ལས་གནས་དྲུག་པ་ཕལ་ཆེར་མདོ་དང་སྦྱར་བ་རྫོགས་སྷོ།། །།འོ་ན་བཅོམ་ལྡན་འདས་ཀྱིས་འདོད་ཆགས་དང་བཅས་པའི་སེམས་ལ་འདོད་ཆགས་དང་བཅས་པའི་སེམས་སོ་ཞེས་བྱ་བ་ལ་སོགས་པ་གསུངས་པ་ཞེས་བྱ་བ་ལ། གནས་མང་པོ་ལས་བཤད་དེ། ཇི་ལྟར་རེ་ཞིག་དྲན་པ་ཉེ་བར་གཞག་པ་ལ་བསྒོམ་པ་ལས་འདི་ན་དགེ་སློང་འདོད་ཆགས་དང་བཅས་པའི་སེམས་ལ་འདོད་ཆགས་དང་བཅས་པའི་སེམས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །འདོད་ཆགས་དང་བྲལ་བའི་སེམས་ལ་འདོད་ཆགས་དང་བྲལ་བའི་སེམས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །ཞེ་སྡང་དང་བཅས་པ་དང༌། ཞེ་སྡང་དང་བྲལ་བ་དང༌། གཏི་མུག་དང་བཅས་པ་དང༌། གཏི་མུག་དང་བྲལ་བ་དང༌། རྣམ་པར་གཡེངས་པ་དང༌། ཀུན་དུ་བསྡུས་པ་དང༌། ཞུམ་པ་དང༌། རབ་ཏུ་བཟུང་བ་དང༌། རྒོད་པ་དང༌། རྒོད་པ་མ་ཡིན་པ་དང༌། རྣམ་པར་མ་ཞི་བ་དང༌། རྣམ་པར་ཞི་བ་དང༌། མཉམ་པར་མ་བཞག་པ་དང༌། མཉམ་པར་བཞག་པ་དང༌། མ་བསྒོམས་པ་དང༌། བསྒོམས་པ་དང༌། རྣམ་པར་མ་གྲོལ་བ་དང༌། རྣམ་པར་གྲོལ་བའི་སེམས་ལ་རྣམ་པར་གྲོལ་བའི་སེམས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །ཤིན་ཏུ་རྣམ་པར་གྲོལ་བའི་སེམས་ལ་ཤིན་ཏུ་རྣམ་པར་གྲོལ་བའི་སེམས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ་ཞེས་གསུངས་སོ། །མདོ་ལས་ཇི་ལྟར་སེམས་ནང་དུ་བསྡུས་པ་ཡིན་ཞེ་ན་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་རྫུ་འཕྲུལ་གྱི་རྐང་པ་བཞི་བསྒོམ་པ་བཤད་པར་བྱ་སྟེ། དེ་ལེགས་པར་ཉོན་ལ་ཡིད་ལ་ཟུང་ཤིག་དང་བཤད་པར་བྱའོ། །དགེ་སློང་དག་ཇི་
ལྟར་ན་རྫུ་འཕྲུལ་གྱི་རྐང་པ་བཞི་བསྒོམ་པ་ཡིན་ཞེ་ན། འདི་ན་དགེ་སློང་བདག་གི་འདུན་པ་ཞུམ་པ་དང༌། རབ་ཏུ་བཟུང་བ་དང༌། ནང་དུ་བསྡུས་པ་དང༌། ཕྱི་རོལ་དུ་རྣམ་པར་གཡེངས་པར་མ་གྱུར་ཅིག །སྔ་མ་དང་ཕྱི་མའི་འདུ་ཤེས་དང༌། འོག་མས་སྟེང་འོག་གི་འདུ་ཤེས་སུ་གྱུར་ཅིག །འདུན་པ་མ་བསྒྲིབས་ཤིང་མ་གཡོགས་ལ་འདུན་པ་སྣང་བ་དང་བཅས་ཤིང་ལྷན་ཅིག་པར་གྱུར་པ་དང༌། འདི་ལྟར་བདག་གི་འདུན་པ་མུན་པའི་རང་བཞིན་དུ་མ་གྱུར་ཅིག་ཅེས་འདུན་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་བ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ་རྣམ་པར་སྤངས་པས་ཡོངས་སུ་བསྒྱུར་བ་སྒོམ་པར་བྱེད་དོ། །ཇི་ལྟར་ན་འདུན་པ་ཞུམ་པ་ཡིན་ཞེ་ན། ལེ་ལོ་དང་ལྷན་ཅིག་པར་གྱུར་པ་སྟེ། དེ་ལྟར་ན་འདུན་པ་ཞུམ་པ་ཡིན་ནོ། །ཇི་ལྟར་ན་འདུན་པ་རབ་ཏུ་བཟུང་བ་ཡིན་ཞེ་ན། འདུན་པ་གང་རྒོད་བ་དང་ལྷན་ཅིག་པར་གྱུར་པ་སྟེ། དེ་ལྟར་ན་འདུན་པ་རབ་ཏུ་བཟུང་བ་ཡིན་ནོ། །ཇི་ལྟར་ན་འདུན་པ་ནང་དུ་བསྡུས་པ་ཡིན་ཞེ་ན། འདུན་པ་གང་རྨུགས་པ་དང༌། གཉིད་དང་ལྷན་ཅིག་པར་གྱུར་ཅིང་ནང་དུ་ཀུན་འགོག་པ་དང་ལྷན་ཅིག་པར་གྱུར་ལ་ལྷག་མཐོང་དང་མཚུངས་པར་མི་ལྡན་པ་ཡིན་ནོ། །ཇི་ལྟར་ན་ཕྱི་རོལ་དུ་རྣམ་པར་གཡེངས་པ་ཡིན་ཞེ་ན། འདུན་པ་གང་འདོད་པའི་ཡོན་ཏན་ལྔ་རྣམས་ལ་གཡེངས་ཤིང་རྣམ་པར་འཕྲོས་པ་ཡིན་ནོ། །དེ་ལྟར་ན་འདུན་པ་ཕྱི་རོལ་དུ་རྣམ་པར་གཡེངས་པ་ཡིན་ནོ། །ཇི་ལྟར་ན་སྔ་མ་དང་ཕྱི་མའི་འདུ་ཤེས་སུ་འགྱུར་ཞེ་ན། འདི་ན་དགེ་སློང་སོ་སོར་རྟོག་པའི་རྒྱུ་མཚན་ཉིད་ལེགས་པར་རབ་ཏུ་བཟུང་ཞིང་ཡིད་ལ་བྱེད་པ་བསྟེན་ཅིང་སོ་སོར་རིག་པ་སྟེ། འདི་ལྟ་སྟེ། འདུག་ཅིང་གནས་པ་ལ་ཉེ་བར་རྟོག་པ་དང༌། འདུག་ཅིང་གཉིད་ལོག་པ་དང༌། མདུན་དུ་འགྲོ་བ་དང༌། ཕྱི་ནས་འགྲོ་བ་ལ་ཉེ་བར་རྟོག་པ་དེ་བཞིན་དུ་དགེ་སློང་སོ་སོར་རྟོག་པའི་རྒྱུ་མཚན་ཉིད་ལེགས་པར་རབ་ཏུ་བཟུང་སྟེ། ཡིད་ལ་བྱེད་པ་བསྟེན་ཅིང་སོ་སོར་རིག་པ་སྟེ། འདི་ལྟར་ན་སྔོན་དང་ཕྱི་མའི་འདུ་ཤེས་སུ་འགྱུར་རོ། །འདི་ན་དགེ་སློང་ལུས་འདི་ལ་སྤྱི་བོ་ནས་རྐང་མཐིལ་གྱི་བར་དུ་སྐྲ་དང༌། ཀླད་པ་དང༌། པགས་པའི་མཐར་ཐུག་པར་ཇི་
ལྟར་གནས་པ་དང༌། ཇི་ལྟར་སྨོན་པ་མི་གཙང་བའི་རྫས་རྣམ་པ་དུ་མས་ཡོངས་སུ་གང་བར་སོ་སོར་རྟོག་པར་བྱེད་དེ། ལུས་འདི་ལ་སྐྲ་ཡང་ཡོད། བ་སྤུ་དང༌། ཁ་དང༌། སོ་དང༌། རྡུལ་དང༌། དྲི་མ་དང༌། པགས་པ་དང༌། ཤ་དང༌། རུས་པ་དང༌། ཆུ་བ་དང༌། རྩ་དང༌། མཆིན་པ་དང༌། གླ་བ་དང༌། རྒྱུ་མ་དང༌། གཉེ་མ་དང༌། ཕོ་བ་དང༌། ལོང་ཀ་དང༌། ལྟོ་བ་དང༌། མཆེར་པ་དང༌། རྡུལ་དང༌། མཆི་མ་དང༌། མཆིལ་མ་དང༌། སྣབས་དང༌། མཁྲིས་པ་དང༌། བད་ཀན་དང༌། རྣག་དང༌། ཁུ་བ་དང༌། ཀླད་པ་དང༌། ཀླད་རྒྱས་དག་འཛག་པའོ། །ཞེས་དེ་ལྟར་ན་སྟེང་དང་འོག་གི་འདུ་ཤེས་སུ་འགྱུར་རོ། །ཇི་ལྟར་ན་བདག་གི་སེམས་མ་བསྒྲིབས་ཤིང་མ་གཡོགས་ལ་སེམས་སྣང་བ་དང་བཅས་ཤིང་ལྷན་ཅིག་པར་གྱུར་པ་དང༌། ཇི་ལྟར་བདག་གི་སེམས་མུན་པའི་རང་བཞིན་དུ་མ་གྱུར་ཅིག་ཅེས་བྱ་བར་འགྱུར་ཞེ་ན། འདི་ན་དགེ་སློང་སྣང་བའི་འདུ་ཤེས་ལེགས་པར་རབ་ཏུ་བཟུང་སྟེ། ཡིད་ལ་བྱེད་དེ་སྟོན་ཅིང་སོ་སོར་རིག་པ་སྟེ། ཉིན་མོ་ཇི་ལྟ་བར་མཚན་མོ་དེ་བཞིན། མཚན་མོ་ཇི་ལྟ་བར་ཉིན་མོ་དེ་བཞིན། སྔོན་ཇི་ལྟ་བར་ཕྱིས་དེ་བཞི་ན། ཕྱིས་ཇི་ལྟ་བར་སྔོན་དེ་བཞིན། སྟེང་དུ་ཇི་ལྟ་བར་འོག་ཏུ་དེ་བཞིན། འོག་ཏུ་ཇི་ལྟ་བར་སྟེང་དུ་དེ་བཞིན་ནོ་ཞེས་བདག་གི་སེམས་མ་བསྒྲིབས་ཤིང་མ་གཡོགས་ལ་སེམས་སྣང་བ་དང་བཅས་ཤིང་ལྷན་ཅིག་པར་གྱུར་པ་དང༌། འདི་ལྟར་བདག་གི་སེམས་མུན་པའི་རང་བཞིན་དུ་མ་གྱུར་ཅིག་ཅེས་བྱ་སྟེ། འདི་ལྟར་ན་བདག་གི་སེམས་མ་བསྒྲིབས་ཤིང་མ་གཡོགས་ལ་སེམས་སྣང་བ་དང་བཅས་ཤིང་ལྷན་ཅིག་པར་གྱུར་པ་དང༌། འདི་ལྟར་བདག་གི་སེམས་མུན་པའི་རང་བཞིན་དུ་མ་གྱུར་ཅིག་ཅེས་བྱ་བར་འགྱུར་རོ། །འདི་ན་དགེ་སློང་བདག་གི་དཔྱོད་པ་ཞུམ་པ་དང༌། རབ་ཏུ་བཟུང་བ་དང༌། ནང་དུ་བསྡུས་པ་དང༌། ཕྱི་རོལ་དུ་རྣམ་པར་གཡེངས་པར་མ་གྱུར་ཅིག །སྔ་མ་དང་ཕྱི་མའི་འདུ་ཤེས་དང༌། སྟེང་དང་འོག་གི་འདུ་ཤེས་སུ་གྱུར་ཅིང༌། བདག་གི་སེམས་མ་བསྒྲིབས་ཤིང་མ་གཡོགས་ལ་སེམས་སྣང་བ་དང་བཅས་ཤིང་ལྷན་ཅིག་བར་གྱུར་པ་དང༌། འདི་ལྟར་བདག་གི་སེམས་མུན་པའི་རང་བཞིན་དུ་མ་གྱུར་ཅིག་ཅེས་བརྩོན་འགྲུས་ཀྱི་ཏིང་ངེ་འཛིན་དང༌། སེམས་ཀྱི་ཏིང་ངེ་འཛིན་
དང། དཔྱོད་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་བའི་རྫུ་འཕྲུལ་གྱི་རྐང་པ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤོང་བ་ཡོངས་སུ་བསྒྱུར་བ་དག་སྒོམ་པར་བྱེད་དོ། །ཇི་ལྟར་དཔྱོད་པ་ཞུམ་པ་ཡིན་ཞེ་ན། དཔྱོད་པ་གང་ལེ་ལོ་དང་ལྷན་ཅིག་པར་གྱུར་པ་སྟེ། དེ་ལྟར་ན་དཔྱོད་པ་ཞུམ་པ་ཡིན་ནོ། །ཇི་ལྟར་ན་དཔྱོད་པ་རབ་ཏུ་བཟུང་བ་ཡིན་ཞེ་ན། དཔྱོད་པ་གང་རྒོད་པ་དང་ལྷན་ཅིག་པར་གྱུར་པའོ། །ཇི་ལྟར་ན་དཔྱོད་པ་ནང་དུ་བསྡུས་པ་ཡིན་ཞེ་ན། དཔྱོད་པ་གང་རྨུགས་པ་དང༌། གཉིད་དང་ལྷན་ཅིག་པར་གྱུར་ཅིང་ནང་དུ་ཀུན་དུ་འགོག་པ་དང་ལྷན་ཅིག་པར་གྱུར་ལ་ལྷག་མཐོང་དང་མཚུངས་པར་མི་ལྡན་པ་ཡིན་ཏེ། འདི་ལྟར་ན་དཔྱོད་པ་ནང་དུ་བསྡུས་པ་ཡིན་ནོ། །ཇི་ལྟར་དཔྱོད་པ་ཕྱི་རོལ་དུ་རྣམ་པར་གཡེངས་པ་ཡིན་ཞེ་ན། དཔྱོད་པ་གང་འདོད་པའི་ཡོན་ཏན་ལྔ་རྣམས་ལ་རྗེས་སུ་གཡེངས་ཤིང་རྣམ་པར་འཕྲོས་པ་ཡིན་ཏེ། འདི་ལྟར་ན་དཔྱོད་པ་ཕྱི་རོལ་དུ་རྣམ་པར་གཡེངས་པ་ཡིན་ནོ། །ཇི་ལྟར་ན་སྔོན་དང་ཕྱི་མའི་འདུ་ཤེས་ཞེས་བྱ་བ་ནས། སྔ་མ་བཞིན་དུ་འདི་ལྟར་བདག་སེམས་མུན་པའི་རང་བཞིན་དུ་མ་གྱུར་ཅིག་ཅེས་བྱ་བའི་བར་དུའོ། །དགེ་སློང་དག་དེ་ལྟར་རྫུ་འཕྲུལ་གྱི་རྐང་པ་བཞི་བསྒོམ་པར་འགྱུར་རོ། །དགེ་སློང་དག་རྫུ་འཕྲུལ་གྱི་རྐང་པ་བཞི་བསྒོམ་པ་དག་བསྟན་པར་བྱའོ་ཞེས་ངས་ཇི་སྐད་བཤད་པ་དེ་རྒྱས་པར་རབ་ཏུ་བཤད་དོ་ཞེས་གསུངས་སོ། །ཞུམ་པ་དང༌། རབ་ཏུ་བཟུང་བ་དང༌། ནང་དུ་བསྡུས་པ་དང༌། ཕྱི་རོལ་དུ་རྣམ་པར་གཡེངས་པ་ལ་སོགས་པ་ཇི་ལྟར་འདུན་པའི་ཏིང་ངེ་འཛིན་ལ་རྒྱས་པར་བཤད་པ་དེ་བཞིན་དུ་བརྩོན་འགྲུས་ཀྱི་ཏིང་ངེ་འཛིན་དང༌། སེམས་ཀྱི་ཏིང་ངེ་འཛིན་ལ་ཡང་ཐམས་ཅད་རྒྱས་པར་གོ་བར་བྱ་སྟེ། དེ་ལྟར་ན་ཤེས་པར་བྱེད་པར་འགྱུར་རོ། །མདོ་ལས་ཇི་ལྟར་ན་སེམས་ནང་དུ་བསྡུས་པ་ཡིན་ཞེ་ན། གང་གི་ཚེ་སེམས་ཞུམ་པར་གྱུར་པའོ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དེ་ནས་དགེ་སློང་རབ་ཏུ་མང་པོ་དག་སྔ་དྲོ་ཆོས་གོས་དང་ལྷུང་བཟེད་ཐོགས་ཏེ། བསོད་སྙོམས་ཀྱི་ཕྱིར་མཉན་ཡོད་དུ་ཞུགས་སོ། །དེ་ནས་དགེ་སློང་རབ་ཏུ་མང་པོ་དེ་དག་འདི་སྙམ་དུ་བདག་ཅག་མཉན་ཡོད་དུ་བསོད་སྙོམས་ཀྱི་ཕྱིར་རེ་
ཞིག་ནམ་མ་ནངས་ཀྱི། བདག་ཅག་གཞན་མུ་སྟེགས་ཅན་གྱི་ཀུན་དུ་རྒྱུ་དེ་དག་གི་ཀུན་དགའ་ར་བར་འགྲོ་བར་བྱའོ་སྙམ་མོ། །དེ་ནས་གཞན་མུ་སྟེགས་ཅན་གྱི་ཀུན་དུ་རྒྱུ་དེ་དག་གིས་དགེ་སློང་རབ་ཏུ་མང་པོ་དེ་དག་ལ་འདི་སྐད་ཅེས་སྨྲས་སོ། །ཁྱེད་ཅག་གི་དགེ་སྦྱོང་གཽ་ཏ་མ་ཉན་ཐོས་རྣམས་ལ་འདི་ལྟར་དགེ་སློང་དག་ཚུར་ཤོག །སྒྲིབ་པ་ལྔ་པོ་སེམས་ཉེ་བར་ཉོན་མོངས་པར་བྱེད་པ། ཤེས་རབ་ཉམ་ཆུང་བར་བྱེད་པ། གནོད་པའི་ཕྱོགས་མྱ་ངན་ལས་འདས་པར་མི་འཇུག་པ་དག་སྤོངས་ལ། དྲན་པ་ཉེ་བར་གཞག་པ་བཞི་པ་རྣམས་ལ་སེམས་ལེགས་པར་གཞག་ཅིང་གནས་ཏེ། བྱང་ཆུབ་ཀྱི་ཡན་ལག་བདུན་བསྒོམ་པར་གྱིས་ཤིག་ཅེས་ཉན་ཐོས་རྣམས་ལ་ཆོས་སྟོན་པ་ཐོས་ནས་བདག་ཅག་འདི་ལྟར་ཁྱེད་ཅག་ཚུར་ཤོག །སྒྲིབ་པ་ལྔ་པོ་སེམས་ཉེ་བར་ཉོན་མོངས་པར་བྱེད་པ། ཤེས་རབ་ཉམ་ཆུང་བར་བྱེད་པ། གནོད་པའི་ཕྱོགས་མྱ་ངན་ལས་འདས་པར་མི་འཇུག་པ་དག་སྤོངས་ལ། དྲན་པ་ཉེ་བར་གཞག་པ་བཞི་པོ་རྣམས་ལ་སེམས་ལེགས་པར་གཞག་ཅིང་གནས་ཏེ། བྱང་ཆུབ་ཀྱི་ཡན་ལག་བདུན་སྒོམས་ཤིག་ཅེས་ཉན་ཐོས་རྣམས་ལ་ཆོས་སྟོན་ན། འདི་ལྟར་ན་དགེ་སྦྱོང་གཽ་ཏ་མས་ཆོས་བསྟན་པ་དང་བདག་ཅག་གིས་ཆོས་བསྟན་པ་ལ་ཁྱད་པར་དང༌། བསམ་པ་དང༌། ཐ་དད་དུ་བྱ་བ་ཅི་ཞིག་ཡོད། དེ་སྐད་ཅེས་སྨྲས་པ་དང༌། དགེ་སློང་རབ་ཏུ་མང་པོ་དེ་དག་ཅང་མི་སྨྲ་བར་གྱུར་ཏོ། །དེ་ནས་དགེ་སློང་རབ་ཏུ་མང་པོ་དེ་དག་གཞན་མུ་སྟེགས་ཅན་གྱི་ཀུན་དུ་རྒྱུད་དེ་དག་གིས་བཤད་པ་ལ་མངོན་པར་དགའ་བར་ཡང་མི་བྱེད་ཁྲོ་བར་ཡང་མི་བྱེད་པར་སྟན་ལས་ལངས་ཏེ་སོང་ངོ༌། །དེ་ནས་དགེ་སློང་རབ་ཏུ་མང་པོ་དེ་དག་མཉན་ཡོད་དུ་བསོད་སྙོམས་སྤྱད་ཅིང་ཟས་ཀྱི་བྱ་བ་བྱས་ནས་ཟོས་པའི་འོག་ཏུ་ལྷུང་བཟེད་བཀྲུས་ཏེ། ཆོས་གོས་དང་ལྷུང་བཟེད་མཐའ་ཅིག་ཏུ་བཞག་སྟེ། རྐང་པ་བཀྲུས་ནས་བཅོམ་ལྡན་འདས་གང་ན་བ་དེར་ཉེ་བར་སོང་སྟེ། ཉེ་བར་སོང་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་བྱས་ཏེ། ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་དགེ་སློང་རབ་ཏུ་མང་པོ་དེ་དག་གིས་གཞན་མུ་སྟེགས་ཅན་གྱི་ཀུན་དུ་རྒྱུ་དེ་དག་དང་ལྷན་ཅིག་ཇི་སྲིད་དུ་གཏམ་གཞན་བརྗོད་པ་དེ་ཐམས་ཅད་རྒྱས་པར་བཅོམ་ལྡན་འདས་ལ་གསོལ་
ཏོ། །དེ་སྐད་ཅེས་གསོལ་བ་དང༌། དགེ་སློང་རབ་ཏུ་མང་པོ་དེ་དག་ལ་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །དགེ་སློང་དག་གཞན་མུ་སྟེགས་ཅན་གྱི་ཀུན་དུ་རྒྱུ་དེ་སྐད་སྨྲ་བ་དེ་དག་ལ་འདི་སྐད་བརྗོད་པར་བྱ་སྟེ། གང་གི་ཚེ་སེམས་བྱིང་བ་དང༌། བྱིང་བར་དོགས་པ་དེའི་ཚེ་བྱང་ཆུབ་ཀྱི་ཡན་ལག་གང་ཞིག་བསྒོམ་པའི་དུས་ཡིན། གང་ཞིག་བསྒོམ་པའི་དུས་མ་ཡིན། གང་གི་ཚེ་རྒོད་པ་དང༌། རྒོད་པར་དོགས་པ་དེའི་ཚེ་བྱང་ཆུབ་ཀྱི་ཡན་ལག་གང་ཞིག་བསྒོམ་པའི་དུས་ཡིན། གང་ཞིག་བསྒོམ་པའི་དུས་མ་ཡིན་ཞེས་དགེ་སློང་དག་གཞན་མུ་སྟེགས་ཅན་གྱི་ཀུན་དུ་རྒྱུ་དེ་དག་ལ་འདི་སྐད་དུ་དྲིས་པ་ན། ཕན་ཚུན་འདྲི་བར་འགྱུར། གཏམ་གཞན་ཉེ་བར་འགོད་པར་འགྱུར། ཁྲོ་བ་དང༌། ཞེ་སྡང་དང༌། ང་རྒྱལ་དང༌། འཚིག་པ་དང༌། གནོད་པ་དང༌། མི་བཟོད་པ་བྱེད་པར་འགྱུར། ཁ་རོག་པར་གནས་པར་འགྱུར། ཡི་མུག་པར་འགྱུར། ཕྲག་པ་བཅུམ་པ་དང༌། ཁ་འོག་ཏུ་བལྟས་པ་དང༌། སྤོབས་པ་མེད་པར་འགྱུར་རོ། །སེམས་ཤིང་གནས་པར་འགྱུར་ཏེ། དེ་ཅིའི་ཕྱིར་ཞེ་ན། དགེ་སློང་དག་ངས་ལྷ་དང་བཅས་པའི་འཇིག་རྟེན་དང༌། བདུད་དང་བཅས་པ་དང༌། ཚངས་པ་དང༌། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་ལྷ་དང་མིར་བཅས་པའི་འཇིག་རྟེན་ན་དེ་བཞིན་གཤེགས་པའམ། དེ་བཞིན་གཤེགས་པའི་ཉན་ཐོས་ཀྱི་དགེ་འདུན་རྣམས་མ་གཏོགས་པ་དྲིས་པ་ལུང་སྟོན་པར་སེམས་པ་ཡང་དག་པར་རྗེས་སུ་མ་གཟིགས་སོ། །དགེ་སློང་དག་ཉོན་ཅིག་གང་གི་ཚེ་སེམས་ཞུམ་པ་དང༌། ཞུམ་པར་དོགས་པ་དེའི་ཚེ་ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་དང། ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་དང༌། བཏང་སྙོམས་ཡང་དག་བྱང་ཆུབ་ཀྱི་ཡན་ལག་བསྒོམ་པའི་དུས་མ་ཡིན་ཏེ། དེ་ཅིའི་ཕྱིར་ཞེ་ན། དགེ་སློང་དག་སེམས་ཞུམ་པ་དང་ཞུམ་པར་དོགས་པ་ན་ཆོས་འདི་དག་གིས་ཞུམ་པ་ཉིད་མངོན་པར་སྒྲུབ་པར་བྱེད་དོ། །དགེ་སློང་དག་དཔེར་ན་མེ་ཆུང་ངུ་ཆེར་འབར་ཞིང་འབར་བར་འདོད་པ་འགའ་ཞིག་ཤིང་རློན་པ་དང༌། རྩྭ་རློན་པ་དང༌། ལྕི་བ་རློན་པ་དག་བཅུག་ན་དགེ་སློང་དག་དེ་ཇི་སྙམ་དུ་སེམས། དེ་དག་གིས་མི་དེ་ཕལ་ཆེར་གསོད་པར་འགྱུར་རམ། བཙུན་པ་དེ་བཞིན་ནོ། །དེ་བཞིན་དུ་གང་གི་ཚེ་སེམས་ཞུམ་པ་དང་ཞུམ་པར་དོགས་པ་དེའི་ཚེ་ཤིན་ཏུ་སྦྱངས་
པ་ཡང་དག་བྱང་ཆུབ་ཀྱི་ཡན་ལག་དང༌། ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་དང༌། བཏང་སྙོམས་ཡང་དག་བྱང་ཆུབ་ཀྱི་ཡན་ལག་དག་བསྒོམ་པའི་དུས་མ་ཡིན་ཏེ། དེ་ཅིའི་ཕྱིར་ཞེ་ན། གང་གི་ཚེ་ཞུམ་པ་དང་ཞུམ་པར་དོགས་པ་དེའི་ཚེ་ཆོས་འདི་དག་གིས་ཞུམ་པ་ཉིད་མངོན་པར་འགྲུབ་པར་བྱེད་པའི་ཕྱིར་རོ། །གང་གི་ཚེ་རྒོད་པ་དང་རྒོད་པར་དོགས་པ་དེའི་ཚེ་ཆོས་རབ་ཏུ་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་དང༌། བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་དང༌། དགའ་བ་ཡང་དག་བྱང་ཆུབ་ཀྱི་ཡན་ལག་རྣམས་བསྒོམ་པའི་དུས་མ་ཡིན་ཏེ། དེ་ཅིའི་ཕྱིར་ཞེ་ན། དགེ་སློང་དག་རྒོད་པ་དང་རྒོད་པར་དོགས་པ་ན་ཆོས་འདི་དག་གིས་ཕལ་ཆེར་རྒོད་པ་ཉིད་མངོན་པར་འགྲུབ་པར་བྱེད་པའི་ཕྱིར་ཏེ། དགེ་སློང་དག་དཔེར་ན་དགའ་ཞིག་མེ་འབར་བར་གྱུར་པ་དག་གསད་པར་འདོད་ནས་ཤིང་སྐམ་པོ་དང༌། རྩྭ་སྐམ་པོ་དང༌། ལྕི་བ་སྐམ་པོ་དག་འཇུག་པར་བྱེད་ན། དགེ་སློང་དག་ཇི་སྙམ་དུ་སེམས། དེའི་རྒྱུས་མེ་དེ་ཆེར་འབར་བར་འགྱུར་རམ། བཙུན་པ་དེ་བཞིན་ནོ། །དེ་བཞིན་དུ་གང་གི་ཚེ་རྒོད་པ་དང་རྒོད་པར་དོགས་པ་དེའི་ཚེ་ཆོས་རབ་ཏུ་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་དང༌། བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་དང༌། དགའ་བ་ཡང་དག་བྱང་ཆུབ་ཀྱི་ཡན་ལག་བསྒོམ་པའི་དུས་མ་ཡིན་ཏེ། དེ་ཅིའི་ཕྱིར་ཞེ་ན། དགེ་སློང་དག་སེམས་རྒོད་པ་དང་རྒོད་པར་དོགས་པ་ན་ཆོས་འདི་དག་གིས་རྒོད་པ་ཉིད་མང་དུ་མངོན་པར་འགྲུབ་པར་བྱེད་པའི་ཕྱིར་རོ། །དགེ་སློང་དག་གང་གི་ཚེ་སེམས་ཞུམ་པ་དང་ཞུམ་པར་དོགས་པ་དེའི་ཚེ། ཆོས་རབ་ཏུ་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་དང༌། བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་དང༌། དགའ་བ་ཡང་དག་བྱང་ཆུབ་ཀྱི་ཡན་ལག་རྣམས་བསྒོམ་པའི་དུས་ཡིན་ཏེ། དེ་ཅིའི་ཕྱིར་ཞེ་ན། དགེ་སློང་དག་སེམས་ཞུམ་པ་དང་ཞུམ་པར་དོགས་པ་ན་ཆོས་འདི་དག་གིས་མཐོང་བ་དང༌། ཡང་དག་པར་བསྐུལ་བ་དང༌། སྣང་བ་དང༌། ཡང་དག་པར་དགའ་བར་བྱེད་པའི་ཕྱིར་རོ། །དགེ་སློང་དག་དཔེར་ན་འགའ་ཞིག་མེ་ཆུང་ངུ་ཆེར་འཕེལ་ཞིང་འབར་བར་འདོད་ནས་ཤིང་སྐམ་པོ་དང༌། རྩྭ་སྐམ་པོ་དང༌། ལྕི་བ་སྐམ་པོ་དག་འཇུག་པར་བྱེད་ན། དགེ་སློང་དག་དེ་ཇི་སྙམ་དུ་སེམས། རྒྱུ་དེས་མེ་འབར་བར་འགྱུར་རམ། བཙུན་
པ་དེ་བཞིན་ནོ། །དེ་བཞིན་དུ་གང་གི་ཚེ་ཞུམ་པ་དང་ཞུམ་པར་དོགས་པ་དེའི་ཚེ་ཆོས་རབ་ཏུ་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་དང༌། བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་དང༌། དགའ་བ་ཡང་དག་བྱང་ཆུབ་ཀྱི་ཡན་ལག་རྣམས་བསྒོམ་པའི་དུས་ཡིན་ཏེ། །དེ་ཅིའི་ཕྱིར་ཞེ་ན། དགེ་སློང་དག་ཞུམ་པ་དང་ཞུམ་པར་དོགས་པ་ན་ཆོས་འདི་དག་གིས་མཐོང་བ་དང༌། ཡང་དག་པར་བསྐུལ་བ་དང༌། སྣང་བ་དང༌། ཡང་དག་པར་དགའ་བར་བྱེད་པའི་ཕྱིར་རོ། །གང་གི་ཚེ་རྒོད་པ་དང་རྒོད་པར་དོགས་པ་དེའི་ཚེ་ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་དང༌། ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་དང༌། བཏང་སྙོམས་ཡང་དག་བྱང་ཆུབ་ཀྱི་ཡན་ལག་རྣམས་བསྒོམ་པའི་དུས་ཡིན་ཏེ། དེ་ཅིའི་ཕྱིར་ཞེ་ན། དགེ་སློང་དག་རྒོད་པ་དང་རྒོད་པར་དོགས་པ་ན་ཆོས་འདི་དག་གིས་ནང་དུ་འཇོག་པར་བྱེད་ཅིང་ཉེ་བར་གནས་པ་དང༌། གཅིག་ཏུ་བྱིད་ཅིང་ཏིང་ངེ་འཛིན་དུ་སྒྲུབ་པར་བྱེད་པའི་ཕྱིར་ཏེ། དགེ་སློང་དག་དཔེར་ན་མེ་འབར་བ་གསད་པར་འདོད་པ་འགའ་ཞིག་གིས་ཤིང་རློན་པ་དང༌། རྩྭ་རློན་པ་དང༌། ལྕི་བ་རློན་པ་དག་འཇུག་པར་བྱེད་ན། དགེ་སློང་དག་འདི་ཇི་སྙམ་དུ་སེམས། རྒྱུ་དེ་ལས་མེ་དེ་འཆི་བར་འགྱུར་རམ། བཙུན་པ་དེ་བཞིན་ནོ། །དེ་བཞིན་དུ་གང་གི་ཚེ་རྒོད་པ་དང་རྒོད་པར་དོགས་པ་ན་དེའི་ཚེ་ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་དང༌། ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་དང༌། བཏང་སྙོམས་ཡང་དག་བྱང་ཆུབ་ཀྱི་ཡན་ལག་རྣམས་བསྒོམ་པའི་དུས་ཡིན་ཏེ། དེ་ཅིའི་ཕྱིར་ཞེ་ན། དགེ་སློང་དག་རྒོད་པ་དང་རྒོད་པར་དོགས་པ་ན་ཆོས་འདི་དག་གིས་ནང་དུ་འཇོག་པར་བྱེད་ཅིང༌། ཉེ་བར་གནས་པ་དང༌། རྩེ་གཅིག་ཏུ་བྱེད་ཅིང་ཏིང་ངེ་འཛིན་སྒྲུབ་པར་བྱེད་དོ། །དགེ་སློང་དག་དྲན་པ་ནི་ཐམས་ཅད་དུ་འགྲོ་བའོ་ཞེས་ང་སྨྲའོ་ཞེས་གསུངས་སོ། །གང་ལས་འདིའི་སེམས་འདོད་ཆགས་དང་བྲལ་བ་ཡིན་ཞེས་བྱ་བ་ལ། བཅོམ་ལྡན་འདས་རྒྱལ་པོའི་ཁབ་ཀྱི་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་ཏེ། དེ་ནས་ལྷ་སྦྱིན་གྱི་ཕྱོགས་པའི་དགེ་སློང་ཟླ་བ་མའི་བུ་ཚེ་དང་ལྡན་པ་ཤཱ་རིའི་བུ་གང་ན་དེར་ཉེ་བར་སོང་སྟེ། ཉེ་བར་སོང་ནས་ཚེ་དང་ལྡན་པ་ཤཱ་རིའི་བུ་དང་ལྷན་ཅིག་ཅེས་བྱ་བ་ནས། ཕྱོགས་གཅིག་ཏུ་འདུག་ནས་ཞེས་བྱ་
བའི་བར་དུ་སྟེ། དེ་ནས་ལྷ་སྦྱིན་གྱི་ཕྱོགས་པ་དགེ་སློང་ཟླ་བ་མའི་བུ་ལ། ཚེ་དང་ལྡན་པ་ཤཱ་རིའི་བུས་འདི་སྐད་ཅེས་སྨྲས་སོ། །ཟླ་བ་མའི་བུ་ལྷ་སྦྱིན་དགེ་སློང་རྣམས་ལ་ཆོས་ཀྱི་གཏམ་དག་སྟོན་པར་བྱེད་དམ། །སྟོན་པར་བྱེད་དོ། །ཟླ་བ་མའི་བུ་ལྷ་སྦྱིན་ཇི་ལྟ་ཇི་ལྟར་དགེ་སློང་རྣམས་ལ་ཆོས་ཀྱི་གཏམ་སྟོན་པར་བྱེད། དགེ་སློང་དག་གཏམ་གང་གི་ཕྱིར་དགེ་སློང་སེམས་ཀྱིས་སེམས་རྣམ་པར་གྱུར་ན། འདི་ལྟ་སྟེ། ལྔ་པོ་དག་ལས་བདག་གི་སེམས་འདོད་ཆགས་དང་བྲལ་ལོ་ཞེས་ལུང་བསྟན་པར་བྱའོ་ཞེས་ཚེ་དང་ལྡན་པ་ཤཱ་རིའི་བུས་འདི་ལྟར་ལྷ་སྦྱིན་དགེ་སློང་རྣམས་ལ་ཆོས་ཀྱི་གཏམ་སྟོན་པར་བྱེད་དོ། །ཟླ་བ་མའི་བུ་གང་གི་ཕྱིར་དགེ་སློང་སེམས་ཀྱིས་སེམས་རྣམ་པར་རྒྱལ་བར་གྱུར་ཏེ། སེམས་འདོད་ཆགས་དང་བྲལ་བར་གྱུར་ཅིང་ཞེ་སྡང་དང་བྲལ་བ་དང༌། རྨོངས་པ་དང་བྲལ་ཞིང་མ་ཆགས་པའི་ཆོས་ཅན་དང༌། མི་སྡང་བའི་ཆོས་ཅན་དང༌། མ་རྨོངས་པའི་ཆོས་ཅན་དང༌། འདོད་པའི་སྲིད་པ་དང༌། གཟུགས་ཀྱི་སྲིད་པ་དང༌། གཟུགས་མེད་པའི་སྲིད་པར་ཕྱིར་མི་ལྡོག་པའི་ཆོས་ཅན་གྱི་དགེ་སློང་དེས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །བྱེད་པ་བྱས་སོ། །སྲིད་པ་འདི་ལ་གཞན་མི་ཤེས་སོ་ཞེས་ལུང་སྟོན་ན་མཛེས་པར་འགྱུར་རོ་ཞེས་ལྷ་སྦྱིན་འདི་ལྟར་དགེ་སློང་རྣམས་ལ་ཆོས་ཀྱི་གཏམ་སྟོན་པར་མི་བྱེད་དམ། ཚེ་དང་ལྡན་པ་ཤཱ་རིའི་བུ་མ་ཡིན་ནོ། །དེ་ནས་ཚེ་དང་ལྡན་པ་ཤཱ་རིའི་བུས་དགེ་སློང་རྣམས་ལ་བོས་ཏེ། ཚེ་དང་ལྡན་པ་དག་གང་གི་ཕྱིར་དགེ་སློང་སེམས་ཀྱིས་སེམས་རྣམ་པར་རྒྱལ་ཞིང་སེམས་འདོད་ཆགས་དང་བྲལ་བ་ཡིན། ཞེ་སྡང་དང་བྲལ་བ་དང༌། རྨོངས་པ་དང་བྲལ་ཞིང་མ་ཆགས་པའི་ཆོས་ཅན་དང༌། མི་སྡང་བའི་ཆོས་ཅན་དང༌། མ་རྨོངས་པའི་ཆོས་ཅན་དང༌། འདོད་པའི་སྲིད་པ་དང༌། གཟུགས་ཀྱི་སྲིད་པ་དང༌། གཟུགས་མེད་པའི་སྲིད་པར་ཕྱིར་མི་ལྡོག་པའི་ཆོས་ཅན་དགེ་སློང་དེས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །བྱེད་པ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་ལུང་སྟོན་ན་མཛེས་པར་འགྱུར་རོ་ཞེས་གསུངས་སོ། །གཞན་ཡོད་ཅེས་པ་བསྟན་བཅོས་ལས་ཞེས་བྱ་བ་ལ། རྣམ་པར་ཤེས་པའི་ཚོགས་ཀྱི་བསྟན་བཅོས་ལས་ཏེ། དེ་ལས་མི་ལྡན་པའི་སེམས་ཀྱིས་ཞེས་བྱ་བ་ལ་སོགས་པ་དང༌།
མཐོང་བས་སྤང་བར་བྱ་བའི་སེམས་ཀྱིས་ཞེས་བྱ་བ་ལ་སོགས་པ་གཉིས་དམིགས་པ་ཞེས་བྱ་བའི་དབུགས་འབྱུང་བ་དྲུག་པ་ལས་རབ་ཏུ་དབྱེ་བ་རྒྱས་པར་འདོན་ཏོ། །མདོ་ལས་ཉེ་བར་ལེན་པའི་ཕུང་པོ་ལྔ་པོ་འདི་དག་ནི་བདུན་པའི་རྩ་བ་ཅན་ཞེས་བྱ་བ་ལ། བཅོམ་ལྡན་འདས་མཉན་ཡོད་ཀྱི་ཤར་གྱི་ཀུན་དགའ་ར་བ་ན་རི་དགས་ཀྱི་མའི་གནས་ན་བཞུགས་ཏེ། དེ་ནས་བཅོམ་ལྡན་འདས་དགོངས་ཀ་ནང་དུ་ཡང་དག་འཇོག་ལས་བཞེངས་ཏེ། བསིལ་ཁོང་ནས་བབས་ཏེ། བསིལ་ཁང་གི་གྲིབ་མ་ལ་དགེ་སློང་གི་དགེ་འདུན་གྱིས་མདུན་དུ་བྱས་ཏེ། གདན་བཤམས་པ་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་ཆེད་དུ་བརྗོད་པ་འདི་ཆེད་དུ་བརྗོད་དོ། །དགེ་སློང་དག་ཉེ་བར་ལེན་པའི་ཕུང་པོ་ནི་ལྔ་སྟེ། ལྔ་གང་ཞེ་ན། གཟུགས་ཉེ་བར་ལེན་པའི་ཕུང་པོ་དང༌། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་ཉེ་བར་ལེན་པའི་ཕུང་པོའོ། །དེ་ནས་དགེ་སློང་གཞན་ཞིག་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ཏེ། བཅོམ་ལྡན་འདས་གང་བ་དེར་ཐལ་མོ་སྦྱར་ཞིང་ཕྱག་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་དེ་བཞིན་ནོ། །བདེ་བར་གཤེགས་པ་དེ་དེ་བཞིན་ཏེ། བཙུན་པ་ཉེ་བར་ལེན་པའི་ཕུང་པོ་ནི་ལྔ་སྟེ། ལྔ་གང་ཞེ་ན། གཟུགས་ཉེ་བར་ལེན་པའི་ཕུང་པོ་དང༌། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་ཉེ་བར་ལེན་པའི་ཕུང་པོའོ། །དེས་ན་དགེ་སློང་འདུག་ཤིག་དང༌། འདུག་ནས་ཇི་ལྟར་འདོད་པ་བཞིན་དུ་ཡོངས་སུ་དྲིས་ཤིག །དེ་ནས་དགེ་སློང་དེ་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་ཕྱོགས་གཅིག་ཏུ་འདུག་སྟེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ཉེ་བར་ལེན་པའི་ཕུང་པོ་ནི་ལྔ་སྟེ། ལྔ་གང་ཞེ་ན། གཟུགས་ཉེ་བར་ལེན་པའི་ཕུང་པོ་དང༌། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་ཉེ་བར་ལེན་པའི་ཕུང་པོའོ། །དགེ་སློང་དེ་དེ་བཞིན་ནོ། །དེ་དེ་བཞིན་ཏེ། དགེ་སློང་ཉེ་བར་ལེན་པའི་ཕུང་པོ་ལྔ་སྟེ། གཟུགས་ཉེ་བར་ལེན་པའི་ཕུང་པོ་དང༌། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་ཉེ་བར་ལེན་པའི་ཕུང་པོའོ། །བཙུན་པ་ལེགས་སོ་ཞེས་དགེ་སློང་དེ་བཅོམ་ལྡན་འདས་ཀྱིས་གསུངས་
བ་ལ་མངོན་པར་དགའ་ཞིང་རྗེས་སུ་ཡི་རངས་ཏེ། སླར་ཡང་བཅོམ་ལྡན་འདས་ལ་དྲི་བ་དྲིས་པ། བཙུན་པ་ཉེ་བར་ལེན་པའི་ཕུང་པོ་འདི་དག་གི་རྩ་བ་ནི་གང༌། ཀུན་འབྱུང་བ་ནི་གང༌། རབ་ཏུ་སྐྱེ་བ་ནི་གང༌། རྐྱེན་གྱི་རྣམ་པ་ནི་གང་ཞིག་ལགས། དགེ་སློང་ཉེ་བར་ལེན་པའི་ཕུང་པོ་ལྔ་པོ་འདི་དག་ནི་འདུན་པའི་རྩ་བ་ཅན། འདུན་པ་ལས་ཀུན་འབྱུང་བ། འདུན་པ་དང་འདྲ་བ། འདུན་པ་ལས་རབ་ཏུ་སྐྱེ་བ་དག་ཡིན་ནོ། །བཙུན་པ་ལེགས་སོ་ཞེས་དགེ་སློང་དེ་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་ཞིང་རྗེས་སུ་ཡི་རངས་ཏེ། སླར་ཡང་བཅོམ་ལྡན་འདས་ལ་ཡོངས་སུ་དྲི་བ་དྲིས་པ། བཙུན་པ་ཕུང་པོ་གང་ཡིན་པ་དེ་ཉིད་ཉེ་བར་ལེན་པའི་ཕུང་པོ་ཡིན་ནམ། འོན་ཏེ་ཕུང་པོ་དག་ལས་གཞན་ཞིག་ཉེ་བར་ལེན་པ་ཡིན་ཞེ་ན། དགེ་སློང་ཕུང་པོ་གང་ཡིན་པ་དེ་ཉིད་ཀྱི་ཉེ་བར་ལེན་པ་མ་ཡིན་ལ། ཕུང་པོ་དག་དང་ཕུང་པོ་ལས་གཞན་ཡང་ཉེ་བར་ལེན་པ་མ་ཡིན་མོད་ཀྱི། འོན་ཀྱང་འདུན་པའི་འདོད་ཆགས་ཏེ། འདི་ཙམ་ནི་ཉེ་བར་ལེན་པ་ཞེས་བྱའོ། །བཙུན་པ་ལེགས་སོ་ཞེས་དགེ་སློང་དེ་བཅོམ་ལྡན་འདས་ཀྱིས་གསུངས་པ་ལ་མངོན་བར་དགའ་ཞིང་རྗེས་སུ་ཡི་རངས་ཏེ། སླར་ཡང་བཅོམ་ལྡན་འདས་ལ་ཡོངས་སུ་དྲི་བ་དྲིས་པ། བཙུན་པ་ཕུང་པོ་དག་ལས་ཕུང་པོ་རབ་ཏུ་དབྱེ་བར་གདགས་པ་རྙེད་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་རྙེད་དེ། ཇི་ལྟར་ཁ་ཅིག་མ་འོངས་པའི་དུས་ན་བདག་གཟུགས་འདི་ལྟ་བུ་དང་ལྡན་པར་གྱུར་ཀྱང་ཅི་མ་རུང༌། བདག་མ་འོངས་པའི་དུས་ན་ཚོར་བ་འདི་ལྟ་བུ་དང་ལྡན་པ་དང༌། འདུ་ཤེས་འདི་ལྟ་བུ་དང་ལྡན་པ་དང༌། འདུ་བྱེད་འདི་ལྟ་བུ་དང་ལྡན་པ་དང༌། རྣམ་པར་ཤེས་པ་འདི་ལྟ་བུ་དང་ལྡན་པར་གྱུར་ཀྱང་ཅི་མ་རུང་སྙམ་པ་སྟེ། དགེ་སློང་འདི་ལྟར་ན་ཕུང་པོ་རབ་ཏུ་དབྱེ་བར་གདགས་པར་འགྱུར་རོ། །བཙུན་པ་ལེགས་སོ་ཞེས་དགེ་སློང་དེ་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་ཞིང་རྗེས་སུ་ཡི་རངས་ནས། སླར་ཡང་བཅོམ་ལྡན་འདས་ལ་ཡོངས་སུ་དྲི་བ་དྲིས་པ། བཙུན་པ་ཇི་ཙམ་གྱིས་ན་ཕུང་པོ་ཕུང་པོ་ཞེས་ཚིགས་བླ་དགས་སུ་གྱུར་ཅེ་ན། དགེ་སློང་འདི་ན་གཟུགས་གང་ཅི་ཡང་རུང་བ་འདས་པའམ། མ་འོངས་པའམ། ད་ལྟར་བྱུང་བའམ། ནང་གིའམ། ཕྱིའི་འམ། རགས་པའམ། ཕྲ་བའམ། དམན་
པའམ། གྱ་ནོམ་པའམ། གང་ཐག་རིང་བའམ། ཐག་ཉེ་བ་དེ་དག་གཅིག་ཏུ་བསྡུས་ནས་ཕུང་པོ་ཞེས་བྱ་བའི་གྲངས་སུ་འགྲོ་སྟེ། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་གང་ཅི་ཡང་རུང་བ་འདས་པའམ། མ་འོངས་པའམ། ད་ལྟར་བྱུང་བ་འམ། ནང་གི་འམ། ཕྱིའི་འམ། རགས་པའམ། ཕྲ་བ་འམ། དམན་པའམ། གྱ་ནོམ་པའམ། ཐག་རིང་བའམ། ཐག་ཉེ་བ་དེ་ཐམས་ཅད་གཅིག་ཏུ་བསྡུས་ནས་རྣམ་པར་ཤེས་པའི་ཕུང་པོ་ཞེས་བྱ་བའི་གྲངས་སུ་འགྲོ་སྟེ། དགེ་སློང་འདི་ཙམ་གྱིས་ན་ཕུང་པོ་ཞེས་བྱ་བའི་ཚིགས་བླ་དགས་སུ་འགྱུར་རོ། །བཙུན་པ་ལེགས་སོ་ཞེས་དགེ་སློང་དེ་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་ཞིང་རྗེས་སུ་ཡི་རངས་ཏེ། སླར་ཡང་བཅོམ་ལྡན་འདས་ལ་ཡོངས་སུ་དྲི་བ་དྲིས་པ། བཙུན་པ་རྒྱུ་གང་དག་དང་རྐྱེན་གང་དག་གིས་གཟུགས་ཀྱི་ཕུང་པོ་ཞེས་གདགས། བཙུན་པ་རྒྱུ་གང་དག་དང་རྐྱེན་གང་དག་གིས་ཚོར་བའི་ཕུང་པོ་དང༌། འདུ་ཤེས་ཀྱི་ཕུང་པོ་དང༌། འདུ་བྱེད་ཀྱི་ཕུང་པོ་དང༌། རྣམ་པར་ཤེས་པའི་ཕུང་པོ་ཞེས་གདགས། དགེ་སློང་འབྱུང་བ་ཆེན་པོ་བཞིའི་རྒྱུ་དག་དང༌། འབྱུང་བ་ཆེན་པོ་བཞིའི་རྐྱེན་གྱིས་གཟུགས་ཀྱི་ཕུང་པོ་ཞེས་གདགས་ཏེ། དེ་ཅིའི་ཕྱིར་ཞེ་ན། གཟུགས་གང་ཅི་ཡང་རུང་བ་དེ་ཐམས་ཅད་ནི་འབྱུང་བ་ཆེན་པོ་བཞིའི་རྐྱེན་ཅན་ཡིན་ནོ། །རེག་པའི་རྒྱུ་དང་རེག་པའི་རྐྱེན་གྱིས་ཚོར་བའི་ཕུང་པོ་དང༌། འདུ་ཤེས་ཀྱི་ཕུང་པོ་དང༌། འདུ་བྱེད་ཀྱི་ཕུང་པོ་ཞེས་གདགས། དེ་ཅིའི་ཕྱིར་ཞེ་ན། ཚོར་བའི་ཕུང་པོ་གང་ཅི་ཡང་རུང་བ་དང༌། འདུ་ཤེས་ཀྱི་ཕུང་པོ་དང༌། འདུ་བྱེད་ཀྱི་ཕུང་པོ་གང་ཅི་ཡང་རུང་བ་དེ་ཐམས་ཅད་ནི་རེག་པའི་རྐྱེན་ཅན་ནོ། །དགེ་སློང་མིང་དང་གཟུགས་ཀྱི་རྒྱུ་དང་རྐྱེན་གྱིས་རྣམ་པར་ཤེས་པའི་ཕུང་པོ་ཞེས་གདགས་ཏེ། དེ་ཅིའི་ཕྱིར་ཞེ་ན། རྣམ་པར་ཤེས་པའི་ཕུང་པོ་གང་ཅི་ཡང་རུང་བ་དེ་ཐམས་ཅད་ནི་མིང་དང་གཟུགས་ཀྱི་རྐྱེན་ཅན་ནོ། །བཙུན་པ་ལེགས་སོ་ཞེས་སྔ་མ་བཞིན་དུའོ། །བཙུན་པ་གཟུགས་ཀྱི་རོ་མྱང་བ་ནི་གང༌། ཉེས་དམིགས་ནི་གང༌། ངེས་པར་འབྱུང་བ་ནི་གང༌། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པའི་རོ་མྱང་བ་ནི་གང༌། ཉེས་དམིགས་ནི་གང༌། ངེས་པར་འབྱུང་བ་
ནི་གང། དགེ་སློང་གང་གཟུགས་ལ་བརྟེན་ནས་བདེ་བ་དང་ཡིད་བདེ་བ་སྐྱེ་བ་འདི་ནི་གཟུགས་ཀྱི་རོ་མྱང་བ་ཞེས་བྱའོ། །གང་ཡང་གཟུགས་ནི་མི་རྟག་པ། སྡུག་བསྔལ་བ། ཡོངས་སུ་འགྱུར་བའི་ཆོས་ཅན་ཏེ། འདི་ནི་གཟུགས་ཀྱི་ཉེས་དམིགས་སོ། །གང་ཡང་གཟུགས་ལ་འདུན་པའི་འདོད་ཆགས་འདུལ་ཞིང་འདུན་པའི་འདོད་ཆགས་སྤངས་པ་དང༌། འདུན་པའི་འདོད་ཆགས་ལས་ཡང་དག་པར་འདས་པ་སྟེ། འདི་ནི་གཟུགས་ཀྱི་ངེས་པར་འབྱུང་བའོ། །གང་ཡང་ཚོར་བ་དང༌། འདུ་ཤེས་དང༌། འདུ་བྱེད་དང༌། གང་ཡང་རྣམ་པར་ཤེས་པ་ལ་བརྟེན་ཏེ། བདེ་བ་དང་ཡིད་བདེ་བ་སྐྱེ་བ་འདི་ནི་རྣམ་པར་ཤེས་པའི་རོ་མྱང་བ་ཞེས་བྱའོ། །གང་ཡང་རྣམ་པར་ཤེས་པ་ནི་མི་རྟག་པ་དང༌། སྡུག་བསྔལ་བ་དང༌། ཡོངས་སུ་འགྱུར་བའི་ཆོས་ཅན་ཏེ། འདི་ནི་རྣམ་པར་ཤེས་པའི་ཉེས་དམིགས་སོ། །གང་ཡང་རྣམ་པར་ཤེས་པ་ལ་འདུན་པའི་འདོད་ཆགས་འདུལ་ཞིང་འདུན་པའི་འདོད་ཆགས་སྤངས་པ་དང༌། འདུན་པའི་འདོད་ཆགས་ལས་ཡང་དག་པར་འདས་པ་སྟེ། འདི་ནི་རྣམ་པར་ཤེས་པའི་ངེས་པར་འབྱུང་བའོ། །བཙུན་པ་ལེགས་སོ་ཞེས་དགེ་སློང་དེ་བཅོམ་ལྡན་འདས་ཀྱིས་གསུངས་པ་ལ་ཞེས་བྱ་བ་ནི་སྔ་མ་བཞིན་ནོ། །བཙུན་པ་ཅི་ཙམ་གྱིས་ན་བདག་ཅེས་བྱ་བར་འགྱུར། དགེ་སློང་བྱིས་པ་སོ་སོ་སྐྱེ་བོ་ཐོས་པ་དང་མི་ལྡན་པ་གཟུགས་ལ་བདག་གོ་ཞེས་ཡང་དག་པར་རྗེས་སུ་མཐོང་ཞིང་བདག་གཟུགས་དང་ལྡན་པ་དང༌། བདག་ལ་གཟུགས་ཡོད་གཟུགས་ལ་བདག་ཡོད་དེ་ཞེས་ཡང་དག་པར་རྗེས་སུ་མཐོང་ངོ༌། །ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་བདག་ཡིན་ནོ། །བདག་རྣམ་པར་ཤེས་པ་དང་ལྡན་པ་དང༌། བདག་ལ་རྣམ་པར་ཤེས་པ་ཡོད། རྣམ་པར་ཤེས་པ་ལ་བདག་ཡོད་དོ་ཞེས་ཡང་དག་པར་རྗེས་སུ་མཐོང་སྟེ། དགེ་སློང་འདི་ཙམ་གྱིས་ན་བདག་ཅེས་བྱ་བར་འགྱུར་རོ། །བཙུན་པ་ལེགས་སོ་ཞེས་བྱ་བ་སྔ་མ་བཞིན་ནོ། །བཙུན་པ་ཇི་ཙམ་གྱིས་ན་བདག་ཅེས་བྱ་བར་མི་འགྱུར་ཞེ་ན། དགེ་སློང་འཕགས་པ་ཉན་ཐོས་ཐོས་པ་དང་ལྡན་པ་གཟུགས་བདག་ཡིན་ནོ་ཞེས་ཡང་དག་པར་རྗེས་སུ་མི་མཐོང་ཞིང་བདག་གཟུགས་དང་ལྡན་པ་དང༌། བདག་ལ་གཟུགས་ཡོད་གཟུགས་ལ་བདག་ཡོད་དོ་ཞེས་
ཡང་དག་པར་རྗེས་སུ་མི་མཐོང་ཞིང༌། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་བདག་ཡིན་ནོ། །བདག་རྣམ་པར་ཤེས་པ་དང་ལྡན་པ་དང༌། བདག་ལ་རྣམ་པར་ཤེས་པ་ཡོད། རྣམ་པར་ཤེས་པ་ལ་བདག་ཡོད་དོ་ཞེས་ཡང་དག་པར་རྗེས་སུ་མི་མཐོང་བ་སྟེ། དགེ་སློང་འདི་ཙམ་གྱིས་ན་བདག་ཅེས་བྱ་བར་མི་འགྱུར་རོ། །བཙུན་པ་ལེགས་སོ་ཞེས་སྔ་མ་བཞིན་ནོ། །བཙུན་པ་ཇི་ལྟར་ཤེས་ཤིང་ཇི་ལྟར་མཐོང་ན་དེ་མ་ཐག་ཏུ་ཟག་པ་ཟད་པར་འགྱུར། དགེ་སློང་འདི་ན་གཟུགས་གང་ཅི་ཡང་རུང་བ་འདས་པ་འམ། མ་འོངས་པ་འམ། ད་ལྟར་བྱུང་བ་འམ། ནང་གི་འམ། ཕྱིའི་འམ། རགས་པ་འམ། ཕྲ་བ་འམ། དམན་པ་འམ། གྱ་ནོམ་པ་འམ། གང་ཐག་རིང་བ་འམ། ཐག་ཉེ་བ་དེ་ཐམས་ཅད་བདག་གི་མ་ཡིན་ལ། བདག་ཀྱང་དེ་དག་གི་མ་ཡིན་ལ་དེ་དག་ཀྱང་བདག་གི་མ་ཡིན་ནོ། །ཞེས་ཡང་དག་པའི་ཤེས་རབ་ཀྱིས་ཇི་ལྟ་བ་བཞིན་མཐོང་ཞིང་རབ་ཏུ་ཤེས་པ་དང༌། དགེ་སློང་འདི་ན་ཚོར་བ་གང་ཅི་ཡང་རུང་བ་དང༌། འདུ་ཤེས་དང། འདུ་བྱེད་དང༌། རྣམ་པར་ཤེས་པ་གང་ཡང་རུང་བ་འདས་པ་འམ། མ་འོངས་པ་འམ། ད་ལྟར་བྱུང་བ་འམ། ནང་གི་འམ། ཕྱིའི་འམ། རགས་པ་འམ། ཕྲ་བ་འམ། དམན་པ་འམ། གྱ་ནོམ་པའམ། གང་ཐག་ཉེ་བ་འམ་ཐག་རིང་བ་དེ་དག་ཐམས་ཅད་བདག་གི་མ་ཡིན་ལ། བདག་ཀྱང་དེ་དག་གི་མ་ཡིན་ལ། དེ་དག་ཀྱང་བདག་གི་མ་ཡིན་ནོ་ཞེས་ཡང་དག་པའི་ཤེས་རབ་ཀྱིས་ཇི་ལྟ་བ་བཞིན་མཐོང་ཞིང་རབ་ཏུ་ཤེས་པ་སྟེ། དགེ་སློང་འདི་ལྟར་ཤེས་ཤིང་འདི་ལྟར་མཐོང་ན་དེ་མ་ཐག་ཏུ་ཟག་པ་ཟད་པར་འགྱུར་རོ། །དེ་ནས་དགེ་སློང་གཞན་མི་མཁས་པ་མ་རིག་པའི་སྒོ་ངའི་སྦུབས་སུ་ནུབ་པ། མིག་ཉམས་པ་སྟོན་པའི་བསྟན་པ་སྤངས་པ་ཞིག་འཁོར་དེ་ན་འདུས་པར་གྱུར་ཅིང་ཚོགས་ཏེ་འདུག་པ་དེ་ལ་འདི་ལྟ་བུའི་སྡིག་པ་ཅན་གྱི་ལྟ་བར་གྱུར་པ་སྐྱེས་ཏེ། གཟུགས་བདག་མ་ཡིན། ཚོར་བ་བདག་མ་ཡིན། འདུ་ཤེས་བདག་མ་ཡིན། འདུ་བྱེད་བདག་མ་ཡིན། རྣམ་པར་ཤེས་པ་བདག་མ་ཡིན་ན། བདག་མེད་པས་བྱས་པ་བདག་གིས་ཇི་ལྟར་མྱོང་བར་འགྱུར། དེ་ནས་བཅོམ་ལྡན་འདས་ཀྱིས་དགེ་སློང་དེའི་སེམས་ཐུགས་ཀྱིས་མཁྱེན་ནས་དགེ་སློང་རྣམས་ལ་བོས་ཏེ། དགེ་སློང་དག་གལ་ཏེ་སྐྱེས་བུ་རྨོངས་པ་མ་རིག་པའི་སྒོ་ངའི་སྡུབས་སུ་ནུབ་ཅིང་མིག་ཉམས་པ་སྟོན་པའི་བསྟན་པ་སྤངས་པས་འཁོར་འདིར་འདུས་ཤིང་ཚོགས་ཏེ་འདུག་པ་འགའ་ཞིག་ལ་གཟུགས་
བདག་མ་ཡིན། ཚོར་བ་བདག་མ་ཡིན། འདུ་ཤེས་བདག་མ་ཡིན། འདུ་བྱེད་བདག་མ་ཡིན། རྣམ་པར་ཤེས་པ་བདག་མ་ཡིན་ན། བདག་མེད་པས་བྱས་པའི་ལས་བདག་གིས་ཇི་ལྟར་མྱོང་བར་འགྱུར་ཞེས་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་སྐྱེས་ནས་ཡོངས་སུ་འདྲི་བའི་གནས་ཡོད་ཀྱིས། དགེ་སློང་དག་ངས་ཁྱེད་ཅག་འདུལ་བར་བྱ་སྟེ། དགེ་སློང་དག་འདི་ལྟ་སྟེ། འདི་ཇི་སྙམ་དུ་སེམས། གཟུགས་རྟག་པ་ཞིག་གམ་མི་རྟག་པ་ཞིག །བཙུན་པ་མི་རྟག་པའོ། །གང་མི་རྟག་པ་དེ་སྡུག་བསྔལ་བའམ། སྡུག་བསྔལ་བ་མ་ཡིན། བཙུན་པ་སྡུག་བསྔལ་བའོ། །གང་མི་རྟག་ཅིང་སྡུག་བསྔལ་བ་དེ་ཡོངས་སུ་འགྱུར་བའི་ཆོས་ཅན་ལ་འཕགས་པ་ཉན་ཐོས་ཐོས་པ་དང་ལྡན་པ་བདག་ཅེས་བྱ་བ་དང༌། འདི་དག་བདག་གི །བདག་ཀྱང་འདི་དག་གི །དེ་དག་ཀྱང་བདག་གི་བདག་ཡིན་ནོ་ཞེས་ཉེ་བར་འགྲོ་འམ། བཙུན་པ་མ་ལགས་སོ། །དགེ་སློང་དག་འདི་ཇི་སྙམ་དུ་སེམས། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་རྟག་པ་ཞིག་གམ། མི་རྟག་པ་ཞིག །བཙུན་པ་མི་རྟག་པའོ་ཞེས་བྱ་བ་ནས་སྔ་མ་བཞིན་དུ་ཉེ་བར་འགྲོ་འམ་ཞེས་བྱ་བའི་བར་དུ་སྟེ། བཙུན་པ་མ་ལགས་སོ། །དགེ་སློང་དག་དེ་ལྟ་བས་ན་གཟུགས་གང་ཅི་ཡང་རུང་བ་འདས་པ་འམ། མ་འོངས་པ་འམ། ད་ལྟར་བྱུང་བ་འམ། ནང་གི་འམ། ཕྱིའི་འམ། རགས་པའམ། ཕྲ་བའམ། དམན་པའམ། གྱ་ནོམ་པའམ། ཐག་རིང་བའམ། ཐག་ཉེ་བ་དེ་ཐམས་ཅད་བདག་གི་མ་ཡིན་ལ། བདག་ཀྱང་དེ་དག་གི་མ་ཡིན་ལ། དེ་དག་ཀྱང་བདག་གི་བདག་མ་ཡིན་ནོ་ཞེས་བྱ་བ་ནས་སྔ་མ་བཞིན་དུ་ཡང་དག་པའི་ཤེས་རབ་ཀྱིས་ཇི་ལྟ་བ་བཞིན་བལྟ་བར་བྱའོ། །ཚོར་བ་གང་ཅི་ཡང་རུང་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་གང་ཅི་ཡང་རུང་བ་འདས་པའམ། མ་འོངས་པའམ། ད་ལྟར་བྱུང་བའམ། ནང་གི་འམ། ཕྱིའི་འམ་ཞེས་བྱ་བ་ནས། སྔ་མ་བཞིན་དུ་ཡང་དག་པའི་ཤེས་རབ་ཀྱིས་ཇི་ལྟ་བ་བཞིན་བལྟ་བར་བྱའོ་ཞེས་བྱ་བའི་བར་དུ་སྟེ། དགེ་སློང་དག་འདི་ལྟར་མཐོང་བའི་འཕགས་པ་ཉན་ཐོས་ཐོས་པ་དང་ལྡན་པ་གཟུགས་ལས་གྲོལ་ཞིང༌། ཚོར་བ་དང༌། འདུ་ཤེས་དང༌།
འདུ་བྱེད་དང༌། རྣམ་པར་ཤེས་པ་དག་ལས་གྲོལ་ཞིང་སྐྱེ་བ་དང༌། རྒ་བ་དང༌། ན་བ་དང༌། འཆི་བ་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུགས་པ་རྣམས་ལས་རྣམ་པར་གྲོལ་ཞིང༌། སྡུག་བསྔལ་ལས་རྣམ་པར་གྲོལ་བའོ་ཞེས་ང་སྨྲའོ། །ཆོས་ཀྱི་རྣམ་གྲངས་འདི་བཤད་པ་ན་དགེ་སློང་རབ་ཏུ་མང་པོ་དག་ཉེ་བར་ལེན་པ་མེད་པ་ཟག་པ་དག་ལས་སེམས་རྣམ་པར་གྲོལ་བར་གྱུར་ཏོ་ཞེས་གསུངས་སོ། །སྲེད་པ་རྣམ་པར་སྤྱོད་པ་ཞེས་བྱ་བ་ལ། སངས་རྒྱས་ཀྱིས་རྣམ་པར་བཤད་པའི་སྡོམ་གྱི་ཚིགས་སུ་བཅད་པ་དགུ་པའི་མདོ་ལྔ་པ་ལས་འབྱུང་བ་འདི་ཉིད་ཀྱི་མཛོད་ཀྱི་གནས་གཉིས་པར། འདུས་མ་བྱས་ལ་དེ་དག་མེད། །ཅེས་བྱ་བའི་སྐབས་སུ་ཇི་ལྟར་སྲེད་པ་རྣམ་པར་སྤྱོད་པ་ཞེས་བྱ་བར་བྲིས་ཟིན་ཏོ། །དགེ་སློང་དག་འདུ་བྱེད་ནི་སྡུག་བསྔལ་བའོ་ཞེས་བྱ་བ་ལ། རྒྱལ་པོ་དང་ཡང་དག་པར་ལྡན་པའི་ཚོགས་ལས་དྲུག་པ་རལ་པ་ཅན་གྱི་མདོ་ལས་འདི་ལྟར་འདོན་ཏེ། དགེ་སློང་དག་འདུ་བྱེད་ནི་སྡུག་བསྔལ་བ་སྟེ། མྱ་ངན་ལས་འདས་པ་ནི་ཞི་བའོ། །རྒྱུ་ལས་ཀུན་དུ་བྱུང་བ་རྣམས་ནི་སྡུག་བསྔལ་བ་སྟེ། རྒྱུ་ལས་བྱུང་བའི་ཆོས་རྣམས་འགགས་བ་དང༌། ཆད་པ་དང༌། མི་འཇུག་པ་དང༌། སྡུག་བསྔལ་གཞན་དང་ཉིང་མཚམས་སྦྱོར་བ་མེད་པ་འདི་ལྟ་བུ་ནི་སྡུག་བསྔལ་གྱི་མཐའ་ཞེས་བྱའོ། །དགེ་སློང་དག་དེ་ལ་མྱ་ངན་ལས་འདས་པ་གང་ཡིན་ཞེ་ན། སྡུག་བསྔལ་འགགས་པ་དང༌། ཞི་བ་དང༌། ཉེ་བར་ཞི་བ་དང༌། བསིལ་བར་གྱུར་པ་དང༌། ནུབ་པར་གྱུར་པ་འདི་ནི་དགེ་སློང་དག་འདི་ནི་ཞི་བའི་གནས་ཞེས་བརྗོད་དོ། །འདི་ལྟ་སྟེ། ཐམས་ཅད་སོ་སོར་སྤངས་པ་སྲེད་པ་ཟད་པ་ནད་མེད་པ་འགོག་པ་མྱ་ངན་ལས་འདས་པ་ཞེས་བྱའོ་ཞེས་གསུངས་སོ།། །།ཇི་སྐད་དུ་མཐོང་བ་རྣམ་པར་དག་པར་བྱ་བའི་ཕྱིར་འདི་ལམ་ཡིན་གྱི། གཞན་ནི་མེད་དོ་ཞེས་བྱ་བ་ལ། འདུ་བྱེད་ཐམས་ཅད་མི་རྟག་པར། །གང་ཚེ་ཤེས་རབ་ཀྱིས་མཐོང་བ། །དེ་ནས་ཡིད་འབྱུང་འགྱུར་བ་སྟེ། །ལམ་འདི་སྡུག་བསྔལ་དག་ཕྱིར་ཡིན། །འདུ་བྱེད་ཐམས་ཅད་སྡུག་བསྔལ་བར། །གང་ཚེ་ཤེས་རབ་ཀྱིས་མཐོང་བ། །དེ་ནས་ཡིད་འབྱུང་འགྱུར་བ་སྟེ། །ལམ་འདི་སྡུག་བསྔལ་དག་ཕྱིར་ཡིན། །འདུ་བྱེད་ཐམས་ཅད་སྟོང་པར་ནི། །གང་ཚེ་ཤེས་རབ་ཀྱིས་མཐོང་བ། །དེ་ནས་ཡིད་
འགྱུར་འབྱུང་བ་སྟེ། །ལམ་འདི་སྡུག་བསྔལ་དག་ཕྱིར་ཡིན། །འདུ་བྱེད་ཐམས་ཅད་བདག་མེད་པར། །གང་ཚེ་ཤེས་རབ་ཀྱིས་མཐོང་བ། །དེ་ནས་ཡིད་འབྱུང་འགྱུར་བ་སྟེ། །ལམ་འདི་སྡུག་བསྔལ་དག་ཕྱིར་ཡིན། །སྲེད་པའི་ཟུག་རྔུ་དབྱུང་བའི་ཕྱིར། །ང་ཡིས་ཁྱེད་ལ་ལམ་བཤད་དེ། །དེ་བཞིན་གཤེགས་པ་འཆད་པ་པོ། །ཁྱེད་ཅག་ཉིད་ཀྱིས་བསྒྲུབ་པར་བྱ། །སྲེད་པའི་ཟུག་རྔུ་དབྱུང་བའི་ཕྱིར། །ང་ཡིས་ཁྱེད་ལ་ལམ་བསྟན་ཏེ། །དེ་བཞིན་གཤེགས་པ་སྟོན་པ་པོ། །ཁྱེད་ཅག་ཉིད་ཀྱིས་བསྒྲུབ་པར་བྱ། །མཐོང་བ་རྣམ་པར་དག་བྱའི་ཕྱིར། །འདི་ཉིད་ལམ་ཡིན་གཞན་མེད་དེ། །སྒྲུབ་པར་བྱེད་པ་བསམ་གཏན་ཅན། །བདུད་ཀྱི་འཆིང་བ་སྤོང་བར་འགྱུར། །ཞེས་གསུངས་སོ། །དབང་པོ་དྲུག་པོ་འདི་དག་ཤིན་ཏུ་འདུལ་བ་དང་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་དབང་པོ་དྲུག་པོ་འདི་དག་ཤིན་ཏུ་མ་དུལ་བ་དང༌། མ་སྦས་པ་དང༌། མ་བསྲུངས་པ་དང༌། མ་བསྡམས་པ་དང༌། མ་བསྒོམས་ན་མ་འོངས་པ་ན་སྡུག་བསྔལ་དག་འབྱུང་བར་འགྱུར་ཏེ། དྲུག་གང་ཞེ་ན། མིག་གི་དབང་པོ་མ་དུལ་བ་དང༌། མ་སྦས་པ་དང༌། མ་བསྲུངས་པ་དང༌། མ་བསྡམས་པ་དང༌། མ་བསྒོམས་ན་མ་འོངས་བ་ན་སྡུག་བསྔལ་འབྱུང་བར་འགྱུར་རོ། །རྣ་བའི་དབང་པོ་དང༌། སྣའི་དབང་པོ་དང༌། ལྕེའི་དབང་པོ་དང༌། ལུས་ཀྱི་དབང་པོ་དང༌། དགེ་སློང་དག་ཡིད་ཀྱི་དབང་པོ་མ་དུལ་བ་དང༌། མ་སྦས་པ་དང༌། མ་བསྲུངས་པ་དང༌། མ་བསྡམས་པ་དང། མ་བསྒོམས་ན་མ་འོངས་པ་ན་སྡུག་བསྔལ་འབྱུང་བར་འགྱུར་རོ། །དགེ་སློང་དག་དབང་པོ་དྲུག་པོ་འདི་དག་མ་དུལ་བ་ནས་མ་འོངས་པའི་སྡུག་བསྔལ་འབྱུང་བའི་བར་དུ་འགྱུར་ཞེ་ན། དགེ་སློང་དག་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ནི་མིག་གིས་གཟུགས་དག་མཐོང་ནས་མཚན་མར་འཛིན་ཅིང་མངོན་རྟགས་སུ་འཛིན་ལ། དེའི་རྒྱུས་སེམས་ལ་འཇིག་རྟེན་གྱི་བརྣབ་སེམས་དང་ཡིད་མི་བདེ་བ་སྡིག་པ་མི་དགེ་བའི་ཆོས་རྣམས་རྗེས་སུ་འཛིན་ཅིང་དེ་དག་མ་བསྡམས་ལ་མིག་གི་དབང་པོ་མ་བསྲུངས་ན་མིག་གི་དབང་པོའི་སྡོམ་པ་ཐོབ་པར་མི་འགྱུར་རོ། །རྣ་བས་སྒྲ་དང༌། སྣས་དྲི་དང༌། ལྕེས་རོ་དང༌། ལུས་ཀྱིས་རེག་བྱ་དང༌། ཡིད་ཀྱིས་ཆོས་རྣམས་རྣམ་པར་ཤེས་ནས་མཚན་མར་འཛིན་ཅིང་མངོན་རྟགས་སུ་འཛིན་པར་འགྱུར་ཏེ་ཞེས་བྱ་བ་ནས། ཡིད་ཀྱི་དབང་པོའི་སྡོམ་པ་ཐོབ་པར་མི་འགྱུར་ཞེས་བྱ་བའི་བར་དུའོ། །དགེ་སློང་དག་འདི་ལྟར་ན་དབང་པོ་དྲུག་པོ་འདི་དག་མ་དུལ་ཞེས་བྱ་བ་ནས་མ་འོངས་པའི་སྡུག་བསྔལ་འབྱུང་བར་འགྱུར་ཞེས་བྱ་བའི་བར་དུའོ། །དགེ་སློང་དག་དབང་པོ་དྲུག་པོ་འདི་དག་ཤིན་ཏུ་དུལ་བ་དང༌།
ཤིན་ཏུ་སྦས་པ་དང༌། ཤིན་ཏུ་བསྲུངས་པ་དང༌། ཤིན་ཏུ་བསྡམས་པ་དང༌། ཤིན་ཏུ་བསྒོམས་ན་མ་འོངས་པའི་སྡུག་བསྔལ་འབྱུང་བར་མི་འགྱུར་ཏེ། དྲུག་གང་ཞེ་ན། དགེ་སློང་དག་མིག་གི་དབང་པོ་ཤིན་ཏུ་དུལ་བ་དང༌། ཤིན་ཏུ་སྦས་པ་དང༌། ཤིན་ཏུ་བསྲུངས་པ་དང༌། ཤིན་ཏུ་བསྡམས་པ་དང༌། ཤིན་ཏུ་བསྒོམས་ན་མ་འོངས་པའི་སྡུག་བསྔལ་འབྱུང་བར་མི་འགྱུར་རོ། །དགེ་སློང་དག་ཇི་ལྟར་ན་དབང་པོ་དྲུག་པོའི་འདི་དག་ཤིན་ཏུ་དུལ་བ་ཞེས་བྱ་བ་ནས་མ་འོངས་པའི་སྡུག་བསྔལ་འབྱུང་བར་མི་འགྱུར་བའི་བར་དུ་འགྱུར་ཞེ་ན། དགེ་སློང་དག་འཕགས་པ་ཉན་ཐོས་ཐོས་པ་དང་ལྡན་པ་མིག་གིས་གཟུགས་མཐོང་ནས་མཚན་མར་མི་འཛིན་ཅིང་མངོན་རྟགས་སུ་མི་འཛིན་ལ། དེའི་རྒྱུས་སེམས་ལ་འཇིག་རྟེན་གྱི་བརྣབ་སེམས་དང་ཡིད་མི་བདེ་བ་སྡིག་པ་མི་དགེ་བའི་ཆོས་རྗེས་སུ་མི་འཛིན་ཅིང་ཞེས་བྱ་བ་ནས། རྒྱས་པར་ཡིད་ཀྱི་དབང་པོ་སྡོམ་པ་ཐོབ་པར་མི་འགྱུར་ཞེས་བྱ་བའི་བར་དུའོ། །དགེ་སློང་དག་འདི་ལྟར་ན་དབང་པོ་དྲུག་པོ་འདི་དག་ལེགས་པར་དུལ་བ་དང༌། ཤིན་ཏུ་བསྲུངས་པ་ཞེས་བྱ་བ་ནས་མ་འོངས་པའི་སྡུག་བསྔལ་འབྱུང་བར་མི་འགྱུར་ཞེས་བྱ་བའི་བར་དུ་གསུངས་སོ། །དེ་བཞིན་དུ་ལུས་འདི་ལ་སྐྲ་ཡོད་ཅེས་བྱ་བ་ལ་སོགས་པ་ཇི་ལྟར་རེ་ཞིག་མཛོད་ཀྱི་གནས་འདི་ཉིད་དུ་རྫུ་འཕྲུལ་གྱི་རྐང་པ་གཉིས་པ་བསྒོམ་པའི་མདོ་ལས་ཇི་ལྟར་ན་སྟེང་དང་འོག་གི་འདུ་ཤེས་སུ་འགྱུར་ཞེས་དེ་དང་དེ་ལས་འདོན་པ་བལྟ་བར་བྱའོ།། །།སྟོབས་བཅུ་ཞེས་བྱ་བ་ལ། བཅུ་ལས་འཕྲོས་པ་དང༌། ལམ་གྱི་ཚོགས་དང༌། སྟོབས་ཀྱི་སྒོའི་མཐའི་མདོ་ལས་འདོན་པ་མཛོད་ཀྱི་གནས་ལྔ་པ་འདི་ཉིད་དུ་འདས་པ་དང༌། མ་འོངས་པ་བསྒོམ་པར་དགེ་སློང་དག་ངའི་ཉན་ཐོས་རྣམས་ལ་ནང་བསྡམས་ན་ནུབ་ཁྱད་པར་དུ་འགྲོ་སྟེ་ཞེས་བྱ་བའི་མདོར་བྲིས་པ་བལྟ་བར་བྱའོ།། །།མི་འཇིགས་པ་བཞི་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བོས་ཏེ། དགེ་སློང་དག་བཞི་པོ་འདི་དག་ནི་དེ་བཞིན་གཤེགས་པའི་མི་འཇིགས་པ་སྟེ། གང་དང་ཡང་དག་པར་ལྡན་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཁྱུ་མཆོག་རླབས་པོ་ཆེའི་གནས་སུ་དམ་འཆའ་ཞིང༌། ཚངས་པའི་འཁོར་ལོ་རབ་ཏུ་བསྐོར་བ་དང༌། འཁོར་གྱི་ནང་དུ་སེང་གེའི་སྒྲ་སྒྲོགས་པ་དག་སྟེ། །
བཞི་གང་ཞེ་ན། ཀྱེ་མ་བདག་མངོན་པར་རྫོགས་པར་སངས་རྒྱས་པ་ལ་ཆོས་འདི་མངོན་པར་རྫོགས་པར་སངས་མ་རྒྱས་སོ་ཞེས་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། གང་སུ་དག་ཡང་རུང་བ་ཆོས་དང་མཐུན་པར་རྒོལ་བའི་རྒྱུ་ཡང་དག་པར་རྗེས་སུ་མ་གཟིགས་ཏེ། འདི་ལྟར་རྒྱུ་ཡང་དག་པར་རྗེས་སུ་མ་གཟིགས་པས་བདག་བདེ་བ་ཐོབ་ཅིང་མི་འཇིགས་པ་ཐོབ་ལ་འཇིགས་པ་མེད་པར་གནས་ཏེ་ཁྱུ་མཆོག་རླབས་པོ་ཆེའི་གནས་སུ་དམ་འཆའ་ཞིང་འཁོར་ལོ་རབ་ཏུ་བསྐོར་ཞིང་འཁོར་གྱི་ནང་དུ་སེང་གེའི་སྒྲ་སྒྲོགས་སོ། །ཀྱེ་མ་བདག་ཟག་པ་ཟད་པ་ལ་ཟག་པ་འདི་ཡོངས་སུ་མ་ཟད་དོ་ཞེས་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་གང་སུ་ཡང་རུང་བ་ཆོས་དང་མཐུན་པར་རྒོལ་བའི་རྒྱུ་ཡང་དག་པར་རྗེས་སུ་མ་གཟིགས་ཏེ། འདི་ལྟར་རྒྱུ་ཡང་དག་པར་རྗེས་སུ་མ་གཟིགས་པས་བདག་བདེ་བ་ཐོབ་ཅིང་མི་འཇིགས་པ་ཐོབ་ལ་འཇིགས་པ་མེད་པར་གནས་ཏེ། ཁྱུ་མཆོག་རླབས་པོ་ཆེའི་གནས་སུ་དམ་འཆའོ། །ཚངས་པའི་འཁོར་ལོ་རབ་ཏུ་བསྐོར་ཞིང་འཁོར་གྱི་ནང་དུ་སེང་གེའི་སྒྲ་སྒྲོགས་སོ། །གང་ངས་ཉན་ཐོས་རྣམས་ལ་བར་དུ་གཅོད་པའི་ཆོས་གསུངས་པ་དེ་དག་བསྟན་ཀྱང་བར་དུ་གཅོད་པར་མི་འགྱུར་རོ་ཞེས་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། གང་སུ་ཡང་རུང་བ་ཆོས་དང་མཐུན་པར་རྒོལ་བའི་རྒྱུ་ཡང་དག་པར་རྗེས་སུ་མ་གཟིགས་ཏེ། འདི་ལྟར་རྒྱུ་ཡང་དག་པར་རྗེས་སུ་མ་གཟིགས་པས་བདག་བདེ་བ་ཐོབ་ཅིང་མི་འཇིགས་པ་ཐོབ་པ་འཇིགས་པ་མེད་པར་གནས་ཏེ། ཁྱུ་མཆོག་རླབས་པོ་ཆེའི་གནས་སུ་དམ་འཆའ་ཞིང་ཚངས་པའི་འཁོར་ལོ་རབ་ཏུ་བསྐོར་ཞིང་འཁོར་གྱི་ནང་དུ་སེང་གེའི་སྒྲ་སྒྲོགས་སོ། །གང་ངས་ཉན་ཐོས་རྣམས་ལ་འཕགས་པའི་ངེས་པར་འབྱུང་བའི་ལམ་ནི་ངེས་ཤིང་ངེས་པར་འབྱིན་པ་དང༌། གང་ཡང་སྡུག་བསྔལ་ཡང་དག་པར་ཟད་པར་བྱེད་པ་དང༌། སྡུག་བསྔལ་མཐར་བྱེད་པ་ཡིན་ནོ་ཞེས་གསུངས་པ་ལ་ངེས་པར་འབྱུང་བའི་ལམ་མ་ཡིན་ནོ་ཞེས་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། གང་སུ་ཡང་རུང་བ་ཆོས་དང་མཐུན་པར་རྒོལ་བའི་རྒྱུ་ཡང་དག་པར་རྗེས་སུ་མ་མཐོང་མ་གཟིགས་ཏེ། རྒྱུ་ཡང་དག་པར་རྗེས་སུ་མ་གཟིགས་པས་བདག་བདེ་བ་ཐོབ་ཅིང་མི་འཇིགས་པ་ཐོབ་
ལ་འཇིགས་པ་མེད་པར་གནས་ཏེ། ཁྱུ་མཆོག་རླབས་པོ་ཆེའི་གནས་སུ་དམ་འཆའ་ཞིང་ཚངས་པའི་འཁོར་ལོ་རབ་ཏུ་བསྐོར་བ་དང༌། འཁོར་གྱི་ནང་དུ་སེང་གེའི་སྒྲ་སྒྲོགས་སོ་ཞེས་གསུངས་སོ། །དྲན་པ་ཉེ་བར་གཞག་པ་གསུམ་པོ་འདི་དག་ནི་ཞེས་བྱ་བ་ལ། རྣམ་པར་འབྱེད་པའི་ཚོགས་ཀྱི་མདོ་གཉིས་པ་སྐྱེ་མཆེད་དྲུག་རྣམ་པར་འབྱེད་པ་ལས་འདི་ལྟར་འདོན་ཏེ། དགེ་སློང་དག་དྲན་པ་ཉེ་བར་གཞག་པ་གསུམ་པོ་འདི་དག་ནི་གང་འཕགས་པས་བསྟེན་ཅིང་འཕགས་པས་བསྟེན་པར་རིགས་ལ་ཚོགས་ཡོངས་སུ་སྡུད་པ་སྟེ་ཞེས་ངས་ཇི་སྐད་དུ་བཤད་པ་དེ་ཅུང་ཟད་བཤད་པར་བྱའོ། །དགེ་སློང་དག་འདི་ན་སྟོན་པ་ཉན་ཐོས་རྣམས་ལ་རྗེས་སུ་བརྩེ་བ་དང༌། ཐུགས་བརྩེ་བ་དང༌། དོན་དུ་བཞེད་པ་དང༌། ཕན་པར་བཞེད་པ་དང༌། བརྩེ་བས་འདི་ནི་ཕན་པ་འདི་ནི་བདེ་བ། འདི་ནི་ཕན་པ་དང་བདེ་བའོ་ཞེས་ཆོས་སྟོན་པར་བྱེད་པ་ན། ཉན་ཐོས་ཁ་ཅིག་ཉན་པར་མི་བྱེད། རྣ་བླགས་ཏེ་ཉན་པར་མི་བྱེད། ཀུན་ཤེས་པའི་སེམས་ཉེ་བར་འཇོག་པར་མི་བྱེད། ཆོས་རྣམས་ལ་ཆོས་ཀྱི་རྗེས་སུ་མཐུན་པ་རྟོགས་པར་མི་བྱེད། སྟོན་པའི་བསྟན་པ་ལས་འདས་ཏེ་འཇུག་ཀྱང་དེས་ད་བཞིན་གཤེགས་པ་ལ་གནོད་པར་མི་འགྱུར། མི་བཟོད་པར་མི་འགྱུར། འཁྲུག་པར་མི་འགྱུར། ཐུགས་མངོན་པར་མི་དགྱེས་པར་མི་འགྱུར། དེ་ལ་དེ་བཞིན་གཤེགས་པ་དྲན་པ་དང་ཤེས་བཞིན་དང་ལྡན་པར་བཏང་སྙོམས་སུ་བཞུགས་ཏེ། འདི་ནི་དྲན་པ་གང་འཕགས་པས་བསྟེན་ཅིང་འཕགས་པས་བསྟེན་པར་རིགས་ཤིང་ཚོགས་ཡོངས་སུ་སྡུད་པ་དྲན་པ་ཉེ་བར་གཞག་པ་དང་པོ་ཡིན་ནོ། །གཞན་ཡང་སྟོན་པ་ཉན་ཐོས་རྣམས་ལ་རྗེས་སུ་བརྩེ་བ་དང༌། ཐུགས་བརྩེ་བ་དང༌། དོན་དུ་བཞེད་པ་དང༌། ཕན་པར་བཞེད་པ་དང༌། བརྩེ་བས་འདི་ནི་ཕན་པ་འདི་ནི་བདེ་བ། འདི་ནི་ཕན་པ་དང་བདེ་བའོ་ཞེས་ཆོས་སྟོན་པར་བྱེད་པ་ན་ཉན་ཐོས་ཁ་ཅིག་ཉན་པར་བྱེད། རྣ་བླགས་ཏེ་ཉན་པར་བྱེད། ཀུན་ཤེས་པའི་སེམས་ཉེ་བར་འཇོག་པར་བྱེད། ཆོས་རྣམས་ལ་ཆོས་ཀྱི་རྗེས་སུ་མཐུན་པ་རྟོགས་པར་བྱེད། སྟོན་པའི་བསྟན་པ་ལས་ཡང་དག་པར་མི་འདའ་བར་འཇུག་ཀྱང་དེས་དེ་བཞིན་གཤེགས་པ་དགྱེས་པར་མི་འགྱུར་རོ། །ཐུགས་ཡེང་ཡེང་པོར་མི་འགྱུར་ཏེ། དེ་ལ་དེ་བཞིན་གཤེགས་པ་དྲན་པ་དང་ཤེས་བཞིན་དང་ལྡན་པར་བཏང་སྙོམས་
སུ་བཞུགས་ཏེ། འདི་ནི་གང་འཕགས་པས་བསྟེན་ཅིང་འཕགས་པས་བསྟེན་པར་རིགས་ཤིང་ཚོགས་ཡོངས་སུ་སྡུད་པ་དྲན་པ་ཉེ་བར་གཞག་པ་གཉིས་པའོ། །གཞན་ཡང་སྟོན་པ་ཉན་ཐོས་རྣམས་ལ་རྗེས་སུ་བརྩེ་བ་དང༌། ཐུགས་བརྩེ་བ་དང༌། དོན་དུ་བཞེད་པ་དང༌། ཕན་པར་བཞེད་པ་དང། བརྩེ་བས་འདི་ནི་ཕན་པ་འདི་ནི་བདེ་བ། འདི་ནི་ཕན་པ་དང་བདེ་བའོ་ཞེས་ཆོས་སྟོན་པར་བྱེད་པ་ན་ཉན་ཐོས་ཁ་ཅིག་ཉན་པར་ཡང་མི་བྱེད། རྣ་བླགས་ཏེ་ཉན་པར་མི་བྱེད། ཀུན་ཤེས་པའི་སེམས་ཉེ་བར་འཇོག་པར་མི་བྱེད། ཆོས་རྣམས་ལ་ཆོས་ཀྱི་རྗེས་སུ་མཐུན་པར་རྟོགས་པར་མི་བྱེད། སྟོན་པའི་བསྟན་པ་ལས་འདའ་བར་མི་བྱེད་པ་དང༌། ཉན་ཐོས་ཁ་ཅིག་ཉན་པར་བྱེད། རྣ་བླགས་ཏེ་ཉན་པར་བྱེད། ཀུན་ཤེས་པའི་སེམས་ཉེ་བར་འཇོག་པར་བྱེད། ཆོས་རྣམས་ལ་ཆོས་ཀྱི་རྗེས་སུ་མཐུན་པར་རྟོགས་པར་བྱེད། སྟོན་པའི་བསྟན་པ་ལས་མི་འདའ་བར་བྱེད་ཀྱང་དེས་དེ་བཞིན་གཤེགས་པ་ལས་གནོད་པར་མི་འགྱུར། །མི་བཟོད་པར་མི་འགྱུར། འཁྲུག་པར་མི་འགྱུར། ཐུགས་མངོན་པར་མི་དགྱེས་པར་མི་འགྱུར་ལ་ཐུགས་དགྱེས་པར་མི་འགྱུར། ཐུགས་ཡེང་ཡེང་པོར་མི་འགྱུར་ཞིང་དེ་ལ་དེ་བཞིན་གཤེགས་པ་དྲན་པ་དང༌། ཤེས་བཞིན་དང་ལྡན་པར་བཏང་སྙོམས་སུ་བཞུགས་ཏེ། འདི་ནི་འཕགས་པས་བསྟེན་ཅིང་འཕགས་པས་བསྟེན་པར་རིགས་ཤིང་ཚོགས་ཡོངས་སུ་སྡུད་པ་དྲན་པ་ཉེ་བར་གཞག་པ་གསུམ་པའོ། །དགེ་སློང་དག་དྲན་པ་ཉེ་བར་གཞག་པ་གསུམ་པོ་འདི་དག་ནི་གང་འཕགས་པས་བསྟེན་ཅིང་འཕགས་པས་བསྟེན་པར་རིགས་པ་ཚོགས་ཡོངས་སུ་སྡུད་པའོ་ཞེས་ངས་ཇི་སྐད་བསྟན་པ་དེ་རྒྱས་པར་རབ་ཏུ་བཤད་དོ། །སྐུ་ཚེ་དང༌། རིགས་དང༌། སྐུ་བོང་ཚད་ཀྱིས་མིན་ཞེས་བྱ་བ་ལ། མདོ་དྲུག་གི་ཚོགས་ཀྱི་ལྔ་པ་རྟོགས་པ་བརྗོད་པ་ཆེན་པོའི་མདོ་ལས་འདི་ལྟར་འདོན་ཏེ། དགེ་སློང་དག་འདི་ནས་བསྐལ་པ་དགུ་བཅུ་རྩ་གཅིག་གི་གོང་དུ་ཡོངས་སུ་གང་ཡང་དེ་བཞིན་གཤེགས་པ་རྣམ་པར་གཟིགས་འཇིག་རྟེན་དུ་བྱུང་བ་དང༌། དགེ་སློང་དག་གང་ཡང་འདི་ནས་བསྐལ་པ་སུམ་ཅུ་རྩ་གཅིག་གི་གོང་དུ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་དང༌། ཐམས་ཅད་སྐྱོབ་འཇིག་རྟེན་དུ་བྱུང་ལ། དགེ་སློང་དག་བསྐལ་པ་བཟང་པོ་འདི་ལ་ཡང་དག་པར་རྫོགས་པའི་སངས་རྒྱས་བཞི་འཇིག་རྟེན་
དུ་བྱུང་སྟེ། འཁོར་བ་འཇིག་དང༌། གསེར་ཐུབ་དང༌། འོད་སྲུངས་དང༌། ད་ལྟར་ཤཱཀྱ་ཐུབ་པ་ང་དག་གོ །དགེ་སློང་དག་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་ཚེའི་ཚད་ནི་ལོ་སྟོང་ཕྲག་བརྒྱད་ཅུ་ཐུབ་པར་གྱུར་ཏོ། །དགེ་སློང་དག་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱི་ཚེའི་ཚད་ནི་ལོ་སྟོང་ཕྲག་བདུན་ཅུ་ཐུབ་པར་གྱུར་ཏོ། །དགེ་སློང་དག་ཡང་དག་པར་རྫོགས་པའི་སངས་རྒྱས་ཐམས་ཅད་སྐྱོབ་ཀྱི་ཚེའི་ཚད་ནི་ལོ་སྟོང་ཕྲག་དྲུག་ཅུ་ཐུབ་པར་གྱུར་ཏོ། །དགེ་སློང་དག་ཡང་དག་པར་རྫོགས་པའི་སངས་རྒྱས་འཁོར་བ་འཇིག་གི་ཚེའི་ཚད་ནི་ལོ་སྟོང་ཕྲག་ལྔ་བཅུ་ཐུབ་པར་གྱུར་ཏོ། །དགེ་སློང་དག་ཡང་དག་པར་རྫོགས་པའི་སངས་རྒྱས་གསེར་ཐུབ་ཀྱི་ཚེའི་ཚད་ནི་ལོ་སྟོང་ཕྲག་བཞི་བཅུ་ཐུབ་པར་གྱུར་ཏོ། །དགེ་སློང་དག་ཡང་དག་པར་རྫོགས་པའི་སངས་རྒྱས་འོད་སྲུངས་ཀྱི་ཚེའི་ཚད་ནི་ལོ་སྟོང་ཕྲག་སུམ་ཅུ་ཐུབ་པར་གྱུར་ཏོ། །ད་ལྟར་ངའི་ཚེའི་ཚད་ནི་ལོ་བརྒྱ་སྟེ། ཡང་དག་པར་བདེ་བ་དང་བཅས་ན་ཅུང་ཟད་ལྷག་པ་ཡང་ཡོད་དོ། །དགེ་སློང་དག་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ནི་རྒྱལ་རིགས་སུ་འཁྲུངས་པར་གྱུར་ལ། དགེ་སློང་དག་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་དང༌། ཐམས་ཅད་སྐྱོབ་དང༌། འཁོར་བ་འཇིག་དང༌། གསེར་ཐུབ་དང༌། འོད་སྲུངས་ནི་བྲམ་ཟེའི་རིགས་སུ་འཁྲུངས་བར་གྱུར་ཅིང༌། ད་ལྟར་ང་ནི་རྒྱལ་རིགས་སུ་འཁྲུངས་པར་གྱུར་ཏོ། །དགེ་སློང་དག་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་གདུང་ནི་ཀོ་ཏི་བྱིར་གྱུར་ལ། དགེ་སློང་དག་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་དང༌། ཐམས་ཅད་སྐྱོབ་དང༌། འཁོར་བ་འཇིག་དང༌། འོད་སྲུངས་དང༌། གསེར་ཐུབ་རྣམས་ཀྱི་གདུང་ནི་འོད་སྲུངས་སུ་གྱུར་ཏོ། །ད་ལྟར་ངའི་གདུང་ནི་གཽ་ཏ་མར་གྱུར་ཏོ་ཞེས་བྱ་བ་འདི་ལྟ་བུ་ལ་སོགས་པར་ཐ་དད་དོ།། །།གང་དག་རྒྱལ་བ་རྣམ་འདྲེན་ཅིང༌། །བྱ་བ་ཆུང་ངུ་བྱེད་གྱུར་པ། །ཞེས་བྱ་བ་ལ་སོགས་པ་ལ། སངས་རྒྱས་རབ་ཏུ་མང་པོའི་བྱེད་པ་ལས་འདོན་ཏོ། །གང་ཞིག་འཇིག་རྟེན་སངས་རྒྱས་ལ། །སྐྱབས་སོང་སྐྱེས་བུ་དེ་མཆོག་སྟེ། །སངས་རྒྱས་བྱ་བ་བྱས་སྐྱེ་བོ། །མྱ་ངན་འདས་པར་འགྲོ་བར་འགྱུར། །གད་ཞིག་རྒྱལ་བ་རྣམ་འདྲེན་ལ། །བྱ་བ་ཅུང་ཟད་བྱེད་གྱུར་པ། །དེ་དག་མཐོ་
རིས་སྣ་ཚོགས་དག །བགྲོད་ནས་བདུད་རྩི་གོ་འཕང་ཐོབ། །འདི་ལྟར་ཇི་བཞིན་ཐོས་ནས་ནི། །ང་ནི་མྱ་ངན་འདས་འོག་ཏུ། །སྲིད་པའི་རྒྱ་མཚོར་འཁྱམ་འགྱུར་ཞེས། །དགེ་བ་མང་པོ་རབ་ཏུ་བྱ། །ཞེས་གསུངས་སོ། །ཉོན་མོངས་པ་མེད་པ་ཞེས་བྱ་བ་ལ་སོགས་པ་ལ། བཅོམ་ལྡན་འདས་མཉན་ཡོད་ཀྱི་ལྷོ་ཕྱོགས་ན་བཞུགས་པ་ན་བྲམ་ཟེ་སྦས་པ་ལ་ཤིན་ཏུ་ཁྲོ་བའི་རང་བཞིན་ཅན་གྱི་བུ་ཞིག་སྐྱེས་པར་གྱུར་ཏོ། །ཇི་ཙམ་ན་ཕའི་སྲིད་སྲུང་གི་རིག་བྱེད་ཀྱི་ལས་ཀྱི་མཐའ་དག་བོར་ཏེ་རབ་ཏུ་བྱུང་ངོ༌། །དེ་དེ་ན་ཡང་ཁྲོ་བའི་རང་བཞིན་དུ་གྱུར་ཏེ། བྱ་དང་རི་དགས་དག་ལ་གནོད་པ་བྱེད་པ་ན། ནགས་ཚལ་ལ་གནས་པའི་ལྷ་རྣམས་ཀྱིས་དེ་དེ་ན་གནས་སུ་མི་སྟེར་ཏེ། ཇི་ཙམ་ན་བཅོམ་ལྡན་འདས་ལྷ་དང་བཅས་པའི་འཇིག་རྟེན་མངོན་པར་དང་བར་བྱེད་པའི་ཆོ་འཕྲུལ་ཆེན་པོ་སྟོན་པ་དེའི་ཚེ་ཆོ་འཕྲུལ་ཆེན་པོ་དེ་ལ་ནགས་ཚལ་ལ་གནས་པའི་ལྷ་དེ་དག་མངོན་པར་དང་སྟེ། སྙིང་རྗེས་སྨྲས་པ། འཇིག་རྟེན་གྱི་རྒྱན་དུ་གྱུར་པའི་སངས་རྒྱས་བྱུང་གི །ཁྱོད་བཅོམ་ལྡན་འདས་བལྟ་བའི་ཕྱིར་སོང་ཤིག་ཅེས་ཇི་སྲིད་དུ་རྒྱལ་བྱེད་ཀྱི་ཚལ་དུ་ཁྲིད་པའི་བར་དུའོ། །བཅོམ་ལྡན་འདས་ཀྱིས་དེ་དད་པར་བྱེད་པའི་འོད་ཀྱི་དཀྱིལ་འཁོར་བཀྱེ་སྟེ། ཇི་ཙམ་ན་རབ་ཏུ་བྱུང་བའི་བར་དུ་སྟེ། བྱམས་པ་གོམས་པར་བྱས་ནས་དགྲ་། བཅོམ་པ་ཉིད་ཐོབ་པར་གྱུར་ཏོ། །རབ་འབྱོར་ཞེས་མིང་གྲགས་པར་གྱུར་པའོ། །གྲང་དང༌། ཡུལ་དང༌། ལྗོངས་གང་དུ་བསོད་སྙོམས་ཀྱི་ཕྱིར་འགྲོ་བ་ན་བདག་ལ་སུ་ཡང་སེམས་ཉོན་མོངས་པར་མ་གྱུར་ཅིག་ཅེས་བྱ་བ་རྣམ་པར་བལྟས་ཏེ། ཕྱིས་སྤྱོད་ཡུལ་དུ་འགྲོ་བར་བྱེད་དེ། གང་གི་ཕྱིར་སེམས་ཉེ་བར་ཉོན་མོངས་པར་བྱེད་ན་སྤྱོད་ཡུལ་དུ་མི་འགྲོ་ཞིང་ཟན་གཅོད་པའི་བར་དུ་ཡང་བྱེད་དོ། །ཇི་ཙམ་ན་དེས་བསམ་པ་ན་བདག་ཉིད་ཀླུ་ལས་ཤི་འཕོས་པ་དང༌། གཉེན་རྣམས་གདུལ་བྱར་གྱུར་པ་མཐོང་སྟེ། ཇི་ཙམ་ན་ཀླུའི་ཁང་པར་ཕྱིན་ཏེ། ཀླུའི་རིགས་ལྔ་བརྒྱ་འོངས་པ་དག་བཏུལ་ཏེ། དེ་དག་བྱམས་པའི་ཏིང་ངེ་འཛིན་ལ་བཀོད་དེ་ཤིང་ཤལ་མ་ལིའི་ནམ་མཁའ་ལྡིང་གི་གནོད་པ་མེད་པར་བྱས་སོ། །ཇི་ཙམ་ན་གནས་བརྟན་གྱིས་ནམ་མཁའ་ལྡིང་རྣམས་གདུལ་པའི་ཕྱིར་ཀླུའི་རིགས་ལྔ་བརྒྱ་ཤིང་ཤལ་མ་ལིའི་སྟེང་དུ་བཏེག་སྟེ། ནམ་མཁའ་ལྡིང་ལྔ་བརྒྱ་ལྔ་བརྒྱ་བཏུལ་བའི་བར་དུའོ། །དེ་ནས་བཅོམ་ལྡན་འདས་
ཀྱིས་དགེ་སློང་རྣམས་ལ་བོས་ཏེ། དགེ་སློང་དག་ངའི་ཉན་ཐོས་ཉོན་མོངས་པ་མེད་པ་ལ་གནས་པ་རྣམས་ཀྱི་ནང་དུ་མཆོག་ནི་དགེ་སློང་རབ་འབྱོར་འདི་ཡིན་ཏེ། ལས་གང་གིས་ཀླུར་སྐྱེས་ཤེ་ན། བཅོམ་ལྡན་འདས་འོད་སྲུངས་ཀྱི་གསུང་རབ་ལ་རིགས་ཀྱི་བུ་འདི་རབ་ཏུ་བྱུང་སྟེ། དེའི་མཁན་པོ་ཉོན་མོངས་པ་མེད་པ་ལ་གནས་ཏེ། དེས་ཀྱང་ཉོན་མོངས་པ་མེད་པ་ལ་དད་པ་ཐོབ་པོ། །དེས་གཞོན་དུ་རྣམས་ཀྱིས་རྒོད་པ་དང༌། བཟློག་པ་དང༌། དེ་རྣམས་ཀྱིས་སྨྲས་པ། འདི་ནི་བྱམས་པ་བྱམས་པ་ལ་གནས་པ་ཞེས་སྨྲས་པ་དང༌། དེ་ཁྲོས་ནས་སྨྲས་པ། ཚེ་དང་ལྡན་པ་ཁྱེད་ཅག་ནི་སྦྲུལ་དང་འདྲའོ་ཞེས་བྱ་བ་ལ་སོགས་པ་རྒྱས་པར་འབྱུང་ངོ༌། །སོ་སོ་ཡང་དག་པར་རིག་པ་བཞི་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ན་འོ། །དགེ་སློང་དག་བཞི་པོ་འདི་དག་ནི་སོ་སོ་ཡང་དག་པར་རིག་པ་བཞི་སྟེ། བཞི་གང་ཞེ་ན། དོན་སོ་སོ་ཡང་དག་པར་རིག་པ་དང༌། ཆོས་སོ་སོ་ཡང་དག་པར་རིག་པ་དང༌།། ངེས་པའི་ཚིག་སོ་སོ་ཡང་དག་པར་རིག་པ་དང༌། སྤོབས་པ་སོ་སོ་ཡང་དག་པར་རིག་པའོ་ཞེས་གསུངས་སོ། །བཏགས་པའི་མིང་དང་གཟུགས་བཏགས་པ་ལས་སོ་སོ་ཡང་དག་པར་རིག་པ་འདི་དག་བཤད་དོ། །མངོན་ཤེས་རྣམ་དྲུག་ཅེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་མངོན་པར་ཤེས་པ་ནི་དྲུག་སྟེ། དྲུག་གང་ཞེ་ན། རྫུ་འཕྲུལ་གྱི་ཡུལ་ཤེས་པ་དང༌། ལྷའི་མིག་དང༌། རྣ་བ་དང༌། སེམས་ཀྱི་རྣམ་གྲངས་དང༌། སྔོན་གྱི་གནས་རྣམ་པ་དུ་མ་རྗེས་སུ་དྲན་པ་དང༌། ཟག་པ་ཟད་པའོ་ཞེས་གསུངས་སོ། །འོ་ན་རབ་ཏུ་བྱེད་པ་ལས་ཞེས་བྱ་བ་ལ། རབ་ཏུ་བྱེད་པའི་རྐང་པའི་ཡང་དག་པར་སྡུད་པའི་རབ་ཏུ་བྱེད་པ་ལས། མངོན་པར་ཤེས་པའི་ཆོས་རྣམས་གང་ཞེ་ན། ཤེས་རབ་དགེ་བ་ནི་མངོན་པར་ཤེས་པ་ཞེས་བརྗོད་དེ། ཆོས་ཐམས་ཅད་ཀྱི་དངོས་པོ་ཇི་ལྟ་བ་བཞིན་མངོན་པར་ཤེས་པའི་ཕྱིར་རོ་ཞེས་གསུངས་སོ། །གསུམ་ནི་རིག་པ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །མི་སློབ་པའི་རིག་པ་ནི་གསུམ་སྟེ། མི་སློབ་པའི་སྔོན་གྱི་གནས་རྗེས་སུ་དྲན་པ་ཤེས་པ་མངོན་སུམ་དུ་བྱ་བའི་རིག་པ་དང༌། མི་སློབ་པའི་འཆི་འཕོ་བ་དང༌། སྐྱེ་བ་ཤེས་པ་མངོན་སུམ་དུ་བྱ་བའི་རིག་པ་དང༌། མི་སློབ་པའི་ཟག་པ་ཟད་པའི་ཤེས་པ་མངོན་སུམ་དུ་བྱ་བའི་རིག་པའོ། །སྔོན་གྱི་
གནས་རྣམས་རིག་པ་ཡིས། །མཐོ་རིས་ངན་སོང་གཟིགས་ནས་ནི། །དེ་ནས་མངོན་ཤེས་ངེས་པ་ཡིས། །ཐུབ་པ་སྐྱེ་བ་ཟད་པར་འགྱུར། །ཀུན་ལས་འདོད་ཆགས་རྣམ་གྲོལ་ཞིང༌། །སེམས་ནི་འདོད་ཆགས་གྲོལ་ཞེས་འགྱུར། །རིག་པ་གསུམ་པོ་ཕུན་ཚོགས་པས། །དེ་ཕྱིར་གསུམ་རིག་ཅེས་བྱའོ། །ཞེས་གསུངས་སོ། །ཆོ་འཕྲུལ་རྣམ་པ་གསུམ་ནི། མདོ་དྲུག་གི་ཚོགས་ཀྱི་བཞི་པ་རེག་པའི་མདོ་ལས་འབྱུང་སྟེ། དེ་ནས་བཅོམ་ལྡན་འདས་ཀྱིས་རལ་པ་ཅན་སྟོང་རབ་ཏུ་ཕྱུང་ཞིང་བསྙེན་པར་རྫོགས་པར་བྱས་ཏེ། ཇི་ལྟར་འདོད་པར་ཉེ་བར་གནས་བར་བྱ་སྟེ། ག་ཡ་མགོ་གང་ན་བ་དེར་ལྗོངས་རྒྱུ་ཞིང་གཤེགས་ཏེ། རིམ་གྱིས་ག་ཡ་མགོར་གཤེགས་ཏེ། ག་ཡ་མགོའི་ཨ་ཤིར་ཤའི་མཆོད་རྟེན་ན་དགེ་སློང་སྟོང་ཐམ་པ་དང༌། ཐབས་ཅིག་ཏུ་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་སྟོང་རྣམས་ལ་ཆོ་འཕྲུལ་རྣམ་པ་གསུམ་པོ་རྫུ་འཕྲུལ་གྱི་ཆོ་འཕྲུལ་དང༌། ཀུན་བརྗོད་པའི་ཆོ་འཕྲུལ་དང། རྗེས་སུ་བསྟན་པའི་ཆོ་འཕྲུལ་རྣམས་ཀྱིས་གདམས་པར་མཛད་དེ། དེ་ལ་བཅོམ་ལྡན་འདས་ཀྱི་རྫུ་འཕྲུལ་གྱི་ཆོ་འཕྲུལ་ནི་འདི་ཡིན་ཏེ། བཅོམ་ལྡན་འདས་ཇི་ལྟར་ཐུགས་མཉམ་པར་གཞག་པ་ན་རང་གི་གདན་ལས་མི་སྣང་བ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ། ཤར་ཕྱོགས་སུ་འཕོས་ཏེ་སྤྱོད་ལམ་བཞི་སྟོན་པར་མཛད་དེ། འདི་ལྟ་སྟེ། གཤེགས་པ་དང༌། བཞུགས་པ་དང༌། གནས་པ་དང༌། གཟིམས་པ་དང༌། སྟོན་པར་མཛད་དོ། །མེའི་ཁམས་ལ་སྙོམས་པར་ཞུགས་ཤིང་མེའི་ཁམས་ལ་སྙོམས་པར་ཞུགས་ནས་སངས་རྒྱས་བཅོམ་ལྡན་འདས་ཀྱི་སྐུ་ལས་རྣམ་པ་དུ་མའི་འོད་དག་འཕྲོས་ཏེ། འདི་ལྟ་སྟེ། སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་དང༌། ལྗང་གུ་དང༌། ཤེལ་གྱི་ཁ་དོག་ལྟ་བུ་དག་འབྱུང་བའི་ཆོ་འཕྲུལ་དག་སྟོན་ཅིང༌། ལུས་ཀྱི་སྟོད་ནས་ཆུ་གྲང་མོའི་རྒྱུན་འབྱུང་ཞིང་ལུས་ཀྱི་སྨད་ནས་འབར་བ་དང༌། ལུས་ཀྱི་སྨད་ནས་ཆུ་གྲང་མོའི་རྒྱུན་འབྱུང་ཞིང་ལུས་ཀྱི་སྟོད་ནས་འབར་བར་བྱེད་དེ། ཤར་ཕྱོགས་ཇི་ལྟ་བ་བཞིན་དུ་ལྷོ་དང༌། དེ་བཞིན་དུ་ནུབ་དང༌། དེ་བཞིན་དུ་བྱང་ཕྱོགས་སུ་ཡང་སྟོན་པར་བྱེད་དེ། ཕྱོགས་བཞིར་སྟེང་དང་འོག་ཏུ་རྫུ་འཕྲུལ་བསྟན་པར་མཛད་ནས། དེ་ནས་རྫུ་འཕྲུལ་མངོན་པར་འདུ་བྱ་བ་ནི་དེ་དག་སླར་བཏུལ་
ཏེ། དགེ་སློང་གི་དགེ་འདུན་གྱི་མདུན་དུ་གདན་བཤམས་པ་ཉིད་ལ་བཞུགས་ཏེ། འདི་ནི་བཅོམ་ལྡན་འདས་ཀྱི་རྫུ་འཕྲུལ་གྱི་ཆོ་འཕྲུལ་ལོ། །དེ་ལ་བཅོམ་ལྡན་འདས་ཀྱི་ཀུན་བརྗོད་པའི་ཆོ་འཕྲུལ་ནི་འདི་ཡིན་ཏེ། དགེ་སློང་དག་ཁྱེད་ཀྱི་སེམས་ནི་འདི་ལྟ་བུ། ཡིད་ནི་འདི་ལྟ་བུ། རྣམ་པར་ཤེས་པ་ནི་འདི་ལྟ་བུ་སྟེ། འདི་ལྟ་བུར་རྟོག་པར་བྱེད་དོ། །འདི་ལྟ་བུར་རྟོག་པར་མི་བྱེད་དོ། །འདི་ལྟར་ཡིད་ལ་བྱེད་དོ། །འདི་ལྟར་ཡིད་ལ་མི་བྱེད་དོ། །འདི་ནི་སྤངས་པའོ། །འདི་ནི་ལུས་ཀྱིས་མངོན་སུམ་དུ་བྱས་ནས་བསྒྲུབས་ཏེ་གནས་སོ་ཞེས་བྱ་བ་སྟེ། འདི་ནི་བཅོམ་ལྡན་འདས་ཀྱིས་ཀུན་བརྗོད་པའི་ཆོ་འཕྲུལ་ཡིན་ནོ། །དེ་ལ་བཅོམ་ལྡན་འདས་ཀྱི་རྗེས་སུ་བསྟན་པའི་ཆོ་འཕྲུལ་ནི་འདི་ཡིན་ཏེ། དགེ་སློང་དག་འདི་ཐམས་ཅད་ནི་ཀུན་དུ་འབར་བའོ། །དགེ་སློང་དག་འདི་ཐམས་ཅད་ནི་འབར་བ་གང་ཞེ་ན། དགེ་སློང་དག་མིག་ནི་ཀུན་དུ་འབར་བའོ། །གཟུགས་དང༌། མིག་གི་རྣམ་པར་ཤེས་པ་དང༌། མིག་གི་འདུས་ཏེ་རེག་པ་དང༌། མིག་གི་འདུས་ཏེ་རེག་པའི་རྐྱེན་གྱིས་བྱུང་བའི་ཚོར་བ་བདེ་བ་འམ། སྡུག་བསྔལ་བ་འམ། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པ་དེ་ཡང་ཀུན་དུ་འབར་བའོ། །གང་གིས་ཀུན་དུ་འབར་ཞེ་ན། འདོད་ཆགས་ཀྱི་མེ་འབར་བ་དང། ཞེ་སྡང་གི་མེ་དང༌། གཏི་མུག་གི་མེ་ཀུན་ཏུ་འབར་བ་དང༌། སྐྱེ་བ་དང༌། རྒ་བ་དང༌། ན་བ་དང༌། འཆི་འཕོ་བ་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་དང༌། སྡུག་བསྔལ་ཀུན་དུ་འབར་བའོ་ཞེས་ང་སྨྲའོ། །དགེ་སློང་དག་རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ནི་ཀུན་དུ་འབར་བ་སྟེ། ཆོས་དང་ཡིད་ཀྱི་རྣམ་པར་ཤེས་པ་དང༌། ཡིད་ཀྱི་འདུས་ཏེ་རེག་པ་དང༌། ཡིད་ཀྱི་འདུས་ཏེ་རེག་པའི་རྐྱེན་གྱིས་འབྱུང་བའི་ཚོར་བ་བདེ་བ་འམ། སྡུག་བསྔལ་བ་འམ། བདེ་བ་ཡང་མ་ཡིན། སྡུག་བསྔལ་བ་ཡང་མ་ཡིན་པ་དང་ཡང་ཀུན་དུ་འབར་བ་སྟེ། གང་གིས་ཀུན་དུ་འབར་ཞེ་ན། འདོད་ཆགས་ཀྱི་མེ་འབར་བ་དང༌། ཞེ་སྡང་གི་མེ་དང༌། གཏི་མུག་གི་མེ་ཀུན་དུ་འབར་བ་དང༌། སྐྱེ་བ་དང༌། རྒ་བ་དང༌། ན་བ་དང༌། འཆི་བ་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་
བསྔལ་བ་དང༌། ཡིད་མི་བདེ་བ་དང༌། འཁྲུག་པ་དང༌། སྡུག་བསྔལ་ཀུན་དུ་འབར་བའོ་ཞེས་ང་སྨྲ་སྟེ། འདི་ནི་བཅོམ་ལྡན་འདས་ཀྱི་རྗེས་སུ་བསྟན་པའི་ཆོ་འཕྲུལ་ཡིན་ནོ། །ཆོས་ཀྱི་རྣམ་གྲངས་འདི་བཤད་པ་ན་སྔོན་རལ་པ་ཅན་དུ་གྱུར་པའི་དགེ་སློང་ཉེ་བར་ལེན་པ་མེད་པར་ཟག་པ་ལས་སེམས་རྣམ་པར་གྲོལ་ལོ་ཞེས་གསུངས་སོ།། །།བསྟན་པ་མཆོག །མི་འཁྲུལ་ཕྱིར་དང་ཕན་པ་དང༌། །ཞེས་བྱ་བ་ལ། བཅོམ་ལྡན་འདས་ནཱ་ལེན་དྲ་ཨ་མྲས་ཀུན་དུ་བསྐོར་བའི་ཀུན་དགའ་ར་བ་ན་བཞུགས་ཏེ། དེ་ནས་ཁྱིམ་བདག་ཉ་པའི་བུ་བཅོམ་ལྡན་འདས་གང་ན་བ་དེར་ཉེ་བར་སོང་སྟེ། ཉེ་བར་སོང་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་བྱས་ཏེ། ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ཁྱིམ་བདག་ཉ་པའི་བུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ནཱ་ལེན་དྲ་འབྱོར་བརྒྱས་པ་བདེ་བ་ལོ་ལེགས་པ་སྐྱེ་བོ་དང་མི་མང་པོས་གང་བ་འདི་ན་བཅོམ་ལྡན་འདས་ལ་མངོན་པར་དད་པ་མང་དུ་མཆིས་ལགས་ཏེ། བཅོམ་ལྡན་འདས་ཀྱིས་དགེ་སློང་རྣམས་འགའ་ཞིག་མིའི་ཆོས་ལས་བླ་མར་གྱུར་པའི་རྫུ་འཕྲུལ་དག་བསྟན་དུ་བཅུག་ན་ལེགས་ཏེ། བྲམ་ཟེ་དང༌། ཁྱིམ་བདག་འགྲོ་བ་དང་འོང་བ་དག་གིས་མཐོང་ནས་འདི་ལྟ་བུའི་ནཱ་ལེན་དྲ་ཕལ་ཆེར་བཅོམ་ལྡན་འདས་ལ་དད་པར་འགྱུར་རོ། །ཁྱིམ་བདག་གི་བུ་ང་འདི་ལྟར་དགེ་སློང་དག་ཁྱེད་ཅག་བྲམ་ཟེ་དང་ཁྱིམ་བདག་འོང་བ་རྣམས་ལ་མིའི་ཆོས་ལས་བླ་མར་གྱུར་པའི་རྫུ་འཕྲུལ་དག་སྟོན་ཅིག་ཅེས་ཉན་ཐོས་རྣམས་ལ་ཆོས་མི་སྟོན་གྱི། འོན་ཀྱང་འདི་ལྟར་དགེ་སློང་དག་དགེ་བ་ནི་གསང་བར་བྱ་ཞིང་སྡིག་པ་ནི་མཐོལ་བར་བྱའོ་ཞེས་ཉན་ཐོས་རྣམས་ལ་ཆོས་སྟོན་ཏོ། །བཅོམ་ལྡན་འདས་ཀྱིས་མིའི་ཆོས་བླ་མར་གྱུར་པའི་རྫུ་འཕྲུལ་ལ་ཉེས་དམིགས་ཅི་ཞིག་ཡང་དག་པར་རྗེས་སུ་གཟིགས་ན་འདི་ལྟར་དགེ་སློང་དག་དགེ་བ་ནི་གསང་བར་བྱ་ཞིང་སྡིག་པ་ནི་མཐོལ་བར་བྱའོ་ཞེས་ཉན་ཐོས་རྣམས་ལ་ཆོས་སྟོན་ཏོ། །ཁྱིམ་བདག་གི་བུ་ཆོ་འཕྲུལ་ནི་རྣམ་པ་གསུམ་སྟེ། གསུམ་གང་ཞེ་ན། རྫུ་འཕྲུལ་གྱི་ཆོ་འཕྲུལ་དང༌། ཀུན་བརྗོད་པའི་ཆོ་འཕྲུལ་དང༌། རྗེས་སུ་བསྟན་པའི་ཆོ་འཕྲུལ་ལོ། །ཁྱིམ་བདག་གི་བུ་རྫུ་འཕྲུལ་གྱི་ཆོ་འཕྲུལ་གང་ཞེ་ན། ཁྱིམ་བདག་གི་བུ་འདི་ན་དགེ་
སྦྱོང་ངམ་བྲམ་ཟེ་ཁ་ཅིག་རྫུ་འཕྲུལ་གྱི་ཡུལ་རྣམ་པ་དུམ་ཉམས་སུ་མྱོང་བར་བྱེད་པ་སྟེ། འདི་ལྟ་སྟེ། གཅིག་ཏུ་གྱུར་ནས་མང་པོར་འགྱུར་བ་དང༌། མང་པོར་གྱུར་ནས་གཅིག་ཏུ་འགྱུར་བ་དང༌། སྣང་བ་དང་མི་སྣང་བར་ཤེས་པ་དང་མཐོང་བ་ཉམས་སུ་མྱོང་བར་བྱེད་པ་དང༌། རྩིག་པ་དང༌། ར་བ་དང༌། རྡོ་བ་དང༌། རི་ལ་ལུས་ཀྱིས་ཐོགས་པ་མེད་པར་འགྲོ་སྟེ། འདི་ལྟ་སྟེ། ནམ་མཁའ་ལ་བྱ་བ་བཞིན་ནོ། །ས་ལ་ཡང་བྱིའུ་ཟུལ་དུ་བྱེད་དེ། འདི་ལྟ་སྟེ། ཆུ་ལ་བྱ་བ་བཞིན་ནོ། །ཆུ་ལ་ཡང་འབྱིང་བ་མེད་པར་འགྲོ་སྟེ། འདི་ལྟ་སྟེ། ས་ལ་བྱ་བ་བཞིན་ནོ། །ནམ་མཁའ་ལ་ཡང་སྐྱིལ་མོ་ཀྲུང་གིས་འགྲོ་སྟེ། དཔེར་ན་འདབ་ཆགས་བྱ་བཞིན་ནོ། །ཉི་མ་དང་ཟླ་བ་འདི་ལྟར་རྫུ་འཕྲུལ་ཆེ་ཞིང་མཐུ་ཆེ་བ་འདི་དག་ལག་པས་ནོམ་ཞིང་ཉུག་པ་དང༌། ཚངས་པའི་འཇིག་རྟེན་གྱི་བར་དུ་ལུས་ཀྱིས་དབང་སྒྱུར་བར་བྱེད་དེ། དགེ་སྦྱོང་ངམ། བྲམ་ཟེ་དག་རྫུ་འཕྲུལ་རྣམ་པ་དུ་མ་ཉི་མ་དང་ཟླ་བ་ལག་པས་ནོམ་ཞིང་ཉུག་པའི་བར་དུ་བྱེད་པ་དག་དད་པའི་ཁྱིམ་བདག་གམ། ཁྱིམ་བདག་གི་བུ་འགའ་ཞིག་གིས་མཐོང་སྟེ། མཐོང་ནས་མ་དད་པའི་ཁྱིམ་བདག་གམ་ཁྱིམ་བདག་གི་བུ་དག་ལ་འདི་སྐད་དུ། ཀྱེ་སྐྱེས་བུ་ཤེས་པར་གྱིས་ཤིག །འདི་ན་དགེ་སྦྱོང་ངམ། བྲམ་ཟེ་རྫུ་འཕྲུལ་གྱི་ཡུལ་རྣམ་པ་དུ་མ་གཅིག་ཏུ་གྱུར་ནས་མང་པོར་འགྱུར་བ་དང༌། ཉི་མ་དང་ཟླ་བ་ལག་པས་ནོམ་ཞིང་ཉུག་པའི་བར་དུ་བྱེད་པ་དག་ངས་མཐོང་ངོ་ཞེས་སྨྲའོ། །དེ་འདི་སྐད་དུ། ཀྱེ་སྐྱེས་བུ་ཁྱོད་ཀྱིས་འདི་ན་དགེ་སྦྱོང་ངམ། བྲམ་ཟེ་རྫུ་འཕྲུལ་གྱི་ཡུལ་རྣམ་པ་དུ་མ་ཉི་མ་དང་ཟླ་བ་ལ་ནོམ་ཞིང་ཉུག་པའི་བར་དུ་བྱེད་པ་མཐོང་བ་དེ་ལ་ངོ་མཚར་བ་ཅི་ཞིག་ཡོད། ཀྱེ་སྐྱེས་བུ་གན་དྷ་ར་པ་ཞེས་བྱ་བའི་རིག་སྔགས་ཡོད་དོ། །དེ་འགའ་ཞིག་གིས་བཟུང་ཞིང་བཅངས་ན་རྫུ་འཕྲུལ་གྱི་ཡུལ་རྣམ་པ་དུ་མ་ཉི་མ་དང་ཟླ་བ་ལ་ནོམ་ཞིང་ཉུག་པའི་བར་དུ་བྱེད་པ་ཡོད་དོ་ཞེས་སྨྲ་ན། ཁྱིམ་བདག་གི་བུ་འདི་ཇི་སྙམ་དུ་སེམས། གནས་དང་པོ་འདི་ལ་དད་པའི་ཁྱིམ་བདག་གམ་ཁྱིམ་བདག་གི་བུ་དག་མ་དད་པའི་ཁྱིམ་བདག་གམ་ཁྱིམ་བདག་གི་བུའི་ཉེ་བར་བརྗོད་པ་ཉན་སྙམ་སེམས་སམ། བཙུན་པ་དེ་བཞིན་ནོ། །ཁྱིམ་བདག་གི་བུ་མིའི་ཆོས་ལས་བླ་མར་གྱུར་པའི་རྫུ་འཕྲུལ་ལ་ཉེས་དམིགས་འདི་ལྟ་བུ་ངས་ཡང་དག་པར་རྗེས་སུ་གཟིགས་ནས་འདི་ལྟར་ཉན་ཐོས་
རྣམས་ལ། དགེ་སློང་དག་དགེ་བ་ནི་གསང་བར་བྱ་ཞིང་སྡིག་པ་ནི་མཐོལ་བར་བྱའོ་ཞེས་ཆོས་སྟོན་པར་མཛད་དོ། །ཁྱིམ་བདག་གི་བུ་ཀུན་བརྗོད་པའི་ཆོ་འཕྲུལ་གང་ཞེ་ན། ཁྱིམ་བདག་གི་བུ་འདི་ན་དགེ་སྦྱོང་ངམ་བྲམ་ཟེ་ཁ་ཅིག་ནི་རྒྱུ་མཚན་ནམ། ཡོངས་སུ་བརྗོད་པ་ལ་ཀུན་བརྗོད་པར་བྱ་སྟེ། ཡིད་ནི་འདི་ལྟ་བུའོ། །ཡིད་ནི་གཞན་དུའོ། །སྔ་བར་བྱས་པ་དང༌། སྔ་བར་བརྗོད་པ་ཡང་ཀུན་བརྗོད་ལ། གསང་བར་བྱས་པ་དང༌། གསང་བར་བརྗོད་པ་ཀུན་ཡང་རྗོད་པར་བྱེད་ལ། འདས་པ་དང༌། མ་འོངས་པ་དང༌། ད་ལྟར་བྱུང་བ་ཀུན་ཡང་རྗོད་པར་བྱེད་ཅིང༌། ཐག་རིང་པོ་ཡང་ཀུན་བརྗོད་ལ། ཐག་ཉེ་བར་ཡང་ཀུན་བརྗོད་ཅིང༌། སེམས་ཀྱང་ཀུན་བརྗོད་ལ་སེམས་ལས་བྱུང་བ་ཡང་ཀུན་རྗོད་པར་བྱེད་དེ། གང་ཅུང་ཟད་བརྗོད་པ་དེ་ཐམས་ཅད་དེ་བཞིན་དུ་འགྱུར་གྱི། གཞན་དུ་ཡང་མ་ཡིན་པ་དང༌། རྒྱུ་མཚན་ནམ་ཡོངས་སུ་བརྗོད་པ་ལས་ཀུན་རྗོད་པར་མི་བྱེད་མོད་ཀྱི། འོན་ཀྱང་ལྷ་དང་མི་རྣམས་ལས་ཐོས་ནས་ཡིད་ནི་འདི་ལྟ་བུའོ་ཞེས་ཀུན་རྗོད་པར་བྱེད་དེ་ཞེས་བྱ་བ་ནས། ཐམས་ཅད་དེ་བཞིན་དུ་གྱུར་པ་མ་ཡིན་ཞེས་བྱ་བའི་བར་དུ་དང༌། རྒྱུ་མཚན་དང་ཡོངས་སུ་བརྗོད་པ་ལས་ཀུན་རྗོད་པར་ཡང་མི་བྱེད་ལ་ལྷ་དང་མི་རྣམས་ལས་ཐོས་ནས་ཀུན་རྗོད་པར་ཡང་མི་བྱེད་མོད་ཀྱི། འོན་ཀྱང་ཡོངས་སུ་རྟོག་པ་དང༌། ཡོངས་སུ་དཔྱོད་པས་སེམས་ཅན་གཞན་དང་གང་ཟག་གཞན་རྣམས་ཀྱི་ཡིད་ཡིད་ཀྱིས་རྣམ་པར་ཤེས་ནས་ཡིད་ནི་འདི་ལྟ་བུའོ་ཞེས་བྱ་བ་ནས། སྔ་མ་བཞིན་དུ་ཐམས་ཅད་དེ་བཞིན་དུ་འགྱུར་གྱི། གཞན་དུ་མ་ཡིན་ཞེས་བྱ་བའི་བར་དུའོ། །དགེ་སྦྱོང་ངམ་བྲམ་ཟེ་རྒྱུ་མཚན་ནམ། ཡོངས་སུ་བརྗོད་པ་ལས་ཡིད་ནི་འདི་ལྟ་བུའོ་ཞེས་ཀུན་རྗོད་པར་བྱེད་པ་ཞེས་བྱ་བ་ནས། སྔ་མ་བཞིན་དུ་ཐམས་ཅད་དེ་བཞིན་དུ་འགྱུར་གྱི། གཞན་དུ་མ་ཡིན་ཞེས་བྱ་བའི་བར་དུ་སྟེ། དད་པའི་ཁྱིམ་བདག་གམ། ཁྱིམ་བདག་གི་བུ་དག་གིས་མཐོང་སྟེ། མཐོང་ནས་མ་དད་པའི་ཁྱིམ་བདག་གམ་ཁྱིམ་བདག་གི་བུ་དེ་དག་ལ་འདི་སྐད་དུ་ཀྱེ་སྐྱེས་བུ་དག་ཤེས་པར་གྱིས་ཤིག །འདི་ན་དགེ་སྦྱོང་ངམ། བྲམ་ཟེ་རྒྱུ་མཚན་ནམ་ཡོངས་སུ་བརྗོད་པ་ལས་ཡིད་ནི་འདི་ལྟ་བུའོ་ཞེས་ཀུན་བརྗོད་ཅེས་བྱ་བ་ནས། ཐམས་ཅད་དེ་བཞིན་དུ་འགྱུར་གྱི། གཞན་དུ་ཡང་མ་
ཡིན་པ་ངས་མཐོང་ངོ་ཞེས་སྨྲས་པ་དང༌། ཀྱེ་སྐྱེས་བུ་ཁྱོད་ཀྱིས་དགེ་སྦྱོང་ངམ་བྲམ་ཟེ་རྒྱུ་མཚན་ནམ་ཡོངས་སུ་བརྗོད་པ་ལས་ཡིད་ནི་འདི་ལྟ་བུའོ་ཞེས་ཀུན་བརྗོད་ཅེས་བྱ་བ་ནས། ཐམས་ཅད་དེ་བཞིན་དུ་འགྱུར་གྱི། གཞན་དུ་མ་ཡིན་པ་མཐོང་བ་ལ་ངོ་མཚར་བ་ཅི་ཞིག་ཡོད། ཀྱེ་སྐྱེས་བུ་རྟོག་བྱེད་ཅེས་བྱ་བའི་རིག་སྔགས་ཡོད་དེ་གང་ཞིག་གིས་བཟུང་ཞིང་བཅངས་ནས་རྒྱུ་མཚན་ནམ་ཡོངས་སུ་བརྗོད་པ་ལས་ཡིད་ནི་འདི་ལྟ་བུའོ་ཞེས་ཀུན་རྗོད་པར་བྱེད་ཅེས་བྱ་བ་ནས་ཐམས་ཅད་དེ་བཞིན་དུ་འགྱུར་གྱི་གཞན་དུ་མ་ཡིན་ནོ་ཞེས་སྨྲ་ན། ཁྱིམ་བདག་གི་བུ་འདི་ཇི་སྙམ་དུ་སེམས། གནས་གཉིས་པ་འདི་ལ་དད་པའི་ཁྱིམ་བདག་གམ། ཁྱིམ་བདག་གི་བུ་དེ་དག་མ་དད་པའི་ཁྱིམ་བདག་གམ། ཁྱིམ་བདག་གི་བུ་དེ་དག་གི་ཉེ་བར་བརྗོད་པ་ཉན་སྙམ་སེམས་སམ། བཙུན་པ་དེ་བཞིན་ནོ། །ཁྱིམ་བདག་གི་བུ་མིའི་ཆོས་ལས་བླ་མར་གྱུར་པའི་ཀུན་བརྗོད་པའི་ཆོ་འཕྲུལ་ལ་ཉེས་དམིགས་འདི་ལྟ་བུ་ངས་ཡང་དག་པར་རྗེས་སུ་གཟིགས་ནས། དགེ་སློང་དག་དགེ་བ་ནི་གསང་བར་བྱ་ཞིང་སྡིག་པ་ནི་མཐོལ་བར་བྱའོ་ཞེས་ཉན་ཐོས་རྣམས་ལ་ཆོས་སྟོན་པར་མཛད་དོ། །ཁྱིམ་བདག་གི་བུ་རྗེས་སུ་བསྟན་པའི་ཆོ་འཕྲུལ་གང་ཞེ་ན། ཁྱིམ་བདག་གི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་བྱུང་ཞེས་བྱ་བ་ནས་རྒྱས་པར་གནས་རྣམ་པ་གསུམ་རྣམས་ལ་སྟོན་པའི་ཡོངས་སུ་དག་པ་བཙལ་བར་བྱའོ་ཞེས་དེའི་དཔེ་ཚུལ་ཁྲིམས་ཀྱི་ཕུང་པོའི་བསམ་གཏན་དང༌། མངོན་པར་ཤེས་པ་ཞེས་བྱ་བའི་ཚུལ་ཁྲིམས་ཀྱི་ཕུང་པོའི་མདོ་ལྔ་བའི་སྟོད་ཀྱི་ཆ་ལས་འབྱུང་ལ། སྨད་ཀྱི་ཆ་ནི་མཛོད་ཀྱི་གནས་གཉིས་པར་ཚངས་པའི་བར་དུ་གཡོ་སྒྱུ་འབྱུང་ངོ་ཞེས་བྱ་བ་དེར་བྲིས་ཟིན་ཏོ། །སྟོན་པ་ལ། ཡིད་མགྱོགས་འགྲོ་བ་ཞེས་བྱ་བ་ལ། བཅོམ་ལྡན་འདས་ཤར་ཤ་པའི་གྲོང་ཁྱེར་གྱི་ཙན་དན་གྱི་ཁང་པ་ན་བཞུགས་ཏེ། དེའི་ཚེ་རྒྱ་མཚོ་ཆེན་པོའི་ནང་ན་ཀླུའི་རྒྱལ་པོ་ནག་པོ་དང༌། གཽ་ཏ་མ་ཞེས་བྱ་བ་གཉིས་གནས་ཏེ། བཅོམ་ལྡན་འདས་ཤར་ཤ་པའི་གྲོང་ཁྱེར་ན་ཆོས་སྟོན་གྱིས་ཉན་པའི་ཕྱིར་འགྲོའོ་ཞེས་གནས་ཏེ། དེ་ནས་ཀླུ་ལྔ་བརྒྱའི་འཁོར་དང༌། ཆུ་བོ་ལྔ་བརྒྱ་ནས་བྱུང་སྟེ་ཤར་ཤ་པའི་གྲོང་ཁྱེར་དུ་འོང་བ་སངས་རྒྱས་བཅོམ་ལྡན་འདས་
ཀྱི་ཆོས་རྣམས་ལ་མི་བརྗེད་པའི་དྲན་པས་ཀླུའི་རྒྱལ་པོ་ནག་པོ་དང༌། གཽ་ཏ་མ་གཉིས་ཤར་ཤ་བའི་གྲོང་ཁྱེར་དུ་འོངས་ན་གྲོང་ཁྱེར་གཞིག་ཅིང་མི་སྣང་བར་འགྱུར་བ་གཟིགས་ཏེ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བོས་ཏེ། མཽད་གལ་གྱི་བུ་ཆེན་པོ་དེ་བཞིན་གཤེགས་པའི་གློ་བུར་བའི་བསོད་སྙོམས་དག་ཟུང་ཤིག །དེ་ཅིའི་ཕྱིར་ཞེ་ན། མཽད་གལ་གྱི་བུ་ཆེན་པོ་གློ་བུར་གྱི་བསོད་སྙོམས་ནི་རྣམ་པ་ལྔ་སྟེ། ལྔ་གང་ཞེ་ན། གློ་བུར་དུ་ལྷགས་པ་དང༌། མགྲོན་པོ་དང༌། ནད་པ་དང༌། ནད་གཡོག་དང༌། ལས་བྱེད་པ་རྣམས་ཀྱིའོ། །འདོན་འདི་ལ་བཅོམ་ལྡན་འདས་ཉིད་ལས་བྱེད་པ་ཡིན་ནོ། །དེ་ནས་བཅོམ་ལྡན་འདས་དང༌། མཽད་གལ་གྱི་བུ་ཐབས་ཅིག་ཏུ་ཀླུའི་རྒྱལ་པོ་ནག་པོ་དང༌། གཽ་ཏ་མ་གཉིས་གང་ན་བ་དེར་གཤེགས་ཤིང་ཉེ་བར་གཤེགས་ཏེ་བཀའ་སྩལ་པ། ཀླུའི་དབང་པོ་དག་ཤུར་པ་རིའི་གྲོང་ཁྱེར་མི་སྣང་བར་འགྱུར་བ་དེ་ལྟར་བསམ་པར་གྱིས་ཤིག །དེ་གཉིས་ཀྱིས་སྨྲས་པ། བཙུན་པ་དད་པའི་ཤུགས་དེ་འདྲ་བས་བདག་ཅག་དེར་འོངས་ན་གང་ཡང་བདག་སྲོག་ཆགས་གྲོག་སྦུར་ཡན་ཆད་ལ་ཡང་གནོད་པར་མི་ནུས་ན། ཤུར་ཤ་པ་ན་གནས་པའི་སྐྱེ་བོའི་ཚོགས་ལ་ལྟ་སྨོས་ཀྱང་ཅི་འཚལ། དེ་ནས་བཅོམ་ལྡན་འདས་གདུགས་ཚོད་གསོལ་བར་རྩོམ་པ་ན། ཀླུ་དེ་དག་སོ་སོ་ནས་འདི་སྙམ་དུ་ཀྱེ་མ་བཅོམ་ལྡན་འདས་བདག་གི་ཆུ་གསོལ་བར་གྱུར་ཀྱང་ཅི་མ་རུང་སྙམ་དུ་སེམས་སོ། །བཅོམ་ལྡན་འདས་ཀྱིས་དགོངས་པ། གལ་ཏེ་གཅིག་གི་ཆུ་འཐུངས་ན་གཞན་དག་མི་དགའ་བར་འགྱུར་གྱིས་ཐབས་ཀྱི་རྣམ་པ་ཞིག་བྱའོ་ཞེས་དགོངས་ཏེ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བོས་ཏེ། མཽད་གལ་གྱི་བུ་ཆུ་ལྔ་བརྒྱ་གང་དུ་འདུས་པ་དེ་ལས་ཆུ་ལྷུང་བཟེད་གང་ཁྱེར་ལ་ཤོག་ཤིག །བཙུན་པ་དེ་བཞིན་ནོ་ཞེས་ཚེ་དང་ལྡན་པ་མཽད་གལ་གྱི་བུ་ཆེན་པོས་བཅོམ་ལྡན་འདས་ལས་མཉན་ཏེ། ཆུ་བོ་ལྔ་བརྒྱ་གང་དུ་འདུས་པ་དེ་ལས་ཆུ་ལྷུང་བཟེད་གང་བླངས་ཏེ། བཅོམ་ལྡན་འདས་གང་ན་བ་དེར་ཉེ་བར་སོང་སྟེ། ཉེ་བར་སོང་ནས་བཅོམ་ལྡན་འདས་ལ་ཆུ་ལྷུང་བཟེད་བཀང་ནས་ཕུལ་བ་དང༌། བཅོམ་ལྡན་འདས་ཀྱིས་བླངས་ཏེ་གསོལ་ཏོ། །དེ་ནས་ཚེ་དང་ལྡན་པ་མཽད་གལ་
གྱི་བུ་ཆེན་པོ་འདི་སྙམ་དུ་སེམས་ཏེ། སྔོན་བཅོམ་ལྡན་འདས་ཀྱིས་དགེ་སློང་དག་ཕ་དང༌། མ་དག་ནི་བུ་ལ་དཀའ་བ་བྱེད་པ་སྟེ། གསོས་སྐྱེད་པར་བྱེད་ཅིང་འཛམ་བུའི་གླིང་སྣ་ཚོགས་སྟོན་པ་སྟེ། ཕྲག་པ་གཅིག་ལ་ཕ། ཕྲག་པ་གཉིས་པ་ལ་མ་ཁྱེར་ཏེ། ལོ་འཁོར་བ་བརྒྱར་གནས་པ་དང༌། གང་ཡང་ས་ཆེན་པོ་འདིའི་ནོར་བུ་དང༌། མུ་ཏིག་དང༌། བཻ་ཌཱུཪྻ་དང༌། དུང་དང༌། ཤེལ་དང༌། གསེར་དང༌། དངུལ་དང༌། ས་ལེ་སྦྲམ་དང༌། ཨསྨ་གརྦྷ་དང༌། མུ་ས་ལ་གརྦྷ་དང༌། ལོ་ཧེ་ཏ་རཱ་ག་དང༌། དུང་གཡས་སུ་འཁྱིལ་པ་ལ་སོགས་པ་འདི་ལྟ་བུ་རྣམས་ཀྱིས་ཕྱུག་པར་བྱས་ཀྱང་བུས་ཕ་དང་མ་ལ་ཕན་པ་བྱས་པ་མ་ཡིན་ནོ། །གང་གིས་ཕ་དང་མ་མ་དད་པ་དད་པ་ཕུན་སུམ་ཚོགས་པར་བྱེད་ཅིང་འདུལ་བ་དང༌། རབ་ཏུ་འགོད་པ་དང༌། རབ་ཏུ་འཇོག་པར་བྱེད་ཅིང་ཚུལ་ཁྲིམས་འཆལ་བ་ཚུལ་ཁྲིམས་ཕུན་སུམ་ཚོགས་པ་དང༌། སེར་སྣ་ཅན་གཏོང་བ་ཕུན་སུམ་ཚོགས་པ་དང༌། ཤེས་རབ་འཆལ་བ་ཤེས་རབ་ཕུན་སུམ་ཚོགས་པར་བྱེད་ཅིང་འདུལ་བ་ལ་རབ་ཏུ་འགོད་པ་དང༌། རབ་ཏུ་འཇོག་པར་བྱེད་ན། འདི་ཙམ་གྱིས་བུས་ཕ་དང་མ་ལ་ཕན་བ་བྱས་པ་ཡིན་ནོ་ཞེས་གསུངས་སོ། །བདག་གིས་མ་ལ་ཕན་པ་ཅུང་ཟད་ཀྱང་མ་བྱས་ཀྱིས་ད་བདག་གིས་མ་གང་དུ་སྐྱེས་པ་བསམ་པར་བྱའོ་ཞེས་དེས་བསམས་པ་དང་འཇིག་རྟེན་གྱི་ཁམས་འོད་ཟེར་ཅན་དུ་སྐྱེས་པར་མཐོང་ཞིང༌། གང་གིས་འདུལ་ཞེ་ན། བཅོམ་ལྡན་འདས་ཀྱིས་འདུལ་བར་མཐོང་ནས། དེ་འདི་སྙམ་དུ་བདག་ཐག་རིང་པོ་ནས་འོངས་པར་གྱུར་ལ་བདག་གིས་དོན་འདི་བཅོམ་ལྡན་འདས་ཀྱིས་དགོངས་པར་བྱའོ་ཞེས། དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་སྔོན་དགེ་སློང་དག་ཕ་དང་མ་བུ་ལ་དཀའ་བ་བྱེད་པ་སྟེ་ཞེས་གསུངས་ན། བདག་གི་མ་འཇིག་རྟེན་གྱི་ཁམས་འོད་ཟེར་ཅན་དུ་སྐྱེས་པ་དེ་བཅོམ་ལྡན་འདས་ཀྱིས་གདུལ་བར་འོས་ཏེ། བཅོམ་ལྡན་འདས་ཐུགས་བརྩེ་བ་ཉེ་བར་བཟུང་སྟེ་དེ་གདུལ་བར་མཛད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། མཽད་གལ་གྱི་བུ་གང་གི་རྫུ་འཕྲུལ་
གྱིས་འགྲོ་བར་བྱ། བཅོམ་ལྡན་འདས་བདག་གི་འོ། །དེ་ནས་བཅོམ་ལྡན་འདས་དང་ཚེ་དང་ལྡན་པ་མཽད་གལ་གྱི་བུ་ཆེན་པོ་རི་རབ་ཀྱི་སྟེང་དུ་ཞབས་འཇོག་ཅིང་གཤེགས་ཏེ། ཞག་བདུན་གྱིས་འོད་ཟེར་ཅན་གྱི་འཇིག་རྟེན་གྱི་ཁམས་སུ་ཕྱིན་ཏོ། །མཽད་གལ་གྱི་དུ་ཆེན་པོ་ཐག་རིང་པོ་ནས་འོང་བ་བུ་མོ་བཟང་མོས་མཐོང་སྟེ། མཐོང་ནས་རིངས་པར་དེའི་དྲུང་དུ་འོངས་ཏེ་སྨྲས་པ། ཡུན་རིང་མོ་ཞིག་ན་བུ་མཐོང་ངོ་ཡུན་རིང་མོ་ཞིག་ན་བུ་མཐོང་ངོ་ཞེས་སྨྲས་སོ། །དེ་ན་སྐྱེ་བོ་མང་བོའི་ཚོགས་དག་འདི་སྐད་དུ་གཞོན་ནུ་མ་འདི་རབ་ཏུ་བྱུང་བ་རྒན་པོ་འདིའི་མར་ཇི་ལྟར་འགྱུར་ཞེས་སྨྲས་པ་དང༌། དེ་དག་ལ་འཕགས་པ་མཽད་གལ་གྱི་བུ་ཆེན་པོས་བདག་གི་ཕུང་པོ་འདི་གསོས་ཤིང་བསྐྱེད་པ་དེས་ན་འདི་མ་ཞེས་བྱའོ་ཞེས་སྨྲས་སོ། །དེ་ནས་བཅོམ་ལྡན་འདས་ཀྱིས་གཞོན་ནུ་མ་བཟང་མོའི་བསམ་པ་དང༌། བག་ལ་ཉལ་དང་ཁམས་དང་རང་བཞིན་མཁྱེན་པར་མཛད་ནས། འཕགས་པའི་བདེན་པ་བཞི་མཐོང་བ་དེ་ལྟ་བུའི་ཆོས་བསྟན་པར་མཛད་དེ། གཞོན་ནུ་མ་བཟང་མོས་ཐོས་ནས་འཇིག་ཚོགས་ལ་ལྟ་བའི་རིའི་རྩེ་མོ་མཐོ་བ་ཉི་ཤུ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། དེ་བདེན་པ་མཐོང་ནས་ཆེད་དུ་བརྗོད་པ་ལན་གསུམ་དུ་ཆེད་དུ་བརྗོད་པ་སྔ་མ་བཞིན་དུ་ལྷ་དང་མི་ལ་བཀོད་དོ་ཞེས་བྱ་བའི་བར་དུའོ། །ཡང་སྨྲས་པ། ཤིན་ཏུ་རྐྱེན་མང་ལྡན་པའི་ངན་སོང་ངམ། །འཇིགས་སུ་རུང་ལས་ཁྱེད་ཀྱི་མཐུ་ཡིས་བསྒྲལ། །མཐོ་རིས་འགྲོ་བའི་བསོད་ནམས་སྒོ་ཕྱེ་ཞིང༌། །མྱ་ངན་འདས་པའི་ལམ་ནི་བདག་གིས་ཐོབ། །ཁྱོད་ལ་བརྟེན་ནས་བདག་སྐྱོན་རྣམ་དག་ཅིང༌། །བདག་གི་མིག་ནི་ཤིན་ཏུ་རྣམ་དག་གྱུར། །སྡུག་བསྔལ་རྒྱ་མཚོའི་ཕ་རོལ་ཕྱིན་གྱུར་ཅིང༌། །འཕགས་པ་དགྱེས་པའི་ཞི་བའི་གནས་ཐོབ་བོ། །སྐྱེ་རྒ་འཆི་བའི་འཁྲུག་དང་བྲལ་གྱུར་ཅིང༌། །ལྷ་དང་ལྷ་མིན་མི་ཡི་འགྲོ་བས་མཆོད། །སྐྱེ་བ་སྟོང་དུ་མཐོང་བ་རྙེད་དཀའ་བ། །ཐུབ་པ་མཐོང་བ་འབྲས་བུ་བཅས་པར་གྱུར། །བཙུན་པ་བདག་ནི་མངོན་པར་འཕགས་སོ། །མངོན་པར་འཕགས་སོ། །དེད་ནས་བཟུང་སྟེ་བཅོམ་ལྡན་འདས་དང་ཆོས་དང་དགེ་འདུན་ལ་སྐྱབས་སུ་མཆིའོ། །བདག་དགེ་བསྙེན་དུ་གཟུང་དུ་གསོལ།
དུས་འདི་ནས་བཟུང་སྟེ་ཇི་སྲིད་འཚོའི་བར་དུ་སྲོག་དང་བསྔོ་ཞིང་སྐྱབས་སུ་འགྲོ་ཞིང་མངོན་པར་དང་ངོ༌། །བཅོམ་ལྡན་འདས་ཚེ་དང་ལྡན་པ་མཽད་གལ་གྱི་བུ་ཆེན་པོ་དང་ཐབས་ཅིག་ཏུ་བསོད་སྙོམས་བཞེས་པར་གནང་བར་མཛོད་ཅིག །བཅོམ་ལྡན་འདས་ཀྱིས་གནང་སྟེ། གཞོན་ནུ་མ་བཟང་མོས་བཅོམ་ལྡན་འདས་དང་ཚེ་དང་ལྡན་པ་མཽད་གལ་གྱི་བུ་ཆེན་པོ་བདེ་བར་བཞུགས་པར་རིག་ནས། གཙང་ཞིང་བསོད་པའི་བཟའ་བ་དང་བཅའ་བ་དག་གིས་རང་གི་ལག་ནས་འདྲིམ་པར་བྱེད། སྟོབས་པར་བྱེད་དེ། ལན་དུ་མར་བསོད་པའོ། །བཟའ་བ་དང་བཅའ་པ་དག་གིས་བྲིམས་ཤིང་བསྟབས་ནས་བཅོམ་ལྡན་འདས་གསོལ་བར་རིག་ནས་ལག་པ་གཉིས་ཀྱིས་ལྷུང་བཟེད་གྱུ་སྟེ། སྟན་དམའ་བ་ཅིག་བླངས་ཏེ་བཅོམ་ལྡན་འདས་ཀྱི་མདུན་དུ་ཆོས་ཉན་པའི་ཕྱིར་འདུག་པར་གྱུར་ཏོ། །བཅོམ་ལྡན་འདས་ཀྱིས་དེ་ལ་ཆོས་བསྟན་ཏེ། ཚེ་དང་ལྡན་པ་མཽད་གལ་གྱི་བུ་ཆེན་པོས་བཅོམ་ལྡན་འདས་ཀྱི་ལྷུང་བཟེད་བླངས་ནས་བཀྲུས་ཏེ། བཅོམ་ལྡན་འདས་ཀྱིས་བཀའ་སྩལ་པ། མཽད་གལ་གྱི་བུ་འགྲོ་བར་བྱའོ། །བཅོམ་ལྡན་འདས་གཤེགས་ཤིག །གང་གི་རྫུ་འཕྲུལ་གྱིས། བཅོམ་ལྡན་འདས་ཀྱིའོ། །གང་ཡང་རྒྱལ་བྱེད་ཀྱི་ཚལ་དུ་ཕྱིན་པ་དེ་ལྟ་བུའི་དགོངས་པ་མཛད་དེ། བཅོམ་ལྡན་འདས་ཕྱིན་ཏམ། མཽད་གལ་གྱི་བུ་ཕྱིན་ཏོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་ངོ་མཚར་སྐྱེས་ཏེ་སྨྲས་པ། བཅོམ་ལྡན་འདས་རྫུ་འཕྲུལ་འདིའི་མིང་ཅི་ལགས། མཽད་གལ་གྱི་བུ་ཡིད་མགྱོགས་པའོ། །བཙུན་པ་སངས་རྒྱས་ཀྱི་ཆོས་འདི་ལྟར་ཟབ་པ་བདག་གིས་རྣམ་པར་མི་ཤེས་ཏེ། གལ་ཏེ་རྣམ་པར་ཤེས་པར་མ་གྱུར་ན་ཡང་བདག་གི་ལུས་ཏིལ་གྱི་ཕྱེ་མ་ཙམ་དུ་གྱུར་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་བཟློག་པར་མི་བྱའོ། །ད་བདག་གིས་ཅི་བྱ་སྟེ་བུད་ཤིང་ཚིག་བ་བཞིན་དུ་གྱུར་ཏོ་ཞེས་གསུངས་སོ། །སངས་རྒྱས་རྣམས་ཀྱི་སངས་རྒྱས་ཀྱི་ཡུལ་ནི་བསམ་གྱིས་མི་ཁྱབ་པོ་ཞེས་བྱ་བ་ལ། བཞི་ལས་འཕྲོས་པ་ལས་འབྱུང་བ་མཛོད་ཀྱི་གནས་གཉིས་པ་འདི་ཉིད་དུ་སེམས་ཅན་གྱི་གནས་དགུའི་སྐབས་སུ་བྲིས་ཤིང༌། མཛོད་ཀྱི་གནས་གསུམ་པར་
སྲིད་པ་བར་མ་བསམ་པར་སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་ནི་བསམ་གྱིས་མི་ཁྱབ་པོ་ཞེས་ཡང་དག་པར་བཤད་དོ། །སྟོན་མིན་སྤྲུལ་པ་པོ་དང་བཅས། །ཞེས་བྱ་བ་ལ། ཕྲན་ཚེགས་ཀྱི་སྡེ་སྣོད་ལས་དོན་གྱི་སྡེ་ཚན་བཅུ་པ་ལས་མདོ་འདི་ལྟར་འདོན་ཏེ། དེ་ནས་མཉན་ཡོད་ན་གནས་པའི་བྲམ་ཟེ་དང་ཁྱིམ་བདག་དེ་དག་འདི་སྙམ་དུ་རྒྱུ་གང་དང་རྐྱེན་གང་གིས་རབ་ཏུ་བྱུང་བ་རྣམས་དང་རབ་ཏུ་བྱུང་བ་རྣམས་སུ་རྩོད་ཅིང་འཐབ་པ་དང་མཚང་འབྲུ་བ་དང་ཆད་པས་གཅོད་པ་དག་བྱུང་བར་གྱུར། བཅོམ་ལྡན་འདས་ལ་གུས་པས་འདྲི་བའི་ནུས་པ་མེད་དོ་སྙམ་མོ། །དེ་ནས་བཅོམ་ལྡན་འདས་ཀྱིས་མཉན་ཡོད་ཀྱི་བྲམ་ཟེ་དང་ཁྱིམ་བདག་དེ་དག་གི་སེམས་ཐུགས་ཀྱིས་མངོན་པར་མཁྱེན་ནས། མགོ་བྲེགས་ཤིང་ཆོས་གོས་བགོས་པ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུ་དང་ཡང་དག་པར་ལྡན་པའི་སྤྲུལ་པ་ཞིག་སྤྲུལ་པར་མཛད་དོ། །ཆོས་ཉིད་ཀྱིས་ཉན་ཐོས་རྣམས་ཀྱིས་སྤྲུལ་པ་སྤྲུལ་ནས། ཉན་ཐོས་རྣམས་སྨྲ་ན་སྤྲུལ་པ་ཡང་སྨྲ་བར་བྱེད་ལ། ཉན་ཐོས་རྣམས་མི་སྨྲ་ན་སྤྲུལ་པ་ཡང་མི་སྨྲ་བར་འགྱུར་ཞིང༌། སྤྲུལ་པ་གཅིག་སྨྲ་ན། ཐམས་ཅད་སྨྲ་ཞིང༌། གཅིག་མི་སྨྲ་ན་ཐམས་ཅད་ཀྱང་མི་སྨྲ་བར་འགྱུར་རོ། །སངས་རྒྱས་བཅོམ་ལྡན་འདས་རྣམས་ཀྱིས་སྤྲུལ་པ་སྤྲུལ་པར་མཛད་པ་ན། སངས་རྒྱས་བཅོམ་ལྡན་འདས་དྲི་བར་མཛད་པ་ན་སྤྲུལ་པ་ལུང་སྟོན་པར་བྱེད་ལ། སྤྲུལ་པ་དྲི་བར་མཛད་ན་བཅོམ་ལྡན་འདས་ལུང་སྟོན་པར་མཛད་དོ། །དེ་ནས་སྤྲུལ་པ་དེ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་བཅོམ་ལྡན་འདས་གང་ན་བ་དེར་ཐལ་མོ་སྦྱར་ཞིང་ཕྱག་བྱས་ནས། དེའི་ཚེ་དོན་གྱི་སྡེ་ཚན་འདི་ལས་བརྩམས་ཏེ་ཚིགས་སུ་བཅད་པའི་དབྱངས་ཀྱིས་ཞུ་བ་ཞུས་པ། ཕྲག་དོག་ལྷན་ཅིག་མྱ་ངན་སྨྲེ་སྔགས་འདོན། །འཐབ་རྩོད་འདི་དག་གང་གིས་རབ་ཏུ་བསྐྱེད། །ཕྲ་མ་དང་བཅས་ང་རྒྱལ་ལྷག་ང་རྒྱལ། །འདི་དག་གང་གིས་བསྐྱེད་པ་བདག་འདྲིའོ། །ཕྲག་དོག་ལྷན་ཅིག་མྱ་ངན་སྨྲེ་སྔགས་འདོན། །འཐབ་དང་རྩོད་པ་འདི་དག་དགའ་བས་བསྐྱེད། །ཕྲ་མ་དང་བཅས་ང་རྒྱལ་ལྷག་ང་རྒྱལ། །འདི་དག་དགའ་བས་རབ་ཏུ་
བསྐྱེད་པ་ཡིན། །ཞེས་བྱ་བ་ལ་སོགས་པ་བྱུང་ངོ༌། །གཅིག་ཅིག་སྨྲ་བར་གྱུར་བ་ན་ཞེས་བྱ་བ་ལ་སོགས་པའི་ཚིགས་སུ་བཅད་པའི་དཔེ་ནི་ལུང་རིང་པོའི་མདོ་ལས་ཚངས་པའི་སྤྲུལ་པ་དེ་དག་ལྷའི་དབང་པོའི་ཕང་པར་འདུག་སྟེ་སོ་སོ་ནས་གཏམ་སྨྲས་སོ་ཞེས་བྱ་བ་ལ་སོགས་པ་འབྱུང་ངོ༌།། །།འཕགས་པ་འོད་སྲུངས་ཆེན་པོའི་བྱིན་གྱིས་རླབས་ཀྱིས་ཞེས་བྱ་བ་ལ། གང་གི་ཕྱིར་དེ་ལ་བཅོམ་ལྡན་འདས་ཀྱིས་བསྟན་པ་གཏད་དེ། བཅོམ་ལྡན་འདས་ཡོངས་སུ་མྱ་ངན་ལས་འདས་པའི་འོག་ཏུ་གསུང་རབ་བསྡུ་བ་བྱས་སོ། །དགྲ་བཅོམ་པ་ལྔ་བརྒྱ་པོ་དེ་དག་ཡོངས་སུ་མྱ་ངན་ལས་འདས་པ་དང༌། འཕགས་པ་འོད་སྲུངས་ཆེན་པོ་ལ་བསྟན་པ་ཡོངས་སུ་གཏད་དོ། །དེ་ལྟར་བྱ་བ་མ་ལུས་པར་བྱས་ཏེ། རི་བྱ་རྐང་མོའི་སྟེང་དུ་འཛེགས་ནས་བཅོམ་ལྡན་འདས་ཀྱི་ཕྱག་དར་ཁྲོད་པའི་ན་བཟས་ལུས་དང་བསིལ་བྱེད་དང་ལྷུང་བཟེད་གཏུམས་ཏེ། རི་གསུམ་གྱིས་བསྒྲིབས་ཏེ། བཅོམ་ལྡན་འདས་བྱམས་པའི་གསུང་རབ་ཀྱི་བར་དུ་ཉམས་པར་མ་གྱུར་ཅིང་དེས་རང་གི་འཁོར་རྣམས་ལ་རིག་པར་བྱེད་པར་འགྱུར་རོ་ཞེས་བྱིན་གྱིས་བརླབས་ནས་ཡོངས་སུ་མྱ་ངན་ལས་འདས་སོ། །གང་གི་ཚེ་བཅོམ་ལྡན་འདས་བྱམས་པ་འཇིག་རྟེན་དུ་བྱུང་བ་དེའི་ཚེ་ཉན་ཐོས་ཀྱི་དགེ་འདུན་དང་ལྷན་ཅིག་ས་ཕྱོགས་དེར་གཤེགས་ཏེ་རི་གསུམ་པོ་དག་རྣམ་པར་བསལ་ཏེ། བཅོམ་ལྡན་འདས་བྱམས་པའི་ཕྱག་གིས་རུས་པའི་ཚོགས་བསྣམས་ཏེ་ཆོས་སྟོན་པར་འགྱུར་ཏེ། ཆོས་སྟོན་བ་ཐོས་ནས་ཉན་ཐོས་བྱེ་བ་ཕྲག་དགུ་བཅུ་རྩ་དྲུག་དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་རོ་ཞེས་ཕྲེན་ཚེགས་ལས། དབྱངས་དང་ཞེས་བྱ་བ་ལ་སོགས་པའི་སྨན་གྱི་གཞིའི་སྡོམ་གྱི་ཚིགས་སུ་བཅད་པ་གསུམ་པ་ལས་རྒྱས་པར་འདོན་ཏོ། །ཆོས་མངོན་པ་མཛོད་ཀྱི་རྣམ་པར་བཤད་པ་ཉེ་བར་མཁོ་བ་ཞེས་བྱ་བ་ལས་མཛོད་ཀྱི་གནས་བདུན་པ་ཕལ་ཆེར་མདོ་དང་སྦྱར་བ་རྫོགས་སོ།། །།འདི་ལྟར་མདོ་ལས་ལྷག་པའི་སེམས་ཀྱི་བསླབ་པ་དང་ཞེས་བྱ་བ་ལ། ལམ་གྱི་ཚོགས་ཀྱི་བསླབ་པའི་སྒོའི་མདོ་གསུམ་པ་དང་བཞི་པ་ལས་འབྱུང་བ་མཛོད་ཀྱི་གནས་དྲུག་པ་འདི་ཉིད་དུ། དེའི་ཚེ་དེ་མི་སློབ་དགྲ་བཅོམ། །ཞེས་བྱ་བ་ལ།
ཚིག་ལེའུར་བྱས་པ་དང༌། ཡང་ཚུལ་ཁྲིམས་དང༌། ཏིང་ངེ་འཛིན་དང༌། ཤེས་རབ་ཀྱི་རང་བཞིན་ཡིན་ཞེས་བྲིས་ཟིན་ཏོ། །སེམས་ཡོངས་སུ་དག་པའི་གཙོ་བོ་ཞེས་བྱ་བ་ལ། སྟག་གི་བྱང་ཆུབ་ཀྱི་བུ་དང༌། ཉན་ཐོས་ཀྱི་རྣམ་པར་བཤད་པ་སྡོམ་གྱི་ཚིགས་སུ་བཅད་པ་བཅུ་གཅིག་པའི་ཐ་མ་ལས་འབྱུང་བ་མཛོད་ཀྱི་གནས་དྲུག་པར་བཤད་ཟིན་ཏོ། །བཅོམ་ལྡན་འདས་ཀྱིས་ཀྱང་བསམ་གཏན་མི་དགེ་བ་དག་ཀྱང་ཞེས་གསུངས་སོ་ཞེས་བྱ་བ་ལ། ཚངས་པའི་ཚོགས་ཀྱི་སྡོམ་གྱི་ཚིགས་སུ་བཅད་པ་དང་པོའི་མཽད་གལ་གྱི་བུ་དང་སྦས་པའི་མདོ་ལས་འདི་ལྟར་འདོན་ཏེ། དེའི་ཚེ་ན་སྡེ་དཔོན་ཉེ་དགའ་འཁོར་དེར་འདུས་པར་གྱུར་ཅིང་ཚོགས་ཏེ་འདུག་པར་གྱུར་ཏེ། དེ་ནས་སྡེ་དཔོན་ཉེ་དགས་ཆེན་པོར་གྲགས་པའི་བྲམ་ཟེ་འཆར་བྱེད་ལ་འདི་སྐད་ཅེས་སྨྲས་སོ། །འཆར་བྱེད་ཁྱེད་ཅག་འོང་མའི་ཚལ་བྱ་ཀ་ལན་ད་ཀ་གནས་པ་ན་དེ་ལྟར་བསམ་གཏན་དང་བསམ་གཏན་གྱི་ཚུལ་གྱིས་མངོན་པར་དགའ་བ་བདེན་ནམ། སྡེ་དཔོན་དེ་དེ་བཞིན་ཏེ། དེ་དེ་བཞིན་ནོ། །བསམ་གཏན་དང་བསམ་གཏན་གྱི་ཚུལ་གྱིས་སྡོམ་པར་བྱེད་དོ། །དུས་གཅིག་གི་ཚེ་བཅོམ་ལྡན་འདས་གཽ་ཏ་མ་ཆུ་བོ་ཅན་བྱི་ཀུན་ཛེ་ཀའི་སྤྱིལ་བུ་ན་བཞུགས་ཏེ། དེའི་ཚེ་བཅོམ་ལྡན་འདས་གཽ་ཏ་མ་དེས་བདག་ལ་བསམ་གཏན་ཐམས་ཅད་ནི་བསྔགས་ཤིང་བསམ་གཏན་ཐམས་ཅད་ཀྱི་རབ་ཏུ་བསྔགས་པ་གསུང་ངོ༌། །དེ་ནས་ཚེ་དང་ལྡན་པ་ཀུན་དགའ་བོས་ཆེན་པོར་གྲགས་པའི་བྲམ་ཟེ་འཆར་བྱེད་ལ་འདི་སྐད་ཅེས་སྨྲས་སོ། །འཆར་བྱེད་ཁྱོད་འདི་སྐད་དུ་བཅོམ་ལྡན་འདས་གཽ་ཏ་མ་དེས་བདག་ལ་བསམ་གཏན་ཐམས་ཅད་བསྔགས་ཤིང་བསམ་གཏན་ཐམས་ཅད་ཀྱིས་རབ་ཏུ་བསྔགས་པ་གསུང་ངོ་ཞེས་མ་སྨྲ་ཤིག །འོན་ཀྱང་བཅོམ་ལྡན་འདས་ནི་བསྔགས་པར་མི་འོས་པ་དེ་དག་གི་བསྔགས་པ་མི་གསུང་གི །བསྔགས་པར་འོས་པ་དག་གི་བསྔགས་པ་མི་གསུང་ངོ༌། །ཇི་ལྟར་བཅོམ་ལྡན་འདས་གཽ་ཏ་མ་གང་བསྔགས་པར་མི་འོས་པ་དག་གི་བསྔགས་པ་མི་གསུང་ཞེ་ན། འཆར་བྱེད་འདི་ན་ཁ་ཅིག་འདོད་པའི་འདོད་ཆགས་ཀྱིས་ཀུན་ནས་དཀྲིས་པའི་སེམས་ལ་ལན་མང་དུ་གནས་ཤིང་འདོད་པའི་འདོད་ཆགས་ཀྱིས་ཀུན་ནས་དཀྲིས་པའི་
སྐྱེས་པ་རྣམས་ལ་ཕྱིས་ངེས་པ་འབྱུང་བ་ཡང་དག་པ་ཇི་ལྟ་བ་བཞིན་དུ་རབ་ཏུ་མི་ཤེས་ཏེ། དེ་འདོད་པའི་འདོད་ཆགས་ཀྱིས་ཀུན་ནས་དཀྲིས་པས་བར་དུ་བཅད་ཅིང་སྒོམ་པར་བྱེད་རབ་ཏུ་བསྒོམ་ཞིང་བསྒོམ་སྟེ། གནོད་སེམས་དང༌། རྨུགས་པ་དང༌། གཉིད་དང་རྒོད་པ་དང༌། འགྱོད་པ་དང༌། ཐེ་ཚོམ་གྱིས་ཀུན་ནས་དཀྲིས་པས་སེམས་ལ་ལན་མང་དུ་གནས་ཤིང་ཐེ་ཚོམ་གྱིས་ཀུན་ནས་དཀྲིས་པ་སྐྱེས་པ་རྣམས་ལས། ཕྱིས་ངེས་པར་འབྱུང་བ་ཡང་དག་པ་ཇི་ལྟ་བ་བཞིན་མི་ཤེས་ཏེ། དེ་ཐེ་ཚོམ་གྱིས་ཀུན་ནས་དཀྲིས་པས་རབ་ཏུ་བཅད་ཅིང་སྒོམ་པར་བྱེད། རབ་ཏུ་བསྒོམ་ཞིང་བསྒོམ་སྟེ། འདི་ལྟར་ན་བསྔགས་པར་མ་འོས་པའི་བསམ་གཏན་གྱི་བསྔགས་པ་མི་གསུང་ངོ༌། །ཇི་ལྟར་ན་བསྔགས་པར་འོས་པའི་བསྔགས་པ་གསུང་ཞེ་ན། འཆར་བྱེད་འདི་ན་དགེ་སློང་འདོད་པ་ལས་དབེན་པ་སྡིག་པ་མི་དགེ་བ་ལས་དབེན་ཞེས་བྱ་བ་ནས། བསམ་གཏན་བཞི་པ་བསྒྲུབས་ཏེ་གནས་སོ་ཞེས་བྱ་བའི་བར་དུ་སྟེ། འདི་ལྟར་ན་བསྔགས་པར་འོས་པ་བསྔགས་སོ། །ཀུན་དགའ་པོ་བཅོམ་ལྡན་འདས་གཽ་ཏ་མས་བསྔགས་པར་མི་འོས་པའི་བསམ་གཏན་གྱི་བསྔགས་པ་མི་གསུང་ཞིང༌། བསྔགས་པར་འོས་པའི་བསྔགས་པ་གསུང་ངམ། ཀུན་དགའ་བོ་བདག་ལ་ཡང་བྱ་བ་མང་པོ་དང་བྱ་བ་མང་དུ་མཆིས་ཀྱིས་འགྲོ་བར་བྱའོ། །འཆར་བྱེད་དེ་ལྟར་དེའི་དུས་ལ་བབ་པར་ཤེས་ན་སོང་ཤིག །དེ་ནས་ཆེན་པོར་གྲགས་པའི་མ་ག་དྷཱའི་བྲམ་ཟེ་འཆར་བྱེད་ཚེ་དང་ལྡན་པ་ཀུན་དགའ་བོས་བཤད་པ་ལ་མངོན་པར་དགའ་ཞིང་རྗེས་སུ་ཡི་རང་སྟེ། སྟན་ལས་ལངས་ཏེ་སོང་ངོ་ཞེས་གསུངས་སོ། །གལ་ཏེ་ཚེ་དང་དྲོད་གཉིས་འདྲེས་པར་གསུངས་པའི་ཕྱིར་དང་ཞེས་བྱ་བ་ལ། ལུང་བར་མའི་སྡོམ་གྱི་ཚིགས་སུ་བཅད་པ་གསུམ་པའི་མཐར་གསུས་པོ་ཆེའི་མདོ་ལས་བྱུང་བ་མཛོད་ཀྱི་གནས་གསུམ་པ་འདི་ཉིད་དུ། དེ་ལས་བྱུང་བའི་ཚོར་བ་དྲུག །ལྔ་ནི་ལུས་ཀྱིའོ་སེམས་ཀྱི་གཞན། །ཞེས་བྱ་བར་ཚེ་དང་དྲོད་གཉིས་ལྷན་ཅིག་ཅིང་འདྲེས་པར་གསུངས་པའི་ཕྱིར་སྐད་ཅིག་མ་ངེས་པར་གྲུབ་པོ་ཞེས་བྱ་བར་བྲིས་ཟིན་ཏོ།། །།འདམ་བུའི་ཤོག་གཉིས་བཞིན་ཞེས་བྱ་བ་ལ། གླེང་གཞི་
ནི་རྒྱལ་པོའི་ཁབ་ནའོ། །དེའི་ཚེ་ན་ཚེ་དང་ལྡན་པ་ཤཱ་རིའི་བུ་དང༌། ཚེ་དང་ལྡན་པ་གསུས་པོ་ཆེ་གཉིས་རྒྱལ་པོའི་ཁབ་ཀྱི་བྱ་རྒོད་ཕུང་པོའི་རི་ལ་བརྟེན་ཏེ་གནས་ཏོ། །དེ་ནས་ཚེ་དང་ལྡན་པ་ཤཱ་རིའི་བུ་དགོངས་ཀ་ནང་དུ་ཡང་དག་འཇོག་ལས་ལངས་ཏེ། ཚེ་དང་ལྡན་པ་གསུས་པོ་ཆེ་གང་ན་བ་དེར་ཉེ་བར་སོང་སྟེ། ཉེ་བར་སོང་ནས་ཚེ་དང་ལྡན་པ་གསུས་པོ་ཆེ་དང་ལྷན་ཅིག་ཡང་དག་པར་དགའ་བ་ངང་ཡང་དག་པར་བདེ་བའི་གཏམ་རྣམ་པ་སྣ་ཚོགས་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་གསུས་པོ་ཆེ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་གསུས་པོ་ཆེ་དྲིས་པ་ལུང་བསྟན་པའི་ཕྱིར་སྐབས་སུ་འབྱེད་ན་བདག་ཕྱོགས་ཅུང་ཟད་ཅིག་ཡོངས་སུ་འདྲིའོ། །ཚེ་དང་ལྡན་པ་ཤཱ་རིའི་བུ་དྲིས་ཤིག་དང་ཐོས་ནས་རིག་པར་བྱའོ། །ཚེ་དང་ལྡན་པ་གསུས་པོ་ཆེ་རྒ་བ་ཡོད་དམ། ཚེ་དང་ལྡན་པ་ཤཱ་རིའི་བུ་ཡོད་དོ། །འཆི་བ་ཡོད་དམ། ཚེ་དང་ལྡན་པ་ཤཱ་རིའི་བུ་ཡོད་དོ། །ཚེ་དང་ལྡན་པ་གསུས་པོ་ཆེ་ཅི་རྒ་བ་དང་འཆི་བ་དག་རང་གིས་བྱས་སམ། གཞན་གྱིས་བྱས་སམ། འོན་ཏེ་རང་གིས་ཀྱང་བྱས་ཤིང་གཞན་གྱིས་ཀྱང་བྱས་སམ། འོན་ཏེ་རྒ་བ་དང་འཆི་བ་དག་རང་གིས་ཀྱང་མ་བྱས་གཞན་གྱིས་ཀྱང་མ་བྱས་པར་རྒྱུ་མེད་པར་བྱུང༌། ཚེ་དང་ལྡན་པ་ཤཱ་རིའི་བུ་རྒ་བ་དང་འཆི་བ་ནི་རང་གིས་མ་བྱས་ཤིང་གཞན་གྱིས་མ་བྱས་ལ། རང་གིས་བྱས་པ་དང་གཞན་གྱིས་བྱས་པ་ཡང་མ་ཡིན་ལ། རྒ་བ་དང་འཆི་བ་དག་ནི་རང་གིས་མ་བྱས་གཞན་གྱིས་མ་བྱས་པར་རྒྱུ་མེད་པ་ལས་ཀྱང་མ་བྱུང་གི །འོན་ཀྱང་སྐྱེ་བའི་རྐྱེན་གྱིས་རྒ་བ་དང་འཆི་བ་བྱུང་ངོ༌། ཚེ་དང་ལྡན་པ་གསུས་པོ་ཆེ་ཅི་སྐྱེ་བ་རང་གིས་བྱས་སམ། འོན་ཏེ་གཞན་གྱིས་བྱས་སམ། འོན་ཏེ་རང་གིས་ཀྱང་བྱས་ཤིང་གཞན་གྱིས་ཀྱང་བྱས་སམ། སྐྱེ་བ་དང་རྒ་བ་དག་རང་གིས་མ་བྱས་གཞན་གྱིས་མ་བྱས་པར་རྒྱུ་མེད་པ་ལས་བྱུང༌། ཚེ་དང་ལྡན་པ་ཤཱ་རིའི་བུ་སྐྱེ་བ་ནི་རང་གིས་མ་བྱས་ཤིང་གཞན་གྱིས་མ་བྱས་ལ། རང་གིས་བྱས་པ་དང་གཞན་གྱིས་བྱས་པ་ཡང་མ་ཡིན་ལ། སྐྱེ་བ་ནི་རང་གིས་མ་བྱས་གཞན་གྱིས་མ་བྱས་པར་རྒྱུ་མེད་པ་ལས་བྱུང་བ་ཡང་མ་ཡིན་ནོ། །འོན་ཀྱང་སྲིད་པའི་
རྐྱེན་གྱིས་སྐྱེ་བ་བྱུང་ངོ༌། །ཚེ་དང་ལྡན་པ་གསུས་པོ་ཆེ་ཅི་སྲིད་པ་རང་གིས་བྱས་སམ། འོན་ཏེ་གཞན་གྱིས་བྱས་སམ། འོན་ཏེ་རང་གིས་ཀྱང་བྱས་ཤིང་གཞན་གྱིས་ཀྱང་བྱས་སམ། འོན་ཏེ་སྲིད་པ་རང་གིས་ཀྱང་མ་བྱས་གཞན་གྱིས་ཀྱང་མ་བྱས་པར་རྒྱུ་མེད་པ་ལས་བྱུང༌། ཚེ་དང་ལྡན་པ་ཤཱ་རིའི་བུ་སྲིད་པ་ནི་རང་གིས་ཀྱང་མ་བྱས་ཤིང་གཞན་གྱིས་ཀྱང་མ་བྱས་ལ། རང་གིས་བྱས་པ་དང་གཞན་གྱིས་བྱས་པ་ཡང་མ་ཡིན་ལ། སྲིད་པ་ནི་རང་གིས་མ་བྱས་གཞན་གྱིས་མ་བྱས་པར་རྒྱུ་མེད་པ་ལས་བྱུང་བ་ཡང་མ་ཡིན་ཏེ། འོན་ཀྱང་ལེན་པའི་རྐྱེན་གྱིས་སྲིད་པའོ། །ཚེ་དང་ལྡན་པ་གསུས་པོ་ཆེ་ཅི་ལེན་པ་རང་གིས་བྱས་སམ། འོན་ཏེ་གཞན་གྱིས་བྱས་སམ། འོན་ཏེ་རང་གིས་ཀྱང་བྱས་ཤིང་གཞན་གྱིས་ཀྱང་བྱས་སམ། འོན་ཏེ་ལེན་པ་རང་གིས་ཀྱང་མ་བྱས་གཞན་གྱིས་ཀྱང་མ་བྱས་པར་རྒྱུ་མེད་པ་ལས་བྱུང༌། ཚེ་དང་ལྡན་པ་ཤཱ་རིའི་བུ་ལེན་པ་ནི་རང་གིས་མ་བྱས་ཤིང་གཞན་གྱིས་མ་བྱས་ལ། རང་གིས་བྱས་པ་དང་གཞན་གྱིས་བྱས་པ་ཡང་མ་ཡིན་ལ། ལེན་པ་ནི་རང་གིས་མ་བྱས་གཞན་གྱིས་མ་བྱས་པར་རྒྱུ་མེད་པ་ལས་བྱུང་བ་ཡང་མ་ཡིན་ཏེ། འོན་ཀྱང་སྲིད་པའི་རྐྱེན་གྱིས་ལེན་པ་བྱུང་ངོ༌། །ཚེ་དང་ལྡན་པ་གསུས་པོ་ཆེ་སྲིད་པ་རང་གིས་བྱས་སམ། འོན་ཏེ་གཞན་གྱིས་བྱས་སམ། འོན་ཏེ་རང་གིས་ཀྱང་བྱས་ཤིང་གཞན་གྱིས་ཀྱང་བྱས་སམ། འོན་ཏེ་སྲེད་པ་རང་གིས་ཀྱང་མ་བྱས་གཞན་གྱིས་ཀྱང་མ་བྱས་པར་རྒྱུ་མེད་པ་ལས་བྱུང༌། ཚེ་དང་ལྡན་པ་ཤཱ་རིའི་བུ་སྲེད་པ་ནི་རང་གིས་ཀྱང་མ་བྱས་ཤིང་གཞན་གྱིས་ཀྱང་མ་བྱས་ལ། རང་གིས་བྱས་པ་དང་གཞན་གྱིས་བྱས་པ་ཡང་མ་ཡིན་ལ། སྲེད་པ་རང་གིས་མ་བྱས་གཞན་གྱིས་མ་བྱས་པར་རྒྱུ་མེད་པ་ལས་བྱུང་བ་ཡང་མ་ཡིན་ཏེ། འོན་ཀྱང་ཚོར་བའི་རྐྱེན་གྱིས་སྲེད་པ་བྱུང་ངོ༌། །ཚེ་དང་ལྡན་པ་གསུས་པོ་ཆེ་ཚོར་བ་རང་གིས་བྱས་སམ། །འོན་ཏེ་གཞན་གྱིས་བྱས་སམ། འོན་ཏེ་རང་གིས་ཀྱང་བྱས་ཤིང་གཞན་གྱིས་ཀྱང་བྱས་སམ། འོན་ཏེ་ཚོར་བ་རང་གིས་མ་བྱས་གཞན་གྱིས་མ་བྱས་པར་རྒྱུ་མེད་པ་ལས་བྱུང༌། ཚེ་དང་ལྡན་པ་ཤཱ་རིའི་བུ་ཚོར་བ་ནི་རང་གིས་ཀྱང་མ་བྱས་ཤིང་གཞན་གྱིས་ཀྱང་མ་བྱས་ལ། རང་གིས་བྱས་པ་ཡང་མ་ཡིན་གཞན་གྱིས་བྱས་པ་ཡང་མ་ཡིན་ལ། ཚོར་བ་རང་གིས་མ་བྱས་
གཞན་གྱིས་མ་བྱས་པར་རྒྱུ་མེད་པ་ལས་བྱུང་བ་ཡང་མ་ཡིན་ཏེ། འོན་ཀྱང་རིག་པའི་རྐྱེན་གྱིས་ཚོར་བ་བྱུང་ངོ༌། །ཚེ་དང་ལྡན་པ་གསུས་པོ་ཆེ་རེག་པ་རང་གིས་བྱས་སམ། འོན་ཏེ་གཞན་གྱིས་བྱས་སམ། འོན་ཏེ་རང་གིས་ཀྱང་བྱས་ཤིང་གཞན་གྱིས་ཀྱང་བྱས་སམ། འོན་ཏེ་རེག་པ་དང་གིས་མ་བྱས་གཞན་གྱིས་མ་བྱས་པར་རྒྱུ་མེད་པ་ལས་བྱུང༌། ཚེ་དང་ལྡན་པ་ཤཱ་རིའི་བུ་རེག་པ་ནི་རང་གིས་མ་བྱས་ཤིང་གཞན་གྱིས་མ་བྱས་ལ། རང་གིས་བྱས་པ་དང་གཞན་གྱིས་བྱས་པ་ཡང་མ་ཡིན་ལ། རེག་པ་རང་གིས་མ་བྱས་གཞན་གྱིས་མ་བྱས་པར་རྒྱུ་མེད་པ་ལས་བྱུང་བ་ཡང་མ་ཡིན་ཏེ། འོན་ཀྱང་སྐྱེ་མཆེད་དྲུག་གི་རྐྱེན་གྱིས་རེག་པ་བྱུང་ངོ༌། །ཚེ་དང་ལྡན་པ་གསུས་པོ་ཆེ་སྐྱེ་མཆེད་དྲུག་རང་གིས་བྱས་སམ། འོན་ཏེ་གཞན་གྱིས་བྱས་སམ། འོན་ཏེ་རང་གིས་ཀྱང་བྱས་ཤིང༌། གཞན་གྱིས་ཀྱང་བྱས་སམ། འོན་ཏེ་སྐྱེ་མཆེད་དྲུག་རང་གིས་མ་བྱས་གཞན་གྱིས་མ་བྱས་པར་རྒྱུ་མེད་པ་ལས་བྱུང༌། ཚེ་དང་ལྡན་པ་ཤཱ་རིའི་བུ་སྐྱེ་མཆེད་དྲུག་ནི་རང་གིས་མ་བྱས་ཤིང་གཞན་གྱིས་ཀྱང་མ་བྱས་ལ། རང་གིས་བྱས་པ་དང་གཞན་གྱིས་མ་བྱས་པ་ཡང་མ་ཡིན་ལ། སྐྱེ་མཆེད་དྲུག་ནི་རང་གིས་མ་བྱས་གཞན་གྱིས་མ་བྱས་པར་རྒྱུ་མེད་པ་ལས་བྱུང་བ་ཡང་མ་ཡིན་ཏེ། འོན་ཀྱང་མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་བྱུང་ངོ༌། །ཚེ་དང་ལྡན་པ་གསུས་པོ་ཆེ་མིང་དང་གཟུགས་རང་གིས་བྱས་སམ། འོན་ཏེ་གཞན་གྱིས་བྱས་སམ། འོན་ཏེ་རང་གིས་ཀྱང་བྱས་ཤིང་གཞན་གྱིས་ཀྱང་བྱས་སམ། མིང་དང་གཟུགས་རང་གིས་མ་བྱས། གཞན་གྱིས་མ་བྱས་པར་རྒྱུ་མེད་པ་ལས་བྱུང༌། ཚེ་དང་ལྡན་པ་ཤཱ་རིའི་བུ་མིང་དང་གཟུགས་ནི་རང་གིས་མ་བྱས་ཤིང་གཞན་གྱིས་ཀྱང་མ་བྱས་ལ། རང་གིས་བྱས་པ་དང་གཞན་གྱིས་བྱས་པ་ཡང་མ་ཡིན་ལ། མིང་དང་གཟུགས་ནི་རང་གིས་མ་བྱས་གཞན་གྱིས་ཀྱང་མ་བྱས་པར་རྒྱུ་མེད་པ་ལས་བྱུང་བ་ཡང་མ་ཡིན་ཏེ། འོན་ཀྱང་རྣམ་པར་ཤེས་པའི་རྐྱེན་གྱིས་མིང་དང་གཟུགས་བྱུང་ངོ༌། །ཚེ་དང་ལྡན་པ་གསུས་པོ་ཆེ་རྣམ་པར་ཤེས་པ་རང་གིས་བྱས་སམ། འོན་ཏེ་གཞན་གྱིས་བྱས་སམ། འོན་ཏེ་རང་གིས་ཀྱང་བྱས་ཤིང་གཞན་གྱིས་ཀྱང་བྱས་སམ། འོན་ཏེ་རྣམ་པར་ཤེས་པ་རང་གིས་མ་བྱས་གཞན་གྱིས་ཀྱང་
མ་བྱས་པར་རྒྱུ་མེད་པ་ལས་བྱུང༌། ཚེ་དང་ལྡན་པ་ཤཱ་རིའི་བུ་རྣམ་པར་ཤེས་པ་ནི་རང་གིས་མ་བྱས་ཤིང་གཞན་གྱིས་ཀྱང་མ་བྱས་ལ། རང་གིས་བྱས་པ་དང་གཞན་གྱིས་བྱས་པ་ཡང་མ་ཡིན་ལ། རྣམ་པར་ཤེས་པ་རང་གིས་མ་བྱས་གཞན་གྱིས་ཀྱང་མ་བྱས་པར་རྒྱུ་མེད་པ་ལས་བྱུང་བ་ཡང་མ་ཡིན་ཏེ། འོན་ཀྱང་མིང་དང་གཟུགས་ཀྱི་རྐྱེན་གྱིས་རྣམ་པར་ཤེས་པ་བྱུང་ངོ༌། །ཚེ་དང་ལྡན་པ་གསུས་པོ་ཆེ་སྔ་མས་ཕྱི་མ་དང༌། ཕྱི་མས་སྔ་མ་འདི་ཇི་ལྟར་རིགས་པར་འགྱུར་ཏེ། དེ་ལྟར་ཚེ་དང་ལྡན་པ་གསུས་པོ་ཆེས་འདི་སྐད་དུ། ཚེ་དང་ལྡན་པ་ཤཱ་རིའི་བུ་མིང་དང་གཟུགས་ནི་རང་གིས་མ་བྱས་ཤིང་གཞན་གྱིས་མ་བྱས་ལ། རང་གིས་བྱས་པ་དང་གཞན་གྱིས་བྱས་པ་ཡང་མ་ཡིན་ལ། མིང་དང་གཟུགས་རང་གིས་མ་བྱས་གཞན་གྱིས་མ་བྱས་པར་རྒྱུ་མེད་པ་ལས་བྱུང་བ་ཡང་མ་ཡིན་ནོ། །འོན་ཀྱང་རྣམ་པར་ཤེས་པའི་རྐྱེན་གྱིས་མིང་དང་གཟུགས་བྱུང་ངོ་ཞེས་བཤད་པ་ལ། ད་ལྟར་ནི་མིང་དང་གཟུགས་ཀྱི་རྐྱེན་གྱིས་རྣམ་པར་ཤེས་པ་བྱུང་ངོ་ཞེས་ཚེ་དང་ལྡན་པ་གསུས་པོ་ཆེས་བཤད་པའི་དོན་མི་ཤེས་ཏེ། ཚེ་དང་ལྡན་པ་གསུས་པོ་ཆེས་བཤད་པའི་དོན་འདི་ཇི་ལྟར་བལྟ་བར་བྱ། དེའི་ཕྱིར་ཚེ་དང་ལྡན་པ་ཤཱ་རིའི་བུས་སྐྱེས་བུ་མཁས་པ་རྣམས་ནི་དཔེས་རྣམ་པར་བཤད་པའི་དོན་ཤེས་པར་འགྱུར་བས་རེ་ཞིག་དཔེ་ཉོན་ཅིག །དཔེར་ན་འདམ་བུའི་ཤོག་གཉིས་བླང་བ་དག་ཕན་ཚུན་བསྟེན་ཅིང་ཕན་ཚུན་འབྲེལ་བ་དང༌། ཕན་ཚུན་བསྟེན་ཅིང་གནས་ཏེ། དེ་ལས་འགའ་ཞིག་གིས་གཅིག་བླངས་ནས་གཉིས་པ་ལྷུང་བར་གྱུར་པ་དེ་བཞིན་དུ། ཚེ་དང་ལྡན་པ་ཤཱ་རིའི་བུ་ཆེས་གཉིས་པོ་འདི་དག་ནི་ཕན་ཚུན་བསྟེན་པ་ཕན་ཚུན་འབྲེལ་བ། ཕན་ཚུན་བསྟེན་ཅིང་གནས་པ་སྟེ། རྣམ་པར་ཤེས་པའི་རྐྱེན་གྱིས་མིང་དང་གཟུགས་ཡིན་ཞིང༌། མིང་དང་གཟུགས་ཀྱི་རྐྱེན་གྱིས་རྣམ་པར་ཤེས་པ་ཡིན་ནོ། །ཚེ་དང་ལྡན་པ་གསུས་པོ་ཆེ་ཇི་ལྟར་སྟོན་པའི་ཀན་ཐོས་མཁས་པ་གསལ་བ་དུལ་བ་འཇིགས་པ་མེད་པ་འཆི་བ་མེད་པ་དང༌། འཆི་བ་མེད་པའི་ཁམས་ལུས་ཀྱིས་མངོན་སུམ་བྱས་ཤིང་བསྒྲུབས་ཏེ་གནས་པ་དག་གིས་འདི་ལྟ་བུའི་རང་བཞིན་ཟབ་ཅིང་ཟབ་པའི་དྲིས་པ་དག་ཡང་དག་པའི་ཤེས་རབ་ཀྱིས་རྣམ་པར་དཔྱད་ནས་ལུང་བསྟན་པ་
ལེགས་སོ་ལེགས་སོ། །ཚེ་དང་ལྡན་པ་གསུས་པོ་ཆེ་ནི་ཚངས་པར་སྤྱོད་པ་མཁས་པ་དག་གིས་སྤྱི་བོ་ལ་ཐོད་བཞིན་དུ་ཐོགས་ཏེ། བལྟ་བའི་ཕྱིར་འགྲོས་རྙེད་པ་དང༌། བསྙེན་བཀུར་བ་དེ་དག་ནི་རྙེད་པ་ལེགས་པར་རྙེད་པའོ། །བདག་ཅག་ཀྱང་རྙེད་པ་ལེགས་པར་རྙེད་དེ། བདག་ཅག་ཚེ་དང་ལྡན་པ་གསུས་པོ་ཆེ་བལྟ་བའི་ཕྱིར་འགྲོ་བ་དང༌། བསྙེན་བཀུར་རྙེད་པ་འབའ་ཞིག་ཏུ་མ་ཟད་ཀྱི་ཚེ་དང་ལྡན་པ་གསུས་པོ་ཆེ་བདག་ཅག་སུམ་ཅུ་པའི་ཆོས་ཀྱི་རྣམ་གྲངས་བསྟན་པ་ལ་བདག་མངོན་པར་སྤྲོ་ཞིང་བསྟོད་ལ་རྗེས་སུ་ཡི་རང་སྟེ། ཚེ་དང་ལྡན་པ་གསུས་པོ་ཆེ་དགེ་སློང་ན་བ་དང་འཆི་བ་ལ་ཡིད་འབྱུང་བ་དང༌། འདོད་ཆགས་དང་བྲལ་བ་དང༌། འགོག་པའི་ཆོས་སྟོན་པར་བྱེད་ན་དགེ་སློང་ཆོས་ཀྱི་གཏམ་སྨྲ་བ་ཞེས་བྱའོ། །སྐྱེ་བ་དང༌། སྲིད་པ་དང༌། ལེན་པ་དང༌། སྲེད་པ་དང༌། ཚོར་བ་དང༌། རེག་པ་དང༌། སྐྱེ་མཆེད་དྲུག་དང༌། མིང་དང༌། གཟུགས་དང༌། རྣམ་པར་ཤེས་པ་ལ་སྐྱོ་བ་དང༌། འདོད་ཆགས་དང་བྲལ་བ་དང༌། འགོག་པའི་ཆོས་སྟོན་པར་བྱེད་ན་དགེ་སློང་ཆོས་ཀྱི་གཏམ་སྨྲ་བ་ཞེས་བྱ་བ་བརྗོད་པར་བྱའོ། །ཚེ་དང་ལྡན་པ་གསུས་པོ་ཆེ་ན་བ་དང་འཆི་བ་ལ་ཡིད་འབྱུང་བ་དང༌། འདོད་ཆགས་དང་བྲལ་བ་དང༌། འགག་པ་རྟོགས་ན་དགེ་སློང་ཆོས་ཀྱི་གཏམ་སྨྲ་བ་ཞེས་བྱའོ་བྱ་བ་ནས། སྔ་མ་བཞིན་དུ་རྣམ་པར་ཤེས་པ་ལ་ཡིད་འབྱུང་བ་དང༌། འདོད་ཆགས་དང་བྲལ་བ་དང་འགོག་པ་དག་རྟོགས་པར་གྱུར་ན་དགེ་སློང་ཆོས་ཀྱི་གཏམ་སྨྲ་བ་ཞེས་བྱའོ། །ཚེ་དང་ལྡན་པ་གསུས་པོ་ཆེ་དགེ་སློང་ན་བ་དང་འཆི་བ་ལ་ཡིད་འབྱུང་བ་དང༌། འདོད་ཆགས་དང་བྲལ་བ་དང་འགོག་པ་དང་ཉེ་བར་ལེན་པ་མེད་པར་ཟག་པ་ལས་སེམས་རྣམ་པར་གྲོལ་བར་འགྱུར་ན་དགེ་སློང་ཆོས་ཀྱི་གཏམ་སྨྲ་བ་ཞེས་བརྗོད་པར་བྱའོ། །ཚེ་དང་ལྡན་པ་གསུས་པོ་ཆེ་སྐྱེ་བ་དང༌། སྲིད་པ་དང༌། ལེན་པ་དང༌། སྲེད་པ་དང༌། ཚོར་བ་དང༌། རེག་པ་དང༌། སྐྱེ་མཆེད་དྲུག་དང༌། མིང་དང་གཟུགས་དང༌། རྣམ་པར་ཤེས་པ་ལ་ཡིད་འབྱུང་བ་དང༌། འདོད་ཆགས་དང་བྲལ་བ་དང༌། འགོག་པ་དང་ཉེ་བར་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་བར་གྱུར་ན་དགེ་སློང་ཆོས་ཀྱི་གཏམ་སྨྲ་བ་ཞེས་བརྗོད་པར་བྱའོ། །ཚེ་དང་ལྡན་པ་ཤཱ་རིའི་བུ་སྟོན་པའི་ཉན་ཐོས་
མཁས་པ་གསལ་བ་དུལ་བ་འཇིགས་པ་མེད་པ་ཞེས་བྱ་བ་ནས། སྔ་མ་བཞིན་དུ་བལྟ་བའི་ཕྱིར་འགྲོ་བ་དང་བསྙེན་བཀུར་རྙེད་པ་ཞེས་བྱ་བ་ནས། ལེགས་སོ་ལེགས་སོ་ཞེས་བྱ་བའི་བར་དུ་སྟེ། སྐྱེས་བུ་དམ་པ་དེ་གཉིས་ཕན་ཚུན་དུ་མངོན་པར་དགའ་ཞིང་རྗེས་སུ་ཡི་རངས་ནས་སྟན་ལས་ལངས་ཏེ་སོང་ངོ་ཞེས་གསུངས་སོ། །གང་ཡང་རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་བྱ་བ་ལ། རྟེན་ཅིང་འབྲེལ་བར་འབྱུང་བའི་མདོ་དེ་དང༌། དེ་ལས་འདོན་ཏེ། གང་ཡང་གཟུགས་ལ་སོགས་པ་ལས་གཞན་དུ་རྣམ་པར་ཤེས་པ་འགྲོ་བ་དང་འོང་བ་བཀག་པའི་ཕྱིར་ཞེས་བྱ་བ་ལ། ཕུང་པོའི་སྡོམ་གྱི་ཚིགས་སུ་བཅད་པ་བདུན་པའི་མངོན་པར་མི་བྱེད་ཅེས་བྱ་བའི་མདོའི་མཐའ་ལས་འབྱུང་བ་དང༌། བདག་མེད་ཅེས་བྱ་བའི་སྡོམ་གྱི་ཚིགས་སུ་བཅད་པའི་མདོ་གསུམ་པར་ས་བོན་གྱི་རྣམ་པ་ལྔ་ཞེས་བྱ་བའི་མདོ་གསུམ་པ་ལས་བྱུང་བ་མཛོད་ཀྱི་གནས་དྲུག་པ་འདི་ཉིད་དུ་འཕགས་པའི་བདེན་པ་བསམ་པར་ས་བོན་གྱི་རྣམ་པ་ལྔ་ཞེས་བྱ་བ་ནི་ཉེ་བར་ལེན་པ་དང་བཅས་པའི་རྣམ་པར་ཤེས་པའི་ཚིག་བླ་དགས་སོ་ཞེས་བྱ་བ་དེར་བཤད་ཟིན་ཏོ། །ཟས་བཞི་གསུངས་པའི་ཕྱིར་ཞེས་བྱ་བ་ལ། གླེང་གཞི་ཡང་དག་པར་ལྡན་པའི་སྒོ་དང་པོ་ལས་བུའི་ཤའི་དཔེས་བསྟན་པ་མཛོད་ཀྱི་གནས་གསུམ་པ་འདི་ཉིད་དུ། འགྲོ་བ་ཟས་ཀྱི་གནས་པ་ཡིན། །ཞེས་བྱ་བར་ཟས་ཀྱི་དབང་དུ་བྱས་ཏེ། བཤད་པ་བལྟ་བར་བྱའོ། །གལ་ཏེ་ཁམ་དུ་བྱེད་པའི་ཟས་ཟ་བའི་ལྷ་རྣམས་ལས་འདས་ཏེ་ཞེས་བྱ་བ་ལ། ལུང་བར་མའི་བདུན་པ་ལས་སྡོམ་གྱི་ཚིགས་སུ་བཅད་པ་ཐ་མ་ལས་འཆར་བྱེད་ཀྱི་མདོ་ལས་འདོན་ཏེ། དེའི་མདོའི་དུམ་བུ་ཡང་མཛོད་ཀྱི་གནས་གཉིས་པའི། འགོག་པ་དང་པོ་མི་ནང་དུ། །ཞེས་བྱ་བར་བསྟན་ཏེ། གཞན་དུ་ན་འཆར་བྱེད་ཀྱི་མདོ་ལས་འགལ་ལོ་ཞེས་བྱ་བར་བྲིས་པ་བལྟ་བར་བྱའོ། །དགའ་བའི་ཟས་ཞེས་གསུངས་པའི་ཕྱིར་ཞེས་བྱ་བ་ལ། ཇི་ལྟར་རེ་ཞིག་བརྒྱ་བྱིན་གྱིས་དྲིས་པའི་མདོ་ལས་མཛོད་ཀྱི་གནས་དྲུག་པ་འདི་ཉིད་དུ། འདོད་པར་ཚེ་ཡོངས་གྱུར་པའི་འཕགས། །ཁམས་གཞན་དུ་ནི་འགྲོ་མི་བྱེད། །ཅེས་བཤད་ཟིན་ཏོ། །གཟུགས་མེད་པ་རྣམས་ནི་གཟུགས་ལས་ངེས་པར་འབྱུང་བ་ཡིན་ནོ་ཞེས་བྱ་བ་ལ།
གླེང་གཞི་ནི་མཉན་དུ་ཡོད་པ་ནའོ། །ངེས་པར་འབྱུང་བའི་ཁམས་ནི་རྣམ་པ་གསུམ་སྟེ། འདོད་པ་རྣམས་ལས་ངེས་པར་འབྱུང་བ་ནི་གཟུགས་ཅན་རྣམས་སོ། །གཟུགས་མེད་པ་རྣམས་ནི་གཟུགས་ལས་ངེས་པར་འབྱུང་བ་ཡིན་ནོ། །གང་ཅུང་ཟད་མངོན་པར་སེམས་ཤིང་མངོན་པར་འདུས་བྱས་པ་དེ་དག་འགགས་པ་ནི་ངེས་པར་འབྱུང་བའོ་ཞེས་གསུངས་སོ། །གཟུགས་མེད་པའི་རྣམ་པར་ཐར་པ་ཞི་བ་གང་དག་ཅེས་བྱ་བ་ལ། ལུང་བར་མའི་སྡོམ་གྱི་ཚིགས་སུ་བཅད་པ་བདུན་པའི་ཕྱི་མ་ལས་བ་ལང་སྐྱོང་གི་མདོ་ལས་བྱུང་བ་དང༌། ཏིང་ངེ་འཛིན་ཡང་དག་པར་ལྡན་པའི་ལུས་སུ་གཏོགས་པའི་དྲན་པ་ཉེ་བར་གཞག་པ་དང༌། རྣམ་གྲངས་རྣམ་པར་བཤད་པའི་སྡོམ་གྱི་ཚིགས་སུ་བཅད་པ་གཉིས་པའི་མདོ་དགུ་པ་ལས་འབྱུང་བ་མཛོད་ཀྱི་གནས་གཉིས་པ་འདི་ཉིད་དུ་དབང་པོའི་རྣ་བ་བཤད་པར་གཟུགས་ན་དྲུག་གོ་ཞེས་བཤད་ཟིན་ཏོ། །གཟུགས་ཅན་མ་ཡིན་པའི་སེམས་ཅན་དག་ཀྱང་ཡོད་ཅེས་བྱ་བ་ལ། མཛོད་ཀྱི་གནས་གསུམ་པ་འདི་ཉིད་དུ་རྣམ་པར་ཤེས་པའི་གནས་བདུན་དང༌། སེམས་ཅན་གྱི་གནས་དགུ་བསྟན་པའི་མདོ་སེམས་ཅན་ལུས་ཐ་དད་ཅིང་འདུ་ཤེས་ཐ་དད་པ་ཞེས་བྱ་བ་ནས། སེམས་ཅན་གྱི་ནི་གནས་དགུར་འདོད། །ཅེས་བྱ་བར་བཤད་ཟིན་ཏོ། །བཅོམ་ལྡན་འདས་ཀྱིས་ཀྱང་བསམ་གཏན་དག་ལ་ནི་ཞེས་བྱ་བ་ལ། ཉན་ཐོས་ཀྱི་རྣམ་པར་བཤད་པའི་སྡོམ་གྱི་ཚིགས་སུ་བཅད་པ་ཉི་ཤུ་པ་ལས་བྱུང་བ་མཛོད་ཀྱི་གནས་གསུམ་པ་འདི་ཉིད་དུ་སྲིད་པ་བར་མའི་རྣམ་པ་ཡོད་པ་ཉིད་སྒྲུབ་པར་བྱེད་པ་བཀོད་པར་མདོ་རྒྱས་པར་བྲིས་ཟིན་ཏོ། །གལ་ཏེ་དེ་ལ་ཡང་འདི་ལྟར་འདུ་ཤེས་ནི་ནད་དོ། །འདུ་ཤེས་ནི་འབྲས་སོ་ཞེས་བྱ་བ་ལ། བཅོམ་ལྡན་འདས་རྒྱལ་པོའི་ཁབ་ཀྱི་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་ཏེ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བོས་ཏེ། དགེ་སློང་དག་རངས་བྱེད་ཀྱི་བུ་ལྷག་སྤྱོད་འབྲས་དང་འབྲས་ཀྱི་རྩ་བ་ཡོངས་སུ་བསལ་བའོ་ཞེས་རྣམ་པར་ཤེས་པ་འདིས་ཤེས་པར་གྱུར་ན། འདི་ནི་ཐམས་ཅད་རིག་པའི་ཤེས་པ། འདི་ནི་ཐམས་ཅད་ཚོར་བའི་ཤེས་པའོ་ཞེས་འདི་ལྟར་ལྟ་ཞིང་འདི་སྐད་དུ་སྨྲ་སྟེ། དགེ་སློང་དག་རངས་བྱེད་ཀྱི་བུ་ལྷག་སྤྱོད་ནི་ཐམས་ཅད་མ་རིག་པ་ལ་ཐམས་ཅད་
རིག་པའི་ང་རྒྱལ་ཅན། ཐམས་ཅད་མ་ཚོར་བ་ལ་ཐམས་ཅད་ཚོར་བའི་ང་རྒྱལ་ཅན་འབྲས་དང་འབྲས་ཀྱི་རྩ་བ་ཡོངས་སུ་མ་བསལ་བ་ལ་འབྲས་དང་འབྲས་ཀྱི་རྩ་བ་ཡོངས་སུ་བསལ་བའི་ང་རྒྱལ་ཅན་ཏེ། དགེ་སློང་དག་རངས་བྱེད་ཀྱི་བུ་ལྷག་སྤྱོད་ནི་འདི་ལྟར་ལྟ་ཞིང་འདི་སྐད་དུ་སྨྲ་སྟེ། འདུ་ཤེས་ནི་ནད་དོ། །འདུ་ཤེས་ནི་འབྲས་སོ། །འདུ་ཤེས་ནི་ཟུག་རྔུའོ། །འདུ་ཤེས་མེད་པ་ནི་ཀུན་དུ་རྨོངས་པའོ། །འདི་ལྟ་སྟེ་འདུ་ཤེས་མེད་འདུ་ཤས་མེད་མིན་སྐྱེ་མཆེད་ནི་ཞིབ། འདི་ནི་གྱ་ནོམ་པའོ་ཞེས་དེ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་ལམ་བསྒོམས་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་ལྷ་རྣམས་དང་སྐལ་བ་མཉམ་པར་སྐྱེས་སོ། །དགེ་སློང་དག་རངས་བྱེད་ཀྱི་བུ་ལྷག་སྤྱོད་ནི་འཇིག་ཚོགས་ལ་ལྟ་བ་ཅན། འཇིག་ཚོགས་ལ་ལྟ་བས་བཅིངས་ཤིང་ཡོངས་སུ་མ་གྲོལ་བ། འཇིག་ཚོགས་ཅན་ཏེ། དེ་གནས་དེ་ནས་འཆི་འཕོས་ནས་འདི་ལྟ་བུ་འོང་བར་འགྱུར་ཏེ། སྐྱེ་གནས་དམན་པ་བྱི་ལའི་སྐྱེ་གནས་སུ་སྐྱེ་བར་འགྱུར་ཏེ། དགེ་སློང་དག་གང་ཞིག་འབྲས་དང་འབྲས་ཀྱི་རྩ་བ་ཡོངས་སུ་བསལ་བའོ་ཞེས་རྣམ་པར་ཤེས་པ་འདིས་ཡོངས་སུ་ཤེས་པར་གྱུར་ན། འདི་ནི་ཐམས་ཅད་རིག་པའི་ཤེས་པ། འདི་ནི་ཐམས་ཅད་ཚོར་བའི་ཤེས་པའོ་ཞེས་སྨྲ་བ་འདི་ནི་ཡང་དག་པར་སྨྲ་བ་སྟེ། ཅིའི་ཕྱིར་དེའི་ཡང་དག་པར་སྨྲས་པས་སྨྲ་བ་ཡིན་ཞེ་ན། འབྲས་དང་འབྲས་ཀྱི་རྩ་བ་ཡོངས་སུ་བསལ་བའོ་ཞེས་རྣམ་པར་ཤེས་པ་འདིས་ཤེས་པར་གྱུར་ན་འདི་ནི་ཐམས་ཅད་རིག་པའི་ཤེས་པ་འདི་ནི་ཐམས་ཅད་ཚོར་བའི་ཤེས་པ་སྟེ། དགེ་སློང་དག་ཇི་ལྟར་ཐམས་ཅད་རིག་པ་ཡིན་ཞེ་ན། འདི་ནི་དགེ་སློང་རིག་པའི་སྐྱེ་མཆེད་དྲུག་རྣམས་ཀྱི་ཀུན་འབྱུང་བ་དང༌། མི་སྣང་བ་དང༌། རོ་མྱང་བ་དང༌། ཉེས་དམིགས་དང༌། ངེས་པར་འབྱུང་བ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་སྟེ། འདི་ལྟར་ན་དགེ་སློང་ཐམས་ཅད་རིག་བར་འགྱུར་རོ། །དགེ་སློང་ཇི་ལྟར་ན་དགེ་སློང་ཐམས་ཅད་ཚོར་བ་ཡིན་ཞེ་ན། འདི་ན་དགེ་སློང་ཚོར་བ་རྣམས་ཀྱི་ཀུན་འབྱུང་བ་དང༌། མི་སྣང་བ་དང༌། རོ་མྱང་བ་དང༌། ཉེས་དམིགས་དང༌། ངེས་པར་འབྱུང་བ་ཡང་དག་པ་ཇི་ལྟ་བ་བཞིན་རབ་ཏུ་ཤེས་ཏེ། འདི་ལྟར་ན་དགེ་སློང་ཐམས་ཅད་ཚོར་བར་འགྱུར་རོ། །དགེ་སློང་དག་འབྲས་ཞེས་བྱ་བ་འདི་ནི་
ལུས་གཟུགས་ཅན་རགས་པ་འབྱུང་བ་ཆེན་པོ་བཞིས་བསྐྱེད་ཅིང་ཕ་དང་མའི་མི་གཙང་བ་ལས་ཡང་དག་པར་བྱུང་བ་ཟན་དྲོན་དང་འབྲས་ཆན་གྱིས་གསོས་ཤིང༌། རྟག་ཏུ་ཁྲུས་དང་བྱུག་པ་བྱས་ཀྱང་འཇིག་ཅིང་གྱེས་པའི་ཆོས་ཅན་གྱི་དེའི་ཚིག་བླ་དགས་སོ། །དགེ་སློང་དག་འབྲས་ཀྱི་རྩ་བ་ཞེས་བྱ་བ་འདི་ནི་མིག་ནི་ཡིད་དུ་འོང་བ་དང་མི་འོང་བའི་གཟུགས་ལ་འཛག་ཅིང༌། རྣ་བ་ནི་སྒྲ། སྣ་ནི་དྲི། ལྕེ་ནི་རོ། །ལུས་ནི་རེག་བྱ་དང༌། ཡིད་ནི་ཡིད་དུ་འོང་བ་དང་མི་འོང་བའི་ཆོས་ལ་འཛག་པའི་ཕྱིར་རོ། །འབྲས་ཀྱི་རྩ་བ་ཞེས་བྱ་བ་འདི་ནི་མ་རིག་པ་དང་སྲིད་པའི་སྲེད་པའི་ཚིག་བླ་དགས་སོ། །གང་གི་ཕྱིར་དགེ་སློང་མ་རིག་པ་དང་སྲིད་པའི་སྲིད་པ་ཡོངས་སུ་སྤངས་ཤིང་ཡོངས་སུ་ཤེས་པར་གྱུར་པ་སྟེ། ཤིང་ཏ་ལ་མགོ་བཅད་པ་ལྟར་དྲུངས་ཕྱུང་ཞིང་མི་སྣང་ཞིང་ཕྱིས་མི་སྐྱེ་བའི་ཆོས་ཅན་དུ་བྱས་པ་འདི་ནི་འབྲས་དང་འབྲས་ཀྱི་རྩ་བ་ཡོངས་སུ་བསལ་བར་ཡོངས་སུ་ཤེས་པ་ཞེས་བྱའོ་ཞེས་གསུངས་སོ། །གང་སེམས་གནས་པ་དང་ཡང་དག་མར་གནས་པ་ཞེས་བྱ་བ་ལ། དེ་དང་དེ་ལས་འདོན་ཏེ། ཇི་ལྟར་རེ་ཞིག་ལམ་གྱི་ཚོམས་ཀྱི་ལམ་གྱི་ཡན་ལག་གི་སྒོའི་ལོག་པ་ཉིད་ཅེས་བྱ་བའི་སྡོམ་གྱི་ཚིགས་སུ་བཅད་པ་བདུན་པའི་མདོ་གསུམ་པ་ལས་འབྱུང་བ་མཛོད་ཀྱི་གནས་བཞི་པར། རྣམ་གསུམ་དྲི་མེད་གཟུགས་གསུངས་དང༌། །འཕེལ་དང་མ་བྱས་ལམ་རྫོགས་ཕྱིར། །ཞེས་བྱ་བའི་སྐབས་སུ། སྤོང་བ་དག་ནི་ཆུ་ལོན་དུ་གསུངས་ཞེས་བྱ་བར་བལྟ་བར་བྱའོ། །འོ་ན་མདོ་ལས་བདེ་བའི་དབང་པོ་གང་ཞེ་ན་ཞེས་བྱ་བ་ལ། ལམ་གྱི་ཚོམས་གྱི་དབང་པོའི་སྒོའི་སྡོམ་གྱི་ཚིགས་སུ་བཅད་པ་གཉིས་པའི་མཐའི་ཆ་ལས་འབྱུང་བ་བལྟ་བར་བྱ་སྟེ། འདི་ཉིད་ཀྱི་མཛོད་ཀྱི་གནས་གཉིས་པར། ལུས་ཚོར་སིམ་པ་མ་ཡིན་གང༌། །སྡུག་བསྔལ་དབང་པོ་ཞེས་བྱ་བར་བཤད་ཟིན་ཏོ། །བདེ་བ་ལུས་ཀྱིས་མྱོང་བ་ཞེས་བྱ་བ་ལ་བསམ་གཏན་གྱི་རྣམ་པར་བྱེད་པ་དེ་དང་དེ་ལས་འདི་ལྟར་འདོན་ཏེ། དེ་དགའ་བ་ལས་འདོད་ཆགས་དང་བྲལ་ཏེ། དྲན་པ་ཤེས་རབ་དང་ལྡན་ཞིང་བཏང་སྙོམས་སུ་གནས་ཏེ། བདེ་བ་ལུས་ཀྱིས་མྱོང་བ་གང་འཕགས་པ་རྣམས་ཀྱིས་དྲན་པ་དང་ལྡན་ཞིང་བཏང་སྙོམས་པའོ་ཞེས་བརྗོད་པ་སྟེ། དགའ་བ་མེད་པའི་བསམ་གཏན་གསུམ་པ་བསྒྲུབས་ཏེ་གནས་སོ་ཞེས་གསུངས་སོ། །གང་གི་ཚེ་
འཕགས་པ་ཉན་ཐོས་རབ་ཏུ་དབེན་པ་ཞེས་བྱ་བ་ལ་སོགས་པ་ལ། བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བར་དབྱར་གནས་པའི་ཕྱིར་གཤེགས་སོ། །དེ་ནས་ཁྱིམ་བདག་མགོན་མེད་ཟས་སྦྱིན་བཅོམ་ལྡན་འདས་གང་ན་བ་དེར་ཉེ་བར་སོང་སྟེ། ཉེ་བར་སོང་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ཁྱིམ་བདག་མགོན་མེད་ཟས་སྦྱིན་ལ་ཆོས་ཀྱི་གཏམ་གྱིས་ཡང་དག་པར་བསྟན་པར་མཛད། ཡང་དག་པར་བསྐུལ། ཡང་དག་པར་གཟེངས་བསྟོད། ཡང་དག་པར་དགའ་བར་མཛད་དེ། ཆོས་དང་ལྡན་པའི་གཏམ་གྱིས་རྣམ་གྲངས་དུ་མར་ཡང་དག་པར་བསྟན། ཡང་དག་པར་བསྐུལ། ཡང་དག་པར་གཟེངས་བསྟོད། ཡང་དག་པར་དགའ་བར་མཛད་ནས་ཅང་མི་གསུང་པར་བཞུགས་སོ། །དེ་ནས་ཁྱིམ་བདག་མགོན་མེད་ཟས་སྦྱིན་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་བཅོམ་ལྡན་འདས་གང་ན་བ་དེར་ཐལ་མོ་སྦྱར་ཏེ་ཕྱག་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་ཟླ་བ་གསུམ་དུ་ཆོས་གོས་དང་བསོད་སྙོམས་དང༌། མལ་ཆ་དང༌། སྟན་དང༌། ན་བའི་རྐྱེན་སྨན་དང༌། འཚོ་བའི་ཡོ་བྱད་བཞེས་པར་གནང་བར་མཛད་དུ་གསོལ། བཅོམ་ལྡན་འདས་ཀྱིས་ཁྱིམ་བདག་མགོན་མེད་ཟས་སྦྱིན་ལ་ཅད་མི་གསུང་བར་གནང་བར་མཛད་དོ། དེ་ནས་ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ཀྱིས་ཅང་མི་གསུང་བར་གནང་བར་རིག་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་བྱས་ནས་སོང་ངོ༌། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་དབྱར་ཟླ་བ་གསུམ་དུ་ཁྱིམ་བདག་མགོན་མེད་ཟས་སྦྱིན་གྱིས་ཆོས་གོས་དང༌། བསོད་སྙོམས་དང༌། མལ་ཆ་དང༌། སྟན་དང༌། ན་བའི་རྐྱེན་སྨན་དང༌། འཚོ་བའི་ཡོད་བྱད་ཀྱིས་ཉེ་བར་གནས་པར་བྱས་ཏེ། དེ་ནས་ཁྱིམ་བདག་མགོན་མེད་ཟས་སྦྱིན་དབྱར་ཟླ་བ་གསུམ་འདས་པའི་འོག་ཏུ་བཅོམ་ལྡན་འདས་གང་ན་བ་དེར་ཉེ་བར་སོང་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་
གཅིག་ཏུ་འདུག་པ་དང༌། བཅོམ་ལྡན་འདས་ཀྱིས་ཁྱིམ་བདག་མགོན་མེད་ཟས་སྦྱིན་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་ལེགས་སོ་ལེགས་སོ་དེ་བཞིན་གཤེགས་པ་དགེ་སློང་གི་དགེ་འདུན་དང་ཐབས་ཅིག་ཏུ་དབྱར་ཟླ་བ་གསུམ་དུ་ཆོས་གོས་དང༌། བསོད་སྙོམས་དང༌། མལ་ཆ་དང༌། སྟན་དང༌། ན་བའི་རྐྱེན་སྨན་དང༌། འཚོ་བའི་ཡོ་བྱད་ཀྱིས་ཉེ་བར་གནས་པར་བྱས་ཀྱི། ཁྱིམ་བདག་མ་འོངས་པ་ན་མཐོ་རིས་འགྲུབ་པར་བྱེད་པ་སྐལ་པ་ཁྱད་པར་ཅན་གྱི་རྣམ་པར་སྨིན་པ་བདེ་བ་ཅན་གོང་མར་འགྲོ་བར་འགྱུར་རོ། །ཁྱིམ་བདག་འདི་ཙམ་ཀྱིས་དགའ་བར་མི་བྱ་སྟེ། འོན་ཀྱང་དུས་དང་དུས་སུ་རབ་ཏུ་དབེན་པའི་བདེ་བ་ལུས་ཀྱིས་མངོན་སུམ་དུ་བྱས་ནས་བསྒྲུབས་ཏེ། གནས་པ་དེ་ལྟར་བསླབ་པར་བྱའོ། །དེ་ནས་ཁྱིམ་བདག་མགོན་མེད་ཟས་སྦྱིན་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་ཞིང་རྗེས་སུ་ཡི་རངས་ཏེ་བཅོམ་ལྡན་འདས་ཀྱི་དྲུང་ནས་སོང་ངོ། །དེའི་ཚེ་ཚེ་དང་ལྡན་པ་ཤཱ་རིའི་བུ་འཁོར་འདུས་པ་དེ་ན་ཚོགས་ཤིང་འདུག་པར་གྱུར་ཏེ། དེ་ནས་ཚེ་དང་ལྡན་པ་ཤཱ་རིའི་བུ་ཁྱིམ་བདག་མགོན་མེད་ཟས་སྦྱིན་བཅོམ་ལྡན་འདས་ཀྱི་དྲུང་ནས་སོང་ནས་རིང་དུ་ལོན་པར་རིག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ངོ་མཚར་རོ་ཞེས་བྱ་བ་ནས་འདི་ལྟར་བཅོམ་ལྡན་འདས་ཀྱིས་ཁྱིམ་བདག་མགོན་མེད་ཟས་སྦྱིན་ལས་བརྩམས་ཏེ། ཁྱིམ་བདག་ལེགས་སོ་ལེགས་སོ་ཞེས་བྱ་བ་ནས། སྔ་མ་བཞིན་དུ་དེ་ལྟར་བསླབ་པར་བྱའོ་ཞེས་བྱ་བའི་བར་དུ་སྟེ། གང་གི་ཚེ་འཕགས་པ་ཉན་ཐོས་རབ་ཏུ་དབེན་པའི་བདེ་བ་ལུས་ཀྱིས་མངོན་སུམ་དུ་བྱས་ཤིང་བསྒྲུབས་ཏེ་གནས་པ་དེའི་ཚེ་ཆོས་ལྔ་ཡོངས་སུ་སྤོང་ཞིང་ཆོས་ལྔ་བསྒོམ་པ་ཡོངས་སུ་རྫོགས་པར་འགྱུར་ཏེ། ཆོས་ལྔ་ཡོངས་སུ་སྤོང་བར་འགྱུར་བ་གང་ཞེ་ན། གང་ཡང་འདོད་པ་ཉེ་བར་སྡུད་པའི་ཡིད་བདེ་བ་ཡོངས་སུ་སྤོང་བ་དང༌། གང་འདོད་པ་ཉེ་བར་སྡུད་པའི་ཡིད་མི་བདེ་བ་ཡོངས་སུ་སྤོང་བ་དང༌། གང་ཡང་མི་དགེ་བ་ཉེ་བར་སྡུད་པའི་ཡིད་བདེ་བ་ཡོངས་སུ་སྤོང་བ་དང༌། གང་མི་དགེ་བ་ཉེ་བར་སྡུད་པའི་ཡིད་མི་བདེ་བ་ཡོངས་སུ་སྤོང་བ་དང༌། གང་མི་དགེ་བ་ཉེ་བར་སྡུད་པའི་བཏང་སྙོམས་ཡོངས་སུ་སྤོང་བར་འགྱུར་བ་སྟེ། ཆོས་ལྔ་པོ་འདི་དག་ཡོངས་སུ་སྤོང་བར་འགྱུར་རོ། །ཆོས་ལྔ་པོ་
བསྒོམ་པ་ཡོངས་སུ་རྫོགས་པར་གྱུར་པ་གང་ཞེ་ན། དགའ་བ་དང༌། རངས་པ་དང༌། ཤིན་ཏུ་སྦྱངས་པ་དང༌། བདེ་བ་དང༌། ཏིང་ངེ་འཛིན་ནོ། །ཤཱ་རིའི་བུ་དེ་དེ་བཞིན་ཏེ། གང་གི་ཚེ་འཕགས་པ་ཉན་ཐོས་རབ་ཏུ་དབེན་པའི་དགའ་བ་ལུས་ཀྱིས་མངོན་སུམ་དུ་བྱས་ཤིང་བསྒྲུབས་ཏེ་གནས་ཞེས་བྱ་བ་ནས། སྔ་མ་བཞིན་དུ་ཏིང་ངེ་འཛིན་ཏོ་ཞེས་བྱ་བའི་བར་དུའོ་ཞེས་གསུངས་སོ། །མདོ་ལས་ཀྱང་ལུས་ཤིན་ཏུ་སྦྱངས་པ་དང་ཞེས་བྱ་བ་ལ། ལམ་གྱི་ཚོམས་ཀྱི་བྱང་ཆུབ་ཀྱི་ཡན་ལག་གི་སྒོའི་སྡོམ་གྱི་ཚིགས་སུ་བཅད་པ་གཉིས་པའི་མདོ་དང་པོ་ལས་འབྱུང་བ་མཛོད་ཀྱི་གནས་གཉིས་པར། དད་དང་བག་ཡོད་ཤིན་ཏུ་སྦྱངས། །ཞེས་བྱ་བའི་ཚིག་ལེའུར་བྱས་པ་དང༌། མདོ་ལས་ལུས་ཤིན་ཏུ་སྦྱངས་པ་ཞེས་ཀྱང་འབྱུང་བ་མ་ཡིན་ནམ་ཞེས་བྱ་བར་བྲིས་པ་བལྟ་བར་བྱའོ། །ཟག་པ་དང་བཅས་པའི་ཆོས་རྣམས་གང་ཞེ་ན་ཞེས་བྱ་བ་ལ། སྐྱེ་མཆེད་དྲུག་གི་ཚོགས་ཀྱིས་བསྡུས་པའི་སྡོམ་དང་པོའི་ལམ་ཞེས་བྱ་བའི་སྡོམ་གྱི་ཚིགས་སུ་བཅད་པའི་ཐ་མ་ལས་འབྱུང་བ་མཛོད་ཀྱི་གནས་དང་པོར། ཟག་བཅས་ཟག་པ་མེད་ཆོས་རྣམས། །ཞེས་བྱ་བར་བྲིས་ཟིན་ཏོ། །བཅོམ་ལྡན་འདས་ཀྱིས་རྣམ་པར་སྒྱུར་བའི་མདོ་ལས་ཞེས་བྱ་བ་ལ། ལམ་གྱི་ཚོགས་ཀྱི་དབང་པོའི་སྒོའི་སྡོམ་གྱི་ཚིགས་སུ་བཅད་པ་གཉིས་པ་ལས་འབྱུང་བ་མཛོད་ཀྱི་གནས་གསུམ་པར། ནང་གི་སྐྱོན་དང་ཆོས་མཚུངས་ཕྱིར། །ཞེས་བྱ་བར་བསྟན་ཅིང༌། འདིར་སྡུག་བསྔལ་གྱིས་དབང་པོ་འགགས་སོ་ཞེས་བྱ་བར་བཤད་ཟིན་ཏོ། །རྣམ་པར་སྒྱུར་བའི་མདོ་ལས་བསམ་གཏན་བཞི་པ་ན་བདེ་བའི་དབང་པོ་འགག་པར་འགྱུར་རོ་ཞེས་བྱ་བ་ལ་སོགས་པ་འབྱུང་ངོ༌། །བདེ་བ་ཡང་སྤངས་ཏེ་ཞེས་བྱ་བ་ལ། བསམ་གཏན་བཞི་པའི་དབང་དུ་བྱས་ནས་མདོ་དེ་དང་དེ་ལས་འདོན་པ་སྟེ། དེ་བདེ་བ་ཡང་སྤངས་སྡུག་བསྔལ་བ་ཡང་སྤངས་ཤིང་ཡིད་བདེ་བ་དང་ཡིད་མི་བདེ་བ་སྔ་ནས་ཀྱང་ནུབ་པས་བདེ་བ་ཡང་མ་ཡིན། སྡུག་བསྔལ་བ་ཡང་མ་ཡིན་པར་བཏང་སྙོམས་ཡོངས་སུ་དག་པར་བསམ་གཏན་བཞི་པ་བསྒྲུབས་ཏེ་གནས་སོ་ཞེས་འབྱུང༌། བཅོམ་ལྡན་འདས་ཀྱིས་བསམ་གཏན་གསུམ་ནི་སྐྱོན་དང་བཅས་པའི་ཕྱིར་གཡོ་བ་དང་བཅས་པར་གསུངས་ཞེས་བྱ་བ་ལུང་བར་མའི་སྡོམ་གྱི་ཚིགས་
སུ་བཅད་པ་གཉིས་པའི་དང་པོའི་མདོ་ལས་ཏེ། མདོ་དུམ་བུ་མཛོད་ཀྱི་གནས་གསུམ་པར། བཞི་པ་གཡོ་བ་མེད་པ་ཡིན། །ཞེས་བྱ་བར་བཤད་པ་བལྟ་བར་བྱའོ། །མདོ་ལས་རླུང་མེད་པའི་མར་མེ་དཔེར་མཛད་པའི་ཕྱིར་རོ་ཞེས་བྱ་བ་ལ། ཕུང་པོ་ལས། དབྱུ་གུ་གསུམ་དང་གོང་བུ་གསུམ། །ལུ་ཧི་ཏ་ཡི་རྣམ་བཤད་གཉིས། །ཞེས་བྱ་བའི་ལུ་ཧི་ཏའི་མདོ་དང་པོ་ལ་རླུང་མེད་པའི་མར་མེའི་དཔེ་འདི་ལྟར་འདོན་ཏེ། ལུ་ཧི་ཏ་གང་གི་ཚེ་འཕགས་པ་ཉན་ཐོས་བདེ་བ་ཡང་སྤངས་ཤིང༌། སྡུག་བསྔལ་བ་ཡང་སྤངས་ཏེ་ཞེས་བྱ་བ་ནས། བསམ་གཏན་བཞི་པ་བསྒྲུབས་ཏེ་གནས་པ་དེའི་ཚེ་སེམས་མཐོ་བར་མི་འགྱུར་ཞིང་དམའ་བར་མི་འགྱུར་བར་མངོན་པར་གནས་ཤིང་མི་གཡོ་བ་ཐོབ་སྟེ། དཔེར་ན་ཁང་པའམ་ཁང་པའི་ཁྱམས་སུ་མར་མེ་བཞག་པ་དུད་འགྲོའམ་བྱའམ་མིས་མ་བསྐུལ་ཞིང་མ་བསྐྱོད་པ་དེ་སྲིད་དུ་མི་མཐོ་མི་དམའ་བར་མི་འགྱུར་བར་མངོན་པར་གནས་ཤིང་མི་གཡོ་བ་ཐོབ་པོ། །ལུ་ཧི་ཏ་གང་གི་ཚེ་འཕགས་པ་ཉན་ཐོས་བསམ་གཏན་ཅན་བདེ་བ་ཡང་སྤངས་ཤིང་ཞེས་བྱ་བ་ནས་བསམ་གཏན་བཞི་པ་བསྒྲུབས་ཏེ་གནས་པ་དེའི་སེམས་ཀྱང་དེའི་ཚེ་མཐོ་བར་མི་འགྱུར་ཞིང་དམའ་བར་མི་འགྱུར་བར་མངོན་པར་གནས་ཤིང་མི་གཡོ་བ་ཐོབ་པོ་ཞེས་གསུངས་སོ། །ཡང་ཏིང་ངེ་འཛིན་ཐམས་ཅད་མདོར་བསྡུས་ཏེ་ཞེས་བྱ་བ་ལ། གླེང་གཞི་ནི་མ་ཉན་དུ་ཡོད་པ་ནའོ། །ཏིང་ངེ་འཛིན་ནི་རྣམ་པ་གསུམ་སྟེ། རྟོག་པ་དང་བཅས་ཤིང་དཔྱོད་པ་དང་བཅས་པའི་ཏིང་ངེ་འཛིན་དང༌། རྟོག་པ་མེད་ལ་དཔྱོད་པ་ཅམ་གྱི་ཏིང་ངེ་འཛིན་དང༌། རྟོག་པ་ཡང་མེད་ལ་དཔྱོད་པ་ཡང་མེད་པའི་ཏིང་ངེ་འཛིན་ཏོ་ཞེས་གསུངས་སོ། །ཡང་སྟོང་པ་ཉིད་ཀྱི་ཏིང་ངེ་འཛིན་དང་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །ཏིང་ངེ་འཛིན་ནི་རྣམ་པ་གསུམ་སྟེ། སྟོང་པ་ཉིད་ཀྱི་ཏིང་ངེ་འཛིན་དང༌། མཚན་མ་མེད་པའི་ཏིང་ངེ་འཛིན་དང༌། སྨོན་པ་མེད་པའི་ཏིང་ངེ་འཛིན་ཏོ་ཞེས་གསུངས་སོ། །ལམ་ཡང་གཟིངས་ལྟ་བུར་གདོན་མི་ཟ་བར་དོར་བར་བྱ་བའི་ཕྱིར་ཞེས་བྱ་བ་ལ། འདི་ལྟ་སྟེ་ཆུ་བོ་གངྒཱ་ཆུས་ཡོངས་སུ་གང་ཞིང་རྒྱས་ཏེ་བྱ་རོག་བཏུང་དུ་རུང་བ་ཙམ་དུ་གྱུར་ལ་གྲུ་འམ་གཟིངས་མེད་པར་རྒྱུན་ཕྱོགས་དང་བཟློག་ཕྱོགས་དང་ཕ་རོལ་དང་ཚུ་རོལ་གྱི་འགྲམ་དུ་བརྒལ་བར་མི་ནུས་པས། གང་བདག་གིས་རྩ་
དང། ཤིང་དང༌། འདབ་མ་དང༌། ལོ་མ་མང་པོ་དག་བསྡུས་ཏེ། གཟིངས་བྱས་པ། གཟིངས་ལ་བརྟེན་ཅིང་གཟིངས་ལ་གནས་ཏེ་ལག་པ་གཉིས་ཀྱིས་རྩོལ་པས་ཕ་རོལ་དུ་འགྲོ་བར་བྱའོ་ཞེས་དེ་དེ་ལྟར་རྣམ་པར་དཔྱད་ནས་རྩྭ་དང༌། ཤིང་དང༌། འདབ་མ་དང༌། ལོ་མ་མང་པོ་དག་བསྡུས་ཏེ་གཟིངས་བྱས་ནས། གཟིངས་ལ་བརྟེན་ཅིང་གཟིངས་ལ་གནས་ཏེ། རྒྱུན་ལས་བཟློག་ཕྱོགས་སུ་ལག་པ་གཉིས་ཀྱིས་རྩོལ་བས་བདེ་བར་ཕ་རོལ་ཏུ་ཕྱིན་ཏེ། དེ་ནས་སྐྱེས་བུ་དེ་འདི་སྙམ་དུ་གཟིངས་འདི་ནི་བདག་ལ་ཕན་པ་མང་པོ་བྱེད་པ་སྟེ། བདག་གཟིངས་འདི་ལ་བརྟེན་ཅིང་གཟིངས་ལ་གནས་ནས་རྒྱུན་ལས་བཟློག་ཕྱོགས་སུ་ལག་པ་གཉིས་ཀྱིས་རྩོལ་བས་བདེ་བར་ཕ་རོལ་ཏུ་བརྒལ་ཏེ། གང་བདག་གིས་གཟིངས་འདི་ནི་མགོ་བོའམ་ཕྲག་པ་ལ་ཁུར་ཏེ་གང་དུ་འདོད་པ་དེར་འགྲོ་བར་བྱའོ་ཞེས། དགེ་སློང་དག་འདི་ཇི་སྙམ་དུ་སེམས། སྐྱེས་བུ་དེས་ཕན་པ་མང་པོ་བྱེད་བ་སྐྱེས་བུ་དེ་དེ་ལྟ་དེ་ལྟར་རྟོག་བཞིན་དུ་གཟིངས་དེ་མགོ་བོ་འམ་ཕྲག་པ་ལ་ཁུར་ཏེ། གང་དུ་འདོད་པ་དེར་འགྲོའམ། བཙུན་པ་མ་ལགས་སོ། །དེ་ནས་སྐྱེས་བུ་དེ་འདི་སྙམ་དུ་གཟིངས་འདིས་ཅུང་ཟད་ཕན་པ་མང་པོ་བྱེད་པ་ཡིན་ཏེ། བདག་གཟིངས་འདི་ལ་བརྟེན་ཅིང་གཟིངས་ལ་གནས་ཏེ་རྒྱུན་ལས་བཟློག་ཕྱོགས་སུ་ལག་པ་གཉིས་ཀྱིས་རྩོལ་བས་བདེ་བར་ཕ་རོལ་གྱི་ངོས་སུ་བརྒལ་བར་བྱས་ཀྱང་བདག་གིས་གཟིངས་འདི་ཐང་ལས་བསྐྱུར་བ་འམ་ཆུའི་རྒྱུན་ལ་བསྐྱུར་བར་བྱའོ་ཞེས་དེས་གཟིངས་དེ་ཐང་ལ་བསྐྱུར་བ་འམ་ཆུའི་རྒྱུན་དུ་བསྐྱུར་ཏེ་ཇི་ལྟར་འདོད་པ་བཞིན་དུ་འགྲོ་ན། དགེ་སློང་དག་འདི་ཇི་སྙམ་དུ་སེམས། སྐྱེས་བུ་དེ་གཟིངས་དེ་ལ་དེ་ལྟ་དེ་ལྟར་རྟོག་པ་ན་བྱ་བ་བྱས་པ་ཡིན་ནམ། བཙུན་པ་དེ་བཞིན་ནོ། །དགེ་སློང་དག་དེ་བཞིན་དུ་ངས་བསྟན་པའི་ཆོས་རྣམས་ཀྱང་ངེས་པར་འབྱུང་བའི་ཕྱིར་ཡིན་གྱི། །ཡོངས་སུ་གཟུང་བའི་ཕྱིར་ནི་མ་ཡིན་ནོ། །དགེ་སློང་དག་དེ་ལྟ་བས་ན་ངས་གཟིངས་ལྟ་བུའི་ཆོས་ཀྱི་རྣམ་གྲངས་བསྟན་པ་དག་ཤེས་ནས་སྔར་ཆོས་མ་ཡིན་པ་བཞིན་དུ་ཆོས་ཀྱང་སྤང་བར་བྱའོ་ཞེས་ལུང་བར་མའི་སྡོམ་གྱི་ཚིགས་སུ་བཅད་པ་གཉིས་པ་བཀྲ་ཤིས་པའི་མདོ་ལས་འབྱུང་ངོ༌། །དྲི་མེད་རྣམ་ཐར་སྒོ་གསུམ་མོ། །ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་
ནའོ། །རྣམ་པར་ཐར་པའི་སྒོ་ནི་རྣམ་པ་གསུམ་སྟེ། གསུམ་གང་ཞེ་ན། རྣམ་པར་ཐར་པའི་སྒོ་སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པའོ་ཞེས་གསུངས་སོ། །གཞན་ཡང་ཏིང་ངེ་འཛིན་གསུམ་མོ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །གཞན་ཡང་ཏིང་ངེ་འཛིན་གསུམ་སྟེ། གསུམ་གང་ཞེ་ན། སྟོང་པ་ཉིད་སྟོང་པ་ཉིད་ཀྱི་ཏིང་ངེ་འཛིན་དང༌། མཚན་མ་མེད་པ་མཚན་མ་མེད་པའི་ཏིང་ངེ་འཛིན་དང༌། སྨོན་པ་མེད་པ་སྨོན་པ་མེད་པའི་ཏིང་ངེ་འཛིན་ནོ་ཞེས་གསུངས་སོ། །ཡང་ཏིང་ངེ་འཛིན་བསྒོམ་པ་རྣམ་པ་བཞི་སྟེ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །ཏིང་ངེ་འཛིན་བསྒོམ་པ་ནི་རྣམ་པ་བཞི་སྟེ། བཞི་གང་ཞེ་ན། ཏིང་ངེ་འཛིན་བསྒོམ་པ་ཀུན་དུ་བསྟེན་གོམས་པར་བྱས་ལན་མང་དུ་བྱས་ན་མཐོང་བའི་ཆོས་ལ་བདེ་བར་གནས་པར་འགྱུར་བ་ཡང་ཡོད། ཏིང་ངེ་འཛིན་བསྒོམ་པ་ཀུན་དུ་བསྟེན་གོམས་པར་བྱས་ལན་མང་དུ་བྱས་ན་ཤེས་པར་འགྱུར་བ་དང་མཐོང་བར་འགྱུར་བ་ཡང་ཡོད། ཏིང་ངེ་འཛིན་བསྒོམ་པ་ཀུན་དུ་བསྟེན་གོམས་པར་བྱས་ལན་མང་དུ་བྱས་ན་ཤེས་རབ་རབ་ཏུ་འབྱེད་པར་འགྱུར་བ་ཡང་ཡོད། ཏིང་ངེ་འཛིན་བསྒོམ་པ་ཀུན་དུ་བསྟེན་གོམས་པར་བྱས་ལན་མང་དུ་བྱས་ན་ཟག་པ་ཟད་པར་འགྱུར་བ་ཡང་ཡོད་དོ། །ཏིང་ངེ་འཛིན་བསྒོམ་པ་ཀུན་དུ་བསྟན་གོམས་པར་བྱས་ལན་མང་དུ་བྱས་ན་མཐོང་བའི་ཆོས་ལ་བདེ་བར་གནས་པར་འགྱུར་བ་གང་ཞེ་ན། འདི་ན་དགེ་སློང་ལུས་འདི་རབ་ཏུ་དབེན་པ་ལས་སྐྱེས་པའི་དགའ་བ་དང༌། བདེ་བས་མངོན་པར་གང་ཞིང་རྒྱས་ལ་ཁྱབ་སྟེ། འདི་ལྟ་སྟེ་རབ་ཏུ་དབེན་པ་ལས་སྐྱེས་པའི་དགའ་བ་དང༌། བདེ་བ་ལུས་འདི་ལ་མ་ཁྱབ་པའི་ཆ་ཅུང་ཟད་ཀྱང་མེད་པར་ཁྱབ་པར་གནས་པ་སྟེ། དཔེར་ན་ཁྲུས་མཁན་ནམ་ཁྲུས་མཁན་གྱི་སློབ་མ་མཁས་པས་འདག་ཆལ་གྱི་ཕྱེ་མ་ཞིབ་མོ་དག་ཟངས་གཞོང་ངམ་འཁར་གཞོང་ངམ་ཉ་ཕྱིས་ཀྱི་ནང་དུ་ཆུ་དང་བཅུག་ནས་སྤངས་ན་གོང་དུ་དེ་རླན་པ་དང་རླན་པའི་རྗེས་སུ་འགྲོ་བ་དང༌། ཕྱི་དང་ནང་དག་རླན་པས་ཁྱབ་ཅིང་སླ་བ་དང་འཐོར་བར་མི་འགྱུར་བ་དེ་བཞིན་དུ་འདི་ན་དགེ་སློང་ལུས་འདི་ཞེས་བྱ་བ་སྔ་མ་བཞིན་ཏེ། འདི་ནི་ཏིང་ངེ་འཛིན་བསྒོམ་པ་ཀུན་དུ་བསྟེན་གོམས་པར་བྱས་ལན་མང་དུ་བྱས་ན་མཐོང་བའི་ཆོས་ལ་བདེ་བར་གནས་པར་འགྱུར་བ་ཞེས་བྱའོ།།
ཏིང་ངེ་འཛིན་བསྒོམ་པ་ཡོངས་སུ་བསྟེན་གོམས་པར་བྱས་ལན་མང་དུ་བྱས་ན་ཤེས་པར་འགྱུར་བ་དང་མཐོང་བར་འགྱུར་བ་གང་ཞེ་ན། འདི་ན་དགེ་སློང་སྣང་བའི་འདུ་ཤེས་ལེགས་པར་རབ་ཏུ་བཟུང་ཞིང་ལེགས་པར་ཡིད་ལ་བྱས་ལེགས་པར་མངོན་སུམ་དུ་བྱེད་ཅིང་བསྒོམ་པ་སྟེ་ཉིན་མོ་ཇི་ལྟ་བར་མཚན་མོ་དེ་བཞིན། མཚན་མོ་ཇི་ལྟ་བར་ཉིན་མོ་དེ་བཞིན། སྔ་མ་ཇི་ལྟ་བར་ཕྱིས་དེ་བཞིན། ཕྱིས་ཇི་ལྟ་བར་སྔར་དེ་བཞིན། སྟེང་དུ་ཇི་ལྟ་བར་འོག་ཏུ་དེ་བཞིན། འོག་ཏུ་ཇི་ལྟ་བར་སྟེང་དུ་དེ་བཞིན་ནོ་ཞེས་འདི་ལྟར་བདག་གི་སེམས་མུན་པའི་རྣམ་པར་མ་གྱུར་ཅིག་ཅེས་སེམས་མ་བསྒྲིམས་ཤིང་སྣང་བ་དང་ལྷན་ཅིག་པར་གྱུར་པའི་སེམས་སྒྲིབ་པ་མེད་པ་སྒོམ་པར་བྱེད། འདི་ནི་ཏིང་ངེ་འཛིན་བསྒོམ་པ་ཀུན་དུ་བསྟེན་གོམས་པར་བྱས་ལན་མང་དུ་བྱས་ན་ཤེས་པར་འགྱུར་བ་དང་མཐོང་པར་འགྱུར་བ་ཞེས་བྱའོ། །ཏིང་ངེ་འཛིན་བསྒོམ་པ་ཀུན་དུ་བསྟེན་གོམས་པར་བྱས་ལན་མང་དུ་བྱས་ན་ཤེས་རབ་རབ་ཏུ་རྣམ་པར་འབྱེད་པར་འགྱུར་བ་གང་ཞེ་ན། འདི་ན་དགེ་སློང་ཚོར་བའི་སྐྱེ་བ་རིག་ཅིང་ཚོར་བའི་སྐྱེ་བ་རྣམ་པར་རིག་ལ། ཚོར་བའི་གནས་པ་རིག་ཅིང་ཚོར་བའི་གནས་པ་རྣམ་པར་རིག་ལ། མི་སྣང་བ་དང་ཡོངས་སུ་ཟད་པ་དང་ཡོངས་སུ་གཏུགས་པ་རྣམ་པར་རིག་གོ །དེ་དྲན་པ་དང་ལྡན་བཞིན་དུ་འདུ་ཤེས་རྣམ་པར་རིག་ཅིང་རྣམ་པར་རྟོག་པའི་སྐྱེ་བ་རྣམ་པར་རིག་ཅིང་གནས་པ་རྣམ་པར་རིག་ལ། མི་སྣང་བ་དང་ཡོངས་སུ་ཟད་པ་དང་ཡོངས་སུ་གཏུགས་པ་རྣམ་པར་རིག་སྟེ། དེ་ཡང་དྲན་པ་དང་ལྡན་བཞིན་དུ་སྟེ་དྲན་པ་དང་མི་ལྡན་པར་ནི་མ་ཡིན་ཏེ། འདི་ནི་ཏིང་ངེ་འཛིན་བསྒོམ་པ་ཀུན་དུ་བསྟེན་གོམས་པར་བྱས་ལན་མང་དུ་བྱས་ན་ཤེས་རབ་རབ་ཏུ་རྣམ་པར་འབྱེད་པ་ཞེས་བྱའོ། །ཏིང་ངེ་འཛིན་བསྒོམ་པ་ཀུན་དུ་བསྟེན་གོམས་པར་བྱས་ལན་མང་དུ་བྱས་ན་ཟག་པ་ཟད་པར་འགྱུར་བ་གང་ཞེ་ན། འདི་ནི་དགེ་སློང་ཉེ་བར་ལེན་པའི་ཕུང་པོ་ལྔ་རྣམས་ཀྱི་སྐྱེ་བ་དང་འཇིག་པ་རྗེས་སུ་ལྟ་ཞིང་གནས་ཏེ། འདི་ནི་གཟུགས་སོ། །འདི་ནི་ཏིང་ངེ་འཛིན་ཀུན་འབྱུང་བ། འདི་ནི་གཟུགས་ཀྱི་མི་སྣང་བ། འདི་ནི་ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པའོ། །འདི་ནི་རྣམ་པར་ཤེས་པའི་ཀུན་འབྱུང་བ། འདི་ནི་རྣམ་པར་ཤེས་པའི་མི་སྣང་བའོ་ཞེས་ཉེ་བར་ལེན་པའི་ཕུང་པོ་ལྔ་རྣམས་ཀྱི་སྐྱེ་བ་
དང་འཇིག་པ་ཡང་དག་པར་རྗེས་སུ་མཐོང་བ་སྟེ། འདི་ནི་ཏིང་ངེ་འཛིན་བསྒོམ་པ་ཀུན་དུ་བསྟེན་གོམས་པར་བྱས་ལན་མང་དུ་བྱས་ན་ཟག་པ་ཟད་བར་འགྱུར་བ་ཞེས་བྱའོ། །ངས་འདི་ལ་དགོངས་ནས་ཕ་རོལ་དུ་འགྲོ་བ་དག་གིས་དྲིས་པ་ལ་རྣམ་པར་བཤད་དོ། །འདོད་པའི་འདུ་ཤེས་ཡིད་མི་བདེ། །གཉི་ག་རབ་ཏུ་སྤང་བར་བྱ། །རྨུགས་དང་གཉིད་དག་སྤང་བྱ་སྟེ། །རྒོད་དང་འགྱོད་པ་སྤང་བར་བྱ། །ཆོས་ལ་རྟོག་པ་སྔོན་འགྲོ་བས། །བཏང་སྙོམས་ཡོངས་དག་དྲན་པ་ཅན། །ཀུན་ཤེས་མ་རིག་རབ་སྤངས་ཤིང༌། །རྣམ་ཐར་བརྟུལ་ཞུགས་ཅན་ཞེས་བྱ། །ཞེས་གསུངས་སོ། །ཚད་མེད་པ་ནི་རྣམ་པ་བཞི། །ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །ཚད་མེད་པ་ནི་རྣམ་པ་བཞི་སྟེ། བཞི་གང་ཞེ་ན། བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་སོ་ཞེས་གསུངས་སོ། །གནོད་སེམས་ལ་སོགས་གཉེན་པོའི་ཕྱིར། །ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། དགེ་སློང་དག་བྱམས་པ་བསྒོམས་ཤིང་བྱམས་པ་ཀུན་དུ་བསྟེན་བྱམས་པ་ལན་མང་དུ་བྱས་ན་གནོད་སེམས་རབ་ཏུ་སྤོང་བར་འགྱུར་རོ་ཞེས་གསུངས་སོ། །གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་སྙིང་རྗེ་བསྒོམས་སྙིང་རྗེ་ཀུན་དུ་བསྟེན་སྙིང་རྗེ་ལན་མང་དུ་བྱས་ན་རྣམ་པར་འཚེ་བ་རབ་ཏུ་སྤོང་བར་འགྱུར་རོ་ཞེས་གསུངས་སོ། །གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་དགའ་བ་བསྒོམས་ཤིང་དགའ་བ་ཀུན་དུ་བསྟེན་དགའ་བ་ལན་མང་དུ་བྱས་ན་མི་དགའ་བ་རབ་ཏུ་སྤོང་བར་འགྱུར་རོ་ཞེས་གསུངས་སོ། །གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་བཏང་སྙོམས་བསྒོམས་ཤིང་བཏང་སྙོམས་ཀུན་དུ་བསྟེན་བཏང་སྙོམས་ལན་མང་དུ་བྱས་ན་འདོད་པའི་འདོད་ཆགས་དང་གནོད་སེམས་རབ་ཏུ་སྤོང་བར་འགྱུར་རོ་ཞེས་གསུངས་སོ། །ཕྱོགས་གཅིག་ནས་འཇིག་རྟེན་ཐམས་ཅད་ཀྱི་རབ་ཏུ་རྒྱས་པར་བྱེད་དོ་ཞེས་བྱ་བ་ལ། གསུམ་ཚན་གསུམ་པའི་བསོད་ནམས་བྱ་བའི་དངོས་པོ་གསུམ་གྱི་མདོ་དེ་དང་དེ་ལས་མངོན་པ་མཛོད་ཀྱི་གནས་བཞི་པར་བསོད་ནམས་བྱ་བའི་དངོས་པོའི་སྐབས་སུ་བྲིས་ཏེ། དེ་ལས་འདི་ལྟར་འདོན་ཏེ། འདི་ན་ཁ་ཅིག་བྱམས་པ་དང་ལྷན་ཅིག་པར་གྱུར་པའི་སེམས་ཁོ་ན་མེད་པ་འགྲན་ཟླ་མེད་པ་གནོད་པ་མེད་པ་རྒྱ་ཆེན་པོར་གྱུར་པ་ཚད་མེད་པ་ལེགས་པར་བསྒོམས་པ།
ཕྱོགས་གཅིག་ཏུ་མོས་ཤིང་ཁྱབ་པར་བྱས་ཏེ་བསྒྲུབས་ནས་གནས་སོ། །དེ་བཞིན་དུ་གཉིས་པ་དང༌། དེ་བཞིན་དུ་གསུམ་པ་དང༌། དེ་བཞིན་དུ་བཞི་པ་དང༌། སྟེང་དང་འོག་དང་ལོགས་ཀྱི་འཇིག་རྟེན་ཐམས་ཅད་བྱམས་པ་ལྷན་ཅིག་པར་གྱུར་པའི་སེམས་ཁོན་མེད་པ་འགྲན་ཟླ་མེད་པ་གནོད་པ་མེད་པ་རྒྱ་ཆེན་པོར་གྱུར་པ་ཚད་མེད་པ་ལེགས་པར་བསྒོམས་པ། ཕྱོགས་གཅིག་ཏུ་མོས་ཤིང་ཁྱབ་པར་བྱས་ཏེ་བསྒྲུབས་ནས་གནས་སོ་ཞེས་གསུངས་སོ། །རྣམ་པར་ཐར་པ་བརྒྱད་ཅེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །རྣམ་པར་ཐར་པ་ནི་རྣམ་པ་བརྒྱད་དེ། བརྒྱད་གང་ཞེ་ན། གཟུགས་ཅན་གྱིས་གཟུགས་རྣམས་ལ་ལྟ་བ་འདི་ནི་རྣམ་པར་ཐར་པ་དང་པོའོ། །ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་རྣམས་ལ་ལྟ་བ་འདི་ནི་རྣམ་པར་ཐར་པ་གཉིས་པའོ། །སྡུག་པའི་རྣམ་པར་ཐར་པ་ལུས་ཀྱིས་མངོན་སུམ་དུ་བྱས་ནས་གནས་པ་འདི་ནི་རྣམ་པར་ཐར་པ་གསུམ་པའོ། །དེ་རྣམ་པ་ཐམས་ཅད་དུ་གཟུགས་ཀྱི་འདུ་ཤེས་ལས་ཡང་དག་པར་འདས་ཏེ། ཐོགས་པའི་འདུ་ཤེས་ནུབ་བར་གྱུར་ཅིང་སྣ་ཚོགས་ཀྱི་འདུ་ཤེས་ཡིད་ལ་མི་བྱེད་པས་ནམ་མཁའ་མཐའ་ཡས་སོ་ཞེས་ནམ་མཁའ་མཐའ་ཡས་སྐྱེ་མཆེད་ཉེ་བར་བསྒྲུབས་ཤིང་ཉེ་བར་གནས་ཏེ་འདི་ལྟ་སྟེ། ནམ་མཁའ་མཐའ་ཡས་སྐྱེ་མཆེད་དུ་ཉེ་བར་འགྲོ་བའི་ལྷ་རྣམས་ཏེ་འདི་ནི་རྣམ་པར་ཐར་པ་བཞི་བའོ། །དེ་རྣམ་པ་ཐམས་ཅད་དུ་ནམ་མཁའ་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ་རྣམ་པར་ཤེས་པ་མཐའ་ཡས་སོ་ཞེས་རྣམ་ཤེས་མཐའ་ཡས་སྐྱེ་མཆེད་ཉེ་བར་བསྒྲུབས་ཤིང་ཉེ་བར་གནས་ཏེ། འདི་ལྟ་སྟེ། རྣམ་ཤེས་མཐའ་ཡས་སྐྱེ་མཆེད་དུ་ཉེ་བར་འགྲོ་བའི་ལྷ་རྣམས་ཏེ། འདི་ནི་རྣམ་པར་ཐར་བ་ལྔ་པའོ། །དེ་རྣམ་པ་ཐམས་ཅད་དུ་རྣམ་ཤེས་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ། ཅི་ཡང་མེད་དོ་ཞེས་ཅི་ཡང་མེད་པའི་སྐྱེ་མཆེད་ཉེ་བར་བསྒྲུབས་ཤིང་ཉེ་བར་གནས་ཏེ། འདི་ལྟ་སྟེ། ཅི་ཡང་མེད་པའི་སྐྱེ་མཆེད་དུ་ཉེ་བར་འགྲོ་བའི་ལྷ་རྣམས་ཏེ། འདི་ནི་རྣམ་པར་ཐར་པ་དྲུག་པའོ། །དེ་རྣམ་པ་ཐམས་ཅད་དུ་ཅི་ཡང་མེད་པའི་སྐྱེ་མཆེད་ལས་ཡང་དག་པར་འདས་ཏེ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་བསྒྲུབས་ཤིང་ཉེ་བར་གནས་ཏེ། འདི་ལྟ་སྟེ་འདུ་ཤེས་མེད་འདུ་ཤེས་མེད་མིན་
སྐྱེ་མཆེད་དུ་ཉེ་བར་འགྲོ་བའི་ལྷ་རྣམས་ཏེ། འདི་ནི་རྣམ་པར་ཐར་པ་བདུན་པའོ། །རྣམ་པ་ཐམས་ཅད་དུ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལས་ཡང་དག་པར་འདས་ཏེ། འདུ་ཤེས་དང་ཚོར་བ་འགོག་པ་ལུས་ཀྱིས་མངོན་སུམ་དུ་བྱས་ཤིང་ཉེ་བར་བསྒྲུབས་ཤིང་གནས་ཏེ། འདི་ནི་རྣམ་པར་ཐར་པ་བརྒྱད་པའོ་ཞེས་གསུངས་སོ། །ཟིལ་གྱིས་གནོན་པའི་སྐྱེ་མཆེད་བརྒྱད། །ཅེས་བྱ་བ་ལ། བརྒྱད་ལས་འཕྲོས་པའི་སྡོམ་གྱི་ཚིགས་སུ་བཅད་པ་བདུན་པའི་མདོ་བཞི་པ་ལས་འབྱུང་བ། མཛོད་ཀྱི་གནས་དང་པོ་འདི་ཉིད་དུ། དེ་བཞིན་གཞན་ཡང་ཅི་རིགས་པ། །ཞེས་བྱ་བའི་ཚིག་ལེའུར་བྱས་པ་དང༌། དེ་བཞིན་དུ། ཟིལ་གྱིས་གནོན་པའི་སྐྱེ་མཆེད་དྲུག །ཅེས་བྱ་བར་བྲིས་པར་བལྟ་བར་བྱའོ། །ཟད་པར་གྱི་སྐྱེ་མཆེད་ནི་བཅུ་སྟེ་ཞེས་བྱ་བ་ལ། བཅུ་ལས་འཕྲོས་པའི་སྡོམ་གྱི་ཚིགས་སུ་བཅད་པ་གསུམ་པ་དང༌། ཡང་དག་པར་འགྲོ་བའི་རྣམ་གྲངས་ཀྱི་མདོ་བཅུ་པའི་ཐ་མ་ལས་འབྱུང་བ་འདི་ཉིད་ཀྱི་མཛོད་ཀྱི་གནས་དང་པོར་བསྡུས་པའི་སྐབས་སུ་དེ་བཞིན་དུ་ཟད་པར་གྱི་སྐྱེ་མཆེད་རྣམས་ཞེས་བྱ་བར་བྲིས་པར་བལྟ་བར་བྱའོ། །ཆོས་མངོན་པ་མཛོད་ཀྱི་རྣམ་པར་བཤད་པ་ཉེ་བར་མཁོ་བ་ཞེས་བྱ་བ་ལས། གནས་བརྒྱད་པ་ཕལ་ཆེར་མདོ་དང་སྦྱར་བ་རྫོགས་སོ།། །།དེ་ལྟར་མོད་ཀྱི་ཅི་བཅོམ་ལྡན་འདས་ཀྱིས་གཟུགས་བདག་མ་ཡིན་ནོ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་གཟུགས་འདས་པ་དང་མ་འོངས་པ་དག་བདག་མ་ཡིན་ན་ད་ལྟར་བྱུང་བ་ལྟ་སྨོས་ཀྱང་ཅི་
དགོས་ཏེ། དགེ་སློང་དག་འདི་ལྟར་མཐོང་བའི་འཕགས་པ ་ཉན་ཐོས་ཐོས་པ་དང་ལྡན་པ་འདས་པའི་གཟུགས་ལ་བཏང་སྙོམས་སུ་འགྱུར་ཞིང་མ་འོངས་པའི་གཟུགས་ལ་མངོན་པར་མི་དགའ་ལ་ད་ལྟར་བྱུང་བའི་གཟུགས་ལ་ཡིད་འབྱུང་བ་དང༌། འདོད་ཆགས་དང་བྲལ་བར་འགྱུར་རོ། །དགེ་སློང་དག་ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་འདས་པ་དང་མ་འོངས་པ་དག་བདག་མ་ཡིན་ན་ད་ལྟར་བྱུང་བ་ལྟ་སྨོས་ཀྱང་ཅི་ དགོས་ཏེ། དགེ་སློང་དག་འདི་ལྟར་མཐོང་བའི་འཕགས་པ ་ཉན་ཐོས་ཐོས་པ་དང་ལྡན་པ་འདས་པའི་གཟུགས་ལ་བཏང་སྙོམས་སུ་འགྱུར་ཞིང༌། མ་འོངས་པའི་གཟུགས་ལ་མངོན་པར་མི་དགའ་ལ། ད་ལྟར་བྱུང་བའི་གཟུགས་ལ་ཡིད་འབྱུང་བ་དང༌། འདོད་ཆགས་དང་བྲལ་བར་འགྱུར་རོ་ཞེས་གསུངས་སོ། །གཉིས་
ལ་བརྟེན་ནས་རྣམ་པར་ཤེས་པ་སྐྱེ་བར་འགྱུར་ཞེས་བྱ་བ་ལ། སྐྱེ་མཆེད་དྲུག་གི་ཚོགས་ལས་འདོན་ཏེ། དེ་ཡང་མཛོད་ཀྱི་གནས་ལྔ་པར་འདས་པ་དང་མ་འོངས་པ་བསམ་པར་བྱའོ་ཞེས་བྱ་བར་རྣམ་པར་བཤད་པ་བསྟན་ལ། མཛོད་ཀྱི་གནས་གསུམ་པར་རྟེན་ཅིང་འབྲེལ་བར་འབྱུང་བའི་སྐབས་སུ་རེག་པའི་ཡན་ལག་རྣམ་པར་དབྱེ་བ་བྲིས་པར་བལྟ་བར་བྱའོ། །དེ་བཞིན་དུ་དགེ་སློང་དག་མིག་གི་རྒྱུ་དང་གཟུགས་ཀྱི་རྐྱེན་ལ་བརྟེན་ཏེ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དེ་ནས་དགེ་སློང་གཞན་ཞིག་བཅོམ་ལྡན་འདས་གང་ན་བ་དེར་ཉེ་བར་སོང་སྟེ། ཉེ་བར་སོང་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་བྱས་ཏེ། ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་དགེ་སློང་དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་རྒྱུ་གང་དང་རྐྱེན་གང་གིས་མིག་གི་རྣམ་པར་ཤེས་པ་སྐྱེ། བཙུན་པ་རྒྱུ་གང་དང་རྐྱེན་གང་གིས་རྣ་བ་དང་སྣ་དང་ལྕེ་དང་ལུས་དང་ཡིད་ཀྱི་རྣམ་པར་ཤེས་པ་སྐྱེ་བར་འགྱུར། དགེ་སློང་མིག་གི་རྒྱུ་དང་གཟུགས་ཀྱི་རྐྱེན་ལ་བརྟེན་ནས་མིག་གི་རྣམ་པར་ཤེས་པ་སྐྱེ་བར་འགྱུར་ཏེ། དེ་ཅིའི་ཕྱིར་ཞེ་ན། མིག་གི་རྣམ་པར་ཤེས་པ་གང་ཅི་ཡང་རུང་བ་དེ་ཐམས་ཅད་ནི་མིག་དང་གཟུགས་ལ་བརྟེན་ཏེ་བྱུང་བའོ། །རྣ་བའི་རྒྱུ་དང་སྒྲའི་རྐྱེན་ལ་བརྟེན་ནས་རྣ་བའི་རྣམ་པར་ཤེས་པ་སྐྱེ་བར་འགྱུར་ཏེ། དེ་ཅིའི་ཕྱིར་ཞེ་ན། རྣ་བའི་རྣམ་པར་ཤེས་པ་གང་ཅི་ཡང་རུང་བ་དེ་ཐམས་ཅད་ནི་རྣ་བ་དང་སྒྲ་ལ་བརྟེན་ནས་འབྱུང་བའོ། །དགེ་སློང་དག་སྣའི་རྒྱུ་དང་དྲིའི་རྐྱེན་ལ་བརྟེན་ནས་སྣའི་རྣམ་པར་ཤེས་པ་སྐྱེ་བར་འགྱུར་ཏེ། དེ་ཅིའི་ཕྱིར་ཞེ་ན། སྣའི་རྣམ་པར་ཤེས་པ་གང་ཅི་ཡང་རུང་བ་དེ་ཐམས་ཅད་ནི་སྣ་དང་དྲི་ལ་བརྟེན་ནས་བྱུང་བའོ། །ལྕེའི་རྒྱུ་དང་རོའི་རྐྱེན་ལ་བརྟེན་ནས་ལྕེའི་རྣམ་པར་ཤེས་པ་སྐྱེ་བར་འགྱུར་ཏེ། དེ་ཅིའི་ཕྱིར་ཞེ་ན། ལྕེའི་རྣམ་པར་ཤེས་པ་གང་ཅི་ཡང་རུང་བ་དེ་ཐམས་ཅད་ནི་ལྕེ་དང་རོ་ལ་བརྟེན་ནས་བྱུང་བའོ། །ལུས་ཀྱི་རྒྱུ་དང་རེག་བྱའི་རྐྱེན་ལ་བརྟེན་ནས་ལུས་ཀྱི་རྣམ་པར་ཤེས་པ་སྐྱེ་བར་འགྱུར་ཏེ། དེ་ཅིའི་ཕྱིར་ཞེ་ན། ལུས་ཀྱི་རྣམ་པར་ཤེས་པ་གང་ཅི་ཡང་རུང་བ་དེ་ཐམས་ཅད་ནི་ལུས་དང་རེག་བྱ་ལ་བརྟེན་ནས་བྱུང་བའོ། །ཡིད་ཀྱི་རྒྱུ་དང་ཆོས་ཀྱི་རྐྱེན་ལ་བརྟེན་ནས་ཡིད་ཀྱི་རྣམ་པར་ཤེས་པ་སྐྱེ་བར་འགྱུར་ཏེ། དེ་ཅིའི་ཕྱིར་ཞེ་ན། ཡིད་ཀྱི་རྣམ་པར་ཤེས་པ་གང་ཅི་ཡང་
རུང་བ་དེ་ཐམས་ཅད་ནི་ཡིད་དང་ཆོས་ལ་བརྟེན་ནས་བྱུང་བའོ་ཞེས་གསུངས་སོ། །གང་རྒྱུ་དང་རྐྱེན་ལ་བརྟེན་ནས་སྐྱེས་པའི་རྣམ་པར་ཤེས་པ་ཞེས་བྱ་བ་དེ་ཡང་ཕུང་པོ་ལས་འདོན་ཏེ། འདས་པ་ཡིས་ནི་བཞི་དག་དང༌། །སྐྱོ་དང་ཡོངས་སུ་གྲོལ་བ་དང༌། །རྒྱུ་ཡིས་རྣམ་པ་གཉིས་བྱེད་ཅིང༌། །གཉིས་པོ་གཞན་ནི་རོ་མྱང་བས། །ཞེས་བྱ་བའི་སྡོམ་གྱི་ཚིགས་སུ་བཅད་པ་གཉིས་པའི་མདོ་བདུན་པ་དང་བརྒྱད་པ་ལས་འབྱུང་བ་འདི་ཉིད་ཀྱི་མཛོད་ཀྱི་གནས་གཉིས་པར། འདུས་མ་བྱས་ལ་དེ་དག་མེད། །ཅེས་བྱ་བར་བྲིས་པ་བལྟ་བར་བྱའོ། །མདོའི་ཚིག་འདི་སྐད་དུ་བྲམ་ཟེ་ཞེས་བྱ་བ་ལ། བཅོམ་ལྡན་འདས་དཔའ་བོའི་སྡེ་ནས་ལྗོངས་རྒྱུ་ཞིང་གཤེགས་ཏེ་ཏ་ལར་གཤེགས་ནས། ཏ་ལའི་ནགས་ཁྲོད་ན་བཞུགས་སོ། །ཏ་ལའི་བྲམ་ཟེ་ཤིང་སཱ་ལ་ཆེན་པོས་དགེ་སྦྱོང་གཽ་ཏ་མ་དཔའ་བོའི་སྡེ་ནས་ལྗོངས་རྒྱུ་ཞིང་གཤེགས་ཏེ། ཏ་ལར་གཤེགས་ནས་ཏ་ལའི་ནགས་ཁྲོད་ན་བཞུགས་སོ་ཞེས་ཐོས་ཏེ། ཐོས་ནས་ཐམས་ཅད་རབ་ཏུ་དཀར་བའི་རྒོད་མའི་ཤིང་རྟ་ལ་ཞོན་ཏེ། གསེར་གྱི་དབྱུག་པ་དང་རིལ་བ་སྤྱི་བླུགས་དག་ཐོགས་ནས། གཞོན་ནུའི་ཚོགས་ཀྱིས་ཡོངས་སུ་བསྐོར་ཞིང༌། གཞོན་ནུའི་ཚོགས་ཀྱིས་མདུན་དུ་བྱས་ནས། བཅོམ་ལྡན་འདས་ཀྱི་དྲུང་དུ་བཅོམ་ལྡན་འདས་ལ་བལྟ་བ་དང་བསྙེན་བཀུར་བའི་ཕྱིར་ཏ་ལའི་ནགས་ནས་བྱུང་སྟེ། ཇི་སྲིད་དུ་ཤིང་རྟས་བགྲོད་པར་བྱ་བ་དེ་སྲིད་དུ་ཤིང་རྟས་སོང་ཞིང་ཤིང་རྟས་བགྲོད་པར་བྱ་བ་མ་ཡིན་པ་ན་རྐང་གིས་ཀུན་དགའ་ར་བར་ཞུགས་ནས། བཅོམ་ལྡན་འདས་གང་ན་བ་དེར་ཉེ་བར་སོང་སྟེ། ཉེ་བར་སོང་ནས་བཅོམ་ལྡན་འདས་དང་ལྷན་ཅིག་ཡང་དག་པར་དགའ་བ་དང༌། ཡང་དག་པར་བདེ་བར་འགྱུར་བའི་གཏམ་རྣམ་པ་སྣ་ཚོགས་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ཏ་ལའི་བྲམ་ཟེ་ཤིང་སཱ་ལ་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གཽ་ཏ་མ་དྲིས་པ་ལུང་བསྟན་པའི་ཕྱིར་སྐབས་འབྱེད་ན་བདག་ཕྱོགས་ཅུང་ཟད་ཅིག་དྲིའོ། །བྲམ་ཟེ་ཇི་ལྟར་འདོད་བཞིན་དུ་དྲིས་ཤིག །གཽ་ཏ་མ་དབང་པོ་ལྔ་པོ་འདི་དག་ནི་སྤྱོད་ཡུལ་ཐ་དད་པ། ཡུལ་ཐ་དད་པ། རང་རང་གི་སྤྱོད་ཡུལ་དང་ཡུལ་ཉམས་སུ་མྱོང་ཞིང༌། གཞན་དང་གཞན་གྱི་སྤྱོད་ཡུལ་དང་ཡུལ་ཉམས་སུ་མི་མྱོང་བ་སྟེ། མིག་གི་དབང་པོ་དང༌། རྣ་བའི་དབང་པོ་དང༌། སྣའི་དབང་པོ་དང༌། ལྕེའི་
དབང་པོ་དང༌། ལུས་ཀྱི་དབང་པོའོ། །འདི་དག་སྤྱོད་ཡུལ་དང་ཡུལ་ཅི་ཞིག་ཉམས་སུ་མྱོང་ཞིང་འདི་དག་ཅི་ཞིག་ལ་བརྟེན་པ་ལགས། བྲམ་ཟེ་དབང་པོ་ལྔ་པོ་འདི་དག་ནི་སྤྱོད་ཡུལ་ཐ་དད་པ། ཡུལ་ཐ་དད་པ། རང་རང་གི་སྤྱོད་ཡུལ་དང་ཡུལ་ཉམས་སུ་མྱོང་ཞིང༌། གཞན་དང་གཞན་གྱི་སྤྱོད་ཡུལ་དང་ཡུལ་ཉམས་སུ་མྱོང་བ་སྟེ། འདི་ལྟར་མིག་གི་དབང་པོ་དང༌། རྣ་བའི་དབང་པོ་དང༌། སྣའི་དབང་པོ་དང༌། ལྕེའི་དབང་པོ་དང༌། ལུས་ཀྱི་དབང་པོའོ། །འདི་དག་ནི་ཡིད་ཀྱི་སྤྱོད་ཡུལ་ཉམས་སུ་མྱོང་ཞིང༌། འདི་དག་ནི་ཡིད་ལ་བརྟེན་པའོ། །གཽ་ཏ་མ་ཡིད་གང་ལ་བརྟེན། བྲམ་ཟེ་ཡིད་ནི་དྲན་པ་ལ་བརྟེན་པའོ། །གཽ་ཏ་མ་དྲན་བ་གང་ལ་བརྟེན། བྲམ་ཟེ་དྲན་པ་ནི་དྲན་པ་ཉེ་བར་གཞག་པ་བཞི་ལ་བརྟེན་ཏོ། །གཽ་ཏ་མ་དྲན་པ་ཉེ་བར་གཞག་པ་བཞི་གང་ལ་བརྟེན། བྲམ་ཟེ་དྲན་བ་ཉེ་བར་གཞག་པ་བཞི་ནི་བྱང་ཆུབ་ཀྱི་ཡན་ལག་བདུན་ལ་བརྟེན་ཏོ། །གཽ་ཏ་མ་བྱང་ཆུབ་ཀྱི་ཡན་ལག་བདུན་གང་ལ་བརྟེན། བྲམ་ཟེ་བྱང་ཆུབ་ཀྱི་ཡན་ལག་བདུན་ནི་རིག་པ་དང་རྣམ་པར་གྲོལ་བ་ལ་བརྟེན་ཏོ། །གཽ་ཏ་མ་རིག་པ་དང་རྣམ་པར་གྲོལ་བ་གང་ལ་བརྟེན། བྲམ་ཟེ་རིག་པ་དང་རྣམ་པར་གྲོལ་བ་ནི་མྱ་ངན་ལས་འདས་པ་ལ་བརྟེན་ཏོ། །གཽ་ཏ་མ་མྱ་ངན་ལས་འདས་པ་གང་ལ་བརྟེན། བྲམ་ཟེ་ཧ་ཅང་ཐལ་ཆེས་ཏེ། དྲིས་པའི་མཐའ་བསྡུ་བར་མི་ནུས་སོ། །དའི་དྲུང་དུ་ཚངས་པར་སྤྱོད་པ་བསྟེན་པ་རྣམས་ནི་སྡུག་བསྔལ་ཡང་དག་པར་ཟད་ཅིང་སྡུག་བསྔལ་མཐར་བྱས་ནས་མྱ་ངན་ལས་འདས་པར་འགྲོ་ཞིང༌། མཐར་མྱ་ངན་ལས་འདས་པར་འགྱུར་རོ། །དེ་ནས་ཏ་ལའི་བྲམ་ཟེ་ཤིང་སཱ་ལ་ཆེན་པོ་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་ཞིང་རྗེས་སུ་ཡི་རང་ནས་བཅོམ་ལྡན་འདས་ཀྱི་དྲུང་ནས་སོང་ངོ༌། །སྲོག་ཆགས་དྲུག་པ་ལྟ་བུའི་མདོ་ལས་ཞེས་བྱ་བ་ལ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བོས་ཏེ། དགེ་སློང་དག་འདི་ལྟ་སྟེ། སྐྱེས་བུ་མཛེ་ཅན་ལུས་ཉམས་པ་ལུས་སྨིན་པ་དབང་པོ་སྡུག་བསྔལ་གྱིས་ཉེ་བར་བཅོམ་པ་དག་སྨྱིག་མའི་ནགས་སུ་ཞུགས་ན། སྨྱིག་མའི་ལོ་མ་དང་ཚེར་མ་དག་ལུས་ལ་ཟུག་ཅིང༌། རྩྭ་དང་ཤིང་དང་རྐང་པ་ལ་ཟུག་ཅིང༌། དེའི་རྒྱུས་སྡུག་བསྔལ་སོ་སོར་མྱོང་བར་འགྱུར་རོ། །དྲག་པ་ཚ་བ་རྩུབ་པ་ཡིད་དུ་མི་འོང་བ་ཉིད་སོ་
སོར་ཉམས་སུ་མྱོང་བར་འགྱུར་རོ། །དེ་བཞིན་དུ་འདི་ན་ཁ་ཅིག་རེག་པའི་སྐྱེ་མཆེད་དྲུག་གིས་སྡུག་བསྔལ་ཉམས་སུ་མྱོང་བར་འགྱུར་ཏེ། དྲག་པ་ཚ་བ་རྩུབ་པ་ཡིད་དུ་མི་འོང་བ་སོ་སོར་ཉམས་སུ་མྱོང་བར་འགྱུར་རོ། །དྲུག་གང་ཞེ་ན། མིག་གི་རེག་པའི་སྐྱེ་མཆེད་ཀྱིས་སྡུག་བསྔལ་སོ་སོར་མྱོང་བར་འགྱུར་ཞིང༌། དྲག་པ་ཚ་བ་རྩུབ་པ་ཡིད་དུ་མི་འོང་བ་ཉིད་ཉམས་སུ་མྱོང་བར་འགྱུར་རོ། །རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ཀྱི་འདུས་ཏེ་རེག་པ་སྡུག་བསྔལ་སོ་སོར་མྱོང་བར་འགྱུར་ཞིང༌། དྲག་པ་ཚ་བ་རྩུབ་པ་ཡིད་དུ་མི་འོང་བ་ཉིད་སོ་སོར་ཉམས་སུ་མྱོང་བར་འགྱུར་རོ། །དགེ་སློང་དག་འདི་ལྟ་སྟེ། གདུག་པ་ཅན་ལ་ཤིང་ངམ་ཤིང་གི་སྡོང་པོ་དག་གིས་སྣད་ན་སྡུག་བསྔལ་བར་འགྱུར་ཞིང༌། ནད་དང་བཅས་པ་དང༌། ཆུ་སེར་དང༌། རྣག་འཛག་པར་འགྱུར་བ་དེ་བཞིན་དུ་འདི་ན་སྐྱེས་བུ་ཁ་ཅིག་གཏུམ་ཞིང་ངོར་སྨྲ་བའི་རང་བཞིན་ཅན་དུ་གྱུར་ན། དེ་ཆུང་ངུ་དང་མི་དགའ་བ་ཆུང་དུས་ཀྱང་ཁྲོ་བ་དང་གནོད་སེམས་སྐྱེད་ཅིང་ཡི་མུག་ཅིང་གནས་ཏེ། ཁྲོ་བར་ཡང་དག་པར་བྱེད་དེ། དེ་ཅིའི་ཕྱིར་ཞེ་ན། དགེ་སློང་དག་སྐྱེས་བུ་དེའི་སེམས་ནི་མཛེ་ཅན་ལྟ་བུའོ། །དགེ་སློང་དག་སྡོམ་པ་མ་ཡིན་པ་དང་སྡོམ་པ་དག་བཤད་པར་བྱ་སྟེ། དེ་ལེགས་པར་ཉོན་ལ་ཡིད་ལ་ཟུང་ཤིག་དང་བཤད་པར་བྱའོ། །སྡོམ་པ་མ་ཡིན་པ་གང་ཞེ་ན། དགེ་སློང་དག་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་དག་མིག་གིས་གཟུགས་དག་མཐོང་ནས་མཚན་མར་འཛིན་ཅིང་མངོན་རྟགས་སུ་འཛིན་ལ་ཕྱིས་ཆོས་རྣམས་ལ་ལན་མང་དུ་རྗེས་སུ་རྟོག་པ་དང༌། རྗེས་སུ་དཔྱོད་པར་བྱེད་དོ། །ཉེས་དམིགས་མ་མཐོང་ཞིང་ཉེས་དམིགས་མ་མཐོང་བས་ལུས་ཀྱིས་ཐག་སྲིང་བར་མི་བྱེད་དོ། །དགེ་སློང་དག་བྱིས་པ་སོ་སོ་སྐྱེ་བོ་ཐོས་པ་དང་མི་ལྡན་པ་དག་རྣ་བས་སྒྲ་དང༌། སྣས་དྲི་དང༌། ལྕེས་རོ་དང༌། ལུས་ཀྱིས་རེག་བྱ་དང༌། ཡིད་ཀྱིས་ཆོས་རྣམ་པར་ཤེས་ནས་མཚན་མར་འཛིན་ཅིང་མངོན་རྟགས་སུ་འཛིན་ལ་ཕྱིས་ཆོས་རྣམས་ལ་ལན་མང་དུ་རྗེས་སུ་རྟོག་པ་དང༌། རྗེས་སུ་དཔྱོད་པར་བྱེད་དེ། ཉེས་དམིགས་མ་མཐོང་ཞིང་ཉེས་དམིགས་མ་མཐོང་བས་ལུས་ཀྱིས་ཐག་སྲིང་བར་མི་བྱེད་དེ། འདི་ནི་སྡོམ་པ་མ་ཡིན་པ་ཞེས་བྱའོ། །སྡོམ་པ་གང་ཞེ་ན། དགེ་སློང་དག་འཕགས་པ་ཉན་ཐོས་
ཐོས་པ་དང་ལྡན་པ་མིག་གིས་གཟུགས་མཐོང་ནས་མཚན་མར་མི་འཛིན་ཅིང་མངོན་རྟགས་སུ་མི་འཛིན་ལ་ཞེས་བྱ་བ་ནས་ལུས་ཀྱིས་ཐག་བསྲིངས་ནས་གནས་སོ་ཞེས་བྱ་བའི་བར་དུ་སྟེ། འདི་ནི་སྡོམ་པ་ཞེས་བྱའོ། །སྡོམ་པ་མ་ཡིན་པ་དང་སྡོམ་པ་དག་བཤད་པར་བྱའོ་ཞེས་ངས་ཇི་སྐད་དུ་བསྟན་པ་དེ་རྒྱས་པར་རབ་ཏུ་བཤད་དོ། །དགེ་སློང་དག་དཔེར་ན་སྐྱེས་བུ་ཞིག་དགོན་པའི་ཨ་མྲའི་ནགས་སུ་སོང་བ་ན་སྲོག་ཆགས་དྲུག་རྙེད་དེ། ཁྱི་རྙེད་དེ་ཁྱི་བཟུང་ནས་སྐྲའི་ཐག་པའི་འཆིང་བས་ལེགས་པར་བརྟན་པར་བཅིངས་ཤིང༌། བྱ་རྙེད་པ་དང་བྱ་བཟུང་ནས་སྐྲའི་ཐག་པའི་འཆིང་པས་ལེགས་བར་བཅིངས་ཤིང༌། ཅེ་སྤྱང་རྙེད་པ་དང་ཅེ་སྤྱང་བཟུང་ནས་སྐྲའི་ཐག་པའི་འཆིང་བས་ལེགས་པར་བརྟེན་པར་བཅིངས་ཤིང༌། ཆུ་སྲིན་བྱིས་པ་གསོད་རྙེད་པ་དང་ཆུ་སྲིན་བྱིས་པ་གསོད་བཟུང་ནས་སྐྲའི་ཐག་པའི་འཆིང་བས་ལེགས་པར་བརྟན་པར་བཅིངས་ཤིང༌། སྤྲུལ་རྙེད་པ་དང་སྤྲུལ་བཟུང་ནས་སྐྲའི་ཐག་པའི་འཆིང་བས་ལེགས་པར་བརྟེན་པར་བཅིངས་ཤིང༌། སྤྲེའུ་རྙེད་པ་དང་སྤྲེའུ་བཟུང་ནས་སྐྲའི་ཐག་པའི་འཆིང་བས་ལེགས་པར་བརྟན་པར་བཅིངས་ཏེ། དེ་དག་བར་དུ་ཐག་པ་གཅིག་གིས་བཅིངས་ཏེ་བཏང་ན་སྤྱོད་ཡུལ་ཐ་དད་པ་དེ་དག་རང་རང་གི་སྤྱོད་ཡུལ་དང་ཡུལ་འདོད་ཅིང་གཞན་དང་གཞན་གྱི་སྤྱོད་ཡུལ་དང་ཡུལ་མི་འདོད་དེ། ཁྱི་ནི་གྲོང་གི་མཐར་འཇུག་པར་འདོད་ཅིང༌། བྱ་ནི་ནམ་མཁའ་ལ་འཕུར་བར་འདོད་ལ། ཅེ་སྤྱང་ནི་དུར་ཁྲོད་དུ་འཇུག་པར་འདོད་དེ། ཆུ་སྲིན་བྱིས་པ་གསོད་ནི་ཆུའི་ནང་དུ་འཇུག་པར་འདོད་ཅིང༌། སྦྲུལ་ནི་ཁུང་དུ་འཇུག་པར་འདོད་ལ་སྤྲེའུ་ནི་རིགས་སུ་འཇུག་པར་འདོད་དེ། དགེ་སློང་དག་འོན་ཀྱང་སྤྱོད་ཡུལ་ཐ་དད་ཅིང་ཡུལ་ཐ་དད་པའི་སྲོག་ཆགས་དྲུག་པོ་རྣམས་རང་རང་གི་སྤྱོད་ཡུལ་དང་ཡུལ་འདོད་ཅིང་གཞན་དང་གཞན་གྱི་སྤྱོད་ཡུལ་དང་ཡུལ་མི་འདོད་མོད་ཀྱི། །འོན་ཀྱང་གང་སྤུངས་ཆེ་ཞིང་སྟོབས་ཆེ་བར་འགྱུར་བ་དེའི་རྗེས་སུ་འགྲོ་ཞིང་དེའི་དབང་དུ་འགྱུར་རོ། །དེ་བཞིན་དུ་སྤྱོད་ཡུལ་དང་ཡུལ་ཐ་དད་པའི་དབང་པོ་དྲུག་པོ་འདི་དག་རང་རང་གི་ཡུལ་འདོད་ཅིང་གཞན་དང་གཞན་གྱི་ཡུལ་མི་འདོད་དེ། མིག་གིས་ཡིད་དུ་འོང་བའི་གཟུགས་བལྟ་བར་འདོད་ཅིང་ཡིད་དུ་མི་འོང་བའི་གཟུགས་རྗེས་སུ་མི་མཐུན་པར་
འགྱུར་རོ། །རྣ་བ་ནི་ཡིད་དུ་འོང་བའི་སྒྲ་མཉན་པར་འདོད་ཅིང་ཡིད་དུ་མི་འོང་བའི་སྒྲ་རྗེས་སུ་མི་མཐུན་པར་འགྱུར་རོ། །སྣ་ནི་ཡིད་དུ་འོང་བའི་དྲི་མནམ་བར་འདོད་ཅིང་ཡིད་དུ་མི་འོང་བའི་དྲི་རྗེས་སུ་མི་མཐུན་པར་འགྱུར་རོ། །ལྕེ་ནི་ཡིད་དུ་འོང་བའི་རོ་མྱོང་བར་འདོད་ཅིང་ཡིད་དུ་མི་འོང་བའི་རོ་དང་རྗེས་སུ་མི་མཐུན་པར་འགྱུར་རོ། །ལུས་ནི་ཡིད་དུ་འོང་བའི་རེག་བྱ་རེག་པར་འདོད་ཅིང་ཡིད་དུ་མི་འོང་བའི་རེག་བྱ་རྗེས་སུ་མི་མཐུན་པར་འགྱུར་རོ། །ཡིད་ནི་ཡིད་དུ་འོང་བའི་ཆོས་རྣམ་པར་ཤེས་པར་འདོད་ཅིང་ཡིད་དུ་མི་འོང་བའི་ཆོས་དང་རྗེས་སུ་མི་མཐུན་པར་འགྱུར་ཏེ། དགེ་སློང་དག་སྤྱོད་ཡུལ་ཐ་དད་པ་དང༌། ཡུལ་ཐ་དད་པའི་དབང་པོ་དྲུག་པོ་འདི་དག་ནི་རང་རང་གི་སྤྱོད་ཡུལ་དང་ཡུལ་འདོད་ཅིང་གཞན་དང་གཞན་གྱི་སྤྱོད་ཡུལ་དང་ཡུལ་མི་འདོད་མོད་ཀྱི། འོན་ཀྱང་གང་སྟོབས་ཆེ་ཞིང་སྟོབས་དང་ལྡན་པ་དེའི་རྗེས་སུ་འགྲོ་ཞིང་དེའི་དབང་དུ་འགྱུར་རོ། །དེ་ནས་སྐྱེས་བུ་དེས་སྲོག་ཆགས་དྲུག་པོ་དེ་དག་ཀ་བའམ་ཕུར་པ་ལ་ལེགས་པར་བཅིངས་ཏེ་བཞག་ན་ཕ་རོལ་རིང་དུ་སོང་ཡང་ལུས་ངལ་བ་དང༌། ལུས་དུབ་པ་དང༌། ལུས་ལྕི་བས་ཀ་བ་འམ་ཕུར་པ་དེ་ཉིད་ཀྱི་དྲུང་དུ་འཁོར་ཞིང་འདུག་ལ་མངོན་པར་གནས་པར་འགྱུར་རོ། །དགེ་སློང་དག་འདི་ནི་ངས་དོན་ཤེས་པར་བྱ་བའི་ཕྱིར་དཔེར་བྱས་པ་ཡིན་ཏེ། འདི་ནི་གཞན་དུ་བལྟ་བར་བྱའོ། །དགེ་སློང་དག་སྲོག་ཆགས་དྲུག་པོ་ཞེས་བྱ་བ་འདི་ནི་དབང་པོ་དྲུག་པོ་རྣམས་ཀྱི་ཚིག་བླ་དགས་སོ། །ཀ་བ་འམ་ཕུར་པ་ལེགས་པར་བཅིངས་ཏེ་ཞེས་བྱ་བ་འདི་ནི་ལུས་སུ་གཏོགས་པའི་དྲན་པའི་ཚིག་བླ་དགས་སོ། །དགེ་སློང་དག་ལུས་སུ་གཏོགས་པའི་དྲན་པ་ཀུན་དུ་བསྟེན་གོམས་པར་བྱས་ལན་མང་དུ་བྱས་ན་མིག་གིས་ཡིད་དུ་འོང་བའི་གཟུགས་བལྟ་བར་འདོད་པ་དང༌། ཡིད་དུ་མི་འོང་བའི་གཟུགས་རྗེས་སུ་མི་མཐུན་པར་མི་འགྱུར་རོ། །རྣ་བས་ཡིད་དུ་འོང་བའི་སྒྲ་མཉན་པར་འདོད་ཅིང་ཡིད་དུ་མི་འོང་བའི་སྒྲ་མི་མཐུན་པར་འགྱུར་རོ། །སྣས་ཡིད་དུ་འོང་བའི་དྲི་བསྣམ་པར་འདོད་ཅིང་ཡིད་དུ་མི་འོང་བའི་དྲི་རྗེས་སུ་མི་མཐུན་པར་མི་འགྱུར་རོ། །ལྕེས་ཡིད་དུ་འོང་བའི་རོ་མྱོང་བར་འདོད་ཅིང་ཡིད་དུ་མི་འོང་བའི་རོ་རྗེས་སུ་མི་མཐུན་པར་མི་འགྱུར་རོ། །ལུས་ཀྱིས་ཡིད་དུ་འོང་བའི་རེག་བྱ་རེག་པར་འདོད་ཅིང་ཡིད་དུ་མི་
འོང་བའི་རེག་བྱ་རྗེས་སུ་མི་མཐུན་པར་མི་འགྱུར་རོ། །ཡིད་ཀྱིས་ཡིད་དུ་འོང་བའི་ཆོས་རྣམ་པར་ཤེས་པར་འདོད་ཅིང་ཡིད་དུ་མི་འོང་བའི་ཆོས་རྗེས་སུ་མི་མཐུན་པར་མི་འགྱུར་ཏེ། དགེ་སློང་དག་དེ་ལྟ་བས་ན་འདི་ལྟར་བསླབ་པར་བྱ་སྟེ། གང་ལུས་སུ་གཏོགས་པའི་དྲན་པ་ཀུན་དུ་སྟེན་པ་དང༌། གོམས་པར་བྱེད་པ་དང་ལན་མང་དུ་བྱེད་པ་དེ་ལྟར་དགེ་སློང་དག་བསླབ་པར་བྱའོ་ཞེས་གསུངས་སོ། །བཅོམ་ལྡན་འདས་ཀྱིས་ཐམས་ཅད་མངོན་པར་ཤེས་པར་བྱ་བ་དང༌། ཡོངས་སུ་ཤེས་པར་བྱ་བ་ཞེས་བྱ་བ་ལ། སྐྱེ་མཆེད་དྲུག་གི་ཆོགས་ཀྱིས་བསྡུས་པའི་སྡོམ་གྱི་ཚིགས་སུ་བཅད་པ་དང་པོའི་སྡོམ་གྱི་ཚིགས་སུ་བཅད་པ་བརྒྱད་པའི་མདོ་ལྔ་པ་ལས་འབྱུང་བ་མཛོད་ཀྱི་གནས་དང་པོར། འདུ་བྱེད་ཕུང་པོ་བཞི་ལས་གཞན། །ཞེས་བྱ་བར་ཆོས་གཅིག་མངོན་པར་མ་ཤེས་ཤིང་ཡོངས་སུ་མ་ཤེས་ན་ཞེས་བྲིས་ཟིན་ཏོ། །ཤེས་རབ་དང་རྣམ་པར་ཤེས་པ་དག་ནི་ཡུལ་མཚུངས་པའི་ཕྱིར་ཞེས་བྱ་བ་ལ། ལུང་བར་མ་ལས་འབྱུང་བས་སྔར་གནས་པར་བཤད་ཅིང་བསྟན་ལ། གསུས་པོ་ཆེའི་མདོ་ལས་འདི་ལྟར་འདོན་ཏེ། ཚེ་དང་ལྡན་པ་ཤཱ་རིའི་བུ་ཤེས་རབ་ཤེས་རབ་ཅེས་བརྗོད་པ། ཚེ་དང་ལྡན་པ་ཤཱ་རིའི་བུ་ཤེས་རབ་གང་ཞེ་ན། ཚེ་དང་ལྡན་པ་གསུས་པོ་ཆེ་རབ་ཏུ་ཤེས་ཤིང་རབ་ཏུ་ཤེས་པ་དེའི་ཕྱིར་ཤེས་རབ་ཅེས་བྱའོ། །ཅི་ཞིག་རབ་ཏུ་ཤེས་ཤེ་ན། དགེ་བ་དང་མི་དགེ་བའི་ཆོས་རྣམས་ཇི་ལྟ་བ་བཞིན་རབ་ཏུ་ཤེས་ཤིང་ཁ་ན་མ་ཐོབ་དང་བཅས་པ་དང༌། ཁ་ན་མ་ཐོ་བ་མེད་པ་དང༌། དམན་པ་དང༌། གྱ་ནོམ་པ་དང༌། དཀར་པོ་དང༌། ནག་པོ་དང། རྟེན་ཅིང་འབྲེལ་བར་འབྱུང་བ་རབ་ཏུ་དབྱེ་བ་དང་བཅས་པ་ཇི་ལྟ་བ་བཞིན་རབ་ཏུ་ཤེས་ཏེ། ཚེ་དང་ལྡན་པ་གསུས་པོ་ཆེ་རབ་ཏུ་ཤེས་ཤིང་རབ་ཏུ་ཤེས་པ་དེའི་ཕྱིར་ཤེས་རབ་ཅེས་བྱའོ། །ཚེ་དང་ལྡན་པ་ཤཱ་རིའི་བུ་རྣམ་པར་ཤེས་པ་རྣམ་པར་ཤེས་པ་ཞེས་བརྗོད་པ་རྣམ་པར་ཤེས་པ་གང་ཡིན་ཞེ་ན། ཚེ་དང་ལྡན་པ་གསུས་པོ་ཆེ་རྣམ་པར་ཤེས་ཤིང་རྣམ་པར་ཤེས་ཏེ། དེའི་ཕྱིར་རྣམ་པར་ཤེས་པ་ཞེས་བྱའོ། །ཅི་ཞིག་རྣམ་པར་ཤེས་ཤེ་ན། གཟུགས་རྣམ་པར་ཤེས་ཤིང༌། སྒྲ་དང༌། དྲི་དང༌། རོ་དང༌། རེག་བྱ་དང༌། ཆོས་རྣམ་པར་ཤེས་ཏེ། ཚེ་དང་ལྡན་པ་གསུས་པོ་ཆེ་རྣམ་པར་ཤེས་ཤིང་
རྣམ་པར་ཤེས་པ་དེའི་ཕྱིར་རྣམ་པར་ཤེས་པ་ཞེས་བྱའོ། །ཚེ་དང་ལྡན་པ་ཤཱ་རིའི་བུ་ཤེས་རབ་གང་ཡིན་པ་དང་རྣམ་པར་ཤེས་པ་གང་ཡིན་པའི་ཆོས་འདི་གཉིས་འདྲེས་པ་ཞིག་གམ་མ་འདྲེས་པ་ཞིག །གང་ཡང་ཆོས་འདི་གཉིས་སོ་སོ་སོ་སོར་ཁྱད་པར་རམ་རྣམ་པ་ཐ་དད་པར་གདགས་པ་རྙེད་དམ། ཚེ་དང་ལྡན་པ་གསུས་པོ་ཆེ་ཤེས་རབ་གང་ཡིན་པ་དང་རྣམ་པར་ཤེས་པ་གང་ཡིན་པའི་ཆོས་འདི་གཉིས་ནི་འདྲེས་པ་སྟེ། མ་འདྲེས་པ་མ་ཡིན་ཞིང་གང་ཡང་ཆོས་འདི་གཉིས་སོ་སོ་སོ་སོར་ཁྱད་པར་རམ་རྣམ་པ་ཐ་དད་པར་གདགས་པ་མི་རྙེད་དེ། ཚེ་དང་ལྡན་པ་གསུས་པོ་ཆེ་གང་ཡང་ཤེས་རབ་ཅེས་བྱ་བ་དང་རྣམ་པར་ཤེས་ཞེས་བྱ་བའི་ཆོས་འདི་གཉིས་ནི་ཡང་དག་པར་འདྲེས་པ་སྟེ། ཆོས་འདི་གཉིས་ནི་སོ་སོ་སོ་སོར་ཁྱད་པར་རམ་རྣམ་པ་ཐ་དད་པར་གདགས་པ་མི་རྙེད་དེ། དེ་ཅིའི་ཕྱིར་ཞེ་ན། གང་རབ་ཏུ་ཤེས་པ་དེ་རྣམ་པར་ཤེས་ཤིང་གང་རྣམ་པར་ཤེས་པ་དེ་རབ་ཏུ་ཤེས་པ་དེའི་ཕྱིར་ཆོས་འདི་གཉིས་ནི་ཡང་དག་པར་འདྲེས་པ་སྟེ་མ་འདྲེས་པ་མ་ཡིན་ཞིང་གང་ཡང་ཆོས་འདི་གཉིས་སོ་སོ་སོ་སོར་ཁྱད་པར་རམ་རྣམ་པ་ཐ་དད་པར་གདགས་པ་མི་རྙེད་དོ་ཞེས་གསུངས་སོ། །མའི་མདོ་ལས་ཞེས་བྱ་བ་ལ་སྐྱེ་མཆེད་དྲུག་གི་ཚོགས་ལས་འབྱུང་བ་གནས་དྲུག་པ་འདི་ཉིད་དུ་ཀུན་འབྱུང་གི་བདེན་པའི་དབང་དུ་མཛད་ནས། བཅོམ་ལྡན་འདས་ཀྱིས་ལས་དང་སྲིད་པ་ཞེས་བྱ་བར་བཤད་པར་བསྟན་ཅིང༌། མཛོད་ཀྱི་གནས་གཉིས་པར། འདུས་མ་བྱས་ལ་དེ་དག་མེད། །ཅེས་བྱ་བའི་སྐབས་སུ་བྲིས་པ་བལྟ་བར་བྱའོ། །བྲམ་ཟེ་ཐམས་ཅད་ཡོད་དོ་ཞེས་བྱ་བ་ནི་སྐྱེ་མཆེད་བཅུ་གཉིས་ཀྱི་བར་གྱི་ཆོས་རྣམས་ཡིན་ནོ་ཞེས་བྱ་བ་ལ། སྐྱེ་མཆེད་དྲུག་གི་ཚོགས་ཀྱིས་བསྡུས་པའི་སྡོམ་གྱི་ཚིགས་སུ་བཅད་པ་གཉིས་པ་ལས། ཐམས་ཅད་ཐམས་ཅད་ཡོད་དོ་ཞེས། །བྲམ་ཟེ་ཆོས་རྣམས་ཐམས་ཅད་དྲིས། །ཞེས་བྱ་བའི་སྡོམ་གྱི་ཚིགས་སུ་བཅད་པའི་མདོ་གཉིས་པ་ལས་འབྱུང་བ་གནས་ལྔ་པ་འདི་ཉིད་དུ་འདས་པ་དང་མ་འོངས་པ་བསམ་པར་ཇི་ལྟར་མདོ་ལས་ཐམས་ཅད་ཡོད་དོ་ཞེས་བཤད་པ་དེ་ལྟར་ལེགས་ཏེ་ཞེས་བྱ་བར་བྲིས་ཟིན་ཏོ། །གཟུགས་ཅན་སྙིང་པོའི་མདོ་ལས་ཞེས་བྱ་བ་ལ། རྒྱལ་པོ་དང་ཡང་དག་པར་ལྡན་པའི་
ཚོམས་ལ་འབྱུང་བ་དྲུག་པ་དང༌། མཛོད་ཀྱི་གནས་གསུམ་པར་རྟེན་ཅིང་འབྲེལ་བར་འབྱུང་བའི་སྐབས་སུ་དགེ་སློང་དག་བདག་བདག་ཅེས་བྱ་བ་འདི་ནི་ཞེས་བྱ་བར་བྲིས་ཟིན་ཏོ། །དགྲ་བཅོམ་མ་བྲག་གིས་བདུད་ལས་བརྩམས་ཏེ་ཞེས་བྱ་བ་ལ། གླེང་གཞི་ནི་མཉན་དུ་ཡོད་བ་ནའོ། །དེའི་ཚེ་དགེ་སློང་མ་བྲག་མཉན་ཡོད་ཀྱི་རྒྱལ་པོའི་དགེ་སློང་མའི་དབྱར་ཁང་ན་གནས་ཏེ། དེ་ནས་དགེ་སློང་མ་བྲག་སྔ་དྲོ་ཆོས་གོས་དང་ལྷུང་བཟེད་ཐོགས་ཏེ་མཉན་ཡོད་དུ་བསོད་སྙོམས་ཀྱི་ཕྱིར་ཞུགས་ཏེ། བསོད་སྙོམས་སྤྱད་ནས་ཟས་ཀྱི་བྱ་བ་བྱས་ཏེ་ཟོས་པའི་འོག་ཏུ་ལྷུང་བཟེད་བྑྲུས་ཏེ། ཆོས་གོས་དང་ལྷུང་བཟེད་ཕྱོགས་གཅིག་ཏུ་བཞག་ནས། འདུག་པའི་སྟན་ཁྱེར་ནས། ལོང་བ་ཅན་གྱི་ནགས་ཚལ་གང་ན་བ་དེར་ཉེ་བར་སོང་སྟེ། ཉེ་བར་སོང་ནས་ལོང་བ་ཅན་གྱི་ནགས་ཚལ་དུ་ཞུགས་ཏེ། ཤིང་ལྗོན་པ་གཞན་ཞིག་གི་དྲུང་དུ་ཉན་བར་གནས་པའི་ཕྱིར་བརྟེན་ཅིང་འདུག་གོ །དེ་ནས་བདུད་སྡིག་ཏོ་ཅན་འདི་སྙམ་དུ་གང་དགེ་སྦྱོང་གཽ་ཏ་མ་ནི་མཉན་ཡོད་ཀྱི་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ལ། དེའི་ཉན་ཐོས་དགེ་སློང་མ་བྲག་ནི་མཉན་ཡོད་ཀྱི་རྒྱལ་པོའི་དགེ་སློང་མའི་དབྱར་ཁང་ན་འདུག་སྟེ། སྔ་དྲོ་ཆོས་གོས་དང་ལྷུང་བཟེད་ཐོགས་ནས་ཞེས་བྱ་བ་ནས། སྔ་མ་བཞིན་དུ་ཤིང་ལྗོན་པ་གཞན་ཞིག་གི་དྲུང་དུ་ཉིན་པར་གནས་པའི་ཕྱིར་འདུག་གོ་ཞེས་བྱ་བའི་བར་དུ་སྟེ། གང་ཡང་བདག་རྣམ་པར་གཡེང་བའི་ལས་ཀྱི་ཕྱིར་ཉེ་བར་འགྲོ་བར་བྱའོ་སྙམ་ནས་གཞོན་ནུ་ལང་ཚོ་ལ་བབ་པའི་གཟུགས་སུ་བདག་ཉིད་མངོན་པར་སྤྲུལ་ནས། དགེ་སློང་མ་བྲག་གང་ན་བ་དེར་ཉེ་བར་སོང་སྟེ། ཉེ་བར་སོང་ནས་དགེ་སློང་མ་བྲག་གི་མདུན་དུ་འདུག་སྟེ་ཚིགས་སུ་བཅད་པ་སྨྲས་པ། སེམས་ཅན་འདི་དག་གང་གིས་བྱས། །སེམས་ཅན་རྣམས་ཀྱི་བྱེད་པ་གང༌། །སེམས་ཅན་གང་ལས་རབ་ཏུ་སྐྱེས། །སེམས་ཅན་གང་དུ་འགྲོ་བར་འགྱུར། །བདུད་ཀྱི་སེམས་ཅན་སྙམ་སེམས་ནས། །འདི་ནི་ལྟ་བར་གྱུར་པ་སྟེ། །འདུ་བྱེད་ཕུང་པོ་འདི་སྟོང་སྟེ། །འདི་ལ་སེམས་ཅན་རྙེད་མ་ཡིན། །ཇི་ལྟར་ཡན་ལག་ཚོགས་ལ་ནི། །ཤིང་རྟའི་འདུ་ཤེས་དྲན་པ་འབྱུང༌། །དེ་བཞིན་ཕུང་པོའི་ཉེར་ལེན་ལས། །
ཀུན་རྫོབ་ཏུ་ནི་སེམས་ཅན་བརྗོད། །འདི་དག་སྐྱེ་བ་སྡུག་བསྔལ་ཏེ། །གནས་པ་ཉིད་ཀྱི་སྡུག་བསྔལ་ཏེ། །སྡུག་བསྔལ་ཉིད་ནི་འགག་འགྱུར་ཞིང༌། །སྡུག་བསྔལ་ཚོགས་ལས་གཞན་དུ་མིན། །དེ་ནས་བདུད་སྡིག་ཅན་འདི་སྙམ་དུ་དགེ་སློང་མ་བྲག་གི་སེམས་ཀྱིས་བདག་གི་སེམས་ཤེས་སོ་སྙམ་ནས་སྡུག་བསྔལ་ཞིང་ཡིད་མི་བདེ་སྟེ། ཡིད་ལ་གཅགས་བཞིན་དུ་དེ་ཉིད་དུ་མི་སྣང་བར་གྱུར་ཏོ་ཞེས་གསུངས་སོ། །ལུང་ཕྲན་ཚེགས་ལས་བྲམ་ཟེ་རྒྱ་ཤུག་གི་དབང་དུ་མཛད་ནས་ཞེས་བྱ་བ་ལ། དེ་བཞིན་གཤེགས་པས་བ་ད་རའི། །སེམས་ནི་ཐུགས་ཀྱིས་མཁྱེན་མཛད་ནས། །རྫོགས་སངས་སྟེང་དུ་རྫུ་འཕྲུལ་གྱིས། །གཤེགས་ནས་སྐྱིལ་མོ་ཀྲུང་བཅས་བཞུགས། །དེ་ནས་མཚན་གྱིས་ཡོངས་བརྒྱན་ཏེ། །སྐྱོ་བཅས་རྒྱ་ཤུག་གིས་མཐོང་ནས། །སྟན་ལས་རབ་ཏུ་ལངས་ནས་ནི། །ཞབས་ལ་སྤྱི་བོས་ཕྱག་བྱས་ཏེ། །གྲོགས་པོ་འདི་ན་སྟོན་པ་ནི། །གཞོན་ནུ་རྣམས་ཀྱིས་ཐོས་ནས་ནི། །ཕ་རོལ་རབ་ཏུ་རྒལ་གྱུར་ཅིང༌། སྐམ་སར་གནས་པའི་ཆོས་སྟོན་བྱེད། །དེ་ནས་པིང་གོ་སྟན་ལས་ལངས། །བླ་གོས་ཕྲག་པ་གཅིག་བྱས་ཤིང༌། །ཐལ་མོ་སྦྱར་བ་བྱས་ནས་ནི། །ཚིགས་སུ་བཅད་པ་འདི་སྐད་སྨྲས། །འདི་ནི་བྲམ་ཟེ་རྫོགས་སངས་རྒྱས། །འགྲོ་བ་སེམས་ཅན་རབ་ཏུ་འཛིན། །འདི་ཡིས་འདོད་པ་རབ་འདུལ་ཞིང༌། །ཐེ་ཚོམ་གཅོད་པར་མཛད་པ་འདི། །འདི་ཡིས་འདོད་པ་རབ་འདུལ་བས། །མཁན་པོ་ཁྱེད་ནི་དགྱེས་པར་མཛོད། །འདི་ནི་འཇིག་རྟེན་ཉི་མ་སྟེ། །འདི་ནི་འཇིག་རྟེན་སྒྲོལ་མ་ཡིན། །འདི་ཡིས་ཉོན་མོངས་རབ་སྤོང་བའི། །ཐུབ་པས་ཆོས་ནི་བསྟན་པར་མཛད། །འདི་ནི་འཇིག་རྟེན་མཆོག་གྱུར་ཏེ། །འཇིག་རྟེན་སྣང་བ་འདི་ཡིན་ནོ། །སེམས་ཅན་གྲོལ་མཛད་འདི་ཡིན་ཏེ། །སེམས་ཅན་གསོ་བར་མཛད་པ་འདི། །འདི་ཡིས་ལས་རབ་གསལ་མཛད་ནས། །སྡུག་བསྔལ་ཀུན་ལས་གྲོལ་བར་མཛད། །འདི་ཡི་རིགས་ནི་མཆོག་ཡིན་ཏེ། །འདི་ནི་ཉི་མའི་རིགས་སུ་འཁྲུངས། །མཚན་མཆོག་སུམ་ཅུ་རྩ་གཉིས་ཀྱིས། །འདི་ཡི་མཚན་རྣམས་ཕུན་སུམ་ཚོགས། །འདི་དང་མཉམ་པ་གཞན་མེད་ཅིང༌། །བླ་མ་དག་ཀྱང་ཡོད་མ་ཡིན། །འདི་ཡིས་ཡེ་ཤེས་
སྐྱེས་པའི་ཕྱིར། །ཇི་ལྟར་རྒྱ་མཚོ་བཞི་མི་གཡོ། །གཟི་བརྗིད་དྲག་ཅིང་མཐུ་ཆེ་བ། །དགེ་སློང་ཆེན་པོ་འདི་ལྟ་བུ། །འདི་ནི་འཇིག་རྟེན་ཐུགས་བརྩེ་ཅན། །འདི་ནི་འཇིག་རྟེན་སྨན་པ་ཡིན། འདི་ཡིས་རྒོལ་བར་བ་འཇོམས་ཤིང༌། །མུ་སྟེགས་ཅན་རྣམས་ཆོས་ལྡན་བྱེད། །འདི་ནི་འཇིག་རྟེན་བླ་མེད་དེ། །འདི་ནི་རྐང་གཉིས་རྣམས་ཀྱི་མཆོག །འདི་ནི་འཇིག་རྟེན་རྣམ་འདྲེན་ཏེ། །སེམས་ཅན་འཁོར་བའི་རྒྱ་མཚོ་ཡི། །ཆུ་བོ་འཇིགས་ཆེན་ལས་སྒྲོལ་འདི། །སྟོན་པ་ཕ་རོལ་ཕྱིན་ཅིང་རྒལ། །འདི་ནི་ཕ་རོལ་སྐམ་སར་གནས། །ཁྱེད་ནི་ཉེར་སོང་དྲི་བྱས་ན། །དོགས་པ་དེ་ཡིས་སེལ་བར་འགྱུར། །རྐང་གཉིས་མཆོག་གྱུར་མཐོང་ནས་ནི། །རྒྱ་ཤུག་གཟི་བརྗིད་ལྡན་གྱུར་ནས། །ཐལ་མོ་རབ་ཏུ་སྦྱར་བྱས་ནས། །དེ་ལ་འདི་སྐད་ཚིག་གསོལ་ཏོ། །འཁོར་བའི་རྒྱ་མཚོ་ཆེན་པོ་ཡི། །ནང་ན་གནས་པ་བདག་ལ་ནི། །ཐུགས་བརྩེ་བསྐྱེད་པ་མཛད་ནས་ནི། །མི་མཆོག་བདག་ཅག་རྒལ་བར་མཛོད། །དེ་ནས་སྟོན་པ་ཐུགས་བརྩེ་བ། །ཐུབ་པ་འཇིག་རྟེན་ཀུན་ཕན་མཛད། །རྐང་གཉིས་གཙོ་བོ་སེམས་ཅན་མཆོག །རྒྱ་ཤུག་ལ་ནི་བཀའ་སྩལ་པ། །ཇི་ལྟར་སེམས་ནི་ཀུན་ཉོན་མོངས། །དེ་བཞིན་སེམས་ནི་རྣམ་པར་བྱང༌། །མདུད་པ་ཐམས་ཅད་གྲོལ་བྱེད་པའི། །ཆོས་ནི་རྒྱ་ཤུག་ཁྱོད་ཉོན་ཅིག །འདི་ན་བདག་ལ་བདག་མེད་དེ། །ཕྱིན་ཅི་ལོག་གིས་ཀུན་དུ་བརྟགས། །བདག་གམ་སེམས་ཅན་མེད་པ་སྟེ། །ཆོས་འདི་དག་ནི་རྒྱུ་དང་བཅས། །སྲིད་པའི་ཡན་ལག་བཅུ་གཉིས་དང༌། །ཕུང་པོ་དང་ནི་སྐྱེ་མཆེད་ཁམས། །ཐམས་ཅད་རབ་ཏུ་བསམ་བྱས་ན། །གང་ཟག་རབ་ཏུ་མི་དམིགས་སོ། །ནང་སྟོང་ཉིད་དུ་མཐོང་གྱུར་ཅིང༌། །ཕྱི་སྟོང་ཉིད་དུ་མཐོང་གྱུར་ན། །དེ་ཡིས་ཅུང་ཟད་ཀྱང་མི་རྙེད། །སྒོམ་པ་པོ་ཡང་སྟོང་པ་སྟེ། །འཇིག་རྟེན་ཐམས་ཅད་ཉེར་འཚོ་བ། །སྟོང་པ་ཉིད་དུ་བལྟ་བར་གྱིས། །མྱ་ངན་འདས་པ་གནས་པར་སྐྱབས། །འདི་ཡི་ལམ་ནི་ཉེར་བསྟན་བྱ། །རྒྱ་ཤུག་སེམས་ཅན་བསམ་བྱས་ཏེ། །སྟན་དེ་ཉིད་ལ་གནས་བཞིན་དུ། །འདོད་ཁམས་ཡོངས་སུ་དག་གྱུར་པའི། །ཕྱིར་མི་འོང་བའི་འབྲས་བུ་ཐོབ། །བདེན་པ་མཐོང་བར་གྱུར་པ་ནི། །རྒྱ་ཤུག་ཡིད་རབ་དགའ་བ་ཡིས།།
ཐལ་མོ་རབ་ཏུ་སྦྱར་བྱས་ནས། །འདི་སྐད་ཅེས་བྱའི་ཚིག་གསོལ་ཏོ། །གང་ཚེ་མ་ལས་བདག་སྐྱེས་ནས། །བདག་གིས་ལོ་བརྒྱ་ཉི་ཤུ་ལོན། །བྲམ་ཟེ་བློན་པོ་རྣམས་ལས་བདག །ཀུན་གྱིས་ཕ་རོལ་ཕྱིན་པར་གྱུར། །ལོ་འདི་རྣམས་སུ་ཁྱད་པར་འཕགས། །བདག་གིས་ཅུང་ཟད་ཀྱང་མ་རྟོགས། །ཆོས་ཅན་ལེགས་པར་བཤད་པ་ཡིས། །བདག་གིས་གྲོལ་བའི་གོ་འཕང་ཐོབ། །བདག་གིས་མཐོང་བ་དྲི་མེད་ཅིང༌། །བདག་གིས་བློ་མིག་ཡོངས་དག་གྱུར། །གྲོལ་བ་སྤྱི་བོས་བཀུར་བྱ་ཞེས། །བདེན་པར་སྨྲ་བའི་ལྷ་རྣམས་གསུངས། །ཞེས་གསུངས་སོ། །ཇི་སྐད་དུ་བདག་ཏུ་ལྟ་བ་ལ་ཉེས་དམིགས་ལྔ་ཡོད་དེ་ཞེས་བྱ་བ་ལ། མདོ་ལྔ་བར་ཡོངས་སུ་རྫོགས་པར་བྲིས་ཟིན་པས་ཡང་མི་འབྲིའོ། །ཅི་དེ་དག་ལ་ཆོས་ཐམས་ཅད་ལ་བདག་མེད་དོ་ཞེས་བྱ་བའི་མདོ་འདི་ཡང་མེད་དམ་ཞེས་བྱ་བ་ལ། དགེ་སློང་དག་འདུ་བྱེད་ཐམས་ཅད་ནི་མི་རྟག་པ། ཆོས་ཐམས་ཅད་ནི་བདག་མེད་པ། མྱ་ངན་ལས་འདས་པ་ནི་ཞི་བའོ་ཞེས་བྱ་བའི་དབང་དུ་མཛད་ནས། སློབ་དཔོན་སྣ་ཚོགས་བློ་གྲོས་ཀྱིས་བཅོམ་ལྡན་འདས་ཀྱི་བསྟོད་པ་བཞི་བརྒྱ་པ་ལས། ཆོས་རྣམས་ཐམས་ཅད་བདག་མེད་ཅིང༌། །འདུས་བྱས་ཐམས་ཅད་སྐད་ཅིག་མ། །མྱ་ངན་འདས་པ་ཞི་བ་ཞེས། །ཁྱོད་ཀྱི་ཆོས་ཀྱི་ཕྱག་རྒྱ་གསུམ། །རྒོལ་བ་ཀུན་གྱིས་མི་རྟོགས་ཤིང༌། །གཞིག་པར་མི་ནུས་རྣམ་པར་གནས། །འཇིག་རྟེན་མང་དུ་སྨྲ་བྱེད་ཀྱང༌། །གང་གིས་རང་བཞིན་བཟློག་པར་ནུས། །ཞེས་གསུངས་ལ། ཆོས་ཀུན་དེ་བཞིན་བདག་མེད་ཅེས། །གང་ཚེ་ཤེས་རབ་ཀྱིས་མཐོང་བ། །དེ་ནས་ཡིད་འབྱུང་འགྱུར་བ་སྟེ། །འདི་ནི་སྡུག་བསྔལ་དག་པའི་ལམ། །ཞེས་འབྱུང་བ་དང༌། བདག་ནི་མེད་པ་སྟེ་གཞན་ནི་ཕྱི་ཅི་ལོག་གོ་ཞེས་བྱ་བའི་མདོ་འདི་ཡང་ཇི་ལྟར་རྟོག་པར་བྱེད་དེ། དེ་ཡང་བཞི་ལས་འཕྲོས་པའི་སྡོམ་གྱི་ཚིགས་སུ་བཅད་པ་བཞི་པ་ལས་འབྱུང་བ་གཉིས་པ་དང་མཛོད་ཀྱི་གནས་ལྔ་པ་འདི་ཉིད་དུ་ཕྱིན་ཅི་ལོག་གི་མདོར་བྲིས་ཟིན་ཏོ། །དགེ་སློང་དག་དགེ་སྦྱོང་ངམ་བྲམ་ཟེ་གང་སུ་ཞིག་བདག་གོ་ཞེས་ཡང་དག་པར་རྗེས་སུ་བལྟ་བ་ཞེས་བྱ་བ་ལ། ཕུང་པོ་ལས། བདག་མེད་ཆ་མེད་ས་བོན་དང༌། །ཉེ་བར་འགྲོ་དང་བདུན་དང་ལྔ། །ཡོངས་སུ་སྐྱོབས་
གཉིས་བྱེད་ཅིང༌། །ཟས་ཀྱི་དཔེ་ཡིས་གཉིས་ཡིན་ནོ། །ཞེས་བྱ་བ་ནས་གོ་རིམས་ལས་བཟློག་སྟེ་བགྲང་བའི་སྡོམ་གྱི་ཚིགས་སུ་བཅད་པ་གསུམ་པའི་མདོ་དགུ་པ་ལས་འབྱུང་བ་མཛོད་ཀྱི་གནས་ལྔ་པ་འདི་ཉིད་དུ། བདག་དང་བདག་གི་ཆད་རྟག་དང༌། །མེད་དང་དམན་ལ་མཆོག་ལྟ་དང༌། །ཞེས་འཇིག་ཚོགས་ལ་ལྟ་བའི་སྒྲིབ་པར་བྲིས་ཟིན་ཏོ། །གང་ཅུང་ཟད་སྔོན་གྱི་གནས་རྣམ་པ་དུ་མ་ཡང་དག་པར་རྗེས་སུ་དྲན་པ་ཞེས་བྱ་བ་ལ། འདི་ཉིད་ཀྱི་སྡོམ་གྱི་ཚིགས་སུ་བཅད་པ་བཅུ་པ་ལས་འབྱུང་བ་མཛོད་ཀྱི་གནས་དང་པོར་རྣམ་པར་རིག་བྱེད་མ་ཡིན་པ་ལ་ཐུག་པའི་གཟུགས་འདི་དག་ཅི་གཟུགས་ཞེས་བརྗོད་ཅེ་ན། གཟུགས་སུ་རུང་ཞིང་གཟུགས་སུ་རུང་བས་སོ་ཞེས་བྱ་བར་བྲིས་ཟིན་ཏོ། །འདས་པ་ལ་སོགས་པ་དང་མ་གསུངས་བའི་ཕྱིར་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བོས་ཏེ། དགེ་སློང་དག་དུས་གཅིག་གི་ཚེ་ང་མངོན་པར་རྫོགས་པར་སངས་རྒྱས་ནས་རིང་པོར་མ་ལོན་པ་ན་ཆུ་པོ་ནཻ་རཉྫནའི་འགྲམ་བྱང་ཆུབ་ཀྱི་ཤིང་དྲུང་ན་གཅིག་པུ་དབེན་པ་ནང་དུ་ཡང་དག་འཇོག་ལ་བཞུགས་པ་ན། འདི་ལྟ་བུའི་སེམས་ལ་སེམས་ཀྱི་ཡོངས་སུ་རྟོགས་པ་སྐྱེས་ཏེ། གུས་པ་མེད་པ་ནི་སྡུག་བསྔལ་བ་སྟེ། བདག་པོ་མེད་ཅིང་འཇིགས་བར་དབང་སྒྱུར་བ་མེད་པ་ནི་དོན་ཆེན་པོ་ལས་ཡོངས་སུ་ཉམས་པར་འགྱུར་རོ། །གུས་པ་དང་བཅས་པ་ནི་བདེ་བ་སྟེ། བདག་པོ་དང་བཅས་ཤིང་འཇིགས་པ་དབང་སྒྱུར་བ་དང་བཅས་པ་ནི་དོན་ཆེན་པོ་ཡོངས་སུ་རྫོགས་པར་འགྱུར་ཏེ། གང་དག་ལས་ཚུལ་ཁྲིམས་ཕུན་སུམ་ཚོགས་པ་ཁྱད་པར་དུ་འཕགས་པའམ་ཏིང་ངེ་འཛིན་ཕུན་སུམ་ཚོགས་པ་ཁྱད་པར་དུ་འཕགས་པ་འམ། ཤེས་རབ་ཕུན་སུམ་ཚོགས་པ་ཁྱད་པར་དུ་འཕགས་པ་འམ། རྣམ་པར་གྲོལ་བ་ཕུན་སུམ་ཚོགས་པ་ཁྱད་པར་དུ་འཕགས་པའམ། རྣམ་པར་གྲོལ་བའི་ཡེ་ཤེས་མཐོང་བ་ཕུན་སུམ་ཚོགས་པ་ཁྱད་པར་དུ་འཕགས་པ་ལྷ་དང་བཅས་པ་དང་བདུད་དང་བཅས་པ་དང་ཚངས་པ་དང་བཅས་པ་དང་དགེ་སྦྱོང་དང་བྲམ་ཟེའི་སྐྱེ་དགུའི་ལྷ་དང་མིའི་འཇིག་རྟེན་ན་འགའ་ཞིག་ཡོད་ན་བཀུར་སྟིར་བྱ་བ་དང༌། བླ་མར་བྱ་བ་དང༌། རྗེད་པར་བྱ་བ་དང༌། མཆོད་པར་
བྱ་བ་དག་གིས་བཀུར་སྟིར་བྱས། བླ་མར་བྱས། རྗེད་པར་བྱས། མཆོད་པར་བྱས་ཏེ་ཡོངས་སུ་བསྟེན་ཅིང་གནས་པར་བྱའོ་ཞེས་དགོངས་སོ། །ཡང་འདི་སྙམ་དུ། གང་ཡང་བཀུར་སྟིར་བྱ་བ་དང༌། བླ་མར་བྱ་བ་དང༌། རྗེད་པར་བྱ་བ་དང༌། མཆོད་པར་བྱ་བདག་བདག་གིས་བཀུར་སྟིར་བྱས། བླ་མར་བྱས། རྗེད་པར་བྱས། མཆོད་པར་བྱས་ཏེ་ཡོངས་སུ་བསྟེན་ཅིང་གནས་པར་བྱ་བ་གང་བདག་ལས་ཚུལ་ཁྲིམས་ཕུན་སུམ་ཚོགས་པ་ཁྱད་པར་དུ་འཕགས་པའམ། ཏིང་ངེ་འཛིན་ཕུན་སུམ་ཚོགས་པ་ཁྱད་པར་དུ་འཕགས་པའམ། ཤེས་རབ་ཕུན་སུམ་ཚོགས་པ་ཁྱད་པར་དུ་འཕགས་པའམ། རྣམ་པར་གྲོལ་བ་ཕུན་སུམ་ཚོགས་པ་ཁྱད་པར་དུ་འཕགས་པའམ། རྣམ་པར་གྲོལ་བའི་ཡེ་ཤེས་མཐོང་བ་ཕུན་སུམ་ཚོགས་པ་ཁྱད་པར་དུ་འཕགས་པ་ལྷ་དང་བཅས་པ་དང༌། བདུད་དང་བཅས་པ་དང༌། ཚངས་པ་དང་བཅས་པ་དང༌། དགེ་སྦྱོང་དང་བྲམ་ཟེའི་སྐྱེ་དགུའི་ལྷ་དང་མིའི་འཇིག་རྟེན་ན་འགའ་ཡང་མེད་དེ། གཞན་དུ་ན་ངས་རང་ཉིད་ཀྱིས་ཆོས་མངོན་པར་མཁྱེན་ནས་མངོན་པར་རྫོགས་པར་སངས་རྒྱས་ཏེ་གང་ཡང་བདག་གིས་ཆོས་ལ་བཀུར་སྟིར་བྱ་བ་དང༌། བླ་མར་བྱ་བ་དང༌། རྗེད་པར་བྱ་བ་དང༌། མཆོད་པར་བྱ་བ་དག། བདག་གིས་བཀུར་སྟིར་བྱས། བླ་མར་བྱས། རྗེད་པར་བྱས། མཆོད་པར་བྱས་ནས་བསྟེན་ཅིང་ལན་མང་དུ་གནས་པར་བྱའོ་ཞེས་དགོངས་སོ། །དེ་ནས་ཚངས་པ་སྟོང་གི་བདག་པོའི་སེམས་ཀྱིས་ངའི་ཐུགས་རྣམ་པར་ཤེས་ནས་སྐྱེས་བུ་སྟོབས་དང་ལྡན་པའི་ལག་པ་བརྐྱང་བ་ལས་བསྐུམ་པའམ་བསྐུམས་པ་ལས་བརྐྱང་བ་ཙམ་གྱིས་ཚངས་པའི་འཇིག་རྟེན་ན་མི་སྣང་བར་གྱུར་ཏེ་ངའི་མདུན་དུ་འདུག་ནས་འདི་སྐད་ཅེས་སྨྲས་སོ། །བཅོམ་ལྡན་འདས་དེ་དེ་བཞིན། །བདེ་བར་གཤེགས་པ་དེ་དེ་བཞིན་ཏེ། གུས་པ་མེད་པ་ནི་སྡུག་བསྔལ་བ་སྟེ། བདག་པོ་མེད་ཅིང་འཇིགས་པར་དབང་སྒྱུར་བ་མེད་པ་ནི་དོན་ཆེན་པོ་ལས་ཡོངས་སུ་ཉམས་པར་འགྱུར་རོ། །གུས་པ་དང་བཅས་པ་ནི་བདེ་བ་སྟེ་བདག་པོ་དང་བཅས་ཤིང་འཇིགས་པར་དབང་སྒྱུར་བ་དང་བཅས་པའི་དོན་ཆེན་པོ་ཡོངས་སུ་རྫོགས་པར་འགྱུར་ཏེ། གང་ཡང་བཅོམ་ལྡན་འདས་ཀྱིས་བཀུར་སྟིར་བྱ་བ་དང༌། བླ་
མར་བྱ་བ་དང༌། རྗེད་པར་བྱ་བ་དང༌། མཆོད་པར་བྱ་བ་དག་བཅོམ་ལྡན་འདས་ཀྱིས་བཀུར་སྟིར་བྱས། བླ་མར་བྱས། རྗེད་པར་བྱས། མཆོད་པར་བྱས་ཏེ་ཡོངས་སུ་བསྟེན་ཅིང་ལན་མང་དུ་གནས་པར་བྱ་བ་བཅོམ་ལྡན་འདས་ལས་ཚུལ་ཁྲིམས་ཕུན་སུམ་ཚོགས་པ་ཁྱད་པར་དུ་འཕགས་པའམ། ཏིང་ངེ་འཛིན་ཕུན་སུམ་ཚོགས་པ་ཁྱད་པུར་དུ་འཕགས་པའམ། ཤེས་རབ་ཕུན་སུམ་ཚོགས་པ་ཁྱད་པར་དུ་འཕགས་པའམ། རྣམ་པར་གྲོལ་བ་ཕུན་སུམ་ཚོགས་པ་ཁྱད་པར་དུ་འཕགས་པའམ། རྣམ་པར་གྲོལ་བའི་ཡེ་ཤེས་མཐོང་བ་ཕུན་སུམ་ཚོགས་པ་ཁྱད་པར་དུ་འཕགས་པ་ལྷ་དང་བཅས་པ་དང་བདུད་དང་བཅས་པ་དང་ཚངས་པ་དང་བཅས་པ་དང་དགེ་སྦྱོང་དང་བྲམ་ཟེའི་སྐྱེ་དགུའི་ལྷ་དང་མིའི་འཇིག་རྟེན་ན་འགའ་ཡང་མེད་དོ། །གཞན་དུ་ན་བཅོམ་ལྡན་འདས་རང་ཉིད་ཀྱིས་ཆོས་མངོན་པར་མཁྱེན་ནས་མངོན་པར་རྫོགས་པར་སངས་རྒྱས་ཏེ། གང་ཡང་བཅོམ་ལྡན་འདས་ཀྱིས་ཆོས་ལ་བཀུར་སྟིར་བྱ་བ་དང༌། བླ་མར་བྱ་བ་དང༌། རྗེད་པར་བྱ་བ་དང༌། མཆོད་པར་བྱ་བ་དག་གིས་བཅོམ་ལྡན་འདས་ཀྱིས་ཆོས་ལ་བཀུར་སྟིར་མཛད་ཅིང་བླ་མར་བྱ་བ་དང༌། རྗེད་པར་བྱ་བ་དང༌། མཆོད་པར་མཛད་ནས་བརྟེན་ཅིང་ལན་མང་དུ་གནས་པར་མཛོད་ཅིག །བཙུན་པ་དེ་ཅིའི་ཕྱིར་ཞེ་ན། གང་ཡང་འདས་པའི་དུས་ན་བྱུང་བར་གྱུར་པའི་སངས་རྒྱས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ཀྱང་ཆོས་ཉིད་ལ་བཀུར་སྟིར་བྱ་བ་དང༌། བླ་མར་བྱ་བ་དང། རྗེད་པར་བྱ་བ་དང༌། མཆོད་པར་བྱ་བ་དག་གིས་ཆོས་ཉིད་ལ་བཀུར་སྟིར་བྱས། བླ་མར་བྱས། རྗེད་པར་བྱས། མཆོད་པར་བྱས་ནས་ཉེ་བར་བསྟེན་ཅིང་བཞུགས་སོ། །གང་ཡང་མ་འོངས་པའི་དུས་ན་འབྱུང་བར་འགྱུར་བའི་སངས་རྒྱས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ཀྱང་ཆོས་ཉིད་ལ་བཀུར་སྟིར་བྱ་བ་དང༌། བླ་མར་བྱ་བ་དང༌། རྗེད་པར་བྱ་བ་དང༌། མཆོད་པར་བྱ་བ་དག་གིས་བཀུར་སྟིར་མཛད་པ་དང༌། བླ་མར་མཛད་པ་དང༌། རྗེད་པར་མཛད་པ་དང༌། མཆོད་པར་མཛད་ཅིང་བསྟེན་ཅིང་གནས་པར་
འགྱུར་རོ། །ད་ལྟར་བྱུང་བའི་དུས་ཀྱི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་ཆོས་ཉིད་ལ་བཀུར་སྟིར་བྱ་བ་དང༌། བླ་མར་བྱ་བ་དང༌། རྗེད་པར་བྱ་བ་དང༌། མཆོད་པར་བྱ་བ་དག་གིས་བཀུར་སྟིར་མཛད་ཅིང་བླ་མར་མཛད་པ་དང༌། རྗེད་པར་མཛད་པ་དང༌། མཆོད་པར་མཛད་ནས་བསྟེན་ཅིང་ལན་མང་དུ་བཞུགས་པར་མཛོད་ཅིག །དེ་ནས་ཚངས་པ་སྟོང་གི་བདག་པོས་དེའི་ཚེ་ཚིགས་སུ་བཅད་པ་འདི་སྐད་ཅེས་སྨྲས་སོ། །གང་ཡང་འདས་པའི་རྫོགས་སངས་རྒྱས། །གང་ཡང་མ་བྱོན་སངས་རྒྱས་དང༌། །མྱ་ངན་མང་པོ་འཇིག་བྱེད་པའི། །གང་ཡང་ད་ལྟར་རྫོགས་སངས་རྒྱས། །དེ་དག་ཐམས་ཅད་དམ་ཆོས་ལ། །བཀུར་སྟིར་མཛད་ཅིང་ཉེ་བར་བཞུགས། །གཞན་ཡང་གནས་པར་འགྱུར་བ་སྟེ། །འདི་ནི་རྫོགས་སངས་ཆོས་ཉིད་ཡིན། །དེ་ཕྱིར་འདོད་ཁམས་འདི་ན་ནི། །ཆེ་བའི་བདག་ཉིད་འདོད་པ་རྣམས།། སངས་རྒྱས་བསྟན་པ་རྗེས་དྲན་ནས། །དམ་པའི་ཆོས་ལ་བཀུར་སྟི་བྱ། །དེ་ནས་ཚངས་པ་སྟོང་གི་བདག་པོ་མངོན་པར་དགའ་ཞིང་རྗེས་སུ་ཡི་རངས་ནས་དེ་ངའི་ཞབས་ལ་སྤྱི་བོས་ཕྱག་བྱས་ནས་མི་སྣང་བར་གྱུར་ཏོ་ཞེས་གསུངས་སོ། །དགེ་སློང་དག་ཁུར་དང་ཁུར་ལེན་པ་དག་ཅེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་ཁུར་དང༌། ཁུར་ལེན་པ་དང༌། ཁུར་སྤོང་བ་དང༌། ཁུར་ཁྱེར་བ་དག་བསྟན་པར་བྱ་སྟེ། དེ་ལེགས་པར་ཉོན་ལ་ཡིད་ལ་ཟུང་ཤིག་དང་བཤད་པར་བྱའོ། །ཁུར་གང་ཞེ་ན། ཉེ་བར་ལེན་པའི་ཕུང་པོ་ལྔ་རྣམས་སོ། །ལྔ་གང་ཞེ་ན། གཟུགས་ཉེ་བར་ལེན་པའི་ཕུང་པོ་དང༌། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་ཉེ་བར་ལེན་པའི་ཕུང་པོའོ། །ཁུར་ལེན་པ་གང་ཞེ་ན། དགའ་བའི་འདོད་ཆགས་དང་ལྷན་ཅིག་པར་གྱུར་པའི་སྲེད་པ་ཡང་སྲིད་པར་ཀུན་འབྱུང་བ་དེ་དང་དེ་ལས་མངོན་པར་དགའ་བའོ། །ཁུར་སྤོང་བ་གང་ཞེ་ན། གང་གི་ཚེ་དགའ་བའི་འདོད་ཆགས་དང་ལྷན་ཅིག་པར་གྱུར་པའི་སྲེད་པ་ཡང་སྲིད་པར་ཀུན་འབྱུང་བ་དེ་དང་དེ་ལས་མངོན་པར་དགའ་བ་འདི་ཉིད་མ་ལུས་པར་སྤངས་ཤིང་སོ་སོར་འགགས་པ་དང༌། ནུབ་པ་དང༌། ཟད་པ་དང༌། འདོད་ཆགས་དང་བྲལ་བ་དང༌། འགགས་པ་དང༌།
ཉེ་བར་ཞི་བ་དང༌། མི་སྣང་བའོ། །ཁུར་ཁྱེར་བ་གང་ཞེ་ན། གང་ཟག་ཅེས་བརྗོད་པར་བྱ་སྟེ། ཚེ་དང་ལྡན་པ་མིང་ནི་འདི་ལྟ་བུ། རུས་ནི་འདི་ལྟ་བུ། རིགས་ནི་འདི་ལྟ་བུ། ཁ་ཟས་ནི་འདི་ལྟ་བུ། བདེ་བ་དང་སྡུག་བསྔལ་ནི་འདི་ལྟ་བུ་དག་མྱོང་ཞིང་ཚེ་རིང་པོ་འམ་ཐུང་ངུ་འདི་ཙམ་ཞིག་ཏུ་གནས་ཏེ། ཚེའི་མཐའ་འདི་ཙམ་དུ་གྱུར་ཞེས་བྱ་བའོ། །དགེ་སློང་དག་ཁུར་དང་ཁུར་ལེན་པ་དང་ཁུར་སྤོང་བ་དང་ཁུར་ཁྱེར་བ་དག་བསྟན་པར་བྱའོ་ཞེས་ངས་ཇི་སྐད་དུ་བསྟན་པ་དེ་རྒྱས་པར་རབ་ཏུ་བཤད་དོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཅིང༌། བདེ་བར་གཤེགས་པས་དེ་སྐད་གསུངས་ནས། སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །ཤིན་ཏུ་ལྕི་བའི་ཁུར་སྤངས་ནས། །སླར་ཡང་ཁུར་དག་ལེན་མི་འགྱུར། །ཁུར་ལེན་བ་ནི་སྡུག་བསྔལ་ཏེ། །ཁུར་སྤངས་པ་ནི་བདེ་བ་ཡིན། །སྲེད་པ་ཐམས་ཅད་རབ་སྤངས་ཤིང༌། །ཀུན་སྦྱོར་ཐམས་ཅད་ཟད་པ་ཡི། །བླང་བྱ་ཡོངས་སུ་ཤེས་པ་ནི། །ཡང་སྲིད་དག་ཏུ་འགྲོ་མི་འགྱུར། །ཞེས་གསུངས་སོ། །སེམས་ཅན་རྫུས་ཏེ་བྱུང་བ་རྣམས་མེད་དོ་ཞེས་བྱ་བ་ལ། རེ་ཞིག་ལུང་བར་མའི་སྡོམ་གྱི་ཚིགས་སུ་བཅད་པ་དེ་དད་དེ་ལས་བཞི་བཅུ་པའི་ཆོས་ཀྱི་རྣམ་གྲངས་ཆེན་པོ་མཛོད་ཀྱི་གནས་དྲུག་པ་འདི་ཉིད་དུ་སློབ་པའི་ལམ་ནི་ཡན་ལག་རྣམ་པ་བརྒྱད་དང་ལྡན་ཞེས་བྱ་བར་བྲིས་ཏེ། དེ་ལས་འདི་ལྟར་འདོན་ཏོ། །ལོག་པའི་ལྟ་བ་གང་ཞེ་ན། ལྟ་བ་གང་ཞིག་མེད་པར་ལྟ་བ་སྟེ། སྦྱིན་པ་མེད་དོ། །ལེན་པ་མེད་དོ། །མཆོད་སྦྱིན་མེད་དོ། །ལེགས་པར་སྤྱད་པ་མེད་དོ། །ཉེས་པར་སྤྱད་པ་མེད་དོ། །ལེགས་པར་སྤྱད་པ་དང་ཉེས་པར་སྤྱད་པའི་ལས་ཀྱི་འབྲས་བུ་རྣམ་པར་སྨིན་པ་མེད་དོ། །འཇིག་རྟེན་འདི་མེད་དོ། །འཇིག་རྟེན་ཕ་རོལ་མེད་དོ། །ཕ་མེད་དོ། །མ་མེད་དོ། །སེམས་ཅན་རྫུས་ཏེ་འབྱུང་བ་རྣམས་མེད་དོ། །འཇིག་རྟེན་ན་དགྲ་བཅོམ་པ་ཡང་དག་པར་རྟོགས་ཤིང་ཡང་དག་པར་ཞུགས་པ་སྐྱེ་བ་ཟད་པ་ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་འཇིག་རྟེན་འདི་དང་འཇིག་རྟེན་ཕ་རོལ་དུ་མཐོང་བའི་ཆོས་ཉིད་ལ་རང་ཉིད་ཀྱིས་མངོན་པར་ཤེས་པ་ཕུན་སུམ་ཚོགས་པ་རབ་ཏུ་རྟོགས་པ་རྣམས་མེད་དོ་ཞེས་བྱ་བ་སྟེ། འདི་
ནི་ལོག་པར་ལྟ་བ་ཞེས་བྱའོ་ཞེས་གསུངས་སོ། །འཇིག་རྟེན་དུ་གང་ཟག་གཅིག་སྐྱེ་བ་ན་སྐྱེའོ་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་སྐྱེ་བོ་མང་པོ་ལ་ཕན་པ་དང༌། སྐྱེ་བོ་མང་པོ་ལ་བདེ་བ་དང༌། འཇིག་རྟེན་ལ་ཐུགས་བརྩེ་བའི་ཕྱིར་དང༌། ལྷ་དང་མི་རྣམས་ལ་ཕན་པ་དང་བདེ་བའི་ཕྱིར་འཇིག་རྟེན་དུ་གང་ཟག་གཅིག་སྐྱེ་བ་ན་སྐྱེ་སྟེ། དགེ་སློང་དག་སྐྱེ་བོ་མང་པོ་ལ་ཕན་བ་དང༌། སྐྱེ་བོ་མང་པོ་ལ་བདེ་བ་དང༌། འཇིག་རྟེན་ལ་ཐུགས་བརྩེ་བའི་ཕྱིར་དང༌། ལྷ་དང་མི་རྣམས་ལ་ཕན་པ་དང་བདེ་བའི་ཕྱིར་འཇིག་རྟེན་དུ་གང་ཟག་གཅིག་སྐྱེ་བ་ན་སྐྱེ་བ་གང་ཞེ་ན། འདི་ལྟ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཏེ། དགེ་སློང་དག་བཱ་རཱ་ཎ་སཱི་བྲང་སྲོང་སྨྲ་བ་རི་དགས་ཀྱི་ནགས་སུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ལན་གསུམ་དུ་བཟླས་ཤིང་རྣམ་པ་བཅུ་གཉིས་སུ་ཆོས་དང་མཐུན་པར་ཆོས་ཀྱི་འཁོར་ལོ་བསྐོར་ཞིང་དགེ་སློང་ཤཱ་རིའི་བུས་དེའི་རྗེས་སུ་བསྐོར་ཏེ། དགེ་སློང་དག་ངས་ལྷ་དང་བཅས་པ་དང༌། བདུད་དང་བཅས་པ་དང༌། ཚངས་པ་དང་བཅས་པ་དང༌། དགེ་སྦྱོང་དང་བྲམ་ཟེར་བཅས་པའི་ལྷ་དང་མིའི་འཇིག་རྟེན་ན་ཆོས་དང་མཐུན་པའི་ཆོས་ཀྱི་འཁོར་ལོ་བསྐོར་བའི་རྗེས་སུ་བསྐོར་བ་གཞན་སུ་ཡང་ཡང་དག་པར་རྗེས་སུ་མ་མཐོང་སྟེ། གཞན་དུ་ན་དགེ་སློང་ཤཱ་རིའི་བུ་ནི་མ་གཏོགས་སོ། །དགེ་སློང་དག་ངས་ཆོས་ཀྱི་འཁོར་ལོ་བསྐོར་བས་དགེ་སློང་ཤཱ་རིའི་བུ་ཉེ་བར་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་བར་གྱུར་ཏོ་ཞེས་གསུངས་སོ། །དོན་དམ་པ་སྟོང་པ་ཉིད་ལས་ཞེས་བྱ་བ་ལས། སྐྱེ་མཆེད་དྲུག་གི་ཚོགས་ཀྱིས་བསྡུས་པའི་སྡོམ་གཉིས་པ་ལས། འདས་པ་ཡིས་ནི་ཞེས་བྱ་བའི་སྡོམ་གྱི་ཚིགས་སུ་བཅད་པའི་མཐའ་ལས་འབྱུང་བ་མཛོད་ཀྱི་གནས་ལྔ་པ་འདི་ཉིད་དུ་འདས་པ་དང་མ་འོངས་པ་བསམ་པར་བཤད་པ་བསྟན་ཅིང༌། གསུམ་པ་ལས་ཀྱང༌། བདག་མེད་ཕུང་པོ་ཙམ་ཉིད་དོ། །ཞེས་བྱ་བར་བྲིས་ཟིན་ཏོ། །ཇི་སྐད་དུ་དབོ་ལས་སྐྱེས་ཀྱི་མདོ་ལས་ཞེས་བྱ་བ་ལ། གླེང་གཞི་ནི་མཉན་དུ་ཡོད་པ་ནའོ། །དགེ་སློང་དག་ཟས་བཞི་པོ་འདི་དག་ནི་སེམས་ཅན་བྱུང་བ་རྣམས་གནས་པར་བྱེད་པ་དང་སྲིད་པ་ཚོལ་བ་རྣམས་ལ་ཕན་འདོགས་པ་སྟེ། བཞི་གང་ཞེ་ན། རགས་པ་དང་ཕྲ་བའི་ཁམ་གྱི་ཟས་དང༌།
གཉིས་པ་རེག་པའི་ཟས་དང༌། གསུམ་པ་ཡིད་ལ་སེམས་པའི་ཟས་དང༌། བཞི་པ་རྣམ་པར་ཤེས་པའི་ཟས་སོ། །དེའི་ཚེ་ཚེ་དང་ལྡན་པ་དབོ་ལས་སྐྱེས་བཅོམ་ལྡན་འདས་ཀྱི་རྒྱབ་ནས་བཅོམ་ལྡན་འདས་ལ་བསིལ་ཡབ་གཡོབ་ཅིང་འདུག་སྟེ། དེ་ནས་ཚེ་དང་ལྡན་པ་དབོ་ལས་སྐྱེས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ཅི་རྣམ་པར་ཤེས་པ་ཟས་སུ་ཟའམ། དབོ་ལས་སྐྱེས་རྣམ་པར་ཤེས་པ་ཟས་སུ་ཟའོ་ཞེས་ང་སྨྲ་ན། དྲི་བདེ་ལེགས་པར་འགྱུར་བ་ཞིག་ན། དབོ་ལས་སྐྱེས་རྣམ་པར་ཤེས་པ་ཟས་སུ་ཟའོ་ཞེས་ང་མི་སྨྲའོ། །བཙུན་པ་ཅི་རྣམ་པར་ཤེས་པ་ཟས་སུ་ཟའོ་ཞེས་མི་གསུང་ངམ། དབོ་ལས་སྐྱེས་དེ་བཞིན་ཏེ། ང་དེ་སྐད་དུ་མི་སྨྲའོ། །གལ་ཏེ་ངའི་དྲུང་དུ་འགའ་ཞིག་ཉེ་བར་འོངས་ཏེ། གང་གི་རྐྱེན་གྱིས་རྣམ་པར་ཤེས་པ་བྱུང་ཞེས་འདི་ལྟར་འདྲི་བ་དེ་ལ་ངས་འདི་སྐད་དུ་ལུང་བསྟན་པར་བྱ་སྟེ། རྣམ་པར་ཤེས་པ་ནི་མ་འོངས་པའི་ཡང་སྲིད་པ་མངོན་པར་འགྲུབ་ཅིང་རབ་ཏུ་འབྱུང་བའི་བར་དུ་སྟེ། བྱུང་བར་གྱུར་ཅིང་ཡོད་པ་ནི་སྐྱེ་མཆེད་དྲུག་གོ །སྐྱེ་མཆེད་དྲུག་གི་རྐྱེན་གྱིས་ནི་རེག་པའོ། །བཙུན་པ་རེག་གོ་རེག་གོ་ཞེས་བྱ་བ་ཅི་ཞིག །དབོ་ལས་སྐྱེས་རེག་གོ་རེག་གོ་ཞེས་ངས་འདི་སྐད་དུ་སྨྲ་ན་དྲི་བ་དེ་ལེགས་པར་འགྱུར་བ་ཞིག་ན་ང་དེ་སྐད་དུ་མི་སྨྲའོ། །བཙུན་པ་རེག་པ་ཞེས་མི་གསུང་ངམ། དབོ་ལས་སྐྱེས་བདེ་སྐད་དུ་མི་སྨྲའོ། །གལ་ཏེ་ངའི་དྲུང་དུ་འགའ་ཞིག་ཉེ་བར་འོངས་ཏེ། གང་གི་རྐྱེན་གྱིས་རེག་པ་བྱུང་ཞེས་འདི་སྐད་དུ་འདྲིན་དྲི་བདེ་ལངས་འདི་སྐད་དུ་ལུང་བསྟན་པར་བྱ་སྟེ། སྐྱེ་མཆེད་དྲུག་གི་རྐྱེན་གྱིས་ནི་རེག་པ་མིན་ལ་རེག་པའི་རྐྱེན་གྱིས་ཚོར་བའོ། །བཙུན་པ་ཚོར་བ་པོ་ཚོར་བ་པོ་ཞེས་བྱ་བ་ཅི་ཞིག །དབོ་ལས་སྐྱེས་ཚོར་བ་པོ་ཚོར་བ་པོ་ཞེས་སྨྲ་ན་དེ་སྐད་དུ་དྲི་བ་ལེགས་པར་འགྱུར་བ་ཞིག་ན་ང་དེ་སྐད་དུ་མི་སྨྲའོ། །བཙུན་པ་ཅི་ཚོར་བ་པོ་ཞེས་མི་གསུང་ངམ། དབོ་ལས་སྐྱེས་དེ་བཞིན་ཏེ། ང་དེ་སྐད་དུ་མི་སྨྲའོ། །གལ་ཏེ་ངའི་དྲུང་དུ་འགའ་ཞིག་ཉེ་བར་འོངས་ཏེ། གང་གི་རྐྱེན་གྱིས་ཚོར་བ་བྱུང་ཞེས་འདི་ལྟར་འདྲི་ན་དེ་ལངས་འདི་སྐད་དུ་ལུད་བསྟན་པར་བྱ་སྟེ། རེག་པའི་རྐྱེན་གྱིས་ཚོར་བ་བྱུང་ཞིང་ཚོར་བའི་རྐྱེན་གྱིས་སྲེད་པའོ། །བཙུན་པ་སྲེད་པ་པོ་སྲེད་པ་པོ་ཞེས་བྱ་བ་ཅི་ཞིག །དབོ་ལས་
སྐྱེས་སྲེད་པ་པོ་སྲེད་པ་པོ་ཞེས་སྨྲ་ན་དྲི་བ་དེ་ལེགས་པར་འགྱུར་བ་ཞིག་ན་ང་དེ་སྐད་དུ་མི་སྨྲའོ། །བཙུན་པ་སྲེད་པ་པོ་ཞེས་མི་གསུང་ངམ། དབོ་ལས་སྐྱེས་དེ་བཞིན་ཏེ། ང་དེ་སྐད་དུ་མི་སྨྲའོ། །གལ་ཏེ་ངའི་དྲུང་དུ་འགའ་ཞིག་ཉེ་བར་འོངས་ཏེ་གང་གི་རྐྱེན་གྱིས་སྲེད་པ་བྱུང་ཞེས་འདི་ལྟར་འདྲིན་དྲི་བ་དེ་ལ་ངས་འདི་སྐད་དུ་ལུང་བསྟན་པར་བྱ་སྟེ། ཚོར་བའི་རྐྱེན་གྱིས་སྲེད་པ་བྱུང་ཞིང་སྲེད་བའི་རྐྱེན་གྱིས་ལེན་པའོ། །བཙུན་པ་ལེན་པ་པོ་ལེན་པ་པོ་ཞེས་བྱ་བ་ཅི་ཞིག །ལེན་པ་པོ་ལེན་པོ་པོ་ཞེས་ང་སྨྲ་ན་འདྲི་བ་དེ་ལེགས་པར་འགྱུར་བ་ཞིག་ན་ང་དེ་སྐད་དུ་མི་སྨྲའོ། །བཙུན་པ་ལེན་པ་པོ་ཞེས་མི་གསུང་ངམ། དབོ་ལས་སྐྱེས་དེ་དེ་བཞིན་ཏེ་ང་དེ་སྐད་དུ་མི་སྨྲའོ། །གལ་ཏེ་ངའི་དྲུང་དུ་འགའ་ཞིག་ཉེ་བར་འོངས་ཏེ་གང་གི་རྐྱེན་གྱིས་ལེན་པ་བྱུང་ཞེས་འདི་ལྟར་འདྲི་ན་དེ་ལ་ངས་འདི་སྐད་དུ་ལུང་བསྟན་པར་བྱ་སྟེ། སྲེད་པའི་རྐྱེན་གྱིས་ལེན་པ་བྱུང་ཞིང་ལེན་པའི་རྐྱེན་གྱིས་སྲིད་པའོ། །བཙུན་པ་སྲིད་པ་སྲིད་པ་ཞེས་བྱ་བ་ཅི་ཞིག །དབོ་ལས་སྐྱེས་སྲིད་པ་སྲིད་པ་ཞེས་ང་སྨྲ་ན་དྲི་བ་དེ་ལེགས་པར་འགྱུར་བ་ཞིག་ན་ང་དེ་སྐད་དུ་མི་སྨྲའོ། །བཙུན་པ་སྲིད་པ་སྲིད་པ་ཞེས་མི་གསུང་ངམ། དབོ་ལས་སྐྱེས་དེ་བཞིན་ཏེ། ང་དེ་སྐད་དུ་མི་སྨྲའོ། །གལ་ཏེ་ངའི་དྲུང་དུ་འགའ་ཞིག་ཉེ་བར་འོངས་ཏེ། གང་གི་རྐྱེན་གྱིས་སྲིད་པ་བྱུང་ཞེས་འདི་ལྟར་འདྲི་ན་དེ་ལ་ངས་འདི་ལྟར་ལུང་བསྟན་པར་བྱ་སྟེ། ཚེ་དང་ལྡན་པ་སྲིད་པ་འདི་ནི་མ་འོངས་པའི་ཡང་སྲིད་པ་མངོན་པར་འགྲུབ་ཅིང་རབ་ཏུ་བྱུང་བའི་བར་དུ་སྟེ། བྱུང་བར་གྱུར་ཅིང་ཡོད་བ་ནི་སྐྱེ་མཆེད་དྲུག་གོ །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་བ་དང༌། ན་བ་དང༌། འཆི་བ་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་རྣམས་ཡང་དག་པར་འབྱུང་ཞིང་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཞིག་ཡང་དག་པར་འབྱུང་བར་འགྱུར་རོ་ཞེས་གསུངས་སོ། །བཅོམ་ལྡན་འདས་ཀྱིས་ཅིའི་ཕྱིར་ལུས་ལས་སྲོག་དེ་ཉིད་དང་གཞན་དུ་ལུང་མ་བསྟན་ཞེས་བྱ་བ་ལ། བཅོམ་ལྡན་འདས་རྒྱལ་པོའི་ཁབ་ཀྱི་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །
དེའི་ཚེ་ཀུན་དུ་རྒྱུ་བེའུའི་རིགས་བཅོམ་ལྡན་འདས་གང་ན་བ་དེར་ཉེ་བར་སོང་སྟེ་ཉེ་བར་སོང་ནས་བཅོམ་ལྡན་འདས་དང་ལྷན་ཅིག་ཅེས་བྱ་བ་ནས་ཀུན་དུ་རྒྱུ་བེའུའི་རིགས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གཽ་ཏ་མ་ཅི་ལུས་དེ་ཉིད་སྲོག་ཡིན་ནམ། བེ་འུ་ལུས་དེ་ཉིད་སྲོག་ཡིན་ནོ་ཞེས་ང་ལུང་མི་སྟོན་ཏོ། །གཽ་ཏ་མ་ཅི་ལུས་ལས་གཞན་ཞིག་སྲོག་ཡིན། བེའུ་ལུས་ལས་སྲོག་གཞན་ཡིན་ནོ་ཞེས་ཀྱང་ལུང་མི་སྟོན་ཏོ། །གཽ་ཏ་མ་ལུས་དེ་ཉིད་སྲོག་ཡིན་ནམ་ཞེས་དྲིས་བ་ན་ལུང་བསྟན་པར་བྱ་བ་མ་ཡིན་ནོ་ཞེས་སྨྲ་ཞིང༌། ཅི་ལུས་ལས་གཞན་ཞིག་སྲོག་ཡིན་ཞེས་དྲིས་པ་ན་ཡང་ལུང་བསྟན་པར་བྱ་བ་མ་ཡིན་ནོ་ཞེས་སྨྲ་སྟེ། བཅོམ་ལྡན་འདས་ཀྱིས་ཉན་ཐོས་འདས་པའི་དུས་ན་དུས་ལས་འདས་པ་དག་གནས་ཆེ་གེ་མོ་ཞིག་ཏུ་སྐྱེས་སོ། །གཞན་ཆེ་གེ་མོ་ཞིག་ཏུ་སྐྱེས་སོ་ཞེས་སྐྱེ་བ་ལུང་སྟོན་པ་ནི་ངོ་མཚར་བ་མ་ཡིན་ནོ། །བེའུ་དེ་དེ་བཞིན་ཏེ། དེ་བཞིན་གཤེགས་པའི་ཉན་ཐོས་དུས་ལས་འདས་པ་དག་གནས་ཆེ་གེ་མོ་ཞིག་ཏུ་སྐྱེས་སོ་གནས་ཆེ་གེ་མོ་ཞིག་ཏུ་སྐྱེས་སོ་ཞེས་སྐྱེ་བ་ལུང་བསྟན་པ་ནི་ངོ་མཚར་བ་མ་ཡིན་ནོ། །གཽ་ཏ་མ་གང་གི་ཚེ་ལུས་འདི་ཡོངས་སུ་བཏང་བར་གྱུར་ཅིང་ཡིད་ཀྱི་རང་བཞིན་གྱི་ལུས་ཀྱི་སེམས་ཅན་གཞན་དུ་སྐྱེས་པར་གྱུར་པ་དེའི་ཚེ་ལུས་དང་སྲོག་གཞན་དུ་གྱུར་ཏོ། །བེའུ་སྐྱེ་བ་ཡང་ཉེ་བར་ལེན་པ་དང་བཅས་པར་ང་སྨྲའི། ཉེ་བར་ལེན་པ་མེད་པར་ནི་མ་ཡིན་ནོ། །གཽ་ཏ་མ་ཇི་ལྟ་ཇི་ལྟར་ན་སྐྱེ་པ་ཉེ་བར་ལེན་པ་དང་བཅས་པར་སྨྲའི། ཉེ་བར་ལེན་པ་མེད་པར་མ་ཡིན་པ་སྨྲ་ཞེ་ན། བེའུ་དཔེར་ན་མེ་ནི་ཉེ་བར་ལེན་པ་དང་བཅས་ན་འབར་གྱིས་ཉེ་བར་ལེན་པ་མེད་པ་ནི་མ་ཡིན་ནོ།། གཽ་ཏ་མ་མེ་ནི་ཉེ་བར་ལེན་པ་མེད་པར་ཡང་འབར་བ་མཐོང་ངོ༌། །བེའུ་ཇི་ལྟར་ན་ཉེ་བར་ལེན་པ་མེད་པར་ཡང་མེ་འབར། གཽ་ཏ་མ་དཔེར་ན་མེའི་ཕུང་པོ་ཆེན་པོ་འབའ་ཞིག་ཀུན་དུ་འབར་ལ་ཀུན་དུ་རབ་ཏུ་འབར་བ་འབར་བ་གཅིག་ཏུ་གྱུར་ཅིང༌། འབར་བ་གཅིག་ཏུ་གྱུར་པ་དེ་ལས་རླུང་གི་མེ་ལྕེ་ཐག་རིང་པོར་འཕངས་པ་དེའི་ཚེ་ཉེ་བར་ལེན་པ་མེད་པར་འབར་ཞིང་མེ་ལྕེ་འབར་བ་ཉེ་བར་ལེན་པ་མེད་པར་ཁྱབ་ཅིང་འབར་རོ། །བེའུ་དེ་ཡང་ཉེ་བར་ལེན་པ་དང་བཅས་པར་ང་སྨྲའི། ཉེ་བར་ལེན་པ་མེད་བར་ནི་མ་ཡིན་ནོ། །གཽ་ཏ་མ་དེའི་ཉེ་བར་ལེན་པ་གང་ཞིག་ཡིན་པར་གདགས། བེའུ་དེའི་ཚེ་ཉེ་བར་ལེན་པ་
རླུང་ཡིན་པར་གདགས་ཏེ། རླུང་ནི་ཉེ་བར་ལེན་པས་མེ་འབར་ཞིང་རླུང་གི་ཉེ་བར་ལེན་པས་མེ་ལྕེ་ཁྱབ་པར་གྱུར་ཏོ། །གཽ་ཏ་མ་གང་གི་ཚེ་ལུས་འདི་ཡོངས་སུ་བཏང་བར་གྱུར་ཅིང་ཡིད་ཀྱི་རང་བཞིན་གྱི་ལུས་སེམས་ཅན་གཞན་དུ་སྐྱེ་བར་གྱུར་པ་དེའི་ཚེ་ཉེ་བར་ལེན་པའི་ཉེ་བར་ལེན་བ་ཅི་ཞིག་ཡིན་པར་ཉེ་བར་གདགས། བེའུ་དེའི་ཚེ་སྲེད་པ་ཉེ་བར་ལེན་པ་ཡིན་ནོ་ཞེས་ང་སྨྲ་སྟེ། སྲིད་པའི་ཉེ་བར་ལེན་པས་སེམས་ཅན་གནས་ཞིང་སྲེད་པའི་ཉེ་བར་ལེན་པས་སེམས་ཅན་ཞེས་བརྗོད་དོ། །གཽ་ཏ་མ་ལེན་པ་ལ་དགའ་བ་དང༌། ལེན་པས་འབགས་པ་དང༌། ལེན་པ་ལས་ཀུན་དུ་འབྱུང་བ་དང་ཉེ་བར་ལེན་པ་དོན་དུ་གཉེར་བའི་སྐྱེ་དགུ་ལས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཆོས་རྣམས་མངོན་པར་རྫོགས་པར་སངས་རྒྱས་སོ། །གཽ་ཏ་མ་བདག་ཅག་ལ་བྱ་བ་དང་བགྱི་བ་མང་དུ་མཆིས་ཀྱིས་མཆིའོ། །བེའུ་དེའི་དུས་ལ་བབ་བར་ཤེས་ན་སོང་ཤིག་།དེ་ནས་ཀུན་དུ་རྒྱུ་བེའུའི་རིགས་གྱིས་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་ཞིང་རྗེས་སུ་ཡི་རངས་ཏེ་བཅོམ་ལྡན་འདས་ཀྱི་དྲུང་ནས་སོང་ངོ་ཞེས་གསུངས་སོ། །ཀུན་དགའ་བོ་ཀུན་དུ་རྒྱུ་བེའུའི་རིགས་ལ་བདག་ཡོད་ཅེས་ལུང་བསྟན་ན་ཞེས་བྱ་བ་ལ། གླེང་གཞི་ནི་རྒྱལ་པོའི་ཁབ་ནའོ། །དེ་ནས་ཀུན་དུ་རྒྱུ་བེའུའི་རིགས་བཅོམ་ལྡན་འདས་གང་ན་བདེར་ཉེ་བར་སོང་སྟེ། ཉེ་བར་སོང་ནས་བཅོམ་ལྡན་འདས་དང་ལྷན་ཅིག་ཡང་དག་པར་དགའ་བ་དང་ཡང་དག་པར་བདེ་བར་འགྱུར་བའི་གཏམ་རྣམ་པ་སྣ་ཚོགས་བྱས་ཏེ་ཞེས་བྱ་བ་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གཽ་ཏ་མ་ཅི་བདག་ཡོད་དམ། དེ་སྐད་ཅེས་གསོལ་བ་དང༌། བཅོམ་ལྡན་འདས་ཅང་མི་གསུང་པར་བཞུགས་སོ། །གཽ་ཏ་མ་ཅི་བདག་མེད་དམ། དེ་སྐད་ཅེས་གསོལ་པ་དང༌། །བཅོམ་ལྡན་འདས་ཅང་མི་གསུང་བར་བཞུགས་སོ། །ཀུན་དུ་རྒྱུ་བེའུའི་རིགས་ཀྱིས་བཅོམ་ལྡན་འདས་ལ་ལན་གཉིས་ལན་གསུམ་དུ་འདི་སྐད་ཅེས་གསོལ་ཏོ། །གཽ་ཏ་མ་ཅི་བདག་ཡོད་དམ། དེ་སྐད་ཅེས་གསོལ་པ་དང༌། བཅོམ་ལྡན་འདས་ཅང་མི་གསུང་བར་བཞུགས་སོ། །གཽ་ཏ་མ་ཅི་བདག་མེད་དམ། དེ་སྐད་ཅེས་གསོལ་པ་དང༌། བཅོམ་ལྡན་འདས་
ཅང་མི་གསུང་བར་བཞུགས་སོ། །དེ་ནས་ཀུན་དུ་རྒྱུ་བེའུའི་རིགས་འདི་སྙམ་དུ་སེམས་ཏེ། དགེ་སྦྱོང་གཽ་ཏ་མ་ལ་ལན་གཉིས་ལན་གསུམ་དུ་དྲིས་ཀྱང་ལུང་མ་བསྟན་ཏོ་ཞེས་རིག་ནས་སྟན་ལས་ལངས་ཏེ་སོང་ངོ༌། །དེའི་ཚེ་ན་ཚེ་དང་ལྡན་པ་ཀུན་དགའ་བོ་རླུང་ཡབ་ཐོགས་ཏེ་བཅོམ་ལྡན་འདས་ཀྱི་རྒྱབ་ན་བཅོམ་ལྡན་འདས་ལ་རླུང་ཡབ་གཡོབ་ཅིང་འདུག་གོ །དེ་ནས་ཚེ་དང་ལྡན་པ་ཀུན་དགའ་བོ་ཀུན་དུ་རྒྱུ་བེའུའི་རིགས་སོང་ནས་རིང་ཞིག་ལོན་པར་རིག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀུན་དུ་རྒྱུ་བེའུའི་རིགས་ཀྱིས་ལན་གཉིས་ལན་གསུམ་དུ་དྲིས་ཀྱང་བཅོམ་ལྡན་འདས་ཀྱིས་ཅིའི་ཕྱིར་ལུང་མ་བསྟན། ཀུན་དུ་རྒྱུ་བེའུའི་རིགས་ལ་སྡིག་པ་ཅན་གྱི་ལྟ་བ་མང་དུ་རྙེད་པར་འགྱུར་བས་ང་ལ་ལན་གསུམ་གྱི་བར་དུ་དྲིས་ཀྱང་ལུང་མ་བསྟན་ཏོ། །ཀུན་དགའ་བོ་ཀུན་དུ་རྒྱུ་བེའུའི་རིགས་ཀྱིས་དྲིས་པ་ལ་བདག་ཡོང་ངོ་ཞེས་ལུང་བསྟན་ན་ཆོས་ཐམས་ཅད་བདག་མེད་དོ་ཞེས་བྱ་བའི་ཚིག་མི་རིགས་པར་འགྱུར་རོ། །ཀུན་དུ་རྒྱུ་བེའུའི་རིགས་ཀྱིས་དྲིས་པ་ལ་བདག་མེད་དོ་ཞེས་ལུང་བསྟན་ན་ཀུན་དུ་རྒྱུ་བེའུའི་རིགས་སྔར་བདག་མེད་པ་ལས་ད་ལྟར་བདག་དང་བཅས་པར་འགྱུར་རོ་ཞེས་སྔར་ཡང་ཀུན་དུ་རྨོངས་པ་ལ་ཀུན་དུ་རྨོངས་པ་ཆེས་མང་དུ་འབྱུང་བར་འགྱུར་རོ། །ཀུན་དགའ་བོ་བདག་ཡོད་ཅེས་བྱ་བ་འདི་ནི་རྟག་པར་འགྱུར་རོ། །བདག་མེད་ཅེས་བྱ་བ་འདི་ནི་ཆད་པར་འགྱུར་ཏེ། །དེ་བཞིན་གཤེགས་པས་མཐའ་གཉིས་པོ་དེ་དག་སྤངས་ནས་དབུ་མའི་ལམ་གྱི་ཆོས་སྟོན་ཏེ། འདི་ལྟ་སྟེ། འདི་ཡོད་པའི་ཕྱིར་འདི་འབྱུང་འདི་སྐྱེས་པའི་ཕྱིར་འདི་སྐྱེ་སྟེ། འདི་ལྟ་སྟེ་མ་རིག་པའི་རྐྱེན་གྱིས་འདུ་བྱེད་རྣམས་ཞེས་བྱ་བ་ནས། རྒྱས་པར་ཀུན་དུ་འགག་པར་འགྱུར་རོ་ཞེས་བྱ་བའི་བར་དུའོ་ཞེས་གསུངས་སོ། །འཇིག་རྟེན་རྟག་པ་ཞེས་བྱ་བ་ལ་འཇིག་རྟེན་ན་རྟག་པ་དང༌། མི་རྟག་པ་དང༌། རྟག་པ་ཡང་མ་ཡིན། མི་རྟག་པ་ཡང་མ་ཡིན་ཞེས་བྱ་བ་ལ་སོགས་པ་ལུང་དུ་མ་བསྟན་པའི་དངོས་པ་བཅུ་བཞི་ལུང་རིང་པོའི་མདོ་དགུ་པ་ལས་འབྱུང་བ་མཛོད་ཀྱི་གནས་ལྔ་པ་འདི་ཉིད་དུ། མགོ་གཅིག་དང་ནི་རྣམ་ཕྱེ་དང༌། །ཞེས་བྱ་བའི་ཚིག་ལེའུར་བྱས་པར་བྲིས་ཟིན་ཏོ། །དེ་བཞིན་དུ་ཀུན་དུ་རྒྱུ་སྨྲ་བ་
ཞེས་བྱ་བ་ལ། བཅོམ་ལྡན་འདས་རྒྱལ་པོའི་ཁབ་ཀྱི་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་ཏེ། དེ་ནས་ཀུན་དུ་རྒྱུ་སྨྲ་བ་བཅོམ་ལྡན་འདས་གང་ན་བདེར་ཉེ་བར་སོང་སྟེ། ཉེ་བར་སོང་ནས་བཅོམ་ལྡན་འདས་དང་ལྷན་ཅིག་ཅེས་བྱ་བ་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གཽ་ཏ་མ་ཅི་འཇིག་རྟེན་མཐའ་དང་བཅས་སམ། སྨྲས་པ་འཇིག་རྟེན་མཐའ་དང་བཅས་སོ་ཞེས་བྱ་བ་འདི་ནི་ངས་ལུང་མི་སྟོན་ཏོ། །གཽ་ཏ་མ་འཇིག་རྟེན་མཐའ་མེད་དམ། མཐའ་དང་བཅས་པ་ཡང་མ་ཡིན་མཐའ་མེད་པ་ཡང་མ་ཡིན་ནམ། མཐའ་དང་བཅས་པ་ཡང་མ་ཡིན་མཐའ་མེད་པ་ཡང་མ་ཡིན་པ་ཞིག །སྨྲ་བ་འཇིག་རྟེན་མཐའ་མེད་པ་དང༌། མཐའ་དང་བཅས་པ་ཡང་ཡིན། མཐའ་མེད་པ་ཡང་ཡིན་པ་དང༌། མཐའ་དང་བཅས་པ་ཡང་མ་ཡིན་མཐའ་མེད་པ་ཡང་མ་ཡིན་ཞེས་བྱ་བ་འདི་ནི་ངས་ལུང་མི་སྟོན་ཏོ། །གཽ་ཏ་མ་འཇིག་རྟེན་མཐའ་དང་བཅས་པས་ཞེས་དྲིས་པ་ན་ལུང་མི་སྟོན་ཏོ་ཞེས་སྨྲ་ཞིང་འཇིག་རྟེན་མཐའ་མེད་པ་དང༌། མཐའ་དང་བཅས་པ་ཡང་ཡིན། མཐའ་མེད་པ་ཡང་ཡིན་པ་དང༌། མཐའ་དང་བཅས་པ་ཡང་མ་ཡིན་མཐའ་མེད་པ་ཡང་མ་ཡིན་པ་ཞིག་ཅེས་དྲིས་པ་ན་ལུང་མི་སྟོན་ཏོ་ཞེས་སྨྲ་ན། གཞན་ཅི་ཞིག་ལུང་སྟོན། སྨྲ་བ་ངས་མངོན་པར་མཁྱེན་ཅིང་མངོན་པར་མཁྱེན་ན་སྡུག་བསྔལ་ཡང་དག་པར་ཟད་ཅིང་སྡུག་བསྔལ་མཐར་བྱ་བའི་ཕྱིར་ཉན་ཐོས་རྣམས་ལ་ལམ་འཆད་པར་མཛད་དོ། །གཽ་ཏ་མ་ཉིད་ཀྱིས་མངོན་པར་མཁྱེན་ཅིང་མངོན་པར་མཁྱེན་ནས་སྡུག་བསྔལ་ཡང་དག་པར་ཟད་ཅིང་སྡུག་བསྔལ་མཐར་བྱ་བའི་ཕྱིར་ཉན་ཐོས་རྣམས་ལ་ལམ་འཆད་པར་མཛད་ན། ཅི་ལམ་འདིས་འཇིག་རྟེན་ཐམས་ཅད་ངེས་པར་འབྱིན་ཏམ། འོན་ཏེ་འཇིག་རྟེན་ཕྱོགས་གཅིག །དེ་སྐད་ཅེས་གསོལ་པ་དང༌། བཅོམ་ལྡན་འདས་ཅད་མི་གསུང་བར་བཞུགས་སོ། །ཀུན་དུ་རྒྱུ་སྨྲ་བས་བཅོམ་ལྡན་འདས་ལ་ལན་གཉིས་ལན་གསུམ་དུ་འདི་སྐད་ཅེས་གསོལ་ཏོ། །གཽ་ཏ་མ་ཉིད་ཀྱིས་མངོན་པར་མཁྱེན་ཅིང་མངོན་པར་མཁྱེན་ནས་སྡུག་བསྔལ་ཡང་དག་པར་ཟད་ཅིང་སྡུག་བསྔལ་མཐར་བྱ་བའི་ཕྱིར་ཉན་ཐོས་རྣམས་ལ་ལམ་འཆད་པ་མཛད་ན། ཅི་ལམ་འདིས་འཇིག་རྟེན་ཐམས་ཅད་ངེས་པར་འབྱིན་ཏམ།
འོན་ཏེ་འཇིག་རྟེན་ཕྱོགས་གཅིག །དེ་སྐད་ཅེས་གསོལ་པ་དང༌། ལན་གཉིས་ལན་གསུམ་གྱི་བར་དུ་ཡང་བཅོམ་ལྡན་འདས་ཅང་མི་གསུང་བར་བཞུགས་སོ། །དེའི་ཚེ་ན་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་རྒྱ་བ་ན་རླུང་ཡབ་ཐོགས་ཏེ་བཅོམ་ལྡན་འདས་ལ་གཡོབ་ཅིང་འདུག་པས་སྨྲས་པ། སྨྲ་བ་ཁྱོད་ཀྱིས་བཅོམ་ལྡན་འདས་ལ་དང་པོར་དྲི་བ་དྲིས་པ་དེ་ཉིད་ད་ལྟར་རྣམ་གྲངས་གཞན་གྱིས་དྲིས་ཏེ། དེས་ན་བཅོམ་ལྡན་འདས་ཀྱིས་དྲིས་པ་ལུང་བསྟན་ཏོ། །སྨྲ་བ་དེའི་ཕྱིར་སྐྱེས་བུ་མཁས་པ་རྣམས་ལ་དཔེས་རྣམ་པར་བཤད་ན་དོན་ཤེས་པར་འགྱུར་བ་དང་ཉོན་ཅིག་།སྨྲ་བ་འདི་ལྟ་སྟེ་འདི་ནི་རྒྱལ་པོའི་མཐའི་གྲོང་ཁྱེར་རྩིག་པ་དང་རབ་བརྟན་པོས་ཡོངས་སུ་བསྐོར་བ་སྒོ་གཅིག་པ་སྒོ་སྲུང་བའི་སྐྱེས་བུ་མཁས་པ་གསལ་བ་བློ་དང་ལྡན་པ་དེར་འོང་བ་དག་དཔྱོད་པའི་ཤེས་རབ་དང་ཡང་དག་པར་ལྡན་པ་རག་བཞག་པར་གྱུར་ཏེ། དེས་གྲོང་ཁྱེར་དེའི་མཐའ་ཀུན་དུ་བསྐོར་ཞིང་བཙལ་ཀྱང་དེས་གྲོང་ཁྱེར་དེ་ལ་སྒོ་གཉིས་པ་ཅུང་ཟད་ཀྱང་མི་རྙེད་དོ། །དེ་ནས་གྲོང་ཁྱེར་དེ་ཀུན་དུ་བསྐོར་ཞིང་བཙལ་ཀྱང་བྱི་ལ་འཇུག་པ་ཙམ་གྱི་སྒོ་གཉིས་པ་ཅུང་ཟད་ཀྱང་མི་རྙེད་དེ། སྨྲ་བ་གཞན་ཡང་སྒོ་སྲུང་བའི་སྐྱེས་བུ་དེ་ལ་ཤེས་རབ་འདི་ལྟ་བུ་སྲོག་ཆགས་འདི་ཙམ་ཞིག་ནི་ངའི་གྲོང་ཁྱེར་དུ་ཞུགས་སོ། །འདི་ཙམ་ཞིག་ནི་བྱུང་ངོ་ཞེས་མཐོང་བ་ནི་མ་སྐྱེས་མོད་ཀྱི་འོན་ཀྱང་སྒོ་སྲུང་བའི་སྐྱེས་བུ་དེ་ལ་ཡང་དག་པའི་ཤེས་རབ་འདི་ལྟ་བུ་གང་ཅུང་ཟད་སྲོག་ཆགས་རགས་པ་རགས་པ་གྲོང་ཁྱེར་དུ་འཇུག་པ་དང་འབྱུང་བ་དེ་ཐམས་ཅད་ནི་སྒོ་འདི་ཁོ་ན་སྟེ། གཞན་ནི་མེད་དོ་ཞེས་ཤེས་པ་སྐྱེའོ། །སྨྲ་བ་དེ་བཞིན་དུ་དེ་བཞིན་གཤེགས་པ་ལ་ཅི་ལམ་འདིས་འཇིག་རྟེན་ཐམས་ཅད་ངེས་པར་འབྱིན་པར་བྱེད་དམ་འོན་ཏེ་འཇིག་རྟེན་ཕྱོགས་གཅིག་ཅེས་འདི་ལྟར་ཐུགས་ལ་རྟོག་པ་མི་མངའ་མོད་ཀྱི། འོན་ཀྱང་དེ་བཞིན་གཤེགས་པ་ལ་ཡང་དག་པའི་ཡེ་ཤེས་འདི་ལྟ་བུ་གང་ཅུང་ཟད་སྡུག་བསྔལ་མཐར་བྱས་པ་དང༌། བྱེད་པ་དང༌། བྱེད་པར་འགྱུར་བ་དེ་ཐམས་ཅད་ལམ་འདིས་བྱེད་དེ། གཞན་ནི་མེད་དོ་ཞེས་ཡང་དག་པའི་ཡེ་ཤེས་སྐྱེའོ། །དེ་ནས་ཀུན་དུ་རྒྱུ་སྨྲ་བ་ཚེ་དང་ལྡན་པ་ཀུན་དགའ་བོས་བཤད་པ་ལ་མངོན་པར་དགའ་ཞིང་རྗེས་སུ་ཡི་རངས་ཏེ་སྟན་ལས་ལངས་ཏེ་སོང་བའི་བར་དུའོ་ཞེས་
གསུངས་སོ། །མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པ་ཞེས་བྱ་བ་འབྱུང་བར་འགྱུར་རོ་ཞེས་བྱ་བ་ལ། རྒྱལ་པོ་དང་ཡང་དག་པར་ལྡན་པའི་ཚོམས་ཀྱི་བཅུ་པ་སྔོན་གྱི་མཐའ་དང་ཕྱི་མའི་མཐའི་མདོ་ལས་འབྱུང་བ་གནས་བརྟེན་མ་འགགས་པས་སྔོན་གྱི་མཐའ་ལས་བརྩམས་ཏེ། བཤད་པ་མཛོད་ཀྱི་གནས་བཞི་པ་འདི་ཉིད་དུ་འཕེན་པར་བྱེད་པ་གཅིག་ཡིན་ཏེ་ཞེས་བྱ་བར་བྲིས་ཟིན་པ། ཕྱི་མའི་མཐའ་ལས་བརྩམས་པ་ནི་བཅོམ་ལྡན་འདས་ཀྱིས་ལུང་བསྟན་ཏེ། དགེ་སློང་དག་མི་རྣམས་ཀྱི་ཚེ་ལ་སྟོང་ཕྲག་བརྒྱད་ཅུ་ཐུབ་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། བླ་ན་མེད་པ། སྐྱེས་བུ་འདུལ་བའི་ཁ་ལོ་སྒྱུར་བ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་བྱམས་པ་ཞེས་བྱ་བའི་སྟོན་པ་འཇིག་རྟེན་དུ་འབྱུང་བར་འགྱུར་ཏེ། འདི་ལྟ་སྟེ། ད་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། སྐྱེས་བུ་འདུལ་ཞིང་ཁ་ལོ་སྒྱུར་བ་ལྷ་འདང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ང་འཇིག་རྟེན་དུ་བྱུང་བ་བཞིན་ནོ། །དེ་ལྷ་དང་བཅས་པ་དང༌། བདུད་དང་བཅས་པ་དང༌། ཚངས་པ་དང་བཅས་པ་དང༌། དགེ་སྦྱོང་དང་བྲམ་ཟེའི་སྐྱེ་དགུའི་ལྷ་དང་མིའི་འཇིག་རྟེན་འདི་ལས་མཐོང་བའི་ཆོས་ཉིད་ལས་རང་ཉིད་ཀྱིས་མངོན་པར་ཤེས་པ་ཕུན་སུམ་ཚོགས་པ་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་རབ་ཏུ་མཁྱེན་པར་འགྱུར་ཏེ། འདི་ལྟ་སྟེ། དེ་ལྟར་ང་ལྷ་དང་བཅས་པ་དང༌། བདུད་དང་བཅས་པ་དང༌། ཚངས་པ་དང་བཅས་པའི་དགེ་སྦྱོང་དང་བྲམ་ཟེའི་སྐྱེ་དགུའི་ལྷ་དང་མིའི་འཇིག་རྟེན་འདི་ལས་མཐོང་བའི་ཆོས་ཉིད་ལས་རང་ཉིད་ཀྱིས་མངོན་པར་ཤེས་པ་ཕུན་སུམ་ཚོགས་པ་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མེ་ཤེས་སོ་ཞེས་མངོན་སུམ་དུ་བྱས་ཤིང་མཁྱེན་པར་གྱུར་པ་བཞིན་ནོ། །དེ་ཐོག་མར་
དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། །ཚིག་འབྲུ་བཟང་པོ། །མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཚངས་པར་སྤྱོད་པ་ཡོངས་སུ་རྫོགས་པ་ཡང་དག་པར་གསལ་བ་འབྱེད་པའི་ཆོས་སྟོན་ཏོ། །འདི་ལྟ་སྟེ། ད་ལྟར་ང་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། །ཚིག་འབྲུ་བཟང་པོ། །མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཚོངས་པར་སྤྱོད་པ་ཡོངས་སུ་རྫོགས་པ་ཡང་དག་པར་གསལ་བར་བྱེད་བའི་ཆོས་སྟོན་པ་བཞིན་ནོ། །དེའི་ཉན་ཐོས་རྣམས་ལ་བྱམས་པའི་རིགས་ཞེས་བྱ་བའི་མིང་འབྱུང་བར་འགྱུར་རོ། །འདི་ལྟ་སྟེ། ད་ལྟར་ངའི་ཉན་ཐོས་རྣམས་ལ་ཤཱཀྱའི་བུ་ཞེས་བརྗོད་པ་བཞིན་ནོ། །དེས་ཚོགས་སྟོང་ཕྲག་དུ་མ་སྡུད་པར་འགྱུར་ཏེ། དེ་ལྟར་ངའི་ཚེགས་བརྒྱ་ཕྲག་དུ་མ་བཞིན་ནོ། །དེའི་ཚེ་ཚེ་དང་ལྡན་པ་བྱམས་པ་འཁོར་འདུས་པ་དེའི་ནང་ན་འདུས་ཤིང་འདུག་པར་གྱུར་ཏེ། དེ་ནས་ཚེ་དང་ལྡན་པ་བྱམས་པ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་བཅོམ་ལྡན་འདས་གང་ན་བ་དེར་ཐལ་མོ་སྦྱར་ཞིང་ཕྱག་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་མི་རྣམས་ཀྱི་ཚེ་ལོ་སྟོང་ཕྲག་བརྒྱད་ཅུ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ་བླ་ན་མེད་པ་སྐྱེས་བུ་འདུལ་བའི་ཁ་ལོ་སྒྱུར་བ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་བྱམས་པ་ཞེས་བྱ་བའི་སྟོན་པ་འཇིག་རྟེན་དུ་འབྱུང་བར་འགྱུར་ཏེ། འདི་ལྟ་སྟེ། །ད་ལྟར་བཅོམ་ལྡན་འདས་འཇིག་རྟེན་དུ་འབྱུང་བ་བཞིན་ནོ། །བདག་ལྷ་དང་བཅས་པ་དང༌། བདུད་དང་བཅས་པ་དང༌། ཚངས་པ་དང་བཅས་པའི་དགེ་སྦྱོང་དང་བྲམ་ཟེའི་སྐྱེ་དགུའི་ལྷ་དང་མིའི་འཇིག་རྟེན་འདི་ལས་མཐོང་བའི་ཆོས་ཉིད་ལ་རང་ཉིད་ཀྱིས་མངོན་པར་ཤེས་པ་ཕུན་སུམ་ཚོགས་པ་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་ནི་མི་ཤེས་སོ་ཞེས་མངོན་སུམ་དུ་བྱས་ཤིང་མཁྱེན་པར་གྱུར་ཏེ། འདི་ལྟ་སྟེ། ད་ལྟར་བཅོམ་ལྡན་འདས་ལྷ་དང་བཅས་པ་དང༌། བདུད་དང་བཅས་པ་དང༌།
ཚངས་པ་དང་བཅས་པའི་དགེ་སྦྱོང་དང་བྲམ་ཟེའི་སྐྱེ་དགུའི་ལྷ་དང་མིའི་འཇིག་རྟེན་འདི་ལས་མཐོང་བའི་ཆོས་ཉིད་ལ་རང་ཉིད་ཀྱིས་མངོན་པར་ཤེས་པ་ཕུན་སུམ་ཚོགས་པ་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་མངོན་སུམ་དུ་བྱས་ཤིང་མཁྱེན་པར་འགྱུར་བ་བཞིན་ནོ། །བདག་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། །ཚིག་འབྲུ་བཟང་པོ། །མ་འདྲེས་པ་ཡོངས་སུ་རྫོགས་པ། ཡོངས་སུ་དག་པ། ཚངས་པར་སྤྱོད་པ་ཡོངས་སུ་རྫོགས་པ་ཡང་དག་པར་གསལ་བར་བྱེད་པའི་ཆོས་སྟོན་ཏེ། འདི་ལྟ་སྟེ། ད་ལྟར་བཅོམ་ལྡན་འདས་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། །མ་འདྲེས་པ་ཡོངས་སུ་རྫོགས་པ། ཡོངས་སུ་དག་པ། ཚངས་པར་སྤྱོད་པ་ཡོངས་སུ་རྫོགས་པ་ཡང་དག་པར་གསལ་བར་བྱེད་པའི་ཆོས་སྟོན་པ་བཞིན་ནོ། །བདག་གི་ཉན་ཐོས་རྣམས་ལ་བྱམས་པའི་རིགས་ཞེས་བྱ་བའི་མིང་འབྱུང་བར་འགྱུར་ཏེ། འདི་ལྟ་སྟེ། ད་ལྟར་བཅོམ་ལྡན་འདས་ཀྱི་ཉན་ཐོས་རྣམས་ལ་ཤཱཀྱའི་སྲས་ཞེས་བརྗོད་པ་བཞིན་ནོ། །བདག་ཚོགས་སྟོང་ཕྲག་དུ་མ་སྡུད་པར་འགྱུར་ཏེ། འདི་ལྟ་སྟེ། ད་ལྟར་བཅོམ་ལྡན་འདས་ཀྱིས་ཚོགས་བརྒྱ་ཕྲག་དུ་མ་བཞིན་དུ་འགྱུར་བ་ནི་བཅོམ་ལྡན་འདས་ངོ་མཚར་ལགས་སོ། །དེ་སྐད་ཅེས་གསོལ་བ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་བྱམས་པ་ལ་འདི་སྐད་ཅེས་བཀའ་སྩལ་ཏོ། །བྱམས་པ་མ་འོངས་པའི་དུས་ན་ཚོགས་ཡོངས་སུ་བསྡུ་བར་བྱའོ་ཞེས་སེམས་ཀྱི་སྨོན་ལམ་རྒྱ་ཆེན་པོ་དང་བཅས་པ་རབ་ཏུ་ལེགས་ཏེ། བྱམས་པ་འདི་ཁོ་ན་ལྟར་འབྱུང་བར་འགྱུར་ཏེ། མ་འོངས་པའི་དུས་ན་མི་རྣམས་ཀྱི་ཚེ་ལོ་སྟོང་ཕྲག་བརྒྱད་ཅུ་ཐུབ་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་བ། བླ་ན་མེད་པ་སྐྱེས་བུ་འདུལ་ཞིང་ཁ་ལོ་སྒྱུར་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་བྱམས་པ་ཞེས་བྱ་བའི་སྟོན་པ་འཇིག་རྟེན་དུ་འབྱུང་བར་འགྱུར་ཏེ། འདི་ལྟ་སྟེ། ད་ལྟར་བཅོམ་ལྡན་འདས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ། བླ་ན་མེད་པ་སྐྱེས་བུ་འདུལ་ཞིང་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་ང་འཇིག་རྟེན་དུ་བྱུང་བ་བཞིན་ནོ། །དེ་ལྷ་དང་བཅས་པ་དང༌། བདུད་དང་བཅས་པ་དང༌། ཚངས་པ་དང་བཅས་པའི་དགེ་སྦྱོང་དང་བྲམ་ཟེའི་སྐྱེ་དགུ་ལྷ་དང་མིའི་འཇིག་རྟེན་འདི་ལས་མཐོང་བའི་ཆོས་ཉིད་ལ་རང་ཉིད་ཀྱིས་མངོན་པར་ཤེས་པ་ཕུན་སུམ་ཚོགས་པ་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་མངོན་སུམ་དུ་རབ་ཏུ་མཁྱེན་པར་གྱུར་ཏེ། འདི་ལྟ་སྟེ། ད་ལྟར་ང་ལྷ་དང་བཅས་པ་དང༌། བདུད་དང་བཅས་པ་དང༌། ཚངས་པ་དང་བཅས་པའི་དགེ་སྦྱོང་དང་བྲམ་ཟེའི་སྐྱེ་དགུའི་འཇིག་རྟེན་འདི་ལས་མཐོང་བའི་ཆོས་དེ་ཉིད་ལ་རང་ཉིད་ཀྱིས་མངོན་པར་ཤེས་པ་ཕུན་སུམ་ཚོགས་པ་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་མངོན་སུམ་དུ་བྱས་ཤིང་མཁྱེན་པ་བཞིན་ནོ། །དེ་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། །ཚིག་འབྲུ་བཟང་པོ། །མ་འདྲེས་པ་ཡོངས་སུ་རྫོགས་པ། ཡོངས་སུ་དག་པ། ཚངས་པར་སྤྱོད་པ། ཡོངས་སུ་རྫོགས་པ། ཡང་དག་པར་གསལ་བར་བྱེད་པའི་ཆོས་སྟོན་པར་འགྱུར་ཏེ། འདི་ལྟ་སྟེ། ད་ལྟར་ང་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། །ཚིག་འབྲུ་བཟང་པོ། །མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཚངས་པར་སྤྱོད་པ་ཡོངས་སུ་རྫོགས་པ། ཡང་དག་པར་གསལ་བར་བྱེད་པའི་ཆོས་སྟོན་པ་བཞིན་ནོ། །དེའི་ཉན་ཐོས་རྣམས་ལ་བྱམས་པའི་རིགས་ཞེས་བྱ་བའི་མིང་འབྱུང་བར་འགྱུར་ཏེ། འདི་ལྟ་སྟེ། ད་ལྟར་ངའི་ཉན་ཐོས་རྣམས་ལ་ཤཱཀྱའི་བུ་ཞེས་བརྗོད་པ་བཞིན་ནོ། །དེས་ཚོགས་སྟོང་ཕྲག་དུ་མ་སྡུད་པར་འགྱུར་ཏེ། འདི་ལྟར་ད་ལྟར་ངའི་ཚོགས་བརྒྱ་ཕྲག་དུ་མ་བཞིན་ནོ་ཞེས་གསུངས་སོ། །ཉན་ཐོས་འདས་པའི་དུས་ན་དུས་ལས་འདས་པ་རྣམས་ཀྱིས་སྐྱེ་བ་ལུང་བསྟན་ཞེས་བྱ་
བ་ལ། བཅོམ་ལྡན་འདས་ཆུ་བོ་ཅན་ན་མུ་ཛེ་ཀའི་སྤྱིལ་བུ་ན་བཞུགས་ཏེ། དེའི་ཚེ་ཆུ་བོ་ཅན་དུ་སྐྱེ་བོ་མང་པོ་དུས་ལས་འདས་པར་གྱུར་ཏེ། དགེ་བསྙེན་ཀད་ཀ་ཊ་དུས་ལས་འདས་ཤིང༌། ཀ་ཊ་མ་ཀ་ཊ་དང༌། ཀད་ཀ་ཤ་དང༌། སྤྱོད་པ་དང༌། ཉེར་སྤྱོད་དང༌། ལྟས་ཅན་དང༌། ཉེ་ལྟས་ཅན་དང༌། བཟང་པོ་དང༌། རབ་ཏུ་བཟང་པོ་དང༌། གྲགས་པ་དང༌། ཉེ་བར་གྲགས་པ་དང༌། གྲགས་སྦྱིན་དང༌། དགེ་བསྙེན་གྲགས་པའི་ལྷ་དག་དུས་ལས་འདས་པར་གྱུར་ཏོ། །དེ་ནས་དགེ་སློང་རབ་ཏུ་མང་པོ་སྔ་དྲོ་ཆོས་གོས་དང་ལྷུང་བཟེད་ཐོགས་ཏེ་ཆུ་བོ་ཅན་དུ། བསོད་སྙོམས་ཀྱི་ཕྱིར་ཞུགས་ཏེ། དགེ་སློང་རབ་ཏུ་མང་པོ་དེ་དག་ཆུ་བོ་ཅན་ན་བསོད་སྙོམས་སྤྱོད་པ་ན། ཆུ་བོ་ཅན་ན་སྐྱེ་བོ་མང་པོ་དུས་ལས་འདས་པར་གྱུར་ཏེ། དགེ་བསྙེན་ཀད་ཊ་ཀ་དུས་ལས་འདས་ཤིང༌། ཀ་ཊ་མ་ཀ་ཊ་དང༌། ཀད་ཀ་ཤ་དང༌། སྤྱོད་པ་དང༌། ཉེར་སྤྱོད་དང༌། ལྟས་ཅན་དང༌། ཉེ་ལྟས་ཅན་དང༌། བཟང་པོ་དང༌། རབ་ཏུ་བཟང་པོ་དང༌། གྲགས་པ་དང༌། ཉེ་བར་གྲགས་པ་དང༌། གྲགས་སྦྱིན་དང༌། དགེ་བསྙེན་གྲགས་པའི་བླ་མ་དག་དུས་ལས་འདས་པར་གྱུར་ཏོ་ཞེས་ཐོས་ཏེ། ཐོས་ནས་བསོད་སྙོམས་སྤྱད་དེ་ཟས་ཀྱི་བྱ་བ་བྱས་ཤིང་ཟོས་པའི་འོག་ཏུ་ལྟུང་བཟེད་བཀྲུས་ཏེ། ཆོས་གོས་དང་ལྷུང་བཟེད་མཐའ་གཅིག་ཏུ་བཞག་སྟེ། རྐང་པ་བཀྲུས་ནས་བཅོམ་ལྡན་འདས་གང་ན་བ་དེར་ཉེ་བར་སོང་སྟེ། ཉེ་བར་སོང་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་བྱས་ནས་ཕྱོགས་གཅིག་ཏུ་འདུག་གོ ། ཕྱོགས་གཅིག་ཏུ་འདུག་ནས་དགེ་བསྙེན་རབ་ཏུ་མང་པོ་དེ་དག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་འདི་ན་བདག་ཅག་དགེ་སློང་རབ་ཏུ་མང་པོ་ཆོས་གོས་དང་ལྷུང་བཟེད་ཐོགས་ཏེ་ཆུ་བོ་ཅན་དུ་བསོད་སྙོམས་ཀྱི་ཕྱིར་ཞུགས་ཏེ། བཙུན་པ་བདག་ཅག་དགེ་སློང་རབ་ཏུ་མང་པོ་ཆུ་བོ་ཅན་ན་བསོད་སྙོམས་སྤྱོད་པ་ན་ཆུ་བོ་ཅན་དུ་སྐྱེ་བོ་མང་པོ་དུས་ལས་འདས་པར་གྱུར་ཏེ། དགེ་བསྙེན་ཀད་ཀ་ཊ་དུས་ལས་འདས་ཤིང༌། ཀ་ཊ་མ་ཀ་ཊ་དང༌། ཀད་ཀ་ཤ་དང༌། སྤྱོད་པ་དང༌། ཉེར་སྤྱོད་དང༌། ལྟས་ཅན་དང༌། ཉེ་ལྟས་ཅན་དང༌། བཟང་པོ་
དང། རབ་ཏུ་བཟང་པོ་དང༌། གྲགས་པ་དང༌། ཉེ་བར་གྲགས་པ་དང༌། གྲགས་སྦྱིན་དང༌། དགེ་བསྙེན་གྲགས་པའི་བླ་མ་དག་དུས་ལས་འདས་པར་གྱུར་ཏོ་ཞེས་ཐོས་ན། བཙུན་པ་དེ་དག་གི་འགྲོ་བ་ནི་གང༌། སྐྱེ་བ་ནི་གང༌། འཇིག་རྟེན་ཕ་རོལ་ནི་གང་ཞིག་ཡིན། དགེ་སློང་དག་དགེ་བསྙེན་ཀད་ཀ་ཊ་ནི་ཐ་མའི་ཆ་དང་མཐུན་པའི་ཀུན་དུ་སྦྱོར་བ་ལྔ་སྤངས་ཤིང་འཇིག་རྟེན་འདིར་ཕྱིར་མི་འོང་པའི་ཆོས་ཅན་སྐྱེས་ནས་ཡོངས་སུ་མྱ་ངན་ལས་འདས་པའི་ཕྱིར་མི་འོང་བའོ། །དགེ་སློང་དག་དགེ་བསྙེན་ཀ་ཊ་མ་ཀ་ཊ་དང༌། ཀད་ཀ་ཤ་དང༌། སྤྱོད་པ་དང༌། ཉེར་སྤྱོད་དང༌། བཟང་པོ་དང༌། རབ་ཏུ་བཟང་པོ་དང༌། གྲགས་པ་དང༌། ཉེ་བར་གྲགས་པ་དང༌། གྲགས་སྦྱིན་དང༌། དགེ་བསྙེན་གྲགས་པའི་བླ་མ་དག་ཀྱང་ཐ་མའི་ཆ་དང་མཐུན་པའི་ཀུན་དུ་སྦྱོར་བ་ལྔ་སྤངས་ཤིང་འཇིག་རྟེན་འདིར་ཕྱིར་མི་ལྡོག་པའི་ཆོས་ཅན་སྐྱེས་ནས་ཡོངས་སུ་མྱ་ངན་ལས་འདའ་བའི་ཕྱིར་མི་འོང་བའོ། །དགེ་སློང་དག་ཆུ་བོ་ཅན་དུ་དགེ་སློང་ཕྱེད་དང་སུམ་བརྒྱ་ལྷག་ཅིག་དུས་ལས་འདས་པ་དེ་དག་ཐ་མའི་ཆ་དང་མཐུན་པའི་ཀུན་དུ་སྦྱོར་བ་ལྔ་སྤངས་ཤིང་འཇིག་རྟེན་འདིར་ཕྱིར་མི་ལྡོག་པའི་ཆོས་ཅན་སྐྱེས་ནས་ཡོངས་སུ་མྱ་ངན་ལས་འདའ་བའི་ཕྱིར་མི་འོང་བར་གྱུར་ཏོ། །དགེ་སློང་དག་ཆུ་བོ་ཅན་དུ་དགེ་སློང་སུམ་བརྒྱ་ལྷག་ཅིག་དུས་ལས་འདས་པར་གྱུར་པ་དེ་དག་ནི་ཀུན་དུ་སྦྱོར་པ་གསུམ་སྤངས་ཤིང༌། འདོད་ཆགས་དང༌། ཞེ་སྡང་དང༌། གཏི་མུག་གསུམ་བསྲབས་པར་གྱུར་པ་འཇིག་རྟེན་འདིར་ལན་ཅིག་ཕྱིར་འོངས་ནས་སྡུག་བསྔལ་མཐར་བྱེད་པར་འགྱུར་བའི་ལན་ཅིག་ཕྱིར་འོང་བར་གྱུར་ཏོ། །དགེ་སློང་དག་ཆུ་བོ་ཅན་དུ་དགེ་བསྙེན་ལྔ་བརྒྱ་ལྷག་ཅིག་དུས་ལས་འདས་པར་གྱུར་པ་དེ་དག་ནི་ཀུན་དུ་སྦྱོར་བ་གསུམ་སྤངས་ཤིང་རྫོགས་པའི་བྱང་ཆུབ་ཏུ་ངེས་ཤིང་མི་ལྟུང་བའི་ཆོས་ཅན་མཆོག་ཏུ་ཐོགས་ན་སྲིད་པ་ལན་བདུན་པ། ལྷ་དང་མི་རྣམས་སུ་ལན་བདུན་དུ་ཉིང་མཚམས་སྦྱར་ནས། སྡུག་བསྔལ་མཐར་བྱེད་པར་འགྱུར་བའི་རྒྱུན་དུ་ཞུགས་པར་གྱུར་ཏོ། །དགེ་སློང་དག་ཁྱེད་ཅག་དེ་བཞིན་གཤེགས་པ་ལ་དུས་ལས་འདས་ཤིང༌། དུས་ལས་འདས་པ་དག་གི་དྲི་བ་འདྲི་འམ། བཙུན་པ་དེ་བཞིན་ནོ། །འདིས་དེ་བཞིན་གཤེགས་
པ་རེག་པར་མི་གནས་ཤིང༌། དེ་བཞིན་གཤེགས་པ་ལ་གནོད་པ་བྱས་པར་གྱུར་ཏེ། འོན་ཀྱང་སྐྱེས་པ་དག་འཆི་ཞིང་དུས་བྱེད་པར་འགྱུར་ཏེ། འདི་ལ་ངོ་མཚར་བ་ཅི་ཞིག་ཡོད་དེ། དེ་བཞིན་གཤེགས་པ་རྣམས་བྱུང་ཡང་རུང༌། དེ་བཞིན་གཤེགས་པ་རྣམས་མ་བྱུང་ཡང་རུང། ཆོས་རྣམས་ཀྱི་ཆོས་ཉིད་འདི་ནི་གནས་པ་སྟེ། ཆོས་ཉིད་གནས་པ་དེ་ཉིད་དེ་བཞིན་གཤེགས་པས་རང་ཉིད་ཀྱིས་མངོན་པར་མཁྱེན་ནས་མངོན་པར་རྫོགས་པར་སངས་རྒྱས་ཏེ་རབ་ཏུ་འདོགས་པར་མཛད་ཅིང་རབ་ཏུ་འཇོག་པར་མཛད་པ་དང༌། རབ་ཏུ་འབྱེད་པ་དང༌། རབ་ཏུ་འགྲེལ་བ་དང། རབ་ཏུ་སྟོན་པ་དང༌། རབ་ཏུ་གསལ་བར་མཛད་དེ། འདི་ལྟར་འདི་ཡོད་པའི་ཕྱིར་འདི་འབྱུང༌། འདི་སྐྱེས་པའི་ཕྱིར་འདི་སྐྱེ་སྟེ། འདི་ལྟར་མ་རིག་པའི་རྐྱེན་གྱིས་འདུ་བྱེད་རྣམས་དང༌། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་དང༌། རྣམ་པར་ཤེས་པའི་རྐྱེན་གྱིས་མིང་དང་གཟུགས་དང༌། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་དང༌། སྐྱེ་མཆེད་དྲུག་གི་རྐྱེན་གྱིས་རེག་པ་དང༌། རེག་པའི་རྐྱེན་གྱིས་ཚོར་བ་དང༌། ཚོར་བའི་རྐྱེན་གྱིས་སྲེད་པ་དང༌། སྲེད་པའི་རྐྱེན་གྱིས་ལེན་པ་དང༌། ལེན་པའི་རྐྱེན་གྱིས་སྲིད་པ་དང༌། སྲིད་པའི་རྐྱེན་གྱིས་སྐྱེ་བ་དང༌། སྐྱེ་བའི་རྐྱེན་གྱིས་རྒ་ཤི་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་རྣམས་ཀུན་དུ་འབྱུང་སྟེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཞིག་ཡང་དག་པར་འབྱུང་བར་འགྱུར་རོ། །འདི་མེད་པས་འདི་མི་འབྱུང་འདི་འགགས་པས་འདི་འགག་སྟེ། འདི་ལྟ་སྟེ། མ་རིག་པ་འགགས་པས་འདུ་བྱེད་འགག་པར་འགྱུར་ཞིང༌། འདུ་བྱེད་འགགས་པས་རྣམ་པར་ཤེས་པ་འགག །རྣམ་པར་ཤེས་པ་འགགས་པས་མིང་དང་གཟུགས་འགག །མིང་དང་གཟུགས་འགགས་པས་སྐྱེ་མཆེད་དྲུག་འགག །སྐྱེ་མཆེད་དྲུག་འགགས་པས་རེག་པ་འགག །རེག་པ་འགགས་པས་ཚོར་བ་འགག །ཚོར་བ་འགགས་པས་སྲེད་པ་འགག །སྲེད་པ་འགགས་པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་སྐྱེ་བ་
འགག །སྐྱེ་བ་འགགས་པས་རྒ་བ་དང༌། ན་བ་དང༌། འཆི་བ་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་རྣམས་ཀུན་དུ་འགག་ཅིང༌། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཞིག་ཡང་དག་པར་འགག་པར་འགྱུར་རོ། །དགེ་སློང་དག་གཞན་ཡང་ཆོས་ཀྱི་མེ་ལོང་ཞེས་བྱ་བའི་ཆོས་ཀྱི་རྣམ་གྲངས་བསྟན་པར་བྱ་སྟེ། དེ་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་པར་བྱའོ། །ཆོས་ཀྱི་མེ་ལོང་ཞེས་བྱ་བའི་ཆོས་ཀྱི་རྣམ་གྲངས་གང་ཞེ་ན། སངས་རྒྱས་ལ་ཤེས་ནས་དད་པ་ཆོས་ཀྱི་མེ་ལོང་གི་ཆོས་ཀྱི་རྣམ་གྲངས་དང༌། ཆོས་དང་དགེ་འདུན་ལ་ཤེས་ནས་དད་པ་ཆོས་ཀྱི་མེ་ལོང་གི་ཆོས་ཀྱི་རྣམ་གྲངས་དང༌། འཕགས་པ་དགྱེས་པའི་ཚུལ་ཁྲིམས་ཆོས་ཀྱི་མེ་ལོང་གི་ཆོས་ཀྱི་རྣམ་གྲངས་སོ། །འདི་ནི་ཆོས་ཀྱི་མེ་ལོང་གི་ཆོས་ཀྱི་རྣམ་གྲངས་ཞེས་བྱའོ། །དགེ་སློང་དག་ཆོས་ཀྱི་མེ་ལོང་ཞེས་བྱ་བའི་ཆོས་ཀྱི་རྣམ་གྲངས་བསྟན་པར་བྱའོ་ཞེས་ངས་ཇི་སྐད་དུ་བསྟན་པ་དེ་རྒྱས་པར་རབ་ཏུ་བཤད་དོ་ཞེས་གསུངས་སོ། །བདེན་པར་གནས་པའི་བདག་མེད་དོ་ཞེས་བྱ་བ་ནི་ལྟ་བའི་གནས་སུ་གསུངས་ཏེ་ཞེས་བྱ་བ་ལ། ལུང་བར་མ་བདུན་པའི་སྡོམ་གྱི་ཚིགས་སུ་བཅད་པ་དང་པོ་ལས་ཟག་པ་བསྟན་ཅིང་བཤད་པའི་མདོ་ལས་འབྱུང་བ། མཛོད་ཀྱི་གནས་གཉིས་པ་འདི་ཉིད་དུ་རྒྱུ་དང་འབྲས་བུ་བསམ་པར། བྱེད་རྒྱུ་ཞེས་བྱ་བདག་པོར་བཤད། །ཅེས་བྱ་བར་མི་ཤེས་ན་ཞེས་བྱ་བར་བྲིས་ཟིན་ཏེ། དེ་ལས་འདི་ལྟར་འདོན་ཏེ། དེ་ཚུལ་བཞིན་མ་ཡིན་པ་ཡིད་ལ་བྱེད་པ་ན་ལྟ་བའི་གནས་དྲུག་པོ་རྣམས་ལས་གང་ཡང་རུང་བ་ཞིག་ཡང་དག་པར་སྐྱེ་ཞིང་སྐྱེ་བར་འགྱུར་ཏེ། བདེན་པར་གནས་པའི་བདག་མེད་དོ། །ཞེས་འདི་ལྟ་བུའི་ལྟ་བའི་གནས་དང་པོ་ཡང་དག་པར་སྐྱེ་ཞིང་སྐྱེ་བར་འགྱུར་རོ། །བདེན་པར་གནས་པའི་བདག་མེད་དོ། །ཞེས་འདི་ལྟ་བུའི་ལྟ་བའི་གནས་གཉིས་པ་ཡང་དག་པར་སྐྱེ་ཞིང་སྐྱེ་བར་འགྱུར་བ་དང༌། བདག་གིས་བདག་མཐོང་ངོ་ཞེས་འདི་ལྟ་བུའི་ལྟ་བའི་གནས་གསུམ་པ་ཡང་དག་པར་སྐྱེ་ཞིང་སྐྱེ་བར་འགྱུར་བ་དང༌། བདག་གིས་བདག་མེད་པ་མཐོང་ངོ་ཞེས་འདི་ལྟ་བུའི་ལྟ་བའི་གནས་བཞི་པ་ཡང་དག་པར་སྐྱེ་ཞིང་སྐྱེ་བར་འགྱུར་བ་དང༌། བདག་མེད་པས་བདག་མཐོང་ངོ་ཞེས་འདི་ལྟ་བུའི་ལྟ་བའི་གནས་ཡང་དག་པར་སྐྱེ་ཞིང་སྐྱེ་བར་འགྱུར་བ་དང༌། འདི་ནི་བདག་གམ། སེམས་ཅན་ནམ། སྲོག་གམ། སྐྱེ་བའམ། གསོ་བའམ། གང་ཟག་གམ། ཤེད་ལས་སྐྱེས་པའམ། ཤེད་བུའམ། བྱེད་པ་པོའམ། བྱེད་དུ་འཇུག་པ་པོའམ།
སྐྱེད་པ་པོའམ་ཡང་དག་པར་སྐྱེད་པ་པོའམ། སློང་བ་པོའམ་ཀུན་ནས་སློང་བ་པོའམ། ཚོར་བ་པོའམ་རབ་ཏུ་ཚོར་བ་པོའམ། སྐྱེད་པ་དགེ་བ་དང་མི་དགེ་བའི་ལས་དེ་དང་དེ་དག་བྱས་ཤིང་བྱས་ནས་འབྲས་བུ་རྣམ་པར་སྨིན་པ་སོ་སོར་ཉམས་སུ་མྱོང་བར་བྱེད་ཅིང་གང་ཡང་ཕུང་པོ་འདི་རབ་ཏུ་སྤོང་ཞིང་མ་འོངས་པའི་ཕུང་པོ་གཞན་ལེན་པར་བྱེད་པ། ད་ལྟར་དེ་མེད་ཅིང་མ་བྱུང་འབྱུང་པར་མི་འགྱུར། དེ་ལྟར་མེད་དོ་ཞེས་འདི་ལྟ་བུའི་ལྟ་བའི་གནས་དྲུག་པ་སྐྱེ་ཞིང་ཡང་དག་པར་སྐྱེ་བར་འགྱུར་རོ་ཞེས་གསུངས་སོ། །བཅོམ་ལྡན་འདས་ཀྱིས་སེམས་ཅན་མ་རིག་པས་བསྒྲིབས་ཤིང་ཞེས་བྱ་བ་ལ་ཕུང་པོ་ལས་སངས་རྒྱས་རྣམ་པར་བཤད་པའི་ཐོག་མ་དང་ཐ་མ་མེད་པའི་མདོ་ལས་འདི་ལྟར་འདོན་ཏེ། དགེ་སློང་དག་སེམས་ཅན་མ་རིག་པས་ཀུན་དུ་བསྒྲིབས་ཤིང་སྲིད་པའི་ཀུན་དུ་སྦྱོར་བ་དང༌། སྲིད་པའི་སྲད་བུས་བཅིངས་ཤིང་འཁོར་བར་ཉིང་མཚམས་སྦྱོར་བ་རྣམས་ཀྱི་སྡུག་བསྔལ་སྔོན་གྱི་མཐར་གདགས་པ་མེད་ཅིང་འཁོར་བ་ལ་ཐོག་མ་མེད་དོ་ཞེས་གསུངས་སོ། །བཅོམ་ལྡན་འདས་ཀྱིས་ང་དེའི་ཚེ་དེའི་དུས་ན་མིག་བཟངས་ཞེས་བྱ་བའི་སྟོན་པར་གྱུར་ཏེ་ཞེས་གསུངས་ཞེས་བྱ་བ་ལ། ལུང་བར་མ་བདུན་པའི་སྡོམ་གྱི་ཚིགས་སུ་བཅད་པ་དང་པོའི་མདོ་བརྒྱད་པ་ཉི་མ་བདུན་པ་ཞེས་བྱ་བ་ལས་འབྱུང་བ་མཛོད་ཀྱི་གནས་གསུམ་པར། འཇིག་པའི་བསྐལ་པའི་དམྱལ་བ་ཡི། །སྲིད་པ་མེད་ནས་སྣོང་ཟད་པར། །ཞེས་བྱ་བའི་སྐབས་སུ་བྲིས་ཟིན་ཏོ།། མདོ་ལས་བདག་ཡོད་ན་བདག་གིར་ལྟ་བ་འབྱུང་བར་འགྱུར་རོ་ཞེས་གསུངས་ཞེས་བྱ་བ་ལ། བར་མ་ཡང་དག་པར་ལྡན་པའི་མདོ་ཉི་ཤུ་བ་ལས་འདི་ལྟར་འདོན་ཏེ། དགེ་སློང་དག་ཁྱེད་ཅག་གིས་མཐོང་ངམ། གང་གི་ཚེ་བདག་ཏུ་སྨྲ་བ་ཉེ་བར་ལེན་པས་བདག་ཏུ་སྨྲ་བ་ཉེ་བར་ལེན་པ་དེའི་ཚེ་རྟག་པ་དང་བརྟན་པ་དང་གཡུང་དྲུང་དང་མི་འགྱུར་བའི་ཆོས་ཅན་དག་ཡང་དག་པར་གནས་སམ། བཙུན་པ་མ་ལགས་སོ། །དགེ་སློང་དག་འདི་ཇི་སྙམ་དུ་སེམས། བདག་ཡོད་ན་བདག་གི་འབྱུང་བར་འགྱུར་ཞིང༌། བདག་གི་ཡོད་ན་བདག་འབྱུང་བར་འགྱུར་རམ། བཙུན་པ་དེ་དེ་བཞིན་ནོ། །དགེ་སློང་དག་འདི་ཇི་སྙམ་དུ་སེམས། བདག་ཡོད་ན་བདག་གི་ཞེས་བྱ་བ་ནི་ལྟ་བའི་གནས་ཏེ། མཆོག་ཏུ་འཛིན་པའི་ཕྲ་རྒྱས་སོ། །བདག་དང་འཇིག་རྟེན་རྟག་པ། བརྟན་པ་དང༌། གཡུང་དྲུང་དང༌། མི་འགྱུར་བའི་ཆོས་ཅན་ཡང་དག་པར་གནས་པ་འདི་ནི་མི་སྲིད་དོ། །བཙུན་པ་དེ་བཞིན་ནོ། །དགེ་སློང་དག་དེའི་ཕྱིར་གཟུགས་འདས་པའམ། མ་འོངས་པའམ། ད་ལྟར་བྱུང་བའམ། ནང་གི་འམ། ཕྱིའི་འམ།
རགས་པའམ། ཕྲ་པའམ། དམན་པའམ། གྱ་ནོམ་པའམ། གང་ཐག་རིང་བའམ། གང་ཐག་ཉེ་བའམ། དེ་ཐམས་ཅད་བདག་མ་ཡིན་བདག་ཀྱང་དེ་དག་མ་ཡིན་ཞིང་དེ་དག་བདག་གི་མ་ཡིན་ནོ་ཞེས་ཡང་དག་པའི་ཤེས་རབ་ཀྱིས་བལྟ་བར་བྱའོ། །ཚོར་བ་གང་ཅི་ཡང་རུང་བ་དང༌། འདུ་ཤེས་གང་ཅི་ཡང་རུང་བ་དང་གང་ཡང་མཐོང་བ་དང་ཐོས་པ་དང་རྣམ་པར་ཤེས་པ་དང་ཐོབ་པ་དང་ཡོངས་སུ་ཚོལ་བ་དང་ཡིད་ལ་ཡིད་ཀྱི་རྗེས་སུ་རྣམ་པར་རྟོག་པ་དང་རྗེས་སུ་དཔྱོད་པ་དེ་ཐམས་ཅད་བདག་མ་ཡིན་ལ་བདག་ཀྱང་དེ་དག་མ་ཡིན་ཞིང་འདི་དག་བདག་གིས་བདག་མ་ཡིན་ནོ་ཞེས་ཡང་དག་པའི་ཤེས་རབ་ཀྱིས་ཇི་ལྔ་བ་བཞིན་བལྟ་བར་བྱའོ་ཞེས་གསུངས་སོ། །འོ་ན་མདོ་ལས་རྣམ་པར་ཤེས་པ་དེ་ཡོངས་སུ་ཤེས་སོ་ཞེས་བྱ་བ་ལ། ཇི་ལྟར་རེ་ཞིག་མཛོད་ཀྱི་གནས་དགུ་པ་འདི་ཉིད་དུ་ཤེས་རབ་དང་རྣམ་པར་ཤེས་པ་དག་ནི་ཡུལ་མཚུངས་པའི་ཕྱིར་རོ་ཞེས་དེ་དང་དེར་བྲིས་པ་ལས་རྟོགས་པར་བྱའོ། །ཆོས་མངོན་པ་མཛོད་ཀྱི་ཊཱི་ཀ་ཉེ་བར་མཁོ་བ་ཞེས་བྱ་བ་ལས་གནས་དགུ་པ་ཕལ་ཆེར་མདོ་དང་སྦྱར་བའོ། །མདོ་སོགས་ལུང་དང་བྲལ་ཞིང་རྒྱན་མེད་གྱུར་པའི་མཛོད་ཀྱི་རྣམ་པར་བཤད་པ་ནི། །གང་ཕྱིར་དྲི་མེད་གྱུར་ཀྱང་ཟླ་བས་སྟོང་པའི་མཚན་བཞིན་ཡིད་འཕྲོག་བྱེད་པ་མིན། །དེ་ཕྱིར་རིན་ཆེན་རང་བཞིན་ལུང་གིས་རྣམ་པར་བཤད་པ་རབ་ཏུ་བརྒྱན་བྱས་ལས། །དག་པ་གང་ཡོད་དེ་ཡིས་འཇིག་རྟེན་དྲི་མེད་བློ་ཡིས་རབ་ཏུ་བརྒྱན་གྱུར་ཅིག །བལ་པོའི་ཡུལ་དུ་སྐྱེ་བ་རབ་ཏུ་ཐོབ་པར་གྱུར་པའི་དགེ་སློང་ཞིག་ནས་ལྷ་ཡིས་ནི། །ཇི་ལྟར་དྲན་པ་བཞིན་དུ་མཛོད་ལ་མཁོ་བ་ཡོངས་སུ་རྫོགས་པར་ཡང་དག་བསྡུས། །མདོ་གཞན་གང་ཡང་བདག་གིས་ཡོངས་སུ་མ་དྲན་འདི་ནི་ཡང་དག་མ་བསྡུས་པ། །དེ་དག་གང་ཞིག་དྲན་པས་ཡང་དག་བསྡུ་བར་མཛོད་ཅེས་གསོལ་བ་བདག་འདེབས་སོ། །ཆོས་མངོན་པ་མཛོད་ཀྱི་ཊཱི་ཀ་ཉེ་བར་མཁོ་བ་ཞེས་བྱ་བ་དགེ་སློང་ཞི་གནས་ལྷས་ཡང་དག་པར་སྦྱར་བ་རྫོགས་སོ།། །།གསུང་རབ་མདོ་སྡེ་སྟོང་གི་མདོ་ཁུངས་ཀྱི། །ཆོས་མངོན་མཛོད་ཀྱི་བསྟན་བཅོས་བརྒྱན་པ་འདི། །ཁམས་པ་སྟོན་པས་དད་པས་རབ་བསྒྱུར་ལས།། འགྲོ་ཀུན་མངོན་པའི་ཆོས་ཀྱི་དོན་རྟོགས་ཤོག །ཁ་ཆེའི་གྲོང་ཁྱེར་ཆེན་པོ་དཔེ་མེད་ཀྱི་དབུས་ཛ་ར་མེའི་གཙུག་ལག་ཁང་གི་བྱང་ཕྱོགས་ཀྱི་བསིལ་ཁང་དུ། རྒྱ་གར་ཀྱི་མཁན་པོ་ཛཱ་ཡ་ཤྲཱི་དང༌། བོད་ཀྱི་ལོ་ཙཱ་བ་ཁམས་པ་དགེ་སློང་ཤེས་རབ་འོད་ཟེར་གྱིས་ཡང་དག་པར་བསྒྱུར་བའོ།། །།