འདུལ་བ་རྣམ་པར་འབྱེད་པའི་ཚིག་རྣམ་པར་བཤད་པ།
འདུལ་བའི་ལྷ།
རྒྱ་གར་སྐད་དུ། བི་ན་ཡ་བི་བྷཾ་ག་པ་ད་བྱཱ་ཁྱཱ་ན། བོད་སྐད་དུ། འདུལ་བ་རྣམ་པར་འབྱེད་པའི་ཚིག་རྣམ་པར་བཤད་པ། བམ་པོ་དང་པོ། དཀོན་མཆོག་གསུམ་ལ་ཕྱག་འཚལ་ལོ། །ཐུབ་པ་སྲིད་རྒྱུན་ཐམས་ཅད་བྲལ་ལ་ཕྱག་འཚལ་ཏེ། །རྣམ་པར་འཆད་དོན་ཡིད་ལྡན་རྣམ་པར་འབྱེད་པ་ཡི། །ཡུལ་ལ་བསྟོད་པ་ཉམས་པས་ཡིད་ཀྱི་གགས་སྐྱེས་པ། །ཡང་དག་རྣམ་བཤད་ཚུལ་གྱིས་ཞི་བ་ཐོབ་པར་བྱ། །སློབ་མ་གུས་པར་བྱས་ཏེ་འདུལ་བ་ཉན་པ་ལ་ངེས་པར་སྦྱོར་བར་འདོད་པ་ཞིག་གིས་གུས་པ་བསྐྱེད་པའི་ཕྱིར་འདུལ་བའི་ཡོན་ཏན་བརྗོད་པ་ནི་རྣམ་པར་འབྱེད་པའི་དང་པོར་འདུལ་བ་ལ་བསྟོད་པ། འདུལ་བ་རྒྱལ་པོ་རྗེ་ཡི་རིགས་སུ་འཁྲུངས། །སློབ་མ་འདུལ་མཛད་ཉེས་པར་བ་ཐུལ་བ། །སངས་རྒྱས་འདུལ་བའི་གཙོ་ལ་ཕྱག་འཚལ་ཏེ། །འདུལ་བའི་བསྔགས་པ་ཅུང་ཟད་བརྗོད་པར་བྱ། །ཞེས་བྱ་བ་ལ་སོགས་པ་བརྩམས་སོ། །དེ་ལ་འདུལ་བའི་ཡོན་ཏན་དག་ནི་བརྗོད་པར་བྱ་བའོ། །དེ་རྟོགས་པས་འདུལ་བ་ལ་གུས་པ་ནི་
དགོས་པའོ། །གུས་པ་དེ་ཡང་བསྟོད་པ་འདིས་བྱེད་པས་ཐབས་དང་ཐབས་ལས་བྱུང་བའི་ཚུལ་ནི་འབྲེལ་པའོ། །འདུལ་བ་ལ་གུས་པས་ཞུགས་པའི་ཚུལ་ཁྲིམས་ཡོངས་སུ་དག་ན་འཕགས་པའི་ལམ་བསྒོམ་པས་མྱ་ངན་ལས་འདས་པ་ཐོབ་པ་ནི་དགོས་པའི་ཡང་དགོས་པའོ། །དེ་ལ་འདུལ་བ་ཞེས་བྱ་བ་ནི་རང་གི་ཆོས་ལུགས་ལ་གནས་པ་དག་གོ །རྒྱལ་པོ་ཞེས་བྱ་བ་ནི་མིའི་བདག་པོ་དག་གོ །དེ་དག་ནི་དུལ་བ་ཡང་ཡིན་ལ་རྒྱལ་པོ་ཡང་ཡིན་པས་དུལ་བརྒྱལ་པོ་དག་གོ །དེ་དག་གི་རྗེ་ཞེས་བྱ་བ་ནི་རྗེ་བོ་དག་སྟེ། དུལ་བ་རྒྱལ་པོ་དག་གི་རྗེ་དཔོན་མང་པོས་བཀུར་བ་ལ་སོགས་པ་འཁོར་ལོས་སྒྱུར་བ་དག་གོ །དེ་དག་གི་རིགས་ཞེས་བྱ་བ་ནི་རིགས་རྒྱུན་མ་ཆད་པ་སྟེ། དུལ་བ་རྒྱལ་པོ་དག་གི་རྗེའི་རིགས་ཤཱཀྱའི་རིགས་བརྒྱུད་དོ། །དེར་འཁྲུངས་ཞེས་བྱ་བ་ནི་སྐྱེས་པ་སྟེ། གདུལ་བའི་དོན་དུ་གཤེགས་ཤིང་དུལ་བ་རྒྱལ་པོ་དག་གི་རྗེའི་རིགས་སུ་འཁྲུངས་པའོ། །དུལ་བ་རྒྱལ་པོ་དག་གི་རྗེའི་རིགས་སུ་འཁྲུངས་པ་དེ་ལ་ཕྱག་འཚལ་ཏེ་ཞེས་བྱ་བར་སྦྱར་ཏེ། དེ་གང་ཞེ་ན། འོག་ནས་སངས་རྒྱས་ཞེས་འབྱུང་བ་དང་སྦྱར་རོ། །དེ་ཇི་ལྟར་སངས་རྒྱས་ཡིན་ཞེ་ན། དོན་དང་མཐུན་པའི་མཚན་བསྟན་པའི་ཕྱིར། སློབ་
མ་འདུལ་མཛད་ཉེས་པ་རབ་ཐུལ་བ། །ཞེས་བྱ་བ་གསུངས་ཏེ། གང་གིས་སློབ་མ་རྣམས་དངོས་པོ་ཐམས་ཅད་ཀྱི་མཆོག་ཁྱད་པར་དུ་འཕགས་པ་མྱ་ངན་ལས་འདས་པར་ཁྲིད་པར་མཛད། ཐོབ་པར་མཛད་པ་དེ་ནི་སློབ་མ་འདུལ་མཛད་ཅེས་བྱའོ། །གང་གིས་རྒྱུད་ལ་ཀུན་དུ་སྤྱོད་པའི་དྲི་མ་དང། རྣམ་པར་སྨིན་པའི་དྲི་མ་སྐྱོན་ཆགས་པར་བྱེད་པའི་ཉེས་པ་འདོད་ཆགས་ལ་སོགས་པ་མཆོག་ཏུ་རབ་ཏུ་གཞིག་པར་གྱུར་ཅིང་རང་གི་རྒྱུད་ལ་བག་ཆགས་དང་བཅས་པ་གསལ་བར་གྱུར། ཕྱུང་བར་གྱུར་བ་དེ་ནི་ཉེས་པ་རབ་ཏུ་ཐུལ་བ་ཞེས་བྱ་སྟེ། དེ་ལྟ་བུ་དེ་ལ་ཕྱག་འཚལ་ཏེ། ཞེས་བྱ་བར་སྦྱོར་གྱི་ཐམས་ཅད་ལ་ནི་མ་ཡིན་ནོ། །དེ་ལ་ཉེས་པ་རབ་ཐུལ་བ་ཞེས་བྱ་བ་ཉིད་ཀྱིས་ནི་ཉོན་མོངས་པ་བག་ཆགས་དང་བཅས་པ་སྤངས་པ་ཐུན་མོང་མ་ཡིན་པ་ཉེ་བར་བསྟན་ནས་གཏི་མུག་གི་གཉིད་མ་ལུས་པ་དང་བྲལ་བའི་ཕྱིར་སངས་རྒྱས་ཉིད་བདག་ལ་ཕན་པ་ཕུན་སུམ་ཚོགས་པ་སྟོན་ཏོ། །སློབ་མ་འདུལ་མཛད་ཅེས་བྱ་བ་ཉིད་ཀྱིས་ནི་དངོས་པོ་ཐམས་ཅད་ངེས་པར་ཐུགས་སུ་ཆུད་པའི་ཕྱིར་སངས་རྒྱས་ཉིད་གཞན་ལ་ཕན་པ་ཕུན་སུམ་ཚོགས་པ་བསྟན་ཏེ། འདི་ལྟར་ཐམས་ཅད་མཁྱེན་པ་ཉིད་མ་ཡིན་པས་ན་རང་དབང་ཉིད་ཀྱིས་འདུལ་བའི་དོན་ཐམས་ཅད་ཇི་ལྟ་བ་བཞིན་དུ་བསྒྲུབ་པར་མི་ནུས་ཏེ། དེ་ལ་ཉེ་བར་སྦྱར་བར་བྱ་བའི་དོན་རྣམས་རྣམ་པ་ཐམས་ཅད་དུ་ཁོང་དུ་མ་ཆུད་པའི་ཕྱིར་རོ། །དེ་ལྟར་བདག་ལ་ཕན་པ་ཕུན་སུམ་ཚོགས་པ་དང༌། གཞན་ལ་ཕན་པ་ཕུན་སུམ་ཚོགས་པ་དང་ལྡན་པ་དེ་གང་ཞེ་ན། དེའི་ཕྱིར་སངས་རྒྱས་ཞེས་བྱ་བ་གསུངས་ཏེ། དོན་ཐམས་ཅད་ངེས་པར་ཐུགས་སུ་ཆུད་པའི་ཕྱིར་རམ། ཉོན་མོངས་པ་བག་ཆགས་དང་བཅས་པའི་གཉིད་ཐམས་ཅད་དང་བྲལ་བའི་ཕྱིར་བཅོམ་ལྡན་འདས་ནི་སངས་རྒྱས་ཞེས་བྱ་སྟེ། དེ་ལ་ཕྱག་འཚལ་ཏེ་ཞེས་བྱ་བར་སྦྱོར་རོ། །དེ་ལ་ཕྱག་འཚལ་ཏེ་ཅི་ཞིག་རྗོད་པར་བྱེད་ཅེ་ན། འོག་ནས་འདུལ་བའི་བསྔགས་པ་ཅུང་ཟད་བརྗོད་པར་བྱ་ཞེས་འབྱུང་བ་བརྗོད་པར་བྱའོ། །འོ་ན་རང་དབང་ཉིད་ཀྱིས་འདུལ་བའི་བསྔགས་པ་བརྗོད་པར་བྱ་བ་ལ། ཅིའི་ཕྱིར་སངས་རྒྱས་བཅོམ་ལྡན་འདས་ལ་ཕྱག་འཚལ་ཏེ། འདུལ་བའི་བསྔགས་པ་བརྗོད་པར་བྱེད་ཅེ་ན་དེའི་ཕྱིར་འདུལ་བའི་གཙོ་ཞེས་བྱ་བ་
གསུངས་ཏེ། འདི་ལྟར་སངས་རྒྱས་བཅོམ་ལྡན་འདས་དེ་ནི་འདུལ་བ་འདིའི་གཙོ་བོ་དངོས་ཡིན་ཏེ། འཇུག་པར་མཛད་པ་ཡིན་པའི་ཕྱིར་རོ། །དེའི་ཕྱིར་དེ་ལ་ཕྱག་འཚལ་ཏེ་འདུལ་བའི་བསྔགས་པ་བརྗོད་པར་བྱའོ་ཞེས་བྱ་བར་སྦྱར་རོ། །འདིས་ནི་སྟོན་པར་མཛད་པ་ཉེ་བར་བསྟན་ནས་འདུལ་བ་ལ་སློབ་མ་དད་པས་རྗེས་སུ་འབྲང་བ་རྣམས་ཀྱི་གུས་པ་སྐྱེད་པར་བྱེད་དོ། །དེ་ལྟར་དུལ་བ་རྒྱལ་པོ་དག་གི་རྗེའི་རིགས་སུ་འཁྲུངས་པ། སློབ་མ་རྣམས་འདུལ་བར་མཛད་པ། ཉེས་པ་རྣམས་རབ་ཏུ་ཐུལ་བའི་སངས་རྒྱས་འདུལ་བའི་གཙོ་བོ་དེ་ལ་ཕྱག་འཚལ་ཏེ་ཞེས་བྱ་བ་ནི་ལུས་དང་ངག་དང་ཡིད་དག་གིས་ཕྱག་འཚལ་པའོ། །ཏེ་ཞེས་བྱ་བའི་སྒྲ་ནི་བརྗོད་པར་བྱ་བ་འོག་ནས་འབྱུང་བ་འདྲེན་པར་བྱའོ་ཞེས་དམ་བཅས་པ་ལ་ལྟོས་པའི་ཚིག་ཡིན་ནོ། །དེ་ལྟར་སངས་རྒྱས་བཅོམ་ལྡན་འདས་ལ་ཕྱག་འཚལ་ཏེ། ཇི་ཞིག་རྗོད་པར་བྱེད་ཅེ་ན། དེའི་ཕྱིར་འདུལ་བའི་བསྔགས་པ་ཅུང་ཟད་བརྗོད་པར་བྱ་ཞེས་བྱ་བ་གསུངས་ཏེ། བསྔགས་པ་བརྗོད་པར་བྱའོ་ཞེས་བྱ་བར་སྦྱར་རོ། །གང་གི་བསྔགས་པ་ཞེ་ན། དེའི་ཕྱིར་འདུལ་བའི་ཞེས་བྱ་བ་གསུངས་ཏེ། གང་གིས་སློབ་མ་རྣམས་མྱ་ངན་ལས་འདའ་བར་འགྲོ་བའི་ཚོགས་ལ་བྱེ་བྲག་ཏུ་འཁྲིད་ཅིང་སློབ་པར་བྱེད་པ་དེ་ནི་འདུལ་བ་ཞེས་བྱའོ། །དེ་ཡང་བྱ་བ་དང་བྱ་བ་མ་ཡིན་པ་ཉེ་བར་སྟོན་པའི་གཞུང་སྟོང་ཕྲག་བརྒྱ་པའི་ཚད་ལ་བྱ་སྟེ་དེའིའོ། །དེའི་བསྔགས་པ་ཞེས་བྱ་བ་ནི་དེ་བསྔགས་པར་བྱ་བ་ཡིན་པས་བསྔགས་པ་སྟེ་ཡོན་ཏན་ནོ། །ཅི་དེའི་བསྔགས་པ་ཐམས་ཅད་རྗོད་པར་བྱེད་དམ་ཞེ་ན། དེའི་ཕྱིར་ཅུང་ཟད་ཅེས་བྱ་བ་གསུངས་ཏེ། བདག་ཉིད་རང་གི་ཐོས་པ་དང་བསམ་པ་གང་ཡིན་པ་དེའི་ཕྱོགས་འགར་གྱུར་པའི་བསྔགས་པ་བརྗོད་པར་བྱའོ། །ཐམས་ཅད་ནི་མ་ཡིན་ཏེ། དེའི་རྣམ་པ་ཐམས་ཅད་ནི་བདག་དང་འདྲ་བ་དག་གིས་བརྗོད་པར་མི་ནུས་སོ་སྙམ་དུ་བསམས་སོ། །དེ་ལྟར་ན་འདིར་སྤྱིའི་དོན་འདི་ཡིན་ཏེ། སློབ་མ་རྣམས་གུས་པ་བསྐྱེད་པར་བྱ་བའི་ཕྱིར་དང༌། གདུལ་བའི་བྱ་བ་སྒྲུབ་པའི་ཕྱིར་སངས་རྒྱས་བཅོམ་ལྡན་འདས་འཁོར་ལོས་སྒྱུར་བའི་རིགས་སུ་གཤེགས་པ་བདག་དང་གཞན་ལ་ཕན་པ་ཕུན་སུམ་ཚོགས་པ་བླ་ན་མེད་པ་རྗེས་སུ་བསྒྲུབ་པ་འདུལ་བ་སྟོན་པར་མཛད་པ་ལ་ཕྱག་
འཚལ་ཏེ། འདུལ་བ་སྨྲ་བར་འདོད་པའི་ཡོན་ཏན་རང་གི་བློ་དང་མཐུན་པ་ཅུང་ཟད་ཅིག་བརྗོད་པར་བྱའོ་ཞེས་བསྟན་ཏོ། །ཅིའི་ཕྱིར་བསྔགས་པ་རྗོད་པར་མི་བྱེད་ཅེ་ན། དེའི་ཕྱིར། ཕ་རོལ་མ་མཐོང་གཏིང་རྟོགས་མ་གྱུར་ཅིང༌། །གླགས་པའི་མུན་ནག་སློབ་དཔོན་ཚོགས་རྣམས་ཀྱི། །དབྱེ་བས་ཐ་དད་འདུལ་བརྒྱ་མཚོ་ལ། །ཡོན་ཏན་ཀུན་བསྟོད་རྩོལ་བློ་བདག་ལ་མེད། །ཅེས་བྱ་བ་གསུངས་ཏེ། །གང་གི་ཕྱིར་བདག་གིས་འདུལ་བ་རྒྱ་མཚོ་འདིའི་ཕ་རོལ་མྱ་ངན་ལས་འདས་པའི་འགྲམ་གཉིས་པ་མ་མཐོང་ལ། བདག་གིས་འདི་འཇུག་པར་མཛད་པ་དེ་བཞིན་གཤེགས་པའི་དགོངས་པའི་གཏིང་རྟོགས་པར་མ་གྱུར་ཅིང༌། ངོ་བོ་ཉིད་ཀྱིས་ཀྱང་འཁོར་ལོ་ལྟ་བུའི་འདྲེས་ལ་སོགས་པའི་དབའ་གློང་དག་གིས་གླགས་པའི་མུན་ནག་ལ་རྣམ་པར་བཤད་པ་བྱེད་པའི་སློབ་དཔོན་གྱི་ཚོགས་རྣམས་ཀྱི་བློའི་དབྱེ་བས་རྣམ་པ་སྣ་ཚོགས་ཐ་དད་པར་གྱུར་པ་དེའི་ཕྱིར་འདུལ་བ་རྒྱ་མཚོ་ལྟ་བུ་འདི་ལ་ཡོན་ཏན་ཀུན་གྱིས་བསྟོད་པར་རྩོལ་ཞིང་འབད་པའི་བློ་གྲོས་བདག་ལ་མེད་པས་དེ་ན་བསྔགས་པ་ཅུང་ཟད་བརྗོད་པར་བྱའི་ཐམས་ཅད་ནི་མ་ཡིན་ནོ་ཞེས་བྱ་བའི་ཐ་ཚིག་གོ །འོ་ན་འདུལ་བའི་བསྔགས་པ་དེ་སྨོས་ཤིག་ཅེ་ན། དེའི་ཕྱིར། ཇི་ལྟར་འདི་ན་ཤིང་རྩ་གཙོ་བོ་སྟེ། །རྣམ་པར་འཕེལ་དང་ཀུན་འཛིན་གཉིས་ཀྱི་གཞི། །དེ་བཞིན་དམ་ཆོས་ཚོགས་རྣམས་ཀུན་གྱི་ཡང༌། །རྒྱུ་དང་རྩ་བ་འདུལ་བ་ཡིན་པར་གསུངས། །ཞེས་བྱ་བ་གསུངས་ཏེ། དེ་ལ་རྣམ་པར་འཕེལ་དང་ཞེས་བྱ་བ་ནི་ཁྱད་པར་དུ་འཕེལ་བ་སྟེ། ཡལ་ག་དང་ཡལ་ག་གྱེས་པ་ལ་སོགས་པ་སྐྱེ་བའོ། །ཀུན་འཛིན་ཞེས་བྱ་བ་ནི་ཆུད་མི་ཟ་བའོ། །རྣམ་པར་འཕེལ་བ་དང་ཀུན་འཛིན་པ་ནི་གཉིས་ཏེ། དེ་གཉིས་ཀྱི་གཞི་ཞེས་བྱ་བ་རྒྱུའི་གཙོ་བོ་ནི་རྩ་བ་ཡིན་ནོ། །དམ་ཆོས་ཞེས་བྱ་བ་ནི་མཛེས་པའི་ཆོས་ནི་དོན་ཇི་ལྟ་བ་བཞིན་དུ་ཉེ་བར་བསྟན་པའོ། །དེའི་ཚོགས་ཞེས་བྱ་བ་ནི་འདུས་པ་སྟེ། མདོ་སྡེ་དང་ཆོས་མངོན་པ་ལ་སོགས་པའོ། །དམ་པའི་ཆོས་ཀྱི་ཚོགས་དེ་རྣམས་ཀུན་གྱི་རྣམ་པར་འཕེལ་བ་དང་ཀུན་འཛིན་པའི་རྒྱུ་དང་རྩ་བ་ཡང་འདུལ་བ་ཡིན་པར་བདག་ཉིད་ཆེན་པོ་རྣམས་གསུང་ངོ༌། །འདི་སྐད་བསྟན་ཏེ། ཇི་ལྟར་འཇིག་རྟེན་འདི་ན་
ཤིང་ནྱ་གྲོ་དྷ་ལ་སོགས་པ་ཤིང་ལྗོན་པའི་རྩ་བ་སའི་ནང་དུ་སོང་བའི་སྦུ་བས་ན་ཤིང་ལྗོན་པ་རྣམ་པར་འཕེལ་བ་དང་ཀུན་འཛིན་པ་གཉིས་ཀྱི་གཞི་ཞེས་བྱ་བ་རྒྱུའི་གཙོ་བོ་དང་རྒྱུ་དངོས་ཡིན་ཏེ་དང་པོའི་རྒྱུ་ཡིན་པ་དེ་བཞིན་དུ་ཐུབ་པའི་དབང་པོའི་གསུང་རབ་འདི་དག་ཐམས་ཅད་ཀྱི་རྒྱུ་དང་རྩ་བ་ཡང་འདུལ་བའི་སྡེ་སྣོད་ཡིན་པར་གསུངས་ཏེ། འདི་ལྟར་འདུལ་བའི་ས་གཞི་དག་ལ་དམ་པའི་ཆོས་ཀྱི་ཤིང་ལྗོན་པ་རྣམས་ཀྱི་བསམ་གཏན་དང༌། གཟུགས་མེད་པ་དང༌། དགེ་སྦྱོང་གི་ཚུལ་གྱིས་འབྲས་བུ་ལ་སོགས་པ་རྣམ་པར་འཕེལ་བ་དང་མ་ཉམས་པའི་དགེ་སློང་ཉིད་ཀྱི་མཚན་ཉིད་ཀུན་འཛིན་པ་དག་འདུལ་བའི་རྟེན་གྱིས་འབྱུང་བའི་ཕྱིར་རོ། །ཇི་ལྟར་ས་ནི་སྐྱེ་དགུ་རྣམས་ཀྱི་གཞི། །དེ་ལས་འབྲུ་རྣམས་སྐྱེ་བར་འགྱུར་བ་ལྟར། །དེ་བཞིན་འདུལ་བའང་སྡོམ་བརྩོན་རྣམས་ཀྱི་གཞི། །དེ་བཞིན་དེ་ལས་བསོད་ནམས་རྣམས་ཀྱང་སྐྱེ། །ཞེས་བྱ་བ་ནི་ཇི་ལྟར་ས་གཞི་ལ་བརྟེན་ཏེ་སྐྱེ་དགུ་སེམས་ཅན་དུ་བགྲང་བ་གཟུགས་ཅན་གྱི་དངོས་པོ་རྣམས་གནས་པར་འགྱུར་བ་དང༌། ཏིལ་དང་གྲོ་ལ་སོགས་པ་འབྲུའི་བདག་ཉིད་ཀྱི་འབྲས་བུ་རྣམས་སྐྱེ་ཞིང་འབྱུང་བར་འགྱུར་བ་དེ་བཞིན་དུ་འདུལ་བ་ལ་བརྟེན་ཏེ་སྡོམ་བརྩོན་དགེ་སློང་དང་དགེ་ཚུལ་ལ་སོགས་པ་རབ་ཏུ་བྱུང་བ་རྣམས་ཀྱང་གནས་པར་འགྱུར་ཏེ། དེས་སྡོམ་པ་སྐྱེ་བ་དང་ཡོངས་སུ་སྲུང་བ་དང་ལེགས་པར་སྦྱོར་བའི་ཕྱིར་རོ། །བྱམས་པ་བསྒོམ་པ་ལ་སོགས་པ་དགེ་བའི་ཆོས་བསོད་ནམས་རྣམས་ཀྱང་སྐྱེ་བར་འགྱུར་བའོ། །ཇི་ལྟར་འདུལ་བ་དང་ཆོས་མཐུན་པ་ཉིད་ཡིན་ཞེ་ན། དེའི་ཕྱིར། ཚུལ་ཁྲིམས་ཡོན་ཏན་རྣམས་ཀྱི་གནས་སུ་དགོངས། །དེ་ཡི་གནས་ནི་འདུལ་བ་ཡིན་པར་གསུངས། །འདི་ལ་གནས་པར་གྱུར་ན་མཐར་ཕྱིན་འགྱུར། །འདི་ལ་མི་གནས་མཐར་ཕྱིན་ག་ལ་འགྱུར། །ཞེས་བྱ་བ་གསུངས་ཏེ། འདི་ལྟར་དེ་ལྟ་བས་ན་ཚུལ་ཁྲིམས་འདི་དག་ཀུན་དུ་རྟེན་ཅིང་གོམས་པར་བྱས་ལན་མང་དུ་བྱས་ན་མཆོག་ཉིད་ཐོབ་པར་བྱེད་དོ་ཞེས་གསུངས་པས་ཚུལ་ཁྲིམས་ནི་བསམ་གཏན་ལ་སོགས་པ་ཡོན་ཏན་ཐམས་ཅད་ཀྱི་གནས་དང་རྟེན་ཡིན་པར་དེ་བཞིན་གཤེགས་པ་རྣམས་ཀྱིས་དགོངས་ལ། ཚུལ་ཁྲིམས་དེའི་གནས་ནི་འདུལ་བ་ཡིན་པར་གསུངས་ཏེ། དེས་དེའི་རྣམ་པ་ཐམས་ཅད་ཉེ་བར་སྟོན་པའི་ཕྱིར་རོ།།
དེ་ལྟ་བས་ན་འདུལ་བ་ནི་ས་དང་ཆོས་མཐུན་པ་ཉིད་ཡིན་ནོ། །དེའི་ཕྱིར་ཕན་ཡོན་དང་ཉེས་དམིགས་ཀྱང་འདི་ལྟ་བུར་འགྱུར་ཏེ། གང་འདུལ་བ་འདི་ལ་གནས་པར་གྱུར་ཅིང༌། ཇི་ལྟ་བ་བཞིན་དུ་རྗེས་སུ་སྒྲུབ་པར་བྱེད་པ་དེ་ནི་ཉེ་བའི་ཕྱིར་མཐའ་མྱ་ངན་ལས་འདས་པར་ཕྱིན་པར་འགྱུར་བར་ཤེས་པར་བྱའོ། །གང་འདུལ་བ་འདི་ལ་མི་གནས་ཤིང་ཐམས་ཅད་ཇི་ལྟ་བ་བཞིན་རྗེས་སུ་སྒྲུབ་པར་མི་བྱེད་པ་དེས་ནི་རེ་ཞིག་མཐའ་ལས་འདས་པར་ཕྱིན་པར་ག་ལ་འགྱུར་ཏེ། སྡིག་པའི་ལས་བཤགས་པ་ལ་སོགས་པས་མྱ་ངན་ལས་འདས་པར་འགྲོ་བའི་ལས་བསགས་པའི་ཕྱིར་རོ། །གཞི་ཉིད་ཀྱིས་འདུལ་བ་ལ་བསྟོད་ནས། ད་ནི་བསྲུང་བ་ཉིད་ཀྱིས་སྟོད་པར་བྱེད་དེ། ཇི་ལྟར་ཆུ་ལོན་མི་ཕྱེད་སྲ་བ་ཡིས། །ཆུ་ཀླུང་ཆེ་ཡང་བཟློག་པར་འགྱུར་བ་ལྟར། །དེ་བཞིན་འདུལ་བ་འཕགས་པའི་ཆུ་ལོན་འདིས། །ཚུལ་ཁྲིམས་འཆལ་བའི་ཆུ་ཀླུང་བཟློག་པར་འགྱུར། །ཞེས་བྱ་བ་ནི་ཇི་ལྟར་ཆུ་ལོན་མི་བྱེད་པ་སྲ་བ་བཅས་ན་ཆུ་ཀླུང་ཆེན་པོ་ཡང་ཟློག་པར་འགྱུར་ཞིང་ཕྱིར་སྒྱུར་བར་བྱེད་པ་དེ་བཞིན་དུ་འདུལ་བ་འཕགས་པར་བསྟོད་པར་འོས་པ་ཆུ་ལོན་ལྟ་བུ་འདིས་ཀྱང༌། ཚུལ་ཁྲིམས་འཆལ་བའི་ཆུ་ཀླུང་ཟློག་པར་འགྱུར་ཞིང་ཕྱིར་སྒྱུར་བར་བྱེད་དེ། འདི་ལྟར་ཚུལ་ཁྲིམས་འཆལ་པའི་རྒྱུར་གྱུར་པ་བུད་མེད་ལ་ལྟ་བ་ལ་སོགས་པ་ནི་ཟློག་པར་བྱེད་པ་དེ་ལས་བྱུང་བའི་ཚུལ་ཁྲིམས་འཆལ་བ་ལ་ནི་སྦྱོང་བ་སྟོན་པར་བྱེད་པའི་ཕྱིར་རོ། །ད་ནི་བྱང་ཆུབ་གསུམ་གྱི་ཚོགས་ཉིད་ཀྱིས་འདུལ་བ་ལ་བསྟོད་པའི་ཕྱིར། སངས་རྒྱས་རྣམས་དང་རང་རྒྱལ་རྣམས་ཀྱིས་ཀྱང༌། །བྱང་ཆུབ་གང་བརྙེས་ཐུབ་སློབ་རྣམ་དག་པའི། །སེམས་ཅན་དགྲ་བཅོམ་ཡོན་ཏན་ལྡན་པ་རྣམས། །དེ་ལ་རྒྱུ་ནི་འདུལ་བ་ཡིན་པར་གསུངས། །ཞེས་བྱ་བ་གསུངས་ཏེ། སངས་རྒྱས་བཅོམ་ལྡན་འདས་རྣམས་ཀྱིས་བླ་ན་མེད་པའི་བྱང་ཆུབ་བརྙེས་པ་གང་ཡིན་པ་དང༌། རང་རྒྱལ་རང་སངས་རྒྱས་རྣམས་ཀྱིས་བྱང་ཆུབ་བརྙེས་པ་གང་ཡིན་པ་དང༌། ཐུབ་པ་བཅོམ་ལྡན་འདས་ཀྱི་སློབ་མ་རྣམ་པར་དག་པའི་སེམས་ཅན་དགེ་བའི་ཚོགས་བསགས་པ་རྣམས་དགྲ་བཅོམ་པའི་ཡོན་ཏན་དང་ལྡན་པ་དགྲ་བཅོམ་པའི་འབྲས་བུ་འཁོར་དང་བཅས་པ་དང་ལྡན་པར་གྱུར་པ་འཕགས་པ་ཤཱ་རིའི་བུ་ལ་སོགས་པ་དེ་ལ་ཡང་ཐམས་
ཅད་དུ་རྒྱུ་ནི་འདུལ་བ་ཡིན་པར་གསུངས་ཏེ། དེས་ཚུལ་ཁྲིམས་ལ་གནས་ཚུལ་ཁྲིམས་ལ་བརྟེན་ཏེ་ལམ་བསྒོམ་པའི་ཕྱིར་རོ། །ད་ནི་བསྟན་པའི་གནས་རྒྱུ་ཉིད་ཀྱིས་སྟོད་པར་བྱེད་དེ། ཇི་སྲིད་འགྲོ་འདིར་རྒྱལ་བ་ཐམས་ཅད་ཀྱི། །མཛོད་མཆོག་འདུལ་བ་རྫོགས་པ་འདི་གནས་པ། །དེ་སྲིད་ཆོས་སྒྲོན་འདི་ནི་གནས་འགྱུར་ཞིང༌། །བཟློག་པར་གྱུར་ན་ཞི་བ་ཐོབ་པར་འགྱུར། །ཞེས་བྱ་བ་ལ་རྫོགས་པའི་ཞེས་བྱ་བ་ནི་ཚང་བ་སྟེ། གསོལ་བ་དང་ལས་ལ་སོགས་པ་ལ་འཇུག་ནུས་པའོ། །དེ་སྲིད་ཆོས་སྒྲོན་འདི་ནི་གནས་འགྱུར་ཞིང་ཞེས་བྱ་བའི་སྒྲ་ནི་ངེས་པར་གཟུང་བའི་དོན་ཏོ། །དེས་འདིར་དོན་དུ་ན་དུས་ཇི་སྲིད་དུ་འགྲོ་བ་འཇིག་རྟེན་འཛམ་བུའི་གླིང་འདིར་རྒྱལ་བ་ཐམས་ཅད་ཀྱི་དམ་པའི་ཆོས་ཀྱི་མཛོད་ཀྱི་མཆོག་འདུལ་བ་རྫོགས་པ་འདི་གནས་པར་འགྱུར་བའི་དུས་དེ་སྲིད་ཁོ་ནར་དེ་བཞིན་གཤེགས་པའི་དམ་པའི་ཆོས་ཀྱི་སྒྲོན་མ་ལྷག་མ་འདི་ཡང་གནས་པར་འགྱུར་ཞིང༌། དེ་ལས་བཟློག་པར་གྱུར་པ་འདུལ་བ་རྫོགས་པར་ནུབ་པར་གྱུར་ན་དམ་པའི་ཆོས་ཀྱི་སྒྲོན་མ་ལྷག་མ་ཡང་ཞི་བ་ཐོབ་པར་འགྱུར་ཏེ་ནུབ་པ་ཁོ་ནར་འགྱུར་རོ་ཞེས་བྱ་བའི་ཐ་ཚིག་གོ །ད་ནི་དཀོན་པ་ཉིད་ཀྱིས་སྟོད་པར་བྱེད་དེ། སངས་རྒྱས་མི་བཞུགས་འཇིག་རྟེན་ཚིགས་བཅད་དང༌། མདོ་སྡེའི་ཡན་ལག་དེ་དང་དེ་དག་སྤྱོད། །བསླབ་འཇུག་མེད་ན་འདུལ་བའང་མེད་འགྱུར་བས། །དེའི་ཕྱིར་རྒྱལ་བ་དག་པས་ཆེས་འདི་དཀོན། །ཞེས་བྱ་བ་ལ། མི་བཞུགས་ཞེས་བྱ་བས་ནི་མེད་པའི་དོན་བསྟན་ཏོ། །དེ་དང་དེ་དག་ཅེས་བྱ་བ་ནི་ཟློག་པའི་ཚིག་སྟེ་མང་བ་ཉིད་དུ་བསྟན་ཏོ། །དེས་ནི་འདི་ལྟར་སངས་རྒྱས་མི་བཞུགས་སུ་ཟིན་ཀྱང་འཇིག་རྟེན་འཛམ་བུའི་གླིང་འདི་ན། འདོད་པ་ཁྱོད་ཀྱི་རྩ་བ་ཤེས། །ཁྱོད་ནི་ཀུན་དུ་རྟོག་ལས་བྱུང༌། །ཁྱོད་ལ་ཀུན་དུ་བརྟག་མི་བྱ། །དེས་ན་ང་ལ་ཁྱོད་མི་འབྱུང༌། །ཞེས་བྱ་བ་ལ་སོགས་པ་ཚིགས་བཅད་དེ་དང་དེ་ལྟ་བུ་དག་དང༌། ལྷའི་མདོ་ལ་སོགས་པ་མདོ་སྡེའི་ཡན་ལག་དམ་དུམ་མང་པོ་དེ་དང་དེ་དག་སྤྱོད་པ་ཡོད་ཀྱི། །བཅོམ་ལྡན་འདས་བྱུང་དུ་ཟིན་ཀྱང་བསླབ་པ་ལ་འཇུག་པ་མེད་ཅིང་བསླབ་པ་བཅའ་བ་མེད་ན་འདུལ་བའང་མེད་ཅིང་སྤྱོད་པར་མི་འགྱུར་བས་དེའི་ཕྱིར་རྒྱལ་བ་སངས་རྒྱས་བཅོམ་ལྡན་འདས་དག་པས་ཀྱང་ཆོས་འདུལ་བ་
འདི་དཀོན་པ་ཡིན་ན་མདོ་སྡེ་ལ་སོགས་པ་དག་པས་དཀོན་པ་ལྟ་ཅི་སྨོས་ཞེས་བྱ་བའི་ཐ་ཚིག་གོ །ད་ནི་དཔེ་ཡི་སྒོ་ནས་བསྟོད་པའི་ཕྱིར། །འཇོག་བྲལ་སེམས་གླང་ལྕགས་ཀྱོ་འདི་ཡིན་ཏེ། །གདུལ་བྱ་མ་ཐུལ་བ་ཡི་སྲབ་འདི་ཡིན། །ར་བའི་མཚམས་ཀྱི་འོབས་དང་འདྲ་བ་སྟེ། །ཟག་པ་ཀུན་གྱི་ཆུ་ལོན་འདུལ་བ་ཡིན། །ཞེས་བྱ་བ་གསུངས་ཏེ། དེ་ལ་འདིས་སེམས་དོན་རྣམས་ལ་འཇོག་པར་བྱེད་པས་ན་འཇོག་པ་ནི་ཏིང་ངེ་འཛིན་ཏོ། །འཇོག་པ་དེ་དང་བྲལ་བའི་ཕྱིར་འཇོག་པ་དང་མ་བྲལ་བ་ནི་མཉམ་པར་མ་བཞག་པ་སྟེ། དེ་ཉིད་སེམས་ཡིན་པས་འཇོག་བྲལ་སེམས་སོ། དེ་ཉིད་གླང་པོ་ཆེ་དང་ཆོས་མཐུན་པ་ཉིད་ཡིན་ཏེ། འཇོག་པ་དང་བྲལ་བའི་སེམས་ནི་གླང་པོ་ཆེ་དང་འདྲ་བས་འཇོག་བྲལ་སེམས་གླང་ཞེས་སྨོས་སོ། །གླང་པོ་ཆེ་དེ་གནས་མ་ཡིན་པ་ལས་བཟློག་ཅིང་གནས་བདེ་བར་འཇོག་པར་བྱེད་པ་ལྕགས་ཀྱོ་ཡིན་པ་དང་འདྲ་བར་འཇོག་པ་དང་བྲལ་བའི་སེམས་གླང་པོ་ཆེ་དང་འདྲ་བ་དེ་གནས་མ་ཡིན་པ་ལས་བཟློག་ཅིང་གནས་བདེ་བར་འཇོག་པར་བྱེད་པའི་ལྕགས་ཀྱོ་ཡང་འདུལ་བ་འདི་ཡིན་ཏེ་འདྲ་བའི་ཕྱིར་རོ། །གདུལ་བྱ་ཞེས་བྱ་བ་ནི་གདུལ་བར་བྱ་བ་སྟེ་རྟའོ། །མ་དུལ་བ་ཞེས་བྱ་བ་ནི་མ་བསླབས་པ་སྟེ། སེམས་ཀྱི་རྟ་གདུལ་བར་བྱ་བ་མ་ཐུལ་བ་དེ་འདུལ་བའི་སྲབ་ཀྱི་ཁ་ལྕགས་དང་འདྲ་བ་ཡང་འདུལ་བ་འདི་ཡིན་ཏེ། ཕན་པ་དང་གནོད་པ་ལ་འཇུག་པ་དང་ལྡོག་པར་བྱེད་པ་ཡིན་པའི་ཕྱིར་རོ། །ར་བའི་མཚམས་ཞེས་བྱ་བ་ནི་རང་ཕྱིའི་མཚམས་ཏེ་དེའི་འོ་བས་དང་འདྲ་བ་ཡང་འདུལ་བ་འདི་ཉིད་ཡིན་ཏེ། འདའ་བ་དང་འདའ་བར་བྱ་བ་མ་ཡིན་པའི་མཚམས་ཀྱི་མུ་ཐུག་པ་ཡིན་པའི་ཕྱིར་རོ། །ཟག་པ་ཞེས་བྱ་བ་ནི་གང་གིས་འཛག་པར་བྱེད་པ་ཉོན་མོངས་པ་རྣམས་དང༌། གང་ནས་འཛག་པར་འགྱུར་བ་ལུས་དང་ངག་དང་ཡིད་ཀྱི་སྒོ་དག་སྟེ། དེ་དག་ཀུན་འགོག་པའི་ཆུ་ལོན་ཡང་འདུལ་བ་ཡིན་ཏེ། འདི་ལྟར་ཉོན་མོངས་པ་མངོན་དུ་གྱུར་པ་དག་དང༌། དེ་ལས་བྱུང་བའི་ལུས་དང་ངག་དང་ཡིད་ཀྱི་ལས་ཀྱང་འདུལ་བས་བཟློག་པའི་ཕྱིར་རོ། །ད་ནི་སྟོན་པ་དང་འདྲ་བ་ཉིད་ཀྱིས་བསྟོད་པའི་ཕྱིར། རྒྱལ་བ་སྟོན་པ་དེ་ཡི་བསྟན་བཅོས་དག །མདོ་དང་ཆོས་མངོན་ཡིན་གསུངས་འདུལ་བ་ནི། །སྟོན་དང་བསྟན་བཅོས་དངོས་ཡིན་དེ་ཡི་
ཕྱིར། །གཉིས་གྱུར་ཕྱག་བྱ་སངས་རྒྱས་ཆོས་གཅིག་བཞིན། །ཞེས་བྱ་བ་གསུངས་ཏེ། འདི་ལྟར་རྒྱལ་བ་བཅོམ་ལྡན་འདས་ནི་སྟོན་པ་ཡིན་ཏེ། བསྟན་པ་ཐམས་ཅད་འཇུག་པར་མཛད་པའི་ཕྱིར་རོ། །སྟོན་པ་དེའི་བསྟན་བཅོས་དག་ནི་མདོ་སྡེ་དང་ཆོས་མངོན་པ་ཞེས་བྱ་བའི་གཞུང་གང་ཡིན་པ་དེ་གཉིས་ཡིན་པར་གསུངས་ཏེ། དེ་གཉིས་ཡོངས་སུ་སྨིན་པ་དང་རྣམ་པར་གྲོལ་བར་མཛད་པའི་ཕྱིར་རོ། །འདུལ་བ་ནི་དངོས་སུ་སྟོན་པ་ཡང་ཡིན་ཏེ། དེ་བཞིན་གཤེགས་པ་འདྲ་བར་རྟག་ཏུ་རྣམ་པར་གྲོལ་བ་དང༌། རྣམ་པར་མ་གྲོལ་བ་རྣམས་ལ་རྗེས་སུ་སྟོན་པའི་ཕྱིར་རོ། །བསྟན་བཅོས་དངོས་ཀྱང་ཡིན་ཏེ། གཞུང་གི་རང་བཞིན་ཡིན་པའི་ཕྱིར་རོ། །དེའི་ཕྱིར་འདུལ་བ་འདི་ནི་ངོ་བོ་ཉིད་གཅིག་ལས་གཉིས་སུ་འགྱུར་བ་ཡིན་ཏེ། སྟོན་པ་དང་བསྟན་བཅོས་ཀྱི་ངོ་བོ་ཉིད་དུ་གྱུར་པ་ཡིན་པས་འདུལ་བ་འདི་ནི་ཕྱག་བྱ་བའི་འོས་ཡིན་ཏེ། འདི་ལ་ངེས་པ་ཁོ་ནར་ཕྱག་བྱ་བའོ། །ཅི་ཞིག་དང་འདྲ་བར་གཉིས་སུ་གྱུར་པ་ཡིན་ཞེ་ན། ཆོས་མི་མཐུན་པའི་དཔེ་བསྟན་པའི་ཕྱིར། སངས་རྒྱས་ཆོས་གཅིག་བཞིན་དུ་ཞེས་བྱ་བ་གསུངས་ཏེ། དཔེར་ན་སངས་རྒྱས་བཅོམ་ལྡན་འདས་དང་ཆོས་ནི་ངོ་བོ་ཉིད་ཐ་དད་པ་ཡིན་ཏེ། ཐམས་ཅད་མཁྱེན་པ་ཉིད་ཡིན་པའི་ཕྱིར་ན་སངས་རྒྱས་བཅོམ་ལྡན་འདས་ཡིན་པ་མྱ་ངན་ལས་འདས་པ་ཐོབ་པར་མཛད་པ་ཡིན་པའི་ཕྱིར་ནི་ཆོས་ཡིན་པས་དེ་གཉིས་ངོ་བོ་ཉིད་ཐ་དད་ཀྱང་སངས་རྒྱས་ཞེས་བྱ་བ་གཅིག་ཏུ་འགྱུར་བ་བཞིན་དུ། འདི་ནི་དེ་ལས་བཟློག་སྟེ་འདུལ་བ་ཞེས་བྱ་བའི་ངོ་བོ་ཉིད་གཅིག་པ་ལས་དེ་བཞིན་གཤེགས་པ་དང་འདྲ་བར་རྟག་ཏུ་རྣམ་པར་གྲོལ་བ་དང༌། རྣམ་པར་མ་གྲོལ་ང་རྣམས་ལ་རྗེས་སུ་སྟོན་པའི་ཕྱིར་ན་སྟོན་པ་ཡང་ཡིན་ལ། གཞུང་གི་རང་བཞིན་ཡིན་པའི་ཕྱིར་ནི་བསྟན་བཅོས་ཀྱང་ཡིན་པས་དེའི་ཕྱིར་སྟོན་པ་དང་བསྟན་བཅོས་ཀྱི་ངོ་བོ་ཉིད་གཉིས་སུ་གྱུར་པ་དེ་ནི་ཕྱག་བྱ་བའི་འོས་ཁོ་ན་ཡིན་ནོ། །ད་ནི་དེ་བཞིན་གཤེགས་པ་བས་ཀྱང་ཆེས་བླ་མ་ཡིན་པས་འདི་ལ་ཕྱག་བྱ་བ་ཉིད་དུ་བསྟན་པའི་ཕྱིར། གང་ལ་བརྟེན་ཏེ་གནས་པའི་སངས་རྒྱས་རྣམས། །དེ་ལ་གུས་བཅས་རྗེ་སར་བཅས་གྱུར་ཅིང༌། །དེ་ནི་མགོན་པོའི་མགོན་ཡིན་སྐྱབས་གནས་ཡིན། །
དེ་ཕྱིར་རབ་བསྒྲིམས་ཚུལ་ལ་ཕྱག་འཚོལ་ཅིག །ཅེས་བྱ་བ་གསུངས་ཏེ། འདུལ་བ་གང་ལ་བརྟེན་ཏེ་གནས་ཤིང་དེ་དང་འགལ་བ་ཀུན་དུ་མི་སྤྱོད་པས་ཐ་སྙད་མཛད་པའི་སངས་རྒྱས་བཅོམ་ལྡན་འདས་རྣམས་འདུལ་བ་དེ་ལ་ངོ་བོ་ཉིད་ཁོ་ནར་གུས་པ་དང་ལྡན་པའི་སྒོ་ནས་གུས་པ་དང་བཅས་པ་དང་དེ་ལ་འཇིག་རྟེན་གྱིས་སྨད་པའི་དབང་གིས་དགོངས་པ་བསྟོད་པའི་སྒོ་ནས་རྗེས་དང་བཅས་པར་གྱུར་པ་དེ་འདྲ་བའི་འདུལ་བ་འདི་ལ་རབ་ཏུ་བསྒྲིམས་ཏེ་ཕྱག་འཚོལ་ཅིག་ཅེས་བྱ་བར་སྦྱར་རོ། །ཅིའི་ཕྱིར་ཞེ་ན། དེའི་ཕྱིར། དེ་ནི་མགོན་པོའི་མགོན་ཡིན་སྐྱབས་གནས་ཡིན། །ཞེས་བྱ་བ་གསུངས་སོ། །གང་གི་ཕྱིར་འདུལ་བ་དེ་ནི་བདག་ཅག་གི་བླ་མ་མགོན་པོ་སངས་རྒྱས་བཅོམ་ལྡན་འདས་པས་ཀྱང་བླ་མ་མགོན་པོ་ཡིན་ཏེ། དེ་དེ་ལྟ་གུས་པ་དང་བཅས་རྗེས་དང་བཅས་པའི་ཕྱིར་དང༌། འདུལ་བ་དེ་ནི་སྐྱབས་ཡིན་ཏེ། ཁྱིམ་ཡོངས་སུ་སྤོང་བ་དང་བརྟུལ་ཞུགས་ཀྱི་བགོ་བཤའ་ལེགས་པར་བྱེད་པའི་རྒྱུ་ཡིན་པའི་ཕྱིར་དང༌། འདུལ་བ་དེ་ནི་གནས་ཡིན་ཏེ། བརྟུལ་ཞུགས་བླངས་པ་རྣམས་ལ་སྐྱོབ་པ་དང་སྲུང་བ་དང༌། བརྟུལ་ཞུགས་ཀྱང་ཡོངས་སུ་སྲུང་བར་བྱེད་པ་དེའི་ཕྱིར་རབ་ཏུ་བསྒྲིམས་ལ་འདུལ་བ་འདི་ལ་ངེས་པ་ཁོ་ནར་ཕྱག་འཚོལ་ཅིག་བྱ་བའི་ཐ་ཚིག་གོ །དེ་ནི་གནོད་པའི་རྒྱུ་ཉིད་ཀྱིས་གུས་པ་སྐྱེད་པའི་ཆེད་དུ་བསྟོད་པའི་ཕྱིར། གང་ཞིག་སྟོན་པ་ཐུགས་རྗེའི་བསྟན་པ་ལ། །ཡང་བར་སེམས་ཤིང་ཅུང་ཟད་འདའ་བྱེད་པ། །དེ་ནི་དེ་ལས་སྡུག་བསྔལ་གཞན་དབང་ཐོབ། །སྨྱིག་ཚལ་བསྲེགས་པས་ཨ་མྲའི་ཚལ་ཉམས་བཞིན། །ཞེས་བྱ་བ་གསུངས་ཏེ། རབ་ཏུ་བྱུང་བ་བག་མེད་པ་དང་ལྡན་པ་གང་ལ་ལ་ཞིག་སྟོན་པ་བཅོམ་ལྡན་འདས་ཐུགས་རྗེ་དང་ལྡན་པ་ཕན་པ་ཉི་བར་སྟོན་པའི་བསྟན་པ་འདུལ་བ་ལས་གསུངས་པའི་བཀའ་ལུང་ལ་བཅས་པའི་ཁ་ན་མ་ཐོ་བ་ཡང་ཡིན་པས་དེ་ལས་འདས་ན་ཉེས་བྱས་ལ་སོགས་པ་ཙམ་འབྱུང་བར་སེམས་ཤིང་རྟོག་པ་ན་དོན་མེད་པ་ཉིད་དོ་སྙམ་དུ་བློ་སྔོན་དུ་གཏོང་ཞིང་ཅུང་ཟད་འདའ་ཞིང་འགལ་བར་བྱེད་པའི་རབ་ཏུ་བྱུང་བ་བག་མེད་པ་དང་ལྡན་པ་དེ་ནི་བསྟན་པ་ལས་འདས་པ་དེ་ལས་འཇིག་རྟེན་ཕ་རོལ་དུ་ལུས་དང་སེམས་ཀྱི་སྡུག་བསྔལ་ཆེན་པོས་གདུང་བར་བྱེད་པ་སེམས་ཅན་དམྱལ་བའི་སྲུང་མ་ལ་སོགས་
པ་དང་འབྲེལ་པ་གཞན་ལ་རག་ལས་ཤིང་གཞན་གྱི་དབང་དུ་གྱུར་པ་ཐོབ་པར་འགྱུར་བས་དེའི་ཕྱིར་སྟོན་པའི་བསྟན་པ་རྗེས་སུ་བསྒྲུབ་པར་བྱའོ་ཞེས་བྱ་བའི་ཐ་ཚིག་གོ །དེ་ཉིད་དཔེས་བསྟན་པའི་ཕྱིར། སྨྱིག་ཚལ་བསྲེགས་པས་ཨ་མྲའི་ཚལ་ཉམས་བཞིན། །ཞེས་བྱ་བ་གསུངས་ཏེ། དཔེར་ན་རྒྱལ་པོའི་ཨ་མྲའི་ཚལ་སྲུང་བའི་ཕྱིར་ཁོར་ཁོར་ཡུག་ཏུ་སྨྱིག་མ་ཚེར་མ་ཅན་གྱིས་བསྐོར་བ་བྱས་པ་དེ་མི་བག་མེད་པ་ལ་ལ་ཞིག་གིས་འདི་ནི་དགོས་པ་མེད་དེ་གྱོད་ཡང་བ་ཡིན་ནོ་སྙམ་དུ་སེམས་ཤིང༌། བསྲེགས་པས་ཨ་མྲའི་ཚལ་དེ་བ་ལང་དང་རྟ་ལ་སོགས་པ་མཐའ་དག་གིས་ཟོས་པ་ལ་སོགས་པས་ཉམས་ཤིང་གནོད་པར་གྱུར་པ་ན་མི་དེ་ལ་གཞི་དེས་རྒྱལ་པོ་ཁྲོས་པས་ཆད་པ་ཆེན་པོ་ལ་གཏུགས་པ་ལས་བྱུང་བའི་སྡུག་བསྔལ་ཐོབ་པར་འགྱུར་བ་དེ་བཞིན་དུ། འདིར་ཡང་བཅས་པའི་ཁ་ན་མ་ཐོ་བ་དང་བཅས་པ་སྨྱིག་མའི་ཚལ་ལྟ་བུ་དེ་ལས་འདས་ཤིང་རང་བཞིན་གྱིས་ཁ་ན་མ་ཐོ་བ་དང་བཅས་པ་ཨ་མྲའི་ཚལ་ལྟ་བུ་དེ་ཉམས་པ་ན་རྒྱལ་པོ་ཁྲོས་པ་ལྟ་བུ་རྒྱལ་བའི་བཀའ་ཁྱད་དུ་བསད་ཅིང་བསླབ་པ་དྲལ་བ་དེ་ལས་རྒྱལ་པོའི་སྡུག་བསྔལ་གཞན་གྱི་དབང་དུ་གྱུར་པ་ཐོབ་པ་ལྟ་བུ་འཇིག་རྟེན་ཕ་རོལ་དུ་སེམས་ཅན་དམྱལ་བའི་སྲུང་མ་ལ་སོགས་པ་གནོད་པའི་སྡུག་བསྔལ་ཆེན་པོ་འཐོབ་པར་འགྱུར་བས་དེའི་ཕྱིར་བཅས་པའི་ཁ་ན་མ་ཐོ་བ་ཡང་སྨྱིག་མའི་ཚལ་ལྟ་བུ་དེ་ཉིད་ལ་གུས་པ་དང་བཅས་པས་བསྲུང་བར་བྱའོ། །ད་ནི་ཁྱད་པར་དུ་གསོད་པའི་སེམས་ཀྱིས་བཅས་པའི་ཁ་ན་མ་ཐོ་བ་དང་བཅས་པ་ལས་འདས་པའི་ཉེས་པ་བརྗོད་པའི་ཕྱིར། འདི་ན་ལ་ལས་རྒྱལ་པོའི་ཚིག་ཆེན་ཡང༌། །བཟླས་ན་ལན་འགའ་ཆད་པ་ཐོབ་མི་འགྱུར། །ཐུབ་པའི་བཀའ་ལུང་ཚུལ་མིན་བཟླས་བྱས་ན། །དུད་འགྲོར་འགྲོ་འགྱུར་ཨེ་ལའི་འདབ་ཀླུ་བཞིན། །ཞེས་བྱ་བ་གསུངས་ཏེ། འཇིག་རྟེན་འདི་ན་སྐྱེ་བོ་ལ་ལས་རྒྱལ་པོའི་ཚིག་ཆེན་པོ་ཡང་བཟླས་ན་ལན་འགའ་བྱམས་པའི་གནས་ལྟ་བུའམ་ཡུལ་འཁྲུག་པ་ལ་སོགས་པར་འགྱུར་བའི་གནས་སྐབས་ན་རྒྱལ་པོའི་ཆད་པ་འཐོབ་པར་མི་འགྱུར་བ་ཡང་སྲིད་ཀྱི། ཐུབ་པ་བཅོམ་ལྡན་འདས་ཐུགས་རྗེ་དང་ལྡན་པ་ཕན་པ་མཛད་པ་བླ་ན་མེད་པའི་བཀའ་ལུང་བསླབ་པ་ཚུལ་མ་ཡིན་པ་
ཁྱད་དུ་གསོད་པས་བཅས་པའི་ཁ་ན་མ་ཐོ་བ་དང་བཅས་པ་ཙམ་ཡང་བཟླ་བ་བྱས་ན་ཕལ་ཆེར་ངན་སོང་གིས་དུད་འགྲོ་བའི་སྐྱེ་གནས་སུ་འགྲོ་བར་འགྱུར་བས་དེའི་ཕྱིར་གུས་པར་བྱའོ་ཞེས་བྱ་བའི་ཐ་ཚིག་གོ །དེ་ཉིད་དཔེས་བསྟན་པའི་ཕྱིར། ཨེ་ལའི་འདབ་ཀླུ་བཞིན་ཞེས་བྱ་བ་གསུངས་ཏེ། བཅོམ་ལྡན་འདས་འོད་སྲུངས་ཀྱི་དགེ་སློང་སྤོང་བ་པ་དེས་འཆག་པའི་ཚེ་མགོ་བོའི་སྟེང་དུ་ཤིང་ཨེ་ལའི་འདབ་མས་རིག་པ་ན། བཅོམ་ལྡན་འདས་ཀྱི་བཀའ་ཁྱད་དུ་བསད་དེ་ཤིང་ཨེ་ལའི་འདབ་མ་དེ་བཅད་པས་གཞི་དེས་དགེ་སློང་དེ་ཀླུ་ཨེ་ལའི་འདབ་ཅེས་བྱ་བར་སྐྱེས་ཏེ། མགོ་ལ་ཤིང་ཨེ་ལའི་དྲུང་ཅིག་སྐྱེས་ཤིང་དེ་འགུལ་བ་ན་སྡུག་བསྔལ་གྱི་ཚོར་བ་མི་བཟད་པ་རྩུབ་པ་ཚ་བ་ཉམས་སུ་མྱོང་སྟེ། དེ་ནས་ཁྲག་དང་རྣག་གི་རྒྱུན་འབབ་པ་ཟས་སུ་ཟ་བར་གྱུར་པ་ལྟ་བུ་དང༌། དེ་དབང་འདྲ་བ་གཞན་དག་ཏུ་ཡང་འགྲོ་བར་འགྱུར་བའོ། །དེ་ནི་སོ་སོར་ཐར་པའི་རྣམ་པར་བཤད་པར་གྱུར་པ་ཉིད་ཀྱིས་འདུལ་བ་ལ་བསྟོད་པའི་ཕྱིར། སོ་སོར་ཐར་བྱ་གང་ཡིན་པ། །སངས་རྒྱས་འདུལ་བ་གང་ཆེན་མཚོ། །གཏིང་མཐའ་མེད་པ་ཐམས་ཅད་ཀྱི། །གནས་པའི་སྙིང་དང་སྙིང་པོ་ཡིན། །ཞེས་བྱ་བ་ལ་སོགས་པ་ཚིགས་སུ་བཅད་པ་དྲུག་གསུངས་སོ། །དེ་ལ་དོན་ནི་འདི་ཡིན་ཏེ། གང་ཕྱིར་སོ་སོར་ཐར་པ་ཞེས་བྱ་བ་གང་ཡིན་པ་དེ་ནི་ཡོན་ཏན་དང་ཕན་ཡོན་དུ་མས་ཡང་དག་པར་རྒྱས་པ་ཡིན་ལ། རྣམ་པར་འབྱེད་པ་དང་ཕྲན་ཚེགས་ལ་སོགས་པ་འདུལ་བ་འདི་དག་ཐམས་ཅད་ནི་སོ་སོར་ཐར་པ་དེའི་རྒྱ་ཆེར་རྣམ་པར་བཤད་པ་ཡིན་པར་གསུངས་པ་དེའི་བྱིན། ཐར་པར་འདོད་པ་དག་གིས་འདུལ་བ་འདི་ལ་གུས་པར་བྱས་ཏེ་མཉན་པ་ལ་འབད་པ་བྱ་ཞིང༌། འདུལ་བ་ལ་གུས་པས་མཉན་པའི་སྤྲོ་བ་བརྟན་པར་བྱའོ་ཞེས་སྟན་ཏོ། །འོ་ན་སོ་སོར་ཐར་པ་ཞེས་བྱ་བ་དེ་ཇི་ལྟ་བུ་ཞིག་ཡིན་ཞེ་ན། དེའི་ཕྱིར་སོ་སོར་ཐར་བྱ་གང་ཡིན་པ་ལ་སོགས་པ་གསུངས་ཏེ། དེ་ལ་སངས་རྒྱས་ཀྱིས་གསུངས་པའི་འདུལ་བ་གང་ཆེན་མཚོ་ཞེས་པ་རྒྱ་མཚོ་ལྟ་བུ་གང་ལ། གཏིང་ཞེས་བྱ་བ་ཀུན་ནས་སློང་བ་དང༌། མཐའ་ཞེས་བྱ་བ་འབྲས་བུ་སྟེ། དེ་གཉིས་དཔག་ཏུ་མེད་པ་དེ་ནི་སངས་རྒྱས་ཀྱི་འདུལ་བ་གང་ཆེན་མཚོ་གཏིང་དང་མཐའ་མེད་པ་ཞེས་
བྱ་བ་སྟེ། འདུལ་བ་རྒྱ་མཚོ་སྟོང་ཕྲག་བརྒྱ་པའི་ཚད་དེ་དག་ཐམས་ཅད་ཀྱི་གནས་པ་ཞེས་བྱ་བ་མཚན་ཉིད་རྣམ་པར་གཞག་པ་དེའི་སྙིང་ཞེས་བྱ་བ་འཕེན་པ་ས་བོན་ཀུན་ནས་སློང་བ་དང༌། སྙིང་པོ་ཞེས་བྱ་བ་བརྟན་པ་རྣམ་པར་མི་གཡོ་བ་ནི་སོ་སོར་ཐར་པ་ཞེས་བྱ་བ་སྡིག་པ་ལས་ཐར་པའམ། འཁོར་བ་ཐམས་ཅད་ལས་ཐར་པ་མདོའི་སྡེ་བསྟན་པ་དེ་ཡིན་ནོ། །འདི་ནི་དམ་ཆོས་རྒྱལ་པོ་ཡི། །ཆོས་ཀུན་གྱི་ནི་འདྲེན་པ་མཆོག །འདི་ནི་དགེ་སློང་ཚོང་ཚོགས་ཀྱི། །བསླབ་ཟོང་ཚོང་ཁང་ཆེན་པོ་ཡིན། །ཞེས་བྱ་བ་ནི་སོ་སོར་ཐར་པ་འདི་ནི་དམ་ཆོས་རྒྱལ་པོ་ཞེས་བྱ་བ་སངས་རྒྱས་བཅོམ་ལྡན་འདས་ཀྱི་མདོའི་སྡེ་ལ་སོགས་པ་བསྟན་པའི་ཆོས་ཀུན་གྱི་ནི་འདྲེན་པ་མཆོག་ཡིན་ཏེ་བློན་པོ་རིན་པོ་ཆེ་དང་འདྲའོ་ཞེས་བྱ་བའི་ཐ་ཚིག་གོ །ཡང་དེ་ཉིད་བྱེ་བྲག་ཏུ་བྱ་བའི་ཕྱིར། འདི་ནི་དགེ་སློང་ཚོང་ཚོགས་ཀྱི། །བསླབ་ཟོང་ཚོང་ཁང་ཆེན་པོ་ཡིན། །ཞེས་བྱ་བ་གསུངས་ཏེ། སོ་སོར་ཐར་པ་འདི་ནི་མྱང་ན་ལས་འདས་པའི་ནོར་བུ་རིན་པོ་ཆེ་འདོད་པའི་དགེ་སློང་ཚོང་པའི་ཚོགས་པ་འདྲོན་པ་རྣམས་ཀྱི་བསླབ་པ་ཟོང་ཚུལ་ཁྲིམས་ཀྱི་ནོར་གང་ཡིན་པ་དེའི་ཚོང་ཁང་ཆེན་པོ་ཞེས་བྱ་བ་ཟོང་བཅེར་བའི་གནས་དང་འདྲ་བ་ཡིན་ནོ། །ཚུལ་ཁྲིམས་འཆལ་པས་ཟིན་རྣམས་ཀྱི། །གདུག་པ་རྣམས་སེལ་སྨན་འདི་ཡིན། །འདི་ནི་ལང་ཚོ་རྣམས་འཁྲུལ་བའི། །རྐང་གཉིས་གཞོན་ནུའི་ལྕགས་ཀྱོ་ཡིན། །ཞེས་བྱ་བ་ནི། གང་དག་ཚུལ་ཁྲིམས་འཆལ་བའི་བསླབ་པ་རལ་པ་ལྷག་མ་དང་བཅས་པ་སྤྲུལ་ཆེན་པོ་དུག་མྱུར་དུ་ཁྱབ་པར་བྱེད་པས་ཟིན་ཅིང་རེག་པ་དེ་རྣམས་ཀྱི་ལྟུང་བ་གདུག་པ་རྣམ་པར་སེལ་ཞིང་རྣམ་པར་འགོག་པའི་སྨན་པ་ནད་སེལ་ནི་སོ་སོར་ཐར་པ་འདི་ཡིན་ཏེ། །འདིས་དེ་སྦྱོང་བ་སྟོན་པའི་ཕྱིར་རོ། །སོ་སོར་ཐར་པ་འདི་ནི་གང་དག་ལང་ཚོ་གཞོན་པ་ཉིད་རྣམ་པར་འཁྲུལ་ཞིང་རྣམ་པར་སྨྱོས་པའི་མི་རྐང་གཉིས་གཞོན་ནུ་དེ་དག་གི་ལྕགས་ཀྱོ་དང་འདྲ་བར་ཕྱིར་ཟློག་པ་ཡིན་ཏེ། བསྙིལ་བ་དང་ཡོངས་སུ་གནས་པ་སྤྱོད་པ་ལ་སོགས་པའི་ཉེས་དམིགས་སྟོན་པས་ཀུན་དུ་སྐྲག་པར་བྱེད་པ་ཡིན་པའི་ཕྱིར་རོ། །མཚོ་བས་ཟབ་པའི་འཁོར་བ་ལས། །སྒྲོལ་བའི་རྒལ་ཐབས་འདི་ཡིན་ཏེ། །འདི་ནི་བཟང་འགྲོར་འགྲོ་བ་ཡི། །ངེས་པའི་ཆུ་ལོན་ཟམ་པ་ཡིན། །ཞེས་
བྱ་བ་ནི་རྒྱ་མཚོ་དུག་ཅན་པ་བས་ཀྱང་ཟབ་ཅིང་ཆེས་གཏིང་སླེབ་པར་དཀའ་བའི་འཁོར་བ་འགྲོ་བ་ལྔ་པའི་འཇིག་རྟེན་གང་ཡིན་པ་དེ་ལས་སྒྲོལ་ཞིང་རྣམ་པར་གྲོལ་པར་འགྱུར་བའི་རྒལ་ཐབས་ཟམ་པ་དང༌། གྲུ་དང༌། གཟིངས་དང༌། རྐྱལ་པ་ལ་སོགས་པ་ལྟ་བུ་ནི་སོ་སོར་ཐར་པ་འདི་ཡིན་ཏེ། ཚུལ་ཁྲིམས་རྣམ་པར་དག་ན་ལམ་སྐྱེ་བའི་ཕྱིར་རོ། །སོ་སོར་ཐར་པ་འདི་ནི་བཟང་འགྲོ་བདེ་འགྲོར་འགྲོ་ཞིང་འཇུག་པའི་ངེས་པ་བརྟན་པོ་གཅིག་ཏུ་གྱུར་པའི་ཆུ་ལོན་ཟམ་པ་ཞེས་བྱ་བ་ས་གཞི་དང་འབྲེལ་པའི་རྒྱུན་ས་ཡིན་ཏེ། ཚུལ་ཁྲིམས་ནི་བདེ་འགྲོའི་རྒྱུ་ཡིན་པའི་ཕྱིར་རོ། །འདི་ནི་ཉོན་མོངས་ཕམ་བྱེད་ལམ། །རྒྱལ་པོ་ཡི་ནི་འདྲེན་པ་མཆོག །འདི་ནི་ཐར་པའི་གྲོང་འཇུག་པའི། །ཐེམ་སྐས་གཞི་དང་འདྲ་བར་གནས། །ཞེས་བྱ་བ་ནི་སོ་སོར་ཐར་པ་འདི་ནི་འདོད་ཆགས་ལ་སོགས་པའི་ཉོན་མོངས་པ་ཕམ་ཞིང་སྤང་བར་བྱ་བ་ལ་འཕགས་པའི་ལམ་མིའི་བདག་པོ་རྒྱལ་པོ་དང་འདྲ་བའི་འདྲེན་པ་སྙིང་ཚོམས་མཆོག་ལྟ་བུ་ཡིན་ནོ། །སོ་སོར་ཐར་པ་འདི་ནི་ཐར་པ་མྱ་ངན་ལས་འདས་པའི་གྲོང་ཁྱེར་རྩེག་མར་འཇུག་ཅིང་འཇོག་པའི་ལམ་གྱི་ཐེམ་སྐས་གཞིའི་ཐེམ་སྐས་དང་པོ་དང་འདྲ་བར་གནས་ཏེ་ལམ་གྱི་གཞི་ནི་ཚུལ་ཁྲིམས་ཡིན་པའི་ཕྱིར་རོ། །ང་ནི་མྱ་ངན་འདས་འོག་ན། །འདི་ནི་ཁྱོད་ཀྱི་སྟོན་པ་ཞེས། །རང་བྱུང་ཉིད་ཀྱིས་གུས་བཅས་པར། །ནན་ཏན་དགེ་སློང་ཚོགས་མདུན་བསྟོད། །ཅེས་བྱ་བ་ནི་སྟོན་པ་བཅོམ་ལྡན་འདས་ཡོངས་སུ་མྱ་ངན་ལས་འདས་པའི་ཚེ་ན་དགེ་སློང་དག་དང་ཕྱིན་ཆད་བདག་ཅག་ལ་སྟོན་པ་མེད་པར་འགྱུར་རོ་སྙམ་དུ་དོགས་པ་བཟློག་པའི་ཕྱིར་འདི་སྐད་ཅེས་པ་མྱ་ངན་ལས་འདས་པར་གྱུར་ནས་སོ་སོར་ཐར་པ་འདི་ཁྱོད་ཀྱི་སྟོན་པ་བྱེད་པར་འགྱུར་བས་འདི་ནི་ཁྱོད་ཀྱི་སྟོན་པ་ཡིན་ནོ་ཞེས་རང་བྱུང་གཞན་གྱི་ལུང་མེད་པར་བླ་ན་མེད་པའི་མཁྱེན་པ་བརྙེས་པ་སངས་རྒྱས་བཅོམ་ལྡན་འདས་ཉིད་ཀྱིས་རང་གི་ཞལ་ནས་གུས་པ་དང་བཅས་པར་དགོངས་པ་གཏད་དེ་ནན་ཏན་དུ་དགེ་སློང་རྣམས་ལ་བཀའ་སྩལ་ནས། དགེ་སློང་གི་ཚོགས་དགེ་འདུན་དུ་བསྟོད་པ་མཛད་པས། དེའི་ཕྱིར་འདི་ནི་སྟོན་པ་ཉིད་ཀྱི་ཞལ་དང་འདྲ་བར་བསྟན་ཏོ། །འདུལ་འདི་སོ་སོར་ཐར་པ་དེའི། །རྣམ་འབྱེད་ཡིན་པར་དགོངས་པས་ན། །ཐར་འདོད་རྣམས་ཀྱིས་གུས་བྱས་ཏེ། །འདི་ནི་
ནན་ཏན་མཉན་བྱར་བྱ། །ཞེས་བྱ་བ་ནི་དེ་ལྟར་གང་གི་ཕྱིར་སོ་སོར་ཐར་པ་ཞེས་བྱ་བ་གང་ཡིན་པ་དེ་ནི་ཡོན་ཏན་དང་ཕན་ཡོན་དེ་ལྟ་བུ་དུ་མས་ཡང་དག་པར་རྒྱས་པ་ཡིན་ལ། རྣམ་པར་འབྱེད་པ་དེ་ཕྲན་ཚེགས་ལ་སོགས་པ་འདི་དག་ཐམས་ཅད་ནི་སོ་སོར་ཐར་པ་དེའི་རྒྱ་ཆེར་རྣམ་པར་འབྱེད་པ་ཡིན་པར་དགོངས་པ་དེའི་ཕྱིར་ཐར་པར་འདོད་པ་རྣམས་ཀྱིས་གུས་པར་བྱས་ཏེ་སོ་སོར་ཐར་པ་དེའི་རྣམ་པར་འབྱེད་པར་གྱུར་པ་འདུལ་བ་འདི་དག་རྣམ་པ་ཐམས་ཅད་དུ་ནན་ཏན་གྱིས་མཉན་པར་བྱ་ཞིང༌། ཐོས་ནས་ཀྱང་འབྲས་བུ་དང་བཅས་པར་བྱའོ་ཞེས་བསྟན་ཏོ། །འདུལ་བ་རྣམ་པར་བཤད་པའི་གགས་བསལ་ཏེ། དེ་ལས་བདག་གིས་དགེ་བསྩགས་གང་ཡིན་པས། །འཆིང་བ་མ་ལུས་རབ་ཏུ་དགྲོལ་བྱའི་ཕྱིར། །འཇིག་རྟེན་ཀུན་གྱི་གགས་ནི་ཉམས་གྱུར་ཅིག །འདུལ་བ་ལ་བསྟོད་པ་བཙུན་པ་ཆོས་ཀྱི་ཚོང་དཔོན་གྱིས་མཛད་པ་སློབ་དཔོན་དུལ་བའི་ལྷས་རྣམ་པར་བཤད་པ་རྫོགས་སོ།། །།དེ་ནས་ཞི་ལམ་རྣམ་དབྱེའི་ཕྱིར། །བདག་ལ་རྣམ་པར་འབྱེད་པའི་ཚིག །གང་དག་མི་གསལ་སྣང་བ་དག །དེ་དག་རྣམ་པར་དགྲོལ་བར་བྱ། །ད་ནི་རྣམ་པར་འབྱེད་པའི་གཞུང་ཉིད་ཀྱི་ཚིག་མི་གསལ་བ་རྣམ་པར་བཤད་པར་བྱའོ། །འདིར་ཡང་བརྗོད་པར་བྱ་བ་ལ་སོགས་པ་བཞི་པོ་དག་ངེས་པར་བརྗོད་པར་བྱ་སྟེ། འདི་ལྟར་བརྗོད་པར་བྱ་བ་ལ་སོགས་པ་དང་བྲལ་ན་ཚིག་ཙམ་ལ་ཡང་ཉན་པ་པོ་དག་གུས་པར་མི་བྱེད་པའི་ཕྱིར་རོ། །དེ་ལ་འདིར་ལྟུང་བ་སྡེ་ལྔ་པོ་དག་ནི་བརྗོད་པར་བྱ་བའོ། །དེ་དག་གི་ངོ་བོ་ཉིད་བསྟན་པ་ནི་དགོས་པའོ། །ངོ་བོ་ཉིད་བསྟན་པ་དེ་ཡང་བསྟན་བཅོས་རྣམ་པར་འབྱེད་པ་ཞེས་བྱ་བ་འདིས་བྱེད་པས་ཐབས་དང་ཐབས་ལས་བྱུར་བའི་ཚུལ་ནི་འབྲེལ་པའོ། །རྣམ་པར་འབྱེད་པ་ལ་སོགས་པའི་འདུལ་བ་ཡོངས་སུ་ཤེས་པས་ཚུལ་ཁྲིམས་ཡོངས་སུ་དག་ན་འཕགས་པའི་ལམ་བསྒོམས་པས་མྱ་ངན་ལས་འདས་པ་ཐོབ་པ་ནི་དགོས་པའི་དགོས་པའོ། །དེ་ལ་རེ་ཞིག་ཡང་དག་པར་སྡུད་པར་བྱེད་པའི་ཚིགས་སུ་བཅད་པ་དག་རྣམ་པར་བཤད་པར་བྱའོ། །བསྐལ་པ་བྱེ་བ་རྣམས་སུ་ཡང༌། །འདུལ་བ་ཐོས་པར་འགྱུར་བ་དང༌། །གཟུང་དང་འཛིན་པ་རྙེད་དཀའ་སྟེ། །བསྒྲུབ་པའང་ཤིན་ཏུ་རྙེད་པར་དཀའ།།
ཞེས་བྱ་བ་ལ། བསྐལ་པ་ཞེས་བྱ་བ་ནི་བསྐལ་བར་བྱེད་པ་སྟེ་དུས་ཀྱི་བྱེ་བྲག་གོ །འདུལ་བ་ཞེས་བྱ་བ་ནི་གང་གིས་སློབ་མ་རྣམས་མྱ་ངན་ལས་འདས་པར་ཁྱད་པར་དུ་ཁྲིད་པར་བྱེད་པའམ། ལམ་ཐོང་པར་བྱེད་པ་སྟེ། བྱ་བ་དང་བྱ་བ་མ་ཡིན་པ་ཉེ་བར་སྟོན་པའོ། །དེ་ཐོས་པ་ཞེས་བྱ་བ་ནི་མཉན་པའོ། །གཟུང་ཞེས་བྱ་བ་ནི་ཚིག་གི་བདག་ཉིད་དང༌། དོན་གྱི་བདག་ཉིད་ཀྱིས་རྟོགས་པའོ། །འཛིན་པ་ཞེས་བྱ་བ་ནི་མི་བརྗེད་པའོ། །དེ་གསུམ་ཆར་ཡང་རྙེད་པར་དཀའ་སྟེ། རྒྱ་མཚོ་ཆེན་པོར་གཉའ་ཤིང་གི་མིག་ཏུ་རུས་སྦལ་གྱི་མགྲིན་པ་ཆུད་པའི་ཚུལ་གྱིས་སངས་རྒྱས་འབྱུང་ཡང་མི་ཉིད་དང། བར་ཆད་མེད་པ་ཉིད་རྙེད་པར་དཀའ་བས། བསྐལ་པ་ཆེན་པོ་བྱེ་བ་སྙེད་དག་འདས་པས་ཀྱང་དེ་དག་རྙེད་པར་དཀའ་སྟེ། དེ་དགེ་བའི་བཤེས་གཉེན་དང་ཕྲད་པ་ལ་སོགས་པའི་དབང་གིས་རྙེད་པར་འགྱུར་བའི་ཕྱིར་རོ། །སྒྲུབ་པ་ཞེས་བྱ་བ་ནི་འདུལ་བ་ལས་ནན་ཏན་བྱེད་པའོ། །དེའང་སྔ་མ་དེ་གསུམ་བས་ཀྱང་ཤིན་ཏུ་རྙེད་པར་དཀའ་སྟེ། ཡང་དག་པར་སྒྲུབ་པ་ནི་མངོན་པར་བརྩོན་པ་ལ་རག་ལས་པའི་ཕྱིར་རོ། །དེ་ལྟ་བས་ན་འདུལ་བ་བརྗོད་པར་བྱས་གུས་པར་ཉོན་ཅིག །ཐོས་ནས་ཀྱང་དྲང་སྲོང་ཆེན་པོས་ཇི་སྐད་གསུངས་པ་དེ་བཞིན་དུ་རྗེས་སུ་བསྒྲུབ་པ་ནན་ཏན་དུ་བྱའོ་ཞེས་བྱ་བའི་ཐ་ཚིག་གོ །ཡང་དག་པར་སྡུད་པར་བྱེད་པའི་ཚིག་འདི་དང་འོག་མ་དག་ཀྱང་འདུལ་བ་ལ་གུས་པར་བྱ་བའི་ཕྱིར་གསུངས་པར་ཤེས་པར་བྱ་སྟེ། གང་གི་ཕྱིར་འདུལ་བ་ཐོས་པ་ལ་སོགས་པ་ནི་རྙེད་པར་དཀའ་བའི་སངས་རྒྱས་འབྱུང་བ་དང་ཆོས་བསྟན་པ་ལ་སོགས་པ་ནི་བདེ་བའི་ཕྱིར། གུས་པ་དང་བཅས་པས་འདུལ་བ་མཉན་པ་ལ་སོགས་པ་བསྒྲུབ་པར་བྱའོ་ཞེས་བྱ་བའི་ཐ་ཚིག་གོ །སངས་རྒྱས་རྣམས་ནི་འབྱུང་བ་བདེ། །ཆོས་བསྟན་པ་ཡང་བདེ་བ་ཡིས། །དགེ་འདུན་མཐུན་པ་བདེ་བ་སྟེ། །མཐུན་པ་རྣམས་ཀྱི་དཀའ་ཐུབ་བདེ། །ཞེས་བྱ་བ་ལ་མཐུན་པ་ཞེས་བྱ་བ་ནི་རོ་གཅིག་པའོ། །དཀའ་ཐུབ་ཅེས་བྱ་བ་ནི་རྗེས་སུ་བསྒྲུབ་པ་སྟེ། ཉེ་བར་སྦྱོང་བ་གདུང་བར་བྱེད་པའོ། །འཕགས་པ་རྣམས་ནི་མཐོང་བ་བདེ། །དམ་པ་དག་དང་འགྲོགས་པ་བདེ། །བྱིས་པ་རྣམས་ནི་མ་མཐོང་ན། རྟག་ཏུ་བདེ་བ་ཉིད་དུ་འགྱུར། །ཞེས་བྱ་བ་ལ། འཕགས་པ་རྣམས་ཞེས་བྱ་བ་
ནི་དགྲ་བཅོམ་པ་ལ་སོགས་པ་དག་གོ །དམ་པ་དག་ཅེས་བྱ་བ་ནི་སོ་སོའི་སྐྱེ་བོ་རྣམས་ཀྱི་ནང་ན་སྐྱེས་བུ་དམ་པ་བྱང་ཆུབ་སེམས་དཔའ་ལ་སོགས་པ་དག་གོ །འགྲོགས་པ་ཞེས་བྱ་བ་ནི་ལྷན་ཅིག་མཚུངས་པར་གནས་པའོ། །བྱིས་པ་རྣམས་ཞེས་བྱ་བ་ནི་ཤེས་རབ་འཆལ་པ་ལོག་པར་སྒྲུབ་པ་རྣམས་སོ། །འཇུག་ངོགས་བདེ་བའི་ཆུ་ཀླུང་བདེ། །ཆོས་ལ་གོམས་པའི་སྐྱེ་བོ་བདེ། །ཤེས་རབ་ཐོབ་པར་གྱུར་པ་བདེ། །ངའོ་ང་རྒྱལ་ཟད་པ་བདེ། །ཞེས་བྱ་བ་ལ་འཇུག་ངོགས་བདེ་བའི་ཞེས་བྱ་བ་ནི་འཇུག་པའི་ལམ་བདེ་བའོ། །ཆོས་ལ་གོམས་པ་ཞེས་བྱ་བ་ནི་དགེ་པའི་ཆོས་ལ་གོམས་པའོ། །ཤེས་རབ་ཐོབ་པར་གྱུར་པ་ཞེས་བྱ་བ་ནི་ཟག་པ་མེད་པའི་ཤེས་རབ་ཐོབ་པར་གྱུར་པའོ། །ངའོ་ང་རྒྱལ་ཟད་པ་ཞེས་བྱ་བ་ནི་ཁམས་གསུམ་པའི་འདོད་ཆགས་དང་བྲལ་བའོ། །ངེས་པར་བྱས་ཤིང་དབང་པོ་ཐུལ་བ་དག །དགོན་བཞི་བ་རྣམས་སུ་རྒས་གྱུར་དང༌།། མང་དུ་ཐོས་པ་ནགས་ཀྱི་ནང་དག་ཏུ། །ལང་ཚོ་ཡོལ་པ་རྣམས་ཀྱི་གནས་པ་བདེ། །ཞེས་བྱ་བ་ལ་ནི་ངེས་པར་བྱས་ཤིང་ཞེས་བྱ་བ་ནི་མངོན་པར་བརྩོན་པར་བྱས་པའོ། །དབང་པོ་ཐུལ་བ་དག་ཅེས་བྱ་བ་ནི་དབང་པོ་རྣམས་དབང་དུ་གྱུར་ཅིང་མཉམ་པར་གཞག་པ་དག་གོ །དེ་དག་དགོན་པ་ཞི་བ་རྣམས་སུ་རྒས་པར་གྱུར་པ་རྣམས་དང༌། མང་དུ་ཐོས་པ་ནགས་ཀྱི་ནང་དག་ཏུ་ལང་ཚོ་ཡོལ་བ་རྣམས་ཀྱི་གནས་པ་བདེ་བ་ཞེས་བྱ་བ་ནི་དེ་ལྟར་གང་དག་གིས་མངོན་པར་བརྩོན་པ་བྱས་ནས་དབང་པོ་ཐུལ་བ་ནི་དགོན་པ་ཞི་བ་དབེན་པ་གྲོང་ལས་ཐག་རིང་བའི་ཕྱོགས་དག་ཏུ་རྒྱས་པར་གྱུར་པ་རྣམས་དང༌། གང་དག་མང་དུ་ཐོས་པ་ནི་ནགས་ཀྱི་ནང་དག་ཏུ་ལང་ཚོ་གཞོན་པ་ཉིད་ཡོལ་ཞིང་ཟད་པར་བྱས་དེ་རྣམས་ཀྱི་གནས་པ་ཞེས་བྱ་བ་གསོན་པ་ཉིད་ནི་བདེའོ་ཞེས་བྱ་བའི་ཐ་ཚིག་གོ །ཤཱཀྱ་སེང་གེ་དེ་ལ་ནི། །སེན་མོ་བཅུ་ཡི་ཐལ་སྦྱར་ཏེ། །འདུལ་བ་རབ་ཏུ་གདོན་པར་བྱ། །འདུལ་བའི་དོན་དུ་ད་ལ་ཉོན། །ཞེས་བྱ་བ་ལ་སེན་མོ་བཅུ་ཞེས་བྱ་བ་ནི་ལག་སོར་གཉིས་ཀྱི་སེན་མོ་བཅུའོ། །འདུལ་བའི་དོན་དུ་ཞེས་བྱ་བ་ནི་སློབ་མ་རྣམས་གདུལ་བའི་དོན་དུའོ། །ཐོས་ནས་དྲང་སྲོང་ཆེན་པོ་ཡིས། །ཇི་སྐད་གསུངས་བཞིན་བསྒྲུབ་བྱ་ཞིང༌། །ཁ་ན་མ་ཐོ་ཕྲ་རྣམས་ལ། །
བརྟུན་ཞིང་བྱེད་པ་ཉིད་དུ་གྱིས། །ཞེས་བྱ་བ་ལ། ཁ་ན་མ་ཐོ་ཕྲ་རྣམས་ལ། །ཞེས་བྱ་བ་ནི་ཆ་ཕྲ་མོ་རྣམས་ལའོ། །བརྟུན་ཞིང་བྱེད་པ་ཞེས་བྱ་བ་ནི་བསྲུང་བ་ལ་སོགས་པ་དག་ལ་འབད་པ་ལྷུར་བླང་བའོ། །རྟག་ཏུ་འབད་པས་བདའ་བ་ཡིས། །སེམས་རྟ་ཁ་བླན་དཀའ་བ་ལ། །མཐུན་པ་གཟེར་རྣོན་བརྒྱ་པ་ཡི། །སྲབ་ནི་འདུལ་བ་འདི་ཡིན་ནོ། །ཞེས་བྱ་བ་ལ། རྟག་ཏུ་འབད་པས་བདའ་ཞེས་བྱ་བ་ནི་ལམ་བདེ་བ་དང་འདྲ་བའི་དག་པའི་ཕྱོགས་ལ་གཞུག་པའི་དུས་ན་རྟག་ཏུ་བྲུངས་བཞིན་དུ་འཐེན་ཅིང་བརྩོན་འགྲུས་ཀྱི་ལྕག་གིས་བདའ་ཞིང་བསྐྱོད་དགོས་པའོ། །ཁ་བླན་དཀའ་བ་ཞེས་བྱ་བ་ནི་ལམ་གོལ་བ་དང་འདྲ་བའི་མི་དགེ་བའི་ཕྱོགས་ལ་འཇུག་པའི་དུས་ན་རླུང་བཞིན་དུ་འཕྱོ་ཞིང་ཆུ་ལོན་གྱི་འགུགས་སྲབ་ཀྱིས་ཕྱིར་བླན་ཞིང་དགུག་དཀའ་བའོ། །མཐུན་པ་ཞེས་བྱ་བ་ནི་རྐྱེན་དུ་འབབ་པ་སྟེ། དཔེར་ན་རྟག་ཏུ་ལྕག་གིས་འབད་པས་བདའ་ཞིང་འགུགས་སྲབ་ཀྱི་ཁ་ལྕགས་ཀྱིས་ཁ་བླན་གོས་པའི་རྟ་ལ་གཟེར་བུ་རྣོན་པོ་བརྒྱ་པའི་སྲབ་ཀྱིས་བསླབ་དགོས་པ་དང་འདྲ་བར་སེམས་ཀྱི་རྟ་རྟག་ཏུ་བརྩོན་འགྲུས་ཀྱི་འབད་པས་བདའ་ཞིང་ཚུལ་ཁྲིམས་ཀྱི་ཆུ་ལོན་གྱིས་བླན་དགོས་པ་ལ་བསླབ་པའི་གཟེར་དུ་འབིགས་པར་བྱེད་པ་རྣོན་པོ་བརྒྱ་པའི་འདུལ་བས་བསྡམ་དགོས་པའོ། །གཟེར་རྣོན་བརྒྱ་པ་ཞེས་བྱ་བ་ནི་བསལ་པའི་གཞིའི་གཟེར་བུ་འབིགས་པར་བྱེད་པ་མང་པོ་དང་ལྡན་པའོ། །བརྒྱ་པ་ཞེས་བྱ་བ་ནི་མང་པོའི་དཔེ་ཡིན་ནོ། །ཆེ་བ་གང་དག་ངག་ཙམ་གྱིས། །ལྡོག་ཅིང་མཚམས་ལས་མི་འདའ་བ། །དེ་དག་མི་རྟ་བཟང་པོ་སྟེ། །ཉོན་མོངས་གཡུལ་ལས་ངེས་རྒྱལ་འགྱུར། །ཞེས་བྱ་བའི་ཚིགས་སུ་བཅད་པས་ནི་རྗེས་སུ་བསྒྲུབ་པའི་ཕན་ཡོན་སྟོན་ཏེ། མཚམས་ལས་ཞེས་བྱ་བ་ནི་བསླབ་པ་ལས་སོ། །མི་བདའ་བ་ཞེས་བྱ་བ་ནི་མི་འབྲལ་བའོ། །མི་རྟ་བཟང་པོ་ཞེས་བྱ་བ་ནི་མི་དེ་དག་གི་རྟ་ཅང་ཤེས་དང་འདྲ་བའོ། །ཉོན་མོངས་གཡུལ་ཞེས་བྱ་བ་ནི་ཉོན་མོངས་པ་གཡུལ་དང་འདྲ་བའོ། །ངེས་རྒྱལ་འགྱུར་ཞེས་བྱ་བ་ནི་སྦྱོར་བར་འགྱུར་ཞིང་འབྲས་བུ་དང་བཅས་པར་འགྱུར་བའོ། །སུ་ལ་སྲབ་འདི་མེད་པ་དང༌། །ནམ་དུའང་འདོད་པར་མི་འགྱུར་བ། །དེ་དག་ཉོན་མོངས་གཡུལ་གྱིས་དཀྲུགས། །འཇོག་བྲལ་
རྣམ་པར་འཁྱམ་པར་འགྱུར། །ཞེས་བྱ་བའི་ཚིགས་སུ་བཅད་པས་ནི་རྗེས་སུ་མི་བསྒྲུབ་པའི་ཉེས་དམིགས་སྟོན་ཏེ། མེད་པ་ཞེས་བྱ་བ་ནི་ཡང་དག་པར་མ་བླངས་པས་མ་རལ་པར་གྱུར་པས་སོ། །ནམ་དུའང་ཞེས་བྱ་བ་ནི་ལན་འགའ་ཡང་ངོ༌། །འདོད་པར་མི་འགྱུར་བ་ཞེས་བྱ་བ་ནི་ཚུལ་ཁྲིམས་ལ་མི་ཕྱོགས་པས་མངོན་པར་འདོད་པར་མི་འགྱུར་བའོ། །དཀྲུགས་ཞེས་བྱ་བ་ནི་ཕམ་པར་བྱས་པའོ། །འཇོག་བྲལ་ཞེས་བྱ་བ་ནི་ལྕགས་ཀྱོ་མེད་པ་སྟེ། ཏིང་ངེ་འཛིན་ལ་འཇོག་པའི་དུལ་བ་དང་བྲལ་བའོ། །རྣམ་པར་འཁྱམ་པར་འགྱུར་ཞེས་བྱ་བ་ནི་འཁོར་བར་འགྱུར་བའོ། །བཅོམ་ལྡན་འདས་ཀྱིས་ཞེས་བྱ་བ་ལ་སོགས་པ་ལ། བཅོམ་ལྡན་འདས་ཞེས་བྱ་བ་ནི་གང་ལ་སྐལ་བ་བསོད་ནམས་དང་ཡེ་ཤེས་ཀྱི་ཚོགས་བླ་ན་མེད་པ་ཡོད་པ་དེ་ནི་ད་རུང་ཡང་བསྟན་པ་རྗེས་སུ་འཇུག་པས་ད་ལྟར་ཉིད་དུ་བརྗོད་པར་འདོད་པའི་ཕྱིར་སྐལ་ལྡན་ཞེས་བྱ་སྟེ་དེའིའོ། །ཉན་ཐོས་ཀྱི་དགེ་འདུན་ཞེས་བྱ་བ་ལ། ཉན་ཐོས་ཞེས་བྱ་བ་དེ་ནི་དེ་བཞིན་གཤེགས་པ་ལས་ཆོས་ཉན་པར་བྱེད་པའམ། དེ་བཞིན་གཤེགས་པའི་བཀའ་རྗེས་སུ་སྒྲུབ་པར་བྱེད་པ་སྟེ། སློབ་མ་རིགས་གསུམ་པོ་དག་དང་ལྡན་པ་རྣམས་སོ། །དེ་དག་གི་དགེ་འདུན་ཞེས་བྱ་བ་ནི་ཚོགས་ཏེ། དེ་ནི་ཉན་ཐོས་ཀྱི་དགེ་འདུན་ནོ། །སྐྱོན་མེད་ཅིང་ཞེས་བྱ་བ་ནི་ལྟ་བའི་ཆུ་བུར་གྱི་སྐྱོན་མེད་པ་སྟེ། ལོག་པར་ལྟ་བ་མ་བྱུང་བའི་ཕྱིར་རོ། །ཆུ་བུར་མེད་ལ་ཞེས་བྱ་བ་ནི་ཚུལ་ཁྲིམས་ཀྱི་ཆུ་བུར་གྱི་ནད་མེད་པ་སྟེ། ཕམ་པ་མ་བྱུང་བའི་ཕྱིར་རོ། །ཡང་ཞེས་བྱ་བ་ནི་བསྡུ་བའོ། །སྡིག་པ་ཐམས་ཅད་མི་བྱ་སྟེ། །ཞེས་བྱ་བ་ལ་སོགས་པ་ལ། རྩ་བ་དང་པོས་ནི་ཚུལ་ཁྲིམས་རྣམ་པར་དག་པ་བསྟན་ཏོ། །རྩ་བ་གཉིས་པས་ནི་ཤེས་རབ་རྣམ་པར་དག་པ་བསྟན་ཏོ། །ཤེས་རབ་རྣམ་པར་དག་པས་མྱ་ངན་ལས་འདས་པ་ཞེས་བྱ་བའི་དགེ་བ་ཕུན་སུམ་ཚོགས་པ་བསྒྲུབ་པའི་ཕྱིར་རོ། །རྩ་བ་གསུམ་པས་སེམས་རྣམ་པར་དག་པ་བསྟན་ཏེ། བསམ་གཏན་གྱི་སེམས་སྦྱོང་བའི་ཕྱིར་རོ། །འདི་ནི་སངས་རྒྱས་བསྟན་པ་ཡིན། །ཞེས་བྱ་བ་ནི་མདོར་བསྡུས་ཏེ་བསྟན་པ་ཡིན་ནོ། །ལུས་ཀྱི་སྡོམ་པ་ལེགས་པ་སྟེ། །ཞེས་བྱ་བ་
ལ་སོགས་པ་ཚིགས་སུ་བཅད་པ་རྩ་བ་དྲུག་པ་གཅིག་གིས་ནི་བློ་བར་མ་རྣམས་ལ་དེ་ཉིད་འབྲས་བུ་དང་བཅས་པར་རྒྱས་པར་བསྟན་ཏོ། །སྡོམ་པ་ཞེས་བྱ་བ་ནི་ཡང་དག་པའི་སྡོམ་པའོ། །ངག་རྣམས་བསྲུང་ཞིང་ཞེས་བྱ་བ་ལ་སོགས་པས་ནི་རྒྱུ་བསྟན་པས་སྒྲུབ་པར་བྱེད་དོ། །ལས་ལམ་ཞེས་བྱ་བ་ནི་ལས་ཀྱི་སྒོ་དག་གོ །དྲང་སྲོང་གསུངས་པ་ཞེས་བྱ་བ་ནི་དེ་བཞིན་གཤེགས་པས་གསུངས་པའོ། །ཐོབ་པར་འགྱུར་ཞེས་བྱ་བ་ནི་རྟོགས་པར་འགྱུར་བའོ། །ལོ་བཅུ་གཉིས་པོ་དག་པ་ནི་དང་པར་ཐར་པའི་ཆ་དང་མཐུན་པ་ཡོངས་སུ་སྨིན་པ་དག་རབ་ཏུ་བྱུང་བའི་ཕྱིར་ཁ་ན་མ་ཐོ་བ་མེད་པའི་ཁ་ན་མ་ཐོ་བ་མེད་པར་རོ། །ཕྱིས་ནི་འདྲེན་མར་གྱུར་པའི་ཕྱིར་ཉེས་པ་བྱུང་ངོ༌། །བབ་པ་ནི་ཞེས་བྱ་བ་ནི་འབྱུང་བ་ནའོ། །སངས་རྒྱས་བཅོམ་ལྡན་འདས་ཞེས་བྱ་བ་ལ། བཅོམ་ལྡན་འདས་ཞེས་བྱ་བའི་སྒྲ་ནི་སངས་རྒྱས་ཀྱི་སྒྲའི་ཉེ་བའི་ཚིག་ཡིན་ཏེ། ཡང་དག་པར་སྡུད་པར་བྱེད་པ་རྣམས་ཀྱིས་གུས་པར་བྱ་བའི་ཕྱིར་རོ། །ཡུལ་སྤོང་བྱེད་དག་ན་ཞེས་བྱ་བ་ནི་ལྗོངས་ཀྱི་མེད་སྤོང་བྱེད་ཅེས་བྱ་དེ་དག་ནའོ། །ཀ་ལན་ད་ཀའི་གྲོང་ཁྱེར་ན་ཞེས་བྱ་བ་ནི་ཀ་ལན་ད་ཀ་ཞེས་བྱ་བ་རིགས་ཐ་དད་པ་དཔེར་ན་ཧུ་ན་ལ་སོགས་པ་དང་འདྲ་བའི་ཕྱིར་མི་དག་ཡོད་དོ། །དེ་དག་གི་གྲོང་ནི་ཀ་ལན་ད་ཀ་གྲོང་ཁྱེར་ཞེས་བྱ་བ་སྟེ་དེ་ནའོ། །བཞུགས་སོ་ཞེས་བྱ་བ་ནི་སྤྱོད་ལམ་བཞི་པོ་དག་གིས་གནས་པའོ། །དེའི་ཚེ་ན་ཞེས་བྱ་བ་ནི་དེའི་དུས་ནའོ། །ཕྱུག་པ་ཞེས་བྱ་བ་ནི་སཱ་ལུ་ལ་སོགས་པ་ནང་གི་ཡོ་བྱད་འབྱོར་བའོ། །ནོར་མང་བ་ཞེས་བྱ་བ་ནི་དབྱིག་དང་གསེར་ལ་སོགས་པ་ནོར་འབྱོར་པའོ། །ལོངས་སྤྱོད་ཆེ་བ་ཞེས་བྱ་བ་ནི་མ་ཧེ་ལ་སོགས་པ་དག་དང་གྲོང་ལ་སོགས་པ་དག་གིས་སོ། །ཡོངས་སུ་གཟུང་བ་ཡངས་པ་ཞེས་བྱ་བ་ནི་བྲན་ལ་སོགས་པ་ཡོ་བྱད་དང་མི་དག་གིས་སོ། །ཡོངས་སུ་བཟུང་བ་རྒྱ་ཆེ་བ་ཞེས་བྱ་བ་ནི་ཁང་ཁྱིམ་གྱི་གཏོས་རྒྱ་ཆེ་བའོ། །རྣམ་ཐོས་ཀྱི་བུའི་ནོར་དང་ལྡན་པ་ཞེས་བྱ་བ་ནི་གྲངས་དང་རིན་པོ་ཆེའི་ནོར་དང་ལྡན་པའི་ཕྱིར་རོ། །རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞེས་བྱ་བ་ནི་ནོར་མཉམ་པ་གཞན་མི་སྣང་བས་རྣམ་ཐོས་ཀྱི་བུ་ལ་ནོར་གྱིས་འགྲན་པའི་ཕྱིར་རོ། །ཆུང་མ་ཞེས་བྱ་བ་ནི་ཁྱིམ་མོའོ། །དེ་དང་ཞེས་བྱ་བ་ནི་ཆུང་མ་དང་ངོ༌། །
རྩ་བར་བྱེད་ཅེས་བྱ་བ་ནི་རྒྱན་པོ་དང་ཕོ་ལོངས་ལ་སོགས་པས་སོ། །དགའ་བར་བྱེད་ཅེས་བྱ་བ་ནི་གླུ་དང་བྲོ་དང་འཁྱུད་པ་ལ་སོགས་པས་སོ། །དགའ་མགུར་སྤྱོད་པ་ཞེས་བྱ་བ་ནི་འཁྲིག་པས་བདག་ཉིད་ཀུན་ཏུ་སྤྱོད་པ་བསྙེན་བཀུར་བྱེད་དུ་འཇུག་པའོ། །སངས་རྒྱས་ལ་མངོན་པར་དད་ཅེས་བྱ་བ་ནི་མི་སློབ་པའི་ཆོས་ཀྱི་ངོ་བོ་ཉིད་དེ་བཞིན་གཤེགས་པ་སྐུ་ལུས་དང་བཅས་པ་ལ་དད་པར་གྱུར་པའོ། །ཆོས་ལ་ཞེས་བྱ་བ་ནི་མྱ་ངན་ལས་འདས་པ་ལའོ། །དགེ་འདུན་ལ་ཞེས་བྱ་བ་ནི་སློབ་པ་དང་མི་སློབ་པའི་ངོ་བོ་ཉིད་ཀྱི་དགེ་སློང་གི་ཚོགས་ལའོ། །སྐྱབས་སུ་སོང་ཞེས་བྱ་བ་ནི་རྟེན་དུ་ཁས་བླངས་པའོ། །སྲོག་གཅོད་པ་སྤངས་ཏེ་ཞེས་བྱ་བ་ནི་ཡང་དག་པའི་ལེན་པའི་དུས་ན་སྲོག་ཆགས་གསོད་པའི་ཡིད་ཡོངས་སུ་གཏང་སྟེའོ། །སྲོག་གཅོད་པ་ལས་ཕྱིར་ལོག་ཅེས་བྱ་བ་ནི་དུས་ཕྱིས་ཀྱང་ལུས་དང་ངག་དག་གིས་ཕྱིར་ལོག་པར་གྱུར་པའོ། །མ་བྱིན་པར་ལེན་པ་ཞེས་བྱ་བ་ནི་གཞན་གྱི་རྫས་བདག་གིར་བྱེད་པའོ། །འདོད་པ་ལ་ལོག་པར་གཡེམ་པ་ཞེས་བྱ་བ་ནི་བགྲོད་པ་མ་ཡིན་པ་དང༌། ཡན་ལག་མ་ཡིན་པ་དང༌། ཡུལ་མ་ཡིན་པ་དང༌། དུས་མ་ཡིན་པ་དག་ཏུ་སྨད་པའི་འདོད་པ་བསྟེན་པའོ། །བརྫུན་དུ་སྨྲ་བ་ཞེས་བྱ་བ་ནི་བསླུ་བའི་ཕྱིར་གཞན་དུ་སྟོན་པའོ། །འབྲུའི་ཆང་ཞེས་བྱ་བ་ནི་ཟས་ཀྱི་ཆང་ངོ༌། །བཅོས་པའི་ཆང་ཞེས་བྱ་བ་ནི་རྫས་ཀྱི་ཆང་ངོ༌། །མྱོས་པར་འགྱུར་བ་ཞེས་བྱ་བ་ནི་ར་རོ་བར་འགྱུར་བའི་རྫས་སོ། །བདག་མེད་པའི་གནས་ཞེས་བྱ་བ་ནི་འབྲུའི་ཆང་དང་བཅོས་པའི་ཆང་གི་མཚན་ཉིད་དོ། བག་མེད་པ་ཞེས་བྱ་བ་ནི་དོན་ནི་ཉམས་ལ་དོན་མ་ཡིན་པ་ནི་འཕེལ་བའོ། །དེའི་གནས་ཞེས་བྱ་བ་ནི་དེའི་རྒྱུ་ཞེས་བྱ་བའི་ཐ་ཚིག་གོ །རྗེས་སུ་སྤེལ་ཞིང་ཞེས་བྱ་བ་ནི་བསྐྱེད་ཅིང་ངོ༌། །སྐྲ་དང་ཁ་སྤུ་བྲེགས་ཏེ་ཞེས་བྱ་བ་ནི་འདོད་ཆགས་དང་བྲལ་བའི་རྗེས་སུ་མཐུན་པར་བྱ་བའི་ཕྱིར་དང༌། མི་འབྲེལ་བར་བྱ་བའི་ཕྱིར་སྐྲ་དང་ཁ་སྤུ་དག་བསྐྱར་ཏེ་ཞེས་བྱ་བའི་ཐ་ཚིག་གོ །བགོས་ནས་ཞེས་བྱ་བ་ནི་བྱོན་ནས་སོ། །ཡང་དག་པ་ཁོ་ནར་ཞེས་བྱ་བ་ནི་ཕྱིན་ཅི་མ་ལོག་པ་ཉིད་དུའོ། །ཁྱིམ་ནས་ཞས་བྱ་བ་ནི་ཁྱིམ་པའི་ཁྱིམ་ནས་སོ། །ཁྱིམ་མེད་པར་ཞེས་བྱ་བ་ནི་ཁྱིམ་ཡོངས་སུ་སྤངས་པ་དང་མཐུན་པར་རབ་ཏུ་འབྱུང་བར་
རོ། །རབ་ཏུ་བྱུང་ངོ་ཞེས་བྱ་བ་ནི་ཞུགས་སོ་ཞེས་བྱ་བའི་ཐ་ཚིག་གོ །ཁྱིམ་པ་ཞེས་བྱ་བ་ནི་ཁྱིམ་ན་གནས་པའོ། །དེ་ནས་ཞེས་བྱ་བ་ནི་དེ་མ་ཐག་དུའོ། །ཚེ་དང་ལྡན་པ་ཞེས་བྱ་བ་ནི་ཚེ་ཡོད་པ་སྟེ། དེའི་འབྲས་བུའི་རྗེས་སུ་ཞུགས་པས་ད་ལྟ་ཉིད་དུ་བརྗོད་པར་འདོད་པའི་ཕྱིར་ལྡན་པ་ཞེས་སྨོས་སོ། །འདི་སྙམ་དུ་སེམས་ཏེ་ཞེས་བྱ་བ་ནི་འདི་སྙམ་དུ་སེམས་པར་འགྱུར་བའོ། །ལེགས་པར་གསུངས་པ་ཞེས་བྱ་བ་ནི་ཇི་ལྟ་བ་བཞིན་དུ་གསུངས་པའོ། །ཆོས་འདུལ་བ་ལ་ཞེས་བྱ་བ་ནི་མྱ་ངན་ལས་འདས་པའི་ཆོས་ཀྱི་དོན་དུ་ཉེ་བར་བསྟན་པའི་གསུངས་རབ་ལའོ། །བདག་གིས་མ་རྙེད་དེ་རྙེད་པ་མ་ཡིན་ཞིང་ཞེས་བྱ་བ་ནི་མིའི་ཆོས་ལས་བླ་མ་མ་ཐོབ་པའི་ཕྱིར་རོ། །ཉེས་པ་རྙེད་དེ་ལེགས་པར་རྙེད་པ་མ་ཡིན་གྱི་ཞེས་བྱ་བ་ནི་རབ་ཏུ་བྱུང་བ་རྙེད་པ་ལ་སོགས་པ་ཡང་རྫོགས་པར་མ་རྙེད་པའི་ཕྱིར་རོ། །འབྲལ་བའི་ཕྱིར་ཞེས་བྱ་བ་ནི་ཐ་དད་པ་ཉིད་དུ་བྱ་བའི་ཕྱིར་རོ། །ལྗོངས་རྒྱུར་ཞེས་བྱ་བ་ནི་ཡུལ་གཞན་དུ་རྒྱུར་རོ་སྙམ་མོ་ཞེས་བྱ་བ་ནི་སོམ་ཉི་བྱེད་པའོ། །མུ་གེ་ཞེས་བྱ་བ་ནི་སློང་མོ་དག་འབྱོར་བ་མེད་པའོ། །ཉམ་ང་བ་ཞེས་བྱ་བ་ནི་སྡུག་བསྔལ་དང་སྡུག་བསྔལ་བའི་རྒྱུ་ཡིན་པའི་ཕྱིར་རོ། །དགོན་པ་ཞེས་བྱ་བ་ནི་བཟའ་བ་དང་བཏུང་བ་དག་མེད་པའི་འབྲོག་དགོན་པ་དང་འདྲ་བའི་ཕྱིར་རོ། །ཟས་ཞེས་བྱ་བ་ནི་བཟའ་བའོ། །སྦྱིན་པ་ཞེས་བྱ་བ་ནི་གཏོང་བར་བྱེད་པའོ། །བྱ་བར་ཞེས་བྱ་བ་ནི་སྒྲུབ་པར་བྱེད་པའོ། །སེམས་པ་ཞེས་བྱ་བ་ནི་སེམས་པའོ། །སྨོས་ཀྱང་ཅི་དགོས་ཞེས་བྱ་བ་ནི་བསམ་པ་ཡང་ཅི་དགོས་ཞེས་བྱ་བའོ། །ད་ལྟར་ཞེས་བྱ་བ་ནི་དེང་སང་ངོ༌། །ཟས་དག་ཅེས་བྱ་བ་ནི་འབྲས་ཆན་ལ་སོགས་པ་བཟའ་བར་བྱ་བ་དག་གོ །སྦྱོར་དུ་གཞུག་ཅེས་བྱ་བ་ནི་བྱེད་དུ་གཞུག་པའོ། །སྐྱོ་མ་དག་ཅེས་བྱ་བ་ནི་སྐྱོ་མའི་བཏུང་བ་དག་གོ །ཐུག་པའི་བཏུང་བ་དག་ཅེས་བྱ་བ་ནི་ཐུག་པར་བཏུང་བ་དག་གོ །རྟག་རེས་འཁོར་དག་ཅེས་བྱ་བ་ནི་རྒྱུན་དུ་ཡོད་པ་དག་གོ །མགྲོན་དུ་བོས་པ་དག་ཅེས་བྱ་བ་ནི་ལན་འགའ་ཡོད་པ་དག་གོ །བརྒྱད་སྟོན་ཞེས་བྱ་བ་ལ་སོགས་པ་ གསུམ་ནི་ཚེས་བརྒྱད 
་ལ་སོགས་པ་ལ་ངེས་པའི་སྟོན་མོ་དག་གོ །སྤྱན་གཟིགས་ཕྲན་ཚེགས་ཞེས་བྱ་བ་ནི་རྩ་བའི་བཅའ་བར་བྱ་བ་ལ་སོགས་པ་དག་གོ །ཅི་དགར་ཞེས་བྱ་བ་ནི་ཅི་འདོད་པར་རོ། །འདུག་
ནས་ཞེས་བྱ་བ་ནི་གནས་ནས་སོ། །མཐར་གྱིས་ཞེས་བྱ་བ་ནི་རྐང་པ་བྱུག་པ་ལ་སོགས་པ་དག་གིས་ཐོད་རྒལ་དུ་མ་ཡིན་ནོ་ཞེས་བྱ་བའི་ཐ་ཚིག་གོ །རྒྱུ་བའི་ཚེ་ཞེས་བྱ་བ་ནི་རྒྱུ་བ་ནིའོ། །གན་དུ་ཞེས་བྱ་བ་ནི་དྲུང་དུའོ། །དགོན་པ་ཞེས་བྱ་བ་ནི་ངེས་པར་དགོན་པར་གནས་པའོ། །ཆོས་གོས་གསུམ་པ་ཞེས་བྱ་བ་ནི་ཆོས་གོས་གསུམ་པ་ལས་ལྷག་པ་བདག་གིར་མི་བྱེད་པའོ། །ཕྱག་དར་ཁྲོད་པ་ཞེས་བྱ་བ་ནི་ལམ་པོ་ཆེ་ནས་རྙེད་པའི་གོས་ཀྱི་དམ་དུམ་ཕྱག་དར་དང་འདྲ་བར་གྱུར་པ་དག་གིས་འཚོ་བའོ། །བསོད་སྙོམས་པ་ཞེས་བྱ་བ་ནི་སློང་མོའི་ཟས་ཀྱིས་འཚོ་བའོ། །མཐར་ཆགས་ཀྱིས་རྒྱུ་བ་ཞེས་བྱ་བ་ལ་མཐར་ཞེས་བྱ་བ་ནི་ཁྱིམ་རེ་རེར་མཐར་གྱིས་འཇུག་པ་སྟེ། མཐར་དེ་དང་བསོད་སྙོམས་ལ་རྒྱུ་བ་བཅས་པ་ནི་མཐར་ཆགས་ཀྱིས་རྒྱུ་བ་ཞེས་བྱ་བ་སྟེ། རིམ་གྱིས་རྒྱུ་ཞེས་བྱ་བའི་ཐ་ཚིག་གོ །དང་པོ་ཁོ་ནར་ཞེས་བྱ་བ་ནི་ཐོག་མ་ཁོ་ནར་རོ་།བསོད་པ་ཞེས་བྱ་བ་ནི་མར་ལ་སོགས་པ་བསྟངས་པས་སོ། །ཚིམ་པར་བྱས་ནས་ཞེས་བྱ་བ་ནི་ཇི་ཙམ་འདོད་པ་ཟར་བཅུག་ནས་སོ། །སྔ་དྲོ་ཞེས་བྱ་བ་ནི་གུང་ཚིགས་ཀྱི་མདུན་རོལ་དུའོ། །ཤམ་ཐབས་བགོས་ཏེ་ཞེས་བྱ་བ་ནི་སྨད་ཀྱི་གོས་བགོས་ཏེའོ། །ཆོས་གོས་ཐོགས་ནས་ཞེས་བྱ་བ་ནི་སྟོད་ཀྱི་གོས་བགོས་ནས་སོ། །བསོད་སྙོམས་ལ་ཞུགས་པ་ནི་ཞེས་བྱ་བ་ནི་རྒྱུ་བ་ནའོ། །ཁྱིམ་ཞེས་བྱ་བ་ནི་ཁང་ཁྱིམ་མོ། །སྦྱིན་པ་ཞེས་བྱ་བ་ནི་སློང་མོ་ལ་སོགས་པ་སྦྱིན་པར་བྱའོ། །ཕྱིར་གཏོང་བ་ཞེས་བྱ་བ་ནི་ཕྱིར་བཟློག་པའོ། །མྱུར་བ་མྱུར་བར་ཞེས་བྱ་བ་ནི་ཡང་དང་ཡང་དུ་ཚིག་གཉིས་བཟླས་པའམ་རྣམ་པ་གཞན་དང་གཞན་དུའོ། །མ་ཞེས་བྱ་བ་ནི་སྐྱེད་པའི་མའོ། །འགའ་ཞིག་ལ་ཞེས་བྱ་བ་ནི་དོན་དགོས་པ་མེད་པའི་ཕྱིར་མིང་མ་སྨོས་སོ། །རྔོ་མོ་ཞེས་བྱ་བ་ནི་ཇོ་མོ་ལ་བོད་པའོ། །མཁྱེན་པར་མཛོད་ཅིག་ཅེས་བྱ་བ་ནི་ཐུགས་སུ་ཆུད་པར་མཛོད་ཅེས་བྱ་བའོ། །ཇོ་ཅོ་ཞེས་བྱ་བ་ནི་བུ་ཐུ་བོལ་གཅུགས་པའི་ཚིག་གོ །འཕྱི་བ་འཕྱི་བར་ཞེས་བྱ་བ་ནི་སྔར་ཡང་དང་ཡང་དུ་མ་འོངས་པ་སྟེ། རྣམ་པའི་ཚིག་ཡིན་པས་ལན་གཉིས་བཟླས་སོ། །མ་ལ་ཞེས་བྱ་བ་ནི་དོན་འདི་ལ་སོགས་པར་འཇུག་སྲིད་པ་བསྟན་ཏོ། །འདོད་པའམ་ཞེས་བྱ་བ་ནི་སྐྱེ་བོ་ཁྱིམ་པར་མངོན་པར་འདོད་པའོ། །
མངོན་པར་མི་དགའ་བའམ་ཞེས་བྱ་བ་ནི་རབ་ཏུ་བྱུང་བས་ཡིད་བྱུང་བའོ། །རྣམ་པར་འཁྱམ་འདོད་པར་གྱུར་ཅིང་ཞེས་བྱ་བ་ནི་འབབ་པར་འདོད་པའོ། །དགེ་སྦྱོང་གི་ཚུལ་དོན་དུ་གཉེར་བའམ་ཞེས་བྱ་བ་ནི་དགེ་སློང་གི་དངོས་པོ་འབྲས་བུ་མེད་པར་སེམས་པའོ། །སྒྱིད་ལུགས་པ་ཞེས་བྱ་བ་ནི་ལུས་ཀྱིས་ངལ་བར་བྱེད་པའོ། །མུས་བྱུང་བའམ་ཞེས་བྱ་བ་ནི་སེམས་ཀྱིས་དེ་ངོ་ཚ་བར་བྱེད་པ་སྟེ། དེ་གཉིས་ནི་འཇིག་རྟེན་འདི་ལ་ལྟོས་པས་སོ། །ཐེ་ཚོམ་ཟ་འམ་ཞེས་བྱ་བ་ནི་ཡིད་གཉིས་ཟ་བའོ། །སྨོད་པའམ་ཞེས་བྱ་བ་ནི་དགེ་སྦྱོང་གི་ཚུལ་ནི་མི་བཟང་བའོ་སྙམ་དུ་སྨོད་པ་སྟེ། དེ་གཉིས་ནི་འཇིག་རྟེན་ཕ་རོལ་ལ་ལྟོས་པས་སོ། །ཡོངས་སུ་གཏོང་འདོད་པའམ་ཞེས་བྱ་བ་ནི་འདོད་པར་འདོད་པའོ། །རིག་ནས་ཞེས་བྱ་བ་ནི་ཤེས་ནས་སོ། །གལ་ཏ་ཞེས་བྱ་བ་ཇི་སྟེ། ཞེས་བྱ་བའི་ཐ་ཚིག་གོ །བུད་མེད་ཀྱི་ནོར་ཞེས་བྱ་བ་ནི་བུད་མེད་ཀྱི་རྫས་སོ། །བུད་མེད་ཀྱི་བག་རྫངས་ཞེས་བྱ་བ་ནི་བག་མའི་རྫངས་ཁུད་པའོ། །བུད་མེད་དབང་བའི་རྫས་ཞེས་བྱ་བ་ནི་བདག་གིར་བྱས་པའི་རྫས་སོ། །འམ་ཞེས་བྱ་བ་ནི་རྣམ་གྲངས་ཉིད་བསྟན་པའི་ཕྱིར་རོ། །དབྱིག་ཅེས་བྱ་བ་ནི་དངུལ་ལོ། །གསེར་ཞེས་བྱ་བ་ནི་གསེར་ཉིད་དོ། །དེ་ནི་ཁྱོད་ཀྱི་མའི་ཡོན་ནོ་ཞེས་བྱ་བ་ནི་ཚད་ཅེས་བྱ་བའི་ཚིག་གི་ལྷག་མའོ། །མཚན་མ་བཏབ་པ་ཞེས་བྱ་བ་ནི་མངོན་མཚན་ཅན་ཉིད་དུ་གྱུར་པའོ། །བརྒྱ་ཕྲག་ཅེས་བྱ་བ་ལ་སོགས་པ་ནི་དགེ་བ་ཐ་དད་པ་དག་ཡིན་ཏེ། གནས་ལ་སོགས་པའི་དབྱེ་བ་ཐ་དད་པར་བསྟན་པའི་ཕྱིར་རོ། །གཞན་ཞེས་བྱ་བ་ནི་གཙོ་བོའོ། ཕལ་ཞེས་བྱ་བ་ནི་གོས་ལ་སོགས་པ་སྙིང་པོ་མ་ཡིན་པའོ། །ཅི་དགོས་ཞེས་བྱ་བ་ནི་ཅི་བསམ་ཞེས་བྱ་བའོ། །སྦྱིན་པ་དག་ཀྱང་ཞེས་བྱ་བ་ནི་ཕན་གདགས་པའི་དོན་དག་གོ །བསོད་ནམས་དག་ཀྱང་ཞེས་བྱ་བ་ནི་ཆོད་པའི་དོན་དག་གོ །ཡང་ན་སྦྱིན་བདག་ཅེས་བྱ་བ་ནི་སྦྱིན་བདག་བྱུང་བའི་བསོད་ནམས་དག་ཀྱང་བརྗོད་དོ། །བསོད་ནམས་དག་ཅེས་བྱ་བས་ནི་ཚུལ་ཁྲིམས་ལས་བྱུང་བའི་བསོད་ནམས་དག་བརྗོད་དོ། །ཕྱིར་བཟློག་པར་ཞེས་བྱ་བ་ནི་དབང་དུ་བྱ་བར་རོ། །བག་སར་ཞེས་བྱ་བ་ནི་བསུས་ནས་རིང་པོ་མ་ལོན་པའི་བུད་མེད་དོ། །སྦད་པར་བྱའོ་ཞེས་བྱ་བ་ནི་སྤྲོ་བར་བྱའོ། །ཀྱེ་ཞེས་བྱ་བ་ནི་བོད་པའོ། །དུས་ལ་བབ་ཅིང་ཞེས་བྱ་བ་ནི་མངལ་ན་གནས་པ་
འཛིན་པའི་དུས་ལ་བབ་ཅིང་རུང་བ་ཞེས་བྱ་བའི་ཐ་ཚིག་གོ །ཟླ་མཚན་དང་ལྡན་པ་ཞེས་བྱ་བ་ནི་ཁྲག་དང་ལྡན་པའོ། །སྔོན་གྱི་ཆུང་མ་ཞེས་བྱ་བ་ནི་ཁྱིམ་པ་མོ་སྟེ། སྔོན་གྱི་ཁྱིམ་པའི་དུས་ཀྱི་ཆུང་མ་ཞེས་བྱ་བའི་ཐ་ཚིག་གོ །ལས་མཉན་ཏོ་ཞེས་བྱ་བ་ནི་དེ་ལས་མཉན་པའི་དང་དུ་བླངས་པའོ། །གྱུར་ནས་ཞེས་བྱ་བ་ནི་སྐྱེས་ནས་སོ། །ངན་བུ་ཞེས་བྱ་བ་ནི་བདག་གོ །ཇི་ལྟ་བུ་ཞེས་བྱ་བ་ནི་ཅི་འདྲ་བས་སོ། །བསྐུ་མཉེ་ཞེས་བྱ་བ་ནི་བསྐུ་ཞིང་མཉེ་བའོ། །ཕྲེང་བ་རྒྱུ་ཞེས་བྱ་བ་ནི་མེ་ཏོག་གོ །བརྒྱན་ན་ཞེས་བྱ་བ་ནི་ལུས་བརྒྱན་པ་དང་ལྡན་པའོ། །དགའ་བ་ཞེས་བྱ་བ་ནི་རྣམ་པར་ཤེས་པ་ལྔ་དང་རྗེས་སུ་མཐུན་པའམ་ལུས་དང་རྗེས་སུ་མཐུན་པའོ། །ཡིད་དུ་འོང་བ་ཞེས་བྱ་བ་ནི་ཡིད་ཀྱི་རྣམ་པར་ཤེས་པ་དང་རྗེས་སུ་མཐུན་པའོ། །ངན་བུ་འདི་འདྲ་ན་ཞེས་བྱ་བ་ནི་བདག་ཉིད་ཀྱིས་སྟ་གོན་བྱས་པ་ཉིད་དུ་བརྗོད་པའོ། །བདག་གིས་ཅི་ཞིག་བགྱི་ཞེས་བྱ་བ་ནི་མཚན་ཉིད་ལུང་ནོད་པའོ། །བཞོན་པ་ལས་བབས་ནས་ཞེས་བྱ་བ་ནི་སྒོ་ལ་སོགས་པས་བཞོན་པ་ལ་ཐོགས་པ་ཡོད་པའི་ཕྱིར་རོ། །བླ་གབ་མེད་པ་ཞེས་བྱ་བ་ནི་གཡོགས་མེད་པའི་ཕྱོགས་སོ། །འཆགས་ན་ཞེས་བྱ་བ་ནི་བཅག་པར་བྱ་བའི་ཆེད་ཀྱི་ཕྱོགས་ནས་སོ། །ས་བོན་གྱི་ཆོས་ཞེས་བྱ་བ་ནི་ཁུ་བའོ། །ཆུང་ཞིག་ཅེས་བྱ་བ་ནི་ཅུང་ཟད་ཅིག་གོ །བུ་མེད་པའི་ཞེས་བྱ་བ་ནི་བུ་མེད་པའི་རྒྱུད་ཀྱིའོ། །དེ་བཞིན་དུ་ཞེས་བྱ་བ་ནི་རིན་མེད་པར་རོ། །ཇི་ལྟར་ཡང་རུང་བས་ཞེས་བྱ་བ་ནི་ཞིང་ལ་སོགས་པ་སྐྱིན་པ་ཅུང་ཟད་ཙམ་ཅིག་སྦྱིན་པས་སོ། །རྒྱལ་པོས་དབང་དུ་བྱས་པ་ཞེས་བྱ་བ་ནི་རྒྱལ་པོས་བསྣམས་པའོ།། །།བམ་པོ་གཉིས་པ། སྔར་བསླབ་པའི་གཞི་མ་བཅས་ཤིང་ཞེས་བྱ་བ་ནི་སྔར་ཁྲིམས་སུ་བྱ་བ་མ་གསུངས་པ་སྟེ། དགེ་བ་ཤས་ཆེ་བའི་ཕྱིར་དང་ཉེས་པ་ཉམ་ཆུང་བའི་ཕྱིར་ཕམ་པར་འགྱུར་བ་ལ་སོགས་པ་འབྱུང་བ་མེད་པས་དེའི་ཕྱིར་སྔར་བསླབ་པའི་གཞི་མ་བཅས་སོ། །འོ་ན་བཅོམ་ལྡན་འདས་ཀྱིས། སྡིག་པ་ཐམས་ཅད་མི་བྱ་སྟེ། །དགེ་བ་ཕུན་སུམ་ཚོགས་པར་བྱ། །ཞེས་བྱ་བ་ལ་སོགས་པ་བཀའ་སྩལ་པ་ན། ཉེས་པར་སྤྱད་པ་ཐམས་ཅད་སྨད་ཅིང་ལེགས་པར་སྤྱད་པ་ཐམས་ཅད་བསྔགས་པ་མཛད་ན། ཇི་ལྟར་སྔར་
བསླབ་པའི་གཞི་མ་བཅས་ཞེས་བྱ་ཞེ་ན། བདེན་མོད་ཀྱི་འོན་ཀྱང་ད་དུང་བཅོམ་ལྡན་འདས་ཀྱིས་མཚམས་མ་མཛད་ཅིང་སྟོན་པ་མ་མཛད་ལ་གང་གིས་ཉེས་པའི་བྱས་པའི་དེའི་ཆད་པ་འདི་ཡིན་ནོ་ཞེས་ཆད་པའི་ལས་བཅའ་བ་ཡང་མཛད་པས་དེའི་ཕྱིར་སྔར་བསླབ་པའི་གཞི་མ་བཅས་ཤིང་ཞེས་བྱ་བ་གསུངས་སོ། །ཉེས་པ་མ་མཐོང་ལ་ཞེས་བྱ་བ་ནི་ཉེས་དམིགས་མ་མཐོང་བའོ། །བུད་མེད་ཀྱི་ཡུལ་ཞེས་བྱ་བ་ནི་བུད་མེད་ཉིད་ཡུལ་ཡིན་ནོ། །གཞོན་ནུ་ཞེས་བྱ་བ་ནི་ན་ཚོད་ལྔ་པའོ། །ཁ་དོག་བཟང་བ་ཞེས་བྱ་བ་ནི་ཤིན་ཏུ་གཞོན་ནུའི་གཟུགས་ཅན་ནོ། །ཆགས་པར་འགྱུར་བ་ཞེས་བྱ་བ་ནི་འདོད་ཆགས་སྐྱེད་པར་བྱེད་པའོ། །ཟིལ་གྱིས་གནོན་ཅིང་ཞེས་བྱ་བ་ནི་ཟིལ་གྱིས་གནོན་པར་བྱེད་པའོ། །ཡོངས་སུ་གདུང་བ་ཞེས་བྱ་བ་ནི་ཀུན་དུ་གདུང་བར་བྱེད་པའོ། །ཉོན་མོངས་པ་རྣམས་ནི་ཡོངས་སུ་གདུང་བར་བྱེད་པ་ཡིན་པའི་ཕྱིར་རོ། །རུང་ངམ་ཞེས་བྱ་བ་ནི་རིགས་སམ་ཞེས་བྱ་བའོ། །འདི་ལྟ་སྟེ། ཞེས་བྱ་བ་ནི་འདི་ལྟར་རོ། །ཤིན་ཏུ་ཞེས་བྱ་བ་ནི་ཧ་ཅང་ངོ༌། །ཕྱོགས་གཅིག་སོང་ནས་ཞེས་བྱ་བ་ནི་ཁྲེལ་ཡོད་པ་ཉིད་ཀུན་དུ་བསྲུང་བའི་ཕྱིར་རོ། །ཆོས་གོས་དག་བཞག་སྟེ་ཞེས་བྱ་བ་ནི་མི་གཙང་བ་སྤང་བའི་ཕྱིར་རོ། །མི་ཚངས་པར་སྤྱོད་པ་ཞེས་བྱ་བ་ནི་ཚངས་པ་མྱ་ངན་ལས་འདས་པའི་དོན་དུ་སྤྱོད་པ་གང་ཡིན་པ་དེ་ནི་ཚངས་པར་སྤྱོད་པ་སྟེ་ལམ་མོ། །དེ་དང་མི་མཐུན་པ་ནི་ཚངས་པར་སྤྱོད་པ་སྟེ་ཉོན་མོངས་པ་ཅན་གྱི་སྤྱོད་པའོ། །དེ་ཡང་གང་ཞེ་ན། དེའི་ཕྱིར་སྤྲོད་པ་ལས་བྱུང་བའི་ཆོས་ཞེས་བྱ་བ་སྨྲས་ཏེ། སྤྲོད་པ་ཞེས་བྱ་བ་ནི་བསྟེན་པར་བྱ་བ་དང༌། སྟེན་པར་བྱེད་པ་གཉིས་སྦྱོར་བའོ། །དེས་སྐྱེད་པ་ནི་སྤྲོད་པ་ལས་བྱུང་བ་ཞེས་བྱའོ། །ཆོས་ཞེས་བྱ་བ་ནི་དེའི་དངོས་པོ་ཞེས་བྱ་བའི་ཐ་ཚིག་གོ །ལན་གཉིས་ལན་གསུམ་དུ་ཞེས་བྱ་བ་ལ། དེས་ལན་ཅིག་བྱས་པས་ཅིའི་ཕྱིར་ཚིམ་པར་མ་གྱུར་ན་ལན་གཉིས་སུ་བྱེད་དེ། ལན་གཉིས་བྱས་པས་ཅིའི་ཕྱིར་ཚིམ་པར་མ་གྱུར་ན་ལན་གསུམ་དུ་བྱེད་ཅེ་ན་ཚིམ་པར་མ་གྱུར་ཏེ། ཅིའི་ཕྱིར་ཞེ་ན། ཡུལ་རྣམས་ནི་འཕྲོག་པར་བྱེད་པ་ཉིད་ཡིན་པའི་ཕྱིར་དང༌། མི་ངོམས་པར་བྱེད་པ་ཉིད་ཡིན་པའི་ཕྱིར་རོ། །དེ་ལྟར་ཡང་ཇི་སྲིད་དུ་ཡུལ་རྣམས་ལ་བརྩལ་བ་བརྩལ་བ་དེ་སྲིད་དུ་འདོད་ཆགས་
ཀྱང་ཆེས་ཤས་ཆེ་བར་གྱུར་ཏེ་ཞེས་གསུངས་པ་ཡིན་ནོ། །ཡང་ན་དྲི་ཟའི་ལས་ཀྱི་དབང་གིས་ཏེ་ལན་ཅིག་བྱས་ནས་ཁྱོད་ལ་ཞུགས་སམ་ཞེས་དྲི་པས་ནི། དེ་ན་རེ་མ་ཞུགས་སོ་ཞེས་ཟེར་རོ། །ལན་གཉིས་བྱས་ནས་ཡང་ཅི་ཁྱོད་ལ་ཞུགས་སམ་ཞེས་དྲིས་པ་ན། དེ་ན་རེ་མ་ཞུགས་སོ་ཞེས་ཟེར་རོ། །ལན་གསུམ་བྱས་ནས་ཅི་ཁྱོད་ལ་ཞུགས་སམ་ཞེས་དྲིས་པས་ན་དེ་དབང་པོ་རྣོན་པོས་ཞུགས་སོ་ཞེས་ཟེར་ཏེ། དེ་ཉིད་ལས་དགོངས་ནས་འོག་ནས་བུད་མེད་ཀྱི་ཡུལ་མཁས་པའི་རང་བཞིན་ཅན་ལ་ལ་ལ་མ་འདྲེས་པའི་ཆོས་ལྔ་ཡོད་དེ་ཞེས་བྱ་བ་ལ་སོགས་པ་གསུངས་པ་ཡིན་ནོ། །ཅིའི་ཕྱིར་དྲི་ཟ་དེ་ལན་དང་པོ་དང་ལན་གཉིས་པའི་གནས་སྐབས་སུ་མཚམས་སྦྱོར་བར་མ་གྱུར་ལ་ལན་གསུམ་པའི་གནས་སྐབས་སུ་མཚམས་སྦྱོར་བར་གྱུར་ཅིག་ཅེས་ཚོགས་པའི་དབང་གི་ཕྱིར་ཏེ། གནས་སྐབས་གང་ལ་ཚོགས་པ་ཡང་ཡོད་པའི་གནས་སྐབས་དེ་ཉིད་ལས་སེམས་ཅན་ཞིག་ཀྱང་ལྷའི་རིས་བཟང་པོ་ནས་ཤི་འཕོས་ཏེ། མའི་རུམ་དུ་འཇུག་པས་དེའི་ཕྱིར་ལན་གསུམ་དུ་ཞེས་བྱ་བ་སྨོས་སོ་ཞེས་འདུལ་བ་བྱེ་བྲག་ཏུ་བཤད་པ་ལས་འབྱུང་ངོ༌། །འོ་ན་བཅོམ་ལྡན་འདས་ཐུགས་རྗེ་ཆེན་པོས་བསྒྱུར་པའི་ཡིད་མངའ་བས་དེ་ཅིའི་ཕྱིར་མི་བཟློག་ཅེ་ན། འདོད་ཆགས་བོད་པ་ཉིད་ཀྱིས་གདོན་མི་ཟ་བར་མི་ཚངས་པར་སྤྱོད་པར་བྱེད་པར་ངེས་པར་ཐུགས་སུ་ཆུད་པའི་ཕྱིར་དང༌། བཅོམ་ལྡན་འདས་ལ་མ་གུས་པ་སྐྱེ་བར་འགྱུར་བས་བཅོམ་ལྡན་འདས་ནི་གནས་མ་ཡིན་པར་མི་འཇུག་པར་དགེ་འདུན་གྱི་དབྱེན་ལ་སོགས་པར་བཟློག་པར་ཡལ་བར་གཞག་པ་དང་འདྲ་བར་ཤེས་པར་བྱའོ། །བསྟེན་ཏེ་ཞེས་བྱ་བ་ནི་ལྷག་པར་སྤྱད་པའོ། །སྲིད་པ་ཐ་མ་ལ་ཞེས་བྱ་བ་ནི་སྐྱེ་བ་ཐ་མ་ལའོ། །སྤྱོད་པ་ཚོལ་བ་ཞེས་བྱ་བ་ནི་ལམ་གྱི་སྤྱོད་པ་ཚོལ་བར་བྱེད་པའོ། །ཐར་པའི་སྙིང་པོ་བཟུང་བ་ཞེས་བྱ་བ་ནི་ཐར་པའི་ཆ་དང་མཐུན་པ་འཕངས་པའོ།། མྱ་ངན་ལས་འདས་པ་ལ་ཕྱོགས་པ་ཞེས་བྱ་བ་ནི་ཐར་པ་མངོན་པར་འདོད་པའོ། །འཁོར་བ་ལས་ཕྱིར་ཕྱོགས་པ་ཞེས་བྱ་བ་ནི་ཁ་ཕྱིར་ཕྱོགས་པར་གྱུར་པའོ། །སྲིད་པའི་འགྲོ་བ་ཐམས་ཅད་དུ་འཆི་འཕོ་བ་སྐྱེ་བ་དོན་དུ་མི་གཉེར་བ་ཞེས་བྱ་བ་ནི་སྲིད་པའི་ངོ་བོ་ཉིད་ཀྱི་འགྲོ་བ་ལྔ་པོ་ཐམས་ཅད་དུ་འཆི་
འཕོ་དང་སྐྱེ་བ་ལ་མི་ལྟོས་པ་ཞེས་བྱ་བའི་ཐ་ཚིག་གོ །སྐྱེས་བུ་དམ་པའི་འགྲོ་བ་བདུན་བཙལ་བའི་ཕྱིར་སྲིད་པའི་ཞེས་སྨོས་སོ། །བདེ་འགྲོ་བསྡུ་བའི་ཕྱིར་ཐམས་ཅད་ཅེས་སྨོས་སོ། །ལུས་ཐ་མ་འཛིན་པ་ཞེས་བྱ་བ་ནི་སྲིད་པ་བར་མའི་ལུས་ཐ་མ་འབའ་ཞིག་འཛིན་པ་ཞེས་བྱ་བའི་ཐ་ཚིག་གོ །ཞིག་ཀྱང་ཞེས་བྱ་བ་ནི་མིང་མ་གྲགས་པའི་སེམས་ཅན་ཞིག་ཀྱང་ངོ༌། །ལྷའི་རིས་ཞེས་བྱ་བ་ནི་ལྷའི་གནས་སོ། །འདི་ཞེས་བྱ་བ་ནི་བཟང་བྱིན་གྱིའོ། །སྐྱེ་དགུའི་བདག་མོ་ཞེས་བྱ་བ་ནི་ཆུང་མའིའོ། །ཞུགས་སོ་ཞེས་བྱ་བ་ནི་བབས་པའོ། །མཁས་པའི་རང་བཞིན་ཅན་ཞེས་བྱ་ང་ནི་ཤེས་རབ་དང་ལྡན་པའོ། །ལ་ལ་ལ་ཞེས་བྱ་བ་ནི་དགེ་བ་དག་གི་ནང་ནས་ཕྱོགས་ལ་ལ་ལ་གནས་པ་འགའ་ཞིག་ལ་ཞེས་བྱ་བའི་ཐ་ཚིག་གོ །མ་འདྲེས་པའི་ཞེས་བྱ་བ་ནི་ཐུན་མོང་མ་ཡིན་པའོ། །ཆོས་ཞེས་བྱ་བ་ནི་དངོས་པོའོ། །སྐྱེས་བུ་ཆགས་པར་གྱུར་པ་ཤེས་པ་ཤིང་ཆགས་པ་དང་བྲལ་བར་ཤེས་པ་དང་ཞེས་བྱ་བ་ནི་ཆགས་པར་གྱུར་པ་དང་ཆགས་པར་དང་བྲལ་བ་ཤེས་པའི་གནས་སྐབས་ཤེས་པའི་ཕྱིར་ཆོས་གཅིག་གོ །དུས་ཤེས་ཤིང་ཟླ་མཚན་ཤེས་པ་དང་ཞེས་བྱ་བ་ནི་བདག་ཉིད་ཀྱི་ངོ་བོ་ཉིད་ཤེས་པའི་ཕྱིར་ཆོས་གཉིས་པ་སྟེ། དུས་ཞེས་བྱ་བ་ནི་མངལ་ན་གནས་པ་ཡོངས་སུ་འཛིན་པའི་དུས་ལ་བབ་པའི་དུས་སོ་།ཟླ་མཚན་ཞེས་བྱ་བ་ནི་ཁྲག་གི་དྲི་མ་ཟགས་པའི་ལྷག་མ་ཁྲག་གི་ཐིགས་པ་གཉིས་སམ་གསུམ་ཙམ་སྟེ། མེ་ཏོག་ཅེས་བྱ་བའི་ཐ་ཚིག་གོ །མངལ་ན་གནས་པ་ཞུགས་ཤེས་པ་དང་ཞེས་བྱ་བ་ནི་མངལ་ན་གནས་པ་ཞེས་བྱ་བ་བུ་མངལ་དུ་ཞུགས་ཤིང་ཆགས་པར་ཤེས་པའི་ཕྱིར་ཆོས་གསུམ་པ་ཡིན་ནོ། །གང་ན་མངལ་ན་གནས་པ་ཞུགས་པ་ཤེས་པ་དང་ཞེས་བྱ་བ་ནི་མངལ་ན་གནས་པ་འཇོག་པར་བྱེད་པའི་སྐྱེས་པ་གང་ལས་མངལ་ན་གནས་པར་རང་གི་རུམ་དུ་ཞུགས་པ་སྐྱེས་པའི་བྱེ་བྲག་ཤེས་པའི་ཕྱིར་ཆོས་བཞི་པའོ། །བྱེའུ་ཤེས་ཤིང་བུ་མོ་ཤེས་པ་སྟེ་ཞེས་བྱ་བ་ནི་མངལ་ན་གནས་པའི་བྱེ་བྲག་ཤེས་པའི་ཕྱིར་ཆོས་ལྔ་པའོ། །ཁྱེའུ་བུ་མོ་ཤེས་པའི་བུད་མེད་ཀྱི་ཤེས་པའི་རྒྱུ་བསྟན་པའི་ཕྱིར་གལ་ཏེ་ཞེས་བྱ་བ་ལ་སོགས་པ་གསུངས་སོ། །དགའ་ཞིང་ཡིད་དགའ་ནས་ཞེས་བྱ་བ་ནི་ཡིད་མགུ་བ་སྟེ་རྣམ་
པའི་ཕྱིར་ཚིག་གཉིས་སུ་སྨོས་སོ། །སེམས་ཅན་ཞུགས་པ་ཞེས་བྱ་བ་ནི་མངལ་ན་གནས་པ་ཆགས་པའོ། །ངེས་པར་ཞེས་བྱ་བ་ནི་གདོན་མི་ཟ་བར་རམ་གོར་མ་ཆག་པར་རོ། །དེ་ཡང་ཞེས་བྱ་བ་ནི་སྒྱུག་མོ་ཡང་ངོ༌། །འདི་སྐད་ཅེས་བྱ་བ་ནི་ལེགས་སོ་སྨོན་པའོ། །ཁོ་མོ་དང་མཐུན་པར་སྐྱེ་ཞིང་མི་མཐུན་པར་མི་སྐྱེ་ཞེས་བྱ་བ་ནི་ཁོ་མོའི་རྗེས་སུ་སྐྱེ་ལ་ཚིག་ཉན་པར་འགྱུར་ཞིང་ཚིག་ཉན་པར་མི་འགྱུར་བ་མ་ཡིན་པའོ། །བྱ་བ་དག་བྱེད་པའོ་ཞེས་བྱ་བ་ནི་ཁྱིམ་གྱི་བྱ་བ་དག་གོ །གསོས་པ་ཞེས་བྱ་བ་ནི་ཚ་བོ་གསོས་པས་སོ། །ཕྱིར་གསོ་བ་ཞེས་བྱ་བ་ནི་ཚ་བོས་བདག་ལ་ལན་དུ་ཕན་འདོགས་ཤིང་ཕྱིར་གསོ་བའོ། །བགོ་སྐལ་ལ་སྤྱོད་པ་ཞེས་བྱ་བ་ནི་སྐལ་བ་བྱིན་པའི་རིགས་ཀྱི་ནོར་ལ་ལོངས་སྤྱོད་པའོ། །རིགས་རྒྱུད་ཅེས་བྱ་བ་ནི་རིགས་ཀྱི་རྒྱུན་ནོ། །བདག་ཅག་ཅེས་བྱ་བ་ནི་ཕྱི་མོ་དང་མེས་མོ་དག་གོ །ཤི་ཞིང་ཞེས་བྱ་བ་ནི་བར་མ་དོར་དུས་མ་ཡིན་པར་འཆི་བས་ཤི་བའོ། །དུས་ལས་འདས་པ་ཞེས་བྱ་བ་ནི་ཚེ་ཟད་ཅིང་འཆི་བས་ཤི་བའོ། །འདི་ཞེས་བྱ་བ་ནི་སྦྱིན་པ་དག་བྱིན་ཞིང་བསོད་ནམས་དག་བྱས་པའོ། །འགྲོ་ཞིང་ཞེས་བྱ་བ་ནི་འཁོར་བའི་ལམ་དུ་མཚམས་སྦྱར་ཞིང་ངོ༌། །རྗེས་སུ་འགྲོ་བར་གྱུར་ཅིག་ཅེས་བྱ་བ་ནི་རྗེས་སུ་ཐོབ་པར་གྱུར་ཅིག་ཅེས་སོ། །མིང་གིས་ཡོན་བཤད་པ་བྱེད་པར་གྱུར་ཅིག་ཅེས་བྱ་བ་ནི་བདག་ཅག་གི་མིང་ནས་འབྱིན་ཅིང་ཡོན་གནས་དག་ལ་མཆོད་པར་བྱ་བའི་ཕྱིར་ནོར་འབུལ་བ་ལ་སོགས་པ་བྱེད་ཅིང་སྨོན་ལམ་འདེབས་པར་གྱུར་ཅིག་ཅེས་བྱ་བའི་ཐ་ཚིག་གོ །ཆེད་དུ་བརྗོད་པ་ཆེད་དུ་རྗོད་པར་བྱེད་དེ་ཞེས་བྱ་བ་ནི་མགུ་བའི་ཚིག་རྗོད་པར་བྱེད་པ་སྟེ། ཡིད་བདེ་བ་ཚིག་ཏུ་རྗོད་པར་བྱེད་ཅེས་བྱ་བའི་ཐ་ཚིག་གོ །ཡོངས་སུ་སྨིན་པར་བྱ་བའི་ཕྱིར་ཞེས་བྱ་བ་ནི་གསོ་བའི་ཕྱིར་རོ། །སྟེང་གི་ཞེས་བྱ་བ་ནི་ཁང་སྟེང་གི་སྟེང་ཕྱོགས་སུ་རྣམ་པར་བལྟ་བས་སེམས་གསང་བའི་ཕྱིར་དང༌། དབེན་པ་ཉིད་དུ་བྱ་བའི་ཕྱིར་སྟེང་དུ་རིམ་གྲོ་བྱེད་དུ་འཛུད་དོ། །གཞིར་ཞེས་བྱ་བ་ནི་ས་གཞིར་རོ། །གྲང་བ་ན་ཞེས་བྱ་བ་ནི་གྲང་བའི་དུས་ནའོ། །དྲོ་བ་ན་ཞེས་བྱ་བ་ནི་དྲོ་བའི་དུས་ནའོ། །སྨན་པས་བཅས་པའི་ཞེས་བྱ་བ་ནི་སྨན་པས་བསྟན་པའིའོ། །ཟས་ཧ་ཅང་མི་ཁ་
བ་ལ་སོགས་པ་དང་ཁ་བ་ལ་སོགས་པ་རྣམ་པར་སྤངས་པ་ནི་རླུང་ལ་སོགས་པའི་རྣམ་པར་འགྱུར་བ་ཡོངས་སུ་སྤངས་པའི་ཕྱིར་རོ། །དོ་ཤལ་ཞེས་བྱ་བ་ནི་མུ་ཏིག་གི་དོ་ཤལ་འཆང་བའོ། །སེ་མོ་དོ་ཞེས་བྱ་བ་ནི་མུ་ཏིག་གི་དོ་ཤལ་གྱི་ཕྱེད་དུ་མ་དག་གི་སྟེང་ན་གནས་པའོ། །དགའ་བའི་ཚལ་ཞེས་བྱ་བ་ནི་སུམ་ཅུ་རྩ་གསུམ་པའི་ལྷ་རྣམས་ཀྱིའོ། །ཁྲི་ནས་ཁྲིར་དང་ཞེས་བྱ་བ་ལ་སོགས་པ་ནི་གཅིག་གི་སྟེང་ནས་གཅིག་གི་སྟེང་དུ་རྗེས་སུ་རྒྱུ་བའོ། །ཤོད་ཀྱིས་གཞིར་མི་དབབ་པ་ཞེས་བྱ་བ་ནི་ངལ་བ་ཡོངས་སུ་སྤངས་པའི་ཕྱིར་རོ། །སྒྲ་ཡིད་དུ་མི་འོང་བ་ཅུང་ཟད་ཀྱང་མ་ཐོས་པར་ཞེས་བྱ་བ་ནི་མི་དགའ་བར་མི་འགྱུར་བར་བྱ་བའི་ཕྱིར་རོ། །ཟླ་བ་བརྒྱད་དང་དགུ་ཞེས་བྱ་བ་ལ། གང་དག་ཟླ་བ་ངོ་ཚང་བ་འབའ་ཞིག་ཟླ་བ་ཉིད་དུ་བགྲང་ཞིང་ཟླ་བ་ཕྱེད་ལ་སོགས་པ་ཡོངས་སུ་སྤོང་བར་བྱེད་པ་དེ་དག་གི་ལུགས་ལྟར་ནི་ཟླ་བ་བརྒྱད་ཅེས་སྨོས་སོ། །གང་དག་ཟླ་བ་ཕྱེད་ལ་སོགས་པའི་བསམ་པས་ཀྱང་ཟླ་བ་དེ་ཉིད་དུ་བསྣན་ཏེ་བགྲང་བར་བྱེད་པ་དེ་དག་གི་ལུགས་ལྟར་ནི་ཟླ་བ་དགུ་ཞེས་སྨོས་སོ། །འདས་ནས་ཞེས་བྱ་བ་ནི་ཡོལ་ནས་སོ། །བཙས་པ་ལས་ཞེས་བྱ་བ་ནི་མངལ་ན་གནས་པ་བཙས་པ་ལས་སོ། །གཟུགས་བཟང་བ་ཞེས་བྱ་བ་ནི་ཁ་དོག་གིས་སོ། །བལྟ་ན་སྡུག་པ་ཞེས་བྱ་བ་ནི་དབྱིབས་ཀྱིས་སོ། །མཛེས་པ་ཞེས་བྱ་བ་ནི་དགའ་ཞིང་སྡུག་པའི་རྒྱུར་འགྱུར་བའོ། །གསལ་བ་གསེར་གྱི་ཁ་དོག་འདྲ་བ་ཞེས་བྱ་བ་ནི་གསེར་གྱི་མདོག་འདྲ་བ་ཉིད་ཀྱིས་གསལ་བ་སྟེ། སྔོ་བསངས་ལ་སོགས་པ་གསལ་བ་ཡིན་ནོ། །མགོ་གདུགས་ལྟ་བུ་དང་ལྡན་པ་ཞེས་བྱ་བ་ནི། མགོ་གདུགས་ལྟར་ཟླུམ་པ་དང་འདྲ་བའོ། །ལག་པ་རིང་བ་ཞེས་བྱ་བ་ནི་ལག་པས་པུས་མོར་སླེབས་པའོ། །དཔྲལ་བའི་དབྱེས་ཆེ་བ་ཞེས་བྱ་བ་ནི་དཔྲལ་བ་ཡངས་པའོ། །སྨིན་མ་འབྱར་བ་ཞེས་བྱ་བ་ནི་སྨིན་མའི་སྤུ་རྣམས་འདབ་ཆགས་སུ་འབྱོར་པ་སྟེ། སྨིན་མ་གཡས་གཡོན་གཉིས་ཀྱི་བར་མཚམས་སྣ་གོང་དུ་འབྲེལ་བ་ནི་མ་ཡིན་ནོ། །སྣའི་གཟང་མཐོ་བ་ཞེས་བྱ་བ་ནི་སྣའི་གཟང་གི་འཕང་མཐོ་བའོ། །བྱུང་ངོ་ཞེས་བྱ་བ་ནི་མངལ་ནས་བྱུང་བའོ། །འདུས་ཤིང་ཞེས་བྱ་བ་ནི་ཉེ་འཁོར་ན་འཁོད་པ་དག་འདུས་ཤིང་ངོ༌།།
ལྷགས་ནས་ཞེས་བྱ་བ་ནི་ཐག་རིང་པོ་ནས་འཁོད་པ་དག་ལྷགས་ནས་སོ། །ཉི་མ་བདུན་གསུམ་ཉི་ཤུ་རྩ་གཅིག་ཏུ་ཞེས་བྱ་བ་ནི་བདུན་དང་པོ་དང་གཉིས་པ་དང༌། གསུམ་པ་ལ་བཙས་སྟོན་ཆུང་ངུ་དང༌། འབྲིང་དང་ཆེན་པོ་བྱེད་དུ་བཅུག་པ་ཉིད་ཀྱི་ཉི་མ་དང་ནི་བདུན་གསུམ་ཡང་ཡིན་ལ་སྤྱིར་བསྡོམས་ན་ཉི་ཤུ་གཅིག་ཀྱང་ཡིན་པའོ། །བཙས་སྟོན་ཞེས་བྱ་བ་ནི་འཚོ་བའི་མཆོད་པ་སྟེ་བང་ཟན་ནོ། །རྒྱ་ཆེར་ཞེས་བྱ་བ་ནི་ཡོ་ལང་ཆེར་རོ། །མིང་ཞེས་བྱ་བ་ནི་མིང་དུ་གདགས་པར་རོ། །རྟེན་ཏེ་ཞེས་བྱ་བ་ནི་ལྟོས་ཏེ་འམ་སྔོན་དུ་གཏང་སྟེའོ། །པང་ན་འཚོ་བའི་མ་མ་ཞེས་བྱ་བ་ནི་འཚོ་བའི་བུད་མེད་དོ། །ནུ་མ་སྣུན་པའི་མ་མ་ཞེས་བྱ་བ་ནི་འོམ་ལྡུད་པའོ། །དྲི་མ་འཕྱི་བའི་མ་མ་ཞེས་བྱ་བ་ནི་ཁྲུས་ལ་སོགས་པ་བྱེད་པའོ། །རྩེ་གྲོགས་ཀྱི་མ་མ་ཞེས་བྱ་བ་ནི་རྩེར་འཇུག་པར་བྱེད་པ་གང་ཡིན་པའོ། །གཉིས་གཉིས་བསྐོ་བ་ནི་བྲེལ་བ་གཉིས་ཀྱིས་ཕོངས་པར་མི་འགྱུར་བར་བྱ་བའི་ཕྱིར་རོ། །མར་གྱི་ཉིད་ཁུ་ཞེས་བྱ་བ་ནི་ཞུན་མར་གྱི་སྙིང་པོའོ། །ཡོ་བྱད་ཀྱི་བྱེ་བྲག་ཅེས་བྱ་བ་ནི་ཡོ་བྱད་ཁྱད་པར་ཅན་དག་གོ །གཙོ་བོ་གཙོ་བོ་དག་ཅེས་བྱ་བ་ནི་བཟང་པོ་དག་སྟེ། རྣམ་པའི་ཚིག་ཏུ་ལན་གཉིས་སྨོས་སོ། །སྲིང་བར་བྱེད་ཅེས་བྱ་བ_ _་ནི་སྲིད་དུའོ། །སྐྱེད་པར་བྱེད་པ་ནི་སྦོམས་སུའོ། །རྫིང་ན་གནས་པའི་པདྨ་ཞེས་བྱ་བ་ནི་རྫིང་གི་ནང་ནས་སྐྱེས་པའི་པདྨའོ། །མྱུར་དུ་ཞེས་བྱ་བ་ནི་སྐྱེན་པར་རོ། །ཡི་གེ་ཞེས་བྱ་བ་ནི་ཡིག་འབྲུ་དག་གོ །གྲངས་ཞེས་བྱ་བ་ནི་ཡིད་ཀྱིས་བགྲང་བའོ། །རྩིས་ཞེས་བྱ་བ་ནི་ཚིག་གིས་རྩིབ་སྟེ། རྩིས་སུ་བྱ་བའོ། །ལག་རྩིས་ཞེས་བྱ་བ་ནི་ལག་པའི་ཐ་སྙད་དོ། །དབྱུང་བ་ཞེས་བྱ་བ་ནི་སྤྲོག་མ་ལ་སོགས་པ་ནས་རྫས་དབྱུང་ངོ༌། །གཞུག་པ་ཞེས་བྱ་བ་ནི་དེ་ཉིད་ཀྱི་ནང་དུ་གཞུག་པའོ། །གཞག་པ་ཞེས་བྱ་བ་ནི་ཕྱི་རོལ་དུ་གཞག་པའོ། །ཉེ་བར་ཞུགས་ནས་ཞེས་བྱ་བ་ནི་བསླབ་པའི་ཕྱིར་ངེས་པར་སྦྱར་ནས་སོ། །འབྱེད་པ་ཞེས་བྱ་བ་ནི་ཡི་གེ་འདྲི་བ་འམ་བསྟན་བཅོས་ཀྱི་གནས་ལ་མཁས་པའོ། །མཁས་པ་ཞེས་བྱ་བ་ནི་དོན་ཤེས་པའོ། །སྤོད་པ་གསལ་བ་ཞེས་བྱ་བ་ནི་གྲིམས་པའོ། །བརྟག་པ་ཞེས་བྱ་བ་ནི་རིན་པོ་ཆེ་ལ་སོགས་པའི་ཡོན་ཏན་དང་སྐྱོན་དཔྱད་པའོ། །གཞི་
ཞེས་བྱ་བ་ནི་ས་གཞིའོ། །མཁས་པར་གྱུར་ཏོ་ཞེས་བྱ་བ་ནི་བྱང་བར་གྱུར་པའོ། །ཕ་ལས་བྱུང་བ་ཞེས་བྱ་བ་ནི་ཕ་ལས་ཐོབ་པའོ། །གཅིག་པུ་ཞེས་བྱ་བ་ནི་གྲོགས་མེད་པ་སྟེ་ལུས་ཀྱིས་དབེན་པའོ། །དབེན་ཞེས་བྱ་བ་ནི་སེམས་ཀྱིས་ཐག་རིང་དུ་གྱུར་པའོ། །བག་ཡོད་པ་ཞེས་བྱ་བ་ནི་ནན་ཏན་ལྷུར་ལེན་པའོ། །བརྟུན་པ་དང་ལྡན་པ་ཞེས་བྱ་བ་ནི་བརྩོན་འགྲུས་དང་ལྡན་པའོ། །བདག་ཉིད་བཏང་བ་ཞེས་བྱ་བ་ནི་ཡིད་བཏང་བ་སྟེ། རྟག་ཏུ་དགེ་བའི་ཕྱོགས་འདོད་ཅེས་བྱ་བའི་ཐ་ཚིག་གོ །གནས་སོ་ཞེས་བྱ་བ་ནི་འདུག་པར་གྱུར་པའོ། །རིགས་ཀྱི་བུ་དག་ཅེས་བྱ་བ་ནི་རིགས་སུ་སྐྱེས་པའི་མི་དག་གོ །གང་ཕྱིར་ཞེས་བྱ་བ་ནི་གང་གི་དོན་དུའོ། །ཚངས་པར་སྤྱོད་པའི་མཐའ་ཞེས་བྱ་བ་ནི་ལམ་གྱི་འབྲས་བུ་མྱ་ངན་ལས་འདས་པའོ། །བླ་ན་མེད་པ་ཞེས་བྱ་བ་ནི་མཆོག་གོ །ཚེ་འདི་ཉིད་ལ་ཞེས་བྱ་བ་ནི་མངོན་སུམ་གྱིས་ཚང་བའོ། །རང་གི་མངོན་པར་ཤེས་པ་ཞེས་བྱ་བ་ནི་རང་གི་ཤེས་པས་སོ། །མངོན་སུམ་དུ་བྱས་ཏེ་ཞེས་བྱ་བ་ནི་ཤེས་པར་བྱས་ཏེའོ། །བསྒྲུབས་ནས་ཞེས་བྱ་བ་ནི་འཐོབ་པ་མངོན་སུམ་དུ་བྱ་བ་ཐོབ་ནས་སོ། །ཟད་དོ་ཞེས་བྱ་བ་ནི་མཐར་ཐུག་པའོ། །སྤྱད་དོ་ཞེས་བྱ་བ་ནི་སྤྱད་ཟིན་པའོ། །བྱ་བ་བྱས་སོ་ཞེས་བྱ་བ་ནི་ཉོན་མོངས་པ་སྤངས་པའོ། །སྲིད་པ་འདི་ལས་གཞན་ཞེས་བྱ་བ་ནི་བར་མ་དོའི་སྲིད་པ་ཡང་ངོ༌། །གོ་བར་བྱེད་ཅིང་ཞེས་བྱ་བ་ནི་ཤེས་པར་བྱེད་ཅིང་ངོ༌། །ཅི་ཞིག་ཤེས་པར་བྱེད་ཅིང་ཞེ་ན། བདག་གི་སྐྱེ་བ་ཟད་དོ་ཞེས་བྱ་བ་ལ་སོགས་པ་སྔར་བསྟན་པ་དག་གོ །དགྲ་བཅོམ་པ་ཞེས་བྱ་བ་ནི་འདོད་ཆགས་དང་བཅས་པ་ཐམས་ཅད་ཀྱི་མཆོད་པར་འོས་པ་ཞེས་བྱའོ། །འོས་པ་དེ་ཅི་འདྲ་བ་ཞིག་ཅེ་ན། དེའི་ཕྱིར་ཁམས་གསུམ་པ་ལས་འདོད་ཆགས་དང་བྲལ་བ་ཞེས་བྱ་བ་ལ་སོགས་པ་གསུངས་ཏེ། འདོད་པ་དང་གཟུགས་དང་གཟུགས་མེད་ཅེས་བྱ་བ་ནི་ཁམས་གསུམ་པོ་དག་ཏུ་སྤྱོད་པ་དང་བསྡུས་པ་དང་འགྲོ་བའི་ཕྱིར་ཁམས་གསུམ་པ་སྟེ་འགྲོ་བ་མཐའ་དག་གོ །དེ་ལས་འདོད་ཆགས་དང་བྲལ་བ་ནི་ཁམས་གསུམ་པ་ལས་འདོད་ཆགས་དང་བྲལ་བའོ། །བོང་བ་དང་གསེར་དུ་མཉམ་པ་ཞེས་བྱ་བ་ནི་གང་ལ་བོང་བ་དང་གསེར་དག་མཉམ་པའི་བློ་ཡོད་པའོ། །ནམ་
མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ་ཞེས་བྱ་བ་ནི་གང་ལ་ནམ་མཁའ་དང་ལག་མཐིལ་དུ་མཚུངས་པའི་སེམས་ཡོད་པ་ན་བདག་དང་བདག་གི་ལ་ཆགས་པ་མེད་པས་དེ་ནི་ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ་ཡིན་ནོ། །ཙན་དན་བཞག་པ་ལྟ་བུ་ཞེས་བྱ་བ་ནི་གང་ཙན་དན་བདར་བ་ཞག་ལོན་པར་བཞག་པ་བསིལ་བར་གྱུར་པ་དང་འདྲ་བ་ཉོན་མོངས་པ་མེད་པ་ཉིད་ཀྱིས་བསིལ་བར་གྱུར་པ་དེ་ནི་ཙན་དན་བཞག་པ་ལྟ་བུ་ཞེས་བྱའོ། །རིག་པས་ཞེས་བྱ་བ་ནི་ཟག་པ་མེད་པའི་ཤེས་པས་སོ། །སྒོ་ངའི་སྦུབས་ཞེས་བྱ་བ་ནི་འཁོར་བ་སྒོ་ང་ལྟ་བུའི་སྦུབས་ཀྱིས་དཀྲིས་པ་མ་རིག་པའི་མཚན་ཉིད་དོ། །དྲལ་བར་གྱུར་ཅིང་ཞེས་བྱ་བ་ནི་བཅོམ་པར་གྱུར་པ་སྟེ། གང་གིས་ཟག་པ་མེད་པའི་ཤེས་པས་འཁོར་བ་སྒོ་ངའི་སྦུབས་གཡོགས་བཅོམ་པར་གྱུར་པ་དེ་ནི་རིག་པས་སྒོ་ངའི་སྦུབས་འདྲལ་བ་ཞེས་བྱའོ། །རིམ་པ་ཞེས་བྱ་བ་ནི་གསུམ་མོ། །མངོན་པར་ཤེས་པ་ཞེས་བྱ་བ་ནི་དྲུག་གོ །སོ་སོ་ཡང་དག་པ་རིག་པ་ཞེས་བྱ་བ་ནི་གང་གི་རིག་པ་གསུམ་དང་མངོན་པར་ཤེས་པ་དྲུག་དང༌། སོ་སོ་ཡང་དག་པར་རིག་པ་བཞི་ཐོབ་པ་དེ་ནི་རིག་པ་དང་མངོན་པར་ཤེས་པ་དང༌། སོ་སོ་ཡང་དག་པར་རིག་པ་ཐོབ་པའོ། །སྲིད་པ་དང་འདོད་པའི་རྙེད་པ་དང་བཀུར་སྟི་ལ་རྒྱབ་ཀྱིས་ཕྱོགས་པ་ཞེས་བྱ་བ་ནི་སྲིད་པ་དག་དང་འདོད་པའི་རྒྱུར་གྱུར་པའི་རྙེད་པ་དག་དང་བཀུར་སྟི་དག་ལ་མི་ཕྱོགས་པར་གྱུར་པའོ། །མཆོད་པར་བྱ་བ་ཞེས་བྱ་བ་ནི་ཆོས་གོས་ལ་སོགས་པ་དག་གིས་ཏེ་མཆོད་པར་འོས་པ་ཡིན་པའི་ཕྱིར་རོ། །རྗེད་པར་བྱ་བ་ཞེས་བྱ་བ་ནི་ཕྱག་ལ་སོགས་པ་དག་གིས་སོ། །མངོན་དུ་སྨ་བར་བྱའོ་ཞེས་བྱ་བ་ནི་གུས་པར་སྨ་བ་ལ་སོགས་པ་དག་གིས་སོ། །རྣམ་པར་གྲོལ་བའི་ཞེས་བྱ་བ་ནི་རྣམ་པར་གྲོལ་བར་གྱུར་པ་ན་ཐོབ་པའོ། །དགའ་བ་ཞེས་བྱ་བ་ནི་བདེ་བ་གང་ཡིན་པའོ། །བདེ་བ་ཞེས་བྱ་བ་ནི་ལུས་ཀྱི་གང་ཡིན་པའམ་ཤིན་ཏུ་སྦྱངས་པའོ། །སོ་སོ་ཡང་དག་པར་རིག་པ་ཞེས་བྱ་བ་ནི་རྣམ་པར་གྲོལ་བར་གྱུར་པ་ན་ཐོབ་པའི་དགའ་བ་དང་བདེ་བ་དེ་ཉིད་ཉམས་སུ་མྱོང་བར་གྱུར་པ་ནའོ། །ཚིགས་སུ་བཅད་པ་ཞེས་བྱ་བ་ནི་གཞུང་གི་བྱེ་བྲག་སྟེ་རྩ་བར་སྦྱར་བའོ། །ཆོས་རྣམས་ལས་ནི་སྐལ་
བ་ཐོབ། །ཅེས་བྱ་བ་ལ་ཆོས་རྣམས་ཞེས་བྱ་བ་བྱང་ཆུབ་ཀྱི་ཕྱོགས་དང་མཐུན་པའི་ཆོས་སུམ་ཅུ་རྩ་བདུན་པོ་རྣམས་སོ། །དེ་རྣམས་ལས་སྐལ་བ་ཐོབ་ཅེས་བྱ་བ་ནི་ཆོས་དེ་རྣམས་ཀྱང་ཉན་ཐོས་རྣམས་དང་རང་སངས་རྒྱས་དང་བླ་ན་མེད་པའི་བྱང་ཆུབ་ཀྱི་རིགས་གསུམ་དུ་གཏོགས་པ་དེ་རྣམས་ལས་ཉན་ཐོས་ཀྱི་རིགས་སུ་གཏོགས་པའི་སྐལ་བ་ཆ་གང་ཡིན་པ་དེ་བདག་གིས་ཐོབ་པ་ཞེས་བྱ་བའི་ཐ་ཚིག་གོ །ཡབ་ཀྱི་དཀོར་གྱིས་བདག་མི་སྟོང༌། །ཞེས་བྱ་བ་ནི་ཡབ་སངས་རྒྱས་བཅོམ་ལྡན་འདས་ཀྱི་ཆོས་ཀྱི་དཀོར་གྱིས་བདག་སྟོང་པ་དང་བྲལ་བ་དང་མེད་པར་མ་གྱུར་ཅེས་བྱ་བའི་ཐ་ཚིག་གོ ། བདག་གིས་ཧ་ཅང་ཕྱི་ནས་ཞེས་བྱ་བ་ནི་བདག་གིས་ཧ་ཅང་འཕྱི་བ་ཁོ་ནར་ཐར་པའི་ལམ་འདི་ཤེས་པར་གྱུར་ཏོ་ཞེས་བྱ་བའི་ཐ་ཚིག་གོ །བདག་ནི་ཆུང་ངུས་ཤིན་ཏུ་འདས། །ཞེས་བྱ་བ་ནི་དེ་ལྟར་བདག་གིས་ཧ་ཅང་ཕྱི་ནས་ཤེས་པ་དེས་ན་བདག་ཉན་ཐོས་ཀྱི་རིགས་ཀྱི་ཆོས་ཀྱི་བསྒོ་སྐལ་ཆུང་ངུས་ཡབ་ཀྱི་ཆོས་ཀྱི་དཀོར་གྱི་འབྱོར་པ་རྒྱ་ཆེན་པོ་དག་ལས་གོ་འཕང་གོང་མ་དག་བསྒྲུབས་པར་ཤིན་ཏུ་འདས་ཤིང་སྐལ་བ་ཐོབ་པ་ཁོ་ནར་གྱུར་ཏེ། སངས་རྒྱས་ཉིད་ལས་མ་ཐོབ་པར་ཉམས་པར་གྱུར་ཏོ་ཞེས་བྱ་བའི་ཐ་ཚིག་གོ །ཡང་ན་ཤིན་ཏུ་འདས་ཞེས་བྱ་བ་ནི་འཁོར་བ་ལས་དང་ཉོན་མོངས་པ་དག་གིས་དུས་ཤིན་ཏུ་ཡུན་རིང་པོར་མཚམས་སྦྱོར་ཅིང་ཉོན་མོངས་པར་གྱུར་པ་སྟེ། དེས་ན་བདག་གིས་ཐར་པའི་ལམ་འདི་ཧ་ཅང་ཕྱི་ན་ཤེས་པས་ཡབ་ཀྱི་ཆོས་ཀྱི་བགོ་སྐལ་ཆུང་ངུས་དག་པར་གྱུར་ཏོ་ཞེས་བྱ་བའི་ཐ་ཚིག་གོ །བརྒྱ་ཕྲག་དུ་མ་ཞེས་བྱ་བ་ནི་བརྒྱའི་ཚད་དུ་མའོ། །འདོད་ཆགས་འདོད་ཆགས་དང་བྲལ་བའི་ཕྱིར་ཞེས་བྱ་བ་ནི་འདོད་ཆགས་སྤང་བའི་ཕྱིར་རོ། །སེམས་རྣམ་པར་གྲོལ་བ་ཞེས་བྱ་བ་ནི་སེམས་ཀྱི་སྒྲིབ་པ་འདོད་ཆགས་ལ་སོགས་པ་སྤང་པའོ། །ཤེས་རབ་རྣམ་པར་གྲོལ་བ་ཞེས་བྱ་བ་ནི་ཤེས་རབ་ཀྱི་སྒྲིབ་པ་མ་རིག་པ་སྤངས་པའོ། །དེའི་ཆོས་སྟོན་ཏོ་ཞེས་བྱ་བ་ནི་སེམས་རྣམ་པར་གྲོལ་བ་དང༌། ཤེས་རབ་རྣམ་པར་གྲོལ་བ་དེའི་ཆོས་ཞེས་བྱ་བ་ཐབས་ཀྱི་ལམ་གང་ཡིན་པ་དེ་འདོད་ཆགས་ལ་སོགས་པ་སྤང་བའི་ཕྱིར་སྟོན་ཅིང་འཆད་དོ་ཞེས་བྱ་བའི་ཐ་ཚིག་གོ །འདུག་ཅིང་ཞེས་བྱ་བ་ནི་ཉེ་བར་ཞུགས་པའོ། །མཐུན་པར་གྱུར་ཏོ་ཞེས་བྱ་བ་ནི་བྱ་བ་མཐུན་པ་ཉིད་དུ་གྱུར་པའོ། །ཇི་ལྟ་ཇི་ལྟར་
ཞེས་བྱ་བ་ནི་ཇི་ཙམ་ཇི་ཙམ་དུའོ། །དེ་ལྟ་དེ་ལྟར་ཞེས་བྱ་བ་ནི་དེ་ཙམ་དེ་ཙམ་དུའོ། །ཅུང་ཟད་འགྱོད་པར་གྱུར་པ་རྣམ་པར་འགྱོད་པར་གྱུར་ཅེས་བྱ་བ་གསུམ་ནི་འགྱོད་པའི་གནས་སྐབས་ཆུང་ངུ་དང་འབྲིང་དང་ཆེན་པོར་གྱུར་པའོ། །འགྱོད་པ་དང་ལྡར་བ་ཞེས་བྱ་བ་ནི་ངན་པ་བྱས་པའི་ལས་ཡང་དང་ཡང་དུ་དྲན་པར་བྱེད་ཅེས་བྱ་བའི་ཐ་ཚིག་གོ །འགྱོད་པ་ཐོབ་ཅེས་བྱ་བ་ནི་འགྱོད་པས་ཟིལ་གྱིས་ནོན་པའོ། །ཅང་མི་སྨྲ་བར་གྱུར་ཅེས་བྱ་བ་ནི་ཁ་རོག་ཅིང་འདུག་པའོ། །ཡུལ་ཡུལ་པོར་གྱུར་ཅེས་བྱ་བ་ནི་ངོ་ཚ་བར་གྱུར་པའོ། །ཕྲག་པ་གློད་ཅེས་བྱ་བ་ནི་བརྩོན་པ་མེད་པའི་ཕྱིར་ཕྲག་པ་ལྟག་པར་གཏོང་བའོ། །གདོང་སྨད་ཅེས་བྱ་བ་ནི་ཐུར་དུ་ལྟ་བའོ། །སྦོབས་པ་མེད་ཅེས་བྱ་བ་ནི་བློ་ཉམས་པའོ། །སེམས་ཁོང་དུ་ཆུད་ཅེས་བྱ་བ་ནི་སེམས་ལ་གཞོལ་བའོ། །གནས་ཉུལ་ཞིང་ཞེས་བྱ་བ་ནི་གནས་ལྟ་ཞིང་ངོ༌། །རྒྱུ་བ་ན་ཞེས་བྱ་བ་ནི་རྗེས་སུ་བསྒྲུབ་པ་ཞེས་བྱ་བའི་ཐ་ཚིག་གོ །མངོན་དུ་ཞེས་བྱ་བ་ནི་མངོན་སུམ་དུའོ། །ཡང་དག་པར་དགའ་བར་འགྱུར་བ་ཞེས་བྱ་བ་ནི་ཡང་དག་པར་རངས་པར་འགྱུར་བ་སྟེ། དེའི་ཡོན་ཏན་ཡང་དག་པར་བརྗོད་པའི་ཕྱིར་རོ། །ཡང་དག་པར་མགུ་བར་གྱུར་པ་ཞེས་བྱ་བ་ནི་གཅུགས་པ་སྐྱེད་པའོ། །སྣ་ཚོགས་ཞེས་བྱ་བ་ནི་རྣམ་པ་དུ་མའོ། །བྱས་ཏེ་ཞེས་བྱ་བ་ནི་ཕན་ཚུན་བྱས་ཏེའོ། །མཐའ་གཅིག་ཏུ་ཞེས་བྱ་བ་ནི་ཕྱོགས་གཅིག་ཏུའོ། །སྔན་ཆད་ཅེས་བྱ་བ་ནི་སྔོན་གྱི་དུས་ནའོ། །གློ་བུར་དུ་ལྷགས་པ་དག་ཅེས་བྱ་བ་ནི་མངོན་དུ་འོངས་པ་དག་གོ །བཤེས་པ་དང་བཅས་པ་ཉིད་ཀྱི་ཚིག་གིས་ཞེས་བྱ་བ་ལ་མི་བཤེས་པ་ནི་འཁོན་ནོ། །འཁོན་མེད་པ་ནི་བཤེས་པ་སྟེ་གཅུགས་པའོ། །བཤེས་པ་དང་ལྷན་ཅིག་འདུག་པ་ནི་བཤེས་པ་དང་བཅས་པའོ། །དེའི་དངོས་པོ་ནི་བཤེས་པ་དང་བཅས་པ་ཉིད་དོ། །དེའི་ཚིག་གིས་ཞེས་བྱ་བ་ནི་བཤེས་དང་བཅས་པ་ཉིད་ཀྱི་ཚིག་སྟེ། ཚིག་གིས་དགའ་བར་བྱེད་པས་ཞེས་བྱ་བའི་ཐ་ཚིག་གོ །བསུ་ནས་ཞེས་བྱ་བ་ནི་མདུན་དུ་ཉེ་བར་སོང་ནས་སོ། །གཏུར་བུར་ཞེས་བྱ་བ་ནི་ཆོས་གོས་ཀྱི་སྣོད་དོ། །འབྲུ་མར་སྣོད་ཅེས་བྱ་བ་ནི་འབྲུ་མར་གྱི་སྣོད་དོ། །གནོད་པ་ཞེས་བྱ་བ་ནི་ནད་དོ། །སེམས་ཀྱི་ཡོངས་སུ་གདུང་བ་ཞེས་བྱ་བ་ནི་མྱ་ངན་ནོ། །སྐབས་
དེ་ཞེས་བྱ་བ་ནི་བྱུང་བའི་མཐའ་དེའོ། །མངོན་པར་སྟོད་པར་ཡང་མི་བྱེད་ཅེས་བྱ་བ་ནི་བསྔགས་པ་རྗོད་པར་ཡང་མི་བྱེད་པ་སྟེ། རྐྱེན་ཆགས་པའི་ཕྱིར་རོ། །ཕྱིར་ཟློག་པར་མི་བྱེད་ཅེས་བྱ་བ་ནི་ཕྱིར་འགོག་པར་ཡང་མི་བྱེད་པ་སྟེ་དེ་བྱ་བ་མ་ཡིན་པ་ངེས་པར་མེད་པའི་ཕྱིར་རོ། །ཟག་པའི་གནས་ལྟ་བུ་ཞེས་བྱ་བ་ནི་ཉོན་མོངས་པའི་རྒྱུ་སྟེ། ཕམ་པར་གྱུར་པ་ལ་སོགས་པའི་ཉེས་པ་དག་གོ །དང་པོ་ཞེས་བྱ་བ་ནི་རྩོལ་བའོ། །འདི་ལྟ་སྟེ་ཞེས་བྱ་བ་ནི་མཚོན་པའི་ཕྱིར་རོ། །མི་ཚངས་པར་སྤྱོད་པའི་རྐྱེན་གྱིས་ཞེས་བྱ་བ་ནི་མི་ཚངས་པར་སྤྱོད་པའི་རྒྱུར་བྱས་ཏེའོ། །བྱས་པར་གྱུར་ཏོ་ཞེས་བྱ་བ་ནི་བྱས་པ་དང་ལྡན་པའོ། །འབྱུང་བ་འདི་ཞེས་བྱ་བ་ནི་ཉེས་པ་སློང་བ་འདིའོ། །གླེང་གཞི་འདི་ཞེས་བྱ་བ་ནི་བསླབ་པ་བཅས་པའི་རྒྱུ་འདིའོ། །སྐབས་འདི་ཞེས་བྱ་བ་ནི་ས་བོན་གྱི་རྒྱུ་ཉིད་ལ་སོགས་པ་བྱུང་བའི་མཐའ་འདི་ལའོ། །བསྡུ་པ་མཛད་དེ་ཞེས་བྱ་བ་ནི་བོད་པ་མཛད་པའོ། །གཅིག་གིས་ཉེས་པ་བྱས་པ་ལ་ཅིའི་ཕྱིར་དགེ་འདུན་བསྡུ་བ་མཛད་པའི་ཕྱིར་དེ་བཞིན་གཤེགས་པ་ནི་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཞེས་བྱ་བ་ནི་དོན་ཇི་ལྟ་བ་བཞིན་དུ་ཉེ་བར་སྟོན་པ་སྟེ་ཐམས་ཅད་མཁྱེན་པ་ཞེས་བྱ་བའི་ཐ་ཚིག་གོ །དོན་གྱི་དབང་ཞེས་བྱ་བ་ནི་དགོས་པའི་སྟོབས་སོ།། གཟིགས་པ་ན་ཞེས་བྱ་བ་ནི་དགོས་པ་ནའོ། །ཀུན་ཤེས་པ་ཉིད་དུ་བྱ་བའི་ཕྱིར་ཞེས་བྱ་བ་ནི་རིག་པ་ཉིད་དུ་བྱ་བའི་ཕྱིར་ཏེ་མངོན་སུམ་དུ་ཐོབ་པའི་ཕྱིར་རོ། །བསླབ་པའི་གཞི་ཞེས་བྱ་བ་ནི་རྗེས་སུ་བསྒྲུབས་པའི་གནས་སམ་སྤོང་བའི་རྒྱུའོ། །ལེགས་པར་བཅས་པར་ཞེས་བྱ་བ་ནི་མི་གཡོ་བར་ཏེ་མང་པོ་དག་གིས་ཐོབ་པའི་ཕྱིར་རོ། །ཅིའི་ཕྱིར་རྨེད་པར་མཛད་ཅེ་ན། དེའི་ཕྱིར་སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་གསུངས་ཏེ། སངས་རྒྱས་བཅོམ་ལྡན་འདས་རྣམས་ནི་ཐམས་ཅད་མཁྱེན་པ་ཡིན་པའི་ཕྱིར་མཁྱེན་པ་ཁོ་ན་ཡིན་མོད་ཀྱི་དོན་དང་བཅས་པ་གང་ཞིག་གི་ཕྱིར་རྨེད་པར་མཛད་དོ། འཇིག་རྟེན་པའི་ཐ་སྙད་བསྒྲུབ་པའི་ཕྱིར་རྨེད་པར་མཛད་ཀྱི་མི་མཁྱེན་པའི་ཕྱིར་རྨེད་པར་མཛད་པ་ནི་མ་ཡིན་ནོ་ཞེས་བྱ་བའི་ཐ་ཚིག་གོ །མཁྱེན་བཞིན་དུ་རྨེད་པ་ཞེས་བྱ་བ་ལ་གལ་ཏེ་མཁྱེན་ན་ཅིའི་ཕྱིར་རྨེད་པར་མཛད་ཅེ་ན་སྐུར་པ་འདེབས་པ་དགག་པའི་
ཕྱིར་ཏེ། བཅོམ་ལྡན་འདས་ཀྱིས་དགེ་སློང་ཉེས་པ་མི་ཤེས་པ་དེ་དག་ལ་མ་རྨེད་པར་བསླབ་པའི་གཞི་བཅས་པར་གྱུར་ན། དགེ་སློང་དེ་དག་བཅོམ་ལྡན་འདས་ལ་སུ་ས་ཉེས་པ་ཅི་བྱས་ན་བཅོམ་ལྡན་འདས་ཀྱིས་བསླབ་པའི་གཞི་བཅས་པར་མཛད་ཅེས་སྐུར་པ་འདེབས་པར་གྱུར་པས་དེའི་ཕྱིར་མཁྱེན་བཞིན་དུ་རྨད་པར་མཛད་དོ། མཁྱེན་བཞིན་དུ་རྨེད་པ་ཞེས་བྱ་བ་ནི་གང་གི་ཕྱིར་གཞན་གྱི་དོན་མ་གཟིགས་ན་མཁྱེན་ཀྱང་མི་རྨེད་པ་སྟེ། གདུལ་བ་ཉིད་མེད་པའི་ཕྱིར་རོ། །དུས་སུ་རྨེད་པ་ཞེས་བྱ་བས་དབྱེ་ན་སྤྱོ་བ་མེད་པ་དང་གཞན་དག་དང་མ་འདྲེས་པའི་དུས་སུ་རྨེད་པར་མཛད་པའོ། །དུས་ལས་ཡོལ་བར་མི་རྨེད་པ་ཞེས་བྱ་བ་ནི་སྔ་མ་ལ་ཟློག་པའི་དུས་སུ་མི་རྨེད་པ་སྟེ། དགོས་པ་མེད་པའི་ཕྱིར་རོ། །དོན་དང་ལྡན་པར་རྨེད་པ་ཞེས་བྱ་བ་ནི་བདེན་པ་མཐོང་བར་བྱ་བ་ལ་སོགས་པའི་དགོས་པ་དང་ལྡན་པ་རྨེད་པར་མཛད་པའོ། །དོན་དང་མི་ལྡན་པ་མི་རྨེད་པས་ཞེས་བྱ་བ་ནི་དགོངས་པ་མེད་པའི་ཕྱིར་ཏེ། སངས་རྒྱས་བཅོམ་ལྡན་འདས་ཀྱིས་ཤེས་བྱ་ཆུ་ཤིང་གི་རིམ་པ་སྙེད་ཐུགས་སུ་ཆུད་ཀྱང་རིམ་པ་གཅིག་ཙམ་ཞིག་ལས་བཀའ་མ་སྩལ་ཏོ་ཞེས་གསུངས་པའི་ཕྱིར་རོ། །ཆུ་ལོན་གྱིས་བཟློག་པར་མཛད་ཅེས་བྱ་བ་ནི་ཆུ་ལོན་ལྟ་བུས་མི་མཛད་པར་ངེས་པ་ཉིད་དུ་བཟློག་པར་མཛད་པ་སྟེ་ཐུགས་རྗེ་དང་མཁྱེན་པ་ཉིད་ཀྱིས་རྟག་ཏུ་ཉེ་བར་གནས་པའི་ཕྱིར་རོ། །དུས་མཁྱེན་པ་ཡིན་པའི་ཞེས་བྱ་བ་ལ། གལ་ཏེ་དུས་མཁྱེན་པ་ཉིད་ཀྱིས་ཅི་ཞིག་སྟོན་པར་བྱེད་ཅེ་ན། སངས་རྒྱས་མཛད་པ་སྐྲའི་རྩེ་མོ་བརྒྱར་གཤེགས་པ་ཙམ་ཡང་ཉམས་པ་མི་མཛད་དེ། བཅོམ་ལྡན་འདས་ནི་གདུལ་བ་ལ་བརྟེན་ཏེ། ཉིད་མཚན་ལན་དྲུག་རྣམ་པར་གཟིགས་པ་འབའ་ཞིག་ཏུ་མ་ཟད་ཀྱི་འདི་ལྟར་བསྟན་པ་གནས་པར་བྱ་བའི་ཕྱིར། ཡང་འདི་ལས་རྗེས་སུ་གནས་པར་བྱ་བ་གང་ཡིན་པ་དེ་ནི་རྗེས་སུ་གནས་པར་བྱ་ལ། ཕྱིར་དགག་པར་བྱ་བ་གང་ཡིན་པ་དེ་ནི་ཕྱིར་དགག་པར་བྱའོ་སྙམ་དུ་བསྟན་པ་ལ་ཡང་རྣམ་པར་གཟིགས་པ་སྟོན་ཏོ། །བཙུན་པ་ཞེས་བྱ་བ་ནི་མཆོད་པའི་ཚིག་ཡིན་ཏེ། ཤིན་ཏུ་དགེ་བ་ཡིན་པའི་ཕྱིར་དང༌། བདེ་བ་སྐྱེད་པར་མཛད་པ་ཡིན་པའི་ཕྱིར་རོ། །མད་དོ་ཞེས་བྱ་བ་ལ་གལ་ཏེ་ཉེས་པ་འཆབ་པར་བྱེད་ཅིང་ཁས་ལེན་པར་མི་བྱེད་པ་ནི་འཇིག་རྟེན་གྱི་ལུགས་ཡིན་
པས་ཅིའི་ཕྱིར་ཁས་ལེན་པར་བྱེད་ཅེ་ན། དེས་བཅོམ་ལྡན་འདས་ཐམས་ཅད་མཁྱེན་པ་ཡིན་པར་ཡིད་ཆེས་པའི་ཕྱིར་ཏེ། བཅོམ་ལྡན་འདས་འདི་ནི་རང་བྱུང་དང༌། ཐམས་ཅད་མཁྱེན་པ་ཉིད་ཡིན་པས་དེའི་ཕྱིར་གལ་ཏེ་བདག་གིས་བཅབས་ན་ཡང་དེས་མཁྱེན་པར་འགྱུར་ལ། མ་བཅབས་ན་ཡང་དེས་མཁྱེན་པར་འགྱུར་བས་དེའི་ཕྱིར་འཇིག་རྟེན་གྱི་ལུགས་ལ་མི་བརྟེན་པར་སྟོན་པའི་ཆེ་བ་ཉིད་ལ་བརྟེན་ཏེ། ཁས་བླང་བར་བྱའོ་སྙམ་དུ་སེམས་པའི་ཕྱིར་རོ། །ཡང་ན་དེའི་དུས་ན་དག་སློང་དགེ་ཉོན་མོངས་པ་ཤས་ཆེ་བར་གྱུར་པ་ཡིན་ལ། བསམ་པ་དགེ་བ་དང་ལྡན་པ་ཡིན་པའི་ཡང་ཕྱིར་ཏེ། དེ་ལ་ཉོན་མོངས་པ་ཤས་ཆེ་བའི་ཕྱིར་ནི་ཉེས་པ་བྱས་པར་ཡང་འགྱུར་ལ། བསམ་པ་དགེ་བ་དང་ལྡན་པའི་ཕྱིར་ནི་ཁས་ལེན་པར་ཡང་བྱེད་དོ། །དགེ་སྦྱོང་གི་ཚུལ་མ་ཡིན་པ་ཞེས་བྱ་བ་ནི་ཁྱིམ་པའི་ལས་ཡིན་པའི་ཕྱིར་རོ། །རྗེས་སུ་མཐུན་པ་མ་ཡིན་པ་ཞེས་བྱ་བ་ནི་འཕགས་པའི་ལམ་དང་མི་མཐུན་པའོ། །རུང་བམ་ཡིན་པ་ཞེས་བྱ་བ་ནི་མི་རིགས་པ་སྟེ། རང་བཞིན་གྱིས་ཁ་ན་མ་ཐོ་བ་དང་བཅས་པའི་ཕྱིར་རོ། །ཚུལ་དང་མཐུན་པ་མ་ཡིན་པ་ཞེས་བྱ་བ་ནི་འདྲ་བ་མ་ཡིན་པ་སྟེ། བཅས་པའི་ཁ་ན་མ་ཐོ་བ་དང་བཅས་པའི་ཕྱིར་རོ། །ཅིའི་ཕྱིར་རུང་བ་མ་ཡིན་ཞིང་ཚུལ་དང་མཐུན་པ་མ་ཡིན་ཞེ་ན། དེའི་ཕྱིར་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་བྱ་བ་གསུངས་ཏེ། གཉི་ག་ཡང་སྐྱོན་ཆགས་པ་མ་ཡིན་པའི་ཕྱིར་རོ། །ཅིའི་ཕྱིར་ཞེས་བྱ་བ་ནི་མི་མཐུན་པ་ཉིད་ཡིན་པའི་ཕྱིར་ཇི་སྟེ་ཞེས་བྱ་བའི་ཐ་ཚིག་གོ །མི་གཏི་མུག་ཅན་ཞེས་བྱ་བ་ནི་མི་ཤེས་པའོ། །གལ་ཏེ་སངས་རྒྱས་བཅོམ་ལྡན་འདས་ནི་རྗེས་སུ་ཆགས་པ་དང་ཁོང་ཁྲོ་བ་སྤངས་པ་ཡིན་ན་ཅིའི་ཕྱིར་བཅོམ་ལྡན་འདས་ཀྱིས་མི་གཏི་མུག་ཅན་ཞེས་སྨད་པའི་ཚིག་གིས་སྨད་པ་མཛད་ཅེ་ན། བཅོམ་ལྡན་འདས་ནི་གདུལ་བའི་རྒྱུད་དག་ལ་དགོངས་པས་ལོག་པར་སྒྲུབ་པ་མི་མངའ་མོད་ཀྱི། འོན་ཀྱང་བྱ་བ་རྣམ་པར་བཟློག་པའི་ཕྱིར་སྨད་པ་མཛད་དེ། མཁན་པོ་དང་སློབ་དཔོན་དག་སློབ་མ་དང་ཉེ་གནས་དག་ལ་བསམ་པས་ལོག་པར་སྒྲུབ་པ་མེད་ཀྱང་ཚིག་དྲག་པ་དག་གིས་སྨོད་པར་བྱེད་པ་དང་འདྲའོ། །སྤྲུལ་ནག་པོ་ཞེས་བྱ་བ་ནི་སྦྲུལ་གྱི་རིགས་སོ། །དེའི་ངོ་
བོ་ཉིད་བསྟན་པའི་ཕྱིར། དུག་མྱུར་དུ་ཁྱབ་པ་ཞེས་བྱ་བ་ལ་སོགས་པ་ཚིག་གསུམ་གསུངས་ཏེ། དུག་མྱུར་དུ་ཁྱབ་པ་ཞེས་བྱ་བ་ནི་དེས་ཟིན་མ་ཐག་ཏུ་དུག་མྱུར་དུ་ལུས་ཐམས་ཅད་ལ་ཁྱབ་པར་བྱེད་པའོ། །དུག་དྲག་པོ་ཞེས་བྱ་བ་ནི་དུག་དབྱུང་དཀའ་བའོ། །དུག་རྣོ་བ་ཞེས་བྱ་བ་ནི་དུག་གདུག་པའོ། །ཁར་རང་གི་ཡན་ལག་གི་རྣམ་པ་བཅུག་པར་གྱུར་པ་ནི་བླའི་ཞེས་བྱ་བ་ལ། གལ་ཏེ་གང་གི་ཚེ་ཁ་ཡང་མི་ཚངས་པར་སྤྱོད་པའི་ལམ་ཡིན་པས་དེའི་ཕྱིར་བཅོམ་ལྡན་འདས་ཀྱིས་དེ་ལས་ཀྱང་མི་ཚངས་པར་སྤྱོད་པའི་བསླབ་པའི་གཞི་འཆའ་བར་འགྱུར་ན་ཅིའི་ཕྱིར་བཅོམ་ལྡན་འདས་ཀྱིས་རུང་བ་མ་ཡིན་པའི་གཞི་དེ་བླའི་ཞེས་གསུངས་ཤེ་ན། བཅོམ་ལྡན་འདས་ཀྱིས་མི་ཚངས་པར་སྤྱད་པར་བྱ་བ་ལ་བརྟེན་ཏེ་དཔེར་མཛད་པ་ནི་མ་ཡིན་གྱི་འདི་ལྟར་གནོད་པར་འགྱུར་བ་ལ་བརྟེན་ཏེ་དཔེར་མཛད་པ་ཡིན་ཏེ། འདི་ལྟར་དེའི་ཁར་བཅུག་སྟེ་ཤི་བར་གྱུར་ཅིག་ལུས་གཅིག་གི་སྲོག་གི་དབང་པོ་དང་བྲལ་བ་ནི་བླའི་བུད་མེད་ཀྱི་ཡུལ་དུ་བཅུག་ཅིང་ཚེ་རབས་བརྒྱ་དག་ཏུ་ཤེས་རབ་ཀྱི་སྲོག་གི་དབང་པོ་དང་བྲལ་བར་འགྱུར་བ་ནི་དེ་ལྟ་མ་ཡིན་ནོ་ཞེས་བྱ་བར་དགོངས་པ་ཡིན་ནོ། །བླའི་ཞེས་བྱ་བ་ནི་མཛེས་ཀྱི་ཞེས་བྱ་བའི་ཐ་ཚིག་གོ །དེ་ལྟར་གྱུར་པས་ཞེས་བྱ་བ་ལ། །གལ་ཏེ་ཇི་ལྟར་གྱུར་པ་ཤེས་ནས་ཆགས་པར་གྱུར་པས་སོ། །ཡང་ན་ཁྱིམ་གྱི་གནས་ནས་མངོན་པར་བྱུང་བ་དང༌། ཡུལ་སྤངས་པ་དང༌། ཁྱིམ་བཏང་པ་དང༌། ཆུང་མ་ལས་གྲོལ་བ་དང༌། བསླབ་པ་ཡང་དག་པར་བླངས་པ་དང༌། སྡོམ་པ་ལ་གནས་པ་དང༌། ཚངས་པར་སྤྱོད་པ་དང༌། བཅོམ་ལྡན་འདས་ཀྱི་སྲས་ཉིད་དུ་ཁས་བླངས་པར་གྱུར་བས་སོ། །བུད་མེད་ཀྱི་ཡུལ་ལ་ཞེས་བྱ་བ་ནི་བུད་མེད་ཀྱི་ལུས་ལའོ་ཞེས་འདུལ་བ་བྱེ་བྲག་ཏུ་བཤད་པ་ལས་གསུངས་སོ། །མ་ཡིན་ནོ་ཞེས་བྱ་བ་ནི་མི་བླའི་ཞེས་བྱ་བའི་ཐ་ཚིག་གོ །གལ་ཏེ་གང་གི་ཚེ་སྦྲུལ་ནག་པོ་དུག་མྱུར་དུ་ཁྱབ་པ་ལ་སོགས་པ་དང་ལྡན་པ་ནི་སྲོག་དང་བྲལ་བར་བྱེད་ལ། བུད་མེད་ཀྱི་ཡུལ་གྱིས་ནི་སྲོག་དང་བྲལ་བར་ལྟ་ག་ལ་བྱེད་ཀྱི་ཡིད་བདེ་བར་ཡང་སྐྱེད་པར་བྱེད་པ་ཡིན་ན། །བཅོམ་ལྡན་འདས་ཀྱིས་ཅིའི་ཕྱིར་དཔེ་དེ་ལྟར་དང་པོ་རྩོམ་པ་མཛད་ཅེ་ན། བུད་མེད་ཀྱི་ཡུལ་གྱིས་ཀྱང་ཚེ་རབས་སྟོང་ཕྲག་དུ་མར་སྲོག་དང་བྲལ་བར་བྱེད་པའི་
ཕྱིར་ཏེ། སྦྲུལ་ནག་པོ་དུག་མྱུར་དུ་ཁྱབ་པ་ལ་སོགས་པ་དང་ལྡན་པས་ཟིན་པ་ནི་ལན་འགའ་གསོར་ཡང་རུང་གི །བུད་མེད་ཀྱི་ཡུལ་གྱིས་ཟིན་པ་ནི་ནམ་ཡང་གསོར་མི་རུང་བ་དང༌། སྦྲུལ་ནག་པོ་དུག་མྱུར་དུ་ཁྱབ་པ་ལ་སོགས་པ་དང་ལྡན་པས་ཟིན་པ་ནི་ལན་འགའ་ནི་ཚངས་པ་མཚུངས་པར་སྤྱོད་པས་ཡོངས་སུ་མི་སྤང་དུ་ཡང་རུང་གི །བུད་མེད་ཀྱི་ཡུལ་གྱིས་ཟིན་པ་ནི་ཚངས་པ་མཚུངས་པར་སྤྱོད་པས་དུས་ཐམས་ཅད་དུ་ཡོངས་སུ་སྤང་བར་བྱ་བ་ཡིན་པ་དང༌། སྤྲུལ་ནག་པོ་དུག་མྱུར་དུ་ཁྱབ་པ་ལ་སོགས་པ་དང་ལྡན་པས་ཟིན་པ་ནི་འཕགས་པའི་ལམ་བསྒྲུབ་པ་དང༌། ངེས་པར་འཇུག་པ་དང། འབྲས་བུ་ཐོབ་པ་དང༌། འདོད་ཆགས་དང་བྲལ་བ་དང༌། ཟག་པ་ཟད་པ་ལ་རབ་ཏུ་གནས་པར་རུང་གི་བུད་མེད་ཀྱི་ཡུལ་གྱིས་ཟིན་པས་ནི་དེ་དག་ཐམས་ཅད་མི་རུང་བའི་ཕྱིར་རོ། །འདི་སྐད་ཅེས་ཡོངས་སུ་བརྟག་པ་ཉེ་བར་བཟུང་བ་དེའི་རྒྱུ་ལས་ཆུ་ཀླུང་གི་རྒྱུན་ནི་གྱེན་ལ་འབབ་ཀྱང་སྲིད་ཀྱི། འཕགས་པའི་ལམ་ནི་གནས་མེད་དེ། འདི་ལྟར་སྣོད་ཉམས་པའི་ཕྱིར་རོ་ཞེས་ཀྱང་གསུངས་སོ། །རྣམ་པར་སྨད་དོ་ཞེས་བྱ་བ་ནི་རྣམ་གྲངས་ཀྱིས་སྨད་པར་མཛད་པ་སྟེ། གལ་ཏེ་དེའི་ཚེ་བཅོམ་ལྡན་འདས་ཀྱིས་གཞི་འདི་ལས་ཉེས་པ་བྱས་ན་ཆད་པའི་ལས་འདི་ཡིན་ནོ་ཞེས་བཅའ་བ་མ་མཛད་ན། ཅིའི་ཕྱིར་སྔར་བཅའ་བ་མ་མཛད་པར་རྣམ་པར་སྨད་པར་མཛད་ཅེ་ན། ཟླ་གྲོགས་བསྟན་པའི་ཕྱིར་ཏེ། འདི་ལྟར་འདི་ལ་ཤཱ་རིའི་བུ་དང་མཽང་གལ་གྱི་བུ་ལ་སོགས་པ་དག་རང་བཞིན་དང་བཅའ་བའི་ཁ་ན་མ་ཐོ་བ་དང་བཅས་པ་སྤོང་བ་ཡང་དག་པར་ལེན་པ་བྱེད་ན་ཁྱོད་ཀྱིས་ཀྱང་དེ་བཞིན་དུ་ཅིའི་ཕྱིར་དེ་དག་སྤོང་པ་དག་ཡང་དག་པར་མི་བླང་ཞེས་ཡང་དག་པར་སྨད་པར་མཛད་དོ། །ཡང་ན་བཅོམ་ལྡན་འདས་ཀྱིས་སྔར། སྡིག་པ་ཐམས་ཅད་མི་བྱ་སྟེ། །དགེ་བ་ཕུན་སུམ་ཚོགས་པར་བྱ། །ཞེས་བྱ་བ་ལ་སོགས་པ་གསུངས་པས་ཉེས་པར་སྤྱད་པ་ཐམས་ཅད་སྨད་པ་དང་ལེགས་པར་སྤྱད་པ་ཐམས་ཅད་བསྔགས་པར་མཛད་ཟིན་པས་དེའི་ཕྱིར་རྣམ་པར་སྨད་པ་མཛད་དོ། །རྣམ་གྲངས་དུ་མས་ཞེས་བྱ་བ་ནི་རྣམ་པ་དུ་མས་སོ། །བཀའ་སྩལ་པ་ཞེས་བྱ་བ་ནི་མངོན་དུ་མཛད་པའོ། །དེ་ལྟ་བས་ན་ཞེས་བྱ་བ་ནི་མཇུག་བསྡུ་བའི་ཕྱིར་རོ། །ཕན་ཡོན་ཞེས་བྱ་བ་ནི་ཡོན་ཏན་ནོ། །དགེ་འདུན་བསྡུ་བ་
ཞེས་བྱ་བ་ནི་དགེ་འདུན་བསྲུང་བ་སྟེ། བསླབ་པ་ཡང་དག་པར་མ་བླངས་པ་རྣམས་ཕྱི་རོལ་དུ་བྱེད་པའི་ཕྱིར་རོ། །ལེགས་པར་བྱ་བ་ཞེས་བྱ་བ་ནི་མཛེས་པར་བྱ་བ་སྟེ། ངེས་པར་གནས་པ་རྣམས་བསྔགས་པའི་ཕྱིར་རོ། །བདེ་བར་གནས་པ་ཞེས་བྱ་བ་ནི་བདེ་བར་འདུག་པའོ། །གནོད་མི་བསྐུར་བའི་གང་ཟག་རྣམས་ཚར་བཅད་པའི་ཕྱིར་ཞེས་བྱ་བ་ནི་ངོ་ཚ་མི་ཤེས་པའི་སེམས་ཅན་རྣམས་ཆད་པས་བཅད་པའི་ཕྱིར་ཏེ་བསྙིལ་བ་དང༌། སྦྱང་བ་ལ་སོགས་པ་གཉེན་པོ་བསྟན་པའི་ཕྱིར་རོ། །ངོ་ཚ་ཤེས་པ་རྣམས་བདེ་བར་གནས་པར་བྱ་བའི་ཕྱིར་ཞེས་བྱ་བ་ནི་ཡོན་ཏན་དང་ལྡན་པ་རྣམས་བདེ་བར་བྱ་བའི་ཕྱིར་རོ། །མངོན་པར་མི་དད་པ་རྣམས་ཞེས་བྱ་བ་ནི་དད་པ་དང་མི་ལྡན་པ་རྣམས་སོ། །ཕྱིར་ཞིང་འབྱུང་བ་ཞེས་བྱ་བ་ནི་འཕེལ་བའོ། །ཚེ་འདིའི་ཞེས་བྱ་བ་ནི་ད་ལྟར་བྱུང་བའིའོ། །བསྡམ་པ་ཞེས་བྱ་བ་ནི་ཟློག་པའོ། །ཚེ་རབས་ཕྱི་མའི་ཞེས་བྱ་བ་ནི་མ་འོངས་པའིའོ། །བཟློག་པ་ཞེས་བྱ་བ་ནི་རྣམ་པར་གནོན་པའོ། །ཆངས་པར་སྤྱོད་པ་ཞེས་བྱ་བ་ནི་ལམ་གྱི་བསྟན་པའོ། །སྐྱེ་བོ་མང་པོ་ལ་ཕན་པ་ཞེས་བྱ་བ་ནི་སྐྱེ་བོ་མང་པོ་ལ་མཁོ་བ་སྟེ། མ་འོངས་པའི་སྐྱེ་བོ་དག་ལ་ཕན་པའི་ཕྱིར་རོ། །ཡངས་པར་གྱུར་བ་ཞེས་བྱ་བ་ནི་རྒྱ་ཆེ་བའོ། །བར་དག་ལ་ཞེས་བྱ་བ་ནི་མཐའ་བསྟན་པའོ། །ཡང་དག་པར་ཞེས་བྱ་བ་ནི་མ་ལོག་པར་རོ། །རབ་ཏུ་བསྟན་པ་ཞེས་བྱ་བ་ནི་རྒྱ་ཆེར་བསྟན་པའོ། །ཡུན་རིང་དུ་གནས་པ་ཞེས་བྱ་བ་ནི་དུས་ཡུན་རིང་དུ་གནས་པའོ། །གདོན་པར་བྱ་སྟེ་ཞེས་བྱ་བ་ནི་ཀླག་པར་བྱ་བ་བའམ་གཞན་དག་ལ་ལུང་དཔོག་པར་བྱ་བའོ། །རྒྱལ་པོའི་ཁབ་ཅེས་བྱ་བ་ནི་གྲོང་ཁྱེར་གྱི་མིང་ངོ༌། །འོད་མའི་ཚལ་ཞེས་བྱ་བ་ནི་སྨྱིག་མའི་ཚལ་ལོ། །བྱ་ཀ་ལན་ང་ཀའི་གནས་ཞེས་བྱ་བ་ནི་བྱ་བོང་ཆུང་ངུ་དག་གི་གནས་སོ། །བ་རྔོད་བརྔོད་ནས་ཞེས་བྱ་བ་ནི་ཡང་དང་ཡང་དབང་དུ་བྱས་ནས་སོ། །སྡིག་པ་ཅན་ཞེས་བྱ་བ་ནི་སྐྱོན་ཆགས་པའོ། །དམ་པ་མ་ཡིན་པའི་ཆོས་ཞེས་བྱ་བ་ནི་ཆོ་ག་མ་ཡིན་པའོ། །རྣམ་པར་ལྟ་བར་བྱེད་པ་ཞེས་བྱ་བ་ནི་རྟོག་པར་བྱེད་པའོ། །རོ་སྨད་ཅེས་བྱ་བ་ནི་རྒྱབ་ཀྱི་ཆའོ། །སྟོབས་པར་བྱེད་ཅེས་བྱ་བ་ནི་འབུལ་བར་བྱེད་ཅེས་བྱ་བའོ། །འདི་ལྟ་སྟེ་ཞེས་བྱ་བ་ནི་འདི་ལྟར་རོ། །ངོ་ཚ་བས་ཞེས་བྱ་བ་ནི་ཤིན་ཏུ་ངོ་ཚ་བས་སོ། །ཁྲོས་
ཞེས་བྱ་བ་ནི་དང་པོ་འཁྲུག་པ་ཆུང་ངུས་རེག་པའོ། །འཁྲུགས་ཞེས་བྱ་བ་ནི་འབྲིང་གིས་སོ། །རྔམ་པར་གྱུར་ཅེས་བྱ་བ་ནི་འཁྲུག་པ་ཆེན་པོས་དྲག་ཤུལ་ཉིད་དུ་གྱུར་པའོ། །ཡིད་མི་དགའ་ནས་ཞེས་བྱ་བ་ནི་ཡིད་མི་བདེ་ཞིང་མི་དགའ་ནས་སོ། །མངོན་པར་བྲེད་དེ་ཞེས་བྱ་བ་ནི་རྣམ་པར་གྲོལ་ཏེའོ། །དུ་རུ་རུ་ཟེར་ཞིང་ཞེས་བྱ་བ་ནི་ཁྲོ་བ་ལས་བྱུང་བའི་སྒྲ་ངུ་རུ་རུ་ཟེར་ཞིང་ངོ༌། །འོན་ཀྱང་ཞེས་བྱ་བ་ནི་ཁྱད་པར་དུའོ། །འོ་ན་ཞེས་བྱ་བ་ནི་དྲི་བའོ། །བཀག་ཅེས་བྱ་བ་ནི་དགག་པར་མཛད་པའོ། །མི་ཉིད་ལ་ཞེས་བྱ་བ་ནི་མིའི་འགྲོ་བར་སྐྱེས་པ་སྟེ། དེ་ལ་ཞུགས་པའི་ཕྱིར་དེ་ཉིད་ལ་དགག་པ་མཛད་པར་བསམས་པའོ། །སྔ་མ་ནི་བཅས་པའོ་ཞེས་བྱ་བ་ནི་གཞིའི་མཚམས་སོ། །འདི་ནི་རྗེས་སུ་བཅས་པའོ་ཞེས་བྱ་བ་ནི་དེའི་རྗེས་སུ་སོང་བའི་མཚམས་ཏེ་དེའི་རྗེས་སུ་སོང་བའི་བསམ་པ་བཟློག་པའི་ཕྱིར་རོ། །ཡང་དགེ་སློང་གང་ཞེས་གསུངས་པ་ལ་སོགས་པ་ནི་འདུལ་བའི་དོན་ཡོངས་སུ་ཤེས་པ་མེད་ན་སློབ་མ་རྣམས་ཀྱི་བྱ་བ་བསྒྲུབ་པ་ཡོངས་སུ་ཉམས་པར་འགྱུར་བ་དང༌། བསླབ་པ་རལ་བར་འགྱུར་བ་དང༌། འཇིག་རྟེན་པ་རྣམས་མ་དད་པ་སྐྱེ་བ་དང༌། ལམ་སྐྱེ་བ་ཐག་རིང་བར་འགྱུར་བས་དེའི་ཕྱིར་བསླབ་པ་བཅས་མ་ཐག་ཁོ་ནར་བཅོམ་ལྡན་འདས་ཉིད་ཀྱིས་བསླབ་བའི་དོན་བཀའ་སྩལ་བ་ཡིན་ནོ། །དེ་ལ་ཡང་ཞེས་བྱ་བ་ནི་སྤྱིར་བཏང་བའི་དོན་ཏོ། །ཡང་ན་ཕྱི་མའི་དོན་ཏེ། དེས་ན་ལས་དང་པོ་པ་མ་གཏོགས་པ་དེ་ལས་གཞན་པ་གང་ཕྱིས་བྱེད་ན་ཞེས་བྱ་བའི་ཐ་ཚིག་གོ །དགེ་སློང་ཞེས་བྱ་བ་ནི་འོག་ནས་དགེ་སློང་གཞི་འབྱུང་བ་མ་གཏོགས་པ་གསོལ་བ་དང་བཞིའ་ལས་མི་གཡོ་བར་བཞག་པར་མི་འོང་བས་རྫོགས་པར་བསྙེན་པ་ཞེས་འབྱུང་བ་དེ་བཟུང་ངོ༌། །གང་ཞེས་བྱ་བ་ནི་ལ་ལ་ཞེས་བྱ་བའི་ཐ་ཚིག་གོ །མིང་གི་དགེ་སློང་ཞེས་བྱ་བ་ནི་མིང་ཙམ་གྱིས་དགེ་སློང་ཡིན་ལ་དོན་གྱིས་སྟོང་པའོ། །ཁས་འཆེ་བའི་དགེ་སློང་ཞེས་བྱ་བ་ནི་ཁས་ལེན་པའི་ཁས་འཆེ་བ་ཙམ་གྱིས་དགེ་སློང་ཡིན་པ་དོན་གྱིས་སྟོང་པའོ། །སློང་པའི་ཕྱིར་དགེ་སློང་ཞེས་བྱ་བ་ནི་སློང་བ་ཙམ་གྱི་རྒྱུས་དགེ་སློང་ཡིན་ལ་དོན་གྱིས་སྟོང་པའོ། །ཉོན་མོངས་པ་བཅོམ་པའི་ཕྱིར་དགེ་སློང་ཞེས་བྱ་བ་ནི་ཉོན་མོངས་པ་རབ་ཏུ་བཅོམ་ཞིང་ཟག་པ་ཟད་པའི་ཕྱིར་དགེ་སློང་ཞེས་བྱ་བ་
ནི་གསོལ་བ་དང་བཞིའི་ལས་མི་གཡོ་བར་གཞག་པར་མི་འོས་པས་རྫོགས་པར་བསྙེན་པ་མ་ཡིན་པའོ། །མིང་དང་མིང་དུ་བརྗོད་པ་ཞེས་བྱ་བ་ལ་སོགས་པའི་སྒྲ་བརྒྱད་པོ་དག་ནི་ཡུལ་ཐ་དད་པར་གྲགས་པའི་མིང་སྟེ། མིང་གི་རྣམ་གྲངས་སོ། །དགེ་སློང་གི་རིགས་ཤེ་འམ་ཞེས་བྱ་བ་ནི། དགེ་སློང་གི་རིགས་བརྒྱུད་དོ། །དགེ་སློང་དང་འདྲ་བར་གྱུར་པ་ཞེས་བྱ་བ་ནི་དགེ་སློང་དང་མཚུངས་པར་གྱུར་པའོ། །ཁས་འཆེ་བར་བྱེད་པ་ཞེས་བྱ་བ་ནི་ཚིག་གིས་ཁས་ལེན་པར་བྱེད་པའོ། །རྐུ་ཐབས་སུ་གནས་ཤིང་ཞེས་བྱ་བ་ནི་རྐུན་པོ་ལྟ་བུར་ཆོས་ཀྱི་ལོངས་སྤྱོད་བྱེད་པའོ། །དགེ་སློང་དུ་དམ་འཆའ་བར་བྱེད་པ་ཞེས་བྱ་བ་ནི་ལུས་ཀྱི་བས་སྨོས་པར་བྱེད་པའོ། ཆོས་དང་ལྡན་པ་ཞེས་བྱ་བ་ནི་ཆོས་དང་རྗེས་སུ་འབྲེལ་པའི་རིགས་པ་དང་ལྡན་པས་སོ། །སློང་མོ་སྤྱོད་པ་ཞེས་བྱ་བ་ནི་སློང་ཞེས་སྤྱོད་པས་སོ། །འཚོ་བ་བྱེད་པ་ཞེས་བྱ་བ་ནི་འཚོ་བ་སྦྱོར་བར་བྱེད་པའོ། །ཀུན་ནས་ཉོན་མོངས་པར་བྱེད་པ་ཞེས་བྱ་བ་ནི་ལས་ཀྱིས་ཀུན་ནས་ཉོན་མོངས་པར་བྱེད་པའོ། །ཡང་སྲིད་པར་བྱེད་པ་ཞེས་བྱ་བ་ནི་ཡང་བར་མ་དོའི་སྲིད་པ་འབྱུང་བའི་རྒྱུ་སྟེ། སྐྱེ་བའི་ཀུན་ནས་ཉོན་མོངས་པར་བྱེད་པའོ། །རིམས་ནད་དང་བཅས་པ་ཞེས་བྱ་བ་ནི་ཀུན་དུ་སྤྱོད་པའི་ཚེ་ན་སྟེ། ཡོངས་སུ་གདུང་བར་བྱེད་པ་ཡིན་པའི་ཕྱིར་རོ། །རྣམ་པར་སྨིན་པ་སྡུག་བསྔལ་བ་ཞེས་བྱ་བ་ནི་སེམས་ཅན་དམྱལ་བ་ལ་སོགས་པའི་རྒྱུ་ཡིན་པའོ། །ཕྱི་མ་ལ་ཞེས་བྱ་བ་ནི་དུས་ཕྱི་མ་ལའོ། །སྐྱེ་བ་དང་རྒ་བ་དང་འཆི་བར་འགྱུར་བ་ཞེས་བྱ་བ་ལ་སྐྱེ་བ་ཞེས་བྱ་བ་ནི། སྐྱེ་བ་གཞན་ནོ། །དགའ་བ་ཞེས་བྱ་བ་ནི་ལུས་ཡོངས་སུ་སྨིན་པའོ། །འཆི་བ་ཞེས་བྱ་བ་ནི་ཚེ་ཟད་པ་སྟེ་དེ་དག་གི་རྒྱུ་ཡིན་པའོ། །སྤངས་པ་ཞེས་བྱ་བ་ནི་ཟད་པ་སྟེ་འཐོབ་པ་ཆད་པའི་ཕྱིར་རོ། །ཡོངས་སུ་ཤེས་པ་ཞེས་བྱ་བ་ནི་ངོ་བོ་ཉིད་དང༌། དམིགས་པ་ཡོངས་སུ་ཆད་པའི་ཕྱིར་རོ། །རྩ་བ་ནས་བཅད་པ་ཞེས་བྱ་བ་ནི་ཉེས་པའི་རྣམ་པ་ཆུང་ངུ་ཡང་སྤངས་པའི་ཕྱིར་རོ། །ཤིང་ཏ་ལའི་མགོ་བཞིན་དུ་ཞེས་བྱ་བ་ནི་ཇི་ལྟར་ཤིང་ཏ་ལའི་མགོ་བཅད་ན་གཞི་མི་སྣང་ཞིང་ཕྱོགས་གཅིག་ཀྱང་མི་སྐྱེ་བ་དེ་དང་འདྲ་འོ་ཞེས་བྱ་བའི་ཐ་ཚིག་གོ །གཞི་མི་སྣང་བ་ཞེས་བྱ་བ་ནི་གང་དག་གི་གཞི་ཞེས་བྱ་བ་གནས་མི་སྣང་ཞེས་
བྱ་བའི་གྲིབ་མ་མེད་པ་དེ་དག་ནི་གཞི་མི་སྣང་བ་ཞེས་བྱ་བ་སྟེ་ལྷག་མ་མ་ལུས་པའོ། །ཕྱི་མ་ལ་མི་སྐྱེ་བའི་ཆོས་ཅན་དུ་གྱུར་པ་ཞེས་བྱ་བ་ནི་ཡང་ཚེ་གཞན་དུ་མི་སྐྱེ་བའི་ཆོས་ཅན་དུ་གྱུར་པའོ། །དོན་འདིར་ནི་ཞེས་བྱ་བ་ནི་ཡུལ་འདིར་ནིའོ། །གསོལ་བ་དང་བཞིའི་ཞེས་བྱ་བ་ནི་ལས་བརྗོད་པ་གང་ལ་གསོལ་བ་དང་ལས་བ་རྗོད་པ་གསུམ་དང་བཞི་བྱེད་པའོ། །མི་གཡོ་བ་ཞེས་བྱ་བ་ནི་ཡང་བྱ་མི་དགོས་པའོ། །གཞག་པར་མི་འོས་པས་ཞེས་བྱ་བ་ནི་བགེགས་བྱ་བར་མི་འོས་པས་སོ། །ཆོས་མཐུན་པ་ཞེས་བྱ་བ་ནི་ལམ་མཐུན་པའོ། །ཚངས་པ་མཚུངས་པར་སྤྱོད་པ་རྣམས་དང་ཞེས་བྱ་བ་ནི་རབ་ཏུ་བྱུང་བ་དགེ་སློང་རྣམས་དང་ངོ༌། །བསླབ་པ་མཚུངས་པར་ཞེས་བྱ་བ་ནི་བསླབ་པས་འདྲ་བར་རོ། །གྱུང་བ་ཞེས་བྱ་བ་ནི་ཞུགས་པས་སོ། །བསླབ་པ་ཞེས་བྱ་བ་ནི་ངེས་པའོ། །དེ་རྫོགས་པར་བསྙེན་པས་ཞེས་བྱ་བ་ནི་ཉི་མ་དེ་ལ་རྫོགས་པར་བསྙེན་པས་སོ། །ཚུལ་ཁྲིམས་ཉིད་ཀྱིས་མཉམ་པ་ཞེས་བྱ་བ་ནི་རང་བཞིན་གྱིས་ཁ་ན་མ་ཐོ་བ་དང་བཅས་པ་སྤངས་པས་མཉམ་པའི་ཕྱིར་རོ། །བསླབ་པ་ཉིད་ཀྱིས་མཉམ་པ་ཞེས་བྱ་བ་ནི་བཅས་པའི་ཁ་ན་མ་ཐོ་བ་དང་བཅས་པས་སྤངས་པས་མཉམ་པའི་ཕྱིར་རོ། །སོ་སོར་ཐར་པའི་མདོ་འདོན་པ་ཉིད་ཀྱིས་མཉམ་པ་ཞེས་བྱ་བ་ནི་ཆོས་ཀྱི་ལོངས་སྤྱོད་ཀྱིས་མཉམ་པའི་ཕྱིར་རོ། །སོ་སོར་ཐར་པ་ཞེས་བྱ་བ་ནི་ངེས་དང་པོར་སྡིག་པ་ལས་ཐར་པ་སྟེ། དང་པོའི་རྣམ་པར་རིག་བྱེད་དང་རྣམ་པར་རིག་བྱེད་མ་ཡིན་པ་ནི་སོ་སོར་ཐར་པའོ་ཞེས་གསུངས་པའི་ཕྱིར་རོ། །དེ་ཉིད་མདོ་ཡིན་ཏེ་འདུལ་བའི་རྣམ་པའི་དོན་མཐའ་དག་སྨོས་པའི་ཕྱིར་རོ། །དེ་འདོན་པ་ནི་དགེ་འདུན་གྱི་དབུས་སུ་བརྗོད་པའོ། །དེའི་དངོས་པོ་ནི་དེ་ཉིད་དོ། །ཁྲོས་ཤིང་ཞེས་འདིར་སྨོས་པ་ནི། གཞུང་གཞན་ཡིན་ཏེ། དེ་ནི་མི་རིགས་ཏེ། གཏོང་བར་འདོད་ཆགས་པར་གྱུར་པ་ལ་སོགས་པ་བཞིན་དུ་བསླབ་པ་བཏང་བར་གྱུར་པའི་ཕྱིར་རོ། །གལ་ཏེ་ཁྲོས་པ་ནི་གཏོང་བའི་སེམས་མེད་པར་ཁྲོ་བའི་ཟིལ་གྱིས་ནོན་པས་བསླབ་པ་འབུལ་ན་ནི་དེའི་ཚེ་བསླབ་པ་མ་ཕུལ་བར་རྗོད་པར་བྱའོ། །འབུལ་ན་ཞེས་བྱ་བ་ནི་ཡོངས་སུ་གཏོང་ནའོ། །སྨྱོས་པ་ཞེས་བྱ་བ་ནི་སྨྱོ་བྱེད་ཀྱིས་ཐ་སྙད་ཀྱི་བློ་ཉམས་པའོ། །སེམས་འཁྲུགས་པ་ཞེས་བྱ་བ་ནི་རླུང་ལ་སོགས་
པས་གང་གི་རང་བཞིན་གྱིས་སེམས་ཉམས་པའོ། །ཚོར་བ་དག་གིས་ཉེན་པ་ཞེས་བྱ་བ་ནི་སྡུག་བསྔལ་གྱི་ཚོར་བ་དག་གི་ས་དགེ་སློང་གི་དངོས་པོའི་སེམས་ཉམས་པ་སྟེ་དེ་ནི་ཐ་སྙད་ཀྱི་སེམས་པ་མེད་པས་དེས་ཕུལ་ཡང་མ་ཕུལ་བར་བརྗོད་པར་བྱའོ། །གླེན་པ་ཞེས་བྱ་བ་ནི་བརྡ་ཕྲད་པར་མི་ནུས་སོ། །ལྐུགས་པ་ཞེས་འདིར་སྨོས་པ་ནི་གཞུང་གཞན་ཡིན་ཏེ། དེ་ཡང་མི་རིགས་ཏེ། བརྡ་ཕྲད་ན་གོ་བར་བྱེད་པ་མེད་དུ་ཟིན་ཀྱང་ཕུལ་བར་འགྱུར་བའི་ཕྱིར་ཏེ། འཆི་བར་ངེས་པ་ལ་སོགས་པ་ལྟ་བུ་དང་ལྕེ་ཐོབ་ན་གོ་བར་བྱེད་པ་ཡང་སྲིད་པའི་ཕྱིར་རོ། །འོན་པ་ཞེས་བྱ་བ་ནི་རྣ་བ་ཉམས་པའོ། །དབེན་པར་ཞེས་བྱ་བ་ནི་གནས་སྟོང་པར་ཏེ། དབེན་པར་ནི་ཉན་པ་པོ་མེད་པའི་ཕྱིར་ཡུལ་མ་ཡིན་ནོ། །དབེན་པར་འདུ་ཤེས་པས་ཞེས་བྱ་བ་ནི་ཉན་དུ་གཞུག་པའི་བློ་མེད་པས་ཡོངས་སུ་བཏང་བའི་བློ་ཡང་མེད་པའི་ཕྱིར་རོ། །དབུས་པ་ཞེས་བྱ་བ་ནི་ཡུལ་དབུས་ན་སྐྱེས་པའོ། །མཐའ་འཁོབ་པ་ཞེས་བྱ་བ་ནི་ཡུལ་མཐའ་འཁོབ་ནས་སྐྱེས་པའོ། །སྙོམས་པར་ཞུགས་པ་ཞེས་བྱ་བ་ནི་སེམས་མཉམ་པར་གཞག་པའམ། །སེམས་མེད་པའོ། །སྤྲུལ་བ་ཞེས་བྱ་བ་ནི་གསང་སྔགས་ལ་སོགས་པས་བསླང་བའོ། །ཀླག་ཅོར་ཅན་གྱིས་ཞེས་བྱ་བ་ནི་དབུལ་བར་བྱེད་པ་གཏམ་གཞན་གྱིས་ཀླག་ཅོར་ཟེར་བ་སྟེ། དེས་ཉན་པ་པོ་ཀླག་ཅོར་ཅན་ལ་འབུལ་བར་བྱེད་ན་ཕུལ་བ་མ་ཡིན་ཏེ། དེ་དག་ཐམས་ཅད་ནི་གོ་བ་མེད་པའི་ཕྱིར་ཕུལ་བར་མི་འགྱུར་རོ། །གཏོང་བའི་སེམས་མེད་པ་ཞེས་བྱ་བ་ནི་འབུལ་བའི་སེམས་མེད་པ་སྟེ། དེས་ན་གཏོང་བའི་སེམས་མེད་ན་འབུལ་བར་བྱེད་དུ་ཟིན་ཀྱང་ཕུལ་བར་མི་འགྱུར་རོ་ཞེས་བྱ་བའི་ཐ་ཚིག་གོ །དགེ་སྦྱོང་གི་ཚུལ་འདོད་པ་ཞེས་བྱ་བ་ནི་དགེ་སློང་གི་དངོས་པོ་ཉིད་འདོད་པའོ། །ཁྱིམ་ནི་གནས་པ་མི་འདོད་པ་ཞེས་བྱ་བ་ནི་ཁྱིམ་པའི་དངོས་པོ་ཉིད་མི་འདོད་པའོ། །མི་རང་བཞིན་དུ་གནས་པ་ཞེས་བྱ་བ་ནི་འཇིག་རྟེན་གྱི་ཐ་སྙད་ལས་མ་ཉམས་པའོ། །ཤེས་པ་ཞེས་བྱ་བ་ནི་སྐད་ཤེས་པའོ། །དེས་ན་གང་གི་ཚེ་གཏོང་བའི་སེམས་མེད་པ་དང༌། དགེ་སློང་གི་ཚུལ་འདོད་པས། ཁྱིམ་ན་གནས་པ་མི་འདོད་པ་དེའི་ཚེ་འབུལ་བར་བྱེད་ཀྱང་ཕུལ་བར་མི་འགྱུར་ལ། གང་གི་ཚེ་གཏོང་བའི་སེམས་ཡོད་པ་
དང། དགེ་སྦྱོང་གི་ཚུལ་མི་འདོད་པ་དང༌། ཁྱིམ་ན་གནས་པ་འདོད་ཀྱང་མི་རང་བཞིན་དུ་གནས་པ་ཤེས་པ་འགའ་ཡང་ཚིག་གིས་རྣམ་པར་རིག་པར་མི་བྱེད་ན་དེའི་ཚེ་ཡང་བསླབ་པ་མ་ཕུལ་བར་བརྗོད་པར་བྱའོ་ཞེས་བྱ་བའི་ཐ་ཚིག་གོ །བསླབ་པ་ཉམས་པར་ཞེས་བྱ་བ་ནི་བསླབ་པའི་ཡུལ་མཐུ་མེད་པ་ཉིད་དུའོ། །མ་བྱས་པར་ཞེས་བྱ་བ་ནི་མ་བརྗོད་པར་རོ། །བསླབ་པ་ཕུལ་ལ་བསླབ་པ་ཉམས་པར་མ་བྱས་པ་ཞེས་བྱ་བ་ནི་བསླབ་པ་དབུལ་བ་ལ་བསླབ་པ་ཉམས་པར་བྱ་བ་མེད་པར་བྱེད་པ་སྟེ། དེ་ནི་རྒྱུ་མ་བསྟན་པའི་ཕྱིར་ཡོངས་སུ་རྫོགས་པ་མ་ཡིན་པས་བསླབ་པ་ཕུལ་ལ་བསླབ་པ་ཉམས་པར་མ་བྱས་པ་ཞེས་མུ་དང་པོར་གཞག་པར་ཟད་ཀྱི། བསླབ་པ་ཕུལ་ན་བསླབ་པ་ཉམས་པར་མ་བྱས་སུ་ཟིན་ཀྱང་དེ་ལ་དགེ་སློང་གི་དངོས་པོ་ཉིད་མེད་དོ། །བསླབ་པ་ཉམས་པར་བྱས་ལ་བསླབ་པ་མ་ཕུལ་ཞེས་བྱ་བ་ནི་བསླབ་པ་ཉམས་པར་བྱས་པ་བསླབ་པ་འབུལ་བ་མེད་པར་བྱེད་པ་སྟེ། དེའི་འབྲས་བུ་མ་བསྟན་པའི་ཕྱིར་ཡོངས་སུ་རྫོགས་པ་མ་ཡིན་པས་བསླབ་པ་ཉམས་པར་བྱས་ལ་བསླབ་པ་མ་ཕུལ་བ་ཞེས་མུ་གཉིས་པར་གཞག་པར་ཟད་ཀྱི་བསླབ་པ་ཉམས་པར་བྱས་ན་བསླབ་པ་མ་ཕུལ་དུ་ཟིན་ཀྱང་དེ་ལ་དགེ་སློང་གི་དངོས་པོ་ཉིད་མེད་དོ། །བསླབ་པ་ཉམས་པར་ཡང་བྱས་ལ་ཕུལ་བ་ཞེས་བྱ་བ་ནི་དགེ་སློང་གི་དངོས་པོ་མེད་པ་ཉིད་གང་ཡིན་པ་དེ་ནི་རྒྱུ་ཡང་བསྟན་ལ་འབྲས་བུ་ཡང་བསྟན་པའི་ཕྱིར་ཡོངས་སུ་རྫོགས་པ་ཡིན་པས་བསླབ་པ་ཉམས་པར་ཡང་བྱས་ལ་བསླབ་པ་ཕུལ་བ་ཞེས་མུ་གསུམ་པར་གཞག་སྟེ། དེ་ཡང་དགེ་སློང་གི་དངོས་པོ་ཉིད་མེད་དོ། །དེ་ལ་གང་གི་ཚེ་དབུལ་བར་བརྗོད་ནས་ཉམས་པ་རྗོད་པར་བྱེད་པ་དེའི་ཚེ་ནི་དབུལ་བ་གཙོ་བོ་ཉིད་ཡིན་པའི་ཕྱིར་ཕུལ་ཞེས་བྱའི་ཉམས་པ་ཞེས་མི་བྱའོ། །གང་གི་ཚེ་ཉམས་པར་བརྗོད་ནས་འབུལ་བ་བྱེད་པ་དེའི་ཚེ་ནི་ཉམས་པ་གཙོ་བོ་ཉིད་ཡིན་པའི་ཕྱིར་ཉམས་པ་ཞེས་བྱའི་ཕུལ་བ་ཞེས་མི་བྱ་སྟེ། དེའི་ཚེ་ཕུལ་བ་དང་ཉམས་པར་བྱས་པ་གཉིས་ནི་དོན་གཅིག་པ་ཉིད་ཡིན་ནོ། །མུ་དང་པོ་གཉིས་ནི་དབུལ་བ་དང་ཉམས་པར་བྱས་པ་ཡོངས་སུ་མ་རྫོགས་པས་བསྡུས་པ་ཡིན་ནོ། །བསླབ་པ་མ་ཕུལ་ཞིང་བསླབ་པ་ཉམས་པར་མ་བྱས་པ་ཞེས་བྱ་བ་ནི་དགེ་སློང་གི་དངོས་པོ་ཉིད་མེད་པར་འགྱུར་བའི་
རྒྱུ་དེ་གཉིས་གང་ཡང་མ་བྱས་པས་དེ་ལ་ནི་དགེ་སློང་གི་དངོས་པོ་ཉིད་ཡོད་པ་ཡིན་པས་མུ་བཞི་པར་རྣམ་པར་གཞག་གོ །མུ་བཞི་པོ་དེ་དག་ལས་དང་པོ་གསུམ་ལ་ནི་དགེ་སློང་གི་དངོས་པོ་ཉིད་མེད་ལ་མུ་ཐ་མ་ལ་ནི་དགེ་སློང་གི་དངོས་པོ་ཡོད་དེ་ཞེས་བྱ་བའི་ཐ་ཚིག་གོ ། སངས་རྒྱས་དང་ཆོས་དང་དགེ་འདུན་དཀོན་མཆོག་འབུལ་བ་ནི་སྡོམ་པའི་རྩ་བ་གཏང་བའི་ཕྱིར་བསླབ་པ་ཕུལ་བ་ཡིན་ནོ། །མདོ་སྡེ་དང་འདུལ་བ་དང་མ་མོའི་སྡེ་སྣོད་དང༌། མཁན་པོ་དང་སློབ་དཔོན་སྐྱེ་བོའི་བླ་མ་འབུལ་བ་ནི་སྡོམ་པ་ལ་ཉེ་བར་སྦྱོར་བ་ཡོངས་སུ་བཏང་བས་བསླབ་པ་ཕུལ་བ་ཡིན་ནོ། །ཁྱིམ་པ་ལ་སོགས་པར་ཁས་ལེན་པ་ནི་བསླབ་པའི་ས་བཏང་བས་བསླབ་པ་ཕུལ་བ་ཡིན་ནོ། །ཆོས་མཐུན་པ་དག་སྤོང་བ་ནི་བསྟན་པ་ལས་ཕྱིར་རོལ་དུ་གྱུར་པར་ཁས་བསླངས་པས་རབ་ཏུ་བྱུང་བའི་ས་གཏང་བའི་ཕྱིར་བསླབ་པ་ཕུལ་བ་ཡིན་ནོ། །མདོ་སྡེ་ཞེས་བྱ་བ་ནི་དབེན་པའི་ཆོས་ཉིད་སྨོས་པའི་ཚིག་ཡིན་ནོ། །མ་མོ་ཞེས་བྱ་བ་ནི་མདོ་སྡེ་དང་འདུལ་བ་གཉིས་ཀྱི་དོན་དང་དོན་མ་ཡིན་པ་སྟོན་པས་མ་དང་འདྲ་བའི་རྣམ་པར་བཤད་པར་གྱུར་པར་བསྟན་བཅོས་ཆོས་མངོན་པ་ཡིན་ནོ། །དགེ་ཚུལ་ཞེས་བྱ་བ་ནི་དགེ་ཚུལ་ཉིད་ཡིན་ནོ། །ཟ་མ་ཞེས་བྱ་བ་ནི་དབང་པོ་ལས་སུམ་མི་རུང་བའོ། །མ་ནིང་ཞེས་བྱ་བ་ནི་མཚན་ཉམས་པ་དང་ས་བོན་མེད་པའོ། །དགེ་སློང་མ་སུན་ཕྱུང་བ་ཞེས་བྱ་བ་ནི་གང་གིས་དགེ་སློང་མ་ཕམ་པ་མ་ཕྱུང་པ་སྤྲོད་པ་ལས་བྱུང་བས་སུན་ཕྱུང་བའོ། །ངན་སེམས་ཀྱིས་ཞེས་བྱ་བ་ནི་བསད་པའི་སེམས་ཀྱིས་སོ། །མུ་སྟེགས་ཅན་ཞུགས་པ་ཞེས་བྱ་བ་ནི་མུ་སྟེགས་ཅན་གྱི་ལྟ་བ་དང་ལྡན་བཞིན་དུ་བསྟན་པ་འདི་ལ་ལས་ལན་གསུམ་ཉམས་སུ་མྱོང་བར་གྱུར་པ་གང་ཡིན་པ་དང༌། དགེ་སློང་གི་རྟགས་བཏང་སྟེ། མུ་སྟེགས་ཅན་གྱི་རྟགས་འཛིན་ཅིང་མུ་སྟེགས་ཅན་གྱི་གནས་སུ་ནམ་ནངས་པར་བྱེད་པ་གང་ཡིན་པའོ། །རྐུ་ཐབས་སུ་གནས་པ་ཞེས་བྱ་བ་ནི་ཡང་དག་པའི་ལྟ་བ་དང་ལྡན་དུ་ཟིན་ཀྱང་རྫོགས་པར་མ་བསྙེན་པའམ། རྫོགས་པར་བསྙེན་པ་ཉམས་པ་རྫོགས་པར་བསྙེན་པ་མ་ཡིན་པར་འདུ་ཤེས་བཞིན་དུ་ལས་ལན་གསུམ་ཉམས་སུ་མྱོང་པ་གང་ཡིན་པའོ། །ཐ་དད་པར་གནས་པ་ཞེས་བྱ་བ་ནི་ལྟ་བ་གཞན་དང་ལྡན་པའོ། །
གནས་པར་མི་བྱ་བ་ཞེས་བྱ་བ་ནི་ཉམས་པའོ། །ཁྱེད་ལྟ་བུ་ཞེས་བྱ་བ་ནི་ཁྱེད་ཅག་འདྲ་བའོ། །ཆོག་གོ་ཞེས་བྱ་བ་ནི་དགག་པའོ། །སྤྱད་དཀའ་བ་ཞེས་བྱ་བ་ནི་བསྒྲུབ་པ་དཀའ་བའོ། །རབ་ཏུ་དབེན་པ་ཞེས་བྱ་བ་ནི་སེམས་རབ་ཏུ་དབེན་པའོ། །གཅིག་བུ་ཉིད་ལ་ཞེས་བྱ་བ་ནི་གཅིག་པ་ཉིད་ལའོ། །མངོན་པར་དགའ་བ་དཀའ་བ་ཞེས་བྱ་བ་ནི་གང་ལ་མངོན་པར་དགའ་བ་སྐྱེ་བར་དཀའ་བའོ། །གནས་མལ་ཞེས་བྱ་བ་ནི་འདུག་པའི་གནས་ཏེ། སྐབས་འདིར་ནི་དགོན་པ་ཞེས་བྱ་བ་དང་སྦྱར་ཏེ། གནས་མལ་དགོན་པ་དེ་ཡང་གང་ཞེ་ན། འོག་ནས་ནགས་ཁྲོད་དང༌། རི་དྲུང་དང་རབ་མཐའ་དག་ཅེས་འབྱུང་བ་དང་སྦྱར་རོ། །ནགས་ཁྲོད་ཅེས་བྱ་བ་ནི་ཤིང་ལྗོན་པའི་ཐིབས་པོའོ། །རི་དྲུང་ཞེས་བྱ་བ་ནི་རི་དང་ཐག་ཉེ་བའོ། །རབ་མཐའ་དག་ཅེས་བྱ་བ་ནི་རབ་ཏུ་ཐག་རིང་པའོ། །གནས་པ་ཞེས་བྱ་བ་ནི་ཉེ་བར་ཕན་པ་སྟེ། འདུག་པ་ཞེས་བྱ་བའི་ཐ་ཚིག་གོ །ཁོང་དུ་ཆུད་པར་དཀའ་བ་ཞེས་བྱ་བ་ནི་ཤེས་པར་དཀའ་བའོ། །བཟོ་དག་ཅེས་བྱ་བ་ནི་འཚོ་བའི་ཐབས་ཏེ། རི་མོ་ལ་སོགས་པས་སོ། །ལས་ཀྱི་མཐའ་དག་ཅེས་བྱ་བ་ནི་བུ་རམ་གྱི་ཤིང་གི་ལས་ལ་སོགས་པའོ། །བཟང་པོ་དག་ཏུ་ཞེས་བྱ་བ་ནི་མཛེས་པ་དག་ཏུའོ། །གཏོང་ཅིག་ཅེས་བྱ་བ་ནི་བསྲུང་བའི་ཕྱིར་ཕུལ་ཅིག་ཅེས་བྱ་བའོ། །ངག་དང་ཚིག་ཅེས་བྱ་བ་ལ་སོགས་པ་ཚིག་བཅུ་ནི་ངག་གི་རྣམ་པར་རིག་བྱེད་ཀྱི་རྣམ་གྲངས་ཏེ་ཡུལ་དང་བསྟན་བཅོས་ལས་གྲགས་པ་དག་བསྟན་པའི་ཕྱིར་རོ། །རྣམ་པ་དེ་དག་མ་གཏོགས་པ་ཞེས་བྱ་བ་ནི་དབུལ་བ་དང་ཉམས་པར་བྱ་བའི་རྣམ་པ་སྔར་བསྟན་པ་དེ་དག་མ་གཏོགས་པའོ།། །།བམ་པོ་གསུམ་པ། གཉིས་ཀྱིས་གཉིས་སྤྲོད་པ་ཞེས་བྱ་བ་ནི་ཕོ་དང་མོ་ཞེས་བྱ་བ་གཉིས་ཀྱིས་ཕོ་དང་མོའི་དབང་པོ་ཞེས་བྱ་བ་གཉིས་སྦྱོར་བའོ། །ཆོས་མ་ཡིན་པ་དེ་ཞེས་བྱ་བ་ནི་བསོད་ནམས་མ་ཡིན་པ་དེའོ། །ཆོས་ཀྱི་སྒྲར་ཞེས་བྱ་བ་ནི་དངོས་པོའི་ཚིག་ཏུ་ཞེས་བྱ་བའི་ཐ་ཚིག་གོ །ཐ་ན་ཞེས་བྱ་བ་ནི་མཐར་ནའོ། །སྤྲ་མོ་དང་འདྲ་བར་གཏོགས་པ་ཞེས་བྱ་བ་ནི་སྤྲ་མོ་དང་རིགས་མཐུན་པ་དུད་འགྲོའི་སྐྱེ་གནས་སུ་གཏོགས་པ་སྟེ། དུད་འགྲོའི་འགྲོ་བ་ཞེས་བྱ་བའི་ཐ་ཚིག་གོ །གང་ལ་དགེ་སློང་གི་དངོས་པོ་ཡོད་པ་གང་ཡིན་པའོ་ཞེས་
བྱ་བ་ལ་སོགས་པ་ལ། དགེ་སློང་གི་དངོས་པོ་ཞེས་བྱ་བ་ནི་དགེ་སློང་གི་སྡོམ་པ་རྣམ་པར་རིག་བྱེད་མ་ཡིན་པའི་མཚན་ཉིད་བདུན་པོ་སྦྱོར་བ་དང་མཇུག་དང༌། བཅས་པའི་ཁ་ན་མ་ཐོ་བ་དང་བཅས་པ་སྤོང་བ་དག་དང་བཅས་པའོ། །དེ་ཉིད་རྫོགས་པར་བསྙེན་པ་ཡིན་ཏེ། མྱ་ངན་ལས་འདས་པའི་མཚན་ཉིད་དགོངས་པ་ཐམས་ཅད་རྫོགས་པ་དང་འདྲ་བའི་ཕྱིར་རོ། །འདིར་དགེ་སློང་གི་དངོས་པོ་དེ་གཙོ་བོ་ཡིན་པའི་ཕྱིར་དང༌། ལྟུང་བའི་གནས་པ་ཡིན་པའི་ཕྱིར་ཏེ། རྟེན་དང་བཅས་པ་ནི་དགེ་སློང་གི་སྒྲར་བརྗོད་དོ་ཞེས་བྱ་བའི་ཐ་ཚིག་གོ །བྱེད་པ་ཉིད་ཅེས་བྱ་བ་ལ་སོགས་པ་ལྔ་ནི་བྱ་བ་རྣམ་གྲངས་ཡིན་ནོ། །རྟེག་པ་ཉིད་དང་ཡང་དག་པར་རྟོག་པ་ཉིད་ཅེས་བྱ་བ་གཉིས་ནི་བློ་སྔོན་དུ་བཏང་སྟེ་བྱེད་པ་ཡིན་ནོ། །ཁས་ལེན་པ་དང་མངོན་པར་ཁས་ལེན་པ་ཞེས་བྱ་བ་གཉིས་ནི་དང་དུ་ལེན་པའི་རྣམ་གྲངས་ཡིན་ནོ། །ཕྱིར་མི་ལྡོག་པ་ཞེས་བྱ་བ་ལ་སོགས་པའི་སྒྲ་གསུམ་གྱིས་ནི་ཕྱིར་མི་ལྡོག་པ་བསྟན་ཏོ། །ངག་དང་ཚིག་ཅེས་བྱ་བ་ལ་སོགས་པ་བཅུས་ནི་གསོལ་བ་བསྟན་ཏོ། །ཉེ་བར་བསྟན་པ་ཞེས་བྱ་བ་ནི་ར་ནས་བཟུང་བའི་ཚུལ་གྱིས་ས་བསྟན་པའོ། །ཀུན་དུ་བསྟན་པ་ཞེས་བྱ་བ་ནི་ཚིག་གིས་བསྟན་པའོ། །ཉེ་བར་བསྟན་པ་དང་ཀུན་དུ་བསྟན་པའི་མི་དེ་གཉིས་ཚིག་བླ་དགས་དེ་ཉིད་ནི་དེ་ཞེས་བྱ་བའི་སྒྲར་བརྗོད་དོ། །ཕམ་པར་གྱུར་པ་ཞེས་བྱ་བ་ལ། ཕམ་པར་སྐྱེས་པ་ནི་ཕམ་པར་གྱུར་པ་སྟེ། དེ་གང་ལ་ཡོད་པ་དེ་ནི་ཕམ་པར་གྱུར་བ་ཡིན་ཏེ། ཉམས་པ་ཞེས་བྱ་བའི་ཐ་ཚིག་གོ །ཅིའི་ཕྱིར་ཕམ་པར་གྱུར་པ་ཡིན་ཞེས་བྱ་ཞེ་ན། དེའི་ཕྱིར་དེ་ཞེས་བྱ་བ་ལ་སོགས་པ་གསུངས་སོ། །མཐར་གྱུར་པ་ཞེས་བྱ་བ་ལ། མཐར་སྐྱེས་པ་ནི་མཐར་གྱུར་པ་སྟེ། ཡང་སྦྱར་བར་བྱ་བ་མེད་པའི་ཕྱིར་རོ། །ལྟུང་བ་ཞེས་བྱ་བ་ནི་ཉེས་པའོ། །དམན་པ་ཞེས་བྱ་བ་ནི་ཉོན་མོངས་པ་ཡིན་པའི་ཕྱིར་རོ། །མཇུག་ན་འདུག་པ་ཞེས་བྱ་བ་ལ། མཇུག་ཅེས་བྱ་བ་ནི་མཇུག་དོ་སྟེ། དེ་ནི་འདུག་པ་དང་འདྲ་བའི་ཕྱིར་མཇུག་ན་འདུག་པའོ། །ཐ་ཆད་ཅེས་བྱ་བ་ནི་ཤིན་ཏུ་སྨད་པ་ཡིན་པའི་ཕྱིར་རོ། །ཡིད་དང་མི་མཐུན་པ་ཞེས་བྱ་བ་ནི་རབ་ཏུ་བྱུང་བའི་ཡིད་དང་མཐུན་པ་མ་ཡིན་པའི་ཕྱིར་རོ། །རྒྱུ་གཞན་བསྟན་
པའི་ཕྱིར་ཡང་ཞེས་བྱ་བ་ལ་སོགས་པ་གསུངས་ཏེ། ཡང་ཞེས་བྱ་བ་ནི་གཞན་ཡང་ཞེས་བྱ་བའི་ཐ་ཚིག་གོ །བྱས་པ་ཞེས་བྱ་བ་ནི་ཐོབ་ནའོ། །བྱས་མ་ཐག་ཏུ་ཞེས་བྱ་བ་ནི་བྱས་པའི་མོད་ལའོ། །དགེ་སློང་དུ་མི་རུང་བར་གྱུར་པ་ཞེས་བྱ་བ་ནི་དགེ་སློང་དག་པ་ཉིད་མེད་པའི་ཕྱིར་རོ། །དགེ་སྦྱོང་དུ་མི་རུང་ཞེས་བྱ་བ་ནི་དགེ་སྦྱོང་གི་ཚུལ་དག་པ་ཉིད་མེད་པའི་ཕྱིར་རོ། །ཤཱཀྱའི་སྲས་ཀྱིར་མི་རུང་ཞེས་བྱ་བ་ནི་ཤཱཀྱའི་སྲས་སངས་རྒྱས་བཅོམ་ལྡན་འདས་ཀྱི་སློབ་མ་ཡོངས་སུ་དག་པར་མི་རུང་ཞེས་བྱ་བའི་ཐ་ཚིག་གོ །ཉམས་པར་འགྱུར་ཞེས་བྱ་བ་ནི་རབ་ཏུ་ཉམས་པར་འགྱུར་བ་སྟེ། རྣམ་པར་དག་པ་དང་བྲལ་བའི་ཕྱིར་རོ། །དེ་ཅིའི་ཕྱིར་ཞེ་ན། དེའི་ཕྱིར་དེའི་དགེ་སྦྱོང་གི་ཚུལ་ཞིག་པར་འགྱུར་ཏེ་ཞེས་བྱ་བ་ལ་སོགས་པ་གསུངས་ཏེ། དགེ་སྦྱོང་གི་ཚུལ་ཞེས་བྱ་བ་ནི་དགེ་སློང་གི་སྡོམ་པའོ། །ཞིག་པ་ཞེས་བྱ་བ་ནི་སྨས་པའོ། །ཉམས་པ་ཞེས་བྱ་བ་ནི་ཉམས་པར་གྱུར་པའོ། །བཅོམ་པ་ཞེས་བྱ་བ་ནི་ཚུལ་ཁྲིམས་ཉམས་པ་བཅོམ་པའོ། །ལྟུང་བ་ཞེས་བྱ་བ་ནི་དག་པའི་གནས་ལས་རྣམ་པར་ཉམས་པའོ། །ཕམ་པར་གྱུར་པ་ཞེས་བྱ་བ་ནི་ཉོན་མོངས་པའི་དགྲ་རྣམས་ཀྱིས་མཐུ་མེད་པ་ཉིད་དུ་བྱས་པའོ། །ཅིའི་ཕྱིར་དགེ་སྦྱོང་གི་ཚུལ་དེ་ལྟར་འགྱུར་ཞེ་ན། དེའི་དགེ་སྦྱོང་གི་དེ་ལ་ཕྱིར་བསླད་དུ་མེད་པར་འགྱུར་རོ་ཞེས་བྱ་བ་གསུངས་ཏེ། ཕྱིར་ཞེས་བྱ་བའི་སྒྲ་ནི་ཡང་ཞེས་བྱ་བའི་སྒྲའི་དོན་ཏོ། །བསླང་དུ་ཞེས་བྱ་བ་ནི་བསླང་བར་ཏེ། རྣམ་པར་དག་པར་བྱ་བའོ། །ཡང་ན་བསླང་བ་ནི་ཕྱིར་བསླང་བའོ། །ཡང་བསླང་དུ་མེད་པ་ནི་ཕྱིར་བསླང་དུ་མེད་པ་སྟེ། བཤགས་པ་ལ་སོགས་པ་སོ་སོའི་སྐྱེ་བོའི་སར་གཏོགས་པ་ཐུན་མོང་བར་གྲགས་པའི་གཉེན་པོ་མེད་པའི་ཕྱིར་རོ། །དཔེ་བསྟན་པའི་ཕྱིར་འདི་ལྟ་སྟེ་དཔེར་ན་ཞེས་བྱ་བ་ལ་སོགས་པ་གསུངས་སོ། །མགོ་ཞེས་བྱ་བ་ནི་མགོ་བོའོ། །སྔོན་པོ་ཞེས་བྱ་བ་ནི་སྔོན་པོ་ལ་སོགས་པ་སྔོ་བ་ཉིད་དུའོ། །མི་རུང་ཞེས་བྱ་བ་ནི་སྣོད་མ་ཡིན་པའོ། །འཕེལ་བ་ཞེས་བྱ་བ་ནི་རྩ་བ་འཕེལ་བའོ། །རྒྱས་པ་ཞེས་བྱ་བ་ནི་སྲིད་དུའོ། །ཡངས་པར་ཞེས་བྱ་བ་ནི་སྦོམས་སུ་སྐྱེ་བའོ། །གནས་དེ་ལྟ་བུ་ཞེས་བྱ་བ་ནི་གཞི་དེ་ལྟ་བུའོ། །དེ་དང་ཞེས་བྱ་བ་ནི་གང་ཟག་དེ་དང་ངོ༌། །གསོལ་བ་ཞེས་བྱ་བ་ནི་གསང་སྟེ་སྟོན་པ་བསྐོ་བ་
ལ་སོགས་པ་གསོལ་བ་འབའ་ཞིག་གི་ལས་དག་གོ །གསོལ་བ་དང་གཉིས་ཞེས་བྱ་བ་ནི་གསོ་སྦྱོང་གི་གནས་ལ་བློ་མཐུན་པར་བྱ་བ་ལ་སོགས་པ་གསོལ་བ་དང་གཉིས་ཀྱི་ལས་དག་གོ །གསོལ་བ་དང་བཞིའི་ལས་ཞེས་བྱ་བ་ནི་རྫོགས་པར་བསྙེན་པར་བྱ་བ་ལ་སོགས་པ་གསོལ་བ་དང་བཞིའི་ལས་དག་ལའོ། །གནས་པར་མི་བྱའོ་ཞེས་བྱ་བ་ནི་འཇུག་པར་མི་བྱ་བའོ། །གང་ཟག་བཅུ་གཉིས་ཞེས་བྱ་བ་ནི་གནས་ཁང་བསྐོ་བ་དང༌། ཟས་ལ་བསྐོ་བ་དང༌། ཐུག་པ་འབྲིམ་པ་དང༌། བག་ཆོས་འབྲིམ་པ་དང༌། སྣོད་སྤྱད་འབྲུབ་པ་དང༌། སྣོད་སྤྱད་འགེད་པ་དང༌། གོས་སྦེད་པ་དང༌། དབྱར་གྱི་རས་ཆེན་འགེད་པ་དང་མངག་གཞུག་པ་དང༌། མཛེས་ཆོས་ཤེས་པ་དག་གོ །བསྐོ་བར་མི་བྱ་སྟེ་ཞེས་བྱ་བ་ནི་བཅོལ་བར་མི་བྱའོ། །རྣམ་པ་གང་གིས་ཕམ་པར་གྱུར་པའི་ལྟུང་བ་འབྱུང་བར་འགྱུར་བ་དེ་ཉེ་བར་བསྟན་པའི་ཕྱིར་དེ་ལ་ལྟུང་བ་ཇི་ལྟར་འགྱུར་ཞེ་ན་ཞེས་བྱ་བ་ལ་སོགས་པ་གསུངས་སོ། །དེ་ལ་ཞེས་བྱ་བ་ནི་སྔར་བསྟན་པའི་མཚན་ཉིད་ལའོ། །ཡང་དག་པར་སྡུད་པར་བྱེད་པ་དག་གིས་འོག་ནས་འབྱུང་བའི་རྣམ་པར་བསྡུ་བའི་ཕྱིར་སྡོམ་ལ་ཞེས་བྱ་བ་ལ་སོགས་པ་གསུངས་ཏེ། སྔོམ་ཞེས་བྱ་བ་ནི་བསྡུ་བ་ལའོ། །གནས་གསུམ་གྱིས་ཞེས་བྱ་བ་ནི་རང་གིས་སྟེན་པར་བྱེད་པ་ཟག་བྱེད་དང་བསྟེན་པར་བྱ་བ་ཁ་དང༌། བཤད་པའི་ལམ་གྱིས་སོ། ཟག་བྱེད་དམ་ཁའམ་བཤད་བའི་ལམ་དུ་ཞེས་བྱ་བ་བསྟེན་པར་བྱ་བ་བུད་མེད་ཀྱིའོ། །བསྟེན་པ་ལ་ཞེས་བྱ་བ་ནི་སྤྲོད་པ་ལས་བྱུང་བ་སྤྱོད་པ་ལའོ། །གཞོལ་བ་ཞེས་བྱ་བ་ནི་འདོད་ཆགས་ཀྱི་སེམས་ཆུང་ངུ་ལའོ། །འབབ་པ་ཞེས་བྱ་བ་ནི་འདོད་ཆགས་ཀྱི་སེམས་འབྲིང་ངོ༌། །བབ་པ་ཞེས་བྱ་བ་ནི་འདོད་ཆགས་ཀྱི་སེམས་ཆེན་པོའོ། །དེ་དག་ཆུང་ངུ་དང༌། འབྲིང་དང་ཆེན་པོ་ཉིད་ཡིན་པས་དུས་གཅིག་ཏུ་མི་འབྱུང་བའི་ཕྱིར་འདིར་རྣམ་གྲངས་ཀྱིས་འབྱུང་བར་ཤེས་པར་བྱའོ། །རྒྱུ་གང་གིས་འཇུག་ཅེ་ན། དེའི་ཕྱིར་དེ་སེམས་བསྟེན་པའམ་གཞོལ་བ་དང་བསྟེན་པ་ལ་འབབ་པ་དང༌། བསྟེན་པ་ལ་བབ་པས་ཞེས་བྱ་བ་གསུངས་ཏེ། འདོད་ཆགས་ཀྱི་སེམས་ཆུང་དུ་དང་འབྲིང་དང༌། ཆེན་པོ་དེ་གསུམ་གང་ཡང་རུང་བས་སོ། །ཡུལ་
གང་ལ་འཇུག་ཅེ་ན། དེའི་ཕྱིར་མིའི་བུད་མེད་གསོན་པོ་མ་ཉམས་པ་ལ་ཞེས་གསུངས་སོ། །མ་ཉམས་པ་ཞེས་བྱ་བ་ནི་ཟག་བྱེད་དང་ཁ་དང་བཤད་པའི་ལམ་གསུམ་ལས་གང་ཡང་རུང་བ་མ་ཉམས་པ་ལ་སྟེ། ཉམས་ན་རེག་པའི་བདེ་བ་ཡོངས་སུ་རྫོགས་པར་བྱེད་པའི་ཕྱིར་རོ། །ཇི་ཞིག་འཇུད་ན་ཞེ་ན། དེ་ཕྱིར་ཟག་བྱེད་ཅེས་བྱ་བ་གསུངས་ཏེ། དགེ་སློང་གིའོ། །དེ་ཁྱད་པར་ཇི་ལྟ་བུ་ཞིག་ཅེ་ན། དེའི་ཕྱིར་བར་དང་བཅས་པས་བར་ཆད་དང་བཅས་པ་ཞེས་བྱ་བ་ལ་སོགས་པ་མུ་བཞི་གསུངས་ཏེ། བར་དང་བཅས་པས་ཞེས་བྱ་བ་ནི་བར་སྐ་བས་དང་བཅས་པ་བུ་གུ་དང་བཅས་པའི་རྫས་ཀྱིས་སོ། །བར་ཆད་དང་བཅས་པ་ཞེས་བྱ་བ་ནི་བར་དུ་གཅོད་པ་དང་བཅས་པ་སྟེ། རྫས་པར་སྐབས་དང་བཅས་པ་དེས་དགེ་སློང་གི་ཟག་བྱེད་པར་ཆད་དང་བཅས་པ་ཞེས་བྱ་བའི་ཐ་ཚིག་གོ །བར་ཆད་དང་བཅས་པས་བར་ཆད་མེད་པ་ཞེས་བྱ་བ་ནི་དེ་ལྟ་བུའི་རྫས་བར་སྐབས་དང་བཅས་བུ་གུ་དང་བཅས་པས་དགེ་སློང་གི་ཟག་བྱེད་པར་དུ་མ་ཆོད་པ་སྟེ། ཟག་བྱེད་པ་བརླིང་བ་ཁོ་ནའོ། །བར་མེད་པས་བར་ཆད་དང་བཅས་པ་ཞེས་བྱ་བ་ནི་བར་སྐབས་མེད་བ་བུ་གུ་མེད་པའི་རྫས་ཀྱིས་ཟག་བྱེད་ཀྱི་བར་དུ་ཆོད་པ་དང་བཅས་པ་སྟེ། རྫས་བར་སྐབས་མེད་པ་བུ་གུ་མེད་པས་དགེ་སློང་གི་ཟག་བྱེད་བར་ཆད་དང་བཅས་པའོ། །དེ་ཡང་དར་ལྟ་བུ་སྲབ་མོས་བར་དུ་ཆོད་པས་རེག་པའི་བདེ་བ་ཉམས་སུ་མྱོང་བར་འགྱུར་བ་ལ་བྱའོ། །རྫས་སྟུག་པོ་རེག་པའི་བདེ་བ་ཉམས་སུ་མྱོང་བར་མི་འགྱུར་བ་ནི་མ་ཡིན་ཏེ། དེ་ལ་ནི་ན་སྨད་པའི་ཕྱིར་བར་མེད་པས་བར་ཆད་མེད་པ་ཞེས་བྱ་བ་ནི་དེ་ལྟ་བུའི་རྫས་བར་སྐབས་མེད་པ་བུ་གུ་མེད་པ་དགེ་སློང་གི་ཟག་བྱེད་བར་དུ་མཆོད་པ་སྟེ། དེ་ཡང་ཟག་བྱེད་བརླིང་བ་ཁོ་ནའོ། །གང་དུ་འཇུད་ཅེ་ན་དེའི་ཕྱིར་ཟག་བྱེད་དམ་ཁའམ་བཤང་བའི་ལམ་དུ་ཞེས་བྱ་བ་གསུངས་ཏེ། བསྟེན་པར་བྱ་བ་བུད་མེད་ཀྱིའོ། །ཉམས་པ་ལ་ཞེས་བྱ་བ་ནི་རྨའི་སྒོ་གསུམ་པོ་དག་ཉམས་པ་ལའོ། །ཉེས་པ་སྦོམ་པོ་ཞེས་བྱ་བ་ནི་ཉེས་པ་ལྕི་བ་སྟེ་ཕམ་པར་གྱུར་བ་དང༌། དགེ་འདུན་ལྷག་མ་དང་ཉེ་བར་འཇུག་པའི་ལྟུང་བའོ། །སྐབས་འདིར་ནི་ཕམ་པར་འགྱུར་བའི་སྦོམ་པོའོ། །མིའི་བུད་མེད་ཤི་བ་མ་ཉམས་པ་ལ་ཞེས་བྱ་བ་ནི་ཤི་བ་ཉིད་ཡིན་
ཡང་རེག་བྱའི་སྒོ་གསུམ་མ་ཉམས་པས་ལོངས་སྤྱད་དུ་རུང་བའི་ཕྱིར་ཉེས་པ་འདྲ་བར་གསུངས་སོ། །མིའི་བུད་མེད་ཤི་བ་ཉམས་པ་ལ་ཞེས་བྱ་བ་ནི་རེག་བྱའི་སྒོ་གསུམ་ཉམས་པས་ལོངས་སྤྱད་དུ་མི་རུང་བའི་ཕྱིར་ན་སྨད་དོ། །མིའི་བུད་མེད་གསོན་པོ་དང་ཤི་བ་ལ་ཇི་ལྟ་བ་དེ་བཞིན་དུ་ཞེས་བྱ་བ་ལ་སོགས་པ་ནི་མིའི་འགྲོ་བར་གཏོགས་པའི་བུད་མེད་ལ་ཉེ་བ་ཇི་ལྟ་བ་དེ་བཞིན་དུ་མི་མིན་པའི་འགྲོ་བར་གཏོགས་པ་མོ་དང༌། དུད་འགྲོའི་འགྲོ་བར་གཏོགས་པ་མོ་དང༌། ཕོ་དང་མ་ནིང་ལ་ཡང་ཉེས་པ་དེ་བཞིན་པར་ཤེས་པ་གཞུང་རྒྱ་ཆེན་པོས་འཇིགས་པ་ཁ་ཅིག་གིས་འདྲ་བར་བསྟན་ཅིང་མདོར་བསྡུས་པའི་ཕྱིར་དེ་སྐད་དྲིས་པ་ཡིན་གྱི། བཅོམ་ལྡན་འདས་དང་ཡང་དག་པར་སྡུད་པར་བྱེད་པ་དག་གིས་ནི་འདྲས་སྔ་མ་བཞིན་དུ་རྒྱས་པར་མཛད་དོ། །མདོར་བསྡུས་པ་འདི་ལ་དོན་ཉམས་པ་ནི་མེད་དོ། །ཡི་གེའི་གཞུང་ནི་ཉམས་སོ། །རྩོལ་བར་བྱེད་ཅེས་བྱ་བ་ནི་སྔོན་དུ་འགྲོ་བར་བྱེད། གནོད་པར་བྱེད་ཅེས་བྱ་བའི་ཐ་ཚིག་གོ །དང་པོར་ཞེས་བྱ་བ་ནི་འཛིན་པའི་དུས་ནའོ། །བར་དུ་ཞེས་བྱ་བ་ནི་རྨ་ལ་སྦྱོར་བའི་དུས་སུའོ། །ཐ་མར་ཞེས་བྱ་བ་ནི་མཚམས་ལས་འདས་པར་འཇུག་པའི་དུས་ནའོ། །བསྙིལ་བར་བྱའོ་ཞེས་བྱ་བ་ནི་དངོས་གཞི་མེད་དུ་ཟིན་ཀྱང་སྡིག་པ་དྲག་པོ་ཡིན་པས་བཟློག་པར་བྱ་སྤང་བར་བྱ་བའི་ཐ་ཚིག་གོ །འབྲུའི་ཆང་གིས་མྱོས་པར་བྱེད་དུ་བཅུག་སྟེ་ཞེས་བྱ་བ་ནི་ར་རོ་བར་བྱེད་དུ་བཅུག་སྟེ་ཞེས་བྱ་བའི་ཐ་ཚིག་གོ །བདག་གིར་མི་བྱེད་ན་ཞེས་བྱ་བ་ནི་དང་དུ་ལེན་པར་མི་བྱེད་ན་སྟེ། ལུས་དང་ངག་དང་གིས་ཁས་མི་ལེན་ནའོ། །འབྲུའི་ཆང་དང༌། བཅོས་པའི་ཆང་ཞེས་བྱ་བ་ནི་གཉིས་ཀ་འདྲེས་པའོ། །རྩ་བའི་བཏུང་བ་ཞེས་བྱ་བ་ལ་སོགས་པ་ནི་བཅོས་པའི་ཆང་གི་བྱེ་བྲག་གོ །བཏུང་བ་ཞེས་བྱ་བ་ནི་སྐོམ་དུ་བཏུང་བའོ། །གསང་སྔགས་དག་ཅེས་བྱ་བ་ནི་ཚོལ་བའི་གསང་སྔགས་དག་གོ །རིག་སྔགས་ཞེས་བྱ་བ་ནི་གྲུབ་པ་ཐམས་ཅད་བྱེད་པའི་རིག་སྔགས་སོ། །སྨན་ཞེས་བྱ་བ་ནི་རྩིའོ། །སེམས་འཁྲུག་པར་བྱས་པ་ཞེས་བྱ་བ་ནི་དབང་དུ་བྱས་པའོ། །གཉིད་ལོག་པར་བྱས་ཏེ་ཞེས་བྱ་བ་ནི་གཉིད་ལོག་ཏུ་བཅུག་སྟེའོ། །གྱ་ཚོམ་དུ་ཞེས་བྱ་བ་ནི་མཚོར་བར་རོ། །མཐུས་ཞེས་བྱ་བ་ནི་ལུས་ཀྱི་སྦབས་ཀྱིས་སོ། །
འཇུག་པ་ན་ཞེས་བྱ་བ་ནི་མཚམས་སུ་ཡན་ལག་གི་རྣམ་པ་འདའ་བར་བྱེད་པ་ནའོ། །སྐབས་འདི་དག་ཏུ་ཇི་ལྟ་བ་བཞིན་དུ་ཞེས་པའི་དཔེའི་སྤྲོས་པ་དག་བསྟན་པས་ནི་མི་ཉིད་དང་མི་མ་ཡིན་པ་ཉིད་དང༌། བུད་མེད་ཉིད་དང༌། བུད་མེད་མ་ཡིན་པ་ཉིད་དང་ཤི་བ་ཉི་དེ་དང༌། མ་ཤི་བ་ཉིད་ལ་སོགས་པ་དག་གིས་ནི་ན་སྨད་པ་མེད་ལ། ཉམས་པ་ཉིད་དང༌། བདག་གིར་མི་བྱེད་པ་ཉིད་གཉིས་ཀྱིས་ནི་ན་སྨད་པ་ཉིད་དུ་བསྟན་པར་ཤེས་པར་བྱའོ། །ད་ནི་དོགས་པ་བཟློག་པའི་དོན་དུ་བྱུང་བའི་མཐའ་གང་དག་གསུངས་པ་དེ་དག་བསྡུ་བའི་ཕྱིར་སྡོམ་ལ། རྒྱབ་མཉེན་དང་ནི་ཞེས་བྱ་བ་ལ་སོགས་པ་གསུངས་སོ། །མཉམ་ཡོད་ཅེས་བྱ་བ་ནི་གྲོང་ཁྱེར་རོ། །རྒྱལ་བྱེད་ཀྱི་ཚལ་ཞེས་བྱ་བ་ནི་གཞོན་ནུ་རྒྱལ་བྱེད་ཀྱི་ཉེ་བར་སྤྱོད་པའི་ཚལ་ལོ། །ཀུན་དགའ་ར་བ་ཞེས་བྱ་བ་ནི་གཙུག་ལག་ཁང་ངོ༌། །རྒྱབ་ཅེས་བྱ་བ་ནི་སྒལ་ཚིགས་ལ་སོགས་པ་ལུས་ཀྱི་ཆའོ། །མཉེན་པ་ཞེས་བྱ་བ་ནི་དགུག་ཏུ་བཟོད་པའོ། །ཤིན་ཏུ་མཉེན་པ་ཞེས་བྱ་བ་ནི་དགྱེད་དུ་བཟོད་པའོ། །གྲོང་ཞེས་བྱ་བ་ནི་གང་ན་ཚོང་ཁང་ལ་སོགས་པ་ཉོ་བ་དང་བཙོང་བའི་གནས་མེད་པའོ། །གྲོང་རྡལ་ཞེས་བྱ་བ་ནི་གྲོང་ཁྱེར་ཏེ་གང་ན་དེ་ཡོད་པའོ། །ལུས་མ་བསྲུངས་པ་ཞེས་བྱ་བ་ནི་མ་སྦས་པ་སྟེ། གཅེར་བུ་ལ་སོགས་པ་བུད་མེད་ལ་རེག་པ་ལ་སོགས་པ་མ་སྤངས་པའི་ཕྱིར་རོ། །མ་བསྡམས་ཞེས་བྱ་བ་ནི་མཉམ་པར་མ་བཞག་པ་སྟེ་གཡེ་བག་དག་གིས་གར་ཡང་རུང་བར་གཏོང་པའི་ཕྱིར་རོ། །ཉེ་བར་མ་བཞག་པ་ཞེས་བྱ་བ་ནི་མ་སྐྱེས་པ་སྟེ། བྱ་བ་དང་བྱ་བ་མ་ཡིན་པ་དག་ཀྱང་མི་དྲན་པའི་ཕྱིར་རོ། །བརྒྱུས་ནས་ཞེས་བྱ་བ་ནི་སོང་ནས་སོ། །ཟས་ཀྱི་བྱ་བ་བྱས་ཏེ་ཞེས་བྱ་བ་ནི་ཟས་ཀྱི་བྱ་བ་བསྒྲུབས་ནས་སོ། །ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ཞེས་བྱ་བ་ནི་གུང་ཚིགས་སམ་ཕྱིས་བཟའ་བར་བྱ་བ་ཡིན་པས་ཕྱི་མའི་ཟས་ཏེ། ཕྱི་དྲོ་ཞེས་བྱ་བའི་དུས་སོ། །ཡང་ན་དེར་ཟས་ཕྱི་མ་ཟ་བས་ཕྱི་མའི་ཟས་ཏེ། དེ་ཡང་ཕྱི་དྲོའི་དུས་ཁོ་ནའོ། །དེ་བསོད་སྙོམས་ལས་ཕྱིར་བཟློག་པ་ཞེས་བྱ་བ་ནི་ཕྱིར་བཟློག་པར་གྱུར་བ་སྟེ། ཕྱི་དྲོའི་ཟས་ཀྱི་དུས་སུ་བསོད་སྙོམས་མི་བྱེད་པར་ཤེས་པའི་ཐ་ཚིག་གོ །མཁོས་སུ་ཕབ་ནས་ཞེས་བྱ་བ་ནི་རང་རང་གི་གནས་སུ་བཞག་ནས་སོ། །ནང་དུ་ཡང་དག་འཇོག་ཅེས་
བྱ་བ་ནི་དབེན་པར་བྱེད་པའོ། །གནས་སུ་ཞེས་བྱ་བ་ནི་གནས་ཁང་དུའོ། །འདོད་པ་ལ་འདོད་ཆགས་ཀྱིས་ཀུན་ནས་དཀྲིས་པར་གྱུར་ཅེས་བྱ་བ་ནི་སྤྲོད་པ་བྱུང་བའི་སྲིད་པས་ངེས་པར་སྟོན་པར་གྱུར་པའོ། །ལས་སུ་རུང་བ་ཞེས་བྱ་བ་ནི་ལས་སུ་རུང་བའོ། །ཡིད་མི་དགའ་ཞིང་ཞེས་བྱ་བ་ནི་མ་རངས་ཤིང་ངོ༌། །མངོན་པར་མ་མགུ་ནས་ཞེས་བྱ་བ་ནི་མ་ཕྱོགས་ནས་སོ། །རང་གི་ལྟ་ལ་སྨོས་ཀྱང་ཅི་དགོས་ཏེ་ཞེས་བྱ་བ་ནི་ཧ་ཅང་མ་གྲགས་པ་ཉིད་ཀྱིས་ཤིན་ཏུ་ཉེས་པར་འགྱུར་བའི་ཕྱིར་རོ། །འཕྱང་བ་ཅན་ཞེས་བྱ་བ་ནི་དེ་འཕྱང་བ་ཡིན་པས་འཕྱང་བའོ། །དེ་གང་ལ་ཡོད་པ་དེ་ནི་འཕྱང་བ་ཅན་ནོ། །འཕགས་རྒྱལ་ཞེས་བྱ་བ་ནི་གྲོང་ཁྱེར་རོ། །དེད་དཔོན་ཞེས་བྱ་བ་ནི་འདྲོན་པའི་གཙོ་བོའོ། །བུ་མངོན་པར་འདོད་པ་ཞེས་བྱ་བ་ནི་བུ་ཡོད་པར་འདོད་པས་སོ། །ཞི་བ་ཞེས་བྱ་བ་ནི་ལྷ་ཆེན་པོའོ། །ཆུ་ལྷ་ཞེས་བྱ་བ་ནི་ཆུའི་ལྷའོ། །ལུས་ངན་ཞེས་བྱ་བ་ནི་རྣམ་ཐོས་ཀྱི་བུའོ། །སོགས་པ་ཞེས་སྨོས་པས་ནི་ཡུལ་འཁོར་སྲུང་ལ་སོགས་པ་དག་བསྡུའོ། །གསོལ་བ་འདེབས་ཞེས་བྱ་བ་ནི་འཆོལ་བའོ། །ལྷའི་བྱེ་བྲག་ཅེས་བྱ་བ་ནི་ལྷའི་རྣམ་པའོ། །ཀུན་དགའི་ར་བ་ཞེས་བྱ་བ་ནི་འབྲས་བུ་དང་ལྡན་པའི་ཤིང་ལྗོན་པའི་གནས་སོ། །ཚལ་ཞེས་བྱ་བ་ནི་འབྲས་བུ་མེད་པའི་ཤིང་ལྗོན་པའི་གནས་སོ། །ལྷན་ཅིག་སྐྱེས་པ་དག་ཅེས་བྱ་བ་ནི་དུས་གཅིག་ཏུ་བྱུང་བ་སྲུང་བར་བྱེད་པ་གནོད་སྦྱིན་ལ་སོགས་པ་དག་གོ །ཆོས་མཐུན་པ་དག་ཅེས་བྱ་བ་ནི་བསྟན་བཅོས་མཐུན་པ་དག་གོ །རྟག་ཏུ་རྗེས་སུ་འབྲང་བ་ཞེས་བྱ་བ་ནི་རྟག་ཏུ་ཕྱི་བཞིན་འོང་བའོ། །གཏན་ཞེས་བྱ་བ་ནི་གྲགས་པའོ། །གནས་གསུམ་པོ་དག་ཅེས་བྱ་བ་ནི་རྒྱུ་གསུམ་པོ་དག་གོ །མངོན་དུ་གྱུར་བ་ལས་ཞེས་བྱ་བ་ནི་ཉེ་བར་གྱུར་པ་ལས་སོ། །འདུས་པ་ཞེས་བྱ་བ་ནི་བྱ་བ་གཅིག་རྩོམ་ཞིང་སྦྱོར་བའོ། །དྲི་ཟ་ཞེས་བྱ་བ་ནི་སྲིད་པ་བར་མ་པའི་སེམས་ཅན་ཏེ། ཟས་སུ་དྲི་ཟ་བའོ། །ཉེ་བར་གནས་ཤིང་ཞེས་བྱ་བ་ནི་འཇུག་པའི་ཕྱིར་ཉེ་བར་འོངས་ཤིང་ངོ༌། །འཇུག་འདོད་པ་ཞེས་བྱ་བ་ནི་མངལ་དུ་འཇུག་འདོད་པའོ། །དགྱེས་པ་ཞེས་བྱ་བ་ནི་རིགས་པའམ་ཤེས་པ་བརྗོད་པའོ། །རོ་སྟོད་བསྲང་སྟེ་ཞེས་བྱ་བ་ནི་སྤྱི་བོ་ལ་སོགས་པ་བསྟོད་དེའོ། །ཀུན་དུ་སྤྱོད་
པ་ཞེས་བྱ་བ་ནི་གྲགས་པས་སོ། །རབ་ཅེས་བྱ་བ་ནི་རིགས་དང་གཟུགས་དང་རེག་དང་རྒྱན་ལ་སོགས་པ་དག་གིས་མཆོག་ཏུ་གྱུར་པའོ། །འབྲིང་དང་ཐ་མ་དག་ཀྱང་དེ་བཞིན་འདོད་པ་ཅན་གྱི་ཐ་མ་དང་འབྲིང་དང་རབ་དག་འདོད་པའི་ཕྱིར་རྣམ་པ་གསུམ་མོ། །དགུན་གྱི་ཞེས་བྱ་བ་ནི་དྲོ་བའི་ཕྱིར་རོ།། དཔྱིད་ཀྱི་ཞེས་བྱ་བ་ནི་བསིལ་བའི་ཕྱིར་རོ། །དབྱར་གྱི་ཞེས་བྱ་བ་ནི་གཉི་ག་དང་རྗེས་སུ་མཐུན་པའི་ཕྱིར་རོ། །སྐྱེད་མོས་ཚལ་ཞེས་བྱ་བ་ནི་མེ་ཏོག་དང་འབྲས་བུའི་ཤིང་ལྗོན་པ་ལ་སོགས་པ་དང་ལྡན་པའི་གནས་སོ། །སྐྱེས་པ་མེད་པ་ཞེས་བྱ་བ་ནི་སྐྱེས་པ་དང་བྲལ་བ་བུད་མེད་འབའ་ཞིག་དང་ངོ༌། །སིལ་སྙན་གྱིས་ཞེས་བྱ་བ་ནི་རོལ་མོའི་སྒྲས་སོ། །དོན་གྱིས་ཤེས་བྱ་བ་ནི་ཟུར་གྱིས་སོ། །བསྐུལ་ཏོ་ཞེས་བྱ་བ་ནི་གོ་བར་བྱས་སོ། །འདོད་པ་ལ་བབ་པར་བྱའོ་ཞེས་བྱ་བ་ནི་འཛིན་དུ་གཞུག་པར་བྱ་བའོ། །སྦྱོར་བར་འགྱུར་བས་ཞེས་བྱ་བ་ནི་སེམས་པར་འགྱུར་བས་སོ། །ཟོང་ཞེས་བྱ་བ་ནི་བཙོང་བར་བྱ་བའི་དངོས་པོའོ། །ཡུལ་གཞན་དུ་ཞེས་བྱ་བ་ནི་འགྲོའོ་།མངོན་དུ་གུར་པ་ཞེས་བྱ་བ་ནི་ད་ལྟར་ཏོ། །བདག་འདས་ནས་ཞེས་བྱ་བ་ནི་ཤི་ནས་སོ། །མུན་པ་མེད་ཅེས་བྱ་བ་ནི་སྣང་བར་རོ། །བཟང་མོ་ཞེས་བྱ་བ་ནི་དགའ་བའི་ཚིག་གིས་བོད་པའོ། །དྲིལ་བསྒྲགས་པ་ཞེས་བྱ་བ་ནི་ཉན་དུ་གཞུག་པའོ། །ཤོ་གམ་ཞེས་བྱ་བ་ནི་ལམ་གྱི་དཔྱའོ། །ལ་གཅན་ཞེས་བྱ་བ་ནི་འཇིགས་པ་དང་བཅས་པའི་ཕྱོགས་བསྲུང་བའི་དཔྱའོ། །གྲུ་བཙས་ཞེས་བྱ་བ་ནི་ཆུ་ཀླུང་རྒལ་བའི་དཔྱའོ། །ཡུལ་གཞན་དུ་འགྲོ་བ་དང་མཐུན་པའི་ཞེས་བྱ་བ་ནི་ཡུལ་གཞན་དུ་འགྲོ་བས་བསྐྱེད་བར་བྱ་བ་གང་ཡིན་པའོ། །ཚོང་པ་ཞེས་བྱ་བ་ནི་ཟོང་ཐོགས་པའི་མིའོ། །མགྲོན་དུ་བོས་ཏེ་ཞེས་བྱ་བ་ནི་གཡར་དྲངས་ཏེའོ། །ཤེས་ལྡན་དག་ཅེས་བྱ་བ་ནི་བོད་པའི་ཕྱིར་མཆོད་པའི་ཚིག་སྟེ་ཤེས་པ་ཞེས་བྱ་བ་དེ་དག་ལ་སོགས་པའི་ཕྱིར་རོ། །དེ་ཁོ་ན་བཞིན་དུ་ཁྱེད་ཀྱི་ཡང་ཡིན་གྱི་ཞེས་བྱ་བ་ནི་བསྲུང་བར་བྱ་བ་ཡིན་པའི་ཕྱིར་དང་སྟེན་གྲོགས་ཀྱི་བུ་ཡིན་པའི་ཕྱིར་དང༌། བཅོལ་བའི་ཕྱིར་རོ། །བར་ཆད་ཅེས་བྱ་བ་ནི་ཉེས་པའོ། །གནོད་པ་ལས་ཞེས་བྱ་བ་ནི་དོན་མེད་པའི་རྒྱུ་ལས་སོ། །ཕན་པ་ལ་ཞེས་བྱ་བ་ནི་དོན་གྱི་རྒྱུ་ལའོ། །རབ་ཏུ་གནས་པར་གྱུར་ནའོ། །ལེགས་ཞེས་བྱ་
བ་ནི་ནོངས་ཞེས་བྱ་བའོ། །ཟོང་རྣམ་པར་སྤངས་ཤིང་ཞེས་བྱ་བ་ནི་བཙོང་ཞིང་ངོ༌། །དེ་ཁོ་ན་བཞིན་དུ་ཚོང་པ་འདི་དག་ཡང་ཡིན་ཞེས་བྱ་བ་ནི་ཕའི་གྲོགས་ཡིན་པའི་ཕྱིར་དང༌། ཕན་པ་དང་གནོད་པ་སྟོན་པའི་ཕྱིར་རོ། །མཉན་ཅིང་ཞེས་བྱ་བ་ནི་ཉན་པའི་དུས་ནའོ། །བྱ་བར་ཞེས་བྱ་བ་ནི་རྗེས་སུ་སྒྲུབ་པའི་དུས་ནའོ། །དགེ་མཚན་ཞེས་བྱ་བ་ནི་གིའུ་ཝང་དང་ཚོན་སྣ་ལྔ་པ་དང་ཡོངས་ཀར་དཀར་པོ་གསང་སྔགས་ཀྱིས་བཏབ་པ་ལ་སོགས་པ་བཀྲ་ཤིས་ཀྱི་རྟོགས་སོ། །བཀྲ་ཤིས་ཀྱི་ཞེས་བྱ་བ་ནི་ཤ་རློན་པ་དང་མེ་ཏོག་དཀར་པོ་དང༌། བ་བཞོན་དང་རྫ་རྔའི་སྒྲ་དང༌། གླང་པོ་ཆེའི་སྐད་ལ་སོགས་ཕྱི་རོལ་གྱིའོ། །བདེ་ལེགས་སུ་གྱུར་པ་ཞེས་བྱ་བ་ནི་མེའི་སྦྱིན་སྲེག་དང་བྲམ་ཟེའི་འདོན་པ་ལ་སོགས་པ་སྲིན་པོ་འཇོམས་པའོ། །ཡང་ན་དགེ་མཚན་ཞེས་བྱ་བ་ནི་ཡིད་དུ་འོང་པའི་རྒྱུའོ། །བཀྲ་ཤིས་ཞེས་བྱ་བ་ནི་ཡིད་དུ་མི་འོང་བ་བཟློག་པའོ། །བདེ་ལེགས་སུ་གྱུར་པ་ཞེས་བྱ་བ་ནི་བགེགས་བསྲུང་བའོ། །ཁུར་དག་ཅེས་བྱ་བ་ནི་ཕྲག་རྡང་གི་ཁུར་དག་གོ །རྫང་དག་ཅེས་བྱ་བ་ནི་འདམ་བུ་དང་སྨྱིག་ཚལ་ལ་སོགས་པ་ལས་ལྷས་པ་འབྲུའི་སྣོད་དག་གོ །གླེ་བ་དག་ཅེས་བྱ་བ་ནི་སོག་མ་ལ་སོགས་པ་ལས་བྱས་པའི་འབྲུའི་སྣོད་དག་གོ །འཕགས་སམ་ཞེས་བྱ་བ་ནི་སོང་བའོ། །ཡུལ་འཁོར་ཞེས་བྱ་བ་ནི་རྒྱལ་སྲིད་གཞན་ནོ། །རྒྱལ་པོའི་ཕོ་བྲང་ཞེས་བྱ་བ་ནི་རྒྱལ་པོ་བཞུགས་པའོ། །ཁད་ཀྱིས་རྒྱུ་བ་ན་ཞེས་བྱ་བ་ནི་མཐར་གྱིས་འགྲོ་བའོ། །གཟུགས་འཚོང་མ་ཞེས་བྱ་བ་ནི་སྨད་འཚོང་མ་སྟེ། །བདག་ཉིད་ཀྱི་གཟུགས་གནས་བར་བྱ་བའི་ཕྱིར་འཚོང་བར་བྱེད་པའི་ཕྱིར་རོ།། སྐྱེས་དགའ་ཞེས་བྱ་བ་ནི་དོན་དུ་གཉེར་བར་འོས་པའི་ཕྱིར་རོ། །མངག་གཞུག་མ་ཞེས་བྱ་བ་ནི་བྲན་མོའོ། །བཙུད་ཀྱི་ཞེས་བྱ་བ་ནི་བཅུག་གི་ཞེས་བྱ་བའོ། །དྲི་ཞེས་བྱ་བ་ནི་ལུས་བྱུག་བ་ལ་སོགས་པའི་རྫས་སོ། །ཕྲེང་བརྒྱུད་ཅེས་བྱ་བ་ནི་མེ་ཏོག་གོ །མི་ཕལ་བ་ཞེས་བྱ་བ་ནི་སྐྱེ་བོ་ཐ་མལ་བའོ། །སྐབས་ཀྱི་གཏམ་ཞེས་བྱ་བ་ནི་འགྲོ་བ་ནག་འོང་བའི་བར་སྐབས་ཀྱི་བཙམ་མོ། །ཇི་སྙེད་ཅེས་བྱ་བ་ནི་ཇི་ཙམ་མོ། །བྱས་པར་གྱུར་པ་ཞེས་བྱ་བ་ནི་བརྗོད་པར་གུར་བའོ། །ཐོས་ནས་ཞེས་བྱ་བ་ནི་མཉན་ནས་
སོ། །དགའ་བ་ཞེས་བྱ་བ་ནི་ཡིད་ཀྱི་བདེ་བའོ། །ཡིད་བདེ་བ་ཞེས་བྱ་བ་ནི་མཆོག་ཏུ་དགའ་བའོ། །ཁ་ཅིག་ན་རེ་ཡིད་བདེ་བ་ཞེས་བྱ་བ་ནི་ཡིད་ཀྱི་བདེ་བའོ། །དགའ་བ་ཞེས་བྱ་བ་ནི་དོན་གཞན་ཡིན་ཞེས་ཟེར་རོ། །ཞིམ་པོ་ཞེས་བྱ་བ་ནི་དྲི་མ་ཞིམ་པོས་སོ། །བླ་རེ་བྲེས་པ་དང་བཅས་པའི་མལ་བཤམས་ནས་ཞེས་བྱ་བ་ནི་བླ་རེ་ཞེས་བྱ་བ་སྟེང་དུ་བྲེ་བའི་རས་བྲེས་པ་ཞེས་བྱ་བའོ། །བརྐྱང་བ་དང་བཅས་པའི་མལ་ཞེས་བྱ་བ་ནི་ཉལ་སྟན་ངན་ཚངས་ཅན་ལ་སོགས་པའོ། །བཤགས་ནས་ཞེས་བྱ་བ་ནི་བཏིང་ནས་སོ། །གཙོ་ཆེར་ཞེས་བྱ་བ་ནི་ཤས་ཆེར་ཏེ། བར་སྐབས་སུ་དོན་གཞན་ཡང་བྱེད་པ་གཙོ་ཆེར་སྨོས་སོ། །སྡོད་ཅིང་ཞེས་བྱ་བ་ནི་སྟ་གོན་བྱེད་ཅིང་ངོ༌། །རྣམ་པར་མཛེས་ཤིང་ཞེས་བྱ་བ་ནི་སྡུག་ཅིང་ངོ༌། །རིགས་སྐྱེས་ཞེས་བྱ་བ་ནི་རིགས་མཐོན་པོའོ། །རིགས་མིན་སྐྱེས་ཞེས་བྱ་བ་ནི་རིགས་དམའ་བའོ། །ནོར་ཉམས་ཞེས་བྱ་བ་ནི་དབུལ་པོའོ། ནོར་གྱིས་འབྱོར་བ་ཞེས་བྱ་བ་ནི་ཕྱུག་པོའོ། །གཟུགས་ཀྱིས་ཕྱུག་པ་ཞེས་བྱ་བ་ནི་གཟུགས་ཀྱིས་འབོར་བ་སྟེ། གཟུགས་བཟང་པོ་དང་ལྡན་པ་ཞེས་བྱ་བའི་ཐ་ཚིག་གོ །ཡིད་འཕྲིག་བྱེད་ཅེས་བྱ་བ་ནི་དབང་དུ་བྱེད་པའོ། །ཁང་ཐོག་ནས་ཞེས་བྱ་བ་ནི་ཁང་བཟངས་ཀྱིས་ནས་སམ་ཁྱིམ་གྱི་ས་ནས་སོ། །འཁྱུད་དེ་ཞེས་བྱ་བ་ནི་ཕང་གིས་འཁྱུད་དེའོ། །ཁྱིམ་གྱི་ནང་དུ་ཞེས་བྱ་བ་ནི་ཁང་བའི་ནང་དུའོ། །བུད་མེད་ཀྱི་ཁྲི་ལ་ཞེས་བྱ་བ་ནི་ཁྲིམས་ཡངས་པ་ལའོ། །ཨེ་མའི་ཞེས་བྱ་བ་ནི་ངོ་མཚར་ཏེ་ཞེས་བྱ་བའོ། །དགུང་གཅིག་གི་གལ་ཞེས་བྱ་བ་ནི་ཉིན་མཚན་གཅིག་གིས་གླའོ། །མི་གཤའ་བ་ཞེས་བྱ་བ་ནི་བརྗེད་པར་བྱ་བ་མ་ཡིན་པའོ། །འདོད་པ་དག་ཅེས་བྱ་བ་ནི་གཟུགས་ལ་སོགས་པ་འདོད་པའི་ཡོན་ཏན་དག་གོ །བསྟེན་པ་ན་ཞེས་བྱ་བ་ན་ཞེས་བྱ་བའི་ནི་ཉེ་བར་སྤྱོད་པའོ། །ལྡོག་པ་ན་ཞེས་བྱ་བ་ནི་ཕྱིར་ལྡོག་པའོ། །ངོམས་པ་ཞེས་བྱ་བ་ནི་མཐར་ཐུག་པ་ཞེས་བྱ་བ་དོན་མེད་པ་ཉིད་དེ། །དེ་གསུམ་ནི་མི་ཕྱོགས་པའི་རྣམ་གྲངས་སོ། །གཏང་བར་ཞེས་བྱ་བ་ནི་བཅོལ་བས་སོ། །ཀུན་དུ་བཙལ་བར་བྱའོ་ཞེས་བྱ་བ་ནི་ཡོངས་སུ་བལྟ་བར་བྱ་བའོ། །འཇུག་མཐུན་མ་ཞེས་བྱ་བ་ནི་སྨད་འཚོང་མ་སྟེ། འཇུག་པ་ཞེས་བྱ་བ་ནི་ཕོའི་དབང་པོ་སྟེ། གཞུག་པར་བྱ་བ་མོའི་
དབང་པོར་དེ་འཇུད་པར་བྱེད་པ་ཡིན་པས་འཇུད་པ་ཞེས་བྱ་བའོ། །བུད་མེད་གང་འཇུག་པ་དེ་དང་རྗེས་སུ་མཐུན་པར་བྱེད་པ་དེ་དང་འཇུག་མཐུན་མ་ཞེས་བྱའོ། །ཡལ་བར་བོར་བ་ཞེས་བྱ་བ་ནི་རིང་དུ་སྤངས་པའོ། །འདིའི་ཕས་ཞེས་བྱ་བ་ནི་མཛེས་དགའི་ཕས་སོ། །ཀླན་ཀར་འགྱུར་རོ་ཞེས་བྱ་བ་ནི་བརྗོད་པར་བྱ་བར་འགྱུར་ཏེ། ཉེས་པ་དང་བཅས་པར་འགྱུར་ཞེས་བྱ་བའི་ཐ་ཚིག་གོ །དོན་མཐུན་རྣམས་ཞེས་བྱ་བ་ནི་དོན་མཐུན་པའི་སྐྱེ་བོའི་ཚོགས་ཏེ་འདྲོན་པའོ། །བང་ཆེན་ཞེས་བྱ་བ་ནི་ཕྲིན་སྐྱེལ་བའོ། །ཐོགས་ནས་ཞེས་བྱ་བ་ནི་ཡུན་རིང་དུ་ཐོགས་ནས་སོ། །འདུས་ཏེ་ཞེས་བྱ་བ་ནི་ཚོགས་ཏེའོ། །ཀུན་དུ་སྦྱོར་བ་དག་ཅེས་བྱ་བ་ནི་ཉོན་མོངས་པ་དག་སྟེ། དེ་དག་གིས་སྡུག་བསྔལ་དག་དང་ཀུན་དུ་སྦྱོར་བའི་ཕྱིར་རོ། །འཕེལ་བར་བྱེད་པ་ཡིན་པས་ཞེས་བྱ་བ་ནི་སྐྱེ་བར་བྱེད་པ་ཡིན་པས་སོ། །བྲལ་བར་གྱུར་བ་ཞེས་བྱ་བ་ནི་ཞི་བར་གྱུར་པའོ། །ཀྱེ་མ་ཞེས་བྱ་བའི་སྒྲ་ནི་ཡི་ཆད་པའི་ཚིག་གོ །བྱ་བ་མ་ཡིན་པ་ལ་ཞེས་བྱ་བ་ནི་མི་སྙན་པ་ལའོ། །འཕགས་སོ་ཞེས་བྱ་བ་ནི་སོང་བའོ། །ཕྱིན་ཆད་ཅེས་བྱ་བ་ནི་སྤང་ངོ༌། །གཉིས་སམ་གསུམ་ཞེས་བྱ་བ་ལ་ཡོངས་སུ་རྫོགས་པ་བགྲངས་ན་ནི་གཉིས་སོ། །ཆ་བགྲངས་ན་ནི་གསུམ་མོ། །ཞིང་ཞེས་བྱ་བ་ནི་ཞིང་དུ་རྨོ་བའོ། །ལས་ཀྱི་མཐའ་ཞེས་བྱ་བ་ནི་ལན་ཚྭའི་ལས་ལ་སོགས་པའོ། །གྲོང་མི་ཞེས་བྱ་བ་ནི་གཡོག་བྲན་དག་གོ །ཁོ་ནར་ཞེས་བྱ་བ་ནི་འབའ་ཞིག་ཏུའོ། །སྐབས་ཞེས་བྱ་བ་ནི་བྱ་བའི་དུས་སོ། །རྨེད་དམ་ཞེས་བྱ་བ་ནི་དྲི་བའོ། །ཚོགས་ཅན་མ་ཞེས་བྱ་བ་ནི་སྨད་འཚོང་མ་སྟེ། ཚོགས་ཅན་ཞེས་བྱ་བ་ནི་སྐྱེ་བོའི་ཚོགས་ཐམས་ཅད་དོ། །བུད་མེད་གང་ལ་སྐྱེ་བོའི་ཚོགས་ཐམས་ཅད་བདག་པོར་ཡོད་པ་དེ་ནི་ཚོགས་ཅན་མ་ཞེས་བྱ་བའོ། །རང་བཞིན་ཞེས་བྱ་བ་ནི་རང་བཞིན་གྱིས་ཏེ་བཅོས་མ་མ་ཡིན་པའི་སྡུག་པས་སོ། །བྱ་རྣམས་ཞེས་བྱ་བ་ནི་འདབ་ཆགས་དག་གོ །འབྲས་བུ་མེད་ཅེས་བྱ་བ་ནི་འབྲས་བུ་ཤིང་ཐོག་ཟད་པའོ། །ལྗོན་པ་ཞེས་བྱ་བ་ནི་ཤིང་ལྗོན་པའོ། །བཞིན་ཞེས་བྱ་བ་ནི་དཔེའོ། །རྙིང་པ་ཞེས་བྱ་བ་ནི་འཕྱོན་མ་པའོ། །རྣམ་པར་སྤོང་ཞེས་བྱ་བ་ནི་གཏོང་བའོ། །ཇི་སྲིད་དུ་
ཞེས་བྱ་བ་དང༌། དེ་སྲིད་དུ་ཞེས་བྱ་བ་ནི་མ་ཟད་པའོ། །དབང་ཞེས་བྱ་བ་ནི་རག་ལས་པའོ། །བརྒྱ་བྱིན་ཞེས་བྱ་བ་ནི་རྡོ་རྗེ་ཅན་ཏེ་དབང་བའོ། །རི་ཀླུང་ཞེས་བྱ་བ་ནི་རིའི་ཆུ་ཀླུང་ངོ༌། །ཡིད་འབེབས་པར་ཞེས་བྱ་བ་ནི་ཡིད་གཅུགས་པར་རོ། །དགོངས་ཀར་ཞེས་བྱ་བ་ནི་མཚན་མོའི་ཆ་དང་པོར་རོ། །རང་ཞེས་བྱ་བ་ནི་འཕྱོན་མ་པ་རང་གིའོ། །གཅུགས་པ་དང་ཞེས་བྱ་བ་ནི་ཡིད་གཅུགས་པ་དང་ངོ༌། །གཏམ་གྱིས་ཞེས་བྱ་བ་ནི་དགའ་བའི་གཏམ་གྱིས་སོ། །དགའ་བར་བྱེད་ཅེས་བྱ་བ་ནི་ཡིད་གཅུགས་པ་དགའ་བའི་གཏམ་དེ་གཉིས་ཀྱིས་འཕྱོན་མ་དགའ་བར་བྱེད་པའོ། །དབུས་གནས་ཤིང་ཞེས་བྱ་བ་ནི་དགོངས་ཀ་ལྟར་དགའ་བར་ཡང་མི་བྱེད་ལ་ནམ་ནངས་ཀ་ལྟར་སྤོང་བར་ཡང་མི་བྱེད་པའོ། །སྤྱོད་པར་བྱེད་དམ་ཞེས་བྱ་བ་ནི་རྗེས་སུ་འཇུག་པར་བྱེད་དམ་ཞེས་བྱ་བའོ། །ནོར་མ་སྤྱད་པ་ཞེས་བྱ་བ་ནི་སྔར་ནོར་སྤྱད་མ་ཟིན་པའོ། །ཤིན་ཏུ་ཐག་རིང་བར་ཞེས་བྱ་བ་ལ་ཤིན་ཏུ་ཞེས་བྱ་བ་ནི་རབ་ཏུའོ། །ཐག་རིང་བར་ཞེས་བྱ་བ་ནི་ཁད་རིང་བར་རོ། །བཞད་གད་དག་ཅེས་བྱ་བ་ནི་དགའ་བ་དང་བཅས་པའི་ཚིག་གོ །འདོད་ཆགས་ཤས་ཆེས་ཆེན་པོས་ཞེས་བྱ་བ་ནི་འདོད་ཆགས་དམ་པས་སོ། །ཡོལ་བས་ཞེས་བྱ་བ་ནི་བསྐྱབ་པའི་རས་ཀྱིས་སོ། །ལམ་པོ་ཆེ་ལ་མི་མཁས་པས་ཞེས་བྱ་བ་ནི་ལམ་རྒྱུས་མི་ཤེས་པས་སོ། །ཇི་ཙམ་ན་ཞེས་བྱ་བ་ནི་དེའི་མོད་ནའོ། །ཕྱི་ཐོག་ཐག་ཅེས་བྱ་བ་ནི་ཕྱི་བཞིན་ཐོག་ཐག་གོ །རྗེས་སུ་སོང་ངོ་ཞེས་བྱ་བ་ནི་རྗེས་སུ་འབྲང་བའོ། །ལོ་མ་ལྷགས་པ་དག་ཅེས་བྱ་བ་ནི་འདབ་མ་འབྲུལ་བ་དག་གོ །བླངས་ཏེ་ཞེས་བྱ་བ་ནི་གདིང་བའི་ཕྱིར་བླངས་ཏེའོ། །ཚུལ་མ་ལགས་པ་ཞེས་བྱ་བ་ནི་སྒྱུ་ཐབས་ཀྱིས་སོ། །གནོད་པ་བསྒྲུབས་པར་གྱུར་ཏོ་ཞེས་བྱ་བ་ནི་སྡུག་བསྔལ་ཐོབ་པར་བྱས་པའོ། །ཉི་མ་གཉིས་སམ་གསུམ་དུ་ཞེས་བྱ་བ་ནི་ཉི་མ་རངས་པར་བགྲངས་པས་ནི་གཉིས་སོ། །ཉི་མ་དུམ་བུར་བགྲངས་པས་ནི་གསུམ་མོ། །ཀུན་དུ་སྤྱད་པའི་ཞེས་བྱ་བ་ནི་ཀུན་དུ་ཐ་སྙད་བྱ་བའོ། །ཆོས་དག་ཅེས་བྱ་བ་ནི་ཆོས་གང་དག་གོ །རི་དགས་ཀྱི་རི་དགས་ཞེས་བྱ་བ་ནི་རབ་ཏུ་བྱུང་བ་རྣམས་ནི་རི་དགས་དང་འདྲ་བའི་ཕྱིར་རོ། །རྒྱ་ཆེ་ལ་ཞེས་བྱ་བ་ནི་གོ་སྐབས་ཡངས་པ་བསྟན་ཏོ། །རང་གི་སྤྱོད་ཡུལ་ཞེས་བྱ་
བ་ནི་འགག་པ་མེད་པར་བསྟན་ཏེ། སྤྱོད་ཡུལ་ནི་ཡུལ་ལོ། །ཡབ་ཀྱི་ཡུལ་ཡིན་གྱི་ཞེས་བྱ་བ་ནི་སྟོན་པས་རྗེས་སུ་གནང་བ་ཉིད་བསྟན་ཏོ། །བསོད་སྙོམས་བསྒྲུབས་ལ་ཞེས་བྱ་བ་ནི་སློང་མོའི་ཟས་བསྒྲུབས་ལ་ཞེས་བྱ་བའོ། །འཚོ་བར་གྱིས་ཤིག་ཅེས་བྱ་བ་ནི་སྲོག་གཟུང་བར་གྱིས་ཤིག་ཅེས་བྱ་བའོ། །འགྱོད་པ་སྐྱེས་ཏེ་ཞེས་བྱ་བ་ནི་ཕྱིར་ལོག་སྟེའོ། །འདོད་པའི་རྒྱུས་ཞེས་བྱ་བ་ནི་སྲིད་པའི་རྒྱུས་སོ། །དེ་ཙམ་དུ་མཛེས་ཤིང་ཞེས་བྱ་བ་ནི་དེ་ལྟར་བཟང་ཞིང་ངོ༌། །བསྐྲད་པ་ཞེས་བྱ་བ་ནི་གནས་མེད་པར་བྱས་པས་སོ། །སྤངས་ཏེ་ཞེས་བྱ་བ་ནི་བོར་ཏེའོ། །སྐལ་ཆད་མ་ཞེས་བྱ་བ་ནི་བསོད་ནམས་ཆུང་བའོ། །རྟག་ཏུ་ནོངས་པ་མཆིས་པས་ཞེས་བྱ་བ་ནི་རྒྱུན་དུ་འཁྲུལ་བའོ། །ཡོངས་སུ་ཉམས་པར་ཞེས་བྱ་བ་ནི་རྣམ་པར་བྲལ་བའོ། །དྲུད་ཅིང་ཞེས་བྱ་བ་ནི་བརྩལ་ཅིང་ངོ༌། །ནང་དུ་ཞེས་བྱ་བ་ནི་མོ་མཚན་གྱིའོ། །གོར་མ་ཆག་པར་ཞེས་བྱ་བ་ནི་དོགས་པར་རོ། །དེ་ལྟར་རྩོལ་པ་དེ་བཅོམ་ལྡན་འདས་ཀྱིས་ཅིའི་ཕྱིར་མ་བཟློག་ཅེ་ན། འདོད་ཆགས་བདོ་བས་གདོན་མི་ཟ་བར་བྱེད་པས་འགྱུར་བར་ངེས་པའི་ཕྱིར་དང༌། །དེ་བཞིན་གཤེགས་པ་ལ་མ་གུས་པ་སྐྱེ་བའི་ཕྱིར་རོ། །ཡ་མཚན་ཞེས་བྱ་བ་ནི་འདོད་པའོ། །གཙང་མ་ཞེས་བྱ་བ་ནི་མ་འདྲེས་པའོ། །བསོད་པས་ཞེས་བྱ་བ་ནི་ཡིད་དུ་འོང་བས་སོ། །བཅའ་བ་ཞེས་བྱ་བ་ནི་རྩ་བ་ལ་སོགས་པའོ། །བཟའ་བ་ཞེས་བྱ་བ་ནི་འབྲས་ཆན་ལ་སོགས་པའོ། །བཞེད་པར་གྱུར་ཏེ་ཞེས་བྱ་བ་ནི་འདོད་པ་དང་བཅས་ནའོ། །ཇི་ཙམ་ན་ཞེས་བྱ་བ་ནི་དེ་མ་ཐག་ཏུའོ། །སྔོན་པོར་བརྡས་པ་ཞེས་བྱ་བ་ནི་རློན་པར་བརྡས་པའོ། །རྙིང་བར་འགྱུར་བ་ཞེས་བྱ་བ་ནི་ཤུན་པ་སྐམས་པར་གྱུར་པའོ། །བསྐམ་པར་འགྱུར་ཞེས་བྱ་བ་ནི་ཤ་དང་སྲ་བ་ཉམས་པར་འགྱུར་བའོ། །དབང་པོ་ཞེས་བྱ་བ་ནི་མིག་ལ་སོགས་པ་བྱེད་པ་དག་གོ །བསྙེན་བཀུར་ཞེས་བྱ་བ་ནི་ཕྱིར་བཅོས་པའོ། །ཇི་ལྟར་གྱུར་པ་ཞེས་བྱ་བ་ནི་བདེན་པའོ། །སྨྲོས་ཤིག་ཅེས་བྱ་བ་ནི་བརྗོད་ཅིག་པའོ། །འབྲས་ཁུ་ཞེས་བྱ་བ་ནི་འབྲས་ཚོས་པའི་ཁུ་བའོ། །ཚར་གྱུར་ཏེ་ཞེས་བྱ་བ་ནི་སྐྱུར་བ་ཉིད་དུ་གྱུར་ཏེའོ། །ཕྱིར་བཟློག་པར་ཡང་མི་བྱེད་ཅིང་ཞེས་བྱ་བ་ནི་དེ་དག་རང་ཡང་ཡིད་མི་བདེ་
བར་གྱུར་བའི་ཕྱིར་རོ། །དེས་ཀྱང་ཞེས་བྱ་བ་ནི་ཕྱི་རོལ་དུ་དྲུད་ཅིང་ནང་དུ་འབོ་བར་བྱེད་པ་ལ་སོགས་པའི་རྣམ་པས་ཀྱང་ངོ༌། །རང་གི་ལས་དག་གིས་ཞེས་བྱ་བ་ནི་བར་མ་དོར་འཆི་བར་འགྱུར་བ་དག་གིས་སོ། །སྐུར་བ་གདབ་པར་འགྱུར་བའི་ལས་དག་གིས་ཞེས་བྱ་བ་ནི་སྐུར་བའི་རྒྱུར་འགྱུར་བ་དག་གིས་སོ། །ཡུགས་ས་མོ་དག་ཅེས་བྱ་བ་ནི་ཁྱོ་ཤི་བའོ། །བདག་ཅེས་བྱ་བ་ནི་བདག་ཉིད་དོ། །ཡི་ཆད་ནས་ཞེས་བྱ་བ་ནི་ཡི་བསད་ནས་སོ། །ཁྱིམ་གྱི་སོ་ཚིས་དག་ཅེས་བྱ་བ་ནི་ཁྱིམ་གྱི་སོ་ནམ་དག་སྟེ་བསམ་པ་ཞེས་བྱ་བའི་ཐ་ཚིག་གོ །ཆུང་པོ་གྲོགས་ཞེས་བྱ་བ་ནི་ཆུང་ངུའི་དུས་ནས་འདྲིས་པའི་གྲོགས་ཤིག་གོ །འཇུད་མཐུན་མའི་ཁྱིམ་ཞེས་བྱ་བ་ནི་གང་དུ་འཕྱོན་མ་དང་འཇུག་པ་དང་འབྱུང་བའོ། །སྡིག་པ་ཅན་ཞེས་བྱ་བ་ནི་བསོད་ནམས་མ་ཡིན་པ་ཉོན་མོངས་པ་ཅན་ནོ། །དམ་པ་མ་ཡིན་པའི་ཆོས་ཞེས་བྱ་བ་ནི་སྨད་པའི་ཆོ་གའོ། །ནད་ཀྱིས་མནན་པ་ནི་ཞེས་བྱ་བ་ནི་ངན་དུས་ཀྱིས་བཅོལ་ནའོ། །བདེ་ལེགས་བདེ་ལེགས་ཞེས་བྱ་བ་ནི་ཤིས་པ་བརྗོད་པ་སྟེ། གུས་པར་བསྒྲིམ་པའི་ཕྱིར་ལན་གཉིས་བཟླས་པའོ། །བྱོན་པ་ལེགས་སོ་ཞེས་བྱ་བ་ནི་དགའ་བའི་ཚིག་གོ །ཅི་བདག་གིས་སྐྱེས་པ་མ་མཐོང་ངམ་ཞེས་བྱ་བ་ནི་དེས་འཇུག་ཏུ་མི་འཇུད་དོ་སྙམ་དུ་བསམ་པའོ། །གོས་ཞེས་བྱ་བ་ནི་བགོ་བའོ། །ཟས་ཞེས་བྱ་བ་ནི་བཟའ་བ་སྟེ་དེས་འགེངས་པར་བྱེད། གཡོག་བྱེད་པའི་ཕྱིར་རོ། །བཟང་པོ་ཞེས་བྱ་བ་ནི་གྱ་ནོམ་བས་སོ། །དུས་ཡུན་མི་རིང་བ་ཞིག་གིས་ཞེས་བྱ་བ་ནི་ཡུན་ཐུང་དུ་ཞིག་གིས་སོ། །བརྟས་པར་གྱུར་ཏོ་ཞེས་བྱ་བ་ནི་ཚོས་པར་གྱུར་པའོ། །གཙུག་ལག་ཁང་དེ་ན་ཞེས་བྱ་བ་ནི་རྒྱལ་བྱེད་ཀྱི་ཚལ་དེའི་ཕྱོགས་གཅིག་ཏུ་གྱུར་པའི་ཁྱམས་གྲུ་བཞི་ནའོ། །གཉིད་ལོག་པར་གྱུར་པ་ཞེས་བྱ་བ་ནི་གཉིད་ཀྱིས་ནོན་པར་གྱུར་པའོ། །བསྟི་གནས་ཞེས་བྱ་བ་ནི་རབ་ཏུ་བྱུང་བ་འདུག་པའི་གནས་སོ། །སེམས་གཏོད་ཅིང་ཞེས་བྱ་བ་ནི་དེ་ལ་གཞོལ་ཞིང་ངོ༌། །དེ་ལྟར་རྣམ་པར་གྱུར་བ་ཞེས་བྱ་བ་ནི་གོས་རྣམ་པར་གྱུར་ཅིང་དེའི་ཡན་ལག་གི་རྣམ་པ་ཡང་ལས་སུ་རུང་བའོ། །འདོད་པའི་ཆོས་ཞེས་བྱ་བ་ནི་འདོད་ཆགས་སོ། །སྟུག་པོས་སོ་ཞེས་བྱ་བ་ནི་མཐུ་ཆེན་པོས་སོ། །སྒྱུ་རྩལ་དྲུག་ཅུ་རྩ་བཞི་ཞེས་བྱ་བ་ནི་འདོད་པ་བསྟེན་པ་ལ་མཁོ་བ་འཁྲུལ་བ་དང་བསྡམས་པ་ལ་
སོགས་པ་ནང་གི་ཐབས་ཀྱི་བྱེ་བྲག་གི་སྒྱུ་རྩལ་དྲུག་ཅུ་རྩ་བཞི་པོ་དེ་དག་ལ་མཁས་པ་ཞེས་བྱ་བའི་ཐ་ཚིག་གོ །ཁ་ཅིག་ན་རེ། རོལ་མོའི་མཚན་ཉིད་སྒྱུ་མ་དང༌། །འགྱེད་སྟོབས་དང་ནི་མེ་ཏོག་ལས། །དམག་རྣམས་དང་ནི་བདག་ཉིད་ཤེས། །གཡོས་སུ་བྱ་བ་རྣམ་པར་ངེས། །ཚོང་དང་ནོར་ནི་བསྒྱུར་བ་དང༌། །རྒྱན་དང་ལག་རྩིས་བཅུད་ཀྱིས་ལེན། །འཁྲུལ་འཁོར་སྦྱོར་དང་འདྲི་བ་དང༌། །འཕོང་སྤྱད་དང་ནི་ཆེ་སྦྱར་སྒྲ། །ཡི་གེ་དང་ནི་ཁ་སྐད་དང༌། །རང་བཟོ་དང་ནི་མཚོན་རྣམས་བརྟག །སྤྱོད་ཐབས་དང་ནི་སོག་ལེ་དང༌། །ཕུག་རྣམས་རྐོ་བར་བྱེད་པ་དང། །སོང་དང་འོང་བ་ཤེས་པ་དང༌། །གཞི་ཡི་མཚན་ཉིད་ཤེས་པ་དང༌། །མདུང་དང་རྡོ་རྗེ་བརྟག་པ་དང༌། །མཐངས་ཀྱི་ཚོར་བའི་མཚན་ཉིད་ནི། །ཟུག་རྡུ་འབྱིན་དང་མི་འཕྲུལ་དང༌། །བ་ར་ཏ་ཡི་བསྟན་བཅོས་ཤེས། །བཅིངས་དང་ཁང་པ་རྩེག་མ་དང༌། །དེ་བཞིན་གོས་ནི་འཕང་བ་དང། །ཡན་ལག་མཉེད་དང་མོ་འདེབས་དང༌། །དེ་བཞིན་ཆུ་ནི་ཀུན་འཛིན་དང༌། །དུང་གི་སྒྲ་དང་སྡེབ་སྦྱར་དང༌། །གྲོང་རྡལ་དང་ནི་གླེགས་འདྲ་དང༌། །མཚན་མོ་ཆོས་རྐུན་ཤེས་པ་དང༌། །བྱིས་པ་རྣམས་ནི་གསོ་བ་དང༌། །མི་རྣམས་གཉིད་ཀྱིས་ལོག་བྱ་དང༌། །སྒོ་ལྕགས་དབྱེ་བར་བྱ་བ་དང༌། །སྨྲ་དང་ས་རྟོག་བྱེད་པ་དང༌། །སྐྱེས་པ་བུད་མེད་རྟ་དང་ནི། །གླང་པོའི་མཚན་ཉིད་གར་སློབ་དང༌། །འབྱུང་བ་དག་ནི་གསོ་བ་དང༌། །ཟངས་མ་ཁར་བ་གསེར་དང་ནི། །ཤིང་དང་དུང་ནི་ཤེས་པ་དང༌། །རི་མོ་མཚོན་དང་ས་དག་གོ །ལས་རྣམས་དེ་དང་གོ་རིམས་བཞིན། །སྐར་མའི་གཏན་ཚིགས་རིག་པ་དང༌། །མཚན་མ་ཤེས་པ་ཉིད་དང་ཡང༌། །ངེས་པའི་ཚིག་གི་གཞུང་རྣམས་ནི། །སྒྱུ་རྩལ་དྲུག་ཅུ་རྩ་བཞིར་དྲན། །ཟེར་རོ། །དྲང་སྲོང་ནེའུ་ལེའི་བུའི་གཞུང་ལས་ནི་བརྒྱད་བརྒྱད་དྲུག་ཅུ་བཞི་ཞེས་འབྱུང་སྟེ། དེ་ལ་བརྒྱད་ནི་སེན་མོས་བྲད་པ་དང༌། སོས་གདབ་པ་དང༌། འཁྱུད་པ་དང༌། མཐང་སྦྱར་བ་དང༌། བྱ་བ་དང༌། ལག་པས་གདབ་པ་དང༌། སྒྲའི་བྱེ་བྲག་དང༌། སྐྱེས་པའི་སྟེང་དུ་ཉལ་བ་སྟེ། རེ་རེ་ལའང་རྣམ་པ་བརྒྱད་བརྒྱད་དུ་དབྱེའོ། །སྒྱུ་རྩལ་དྲུག་ཅུ་རྩ་ལྔ་ཤེས་ཏེ་ཞེས་བྱ་བ་ནི་དྲུག་ཅུ་རྩ་བཞི་པས་གཅིག་གིས་ལྷག་པར་ཤེས་ཏེ་ཞེས་བྱ་བའི་ཐ་ཚིག་གོ །ལྷག་མ་དེ་གང་ཞེ་ན།
འདི་ལྟར་ཞེས་བྱ་བ་ལ་སོགས་པ་གསུངས་སོ། །སུན་པར་བྱེད་པ་ཞེས་བྱ་བ་ནི་ཉེས་པ་སྐྱེད་པར་བྱེད་པའོ། །དགེ་སློང་ཁྱོད་ཀྱིས་རེག་པ་བདག་གིར་མ་བྱས་སམ་ཞེས་བྱ་བ་ནི་འཇིག་རྟེན་ལ་གོ་བར་བྱ་བའི་ཕྱིར་རོ། །གྲོང་མཐའ་བ་ཞེས་བྱ་བ་ནི་གྲོང་ན་གནས་པའོ། །ཉིན་པར་ཞེས་བྱ་བ་ནི་དེའི་ཚེ་མི་དག་འོང་བའི་ཕྱིར་རོ། །གློས་ཕབ་སྟེ་ཞེས་བྱ་བ་ནི་ལུས་བསྙལ་ཏེའོ། །སྒོ་གཏན་ཞེས་བྱ་བ་ནི་སྒོ་ལྕགས་ལ་སོགས་པའོ། །གོས་བཅིང་བར་བྱའོ་ཞེས་བ་བྱ་ནི་ཤམ་ཐབས་ཀྱི་མ་མཐའ་ལ་བཅིང་བར་བྱའོ། །འགལ་ཚབས་ཅན་ཞེས་བྱ་བ་ནི་ཤིན་ཏུ་འདས་པ་དང་བཅས་པ་སྟེ། ཉེས་པ་དང་བཅས་པ་ཞེས་བྱ་བའི་ཐ་ཚིག་གོ །གསར་བུ་གསར་བུ་དག་གིས་ཞེས་བྱ་བ་ནི་གཞོན་པ་གཞོན་པ་དག་གིས་ཏེ། བཟླས་པའམ་རྣམ་པའི་ཕྱིར་ལན་གཉིས་སྨོས་སོ། །ངོ་ཤེས་པར་བྱས་སོ་ཞེས་བྱ་བ་ནི་ཤེས་པར་གྱུར་པའོ། །བཞིན་བཟངས་དག་ཅེས་བྱ་བ་ནི་དགའ་བའི་ཚིག་གོ །དེ་བཞིན་ནོ་ཞེས་པའི་སྒྲ་ནི་ཁས་བླང་བའོ། །བྱ་བ་ཞེས་བྱ་བ་ནི་ཕྱིར་བཅོས་པའི་བྱ་བའོ། །མི་འདོད་པ་ཞེས་བྱ་བ་ནི་མ་བྱུང་བ་འདོད་པར་མི་འགྱུར་བ་གང་ཡིན་པའོ། །མི་དགའ་བ་ཞེས་བྱ་བ་ནི་གང་ལས་བྲལ་བར་འདོད་པའོ། །མི་སྡུག་པ་ཞེས་བྱ་བ་ནི་རྣམ་པར་ཤེས་པ་ལྔ་པོ་དག་ལས་མི་སྡུག་པའོ། །ཡིད་དུ་མི་འོང་བ་ཞེས་བྱ་བ་ནི་ཡིད་ཀྱི་རྣམ་པར་ཤེས་པའི་ཡིད་དུ་མི་འོང་བའོ། །འཇིག་རྟེན་ཕ་རོལ་དུ་འཁྲིད་པར་འགྱུར་བས་ཤེས་པར་བྱ་བ་ནི་ཆུད་ཟ་བར་འགྱུར་བས་ཞེས་བྱ་བའི་ཐ་ཚིག་གོ །བསོད་ནམས་མང་པོ་ཞེས་བྱ་བ་ནི་ཚུལ་ཁྲིམས་ལས་བྱུང་བའི་དགེ་བའོ། །མཐོ་རིས་དག་ཏུ་ཞེས་བྱ་བ་ནི་འདོད་པ་དང་གཟུགས་ན་སྤྱོད་པའི་ལྷའི་འཇིག་རྟེན་དག་ཏུའོ། །དགའ་བར་འགྱུར་བ་ཞེས་བྱ་བ་ནི་བདེ་བ་ཉམས་སུ་མྱོང་བར་འགྱུར་བའོ། །དེའི་དོན་ཁོ་ནར་ཞེས་བྱ་བ་ནི་དེའི་ཕྱིར་ཁོ་ནར་རོ། །དོན་གྱིས་ན་ཞེས་བྱ་བ་ནི་ཐབས་བསྟན་པས་ནའོ། །ཤེས་ཀྱིས་ཞེས་བྱ་བ་ནི་འཕྲིགས་ཀྱིས་སོ་ཞེས་བྱའོ། །བསོད་ནམས་སུ་འགྱུར་རོ་ཞེས་བྱ་བ་ནི་སྦྱིན་པ་ལས་བྱུང་བའི་དགེ་བའོ། །དམ་ཚིག་ཅེས་བྱ་བ་ནི་བརྡ་སྟེ་དམ་འཆའ་བའི་ཚིག་ཅེས་བྱ་བའི་ཐ་ཚིག་གོ །ཉུངས་མར་ཞེས་བྱ་བ་ནི་ཡུངས་ཀར་གྱི་འབྲུ་མར་ཏེ། ཡུངས་ཀར་ནི་སྲིན་བུ་དང་གཡན་པ་འཇོམས་པ་ཡིན་ནོ་ཞེས་ཟེར་བའི་ཕྱིར་རོ། །
ལྷུང་བཟེད་ཆུང་ངུ་ཞེས་བྱ་བ་ནི་སྣོད་ཆུང་ངུའོ། །གནས་སུ་ཞེས་བྱ་བ་ནི་འདུག་པའི་གནས་སུའོ། །དམ་དུམ་དག་ཅེས་བྱ་བ་ནི་གོས་ཀྱི་དམ་དུམ་དག་གོ །ལུས་དག་ཅེས་བྱ་བ་ནི་ཡན་ལག་དག་གོ །བསྐུས་ཏེ་ཞེས་བྱ་བ་ནི་བསྐུ་མཉེ་བྱས་ཏེའོ། །ཨུད་ཙ་ཏི་ག་ཞེས་བྱ་བ་ནི་མཆོང་ཞིང་འགྲོ་བའོ། །ཟིན་ཅེས་བྱ་བ་ནི་སྨས་པར་བྱས་པའོ། །ཕྱིར་བཟློག་པར་ཞེས་བྱ་བ་ནི་བསྐྲད་པར་རོ། །འདོད་པ་ལས་འདོད་ཆགས་དང་བྲལ་བ་ཞེས་བྱ་བ་ནི་འདོད་པའི་ཁམས་ལས་རྣམ་པར་གྲོལ་བའོ། །ཡལ་ག་དག་ཅེས་བྱ་བ་ནི་ཡལ་ག་དག་གོ །སེག་དག་ཅེས་བྱ་བ་ནི་སྨྱིག་མ་ལ་སོགས་པ་ལ་བཏགས་པ་གྲུ་བཞི་དག་གོ །རི་ལྡེ་དག་ཅེས་བྱ་བ་ནི་དེ་ཉིད་རིང་པོ་དག་གོ །ཐེ་ཚོམ་སྐྱེས་ནས་ཞེས་བྱ་བ་ནི་འདོད་ཆགས་དང་བྲལ་བ་དང་ཡན་ལག་གི་རྣམ་པ་ལས་སུ་རུང་བ་ནི་འགལ་བར་དོགས་པས་ཐེ་ཚོམ་སྐྱེས་སོ། །ཉེ་བར་ནོན་པ་ཞེས་བྱ་བ་ནི་བདས་ཤིང་བཙིར་བའོ། །དགེ་སློང་རྣམས་ཐེ་ཚོམ་སྐྱེས་ནས་ཞེས་བྱ་བ་ནི་དད་པས་རབ་ཏུ་བྱུང་བ་བསྟན་པ་སྐྱོན་མེད་པ་དང་པོར་ཧ་ཅང་ལྕི་བ་དོན་མེད་པ་སྤྱོད་པ་ནི་བྱ་དཀའ་བ་ཉིད་ཡིན་པའི་ཕྱིར་དགེ་སློང་རྣམས་ཐེ་ཚོམ་སྐྱེས་སོ། །ཞུས་པ་ཞེས་བྱ་བ་ནི་དྲིས་པའོ། །གཟིགས་ཞེས་བྱ་བ་ནི་ངོ་མཚར་ཆེའོ་སྙམ་དུ་བསམས་པའོ། །དུས་ན་ཡང་ཞེས་བྱ་བ་ནི་ཚེ་ན་ཡང་ངོ༌། །འཇིག་རྟེན་སྐྱོན་མེད་ཅིང་ཆུ་བུར་མེད་པ་ལ་ཞེས་བྱ་བ་ནི་འཛམ་བུའི་གླིང་གི་མིའི་འཇིག་རྟེན་པའོ། །དེའི་དང་པོར་ཞེས་བྱ་བ་ནི་ཐམས་ཅད་ཀྱི་དང་པོར་རོ། །འཇིག་རྟེན་འདི་ཞེས་བྱ་བ་ནི་སྟོང་གསུམ་པའི་འཇིག་རྟེན་གྱི་ཁམས་སོ། །འཇིག་པ་ཞེས་བྱ་བ་ནི་འཇིག་ཅིང་འགོང་བའོ། །དུས་ཞེས་བྱ་བ་ནི་རྒྱུ་དང་འབྲས་བུའི་དངོས་པོ་འབྲེལ་པའོ། །གང་ཡིན་པ་ཞེས་བྱ་བ་ནི་ཉེ་བར་བསྟན་པའི་ཚིག་གོ །འོད་གསལ་ཞེས་བྱ་བ་ནི་འོད་ཤིན་ཏུ་གསལ་བ་སྟེ། བསམ་གཏན་གཉིས་པ་ནི་གནས་གསུམ་པའི་མི་དེ་ཡིན་ནོ། །གཟུགས་ཅན་ཞེས་བྱ་བ་ནི་གཟུགས་ཀྱི་ཕུང་པོ་དང་ལྡན་པའོ། །ཡིད་ལས་བྱུང་བ་ཞེས་བྱ་བ་ནི་རྫུས་ཏེ་སྐྱེས་པ་ཉིད་ཀྱིས་ཡིད་ཙམ་གྱི་རྒྱུ་ལས་བྱུང་བའི་ཕྱིར་རོ། །མ་ཚང་བ་མེད་པ་ཞེས་བྱ་བ་ནི་དབང་པོ་ཚང་བའོ། །དབང་པོ་མ་ཉམས་པ་ཞེས་བྱ་བ་ནི་དབང་པོ་ཉམས་པ་མེད་པའོ། །ཡན་ལག་ཅེས་བྱ་བ་ནི་ལྷག་པ་དང་རྐང་པ་དང་མགོ་
ཞེས་བྱ་བ་ཡན་ལག་བཞི་པ་དག་གོ །ཉིང་ལག་ཅེས་བྱ་བ་ནི་སོར་མོ་ལ་སོགས་པ་སྟེ། དེ་དག་ཐམས་ཅད་དད་ལྡན་པའོ། །བཟང་བ་ཞེས་བྱ་བ་ནི་དབྱིབས་ཀྱིས་མཛེས་པའོ། །ཁ་དོག་དང་ལྡན་པ་ཞེས་བྱ་བ་ནི་ཁ་དོག་གི་གཟུགས་ལ་གནས་པའོ། །རང་ལས་འོད་བྱུང་བ་ཞེས་བྱ་བ་ནི་རང་གི་ལུས་ལས་བྱུང་བ་ཉིད་ཀྱི་འོད་ཀྱིས་བྱ་བར་གྲུབ་པའི་ཕྱིར་རོ། །ནམ་མཁའ་ལ་འགྲོ་བ་ཞེས་བྱ་བ་ནི་བར་སྣང་ལ་འགྲོ་བ་དང་ལྡན་པའོ། །དགའ་བ་ཟ་བ་ཞེས་བྱ་བ་ནི་དགའ་བ་ཙམ་ཟ་བའི་ཕྱིར་རོ། །དགའ་བའི་ཟས་དང་ལྡན་པ་ཞེས་བྱ་བ་ནི་དེ་དག་གི་གནས་པའི་ཟས་དགའ་བ་ཉིད་ཡིན་པའི་ཕྱིར་རོ། །ཚེ་རིང་ཞིང་ཞེས་བྱ་བ་ནི་ཚེ་བསྐལ་པ་དུ་མར་ཐུབ་པའི་ཕྱིར་རོ། །ཡུན་རིང་དུ་གནས་སོ་ཞེས་བྱ་བ་ནི་འཚོ་བའོ། །ཆུ་འབའ་ཞིག་ཅེས་བྱ་བ་ནི་ཆུས་ཁྱབ་པའོ། །རྒྱ་མཚོ་འབའ་ཞིག་ཅེས་བྱ་བ་ནི་རྒྱ་མཚོ་དག་དང་འདྲེས་པའི་ཕྱིར་རོ། །ཕྲི་འམ་ཞེས་བྱ་བ་ནི་སྟེང་རིམ་མོ། །ཀུན་དུ་ཆགས་པར་བྱེད་ཅེས་བྱ་བ་ནི་ཀུན་ཏུ་སྐྱེ་བ་བྱེད་པའོ། ཀུན་དུ་འཐས་པར་བྱེད་ཅེས་བྱ་བ་ནི་ཀུན་དུ་བརྟས་པར་བྱེད་པའོ། །ཀུན་དུ་ཁྱབ་པར་བྱེད་ཅེས་བྱ་བ་ནི་ཀུན་དུ་འབྱེད་པར་བྱེད་པའོ། །འོ་མ་ཞེས་བྱ་བ་ནི་འོ་རློན་ནོ། །སྦྲང་བུ་ཞེས་བྱ་བ་ནི་སྦྲང་རྩི་བྱེད་པའོ། །སྦྲང་རྩི་ཞེས་བྱ་བ་ནི་སྦྲང་བུ་ལས་བྱུང་བའོ། །མ་བསྐོལ་བ་ཞེས་བྱ་བ་ནི་ཁོལ་བར་མ་བྱས་པའོ། །དེ་ཡང་བུང་བ་ལ་སོགས་པའི་བྱེ་བྲག་གིས་སྤྲང་རྩི་རྣམ་པ་བཞི་ཡོང་པས་དེའི་ཕྱིར། སྤྲང་བུའི་ཞེས་བྱ་བ་གསུངས་ཏེ། སྦྲང་རྩིའི་རྣམ་པ་དག་ནི་སྦྲང་མ་ལས་བྱུང་བ་དང༌། རུང་བ་ལས་བྱུང་བ་དང༌། སྦྲང་བུ་ལས་བྱུང་བ་དང༌། སྦྲང་རྒོད་ལས་བྱུང་བའོ་ཞེས་ཟེར་བའི་ཕྱིར་རོ། །འཆགས་པ་ཞེས་བྱ་བ་ནི་འབྱུང་ཞིང་འཕེལ་བའོ། །ཚེ་ཟད་ཅེས་བྱ་བ་ནི་འཚོ་བ་ཟད་པའོ། །ལས་ཟད་ཅེས་བྱ་བ་ནི་འཕེན་པར་བྱེད་པའི་ལས་ཟད་པའོ། །ལས་ཟད་ཅེས་བྱ་བ་ནི་འཕེན་པར་བྱེད་པའི་ལས་ཅད་པའོ། །བསོད་ནམས་ཟད་པས་ཞེས་བྱ་བ་ནི་ཡོངས་སུ་རྫོགས་པར་བྱེད་པའི་ལས་ཟད་པས་སོ། །འདི་ལྟ་བུ་ཉིད་དུ་ཞེས་བྱ་བ་ནི་རྣམ་པ་འདི་ལྟ་བུ་ཉིད་དུའོ། །དེ་གང་ཞེ་ན་མི་རྣམས་དང་ཞེས་བྱ་བ་ལ་སོགས་པས་སྟོན་པར་བྱེད་པའོ། །སྐལ་བ་མཐུན་པ་ཉིད་དུ་ཞེས་བྱ་བ་ནི་རང་བཞིན་མཐུན་པ་ཉིད་དུ་སྟེ། ངོ་བོ་ཉིད་འདྲ་བ་ཉིད་དུའོ། །དེའི་ཚེ་ན་
ཞེས་བྱ་བ་ལ་སོགས་པ་ལ་མུན་པ་མེད་པའི་ཕྱིར་ཉི་མ་དང་ཟླ་བ་ལ་སོགས་པ་ཡང་མ་བྱུང་ངོ༌། །དེ་དག་མེད་པའི་ཕྱིར་མཚན་མོ་དང་ཉིན་མོ་ལ་སོགས་པ་ལ་ཡང་མ་བྱུང་ངོ༌། །སྐད་ཅིག་ཅེས་བྱ་བ་ནི་འདིར་དེའི་སྐད་ཅིག་ལ་སྐད་ཅིག་ཅེས་གསུངས་ཏེ། སྐད་ཅིག་བརྒྱ་ཉི་ཤུ་ལ་དེའི་སྐད་ཅིག་སྟེ། བུད་མེད་འཁལ་སྐྱེན་པས་རས་བལ་འདབ་མ་ལས་ལག་པ་ཇི་ཙམ་དུ་རྐྱོང་བའི་དུས་ཀྱིས་དེ་ལས་འདྲེས་པར་བྱེད་དོ། །འདིར་ནི་དེའི་སྐད་ཅིག་གི་ཡུན་ཡིན་ནོ། །ཐང་ཅིག་ཅས་བྱ་བ་ནི་དེའི་སྐད་ཅིག་དྲུག་ཅུ་སྟེ། ཆུ་སྲང་གི་གཞི་ཆུ་ཚོད་ཀྱིས་ཟད་པའི་དུས་ཀྱིས་མཚོན་པ་ཡིན་ནོ། །ཡུད་ཙམ་ཞེས་བྱ་བ་ནི་ཐང་ཅིག་སུམ་ཅུ་སྟེ། ཆུ་ཚོད་གཉིས་ཟད་པའི་དུས་ཀྱིས་མཚོན་པ་ཡིན་ནོ། །བུད་མེད་ཀྱང་མེད་ཅེས་བྱ་བ་ལ་སོགས་པ་ནི་དབང་པོ་མེད་པའི་ཕྱིར་རོ། །བརྐམ་པ་ཞེས་བྱ་བ་ནི་མང་དུ་ཟ་བར་བྱེད་པའོ། །དེའི་ངོ་བོ་ཉིད་ནི་བརྐམ་པའི་རང་བཞིན་ཅན་ནོ། །མྱོང་བར་བྱེད་དོ་ཞེས་བྱ་བ་ནི་རོ་མྱོང་བར་བྱེད་པའོ། །ཁམ་གྱི་ཟས་ཀྱི་རྩོལ་བས་ཞེས་བྱ་བ་ནི་ལག་པ་དགང་བས་སོ། །སྲ་བ་ཉིད་ཅེས་བྱ་བ་ནི་མཁྲང་བ་ཉིད་དོ། །ལྕི་བ་ཉིད་ཅེས་བྱ་བ་ནི་ལྕིད་དང་བཅས་པ་ཉིད་དོ། །བྱུང་ཞིང་ཞེས་བྱ་བ་ནི་ཞུགས་ཤིང་ངོ༌། །ཁ་དོག་གསལ་བ་ཞེས་བྱ་བ་ནི་ཁ་དོག་གི་བཀྲག་གོ །ཆོས་ཀྱིས་ན་ཞེས་བྱ་བ་ནི་ཆོས་ཀྱི་ངོ་བོ་ཉིད་ཀྱིས་ཏེ། སེམས་ཅན་ཐམས་ཅད་ཀྱི་དབང་གིས་མུན་པའི་གཉེན་པོ་སྣང་བ་དགོས་པའི་ཕྱིར་རོ། །རྣམ་པ་གཉིས་ཞེས་བྱ་བ་ནི་རྣམ་པ་གཉིས་ཉིད་དོ། །སྡིག་པ་ཅན་ཞེས་བྱ་བ་ནི་ཉོན་མོངས་པ་ཅན་ནོ། །མི་དགེ་བ་ཞེས་བྱ་བ་ནི་འབྲས་བུ་མི་འདོད་པའོ། །ཡང་དག་པར་བླངས་པའི་རྒྱུས་ཞེས་བྱ་བ་ནི་གོམས་པའི་དབང་གིས་སོ། །མྱ་ངན་ཞེས་བྱ་བ་ནི་ཡིད་ཀྱི་ཡོངས་སུ་གདུང་བའོ། །སྒྱིད་ལུག་པ་ཞེས་བྱ་བ་ནི་ལུས་ཀྱིའོ། །སྨྲེ་སྔགས་འདོན་པ་ཞེས་བྱ་བ་ནི་ངག་གི་ཉོན་མོངས་པའོ། །ཀྱེ་མའོ་བཅུད་ཅེས་བྱ་བ་ལ་སོགས་པ་ནི་ངོ་མཚར་ཏོ་ཞེས་བྱ་བ་སྟེ། བརྟད་པའི་ཕྱིར་ལན་གཉིས་བཟླས་སོ། །ཞིམ་པ་ཞེས་བྱ་བ་ནི་ཡིད་དུ་འོང་བའོ། །བཟང་པོ་ཞེས་བྱ་བ་ནི་ཁྱད་པར་དུ་འཕགས་པའོ། །ཡི་གེ་ཞེས་བྱ་བ་ནི་ཨ་ལ་སོགས་པ་ཡི་གེའི་སྒྲར་བརྗོད་པ་དག་གོ །སྦྱོར་བ་ཞེས་བྱ་བ་ནི་ཡི་གེ་
བསྡུས་པ་སྟེ། གང་གིས་ཡུལ་དང་དུས་ལ་སོགས་པ་ངེས་པར་མ་ཆད་པའི་དོན་གྱི་བདག་ཉིད་རྗོད་པར་བྱེད་པ་དཔེར་ན་བུམ་པ་ཞེས་བྱ་བ་ལ་སོགས་པར་ཡིག་འབྲུ་སྦྱར་བའོ། །ཚིག་ཅེས་བྱ་བ་ནི་སྦྱར་བ་བསྡུས་པ་དག་ཅེས་བྱ་བའི་ཐ་ཚིག་གོ །གང་གིས་ཡུལ་དང་དུས་ལ་སོགས་པ་ངེས་པར་ཆད་པའི་དོན་གྱི་བདག་ཉིད་གསལ་བར་བྱེད་པ་དཔེར་ན་ལྷས་བྱིན་པ་དཀར་མོ་ཁྲིད་དེ་ཤོག་ཁྱེད་ཀྱི་མཁན་པོ་ལ་འོ་མ་བླུད་དོ་ཞེས་བྱ་བ་ལ་སོགས་པ་ལྟ་བུའོ། །དེའི་ཡི་གེ་འདུས་པ་ནི་སྦྱར་བའོ། །སྦྱར་བ་འདུས་པ་ནི་ཚིག་གོ་ཞེས་གསུངས་སོ། །རྗེས་སུ་ཐ་སྙད་འདོགས་ཤིང་ཞེས་བྱ་བ་ནི་རྗེས་སུ་འཇུག་ཅིང་ངོ༌། །མི་ཤེས་སོ་ཞེས་བྱ་བ་ནི་ཁོང་དུ་མ་ཆུད་པ་སྟེ། བརྡ་ལ་མ་ཞུགས་པའི་ཕྱིར་དེ་མི་ཤེས་སོ། །ས་ཞག་ཅེས་བྱ་བ་ནི་གྱོང་གྲུགས་སུ་གྱུར་པའི་དུམ་བུའོ། །དོང་ཀའི་མེ་ཏོག་ཅེས་བྱ་བ་ནི་སེར་པོའོ། །ཀྱེ་མའོ་ཀྱེ་མའོ་ཞེས་བྱ་བ་ལ་སོགས་པ་ནི་ཡིད་ལ་གཅགས་པའོ། །མྱུ་གུའི་ཚལ་ཞེས་བྱ་བ་ནི་མྱུ་གུ་སྟུག་པོར་གནས་པའོ། །ཀ་དམ་བུ་གང་གི་མེ་ཏོག་ཅེས་བྱ་བ་ནི་ཤིང་ཀ་པུ་ཤི་སྟེ་རྨ་མོ་ཁྲི་ཁྲི་མོའི་མེ་ཏོག་ཟེར་རོ། །ཕར་སོང་ཞེས་བྱ་བ་ནི་མདུན་ན་མ་འདུག་ཅིག་ཅེས་ཟེར་བ་སྟེ། མི་ཕྱོགས་པའི་ཚིག་ཡིན་ནོ། །སྨད་པ་ཞེས་བྱ་བ་ནི་དམའ་དབབ་པའོ། །རྣོན་པོ་ཞེས་བྱ་བ་ནི་རྩུབ་པོས་སོ། །མ་རྨོས་མ་བཏབ་པ་ཞེས་བྱ་བ་ནི་ཞིང་དུ་རྨོས་པ་དང་ས་བོན་གདབ་པ་ལ་མི་ལྟོས་པ་གང་ཡིན་པའོ། །འབྲས་སཱ་ལུའི་འབྲུ་ཞེས་བྱ་བ་ནི་སཱ་ལུ་གང་གི་འབྲུ་འབྲས་ཐུག་པོ་ཆེ་ཁོ་ན་འབྱུང་བ་ཡིན་གྱི་འབྲས་སོ་བ་ལ་སོགས་པ་མི་འབྱུང་བ་ཞེས་བྱ་བའི་ཐ་ཚིག་གོ །སོ་བ་མེད་པ་ཞེས་བྱ་བ་ནི་འབྲས་ཐུག་པོ་ཆེ་མང་པོ་དག་གི་ནང་ན་སོ་བ་སྦུན་པ་ཅན་གཅིག་ཀྱང་མེད་པ་གང་ཡིན་པའོ། །སྦུན་པ་མེད་པ་ཞེས་བྱ་བ་ནི་སྦུན་པ་དང་བྲལ་བའོ། །དག་པ་ཞེས་བྱ་བ་ནི་དཀར་བའོ། །གཙང་བ་ཞེས་བྱ་བ་ནི་མ་འདྲེས་པ་སྟེ་དྲི་མ་མེད་པ་ཞེས་བྱ་བའི་ཐ་ཚིག་གོ ། སོར་བཞི་པ་ཞེས་བྱ་བ་ནི་སྲིད་དེ་ཙམ་ཡོད་པའོ། །ཀུན་ནས་མ་དཀྲིས་པ་ཞེས་བྱ་བ་ནི་རྒྱ་ལ་སོགས་པ་གང་གིས་ཀྱང་མ་དཀྲིས་པ་གང་ཡིན་པའི། །ནུབ་བརྔས་ན་ཞེས་བྱ་བ་ནི་ནུབ་མོ་བཅད་ནའོ། །ནང་ཞེས་བྱ་བ་ནི་ནང་པར་རོ། །རྒྱལ་ཞིང་ཞེས་བྱ་བ་ནི་འབྲས་བུའོ། །ཕྱིར་སྐྱེ་ཞེས་བྱ་བ་ནི་རྩ་བ་ལ་
སོགས་པ་ཡང་སྐྱེ་བའོ། །བརྔས་པ་ཞེས་བྱ་བ་ནི་བཅད་ཅིང་བྲེགས་པའོ། །དབང་པོ་ཐ་དད་པ་ཞེས་བྱ་བ་ནི་གཅིན་འབྱུང་བའི་ཕྱིར་ལུས་དབང་པོ་དང་བཅས་པ་ལ་བུ་གུ་རྣམ་གཉིས་དོད་པའོ། །མིག་གིས་མིག་ལ་བརྟེན་ཏེ་ཞེས་བྱ་བ་ནི་མིག་གིས་མིག་ལ་བརྟེན་ཏེ་ལྟ་བ་ཡིན་གྱི། གློ་བུར་དུ་ལྟ་བ་ཙམ་མ་ཡིན་ནོ་ཞེས་བྱ་བའི་ཐ་ཚིག་གོ །ཀུན་དུ་ཆགས་ཞེས་བྱ་བ་ནི་ཀུན་ནས་དཀྲིས་པར་གྱུར་པའོ། །དྲལ་ཞེས་བྱ་བ་ནི་འདོད་ཆགས་ཀྱིས་ངོ་ཚ་ཤེས་པ་དྲལ་ཅིང་ཕམ་པར་མ་བྱས་པ་སྟེ། ངོ་ཚ་མེད་པར་གྱུར་ཅེས་བྱ་བའི་ཐ་ཚིག་གོ །ལོག་པར་ཞུགས་ཞེས་བྱ་བ་ནི་མི་ཚངས་པར་སྤྱོད་པའོ། །སས་ཞེས་བྱ་བ་ནི་རྡུལ་གྱིས་སོ། །བོང་པ་ཞེས་བྱ་བ་ནི་ས་མཁྲེགས་པའོ། །གསེག་མ་ཞེས་བྱ་བ་ནི་རྡོ་ལ་སོགས་པའི་ཆ་ཤས་ཀྱིས་སོ། །གྱོ་དུམ་ཞེས་བྱ་བ་ནི་གྱོ་མོའི་དུམ་བུའོ། །ངན་པ་ཞེས་བྱ་བ་ནི་སྨད་པའོ། །གྲོང་བ་ཞེས་བྱ་བ་ནི་བླུན་པའོ། །བྱ་བ་མ་ཡིན་པ་བྱེད་པ་ཞེས་བྱ་བ་ནི་སྡིག་པ་བྱེད་པའོ། །ཆོས་མ་ཡིན་པར་གྲགས་པ་ཞེས་བྱ་བ་ནི་སྡིག་པ་ཞེས་བྱ་བར་གྲགས་པའོ། །འདུལ་བ་མ་ཡིན་པར་གྲགས་པ་ཞེས་བྱ་བ་ནི་ཆོ་ག་མ་ཡིན་པ་ཞེས་བྱ་བར་གྲགས་པའོ། །སྨད་པར་བྱ་ཞེས་བྱ་བ་ནི་བཤུང་བར་བྱ་བའོ། །བསྟོད་པར་བྱ་ཞེས་བྱ་བ་ནི་བསྔགས་པར་བྱ་བའོ། །ཉི་མ་གཅིག་ལ་སོགས་པ་ནི་ཚིག་ཐ་དད་པ་ཡིན་ཏེ། ཁ་ཅིག་ཉི་མ་གཅིག་སྤོང་བར་བྱེད་ཁ་ཅིག་ཉི་མ་བདུན་གྱི་བར་དུ་སྤོང་བར་བྱེད་པའི་ཕྱིར་རོ། །སྤོང་བར་བྱེད་ཅེས་བྱ་བ་ནི་གཏོང་བར་བྱེད་པའོ། །གང་གི་ཕྱིར་ཞེས་བྱ་བ་ནི་རྒྱུའི་ཚིག་ཡིན་ནོ། །ཤིན་ཏུ་ཞེས་བྱ་བ་ནི་མངོན་པར་ཞེན་པ་དང་བཅས་པའོ། །ལྟུང་བ་བྱེད་པ་ཞེས་བྱ་བ་ནི་འདུག་པར་བྱེད་པས་སོ། །བརྟུལ་ཞུགས་ལ་ཞེས་བྱ་བ་ནི་ངེས་པ་ལའོ། །ཞུགས་པ་ཞེས་བྱ་བ་ནི་ཁས་བླངས་བ་ལའོ། །མིང་ཞེས་བྱ་བ་ནི་མིང་དུ་གདགས་པའོ། །བྱུང་ངོ་ཞེས་བྱ་བ་ནི་བྱུང་བར་གྱུར་པའོ། །ཁྱིམ་གྱི་ལས་ཀྱི་མཐའ་དག་ཅེས་བྱ་བ་ནི་ཁང་ཁྱིམ་གྱི་ལས་དག་གོ །དང་པོ་ཞེས་བྱ་བ་ནི་ཐོག་མའོ། །རྩོམ་ལ་ཞེས་བྱ་བ་ནི་གཙོ་བོ་སྟེ། ཐོག་མ་རྩོམ་པ་ཞེས་བྱ་བའི་ཐ་ཚིག་གོ །ཆོས་ནི་འདི་ཡིན་ཏེ་ཞེས་བྱ་བ་ནི་ཁྱིམ་གྱི་ལས་ཀྱི་མཐའ་བསྟན་མ་ཐག་པ་སྟེ། ངོ་ཚ་ཤེས་པའི་རྒྱུའི་མཚན་ཉིད་དོ། །རྒྱལ་བ་དབང་པོ་
རྣམས་ཀྱི་ཞེས་བྱ་བ་ནི་དེ་བཞིན་གཤེགས་པ་རྣམས་ཀྱིའོ། །ཆོས་ཞེས་བྱ་བ་ནི་ངོ་ཚ་ཤེས་པ་སྟེ། དགེ་བ་ས་མང་པོ་པ་ཡིན་པའི་ཕྱིར་རོ། །མཆོག་ཅེས་བྱ་བ་ནི་དངོས་སོ། །དགེ་སློང་དག་དེ་ལ་ཞེས་བྱ་བ་ལ་སོགས་པ་ནི་སྐབས་ཀྱི་མཇུག་བསྡུ་བའི་ཕྱིར་རོ། །དེའི་ཚེ་ཞེས་བྱ་བ་ནི་བསྐལ་པའི་དང་པོ་ཡིན་པས་ཡུན་རིང་བའོ། །དེའི་དུས་ཞེས་བྱ་བ་ནི་ལས་ཀྱི་དུས་མ་ཡིན་པས་ཡུན་ཐུང་ངོ༌། །ཡང་ན་དེའི་ཚེ་ཞེས་བྱ་བ་ནི་རྒྱུའི་རྒྱུ་ཡིན་ནོ། །དུས་ཞེས་བྱ་བ་ནི་ཉེ་བའི་རྒྱུ་ཡིན་ནོ། །དགེ་སློང་དག་དེ་ལྟ་བས་ན་ཞེས་བྱ་བ་ནི་མཇུག་བསྡུ་བའི་རྒྱུའི་ཚིག་ཡིན་ནོ། །ན་ཞེས་བྱ་བ་ནི་སྒྲ་ནི་ཡང་ཞེས་བྱ་བའི་དོན་ཏོ། །ཁྱོད་ཀྱིས་ཞེས་བྱ་བ་ནི་ཁྱེད་ཅག་གིས་སོ། །བསླབ་པར་བྱའོ་ཞེས་བྱ་བ་ནི་བརྩོན་པར་བྱ་བ་རྗེས་སུ་བསྒྲུབ་པར་བྱ་བའི་ཐ་ཚིག་གོ །འདུལ་བ་རྣམ་པར་འབྱེད་པའི་ཚིག་རྣམ་པར་བཤད་པ་སློབ་དཔོན་དུལ་བའི་ལྷས་ཉེ་བར་སྦྱར་བ་ལས་ཕམ་པར་འགྱུར་བ་དང་པོའི་མི་ཚངས་པར་སྤྱོད་པའི་ཚིག་རྣམ་པར་བཤད་པ་རྫོགས་སོ།། །།སྔོན་རྫ་མཁན་ཞེས་བྱ་བ་ནི་བྱེ་བྲག་སྟེ། ནོར་ཅན་དག་ནི་མང་བའི་ཕྱིར་རོ། །སྤྱོད་ཡུལ་དུ་ཞེས་བྱ་བ་ནི་བསླབ་པའི་ཡུལ་གྱི་སྤྱོད་ཡུལ་དུའོ། །ཞུགས་པ་ཞེས་བྱ་བ་ནི་སོང་བའོ། །ལམ་གྱིས་འཚོ་བ་དག་ཅེས་བྱ་བ་ནི་གང་དག་ལམ་ལ་བརྟེན་ཏེ་འཚོ་བར་བྱེད་པ་དག་གོ །ལམ་གོལ་བས་འཚོ་བ་དག་ཀྱང་དེ་བཞིན་ནོ། །བཅོམ་ཞིང་ཞེས་བྱ་བ་ནི་གཏིབ་ཅིང་ངོ༌། །རྣམ་པར་དཀྲུགས་ཏེ་ཞེས་བྱ་བ་ནི་ཕྱུང་སྟེའོ། །བྱེད་དོ་ཞེས་བྱ་བ་ནི་ཡང་བྱེད་པའོ། །ཀྱེ་མའོ་ཞེས་བྱ་བ་ནི་ཡི་ཆད་པའི་ཚིག་གོ །སྡུག་བསྔལ་ཞེས་བྱ་བ་ནི་ཉམ་ང་བའོ། །མི་ཟད་ཅེས་བྱ་བ་ནི་ཆེས་ཉམ་ང་བའོ། །ཕའི་ཞེས་བྱ་བ་ནི་ཕའི་རྒྱུད་ལས་བྱུང་བའོ། །བཟོའི་གནས་ཞེས་བྱ་བ་ནི་ལས་ལ་མཁས་པ་ནི་བཟོ་སྟེ་དེའི་གནས་ནི་ཡུལ་ལོ། །ལས་ཀྱི་གནས་ཞེས་བྱ་བ་ནི་བྱི་དོར་གྱི་ལས་རྗེས་སུ་བསྒྲུབ་པ་ནི་ལས་ཏེ། །དེའི་གནས་ནི་ཡུལ་ལོ། །ཡང་ན་བཟོའི་གནས་ཞེས་བྱ་བ་ནི་ནོར་གྱི་དོན་དུ་མ་གྲུབ་པའི་ལས་ཏེ། དེའི་གནས་ནི་གླིང་བུ་བུད་པ་ལ་སོགས་པའི་ཡུལ་ལོ། །ལས་ཀྱི་གནས་ཞེས་བྱ་བ་ནི་ནོར་དང་རྩེད་མོ་ལ་སོགས་པའི་དོན་དུ་མགུ་བར་བྱ་བའི་འབྲས་བུ་མེད་པ་རྩོལ་བའི་ལས་ཏེ། དེའི་གནས་
ནི་ཞིང་དང་ཚོང་ལ་སོགས་པའི་ཡུལ་ལོ། །མཁས་ཀྱིས་ཞེས་བྱ་བ་ནི་ཤེས་ཀྱིས་ཞེས་བྱ་བའི་ཐ་ཚིག་གོ །ལུས་ཀྱིས་ཞེས་བྱ་བ་ནི་ལག་པ་ལ་སོགས་པ་སྟེ། སྦྱང་བ་ལ་སོགས་པ་མེད་པའི་ཕྱིར་རོ། །སྤངས་ཏེ་ཞེས་བྱ་བ་ནི་གཤེར་བར་བྱས་ཏེའོ། །གཞིའི་རྨོང་ཞེས་བྱ་བ་ནི་གཅལ་ལོ། །ཐོག་ཅེས་བྱ་བ་ནི་སྟེང་གིས་སོ། །དགབ་པ་ཞེས་བྱ་བ་ནི་ཆར་དགབ་པོ། །སྟེང་རིམ་ཞེས་བྱ་བ་ནི་སྟེང་གི་ཆ་ཆར་ཁབ་དང་ལྷན་ཅིག་པའོ། །ཆོས་གོས་ཀྱི་གདང་ཁུང་ཞེས་བྱ་བ་ནི་ཆོས་གོས་ཀྱི་གདང་གཞུག་པའི་སྦུབས་སོ། །ཨན་ཁྲིའུ་ཞེས་བྱ་བ་ནི་གླེགས་བམ་གྱི་གཞིའོ། །ཁ་དོག་ཅེས་བྱ་བ་ནི་འཇིམ་པའི་ཁ་དོག་ཅན་ནོ། །སྐུད་པ་ཞེས་བྱ་བ་ནི་ཉུག་པའོ། །བཅེར་ཞེས་བྱ་བ་ནི་གཅིག་ཏུ་སྤུངས་ཏེའོ། །ཚོས་པ་ཞེས་བྱ་བ་ནི་ཕྱི་རིམ་མོ། །ཤིན་ཏུ་ཚོས་པ་ཞེས་བྱ་བ་ནི་ནང་རིམ་མོ། །གྲུབ་པ་ཞེས་བྱ་བ་ནི་གྲུགས་པ་ལ་སོགས་པའི་སྐྱོན་ཆེན་པོ་མེད་པའི་ཕྱིར་རོ། །མཆོག་ཏུ་གྲུབ་པ་ཞེས་བྱ་བ་ནི་སེར་ག་ལ་སོགས་པ་ཆུང་ངུ་ཡང་མེད་པའི་ཕྱིར་རོ། །དམར་བ་ཞེས་བྱ་བ་ནི་མདོག་དམར་བ་ཤས་ཆེ་བའི་ཕྱིར་རོ། །མདོག་དམར་བ་ཞེས་བྱ་བ་ནི་བར་སྐབས་ན་ནག་པོ་ལ་སོགས་པའི་མདོག་ཀྱང་མེད་པའི་ཕྱིར་རོ། །འོད་དམར་པོ་ཞེས་བྱ་བ་ནི་གསལ་བས་འོད་འབྱུང་བ་ཡང་དམར་བ་ཡིན་ནོ། །དུས་སྟོན་བྱའོ་ཞེས་བྱ་བ་ནི་དུས་སྟོན་གྱི་ཉི་མ་རྣམ་པར་གཞག་པར་བྱའོ། །ཉེ་འཁོར་བ་དག་ལ་ཞེས་བྱ་བ་ནི་ཉེ་འཁོར་ན་གནས་པ་དག་ལའོ། །གསོན་ཞིང་ཞེས་བྱ་བ་ནི་མྱ་ངན་ལས་འདས་ཤིང་ངོ༌། །བཞུགས་ཏེ་ཞེས་བྱ་བ་ནི་གཞན་དུ་མ་བཞུད་དེའོ། །འཚོ་ཞིང་ཞེས་བྱ་བ་ནི་ཉིད་ཀྱི་མཐུས་སྐུ་ཕྲིན་ལས་སུ་རུང་ཞིང་ངོ༌། །གཞེས་པ་ཞེས་བྱ་བ་ནི་སྨན་གྱི་མཐུས་སྐུ་ཕྲིན་ལས་སུ་རུང་བའོ། །གདུལ་བར་གྱུར་པའི་དབང་གིས་ཞེས་བྱ་བ་ནི་གདུལ་བར་བྱ་བ་ནི་གདུལ་བའོ། །དེ་དག་ཏུ་སྐྱེས་པ་ནི་གདུལ་བར་གྱུར་པའོ། །དེའི་དོན་ནི་གདུལ་བར་གྱུར་པའི་དབང་སྟེ། གདུལ་བར་གྱུར་པའི་དབང་དེས་སོ། །དུས་དང་དུས་སུ་ཞེས་བྱ་བ་ནི་དུས་དང་པོ་དང་ལྷན་ཅིག་པའི་དུས་ཕྱི་མར་གང་དུ་རྒྱུ་བ་སྟེ། བྱ་བའི་བྱེ་བྲག་ཡིན་ནོ། །ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ་ཞེས་བྱ་བ་ནི་དེའི་སྤྱན་སྔ་ན་འདུག་
པའི་ཕྱིར་དང་བསྙེན་བཀུར་བ་ཡིན་པའི་ཕྱིར་དེ་ལ་བཀའ་སྩལ་གྱི་གཞན་ལ་མ་སྩལ་ཏོ། །དེ་བཞིན་གཤེགས་པ་ཞེས་བྱ་བ་ནི་དངོས་པོ་ཐམས་ཅད་ཇི་ལྟ་བ་དེ་བཞིན་དུ་གང་ལ་འོང་ཞིང་མཁྱེན་པ་སྟེ། གཞན་དུ་མི་གསུང་ཞེས་བྱ་བའི་ཐ་ཚིག་གོ །ལྡེ་མིག་ཀྱོག་པོ་ཞེས་བྱ་བ་ནི་གཏན་པ་དབྱེ་བའི་ལྕགས་བུ་དགུ་པོ་སྟེ། རང་དང་གཞན་གྱི་གནས་དག་ཏུ་དགོས་པའི་ཕྱིར་དེ་ཐོགས་སོ། །ཀུན་དགའི་ར་བ་ནས་ཀུན་དགའི་ར་བར་ཞེས་བྱ་བ་ནི་ཀུན་དགའི་ར་བ་ཞེས་བྱ་བ་ནི་གཙུག་ལག་ཁང་འཁོར་དང་བཅས་པ་དེ་དང་འབྲེལ་པའི་ཀུན་དགའ་ར་བ་གཞན་དེ་ན་ཡོད་པས་དེ་ནས་དེར་ཞེས་སྨོས་ཏེ་བྱ་བའི་བྱེ་བྲག་ཡིན་ནོ། །ལྷག་མ་རྣམས་ལ་ཡང་དེ་བཞིན་དུ་ཤེས་པར་བྱའོ། །གཙུག་ལག་ཁང་ཞེས་བྱ་བ་ནི་ཁྱམས་བཞི་པའམ་ཁྱམས་གསུམ་པའོ། །ཁང་ཁྱིམ་ཞེས་བྱ་བ་ནི་ཁང་པ་ལ་སོགས་པའི་གནས་སོ། །གོལ་བར་འགྲོ་ཞིང་ཞེས་བྱ་བ་ནི་ལམ་ལས་གྱུ་ཞིང་དགོན་པའི་ཕྱོགས་དག་ཏུ་འགྲོ་བའོ། །དྲང་པོར་འགྲོ་བ་ཞེས་བྱ་བ་ནི་ལམ་དྲང་པོར་འགྲོ་བ་ནའོ། །མཐར་གྱིས་གཙུག་ལག་ཁང་རྒྱུ་ཞིང་གཤེགས་པ་ན་ཞེས་བྱ་བ་ནི་མཐར་གྱིས་ཞར་ལ་མཛེས་ཞེས་འཇིག་རྟེན་ལ་བསྟན་པའི་ཕྱིར་རོ། །གཞི་འདི་ཞེས་བྱ་བ་ནི་རྒྱུ་འདིས་སོ། །མུ་སྟེགས་ཅན་དག་ཞེས་བྱ་བ་ནི་གཞན་རབ་ཏུ་བྱུང་བ་དག་གོ །དགེ་སྦྱོང་ཞེས་བྱ་བ་ནི་སྡོམ་བརྩོན་ནོ། །གཽ་ཏ་མ་ཞེས་བྱ་བ་ནི་དྲང་སྲོང་གཽ་ཏ་མའི་རིགས་ལས་བྱུང་བའོ། །ཐག་པའི་གནས་ལྟ་བུའི་ཆོས་ཁ་ཅིག་ཅེས་པ་ནི་ཉེས་པ་ཁ་ཅིག་སྟེ། ཁྱིམ་བྱེད་ཅེས་བྱ་བའི་ཐ་ཚིག་གོ །ཁ་ཟེར་བ་ཞེས་བྱ་བ་ནི་སྐུར་པ་འདེབས་པར་རོ། །འགྱུར་གྱི་ཞེས་བྱ་བ་ནི་འབྱུང་བར་འགྱུར་གྱི་ཞེས་བྱ་བའོ། །ཤིག་ཤིག་ཅེས་བྱ་བ་ནི་གནས་གཞན་དུ་གྱུར་ཅིག་པའོ། །ཆོས་ཀྱི་རྗེ་ཆོས་ཀྱི་རྗེས་ཞེས་བྱ་བ་ནི་བསྟན་པའི་ཆོས་ཀྱི་རྗེ་ནི་གསུང་བའི་ཕྱིར་རོ། །འབྲས་བུའི་ཆོས་ཀྱི་རྗེ་ནི་ཉེ་བར་སྟོན་པའི་ཕྱིར་རོ། །དོན་དམ་པའི་ཆོས་ཀྱི་རྗེ་ནི་གསལ་བར་མཛད་པའི་ཕྱིར་རོ། །བདེ་བར་གཤེགས་པ་ཞེས་བྱ་བ་ནི་མཛེས་པ་ཉིད་དམ་ཡང་ཕྱིར་མི་ལྡོག་པ་ཉིད་དམ་བགྲོད་པ་མ་ལུས་པའི་ཕྱིར་ཏེ། གཟུགས་མཛེས་པ་དང་རིམས་ནད་ཤིན་ཏུ་བྱང་བ་དང་བུམ་པ་གང་བ་ལྟ་བུའོ།།
ཆོས་ཀྱི་རྗེ་ཞེས་ལན་གཉིས་སུ་བཟླས་པ་ནི་གུས་པ་བསྐྱེད་པའི་ཕྱིར་རོ། །བཤིག་པ་ལེགས་སོ་ཞེས་བྱ་བ་ནི་གནོད་པ་མེད་དོ་ཞེས་བྱ་བའོ།། །།བམ་པོ་བཞི་པ། ཤིང་སྲུང་བའི་མི་སྣ་ཆེན་པོ་ལ་གཏོགས་པ་ཞེས་བྱ་བ་ནི་ཤིང་དག་སྲུང་སྦེད་པའི་མི་སྣ་ཆེན་པོ་ལ་གཏོགས་པ་དཔོན་པོ་གང་ཡིན་པའོ། །གཏམ་འདྲེས་པ་ཞེས་བྱ་བ་ནི་ཆུར་ཤོག་འོངས་པ་ལེགས་སོ་ཞེས་བྱ་བ་ལ་སོགས་པའི་གཏམ་འདྲེས་པ་བྱས་པའི་ཕྱིར་རོ། །ཕེབས་པར་སྨྲ་བ་ཞེས་བྱ་བ་ནི་ཡིད་གཅུགས་པ་སྟེ། ཕེབས་པར་སྨྲ་བ་བྱས་པའི་ཕྱིར་རོ། །སྨོས་འགྲིན་ཞེས་བྱ་བ་ནི་ངོ་ཤེས་པ་སྟེ་མིང་དང་རུས་ལ་སོགས་པ་གཟུང་བར་བྱ་བའི་ཕྱིར་རོ། །འགྲོགས་བཤེས་ཞེས་བྱ་བ་ནི་དེ་ལ་ཤེས་པ་སྐྱེས་པའི་ཕྱིར་རོ། །ལུས་འཕགས་མོའི་བུ་ཞེས་བྱ་བ་ནི་སྐྱེས་པའི་བཙུན་མོ་ལུས་འཕགས་མ་ཞེས་བྱ་བའི་བུ་ཡིན་པའི་ཕྱིར་རོ། །མ་ག་དྷཱར་བྱུང་བ་ཞེས་བྱ་བ་ནི་ཡུལ་མ་ག་དྷཱ་དག་ཏུ་སྐྱེས་པའོ། །མ་སྐྱེས་དགྲ་ཞེས་བྱ་བ་ནི་མིང་སྟེ་མངལ་ན་གནས་པ་ཉིད་ཀྱིས་ཕ་ལ་དགྲ་ཉིད་བྱེད་པའི་ཕྱིར་རོ། །ཅི་བདེར་ཞེས་བྱ་བ་ནི་ཅི་འདོད་པར་རོ། །རལ་པ་ཞེས་བྱ་བ་ནི་རྡིབ་པའོ། །འདྲུམས་པ་ཞེས་བྱ་བ་ནི་གས་པའོ། །བཅོས་པ་ཞེས་བྱ་བ་ནི་གསོས་པའོ། །འབྲེལ་པའི་དོན་དུ་ཞེས་བྱ་བ་ནི་འབྲེལ་པའི་དུས་ན་དགོས་པའོ། །སྦས་པ་ཞེས་བྱ་བ་ནི་དབེན་པའི་ཕྱོགས་སུ་བཞག་པའོ། །ཤིན་ཏུ་སྦས་པ་ཞེས་བྱ་བ་ནི་དོན་མེད་པར་མི་དགོད་པར་བྱས་པའོ། །ཤིན་ཏུ་བསྲུངས་པ་ཞེས་བྱ་བ་ནི་གྲོང་ཁྱེར་གསོ་བ་ལ་སོགས་པའི་དོན་དུ་ཡང་མི་དགོད་པར་བྱས་པའོ། །ཡང་ན་བསྲུངས་པ་ཞེས་བྱ་བ་ནི་ཚལ་ཟ་དག་གིས་བཟློག་པའོ། །ཤིན་ཏུ་བསྲུངས་པ་ཞེས་བྱ་བ་ནི་རྒྱལ་པོ་རང་ཉིད་ཀྱིས་བཟློག་པའོ། །སྟེར་བར་སླ་བ་མ་ཡིན་པ་ཞེས་བྱ་བ་ནི་སྦྱིན་པའི་འོས་སུ་བདེ་བླག་ཏུ་མི་བྱེད་པ་གང་ཡིན་པའོ། །ཕྱུང་སྟེ་ཞེས་བྱ་བ་ནི་ཁྲོད་ནས་ཕྱུང་སྟེའོ། །བཅད་ཅིང་ཞེས་བྱ་བ་ནི་ཐད་ཀར་བཅད་ཅིང་ངོ༌། །གཤེགས་ནས་ཞེས་བྱ་བ་ནི་ཆུ་ཚལ་དུ་གཤེགས་པའོ། །འདྲེན་པར་བྱེད་དོ་ཞེས་བྱ་བ་ནི་ཁྱེར་བར་བྱེད་པའོ། །མཁར་གྱི་ཕྱི་ལམ་ཞེས་བྱ་བ་ནི་ཁོར་ཁོར་ཡུག་ཏུ་རྗེས་སུ་འགྲོ་བར་བྱ་བའི་ཕྱིར་ར་བའི་དྲུང་ཐོག་དག་ཏུ་ལམ་
གཏོད་པ་ཡིན་པར་ཤེས་པར་བྱའོ། །ཉུལ་བ་ཞེས་བྱ་བ་ནི་རྗེས་སུ་འགྲོ་བ་སྟེ། ཐོང་མི་པ་ཞེས་བྱ་བ་ནི་གསོད་པར་འདོད་པའོ། །ཆོམ་རྐུན་པ་ཞེས་བྱ་བ་ནི་ལོངས་སྤྱོད་འཕྲོག་པའོ། །དགྲ་བོ་ཞེས་བྱ་བ་ནི་འཁོན་གྱི་ཤ་གླན་པར་འདོད་པའི་དགྲའོ། །འཇིགས་པ་ཞེས་བྱ་བ་ནི་སེམས་འཕར་བའོ། །སྡངས་པ་ཞེས་བྱ་བ་ནི་ཕྱོགས་བསླད་པའམ་འདར་བའོ། །སྤུ་ཟིང་ཞེས་བྱེད་པ་ཞེས་བྱ་བ་ནི་སྤུ་གྱེན་དུ་འགྲེང་བར་གྱུར་པའོ། །དེ་སྐད་མཆིའོ་ཞེས་བྱ་བ་ནི་བདག་གིས་ཇི་སྐད་བརྗོད་པ་དེ་སྐད་མཆིའོ་ཞེས་བྱའོ། །འཕགས་སོ་ཞེས་བྱ་བ་ནི་བསྐྱོད་པའོ། །བསྡད་དོ་ཞེས་བྱ་བ་ནི་འཁོད་པའོ། །མ་སྦྲན་པ་ཞེས་བྱ་བ་ནི་མ་བོས་པའོ། །ཨ་རོག་གྱ་ཞེས་བྱས་ཏེ་ཞེས་བྱ་བ་ནི་ནད་མེད་པར་གྱུར་ཅིག་ཅེས་བྱ་བའི་ཤིས་པ་བརྗོད་དེའོ། །བླང་དུ་ཞེས་བྱ་བ་ནི་བདག་གིར་བྱ་བར་རོ། །རྒྱལ་སྲིད་ཀྱི་དབང་ཕྱུག་ཅེས་བྱ་བ་ནི་རྒྱལ་སྲིད་ཀྱི་མཚན་ཉིད་ཀྱི་དབང་ཕྱུག་སྟེ། ནོར་དང་བཅས་པ་ཉིད་དོ། །མངའ་བདག་ཏུ་ཞེས་བྱ་བ་ནི་རང་དབང་ཅན་ཉིད་དུའོ། །མངའ་བ་ཞེས་བྱ་བར་གྱུར་ནས་ཞེས་བྱ་བ་ནི་དབང་བསྐུར་བར་གྱུར་ནས་ཏེ་རབ་ཏུ་བཞག་ནས་སོ། །མངའ་རིས་ཞེས་བྱ་བ་ནི་ཕེབས་པ་ན་སྟེ། ཡུལ་འཁོར་ནའོ་ཞེས་བྱ་བའི་ཐ་ཚིག་གོ །དགེ་སྦྱོང་ཞེས་བྱ་བ་ནི་རབ་ཏུ་བྱུང་བའོ། །བྲམ་ཟེ་ཞེས་བྱ་བ་ནི་རིགས་ལ་གནས་པའོ། །རང་བཞིན་བཟང་པོར་གྲགས་པ་ཞེས་བྱ་བ་ནི་སྐྱེས་བུ་དམ་པ་ཉིད་དུ་གྲགས་པའོ། །དེང་ཕྱིན་ཆད་ཅེས་བྱ་བ་ནི་དེ་ནས་སོ། །ཁྱུ་མཆོག་གི་བཀའ་ཞེས་བྱ་བ་ནི་ཁྱུ་མཆོག་དང་འདྲ་བའི་བཀའ་སྟེ། འཇིགས་པ་མེད་པའི་ཚིག་ཅེས་བྱ་བའི་ཐ་ཚིག་གོ །རྒྱ་ཆེན་པོ་ཞེས་བྱ་བ་ནི་ཡུལ་ཡངས་པའོ། །གཅིག་ཏུ་དང་དུ་བཞེས་ཤིག་ཅེས་བྱ་བ་ནི་ཅི་བདེར་སྤྱོད་ཅིག་ཅེས་བྱ་བ་ལ་གཅིག་ཏུ་ངེས་པར་བརྟེན་ཅིང་ངོ༌། །འཁོར་གྱི་ནང་དུ་ཞེས་བྱ་བ་ནི་རྒྱལ་བའི་ཚིག་གི་ནང་དུའོ། །ཡང་དག་པར་ཞེས་བྱ་བ་ནི་རིགས་པར་རོ། །སེང་གེའི་སྒྲ་བསྒྲགས་པ་ཞེས་བྱ་བ་ནི་མི་འཇིགས་པར་སྒྲ་བསྒྲགས་པའོ། །ཡོངས་སུ་མ་བཟུང་བ་ལ་ཞེས་བྱ་བ་ནི་བདག་གིར་མ་བྱས་པ་ལའོ། །བསམས་ཏེ་ཞེས་བྱ་བ་ནི་དགོངས་ཏེའོ་།ལྷ་རེ་ཞིག་ཡོངས་སུ་མ་བཟུང་བ་གང་ལགས་པ་དེ་ལ་ལྷ་ཅི་ཞིག་བགྱིར་མཆིས་
ཞེས་བྱ་བས་ནི་ཡོངས་སུ་མ་བཟུང་བ་ལ་བདག་ཉིད་ལ་ཡང་ཉེས་པ་མེད་པའི་ཕྱིར་དང༌། རྗེས་སུ་གནང་བ་ཡང་མི་རིགས་པའི་ཕྱིར་ཅི་བདེར་སྤྱོད་ཅིག་ཅེས་བྱ་བ་དོན་མེད་པ་ཡིན་ནོ་ཞེས་གོ་བར་བྱེད་པའོ། །འཕྲལ་རྩེ་གསུམ་ཞེས་བྱ་བ་ནི་མདུང་རྩེ་གསུམ་པ་དང་འདྲ་བའི་ཡན་ལག་གསུམ་པའོ། །ཁྲོ་གཉེར་ཞེས་བྱ་བ་ནི་སྨིན་མ་འགྱུར་བའོ། །བཞིན་འགྱུར་ཞེས་བྱ་བ་ནི་ཉམས་པ་སྟེ། རང་གི་རང་བཞིན་ལས་ཉམས་པའོ། །མིག་བགྲད་དེ་ཞེས་བྱ་བ་ནི་གདངས་ཏེའོ། །ལག་མཐིལ་གཉིས་འདྲིལ་ཞིང་ཞེས་བྱ་བ་ནི་གཅིག་ལ་གཅིག་དྲུད་ཅིང་ངོ༌། །གཏུམ་པ་ཞེས་བྱ་བ་ནི་འཁྲུག་པའོ། །བརྟུན་ངས་པ་ཞེས་བྱ་བ་བརྟད་སྐྱེན་པ་སྟེ། རྩོལ་བ་ལ་གཞོལ་བ་ཞེས་བྱ་བའི་ཐ་ཚིག་གོ །དྲག་ཤུལ་ཆེ་བ་ཞེས་བྱ་བ་ནི་ཞེ་གནག་པ་ལ་མངོན་པར་ཞེན་པ་ཞེས་བྱ་བའི་ཐ་ཚིག་གོ །ཚམ་ཚོམ་མེད་པ་ཞེས་བྱ་བ་ནི་རྟོག་པ་སྔོན་དུ་མི་གཏོང་བར་བྱེད་པ་ཞེས་བྱ་བའི་ཐ་ཚིག་གོ །ཚིག་སྙིང་པོ་མེད་པ་ཞེས་བྱ་བ་ནི་འབྲས་བུ་མེད་པ་སྟེ། གསད་པའི་རིགས་ལ་ཁྱོད་ཅེས་སྨྲས་ལ་མ་བསད་པར་བཏང་བའི་ཕྱིར་རོ། །སྤྱོས་ཏེ་ཞེས་བྱ་བ་ནི་བསྡིགས་ཏེའོ། །སྐད་པོ་ཆེའི་སྐད་ཕྱུང་ཞིང་ཞེས་བྱ་བ་ནི་སྐད་ཆེན་པོར་སྨྲས་པ་ནི་སྐད་ཆེན་པོ་སྟེ། སྐད་ཆེན་པོའི་སྐད་དེ་ཕྱུང་ཞིང་ངོ༌། །སྒྲ་མཐོན་པོ་ཞེས་བྱ་བ་ནི་སྒྲའི་གསང་མཐོ་བའོ། །སྒྲ་ཆེན་པོ་ཞེས་བྱ་བ་ནི་ཀླག་ཅོར་གྱི་སྒྲ་སྟེ། སྔ་མ་ནི་རྒྱུའི་ཚིག་ཡིན་ལ་ཕྱི་མ་ནི་འབྲས་བུའི་ཚིག་ཡིན་ནོ། །ཡང་ན་སྐད་ཆེན་པོའི་སྐད་ཕྱུང་ཞེས་བྱ་བ་ནི་རངས་པའི་ཚིག་གི་སྐད་པོ་ཆེ་ཞེས་བྱ་བ་སྟེ། དེའི་སྐད་བྱུང་བ་ནི་སྐད་པོ་ཆེའི་སྐད་ཕྱུང་ཞིང་ངོ༌། །སྒྲ་མཐོན་པོའི་ཞེས་བྱ་བ་ནི་སྐད་མཐོན་པོའོ། །སྒྲ་ཆེན་པོ་ཞེས་བྱ་བ་ནི་ཀླག་ཅོར་གྱི་སྒྲའོ་།གྱོད་ཅེས་བྱ་བ་ནི་ཡན་ལག་བཅད་པའོ། །སྲོག་དང་བྲལ་བ་ཞེས་བྱ་བ་ནི་བསད་པའོ། །ལམ་པོ་ཆེ་ཞེས་བྱ་བ་ནི་ཤིན་རྟའི་ལམ་མོ། །སྲང་ཞེས་བྱ་བ་ནི་ལམ་དོགས་པའམ་ཚོང་ཁང་གི་བར་རོ། །བཞི་མདོ་ཞེས་བྱ་བ་ནི་ལམ་གྱི་བཞི་མདོའོ། །སུམ་མདོ་ཞེས་བྱ་བ་ནི་ལམ་གྱི་སུམ་མདོའོ། །བཀའ་འདོགས་པའི་གནས་ཞེས་བྱ་བ་ནི་སྒྲོགས་པའི་གནས་སོ། །གྲོང་རྡལ་བ་དག་ཅེས་བྱ་བ་ནི་གྲོང་ཁྱེར་ན་གནས་པ་དག་གོ །ཡུལ་མི་དག་ཅེས་བྱ་བ་ནི་ཡུལ་ན་
གནས་པ་དག་གོ །ནོར་ཅན་དག་ཅེས་བྱ་བ་ནི་ཚོང་པ་དག་གོ །ཚོང་དཔོན་དག་ཅེས་བྱ་བ་ནི་ཚོང་བའི་གཙོ་བོ་དག་གོ །མ་ཤ་ཀ་ལྔ་ཞེས་བྱ་བ་ནི་པ་ཎ་འགྲོན་བུ་བརྒྱད་ཅུའི་རིན་གྱི་ཚད་ལྔའོ། །མ་ཤ་ཀ་ལྔ་ལས་ལྷག་པས་ཞེས་བྱ་བ་ནི་པ་ཎ་ལྔ་ལས་ལྷག་པས་སོས། །བདག་དང་བཟོད་ཅེས་བྱ་བ་ནི་བདག་དེའོ། །མ་བྱིན་པ་གང་ཡིན་པ་དེ་རྐུ་བའི་གྲངས་སུ་གཏོགས་པ་ཡང་ཡིན་ནོ་ཞེས་བྱ་བ་ནི་མ་བྱིན་པ་ནི་རྐུ་བ་གྲངས་སུ་ཆུད་པ་ཡིན་པའི་ཕྱིར་རོ། །དེ་ཡང་རྐུབ་བདག་གིར་བྱེད་པའི་མཚན་ཉིད་ནི་རྐུ་སེམས་ཡིན་པར་བསྟན་པའི་སར་སྨོས་པར་ཤེས་པར་བྱའོ། །འདི་ལྟ་སྟེ་ཞེས་བྱ་བ་ནི་ཉེ་བར་བསྟན་པའི་ཕྱིར་རོ། །རྒྱལ་སྲིད་ལ་དབང་བསྐུར་བ་ཞེས་བྱ་བ་ནི་རྒྱལ་སྲིད་ལ་བཞག་པས་སོ། །དེ་ཡང་རྒྱལ་པོ་ཞེས་བྱ་བ་ནི་བདག་པོ་ཉིད་ཡིན་པའི་ཕྱིར་རོ། །རྒྱལ་རིགས་ཞེས་བྱ་བ་ནི་སྐྱེ་དགུ་བསྲུང་བའི་ཕྱིར་རོ། །སྤྱི་བོར་དབང་བསྐུར་བ་ཞེས་བྱ་བ་ནི་སྐྱེ་བོའི་སྟེང་དུ་བཞག་པའི་ཕྱིར་རོ། །བློན་པོ་ཆེན་པོ་ཞེས་བྱ་བ་ནི་རྒྱལ་པོ་དང་འདྲ་བའོ། །བློན་པོ་ཞེས་བྱ་བ་ནི་རྗེས་སུ་འབྲང་བའོ། །རྩིས་མཁན་ཞེས་བྱ་བ་ནི་སྐར་མཁན་ནོ། །སྣ་ཆེན་པོ་ལ་གཏོགས་པ་ཞེས་བྱ་བ་ནི་དབང་དུ་བསྐོས་པའོ། །གསང་ཚིག་མཐུན་པས་འཚོ་བ་ཞེས་བྱ་བ་ནི་གསང་ཚིག་གཅིག་པའོ། །ཀྱེ་ཞེས་བྱ་བ་ནི་བོད་པའོ། །རྐུན་མ་ཞེས་བྱ་བ་ནི་འཇབ་བུས་རྐུ་བའོ། །བྱིས་པ་ཞེས་བྱ་བ་ནི་རང་གིས་མི་ཤེས་པའོ། །བླུན་པ་ཞེས་བྱ་བ་ནི་ལུང་ཕོག་པ་མི་ཤེས་པའོ། །རྐུ་བ་ཞེས་བྱ་བ་ནི་མཐུས་རྐུ་བའོ། །རྫོགས་པར་བསྙེན་པ་ཞེས་བྱ་བ་ནི་ཕུན་སུམ་ཚོགས་པ་ཐམས་ཅད་རྫོགས་པའི་གནས་མྱ་ངན་ལས་འདས་པར་ཁད་བསྙེན་ཅིང་མཐུན་པར་འགྱུར་བ་སྟེ། དགེ་སློང་གི་དངོས་པོ་ཡང་དག་པར་བླངས་པས་མྱ་ངན་ལས་འདས་པ་དང་ཉེ་བར་གྱུར་པའི་ཕྱིར་རོ། །དེ་ཡང་ཞེས་བྱ་བ་ལ་ཡང་ཞེས་བྱ་བ་ནི་སྔ་མ་ལ་ལྟོས་པའི་སྒྲ་ཡིན་ནོ། །སྤྱི་སྡོམ་ལ་ཞེས་བྱ་བ་ནི་སྡོམ་གྱི་ཚིགས་སུ་བཅད་པ་རྣམས་སྤྱིར་བསྡུས་པའི་སྡོམ་མོ། །ཡོ་བྱད་ཅེས་བྱ་བ་ནི་རྫས་སོ། །ལྕི་བ་དག་ཅེས་བྱ་བ་ནི་རིན་ཆེ་བ་དག་གོ །རྒྱུ་གསུམ་གྱིས་ཞེས་བྱ་བ་ནི་དུས་གཅིག་ཏུའང་རྣམ་གྲངས་ཀྱིས་སོ། །བདག་ཉིད་ཀྱིས་རྐུ་བ་ཞེས་བྱ་བ་ནི་རང་གི་ལུས་ཀྱིས་སོ། །བདག་ཉིད་ཀྱིས་རྐུར་འཇུག་
པ་ཞེས་བྱ་བ་ནི་རང་གི་ལུས་ལ་གནས་པའི་ཁར་བའམ། ཤིང་ངམ་ཐལ་ཕྱགས་སམ་གཞན་གྱི་ལག་པའམ། གཞན་ཡང་རྒྱུ་གང་ཡང་རུང་བས་སོ། །རྐུབ་དང་རྐུར་འཇུད་པ་གཉིས་ཀྱིས་རང་གི་ངོ་བོ་བསྟན་པའི་ཕྱིར་བདག་ཉིད་ཀྱིས་གནས་ནས་གནས་སུ་སྦེད་པར་བྱེད་པ་སྟེ་ཞེས་བྱ་བ་གསུངས་སོ། །ཞལ་ཏ་བྱས་ཏེ་རྐུ་བ་ཞེས་བྱ་བ་ནི་རང་གིས་ཞལ་ཏ་བྱས་ཏེ་རང་གི་མངོན་སུམ་དུ་བསྐོས་པ་གཞན་རྒྱུར་གྱུར་པས་རྐུ་བའོ། །ཞལ་ཏ་བྱས་ཏེ་རྐུར་འཇུག་པ་ཞེས་བྱ་བ་ནི་གཞན་གྱི་ལུས་དང་འབྲེལ་པའི་ཁར་བའམ། ཤིང་ངམ་ཐལ་ཕྱགས་སམ། མཚོན་ལ་སོགས་པ་དང༌། གཞན་གྱིས་བསྐོས་པའི་སྐྱེས་པ་དང༌། བུད་མེད་ལ་སོགས་པས་རྐུ་བའོ། །འདིར་ཡང་རྐུ་བ་དང་རྐུར་འཇུག་པ་གཉིས་ཀྱི་རང་གི་ངོ་བོ་བསྟན་པའི་ཕྱིར་རོ། །ཞལ་ཏ་བྱས་ཏེ་གནས་ནས་གནས་སུ་སྦེད་པར་བྱེད་པས་ཏེ་ཞེས་བྱ་བ་གསུངས་སོ། །མངགས་པས་རྐུ་བ་ཞེས་བྱ་བ་ནི་མངགས་པ་རྒྱུར་གྱུར་པ་ལྐོག་ན་འདུག་པས་རྐུ་བའོ། །མངགས་པས་རྐུར་འཇུག་པ་ཞེས་བྱ་བ་ནི་མངགས་པ་ལྐོག་ན་འདུག་པའི་ལུས་དང་འབྲེལ་པ་ཁར་བ་ལ་སོགས་པ་དང་དེས་བསྐོས་པའི་སྐྱེས་པ་དང་བུད་མེད་ལ་སོགས་པས་རྐུ་བའོ། །འདིར་ཡང་རྐུ་བ་དང་རྐུར་འཇུད་པ་གཉིས་ཀྱིས་རང་གི་ངོ་བོ་བསྟན་པའི་ཕྱིར་མངགས་པས་གནས་ནས་གནས་སུ་སྦེད་པར་བྱེད་པས་ཏེ་ཞེས་བྱ་བ་གསུངས་སོ། །གསུམ་པ་དང་པོ་འདི་ནི་རང་གིས་སམ་གཞན་གྱིས་སམ་མངོན་སུམ་དུའོ་ལྐོག་ཏུ་རྐུ་བ་ལ་བྱེ་བྲག་འགའ་ཡང་མེད་དོ་ཞེས་བསྟན་པའི་ཕྱིར་གསུངས་སོ། །གསུམ་པ་གཉིས་པ་ནི་མ་བྱིན་པ་ཉིད་དང༌། །དངོས་པོ་ཡོངས་སུ་ཚང་བ་དང༌། གནས་ནས་སྤོ་བ་དག་ཕམ་པར་འགྱུར་བའི་ཡན་ལག་ཉིད་ཡིན་པར་བསྟན་པའི་ཕྱིར་གསུངས་སོ། །གསུམ་པ་གསུམ་པ་ནི་རྐུ་བ་དང་བདག་གིར་བྱེད་པའི་མཚན་ཉིད་ཀྱི་རྐུ་སེམས་དང་ལུས་དང་ངག་གི་ཚོལ་བ་དག་ཕམ་པར་འགྱུར་བའི་ཡན་ལག་ཉིད་བསྟན་པའི་ཕྱིར་གསུངས་སོ། །གསུམ་པ་བཞི་པ་ནི་མིའི་འགྲོ་བ་བས་བདག་གིར་བྱས་པ་ཉིད་ཕམ་པར་འགྱུར་བའི་ཡན་ལག་ཉིད་ཡིན་པར་བསྟན་པའི་ཕྱིར་གསུངས་སོ། །གསུམ་པ་ལྔ་པ་ནི་མིའི་འགྲོ་བ་བས་ཡོངས་སུ་གཟུང་བར་འདུ་ཤེས་པ་
ཉིད་ཕམ་པར་འགྱུར་བའི་ཡན་ལག་ཉིད་དུ་བསྟན་པའི་ཕྱིར་གསུངས་སོ། །དགེ་སློང་གིས་གཞན་དག་གི་ཡོ་བྱད་དག་ལྕི་བ་དག་རྒྱུ་བཞིས་མ་བྱིན་པར་ལེན་ན་ཕམ་པར་འགྱུར་རོ་ཞེས་བྱ་བ་ལ་སོགས་པ་བཞི་པ་བཞི་ནི་སྔར་གསུམ་པ་ལྔས་བསྟན་པའི་ཡན་ལག་རྣམས་ལ་སློབ་མ་རྣམས་གོམས་པར་བྱ་བའི་ཕྱིར་བསྟན་ཏེ་གསུངས་པ་ཡིན་ནོ། །ཟངས་པོ་ཆེ་ཞེས་བྱ་བ་ནི་ཟངས་ཆེན་པོའོ། །ཟངས་ཞེས་བྱ་བ་ནི་ཟངས་ཐ་མལ་པའོ། །རྫ་བོ་ཞེས་བྱ་བ་ནི་རྫ་མ་ཆེན་པོའོ། །སྒྲོམ་ཞེས་བྱ་བ་ནི་སྤྲོག་མའོ། །ཀོ་ལྤགས་ཞེས་བྱ་བ་ནི་སྒྲོ་བ་དང་རྐྱལ་པ་ལ་སོགས་པའོ། །གླང་པོ་ཆེའི་ཚོགས་ཞེས་བྱ་བ་ལ་སོགས་པ་ལ་ཚོགས་ཞེས་བྱ་བ་ནི་འདུས་པའོ། །དཔུང་བུ་ཆུང་ཞེས་བྱ་བ་ནི་རྐང་ཐང་ངོ༌། །བདག་གིར་བྱེད་པ་ཞེས་བྱ་བ་ནི་བདག་གིའོ་ཞེས་སོ་སོར་བདག་གིར་བྱེད་པའོ། །བསྲུངས་ཤིང་བདག་གིར་མ་བྱས་པ་ཞེས་བྱ་བ་ནི་སྲུང་བར་བྱེད་པ་དག་གིས་སོ། །ཁ་ལུངས་པ་ཞེས་བྱ་བ་ནི་འབྲོག་དགོན་པ་ན་གནས་པའོ། །ལ་གཅན་པ་ཞེས་བྱ་བ་ནི་ལ་སྲུང་བར་བསྐོས་པའོ། །རྐུན་རྫས་ཞེས་བྱ་བ་ནི་ཆོམ་རྐུན་བྱས་པའི་རུལ་ལོ། །བདག་གིར་བྱས་ཤིང་མ་བསྲུངས་པ་ཞེས་བྱ་བ་ནི་སྲུང་མ་མེད་ཀྱང་བདག་གིར་བྱས་པ་སྟེ། དེས་ཀྱང་ཕམ་པར་གྱུར་པ་སྟོན་ཏོ། །རང་གི་འདུ་ཤེས་ཀྱིས་ལེན་པར་མི་བྱེད་ཅེས་བྱ་བ་ལ་སོགས་པ་ལྔ་པས་ནི་རྐུ་སེམས་ཉིད་སྟོན་པར་བྱེད་དོ། །རང་གི་འདུ་ཤེས་ཞེས་བྱ་བ་ནི་རང་གི་བློའོ། །ཡིད་གཅུགས་པའི་འདུ་ཤེས་ཞེས་བྱ་བ་ནི་ནོར་གཅིག་པ་ཉིད་ཀྱི་བློའོ། །རེ་ཞིག་གི་འདུ་ཤེས་ཞེས་བྱ་བ་ནི་ཕྱིར་སྦྱིན་པའི་བློའོ། །གཞན་ལ་གོ་བར་བྱེད་པ་ཞེས་བྱ་བ་ནི་གང་གི་ཡིན་པ་དེ་ཉིད་ལ་སྦྱིན་པར་བྱ་བའམ། རིན་གྱིས་བསབ་པར་བྱའོ་ཞེས་བྱ་བ་ལ་སོགས་པར་གོ་བར་བྱ་བ་དང་གཞན་རྐུ་སེམས་ཡོད་དོ་ཞེས་སྐུར་བ་འདེབས་པ་བཟློག་པའི་ཕྱིར་རོ། །དེ་ལ་རྐུ་སེམས་ཉེ་བར་གནས་པར་གྱུར་པ་སྟེ་ཞེས་བྱ་བ་ནི་རྨོངས་པ་དང་ཡོངས་སུ་མ་བཟུང་བར་འདུ་ཤེས་པ་དང་དེའི་ཡིན་པར་མི་ཤེས་པ་དང༌། མི་མ་ཡིན་པས་ཡོངས་སུ་གཟུང་བར་འདུ་ཤེས་པ་ལ་སོགས་པ་རྣམ་པར་བཟློག་པའི་ཕྱིར་གསུངས་སོ། །རྒྱུ་ལྔས་ནི་ལྟུང་བ་མེད་དེ་ཞེས་བྱ་བ་ལ་སོགས་པ་ལྔ་པ་ཐ་མ་ཚིག་གི་དོན་
ཡང་དེ་བཞིན་དུ་ཤེས་པར་བྱའོ། །སྡོམ་ལ། ས་ལ་འདུག་དང་སྣོད་འདུག་དང༌། །ཞེས་བྱ་བ་ལ་སོགས་པ་ནི་གཞི་བརྟག་པའི་ཕྱིར་གསུངས་སོ། །འདི་ལྟར་ཞེས་བྱ་བ་ནི་བྱུང་བའི་མཐའ་དང་བྲལ་བ་སྟེ། སྲིད་པ་བསྟན་པའི་ཚིག་ཡིན་ནོ། །མགུལ་གདུབ་ཅེས་བྱ་བ་ནི་མགུལ་དུ་གདགས་པའི་གདུ་བུ་ཟླུམ་པོའོ། །གདུ་བུ་རྒྱན་ཅན་ཞེས་བྱ་བ་ནི་ལག་ངར་ལ་བསྐོན་པའི་གདུ་བུ་རྒྱན་ཅན་སྲབ་མོའོ། །དཔུང་རྒྱན་ཞེས་བྱ་བ་ནི་དཔུང་པའི་རྒྱན་ནོ། །དོ་ཤལ་ཞེས་བྱ་བ་ནི་མུ་ཏིག་གི་དོ་ཤལ་རིང་དུ་འཕྱང་བའོ། །སེ་མོ་དོ་ཞེས་བྱ་བ་ནི་མུ་ཏིག་གི་སེ་མོ་དོ་ནུ་མར་སླེབ་ཙམ་དུ་འཕྱང་བའོ། །མུ་ཏིག་གི་ཆུན་པོ་ཞེས་བྱ་བ་ནི་མུ་ཏིག་གི་དོ་ཆུན་མགུལ་ལ་རེག་པར་འཁོར་བའོ། །དེ་ལ་སྦྱོར་བས་ཞེས་བྱ་བ་ནི་དེ་རྐུ་འདོད་པས་སོ། །ནོམ་ཕ་ཞེས་བྱ་བ་ནི་ཅུང་ཞིག་རེག་པའོ། །ཉུག་པ་ཞེས་བྱ་བ་ནི་དམ་དུ་རེག་པའོ། །ཉེས་པ་སྦོམ་པོར་འགྱུར་རོ་ཞེས་བྱ་བ་ནི་ཕམ་པར་འགྱུར་བའི་བསམ་པས་ཞུགས་པའི་ཕྱིར་སྦྱོང་བ་ལས་བྱུང་བ་ཡིན་ནོ། །དངོས་པོ་ཚང་ན་ཞེས་བྱ་བ་ནི་མ་ཤ་ཀའི་རིན་དུ་ཆོག་ནའོ། །མུ་གཅིག་པ་ཞེས་བྱ་བ་ནི་ལུས་གཅིག་པའོ། །གྱོང་གྲུགས་ཞེས་བྱ་བ་ནི་ཁགས་ཁོགས་སུ་གྱུར་པའོ། །གས་པ་ཞེས་བྱ་བ་ནི་རལ་བའོ། །ཡི་གེ་བྲིས་པ་ཞེས་བྱ་བ་ནི་ཡི་གེས་ཁྱབ་པའོ། །ཚོན་སྣ་ཚོགས་བཀྲ་ཞེས་བྱ་བ་ནི་ཁ་དོག་ཐ་དད་པའོ། །ཕྱོགས་ཐ་དད་པ་ཞེས་བྱ་བ་ནི་སོ་སོ་བ་སྟེ། དེ་ནི་གནས་ཐ་དད་པར་བསྟན་པའི་ཕྱིར་རོ། །མཚམས་ཅན་ཞེས་བྱ་བ་ནི་འཕྲོ་སྦྱོར་བས་སྤྲད་པའོ། །གཡུལ་ཞེས་བྱ་བ་ནི་འབྲུའི་གནས་སོ། །དོང་ཞེས་བྱ་བ་ནི་འབྲུའི་གནས་བརྐོས་པའོ། །མུ་དང་ཁ་ད་ཆད་ཅེས་བྱ་བ་ནི་ཁ་དང་མཉམ་པའོ། །ཤིང་བུས་བར་དུ་ཆོད་པའམ་ཞེས་བྱ་བ་ལ་སོགས་པ་ལ། བར་དུ་ཆོད་པ་ཞེས་བྱ་བ་ནི་བར་ཆད་བྱས་པ་སྟེ། དེ་དག་ནི་མ་གང་བའི་དབྲེས་ནས་བཟུང་སྟེ། དོང་གི་ཁའི་བར་དུ་གྱེན་དུ་རིམ་པར་གནས་པར་ཤེས་པར་བྱའོ། །འབྱིན་པར་བྱེད་ཅེས་བྱ་བ་ནི་རྩ་ཐོན་དུ་འབྱིན་པར་བྱེད་པའོ། །ཁུར་འདྲག་པར་བྱེད་ཅིང་ཞེས་བྱ་བ་ནི་ཁུར་དུ་དྲགས་ནས་ཁུར་བརྐུའོ་སྙམ་པའི་སེམས་ཀྱིས་རྐུ་བའི་སྐབས་ཡིན་པས་དེའི་མདུན་རོལ་དུ་རྫས་རེ་རེ་ནས་འབྱིན་ཅིང་སྡུད་
པ་དང༌། ཁུར་འདྲག་པའི་ཚེ་ན་གནས་ནས་སྤོས་པ་མ་ཡིན་ཏེ། འོག་མ་དག་ལ་ཡང་དེ་བཞིན་དུ་ཤེས་པར་བྱའོ། །ཁང་ཐོག་དག་ཏུ་ཞེས་བྱ་བ་ནི་ཁང་པ་ནི་ཁྱིམ་སྟེ། དེའི་ཐོག་དག་ཏུའོ། །ཡ་གད་ཅེས་བྱ་བ་ནི་རྐང་རྟེན་བརྟན་པའོ། །ཁྲི་འཕང་ཞེས་བྱ་བ་ནི་ཤིང་གི་གོང་ནས་གོང་དུ་བརྩེགས་པའོ། །ཐག་སྐས་ཞེས་བྱ་བ་ནི་ཤིང་རིང་པོ་ལ་རྐང་པ་གཞག་པའི་ཕྱིར། །ཐག་པས་བཅིངས་པ་བྱས་པའོ། །དཔྱད་ཐག་ཅེས་བྱ་བ་ནི་ཐག་པའི་ཐོག་མ་ལ་ལྕགས་ལས་བྱས་པའི་ལྕགས་ཀྱོ་བཏགས་པ་འཕང་བའོ། །དག་ར་ཞེས་བྱ་བ་ནི་སྒོ་ཁའི་བར་རིམ་མོ། །ཁང་པ་བརྩེགས་པ་ཞེས་བྱ་བ་ནི་ར་བའི་ཁྱིམ་མོ། །ཁང་པ་བརྩེགས་པའི་སྟེང་ཞེས་བྱ་བ་ནི་མཐོངས་ཡོན་པོ་ལ་སོགས་པ་བཏོད་པའོ། །ཁྱིམ་དག་ཅེས་བྱ་བ་ནི་གནས་པའི་ཁྱིམ་དག་གོ །ཆུའི་གནས་དག་ཅེས་བྱ་བ་ནི་ཆུའི་ཁང་པ་དག་གོ །འདུག་པའི་ཤིང་ལྗོན་པ་ཞེས་བྱ་བ་ནི་ངལ་བསོ་བའི་ཤིང་ལྗོན་པའོ། །ཟས་ལ་ཆགས་པ་ཞེས་བྱ་བ་ནི་ཟས་འདོད་པའོ། །དེ་འདི་སྙམ་དུ་ཞེས་བྱ་བ་ལ་སོགས་པ་ནི་མིས་བདག་གིར་བྱ་བ་དང་མ་བྲལ་བའི་ཕྱིར་དང༌། མིས་ཡོངས་སུ་གཟུང་བའི་འདུ་ཤེས་པའི་ཕྱིར་དེ་ལ་སྨད་དོ། །སྐོན་པ་ཞེས་བྱ་བ་ནི་གཟེབ་གཞི་དང་བཅས་པའོ། །རྩེད་མོའི་བྱ་ཞེས་བྱ་བ་ནི་རྩེ་བའི་ཆེད་ཀྱི་བྱའོ། །བདག་པོ་དང་བཅས་པ་ཞེས་བྱ་བ་ནི་བདག་པོ་མི་དང་བཅས་པའོ། །བདག་པོ་མེད་པ་ཞེས་བྱ་བ་ནི་གང་ལ་མིས་བདག་གིར་བྱས་པའི་བདག་པོ་མེད་པའོ། །ཕྱོགས་བཞིར་ཞེས་བྱ་བ་ནི་ངོས་བཞིར་རོ། །ཡམ་སྲེག་ཤིང་ཞེས་བྱ་བ་ནི་བུད་ཤིང་ངོ༌། །མིག་སྔར་སྣང་བ་ཞེས་བྱ་བ་ནི་གནས་གཞན་དུ་གྱུར་པས་དེ་ལ་བརྐུས་པར་བརྗོད་པར་བྱའོ། །འདི་ལ་གནས་ཀྱི་གཞི་གཏང་བ་ནི་སྦྱོར་བའོ། །ལྡང་བ་ལ་སོགས་པ་ནི་སྦྱོར་བའི་སྦྱོར་བར་ཤེས་པར་བྱའོ། །དགེ་སློང་གི་བདག་པོ་དང་བཅས་པའི་གཏེར་གྱི་ཕྱིར་ཞེས་བྱ་བ་ལ་སོགས་པ་ལ་ནི་དཀྱིལ་འཁོར་ཉུག་པ་ལ་སོགས་པ་རྩོམ་པ་ནི་སྦྱོར་བར་ཤེས་པར་བྱའོ། །སྤང་ལེབ་ཅེས་བྱ་བ་ནི་ཤིང་ལེབ་པོ། །རྩིག་རྨང་ཞེས་བྱ་བ་ནི་ཐེམ་པའོ། །ཟུང་ཞེས་བྱ་བ་ནི་གླང་པོ་ཆེའི་སོའི་རྣམ་པ་འདྲ་བའི་ཕུར་པའོ། །ཕྱུང་སྟེ་རྐུ་ཞེས་བྱ་བ་ནི་ཕྱུང་བའི་རྣམ་པ་དགུ་པའོ། །བཞོན་པ་ཞེས་བྱ་བ་ནི་རྟ་ལ་སོགས་པའི་སྤྱིའོ། །
བཤམས་པ་ཞེས་བྱ་བ་ནི་བརྒྱན་པའོ། །སྲང་གི་ཁང་པ་ཞེས་བྱ་བ་ནི་ཤིང་རྟའི་ལམ་གྱི་ཁང་བཟངས་ཉིས་བརྩེགས་ལ་སོགས་པའོ། །གྲོང་པོ་ཆེའི་བཞོན་པ་ཞེས་བྱ་བ་ལ་སོགས་པ་ནི་བཞོན་པའི་བྱེ་བྲག་ཡིན་ནོ། །ཚོ་བ་ཞེས་བྱ་བ་ནི་འཚག་རྒྱས་པའོ། །རིད་པ་ཞེས་བྱ་བ་ནི་མ་རྒྱས་པའོ། །ཉམ་ཆུང་བ་ཞེས་བྱ་བ་ནི་སྟོབས་ཉམས་པའོ། །ཀོ་བ་ཞེས་བྱ་བ་ནི་པགས་པ་སྐམས་པའོ། །བསྐམས་པ་ཞེས་བྱ་བ་ནི་ཤ་ཉམས་པའོ། །ལུས་མ་ཐོབ་པ་ཞེས་བྱ་བ་ནི་བརྩོན་པ་མེད་པའོ། །ཁང་པ་བརྩེགས་པ་ཕྱེད་ཅེས་བྱ་བ་ནི་ཐོག་མཐོར་མ་བསྒྲེང་བའོ། །ཟུང་ཁྱོགས་ཞེས་བྱ་བ་ནི་མི་གཉིས་ཀྱིས་འདེགས་པའོ། །ཁྱོགས་སྤྱིལ་ཞེས་བྱ་བ་ནི་ཟུང་ཁྱོགས་གཡོགས་མ་མེད་པའོ། །བྱིས་པའི་བཞོན་པ་ཞེས་བྱ་བ་ནི་ཁྱེའུ་དང་བུ་མོ་དག་བཀུར་བའོ། །གྲུ་ཚུགས་ཞེས་བྱ་བ་ནི་སྒྲོལ་བ་དང་ཕྱིར་སྒྲོལ་བའི་ཕྱོགས་སོ། །ཚུ་རོལ་ཞེས་བྱ་བ་ནི་རང་གི་ཡུལ་ལོ། །ཕ་རོལ་ཞེས་བྱ་བ་ནི་འགྲམ་གཉིས་པའོ། །སྐམ་ལ་ཕྱུང་སྟེ་རྐུ་བར་བྱེད་པ་ཞེས་བྱ་བ་ནི་སྐམ་པའི་ལམ་དུ་འཇུད་པར་བྱེད་པའོ། །རྫབ་ཏུ་སྦེད་པར་བྱེད་ཅེས་བྱ་བ་ནི་འདབ་རྫ་མ་ཀྱི་ནང་དུ་འཇུག་པར་བྱེད་པའོ། །བདེ་བ་མེད་པར་བྱ་ཞེས་བྱ་བ་ལ། །བདེ་བ་ཞེས་བྱ་བ་ནི་བདེ་བར་འགྱུར་བ་སྟེ། བྱ་བ་གང་ལ་དེ་གཞན་ལས་འབྱུང་བར་མ་གྱུར་ཅིག་སྙམ་དུ་འཇུག་པ་ཡོད་པ་དེ་ནི་བདེ་བ་མེད་པར་བྱ་བའོ། །དེའི་བསམ་པས་ཞེས་བྱ་བ་ནི་ཕྲག་དོག་གི་སེམས་ཀྱིས་ཞེས་བྱ་བའི་ཐ་ཚིག་གོ །གཅོག་པར་བྱེད་ཅེས་བྱ་བ་ནི་དུམ་གྲུགས་སུའོ། །འཆག་པར་བྱེད་ཅེས་བྱ་བ་ནི་ཚལ་པར་རོ། །སྟོན་ཀ་འབྱུང་བ་ཞེས་བྱ་བ་ནི་གང་དག་སྟོན་འབྲས་བུར་འགྱུར་བའོ། །རྣང་ཞེས་བྱ་བ་ནི་ཞིང་ངོ༌། །ཡུར་བ་ཞེས་བྱ་བ་ནི་རྣང་ཡུར་སྲོལ་ཞེས་བྱ་བའི་ཐ་ཚིག་གོ །དེའི་འབྱོར་པ་ཞེས་བྱ་བ་ནི་ཆུ་དེས་ཞིང་དེ་ལ་འབྲས་བུ་གྲུབ་པར་བྱས་པ་དེའི་འབྱོར་པ་སྟེ། དེའི་དོན་དུ་ཆུ་རྐུ་བར་བྱེད་ཅེས་བྱ་བའི་ཐ་ཚིག་གོ །གྲུ་ནི་གསུམ་སྟེ་ཞེས་བྱ་བ་ནི་དེ་གསུམ་ཀ་ནི་ཕལ་ཆེར་རྒུད་པར་འགྱུར་བ་ཡིན་པའི་ཕྱིར་རོ། །བུམ་པའི་གྲུ་ཞེས་བྱ་བ་ནི་བུམ་པ་ཁ་སྦུབ་ཏུ་བཞག་པ་དག་གིས་འགྲུབ་པའི་གྲུ་གང་ཡིན་པའོ། །རྫ་མའི་གྲུ་ཞེས་བྱ་བ་ནི་རྫ་མ་དག་གིས་འགྲུབ་པའི་གྲུ་གང་ཡིན་པའོ། །ར་རྐྱལ་གྱིའོ་ཞེས་
བྱ་བ་ནི་རའི་རྐྱལ་པས་འགྲུབ་པ་གང་ཡིན་པའོ། །ཟོང་ལྕི་ཞེས་བྱ་བ་ནི་འབྱིང་བའོ། །རིན་ལྕི་ཞེས་བྱ་བ་ནི་རིན་ཆེ་བའོ། །ཟོང་ཡང་ཞེས་བྱ་བ་ནི་འཕྱོ་བའོ། །རིན་ཡང་ཞེས་བྱ་བ་ནི་རིན་ཆུང་བའོ། །ནོར་བུ་ཞེས་བྱ་བ་ནི་འོད་ཀྱི་བདག་ཉིད་ཅན་དུ་དུག་སེལ་བའོ། །བཻཌཱུཪྻ་ཞེས་བྱ་བ་ནི་རི་བི་རུ་ར་ལས་བྱུང་བས་བཻཌཱུཪྻ་ཞེས་བྱ་སྟེ། རིན་པོ་ཆེ་སྔོན་པོར་སྣང་བའོ། །མན་ཤེལ་དཀར་པོ་ཞེས་བྱ་བ་ནི་ཤང་ཁ་ཤི་ལ་ཞེས་བྱ་སྟེ། རིན་པོ་ཆེ་དུང་གི་རྣམ་པ་ལྟར་མཆོག་ཏུ་དཀར་བའོ། །བྱི་རུ་ཞེས་བྱ་བ་ནི་བྱི་རུའི་རིགས་ཁྱད་པར་འཕགས་པའོ། །དངུལ་ཞེས་བྱ་བ་ནི་དངུལ་ཉིད་དོ།། ས་ལེ་སྦྲམ་ཞེས་བྱ་བ་ནི་གསེར་རོ། །རྡོའི་སྙིང་པོ་ཞེས་བྱ་བ་ནི་མ་རྒད་དོ། །སྦུག་ཅེས་བྱ་བ་ནི་རིན་པོ་ཆེའི་རིགས་ཤིན་ཏུ་གཙོ་བོ་སྔོན་པོ་དང༌། སེར་པོ་དང༌། དམར་པོ་དང༌། དཀར་པོར་སྣང་བའི་བདག་ཉིད་ཅན་ཏེ། ཁྲ་བོ་ཞེས་བྱ་བའི་ཐ་ཚིག་གོ །དཀར་པོ་ཞེས་བྱ་བ་ནི་པདྨ་རཱ་ག་ལའོ། །གཡས་སུ་འཁྱིལ་ཞེས་བྱ་བ་ནི་དུང་དེ་ཤིས་པ་སྐྱེད་པར་བྱེད་ཕས་རིན་པོ་ཆེའི་བྱེ་བྲག་ཁོ་ན་ཡིན་ནོ། །སྲིན་བལ་ཞེས་བྱ་བ་ནི་ཁ་ཆུ་དར་གྱི་ཚིགས་མའོ། །ལྕགས་ཞེས་བྱ་བ་ནི་ལྕགས་ཉིད་དོ། །རྡོ་ཞེས་བྱ་བ་ནི་རྡོ་བའོ། །ཁྲོ་ཆུ་ཞེས་བྱ་བ་ནི་མེ་ལོང་རྒྱུ་ལྕགས་འདྲ་བའོ། །ན་མེ་རུ་ཞེས་བྱ་བ་ནི་མེ་ཏོག་གི་བྱེ་བྲག་གོ །ཐོབ་རྒྱལ་ཞེས་བྱ་བ་ནི་གང་གིས་གང་ཟིན་པ་དེ་དེའི་ཡིན་པར་རྣམ་པར་གཞག་པར་བྱའོ། །གོས་འཆིང་བར་བྱེད་ཅེས་བྱ་བ་ནི་མདོམས་དཀྲིས་པ་བསྡམས་པས་བརྟན་པར་བྱེད་པའོ། །དུས་ཚིགས་ཐམས་ཅད་པ་ཞེས་བྱ་བ་ནི་རང་གི་དུས་ཚིགས་ཐམས་ཅད་དུ་ཁྱབ་པར་བྱེད་པ་གང་ཡིན་པའོ། །དུས་ཐམས་ཅད་པ་ཞེས་བྱ་བ་ནི་དུས་ཚིགས་གཞན་གྱི་དུས་ཐམས་ཅད་དུ་ཡང་ཁྱབ་པར་བྱེད་པ་གང་ཡིན་པའོ། །སྐྱེ་བོ་ཐམས་ཅད་ལས་སྐྱབས་པ་ཞེས་བྱ་བ་ནི་སྐྱེ་བོ་ཐམས་ཅད་ཀྱིས་འགའ་ཡང་མི་འཐོབ་པར་བཀག་པའོ། །འགྲམ་གཉིས་སུ་ཞེས་བྱ་བ་ནི་ངོགས་གཉིས་སུའོ། །རི་དགས་ཀྱི་རྔོན་པ་ཞེས་བྱ་བ་ནི་དངོས་སོ། །རི་དགས་ཀྱི་རྔོན་པའི་སློབ་མ་ཞེས་བྱ་བ་ནི་གཞན་ལ་རག་ལས་པས་སོ། །མཁས་པས་ཞེས་བྱ་བ་ནི་ཤེས་པས་སོ། །ནགས་མཆོག་ཅེས་བྱ་བ་ནི་སྐྱེ་བོ་མེད་ཅིང་ཆེས་ཐག་རིང་བའི་
ནགས་སོ། །དྲུངས་དབྱུང་བའི་ཕྱིར་ཞེས་བྱ་བ་ནི་རྩད་བཅད་པའི་ཕྱིར་དེ་ཡང་འཚོང་བའི་ཕྱིར་རོ། །ཉམས་པར་བྱ་བའི་ཕྱིར་ཞེས་བྱ་བ་ནི་མ་བསད་པར་ཡན་ལག་ལ་སོགས་པ་དུམ་བུར་བཅད་པའི་ཕྱིར་རོ། །ཚུལ་མ་ཡིན་པས་སྡུག་བསྔལ་བར་བྱ་བའི་ཕྱིར་ཞེས་བྱ་བ་ནི་རིགས་པ་མ་ཡིན་པས་གསད་ཅེས་བྱ་བའི་ཐ་ཚིག་གོ །རྔོན་སྤྱད་ཅེས་བྱ་བ་ནི་སྒོ་མཐོན་པོ་དང་རྩང་ལ་སོགས་པའི་རྔོན་སྤྱད་བཤམས་པ་དག་གོ །གཞི་འདི་ཞེས་བྱ་བ་ནི་རྒྱུ་འདིས་སོ། །ཉ་པ་ཞེས་བྱ་བ་ནི་ཉ་ཤོར་བའོ། །ཆུ་ཀླུང་ཞེས་བྱ་བ་ནི་ཆུ་ཀླུང་ཆེ་བའོ། །ཡུར་པོ་ཞེས་བྱ་བ་ནི་ཆུ་ཀླུང་ཆུང་ངུའོ། །ཁར་ཞེས་བྱ་བ་ནི་ཆུ་འབབ་པའི་གནས་སུའོ། །ཉ་རྡང་བ་ཞེས་བྱ་བ་ནི་སྐོན་པའི་རྣམ་པ་ལྟ་བུ་བཅས་པའོ། །དཀོན་ཞེས་བྱ་བ་ནི་ཕྱོགས་ཁ་ཅིག་ནི་ཡོད་པའི་ཕྱིར་རོ། །རིན་ཆེ་ཞེས་བྱ་བ་ནི་རིན་ཆེན་པོས་རྙེད་པའི་ཕྱིར་རོ། །དེའི་གནས་སྐབས་སུ་ཞེས་བྱ་བ་ནི་རྐུ་པའི་དུས་དང་རྐུ་བའི་ཡུལ་དེར་རོ། །དུད་འགྲོའི་སྐལ་བའི་ཆུ་བདག་གིར་བྱེད་ན་དངོས་པོ་ཚང་ན་ཉེས་པ་སྦོམ་པོར་འགྱུར་བ་ནི་མི་རྣམས་ཀྱི་བསམ་པ་ཐག་པ་ནས་གཏང་བའི་ཕྱིར་དང་འདུ་ཤེས་འཁྲུལ་བའི་ཕྱིར་དེ་ཡང་སྲིད་པའི་ཕྱིར་རོ། །ནོར་སྒྲུབ་པ་དག་ཅེས་བྱ་བ་ནི་ནོར་ཚོལ་བ་དག་གོ །ཞུགས་ཏེ་ཞེས་བྱ་བ་ནི་བསྐྱོད་ཅིང་བླང་ཏེའོ། །ལན་ཚྭའི་རོ་འབའ་ཞིག་ཅེས་བྱ་བ་ནི་ཐམས་ཅད་ལན་ཚྭའི་རོ་ཡིན་པའོ། །ལན་གྱི་བགྲོད་པ་ཞེས་བྱ་བ་ནི་ལམ་གྱི་ངོ་བོ་ཉིད་དེ་རྒྱ་གྲགས་ལ་སོགས་པའི་ཚད་ཀྱི་ལམ་མོ། །གོམ་པ་བསྲི་བ་ཞེས་བྱ་བ་ནི་གོམ་པ་སྐྱུང་བས་སོ། །ཆོས་གོས་དག་རྐུ་བར་བྱེད་ཅིང་ཞེས་བྱ་བ་ནི་རྐུ་ཞིབ་བྱེར་བར་བྱེད་པའོ། །ལྕོང་ཞེས་བྱ་བ་ནི་དམའ་བའོ། །ཐང་ཞེས་བྱ་བ་ནི་མཉམ་པར་རོ། །ཐིབས་པོ་ཞེས་བྱ་བ་ནི་རྩྭ་ལ་སོགས་པ་འཁྲིགས་པའོ། །ཐམས་ཅད་དུ་ཞེས་བྱ་བ་ནི་གནས་ཁང་ནས་ཁྱམས་སུ་དང༌། ཁྱམས་ནས་གནས་ཁང་དུ་འཇུག་པ་སོགས་ལ་ཡང་ངོ༌། །མི་རྨས་ཞེས་བྱ་བ་ནི་རྨ་མི་འབྱུང་བའོ། །མ་ཉམས་ཞེས་བྱ་བ་ནི་མཐུ་མ་ཉམས་པའོ། །ཏེ་པོར་ཞེས་བྱ་བ་ནི་ཧ་ཅང་ངོ༌། །རྐུན་ཤས་ཞེས་བྱ་བ་ནི་རུལ་གྱི་ཤས་སོ། །
བྱིས་པ་ཞེས་བྱ་བ་ནི་རང་གིས་མངོན་པར་མི་ཤེས་པའོ། །བླུན་པ་ཞེས་བྱ་བ་ནི་ལུང་ཕོག་པ་མངོན་པར་མི་ཤེས་པའོ། །མི་གསལ་བ་ཞེས་བྱ་བ་ནི་སྔར་ཤེས་པ་མངོན་པར་མི་ཤེས་པ་སྟེ་བརྗེད་ངས་པ་ཞེས་བྱ་བའི་ཐ་ཚིག་གོ །མི་མཁས་པ་ཞེས་བྱ་བ་ནི་ཕན་ཚུན་གྱི་བྱེ་བྲག་ལ་མི་མཁས་པའོ། །ཡང་ན་བྱིས་པ་དང་བླུན་པོ་དང་མི་གསལ་བ་དང་མི་མཁས་པ་ཞེས་བྱ་བ་ནི་སྐྱེས་ནས་ཐོབ་པའི་ཤེས་རབ་དང༌། ཐོས་པ་ལས་བྱུང་བའི་ཤེས་རབ་དང༌། བསམས་པ་ལས་བྱུང་བའི་ཤེས་རབ་དང༌། བསྒོམས་པ་ལས་བྱུང་བའི་ཤེས་རབ་དང་བྲལ་བ་སྟེ་གོ་རིམས་བཞིན་ནོ། །གྱ་ཆོམ་ཞེས་བྱ་བ་ནི་ཆེད་དུ་མ་བསམས་པར་གློ་བུར་རོ། །བྱུང་རྒྱལ་ཞེས་བྱ་བ་ནི་བརྗོད་པ་དེ་ལས་འབྱུང་བ་སྟེ། དེ་ལས་བྱུང་བ་དེ་བྱུང་རྒྱལ་མ་ཡིན་ནོ། །དེ་ལས་བྱུང་བ་མ་ཡིན་པ་ནི་བྱུང་རྒྱལ་ཏེ་དངོས་པོས་སྟོང་པའོ། །སོ་སོར་མ་བརྟགས་པར་ཞེས་བྱ་བ་ནི་རིགས་པས་མ་དཔྱད་པར་རོ། །བྱ་ར་གྱིས་ཤིག་ཅེས་བྱ་བ་ནི་རེས་པར་བལྟ་བ་ལྟར་ལོངས་ཤིག་ཅེས་པའོ། །བག་གྱིས་ཤིག་ཅེས་བྱ་བ་ནི་བྱ་བ་གཞན་མ་བྱེད་ཅིག་པའོ། །ཤགས་ཞོས་བྱ་བ་ནི་ཤགས་འགྱེད་པའོ། །ཡོངས་སུ་བསྐོར་བ་ཞེས་བྱ་བ་ནི་མཐའ་བསྐོར་བའོ། །འོག་གཟུ་ཞེས་བྱ་བ་ནི་ཡུལ་མིའི་ཚོགས་སོ།། སྦྱོར་བ་བཏང་ནས་ཞེས་བྱ་བ་ནི་རྩོལ་བ་བཏང་ནའོ། །འོག་གཟུར་དུ་ཟིན་ཀྱང་བླའི་གྲྭའི་སྐབས་ཡོད་པའི་ཕྱིར་སྦྱོར་བ་བཏང་ན་བརྐུས་པའི་དུས་ཡིན་ནོ། །བླའི་གྲྭ་ཞེས་བྱ་བ་ནི་རྒྱལ་པོས་བསྐོས་པའི་གྲྭའོ། །དཔོན་པོ་ཡིན་པས་ཞེས་བྱ་བ་ནི་རྒྱལ་པོ་ནི་བདག་པོ་ཡིན་པའི་ཕྱིར་ཏེ། དེར་རྒྱལ་ན་གཞན་གྱི་སྐབས་མེད་པའི་ཕྱིར་རྐུས་པའི་དུས་ཡིན་ནོ། །རྩིག་པའི་ཞེས་བྱ་བ་ནི་ར་བའོ། །མཚམས་ཀྱི་སྣ་དང་ཞེས་བྱ་བ་ནི་མཚམས་ཀྱི་གནས་ཕྱི་མ་ཤོས་དང་ངོ༌། །མཚམས་ཀྱི་སྣར་ཞེས་བྱ་བ་ནི་མཚམས་ཀྱི་གནས་མདུན་མ་ཤོས་སུའོ། །བླ་ན་མེད་པའི་ཡེ་ཤེས་ཞེས་བྱ་བ་ནི་རྫོགས་པའི་བྱང་ཆུབ་བོ། །རྒྱས་པ་ཞེས་བྱ་བ་ནི་རྒྱ་ཆེར་རོ། །སྤ་དགོང་སླ་ཞེས་བྱ་བ་ནི་ཟིལ་གྱིས་མནན་སླ་བའོ། །ཤོ་གམ་གཞལ་དགོས་པ་ཞེས་བྱ་བ་ནི་གཞལ་བར་འོས་པའོ། །རུང་ངམ་ཞེས་བྱ་བ་ནི་རིགས་སམ་ཞེས་བྱ་བའོ། །ལྟུང་བ་མེད་ཅེས་བྱ་བ་ནི་ཤོག་མ་
གཞལ་བ་དབང་བ་ཉིད་མི་ཤེས་པའི་ཕྱིར་དང་རྐུ་སེམས་མེད་པའི་ཕྱིར་རོ་།སར་ཕྱིན་པ་ཞེས་བྱ་བ་ནི་ཤོ་གམ་གྱི་གནས་སུ་ཕྱིན་པའོ། །འགལ་ཚབས་ཅན་ཞེས་བྱ་བ་ནི་ཤིན་ཏུ་འདས་པ་དང་བཅས་པ་སྟེ། ཉེས་པ་དང་བཅས་པ་ཞེས་བྱ་བའི་ཐ་ཚིག་གོ །དེ་ཡང་ཁ་ཅིག་ཕམ་པར་འགྱུར་བ་ཡང་ཡིན། །ཁ་ཅིག་ཉེས་པ་སྦོམ་པོ་དང་ལྟུང་བྱེད་ལ་སོགས་པར་འགྱུར་བ་ཡང་ཡོད་དོ། །འདིར་ནི་རྐུ་སེམས་ཀྱིས་རང་གི་རྫས་ཤོ་གམ་གཞལ་དགོས་པ་བཟླས་ཏེ། རིན་ཐང་ཚང་ན་ཕམ་པར་འགྱུར་རོ། །གཞན་གྱི་བཟླས་ན་སྦོམ་པོར་འགྱུར་ངོ། །བཟླ་བར་མི་བྱའོ་ཞེས་བསླབ་པའི་གཞི་བཅས་པ་ལས་འདས་པ་ནི་ཐམས་ཅད་དུ་ཉེས་བྱས་སུ་འགྱུར་རོ། །ཤར་བའི་ཚལ་གསེབ་ཅེས་བྱ་བ་ནི་སྨྱིག་མི་ཉག་མ་ཤར་བའི་ཚལ་གསེབ་བོ། །བཟོ་སྤྱོང་ཞེས་བྱ་བ་ནི་རྒྱལ་པོ་དེས་བཟོ་བོའི་ཚོགས་བཅོ་བརྒྱད་པོ་དག་ལ་ཕས་བཟོ་སློབ་ཏུ་བཅུག་བ་ལས་བཟོ་བར་གྱུར་པ་དེའི་མིང་བཟོ་སྦོང་ཞེས་བྱའོ། །བཟོ་བོའི་ཚོགས་བཅོ་བརྒྱད་ནི་ཚོང་པ་དང༌། རྫ་མཁན་པ་དང༌། ཕྲེང་བརྒྱུད་དང༌། ཆང་པ་དང༌། ཕྱུགས་རྫི་དང༌། འདྲེག་མཁན་དང༌། འབྲུ་མར་མཁན་དང༌། མགར་བ་མཁན་དང༌། ཤིང་མཁན་དང༌། ཕྱྭ་པ་མཁན་དང༌། ཐ་ག་པ་དང༌། ཀོ་ལྤགས་མཁན་དང༌། ཉ་བ་དང༌། བཙོ་བླག་མཁན་དང༌། སྨྱིག་མ་མཁན་དང༌། ཤན་པ་དང༌། བཤེད་མ་དང༌། ཤིང་རྟ་མཁན་ཞེས་བྱ་བ་བདག་སྟེ། དེ་ཕས་བཟོ་སྒོ་བཅོ་བརྒྱད་པོ་དག་ལ་བཙུད་དོ་ཞེས་གསུངས་པའི་ཕྱིར་རོ། །བདེན་པ་དག་ལ་ཞེས་བྱ་བ་ནི་སྡུག་བསྔལ་དང༌། ཀུན་འབྱུང་བ་དང༌། འགོག་པ་དང༌། ལམ་ཞེས་བྱ་བ་དེ་ཁོ་ན་ཉིད་དག་ལའོ། །བཀོད་ནས་ཞེས་བྱ་བ་ནི་ཤེས་པ་མི་གཡོ་བས་བཞག་ནས་སོ། །ཀོ་ས་ལས་བྱུང་བ་ཞེས་བྱ་བ་ནི་ཡུལ་ཀོ་ས་ལང་སྐྱེས་པའོ། །གཞོན་ནུའི་མདོ་སྡེ་ཞེས་བྱ་བ་ནི་མདོ་སྡེ་ལས་འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་ཀོ་ས་ལ་དག་ཏུ་ཉུ་ལྗོངས་རྒྱུར་གཤེགས་པ་ན་མཉན་ཡོད་ན་བྱོན་ནས། མཉན་ཡོང་ན་རྒྱལ་བྱེད་ཀྱི་སལ་མགོན་མེད་ཟས་སྦྱིན་གྱི་ཀུན་དགའ་བ་ར་བ་ན་བཞུགས་སོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་དགེ་སྦྱོང་
གཽ་ཏ་མ་ཀོ་ས་ལ་དག་ཏུ་ལྗོངས་རྒྱུར་གཤེགས་པ་ན་མཉན་ཡོད་དུ་བྱོན་ནས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་རབ་ན་བཞུགས་ཤིང༌། ཤེས་ལྡན་གཽ་ཏ་མ་དེ་བླ་ན་མེད་པ་ཡང་དག་པར་རྫོགས་པའི་སངས་རྒྱས་སོ་ཞེས་བདག་ཉིད་ཞལ་གྱིས་འཆེའོ་ཞེས་ཐོས་སོ། །ཐོས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་དང་ཐབས་ཅིག་མངོན་དུ་ཡང་དག་པར་དགའ་བར་འགྱུར་བ་དང༌། ཡང་དག་པར་མགུ་བར་འགྱུར་བའི་གཏམ་སྣ་ཚོགས་བྱས་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་ཀོ་ས་ལར་བྱུང་བའི་རྒྱལ་པོ་གསལ་རྒལ་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ་གཽ་ཏ་མ་བདག་གིས་ཤེས་ལྡན་གོ་ཏ་མ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ་ཞེས་བྱ་བདག་ཉིད་ཞལ་གྱིས་འཆེའོ་ཞེས་ཐོས་ན། ཀྱེ་གཽ་ཏ་མ་ཇི་ལྟ་གང་དག་ཇི་སྐད་མཆི་བ་དེ་དག་དེ་ལྟར་བརྡ་སྤྲོད་པར་བགྱིད་པ་ན་ཤེས་ལྡན་གཽ་ཏ་མ་ལ་སྐུར་བ་འདེབས་པར་མི་བགྱིད་ཅིང་ཧ་ཅང་ཐལ་བར་བགྱིད་པ་དང༌། དེ་དག་ཤེས་ལྡན་གཽ་ཏ་མས་གསུངས་པའི་རྗེས་སུ་སྨྲ་བ་དང༌། ཆོས་སྨྲ་བ་དང༌། ཆོས་ཀྱི་རྗེས་སུ་མཐུན་པའི་ཆོས་བརྡ་སྤྲོད་པར་བགྱིད་པ་དང༌། གསུངས་པའི་རྗེས་སུ་སྨྲ་བ་དེ་དག་ལ་གཞན་ལས་ཆོས་དང་མཐུན་པས་སྨད་པའི་གནས་ལྟ་བུའི་ཆོས་འགའ་ཡང་མི་མཆི་བ་ལགས་སམ། རྒྱལ་པོ་ཆེན་པོ་གང་དག་དེ་སྐད་ཟེར་བ་དེ་དག་དེ་ལྟར་བརྡ་སྤྲོད་པར་བྱེད་པ་ནི་ཁོ་བོ་ལ་སྐུར་བ་འདེབས་པར་མི་བྱེད་ཅིང༌། ཧ་ཅང་ཐལ་བར་མི་བྱེད་པ་དང༌། དེ་དག་ཁོ་བོས་སྨྲས་པའི་རྗེས་སུ་སྨྲ་བ་དང༌། ཆོས་སྨྲ་བ་དང༌། ཆོས་ཀྱི་རྗེས་སུ་མཐུན་པའི་ཆོས་བརྡ་སྤྲོད་པར་བྱེད་པ་དང༌། སྨྲས་པའི་རྗེས་སུ་སྨྲ་བ་དེ་དག་ལས་གཞན་ལས་ཆོས་དང་མཐུན་པས་སྨད་པའི་གནས་ལྟ་བུའི་ཆོས་འགའ་ཡང་ཤིན་ཏུ་འོང་བ་ཡིན་ནོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་ཁོ་བོས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་ཕྱིར་རོ། །ཤེས་ལྡན་གཽ་ཏ་མ་དེ་སྐད་གསུང་དུ་ཟིན་ཀྱང་བདག་ནི་ཤེས་ལྡན་གཽ་ཏ་མ་ལ་དད་པས་མི་མཆིའོ། །དེ་ཅིའི་སླད་དུ་ཞེ་ན། རེ་ཞིག་དགེ་སྦྱོང་དང་བྲམ་ཟེ་རྒན་པ་འདི་ལྟ་སྟེ། འོད་སྲུངས་རྫོགས་བྱེད་དང་ཀུན་ཏུ་
རྒྱུ་གནག་ལྷས་ཀྱི་བུ་དང༌། སྨྲ་འདོད་ཀི་བུ་མོའི་བུ་ཡང་དག་པར་རྒྱལ་བ་ཅན་དང༌། མི་ཕམ་སྐྲའི་ལ་བ་ཅན་དང༌། ཀ་ཏྱའི་བུ་ནོག་ཅན་དང༌། གཅེར་བུ་པ་གཉེན་གྱི་བུ་གང་དག་ལགས་པ་དེ་དག་ཀྱང་ད་དུང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ་ཞེས་བདག་ཉིད་ཁས་འཆེ་བར་མི་བགྱིད་ན། ཤེས་ལྡན་གཽ་ཏ་མ་ན་ཚོད་ཀྱིས་གཞོན་ཞིང་རབ་ཏུ་བྱུང་བ་གསར་པས་ལྟ་སྨོས་ཀྱང་ཅི་འཚལ་བའི་སླད་དུའོ། །རྒྱལ་པོ་ཆེན་པོ་བཞི་པོ་དི་དག་ནི་གཞོན་ནུ་ཁྱད་དུ་གསད་པར་ཡང་མི་བྱ་ཞིང་གཞོན་ནུ་ཟིལ་གྱིས་མནན་པར་མི་བྱའོ། །བཞི་གང་ཞེ་ན། རྒྱལ་པོ་ཆེན་པོ་རྒྱལ་རིགས་གཞོན་ནུ་ཁྱད་དུ་གསད་པར་མི་བྱ་ཞིང་གཞོན་ནུ་ཟིལ་གྱིས་མནན་པར་ཡང་མི་བྱ་བ་དང༌། རྒྱལ་པོ་ཆེན་པོ་བྲང་འགྲོ་གཞོན་ནུ་ཁྱད་དུ་གསད་པར་མི་བྱ་ཞིང་གཞོན་ནུ་ཟིལ་གྱིས་མནན་པ་ཡང་མི་བྱ་བ་དང༌། རྒྱལ་པོ་ཆེ་པོ་མི་ཆུང་ངུ་ཁྱད་དུ་གསད་པར་མི་བྱ་ཞིང༌། ཆུང་ངུ་ཟིལ་གྱིས་མནན་པར་མི་བྱ་བ་དང༌། རྒྱལ་པོ་ཆེན་པོ་དགེ་སློང་གཞོན་ནུ་ཁྱད་དུ་གསད་པར་མི་བྱ་ཞིང་གཞོན་ནུ་ཟིལ་གྱིས་མནན་པར་ཡང་མི་བྱའོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་དགེ་སློང་ནི་གཞོན་ནུ་ཡིན་ཡང་དེ་ནི་རྫུ་འཕྲུལ་ཆེ་ཞིང་མཐུ་ཆེ་བ་ཡིན་པའི་ཕྱིར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །རྒྱལ་རིགས་དཔེ་བྱད་ལྡན་གྱུར་ཅིང༌། །རིགས་བཙུན་གྲགས་དང་ལྡན་པ་དེ། །གཞོན་དུའང་ཁྱད་དུ་མི་གསད་ཅིང༌། །མཁས་པས་ཟིལ་གྱིས་མནན་མི་བྱ། །རྒྱལ་པོ་རྒྱལ་སྲིད་ཐོབ་དཀྲུགས་ན། །རྒྱལ་རིགས་ཆད་པར་འབྱུང་འགྱུར་བའི། །གནས་ནི་གང་ཕྱིར་ཡོད་པས་ན། །དེ་ཕྱིར་དེ་ལ་གུས་ཕྱག་འཚལ། །དེ་ཕྱིར་བདག་སྲོག་སྲུང་བྱེད་པས། །དེ་ནི་ཁྱད་དུ་གསད་མི་བྱ། །བདག་ཉིད་དོན་ལ་ལེགས་ལྟ་བས། །དེ་ནི་ལེགས་པར་སྤང་བར་བྱ། །གྲོང་ངམ་ཡང་ན་དགོན་པར་ནི། །གང་དུ་ལག་འགྲོ་མཐོང་བ་དེ། །གཞོན་ཡང་ཁྱད་དུ་མི་གསད་ཅིང༌། །མཁས་པས་ཟིལ་གྱིས་མནན་མི་བྱ། །མཐོན་པོའམ་དམའ་བའི་རིགས་དག་ཏུ། །ཚོལ་ཅན་ནང་དུ་ཀླུ་རྒྱུ་བས། །
སྐྱེས་པ་བུད་མེད་དུ་མ་དང༌། །བྱིས་པ་རྣམས་ཀྱི་རྙེད་ན་འཛིན། །དེ་ཕྱིར་བདག་སྲོག་སྲུང་བྱེད་པས། །དེ་ནི་ཁྱད་དུ་གསད་མི་བྱ། །བདག་ཉིད་དོན་ལ་ལེགས་ལྟ་བས། །དེ་ནི་ལེགས་པར་སྤང་བར་བྱ། །འབར་བ་མང་པོ་ཟད་བྱེད་པ། །བྱིན་ཟླ་ལམ་སྔོན་ལྡན་པ་དེ། །ཆུང་ཡང་ཁྱད་དུ་མི་གསད་ཅིང༌། །མཁས་པས་ཟིལ་གྱིས་མནན་མི་བྱ། །ཉེ་བར་ལེན་པ་བྱིན་ཟ་ནི། །ཆུང་ངུར་གྱུར་ནས་ཆེན་པོར་གྱུར། །མེ་ལྕེ་འབར་བས་མྱུར་བར་ནི། །གྲོང་དང་གྲོང་ཁྱེར་སྲེག་པར་བྱེད། །དེ་ཕྱིར་བདག་སྲོག་སྲུང་བྱེད་པས། །དེ་ནི་ཁྱད་དུ་གསད་མི་བྱ། །བདག་ཉིད་དོན་ལ་ལེགས་ལྟ་བས། །དེ་ནི་ཁྱད་དུ་གསད་མི་བྱ། །དེ་ནི་ལེགས་པར་སྤང་བར་བྱ། །བྲིན་ཟ་ལམ་སྔོན་ལྡན་འགྱུར་བའི། །མེ་ཡི་ཚང་ཚིང་གང་བསྲེགས་པ། །དེ་ལ་ཉིན་མཚན་འདས་གྱུར་པས། །ལ་ལར་ལོ་མ་སྐྱེ་བར་འགྱུར། །གང་གིས་ཚུལ་ཁྲིམས་ལྡན་པ་ཡི། །དགེ་སློང་རྙེད་ནས་སྲེད་བྱེད་པ། །དེ་ལ་བུ་དང་ཚ་བོ་དང༌། །བགོ་སྐལ་ཡོད་པར་མི་འགྱུར་ཏེ། །ཏ་ལའི་མགོ་བཞིན་མི་རིང་བར། །རིགས་རྒྱུད་དང་ཡང་བྲལ་བར་འགྱུར། །དེ་ཕྱིར་བདག་སྲོག་སྲུང་བྱེད་པས། །དེ་ནི་ཁྱད་དུ་གསད་མི་བྱ་།བདག་ཉིད་དོན་ལ་ལེགས་ལྟ་བས། །དེ་ནི་ལེགས་པར་སྤང་བར་བྱ། །རྒྱལ་རིགས་དཔེ་བྱད་ལྡན་པ་དང༌། །ལག་འགྲོ་མེ་དང་དེ་བཞིན་དུ། །དགེ་སློང་ཚུལ་ཁྲིམས་ལྡན་པ་དེ། །མཁས་པས་ཟིལ་གྱིས་མནན་མི་བྱ། །དེ་ཕྱིར་བདག་སྲོག་སྲུང་བྱེད་པས། །དེ་ལ་ཁྱད་དུ་གསད་མི་བྱ། །བདག་ཉིད་དོན་ལ་ལེགས་ལྟ་བས། །དེ་ནི་ལེགས་པར་སྤང་བར་བྱ། །དེ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བཅོམ་ལྡན་འདས་ཀྱིས་བཀའ་སྩལ་བ་ལ་མངོན་པར་བསྟོད་ཅིང་རྗེས་སུ་ཡི་རང་བར་བྱས་ནས། བཅོམ་ལྡན་འདས་ཀྱིས་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་མས་ཕྱིར་སོང་ཞེས་གསུངས་པ་ཡིན་ནོ། །བཏུལ་ཞེས་བྱ་བ་ནི་དུལ་བར་བྱས་པའོ། །གཞོན་ནུའི་ཡོངས་སུ་སྤང་བ་ཞེས་བྱ་བ་ནི་བུའི་རིམ་གྲོའོ། །དེ་བྱིན་པ་ནི་པུའི་ཐབས་བྱིན་པའོ། །བཙུན་མོའི་འཁོར་གྱི་ཡོངས་སུ་སྤང་བ་བྱིན་པ་ལ་ཡང་བཙུན་མོའི་འཁོར་གྱི་ཐབས་ཕྱིན་པའོ། །སྡིག་སྦྲུལ་ཞེས་བྱ་བ་ནི་སྦྲུལ་ལ་སོགས་པའོ། །ཉེན་བཞིན་
དུ་ཞེས་བྱ་བ་ནི་གནོད་བཞིན་དུའོ། །སྤྲོ་བར་བགྱིད་ཅེས་བྱ་བ་ནི་ཡིད་ཀྱིས་བརྩོན་པར་བྱེད་པའོ། །འབར་བར་བགྱིད་ཅེས་བྱ་བ་ནི་ལུས་ཀྱིས་ཡོངས་སུ་རྒྱུ་བའོ། །རྩོལ་བར་བྱེད་ཅེས་བྱ་བ་ནི་གང་གིས་རིགས་པའི་ཐ་སྙད་བརྗོད་པའོ། །མཆོད་པ་དག་ཅེས་བྱ་བ་ནི་མཆོད་པ་བྱས་པ་དག་གོ །རིགས་སོ་ཞེས་བྱ་བ་ནི་འོས་སོ་ཞེས་བྱ་བའོ། །ཇི་ལྟར་འགྱུར་ཞེས་བྱ་བ་ནི་དྲི་བའོ། །ལྟུང་བ་མེད་ཅེས་བྱ་བ་ནི་བདག་གིས་ཡོངས་སུ་སྤང་བ་ཐོབ་པ་སྙམ་དུ་ཤེས་པའི་ཕྱིར་དང༌། རྐུ་སེམས་མི་སྐྱེད་པའི་ཕྱིར་རོ། །མི་མཐུན་པར་བྱེད་པ་ཡིན་པས་ཞེས་བྱ་བ་ནི་དུས་ཆེར་བའོ། །གྲོས་བྱས་ཏེ་ཞེས་བྱ་བ་ནི་མཐུན་པར་བྱས་ཏེའོ། །བར་བུར་སྣོད་དག་ཅེས་བྱ་བ་ནི་རྫས་དུ་མའི་སྣོད་དག་གོ །རང་ཉིད་ཀྱིས་ཕྱུང་སྟེ་ཞེས་བྱ་བ་ནི་བརྟད་པའི་དབང་གིས་དེ་ལ་རེག་པར་རྗེས་སུ་གནང་བའོ། །ཤེས་པར་གྱིས་ཞེས་བྱ་བ་ནི་སྲུངས་ཤིག་ཅེས་སོ། །མཁོ་བ་བསྟབས་པ་ཞེས་བྱ་བ་ནི་བསྙེན་བཀུར་བྱ་བའོ། །སྙོད་པར་བྱེད་པ་ཞེས་བྱ་བ་ནི་སྦྲང་རྩི་དང༌། ཞུན་མར་དང་མར་ལ་སོགས་པ་སྙོད་པའོ། །གསོ་བར་བྱེད་པ་ཞེས་བྱ་བ་ནི་ལུས་སྦོམ་ལག་ཏུ་བྱེད་པའི་ཕྱིར་རོ། །སྐྱེད་པར་བྱེད་པ་ཞེས་བྱ་བ་ནི་ལུས་སྲུང་བར་བྱེད་པའི་ཕྱིར་རོ། །ནུ་མ་སྣུན་པ་ཞེས་བྱ་བ་ནི་ནུ་ཞོ་ལྡུད་པར་བྱེད་པའོ། །འཛམ་བུའི་གླིང་སྣ་ཚོགས་སྟོན་པར་བྱེད་པ་ཞེས་བྱ་བ་ནི་གནོད་པ་ཡོངས་སུ་བསྲུང་བའི་ཕྱིར་རོ། །བྱ་དཀའ་བ་བྱེད་པ་དག་ཡིན་ཏེ་ཞེས་བྱ་བ་ནི་མངལ་ནི་གནས་པ་བཟུང་བ་དང་མི་གཙང་བའོ། །ལས་ལ་སོགས་པ་བྱ་དཀའ་བ་བྱེད་པའི་ཕྱིར་རོ། །སྤང་བ་བྱས་ཞེས་བྱ་བ་ནི་རལ་བ་ཡོངས་སུ་སྤང་ཞིང་རང་གིས་བསྐུར་བ་བྱས་པའོ། །དེ་ཙམ་གྱིས་ནི་ཞེས་བྱ་བ་ནི་རེ་ཞིག་གོ །བྱས་པ་ཞེས་བྱ་བ་ནི་འཁོར་བའོ། །ཉེས་པར་བྱས་པ་ཞེས་བྱ་བ་ནི་ལྷག་པར་ཕན་འདོགས་པ་སྤྱོད་པའོ། །ཡང་དག་པར་འཛིན་ཅེས་བྱ་བ་ནི་འདུན་པ་སྐྱེད་དེ་སྦྱོར་དུ་འཇུད་པའོ། །འདུལ་བར་བྱེད་ཅེས་བྱ་བ་ནི་མངོན་པར་ཁས་ལེན་པ་འཛིན་དུ་འཛུད་པའོ། །འཇུད་པར་བྱེད་ཅེས་བྱ་བ་ནི་ཆད་པར་མི་བྱེད་པའོ། །རབ་ཏུ་དགོད་པར་བྱེད་ཅེས་བྱ་བ་ནི་ཆེན་པོ་ཉིད་བྱེད་པའོ། །ཚུལ་ཁྲིམས་ཕུན་སུམ་ཚོགས་པ་ཞེས་བྱ་བ་ལ་སོགས་པ་ཕུན་སུམ་ཚོགས་པའི་དོན་ནི་ཟག་པ་
མེད་པ་ཁོ་ན་ཡིན་པར་ཤེས་པར་བྱའོ། །འདུན་པ་ལས་བྱུང་བའི་སློང་མོ་ཞེས་བྱ་བ་ནི་འདུན་པ་བསྐྱེད་པས་སློང་མོ་བསྒྲུབ་པའོ། །ཟད་པར་ཞེས་བྱ་བ་ནི་ཐམས་ཅད་དུའོ། །ཁྱབ་པར་གྱུར་ཅེས་བྱ་བ་ནི་ཆུབ་པར་གྱུར་པའོ། །འདི་ལྟར་བཅོམ་ལྡན་འདས་དེ་ནི་ཞེས་བྱ་བ་ལ་སོགས་པ་ལ་འདི་ལྟར་ཞེས་བྱ་བ་ནི་འདི་ལྟར་རོ། །བཅོམ་ལྡན་འདས་དེ་ནི་ཞེས་བྱ་བ་ནི་དེ་བཞིན་གཤེགས་པ་ཉེ་བར་སྟོན་པ་ཡིན་ནོ། །དེ་བཞིན་གཤེགས་པ་ཞེས་བྱ་བ་ནི་དངོས་པོ་ཐམས་ཅད་ཀྱི་ངོ་བོ་ཉིད་ཇི་ལྟ་བ་དེ་བཞིན་དུ་གཤེགས་པ་དང༌། སེམས་ཅན་འདུལ་བ་དེ་བཞིན་དུ་གཤེགས་པ་དང༌། ཉེས་པ་བག་ཆགས་དང་བཅས་པ་ཡང་མི་འབྱུང་བ་ཇི་ལྟ་བ་བཞིན་དུ་གཤེགས་པ་དང༌། དེའི་དང་པོའི་སྨོན་ལམ་ཇི་ལྟར་གྱུར་པ་དེ་བཞིན་དུ་མཛད་པ་མ་ལུས་པ་མཛད་པར་གྱུར་པས་དེ་བཞིན་གཤེགས་པ་ཞེས་བྱའོ། །དགྲ་བཅོམ་པ་ཞེས་བྱ་བ་ནི་འགྲོ་བ་མཐའ་དག་གིས་མཆོད་པར་འོས་པའོ། །ཡང་དག་པར་རྫོགས་པའི་སངས་རྒྱས་སོ་ཞེས་བྱ་བ་ནི་ཡང་དག་པར་རྫོགས་པར་སངས་རྒྱས་པ་ཞེས་བྱ་བ་སྟེ། མི་སླུ་བའི་མཁྱེན་པ་ཡང་དག་པས་དོན་མཐའ་དག་རྫོགས་པར་ཐུགས་སུ་ཆུད་ཅིང་སངས་རྒྱས་པའི་ཕྱིར་རོ། །རིག་པ་དང་ཞབས་སུ་ལྡན་པ་ཞེས་བྱ་བ་ནི་མི་སློབ་པའི་རིག་པ་གསུམ་དང༌། མི་སློབ་པའི་ལུས་ཀྱི་སྡོམ་པ་དང༌། ངག་གི་སྡོམ་པ་དང༌། ཡང་དག་པར་འཚོ་བའི་སྤྱོད་པ་དག་དང་ལྡན་པའོ། །བདེ་བར་གཤེགས་པ་ཞེས་བྱ་བ་ནི་ཀུན་དུ་གཟིགས་པ་ལ་སོགས་པའི་སྤྱོད་པ་མཛེས་པར་གཤེགས་པ་དང་ལྡན་པའོ། །འཇིག་རྟེན་མཁྱེན་པ་ཞེས་བྱ་བ་ནི་སེམས་ཅན་འཁོར་བ་ཐུགས་སུ་ཆུད་པའི་ཕྱིར་རོ། །སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ཞེས་བྱ་བ་ནི་འཇམ་པ་དང་རྩུབ་པ་དང་གཉིས་ཀའི་འདུལ་བའི་རྣམ་པ་གསུམ་གྱིས་འདུལ་བ་སྐྱེས་བུ་ལྟ་བུ་དག་ཕྱིན་ཅི་མ་ལོག་པར་འདུལ་བ་མཛད་པའི་ཕྱིར་རོ། །ལྷ་དང་མི་རྣམས་ཀྱི་སྟོན་པ་ཞེས་བྱ་བ་ནི་ཡང་དག་པ་ཇི་ལྟ་བ་བཞིན་བདེན་པ་སྟོན་པར་མཛད་པའི་ཕྱིར་རོ། །སངས་རྒྱས་ཞེས་བྱ་བ་ནི་མི་ཤེས་པའི་གཉིད་མ་ལུས་པ་དང་བྲལ་བའི་ཕྱིར་རོ། །བཅོམ་ལྡན་འདས་ཞེས་བྱ་བ་ནི་བདུད་བཞི་བཅོམ་པ་དང་ལྡན་པའི་ཕྱིར་རོ། །བཅོམ་ལྡན་འདས་ཀྱི་ཆོས་ནི་ལེགས་པར་གསུངས་པ་ཞེས་
བྱ་བ་ནི་སངས་རྒྱས་བཅོམ་ལྡན་འདས་ཀྱི་ཆོས་ནི་འཕགས་པའི་བདེན་པ་བཞི་སྟེ། དེ་ནི་དེའི་ལེགས་པར་གསུངས་པའི་ཇི་ལྟ་བ་བཞིན་དུ་ཕྱིན་ཅི་མ་ལོག་པར་ཉེ་བར་བསྟན་པ་ཡིན་ནོ། །ཡང་དག་པར་མཐོང་བ་ཞེས་བྱ་བ་ནི་ཡང་དག་པར་མཐོང་བས་ཕྱེ་བ་སྟེ། ཡང་དག་པར་མཐོང་བ་ཞེས་ཡང་དག་པའི་ལྟ་བ་ཟག་པ་མེད་པའི་བློ་སྟེ། དེས་ཕྱེ་བ་ཇི་ལྟ་བ་བཞིན་དུ་རབ་ཏུ་རྣམ་པར་འབྱེད་པས་མཐོང་བའི་ལམ་གྱི་ཚེ་བཅོམ་ལྡན་འདས་ཀྱི་ཆོས་བདེན་པ་བཞིའི་ངོ་བོ་ཉིད་མཐོང་བས་དེའི་ཕྱིར་ཡང་དག་པར་མཐོང་བས་ཕྱེ་བ་ཞེས་བྱ་བ་སྟེ། སླུ་བ་དང་བྲལ་བ་ཞེས་བྱ་བའི་ཐ་ཚིག་གོ །ནད་མེད་པ་ཞེས་བྱ་བ་ནི་འདོད་ཆགས་ལ་སོགས་པའི་ཉོན་མོངས་པས་གདུང་བར་བྱེད་པའི་རང་བཞིན་རིམས་ནད་ལྟ་བུ་དག་དང་ངེས་པར་བྲལ་བས་ནད་མེད་པ་ཞེས་བྱ་སྟེ། བཅོམ་ལྡན་འདས་ཀྱི་ཆོས་ལམ་གྱི་མཚན་ཉིད་དོ། །དུས་ཆད་པ་མེད་པ་ཞེས་བྱ་བ་ནི་འདིར་དེའི་རྩོམ་པ་དང་མཐའ་གཉིས་དུས་མཉམ་པ་སྟེ། འདི་ལྟར་གང་ཁོ་ནའི་ཚེ་སྡུག་བསྔལ་ལ་དམིགས་པའི་ལས་སྐྱེ་བ་དེ་ཁོ་ནའི་ཚེ་སྡུག་བསྔལ་མཐོང་བས་སྤང་བར་བྱ་བའི་ཉོན་མོངས་པ་རྣམས་སྤོང་བ་དང༌། གང་ཁོ་ནའི་ཚེ་ཀུན་འབྱུང་བ་དང༌། འགོག་པ་དང༌། ལམ་ལ་དམིགས་པའི་ལམ་སྐྱེ་བ་དེ་ཁོ་ནའི་ཚེ་ཀུན་འབྱུང་བ་དང༌། འགོག་པ་དང༌། ལམ་མཐོང་བས་སྤང་བར་བྱ་བའི་ཉོན་མོངས་པ་རྣམས་སྤོང་བ་དེའི་དུས་ཕྱིས་དུས་མཉམ་པ་ཞེས་བྱ་བ་སྟེ་ལམ་གྱི་རྩོམ་པ་དང་འབྲས་བུའི་མཐའ་གཉིས་དུས་མཉམ་པ་ཞེས་བྱ་བའི་ཐ་ཚིག་གོ །ཉེ་བར་གཏོད་པ་ཞེས་བྱ་བ་ནི་ཉེ་བར་གཏོད་པ་ལ་ཡོད་པ་ཞེས་བྱ་སྟེ། འཕགས་པའི་བདེན་པ་བཞི་པོ་དག་ལ་ཉེ་བར་གཏོད་པར་མཛད་པས་ཉེ་བར་གཏོད་པ་སྟེ། སངས་རྒྱས་བཅོམ་ལྡན་འདས་སོ། །དེ་ལ་ཡོད་པ་ནི་ཉེ་བར་གཏོད་པ་ལ་ཡོད་པ་སྟེ། བཅོམ་ལྡན་འདས་ཀྱི་ཆོས་ལམ་གྱི་ངོ་བོ་ཉིད་དེ། འདི་ལྟར་གང་གི་ཚེ་ལམ་སྐྱེ་བ་དེའི་ཚེ་ན་འཕགས་པའི་བདེན་པ་བཞི་པོ་དག་ལ་ཐེ་ཚོམ་མེད་པར་འགྱུར་བའི་ཕྱིར་རོ། །འདི་མཐོང་བ་ཡོད་པ་ཞེས་བྱ་བ་ནི་ཤོག་ལ་ལྟོས་ཤིག་པ་ལྟ་བུ་ཞེས་བྱ་བ་སྟེ། འཕགས་པའི་ལམ་གྱིས་འགྲོ་བ་རྣམས་ལ་ཚུར་ཤོག་ལ་དེ་ཁོ་ན་ཉིད་བཞི་པོ་དག་ལ་ལྟོས་ཤིག་ཅེས་རུང་བ་ཉིད་ཀྱིས་སྨྲ་བ་དང་འདྲ་
བར་འབོད་ཅིང་སྟོན་པས་ན། ཤོག་ལ་ལྟོས་ཤིག་པ་ལྟ་བུ་ཞེས་བྱས་ཏེ། འཕགས་པའི་ལམ་སྐྱེས་པ་ན་དེ་ཁོ་ན་ཉིད་ལ་སྒྲིབ་པ་མེད་པ་ཞེས་བྱ་བའི་ཐ་ཚིག་གོ །མཁས་པ་རྣམས་ཀྱིས་སོ་སོ་རང་གིས་རིག་པ་ཞས་བྱ་བ་ནི་མཁས་པ་འཇིག་རྟེན་ལས་འདས་པའི་ཡེ་ཤེས་བརྙེས་པ་མང་པོ་རྣམས་ཀྱིས་སོ་སོར་རང་གི་སེམས་ཀྱིས་རིག་པར་བྱ་བ་ཡིན་གྱི་གཞན་གྱིས་མ་ཡིན་ནོ་ཞེས་བྱ་བའི་ཐ་ཚིག་གོ །བཅོམ་ལྡན་འདས་ཀྱི་ཆོས་ལ་ལམ་དང་འབྲས་བུའི་མཚན་ཉིད་ཡིན་ནོ། །བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ནི་ལེགས་པར་ཞུགས་པ་ཞེས་བྱ་བ་ནི་བཅོམ་ལྡན་འདས་ཀྱི་སློབ་མར་རབ་ཏུ་བྱུང་བའི་དགེ་འདུན་ནི་མངོན་པར་ཤེས་པ་བུལ་བ་དཀའ་བ་དང༌། མངོན་པར་ཤེས་པ་མྱུར་བ་དཀའ་བ་དང༌། མངོན་པར་ཤེས་པ་བུལ་བ་སླ་བ་དང༌། མངོན་པར་ཤེས་པ་མྱུར་བ་སླ་བའི་ལམ་བསྒྲུབ་པ་ལ་ཞུགས་ཤིང་ཡང་དག་པར་བརྟེན་པ་ཡིན་ནོ། །རིགས་པར་ཞུགས་པ་ཞེས་བྱ་བ་ནི་དྲན་པ་ཉེ་བར་གཞག་པ་དང་དྲོ་བར་གྱུར་པ་ལ་སོགས་པ་རིགས་པར་འོས་པའི་ཚོགས་ལ་ཞུགས་པའོ། །དྲང་པོར་ཞུགས་པ་ཞེས་བྱ་བ་ནི་གྱ་གྱུ་མེད་པ་མྱ་ངན་ལས་འདས་པའི་སྲོལ་འཕགས་པའི་ལམ་དུ་ཞུགས་པའོ། །མཐུན་པར་ཞུགས་པ་ཞེས་བྱ་བ་ནི་བསླབས་པས་མཐུན་པའམ་མི་སློབ་པས་མཐུན་པའི་ལམ་དུ་ཞུགས་པའོ། །ཆོས་ཀྱི་རྗེས་སུ་མཐུན་པའི་ཆོས་ལ་ཞུགས་པ་ཞེས་བྱ་བ་ནི་ཆོས་མྱ་ངན་ལས་འདས་པ་དེའི་རྗེས་སུ་འགྲོ་བ་ནི་ཆོས་ཀྱི་རྗེས་སུ་མཐུན་པའི་ཆོས་ཏེ། ཟག་པ་མེད་པའི་ཤེས་པ་དང་ལུས་དང་ངག་གི་སྡོམ་པ་དང་ཡང་དག་པའི་འཚོ་བ་ཉིད་ལ་ཞུགས་པའོ། །ཆོས་ཀྱི་རྗེས་སུ་མཐུན་པར་སྤྱོད་པ་ཞེས་བྱ་བ་ནི་ཆོས་མྱ་ངན་ལས་འདས་པའི་རྗེས་སུ་མཐུན་པའི་ཆོས་འཕགས་པའི་ལམ་གྱི་རྗེས་སུ་མཐུན་པའི་ཆོས་སོ་སོར་ཐར་པའི་སྡོམ་པ་དང་སྡོམ་པའི་རྗེས་སུ་མཐུན་པའི་ཆོས་ལུས་དང་ངག་གི་སྡོམ་པ་དང་ཡང་དག་པའི་འཚོ་བ་དག་ལ་རྗེས་སུ་སྒྲུབ་པར་བྱེད་ཅེས་བྱ་བའི་ཐ་ཚིག་གོ །དེ་ལྟར་ཆོས་ཀྱི་རྗེས་སུ་མཐུན་པར་དཔྱོད་པ་དག་གི་ངོ་བོ་ཉིད་བསྟན་པའི་ཕྱིར་དགེ་འདུན་ལ་ཞེས་བྱ་བ་ལ་སོགས་པ་གསུངས་ཏེ། དགེ་འདུན་ལ་ཞེས་བྱ་བ་ནི་དགེ་འདུན་གྱི་ནང་ན་སྟེ་དེན་གང་ཟག་འདི་ལྟ་བུ་དག་ཡོད་དོ་ཞེས་བྱ་བའི་ཐ་ཚིག་གོ །རྒྱུན་དུ་
ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་དག་ཀྱང་ཡོད་ཅེས་བྱ་བ་ལ་རྒྱུན་ཅེས་བྱ་བ་ནི་འཕགས་པའི་ལམ་སྟེ། དེས་མྱ་ངན་ལས་འདས་པའི་རྒྱ་མཚོར་འཇུག་པའི་ཕྱིར་རོ། །དེར་ཞུགས་པ་ནི་རྟོགས་པ་སྟེ། རྒྱུན་དུ་ཞུགས་པ་དེ་ཉིད་འབྲས་བུ་ཡིན་པས་རྒྱུན་དུ་ཞུགས་པའི་འབྲས་བུ་སྟེ། ཁམས་གསུམ་གྱི་ཉོན་མོངས་པ་མཐོང་བས་སྤང་བར་བྱ་བ་རྣམས་སྤངས་སོ། །དེས་འཐོབ་པའི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བས་དེ་དེའི་ཕྱིར་ཞུགས་པ་ནི་རྒྱུན་དུ་ཞུགས་པའི་འབྲས་བུས་མངོན་སུམ་དུ་བྱ་བའི་ཕྱིར་ཞུགས་པ་དག་སྟེ། རིམ་གྱིས་མཐོང་བའི་ལམ་གྱིས་ཁམས་གསུམ་པའི་ཉོན་མོངས་པ་མཐོང་བས་སྤང་བར་བྱ་བ་རྣམས་སྤང་བའི་ཕྱིར་བརྩོན་པ་གང་དག་ཡིན་པ་དག་གམ་ཞེས་ཆེར་འདོད་ཆགས་དང་བྲལ་བ་བསྒོམ་པས་སྤང་བར་བྱ་བ་རྣམས་དྲུག་པ་མ་སྤངས་པ་གང་དག་ཡིན་པ་དག་གོ །རྒྱུན་དུ་ཞུགས་པ་དག་ཅེས་བྱ་བ་ནི་གང་དག་གིས་རྒྱུན་དུ་ཞུགས་པའི་འབྲས་བུ་ཐོབ་པ་དེ་དག་གོ །ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་དག་ཅེས་བྱ་བ་ནི་གང་དག་ལན་ཅིག་ཅེས་བྱ་བ་རེ་ཞིག་མིའི་འགྲོ་བ་པའི་དཔེར་འགྱུར་ཞིང་ལྷག་པ་མེད་པ་དེ་དག་ནི་ལན་ཅིག་ཕྱིར་འོང་བ་དག་སྟེ་འདོད་པ་ན་སྤྱོད་པའི་ཉོན་མོངས་པ་བསྒོམ་པས་སྤང་བར་བྱ་བདག་གི་རྣམ་པ་དྲུག་ཏུ་སྤངས་ཤིང་མཐོང་བའི་ལམ་ལས་ལངས་པའི་འཕགས་པའི་གང་ཟག་རྣམས་སོ། །དེ་དག་གི་འབྲས་བུ་ནི་ལན་ཅིག་ཕྱིར་འོང་བའི་འབྲས་བུ་སྟེ། ཁམས་གསུམ་པའི་ཉོན་མོངས་པ་མཐོང་བས་སྤང་བར་བྱ་བ་རྣམས་སྤངས་པ་དང་འདོད་པ་ན་སྤྱོད་པ་ཉོན་མོངས་པ་རྣམས་བསྒོམ་པས་སྤང་བར་བྱ་བ་དག་གི་རྣམ་པ་དྲུག་སྤངས་པའོ། །དེ་མངོན་སུམ་དུ་བྱ་བའི་ཕྱིར་ཞུགས་པ་ནི་ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་དག་སྟེ། རིམ་གྱིས་བསྒོམ་པའི་ལམ་ལས་རིམ་གྱིས་ཞུགས་པ་དང་མཐོང་བའི་ལམ་ལ་ཤས་ཆེར་འདོད་ཆགས་དང་བྲལ་བའོ། །ལན་ཅིག་ཕྱིར་འོང་བ་དག་ཅེས་བྱ་བ་ནི་གང་དག་གིས་དེའི་འབྲས་བུ་ཐོབ་པ་དག་གོ །ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་དག་ཅེས་བྱ་བ་ནི་གང་དག་འདོད་པའི་ཁམས་སུ་སྐྱེ་བའི་དོན་དུ་ཡང་ཕྱིར་མི་འོང་བར་འདོད་
པ་ན་སྤྱོད་པའི་ཉོན་མོངས་པ་བསྒོམ་པས་སྤང་བར་བྱ་བ་དག་གི་རྣམ་པ་དགུ་པ་ཡང་སྤངས་བའི་ཕྱིར་རོ། །དེ་དག་གི་འབྲས་བུ་ནི་ཕྱིར་མི་འོང་བའི་འབྲས་བུ་སྟེ་ཁམས་གསུམ་པའི་ཉོན་མོངས་པ་མཐོང་བས་སྤང་བར་བྱ་བ་རྣམས་དང༌། འདོད་པ་ན་སྤྱོད་པའི་བསྒོམ་པས་སྤང་བར་བྱ་བ་རྣམས་སྤངས་པའོ། །དེ་མངོན་སུམ་དུ་བྱ་བའི་ཕྱིར་ཞུགས་པ་ནི་ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་དག་སྟེ། བསྒོམ་པའི་ལམ་ལ་མཐར་གྱིས་ཞུགས་པ་དང་མཐོང་བའི་ལམ་ལ་འདོད་ཆགས་དང་བྲལ་བ་སྔོན་དུ་བཏང་བ་དག་གོ །ཕྱིར་མི་འོང་བ་དག་ཅེས་བྱ་བ་ནི་གང་དག་གིས་དེའི་འབྲས་བུ་ཐོབ་པ་དག་གོ །དགྲ་བཅོམ་པ་ཉིད་ཀྱི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་དག་ཅེས་བྱ་བ་ལ། དགྲ་བཅོམ་པ་ཉིད་ཅེས་བྱ་བ་ནི་འགྲོ་བ་མཐའ་དག་གིས་མཆོད་པར་འོས་པ་ཉིད་དོ། །དེ་ཉིད་འབྲས་བུ་ཡིན་པས་དགྲ་བཅོམ་པ་ཉིད་ཀྱི་འབྲས་བུ་སྟེ། ཁམས་གསུམ་པའི་མཐོང་བ་དང་བསྒོམ་པས་སྤང་བར་བྱ་བའི་ཉོན་མོངས་པ་མ་ལུས་པར་སྤངས་པའོ། །དེ་མངོན་སུམ་དུ་བྱ་བའི་ཕྱིར་ཞུགས་པ་ནི་དགྲ་བཅོམ་པ་ཉིད་ཀྱི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་དག་གོ །ངག་དང་མཐོང་བའི་མས་ལས་ལངས་ཤིང་གཟུགས་དང་གཟུགས་མེད་པ་ལས་འདོད་ཆགས་དང་བྲལ་བར་བྱ་བའི་ཕྱིར་ལམ་སྒོམ་པར་བྱེད་པ་དག་གོ །དགྲ་བཅོམ་པ་དག་ཅེས་བྱ་བ་ནི་གང་དག་གིས་དེའི་འབྲས་བུ་ཐོབ་པ་དག་གོ །གང་ཟག་རྣམ་པར་གཞག་པ་བསྟན་པའི་ཕྱིར་དེ་ལྟར་དེ་དག་ནི་ཞེས་བྱ་བ་ལ་སོགས་པ་གསུངས་ཏེ། སྐྱེས་བུ་བཞི་ཞེས་བྱ་བ་ལ། ཟུང་ཞེས་བྱ་བ་ནི་ཕྲུགས་ཏེ་རྒྱུན་དུ་ཞུགས་པ་དང༌། དེ་ལ་ཞུགས་པ་ནི་ལམ་གྱི་རིགས་མཐུན་པའི་ཟུང་གཅིག་གོ །ལྷག་མ་
གསུམ་ཡང་དེ་བཞིན་དུ་ཤེས་པར་བྱའོ། །རྒྱུ་ཆེར་བགྲང་བ་བསྟན་པའི་ཕྱིར་སྐྱེས་བུ་གང་ཟག་བརྒྱད ་ཡིན་ནོ་ཞེས་བྱ་བ་གསུངས་ཏེ། གཞན་ནི་ཞུགས་པ་ཡིན་ལ་གཞན་ནི་འབྲས་བུ་ལ་གནས་པ་ཡིན་པར་བསྟན་པའི་ཕྱིར་བརྒྱད་ཅེས་སྨོས་ཏེ་ལམ་ཐ་དད་པའི་ཕྱིར་རོ། །ཡོན་ཏན་འགྲུབ་པར་བསྟན་པའི་ཕྱིར་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་དེ་ནི་ཞེས་བྱ་བ་ལ་སོགས་པ་གསུངས་ཏེ། ཚུལ་ཁྲིམས་ཕུན་སུམ་ཚོགས་པ་ཞེས་བྱ་བ་ནི་སློབ་པ་དང་མི་སློབ་པའི་ཚུལ་ཁྲིམས་དང་ལྡན་པའོ། །ཏིང་
ངེ་འཛིན་ཕུན་སུམ་ཚོགས་པ། ཤེས་རབ་ཕུན་སུམ་ཚོགས་པ་ཞེས་བྱ་བ་ཡང་དེ་བཞིན་དུ་ཤེས་པར་བྱའོ། །རྣམ་པར་གྲོལ་བ་ཕུན་སུམ་ཚོགས་པ་ཞེས་བྱ་བ་ལ། རྣམ་པར་གྲོལ་བ་ཞེས་བྱ་བ་ནི་ཟག་པ་མེད་པའི་མོས་པ་སྟེ། སློབ་པ་དང་མི་སློབ་པའི་སྡུག་བསྔལ་ལ་ཆོས་ཤེས་པའི་བཟོད་པ་ལ་སོགས་པ་དང་དེ་དང་མཚུངས་པར་ལྡན་པ་དང་ལྡན་པ་ནི་རྣམ་པར་གྲོལ་བ་ཕུན་སུམ་ཚོགས་པའོ། །རྣམ་པར་གྲོལ་བའི་ཤེས་པ་དང༌། མཐོང་བ་ཕུན་སུམ་ཚོགས་པ་ཞེས་བྱ་བ་ལ། རྣམ་པར་གྲོལ་བའི་ཞེས་བྱ་བ་ནི་རྣམ་པར་གྲོལ་བ་ན་ཤེས་པ་དང་མཐོང་བ་སྐྱེས་པའམ་རྣམ་པར་གྲོལ་བ་དང་མཚུངས་པར་ལྡན་པའི་ཤེས་པ་དང་མཐོང་བ་ཞེས་བྱ་བར་སྦྱར་རོ། །ཤེས་པ་ཞེས་བྱ་བ་ནི་སྡུག་བསྔལ་ལ་ཆོས་ཤེས་པ་ལ་སོགས་པ་དང༌། ཟག་པ་ཟད་པ་ལ་སོགས་པ་དང༌། མཐོང་བ་ཞེས་བྱ་བ་ནི་སྡུག་བསྔལ་ལ་ཆོས་ཤེས་པའི་བཟོད་པ་ལ་སོགས་པ་དང༌། མི་སློབ་པའི་ཡང་དག་པའི་ལྟ་བ་ལ་སོགས་པའོ། །ཤེས་པ་དང་མཐོང་བ་དེ་གཉིས་དང་ལྡན་པ་ནི་རྣམ་པར་གྲོལ་བའི་ཤེས་པ་དང་མཐོང་བ་ཕུན་སུམ་ཚོགས་པ་ཞེས་བྱའོ། །གང་དག་ཉོན་མོངས་པའི་དྲི་མ་བསལ་ཞིང་ངོ་བོ་ཉིད་རྣམ་པར་གྲོལ་བར་སྨྲ་བ་དེ་དག་གི་ལུགས་ལ་ནི་སློབ་པ་རྣམ་པར་གྲོལ་བ་མེད་པར་འགྱུར་བས་དགེ་འདུན་ཐམས་ཅད་ལ་རྣམ་པར་གྲོལ་བ་ཕུན་སུམ་ཚོགས་པས་ཁྱབ་པར་མི་འགྱུར་བ་དེ་ནི་མི་རུང་ངོ༌། །ཀུན་སྦྱིན་པའི་འོས་སུ་གྱུར་པ་ཞེས་བྱ་བ་ནི་འབྲས་བུ་འདོད་པས་ཆོས་གོས་ལ་སོགས་པ་དག་གིས་མཆོད་པར་འོས་པའི་ཕྱིར་རོ། །རབ་ཏུ་སྦྱིན་པའི་འོས་སུ་གྱུར་པ་ཞེས་བྱ་བ་ནི་ཐར་པའི་འབྲས་བུ་ཉིད་ཀྱིས་དེ་ལ་མཆོད་པར་བྱ་བ་ཆེས་ཁྱད་པར་དུ་འཕགས་པའི་ཕྱིར་རོ། །ཐལ་མོ་སྦྱར་བའི་འོས་སུ་གྱུར་པ་ཞེས་བྱ་བ་ནི་ཐལ་མོ་སྦྱར་བས་མཆོད་པའི་འོས་ཡིན་པའི་ཕྱིར་རོ། །ཕྱག་བྱ་བའི་འོས་སུ་གྱུར་པ་ཞེས་བྱ་བ་ནི་ཕྱག་བྱ་བའི་འོས་ཡིན་པའི་ཕྱིར་རོ། །བསོད་ནམས་ཀྱི་ཞིང་བླ་ན་མེད་པ་ཞེས་བྱ་བ་ནི་དེ་བས་ཁྱད་པར་འཕགས་པའི་དགེ་འདུན་གཞན་མེད་པའི་ཕྱིར་རོ། །འཇིག་རྟེན་གྱི་ཡོན་གནས་ཡིན་ནོ་ཞེས་བྱ་བ་ནི་འགྲོ་བ་ཐམས་ཅད་ཀྱི་ཡོན་གྱི་འོས་ཡིན་པའི་ཕྱིར་རོ། །ཆོམ་རྐུན་པ་དག་ཅེས་བྱ་བ་ནི་གཡོ་སྒྱུ་ཅན་དག་གོ །བགྲོད་པར་གྱུར་ནས་ཞེས་བྱ་བ་ནི་དབང་དུ་གྱུར་ནས་སོ། །
སྡེ་སྣོད་ཅེས་བྱ་བ་ནི་མདོ་སྡེ་དང་འདུལ་བ་དང༌། ཆོས་མངོན་པ་དག་ལ་སྡེ་སྣོད་ཀྱི་སྒྲ་ཡོད་དེ། འདུས་པ་ཡིན་པའི་ཕྱིར་ཆོས་སྨྲ་བ་ཞེས་བྱ་བ་ནི་ཆོས་ཀྱི་གཏམ་བྱེད་ནུས་པའོ། །རིགས་པའི་སྤོབས་པ་དང་ལྡན་པ་ཞེས་བྱ་བ་ནི་རིགས་པ་དང་ལྡན་པ་སྟོན་པའི་ཕྱིར་རོ། །གྲོལ་བའི་སྤོབས་པ་དང་ལྡན་པ་ཞེས་བྱ་བ་ནི་ཐགས་ཐོགས་མེད་པར་སྟོན་པའི་ཕྱིར་རོ། །བསོད་ནམས་བྱ་བའི་གཞི་ཞེས་བྱ་བ་ལ། བསོད་ནམས་བྱ་བ་ཞེས་བྱ་བ་ནི་དགེ་བ་སྤེལ་བའོ། །དེའི་གཞི་ཞེས་བྱ་བ་ནི་རྒྱུའོ། །དེ་ནི་སྦྱིན་པ་དང་ཚུལ་ཁྲིམས་དང༌། སྒོམ་པ་ཞེས་བྱ་བ་གསུམ་པོ་དག་གོ །དེ་དག་གི་བསྔགས་པ་བརྗོད་ཅིང་ཞེས་བྱ་བ་ནི་ཕན་ཡོན་བསྒྲགས་ཤིང་དོ། །དེ་དག་ལ་བཀོད་ནས་ཞེས་བྱ་བ་ནི་བཞག་ནས་སོ། །རྣམ་པར་བཤད་ཅེས་བྱ་བ་ནི་རྣམ་པར་ཕྱེ་བའོ། །རིན་ཆེ་བ་ཞེས་བྱ་བ་ནི་རིན་ཐང་ཆེ་བའོ། །ཆེ་བར་འོས་པ་ཞེས་བྱ་བ་ནི་བཀྲ་བའོ། །བར་ཇི་སྲིད་པ་ཞེས་བྱ་བ་ནི་ཐག་ཇི་སྲིད་པར་རོ། །ནད་པའི་རྐྱེན་དང་སྨན་གྱི་ཡོ་བྱད་ཅེས་བྱ་བ་ནི་ནད་པའི་རྐྱེན་མཁོ་བའི་ཡོ་བྱད་བུ་རམ་ལ་སོགས་པ་གང་དག་ཡིན་ང་དང༌། སྨན་གྱི་ཟོང་ལ་སོགས་པ་སྨན་ཡོ་བྱད་གང་དག་ཡིན་པ་དེ་དག་ནི་ནད་པའི་རྐྱེན་དང་སྨན་གྱི་ཡོ་བྱད་དག་ཅེས་བྱའོ། །ཐུགས་ལས་ཆུང་ངུ་ཞེས་བྱ་བ་ནི་བསམ་མི་དགོས་པའོ། །གནས་དེ་ལྟ་བུ་ཡོད་པས་ཞེས་བྱ་བ་ལ། འདིར་གནས་ཞེས་བྱ་བ་ནི་སྲིད་པའམ་རྒྱུའོ། །དུས་ཤེས་པར་འགྱུར་རོ་ཞེས་བྱ་བ་ནི་དགོས་པའི་དུས་གང་ཡིན་པ་ཤེས་པར་འགྱུར་བའོ། །བཞིན་བསྒྱུར་ཞིང་ཞེས་བྱ་བ་ནི་ངོམ་ཟུམ་བྱེད་པའོ། །ཡོངས་སུ་བཏང་བ་ལས་བྱུང་བའི་བསོད་ནམས་ཞེས་བྱ་ནི་ཡོངས་སུ་གཏོང་བའི་རྒྱུ་ལས་བྱུང་བ་དངོས་ཀྱི་དུས་སུ་བྱུང་བའོ། །ཡོངས་སུ་ལོངས་སྤྱོད་པ་ལས་བྱུང་བའི་བསོད་ནམས་ཞེས་བྱ་བ་ནི་ཡོངས་སུ་ལོངས་སྤྱོད་པའི་རྒྱུ་ལས་བྱུང་བ་སེམས་ཅན་ལ་ཕན་པའི་དུས་སུ་འབྱུང་བ་ཞེས་བྱ་བའི་ཐ་ཚིག་གོ །ལེགས་ཀྱི་ཞེས་བྱ་བ་ནི་ཆས་མཛེས་ཀྱིའོ། །ལམ་དུ་ཞུགས་པ་ཞེས་བྱ་བ་ནི་ངལ་བས་ཉམ་ཐག་པའི་མི་དག་ལམ་དེར་སྐྲ་མེད་པར་འཇུག་པས་སྒྲ་མེད་པ་ནི་ལམ་མོ། །དེར་ཞུགས་པ་ནི་ལམ་དུ་ཞུགས་པའོ། །ཡང་དག་པར་བླངས་ཏེ་འཇུག་པ་ཞེས་བྱ་བ་ནི་རྗེས་སུ་བསྒྲུབ་པའོ། །ཤེས་པ་ཞེས་བྱ་བ་ནི་རབ་ཏུ་གྲགས་པའོ། །རྫས་ཞེས་བྱ་བ་ནི་
གཞིའོ། །ཡོ་བྱད་ཅེས་བྱ་བ་ནི་བཞག་པའོ། །འབྲང་ཞིང་ཞེས་བྱ་བ་ནི་ཕྱི་བཞིན་འབྲང་བའོ། །དེ་ལྟར་ན་ཞེས་བྱ་བའི་སྒྲ་ནི་མི་བཟོད་པའོ། །ལམ་དུ་བཟླ་བ་ཞེས་བྱ་བ་ནི་བསྐུར་བའོ། །རི་བྲགས་ཞེས་བྱ་བ་ནི་རིའི་གྲོང་ངོ༌། །རུང་བར་བྱས་ཏེ་ཞེས་བྱ་བ་ལོངས་སྤྱད་པར་འོས་པའོ། །མཐའ་ཆགས་ཞེས་བྱ་བ་ནི་ཁ་ཚར་གྱི་མཐའ་བཙེམས་པའོ། །རང་ཆགས་ཞེས་བྱ་བ་ནི་ཕུན་ཚར་གྱི་མཐའ་བཙེམས་པའོ། །ཁ་ཅིག་ན་རེ་མཐའ་ཆགས་ཞེས་བྱ་བ་ནི་ཁ་ཚར་བཅད་པའོ་ཞེས་ཟེར་རོ། །བ་ལང་གི་ལྕི་བ་བཙིར་བ་ཞེས་བྱ་བ་ནི་བ་ལང་གི་ལྕི་བའི་ཁུ་བའོ། །ཕོངས་པ་དག་ཏུ་ཞེས་བྱ་བ་ནི་ཕོངས་པའི་དུས་ཏེ། གང་དུ་བཙོ་བླག་ལ་སོགས་པ་གཞིའི་ཆོ་ག་མི་ནུས་པ་ཞེས་བྱ་བའི་ཐ་ཚིག་གོ །གནས་སྐབས་ཐ་མལ་པ་དག་ཏུ་ཞེས་བྱ་བ་ནི་མི་བྲེལ་བ་དག་ཏུའོ། །དྲུག་སྡེ་ཞེས་བྱ་བ་ནི་དགའ་བོ་དང་ཉེ་དགའ་དང་འཆར་ཀ་དང་འགྲོ་མགྱོགས་དང་ནབ་སོ་དང་འདུན་པ་ཞེས་བྱ་བ་དག་གོ །ལྷུང་བཟེད་ནག་པོ་ཅན་ཞེས་བྱ་བ་ནི་བསོད་སྙོམས་པའོ། །རྐང་པ་སྤྲེའུའི་ཞག་གིས་བསྐུས་ཏེ་ཞེས་བྱ་བ་ནི་རྐང་པ་བསྐུ་བ་ལ་དེ་མཁོ་སྟེ། དེས་ན་ཇི་ལྟར་འདོད་པའི་ཡུལ་དུ་འགྲོ་བ་འགྲུབ་པ་དང༌། ཇི་ལྟར་བསམས་པའི་དོན་ཡང་འགྲུབ་པའོ། །ཁྲོན་པའི་རུས་སྦལ་ཞེས་བྱ་བ་ནི་ཁྲོན་པའི་ནང་ན་འདུག་པའི་རུས་སྦལ་ལོ། །འགྲུབ་པར་རོ་ཞེས་བྱ་བ་རྙེད་པར་རོ། །མཐོན་དམན་ཅན་ཞེས་བྱ་བ་ནི་འབར་འབུར་ཅན་ནོ། །བུད་མེད་ཀྱི་ཡུལ་གནས་ངན་ལེན་ཀུན་དུ་སྤྱོད་པ་ཞེས་བྱ་བ་ནི་བུད་མེད་མི་དགེ་བ་སྟེ། ཕལ་ཆེར་དགེ་སློང་དག་ལ་ཀུན་དུ་ཆགས་པའི་ཕྱིར་རོ། །མ་བསྒྱུར་ཏེ་ཞེས་བྱ་བ་ནི་མ་བཙོངས་ཏེའོ། །ཀུན་དུ་སྤྱོད་པ་ཞེས་བྱ་བ་ནི་གོམས་པའོ། །ཕྱིར་འོང་བའི་དོན་མཐུན་ཞེས་བྱ་བ་ནི་ཁ་ཕྱིར་བལྟས་ཏེ་འོང་བའི་ཚོང་བའོ། །གོས་དཀར་པོ་ཅན་ཞེས་བྱ་བ་ནི་ཆོམ་རྐུན་པ་དག་ནི་གོས་སྔོན་པོ་ཅན་ཡིན་པས་འདི་དག་ནི་དངོས་ཆོམ་རྐུན་པ་མ་ཡིན་པས་གོས་དཀར་པོ་གོན་ཡང་ཆོམ་རྐུན་པ་དང་འདྲ་བས་ཆོམ་རྐུན་པ་ལྟ་བུ་ཞེས་གསུངས་སོ། །ལྕེ་རྟེན་གྱིས་ཞེས་བྱ་བ་ནི་སྒྱུ་ཐབས་ཀྱིས་སོ། །བདེན་པ་ཞེས་བྱ་བ་ནི་རིགས་པ་ཐོབ་པས་སོ། །རྫས་ཐམས་ཅད་འཕྲོག་པར་བྱེད་པས་ཞེས་བྱ་བ་ནི་ནོར་ཐམས་ཅད་འཕྲོག་པར་བྱེད་པའོ། །འཚེར་ཞིང་ཞེས་བྱ་བ་ནི་འཇིགས་
ཤིང་ངོ༌། །ལག་པ་ལ་འགྲམ་པ་གཏད་དེ་ཞེས་བྱ་བ་ནི་ལག་པར་འགྲམ་པ་མཁུར་ཚོས་བཞག་སྟེའོ། །ཀུན་ཤེས་པ་ཞེས་བྱ་བ་ནི་ཀུན་དུ་གྲགས་པའོ། །གང་དུ་སྒོ་དང་སྒེའུ་ཆུང་དག་ནས་ཤོ་གམ་གཅོད་པར་གྲགས་པ་ད་ནི་ཀུན་ཤེས་པའི་ཤོ་གམ་ཅན་ནོ། །སྒེའུ་ཆུང་ཞེས་བྱ་བ་ནི་མ་གྲགས་པའི་ལམ་མོ། །གནོད་སྦྱིན་ལ་གཏོར་མ་བྱས་ཏེ་ཞེས་བྱ་བ་ནི་ལྷ་ལ་གཏོར་མ་ཕུལ་ཏེའོ། །མིག་ལམ་ཞེས་བྱ་བ་ནི་མིག་ལམ་སྟེ་སྣང་བའོ། །འདེས་ཤིང་ཞེས་བྱ་བ་ནི་དེད་ཅིང་ངོ༌། །མཚན་མོ་ནམ་ལངས་པ་ཞེས་བྱ་བ་ནི་མཚན་མོ་ཟད་པའོ། །སྲང་དུ་ཞེས་བྱ་བ་ནི་ཚོང་དུས་སུའོ། །དགེ་སྦྱོང་གི་ཚུལ་ཞེས་བྱ་བ་ནི་རབ་ཏུ་བྱུང་བའོ། །ཚིག་པ་ཡིན་ནོ་ཞེས་བྱ་བ་ནི་ཉམས་པའོ། །བྲམ་ཟེའི་ཚུལ་ཞེས་བྱ་བ་ནི་རིགས་ཀྱི་ཆོས་སོ། །གཞན་གྱི་འཚོ་ཞེས་བྱ་བ་ནི་གཞན་གྱི་འཚོ་བའི་ཐབས་སོ། །གནོད་པ་བྱེད་ཅེས་བྱ་བ་ནི་མེད་པར་བྱེད་པའོ། །སྨོད་པར་བྱེད་ཅེས་བྱ་བ་ནི་མིང་ནས་འབྱིན་ཅིང་ཉེས་པ་སྒྲོགས་པའོ། །ཕྱར་ཀ་གཏོང་བར་བྱེད་ཅེས་བྱ་བ་ནི་གཞོགས་ཀྱིས་སྙད་འདོགས་པས་སོ། །ཁ་ཟེར་བར་བྱེད་ཅེས་བྱ་བ་ནི་སྤྱོ་བར་བྱེད་པའོ། །དགེ་སྦྱོང་མི་བསྲུང་བ་ཞེས་བྱ་བ་ནི་ཆད་པ་དང་བྲལ་བའོ། །ངོ་བྱའོ་ཞེས་བྱ་བ་ནི་རག་ལུས་པར་བྱ་བའོ། །སྡིག་པ་ཞི་བར་གྱུར་ཅིག་ཅེས་བྱ་བ་ནི་ལྡོག་པར་གྱུར་ཅིག་ཅེས་བྱ་བའི་ཐ་ཚིག་གོ །ཚར་གཅད་པར་བྱ་ཞེས་བྱ་བ་ནི་ཕམ་པར་བྱ་བའོ། །མི་ཉལ་བར་སྦྱོར་ཞེས་བྱ་བ་ནི་མི་ཉལ་བ་ལ་བརྩོན་པའོ། །དེའི་རྗེས་སུ་སོང་བ་ནི་མི་ཉལ་བའི་སྦྱོར་བ་ལ་རྗེས་སུ་བརྩོན་པའོ། །ཡོངས་སུ་གཡོ་བ་དང་བཅས་པ་ཞེས་བྱ་བ་ནི་འཁྲུགས་པ་དང་བཅས་པའོ། །མཚན་མོ་དང་བཅས་པ་ཞེས་བྱ་བ་ནི་ནམ་མཁའ་ཕན་ཕུན་ཙམ་གྱི་དུས་ཞེས་བྱ་བའི་ཐ་ཚིག་གོ །བཀྲེན་པ་དག་ཅེས་བྱ་བ་ནི་ཉོན་མོངས་པ་དག་ཅེས་བྱ་བའི་ཐ་ཚིག་གོ །རྒྱས་པ་ཞེས་བྱ་བ་ནི་རྒྱུན་མི་འཆད་པའོ། །འཕེལ་བ་ཞེས་བྱ་བ་ནི་འབྲས་བུ་མང་བའོ། །ཡངས་པ་ཞེས་བྱ་བ་ནི་ཞིང་ལ་སོགས་པའི་ས་གཞི་མང་བའོ། །དབང་བའི་ཞེས་བྱ་བ་ནི་འཐོབ་པའིའོ། །བསླུས་ཏེ་ཞེས་བྱ་བ་ནི་བྲིད་དེའོ། །ཁུ་ཚུར་ཞེས་བྱ་བ་ནི་སོར་མོ་བཅངས་པས་བརྡེག་པའོ། །རང་ཐག་གི་རྡོ་ཞེས་བྱ་བ་ནི་རྡོ་བའོ། །རྩ་ཕུག་གི་ཞེས་བྱ་བ་ནི་ཁྲག་གཏར་བའོ། །བྲལ་ཞེས་བྱ་བ་ནི་ཐག་རིང་དུ་སོང་བའོ། །འདའ་
བར་བགྱིད་པ་མ་ལགས་ཀྱི་ཞེས་བྱ་བ་ནི་འཁུ་བར་བྱ་བ་མ་ཡིན་པའོ། །ཚོང་པར་མི་འགྱུར་བ་ཞེས་བྱ་བ་ནི་ཟོང་ཟད་པའོ། །དྲལ་དྲལ་ཅིང་ཞེས་བྱ་བ་ནི་བཟླས་པའི་ཕྱིར་ལན་གཉིས་སུ་སྨོས་སོ། །ལོ་ཐང་འདུ་བ་ཞེས་བྱ་བ་ལ། །ལོ་ཐང་ཞེས་བྱ་བ་ནི་རྒྱལ་པོའི་དཔྱའོ། །དེའི་འབྱུང་ཁུངས་ནི་རྐུ་བའོ། །དེ་མི་སྐྱེ་བ་ནི་མི་འབྱུང་བའོ། །བཙོན་རར་བཅུག་སྟེ་ཞེས་བྱ་བ་ནི་བཙོན་དུ་བཟུང་སྟེའོ། །ཀུན་ཤེས་པའི་ཤོ་གམ་ཅན་ཞེས་བྱ་བ་ནི་གྲགས་པའི་ཤོ་གམ་ཅན་ནོ། །ཉེས་པ་བྱེད་པའི་ཤོ་གམ་ཅན་ཞེས་བྱ་བ་ལ། ཉེས་པ་ཞེས་བྱ་བ་ནི་སྐྱོན་ནམ་གནོད་པའམ་ནན་ཏུར་རོ།། དེ་བྱེད་པ་ནི་ཉེས་པ་བྱེད་པ་སྟེ། ཤོ་གམ་འདྲ་བ་དག་གི་ནོར་འཕྲོག་པར་བྱེད་ཅེས་བྱ་བའི་ཐ་ཚིག་གོ །རྒྱལ་སྲིད་བྱེད་དུ་བཅུག་ཅེས་བྱ་བ་ནི་བློན་པོ་དག་ཡུལ་སྲུང་བ་བྱེད་དུ་བཅུག་པའོ། །འདུན་པ་ཞེས་བྱ་བ་ནི་སྐྱེ་བོ་མང་པོ་འདུ་བའི་གནས་སོ། །གཟིགས་སུ་གསོལ་ཞེས་བྱ་བ་ནི་ལྟོས་ཤིག་ཅེས་བྱ་བའོ། །ར་མདའ་ཟློག་པའི་སྐད་ཅེས་བྱ་བ་ནི་ཐར་བར་བྱ་བའི་སྒྲའོ། །བསྔགས་པ་ཞེས་བྱ་བ་ནི་ཡོན་ཏན་བརྗོད་པའོ། །ཧ་ཅང་བྱ་བ་བྱེད་པ་ཞེས་བྱ་བ་ནི་ལན་མང་དུ་ཚོད་མི་ཤེས་པ་ཉིད་དུ་བྱེད་པར་རོ། །རྡེའུ་སྲིན་ཞེས་བྱ་བ་ནི་སའི་ནང་ནས་སྐྱེས་པའོ། །སྦྲུལ་ཁས་སྡིགས་པ་དག་ཅེས་བྱ་བ་ནི་གང་དག་སྦྲུལ་གྱི་ཁ་ཉེ་བར་བསྟན་ཏེ་སྡིགས་པ་ལ་སོགས་པས་འཚོ་བར་བྱེད་པ་དག་གོ །ཁ་ལུངས་པའི་ཡང་བ་ན་དག་ཅེས་བྱ་བ་ལ། ཁ་ལུངས་པ་ཞེས་བྱ་བ་ནི་འབྲོག་ཕྱོགས་ན་གནས་པའོ། །ཡང་བ་ན་ཞེས་བྱ་བ་ནི་མིའི་རིགས་ཀླ་ཀློ་དག་ཅིག་གི་མིང་ངོ༌། །འཆའ་ཞིང་ཞེས་བྱ་བ་ནི་ལྡད་པའོ། །ཡུལ་ཕྱོགས་ཞེས་བྱ་བ་ནི་འདུ་བའི་གནས་སོ། །བརྡ་ཞེས་བྱ་བ་ནི་དུས་བརྡའོ། །མཚན་མ་ཞེས་བྱ་བ་ནི་མངོན་མཚན་ཅན་ནོ། །དམར་སེར་ཅན་ཞེས་བྱ་བ་ནི་བླ་གོས་སེར་པོ་དང་བཅས་པའི་སྣམ་སྦྱར་དམར་པོ་འམ་ཡང་ན་ཉིས་རིམ་མོ། །ཁར་བ་སྦུབས་ཅན་ཞེས་བྱ་བ་ནི་ལྕགས་ཀྱི་སྦུབས་ཀྱིས་དཀྲིས་པའོ། །ཡུལ་ཕྱོགས་ལ་སོགས་པ་དེ་དག་ནི་རྐུ་བར་བྱེད་པའི་ཡུལ་དུ་ཁྲིད་པའི་མཐའ་ཡིན་ཏེ། དེ་ཉིད་བརྐུས་པ་ཡིན་པར་ཤེས་པར་བྱའོ། །མངོན་སུམ་དུ་བབས་པ་ཞེས་བྱ་བ་ནི་གཞན་དག་གི་དགེ་སློང་གི་མངོན་སུམ་དུ་ལྟུང་བར་བྱས་པའོ། །ཁྱུ་ནས་དགར་བ་ཞེས་བྱ་བ་ནི་ཁྱུ་ནས་དབྱུང་བའོ། །མིག་སྣར་སྣང་བ་ཞེས་བྱ་
བ་ནི་ཁྱུའི་ཡུལ་ནས་སམ་རྫི་བོའི་ཡུལ་ནས་སྣང་བའོ། །གྲོག་མ་ཞེས་བྱ་བ་ནི་གྲོར་སྦུར་དག་གོ །ཏིལ་ཟ་བ་ཞེས་བྱ་བ་ནི་ཏིལ་ཉམས་པར་བྱེད་པའོ། །ཕུབ་མ་ཟ་བར་བྱེད་པ་ཞེས་བྱ་བ་ནི་ཟས་སུ་ཕུབ་མ་ཟ་བ་དག་གོ །རུལ་པ་ཟ་བ་ཞེས་བྱ་བ་ནི་ཤིང་རུལ་པ་སྟེ་ཤིང་སྲིན་གྱི་རིགས་དག་གོ །ཏྲཻམ་བུ་ཀ་ཞེས་བྱ་བ་ནི་ཕྲ་མོའོ། །ཏྲེའུ་ཏ་ལ་ཞེས་བྱ་བ་ནི་རགས་པའོ། །གནོད་བྱེད་དག་ཅེས་བྱ་བ་ནི་ཆད་པས་བཅད་པའི་མི་དག་གོ །ཆད་པས་བཅད་ཅེས་བྱ་བ་ནི་ཆད་པ་ལ་ཐུག་པ་དག་གོ །གསུག་ཅེས་བྱ་བ་ནི་གསང་སྟེ་གཞལ་དུ་གཞུག་པའོ། །བུམ་པ་སོ་མ་བཏང་བ་ཞེས་བྱ་བ་ནི་འཇིག་པར་བྱེད་པའི་ཕྱིར་རོ། །ནག་པོ་ཞེས་བྱ་བ་ནི་གནག་པའོ། །གནས་སྐབས་མཉམ་པར་སྤྱོད་པ་ཞེས་བྱ་བ་ནི་བྱ་བ་མཐུན་པའོ། །ལུས་ཆུང་ཞེས་བྱ་བ་ནི་ལུས་ཀྱི་བོང་ཆུང་བའོ། །ཡང་ན་དབང་ཐང་ཆུང་བའོ། །ངན་ཅིང་ཞེས་བྱ་བ་ནི་རིན་ཆུང་ཞིང་ངོ༌། །ཡོངས་སུ་རྙིངས་པ་ཞེས་བྱ་བ་ནི་དེངས་པའོ། །མེད་ནས་ཞེས་བྱ་བ་ནི་མི་འདུག་ནས་སོ། །དྲིན་ཅན་ཞེས་བྱ་བ་ནི་ཕན་གདགས་པའི་རྒྱུ་ལྕི་བ་ཉིད་དོ། །གཞན་ནས་གཞན་དུ་ཞེས་བྱ་བ་ནི་གོང་ནས་གོང་དུའོ། །མཚུངས་པར་འདོད་པ་ཞེས་བྱ་བ་ནི་གླག་པ་དང་ཁ་ཏོན་དང་མཐུན་པའོ། །མཛེས་པ་ཞེས་བྱ་བ་ནི་ཡིད་དུ་འོང་བས་སོ། །ཁ་དོག་གིས་གསལ་བ་ཞེས་བྱ་བ་ནི་འཇམ་པ་ཉིད་ཀྱིས་སོ། །ཟླུམ་པ་ཞེས་བྱ་བ་ནི་ཟླུམ་རིལ་ལོ། །ལོངས་སྤྱད་བཟོད་པ་ཞེས་བྱ་བ་ནི་སྤྱད་བཟོད་པའོ། །དགེ་བའི་ཕྱོགས་ཞེས་བྱ་བ་ནི་དགེ་བ་སྤེལ་བའོ། །སྤྱོད་པ་ཞེས་བྱ་བ་ནི་རྗེས་སུ་སྒྲུབ་པའོ། །ཐབས་ཡིན་ནོ་ཞེས་བྱ་བ་ནི་ཁས་བླངས་པའོ། །གླ་རྔན་ཞེས་བྱ་བ་ནི་རིན་ནོ། །བསྒྲུབས་ཀྱིས་ཞེས་བྱ་བ་ནི་གྲུབ་པར་བྱས་པའོ། །ཁྱིམ་བདག་མགོ་རེག་ཅེས་བྱ་བ་ནི་དགེ་སློང་ཐམས་ཅད་ཀྱི་སྦྱིན་པ་དག་ཏུ་གྱུར་པའོ། །འཕྲལ་གྱི་ཞེས་བྱ་བ་ནི་འཕྲལ་ངག་གི་བྱ་བའོ། །ཐོག་མར་འགྲོ་བ་ནི་གྲོགས་བྱ་བའོ། །སྐབས་ཞེས་བྱ་བ་ནི་གླགས་སོ། །རྙང་རྙིང་དག་ཅེས་བྱ་བ་ནི་གོས་དེངས་པ་དག་གོ །ལྕགས་ཀྱི་ཐུ་ལུམ་ཞེས་བྱ་བ་ནི་ལྕགས་བསྒོངས་པ་སྟེ། འཇུ་དཀའ་བ་ཉིད་ཀྱིས་དེ་དང་འདྲ་བའི་ཕྱིར་རོ། །སྐལ་བ་ཡོད་ཅེས་བྱ་བ་ནི་རུང་བའོ། །དེ་ལྟར་ཞེས་བྱ་བ་ནི་དེ་ལྟར་ནའོ། །ཉེས་དམིགས་ཞེས་བྱ་བ་ནི་ཉེས་པའོ། །ཉེས་པ་སྦོམ་པོར་འགྱུར་རོ་ཞེས་བྱ་བ་ནི་མ་བྱིན་པ་ཉིད་མེད་པས་དེའི་ཕྱིར་དེ་སྦོམ་པོར་
འགྱུར་རོ། །ཤར་ནས་སྐྱེས་པ་ཞེས་བྱ་བ་ནི་ཤར་ཕྱོགས་ནས་སྐྱེས་པའོ། །ཕྲག་པ་ལ་གྱོན་པ་ཞེས་བྱ་བ་ནི་ཐལ་གོང་དུ་བཞག་པའོ། །འཕྱང་བར་གྱུར་ནས་ཞེས་བྱ་བ་ནི་ནར་བར་གྱུར་ནས་སོ། །ཆོས་ཀྱི་ཞུགས་ཞེས་བྱ་བ་ནི་དད་པ་ལྷག་པའོ། །མི་བསམ་པས་ཞེས་བྱ་བ་ནི་མི་ལྟ་བས་སོ། །ཡོངས་སུ་ཉམས་པར་འགྱུར་བས་ཞེས་བྱ་བ་ནི་བགེགས་སུ་འགྱུར་བས་སོ། །དབྱར་ཁང་ཞེས་བྱ་བ་ནི་དགེ་སློང་མའི་གཙུག་ལག་ཁང་ངོ༌། །མྱུར་བ་མྱུར་བ་ཞེས་བྱ་བ་ནི་རིངས་པ་སྟེ། གུས་པར་བསྒྲིམས་པའི་ཕྱིར་ལན་གཉིས་སུ་བཟླས་སོ། །ནད་དང་བཅས་པས་ཞེས་བྱ་བ་ནི་ཁོན་དང་བཅས་པའོ། །སྐད་ཀྱི་ངེས་པའི་ཚིག་ཅེས་བྱ་བ་ལ། སྐད་ཅེས་བྱ་བ་ནི་ཐ་སྙད་གདགས་པའི་ཕྱིར་སྨྲ་བའོ། །དེས་ངེས་པར་སྨྲ་བ་ནི་སྐད་ཀྱི་ངེས་པའི་ཚིག་གོ །ཡུལ་ཞེས་བྱ་བ་ནི་ཡུལ་གྱི་འཁོར་གྱི་ཕྱོགས་གཅིག་གོ །ལྗོངས་ཞེས་བྱ་བ་ནི་ཡུལ་འཁོར་རོ། །ཏིང་ངེ་འཛིན་གྱི་མཚན་མ་ཞེས་བྱ་བ་ནི་བསམ་གཏན་གྱི་ལམ་མོ། །བཟང་བ་ཞེས་བྱ་བ་ནི་འཁྲུག་པ་མེད་པའོ། །དགེ་སྐོས་ཞེས་བྱ་བ་ནི་དགེ་འདུན་གྱི་ལས་ལ་དབང་བྱེད་པའོ། །དགེ་འདུན་གྱིས་ཅི་བ་དེར་བྱའོ་ཞེས་བྱ་བ་ནི་དེའི་ས་གཞིར་དེ་བྱུང་བའི་ཕྱིར་རོ། །རྣམ་པར་རྒྱལ་བར་བྱ་བ་ལས་རྣམ་པར་རྒྱལ་བ་ཞེས་བྱ་བ་ལ། འདིར་རྣམ་པར་རྒྱལ་བ་ཞེས་བྱ་བ་ནི་ཉོན་མོངས་པའི་གཡུལ་ལམ་ཁམས་གསུམ་པ་སྟེ། དེ་ལས་རྣམ་པར་རྒྱལ་བ་ཞེས་བྱ་བའི་ཐ་ཚིག་གོ །བསྟབས་པ་ཞེས་བྱ་བ་ནི་མགྲོན་དུ་བོས་པའོ། །ཡང་དག་པར་སྟོབས་པ་ཞེས་བྱ་བ་ནི་བཅོས་མ་མ་ཡིན་པས་སོ། །རྟོག་པས་སྟོབས་ཞེས་བྱ་བ་ནི་འཇིག་རྟེན་གྱི་ཚུལ་ལོ། །བ་གམ་པ་ཞེས་བྱ་བ་ནི་བརྟག་པའོ། །ལྟོ་གང་ངོ་ཞེས་བྱ་བ་ནི་ཕལ་ཆེ་བར་བསྟན་པའོ། །ལྕགས་ཀྱི་སེའུ་དང་འདྲ་སྟེ་ཞེས་བྱ་བ་ནི་ལྕགས་ལས་བྱས་པའི་བལ་པོ་སེའུ་དག་འདྲའོ། །ངེས་པ་ལ་འཇུག་པར་ཡང་མི་འགྱུར་ཞེས་བྱ་བ་ལ། དེས་པ་ཞེས་བྱ་བ་ནི་ཡོངས་སུ་མྱ་ངན་ལས་འདས་པ་ལ་སོགས་པར་བྱེད་པ་ངེས་པ་སྟེ་མཐོང་བའི་ལམ་མོ། །དེར་འཇུག་པ་ནི་ངེས་པ་ལ་འཇུག་པའོ། །ཟག་བ་ཟད་པ་ཞེས་བྱ་བ་ནི་དགྲ་བཅོམ་པ་ཉིད་ཐོབ་པའོ། །ཐོག་མ་དང་བར་དང་ཐ་མར་དགེ་བ་ཞེས་བྱ་བ་ལ། མདོར་སྟོན་པར་བྱེད་པ་ནི་ཐོག་མའོ། །རྒྱས་པར་
འཆད་པར་བྱེད་པ་ནི་བར་རོ། །ངེས་པར་སྦྱོར་བ་ནི་ཐ་མར་རོ། །ཡང་ན་ཉན་པ་ནི་ཐོག་མར་རོ། །སེམས་པ་ནི་བར་རོ། །སྒོམ་པ་ནི་ཐ་མའོ། །མངོན་པར་ཤེས་པ་ཞེས་བྱ་བ་ནི་ཟག་པ་མེད་པའི་ཤེས་པ་སྟེ། ངེས་པ་ལ་འཇུག་པའོ། །རྫོགས་པར་བྱང་ཆུབ་ཅེས་བྱ་བ་ནི་དགྲ་བཅོམ་པ་ཉིད་དེ་ཟག་པ་ཟད་པའོ། །མྱ་ངན་ལས་འདས་པ་ཞེས་བྱ་བ་ནི་ཡང་འབྱུང་བ་མེད་དོ། །འགྱུར་བ་ཡིན་ན་ཞེས་བྱ་བ་ནི་དེའི་དོན་དུ་འབྲས་བུར་འགྱུར་བ་ཡིན་པའོ། །སྟོན་ཟླ་ཐ་ཆུངས་ཀྱི་གཡོན་ཅན་ཞེས་བྱ་བ་ནི་སྟོན་ཟླ་ཐ་ཆུངས་ཀྱི་ཟླ་བ་ལ་ལྷ་མོ་བགྲོད་དཀའ་མཆོད་ནས་ཆོམ་རྐུན་བྱེད་པ་དག་གོ །བརྩལ་མི་དགོས་པར་ཞེས་བྱ་བ་ནི་འབད་མི་དགོས་པར་རོ། །འཚོ་བའི་བར་གྱི་འཚོ་བ་ཡོད་པ་ཞེས་བྱ་བ་ནི་ཁྱེའུ་དག་ཐར་བར་བྱ་བའི་ཕྱིར་རྙེད་པ་མང་པོ་འབྱུང་བས་སོ། །ཐབས་སོམས་ཤིག་ཅེས་བྱ་བ་ནི་ཕྱིར་དགུག་པའི་ཐབས་སོམས་ཤིག་པའོ། །བརྩོན་པར་མཛད་དུ་གསོལ་ཞེས་བྱ་བ་ནི་བརྩལ་བར་མཛད་དུ་གསོལ་ཞེས་བྱ་བའོ། །མ་བསམས་ན་ཞེས་བྱ་བ་ནི་མ་བལྟས་ནའོ། །གླགས་ཞེས་བྱ་བ་ནི་སྐོན་ནོ། །གཞན་དུ་གྱུར་པ་ཉིད་ཅེས་བྱ་བ་ནི་འགྱོད་པའོ། །རྫུ་འཕྲུལ་ཞེས་བྱ་བ་ནི་ཏིང་ངེ་འཛིན་གྱི་འབྲས་བུའོ། །རྫུ་འཕྲུལ་མངོན་པར་འདུ་བྱ་བ་ཞེས་བྱ་བ་ནི་རྫུ་འཕྲུལ་གྱི་རྒྱུའོ། །ཕྱིར་བརྟུལ་ནས་ཞེས་བྱ་བ་ནི་བསྡུས་ནས་སོ། །ཐར་པར་བྱ་བ་ཞེས་བྱ་བ་ནི་བཏང་བའོ། །གོ་བསྐོན་ཏེ་ཞེས་བྱ་བ་ནི་ཅི་ལས་མ་རག་པར་བཅས་ཏེའོ། །རྫུ་འཕྲུལ་ཆེ་བ་ཞེས་བྱ་བ་ནི་ཡོན་ཏན་ཆེ་བའོ། །མཐུ་ཆེ་བ་ཞེས་བྱ་བ་ནི་ནུས་པ་ཆེ་བའོ། །ཚེ་འདི་ཞེས་བྱ་བ་ནི་འཇིག་རྟེན་འདིའོ། །ཚེ་ཕྱི་མ་ཞེས་བྱ་བ་ནི་ཚེ་ཕ་རོལ་ལོ། །ཚེ་འདི་དང་ཕྱི་མ་ཞེས་བྱ་བ་ནི་གཉི་གའོ། །སྤྱི་བོ་ཞེས་བྱ་བ་ནི་སྐྲ་མེད་པའི་ཕྱིར་རམ་ཡོན་ཏན་ཆུང་བའི་ཕྱིར་རོ། །གོ་བར་བྱས་སོ་ཞེས་བྱ་བ་ནི་ལན་གླན་པའོ། །དོན་ཉུང་དུ་ཞེས་བྱ་བ་ནི་བསོད་སྙོམས་པ་སྟེ་བྱ་བ་ཉུང་བའི་ཕྱིར་རོ། །སྐབས་ཞེས་བྱ་བ་ནི་གླེང་བའི་སྐབས་སོ། །ལྟུང་བ་སྡེ་ལྔ་ཞེས་བྱ་བ་ནི་ཕམ་པར་གྱུར་པ་དང༌། དགེ་འདུན་ལྷག་མ་དང༌། ལྟུང་བྱེད་དང༌། སོ་སོར་བཤགས་པར་བྱ་བ་དང༌། ཉེས་བྱས་ཀྱི་སྡེ་ཚན་དག་གོ །བསམ་གཏན་ཞེས་བྱ་བ་ནི་བཞིའོ། །ཐར་པ་ཞེས་བྱ་བ་ནི་བརྒྱད་དེ། སེམས་རྣམ་པར་ཐར་པར་བྱེད་པའི་ཕྱིར་རོ། །ཏིང་ངེ་འཛིན་ཅེས་བྱ་བ་ནི་སྟོང་པ་ཉིད་ལ་སོགས་པའམ་
རྟོག་པ་དང་བཅས་ཤིང་དཔྱོད་པ་དང་བཅས་པ་ལ་སོགས་པའོ། །སྙོམས་པར་འཇུག་པ་ཞེས་བྱ་བ་ནི་མཐར་གྱིས་སྙོམས་པར་འཇུག་པ་དགུ་སྟེ་སེམས་སྙོམས་པར་འཇུག་པར་བྱེད་པའི་ཕྱིར་རོ། །བདེ་བ་ཞེས་བྱ་བ་ནི་དེ་དག་ལས་བྱུང་བའི་ཞི་བ་ཉིད་དོ། །ལྟུང་བ་ཞེས་བྱ་བ་ནི་སྦོམ་པོ་འམ་ཉེས་བྱས་སོ། །ཆོས་བཞིན་དུ་ཞེས་བྱ་བ་ནི་ཆོས་ཀྱི་རྗེས་སུ་འབྲང་བས་འདུལ་བ་ལས་གསུངས་པའི་ཆོ་ག་ཡོངས་སུ་མི་གཏོང་ཞེས་བྱ་བའི་ཐ་ཚིག་གོ །སླར་མཛོད་ཅིག་ཅེས་བྱ་བ་ནི་ཉེ་བར་ཞི་བར་གྱིས་ཤིག་ཅེས་བྱ་བ་སྟེ་ཤོགས་ཤིག་ཅེས་བྱ་བའི་ཐ་ཚིག་གོ །ལྟུང་བ་མཐོང་ཞེས་བྱ་བ་ནི་ལྟུང་བ་ནི་ཉོན་མོངས་པ་ཅན་ཡིན་པའི་ཕྱིར་དང༌། །རྫུ་འཕྲུལ་གྱི་སེམས་ནི་མ་བསྒྲིབས་ལ་ལུང་མ་བསྟན་པའི་ཕྱིར་དང༌། ལུང་དུ་མ་བསྟན་པའི་སེམས་ཀྱིས་བསླང་བ་ནི་ཉོན་མོངས་པ་ཅན་ཡིན་པ་མི་འཐད་པའི་ཕྱིར་དང༌། ཕྱོགས་པའི་སེམས་མེད་པའི་ཕྱིར་ལྟུང་བ་མེད་དོ་ཞེས་བྱ་བའི་ཐ་ཚིག་གོ །གནས་ནས་དབྱུང་བ་ཞེས་བྱ་བ་ནི་དགེ་འདུན་ལས་དགར་བའོ། །ཆོས་ཀྱི་སྒྱུ་ཐབས་ཞེས་བྱ་བ་ནི་ཆོས་ལྟར་བཅོས་པའོ། །མི་མཐུན་པ་ཞེས་བྱ་བ་ནི་འགལ་བའོ། །ཡོངས་སུ་གནས་པ་ཞེས་བྱ་བ་ནི་དགེ་འདུན་ལྷག་མ་བཅས་པའི་ཆད་པའི་ལས་བྱ་བའོ། །གཞི་ནས་ཡོངས་སུ་གནས་པ་ཞེས་བྱ་བ་ནི་ཡོངས་སུ་གནས་པ་གཞི་ནས་བསླད་པའོ། །མགུ་བར་བྱ་བ་ཞེས་བྱ་བ་ནི་དགེ་འདུན་མགུ་བར་བྱ་བའི་ཕྱིར་ཆད་པའི་ལས་བྱེད་པའོ། །གཞི་ནས་མགུ་བར་བྱ་བ་ཞེས་བྱ་བ་ནི་དེ་ཉིད་གཞི་ནས་བསླང་བའོ། །འབྱིན་པ་ཞེས་བྱ་བ་ནི་དགེ་འདུན་ལྷག་མའི་ལྟུང་བའི་ཟུག་རྡུ་འབྱིན་པའོ། །ཐམས་ཅད་མཁྱེན་པ་ཞེས་བྱ་བ་ནི་ཤེས་པས་རང་གི་མཚན་ཉིད་མཁྱེན་པའི་ཕྱིར་རོ། །ཐམས་ཅད་གཟིགས་པ་ཞེས་བྱ་བ་ནི་མཐོང་བས་དངོས་པོ་ཐམས་ཅད་ཀྱི་བྱེ་བྲག་མཁྱེན་པའི་ཕྱིར་རོ། །མཁྱེན་པ་དང་ཤེས་བྱ་དག་ལ་བླ་ན་མེད་པའི་མངའ་བརྙེས་པ་ཞེས་བྱ་བ་ལ་མཁྱེན་པ་ཞེས་བྱ་བ་ནི་ཆོས་ཤེས་པ་དག་ལའོ། །ཤེས་བྱ་དག་ལ་ཞེས་བྱ་བ་ནི་སྔོན་པོ་དང་སེར་པོ་དག་ལ་སོགས་པའི་ཡུལ་དག་ལའོ། །བླ་ན་མེད་པ་ཞེས་བྱ་བ་ནི་ཟླ་མེད་པའོ། །མངའ་བརྙེས་པ་ཞེས་བྱ་བ་ནི་ཏིང་ངེ་འཛིན་གྱི་དབང་ཐོབ་པའོ། །ཟུང་ཤིག་ཅེས་བྱ་བ་ནི་ཁོང་དུ་ཆུད་པར་གྱིས་ཤིག་པའོ། །བསམ་པ་དེ་ལྟ་བུ་ཞེས་བྱ་བ་ནི་སྙིང་
རྗེ་བའི་བསམ་པ་དང་འཕྲེག་པ་མེད་པའི་བསམ་པས་ཞེས་བྱ་བའི་ཐ་ཚིག་གོ །དགའ་བའི་ཆོས་ཅན་དག་ཅེས་བྱ་བ་ནི་དགའ་བ་ལ་རག་ལུས་པ་དག་གོ །ཆོས་དང་ལྡན་པ་ཞེས་བྱ་བ་ནི་ཆོས་དང་རྗེས་སུ་འབྲེལ་པའོ། །ཡང་དག་པར་སྟོན་པར་མཛད་ཅེས་བྱ་བ་ནི་མ་གོ་བ་གོ་བར་མཛད་པའོ། །ཡང་དག་པར་འཛིན་དུ་འཇུག་པར་མཛད་ཅེས་བྱ་བ་ནི་སྦྱིན་པ་ལ་སོགས་པ་ལ་ངེས་པར་སྦྱོར་བར་མཛད་པའོ། །ཡང་དག་པར་གཟེངས་བསྟོད་པར་མཛད་ཅེས་བྱ་བ་ནི་ད་ལྟར་བྱུང་བའི་ཡོན་ཏན་བརྗོད་པས་དགའ་བར་མཛད་པའོ། །ཡང་དག་པར་རབ་ཏུ་དགའ་བར་མཛད་ཅེས་བྱ་བ་ནི་ཕྱིས་འབྱུང་བར་འགྱུར་བའི་ཡོན་ཏན་བརྗོད་པས་དགའ་བར་མཛད་པའོ། །རྣམ་གྲངས་དུ་མར་ཞེས་བྱ་བ་ནི་རྣམ་པ་མང་པོར་རོ། །རལ་བ་ཞེས་བྱ་བ་ནི་རྡིབ་པའོ། །འདྲུམས་པ་ཞེས་བྱ་བ་ནི་གས་པའོ། །རང་ཉིད་ཀྱིས་བྱེད་པ་ཡིན་ཏེ་ཞེས་བྱ་བ་ནི་བདག་ཉིད་ཁོ་ནས་ལས་བྱེད་པའོ། །ལྷན་ཅིག་གནས་པ་ཞེས་བྱ་བ་ནི་སློབ་མའོ། །བདེན་པ་ཞེས་བྱ་བ་ནི་ཡང་དག་པའོ། །མཐུན་པ་ཞེས་བྱ་བ་ནི་ཕན་པའོ། །ངོ་ཟློག་ཕོད་པར་སྨྲ་བ་ཞེས་བྱ་བ་ནི་གྱ་གྱུ་མེད་པར་སྨྲ་བའོ། །འཁྲུག་ལོང་ཞེས་བྱ་བ་ནི་ཕན་ཕུན་ནོ། །ཨེ་མ་ཞེས་བྱ་བའི་སྒྲ་ནི་འདོད་པའི་དོན་ཡིན་ནོ། །སྡུམ་པ་ཞེས་བྱ་བ་ནི་ཁྱིམ་མོ། །རྒྱལ་པོའི་ཁབ་ཀྱི་ཕྱི་རོལ་དང་འོད་མའི་ཚལ་གྱི་ཕྱི་རོལ་གྱི་བར་དུ་ཞེས་བྱ་བ་ནི་དེ་གཉིས་ཀྱི་བར་དུའོ། །ལྷ་འབངས་ཞེས་བྱ་བ་ནི་ལས་སུ་རུང་བར་བྱེད་པས་བྱེད་ཅེས་བྱ་བའོ། །དགེ་འདུན་གྱི་ཀུན་དགའ་ར་བ་ཞེས་བྱ་བ་ནི་གཙུག་ལག་འཁོར་དང་བཅས་པའོ། །རྩེ་རྒོད་ཅེས་བྱ་བ་ནི་དགེ་འདུན་གྱི་ཀུན་དགའི་རབ་སྐྱོང་བར་བྱེད་པས་ཀུན་དགའི་ར་བ་ཞེས་བྱའོ། །ཀླག་ཅོར་ཞེས་བྱ་བ་ནི་ཅ་ཅོའོ། །ནང་པར་སྔར་ཞེས་བྱ་བ་ནི་དུས་སྔ་མ་དང་བཅས་པའོ། །དགེ་སློང་གི་རྒྱུས་ཤེས་པ་ཞེས་བྱ་བ་ནི་དགེ་སློང་དང་འདྲེ་འདྲེ་བའོ། །སྒོ་འཕར་ཞེས་བྱ་བ་ནི་སྒྲོ་དྲུང་གི་ཐེམ་པའོ། །ལན་བདུན་ཞེས་བྱ་བ་ནི་རེས་བདུན་ནོ། །བྱི་དོར་ཞེས་བྱ་བ་ནི་བཅིལ་ཏེ་སས་མ་གོས་པར་བྱ་བའོ། །ཁྲུས་བྱས་ཤིང་ཞེས་བྱ་བ་ནི་སྔར་ཁྲུས་བྱས་ཏེ་ཕྱིས་གོས་དཀར་པོ་དང་དྲི་དང་ཕྲད་བ་བརྒྱུས་པས་བརྒྱན་ཏོ་ཞེས་བྱ་བར་སྦྱར་རོ། །མ་བསྒོ་འམ་ཞེས་བྱ་བའི་སྒྲ་ནི་དྲི་བའི་ཚིག་ཡིན་ནོ། །བསྙེམས་པ་ཞེས་བྱ་བ་ནི་རློམ་པའོ། །སྦྲན་ཏེ་ཞེས་བྱ་བ་ནི་
བསྐུལ་ཏེའོ། །དགོངས་ཀ་ཟ་འདོད་པས་ཞེས་བྱ་བ་ནི་མཚན་མོ་ཟ་འདོད་པས་སོ། །ནང་པར་ཟ་འདོད་པས་ཞེས་བྱ་བ་ནི་སྔ་དྲོ་ཟ་འདོད་པས་སོ། །འདོང་བར་བྱེད་དོ་ཞེས་བྱ་བ་ནི་འགྲོ་བར་བྱེད་པའོ། །ལེ་ལོའི་རང་བཞིན་ཅན་ཞེས་བྱ་བ་ནི་བརྩོན་འགྲུས་ཞེན་པའོ། །སོམས་ཤིག་ཅེས་བྱ་བ་ནི་ཤེས་པར་གྱིས་ཤིག་པའོ། །ཀྱེ་མ་ཞེས་བྱ་བའི་སྒྲ་ནི་འདོད་པའི་དོན་ཡིན་ནོ། །ལེགས་སོ་ཞེས་བྱ་བ་ནི་མཛེས་པའོ། །བཟང་པོ་ཞེས་བྱ་བ་ནི་གནོད་པ་མེད་པའི་ཕྱིར་ཆེས་མཛེས་པའོ། །ཉི་མ་གཉིས་ཀྱི་ཞེས་བྱ་བ་ནི་ཉིན་མཚན་གཉིས་ཀྱི་དགོས་པའོ། །ཉི་མ་གསུམ་གྱི་ཞེས་བྱ་བ་ནི་ཉིན་མཚན་གསུམ་གྱི་དགོས་པའོ། །ཉི་མ་བདུན་གྱི་ཞེས་བྱ་བ་ནི་ཉིན་མཚན་བདུན་གྱི་དགོས་པའོ། །བར་གྱི་ཞེས་བྱ་བ་ནི་མཐའོ། །གསོག་འཇོག་གི་ཡོངས་སུ་སྤྱོད་པས་ཞེས་བྱ་བ་ནི་སོགས་ཤིང་ཟ་བས་སོ། །བྱིངས་དང་བྱིངས་མ་ཡིན་པ་དག་ན་ཞེས་བྱ་བ་ནི་གཏོས་དང་གཏོས་མ་ཡིན་པ་དག་ནའོ། །མཚམས་ཞེས་བྱ་བ་ནི་རྡོ་བསྒྲེང་བ་ལ་སོགས་པའི་མཚན་མ་བྱ་བའོ། །མུ་ཐུག་ཅེས་བྱ་བ་ནི་འདི་ནི་ཁྱོད་ཀྱིའོ་འདི་ནི་ངའི་ཞེས་བགོ་བཤའ་བྱ་བའོ། །ཆོས་ཀྱིས་ཞེས་བྱ་བ་ནི་བགོ་བཤའ་བྱ་བའི་ངང་ཚུལ་ཉིད་འདོད་པ་མེད་པ་ཡིན་པས་འདིར་ཆོས་སུ་ཤེས་པར་བྱའོ། །འདྲེན་པར་བྱེད་ཅེས་བྱ་བ་ནི་གཞིའི་གནས་ནས་སྐྱོང་པར་བྱེད་པའོ། །ཁྲིད་པར་བྱེད་ཅེས་བྱ་བ་ནི་འདོད་པའི་གནས་སུ་ཁྲིད་པར་བྱེད་པའོ། །ཆད་པས་གཅད་པར་ཞེས་བྱ་བ་ནི་ཆད་པས་གཅད་པར་འོས་པ་དག་གོ །ཕན་གདགས་པར་བྱ་བ་ཞེས་བྱ་བ་ནི་བསྲུང་བར་བྱ་བ་དག་གོ །ཆོས་དང་ལྡན་པ་ཞེས་བྱ་བ་ནི་རིགས་པ་དང་ལྡན་པ་སྟེ་དྲུག་ཆ་ཞེས་བྱ་བའོ། །ཐོག་ཤས་ཞེས་བྱ་བ་ནི་རིན་ངེས་པའོ། །བཀུར་ཞེས་བྱ་བ་ནི་གསོལ་བ་བཏབ་པའོ། །སྨས་པ་ལ་སྐྱོབ་པར་བྱེད་ཅེས་བྱ་བ་ནི་སྡུག་བསྔལ་ལས་ཡོངས་སུ་སྲུང་བར་བྱེད་པའོ། །ཚུལ་ཁྲིམས་ཞེས་བྱ་བ་ནི་འདིར་ངེས་པ་སྟེ་དེའི་སྤྱད་པ་རྗེས་སུ་བསྒྲུབ་པའོ། །དེས་ཀུན་ཏུ་སྤྱོད་པ་ཞེས་བྱ་བ་རྗེས་སུ་ཐ་སྙད་འདོགས་པ་ནི་ཚུལ་ཁྲིམས་ཀྱི་སྤྱོད་པ་རྗེས་སུ་སྤྱོད་དེ། དེས་ཆོས་ཀྱིས་སྐྱེ་དགུ་དགའ་བར་བྱེད་པས་སོ། །ཤེས་རབ་ཀྱི་སྤྱོད་པ་ཞེས་བྱ་བ་ནི་བློ་སྔོན་དུ་གཏོང་བའི་རྗེས་སུ་བསྒྲུབ་པའོ། །དེས་ཀུན་ཏུ་སྤྱོད་པ་ཞེས་བྱ་བ་རྗེས་སུ་ཐ་སྙད་འདོགས་པ་ནི་ཤེས་རབ་ཀྱི་
སྤྱོད་པ་ཀུན་དུ་སྤྱོད་པ་སྟེ། དེས་ཆོས་ཀྱིས་སྐྱེ་དགུ་དགའ་བར་བྱེད་པས་སོ། །རྒྱལ་རིགས་ཀྱི་དཀྱིལ་འཁོར་ཞེས་བྱ་བ་ནི་རྒྱལ་རིགས་ཀྱི་སྡེ་ཚན་ཏེ་རྒྱལ་རིགས་ཀྱི་རིགས་ཞེས་བྱ་བའི་ཐ་ཚིག་གོ །དེ་ཡང་ཆོས་ཀྱིས་ཡིན་གྱི་ཞེས་བྱ་བ་ནི་སྐྱེ་དགུ་སྲུང་བར་བྱེད་ཅིང་སེམས་ཅན་ལ་རྗེས་སུ་སྙིང་བརྩེ་བ་ཉིད་འདིར་ཆོས་ཡིན་ནོ། །ཡོངས་སུ་འཛིན་པ་ཞེས་བྱ་བ་ནི་བདག་གིར་བྱེད་པའམ་ཡོངས་སུ་བཟུང་བའི་རྫས་སོ། །ནད་ཅེས་བྱ་བ་ནི་སྦུབས་ནང་དུ་བལྟས་པའི་རྨའོ། །འབྲས་ཞེས་བྱ་བ་ནི་སྦུབས་ཕྱིར་བལྟས་པའི་རྨའོ། །ཟུག་རྔུ་ཞེས་བྱ་བ་ནི་འཇུག་པ་གློ་བུར་བའོ། །དེ་དག་ནི་ནད་ལ་སོགས་པ་དང་འདྲ་བའི་ཕྱིར་སྨོས་པ་ཡིན་ནོ། །སྡུག་བསྔལ་གྱི་རྩ་བ་ཞེས་བྱ་བ་ནི་ལུས་དང་སེམས་ངལ་བའི་རྒྱུ་ཡིན་པའོ། །དགོན་པའི་གནས་ཞེས་བྱ་བ་ནི་དགོན་པའི་འདུག་གནས་སོ། །སྤྱིལ་པོ་ཞེས་བྱ་བ་ནི་ཁྱིམ་མོ། །བསམ་གཏན་ཞེས་བྱ་བ་ནི་ཏིང་ངེ་འཛིན་ཏོ། །རབ་ཏུ་དབེན་པ་ཞེས་བྱ་བ་ནི་ལུས་དང་སེམས་དབེན་པའམ་འདོད་ཆགས་དང་བྲལ་བའོ། །མངོན་པར་རྫོགས་པར་མ་རྟོགས་པ་ཞེས་བྱ་བ་ནི་ཁོང་དུ་མ་ཆུད་པའོ། །སྔགས་ཞེས་བྱ་བ་ནི་དུག་སེལ་བ་ལ་སོགས་པའི་འབྲས་བུ་དང་ལྡན་པ་སྐྱེས་བུ་ཆེན་པོའི་ཚིག་གོ །གཞུང་ཞེས་བྱ་བ་ནི་འདོད་པའི་གོ་རིམས་བཞིན་དུ་སྡེབས་པའོ། །རིག་བྱེད་ཅེས་བྱ་བ་ནི་ཤེས་པ་བསྟན་པའི་ཚིག་གོ །སྦྱར་ཞེས་བྱ་བ་ནི་དོན་དང་ལྡན་པའི་འབྲེལ་པས་སྦྱར་བའོ། །ཅི་ནུས་ཞེས་བྱ་བ་ནི་ཇི་ལྟར་སྤྲོ་བའོ། །ཅི་ལྕོགས་ཞེས་བྱ་བ་ནི་ནོར་ཇི་ལྟ་བར་རོ། །ཕྱི་རོལ་དུ་སེམས་པ་ཞེས་བྱ་བ་ནི་མི་ཕྱོགས་པའོ། །དེ་ཡང་ཆོས་ཀྱི་ཡིན་ཞེས་བྱ་བ་ནི་འདིར་ཡང་འདོད་པ་མེད་པ་ལ་སོགས་པ་ནི་ཆོས་ཡིན་ནོ། །ཁང་ཁྱིམ་སོ་སོ་དང་ལྡན་པ་ཞེས་བྱ་བ་ནི་ཁང་ཁྱིམ་སོ་སོར་མཁོ་བའོ། །བཟོའི་གནས་ཞེས་བྱ་བ་ནི་བུམ་པ་དང་ཕྲུ་བ་བྱེད་པ་ལ་སོགས་པའོ། །ལས་ཀྱི་གནས་ཞེས་བྱ་བ་ནི་ཞིང་ལས་དང་བ་ལང་བཙའ་བ་དང་ས་ཕྱགས་པ་ལ་སོགས་པའོ། །དེ་ཡང་ཆོས་ཀྱིས་ཡིན་གྱི་ཞེས་བྱ་བ་ནི་འདིར་བརྩོན་འགྲུས་ལ་ནོས་ཞེས་བྱ་བའོ། །མངོན་དུ་སྨྲ་བ་ཞེས་བྱ་བ་ནི་ཕྱག་འཚལ་ལོ་ཞེས་མངོན་དུ་སྨྲ་བའོ། །ཕྱག་བྱ་བ་ཞེས་བྱ་བ་ནི་ལུས་ཀྱིས་འདུད་པའོ། །ལྡང་བ་ཞེས་བྱ་བ་ནི་མངོན་དུ་ལྡང་བའོ། །ཐལ་མོ་སྦྱར་བ་ཞེས་བྱ་བ་ནི་ཐལ་མོ་སྦྱར་བའི་ལས་སོ། །འདུད་པའི་ལས་ཞེས་བྱ་བ་ནི་ལུས་འདུད་པ་
དང་མགོ་བོས་ཕྱག་བྱ་བ་ལ་སོགས་པའོ། །ཁ་ཅིག་ན་རེ་སྐ་བས་འདིར་བྲམ་ཟེའི་དཀྱིལ་འཁོར་དང་རྗེའུ་རིགས་ཀྱི་དཀྱིལ་འཁོར་དང་དགེ་སྦྱོང་གི་དཀྱིལ་འཁོར་འཇིག་རྟེན་དུ་འབྱུང་བའི་གཏམ་དང་སྐྱོན་མེད་ཅིང་ཆུ་བུར་མེད་པ་ཞེས་སྨོས་པ་ནི་བ་སི་ཏའི་བུའི་མདོ་ལས་གསུངས་པ་ཁ་ཅིག་གིས་འདིར་བཏུས་པ་ཡིན་ཏེ། བདེ་བར་གཤེགས་པས་འདུལ་བའི་སྐབས་འདིར་གསུངས་པ་མ་ཡིན་ཞེས་ཟེར་རོ། །འདུལ་བ་རྣམ་པར་འབྱེད་པའི་ཚིག་རྣམ་པར་བཤད་པ་སློབ་དཔོན་དུལ་བའི་ལྷས་ཉེ་བར་སྦྱར་བ་ལས་ཕམ་པར་འགྱུར་བ་གཉིས་པའི་ཚིག་རྣམ་པར་བཤད་པ་རྫོགས་སོ།། །།སྒྲ་བསྒྲགས་པར་ཞེས་བྱ་བ་ནི་སྒྲ་དབྱུང་བར་རོ། །སོ་སོར་རྟོག་པ་མི་མང་བ་ཞེས་བྱ་བ་ནི་བློས་རྟོག་པ་མི་མང་བའོ། །འཕྲོད་པ་ཞེས་བྱ་བ་ནི་རྫས་སུ་མཐུན་པའོ། །འདག་རྫས་ཞེས་བྱ་བ་ནི་ལྕི་སྐམ་དང་ཐལ་བ་ལ་སོགས་པ་ཁྲུས་ཀྱི་ཆལ་ལོ། །ཧ་ཅང་ཟས་དྲགས་ནས་ཞེས་བྱ་བ་ནི་ཧ་ཅང་ཚིམ་ཆེས་སོ། །ཡིག་བརྒྱངས་ཏེ་ཞེས་བྱ་བ་ནི་མི་གསལ་བར་རོ། །མི་མཐུན་པ་ཞེས་བྱ་བ་ནི་མི་འཕྲོད་པའོ། །ཡི་ཆད་པའི་བཞིན་གྱིས་ཞེས་བྱ་བ་ནི་མི་དགའ་བའི་གདོང་གིས་སོ། །རྣོན་པོ་ཞེས་བྱ་བ་ནི་མཐུ་ཆེ་བའོ། །དུས་ལ་བབ་པོ་ཞེས་བྱ་བ་ནི་ཤི་བ་སྟེ། ཐ་མའི་དུས་ལ་བབ་པའི་ཕྱིར་རོ། །འཆི་བའི་ཕྱིར་རྩོལ་བར་བྱེད་པ་ཞེས་བྱ་བ་ནི་འཇུག་པར་བྱེད་པའོ། །འདི་ནི་རེ་ཞིག་བྱུང་བ་ཡིན་གྱི་ཞེས་བྱ་བ་ནི་འཆི་བ་སྨོས་པར་བྱེད་པའི་ཕྱིར་རོ། །བསླབ་པའི་གཞི་འཆའ་བར་མི་མཛད་དོ་ཞེས་བྱ་བ་ནི་དངུང་གསོད་པའི་ལྟུང་བའི་གཞི་ཉིད་མ་ཡིན་པའི་ཕྱིར་རོ་སྙམ་དུ་དགོངས་པའོ། །ཁྱིམ་བདག་ཅེས་བྱ་བ་ནི་རྒྱལ་རིགས་ལ་སོགས་པ་སྟེ། ཁྱིམ་ཁོལ་གྱི་བདག་པོ་ཡིན་པའི་ཕྱིར་རོ། །འདི་གཉིས་འདོང་ན་ཞེས་བྱ་བ་ནི་བདག་ཅག་གི་རྗེས་སུ་དགའ་བའི་བསམ་པ་ཡོད་ན་ཞེས་བྱ་བའི་ཐ་ཚིག་གོ །ཡང་ན་འདབ་མ་ལ་སོགས་པ་འབུལ་བར་འདོད་ན་འབུལ་དུ་ཆུག་ཅེས་བྱ་བའི་ཐ་ཚིག་གོ །གྲིམས་པ་ཞེས་བྱ་བ་ནི་སྒྲིན་པའོ། །ལེ་ལོ་མེད་པ་ཞེས་བྱ་བ་ནི་ལེ་ལོ་ཅན་མ་ཡིན་པའོ། །སྒྲུབ་ཕོང་བ་ཞེས་བྱ་བ་ནི་མཐུ་དང་ལྡན་པའོ། །སྟོབས་དང་སྙེམས་པ་དང་ལྡན་པར་གྱུར་ཏོ་ཞེས་བྱ་བ་ལ། སྟོབས་དང་ལྡན་པ་ནི་ལུས་ཀྱི་མཐུ་དང་ལྡན་པའོ། །སྙེམས་པ་དང་ལྡན་པ་ནི་རྒྱགས་པ་དང་ལྡན་པའོ། །ཡང་ན་སྟོབས་ཀྱི་རྒྱུའི་
རྒྱགས་པ་དང་ལྡན་པ་ནི་སྟོབས་དང་སྙེམས་པ་དང་ལྡན་པར་གྱུར་ཅེས་པའོ། །རི་དགས་ཤོར་དུ་ཞེས་བྱ་བ་ནི་རི་དགས་གསོང་དུའོ། །ལས་མེད་པའི་ངང་ཚུལ་ཅན་རྣམས་ཞེས་བྱ་བ་ནི་གང་དག་ལ་ཞིང་ལ་སོགས་པའི་ལས་ཀྱི་ངང་ཚུལ་མེད་པ་སྟེ་ལས་མི་བྱེད་པ་ཞེས་བྱ་བའི་ཐ་ཚིག་གོ །ཕའི་ལས་རྗེས་སུ་སྒྲུབས་ཤིག་ཅེས་བྱ་བ་ནི་རྗེས་སུ་སྐྱོངས་ཤིག་ཅེས་བྱ་བའོ། །བདག་ཅག་གཉིས་མགོ་ལ་གསེར་གྱི་ཕྲེང་བས་བཅིངས་པ་ནི་ངོ་ཚའི་ལས་རྗེས་སུ་བསྒྲུབས་པས་ནི་དེ་ལྟ་མ་ལགས་ཀྱིས་ཞེས་བྱ་བ་ནི་ལ་ལ་ཞིག་གིས་རྒྱུ་འགའ་ཞིག་གི་ཕྱིར་བདག་ཅག་གཉིས་ཀྱི་མགོ་ལ་གསེར་གྱི་ཕྲེང་བས་བཅིངས་པར་གྱུར་པ་ནི་བདག་ཅག་གཉིས་ངོ་ཚ་བར་གྱུར་ཡང་སྲིད་ཀྱིས་བདག་ཅག་གཉིས་ཕའི་ལས་རྗེས་སུ་བསྒྲུབས་པས་ནི་ངོ་ཚ་བར་མི་འགྱུར་གྱིས་ཞེས་བྱ་བའི་ཐ་ཚིག་གོ །དེའི་ཚིག་ཚིག་མ་ཡིན་པར་བྱས་ཏེ་ཞེས་བྱ་བ་ནི་མ་བགྲངས་པ་སྟེ། དོན་མེད་པར་བྱས་ཏེ་ཞེས་བྱ་བའི་ཐ་ཚིག་གོ །ཡུལ་གཞན་དུ་སོང་ན་ཞེས་བྱ་བ་ནི་དུས་ཉེ་བར་རོ། །ལོ་ལེགས་ཤིང་ཞེས་བྱ་བ་ནི་མཐོ་རིས་ཀྱི་བདེ་བ་ནི་ལོ་ལེགས་པ་དང་ཆོས་མཐུན་པའི་ཕྱིར་རོ། །དར་གྱིས་ཆོད་པ་ཙམ་ཞེས་བྱ་བ་ནི་སྐྱེ་བའི་ལྷག་མ་འདི་ལོ་ནས་ཆོད་པའི་ཕྱིར་རོ། །ཡོལ་བས་བསྒྲིབས་པ་ཙམ་ཞེས་བྱ་བ་ནི་སྐྱེ་བ་ཉུང་ཤས་ཤིག་གིས་བསྒྲིབས་པའི་ཕྱིར་རོ། །ལུས་ཞིག་ན་ཞེས་བྱ་བ་ནི་ཤི་བའོ། །གསོད་པར་བྱེད་པ་ཞེས་བྱ་བ་ནི་སྲོག་གཅོད་པར་བྱེད་པའོ། །དྲག་ཤུལ་ཅན་ཞེས་བྱ་བ་ནི་སྙིང་རྗེ་མེད་པའོ། །ལག་པ་དམར་བ་ཞེས་བྱ་བ་ནི་ཁྲག་གིས་གོས་པའི་ལག་པ་ཅན་ནོ། །བསྣུན་པ་དང་རབ་ཏུ་བསྣུན་པ་ལ་ཞུགས་པ་ཞེས་བྱ་བ་ལ། བསྣུན་པ་ཞེས་བྱ་བ་ནི་གནོད་པའོ། །རབ་ཏུ་བསྣུན་པ་ཞེས་བྱ་བ་ནི་གསོད་པའོ། །དེ་ལ་ཞུགས་པ་ཞེས་བྱ་བ་ནི་དམ་དུ་འཛིན་པ་སྟེ། འདིས་ནི་ཡིད་ཀྱི་འདོད་པ་ཉིད་བསྟན་ཏོ། །གཞན་གྱི་སྲོག་འཕྲོག་པ་ཞེས་བྱ་བ་ནི་རང་ཉིད་ཀྱིས་གསོད་པའོ། །གཞན་གྱིས་སྲོག་གཅོད་དུ་འཇུག་པ་ཞེས་བྱ་བ་ནི་བསྐོས་པས་སྲོག་གཅོད་དུ་འཇུག་པའོ། །གཞན་གྱི་སྲོག་གཅོད་པས་འཚོ་བར་བྱེད་པ་ཞེས་བྱ་བ་ནི་མངོན་པར་ཞེན་པས་རྗེས་སུ་བསྒྲུབ་པར་བསྟན་ཏོ། །འདུ་འཛིའི་རིགས་པ་ཞེས་བྱ་བ་ནི་བསྟེན་པའི་བསླབ་པའོ། །གྲོག་སྦུར་ཕྲ་མོ་ཞེས་བྱ་བ་ནི་གྲོག་སྦུར་ཆུང་ངུའོ། །བདག་ལ་རྩོམ་པར་བྱེད་པའོ་ཞེས་བྱ་བ་ནི་བདག་
གིས་བདག་གསོད་པར་བྱེད་པའོ། །བགྲོས་པར་གྱུར་ཅེས་བྱ་བ་ནི་བསམས་པའོ། །མཚོན་ཐོགས་པ་ཞེས་བྱ་བ་ནི་མཚོན་ལུས་ལ་འདེབས་པར་བྱེད་པའོ། །མི་མཁས་པ་ཞེས་བྱ་བ་ནི་བླུན་པའོ། །བསྒོ་སྟེ་ཞེས་བྱ་བ་ནི་གོ་བར་བྱས་ཏེའོ། །བཙའ་ཞུགས་ནས་ཞེས་བྱ་བ་ནི་ལྕགས་ཀྱི་དྲི་མས་ཟོས་པ་གང་ཡིན་པའོ། །རྫའོ་ཞེས་བྱ་བ་ནི་རྫ་མའོ། །ཏིལ་གྱི་ཚིགས་མའོ་ཞེས་བྱ་བ་ནི་ཏིལ་མར་བཙིར་བའི་ཚིགས་མའོ། །འགྲུབ་པར་འགྱུར་རམ་ཞེས་བྱ་བ་ནི་དོན་འགྲུབ་བམ་ཞེས་བྱ་བའོ། །ནད་ཀྱིས་བཏབ་ཅིང་ཞེས་བྱ་བ་ནི་ནད་དང་ལྡན་པའོ། །སྡུག་བསྔལ་ཞེས་བྱ་བ་ནི་སྡུག་བསྔལ་ཉིད་ཀྱིས་ཉམ་ཐག་པའོ། །ཚབས་ཆེ་བས་ཞེས་བྱ་བ་ནི་ཏེ་པོར་ན་བས་ཏེ་ཤི་ལ་ཐུག་ཅེས་བྱ་བའི་ཐ་ཚིག་གོ །རྙིངས་པ་ཞེས་བྱ་བ་ནི་དེངས་པའོ། །རྡོལ་བར་གྱུར་ཅེས་བྱ་བ་ནི་བུ་གུ་བྱུང་བའོ། །པགས་པ་ཞེས་བྱ་བ་ནི་ལུས་ཀྱི་པགས་པའོ། །ཤིང་དག་བྱས་ནས་ཞེས་བྱ་བ་ནི་དད་པ་ལས་བྱུང་བ་ལ་སོགས་པའི་ཤི་བའི་ལས་དག་བྱས་ནས་སོ། །ཁྱིམ་དབུབ་པར་བྱའོ་ཞེས་བྱ་བ་ནི་བག་མ་བླང་བར་བྱ་བའོ། །དུས་ཀྱི་ཆོས་དང་ལྡན་པར་འགྱུར་རོ་ཞེས་བྱ་བ་ལ། དུས་ཞེས་བྱ་བ་ནི་འཚོ་བའི་མཐའི་དུས་ཏེ་འཆི་བའོ། །ཆོས་ཞེས་བྱ་བ་ནི་ངོ་བོ་ཉིད་དེ་དུས་ཀྱི་ཆོས་འཆི་བ་དང་ལྡན་པར་གྱུར་ཏོ་ཞེས་བྱ་བའི་ཐ་ཚིག་གོ །བརྟན་པ་ཞེས་བྱ་བ་ནི་སེམས་བརྟན་པ་སྟེ་རེ་བ་དང་བཅས་པའོ། །སྦུངས་ཞེས་བྱ་བ་ནི་ལུས་མི་ཞན་པའོ། །སྤྲོ་བ་ཆེན་པོ་ཞེས་བྱ་བ་ནི་རྩོམ་པ་ཆེན་པོ་སྟེ། ལས་བརྩམས་པ་རྣམས་ཉམས་པར་མི་བྱེད་པའོ། །དུས་དང་མཐུན་པའི་དུས་སུ་ཞེས་བྱ་བ་ནི་བྱ་བ་གང་ལ་དུས་སྔ་མ་དང་རྗེས་སུ་འབྲེལ་པའི་དུས་ཕྱི་མ་ཡོད་པ་དེ་ནི་དུས་དང་མཐུན་པའི་རྗེས་སུ་ཞེས་བྱ་བ་སྟེ་བྱ་བའི་བྱེ་བྲག་ཡིན་ནོ། །ཆོས་ཉིད་ཀྱིས་ན་ཞེས་བྱ་བ་ནི་དུས་ཐམས་ཅད་པའི་དངོས་པོ་རྣམས་ཀྱི་ངོ་བོ་ཉིད་ཀྱིས་ནའོ། །མཚན་མ་སྟོན་པར་བྱེད་ཅེས་བྱ་བ་ནི་གླེང་བར་བྱེད་པའོ། །དབང་པོ་རྣམས་ཕྱིར་བླན་ཏེ་ཞེས་བྱ་བ་ནི་མིག་ཕྱིར་བསྡུས་ཏེའོ། །མ་བསླབས་པར་མཁས་པ་ཞེས་བྱ་བ་ནི་བུད་མེད་ཀྱི་བྱ་བ་མ་ཡིན་པའི་ལས་དག་ལ་རང་ཉིད་ཀྱིས་མཁས་པ་ཡིན་པའོ། །ཁྲི་ཞིག་པ་ཞེས་བྱ་བ་ནི་ཐགས་མ་རྙོངས་པའི་ཁྲིའོ། །ནང་མི་དག་
ཅེས་བྱ་བ་ནི་ཁྱིམ་གྱི་མི་དག་གོ །རིགས་གཉི་ག་ལ་ཞེས་བྱ་བ་ནི་ཕའི་རིགས་དང་གྱོས་པོའི་རིགས་ལའོ། །མི་སྙན་པ་འབྱུང་བར་བྱའོ་ཞེས་བྱ་བ་ནི་སྐྱེས་པ་གཞན་དག་ལ་འགྲོ་བར་བྱའོ་སྙམ་དུ་བསམས་པའོ། །དུས་ལ་བབ་པ་ཡིན་ནོ་ཞེས་བྱ་བ་ནི་དེ་ལྟར་བྱའོ་ཞེས་བྱ་བའོ། །གཡེན་སྤྱོ་བ་ཞེས་བྱ་བ་ནི་འཁྲུག་པའོ། །བྱིས་པ་ནས་བསྐྱེད་པ་ཞེས་བྱ་བ་ནི་བྱིས་པ་ཚུན་ཆད་ནས་གསོས་ཞེས་བྱ་བའི་ཐ་ཚིག་གོ །དང་དུ་བླངས་པས་ཁས་བླངས་སོ་ཞེས་བྱ་བ་ནི་མི་སྤང་པས་ཁས་བླངས་པ་ཡིན་གྱི་ཚིག་གིས་ནི་མ་ཡིན་ནོ་ཞེས་བྱ་བའི་ཐ་ཚིག་གོ །མངལ་ན་གནས་པའི་མཚན་མ་དག་ཅེས་བྱ་བ་ནི་སྦྲུམ་མའི་རྟགས་དག་སྟེ། ནུ་མ་སྔོ་བ་ལ་སོགས་པའོ། །ན་ཟླ་དག་ཅེས་བྱ་བ་ནི་ན་མཉམ་པའི་གྲོགས་པོ་དག་གོ །གྲོགས་མོ་ཞེས་བྱ་བ་ནི་མཛའ་བཤེས་མོའོ། །སེམས་ཅན་དང་ལྡན་པར་གྱུར་ཞེས་བྱ་བ་ནི་མངལ་ན་གནས་པ་དང་ལྡན་པར་གྱུར་པའོ། །སྤྲིན་བཞིན་དུ་ཞེས་བྱ་བ་ནི་ཆར་པ་འདོད་པ་རྣམས་དེ་འདོད་པའི་ཕྱིར་རོ། །ཐ་ཆད་ཅེས་བྱ་བ་ནི་ཆེས་ལྷག་པར་སྨད་པ་ཞེས་བྱ་བའི་ཐ་ཚིག་གོ །ལོངས་སྤྱོད་དག་ནི་འགྱུར་བ་ཡིན་གྱི་ཞེས་བྱ་བ་ནི་ནོར་དག་གཡོ་བ་ཡིན་པའོ། །ལམ་ལམ་པོར་བྱས་ཞེས་བྱ་བ་ནི་གསལ་བར་བྱས་པའོ། །དུམ་བུ་དུམ་བུར་ཞེས་བྱ་བ་ནི་དུམ་བུ་དུམ་བུ་སྟེ་བྱ་བའི་བྱེ་བྲག་ཡིན་ནོ། །གྲགས་ཞེས་བྱ་བ་ནི་ཁྱབ་པའོ། །སྤྱོད་ལམ་སྤྱད་ཅེས་བྱ་བ་ནི་འགྲོ་བ་དང་འོང་བ་བཅད་པའོ། །མི་བདེ་བ་ཞེས་བྱ་བ་ནི་མི་དགའ་འམ་ཞེས་བྱ་བའི་ཐ་ཚིག་གོ །རྐུན་མ་དག་ཅེས་བྱ་བ་ནི་ཆོམ་རྐུན་པ་དག་གོ །བཀག་བཞིན་དུ་ཞེས་བྱ་བ་ནི་ཕྱིར་བཟློག་བཞིན་དུའོ། །མཛའ་བཤེས་དང་དགྲ་བོ་དང་བར་མ་ཞེས་བྱ་བ་ནི་སྐྱེ་བོ་དེ་ཉིད་ལན་འགའ་མཛའ་བཤེས་སུ་འགྱུར་ལན་འགའ་དགྲ་པོར་འགྱུར་ལན་འགའ་ཐ་མལ་བར་འགྱུར་རོ་ཞེས་གསུངས་པའི་ཕྱིར་རོ། །སྔ་དྲོ་རྨ་བ་བྲིས་ཏེ་ཞེས་བྱ་བ་ནི་སྤྲིན་ཡིག་གི་ནང་དུའོ། །བག་ཚབས་ཡིད་མི་བདེ་ཞིང་ཞེས་བྱ་བ་ནི་འཇིགས་པའི་བག་ཚབས་ཡིད་མི་བདེ་ཞིང་ངོ༌། །ཐོས་པ་བརྒྱུད་པས་ཞེས་བྱ་བ་ནི་མི་དག་ལས་གཏམ་གཅིག་ནས་གཅིག་ཏུ་ཐོས་པས་སོ། །གདམས་ངག་ཅེས་བྱ་བ་ནི་བསམ་གཏན་གྱི་ལུང་ངོ༌། །བསིལ་བའི་ཚལ་གྱི་དུར་ཁྲོད་ཅེས་བྱ་བ་ནི་སྔོན་ས་ཕྱོགས་དེ་མཆོག་ཏུ་བསིལ་བས་
གྲོང་ཁྱེར་བ་རྣམས་ཀྱིས་དེར་ཚལ་ཆེན་པོ་བསྐྱེད་པས་བསིལ་ཚལ་ཞེས་བྱ་བའོ། །ཕྱིས་དེར་གནོད་སྦྱིན་ཆེན་པོ་ཞིག་གློ་བུར་དུ་འོངས་ཏེ། དེ་ན་གནས་པས་སྨྲས་པ། ད་ཕྱིན་ཆད་མི་སུ་དག་བསིལ་ཚལ་ན་གནས་པ་ཐམས་ཅད་བཟའ་བའོ་ཞེས་ཟེར་ནས་གྲོང་ཁྱེར་བ་རྣམས་ཀྱིས་ཚལ་དེ་བོར་ཏེ་དུར་ཁྲོད་དུ་གྱུར་པས་བསིལ་བའི་ཚལ་གྱི་དུར་ཁྲོད་ཅེས་བྱ་བའོ། །བརྩོན་པ་ཞེས་བྱ་བ་ནི་ཡིད་ཀྱིས་མངོན་པར་བརྩོན་པའོ། །འབད་པ་ཞེས་བྱ་བ་ནི་ལུང་ནོད་པ་དང་འཛིན་པ་དང༌། ཐེ་ཚོམ་སེལ་བ་ལ་སོགས་པའི་བྱ་བའོ། །བརྩལ་བས་ཞེས་བྱ་བ་ནི་དེ་བཞིན་དུ་སྒྲུབ་ཅིང་བསྒོམ་པས་ཞེས་བྱ་བའི་ཐ་ཚིག་གོ །ཆེན་པོར་གྱུར་ཏོ་ཞེས་བྱ་བ་ནི་ལུས་ཀྱི་བོང་ཚོད་དོ། །མཁས་པས་ཞེས་བྱ་བ་ནི་ཐ་སྙད་ལ་མཁས་པའོ། །རྣམ་པར་གནོན་པ་ལས་ཞེས་བྱ་བ་ནི་ལུས་ཀྱི་སྟོབས་ལས་སོ། །ན་ལེ་ཤམ་དཀར་པོ་འབྱུང་བ་དང་འདྲ་བར་ཞེས་བྱ་བ་ནི་གློ་བུར་བ་ཉིད་ཡིན་པའི་ཕྱིར་དེའི་གནས་ལོགས་ཤིག་ན་མི་དམིགས་པའོ། །སེམས་དག་གསོ་བར་བྱེད་ཅིང་ཞེས་བྱ་བ་ནི་མཐུ་དང་ལྡན་པར་བྱེད་པའོ། །སྒོ་གླེགས་དྲུད་པའི་འོག་ཏུ་ཞེས་བྱ་བ་ནི་སྒོ་གླེགས་བཅད་པ་དང་དབྱེ་བའི་མཐའ་འོག་གཞི་དང་འདྲུད་པའི་གནས་སུའོ། །མ་བསམས་པར་ཤེས་པ་དང་མཐོང་བ་མི་འཇུག་ཅེས་བྱ་བ་ནི་དོན་ཆུང་བའི་ཕྱིར་ཐམས་ཅད་ལ་སེམས་པར་མི་བྱེད་དོ་ཞེས་བྱ་བར་དགོངས་སོ། །དུག་ཤིན་ཏུ་རྣོ་བ་ཞེས་བྱ་བ་ནི་ཁྲོ་བ་ནི་ཞེ་སྡང་གི་དྲི་མ་ཡིན་པའི་ཕྱིར་དུག་ཀྱང་ཁྲོ་བ་ལ་སོགས་པ་འཕེལ་བར་འགྱུར་རོ། །ལུས་ཤིན་ཏུ་ཕྲ་བས་ཞེས་བྱ་བ་ནི་ཁྲོ་བ་དང་ཞེ་སྡང་གཉིས་ཀྱིས་ལུས་གནོན་པའི་ཕྱིར་དེ་གཉིས་སྐྱེས་པས་ལུས་བྲི་བའོ། །ཉིང་མཚམས་སྦྱོར་བ་ཞེས་བྱ་བ་ནི་སྐྱེ་བའོ། །སྤང་ལེབ་ཀྱི་བར་དུ་ཞེས་བྱ་བ་ནི་སྟེང་རིམ་དང་སྤང་ལེབ་ཀྱི་བར་དུའོ། །གཅིག་པུ་ཞེས་བྱ་བ་ནི་གྲོགས་མེད་པའོ། །དབེན་པར་སོང་སྟེ་ཞེས་བྱ་བ་ནི་ཁྱིམ་སྟོང་པ་ན་གནས་པའོ། །འབར་བ་རྣོ་བ་ཞེས་བྱ་བ་ནི་ཚ་བ་གདུང་བ་རྣོ་བའོ། །དུག་དྲག་པོ་ཞེས་བྱ་བ་ནི་ཕྱིར་དབྱུང་དཀའ་བའོ། །ཕྲ་བ་ཞེས་བྱ་བ་ནི་བོང་ཆུང་བའོ། །ཐོན་ཀོར་ནས་ཞེས་བྱ་བ་ནི་ཕྱོགས་བཞི་ནས་སོ། །ཉིན་མོ་གནས་པ་ཞེས་བྱ་བ་ནི་ཉིན་མོ་དགེ་བའི་ཕྱོགས་བྱེད་པའོ། །བཞིན་གཞན་དུ་གྱུར་
པ་ཞེས་བྱ་བ་ནི་ཁ་དོག་དང་དབྱིབས་གཉིས་ཀྱིས་སོ། །དབང་པོ་རྣམས་སྣ་ཚོགས་སུ་གྱུར་པ་ཞེས་བྱ་བ་ནི་འགག་པ་དང་ཞུམ་པ་དང་བརྟད་པ་ལ་སོགས་པའོ། །མིག་ཅེས་བྱ་བ་ལ་སོགས་པ་སྨོས་པ་ནི་དབང་པོ་དག་ལས་འདོད་ཆགས་དང་བྲལ་བར་བསྟན་ཏོ། །གཟུགས་ཞེས་བྱ་བ་ལ་སོགས་པ་སྨོས་པ་ནི་ཡུལ་རྣམས་ལས་འདོད་ཆགས་དང་བྲལ་བར་བསྟན་ཏོ། །སའི་ཁམས་ཞེས་བྱ་བ་ལ་སོགས་པ་སྨོས་པ་ནི་ཟིན་པའི་ལུས་ཀྱི་དངོས་གཞི་དག་ལས་འདོད་ཆགས་དང་བྲལ་བར་བསྟན་ཏོ། །གཟུགས་ཀྱི་ཕུང་པོ་ལ་སོགས་པ་སྨོས་པ་ནི་འཁོར་བ་ཐམས་ཅད་ལས་འདོད་ཆགས་དང་བྲལ་བར་བསྟན་ཏོ། །དེ་ལྟར་ན་གང་ལ་བདག་དང་བདག་གིར་འཛིན་པ་སྔོན་དུ་འགྲོ་བའི་སེམས་རྣམ་པར་འགྱུར་བ་སྐྱེ་བ་ལ་ནི་བཞིན་གཞན་དུ་འགྱུར་བ་དང་དབང་པོ་རྣམས་སྣ་ཚོགས་སུ་འགྱུར་བ་ཡོད་ཀྱིས་གང་ལ་དེ་ལྟ་བུའི་སེམས་སྐྱེ་བ་མེད་པ་ལ་ནི་བཞིན་ལ་སོགས་པར་འགྱུར་བ་མེད་དོ་ཞེས་བྱ་བའི་ཐ་ཚིག་གོ །ཡུན་རིང་པོ་ནས་ཞེས་བྱ་བ་ནི་དུས་ཡུན་རིང་པོ་ནས་སོ། །བདག་ཏུ་འཛིན་པ་ཞེས་བྱ་བ་ནི་བདག་ཏུ་ལྟ་བའོ། །བདག་གིར་འཛིན་པ་ཞེས་བྱ་བ་ནི་བདག་གིར་ལྟ་བའོ། །ངའོ་སྙམ་པའི་ང་རྒྱལ་ཞེས་བྱ་བ་ནི་བདག་ཏུ་འཛིན་པའི་རྒྱུའི་ང་རྒྱལ་ལོ། །མངོན་པར་ཞེན་པ་ཞེས་བྱ་བ་ནི་དམན་པ་ལ་མཆོག་ཏུ་འཛིན་པ་སྟེ། ལྟ་བ་མཆོག་ཏུ་འཛིན་པ་ཞེས་བྱ་བའི་ཐ་ཚིག་གོ །བག་ལ་ཉལ་བ་ཞེས་བྱ་བ་ནི་བདག་ཏུ་འཛིན་པ་དང༌། བདག་གིར་འཛིན་པ་དང༌། ངའོ་སྙམ་པའི་ང་རྒྱལ་དང༌། མངོན་པར་ཞེན་པའི་ཉོན་མོངས་པ་དེ་དག་ཉིད་བག་ལ་ཉལ་བ་ཡིན་ནོ། །དེ་ནས་ཚེ་དང་ལྡན་པ་ཤཱ་རིའི་བུས་དེའི་ཚེ་ཚེགས་སུ་བཅད་པ་སྨྲས་པ་ཞེས་བྱ་བ་ནི་དེའི་ཚེ་འཕགས་པ་ཤཱ་རིའི་བུས་བྱིས་པའི་སྐྱེ་བོ་དག་དགྲ་བཅོམ་པས་དུག་ཙམ་བཟློག་པར་མི་ནུས་སམ་སྙམ་དུ་དོགས་པ་བསལ་བའི་ཕྱིར་ཚིགས་སུ་བཅད་པ་སྨྲས་པ་ཡིན་ནོ། །ཚངས་སྤྱོད་ཅེས་བྱ་བ་ནི་འདིར་ཚུལ་ཁྲིམས་ལ་བྱའོ། །ལམ་ཞེས་བྱ་བ་ནི་འཕགས་པའི་ལམ་མོ། །ལེགས་པར་བསྒོམས་པ་ཞེས་བྱ་བ་ནི་མི་སློབ་པ་ཉིད་རྟོགས་པའོ། །དུས་སྣོད་སྤང་བ་ཞེས་བྱ་བ་ནི་བོར་བར་རོ། །འབར་བའི་ཁྱིམ་ནས་ཐར་པ་ལྟར་ཞེས་བྱ་བ་ལ། ལྟར་ཞེས་བྱ་བའི་སྒྲ་ནི་དཔེའི་ཚིག་ཡིན་ནོ། །འཆི་བའི་མཐར་ཞེས་བྱ་བ་ནི་འཆིར་ཉེ་བ་
ནའོ། །རྩྭ་དང་ཤིང་འདྲ་བར་མཐོང་བར་འགྱུར་བར་ཞེས་བྱ་བ་ནི་བདག་མེད་པའི་ཕྱིར་དང༌། འདོད་ཆགས་དང་ཞེ་སྡང་དང་གཏི་མུག་གི་རྒྱུ་ཉིད་མེད་པའི་ཕྱིར་རྩྭ་དང་ཤིང་དང་འདྲའོ། །ཉིང་མཚམས་སྦྱོར་མེད་ཅེས་བྱ་བ་ནི་ཡང་འབྱུང་བ་མེད་པ་སྟེ། ཡོངས་སུ་མྱ་ངན་ལས་འདས་པ་ཞེས་བྱ་བའི་ཐ་ཚིག་གོ །དེས་ན་འདོད་པ་མེད་པའི་ཕྱིར་དང་གནས་པ་མ་ཡིན་པའི་ཕྱིར་རྩོལ་བ་མེད་པར་ཟད་ཀྱི་དགྲ་བཅོམ་པས་དུག་ཙམ་རྣམ་པར་སྦྱོང་བར་མི་ནུས་པ་ནི་མ་ཡིན་ནོ་ཞེས་བྱ་བར་དགོངས་སོ། །ལུས་ཀྱི་མཆོད་པ་ཞེས་བྱ་བ་ནི་ལུས་ཀྱི་བསྙེན་བཀུར་རོ། །སྣང་བར་གྱུར་ན་ཞེས་བྱ་བ་ནི་མངོན་དུ་གྱུར་ནའོ། །ཚུགས་པར་མི་འགྱུར་ཞིང་ཞེས་བྱ་བ་ནི་འཇུག་པར་མི་འགྱུར་ཞིང་ངོ༌། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་བཀའ་སྩལ་པ་ཞེས་བྱ་བ་ལ་སོགས་པའི་ཚིགས་སུ་བཅད་པ་དང་གསང་སྔགས་ཀྱི་ཚིག་རྣམས་ནི་སྟོན་པ་བཅོམ་ལྡན་འདས་ཀྱིས་ཚིགས་སུ་བཅད་པ་དང་གསང་སྔགས་ཐོགས་པ་མེད་པ་མཐུ་དང་ལྡན་པ་འདི་བསྟན་པ་དང་མྱོང་བར་འགྱུར་བར་ངེས་པའི་ལས་མངོན་དུ་མ་གྱུར་བའི་མ་འོངས་པའི་སྐྱེ་བོ་རྣམས་ལ་ཕན་གདགས་པའི་ཕྱིར་བཀའ་སྩལ་པ་ཡིན་ནོ། །ཡུལ་འཁོར་སྲུང་ཞེས་བྱ་བ་ལ་སོགས་པ་ནི་ཀླུ་ཡིན་ནོ། །བྱམས་ཞེས་བྱ་བ་ནི་མཛའ་བཤེས་དག་ལ་ཀུན་དུ་སྤྱོད་པར་བྱེད་པ་བྱམས་པ་སྟེ་ཁོ་ན་མེད་པ་ཡིན་ནོ། །འགུལ་ཞེས་བྱ་བ་ནི་གཡོ་བའོ། །གནས་པ་ཞེས་བྱ་བ་ནི་བརྟན་པ་སྟེ་སྙོམས་པར་ཞུགས་པ་ལ་སོགས་པའོ། །སེམས་ཅན་ཀུན་ཞེས་བྱ་བ་ནི་ལྷ་དང་མི་རྣམས་ཏེ་སྙིང་སྟོབས་དང་ལྡན་པའི་ཕྱིར་རོ། །སྲོག་ཆགས་ཀུན་ཞེས་བྱ་བ་ནི་དུད་འགྲོ་རྣམས་ཏེ་སྲོག་ཙམ་དང་ལྡན་པའི་ཕྱིར་རོ། །འབྱུང་པོ་ཀུན་ཞེས་བྱ་བ་ནི་འདྲེ་ལ་སོགས་པ་སྟེ། ཕལ་ཆེར་འབྱུང་པོའི་དོན་དུ་བསྟན་པའི་ཕྱིར་རོ། །མ་འདྲེས་ཤོག་ཅེས་བྱ་བ་ནི་སྐྱོན་མེད་པར་ཤོག་ཤིག་ཅེས་བྱ་བའི་ཐ་ཚིག་གོ །ནད་ནི་མེད་གྱུར་ཅིག་ཅེས་བྱ་བ་ནི་ནད་མེད་པར་གྱུར་ཅིག་ཅེས་བྱ་བའི་ཐ་ཚིག་གོ །བཟང་པོ་མཐོང་གྱུར་ཅིང་ཞེས་བྱ་བ་ནི་འདོད་པའི་དངོས་པོ་ཐོབ་པར་གྱུར་ཅིང་ཞེས་བྱ་བའི་ཐ་ཚིག་གོ །སྡིག་པར་མ་གྱུར་ཅིག་ཅེས་བྱ་བ་ནི་མི་དགེ་བ་འཕེལ་བར་མ་གྱུར་ཅིག་ཅེས་བྱ་བའི་ཐ་ཚིག་གོ །སྦྲུལ་གྱིས་གད་བའི་ཞེས་བྱ་བ་ནི་སྦྲུལ་གྱིས་ཆལ་བར་
གང་བའོ། །བྱ་སྐྱིབས་སུ་ཞེས་བྱ་བ་ནི་ངམ་གྲོག་གི་ཕྱོགས་སུའོ། །བདག་གི་སྲོག་ལ་གནོད་པར་འབྱུར་ཞེས་བྱ་བ་ནི་དེ་ལྟ་བུར་རྟག་ཏུ་གནས་པར་གྱུར་དུ་ཟིན་ཀྱང་བདག་གི་སྲོག་ལ་གནོད་པར་བྱེད་པར་མ་གྱུར་ཅིག་ཅེས་བྱ་བའི་ཐ་ཚིག་གོ །བདག་གི་བདེན་ཚིག་གང་གིས་ནི་ཞེས་བྱ་བ་ལ་སོགས་པས་ནི་བདག་གི་བདེན་པའི་ཚིག་མ་ནོར་བ་གང་གིས་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་ཐམས་ཅད་ན་བླ་ན་མེད་པ་ཡིན་ཏེ། གཞན་དུ་མ་ཡིན་པའི་བདག་གི་བདེན་ཚིག་མ་ནོར་བ་དེས་བདག་གི་ལུས་ལ་དུག་མ་འཇུག་ཅིག་ཅེས་བྱ་བའི་ཐ་ཚིག་གོ །སངས་རྒྱས་བདེན་པས་ཞེས་བྱ་བ་ནི་སངས་རྒྱས་ཀྱི་མ་ནོར་བ་ཉིད་ཀྱིས་ཏེ་ཆོས་དང་དགེ་འདུན་ལ་ཡང་དེ་བཞིན་ནོ། །བསྲུང་བས་ཡོངས་སུ་གཟུང་བ་བྱས་ཞེས་བྱ་བ་ནི་རིག་སྔགས་ཀྱི་བསྲུང་བས་ཡོངས་སུ་བསྐྱད་བར་བྱས་པའོ། །སངས་རྒྱས་ཐམས་ཅད་དུག་བཅོམ་པས་ཞེས་བྱ་བ་ནི་འདོད་ཆགས་ལ་སོགས་པའི་དུག་དང་བཟའ་བ་ལ་སོགས་པའི་དུག་ཕམ་པར་བྱས་པའི་ཕྱིར་རོ། །དེ་ལ་ཞེས་བྱ་བ་ནི་དུག་གི་ལས་ལའོ། །སྔོན་མ་ཐོས་པས་ཞེས་བྱ་བ་ནི་སྔོན་ཆད་མ་ཐོས་པས་སོ། །མངོན་པར་དགའ་བ་ཞེས་བྱ་བ་ནི་རྗེས་སུ་བསྔགས་པའོ། །རྗེས་སུ་ཡི་རང་བ་ཞེས་བྱ་བ་ནི་དེ་བཞིན་ནོ་ཞེས་ཁས་བླངས་པའོ། །ལས་ཞེས་བྱ་བ་ནི་ལུས་དང༌། ངག་དང་ཡིད་ཀྱི་ལས་དགེ་བ་དང༌། མི་དགེ་བ་དང༌། བརྣབ་སེམས་ལ་སོགས་པ་དག་གོ །རྣམ་པར་སྨིན་པ་ཞེས་བྱ་བ་ནི་འདིར་འབྲས་བུ་ཡིན་ནོ། །གཟེར་བའི་སྙིང་གིས་ཞེས་བྱ་བ་ནི་གནོད་པའི་ལུས་ཀྱིས་སོ། །ཚོགས་རྙེད་པ་ཞེས་བྱ་བ་ནི་ནང་གི་ལྷན་ཅིག་བྱེད་པའི་རྒྱུ་དག་རྙེད་པའོ། །རྐྱེན་ཡོངས་སུ་བསྒྱུར་བ་ཞེས་བྱ་བ་ནི་ཕྱི་རོལ་གྱི་གྲོགས་རྗེས་སུ་མཐུན་པར་འགྱུར་བའོ། །འོད་པ་བཞིན་དུ་ཉེ་བར་གནས་པ་ཞེས་བྱ་བ་ནི་ཆུའི་འོད་པ་བཞིན་དུ་རང་གི་བྱ་བ་བྱེད་པ་ལ་མངོན་དུ་ཕྱོགས་པར་གནས་པའོ། །གདོན་མི་ཟ་བར་འབྱུང་བར་འགྱུར་བ་དག་ཅེས་བྱ་བ་ནི་དེས་པ་སྟེ་བཅོམ་ལྡན་འདས་ཀྱིས་ཀྱང་ཟློག་པར་མི་སྤྱོད་པ་དག་གོ །བྱས་ཤིང་ཞེས་བྱ་བ་ནི་བླངས་ཤིང་ངོ༌། །བསྩགས་པས་ཞེས་བྱ་བ་ནི་རིགས་མཐུན་པའི་ཚིགས་ཀྱིས་གསོས་པའམ་འབྲས་བུར་འགྱུར་བར་ངེས་པར་བྱས་པའོ། །བཅོམ་ལྡན་འདས་ནི་ཐུགས་རྗེའི་བདག་ཉིད་ཅན་ཡིན་ནོ། །ཉིད་ཀྱིས་ཅིའི་ཕྱིར་ཞལ་གྱིས་མི་
བཞེས་ཤེ་ན། དེའི་ཕྱིར་ཉེ་སྡེ་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར་ཞེས་བྱ་བ་གསུངས་ཏེ། འབྲེལ་པ་མེད་པའི་ཕྱིར་གཞན་གྱི་རྒྱུད་ལ་འབྲས་བུ་དག་ཏུ་མི་འགྱུར་རོ་ཞེས་བྱ་བར་དགོངས་སོ། །རྫུ་འཕྲུལ་དང་གསང་སྔགས་ལ་སོགས་པའི་དབང་གིས་ཕྱི་རོལ་གྱི་དངོས་པོ་དག་ལ་ཅིའི་ཕྱིར་འབྱུང་བར་མི་མཛད་ཅེ་ན། དེའི་ཕྱིར་དགེ་སློང་དག་ལས་བྱས་ཤིང་བསྩགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར་ཞེས་བྱ་བ་ལ་སོགས་པ་གསུངས་སོ། །ཟིན་པ་ཞེས་བྱ་བ་ནི་སེམས་པས་ཟིན་པ་སྟེ། ནང་གི་ཞེས་བྱ་བའི་ཐ་ཚིག་གོ །དུས་འཕོས་པས་ཇི་ལྟར་ཆུད་ཟ་བར་མི་འགྱུར་ཞེ་ན། དེའི་ཕྱིར། །ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཞེས་བྱ་བ་ལ་སོགས་པ་གསུངས་ཏེ། འང་ཞེས་བྱ་བའི་སྒྲ་གཉིས་པ་ནི་འདི་ལྟར་ཞེས་བྱ་བའི་སྒྲའི་དོན་ལ་འཇུག་པའི་བྱེ་བྲག་བསྟན་ཏོ། །ཆོགས་ཞེས་བྱ་བ་ནི་བསྐྱེད་པའི་རྒྱུའི་ཚོགས་པའོ། །དུས་ཞེས་བྱ་བ་ནི་བར་དུ་གཅོད་པའི་རྒྱུ་མེད་པའོ། །ལུས་ཅན་རྣམས་ལ་འང་ཞེས་བྱ་བ་ནི་སེམས་ཅན་རྣམས་ལའོ། །ཉིད་ཅེས་བྱ་བ་ནི་སྒྲའི་ངེས་པར་གཟུང་བའོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། ལས་ངེས་པ་རྣམས་ནི་བསྐལ་པ་བརྒྱ་ཕྲག་འདས་པ་དག་ཏུ་ཡང་ཆུད་མི་ཟ་བ་ཡིན་ཏེ། དེའང་འདི་ལྟར་རྒྱུའི་ཚོགས་པ་དང་བར་དུ་གཅོད་པའི་རྒྱུ་མེད་པའི་དུས་རྙེད་ན་བྱེད་པ་པོ་སེམས་ཅན་ལུས་ཅན་རྣམས་ལ་འདོད་པ་དང་མི་འདོད་པའི་འབྲས་བུ་དག་ཏུ་འགྱུར་བ་ཉིད་ཡིན་ཏེ། འདིར་དོན་ནི་དེ་ཡིན་ནོ། །ཉེ་སྡེས་གང་གི་ཚེ་ཅི་ཞིག་བྱས་ཤེ་ན། དེའི་ཕྱིར་དགེ་སློང་རག་སྔོན་བྱུང་བ་འདས་པའི་དུས་ན་ཞིས་བྱ་བ་ལ་སོགས་པ་གསུངས་ཏེ། སྔོན་བྱུང་བ་ཞེས་བྱ་བ་ནི་འོག་ནས་འབྱུང་བ་གང་ཡིན་པ་འདི་ནི་སྔོན་བྱུང་བ་ཡིན་གྱི་ད་ལྟར་བ་མ་ཡིན་ནོ་ཞེས་བྱ་བ་ནི་ཐ་ཚིག་གོ །སངས་རྒྱས་རྣམས་འབྱུང་བ་མེད་པའི་ཚེ་ཞེས་བྱ་བ་ནི་ཆོས་ཀྱི་རྒྱལ་པོ་ནི་འགྲན་ཟླ་མེད་པས་ཕངས་པ་ཡིན་པའི་ཕྱིར་རོ། །རང་སངས་རྒྱས་ཞེས་བྱ་བ་ནི་བདག་ཉིད་གཅིག་པུ་ཁོ་ནའི་ཕྱིར་སངས་རྒྱས་པ་སྟེ། གཞན་ལ་རྗེས་སུ་སྟོན་པར་མི་བྱེད་ཅེས་བྱ་བའི་ཐ་ཚིག་གོ །དམན་པ་ཞེས་བྱ་བ་ནི་རིགས་དམའ་བའོ། །བཀྲེན་པ་ཞེས་བྱ་བ་ནི་དབུལ་བའོ། །
རབ་མཐའི་གནས་མལ་ལ་དགའ་བ་ཞེས་བྱ་བ་ནི་ཐག་རིང་བའི་གནས་ན་གནས་པའོ། །བསེ་རུ་ལྟ་བུ་ཞེས་བྱ་བ་ནི་གཅིག་པུ་འདུག་པའོ། །གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་ཞེས་བྱ་བ་ནི་གཉིས་སུ་མེད་པས་དེའི་ཚེ་ཉིད་འཇིག་རྟེན་གྱི་ཡོན་གནས་ཡིན་པ་སྟེ། དེ་བཞིན་གཤེགས་པ་རྣམས་འཇིག་རྟེན་དུ་མ་བྱུང་བའི་ཕྱིར་རོ་ཞེས་བྱ་བར་དགོངས་སོ། །མཚེའུ་ཞེས་བྱ་བ་ནི་མཚོའོ། །རྙོང་ཞེས་བྱ་བ་ནི་བྱ་འཛིན་པ་སྟེ་ཐང་ཤིང་གི་ཐང་ཆུང་ལ་སོགས་པའོ། །དོན་ཡོད་པ་ཞེས་བྱ་བ་ནི་འབྲས་བུ་ཡོད་པ་ཡིན་ནོ། །བྲང་འགྲོའི་རྒྱལ་པོ་ཞེས་བྱ་བ་ནི་ཀླུ་སྟེ། དེ་ཉལ་བའི་ལུས་བསྐྱིལ་བ་ཟླུམ་པོར་འདུག་པ་ལྟར་བརླ་གཉིས་ཀྱིས་སྐྱིལ་མོ་ཀྲུང་བྱས་ཏེ་འདུག་པའོ། །ཉོན་མོངས་པ་ཞེས་བྱ་བ་ནི་བཀྲེན་པའོ། །སྨས་པ་ཞེས་བྱ་བ་ནི་ཞེ་སྡང་གིས་སོ། །ཉམས་པ་ཞེས་བྱ་བ་ནི་སྡིག་པས་སོ། །ཡང་ན་སྨས་པ་ནི་དངོས་གཞིའི་སྡིག་པ་བྱེད་པས་སོ། །ཉམས་པ་ནི་རྗེས་ཀྱི་ཉེས་པའོ། །ལག་ནས་དྲངས་པ་ཞེས་བྱ་བ་ནི་ཕྱིར་བཅོས་པས་ཏེ། འགྱོད་པ་ལ་སོགས་པ་ལ་བྱའོ། །འདབ་མ་བརྐྱང་པ་ཞེས་བྱ་བ་ནི་གཤོག་པ་ཕྱར་བའོ། །ནམ་མཁའ་ཞེས་བྱ་བ་ནི་བར་སྣང་ངོ༌། །ཆོ་འཕྲུལ་ཞེས་བྱ་བ་ནི་ཡ་མཚན་ནོ། །སོ་སོའི་སྐྱེ་བོ་ཞེས་བྱ་བ་ནི་དེ་ཁོ་ན་ཉིད་མ་མཐོང་བའོ། །སེམས་གཏོད་པ་ཞེས་བྱ་བ་ནི་རྗེས་སུ་མཐུན་པར་བྱེད་པའོ། །རྨ་ལྷན་ཞེས་བྱ་བ་ནི་རྨ་གླེན་པའོ། །ཞི་བ་ཞེས་བྱ་བ་ནི་ཉེས་པ་ཐམས་ཅད་ལས་རྣམ་པར་གྲོལ་བའོ། །ཕུང་པོའི་ལྷག་མ་མེད་པར་ཞེས་བྱ་བ་ནི་ཕུང་པོ་ཙམ་དང་ཡང་མི་ལྡན་པའོ། །མྱ་ངན་ལས་འདས་པའི་དབྱིངས་ཞེས་བྱ་བ་ནི་ཕུང་པོ་མེད་པའོ། །འཇུག་པ་ཞེས་བྱ་བ་ནི་དེ་དང་མཐུན་པའོ། །མཉེས་པར་བྱེད་ཅེས་བྱ་བ་ནི་མགུ་བའི་རྗེས་སུ་འཇུག་པའོ། །ལས་དེ་ཉིད་ཀྱི་ལྷག་མས་ཞེས་བྱ་བ་ནི་ལས་དེའི་འཁོར་གྱི་ལས་ཡོད་པས་སོ། །དེ་ལྟར་ན་ཞེས་བྱ་བ་ནི་དེ་ལྟ་བས་ནའོ། །ལས་གཅིག་ཏུ་གནག་པ་རྣམས་ཞེས་བྱ་བ་ནི་རྣམ་པ་ཐམས་ཅད་དུ་མི་དགེ་བ་དག་གོ །ལས་གཅིག་ཏུ་དཀར་བ་རྣམས་ཞེས་བྱ་བ་ནི་རྣམ་པ་ཐམས་ཅད་དུ་དགེ་བ་དག་གོ །བརྩམ་པར་བྱ་སྟེ་ཞེས་བྱ་བ་ནི་བསམ་པ་དང་སྤེལ་བར་བྱ་བའོ། །བཙས་པའི་རིམ་གྱིས་ཞེས་བྱ་བ་ནི་བཙས་སྟོན་ལ་སོགས་པའི་གོ་རིམས་ཀྱིས་སོ། །གནང་ཆེན་ལ་ཞེས་
བྱ་བ་ནི་བྱམས་པའོ། །ཅི་ནས་ཅིར་བསྒྱུར་ཏེ་ཞེས་བྱ་བ་ནི་ཚེགས་ཆེན་པོས་སོ། །ཡང་དག་པར་རབ་ཏུ་དགའ་བ་ཞེས་བྱ་བ་ནི་གཟེངས་བསྟོད་པས་སོ། །དགའ་བ་ཞེས་བྱ་བ་ནི་འདོད་པའི་དོན་ཏོ། །སྙན་པ་ཞེས་བྱ་བ་ནི་རྗེས་སུ་མཐུན་པའི་སྒྲའོ། །འཁྱམས་པ་ཞེས་བྱ་བ་ནི་གར་སོང་མི་ཤེས་པའོ། །བསིལ་བའི་རོ་དང་ལྡན་པ་ཞེས་བྱ་བ་ནི་གང་དག་བསིལ་བའི་རོ་དང་ལྡན་པའོ། །དེ་དུས་ལགས་པར་དགོངས་སུ་གསོལ་ཞེས་བྱ་བ་ནི་གང་འདོད་པ་དེ་གྱིས་ཤིག་ཅེས་བྱ་བའི་ཐ་ཚིག་གོ །ཚིམ་པར་བྱས་ཞེས་བྱ་བ་ནི་ཟས་འདོད་པས་སོ། །བསྟབས་ཞེས་བྱ་བ་ནི་མི་འདོད་ན་གཞན་དབུལ་བའོ། །ཁྲོན་པ་ལྟ་བུར་གྱུར་པ་ཞེས་བྱ་བ་ནི་ཆུའི་ཁྲོན་པ་དང་འདྲ་བར་ཐམས་ཅད་འདུ་བའི་རྟེན་དུ་གྱུར་པའོ། །འདི་ལྟར་ཞེས་བྱ་བ་ནི་གང་གི་ཕྱིར་ཞེས་བྱ་བའི་ཐ་ཚིག་གོ །དགེ་བའི་བཤེས་གཉེན་ཞེས་བྱ་བ་ནི་ཕན་པ་ཉེ་བར་སྟོན་པའོ། །ཐུན་མོང་མ་ཡིན་པ་ཞེས་བྱ་བ་ནི་བསྒྲུབ་དཀའ་བའོ། །སྦོམ་པོ་ཞེས་བྱ་བ་ནི་ལུས་ལྕི་བའོ། །གླེན་མ་ཞེས་བྱ་བ་ནི་བློ་ངན་པའོ། །དམན་པ་ཞེས་བྱ་བ་ནི་སྤྱོད་པ་ཞན་པའོ། །སྤོབས་པ་ཞེས་བྱ་བ་ནི་ཤེས་པའོ། །བུ་ཟན་མོའི་བུ་ཞེས་བྱ་བ་ལ། བུ་ཟན་མོ་ཞེས་བྱ་བ་ནི་མཁའ་འགྲོ་མ་སྟེ། དེའི་བུ་ནི་བུ་ཟན་མོའི་བུ་སྟེ་མཁའ་འགྲོ་མའི་བུ་ཞེས་བྱ་བའི་ཐ་ཚིག་གོ །ཉམ་ང་ནས་ཞེས་བྱ་བ་ནི་ངོ་ཚ་ནས་སོ། །སྒྲོན་ཤིང་གི་ཚལ་ཞེས་བྱ་བ་ནི་སྒྲོན་མ་རྒྱུའི་ཤིང་གི་ཚལ་ལོ། །བསྟེན་ཅིང་གོམས་པས་བྱས་ལན་མང་དུ་བྱས་ཞེས་བྱ་བ་ནི་ཆུང་དུ་དང༌། །འབྲིང་དང༌། ཆེན་པོ་ཉིད་ཀྱིས་བསྐྱེད་པའོ། །འབྲས་བུ་ཞེས་བྱ་བ་ནི་བར་དུ་མཆོད་པའི་འབྲས་བུའོ། །ཕན་ཡོན་ཞེས་བྱ་བ་ནི་བར་ཆོད་པའོ། །མི་སྡུག་པ་སྟོན་པར་མཛད་ཅེས་བྱ་བ་ནི་རུས་པའི་ཀེང་རུས་ལ་སོགས་པའི་རྣམ་པར་བསྒོམ་པ་སྟོན་པར་མཛད་དེའོ། །བསྔགས་པ་བརྗོད་པ་ཡང་མཛད་དོ་ཞེས་བྱ་བ་ནི་ཡོན་ཏན་སྟོད་པར་མཛད་པའོ། །དགེ་སློང་ལ་སྩོལ་བར་བྱེད་དོ་ཞེས་བྱ་བ་ནི་གསོང་པར་བྱེད་དོ་ཞེས་བྱ་བའི་ཐ་ཚིག་གོ །རི་དགས་ཟློག་དགེ་སྦྱོང་སྦེད་ཅེས་བྱ་བ་ནི་ཀུན་དུ་རྒྱུ་ཞིག་གི་མིང་སྟེ་རི་དགས་ཟློག་ཅེས་བྱ་བ་ནི་རི་དགས་ཕྱིར་ཟློག་པར་བྱེད་པའོ། །དགེ་སྦྱོང་སྦེད་ཅེས་བྱ་བ་ནི་ཀུན་དུ་རྒྱུའི་དགེ་སྦྱོང་ལ་གསང་ཐབས་སུ་སྐྱེས་པའི་ཕྱིར་རོ། །ཡང་ན་ནགས་
ཁྲོད་ན་གནས་པའི་རབ་ཏུ་བྱུང་བ་དགེ་སྦྱོང་རྣམས་ཆོམ་རྐུན་ལ་སོགས་པ་དག་ལས་སྲུང་བར་བྱེད་པའི་ཕྱིར་རོ། །བདུད་ཀྱི་རིགས་ཞེས་བྱ་བ་ནི་བདུད་ཀྱི་འཁོར་རོ། །རྒྱུན་མ་ཕྱེ་བར་འདུག་ནས་ཞེས་བྱ་བ་ནི་ཆུ་ཀླུང་གི་ཆུའི་རྒྱུན་སོ་སོར་མ་ཕྱེ་བར་འདུག་པ་སྟེ། ཆུའི་སྟེང་ན་འདུག་ཅེས་བྱ་བའི་ཐ་ཚིག་སྟེ་དེ་ནི་ཡིབ་ཅེས་བྱ་བའི་ཕྱིར་རོ། །ཚུལ་ཁྲིམས་དང་ལྡན་པ་ཞེས་བྱ་བ་ནི་རང་བཞིན་གྱིས་ཁ་ན་མ་ཐོ་བ་དང་བཅས་པ་སྤོང་བ་དང་ལྡན་པའོ། །ཡོན་ཏན་དང་ལྡན་པ་ཞེས་བྱ་བ་ནི་བཅས་པའི་ཁ་ན་མ་ཐོ་བ་དང་བཅས་པ་སྤོང་བ་དང་ལྡན་པའོ། །རྒལ་བར་བྱེད་ཅེས་བྱ་བ་ནི་ལུས་ཀྱིས་སྡུག་བསྔལ་གྱི་ཆུ་བོ་ལས་རྒལ་བར་བྱེད་པའོ། །གྲོལ་བར་བྱེད་ཅེས་བྱ་བ་ནི་ལུས་ཀྱི་མདུད་པ་ལས་གྲོལ་བར་བྱེད་པའོ། །དབུགས་འབྱིན་པར་བྱེད་ཅེས་བྱ་བ་ནི་མ་འོངས་པའི་དུས་ཀྱི་སྡུག་བསྔལ་འབྱུང་བར་དོགས་པ་ཟློག་པར་བྱེད་པའོ། །ཡོངས་སུ་མྱ་ངན་ལས་འདའ་བར་བྱེད་ཅེས་བྱ་བ་ནི་སྡུག་བསྔལ་གྱི་རྒྱུའི་ལུས་འགོག་པར་བྱེད་པའོ། །དེ་ལྟར་དེ་ལ་ཞེས་བྱ་བ་ལ། འདིར་དེ་ལ་ཞེས་བྱ་བའི་སྒྲས་ནི་དེའི་ཕྱིར་ཞེས་བྱ་བར་བསྟན་ཏོ། །ལྟ་བའི་རྣམ་པ་ཞེས་བྱ་བ་ནི་ལྟ་བའི་རྣམ་གྲངས་སོ། །ཉུང་ངུར་གྱུར་ཅེས་བྱ་བ་ནི་གྲངས་ཀྱིས་སོ། །ཉམས་པར་གྱུར་ཅེས་བྱ་བ་ནི་ཆུད་ཟོས་པས་སོ། །ཡང་ན་ཉུང་ངུར་གྱུར་ཅེས་བྱ་བ་ནི་གསོན་པོ་དག་གོ །ཉམས་པར་གྱུར་ཅེས་བྱ་བ་ནི་ཤི་བ་དག་གོ །རྡ་རྡོར་གྱུར་ཅེས་བྱ་བ་ནི་ཤི་བར་མི་ཤེས་པ་དག་གི་བྱུག་རིས་བཞག་པས་སྐབས་སྐབས་སུ་སྟོང་པར་གྱུར་པའི་ཕྱིར་རོ། །བསྲབས་པར་གྱུར་ཅེས་བྱ་བ་ནི་དགེ་སློང་ཉུང་བས་གོ་བ་སྲབ་མོར་གྱུར་པའི་ཕྱིར་རོ། །འདི་ལ་ངེས་པར་འཆི་བར་གྱུར་པ་ཉིད་ཡིན་པས་བཅོམ་ལྡན་འདས་ཀྱིས་ཀྱང་བཏང་སྙོམས་སུ་མཛད་དོ། །འཕགས་པའི་ལམ་སྐྱེ་བ་སྒྲིབ་པ་ཡོད་པའི་ཕྱིར་འཕགས་པའི་ལམ་སྟོན་པར་མི་མཛད་དོ། །ཐར་པའི་ཆ་དང་མཐུན་པའི་དགེ་བའི་རྩ་བ་སྐྱེ་བ་དང་འཆི་བར་ངེས་པ་རྣམས་ལ་འཇིག་རྟེན་ཕ་རོལ་དུ་ལམ་སྐྱེ་བའི་རྒྱུར་འགྱུར་བའི་ཕྱིར་མི་སྡུག་པ་སྟོན་པ་མཛད་དོ། །དགེ་སློང་ཤི་བར་གྱུར་པ་དེ་དག་ནི་སྔོན་བཅོམ་ལྡན་འདས་འོད་སྲུངས་ཀྱི་རི་ལ་དགེ་སློང་རྣལ་འབྱོར་སྤྱོད་པར་གྱུར་ཏེ། ལོ་ཁྲིའི་བར་དུ་མི་སྡུག་པ་བསྒོམས་པ་འཕགས་པའི་ལམ་མཐོང་བ་དག་སྦྱོར་བ་དེའི་རྒྱུ་བཅོམ་ལྡན་འདས་
ཀྱི་ཉན་ཐོས་ཀྱི་དགེ་འདུན་དུ་གྱུར་པ་ཡིན་པས་དེ་དག་ལ་མི་སྡུག་པ་བསྒོམ་པ་བསྟན་ན་ཚེ་ཕྱི་མ་ལ་འཕགས་པའི་ལམ་སྐྱེ་བའི་རྒྱུར་འགྱུར་ཞིང་དེ་དག་ཤི་མ་ཐག་ཏུ་ལྷར་སྐྱེས་ནས། བཅོམ་ལྡན་འདས་ཀྱི་སྤྱན་སྔར་འོང་བའི་ཚེ། བཅོམ་ལྡན་འདས་ཀྱིས་མི་སྡུག་པའི་རྣམ་པར་བསྒོམ་པ་རྒྱ་ཆེར་བསྟན་པས་ཚེ་དེ་ཉིད་ལ་རྒྱུན་དུ་ཞུགས་པའི་འབྲས་བུ་ཐོབ་པར་གྱུར་ཏོ་ཞེས་འདུལ་བ་བྱེ་བྲག་ཏུ་བཤད་པ་ལས་འབྱུང་ངོ༌། །དེ་ཉིད་ཀྱི་ཚེས་བཅོ་ལྔ་ཞེས་བྱ་བ་ནི་དེ་ཉིད་ཀྱི་ཟླ་བ་ཕྱེད་པོའི་བར་དུ་མ་ཆོད་པ་ལ་ཞེས་བྱ་བའི་ཐ་ཚིག་གོ །རྒྱུ་ཞེས་བྱ་བ་ནི་ནང་གི་གཙོ་བོའི་རྒྱུའོ། །རྐྱེན་ཅེས་བྱ་བ་ནི་ཕྱི་རོལ་གྱི་གྲོགས་སུ་གྱུར་པའི་རྐྱེན་ནོ། །མིར་ཆགས་པ་ཞེས་བྱ་བ་ནི་མིའི་རྒྱུའོ། །རང་གི་ལག་དར་ཏེ་ཞེས་བྱ་བ་ནི་འདི་ལ་རང་གི་ལག་མངོན་སུམ་དུ་དར་བསྲིད་པའི་ཕྱིར་རོ། །ལག་པས་ལག་པ་ཞེས་བྱ་བ་ནི་བྱེ་བྲག་སྟེ་དེ་ལ་ལག་པས་བསྐྱོད་པའི་ལག་པའོ། །དེ་ལ་མཚོན་བྱིན་ནམ་ཞེས་བྱ་བ་ནི་དེ་ལ་མཚོན་ཕུལ་བའོ། །ཆུ་གྲི་ཞེས་བྱ་བ་ནི་བླ་དགས་སོ། །ཁ་ཅིག་ན་རེ་རལ་གྲི་སོ་གཅིག་པ་ཞེས་ཟེར་རོ། །འཚོ་བའི་ཡོ་བྱད་ཅས་བྱ་བ་ནི་འཚོ་བའི་འཚོག་ཆས་སོ། །ཚུལ་ཁྲིམས་འཆལ་བ་ཞེས་བྱ་བ་ནི་ལུས་དང་ངག་གི་ལས་དག་གིའོ། །སྡིག་པའི་ཆོས་ཅན་ཞེས་བྱ་བ་ནི་བསམ་པ་ལ་སྐྱོན་ཆགས་པའོ། །བདག་ཉིད་ཐོང་ཤིག་ཅེས་བྱ་བ་ནི་རང་གི་ལག་པའམ་སོས་བདག་ཉིད་བོད་ཅིག་པའོ། །བདག་ཉིད་སོད་ཅིག་ཅེས་བྱ་བ་ནི་རང་གིས་བསྐྱོད་པའི་མཚོན་ལ་སོགས་པས་སོ། །བདག་ཉིད་སྲོག་དང་བྲལ་བར་བྱེད་དུ་ཆུག་ཤིག་ཅེས་བྱ་བ་ནི་གཞན་ལ་བཅོལ་བས་སོ། །ལུས་ཀྱི་ཀུན་དུ་སྤྱོད་པ་ཡོངས་སུ་མ་དག་པ་ཉིད་ཅེས་བྱ་བ་ལ། ལུས་ཀྱི་ཀུན་དུ་སྤྱོད་པ་ཞེས་བྱ་བ་ལས་ཉོན་མོངས་པ་ཅན་གང་ཡིན་པ་དེ་ནི་ལུས་ཀྱི་ཀུན་དུ་སྤྱོད་པ་ཡོངས་སུ་མ་དག་པའོ། །དེའི་དངོས་པོ་ནི་དེ་ཉིད་དེ། ལུས་ཀྱི་ཚུལ་ཁྲིམས་འཆལ་པ་ཞེས་བྱ་བའི་ཐ་ཚིག་གོ །ངག་དང་ཡིད་ལ་ཡང་དེ་བཞིན་དུ་ཤེས་པར་བྱའོ། །བསླང་སྟེ་ཞེས་བྱ་བ་ནི་བཤགས་པ་ལ་སོགས་པས་ཕྱུང་སྟེའོ། །འཇོག་པ་ཞེས་བྱ་བ་ནི་ངེས་པར་སྦྱོར་བའོ། །ལུས་ཞིག་ན་ཞེས་བྱ་བ་ནི་ཤི་ནའོ། །བདེ་འགྲོ་ཞེས་བྱ་བ་ནི་བཟང་པོ་རྣམས་ཀྱིས་འགྲོ་བའོ། །མཐོ་རིས་ཀྱི་འཇིག་རྟེན་ཞེས་བྱ་བ་ནི་མིའི་འཇིག་རྟེན་ཡོངས་སུ་སྤང་བ་བསྟན་ཏོ། །ལྷ་རྣམས་ཀྱི་ནང་དུ་ཞེས་བྱ་བ་ནི་དེར་ཡང་དྲི་ཟ་
ལ་སོགས་པ་ཡོངས་སུ་སྤང་བ་བསྟན་ཏོ། །དགེ་བའི་ཆོས་ཅན་ཞེས་བྱ་བ་ནི་དགེ་བའི་བསམ་པ་ཅན་ནོ། །ལྷུག་པར་གཏོང་བ་ཞེས་བྱ་བ་ནི་བདག་ཉིད་རང་ལ་མི་འགོག་པར་གཏོང་བ་སྟེ། སྦྱིན་པའི་ཆོ་ག་བླངས་པའོ། །ལག་རྐྱོང་བ་ཞེས་བྱ་བ་ནི་གཏོང་བའི་དོན་དུ་ལག་པ་རྐྱོང་བའོ། །རྣམ་པར་གཏོང་བ་ལ་དགའ་བ་ཞེས་བྱ་བ་ནི་སྦྱིན་པ་ལ་མངོན་པར་དགའ་བའོ། །མཆོད་སྦྱིན་རྒྱུན་དུ་བྱེད་པ་ཞེས་བྱ་བ་ནི་ཡོན་ཏན་དང་ལྡན་པ་རྣམས་ལ་མཆོད་པ་ཡང་དང་ཡང་དུ་བྱེད་པའོ། །གཏོང་བ་ཕུན་སུམ་ཚོགས་པ་ཞེས་བྱ་བ་ནི་སྦྱིན་པ་བྱས་པའོ། །སྦྱིན་པ་ལ་འགེད་པར་དགའ་བ་ཞེས་བྱ་བ་ནི་གཞན་ལས་ཐོབ་པའི་སྦྱིན་པ་སྦྱིན་པར་བྱ་བའི་དངོས་པོ་གང་ཡིན་པ་དེ་གཞན་ལ་ཡང་འགེད་པར་དགའ་བ་ཞེས་བྱ་བའི་ཐ་ཚིག་གོ །ཚོར་བ་སྡུག་བསྔལ་བ་ཞེས་བྱ་བ་ནི་མི་འདོད་པའོ། །མི་ཟད་པ་ཞེས་བྱ་བ་ནི་རྒྱུན་དུ་འབྱུང་བའོ། །རྩུབ་པར་ཞེས་བྱ་བ་ནི་རབ་ཏུ་འཕེལ་ནས་འབྲིང་ཉིད་དུ་གྱུར་པའོ། །ཚ་བ་ཞེས་བྱ་བ་ནི་ཆེན་པོ་ཉིད་ཀྱིས་བརྣག་མི་བཟོད་པའོ། །ཡིད་དུ་མི་འོང་བ་ཞེས་བྱ་བ་ནི་ཡིད་སྡུག་བསྔལ་ལོ་ཞེས་བྱ་བའི་ཐ་ཚིག་གོ །ཟས་སོ་སོར་བསྟེན་པར་བྱ་བ་དག་ཅེས་བྱ་བ་ནི་འདོད་པ་དག་གོ །ནད་གཡོག་ཚུལ་དང་མཐུན་པ་དག་ཅེས་བྱ་བ་ནི་རྗེས་སུ་མཐུན་པ་དག་གོ །བོད་པའི་ཚིག་བླ་དགས་ཞེས་བྱ་བ་ནི་གོ་བར་བྱེད་པའི་མིང་ངོ༌། སྡིག་པ་ཞེས་བྱ་བ་ནི་སྡིག་པའི་འབྲས་བུའམ་སྡིག་པའི་རྒྱུའོ། །མི་གཙང་བ་ཞེས་བྱ་བ་ནི་ལུས་ཀྱི་གཞི་མི་གཙང་བའི་ཕྱིར་རོ། །འཚོ་བ་ངན་པ་ཞེས་བྱ་བ་ནི་སྨད་པའོ། །སེམས་ཀྱི་འདོད་པ་ཞེས་བྱ་བ་ནི་མངོན་པར་འདོད་པའོ། །སེམས་ཀྱི་ཀུན་དུ་རྟོག་པ་དག་གི་ཞེས་བྱ་བ་ནི་རྣམ་པར་རྟོག་པ་དག་གིས་སོ། །ཡང་ན་སྨོས་པ་ཞེས་བྱ་བ་ལ་སོགས་པ་ནི་འཆི་བའི་བསྔགས་པ་བརྗོད་པ་རྒྱུན་མི་གཅོད་པ་ལ་བསྟན་པའི་ཕྱིར་ཡང་ཚིག་ཏུ་སྨོས་ཞེས་བྱ་བའི་ཐ་ཚིག་གོ །དེས་ན་སྦྱོར་བ་མ་བཏང་བའི་འབྲས་བུ་གྲུབ་ན་དངོས་གཞིར་འགྱུར་གྱི། གཞན་གྱིས་ནི་མ་ཡིན་ནོ་ཞེས་བྱ་བར་བསྟན་ཏོ། །བདག་ཉིད་ཀྱིས་ཟིན་པ་ཞེས་བྱ་བ་ནི་ལུས་ཀྱི་ཁོངས་སུ་གཏོགས་པ་སྟེ། སེམས་པ་དང་བཅས་པ་ཞེས་བྱ་བའི་ཐ་ཚིག་གོ །རྩོམ་པ་ཞེས་བྱ་བ་ནི་སྦྱོར་བའོ། །དེས་ཞེས་བྱ་བ་ནི་རྩོམ་པ་དེས་སོ། །དེའི་ཚེ་ཞེས་བྱ་བ་ནི་རྩོམ་པའི་ཚེའོ། །མ་ཡིན་ཡང་ཞེས་བྱ་བ་ནི་དུས་བྱེད་པ་མ་ཡིན་ཡང་ངོ༌། །དེའི་འོག་ཏུ་ཞེས་བྱ་བ་ནི་རྩོམ་པའི་དུས་ཀྱི་འོག་ཏུའོ། །
གྲུ་མོ་ཞེས་བྱ་བ་ནི་ལག་ངར་དང་ཕུང་པའི་བར་གྱི་ཟུར་རོ། །ཕྱི་རོལ་ཏུ་འཕངས་པ་ཞེས་བྱ་བ་ནི་ལུས་ཀྱིས་མདའ་ལ་སོགས་པ་འཕངས་པའོ། །མདའ་ཞེས་བྱ་བ་ནི་མདའ་རྩེ་མོ་མདེའུ་དང་བཅས་པའོ། །ལྕགས་མདའ་ཞེས་བྱ་བ་ནི་ལྕགས་ཀྱི་མདའོ། །མདའ་ཕྱེད་ཀྱི་ལྕགས་ལས་བྱས་པ་ཞེས་བྱ་བ་ནི་མདའ་ཕྱེད་ལྕགས་ལས་བྱས་པའོ། །ཁ་ཅིག་ན་རེ་སྨྱིག་མའི་དམའ་མདེའུ་འདབ་མ་རིང་པོ་བཅས་པ་ནི་ལྕགས་མདའ་ཡིན་ལ། དེ་ཉིད་ཀྱི་མདེའུ་རྣ་སྦྲང་ཅན་ནི་མདའ་ཕྱེད་ལྕགས་ལས་བྱས་པའོ་ཞེས་ཟེར་རོ། །སྟེའུ་ཁ་མ་ཞེས་བྱ་བ་ནི་མདའི་མདེའུ་དྲ་གྲིའི་དབྱིབས་འདྲ་བའོ། །མདེའུ་བེའུ་སོ་ལྟ་བུ་ཞེས་བྱ་བ་ནི་མདེའུ་བ་ལང་གི་སོའི་དབྱིབས་འདྲ་བའོ། །མདེའུ་ཟུར་མ་ཞེས་བྱ་བ་ནི་མདེའུ་ཏིལ་གྱི་གང་བུའི་དབྱིངས་དང་འདྲ་བའོ། །མདེའུ་ཀ་ར་བཱི་རའི་ལོ་མ་དབྱིབས་འདྲ་བའོ། །མདེའུ་བྱེའུ་སྙིང་མའི་ཞེས་བྱ་བ་ནི་མདེའུ་མེ་ཏོག་གཞོན་ནུའི་གནས་སྐབས་ཀྱི་དབྱིབས་འདྲ་བའོ། །རྡོ་རྗེ་རྩེ་གཅིག་པ་ཞེས་བྱ་བ་ནི་མཚོན་རྡོ་རྗེའི་དབྱིབས་འདྲ་བ་རྩེ་མོ་མི་རྣོ་བའོ། །མདའ་བོ་ཆེ་ཞེས་བྱ་བ་ནི་མདེའུ་ཅན་ཐུང་ལ་ཡུབ་སྦོམ་པོའོ། །མཚོན་རྩེ་གཅིག་པ་ཞེས་བྱ་བ་ནི་དབྱུག་པ་མུད་ག་རའོ། །རྒྱུ་ཤུག་གི་འབྲས་བུ་ཞེས་བྱ་བ་ནི་རྒྱུ་ཤུག་གི་རུས་པའོ། །རལ་གྲི་ཞེས་བྱ་བ་ནི་རལ་གྲི་ཆེན་པོའོ། །ཤང་ལང་ཞེས་བྱ་བ་ནི་རལ་གྲི་སོ་གཅིག་པ་སྟེ། གྲི་བོ་ཆེ་ཞེས་བྱ་བའི་ཐ་ཚིག་གོ །རལ་གྲི་སོ་གཅིག་པ་ཞེས་བྱ་བ་ནི་རལ་གྲི་དགུ་བོའོ། །རལ་གྲི་སོ་གཉིས་པ་ཞེས་བྱ་བ་ནི་རལ་གྲི་རིང་པོའོ། །མདུང་ཞེས་བྱ་བ་ནི་མདུང་རྩེ་དང་བཅས་པ་ཡུ་བ་གཉིས་སམ་གསུམ་གྱི་ཚད་ཙམ་དུ་རིང་བའོ། །མདུང་ཐུང་ཞེས་བྱ་བ་ནི་ཡུ་བ་ཐུང་བ་མིའི་ཚད་ཙམ་མོ། །འཕང་མདུང་ཞེས་བྱ་བ་ནི་སྲོག་ཤིང་མདུང་རྩེ་ཅན་འཕང་བར་བྱ་བའོ། །ཀྱོ་བ་ཁ་བྲག་ཅེས་བྱ་བ་ནི་མཁའ་འགྲོ་མ་དྲང་བའི་ལྕགས་ཀྱོ་བ་ཁ་བྲག་གོ །ཚ་ལྕག་ཅེས་བྱ་བ་ནི་གཙག་པའི་ལྕག་ཡུའོ། །ཁ་ཅིག་ན་རེ་འབྲེང་ལྕགས་ལ་བྱའོ་ཞེས་ཟེར་རོ། །རྩ་མ་དང་ཞེས་བྱ་བ་ནི་ཤར་བ་འཕྲ་མའོ། །བལྡག་པ་ཞེས་བྱ་བ་ནི་སྦྲང་རྩེ་དང་པི་པོ་ལིང་ལ་སོགས་པ་བལྡག་པའོ། །གཞིབ་པ་ཞེས་བྱ་བ་ནི་ཨ་མྲ་ལ་སོགས་པ་དབུགས་རྔུབ་ཅིང་ཟ་བའོ། །དྲིལ་ཕྱི་ཞེས་བྱ་བ་ནི་ལུས་དྲིལ་ཞིང་ཕྱི་བའོ། །ཕྱེ་མ་ཞེས་བྱ་བ་ནི་སྐྲ་དང་རྒྱུ་མ་ལ་སོགས་པ་ལྷག་བག་པའི་དུག་གོ །འཆིང་
བ་ཞེས་བྱ་བ་ནི་འཆིང་བར་བྱེད་པའོ། །མཚའ་ཞེས་བྱ་བ་ནི་བ་ལང་ལ་ཟ་བའི་གཅན་གཟན་ནོ། །སྤྱང་ཀི་ཞེས་བྱ་བ་ནི་ཅེ་སྦྱང་ངོ༌། །ཡོངས་སུ་སྐམ་པ་ཞེས་བྱ་བ་ནི་པགས་པ་ཉམས་པའོ། །ཡོངས་སུ་ཟད་པ་ཞེས་བྱ་བ་ནི་ཁྲག་སྐམ་པའོ། །ཡོངས་སུ་འདུག་པ་ཞེས་བྱ་བ་ནི་ཤ་སྐམ་པའོ། །དཀྲིས་པ་ཞེས་བྱ་བ་ནི་ཡོངས་སུ་ཟིན་པས་སོ། །བྲང་དུ་འདེབས་པ་ཞེས་བྱ་བ་ནི་འཁྲུལ་འཁོར་གྱི་མི་སྟེ་དེས་གཞན་གྱི་བྲང་དུ་རྡེག་པར་བྱེད་དོ། །འཁྲུལ་འཁོར་ཞེས་བྱ་བ་ནི་ཤིང་ལྗོན་པ་འགུགས་པ་དང་རྡོ་བསྒྲེང་བ་ལ་སོགས་པའོ། །རྔོན་སྤྱད་ཅེས་བྱ་བ་ནི་རི་དགས་ཀྱི་འཁྲུལ་འཁོར་རོ། །ཟླ་བ་མར་གྱི་ངོའི་ཚེས་བཅུ་བཞི་ཞེས་བྱ་བ་ནི་ཚེས་ཉི་ཤུ་དགུའོ། །ཤི་བའི་རོ་ཞེས་བྱ་བ་ནི་མིའི་རོའོ། །མ་སྨས་ཞེས་བྱ་བ་ནི་བུ་གུམ་བྱུང་བའོ། །མ་ཉམས་པ་ཞེས་བྱ་བ་ནི་ཡན་ལག་དུམ་བུར་མ་གྱུར་པའོ། །བྱ་རྨྱང་ཞེས་བྱ་བ་ནི་ལུས་གྱེན་དུ་འཆུ་བའོ། །བླག་བླག་ཟེར་ཞིང་ཞེས་བྱ་བ་ནི་སྒྲ་བླག་བླག་ཟེར་ཞིང་ངོ༌། །རོ་ལངས་ཞེས་བྱ་བ་ནི་འདྲེ་ལ་སོགས་པ་མི་མ་ཡིན་པའོ། །ནགས་ཀྱི་ཕྲེང་བ་ཞེས་བྱ་བ་ནི་ནགས་ཚལ་གྱི་ནང་ནས་སྐྱེས་པའི་མེ་ཏོག་དང་འབྲས་བུ་ལ་བྱས་པའི་ཕྲེང་བའོ། །བུམ་པ་གང་བ་ཞེས་བྱ་བའི་ཆུས་བཀང་བའོ། །བ་དང་བེའུར་འདྲ་བ་ཞེས་བྱ་བ་ནི་སྨད་གཉིས་སྤུ་ག་མཐུན་པའོ། །མཆིག་མཆི་གུ་དང་བཅས་པ་ཞེས་བྱ་བ་ནི་མཆིག་སྨད་ཕྲུགས་སུ་ལྡན་པའོ། །མེ་ཚུགས་སྦར་བ་ཞེས་བྱ་བ་ནི་མེ་བུད་པའོ། །རྒྱལ་བ་ཞེས་བྱ་བ་ནི་དེ་བཞིན་གཤེགས་པའོ། །རྒྱལ་བས་བཀའ་སྩལ་བ་ཞེས་བྱ་བ་ནི་བཅོམ་ལྡན་འདས་ཀྱི་ཕོ་ཉའམ། བཅོམ་ལྡན་འདས་ཀྱིས་བསྟན་པའོ། །བྱང་ཆུབ་སེམས་དཔའ་ཞེས་བྱ་བ་ནི་སྲིད་པ་ཐ་མའོ། །སོ་སོར་ཐར་པ་ཞེས་བྱ་བ་ནི་དང་པོར་ཐར་པའོ། །ཁ་ཏོན་པ་ཞེས་བྱ་བ་ནི་ཁ་དོན་དུ་མ་བསླབས་པའོ། །རྒྱ་ཆེར་དབྱངས་ཀྱིས་ཞེས་བྱ་བ་ནི་གཞན་གྱིས་ཐོས་པའི་སྒྲས་སོ། །མདོ་སྡེའི་སྡེ་ཚན་བཞི་པོ་ཞེས་བྱ་བ་ནི་ལུང་རིང་པོ་དང༌། ལུད་བར་མ་དང༌། ཡང་དག་པར་ལྡན་པའི་ལུང་དང༌། གཅིག་ལས་འཕྲོས་པའི་ལུང་ངག་གོ །མདོ་ཆེན་པོ་ཞེས་བྱ་བ་ནི་ཕས་ཀྱི་རྒོལ་བ་ལས་རྒྱལ་བར་བྱེད་པའི་ཕྱིར་དང༌། །གནོད་སྦྱིན་གདུག་པ་ལ་སོགས་པ་ལས་རྒྱལ་བར་བྱེད་པའི་ཕྱིར་རོ། འབྲས་བུ་ཆེན་པོ་ཞེས་བྱ་བའི་ཐ་ཚིག་གོ །ཆེ་བ་ཞེས་བྱ་བ་ནི་དོན་ཟབ་པ་ཉིད་ཀྱིས་དོན་ཆེ་བའོ། །
དེ་དག་ཀྱང་གང་ཞེ་ན་མདོ་ཆེ་བ་བརྒྱད་དེ། འདི་ལྟ་སྟེ་ཞེས་བྱ་བས་དངོས་སུ་བསྟན་པ་དག་ཡིན་ནོ། །དེ་དག་གི་ལུང་རིང་པོ་ལ་སོགས་པ་དག་གི་རྒྱུད་དུ་གཏོགས་པ་ཡིན་ནོ། །གཏང་ཞེས་བྱ་བ་ནི་གནས་མ་ཡིན་པར་གཏང་བའོ། །དགེ་སློང་བདག་ཉིད་གསོད་པར་སེམས་པར་འགྱུར་བས་ཞེས་བྱ་བ་ནི་རོ་ལངས་དེས་དགེ་སློང་སྔགས་པ་རང་ཉིད་གསོད་པར་བྱེད་དོ་ཞེས་བྱ་བའི་ཐ་ཚིག་གོ །ཉེ་བར་འགག་པ་ཞེས་བྱ་བ་ནི་ཟད་པའོ། །ཏིལ་དང་ཉུངས་ཀར་བྲེའུ་ཆུང་གང་ལ་མ་ག་དྷཱའི་སྲང་བཅུ་དྲུག་གོ །གཏུན་བུའི་རྩེ་མོ་ཞེས་བྱ་བ་ནི་གཏུན་བུའི་སྣའོ། །འབྲུ་ཞེས་བྱ་བ་ནི་འབྲས་བུའོ། །འདྲེས་པར་གྱུར་པ་ཞེས་བྱ་བ་ནི་འདུས་པར་གྱུར་པའོ། །འོ་མ་དང་ཞོ་བྲེའུ་ཆུང་གང་ལ་ནི་མ་ག་དྷཱའི་སྲང་སུམ་ཅུ་རྩ་གཉིས་སོ། །འཕྲོག་པར་བྱེད་ཅེས་བྱ་བ་ནི་དགུག་པའི་སྒྲའོ། །བྱེད་པར་གྱུར་པ་ཞེས་བྱ་བ་ནི་ཡལ་བར་གྱུར་པ་སྟེ་མི་མངོན་པར་གྱུར་ཅེས་བྱ་བའི་ཐ་ཚིག་གོ །ལྗན་ལྗིན་ཅེས་བྱ་བ་ནི་འདམ་རྫབ་བོ། །རྒྱ་ཐབ་ཅེས་བྱ་བ་ནི་བཙོ་བའི་གནས་སོ། །ད་ནུར་ཞེས་བྱ་བ་ནི་བསྲེག་པའི་གནས་སོ། །ཚེས་བརྒྱད་ཀྱི་བར་ཞེས་བྱ་བ་ནི་དགུན་ཟླ་ར་བ་དང༌། དགུན་ཟླ་འབྲིང་པོ། །དགུན་ཟླ་ཐ་ཆུངས་རྣམས་ཀྱི་མར་གྱི་ངོའི་ཚེས་ བརྒྱད་པ་དག་གི་བར་ཏེ། དགུན་ཟླ་ར་བ་ཚེས་ཉི་ཤུ་གསུམ ་ནས་དགུན་ཟླ་འབྲིང་པོའི་ཚེས་ཉི་ཤུ་གསུམ་དང༌། དགུན་ཟླ་ཐ་ཆུངས་ཚེས་ཉི་ཤུ་གསུམ་གྱི་བར་དག་ཏུ་ཞེས་བྱ་བའི་ཐ་ཚིག་གོ །སོག་མའི་ཆག་ཆག་ཅེས་བྱ་བ་ནི་སོག་མའི་ཆད་སྤུངས་ཏེ་ཆུ་གྲང་མོས་འདེབས་པའོ། །སྲོག་ཆགས་ཕྲ་མོ་སྐྱེ་བ་ཞེས་བྱ་བ་ནི་དུས་གང་དག་གི་ཚེ་དྲོད་གཤེར་ལས་སྐྱེས་པའི་སྲོག་ཆགས་ཕྲ་མོ་དག་སྐྱེ་བའི་དུས་དེ་དག་ཏུ་ཞེས་བྱ་བའི་ཐ་ཚིག་གོ །འཕྲོག་གནས་ཞེས་བྱ་བ་ནི་གྲོང་ཁྱེར་གྱི་མི་སྟེ། འབྲོག་ན་གནས་པ་ཡིན་པའི་ཕྱིར་རོ། །ནགས་ཞེས་བྱ་བ་ནི་ཚང་ཚིང་གི་ཕྱོགས་སོ། །རྫས་ལས་བྱུང་བའི་ཞེས་བྱ་བ་ནི་རྫས་ཀྱི་རྒྱུ་ལས་བྱུང་བའོ། །བསོད་ནམས་བྱ་བའི་གཞི་ཞེས་བྱ་བ་ནི་དགེ་བ་སྤེལ་བའི་རྒྱུའི་ཆོས་སོ། །བདུན་པོ་དག་ཅེས་བྱ་བ་ནི་ཀུན་དགའ་ར་བའི་སྦྱིན་པ་དང་གཙུག་ལག་ཁང་བརྩེག་ཏུ་གཞུག་པ་ནི་གནས་མལ་གྱི་སྦྱིན་པ་དང༌། ཟས་ནར་མ་སྦྱོར་དུ་གཞུག་པ་དང༌། གློ་བུར་དུ་འོངས་པ་དང༌། འགྲོ་བར་ཆས་པ་ལ་ཕན་འདོགས་པ་དང༌།
ནད་པ་དང་ནད་གཡོག་ལ་ཕན་འདོགས་པ་དང༌། ཕོངས་པའི་དུས་སུ་གནས་པའི་དགེ་འདུན་བཤོས་གསོལ་བའོ། །མཁར་ལེན་གྱི་འབྲས་བུ་ཞེས་བྱ་བ་ནི་འབད་པ་དང་རྩོལ་བའི་འབྲས་བུ་སྟེ། གླ་རྔན་ཞེས་བྱ་བའི་ཐ་ཚིག་གོ །བརྒྱ་ལ་ཞེས་བྱ་བ་ནི་དཔྱིད་ལ་སོགས་པའི་དུས་ཚིགས་ཀྱི་དུས་སོ།། བརྒྱ་ལམ་ན་ཞེས་བྱ་བ་ནི་དུས་ཚིགས་ཀྱི་བར་སྐབས་ཀྱི་ཟླ་བ་ཡར་གྱི་ངོ་ལ་སོགས་པའོ། །མཁར་ལེན་གྱི་སྟོང་མོ་ཞེས་བྱ་བ་ནི་ལས་ཀྱི་གྲོགས་ཞེས་བྱ་བའི་ཐ་ཚིག་གོ །གཞི་ཞེས་བྱ་བ་ནི་གནས་སོ། །ཕྱི་དྲོ་ཞེས་བྱ་བ་ནི་གུང་ཚིགས་ཀྱི་འོག་ཅེས་བྱ་བའི་ཐ་ཚིག་གོ །སྔ་དྲོ་ཞེས་བྱ་བ་ནི་གུང་ཚིགས་ཀྱི་མདུན་ཞེས་བྱ་བའི་ཐ་ཚིག་གོ །དུས་རྟིང་ལ་ཐུག་པ་ཞེས་བྱ་བ་ནི་ཉེ་བར་འགྱུར་ཞེས་བྱ་བའི་ཐ་ཚིག་གོ །ཅོ་འདྲི་བར་བྱེད་ཅེས་བྱ་བ་ནི་ཐོ་འཚམས་པར་བྱེད་པའོ། །ཕྱམ་ཞེས་བྱ་བ་ནི་གདུང་ཕྲན་ནོ། །རྐྱེན་དེ་ལྟ་བུ་ཞེས་བྱ་བ་ནི་གང་ལ་གདོན་མི་ཟ་བར་མི་གདེག་ཏུ་མི་རུང་བ་ཞེས་བྱ་བའི་ཐ་ཚིག་གོ །ཁྱིམ་པ་གཅིག་གི་ཁུར་ཞེས་བྱ་བ་ནི་སྲང་ཉིས་སྟོང་ངོ༌། །དྲང་སྲོང་གི་གདན་ཞེས་བྱ་བ་ལ། དྲང་སྲོང་ནི་ཤེས་པ་དང་ལྡན་པའོ། །དེའི་ཕྱིར་བཤམས་པའི་གདན་ནི་དྲང་སྲོང་གི་གདན་ནོ། །ཆོས་ཀྱི་ལུས་ཞེས་བྱ་བ་ནི་ཆོས་ཀྱི་བདག་ཉིད་ལུས་སམ། ཆོས་ཀྱི་ཕྱིར་སྒྲུབ་པའི་ལུས་སོ། །ཀུན་ཤེས་པ་བརྡ་སྤྲོད་པ་ཞེས་བྱ་པ་ལ། ཀུན་ཤེས་པ་ཞེས་བྱ་བ་ནི་ཟག་པ་མེད་པ་མི་སློབ་པའི་ཤེས་པ་བྱང་ཆུབ་རྟོགས་པའོ། །དེ་བརྡ་སྤྲོད་པ་ཞེས་བྱ་བ་ནི་བདག་གི་ཟག་པ་ཟད་དོ་ཞེས་བྱ་བ་ལ་སོགས་པ་སྒྲོགས་པར་བྱེད་ཅེས་བརྗོད་པའི་ཐ་ཚིག་གོ །ཆོས་ཀྱི་ལོངས་སྤོད་ཅེས་བྱ་བ་ནི་ཆོས་མཉན་པ་ལ་སོགས་པའི་ཆོས་ཀྱི་ལོངས་སྤྱོད་དོ།། ཟང་ཟིང་གི་ལོངས་སྤྱོད་ཅེས་བྱ་བ་ནི་བསོད་སྙོམས་ལ་སོགས་པའི་ཟང་ཟིང་གི་ལོངས་སྤྱོད་དོ། །གནོད་པ་ཉུང་བ་ཞེས་བྱ་བ་ནི་ནད་ཉུང་བ་སྟེ། ཡམས་ཀྱི་ནད་ཉུང་བ་ཞེས་བྱ་བའི་ཐ་ཚིག་གོ །ཡུན་རིང་དུ་འཚོ་བར་འགྱུར་ཞིང་ཞེས་བྱ་བ་ནི་ངེས་པའི་ཚེའོ། །ཚེ་རིང་དུ་སྐྱོང་བར་འགྱུར་རོ་ཞེས་བྱ་བ་ནི་མ་ངེས་པའི་ཚེ་སྲུང་བར་འགྱུར་རོ་ཞེས་བྱ་བའི་ཐ་ཚིག་གོ །ཡང་ན་སྔ་མ་ནི་བསྒྲུབ་པའོ། །ཕྱི་མ་ནི་སྒྲུབ་པར་བྱེད་པའོ། །ལན་ཚྭའི་སྨན་རྩབས་ཞེས་བྱ་བ་ནི་ལན་ཚྭའི་རྩབ་མོའོ། །ཁ་ཅིག་ན་རེ་པི་པི་ལིང་དཀར་པོའི་རྩ་བ་མོ་ལན་ཚྭ་ཅན་ཡིན་ནོ་ཞེས་ཟེར་རོ། །སྨན་པར་རབ་ཏུ་བྱུང་བ་ཞེས་བྱ་བ་ནི་སྔོན་སྨན་
པར་གྱུར་བ་ལས་ཕྱིས་རབ་ཏུ་བྱུང་བའོ། །སྨན་པས་བཀོལ་བ་ཞེས་བྱ་བ་ནི་སྨན་པ་དང་ལྷན་ཅིག་སྤྱོད་སྤྱོད་པའོ། །ནད་ཀྱིས་ཐེབས་པ་ཞེས་བྱ་བ་ནི་ནད་དེ་ཉིད་ཀྱིས་སྔོན་ཉོན་མོངས་པར་གྱུར་པ་གང་ཡིན་པའོ། །མཛོད་ཅེས་བྱ་བ་ནི་བཅས་པའི་མཛོད་དོ། །བང་བ་ཞེས་བྱ་བ་ནི་འབྲུ་ལ་སོགས་པའི་བང་བའོ། །ས་མཚམས་ཀྱི་བར་ཞེས་བྱ་བ་ནི་ས་མཚམས་ཀྱི་བར་གྱི་ཡུལ་ལོ། །དོན་མཐུན་པ་བསེལ་བ་དང་བཅས་པ་ཞེས་བྱ་བ་ལ། །བསེལ་བ་ཞེས་བྱ་བ་ནི་ཡུལ་གཞན་དུ་བསྐྱེལ་བའི་བསེལ་ལོ། །དེའི་དོན་དུ་གནས་པ་ནི་བསེལ་བ་སྟེ། སྲུང་བར་བྱེད་པའི་མི་དག་གོ །ཚོང་པ་དོན་ཐུན་གང་དག་བསེལ་བ་དག་དང་ལྷན་ཅིག་འཇུག་པ་དེ་དག་ནི་དོན་མཐུན་བསེལ་བ་དང་བཅས་པ་ཞེས་བྱའོ། །དཔའ་བ་ཞེས་བྱ་བ་ནི་མི་འཇིགས་པའོ། །རྩལ་ཆེ་བ་ཞེས་བྱ་བ་ནི་ནུས་པའོ། །གསོན་པོར་བཟུང་ཞེས་བྱ་བ་ནི་སྲོག་འཛིན་བཞིན་དུ་བཟུང་བ་སྟེ། སྲོག་དང་ལྡན་པར་བཟུང་ཞེས་བྱ་བའི་ཐ་ཚིག་གོ །གསོད་པ་ཞེས་བྱ་བ་ནི་གསོད་པའི་གནས་ཏེ་དུར་ཁྲོད་ཅེས་བྱ་བའི་ཐ་ཚིག་གོ །ཡང་དང་ཡང་དུ་སོ་སོར་རྟོགས་ཤེས་ཡོད་ཅེས་བྱ་བ་ནི་ཡང་དང་ཡང་དུ་རྣམ་པར་དཔྱོད་ཅིག་ཅེས་བྱ་བའི་ཐ་ཚིག་གོ །དེ་ཅིའི་ཕྱིར་ཞེ་ན་ཞེས་བྱ་བ་ནི་ཅི་ཞིག་གི་ཕྱིར་ཞེས་བྱ་བའི་ཐ་ཚིག་གོ །དེ་ནི་སེམས་ཚིམ་པ་དང་ཞུམ་པ་རྣམས་ལས་སུ་རུང་བའི་ཕྱིར་རོ། །དལ་བུས་ཞེས་བྱ་བ་ནི་དམན་པ་སྟེ། ཧ་ཅང་གསང་མི་མཐོ་བར་རོ། །ཁད་ཀྱིས་ཁད་ཀྱིས་ཞས་བྱ་བ་ནི་འདིར་ཁ་ཅིག་ཏུ་ནི་སྦོམ་པོའོ། །ཁ་ཅིག་ཏུ་ནི་དངོས་གཞིའོ། །སར་པ་ཞེས་བྱ་འདུ་ཤེས་ཡོད་ཅེས་བྱ་བ་ནི་འདིར་མ་ཡིན་པར་ཤེས་པ་ནི་འདུ་ཤེས་སོ། །སེམས་པ་ཡང་ཡོད་པས་ཞེས་བྱ་བ་ནི་གསང་བའི་སེམས་ཡོད་པའོ། །ཇི་ནས་ཀྱང་ཞེས་བྱ་བ་ནི་འདོད་པའོ། །འགལ་ཚབས་ཅན་ཞེས་བྱ་བ་ནི་འདིར་ཁ་ཅིག་ཏུ་ནི་སྦོམ་པོའོ། །ཁ་ཅིག་ཏུ་ནི་དངོས་གཞིའོ། །སར་པ་ཞེས་བྱ་བ་ནི་རྫོགས་པར་བསྙེན་ནས་རིང་པོ་མ་ལོན་པའོ། །སྐྱེས་ཕྲན་ཞེས་བྱ་བ་ནི་སྐྱེས་མ་ཟག་པ་ཉིད་དགག་པ་བསྟན་ཏེ་དབང་པོ་ལས་སུ་རུང་ཞིང་གསལ་བ་ཞེས་བྱ་བའི་ཐ་ཚིག་གོ །གཞོན་པ་ཞེས་བྱ་བ་ནི་གཞོན་ནུ་ཉིད་དགག་པ་བསྟན་ཏེ་ན་ཚོད་གཉིས་པ་ཞེས་བྱ་བའི་ཐ་ཚིག་གོ །བཅུ་བདུན་སྡེ་ཞེས་བྱ་
བ་ནི་བཅུ་བདུན་པོ་དག་གི་ཚོགས་སོ། །ཚོགས་དག་ཅེས་བྱ་བ་ནི་གཅིག་པ་དག་སྟེ་དེ་དག་ལ་ཚོགས་ཀྱི་གྲངས་དང་འབྲེལ་བ་ཡོད་པའི་ཕྱིར་རོ། །ལས་སུ་བསྐོ་བ་ཞེས་བྱ་བ་ནི་ལས་སུ་ཞུགས་པ་སྟེ། ལས་ཀྱི་རེས་ཞེས་བྱ་བའི་ཐ་ཚིག་གོ །སྟོངས་ཏེ་ཞེས་བྱ་བ་ནི་བྱ་བ་གཅིག་པ་ཉིད་དུའོ། །གག་ཚིལ་ཞེས་བྱ་བ་ནི་མཆན་ཁུང་ལ་སོགས་པར་སོར་མོ་གཉིས་སམ་གསུམ་དལ་བུས་ཉེད་པར་བྱེད་པའོ། །དད་པ་ཅན་ཞེས་བྱ་བ་ནི་ཡོན་ཏན་རྣམས་དང་ཡོན་ཏན་དང་ལྡན་པ་རྣམས་ལ་ཡིད་ཆེས་པ་དང་ལྡན་པའོ། །བཟང་བ་ཞེས་བྱ་བ་ནི་གནམ་པ་དང་ལྡན་པའོ། །དགེ་བའི་བསམ་པ་ཅན་ཞེས་བྱ་བ་ནི་བསོད་ནམས་འདོད་པའོ། །བསྔོས་ཏེ་ཞེས་བྱ་བ་ནི་མངོན་པར་བསམས་ཏེའོ། །རྟ་བབས་མཐོན་པོ་ཞེས་བྱ་བ་ལ། རྟ་བབས་ཞེས་བྱ་བ་ནི་ལམ་པོ་ཆེའི་སྒོའོ། །མཐོན་པོ་ཞེས་བྱ་བ་ནི་བསྒྲེངས་པའོ། །སྐར་ཁུང་ཞེས་བྱ་བ་ནི་སྣང་བའི་མཐོངས་སོ། །སྐར་ཁུང་དྲ་བ་ཅན་ཞེས་བྱ་བ་ནི་རླུང་གི་ལམ་དྲ་བ་དང་བཅས་པའོ། །ལན་ཀན་ཞེས་བྱ་བ་ནི་རྒྱུ་བའི་ལམ་གཅད་པའོ། །དེས་ན་གཙུག་ལྷག་ཁང་རྟ་བབས་མཐོང་པོ་དང་སྐར་ཁུང་དང་སྐར་ཁུང་དྲ་བ་ཅན་ལན་ཀན་གྱིས་བརྒྱན་པ་དེ་ལྟ་བུ་བྱེད་དུ་བཅུག་གོ་ཞེས་བྱ་བའི་ཐ་ཚིག་གོ །སྙིང་དང་མིག་འཕྲོག་པ་ཞེས་བྱ་བ་ནི་དབང་དུ་བྱེད་པའོ། །མཐོ་རིས་ཀྱི་ཐེམ་སྐས་སུ་གྱུར་པ་ཞེས་བྱ་བ་ནི་སྟེགས་སུ་གྱུར་པའོ། །དཔྱང་ཚགས་ཞེས་བྱ་བ་ནི་ཆུ་བཙགས་པའི་ཚགས་སོ། །མཚོ་པདྨ་གང་བ་བཞིན་ཞེས་བྱ་བ་ནི་པདྨ་དང་བཅས་པའི་མཚོ་བཞིན་ནོ། །ས་གཞི་དེ་ནི་དགའ་བྱེད་ཡིན་ཞེས་བྱ་བ་ནི་ས་རྣམས་དགའ་བར་གྱུར་བའོ། །ཡོན་བཤད་པ་ཞེས་བྱ་བ་ནི་སྦྱིན་པའི་འབྲས་བུ་ཡོངས་སུ་བསྔོ་བའོ། །མི་སྡུག་པ་ཞེས་བྱ་བ་ནི་རུས་གོང་ལ་དམིགས་པ་ལ་སོགས་པའི་ཆགས་པ་མེད་པའི་སེམས་སོ། །བླ་མཁྱེན་ཞེས་བྱ་བ་ནི་བཙུན་མོའི་འཁོར་གྱི་སྤྱན་ནོ། །དད་པས་སྤེལ་བར་བྱ་ཞིང་ཞེས་བྱ་བ་ནི་ཚུལ་དང་མཐུན་པར་རྗེས་སུ་བསྒྲུབས་པས་སོ། །རྗེས་སུ་སྙིང་བརྩེ་བར་བྱའོ་ཞེས་བྱ་བ་ནི་སྦྱིན་པར་བྱ་བའི་ཆོས་བླང་བ་ལ་སོགས་པའོ། །ཚིགས་སུ་བཅད་པའི་དབྱངས་ཀྱིས་ཞེས་བྱ་བ་ནི། །རྟ་བརྒྱད་དང་ནི་གསེར་བརྒྱ་དང༌། དྲེའུ་དང་ཤིང་རྟ་བརྒྱ་དག་དང༌། །ཞེས་བྱ་བ་ལ་སོགས་པའི་ཚིགས་སུ་བཅད་པ་འདོན་པས་སོ། །རྒན་ཞུགས་ཞེས་བྱ་
བ་ནི་ཡུན་རིང་དུ་ལོན་ནས་རབ་ཏུ་བྱུང་བའོ། །ཤིང་ཤུན་ཞེས་བྱ་བ་ནི་ཤིང་ལྗོན་པའི་ཤུན་པའོ། །གོས་ཞེས་བྱ་བ་ནི་བགོ་བ་ལ་སོགས་པའི་གོས་སོ། །ཕུར་ཤོག་ཅིང་འདུག་པ་ཞེས་བྱ་བ་ནི་གོས་ཀྱི་ཚོགས་དག་སྒྲ་ཕུར་ཤོག་ཟེར་ཞིང་འདུག་པའོ།། བྱུག་རིས་ཞེས་བྱ་བ་ནི་སའོ། །དང་པོ་བདུན་པོ་དག་ཅེས་བྱ་བ་ནི་སྟན་ནང་ཚངས་ཅན་དང༌། འོག་གཞི་དང་སྟེང་གཡོགས་དང༌། གདིང་བ་དང༌། བགོ་བ་དང་སྔས་དང༌། རྟེན་མའོ། །པདྨའི་མིག་ཅན་དག་ཅེས་བྱ་བ་ནི་དགའ་བ་ལ་བོད་པའོ། །གྲུ་བོ་ཆེ་ཞེས་བྱ་བ་ནི་འདེགས་པའི་སྣོད་དོ། །ཕྲོགས་ཤིང་ཕྲོགས་ཤིག་ཅེས་བྱ་བ་ནི་ཁྱེར་ཅིག་ཅེས་བྱ་བ་སྟེ། གུས་པར་བསྒྲིམ་པའི་ཕྱིར་ལན་གཉིས་སུ་སྨོས་སོ། །འཕོང་གི་སློབ་དཔོན་ཞེས་བྱ་བ་ནི་འཕོང་གི་རིག་བྱེད་ལ་མཁས་པའོ། །བཏོན་ཏེ་ཞེས་བྱ་བ་ནི་སྨྲས་ཏེའོ། །གསོ་སྦྱོང་ཞེས་བྱ་བ་ནི་ཚུལ་ཁྲིམས་གསོ་བའོ། །མི་མཆོག་འདུལ་བའི་ཁ་ལོ་སྒྱུར་མཛད་པ། །ཀུན་སྦྱོར་འཆིང་བ་གཅོད་པ་དེ་བཞིན་གཤེགས། །དབང་པོ་ཞི་ཞིང་ཉེར་ཞི་ཞི་ལ་མཁས། །མཉན་ཡོད་བཞུགས་པས་བཀའ་བཞིན་བྱེད་པས་གསུངས། །ཞེས་བྱ་བ་ལ། མི་མཆོག་འདུལ་བ་ཞེས་བྱ་བ་ནི་འཕགས་པ་ཤཱ་རིའི་བུ་ལ་སོགས་པ་ལྟ་བུ་བདེན་པའི་སྣོད་དུ་རུང་བའི་འདུལ་བ་དག་གོ །ཁ་ལོ་སྒྱུར་མཛད་ཅེས་བྱ་བ་ལ་སོགས་པ་ནི་བཅོམ་ལྡན་འདས་ཀྱི་ཡོན་ཏན་གྱི་ཁྱད་པར་རོ། །ཀུན་སྦྱོར་ཞེས་བྱ་བ་ནི་རྗེས་སུ་ཆགས་པ་དང༌། ཁོང་ཁྲོ་དང༌། ང་རྒྱལ་དང༌། མ་རིག་པ་དང༌། ལྟ་བ་དང༌། མཆོག་ཏུ་འཛིན་པ་དང༌། ཐེ་ཚོམ་དང༌། ཕྲ་དོག་དང༌། སེར་སྣའི་ཀུན་དུ་སྦྱོར་བ་དགུ་པོ་དག་གོ །འཆིང་བ་ཞེས་བྱ་བ་ནི་འདོད་ཆགས་དང༌། ཞེ་སྡང་དང༌། གཏི་མུག་གི་འཆིང་བ་སྟུག་པོ་དག་གོ །གཅོད་པ་ཞེས་བྱ་བ་ནི་གདུལ་བ་རྣམས་ཀྱི་ཀུན་དུ་སྦྱོར་བ་དང་འཆིང་བ་དེ་དག་གཅོད་པར་མཛད་པའོ། །དབང་པོ་ཞི་ཞིང་ཞེས་བྱ་བ་ནི་རང་གིའོ། །ཉེར་ཞི་ཞེས་བྱ་བ་ནི་ལམ་མོ། །ཞི་ལ་ཞེས་བྱ་བ་ནི་མྱ་ངན་ལས་འདས་པ་ལའོ། །བཀའ་བཞིན་བྱེད་པ་ཞེས་བྱ་བ་ནི་སློབ་མ་རྣམས་ལའོ། །གསུང་ཞེས་བྱ་བ་ནི་གོ་བར་མཛད་པའོ། །མིང་འདོགས་པར་བྱེད་པ་ནི་ཉམས་སོ་ཞེས་བྱ་བ་ནི་དོན་མེད་ཅིང་དལ་
བ་ཞིག་བྱས་སོ་ཞེས་བྱ་བའི་ཐ་ཚིག་གོ །ལྷག་མ་དང་བཅས་པར་བཞོ་བར་བྱ་བའོ་ཞེས་བྱ་བ་ནི་འདོད་ཞོའི་ལྷག་མ་དང་བཅས་པར་བཞོ་བ་བཞིན་དུ་ཚོད་ཤེས་པར་བྱའོ་ཞེས་བྱ་བའི་ཐ་ཚིག་གོ །ཕྱོགས་བཞི་པའི་དགེ་སློང་གི་དགེ་འདུན་ཞེས་བྱ་བ་ནི་ཕྱོགས་བཞིན་གནས་པའོ། །མཚན་མོ་འགེབས་པ་ཞེས་བྱ་བ་ནི་མཚན་མོ་དེ་དག་འགེབས་ཤིང་མི་སྣང་བར་བྱེད་པ་ཞེས་བྱ་བའི་ཐ་ཚིག་གོ །གཙུག་ལག་ཁང་ཞེས་བྱ་བ་ནི་ཐུན་མོང་མ་ཡིན་པའོ། འདུག་གནས་ཞེས་བྱ་བ་ནི་གཞན་དང་ཐུན་མོང་བའོ། །དུས་ཀྱི་འཁོར་ལོ་ཞེས་བྱ་བ་ནི་གཉིས་བཞུར་གྱི་འཁོར་ལོའོ། །བདུན་པ་ཞེས་བྱ་བ་ནི་ཆོས་གོས་གླེགས་བུ་བདུན་པའོ། ལྔ་པ་ཞེས་བྱ་བ་ནི་ཆོས་གོས་གླེགས་བུ་ལྔ་པའོ། །རྒྱ་ཅང་ཞེས་བྱ་བ་ནི་སྐ་རགས་སྦྲུལ་གྱི་མགྲིན་པ་ལྟ་བུའོ། །ཤུར་བུ་ཞེས་བྱ་བ་ནི་སྐྲ་རགས་ལེབ་ལེབ་པའོ། །ལྕག་པོད་ཅེས་བྱ་བ་ནི་སྐ་རགས་རྒྱུན་སྦོམ་པའོ། །ཤུར་བུ་ཕྲེའུ་ཞེས་བྱ་བ་ནི་སྐ་རགས་རྒྱུན་ཕྲ་མོའོ། །ཚམ་ངམ་ཞེས་བྱ་བ་ནི་རབ་ཏུ་སྡང་བའི་སེམས་མེད་པས་བསྡིགས་པར་བྱ་བའོ། །ཡོ་བྱད་བཅུ་གསུམ་ཞེས་བྱ་བ་ནི་སྣམ་སྦྱར་དང༌། བླ་གོས་དང༌། མཐང་གོས་དང༌། ཤམ་ཐབས་དང༌། ཤམ་ཐབས་ཀྱི་གཟན་དང༌། རྡུལ་གཟན་དང༌། རྡལ་གཟན་གྱི་གཟན་དང། གདིང་བ་དང༌། སྐྲ་བཟེད་པ་དང༌། རྣག་གཟན་དང༌། གཡན་པ་དགབ་པ་དང་ཁྲུས་རས་དང༌། དབྱར་གྱི་རས་ཆེན་དང༌། ཡོ་བྱད་ཀྱི་གོས་སོ། །ལེགས་གསུངས་ཞེས་བྱ་བ་ནི་ལེགས་པར་གསུངས་པ་གསུངས་པའོ། །རྐང་གཉིས་གཙོ་བོ་ཞེས་བྱ་བ་ནི་ལྷ་དང་མིའི་གཙོ་བོའོ། །གང་བསྟན་པ་ཞེས་བྱ་བ་ནི་བཀའ་སྩལ་བ། །གཡུལ་ལས་སྔར་བ་ཞེས་བྱ་བ་ནི་གཡུལ་ངར་འཇིགས་པའོ། །རྒན་པའི་མཐའ་ཞེས་བྱ་བ་ནི་རྒན་པའི་ཡུལ་ལོ། །གཞོན་པའི་མཐའ་ཞེས་བྱ་བ་ཡང་གཞོན་པའི་ཡུལ་ལོ། །རྒན་ཞུགས་ཞེས་བྱ་བ་ནི་རྒན་པའོ། །འཕང་ལོས་རློགས་པའི་ས་ཞེས་བྱ་བ་ནི་ཤིང་རྟའི་འཕོང་ལོ་བཏེག་པའི་སའོ། །མཚམས་མེད་པ་ཞེས་བྱ་བ་ནི་བར་ཆད་མེད་པ་སྟེ་སེམས་ཅན་དམྱལ་བར་སྐྱེ་བའི་ཕྱིར་བར་དུ་གཅོད་པར་མི་ནུས་པ་ནི་བར་མེད་པ་སྟེ། བར་མེད་པར་སེམས་ཅན་དམྱལ་བ་རྣམས་སུ་སྐྱེ་བའི་ལས་ཤེས་བྱ་བའི་ཐ་ཚིག་གོ །སྤང་ལེབ་ཅེས་བྱ་བ་ནི་
བཀྲུ་བཤལ་བྱ་བའི་དབྱུག་པའོ། །འདུལ་བ་རྣམ་པར་འབྱེད་པའི་ཚིག་རྣམ་པར་བཤད་པ་སློབ་དཔོན་དུལ་བའི་ལྷས་ཉེ་བར་སྦྱར་བ་ལས་ཕམ་པར་གྱུར་པ་གསུམ་པ་གསོད་པའི་ཕམ་པར་འགྱུར་བའི་ཚིག་རྣམ་པར་བཤད་པ་རྫོགས་སོ།། །།ཡངས་པ་ཅན་ཞེས་བྱ་བའི་གྲོང་ཁྱེར་དེ་ཁྱིམ་སྤངས་པའི་ཕྱིར་རོ། །སྤྲེའུ་རྫིང་གི་འགྲམ་ཞེས་བྱ་བ་ནི་སྤྲེའུས་བརྐོས་པའི་རྫིང་གི་རྒྱུན་ངོགས་ནའོ། །ཁང་པ་བརྩེགས་པའི་ཁང་བཟངས་ཞེས་བྱ་བ་ནི་གཙུག་ལག་ཁང་གི་མིང་ངོ༌། །ཆུ་སྲིན་ཉའི་རིགས་ཞེས་བྱ་བ་ནི་ཉ་དང་འདྲ་བ་སྟེ་མཇུག་མ་ལ་སོགས་པ་ཉའི་རྣམ་པ་དང་འདྲ་བའོ། །ལས་མ་མཐོང་བ་ཞེས་བྱ་བ་ནི་དགེ་བ་དང་མི་དགེ་བའི་ལས་ཇི་ལྟ་བ་བཞིན་དུ་མི་ཤེས་པ་ཞེས་བྱ་བའི་ཐ་ཚིག་གོ །སྨྲས་པ་ཞེས་བྱ་བ་ནི་རྨ་ཆུང་ཞིག་བྱུང་བའོ། །རྣམ་པར་སྨས་པ་ཞེས་བྱ་བ་ནི་རྨ་ཆེན་པོ་བྱུང་བའོ། །རལ་པ་ཞེས་བྱ་བ་ནི་ཅུང་ཞིག་རལ་པའོ། །རབ་ཏུ་རལ་པ་ཞེས་བྱ་བ་ནི་ཆེར་རལ་པའོ། །ལྟད་མོ་ཞེས་བྱ་བ་ནི་ཡ་མཚན་གྱི་བློས་ལྟ་འདོད་པའོ། །སྟོན་པ་དྲུག་པོ་ཞེས་བྱ་བ་ནི་འོད་སྲུངས་རྫོགས་བྱེད་དང༌། ཀུན་དུ་རྒྱུ་གནག་ལྷས་ཀྱི་བུ་དང༌། སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་དང༌། ཀ་ཏྱའི་བུ་ནོག་ཅན་དང༌། མི་ཕམ་སྐྲའི་ལ་བ་ཅན་དང༌། གཅེར་བུ་པ་གཉེན་གྱི་བུ་ཞེས་བྱ་བ་མུ་སྟེགས་ཅན་རྣམས་ཀྱི་ལམ་སྟོན་པར་བྱེད་པ་དག་གོ །རྟོག་པར་བྱེད་ཅེས་བྱ་བ་ནི་རྣམ་པར་དཔྱོད་པར་བྱེད་པའོ། །མཁྱེན་པ་ཞེས་བྱ་བ་ནི་ཡེ་ཤེས་ཀྱིས་སོ། །གཟིགས་པ་ཞེས་བྱ་བ་ནི་སྤྱན་གྱིས་སོ། །རིག་པ་ཞེས་བྱ་བ་ནི་སྙན་གྱིས་སོ། །རྣམ་པར་མཁྱེན་པ་ཞེས་བྱ་བ་ནི་ཡིད་ཀྱིས་རྣམ་པར་ཤེས་སོ། །ཐུགས་རྗེ་ཆེན་པོ་དང་ལྡན་པ་ཞེས་བྱ་བ་ནི་ཐུགས་རྗེ་བླ་ན་མེད་པས་བསྐྱེད་པའོ། །འཇིག་རྟེན་ལ་ཕན་པར་ཞུགས་པ་ཞེས་བྱ་བ་ནི་རྗེས་སུ་བསྒྲུབ་པས་སོ། །བསྲུང་བ་གཅིག་བུ་གཅིག་པ་ཞེས་བྱ་བ་ནི་རྟག་ཏུ་དྲན་པ་ཉེ་བར་གཞག་པའི་སྒོ་སྲུང་དང་ལྡན་པའོ། །ཉག་གཅིག་དཔའ་བ་ཞེས་བྱ་བ་ནི་གྲོགས་ལ་མི་ལྟོས་པའོ། །གཉིས་པ་མེད་པ་ཞེས་བྱ་བ་ནི་འདྲ་བ་གཉིས་པ་མེད་པའོ། །གཉིས་སུ་མི་གསུང་བ་ཞེས་བྱ་བ་ནི་ཤིན་ཏུ་ངེས་པར་གསུངས་པ་སྟེ། སྔ་ཕྱི་འགལ་བ་མི་གསུང་བའོ། །ཞི་གནས་དང་ལྷག་མཐོང་གིས་ཞུགས་པ་ཞེས་བྱ་བ་ལ། ཞི་གནས་ཞེས་བྱ་བ་ནི་ཏིང་ངེ་འཛིན་ཏེ། ཉེས་པ་
ཞི་བར་བྱེད་པའི་ཕྱིར་རོ། །ལྷག་མཐོང་ཞེས་བྱ་བ་ནི་ཤེས་རབ་མཁས་པ་སྟེ། ལྷག་མཐོང་གི་སྐྱེས་བུ་མཁས་པར་བྱེད་པའི་ཕྱིར་རོ། །རིག་པ་གསུམ་གསལ་བར་མཛད་པ་ཞེས་བྱ་བ་ནི་སྔོན་གྱི་གནས་དང༌། ཤི་འཕོ་བ་དང༌། སྐྱེ་བ་དང༌། ཟག་པ་ཟད་པ་མཁྱེན་པའི་རིག་པ་གསུམ་སྟོན་པར་མཛད་པའོ། །བསླབ་པ་གསུམ་ལ་ལེགས་པར་བསླབས་པ་ཞེས་བྱ་བ་ནི་ལྷག་པའི་ཚུལ་ཁྲིམས་དང༌། ལྷག་པའི་སེམས་དང༌། ལྷག་པའི་ཤེས་རབ་ཀྱི་བསླབ་པ་གསུམ་རྗེས་སུ་བསྒྲུབ་པའོ། །དུལ་བའི་གནས་གསུམ་གྱི་གཞི་ལ་མཁས་པ་ཞེས་བྱ་བ་ནི་གཅིག་ཏུ་འཇམ་པ་དང༌། གཅིག་ཏུ་རྩུབ་པ་དང། འཇམ་རྩུབ་འདྲེས་པས་འདུལ་བའི་གནས་གསུམ་ལ་མཁས་པའོ། །ཆུ་བོ་བཞི་ལས་རྒལ་བ་ཞེས་བྱ་བ་ནི་འདོད་པ་དང༌། སྲིད་པ་དང༌། ལྟ་བ་དང༌། མ་རིག་པའི་ཆུ་བོ་ལས་རྒལ་བའོ། །རྫུ་འཕྲུལ་གྱི་རྐང་པ་བཞིས་སྤྱོད་པའི་གཞི་ལ་ལེགས་པར་གནས་ཞེས་བྱ་བ་ནི་འདུན་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་དང༌། སེམས་དང༌། བརྩོན་འགྲུས་དང༌། དཔྱོད་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པའོ། །བསྡུ་བའི་དངོས་པོ་བཞི་ལ་ཡུན་རིང་པོ་ནས་ཡོངས་སུ་སྦྱང་བ་མཛད་པ་ཞེས་བྱ་བ་ནི་སྦྱིན་པ་དང༌། སྙན་པར་སྨྲ་བ་དང༌། དོན་མཐུན་པ་དང༌། དོན་སྤྱོད་པ་ལ་ཡུན་རིང་པོ་ནས་གོམས་པར་མཛད་པའོ། །མི་འཇིགས་པ་བཞིས་བསྙེངས་པ་མི་མངའ་བ་ཞེས་བྱ་བ་ནི་ཡང་དག་པར་རྫོགས་པའི་སངས་རྒྱས་པ་ཉིད་དང༌། གང་ལ་ཟག་བཟང་པ་ཉིད་ངེས་པར་འབྱུང་བའི་ལམ་སྟོན་པ་དང༌། བར་དུ་གཅོད་པའི་ཆོས་དེ་བཞིན་དུ་བསྟན་པ་ལ་བསྙེངས་པ་མི་མངའ་ཞིང་ཁྱུ་མཆོག་རླབས་པོ་ཆེའི་གནས་སུ་དམ་འཆའ་ལ། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོག་པའོ། །ཡན་ལག་ལྔ་སྤངས་པ་ཞེས་བྱ་བ་ནི་འདོད་པ་ལ་འདུན་པ་དང༌། གནོད་སེམས་དང༌། རྨུགས་པ་དང་གཉིད་དང༌། འགྱོད་པ་དང༌། རྒོད་པ་དང། ཐེ་ཚོམ་ཞེས་བྱ་བའི་འཁོར་བར་བྱེད་པའི་ཡན་ལག་ལྔ་པོ་དག་སྤངས་པའོ། །འགྲོ་བ་ལྔ་ལས་ཡང་དག་པར་འདས་པ་ཞེས་བྱ་བ་ནི་ལྷ་དང༌། མི་དང༌། སེམས་ཅན་དམྱལ་བ་དང་དུད་འགྲོ་དང་ཡི་དགས་ཀྱི་འགྲོ་བ་ལྔ་ལས་སོ། །ཡན་ལག་དྲུག་དང་ལྡན་པ་ཞེས་བྱ་བ་ནི་རྫུ་འཕྲུལ་གྱི་
ཡུལ་དང༌། ལྷའི་རྣ་བ་དང༌། སེམས་ཀྱི་རྣམ་གྲངས་དང༌། འཆི་འཕོ་དང༌། སྐྱེ་བ་དང༌། ཟག་པ་ཟད་པ་ཤེས་པ་དང་བརྙེས་པའོ། །ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པ་ཞེས་བྱ་བ་ནི་སྦྱིན་པ་དང༌། ཚུལ་ཁྲིམས་དང༌། བཟོད་པ་དང༌། བརྩོན་འགྲུས་དང༌། བསམ་གཏན་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་དག་ཡོངས་སུ་རྫོགས་པ་སྟེ། དེ་དག་འཕེལ་བའི་ཕྱིར་རོ། །རྟག་ཏུ་གནས་པ་དྲུག་གིས་གནས་པ་མིག་དང༌། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ཀྱི་རྣམ་པར་ཤེས་པར་བྱ་བ་ཡུལ་དྲུག་པོ་དང་རྟག་ཏུ་དྲན་པ་དང་ཤེས་བཞིན་གྱིས་གནས་པའོ། །བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་ཕྱུག་པ་ཞེས་བྱ་བ་ནི་དྲན་པ་ཡང་དག་བྱང་ཆུབ་ཀྱི་ཡན་ལག་དང༌། ཆོས་རྣམ་པར་འབྱེད་པ་དང༌། བརྩོན་འགྲུས་དང༌། དགའ་བ་དང༌། ཤིན་ཏུ་སྦྱངས་པ་དང༌། ཏིང་ངེ་འཛིན་དང༌། བཏང་སྙོམས་ཡང་དག་བྱང་ཆུབ་ཀྱི་ཡན་ལག་གོ །ལམ་གྱི་ཡན་ལག་བརྒྱད་སྟོན་པ་ཞེས་བྱ་བ་ནི་ཡང་དག་པའི་ལྟ་བ་དང༌། ཡང་དག་པའི་རྟོག་པ་དང༌། ཡང་དག་པའི་ངག་དང༌། ཡང་དག་པའི་ལས་ཀྱི་མཐའ་དང༌། ཡང་དག་པའི་འཚོ་བ་དང༌། ཡང་དག་པའི་རྩོལ་བ་དང༌། ཡང་དག་པའི་དྲན་པ་དང༌། ཡང་དག་པའི་ཏིང་ངེ་འཛིན་གྱི་ངོ་བོ་ཉིད་ཀྱིས་འཕགས་པའི་ལམ་སྟོན་པར་མཛད་པའོ། །མཐར་གྱིས་གནས་པའི་སྙོམས་པར་འཇུག་པ་དགུ་ལ་མཁས་པ་ཞེས་བྱ་བ་ནི་བསམ་གཏན་བཞི་དང༌། གཟུགས་མེད་པ་བཞི་དང༌། འགོག་པའི་སྙོམས་པར་འཇུག་པ་ལའོ། །སྟོབས་བཅུའི་སྟོབས་དང་ལྡན་པ་ཞེས་བྱ་བ་ནི་གནས་དང་གནས་མ་ཡིན་པ་མཁྱེན་པའི་སྟོབས་དང༌། ལས་བདག་གིར་བྱ་བ་མཁྱེན་པ་དང༌། བསྟན་པ་དང༌། རྣམ་པར་ཐར་པ་དང་ཏིང་ངེ་འཛིན་ལ་སྙོམས་པར་འཇུག་པ་མཁྱེན་པའི་སྟོབས་དང་དབང་པོ་མཆོག་དང༌། མཆོག་མ་ཡིན་པ་མཁྱེན་པའི་སྟོབས་དང༌། མོས་པ་སྣ་ཚོགས་མཁྱེན་པའི་སྟོབས་དང། ཁམས་སྣ་ཚོགས་མཁྱེན་པའི་སྟོབས་དང༌། ཐམས་ཅད་དུ་འགྲོ་བའི་ལམ་མཁྱེན་པའི་སྟོབས་དང༌། སྔོན་གྱི་གནས་རྗེས་སུ་དྲན་པ་མཁྱེན་པའི་སྟོབས་དང༌། འཆི་འཕོ་དང་སྐྱེ་བ་མཁྱེན་པའི་སྟོབས་དང༌། ཟག་པ་ཟད་པ་མཁྱེན་པའི་སྟོབས་དང་ངོ༌། །ཕྱོགས་བཅུར་སྙན་པས་ཡང་དག་པར་
རྒྱས་པ་ཞེས་བྱ་བ་ལ། ཕྱོགས་བཅུ་ཞེས་བྱ་བ་ནི་ཕྱོགས་བཞི་དང༌། ཕྱོགས་མཚམས་བཞི་དང་སྟེང་དང་འོག་གོ །བརྒྱ་ཕྲག་བཅུར་དབང་བསྒྱུར་བ་ལས་ཁྱད་པར་དུ་འཕགས་པ་ཞེས་བྱ་བ་ལ། བརྒྱ་ཕྲག་བཅུ་ཞེས་བྱ་བ་ནི་སྟོང་གི་འཇིག་རྟེན་གྱི་ཁམས་སོ། །དེར་དབང་སྒྱུར་བ་ནི་འཁོར་གྱི་བདག་པོས་ཏེ། སྟོང་གི་འཇིག་རྟེན་གྱི་ཁམས་སུ་དབང་སྒྱུར་བའི་ཚངས་པའོ། །དེ་ལས་ཁྱད་པར་དུ་འཕགས་པ་ནི་མཐུས་ལྷག་པའོ། །ཉིན་ལན་གསུམ་མཚན་ལན་གསུམ་ཞེས་བྱ་བ་ནི་ཉིན་པར་གྱི་སྔ་དྲོ་དང༌། གུང་དང༌། ཕྱི་དྲོའི་ཆ་གསུམ། མཚན་མོའི་ཐུན་དང་པོ་དང༌། གུང་དང༌། ཐ་མ་གསུམ་མོ། །སངས་རྒྱས་ཀྱི་སྤྱན་གྱིས་ཞེས་བྱ་བ་ནི་ཐམས་ཅད་མཁྱེན་པའི་ཡེ་ཤེས་ཀྱིས་སོ། །འཇིག་རྟེན་ལ་ཞེས་བྱ་བ་ནི་ཁམས་གསུམ་པའི་འགྲོ་བ་ལའོ། །རྣམ་པར་གཟིགས་ནས་ཞེས་བྱ་བ་ནི་སོ་སོར་བརྟགས་ནས་སོ། །ཉམས་པར་འགྱུར་ཞེས་བྱ་བ་ནི་དེ་དག་ལས་ལྟུང་བའོ། །འཕེལ་བར་འགྱུར་ཞེས་བྱ་བ་ནི་དགེ་བ་དག་ཉེ་བར་སོགས་པར་འགྱུར་བའོ། །གནོད་པ་ཞེས་བྱ་བ་ནི་ལུས་ཀྱི་སྡུག་བསྔལ་བའོ། །ཉམ་ང་བ་ཞེས་བྱ་བ་ནི་སྡུག་པ་དང་བྲལ་བའི་སྡུག་བསྔལ་ལོ། །མི་བདེ་བ་ཞེས་བྱ་བ་ནི་མི་སྡུག་པ་དང་ཕྲད་པའི་སྡུག་བསྔལ་ལོ། །གཞོལ་བ་དང་བབ་པ་དང་འབབ་པ་ཞེས་བྱ་བ་ནི་ཆུང་ངུ་དང་འབྲིང་དང་ཆེན་པོའི་རྣམ་པས་མངོན་པར་ཕྱོགས་པའོ། །མཐོ་རིས་ཞེས་བྱ་བ་ནི་ལྷའི་འཇིག་རྟེན་ནོ། །ཐར་པ་ཞེས་བྱ་བ་ནི་མྱ་ངན་ལས་འདས་པའོ། །འབྲས་བུ་ཞེས་བྱ་བ་ནི་དགེ་སྦྱོང་གི་ཚུལ་གྱི་འབྲས་བུའོ། །འདོད་པའི་འདམ་ཞེས་བྱ་བ་ནི་དངོས་པོའི་འདོད་པ་དང་ཉོན་མོངས་པའི་འདོད་པ་སྟེ། འདམ་པ་དང་ཆོས་མཐུན་པའི་ཕྱིར་རོ། །འཕགས་པའི་ནོར་ཞེས་བྱ་བ་ནི་ཟག་པ་མེད་པའི་དད་པ་དང༌། །ཚུལ་ཁྲིམས་དང༌། ངོ་ཚ་ཤེས་པ་དང༌། ཁྲེལ་ཡོད་པ་དང༌། ཐོས་པ་དང༌། གཏོང་བ་དང༌། ཤེས་རབ་ཀྱི་ནོར་བདུན་པོ་དག་གོ །འབྲས་བུ་དང་བཅས་པ་ཞེས་བྱ་བ་ནི་གནས་ལ་དད་པ་ལ་སོགས་པའི་རིམ་གྱིས་སོ། །དགེ་བའི་རྩ་བ་དག་མ་བསྐྱེད་པ་ཞེས་བྱ་བ་ནི་ཐར་པའི་ཆ་དང་མཐུན་པ་དག་མ་འཕགས་པའོ། །ཡོངས་སུ་སྨིན་པ་ཞེས་བྱ་བ་ནི་མཐུས་བསྐྱེད་ཅིང་སྤེལ་བའོ། །སྨས་པ་ཞེས་བྱ་བ་ནི་བསྟོད་པ་བྱེད་པ་ལ་བསམས་སོ། །ཆུ་སྲིན་གནས་ཀྱི་དུག་
ཅན་པ། །ཞེས་བྱ་བ་ནི་རྒྱ་མཚོ་སྟེ། དེ་ནི་ཆུ་སྲིན་གྱི་གནས་ཀྱང་ཡིན་ལ་དུག་ཅན་ཡང་ཡིན་པའི་ཕྱིར་རོ། །དུག་ལས་ཞེས་བྱ་བ་ནི་དུས་གསུམ་དུ་རླབས་འབྱུང་བའི་དུས་ལས་སོ། །སྲིད་ཀྱིས་ཞེས་བྱ་བ་ནི་སྲིད་པར་འགྱུར་བའོ། །བྱམས་པ་ཞེས་བྱ་བ་ནི་སྤྱན་རས་ཀྱིས་འཆོ་བའོ། །རྟོག་ཅིང་ཞེས་བྱ་བ་ནི་ཚོལ་བའོ། །བྱ་བ་ལྷག་པར་བྱས་ཞེས་བྱ་བ་ནི་ཐར་པའི་ལམ་འཕངས་པར་བྱས་པའོ། །གདུལ་བར་གྱུར་བའི་རྒྱ་མཚོ་ཆེན་པོ་ཞེས་བྱ་བ་ནི་གདུལ་བའི་ཚོགས་སོ། །འཛུམ་པ་ཞེས་བྱ་བ་ནི་ཞལ་ཅུང་ཟད་དབྱེ་བའོ། །འོད་ཟེར་ཞེས་བྱ་བ་ནི་འོད་འཕྲོ་བའོ། །ཡང་སོས་ཞེས་བྱ་བ་ནི་བཅད་ཅིང་ཡང་འཚོ་བ་རྣམས་སོ། །ཐིག་ནག་ཅེས་བྱ་བ་ནི་གཤེགས་པ་ལ་སོགས་པའི་ཕྱིར་ཐིག་ནག་པོ་འདེ་བས་པའོ། །བསྡུས་གཞོམ་ཞེས་བྱ་བ་ནི་བསྡུས་ཏེ་གཞོམ་པའི་སྡུག་བསྔལ་མང་པོ་དང་ལྡན་པ་དག་གོ །ངུ་འབོད་ཅེས་བྱ་བ་ནི་རྟག་ཏུ་ངུ་བའོ། །ངུ་འབོད་ཆེན་པོ་ཞེས་བྱ་བ་ནི་ངུ་འབོད་པས་ཀྱང་ཆེས་རྟག་ཏུ་ངུ་འབོད་དོ། །ཚ་བ་ཞེས་བྱ་བ་ནི་རྟག་ཏུ་མེ་འབར་བས་ཚ་བའོ། །རབ་ཏུ་ཚ་བ་ཞེས་བྱ་བ་ནི་ཚ་བ་བས་ཀྱང་ཆེས་མཆོག་ཏུ་ཚ་བའོ། །མནར་མེད་པ་ཞེས་བྱ་བ་ནི་ཐམས་ཅད་དུ་མེས་ཁྱབ་པས་བདེ་བའི་མཚམས་ཀྱི་བར་སྐབས་སྟོང་པ་མེད་པ་དང༌། སྡུག་བསྔལ་བར་དུ་འཆད་པ་མེད་པའོ། །ཆུ་བུར་ཅན་ཞེས་བྱ་བ་ནི་ཆུ་བར་འབུས་པའི་རྣམ་པ་ལྟར་ལུས་སྐྲངས་པའོ། །ཆུ་བོར་རྡོལ་ཞེས་བྱ་བ་ནི་ཆུ་བུར་རྣམ་པར་གས་པའི་ཕྱིར་རོ། །སོ་ཐམས་ཐམས་ཞེས་བྱ་བ་ནི་རྟག་ཏུ་ཁ་དང་སོ་དག་ལས་སྒྲ་ཐམས་ཐམས་ཟེར་བ་འབྱུང་བའི་ཕྱིར་རོ། །ཀྱི་ཧུད་ཟེར་ཞེས་བྱ་བ་ནི་རྟག་ཏུ་ཀྱི་ཧུད་ཅེས་བྱ་བའི་སྒྲ་འབྱིན་པའི་ཕྱིར་རོ། །ཨ་ཆུ་ཟེར་ཞེས་བྱ་བ་ནི་རྟག་ཏུ་ཨ་ཆུ་ཞེས་ཟེར་བའི་སྒྲ་འབྱིན་པའི་ཕྱིར་རོ། །ཨུཏྤལ་ལྟར་གས་པ་ཞེས་བྱ་བ་ལ་སོགས་པ་ཡང་ལུས་དེ་ལྟར་གས་པ་ཞེས་བྱ་བའི་ཐ་ཚིག་གོ །ཚ་བ་ཞེས་བྱ་བ་ནི་ཚ་བའི་སེམས་ཅན་དམྱལ་བ་བརྒྱད་པོ་ལ་སོགས་པའོ། །གྲང་བ་ཞེས་བྱ་བ་ནི་གྲང་བའི་སེམས་ཅན་དམྱལ་བ་ལ་སོགས་པའོ། །གནོད་པའི་བྱེ་བྲག་ཅེས་བྱ་བ་ནི་མྱོང་བར་འགྱུར་པར་མ་ངེས་པའི་ལས་ཀྱི་འབྲས་བུ་ཉམ་ང་བ་དག་གོ །འདི་ནས་ཤི་འཕོས་ནས་ཞེས་བྱ་བ་ནི་སེམས་ཅན་དམྱལ་
བའི་འགྲོ་བ་རྣམས་སོ། །གཞན་དུ་སྐྱེས་ཞེས་བྱ་བ་ནི་ཤལ་མ་ལིའི་ཚལ་ལ་སོགས་པ་གནས་གཞན་དུའོ། །རྒྱལ་ཆེན་བཞི་པ་ཞེས་བྱ་བ་ནི་རྒྱལ་པོ་ཆེན་པོ་བཞི་གནས་ན་གནས་པའི་ཕྱིར་རོ། །སུམ་ཅུ་རྩ་གསུམ་པ་ཞེས་བྱ་བ་ལ། སུམ་ཅུ་རྩ་གསུམ་ཞེས་བྱ་བ་ནི་དབང་པོ་སྟེ། དེ་ལ་ཉན་པའི་ཕྱིར་སུམ་ཅུ་རྩ་ གསུམ་པ་ཞེས་བྱ་བའོ། །འཐབ་བྲལ་ཞེས་བྱ་བ་ནི་སྐབས་འདིར་ཐུན་སྒྲོགས་ཞེས་ཀྱང་བྱ་སྟེ། ཐུན་བརྒྱད ་པོ་དག་ཏུ་བསོད་ནམས་ལ་སྤྲོ་བའི་སྒྲ་སྒྲོགས་པའི་ཕྱིར་རོ། །དགའ་བ་ཞེས་བྱ་བ་ནི་ཅི་དགའ་བ་དང་ལྡན་པའི་ཕྱིར་རོ། །འཕྲུལ་དགའ་ཞེས་བྱ་བ་ནི་ཅི་དགར་སྤྲུལ་པ་དག་གིས་མངོན་པར་དགའ་བར་བྱེད་པའི་ཕྱིར་རོ། །གཞན་འཕྲུལ་དབང་བྱེད་ཅེས་བྱ་བ་ནི་གཞན་དག་གིས་སྤྲུལ་པ་དག་ལ་དབང་བྱེད་པའི་ཕྱིར་རོ། །ཚངས་རིས་ཞེས་བྱ་བ་ནི་ཚངས་པའི་འཁོར་ཡིན་པའི་ཕྱིར་རོ། །ཚངས་པའི་མདུན་ན་འདོན་ཞེས་བྱ་བ་ནི་ཚངས་པ་དང་ཉེ་བའི་ཕྱིར་རོ། །ཚངས་ཆེན་ཞས་བྱ་བ་ནི་ཚངས་པའི་འཇིག་རྟེན་ན་བདག་པོ་ཡིན་པའི་ཕྱིར་རོ། །འོད་ཆུང་དང་ཚད་མེད་འོད་དང་འོད་གསལ་ཞེས་བྱ་བ་དག་ནི་འོང་ཆུང་ངུ་དང་འབྲིང་དང་ཆེན་པོ་ཉིད་དང་ལྡན་པའི་བྱེ་བྲག་གིས་གོ་རིམས་བཞིན་ནོ། །དགེ་ཆུང་དང་ཚད་མེད་དགེ་དང༌། དགེ་རྒྱས་ཞེས་བྱ་བ་དག་ཀྱང་དགེ་ཆུང་དང་འབྲིང་དང་ཆེན་པོ་ཉིད་ཀྱི་བྱེ་བྲག་གིས་གོ་རིམས་བཞིན་དུ་ཤེས་པར་བྱའོ། །སྤྲིན་མེད་ཅེས་བྱ་བ་ནི་དབུགས་རྔུབ་པ་དང༌། དབུགས་འབྱུང་བ་ལ་སོགས་པའི་བར་ཆད་ཀྱི་སྤྲིན་མེད་པའི་ཕྱིར་རོ། །བསོད་ནམས་སྐྱེས་ཞེས་བྱ་བ་ནི་ཡང་ནས་ཡང་དུ་དགེ་བ་རྩོམ་པའི་ཕྱིར་རོ། །འབྲས་བུ་ཆེ་བ་ཞེས་བྱ་བ་ནི་རྣམ་པར་སྨིན་པ་རྒྱ་ཆེ་ཞིང་རབ་ཏུ་ཞི་བའི་ཕྱིར་རོ། །མི་ཆེ་བ་ཞེས་བྱ་བ་ནི་ཟག་པ་མེད་པའི་ཆོས་རྟོགས་པའི་ཕྱིར་འབད་པ་ཀློག་པས་ཆེད་དུ་སྒྲིམ་པ་མི་ཆེ་བའི་ཕྱིར་རོ། །མི་གདུང་བ་ཞེས་བྱ་བ་ནི་གདུང་བ་མེད་པའི་ཕྱིར་རོ། །གྱ་ནོམ་སྣང་ཞེས་བྱ་བ་ནི་ཤེས་རབ་གྱ་ནོམ་པ་སྣང་བའི་ཕྱིར་རོ། །ཤིན་ཏུ་མཐོང་བའི་ཞེས་བྱ་བ་ནི་སྲིད་པ་ཐ་མལ་པ་ཉིད་ཀྱིས་ཤེས་པ་མཐོང་བའི་ཕྱིར་རོ། །འོག་མིན་ཞེས་བྱ་བ་ནི་གཟུགས་ཅན་ཐམས་ཅད་ཀྱི་ཐུ་བོ་ཡིན་པའི་ཕྱིར་རོ་།མི་རྟག་པ་ཞེས་བྱ་བ་ནི་སྐྱེ་བ་དང་འཇིག་པའི་ཆོས་ཅན་ཡིན་པའི་ཕྱིར་རོ། །སྡུག་བསྔལ་བ་ཞེས་བྱ་བ་ནི་མི་འདོད་
པ་ཉིད་ཡིན་པའི་ཕྱིར་རོ། །སྟོང་པ་ཞེས་བྱ་བ་ནི་བདག་མེད་པའི་ཕྱིར་རོ། །བདག་མེད་པ་ཞེས་བྱ་བ་ནི་རང་གི་བདག་ཉིད་དང་གཞན་ལ་བདག་པོ་མི་བྱེད་པའི་ཕྱིར་རོ། །བརྩམ་པར་བྱ་ཞིང་ཞེས་བྱ་བ་ནི་བརྩོན་པར་གྱིས་ཤིག་པའོ། །འབྱུང་བར་བྱ་ཞེས་བྱ་བ་ནི་འཁོར་བ་ལས་ངེས་པར་འབྱུང་བར་གྱིས་ཤིག་པའོ། །སངས་རྒྱས་བསྟན་པ་ཞེས་བྱ་བ་ནི་བདེན་པ་བཞི་བསྟན་པ་ལའོ། །འཇུག་པ་ཞེས་བྱ་བ་ནི་མངོན་པར་བརྩོན་པར་གྱིས་ཤིག་པའོ། །འཆི་བདག་ཅེས་བྱ་བ་ནི་འཆི་བའོ། །སྡེ་ཞེས་བྱ་བ་ནི་སྲིད་པ་ལ་སོགས་པ་འཁོར་རོ། །ཕན་ཡོན་བསྟན་པའི་ཕྱིར། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཞེས་གསུངས་ཏེ། སྐྱེ་བའི་འཁོར་བ་ཞེས་བྱ་བ་ནི་སྐྱེ་བ་དག་ཏུ་འཁོར་བའི་ཕྱིར་རོ། །སྡུག་བསྔལ་ཞེས་བྱ་བ་ནི་སྐྱེ་བ་ལ་སོགས་པའོ། །ཐ་མར་བྱེད་པར་འགྱུར་ཞེས་བྱ་བ་ནི་རྒྱུན་གཅོད་པར་འགྱུར་བའོ། །སྟོང་གསུམ་གྱི་སྟོང་ཆེན་པོ་ཞེས་བྱ་བ་ནི་གཅིག་རྣམས་ཀྱི་སྟོང་དང༌། སྟོང་རྣམས་ཀྱི་སྟོང་དང༌། སྟོང་གི་སྟོང་རྣམས་ཀྱི་སྟོང་དག་སྟེ། དེ་དག་ནི་གླིང་བཞི་པ་དང༌། འདོད་པ་ན་སྤྱོད་པའི་ལྷའི་རིས་དང༌། ཚངས་རིས་ཀྱི་འཇིག་རྟེན་སྟོང་ལ་ནི་སྟོང་ཆུང་ངུ་གཅིག་གོ ། སྟོང་ཆུང་ངུ་སྟོང་ལ་ནི་སྟོང་འབྲིང་པོ་གཅིག་གོ །སྟོང་འབྲིང་པོ་སྟོང་ལ་ནི་སྟོང་ཆེན་པོ་གཅིག་སྟེ་དེ་ནི་སྟོང་ཡང་ཡིན་ལ་སྟོང་ཆེན་པོ་ཡང་ཡིན་པས་སྟོང་ཆེན་པོའོ། །དེ་ནི་སྟོང་གསུམ་ཡང་ཡིན་ལ་སྟོང་ཆེན་པོ་ཡང་ཡིན་པས་སྟོང་གསུམ་གྱི་སྟོང་ཆེན་པོ་སྟེ། གླིང་བཞི་པ་ཐར་འབུམ་གྱི་ཚད་ཅེས་བྱ་བའི་ཐ་ཚིག་གོ །འཇིག་རྟེན་གྱི་ཁམས་ཞེས་བྱ་བ་ནི་འདུག་པའི་གནས་སོ། །འདས་པའི་ལས་ལུང་སྟོན་པར་བཞེད་ཅེས་བྱ་བ་ནི་གང་ལ་འབྲས་བུ་ཐམས་ཅད་འདས་པའོ། །མ་འོངས་པའི་ལས་ལུང་སྟོན་པར་ཡང་བཞེད་ཅེས་བྱ་བ་ནི་གང་ལ་འབྲས་བུ་ཉིད་མ་འོངས་པའོ། །ཐལ་མོ་སྦྱར་ཏེ་ཞེས་བྱ་བ་ནི་ཐལ་མོ་པུག་པུག་པོར་སྦྱར་བའོ། །ཚོགས་རྣམས་ཞེས་བྱ་བ་ནི་འོད་ཟེར་གྱི་ཚོགས་རྣམས་སོ། །ཞལ་གྱི་སྒོ་ནས་ཞེས་བྱ་བ་ནི་ཞལ་གྱི་སྒོ་ནས་སོ། །རྒོད་བྲལ་ཞེས་བྱ་བ་ནི་རྒོད་པ་སྤངས་ནས་སོ། །ཞུམ་པ་ཞེས་བྱ་བ་ནི་སེམས་ཞུམ་པ་ཉིད་དོ། །རྒྱགས་པ་ཞེས་བྱ་བ་ནི་རང་གི་ཡོན་
ཏན་ལ་ལྟོས་པས་ཁེངས་པའོ། །དེ་གཉིས་ལས་གྲོལ་བ་ནི་ཞུམ་དང་རྒྱགས་པ་རབ་སྤངས་པའོ། །མཆོག་གི་རྒྱུར་གྱུར་པ་ཞེས་བྱ་བ་ནི་མྱ་ངན་ལས་འདས་པའི་རྒྱུའི་ངོ་བོ་ཉིད་དོ། །དགྲ་ཐུལ་ཞེས་བྱ་བ་ནི་བདུད་བཞིའི་དགྲ་ཐུལ་ལོ། །བྱེད་རྒྱུ་མ་མཆིས་པར་ཞེས་བྱ་བ་ནི་རྒྱུ་མེད་པར་ཏེ། འདི་ལ་རྒྱུ་གང་ལགས་ཞེས་བྱ་བའི་ཐ་ཚིག་གོ །རྩ་ལག་ཅེས་བྱ་བ་ནི་པདྨའི་རྩ་ལག་ནི་མྱུ་གུའི་མཚན་ཉིད་གནས་པའོ། །དུང་ཞེས་བྱ་བ་ནི་དུང་ཉིད་དོ། །པདྨའི་རྩ་ལག་དང་དུང་ལྟར་དཀར་བ་ཞེས་བྱ་བ་ནི་ཞལ་བཞེད་པའི་ཚེམས་འཛུམ་པ་སྟེ། འཛུམ་ཞེས་བྱ་བ་ནི་ཅུང་ཟད་བཞད་པའོ། །དེ་སླད་ཅེས་བྱ་བ་ནི་དེའི་ཕྱིར་ཞེས་བྱ་བའི་ཐ་ཚིག་གོ །བསྟན་པ་ཞེས་བྱ་བ་ནི་བོད་པའོ། །རང་བློས་ཞེས་བྱ་བ་ནི་རང་གི་ཡེ་ཤེས་ཀྱིས་སོ། །དུས་མཁྱེན་ནས་ཞེས་བྱ་བ་ནི་ལུང་བསྟན་པའི་དུས་མཁྱེན་ནས་སོ། །ཐུབ་པ་ཁྱུ་མཆོག་དགེ་སྦྱོང་སྐྱེ་དབང་པོ། །ཞེས་བྱ་བ་དག་ཀྱང་བོད་པའི་ཚིག་སྟེ། ཐུབ་པ་ཞེས་བྱ་བ་དང༌། ཁྱུ་མཆོག་ཅེས་བྱ་བ་དང༌། དགེ་སྦྱོང་སྐྱེ་བོའི་དབང་པོ་འཕགས་པའི་གང་ཟག་གི་གཙོ་བོ་ཞེས་བྱ་བའི་ཐ་ཚིག་གོ །ཉན་པའི་སྐྱེ་བོ་སོམ་ཉི་ལྡན་རྣམས་ལ། །ཞེས་བྱ་བ་ནི་ཉན་ཐོས་ཐེ་ཚོམ་ཅན་རྣམས་སོ། །དེ་རྣམས་ལ་ཐེ་ཚོམ་སྐྱེས་པ་བསལ་དུ་གསོལ་ཞེས་བྱ་བར་སྦྱར་རོ། །ཚིག་ཇི་ལྟ་བུ་དག་གིས་བསལ་ཞེ་ན། དེའི་ཕྱིར་གསུང་ཚིག་བསྟན་པ་དང༌། དམ་པ་དགེ་བ་དག་གིས་ཞེས་བྱ་བ་གསུངས་ཏེ་བརྟན་པ་ཞེས་བྱ་བ་ནི་མི་གཡོ་བའོ། །དམ་པ་ཞེས་བྱ་བ་ནི་དོན་གྱི་མཆོག་ཡིན་པའི་ཕྱིར་དང༌། ཟབ་པའི་ཕྱིར་རོ། །དགེ་བ་ཞེས་བྱ་བ་ནི་བཟང་བའི་ཕྱིར་དང༌། ཁ་ན་མ་ཐོ་བ་མེད་པའི་ཕྱིར་རོ། །ཚ་ཆུ་ཞེས་བྱ་བ་ནི་རྒྱ་མཚོའོ། །རི་རྒྱལ་ཞེས་བྱ་བ་ནི་རིའི་རྒྱལ་པོ་རི་རབ་བོ། །དེ་གཉིས་ལྟ་བུར་བརྟན་པ་གང་དག་ཡིན་པ་དེ་དག་ནི་ཚ་ཆུས་རི་རྒྱལ་ལྟ་བུར་བརྟན་པ་དག་གོ །དེ་དག་གང་ཞེ་ན། སངས་རྒྱས་མགོན་རྣམས་ཞེས་བྱ་བ་དག་གོ །དེ་དེ་བཞིན་ནོ། །དེ་དེ་བཞིན་ཏེ་ཞེས་བྱ་བ་ནི་མཐུན་པར་བཀའ་སྩལ་པ་སྟེ། གུས་པར་མཛད་པའི་སླད་དུ་ལན་གཉིས་སུ་བཟླས་སོ། །རྒྱུ་མེད་ཅེས་བྱ་བ་ནི་རྒྱུ་མེད་པའོ། །རྐྱེན་མེད་པར་ཞེས་བྱ་བ་ནི་རྐྱེན་དང་བྲལ་བའོ། །དུལ་བ་ཞེས་བྱ་བ་ནི་སེམས་ཀྱིས་མཉམ་པར་བཞག་པ་སྟེ། ཉོན་མོངས་
པ་ཀུན་དུ་འབྱུང་བ་སྤངས་པའོ། །ཞི་བ་ཞེས་བྱ་བ་ནི་ལུས་དང་ངག་གིས་སོ། །གྲོལ་བ་ཞེས་བྱ་བ་ནི་སྲིད་པ་གཞན་སྤངས་པའོ། །དབུགས་ཕྱིན་པ་ཞེས་བྱ་བ་ནི་སྡུག་བསྔལ་མེད་པའི་ཕྱིར་ཤིན་ཏུ་སྦྱངས་པའོ། །ཐུལ་བ་ཞེས་བྱ་བ་ནི་ཚུལ་མ་ཡིན་པར་སྤྱོད་པ་མེད་པའི་ཕྱིར་རོ། །དགྲ་བཅོམ་པ་ཞེས་བྱ་བ་ནི་མཆོད་པར་འོས་པའི་ཕྱིར་རོ། །འདོད་ཆགས་དང་བྲལ་བའི་ཞེས་བྱ་བ་ནི་འདོད་པ་ལ་འདོད་ཆགས་མེད་པའི་ཕྱིར་རོ། །མཛེས་པ་ཞེས་བྱ་བ་ནི་རྣམ་པར་སྨིན་པའི་གཟུགས་ཀྱིས་མཛེས་པའོ། །ཁྱུ་མཆོག་ལྟར་ཞེས་བྱ་བ་ནི་གྲོང་མཐའ་དག་གི་དཔེའོ། །གླང་པོ་ཆེ་ལྟར་ཞེས་བྱ་བ་ནི་དགོན་པ་པ་དག་གི་དཔེའོ། །སེང་གེ་ལྟར་ཞེས་བྱ་བ་ནི་ནགས་ཁྲོད་ན་གནས་པ་དག་གི་དཔའོ། །ངང་པའི་རྒྱལ་པོ་ལྟར་ཞེས་བྱ་བ་ནི་ཆུ་ཀླུང་གི་འགྲམ་ན་གནས་པའི་དཔེའོ། །ནམ་མཁའ་ལྡིང་ལྟར་ཞེས་བྱ་བ་ནི་རྒྱ་མཚོའི་འགྲམ་ན་གནས་པ་དག་གི་དཔེའོ། །བྲམ་ཟེ་ལྟར་ཞེས་བྱ་བ་ནི་ཀློག་པ་དག་གི་དཔེའོ། །སྨན་པ་མཁས་པ་ལྟར་ཞེས་བྱ་བ་ནི་ནང་པ་དག་གི་དཔེའོ། །དཔའ་བོ་ལྟར་ཞེས་བྱ་བ་ནི་སྔར་མ་དག་གི་དཔེའོ། །ས་མཁན་ལྟར་ཞེས་བྱ་བ་ནི་ལམ་དག་གི་དཔེའོ། །དེད་དཔོན་ལྟར་ཞེས་བྱ་བ་ནི་དོན་མཐུན་པ་དག་གི་དཔེའོ། །ཚོང་དཔོན་ལྟར་ཞེས་བྱ་བ་ནི་ཚོང་པ་དག་གི་དཔེའོ། །མཁར་གྱི་རྒྱལ་པོ་ལྟར་ཞེས་བྱ་བ་ནི་མཐའ་འཁོབ་པ་དག་གི་དཔེའོ། །འཁོར་ལོས་སྒྱུར་བ་ལྟར་ཞེས་བྱ་བ་ནི་འཛམ་བུའི་གླིང་པ་དག་གི་དཔེའོ། །ཟླ་བ་ལྟར་ཞེས་བྱ་བ་ནི་མངོན་པར་སྐབས་ཡོད་པ་དག་གི་དཔེའོ། །ཉི་མ་ལྟར་ཞེས་བྱ་བ་ནི་ཉི་མ་ལ་དགའ་བ་དག་གི་དཔེའོ། །ཡུལ་འཁོར་སྲུང་ལྟར་ཞེས་བྱ་བ་ལ་སོགས་པ་རྒྱལ་པོ་ཆེན་པོ་ཞི་ནི་རི་རབ་ཀྱི་བང་རིམ་དག་ན་གནས་པ་དག་གི་དཔེའོ། །ཐག་བཟང་རིས་ལྟར་ཞེས་བྱ་བ་ནི་རི་གཉའ་འཛིན་ལ་གནས་པ་དག་གི་དཔེའོ། །བརྒྱན་བྱིན་ལྟར་ཞེས་བྱ་བ་ནི་རི་རབ་ཀྱི་སྟེང་ན་གནས་པ་དག་གི་དཔེའོ། །ཚངས་པ་ལྟར་ཞེས་བྱ་ནི་ཚངས་པའི་འཇིག་རྟེན་ན་གནས་པ་དག་གི་དཔེ་སྟེ། དེ་དག་ཐམས་ཅད་ཀྱང་མངའ་མཛད་པ་དང༌། འཁོར་གུས་པ་དང་ལྡན་པའི་དོན་དུ་ཤེས་པར་བྱའི་དངོས་སུ་ཁྱུ་མཆོག་ལྟར་བ་ལང་གི་ཚོགས་ཀྱིས་བསྐོར་བ་ལ་
སོགས་པ་ཉིད་ནི་མ་ཡིན་པར་ཤེས་པར་བྱའོ། །དབང་པོ་རྣམས་ཀྱིས་ཤིན་ཏུ་དུལ་བ་ཞེས་བྱ་བ་ནི་མིག་ལ་སོགས་པའི་དབང་པོ་རྒྱུར་གྱུར་པ་དག་གིས་ཤིན་ཏུ་དུལ་ཞིང་ཤིན་ཏུ་དབང་དུ་གྱུར་པའོ། །སྤྱོད་ལམ་དང་སྤྱོད་པ་མ་འཁྲུགས་པ་ཞེས་བྱ་བ་ནི་འགྲོ་བ་ལ་སོགས་པ་འཁྲུག་ལོང་མེད་པའོ། །འོ་ན་ཇི་ལྟ་བུ་ཞེ་ན་དེའི་ཕྱིར་ཆུ་གཏེར་ལྟར་ཏིང་ངེ་ཞེས་བྱ་བ་ལ་སོགས་པ་གསུངས་ཏེ་ཆུ་གཏེར་ཞེས་བྱ་བ་ནི་རྒྱ་མཚོའོ། །ཏིང་ངེ་བ་ཞེས་བྱ་བ་ནི་བརྟན་ཞིང་མི་གཡོ་བ་སྟེ། དེ་ནི་རྒྱ་མཚོར་འགྲོ་བ་རྣམས་ཀྱི་དཔེའོ། །སྤྲིན་ལྟར་ཆུ་དང་བཅས་པ་ཞེས་བྱ་བ་ནི་ཞིང་པ་རྣམས་ཀྱི་དཔེའོ། །གླང་པོ་ཆེའི་རྒྱལ་པོ་ལྟར་དྲེགས་པ་དྲལ་བ་ཞེས་བྱ་བ་ནི་དགོན་པ་པ་རྣམས་ཀྱི་དཔེའོ། །སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ལེགས་པར་བརྒྱན་པ་ཞེས་བྱ་བ་ལ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ནི་ཞབས་ཤིན་ཏུ་གནས་པ་དང༌། ཕྱག་དང་ཞབས་ཀྱི་མཐིལ་འཁོར་ལོའི་མཚན་དང་ལྡན་པ་དང༌། སོར་མོ་རིང་བ་དང༌། ཞབས་ཀྱི་རྟིང་པ་ཡངས་པ་དང༌། ཕྱག་དང་ཞབས་འཇམ་ཞིང་གཞོན་ཤ་ཆགས་པ་དང༌། ཕྱག་དང་ཞབས་དྲ་བར་འབྲེལ་བ་དང༌། ཞབས་འབར་འབུར་མེད་པ་དང༌། བྱིན་པ་རི་དགས་ཨེ་ན་ཡའི་བྱིན་པ་ལྟ་བུ་དང༌། སྐུ་མ་བཏུད་པ་དང༌། མདོམས་ཀྱི་སྦ་བ་སྦུབས་སུ་ནུབ་པ་དང༌། ཤིང་ནྱ་གྲོ་དྷ་ལྟར་ཆུ་ཞེང་གབ་པ་དང༌། སྐུའི་སྤུ་གྱེན་དུ་ཕྱོགས་པ་དང༌། སྤུ་རེ་རེ་ནས་སྐྱེས་ཤིང་གཡས་སུ་འཁྱིལ་བ་དང༌། སྐུ་མདོག་གསེར་འདྲ་ཤིང་འོད་འདོམས་གང་བ་དང་ལྡན་པ་དང༌། པགས་པ་སྲབ་པ་དང༌། བདུན་མཐོ་བ་དང༌། རོ་སྟོད་སེང་གེའི་འདྲ་བ་དང༌། དཔུང་མགོ་ལེགས་པར་གྲུབ་པ་དང༌། ཐལ་གོང་རྒྱས་པ་དང༌། སྐུ་ཆེ་ཞིང་དྲང་བ་དང༌། ཚེམས་བཞི་བཅུ་མངའ་བ་དང༌། ཚེམས་མཉམ་པ་དང༌། ཚེམས་ཐགས་བཟང་བ་དང༌། ཚེམས་ཤིན་ཏུ་དཀར་བ་དང༌། འགྲམ་པ་སེང་གེ་འདྲ་བ་དང༌། ལྗགས་རིང་ཞིང་སྲབ་པ་དང༌། རོ་བྲོ་བ་མཁྱེན་པ་དང༌། ཚངས་པའི་དབྱངས་དང༌། སྤྱན་མཐོན་མཐིང་དང༌། རྫི་མ་བའི་ལྟ་བུ་དང༌། དབུ་གཙུག་ཏོར་དང་ལྡན་པ་དང༌། སྨིན་མཚམས་ཀྱི་མཛོད་སྤུ་དུང་གི་མདོག་འདྲ་བ་གཡས་སུ་འཁྱིལ་པ་དང་ལྡན་པའོ། །
དཔེ་བྱད་བཟང་པོ་བརྒྱད་ཅུས་སྐུ་རྣམ་པར་མཛེས་པ་ཞེས་བྱ་བ་ལ། དཔེ་བྱད་བཟང་པོ་བརྒྱད་ཅུ་ཞེས་བྱ་བ་ནི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་པོ་དེ་དག་རྟེན་གྱི་ཚུལ་གྱིས་འཛིན་ཅིང༌། གཟུགས་བཟང་པོ་མཛེས་པར་བྱེད་པའི་དཔེ་བྱད་བཟང་པོ་བརྒྱད་ཅུ་སྟེ། དེ་ལ་དཔེ་བྱད་བཟང་པོ་དྲུག་ཅུ་ནི་མགུར་ཡན་ཆད་མ་གཏོགས་པ་སྐུ་མན་ཆད་དུ་གཏོགས་པ་ཡིན་ལ་ཉི་ཤུ་ནི་མགུར་ཡན་ཆད་དུ་གཏོགས་པ་ཡིན་ནོ། །དེ་ལ་ཕྱག་དང་ཞབས་ཀྱི་སོར་མོ་ཉི་ཤུ་ཚིགས་དང་བཅས་སེན་མོ་དང་བཅས་པ་དཔེ་བྱད་བཟང་པོ་ཉི་ཤུ་དང༌། ཕྱག་དང་ཞབས་གཉིས་ལ་མཐིལ་བརྒྱད་བརྒྱད་དེ་ཕྱག་གཉིས་ལ་བཞི་དང༌། ཞབས་གཉིས་ལ་བཞི་དཔེ་བྱད་བཟང་པོ་བརྒྱད་དང༌། ལོང་བུ་གཉིས་དང་པུས་མོ་གཉིས་དང༌། བརླ་གཉིས་ཏེ་རྣམ་པ་དྲུག་རྒྱས་པ་དཔེ་བྱད་བཟང་པོ་དྲུག་དང༌། ཕྱག་གི་མཁྲིག་མ་གཉིས་དང༌། ལག་ངར་གཉིས་དང༌། དཔུང་པ་གཉིས་ཏེ་རྣམ་པ་དྲུག་རྒྱས་པ་དཔེ་བྱད་བཟང་པོ་དྲུག་པོ་དང༌། སྟ་ཟུར་དཔེ་བྱད་བཟང་པོ་གཅིག་དང༌། རྐེད་པ་དཔེ་བྱད་བཟང་པོ་གཅིག་དང༌། འབྲས་བུ་གཉིས་དཔེ་བྱད་བཟང་པོ་གཉིས་དང༌། མདོམས་དཔེ་བྱད་བཟང་པོ་གཅིག་དང༌། སྣམ་བཙོས་གཉིས་དཔེ་བྱད་བཟང་པོ་གཉིས་དང༌། དཀུ་དོ་དཔེ་བྱད་བཟང་པོ་གཅིག་དང༌། ཕྱལ་དཔེ་བྱད་བཟང་པོ་གཅིག་དང༌། ལྟེ་བ་དཔེ་བྱད་བཟང་པོ་གཅིག་དང༌། རྩིབ་ལོགས་གཉིས་དང༌། མཆན་ཁུང་གཉིས་དང༌། ནུ་མ་གཉིས་བསྡུས་པ་དཔེ་བྱད་བཟང་པོ་དྲུག་དང༌། བྲང་དཔེ་བྱད་བཟང་པོ་གཅིག་དང༌། ཐུགས་ཀ་དཔེ་བྱད་བཟང་པོ་གཅིག་དང༌། མགུར་དཔེ་བྱད་བཟང་པོ་གཅིག་དང༌། རྒྱབ་དཔེ་བྱད་བཟང་པོ་གཅིག་སྟེ། དཔེ་བྱད་བཟང་པོ་དྲུག་ཅུ་པོ་དེ་རྣམས་ནི་མགུར་ཡན་ཆད་མ་གཏོགས་པ་སྐུ་མན་ཆད་དུ་གཏོགས་པ་ཡིན་ནོ། །ཚེམས་ཕྲེང་ལ་གཉིས་དཔེ་བྱད་བཟང་པོ་གཉིས་དང༌། དཀར་ཐན་ཀོར་དང་བཅས་པ་དཔེ་བྱད་བཟང་པོ་གཅིག་དང༌། སྒྲོས་གཉིས་དཔེ་བྱད་བཟང་པོ་གཉིས་དང༌། མཁུར་བ་ཤིན་ཏུ་རྒྱས་པ་དཔེ་བྱད་བཟང་པོ་གཅིག་དང༌། འགྲམ་པ་རྒྱས་ཤིང་དབྱིབས་ལེགས་པ་དཔེ་བྱད་བཟང་པོ་གཉིས་ཏེ། སྤྱན་གཉིས་ཐན་ཀོར་དང་བཅས་པ་དཔེ་བྱད་བཟང་པོ་གཉིས་དང༌། །སྨིན་
མ་གཉིས་དཔེ་བྱད་བཟང་པོ་གཉིས་དང༌། ཤངས་ཀྱི་སྦུབས་གཉིས་དཔེ་བྱད་བཟང་པོ་གཉིས་དང༌། དཔྲལ་བ་དཔེ་བྱད་བཟང་པོ་གཅིག་དང༌། སྤྱན་གྱི་གྲྭ་གཉིས་དང༌། སྙན་གཉིས་དཔེ་བྱད་བཟང་པོ་བཞི་དང༌། དབུ་སྐྲ་དང་བཅས་པ་དཔེ་བྱད་བཟང་པོ་གཅིག་སྟེ། དཔེ་བྱད་བཟང་པོ་ཉི་ཤུ་པོ་དེ་དག་ནི་མགུར་ཡན་ཆད་དུ་གཏོགས་པ་ཡིན་ནོ། །གཟུགས་ཅན་ཞེས་བྱ་བ་ནི་གཟུགས་ཀྱི་སྐུའོ། །མ་འདྲེས་པའི་དྲན་པ་ཉེ་བར་གཞག་པ་གསུམ་ཞེས་བྱ་བ་ནི་ཐུན་མོང་མ་ཡིན་པའི་མཁྱེན་པ་གསུམ་སྟེ། གུས་པར་ཉན་པ་རྣམས་ལ་སེམས་སྙོམས་པ་དང༌། གུས་པར་མི་ཉན་པ་རྣམས་ལ་སེམས་སྙོམས་པ་དང༌། གུས་པར་ཉན་པ་དང་མི་གུས་པར་ཉན་པ་རྣམས་ལ་སེམས་སྙོམས་པའོ། །ཐུགས་རྗེ་ཆེན་པོ་ཞེས་བྱ་བ་ནི་ཁམས་གསུམ་པའི་སེམས་ཅན་ལ་དམིགས་པ་སྡུག་བསྔལ་ཉིད་གསུམ་གྱི་རྣམ་པ་མཉམ་པར་འཇུག་པ་དེ་བཞིན་གཤེགས་པའི་རྒྱུད་ལ་མངའ་བ། ཐབས་ཀྱི་འཇུག་པ་འཕགས་པའི་ལམ་སྐྱེད་པ་མྱ་ངན་ལས་འདས་པ་ཐོབ་པར་མཛད་པ་ཟག་པ་དང་བཅས་པའི་བློའོ། །ལྡན་པར་ཞེས་བྱ་བ་ནི་མངའ་བའོ། །ཉན་ཐོས་ཆེན་པོ་དག་ཅེས་བྱ་བ་ནི་མངོན་པར་ཞེས་པའི་ཡོན་ཏན་གྱི་གཙོ་བོར་གྱུར་པའི་སློབ་མ་དག་གོ །ལྟད་མོ་ཞེས་བྱ་བ་ནི་མི་སྲིད་དོ་སྙམ་དུ་ཐེ་ཚོམ་ཟ་ཞིང་ལྟ་འདོད་པའོ། །ངོ་མཚར་ཞེས་བྱ་བ་ནི་བརྒྱ་ལ་མ་ན་འབྱུང་བའི་ཆོས་སོ། །རྨད་དུ་བྱུང་བ་ཞེས་བྱ་བ་ནི་དོན་དང་ལྡན་པའི་ཆོས་སོ། །ཅུང་ཞིག་ཅེས་བྱ་བ་ནི་མི་ཤེས་པའི་རང་བཞིན་ནོ། །ལྟད་མོ་བྲལ་བའི་དགོངས་ལྡན་པ། །ཞེས་བྱ་བ་ནི་ལྟད་མོའི་སེམས་སྤངས་པའོ། །སྐྱེ་ངན་ཞེས་བྱ་བ་ནི་སྐྱེ་བོ་ངན་པ་དག་སྟེ་སྨད་པའི་ཚིག་གོ །དོན་མེད་ཅེས་བྱ་བ་ནི་དོན་དང་མི་ལྡན་པའོ། །ངེས་པར་ཞེས་བྱ་བ་ནི་གོར་མ་ཆག་པའོ། །འཕྲལ་ཁོན་ལ་ཞེས་བྱ་བ་ནི་གཟི་བརྗིད་མི་བཟོད་པའི་ཕྱིར་ཐོག་མ་བྱས་པའོ། །གཤེགས་ཏེ་ཞེས་བྱ་བ་ནི་བྱོན་ཏེའོ། །འགྲོ་བ་ཞེས་བྱ་བ་ནི་རྣམ་པར་སྨིན་པ་ལས་སྐྱེས་པའི་ཕུང་པོ་དག་གོ །སྐྱེ་བ་ཞེས་བྱ་བ་ནི་སྲིད་པ་བར་མ་ལ་འབྱུང་བ་ལ་སོགས་པ་དགེ་བ་ཉོན་མོངས་པ་ཅན་དང༌། ཉེ་བར་བསགས་པ་ལས་བྱུང་བ་དང༌། རྒྱུ་མཐུན་པ་ལས་བྱུང་བ་དག་གོ །ཚེ་ཕྱི་མ་ཞེས་བྱ་བ་ནི་དུས་དང་པོའི་སྲིད་པའོ། །ཡང་ན་འགྲོ་བ་ནི་བར་མ་དོའི་སྲིད་
པའོ། །སྐྱེ་བ་ནི་སྐྱེ་བའི་སྲིད་པའོ། །ཚེ་ཕྱི་མའི་དུས་དང་པོའི་སྲིད་པ་ལ་སོགས་པ་དུས་ཕྱི་མའོ། །ཆུ་ཇི་ལྟར་བ་ཁོ་ན་བཞིན་དུ་ཞེས་བྱ་བ་ནི་ཆུའི་རྗེས་སུ་འབྲང་ཞིང་སྟེ། དེ་ནི་ཐད་ཀར་འགྲོ་བ་དགག་པའི་ཕྱིར་རོ། །མི་ཁོམ་པ་ཞེས་བྱ་བ་ནི་བདེན་པ་མཐོང་བའི་སྐབས་མེད་པའོ། །ཆགས་བྲལ་ཞེས་བྱ་བ་ནི་ཡོངས་སུ་སྤངས་ཏེའོ། །ཞི་བའོ་ཞེས་བྱ་བ་ནི་འདོད་ཆགས་ལ་སོགས་པའི་ཉེས་པ་དང་བྲལ་བའོ། །བསྟེན་པར་དཀའ་བ་ཞེས་བྱ་བ་ནི་ཟིལ་གྱིས་མནན་པར་དཀའ་བའོ། །བཟོད་པར་དཀའ་བ་ཞེས་བྱ་བ་ནི་བརྣག་པར་མི་ནུས་པའོ། །ལས་ཀྱི་རྒྱུ་བ་ཞེས་བྱ་བ་ནི་ལས་ཀྱི་འགྲོ་བ་སྟེ། ལས་ཀྱི་བྱེ་བྲག་ཅེས་བྱ་བའི་ཐ་ཚིག་གོ །ཉོན་ལ་ཞེས་བྱ་བ་ནི་རྣ་བའི་རྣམ་པར་ཤེས་པས་སོ། །ལེགས་པར་ཡིད་ལ་གྱིས་ཤིག་ཅེས་བྱ་བ་ནི་རྒྱུན་དུ་ཉམས་སུ་མྱོང་བས་སོ། །རབ་ཏུ་ཡིད་ལ་གྱིས་ཤིག་ཅེས་བྱ་བ་ནི་གསལ་བར་ཉམས་སུ་མྱོང་བས་སོ། །བསྐལ་བ་ཆེན་པོ་བཟང་པོ་ཞེས་བྱ་བ་ནི་བསྐལ་བ་མཛེས་པ་སྟེ། སངས་རྒྱས་ལྔ་བརྒྱ་འབྱུང་བའི་ཕྱིར་རོ། །དྲང་སྲོང་སྨྲ་བ་ཞེས་བྱ་བ་ནི་དྲང་སྲོང་གི་གནས་ཀྱི་མིང་ངོ༌། །རི་དགས་ཀྱི་གནས་ཞེས་བྱ་བ་ནི་རི་དགས་ཀྱི་ཚལ་ལོ། །འབྱོར་པ་ཞེས་བྱ་བ་ནི་དབྱིག་དང་གསེར་ལ་སོགས་པས་སོ། །རྒྱས་པ་ཞེས་བྱ་བ་ནི་གྲོང་དང་གྲོང་ཁྱེར་ལ་སོགས་པས་སོ། །བདེ་བ་ཞེས་བྱ་བ་ནི་གནོད་པ་མེད་པས་སོ། །ལོ་ལེགས་པ་ཞེས་བྱ་བ་ནི་བཟའ་བ་དང་བཏུང་བ་མང་བས་སོ། །སྐྱེ་བོ་དང་མི་མང་པོས་གང་བ་ཞེས་བྱ་བ་ནི་སྐྱེས་པ་དང་བུད་མེད་དང་མ་ནིང༌། དང་གླང་པོ་ཆེ་དང་རྟ་དང་རྔ་མོ་ལ་སོགས་པས་གང་བའོ། །ཐབ་མོ་ཞེས་བྱ་བ་ནི་ཕ་རོལ་གྱི་ཡུལ་འཁོར་དང་འཁོན་པའོ། །འཐབ་པ་ཞེས་བྱ་བ་ནི་རང་གི་ཡུལ་འཁོར་དང་འཁོན་པའོ། །ཕྱི་དགྲ་ཞེས་བྱ་བ་ནི་ཕ་རོལ་གྱི་དམག་ཚོགས་ཀྱིས་བྱས་པའི་འཁྲུག་པའོ། །ནང་འཁྲུག་ཅེས་བྱ་བ་ནི་རང་གི་དམག་ཚོགས་ཀྱིས་བྱས་པའི་འཁྲུག་པའོ། །ཆོམ་རྐུན་ཞེས་བྱ་བ་ནི་གཡོན་ཅན་ནོ། །མུ་གེ་ཞེས་བྱ་བ་ནི་བཟའ་བ་དང་བཏུང་བ་དཀོན་པའོ། །ནད་ཅེས་བྱ་བ་ནི་ཡམས་ཀྱི་ནད་ལ་སོགས་པའོ། །སཱ་ལུའི་ཕྲེང་བ་ཞེས་བྱ་བ་ནི་འབྲས་སཱ་ལུའི་ཞིང་གི་ཚར་རོ། །བུ་རམ་ཤིང་གི་ཕྲེང་
པ་ཞེས་བྱ་བ་ནི་བུ་རམ་ཤིང་གི་ཞིང་གི་ཚར་རོ། །ཆོས་དང་ལྡན་པ་ཞེས་བྱ་བ་ནི་སྦྱིན་པ་དང་ཚུལ་ཁྲིམས་ལ་སོགས་པའི་ཆོས་སྤྱོད་པའི་ཕྱིར་རོ། །ཆོས་ཀྱི་རྒྱལ་པོ་ཞེས་བྱ་བ་ནི་རིགས་པས་རྒྱལ་སྲིད་ཐོབ་པའི་ཕྱིར་རོ། །ཆོས་ཀྱི་རྒྱལ་སྲིད་བྱེད་དུ་བཅུག་གོ་ཞེས་བྱ་བ་ནི་མི་རིགས་པའི་ཆད་པ་ལ་སོགས་པས་སྐྱེ་བོ་ལ་གནོད་པ་མི་བྱེད་པས་བློན་པོའི་ཚོགས་རྣམས་རྒྱལ་སྲིད་བྱེད་དུ་བཅུག་པ་ཡིན་ནོ། །ཤེད་བུ་ཞེས་བྱ་བ་ནི་བྲམ་ཟེ་གཞོན་ནུའོ། །གསང་ཚིག་འདོད་པ་ཞེས་བྱ་བ་ནི་སེམས་ཀྱིས་ཏེ། གསང་ཚིག་ཅེས་བྱ་བ་ནི་རིག་བྱེད་དང་གསང་སྔགས་སོ། །གསང་ཚིག་ཚོལ་བ་ཞེས་བྱ་བ་ནི་བྱ་བས་སོ། །རིག་བྱེད་ཅེས་བྱ་བ་ནི་ངེས་བརྗོད་ཀྱི་རིག་བྱེད་དང༌། མཆོད་སྦྱིན་གྱི་རིག་བྱེད་དང༌། སྙན་ཚིག་གི་རིག་བྱེད་དང༌། སྲིད་སྲུང་གི་རིག་བྱེད་དོ། །རིག་བྱེད་ཀྱི་ཡན་ལག་ཅེས་བྱ་བ་ནི་བརྡ་སྤྲོད་པ་དང་སྐར་མའི་བསྟན་བཅོས་ལ་སོགས་པའོ། །ཕ་རོལ་དུ་སོན་པ་ཞེས་བྱ་བ་ནི་མཁས་པའོ། །སྟོན་པར་གྱུར་པ་ཞེས་བྱ་བ་ནི་རྟེན་དུ་གྱུར་པའོ། །ཞི་བ་ཞེས་བྱ་བ་ནི་མི་རྒོད་པའོ། །སྤྱོད་ལམ་ཞི་བ་ཞེས་བྱ་བ་ནི་ཆ་ལུགས་ཀྱིའོ། །ཞབས་ཀྱི་སྲིད་ཞུ་བགྱིད་ཅེས་བྱ་བ་ནི་མཆོད་པ་བྱེད་པར་རོ། །ཆུ་ངོགས་ཞེས་བྱ་བ་ནི་ཆུ་འགྲམ་མོ། །ཉེ་རེག་ཅེས་བྱ་བ་ནི་ཆུས་ཁྲུས་བྱས་པ་དང༌། སྦྱིན་བླུགས་བྱ་བ་ལ་སོགས་པའི་ལས་སོ། །ཡམ་སྲེག་ཤིང་ཞེས་བྱ་བ་ནི་སྦྱིན་སྲེག་བྱ་བའི་བུད་ཤིང་ངོ༌། །ཀུད་སའི་རིགས་ཅེས་བྱ་བ་ལ་སོགས་པ་ནི་བྲམ་ཟེའི་རིགས་ཀྱི་སྒྲ་སྟེ། དྲང་སྲོང་ཀུད་ས་ལ་སོགས་པའི་རིགས་རྒྱུད་ཡིན་པའི་ཕྱིར་རོ། །ཁྱབ་པ་ཞེས་བྱ་བ་ནི་ཆུབ་པའོ། །སྐྱེ་བོ་མཁས་པ་ཞེས་བྱ་བ་ནི་སྐྱེ་བོ་མཛངས་པའོ། །ཁ་རྗེ་ཞེས་བྱ་བ་ནི་འཇིག་རྟེན་པའི་དོན་འགྲུབ་པའོ། །བསོད་ནམས་ཞེས་བྱ་བ་ནི་དགེ་བ་འགྲུབ་པའོ། །བཀྲ་ཤིས་ཞེས་བྱ་བ་ནི་སྡིག་པ་ཉམས་པར་བྱེད་པའོ། །གཙང་བ་ཞེས་བྱ་བ་ནི་རང་ཉིད་དབེན་པའི་ཕྱིར་རོ། །གཙང་བ་ཉིད་ཀྱི་གནས་སུ་གྲགས་པ་ཞེས་བྱ་བ་ལ། གཙང་བའི་དངོས་པོ་ནི་གཙང་བ་ཉིད་དེ། དེའི་གནས་ཞེས་བྱ་བ་ནི་དེའི་ཡུལ་དུ་གྲགས་པའོ། །འགྲམ་གཉིས་ན་རླན་འཕྱོ་བ་ཞེས་བྱ་བ་ནི་ངོགས་གཉིས་ཀྱི་མུ་གཉིས་ཀ་ནས་ཆུའི་དབྱིངས་ཀྱིས་གང་བའོ། །ཆུ་དགུར་བཅོ་བརྒྱད་འབབ་པ་ཞེས་བྱ་བ་ནི་གྱ་གྱུར་
འབེབས་པའི་གླིང་བཅོ་བརྒྱད་ཀྱིས་མཚོན་པའི་ཡུལ་ལོ། །སྙན་པར་སྨྲ་བ་ཞེས་བྱ་བ་ནི་མཉེན་པར་སྨྲ་བའོ། །ས་དང་ས་གཞི་ཞེས་བྱ་བ་ནི་ས་ཉིད་དོ། །མཛེས་པ་མཛེས་པ་དག་ཅེས་བྱ་བ་ནི་བཟང་པོ་དག་གི་རྣམ་གྲངས་སོ། །སློབ་མ་ལ་རྗེས་སུ་ཆགས་པ་དང་བཅས་པ་ཞེས་བྱ་བ་ནི་སློབ་མ་དགའ་བའོ། །འཁོར་ཉུང་བ་ཞེས་བྱ་བ་ནི་གཡོག་འཁོར་ཉུང་བ་དག་གོ །གཡང་གཞི་དག་ཅེས་བྱ་བ་ནི་རི་དགས་ལ་སོགས་པའི་པགས་པ་དག་གོ །བླུགས་གཟར་དག་ཅེས་བྱ་བ་ནི་སྦྱིན་སྲེག་རྒྱུ་ལྡུགས་པར་བྱེད་པའི་གཟར་བུ་མུ་བ་རིང་པོའོ། །དགང་གཟར་ཞེས་བྱ་བ་ནི་སྦྱིན་སྲེག་རྒྱུས་དགང་བར་བྱ་བའི་གཟར་བུ་ཆེན་པོའོ། །རྒོལ་བའི་ཤིང་རྟ་ཞེས་བྱ་བ་ནི་རྒོལ་བ་ཚར་གཅོད་པ་དག་གིས་དྲང་བར་བྱ་བའི་ཤིང་རྟའོ། །དབྱེ་ཚོང་པ་ཞེས་བྱ་བ་ནི་སྐྱེ་བོའི་གནས་མེད་པའི་དབྱེ་བ་སྟོང་པར་ཉོ་ཚོང་བྱེད་པའི་གནས་སོ། །ཆོང་རྡལ་ཞེས་བྱ་བ་ནི་སྐྱེ་བོའི་གནས་མེད་པ་ཆུ་ཀླུང་གི་འགྲམ་ལ་སོགས་པར་ཉོ་ཚོང་བྱེད་པའི་གནས་སོ། །འདུལ་ཞིང་ཞེས་བྱ་བ་ནི་ཕམ་པར་བྱེད་ཅིང་ངོ༌། །ལོ་མ་ཞེས་བྱ་བ་ནི་ཡལ་ག་ཕྲེའུའོ། །རྒྱལ་བ་དང་ཚེ་སྤེལ་བར་བྱས་ཏེ་ཞེས་བྱ་བ་ལ། རྒྱལ་བས་སྤེལ་བར་བྱས་ཏེ་ཞེས་བྱ་བ་ནི་ཁྱོད་རྒྱལ་བར་གྱུར་ཅིག་ཅེས་ཤིས་པ་བརྗོད་པས་སྤེལ་བར་བྱས་ཏེའོ། །ཚེ་སྤེལ་བར་བྱས་ཏེ་ཞེས་བྱ་བ་ནི་ཁྱོད་ཚེ་རིང་བར་གྱུར་ཅིག་ཅེས་ཤིས་པ་བརྗོད་པས་སྤེལ་བར་བྱས་ཏེའོ། །བཀའ་མཆིད་རྣམ་པར་གཏན་ལ་དབབ་པ་ཞེས་བྱ་བ་ནི་གཏམ་རྣམ་པར་གཏན་ལ་དབབ་པའོ། །ཞུགས་ལྟ་བུའི་ཤེས་པས་ཞེས་བྱ་བ་ནི་མེ་དང་འདྲ་བའི་ཤེས་པ་སྟེ། ཐམས་ཅད་དུ་མཐུས་ཐོགས་པ་མེད་པའི་ཕྱིར་རོ། །རང་གི་སྨྲ་བ་གསལ་བར་བགྱིད་པ་ཞེས་བྱ་བ་ནི་རང་གི་གཞུང་ལུགས་རབ་ཏུ་བཞག་པའོ། །གཞན་གྱི་སྨྲ་བར་ཚར་གཅོད་པ་ཞེས་བྱ་བ་ནི་གཞན་གྱི་གཞུང་ལུགས་དགག་པའོ་།ཕྱོགས་ཞེས་བྱ་བ་ནི་རང་གི་གཞུང་ལུགས་དམ་བཅའ་བའོ། །གཞན་གྱི་ཕྱོགས་ཞེས་བྱ་བ་ནི་གཞན་གྱི་གཞུང་ལུགས་དམ་འཆའ་བའོ། །ཕྱོགས་སྔ་མ་ཞེས་བྱ་བ་ནི་རང་གི་གཞུང་ལུགས་དམ་འཆའ་བ་སྔར་བྱེད་པའོ། །འགྲོན་པ་ཞེས་བྱ་བ་ནི་མངོན་པར་འོངས་པའོ། །རྒྱུད་ཆགས་ཞེས་བྱ་བ་ནི་རྩོད་པའི་གནས་སོ། །རིགས་པ་མེད་པ་ཞེས་བྱ་བ་ནི་ལུང་དང་
འགལ་བའོ། །མི་མཐུན་པ་ཞེས་བྱ་བ་ནི་སྔ་ཕྱི་འགལ་བའོ། །མི་འཐད་པ་ཞེས་བྱ་བ་ནི་རིགས་པ་དང་འགལ་བའོ། །ཚར་གཅོད་པའི་གནས་ཞེས་བྱ་བ་ནི་ཕམ་པའི་རྒྱུའོ། །ལན་ལ་མི་སྤོབས་པ་ཞེས་བྱ་བ་ནི་ལན་གྱི་སྐབས་སུ་ཅང་མི་སྨྲ་བར་འདུག་པའོ། །རངས་པ་ཞེས་བྱ་བ་ནི་སྤུ་གྱེན་དུ་འགྲེང་བའོ། །དགའ་བ་ཞེས་བྱ་བ་ནི་ལུས་ཀྱི་བདེ་བ་དང་ལྡན་པའོ། །མཆོག་ཏུ་དགའ་བ་ཞེས་བྱ་བ་ནི་ཡིད་བ་བདེ་བ་དང་ལྡན་པའོ། །བྲམ་ཟེ་ཞེས་བྱ་བ་ནི་བྲམ་ཟེའི་འབྲེལ་བའོ། །སྤྱོད་ཚུལ་ཞེས་བྱ་བ་ནི་འགྲེང་བ་ལ་སོགས་བྱ་བ་མེད་པའི་རྣམ་པའོ། །སྤྱོད་པ་ཞེས་བྱ་བ་ནི་གྲོ་བ་ལ་སོགས་པའི་བྱ་བའོ། །གཙང་སྦྲ་ཞེས་བྱ་བ་ནི་དག་པར་བྱེད་པའོ། །ཀུན་དུ་སྤྱོད་པ་ཞེས་བྱ་བ་ནི་རྗེས་སུ་བསྒྲུབ་པའོ། །ཐལ་བ་བླངས་པ་ཞེས་བྱ་བ་ནི་བྱུག་རིས་རྒྱུའོ། །བྱ་མ་བུམ་བླངས་པ་ཞེས་བྱ་བ་ནི་ཆུ་སྣོད་དོ། །ས་བླངས་པ་ཞེས་བྱ་བ་ནི་འདག་རྫས་རྒྱུའོ། །ལག་སྟབས་ཞེས་བྱ་བ་ནི་ལག་པ་བཞག་པའི་ཐབས་སོ་།ཐོར་ཚུགས་ཞེས་བྱ་བ་ནི་སྐྲ་བཅིང་བའི་ཐབས་སོ། །རབ་བསྔགས་བྱ་བ་ཞེས་བྱ་བ་ནི་ཨོཾ་ཞེས་བྱ་བའོ། །ཀྭ་ཞེས་བྱ་བ་ནི་བོད་པའོ། །ངེས་བརྗོད་ཀྱི་རིག་བྱེད་ཅེས་བྱ་བ་ནི་རི་ཙ་ཞེས་བྱ་ཚིག་སྦྱར་བའི་ཚད་ངེས་པར་བརྗོད་པའི་རིག་བྱེད་དེ། ཤེས་པ་བསྐྱེད་པའི་ཚིག་གོ །མཆོད་སྦྱིན་གྱི་རིག་བྱེད་ཅེས་བྱ་བ་ནི་ཚིག་སྦྱར་བའི་ཚད་ངེས་པ་མེད་པ་དག་གོ ། སྙན་ཚིག་གི་རིག་བྱེད་ཅེས་བྱ་བ་ནི་བརྒྱ་བྱིན་དང་ཚངས་པ་ལ་སོགས་པ་ལ་བསྟོད་པའི་ཚིག་གོ །སྲིད་སྲུང་གི་རིག་བྱེད་ཅེས་བྱ་བ་ནི་སྐྱེ་དགུ་བསྲུང་བའི་ཐབས་སྟོན་པའོ། །འདོན་དུ་བཅུག་གོ་ཞེས་བྱ་བ་ནི་ཀློག་ཏུ་བཅུག་པའོ། །རི་ཙ་ཞེས་བྱ་བ་ནི་སྐད་ཀྱི་དབྱིངས་ཏེ་ཚིག་སྦྱར་བའི་ཚད་ངེས་པའི་དོན་ཏོ། །ཡུན་རིང་པོ་ནས་བྲལ་བ་དག་སྟེ་ཞེས་བྱ་བ་ནི་ཡུན་རིང་པོ་ནས་ལུང་རྣམ་པར་འཆད་པའོ། །བླ་མའི་ཚིག་ཤེས་དཀའ་བ་དག་ཅེས་བྱ་བ་ནི་ཡུན་རིང་པོ་ནས་བྲལ་བའི་ཕྱིར་རོ། །ཅི་དགར་འགྲོ་བ་ཞེས་བྱ་བ་ནི་མངོན་པར་འདོད་པའི་གནས་སུ་འགྲོ་བའི་ཕྱིར་རོ། །ཅི་དགར་སྤྱོད་པས་ཞེས་བྱ་བ་ནི་མངོན་པར་འདོད་པའི་ཉལ་བ་དང༌། འཆག་པ་ལ་སོགས་པ་བྱེད་པས་སོ། །འཇིགས་པ་ཞེས་བྱ་བ་ནི་སྐྲག་པ་སྐྱེས་པའོ། །བག་ཚ་བ་ཞེས་བྱ་བ་ནི་འཇིགས་པ་སྐྱེ་བར་རོགས་པའོ། །རྒྱུད་རྒྱ་ཆེན་པོ་དང་ལྡན་པ་ཞེས་བྱ་བ་ནི་ལུང་རྒྱ་ཆེན་པོ་དང་ལྡན་པ་སྟེ། འཁོར་བ་དང་ཐར་པ་གཉིས་ཐབས་
དང་བཅས་པ་དག་སེམས་པའི་ཕྱིར་རོ། །རྒྱུ་ཟབ་མོ་དང་ལྡན་པ་ཞེས་བྱ་བ་ནི་བདག་མེད་པ་དང༌། མི་རྟག་པ་དང་སྟོང་པ་ཉིད་ལ་སོགས་པ་རྟོགས་པར་དཀའ་བའི་དོན་ལ་སེམས་པའི་ཕྱིར་རོ། །རྒྱུད་བཟང་པོ་དང་ལྡན་པ་ཞེས་བྱ་བ་ནི་གཞི་ལ་གནས་པའི་ལུང་དང་ལྡན་པའི་ཕྱིར་རོ། །འཇིག་རྟེན་པ་ལ་ཕན་པར་མི་ནུས་པ་ཞེས་བྱ་བ་ནི་རྟེན་ཅིང་འབྲེལ་བར་འབྱུང་བ་ལ་སོགས་པ་འཇིག་རྟེན་པའི་ལམ་ལ་གཞན་གྱིས་ཕམ་པར་བྱེད་མི་ནུས་པའོ། །འཇིག་རྟེན་ལས་འདས་པ་ལས་གཏིང་མེད་པ་ཞེས་བྱ་བ་ནི་ཐར་པ་དང༌། ཐར་པའི་ལམ་ལ་མུ་སྟེགས་ཅན་རྣམས་ཀྱི་འཇུག་པའི་ལམ་མེད་པའི་ཕྱིར་རོ། །མང་བ་ཞེས་བྱ་བ་ནི་མཐུ་ཟད་པ་མེད་པས་ཕམ་པར་མི་ནུས་པ་བསྟན་ཏོ། །མཐུན་པ་ཞེས་བྱ་བ་ནི་ཐ་དད་པར་དབྱེ་བ་མེད་པས་ཕམ་པར་མི་ནུས་པ་ཉིད་བསྟན་ཏོ། །ལོངས་སྤྱོད་དང་དོན་དུ་མི་གཉེར་བ་ཞེས་བྱ་བ་ནི་བདག་ཉིད་ལ་བསྙེན་བཀུར་བྱེད་པ་མེད་པས་ཕམ་པར་མི་ནུས་པ་ཉིད་བསྟེན་ཏོ། །ཤེས་རབ་ཀྱི་སྤོབས་པ་ཞེས་བྱ་བ་ནི་ཤེས་རབ་ཀྱིས་ཀུན་དུ་སྤྱོད་པའོ། །བྲན་ཞེས་བྱ་བ་ནི་ཁོལ་པོའོ། །མདུན་དུ་བྱས་ཏེ་ཞེས་བྱ་བ་ནི་སྟེན་ཏེའོ། །མཚོ་རྣམས་ཞེས་བྱ་བ་ནི་འབབ་པར་བྱེད་པས་མཚོ་རྣམས་ཏེ། སྲིད་པ་གསུམ་པོ་འདོད་པ་དང༌། གཟུགས་དང༌། གཟུགས་མེད་པ་ན་སྤྱོད་པའོ། །ལྡོག་པར་འགྱུར་ཞེས་བྱ་བ་ནི་ཕྲ་རྒྱས་སུ་མི་འགྱུར་བའོ། །ལམ་ཞེས་བྱ་བ་ནི་འཇིག་རྟེན་པའི་འཇུག་པའི་ལམ་སྟེ། མ་རིག་པ་དང༌། འདུ་བྱེད་དང༌། རྣམ་པར་ཤེས་པ་དག་ལ་སོགས་པ་དག་གོ །ལྡོག་པ་ཞེས་བྱ་བ་ནི་དེ་ལུགས་ལས་བཟློག་པའོ། །མ་ལུས་པར་ནི་འགག་པར་འགྱུར་ཞེས་བྱ་བ་ནི་ཡང་མི་འབྱུང་བའོ། །ཚིག་དེ་དག་གིས་མྱ་ངན་ལས་འདས་པ་ལ་བསམ་པ་ཡིན་པས་བྲམ་ཟེ་མི་ཤེས་སོ། །སྤང་བ་ཞེས་བྱ་བ་ནི་གྱ་གྱུ་དང་པོའོ། །གཅེས་པ་ཞེས་བྱ་བ་ནི་ཚིག་བཙན་པའོ། །བསྟབས་པར་འགྱུར་ཞེས་བྱ་བ་ནི་གསལ་བར་འགྱུར་བའོ། །རབ་ཏུ་ཤེས་པའི་བྲམ་ཟེ་ཞེས་བྱ་བ་ནི་གྲགས་པའོ། །ཐོས་པས་ཐོབ་པར་བྱ་བ་ཞེས་བྱ་བ་ནི་གྲགས་པའོ། །བསྙེན་བཀུར་བ་ཞེས་བྱ་བ་ནི་ལེགས་པར་བསྟེན་པའོ། །ལུང་ཞེས་བྱ་བ་ནི་བསྟན་བཅོས་སོ། །རྟོགས་པ་ཞེས་བྱ་བ་ནི་འབྲས་བུའོ། །ཇི་ཙམ་དེ་ཙམ་ཞེས་བྱ་བ་ནི་ཅུང་ཞིག་གོ །མདོ་སྡེའི་མཐའ་ཞེས་བྱ་བ་ནི་ངེས་པའི་དོན་གྱི་མདོ་སྡེ་
དག་སྟེ། མདོ་རྣམས་ཀྱི་མཐར་ཐུག་པ་ཡིན་པའི་ཕྱིར་རོ། །གནོད་པ་ཞེས་བྱ་བ་ནི་འགལ་བའོ། །ཆོས་ཀྱི་ཁྲིད་བྱེད་ཅེས་བྱ་བ་ནི་ཆོས་མངོན་པ་སྟེ། དངོས་པོའི་རྣམ་པར་གཞག་པའི་ཁྲིད་པར་བྱེད་པ་དང༌། མཚོན་པར་བྱེད་པ་དང༌། གཏན་ལ་འབེབས་པ་ཡིན་པའི་ཕྱིར་རོ། །རྣམ་པར་དཀྲུགས་པ་ཞེས་བྱ་བ་ནི་དྲུངས་དབྱུང་བ་སྟེ་མི་རུང་བར་བྱེད་ཅེས་བྱ་བའི་ཐ་ཚིག་གོ །ཆོས་ཀྱི་མངལ་ཞེས་བྱ་བ་ནི་འདུལ་བ་སྟེ། འབྲས་བུའི་ཆོས་དེ་ནས་བྱུང་བའི་ཕྱིར་རོ། །ཡང་ན་ཆོས་ཀྱི་མངལ་ཞེས་བྱ་བའི་མདོ་སྡེ་དང༌། ཆོས་མངོན་པར་ཉིད་ཡིན་ཏེ། བསྒྲུབ་པ་ཆོས་དེ་ནས་བྱུང་བའི་ཕྱིར་རོ། །བརྟོལ་ཞེས་བྱ་བ་ནི་འབྱིན་པའོ། །ཆོས་ཀྱི་རྒྱལ་མཚན་ཞེས་བྱ་བ་ནི་འཕགས་པའི་ལམ་སྟེ། ཆོས་ཐམས་ཅད་པས་དེ་ཆེས་ལྷག་པར་མཐོ་བའི་ཕྱིར་རོ། །གཏི་བ་ཅེས་བྱ་བ་ནི་དེ་སྨད་པའོ། །བདུད་ཀྱི་རྒྱལ་མཚན་ཞེས་བྱ་བ་ནི་སྲེད་པ་ལ་སོགས་པ་འཇུག་པའི་རྒྱུའོ། །བསྒྲེང་ཞེས་བྱ་བ་ནི་དེ་ཆོས་སུ་སྟོན་པའོ། །སེམས་ཅན་དམྱལ་བ་ལ་གཞོལ་བ་ཞེས་བྱ་བ་ནི་སེམས་ཅན་དམྱལ་བ་བས་འབྲས་བུ་འགྱུར་བའོ། །ཚིག་གི་མཚོན་ཞེས་བྱ་བ་ནི་ཁ་ཟེར་བའོ། །ཆོས་ཞེས་བྱ་བ་ནི་དངོས་པོ་རྣམ་པར་གཞག་པའོ། །སོ་སོར་རྟོག་པ་ཞེས་བྱ་བ་ནི་བློས་གཉེན་པོས་སེམས་པའོ། །འདི་ཉིད་ཀྱིར་འགྱུར་བར་ཟད་དོ་ཞེས་བྱ་བ་ནི་ཁོ་བོ་བདག་རང་ལ་རྣམ་པར་སྨིན་པར་འགྱུར་བར་ཟད་དོ་ཞེས་བྱ་བའི་ཐ་ཚིག་གོ །སློབ་པ་ཞེས་བྱ་བ་ནི་རྒྱུན་དུ་ཞུགས་པ་ལ་སོགས་པ་བདུན་ནོ། །མི་སློབ་པ་ཞེས་བྱ་བ་ནི་དགྲ་བཅོམ་པའོ། །གསུང་རབ་ཅེས་བྱ་བ་ནི་བསྟན་པའོ། །རྩུབ་པོ་ཞེས་བྱ་བ་ནི་ཞེར་འདེབས་པའོ། །འཇིགས་སུ་རུང་བ་ཞེས་བྱ་བ་ནི་འཇིགས་པར་བྱེད་པའོ། །རྣ་བའི་སྦུབས་དག་ཅེས་བྱ་བ་ནི་རྣ་བའི་བུ་ག་དག་གོ །བསམ་པ་ཞེས་བྱ་བ་ནི་སེམས་པའོ། །བག་ལ་ཉལ་ཞེས་བྱ་བ་ནི་སྲིད་པ་ལ་སོགས་པ་སྤྱད་པའི་ཉོན་མོངས་པའོ། །ཁམས་ཞེས་བྱ་བ་ནི་ཉན་ཐོས་ལ་སོགས་པའི་རིགས་སོ། །རང་བཞིན་ཞེས་བྱ་བ། ནི་དབང་པོ་རྟུལ་པོ་ཉིད་ལ་སོགས་པའི་ངོ་བོ་ཉིད་དོ། །དྲོ་བར་གྱུར་པ་ཞེས་བྱ་བ་ནི་འཇིག་རྟེན་པའི་ཤེས་པ་སྟེ། འཕགས་པའི་ལམ་གྱི་མེའི་དྲོད་དུ་གྱུར་པ་ཡིན་པའི་ཕྱིར་རོ། །རྩེ་མོ་ཞེས་བྱ་བ་ཡང་འཇིག་རྟེན་པའི་ཤེས་པའི་ངོ་བོ་ཉིད་དེ་འཁོར་བའི་ཤེས་པའི་རིའི་རྩེ་མོར་གྱུར་པ་ཡིན་པའི་ཕྱིར་རོ།།
བཟོད་པ་ཞེས་བྱ་བ་ནི་ཟག་པ་དང་བཅས་པའི་བློ་ཆུང་ངུ་དང༌། འབྲིང་དང་ཆེན་པོ་སྟེ་འཕགས་པའི་བདེན་པ་བཞིའི་རྣམ་པ་ལ་བཟོད་པའི་ཕྱིར་རོ། །འཇིག་རྟེན་པའི་ཆོས་ཀྱི་མཆོག་ཅེས་བྱ་བ་ནི་འཇིག་རྟེན་པའི་ཤེས་པའི་མཆོག་སྟེ། འཕགས་པའི་ལམ་འདྲེན་པར་བྱེད་པས་ཟག་པ་དང་བཅས་པའི་ཆོས་ཐམས་ཅད་ཀྱི་མཆོག་ཏུ་གྱུར་པ་ཡིན་པའི་ཕྱིར་རོ། །སངས་རྒྱས་ལ་གཞོལ་བ་ཞེས་བྱ་བ་ནི་སངས་རྒྱས་ལ་གུས་པ་དང་བཅས་པའི་ཕྱིར་རོ། །དམན་པ་དག་གིས་འདུག་པར་བྱ་བའི་ཐ་ཚིག་གོ །ཆོས་ལ་འབད་པ་ཞེས་བྱ་བ་ནི་མྱ་ངན་ལས་འདས་པའི་ས་ལ་སེམས་པ་སྟེ། མྱ་ངན་ལས་འདས་པ་ལ་སྐྱབས་སུ་འཇུག་ཅེས་བྱ་བའི་ཐ་ཚིག་གོ །དགེ་འདུན་ལ་བབ་པ་ཞེས་བྱ་བ་ནི་དགེ་འདུན་ལ་འདུད་པ་སྟེ། ཆོས་གོས་ལ་སོགས་པའི་འབྲས་བུ་སྦྱིན་པའི་ཕྱིར་རོ། །ཡོངས་སུ་གནས་པ་བསྟེན་ཏེ་ཞེས་བྱ་བ་ནི་ཉིན་མཚན་འདས་ཏེའོ། །རྣ་ཆ་གདུབ་འཁོར་གཡོ་ཞིང་དྲི་མ་མེད་པ་ཐོགས་ཏེ་ཞེས་བྱ་བ་ལ་རྣ་ཆ་གདུབ་འཁོར་ཞེས་བྱ་བ་ནི་རྣ་ཆ་གདུབ་འཁོར་ཅན་ནོ། །གཡོ་ཞིང་ཞེས་བྱ་བ་ནི་ཡང་བའོ། །དྲི་མ་མེད་པ་ཞེས་བྱ་བ་ནི་འོད་གསལ་བའོ། །ཐོགས་ཏེ་ཞེས་བྱ་བ་ནི་དེས་དེ་ཉིད་དོ། །ཐུ་བ་ཞེས་བྱ་བ་ནི་བླ་གོས་ཀྱི་གྲྭའོ། །ཁ་དོག་ཤིན་ཏུ་འདས་པ་ཞེས་བྱ་བ་ནི་མི་ལས་ཤིན་ཏུ་འདས་པའི་ཁ་དོག་དང་ལྡན་པའི་ཕྱིར་རོ། །མཚན་མོ་ལ་བབ་པ་ཞེས་བྱ་བ་ནི་ནམ་སྲོས་པའོ། །འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཞེས་བྱ་བ་ལ་འཇིག་ཚོགས་ལ་ལྟ་བ་ཞེས་བྱ་བ་ནི་ཉེ་བར་ལེན་པའི་ཕུང་པོ་ལྔའི་ཡུལ་ལ་བདག་དང་བདག་གིར་ཤེས་པའོ། །རིའི་རྩེ་མོ་ཞེས་བྱ་བ་ནི་འཇིག་ཚོགས་ལ་ལྟ་བ་དེ་ཉིད་གཞི་ག་དཀའ་བའི་ཕྱིར་རི་དང་འདྲའོ། །ཉི་ཤུ་ཞེས་བྱ་བ་ནི་བདག་གཟུགས་ཡིན་ཏེ་བདག་པོ་དང་འདྲ་བ་དང༌། བདག་གཟུགས་དང་ལྡན་ཏེ་རྒྱན་དང་འདྲ་བ་དང༌། གཟུགས་བདག་གི་ཡིན་ཏེ་བྲན་དང་འདྲ་བ་དང༌། གཟུགས་ལ་བདག་གནས་ཏེ་སྣོད་དང་འདྲ་བ་དང༌། བདག་ཚོར་བ་ཡིན་ཏེ་བདག་པོ་དང་འདྲ་བ་དང༌། བདག་ཚོར་བ་དང་ལྡན་ཏེ་རྒྱན་དང་འདྲ་བ་དང༌། ཚོར་བ་བདག་གི་ཡིན་ཏེ་བྲན་དང་འདྲ་བ་དང༌། ཚོར་བ་ལ་བདག་གནས་ཏེ་སྣོད་དང་འདྲ་བ་དང༌། བདག་འདུ་ཤེས་ཡིན་ཏེ་བདག་པོ་དང་འདྲ་བ་དང༌། བདག་འདུ་ཤེས་དང་ལྡན་ཏེ་
རྒྱན་དང་འདྲ་བ་དང༌། འདུ་ཤེས་བདག་གི་ཡིན་ཏེ་བྲན་དང་འདྲ་བ་དང༌། འདུ་ཤེས་ལ་བདག་གནས་ཏེ་སྣོད་དང་འདྲ་བ་དང༌། བདག་འདུ་བྱེད་ཡིན་ཏེ་བདག་པོ་དང་འདྲ་བ་དང༌། བདག་འདུ་བྱེད་དང་ལྡན་ཏེ་རྒྱན་དང་འདྲ་བ་དང༌། འདུ་བྱེད་བདག་གི་ཡིན་ཏེ་བྲན་དང་འདྲ་བ་དང༌། འདུ་བྱེད་ལ་བདག་གནས་ཏེ་སྣོད་དང་འདྲ་བ་དང༌། བདག་རྣམ་པར་ཤེས་པ་ཡིན་ཏེ་བདག་པོ་དང་འདྲ་བ་དང༌། བདག་རྣམ་པར་ཤེས་པ་དང་ལྡན་ཏེ་རྒྱན་དང་འདྲ་བ་དང༌། རྣམ་པར་ཤེས་པ་བདག་གི་ཡིན་ཏེ་བྲན་དང་འདྲ་བ་དང༌། རྣམ་པར་ཤེས་པ་ལ་བདག་གནས་ཏེ་སྣོད་དང་འདྲ་བ་ཞེས་བདག་ཏུ་ལྟ་བའི་རྣམ་པ་ཉི་ཤུ་པོ་དག་གི །ཡེ་ཤེས་ཀྱི་རྡོ་རྗེ་ཞེས་བྱ་བ་ནི་མཐོང་བའི་ལམ་སྟེ། མཐོང་བའི་ལམ་གྱིས་སྤང་བར་བྱ་བའི་ཉོན་མོངས་པ་ཅིག་ཅར་འཇོམས་པའི་ཕྱིར་རོ། །འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པ་ཞེས་བྱ་བ་ནི་བདེན་པ་བཞི་ཁོང་དུ་ཆུད་པར་བྱེད་པའི་ཕྱིར་རོ། །སྔོན་གྱི་ཕ་མེས་ཞེས་བྱ་བ་ནི་མེས་པའི་ལ་སོགས་པ་ཉིད་དུ་སོང་ཤི་བ་དག་གོ །མཛའ་ཤེས་ཞེས་བྱ་བ་ནི་གྲོགས་པ་ལ་སོགས་པའོ། །རྩ་ལག་ཅེས་བྱ་བ་ནི་ཉེ་དུའོ། །སྐབས་ཞེས་བྱ་བ་ནི་ཡང་དག་པར་འགྱུར་བ་མེད་པའི་ཕྱིར་རོ། །བསྒྲལ་བ་ཞེས་བྱ་བ་ནི་ཡང་སྩོགས་པར་འགྱུར་བ་མེད་པའི་ཕྱིར་རོ། །བཀུམ་ཞེས་བྱ་བ་ཡང་དེར་འཇུག་པ་མེད་པའི་ཕྱིར་རོ། །ཕྱེ་ཞེས་བྱ་བ་ནི་དེར་འགྲོ་བའི་ཕྱིར་རོ། །རབ་གྲག་ཅེས་བྱ་བ་ནི་རབ་ཏུ་འཇིགས་པའོ། །ཉེས་པ་མང་ལྡན་པ་ཞེས་བྱ་བ་ནི་མཚོན་དང་མེ་དང་ཚེར་མ་ལ་སོགས་པའི་ཉེས་པ་དང་ལྡན་པའོ། །ངན་སོང་ཤུལ་ཞེས་བྱ་བ་ནི་ཡང་སོས་ལ་སོགས་པའི་སྒོའོ། །བསོད་ནམས་རབ་ལྡན་པ་ཞེས་བྱ་བ་ནི་ཤིན་ཏུ་བཟང་བའོ། །མཐོ་རིས་འགྲོ་བ་ཞེས་བྱ་བ་ནི་སུམ་ཅུ་རྩ་གསུམ་ལ་སོགས་པའི་མཐོ་རིས་ཀྱི་ལམ་མོ། །མྱ་ངན་ལས་འདས་པའི་ཤུལ་ཞེས་བྱ་བ་ནི་འཕགས་པའི་ལམ་མོ། །ཐོབ་པར་འགྱུར་ཞེས་བྱ་བ་ནི་ཤེས་པར་གྱུར་བའོ། །ཤིན་ཏུ་རྣམ་པར་དག་ཅེས་བྱ་བ་ནི་བོད་པའི་ཚིག་སྟེ། བཅོམ་ལྡན་འདས་ཀྱིས་ཉོན་མོངས་པ་བག་ཆགས་དང་བཅས་པ་སྤངས་པའི་ཕྱིར་རོ། །སྐྱོན་བྲལ་ཞེས་བྱ་བ་ནི་ཟག་པ་མེད་པའོ། །དག་པ་ཞེས་བྱ་བ་ནི་མ་ནོར་བའོ། །ཐོབ་ཅིང་ཞེས་བྱ་བ་ནི་རྙེད་ཅིང་ངོ༌། །གོ་འཕང་ཞི་བ་ཞེས་བྱ་བ་ནི་མྱ་ངན་ལས་འདས་པའོ། །
འཕགས་པ་དགྱེས་པ་ཞེས་བྱ་བ་ནི་འཕགས་པ་རྣམས་བཞེད་པའོ། །སྡུག་བསྔལ་རྒྱ་མཚོ་ཕ་རོལ་རྒལ་བར་གྱུར། །ཅེས་བྱ་བ་ནི་འཁོར་བ་ལས་རྒལ་བར་གྱུར་ཅེས་བྱ་བའི་ཐ་ཚིག་གོ །འགྲོ་བ་ལྷ་མིན་མི་དང་ལྷས་མཆོད་པ། །སྐྱེ་དང་རྒ་དང་ན་འཆི་བྲལ་བའོ། །སྲིད་པ་སྟོང་དུ་མཐོང་བར་རབ་དཀོན་པ། །ཐུབ་པ་ཞེས་བྱ་བ་དག་ནི་བོད་པའོ། །འདུད་བྱས་ཞེས་བྱ་བ་ནི་ཞབས་གཉིས་ལ་ཕྱག་བྱས་པ་སྟེ། ཞབས་གཉིས་ལ་ཡན་ལག་ལྔས་འདུད་པ་བྱས་ནས་ཞེས་བྱ་བའི་ཐ་ཚིག་གོ །དགྲ་ཐུལ་གཡས་ནས་ཡོངས་སུ་བསྐོར་བྱས་ཏེ། །ཞེས་བྱ་བ་ནི་བཅོམ་ལྡན་འདས་ཀྱི་གཡས་ཕྱོགས་ནས་སོང་བ་སྟེ། གཡས་ཕྱོགས་ནས་བསྐོར་ཞེས་བྱ་བའི་ཐ་ཚིག་གོ །མཁའ་ལ་སོང་ཞེས་བྱ་བ་ནི་བར་སྣང་ལ་སོང་ཞེས་བྱ་བའི་ཐ་ཚིག་གོ །མི་མཇེད་ཀྱི་བདག་པོ་ཞེས་བྱ་བ་ནི་ཚངས་པ་སྟེ་སྔོན་བཅོམ་ལྡན་འདས་འོད་སྲུངས་ཀྱི་སློབ་མ་དགེ་སློང་དུ་གྱུར་པའི་ཚེ་མིང་མི་མཇེད་ཀྱི་བདག་པོ་ཞེས་བྱ་བར་གྱུར་པའི་མིང་དེ་ཉིད་དིང་སོང་ཡང་མིང་དུ་བརྗོད་པའོ། །གཞུང་ཁ་ཅིག་ལས་ཚོགས་ཀྱི་བདག་པོ་ཞེས་ཀྱང་འབྱུང་སྟེ། བདུད་ཀྱི་འཁོར་ལ་སོགས་པ་ཐམས་ཅད་ཀྱི་བདག་པོ་ཉིད་ཡིན་པའི་ཕྱིར་མིང་དེ་སྐད་ཅེས་བྱའོ། །འབྱོར་པ་ཆེ་བ་ཞེས་བྱ་བ་ནི་དབང་ཕྱུག་གིས་སོ། །མཐུ་ཆེ་བ་ཞེས་བྱ་བ་ནི་ནུས་པས་སོ། །གཞན་ཞེས་བྱ་བ་ནི་རབ་འཐབ་བྲལ་ལམ་ཡོངས་སུ་དགའ་ལྡན་ལ་སོགས་པའོ། །སྐྱེས་ནས་མྱོང་བར་འགྱུར་བའི་ལས་ཞེས་བྱ་བ་ནི་སྐྱེས་པའི་མཇུག་ཐོགས་སུ་ཚེ་གཉིས་པ་ལ་མྱོང་བར་འགྱུར་བ་གང་ཡིན་པའོ། །ལན་གྲངས་གཞན་ལ་མྱོང་བར་འགྱུར་བའི་ལས་ཞེས་བྱ་བའི་ཚེ་རབས་གསུམ་ལ་སོགས་པའི་ཚེ་རབས་གཞན་གྱི་རིགས་ཀྱིས་མྱོང་བར་འགྱུར་བ་གང་ཡིན་པའོ། །ལུང་ཕོག་པ་ཞེས་བྱ་བ་ནི་གཞན་གྱིས་བདག་ལ་ལུང་ཕོག་པ་དང་བདག་གིས་གཞན་ལ་ལུང་ཕོག་པའོ། །རྟེན་ཅིང་འབྲེལ་པར་འབྱུང་བ་ལ་མཁས་པ་ཤེས་ཞེས་བྱ་བ་ནི་མ་རིག་པའི་རྐྱེན་གྱིས་འདུ་བྱེད་རྣམས་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཞེས་བྱ་བ་ལ་སོགས་པའི་རྒྱུ་དང་འབྲས་བུའི་དངོས་པོ་ལ་ཐོས་པ་དང་བསམས་པ་ལས་བྱུང་བའི་ཤེས་པ་གོམས་པའོ། །གནས་དང་གནས་མ་ཡིན་པ་ལ་མཁས་པ་ཞེས་བྱ་བ་ནི་དངོས་པོ་རྣམས་ཀྱི་སྲིད་པ་དང་མི་
སྲིད་པ་དག་ལ་ཐོས་པ་དང་བསམས་པ་ལས་བྱུང་བའི་ཤེས་པ་ཇི་ལྟ་བ་བཞིན་དུ་རྣམ་པར་འབྱེད་པའོ། །ཚོགས་ཀྱི་དངོས་པོ་ཞེས་བྱ་བ་ནི་རྒྱུ་ཉིད་ཀྱིས་སོ། །ལག་པ་ལ་འགྲམ་པ་གཏད་དེ་ཞེས་བྱ་བ་ནི་མཁུར་ཚོས་བཞག་སྟེའོ། །སྦྱོར་བ་ཞེས་བྱ་བ་ནི་བཞི་སྟེ། འདོད་པ་དང༌། སྲིད་པ་དང༌། ལྟ་བ་དང། མ་རིག་པའི་སྦྱོར་བ་དག་གོ །ཡང་དག་པར་འདའ་བར་བྱ་བ་ནི་སྤང་བར་བྱ་བའོ། །ཐུབ་པའི་དབང་པོ་ཞེས་བྱ་བ་ནི་དེ་བཞིན་གཤེགས་པའོ། །རིགས་གཅེས་པ་མ་ཡིན་ཞེས་བྱ་བ་ནི་རིགས་གཙོ་བོ་མ་ཡིན་པ་སྟེ། བྲམ་ཟེའམ་རྒྱལ་རིགས་ནི་རྣམ་པར་དག་པར་འགྱུར་ལ། གཞན་ནི་མི་འགྱུར་བ་མ་ཡིན་ནོ། །ཁྱིམ་ཞེས་བྱ་བ་ནི་ཕྱུག་པོ་དང༌། དབུལ་པོ་དང༌། འབྲིང་གི་ཁྱིམ་མོ། །རུས་ཞེས་བྱ་བ་ནི་ཀཽཎྜི་ནྱའི་རུས་དང༌། བ་སིས་ཐའི་རུས་ལ་སོགས་པའོ། །ཁྱིམ་ནི་ཉེ་དུའི་ཚོགས་སོ། །རུས་ནི་རྒྱུད་བརྒྱད་པ་ལ་སོགས་པ་དང་ཉེ་དུ་མ་ཡིན་པའི་ཚོགས་ཏེ། ཁྱིམ་དང་རིགས་ཀྱི་བྱེ་བྲག་ནི་དེ་ཡིན་ནོ། །སྒྲུབ་པ་ཞེས་བྱ་བ་ནི་མཐོང་བའི་ལམ་ལ་སོགས་པ་རྗེས་སུ་སྒྲུབ་པའོ། །ཐུགས་བརྩེ་བའི་སླད་ཅེས་བྱ་བ་ནི་ཐུགས་རྗེ་ལ་བརྟེན་ནས་སོ། །དགེ་སློང་ཚུར་ཤོག་བྱ་བས་ཞེས་བྱ་བ་ནི་བྱ་བ་གང་ལ་དགེ་སློང་ཚུར་ཤོག་ཅེས་བྱ་བ་ཡོད་པ་དེ་ནི་དགེ་སློང་ཚུར་ཤོག་པའོ།། གང་ལ་ཁས་བླང་བར་བྱ་བ་དང༌། བྱེད་དུ་འཇུག་པ་ཙམ་ཁོ་ནས་རྫོགས་པར་བསྙེན་པར་འགྱུར་བ་སྟེ། སྨོན་ལམ་བཏབ་པའི་ཕྱིར་སློབ་དཔོན་ལ་སོགས་པ་ལ་མི་ལྟོས་པས་དེ་ཞེས་བྱ་བའི་ཐ་ཚིག་གོ །བཀའི་མཇུག་ཁོ་ནར་ཞེས་བྱ་བ་ནི་བཀའ་སྩལ་མ་ཐག་ཁོ་ནར་རོ། །སྣམ་སྦྱར་གྱོན་པའི་ལུས་ལྡན་ཞང༌། །ཞེས་བྱ་བ་ལ་སྣམ་སྦྱར་ཞེས་བྱ་བ་ནི་སྣམ་བུར་དྲས་ཤིང་སྦྱར་བའི་ཆོས་གོས་ཏེ། གང་གི་ལུས་ལ་དེ་གྱོན་པ་དེ་ནི་སྣམ་སྦྱར་གྱོན་པའི་ལུས་དང་ལྡན་པའོ། །མོད་ལ་དབང་པོ་རབ་ཞིར་གནས་གྱུར་ཏེ། །ཞེས་བྱ་བ་ནི་རབ་ཏུ་བྱུང་བའི་མོད་ལ་དབང་པོ་རྣམས་རབ་ཏུ་ཞི་བར་གནས་པར་གྱུར་པའོ། །དགོངས་པས་ཞེས་བྱ་བ་ནི་ཐུགས་ལ་དགོངས་པའོ། །དེ་དག་གིས་ཅི་ཞིག་དགོངས་པར་གྱུར་ཅེ་ན། དེའི་ལུས་གཟུགས་བཀབ་པར་འགྱུར་ཞེས་བྱ་བ་གསུངས་ཏེ། ལུས་གཟུགས་ཞེས་བྱ་བ་རང་བཞིན་དུ་གནས་པའི་ལུས་ཀྱི་གནས་སྐབས་སོ། །
དེ་བཀབ་པ་ནི་འགེབས་ཤིང་གཡོགས་པར་བྱེད་པ་སྟེ། ཆ་ལུགས་སོ། །ཆ་ལུགས་དེ་དང་ལྡན་པར་གྱུར་ཅེས་བྱ་བའི་ཐ་ཚིག་གོ །གྲོང་གི་བྱང་ཕྱོགས་ཞེས་བྱ་བ་ནི་གྲོང་ནས་ཧ་ཅང་མི་རིང་བའི་བྱང་ཕྱོགས་ལོགས་ཀྱི་ངོས་ནའོ། །ཉོན་མོངས་པར་འགྱུར་ཞེས་བྱ་བ་ནི་ཕོངས་པར་འགྱུར་བའོ། །ཐོས་པ་ཉུང་བ་ཞེས་བྱ་བ་ནི་བསྟན་བཅོས་ཉུང་དུ་ཐོས་པའོ། །ཐོས་པ་ཉུང་དུ་དང་ལྡན་པ་ཞེས་བྱ་བ་ནི་བསྟན་བཅོས་ཇི་ལྟར་ཐོས་པ་བཞིན་མ་བསམས་པ་སྟེ། མངོན་པར་བརྩོན་པར་མ་བྱས་ཞེས་བྱ་བའི་ཐ་ཚིག་གོ །གྲོང་ཚིགས་ཞེས་བྱ་བ་ནི་གྲོང་གི་ཕྱོགས་སོ། །མི་རྟག་པའི་འདུ་ཤེས་ཞེས་བྱ་བ་ནི་འདུ་བྱེད་ཐམས་ཅད་མི་རྟག་གོ་ཞེས་བྱ་བར་ཞུགས་པ་བསམ་གཏན་གྱི་དངོས་གཞིའི་ས་པའི་འདུ་ཤེས་སོ། །མི་རྟག་པ་ལ་སྡུག་བསྔལ་བའི་འདུ་ཤེས་ཞེས་བྱ་བ་ནི་ཟག་པ་དང་བཅས་པ་མི་རྟག་པ་གང་ཡིན་པ་དེ་སྡུག་བསྔལ་བའོ་ཞེས་བྱ་བ་བསམ་གཏན་གྱི་དངོས་གཞིའི་སའི་འདུ་ཤེས་སོ། །སྡུག་བསྔལ་བ་ལ་བདག་མེད་པའི་འདུ་ཤེས་ཞེས་བྱ་བ་ནི་ཟག་པ་དང་བཅས་པ་སྡུག་བསྔལ་གང་ཡིན་པ་དེ་ལ་རང་དབང་མེད་དོ་ཞེས་བྱ་བར་འདུ་ཤེས་པ་བསམ་གཏན་གྱི་དངོས་གཞིའི་སའི་འདུ་ཤེས་སོ། །ཟས་ལ་མི་མཐུན་པའི་འདུ་ཤེས་ཞེས་བྱ་བ་ནི་ཟས་ལ་མི་ཕྱོགས་པའི་འདུ་ཤེས་སོ། །འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་ཞེས་བྱ་བ་ནི་འཇིག་རྟེན་གསུམ་པོ་དག་ལ་མི་ཕྱོགས་པའི་འདུ་ཤེས་སོ། །ཉེས་དམིགས་ཞེས་བྱ་བ་ནི་ཡོངས་སུ་གྱུར་པའི་ཉེས་པའོ། །སྤོང་བ་ཞེས་བྱ་བ་ནི་ཞེ་སྡང་ལ་སོགས་པ་ཉོན་མོངས་པ་དང་ཉེ་བའི་ཉོན་མོངས་པ་འགོག་པའོ། །འདོད་ཆགས་དང་བྲལ་བ་ཞེས་བྱ་བ་ནི་འདོད་ཆགས་འགོག་པའོ། །འགོག་པ་ཞེས་བྱ་བ་ནི་གཟུགས་ལ་སོགས་པ་སྤོང་བའོ། །ཤི་བ་ཞེས་བྱ་བ་ནི་ཚེའི་འདུ་བྱེད་འགག་པའོ། །མི་སྡུག་པ་ཞེས་བྱ་བ་ནི་རུས་པའི་ཀེང་རུས་ལ་དམིགས་པའི་འདུ་ཤེས་སོ། །རྣམ་པར་བསྔོས་པ་ཞེས་བྱ་བ་ནི་ལུས་རུལ་ཞིང་སྔོན་པོར་གྱུར་པའོ། །རྣམ་པར་རྣགས་པ་ཞེས་བྱ་བ་ནི་རྣག་འཛག་པའོ། །རྣམ་པར་བམ་པ་ཞེས་བྱ་བ་ནི་སྐྲངས་ཤིང་བསྔོས་པའོ། །རྣམ་པར་འབུས་གཞིགས་པ་ཞེས་བྱ་བ་ནི་སྲིན་བུས་གཞིགས་པའོ། །རྣམ་པར་ཟོས་པ་ཞེས་བྱ་བ་ནི་ཤ་བར་
བར་དུ་ཟོས་པའོ། །རྣམ་པར་དམར་བ་ཞེས་བྱ་བ་ནི་དམར་བའི་རྣམ་པའོ། །རྣམ་པར་འཐོར་བ་ཞེས་བྱ་བ་ནི་ཡན་ལག་རྣམ་པར་འཐོར་བའོ། །རུས་གོང་གི་འདུ་ཤེས་ཞེས་བྱ་བ་ནི་ཐོད་པ་ལ་སོགས་པ་ལ་དམིགས་པའི་འདུ་ཤེས་སོ། །སྟོང་པ་ཉིད་དུ་སོ་སོར་རྟོག་པའི་འདུ་ཤེས་ཞེས་བྱ་བ་ནི་འགྲོ་བ་ལ་རྟོག་པའི་ཆོས་ཀྱི་བདག་ཉིད་དང་གང་ཟག་གི་བདག་ཉིད་ཀྱིས་སྟོང་བར་སེམས་པར་བསམ་གཏན་གྱི་དངོས་གཞིའི་སའི་འདུ་ཤེས་སོ། །བསམ་གཏན་དང་པོ་ཞེས་བྱ་བ་ནི་རྟོག་པ་དང་བཅས་ཤིང་དཔྱོད་པ་དང་བཅས་པའོ། །གཉིས་པ་ཞེས་བྱ་བ་ནི་རྟོག་པ་མེད་ཅིང་དཔྱོད་པ་མེད་པའོ། །གསུམ་པ་ཞེས་བྱ་བ་ནི་དགའ་བ་མེད་ཅིང་བདེ་བའོ། །བཞི་པ་ཞེས་བྱ་བ་ནི་སྡུག་བསྔལ་ཡང་མེད་ཅིང༌། བདེ་བ་ཡང་མེད་པའོ། །བྱམས་པ་ཞེས་བྱ་བ་ནི་ཀྱེ་མ་སེམས་ཅན་རྣམས་བདེ་བར་གྱུར་ཅིག་ཅེས་མོས་པ་ལས་བྱུང་བ་བསམ་གཏན་གྱི་དངོས་གཞིའི་ས་པའི་ཞེ་སྡང་མེད་པ་སྟེ། མཛའ་བཤེས་དག་ལས་བྱུང་བའི་ཕྱིར་རོ། །སྙིང་རྗེ་ཞེས་བྱ་བ་ནི་ཀྱེ་མ་སེམས་ཅན་རྣམས་ནི་སྡུག་བསྔལ་ལོ་ཞེས་བྱ་བར་མོས་པ་ལས་བྱུང་བ་བསམ་གཏན་གྱི་ས་པའི་ཞེ་སྡང་མེད་པའོ། །དགའ་བ་ཞེས་བྱ་བ་ནི་ཀྱེ་མ་སེམས་ཅན་རྣམས་དགའ་བར་གྱུར་ཅིག་ཅེས་མོས་པ་ལས་བྱུང་བ་བསམ་གཏན་གྱིས་པའི་ཡིད་བདེ་བའོ། །བཏང་སྙོམས་ཞེས་བྱ་བ་ནི་འདི་དག་ནི་སེམས་ཙམ་མོ་ཞེས་བྱ་བར་མོས་པ་ལས་བྱུང་བ་བསམ་གཏན་གྱིས་པའི་འདོད་པ་མེད་པའོ། །ནམ་མཁའ་མཐའ་ཡས་སྐྱེ་མཆེད་དང༌། རྣམ་ཤེས་མཐའ་ཡས་སྐྱེ་མཆེད་དང༌། ཅི་ཡང་མེད་པའི་སྐྱེ་མཆེད་ཅེས་བྱ་བ་ནི་ནམ་མཁའ་མཐའ་ཡས་སོ། །རྣམ་པར་ཤེས་པ་མཐའ་ཡས་སོ། །བདག་གི་གོང་ན་ཅུང་ཟད་ཀྱང་མེད་དོ་ཞེས་བྱ་བར་སྦྱར་བ་ལས་བྱུང་བའི་ཕུང་པོ་བཞི་པའོ། །འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཅེས་བྱ་བ་ནི་དེ་འདུ་ཤེས་བྱ་བ་མི་བྱེད་པའི་ཕྱིར་འདུ་ཤེས་ཀྱང་མ་ཡིན་ལ། རྫས་སུ་ཡོད་པའི་ཕྱིར་འདུ་ཤེས་མེད་པའང་མ་ཡིན་པས། འདུ་ཤེས་མེད་འདུ་ཤེས་མེད་མིན་གཙོ་ཆེ་བའི་ཕུང་པོ་བཞི་པའོ། །རྫུ་འཕྲུལ་གྱི་ཡུལ་ཞེས་བྱ་བ་ལ། རྫུ་འཕྲུལ་ཞེས་བྱ་བ་ནི་ནམ་མཁའ་ལ་འགྲོ་བ་དང་དངོས་པོ་དབྱུང་བ་དང༌། བསྒྱུར་བ་དང་བྱིན་གྱིས་བརླབ་པ་དང༌། ཀ་བ་ལ་སོགས་པ་
བསྒྲིབས་པ་ལ་འཇུག་པ་དང༌། འབྱུང་བའི་ཡོན་ཏན་ནི་རྫུ་འཕྲུལ་ཡིན་ནོ། །ཤེས་པ་གང་ལ་རྫུ་འཕྲུལ་གྱི་ཡུལ་ཡོད་པ་དེ་ནི་རྫུ་འཕྲུལ་གྱི་ཡུལ་དང་ལྡན་པ་དང༌། དངོས་གཞིའི་བསམ་གཏན་གྱི་ས་པའི་ཏིང་ངེ་འཛིན་ཏོ། །ལྷའི་རྣ་བ་ཞེས་བྱ་བ་ནི་ཏིང་ངེ་འཛིན་ལས་སྐྱེས་པའི་རྣ་བའོ། །སེམས་ཡོངས་སུ་ཤེས་པ་ཞེས་བྱ་བ་ནི་གཞན་གྱི་སེམས་ཤེས་པ་སྟེ། འདིས་སེམས་ཡོངས་སུ་ཤེས་པར་བྱེད་པའི་ཕྱིར་རོ། །སྔོན་གྱི་གནས་ཞེས་བྱ་བ་ནི་སྔོན་གྱི་སྐྱེ་བ་དྲན་པ་སྟེ། སྔོན་གྱི་གནས་ཤེས་པར་བྱེད་པའི་ཕྱིར་རོ། །འཆི་འཕོ་བ་དང་སྐྱེ་བ་ཞེས་བྱ་བ་ནི་ལྷའི་མིག་སྟེ། འཆི་འཕོ་དང་སྐྱེ་བ་མཐོང་བར་བྱེད་པའི་ཕྱིར་རོ། །ཟག་པ་ཟད་པ་ཞེས་བྱ་བ་ནི་ཟད་པ་ཤེས་པ་སྟེ། ཟག་པ་ཟད་པ་ཤེས་པར་བྱེད་པའི་ཕྱིར་རོ། །རྣམ་པར་ཐར་པ་བརྒྱད་ལ་བསམ་གཏན་པ་ཞེས་བྱ་བ་ལ། རྣམ་པར་ཐར་པ་བརྒྱད་ནི་གཟུགས་ཅན་གཟུགས་རྣམས་ལ་ལྟ་བ་དང༌། ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་རྣམས་ལ་ལྟ་བ་དང༌། སྡུག་པའི་རྣམ་པར་ཐར་པ་དང༌། གཟུགས་མེད་པའི་བཞི་དང༌། འགོག་པའི་སྙོམས་པར་འཇུག་པའོ། །དེ་དག་ལ་བསམ་གཏན་པ་ཞེས་བྱ་བ་ནི་གང་རྣམ་པར་ཐར་པ་བརྒྱད་པོ་དག་ལ་སྙོམས་པར་འཇུག་པའོ། །གཉིས་ཀའི་ཆ་ལས་རྣམ་པར་གྲོལ་བ་ཞེས་བྱ་བ་ནི་ཉོན་མོངས་པའི་སྒྲིབ་པ་དང༌། སྙོམས་པར་འཇུག་པའི་སྒྲིབ་པ་ལས་རྣམ་པར་གྲོལ་བ་གང་ཡིན་པའོ། །དབྱར་ཟླ་བ་འབྲིང་པོ་ཉ་ལ་ཞེས་བྱ་བ་ནི་དབྱར་ཟླ་བ་འབྲིང་པོ་ཚེས་བཅོ་ལྔ་པའོ། །དབྱར་ཉེ་བར་བསྒྲུབ་པའི་ཚེ་ཞེས་བྱ་བ་ནི་ཚེས་བཅུ་དྲུག་ལ་དབྱར་གནས་པར་ཁས་བླངས་པ་དང༌། ཉེ་བར་གནས་པ་སྟེ་ཚེས་བཅོ་ལྔའི་ཚེའོ། །སྟོན་ཟླ་འབྲིང་པོའི་ཟླ་བ་ཉ་ལ་ཞེས་བྱ་བ་ནི་སྟོན་ཟླ་འབྲིང་པོའི་ཚེས་བཅོ་ལྔ་ལའོ། །བདེ་བ་ལ་རེག་པ་ཞེས་བྱ་བ་ནི་བྱ་བའི་བྱེ་བྲག་སྟེ། དེར་བདེ་བ་དང་ཕྲད་ཅིང་རེག་པའི་ཕྱིར་རོ། །ཟང་ཟིང་ཅུང་ཟད་ཙམ་གྱི་ཕྱིར་ཞེས་བྱ་བ་ནི་ཟང་ཟིང་ཅུང་ཟད་ཙམ་གྱི་དོན་དུའང་ཟང་ཟིང་ཅུང་ཟད་ཙམ་གྱི་ཆེད་ལས་སོ། །མིའི་ཆོས་བླ་མ་ཞེས་བྱ་བ་ནི་འདོད་པའི་ཁམས་ལས་བླ་མ་སྟེ། གཟུགས་དང་གཟུགས་མེད་པ་ན་སྤྱོད་པ་དང་ཟག་པ་མེད་པའི་ཡོན་ཏན་ནོ། །མེད་ལ་ཞེས་བྱ་བ་ནི་མངོན་དུ་མ་
གྱུར་པའམ་མི་སྲིད་པའོ། །དེ་བཞིན་དུ་ཞེས་བྱ་བ་ནི། མ་ཐོབ་པའོ། །རུང་ངམ་ཞེས་བྱ་བ་ནི་རིགས་སམ་ཞེས་བྱ་བའོ། །དོན་ཉུང་ངུ་དག་ཅེས་བྱ་བ་ནི་འདོད་པ་ཆུང་བ་དག་གོ །ཡོད་ཅིང་ཞེས་བྱ་བ་ནི་ད་ལྟར་བྱུང་བ་ཉིད་དུ་ཡོད་པའོ། །སྲིད་པ་ཞེས་བྱ་བ་ནི་འཇིག་རྟེན་གྱིས་ཉེ་བར་དམིགས་པའོ།། རྐུན་པོ་ཞེས་བྱ་བ་ནི་མ་གྲགས་པའོ། །རྐུན་པོ་ཆེན་པོ་ཞེས་བྱ་བ་ནི་གྲགས་པ་སྟེ། ཤིན་ཏུ་ཐ་ཆད་པ་ཡིན་པའི་ཕྱིར་རོ། །ཁྱིམ་འབུགས་པ་ཞེས་བྱ་བ་ནི་རྩིག་པ་འབིགས་པའོ། །མདུད་པ་འགྲོལ་བ་ཞེས་བྱ་བ་ནི་གཅན་འདྲལ་བའམ་སྒོ་གཏན་འབྱེད་པ་ལ་སོགས་པས་སྒོ་འབྱེད་པའོ། །རིལ་གྱིས་འཕྲོག་པ་ཞེས་བྱ་བ་ནི་མ་ལུས་པར་འཕྲོག་པའོ། །ལམ་སྒུགས་ཤིང་འདུག་པ་ཞེས་བྱ་བ་ནི་ལམ་འགོག་པར་བྱེད་པའམ། གསེབ་ལམ་ལ་འཛོམ་པར་བྱེད་པའོ། །མེ་ག་ཏོང་བ་ཞེས་བྱ་བ་ནི་ཁྱིམ་དུ་མེ་གཏོང་བར་བྱེད་པའོ། །ལམ་ལ་འཇོག་པར་བྱེད་པ་ཞེས་བྱ་བ་ནི་འགྲོན་པོ་འཇོག་པར་བྱེད་པ་ཞེས་བྱ་བའི་ཐ་ཚིག་གོ །རྒྱལ་པོའི་མཛོད་རྐུ་བ་ཞེས་བྱ་བ་ནི་རྒྱལ་པོའི་ཕྱག་མཛོད་རྐུ་བར་བྱེད་པའོ། །གཞན་ཡང་ཞེས་བྱ་བ་ནི་རྣམ་པ་གཞན་ཡང་ཞེས་བྱ་བའི་ཐ་ཚིག་གོ །གཞལ་བར་ཞེས་བྱ་བ་ནི་འབྲས་ཐུག་པོ་ཆེ་དང་ཏིལ་དང་གྲོ་ལ་སོགས་པ་བྲེའུ་ཆུང་ལ་སོགས་པས་གཞལ་བར་བྱ་བའོ། །འཚོ་བར་བྱེད་པ་ཞེས་བྱ་བ་ནི་བདག་ཉིད་འཚོ་བར་བྱེད་པའོ། །ཁྱིམ་མི་གསོ་བར་བྱེད་པ་ཞེས་བྱ་བ་ནི་ཁྱིམ་གྱི་བཟའ་མི་གསོ་བར་བྱེད་ཅེས་བྱ་བའི་ཐ་ཚིག་གོ །རྐུན་པོ་ཆེན་པོ་གསུམ་ཞེས་བྱ་བ་ལ། དང་པོ་ནི་འཁོར་མང་པོའི་ཕྱིར་རྐུན་པོ་ཆེན་པོ་ཡིན་ནོ། །གཉིས་པ་ནི་ཞིང་ཆེན་པོ་ལ་ཉེས་པ་བྱེད་པའི་ཕྱིར་རྐུན་པོ་ཆེན་པོ་ཡིན་ནོ། །གསུམ་པ་ནི་དོན་ཆེན་པོ་ཉམས་པར་བྱེད་པའི་ཕྱིར་རྐུན་པོ་ཆེན་པོ་ཡིན་ནོ། །ལྷ་དང་བཅས་པ་སྟེ་ཞེས་བྱ་བ་ནི་དབང་པོ་དང་བཅས་པ་སུམ་ཅུ་རྩ་གསུམ་པ་མན་ཆད་ན་དབང་པོ་གཙོ་བོ་ཡིན་པའི་ཕྱིར་རོ། །བདུད་དང་བཅས་པ་ཞེས་བྱ་བ་ནི་བདུད་སྡིག་ཅན་དང་བཅས་པ་སྟེ། འདོད་པའི་ཁམས་ན་བདུད་གཙོ་བོ་ཡིན་པའི་ཕྱིར་རོ། །ཚངས་པ་དང་བཅས་པ་ཞེས་བྱ་བ་ནི་ཚངས་པ་ཆེན་པོ་དང་བཅས་པ་སྟེ། ཚངས་པའི་འཇིག་རྟེན་མན་ཆད་འཁོར་དང་ལྡན་པ་རྣམས་ཀྱི་ནང་ན་ཚངས་པ་གཙོ་བོ་ཡིན་པའི་ཕྱིར་རོ། །དགེ་སྦྱོང་
དང་བྲམ་ཟེར་བཅས་པའི་སྐྱེ་དགུ་ཞེས་བྱ་བ་ནི་མི་རྣམས་ཀྱི་ནང་ན་དགེ་སྦྱོང་དང་བྲམ་ཟེ་གཙོ་བོ་ཡིན་པའི་ཕྱིར་རོ། །ལྷ་དང་མིར་བཅས་པ་ཞེས་བྱ་བ་ནི་འགྲོ་བ་ལྔར་སྐྱེས་པའི་སེམས་ཅན་རྣམས་ཀྱི་ནང་ན་ལྷ་དང་མི་རྣམས་འབའ་ཞིག་བདེན་པ་རྣམས་ཀྱི་སྣོད་ཡིན་གྱི་གཞན་དག་མ་ཡིན་པའི་ཕྱིར་རོ། །དེ་ནི་ཚངས་བཅས་འཇིག་རྟེན་རྐུན་པོ་སྟེ། །ཞེས་བྱ་བ་ནི་གསུམ་པོ་དེ་ནི་མི་ཆོས་བླ་མ་ཉམས་པར་འདོད་པའི་ཕྱིར་ཆེས་རྐུན་པོ་ཉིད་ཡིན་པའོ། །ཚུལ་ཁྲིམས་འཆལ་བ་ཡིན་པར་བརྗོད་པར་བྱ་ཞེས་བྱ་བ་ནི་ཆོ་ག་ལ་སྐྱོན་ཆགས་པས་ཚུལ་ཁྲིམས་འཆལ་པ་སྟེ་རྐུན་པོ་དང་འདྲ་བར་བརྗོད་པར་བྱའོ། །མངོན་པར་མི་ཤེས་ཤིང་ཞེས་བྱ་བ་ནི་བསམ་གཏན་དང་གཟུགས་མེད་པའི་ས་པའི་ཤེས་པ་གང་ཟག་པ་དང་བཅས་པས་སོ། །ཡོངས་སུ་མི་ཤེས་པ་ཞེས་བྱ་བ་ནི་ཟག་པ་མེད་པས་སོ། །མཐའ་ཞེས་བྱ་བ་ནི་མཇུག་གི་མཐར་ཐུག་པ་སྟེ་མྱ་ངན་ལས་འདས་པའོ། །འཕགས་པའི་བྱེ་བྲག་ཐོབ་པ་ཞེས་བྱ་བ་ནི་ཟག་པ་ཟད་པ་ཐོབ་པའོ། །ཤེས་པ་ཞེས་བྱ་བ་ནི་རྗེས་སུ་མི་ཚོལ་བའི་ཤེས་རབ་བོ། །མཐོང་བའི་ཞེས་བྱ་བ་ནི་རྗེས་སུ་ཚོལ་བའི་ཤེས་རབ་བོ། །རེག་པར་སྤྱོད་པ་ཞེས་བྱ་བ་ནི་བདེ་བར་གནས་པའོ། །གསོབ་ཅེས་བྱ་བ་ནི་དོན་དེས་སྟོང་པའོ། །གསོག་ཅེས་བྱ་བ་ནི་དོན་དེ་ས་བོན་གྱིས་སྟོང་པ་སྟེ། གྲིབ་མ་ཙམ་དང་ཡང་བྲལ་བའོ། །བརྫུན་པ་ཞེས་བྱ་བ་ནི་དེས་འདུ་ཤེས་པ་དང་ཡང་བྲལ་བའོ། །ཞི་གནས་ཀྱི་རྒྱུ་མཚན་ཞེས་བྱ་བ་ནི་ཏིང་ངེ་འཛིན་མ་གྲུབ་པའོ། །རང་གི་མཚན་ཉིད་འཛིན་པ་ཞེས་བྱ་བ་ནི་ཕྱོགས་གཅིག་པ་སྟེ། ལུས་ལ་སོགས་པའི་རང་གི་ངོ་བོ་ལ་དམིགས་པའི་ཕྱིར་རོ། །འཇིག་རྟེན་པའི་ཡིད་ལ་བྱེད་པས་ཞེས་བྱ་བ་ནི་འདོད་པས་སྤྱོད་པའི་བསམ་པ་ལས་བྱུང་བས་སོ། །རྣམ་པར་མནན་པས་ཞེས་བྱ་བ་ནི་བགགས་པས་སོ། །མངོན་པའི་ང་རྒྱལ་ཞེས་བྱ་བ་ནི་གྲིབ་མ་ཙམ་མཐོང་བ་ལ་ཡོན་ཏན་ཐོབ་པར་ང་རྒྱལ་བྱེད་པའོ། །མ་གཏོགས་སོ་ཞེས་བྱ་བ་ནི་མངོན་པའི་ང་རྒྱལ་ཅན་གྱིས་དོན་བརྫུན་པ་ཡང་དག་པའི་འདུ་ཤེས་ཀྱིས་རྗོད་པར་བྱེད་པ་ལ་བརྫུན་དུ་སྨྲ་བ་མེད་པས་ལྟུང་བ་མེད་དོ་ཞེས་གསུངས་པའི་ཕྱིར་དེ་མ་གཏོགས་སོ། །བསླབ་པ་འདོད་པ་ཞེས་བྱ་བ་ནི་བསླབ་པ་
དོན་དུ་གཉེར་བའི་ཡིད་དང་ལྡན་པའོ། །བསླབ་པ་ལ་གུས་པ་ཞེས་བྱ་བ་ནི་བསླབ་པ་དག་ལ་རྫས་ཀྱི་བློ་དང་ལྡན་པའོ། །བསླབ་པ་ལ་ཡོ་བྱད་བསྙུངས་པ་ཞེས་བྱ་བ་ནི་བསླབ་པ་ལ་འདུ་འཛི་གཞན་བསྙུངས་ཏེ་རྗེས་སུ་བསྒྲུབ་པའོ། །དེ་དང་རྗེས་སུ་མཐུན་པ་ཞེས་བྱ་བ་ནི་དེ་དང་རྗེས་སུ་འདྲ་བའོ། །དེའི་ཤས་ཆེ་བ་ཞེས་བྱ་བ་ནི་དེའི་འབྲས་བུ་དང་ལྡན་པའོ། །དེ་དང་འཚམ་པ་ཞེས་བྱ་བ་ནི་འདྲ་བའོ། །རྗེས་སུ་གནང་བ་མ་གཏོགས་སོ། །མངོན་པར་མི་ཤེས་པ་དང་ཡོངས་སུ་མི་ཤེས་པ་ཞེས་བྱ་བ་ནི་གཟུགས་ལ་སོགས་པ་མི་རྟག་པ་དང་སྟོང་པ་ལ་སོགས་པའི་རྣམ་པ་དག་གིས་མ་རྟོགས་པ་ཡིན་པར་ཤེས་པར་བྱ་བའོ། །སྒྲིབ་པ་ལྔ་པོ་ཞེས་བྱ་བ་ནི་འདོད་པ་ལ་འདུན་པ་དང༌། གནོད་སེམས་དང༌། རྨུགས་པ་དང༌། གཉིད་དང༌། རྒོད་པ་དང༌། འགྱོད་པ་དང༌། ཐེ་ཚོམ་སྟེ་སེམས་ཀྱི་སྒྲིབ་པ་ཡིན་པའི་ཕྱིར་རོ། །དགེ་སྦྱོང་གི་ཚུལ་གྱི་འབྲས་བུ་ཞེས་བྱ་བ་ལ། དགེ་སྦྱོང་གི་ཚུལ་ཞེས་བྱ་བ་ནི་འཕགས་པའི་ལམ་སྟེ་དེ་དག་དེའི་འབྲས་བུ་ཡིན་པའི་ཕྱིར་རོ། །སྡུག་བསྔལ་ཤེས་པ་ཞེས་བྱ་བ་ནི་མི་རྟག་པ་དང༌། སྡུག་བསྔལ་བ་དང༌། སྟོང་པ་དང༌། བདག་མེད་པའི་རྣམ་པ་དག་གིས་སྐྱེས་པ་ཟག་པ་མེད་པའི་ཤེས་པའོ།། ཀུན་འབྱུང་བ་ཞེས་བྱ་བ་ནི་རྒྱུ་དང༌། ཀུན་འབྱུང་དང༌། རབ་ཏུ་སྐྱེ་བ་དང༌། རྐྱེན་གྱི་རྣམ་པ་དག་གིས་སྐྱེས་པ་ཟག་པ་མེད་པའི་ཤེས་པའོ། །འགོག་པའི་ཤེས་པ་ཞེས་བྱ་བ་ནི་འགོག་པ་དང༌། ཞི་བ་དང༌། གྱ་ནོམ་པ་དང༌། ངེས་པར་འབྱུང་བའི་རྣམ་པ་དག་གིས་སྐྱེས་པ་ཟག་པ་མེད་པའི་ཤེས་པའོ། །ལམ་ཤེས་པ་ཞེས་བྱ་བ་ནི་ལམ་དང༌། རིགས་པ་དང༌། སྒྲུབ་པ་དང༌། ངེས་པར་འབྱིན་པའི་རྣམ་པ་དག་གིས་སྐྱེས་པ་ཟག་པ་མེད་པའི་ཤེས་པའོ། །སྡུག་བསྔལ་མཐོང་བ་ཞེས་བྱ་བ་ནི་འབྲས་བུར་གྱུར་པ་ཉེ་བར་ལེན་པའི་ཕུང་པོ་ལྔ་པོ་དག་གོ །ཀུན་འབྱུང་བ་མཐོང་བ་ཞེས་བྱ་བ་ནི་རྒྱུར་གྱུར་པ་ཉེ་བར་ལེན་པའི་ཕུང་པོ་ལྔ་པོ་དག་གོ །འགོག་པ་མཐོང་བ་ཞེས་བྱ་བ་ནི་མྱ་ངན་ལས་འདས་པའོ། །ལམ་མཐོང་བ་ཞེས་བྱ་བ་ནི་འཕགས་པའི་ལམ་ཡན་ལག་བརྒྱད་པའོ། །འདི་མཐོང་བ་ཞེས་བྱ་བ་ལ་སོགས་པས་ནི་འདིར་སྒྲ་ཐོས་པ་དང་ད་ལྟར་འགྲོ་བ་
ལ་སོགས་པ་དག་ཀྱང་མཐོང་བ་ཉིད་དུ་གསུངས་ཏེ། མངོན་སུམ་དུ་གྱུར་པ་ཉིད་ཀྱིས་མཐོང་བ་དང་འདྲ་བའི་ཕྱིར་རོ། །ལྷ་རྣམས་ཞེས་བྱ་བ་ནི་བརྒྱ་བྱིན་ལ་སོགས་པའོ། །ཀླུ་རྣམ་ཞེས་བྱ་བ་ནི་ཀླུ་ཕྲ་མོ་རྣམས་སོ། །གནོད་སྦྱིན་རྣམས་ཞེས་བྱ་བ་ནི་ལྷའི་གནས་སུ་མཆོད་པར་བྱ་བ་གཏོར་མ་ལེན་པ་རྣམས་སོ། །ནམ་མཁའ་ལྡིང་རྣམས་ཞེས་བྱ་བ་ནི་འདབ་བཟང་རྣམས་སོ། །དྲི་ཟ་རྣམས་ཞེས་བྱ་བ་ནི་ལྷ་རྣམས་ཀྱི་གླུ་དང་རོལ་མོ་བྱེད་པ་རྣམས་སོ། །མི་འམ་ཅི་རྣམས་ཞེས་བྱ་བ་ནི་དུད་འགྲོ་མིའི་རྣམ་པ་ཅན་ཤིན་ཏུ་གཟུགས་བཟང་པོ་དང་ལྡན་པ་རྣམས་སོ། །ལྟོ་འཕྱེ་ཆེན་པོ་རྣམས་ཞེས་བྱ་བ་ནི་ཀླུ་ཆེན་པོ་སྟེ། དགའ་བོ་དང་ཉེ་དགའ་ལ་སོགས་པ་ཀླུའི་བདག་པོ་རྣམས་སོ། །ཡི་དགས་རྣམས་ཞེས་བྱ་བ་ནི་རྐང་པ་ཕྱིར་ལྟ་བ་ལྟོགས་པ་རྣམས་སོ། །ཤ་ཟ་རྣམས་ཞེས་བྱ་བ་ནི་ཡི་དགས་ཀྱི་བྱེ་བྲག་སྟེ་ཤ་དང་ཁྲག་ཟ་བ་ནག་པོ་ཆེན་པོ་ལ་སོགས་པ་དག་གོ །གྲུལ་བུམ་རྣམས་ཞེས་བྱ་བ་ནི་ཡི་དགས་ཀྱི་རྣམ་པ་ཉིད་དེ། དེ་དག་གི་ཡན་ལག་གི་རྣམ་པ་འབྲས་བུ་བུམ་པའི་རྣམ་པ་འདྲ་བ་སྟེ་བུམ་རྣ་ལ་སོགས་པ་དག་གོ །སྲུལ་པོ་རྣམས་ཞེས་བྱ་བ་ནི་ཡི་དགས་ཀྱི་བྱེ་བྲག་གོ །ལུས་སྲུལ་པོ་རྣམས་ཞེས་བྱ་བ་ཡང་ཡི་དགས་ཀྱི་བྱེ་བྲག་ཉིད་དེ། ཐུང་ངུ་ལུས་དྲི་ང་བ་སེག་དང་རེ་ལྡེ་ལ་སོགས་པ་གྱོན་པ་དག་གོ །རྡུལ་ཁྲོད་ཀྱི་ཤ་ཟ་ཞེས་བྱ་བ་ནི་ཕྱག་དར་ཁྲོད་ཀྱི་འདྲེའམ་ཚུབ་མའི་ནང་ན་འདུག་པའི་འདྲེའོ། །བདག་ཀྱང་ལྷན་ཅིག་གནས་པར་བྱེད་ཅེས་བྱ་བ་ནི་ལྷན་ཅིག་ན་འདུག་པའོ། །དྲིས་ཞེས་བྱ་བ་ནི་གླེངས་པའོ། །མ་དྲིས་ཞེས་བྱ་བ་ནི་མ་གླེངས་པའོ། །འདུ་ཤེས་ཞེས་བྱ་བ་ནི་མཚན་མར་འཛིན་པའོ། །བསྒྱུར་ཞེས་བྱ་བ་ནི་སྦས་པའོ། །བཟོད་པ་ཞེས་བྱ་བ་ནི་རང་གི་བསམ་པས་བྱས་པའི་ཡིད་ཆེས་པའོ། །འདོད་པ་ཞེས་བྱ་བ་ནི་གཞན་གྱིས་བསྟན་པས་བྱས་པའི་ཡིད་ཆེས་པའོ། །བློ་གྲོས་ཞེས་བྱ་བ་ནི་སྣ་དང་ལྕེ་དང་ལུས་ཀྱི་རྣམ་པར་ཤེས་པ་དང་ལྷན་ཅིག་སྐྱེས་པའི་ཤེས་རབ་བོ། །རྟོག་པ་ཞེས་བྱ་བ་ནི་རྟགས་ལས་སྐྱེས་པའི་ཤེས་རབ་བོ། །ལྟ་བ་ཞེས་བྱ་བ་ནི་མིག་གི་རྣམ་པར་ཤེས་པ་དང་རྟགས་ཅན་གྱི་ཡུལ་དང་ལྡན་པའི་ཡིད་ཀྱི་རྣམ་པར་ཤེས་པའོ། །ལྷ་རྣམས་མཐོང་ཞེས་བྱ་བ་ལ་སོགས་པ་ནི་མངོན་པར་ཤེས་
པའི་འབྲས་བུ་ཡིན་པའི་ཕྱིར་དེ་སྨྲ་བ་ཡང་མི་ཆོས་བླ་མ་སྨྲ་བ་ཉིད་ཡིན་ནོ། །རྡུལ་ཁྲོད་ཀྱི་ཤ་ཟ་རྣམས་ནི་ཕལ་ཆེར་ཐ་མལ་པའི་དབང་པོས་གཟུང་བར་བྱ་བ་ཡིན་པའི་ཕྱིར་དེ་དག་མཐོང་བ་ལ་སོགས་པར་སྨྲ་བ་ནི་སྦྱོར་བར་གྱུར་པ་ཡིན་པའི་ཕྱིར་ཉེས་པ་སྦོམ་པོར་འགྱུར་བ་ཉིད་ཡིན་ནོ། །གྲོང་མེད་པ་ཞེས་བྱ་བ་ནི་གྲོང་དང་བྲལ་བའོ། །འཚེ་བར་མི་བྱེད་པ་ནི་འཕགས་པའི་ཆོས་རྣམས་ཡིན་པའི་ཕྱིར་རོ། །ཁས་ལེན་པ་ཡང་མིའི་ཆོས་ལས་བླ་མ་སྨྲས་པ་ཉིད་ཡིན་ནོ། །སྟན་ཁྲ་བོ་ཉེ་བར་བཀྲ་བ་ཞེས་བྱ་བ་ཡང་དེ་བཞིན་དུ་ཤེས་པར་བྱའོ། །ཁྲ་བོ་ཞེས་བྱ་བ་ནི་རྒྱ་ཆེ་བ་ཉིད་ཀྱིས་སེ། །ཉེ་བར་བཀྲ་བ་ཞེས་བྱ་བ་ནི་ཆུང་ངུ་ཉིད་ཀྱིས་སོ། །ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ནི་འཇིག་རྟེན་པའི་ལམ་ཡིན་པས་མིའི་ཆོས་བླ་མ་མ་ཡིན་པའི་ཕྱིར་དེ་སྨྲ་བ་ནི་སྦྱོར་བ་ཉིད་ཡིན་ནོ། །བདག་ཉིད་ལ་ཉེ་བར་སྟོན་པས་ཞེས་བྱ་བ་ནི་ལུས་ཀྱིས་སམ་ཡིད་ཀྱིས་ཡིན་གྱི་ཚིག་ནི་མ་ཡིན་པར་ཤེས་པར་བྱའོ། །ཚིག་མེད་པའི་ཕྱིར་ནི་བདག་ཉིད་ཀྱི་ཡུལ་ཡིན་ཏེ། སྨྲ་བ་མེད་པའི་ཕྱིར་ན་སྨད་དོ། །ལིཙྪ་བཱི་ཞེས་བྱ་བ་ནི་གོ་བའི་རིགས་ལ་སོགས་པ་དང་འདྲ་བར་རིགས་ཀྱི་མིང་ཡིན་ནོ། །མཆོག་གསུམ་པ་ཞེས་བྱ་བ་ལ། མཆོག་གཅིག་ནི་བཅོམ་ལྡན་འདས་སོ། །གཉིས་པ་ནི་འཕགས་པ་ཤཱ་རིའི་བུའོ། །གསུམ་པ་ནི་འཕགས་པ་མཽད་གལ་གྱི་བུ་ཆེན་པོའོ། །མངོན་དུ་མཆི་ན་ཞེས་བྱ་བ་ནི་མངོན་སུམ་དུ་འགྲོ་བའོ། །བ་སིསྠི་རིའི་རིགས་ཞེས་བྱ་བ་ནི་དྲང་སྲོང་བ་སིསྠི་རིའི་རིགས་རྒྱུད་དོ། །མགུ་བ་ཞེས་བྱ་བ་ནི་འཇིགས་པ་མེད་པའོ། །ཕམ་པ་ཞེས་བྱ་བ་ནི་ཟིལ་གྱིས་མནན་པ་སྟེ་སྙིང་ཚོགས་གཙོ་བོ་དག་སྐྱེལ་བའི་ཕྱིར་རོ། །སྐྲག་པ་ཞེས་བྱ་བ་ནི་བྲེད་པ་སྟེ་བསྟན་པ་ཉམས་པའི་ཕྱིར་རོ། །བཅོམ་པ་ཞེས་བྱ་བ་ནི་གཡུལ་ངོ་ནས་ཕྱིར་ལོག་པའོ། །གཞན་རྒྱལ་བ་ཞེས་བྱ་བ་ནི་གཡུལ་གྱི་སར་རབ་ཏུ་ཉམས་པའོ། །རྒྱབ་ཀྱིས་ཕྱོགས་པར་བྱ་སྟེ་ཞེས་བྱ་བ་ནི་འབྲོས་པར་བརྩམས་པ་སྟེ། གཡུལ་གྱི་ས་ནས་ཕྱིར་དེའི་རྒྱབ་བསྟན་ཞེས་བྱ་བའི་ཐ་ཚིག་གོ །རྒྱ་མོའམ་མཆིལ་པས་དབྱུང་བས་ཞེས་བྱ་བ་ནི་ཁ་ཅིག་ནི་རྒྱ་མོས་འབྱིན་པར་བྱེད། ཁ་ཅིག་ནི་མཆིལ་པས་འབྱིན་ཞེས་བྱ་བའི་ཐ་ཚིག་གོ །འཆི་བའི་ཤུགས་ཀྱིས་བརྡོས་པ་ཞེས་བྱ་བ་ནི་འཆི་བའི་ཕྱིར་བརྟུལ་བའོ། །སྦྲེངས་ནས་ཞེས་
བྱ་བ་ནི་བསྐོར་ཏེ་སྲུང་བར་བྱེད་ཅེས་བྱ་བའི་ཐ་ཚིག་གོ །འཚོ་བ་ཞེས་བྱ་བ་ནི་སྟོབས་དང་ལྡན་པའོ། །ཀུན་ཤེས་པ་ཞེས་བྱ་བ་ནི་ཁྱད་པར་དུ་འཕགས་པའི་ཤེས་པའོ། །བརྡ་སྤྲོད་པ་ཞེས་བྱ་བ་ནི་དེ་སྟོན་པའོ། །ཆོས་ཀྱི་དབང་དུ་བྱས་པ་ཞེས་བྱ་བ་ནི་ཆོས་ཀྱི་དབང་དུ་བྱས་པ་ཡིན་གྱི། ཟང་ཟིང་གི་དབང་དུ་བྱས་པ་མ་ཡིན་ཞེས་བྱ་བའི་ཐ་ཚིག་གོ །འདྲུམས་པ་ལྟུང་བས་ཞེས་བྱ་བ་ནི་ཆེས་རལ་བ་ལྟུང་བར་བྱེད་པས་སོ། །འདུ་ཤེས་དེ་ལྟ་བུས་ཞེས་བྱ་བ་ནི་དང་པོར་རྒྱལ་བའི་འདུ་ཤེས་སོ། །ཇི་ལྟར་ཡངས་པ་ཅན་དག་གི་ཞེས་བྱ་བ་ལ་སོགས་པ་ནི་ཡངས་པ་ཅན་དག་ལ་ཇི་ལྟར་འགྱུར་བ་དེ་བཞིན་དུ་བཟློག་པ་སྟེ་རྒྱལ་པོ་ཁབ་པ་ཡང་དེ་ལྟར་གྱུར་པའི་འདྲེས་ཅིག་ཡོང་ཀློག་པར་བྱེད་པ་ཁ་ཅིག་གིས་མདོར་བསྡུས་པའི་ཚིག་ཡིན་ཏེ། གང་གཱ་རྒལ་ན་ཡངས་པ་ཅན་པ་ཕམ་ལ། ཡུལ་སྤོང་བྱེད་དུ་འོངས་ན་མ་སྐྱེས་དགྲ་ཕམ་པ་ཞེས་བྱ་བའི་ཐ་ཚིག་གོ །སྒྲ་ཕྱུང་ནས་ཞེས་བྱ་བ་ནི་འབྲུ་མི་གསལ་བར་གྲག་པའོ། །ས་རྒྱས་བཏབ་ཅེས་བྱ་བ་ནི་ཆར་བའི་ཐིགས་པས་བཀྲ་བར་གྱུར་པའོ། །ཆར་ཅུང་ཟད་ཀྱང་ཕེབས་པ་ཞེས་བྱ་བ་ནི་ཆར་པ་ཅུང་ཟད་འབེབས་པའོ། །རྒྱུ་ལྔ་དང་རྐྱེན་ལྔ་ཞེས་བྱ་བ་ལ། ཉེ་བའི་བྱེད་རྒྱུ་ནི་རྒྱུའོ། །བརྒྱུད་པའི་བྱེད་རྒྱུ་ནི་རྐྱེན་ནོ། །མི་མཉམ་པའི་རླུང་ཞེས་བྱ་བ་ནི་འཁྲུག་ལོང་བྱེད་པའི་ཤུགས་དང་ལྡན་པའོ། །དཎྜ་ཀའི་དགོན་པ་དག་ཅེས་བྱ་བ་ནི་ཤིང་ལ་སོགས་པའི་ནགས་དག་གོ །ཀ་ལིཾ་ཀའི་དགོན་པ་དག་ཅེས་བྱ་བ་ནི་གང་ན་ཀ་ལིཾ་ཀ་ནས་བྱུང་བའི་གྲང་པོ་ཆེ་འདུག་པའོ། །མ་ཏང་གའི་དགོན་པ་དག་ཅེས་བྱ་བ་ནི་གང་ན་གདོལ་པའི་རིགས་མ་ཏང་ཀ་ཞེས་བྱ་བ་རི་ཁྲོད་པ་དག་འདུག་པའོ། །འབེབས་པར་བྱེད་ཅེས་བྱ་བ་ནི་འཛག་པར་བྱེད་པའོ། །ལྷའི་བུ་ཆར་གྱི་ཤུགས་ཅན་དག་ཅེས་བྱ་བ་ནི་ཆར་ལ་དབང་བ་དག་གོ །རབ་ཏུ་མྱོས་པ་ཞེས་བྱ་བ་ནི་སེམས་ཀྱིས་མི་གཏོང་པའོ། །བག་མེད་པ་ཞེས་བྱ་བ་ནི་ལུས་དང་ངག་གིས་མི་གཏོད་པའོ། །ལྷ་ཞེས་བྱ་བ་ནི་ལྷའི་ཕྱོགས་སུ་གཏོགས་པ་ཀླུ་ཆེན་པོའོ། །ཆོས་མ་ཡིན་པའི་འདོད་ཆགས་ཞེས་བྱ་བ་ནི་སྤྱད་བར་རུང་བ་མ་ཡིན་པའི་འདོད་ཆགས་ཏེ། ཕ་མ་ལ་སོགས་པ་ལ་འཇུག་པའི་ཕྱིར་རོ། །འདོད་པ་དཀའ་བ་ཞེས་བྱ་བ་ནི་འདོད་པ་ཆེན་པོ་སྟེ།
སྲོག་བཏང་བ་ལ་སོགས་པས་ནོར་སྒྲུབ་པའི་ཕྱིར་རོ། །ཆོས་ལོག་པ་ཞེས་བྱ་བ་ནི་ལོག་པར་ལྟ་བའོ། །གཅེར་བུ་པ་ཞེས་བྱ་བ་ནི་མུ་སྟེགས་གཅེར་བུ་པའོ། །རྟོག་གེའི་ཤེས་པ་ཞེས་བྱ་བ་ནི་རྟོགས་པར་བྱེད་པ་མཚན་མའི་བསྟན་བཅོས་སོ། །ཚར་གཅད་ནས་ཞེས་བྱ་བ་ནི་སྨད་ནས་སོ། །ཤེས་པ་མཚོ་ལ་འཁྲུལ་པ་ཡོད་ཀྱི་ཞེས་བྱ་བ་ནི་ཤེས་པ་རྒྱ་མཚོ་ལྟ་བུ་ལ་ནོར་པ་ཡོད་ཅེས་བྱ་བའི་ཐ་ཚིག་གོ །སྐྱོབ་པ་ཞེས་བྱ་བ་ནི་བསྟན་པ་སྟེ། རྗེ་དང་བདེན་པ་གསུངས་པ་ཞེས་བྱ་བའི་ཐ་ཚིག་གོ །བཞི་པོ་འདི་དག་ནི་ཞེས་བྱ་བ་ལ་སོགས་པ་ལ། བསམ་པར་མི་བྱ་བ་དག་ཡིན་ཏེ་ཞེས་བྱ་བ་ནི་ཆོས་ཉིད་ཀྱིས་མངོན་པར་ཤེས་པར་མི་བྱ་བ་དང༌། རྣམ་པར་དཔྱད་པར་མི་བྱ་བ་དག་ཡིན་པའོ། །རྨོངས་པ་ཞེས་བྱ་བ་ནི་ཤེས་པ་མུན་པར་འགྱུར་བའོ། །བདག་ལ་སེམས་པ་ཞེས་བྱ་བ་ནི་བདག་གང་ཡིན་གང་ནས་འོངས་ཞེས་བྱ་བ་ལ་སོགས་པ་གང་ཟག་བདག་ལ་སོ་སོར་རྟོག་པའོ། །འཇིག་རྟེན་ལ་སེམས་པ་ཞེས་བྱ་བ་ནི་གང་ཟག་གཞན་ལ་སོ་སོར་རྟོག་པའོ། །ལས་ཀྱི་རྣམ་པར་སྨིན་པ་ཞེས་བྱ་བ་ནི་ཇི་ལྟར་འདི་དག་འགགས་ནས་ལས་ཀྱི་རྣམ་པར་སྨིན་པ་སྐྱེ་བར་འགྱུར་ཞེས་བྱ་བ་ལ་སོགས་པ་ལས་དང་འབྲས་བུ་ལ་སོ་སོར་རྟོག་པའོ། །སངས་རྒྱས་ཀྱི་ཡུལ་ཞེས་བྱ་བ་ནི་བཅོམ་ལྡན་འདས་ཀྱི་འཇིག་རྟེན་ལས་འདས་པའི་མཁྱེན་པ་ནི་ཅི་འདྲ། ཇི་ལྟར་མ་འོངས་པ་གཟིགས། ཇི་ལྟར་འདས་པ་གཟིགས། ཇི་ལྟར་བཏང་སྙོམས་སུ་མཛད། ཇི་ལྟར་ཐག་རིང་པོར་མྱུར་དུ་གཤེགས་ཞེས་བྱ་བ་ལ་སོགས་པ་ཐུན་མོང་མ་ཡིན་པའི་སངས་རྒྱས་ཀྱི་ཡུལ་ལ་སོ་སོར་རྟོག་པའོ། །དེ་ལ་དང་པོ་གཉིས་ནི་བདག་མེད་པ་དང༌། རྟེན་ཅིང་འབྲེལ་བར་འབྱུང་བ་ཟབ་པའི་ཕྱིར་བསམ་གྱིས་མི་ཁྱབ་པ་ཉིད་ཡིན་ནོ། །གསུམ་པ་ནི་རྒྱུ་དང་འབྲས་བུའི་དངོས་པོ་དང༌། འདས་པ་དང་མ་འོངས་པའི་དུས་ཤིན་ཏུ་ཟབ་པའི་ཕྱིར་རོ། །བཞི་པ་ནི་རིགས་གཞན་གྱིས་སངས་རྒྱས་ཀྱི་ཡུལ་གཞན་དག་ལ་ཤིན་ཏུ་ཟབ་པའི་ཕྱིར་རོ། །འདུ་ཤེས་དེ་ལྟ་བུས་ཞེས་བྱ་བ་ནི་ཁྱེའུ་ཡོད་པ་ཡིད་ཀྱི་འདུ་ཤེས་ཀྱིས་སོ། །སོ་སོར་རིག་པར་མ་བྱས་པར་ཞེས་བྱ་བ་ནི་སྔར་གོ་བར་མ་བྱས་པར་རོ། །ཞུན་མར་མང་པོ་དང་སྦྱར་བ་ཞེས་བྱ་བ་ནི་ཞུན་མར་མང་པོས་བཏབ་པའོ། །སྒོ་བ་ཞེས་བྱ་བ་ནི་སྒོ་སྲུང་བའོ།།
ཡུལ་ངན་ཞེས་བྱ་བ་ནི་ཉི་མ་འཁྲུལ་པའོ། །ཆུ་དྲོན་ཞེས་བྱ་བ་ནི་ཆུའི་རྒྱུན་དྲོན་མོའོ། །ཚུལ་བཞིན་ཡིད་ལ་བྱེད་པ་ཞེས་བྱ་བ་ནི་རྣམ་པར་རྟོག་པ་དགེ་བ་སྟེ། ཚུལ་ཞེས་བྱ་བ་འཁོར་བའི་ལམ་མམ་མྱ་ངན་ལས་འདས་པ་ཡིན་ལ། བཞིན་ཞེས་བྱ་བ་ནི་དེ་བསྟོད་པ་ཡིན་པའི་ཕྱིར་རོ། །ཡན་ལག་དང་པོ་ཉིད་ཀྱིས་ཞེས་བྱ་བ་ནི་བསིལ་བས་སོ། །ཉི་ཚེ་བའི་སེམས་ཅན་དམྱལ་བ་ཞེས་བྱ་བ་ནི་ཐམས་ཅད་དང་ཐུན་མོང་མ་ཡིན་པའི་སེམས་ཅན་དམྱལ་བ་སྟེ། ཁ་ཅིག་ནི་སྐྱེ་བའི་གནས་ཡིན་པའི་ཕྱིར་རོ། །འདུ་ཤེས་དེ་ལྟ་བུས་ཞེས་བྱ་བ་ནི་འོང་བའི་འདུ་ཤེས་ཀྱིས་སོ། །དལ་གྱིས་འབབ་ཅེས་བྱ་བ་ནི་ལྷ་རྣམས་ཀྱི་རྫིང་བུ་འཛམ་བུའི་གླིང་འདི་ན་མཚོ་མ་དྲོས་པ་དང༌། རི་སྤོས་ཀྱི་ངད་ལྡང་གཉིས་ཀྱི་བར་ན་ཡོད་དེ་གང་གི་འགྲམ་ན་གླང་པོ་ཆེའི་རྒྱལ་པོ་རབ་བརྟན་འདུག་པའོ། །སྒྲ་སྐད་ཅེས་བྱ་བ་ནི་གླང་པོ་ཆེའི་སྐད་དོ། །རྣམ་པར་བཤིག་ཅེས་བྱ་བ་ནི་རྣམ་པར་ཉམས་པའོ།། བྲལ་ཞེས་བྱ་བ་ནི་རྒྱུན་ཆད་པའོ། །འདུ་ཤེས་དེ་ལྟ་བུས་ཞེས་བྱ་བ་ནི་རྣམ་པར་མ་ལངས་པའི་འདུ་ཤེས་ཀྱིས་སོ། །སློབ་དཔོན་དུལ་བའི་ལྷས་འདུལ་བ་རྣམ་པར་འབྱེད་པའི་ཚིག་རྣམ་པར་བཤད་པ་ཉེ་བར་སྦྱར་བ་ལས་ཕམ་པར་འགྱུར་བ་བཞི་པའི་ཚིག་རྣམ་པར་བཤད་པ་རྫོགས་ཏེ། །ཕམ་པར་འགྱུར་བ་རྣམས་ཀྱི་ཚིག་རྣམ་པར་བཤད་པ་རྫོགས་སོ།། །།བ་ལང་གི་ལྕི་བ་སར་པ་ཞེས་བྱ་བ་ནི་གནས་པའོ། །བྱུག་པ་ཞེས་བྱ་བ་ནི་ཞལ་ཞལ་ལོ། །ལུས་མ་བསྲུངས་ཞེས་བྱ་བ་ནི་ཡུལ་མ་ཡིན་པ་ལས་ཕྱིར་མ་བླན་པའོ། །དབང་པོ་རྣམས་ཀྱིས་མ་བསྡམས་པ་ཞེས་བྱ་བ་ནི་དབང་པོ་རྣམས་ཀྱིས་ངེས་པར་མ་བྱས་པའོ། །དྲན་པ་ཉེ་བར་མ་བཞག་པ་ཞེས་བྱ་བ་ནི་དྲན་པ་ཉེ་བར་མ་གཏད་པའོ། །བཟོད་ཅེས་བྱ་བ་ནི་འདོད་པའམ་ནད་མེད་པ་ཉིད་དོ། །འཚོ་བ་ཞེས་བྱ་བ་ནི་འཕྲོད་པའམ། ནད་མནན་པའོ། །རིམས་ནད་ཅེས་བྱ་བ་ནི་ལུས་ཀྱི་གདུང་བའོ། །ཡོངས་སུ་གདུང་བའོ་ཞེས་བྱ་བ་ནི་ཡིད་ཀྱི་གདུང་བའོ། །ལུས་ཀྱི་བསྙེན་བཀུར་ཞེས་བྱ་བ་ནི་ལུས་ཀྱི་ཀུན་དུ་སྤྱད་པ་དང༌། ལུས་ཀྱི་ལོངས་སྤྱོད་དེ་སྤྲོད་པ་ལས་བྱུང་བ་ཞེས་བྱ་བའི་ཐ་ཚིག་གོ །མི་གཙང་བ་ཤོར་ཞིང་ཞེས་བྱ་བ་ནི་ཁུ་བ་ཕྱུང་བར་གྱུར་ཏེ་ཞེས་བྱ་བ་ཉིད་ཀྱིས་བཤད་དེ། །དེ་ལ་བྱེ་བྲག་ཏུ་ནི་
མི་གཙང་བ་ཤོར་ཞིང་ཞེས་བྱ་བ་ནི་ཁུ་བ་རང་གི་གནས་ནས་འཕགས་པའོ། །ཁུ་བ་ཕྱུང་བར་གྱུར་ཞེས་བྱ་བ་ནི་ཕྱི་རོལ་དུ་སྣང་བར་གྱུར་པའོ། །འདུ་ཤེས་ཞེས་བྱ་བ་ནི་དགེ་སློང་ཉིད་དུ་ཤེས་པ་དང༌། ཡུལ་དུ་འདུ་ཤེས་པའོ། །སེམས་པ་ཞེས་བྱ་བ་ནི་ཁུ་བ་ཕྱུང་བར་ཤེས་སོ། །ཐ་སྙད་དུ་བྱར་རུང་བ་མ་ཡིན་ཏེ་ཞེས་བྱ་བ་ནི་ལུས་དང་ངག་གི་ལས་དང༌། རྣམ་པར་རིག་བྱེད་དང་རྣམ་པར་རིག་བྱེད་མ་ཡིན་པའི་གཟུགས་བརྙན་བསྟན་པར་འཇུག་མི་ནུས་སོ་ཞེས་བྱ་བའི་ཐ་ཚིག་གོ །འདི་ལྟར་རྨི་ལམ་གྱི་སེམས་ནི་རྣམ་པར་ཤེས་པའི་ཚོགས་ལྔ་ལ་སོགས་པའི་གཟུགས་བརྙན་ཡིན་པ་དང༌། ཡིད་ཀྱི་རྣམ་པར་ཤེས་པ་ནི་ཁ་ནང་དུ་བལྟས་ཏེ་འཇུག་པ་ཡིན་ལ། ཁ་ཕྱིར་ལྟ་བའི་ཕྱི་སེམས་ཀྱིས་ནི་ཐ་སྙད་སློང་བར་བྱེད་པ་ཡིན་པའི་ཕྱིར་རོ། །དབང་བསྐུར་བར་འོས་ལ་ཞེས་བྱ་བ་ནི་དབང་བསྐུར་བར་རིག་པར་བྱའོ། །གནས་པ་ཞེས་བྱ་བ་ནི་ཉེ་བར་ཞི་བ་སྟེ། བརྟན་པ་ཞེས་བྱ་བའི་ཐ་ཚིག་གོ ། མཚམས་ཐོབ་པ་ཞེས་བྱ་བ་ནི་རྒྱལ་པོ་ཚུལ་དང་ལྡན་པའོ། །སྣ་ཆེན་པོ་ལ་གཏོགས་པ་འཁོར་ལོའི་མཐའ་པ་ཞེས་བྱ་བ་ནི་བློན་པོ་ཆེན་པོ་འཁོར་ལོས་སྒྱུར་བའི་འཁོར་ལོ་རིན་པོ་ཆེ་སྐྱོང་བར་བྱེད་པའོ། །བསྐ་བ་ཞེས་བྱ་བ་ནི་གར་བའོ། །སླ་བ་ཞེས་བྱ་བ་ནི་སླན་ཏེའོ། །ཡོངས་སུ་མ་སྨིན་པ་ཞེས་བྱ་བ་ནི་ནར་མ་སོན་པ་སྟེ་ལུས་ལས་སུ་མི་རུང་བ་ཉིད་དོ། །དེ་ལས་བཟློག་པ་ནི་ཡོངས་སུ་སྨིན་པའོ། །བུད་མེད་ཀྱིས་དུབ་པ་དང་ཁུར་གྱིས་དུབ་པ་དང༌། ལམ་གྱིས་དུབ་པའོ་ཞེས་བྱ་བ་ནི་བུད་མེད་ལ་སོགས་པ་ཧ་ཅང་བསྟེན་དྲགས་པས་ལུས་ཉམས་པའོ། །གཏའ་གམ་ཞེས་བྱ་བ་ནི་ལང་ཚོ་ཉམས་པའོ། །ཡ་ཟ་མ་ལུག་ཅེས་བྱ་བ་ནི་ལུས་ལ་ཇི་ལྟར་ཟོས་པ་དེ་བཞིན་དུ་ཐུར་དུ་འཛག་པའམ། བཅིངས་པས་ཉམས་པས་ཆིང་མ་བཀྲོལ་ཡང་བཅིངས་པ་བཞིན་དུ་འགྲོ་བས་སྒྲོག་བཀྲོལ་ཞེས་ཀྱང་བྱའོ། །དེ་དག་ནི་ཁམས་ཉམས་པ་ཡིན་པའི་ཕྱིར་ཁུ་བ་སླ་བ་ཡིན་ནོ།། དེ་མ་ཐག་ཏུ་ཕྱུང་བ་ཞེས་བྱ་བ་ནི་གཞན་གྱིས་བར་དུ་མ་ཆོད་པ་ཁོ་ནར་རང་གི་གནས་ནས་འཕྲལ་ལ་བྱུང་བ་སྟེ། དང་པོ་ཁོ་ནར་གནས་འཐོན་ཞེས་བྱ་བའི་ཐ་ཚིག་གོ །དགེ་འདུན་ལ་རག་ལས་པ་ཞེས་བྱ་བ་ནི་དེ་སྦྱངས་པའི་ཕྱིར་ཆད་པའི་ལས་བྱ་བ་དགེ་འདུན་ལས་ཐོབ་པའི་ཕྱིར་རོ། །
དགེ་འདུན་དང་འབྲེལ་པ་ཞེས་བྱ་བ་ནི་ཆད་པའི་ལས་དགེ་འདུན་ཉིད་ཀྱིས་སྦྱིན་པ་ཡིན་པའི་ཕྱིར་རོ། །དགེ་འདུན་ལ་བརྟེན་པ་ཞེས་བྱ་བ་ནི་ཆད་པའི་ལས་དགེ་འདུན་གྱི་ཡུལ་ཉིད་ལ་སྤྱོད་པར་བྱ་བ་ཡིན་པའི་ཕྱིར་རོ། །དགེ་འདུན་ལས་རྣམ་པར་ལྡང་བར་འགྱུར་ཞེས་བྱ་བ་ནི་འབྱུང་བ་ཞེས་བྱ་བ་རྣམ་པར་སྦྱང་བ་ཡང་དགེ་འདུན་ཉིད་ཀྱིས་བྱ་བ་ཡིན་པའི་ཕྱིར་རོ། །ལྷག་མ་མེད་པ་ཞེས་བྱ་བ་ནི་སྦྱང་པའི་ཐབས་ཐུན་མོང་མེད་པའི་ཕྱིར་རོ། །ལྷག་མ་དང་བཅས་པ་ཞེས་བྱ་བ་ནི་སྦྱང་པའི་ཐབས་ཐུན་མོང་ཡོད་པའི་ཕྱིར་རོ། །གཞི་ལྔས་ཞེས་བྱ་བ་ནི་རྒྱུ་རྣམ་པ་ལྔའོ། །བདེ་བ་འདོད་པ་ཞེས་བྱ་བ་ནི་བདེ་བ་འདོད་པ་འབྱིན་པའོ། །ས་བོན་འདོད་པ་ཞེས་བྱ་བ་ནི་བུ་བསྐྱེད་པའི་ཕྱིར་ས་བོན་གྱི་དངོས་པོ་ཉིད་དུ་ཁུ་བ་ཡོངས་སུ་ཚོལ་བའོ། །རིག་སྔགས་འདོད་པའོ་ཞེས་བྱ་བ་ནི་ཁུ་བ་འབྱིན་པས་གསང་སྔགས་ཀྱི་རིག་པ་སྒྲུབ་པར་འདོད་པའོ། །སྨན་འདོད་པ་ཞེས་བྱ་བ་ནི་ཁུ་བ་ཕྱུང་ན་ཕན་པ་ཉིད་དུ་འདོད་པའོ། །བརྟག་པ་འདོད་པས་ཞེས་བྱ་བ་ནི་ཁུ་བ་འབྱུང་བ་སད་པའི་ཕྱིར་འཇུག་པས་སོ། །རང་གི་གཟུགས་ཉེ་བར་ལེན་ཅིང་ཞེས་བྱ་བ་ནི་ཡན་ལག་གི་རྣམ་པས་ནང་གི་རང་གི་རྒྱུད་དུ་གཏོགས་པ་ལག་པ་ལ་སོགས་པ་གཟུགས་ཀྱི་ཕུང་པོ་ཡུལ་ཉིད་དུ་ལེན་པ་ཞེས་བྱ་བའི་ཐ་ཚིག་གོ །སེམས་པར་བྱེད་ཅེས་བྱ་བ་ནི་འབྱིན་པར་འདོད་པའོ། །རྩོལ་བར་བྱེད་ཅེས་བྱ་བ་ནི་རེག་པའི་བྱ་བ་འདྲུད་པ་ལ་སོགས་བྱེད་པའོ། །ཁུ་བ་འབྱིན་ན་ཞེས་བྱ་བ་ནི་དང་པོ་རང་གི་གནས་ནས་འབྱིན་པར་བྱེད་པའོ། །རིལ་གྱིས་འཆང་བར་བྱེད་ཅེས་བྱ་བ་ནི་ལག་པ་ལ་སོགས་པས་ཡན་ལག་གི་རྣམ་པ་ཀུན་འཛིན་པར་བྱེད་པའོ། །དམ་དུ་འཆང་བར་བྱེད་ཅེས་བྱ་བ་ནི་དེ་ལྟར་རིལ་གྱིས་བཅངས་པ་ལ་དམ་དུ་འཛིན་པར་བྱེད་པའོ། །བྱེ་བྲག་ངེས་པར་མྱོང་བའི་བདེ་བ་ཞེས་བྱ་བ་ནི་བུད་མེད་དང་སྐྱེས་པ་ཀུན་དུ་སྤྲད་པའི་གནས་སྐབས་ན་བདེ་བ་གང་ཡོད་པ་དང༌། ཡན་ལག་གི་རྣམ་པ་བཅུད་དེ། སྦུབས་འདོགས་པའི་གནས་སྐབས་ན་བདེ་བ་གང་ཡོད་པའོ། །བྱུང་ལ་ཐུག་པའི་བདེ་བ་ཞེས་བྱ་བ་ནི་ཁུ་བ་འབྱུང་བའི་གནས་སྐབས་ན་བདེ་བ་གང་སྐྱེ་བའོ། །ངད་ལས་པའི་བདེ་བ་ཞེས་བྱ་བ་ནི་འདོད་ཆགས་ཀྱི་གདུང་བ་དང་བྲལ་བའི་
གནས་སྐབས་ན་བདེ་བ་གང་འབྱུང་བའོ། །དགེ་སློང་གིས་བདེ་བ་ལ་སོགས་པ་འདོད་པས་ནང་གི་གཟུགས་ལ་སོགས་པ་ཉེ་བར་ལེན་ཅིང་སེམས་པར་བྱེད་རྩོལ་བར་བྱེད་པས་ཁུ་བ་འབྱིན་པ་ན་ཡང་དངོས་གཞིར་འགྱུར་རོ། །སེམས་པར་བྱེད། རྩོལ་བར་བྱེད། རིལ་གྱིས་འཆད་པར་བྱེད་པས་ཁུ་བ་འབྱིན་ན་ཡང་དངོས་གཞིར་འགྱུར་རོ། །སེམས་པར་བྱེད་རྩོལ་བར་བྱེད། །རིལ་གྱིས་འཆང་བར་བྱེད། དམ་དུ་འཆང་བར་བྱེད་ལ། དེས་ཀྱང་བྱེ་བྲག་ངེས་པར་མྱོང་བའི་བདེ་བ་ཉམས་སུ་མྱོང་བར་བྱེད་ཅིང་ཁུ་བ་འབྱིན་ན་ཡང་དངོས་གཞིར་འགྱུར་རོ། །སེམས་པར་བྱེད། །རྩོལ་བར་བྱེད་རིལ་གྱི་འཆང་བར་བྱེད། དམ་དུ་འཆང་བར་བྱེད་ལ། དེས་ཀྱང་བྱེ་བྲག་ཏུ་ངེས་པར་མྱོང་བའི་བདེ་བ་དང་བྱུང་བ་ཐུག་པའི་བདེ་བ་ཉམས་སུ་མྱོང་བར་བྱེད་ཅིང་ཁུ་བ་འབྱིན་ན་ཡང་དངོས་གཞིར་འགྱུར་རོ། །སེམས་པར་བྱེད་རྩོལ་བར་བྱེད། །རིལ་གྱིས་འཆད་པར་བྱེད། དམ་དུ་འཆང་བར་བྱེད་ལ། དེས་ཀྱང་བྱེ་བྲག་ངེས་པར་མྱོང་བའི་བདེ་བ་ཉམས་སུ་མྱོང་བར་བྱེད་ཅིང་ཁུ་བ་འབྱིན་པར་བྱེད་ན་ཡང་དངོས་གཞིར་འགྱུར་རོ་ཞེས་བསྟན་པའི་ཕྱིར་དགེ་སློང་གི་བདེ་བར་འདོད་པས་ནང་གི་གཟུགས་ཉེ་བར་ལེན་ཅིང་ཞེས་བྱ་བ་ནི་འདྲེས་དྲུག་གོང་ནས་གོང་དུ་སྨོས་པར་རིག་པར་བྱའོ། །ཕྱི་རོལ་གྱི་གཟུགས་ཉེ་བར་ལེན་པ་ཞེས་བྱ་བ་ནི་ཕྱི་རོལ་དང་གཞན་གྱི་རྒྱུད་དུ་གཏོགས་པ་དང་རང་གི་རྒྱུད་དུ་གཏོགས་པའི་ལག་པ་བཅས་པ་ལ་སོགས་པ་གཟུགས་ཀྱི་ཕུང་པོ་ཡུལ་ཉིད་དུ་ཉེ་བར་ལེན་ཅིང་ཞེས་བྱ་བའི་ཐ་ཚིག་གོ །གང་བར་བྱེད་པ་ཞེས་བྱ་བ་ནི་ཅུང་ཟད་གར་བྱེད་པའོ། །རབ་ཏུ་གར་བྱེད་པ་ཞེས་བྱ་བ་ནི་ཤས་ཆེར་གར་བྱེད་པའོ། །དེ་གཉིས་ནི་ཡན་ལག་གི་རྣམ་པ་ལ་རེག་པ་མེད་པའི་ཕྱིར་ཉེས་པ་སྦོམ་པོར་འགྱུར་རོ། །ཤུགས་གཏང་སྟེ་ཞེས་བྱ་བ་ལ། ཤུགས་ཞེས་བྱ་བ་ནི་དེ་མ་ཐག་ཏུ་ཁུ་བ་འབྱུང་བ་ལྟར་འགྱུར་བ་སྟེ། དེའི་གནས་སྐབས་སུ་ལུས་ཀྱི་བརྩལ་བ་བཏང་ན་ཁུ་བ་འབྱིན་པ་རྫོགས་པར་མ་བྱས་པ་ཉིད་ཡིན་པས་དེའི་སྦྱོར་བ་ལས་བྱུང་བའི་ཉེས་པ་སྦོམ་པོར་འགྱུར་རོ། །སྦུབས་སུ་འོངས་པ་ཞེས་བྱ་བ་ནི་ཁུ་བ་འབྱུང་བའི་གནས་ནས་སྔར་འཕོས་ནས་ཡན་ལག་གི་རྣམ་པའི་སྒོར་མ་བྱུང་བའི་སྐབས་སུ་ཁུ་བ་བར་དུ་ལས་ཏེ་དེ་ལས་སྦྱོར་བ་ཕྱི་མས་
བརྩལ་ཏེ་འབྱིན་ན་དེ་ནི་དང་པོ་འབྱུང་བ་མ་ཡིན་པའི་ཕྱིར་ཉེས་པ་སྦོམ་པོར་འགྱུར་རོ་།ཀུན་དུ་མཉེད་པའི་བདེ་བ་ཉམས་སུ་མྱོང་བར་བྱེད་ཅིང་ཞེས་བྱ་བ་ནི་ཡན་ལག་གི་རྣམ་པ་ལས་གཞན་གྱི་ལུས་ཀྱི་ཕྱོགས་དག་ཏུ་རེག་པའི་བདེ་བ་ཉམས་སུ་མྱོང་བ་ནི་ཀུན་དུ་མཉེད་པའི་བདེ་བ་ཉམས་སུ་མྱོང་བ་ཞེས་བྱ་བ་སྟེ་དེ་ཡང་ཡན་ལག་གི་རྣམ་པ་ལ་རེག་པ་མེད་པའི་ཕྱིར་ཉེས་པ་སྦོམ་པོར་འགྱུར་རོ། །བྱེ་བྲག་ངེས་པར་མྱོང་བའི་བདེ་བ་ཉམས་སུ་མྱོང་བར་བྱེད་ཅིང་ཞེས་བྱ་བ་ནི་བུད་མེད་དང་སྐྱེས་པ་ཀུན་དུ་སྤྲད་པའི་གནས་སྐབས་ན་བདེ་བ་གང་ཡོད་པ་དེ་ལ་ཚུལ་བཞིན་མ་ཡིན་པས་རྣམ་པར་རྟོག་ཅིང་ཁུ་བ་འབྱིན་ན་དེ་ཡང་ཉེས་པ་སྦོམ་པོར་འགྱུར་རོ། །དེ་ནི་ཡན་ལག་གི་རྣམ་པ་ལ་རེག་པ་མེད་པའི་ཕྱིར་ཉེས་པ་སྦོམ་པོར་འགྱུར་གྱི། ཡན་ལག་གི་རྣམ་པ་ལ་རེག་པ་ཡོད་ན་ནི་དངོས་གཞི་ཉིད་དུ་འགྱུར་རོ། །བྱེ་བྲག་ངེས་པར་མྱོང་བའི་བདེ་བ་ཞེས་བྱ་བ་འདི་ནི་དཔེ་ཙམ་སྟེ། བྱུང་ལ་ཐུག་པའི་བདེ་བ་དང་ངད་ལས་པའི་བདེ་བ་ཉམས་སུ་མྱོང་བ་བསྒྲུབ་པས་དགེ་སློང་གི་ཡིད་ཀྱིས་དེའི་བདག་ཉིད་ཁས་ལེན་པས་ཇི་ཙམ་དུ་བྱུང་བ་ལ་ཐུག་པའི་བདེ་བ་དང༌། ངད་ལས་པའི་བདེ་བ་ལ་རྣམ་པར་རྟོག་པ་དེ་ཙམ་དུ་ཡན་ལག་གི་རྣམ་པ་ལ་རེག་པ་མེད་པར་ཁུ་བ་འབྱིན་ན་ཡང་ཉེས་པ་སྦོམ་པོར་འགྱུར་རོ། །རང་གི་ཡན་ལག་གི་རྣམ་པར་འཇལ་བར་བྱེད་ཅེས་བྱ་བ་ནི་ཁུ་བ་འབྱིན་པའི་འདོད་ཆགས་ཀྱིས་ཞེས་བྱ་བར་ཤེས་པར་བྱ་སྟེ། དེ་ལ་ནི་རྩོལ་བ་མེད་པའི་ཕྱིར་ཉེས་པ་སྦོམ་པར་འགྱུར་རོ། །འདིར་འཆལ་བ་ཞེས་བྱ་བ་ནི་དཔེ་ཙམ་དུ་ཟད་དེ་རིག་པ་གཞན་ཡང་དེ་དང་འདྲ་བར་ཤེས་པར་བྱའོ། །ལྟ་ན་ཉེས་བྱས་སུ་འགྱུར་རོ་ཞེས་བྱ་བ་ནི་ཆགས་པའི་སེམས་དང་ལྡན་པ་ཉིད་ནི་ཡན་ལག་གི་རྣམ་པ་ལྔའོ། །ཆུའི་རྒྱུན་ལས་བཟློག་པའི་ཕྱོགས་སུ་གཏོད་པར་ཞེས་བྱ་བ་ནི་ཡན་ལག་གི་རྣམ་པ་འབབ་ཆུའི་རྒྱུན་ལས་བཟློག་པའི་ཕྱོགས་སུ་གཏད་དེ་ཀུན་དུ་ཆགས་པའི་སེམས་ཀྱིས་ཁུ་བ་འབྱིན་ན་དེ་ཡང་ཉེས་པ་སྦོམ་པོར་འགྱུར་རོ། །རྫི་ཕྱོགས་མ་ཡིན་པར་གཏོད་པ་ཡང་གཏད་པ་དེ་དང་འདྲ་བར་ཤེས་པར་བྱའོ། །ཆུའི་རྒྱུན་ཕྱོགས་སུ་གཏོད་པ་ཞེས་བྱ་བ་ནི་ཆུའི་རྒྱུན་ཕྱོགས་སུ་ཡན་ལག་གི་རྣམ་པ་ཆགས་པའི་སེམས་ཀྱིས་གཏོད་པར་བྱེད་ན་ཉེས་བྱས་སུ་འགྱུར་རོ། །
རྫི་ཕྱོགས་སུ་གཏོད་པར་བྱེད་པ་ཡང་དེ་བཞིན་དུ་ཤེས་པར་བྱའོ། །དེ་དག་ནི་སེམས་ཅན་དུ་བགྲང་བའི་རེག་པ་མེད་པའི་ཕྱིར་ན་སྨད་དོ། །ཕྱི་རོལ་དུ་མཆོད་པ་ཞེས་བྱ་བ་ནི་སྒོའི་ཐེམ་པ་ལའོ། །ཁུ་བ་འབྱིན་པའི་དགེ་འདུན་ལྷག་མའི་ཚིག་རྣམ་པར་བཤད་པ་སྟེ་དང་པོ་རྫོགས་སོ།། །། གྲོང་ཁྱེར་ཆེན་པོ་དྲུག་ཅེས་བྱ་བ་ནི་མཉན་ཡོད་དང༌། ཡངས་པ་ཅན་དང༌། བཱ་རཱ་ཎ་སཱི་དང༌། ཙམ་པ་ཀ་དང༌། གནས་བཅས་དང༌། རྒྱལ་པོའི་ཁབ་བོ། །འཚོ་བ་ཞེས་བྱ་བ་ནི་འཚོ་བའི་ཐབས་སོ། །མི་ཤེས་ཞེས་བྱ་བ་ནི་གཏམ་གྱིས་སོ། །རྣམ་པར་མི་ཤེས་པ་ཞེས་བྱ་བ་ནི་དཔག་པས་སོ། །ཟླ་བ་ལྟར་རྒྱུ་ཞེས་བྱ་བ་ནི་ཟླ་བ་བཞིན་དུ་ལན་འགའ་སྣང་བའོ། །མི་ཁྱིམ་པ་ཞེས་བྱ་བ་ནི་སྐབས་མེད་པ་སྟེ། དུས་ངེས་པའི་དུས་མེད་པའོ། །དུས་མ་ལགས་སོ། ཞེས་བྱ་བ་ནི་གནས་སྐབས་མ་ཡིན་པ་སྟེ་བར་དུ་ཆོད་པའི་དུས་མེད་པའོ། །ཀུན་དགའི་ར་བ་ཞེས་བྱ་བ་ནི་འདིར་རྒྱལ་བྱེད་ཀྱི་ཚལ་ལ་བྱའོ། །གཙུག་ལག་ཁང་ཞེས་བྱ་བ་ནི་གནས་ཁང་ངོ༌། །མཁས་པ་གང་ཞིག་ཅེས་བྱ་བ་ལ་སོགས་པས་ནི་སྐྱེ་བོ་མཁས་པ་གང་ཞིག་རབ་ཏུ་དང་བའི་སེམས་ཀྱིས་སངས་རྒྱས་ཀྱི་མཆོད་རྟེན་དག་ལ་བསྐོར་བའི་ཕྱིར་གོམ་པ་འདོར་བར་བྱེད་པ་དེའི་འབྲས་བུ་ནི་མྱ་ངན་ལས་འདས་པ་ཡིན་པའི་ཕྱིར་དེ་ལས་དགོངས་ནས་འཛམ་བུ་ཆུ་བོ་གསེར་གྱི་སྲང་ཚད་སྟོང་ཕྲག་བརྒྱ་ཡང་དེ་དང་མཉམ་པ་མ་ཡིན་ནོ་ཞེས་གསུངས་སོ། །སྲང་ཚད་ཅེས་བྱ་བ་ནི་སྲང་བརྒྱད་ཀྱི་ཚད་དོ། །ཁ་ཅིག་ན་རེ་སྲང་བརྒྱའི་ཚད་ཅེས་ཀྱང་ཟེར་རོ། །ཚིག་པའི་བསོད་སྙོམས་ཞེས་བྱ་བ་ནི་འབྲས་ཆན་ཚིག་པའོ། །ཡང་ན་ཚིག་པའི་ཞེས་བྱ་བ་ནི་བུད་མེད་ཀྱི་བྱེ་བྲག་སྟེ་དམན་པ་ཞེས་བྱ་བའི་ཐ་ཚིག་གོ །འདྲེན་པ་ཞེས་བྱ་བ་ནི་མཚོན་པའོ། །ཡོངས་སུ་འདྲེན་ཞེས་བྱ་བ་ནི་སྲུང་བའོ། །གནས་བརྟེན་ཞེས་བྱ་བ་ནི་གཞན་ལ་མི་བརྟེན་པའོ། །རྒྱལ་མཚན་པ་ལྟ་བུ་ཞེས་བྱ་བ་ནི་ལོ་ཉི་ཤུ་ལོན་ཞིང་འདུལ་བ་ཤེས་པའོ། །ཡུན་རིང་པོ་ནས་རབ་ཏུ་བྱུང་བ་ཞེས་བྱ་བ་ནི་ལོ་ཉི་ཤུ་རྩ་ལྔ་ལ་སོགས་པ་ལོན་པའོ། །ཚངས་པར་སྤྱོད་པ་མངོན་པར་སྤྱད་པ་ཞེས་བྱ་བ་ནི་ལམ་ཐོབ་པའོ། །སྣམ་སྦྱར་གྱི་རྒྱལ་མཚན་ཐོགས་པ་ཞེས་བྱ་བ་ནི་དགེ་སློང་དག་གོ །དེའི་དང་པོ་ཞེས་བྱ་བ་ལ་སོགས་པ་ལ། བསྐོར་མི་
ནུས་པ་ཞེས་བྱ་བ་ནི་བསྐོར་བར་མི་ནུས་པའོ། །ཆོས་དང་ལྡན་པ་ཞེས་བྱ་བ་ནི་མྱ་ངན་ལས་འདས་པའི་ཆོས་དང་མཐུན་པའི་ཕྱིར་རོ། །ཆོས་ཀྱི་འཁོར་ལོ་ཞེས་བྱ་བ་ནི་བདེན་པ་མཐོང་བ་སྟེ། འཕགས་པའི་ལམ་ནི་འཁོར་ལོ་དང་འདྲ་བའི་ཕྱིར་རོ། །དོན་ཆེས་བྱ་བ་ནི་ད་ལྟར་གྱི་འབྲས་བུའོ། །ཕན་པ་ཞེས་བྱ་བ་ནི་དུས་གཞན་ན་ཕན་པའོ། །བདེ་བ་ཞེས་བྱ་བ་ནི་གཏན་དུའོ། །རྗེས་སུ་ཐུགས་བརྩེ་བ་ཞེས་བྱ་བ་ནི་སྙིང་བརྩེ་བའོ། །ལན་གསུམ་དུ་བཟླས་ཏེ་ཞེས་བྱ་བ་ནི་མཐོང་བའི་ལམ་དང༌། སློབ་པའི་ལམ་དང༌། མི་སློབ་པའི་ལམ་དག་ལས་བཟླས་པའི་ཕྱིར་རོ། །རྣམ་པ་བཅུ་གཉིས་སུ་ཞེས་བྱ་བ་ནི་བཟླས་པ་རེ་རེ་ལ་ཡང་སྡུག་བསྔལ་བ་དང༌། ཀུན་འབྱུང་བ་དང༌། འགོག་པ་དང༌། ལམ་གྱི་རྣམ་པ་དག་ཡོད་པའི་ཕྱིར་རོ། །བསྐོར་བ་ཞེས་བྱ་བ་ནི་བསྐྱེད་པའོ། །ཤིང་སཱ་ལ་ཆེན་པོ་ལྟ་བུ་ཞེས་བྱ་བ་ནི་འབྱོར་པ་རྒྱ་ཆེན་པོ་སྟེ། ཤིང་སཱ་ལའི་ཚལ་ལྟར་མཐོ་བ་ཞེས་བྱ་བའི་ཐ་ཚིག་གོ །སྨོན་པ་ཞེས་བྱ་བ་ནི་སྨོན་པ་དོར་བའོ། །སྦྱོར་བའི་གྲོང་ཞེས་བྱ་བ་ནི་དེ་དག་ཏུ་གསེར་དངུལ་ལ་སོགས་པ་སྤེལ་བ་ཉིད་ཀྱིས་སྦྱོར་བ་བྱེད་པའི་ཕྱིར་རོ། །མཆིལ་མའི་ཐལ་བ་ཞེས་བྱ་བ་ནི་བད་ཀན་ནོ། །བུ་མངས་ཀྱི་མཆོད་རྟེན་ཞེས་བྱ་བ་ནི་བུ་རང་སངས་རྒྱས་སུ་གྱུར་པ་སུམ་ཅུ་རྩ་གཉིས་ཀྱི་ཕྱིར་མས་བརྩིགས་པའི་མཆོད་རྟེན་ཞེས་བྱ་བ་ནི་དེ་བཞིན་གཤེགས་པ་ལ་སོགས་པའི་ཡོན་ཏན་རྣམས་ཀྱི་གཟུགས་བརྙན་དུ་གྱུར་པ་སྟེ་བསམ་པ་ཉིད་ཀྱིས་བཀྲ་བ་ཞེས་བྱ་བའི་ཐ་ཚིག་གོ །ཡང་ན་དྲན་པ་ཉེ་བར་གཞག་པ་ལ་སོགས་པའི་ཡོན་ཏན་དེ་དག་གི་གཟུགས་བརྙན་ནོ། །དགེ་སློང་གི་སྡོམ་པ་ཞེས་བྱ་བ་ནི་དགེ་སློང་གི་ཚུལ་ཁྲིམས་ཏེ་ཚེ་དགེ་སློང་གི་དངོས་པོའོ། །འདོད་པ་ཆུང་ངུ་བ་ཞེས་བྱ་བ་ནི་བྱ་བ་བྱེད་ནུས་པ་ཙམ་གྱིས་བསོད་སྙོམས་ལ་སོགས་པ་ཚོལ་བའི་ཕྱིར་རོ། །ཆོག་ཤེས་པ་ཞེས་བྱ་བ་ནི་བྱ་བ་བྱེད་ནུས་པ་ཙམ་གྱིས་བསོད་ནམས་ལ་སོགས་པ་ཐོབ་པས་མགུ་བའོ། །སྦྱངས་པའི་ཡོན་ཏན་སྨྲ་བ་ཞེས་བྱ་བ་ནི་ཆོས་གོས་གསུམ་པ་ལ་སོགས་སྦྱངས་པའི་ཡོན་ཏན་དག་ལ་སྟོད་པར་བྱེད་ཅེས་པའི་ཐ་ཚིག་གོ །མཆོག་ཐོབ་པའི་བུ་ཞེས་བྱ་བ་ནི་འཕགས་པའི་ཤཱ་རིའི་བུ་ཕ་བྲམ་ཟེ་རྒྱལ་ཞེས་བྱ་བ་དེ་ཀློག་པ་ལ་སོགས་པ་ཕུན་སུམ་
ཚོགས་པ་ཡིན་པས་རྒྱལ་པོས་རྒོལ་བའི་ལོངས་སྤྱོད་ཀྱིས་བྲམ་ཟེ་རྣམས་ཀྱི་མཆོག་ཏུ་བཀུར་བ་ཡིན་ཏེ། དེའི་བུ་ཡིན་པའི་ཕྱིར་རོ། །ལོ་བརྒྱད་གཉིས་སུ་ཞེས་བྱ་བ་ནི་ལོ་བཅུ་དྲུག་ཏུའོ། །དབང་པོའི་བརྡ་སྤྲོད་པ་ཞེས་བྱ་བ་ནི་ལྷའི་དབང་པོ་བརྒྱ་བྱིན་གྱིས་བྱས་པའི་བྱཱ་ཀ་ར་ཎ་འབུམ་གྱི་ཚད་ཡིན་ནོ་ཞེས་འཇིག་རྟེན་པ་དག་ཟེར་རོ། །ཤེས་རབ་ཆེན་པོ་ཞེས་བྱ་བ་ནི་རང་གི་ཆོས་ལ་རྟོགས་པས་ཤེས་རབ་ཆེ་བའི་ཕྱིར་རོ། །སྤོབས་པ་ཆེན་པོ་ཞེས་བྱ་བ་ནི་གཞན་ལ་གོ་བར་བྱེད་པ་ལ་ཤེས་རབ་ཆེ་བའི་ཕྱིར་རོ། །ཆ་ཞེས་བྱ་བ་ནི་ཆ་ཤས་སོ། །ཅོད་པན་མེད་པའི་རྒྱལ་སྲིད་ཅེས་བྱ་བ་ནི་རྒྱལ་ཐབས་ཀྱི་ཅོད་པན་མགོ་ལ་བཅིངས་པ་མེད་པའི་རྒྱལ་སྲིད་དེ་རྒྱལ་པོ་ཉིད་མ་ཡིན་ལ། རྒྱལ་པོ་དང་འདྲ་བའི་རྒྱལ་སྲིད་ནི་ཡོད་པའི་ཕྱིར་རོ། །བསྒུལ་ཀུན་དུ་བསྒུལ། ཀུན་དུ་རབ་ཏུ་བསྒུལ་ཞེས་བྱ་བ་ནི་ཆུང་ངུ་དང༌། འབྲིང་དང༌། ཆེན་པོའི་གནས་སྐབས་སོ། །བསྐལ་བ་བཟང་པོ་ཞེས་བྱ་བ་ནི་ཤིན་ཏུ་བཀྲ་ཤིས་པ་སྟེ་བསོད་ནམས་དང་ལྡན་པའོ། །ཡབ་ཀྱི་མཆེད་ཀྱི་སྲས་ཞེ་བྱ་བ་ནི་ཁུའི་སྲས་སོ། །བཞོན་པའི་སྣོད་ཅེས་བྱ་བ་ནི་རྒྱ་མཚོའི་གྲུ་བོ་ཆེའོ། །ཞམ་རིང་ནས་ཉེ་བར་སྤྱོད་པ་ཞེས་བྱ་བ་ནི་དྲུང་ན་འདུག་པའོ། །ཡང་དག་པར་བཀུར་བ་ཞེས་བྱ་བ་ནི་མངོན་པར་དད་པར་བྱས་པའོ།། མང་དུ་ཐོས་པ་ཞེ་བྱ་བ་ནི་བསྟན་བཅོས་མང་དུ་ཐོས་པའོ། །ཐོས་པ་འཛིན་པ་ཞེས་བྱ་བ་ནི་ཚིག་མི་བརྗེད་པའོ། །ཐོས་པ་ལྕགས་པ་ཞེས་བྱ་བ་ནི་དོན་མི་བརྗེད་པའོ། །སྲུའི་སྲས་ཞེས་བྱ་བ་ནི་སྐྱེད་དགུའི་བདག་མོ་ཆེན་མོའི་སྲས་སོ། །དབང་པོ་དག་གི་སྒོ་བསྡམས་པ་ཞེས་བྱ་བ་ནི་མིག་ལ་སོགས་པའི་དབང་པོ་རྣམས་ཀྱི་ཟག་པའི་སྒོ་བསྡམས་པའོ། །མཐུ་དང་ལྡན་པ་ཞེས་བྱ་བ་ནི་མཐུ་ཆེ་བ་སྟེ་དབུས་ཀྱི་ཡུལ་མཐའ་དག་ཕེབས་པར་བྱད་པ་ཞེས་བྱ་བའི་ཐ་ཚིག་གོ །མོན་སྲན་གྲེའུའི་ཕྱེ་མས་བསྐུས་པ་ཞེས་བྱ་བ་ནི་དེའི་བྱུག་པས་བསྐུས་པའོ། །བེའུ་ཕྲུག་གི་སྙིང་པོ་ཅན་ཞེས་བྱ་བ་ནི་རས་བལ་ལས་བྱས་པའི་གོས་སྤུ་དང་བཅས་པ་དག་གིས་བཀབ་པ་ཞེས་བྱ་བའི་ཐ་ཚིག་གོ །གནས་དྲུག་པོ་དག་ཅེས་བྱ་བ་ནི་དོན་དྲུག་པོ་དག་གོ །དབུས་པའི་གནས་ཞེས་བྱ་བ་ནི་ཡུལ་དབུས་སོ། །བྲལ་ཞིང་ཞེས་བྱ་བ་ནི་འདོད་ཆགས་ཀྱིས་སྨས་པ་སྟེ་འདིས་ནི་འདོད་ཆགས་ཀྱི་དབང་གིས་
རིག་པའི་ལྷག་མ་ལ་སོགས་པ་གསུམ་པོ་དག་སྟོན་པར་བྱེད་པའོ། །གཞོགས་སྟེགས་ཞེས་བྱ་བ་ནི་མིག་ཟུར་བྱེད་པ་ལ་སོགས་པའོ། །འཕྱར་གཡེང་ཞེས་བྱ་བ་ནི་རབ་ཏུ་རྒྱུག་པའོ། །ཐོ་འཚམས་པ་ཞེས་བྱ་བ་ནི་ཕན་ཚུན་འཁྱུད་པའོ། །ཀུན་དུ་བརྩེ་བ་ཞེས་བྱ་བ་ནི་ལག་ནས་འདྲེན་པ་ལ་སོགས་པས་དགའ་བར་བྱེད་པའོ། །ཀུན་དུ་ཅ་ཅོ་འདོན་པ་ཞེས་བྱ་བ་ནི་སྒྲ་མི་གསལ་བ་ཆེན་པོ་འབྱིན་པའོ། །ལུས་བསྒྱུར་བ་ཞེས་བྱ་བ་ནི་ལུས་ཀྱིས་རྡེབས་པའོ། །གང་ལས་ཆུ་འབྱུང་བ་ཞེས་བྱ་བ་ནི་ཕྱོགས་གང་ནས་ཆུ་འབབ་པའོ། །དེ་ལས་འབར་ཞེས་བྱ་བ་ནི་ཕྱོགས་དེ་ལས་མེ་འབར་བའོ། །གང་ལས་སྐྱོབ་པ་ཞེས་བྱ་བ་ནི་སྲུང་བའོ། །འཇིགས་པ་མེད་ལས་ཞེས་བྱ་བ་ནི་འཇིགས་པ་དང་བྲལ་བས་སོ། །སྐྱབས་ལས་ཞེས་བྱ་བ་ནི་སྲུང་བར་བྱེད་པ་ལས་སོ། །བདེ་བ་ཞེས་བྱ་བ་ནི་ཕྱི་རོལ་གྱི་གནོད་པ་མེད་པའི་ཕྱིར་རོ། །ཞི་བ་ཞེས་བྱ་བ་ནི་རང་ཉིད་ཉེ་བར་ཞི་བའོ། །བདེ་ལེགས་བརྗོད་པ་ཞེས་བྱ་བ་ནི་བཀྲ་ཤིས་སྨྲ་བའོ། །བདེ་ལེགས་སུ་འགྱུར་བ་ཞེས་བྱ་བ་ནི་བདེ་ལེགས་ཤེས་བྱ་བ་ཟང་བ་མྱ་ངན་ལས་འདས་པ་སྟེ། དེ་སྐྱེད་པར་བྱེད་ཅེས་བྱ་བའི་ཐ་ཚིག་གོ །འཇིགས་པ་ཞེས་བྱ་བ་ནི་ནང་ནས་སྐྲག་པའོ། །ཡམས་ཞེས་བྱ་བ་ནི་མི་མ་ཡིན་པས་བྱས་པའི་གནོད་པའོ། །གནོད་པ་ཞེས་བྱ་བ་ནི་མིས་བྱས་པའི་གནོད་པའོ། །འགོ་བའི་ནད་ཅེས་བྱ་བ་ནི་འབྱུང་བ་ཆེན་པོ་འཁྲུགས་པ་ལས་གྱུར་པའི་གནོད་པའོ། །འཁྲུགས་པ་ཞེས་བྱ་བ་ནི་ལུས་ལ་གནོད་པའོ། །རྩོམ་པ་དེས་ཞེས་བྱ་བ་ནི་ཐབས་དེས་སོ། །ཚིག་བཞི་པའི་ཚིགས་སུ་བཅད་པ་ཞེས་བྱ་བ་ནི། སྡིག་པ་ཐམས་ཅད་མི་བྱ་སྟེ། ཞེས་བྱ་བ་ནི་ཚིགས་བཅད་གཅིག་གོ །དགེ་བ་ཕུན་སུམ་ཚོགས་པར་བྱ། ཞེས་བྱ་བ་ནི་ཚིག་གཉིས་སོ། །རང་གི་སེམས་ནི་ཡོངས་སུ་དུལ། ཞེས་བྱ་བ་ནི་ཚིག་གསུམ་མོ། །འདི་ནི་སངས་རྒྱས་བསྟན་པ་ཡིན། །ཞེས་བྱ་བ་ནི་ཚིག་བཞི་པ་སྟེ། གཞན་དག་ལ་ཡང་དེ་བཞིན་དུ་སྦྱར་རོ། །དབང་པོ་ཡོངས་སུ་སྨིན་པར་བྱ་བ་ཞེས་བྱ་བ་ནི་ཆ་གཉིས་ཏེ་བདེན་པ་མཐོང་བར་བྱེད་པ་ལ་ནི་དད་པ་ལ་སོགས་པའི་དབང་པོ་ཡོངས་སུ་སྨིན་པ་དགོས་སོ། །གྲོང་བའི་ཆོས་མཐོང་བར་ཞེས་བྱ་བ་ནི་ཕོ་དང་མོའི་དབང་པོ་ཡོངས་སུ་
སྨིན་པར་བྱ་བའོ། །ཡན་ལག་གིས་ཞེས་བྱ་བ་ནི་རྒྱུ་གང་གིས་སོ། །ལུས་རེག་པར་བྱེད་དམ་ཞེས་བྱ་བ་ནི་ལུས་གཉིས་བར་ཆད་མེད་པས་རེག་པར་བྱེད་པའོ། །ལག་པ་ནས་བཟུང་ངམ་ཞེས་བྱ་བ་ལ་སོགས་པས་ནི། ལུས་ཀྱི་རེག་པའི་ངོ་བོ་ཉིད་བསྟན་ཏོ། །ངམ་ཞེས་བྱ་བའི་སྒྲ་ནི་འདིར་བསྡུ་བའི་དོན་ཏེ་དེས་ན་རྩོམ་པ་གཅིག་ཏུ་གྱུར་པའི་ལག་པ་དང༌། རྐང་པ་དང་ལན་བུ་ལ་སོགས་པ་ལ་འཛིན་པ་དག་བྱེད་ན་དགེ་འདུན་ལྷག་མ་གཅིག་ཁོ་ནར་འགྱུར་གྱི་རེ་རེས་མི་འགྱུར་རོ་ཞེས་བྱ་བའི་ཐ་ཚིག་གོ །གང་དག་གམ་ཞེས་བྱ་བའི་སྒྲ་དག་ཡང་རུང་བའི་དོན་དུ་ཁས་ལེན་ཅིང་ལན་བུ་ལ་བཟུང་བ་ཡང་དངོས་གཞིར་སྨྲ་བ་དེ་དག་ནི་ལྟུང་བ་བསྟན་པ་ལན་བུ་མ་སྨོས་པ་དང་ཡང་འགལ་ལ། ཞུ་བ་ལས་ཀྱང༌། སྤུ་དང་སེན་མོ་དང་སོ་ལ་སོགས་པ་ལ་སྤོམ་པོར་གསུངས་པས་དངོས་གཞིར་མི་རུང་ངོ༌། །ཆགས་པ་དང༌། ཀུན་དུ་ཆགས་པ་དང༌། ཀུན་ནས་དཀྲིས་བ་ཞེས་བྱ་བ་དག་ནི་ཆུང་ངུ་དང༌། འབྲིང་དང༌། ཆེན་པོའི་གནས་སྐབས་སོ། །གྱུར་པ་ཞེས་བྱ་བ་ནི་རྣམ་པར་གྱུར་པ་སྟེ་ཡུལ་དེ་དང་འབྲེལ་པར་འདོད་པར་གྱུར་ཅེས་བྱ་བའི་ཐ་ཚིག་གོ །འདིར་ནི་རེག་པ་ལ་སོགས་པའི་བདེ་བ་འདོད་པ་ལ་ལྟུང་བ་འདི་དང་འོག་མ་གཉིས་འབྱུང་བར་སྟོན་ཏོ། །རྟོག་པ་དང་ལྡན་པ་ཞེས་བྱ་བ་ནི་བྱམས་པ་དང་ལྡན་པའོ། །འབྲེལ་པ་ཞེས་བྱ་བ་ནི་དབང་དུ་གྱུར་པ་ཉིད་དོ། །རྣམ་པ་དེ་དག་མ་རྟོགས་པ་ཞེས་བྱ་བ་ནི་འདོད་ཆགས་དང་བྲལ་བའི་གནས་སྐབས་སོ། །སྟེན་ནུས་པ་ཞེས་བྱ་བ་ནི་བོང་ཚོད་འབྲིང་སྟེ་སྐྱེས་པའི་ལག་པ་དང་རྐང་པ་དང་ཟག་ཕྱེད་ལ་སོགས་པ་ཡན་ལག་གིས་འཛིན་ནུས་པའི་ལུས་ཅན་ཡིན་གྱི་ལུས་མ་ཐོབ་པ་དང༌། ལུས་ཟད་པ་མ་ཡིན་ནོ་ཞེས་བྱ་བའི་ཐ་ཚིག་གོ །མཁྲིག་མ་ཞེས་བྱ་བ་ནི་ཁབ་རལ་གྱི་ཕྱོགས་སོ། །སྐྲ་དག་དང་དེ་དང་འབྲེལ་བའི་གོས་སོ་ཞེས་བྱ་བ་ནི་དེ་གཉིས་ཀ་བསྡུས་པ་ལན་བུ་ཞེས་བྱ་བའི་ཐ་ཚིག་གོ །ནོམ་པ་ཞེས་བྱ་བ་ནི་ཅུང་ཞིག་རེག་པའོ། །ཉུག་པ་ཞེས་བྱ་བ་ནི་ཕྱོགས་ཐམས་ཅད་ཀྱིས་རེག་པའོ། །སྤྲོད་པར་བྱེད་པ་ཞེས་བྱ་བ་ནི་ལག་པ་གཉིས་ཀྱིས་འཁྱུད་པར་བྱེད་པའོ། །འཛིན་པར་བྱེད་པ་ཞེས་བྱ་བ་ནི་སྡོམ་པར་བྱེད་པའོ། །འདྲེན་པར་བྱེད་པ་ཞེས་བྱ་བ་ནི་བདག་ཉིད་ཀྱི་གནས་སུ་འདྲེན་པར་
བྱེད་པའོ། །ཡོངས་སུ་འདྲེན་པར་བྱེད་པ་ཞེས་བྱ་བ་ནི་གནས་ནས་གནས་གཞན་དུ་འཁྲིད་པར་བྱེད་པའོ། །འོག་ནས་འཁྱུད་པར་བྱེད་པ་ཞེས་བྱ་བ་ནི་གྱེན་དུའོ། །སྟེང་ནས་འཁྱུད་པར་བྱེད་པ་ཞེས་བྱ་བ་ནི་ཐུར་དུའོ། །དམ་དུ་སྦྱོར་བར་བྱེད་པ་ཞེས་བྱ་བ་ནི་དབང་དུ་གནོན་པར་བྱེད་པའོ། །ཟ་འགྲམ་ཞེས་བྱ་བ་ནི་འགྲམ་པའི་མཚམས་སོ། །རྐང་པའི་རྩེ་མོ་ཞེས་བྱ་བ་ནི་རྐང་པའི་ཐོག་མའོ། །རོ་མྱོང་བར་བྱེད་ཅེས་བྱ་བ་ནི་བདག་གིར་བྱེད་པའོ། །ངེས་པར་རྟོག་པར་བྱེད། །ལྷག་པར་ཆགས་པར་བྱེད། ལྷག་པར་ཆགས་ཤིང་འདུག་པར་བྱེད་ཅེས་བྱ་བ་ནི་ཆུང་ངུ་དང་འབྲིང་དང༌། ཆེན་པོའི་གནས་སྐབས་སོ། །ལུས་ཉེ་བར་གཞོལ་བར་བྱེད་ན་ཞེས་བྱ་བའི་ཚིག་ནི་ཕ་རོལ་གྱི་སྤྱོད་པ་ལས་ལྟུང་བར་མི་འགྱུར་བ་དང༌། རོ་མྱོང་བའི་བྱ་བ་ལས་ལུས་ཀྱི་ལྟུང་བར་མི་འགྱུར་རོ་ཞེས་བསྟན་པའི་ཕྱིར་རོ། །དེ་ལ་དོན་མ་ནོར་བར་བསྡུ་བ་བསྟན་པའི་ཕྱིར། ནུས་པ་ལ་དགེ་འདུན་ལྷག་མ་གང་ཡིན་པ་དེ་མི་ནུས་པ་ལ་ཉེས་པ་སྦོམ་པོའོ་ཞེས་བྱ་བ་ལ་སོགས་པ་གསུངས་ཏེ། ནུས་པ་དང་གོས་ཀྱིས་བར་དུ་ཆོད་པ་མེད་པ་དང༌། ནོམ་པ་ལ་སོགས་པ་གང་ལ་དགེ་འདུན་ལྷག་མའི་ལྟུང་བར་འགྱུར་བ་དེ་ལས་མི་ནུས་པ་ལ་སྨད་པའི་ཕྱིར་ཉེས་པ་སྤོམ་པོར་ཤེས་པར་བྱའོ། །མིའི་འགྲོ་བར་གཏོགས་པའི་སྐྱེས་པ་དང༌། ཟ་མ་དང་མ་ནིང་དང༌། མཚན་གཉིས་པ་རྣམས་ལ་ནི་ནུས་པ་ཉིད་ཡིན་ཡང་བུད་མེད་ཉིད་མེད་པའི་ཕྱིར་ཉེས་པ་སྦོམ་པོའོ། །དུད་འགྲོ་ལས་སྐྱེས་པའི་སྐྱེས་པ་དང༌། ཟ་མ་དང་མ་ནིང་དང༌། མཚན་གཉིས་པ་དག་ལ་ཡང་ནུས་པ་ཉིད་ཡིན་ཡང་བུད་མེད་ཉིད་མེད་པའི་ཕྱིར་ཉེས་པ་སྦོམ་པོར་འགྱུར་རོ། །གང་དུད་འགྲོ་མོ་ལ་ཉེས་པ་སྦོམ་པོར་འདོད་པ་དེ་ནི་དུད་འགྲོའི་སྐྱེ་གནས་སུ་སྐྱེས་པ་ཕོ་ལ་སོགས་པ་ལ་རེག་པ་སྦོམ་པོར་གསུངས་པའི་ཚིག་འདིས་བཀག་པར་ཤེས་པར་བྱས་ཏེ། གཞན་དུ་ན་ཡན་ལག་གཉིས་མ་ཚང་བའི་ཕྱིར་འདི་ལ་ཡང་ཉེས་བྱས་སུ་འགྱུར་རོ། །ནུས་པ་གང་ལ་གོས་ཀྱིས་བར་དུ་ཆོད་པ་ལ་སོགས་པ་རེག་པ་ལ་ཉེས་པ་སྦོམ་པོ་གང་ཡིན་པ་དེ་ལ་མི་ནུས་པ་ལས་ཉེས་བྱས་ཏེ། ཡན་ལག་གཉིས་མ་ཚང་བའི་ཕྱིར་རོ། །མིའི་འགྲོ་བར་གཏོགས་པ་སྐྱེས་པ་ལ་སོགས་པ་མི་ནུས་པ་ལ་ཡང་ཉེས་བྱས་ཏེ། མི་ནུས་
པའི་ཕྱིར་དང༌། བུད་མེད་ཉིད་མེད་པའི་ཕྱིར་རོ། །དུད་འགྲོའི་སྐྱེ་གནས་སུ་སྐྱེས་པ་ཕོ་ལ་སོགས་པ་ལ་ཡང་ཉེས་བྱས་ཉིད་དེ། ཡན་ལག་གཉིས་མེད་པའི་ཕྱིར་རོ། །ནུས་པ་གང་ལ་ཁྱིམ་དུ་འགྲོ་བ་ལ་སོགས་པའི་བྱ་བ་ལ་སྦྱོར་བར་གྱུར་པའི་ཉེས་བྱས་ཡིན་པ་དེ་ལ་མི་ནུས་པ་ལ་ཉེས་བྱས་ཉིད་དེ། དེ་ནི་ཉེས་བྱས་ཕྲ་མོ་ཡིན་ནོ། །སྐྱེས་པ་ལ་སོགས་པ་ལ་ནི་ཉེས་བྱས་ཕྲ་མོ་ཡིན་ནོ། །མ་ཡང་ཡིན་ལ་མར་འདུ་ཤེས་པ་ཡང་ཡོད་པ་ཞེས་བྱ་བ་ནི་ཡོན་ཏན་གཉིས་ཀ་དང་ལྡན་པ་ལ་ལྟུང་བ་མེད་པར་བསྟན་པའི་ཕྱིར་ཏེ། དེ་ལ་ནི་དྲལ་ཅིང་གྱུར་པའི་སེམས་མེད་པའི་ཕྱིར་ལྷག་མ་རྣམས་ལ་ཡང་ལྟུང་བ་མེད་དོ། །ལུས་ཀྱིས་རེག་པའི་དགེ་འདུན་ལྷག་མ་སྟེ་གཉིས་པའི་ཚིག་རྣམ་པར་བཤད་པ་རྫོགས་སོ།། །།དྭ་ཞེས་བྱ་བ་ནི་ཕ་ཤི་བའི་བུ་སྟེ་གཞན་གྱིས་གསོས་པའི་ཕྱིར་རོ། །རྒྱན་པོ་པ་ཞེས་བྱ་བ་ནི་རྒྱན་འགྱེད་པའོ། །ནལ་གྱི་བུ་ཞེས་བྱ་བ་ནི་ཁྱིམ་ཐབ་མ་ཡིན་པའི་བུའོ། །ལེགས་པར་སྨྲས་པ་ཞེས་བྱ་བ་ནི་དགེ་བ་དག་གོ །ཉེས་པར་སྨྲ་བ་ཞེས་བྱ་བ་ནི་མི་དགེ་བ་ཉོན་མོངས་པ་ཅན་དག་གོ །གནས་ངན་ལེན་ཞེས་བྱ་བ་ནི་ཉེས་པའོ། །དེ་ལེན་པ་ནི་ཉེས་པ་སྐྱེད་པ་སྟེ་སྐྱོན་ཆགས་པའོ། །ཕམ་པར་གྱུར་པ་ཀུན་ནས་སློང་བ་ཞེས་བྱ་བ་ནི་ཕམ་པར་འགྱུར་བ་སྐྱེད་པར་བྱེད་པ་སྟེ། ཀུན་ནས་སློང་བ་ཞེས་བྱ་བ་ནི་རྒྱུའོ། །དགེ་འདུན་ལྷག་མ་ཀུན་སློང་བ་ཞེས་བྱ་བ་ནི་དགེ་འདུན་ལྷག་མ་སྐྱེད་པར་བྱེད་པའོ། །སྡིག་པ་ཅན་ཞེས་བྱ་བ་ནི་སྡིག་པའི་དོན་དང་ལྡན་པའོ། །ཚོགས་པར་མི་འབྱུང་བ་ཞེས་བྱ་བ་ནི་ཚོགས་ཀྱི་ནང་དུ་འཇུག་པར་མི་འོས་པའི་ཕྱིར་རོ། །སྤྲོད་པ་ལས་བྱུང་བ་དང་ལྡན་པ་ཞེས་བྱ་བ་ནི་གཉིས་ཀྱིས་གཉིས་སྤྲོད་པ་ལས་བྱུང་བའི་ཆོས་ཀྱི་མིང་དང་ལྡན་པ་སྟེ། མི་ཚངས་པར་སྤྱོད་པ་དང་ལྡན་པའི་ཚིག་གོ །མ་སྨྲས་པ་ལ་སྨྲས་པ་ཞེས་བྱ་བ་ནི་བུད་མེད་ཀྱིས་སྔར་མ་སྨྲས་པ་ལ་དགེ་སློང་གིས་སྨྲས་པའོ། །སྨྲས་པ་ལ་ཕྱིར་སྨྲས་ནའོ་ཞེས་བྱ་བ་ནི་སྔར་བུད་མེད་ཀྱིས་སྨྲས་པ་ལ་དགེ་སློང་གིས་ཕྱིར་སྨྲས་པའོ། །བསྔགས་པ་བྱེད་པ་ཞེས་བྱ་བ་ནི་སྟོད་པར་བྱེད་པའོ། །བསྔགས་པ་མ་ཡིན་པ་བྱེད་པ་ཞེས་བྱ་བ་ནི་སྨོད་པར་བྱེད་པའོ། །གསོལ་བར་བྱེད་པ་ཞེས་བྱ་བ་ནི་དངོས་སུ་གསོལ་བར་བྱེད་པའོ། །ཉེ་བར་གསོལ་བར་བྱེད་པ་ཞེས་བྱ་བ་ནི་དངོས་སུ་མི་སྨོས་པར་གསོལ་བར་བྱེད་པའོ། །འདྲི་བར་བྱེད་པ་
ཞེས་བྱ་བ་ནི་སྐབས་འདྲི་བར་བྱེད་པའོ། །ཡོངས་སུ་འདྲི་བར་བྱེད་པ་ཞེས་བྱ་བ་ནི་སྐབས་དང་སྐབས་མ་ཡིན་པ་གཉི་ག་ཀུན་ནས་འདྲི་བར་བྱེད་པའོ། །རྗོད་པར་བྱེད་པ་ཞེས་བྱ་བ་ནི་བདག་ཉིད་དགའ་བའི་སྐབས་བརྗོད་པའོ། །སྨོན་པར་བྱེད་པ་ཞེས་བྱ་བ་ནི་ཤིས་པ་བརྗོད་པའོ། །གཤེ་བར་བྱེད་པ་ཞེས་བྱ་བ་ནི་སྦྱོར་བར་བྱེད་པའོ། །དྲལ་ཞིང་ཞེས་བྱ་བ་ནི་ཀུན་ནས་དཀྲིས་པ་ཉིད་དོ། །གྱུར་པ་ཞེས་བྱ་བ་ནི་ཡུལ་ལ་རྟོག་པ་ཉིད་དོ། །རྨའི་སྒོ་གསུམ་པོ་དག་ཅེས་བྱ་བ་ནི་ཁ་དང༌། བཤང་བའི་ལམ་དང༌། ཟག་བྱེད་དོ། །ལེགས་པར་འདོད་པ་ཞེས་བྱ་བ་ནི་ཁ་དོག་གིས་སོ། །ལེགས་པར་གནས་པ་ཞེས་བྱ་བ་ནི་དབྱིབས་ཀྱིས་སོ། །ལེགས་པར་གྱུར་པ་ཞེས་བྱ་བ་ནི་ལས་སུ་རུང་བ་སྟེ། ཡོངས་སུ་སྨིན་ཞེས་བྱ་བའི་ཐ་ཚིག་གོ །སྤྲོད་པ་ལས་བྱུང་བ་དང་ལྡན་པ་ཞེས་བྱ་བ་ནི་གཉིས་ཀྱིས་གཉིས་སྤྲོད་པ་ལས་ཆོས་གང་བྱུང་བ་དེའི་མིང་དང་ལྡན་པའི་ཚིག་སྟེ། རྒྱ་ཞེས་བྱ་བའི་འོག་ཁོ་ནང་རྣ་རུ་ཞེས་བྱ་བ་བརྗོད་པའོ། །དེ་བཞིན་ནམ་འོན་ཏེ་མ་ཡིན། དེ་ལ་སྲུང་བ་ཇི་སྙམ་བྱེད་ཅེས་བྱ་བ་ནི་ཇི་ལྟར་དགའ་བ་དང་ཇི་ལྟར་ཡིད་དུ་འོང་བ་ཡིན་ནམ་འོན་ཏེ་མ་ཡིན། དེ་ལ་ཁྱོད་ཇི་སྙམ་དུ་སེམས་ཞེས་བྱ་བའི་ཐ་ཚིག་གོ །རོ་ལྟ་བུ་ལ་སོགས་པས་སྦྱོ་བདག་གིས་ཞེས་བྱ་བ་ནི་རོ་ལྟ་བུ་དང༌། མོ་གཤམ་ལྟ་བུ་དང༌། ཟ་མ་ལྟ་བུ་ཁྱོད་ལ་བོང་བུ་དག་དེ་ལྟར་བྱེད་པར་གྱུར་ཅིག །ཁྱོད་ཀྱིས་དེར་མགལ་དུམ་དག་ཆུག་ཤིག་ཅེས་བྱ་བ་ལ་སོགས་པས་སྤྱོས་པ་དག་གིས་སོ། །གཞན་ཡང་ཞེས་བྱ་བ་ལ་སོགས་པའི་འགྲེས་ཀྱིས་ནི་གཞན་གྱི་ཚིག་གིས་ཀྱང་ལྟུང་བར་མི་འགྱུར་ལ། རོ་མྱང་བ་མེད་པས་ཀྱང་ལྟུང་བར་མི་འགྱུར་གྱི། བདག་ཉིད་ཀྱི་ཚིག་དང༌། རོ་མྱང་བས་ལྟུང་བར་འགྱུར་རོ་ཞེས་བྱ་བར་སྟོན་ཏེ། དེའི་ཕྱིར་དགེ་སློང་གིས་དྲལ་ཞིང་གྱུར་པའི་སེམས་ཀྱིས་དེ་རོ་མྱོང་བར་བྱེད། ངེས་པར་རྟོག་པར་བྱེད། ལྷག་པར་ཆགས་པར་བྱེད། ལྷག་པར་ཆགས་ཤིང་འཇུག་པར་བྱེད་པ་དེ་ལྟ་དེ་ལྟར་ཕྱིར་སྨྲ་བར་བྱེད་ཅིང་ཞེས་བྱ་བ་གསུངས་པའོ། །དུད་འགྲོའི་སྐྱེ་གནས་སུ་སྐྱེས་པ་ལ་ཉེས་བྱས་སོ་ཞེས་བྱ་བ་ནི་ཕོ་ལ་སོགས་པ་ལ་སྟེ། མོ་ཉིང་མ་ཡིན་པའི་ཕྱིར་དང༌། རིགས་མི་མཐུན་པ་ཉིད་ཀྱིས་ཐ་སྙད་དུ་བྱར་མི་རུང་བ་ཉིད་ཀྱི་ཕྱིར་ན་སྨད་དོ་ཞེས་བྱ་བའི་
ཐ་ཚིག་གོ །འདིར་ནི་དུད་འགྲོ་མི་ནུས་པ་ལ་སྦོམ་པོའོ་ཞེས་བྱ་བ་སྨོས་པར་ཤེས་པར་བྱའོ། །སྐད་ཀྱི་ངེས་པའི་ཚིག་ཅེས་བྱ་བ་ལ་སོགས་པ་ལ་ནི་དྲལ་ཅིང་གྱུར་པའི་སེམས་མེད་པའི་ཕྱིར་ལྟུང་བ་མེད་དོ། །ནས་ཀྱི་མིང་དང༌། རྩ་བའི་མིང་དང༌། ཡོལ་བའི་མིང་ཞེས་བྱ་བ་ནི་རྒྱ་གར་སྐད་དུ་ནས་ལ་ནི་ཡ་བ་ཞེས་བྱ། རྩ་ལ་ནི་ཡ་བ་ས་ཞེས་བྱ། ཡོལ་བ་ལ་ནི་ཡ་བ་ནི་ཀ་ཞེས་བྱ། སྤྲོད་པ་ལས་བྱུང་བ་ལ་ནི་ཡ་བྷ་ཞས་བྱ་བ་སྟེ། དེའི་མིང་གི་ཆ་འདྲ་བ་ཙམ་དུ་ཟད་པས་དེ་དག་བརྗོད་པ་ལ་ཡང་ལྟུང་བ་མེད་དོ། །སྤྲོད་པ་ལས་བྱུང་བ་དང་ལྡན་པ་སྨྲ་བའི་དགེ་འདུན་ལྷག་མ་སྟེ་གསུམ་པའི་རྣམ་པར་བཤད་པ་རྫོགས་སོ།། །།ལུས་ཀྱི་ཀུན་དུ་སྤྱོད་པ་ཞེས་བྱ་བ་ནི་སྤྲོད་པ་ལས་བྱུང་བའོ། །དགེ་བའི་ཆོས་ཅན་ཞེས་བྱ་བ་ནི་སེམས་མཉམ་པར་གཞག་པའོ། །ཚངས་པར་སྤྱོད་པ་ཞེས་བྱ་བ་ནི་ལམ་ཤེས་པའོ། །མཆོག་ཅེས་བྱ་བ་ལ་སོགས་པ་བཅོ་བརྒྱད་ནི་བསྔགས་པ་སྨྲ་བའི་རྣམ་གྲངས་པ་དག་ཡིན་པས་འདིར་སྨོས་ཏེ། དེ་དག་གང་བརྗོད་ཀྱང་བྱེ་བྲག་མེད་དོ། །དེ་ལ་ཇི་ལྟར་མཆོག་གི་ཞེ་ན་ཞེས་བྱ་བ་ལ་སོགས་པའི་འགྲེས་དང་པོས་ནི་དེ་ལྟ་བུ་ཞེས་བྱ་བ་དང་སྤྲོད་པ་ལས་བྱུང་བའི་ཞེས་བྱ་བ་གཉིས་ཀ་སྨོས་ཏེ། ཚུལ་ཁྲིམས་དང་ལྡན་པ་ལ་ཞེས་བྱ་བ་དང༌། དགེ་བའི་ཆོས་ཅན་ལ་ཞེས་བྱ་བ་དང༌། ཚངས་པར་སྤྱོད་པ་ལ་ཞེས་བྱ་བ་དང༌། ཚུལ་ཁྲིམས་དང་ལྡན་པའི་དགེ་བའི་ཆོས་ཅན་ལ་ཞེས་བྱ་བ་དང༌། ཚུལ་ཁྲིམས་དང་ལྡན་པ་ཚངས་པར་སྤྱོད་པ་ལ་ཞེས་བྱ་བ་དང༌། དགེ་བའི་ཆོས་ཅན་ཚུལ་ཁྲིམས་དང་ལྡན་པ་ལ་ཞེས་བྱ་བ་དང༌། དགེ་བའི་ཆོས་ཅན་ཚངས་པར་སྤྱོད་པ་ལ་ཞེས་བྱ་བ་དང༌། ཚངས་པར་སྤྱོད་པ་ཚུལ་ཁྲིམས་དང་ལྡན་པ་ལ་ཞེས་བྱ་བ་དང༌། ཚངས་པར་སྤྱོད་པ་དགེ་བའི་ཆོས་ཅན་ལ་ཞེས་བྱ་བ་དང༌། ཚུལ་ཁྲིམས་དང་ལྡན་པ་དགེ་བའི་ཆོས་ཅན་ཚངས་པར་སྤྱོད་པ་ལ་ཞེས་བྱ་བར་ཡོན་ཏན་རྣམ་པ་བཅུ་པོ་རེ་རེ་མཆོག་ལ་སོགས་པ་བཅོ་བརྒྱད་པོ་དག་རེ་རེ་ལ་ཡང་བཅུ་བཅུར་སྦྱར་བའི་དངོས་གཞིར་འགྱུར་བའི་ལྟུང་བ་བརྒྱ་བརྒྱད་ཅུ་སྟོན་ཏོ། །འགྲེས་གཉིས་པ་ནི་ང་ལྟ་བུ་ཞེས་སྨོས་ལ། སྤྲོས་པ་ལས་འབྱུང་བ་ཞེས་མ་སྨོས་པའི་ཡོན་ཏན་བཅུ་པོ་དག་མཆོག་ལ་སོགས་པ་བཅོ་བརྒྱད་པོ་དག་རེ་རེ་ལ་ཡང་བཅུ་བཅུར་སྦྱར་བའི་སྦོམ་པོ་བརྒྱ་
བརྒྱད་ཅུ་སྟོན་ཏོ། །འགྲེས་གསུམ ་པས་ནི་སྤྲོས་པ་ལས་བྱུང་བ་ཞེས་སྨོས་པས་ནི་ང་ལྟ་བུ་ཞེས་མ་སྨོས་པའི་ཡོན་ཏན་བཅུ་པོ་དག་མཆོག་ལ་སོགས་པ་བཅོ་བརྒྱད་རེ་རེ་ལ་ཡང་བཅུ་བཅུར་སྦྱར་བའི་སྦོམ་པོ་བརྒྱ་བརྒྱད་ཅུ་སྟོན་ཏོ། །འགྲེས་བཞི་པས་ནི་ང་ལྟ་བུ་ཞེས་བྱ་བ་དང༌། སྤྲོད་པ་ལས་བྱུང་བ་ཞེས་བྱ་བ་གཉི་ག་མ་སྨོས་པའི་ཡོན་ཏན་བཅུ་པོ་དག་མཆོག་ལ་སོགས་པ་བཙོ་བརྒྱད་རེ་རེ་ལ་ཡང་བཅུ་བཅུར་སྦྱར་བའི་ཉེས་བྱས་བརྒྱ་བརྒྱད་ཅུ་སྟོན་ཏོ། །ཀུན་དུ་སྤྱོད་པས་བསྔགས་པའི་དགེ་འདུན་ལྷག་མ་སྟེ་བཞི་པའི་ཚིག་རྣམ་པར་བཤད་པ་རྫོགས་སོ།། །། ཡིད་གཅུགས་པ་ཞེས་བྱ་བ་ནི་ཡིད་རྟོན་པའོ། །ཁྱིམ་འཇུག་པར་བྱེད་ཅེས་བྱ་བ་ནི་ཁྱིམ་རྣམས་ཕན་ཚུན་འབྲེལ་བར་བྱེད་པ་གང་ཡིན་པ་སྟེ། མཚན་མཁན་ཞེས་བྱ་བའི་ཐ་ཚིག་གོ །ཁྱིམ་ན་གནས་པར་ནུས་པ་ཞེས་བྱ་བ་ནི་ཁྱིམ་སྐྱོང་བར་བྱེད་ནུས་པའོ། །དུས་གཅིག་ཏུ་ཞེས་བྱ་བ་ནི་དུས་མཉམ་དུའོ། །རེ་ཞིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་ནི་མ་མཛད་དོ་ཞེས་བྱ་བ་ནི་འཕྲིན་ནོད་པ་དང་འཕྲིན་ཕར་སྐྱེལ་བ་དང་འཕྲིན་ཚུར་སྐྱེལ་བའི་རང་བཞིན་གྱི་སྨྱན་བྱེད་པ་ལ་མ་ཞུགས་པའི་ཕྱིར་རོ། །བུད་མེད་ལ་སྐྱེས་པའི་ཚིག་དང་ཞེས་བྱ་བ་ནི་བུད་མད་ཀྱི་ཡུལ་ལས་སྐྱེས་པའི་ཚིག་གིས་སོ། །སྐྱེས་པ་ལ་བུད་མེད་ཀྱི་ཚིག་གིས་སྐྱེས་བྱ་བ་ནི་སྐྱེས་པའི་ཡུལ་ལ་བུད་མེད་ཀྱི་ཚིག་གིས་སོ། །ཆུང་མ་ཉིད་ཅེས་བྱ་བ་ནི་བུད་མེད་གྲགས་པ་ཉིད་དོ། །མཛའ་ན་མོ་ཉིད་ཅེས་བྱ་བ་ནི་བུད་མེད་མཁྱུད་བུ་ཉིད་དོ། །སྨྱན་ཞེས་བྱ་བ་ནི་འཕྲིན་པ་ཉིད་དོ། །བྱེ་བྲག་ནི་ཅི་ཡོད་ཅེས་བྱ་བ་ནི་སྦྱོར་བའི་དུས་ནའོ། །བསམ་པ་ནི་ཅི་ཡོད་ཅེས་བྱ་བ་ནི་སེམས་པའི་དུས་ནའོ། །ཐ་དད་དུ་བྱ་བ་ནི་ཅི་ཡོད་ཅེས་བྱ་བ་ནི་ཕྲད་པའི་འབྲས་བུའི་དུས་ནའོ། །ཆུང་མ་ཞེས་བྱ་བ་ནི་གསོ་བར་བྱ་བའོ། །སྐྱེ་དགུའི་བདག་མོ་ཞེས་བྱ་བ་ནི་བུ་ཚང་མའོ། །ཆུ་ཚིགས་ཀྱིས་བྱིན་ཞིང་ཞེས་བྱ་བ་ནི་སྔར་ཆུ་བྱིན་ནས་དེའི་རྗེས་སུ་བུ་མོ་ཡང་བྱིན་པའོ། །འདོད་པ་དག་གི་ཕྱིར་སྤྱོད་པ་ཞེས་བྱ་བ་ནི་འདོད་པ་དག་གི་དོན་དུ་སྤྱོད་པའོ། །བསྲུངས་པ་ཞེས་བྱ་བ་ནི་བསྐོས་པས་སོ། །ཤིན་ཏུ་བསྲུངས་པ་ཞེས་བྱ་བ་ནི་བདག་ཉིད་ཀྱིས་སོ། །སྦས་པ་ཞེས་བྱ་བ་ནི་སབ་མོ་ལ་སོགས་པས་བསྐོར་བའོ།།
ཤིན་ཏུ་སྦས་པ་ཞེས་བྱ་བ་ནི་སྒོ་བཅད་པ་ལ་སོགས་པས་སོ། །རྒྱལ་མཚན་དུ་བྱས་ནས་ཞེས་བྱ་བ་ནི་རྒྱུར་བཞག་ནས་སོ། །རང་གི་དད་པ་ཞེས་བྱ་བ་ནི་འདོད་པའོ། །གཅུགས་པ་ཞེས་བྱ་བ་ནི་བྱམས་པའོ། །དགའ་བ་ཞེས་བྱ་བ་ནི་གྱ་གྱུ་མེད་པས་སོ། །གཅིག་ཏུ་བསྡུས་ཏེ་ཞེས་བྱ་བ་ནི་རྣམ་པ་གཅིག་ཏུ་བྱས་ཏེའོ། །ཐང་འགའ་ཕྲད་པ་ཞེས་བྱ་བ་ནི་བྱ་བ་དེ་ཉིད་ཀྱིས་སྐད་ཅིག་ལ་ཉེ་བར་གཟུང་སྟེ་གཟུགས་འཚོང་མ་དང་ཚོགས་ཅན་མ་དང༌། འཇུད་མཐུན་མ་ཞེས་བྱ་བའི་ཐ་ཚིག་གོ །ཁྱིམ་བདུན་པ་ཚུན་ཆད་ཅེས་བྱ་བ་ནི་སྔོན་རོལ་དུ་ནི་ཕ་དང་མའི་ཁྱིམ་བདུན་པ་ཚུན་ཆད་གཟུང་ངོ། །འོག་རོལ་དུ་ནི་བུ་དང་བུ་མོའི་ཁྱིམ་བདུན་པ་ཚུན་ཆད་གཟུང་སྟེ། རྒྱུད་གཅིག་ནས་སྐྱེས་པའི་འབྲེལ་བ་གང་ཡིན་པ་དེ་ནི་ཉེ་དུ་ཞེས་བྱའོ་ཞེས་བྱ་བའི་ཐ་ཚིག་གོ །རྣམ་པར་འཁྲུག་པ་མེད་པ་ཞེས་བྱ་བ་ནི་གང་ལ་གྲོང་པའི་ཆོས་ལས་གྱུར་པའི་རྣམ་པར་འཁྲུག་པ་མེད་པ་སྟེ། སྐྱེས་པ་གཞན་གྱི་གན་དུ་མི་འགྲོ་ཞེས་བྱ་བའི་ཐ་ཚིག་གོ །ཁྱིམ་ཐབ་ཀྱི་མལ་གྱི་རྗེས་སུ་འཇུག་པ་ཞེས་བྱ་བ་ནི་ཁྱིམ་ཐབ་འབའ་ཞིག་དང་ལྷན་ཅིག་ཉལ་གྱི། མི་གཞན་དང་མ་ཡིན་ཞེས་བྱ་བའི་ཐ་ཚིག་གོ །ཆོས་བཞིན་སྤྱོད་པ་ཞེས་བྱ་བ་ནི་ཁྱིམ་པ་མོ་བསླབ་པའི་གཞི་གཟུང་བའོ། །དེ་ལ་ལྟུང་བ་ཅིར་འགྱུར་ཞེས་བྱ་བ་ལ་སོགས་པའི་འགྲེས་ལ། སྤྲིང་བ་ནོད་པ་དང༌། འཕྲིན་ཕར་སྐྱེལ་བ་དང༌། འཕྲིན་ཚུར་སྐྱེལ་བ་དག་བདག་ཉིད་དང་མངགས་པས་རྗེས་སུ་བསྒྲུབ་པ་ལ་ལྟུང་བ་འདྲ་བར་བསྟན་པའི་ཕྱིར། དགེ་སློང་གིས་བདག་ཉིད་ཀྱིས་སྤྲིང་བ་མནོས་ཏེ་ཞེས་བྱ་བ་ལ་སོགས་པ་བཞི་པ་དང་པོ་གསུངས་སོ། །བདག་པོ་ལས་སམ་མངགས་པ་ལས་སྤྲིང་བ་ནོད་པ་ལ་ལྟུང་བ་འདྲ་བར་བསྟན་པའི་ཕྱིར། དགེ་སློང་གིས་མངགས་པ་ལས་བདག་ཉིད་ཀྱིས་སྤྲིང་བ་མནོས་ཏེ། ཞེས་བྱ་བ་ལ་སོགས་པ་བཞི་པ་གཉིས་པ་གསུངས་སོ། །མངགས་པས་མངགས་པ་ལ་སོགས་པས་ཡང་བདག་པོ་དང་འདྲ་བར་བསྟན་པའི་ཕྱིར། དགེ་སློང་གི་མངགས་པས་མངགས་པ་ལ་བདག་ཉིད་ཀྱིས་སྤྲིང་བ་མནོས་ཏེ་ཞེས་བྱ་བ་ལ་སོགས་པ་བཞི་པ་གསུམ་གསུངས་སོ། །འཕྲིན་ནོད་པ་དང་འཕྲིན་པར་སྐྱེལ་བ་དང༌། འཕྲིན་ཚུར་སྐྱེལ་བ་དག་འཕྲད་པ་སོ་སོའི་ཕྱིར་དང༌། ཐ་དད་པར་གྱུར་པ་ཉིད་
ཡིན་པའི་ཕྱིར་རོ། །སྦྱོར་བ་སོ་སོ་བསྟན་པའི་ཕྱིར། དགེ་སློང་གཉིས་ཀྱིས་གཉི་གས་སྤྲིང་བ་མནོས་ཏེ་ཞེས་བྱ་བ་ལ་སོགས་པའི་ཚར་བརྩམས་སོ། །ལམ་ལ་སོགས་པ་ལ་ཡང་ཁ་ན་མ་ཐོ་བ་འདྲ་བར་བསྟན་པའི་ཕྱིར། དགེ་སློང་གཅིག་ཅེས་བྱ་བ་ལ་སོགས་པའི་ཚར་བརྩམས་སོ། །མཛའ་ན་མོ་ཞེས་བྱ་བ་ནི་ཡང་དང་ཡང་དུ་བགྲོད་པར་བྱ་བའོ། །སྨོས་འདྲིན་ཞེས་བྱ་བ་ནི་ལན་ཅིག་བགྲོད་པར་བྱ་བའོ། །མཛའ་ན་ཕོ་ཞེས་བྱ་བ་ནི་ཡང་དང་ཡང་དུ་འགྲོ་བར་བྱེད་པའོ། །སྨོས་འདྲིན་ཞེས་བྱ་བ་ནི་ལན་ཅིག་འགྲོ་བར་བྱེད་པའོ། །མ་བཅོལ་བར་བྱེད་པ་ལ་དངོས་གཞི་མེད་པར་བསྟན་པའི་ཕྱིར། དགེ་སློང་གི་མདུན་དུ་འགྲོ་བའི་དགེ་སློང་དང༌། ཕྱི་བཞིན་འབྲང་བའི་དགེ་སྦྱོང་གཉིས་ལ་སོགས་པའི་ཚར་བརྩམས་སོ། །བདག་པོའི་ཡུལ་དག་ལས་སྤྲིང་བ་ནོད་པ་ལ་སོགས་པ་ལ་དངོས་གཞིར་འགྱུར་གྱི་གནས་ལ་མ་ཡིན་པར་བསྟན་པའི་ཕྱིར་ཁྱིམ་བདག་ནི་གཉིས་ཏེ། བདག་པོ་དང་བདག་པོ་མ་ཡིན་པའོ་ཞེས་བྱ་བ་ལ་སོགས་པའི་ཚར་བརྩམས་སོ། །བདག་པོ་ཞེས་བྱ་བ་ནི་མཐུ་ཡོད་པའོ། །རྒྱུ་གསུམ་གྱིས་སྤྲིང་བའི་འཕྲིན་ཚུར་བསྐྱལ་བར་འགྱུར་ལ་ཞེས་བྱ་བ་ནི་ཕྱིར་གོ་བར་བྱེད་པར་འགྱུར་རོ། །ཕར་བསྐྱལ་བར་ནི་མི་འགྱུར་ཏེ་ཞེས་བྱ་བ་ནི་སྔར་གོ་བར་མ་བྱས་པ་ལ་ཡུལ་ཕྱོགས་ལ་སོགས་པས་བརྡ་སྤྲད་པ་མི་སྲིད་པའི་ཕྱིར་རོ། །ཡུལ་ཕྱོགས་དང་སྤྲིང་ཡིག་ལ་སོགས་པས་སྤྲིང་པ་ནོད་པ་ལ་སོགས་པ་ཡང་དངོས་གཞིར་འགྱུར་བར་བསྟན་པའི་ཕྱིར། རྒྱུ་གསུམ་གྱིས་ནི་སྤྲིང་བའི་འཕྲིན་ཕར་བསྐྱལ་བར་ཡང་འགྱུར་ལ་འཕྲིན་ཚུར་བསྐྱལ་བར་ཡང་འགྱུར་ཏེ་ཞེས་བྱ་བ་ལ་སོགས་པའི་ཚུལ་གྱིས་ལྔ་པ་དྲུག་པ་བརྩམས་ཏེ། ལྔ་པ་དང་པོ་ནི་ཚིག་དང་སྤྲིང་ཡིག་བསྡུས་ཏེ་དེ་ལ་ཡང་དང་པོ་ལ་ནི་ཚིག་འབའ་ཞིག་གོ །གཉིས་པ་ལ་ནི་ཐ་མ་སྤྲིང་ཡིག་གོ །གསུམ་པ་ལ་ནི་བར་མ་སྤྲིང་ཡིག་གོ ། བཞི་པ་ལ་ནི་བར་མ་དང་ཐ་མ་སྤྲིང་ཡིག་གོ །ལྔ་པ་ལ་ནི་བར་མ་སྤྲིང་ཡིག་ཡིན་ལ་ཐ་མ་ཡུལ་ཕྱོགས་དང་བརྡ་དང་མཚན་མ་ཡིན་པར་སྦྱར་རོ། །ལྔ་པ་གཉིས་པ་ནི་ཚིག་དང་ལག་ཡིག་བསྡུས་ཏེ་དེ་བཞིན་སྦྱར་བ་ཡིན་ནོ། །ལྔ་པ་གསུམ་པ་ནི་སྤྲིང་ཡིག་དང་ཚིག་བསྡུས་ཏེ་དོ་བཞིན་དུ་སྦྱར་བ་ཡིན་
ནོ། །ལྔ་བ་བཞི་པ་སྤྲིང་ཡིག་དང་ལག་ཡིག་བསྡུས་ཏེ་དེ་བཞིན་དུ་སྦྱར་བ་ཡིན་ནོ། །ལྔ་པ་ལྔ་པ་ནི་ལག་ཡིག་དང་ཚིག་བསྡུས་ཏེ་དེ་བཞིན་དུ་སྦྱར་བ་ཡིན་ནོ། །ལྔ་པ་དྲུག་པ་ནི་ལག་ཡིག་དང་སྤྲིང་ཡིག་བསྡུས་ཏེ་དེ་བཞིན་དུ་སྦྱར་བ་ཡིན་པར་ཤེས་པར་བྱའོ། །བུད་མེད་ཇི་ལྟ་བུ་ལ་སྤྲད་པར་བྱས་པ་ནི་དངོས་གཞིར་འགྱུར་བ་བསྟན་པའི་ཕྱིར། དགེ་སློང་གིས་ཆུང་མ་དང་པོ་གསུམ་པོ་ཞེས་བྱ་བ་ལ་སོགས་པ་གསུངས་སོ། །འཐབས་པ་ཉིད་ཀྱི་མོད་ཅེས་བྱ་བ་ནི་ད་ལྟར་འཐབས་པ་ཉིད་ཀྱི་མོད་དོ། །འཐབས་པའི་འོག་ཅེས་བྱ་བ་ནི་འཐབས་པའི་དུས་འདས་པ་ཉིད་དོ། །དུམ་པ་བཅད་པ་ཞེས་བྱ་བ་ནི་རྩས་བསྣུན་པ་དག་འཐབས་པ་ཉིད་དོ། །རྡེའུ་གསུམ་གཏོར་ཞེས་བྱ་བ་ནི་བོང་བ་མང་པོ་དག་གིས་བསྣུན་པ་ཉིད་དོ། །ཆོ་ག་བཏང་བ་ཞེས་བྱ་བ་ནི་ཤགས་བཀྱེ་བར་གྱུར་པ་ཉིད་དོ། །ཆུང་མ་མ་ཡིན་པར་བསྒྲགས་པ་དང་ཞེས་བྱ་བ་ནི། འདི་དང་ཕན་ཆད་བདག་གི་ཆུང་མ་མ་ཡིན་ནོ་ཞེས་བསྒྲགས་པ་ཉིད་དོ། །དྲིལ་བསྒྲགས་པ་ཞེས་བྱ་བ་ནི་ལྷའི་གནས་ལ་སོགས་པར་དྲིལ་བསྒྲགས་པས་བྲན་དུ་ཞུགས་པ་ཉིད་དོ། །དེ་ལ་ཆུང་མ་དང་པོ་གསུམ་ནི་སྐྱེས་པ་དབང་བ་ཉིད་དང༌། །ཇི་སྲིད་འཚོའི་བར་དུ་འབྲེལ་བ་ཉིད་ཡིན་པས་ཆུང་མ་མ་ཡིན་པར་བསྒྲགས་པ་དང༌། དྲིལ་བསྒྲགས་པར་གྱུར་ན་འབྲེལ་པ་མེད་པར་ཟད་ཀྱི་གཞན་དུ་མ་ཡིན་པས་ལོགས་ཤིག་ཏུ་སྨོས་སོ། །ཆུང་མ་གཞན་བཞི་དང་མཛའ་ན་མོ་བཅུ་ནི་དེ་མི་དབང་པོའི་ཕྱིར་དང༌། དགའ་བའི་དུས་ན་འབྲེལ་པ་ཡིན་པའི་ཕྱིར་འཐབ་པ་ཙམ་ཁོ་ནས་འབྲེལ་པ་དང་བྲལ་བའི་ཕྱིར་ལོགས་ཤིག་ཏུ་སྨོས་སོ། །དེ་ལ་ཆུང་མ་དང་པོ་གསུམ་ནི་འཐབ་པ་ཉིད་ཀྱི་མོད་ལ་དང༌། འཐབ་པའི་འོག་ཉིད་དང༌། དུམ་པ་བཅད་པ་ཉིད་ན་ཡིད་དུ་འོང་བ་ཙམ་རྒྱུན་ཆད་པར་ཟད་ཀྱི་བྱ་བ་གཅིག་པར་རྒྱུན་ཆད་པ་ཡང་མ་ཡིན་ལ། ཕྲད་པ་ལ་མངོན་པར་ཕྱོགས་པ་རྒྱུན་ཆད་པ་མ་ཡིན་པས་རུང་བ་མ་ཡིན་པའི་དགའ་བ་སྒྲུབས་ནས་ཉེས་བྱས་སུ་འགྱུར་རོ། །དེའུ་གསུམ་གཏོར་བ་ཉིད་དང༌། སྦྱོར་བ་བཏང་བ་ཉིད་ནི་ཡིད་དུ་འོང་བ་ཡང་རྒྱུན་ཆད་ལ་བྱ་བ་གཅིག་པ་ཡང་རྒྱུན་ཆད་པའི་ཕྱིར་རུང་བ་མ་ཡིན་པའི་བྱ་བ་གཅིག་པ་ཉིད་བསྒྲུབས་ན་སྤྲད་པ་དང་འདྲ་བའི་ཕྱིར་སྦྱོར་བ་བྱས་པར་འགྱུར་བའི་ཕྱིར་སྦྱོར་བ་ལས་བྱུང་བའི་སྦོམ་པོའོ། །ཆུང་མ་མ་ཡིན་པར་
བསྒྲགས་པ་ཉིད་དང༌། དྲིལ་བསྒྲགས་པ་ཉིད་ནི་ཡིད་དུ་འོང་བ་ཡང་རྒྱུན་ཆད་ཅིང་བྱ་བ་གཅིག་པ་ཉིད་ཀྱང་རྒྱུན་ཆད་པ་ཡིན། ཕྲད་པ་ལས་མངོན་པར་ཕྱོགས་པ་ཡང་རྒྱུན་ཆད་པ་ཡང་ཡིན་པས་ཕྲད་པ་ལ་མངོན་པར་རྫོགས་པར་བསྒྲུབས་ན་སྨྱན་རྫོགས་པར་བྱས་པ་ཡིན་པས་དངོས་གཞིར་འགྱུར་རོ། །ཆུང་མ་ལྷག་མ་རྣམས་ནི་འཐབ་པ་ཉིད་ཀྱི་མོད་ཡིན་ཡང་ཕྲད་པ་ལ་མངོན་པར་ཕྱོགས་པ་དང་བྲལ་བའི་ཕྱིར་བསྒྲུབས་ན་དངོས་གཞིར་འགྱུར་རོ། །སྡུམས་བྱེད་ཅིང་ཞེས་བྱ་བ་ནི་དགའ་བའི་སྡུམས་སོ། །མཐུན་པར་གྱུར་པ་ནི་ཞེས་བྱ་བ་ནི་དོན་གཅིག་ཏུ་གྱུར་ནའོ། །སྨྱན་བྱེད་པའི་དགེ་འདུན་ལྷག་མ་སྟེ་ལྔ་པའི་ཚིག་རྣམ་པར་བཤད་པ་རྫོགས་སོ།། །།ཁང་པ་འདི་ལྟ་བུར་མང་བ་ཉིད་དུ་གྱུར་ཏེ་ཞེས་བྱ་བའི་ཁང་པ་མང་པོ་ཉིད་དུ་གྱུར་པའོ། །ཧ་ཅང་རིངས་སོ་ཞེས་བྱ་བ་ནི་སྲིད་དུའོ། །ཧ་ཅང་ཐུང་ངོ་ཞེས་བྱ་བ་ཡང་སྲིད་དུའོ། །ཧ་ཅང་ཡངས་སོ་ཞེས་བྱ་བ་ནི་ཆེས་པའོ། །ཧ་ཅང་དོག་གོ་ཞེས་བྱ་བ་ནི་ཆུང་བའོ། །ཧ་ཅང་རྙིངས་སོ་ཞེས་བྱ་བ་ནི་རྒས་པའོ། །ཧ་ཅང་ཆུང་ངོ་ཞེས་བྱ་བ་ནི་རླུང་དང་ཆར་ལ་སོགས་པ་མི་བཟོད་པའོ། །ཧ་ཅང་བརྩིགས་ཉེས་སོ་ཞེས་བྱ་བ་ནི་བརྩིགས་མ་ལེགས་པའོ། །བྱ་བ་ཞེས་བྱ་བ་ནི་དུས་ཉེ་བར་བྱ་བའོ། །བྱེད་པ་ཞེས་བྱ་བ་ནི་དུས་གཞན་ན་འབྱུང་བའི་བྱ་བའོ། །རྣལ་འབྱོར་ཞེས་བྱ་བ་ནི་ཏིང་ངེ་འཛིན་གྲུབ་པའོ། །ཡིད་ལ་བྱེད་པ་ཞེས་བྱ་བ་ནི་སྦྱོར་བ་ལས་བྱུང་བའི་ཏིང་ངེ་འཛིན་ཏོ། །གཏོང་ཞིང་ཞེས་བྱ་བ་ནི་ཉམས་པར་བྱེད་ཅིང་ངོ༌། །མི་བླས་ཞེས་བྱ་བ་ནི་མིའི་ལས་སོ། །ཤིང་རྟའི་ལས་ཞེས་བྱ་བ་ཡང་ཤིང་རྟའི་ལས་སོ། །ཁ་བྱ་བ་ཞེས་བྱ་བ་ནི་བརྗོད་པར་བྱ་བའི་སྐབས་དང་བཅས་པའོ། །ཤར་གྱི་ཀུན་དགའི་ར་བ་ཞེས་བྱ་བ་ནི་གཙུག་ལག་ཁང་གི་མིང་ངོ༌། །རི་དགས་འཛིན་གྱི་མའི་ཁང་བཟངས་ཞེས་བྱ་བ་ནི་གཙུག་ལག་ཁང་གི་ཕྱོགས་གཅིག་གོ།། ཁང་པ་དང་ཁང་པའི་གཞི་ལེགས་པར་བསྟན་དུ་གསོལ་ཞེས་བྱ་བ་ལ་ནི་ཚད་ལ་སོགས་པ་དག་གིས་བསྟན་པའོ། །ཁང་པའི་གཞི་ལེགས་པར་བསྟན་དུ་གསོལ་ཞེས་བྱ་བ་ནི་རུང་བ་ཉིད་ལ་སོགས་པ་དག་གིས་ས་གཞི་བསྟན་པའོ། །འདོད་པ་ཞེས་བྱ་བ་ནི་དགོས་པ་དང་བཅས་པ་མ་ཐོབ་
ར་ལས་ལྷག་པར་འདོད་པའོ། །ཆོག་མི་ཤེས་པ་ཞེས་བྱ་བ་ནི་དགོས་པ་དང་བཅས་པ་ཐོབ་པ་ལས་ལྷག་པར་འདོད་པའོ། །གསོ་དཀའ་བ་ཞེས་བྱ་བ་ནི་བཟའ་བ་དང་བཏུང་བ་བསོད་པ་དག་གིས་ལུས་འཚོ་བར་བྱེད་པའོ། །དགང་དཀའ་བ་ཞེས་བྱ་བ་ནི་ཆོས་གོས་ལ་སོགས་པ་ཕྱི་རོལ་གྱི་ཡོ་བྱད་བཟང་པོ་དག་གིས་ལུས་འཛིན་པར་བྱེད་པའོ། །འདོད་པ་ཆུང་ལ་ཞེས་བྱ་བ་ལ་སོགས་པ་ནི་དེ་ལས་བཟློག་པ་ལས་ཤེས་པར་བྱའོ། །ཕྲི་བ་ཞེས་བྱ་བ་ནི་འཁོར་ཉུང་བ་ལ་སོགས་པའོ། །སྦྱངས་པ་ཞེས་བྱ་བ་ནི་དཀར་བའོ། །མཛེས་པ་ཞེས་བྱ་བ་ནི་ཚུལ་དང་མཐུན་པར་བྱེད་པ་ཉིད་དོ། །ཚོད་ཤེས་པས་ཞེས་བྱ་བ་ནི་ཚད་ལ་མཁས་པའོ། །སྤྱོད་ལམ་ཞེས་བྱ་བ་ནི་འདུག་པའི་ཐབས་སོ། །འཆག་པ་ཞེས་བྱ་བ་ནི་གོམ་པ་ཐ་མལ་པ་གསུམ་ལ་སོགས་པ་དོར་བའོ། །འགྲེང་བ་ཞེས་བྱ་བ་ནི་ལུས་མ་བཏུད་པས་འགྲེང་བ་ཉིད་དོ། །འདུག་པ་ཞེས་བྱ་བ་ནི་སྐྱིལ་མོ་ཀྲུང་བཅས་ཏེ་འདུག་པའོ། །ཉལ་བ་ཞེས་བྱ་བ་ནི་རྐང་པ་བརྐྱང་སྟེ་ཉལ་བའོ། །བདེ་བར་གཤེགས་པའི་མཐོ་གང་ལ་ནི་ཚད་དང་ལྡན་པའི་ཁྲུ་ཕྱེད་དང་དོ་ཡོད་དོ། །གནས་ཞེས་བྱ་བ་ནི་ཚང་ངོ༌། །བསྟན་པ་ཞེས་བྱ་བ་ནི་དགེ་འདུན་གྱི་ཀའོ། །དྲིས་པའི་ཚིག་གིས་ཞེས་བྱ་བ་ནི་ཅིའི་ཕྱིར་གཎྜི་བརྡུངས་ཞེས་གཞན་གྱིས་དྲིས་པ་ལ་འདིའི་ཕྱིར་བརྡུངས་སོ་ཞེས་ལན་གདབ་པའི་ཚིག་གིས་སོ། །དད་པས་ཞེས་བྱ་བ་ནི་ཡོན་ཏན་ལ་ཡིད་ཆེས་པས་སོ། །ཡིད་ཆེས་པས་ཞེས་བྱ་བ་ནི་མི་སླུ་བ་བྱས་པས་སོ། །སྦྲུལ་དང་སྡིག་པ་ལ་སོགས་པས་གནས་ཀྱི་ཤས་ཆེ་བ་ཞེས་བྱ་བ་ནི་གང་བའོ། །དེ་ལ་ལྟུང་བ་ཅི་འགྱུར་ཞེ་ན་ཞེས་བྱ་བ་ལ་སོགས་པ་ལ་མི་རུང་བ་ལ་སོགས་པ་སོ་སོ་ལ་འདིར་སྦྱོར་བ་ཉིད་དུ་འགྱུར་བས་ཁང་པ་མ་དག་པར་བྱེད་ན་རྩོམ་པར་གྱུར་པ་ཉིད་ཡིན་པར་བསྟན་པའི་ཕྱིར་དགེ་སློང་གིས་ཁང་པ་བྱེད་དུ་འཇུག་ཅིང་ཞེས་བྱ་བ་ལ་སོགས་པ་དྲུག་པ་དང་པོ་སྨོས་སོ། །བདག་གི་དོན་ཉིད་ནི་འདིར་ཡན་ལག་མ་ཡིན་གྱི་ཁང་པ་བྱེད་པ་ལ་ཉེ་བར་འགྱུར་བར་བསྟན་པའི་ཕྱིར། །དགེ་སློང་གི་གན་དུ་སོང་ངོ་ཞེས་བྱ་བ་ལ་སོགས་པ་དྲུག་པ་གཉིས་པ་བརྩམས་སོ། །གཞན་གྱིས་བརྩམས་པ་མ་ཟིན་པ་ཁྱིམ་དུ་མ་རེད་པ་སྒྲུབ་པར་བྱེད་པ་ལ་ཁ་ན་མ་ཐོ་བ་འདྲ་བ་བསྟན་པའི་ཕྱིར་གལ་ཏེ་དེ་དེའི་གན་དུ་སོང་སྟེ་འདི་སྐད་ཅེས་ལེགས་པར་བྱས་སོ།།
ཤིན་ཏུ་བྱས་སོ་ཞེས་བྱ་བ་ལ་སོགས་པ་དྲུག་པ་གསུམ་པ་དང་བཞི་པ་བརྩམས་སོ། །བྱས་པ་རྙེད་པ་ཞེས་བྱ་བ་ནི་གཞན་གྱིས་བྱས་ཟིན་པ་བདག་གཏན་ཐོབ་པའོ། །བྱས་པ་ལ་ལོངས་སྤྱོད་པ་ཞེས་བྱ་བ་ནི་གཞན་གྱིས་བྱས་པ་ལ་རེ་ཞིག་ལོངས་སྤྱོད་པའོ། །དེ་གཉིས་ལ་ནི་ལྟུང་བ་མེད་དེ། བྱེད་པ་མེད་པའི་ཕྱིར་རོ། །རྙིང་པ་འཆོས་པ་ཞེས་བྱ་བ་ནི་བྱི་དོར་བྱེད་པ་སྟེ་དེ་ལ་ཡང་ལྟུང་བ་མེད་དོ། །གསར་པ་འཆོས་པ་ཡང་དེ་དང་འདྲའོ། །ཁང་པའི་དགེ་འདུན་ལྷག་མ་སྟེ་དྲུག་པའི་ཚིག་རྣམ་པར་བཤད་པ་རྫོགས་སོ།། །།ངོས་ཉམས་པ་ཞེས་བྱ་བ་ནི་རྩིག་པ་སྣུར་བའོ། །མ་མོའི་ཁྱིམ་ཞེས་བྱ་བ་ནི་འབྱུང་པོའི་ཁྱིམ་ཞེས་ཏེ་དོག་ལ་འཕང་མཐོ་བའོ། །ང་རྒྱལ་གྱིས་ཁེངས་པར་གྱུར་པ་ནས་ཞེས་བྱ་བ་ནི་ང་རྒྱལ་བདོ་བར་གྱུར་ནས་སོ། །ཐབས་ཡིན་གྱིས་དེ་ལྟར་བྱའོ་ཞེས་བྱ་བ་ནི་དེ་ནི་ཐབས་ཡིན་པའི་ཕྱིར་དེ་ལྟར་བྱའོ་ཞེས་ཚིག་གིས་ཁས་བླངས་པའོ། །སེར་སྣ་ཅན་ཞེས་བྱ་བ་ནི་སྦྱིན་མི་འདོད་པའོ། །མི་ཕྲ་བ་ཞེས་བྱ་བ་ནི་ཡིད་མི་ཆེས་པའོ། །རོལ་མོ་མཁན་གྱི་གནས་ཞེས་བྱ་བ་ནི་གླུ་ལེན་པའི་གནས་སོ། །འཇུད་མཐུན་མའི་གནས་ཞེས་བྱ་བ་ནི་བུད་མེད་ཚོགས་ཅན་མའི་གནས་སོ། །ཆང་མའི་གནས་སོ་ཞེས་བྱ་བ་ནི་ཆང་བྱེད་པའི་གནས་སོ། །གདོལ་པའི་གནས་ཞེས་བྱ་བ་ནི་གདོལ་པའི་གྲོང་ངོ༌། །རྒྱལ་པོའི་ཕོ་བྲང་ཞེས་བྱ་བ་ནི་གང་ན་རྒྱལ་པོ་འདུག་པའོ། །ངོ་ཕྲད་པ་ཞེས་བྱ་བ་ནི་དང་པོ་ཕྲད་པའོ། །བཅུ་གཉིས་འདུས་པའི་ཞེས་བྱ་བ་ནི་མི་བཅུ་གཉིས་ཀྱིས་བྱས་པའོ། །དགེ་འདུན་ཞེས་བྱ་བ་ནི་དགེ་བའི་དོན་དུ་ཚོགས་སྡོང་བའོ། །འདོད་ཆགས་དང་བྲལ་བའི་ས་སྦྱོང་བར་བྱེད་པ་ཞེས་བྱ་བ་ནི་འདོད་ཆགས་དང་བྲལ་བའི་སྤྱོད་ཡུལ་སྟོན་པར་བྱེད་པའོ། །དོན་ཡོད་པས་ཞེས་བྱ་བ་ནི་དོན་དང་བཅས་པ་ཉིད་ཀྱིས་སོ། །བཙག་པ་ཞེས་བྱ་བ་ནི་ཚགས་སུ་བཙག་པའོ། །ཀུན་ཏུ་བསྟེན་ཅིང་ཞེས་བྱ་བ་ནི་ཆུང་ངུ་རྩོམ་པས་སོ། །གོམས་པར་བྱས་ཞེས་བྱ་བ་ནི་འབྲིང་དུ་རྩོམ་པས་སོ། །ལེན་མང་དུ་བྱས་པས་ཞེས་བྱ་བ་ནི་ཆེར་རྩོམ་པས་སོ། །ཡང་ན་ཀུན་ཏུ་བསྟེན་ཅིང་ཞེས་བྱ་བ་ནི་སྦྱོར་བ་ལའོ། །གོམས་པར་བྱས་ཞེས་བྱ་བ་ནི་དངོས་ལའོ། །ལན་མང་དུ་བྱ་ཞེས་བྱ་བ་ནི་མཇུག་ལའོ། །ལུས་ཞིག་སྟེ་ཞེས་བྱ་བ་ནི་ལུས་ཤི་ནས་སོ། །ཤི་བའི་འོག་ཏུ་ཞེས་བྱ་བ་ནི་སྲིད་པ་བར་མ་
ནས་སོ། །ངན་སོང་ཞེས་བྱ་བ་ནི་ཡི་དགས་ཏེ། དང་པོར་བདེ་འགྲོ་ལས་ཉམས་པའི་ཕྱིར་རོ། །ངན་འགྲོ་ཞེས་བྱ་བ་ནི་དུད་འགྲོ་སྟེ། སྡུག་བསྔལ་མང་པ་ཉིད་ཀྱིས་སྨད་པའི་ཕྱིར་རོ། །ལོག་པར་ལྟུང་བ་ཞེས་བྱ་བ་ནི་ངན་སོང་དང་ངན་འགྲོའི་འགྲོ་བ་དེ་གཉིས་མི་ལེན་པར་ཐོད་རྒལ་དུ་འདས་ཏེ་སེམས་ཅན་དམྱལ་བ་རྣམས་སུ་ཐལ་བྱུང་དུ་སྐྱེ་བའོ། །དང་པོ་འདི་ཉིད་ཐ་མར་འགྱུར་རོ་ཞེས་བྱ་བ་ནི་དང་པོ་གང་ཡིན་པ་དེ་ཉིད་ཐ་མར་འགྱུར་བ་སྟེ་ཕྱིས་མི་འབྱུང་ངོ་ཞེས་བྱ་བའི་ཐ་ཚིག་གོ །འཕགས་པའི་རིགས་ཞེས་བྱ་བ་ནི་འཕགས་པ་དེ་བཞིན་གཤེགས་པ་ལ་སོགས་པའི་རིགས་ཏེ་འདོད་པ་རྣམ་པར་གནོན་པ་ལ་སོགས་པ་ཉོན་མོངས་པ་སྤངས་པ་ལས་འཕགས་པ་ཉིད་འགྲུབ་པའི་ཕྱིར་རོ། །ཆོས་གོས་གང་ཡང་རུང་བས་ཆོག་ཤེས་པ་ཞེས་བྱ་བ་ནི་ཆོས་གོས་ངན་པ་འམ་བཟང་པོ་གང་ཡང་རུང་བ་བྱ་བ་བྱེད་ནུས་པས་ཆོག་ཤེས་པའོ། །བསོད་སྙོམས་པ་དང་གནས་མལ་གདིང་བ་ལ་སོགས་པས་ཀྱང་དེ་བཞིན་ནོ། །སྤོང་བ་ལ་དགའ་བ་ཞེས་བྱ་བ་ནི་མྱ་ངན་ལས་འདས་པ་ལ་དགའ་བའོ། །བསྒོམ་པ་ལ་དགའ་བ་ཞེས་བྱ་བ་ནི་ལམ་བསྒོམ་པ་ལ་དགའ་བ་སྟེ། དེ་གཉིས་ནི་འབྲས་བུ་དང་རྒྱུའི་དངོས་པོས་འཁྲུལ་པ་མེད་པའི་ཕྱིར་གཅིག་ཏུ་གསུངས་སོ། །གཤིན་རྗེའི་དབྱུང་བ་ཞེས་བྱ་བ་ནི་གཤིན་རྗེའི་སྙིང་ཚོགས་སོ། །འཁྲུག་པར་བྱེད་པར་འགྱུར་བས་ཞེས་བྱ་བ་ནི་སེམས་འཁྲུག་པར་བྱེད་པས་ཞེས་བྱ་བའི་ཐ་ཚིག་གོ །ཚོགས་ཉུང་ངུ་ཞེས་བྱ་བ་ནི་འཁོར་ཉུང་ངུའོ། །དམ་པ་ཞེས་བྱ་བ་ནི་འདོད་པ་འགྲུབ་པའི་ཚིག་གོ །བྲམ་ཟེའི་འཁོར་ཤིན་ཏུ་མང་པོ་དང་ལྡན་པ་ཞེས་བྱ་བ་ནི་འཁོར་གཙོ་བོའོ། །བསོད་སྙོམས་མཆོག་ཅེས་བྱ་བ་ནི་བསླབ་པའི་གཙོ་བོའོ། །བསོད་སྙོམས་དང་པོ་ཞེས་བྱ་བ་ནི་བསླབ་པའི་དང་པོའོ། །ཁེངས་སམ་ཞེས་བྱ་བ་ནི་གང་ངམ་ཞེས་བྱའོ། །ཅོ་འདྲི་བ་ཞེས་བྱ་བ་ནི་ཐོ་འཚམས་པའོ། །སྦྱིན་པར་བྱ་བ་ཞེས་བྱ་བ་ནི་རྒྱུ་ལས་སོ། །ལྷག་མ་ཐམས་ཅད་ནི་སྔ་མ་བཞིན་ནོ། །འདིར་ཚད་ལས་འདས་པ་ཞེས་བྱ་བ་ནི་ཡན་ལག་ཏུ་མ་སྨོས་པ་ནི་དགེ་འདུན་གྱི་གཙུག་ལག་ཁང་ལ་ནི་བདག་པོ་དུ་མ་ཡོད་པའི་ཕྱིར་ཚད་ངེས་པ་མེད་པ་ཚད་ལས་འདས་པ་ནི་གཙུག་ལག་ཁང་མ་དག་པའི་ཡན་ལག་ཏུ་མ་གསུངས་སོ། །
གཙུག་ལག་ཁང་གི་དགེ་འདུན་ལྷག་མ་སྟེ་བདུན་པའི་ཚིག་རྣམ་པར་བཤད་བ་རྫོགས་སོ།། །།སྡིག་བྱུང་ཞེས་བྱ་བ་ནི་གྲོང་ཁྱེར་རོ། །ཅོད་པན་མེད་པའི་རྒྱལ་སྲིད་ཅེས་བྱ་བ་ནི་ཚོགས་ཀྱི་རྒྱལ་པོ་ཡིན་པའི་ཕྱིར་རྒྱལ་ཐབས་ཀྱི་ཅོད་པན་ནི་མེད་ལ་རྒྱལ་སྲིད་ནི་ཡོད་པའི་ཕྱིར་རོ། །ནོར་བུ་ལྟ་བུ་ཞེས་བྱ་བ་ནི་དབྱིག་ལྟ་བུའོ། །འབྲས་བུ་ཆེན་པོ་ཞེས་བྱ་བ་ནི་རྣམ་པར་སྨིན་པའི་འབྲས་བུས་སོ། །ཕན་ཡོན་ཆེན་པོ་ཞེས་བྱ་བ་ནི་སྐྱེས་པའི་རྩལ་གྱི་འབྲས་བུས་སོ། །གསལ་བ་ཆེན་པོ་ཞེས་བྱ་བ་ནི་འོད་ཀྱིས་སོ། །ཡངས་པ་ཆེན་པོ་ཞེས་བྱ་བ་ནི་འཁོར་གྱིས་སོ། །ལྗོངས་ཀྱི་དབང་ཕྱུག་ཅེས་བྱ་བ་ནི་ཡུལ་སྲུང་བའོ། །མཐུ་ཞེས་བྱ་བ་ནི་སྟོབས་སོ། །བརྩོན་འགྲུས་ཞེས་བྱ་བ་ནི་མངོན་པར་སྤྲོ་བ་སྟེ་དེ་གཉིས་ཐོབ་པའོ། །མངོན་པར་རྒྱལ་བར་བྱས་ཏེ་གནས་པ་ཞེས་བྱ་བ་ནི་ཉེ་བར་སྤྲོད་པའོ། །གླང་པོ་ཆེའི་གཉའ་བར་ཞོན་པ་ཞེས་བྱ་བ་ནི་གླང་པོ་ཆེ་དག་གི་གཉའ་བར་བཞོན་པའི་ཕྱིར་བསླབ་པའོ། །རྟ་ལ་ཞོན་པ་ཞེས་བྱ་བ་ཡང་རྟ་བཞོན་པའི་ཕྱིར་བསླབ་པའོ། །ཤིང་རྟའི་ཐབས་ཞེས་བྱ་བ་ནི་ཤིང་རྟ་བཞོན་པའི་ཕྱིར་བསླབ་པའོ། །རལ་གྱིའི་ཐབས་ཞེས་བྱ་བ་ནི་རལ་གྱི་གཟུང་བའོ། །འཕོང་ཞེས་བྱ་བ་ནི་མདའ་གཞུའི་ཐབས་སོ། །ཕྱིར་བསྣུར་ཞེས་བྱ་བ་ནི་འབྲོས་པའོ། །མདུན་དུ་བསྣུར་བ་ཞེས་བྱ་བ་ནི་གཡུལ་གྱི་སར་འབྱུང་བའོ། །འཛིན་སྟངས་ཞེས་བྱ་བ་ནི་མདའ་འཕང་བ་ལ་དགོས་པའོ། །གོམ་སྟབས་ཞེས་བྱ་བ་ནི་འཁོར་ལོ་འཕང་བ་ལ་སོགས་པ་ལ་དགོས་པའོ། །ཐོར་ཚུགས་ཞེས་བྱ་བ་ནི་གཡུལ་ལ་སོགས་པར་དགོས་པའི་སྐྲ་བཅིངས་པའོ། །གཅད་པ་ཞེས་བྱ་བ་ལ་སོགས་པ་ནི་ལྕུག་མ་ལ་སོགས་པའོ། །དྲལ་བ་ཞེས་བྱ་བ་ནི་ཤིང་ལྗོན་པ་ལ་སོགས་པ་སྤོམ་པོའོ། །དབུག་པ་ཞེས་བྱ་བ་ནི་རི་ལ་སོགས་པ་དབུག་པའོ། །རྒྱང་ནས་ཕོག་པ་ཞེས་བྱ་བ་ནི་ཐག་རིང་པོ་ནས་ཕོག་པའོ། །སྒྲ་གྲག་པར་ཕོག་པ་ཞེས་བྱ་བ་ནི་སྒྲའི་རྗེས་སུ་འབྲང་བས་ཕོག་པའོ། །གནད་དུ་ཕོག་པ་ཞེས་བྱ་བ་ནི་འཆི་བའི་ཕྱོགས་དག་ཏུ་ཕོག་པའོ། །མི་འཆོར་བར་ཕོག་པ་ཞེས་བྱ་བ་ནི་གདོན་མི་ཟ་བར་ཕོག་པའོ། །ཚབས་ཆེ་བ་ཞེས་བྱ་བ་ནི་
མཐུ་དང་ལྡན་པར་ཕོག་པའོ། །དུས་གསུམ་དུ་ཞེས་བྱ་བ་ནི་ལན་གསུམ་སྟེ་དེ་ནི་ལྟ་བའི་དུས་ཡིན་ནོ་ཞེས་བྱ་བའི་བྱེ་བྲག་གོ །ས་ལ་ལྷན་ཅིག་རྩེ་བ་ཞེས་བྱ་བ་ནི་ས་རྡུལ་ལ་ལྷན་ཅིག་རྩེ་བ་ཞེས་བྱ་བའི་ཐ་ཚིག་གོ །གྲིབ་མར་སྐྱེས་པ་ཞེས་བྱ་བ་ནི་བདེ་ཞིང་སྐྱེས་བུའི་རྩལ་མེད་པའོ། །ཕྱིར་བཅོས་པར་མི་ནུས་སོ་ཞེས་བྱ་བ་ནི་བཟློག་པར་མི་ནུས་པའོ། །ཆོས་ལ་དགའ་བ་ཞེས་བྱ་བ་ནི་ཆོས་ལ་དད་པའོ། །སེམས་ཅན་གྱི་གནས་ལ་ཞེས་བྱ་བ་ནི་སེམས་ཅན་གྱི་ཡུལ་ལའོ། །སྙིང་སྟོང་ཞིང་ཞེས་བྱ་བ་ནི་ཡིད་ལ་གཅགས་ཤིང་སྟེ། སེམས་དགའ་བ་དང་བྲལ་ཞིང་ངོ་རྟོག་པ་ན་ཞེས་བྱ་བ་ནི་སེམས་པས་གནོད་པ་ནའོ། །དབང་པོ་དག་ཕྱིར་གླན་པར་བྱེད་ཅེས་བྱ་བ་ནི་ཟློག་པར་བྱེད་པའོ། །ལས་མི་འདྲ་བ་ཞེས་བྱ་བ་ནི་བྱ་བ་ཆ་མ་ཡིན་པའོ། །རྔོན་པ་ཞེས་བྱ་བ་ནི་ཤ་རྡུང་བའོ། །བསམ་པ་མཐོང་སྟེ་ཞེས་བྱ་བ་ནི་སྤོང་སྟེའོ། །དགེ་བ་གང་ཡིན་ཞེས་ཚོལ་བས་ཞེས་བྱ་བ་ནི་དགེ་བ་གང་ཡིན་ཞེའམ་དགེ་བ་གང་ལས་འབྱུང་ཞེས་རྟག་ཏུ་ཚོལ་བས་ཞེས་བྱ་བའི་ཐ་ཚིག་གོ །ངེས་པར་འབྱུང་བའི་མངོན་པར་དགའ་བ་ཞེས་བྱ་བ་ནི་མྱ་ངན་ལས་འདས་པར་འགྲོ་བའི་ལམ་ལ་དགའ་བའོ། །རྫོགས་བྱེད་ལ་སོགས་པ་སྟོན་པ་དྲུག་པོ་ཞེས་བྱ་བ་ནི་འདྲོབ་སྐྱོང་གི་བུ་རྫོགས་བྱེད་དང༌། གནག་ལྷས་ཀྱི་བུ་ཀུན་དུ་རྒྱུ་དང༌། སྨྲ་འདོད་ཀྱི་བུ་མོའི་བུ་ཡང་དག་རྒྱལ་པ་ཅན་དང༌། མི་ཕམ་སྐྲའི་བུ་ལ་བ་ཅན་དང༌། ཀ་ཏའི་བུ་ནོག་ཅན་དང༌། གཉེན་གྱི་བུ་གཅེར་བུ་དག་གོ །ཆོས་ཀྱི་ཚུལ་ཞེས་བྱ་བ་ནི་དངོས་པོའི་ཚུལ་ལོ། །སློབ་མ་ལ་གདམས་པ་ཞེས་བྱ་བ་ནི་ལམ་བསྟན་པའོ། །ཚངས་པར་སྤྱོད་པའི་ཞེས་བྱ་བ་ནི་དཀའ་ཐུབ་ཀྱིའོ། །འབྲས་བུ་ནི་གང་ཡིན་ཞེས་བྱ་བ་ནི་དངོས་ཀྱི་འབྲས་བུ་ལས་བསམས་པའོ། །ཕན་ནི་གང་ཡིན་ཞེས་བྱ་བ་ནི་ཞར་ལས་བྱུང་བའི་འབྲས་བུ་ལས་བསམས་སོ། །འདི་ལྟར་ལྟ་ཞིང་ཞེས་བྱ་བ་ནི་ཤེས་པས་སོ། །འདི་སྐད་སྨྲས་ཏེ་ཞེས་བྱ་བ་ནི་ཚིག་གིས་སོ། །བྱིན་པ་ཞེས་བྱ་བ་ནི་གཞན་ལ་ཕན་གདགས་པའི་ཕྱིར་བྱིན་པའོ། །མཆོད་སྦྱིན་ཞེས་བྱ་བ་ནི་མཆོད་པའི་ཕྱིར་བྱིན་པའོ། །སྦྱིན་སྲེག་ཅེས་བྱ་བ་ནི་མེར་བླུགས་པའོ། །ལེགས་པར་སྤྱད་པ་ཞེས་བྱ་བ་ནི་སྲོག་གཅོད་པ་ལ་སོགས་པ་སྤོང་བའོ། །ཉེས་པར་སྤྱད་པ་
ཞེས་བྱ་བ་ནི་སྲོག་གཅོད་པ་ལ་སོགས་པའོ། །དེ་དག་ལ་སྐུར་པ་འདེབས་པ་ནི་རྒྱུའི་དངོས་པོ་འགོག་པ་ཡིན་ནོ། །ལས་རྣམས་ཀྱི་འབྲས་བུ་དང༌། རྣམ་པར་སྨིན་པ་མེད་དོ་ཞེས་བྱ་བ་ནི་འབྲས་བུ་འགོག་པར་བྱེད་དོ། །འཇིག་རྟེན་འདི་མེད་དོ་འཇིག་རྟེན་ཕ་རོལ་མེད་དོ། །མ་མེད་དོ། །ཕ་མེད་དོ། །སེམས་ཅན་རྫུས་ཏེ་སྐྱེ་བ་མེད་དོ་ཞེས་བྱ་བའི་ཚིག་ལྔས་ནི་རྒྱུ་དང་འབྲས་བུའི་དངོས་པོ་གཉིས་འགོག་པར་བྱེད་དོ། །རྫུས་ཏེ་སྐྱེ་བ་ཞེས་བྱ་བ་ནི་བར་མ་དོའི་སྲིད་པའོ། །འཇིག་རྟེན་ན་ཞེས་བྱ་བ་ལ་སོགས་པས་ནི་ཐར་པའི་ལམ་འགོག་པར་བྱེད་པའོ། དགྲ་བཅོམ་པ་ཞེས་བྱ་བ་ནི་མཆོད་པར་འོས་པ་སྟེ་དེའི་བྱེ་བྲག་བསྟན་པའི་ཕྱིར་ཡང་དག་པར་རྟོགས་པ་ཡང་དག་པར་སྒྲུབ་པ་ཞེས་བྱ་བ་སྨྲས་ཏེ། ཡང་དག་པར་རྟོགས་པ་ཞེས་བྱ་བ་ནི་ཡང་དག་པའི་ཡེ་ཤེས་དང་ལྡན་པའོ། །ཡང་དག་པར་སྒྲུབ་པ་ཞེས་བྱ་བ་ནི་ཕྱིན་ཅི་མ་ལོག་པར་སྒྲུབ་པའོ། །དེ་དག་གི་བྱེ་བྲག་བསྟན་པའི་ཕྱིར་གང་དག་ཚེ་འདི་ཉིད་ལ་ཞེས་བྱ་བ་ལ་སོགས་པ་སྨྲས་སོ། །རང་གི་མངོན་པར་ཤེས་པས་ཞེས་བྱ་བ་བདག་ཉིད་ཀྱི་ཤེས་པས་སོ། །མངོན་སུམ་དུ་བྱས་ནས་ཞེས་བྱ་བ་ནི་ཤེས་པར་བྱས་ནས་སོ། །བསྒྲུབ་སྟེ་ཞེས་བྱ་བ་ནི་ཤེས་པ་དེ་ཐོས་ནས་ཏེ། འཐོབ་པ་མངོན་སུམ་དུ་བྱས་ཞེས་བྱ་བའི་ཐ་ཚིག་གོ །གོ་བར་བྱེད་པ་ཞེས་བྱ་བ་ནི་མཐོང་བར་བྱེད་ཅེས་བྱ་བའི་ཐ་ཚིག་གོ །དེ་དག་མེད་པ་འདི་ལ་རྒྱུ་གང་ཞེ་ན། དེའི་ཕྱིར་སྲོག་འདི་ཉིད་ལ་ཞེས་བྱ་བ་ལ་སོགས་པ་སྨྲས་ཏེ། གང་གི་ཕྱིར་སྲོག་བདག་ནི་ཆོ་འདི་ཉིད་ལ་འཚོ་ཞིང་སྲོག་དེ་ཕྱིས་མཇུག་ཏུ་ཤེས་པའི་བདག་ཉིད་ཀྱིས་ཆད་ཅིང་ཟད་པར་འགྱུར་ལ་གཟུགས་ཀྱི་བདག་ཉིད་ཀྱིས་ཞིག་ཅིང་ཆུད་ཟ་བར་འགྱུར་ཏེ་ཤི་བའི་འོག་ཏུ་ཤེས་པའི་བདག་ཉིད་དང༌། གཟུགས་ཀྱི་བདག་ཉིད་གཉི་གས་ཆད་པར་འགྱུར་ཞིང་མི་འབྱུང་བ་དེའི་ཕྱིར་བྱིན་པ་ལ་སོགས་པ་མེད་དོ་ཞེས་བྱ་བའི་ཐ་ཚིག་གོ ། འོ་ན་གང་དུ་འགྲོ་བར་འགྱུར་ཞེ་ན། དེའི་ཕྱིར་སྐྱེས་བུའི་ལུས་ནི་ཞེས་བྱ་བ་ལ་སོགས་པ་སྨྲས་ཏེ། རེ་ཞིག་བདག་ནི་ཆད་པར་འགྱུར་ན་སྐྱེས་བུ་ལུས་འདི་གར་འགྲོ་ཞེ་ན། སྐྱེས་བུའི་ལུས་འབྱུང་བ་ཆེན་པོ་བཞི་ལས་འདུས་བྱས་གང་ཡིན་པ་དེ་ནི་འཆི་བའི་དུས་ནི་འབྱུང་བ་ཆེན་པོ་
བཞི་པ་དག་གི་བག་ལ་ཞ་བར་འགྱུར་རོ། །མི་ལ་སོགས་པ་དབང་པོ་རྣམས་ནི་ནམ་མཁའི་བག་ལ་ཞ་བར་འགྱུར་རོ། །རོ་ནི་རོ་གཞག་པའི་ཁྲི་དང་དེ་འདེགས་པའི་མི་བཞིའི་ཁྲི་དང་ལྔའི་མི་དག་གིས་དུར་ཁྲོད་དུ་མེར་བསྲེགས་ཏེ། ཐལ་བར་འགྱུར་རོ་ཞེས་བསྲེགས་པ་ལ་སོགས་པའི་རུས་པ་དག་ནི་ཐི་བའི་མདོག་འདྲ་བར་གནས་ཏེ་སྐྱེས་བུའི་འགྲོ་བ་ནི་དེ་ལྟ་བུ་ཡིན་ནོ། །འོ་ན་སྦྱིན་པ་དང་ལེན་པ་དག་སུ་ས་བསྟན་ཅེ་ན། དེའི་ཕྱིར་རྨོངས་པ་ཉེ་བར་བསྟན་པ་ནི་སྦྱིན་པ་ལ་མཁས་པ་ཉེ་བར་བསྟན་པ་ནི་ལེན་ཏོ་ཞེས་བྱ་བ་སྨྲས་ཏེ། རྨོངས་པ་ཞེས་བྱ་བ་ནི་བླུན་པའོ། །ཉེ་བར་བསྟན་པ་ཞེས་བྱ་བ་ནི་དང་པོ་བསྟན་པ་སྟེ་དེ་ནི་རྨོངས་པ་ཡིན་པས་དང་པོ་འགའ་ཞིག་གིས་ཉེ་བར་བསྟན་པའི་དྲིང་འཇོག་ཅིང་མི་ཕན་བཞིན་དུ་སྦྱིན་པར་བྱེད་དེ། མཁས་པ་ཉེ་བར་བསྟན་པ་ནི་འཕྲལ་གྱི་ཐོབ་རྒྱལ་གྱིས་ཟུག་ཟུག་ཏུ་ལེན་པར་བྱེད་དོ་ཞེས་བྱ་བའི་ཐ་ཚིག་གོ །འོ་ན་ཡོད་པར་སྨྲ་བ་དག་གིས་འཇིག་རྟེན་ཕ་རོལ་ལ་སོགས་པ་མ་བསྟན་ཏམ་ཞེ་ན། དེའི་ཕྱིར་དེ་ལ་གང་དག་ཡོད་པར་སྨྲས་པ་ཞེས་བྱ་བ་ལ་སོགས་པ་སྨྲས་སོ། །འོ་ན་ད་ལྟར་མཛངས་ངན་ལ་སོགས་པ་མེད་དམ་ཞེ་ན། དེའི་ཕྱིར་འདི་ལྟར་བྱིས་པ་དང་མཁས་པ་དེ་གཉིས་ནི་ཞེས་བྱ་བ་ལ་སོགས་པ་སྨྲས་སོ། །ལམ་གོལ་བར་ཞུགས་པ་ཞེས་བྱ་བ་ནི་ཡང་དག་པའི་ཤེས་པ་སྤངས་པར་གྱུར་པའོ། །ལམ་ངན་པ་ལེགས་པར་སྒྲུབ་པ་ཞེས་བྱ་བ་ནི་ལམ་ལོག་པ་ལུས་དང་ངག་གཉིས་ཀྱི་རྗེས་སུ་སྒྲུབ་པར་བྱེད་ཅེས་བྱ་བའི་ཐ་ཚིག་གོ །ལམ་འཇིགས་པ་དང་བཅས་པ་ཇི་ལྟ་བ་བཞིན་དུ་ཞེས་བྱ་བ་ནི་དེར་སོང་ན་འཇིགས་པ་དང་ཕྲད་པར་འགྱུར་བས་ལམ་དེ་སྔ་ནས་སྤང་བར་བྱ་དགོས་བཞིན་དུའོ། །བློ་ངན་ཅེས་བྱ་བ་ནི་ནང་གི་བདག་ཉིད་ཀྱིས་སོ། །ལོག་པར་སྟོན་བྱེད་པ་ཞེས་བྱ་བ་ནི་ལུང་འབོགས་པའི་སྒོ་ནས་སོ། །དམན་པས་ཞེས་བྱ་བ་ནི་བྱིས་པས་སོ། །སྟོན་པར་གྲགས་པ་ཞེས་བྱ་བ་ནི་སྟོན་པ་མ་ཡིན་པ་སྟོན་པར་གྲགས་པའོ། །གང་གིས་ཞེས་བྱ་བ་ནི་སྟོན་པ་དེའིའོ། །ཆོས་འདི་དེ་འདྲ་བ་ཞེས་བྱ་བ་ནི་མེད་པ་ཉིད་དང་ཆད་པར་ལྟ་བའོ། །དེའི་ཆོས་མིན་ཅི་ཞིག་འདྲ་ཞེས་བྱ་བ་ནི་ཆོས་དེ་པས་ཆེས་དམན་པའི་ཆོས་མ་ཡིན་པ་མེད་པའི་ཕྱིར་དེའི་ཆོས་མ་ཡིན་པ་གཞན་མི་སྲིད་དོ་ཞེས་བྱ་བའི་ཐ་
ཚིག་གོ །ཞེས་སྨྲས་ནས་ཞེས་བྱ་བ་ནི་དེ་སྐད་སྨྲས་ནས་སོ། །སོད་སྟོང་པ་བཞིན་དུ་བརྡབས་ཏེ་ཞེས་བྱ་བ་ནི་རྫས་ཀྱིས་སྟོང་པའི་སྣོད་སོང་མོ་ལ་སོགས་པར་བརྡབས་ཏེ་སྒྲ་ཕྱུང་ན་ནང་ན་རྫས་མེད་པར་ཤེས་པ་བཞིན་དུ་སྟོན་པ་དེ་ཡང་བརྒལ་ཞིང་བརྟག་པའི་ཚིག་གིས་བརྡབས་ཏེ་རང་གི་གཞུང་ལུགས་སྨྲས་པའི་སྒྲ་ཕྱུང་ན་བློའི་ནང་ན་ངོན་གྱི་རྫས་མེད་པར་ཤེས་པར་བྱ་བའི་ཐ་ཚིག་གོ །ཀུན་ནས་ཉོན་མོངས་པར་འགྱུར་བ་ལ་ཞེས་བྱ་བ་ནི་སྐྱེ་བ་ལ་སོགས་པའི་སྡུག་བསྔལ་དུ་འགྱུར་བའོ། །རྒྱུ་མེད་ཅེས་བྱ་བ་ནི་ནང་གི་གོམས་པ་ལ་སོགས་པའི་རྒྱུ་མེད་པའོ། །རྐྱེན་མེད་ཅེས་བྱ་བ་ནི་ཕྱི་རོལ་གྱི་དམ་པ་མ་ཡིན་པའི་ཆོས་ཉན་པ་ལ་སོགས་པའི་བྱེད་རྒྱུ་མེད་པའོ། །རྣམ་པར་དག་པར་འགྱུར་བ་ལ་ཞེས་བྱ་བ་ནི་འཁོར་བ་ལས་རྣམ་པར་གྲོལ་བར་འགྱུར་བ་ལའོ། །དེ་དག་གིས་ནི་འཇུག་པའི་རྒྱུ་དང་ལྡོག་པའི་རྒྱུ་འགོག་པར་བྱེད་དོ། །ཤེས་པ་མེད་པ་ཞེས་བྱ་བ་ནི་ངོ་བོ་མི་རྟོག་པའོ། །མཐོང་བ་མེད་པ་ཞེས་བྱ་བ་ནི་བྱེ་བྲག་མི་རྟོག་པའོ། །ཤེས་པ་དང་མཐོང་བ་ཞེས་བྱ་བ་ནི་དེ་ལས་བཟློག་པའོ། །འདིས་ནི་འཇུག་པ་དང་ལྡོག་པའི་རྒྱུ་ཉིད་དུ་འདོད་པ་ཤེས་པ་དང་མི་ཤེས་པ་གཉིས་རྒྱུ་ཉིད་མ་ཡིན་པར་འགོག་པར་བྱེད་དོ། །སྟོབས་ཞེས་བྱ་བ་ནི་ནུས་པའོ། །བརྩོན་འགྲུས་ཞེས་བྱ་བ་ནི་སྤྲོ་བའོ།། དེ་གཉིས་ཀ་བསྡུས་པ་ནི་སྟོབས་དང་བརྩོན་འགྲུས་སོ། །སྐྱེས་བུའི་རྩལ་ཞེས་བྱ་བ་ནི་སྐྱེས་བུའི་ཞོ་ཤ་སྟེ་རང་གི་ནུས་པའོ། །ཕ་རོལ་གནོན་པ་ཞེས་བྱ་བ་ནི་ཐབས་ཀྱིས་ནུས་པའོ། །དེ་གཉིས་བསྡུས་པ་ནི་སྐྱེས་པའི་རྩལ་དང་ཕ་རོལ་གནོན་པའོ། །བདག་གི་རྩལ་ཞེས་བྱ་བ་ནི་བདག་ཉིད་ཀྱི་ནུས་པའོ།། གཞན་གྱི་རྩལ་ཞེས་བྱ་བ་ནི་ཕ་རོལ་གྱི་ནུས་པའོ། །དེ་གཉིས་བསྡུས་པ་ནི་བདག་གི་རྩལ་དང་གཞན་གྱི་རྩལ་ལོ། །སེམས་ཅན་ཞེས་བྱ་བ་ནི་ལྷ་དང་མིའོ། །སྲོག་ཆགས་ཞེས་བྱ་བ་ནི་དུད་འགྲོའི་སྐྱེ་གནས་སུ་སྐྱེས་པའི་སྲོག་ཆགས་སོ། །འབྱུང་པོ་ཞེས་བྱ་བ་ནི་ཡི་དགས་ལ་སོགས་པ་མི་སྣང་བའི་སྲོག་ཆགས་སོ། །མཐུ་མེད་ཅེས་བྱ་བ་ནི་ཡིད་ཀྱི་སྟོབས་དང་བྲལ་བའོ། །སྟོབས་མེད་ཅེས་བྱ་བ་ནི་ལུས་ཀྱི་སྟོབས་དང་བྲལ་བའོ། །དབང་མེད་ཅེས་བྱ་བ་ནི་འདོད་པའི་སྟོབས་དང་བྲལ་བའོ། །བརྩོན་འགྲུས་མེད་ཅེས་བྱ་བ་ནི་སྤྲོ་བ་དང་བྲལ་བའོ། །ཕ་རོལ་གནོན་པ་མེད་ཅེས་བྱ་བ་ནི་ཐབས་ཀྱི་སྟོབས་
དང་བྲལ་བའོ། །འགྲོ་བ་མཚམས་སྦྱོར་བའི་སྲིད་པ་གང་དག་ངེས་པར་གྱུར་ཏོ་ཞེས་བྱ་བ་ལ། མཚམས་སྦྱོར་བའི་སྲིད་པ་ཞེས་བྱ་བ་ནི་འགྲོ་བ་དྲུག་པོ་དག་འཁོར་བར་མཚམས་སྦྱོར་བའི་སྲིད་པའོ། །ངེས་པ་ཞེས་བྱ་བ་ནི་བསྟན་པ་སྟེ་ལྷ་གང་དག་ཡིན་པ་དེ་དག་ཀྱང་ལྷ་ཉིད་དུ་མཚམས་སྦྱོར་ལ། མི་གང་དག་ཡིན་པ་དེ་དག་ཀྱང་མི་ཉིད་དུ་མཚམས་སྦྱོར་བ་ལ་སོགས་པ་འགྲོ་བ་དང་འཁྲུལ་པ་མེད་དོ། །གྱུར་ཏོ་ཞེས་བྱ་བ་ནི་དེ་ལྟར་རྣམ་པར་གནས་སོ་ཞེས་བྱ་བའི་ཐ་ཚིག་གོ །གང་གི་ཕྱིར་དེ་ལྟ་ཡིན་པ་དེའི་ཕྱིར་འབྱུང་པོ་ཐམས་ཅད་ནི་འདི་ལྟར་འགྲོ་བ་དྲུག་པོ་དག་ཏུ་བདེ་བ་དང་སྡུག་བསྔལ་སོ་སོར་མྱོང་བར་འགྱུར་རོ་ཞེས་བྱ་བ་སྨྲས་ཏེ། ནང་འཁྲུལ་པ་མེད་པར་སོ་སོར་འཁོར་ཞེས་བྱ་བའི་ཐ་ཚིག་གོ །འདིར་ལྷ་མ་ཡིན་གྱི་འགྲོ་བ་དྲུག་པོ་ཡིན་ནོ། །དེ་དག་གིས་ནི་ཆོས་ཐམས་ཅད་ཀྱི་ནུས་པ་འགོག་པར་བྱེད་དོ། །ཆོས་འདི་དེ་འདྲ་བ་ཞེས་བྱ་བ་ནི་རྒྱུ་ལ་སྐུར་པ་འདེབས་པ་དང༌། ལམ་ལ་སྐུར་པ་འདེབས་པ་དང༌། ཐར་པ་ལ་སྐུར་པ་འདེབས་པ་ཞེས་བྱ་བའི་ཐ་ཚིག་གོ །བྱེད་པ་དང་བྱེད་དུ་འཇུག་པ་དང་ཞེས་བྱ་བ་ལ་སོགས་པ་བྱེད་པ་ཞེས་བྱ་བ་ནི་སྲོག་གཅོད་པ་ལ་སོགས་པ་བདག་གིས་བྱེད་པའོ། །བྱེད་དུ་འཇུག་པ་ཞེས་བྱ་བ་ནི་སྲོག་གཅོད་པ་ལ་སོགས་པ་གཞན་བྱེད་དུ་འཇུག་པ་སྟེ། དེ་ལ་གཞི་དེ་ལས་སྡིག་པ་ཡང་མེད། གཞི་དེ་ལས་སྡིག་པར་འགྱུར་བ་ཡང་མེད་དོ་ཞེས་འོག་ནས་འབྱུང་བའི་བྱེད་པའི་ཚིག་དེ་དང་སྦྱར་བར་བྱ་སྟེ། སོགས་པ་མེད་པའི་ཕྱིར་སྡིག་པ་མེད་པ་ལ་སྡིག་པའི་སྐྱེ་བ་མེད་པའི་ཕྱིར་སྡིག་པར་འགྱུར་བ་ཡང་མེད་དོ་ཞེས་བྱ་བའི་ཐ་ཚིག་གོ །གཅོད་པ་དང་གཅོད་དུ་འཇུག་པ་ལ་སོགས་པ་ལྷག་མ་རྣམས་ལ་ཡང་དེ་བཞིན་དུ་སྦྱར་རོ། །གཅོད་པ་དང་གཅོད་དུ་འཇུག་པ་ཞེས་བྱ་བ་ནི་ལག་པ་དང་ཤིང་ལྗོན་པ་ལ་སོགས་པའོ། །སྲེག་པ་དང་སྲེག་ཏུ་འཇུག་པ་ལ་སོགས་པ་ཞེས་བྱ་བ་ནི་མེས་སོ། །རྡེག་པ་དང་རྡེག་ཏུ་འཇུག་པ་ཞེས་བྱ་བ་ནི་དབྱུག་པ་ལ་སོགས་པས་སོ། །སྲོག་ཆགས་ལ་འཚེ་བ་ཞེས་བྱ་བ་ནི་དུག་ལ་སོགས་པས་གསོད་པར་བྱེད་པའོ། །འཁོར་ལོའི་མཐའ་སྤུ་གྲི་ལས་བྱས་པས་ཞེས་བྱ་བ་ནི་སྤུ་གྲིའི་སོ་དང་འདྲ་བར་རྣོན་པོས་ཞེས་བྱ་བའི་ཐ་ཚིག་གོ །གཅོད་པ་ཞེས་བྱ་བ་ནི་ཐད་ཀར་གཅོད་པའོ། །འབྲེག་པ་ཞེས་བྱ་བ་ནི་ཚལ་པ་
གཉིས་སུ་འབྲེག་པའོ། །རྡུང་བ་ཞེས་བྱ་བ་ནི་ཏིལ་བཞིན་དུ་ཕྱེ་མར་རྡུང་བའོ། །འདྲལ་བ་ཞེས་བྱ་བ་ནི་བཞོག་པའོ། །ཐང་མ་ཞེས་བྱ་བ་ནི་བཀྲམ་པའི་ཕུང་པོའོ། །ཚོམས་ཞེས་བྱ་བ་ནི་གཤིབས་པའི་ཕུང་པོའོ། །སྤུངས་པ་ཞེས་བྱ་བ་ནི་ཚོམས་དག་གི་ཕུང་པོའོ། །ཕུང་པོ་ཞེས་བྱ་བ་ནི་ཟླུམ་པོ་ལས་གཞན་པའི་ཚོགས་སོ། །ཆུ་ཀླུང་གང་གཱའི་ལྷོ་ནས་ཞེས་བྱ་བ་ནི་ཆུ་ཀླུང་གང་གཱ་དང་ཉེ་བའི་ལྷོའི་ངོས་ནས་ཞེས་བྱ་བའི་ཐ་ཚིག་གོ །བྱང་ནས་ཞེས་བྱ་བ་ཡང་དེ་བཞིན་དུ་ཤེས་པར་བྱའོ། །དུལ་བ་ཞེས་བྱ་བ་ནི་ཏིང་ངེ་འཛིན་ཏོ། །ཡང་དག་པར་སྡོམ་པ་ཞེས་བྱ་བ་ནི་ཚུལ་ཁྲིམས་སོ། །དོན་སྤྱོད་པ་ཞེས་བྱ་བ་ནི་གཞན་ལ་ཕན་འདོགས་པར་བྱེད་པའོ། །དོན་མཐུན་པ་ཞེས་བྱ་བ་ནི་འབྲས་བུ་མཐུན་པ་ཉིད་ཀྱིས་སོ། །དེ་ལྟར་སྤྱོད་པ་ཡང་ཞེས་བྱ་བ་ལ་སོགས་པ་ནི་དེ་ལྟར་སྦྱིན་པ་ལ་སོགས་པ་བྱེད་པ་ཡང་བསོད་ནམས་མི་བྱེད་པ་ཁོ་ན་ཡིན་ནོ་ཞེས་བྱ་བའི་ཐ་ཚིག་གོ །ཆོས་འདི་དེ་འདྲ་བ་ཞེས་བྱ་བ་ནི་བསོད་ནམས་དང་སྡིག་པ་མེད་པ་ཉིད་དང་རྒྱུ་དང་འབྲས་བུ་ལ་སྐུར་པ་འདེབས་པ་ཞེས་བྱ་བའི་ཐ་ཚིག་གོ །ལུས་བདུན་པོ་ཞེས་བྱ་བ་ནི་ཆ་བདུན་པོ་འམ་དངོས་པོ་དེ་ཡང་ཡོད་པའི་སྒྲར་བརྗོད་པར་བྱ་བ་ཞེས་བྱ་བའི་ཐ་ཚིག་གོ །མ་བྱས་པ་ཞེས་བྱ་བ་ནི་ཚངས་པ་ལ་སོགས་པའི་བྱིན་པ་པོ་རང་གིས་མ་བྱས་པའོ།། བྱས་པས་མ་བྱས་པ་ཞེས་བྱ་བ་ནི་ཚངས་པས་བྱས་པའི་སྐྱེ་དགུའི་བདག་པོ་ལ་སོགས་པས་མ་བྱས་པའོ། །མ་སྤྲུལ་ཞེས་བྱ་བ་ནི་ཚངས་པ་ལ་སོགས་པས་རྒྱུ་མེད་པར་འདོད་པའི་དབང་གིས་མ་བསླངས་པའོ། །སྤྲུལ་པས་མ་བྱས་པ་ཞེས་བྱ་བ་ནི་ཚངས་པ་ལ་སོགས་པའི་སྤྲུལ་པའི་སྐྱེ་དགུའི་བདག་པོ་ལ་སོགས་པས་རྒྱུ་མེད་པར་འདོད་པའི་དབང་གིས་མ་བསླངས་པའོ། །གནོད་པར་བྱེད་པ་མ་ཡིན་པ་ཞེས་བྱ་བ་ནི་བསྣུན་པར་མི་ནུས་པའོ། །ཐེར་ཟུག་ཏུ་གནས་པ་ཞེས་བྱ་བ་ནི་ངོ་བོ་ཉིད་གཅིག་ཏུ་གནས་པ་བསྟན་པའོ། །ཀ་བ་བཞིན་དུ་གནས་པ་ཞེས་བྱ་བ་ནི་ཀ་བའི་རྣམ་པ་ལྟར་མི་འགྱུར་བའོ། །སྲོག་གསོན་པ་ཉིད་ཅེས་བྱ་བ་ནི་ནང་གི་སྐྱེས་བུ་སྲོག་གི་རང་བཞིན་དུ་གསོན་པའོ། །བསོད་ནམས་སུ་འགྱུར་བའི་ཕྱིར་ཞེས་བྱ་བ་ནི་ཕན་འདོགས་པའི་སྒོ་ནས་བསོད་ནམས་སུ་འགྱུར་བའི་ཕྱིར་རོ། །སྡིག་པར་འགྱུར་བའི་ཕྱིར་ཞེས་བྱ་བ་ནི་གནོད་པ་བྱེད་པའི་སྒོ་ནས་སྡིག་པར་འགྱུར་བའི་
ཕྱིར་རོ།། བསོད་ནམས་དང་སྡིག་པར་འགྱུར་བའི་ཕྱིར་ཞེས་བྱ་བ་ནི་ཕན་འདོགས་པ་དང་གནོད་པར་བྱེད་པའི་སྒོ་ནས་གཉི་གར་འགྱུར་བའི་ཕྱིར་རོ། །གཡོ་བར་མི་བྱེད་ཅེས་བྱ་བ་ནི་འགུལ་བར་མི་བྱེད་པའོ། །རྣམ་པར་འགྱུར་བར་མི་བྱེད་ཅེས་བྱ་བ་ནི་གཞན་དུ་འགྱུར་བར་མི་བྱེད་པའོ། །གཅིག་ལ་གནོད་པར་མི་བྱེད་ཅེས་བྱ་བ་ནི་ཕན་ཚུན་གནོད་པར་མི་བྱེད་པའོ། །འོ་ན་བརྡེག་པ་ལ་སོགས་པས་རྣམ་པར་འགྱུར་བ་སྣང་ངོ་སྙམ་དུ་དོགས་པའི་ཕྱིར་སྐྱེས་བུ་གང་གིས་ཞེས་བྱ་བ་ལ་སོགས་པ་སྨྲས་སོ། །དེ་ཅིའི་ཕྱིར་ཞེ་ན། དེའི་ཕྱིར་ལུས་བདུན་པོ་དག་ལ་བར་མེད་པར་མཚོན་ཐལ་བྱུང་དུ་འགྲོ་ཞེས་བྱ་བ་ལ་སོགས་པ་སྨྲས་ཏེ། བར་མེད་པར་ཞེས་བྱ་བ་ནི་བུ་གུ་མེད་པར་རོ། །གང་གི་ཕྱིར་ལུས་བདུན་པོ་རྟག་པ་དག་ལ་བར་མ་བྱས་པ་ཉིད་དུ་མགོ་གཅོད་པར་བྱེད་པའི་མཚོན་དེ་ཐལ་བྱུང་དུ་འགྲོ་བ་དང༌། གང་གི་ཕྱིར་དེ་ལ་གནས་པའི་སྲོག་ལ་གནོད་པར་བྱེད་མི་ནུས་ཏེ། དུས་ངེས་པ་ཡིན་པ་དེའི་ཕྱིར་གནོད་པ་ཅུང་ཟད་ཀྱང་མི་བྱེད་དོ། །དེ་ལྟར་གནོད་པ་མེད་ན་ལུས་རྣམ་པ་བདུན་པོ་དེ་དག་ལ་གནོད་པ་བྱེད་པ་ཡང་མེད་པར་བསྟན་པའི་ཕྱིར་དེ་ལ་གསོད་པར་བྱེད་པའམ་ཞེས་བྱ་བ་ལ་སོགས་པ་སྨྲས་སོ། །སྐུལ་བར་བྱེད་པ་ཞེས་བྱ་བ་ནི་སྐུལ་བས་བརྡེགས་པ་ལ་སོགས་པ་འཇུག་པའོ། །སྐྱེ་གནས་གཙོ་བོ་དང་ལྡན་པ་ཁྲི་བཞི་སྟོང་ཞེས་བྱ་བ་ནི་དང་པ་དང༌། ཁུ་བྱུག་དང༌། ཁྲུང་ཁྲུང་ལ་སོགས་པ་སྐྱེ་གནས་ནས་སྐྱེས་པའི་གཙོ་བོ་དག་གོ །ལས་ལྔ་ཞེས་བྱ་བ་ནི་བྲམ་ཟེ་གསོད་པ་ལ་སོགས་པ་སྡིག་ཏོ་ཆེན་པོ་ལྔ་པོ་དག་གོ །ལས་གསུམ་ཞེས་བྱ་བ་ནི་ལུས་དང༌། ངག་དང༌། ཡིད་ཀྱི་ཉེས་པ་དག་གོ །ལས་གཉིས་པ་ཞེས་བྱ་བ་ནི་རང་གིས་བྱས་པ་དང༌། གཞན་གྱིས་བྱས་པའོ། །ལས་དང་ལས་བྱེད་ཅེས་བྱ་བ་ལ། ལས་ཞེས་བྱ་བ་ནི་བསམས་པ་དང་བྱས་པ་གང་ཡིན་པའོ། །ལས་ཕྱེད་ཅེས་བྱ་བ་ནི་བསམས་པ་ཉིད་ཡིན་ལ་མ་བྱས་པ་གང་ཡིན་པའོ། །ལམ་དྲུག་ཅུ་རྩ་གཉིས་ཞེས་བྱ་བ་ནི་ཟན་མི་ཟ་བ་དང༌། མེར་མི་འཇུག་པ་དང༌། རི་ལས་མཆོང་བ་དང༌། ཆུར་འཇུག་པ་དང༌། རལ་པ་ཐོགས་པ་དང༌། ཐལ་བསྐུད་པ་དང༌། གཡང་གཞི་ཐོགས་པ་དང༌། དབྱུག་པ་ཐོགས་པ་ལ་སོགས་པ་མཐོ་རིས་ལ་སོགས་པའི་ཐབས་དག་གོ །རྟོགས་པ་བར་
མ་དྲུག་ཅུ་རྩ་གཉིས་ཞེས་བྱ་བ་ནི་མི་རྣམས་ཀྱི་འཕེལ་བ་དང་འགྲིབ་པའི་དུས་སོ། །སེམས་ཅན་དམྱལ་བ་བརྒྱ་ཉི་ཤུ་ཞེས་བྱ་བ་ནི་མེ་མར་མུར་ལ་སོགས་པ་བརྒྱ་ཉི་ཤུའོ། །དབང་པོ་བརྒྱ་ཉི་ཤུ་ཞེས་བྱ་བ་ནི་མིག་ལ་སོགས་པ་བརྒྱ་ཉི་ཤུའོ། །རྡུལ་གྱི་ཁམས་དྲུག་ཅུ་རྩ་གཉིས་ཞེས་བྱ་བ་ནི་བརྒྱ་བྱིན་ལ་སོགས་པ་བདེ་བའི་གནས་དག་གོ །འདུ་ཤེས་ཅན་གྱི་གནས་བདུན་ཞེས་བྱ་བ་ནི་གང་ན་འདུ་ཤེས་ཡོད་པའོ། །འདུ་ཤེས་མེད་པའི་གནས་བདུན་ཞེས་བྱ་བ་ནི་དེ་ལས་བཟློག་པའོ། །ལྷ་མ་ཡིན་བདུན་པོ་ཞེས་བྱ་བ་ནི་གང་དག་ན་ལྷ་མེད་པ་དག་གོ།། ཤ་ཟ་བདུན་ཞེས་བྱ་བ་ནི་གང་དག་ན་ཤ་ཟ་ཡོད་པའོ། །མཚོ་ཆེན་པོ་བདུན་ཞེས་བྱ་བ་ལ་སོགས་པ་ནི་མ་དྲོས་པ་ལ་སོགས་པ་མཚོ་ཆེན་པོ་དག་གོ །མཚོ་བདུན་བརྒྱ་པ་ཞེས་བྱ་བ་ནི་དེ་དག་ལས་གཞན་པའི་མཚོ་དག་གོ །རྨི་ལམ་བདུན་ཞེས་བྱ་བ་ནི་རྨི་ལམ་དུ་ཡུན་རིང་པོ་དག་གོ །རྨི་ལམ་བདུན་བརྒྱ་པ་ཞེས་བྱ་བ་ནི་དེ་ལས་གཞན་པའི་རྨི་ལམ་ཡུན་ཐུང་དག་གོ །སད་པ་ཆེན་པོ་བདུན་ཞེས་བྱ་བ་ནི་ཚངས་པའི་འཇིག་རྟེན་ལ་སོགས་པའོ། །སང་པ་བདུན་བརྒྱ་པ་ཞེས་བྱ་བ་ནི་འདོད་པའི་ལྷ་དག་གོ །གཡང་ས་ཆེན་པོ་བདུན་ཞེས་བྱ་བ་ནི་ངམ་གྲོག་ཆེན་པོ་དག་གོ །གཡང་ས་བདུན་བརྒྱ་པ་ཞེས་བྱ་བ་ནི་དེ་ལས་གཞན་པ་དག་གོ །མཚོ་དང་གཡང་ས་དེ་དག་ནི་སྐྱེ་བའི་སྒོ་ནས་ལོངས་སྤྱོད་པ་དག་ཡིན་ནོ་ཞེས་གྲག་གོ །མངོན་པར་མཐོ་བ་ཞེས་བྱ་བ་ནི་མིའི་རྒྱལ་པོ་ཆེན་པོ་བཞི་དང༌། ལྷའི་རྒྱལ་པོ་ཆེན་པོ་བཞི་དང༌། བརྒྱ་བྱིན་ཉིད་དང་བདུད་ཉིད་དོ། །སྐྱེས་བུ་ཆེན་པོའི་ས་བརྒྱད་ཅེས་བྱ་བ་ནི་སྐྱེས་པའི་སྒོ་ནས་བསམ་གཏན་བཞི་དང༌། གཟུགས་མེད་པ་བཞི་པོ་དག་གོ །མཚམས་སྦྱར་ཅིང་ཞེས་བྱ་བ་ནི་བར་དོའི་སྲིད་པས་སོ། །འཁོར་ནས་ཞེས་བྱ་བ་ནི་སྐྱེ་བའོ། །སྐུད་པའི་དྲུ་བུ་ཞེས་བྱ་བ་ནི་སྐུད་པའི་གོང་བུའོ། །སྟེང་གི་ནམ་མཁའ་ལ་འཕངས་པ་ཞེས་བྱ་བ་ནི་ང་ལ་འཕངས་པའོ། །གལ་ཏེ་དུས་ལས་གྲོལ་བ་ཡིན་ནའོ་ན་ཅིའི་ཕྱིར་ཚུལ་ཁྲིམས་ལ་སོགས་པ་སྤྱོད་པར་བྱེད་སྙམ་དུ་དོགས་པའི་ཕྱིར། དེ་ལ་དགེ་སྦྱོང་ངམ་བྲམ་ཟེ་གང་འདི་སྐད་ཅེས་བྱ་བ་ལ་སོགས་པ་སྨྲས་སོ། །ཚུལ་ཁྲིམས་ཞེས་བྱ་བ་ནི་འཚེ་བ་ལ་སོགས་པ་
ལས་ལྡོག་པའོ། །བརྟུལ་ཞུགས་ཞེས་བྱ་བ་ནི་མཚན་མ་ཟབ་མོ་ལ་སོགས་པའི་ངེས་པའོ། །དུ་བ་རྔུབ་པ་ལ་སོགས་པའོ། །ཚངས་པར་སྤྱོད་པ་ཞེས་བྱ་བ་ནི་སྤྲོད་པ་ལས་བྱུང་བ་ལས་ལྡོག་པའོ། །ཡོངས་སུ་སྨིན་པ་ཞེས་བྱ་བ་ནི་འབྲས་བུ་མངོན་དུ་གྱུར་པའོ། །རེག་པར་བྱས་ནས་ཞེས་བྱ་བ་ནི་སྤྱད་ནས་སོ། །བྱང་བར་བྱའོ་ཞེས་བྱ་བ་ནི་ཟད་པར་བྱ་བའོ། །བདེ་བ་དང་སྡུག་བསྔལ་འདི་ནི་ངེས་པ་ཡིན་ནོ་ཞེས་བྱ་བ་ནི་མཐར་ཐུག་པར་བྱ་བའོ། །ཡར་སྐྱེ་བ་དང་མར་འགྲིབ་པ་ནི་མི་སྲིད་དོ་ཞེས་བྱ་བ་ལ། ཡར་སྐྱེ་བ་ཞེས་བྱ་བ་ནི་བསྐལ་པ་ཆེན་པོ་བརྒྱད་ཁྲི་བཞི་སྟོང་ལས་ལྷག་པའོ། །མར་འགྲིབ་པ་ཞེས་བྱ་བ་ནི་དེ་དག་པས་ཉུང་བ་སྟེ་དེས་ན་དེ་གཉིས་ཀ་ཡང་མི་སྲིད་དེ་དེ་ཁོ་ནའི་མཐའ་མྱོང་ནས་གྲོལ་བར་འགྱུར་རོ་ཞེས་བྱ་བའི་ཐ་ཚིག་གོ །འདི་ལྟ་བུ་ཉིད་དང་གཞན་མ་ཡིན་པ་ཞེས་བྱ་བ་ལ། འདི་ལྟ་བུ་ཉིད་ཅེས་བྱ་བ་ནི་ཡར་སྐྱེ་བའོ། །གཞན་ཡང་ཞེས་བྱ་བ་ནི་མར་འགྲིབ་པའོ། །མ་ཡིན་ཞེས་བྱ་བ་ནི་མི་སྲིད་པས་སོ། །ཡང་ན་འདི་ལྟ་བུ་ཉིད་ཅེས་བྱ་བ་ནི་ཁོ་བོས་སྔར་ཇི་ལྟར་བརྗོད་པའི་རིམ་པས་སོ། །གཞན་ཡང་མ་ཡིན་པས་ཞེས་བྱ་བ་ནི་གལ་ཏེ་དེ་སྐད་མི་བརྗོད་ན་གཞན་གང་གིས་ཀྱང་དེ་བརྗོད་པར་མི་འགྱུར་རོ། །ཞེས་བྱ་བའི་ཐ་ཚིག་གོ།། འཁོར་བ་གཞལ་ལོ་ཞེས་བྱ་བ་ནི་རྣམ་པར་ཕྱེ་བའོ། །ཆོས་འདི་དེ་འདྲ་བ་ཞེས་བྱ་བ་ནི་དུས་ཀྱི་ངོ་བོ་ཉིད་ཀྱིས་གྲོལ་བར་སྨྲ་བ་དང་མཐར་འཛིན་པའི་ལྟ་བ་ཞེས་བྱ་བའི་ཐ་ཚིག་གོ །གལ་ཏེ་འགའ་ཞིག་ཁོ་བོའི་གན་དུ་འོངས་ཏེ་འདི་སྐད་ཅེས་འཇིག་རྟེན་ཕ་རོལ་ཡོད་དམ་ཞེས་དྲི་བ་འདྲི་ན་ཞེས་བྱ་བ་ལ་སོགས་པ་ལ། ཡོད་དམ་ཞེས་བྱ་བ་ནི་དྲི་བ་གཅིག་སྟེ། རྟག་པར་འཛིན་པའོ། །མེད་དམ་ཞེས་བྱ་བ་ནི་དྲི་བ་གཉིས་པ་སྟེ། ཆད་པར་འཛིན་པའོ། །ཡོད་པ་དང་མེད་པ་ཡིན་ནམ་ཞེས་བྱ་བ་ནི་དྲི་བ་གསུམ་པ་སྟེ། རྟག་པ་དང་ཆད་པར་འཛིན་པ་སྟེ། བདག་ཏུ་འདོད་པའི་འཇིག་རྟེན་ལ་རྟག་པ་དང་ཆད་པར་འཛིན་པའི་ཕྱིར་རོ། །ཡོད་པ་ཡང་མ་ཡིན་མེད་པ་ཡང་མ་ཡིན་པ་ཞེས་བྱ་བ་ནི་དྲི་བ་བཞི་པ་སྟེ། རྟག་པ་ཉིད་དང་མི་རྟག་པ་ཉིད་གཉི་ག་མི་རིགས་པའི་ཕྱིར་གནས་སྐབས་སུ་གཏོགས་པའི་དྲི་བའོ། །དེ་དག་ནི་རེ་ཞིག་ཡོད་པ་ཙམ་དྲི་བ་དག་ཡིན་ནོ། །བྱེ་བྲག་ཏུ་དྲི་
བ་དེ་དག་གི་དབང་དུ་བྱས་ནས་དེ་བཞིན་དུ་གལ་ཏེ་ཞེས་བྱ་བ་ལ་སོགས་པ་དྲི་བ་བཞི་སྨྲས་སོ། །འཇིག་རྟེན་ཕ་རོལ་འདི་ལྟ་བུ་ཉིད་མ་ཡིན་པ་ཡིན་ནམ་ཞེས་བྱ་བ་ནི་བྱེ་བྲག་ཏུ་དྲི་བ་གཅིག་སྟེ། འདི་ལྟ་བུ་ཉིད་ཅེས་བྱ་བ་ནི་རྣམ་པ་འདི་ལྟ་བུ་ཉིད་དོ། །དང་ཞེས་བྱ་བའི་སྒྲ་ནི་འམ་ཞེས་གང་ཡང་རུང་བ་ཅིག་བཟུང་བའི་དོན་དུ་མི་ལྟ་བ་དང་ཞེས་བྱ་བའི་སྒྲ་ཉིད་ཀྱིས་གཉི་ག་བསྡུས་པའི་དོན་དུ་བལྟའོ། །མ་ཡིན་པ་ཞེས་བྱ་བའི་སྒྲ་ནི་དགོས་པའི་དོན་ཏེ། དེ་ནས་འཇིག་རྟེན་ཕ་རོལ་འཇིག་རྟེན་འདིའི་རྣམ་པ་དང་འདྲ་བ་འདི་ལྟ་བུ་ཉིད་ཀྱང་ཡིན་ལ་འཇིག་རྟེན་འདིའི་རྣམ་པ་འདྲ་བ་འདི་ལྟ་བུ་ཉིད་ཀྱང་མ་ཡིན་ཏེ། ཅུང་ཞིག་མི་འདྲ་བ་ཉིད་ཀྱང་ཡོད་པའི་ཕྱིར་རོ་ཞེས་འདྲ་བ་ཡང་ཡིན་ལ་མི་འདྲ་བ་ཡང་ཡིན་ནམ་ཞེས་འདྲིའོ། །འཇིག་རྟེན་ཕ་རོལ་གཞན་ཉིད་དང་གཞན་མ་ཡིན་ནམ་ཞེས་བྱ་བ་ནི་བྱེ་བྲག་ཏུ་དྲི་བ་གཉིས་པ་སྟེ། འཇིག་རྟེན་ཕ་རོལ་འཇིག་རྟེན་འདི་ལས་གཞན་ཉིད་ཀྱང་ཡིན་ལ། གཞན་པ་ཉིད་ཀྱང་མ་ཡིན་ཏེ། ཅུང་ཟད་འདྲ་བ་ཡང་ཡོད་པའི་ཕྱིར་རོ་ཞེས་གཞན་པ་ཡང་ཡིན་ལ་གཞན་པ་ཉིད་ཀྱང་མ་ཡིན་ནམ་ཞེས་འདྲིའོ། །འཇིག་རྟེན་ཕ་རོལ་གཞན་མ་ཡིན་པ་ཉིད་དང་གཞན་མ་ཡིན་པ་ཡིན་ནམ་ཞེས་བྱ་བ་ནི་བྱེ་བྲག་ཏུ་དྲི་བ་གསུམ་པ་སྟེ། འཇིག་རྟེན་ཕ་རོལ་འཇིག་རྟེན་འདི་ལས་གཞན་མ་ཡིན་པ་ཉིད་ཀྱང་ཡིན་ལ། གཞན་མ་ཡིན་པ་ཉིད་མ་ཡིན་པ་ཡང་ཡིན་ཏེ། །གཞན་པ་ཉིད་དང་གཞན་མ་ཡིན་པ་ཉིད་གཉི་ག་ཡང་མཉམ་དུ་ཡོད་པའི་ཕྱིར་རོ་ཞེས་གཞན་མ་ཡིན་པ་ཡང་ཡིན་ལ་གཞན་མ་ཡིན་པ་ཉིད་ཀྱང་མ་ཡིན་ནོ་ཞེས་འདྲིའོ། །འཇིག་རྟེན་ཕ་རོལ་དེ་ཉིད་དང་དེ་ཉིད་མ་ཡིན་པ་ཡིན་ནམ་ཞེས་བྱ་བ་ནི་བྱེ་བྲག་ཏུ་འདྲི་བ་བཞི་པ་སྟེ། འཇིག་རྟེན་ཕ་རོལ་འཇིག་རྟེན་འདི་ཉིད་ཀྱང་ཡིན་ལ་འདི་ཉིད་མ་ཡིན་པ་ཡང་ཡིན་ཏེ། དེ་ཉིད་དང་དེ་ཉིད་མ་ཡིན་པ་གཉི་ག་ཡང་མཉམ་དུ་ཡོད་པའི་ཕྱིར་རོ་ཞེས་དེ་ཉིད་ཀྱང་ཡིན་པ་དེ་ཉིད་མ་ཡིན་པ་ཡང་ཡིན་ནམ་ཞེས་འདྲིའོ། །དེ་ལ་དྲི་བ་དང་པོ་ལ་འདི་ལྟ་བུ་ཉིད་གཙོ་ཆེའོ། །གཉིས་པ་ལ་ནི་གཞན་ཉིད་གཙོ་ཆེའོ། །གསུམ་པ་ལ་ནི་གཞན་ཉིད་མ་ཡིན་པ་ཉིད་མཉམ་པའོ། །བཞི་པ་ལ་ནི་དེ་ཉིད་དང་དེ་ཉིད་མ་ཡིན་པ་མཉམ་པར་ཤེས་པར་བྱའོ། །ཆོས་འདི་དེ་འདྲ་བ་ཞེས་བྱ་བ་ནི་ཀུན་ཏུ་རྨོངས་
པ་མང་བའི་ཕྱིར་རྟག་པ་དང་ཆད་པར་སྨྲ་བ་དང༌། བདག་ཏུ་སྨྲ་བ་ཞེས་བྱ་བའི་ཐ་ཚིག་གོ །སྐྱེས་བུ་གང་ཟག་ཅེས་བྱ་བ་ནི་སེམས་ཅན་ནོ། །སོ་སོར་མྱོང་བ་ཞེས་བྱ་བ་ནི་བདེ་བ་དང་སྡུག་བསྔལ་ཉམས་སུ་མྱོང་བའོ། །སྔོན་བྱས་པའི་རྒྱུ་ལས་བྱུང་བ་ཞེས་བྱ་བ་ནི་སྔོན་གྱི་ལས་ཀྱི་རྒྱུ་ལས་བྱུང་བའོ།། དཀའ་ཐུབ་ཀྱིས་འབྱུང་བར་འགྱུར་ལ་ཞེས་བྱ་བ་ནི་བརྟུལ་ཞུགས་དྲག་པོས་ཟད་པར་འགྱུར་རོ། །མི་བྱ་བར་ཆུ་ལོན་གྱིས་བཟློག་པར་ཞེས་བྱ་བ་ནི་ལྷག་པར་མི་སྤྱད་པས་འཇུག་པར་མི་བྱའོ། །ཟག་པ་མེད་དོ་ཞེས་བྱ་བ་ནི་ལས་ཀུན་དུ་མི་སྤྱད་པ་སྡུག་བསྔལ་མཐར་བྱེད་པ་ཞེས་བྱ་བ་མྱ་ངན་ལས་འདས་པའོ། །ཆོས་འདི་དེ་འདྲ་བ་ཞེས་བྱ་བ་ནི་སྐྱེས་བུའི་རྩལ་ལ་སྐུར་པ་འདེབས་པ་དཀའ་ཐུབ་ཀྱིས་དག་པ་དང་ཤེས་པ་ལ་སྐུར་པ་འདེབས་པ་ཞེས་བྱ་བའི་ཐ་ཚིག་གོ །སྨན་ཞེས་བྱ་བ་ལ་སོགས་པ་ནི་སྨན་འཆང་བ་དང༌། གསང་སྔགས་འཆང་བ་དང༌། རིག་སྔགས་འཆང་བ་ཞེས་བྱ་བའི་ཐ་ཚིག་གོ །ཅི་འདིར་རེ་ཞིག་སྟོན་པས་གདུལ་བ་ཡིན་ནམ་འོན་ཏེ་ཉན་ཐོས་ཀྱིས་གདུལ་བ་ཡིན་སྙམ་དུ་དགོངས་ན་ཞེས་བྱ་བ་ལ་སོགས་པའི་ཚིག་དེ་ནི་ཉན་ཐོས་ཀྱིས་གདུལ་བ་ཐམས་ཅད་དུལ་བར་མི་འགྱུར་བ་དགག་པ་ཡིན་གྱི་སྟོན་པས་འདུལ་བ་ཁ་ཅིག་མ་དུལ་བར་དགག་པ་ནི་མ་ཡིན་ཏེ་འདི་ལྟར་སྟོན་པས་ནི་གདུལ་བ་ཐམས་ཅད་འདུལ་བར་འགྱུར་བའི་ཕྱིར་རོ། །པད་པའི་ནགས་ཁྲོད་ཅེས་བྱ་བ་ནི་སྲོག་ཆགས་པད་པ་ཡོད་པའི་ནགས་ཀྱི་ནང་ནའོ། །འགྲོ་བ་ཞེས་བྱ་བ་ནི་ཕར་འགྲོ་བའོ། །ལྡོག་པ་ཞེས་བྱ་བ་ནི་ཕྱིར་ལྡོག་པའོ། །ཆུང་ཟད་ལྟ་བ་ཞེས་བྱ་བ་ནི་མདུན་དུ་ལྟ་བའོ། །རྣམ་པར་ལྟ་བ་ཞེས་བྱ་བ་ནི་གཡས་གཡོན་དུ་ལྟ་བའོ། །བསྐུམ་པ་ཞེས་བྱ་བ་ནི་ལག་པ་ལ་སོགས་བསྐུམ་པའོ། །བརྐྱང་བ་ཞེས་བྱ་བ་ནི་ཡན་ལག་ལ་སོགས་པ་བརྐྱང་བའོ། །ལྷགས་ཤིང་ཞེས་བྱ་བ་ནི་འོངས་ཤིང་ངོ༌། །འཆོས་ལ་ཞེས་བྱ་བ་ནི་བཅོས་མའི་རྣམ་པ་བྱེད་པ་ལའོ། །འབྱོར་པ་ཞེས་བྱ་བ་ནི་ཤིས་པའོ། །དེའི་ཕུན་སུམ་ཚོགས་པ་ཞེས་བྱ་བ་ནི་འགྲུབ་པའམ་ལྡན་པའོ། །སྟོན་པའི་ལམ་གྱི་རྗེས་སུ་ཞུགས་པ་ཞེས་བྱ་བ་ནི་ལམ་གྱི་རྗེས་སུ་སོང་བའོ། །ཁྱད་པར་ཅི་མཆིས་ཞེས་བྱ་བ་ནི་བྱེ་བྲག་ཅི་ཡོད་ཅེས་བྱ་བའོ། །རིའི་རྒྱལ་པོ་
རི་རབ་ཇི་ལྟ་བ་དེ་ལྟར་ནི་སྟོན་པ་ལ་བལྟ་བར་བྱ་བ་ལ་ཞེས་བྱ་བ་ནི་སྟོབས་ལ་སོགས་པའི་ཡོན་ཏན་དང་བྱང་ཆུབ་ཀྱི་ཚོགས་ཀྱིས་མཐོང་བའི་ཕྱིར་རོ། །རྒྱ་མཚོ་ཆེན་པོ་ཇི་ལྟ་བ་དེ་ལྟར་ནི་སྟོན་པ་ལ་བལྟ་བར་བྱ་བ་ལ་ཞེས་བྱ་བ་ནི་མ་འདྲེས་པའི་དྲན་པ་ཉེ་བར་གཞག་པ་དང་བཏང་སྙོམས་ཆེན་པོ་ལ་སོགས་པའི་ཡོན་ཏན་དག་གིས་ཟབ་པའི་ཕྱིར་རོ། །ཉི་མ་ཇི་ལྟ་བ་དེ་ལྟར་ནི་སྟོན་པ་ལ་བལྟ་བར་བྱ་བ་ཞེས་བྱ་བ་ནི་ཐམས་ཅད་མཁྱེན་པ་ཉིད་དང་འོད་ཀྱིས་ཤིན་ཏུ་གསལ་བའི་ཕྱིར་རོ། །ནམ་མཁའ་ཇི་ལྟ་བ་དེ་ལྟར་ནི་སྟོན་པ་བལྟ་བར་བྱ་ལ་ཞེས་བྱ་བ་ནི་ཉོན་མོངས་པ་བག་ཆགས་དང་བཅས་པ་སྤངས་པས་སེམས་ཅན་མཐའ་ཡས་པ་རྣམ་པར་གྲོལ་བའི་ཕྱིར་རོ། །ཁྱད་པར་ཞེས་བྱ་བ་ནི་བྱེ་བྲག་གོ །མེ་ཁྱེར་ཞེས་བྱ་བ་ནི་སྲིན་བུ་མེ་ཁྱེར་ཏེ་སྲིན་བུའི་མདོག་མེ་འདྲ་བའི་ཕྱིར་རོ། །སངས་རྒྱས་ཉན་ཐོས་བྱང་ཆུབ་ཁྱད་པར་དེ་ཡོད་དོ་ཞེས་བྱ་བ་ནི་སངས་རྒྱས་ཀྱི་བྱང་ཆུབ་དང༌། ཉན་ཐོས་ཀྱི་བྱང་ཆུབ་ལ་བྱེ་བྲག་དེ་ཡོད་དོ་ཞེས་བྱ་བའི་ཐ་ཚིག་གོ །དམ་པ་མ་ཡིན་པར་མི་འགྱུར་ལ་ཞེས་བྱ་བ་ནི་མཆོག་ཏུ་འགྱུར་བའོ། །བཟོད་པ་ཞེས་བྱ་བ་ནི་བཟོད་པ་དང་ལྡན་པ་སྟེ་ཚིག་ཉན་པའོ། །མཐོང་ན་མི་མཐུན་པ་མེད་པ་ནི་ཞེ་འགྲས་པ་མེད་པ་སྟེ་བདེ་བ་བྱེད་པ་ཞེས་བྱ་བའི་ཐ་ཚིག་གོ།། མི་འདོད་བཞིན་དུ་འབྲལ་བ་ཁོ་ན་ཡིན་གྱི་ཞེས་བྱ་བ་ནི་མི་དགའ་བཞིན་དུ་འབྲལ་བའོ། །ཤིན་ཏུ་གཞོན་པ་ཞེས་བྱ་བ་ནི་ལུས་ཀྱིས་སོ། །བདེ་བ་འདོད་པ་ཞེས་བྱ་བ་ནི་སེམས་ཀྱིས་སོ། །རི་དགས་གདུག་པ་ཞེས་བྱ་བ་ནི་གཅན་གཟན་ནོ། །གཞན་གྱིས་བྱིན་པས་འཚོ་བར་བྱ་དགོས་སོ་ཞེས་བྱ་བ་ནི་གཞན་དག་གིས་བྱིན་པའི་བཟའ་བ་དང༌། བཏུང་བ་དང་གོས་ལ་སོགས་པས་འཚོ་བར་བྱ་དགོས་པ་སྟེ་གཞན་གྱི་ངོར་བལྟ་དགོས་ཞེས་བྱ་བའི་ཐ་ཚིག་གོ །མི་འདོད་པ་དག་ལས་ཞེས་བྱ་བ་ནི་གཟུགས་དང་སྒྲ་དང་དྲི་ལ་སོགས་པ་འདོད་པའི་ཡོ་བྱད་དག་ལས་སོ། །དབེན་པར་ཞེས་བྱ་བ་ནི་བར་ཆད་དོ། །དགའ་བ་དང་རྩེ་བ་དག་ལས་ཞེས་བྱ་བ་ནི་འདོད་པའི་ལོངས་སྤྱོད་དང་དངོས་པོ་དག་ལས་སོ། །ཞི་བ་ཞེས་བྱ་བ་ནི་དགའ་བའི་ཚིག་གིས་བོར་བའོ། །མཁས་པས་བསྔགས་པ་ཞེས་བྱ་བ་ནི་ཡེ་ཤེས་འབྱམ་ཀླས་པ་དག་གིས་བསྔགས་པའོ། །སླར་ལྡོག་པ་ཞེས་བྱ་བ་ནི་ཕྱིར་ཁྱིམ་དུ་འོང་བའོ།།
འབྲས་བུའི་རིམ་གྱིས་ཞེས་བྱ་བ་ནི་འབྲས་བུ་ཞེས་བྱ་བ་འབྲས་བཙོས་པའི་ཁུ་བ་ཐུག་པའི་རྣམ་པ་ལྟ་བུ་སྟེ་དང་པོར་དེ་བཏུང་བའི་རིམ་གྱིས་སོ། །ཐན་བཅད་པ་བྱས་པ་ནི་དྲོད་ཆུང་བས་དང་པོར་དེ་འཐུངས་ན་མེའི་ཁམས་སྐྱེ་བར་འགྱུར་བའི་ཕྱིར་རོ། །མཐུ་ཞེས་བྱ་བ་ནི་བརྟན་པའི་ཉིད་དོ། །སྟོབས་ཞེས་བྱ་བ་ནི་འོང་བ་དང་འགྲོ་བ་ལ་སོགས་པའི་ནུས་པའོ། །བརྩོན་འགྲུས་ཞེས་བྱ་བ་ནི་ཡིད་ཀྱི་སྤྲོས་པའོ། །བསྐྱེད་དེ་ཞེས་བྱ་བ་ནི་བྱས་ཏེའོ། །རབ་ཏུ་འབྱུང་བ་ལ་མོས་པ་བྱ་བ་ནི་རབ་ཏུ་འབྱུང་བ་མངོན་པར་འདོད་པར་བྱ་བའོ། །རིགས་ཞེས་བྱ་བ་ནི་འོས་ཤིང་བཟང་བ་ཞེས་བྱ་བའི་ཐ་ཚིག་གོ །མ་འདྲེས་པ་ཞེས་བྱ་བ་ནི་རྒྱལ་པོ་ལ་སོགས་པ་དང་ཐུན་མོང་མ་ཡིན་པའོ། །བྲན་ཞེས་བྱ་བ་ནི་ཉེ་བར་སྤྱོད་པའོ། །མངག་གཞུག་ཅེས་བྱ་བ་ནི་ལྐོག་གི་ལས་སུ་བསྐོ་བར་བྱ་བའོ། །བསྐོ་བ་ཞེས་བྱ་བ་ནི་མངོན་སུམ་གྱི་ལས་སུ་བསྐོ་བར་བྱ་བའོ། །རང་དབང་མེད་པ་ཞེས་བྱ་བ་ནི་གཞན་ལ་རག་ལས་པའོ། །དགའ་མགུར་འགྲོར་མེད་པ་ཞེས་བྱ་བ་ནི་དགའ་མགུར་སྤྱད་དུ་མེད་པའོ། །མཆོད་པར་བྱ་བ་ཞེས་བྱ་བ་ནི་ཆོས་གོས་ལ་སོགས་པས་སོ། །བསྟོད་པར་བྱ་བ་ཞེས་བྱ་བ་ནི་ཚིག་གིས་སོ། །གྲུབ་པ་དང་བདེ་བ་ཞེས་བྱ་བ་ལ། གྲུབ་པ་ཞེས་བྱ་བ་ནི་སྔར་ཐོབ་པའོ། །བདེ་བ་ཞེས་བྱ་བ་ནི་ཐོབ་པ་མི་ཉམས་པ་སྟེ་དེ་ནི་གྲུབ་པ་ཡང་ཡིན་ལ་བདེ་བ་ཡང་ཡིན་པས་གྲུབ་པ་དང་བདེ་བ་སྟེ། མྱ་ངན་ལས་འདས་པ་ཞེས་བྱ་བའི་ཐ་ཚིག་གོ །ཉམས་ན་ཞེས་བྱ་བ་ནི་མ་ཐོབ་པ་སྟེ་མྱ་ངན་ལས་འདས་པ་ལས་མ་ཐོབ་པའི་ཡོངས་སུ་ཉམས་པ་ཉམས་ནའོ། །གོང་ནས་གོང་དུ་ཡིད་ལ་བྱེད་པའི་ཁྱད་བར་ཐོབ་ནས་ཞེས་བྱ་བ་ནི་མི་སྡུག་པ་དང༌། དབུགས་འབྱུང་བ་དང༌། རྔུབ་པ་དྲན་པ་དང༌། དྲོ་བར་གྱུར་པ་ལ་སོགས་པ་དག་གོ །ཆ་ལྔ་པ་ཞེས་བྱ་བ་ནི་སེམས་ཅན་དམྱལ་བ་དང༌། ཡི་དགས་དང༌། དུད་འགྲོ་བ་དང༌། ལྷ་དང༌། མིའི་འགྲོ་བ་ལྔའི་རིགས་ལྔ་དང་ལྡན་པའོ། །གཡོ་བ་ཞེས་བྱ་བ་ནི་རྒྱུན་གྱིས་མི་རྟག་པས་སོ། །མི་གཡོ་བ་ཞེས་བྱ་བ་ནི་འཕགས་པའི་ལམ་མེད་པར་མི་ལྡོག་པའི་ཕྱིར་རོ། །འདུ་བྱེད་ཀྱི་རྣམ་པ་ཐམས་ཅད་ཅེས་བྱ་བ་ནི་གཟུགས་ལ་སོགས་པ་འདུ་བྱེད་ཀྱི་རྣམ་པ་ཐམས་ཅད་དོ། །ཉམས་པ་ཞེས་བྱ་བ་ནི་སྐྱེ་བའི་ཆོས་ཉིད་ཀྱིས་སོ། །ལྟུང་བ་ཞེས་བྱ་བ་
ནི་རྒས་པའི་ཆོས་ཉིད་ཀྱིས་སོ། །རྣམ་པར་འཐོར་བ་ཞེས་བྱ་བ་ནི་ན་བའི་ཆོས་ཉིད་ཀྱིས་སོ། །རྣམ་པར་འཇིག་པ་ཞེས་བྱ་བ་ནི་འཆི་བའི་ཆོས་ཉིད་ཀྱིས་སོ། །ཟིལ་གྱིས་མནན་ནས་ཞེས་བྱ་བ་ནི་ཟིལ་གྱིས་མནན་ཏེའོ། །ཁ་ཏོན་དག་ཞེས་བྱ་བ་ནི་ཚིག་གི་ཐེ་ཚོམ་གཅད་པའི་ཕྱིར་རོ། །ཡོངས་སུ་དྲི་བ་དག་ཅེས་བྱ་བ་ནི་དོན་གྱི་ཐེ་ཚོམ་གཅད་པའི་ཕྱིར་རོ། །ཆོས་གོས་བྱས་པ་དང་ལྡན་པ་ཞེས་བྱ་བ་ནི་ཐག་པ་ལ་སོགས་པ་ལས་སོ། །ཆོས་གོས་ཟིན་པ་དང་ལྡན་པ་ཞེས་བྱ་བ་ནི་བཀྲུ་བཤལ་བ་དང་བཅོ་བླག་པ་ལས་སོ། །སོམ་ཉི་ཞེས་བྱ་བ་ནི་རང་གིས་རྟོགས་པ་ལས་ཐེ་ཚོམ་ཟ་བའོ། །ཡིད་གཉིས་ཞེས་བྱ་བ་ནི་གཞན་གྱིས་བསྟན་པ་ལས་ཐེ་ཚོམ་ཟ་བའོ། །འདོད་པ་སྐྱེས་ཤིང་ཞེས་བྱ་བ་ནི་བྱས་པ་ཤེས་པ་ཉིད་དང་སྨོན་ལམ་གྱི་དབང་གིས་དགེ་བའི་ཆོས་ལ་འདུན་པ་བསྐྱེད་དཔའོ། །ཆོས་ཀྱི་སྐུའི་སྒོ་ནས་ནི་མཐོང་ན་ཞེས་བྱ་བ་ནི་ལམ་གྱི་བདེན་པ་བསྒོམ་པའི་དུས་ནའོ། །ཁྱོད་དུས་སུ་ཟིན་ཏོ་ཞེས་བྱ་བ་ནི་གནས་མལ་དང་ཟས་བསྐོ་བ་བྲེལ་བར་གྱུར་པས་དེས་སེལ་བར་བྱེད་པའི་ཕྱིར་རོ། །གནས་མལ་གྱི་མཐུན་པར་འབོགས་པར་བྱེད་ཅེས་བྱ་བ་ནི་མཐུན་པར་མི་བརྡེག་པར་རོ། །དཔེར་ན་ཆུ་མེད་པ་ལས་ཨུཏྤ་ལ་བཞིན་ནོ་ཞེས་བྱ་བ་ནི་མི་སྐྱེ་བ་བཞིན་ནོ། །ཡང་དག་པར་རྫོགས་པའི་སངས་རྒྱས་པ་ཞེས་བྱ་བ་ནི་ཕྱིན་ཅི་མ་ལོག་པའི་ཡེ་ཤེས་ཡང་དག་པས་ཤེས་པའི་ཡུལ་མ་ལུས་པར་རྫོགས་པར་ཐུགས་སུ་ཆུད་ཅིང་སངས་རྒྱས་པའོ། །བསྐོ་བར་བྱའོ་ཞེས་བྱ་བ་ནི་སྔར་སྤྲོ་བར་བྱས་ནས་གསོལ་བ་དང་གཉིས་ཀྱི་ལས་ཀྱིས་སོ། །དབྱུང་བར་བྱ་སྟེ་ཞེས་བྱ་བ་ནི་ལས་དེ་ལས་སོ། །གནས་མལ་ཕོག་པ་དང་མ་ཕོག་པ་མི་ཤེས་ཞེས་བྱ་བ་ནི་བརྗེད་ངེས་པའོ། །གནས་མལ་འབོགས་པ་ཞེས་བྱ་བ་ནི་སྟོབས་པའོ། །གསོལ་བ་བྱས་ཏེ་ལས་བྱ་བ་ནི་གསོལ་བ་དང་གཉིས་ཀྱི་ལས་སོ། །གཏམ་དང་འབྲེལ་པའི་གཏམ་གྱིས་རྣམ་པར་གཏན་ལ་འབེབས་པས་ཞེས་བྱ་བའི་གཏམ་ཞེས་བྱ་བ་ནི་ཆོས་སྟོན་པའོ། །འབྲེལ་པའི་གཏམ་ཞེས་བྱ་བ་ནི་ལྷན་ཅིག་འབྲེལ་ཞིང་ཕན་ཚུན་ཆོས་སྤྱོད་པའོ། །གཏམ་དང་འབྲེལ་པའི་གཏམ་དེ་གཉིས་ཀྱིས་ཆོས་རྣམ་པར་འབྱེད་པ་ནི་གཏམ་དང་འབྲེལ་པའི་གཏམ་གྱིས་རྣམ་པར་གཏན་ལ་འབེབས་པ་ཞེས་བྱ་བའི་ཐ་ཚིག་གོ།།
རྫུ་འཕྲུལ་གྱི་ཆོ་འཕྲུལ་ཞེས་བྱ་བ་ནི་རྫུ་འཕྲུལ་གྱི་མཚན་ཉིད་རྨད་དུ་བྱུང་བའོ། །གནས་པ་ཞེས་བྱ་བ་ནི་གནས་ཀྱི་ཁྱད་པར་ཤེས་པའོ། །གཉུག་མར་གནས་པ་ཞེས་བྱ་བ་ནི་ངེས་པར་གནས་པའོ། །གསོལ་བར་བྱེད་པ་ཞེས་བྱ་བ་ནི་གསོལ་བ་དང༌། གསོལ་བ་དང་གཉིས་དང་གསོལ་བ་དང་བཞིའི་ལས་བྱེད་པའོ། །གཏམས་པ་འཛིན་པ་ཞེས་བྱ་བ་ནི་གཞན་གྱིས་གཏམས་པ་སྲུང་བའོ། །ལུགས་ཇི་ལྟ་བ་བཞིན་ཞེས་བྱ་བ་ནི་རྣམ་པར་གཞག་པའི་རྗེས་སུ་འབྲངས་པས་ཟས་བསོད་པ་དང༌། འབྲིང་དང༌། ངན་པའི་རྗེས་སུ་འགྲོ་བའོ། །རྒན་རིམས་ཇི་ལྟ་བ་བཞིན་ཞེས་བྱ་བ་ནི་རྒན་པའི་རྗེས་སུ་འགྲོ་བས་སོ། །གོ་རིམས་ཇི་ལྟ་བ་བཞིན་ཞེས་བྱ་བ་ནི་རིམ་བཞིན་དུ་བར་མི་འདོར་བར་རོ། །ཐོད་རྒལ་མེད་པར་ཞེས་བྱ་བ་ནི་བཀོལ་བར་མི་འོས་པ་བཀོལ་བར་མི་བྱེད་པའོ། །མཐའི་གཙུག་ལག་ཅེས་བྱ་བ་ནི་མཇུག་ན་འདུག་པའོ། །གནས་ངན་ལེན་ཀུན་དུ་སྤྱོད་པ་ཞེས་བྱ་བ་ནི་རང་ཉམས་ཅན་ཏེ་ཐམས་ཅད་དུ་སྨོད་པར་ཀུན་དུ་སྤྱོད་པ་ཞེས་བྱ་བའི་ཐ་ཚིག་གོ །མི་བཟོད་ཅེས་བྱ་བ་ནི་རྟག་ཏུ་བྱུང་བའི་ཕྱིར་རོ། །མི་མཛེས་ཤིང་ཞེས་བྱ་བ་ནི་མ་ལེགས་པའོ། །ལྟུང་བ་མ་མཆིས་པ་ལ་ཞེས་བྱ་བ་ནི་ལྟུང་བ་མ་བྱུང་བ་ལའོ། །གཞི་མ་མཆིས་པ་ཞེས་བྱ་བ་ནི་མཐོང་བ་དང༌། ཐོས་པ་དང༌། དོགས་པའི་གཞི་གསུམ་མེད་པར་རོ། །དེ་ལ་མཐོང་བ་ནི་བདག་ཉིད་ཀྱི་མིག་གིས་མཐོང་ངོ༌། །ཐོས་པ་ནི་གཞན་ལས་གཏམ་ཐོས་པ་མ་ཡིན་གྱི། ཡོལ་བ་ལ་སོགས་པས་བསྒྲིབས་པའི་ཕག་ན་མི་ཚངས་པར་སྤྱད་པ་ལ་སོགས་པ་བྱེད་པའི་སྒྲ་བདག་ཉིད་ཀྱི་རྣ་བས་ཐོས་པའོ། །དོགས་པ་ནི་བར་དུ་ཐ་གུས་དྲང་བ་ལ་སོགས་པས་བརྟག་དགོས་པའོ། །དྲན་པ་དང་ལྡན་པར་ཟུང་ཤིག་ཅེས་བྱ་བ་ནི་དེའི་དྲན་པ་ཚད་མར་གྱུར་པ་ཡིན་པར་གྱིས་ཤིག་ཅེས་བྱ་བའི་ཐ་ཚིག་གོ །རང་གིས་ཁས་བླངས་པས་བསྙིལ་བར་བྱའོ་ཞེས་བྱ་བ་ནི་རང་གི་ཚིག་གིས་ནི་ཕྱི་སར་གྱིས་ཤིག་ཅེས་བྱ་བའི་ཐ་ཚིག་གོ །གླེང་བར་གྱིས་ཤིག་ཅེས་བྱ་བ་ནི་དྲིས་ཤིག་ཅེས་བྱ་བའོ། །བརྟག་པར་གྱིས་ཤིག་ཅེས་བྱ་བ་ནི་གཏན་ལ་ཕོབ་ཤིག་ཅེས་བྱ་བའི་ཐ་ཚིག་གོ །འདུན་པས་སྨྲས་ཞེས་བྱ་བ་ནི་བདག་ལ་བྱམས་པའི་རྒྱུས་སོ། །འཇིགས་པས་སྨྲས་ཞེས་བྱ་བ་ནི་ཕྱིས་གནོད་པ་བྱེད་པས་འཇིགས་
པའི་ཕྱིར་རོ། །ལུས་ཅན་བརྫུན་དུ་སྨྲ་བ་ཡིན་ཞེས་བྱ་བ་ལ་སོགས་པས་ནི་སེམས་ཅན་བརྫུན་དུ་སྨྲ་བའི་ཆོས་གཙོ་བོ་གཅིག་ལས་འདས་པར་གྱུར་ཅིང་འཇིག་རྟེན་ཕ་རོལ་དྲལ་ཅིང་སྨྲས་པས་བྱས་པ་ནི་ཚེ་འདི་ཉིད་ལ་སྡིག་པ་མི་བྱ་བ་ཅི་ཡང་མེད་དོ་ཞེས་བྱ་བའི་ཐ་ཚིག་གོ །བརྫུན་དུ་སྨྲ་བ་སྡིག་པའི་རྒྱུ་ཉིད་དང་སྡུག་བསྔལ་གྱི་རྒྱུ་ཉིད་ཀྱང་ཡིན་པར་བསྟན་པའི་ཕྱིར། ལྕགས་གོང་མེ་ལྕེ་འདྲ་བ་དག་ཅེས་བྱ་བ་ལ་སོགས་པ་གསུངས་སོ། །ཚུལ་འཆལ་ཅེས་བྱ་བ་ནི་བརྫུན་དུ་སྨྲ་བའོ། །ཡང་དག་མི་སྡོམ་པ་ཞེས་བྱ་བ་ནི་མི་སྤོང་བ་སྟེ་འདིས་ནི་འཆལ་པ་བསྟན་ཏོ། །ངན་ཏོ་ཞེས་བྱ་བ་ནི་སྨད་པའོ། །མི་བཟད་དོ་ཞེས་བྱ་བ་ནི་བདག་ཉིད་ལ་གནོད་པའི་ཕྱིར་རོ། །མཆོག་ཏུ་མི་བཟོད་དོ་ཞེས་བྱ་བ་ནི་གཞན་ལ་གནོད་པའི་ཕྱིར་རོ། །ཡང་ན་འཇིག་རྟེན་འདི་དང་མི་མཐུན་པ་དང༌། འཇིག་རྟེན་ཕ་རོལ་དང་མི་མཐུན་པ་སྟེ་གོ་རིམས་བཞིན་ནོ། །དེ་མ་སྤངས་ན་ཞེས་བྱ་བ་ནི་འོག་ནས་འབྱུང་བ་ཉེ་བར་སྤྱོད་པ་དེ་ནི་མི་སྤོང་ཞིང་ཡང་དང་ཡང་དུ་བྱེད་ན་ཞེས་བྱ་བའི་ཐ་ཚིག་གོ །བདག་ཉིད་ཚུལ་ཁྲིམས་འཆལ་ཅིང་ཞེས་བྱ་བ་ནི་མཉམ་པར་མ་བཞག་པའོ། །གཞན་ལ་ཚུལ་ཁྲིམས་ཀྱི་དབང་དུ་བྱས་ཏེ། སྨྲ་བ་ཞེས་བྱ་བ་ནི་ཚུལ་ཁྲིམས་ཀྱི་དབང་དུ་བྱས་ཏེ་གླེང་བར་བྱེད་ཅེས་བྱ་བའི་ཚིག་གོ ། སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ་ཞེས་བྱ་བ་ནི་ཉན་པ་པོ་དྲུང་ན་གནས་པ་རྒྱས་པ་དང་མདོར་བསྡུ་བ་ལ་མོས་པ་གཉི་ག་ལ་ཕན་གདགས་པའི་ཕྱིར་དང༌། ཕྱིར་འོངས་པས་སྔར་རྒྱས་པར་བསྟན་པས་མ་ཐོབ་པ་ལ་ཕན་འདོགས་པའི་ཕྱིར་དང༌། དགེ་བའི་རྩ་བ་ཡོངས་སུ་སྨིན་པར་བྱ་བ་ཚིག་བཟླས་པ་ལ་ལྟོས་པ་དག་ཡོངས་སུ་སྨིན་པར་བྱ་བའི་ཕྱིར་རོ། །བརྫུན་དུ་སྨྲ་བའི་ཉེས་དམིགས་བསྟན་པའི་ཕྱིར། །ཚིག་གིས་ཉེས་སྨྲས་རྗོད་བྱེད་ན། །ཞེས་བྱ་བ་ལ་སོགས་པ་གསུངས་སོ། །འཐབ་ཀྲོལ་ཞེས་བྱ་བ་ནི་གནོད་པའི་རྒྱུའོ། །རྒྱན་པོས་འཐབ་ཀྲོལ་དུ་གྱུར་པ་ཡིན་ན་སྟོད་པ་དང་སྨོད་པ་གཉིས་ཇི་ལྟར་འཐབ་ཀྲོལ་ཡིན་ཞེ་ན། དེའི་ཕྱིར་གང་འདིར་ཆོ་ལོས་ཞེས་བྱ་བ་ལ་སོགས་པ་གསུངས་སོ། །ཆོ་ལོ་ཞེས་བྱ་བ་ནི་རྒྱལ་པོའི་རྩེ་མོའོ། །རང་ནོར་ཕམ་བྱེད་པ་ཞེས་བྱ་བ་ནི་ཉམས་པར་བྱེད་པའོ། །བསྟོད་པ་དང་སྨད་པ་ཞེས་བྱ་བ་ནི་དེ་བཞིན་གཤེགས་པ་དང་དེ་བཞིན་
གཤེགས་པའི་ཉན་ཐོས་རྣམས་ལའོ། །ཇི་ལྟར་ན་འཐབ་ཀྲོལ་ཤིན་ཏུ་ཆེན་པོ་ཡིན་ཞེ་ན། དེའི་ཕྱིར་འཕགས་པས་སྨད་པས་ཞེས་པ་ལ་སོགས་པ་གསུངས་སོ། །འཕགས་པས་སྨད་པས་ཞེས་བྱ་བ་ནི་སྐྱེ་བོ་འཕགས་པ་ལ་སྐུར་པ་འདེབས་པས་སོ། །ངག་ཡིད་སྡིག་བསྟེན་ན་ཞེས་བྱ་བ་ནི་ངག་གིས་སྐུར་པ་འདེབས་པ་དང༌། ཡིད་ཀྱིས་ངན་སེམས་བསྐྱེད་ནའོ། །བྱེ་བ་བརྒྱ་ཕྲག་སྟོང་ཞེས་བྱ་བ་ལ། བྱེ་བ་ཞེས་བྱ་བ་ནི་གྲངས་ཀྱི་གནས་བརྒྱད་པ་སྟེ། བརྒྱ་ཕྲག་སྟོང་ནི་བྱེ་བ་ཕྲག་འབུམ་མོ། །དུང་ཕྱུར་ཕྲག་སུམ་ཅུ་དྲུག་དང་ལྡན་ཞེས་བྱ་བ་ལ། དུང་ཕྱུར་ཞེས་བྱ་བ་ནི་གྲངས་ཀྱི་གནས་དགུ་པ་སྟེ། དེ་ཕྲག་སུམ་ཅུ་རྩ་དྲུག་དང་ལྔ་ནི་དུང་ཕྱུར་ཕྲག་བཞི་བཅུ་རྩ་གཅིག་སྟེ། སྐྱེ་བོ་འཕགས་པས་སྨད་པ་གང་དག་ངག་དང་ཡིད་ཀྱི་སྒོ་ནས་གཞན་ལ་སྐུར་པ་འདེབས་ཤིང་སྨད་པ་དང༌། ཞེ་སྡང་བསྐྱེད་ཅིང་ཚངས་པར་སྤྱོད་པ་དང་འབྲལ་བར་སེམས་པ་དེ་དག་ནི་ལོ་གྲངས་བྱེ་བ་ཕྲག་འབུམ་དང༌། དུང་ཕྱུར་ཕྲག་བཞི་བཅུ་རྩ་གཅིག་ཇི་སྙེད་སེམས་ཅན་དམྱལ་བ་རྣམས་སུ་འགྲོ་བར་འགྱུར་བས་དེའི་ཕྱིར་གང་དག་བདེ་བར་གཤེགས་པ་དང༌། བདེ་བར་གཤེགས་པའི་སྲས་ཆོས་སྒྲོག་པ་ལ་སོགས་པ་དག་ལ་ངག་དང་ཡིད་ཀྱིས་འཐབ་ཀྲོལ་བྱེད་པ་དེ་ནི་ཤིན་ཏུ་འཐབ་ཀྲོལ་ཆེན་པོ་ཡིན་ནོ་ཞེས་བྱ་བའི་ཐ་ཚིག་གོ །ཚངས་པར་སྤྱོད་པ་དང་དབྲལ་ལོ་སྙམ་ནས་ཞེས་བྱ་བ་ནི་དགེ་སློང་གི་དངོས་པོ་ལས་དབྲལ་ལོ་སྙམ་ནས་སོ། །དགེ་སློང་དག་པ་ཞེས་བྱ་བ་ནི་ལྟུང་བ་མེད་པའོ། །གཞི་དེའི་ལྟུང་བ་མེད་པ་ཞེས་བྱ་བ་ནི་གཞི་གསུམ་པོ་གང་གིས་སྐུར་པ་དེའིའོ། །བརྗོད་དོ་ཅོག་ཅེས་བྱ་བ་ནི་རྩོལ་བ་ཐ་དད་པའི་ཕྱིར་ཏེ། མཐོང་བ་ལ་སོགས་པ་ལ་ཞེས་བྱ་བའི་ཐ་ཚིག་གོ །བརྗེད་པ་ཞེས་བྱ་བ་ནི་མི་དྲན་པའོ། །ཡིད་ཆེས་ནས་ཞེས་བྱ་བ་ནི་བདེན་པར་རོ། །ཇི་ལྟར་གཞི་ལྔས་ལྟུང་བར་མི་འགྱུར་ཞེ་ན་ཞེས་བྱ་བ་ལ་སོགས་པ་ནི་མ་མཐོང་བ་ལ་སོགས་པ་ལ་འཁྲུལ་པའི་རྒྱུས་མཐོང་བར་འདུ་ཤེས་པས་མཐོང་ངོ་ཞེས་བྱ་བ་ལ་སོགས་པ་སྨྲས་པ་ལ་འདུ་ཤེས་བསྒྱུར་བ་མེད་པའི་ཕྱིར་ལྟུང་བར་མི་འགྱུར་རོ། །མ་དག་པ་ལྟར་བཅོས་པ་ཞེས་བྱ་བ་ནི་ཚུལ་ངན་པའི་ཕྱིར་མ་དག་པ་ལྟར་སྣང་བའོ། །གཞི་བཅུ་གཅིག་དང་གཞི་དྲུག་ཅེས་བྱ་བ་འདི་ལ་ནི་མཐོང་བ་གཉིས་ལྷག་པའི་
ཕྱིར་རོ། །དག་པ་ལྟར་བཅོས་པ་ཞེས་བྱ་བ་ནི་ཚུལ་བཟང་བས་དག་པ་ལྟར་སྣང་བའོ། །དྲིལ་བསྒྲགས་པ་ཞེས་བྱ་བ་ནི་སྐྱེ་བོ་ཐམས་ཅད་ལ་བསྒྲགས་པའོ། །ངོས་ལ་རི་མོར་བྲིས་པ་ཕན་ཆད་ཅེས་བྱ་བ་ནི་རྩིག་ངོས་ལ་སོགས་པ་ལ་རི་མོར་བྲིས་པའི་ཚིགས་ཀྱིས་བཟུང་བ་ཕན་ཆད་དོ། །དྲིལ་བསྒྲགས་པ་དང༌། ངོས་ལ་རི་མོར་བྲིས་པ་ཡན་ཆད་ལ་སྐུར་པ་འདེབས་པ་ན་བསམ་གཏན་པ་ཇི་ལྟ་བུ་ལ་ལྟུང་བ་མེད་ཅེ་ན། དེའི་ཕྱིར་ཇི་ལྟར་བདག་གིས་ཤེས་པ་དེ་བཞིན་དུ་འཇིག་རྟེན་ཐམས་ཅད་ཀྱིས་ཀྱང་ཤེས་སོ་སྙམ་ནའོ་ཞེས་བྱ་བ་གསུངས་ཏེ། གྲགས་པའི་དབང་གིས་འདུ་ཤེས་བསྒྱུར་བ་མེད་པས་འདེ་ལ་ལྟུང་བ་མེད་པར་རྣམ་པར་བཞག་གོ །མེའི་ཁམས་ཞེས་བྱ་བ་ནི་མེ་ལ་མོས་པའོ། །རྙིང་པ་ཞེས་བྱ་བ་ནི་གྱི་ནའོ། །སྟོབས་པར་བྱེད་པ་ཞེས་བྱ་བ་ནི་འབུལ་བར་བྱེད་པ་གང་ཡིན་པའོ། །སེལ་བར་བྱེད་པ་ཞེས་བྱ་བ་ནི་ལྷག་མ་ལ་སོགས་པ་འདོར་བར་བྱེད་པ་གང་ཡིན་པའོ། །རྐྱལ་ཆེན་ཞེས་བྱ་བ་ནི་ཆུའི་ནང་དུ་འཇུག་པ་གང་ཡིན་པའོ། །གྲུ་པ་ཞེས་བྱ་བ་ནི་གྲུ་པའི་ལས་བྱེད་པ་གང་ཡིན་པའོ། །རླུང་ཡོར་ཐོགས་པ་ཞེས་བྱ་བ་ནི་རླུང་ཡོར་གྱི་དྲུང་ན་འདུག་ཅིང་ལམ་དང་ལམ་མ་ཡིན་པ་དག་ལ་རྟོག་པར་བྱེད་པ་གང་ཡིན་པའོ། །བཀྲེན་པ་ཞེས་བྱ་བ་ནི་ཟས་དང་གོས་མེད་པ་ལུས་དྲི་མས་གོས་པས་སྙིང་རྗེའི་གནས་སོ། །སྡུག་ཕོངས་ཞེས་བྱ་བ་ནི་སློང་འདོད་པས་བསྟེན་པའོ། །སྐྱོ་མ་ཞེས་བྱ་བ་ནི་སྐོམ་གྱི་ནང་དུ་ཕྱེས་བཏབ་པའོ། །ཕུ་ནུ་མོ་ལྟ་བུ་ཞེས་བྱ་བ་ནི་ཕུ་ནུ་མོ་དང་འདྲ་བའོ། །ཤིན་ཏུ་རྔམས་ཆེ་ཞེས་བྱ་བ་ནི་ཆེ་བའོ། །ཡོངས་སུ་རྫོགས་པ་ཞེས་བྱ་བ་ནི་གྲོགས་རྙེད་པའོ། །ལུས་འཇིག་པ་ཞེས་བྱ་བ་ནི་འཆི་བའོ། །མ་ཉེས་སོ་ཞེས་སྨྲས་པ་ཞེས་བྱ་བ་ནི་བདག་ལ་ཉེས་པ་མེད་དོ་ཞེས་སྨྲས་པའོ། །སྡུམ་ཚེས་ཞེས་བྱ་བ་ནི་ཁྱིམ་ཚེས་སོ། །སྔོན་མ་བྱུང་བ་ཞེས་བྱ་བ་ནི་རང་ལ་སྐྱོན་ཆགས་པའི་ཕྱིར་རོ། །གནོད་པ་མེད་པ་ཞེས་བྱ་བ་ནི་དེ་ལ་མི་གནོད་པའི་ཕྱིར་རོ། །ཡོན་ཏན་གྱི་ཚོགས་ཞེས་བྱ་བ་ནི་མཐོང་བའི་ལམ་ལ་སོགས་པ་ཟག་པ་མེད་པའོ། །གཞི་མེད་པར་སྐུར་པ་འདེབས་པའི་དགེ་འདུན་ལྷག་མ་སྟེ་བརྒྱད་པའི་ཚིག་རྣམ་པར་བཤད་པ་རྫོགས་སོ།། །།རྡོ་རྩིག་ཅན་ཞེས་བྱ་བ་ནི་རྡོ་བ་རྩིགས་པའོ། །ཤེས་
ནས་དད་པ་དང་ལྡན་པས་ཞེས་བྱ་བ་ལ། ཤེས་ནས་དད་པ་ཞེས་བྱ་བ་ནི་བདེན་པ་མཐོང་བས་སངས་རྒྱས་དང་ཆོས་དང་དགེ་འདུན་དག་ཇི་ལྟ་བ་བཞིན་དུ་ཤེས་ནས་དད་པ་ཐོབ་པ་གང་ཡིན་པ་དེ་དེ་དང་ལྡན་པའོ། །ཞལ་ཏ་ཞེས་བྱ་བ་ནི་བྱ་བའོ། །རི་དགས་ཞེས་བྱ་བ་ནི་རྐང་བཞི་པ་དག་གོ །གནས་ནས་དབྱུང་བའི་ལས་ཞེས་བྱ་བ་ནི་ལྟུང་བ་ཕྱིར་མི་འཆོས་པས་སོ། །བག་ཙམ་ལས་བསམས་པ་ཞེས་བྱ་བ་ནི་ཆ་ཤས་ཙམ་གཟུང་ངོ༌། །རྫུ་འཕྲུལ་གྱི་ཆོ་འཕྲུལ་ཞེས་བྱ་བ་ནི་སོར་མོ་ལས་འོད་སྦར་བའོ། །གཞན་གྱི་ཆ་མ་ཡིན་པ་དང་མཐུན་པ་ཞེས་བྱ་བ་ལ། གཞན་ཞེས་བྱ་བ་ནི་མྱ་ངན་ལས་འདས་པ་སྟེ། འཁོར་བ་ལས་གཞན་པའི་ཕྱིར་རོ། །དེའི་ཆ་མ་ཡིན་པ་ཞེས་བྱ་བ་ནི་མི་མཐུན་པའི་ཕྱོགས་ཏེ། ཉོན་མོངས་པ་ཅན་གྱི་ཆོས་རྣམས་སོ། །དེ་དང་མཐུན་པ་ཞེས་བྱ་བ་ནི་དེར་གྱུར་པ་འམ་དེ་ལ་ཡོད་པ་སྟེ་ཕམ་པར་འགྱུར་བ་བཞི་པོ་དག་གོ །དེ་ཕམ་པར་འགྱུར་བ་བཞི་པོ་དག་ཡིན་ན་ཕམ་པར་འགྱུར་བའི་ཆོས་ཞེས་བྱ་བ་དངོས་སུ་སྨོས་ཅི་དགོས་ཤེ་ན་དེ་ནི་ཕམ་པའི་ཉེས་པ་བསྟན་པའི་ཕྱིར་ཏེ། ཕམ་པར་འགྱུར་བའི་ཆོས་ནི་མྱ་ངན་ལས་འདས་པ་དང་མི་མཐུན་པ་ཡིན་པའི་ཕྱིར་རོ། །བག་ཙམ་ལས་བསམས་པས་ཙམ་ཞེས་བྱ་བ་ལ་བག་ཙམ་ཞེས་བྱ་བ་ནི་ཆ་ཞེས་སོ། །དེ་ལས་བསམས་པ་ཞེས་བྱ་བ་ནི་དེ་ལ་སེམས་བཞག་པ་སྟེ་དེ་ཉིད་ཙམ་བྱ་སྟེ་འཕགས་པ་དང་འཕགས་མ་དེ་གཉིས་ཉེ་བ་དང་རི་དགས་དང་རི་དགས་མོ་ལོག་པར་ཞུགས་པ་ཙམ་མོ། །བླངས་པར་གྱུར་ལ་ཞེས་བྱ་བ་ནི་ཡིད་ཀྱིས་ངེས་པར་བྱས་ཞེས་བྱ་བའི་ཐ་ཚིག་གོ །ལྟ་བ་ཐོབ་ནས་ཞེས་བྱ་བ་ནི་བློ་སྐྱེས་ནས་ཞེས་བྱ་བའི་ཐ་ཚིག་གོ །ལྟུང་བ་རྣམ་པར་བཞག་པའི་སྐབས་འདིར་ཕམ་པར་འགྱུར་བར་བྱེད་པ་ལས་ལྟུང་བ་མེད་པ་དང༌། དགེ་འདུན་ལྷག་མ་དང༌། ལྟུང་བྱེད་དང༌། སོ་སོར་བཤགས་པར་བྱ་བ་དང༌། ཉེས་བྱས་ཀྱི་བློ་སྐྱེས་པ་ལྔ་དང༌། དགེ་འདུན་ལྷག་མ་དང༌། ལྟུང་བྱེད་དང་སོ་སོར་བཤགས་པར་བྱ་བ་དང༌། ཉེས་བྱས་བྱེད་པ་ལ་ཡང་ལྔ་ལྔ་སྟེ་ལྟུང་བའི་འགྲོས་ཉི་ཤུ་རྩ་ལྔར་ཤེས་པར་བྱའོ། །དགེ་འདུན་ལྷག་མ་སྔ་མ་དང་འདི་གཉིས་ལ་བྱེ་བྲག་ནི་སྔ་མ་ནི་གཞི་མེད་པ་ཁོ་ནར་སྐུར་བ་འདེབས་པ་ཡིན་ལ། འདི་ནི་བག་ཙམ་གྱིས་གཞི་ཡོད་པ་ལས་སྐུར་པ་འདེབས་པ་ཡིན་ནོ།།
གཞན་གྱི་ཆ་མ་ཡིན་པ་དང་མཐུན་པའི་དགེ་འདུན་ལྷག་མ་སྟེ་དགུ་པའི་ཚིག་རྣམ་པར་བཤད་པ་རྫོགས་སོ།། །།གང་གི་མིང་གིས་འཛམ་བུའི་གླིང་ཞེས་བྱ་བར་ཤེས་པ་ཤིང་འཛམ་བུ་ཞེས་བྱ་བ་ནི་འཛམ་བུའི་གླིང་བྱང་གི་ངོས་རྒྱ་མཚོའི་འགྲམ་ན་ཤིང་ལྗོན་པ་འཛམ་བུ་ཞེས་བྱ་བ་བོང་ཚོད་ཆེན་པོ་ཡོད་པ་དེའི་མིང་གིས་གླིང་འཛམ་བུའི་གླིང་ཞེས་བྱ་བར་ཤེས་པའི་ཤིང་དེའོ། །འཛམ་བུའི་འབྲས་བུ་ལྷགས་པ་ཞེས་བྱ་བ་ནི་འཛམ་བུ་ལྷགས་ཤིང་པ་པགས་པ་སྐམས་པ་དག་གོ །དེའི་ཉེན་ཀོར་ན་ཞེས་བྱ་བ་ནི་འཛམ་བུའི་དྲུང་ན་ཞེས་བྱ་བའི་ཐ་ཚིག་གོ །ལྷག་མ་ཡོད་ན་དགེ་སློང་རྣམས་ལ་ཡང་བགོ་བཤའ་བྱེད་དོ་ཞེས་བྱ་བ་ནི་ལྷག་མ་ཡོད་ན་དགེ་སློང་རྣམས་ལ་ཕན་འདོགས་ཞེས་བྱ་བའི་ཐ་ཚིག་གོ །བདུད་རྩི་ཞེས་བྱ་བ་ནི་ཞུན་མར་གྱི་རྣམ་པ་ལྟ་བུའི་ཟས་སོ། །འདོད་པའི་རྣམ་པ་ཞེས་བྱ་བ་ནི་འདོད་ཞེན་ཆེ་བ་ཉིད་དོ། །གཞན་ཡང་ཞེས་བྱ་བ་ནི་མངོན་པར་ཤེས་པ་ལྷག་མ་རྣམས་སོ། །ཚུལ་བཞིན་ཡིད་ལ་གྱིས་ཤིག་ཅེས་བྱ་བ་ནི་ཡང་དག་པར་རྟོགས་ཤིག་ཅེས་བྱ་བའི་ཐ་ཚིག་གོ །ཡང་དག་པར་བགྲོད་པར་གྱུར་པ་ཞེས་བྱ་བ་ནི་གྲོས་བྱས་པས་སོ། །སྡེ་ཅན་མའི་ཕུག་ཅེས་བྱ་བ་ནི་སྡེ་ཅན་མས་བྱེད་དུ་བཅུག་པའི་ཕུག་གི་མིང་ངོ༌། །གཡོ་མེད་པ་ཞེས་བྱ་བ་ནི་གྱ་གྱུ་མེད་པ་སྟེ་བསམ་པ་ཇི་ལྟ་བ་བཞིན་དུ་སྨྲ་ཞེས་བྱ་བའི་ཐ་ཚིག་གོ །མེད་པ་ཞེས་བྱ་བ་ནི་མི་སླུ་བའོ། །དྲང་པོ་ཞེས་བྱ་བ་ནི་གཡོ་དང་སྒྱུ་དང་བྲལ་བའི་ཕྱིར་སྤྱོད་པ་གསལ་བའོ། །དྲང་པོའི་རང་བཞིན་ཅན་ཞེས་བྱ་བ་ནི་སྐྱེས་ནས་འཐོབ་པའི་རྣམ་པ་དང་ལྡན་པ་ཡིན་གྱི་སྦྱོར་བ་ལས་བྱུང་བ་དང་ལྡན་པ་མ་ཡིན་ཞེས་བྱ་བའི་ཐ་ཚིག་གོ །ཕུན་རྒན་པ་ཞེས་བྱ་བ་ནི་སྤུན་རྒན་པའོ། །རྣམ་པར་མ་བལྟས་པར་ཞེས་བྱ་བ་ནི་རྣམ་པར་མ་བསྐུལ་བའི་ཕྱིར་རོ། །བཅོམ་ལྡན་འདས་ཀྱིས་ཅིའི་ཕྱིར་མ་བསྐུལ་ཅེ་ན། ལས་ཀྱི་དབང་གིས་གདོན་མི་ཟ་བར་གྲུབ་པས་བཅོམ་ལྡན་འདས་ནི་གནས་མ་ཡིན་པར་མི་འཇུག་པའི་ཕྱིར་རོ། །བསམ་གཏན་དང་པོ་ལ་བརྟེན་ནས་ཞེས་བྱ་བ་ནི་མི་ལྕོགས་པ་མེད་པ་ལ་བརྟེན་པ་ཡིན་ཏེ། དངོས་གཞི་ལ་ནི་མ་ཡིན་ཏེ། ལྷས་བྱིན་འདོད་ཆགས་དང་མ་བྲལ་བའི་ཕྱིར་རོ། །ཤེས་པ་དང་མཐོང་བ་སྣང་བ་དང་མི་སྣང་བ་ཡང་ཉམས་སུ་མྱོང་བར་བྱེད་དོ་ཞེས་བྱ་བ་ལ།
ཤེས་པ་ཞེས་བྱ་བ་ནི་མངོན་པར་ཤེས་པའོ། །མཐོང་བ་ཞེས་བྱ་བ་ནི་སྦྱོར་བ་ལས་བྱུང་བའི་སེམས་ཀྱི་ཤེས་རབ་སྟེ། དེ་གཉིས་ཀྱིས་ཉམས་སུ་མྱོང་བར་བྱེད་དོ་ཞེས་བྱ་བར་སྦྱར་རོ། །སྣང་བ་ཞེས་བྱ་བ་ནི་མངོན་པའོ། །མི་སྣང་བ་ཞེས་བྱ་བ་ནི་མི་མངོན་པའོ། །ཉམས་སུ་མྱོང་བར་བྱེད་དོ་ཞེས་བྱ་བ་ནི་བདག་ཉིད་ཀྱིས་ཀྱང་ཉམས་སུ་མྱོང་བར་བྱེད་པ་ཡིན་གྱི་གཞན་གྱི་དབང་པོ་སླུ་བར་བྱེད་པ་ཡིན་ཞེས་བྱ་བའི་ཐ་ཚིག་གོ །ངོས་ཀྱི་རྩིག་པ་ཞེས་བྱ་བ་ནི་ངོས་ན་འདུག་པའི་རྩིག་པ་སྟེ། དེ་ལ་ལུས་ཀྱིས་མི་ཐོགས་པར་འགྲོ་ཞེས་བྱ་བར་སྦྱར་རོ། །ངོས་ཀྱི་ར་བ་ཞེས་བྱ་བ་ལ་ཡང་དེ་བཞིན་དུ་ཤེས་པར་བྱའོ། །སྟེང་དུ་འབྱུང་བ་ཞེས་བྱ་བ་ནི་གྱེན་དུ་འབྱུང་བའོ། །བྱེའུ་ཟུལ་ཞེས་བྱ་བ་ནི་འོག་ཏུ་འཇུག་པའོ། །འདབ་ཆགས་བྱ་ཞེས་བྱ་བ་ནི་འདབ་མ་ཡོད་པ་བྱའི་སྐྱེ་གནས་ནས་སྐྱེས་པའོ། །མཐུ་དང་ལྡན་པའི་བུ་ཞེས་བྱ་བ་ནི་གཙོ་བོ་སྟེ་མཐུ་དང་ལྡན་པ་ཞེས་བྱ་བ་ནི་སྟོབས་དང་ལྡན་པ་སྟེ། དེའི་བུ་རྒྱུད་ཡིན་པའི་ཕྱིར་རོ། །འགྲེ་བར་བྱེད་ཅེས་བྱ་བ་ནི་གཡོ་བར་བྱེད་པའོ། །ལྡོག་པར་བྱེད་ཅེས་བྱ་བ་ནི་འཕར་བར་བྱེད་པའོ། །འཁྱུད་པར་བྱེད་ཅེས་བྱ་བ་ནི་འགུལ་ནས་འཁྱུད་པར་བྱེད་པའོ། །ཁ་སྦྱོར་བར་བྱེད་ཅེས་བྱ་བ་ནིའོ་བྱེད་པའོ། །ཀུན་ཏུ་འཁྱུད་པར་བྱེད་ཅེས་བྱ་བ་ནི་ལུས་ཀྱི་རྐེད་པ་ནས་འཁྱུད་པར་བྱེད་པའོ།། ཟིལ་གྱིས་གནོན་ཅིང་ཞེས་བྱ་བ་ནི་ལུས་དང་ངག་ཕམ་པར་བྱེད་པའོ། །སེམས་ཡོངས་སུ་གཏུགས་པས་ཞེས་བྱ་བ་ནི་སེམས་ཀུན་ནས་དཀྲིས་པས་སོ། །དད་པའི་ཆེད་དུ་བྱ་བ་ཞེས་བྱ་བ་ནི་དད་པའི་ལས་ཏེ་བསྙེན་བཀུར་ཞེས་བྱ་བའི་ཐ་ཚིག་གོ །སྣོད་དུ་བཙོས་པ་ཞེས་བྱ་བ་ནི་སྣོད་ནང་དུ་འབྲས་ཆན་དང་ཚོད་མའོ། །ཟས་ཀྱི་ཚོམ་བུ་ཚོམ་བུ་དག་ཅེས་བྱ་བ་ནི་འདྲིམ་སྒོའི་ཟས་ཀྱི་སྤྱི་བུངས་ཏེ་བཟླས་པའི་ཕྱིར་ལན་གཉིས་སུ་སྨོས་སོ། །ཟས་ཀྱི་གྲལ་ཞེས་བྱ་བ་ནི་བཀད་པའི་གྲལ་ལོ། །དགའ་བར་མ་བྱེད་ཅིག་ཅེས་བྱ་བ་ནི་འདོད་པར་མ་བྱེད་ཅིག་ཅེས་པའོ། །གསོད་པ་ཞེས་བྱ་བ་ནི་ཆུད་ཟ་བའོ། །ཟིལ་གྱིས་གནོན་པ་ཞེས་བྱ་བ་ནི་སྨད་པ་ལ་སོགས་པའི་མི་གུས་པའོ། །ཆུ་ཤིང་གི་གསོད་པ་ནི་སྐམ་པའོ། །ཟིལ་གྱིས་གནོན་པ་ཞེས་བྱ་བ་ནི་འབྲུལ་བ་ལ་སོགས་པའོ། །འོད་མ་དང་འདམ་བུ་ལ་ཡང་དེ་བཞིན་དུ་ཤེས་པར་བྱའོ། །དྲེའུ་མོ་ཞེས་བྱ་བ་ནི་དྲེ་མོའོ། །དེའི་གསོད་པ་ནི་འཆི་བའོ། །ཟིལ་གྱིས་
གནོན་པ་ནི་ལྟོ་འདྲལ་བའོ། །རྙེད་པ་དང་བཀུར་སྟི་ཟིལ་གྱིས་མནན་པར་བྱ་ཞིང་ཞེས་བྱ་བ་ནི་ཡོངས་སུ་སྤང་བར་བྱ་ཞིང་ངོ༌། །སེམས་ཡོངས་སུ་གཏུགས་ཤིང་གནས་པར་མི་བྱ་བ་ནི་སྲེད་པ་སྐྱེད་པར་མི་བྱ་བའི་ཐ་ཚིག་གོ །བྱིས་པ་ཞེས་བྱ་བ་ནི་རྨོངས་པའོ། །ཇི་ཙམ་ཞེས་བྱ་བ་ནི་མཐའ་བསྟན་པའོ། །གྲགས་པར་གྱུར་པ་ཞེས་བྱ་བ་ནི་བཀུར་སྟི་བྱས་པའོ། །དཀར་ཆ་ཞེས་བྱ་བ་ནི་དགེ་བའི་ཕྱོགས་སོ། །རྩེ་མོ་ལས་ཀྱང་ལྟུང་བར་འགྱུར་བ་ཞེས་བྱ་བ་ནི་ངེས་པར་འབྱེད་པའི་ཆ་དང་མཐུན་པའི་དགེ་བའི་རྩ་བ་རྩེ་མོ་ཞེས་བྱ་བ་ལས་ཀྱང་ཡོངས་སུ་ཉམས་པར་འགྱུར་རོ་ཞེས་བྱ་བའི་ཐ་ཚིག་གོ །རྒན་པོ་ཞེས་བྱ་བ་ནི་རྒན་པའི་གནས་སྐབས་སུ་གྱུར་པའོ། །རྒས་པ་ཞེས་བྱ་བ་ནི་ལུས་རྒས་པའི་མཐར་ཐུག་པའོ། །དགོག་ཏུ་གྱུར་པ་ཞེས་བྱ་བ་ནི་ལུས་ལྕི་བའོ། །ཡོངས་སུ་དྲང་བར་བྱ་ཞེས་བྱ་བ་ནི་རྗེས་སུ་བསྟན་པར་བྱ་བའོ། །སེམས་བསྐྱེད་མ་ཐག་ཏུ་ཞེས་བྱ་བ་ནི་སེམས་བསྐྱེད་པའི་མོད་ལའོ། །ཡོངས་སུ་ཉམས་པར་གྱུར་ཅེས་བྱ་བ་ནི་བསོད་ནམས་ཟད་པས་རྒྱུད་ལ་རྫུ་འཕྲུལ་གྱི་རྒྱུན་ཉམས་ཞེས་བྱ་བའི་ཐ་ཚིག་གོ །ཚངས་པའི་གནས་པ་བཞི་པོ་དག་ཅེས་བྱ་བ་ནི་བྱམས་པ་ལ་སོགས་པ་ཚད་མེད་པ་བཞི་སྟེ། བཅོམ་ལྡན་འདས་ཚངས་པར་གྱུར་པ་དེ་དག་གིས་གནས་པའི་ཕྱིར་རོ། །འདོད་པ་ལ་འདུན་པ་ཞེས་བྱ་བ་ནི་འདོད་ཆགས་སོ། །དེས་མང་དུ་གནས་པས་ཞེས་བྱ་བ་ནི་འདོད་པ་ལ་འདུན་པ་སྤངས་པ་དེས་གནས་པ་སྟེ། དེ་ལས་ཡོངས་སུ་མི་ཉམས་ཞེས་བྱ་བའི་ཐ་ཚིག་གོ །ངན་སྤོང་གི་བུ་དག་ཅེས་བྱ་བ་ནི་དྲང་སྲོང་ངན་སྤོང་གི་རྒྱུད་ཀྱི་མི་དག་གནས་པའི་ཡུལ་ལོ། །ཆུ་སྲིན་བྱིས་པ་གསོད་ཀྱི་རི་ཞེས་བྱ་བ་ནི་རིའི་མིང་སྟེ་དེའི་ཉེ་འཁོར་ན་སྲོག་ཆགས་ཆུ་སྲིན་བྱིས་པ་གསོད་ཅེས་བྱ་བ་དག་གནས་པའི་ཕྱིར་རོ། །འཇིགས་སུ་རུང་གི་ཚལ་ཞེས་བྱ་བ་ནི་ནགས་ཚལ་གྱི་མིང་སྟེ། གནོད་སྦྱིན་མོ་འཇིགས་སུ་རུང་བ་དག་དེ་ན་གནས་པའི་ཕྱིར་རོ།། མཽད་གལ་གྱི་བུ་ཁྱོད་ཀྱིས་ཞེས་བྱ་བ་ལ་སོགས་པ་ནི་དྲི་བའི་ཚིག་སྟེ་ཁྱོད་ཀྱིས་ཆེས་སྔར་རིག་གོ་ཞེས་བྱ་བའི་ཐ་ཚིག་གོ །སེམས་ལ་སེམས་ཀྱིས་ཁྱབ་པར་བྱ་སྟེ་ཞེས་བྱ་བ་ནི་ལྷས་བྱིན་གྱི་སེམས་ལ་བདག་གི་ཕ་རོལ་གྱི་སེམས་ཤེས་པས་དམིགས་ཏེ་ཞེས་བྱ་བའི་ཐ་ཚིག་གོ །ཚིག་སྲུངས་ཤིག་
ཅེས་བྱ་བ་ནི་ཀུན་ནས་མནར་སེམས་དང་ཁྲོ་བ་ལ་སོགས་པའི་ཉེས་པ་བཅད་པའི་ཕྱིར་རོ། །དེས་པ་དེས་པ་དག་ཅེས་བྱ་བ་ནི་འདོད་པ་ཆུང་བ་སྟེ། བཟང་པོ་ཞེས་བྱ་བའི་ཐ་ཚིག་གོ །རོ་དང་འདྲ་བ་ཞེས་བྱ་བ་ནི་སྙིང་པོ་མེད་པ་སྟེ། ཟག་པ་མེད་པའི་ཡོན་ཏན་མེད་པའི་ཕྱིར་རོ། །ཀུན་ནས་མནར་སེམས་ཞེས་བྱ་བ་ནི་ཞེ་སྡང་ངོ༌། །མི་བཟོད་པ་ཞེས་བྱ་བ་ནི་མོ་འདོད་པའོ། །ཡིད་མི་ཆེས་ཞེས་བྱ་བ་ནི་མ་དད་པའོ། །སྡོད་ཅིག་ཅེས་བྱ་བ་ནི་སྤྱོད་བའི་ཚིག་གོ །ཀུན་དགའ་བོ་སོང་ལ་ཞེས་བྱ་བ་ལ་སོགས་པ་ལ། དགེ་འདུན་བྱེ་བར་གྱུར་ཏམ་འབྱེད་ཀྱང་དེ་བཞིན་གཤེགས་པ་ལ་ཞུམ་པ་དང་སྲུང་བར་བཞེད་པ་མི་མངའ་སྟེ། མ་འདྲེས་པའི་དྲན་པ་ཉེ་བར་གཞག་པ་དག་ལ་རྟག་ཏུ་གནས་པའི་ཕྱིར་རོ་ཞེས་བསྟན་པའི་ཕྱིར་རོ། །དགེ་སློང་རྣམས་ལ་བཀའ་སྩལ་པ་ཞེས་བྱ་བ་ལ་སོགས་པ་གསུངས་སོ། །དགེ་སློང་དག་ལྔ་པོ་འདི་དག་ནི་ཞེས་བྱ་བ་ལ་སོགས་པ་ལ་ཀུན་ནས་ཉོན་མོངས་པ་མེད་དེ་ཞེས་བྱ་བ་ནི་ཚུལ་ཁྲིམས་འཆལ་པ་དང་ཉོན་མོངས་པ་དག་གིས་མ་ཉམས་པ་སྟེ་དེ་ནི་ཡོངས་སུ་དག་པ་ཉིད་ཀྱི་རྒྱུ་བསྟན་པའོ། །ལྷན་ཅིག་འགྲོགས་པའི་རྒྱུས་ཞེས་བྱ་བ་ནི་ལྷན་ཅིག་ན་འདུག་འདུག་པའི་རྒྱུས་སོ། །སེམས་པར་བྱེད་དོ་ཞེས་བྱ་བ་ནི་རྣམ་པར་ལྟ་བར་བྱེད་པའོ། །རེ་བར་བྱེད་དེ་ཞེས་བྱ་བ་ནི་འདོད་པར་བྱེད་པའོ། །འཚོ་བར་བྱེད་དེ་ཞེས་བྱ་བ་ནི་ཆོས་གོས་ལ་སོགས་པ་བསྒྲུབ་པའོ། །ཤེས་པ་ཞེས་བྱ་བ་ནི་ལྷའི་མིག་གིས་ཤེས་པ་ལ་སོགས་པའོ། །བརྡ་སྤྲོད་པ་ཕུན་སུམ་ཚོགས་པ་ཞེས་བྱ་བ་ནི་དངོས་པོ་བདེན་པ་བརྡ་སྤྲོད་པའོ། །ཆོས་འདུལ་བ་ལེགས་པར་གསུངས་པ་ཞེས་བྱ་བ་ནི་ཐར་པའི་ལམ་བདེན་པ་སྟོན་པའོ། །ཚར་གཅད་ཅིང་ཚར་གཅད་ཅིང་ཞེས་བྱ་བ་ལ་སོགས་པ་ནི་འདི་སྐད་བསྟན་ཏེ། ཇི་ལྟར་འཇིག་རྟེན་པའི་སྟོན་པ་ལྔ་པོ་དེ་དག་ནི་ཉན་ཐོས་རྣམས་ལས་དངོས་པོ་ལྔ་རེ་བར་བྱེད་པས་ཉན་ཐོས་རྣམས་ལ་སེམས་ཞུམ་པས་ལྟོས་པ་དང་བཅས་པར་གནས་ཀྱི་ངལ་ནི་དེ་ལྟ་བུ་མེད་པས་དེའི་ཕྱིར་ང་ནི་སྙིང་རྗེ་དང་རེ་བ་མེད་པའི་ཕྱིར་ཚར་གཅད་ཅིང་ཞེས་བྱ་བ་ཐག་བཅད་ཅིང་ཐག་བཅད་ཅིང་ཁྱེད་ཅག་ལ་འདོམ་པར་བྱེད། ཟིལ་གྱིས་མནན་ཅིང་ཟིལ་གྱིས་མནན་ཅིང་ཞེས་བྱ་བས་པ་བཀོང་ཞིང་ཁྱེད་ལ་འདོམ་པར་བྱེད་དོ། །ཁྱོད་ལ་དབྱིག་ཏུ་མི་འཛིན་ཅིང་ཞེས་བྱ་བ་ནི་ཀུན་ཏུ་བསྲུང་བའི་
བློས་འཛིན་པར་མི་བྱེད་པ་སྟེ། དཔེར་ན་རྫ་མཁན་གྱི་སྣོད་སོ་མ་བཏང་བ་དག་ནི་སྙིང་པོ་མེད་པ་དང༌། སྤྱད་མི་བཟོད་པའི་ཕྱིར་དེ་དག་ལས་གང་སྙིང་པོ་ཡོད་པ་དེ་འཇོག་པར་བྱེད་པ་བཞིན་དུ་ཁྱེད་ཅག་ལས་ཀྱང་གང་སྣོད་དུ་རུང་བར་འགྱུར་བའི་སྙིང་པོ་ཡོད་པ་དེ་འཇོག་པར་བྱེད་དོ། །མདོར་བསྡུ་ན་ང་དོན་དུ་གཉེར་བ་དང་བཅས་པ་ཉིད་ན་ངའི་ཚིག་གི་ལམ་ཕན་པ་སྟོན་པ་དག་ལ་བཟོད་པར་གྱིས་ཤིག །ང་དོན་དུ་མི་གཉེར་བ་ཉིད་ཡིན་ན་ཅི་དགར་དེངས་ཤིག །ང་ནི་ཅུང་ཟད་ཙམ་དང་ཇི་ལྟར་ཡང་དོན་དུ་གཉེར་བར་བྱེད་དོ་ཞེས་བསྟན་ཏོ། །འཁོར་ལོ་ཡང་དབྱེ་བར་བྱ་སྟེ་ཞེས་བྱ་བ་ནི་འཕགས་པའི་ལམ་དབྱེ་བའོ། །སྙན་པའི་སྒྲ་ཚོགས་རྒྱ་ཆེན་པོ་དགེ་བ་ཞེས་བྱ་བ་ལ་སྙན་པའི་སྒྲའི་ཚོགས་ཞེས་བྱ་བ་ནི་སྙན་ཚིག་དག་གི་ཚོགས་སོ། །རྒྱ་ཆེན་པོ་ཞེས་བྱ་བ་ནི་མང་པོའོ། །དགེ་བ་ཞེས་བྱ་བ་ནི་བསྔགས་པའོ། །འཕགས་པ་ཉིད་ཅེས་བྱ་བ་ནི་ཉེ་བར་འོང་བར་བྱེད་པའོ། །དྲ་བ་ཞེས་བྱ་བ་ནི་ལྷུང་བཟེད་གཞུག་པའོ། །ཕོར་བུ་ཞེས་བྱ་བ་ནི་སྐོམ་ཀྱི་སྣོད་དོ། །བསྙེན་བཀུར་ཞེས་བྱ་བ་ནི་བསྡུ་བའོ། །སློང་མོ་ཞེས་བྱ་བ་ནི་གསོ་བའོ། །བརྟུལ་བ་ཞེས་བྱ་བ་ནི་བརྩལ་བའོ། །བཞམས་ཏེ་ཞེས་བྱ་བ་ནི་ཚིག་འཇམ་པོས་ཏེ་སྡུམས་བྱེད་པའི་ཕྱིར་རོ། །བསྒོ་བ་ཞེས་བྱ་བ་ནི་གོ་བར་བྱེད་པ་སྟེ་བཟློག་པར་བྱ་བ་ཞེས་བྱ་བའི་ཐ་ཚིག་གོ །མཐུན་པ་ཞེས་བྱ་བ་ནི་བྱ་བ་གཅིག་པ་སྟེ་ལམ་དུ་ཞུགས་པ་དབྱེ་བའི་ཕྱིར་ཞེས་བྱ་བ་ནི་དབྱེན་བྱ་བའི་ཕྱིར་རོ། །བརྟུལ་བར་མ་བྱེད་ཅིག་ཅེས་བྱ་བ་ནི་རྩོལ་བར་མ་བྱེད་ཅིག་ཅེས་བྱ་བའོ། །དབྱེན་བྱེད་པར་འགྱུར་བའི་རྩོད་པ་ཞེས་བྱ་བ་ནི་དབྱེན་བྱེད་པར་འགྱུར་བའི་རྒྱུའི་རྩོད་པའོ། །ཡང་དག་པར་བླངས་ནས་ཞེས་བྱ་བ་ནི་དེ་ལ་དམིགས་ནས་སོ། །རབ་ཏུ་བཟུང་སྟེ་ཞེས་བྱ་བ་ནི་དམ་དུ་བཟུང་སྟེ་ཞེས་བྱ་བའི་ཐ་ཚིག་གོ །མཐུན་པར་གྱིས་ཤིག་ཅེས་བྱ་བ་ནི་འདུམ་པར་གྱིས་ཤིག་པར་འགྱུར་ཤིག་ཅེས་བྱ་བའོ། །ཅིའི་ཕྱིར་མཐུན་པར་བྱ་ཞེ་ན། དེའི་ཕྱིར་དགེ་འདུན་བསྡུ་བ་ཞེས་བྱ་བ་ལ་སོགས་པ་ནས་བདེ་བ་ལ་རེག་པར་འགྱུར་གྱི་ཞེས་བྱ་བའི་བར་གྱིས་དེའི་དགོས་པ་བསྟན་པ་སྟེ། གང་གི་ཕྱིར་དགེ་འདུན་མཐུན་ན་བདེ་བ་ལ་རེག་པར་གནས་པར་འགྱུར་བ་དེའི་ཕྱིར་དགེ་འདུན་དང་མཐུན་པར་གྱིས་ཤིག །ཅེས་བྱ་བའི་ཐ་ཚིག་གོ །མཐུན་ཞེས་
བྱ་བ་ནི་བྱ་བ་གཅིག་ཕ་འམ་ལམ་གཅིག་པ་སྟི། ལམ་གཅིག་ཏུ་ཞུགས་པའི་ཕྱིར་རོ་ཞེས་སྔར་བསྟན་པ་ཡིན་ནོ། །མི་ཕྱེད་ཅེས་བྱ་བ་ནི་འདྲེས་པ་སྟེ་བར་དུ་ཆོད་པ་མེད་པའོ། །ཀུན་དགའ་ཞེས་བྱ་བ་ནི་ཕན་ཚུན་ཡོན་ཏན་བརྗོད་པར་དགའ་བའོ། །མི་རྩོད་པ་ཞེས་བྱ་བ་ནི་རྩོད་པ་མ་བྱུང་བའོ། །མཆོག་གཅིག་ཅེས་བྱ་བ་ནི་འབྲས་བུ་གཅིག་པ་སྟེ་མྱ་ངན་ལས་འདས་པའི་འབྲས་བུ་མཆོག་གཅིག་དང་ལྡན་པའི་ཕྱིར་རོ། །འདོན་བ་གཅིག་ཅེས་བྱ་བ་ནི་གསོ་སྦྱོང་མཐུན་པའོ། །ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ་ཞེས་བྱ་བ་ནི་དགག་དབྱེ་ལ་སོགས་པའི་ལས་མཐུན་པའི་ཕྱིར་རོ། །སྟོན་པའི་བསྟན་པ་གསལ་བར་བྱེད་ན་ཞེས་བྱ་བ་ནི་རབ་ཏུ་སྟོན་པར་བྱེད་ནའོ། །བདེ་བ་ལ་རེག་པར་གནས་པར་འགྱུར་གྱི་ཞེས་བྱ་བ་ནི་མྱ་ངན་ལས་འདས་པ་ཐོབ་པར་འགྱུར་པའོ། །ནན་གྱིས་མཆོག་ཏུ་བཟུང་ཞིང་ཞས་བྱ་བ་ནི་མཐུ་ཇི་ལྟ་བས་དམིགས་ཤིང་ངོ༌། །མངོན་པར་ཞེན་ནས་ཞེས་བྱ་བ་ནི་དམ་དུ་བཟུང་ནས་སོ། །བདེན་གྱིས་ཞེས་བྱ་བ་ནི་མ་ནོར་གྱིས་ཞེས་བྱ་བའོ། །བརྫུན་པའོ་ཞེས་བྱ་བ་ནི་འབྲས་བུ་མེད་པའོ། །མི་མཐུན་པར་སྨྲ་བ་ཞེས་བྱ་བ་ནི་གཞུང་ལུགས་ཐ་དད་པར་སྨྲ་བའོ། །ཆོས་སྨྲ་བ་ཞེས་བྱ་བ་ནི་རིགས་པ་སྨྲ་བའོ། །འདུལ་བ་སྨྲ་བ་ཞེས་བྱ་བ་ནི་ལུང་གི་རྗེས་སུ་འབྲང་བའོ། །འདོད་ཅིང་ཞེས་བྱ་བ་ནི་ཡིད་དང་མཐུན་པའི་སྒོ་ནས་སོ། །བཟོད་པ་ཞེས་བྱ་བ་ནི་རིགས་པས་རྟོགས་པའི་སྒོ་ནས་སོ། །དེ་ལ་ལྟུང་བ་ཇི་ལྟར་འགྱུར་ཞེ་ན་ཞེས་བྱ་བ་ལ་སོགས་པ་ལ། ཅུང་ཟད་ཇི་ཙམ་དུ་དགེ་འདུན་མཐུན་པའི་དབྱེ་བའི་རྟུལ་བར་བྱེད་ན་ཐམས་ཅད་དུ་ཉེས་བྱས་སུ་འགྱུར་རོ་ཞེས་བྱ་བ་ནི་ཅུང་ཟད་ཅིག་རྟུལ་བར་བྱེད་ན་ཡང་དེ་ལ་སྦྱོར་བའི་སྦྱོར་བ་ཡོད་པས་ཉེས་བྱས་སུ་འགྱུར་རོ། །བཞམས་ཏེ་བསྒོ་བ་ན་གཞི་དེ་མི་གཏོང་ན་ཉེས་པ་སྦོམ་པོར་འགྱུར་རོ་ཞེས་བྱ་བ་ནི་གང་ཟག་གི་ཚིག་གིས་བཞམས་ཏེ་ཕྱིར་བཟློག་པ་ན་མི་གཏོང་ན་ཡང་ཉེས་པ་སྦོམ་པོར་འགྱུར་བ་སྟེ། དགེ་འདུན་གྱིས་བསྒོ་བ་ལས་འདས་ན་དངོས་གཞིར་འགྱུར་བའི་ཕྱིར་གང་ཟག་གིས་བསྒོ་བ་ནི་དགེ་འདུན་གྱིས་བསྒོ་བ་ལ་འཇུག་པ་ཉིད་ཡིན་པས་སྦྱོར་བ་ཡིན་པའི་ཕྱིར་རོ། །གསོལ་བ་དང་ལས་བརྗོད་པ་གཉིས་པ་ལ་མི་གཏོང་ན་ཉེས་པ་སྦོམ་པོར་འགྱུར་ཏེ། དགེ་འདུན་གྱིས་བསྒོ་བ་ལས་འདས་པ་
དེས་སྦྱོར་བ་ཡིན་པའི་ཕྱིར་རོ། །ལས་བརྗོད་པ་གསུམ་པ་བྱས་ན་མི་གཏོང་ན་དངོས་གཞིའི་དུས་ཡིན་པའི་ཕྱིར་དགེ་འདུན་ལྷག་མར་འགྱུར་རོ། །ཅི་བྱེ་བྲག་མེད་པར་དགེ་འདུན་ལྷག་མར་འགྱུར་ཞེ་ན། དེའི་ཕྱིར་རྫོགས་པར་བརྗོད་པ་ན་གལ་ཏེ་མཐུན་པ་དང་ཆོས་མ་ཡིན་པས་བསྒོ་བར་བྱེད་ན་ལྟུང་བ་མེད་དོ་ཞེས་བྱ་བ་ལ་སོགས་པ་གསུངས་ཏེ། ཆོས་མ་ཡིན་པ་ཞེས་བྱ་བ་ནི་དགེ་འདུན་མ་ཚང་བ་དང༌། ལས་བྱེད་པ་དགེ་སློང་ཉིད་མ་ཡིན་པ་དང༌། ལས་ཉམས་པ་དང༌། ཉན་པ་པོ་རྣམས་ཀྱིས་མ་གོ་བ་ལ་སོགས་པའོ། །མི་མཐུན་པ་ཞེས་བྱ་བ་ནི་ཁ་སྐོང་བར་བྱེད་པ་དག་མ་ཞུགས་པ་དང༌། འདུན་པ་མ་བླངས་པ་ཉིད་དང༌། འཇོག་པར་བྱེད་པ་ལ་སོགས་པའོ། །ཆོས་ལྟར་བཅོས་པ་ཞེས་བྱ་བ་ནི་འཁྲུལ་པས་ཆོས་ལྟར་སྣང་བར་ཟད་ཀྱི་དངོས་སུ་ཆོས་མ་ཡིན་པ་ཉིད་དོ། །ལྟུང་བ་མེད་དོ་ཞེས་བྱ་བ་ནི་དགེ་འདུན་ལྷག་མ་མེད་པར་ཟད་ཀྱི་དགེ་འདུན་གྱིས་ཟློག་པ་ཉིད་ཀྱི་སྦྱོར་བ་ལ་ནི་ཉེས་བྱས་ལ། མཐར་ནི་སྦོམ་པོ་ཞེས་བྱ་བའི་ཐ་ཚིག་གོ །ཆོས་ཇི་ལྟ་བ་ཞེས་བྱ་བ་ནི་བསྒོ་བར་འོས་པ་ཉིད་ཞིང་ཡིན་པའོ། །འདུལ་བ་ཇི་ལྟ་བ་ཞེས་བྱ་བ་ནི་ལས་མ་ཉམས་པའོ། །སྟོན་པའི་བསྟན་པ་ཇི་ལྟ་བ་ཞེས་བྱ་བ་ནི་འདུན་པ་བླངས་པ་ལ་སོགས་པའི་བྱ་བའོ། །ཆོས་ཉིད་དང་མཐུན་པ་ཉིད་གཉིས་མེད་ན་དགེ་འདུན་གྱིས་བསྒོ་བ་ཉིད་ཡིན་ཡང་ལྟུང་བ་མེད་པ་ཞེས་བྱ་བའོ། །གལ་ཏེ་དེ་སྐད་བརྗོད་ན་ལེགས་ཞེས་བྱ་བ་ནི་མཐོལ་བའི་ཕྱིར་འཆབ་པའི་ཉེས་པ་མི་འབྱུང་བ་ལ་དགོངས་སོ། །ཇི་ཙམ་དུ་གཞི་དེས་ཞེས་བྱ་བ་ནི་བསྒོ་བ་ལས་བྱུང་བའི་དགེ་འདུན་ལྷག་མས་སོ། །མ་བཤགས་ཤིང་ཞེས་བྱ་བ་ནི་ལྷན་ཅིག་གོ །སོ་སོར་མ་བཤགས་པ་ཞེས་བྱ་བ་ནི་ལན་གཉིས་ལན་གསུམ་དུའོ། །ཉེས་བྱས་སུ་འགྱུར་རོ་ཞེས་བྱ་བ་ནི་དགེ་འདུན་མི་མཐུན་པ་ཡིན་པས་དེ་དགེ་འདུན་དང་ལྷན་ཅིག་འདུ་བ་ལ་འགལ་བ་ལས་དགོངས་སོ། །ཁ་ཅིག་ན་རེ་གསོ་སྦྱོང་དང་དགག་དབྱེ་དག་ནི་མྱོང་བར་བྱར་རུང་ངོ་ཞེས་ཟེར་བ་དེ་ཡང་མི་རིགས་ཏེ་མི་མཐུན་པ་ཡིན་ན་ཚུལ་མ་ཡིན་པ་ཉིད་དུ་འདྲ་བའི་ཕྱིར་རོ། །དགེ་འདུན་གྱི་དབྱེན་བྱེད་པའི་དགེ་འདུན་ལྷག་མ་སྟེ་བཅུ་པའི་ཚིག་རྣམ་པར་བཤད་པ་རྫོགས་སོ།། །།ཅུང་ཟད་ཇི་ཙམ་དུ་ཞེས་བྱ་བ་ལ་སོགས་པས་ནི་དགེ་སློང་གིས་བརྡས་
སམ། ངེས་པས་སམ། མངག་པས་སམ། བློ་མཐུན་པར་བྱས་པས་ཇི་ཙམ་ཅུང་ཟད་དུ་དགེ་འདུན་མཐུན་པ་དེ་དབྱེ་བའི་ཕྱིར་རྟུལ་བར་བྱེད་ཅིང་དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་པ་དེའི་གྲོགས་བྱེད་ན་ཐམས་ཅད་དུ་ཉེས་བྱས་སུ་འགྱུར་རོ་ཞེས་བསྟན་ཏོ། །རྗེས་སུ་ཕྱོགས་པའི་དགེ་འདུན་ལྷག་མ་སྟེ་བཅུ་གཅིག་པའི་ཚིག་རྣམ་པར་བཤད་པ་རྫོགས་སོ།། །།ཁྱིམ་སུན་འབྱིན་པ་ཞེས་བྱ་བ་ནི་ཁྱིམ་རྣམས་མ་དད་པར་བྱེད་པའོ། །སྡིག་པའི་ཆོས་ཀུན་དུ་སྤྱོད་པ་ཞེས་བྱ་བ་ནི་ཁྱིམ་སུན་འབྱིན་པ་ཉིད་ཀྱི་རྒྱུ་ཡིན་ནོ། །སྣོད་གཅིག་ཏུ་ཟ་བར་བྱེད་ཅེས་བྱ་བ་ནི་སྣོད་ཆེན་པོ་གཅིག་གམ་གྱོ་མོའི་སྣོད་གཅིག་ཏུ་ཞེས་བྱ་བའི་ཐ་ཚིག་གོ །མེ་ཏོག་རྣམ་རྒྱན་ཞེས་བྱ་བ་ནི་མེ་ཏོག་གི་ཐོད་དོ། །ངོ་སོ་ལས་བྱུང་བ་ཞེས་བྱ་བ་ནི་ངོ་འཕྲད་དེ་བྱ་དགའ་ཞེས་བྱ་བའི་ཐ་ཚིག་གོ །རྒྱུག་པར་བྱེད་ཅེས་བྱ་བ་ནི་མྱུར་དུ་འགྲོ་བར་བྱེད་པའོ། །མཆོང་བར་བྱེད་ཅེས་བྱ་བ་ནི་ཐད་ཀར་རོ།། རབ་ཏུ་མཆོང་བར་བྱེད་ཅེས་བྱ་བ་ནི་གྱེན་དུའོ། །བརླ་སྐོར་བར་བྱེད་ཅེས་བྱ་བ་ནི་བརླ་གཅིག་གིས་སྐོར་བར་བྱེད་པའོ། །ལག་པ་སྐོར་བར་བྱེད་ཅེས་བྱ་བ་ནི་ལག་པ་གཅིག་གིས་སྐོར་བར་བྱེད་པའོ། །ཉ་ལྟར་སྐོར་བར་བྱེད་ཅེས་བྱ་བ་ནི་ཉ་འཕར་བ་ལྟར་འགྱུར་བར་བྱེད་པའོ། །འཕྱོ་བ་འཕེན་པར་བྱེད་ཅེས་བྱ་བ་ནི་ཆུའི་སྟེང་དུ་གྱོ་དུམ་དང་གསེག་མ་ལ་སོགས་པ་འཕྱོ་བར་བྱེད་པ་འཕེན་པའོ། །ཐི་བ་ཞེས་བྱ་བ་ནི་བྱ་ཐི་བའོ། །འུར་བ་ཞེས་བྱ་བ་ནི་བྱ་འུར་བ་སྟེ། བྱ་ལ་པ་ཀ་ཞེས་བྱ་བ་ཡིན་ནོ། །སྤྱོད་ཚུལ་ཞེས་བྱ་བ་ནི་ཆ་ལུགས་སོ། །སྤྱོད་པ་ཞེས་བྱ་བ་ནི་བྱ་བའོ། །ལོག་པར་བསྒྲུབ་པ་ཞེས་བྱ་བ་ནི་བསླབ་པ་འཁྲུགས་པའོ་ཡིད་མི་དགའ་ཞིང་ཞེས་བྱ་བ་ནི་ཡི་ཆད་ཅིང་ངོ༌། །ཞེ་ལྕི་བར་གྱུར་ནས་ཞེས་བྱ་བ་ནི་མི་ཕྱོགས་པར་གྱུར་ནས་སོ། །ཀུན་དགའ་བོ་ཁྱོད་དགེ་སློང་གནས་བརྟན་གནས་བརྟན་རྣམས་དང་ལྷན་ཅིག་རེ་ལྡེ་རི་ལ་སོང་ལ་ཞེས་བྱ་བ་ནི་དགེ་སློང་གནས་བརྟན་དག་གཙོ་བོ་ཡིན་པའི་ཕྱིར་འཕགས་པ་ཀུན་དགའ་བོ་ལ་སྐུར་པ་འདེབས་པ་དགག་པའི་ཆེད་དུ་དེ་དག་དང་ལྷན་ཅིག་སོང་ལ་ཞེས་བྱ་བ་བཀའ་སྩལ་ཏོ། །བསྐྲད་པའི་ལས་ཞེས་བྱ་བ་ནི་གནས་མེད་པར་བྱ་བ་དང༌། མཐུན་པ་ཞེས་བྱ་བའི་ཐ་ཚིག་གོ །དགེ་སློང་གླེང་བ་པོ་བསྐོ་བར་བྱ་སྟེ་ཞེས་བྱ་བ་ནི་དེ་ན་གླེང་བ་པོ་གཞན་འགའ་
ཡང་མེད་པའི་ཕྱིར་རོ། །འགྲོ་མགྱོགས་དང་ན་བས་སོ་གཉིས་གཙོ་བོ་ཡིན་པའི་ཕྱིར་ཏེ། བཟློག་དཀའ་བ་དེ་གཉིས་བཟློག་ན་དགེ་སློང་དམར་སེར་ཅན་གཞན་དག་ཀྱང་བཟློག་པར་འགྱུར་བའི་ཕྱིར་རོ། །མ་གུས་པ་དེ་གཉིས་ཀྱིས་ཞེས་བྱ་བ་ནི་མ་གུས་པའི་ཕྱིར་དང༌། ཉེས་པ་ཤེས་པའི་ཕྱིར་བསྐྲད་པའི་ལས་བྱས་པ་ཁོ་ན་ཡིན་གྱི་མཐུན་པ་སྦྱིན་དུ་གཞུག་པ་དང༌། སྐབས་འབྱེད་དུ་གཞུག་པ་དང༌། ཉེས་པ་སྟོན་དུ་གཞུག་པ་ལ་ནི་འབད་པར་བྱ་མི་དགོས་སོ་ཞེས་བྱ་བའི་ཐ་ཚིག་གོ །སེམས་ཀྱི་རྣམ་པར་རྟོག་པ་སྣ་ཚོགས་ཞེས་བྱ་བ་ནི་སེམས་ཀྱི་རྣམ་པར་རྟོག་པ་མང་པོ་སྟེ། འདོད་ཆགས་ལ་སོགས་པ་རྣམ་པར་རྟོག་པ་དག་གོ །དགེ་འདུན་གྱི་བྱ་བ་ཞེས་བྱ་བ་ནི་ཁྲིམས་སུ་བྱ་བའོ། །ཀུན་དུ་སྤྱད་པ་ཞེས་བྱ་བ་ནི་ལུས་ཀྱིས་སོ། །སྨྲས་པ་ཞེས་བྱ་བ་ནི་ངག་གིས་སོ། །བརྟུལ་བ་ཞེས་བྱ་བ་ནི་མངག་པ་ལ་སོགས་པའི་སྦྱོར་བས་སོ། །ལྟར་ཞེས་བྱ་བ་ནི་གང་གི་ཕྱིར་ཞེས་བྱ་བའི་ཐ་ཚིག་གོ །ཚིག་གི་ལམ་ཞེས་བྱ་བ་ནི་ཚིག་འབྱུང་བའོ། །ཁྱིམ་སུན་འབྱིན་པའི་དགེ་འདུན་ལྷག་མ་སྟེ། བཅུ་གཉིས་པའི་ཚིག་རྣམ་པར་བཤད་པ་རྫོགས་སོ།། །།དོན་འདོད་པ་ཞེས་བྱ་བ་ནི་འཇིག་རྟེན་འདི་ལ་ཁ་ན་མ་ཐོབ་བ་མེད་པ་ཉིད་ཀྱི་དོན་འདོད་པའོ། །ཕན་པར་འདོད་པ་ཞེས་བྱ་བ་ནི་འཇིག་རྟེན་ཕ་རོལ་ཏུ་ལྷ་དང་མིའི་བདེ་བ་འདོད་པའོ། །བདེ་བ་འདོད་པ་ཞེས་བྱ་བ་ནི་འདོད་ཆགས་དང་བྲལ་བའི་བདེ་བ་འདོད་པའོ། །བདེ་བ་ལ་རེག་པར་འདོད་པས་ཞེས་བྱ་བ་ནི་རྣམ་པར་འཁྲུག་པ་མེད་པ་ཉིད་འདོད་པའོ། །གྲུབ་པ་དང་བདེ་བ་འདོད་པ་རྣམས་ཀྱིས་ཞེས་བྱ་བ་ནི་ཐར་པ་འདོད་པ་རྣམས་ཀྱིས་སོ། །གླེང་བར་བྱེད་ཅེས་བྱ་བ་ནི་ཉེས་པ་བརྗོད་པས་སོ། །དྲན་པར་བྱེད་ཅེས་བྱ་བ་ནི་ཡུལ་དང༌། དུས་དང་བྱ་བ་དང་གྲོགས་བརྗོད་པས་སོ། །འཐུར་ཞིང་ཞེས་བྱ་བ་ནི་འཁྲུགས་ཤིང་ངོ༌། །གཅིག་ཏུ་ལྟུང་ཞིང་གཅིག་ཏུ་འདུག་པ་ཞེས་བྱ་བ་ནི་ཕུང་པོར་བྱེད་པ་ལ་སོགས་པའོ། །ཁོ་བོའི་འཕགས་པས་ཞེས་བྱ་བ་ནི་ཉེ་དུས་སོ། །འདོན་པར་གཏོགས་པ་ཞེས་བྱ་བ་ནི་སོ་སོར་ཐར་བའི་མདོ་འདོན་པ་རྣམ་པ་བཞི་པོ་དག་ཏུ་གཏོགས་པའོ། །བདེ་བར་གཤེགས་པའི་མདོར་གཏོགས་པ་རྣམས་ཀྱིས་ཞེས་བྱ་བ་ནི་སོ་སོར་ཐར་བའི་མདོ་རིལ་གྱིས་གདོན་པར་གཏོགས་པ་རྣམས་ཀྱིས་སོ། །ཚིག་དེ་གཉི་ག་སྨོས་པ་ནི་
འདོན་པའི་དུས་ན་བརྗོད་པར་བྱ་བ་མ་ཡིན་པ་ཉིད་དུ་བྱེད་པ་དང་དུས་གཞན་གྱི་ཚེ་ཡང་དག་པར་བརྗོད་པར་བྱ་བ་མ་ཡིན་པ་ཉིད་དུ་བྱེད་པའི་ཉེས་པ་བསྟན་པའི་ཕྱིར་རོ། །ཆོས་དང་མཐུན་པ་ཞེས་བྱ་བ་ནི་ཆོས་ཀྱི་རྗེས་སུ་འགྲོ་བའོ། །འདུལ་བ་དང་མཐུན་པ་ཞེས་བྱ་བ་ནི་ཡང་འདུལ་བའི་རྗེས་སུ་འགྲོ་བར་རོ། །བརྗོད་པར་བྱ་བ་མ་ཡིན་པ་ཞེས་བྱ་བ་ནི་གླེང་བར་བྱ་བ་མ་ཡིན་པའོ། །བརྗོད་པར་བྱ་བ་ཉིད་དུ་བྱེད་པའི་ཕན་ཡོན་གང་ཡིན་ཞེ་ན་ཇི་འདི་ལྟ་སྟེ་ཞེས་བྱ་བ་ལ་སོགས་པ་གསུངས་སོ། །གཅིག་ལ་གཅིག་བརྗོད་པར་བྱེད་པ་ཉིད་དུ་བྱེད་པ་ཞེས་བྱ་བ་ནི་གཅིག་ལ་གཅིག་གླེང་བར་བྱ་བ་ཉིད་དུ་བྱེད་པའོ། །གཅིག་ལ་གཅིག་འདོམས་ཤིང་རྗེས་སུ་སྟོན་པ་ཞེས་བྱ་བ་ནི་གཅིག་ལ་གཅིག་གིས་སློབ་པའོ། །གཅིག་གིས་གཅིག་ལྟུང་བ་ལས་སློང་བ་ཉིད་ཅེས་བྱ་བ་ནི་གཅིག་གིས་གཅིག་གི་ལྟུང་བ་སྦྱང་བའོ། །འཁོར་འདི་ཞེས་བྱ་བ་ནི་དགེ་འདུན་ནོ། །འཕེལ་བར་འགྱུར་གྱིས་ཞེས་བྱ་བ་ནི་སྔོན་ཆད་དོ། །བརྗོད་པར་བྱ་བ་མ་ཡིན་པར་བྱེད་པའི་ལས་ཀྱི་མཐའ་ཞེས་བྱ་བ་ནི་བརྗོད་པར་བྱ་བ་མ་ཡིན་པར་བྱེད་པའི་བྱ་བའོ། །བཀའ་བློ་མི་བདེ་བའི་རང་བཞིན་ཅན་དུ་གྱུར་པ་ཞེས་བྱ་བ་ལ། བཀའ་བློ་མི་བདེ་བ་ཞེས་བྱ་བ་ནི་ཚིག་སྐྱོན་ཆགས་ཤིང་འབྲས་བུ་མེད་པའོ། །དེའི་རྣམ་པ་ནི་དེའི་རང་བཞིན་ནོ། །གང་ཟག་གང་ལ་དེ་ཡོད་པ་དེ་ནི་བཀའ་བློ་མི་བདེ་བའི་རང་བཞིན་ཅན་ཏེ། གུས་པར་མི་ཉན་ཅིང་འགོག་པར་བྱེད་པའོ། །རྗེས་སུ་མཐུན་པ་ཞེས་བྱ་བ་ནི་མཐུན་པར་བྱེད་པ་སྟེ་འཕྲོད་པར་བྱ་བ་ཞེས་བྱ་བའི་ཐ་ཚིག་གོ །རྗེས་སུ་མཉན་པར་བྱ་བ་ཞེས་བྱ་བ་ནི་མཉན་པར་འོས་པ་སྟེ་ཁས་བླང་བར་བྱ་བ་ཞེས་བྱ་བའི་ཐ་ཚིག་གོ །ཚུལ་དང་མཐུན་པ་ཞེས་བྱ་བ་ནི་རབ་ཏུ་བྱུང་བའི་ཚུལ་དང་མཐུན་པའོ། །དྲང་པོར་འཇུག་པ་ཞེས་བྱ་བ་ནི་མཐུན་པར་བསྒྲུབ་པའོ། །འགྲུས་སྐྱོང་གི་ཡན་ལག་གི་ཚོགས་དག་ཅེས་བྱ་བ་ལ། འགྲུས་སྐྱོང་ཞེས་བྱ་བ་ནི་བརྩོན་འགྲུས་བརྩམས་པའོ། །ཡན་ལག་གི་ཚོགས་ཞེས་བྱ་བ་ནི་ཡང་དག་པའི་ལྟ་བ་ལ་སོགས་པ་ལམ་གྱི་ཡན་ལག་རྣམས་གསོ་བར་བྱེད་པའོ། །ཀུན་ཏུ་འགོག་པ་ཞེས་བྱ་བ་ནི་རྣམ་པར་གནོན་པའོ། །མི་འཛིན་པ་ཞེས་བྱ་བ་ནི་གཏོང་པའོ། །མི་བྱ་ཞེས་བྱ་བ་ནི་རྗེས་སུ་བསྒྲུབ་པའོ། །མི་བྱེད་པ་ཞེས་བྱ་བ་ནི་ལས་དང་བྲལ་བའོ། །མཐུན་པར་འཛིན་པ་ཞེས་བྱ་བ་ནི་ལོག་
པར་བྱེད་པའོ། །བདེ་བར་གཤེགས་པའི་མདོ་ཞེས་བྱ་བ་ལུང་བཞི་པོ་དག་ཡིན་པར་དོགས་པ་བསལ་བའི་ཕྱིར། བདེ་བར་གཤེགས་པ་ཞེས་བྱ་བ་ནི་སྟོན་པའོ་ཞེས་བྱ་བ་ལ་སོགས་པ་གསུངས་སོ། །དེས་ཉེ་བར་སྦྱར་བའི་མདོ་འམ་ཞེས་བྱ་བ་ནི་བདེ་བར་གཤེགས་པ་བཅོམ་ལྡན་འདས་དེས་ཉེ་བར་སྦྱར་ཅིང་ཉེ་བར་བསྟན་པ་བསླབ་པའི་མདོ་སོ་སོ་ཐར་བའི་མདོ་སྡེ་གང་ཡིན་པ་དེ་ཉིད་འདིར་བདེ་བར་གཤེགས་པའི་མདོ་ཡིན་ནོ་ཞེས་བྱ་བའི་ཐ་ཚིག་གོ །ཡང་ན་མདོ་ཡང་དག་པར་སྦྱོར་བའོ་ཞེས་བྱ་བ་ནི་སོ་སོར་ཐར་པའི་མདོའི་རྣམ་པར་བཤད་པར་གྱུར་པ་འདུལ་བའི་སྡེ་སྣོད་ཐམས་ཅད་དེ་དག་ཐམས་ཅད་ཀྱི་མདོ་དང་ཡང་དག་པར་སྦྱོར་བར་བྱེད་པའི་ཕྱིར་ཏེ། མདོས་དེ་དག་ཐམས་ཅད་འཕངས་པའི་ཕྱིར་རོ། །བཀའ་བློ་མི་བདེ་བ་ཉིད་དོ་ཞེས་བྱ་བ་བཀའ་བློ་མི་བདེ་བའི་ཚིག་གང་ལ་ཡོད་པ་དེ་བཀའ་བློ་མི་བདེ་བའོ། །དེའི་དངོས་པོ་ནི་དེ་ཉིད་དོ། །སྨྲ་བ་ཞེས་བྱ་བ་ནི་བསྟོད་པའོ། །རྣམ་པར་སྨྲ་བ་ཞེས་བྱ་བ་ནི་ཡང་དག་མ་ཡིན་པའི་ཡོད་ཏན་སྒྲོ་འདོགས་པའོ། །ཐོ་འཚམས་པར་མི་བགྱིད་དོ་ཞེས་བྱ་བ་ནི་བཤུང་བར་མི་བྱེད་པའོ། །བློ་རྣོ་བ་ཞེས་བྱ་བ་ནི་བློས་ཟིན་པའོ། །བརྟན་པ་ཞེས་བྱ་བ་ནི་བློ་མི་འགྱུར་བའོ། །སྦྱིན་པ་ཞེས་བྱ་བ་ནི་ནོར་འབུལ་བའོ། །མཆོད་པ་ཞེས་བྱ་བ་ནི་མཆོད་ཡོན་དང་མེ་ཏོག་ལ་སོགས་པས་མཆོད་པའོ། །བསྙེན་བཀུར་ཞེས་བྱ་བ་ནི་ཕྱག་ལ་སོགས་པས་མཆོད་པའོ། །ཚིག་མི་བཅག་པ་ཞེས་བྱ་བ་ནི་འདའ་བར་མི་བྱེད་པའོ། །དེས་ཤིང་ཞེས་བྱ་བ་ནི་སྙན་པར་སྨྲ་བའོ། །འགྲོགས་ན་བདེ་བ་ཞེས་བྱ་བ་ནི་དགའ་བར་བྱེད་པའོ། །གྲོང་སྲུང་ཞེས་བྱ་བ་ནི་གདོལ་པ་ལ་སོགས་པའོ། །གུས་པ་དང་བཅས་ཞེས་བྱ་བ་ནི་ངོ་ཚ་ཤེས་པ་དང་བཅས་པའོ། །རྗེས་དང་བཅས་པ་ཞེས་བྱ་བ་ནི་བླ་མའི་འདུ་ཤེས་ཀྱིས་རྗེས་དང་བཅས་པ་ཞེས་བྱ་བའི་ཐ་ཚིག་གོ །འཇིག་པ་དང་བཅས་པའི་དབང་དུ་འགྱུར་བ་ཞེས་བྱ་བ་ནི་ཁྲེལ་ཡོད་པ་དང་བཅས་པས་དབང་སྒྱུར་བར་བྱེད་པའི་ཐ་ཚིག་གོ །བཀའ་བློ་མི་བདེ་བའི་དགེ་འདུན་ལྷག་མ་སྟེ་བཅུ་གསུམ་པའི་ཚིག་རྣམ་པར་བཤད་པ་རྫོགས་སོ།། །།འདུལ་བ་རྣམ་པར་འབྱེད་པའི་ཚིག་རྣམ་པར་བཤད་པ་སློབ་དཔོན་དུལ་བའི་ལྷས་ཉེ་བར་སྦྱར་བ་ལས་དགེ་འདུན་ལྷག་མ་རྣམས་ཀྱི་ཚིག་རྣམ་
པར་བཤད་པ་རྫོགས་སོ།། །།སྐད་ཀྱི་གདངས་ཞེས་བྱ་བ་ནི་སྒྲའི་ཡོན་ཏན་སྙན་པ་ལ་སོགས་པ་དང་ལྡན་པའོ། །གཞན་ལ་བརྩམས་པ་ཞེས་བྱ་བ་ནི་གཞན་གྱི་ཕྱིར་བརྩམས་པའོ། །མཐར་ཐུག་པའི་འགྲོ་བ་ཞེས་བྱ་བ་ནི་ངེས་པས་ཐོབ་པའོ། །དྲན་པར་བགྱི་བ་ཞེས་བྱ་བ་ནི་བསླབ་པའི་གཞི་སྟེ། དེས་དྲན་པ་སྐྱེད་པར་བྱེད་པའི་ཕྱིར་རོ། །གཅིག་བུ་གཅིག་དང་ཞེས་བྱ་བ་ནི་དགེ་སློང་གཅིག་པུ་བུད་མེད་གཅིག་དང་ངོ༌། །སྐྱབས་ཡོད་པ་ན་ཞེས་བྱ་བ་ནི་བསྐོར་བ་ནའོ། །སྟན་ལ་ཞེས་བྱ་བ་ནི་འདོམ་གང་གི་ཉེན་ཀོར་དང་བཅས་པའི་ཁྲི་ལ་སོགས་པའི་གནས་སོ། །འདུག་པ་ཞེས་བྱ་བ་ནི་རྐུབ་ཚོས་འཇོག་པར་བྱེད་པའོ། །ཡིད་ཆེས་པའི་ཚིག་དང་ལྡན་པ་ཞེས་བྱ་བ་ནི་ཚིག་གཟུང་བར་འོས་པ་དང་ལྡན་པ་སྟེ། བདེན་པ་མཐོང་བ་ཉིད་ཀྱིས་འཁྲུལ་བ་མེད་པར་གྲགས་པ་ཞེས་བྱ་བའི་ཐ་ཚིག་གོ །ཆོས་གང་དང་གང་ཞེས་བྱ་བ་ནི་ཉེས་བྱས་ལ་སོགས་པས་སོ། །བྱེད་དུ་གཞུག་ལྕེས་བྱ་བ་ནི་རྗེས་སུ་བསྒྲུབ་ཏུ་གཞུག་པ་སྟེ་བཤགས་པ་ལ་སོགས་པའི་ཕྱིར་བཅོས་པ་བྱེད་དུ་གཞུག་ཅེས་བྱ་བའི་ཐ་ཚིག་གོ །མ་ངེས་པ་ཞེས་བྱ་བ་ནི་ལྟུང་བ་ངེས་པ་མེད་པའི་ཕྱིར་རོ། །གང་ན་བུད་མེད་དེ་སྐྱེས་པ་དང་མ་ནིང་གཞན་འགའ་ཡང་མེད་པ་ཞེས་བྱ་བས། བུད་མེད་ལ་སོགས་སྨོས་པ་ནི་འགྲོ་བ་གཞན་དང་མི་ཤེས་པ་ཐ་སྙད་དུ་མི་རུང་བ་དགག་པའི་ཕྱིར་རོ། །གཅིག་ཏུ་གྱུར་པ་ཞེས་བྱ་བ་ནི་དེ་ཁོ་ན་ལྟར་ངེས་པའོ། །ནིམ་ནུར་མེད་ཅེས་བྱ་བ་ནི་གང་ལ་གཞན་གྱིས་བསྟན་པ་ལས་ཐེ་ཚོམ་མི་བསྐྱེད་པའོ། །ཐེ་ཚོམ་མེད་ཅེས་བྱ་བ་ནི་གང་ལ་རང་གིས་བསམས་པ་ལས་ཐེ་ཚོམ་མི་སྐྱེ་བའོ། །འབྲས་བུ་ཐོབ་པའི་ཞེས་བྱ་བ་ནི་རྒྱུན་དུ་ཞུགས་པའི་འབྲས་བུ་ཐོབ་པའོ། །མངོན་པར་རྟོགས་པ་དང་ལྡན་པ་ནི་ཞེས་བྱ་བ་ནི་མངོན་པར་རྟོགས་པ་དང༌། དམིགས་པ་མངོན་པར་རྟོགས་པ་དང༌། བྱ་བ་མངོན་པར་རྟོགས་པ་གསུམ་ཐོབ་པ་དང་ལྡན་པ་སྟེ། འཇིག་རྟེན་ལས་འདས་པའི་ཤེས་པ་བསྒོམ་པའི་ལམ་གྱིས་བསྡུས་པ་དང་ལྡན་པ་ཞེས་བྱ་བ་བའི་ཐ་ཚིག་གོ །བཞི་བོ་དག་ལས་གང་ཡང་རུང་བས་སོ་ཞས་བྱ་བ་ནི་མི་ཚང་སྤར་སྤྱོད་པ་ལས་བྱུང་བས་སོ། །བཅུ་གསུམ་པོ་དག་ལས་གང་ཡང་རུང་བས་སོ་ཞེས་བྱ་བ་ནི་ཁུ་བ་འབྱིན་པ་ལས་བྱུང་བའོ། །ལུས་ཀྱི་རེག་པ་ལས་བྱུང་བའམ། སྤྲོད་པ་ལས་བྱུང་བའམ། སྨྲས་པ་ལས་བྱུང་བ་འམ།
ཀུན་སྤྱོད་པ་བསྔགས་པ་ལས་བྱུང་བ་འམ། སྨྱན་བྱེད་པ་ལས་བྱུང་བ་འམ། གཞི་མེད་པ་དང༌། བག་ཙམ་གྱིས་སྐུར་བ་འདེབས་པ་ལས་བྱུང་བ་ཞེས་བྱ་བའི་ཐ་ཚིག་གོ །དགུ་བཅུ་དག་ལས་གང་ལས་ཀྱང་རུང་བས་སོ་ཞེས་བྱ་བ་ནི་བརྫུན་སྨྲ་བ་ལས་བྱུང་བ་འམ། སྐྱོན་ནས་སྨྲ་བ་ལས་བྱུང་ངམ། ཆོས་སྟོན་པ་ལས་བྱུང་བ་འམ། ཚིག་མཐུན་པར་ཀློག་པ་ལས་བྱུང་བ་འམ། གཞི་མེད་པར་དགེ་འདུན་ལྷག་མས་སྐུར་པ་འདེབས་པ་ཞེས་བྱ་བའི་ཐ་ཚིག་གོ །ལྟུང་བ་ལ་མི་མཁས་པ་ཞེས་བྱ་བ་ནི་དེའི་རང་གི་ངོ་བོ་མི་ཤེས་པའི་ཕྱིར་རོ། །ལྟུང་བའི་གླེང་གཞི་ལ་མི་མཁས་པ་ཞེས་བྱ་བ་ནི་དེའི་རྒྱུ་མི་ཤེས་པའི་ཕྱིར་རོ། །ལྟུང་བ་ཀུན་ནས་སློང་བ་ལ་མི་མཁས་པའི་ཞེས་བྱ་བ་ནི་དེ་འབྱུང་བར་མི་ཤེས་པའི་ཕྱིར་རོ། །རང་བཞིན་དང་བཅས་པའི་ཁ་ན་མ་ཐོ་བ་དང་བཅས་པ་ཞེས་བྱ་བ་ལ། རང་བཞིན་གྱི་ཁ་ན་མ་ཐོ་བ་དང་བཅས་པ་ནི་ཉོན་མོངས་པ་ཅན་གྱིས་སེམས་ལས་བྱུང་བ་སྟེ། ངོ་བོ་ཉིད་ཀྱིས་སྐྱོན་ཆགས་པའི་ཕྱིར་རོ། །བཅས་པའི་ཁ་ན་མ་ཐོ་བ་དང་བཅས་པ་ནི་ཉོན་མོངས་པ་ཅན་མ་ཡིན་ཡང་སྨད་པའི་དབང་གིས་བཀག་པའོ། །ཆད་པའི་ལས་འོས་པ་ཡིན་པས་ཞེས་བྱ་བ་ནི་མ་མཐོང་བས་གནས་ནས་དབྱུང་བ་དང༌། དེའི་ངོ་བོ་ཉིད་ཚོལ་དུ་གཞུག་པ་སྦྱིན་པ་གདུལ་བའི་ལས་འོས་པ་ཡིན་ཏེ། དེ་ལ་གནས་ནས་དབྱུང་བ་ནི་ནན་ཏུར་གྱི་ལས་ཀྱི་སྐབས་ཉིད་ནས་འབྱུང་བས་འདིར་ནི་དེའི་ངོ་བོ་ཉིད་ཚོལ་དུ་གཞུག་པ་སྦྱིན་པ་འབའ་ཞིག་བསྟན་ཏེ། ལྟུང་བ་དེའི་ངོ་བོ་ཉིད་བཙལ་བས་དྲན་པ་བརྗེད་པ་རྣམ་པར་བཅད་པའི་ཕྱིར་རོ། །དགེ་ཚུལ་ཉེ་བར་གཞག་པར་མི་བྱའོ་ཞེས་བྱ་བ་ནི་སྔར་རབ་ཏུ་བྱུང་ཟིན་པ་ཡང་ངོ༌། །སོ་སོར་ཐར་པའི་མདོ་གདོན་པར་མི་བྱའོ་ཞེས་བྱ་བ་ནི་གསོ་སྦྱོང་གི་ཚེའོ། །མ་ངེས་པའི་ཆོས་དང་པོའི་ཚིག་རྣམ་པར་བཤད་པ་རྫོགས་སོ།། །།འདོད་པ་བྱར་མི་རུང་བར་ཞེས་བྱ་བ་ནི་མི་ཚངས་པར་སྤྱད་པར་བྱར་མི་རུང་བ་སྟེ་ཐག་རིང་བའི་ཕྱིར་རོ། །དེས་ན་འདིར་མི་ཚངས་པར་སྤྱོད་པའི་ཕམ་པར་འགྱུར་བ་མེད་པས་དགེ་འདུན་ལྷག་མ་དང་ལྟུང་བྱེད་ཀྱི་གླེང་བ་བསྟན་པར་ཤེས་པར་བྱའོ། །ལྷག་མ་ཐམས་ཅད་ནི་སྔ་མ་བཞིན་ནོ། །མ་ངེས་པའི་ཆོས་གཉིས་པའི་ཚིག་རྣམ་པར་བཤད་པ་རྫོགས་སོ།། །།འདུལ་བ་རྣམ་པར་འབྱེད་པའི་ཚིག་རྣམ་པར་བཤད་པ་སློབ་དཔོན་དུལ་བའི་ལྷས་ཉེ་བར་སྦྱར་བ་ལས་
མ་ངེས་པའི་ཆོས་གཉིས་ཀྱི་ཚིག་རྣམ་པར་བཤད་པ་རྫོགས་སོ།། །།བམ་པོ་བཅུ་པ། ཆོས་གོས་མང་བ་ཉིད་ཅེས་བྱ་བ་ནི་གོས་མང་བ་ཉིད་དོ། །གྱོན་པ་ཞེས་བྱ་བ་ནི་ལུས་ལ་གྱོན་པའོ། །འབུད་པ་ཞེས་བྱ་བ་ནི་ལུས་ལས་འབུད་པའོ། །ནང་གི་སེམས་ཀྱི་ཞི་གནས་ཞེས་བྱ་བ་ནི་ནང་བདེ་བ་ལ་གནས་པའོ། །སྨོད་པ་ཞེས་བྱ་བ་ནི་འདོད་པའོ། །དུས་མ་ཡིན་པའི་ཕྱིར་ཞེས་བྱ་བ་ནི་འདི་ནི་བླང་དུ་རུང་བའི་དུས་ཡིན་ནོ་སྙམ་དུ་བསམས་པའི་ཕྱིར་རོ། །དེ་ལས་འདས་པའི་ཞེས་བྱ་བ་ནི་གཞག་བཅུ་ལས་འདས་པར་རོ། །སྤང་བའི་ལྟུང་བྱེད་ཅེས་བྱ་བ་ནི་དངོས་པོ་གང་བདག་གིར་བྱས་པའི་གཞི་ལས་ལྟུང་བ་བྱུང་བའི་དངོས་པོ་དེ་སྤངས་ཏེ་ལྟུང་བ་བཤགས་པར་བྱ་དགོས་པའོ། །ཞག་བཅུ་པོ་དེ་ཉིད་ཀྱི་ནང་དུ་ཞེས་བྱ་བ་ནི་ཐོག་མ་གོས་རྙེད་པའི་དུས་ནས་བཟུང་སྟེ་ཞག་བཅུ་གཅིག་པའི་སྐྱ་རེངས་དང་པོ་མ་ཤར་ཚུན་ཆད་ཀྱི་ནང་དུའོ། །བྱིན་གྱིས་བརླབ་པར་ཞེས་བྱ་བ་ནི། །བྱིན་གྱིས་བརླབ་པར་བྱ་བ་ཉིད་དུ་གཞག་པར་བྱ་བའོ། །གཏང་བར་བྱ་བ་ཞེས་བྱ་བ་ནི་གནས་གཞན་དུ་བསྐུར་བར་བྱ་བའོ། །རྣམ་པར་བརྟག་པར་བྱ་བ་ཞེས་བྱ་བ་ནི་བདག་པོ་གཞན་ཉིད་དུ་རྣམ་པར་བསམ་པར་བྱ་བའོ། །གཞན་ལ་སྦྱིན་པར་བྱ་བ་ཞེས་བྱ་བ་ནི་མངོན་སུམ་དུ་གྱུར་པ་ལ་སྦྱིན་པར་བྱ་བའོ། སྐྱ་རེངས་ཤར་ནས་ཞེས་བྱ་བ་ནི་ཉི་མའི་མགོ་རྩོམ་པའི་སྐྱ་རེངས་དང་པོ་ཤར་ནའོ། །གཞན་ཞིག་ཤར་ན་ཞེས་བྱ་བ་ནི་སྔ་མ་ཤོས་སྤང་བར་གྱུར་ན་ཕྱི་མ་ཞག་བཅུ་ལས་མ་འདས་ཀྱང་སྔ་མའི་རྒྱུད་ཀྱིས་སྤང་བར་གྱུར་པའོ། །གོས་གཉིས་ཞེས་བྱ་བ་དང༌། གོས་མང་པོ་ཞེས་བྱ་བའི་ཚར་གཉིས་སྨོས་པ་ནི་སྦྱོར་བ་གཅིག་པ་ཡིན་ན་དངོས་པོ་གཉིས་དང་མང་པོས་ཀྱང་ལྟུང་བ་གཅིག་ཏུ་འགྱུར་པར་བསྟན་པའི་ཕྱིར་རོ། །མ་སྤངས་ཤིང་ཞེས་བྱ་བ་ནི་བདག་གིས་བྱེད་ཅིང་གཞན་ལམ་སྤངས་པའོ། །བྲལ་བར་མ་བྱས་ལ་ཞེས་བྱ་བ་ནི་གནས་གཞན་དུ་ཞག་ལོན་པར་མ་བྱས་པའོ། །ལྟུང་བ་མ་བཤགས་པ་ཞེས་བྱ་བ་ནི་དགེ་སློང་རང་བཞིན་དུ་གནས་པའི་མདུན་དུའོ། །དེ་གསུམ་ལས་གཅིག་གམ་གཉིས་སམ་གསུམ་ཆར་མ་བྱས་ན་ཡང་ཕྱིར་གཞན་རྙེད་པ་སྤངས་བར་འགྱུར་རོ། །སྔ་མའི་རྒྱུད་ཀྱི་སྤངས་པ་སྔ་མ་ཉིད་ཀྱི་རྒྱུན་ཀྱིས་ཞེས་བྱ་བའི་ཐ་ཚིག་གོ །ལྷུང་བཟེད་ལ་སོགས་པ་ཡང་སྤངས་པར་འགྱུར་བ་ནི་སྦང་བའི་ལྟུང་བ་སྔ་མ་དེ་ཡོད་ན་ཕྱིས་རིགས་མཐུན་པ་དང༌། རིགས་
མི་མཐུན་པའི་ཡོ་བྱད་རུང་བ་བདག་གིར་བྱས་པ་དག་ཀྱང་སྤང་བ་ཉིད་དུ་འགྱུར་ཏེ། སྔ་མའི་ལྟུང་བ་འཆགས་པའི་ཚེ་ན་དེ་དག་སྤང་བ་ཡིན་གྱི་ཕྱི་མ་དེ་དག་གི་ཕྱིར་ནི་ལྟུང་བ་བཤགས་པ་མི་དགོས་ཏེ། དེའི་གཞི་ལས་ལྟུང་བ་མི་འབྱུང་བའི་ཕྱིར་རོ། །འཆང་བའི་སྤང་བ་སྟེ་དང་པོའི་ཚིག་རྣམ་པར་བཤད་པ་རྫོགས་སོ།། །།སྟོད་གཡོགས་སྨད་གཡོགས་དང་བཅས་པ་ཞེས་བྱ་བ་ནི་སྟོད་གཡོགས་དང་ཤམ་ཐབས་དང་བཅས་པའོ། །མ་སྦས་པ་ཞེས་བྱ་བ་ནི་རོ་སྨད་སྣང་བའི་ཕྱིར་རོ། །སྦེད་དུ་མ་བཅུག་པ་ཞེས་བྱ་བ་ནི་རོ་སྟོད་སྣང་བའི་ཕྱིར་རོ། །སྐེམས་པ་ཞེས་བྱ་བ་ནི་ཉི་མ་ལ་སྐེམས་པའོ། །བསང་པ་ཞེས་བྱ་བ་ནི་གྲི་བ་མ་ལ་བསང་པའོ། །འདིངས་པ་ཞེས་བྱ་བ་ནི་འགྲེམས་པའོ། །སྦྲུག་པ་ཞེས་བྱ་བ་ནི་སྤྲུག་བརྡབ་བྱ་བའོ། །བརྟུལ་བ་ཞེས་བྱ་བ་ནི་སྡུད་པའོ། །སྦེད་པ་ཞེས་བྱ་བ་ནི་གཏུར་བུ་ལ་སོགས་པར་འཇུད་པའོ། །གསོ་སྦྱོང་གཅིག་པའི་གནས་ཀྱི་སྡོམ་པ་ཞེས་བྱ་བ་ནི་གང་དུ་གསོ་སྦྱོང་བྱེད་པའི་གནས་སོ། །ཆུ་རླབས་ཞེས་བྱ་བ་ནི་ཆུའི་རླབས་སོ། །ཡོངས་སུ་སྐྱོང་ཞེས་བྱ་བ་ནི་ཡོངས་སུ་བསྐྱངས་པའོ། །སྣམ་སྦྱར་དང་འབྲལ་བར་མི་འགྱུར་བའི་གནང་བ་ཞེས་བྱ་བ་ནི་སྣམ་སྦྱར་དང་མཚམས་པ་ལ་སོགས་པ་གནས་ཐུན་མོང་མ་ཡིན་པ་གཞན་དག་ཏུ་སྐྱ་རེངས་ཀྱིས་ཆོད་པར་གྱུར་བ་ལ་འབྲལ་བའི་སྤང་པའི་ལྟུང་བྱེད་མི་འབྱུང་བར་གནང་པའི་ངེས་པའོ། །རླུང་ནད་ཅན་ཞེས་བྱ་བ་ནི་རླུང་གི་ནད་ཡོད་པའོ། །མུ་བཞི་ཞེས་བྱ་བ་ལ། མུ་བཞིན་ཞེས་བྱ་བ་ནི་འདིར་རྣམ་པ་ལ་བྱའོ། །ཁྱིམ་གྱི་ཚོགས་དང་ལྡན་པ་ཞེས་བྱ་བ་ནི་ཁྱིམ་མང་པོ་དང་ལྡན་པའོ། །ཉེ་འཁོར་ཞེས་བྱ་བ་ནི་འཁོར་གྱི་ཉེ་འཁོར་རོ། །ཁྱིམ་ཞེས་བྱ་བ་ནི་ཉེ་དུའི་ཚོགས་སོ། །རྟེན་འགྲོ་ཞེས་བྱ་བ་ནི་རོལ་མོ་མཁན་གྱི་བྱེ་བྲག་གོ །མུ་སྟེགས་ཅན་ཞེས་བྱ་བ་ནི་བསྟི་གནས་ན་གནས་པ་རབ་ཏུ་བྱུང་བ་བཞེས་བྱ་བའི་ཐ་ཚིག་གོ །ཚོང་རྡལ་ཞེས་བྱ་བ་ནི་ཟོང་འཚོང་བར་བྱེད་པའི་གནས་སོ། །ཚོང་ཁང་ཞེས་བྱ་བ་ནི་ཟོང་བཅེར་བའི་གནས་སོ། །དགྲ་ཁང་ཞེས་བྱ་བ་ནི་བསྲུང་བའི་གནས་སོ། །གཡུལ་ཞེས་བྱ་བ་ནི་བརྡུང་བའི་གནས་སོ། །གཡུལ་གྱི་ཚོགས་ཞེས་བྱ་བ་ནི་གཡུལ་གྱི་དཀྱིལ་འཁོར་རོ། །རི་ཁྲོད་པ་རྣམས་ཞེས་བྱ་བ་ནི་འབྲོག་དགོན་པ་ན་གནས་པ་དག་སྟེ་དེ་དག་གི་ཁྱིམ་ནི་ཤིང་དང་ལོ་མ་དང་འདབ་མ་ལ་སོགས་པས་གཡོགས་པའི་ཁྱིམ་ཆེན་པོ་
བྱས་ནས། དེའི་ནང་ན་ཐམས་ཅད་ལྷན་ཅིག་འཁོད་པ་ཡིན་ནོ། །བོད་རྣམས་ཞེས་བྱ་བ་ནི་གསེར་གྱི་འབྱུང་གནས་ནས་སྐྱེས་པ་དག་སྟེ། དེ་དག་གི་ཁྱིམ་ཡང་ས་ཁང་དམ་རྡོ་ཁང་ཆེན་པོ་བྱས་ཏེ། དེའི་ནང་ན་སྤྱིར་འཁོད་པ་ཡིན་ནོ། །ཀླ་ཀློ་རྣམས་ཞེས་བྱ་བ་ནི་ཟན་བཟའ་བར་བྱ་བ་མ་ཡིན་པའི་རིགས་ངན་དག་སྟེ། དག་གི་ཁྱིམ་ཡང་ལྗོན་པའི་ཐིབས་པོ་ལ་སོགས་པའི་ནང་ན་ལྷན་ཅིག་འཁོད་པ་ཡིན་ནོ། །རྡུང་བར་བྱེད་པ་ཞེས་བྱ་བའི་ནི་འཆག་པར་བྱེད་པའོ། །རྔོ་བར་བྱེད་པ་ཞེས་བྱ་བ་ནི་ཚོས་པར་བྱེད་པའོ། །འཐག་པར་བྱེད་པ་ཞེས་བྱ་བ་ནི་ཕྱེ་མར་བྱེད་པའོ། །འཆའ་བར་བྱེད་པ་ཞེས་བྱ་བ་ནི་རྩ་བ་ལ་སོགས་པ་བཅའ་བ་དག་གོ །ཟ་བ་ཞེས་བྱ་བ་ནི་ལ་དུ་ལ་སོགས་པ་དག་གོ །འཐུང་བར་བྱེད་པ་ཞེས་བྱ་བ་ནི་ཁུ་བ་འཐུང་བའོ། །ནང་དུ་ཆོས་གོས་དག་བཞག་སྟེ་ཞེས་བྱ་བ་ལ་སོགས་པ་ལྟ་བ་མེད་དོ་ཞེས་བྱ་བ་ནི་གནས་གཅིག་ནས་སོ་ཞེས་བྱ་བར་དགོངས་སོ། །གཞན་དུ་སྐྱ་རེངས་འཆར་བར་བྱེད་ན་སྤང་བའི་ལྟུང་བྱེད་དུ་འགྱུར་རོ་ཞེས་བྱ་བ་ནི་གནས་ཐད་དད་པ་ན་གནས་པའི་ཕྱིར་རོ་ཞེས་བྱ་བར་དགོངས་སོ། །རྩི་པས་བསྐོར་བ་ཞེས་བྱ་བ་ནི་ར་བས་བསྐོར་བའོ། །རྨིག་པས་བསླང་བའི་རྡུལ་ཞེས་བྱ་བ་ནི་རྡོག་ཤགས་ལས་བྱུང་བའི་རྡུལ་ལོ། །རང་བཞིན་གྱིས་ངོ་ཚ་དང་ལྡན་པ་ཞེས་བྱ་བ་ནི་ངོ་བོ་ཉིད་ཀྱིས་ངོ་ཚ་དང་ལྡན་པ་ཡིན་གྱི་བཅོས་མ་མ་ཡིན་པའོ། །བཤང་ས་ཞེས་བྱ་བ་ནི་བཤད་པ་དང་གཅི་བའི་གནས་སོ། །སྤུན་སྒོ་མ་ཕྱེ་བ་དག་གིས་ཞེས་བྱ་བ་ནི་ཁྱིམ་གཅིག་པ་དག་གིས་སོ། །རྒྱལ་མཚན་གྱི་ཤིང་ཞེས་བྱ་བ་ནི་རྟེན་འགྲོའི་ཁྱིམ་གྱི་མཚན་མའོ། །ལྟ་བ་གཅིག་པ་ཞེས་བྱ་བ་ནི་བདག་ཏུ་ལྟ་བ་ལ་སོགས་པའི་ལྟ་བའོ། །བཟོད་པ་ཞེས་བྱ་བ་ནི་གཞན་གྱི་གཏན་པ་ལས་གྱུར་བའི་ཤེས་པའོ། །འདོད་པ་ཞེས་བྱ་བ་ནི་རང་གི་རྣམ་པར་རྟོག་པ་ལས་སྐྱེས་པའོ། །བསམ་པ་ཞེས་བྱ་བ་ནི་འདོད་པ་བསྒྲུབ་པའི་ཐ་ཚིག་གོ །ལྕི་བ་དག་འདིང་བར་བྱེད་པ་ཞེས་བྱ་བ་ནི་ལྕི་བ་སྐེམས་པར་བྱེད་པའོ། །བགྲང་བ་ཞེས་བྱ་བ་ནི་གྲངས་སོ། །འཇལ་བ་ཞེས་བྱ་བ་ནི་སྲང་ལའོ། །འཇོག་པ་ཞེས་བྱ་བ་ནི་རྫས་ཕུང་པོར་བཅེར་ཞིང་འཇོག་པ་ཞེས་བྱ་བའི་ཐ་ཚིག་གོ །གཞག་སྟེགས་ཞེས་བྱ་བ་ནི་གཞག་པའི་སྤང་ལེབ་པོ། །འདུག་སྟེགས་ཞེས་བྱ་བ་ནི་སྟེགས་བུ་གང་ལ་ཚོང་པ་འདུག་སྟེ་ཚོང་བྱེད་པའོ། །རྩྭ་
དག་འཇོག་པར་བྱེད་པ་ཞེས་བྱ་བ་ནི་སྤུང་བར་བྱེད་པའོ། །ཡ་གད་ཅེས་བྱ་བ་ནི་གང་ལ་འཛེག་པའི་སྐས་སོ། །འཕྱར་བར་བྱེད་པ་ཞེས་བྱ་བ་ནི་རླུང་གིས་སོ། །འཁྲབ་པར་བྱེད་ཅེས་བྱ་བ་ནི་ཞིབ་མས་སོ། །རླུང་གཡོར་ཞེས་བྱ་བ་ནི་རླུང་ལ་སོགས་པའི་ཆེད་ཀྱི་ཤིང་ངོ༌། །གཡུལ་གྱི་དཀྱིལ་ཞེས་བྱ་བ་ནི་གཡུལ་གྱི་རྟེན་གནས་ཏེ་གཡུལ་གྱི་དཀྱིལ་གང་དུ་གཏོར་མ་ལ་སོགས་པ་བྱེད་པའམ། གང་དུ་འབྲུ་སྤུང་བར་བྱེད་པའམ། དཀྱིལ་གང་དུ་འདུག་སྟེ་འབྲུ་བཅག་པའི་ཕྱིར་ལ་སྐོར་བར་བྱེད་པའོ། །ཕུར་པ་འདེབས་པར་བྱེད་པ་ཞེས་བྱ་བ་ནི་གྲུ་བརྟོད་པའི་ཕྱིར་རོ། །གདོས་པ་ཞེས་བྱ་བ་ནི་འཕུལ་བའི་ཤིང་ངོ༌། །གྲུ་སྐྱ་ཞེས་བྱ་བ་ནི་བསྐྱོད་པའི་ཤིང་ལེབ་པོ། །གྲུ་གདོང་ཞེས་བྱ་བ་ནི་གྲུ་གང་དུ་འདུག་ནས་གྲུ་སྐྱོད་པར་བྱེད་པའི་གནས་སོ། །ཁ་ལོ་བའི་གནས་ཞེས་བྱ་བ་ནི་ཁ་ལོ་བ་གང་དུ་འདུག་པས་གླང་ལ་སོགས་པས་ཤིང་དང་ལྡན་པ་དག་དེད་པའི་གནས་སོ། །ཡལ་གའི་ཚོགས་ཞེས་བྱ་བ་ནི་ཡལ་ག་མང་བའོ། །ནང་ཐམས་ཅད་ཅེས་བྱ་བ་ནི་ཤིང་ལྗོན་པའི་སྡོང་པོ་ཁོག་སྟོང་གིའོ། །རྩ་བ་ཞེས་བྱ་བ་ནི་སྡོང་པོ་ལ་སོགས་པ་སྐྱེ་བའི་གནས་སོ། །མེ་ཏོག་ཐུ་བར་བྱེད་པ་ཞེས་བྱ་བ་ནི་བྱེ་བྲག་ཏུ་སེལ་བར་བྱེད་པ་སྟེ་རིགས་མཐུན་པ་ཕྱོགས་ཕྱོགས་སུ་འཇོག་པར་བྱེད་ཅེས་བྱ་བའི་ཐ་ཚིག་གོ ། དགེ་སློང་མལ་དུ་ཞུགས་པའི་ཆོས་གོས་དག་གི་ཉེ་འཁོར་འདོམ་བཞི་བཅུ་རྩ་དགུར་གསུངས་པ་ནི་དགེ་སློང་ཉིད་ཀྱི་མདུན་རོལ་དང་རྒྱབ་རོལ་གཉིས་ཀར་འདོམ་བཞི་བཅུ་རྩ་དགུར་ཤེས་པར་བྱའོ། །གློ་ནི་ལམ་གྱི་འགྲམ་ཚུན་ཆད་ཀྱི་ཚད་ཇི་ཙམ་ཡོད་པ་དང་སྦྱར་གྱི་འདོམ་བཞི་བཅུ་རྩ་དགུར་ངེས་པ་མེད་དོ། །ཐད་ཀར་འགྲོ་བ་ཞེས་བྱ་བ་ནི་ལམ་གྱི་འགྲམ་གཡས་གཡོན་ལོགས་སུ་འགྲོ་བའོ། །མཚམས་གཞན་ཞེས་བྱ་བ་ནི་བདག་པོ་ཐ་དད་པ་ཉིད་ཀྱི་མཚམས་ཀྱི་བར་རོ། །ལུས་མ་བྲལ་བ་ཚུན་ཆད་དོ་ཞེས་བྱ་བ་ནི་བདག་པོ་ཐ་དད་པ་ཡུལ་ཐ་དད་པ་ཡིན་པའི་ཕྱིར་ལུས་དང་བྲལ་བ་ན་གནས་ནས་གཞན་ཉིད་དུ་འགྱུར་བས་དེའི་ཕྱིར་འདི་བསྟན་ཏོ། །འབྲལ་བའི་སྤང་བ་སྟེ་གཉིས་པའི་ཚིག་རྣམ་པར་བཤད་པ་རྫོགས་སོ།། །།བྱེད་དུ་འཇུད་པ་ཞེས་བྱ་བ་ནི་མི་ལངས་ཤིང་མི་ཆོག་པས་ཞེས་བྱ་བའི་ཐ་ཚིག་གོ །འཇོག་པར་བྱེད་ཅིང་ཞེས་བྱ་བ་ནི་ཁ་སྩོགས་སུ་འཇོག་པར་བྱེད་ཅིང་ངོ༌། །སྟུག་པོ་ཞེས་བྱ་བ་
ནི་སྲ་བའོ། །སྲབ་མོ་ཞེས་བྱ་བ་ནི་མི་ས་བའོ། །དུས་མ་ཡིན་པའི་གོས་ཞེས་བྱ་བ་ནི་སྐྱོན་གྱི་དུས་སུ་རྙེད་པའི་ཕྱིར་རོ། །དེ་ནི་གོས་ཀྱི་དུས་ཡིན་ལ་ཞེས་བྱ་བ་ནི་ཅི་དགར་འཆང་དུ་གནང་བའི་ཕྱིར་རོ། །ལོ་ལྔའི་དུས་སྟོན་པ་དང༌། ལོ་དྲུག་གི་དུས་སྟོན་པ་དང༌། གཙུག་ཕུད་འབྲེག་པའི་དུས་སྟོན་ཞེས་བྱ་བ་ནི་བྱང་ཆུབ་སེམས་དཔའི་ཕྱིར་དུས་སྟོན་བྱ་བའོ། །གནས་ཁང་གི་དུས་སྟོན་ཞེས་བྱ་བ་ནི་གཙུག་ལག་ཁང་གི་དུས་སྟོན་ནོ། །དུས་སྟོན་ཆེན་པོ་ཞེས་བྱ་བ་ནི་གྲོང་ཁྱེར་དུ་འཇུག་པའི་དུས་སྟོན་ནོ། །དོགས་པ་དང་བཅས་པ་ཞེས་བྱ་བ་ནི་ཅི་འདི་གཏན་ཐོབ་པ་ཡིན་ནམ་འོན་ཏེ་ཕྱིར་སྦྱིན་དགོས་པ་ཡིན་སྙམ་དུ་ཐེ་ཚོམ་ཟ་བ་དང་བཅས་པའོ། །དོགས་པ་དང་བཅས་པ་དང་དོགས་པ་མེད་པའི་བྱེ་བྲག་སྨོས་པ་ནི་ཡིད་གཉིས་ཀྱིས་ཐོབ་པས་ཀྱང་ཁ་སྐོང་བ་ཉིད་ཡིན་ན། ཁ་ལངས་པ་ཉིད་ཡིན་པར་བསྟན་པའི་ཕྱིར་རོ། །ཉི་མ་བཅུ་གཅིག་པའི་སྐྱ་རེངས་ཤར་ན་སྤང་བའི་ལྟུང་བྱེད་དུ་འགྱུར་རོ་ཞེས་བྱ་བ་ནི་འཇོག་པའི་ཞར་ལས་བྱུང་བ་འཆང་བའི་སྤང་བའི་ལྟུང་བྱེད་ཡིན་པར་ཤེས་པར་བྱ་བའོ། །ཉམས་པར་གྱུར་ཅེས་བྱ་བ་ནི་རེ་བ་མེད་པ་ཉིད་ཀྱིས་ཟིལ་གྱིས་གནོན་པར་གྱུར་པའོ། །འགྱངས་པར་གྱུར་ཅེས་བྱ་བ་ནི་དུས་ཡོལ་བར་གྱུར་པའོ། །ཉམ་ཆུང་བར་གྱུར་ཅེས་བྱ་བ་ནི་བསྲབས་པར་གྱུར་བའོ། །དེས་ཚེས་དེ་ཉིད་ལ་གོས་སྔོན་པོ་གཞན་ཞིག་རྙེད་པར་འགྱུར་ན་ཞེས་བྱ་བའི་ཚིག་ནི་གཞན་གྱིས་ཁ་སྐོང་བ་ཉིད་ཡིན་ན་ཡང་ཁ་ལངས་པ་ཉིད་ཡིན་པར་བསྟན་པའི་ཕྱིར་རོ། །གྲུབ་པར་མ་གྱུར་རྒྱུན་ཆད་པར་མ་གྱུར་པར་ཞེས་བྱ་བའི་ཚིག་འདི་ནི་གྲུབ་པ་དང་མ་གྲུབ་པ་གཉིས་འདྲ་བར་བསྟན་པའི་ཕྱིར་རོ།། ཐམས་ཅད་ཀྱི་ཐམས་ཅད་དུ་རྒྱུན་ཆད་པར་གྱུར་པ་ན་ཞེས་བྱ་བའི་ཐ་ཚིག་དེ་ནི་རེ་བ་རྒྱུན་ཆད་པར་གྱུར་ན་ཁ་སོགས་ཟླ་བ་གཞག་ཏུ་མི་རུང་བར་བསྟན་པའི་ཕྱིར་རོ། །གོས་བདག་པོ་ཡོད་པར་ཞེས་བྱ་བ་ནི་སྦྱིན་པར་བྱེད་པའི་བདག་པོ་ཡོད་པའོ། །གོས་བདག་པོ་མེད་པའི་ཞེས་བྱ་བ་ནི་སྦྱིན་པར་བྱེད་པའི་བདག་པོ་མེད་པའོ། །གོས་བོར་བླངས་ཞེས་བྱ་བ་ནི་ཁྱིམ་ནས་དུར་ཁྲོད་དུ་ཁྱེར་ཏེ་ཕྱིར་བླངས་པ་དགེ་སློང་གིས་ཐོབ་པ་གང་ཡིན་པའོ། །གོས་དུར་ཁྲོད་པ་ཞེས་བྱ་བ་ནི་ཡོངས་སུ་འཛིན་པ་མེད་པའི་དུར་ཁྲོད་ལས་བླངས་པའོ། །གོས་ཕྱག་དར་ཁྲོད་པ་ཞེས་བྱ་བ་ནི་ཕྱག་དར་དང་འདྲ་བར་བོར་བ་
བླངས་པའོ། །ཉམས་པ་ཞེས་བྱ་བ་ནི་རབ་ཏུ་ཉམས་པ་སྟེ་ཤི་བའོ། །ལམ་པོ་ཆེའི་གོས་ཞེས་བྱ་བ་ནི་ལམ་དུ་བོར་བ་ལས་རྙེད་པ་གང་ཡིན་པའོ། །དགོན་པར་བོར་བ་ཞེས་བྱ་བ་ནི་དགོན་པར་བོར་བ་གང་ཡིན་པའོ། །ཆུ་འགྲམ་པ་ཞེས་བྱ་བ་ནི་ལུས་ལ་སོགས་པའི་དོན་དུ་ཆུ་ཀླུང་གི་འགྲམ་དུ་བོར་བ་གང་ཡིན་པའོ། །སྲིལ་ཟན་ཞེས་བྱ་བ་ནི་སྲོག་ཆགས་ཀྱིས་ཟོས་པ་གང་ཡིན་པའོ། །རལ་རུལ་ཞེས་བྱ་བ་ནི་ཤ་ལས་བྱས་པ་ལ་སོགས་པ་ཁྲུས་ལ་སོགས་པ་སྤྱད་མ་ཐག་ཏུ་བོར་བ་གང་ཡིན་པའོ། །བེ་འུས་ཟོས་པ་ཞེས་བྱ་བ་ནི་བེའུ་གོས་ལ་ཟ་བས་ཟོས་པ་གང་ཡིན་པའོ། །ཐག་པས་གསར་དུ་བཏགས་པ་ཞེས་བྱ་བ་ནི་བཏགས་མ་ཐག་པའོ། །སྣམ་སྦྱར་དང་གདིང་བ་ཡང་ཉི་རིམ་བྱ་བ་ནི་ལས་ཆེ་བའི་ཕྱིར་རོ། །འབོགས་པ་ན་ཉེས་བྱས་སུ་འགྱུར་ལ་ཞེས་བྱ་བ་ནི་ཞག་པ་བཅུ་པ་བཅད་པའི་ཕྱིར་འབོགས་པ་དེ་ཉིད་ཀྱི་སྦྱོར་བ་ཡིན་པའི་ཕྱིར་རོ། །སྣམ་ཕྲན་ཞེས་བྱ་བ་ནི་ཚལ་བུ་ཞེས་བྱ་བའི་སྣམ་ཕྲན་རྣམས་སྦྱར་བའོ། །སྣམ་ཕྲན་དགུ་པ་ཞེས་བྱ་བ་ལ་སོགས་པ་འདིར་ཡང་སྣམ་ཕྲན་ཞེས་བྱ་བ་ནི་གླེགས་བུ་དང༌། གླེགས་བུ་ཕྱེད་སྦྱར་བའི་སྣམ་ཕྲན་གྱི་མཚན་ཉིད་ནི་སྣམ་ཕྲན་ཉིད་ཡིན་པར་ཤེས་པར་བྱའོ། །གསུམ་སྦྱར་ཞེས་བྱ་བ་ནི་སྣམ་ཕྲན་ཚལ་བུའི་ངོ་བོ་ཉིད་གསུམ་སྦྱར་བའོ། །གླེགས་བུ་ཕྱེད་དང་གསུམ་པ་ཞེས་བྱ་བ་ནི་གང་ལ་དཀྱིལ་འཁོར་ཕྱེད་དང་གསུམ་ཡོད་པའོ། །དེ་ཡང་ཆད་ནི་ཚེམ་བུའོ་ཞེས་བྱ་བ་ནི་སྣམ་ཕྲན་ཉི་ཤུ་ལྔ་པ་དང་གླེགས་བུ་ཕྱེད་དང་ལྔ་ཡན་ཆད་དོ། །ལྷན་པ་མཐར་ཆགས་སུ་གྱུར་པ་ཡིན་པའི་ཕྱིར་རལ་རུལ་ཡིན་གྱི་སྣམ་སྦྱར་མ་ཡིན་ནོ་ཞེས་བྱ་བའི་ཐ་ཚིག་གོ །ཁྲུ་གསུམ་དང་ལྔའོ་ཞེས་བྱ་བ་ནི་ཞེང་དུ་ཁྲུ་གསུམ་དང༌། ཆུར་ཁྲུ་ལྔ་ཞེས་བྱ་བའི་ཐ་ཚིག་གོ །ཁྲུ་ཕྱེད་དང་གསུམ་དང་ཕྱེད་དང་ལྔའོ་ཞེས་བྱ་བ་ནི་ཞེང་དུ་ཁྲུ་ཕྱེད་དང་གསུམ་དང་ཆུར་ཁྲུ་ཕྱེད་དང་ལྔ་ཞེས་བྱ་བའི་ཐ་ཚིག་གོ །ཁྲུ་དོ་དང་ཁྲུ་ལྔ་པ་ཞེས་བྱ་བ་ནི་ཞེང་དུ་ཁྲུ་དོ་དང་ཆུར་ཁྲུ་ལྔ་ཞེས་བྱ་བའི་ཐ་ཚིག་གོ །ཁྲུ་དོ་དང་ཁྲུ་བཞི་པ་ཞེས་བྱ་བ་ནི་ཞེང་དུ་ཁྲུ་དོ་དང་ཆུར་ཁྲུ་བཞི་པ་ཞེས་བྱ་བའི་ཐ་ཚིག་གོ །འཁོར་གསུམ་ཁེབས་པ་ཞེས་བྱ་བ་ནི་པུས་མོ་གཉིས་ཀྱི་འཁོར་དང་ལྟེ་བའི་འཁོར་ཞེས་བྱ་བའི་ཐ་ཚིག་གོ །ཁྲུ་གང་ཁོ་ར་ཁོར་ཡུག་ཅེས་བྱ་བ་ནི་ངོས་རེ་ཁྲུ་རེའི་ཚད་དོ། །འཇོག་པའི་སྤང་པ་སྟེ་གསུམ་པའི་ཚིག་རྣམ་
པར་བཤད་པ་རྫོགས་སོ།། །།བྱང་ཆུབ་སེམས་དཔའ་ཞེས་བྱ་བ་ལ་བྱང་ཆུབ་ཅེས་བྱ་བ་ནི་ཟད་པ་དང་མི་སྐྱེ་བ་ཤེས་པ་བླ་ན་མེད་པ་སྟེ། དེའི་ཕྱིར་སྙིང་སྟོབས་ནི་བྱང་ཆུབ་སེམས་དཔའོ། །གཟིགས་པ་ཞེས་བྱ་བ་ནི་རྟོག་པའོ། །རིགས་ཞེས་བྱ་བ་ནི་རྒྱལ་རིགས་དང་བྲམ་ཟེ་ཞེས་བྱ་བའོ། །ཡུལ་ཞེས་བྱ་བ་ནི་ཡུལ་དབུས་དང་མཐའ་འཁོབ་ཅེས་བྱ་བའོ། །དུས་ཞེས་བྱ་བ་ནི་ཡར་སྐྱེ་དང་མར་འགྲིབ་ཅེས་བྱ་བའོ། །རུས་ཞེས་བྱ་བ་ནི་ཤཱཀྱའི་རིགས་བརྒྱུད་ཅེས་བྱ་བའི་ཐ་ཚིག་གོ །བུད་མེད་ཅེས་བྱ་བ་ནི་བཙུན་མོ་སྒྱུ་འཕྲུལ་ཆེན་མོའོ། །གླང་པོ་ཆེ་ལྟར་སྣང་བ་བསྒྱུར་ཏེ་ཞེས་བྱ་བ་ནི་རྨི་ལམ་དུ་དགེ་བའི་མཚན་མ་བསྟན་པའི་ཕྱིར་བདག་ཉིད་གླང་པོ་ཆེ་མཆེ་བ་དྲུག་པར་བསྟན་པར་འགྱུར་ཏེ་ཞེས་བྱ་བའི་ཐ་ཚིག་གོ །འཇིག་རྟེན་འཇིག་རྟེན་གྱི་བར་ཞེས་བྱ་བའི་ནི་གླིང་བཞི་པའི་འཇིག་རྟེན་གྱི་ཁོར་ཡུག་གི་བར་དག་ན་གྲང་བའི་སེམས་ཅན་དམྱལ་བའི་གནས་དག་ཡོད་པ་ཞེས་བྱ་བའི་ཐ་ཚིག་གོ །ཉམས་སུ་མྱོང་བ་ཞེས་བྱ་བ་ནི་སྣང་བ་མི་ཕྱེད་པ་ཞེས་བྱ་བའི་ཐ་ཚིག་གོ །མུན་པ་ཞེས་བྱ་བ་ནི་མི་སྣང་བའོ། །མུན་གནག་མུན་པར་བྱེད་པས་གནག་པར་འགྱུར་བ་ཞེས་བྱ་བ་ནི་མུན་གནག་མུན་པར་བྱེད་པས་བསྒྲིབས་པར་གྱུར་པའོ། །གསལ་བ་གསལ་བ་ཞེས་བྱ་བ་ནི་ཤིན་ཏུ་དྲི་མ་མེད་པའོ། །བཙུན་མོ་གཟུགས་ཅན་ཞེས་བྱ་བ་ནི་བཙུན་མོ་ཆེན་མོའི་མིང་ངོ༌། །རབ་སྣང་ཞེས་བྱ་བ་ནི་སྐར་མདོའོ། །ལྟས་པ་ཞེས་བྱ་བ་ནི་ལྟས་ཀྱི་བསྟན་བཅོས་ཤེས་པ་དག་གོ །མཚན་མཁན་ཞེས་བྱ་བ་ནི་མཚན་གྱི་བྱེ་བྲག་ཤེས་པ་དག་གོ །འཁོར་ལོས་སྒྱུར་བའི་རྒྱལ་པོ་ཞེས་བྱ་བ་ནི་གསེར་གྱི་འཁོར་ལོ་ནམ་མཁའ་ལ་འགྲོ་བས་རྒྱལ་སྲིད་སྒྱུར་བར་བྱེད་པའི་ཕྱིར་རོ། །མཐའ་བཞི་ཞེས་བྱ་བ་ནི་རྒྱ་མཚོ་བཞིའི་མཐར་རོ། །རྒྱལ་བ་ཞེས་བྱ་བ་ནི་དཔའ་བའོ། །ཆོས་ཀྱི་རྒྱལ་པོ་ཞེས་བྱ་བ་ནི་རིགས་པས་རྒྱལ་སྲིད་བདག་གིར་བྱས་པའི་ཕྱིར་རོ། །ཆོས་དང་ལྡན་པ་ཞེས་བྱ་བ་ནི་ཆོས་སྤྱོད་པའི་ཕྱིར་རོ། །རིན་པོ་ཆེ་སྣ་བདུན་དང་ལྡན་པ་ཞེས་བྱ་བ་ནི་རིན་པོ་ཆེ་སྣ་བདུན་གྱི་དབང་ཕྱུག་གོ །ནོར་བུ་རིན་པོ་ཆེ་ཞེས་བྱ་བ་སྒྲོན་མའི་ཆེད་ཀྱི་ནོར་བུ་ཆེན་པོའོ། །ཁྱིམ་བདག་རིན་པོ་ཆེ་ཞེས་བྱ་བ་ནི་མཛོད་ཀྱི་བདག་པོའོ། །དམག་དཔོན་རིན་པོ་ཆེ་ཞེས་བྱ་བ་ནི་སྒྲུབ་པའི་བདག་པོའོ། །དཔའ་ཞེས་བྱ་བ་ནི་མི་འཇིགས་པའོ། །རྟུལ་ཕོད་པ་ཞེས་བྱ་བ་ནི་མཐུ་ཕུན་
སུམ་ཚོགས་པའོ། །ཡན་ལག་མཆོག་གི་གཟུགས་དང་ལྡན་པ་ཞེས་བྱ་བ་ནི་ཡན་ལག་མཛེས་པ་མཆོག་གི་གཟུགས་དང་ལྡན་པའོ། །ཕ་རོལ་གྱི་སྡེ་རབ་ཏུ་འཇོམས་པ་ཞེས་བྱ་བ་ནི་ཕ་རོལ་གྱི་སྒྲུབ་པ་ཕམ་པར་བྱེད་པས་རང་གི་ལས་ལ་བག་ཡོད་ཅེས་བྱ་བའི་ཐ་ཚིག་གོ །མ་ལུས་པ་ཞེས་བྱ་བ་ནི་ཐམས་ཅད་དམ་གཅུགས་མེད་པའོ། །གནོད་པར་སྔོ་བ་མེད་ཅིང་ཞེས་བྱ་བ་ནི་འགྲན་ཟླ་མེད་པའོ། །འཚེ་བ་མེད་པ་ཞེས་བྱ་བ་ནི་གནོད་པ་མེད་པའོ། །ཆད་པ་མེད་ཅིང་ཞེས་བྱ་བ་ནི་ནོར་འཕྲོག་པ་མེད་ཅིང་ངོ༌། །མཚོན་གྱི་བདའ་བ་མེད་ཅེས་བྱ་བ་ནི་གསོད་པ་མེད་པའོ། །ཆོས་དང་མཐུན་ཞེས་བྱ་བ་ནི་ཆོམ་རྐུན་ལ་སོགས་པ་ཤོམ་པ་མེད་པའི་རིགས་པ་དང་མཐུན་ཞིང་ངོ༌། །སྙོམས་པར་ཞེས་བྱ་བ་ནི་སྡིག་པ་དང་མ་འདྲེས་པ་དང་ཆོས་བསྟན་པས་སོ། །རྣམ་པར་གྲངས་པ་སྒྲ་དང་ལྡན་པ་ཞེས་བྱ་བ་ནི་གྲགས་པ་དང་ལྡན་པའོ། །གངས་ཀྱི་ངོས་དང་ཉེ་བ་ཞེས་བྱ་བ་ནི་རི་གངས་ཀྱི་ལྷོ་ཕྱོགས་ཀྱི་ངོས་དང་ཉེ་བའོ། །ཆུ་ཀླུང་སྐལ་ལྡན་ཤིང་རྟ་ཞེས་བྱ་བ་ནི་ཆུ་ཀླུང་གང་གཱའོ། །དཀོར་སྒྲོམ་ཞེས་བྱ་བ་ནི་སྤྲོག་མ་ལ་སོགས་པ་སྐྱེས་ཀྱི་ནོར་རྫས་ཀྱི་སྣོད་དོ། །བུད་མེད་ལ་ཆགས་པ་ཞེས་བྱ་བ་ནི་བུད་མེད་འདོད་པའོ། །ལན་གཉིས་སམ་ལན་གསུམ་ཞེས་བྱ་བ་ནི་མདོར་བསྡུས་ན་གཉིས་ལ་རྒྱས་པར་བྱས་ན་གསུམ་མོ། །མི་འདོད་བཞིན་དུ་དགང་བར་བགྱི་བ་ལགས་ཏེ་ཞེས་བྱ་བ་ནི་མི་འདོད་བཞིན་དུ་གསོ་བར་བྱ་བ་སྟེ། སྦྱིན་གནས་ཡིན་པའི་ཕྱིར་རོ། །ཚར་གཅད་པ་ཞེས་བྱ་བ་ནི་བསྡིགས་པའོ། །དཀའ་བ་བྱེད་པ་ཞེས་བྱ་བ་ནི་དབུགས་འགོག་པ་ལ་སོགས་པ་དཀའ་ཐུབ་དྲག་པོའོ། །ཅི་ཡང་མེད་པ་ཞེས་བྱ་བ་ནི་འབྲས་བུ་མེད་པའོ། །རྒྱ་ཆེ་བ་ཞེས་བྱ་བ་ནི་རྒྱུ་མཐུན་པ་ཆེ་བའི་ཕྱིར་དང་ཚད་ཆེ་བའི་ཕྱིར་རོ། །ལན་བཅུ་དྲུག་བཟླས་པ་ཞེས་བྱ་བ་ནི་སྟོང་དང་ལྔ་བརྒྱ་དང༌། ཉིས་བརྒྱ་ལྔ་བཅུ་དང༌། བརྒྱ་ཉི་ཤུ་རྩ་ལྔ་དང༌། དྲུག་ཅུ་རྩ་ གསུམ་དང༌། སུམ་ཅུ་རྩ་གཉིས་དང༌། བཅུ་དྲུག་དང༌། བརྒྱད ་ཀྱི་ཚད་ཀྱི་བརྒྱད་པོ་དག་གི་ཚོགས་རྣམས་བཞོ་བ་དང༌། བླུད་པ་ལ་སོགས་པ་དག་བཞོ་བ་དག་གིས་ལན་གཉིས་གཉིས་སུ་ལན་བཅུ་དྲུག་བཟླས་པ་དེ་བཞོ་བས་བཟླས་ཞེས་བྱ་བའི་ཐ་ཚིག་གོ །རྩྭ་བཀྲ་ཤིས་འཚོང་བ་ཞེས་བྱ་བ་ནི་རྩྭ་འཚོང་ངོ༌། །བྱང་ཆུབ་ཀྱི་གཞི་ཞེས་བྱ་བ་ནི་རྡོ་རྗེའི་
གདན་ནོ། །རྩྭ་མ་འཁྲུགས་པ་ཞེས་བྱ་བ་ནི་རྩྭའི་ཁ་ཕྱོགས་གཅིག་ཏུ་བལྟ་བའོ། །དྲན་པ་ཕྱོགས་པར་བཞག་སྟེ་ཞེས་བྱ་བ་ནི་མི་མཐུན་པའི་ཕྱོགས་ལས་ཕྱིར་ཕྱོགས་པ་དང༌། དམིགས་པ་ལ་མངོན་པར་ཕྱོགས་ཏེ་སྣའི་རྩེ་མོ་གཏད་ཅིང་དབུགས་འབྱུང་བ་དང་རྔུབ་པ་ལས་དམིགས་པའོ། །ཆོ་འཕྲུལ་གསུམ་གྱིས་ཞེས་བྱ་བ་ནི་རྫུ་འཕྲུལ་དང༌། ཀུན་བརྗོད་པ་དང་རྗེས་སུ་བསྟན་པའི་མཚན་ཉིད་ཀྱི་རྨད་དུ་བྱུང་བ་དག་གིས་སོ། །ཤིན་ཏུ་མཐར་ཐུག་པ་ཞེས་བྱ་བ་ནི་ཡང་བྱང་བ་གཞན་མེད་པའི་མྱ་ངན་ལས་འདས་པའོ། །བདུད་རྩི་ཞེས་བྱ་བ་ནི་མྱ་ངན་ལས་འདས་པའི་ལམ་མོ། །ཡོངས་སྐོམ་ཞེས་བྱ་བ་ནི་འདོད་པའོ། །རུམ་དུ་ཞུགས་པ་ཞེས་བྱ་བ་ནི་ལྷུམས་ན་བཞུགས་པའོ། །ཚུན་ཆད་ནས་ཞེས་བྱ་བ་ནི་དེ་ཚུན་ཆད་ནས་བརྩམས་ནས་སོ། །ཁྲིད་པར་བྱེད་ཅེས་བྱ་བ་ནི་འཇུག་པར་བྱེད་པའོ། །སྲེད་པ་ཞེས་བྱ་བ་ནི་འདོད་པའོ། །དྲ་ཞེས་བྱ་བ་ནི་དྲ་བ་སྟེ་གྱ་གྱུར་སྤྱོད་པའོ། །བཀྲམ་པ་ཞེས་བྱ་བ་ནི་བརྐྱང་བའོ། །སྤྱོད་ཡས་ཞེས་བྱ་བ་ནི་ཡུལ་མཐའ་ཡས་པ་སྟེ་མྱ་ངན་ལས་འདས་པའི་སྤྱོད་ཡུལ་དང་ལྡན་པའོ། །གཞི་མེད་ཅེས་བྱ་བ་ནི་འགྲོ་བ་ལྔ་ལས་ཡང་དག་པར་འདས་པ་གཞི་མེད་པའོ། །གང་གི་གཞིས་ནི་ཞེས་བྱ་བ་ནི་ཐབས་གང་གིས་སོ། །རྩལ་ཡས་ཞེས་བྱ་བ་ནི་རྩལ་མཐའ་ཡས་པ་སྟེ། ཡེ་ཤེས་ཀྱི་སྟོབས་དཔག་ཏུ་མེད་པ་དང་ལྡན་པའོ། །གང་རྒྱལ་མི་ཉམས་ཞེས་བྱ་བ་ནི་གང་རྒྱལ་བ་ཉམས་པར་མི་འགྱུར་བ་སྟེ། རྒྱལ་བ་ཞེས་བྱ་བ་ནི་ཡེ་ཤེས་ཀྱིས་སོ། །མི་ཉམས་ཞེས་བྱ་བ་ནི་འཇིག་པར་མི་འགྱུར་བའོ། །གང་ལ་འཇིག་རྟེན་མ་རྒྱལ་ཡང་མེད་པ་ཞེས་བྱ་བ་ནི་གང་ལ་འཇིག་རྟེན་ན་ཡེ་ཤེས་ཀྱིས་མ་རྒྱལ་བ་འགའ་ཡང་མེད་པའོ། །ཚིགས་བཅད་དང་པོས་ནི་འདོད་པའི་ཐབས་ཀྱིས་བཀྲིར་མི་ནུས་པ་བསྟན་ཏོ། །གཉིས་པས་ནི་མཐུས་བཀྲིར་མི་ནུས་པ་བསྟན་ཏོ། །གསུམ་པ་དང་བཞི་པས་ནི་ཡོངས་སུ་ཉམས་པ་མི་མངའ་བས་བཀྲིར་མི་ནུས་པ་བསྟན་ཏོ། །ཚེ་རབས་བརྗེས་པ་ཞེས་བྱ་བ་ནི་སྐྱེ་བའི་རྣམ་གྲངས་སོ། །བླ་མ་ཞེས་བྱ་བ་ནི་མེས་པོ་དང་ཤེས་པའི་ལུང་འབོགས་པ་ལ་སོགས་པའོ། །བླ་མའི་གནས་ལྟ་བུ་ཞེས་བྱ་བ་ནི་བླ་ནི་དང་འདྲ་བ་དག་གོ །ཚམ་ཚོམ་མེད་པ་ཞེས་བྱ་བ་ནི་ཞུགས་ཤིག་ཅེས་མི་ཟེར་བར་རོ། །སངས་རྒྱས་ཀྱི་
མཐུ་ཞེས་བྱ་བ་ནི་འཇུག་པ་བྱེད་པའི་རྒྱུ་ཡིན་ནོ། །ལྷ་རྣམས་ཀྱི་མཐུ་ཞེས་བྱ་བ་ནི་རྗེས་སུ་འཇུག་པར་བྱེད་པའི་རྒྱུ་ཡིན་ནོ། །བྱི་དོར་ཞེས་བྱ་བ་ནི་སྦྱང་བའོ། །ཁང་ཆེན་ཞེས་བྱ་བ་ནི་ཚད་ཆེན་ཏེ་གནས་ལ་བདུན་ནམ་བརྒྱད་ལ་སོགས་པ་དང་ལྡན་པའོ། །ཁང་པའི་གཞི་ཞེས་བྱ་བ་ནི་ཁང་ཁྱིམ་གྱི་གནས་སོ། །ལྷ་རྣམས་ནི་སེམས་ཀྱིས་འགྲུབ་པ་ཡིན་ཞེས་བྱ་བ་ནི་སེམས་ཀྱི་སྐད་ཅིག་ཏུ་བསྒྲུབས་པས་སོ། །སེམས་བསྐྱེད་པ་ཙམ་གྱིས་ཞེས་བྱ་བ་ནི་སྤྲུལ་པའི་སེམས་གཅིག་གི་མོད་ཁོ་ནས་ཞེས་བྱ་བའི་ཐ་ཚིག་གོ །སངས་རྒྱས་ལུང་མ་བསྟན་པ་ཞེས་བྱ་བ་ནི་བྱང་ཆུབ་ཀྱི་ཕྱོགས་བྱས་པ་སངས་རྒྱས་ཉིད་དུ་མ་བསྟན་པར་རོ། །སེམས་ཅན་གྱིས་ཞེས་བྱ་བ་ནི་ལུང་བསྟན་པའི་སེམས་ཅན་ལས་གཞན་པས་སོ། །ཕྱིར་མི་ལྡོག་པའི་སེམས་ཞེས་བྱ་བ་ནི་གང་སྐྱེས་ནས་ཡུན་རིང་དུ་ཕྱིར་མི་ལྡོག་པ་ཉིད་ཀྱི་སྐད་ཅིག་མི་ཕྱོགས་པ་ནི་དགག་པ་མེད་དོ། །མཚམས་བཅད་པ་ཞེས་བྱ་བ་ནི་ཉན་ཐོས་ཀྱི་དགེ་འདུན་གྱིས་མཚམས་ཆེན་པོ་གཅོད་པའི་ལས་སོ། །ལས་ཀྱི་རྒྱུ་བ་ཞེས་བྱ་བ་ནི་ལས་རྣམ་པར་གཞག་པ་ལས་ཀྱི་ཚུལ་ལོ། །བདུག་པ་ཞེས་བྱ་བ་ནི་བདུག་སྤོས་དྲི་ཞིམ་པོའི་སྣོད་ནས་དུ་བ་འཐུལ་བའོ། །དར་གྱི་ཆུན་པོ་མང་པོ་ཞེས་བྱ་བ་ནི་དར་ཆུན་པོ་བརྒྱ་ཕྲག་མང་པོ་དང་ལྡན་པའོ། །རྒྱལ་པོའི་འབྱོར་པ་ཆེན་པོ་ཞེས་བྱ་བ་ནི་འཁོར་ལ་སོགས་པའི་དབང་ཕྱུག་གོ །རྒྱལ་པོའི་མཐུ་ཆེན་པོ་ཞེས་བྱ་བ་ནི་ཡུལ་བདེ་ཞིང་ལོ་ལེགས་པ་ལ་སོགས་པ་རྒྱལ་སྲིད་ཀྱི་འབྲས་བུའོ། །ལུས་མ་བཏུད་ཅེས་བྱ་བ་ནི་ལུས་གདུང་བར་མི་བྱེད་པར་རོ། །ཏ་ལ་ཞེས་བྱ་བ་ནི་སྲིད་དུ་མིའི་ཁྲུ་བདུན་ཡོད་དོ། །རྫུ་འཕྲུལ་གྱི་རྐང་པ་བཞི་པོ་ཤིང་རྟ་ལྟ་བུས་ཐག་རིང་པོར་གཤེགས་པའི་ཕྱིར་རོ། །ཡང་དག་རྩོལ་བའི་བཞོན་པའི་བཞོན་པ་ཞེས་བྱ་བ་ནི་བརྩོན་འགྲུས་ཁ་ལོ་བསྒྱུར་བ་ལྟ་བུས་གང་དུ་གཤེགས་བཞེད་པའི་ཡུལ་དུ་གཤེགས་པའི་ཐ་ཚིག་གོ །མི་སྨན་པ་ཞེས་བྱ་བ་ནི་མི་ལྡན་པར་རོ། །ཇི་ལྟར་ཁྱོད་སྐུས་བཟོད་པ་མཛད་པ་ཞེས་བྱ་བ་ནི་ཇི་ལྟར་དང་དུ་བཞེས་པར་མཛད་ཅིང་ཐུགས་བྱུང་བར་མི་འགྱུར་ཞེས་བྱ་བའི་ཐ་ཚིག་གོ །ཁྲེལ་འཛེམ་ཞེས་བྱ་བ་ནི་ཟག་པ་མེད་པའི་ཆོས་དག་ལ་གུས་པའོ། །རོ་མང་ལྡན་ཞེས་བྱ་བ་ནི་སྲན་ཚོད་དང་སྐྱུ་རུམ་མང་པོའི་རོ་དང་ལྡན་པའོ། །
ཇི་ལྟར་ཁྱོད་ཀྱི་མགུར་དུ་བྱོན་པ་ཞེས་བྱ་བ་ནི་གསོལ་བ་ན་ཇི་ལྟར་མགུར་དུ་བྱོན་ཞེས་བྱ་བའི་ཐ་ཚིག་གོ །ཆོས་ལྡན་དགའ་བ་ཞེས་བྱ་བ་ནི་དགའ་བ་ཡང་བྱང་ཆུབ་ཀྱི་ཡན་ལག་དང་ལྡན་པ་ཟག་པ་མེད་པའི་ཡུལ་ལོ། ངེས་འབྱུང་ལྡན་ཞེས་བྱ་བ་ནི་ཆགས་པ་མེད་པའོ། །འོ་ན་ཅིའི་ཕྱིར་བསོད་སྙོམས་སྤྱོད་པར་མཛད་སྙམ་པ་ལ། ཟས་སྲེད་སྤངས་ཀྱང་འཇིག་རྟེན་ཀུན། །རྗེས་སུ་གཟུང་ཕྱིར་བདག་སྤྱོད་བྱེད། །ཅེས་བྱ་བ་གསུངས་ཏེ། ཁམ་དང༌། རེག་པ་དང༌། སྤོང་བ་ལ་སེམས་པ་དང༌། རྣམ་པར་ཤེས་པའི་ཟས་ཀྱི་སྲེད་པ་ཐམས་ཅད་སྤངས་ཀྱང་ངོ༌། །ཡང་ཏོག་གི་གཞལ་མེད་ཁང་ཞེས་བྱ་བ་ནི་ཁང་པའི་གཞལ་མེད་ཁང་ངོ༌། །སྟེང་ཞེས་བྱ་བ་ནི་ཁང་བཟངས་ཀྱི་སྟེང་གི་གཞི་ནའོ། །དུས་མཐུན་ཞེས་བྱ་བ་ནི་རྟག་ཏུ་དུས་ཚིགས་རྣམས་དང་མཐུན་པར་རོ། །བཞུགས་ཞེས་བྱ་བ་ནི་ཀུན་དུ་སྤྱོད་པའོ། །གཽ་ཏ་མ་ཞེས་བྱ་བ་ནི་རྒྱལ་པོ་ལ་བོད་པའོ། །འཇིགས་ཀུན་རྩེ་ཞེས་བྱ་བ་ནི་འཆི་བའི་འཇིགས་པ་ལ་སོགས་པའི་རྒྱུ་གང་ཡིན་པའོ། །སྲིད་ཅེས་བྱ་བ་ནི་འདོད་པའི་སྲིད་པ་ལ་སོགས་པ་སྲིད་པ་གསུམ་པོ་དག་གོ །བག་ཉལ་བཅས་ཞེས་བྱ་བ་ནི་ཉོན་མོངས་པ་དང་བཅས་པའོ། །སྤངས་པས་ཞེས་བྱ་བ་ནི་རང་ཉིད་སྤངས་པ་དང༌། དེའི་དམིགས་པའི་ཉོན་མོངས་པ་སྤངས་པས་སོ། །ཁྲུས་མཆོག་ཅེས་བྱ་བ་ནི་ག་བུར་ལ་སོགས་པ་དང་སྦྱར་བའི་སྐྱུ་རུ་རའི་ཤུ་པ་ལ་སོགས་པ་ཁྲུས་ཀྱི་ཡོ་བྱད་དག་གིས་སོ་། །ཆོས་རྫིང་ཞེས་བྱ་བ་ནི་ལམ་སྟེ་རྫིང་དང་འདྲ་བའི་ཕྱིར་རོ། །བསོད་ནམས་འབྲམ་ཞེས་བྱ་བ་ནི་ཚུལ་ཁྲིམས་ལ་འཇུག་པའོ། །རྙོག་པ་མེད་ཅེས་བྱ་བ་ནི་ཟག་པ་མེད་པའོ། །ཡི་ལུས་མི་གཤེར་ཞེས་བྱ་བ་ནི་རྒྱུད་ལ་སྲེད་པ་མེད་པའོ། །རིག་བྱེད་ཡོན་ཏན་ཞེས་བྱ་བ་ནི་ཡང་དག་པར་རྟོག་པ་ལ་སོགས་པ་ཤེས་པའི་ཡན་ལག་དག་གིས་སོ། །ཕ་རོལ་འགྲོ་ཞེས་བྱ་བ་ནི་མྱ་ངན་ལས་འདས་པར་འགྲོ་བའོ། །ཟིལ་གནོན་ཞེས་བྱ་བ་ནི་མི་གུས་པའོ། །འཇིགས་སྐྲག་ཅེས་བྱ་བ་ནི་འཇིགས་པ་ཉིད་དོ། །ཡིད་འབྱུང་ཅེས་བྱ་བ་ནི་མི་ཕྱོགས་སོ། །འཇིག་རྟེན་ཆོས་བརྒྱད་ཀྱིས་ཞེས་བྱ་བ་ནི་བདེ་བ་དང༌། སྡུག་བསྔལ་བ་དང༌། སྙན་པ་དང༌། མི་སྙན་པ་དང༌། བསྟོད་པ་དང༌། སྨད་པ་དང༌། རྙེད་པ་དང༌། མ་རྙེད་པ་ཞེས་བྱ་བ་ནི་འཇིག་རྟེན་གྱི་ཀུན་དུ་སྤྱོད་པ་དག་
གིས་སོ། །ལེགས་པར་འཁྲུངས་པ་ཞེས་བྱ་བ་ནི་ཁྱད་དུ་འཕགས་པར་སྐྱེས་པའོ། །དད་རྒྱས་པས་ཞེས་བྱ་བ་ནི་དད་པ་མངོན་པར་འཕེལ་བས་སོ། །དྲང་སྲོང་ཞེས་བྱ་བ་ནི་སངས་རྒྱས་བཅོམ་ལྡན་འདས་སོ། །དགེ་འདུན་ཞེས་བྱ་བ་ནི་འཕགས་པའི་དགེ་འདུན་ནོ། །སྡིག་པ་འདོད་པ་ཞེས་བྱ་བ་ནི་ཉོན་མོངས་པ་ཅན་གྱི་བསམ་པའོ། །ང་རྒྱལ་ལས་ང་རྒྱལ་ཞེས་བྱ་བ་ནི་འགྲོ་བ་ཐམས་ཅད་ཀྱི་མཆོག་དེ་བཞིན་གཤེགས་པ་པས་ཀྱང་མཐོ་བར་འདོད་པའི་ཕྱིར་རོ། །རྗེས་སུ་འཇུག་པར་འདོད་པས་ཞེས་བྱ་བ་ནི་དབང་དུ་བྱེད་པའོ། །གཅུགས་པར་གྱུར་པ་དགའ་སྟོན་པ། །ཞེས་བྱ་བ་ནི་གཅུགས་པར་གྱུར་ཕས་དེ་དང་ལྷན་ཅིག་བག་དབབ་པ་བྱས་པའོ། །འཇིག་རྟེན་པའི་ཐུགས་ཞེས་བྱ་བ་ནི་ཆེ་གེ་མོ་ཞིག་འོད་བར་གྱུར་ཅིག་སྙམ་དུ་བཞེད་པའི་ཐུགས་སོ། །འཇིག་རྟེན་ལས་འདས་པའི་ཐུགས་ཞེས་བྱ་བ་ནི་ཟག་པ་མེད་པའི་བསམ་གཏན་དང༌། གཟུགས་མེད་པའི་ཟག་པ་དང་བཅས་པའོ། །ཐུབ་པའི་ཉན་ཐོས་མཐུ་ཆེ་བ་ཞེས་བྱ་བ་ལ། མཐུ་ཆེ་བ་ཞེས་བྱ་བ་ནི་རྫུ་འཕྲུལ་དང་ལྷའི་རྣ་བ་དང་ལྡན་པའོ། །གསུམ་རིག་ཅེས་བྱ་བ་ནི་རིག་པ་གསུམ་དང་ལྡན་པའོ། །སེམས་ཀྱི་རྣམ་གྲངས་ཞེས་བྱ་བ་ནི་གཞན་གྱི་སེམས་ཡོངས་སུ་ཤེས་པ་ལ་མཁས་པའོ། །ཟག་པ་ཟད་པར་གྱུར་པ་དང༌། དགྲ་རྣམས་བཅོམ་པ་མང་དུ་ཡོད་ཅེས་བྱ་བ་ནི་ཟག་པ་ཟད་པ་དགྲ་བཅོམ་པར་གྱུར་པ་ཡིན་གྱི་མིང་ཙམ་གྱིས་མ་ཡིན་པའོ། །མངོན་པར་ཞུགས་པ་ཞེས་བྱ་བ་ནི་འཕགས་པའི་སར་ཆུད་པའོ། །གློ་བ་ཐག་པ་ལས་ཞེས་བྱ་བ་ནི་སྲོག་གི་མཐར་ཐུག་པ་ནས་སྙིང་ནས་སྐྱབས་སུ་འགྲོའོ་ཞེས་བྱ་བའི་ཐ་ཚིག་གོ །རྙེད་པའི་ཕྱིར་དང་ཉེ་བ་ཞེས་བྱ་བ་ནི་རྙེད་པ་དག་གི་རྒྱུ་ནི་མང་དུ་ཐོས་པ་ལ་སོགས་པ་ཡིན་ནོ་ཞེས་བྱ་བའི་ཐ་ཚིག་གོ །ཤིན་ཏུ་དཀའ་བ་ཡིན་གྱི་ཞེས་བྱ་བ་ནི་གནོད་པ་ཡིན་གྱི་ཞེས་བྱ་བའོ། །རྡུལ་གྱི་རྫབ་འདྲ་བ་ཁྱོད་ལ་མི་བྲ་བ་ཅི་ཡོད་ཅེས་བྱ་བ་ནི་རྡུལ་དང་རྡུལ་དུ་འདྲེས་པའི་རྫབ་འདྲ་བ་ཁྱོད་བཏང་དུ་མི་བྲ་བ་ཅི་ཡོད་ཅེས་བྱ་བའི་ཐ་ཚིག་གོ །དགེ་སློང་མ་གསོ་སྦྱོང་འབུལ་བ་དག་ཅེས་བྱ་བ་ནི་དགེ་སློང་མ་རྣམས་ཀྱི་ལས་ནི་རྫོགས་པར་བསྙེན་པ་དགག་དབྱེ་མ་གཏོགས་པ་གཞན་ཐམས་ཅད་དགེ་སློང་དང་ཐ་དད་པ་ཉིད་ཡིན་ལ་དགེ་སློང་མ་རྣམས་ཀྱི་གསོ་སྦྱོང་ནི་
དགེ་སློང་གི་དགེ་འདུན་དང་མཐུན་པ་འགྲུབ་པ་རྣམས་ཀྱི་བྱ་བ་ཡིན་ཏེ། མཐུན་པ་སྒྲུབ་པ་ཡང་དགེ་སློང་མའི་དགེ་འདུན་པ་གསོ་སྦྱོང་དབུལ་བའི་དགེ་སློང་མ་གཉིས་ཡན་ཆད་བསྐོས་པས་དགེ་སློང་གི་དགེ་འདུན་གྱིས་དེ་ལེན་པའི་དགེ་སློང་བསྐོས་པ་སྒོ་གང་ན་སྡོད་པ་ལ་ཕུལ་བས་བསྒྲུབ་དགོས་པས་དེ་དབུལ་བའི་དགེ་སློང་མ་ཞེས་བྱ་བའི་ཐ་ཚིག་གོ །གཡེངས་མ་ཞེས་བྱ་བ་ནི་སེམས་རྣམ་པར་གཡེངས་བའོ། །རྒྱ་ཅང་དག་ལྕག་པོད་དང༌། ཤུར་བུ་དང༌། ཤུར་བུ་ཕྲེའུ་དག་གིས་བར་ཆད་ཀྱང་བྱས་ལས་ཞེས་བྱ་བ་ནི་དེ་དག་དགེ་སློང་མ་ལས་ཐོབ་པའི་ཕྱིར་རོ། །མགོ་སྤྲ་བའི་མེ་ཏོག་ལྟར་སྐྱ་བ་ཞེས་བྱ་བ་ནི་སྐྲ་སྤྲ་བའི་མེ་ཏོག་ལྟར་དཀར་བའོ། །གནོད་པ་ཆུང་བ་ཞེས་བྱ་བ་ནི་རྟག་པའི་ནང་ཉུང་བའོ། །ཉམ་ང་བ་ཆུང་བ་ཞེས་བྱ་བ་ནི་ཕྱི་རོལ་གྱི་གནོད་པའི་ཉམ་ང་བ་ཆུང་བའོ། །བདེ་བ་ཞེས་བྱ་བ་ནི་ཆོས་གོས་ལ་སོགས་པ་ཡོ་བྱད་འབྱོར་བའོ། །བསྙུན་མི་མངའ་བ་ཞེས་བྱ་བ་ནི་ལན་འགའ་འབྱུང་བའི་བསྙུན་དང་བྲལ་བའོ། །བླ་མཁྱེན་ཞེས་བྱ་བ་ནི་བཙུན་མོ་འཁོར་གྱི་ཞལ་ཏ་པའོ། །གཏམ་ཤེས་སོ་ཞེས་བྱ་བ་ནི་རྒྱུས་ཤེས་སོ་ཞེས་བྱ་བའི་ཐ་ཚིག་གོ །རག་མང་དུ་ལས་ཀྱི་ཞེས་བྱ་བ་ནི་ལུང་ནོད་པ་རྫོགས་པར་བསྙེན་པ་ལ་སོགས་པའོ། །བརྟད་པ་ཅི་འབྱུང་ན་ཞེས་བྱ་བ་ནི་ཉམས་པ་ཅི་ཡོད་ན་ཞེས་བྱ་བའི་ཐ་ཚིག་གོ །བདག་ཉིད་ཀྱི་ལག་རང་ལ་སོས་འདེབས་པར་བྱེད་དམ་ཞེས་བྱ་བ་ནི་སྒྱེ་དགུའི་བདག་མོ་ཆེན་མོ་ནི་བདག་དང་འདྲ་བས་དེ་ལས་ལོག་པ་མི་བྱེད་དོ་ཞེས་བྱ་བའི་ཐ་ཚིག་གོ །བཤང་པ་བྱེད་འདོད་དམ་ཞེས་བྱ་བ་ནི་བཤང་པ་བྲོ་བའོ། །སྟེན་པ་བྱེད་པ་ཞེས་བྱ་བ་ནི་གོམས་པར་བྱེད་པ་ལ་སོགས་པའི་རྩོམ་པའོ། །གོམས་པར་བྱེད་པ་ཞེས་བྱ་བ་ནི་འབྲིང་དུ་བྱེད་པའོ། །ལན་མང་དུ་བྱེད་པ་ཞེས་བྱ་བ་ནི་ཆེར་བྱེད་པའོ། །རྗེས་སུ་སྲུང་བར་བྱེད་པ་ཞེས་བྱ་བ་ནི་ཡོངས་སུ་ཉམས་པ་བཟློག་པར་བྱེད་པའོ། །རེག་པར་བྱེད་པ་ཞེས་བྱ་བ་ནི་ཤེས་པ་ཡོངས་སུ་གཅོད་པའོ། །མངོན་སུམ་དུ་བྱེད་པ་ཞེས་བྱ་བ་ནི་འཐོབ་པ་བསྒྲུབ་པའོ། །བདག་ཉིད་སྲུང་ན་གཞན་སྲུང་བར་བྱེད་ཅེས་བྱ་བ་ནི་བདག་ཉིད་སྲུང་ན་གཞན་ལ་མི་གནོད་པའི་ཕྱིར་རོ། །ཐོ་མི་འཚམས་པ་ཞེས་བྱ་བ་ནི་འདོད་པའི་གེགས་མི་བྱེད་པའོ། །མི་གཤེ་བ་ཞེས་བྱ་བ་ནི་ཁྲོ་བ་མི་བསྐྱེད་པའོ། །མི་འཚེ་བ་ཞེས་བྱ་བ་ནི་མི་འདོད་
པ་མི་བསྒྲུབ་པའོ། །རྗེས་སུ་བརྩེ་བ་ཞེས་བྱ་བ་ནི་འདོད་པ་བསྒྲུབ་པའོ། །རྗེས་སུ་སྙིང་བརྩེ་བ་ཞེས་བྱ་བ་ནི་སེམས་མགུ་བར་བྱེད་པའོ། །བྱམས་པའི་སེམས་ཞེས་བྱ་བ་ནི་ཕན་པའི་བསམ་པ་ཉིད་དང་མི་འདོད་པ་གཅད་པའི་བསམ་པ་ཉིད་དོ། །གཞན་སྲུང་བ་ན་བདག་ཉིད་སྲུང་བར་བྱེད་དོ་ཞེས་བྱ་བ་ནི་སེམས་ཁྲོ་བ་ལ་སོགས་པ་སྡིག་པ་ལས་ལོག་པའི་ཕྱིར་རོ། །ཆོས་བཟང་པོའི་ཆོས་ཀྱིས་ཞེས་བྱ་བ་ནི་བྱ་བ་གང་ལ་ཆོས་བཟང་པོའི་ཆོ་ག་ཡོད་པའི་ཆོས་ཀྱིས་སོ། །གཏམ་སྣ་ཚོགས་ཞེས་བྱ་བ་ནི་ཚིག་སྣ་ཚོགས་སོ། །གཏམ་སྙན་པ་ཞེས་བྱ་བ་ནི་ཚིག་དགའ་བའོ། །སྤོབས་པ་དགེ་བ་ཞེས་བྱ་བ་ནི་རྗེས་སུ་མཐུན་པའི་ཤེས་རབ་པོ། །དུ་གུ་ལའི་གོས་ཞེས་བྱ་བ་ནི་རྩྭ་དུ་གུ་ལའི་ཚལ་པ་ལས་བྱས་པའོ། །ཀོ་ཏམ་པའི་གོས་ཞེས་བྱ་བ་ནི་རྩྭ་ཀོ་ཏམ་པ་ལས་བྱུང་བའོ། །ཉི་འོག་གི་གོས་ཞེས་བྱ་བ་ནི་མཐའ་འཁོབ་ནས་བྱུང་བ་ཟབ་དར་ལ་སོགས་པའོ། །ཐལ་མོས་བརྡེབས་པ་ཞེས་བྱ་བ་ནི་ཐལ་ལྕག་གོ །དགེ་སློང་མ་ཉེ་དུ་མ་ཡིན་པ་ལ་ཉེ་དུ་མ་ཡིན་པར་འདུ་ཤེས་པ་དང༌། ཉེ་དུ་མ་ཡིན་པར་ཡིད་གཉིས་ཟ་བ་ནི་དངོས་གཞི་ཉིད་དུ་འགྱུར་རོ། །དགེ་སློང་མ་ཉེ་དུ་ལ་ཉེ་དུ་མ་ཡིན་པར་འདུ་ཤེས་པ་དང་ཉེ་དུ་མ་ཡིན་པར་ཡིད་གཉིས་ཟ་བ་ནི་ཉེས་བྱས་སུ་འགྱུར་རོ་ཞེས་བསྟན་པའི་ཕྱིར་འགྲེས་བཞི་སྨོས་སོ། །འཁྲུར་འཇུག་པ་ལ་སོགས་པ་འདོད་པ་ཐ་དད་ན་རེ་རེ་ལ་ཡང་ལྟུང་བ་རེ་རེར་འགྱུར་ལ་སྦྱོར་བ་གཅིག་ན་གཉིས་ལ་ཡང་ལྟུང་བ་གཅིག་ཏུ་འགྱུར་བ་དང་སྦྱོར་བ་གཅིག་ན་གསུམ་ཆར་ལ་ཡང་མཐར་ལྟུང་བ་གཅིག་ཏུ་འགྱུར་བ་བསྟན་པའི་ཕྱིར་འགྲེས་བཞི་པོ་རེ་རེ་ལ་ཡང་ལྟུང་བ་བཅུ་བཅུ་རྣམ་པར་གཞག་གོ །ཤིན་ཏུ་གོས་ཀྱིས་ཆ་བ་ལས་སྦྱོར་བ་ཞེས་བྱ་བ་ནི་གོས་བཟང་པོར་བྱ་བའི་ཕྱིར་རྩོལ་པའོ། །བདེན་པ་དག་མ་མཐོང་ངོ་ཞེས་བྱ་བ་ནི་ཡོ་བྱད་ལ་ལྷག་པར་ཆགས་པས་སྐྱོ་བ་མ་སྐྱེས་པའི་ཕྱིར་རོ། །སྨད་ན་ཞེས་བྱ་བ་ནི་ཚིག་དངོས་སུ་སྨྲ་བས་སྨད་ནའོ། །དབྲལ་དཀའ་བར་འགྱུར་རོ་ཞེས་བྱ་བ་ནི་དེ་དག་ང་རྒྱལ་བཅད་པ་ཡིན་པས་ཚིག་མི་སྙན་པར་འགྱུར་རོ་ཞེས་བྱ་བའི་ཐ་ཚིག་གོ །ལྟུང་བྱེད་ཀྱི་ལྟུང་བ་བྱེད་དུ་གཞུག་གོ་ཞེས་བྱ་བ་ནི་མ་གུས་པ་ལས་བྱུང་བའི་ལྟུང་བྱེད་འཆགས་སུ་གཞུག་པའོ། །ཟླ་བ་ཤོལ་མ་བོར་ཞེས་བྱ་བ་ནི་ཟླ་བ་ལྷག་པར་མ་བྱས་པའོ། །ཟླ་བ་ཤོལ་བོར་བ་ཞེས་བྱ་བ་ནི་ཟླ་
བ་ལྷག་པར་བྱས་པའོ། །བསྟོད་པ་ཞེས་བྱ་བ་ནི་རང་གི་ངོ་བོ་ཉིད་བསྟོད་པའོ། །བཀུར་བ་ཞེས་བྱ་བ་ནི་འབྲས་བུ་བསྟོད་པའོ། །བསྔགས་པ་ཞེས་བྱ་བ་ནི་གཞན་གྱིས་བྱས་པའི་དྲིས་པ་ལན་གདབ་པས་སོ། །རབ་ཏུ་བསྔགས་པ་ཞེས་བྱ་བ་ནི་གཞན་གྱིས་སྨྲས་པའི་ཡོན་ཏན་ལ་རྗེས་སུ་ཡི་རང་བས་སོ། །ཁྲིམས་ནི་གང་ལགས་ཞེས་བྱ་བ་ནི་རྟག་ཏུ་བྱ་བའི་ཁྲིམས་སོ། །ཁྲིམས་བགྱི་བ་ནི་གང་ལགས་ཞེས་བྱ་བ་ནི་གློ་བུར་དུ་བྱ་བའི་ཁྲིམས་སོ། །རྙེད་པ་ཆོག་པའི་བསོད་སྙོམས་པ་ཞེས་བྱ་བ་ནི་དང་པོ་ཁོ་ནས་ཐོབ་པའི་བསོད་སྙོམས་ངེས་པར་ལོངས་སྤྱོད་ཅིང་གཞན་མི་ཚོལ་བ་གང་ཡིན་པའོ། །ཕྱིང་པ་པ་ཞེས་བྱ་བ་ནི་ཕྱིང་པ་ལས་བྱས་པའི་ཆོས་གོས་གསུམ་འཆང་བ་གང་ཡིན་པའོ། །ཅོག་པུ་པ་ཞེས་བྱ་བ་ནི་མི་ཉལ་བར་ཅོག་པུ་ཁོ་ནར་འདུག་པ་གང་ཡིན་པའོ། །གཞི་ཇི་བཞིན་པ་ཞེས་བྱ་བ་ནི་དང་པོ་བཏིང་བ་ཁོ་ནའི་སྟེང་དུ་ཉལ་གྱི་བདག་གིས་གདིང་བ་དང་གཞན་འདིང་དུ་མི་འཇུག་པ་གང་ཡིན་པའི་ཡོངས་སུ་སྤང་བ་སྦྱིན་པར་བྱས་ཏེ་ཞེས་བྱ་བའི་ཐ་ཚིག་གོ །རེ་ཞིག་དང་པོར་ཁྲིམས་སུ་བྱ་བ་མི་བྱེད་པའི་ཕྱིར་དང༌། ཁྱེད་ཀྱི་ཡུལ་ལ་ཁྲིམས་སུ་བྱ་བ་མ་བྱས་པའི་ཕྱིར་ཁྱོད་ལ་ལྟུང་བ་མེད་ལ། ད་ཕྱིན་ཆད་ཀྱང་ཁྱོད་ཀྱི་ཡུལ་ལ་ཁྲིམས་སུ་བྱ་བ་མེད་པ་ཁོ་ན་ཡིན་པས་ཁྱོད་ལ་ཚངས་པ་མཚུངས་པར་སྤྱོད་པ་རྣམས་ཀྱི་ལྟུང་བས་གླེང་བའི་དོགས་པ་མེད་པར་བྱའོ་ཞེས་བསྟན་པའི་ཕྱིར་དང༌། ཤཱཀྱ་རབ་ཏུ་བྱུང་བ་རྣམས་ལ་ཡང་བསྐུལ་བའི་ཕྱིར་རོ། །རྒྱུད་དག་པ་ཞེས་བྱ་བ་ནི་འདོད་པའི་ཀུན་དུ་སྤྱོད་པ་མེད་པའི་ལུས་སོ། །རྒྱུད་དག་པའི་ཚུལ་དག་གིས་ཞེས་བྱ་བ་ནི་སྲེད་པའི་སེམས་དག་གིས་སོ། །ཡོ་བྱད་བསྙུངས་པའི་ཚུལ་དག་གིས་ཞེས་བྱ་བ་ནི་ངེས་པའི་བྱ་བ་དག་གིས་སོ། །སྲེད་པ་མེད་པ་ཞེས་བྱ་བ་ནི་ཉེ་དུ་ལ་ཆགས་པ་མེད་པའོ། །ལེན་པ་མེད་པ་ཞེས་བྱ་བ་ནི་ཡོ་བྱད་འདོད་པ་མེད་པའོ། །འདོད་པ་ཞེས་བྱ་བ་ནི་ཡིད་ལ་འདོད་པའོ། །སྒྱུ་ཐབས་ཞེས་བྱ་བ་ནི་གཡོས་སོ། །འཕྱེ་བོ་ཉིད་ཅེས་བྱ་བ་ནི་གྲུམ་པ་ཉིད་དོ། །མཆོངས་པ་ཞེས་བྱ་བ་ནི་མཆོང་ཞིང་འགྲོ་བའོ། །དཀྱུས་མོ་ཞེས་བྱ་བ་ནི་རྒྱུག་ཅིང་འགྲོ་བའོ། །གཅུགས་མེད་པར་གནོད་པ་ཞེས་བྱ་བ་ནི་གནས་མ་ཡིན་པ་ལ་མངོན་པར་ཞེན་པའོ། །ཆེད་དུ་བསམས་ཏེ་ཞེས་བྱ་བ་ནི་སྒྱུ་ཐབས་ཀྱི་རྒྱུ་ཉིད་དོ། །གདུང་ཆད་པ་ཞེས་བྱ་
བ་ནི་རྒྱུ་མེད་པའོ། །སྨན་པ་གཉེར་ཏེ་ཞེས་བྱ་བ་ནི་སྨན་པ་དག་གིས་བསྐོར་ཏེའོ། །གང་གཅད་པར་བྱ་ཞེས་བྱ་བ་ནི་རྐང་ལག་ལ་སོགས་པ་གཅད་པར་བྱ་བའོ། །གང་གཅོད་དུ་གཞུག་པར་བྱ་ཞེས་བྱ་བ་ནི་རྐང་ལག་ལ་སོགས་པ་གཅོད་དུ་གཞུག་པར་བྱ་བའོ། །དོང་ཞེས་བྱ་བ་ནི་ས་ཐམས་ཅད་དུ་གཞུག་པའི་དོང་ངོ༌། །གླེན་པ་མ་ལགས་ཞེས་བྱ་བ་ནི་བརྡ་མི་ཕྲད་པ་མ་ཡིན་པའོ། །བློ་མེད་མིན་ཞེས་བྱ་བ་ནི་བདག་ཉིད་སེམས་མི་ཤེས་པ་མ་ཡིན་པའོ། །གསལ་བར་བགྱིད་པའི་ཞེས་བྱ་བ་ནི་ལྕེ་དང་རྐན་དང་སྣ་ལ་སོགས་པ་རྒྱུ་གཞན་དག་གིས་སོ། །སྨྲ་བ་ཞེས་བྱ་བ་ནི་སྨྲ་བ་པོའོ། དབང་པོ་ཚང་བ་ཞེས་བྱ་བ་ནི་དབང་པོ་ཐམས་ཅད་དང་ལྡན་པའོ། །གསལ་བ་ཞེས་བྱ་བ་ནི་མ་ཉམས་པའོ། །རིགས་མཐུན་ཞེས་བྱ་བ་ནི་རིགས་ཀྱིས་འོངས་པའོ། །རབ་ཏུ་ཞེས་བྱ་བ་ནི་ཤིན་ཏུའོ། །མི་ཟད་པ་ཞེས་བྱ་བ་ནི་རྒྱུན་དུ་འབྱུང་བའོ། །དྲག་པོ་ཞེས་བྱ་བ་ནི་རྣོན་པོའོ། །འཇིགས་སུ་རུང་བ་ཞེས་བྱ་བ་ནི་འཇིགས་འཇིགས་ལྟ་སྟེ་དེས་ནི་མི་བཟད་པ་དང་དྲག་པོ་ཉིད་བསྟན་པའོ། །མཆི་མི་བགྱི་ཞེས་བྱ་བ་ནི་འགྲོ་བར་མི་བྱ་བའོ། །དཀའ་ཐུབ་ཀྱིས་གདུང་བ་ཞེས་བྱ་བ་ནི་དུ་བ་རྔུབ་པ་ལ་སོགས་པ་དཀའ་ཐུབ་དྲག་པོ་བྱེད་པའོ། །སྦྱིན་སྲེག་ཅེས་བྱ་བ་ནི་རྒྱུན་དུ་མེར་སྦྱིན་སྲེག་བྱེད་པའོ། །མཆོད་སྦྱིན་ཞེས་བྱ་བ་ནི་རྟའི་ཚིལ་ལ་སོགས་པས་མཆོད་སྦྱིན་བྱེད་པའོ། །ཀིམ་པའི་འབྲས་བུ་ཞེས་བྱ་བ་ནི་ཤིང་ཀིམ་པ་ཀའི་འབྲས་བུ་སྟེ་མིག་སྔར་སྡུག་ཅིང་གསོད་པར་བྱེད་པ་ཡིན་ནོ། །བདུད་རྩིའི་རོ་དགའ་བ་ཞེས་བྱ་བ་ནི་ཐོག་མ་དང་བར་དང་ཐ་མར་ཞི་བ་ཉིད་ཡིན་པའི་ཕྱིར་རོ། །གནས་མལ་འཇམ་པ་ཞེས་བྱ་བ་ནི་རེག་པ་འཇམ་པའི་ཤིང་བལ་དག་གོ །ལེགས་པར་བཤམས་པར་ཞེས་བྱ་བ་ནི་ལེགས་པར་བཏིང་བའོ། །གང་ནས་ཀྱང་འཇིགས་པ་མེད་པ་ཞེས་བྱ་བ་ནི་གང་ནས་ཀྱང་མི་འཇིགས་པའོ། །བྲེད་ངས་ཀྱི་འཇིགས་པ་དང་བཅས་པ་ཞེས་བྱ་བ་ལ། བྲེད་ངས་ཞེས་བྱ་བ་ནི་སྡར་མ་སྟེ་དེ་འཇིགས་པ་གང་ཡིན་པ་དེ་བྲེད་ངས་ཀྱིས་འཇིགས་པ་སྟེ་དེ་དང་ལྡན་པའི་སེམས་ཀྱིས་སོ། །ཤིང་ཤུན་ཞེས་བྱ་བ་ནི་ཤིང་ལྗོན་པའི་ཤུན་པའོ། །རྩྭ་གྱོན་ཞེས་བྱ་བ་ནི་རྩྭ་དང་ལྷའི་གོས་སོ། །ཐོས་ནས་ཞེས་བྱ་བ་ནི་བརྟགས་སམ་ཁོང་དུ་ཆུང་ནས་སོ་ཞེས་བྱ་བའི་ཐ་ཚིག་གོ །མཆི་མས་
བརྣངས་པ་ཞེས་བྱ་བ་ནི་མཆི་མས་རྣམ་པར་དཀྲུགས་པའི་མགྲིན་པས་སོ། །བུ་བླངས་ཞེས་བྱ་བ་ནི་བུ་ལ་འཁྱུད་ནས་སོ། །བརྟུལ་ཞུགས་ངེས་འཆང་ཞིང་ཞེས་བྱ་བ་ལ་བརྟུལ་ཞུགས་ཞེས་བྱ་བ་ནི་ལུས་དང་ངག་གི་ངེས་པའོ། །ངེས་པ་ཞེས་བྱ་བ་ནི་ཡིད་ཀྱིས་ཡང་དག་པར་སྡོམ་པའོ། །རང་གི་ཆོས་ཞེས་བྱ་བ་ནི་དྲང་སྲོང་གི་ཆོས་སོ། །བྱམས་པའི་བདག་ཉིད་ཅན་ཞེས་བྱ་བ་ནི་བྱམས་པ་ཐོབ་པའོ། །སྙིང་རྗེ་དང་ལྡན་པ་ཞེས་བྱ་བ་ནི་སྙིང་རྗེ་ཐོབ་པའོ། །བརྩེ་བ་དང་ལྡན་པ་ཞེས་བྱ་བ་ནི་གནོད་པ་དག་ལ་བསྲུང་བའོ། །སེམས་ཅན་ལ་བྱམས་པ་དང་ཞེས་བྱ་བ་ནི་བྱམས་པའི་བསམ་པ་དང་ལྡན་པའོ། །རི་དགས་ཀྱི་བུ་བརྟུལ་ཞུགས་ཅན་ཞེས་བྱ་བ་ནི་རི་དགས་དང་འདྲ་བའི་ཡི་དམ་སྔར་བླངས་ཏེ་སྤྱོད་པའོ། །འཁྲུར་འཇུག་པའི་སྤང་བ་སྟེ་བཞི་པའི་ཚིག་རྣམ་པར་བཤད་པ་རྫོགས་སོ།། །།འགོག་པ་ལ་སྙོམས་པར་ཞུགས་ཞེས་བྱ་བ་ནི་སེམས་དང་སེམས་ལས་བྱུང་བ་དགག་པའི་ཕྱིར་འགོག་པ་སྟེ་དེ་ལ་སྙོམས་པར་ཞུགས་སོ། །སྐལ་བ་ཞེས་བྱ་བ་ནི་བགོ་སྐལ་ལོ། །ནགས་བྱུལ་བ་ཞེས་བྱ་བ་ནི་ནགས་བརྟག་པའོ། །མཐོ་ཡོར་ཞེས་བྱ་བ་ནི་རྡོ་ལ་སོགས་པ་བསྒྲེང་བའོ། །བསོད་སྙོམས་ཀྱི་ཕུད་ཅེས་བྱ་བ་ནི་བསོད་སྙོམས་དང་པོའི་མཆོག་གོ །ནང་པར་ཞེས་བྱ་བ་ནི་ནང་པར་སྔར་རོ། །ཉིན་མོ་ཉིད་ཅེས་བྱ་བ་ནི་སྔ་དྲོའི་ཉིན་མོའོ། །ལྷའི་གནས་ཀྱི་ལྷག་མ་བཞིན་དུའོ་ཞེས་བྱ་བ་ནི་ཇི་ལྟར་ལྷའི་གནས་སུ་ཟས་ཕུལ་བའི་ལྷག་མ་བཀྲ་ཤིས་པའི་ཕྱིར་འདོད་པར་བྱ་བ་དེ་བཞིན་དུ་ཏེ་པོར་གསོལ་ཞེས་བྱ་བའི་ཐ་ཚིག་གོ །དགེ་སློང་མའི་རས་མ་ཞེས་བྱ་བ་ནི་དགེ་སློང་མའི་རས་རོས་སོ། །ཁུར་བདག་བསླང་ཞེས་བྱ་བ་ནི་བསླབ་པའི་གཞི་དང་བཅས་པའོ། །དེ་ལ་བརྗེ་བ་ནི་འདི་ཡིན་ཏེ་ཞེས་བྱ་བ་ནི་བརྗེ་བའི་ཚུལ་ནི་འདི་ཡིན་ཏེ་ཞེས་བྱ་བའི་ཐ་ཚིག་གོ །དེ་ཙམ་གྱིས་ཞེས་བྱ་བ་ནི་རིན་མ་ཉམས་པས་བརྗེ་བར་བྱ་བའོ། །ཇི་ཙམ་གྱིས་དགེ་སློང་མ་དགའ་བར་འགྱུར་བས་ཞེས་བྱ་བ་ནི་རིང་ཆུང་དུས་ཀྱང་དགེ་སློང་མ་གང་དང་ལྷན་ཅིག་དེ་བརྗེ་བར་བྱེད་པའི་དགེ་སློང་མ་དགའ་བར་འགྱུར་བས་ཞེས་བྱ་བའི་ཐ་ཚིག་གོ །ལེན་པའི་སྤང་བ་སྟེ་ལྔ་པའི་ཚིག་རྣམ་པར་བཤད་པ་རྫོགས་སོ།། །།ཁ་ཟས་ཙམ་ཞེས་བྱ་བ་ནི་ཁ་ཟས་ཙམ་དུ་འགོད་པའོ། །ཆང་ཆུང་
ཙམ་ཞེས་བྱ་བ་ནི་འཚོ་བ་ཙམ་ཞེས་བྱ་བའི་ཐ་ཚིག་གོ །རྒྱུ་མཐུན་པ་ཞེས་བྱ་བ་ནི་གཤེར་བའོ། །བཤེས་པ་ཞེས་བྱ་བ་ནི་འབྲེལ་བའོ། །ད་ནི་དུས་ཀྱི་ཕྱེད་ཀྱིས་ཞེས་བྱ་བ་ནི་མཐུས་འཕྲོག་པའི་ཕྱེད་ཀྱིས་སོ། །སྤྱོད་པས་ཞེས་བྱ་བ་ནི་འཇུག་པའི་དང་ཚུལ་ལོ། །ཤིང་ཚལ་ཞེས་བྱ་བ་ནི་དབྱིག་གུ་ཚལ་པའོ། །གྲོང་ཕྲེང་བ་ཅན་ཞེས་བྱ་བ་ནི་གྲོང་ཕྲེང་བ་ཅན་ཞེས་བྱ་བ་ནས་སྐྱེས་པའི་ཕྱིར་རོ། །ཚང་ཚིང་ཞེས་བྱ་བ་ནི་རྩྭ་ཐིབས་པོའོ། །དེ་ལ་དེས་ནི་དུས་ཡིན་ནོ་ཞེས་བྱ་བ་ཡང་ཚིག་ཏུ་བཟླས་པ་ནི་བསྣན་པའི་ཕྱིར་ཏེ། དེ་ལས་ལྷག་པ་མེད་དོ་ཞེས་བྱ་བའི་ཐ་ཚིག་གོ །རིན་ཐང་ཞེས་བྱ་བ་ནི་རིན་ནོ། །ཁ་དོག་ཅེས་བྱ་བ་ནི་ཁ་དོག་གི་གཟུགས་སོ། །ཁྲུ་ཚད་ཅེས་བྱ་བ་ནི་ཁྲུ་གང་ངོ༌། །ལྷག་མ་ཐོབ་ན་ལྟུང་བ་མེད་དོ་ཞེས་བྱ་བ་ནི་དེས་ལྷག་པ་མ་བསླངས་པའི་ཕྱིར་རོ། །ཁ་དོག་དང་ཚད་ལས་ལྷག་པ་ཡང་དེ་བཞིན་དུ་ཤེས་པར་བྱེད་པའོ། །སློང་བའི་སྤང་བ་སྟེ་དྲུག་པའི་ཚིག་རྣམ་པར་བཤད་པ་རྫོགས་སོ།། །།བསྡམས་པས་ཞེས་བྱ་བ་ནི་ཁྱད་པར་བྱས་ཤིང་དམ་པོར་བྱས་ཞེས་བྱ་བའི་ཐ་ཚིག་གོ །ཕྱི་རོལ་ཏུ་ཟས་ལ་བོས་པ་ཞེས་བྱ་བ་ནི་མགྲོན་དུ་བོས་པའོ། །བྱ་རོག་དཀར་པོ་དང་འདྲ་བས་ཞེས་བྱ་བ་ནི་དགེ་སློང་ཧྲལ་པོ་ཡིན་པས་འཇིག་རྟེན་དག་གིས་ངོ་ཤེས་པའི་ཕྱིར་རོ། །བར་བར་དུ་རྒན་པ་དག་གིས་འཁོད་པར་བྱ་བའོ་ཞེས་བྱ་བ་ནི་བར་བར་དག་ཏུ་གཞོན་ནུ་དག་གིས་བཅད་དེ་རྒན་པ་དག་གིས་འཁོད་པར་བྱ་བའི་ཐ་ཚིག་གོ །དངར་ཁ་བྱས་ཏེ་ཞེས་བྱ་བ་ནི་གྲལ་ཐབས་སུ་སྦྲེངས་ཏེའོ། །ཁ་ཅིག་ན་རེ་སྒྲོ་གུ་བསྒྲོགས་པའོ་ཞེས་ཀྱང་ཟེར་རོ། །ཡོ་བྱད་བཅུ་གསུམ་བདུན་བདུན་ཞེས་བྱ་བ་ནི་གསལ་རྒྱལ་ལ་སོགས་པ་སྦྱིན་བདག་བདུན་གྱིས་རེ་རེས་ཀྱང་ཡོ་བྱད་བཅུ་གསུམ་བཅུ་གསུམ་བྱིན་ནོ་ཞེས་བྱ་བའི་ཐ་ཚིག་གོ །མི་བརྩོན་པ་ཞེས་བྱ་བ་ནི་སེམས་ཀྱིས་མི་བརྩོན་པ་བསྟན་ཏོ། །མི་སྦྱོར་བ་ཞེས་བྱ་བ་ནི་ལུས་དང་ངག་གིས་མི་སྦྱོར་བ་བསྟན་ཏོ། །མ་བརྟགས་པར་སྤྱོད་པ་ཞེས་བྱ་བ་ནི་རྟོག་པ་སྔོན་དུ་མ་སོང་བར་བྱེད་པའོ། །དེ་ལས་ཞེས་བྱ་བ་ནི་བྲམ་ཟེ་འམ་ཁྱིམ་བདག་དད་པ་ཅན་དེ་ལས་སོ། །ཁྲུ་བཅུ་གཉིས་པ་ཞེས་བྱ་བ་ནི་སྲིད་དུའོ། །གལ་ཏེ་ཆུང་ན་ཡང་བསླང་བར་མི་བྱ་ལ་ལྷག་ན་ཡང་སྦྱིན་པར་མི་བྱའོ་ཞེས་བྱ་བ་མི་ཁྱིམ་པའི་གོས་བསྐྱེད་བྲི་ངེས་པ་ཡིན་པའི་
ཕྱིར་རོ། །གལ་ཏེ་ཆུང་ན་ཡང་བསླང་བར་བྱ་ལ་ལྷག་ན་ཡང་སྦྱིན་པར་བྱ་བ་ནི་དགེ་སློང་གི་ཚད་ངེས་པ་ཡིན་པའི་ཕྱིར་རོ། །ཐམས་ཅད་དུ་སྤང་བའི་ལྟུང་བྱེད་དུ་འགྱུར་རོ་ཞེས་བྱ་བ་ནི་ལྷག་པ་སློང་བའི་ཕྱིར་དང༌། ལྷག་མ་བཅབས་པའི་ཕྱིར་རོ། །སློང་བར་རིགས་པ་སྤང་བ་སྟེ་བདུན་པའི་ཚིག་རྣམ་པར་བཤད་པ་རྫོགས་སོ།། །།དེ་དག་དང་བདག་མཉམ་པར་ཞེས་བྱ་བ་ནི་དེ་དང་བདག་འདྲ་བར་རོ། །སྔ་མ་ལ་ནི་ལྟུང་བ་མེད་དོ་ཞེས་བྱ་བ་ནི་མ་བསླངས་པ་ཉིད་དུ་ཐོབ་པའི་ཕྱིར་རོ། །སྤགས་པ་ལས་ལྷག་པ་སློང་བའི་སྤང་བ་སྟེ་བརྒྱད་པའི་ཚིག་རྣམ་པར་བཤད་པ་རྫོགས་སོ།། །། ཁྱོ་ཤུག་ཅེས་བྱ་བ་ནི་སྐྱེས་པ་དང་བུད་མེད་དོ། །བསླབ་པའི་གཞི་འདི་ནི་སྦྱིན་བདག་གཅིག་མ་ཡིན་པའི་ཕྱིར་ལོགས་ཤིག་ཏུ་སྨོས་སོ། །གླེང་གཞི་དང་བསླབ་པ་དང་བཅས་པ་དང་ལྟུང་བ་རྣམ་པར་གཞག་པའི་ཚིག་གི་དོན་ནི་སྔ་མ་ཁོ་ན་བཞིན་དུ་རིག་པར་བྱའོ། །སོ་སོ་ནས་སྤགས་པ་ལས་ལྷག་པ་སློང་བའི་སླང་བ་སྟེ་དགུ་པའི་ཚིག་རྣམ་པར་བཤད་པ་རྫོགས་སོ།། །།སྙིང་ཚོམ་ཞེས་བྱ་བ་ནི་བཀྲབས་པའོ། །སྒྲ་མཐོན་པོ་ཞེས་བྱ་བ་ནི་སྐད་ཆེན་པོའོ། །སྒྲ་ཡིད་དུ་འོང་བ་ཞེས་བྱ་བ་ནི་སྙན་པའོ། །སྒྲ་ཟབ་བོ་ཞེས་བྱ་བ་ནི་མཐུ་དང་ལྡན་པའི་ཕྱིར་སྒྲ་གསལ་བའོ། །མི་དགའ་བ་ཞེས་བྱ་བ་ནི་ཡིད་ལ་གཅགས་པའོ། །སྒྲ་དམའ་བ་ཞེས་བྱ་བ་ནི་སྐད་ཆུང་པའོ། །སྒྲ་ཡིད་དུ་མི་འོང་བ་ཞེས་བྱ་བ་ནི་སྒྲ་མི་སྙན་པའོ། །སྒྲ་ཞུམ་པ་ཞེས་བྱ་བ་ནི་མི་དགའ་བའི་སྐད་དོ། །བརྒྱལ་ཞེས་བྱ་བ་ནི་དུས་ཚིགས་བཟུང་བའོ། །བརྒྱ་ལམ་ན་ཞེས་བྱ་བ་ནི་ཉི་མ་བཟུང་བའོ། །ཟུར་གྱིས་གོ་ཞེས་བྱ་བ་ནི་ཟུར་ཙམ་གྱིས་གོ་བ་སྟེ་ལག་བརྡ་ལ་སོགས་པས་ཀྱང་བརྡ་ཕྲད་པའི་ཕྱིར་རོ། །བརྗོད་ན་ཞེས་བྱ་བ་ནི་མགོ་སྨོས་པས་གོ་བ་སྟེ་ཅུང་ཞིག་བརྗེད་པས་ལྷག་མ་ཞེས་བྱ་བའི་ཕྱིར་རོ། །ཡི་གེ་ཕྱེད་ཀྱིས་ཞེས་བྱ་བ་ནི་རྣམ་པར་མ་སྤྲོས་པས་གོ་བས་ཏེ། ཡི་གེ་ཕྱེད་བརྗོད་པས་ཐམས་ཅད་ཤེས་པའི་ཕྱིར་རོ། །མི་སྨྲས་ན་མི་ཤེས་སོ་ཞེས་བྱ་བ་ནི་བཀྲི་དགོས་པ་སྟེ། རིལ་གྱིས་མ་སྨྲས་ཀྱི་བར་དུ་མི་ཤེས་པའི་ཕྱིར་རོ། །ཕན་ཚུན་མེད་པ་ཞེས་བྱ་བ་ནི་ཡང་རྒྱུན་མི་གཅོད་པའི་ཕྱིར་རོ། །ཀུན་ནས་ཉོན་མོངས་པ་མེད་པ་ཞེས་བྱ་བ་ནི་ལེན་པ་རྣམས་ལ་ཀུན་ནས་ཉོན་མོངས་པ་མེད་པའི་ཕྱིར་རོ། །ཡུལ་གྱི་ཁེ་སྤོགས་ཞེས་
བྱ་བ་ནི་ཡུལ་གཞན་དུ་བྱིན་པའི་ནོར་ལས་ཡུལ་གཞན་དུ་ཁེ་སྤོགས་ཀྱི་སྐྱེད་འཐོབ་པའོ། །སྒྲོན་མ་རབ་ཏུ་འབར་བ་ཞེས་བྱ་བ་ནི་རྩ་བ་ནས་ཀྱང་འབར་བའོ། །རྒྱ་མ་བྱིང་དམ་ཞེས་བྱ་བ་ནི་རྒྱ་དྲུད་པས་མ་བྱིད་དམ་ཞེས་བྱའོ། །མ་ཞུ་འམ་ཞེས་བྱ་བ་ནི་རྒྱ་མ་ཚིག་གམ་ཞེས་པའོ། །སྒྱུ་མ་ཞུགས་སམ་ཞེས་བྱ་བ་ནི་རྒྱ་ལ་སྒྱུ་ཐབས་མ་བྱས་སམ་ཞེས་པའོ། །གོམ་པ་བསྐྱེད་དེ་ཞེས་བྱ་བ་ནི་གོམ་པ་ཆེར་འདོར་བའོ། །རྟུག་པ་ལ་དད་པ་ཞེས་བྱ་བ་ནི་ཁྱོད་རྟུག་པ་ཙམ་ལ་དད་པ་ཡིན་གྱི་སྦྱིན་པ་དང་མཆོད་པ་ལ་སོགས་པ་མ་ཡིན་ནོ་ཞེས་བྱ་བའི་ཐ་ཚིག་གོ །སྒྱིད་པ་གཉིས་སྐྲངས་སྐྲངས་སུ་ཞེས་བྱ་བ་ནི་སྐྲངས་པར་གྱུར་གྱི་བར་དུའོ། །བྲམ་ཟེ་གཙང་སྒྲ་ཅན་ཞེས་བྱ་བ་ནི་སྡེ་བ་སྦྱར་ཀློག་པ་སྟེ་ཆུང་མ་མ་བླངས་པ་ཞེས་བྱ་བའི་ཐ་ཚིག་གོ །ཞལ་ཏ་བྱེད་པ་ཞེས་བྱ་བ་ནི་ལས་བྱེད་པའོ། །རུང་བ་བྱེད་པ་ཞེས་བྱ་བ་ནི་ལྷ་འབངས་སམ་རྩེ་དགོད་དོ། །ལན་གཉིས་སམ་གསུམ་དུ་བསྐུལ་བར་བྱ་དྲན་པར་བྱ་བ་ནི་ཚིག་གི་བདག་ཉིད་ཀྱིས་དེ་ལན་གསུམ་པས་ལྷག་པར་བསྐུལ་བར་མི་བྱ་བའོ། །ལན་བཞི་ལན་ལྔ་ལན་དྲུག་གི་བར་དུ་ཞེས་བྱ་བ་ནི་སྔར་བསྐུལ་བ་ལན་གསུམ་བྱས་པའི་འོག་ཏུ་ཕྱོགས་སུ་ཅང་མི་སྨྲ་བར་བསྡད་པ་ཡང་ལན་གསུམ་བྱས་ཏེ་བསྐུལ་བ་དང༌། བསྡད་པ་དང་གཉིས་ཀ་ལ་སྤྱིར་ལན་དྲུག་ཏུ་བགྲང་བ་ཡིན་གྱི་ཕྱོགས་སུ་བསྡད་པ་འབའ་ཞིག་ལ་ལན་དྲུག་བྱ་བ་མ་ཡིན་ཏེ། བསྐུལ་བ་ལན་གསུམ་ལས་ལྷག་གམ་བསྡད་པ་ལན་གསུམ་ལས་ལྷག་པ་བྱས་ཏེ། གོས་གྲུབ་ན་སྤང་བའི་ལྟུང་བྱེད་དུ་འགྱུར་བའི་ཕྱིར་རོ། །ཕྱོགས་སུ་ཞེས་བྱ་བ་ལ། ཕྱོགས་གང་དུ་ཞེ་ན་དེའི་ཕྱིར་ཕྱོགས་བཞི་པོ་དེ་དག་ཏུ་ཞེས་བྱ་བ་གསུངས་ཏེ། དེ་དག་ཏུ་མི་དག་ཕལ་ཆེར་གནས་པ་ལས་དགོངས་སོ། །འབོད་གནས་ཞེས་བྱ་བ་ནི་ལས་འདོད་པའི་མི་དག་འབོད་པའི་གནས་སོ། །ཁྱིམ་གནས་ཞེས་བྱ་བ་ནི་འདུག་པའི་གནས་སོ། །ཧ་ཅང་མྱུར་བ་ཞེས་བྱ་བ་ནི་ཚིག་མྱུར་བའོ། །ཐོགས་པ་མེད་པ་ཞེས་བྱ་བ་ནི་མི་སྡོད་པར་རོ། །བརྗོད་ཅིང་ཞེས་བྱ་བ་ནི་ཞལ་ཏ་བྱེད་པས་སོ། །གཞན་གྱི་ཚིག་གི་སྐབས་ཞེས་བྱ་བ་ནི་སྐུལ་བར་བྱེད་པའི་དགེ་སློང་གིའོ། །དེའི་དོན་ཅིར་ཡང་མ་གྲུབ་ཀྱིས་ཞེས་བྱ་བ་ནི་འབྲས་བུ་ཅི་ཙམ་ཡང་མ་གྲུབ་ཀྱིས་ཞེས་བྱ་བའི་ཐ་ཚིག་གོ །ཤེས་པར་གྱིས་ཤིག་
ཅེས་བྱ་བ་ནི་རང་གི་རྫས་ཚོལ་ཅིག་ཅེས་བྱ་བའོ། །ཆོ་ག་ཞེས་བྱ་བ་ནི་རིས་པ་རྗེས་སུ་བསྒྲུབ་པ་ཞེས་བྱ་བའི་ཐ་ཚིག་གོ །དེའི་སེམས་བསྡུ་བཞེས་བྱ་བ་ནི་ཡོངས་སུ་དགའ་བའོ། །གོ་རིམས་དེ་ལྟ་བུས་མ་བྱས་པར་གང་ཅུང་ཟད་ལེན་ན་ཐམས་ཅད་དུ་ཉེས་བྱས་སུ་འགྱུར་རོ་ཞེས་བྱ་བ་ནི་རིན་རུང་བ་མ་ཡིན་པ་དག་ལེན་ན་ཉེས་བྱས་སུ་འགྱུར་བ་དང༌། མ་འདྲེས་པར་ཞལ་ཏ་བྱེད་པ་སྟོན་ན་ཉེས་བྱས་སུ་འགྱུར་བ་དང༌། ཕོ་ཉས་མ་སྨྲས་པ་བསྐུལ་བ་དང་དྲན་པར་བྱེད་ན་ཉེས་བྱས་སུ་འགྱུར་བ་དང༌། མ་ཐོབ་ན་སྦྱིན་བདག་ལ་སྒྲོགས་པར་མི་བྱེད་ན་ཉེས་བྱས་སུ་འགྱུར་བ་དང༌། བསྒྲགས་ནས་ཞལ་ཏ་བྱེད་པ་སྟོབས་པ་ན་སྦྱིན་བདག་ལ་བསྒྲགས་ཟིན་ཏོ་ཞས་སྤངས་པ་མི་སྨྲ་ན་ཉེས་བྱས་སུ་འགྱུར་བ་དང༌། སྦྱིན་པར་བྱེད་པའི་སེམས་བསྡུ་བ་རྗེས་སུ་བསྒྲུབ་པ་ཁས་མི་ལེན་པའི་ཞལ་ཏ་བྱེད་པ་ལས་གོས་ལེན་ན་ཉེས་བྱས་སུ་འགྱུར་རོ་ཞེས་བྱ་བའི་ཐ་ཚིག་གོ །མི་མ་ཡིན་པས་སྦྱིན་པར་བྱེད་ཅིང་ཞེས་བྱ་བ་ལ་སོགས་པའི་མུ་བཞི་པ་གཉིས་ཀྱི་གོ་རིམས་ནི་དང་པོ་དང་དབུས་དང་ཐ་མ་གསུམ་ཆར་མི་མ་ཡིན་པ་ནི་མུ་དང་པོའོ། །དང་པོ་དང་དབུས་གཉིས་མི་ཡིན་ལ་ཐ་མ་མི་མ་ཡིན་པ་ནི་མུ་གཉིས་པའོ། །དང་པོ་དང་དབུས་གཉིས་མི་ཡིན་ལ་ཐ་མ་མི་མ་ཡིན་པ་ནི་མུ་གཉིས་པའོ། །དང་པོ་དང་ཐ་མ་མི་མ་ཡིན་ལ་དབུས་མ་ཡིན་པ་ནི་མུ་གསུམ་པའོ། །དང་པོ་མི་ཡིན་ལ་དབུས་དང་ཐ་མ་མི་མ་ཡིན་པ་ནི་མུ་བཞི་པ་སྟེ་དེ་དག་ནི་མི་མ་ཡིན་པ་སྔོན་དུ་བཏང་བའི་མུ་བཞི་ཡིན་ནོ། །དེ་བཞིན་དུ་དང་པོ་དང་དབུས་མི་ཡིན་ལ་ཐ་མ་མི་མ་ཡིན་པ་མུ་དང་པོའོ། །དང་པོ་དང་ཐ་མ་མི་ཡིན་ལ་དབུས་མི་མ་ཡིན་པ་ནི་མུ་གཉིས་པའོ། །དབུས་དང་ཐ་མ་མི་ཡིན་ལ་དང་པོ་མི་མ་ཡིན་པ་ནི་མུ་གསུམ་པའོ། །དང་པོ་དང་དབུས་དང་ཐ་མ་གསུམ་ཆར་མི་མ་ཡིན་པ་ནི་མུ་བཞི་པ་སྟེ་གང་དག་ནི་མི་སྔོན་དུ་བཏང་བའི་མུ་བཞི་ཡིན་ནོ། །དང་པོ་དང་དབུས་དང་ཐ་མ་གསུམ་ཆར་མི་ཡིན་པ་ནི་སྤང་བའི་ལྟུང་བྱེད་གྱི་རྒྱུ་ཡིན་པས་མཇུག་ཏུ་བསྟན་ཏེ་ཉེས་པ་ལྗི་བའི་ཕྱིར་རོ། །སྐུར་པའི་སྤང་བ་སྟེ་བཅུ་པའི་ཚིག་རྣམ་པར་བཤད་པ་རྫོགས་སོ།། །།སྲིན་བལ་ཞེས་བྱ་བ་ནི་སྲིན་བལ་འབྱུང་བའི་སྲིན་བུ་ལས་བྱུང་བའོ། །མ་ལོག་ཅེས་བྱ་བ་ནི་སྦྱོར་བ་ལས་སོ། །མ་སྤངས་ཞེས་བྱ་བ་ནི་དངོས་གཞིའོ། །སོ་སོར་མ་སྤངས་ཞེས་བྱ་བ་ནི་མཇུག་གོ །གསར་པས་གསར་པ་ཞེས་བྱ་བ་ནི་དཔེར་ན་ཤིང་ཐོག་གསར་པ་
དང་ལོ་ཏོག་གསར་པ་ལྟ་བུའོ། །རྙེད་པས་གསར་པ་ཞེས་བྱ་བ་ནི། དཔེར་ན་རྒྱལ་སྲིད་གསར་པ་དང༌། གཞུང་གསར་པ་ལྟ་བུའོ། །གསར་པས་གསར་པ་ཡིན་པར་དགོངས་སོ་ཞེས་བྱ་བ་ནི་དཀོན་པའི་ཕྱིར་དང༌། སྲོག་ཆགས་གསོད་པས་སྐུར་པ་འདེབས་པའི་རྒྱུ་ཡིན་པའི་ཕྱིར་རོ། །ནང་ཚངས་ཅན་ཞེས་བྱ་བ་ནི་རས་བལ་ཅན་གྱི་རྣམ་པ་ལྟ་བུའོ། །བླིངས་པ་ཞེས་བྱ་བ་ནི་ཕྱིང་པའི་རྣམ་པ་ལྟ་བུའོ། །གཉིས་ཀ་ཡིན་པར་དགོངས་སོ། །ཞེས་བྱ་བ་ནི་གཉིས་ཀ་ཡང་དཀོན་པའི་ཕྱིར་རོ། །ཆུན་པོ་ཞེས་བྱ་བ་ནི་ཀེ་དུའོ། །མདའ་བ་ཞེས་བྱ་བ་ནི་སྒོ་ངའོ། །ཕུང་པོ་ཞེས་བྱ་བ་ནི་བཀྲམ་པའོ། །འབྱེད་པར་བྱེད་ཅེས་བྱ་བ་ནི་འགྲོལ་བར་བྱེད་པའོ། །འཇིག་པར་བྱེད་ཅེས་བྱ་བ་ནི་སེལ་བར་བྱེད་པའོ། །རྨེལ་བར་བྱེད་ཅེས་བྱ་བ་ནི་སྤུ་ནས་སེལ་བར་བྱེད་པའོ། །སྲིན་བལ་གྱི་སྤང་བ་སྟེ་བཅུ་གཅིག་པའི་ཚིག་རྣམ་པར་བཤད་པ་རྫོགས་སོ།། །།ནག་པོ་འབའ་ཞིག་ཅེས་བྱ་བ་ནི་ནག་པོ་ཉི་ཚེའོ། །རང་བཞིན་གྱིས་གནག་པ་ཞེས་བྱ་བ་ནི་རང་བཞིན་ཁོ་ནས་གནག་པ་གནག་དག་ཡིན་པའོ། །སྔོ་བས་གནག་པ་ཞེས་བྱ་བ་ནི་ཕྱིས་སྔོན་པོས་ཁ་བསྒྱུར་བ་གང་ཡིན་པའོ། །འདམ་ཁ་ཞེས་བྱ་བ་ནི་འདམ་རྫབ་གྱི་ས་ནག་གིས་ཁ་བསྒྱུར་བ་གང་ཡིན་པའོ། །ཁམ་པ་ཞེས་བྱ་བ་ནི་རང་བཞིན་གྱིས་ཁམ་པ་དང༌། གྲོ་བོ་དང་སྲེ་བོ་ལ་སོགས་པ་ནག་ནོག་ཅན་གང་ཡིན་པའོ། །བླིངས་པ་ཡིན་པར་དགོངས་སོ་ཞེས་བྱ་བ་ནི་དེ་ཆེས་བྱ་བ་དཀའ་བ་ཡིན་པའི་ཕྱིར་རོ། །བལ་ནག་པོ་འབའ་ཞིག་གི་སྤང་བ་སྟེ་བཅུ་གཉིས་པའི་ཚིག་རྣམ་པར་བཤད་པ་རྫོགས་སོ།། །།འཁོབ་བལ་ཞེས་བྱ་བ་ནི་མགོ་དང་རྐང་པ་དང་ལྟོ་ནས་སྐྱེས་པའི་བལ་དག་སྟེ་ཕལ་ཆེར་ས་ལ་རྒྱུ་བའི་ཕྱིར་ས་རྒྱུ་བ་ཞེས་བྱ་བའོ། །ནག་པོ་འབའ་ཞིག་མོད་པ་དང་རིན་མཉམ་པ་ལ་ལྟུང་བ་མེད་པ་ནི་བསླངས་པའི་ཕྱིར་དང་འདོད་པ་ཆེ་བ་ཉིད་མེད་པའི་ཕྱིར་རོ། །ཆ་གཉིས་སྲེ་བའི་སྤང་བ་སྟེ་བཅུ་གསུམ་པའི་ཚིག་རྣམ་པར་བཤད་པ་རྫོགས་སོ།། །།གྲང་བ་ཞེས་བྱ་བ་ནི་གྲང་བའི་རིག་པའོ། །རླུང་ཆེ་བ་ནི་རླུང་མང་བའོ། །སྟན་གྱིས་མི་ཐུབ་པ་ཞེས་བྱ་བ་ནི་སྟན་དུ་གདིང་བ་དང་བགོ་བ་དང་སྔས་དག་ཏུ་དགོས་པ་ཟད་པའི་ཕྱིར་རོ། །བལ་སྦྱིན་པར་བྱའོ་ཞེས་བྱ་བ་ནི་བསྐྱེད་པའི་ཕྱིར་དང་གསོ་བའི་ཕྱིར་རོ། །རལ་བ་ཞེས་
བྱ་བ་ནི་དུམ་བུར་གྱུར་པའོ། །རྡོལ་བ་ཞེས་བྱ་བ་ནི་བུ་གུ་དོད་པའོ། །དགེ་འདུན་གྱིས་གནང་བ་ཞེས་བྱ་བ་ནི་དགེ་འདུན་གྱིས་ཡོངས་སུ་སྤངས་པའོ། །འདིར་གསོལ་བ་ལ་སོགས་པ་ལ་ལག་གི་གླ་སྨོས་པ་ནི་དགེ་འདུན་ལ་གཅིས་པ་ཡིན་པའི་ཕྱིར་ངེས་པ་ཡིན་པར་རིག་པར་བྱའོ། །གཉིས་པ་རྩམ་ལ་ཉེས་བྱས་སུ་འགྱུར་ལ་ཞེས་བྱ་བ་ནི་སྔ་མ་བརྩམས་པ་ཉིད་ན་ཕྱི་མ་རྩོམ་པ་ནི་སྔ་མ་བྱས་ཟིན་ནས་ཕྱི་མ་རྩོམ་པ་དང་འདྲ་བའི་ཕྱིར་རོ། །བྱས་ཟིན་ན་ཡང་ཉེས་བྱས་སུ་འགྱུར་རོ་ཞེས་བྱ་བ་ནི་ཕྱིས་བརྩམས་པ་ཤོས་སྔར་ཟིན་ན་ཡང་སྦྱོར་བའི་ལྟུང་བ་ཉིད་ཡིན་པའི་ཕྱིར་རོ། །སྔ་མ་ལ་ལྟུང་བ་མེད་དོ་ཞེས་བྱ་བ་ནི་གཞན་མ་བྱས་པར་དེ་བརྩམས་པའི་ཕྱིར་རོ། །སྔ་མ་ཟིན་པར་བྱེད་ཅེས་བྱ་བ་ནི་བརྩམས་པའོ། །བྱས་ཟིན་ན་སྤང་བའི་ལྟུང་བྱེད་དུ་འགྱུར་རོ་ཞེས་བྱ་བ་ནི་སྟན་མའོ། །ལོ་གང་ལ་སྟན་བྱས་པའི་ལོ་དེ་ཉིད་ལ་སྟན་གཉིས་པ་ཡང་བྱས་ནས་ཞེས་བྱ་བ་ནི་སྔ་ཕྱིར་བརྩམས་ཏེ་ངུས་གཅིག་ཏུ་ཟིན་པར་བྱས་ནས་སོ། །མ་ཟིན་པ་གཏོང་བ་ཞེས་བྱ་བ་ནི་ཕྱེད་ཟིན་པ་མེད་པས་དེ་ལ་དངོས་གཞི་མེད་དོ། །ལོ་དྲུག་པ་ལ་བྱེད་ན་ལྟུང་བ་མེད་དོ་ཞེས་བྱ་བ་ནི་ལོ་དྲུག་གི་འོག་ཏུ་ཕྱེད་ན་སྟེ། ལོ་དྲུག་ཚུན་ཆད་དུ་བཅང་བར་བྱས་ཟིན་པའི་ཕྱིར་རོ། །འགྲེས་ལྔ་པའི་བསྡུ་བ་ནི་ཕྱི་མ་ཟིན་པར་བྱེད་པ་དང༌། སྔ་མ་ཟིན་པར་བྱེད་པ་དང༌། གཉི་ག་ཟིན་པར་བྱེད་པ་དང༌། གཉི་ག་བརྩམས་ཏེ་གཏོང་བ་དང༌། ལོ་དྲུག་གི་འོག་ཏུ་བྱེད་པ་ལ་ལྟུང་བ་མེད་པའོ། །ལོ་དྲུག་ཏུ་བཅང་བའི་སྤང་བ་སྟེ་བཅུ་བཞི་པའི་ཚིག་རྣམ་པར་བཤད་པ་རྫོགས་སོ།། །།གདིང་བ་ཞེས་བྱ་བ་ནི་སོ་སོར་གདིང་བ་དྲས་པ་དག་གོ །ཕུལ་ལོ་ཞེས་བྱ་བ་ནི་བྱིན་པའོ། །རྫས་ལས་བྱུང་བའི་ཞེས་བྱ་བ་ནི་གཙུག་ལག་ཁང་སྟེ་རྫས་ལས་བྱུང་བའི་འབྲས་བུ་ཡིན་པའི་ཕྱིར་རོ། །བསོད་སྙོམས་མངོན་པར་བསྒྲུབས་སོ་ཞེས་བྱ་བ་ནི་མནོས་པའོ། །རྡོལ་བ་ཞེས་བྱ་བ་ནི་བུ་གུ་འབྱུང་བའོ། །རལ་བ་ཞེས་བྱ་བ་ནི་དུམ་བུར་གྱུར་པའོ། །བཀྲམ་པ་ཞེས་བྱ་བ་ནི་ཆལ་བར་བཀོད་པའོ། །ཨེ་མ་ཞེས་བྱ་བ་ནི་མ་མཉེས་པའི་ཚིག་གོ །སྨད་ནས་ཞེས་བྱ་བ་ནི་མི་རིགས་པར་རོ། །དྲོད་མི་ཤེས་པ་ཞེས་བྱ་བ་ནི་ཚོད་མི་ཤེས་པའོ། །སོ་སོར་མི་རྟོག་པ་ཞེས་བྱ་བ་ནི་མངོན་པར་མི་རྟོག་པར་རོ། །དྲོད་རན་པར་ཡོངས་སུ་ལོངས་སྤྱད་པ་ཞེས་བྱ་བ་ནི་ཡོངས་སུ་གཞལ་ཞིང་ལོངས་སྤྱད་པའོ། །སྤང་ཞིང་ཡོངས་སུ་ལོངས་
སྤྱད་པ་ཞེས་བྱ་བ་ནི་བརྒྱ་ལ་བརྒྱ་ལམ་ན་ལོངས་སྤྱོད་པའོ། །དུས་སུ་ཡོངས་སུ་ལོངས་སྤྱོད་པ་ཞེས་བྱ་བ་ནི་དགོས་པའི་དུས་སུ་ལོངས་སྤྱོད་པའོ། །བརྟག་ཅིང་ཡོངས་སུ་སྤྱད་པ་ཞེས་བྱ་བ་ནི་བྱ་བ་བརྟགས་ཏེ་ཡོངས་སུ་ལོངས་སྤྱད་པའོ། །ཁད་ཀྱིས་ཡོངས་སུ་ལོངས་སྤྱོད་ན་ཞེས་བྱ་བ་ནི་ཁད་ཀྱིས་ཁད་ཀྱིས་ལྟོས་པ་དང་བཅས་པར་ཡོངས་སུ་ལོངས་སྤྱོད་ནའོ། །ཁ་དོག་མི་སྡུག་པར་བྱ་བའི་ཕྱིར་ཞེས་བྱ་བ་ནི་ཁ་དོག་མི་སྡུག་པར་སྒྲུབ་པའི་ཕྱིར་རོ། །ཅིའི་ཕྱིར་ཁ་དོག་མི་སྡུག་པར་བྱ་ཞེ་ན། དེའི་ཕྱིར་སྲ་བར་བྱ་བའི་ཕྱིར་རོ་ཞེས་བྱ་བ་གསུངས་ཏེ་གཉིས་པས་སྲ་བར་བྱ་བའི་ཕྱིར་ཞེས་བྱ་བ་གསུངས་སོ། །སྤྱོད་པར་བྱེད་ན་ཞེས་བྱ་བ་ནི་སོ་སོར་གདིང་བ་ཉིད་དུ་སྤྱོད་པར་བྱེད་ནའོ། །སོ་སོར་གདིང་བ་ཞེས་བྱ་བ་ནི་སྟན་འོག་མ་སོ་སོར་ཐམས་ཅད་ཀྱི་སྟེང་དུ་གདིང་བར་བྱ་བ་ཡིན་པའི་ཕྱིར་རོ། །མཐོ་གང་གི་སྤང་བ་སྟེ་བཅོ་ལྔ་པའི་ཚིག་རྣམ་པར་བཤད་པ་རྫོགས་སོ།། །།རྔ་མོའི་རྒྱབ་འདྲ་བ་ཞེས་བྱ་བ་ལ། འདྲ་བ་ཞེས་བྱ་བའི་སྒྲ་ནི་དཔེ་བསྟན་ཏེ། དེས་ན་བལ་ཡུལ་ནི་རྔ་མོའི་རྒྱབ་འདྲ་བར་མི་མཉམ་པ་ཡིན་ནོ་ཞེས་བྱ་བའི་ཐ་ཚིག་གོ །ཁུར་ཞེས་བྱ་བ་ནི་རྒྱབ་ཁལ་ལོ། །ཐོ་འཚམས་པ་ཞེས་བྱ་བ་ནི་ཞེས་འདེབས་པའོ། །རྡུལ་ཕྲ་རབ་ཅེས་བྱ་བ་ནི་རྫས་བརྒྱད་སྐྱེ་བའི་ཆོས་འདུས་པ་སྟེ། ཉི་ཟེར་གྱི་རྡུལ་གྱི་བཞི་བཅུ་རྩ་དགུའི་ཆ་གཅིག་ལ་རྡུལ་ཕྲ་རབ་གཅིག་གོ །འདུལ་བ་ལས་དྲུག་འགྱུར་དུ་བསྒྲེ་བ་ནི་མར་འབྲི་བའི་དུས་ཀྱི་ཚེ་མི་ཉམ་ཆུང་བའི་སོར་རྣམ་པར་གཞག་པའི་ཕྱིར་རོ། །ཆོས་མངོན་པ་ལས་བདུན་དུ་བསྒྲེ་བ་ནི་བསྐལ་བ་དང་པོའི་མི་ཉམས་ཆེ་བའི་སོར་རྣམ་པར་གཞག་པའི་ཕྱིར་རོ། །ཞྭ་ལ་སོགས་པའི་དོན་དུ་དེ་ཙམ་དག་ཁྱེར་བ་ལ་ལྟུང་བ་མེད་པའི་ཕྱིར་རོ། །བལ་ཐོགས་པའི་སྤང་བ་སྟེ་བཅུ་དྲུག་པའི་ཚིག་རྣམ་པར་བཤད་པ་རྫོགས་སོ།། །།ཀ་ཀ་ནི་ཞེས་བྱ་བ་ནི་མ་ཤ་ཀའི་གཞི་ཆ་གཅིག་སྟེ་འགྲོན་བུ་ཉི་ཤུའི་རིན་གྱི་མིང་ཡིན་ནོ། །དང་ལ་ཁ་ཞེས་བྱ་བ་ནི་རྫིང་བུའི་ཁ་སྟེ་ཝ་འབབ་པའི་གནས་སོ། །བཙོ་བླག་མཁན་གྱི་ལག་པ་ལྟར་དམར་བ་ཞེས་བྱ་བ་ནི་རང་གི་ཚོན་རྩིའི་ལས་བྱེད་པ་གང་ཡིན་པའོ། །ལྟུང་བ་རྣམ་པར་གཞག་པའི་ཚིག་གི་དོན་ནི་འཁྲུར་འཇུག་པའི་སྤང་བའི་སྐབས་སུ་བཤད་པ་བཞིན་དུ་རིག་པར་བྱའོ། །བྱེ་བྲག་ཏུ་ན་སྔར་གོས་
རྙིང་པ་ཞེས་བྱ་བའི་གནས་སུ་འདིར་ལུག་བལ་དག་ཅེས་སྨོས་པར་བྱའོ། །སྔར་གྱི་འཆག་ཏུ་འཇུག་ན་ཞེས་བྱ་བ་སྨོས་པའི་གནས་སུ་འདིར་རྨེལ་དུ་འཇུག་ན་ཞེས་སྨོས་པར་བྱའོ། །བལ་རྨེལ་དུ་འཇུག་པའི་སྤང་བ་སྟེ་བཅུ་བདུན་པའི་ཚིག་རྣམ་པར་བཤད་པར་རྫོགས་སོ།། །།གྲོང་དཔོན་ཞེས་བྱ་བ་ནི་གྲོང་གི་དཔོན་པོའོ། །སྔོན་གྱི་གདུགས་རྣམས་ཀྱིས་ཞེས་བྱ་བ་ནི་དེང་གི་ཉི་མ་ཉིད་སེལ་བར་བྱེད་དོ། །ཆེས་སྔ་བ་ཞིག་ན་ཞེས་བྱ་བ་ནི་འདས་མ་ཐག་པའི་ཉི་མ་སེལ་བར་བྱེད་དོ། །མངོན་མཚན་ཅན་ཞེས་བྱ་བ་ནི་རྫས་གྲགས་པའོ། །རུང་ཞེས་བྱ་བ་ནི་རིགས་པའོ། །གསེར་ཞེས་བྱ་བ་ནི་དངུལ་དང་དེ་གཉིས་ཀའི་རྫས་མཚན་མས་བཏབ་པ་དག་གིས་བསྡུས་པའོ། །བདག་གིར་བྱེད་ཅེས་བྱ་བ་ནི་བདག་གི་བ་ཉིད་དུ་འཛིན་པར་བྱེད་པའོ། །བརྡ་སྤྲོད་པའོ་ཞེས་བྱ་བ་ནི་སྨྲ་བའོ། །སྐུར་བ་འདེབས་པར་མི་བགྱིད་ཅིང་ཞེས་བྱ་བ་ནི་སླར་སྐུར་བ་འདེབས་པར་མི་བགྱིད་ཅིང་ངོ༌། །ཧ་ཅང་ཐལ་བར་མི་བགྱིད་པ་ཞེས་བྱ་བ་ནི་བཅོམ་ལྡན་འདས་ལ་ཡང་དག་པ་མ་ཡིན་པར་སྒྲོ་འདོགས་པས་ཧ་ཅང་ཐལ་བར་ཡང་མི་བགྱིད་དོ། །གསུངས་པའི་རྗེས་སུ་སྨྲ་བ་ཞེས་བྱ་བ་ནི་བཅོམ་ལྡན་འདས་ཀྱིས་གསུངས་པ་ཁོ་ནའི་རྗེས་སུ་སྨྲ་བའོ། །ཆོས་སྨྲ་བ་ཞེས་བྱ་བ་ནི་བཅོམ་ལྡན་འདས་ཀྱིས་མངོན་སུམ་དུ་མ་གསུངས་ཀྱང་དོན་གྱིས་གོ་བ་ཉིད་ཀྱིས་ཆོས་སྨྲ་བའོ། །ཆོས་ཀྱི་རྗེས་སུ་མཐུན་པའི་ཆོས་བརྡ་སྤྲོད་པར་བགྱིད་པ་ཞེས་བྱ་བ་ནི་ལམ་གྱི་ཆོས་ཀྱི་རྗེས་སུ་མཐུན་པའི་ཆོས་སྟོན་པར་བགྱིད་པའོ། །གཞན་ལས་ཞེས་བྱ་བ་ནི་ཕྱིར་རྒོལ་བ་ལས་སོ། །ཆོས་དང་མཐུན་པས་ཞེས་བྱ་བ་ནི་རིགས་པ་ཡང་དག་པས་སོ། །སྨད་པའི་གནས་ལྟ་བུའི་ཆོས་ཞེས་བྱ་བ་ནི་སྨད་ཅིང་ཕམ་པར་འགྱུར་བའི་ཆོས་ཞེས་བྱ་བའི་ཐ་ཚིག་གོ །མི་འཆི་བ་ལགས་སམ་ཞེས་བྱ་བ་ནི་མི་འབྱུང་བ་ཡིན་ནམ་ཞེས་བྱ་བའོ། །དགེ་སྦྱོང་གི་ཆོས་མ་ཡིན་པ་ཞེས་བྱ་བ་ནི་ཁྱིམ་པའི་ཡོ་བྱད་དུ་རུང་བའི་རབ་ཏུ་བྱུང་བའི་ཆོས་མ་ཡིན་པའི་ཕྱིར་རོ། །ཤཱཀྱའི་སྲས་ཀྱི་ཆོས་མ་ཡིན་པ་ཞེས་བྱ་བ་ནི་བཅོམ་ལྡན་འདས་ཀྱིས་བཀག་པའི་ཕྱིར་རོ། །ལན་གཉིས་ལན་གསུམ་གྱི་བར་དུ་བརྗོད་པར་བྱ་སྟེ་ཞེས་བྱ་བ་ནི་རྒལ་བ་ལས་ཐ་བརྡ་བར་བྱ་བའི་ཕྱིར་མ་ཡིན་གྱི་དོན་ཡང་དག་པ་དེ་ཉིད་བསྟན་པའི་ཕྱིར་ཞེས་བྱ་བའི་ཐ་ཚིག་གོ།།
འདོད་པའི་ཡོན་ཏན་ལྔ་པོ་དག་ཀྱང་རུང་བ་ཁོ་ན་ལགས་སོ་ཞེས་བྱ་བ་ནི་རྒྱུད་གྱུར་པ་ཡིན་པའི་ཕྱིར་རོ་ཞེས་བྱ་བར་བསམ་མོ། །ཕུང་པོ་གཅིག་ཏུ་བྱེད་ཅེས་བྱ་བ་ནི་ཚོགས་གཅིག་ཏུ་བྱེད་པའོ། །ཕུང་པོ་གཉིས་སུ་བྱེད་ཅེས་བྱ་བ་ནི་ཚོགས་གཉིས་སུ་བྱེད་པའོ། །མ་ལོག་མ་སྤངས་སོ་སོར་མ་སྤངས་ཞེས་བྱ་བ་ནི་ཁྱིམ་པའི་བྱ་བ་བདག་གིས་སྦྱོར་བ་དང་དངོས་དང་མཇུག་དག་ལས་སོ། །གསེར་ཞེས་བྱ་བ་ནི་མངོན་མཚན་ཅན་དུ་མ་བྱས་པའི་གསེར་ཉིད་དོ། །དངུལ་ཞེས་བྱ་བ་ནི་ཡང་མངོན་མཚན་ཅན་དུ་མ་བྱས་པའི་དངུལ་ཉིད་དོ། །དབྱིག་ཅེས་བྱ་བ་ནི་གསེར་རམ་དངུལ་ལས་མངོན་མཚན་ཅན་དུ་བྱས་པའི་རྫས་སོ། །འཐོབ་པར་འགྱུར་བའི་ཕྱོགས་སུ་ཞེས་བྱ་བ་ནི་སྨྲ་བ་པོའི་མངོན་སུམ་དུ་སྟེ་ལག་ཏུ་འཐོབ་པའམ་ལག་ཏུ་བླང་དུ་རུང་བའི་ཕྱོགས་སུའོ། །དེ་ལ་རང་གིས་བསྒོ་བ་ཉིད་ཡོད་པས་དངོས་གཞིར་འགྱུར་རོ། །འདི་ཞེས་བྱ་བ་ནི་མངོན་སུམ་དུ་སྣང་བའོ། །དེ་ཞེས་བྱ་བ་ནི་མངོན་སུམ་དུ་མི་སྣང་བའོ། །འཐོབ་པར་འགྱུར་བ་མ་ཡིན་པའི་ཕྱོགས་སུ་ཞེས་བྱ་བ་ནི་སྨྲ་བ་པོའི་མངོན་སུམ་མ་ཡིན་པར་ཏེ་ལག་ཏུ་འཐོབ་པར་མི་རུང་བའམ། ལག་ཏུ་བླང་དུ་མི་རུང་བའི་ཕྱོགས་སུའོ། །དེ་ལ་རང་གིས་བསྒོ་བ་ཉིད་མེད་པས་ཉེས་བྱས་སུ་འགྱུར་རོ། །བརྡུངས་པ་ཞེས་བྱ་བ་ནི་རྒྱན་དང་སྣོད་སྤྱད་ལ་སོགས་པར་གནས་པའོ། །མངོན་མཚན་ཅན་ཞེས་བྱ་བ་ནི་ཐ་སྙད་དུ་བྱ་བའི་མཚན་མ་ཅན་ཏེ་ཟླུམ་པོ་ལ་སོགས་པའི་དབྱིབས་ལ་མི་ལ་སོགས་པའི་རྟགས་བྱས་པའོ། །ནོར་བུ་དང་མུ་ཏིག་དང་བཻཌཱུ་ཪྻ་དང་ཤི་ཀ་ཤི་ལ་དང་བྱི་རུ་དང་དངུལ་དང་གསེར་དང་རྡོའི་སྙིང་པོ་དང༌། སྦུག་དང་དམར་པོ་དང་གཡས་སུ་འཁྱལ་དང་སངས་རྒྱས་ཀྱི་སྐུ་གདུང་ལ་སོགས་པའི་རིན་པོ་ཆེའི་འོ་ཞེས་གསུངས་པ་དག་ཀྱང་བསྡུས་པ་ཡིན་ནོ། །ཡུལ་གྱི་ཐ་སྙད་ཅན་ཞེས་བྱ་བ་ནི་ཡུལ་གཞན་གྱི་ཐ་སྙད་ཅན་ཏེ་ཡུལ་འདིར་ཐ་སྙད་གདགས་སུ་ནི་མི་རུང་བའོ། །དེ་ནི་གས་པ་དང་ཆག་པ་དང་དུམ་བུ་དང་ཚིག་པ་དང༌། སྔོན་མ་སྤྱད་པ་དང་མ་བྱས་པ་དང་མཚན་དང་མི་ལྡན་པ་དང་བཅོས་པའོ། །དེ་དག་ལ་མངོན་མཚན་གྱིས་ཉོ་ཚོང་ལ་སོགས་པ་བྱར་མི་རུང་ཡང༌། གསེར་དངུལ་ལ་སོགས་པའི་ངོ་བོ་ཉིད་ཡིན་པ་དེ་ལས་རེག་གམ་རེག་ཏུ་བཅུག་ན་ཅིའི་ཕྱིར་དངོས་གཞིར་མི་འགྱུར་ཞེ་ན། དེ་ནི་གསེར་དངུལ་ལ་སོགས་པའི་རང་བཞིན་
གྱིས་རིན་པོ་ཆེར་གཞག་པ་མ་ཡིན་གྱི་མངོན་མཚན་བཏབ་པའི་སྒོ་ནས་རིན་པོ་ཆེར་གཞག་པ་ཡིན་ནོ། །མངོན་མཚན་ཉམས་ཏེ་ཐ་སྙད་གདགས་སུ་མི་རུང་བའི་ཕྱིར་དེ་ཉིད་ཀྱིས་རིན་པོ་ཆེ་ཉམས་པ་ཡིན་པས་དེའི་ཕྱིར་ན་སྨད་དོ། །རྣོ་ལྕགས་ཞེས་བྱ་བ་ནི་ལྕགས་བཟང་པོའི་རིགས་སོ། །ཁྲོ་ཆུ་ཞེས་བྱ་བ་ནི་མེ་ལོང་གི་རྒྱུའི་ལྕགས་སོ། །འདོད་པ་ཞེས་བྱ་བ་ནི་འགྲོ་བར་ཆས་སོ། །འདི་ལ་འགྱོད་པར་མི་བྱའོ་ཞེས་བྱ་བ་ནི་རུང་བར་བྱ་བ་བདག་གིར་བྱེད་པ་གཅད་པར་བྱ་བའི་ཕྱིར་དང༌། མི་རུང་བ་ལས་བདག་གིར་བྱ་བ་མི་སྐྱེ་བའི་ཕྱིར་རོ། །དང་པ་ཅན་ཞེས་བྱ་བ་ནི་དད་པ་དང་བརྟན་པ་དང་ལྡན་པའོ། །གསེར་དངུལ་ལ་རེག་པའི་སྤང་བ་སྟེ་བཅོ་བརྒྱད་པའི་ཚིག་རྣམ་པར་བཤད་པ་རྫོགས་སོ།། །།ཤེས་པ་ཅན་ཞེས་བྱ་བ་ནི་མུ་སྟེགས་གཅེར་བུ་བ་སྟེ། རྩིས་ཀྱི་ཤེས་པ་ཡོད་པའི་ཕྱིར་རོ། །ཅུང་ཟད་དམིགས་པས་ཀྱང་ཞེས་བྱ་བ་ནི་ཁ་དོག་དང་ཚད་དང་དབྱིངས་ལ་སོགས་པ་མིག་དང་རྣ་བ་ལ་སོགས་པས་ཤེས་པའོ། །ཅུང་ཟད་རྟོག་གེས་ཀྱང་ཤེས་བྱ་བ་ནི་རྩིས་ཀྱིས་བྱས་པའི་རྟོག་པས་ཤེས་པའོ། །ནགས་ཀྱི་འབྲས་བུ་ཞེས་བྱ་བ་ནི་ཤིང་ཏོག་གོ །སློང་ཕོར་ཞེས་བྱ་བ་ནི་གཅེར་བུ་པའི་ལྷུང་བཟེད་ཀྱི་མིང་ངོ༌། །ལ་བ་སྲིན་བུའི་མདོག་ལྟ་བུ་ཞེས་བྱ་བ་ནི་སྲིན་བུའི་མདོག་དམར་པོ་བཙོས་པ་དག་གིས་ཁ་བསྒྱུར་བའི་ལ་དམར་ཞེས་བྱ་བའི་ཐ་ཚིག་གོ །ཁ་ཅིག་ན་རེ་སྲིན་བུ་ནག་པོའི་མདོག་ལྟ་བུ་ཞེས་ཀྱང་ཟེར་རོ། །མགོ་ཟློག་སྟེ་ཉལ་བ་ཞེས་བྱ་བ་ནི་ཁས་བུབ་ཏུ་ཉལ་བའོ། །ཁ་ཅིག་ན་རེ་རོ་ཞེས་ཟེར་རོ། །ཚུལ་ཁྲིམས་འཚལ་བ་ཀུན་དུ་སྤྱོད་དོ་ཞེས་བྱ་བ་ནི་གཅེར་བུ་ལས་འདས་པའོ། །ཁྱོད་ཀྱི་སྟོན་པ་ཞེས་བྱ་བ་ནི་འདྲོ་བ་སྐྱོང་བའི་བུ་རྫོགས་བྱེད་དོ། །ནུར་རྩི་ཞེས་བྱ་བ་ནི་ཆང་གི་ཚིགས་མའོ། །ལ་བ་རྩུབ་པོ་ཞེས་བྱ་བ་ནི་ལ་བ་སྦོམ་པོ་རྩུབ་པའོ། །གསོན་པས་ཀྱང་མི་དགའ་བ་ཡིན་ནོ་ཞེས་བྱ་བ་ནི་གསོན་པ་ཙམ་གྱིས་ཀྱང་མི་དགའ་བར་འགྱུར་རོ་ཞེས་བྱ་བའི་ཐ་ཚིག་གོ །ཟོང་ཞེས་བྱ་བ་ནི་ན་ར་བ་བཞིའི་རིན་ཐང་ངོ༌། །ཁྲག་གི་ཕྱིས་བུ་ཞེས་བྱ་བ་ནི་ཁྲག་སྲུང་ངོ༌། །གནས་ནས་དབྱུང་བ་ཞེས་བྱ་བ་ནི་སྤང་བའོ། །ཚུལ་ཤིང་ཡང་འབྱུང་བར་ཞེས་བྱ་བ་ནི་བགྲང་བའི་དོན་གྱི་ཐུར་མ་ཡང་དོར་བར་བྱའོ། །སྤང་ལེབ་ཁྲིའུ་ཡང་བསྒྱུར་བར་བྱ་ཞེས་བྱ་བ་ནི་སྟན་གནས་ནས་གདོན་པར་བྱ་བའོ། །སློང་ཕོར་ཡང་ཁས་
དབུབ་པར་བྱ་བ་ནི་ཁྲིམས་སུ་བཅའ་བས་ལོངས་སྤྱོད་ཉམས་པར་བྱ་ཞིང་ཟས་ཀྱི་སྣོད་ཀྱང་ཉམས་པར་བྱེད་པའོ། །ཁར་བ་ཡང་དོར་བར་བྱ་ཞེས་བྱ་བ་ནི་ཁར་བ་གནས་ནས་ཕྱི་རོལ་དུ་དོར་བར་བྱ་བའོ། །བཀའ་མཉན་པར་ཟད་ཀྱི་ཞེས་བྱ་བ་ནི་འདའ་བར་མི་བྱ་བའོ། །མི་གཡོ་སྟེ་ཞེས་བྱ་བ་ནི་མི་འགལ་བའོ། །བཞི་ལྟབ་ཏུ་བལྟ་བ་སྟེ་ཞེས་བྱ་བ་ནི་བཞི་རིམ་དུའོ། །ཤུགས་ཀྱིས་ཞེས་བྱ་བ་ནི་སྟོབས་ཀྱི་ཤུགས་ཀྱིས་སོ། །དེ་ནི་རི་ཞིག་བྱུང་བ་ཡིན་གྱི་ཞེས་བྱ་བ་ནི་ལ་བ་རྩུབ་པོས་ལ་བ་བཟང་པོ་བསྒྲུབ་པས་སྐྱེད་བསྒྲུབ་པའི་ཕྱིར་རོ། །ཀུན་དུ་སྦྱོར་བ་བྱེད་ཅེས་བྱ་བ་ནི་ཡུལ་གཞན་དུ་འདོད་པར་བྱེད་པའོ། །རབ་ཏུ་སྦྱོར་བར་བྱེད་ཅེས་བྱ་བ་ནི་དུས་དང་ཡུལ་ལ་ལྟོས་པར་བསྐྱེད་པའི་ཕྱིར་གཏོང་བར་བྱེད་པའོ། །བུན་འགྱེད་པར་བྱེད་ཅེས་བྱ་བ་ནི་རྙིང་པས་གསར་སྐྱེད་དང་བཅས་པ་སྤེལ་བར་བྱེད་པའོ། །སྐྱེད་འགྱེད་པར་བྱེད་ཅེས་བྱ་བ་ནི་སྐྱེད་པའི་ཕྱིར་རྗེ་བར་བྱེད་པའོ།། བྱས་པ་ཞེས་བྱ་བ་ནི་མངོན་མཚན་ཅན་དུ་བྱས་པའོ། །མ་བྱས་པ་ཞེས་བྱ་བ་ནི་མངོན་མཚན་ཅན་དུ་མ་བྱས་པའོ། །ཀུན་དུ་རྩོམ་པར་བྱེད་ཅེས་བྱ་བ་ནི་གཞན་དང་སྐད་སྦྱོར་བ་ལ་སོགས་པ་བྱེད་པའོ། །ཡུལ་ཚོལ་བར་བྱེད་ཅེས་བྱ་བ་ནི་ཡུལ་གང་དུ་གཏང་བར་བྱ་ཞེས་སོ། །ཤིང་རྟ་སོགས་པར་བྱེད་ཅེས་བྱ་བ་ནི་ཤིང་རྟ་སྟ་གོན་བྱེད་པའོ། །བརྒྱད་ཤས་ཞེས་བྱ་བ་ནི་གང་དུ་བརྒྱད་བཏང་ན་ཟླ་བ་གཅིག་གིས་སྐྱེད་བརྒྱད་ལེན་པ་སྟེ་ལྷག་མ་རྣམས་ལ་ཡང་དེ་བཞིན་དུ་ཤེས་པར་བྱའོ། །ནས་དང་འབྲུ་རྙིང་པ་གསར་ཕྱེད་དང་ཉིས་སྡེའི་ཕྱིར་གཏོང་བ་ཞེས་བྱ་བ་ནི་རྙིང་ཁལ་གཅིག་བཏང་ན་གསར་ཁལ་ཕྱེད་དང་གཉིས་ལེན་པ་ལ་སོགས་པ་ལྟ་བུའོ། །དུང་གི་ཚོགས་ཀྱི་ཕྱིར་ནོར་བུའི་ཚོགས་གཏོང་བར་བྱེད་པ་ཞེས་བྱ་བ་ནི་དུང་བཅུ་ལ་སོགས་པའི་ཚོགས་ཐོབ་པར་བྱ་བའི་ཕྱིར་ནོར་བུ་གཅིག་གམ་གཉིས་སམ་གསུམ་ལ་སོགས་པའི་ཚོགས་གཏོང་བར་བྱེད་པ་སྟེ་ལྷག་མ་རྣམས་ལ་ཡང་དེ་བཞིན་དུ་ཤེས་པར་བྱའོ། །མངོན་མཚན་ཅན་གྱི་སྤྱོད་པ་ནི་སྦྱོར་བ་ལ་སོགས་པས་རྙེད་པ་སྒྲུབ་པའོ། །གཞལ་བླུགས་ཞེས་བྱ་བ་ནི་སྲང་དང་བྲེའོ། །རྡིབ་ཅེས་བྱ་བ་ནི་ཞིག་པའོ། །མི་ཟད་པ་ཞེས་བྱ་བ་ནི་ནམ་ཡང་ཟད་པར་མི་འགྱུར་བའི་ཟོང་ངོ༌། །མཐུ་དང་ལྡན་པ་ལ་བརྟེན་ཞེས་བྱ་བ་ནི་འཁྲས་བརྩན་པོ་རྒྱབ་རྟེན་
འཆའ་བའོ། །དམ་རྒྱ་ཞེས་བྱ་བ་ནི་ཁྲིམས་སུ་བྱ་བའོ། །མངོན་མཚན་ཅན་གྱི་སྤང་བ་སྟེ་བཅུ་དགུ་པའི་ཚིག་རྣམ་པར་བཤད་པར་རྫོགས་སོ།། །།ཉོ་ཚོང་ཞེས་བྱ་བ་ནི་ཉོས་ཏེ་འཚོང་བའོ། །དེ་གཉིས་ཀྱི་སྔ་མ་ལས་བྱེ་བྲག་ཏུ་གྱུར་པ་ཡིན་ནོ། །ལེན་པར་བྱེད་ཅེས་བྱ་བ་ནི་གཞན་ནས་ལེན་པར་བྱེད་པའོ། །གཏོང་བར་བྱེད་ཅེས་བྱ་བ་ནི་འདི་ནས་གཏོང་བར་བྱེད་པའོ། །ཡུལ་གཞན་གྱི་སྦྱོར་བར་ཤེས་པར་བྱ་བ་ནི་ཡུལ་གཞན་གྱི་ཐ་སྙད་ཀྱིས་སོ། །སྔ་མའི་རྒྱུད་ཅེས་བྱ་བ་ནི་སྔར་བསྐྱིས་པའོ། །བྱང་ལམ་པ་ཞེས་བྱ་བ་ནི་བྱང་ལམ་ནས་འོངས་པའོ། །མཆོད་སྟོན་གྱི་ཡོ་བྱད་ཅེས་བྱ་བ་ནི་འབྲས་ཐུག་པོ་ཆེ་ལ་སོགས་པ་ཡོ་བྱད་དག་གོ །ཉོ་ཚོང་བྱེད་པའི་སྤང་བ་སྟེ་ཉི་ཤུ་པའི་ཚིག་རྣམ་པར་བཤད་པ་རྫོགས་སོ།། །།དེ་ནི་རེ་ཞིག་བྱུང་བ་ཡིན་གྱི་ཞེས་བྱ་བའི་ལྷུང་བཟེད་ལྷག་པ་བསྒྲུབ་པའི་ཕྱིར་སྦྱོར་བ་ཡིན་པའི་ཕྱིར་རོ། །བསླབ་པའི་གཞི་འཆའ་བར་ནི་མི་མཛད་དོ་ཞེས་བྱ་བ་ནི་དངོས་ཁོ་ནར་ལྷུང་བཟེད་ལྷག་མ་ཉེ་བར་མ་བཞག་པའི་ཕྱིར་རོ། །དགེ་སློང་གིས་ཚེས་ལ་ལྷུང་བཟེད་རྙེད་ན་ཞེས་བྱ་བ་ལ་སོགས་པ་རྣམ་གྲངས་དང་པོར་ནི་ལྷུང་བཟེད་ལྷག་མ་གཅིག་འཆང་བ་བསྟན་ཏོ། །དགེ་སློང་གིས་ཚེས་ལ་ལྷུང་བཟེད་རྙེད་ན་ཞེས་བྱ་བ་ལ་སོགས་པ་རྣམ་གྲངས་གཉིས་པས་ནི་ལྷུང་བཟེད་ལྷག་པ་གཉིས་འཆང་བ་བསྟན་ཏོ། །དགེ་སློང་གིས་ཚེས་ལ་ལྷུང་བཟེད་མང་པོ་རྙེད་ན་ཞེས་བྱ་བ་ལ་སོགས་པ་རྣམ་གྲངས་གསུམ་པས་ནི་ལྷུང་བཟེད་ལྷག་པ་མང་པོ་བསྟན་ཏོ། །དགེ་སློང་གིས་ཚེས་ལ་ལྷུང་བཟེད་མང་པོ་དག་ཅིག་རྙེད་ཅིང་དེས་ཚེས་གཉིས་ལ་ཡང་གཞན་མང་པོ་དག་ཅིག་རྙེད་ན་ཞེས་བྱ་བ་ལ་སོགས་པ་འགྲེས་བཞི་པས་ནི་ཕྱི་མ་ཡང་མང་པོ་དག་ཡིན་པར་བསྟན་ཏོ། །རྣམ་གྲངས་བཞི་པོ་དག་གི་བྱེ་བྲག་ནི་དེ་ཡིན་ནོ། །ལྷུང་བཟེད་ཆུང་ངུ་ལ་སོགས་པ་ལྟུང་བ་མེད་དོ་ཞེས་བྱ་བ་ནི་ལྷུང་བཟེད་ཆུང་ངུ་ལ་སོགས་པ་ནི་རུང་བ་མ་ཡིན་པའི་ཕྱིར་བྱིན་གྱིས་བརླབ་པར་བྱ་བ་མ་ཡིན་པས་དེ་དག་འཆང་ན་ཉེས་བྱས་སུ་འགྱུར་བ་ཡིན་གྱི་དངོས་གཞིའི་ལྟུང་བ་མེད་པར་བསྟན་པའི་ཕྱིར་ལྟུང་བ་མེད་དོ་ཞེས་གསུངས་སོ། །རབ་ཏུ་འབྱུང་བ་ལ་ལྟོས་པའི་དོན་དུ་ལྷུང་བཟེད་འཆང་བ་ལ་ནི་བདག་གིར་བྱེད་པ་མེད་པའི་ཕྱིར་ཉེས་བྱས་ཀྱང་མེད་པས་ཐམས་ཅད་ལྟུང་བ་མེད་དོ་ཞེས་གསུངས་སོ།།
ལྷུང་བཟེད་འཆང་བའི་སྤང་བ་སྟེ་ཉི་ཤུ་གཅིག་པའི་ཚིག་རྣམ་པར་བཤད་པ་རྫོགས་ས།། །།ཉེ་བར་མ་ཞི་ཙམ་དུ་ཟད་ཀྱི་ཞེས་བྱ་བ་ནི་ཐེ་ཚོམ་ཟ་བས་བྱུང་རྒྱལ་མི་དོགས་པ་ཞིག་སྨྲས་པ་ཙམ་དུ་ཟད་ཀྱི་ཞེས་བྱ་བའི་ཐ་ཚིག་གོ །ནལ་གྱི་བུ་ཞེས་བྱ་བ་ནི་ནལ་མའི་བུའོ། །རིན་མ་མཆིས་པ་ཞེས་བྱ་བ་ནི་རིན་མེད་པར་རོ། །གལ་ཏེ་སྐྱེས་བུས་ས་སྣོད་ཀྱིས། །གསེར་གྱི་སྣོད་ནི་ཐོབ་གྱུར་ན། ཞེས་བྱ་བ་ནི་དཔེར་ན་ཕྲུ་བས་གསེར་སྣོད་ཐོབ་པར་གྱུར་པ་དང་འདྲ་བར་ལྷུང་བཟེད་ཀྱི་སྦྱིན་པས་ལྷ་དང་མི་རྣམས་ཀྱི་ནང་ན་སྣོད་དུ་གྱུར་པའི་འབྲས་བུ་ཆེན་པོ་ཐོབ་པར་གྱུར་ན་ཞེས་བྱ་བར་བསམས་སོ། །དེ་ཡིས་མྱ་ངན་ཅིའི་ཕྱིར་བྱ། །ཞེས་བྱ་བ་ནི་མྱ་ངན་མི་བྱའོ་ཞེས་བྱ་བའི་ཐ་ཚིག་གོ །ཅིའི་ཕྱིར་མྱ་ངན་མི་བྱ་ཞེ་ན། དེའི་ཕྱིར་བསླུས་པ་མེད་པར་ཁོ་བོས་མཐོང་ཞེས་བྱ་བ་གསུངས་ཏེ། གང་གི་ཕྱིར་བསླུས་པ་མེད་པར་ཁོ་བོས་མཐོང་བ་དེའི་ཕྱིར་མྱ་ངན་མི་བྱེད་དོ་ཞེས་བྱ་བའི་ཐ་ཚིག་གོ །ཡོད་ཅིང་ཞེས་བྱ་བ་ནི་རྫས་ཙམ་དུ་ཡོད་པས། །བདོག་བཞིན་དུ་ཞེས་བྱ་བ་ནི་བྱ་བ་ནུས་པས་སོ། །འབྲས་ཆན་གཤེར་བར་བྱེད་པ་ནི་ཁུ་བ་དང་བཅས་པའོ། །ཅལ་ཅོལ་ཞེས་བྱ་བ་ནི་ཕན་ཕུན་ནོ། །ལྷན་པ་སྙི་བ་ཞེས་བྱ་བ་ནི་ལྷན་པ་མི་སྲ་བའོ། །ལྷན་རིངས་ཞེས་བྱ་བ་ནི་ལྕགས་ལས་བྱས་པའི་ལྷན་ཕ་རིང་པོའོ། །ཐ་མ་ཕྲན་ཞེས་བྱ་བ་ནི་བུ་གུ་དགག་པའི་ལྕགས་ཟེར་རོ། །ལྷན་པ་ཞེས་བྱ་བ་ནི་ལྕགས་ཀྱི་ལྷན་པ་གྲུ་བཞི་འམ་ཟླུམ་པོའམ་ཟུར་གསུམ་མཐའ་རད་རོད་མེད་པའོ། །ཆུ་སྲིན་གྱི་སོ་ལྟ་བུ་ཞེས་བྱ་བ་ནི་དེ་ཉིད་ཀྱི་མཐའ་ཐམས་ཅད་སོག་ལེའི་སོ་ལྟ་བུ་དང་ལྡན་པའོ། །ཕྱེ་མ་ཞེས་བྱ་བ་ནི་ཞིབ་མོའོ། །ལྷན་པ་ལྔ་མེད་པ་ཞེས་བྱ་བ་ནི་ལྷན་པ་ལྡར་མ་ཚང་བ་དང་ལྡན་པ་ལྔ་མ་གླན་པ་ལ་མ་ཐུག་པ་ཞེས་བྱ་བའི་ཐ་ཚིག་གོ །ལྷུང་བཞེད་འབྲེལ་པ་མེད་པ་ཞེས་བྱ་བ་ནི་ལྷུང་བཟེད་སར་པ་གཞན་བཙལ་བ་སྟེ་རྙེད་པ་དེ་ཡང་དགེ་འདུན་ལ་ཕུལ་ནས་དགེ་འདུན་ལས་ཐོབ་པའི་ལྷུང་བཟེད་ཐ་ཆད་གང་ཡིན་པ་དེ་གཉི་གའི་མ་ཡིན་པར་རིག་པར་བྱ་སྟེ། དེ་ཡང་དགེ་སློང་རྣམས་ཀྱི་ལྷུང་བཟེད་ཀྱི་ཡུལ་ལ་འབྲེལ་བ་ནི་འདི་གཉིས་ཁོ་ནར་ཟད་དེ། །བྱིན་གྱིས་མ་བརླབས་པས་བདག་ཉིད་ཀྱིས་སྤྱད་པ་དང༌། ཡོངས་སུ་སྤང་བའི་དུས་ན་ཡང་གཏང་བར་བྱ་བའམ་གཞན་ལ་
སྦྱིན་པར་བྱ་བ་རང་དབང་ཉིད་དུ་བསྟན་པར་བྱ་བ་ཡིན་ན་ལྷུང་བཟེད་འབྲེལ་བ་མེད་པ་དེ་ནི་བྱིན་གྱིས་མ་བརླབས་པས་བདག་ཉིད་ཀྱིས་སྤྱད་པའི་འབྲེལ་བ་ཡང་མེད་ལ། གཏང་བར་བྱ་བའམ། གཞན་ལ་སྦྱིན་པར་བྱ་བས་ཡོངས་སུ་སྤངས་པའི་འགྲེལ་བ་མེད་པ་ཞེས་བྱ་བ་སྟེ། ལྷུང་བཟེད་དེ་ནི་བྱིན་གྱིས་བརླབ་པར་བྱ་བ་ཡང་མ་ཡིན་ལ། ཡོངས་སུ་སྤང་བར་བྱ་བ་ཡང་མ་ཡིན་མོད་ཀྱི་འོན་ཀྱང་དེ་ཁ་བསྒྱུར་བ་དང་བསྲེག་པ་དང་བྱི་དོར་ལ་སོགས་པ་ལྷུང་བཟེད་ཀྱི་ནན་ཏན་ཡང་བྱ་དགོས་པས་དེའི་ཕྱིར་དེ་ནི་ལྷུང་བཟེད་ཀྱང་ཡིན་ལ་འབྲེལ་བ་མེད་པ་ཡང་ཡིན་པས་ལྷུང་བཟེད་འབྲེལ་བ་མེད་པ་ཞེས་བྱ་བ་སྟེ། བྲན་ནམ་ཁོལ་དུ་བྱུང་བ་དང་འདྲའོ། །འདུལ་བ་དང་འགལ་བ་ཞེས་བྱ་བ་ནི་བཅས་པའི་ཁ་ན་མ་ཐོ་བ་སྟེ་བཏང་བ་ནས་ཡང་སློང་བས་གཞན་ལ་ཐོ་འཚམས་པའི་ཕྱིར་རོ། །ངོས་ཁུང་ཞེས་བྱ་བ་ནི་བུ་གའོ། །ཆད་པའི་ལམ་ཡིན་ཏེ་ཞེས་བྱ་བ་ནི་ལྷུང་བཟེད་ལྷག་པ་ཚོལ་བའི་སྲེད་པ་བཅད་པའི་ཕྱིར་རོ། །ཚུལ་ཁྲིམས་ཡང་དག་པར་རྗེས་སུ་བསྲུང་བས་ཇི་སྲིད་འཚོའི་བར་དུ་སྤྱད་པར་བྱ་བའོ་ཞེས་བྱ་བ་ནི་རྫོགས་པར་བསྙེན་པ་རྗེས་སུ་སྲུང་བར་བྱེད་ན་ཞེས་བྱ་བའི་ཐ་ཚིག་གོ །དེ་ལ་ལྟུང་བ་ཇི་ལྟར་འགྱུར་ཞེ་ན་ཞེས་བྱ་བ་ལ་སོགས་པའི་རྣམ་གྲངས་ལ་མ་གླན་པའི་རྣམ་གྲངས་བཞི་དང་གླན་པའི་རྣམ་གྲངས་བཞི་སྟེ་བརྒྱད་ཀྱི་ལྟུང་བ་རྣམ་པར་གཞག་གོ །ལྷན་པ་ལྔ་གླན་པར་འོས་པ་ལ། ལྟུང་བ་མེད་པ་ནི་བུ་ག་རྡོལ་མང་བ་ཉིད་ཀྱིས་མེད་པ་དང་འདྲ་བ་ཡིན་པའི་ཕྱིར་རོ། །རིན་གྱིས་ལེན་པ་ལ་ལྟུང་བ་མེད་པའི་ཕྱིར་རོ། །བརྗི་བས་ལེན་པ་ལ་ལྟུང་བ་མེད་དོ་ཞེས་བྱ་བ་ཡང་སྤོང་བ་མེད་པའི་ཕྱིར་རོ། །ལྷུང་བཟེད་ཚོལ་བའི་སྤང་བ་སྟེ་ཉི་ཤུ་རྩ་གཉིས་པའི་ཚིག་རྣམ་པར་བཤད་པ་རྫོགས་སོ།། །།ཡུགས་ས་མོ་ཞེས་བྱ་བ་ནི་བུད་མེད་ཁྱོ་ཤི་བས་སོ། །ལས་བདག་གིར་བྱ་བ་དང་ལྡན་པ་ཞེས་བྱ་བ་ནི་ལས་གཞན་གྱི་དཔང་དང་ལྡན་པའོ། །ཐོང་གཤོལ་དཀར་པོ་ཞེས་བྱ་བ་ནི་རྨོར་སྤངས་པ་ལས་བསམས་པ་ཡིན་ནོ། །བསོད་ནམས་འདོད་པ་ཞེས་བྱ་བ་ནི་བསོད་ནམས་ཀྱི་སེམས་དང་ལྡན་པའོ། །འཚོ་ཚིས་ཞེས་བྱ་བ་ནི་འཚོ་བའི་སོ་ནམ་མོ། །སྒྱུར་བ་ཞེས་བྱ་བ་ནི་ཉོ་ཚོང་ངོ༌། །བསོད་ནམས་ཆུང་ཡང་བརྙས་མི་བྱ། །ཞེས་བྱ་བ་ལ་སོགས་པ་ནི་ཆུང་ངུ་ཞིག་ན་བསོད་
ནམས་སུ་མི་འགྱུར་བར་དོགས་པར་མི་བྱ་བ་དང༌། བདག་འཇིག་རྟེན་ཕ་རོལ་དུ་སོན་ན་དེ་མི་འོང་བར་དོགས་པར་མི་བྱའོ་ཞེས་བྱ་བའི་ཐ་ཚིག་གོ །བདེ་གནས་མ་ཞེས་བྱ་བའི་བག་མར་བཏང་ནས་རིང་པོར་མ་ལོན་པ་སྟེ་ཁྱིམ་ཐབ་དང་ལྷན་ཅིག་བདེ་བར་གནས་པ་ཞེས་བྱ་བའི་ཐ་ཚིག་གོ །དོག་པ་ཕྲར་ཁོལ་ཞེས་བྱ་བ་ནི་དོག་པ་ཕྲ་བདར་ཆེ་བ་དང་རིང་ཆ་བཟང་བར་སྨོན་པ་གཅིག་པའོ། །ར་བ་ག་གེ་མོའི་དྲུང་ཞེས་བྱ་བ་ནི་ར་བ་ཞིག་གི་དྲུང་ནའོ། །ཆེན་པོ་ལ་འོས་པའི་རས་ཡུག་ཆེན་ཞེས་བྱ་བ་ནི་མི་ཆེ་བ་ནི་མི་ཆེན་པོས་ལོངས་སྤྱོད་དུ་རུང་བ་སྟེ་ཆེན་པོ་ལ་འོས་པའི་ཕྱིར་རོ། །མཁས་པ་ཞེས་བྱ་བ་ནི་དམ་པའོ། །ཐགས་གླ་ཞེས་བྱ་བ་ནི་རྔན་པའོ། །ཕོ་བྲང་གི་ཡིད་བརྟན་པ་ཞེས་བྱ་བ་ནི་ཁྱིམ་གྱི་ཚེས་བྱེད་པའོ། །ཆང་ཚོང་བ་ཞེས་བྱ་བ་ནི་ཆང་ཚོང་བར་བྱེད་པའི་མིའོ། །ཁུ་ཚུར་ཞེས་བྱ་བ་ནི་སུམ་པོས་བརྡེག་པའོ། །མི་མཐུན་པ་ཞེས་བྱ་བ་ནི་ལོག་པར་རོ། སྡུག་ཅེས་བྱ་བ་ནི་མགུ་བའི་ནོར་རོ། །དགེ་སློང་ཕ་ལ་ཉེས་བྱས་སུ་འགྱུར་ལ་ཞེས་བྱ་བ་ནི་དགེ་སློང་ཕའི་སྦང་བའི་ཆར་གཏོགས་པའི་ཉེས་བྱས་ཡིན་ཏེ་གླེང་གཞིའི་དབང་གིས་འདིར་གསུངས་སོ། །བདག་ཉིད་ཀྱིས་འཐག་པ་ལ་ཡང་ཉེས་བྱས་སུ་འགྱུར་རོ་ཞེས་བྱ་བ་ནི་བཟོ་རྗེས་སུ་བསྒྲུབ་པ་ཚུལ་དང་མཐུན་པ་མ་ཡིན་པའི་ཕྱིར་རོ། །ཐག་པ་ཉེ་དུ་མ་ཡིན་པ་གོས་འཐག་ཏུ་འཇུག་པ་དང༌། ཐག་པ་ཉེ་དུ་ལ་གོས་འཐག་ཏུ་འཇུག་པ་དང༌། བདག་ཉིད་ཀྱིས་འཐག་པར་བྱེད་པ་ལ་རེ་རེ་བའི་རྣམ་པ་གསུམ་མོ། །ཐ་ག་པ་ཉེ་དུ་དང་ཉེ་དུ་མ་ཡིན་པ་ལ་གོས་འཐག་ཏུ་འཇུག་པ་དང༌། བདག་ཉིད་དང་ཐ་ག་པ་ཉེ་དུ་མ་ཡིན་པ་ལ་གོས་འཐག་ཏུ་འཇུག་པ་དང༌། བདག་ཉིད་དང་ཐག་པ་ཉེ་དུ་ལ་གོས་འཐག་ཏུ་འཇུག་པ་ཞེས་བྱ་བ་འདྲེན་མའི་རྣམ་པ་གསུམ་སྟེ། དེ་དག་ནི་ཉེ་དུ་མ་ཡིན་པ་ལས་དོག་པ་བསླངས་པའི་འགྲེས་དྲུག་ཡིན་ནོ། །ཉེ་དུ་ལ་དོག་པ་བསླངས་པ་ལ་འབའ་ཞིག་པའི་རྣམ་པ་གསུམ་དང་འདྲེན་མའི་རྣམ་པ་གསུམ་སྟེ་ལྟུང་བའི་འགྲེས་དྲུག་དེ་བཞིན་དུ་ཤེས་པར་བྱ་སྟེ་ཉེ་དུ་ལས་དོག་པ་བསླངས་ཀྱང་ཐག་པ་ཉེ་དུ་མ་ཡིན་པ་ལ་འཐག་པ་འཇུག་ན་ཉེས་པ་འདྲ་བར་བསྟན་པའི་ཕྱིར་རོ། །གླ་རྔན་གྱིས་འཐག་ཏུ་འཇུག་པ་ལ་ལྟུང་བ་མེད་དོ་ཞེས་བྱ་བ་འཆོལ་བ་མེད་པའི་ཕྱིར་རོ། །འཐག་ཏུ་འཇུག་པའི་སྤང་བ་སྟེ་ཉི་ཤུ་གསུམ་པའི་ཚིག་རྣམ་པར་
བཤད་པ་རྫོགས་སོ།། །།དོག་པ་ལས་ཞེས་བྱ་བ་ནི་རྒྱུ་བདུན་གྱི་དོག་པ་ཟད་པའོ། །རུང་ངམ་ཞེས་བྱ་བ་ནི་བདེ་བའམ་ཞེས་བྱ་བའོ། །མི་རུང་ངོ་ཞེས་བྱ་བ་ནི་མི་བདེ་བའོ། །ལྟོས་བཟུང་བས་ཞེས་བྱ་བ་ནི་ཟས་ཀྱི་སྲེད་པས་དབང་དུ་བྱས་པའོ། །ལྷག་པ་ཞེས་བྱ་བ་ནི་སྐྱེད་པའོ། །འབྲི་བ་ཞེས་བྱ་བ་ནི་ཕྲི་བའོ། །ཞེང་ཆེ་བ་ཞེས་བྱ་བ་ནི་རྒྱ་ཆེ་བ་ཉིད་ཀྱིས་ཁོ་ལག་ཆེ་བའོ། །ཁྲུན་རིང་བ་ཞེས་བྱ་བ་ནི་ཆུར་རིང་བ་ཉིད་ཀྱིས་ཁོ་ལ་ག་ཆེ་བའོ། །ཐར་གྱིས་ཞག་པ་ཞེས་བྱ་བ་ནི་འཇུར་མདུད་མེད་པར་ཐང་ཆད་པའོ། །ཐག་རན་བཟང་བ་ཞེས་བྱ་བ་ནི་རྒྱུ་སྤུན་འཛེར་བའོ། །གླ་རྔན་ཞེས་བྱ་བ་ནི་བྱ་དགའོ། །བྱེར་ཟུག་སྙོམས་པ་ཞེས་བྱ་བ་ནི་སྙོམས་པའོ། །ཤས་བཟང་བ་ཞེས་བྱ་བ་ནི་མཚམས་སྦྱོར་བའོ། །སང་སེང་མེད་པ་ཞེས་བྱ་བ་ནི་འཛེར་ཞིང་ཟང་བུག་མེད་པའོ། །བཟའ་བ་འམ་ཞེས་བྱ་བ་ནི་བཟའ་བ་ལྔ་པོ་དག་གོ །བཟའ་བ་ཙམ་མམ་ཞེས་བྱ་བ་ནི་བཅའ་བ་ལྔ་དག་སྟེ་བཟའ་བ་དང་འདྲ་བའི་ཕྱིར་བཟའ་བ་ཙམ་སྟེ་རྒྱལ་པོ་དང་འདྲ་བའི་ཕྱིར་བློན་པོ་ཆེན་པོའོ་ཞེས་བྱ་བ་ལྟ་བུའོ། །བཟའ་རྒྱུ་ཞེས་བྱ་བ་ནི་བཟའ་བའི་རྒྱུ་འབྲས་བུ་ཐུག་པོ་ཆེ་ལ་སོགས་པའོ། །སྔར་བསྟབས་པར་གྱུར་ན་ལྟུང་བ་མེད་དོ་ཞེས་བྱ་བ་ནི་འདྲིད་པ་དང་སློང་བདག་མེད་པས་ལྟུང་བ་མེད་དོ། །འཐག་པ་སྐྱེད་པའི་སྤང་བ་སྟེ་ཉི་ཤུ་བཞི་པའི་ཚིག་རྣམ་པར་བཤད་པ་རྫོགས་སོ།། །།རང་བཞིན་དུ་གནས་པ་ཞེས་བྱ་བ་ནི་བསླབ་པ་འདོད་པའོ། །སྒོ་འཕར་ཞེས་བྱ་བ་ནི་སྒོ་འཕར་གྱི་ཤིང་ངོ༌། །སྦྱིན་པ་ཞེས་བྱ་བ་ནི་ནོར་གཏོང་བའོ། །སྙན་པར་སྨྲ་བ་ཞེས་བྱ་བ་ནི་ཚིག་སྙན་པར་སྨྲ་བའོ། །དོན་སྤྱོད་པ་ཞེས་བྱ་བ་ནི་དགོས་པ་བསྒྲུབ་པའོ། །དོན་མཐུན་པ་ཞེས་བྱ་བ་ནི་དགོས་པ་མཐུན་ཞིང་བྱ་བ་གཅིག་པ་སྟེ། དེ་དག་ནི་འཁོར་དགའ་བར་བྱེད་པའི་རྒྱུ་ཡིན་པས་བསྡུ་བའི་དངོས་པོ་ཞེས་བྱའོ། །ངན་པ་ཞེས་བྱ་བ་ནི་གླེན་པའོ། །གླང་པོ་ཆེའི་ལྟ་སྟངས་ཀྱིས་ཞེས་བྱ་བ་ནི་དཔེར་ན་གླང་པོ་ཆེ་ལུས་ཐམས་ཅད་ཀྱིས་ཡོངས་སུ་བསྒྱུར་ཏེ་རྒྱབ་ལོགས་སུ་རྣམ་པར་ལྟ་བར་བྱེད་པ་དེ་བཞིན་དུ་སངས་རྒྱས་བཅོམ་ལྡན་འདས་རྣམས་ཀྱང་སྐུའི་ཚིགས་སྤྲུལ་གྱི་མདུད་པ་ལྟ་བུ་ཡིན་པའི་ཕྱིར་དང༌། དུས་ཐམས་ཅད་དང་ཐམས་ཅད་དུ་མཐུན་པར་འཛིན་པ་ཡིན་པའི་ཕྱིར་གློ་གཡས་ཕྱོགས་ནས་སྣམ་ལོགས་སུ་བསྒྱུར་ཏེ་རྣམ་པར་
གཟིགས་པ་མཛད་པ་ཡིན་ནོ། །ལྷག་མ་ཡོད་པའི་ཕྱིར་སྦྱིན་པར་བྱ་ཞིང་ཞེས་བྱ་བ་ནི་གོས་དེ་སྤྱད་པའི་ལྷག་མ་ཅི་ཡོད་པའོ། །ཕྱིར་སྦྱིན་པར་བྱ་ཞིང་ཞེས་བྱ་བ་ནི་དགེ་སློང་དེ་ལ་ཕྱིར་སྦྱིན་པར་བྱ་སྟེ། འདིར་ཕྱིར་སྦྱིན་པར་བྱ་བའི་ཚུལ་ནི་དེ་ལྟ་བུ་ཡིན་ནོ་ཞེས་བྱ་བའི་ཐ་ཚིག་གོ ། བཏང་ན་སྤང་བའི་ལྟུང་བྱེད་དོ་ཞེས་བྱ་བ་ནི་གང་གི་ཚེ་གོས་དེ་ལུས་ལས་བཏང་ཞིང་བྲལ་བར་བྱས་པ་དེའི་ཚེ་ན་སྤང་བའི་ལྟུང་བྱེད་དོ་ཞེས་བྱ་བའི་ཐ་ཚིག་གོ །ལུས་གཡོ་བར་བྱེད་པ་ཞེས་བྱ་བ་ནི་གང་ལ་ལུས་གཡོ་བ་ཞེས་བྱ་བ་ནི་ལུས་ཀྱི་ལས་ཡོད་པ་ཞེས་བྱ་བའི་ཐ་ཚིག་གོ །ཚིག་རྗོད་པར་བྱེད་པ་ཞེས་བྱ་བ་ནི་གང་ལ་ཚིག་རྗོད་པར་བྱེད་པ་ཞེས་བྱ་བ་གང་གི་ལས་ཡོད་པ་ཞེས་བྱ་བའི་ཐ་ཚིག་གོ །དེ་གཉིས་ཀ་དང་ལྡན་པ་ཞེས་བྱ་བ་ནི་གང་ལ་ལུས་དང་ངག་གི་ལས་གཉིས་ཀ་ཡོད་པའོ། །གཞན་དག་གི་ཞེས་བྱ་བ་ནི་གང་ལ་གཞན་ཁྱིམ་པ་དང་རབ་ཏུ་བྱུང་བདག་བསྐོས་པ་ཞེས་བྱ་བའི་ཐ་ཚིག་གོ །དགེ་སློང་མ་དང་དགེ་ཚུལ་དང་དགེ་ཚུལ་མ་ལ་ཉེས་བྱས་ཉིད་དུ་འགྱུར་བ་ནི་རྫོགས་པར་མ་བསྙེན་པའི་ཕྱིར་རོ། །ཁྱིམ་པ་དང་ཁྱིམ་པ་མོ་ལ་བསོད་ནམས་མ་ཡིན་པ་མང་དུ་སྐྱེ་བར་འགྱུར་བ་ནི་རབ་ཏུ་བྱུང་བ་ཉིད་མ་ཡིན་པས་ལྟུང་བ་མེད་པའི་ཕྱིར་རོ། །བསོད་ནམས་མ་ཡིན་པ་ཆེས་མང་དུ་སྐྱེ་བར་འགྱུར་བ་ནི་དངོས་གཞི་བསྡུས་པ་ཡིན་པའི་ཕྱིར་རོ། །དོན་གཞན་ཞེས་བྱ་བ་ནི་འཇིག་རྟེན་པའི་དགོས་པ་གཞན་གྱིས་སོ། །གདུལ་བའི་ཡོ་བྱད་ཀྱིས་ཞེས་བྱ་བ་ནི་འདུལ་བའི་ཐབས་ཀྱིས་ཏེ་དེ་གཉིས་ལ་ནི་དབྲོག་པའི་བསམ་པ་མེད་པས་ལྟུང་བ་མེད་དོ། །གྲོགས་པོ་ཞེས་བྱ་བ་ནི་གཅུགས་པའོ། །ཟླ་བོ་ཞེས་བྱ་བ་ནི་དོན་གཅིག་པའོ། །བསྟེན་གྲོགས་ཞེས་བྱ་བ་ནི་ཡང་དང་ཡང་དུ་སྡོད་པར་བྱེད་པའོ། །འཕྲོག་པའི་སྡང་བ་སྟེ་ཉི་ཤུ་ལྔ་པའི་ཚིག་རྣམ་པར་བཤད་པ་རྫོགས་སོ།། །།དབྱར་འདས་ནས་ཞེས་བྱ་བ་ནི་དབྱར་གྱི་དུས་འདས་ནས་སྟོན་ལ་བབ་པ་ནའོ། །ཡིད་ཀྱིས་བསྐོར་བ་ན་ཞེས་བྱ་བ་ནི་དེ་དག་ལ་ཡིད་དད་པ་ཁོ་ན་གཙོ་བོ་ཡིན་ཞིང་སྐོར་བར་བྱེད་ལ་ཡིད་ཀྱི་ལུས་བསྐྱོད་པ་ཙམ་གྱིས་མ་ཡིན་ནོ་ཞེས་བྱ་བའི་ཐ་ཚིག་གོ །ཡིད་ཀྱིས་འདྲེན་ཅེས་བྱ་བ་ནི་སེམས་སྔོན་དུ་འགྲོ་བ་སྟེ་སེམས་ཀྱི་ཚོར་བ་དང་སེམས་པ་ལ་སོགས་པའི་ཆོས་རྣམས་ཡུལ་རྣམས་འདྲེན་པར་བྱེད་ཅེས་བྱ་བའི་ཐ་ཚིག་གོ །ཡིད་
གཙོ་བོ་ཞེས་བྱ་བ་ནི་སེམས་གཙོ་བོ་ཡིན་པ་སྟེ་སེམས་ལས་སུ་རུང་ན་དེ་དག་ཀྱང་ལས་སུ་རུང་ལ་སེམས་ལས་སུ་མི་རུང་ན་དེ་དག་ཀྱང་ལས་སུ་མི་རུང་ངོ་ཞེས་བྱ་བའི་ཐ་ཚིག་གོ །ཡིད་ཀྱི་འགྲོས་ཅན་ཞེས་བྱ་བ་ནི་ཡིད་ཀྱི་འགྲོས་དང་ལྡན་པ་སེམས་ལ་བརྟེན་པ་སྟེ་སེམས་སྐྱེ་ན་དེ་དག་ཀྱང་སྐྱེ་ལ་སེམས་འགག་ན་དེ་དག་ཀྱང་འགག་ཅེས་བྱ་བའི་ཐ་ཚིག་གོ །ལྟོ་འདུན་ཅན་ཞེས་བྱ་བ་ནི་མཆོག་ཏུ་བསོད་པ་དང༌། མང་པོ་ཟ་བར་འདོད་པ་སྟེ་རྒྱ་ཆེན་པོ་ལ་མོས་པ་ལྔ་ཕྱི་ལ་མི་ལྟ་ཞེས་བྱ་བའི་ཐ་ཚིག་གོ །བཅའ་བ་རྣམ་པ་བཅོ་བརྒྱད་ཅེས་བྱ་བ་ནི་མར་ཁུར་དང༌། ཧྭགས་ཁུར་དང༌། སྦྲང་རྩིའི་ཁུར་བ་ལ་སོགས་པ་ཁུར་བའི་རྣམ་པའོ། །ཁུར་ཡ་གཅིག་ནི་འདུག་དཀའ་བ་ཡིན་གྱི་ཞེས་བྱ་བ་ནི་དཔེར་ན་མའི་ཕྲག་རྡང་གི་ཁུར་ཁྱེར་བའི་ཕྲག་རྡང་གི་རྩེ་མོ་ཡ་གཅིག་ཏུ་ཁུར་བཏགས་ལ། ཡ་གཅིག་ཏུ་མ་བཏགས་ན་ཕྲག་པར་ཆགས་པར་དཀའ་བ་དེ་བཞིན་དུ་བདག་ཅག་གིས་ཀྱང་ཟས་ཀྱི་རྙེད་པ་ལ་ཟོས་ལ་གོས་ཀྱི་རྙེད་བ་ལ་མ་བགོས་པར་གལ་ཏེ་དོར་ནས་སེམས་བདེ་བར་འདུག་པར་དཀའ་བ་ཡིན་གྱི་ཞེས་བྱ་བའི་ཐ་ཚིག་གོ །སྤྱོད་སྤྱོད་པ་ཞེས་བྱ་བ་ནི་ཟ་ཟ་ལ་ཞེས་བྱ་བའི་ཐ་ཚིག་གོ །ལྟག་པའི་སྤུ་བྱི་བར་འགྱུར་རོ་ཞེས་བྱ་བ་ནི་ལྟག་སྒྲེར་འགྱུར་རོ་ཞེས་བྱ་བའི་ཐ་ཚིག་གོ །འགལ་ཚབས་ཅན་དུ་འགྱུར་རོ་ཞེས་བྱ་བ་ནི་ཉེས་བྱས་ཀྱི་ལྟུང་བ་དང་བཅས་སོ་ཞེས་བྱ་བའི་ཐ་ཚིག་གོ །འཁོར་རྣམ་པར་ལངས་པར་འགྱུར་ཞེས་བྱ་བ་ནི་དགེ་བའི་ཕྱོགས་ཀྱི་ཕྱིར་བརྩོན་པར་འགྱུར་ཞེས་བྱ་བའི་ཐ་ཚིག་གོ །དམག་གི་གནས་ཞེས་བྱ་བ་ནི་གཡུལ་གྱི་གནས་སོ། །ལོངས་སྤྱོད་དག་གིས་ཕྱུག་ཅེས་བྱ་བ་ནི་གྲོང་ལ་སོགས་པས་རྒྱས་པའོ། །ཉེ་བར་བསགས་ཞེས་བྱ་བ་ནི་གོས་དང་རྒྱན་ལ་སོགས་པས་རྒྱས་པའོ། །ཡོངས་སུ་མ་སྤྱད་པས་ཞེས་བྱ་བ་ནི་རྒྱུག་པ་དང་གདུལ་བ་ལ་སོགས་པས་མ་སྤྱད་པས་སོ། །གནོད་སྦྱིན་གྱི་དམག་དཔོན་ཆེན་པོ་ཉི་ཤུ་རྩ་བརྒྱད་ཅེས་བྱ་བ་ནི་དབང་པོ་དང༌། ཟླ་བ་དང༌། ཆུ་ལྷ་དང༌། སྐྱེ་དགུའི་བདག་པོ་དང༌། པ་ར་དྭ་ཛ་དང༌། དབང་ལྡན་དང༌། ཙན་དན་དང༌། འདོད་མཆོག་དང༌། མགྲིན་ངན་དང༌། མགུལ་ངེས་དང༌། བ་ཌི་དང༌། ནོར་བུ་དང༌། ནོར་བུ་སྤྱོད་པ་དང༌། སྒྲ་རབ་དང༌། ཉེ་ལྔ་དང༌། རི་མཉམ་དང༌། ཁ་བ་ཅན་དང༌། གང་བོ་དང༌། སེང་ལྡེང་པ་དང༌།
བི་ཏ་དང༌། གནོད་སྦྱིན་བ་ལང་སྐྱོང་དང༌། འབྲོག་གནས་དང༌། མིའི་རྒྱལ་པོ་རྒྱལ་བ་ཁྱུ་མཆོག་དང༌། ལྔ་ལེན་པ་དང༌། བཞིན་བཟངས་དང༌། གནོད་སྦྱིན་རིང་པོ་འཁོར་དང་བཅས་པ་དང༌། འབྲས་བུ་གསུམ་པ་དང༌། ཚེར་མ་གསུམ་པ་ཞེས་བྱ་བ་དག་གོ །གནོད་སྦྱིན་འདུ་བ་ཞེས་བྱ་བ་ནི་གནོད་སྦྱིན་འདུས་པའོ། །ཆོས་ཀྱི་སྤུན་དག་ཅེས་བྱ་བ་ནི་འཕགས་པའི་ལམ་གྱི་རིགས་ཀྱིས་ལྟོ་གཅིག་པའི་ཕྱིར་རོ། །རིའི་རྩེ་མོ་ལྟ་བུ་ཞེས་བྱ་བ་ནི་རིའི་སྤོ་འདྲ་བའོ། །རྔ་མོ་ལྟ་བུ་ཞེས་བྱ་བ་ནི་རྡེའུ་འདྲ་བའོ། །གནོད་སྦྱིན་གདུག་པ་ལྟ་བུ་ཞེས་བྱ་བ་ནི་གནོད་སྦྱིན་ཕ་རོལ་གནོན་པ་ལྟ་བུའོ། །གཉིས་ཀ་བཅད་བྱས་ན་ཞེས་བྱ་བ་ནི་ཡུལ་དང་སྲོག་གཉིས་ཀ་ལ་གནོད་པ་བཏགས་ནའོ། །མ་ལེགས་པར་འགྱུར་ཞེས་བྱ་བ་ནི་བསོད་ནམས་ཀྱི་བར་ཆད་དུ་འགྱུར་རོ། །བརྟད་པ་ལས་བྱུང་བའི་གོས་ཞེས་བྱ་བ་ནི་ཉམ་ང་བའི་དུས་ལས་བྱུང་བའི་གོས་སོ། །གཏན་པ་མ་བཏིང་བའི་གནས་ན་ནི་སྟོན་ཟླ་ཐ་ཆུངས་ཉ་ཚུན་ཆད་གོས་སྦྱིན་པའི་དུས་མ་ཡིན་ནོ། །གཏན་པ་བཏིང་བའི་གནས་ན་ནི་དཔྱིད་ཟླ་འབྲིང་པོ་ཉ་ཚུན་ཆད་གོས་སྦྱིན་པའི་དུས་མ་ཡིན་ནོ་ཞེས་བྱ་བ་ནི་དེའི་བར་དུ་འགྱེད་པར་མི་བྱེད་པའི་ཕྱིར་རོ། །དབྱར་གྱི་རྙེད་པ་དབྱར་གྱི་ནང་དུ་བདག་གིར་བྱེད་ན་དངོས་གཞིར་འགྱུར་རོ། །གོས་སྦྱིན་པའི་དུས་ལས་འདས་པར་འཆང་ན་སྤང་བའི་ལྟུང་བྱེད་དུ་གསུངས་པ་ནི་སོགས་པ་ལྷུར་ལེན་པའི་ཕྱིར་དང༌། རྫས་ཆུད་ཟོས་པའི་ཞར་ལ་གནོད་པར་འགྱུར་བའི་ཕྱིར་རོ། །བརྟད་པ་ལས་བྱུང་བའི་གོས་ལྔ་པོ་དག་བདག་གིར་བྱེད་པ་ལ་ལྟུང་བ་མེད་པ་ནི་བརྟད་པའི་དབང་གིས་དབྱར་གྱི་རྙེད་པ་དབྱར་གྱི་ནང་དུ་བདག་གིར་བྱེད་པ་ལས་ཉེས་བྱས་ཀྱང་མེད་དོ་ཞེས་བྱ་བའི་ཐ་ཚིག་གོ །སྦྱིན་བདག་གིས་རང་གི་ལ་གནས་སྦྱིན་པར་བྱེད་པ་ལ་ལྟུང་བ་མེད་དོ་ཞེས་བྱ་བ་ནི་བརྐམ་ཆགས་ཀྱི་རྒྱུས་འགེད་པ་ཡིན་པའི་ཕྱིར་རོ། །གོས་འགེད་པའི་དགེ་སློང་བསྐོས་པས་དུས་ལས་འདས་པར་གཞག་པ་ལ་ལྟུང་བ་མེད་པ་ནི་རྫས་ཆུད་ཟ་བའི་ཉེས་པར་མི་འགྱུར་བའི་ཕྱིར་རོ། །སྦྱིན་བདག་འོངས་ཏེ་བཞེས་ཤིག་དང༌། རང་གི་སུག་པ་ཉིད་ནས་དབུལ་ལོ་ཞེས་ཟེར་བར་དུས་ལས་འདས་པར་གཞག་པ་ལས་ལྟུང་བ་མེད་པ་ནི་རྫས་ཆུད་ཟོས་ཀྱང་དག་སློང་གིས་མ་ཉེས་
པའི་ཕྱིར་རོ། །བརྟད་པ་ལས་བྱུང་བའི་སྤང་པ་སྟེ་ཉི་ཤུ་དྲུག་པའི་ཚིག་རྣམ་པར་བཤད་པ་རྫོགས་སོ།། །།ཁྱིམ་གཞན་དུ་གཞག་པར་བྱའོ། །ཞེས་བྱ་བ་ནི་དགོན་པ་པའི་གཙུག་ལག་ཁང་གི་ཉེ་འཁོར་དུ་གྱུར་པའི་གྲོང་ཞེས་བྱ་བའི་ཐ་ཚིག་གོ །ཐུགས་མི་ཆེས་ཞེས་བྱ་བ་ནི་ཡིད་མི་ཆེས་པའོ། །འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་དག་ཏུ་ཞེས་བྱ་བ་ལ། འཇིགས་པ་ཐ་དད་པས་ཞེས་བྱ་བ་ནི་འཇིགས་པའི་རྒྱུས་སོ། །འཇིགས་སུ་རུང་བ་ཞེས་བྱ་བ་ནི་རྒྱུ་དེ་ལས་སྐྲག་པའི་འཇིགས་སུ་རུང་བ་སྐྱེ་བའོ། །དེ་དང་ལྷན་ཅིག་འཇིགས་པ་ཐ་དད་པས་འཇིགས་སུ་རུང་བ་དང་བཅས་པའོ། །དེ་ལྟ་བུ་ཉིད་ཡིན་པར་གྲགས་པ་དག་ནི་འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་དག་གོ །འདིའམ་ཞེས་བྱ་བ་ནི་དགོན་པ་འམ་གཙུག་ལག་ཁང་གྲོང་དང་བཅས་པར་རོ། །དེར་ཞེས་བྱ་བ་ནི་གནས་གཞན་གང་དུ་སོང་བ་དེར་རོ། །ཞག་བདུན་གྱི་འབྲལ་བའི་སྤང་བ་སྟེ་ཉི་ཤུ་བདུན་པའི་ཚིག་རྣམ་པར་བཤད་པ་རྫོགས་སོ།། །།སྔ་མས་ཞེས་བྱ་བ་ནི་དབྱར་གནས་པར་ཁས་བླངས་པ་སྔ་མས་སོ། །རང་གི་དུས་ཞེས་བྱ་བ་ནི་བདག་ཉིད་ཀྱི་སྐབས་སོ། །ཕྱི་མས་ཞེས་བྱ་བ་ནི་དབྱར་གནས་པར་ཁས་བླངས་པ་ཕྱི་མས་སོ། །སོ་ག་རྣམས་ཀྱི་ཟླ་བ་གཅིག་ལུས་ན་ཞེས་བྱ་བ་ནི་དབྱར་ཟླ་ར་བ་ཉ་ནས་དབྱར་ཟླ་འབྲིང་པོ་ཉའི་བར་གྱི་ཟླ་བ་གཅིག་ལུས་ནའོ། །དབྱར་ཟད་ནས་འོག་ཏུ་ཟླ་བ་ཕྱེད་ཀྱི་བར་དུ་ཞེས་བྱ་བ་ནི་སྟོན་ཟླ་ཐ་ཆུངས་ཚེས་ཀྱི་བར་དུའོ། །འདི་སྐད་བསྟན་གྱི་དབྱར་གྱི་གོས་རས་ཆེན་དབྱར་གནས་པས་ཁས་ལེན་པའི་དུས་ཟླ་བ་གཅིག་གིས་མ་བབ་པའི་དུས་ནས་བཙལ་བར་བྱ་ཞིང་དགག་དབྱེ་བྱས་ནས་ཟླ་བ་ཕྱེད་ཀྱི་བར་དུ་བཅང་བར་བྱའོ། །ཟླ་བ་གཅིག་ན་དབྱར་ཉེ་བར་བསྒྲུབ་པ་འབྱུང་བར་འགྱུར་བ་ནའོ་ཞེས་བྱ་བ་ནི་དབྱར་གནས་པ་སྔ་མ་ཁས་ལེན་པ་ལ་ནི་དབྱར་ཟླ་ར་བ་ཉ་ནའོ། །དབྱར་གནས་པ་ཕྱི་མར་ཁས་ལེན་པ་ལ་ནི་དབྱར་ཟླ་འབྲིང་པོ་ཉ་ནའོ་ཞེས་བྱ་བར་སྦྱར་རོ། །དགག་དབྱེ་བྱས་ནས་ཟླ་བ་ཕྱེད་ཀྱི་བར་དུའོ་ཞེས་བྱ་བ་ནི་དབྱར་གནས་པ་སྔ་མར་ཁས་བླངས་པ་ལ་ནི་སྟོན་ཟླ་བ་ཐ་ཆུངས་ཚེས་ཀྱི་བར་དུའོ། །དབྱར་གནས་པ་ཕྱི་མར་ཁས་བླངས་པ་ལ་ནི་དགུན་ཟླ་ར་བ་ཚེས་ཀྱི་བར་དུའོ། །གང་དག་
དབྱར་སྔ་མར་གནས་པར་ཁས་ལེན་པ་དེ་དག་ལ་ནི་ཧ་ཅང་ཡུན་རིང་དུ་འཆང་ན་སྤང་བའི་ལྟུང་བྱེད་དུ་འགྱུར་རོ་ཞེས་བྱ་བ་ནི་སྟོན་ཟླ་ཐ་ཆུང་ཚེས་ཀྱི་བར་དུ་འཆང་ན་སྤང་བའི་ལྟུང་བྱེད་དུ་འགྱུར་བ་ཡིན་ནོ། །དེ་བཞིན་དུ་གང་དག་དབྱར་ཕྱི་མར་གནས་པར་ཁས་བླངས་པ་དེ་དག་ལ་དགུན་ཟླར་བ་ཚེས་ཀྱི་བར་དུ་འཆང་ན་སྤང་བའི་ལྟུང་བྱེད་དུ་འགྱུར་བར་ཤེས་པར་བྱ་བའོ། །གང་དག་དབྱར་ཕྱི་མར་གནས་པ་ཁས་ལེན་པ་དེ་དག་ལ་ནི་ཧ་ཅང་མྱུར་དུ་ཚོལ་ན་སྤང་བའི་ལྟུང་བྱེད་དུ་འགྱུར་ཞེས་བྱ་བ་ནི་དབྱར་ཟླ་འབྲིང་པོ་ཉ་ཕན་ཆད་དུ་ཚོལ་ནའོ། །དེ་བཞིན་དུ་གང་དག་དབྱར་སྔ་མར་གནས་པར་ཁས་ལེན་པ་དེ་དག་ལ་ནི་དབྱར་ཟླ་ར་བ་ཉ་ཕན་ཆད་དུ་ཚོལ་ན་སྤང་པའི་ལྟུང་བྱེད་དུ་འགྱུར་བར་ཤེས་པར་བྱའོ། །དེ་ལྟ་ན་དགེ་སློང་གིས་ཇི་ཙམ་དུ་ཧ་ཆང་མྱུར་དུ་ཚོལ་བར་བྱེད་པ་དང༌། ཧ་ཅང་ཡུན་རིང་དུ་གནས་པར་བྱེད་ན་ཐམས་ཅད་དུ་སྤང་བའི་ལྟུང་བྱེད་དུ་འགྱུར་རོ་ཞེས་བྱ་བ་ནི་སྔར་ཚོལ་ན་ཚོལ་བའི་ཚེ་ནི་སྦྱོར་བའི་ཉེས་བྱས་སུ་འགྱུར་ལ། རྙེད་པའི་ཚེ་ན་སྤང་བའི་ལྟུང་བྱེད་དུ་འགྱུར་བ་དང༌། འདས་པར་འཆང་ན་འཆང་བར་རྩོལ་བའི་ཚེ་ནི་ཉེས་བྱས་སུ་འགྱུར་ལ། འདས་པར་བཅངས་པའི་ཚེ་ན་ནི་སྤང་བའི་ལྟུང་བྱེད་དུ་འགྱུར་རོ་ཞེས་བསྟན་ཏོ། །དབྱར་གྱི་རས་ཆེན་གྱི་སྤང་བ་སྟེ་ཉི་ཤུ་རྩ་བརྒྱད་པའི་ཚིག་རྣམ་པར་བཤད་པ་རྫོགས་སོ།། །།དད་པ་ཞེས་བྱ་བ་ནི་ཡོན་ཏན་ལ་ཡིད་ཆེས་པའོ། །གཅུགས་པ་ཞེས་བྱ་བ་ནི་བྱམས་པའོ། །དད་པ་ཞེས་བྱ་བ་ནི་ཡོན་ཏན་འདོད་པའོ། །ཆོས་དང་ལྡན་པའི་སྦྱིན་པ་མ་ཡིན་པ་ཞེས་བྱ་བ་ནི་སྦྱིན་དུ་མི་རུང་བ་སྟེ་རྫས་དེ་གཞན་ལ་བྱིན་ཟིན་པའི་ཕྱིར་རོ། །ཆོས་དང་ལྡན་པའི་ལེན་པ་མ་ཡིན་པ་ཞེས་བྱ་བ་ནི་བླང་དུ་མི་རུང་བ་སྟེ་དེའི་བདག་པོ་གཞན་ཡོད་པའི་ཕྱིར་རོ། །ལོངས་སྤྱོད་དུ་མི་རུང་བ་ཞེས་བྱ་བ་ནི་སྤྱད་དུ་མི་རུང་བ་སྟེ་སྤྱོད་པར་བྱེད་པ་དག་གིས་དེ་གཞན་གྱི་ཡིན་པར་ཤེས་བཞིན་དུ་སྤྱོད་པ་མི་རུང་བའི་ཕྱིར་རོ། །དགེ་འདུན་བྱེ་ཞིང་ཞེས་བྱ་བ་ནི་ལམ་གཞན་ཁས་བླངས་པས་སོ། །གཉིས་འགྱུར་ཏེ་ཞེས་བྱ་བ་ནི་སྟོན་པ་གཞན་ཁས་བླངས་པས་སོ། །ཕྱོགས་དང་གཞན་གྱི་ཕྱོགས་སུ་རྣམ་པར་གནས་པ་ཞེས་བྱ་བ་ནི་རྩོད་པར་གྱུར་པས་ལས་བྱ་བའི་ཕྱིར་རོ། །འདིར་རྒྱུ་བསྟན་པའི་ཕྱིར། །དགེ་སློང་དག་དེ་ལྟ་བས་ན་སྔ་མ་ནི་སྦྱིན་པ་ཡིན་ལ་ཕྱི་མ་ནི་མ་ཡིན་ནོ་ཞེས་བྱ་བ་
གསུངས་ཏེ། འདི་ལྟར་སྔ་མ་ཉིད་གཏོང་བའི་ཚེ་སྦྱིན་པ་བྱས་པ་ཡིན་པས་དེའི་ཚེ་ན་སྦྱིན་བདག་བདག་པོ་ཡིན་གྱི་ཕྱི་མའི་ཚེ་ན་བདག་པོ་མ་ཡིན་ཏེ། དེའི་ཚེ་ན་ལེན་པ་པོ་ཉིད་བདག་པོ་ཡིན་ནོ། །སྦྱིན་བདག་དེ་ཉིད་ཐམས་ཅད་ལ་བདག་པོ་ཡིན་པར་དོགས་པ་བསལ་བའི་ཕྱིར་རྒྱལ་པོ་ནི་ས་བཞི་ལ་དབང་ལ། བདག་པོ་ནི་གནས་མལ་ལ་དབང༌། དགེ་སློང་ནི་ལྷུང་བཟེད་ལ་དབང༌། ཆོས་གོས་ལ་དབང་ངོ་ཞེས་བྱ་བ་གསུངས་ཏེ། རྒྱལ་པོ་ནི་རེ་ཞིགས་བཞི་ལ་དབང་བ་ཡིན་ལ། གཙུག་ལག་ཁང་གི་བདག་པོ་ནི་གནས་ཁང་དང་ཁྲི་དང་ཁྲིའུ་ལ་སོགས་པ་གནས་མལ་ལ་དབང་ངོ༌། །གཙུག་ལག་ཁང་དེ་ན་གནས་པའི་དགེ་སློང་ནི་གཙུག་ལག་ཁང་དེ་ན་ཡོད་པའི་ལྷུང་བཟེད་དང༌། ཆོས་གོས་ལ་སོགས་པ་དབང་ངོ༌། །སྦྱིན་པ་པོ་དང་སྦྱིན་བདག་གིས་རང་གི་སྦྱིན་པར་བྱ་བའི་ཆོས་མངོན་པར་འདུ་བྱ་བར་མི་རུང་གི་གཞན་ལ་སྦྱིན་དུ་ནི་མི་རུང་ངོ་ཞེས་བྱ་བ་ནི་སྦྱིན་པ་པོ་དང་སྦྱིན་བདག་གིས་སྔར་ལེན་པ་པོ་ལ་ཕུལ་བ་རང་གི་སྦྱིན་པར་བྱ་བའི་ཆོས་དེ་བྱི་དོར་ལ་སོགས་པ་མངོན་པར་འདུ་བྱ་བར་ནི་སྟེ་བསོད་ནམས་ཡུན་རིང་དུ་གནས་པར་བྱ་བའི་ཕྱིར་རོ། །གཞན་ལ་སྦྱིན་དུ་ནི་མི་རུང་སྟེ་དེའི་ཚེ་ན་བདག་པོ་གཞན་ཡིན་པའི་ཕྱིར་རོ། །རེ་ཞིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ་ཞེས་བྱ་བ་ནི་དགེ་འདུན་གྱི་རྙེད་པ་གང་ཟག་བདག་ལ་མ་བསྡོས་པའི་ཕྱིར་རོ། །རིས་མཐུན་པ་ཞེས་བྱ་བ་ནི་སྐྱེ་བའོ། །གཅིག་ཅིག་ཅེས་བྱ་བ་ནི་ཕྱོགས་ལས་གཅིག་ཅིག་གོ །གོས་ཀྱི་རྙེད་པ་ཡིན་པར་དགོངས་སོ་ཞེས་བྱ་བ་ནི་གཙོ་བོ་ཡིན་པས་དེའི་ལས་དངོས་གཞིར་འགྱུར་བའི་ཕྱིར་རོ། །དེ་ལ་ལྟུང་བ་ཇི་ལྟར་འགྱུར་ཞེ་ན་ཞེས་བྱ་བ་བའི་རྣམ་པ་ལ་གང་ཟག་གཅིག་དང༌། གཉིས་དང༌། རབ་ཏུ་མང་པོ་དང༌། དགེ་འདུན་ལ་བསྔོས་པའི་རྙེད་པ་གང་ཟག་བདག་ལ་སྒྱུར་དུ་འཇུད་པ་ལ་རྣམ་པ་བཞིའོ། །གང་ཟག་གཅིག་ལ་བསྔོས་པའི་རྙེད་པ་གང་ཟག་གཞན་གཅིག་དང༌། རབ་ཏུ་མང་པོ་དང༌། དགེ་འདུན་ལ་སྒྱུར་དུ་འཇུད་པ་ལ་ཡང་རྣམ་པ་བཞིའོ། །གང་ཟག་གཉིས་ལ་བསྔོས་པའི་རྙེད་པའི་གང་ཟག་གཞན་གཅིག་དང༌། གཉིས་དང༌། རབ་ཏུ་མང་པོ་དང༌། དགེ་འདུན་ལ་སྒྱུར་དུ་འཇུད་པ་ལ་ཡང་རྣམ་པ་བཞིའོ། །གང་ཟག་རབ་ཏུ་མང་པོ་དག་ལ་བསྔོས་པའི་རྙེད་པ་གང་ཟག་གཞན་
གཅིག་དང༌། གཉིས་དང༌། རབ་ཏུ་མང་པོ་དང༌། དགེ་འདུན་ལ་སྒྱུར་དུ་འཇུད་པ་ལ་ཡང་རྣམ་པ་བཞིའོ། །དགེ་འདུན་ལ་བསྔོས་པའི་རྙེད་པ་གང་ཟག་གཅིག་དང༌། གཉིས་དང༌། རབ་ཏུ་མང་པོ་དང༌། དགེ་འདུན་གཞན་ལ་སྒྱུར་དུ་འཇུད་པ་ལ་ཡང་རྣམ་པ་བཞིའོ། །དགེ་སློང་གི་དགེ་འདུན་ལ་བསྔོས་པའི་རྙེད་པའི་དགེ་སློང་མའི་དགེ་འདུན་ལ་སྒྱུར་དུ་འཇུད་པ་དང༌། དགེ་སློང་མའི་དགེ་འདུན་ལ་བསྔོས་པའི་རྙེད་པ་དགེ་འདུན་ལ་སྒྱུར་དུ་འཇུད་པ་ལ་རྣམ་པ་གཉིས་སོ། །གཉིས་པའི་དགེ་འདུན་ལ་བསྔོས་པའི་རྙེད་པ་དག་དགེ་སློང་གི་དགེ་འདུན་ལ་སྒྱུར་དུ་འཇུད་པ་དང། གཉིས་ཀའི་དགེ་འདུན་ལ་བསྔོས་པའི་རྙེད་པ་དགེ་སློང་མའི་དགེ་འདུན་ལ་སྒྱུར་དུ་འཇུད་པ་ལ་ཡང་རྣམ་པ་གཉིས་སོ། །དགེ་འདུན་བྱེ་བ་ནི་ཕྱོགས་གཅིག་ལ་བསྔོས་པའི་རྙེད་པ་ཕྱོགས་གཉིས་པ་ལ་སྒྱུར་དུ་འཇུད་པ་ལ་རྣམ་པ་གཅིག་སྟེ། དེ་ལྟར་དེ་དག་ནི་རབ་ཏུ་བྱུང་བའི་ཡུལ་ལ་ལྟུང་བ་རྣམ་པར་གཞག་པའི་འགྲེས་ཉི་ཤུ་རྩ་ལྔ་ཡིན་ནོ། །དེ་ལ་གང་ཟག་གཅིག་དང་གཉིས་དང་རབ་ཏུ་མང་པོ་དང༌། དགེ་འདུན་ལ་བསྔོས་པའི་རྙེད་པ་གང་ཟག་བདག་ལ་སྒྱུར་དུ་འཇུད་ན་ནི་དངོས་གཞིར་འགྱུར་རོ། །གཞན་ལ་སྒྱུར་དུ་འཇུད་ན་ནི་ཉེས་བྱས་སུ་འགྱུར་བར་ཤེས་པར་བྱའོ།། གནས་ཁང་ལ་སོགས་པའི་བྱེ་བྲག་གིས་སེམས་ཅན་དུ་བགྲང་བ་མ་ཡིན་པའི་ཡུལ་ལ་ནི་རྣམ་པ་མང་ངོ༌། །མུ་ཏོ་བ་དང་དུད་འགྲོའི་ཡུལ་ལ་རྣམ་པ་གཉིས་ཏེ། དེ་དག་ལ་ཡང་སྦྱོར་བ་དང༌། དངོས་གཉིས་ཀ་ལ་ཡང་ཉེས་བྱས་སོ། །གཡར་པོའི་ཆོས་ཞེས་བྱ་བ་ནི་བརྙན་པོ་ཉིད་དོ། །ཐེམ་སྐས་ཀྱི་གཞི་ཞེས་བྱ་བ་ནི་རྐང་རྟེན་ནོ། །མེ་ཏོག་ཁང་ཞེས་བྱ་བ་ནི་བང་རིམ་བཞི་པ་སྟེ། མེ་ཏོག་གི་གནས་ཡིན་པའི་ཕྱིར་རོ། །ཡང་ན་མེ་ཏོག་གི་ཕྲེང་བ་ཡིན་ནོ། །བ་གམ་ཞེས་བྱ་བ་ནི་གཙང་ཁང་ཕྱུར་བུའོ། །ཕུ་ཤུ་ཞེས་བྱ་བ་ནི་མཆོད་རྟེན་གྱི་བྲེའོ། །གདུགས་ཞེས་བྱ་བ་ནི་མཆོད་རྟེན་གྱི་འཁོར་ལོའོ། །མུ་ཏོ་བ་ཞེས་བྱ་བའི་ལྷག་མ་ཟ་བའོ། །བཙལ་ཏེ་མ་རྙེད་པ་ལ་ནི་ལྟུང་བ་མེད་དོ་ཞེས་བྱ་བ་ནི་དེས་མ་བླངས་པའི་ཕྱིར་དང༌། རྫས་ཆུད་ཟ་བ་ཡོངས་སུ་སྤང་བའི་དོན་གྱི་ཕྱིར་རོ། །བསྔོས་པ་ལས་བསྒྱུར་བའི་སྤང་བ་སྟེ་ཉི་ཤུ་དགུ་པའི་ཚིག་རྣམ་པར་བཤད་པ་རྫོགས་སོ།། །།དེ་ནས་ལག་ཉར་
བླངས་པ་ཞེས་བྱ་བ་ནི་གནས་ནས་རང་གིས་བླངས་པའོ། །དེ་ལས་བྱིན་ལེན་བྱས་པ་ཞེས་བྱ་བ་ནི་བྱིན་ལེན་སྟོབས་པ་ལས་བྱིན་ལེན་བྱས་པའོ། །ཟས་ཀྱི་ཕྱེ་མ་དང་འདྲེས་པ་ཞེས་བྱ་བ་ནི་འབྲས་ཀྱི་གཟེགས་མ་ལ་སོགས་པ་དང་འདྲེས་པའོ། །ཕན་ཚུན་འདྲེས་པ་ཞེས་བྱ་བ་ནི་ཞུན་མར་དང་བུ་རམ་ལ་སོགས་པ་འདྲེས་པའོ། །རང་གི་རྒྱུད་ཀྱིས་མྱངས་པ་ཞེས་བྱ་བ་ནི་རང་བཞིན་གྱིས་ཞུ་བའོ། །རྣམ་པར་དབྱེ་བ་ཞེས་བྱ་བ་ནི་ཐ་དད་པར་དབྱེ་བའོ། །གསོག་འཇོག་པ་ཞེས་བྱ་བ་ནི་བསག་པར་བྱ་བ་སྟེ། འདི་ལྟ་སྟེ་སྦྱིན་པ་དེ་ལག་ཉར་བླངས་པ་དང་སྤ་བ་དང་བཟའ་བ་དང་འདས་པའོ། །ལྟུང་བྱེད་སུམ་ཅུ་པ་གསོག་འཇོག་གི་སྤང་བའི་ཚིག་རྣམ་པར་བཤད་པ་རྫོགས་སོ།། །།འགགས་པ་ཞེས་བྱ་བ་ནི་འཇུག་ཀྱང་འགག་པའི་ཕྱིར་རོ། །བྲལ་བ་ཞེས་བྱ་བ་ནི་དེ་ཀུན་ནས་སློང་བར་བྱེད་པའི་སེམས་དང་བྲལ་བར་བྱེད་པའི་ཕྱིར་རོ། །རྣམ་པར་འགྱུར་བ་ཞེས་བྱ་བ་ན་ཀུན་ནས་སློང་བར་བྱེད་པ་དང༌། མི་མཐུན་པའི་སེམས་སྐྱེད་པའི་ཕྱིར་རོ། །སོ་སོར་བཤགས་པར་བྱ་བ་ཞེས་བྱ་བ་ནི་ལྟུང་བ་སྦྱང་པའི་ཕྱིར་དང༌། རྣམ་པར་སྨིན་པ་འཕངས་པ་བསྲབ་པའི་ཕྱིར་བཤགས་པའི་བྱ་བའོ། །བསྡམ་པ་ཞེས་བྱ་བ་ནི་བསོད་ནམས་སྤེལ་བའི་ཕྱིར་དང་སྡིག་པ་གཞོམ་པའི་ཕྱིར་རོ། །དགའ་བ་ཞེས་བྱ་བ་ནི་ཡིད་བདེ་བའོ། །མཆོག་ཏུ་དགའ་བ་ཞེས་བྱ་བ་ནི་དགའ་བ་དང་མཐུན་པའི་དགེ་བའི་ཆོས་ལ་མོས་པའོ། །ཉིན་མཚན་དུ་རྗེས་སུ་བསླབ་ཅིང་ཞེས་བྱ་བ་ནི་ཉིན་མཚན་ཐམས་ཅད་དུ་ཁྱབ་པར་རོ། །དྲན་པ་ཞེས་བྱ་བ་ནི་དྲན་པ་ཉེ་བར་གཞག་པ་སྟེ་དེས་ནི་དགའ་བ་དང་མཆོག་ཏུ་དགའ་བ་དེ་ལ་ཉོན་མོངས་པ་སྐྱེད་པར་མི་བྱེད་དོ། །ཤེས་བཞིན་ཞེས་བྱ་བ་ནི་ཉེ་བར་གནས་པའི་ཤེས་རབ་ཀྱིས་མི་རྟག་པ་ཉིད་ལ་སོགས་པར་ལྟ་བ་སྟེ། དེས་ནི་མཆོག་ཏུ་འཛིན་པར་ལྟ་བ་ལ་སོགས་པའི་ཉོན་མོངས་པ་སྐྱེད་པར་མི་བྱེད་དོ། །མང་དུ་གནས་པར་བྱའོ་ཞེས་བྱ་བ་ནི་ཤས་ཆེར་གནས་པར་བྱ་བ་ཡིན་གྱི་བྱ་བ་གཞན་མི་བྱ་བ་ནི་མ་ཡིན་ནོ་ཞེས་བྱ་བའི་ཐ་ཚིག་གོ །ཡིད་ནི་འདས་པའི་འདུ་བྱེད་རྣམས་ལ་བརྟེན་ཏེ་སྐྱེ་བས་ཞེས་བྱ་བ་ལ་སོགས་པས་ནི་དམིགས་པའི་དབང་གིས་ཡིད་ཀྱི་ལས་རྣམ་པ་གསུམ་དུ་འགྱུར་གྱི་རང་ལས་ནི་མ་ཡིན་ཏེ། དེ་ནི་སྐྱེས་མ་ཐག་ཏུ་དངོས་གཞི་ཡིན་པའི་ཕྱིར་རོ།
ཞེས་བསྟན་ཏོ། །ཆོས་དེ་ནི་དུས་ཐམས་ཅད་པ་ཡིན་པ་དང༌། སྐྱེ་བོ་ཐམས་ཅད་ཀྱིས་བསྟེན་པར་བྱ་བ་ཡིན་པས་དེ་ལ་གུས་པར་བྱ་བ་བསྟན་པའི་ཕྱིར་སྒྲ་གཅན་ཟིན་དགེ་སློང་ངམ་བྲམ་ཟེ་གང་དག་ཅེས་བྱ་བ་ལ་སོགས་པ་གསུངས་སོ། །གོ་བླ་བར་བྱ་བ་དང་ལས་ལ་སོ་སོར་རྟོག་པའི་འབྲས་བུ་བསྟན་པའི་ཚིགས་སུ་བཅད་པ་གཉིས་བཀའ་སྩལ་ཏོ། །སངས་རྒྱས་ཀྱིས་བསྟན་པ་ཞེས་བྱ་བ་ནི་སངས་རྒྱས་གྱི་བཀའོ། །དགེ་བ་ཞེས་བྱ་བ་ནི་འཕགས་པའི་ལམ་དང་མྱ་ངན་ལས་འདས་པའོ། །བསླབ་པའི་གཞི་འཆའ་བར་ནི་མི་མཛད་དོ་ཞེས་བྱ་བ་ནི་སྒྲ་གཅན་ཟིན་རྫོགས་པར་མ་བསྙེན་པའི་ཕྱིར་རོ་ཞེས་བྱ་བར་ཤེས་པར་བྱའོ། །སྨྲ་བ་དང་གཞན་གྱི་སྨྲ་བའི་རྗེས་སུ་བརྩོན་པ་ཞེས་བྱ་བ་ལ། སྨྲ་བ་ཞེས་བྱ་བ་ནི་སངས་རྒྱས་ཀྱི་བཀའ་ཡིན་པའི་བསྟན་བཅོས་དག་གོ །གཞན་གྱི་སྨྲ་བ་ཞེས་བྱ་བ་ནི་དཔྱོད་པ་ཅན་ལ་སོགས་པ་གཞན་གྱི་གྲུབ་པའི་མཐའ་དག་སྟེ། དེ་དག་ལ་རྗེས་སུ་བརྩོན་ཞེས་བྱ་བའི་ཐ་ཚིག་གོ །ཡང་ན་བསྟན་བཅོས་ཀྱི་སྒོ་ནས་གཞན་དང་ལྷན་ཅིག་རྩོད་པ་སྨྲས་པས་གཞན་དང་རྩོད་པའི་རྗེས་སུ་བརྩོན་པ་ཞེས་བྱ་བར་སྦྱར་རོ། །བྲམ་ཟེ་མཆོག་ཉིད་དུ་འགྱུར་ལ་ཞེས་བྱ་བ་ནི་བྲམ་ཟེ་རྣམས་རྒྱལ་ཞིང་མཆོག་ཉིད་དུ་འགྱུར་རོ། །རིགས་བཞི་པོ་དག་རྣམ་པར་དག་པ་ཞེས་བྱ་བ་ནི་རིགས་བཞི་པོ་དག་རྣམ་པར་ཐར་པའོ། །འདོད་པ་ཞེས་བྱ་བ་ནི་མངོན་པར་འདོད་པའོ། །སྟོན་པ་ཞེས་བྱ་བ་ནི་རབ་ཏུ་སྟོན་པའོ། །འདོགས་པ་ཞེས་བྱ་བ་ནི་འཛིན་དུ་འཇུད་པའོ། །རབ་ཏུ་འཇོག་པ་ཞེས་བྱ་བ་ནི་རྗེས་སུ་བསྒྲུབ་ཏུ་འདུད་པའོ། སློབ་དཔོན་གྱི་མཚན་ཞེས་བྱ་བ་ནི་སྣའི་གཟངས་མཐོ་བ་ལ་སོགས་པའི་རྟགས་སོ། །རྣོན་པོར་བྱ་ཞེས་བྱ་བ་ནི་ངེས་པར་རྒྱལ་བར་བྱ་བའི་ཕྱིར་ངེས་པར་གཞག་པའོ། །བློན་པོ་ཆེན་པོ་ཞེས་བྱ་བ་ནི་བརྗེད་ངས་པའི་ཕྱིར་རོ། །ཤེས་པས་མི་འཁྲུགས་པ་ཞེས་བྱ་བ་ནི་དོགས་པ་མེད་པའི་ཕྱིར་རོ། །ཐོས་པ་གཟུང་བ་ཞེས་བྱ་བ་ནི་དོན་དང་ཚིག་གི་བདག་ཉིད་གཟུང་བའོ། །ཚོགས་ཀློག་དུ་གཞུག་ཅེས་བྱ་བ་ནི་འཁོར་གྱི་ཚོགས་ཀློག་ཏུ་གཞུག་པའོ། །རྣམ་པར་དཔྱད་པ་ཞེས་བྱ་བ་ནི་རྣམ་པར་བརྟགས་ནས་སོ། །གཞི་མེད་པར་མཐོང་བ་དང་ཞེས་བྱ་བ་ལ། འདིར་མཐོང་བ་ཞེས་བྱ་བ་ནི་
མཐོང་བ་སྨྲ་བའོ། །བརྫུན་སྨྲ་བར་བྱའོ་སྙམ་པ་ཞེས་བྱ་བ་ནི་འདིར་བརྫུན་སྨྲ་བའི་སྦྱོར་བ་ཡིན་པར་ཤེས་པར་བྱའོ། །བརྫུན་སྨྲའོ་སྙམ་པ་ཞེས་བྱ་བ་ནི་དངོས་སོ། །བརྫུན་སྨྲས་སོ་སྙམ་པ་ཞེས་བྱ་བ་ནི་མཇུག་གོ །བརྫུན་སྨྲ་བ་ལ་རྣམ་པ་གཅིག་པུ་འབའ་ཞིག་ནི་མེད་དོ་ཞེས་བྱ་བ་ནི་གང་གི་ཕྱིར་འདིར་གང་ཟག་རང་བཞིན་དུ་གནས་པ་ཐ་སྙད་དུ་བྱར་རུང་བའི་དབང་དུ་བྱས་པས་ཡིན་ལ་གང་ཟག་དབང་དུ་གནས་པ་ལ་ནི་བརྫུན་སྨྲ་བ་ན་བདག་གིས་བརྫུན་སྨྲའོ་སྙམ་པའི་སེམས་སྐྱེ་བར་འགྱུར་གྱི་སྨྲས་པ་ན་ཡང་བརྫུན་སྨྲའོ་སྙམ་པའི་སེམས་ཀྱིས་མ་བསླངས་པར་བརྫུན་སྨྲ་བར་མི་རིགས་པས་དེའི་ཕྱིར་རྣམ་པ་གཅིག་པ་འབའ་ཞིག་ནི་མེད་དོ། །དགེ་འདུན་གྱི་ནང་ན་ཞེས་བྱ་བ་ནི་དབྱེ་བའི་བསམ་པས་སོ། །ཆོས་མ་ཡིན་པ་ཆོས་སུ་ཞེས་བྱ་བ་ནི་མེད་པ་ཉིད་དང་བདག་ཏུ་ལྟ་བ་ལ་སོགས་པ་ལ་རིགས་པ་མ་ཡིན་པར་རིགས་པར་རོ། །ཆོས་ཞེས་བྱ་བ་ནི་ཡོད་པ་ཉིད་དང་བདག་མེད་པ་ལ་སོགས་པ་རིགས་པའོ། །འདུལ་བ་མ་ཡིན་པ་ཞེས་བྱ་བ་ནི་ཚངས་པར་སྤྱོད་པ་མ་ཡིན་པ་ལ་སོགས་པའོ། །འདུལ་བ་ཞེས་བྱ་བ་ནི་ཚངས་པར་སྤྱོད་པ་མ་ཡིན་པ་སྤོང་བ་ལ་སོགས་པའོ། །ཅང་མི་སྨྲ་བར་སྡོད་པའོ་ཞེས་བྱ་བ་ནི་བསྡམ་པར་བྱ་བའི་ཉེས་བྱས་སོ། །ཁ་འགུལ་བ་ལ་སོགས་པ་ཡོད་ན་ནི་བཤགས་པར་བྱ་བ་ཡང་ཡིན་ནོ། །སྲེད་པར་བྱེད་འཚེད་པར་བྱེད་ཅེས་བྱ་བ་འདིས་ནི་འཚེད་པར་བྱེད་པས་ལྟུང་བྱེད་དོ་ཞེས་བྱ་བ་སྟོན་ཏེ། སྲེག་པར་བྱེད་ཅེས་བྱ་བ་ནི་སེམས་ཅན་དམྱལ་བ་དག་ཏུ་མེས་སོ། །འཚེད་པར་བྱེད་ཅེས་བྱ་བ་ནི་དུད་འགྲོ་དག་ཏུ་ལུས་ཀྱི་སྡུག་བསྔལ་དུ་མས་ཉོན་མོངས་པའི་ཕྱིར་རོ། །ལྟུང་བར་བྱེད་ཅེས་བྱ་བ་འདིས་ནི་ལྟུང་བར་བྱེད་དོ་ཞེས་བྱ་བ་སྟོན་ཏོ། །ཡིད་དགས་རྣམས་སུ་མི་གཙང་བ་ཟག་བ་ལ་སོགས་པའི་ལས་ཤིན་ཏུ་མང་བར་ལྟུང་བའི་ཕྱིར་རོ། །དགེ་བའི་ཆོས་རྣམས་ལ་སྒྲིབ་པར་བྱེད་པ་ཞེས་བྱ་བ་ནི་འདིས་ནི་དགེ་བའི་ཆོས་ལ་ལྟུང་བས་ལྟུང་བྱེད་དོ་ཞེས་བྱ་བར་སྟོན་ཏེ་དྲོ་བར་གྱུར་བ་ལ་སོགས་པ་འབྱུང་བའི་ཆོས་ཀྱི་བར་དུ་གཅོད་པའི་ཕྱིར་རོ། །དེ་ལ་ལྟུང་བ་ཇི་ལྟར་འགྱུར་ཞེ་ན་ཞེས་བྱ་བ་ལ། མཐོང་བ་དང༌། ཐོས་པ་དང༌། རིག་པ་དང༌། རྣམ་པར་ཤེས་པའི་གཞི་མེད་པ་ཉིད་ནི་བཞི་པ་གཅིག་གོ །བརྗེད་པ་ཉི་གཉིས་པ་སྟེ་བརྗོད་པ་ཡང་གཞི་མེད་
པ་ཉིད་དུ་བསྟན་པའི་ཕྱིར་རོ། །ཡིད་གཉིས་ཟ་བ་ནི་གསུམ་པ་སྟེ། ཡིད་གཉིས་ཟ་བཞིན་དུ་ངེས་པར་སྨྲ་བ་ཡང་བརྫུན་ཉིད་ཡིན་པར་བསྟན་པའི་ཕྱིར་རོ། །མཐོང་བ་ལ་སོགས་པ་ལ་མ་མཐོང་བ་ལ་སོགས་པར་འདུ་ཤེས་པ་ནི་བཞི་པར་རོ། །མ་མཐོང་ཞིང་ཐོས་པ་ལ་སོགས་པ་ལ་མཐོང་བར་སྨྲ་བ་ནི་ལྔ་པའོ། །མ་ཐོས་ཤིང་མཐོང་བ་ལ་སོགས་པ་ལ་ཐོས་པར་སྨྲ་བ་ནི་དྲུག་པའོ། །མ་རིག་ཅིང་མཐོང་བ་ལ་སོགས་པ་ལ་རིག་པར་སྨྲ་བ་ནི་བདུན་པའོ། །རྣམ་པར་མ་ཤེས་ཤིང་མཐོང་བ་ལ་སོགས་པ་ལ་རྣམ་པར་ཤེས་པར་སྨྲ་བ་ནི་བརྒྱད་པའོ། །མཐོང་བ་ལ་སོགས་པ་བརྗོད་པ་ལ་མ་མཐོང་ཞིང་མ་བརྗོད་དོ་ཞེས་བྱ་བ་ལ་སོགས་པར་སྨྲ་བ་ནི་དགུ་པའོ། །མཐོང་བ་ལ་སོགས་པ་ཡིད་གཉིས་ཟ་བ་ལ་མ་མཐོང་ཞིང་ཡིད་གཉིས་མི་ཟའོ་ཞེས་བྱ་བ་ལ་སོགས་པར་སྨྲ་བ་ནི་བཅུ་པའོ། །མཐོང་བ་ལ་མ་མཐོང་ཞིང་ཐོས་པ་ལ་སོགས་པར་སྨྲ་བ་ནི་བཅུ་གཅིག་པའོ། །ཐོས་པ་ལ་མ་ཐོས་ཤིང་མཐོང་བ་ལ་སོགས་པར་སྨྲ་བ་ནི་བཅུ་གཉིས་པའོ། །རིག་པ་ལ་མ་རིག་ཅིང་ཐོས་པ་ལ་སོགས་པར་སྨྲ་བ་ནི་བཅུ་གསུམ་པའོ། །རྣམ་པར་ཤེས་པ་ལ་རྣམ་པར་མ་ཤེས་ཤིང་མཐོང་བ་ལ་སོགས་པར་སྨྲ་བ་ནི་བཅུ་བཞི་པའོ། །བཞི་པ་བཅུ་བཞི་པོ་དེ་དག་ཇི་ལྟ་བ་བཞིན་དུ་དེ་ལས་བཟློག་པར་ཡང་བཅུ་བཞི་སྟེ་སྤྱིར་བཞི་པ་ཉི་ཤུ་རྩ་བརྒྱད་ཡོད་དོ། །བརྫུན་དུ་སྨྲ་བའི་ལྟུང་བྱེད་དེ་དང་པོའི་ཚིག་རྣམ་པར་བཤད་པ་རྫོགས་སོ།། །།ཞར་བ་ཞེས་བྱ་བ་ནི་མིག་ཡ་གཅིག་པའོ། །འཐེང་པོ་ཞེས་བྱ་བ་ནི་རྐང་པ་འཐེང་ཞིང་ལེག་ལེག་པོར་འགྲོ་བའོ། །སྨད་འཆལ་ཞེས་བྱ་བ་ནི་བརླའི་ཕྱོགས་རླུང་གིས་ཀུན་ནས་ཉམས་པར་གྱུར་པའོ། །ལག་སོར་རྡུམ་པོ་ཞེས་བྱ་བ་ནི་མཁྲིག་མའི་ཕྱོགས་ན་མཚན་མ་ཙམ་གྱི་ལག་པ་ཡོད་ཅིང་ཅུང་ཟད་ཀྱང་བྱེད་མི་ནུས་པའོ། །སྒུར་པོ་ཞེས་བྱ་བ་ནི་བྲང་དང་སྒལ་ཚིགས་ཞོམ་པའོ། །མིའུ་ཐུང་ཞེས་བྱ་བ་ནི་ཧ་ཅང་ལུས་ཆུང་བར་གྲགས་པའོ། །ལྦ་བ་ཅན་ཞེས་བྱ་བ་ནི་ལྐོག་མ་ལ་ལྦ་བ་ཡོད་པའོ། །ལྐུགས་པ་ཞེས་བྱ་བ་ནི་སྨྲ་མི་ནུས་པའོ། །འོན་པ་ཞེས་བྱ་བ་ནི་དོན་དང་བཅས་པའི་སྒྲ་ཐོས་པར་མི་ནུས་པའོ། །རྟེན་འཕྱེ་ཞེས་བྱ་བ་ནི་ལག་པ་གཉིས་ལག་རྟེན་ལ་བརྟེན་ནས་གཟུགས་བཞིས་འཕྱེ་བའོ། །རྐང་
བམ་ཞེས་བྱ་བ་ནི་རྐང་པ་ལ་ནད་ཀྱི་རིགས་རྐང་བམ་ཞེས་བྱ་བ་ནི་སྐྲངས་པ་ཡོད་པའོ། །གྱོལ་པོ་ཞེས་བྱ་བ་ནི་རྐང་ཡོན་ནོ། །མཆུ་འཕྱངས་ཞེས་བྱ་བ་ནི་མཆུ་རིང་བའོ། །མགོ་བོ་ཆེ་ཞེས་བྱ་བ་ནི་མགོ་ཚད་ལས་འདས་པར་ཆེ་བའོ། །སྦ་གོང་བ་ཞེས་བྱ་བ་ནི་བག་འཁུམས་པའོ། །གཟེངས་དམའ་བ་ཞེས་བྱ་བ་ནི་སྦུང་ཉམས་པའོ། །ཞུམ་པ་ཞེས་བྱ་བ་ནི་སེམས་ཞུམ་པའོ། །གྲོང་གི་བྱ་བ་ཞེས་བྱ་བ་ནི་ཁྱིམ་གྱི་བསམ་པ་ལ་སོགས་པའོ། །དགོན་པའི་བྱ་བ་ཞེས་བྱ་བ་ནི་ཞིང་རྨོ་བ་ལ་སོགས་པའོ། །ཞིང་ཚིགས་ཞེས་བྱ་བ་ནི་ཞིང་གི་བར་རོ། །དུ་བ་གཏུལ་ཏེ་ཞེས་བྱ་བ་ནི་སྦྲང་མ་ལ་སོགས་པ་བཟློག་པའི་ཕྱིར་རོ། །ཞིང་ཟན་ཞེས་བྱ་བ་ནི་ལོ་ཐོག་ཟ་བའོ། །ཞིང་ལ་སྤྲོས་ནས་ཞེས་བྱ་བ་ནི་ཞིང་ལ་ཞུགས་ནས་སོ། །བག་རྫངས་ཞེས་བྱ་བ་ནི་བག་མ་བཏང་བ་ལ་དགོས་པའི་རྫས་སོ། །འཇིག་རྟེན་གནས་ཞེས་བྱ་བ་ནི་སྣོད་ཀྱི་འཇིག་རྟེན་གནས་པའོ། །ཆགས་ནས་རིང་པོ་མ་ལོན་པར་ཞེས་བྱ་བ་ནི་ཡུན་མི་རིང་བའོ། །བདེན་པས་གསོལ་བ་ཞེས་བྱ་བ་ནི་བདེན་པའི་ཚིག་གིས་ལྷ་ལ་སོགས་པ་གསོལ་བའོ། །ནུབ་ཕྱོགས་ནས་ཉི་མ་ཤར་ཏམ་ཇི་ན་ཞེས་བྱ་བ་ནི་འཇིག་རྟེན་ལོག་པར་གྱུར་ཏམ་ཞེས་བྱ་བའི་ཐ་ཚིག་གོ །ཁམ་ཞེས་བྱ་བ་ནི་ཟ་བའོ། །རུ་འདེལ་ཞེས་བྱ་བ་ནི་རྭ་ཐད་ཀར་འདུག་པའོ། །ཁུ་ཡུ་ཞེས་བྱ་བ་ནི་མོན་རུའོ། །ཆང་གྲལ་ཞེས་བྱ་བ་ནི་ཆང་བའི་ཁྱིམ་མོ། །ལམ་དམའ་བ་ནས་ཞེས་བྱ་བ་ནི་དམའ་བ་ནས་གྱེན་གཤོར་རོ། །སྐུགས་སུ་འཛུགས་ཞེས་བྱ་བ་ནི་ཡལ་ཟུག་འཁྲས་པའོ། །བདའ་བ་ཞེས་བྱ་བ་ནི་གདབ་པའོ། །མིང་མི་སྙན་པ་ཞེས་བྱ་བ་ནི་སྨད་པའི་མིང་ངོ༌། །མྱུར་བ་ཞེས་བྱ་བ་ནི་སྐྱེན་པའོ། །བྱམས་པའི་རྒྱུན་ཞེས་བྱ་བ་ནི་གཅུགས་པའི་རྒྱུན་ནམ་ཆུང་ཟད་དོ། །བྱུང་བའི་མཐའ་སྔ་མས་ནི་ཆུང་ལ་གྲུབ་པ་བསྟན་ཏོ། །ཕྱི་མས་ནི་ནོར་གྲུབ་པ་བསྟན་ཏོ། །མིའི་སྐྱོན་ནས་སྨྲ་བའི་བསམ་པས་ཞེས་བྱ་བ་ནི་མིའི་ཡོན་ཏན་སྨྲ་བར་འདོད་པས་བཤུང་བ་ཉིད་སྨྲའོ་སྙམ་པའི་བསམ་པས་ཉོན་མོངས་པ་ཅན་གྱིས་ཞེས་བྱ་བའི་ཐ་ཚིག་གོ །སྤ་གོང་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་ཞེས་བྱ་བ་ནི་སྐྱོན་ནས་སྨྲ་བ་ཉིད་ཉེས་པ་ཡིན་པར་དགོངས་སོ། །བྲམ་ཟེ་དང་རྒྱལ་རིགས་ལ་ཉེས་བྱས་སུ་འགྱུར་རོ་ཞེས་བྱ་བ་ནི་དེ་གཉིས་འཇིག་རྟེན་ན་ཁྱད་པར་དུ་འཕགས་
པ་ཡིན་པའི་སྐྱོན་དུ་མི་བརྩི་བའི་ཕྱིར་རོ། །རྗེའུ་རིགས་ལ་སོགས་པ་ནི་སྐྱོན་དུ་བརྩི་བ་ཡིན་པའི་ཕྱིར་དངོས་གཞིར་འགྱུར་རོ། །ཁབ་རིས་མཁན་ཞེས་བྱ་བ་ནི་སྐུད་རིས་མཁན་ནོ། །བ་ལང་སྲུང་བ་ཞེས་བྱ་བ་ནི་ཕྱུགས་རྫིའོ། །ཟོར་བ་ཞེས་བྱ་བ་ནི་བརྡ་སྤྱད་དོ། །ཕྲག་གདང་ཞེས་བྱ་བ་ནི་ཕྲག་པའི་ཁུར་རོ། །བེའུ་རས་ཞེས་བྱ་བ་ནི་རས་བལ་གྱི་སྣམ་བུ་སྤུ་ཅན་ནོ། །དར་ལ་ཞེས་བྱ་བ་ནི་རས་སྲབ་མོའོ། །བེའུ་རས་ཡུག་ཆེན་ཞེས་བྱ་བ་ནི་གོས་ཀྱི་རིགས་སྤུ་ཅན་ཡིན་ནོ། །བར་ཏང་ཞེས་བྱ་བ་ནི་གོས་ཀྱི་རིགས་ཁྲ་བོ་སྡུག་པའོ། །ཁྲིའུ་ཚེ་ཞེས་བྱ་བ་ནི་ཐགས་མ་ཁ་དོག་ཅན་ནོ། །གོར་བུ་ཞེས་བྱ་བ་ནི་ཁྲི་རུ་སྟན་ནོ། །ཞྭ་སྒྲའོ་ཞེས་བྱ་བ་ནི་རྣ་བ་མེད་པའོ། །བྱིས་པའི་གོས་ཞེས་བྱ་བ་ནི་བྱིས་པ་ཆུང་ངུའི་གོས་སོ། །ཤིང་ང་དཔུང་ཆད་ཅེས་བྱ་བ་ནི། ཤིང་ང་དཔུང་ཆད་དུ་བགོ་བ་དྲས་ཏེ་དྲུབས་པའོ། །དོར་མ་ཞེས་བྱ་བ་ནི་རྐང་གོས་སོ། །རྡུ་ས་མགར་ཞེས་བྱ་བ་ནི་ཁར་བ་ལ་སོགས་པ་རྡུ་ས་མགར་རོ། །ཆ་ལང་ཞེས་བྱ་བ་ནི་རོལ་མོའི་སྒྲ་འབྱིན་པའོ། །སྐོམ་ཕོར་ཞེས་བྱ་བ་ནི་སྐོམ་གྱི་སྣོད་དོ། །སྒ་ཞེས་བྱ་བ་ནི་རྟ་ཞོན་པའི་སྒའོ། །དོང་པ་ཞེས་བྱ་བ་ནི་མདའ་སྣོད་དོ། །ཁ་སྤུ་བྲེགས་པ་ཞེས་བྱ་བ་ནི་སྨར་བཅོས་པའོ། །བྱིན་པ་བཅོས་པ་ཞེས་བྱ་བ་ནི་རྗེ་ངར་གྱི་སྤུ་བཅོས་པའོ། །དུད་གཟེབ་པ་ཞེས་བྱ་བ་ནི་གོས་དུ་བས་བདུག་པའི་གཟེབ་བོ། །ཕོ་ཉར་འགྲོ་བ་ཞེས་བྱ་བ་ནི་བདག་ཉིད་མངག་པར་འགྲོ་བའོ། །མདག་པ་ཞེས་བྱ་བ་ནི་གཞན་བསླབས་ཏེ་མདག་པར་བཏང་བའོ། །སོན་པ་ཞེས་བྱ་བ་ནི་སོན་མའོ། །དྲུ་བུ་ཞེས་བྱ་བ་ནི་ཕུད་བུ་ལ་སོགས་པའོ། །བརྒྱད་ཞིང་ཞེས་བྱ་བ་ནི་བཙེམ་པའི་ཕྱིར་གོས་བརྒྱད་བ་ལ་དགོས་པའོ། །ཚོན་ཞེས་བྱ་བ་ནི་སྔོན་པོ་ལ་སོགས་པའོ། །ཕུར་པ་ཞེས་བྱ་བ་ནི་བཅིང་བའི་ཤིང་ངོ༌། །སོ་མངས་ཞེས་བྱ་བ་ནི་ཆ་མཉམ་པར་བྱ་བ་ལ་དགོས་པའི་ཤིང་སོ་མངས་སོ། །སྦུ་བ་མོ་ཞེས་བྱ་བ་ནི་སོར་མོ་ལ་བསྐོན་པའི་ཀོ་བའོ། །སྦུད་རུ་ཞེས་བྱ་བ་ནི་སྦུད་པའི་སྣ་ལ་གདགས་པའི་སྦུ་བུའོ། །ཏི་ཚ་ཞེས་བྱ་བ་ནི་འོག་གཞིའི་རྡོའོ། །ཐོ་བ་ཞེས་བྱ་བ་ནི་ལྕགས་ཐོའོ། །རྒྱུས་པ་ཞེས་བྱ་བ་ནི་འཚེམ་པའི་སྐུད་པའོ། །སྨྱུང་བུ་ཞེས་བྱ་བ་ནི་སྨྱུང་ཕྲ་མོའོ། །འཁོར་ལོའི་རྟེན་མ་ཞེས་བྱ་བ་ནི་འཁོར་ལོའི་གཞི་སྟེ་འཁོར་གཏན་ཞེས་བྱ་བའི་ཐ་ཚིག་གོ །གཞལ་
ཞེས་བྱ་བ་ནི་ཁ་དོག་བྱེད་པའོ། །སོག་ལེ་ཞེས་བྱ་བ་ནི་བེའུ་སོ་ལྟ་བུའོ། །སྨྱིག་ཐོ་ཞེས་བྱ་བ་ནི་སྨྱིག་མ་རུང་བའི་ཤིང་ངོ༌། །ལྷང་ཚེར་ཞེས་བྱ་བ་ནི་ཉི་མའི་སྣབས་སོ། །ངལ་སྐྱེན་པ་ཞེས་བྱ་བ་ནི་དུབ་སྐྱེན་པའོ། །ཁྱི་རྡོ་ཞེས་བྱ་བའི་སྐྲང་བའོ། །གློག་པ་ཞེས་བྱ་བ་ནི་གློག་པ་སྐྱ་བོ་གཡའ་བའོ། །བཀྲེས་དབ་ཞེས་བྱ་བ་ནི་བྲུ་བ་ཚ་བའོ། །ཚིལ་པོ་ཆེ་ཞེས་བྱ་བ་ནི་ཚིལ་གྱིས་ཚོ་བའོ། །ཁོན་དུ་འཛིན་པ་ཞེས་བྱ་བ་ནི་གང་གིས་ཀུན་ནས་མནར་སེམས་ཀྱི་རྒྱུ་སྩོགས་པ་བྱེད་པའོ། །འཆབ་པ་ཞེས་བྱ་བ་ནི་གང་གིས་ཁ་ན་མ་ཐོ་བ་འཆབ་པར་བྱེད་པའོ། །ངན་དུས་ཞེས་བྱ་བ་ནི་གང་གིས་བྱ་བ་མ་ཡིན་པ་གཏོང་བར་མི་འདོད་པའོ། །མིའི་སྐྱོན་ནས་སྨྲ་བའི་ལྟུང་བྱེད་དེ་གཉིས་པའི་ཚིག་རྣམ་པར་བཤད་པར་རྫོགས་སོ།། །།ཕྲ་མ་ཞེས་བྱ་བ་ནི་འབྱེད་འདོད་པའི་སྲེད་པ་ལ་སོགས་པ་ལས་བྱུང་བའི་ཐ་ཚིག་གོ །ཕྱི་བཞིན་འབྲང་ཞེས་བྱ་བ་ནི་ཕི་ན་ལུས་པའོ། །འཁོར་ཞེས་བྱ་བ་ནི་བསྟེན་པའོ། །རབ་ཏུ་གདུང་བ་ཞེས་བྱ་བ་ནི་མངོན་པར་དགའ་བས་རྟག་ཏུ་རྗེས་སུ་འཇུག་པའོ། །ཚང་ཞེས་བྱ་བ་ནི་གནས་སོ། །རླུང་ཚ་བ་དག་ཅེས་བྱ་བ་ནི་སྡུག་བསྔལ་གྱི་རྒྱུ་དག་གོ །བྱ་རྨྱངས་ཞེས་བྱ་བ་ནི་ལུས་བརྐྱངས་པའོ། །གླལ་ཞེས་བྱ་བ་ནི་ཁ་གདངས་པའོ། །རྩ་བའི་སེང་གེ་ཞེས་བྱ་བ་ནི་སྟོབས་ཆུང་བའོ། །ཕུག་ཏྲིག་ཅེས་བྱ་བ་ནི་རྐང་ལག་གིས་ས་འཐོར་བའོ། །རྔམ་པ་ཞེས་བྱ་བ་ནི་ཚམ་ངམ་མོ། །བཟང་པོ་ཞེས་བྱ་བ་ནི་དགེ་བའོ། །སྐྱེ་བོ་ངན་པ་ཞེས་བྱ་བ་ནི་སྐྱེ་བོ་དམན་པའོ། །ཝ་ཞེས་བྱ་བ་ནི་སྲོག་ཆགས་ཀྱི་རིགས་ཝའོ། །དབྱེན་གྱི་ཚིག་མི་ཉན་པའི་ཕན་ཡོན་བསྟན་པའི་ཕྱིར་བྱུང་བའི་མཐའ་གཉིས་པ་བཀའ་སྩལ་ཏོ། །ཕྲུ་གུ་ཞེས་བྱ་བ་ནི་བུའོ། །ལྷག་རོལ་ཞེས་བྱ་བ་ནི་གོད་མའོ། །ཆུ་ཞེང་ཞེས་བྱ་བ་ནི་ལུས་ཀྱི་བོང་ངོ༌། །རྩ་ལ་ཞེས་བྱ་བ་ནི་བརྩོན་པའོ། །ཤུགས་ཞེས་བྱ་བ་ནི་མྱུར་བའོ། །རྒོལ་བ་ཞེས་བྱ་བ་ནི་གསོད་པའོ། །མི་སྤང་བ་ཞེས་བྱ་བ་ནི་མི་གཏང་བའོ། །གཞན་གྱིས་སྨྲས་པ་དག་ཅེས་བྱ་བ་ནི་འབྱེད་པར་བྱེད་པའི་ཚིག་དག་གོ །བརྟག་པར་བྱ་བ་ནི་དཔྱད་པར་བྱ་བའོ། །སྐབས་ཞེས་བྱ་བ་ནི་གླགས་སོ། །ཚོལ་ཞེས་བྱ་བ་ནི་ལྟ་བའོ། །དེ་ལ་ལྟུང་བ་ཇི་ལྟར་འགྱུར་ཞེས་བྱ་བ་ལ། བྲམ་ཟེ་དང་རྒྱལ་རིགས་གཉིས་ནི་
སྨད་པར་བྱ་བ་མ་ཡིན་པ་ཉིད་ཀྱི་སྐྱོན་ནས་སྨྲ་བ་མེད་པའི་ཕྱིར་མིང་དང་རིགས་དང་རུས་བརྗོད་པ་ལ་ཉེས་བྱས་སོ། །རྗེའུའི་རིགས་ལ་སོགས་པ་སྐྱོན་ནས་སྨྲ་བ་ཉིད་ཡིན་པའི་ཕྱིར་མིང་དང་རིགས་དང་རུས་བརྗོད་ན་དངོས་གཞིར་འགྱུར་རོ། །དམངས་རིགས་ལ་སོགས་པ་བྲན་གྱི་མཐར་ཐུག་པ་ཐམས་ཅད་ལ་ཡང་དེ་བཞིན་ནོ། །དགེ་སློང་ལ་ཕྲ་མ་བྱེད་པའི་ལྟུང་བྱེད་དེ་གསུམ་པའི་ཚིག་རྣམ་པར་བཤད་པ་རྫོགས་སོ།། །།ཤད་ཀྱིས་མ་བྱུང་ཞེས་བྱ་བ་ནི་དགེ་འདུན་གྱི་ནང་དུ་སྙིང་ཐག་པ་ནས་མ་སྨྲས་པའོ། །ལེགས་པར་ཤད་ཀྱིས་མ་བྱང་ཞེས་བྱ་བ་ནི་ཕྱོགས་གཅིག་མ་སྨྲས་པའོ། །ཡང་ཤད་ཀྱིས་བྱང་བར་བྱ་ཞེས་བྱ་བ་ནི་མཐར་ཐུག་པའི་ཕྱིར་རོ། །ངེས་པར་མ་བརྟགས་ཞེས་བྱ་བ་ནི་རྣམ་པར་མ་དཔྱད་བའོ། །ཉེ་བར་མ་ཞི་བ་ཞེས་བྱ་བ་ནི་མ་བཏང་བའོ། །ཡང་ལས་ཀྱིས་སྐྱོ་སྔོགས་བྱེད་ཅེས་བྱ་བ་ནི་ཡང་ལས་བྱས་པར་སྔར་ལས་བྱས་པ་སྤོང་བར་བྱེད་ཅེས་བྱ་བའི་ཐ་ཚིག་གོ །དེ་ལ་ལྟུང་བ་ཇི་ལྟར་འགྱུར་ཞེ་ན་ཞེས་བྱ་བ་ལ། འཐབ་པའི་ཕྱིར་རྩོད་པ་དང༌། མི་གདམས་པའི་ཕྱིར་རྩོད་པ་དང༌། ལྟུང་བའི་ཕྱིར་རྩོད་པ་དང༌། བྱ་བའི་ཕྱིར་རྩོད་པར་འདུ་ཤེས་ནས། ཤད་ཀྱིས་བྱང་བ་ལ་དེར་འདུ་ཤེས་པ་དང༌། ཡིད་གཉིས་ཟ་བ་དང༌། ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་པ་དང༌། ཡིད་གཉིས་ཟ་བ་ལ་བཞི་པ་བཞི་པའོ། །མི་གདམས་པའི་ཕྱིར་རྩོད་པ་དང༌། ལྟུང་བའི་ཕྱིར་རྩོད་པ་དང༌། བྱང་བའི་ཕྱིར་རྩོད་པ་དང༌། ཡང་དེ་བཞིན་དུ་བཞི་པ་བཞི་སྟེ། སྤྱིར་བཞི་པ་བཅུ་དྲུག་པ་བསྟན་ཏོ། །འདིར་རྩོད་པ་ལ་སྐྱོ་སྡོགས་བྱེད་པ་ཉིད་ཉེས་པ་ཡིན་པས། རྩོད་པ་གཞན་ལ་གཞན་དུ་འདུ་ཤེས་ཤིང་ཡང་ལས་ཀྱིས་སྐྱོ་སྔོགས་བྱེད་པ་ལ་ཡང་དེ་བཞིན་དུ་ལྟུང་བ་འདྲ་བར་བསྟན་པའོ། །འདུན་པ་འབུལ་བ་ཞེས་བྱ་བ་ནི་ཉེ་བར་ཞི་བའི་ལས་དེ་བྱ་བའི་ཕྱིར་འདུན་པ་ཕུལ་བའོ། །ལྟ་བ་སྨྲ་བ་ཞེས་བྱ་བ་ནི་ཁོ་བོ་འདི་ལྟར་འདོད་པ་འདི་ལྟར་མི་འདོད་དོ་ཞེས་རང་གི་བསམ་པས་སྨྲས་པའོ། །གང་ཟག་དང་པོ་གསུམ་ལ་ལྟུང་བྱེད་དུ་འགྱུར་བ་ནི་རང་ཉིད་ཉེ་བར་ཞི་བར་བྱས་ནས་ཡང་སྐྱོ་སྔོགས་བྱེད་པ་དེ་མི་བརྟན་པ་ལ་སོགས་པར་གྱུར་པ་ཉིད་ཡིན་པས་ཉེས་པ་རྫོགས་པར་འགྱུར་རོ། །གང་ཟག་ཐ་མ་གཉིས་ལ་ཉེས་བྱས་སུ་འགྱུར་བ་ནི་གཞན་གྱིས་བྱས་
པའི་རྗེས་སུ་འབྲང་བ་ཙམ་གྱིས་ཐོ་འཚམས་བ་ཉིད་ཡིན་པས་ཁ་ན་མ་ཐོ་བ་ན་སྨད་དོ། །སྐྱོ་སྔོགས་བྱེད་པའི་ལྟུང་བ་བྱེད་དེ་བཞི་པའི་ཚིག་རྣམ་པར་བཤད་པར་རྫོགས་སོ།། །།ཤ་མཚན་གྱི་རིག་པ་ཞེས་བྱ་བ་ནི་མཚན་མའི་བསྟན་བཅོས་གང་གིས་ལུས་ཀྱི་ཕྱོགས་ན་ཡོད་པའི་ཤ་རྨེན་ལ་སོགས་པ་ཤ་མཚན་དུ་གྱུར་པའི་རྣམ་པར་གྱུར་པ་ཤེས་པའོ། །རི་བོང་མོ་མདས་ཕོག་པ་ཞེས་བྱ་བ་ནི་འདི་ལྟར་དེ་མདའི་ཤུགས་ཀྱིས་ཤིན་ཏུ་གཏུམ་པར་འགྱུར་བའི་ཕྱིར་རོ། །ཤ་རྨེན་ཞེས་བྱ་བ་ནི་སྦྲང་བུའི་རྣམ་པ་ལྟ་བུའི་མཚན་མའོ། །མཛེར་བུ་ཞེས་བྱ་བ་ནི་ཤ་འབུར་བའོ། །སྨེ་བ་ཞེས་བྱ་བ་ནི་ཁྲག་ལས་གྱུར་པའི་མཚན་མ་ནག་པོའོ། །སྨེ་བ་དམར་པོ་ཞེས་བྱ་བ་ནི་ཁྲག་ལས་གྱུར་པའི་མཚན་མ་ཏི་ལ་གྱི་རྣམ་པ་ལྟ་བུའོ། །སྤུ་འཁྱིལ་པ་ཞེས་བྱ་བ་ནི་གཙུག་གོ །སེག་གདར་ཞེས་བྱ་བ་ནི་ལྕགས་བདར་བའི་གར་བུ་རྩུབ་པོའོ། །དེས་པ་ཞེས་བྱ་བ་ནི་བགྲུངས་པའོ། །དཔལ་བེའུ་ཞེས་བྱ་བ་ནི་རྡོ་རྗེའི་རྩེ་མོ་ལྟ་བུའི་མཚན་མའོ། །བཀྲ་ཤིས་ཞེས་བྱ་བ་ནི་ཟླ་གམ་ལྟ་བུའི་མཚན་མ་ཁ་བཞི་པའོ། །གཡུང་དྲུང་ཞེས་བྱ་བ་ནི་རི་མོ་འཁྱིལ་པའོ། །སྨྲ་བར་བྱེད་དམ་ཞེས་བྱ་བ་ནི་ཐབ་མོ་རྒོལ་ལམ་ཞེས་བྱ་བའོ། །ཇི་ཙམ་འདོད་པ་ཞེས་བྱ་བ་ནི་ཅི་དགའ་བའོ། །གནས་སྐབས་དེ་འདྲ་ཞེས་བྱ་བ་ནི་བསྟན་པ་ལ་ཞེ་འགྲས་པ་ཉིད་དོ། །རིག་པའི་སྐྱེས་པ་ཞེས་བྱ་བ་ནི་སྐད་བརྡ་སྤྲད་པའི་སྐྱེས་བའོ། །སྟེང་གི་ཁང་ཐོག་ལ་སོགས་པ་གནས་ཐ་དད་པར་བསྟན་པའི་ཚིག་ཐ་དད་པའི་ཕྱིར་སྔ་མར་བསྟན་པའི་ཕྱིར་མ་དང་ཐ་དད་པར་ཤེས་པར་བྱའོ། །དྲིས་པ་ཞེས་བྱ་བ་ནི་དོན་གྱི་ཐེ་ཚོམ་གཅད་པའི་ཕྱིར་རོ། །སློབ་གཉེར་གསོད་བ་ཞེས་བྱ་བ་ནི་སྔར་ཕོག་པའོ། །ཁ་ཏོན་ཞུ་བ་ཞེས་བྱ་བ་ནི་ཁ་ཏོན་འདོན་པའོ། །དམིགས་ཀྱིས་འདྲི་བ་ཞེས་བྱ་བ་ནི་ཚིག་ལ་ཐེ་ཚོམ་ཟ་བའི་གནས་རྣམ་པར་ངེས་པར་བྱེད་པའོ། །བཀག་པ་ཞེས་བྱ་བ་ནི་སྤངས་པའོ། །ལྡབ་ལྡིབ་ཅན་ཞེས་བྱ་བ་ནི་ལྕེ་འཁྲུལ་བའོ། །སྨྲ་བ་ཉུང་བ་ཞེས་བྱ་བ་ནི་ཉུང་དུ་སྨྲ་བའོ། །སྟོན་པའི་ལྟུང་བྱེད་ལྔ་པའི་ཚིག་རྣམ་པར་བཤད་པར་རྫོགས་སོ།། །།ཚིག་གིས་ཞེས་བྱ་བ་ནི་ཚིག་དང་ཚིག་གིས་སོ། །ཀུན་དགའི་མཐར་ཞེས་བྱ་བ་ནི་གཙུག་ལག་ཁང་གི་ཕྱོགས་གཅིག་ཏུའོ། །བྲམ་ཟེའི་གསང་ཚིག་ཅེས་བྱ་བ་ནི་རིག་བྱེད་ཀྱི་སྔགས་སོ།།
འདོན་པ་ཞེས་བྱ་བ་ནི་ཀློག་པའོ། །རྩིས་མཁན་ཞེས་བྱ་བ་ནི་སྐར་མཁན་ནོ། །ཚིག་མཉམ་པ་ཞེས་བྱ་བ་ནི་ཚིག་དུས་གཅིག་ཏུ་འདོན་པའོ། །ཚིག་སྔ་མ་ཞེས་བྱ་བ་ནི་ཚིག་སྔན་མ་ཚོགས་སུ་སྨྲ་བའོ། །དེ་ལ་ལྟུང་བ་ཇི་ལྟར་འགྱུར་ཞེ་ན་ཞེས་བྱ་བ་ལ། རྫོགས་པར་མ་བསྙེན་པ་ལ་བཞི་པ་གཉིས་སོ། །རྫོགས་པར་བསྙེན་པ་ལ་ཡང་བཞི་པ་གཉིས་སོ། །ལྡབ་ལྡིབ་ཅན་ཞེས་བྱ་བ་ནི་སློབ་དཔོན་ནོ། །སྒྲ་མྱུར་བ་ཞེས་བྱ་བ་ནི་ཉེ་གནས་སོ། །རྗེས་སུ་བསྒྲགས་ཏེ་ཞེས་བྱ་བ་ནི་མཉམ་པ་དང་སྔར་མ་འདོན་ཅིང་ཅེས་བསྒོ་སྟེའོ། །འདོན་པའི་ལྟུང་བྱེད་དེ་དྲུག་པའི་ཚིག་རྣམ་པར་བཤད་པ་རྫོགས་སོ།། །།ལམ་གོལ་བར་རྒལ་བ་ཞེས་བྱ་བ་ནི་མ་བསླབས་པའོ། །ལག་པས་བྱ་བ་མིན་པ་བྱས་ཏེ་ཞེས་བྱ་བ་ནི་ཆང་བ་འཆང་བ་ལ་སོགས་པ་ཉེ་བར་བསྟན་ཏེའོ། །ཉེས་པ་ཞེས་བྱ་བ་ནི་རང་བཞིན་གྱིས་ཁ་ན་མ་ཐོ་བ་དང་བཅས་པ་ལས་འདས་པའོ། །སྐྱོན་ཞེས་བྱ་བ་ནི་བཅས་པའི་ཁ་ན་མ་ཐོ་བ་ལས་འདས་པའོ། །ཀུན་དུ་རྨོངས་པ་ཞེས་བྱ་བ་ནི་མི་ཤེས་པའོ། །བསྟན་པ་ཞེས་བྱ་བ་ནི་འཁྲལ་འཁྲུལ་མེད་པའོ། །གསུངས་ཞེས་བྱ་བ་ནི་བསྟན་པའོ། །མ་དད་པར་རིག་པར་འགྱུར་བ་ཞེས་བྱ་བ་ནི་བསྟན་པ་ལ་མི་ཕྱོགས་པ་ཉམས་སུ་མྱོང་བར་འགྱུར་རོ། །ཁྱིམ་རྣམས་སུ་སོ་སོར་གྲོ་པར་བྱེད་པ་ཞེས་བྱ་བ་ནི་དེའི་དགེ་སྦྱོང་གི་ཚུལ་མ་ཡིན་པ་སྒྲོགས་པར་བྱེད་པ་སྟེ། བསྟན་པ་ཐམས་ཅད་ལ་མ་དད་པ་བཟློག་པའི་ཕྱིར་རོ། །ཁྱིམ་སུན་པར་བྱེད་པ་ཞེས་བྱ་བ་ནི་ཁྱིམ་བདག་གོ །གནས་སུན་པར་བྱེད་པ་ཞེས་བྱ་བ་ནི་རབ་ཏུ་བྱུང་བ་དག་གོ །འཁོར་ལོ་མི་བཟད་པ་ཞེས་བྱ་བ་ནི་རྣམ་པར་འཁྲུག་པའོ། །འདི་ལྟར་ཞེས་བྱ་བ་ནི་འདི་ལྟ་སྟེའོ། །ཤིན་ཏེ་མ་ཞེས་བྱ་བ་ནི་མཐུ་ཆུང་བ་སྟེ་མི་འཕེལ་བའོ། །ཆུང་ཟ་བ་ཞེས་བྱ་བ་ནི་སྐམ་པའོ། །ཚུལ་མ་ཡིན་པས་མ་རུང་བར་གྱུར་པ་ཞེས་བྱ་བ་ནི་རིགས་པ་མ་ཡིན་པས་དྲུངས་ཕྱུང་བའོ། །དམར་པོ་ཞེས་བྱ་བ་ནི་ནད་ཀྱི་རིགས་དམར་བྲེང་བྲེང་པའོ། །བསྟན་པའི་ཚོང་མ་འཛིན་ཅིག་ཅེས་བྱ་བ་ནི་བསྟན་པ་ཡང་འདྲ་བ་ཞིག་ཡིན་ནོ་སྙམ་དུ་མ་སེམས་ཤིག་པའོ། །ཡོས་ཚིག་པ་བཞིན་དུ་ཞེས་བྱ་བ་ནི་ཐལ་བར་གྱུར་པའོ། །སྐྱེར་མི་རུང་བའི་ཆོས་ཅན་ཞེས་བྱ་བ་ནི་འཕགས་པའི་ལམ་གྱི་མྱུ་གུ་མི་སྐྱེ་བའོ།།
སུན་འབྱིན་ཞེས་བྱ་བ་ནི་དགོང་ཏོར་དུ་འབྱིན་པའོ། །འབྲུ་མར་གྱི་སྣོད་ཅེས་བྱ་བ་ནི་འབྲུ་མར་བླུགས་པའི་སྣོད་དོ། །གསོལ་བ་འབའ་ཞིག་གི་ལས་ཞེས་བྱ་བ་ནི་ལས་བརྗོད་པ་མེད་པའོ། །སོ་སོར་རིག་པའི་ཁྱིམ་དག་ཅེས་བྱ་བ་ནི་དེའི་སྐྱོན་སོ་སོར་རིག་ཅིང་མ་དད་པར་གྱུར་བའི་ཁྱིམ་དག་གོ ། སོ་སོར་མ་རིག་པའི་ཁྱིམ་དག་ཅེས་བྱ་བ་ནི་དེའི་སྐྱོན་སོ་སོར་མ་རིག་ཅིང་མ་དད་པར་མ་གྱུར་པའི་ཁྱིམ་དག་གོ །དགེ་འདུན་གྱིས་གནང་བ་ཞེས་བྱ་བ་ནི་དགེ་འདུན་གྱིས་སྤང་བ་བྱས་པའོ། །དེ་ལྟ་ལྟུང་བ་ཇི་ལྟར་འགྱུར་ཞེ་ན་ཞེས་བྱ་བ་ནི་འདུ་ཤེས་དང་ཡིད་གཉིས་ཀྱིས་དངོས་གཞིར་གཞག་པ་གཉིས་དང་ཉེས་བྱས་སུ་གཞག་པ་གཉིས་ཏེ་བཞི་པོ་བསྟན་ཏོ། །དེ་དག་ཀྱང་དགེ་འདུན་གྱིས་གནང་བ་མེད་པར་དེ་ལྟར་འགྱུར་བར་ཤེས་པར་བྱའོ། །གནས་ངན་ལེན་བརྗོད་པའི་ལྟུང་བྱེད་དེ་བདུན་པའི་ཚིག་རྣམ་པར་བཤད་པ་རྫོགས་སོ།། །།གདོས་བུ་དང་ཕོ་ལོང་གི་སྦྱོར་བ་ཞེས་བྱ་བ་ནི་གཉིད་བསང་བའི་ཕྱིར་རྣ་བ་ལ་གདོས་བུ་གདགས་པ་དང༌། ཕོ་ལོང་ཐ་གུས་གདགས་པ་འཕང་བའོ། །གཅིག་གིས་གཅིག་གི་ཡང་དག་པའི་ཡོན་ཏན་བསྒྲག་པར་བྱའོ་ཞེས་བྱ་བ་ནི་ཉོན་མོངས་པ་ཅན་གྱི་སེམས་མེད་པའི་འགལ་བ་མེད་དོ། །ཡང་དག་པར་བརྗོད་ན་ལྟུང་བྱེད་དོ་ཞེས་བྱ་བ་ནི་ཡང་དག་པར་ཡིན་དུ་ཟིན་ཀྱང་གདུལ་བ་མ་ཡིན་པའི་སེམས་ཅན་རྣམས་ཡིད་མི་ཆེས་པ་ལ་སོགས་པའི་ཉེས་པ་ཡོད་པས་དགག་པ་མཛད་དོ། །མིའི་མཆོག་བླ་མ་བརྗོད་པའི་ལྟུང་བྱེད་དེ་བརྒྱད་པའི་ཚིག་རྣམ་པར་བཤད་པ་རྫོགས་སོ།། །།མི་གཡོ་བར་འགྱུར་རོ་ཞེས་བྱ་བ་ནི་མི་འགྱུར་བའོ། །གཅིག་གི་ཞེས་བྱ་བ་ནི་གཅིག་གི་ཕྱོགས་ན་གནས་ན་སྟེ་བཙུན་པ་གྱད་བུ་ནོར་གྱི་ཕྱོགས་ཤེས་པར་བྱའོ། །བཤེས་ངོར་བྱས་ཏེ་ཞེས་བྱ་བ་ནི་གང་གི་བཤེས་གང་ཡིན་པའི་གང་ཟག་དེ་ལ་སྟོབས་པར་བྱེད་ཅེས་བྱ་བའི་ཐ་ཚིག་གོ །ལེགས་པར་རུང་བར་བྱས་ནས་ཞེས་བྱ་བ་ནི་དད་པ་ཕུལ་བ་སྟེ་ལེགས་པར་རྗེས་སུ་གནང་བ་བྱས་པའི་ཕྱིར་རོ། །གོས་གྱི་རྙེད་པ་ཡིན་པར་དགོངས་སོ་ཞེས་བྱ་བ་ནི་དེ་དཀོན་པའི་ཕྱིར་རོ། །དགེ་འདུན་གྱི་ནང་དུ་ཞེས་བྱ་བ་ནི་དགེ་འདུན་གྱི་ཡུལ་ལ་སྟེ་དགེ་འདུན་ལ་བརྟེན་ནས་ཞེས་བྱ་བའི་ཐ་ཚིག་གོ །འདི་ནི་སླུ་བར་བྱེད་པའི་ཕྱིར་དགག་པ་མཛད་དོ། །སྐུར་བ་འདེབས་
པའི་ལྟུང་བྱེད་དེ་དགུ་པའི་ཚིག་རྣམ་པར་བཤད་པ་རྫོགས་སོ།། །།ཟླ་བ་ཕྱེད་ཕྱེད་ཅིང་ཞེས་བྱ་བ་ནི་ཟླ་བ་ངོ་ཕྱེད་ཕྱེད་ཅིང་ངོ༌། །འཁོད་དོ་ཞེས་བྱ་བ་ནི་སྡོད་པའོ། །གཞི་ངེས་པ་ཞེས་བྱ་བ་ནི་བསླབ་པའི་གཞི་བཅའ་བའི་རྒྱུ་ཁུ་བ་འབྱིན་པ་ལ་སོགས་པའི་གཞི་ངེས་པ་ཡོད་པའོ། །གང་ཟག་པ་ཞེས་བྱ་བ་ནི་ཚེ་དང་ལྡན་པ་འཆར་ཀ་ལ་སོགས་པ་བྱེད་པ་པོ་ངེས་པ་ཡོད་པའོ། །རྨ་སོས་པ་སོས་པ་དག་ཅིའི་ཕྱིར་འདྲལ་བར་བྱེད་ཅེས་བྱ་བ་ནི་ཉེས་པ་ཚང་ཟིན་པ་དག་ཅིའི་ཕྱིར་གླེང་བར་བྱེད་ཅེས་བྱའོ། །བདག་ཉིད་ཀྱི་དོན་མེད་པར་སྨྲས་ནས་གཞན་གྱི་དོན་མེད་པ་བསྟན་པའི་ཕྱིར་གང་དག་གིས་ཞེས་བྱ་བ་ལ་སོགས་པ་གསུངས་སོ། །ཕྲན་ཚེགས་ཞེས་བྱ་བ་ཕྲ་བའོ། །རབ་ཏུ་ཕར་བ་ཞེས་བྱ་བ་ནི་ཆེས་ཕྲ་བའོ། །གནོད་པ་ཞེས་བྱ་བ་ནི་གདུང་བའོ། །འགྱུར་བ་ཞེས་བྱ་བ་ནི་རྒྱུའི་དངོས་པོའོ། བསླབ་པ་ཁྱད་དུ་གསོད་ན་ཞེས་བྱ་བ་ནི་བསླབ་པ་རྣམས་དང་མི་མཐུན་པར་གཉེའུ་རེངས་བྱེད་ཅེས་བྱ་བའི་ཐ་ཚིག་གོ ། གདུང་བ་དང་ཀུན་དུ་གདུང་བ་ཞེས་བྱ་བ་ནི་ལུས་ཀྱི་ཡོངས་སུ་གདུང་བ་ཆུང་དུ་དང༌། འབྲིང་དང༌། ཆེན་པོའོ། །འདོད་པ་ཞེས་བྱ་བ་ནི་ཁྱིམ་ན་གནས་པར་འདོད་པའོ། །མངོན་པར་མི་དགའ་བ་ཞེས་བྱ་བ་ནི་རབ་ཏུ་བྱུང་བས་ཡིད་མི་བདེ་བའོ། །རྣམ་པར་འབྱམ་པ་ཞེས་བྱ་བ་ནི་ཕྱིར་འབབ་པའོ། །གླེང་གཞི་དག་དང་ཞེས་བྱ་བ་ལ་སོགས་པ་ནི་གཞུང་ཕྱི་མོའི་རྣམ་པ་དག་ཡིན་ནོ། །འདུལ་བའི་མ་མོ་དག་ཅེས་བྱ་བ་ལ། འདུལ་བ་སྨོས་པ་ནི་ཆོས་མངོན་པའི་མ་མོ་དགག་པའི་ཕྱིར་རོ། །འདུལ་བ་དང་ལྡན་པའི་མདོ་དག་ཅེས་བྱ་བ་ནི་འདུལ་བའི་དོན་དང་ལྡན་པའི་མདོ་སྡེ་དག་སྟེ་དམར་པོའི་མདོ་སྡེ་ལ་སོགས་པ་དག་གོ །དེ་ལས་གཞན་པའི་མདོ་སྡེ་དག་ཅེས་བྱ་བ་ནི་འཕགས་པའི་བདེན་པ་བསྟན་པ་ལ་སོགས་པ་དག་གོ །འདི་ནི་དགེ་སློང་གི་དངོས་པོ་ལ་མ་གུས་པའི་ཕྱིར་བཅའ་བ་མཛད་དོ། །བསླབ་པ་ཁྱད་དུ་གསོད་པའི་ལྟུང་བྱེད་དེ་བཅུ་པའི་ཚིག་རྣམ་པར་བཤད་པ་རྫོགས་སོ།། །།ང་སྔོན་ཤིང་མཁན་ཞེས་བྱ་བ་ནི་སྔོན་ཤིང་མཁན་གྱི་རིགས་ཡིན་པའོ། །གནས་ཞེས་བྱ་བ་ནི་ཁྱིམ་སྟེ་འདུག་པའི་གནས་ཡིན་པའི་ཕྱིར་རོ། །གླིང་ཞེས་བྱ་བ་ཡང་གྲང་བ་ལ་སོགས་པ་ཡོངས་སུ་སྐྱོབ་པའི་ཕྱིར་རོ། །སྐྱོབ་པ་ཞེས་བྱ་བ་ནི་ཡང་བདེ་བ་དང་བསྐྱེད་པའི་ཕྱིར་རོ། །སྐྱབས་ཞེས་བྱ་བ་ཡང་གཞན་དག་གིས་ཟིལ་
གྱིས་མི་གནོན་པའི་ཕྱིར་རོ།། དཔུང་གཉེན་ཞེས་བྱ་བ་ནི་ཡང་ཐག་རིང་པོར་སོང་བ་ཡང་འདོད་པའི་ཕྱིར་རོ། །གནས་མལ་ཞེས་བྱ་བ་ཡང་ལུས་ཀྱི་རྒྱུན་གྱིས་དེར་གནས་པའི་ཕྱིར་རོ། །གཞི་ཞེས་བྱ་བ་ཡང་འདུག་པའི་གནས་ཡིན་པའི་ཕྱིར་རོ། །རྟེན་ཞེས་བྱ་བ་ཡང་གཞིའི་གནས་ཡིན་པའི་ཕྱིར་རོ། །རྣམ་གྲངས་ཀྱི་ཚིག་དེ་དག་ནི་ཕན་ཡོན་བསྟན་པའི་ཕྱིར་སྨོས་སོ། །བུ་ཞེས་བྱ་བ་ནི་གཞོན་ནུའོ། །ཕྲུ་གུ་ཞེས་བྱ་བ་ནི་བྱིས་པའོ། །ལྷ་དེ་ནི་ས་ལ་རྒྱུ་བའི་གནོད་སྦྱིན་ཡིན་ཏེ་གྲང་བའི་གནོད་པ་ལ་སོགས་པས་ཚུགས་པའི་ཕྱིར་རོ། །ཀྱེ་མ་ཞེས་བྱ་བ་ནི་ཞུམ་པའི་ཚིག་ཡིན་ནོ། །ཤིང་མེད་པས་ཞེས་བྱ་བ་ནི་ཤིང་མི་བདོག་པའོ། །འགྱུར་བ་རྟེན་ཞེས་བྱ་བ་ནི་ཁྲག་འབྱུང་བ་ལ་སོགས་པའོ། །རེ་ཞིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བ་ནི་མི་མཛད་དོ་ཞེས་བྱ་བ་ནི་རང་གི་བཅད་པ་མེད་པའི་ཕྱིར་རོ། །ས་བོན་གྱི་ཚོགས་ཞེས་བྱ་བ་ནི་ས་བོན་གྱི་ཡོ་བྱད་དོ། །འབྱུང་པོའི་གནས་ཞེས་བྱ་བ་ནི་འབྱུང་པོ་གནས་ཤིང་ལྗོན་པ་ལ་སོགས་པའི་ཤིང་སྐྱེ་བའོ། །ས་བོན་དང་སྐྱེ་བ་ཉིད་ནི་ཐ་མི་དད་པའི་ཕྱིར་ལྟུང་བ་གཅིག་ཏུ་བཅའ་བ་མཛད་དོ། །སྡོང་བུ་ཞེས་བྱ་བ་ནི་བར་གྱི་ཆའོ། །ཐོ་གུ་ཞེས་བྱ་བ་ནི་རྩེ་མོའོ། །འགས་པ་ཞེས་བྱ་བ་ནི་ཚལ་བའོ། །ས་བོན་ཞེས་བྱ་བ་ནི་འབྲས་བུའོ། །ཨརྫ་ཀ་ཞེས་བྱ་བ་ནི་ལྡུམ་བུ་ཀུ་ཏེ་རའོ། །ས་རྫ་ཞེས་བྱ་ནི་ལྡུམ་བུ་ཀོ་རེ་ཐ་གའོ། །པ་ནི་རྫ་ཀ་ཞེས་བྱ་བ་ནི་ལྡུམ་བུ་ཀུ་རེ་ཏེ་རའི་རྣམ་པ་ལྟ་བུ་དྲི་ཞིམ་པའོ། །བུ་སྲིན་ཞེས་བྱ་བ་ནི་ལྡུམ་བུ་བྷ་ཡ་ན་ཀའོ། །ཛམྦྷི་ར་ཞེས་བྱ་བ་ནི་ལྡུམ་བུ་དུམ་བུ་རུའོ། །འབྱིན་པ་ཞེས་བྱ་བ་ནི་རྩ་ཐོན་དུ་འབྱིན་པའོ། །དེ་ལ་ལྟུང་བ་ཇི་ལྟར་འགྱུར་ཞེ་ན་ཞེས་བྱ་བ་ལ་སོགས་པ་ལ། རྩ་བའི་ས་བོན་དང༌། སྡོང་བུའི་ས་བོན་དང༌། ཐོ་གུའི་ས་བོན་དང༌། འགས་པའི་ས་བོན་དང༌། ས་བོན་གྱི་ས་བོན་རྣམ་པ་ལྔ་ལ་རེ་རེ་ལ་ཡང་བཞི་པ་ལྔ་ལྔ་སྟེ་སྤྱིར་བཞི་པ་ཉིད་ཤུ་རྩ་ལྔ་བསྟན་ཏོ། །ཉམས་པ་ཞེས་བྱ་བ་ནི་བྲང་པའི་ཕྱོགས་གཅིག་ཉམས་སོ།། རྣམ་པར་ཉམས་པ་ཞེས་བྱ་བ་ནི་བདག་ཉིད་ཐམས་ཅད་ཉམས་པའོ། །ལྟུང་བྱེད་ལྔར་འགྱུར་རོ་ཞེས་བྱ་བ་ནི་ཡུལ་ཐ་དད་པའི་ཕྱིར་རོ། །ཚ་སྒོ་ཞེས་བྱ་བ་ནི་ས་ཚོས་པ་འབུས་བའོ། །ཉུག་པའི་བསམ་པ་ལ་ནི་ལྟུང་བ་མེད་དོ་ཞེས་བྱ་བ་ནི་གཞིག་པའི་བསམ་པ་མེད་པའི་ཕྱིར་རོ། །ཤ་བལ་ཞེས་བྱ་བ་ནི་ས་དྲེག་སྟེ་ས་གཞི་
བཙོག་པའི་སྟེང་སྔོ་བ་དང་ཤ་བལ་ལ་སོགས་པ་དག་གོ །རྩ་རྒྱུན་ཞེས་བྱ་བ་ནི་རྩའི་རྒྱུན་ཕྲ་མོའོ། །ཤུན་པ་ཞེས་བྱ་བ་ནི་ཕྱི་ཤུན་རྙིང་པའོ། །ཕྲི་ཞེས་བྱ་བ་ནི་ནང་ཕྲི་སྲ་བའོ། །སྙིང་པོ་ཞེས་བྱ་བ་ནི་ཤིང་དང་འབྲེལ་པའི་རྒྱན་ནོ། །ཉ་ལྕིབས་ཞེས་བྱ་བ་ནི་ཆུ་ན་འཕྱོ་བའི་རྫས་སོ། །ཉ་ཚང་ཞེས་བྱ་བ་ནི་ཉ་ལྕིབས་དང་འདྲ་བའི་རྩ་བའོ། །ད་གཉིས་ནི་སྒྲོགས་ཆུང་ངུ་དང་འབྲེལ་བ་ཡིན་པས་ཆུ་ནས་བཏོན་ན་འཇིག་གོ །ཤ་མོ་ཞེས་བྱ་བ་ནི་ཤ་མོ་ཞོ་ལུ་ལ་སོགས་པའོ། །ཕ་བ་དགོ་དགོ་ཞེས་བྱ་བ་ནི་འབྲུག་གི་སྒྲས་བསླང་བ་ཕྲུམ་གྱི་རྣམ་པ་ལྟ་བུའི་ལྡུམ་མོའོ། །རུང་བར་བྱས་ཏེ་སྤྱོད་པ་ལ་ལྟུང་བྱེད་དོ་ཞེས་བྱ་བ་ནི་མེ་ལ་སོགས་པ་འོག་ནས་འབྱུང་བས་སོ། །ས་བོན་དང་སྐྱེ་བ་འཇིག་པའི་ལྟུང་བྱེད་དེ་བཅུ་གཅིག་པའི་ཚིག་རྣམ་པར་བཤད་པ་རྫོགས་སོ།། །།འདུ་འཛིའི་གཏམ་ཞེས་བྱ་བ་ནི་བྲེ་མོའི་གཏམ་མོ། །གྲངས་སུ་ཆུག་ཤིག་ཅེས་བྱ་བ་ནི་རྣམ་པར་ཞོག་ཅེས་བྱ་བ་སྟེ། ངོ་ཚ་སྐྱེད་པའི་ཕྱིར་དེའི་གྲངས་སུ་གཞུག་གོ །གཞོགས་འཕྱས་ཞེས་བྱ་བ་ནི་གཞོགས་ཀྱིས་སྨོད་པའོ། །ངོར་འཕྱ་བ་དང་གཞོགས་འཕྱས་གཉིས་ནི་ངོ་བོ་ཉིད་གཅིག་པས་ལྟུང་བྱེད་གཅིག་ཏུ་བསྟན་ཏོ། །དེ་ལ་ལྟུང་བ་ཇི་ལྟར་འགྱུར་ཞེ་ན་ཞེས་བྱ་བ་ལ་སོགས་པ་ལ་དགེ་འདུན་གྱིས་བགྲངས་པས་གང་ཟག་བཅུ་གཉིས་མུ་བསྐོས་པ་སྦྱོར་བམ་བཏང་བ་ལས་ཀྱང་ལྟུང་བྱེད་གསུམ་མོ། །གང་ཟག་བཅུ་གཉིས་སུ་མ་བསྐོས་པ་སྦྱོར་བ་མ་བཏང་བ་ལས་ཀྱང་ལྟུང་བྱེད་གསུམ་མོ། །གང་ཟག་བཅུ་གཉིས་སུ་མ་བསྐོས་པ་སྦྱོར་བ་བཏང་བ་ལས་ཀྱང་ལྟུང་བྱེད་གསུམ་སྟེ། སྤྱིར་ལྟུང་བྱེད་བཅུ་གཉིས་སོ། །དགེ་སློང་གི་དགེ་འདུན་གྱིས་བགྲངས་པས་དེ་དག་གཉིས་ལས་ཉེས་བྱས་ཏེ་སྤྱིར་ལྟུང་བ་རྣམ་པར་གཞག་པ་ཉི་ཤུ་རྩ་བཞི་བསྟན་ཏོ། །ཉེས་པ་དང་ལྡན་པ་ཉིད་དུ་བགྲངས་ཀྱང་ཉེས་པ་དེ་ལས་ཕྱིར་མི་ལྡོག་པ་ནི་ཤིན་ཏུ་ངོ་ཚ་མེད་པའི་ཕྱིར་བགྲངས་པ་ལས་དངོས་གཞིར་གཞག་ལ་མ་བགྲངས་པ་ལས་ཉེས་བྱས་སུ་བཞག་གོ །དགེ་འདུན་གྱིས་བགྲངས་ཤིང་ཞེས་བྱ་བ་ནི་འཕྱ་བ་དང་གཞོགས་འཕྱས་བྱེད་པའི་གྲངས་སུ་གསོལ་བ་འབའ་ཞིག་གི་ལས་ཀྱིས་བགྲངས་པའོ། །གང་ཟག་བཅུ་གཉིས་ཞེས་བྱ་བ་ནི་གནས་ཁང་བསྐོ་བ་དང༌། ཟས་ལ་བསྐོ་བ་དང༌། ཐུག་པ་འབྲིམ་པ་དང༌། བག་ཆོས་འབྲིམ་པ་དང༌། ཕྲན་
ཚེགས་འབྲིམ་པ་ལ་སོགས་པ་དག་སྟེ། དེ་དག་ནི་ཞལ་ཏ་བྱེད་པའི་ལས་གཞན་ཐམས་ཅད་ཀྱི་དཔེ་ཡིན་ཏེ། སྒེའུ་ཆུང་སྲུང་བ་ལ་སོགས་པ་གཞན་དག་ལ་འཕྱ་བ་དང་གཞོགས་འཕྱས་བྱེད་ན་ཡང་དངོས་གཞིར་འགྱུར་རོ། །བསྐོ་བ་ཞེས་བྱ་བ་ནི་དགེ་འདུན་གྱིས་བསྐོས་པའོ། །སྦྱོར་བ་མ་བཏང་བ་ཞེས་བྱ་བ་ནི་ལས་བྱེད་བཞིན་པའོ། །སྦྱོར་བ་བཏང་བ་ཞེས་བྱ་བ་ནི་རེ་ཞིག་ངལ་སོ་བའོ། །མ་བསྐོས་པ་ཞེས་བྱ་བ་ནི་རང་ཞུགས་པའོ། །འཕྱ་བ་དང༌། གཞོགས་འཕྱས་དང༌། འཕྱ་བ་དང་གཞོགས་འཕྱས་གཉིས་ཀ་ལས་རྣམ་པ་གསུམ་དུ་གཞག་གོ །འཕྱ་བའི་ལྟུང་བྱེད་དེ་བཅུ་གཉིས་པའི་ཚིག་རྣམ་པར་བཤད་པ་རྫོགས་སོ།། །།ཁོ་བོའི་མདུན་དུ་མ་ཆགས་པར་ཞེས་བྱ་བ་ནི་ཁོ་བོའི་ལྟུང་བ་དང་བཅས་པ་ཉིད་ཡིན་པའི་ཕྱིར་རོ་སྙམ་དུ་བསམས་པའོ། །ངག་རྣམ་པ་བཞི་པོ་ཞེས་བྱ་བ་ནི། བརྫུན་དུ་སྨྲ་བ་དང༌། ཕྲ་མ་དང༌། ངག་རྩུབ་པོ་དང༌། ཚིག་འཁྱལ་བའི་བདག་ཉིད་དོ། །གོང་མ་སྲེག་ཞེས་བྱ་བ་ནི་བྱའི་རིགས་སོ། །བསྒོ་བ་རྣ་ལ་གཟོན་པ་ཞེས་བྱ་བ་ནི་ཆོས་དང་ལྡན་པའི་བསྒོ་བ་དང་མི་མཐུན་པར་བྱེད་པའོ། །ཀྱིས་འོང་བ་ཞེས་བྱ་བ་ནི་ཉེ་བར་མཚོན་པའི་ཕྱིར་གྱིས་ཞེས་སྨོས་པས་སོ། །རྐང་པ་གཉིས་ཀྱིས་འོང་བ་ཞེས་བྱ་བ་ནི་རྒྱུ་བསྟན་པའི་ཕྱིར་གྱིས་ཞེས་སྨོས་སོ། །ཅང་མི་སྨྲ་བས་ཁ་གཟོན་པའོ་ཞེས་བྱ་བ་ནི་ན་སྨད་པའི་ཉེས་བྱས་སུ་གསུངས་སོ། །སྨྲ་འདོད་པ་ཞེས་བྱ་བ་ནི་གཅོར་བའོ། །ཐོ་འཚམས་པ་ཞེས་བྱ་བ་ནི་ཅོ་འདྲི་བའོ། །ལྟུང་ཞེས་བྱ་བ་ནི་ས་ལ་ལྟུང་བའོ། །ལས་ཞེས་བྱ་བ་ནི་ཕྱི་ན་ལས་པའོ། །བསྒོ་བ་རྣ་ལ་གཟོན་པའི་ལྟུང་བྱེད་དེ་བཅུ་གསུམ་པའི་ཚིག་རྣམ་པར་བཤད་པ་རྫོགས་སོ།། །།དུས་མ་ཡིན་པའི་སྤྲིན་ཞེས་བྱ་བ་ནི་དབྱར་མ་ཡིན་པའི་སྤྲིན་ནོ། །ཕྱིར་དགག་པ་ཞེས་བྱ་བ་ནི་ཕྱིར་བཟློག་པའོ། །དབྱར་གྱི་ན་བཟའ་རས་ཆེན་ཞེས་བྱ་བ་ནི་ཁྲུས་རས་སོ། །སླར་བསྡུ་བ་ཞེས་བྱ་བ་ནི་བརྟུལ་བའོ། །དོན་མཐུན་པ་ལ་རག་ལས་པ་ཞེས་བྱ་བ་ནི་དོན་མཐུན་པ་དང་འབྲེལ་བའོ། །གླང་ཐ་མ་ཞེས་བྱ་བ་ནི་ཐམས་ཅད་གྱི་མཇུག་ན་མོའོ། །མཛའ་བཤེས་དང་དགྲ་བོ་དང་ཐ་མལ་པ་ཡིན་པས་ཞེས་བྱ་བ་ནི་དེ་གསུམ་ཡོད་པས་ཞེས་བྱ་བའི་ཐ་ཚིག་གོ །རྗེས་སུ་འབྲེལ་པ་ཞེས་བྱ་བ་ནི་ཟིན་པའོ། །བཅོལ་བ་ནི་རྣམ་པ་ལྔ་སྟེ་ཞེས་བྱ་བ་ལ། གཙུག་ལག་ཁང་འདི་རེ་ཞེས་
བྱ་བ་དང༌། གཙུག་ལག་ཁང་ལྟོས་ཤིག་ཅེས་བྱ་བ་འདི་གཉིས་ཀྱིས་ནི་གཞི་བཅོལ་བས་གཞག་པ་ཡང་བཅོལ་བ་ཡིན་པར་བསྟན་ཏོ། །སྒོ་ལྕགས་ཆུག་ཤིག་ཅེས་བྱ་བ་ནི་བསྡོམ་བཅོལ་བས་བསྡམས་པ་ཡང་བཅོལ་བ་ཉིད་དུ་བསྟན་ཏོ། །སེམས་བསྐྱེད་པར་བྱ་ཞིང་ཚིག་ཏུ་ཡང་བརྗོད་པ་སྟེ་ཞེས་བྱ་བ་ནི་མ་གུས་པ་བཟློག་པའི་ཕྱིར་དང་གུས་པ་བསྐྱེད་པའི་ཕྱིར་རོ། །ལྟུང་བ་དེ་ཆོས་བཞིན་དུ་ཕྱིར་བྱའོ་ཞེས་བྱ་བ་ནི་སེམས་བསྐྱེད་པ་དང་ཚིག་ཏུ་བརྗོད་པས་ལྟུང་བ་མི་འབྱང་བ་བསྟན་པའི་ཕྱིར་རོ། །འགལ་ཚབས་ཅན་དུ་འགྱུར་རོ་ཞེས་བྱ་བ་ནི་ཁས་བླངས་པ་ཡལ་བར་བོར་བའི་ཕྱིར་ཉེས་བྱས་སུ་འགྱུར་རོ་ཞེས་བྱ་བའི་ཐ་ཚིག་གོ །མཉམ་པར་གཞག་གོ་སྙམ་པ་ཞེས་བྱ་བ་ནི་བསམ་གཏན་དང་གཟུགས་མེད་པའི་ས་མངོན་དུ་བྱས་སོ་སྙམ་པའོ། །རྣམ་པར་གྲོལ་བར་བྱའོ་སྙམ་པ་ཞེས་བྱ་བ་ནི་ཉོན་མོངས་པ་སྤང་བར་བྱའོ་སྙམ་པའོ། །ཕན་ཕུན་ཞེས་བྱ་བ་ནི་མ་རུང་བའོ། །ཉི་མའི་བརྒྱད་ཆ་ཤར་བ་ཞེས་བྱ་བ་ནི་ནམ་མཁའི་ཕྱོགས་འགྲོ་བའི་ལམ་གྱི་བརྒྱད་ཆ་ཆོད་པའམ་ཡང་ན་ཉི་མའི་དཀྱིལ་འཁོར་གྱི་བརྒྱད་ཆ་ཤར་བའོ། །སྐྱེས་འབུལ་བ་ཞེས་བྱ་བ་ནི་ཕོ་ཉའོ། །གཅིག་གིས་ཆོས་བསྟན་པར་བྱའོ་ཞེས་བྱ་བ་ནི་སྤྱོད་ཡུལ་གཅིག་ཏུའོ། །མཆིལ་མའི་སྣོད་གཞག་པར་བྱའོ་ཞེས་བྱ་བ་ནི་སེང་གིའི་ཁྲི་ལའོ། །གནས་པ་དག་གིས་ཞེས་བྱ་བ་ནི་སློབ་མ་དང་ཉེ་གནས་དག་གིས་སོ། །གཎྜཱི་ཆུང་ངུ་ཞེས་བྱ་བ་ནི་བསྡུ་བའི་ཕྱིར་ལས་ཀྱི་གཎྜཱི་ཆུང་ངུ་བརྡུངས་པའོ། །དེ་དག་ཕྱིར་ཆོས་ཉན་པ་མི་བྱེད་ནས་ཞེས་བྱ་བ་ནི་བར་ཆད་ནས་སོ། །ནོར་བུས་སྤྲས་པ་ཞེས་བྱ་བ་ནི་རིན་པོ་ཆེས་གླན་པའོ། །བརྒྱན་པ་ཞེས་བྱ་བ་ནི་མཛེས་པར་བྱས་པའོ། །ཟིལ་གྱིས་མནན་ནས་ཞེས་བྱ་བ་ནི་ཁྱད་དུ་བསད་ནས་སོ། །དུས་སྟོན་ཞེས་བྱ་བ་ནི་མཆོད་སྟོན་ནོ། །ཆར་འབབ་ཏུ་དོགས་ན་ཞེས་བྱ་བ་ནི་མངོན་དུ་ཕྱོགས་ནའོ། །འཛམ་བུའི་གྲིབ་མ་ལ་བཞུགས་པའི་སྐུ་གཟུགས་ཞེས་བྱ་བ་ནི་བྱང་ཆུབ་སེམས་དཔའ་ལང་ཚོ་གསར་ལ་བབ་པའི་ཚེ་ཤིང་འཛམ་བུའི་གྲིབ་མ་ལ་བཞུགས་པའི་སྐུ་གཟུགས་ཁ་སྤུ་མ་སྐྱེས་པའི་རབ་ཏུ་མ་བྱུང་བའི་ཆ་ལུགས་ཅན་ནོ། །དགེ་སློང་རྣམས་ཀྱིས་དེ་བོར་ཏེ་དོང་བ་ནི་རིན་པོ་ཆེ་ལ་རེག་གམ་རེག་ཏུ་འཇུད་དུ་མི་རུང་བའི་ཕྱིར་རོ། །སྟོན་པའི་འདུ་ཤེས་སྐྱེད་དེ་ཞེས་
བྱ་བ་ནི་སྟོན་པའི་འདུ་ཤེས་བསྐྱེད་ན་རིན་པོ་ཆེའི་འདུ་ཤེས་མེད་པས་རིན་པོ་ཆེ་ལ་རེག་པའི་ཉེས་པར་མི་འགྱུར་རོ། །ནད་པར་དུས་གསུམ་དུ་བལྟ་བར་བྱའོ་ཞེས་བྱ་བ་ནི་མཚན་མོའི་གནས་སྐབས་བརྟག་པའི་ཕྱིར་ནང་པར་བལྟའོ། །ཁ་ཟས་ཀྱི་གནས་སྐབས་བརྟག་པའི་ཕྱིར་དྲོ་ཀར་བལྟའོ། །མ་ཞུ་བ་ལ་སོགས་པའི་གནས་སྐབས་བརྟག་པའི་ཕྱིར་དགོངས་ཀར་བལྟའོ། །ནད་པ་དག་ལ་ཉམ་ང་བར་གྱུར་ན་ཞེས་བྱ་བ་ནི་རྗེས་བྱེད་པས་གནོད་པའོ། །ངོ་ཚ་མེད་པ་ཞེས་བྱ་བ་ནི་ཚུལ་ཁྲིམས་འཆལ་བའོ། །ནད་དང་བཅས་པ་ཞེས་བྱ་བ་ནི་ཞེ་འགྲས་པའོ། །རྒས་པ་ནི་འཁོགས་ཤིང་ཉམ་ཆུང་བས་བྱེ་བྲག་ཏུ་བསྟན་པའོ། །ན་བ་ནི་སྦྱོར་མི་བཟོད་པས་བྱེ་བྲག་ཏུ་བསྟན་ཏོ། །མཁར་ལེན་བྱེད་པར་བསྐོས་ན་ནི་ལྟུང་བ་མེད་པའོ་ཞེས་བྱ་བ་ནི་ཆད་པའི་ལས་ལ་སོགས་པ་བྱེད་ནའོ། །སྔར་ཞུགས་པ་དེ་ཉིད་ཀྱིས། ཐམས་ཅད་ཞུས་པ་ནི་ཡིན་ནོ་ཞེས་བྱ་བ་ནི་དགེ་འདུན་གྱི་ལས་ནི་སྤྱི་གཅིག་པའི་ཕྱིར་རོ། །དུས་སྔ་ཚོགས་སུ་ཞེས་བྱ་བ་ནི་གདུགས་ཚོད་མ་བབ་པའི་ཕྱིར་རོ། །གྱ་ཚོམ་དུ་ཟན་གཅད་པར་མི་བྱའོ་ཞེས་བྱ་བ་ནི་ཟན་གཅད་པའི་རྒྱུ་མེད་ནའོ། །ཚིག་ལ་ཐུག་ཅེས་བྱ་བ་ནི་ཚིག་པར་འགྱུར་བའོ། །དེ་འདྲ་མ་ཞེས་བྱ་བ་ནི་སྨད་པའོ། །སེར་ཆེ་བ་ཞེས་བྱ་བ་ནི་ཆུ་དང་བཅས་པའོ།། རི་ཀ་ཞེས་བྱ་བ་ནི་རིའི་སྤོའོ། །ཁྱེར་ཞེས་བྱ་བ་ནི་ཆུས་སོ། །གནས་མལ་གྱི་ལྟུང་བྱེད་དེ་བཅུ་བཞི་པའི་ཚིག་རྣམ་པར་བཤད་པ་རྫོགས་སོ།། །།འཁོར་ལོ་དང་བཀྲ་ཤིས་དང་གཡུང་དྲུང་གི་ལྕགས་ཀྱོ་དག་དང་ལྡན་པ་ཞེས་བྱ་བ་ནི་ལྕགས་ཀྱོ་ཞེས་བྱ་བ་ནི་མཚན་ཏེ། དེ་ནི་འཁོར་ལོ་ལ་སོགས་པ་རེ་རེ་དང་སོ་སོར་སྦྱར་བར་བྱ་སྟེ། དེས་ན་འཁོར་ལོའི་མཚན་དང་ལྡན་པའོ། །བཀྲ་ཤིས་ཀྱི་མཚན་དང་ལྡན་པ་དང༌། གཡུང་དྲུང་གི་མཚན་དག་དང་ལྡན་ཞེས་བྱ་བར་སྦྱར་རོ། །བསོད་ནམས་བརྒྱ་ཞེས་བྱ་བ་ནི་སངས་རྒྱས་བཅོམ་ལྡན་འདས་མངོན་སུམ་དུ་གྱུར་པ་ལ་བྱང་ཆུབ་སེམས་དཔའ་བསྐལ་པ་བརྒྱ་ལུས་པ་དག་གིས་དམིགས་པའི་སེམས་པས་བསོད་ནམས་བརྒྱ་བསགས་པ་ལས་བྱུང་བ་སྟེ། སེམས་པ་བརྒྱ་ནི་བཅོམ་ལྡན་འདས་ནི་སྲོག་གཅོད་པ་སྤངས་པ་དང༌། དེ་སྤངས་པའི་བསྔགས་པ་བརྗོད་པ་དང༌། གཞན་དག་དེ་སྤངས་པ་ཡང་དག་པར་
འཛིན་དུ་འཇུད་པ་དང༌། དེ་སྤངས་པ་གཟིགས་ན་ཐུགས་དགྱེས་པ་དང༌། དེ་སྤངས་པ་ལས་བྱུང་བའི་བསོད་ནམས་ཐར་པར་འོང་བའི་སེམས་པ་ལྔ་དང་བདག་ཉིད་ཀྱིས་ཀྱང་དེ་ལྟར་བྱའོ་སྙམ་པའི་སེམས་པ་ལྔ་སྟེ། དེ་ལྟར་སྲོག་གཅོད་པ་སྤངས་པ་ལ་སེམས་པ་བཅུའོ། །དེ་བཞིན་དུ་ལོག་པར་ལྟ་བ་སྤངས་པའི་བར་གྱི་དགེ་བ་བཅུ་པོ་དག་ལ་སེམས་པ་བཅུ་བཅུ་སྟེ། སྤྱིར་སེམས་པ་བརྒྱ་པོ་དག་ཡིན་པར་ཤེས་པར་བྱའོ། །རྩྭའི་གདིང་བ་ཞེས་བྱ་བ་སྨོས་པས་ནི་རས་བལ་གྱིས་བརྫངས་པ་དང༌། རིན་པོ་ཆེ་ལ་སོགས་པའི་གདིང་བ་དག་སེལ་བར་བྱེད་པ་དེ་དག་ཉེས་པ་དེ་ལྟ་བུའི་གཞི་ཡིན་པའི་ཕྱིར་རོ། །འཇིག་རྟེན་ལ་བདག་ཉིད་མཁས་པར་བགྲང་ཞེས་བྱ་བ་ནི་མི་དག་ལ་བདག་ཉིད་མཁས་པའི་གྲངས་སུ་བགྲངས་པའོ། །གློངས་ཏེ་ཞེས་བྱ་བ་ནི་སྔས་ཀྱི་མཐའ་དང་རྟེན་མའི་མཐའ་ཟློག་པ་ཙམ་བྱས་ཏེའོ། །གལ་ཏེ་མི་འདི་ཞེས་ཟེར་ན་སྦྱིན་པར་མི་བྱའོ་ཞེས་བྱ་བ་ནི་ཕྱིས་སྲིལ་དག་སྐྱེ་བའི་ཕྱིར་རོ། །སྐབས་འདིར་གཞུང་ཁ་ཅིག་ལས་བཅོམ་ལྡན་འདས་ཀྱིས་ཚོན་རྩིའི་ལས་བྱའོ་ཞེས་བཀའ་སྩལ་ནས་ཞེས་བྱ་བ་ལ་སོགས་པ་ཚོན་རྩིའི་ལས་ཀྱི་སྐབས་བདག་བཤད་པ་ནི་འདིར་སྐབས་མ་ཡིན་པས་གཞུང་ལྷུག་པ་ཡིན་པར་རིག་པར་བྱའོ། །གལ་ཏེ་ཐམས་ཅད་ཀྱི་ཐམས་ཅད་དུ་འདོད་ན་ཞེས་བྱ་བ་ནི་ཕྱིར་ཡེ་མི་འོང་བའི་སེམས་ཀྱིས་སམ་ཡུན་རིང་ཞིག་གིས་ཕྱིར་འོང་བའི་སེམས་སོ། །རྡོ་བའི་གཞི་ཅན་ཞེས་བྱ་བ་ནི་རྡོ་བ་མང་པོའོ། །བྱེ་མའི་གཞི་ཅན་ཞེས་བྱ་བ་ཡང་བྱེ་མ་མང་པོའོ། །ཉེས་དམིགས་དེ་ལྟ་བུ་ཞེས་བྱ་བ་ནི་ཕན་ཚུན་རྣམ་གཉིས་སོ། །འདིང་བའི་ལྟུང་བྱེད་དེ་བཅོ་ལྔ་པའི་ཚིག་རྣམ་པར་བཤད་པ་རྫོགས་སོ།། །།ཁྲོན་པ་ཞིག་གི་དྲུང་དུ་ཞེས་བྱ་བ་ནི་ཁྲོན་པ་དང་ཉེ་བར་རོ། །འདམ་བུ་ཐིབས་པོའི་གསེབ་ཅེས་བྱ་བ་ནི་འདམ་བུ་སྟུག་པོའི་གནས་སོ། །སྤྲིན་གྱི་ཁ་དོག་ལྔ་པའི་ཞེས་བྱ་བ་ནི་སེར་པོ་དང༌། དམར་པོ་དག་ལ་སོགས་པ་དང་ལྡན་པའོ། །སྐྲོད་པའི་ལྟུང་བྱེད་དེ་བཅུ་དྲུག་པའི་ཚིག་རྣམ་པར་བཤད་པ་རྫོགས་སོ།། །།གྲུ་མོས་བསྣུན་ཞེས་བྱ་བ་ནི་གྲུ་ཕྲུགས་ཀྱིས་བརྡེགས་པའོ། །ཕྱིས་གནོན་ཞེས་བྱ་བ་ནི་གནོད་པ་བྱས་ཏེ་ཟིལ་གྱིས་གནོན་
པའོ། །དེ་ཉིད་རྐྱེན་དུ་བྱས་ཏེ་ཞེས་བྱ་བ་ནི་གནས་ནས་འགྲོ་བ་ཉིད་ཀྱི་རྒྱུ་ལ་བརྟེན་ཏེའོ། །ཟུང་ངུ་ཞེས་བྱ་བ་ནི་སྐད་མཐུན་པའོ། །དགེ་སློང་གིས་ཇི་ཙམ་ཅུང་ཟད་དགེ་སློང་ལ་ཐོ་འཚམས་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ་ཞེས་བྱ་བ་ནི་ཕྱིས་གནོད་པ་བྱེད་པ་ནི་དགེ་སློང་ལ་ཐོ་འཚམས་པར་བྱེད་པའི་དཔེ་སྟེ། གཞན་ཡང་དགེ་སློང་གིས་ཇི་ཙམ་ཅུང་ཟད་དགེ་སློང་ལ་ཐོ་འཚམས་པར་བྱེད་ན་དེ་དག་ཐམས་ཅད་ཀྱང་བསླབ་པའི་གཞི་འདིར་གཏོགས་པའི་ལྟུང་བྱེད་དུ་འགྱུར་རོ། །མཁོས་སུ་མ་ཕབ་ཅེས་བྱ་བ་ནི་ངལ་སོ་པ་ལ་སོགས་པས་མགྲོན་དུ་གཉེར་བའོ། །ཆོལ་ཟངས་ཅན་ཞེས་བྱ་བ་ནི་གང་ན་ཆོལ་ཟངས་མང་བའམ་ཆོལ་ཟངས་གཞག་པའོ། །ཝའི་ཁ་ཞེས་བྱ་བ་ནི་ཝའི་བུ་གུ་དག་གོ །བུལ་བ་ཞེས་བྱ་བ་ནི་ཐོགས་པར་རོ། །གཎྜཱི་བསུ་ཞེས་བྱ་བ་ནི་ཅིའི་ཕྱིར་གཎྜཱི་བརྡུངས་ཞེས་བརྟགས་པའོ། །དགའ་བའི་ཞེས་བྱ་བ་ནི་འདོད་ཀྱི་ཞེས་བྱ་བའོ། །ཐེམ་སྐས་ཀྱི་གཞི་ཞེས་བྱ་བ་ནི་འཛེག་པའི་གནས་སོ། །ཕྱིས་གནོན་གྱི་ལྟུང་བྱེད་དེ་བཅུ་བདུན་པའི་ཚིག་རྣམ་པར་བཤད་པ་རྫོགས་སོ།། །།ལོ་འདས་པ་ཞེས་བྱ་བ་ནི་གནས་བཅའ་བའི་ལོ་དག་ལས་ཐལ་བའོ། །སྟེང་གི་ནམ་མཁའ་ལ་ཞེས་བྱ་བ་ནི་ཁང་པའི་སྟེང་གི་ནམ་མཁའ་ལའོ། །རྩ་བ་འབྱུང་ཞེས་བྱ་བ་ནི་གང་ལ་རྩ་བ་དགོས་པའི་དྲུང་དུ་འཕྲལ་ལ་འཇུད་ཅིང་རང་ཉིད་རྐྱེན་གཞན་མེད་པར་འབྱུང་ངོ༌། །དེ་ནི་དགེ་འདུན་གྱི་གཙུག་ལག་ཁང་གིས་གཞི་མ་རུང་བར་འགྱུར་བ་སྤང་བའི་ཕྱིར་རོ། །སྤང་ལེབ་ཅེས་བྱ་བ་ནི་སྤང་ལེབ་ཞེང་ཆེན་པོའོ། །སྤང་ལེབ་ཆུང་ངུ་ཞེས་བྱ་བ་ནི་སྤང་ལེབ་སྲབ་མོའོ། །ཤིང་ལེབ་ཅེས་བྱ་བ་ནི་ཤིང་སྲབ་མོའོ། །ཤིང་ལེབ་འབུར་ཆེན་ཞེས་བྱ་བ་ནི་ཤིང་ལེབ་འབུར་དུ་བརྐོས་པའོ། །བྱིན་གྱིས་གཞོལ་བ་ཞེས་བྱ་བ་ནི་ས་ཕག་དག་གིས་བྱིན་གྱིས་གཞོལ་བ་དེ་གཡོགས་པའོ། །རྩ་བ་འབྱུང་བ་ལ་འདུག་པའི་ལྟུང་བྱེད་དེ་བཅོ་བརྒྱད་པའི་ཚིག་རྣམ་པར་བཤད་པ་རྫོགས་སོ།། །།གང་དག་མིག་གིས་མཐོང་བར་འགྱུར་བ་ཞེས་བྱ་བ་ནི་མིའི་མིག་ཐ་མལ་པས་མཐོང་བར་འགྱུར་བའོ། །གང་དག་ཆུ་ཚགས་ཀྱིས་ཟིན་པར་འགྱུར་བ་ཞེས་བྱ་བ་ནི་རས་ཐགས་རན་བཟང་པོས་ཟིན་པར་འགྱུར་བའོ། །གང་དག་མི་མཐོང་བ་དང༌། མི་ཟིན་པ་དེ་དག་ནི་ཡོད་ཀྱང་སྲོག་ཆགས་དང་བཅས་པ་མ་ཡིན་ཏེ།
གསད་པར་མི་ནུས་སོ་ཞེས་བྱ་བའི་ཐ་ཚིག་གོ །དུད་འགྲོ་གསད་པའི་སེམས་ཀྱིས་དུད་འགྲོ་གསོད་པའི་ལྟུང་བྱེད་ཡིན་ནོ། །ཕྱི་རོལ་དུ་བཅས་པའི་སེམས་ཀྱིས་སྲོག་ཆགས་དང་བཅས་པའི་ཆུ་ལ་སྤྱོད་པ་ནི་སྲོག་ཆགས་དང་བཅས་པའི་ཆུ་ལ་སྤྱོད་པ་ནི་སྲོག་ཆགས་དང་བཅས་པ་ལ་སྤྱོད་པའི་ལྟུང་བྱེད་འདི་ཡིན་ནོ། །ནང་དུ་སྤྱད་པའི་སེམས་ཀྱིས་སྲོག་ཆགས་དང་བཅས་པའི་ཆུ་ལ་སྤྱོད་པ་ནི་སྲོག་ཆགས་དང་བཅས་པའི་ཆུ་ལ་སྤྱོད་པའི་ལྟུང་བྱེད་འོག་མའི་སྐབས་ཡིན་ནོ། །སྲོག་ཆགས་དང་བཅས་པ་ལ་སྤྱོད་པའི་ལྟུང་བྱེད་དེ་བཅུ་དགུ་པའི་ཚིག་རྣམ་པར་བཤད་པ་རྫོགས་སོ།། །།མཚམས་མཉམ་པ་ཞེས་བྱ་བ་ནི་གང་ལ་ཕ་གུའི་མཚམས་མཉམ་ཞིང་མ་བསྣོལ་བར་བརྩིགས་པའོ། །ལག་གི་བླ་བསྐོ་བ་ཞེས་བྱ་བ་ནི་བློ་མཐུན་པར་བྱ་བའོ། །ལོག་སྟེ་ཞེས་བྱ་བ་ནི་ཐམས་ཅད་འདུས་ཏེའོ། །ཕྱ་མཁན་ཞེས་བྱ་བ་ནི་ཐིག་སྐུད་ལ་ལྟ་བའི་བསྟན་བཅོས་ཤེས་པའོ། །ཤིང་མཁན་ཞེས་བྱ་བ་ནི་ཤིང་འཇོག་པའོ། །ཆུ་ཀླུང་ཞེས་བྱ་བ་ནི་ཆུ་ཕྱིར་འབྱུང་བའི་སྲོལ་ལོ། །གཙུག་ལག་ཁང་འདི་དེ་ཉིད་དུ་རྡིབ་པར་འགྱུར་ཞེས་བྱ་བ་ནི་བྲམ་ཟེ་དེ་མ་བྱིན་པར་ལེན་པའི་ལས་བྱས་པའི་རྒྱུ་མཐུན་པ་ངེས་པར་མྱོང་བར་འགྱུར་བ་ཡིན་པས་བཟློག་པར་མི་ནུས་པའི་ཕྱིར་རོ། །གནས་པའི་སྙོམས་པར་འཇུག་པ་ཞེས་བྱ་བ་ནི་ཞི་བར་གནས་པར་བྱ་བའི་ཕྱིར་སེམས་ཀྱི་རྒྱུད་སྙོམས་པར་སྒྲུབ་པའོ། །སྒོའི་སྦུབས་དང་གཏན་པ་དང་སྣང་བའི་གནས་ཇི་ཙམ་པའི་འདུ་ཤེས་ཀྱིས་ཞེས་བྱ་བའི་སྒོའི་སྦུབས་ཀྱི་གནས་ཇི་ཙམ་པའི་འདུ་ཤེས་དང༌། གཏན་པའི་གནས་ཇི་ཙམ་པའི་འདུ་ཤེས་དང༌། སྐར་ཁུང་དང་ཆུ་ཁུང་གི་སྣང་བའི་གནས་ཇི་ཙམ་པའི་འདུ་ཤེས་བཞིན་བརྩིག་པར་བྱ་བའོ། །ས་བརྟག་པ་ཞེས་བྱ་བ་ནི་བརྐོས་ནས་ཕྱིར་དགང་པ་ལ་སོགས་པས་ས་བརྟག་པའོ། །ནས་བཟུང་སྟེ་ཞེས་བྱ་བ་ནི་དེ་ནས་བརྩམས་ཏེའོ། །གཉིས་སམ་གསུམ་བརྩིགས་པའོ་ཞེས་བྱ་བ་ནི་ཉི་མ་གཅིག་པའོ། །དེ་ལས་ལྷག་པའི་བར་བརྩིགས་པ་ཞེས་བྱ་བ་ནི་རིམ་པ་བཞི་ལ་སོགས་པ་བརྩིགས་ནའོ། །སྒོའི་སྦུབས་ཀྱི་གནས་གཏན་པའི་གནས་དང་སྣང་བའི་གནས་ཇི་ཙམ་པའི་འདུ་ཤེས་མེད་པ་ནི་མི་རིགས་པར་བྱེད་པ་ཡིན་པས་ཉེས་བྱས་སུ་འགྱུར་བའོ། །འདི་ནི་རྡིབ་པ་དང་གས་པ་དང་འདྲུམ་པ་ལ་སོགས་པ་སྤང་བའི་ཕྱིར་བཅའ་བ་མཛད་དོ། །རྡོ་འབའ་ཞིག་ལ་སོགས་པ་ལ་ནི་
འགས་པ་ལ་སོགས་པའི་ཉེས་པར་མི་འགྱུར་བས་ལྟུང་བ་མེད་དོ། །སྦྱིན་བདག་རིངས་པར་འདོད་པས་ནི་རྡིབ་ན་ཡང་ལྟུང་བ་མེད་དེ། གཙུག་ལག་ཁང་ནི་དེ་ལ་རག་ལུས་པའི་ཕྱིར་རོ། །གཙུག་ལག་ཁང་གི་ལྟུང་བྱེད་དེ་ཉིད་ཤུ་པའི་ཚིག་རྣམ་པར་བཤད་པ་རྫོགས་སོ།། །།དེ་དག་དང་གཞན་ཡང་ཞེས་བྱ་བས་ནི། འཇིག་རྟེན་ལ་མ་གྲགས་པ་གཞན་དག་གི་མིང་ཡང་གཟུང་ངོ༌། །གཽ་ཏ་མའི་ཞེས་བྱ་བ་ནི་ཤཱཀྱའི་དགེ་སློང་མ་རྣམས་ལ་བོད་པའོ། །ཁྱོད་ཀྱི་དུས་ཡིན་གྱི་ཞེས་བྱ་བ་ནི་ཁྱོད་འགྲོ་བའི་དུས་ཡིན་ཞེས་བྱ་བའི་ཐ་ཚིག་གོ །སྐུལ་བ་མཛད་དོ་ཞེས་བྱ་བ་ནི་འགྲོ་བར་སྤྲོ་བ་མཛད་པའོ། །ངལ་བ་ཞེས་བྱ་བ་ནི་ཆད་པའོ། །རེས་ཀྱིས་ཞེས་བྱ་བ་ནི་རེ་མོས་སོ། །རེས་བབ་པ་ན་དགེ་སློང་མ་ལ་སྟོན་པར་མི་བཏུབ་པོ་ཞེས་བྱ་བ་ནི་བཅོམ་ལྡན་འདས་བཞུགས་པས་རྗེས་བྱ་བ་དང་མི་འཇིགས་པ་མ་ཡིན་པ་གཉིས་དབེན་པ་ལ་མངོན་པར་དགའ་བའི་ཕྱིར་དང༌། དགེ་སློང་མའི་འདུ་འཛི་སྤང་བར་འདོད་པའི་ཕྱིར་དང༌། ཚངས་པ་མཚུངས་པར་སྤྱོད་པའི་སེམས་བསྲུང་བའི་ཕྱིར་རོ། །ཆོས་དང་ལྡན་པའི་གཏམ་གྱིས་ཤིག་ཅེས་བྱ་བ་ནི་སྐྱོ་བར་འགྱུར་བ་ལ་སོགས་པའི་གཏམ་མོ། །ང་འམ་ཁྱོད་ཀྱིས་གཏམ་ཀྱང་རུང་ཞེས་བྱ་བ་ལ་སོགས་པས་ནི་དགེ་སློང་མ་དེ་དག་ནི་གཉི་གས་གདུལ་བ་ཡིན་པས་འཕགས་པ་དགའ་བྱེད་སྤྲོ་བར་བྱ་བའི་ཚིག་ཡིན་ནོ། །རྣམ་པར་སེལ་བ་ཡོངས་སུ་དྲིས་ཞེས་བྱ་བ་ནི་གཏམ་གང་དྲིས་པ་དག་གིས་ཐེ་ཚོམ་རྣམ་པར་སེལ་བར་བྱེད་པ་དེ་ལྟ་བུའི་གཏམ་ཡོངས་སུ་དྲིས་ཤིག་པའོ། །ཀུན་ཤེས་པ་ཞེས་བྱ་བ་ནི་རྟོགས་པའོ། །སྨྲས་པ་འདིའི་དོན་ཅི་ལགས་ཞེས་བྱ་བ་ནི་དགོངས་པ་བརྟག་པའོ། །འདི་ཇི་ལྟ་བུ་ལགས་ཞེས་བྱ་བ་ནི་རིགས་པ་བརྟག་པའོ། །དེ་དག་ནི་དགེ་སློང་མ་རྣམས་མི་འཇིགས་པ་བསྐྱེད་པའི་ཕྱིར་རོ། །བཙུན་པ་དགའ་བྱེད་ཆོས་གསུངས་ཤིག་དང་ཞེས་བྱ་བ་ལ་སོགས་པ་ནི་དམ་བཅའ་བའི་ཚིག་ཡིན་ནོ། །འཕགས་པས་ཆོས་རྣམས་ཀྱི་བདག་མེད་པ་བསྟན་པ་ལ། ནང་གི་སྐྱེ་མཆེད་དྲུག་གི་དབང་དུ་མཛད་ན། སྲིང་མོ་དག་ཁྱེད་ཀྱི་ནང་གི་སྐྱེ་མཆེད་མིག་ལ་ཞེས་བྱ་བ་ལ་སོགས་པ་གསུངས་སོ། །ནང་གི་ཞེས་བྱ་བ་ནི་ཡང་དང་ཡང་དུ་འབྱུང་བའི་ཕྱིར་སེམས་ནི་ནང་ཞེས་བྱའོ། །དེ་ལ་ཉེ་བར་བརྟེན་པའི་དངོས་པོས་འཇུག་པའི་ཕྱིར་ནང་གི་ཞེས་བྱ་བ་ནི་སེམས་ཀྱི་མཇུག་ཐོགས་སུ་ཞེས་བྱ་བའི་ཐ་ཚིག་གོ །སྐྱེ་མཆེད་
ཅེས་བྱ་བ་ནི་སེམས་སྐྱེ་བའི་མཚན་ཉིད་དེ། སྐྱེ་ཞིང་མཆེད་པར་བྱེད་པས་སྐྱེ་མཆེད་དེ་སེམས་ཀྱི་རྒྱུ་ཞེས་བྱ་བའི་ཐ་ཚིག་གོ །འདི་ནི་བདག་གིའོ་ཞེས་བྱ་བ་ནི་བདག་ཉིད་གཞན་ཞིག་ཉིད་ལ་མིག་ནི་བདག་གི་ཡིན་པའོ། །འདི་ནི་བདག་གོ་ཞེས་བྱ་བ་ནི། མིག་གང་ཡིན་པ་དེ་བདག་ཉིད་ཡིན་པའོ། །འདི་ནི་བདག་གི་བདག་གོ་ཞེས་བྱ་བ་ནི་མིག་ནི་བདག་གི་བདག་ཡིན་ལ་ལྷག་མ་ནི་བདག་གི་ཡིན་ཏེ། དེའི་རྗེས་སུ་འཇུག་པར་བྱེད་པ་གཞན་ལ་བདག་གིའོ་སྙམ་པའོ། །དང་པོ་ཉིད་ནས་ཞེས་བྱ་བ་ནི་ཐོག་མ་ཉིད་ནས་ཏེ་མཐོང་བའི་ལམ་གྱི་ཚེའོ། །ནང་གི་སྐྱེ་མཆེད་དྲུག་པོ་འདི་དག་བདག་མ་མཆིས་པ་ཞེས་བྱ་བ་ནི་མི་རྟག་པ་ཉིད་ཀྱིས་བདག་མེད་པའི་མཚན་ཉིད་ཡིན་ཏེ་རང་དབང་མེད་པའི་ཕྱིར་རོ། །ཡང་དག་པའི་ཞེས་བྱ་བ་ནི་ཕྱིན་ཅི་མ་ལོག་པའོ། །ཤེས་རབ་ཀྱིས་ཞེས་བྱ་བ་ནི་ཟག་པ་མེད་པའི་བློས་སོ། །ཡང་དག་པ་ཇི་ལྟ་བ་བཞིན་དུ་ཞེས་བྱ་བ་ནི་དེ་ཁོ་ནའི་རྗེས་སུ་འབྲང་བས་སོ། །དེ་ལ་མོས་པའི་སླད་དུའོ་ཞེས་བྱ་བ་ནི་མཐོང་བའི་ལམ་ལས་ལངས་པ་དག་ལ་ཡང་བདག་མེད་པའི་ཤེས་པ་ཉམས་པའི་ཕྱིར་རོ། །ཕྱི་རོལ་གྱི་སྐྱེ་མཆེད་དྲུག་གི་དབང་དུ་མཛད་ནས། སྲིང་མོ་དག་ཁྱེད་ཀྱིས་ཕྱི་རོལ་གྱི་སྐྱེ་མཆེད་གཟུགས་དག་པ་ཞེས་བྱ་བ་ལ་སོགས་པ་གསུངས་སོ། །ཕྱི་རོལ་གྱིས་ཞེས་བྱ་བ་ནི་སེམས་ཀྱི་བདག་ཉིད་ཀྱི་ཡུལ་གྱི་དངོས་པོས་ཕྱི་རོལ་དུ་འགྱུར་བའི་ཕྱིར་ཏེ། འདི་ལྟར་དབང་པོ་རྣམ་པར་གྱུར་པས་སེམས་རྣམ་པར་འགྱུར་གྱི་ཡུལ་རྣམ་པར་འགྱུར་བས་སེམས་རྣམ་པར་མི་འགྱུར་བ་དང༌། སེམས་རྣམ་པར་འགྱུར་བས་ཀྱང་དབང་པོ་རྣམ་པར་འགྱུར་གྱི་ཡུལ་རྣམ་པར་འགྱུར་བས་དབང་པོ་རྣམ་པར་མི་འགྱུར་བ་དེའི་ཕྱིར་ཡུལ་ཉིད་ཕྱི་རོལ་གྱི་དབང་པོ་རྣམས་ནི་ཕྱི་རོལ་མ་ཡིན་པའོ། །རྣམ་པར་ཤེས་པའི་ཚོགས་དྲུག་གི་དབང་དུ་མཛད་ནས། སྲིང་མོ་དག་ཁྱོད་ཀྱིས་མིག་དང་གཟུགས་རྣམས་ལ་བརྟེན་ནས་མིག་གི་རྣམ་པར་ཤེས་པ་སྐྱེས་པའི་ཞེས་བྱ་བ་ལ་སོགས་པ་གསུངས་སོ། །བརྟེན་ནས་ཞེས་བྱ་བ་ནི་ལྟོས་ནས་སོ། །མིག་གི་རྣམ་པར་ཤེས་པ་ཞེས་བྱ་བ་ནི་མིག་ལ་བརྟེན་པའི་ཕྱིར་རོ། །རྣམ་པར་ཤེས་པའི་ཚོགས་ཞེས་བྱ་བ་ལ། ཚོགས་ཞེས་བྱ་བ་ནི་འདུས་པ་སྟེ། རྫས་གཅིག་པ་ཉིད་མ་ཡིན་པའི་ཕྱིར་རོ། །རེག་པའི་ཚོགས་དྲུག་གི་དབང་དུ་མཛད་ནས་སྲིང་མོ་
ཁྱོད་ཀྱིས་མིག་དང་གཟུགས་རྣམས་ལ་བརྟེན་ནས་མིག་གི་རྣམ་པར་ཤེས་པ་སྐྱེས་ཞེས་བྱ་བ་ལ་སོགས་པ་གསུངས་སོ། །གསུམ་འདུས་པ་ཞེས་བྱ་བ་ནི་དབང་པོ་དང༌། ཡུལ་དང༌། རྣམ་པར་ཤེས་པ་རྣམས་ཀྱི་བྱ་བ་གཅིག་པ་ཉིད་དོ། །རེག་པ་ཞེས་བྱ་བ་ནི་ཡུལ་ལ་རེག་པ་དང་འདྲ་བའི་ཕྱིར་ཏེ། དེའི་རྗེས་སུ་འབྲངས་པས་བདེ་བ་དང་སྡུག་བསྔལ་ལ་སོགས་པ་ཡུལ་གྱི་འབྲས་བུ་འབྱུང་བའི་ཕྱིར་རོ། །ཚོར་བའི་ཚོགས་དྲུག་གི་དབང་དུ་མཛད་ནས། སྲིང་མོ་དག་ཁྱོད་ཀྱིས་མིག་དང་གཟུགས་རྣམས་ལ་བརྟེན་ནས་མིག་གི་རྣམ་པར་ཤེས་པ་སྐྱེ་ཞིང་གསུམ་འདུས་པ་ལས་རེག་པའི་རྐྱེན་གྱིས་ཚོར་བ་ཞེས་བྱ་བ་ལ་སོགས་པ་གསུངས་སོ། །སྲེད་པའི་ཚོགས་དྲུག་གི་དབང་དུ་མཛད་ནས། སྲིང་མོ་དག་ཁྱེད་ཀྱིས་མིག་དང་གཟུགས་རྣམས་ལ་བརྟེན་ནས་མིག་གི་རྣམ་པར་ཤེས་པ་སྐྱེ་ཞིང་གསུམ་འདུས་པ་ལས་རེག་པ། །རེག་པའི་རྐྱེན་གྱིས་ཚོར་བའི་ཚོར་བའི་རྐྱེན་གྱིས་སྲེད་པ་ཞེས་བྱ་བ་ལ་སོགས་པ་གསུངས་སོ། །གང་ཟག་བདག་མེད་པ་བསྟན་ནས་རྟག་པའི་ཆོས་སྤངས་པས་ཆོས་བདག་མེད་པར་བསྟན་པར་བཞེད་པས་ཆོས་རྣམས་ཀྱིས་མི་རྟག་པ་ཉིད་བསྟན་པའི་ཕྱིར། སྲིང་མོ་དག་འདི་ལྟ་སྟེ། དཔེར་ན་འབྲུ་མར་དང་མར་མེའི་སྙིང་པོ་ལ་བརྟེན་ནས་ཞེས་བྱ་བ་ལ་སོགས་པ་གསུངས་སོ། །འབྲུ་མར་གྱི་མར་མེ་ཞེས་བྱ་བ་ནི་འབྲུ་མར་གྱི་མར་མེའོ། །འབར་བར་འགྱུར་ཞེས་བྱ་བ་ནི་གནས་པར་འགྱུར་མཆེད་པར་འགྱུར་བའི་ཐ་ཚིག་གོ །དེ་ལ་བརྟེན་པའི་ཞེས་བྱ་བ་ནི་མར་མེ་ལ་བརྟེན་པའིའོ། །སྣང་བ་ཞེས་བྱ་བ་ནི་འོད་དོ། །རྟག་པ་ཞེས་བྱ་བ་ལ་སོགས་པ་ནི་རྣམ་གྲངས་ཉིད་དོ། །ཡང་ན་རྟག་པ་ཞེས་བྱ་བ་ནི་འཇུག་པའི་རྟག་པས་སོ། །བརྟན་པ་ཞེས་བྱ་བ་ནི་རྒྱུན་བརྟན་པས་སོ། །ཐེར་ཟུག་པ་ཞེས་བྱ་བ་ནི་རྣམ་གྲངས་རྟག་པས་ཏེ་རིམ་གྱིས་འབྱུང་བའི་སོ་སོའི་སྐྱེ་བོའི་སྐྱེ་བ་བཞིན་ནོ། །རྣམ་པར་མི་འགྱུར་བའི་ཆོས་ཅན་ཞེས་བྱ་བ་ནི་རྣམ་པར་གནས་པར་རྟག་པ་སྟེ། མི་སྣང་བར་གྱུར་ཀྱང་ས་བོན་ཉིད་ཀྱིས་འབྱུང་བ་སཱ་ལུའི་ས་བོན་བཞིན་ནོ། །ཡང་དག་པ་ཞེས་བྱ་བ་ནི་ཕྱིན་ཅི་མ་ལོག་པའོ། །ཆོས་དེ་དང་དེ་དག་སྐྱེས་པས་ཞེས་བྱ་བ་ནི་ནང་དང་ཕྱི་རོལ་གྱི་རྒྱུ་རྣམས་སོ། །ཆོས་དེ་དང་དེ་དག་སྐྱེ་བར་འགྱུར་ཞིང་ཞེས་བྱ་བ་ནི་འབྲས་བུ་རྣམས་སོ། །དགག་པར་འགྱུར་ཞེས་བྱ་བ་ནི་དོན་ཉམས་པའོ། །ཉེ་བར་འགྱུར་ཞི་བར་
འགྱུར་ཞེས་བྱ་བ་ནི་གྲུབ་པ་ཉམས་སོ། །བསིལ་བར་གྱུར་ཞེས་བྱ་བ་ནི་ཤུགས་ཉམས་པ་སྟེ་མཉེན་པར་གྱུར་པའོ། །ནུབ་པར་འགྱུར་བ་ཞེས་བྱ་བ་ནི་རྒྱུན་འཆད་པའོ། །ནང་གི་སྐྱེ་མཆེད་རྣམས་ལ་ཁང་པའི་ནང་གི་མར་མེའི་དཔེས་བསྟན་ནས་ཕྱི་རོལ་གྱི་སྐྱེ་མཆེད་རྣམས་ལ་ཁང་པའི་ཕྱི་རོལ་གྱི་ཤིང་ལྗོན་པའི་དཔེས་བསྟན་པར་བཞེད་ནས། སྲིང་མོ་དག་འདི་ལྟ་སྟེ་དཔེར་ན། ཤིང་ལྗོན་པ་ཆེན་པོ་ཞེས་བྱ་བ་ལ་སོགས་པ་གསུངས་སོ། །དེ་ལྟར་བདག་མེད་པ་རྣམ་པ་གཉིས་བསྟན་ནས་ད་ནི་ནང་དང་ཕྱི་རོལ་གྱི་སྐྱེ་མཆེད་ཇི་ལྟར་གནས་པ་དག་ལ་སེམས་རྣམ་པར་གྲོལ་བར་འགྱུར་བ་བསྟན་པའི་ཕྱིར་རོ། །སྲིང་མོ་དག་འདི་ན་སྐྱེས་བུ་མཁས་པ་དག་དཔེས་སྨྲས་པའི་དོན་ཀུན་ཤེས་པར་འགྱུར་བས་དེའི་ཕྱིར་རེ་ཞིག་དཔེ་ཉོན་ཅིག་ཅེས་བྱ་བ་ལ་སོགས་པ་གསུངས་སོ། །སྐྱེས་བུ་མཁས་པ་དག་ཅེས་བྱ་བ་ནི་སྐྱེ་བོ་མཁས་པ་དག་གོ །དཔེས་ཞེས་བྱ་བ་ནི་འཇིག་རྟེན་ལ་གྲགས་པའི་དཔེས་སོ། །དེའི་ཕྱིར་ཞེས་བྱ་བ་ནི་དེ་ལྟ་བས་ནའོ། །བ་ལང་གསོད་པ་ཞེས་བྱ་བ་ནི་གདོལ་པའོ། །བ་ལང་གསོད་པའི་སློབ་མ་ཞེས་བྱ་བ་ནི་ལྟོ་ཁོལ་ལོ། །མཁས་པ་ཞེས་བྱ་བ་ནི་སླུད་བུར་འཆུ་བ་ལ་མཁས་པའོ། །བ་ལང་བཤའ་བའི་གྲི་ཞེས་བྱ་བ་ནི་བ་ལང་གསོད་པའི་མཚོན་ནོ། །ཤའི་ཚོགས་ཞེས་བྱ་བ་ནི་ཤའི་ཚོམས་སོ། །མ་ཉམས་པ་ཞེས་བྱ་བ་ནི་དུམ་བུར་མ་གྱུར་བའོ། །བར་གྱི་ཞེས་བྱ་བ་ནི་པགས་པ་དང་ཤའི་ཚོགས་ཀྱི་བར་གྱིའོ། །ཆུ་རྒྱུས་ཞེས་བྱ་བ་ནི་མཇུག་མ་ལ་སོགས་པ་དང་འབྲེལ་པའི་ཆུ་བ་དང་རྒྱུས་པའོ། །གློ་བ་དང་མཆིན་པའོ་ཞེས་བྱ་བ་ནི་ཁོང་པ་ན་འདུག་པའི་ཤའི་རྡོ་གུའོ། །རྩ་རྒྱུན་ཞེས་བྱ་བ་ནི་རྩའི་ཆུ་བའོ། །ཡང་བ་ལང་གི་ཀོ་བས་གཡོགས་པར་གྱུར་བ་ཞེས་བྱ་བ་ནི་སྔོན་གྱི་གནས་སྐབས་བསྟན་པའི་ཕྱིར་རོ། །ལྡན་པ་ཞེས་བྱ་བ་ནི་འབྲེལ་པ་སྟེ། ཕན་ཚུན་འབྱར་ཞེས་བྱ་བའི་ཐ་ཚིག་གོ །བྲལ་བ་ཞེས་བྱ་བ་ནི་ཆད་པ་སྟེ་དུམ་བུ་དུ་མར་གྱུར་ཅེས་བྱ་བའི་ཐ་ཚིག་གོ །དོན་རྣམ་པར་རིག་པར་བྱ་བའི་ཕྱིར་ཞེས་བྱ་བ་ནི་དཔེས་སེམས་རྣམ་པར་གྲོལ་པ་འཇིག་རྟེན་ལས་འདས་པའི་དོན་གོ་བར་བྱ་བའི་ཕྱིར་རོ། །གཟུགས་ཅན་ཞེས་བྱ་བ་སྨོས་པས་ནི་རྣམ་པར་ཤེས་པའི་ཚོགས་ལ་སོགས་པ་བསལ་བའི་ཕྱིར་རོ། །རགས་
པ་ཞེས་བྱ་བ་སྨོས་པས་ནི་བར་མ་དོའི་སྲིད་པའི་ལུས་ཆ་ཕྲ་མོ་བསལ་བའི་ཕྱིར་རོ། །འབྱུང་བ་ཆེན་པོ་བཞི་ལས་གྱུར་པ་ཞེས་བྱ་བ་ནི་ས་ལ་སོགས་པ་ལས་གྱུར་པ་ཡིན་གྱི་དབང་ཕྱུག་ལ་སོགས་པ་ལས་གྱུར་པ་མ་ཡིན་པའོ། །ཕ་མའི་མི་གཙང་བ་མེར་མེར་པོ་ལས་གྱུར་བ་ཞེས་བྱ་བ་ནི་ཕ་མ་ཆགས་པར་གྱུར་པའི་ཁུ་བ་དང་ཁྲག་འདུས་པ་ལས་བྱུང་བ་སྟེ། དེ་ནི་རྫུས་ཏེ་སྐྱེ་བ་ཉིད་བསལ་བའི་ཕྱིར་རོ། །འབྱེ་བ་ཞེས་བྱ་བ་ནི་འགས་པའོ། །རྣམ་པར་འཐོར་བ་ཞེས་བྱ་བ་ནི་དུམ་བུ་དུམ་བུར་ཆད་པའོ། །རྣམ་པར་འཇིག་པ་ཞེས་བྱ་བ་ནི་སྐམ་པ་ལ་སོགས་པ་ཆུད་ཟ་བའོ། །ཚིག་བླ་དགས་ཞེས་བྱ་བ་ནི་མིང་ངོ༌། །དགའ་པའི་འདོད་ཆགས་ཞེས་བྱ་བ་ནི་སྲེད་པའོ། །འཕགས་པའི་ཞེས་བྱ་བ་ནི་དེ་བཞིན་གཤེགས་པ་ལ་སོགས་པའོ། །ཉན་ཐོས་ཞེས་བྱ་བ་ནི་གུས་པས་ཉན་པའི་སློབ་མའོ། །ཐོས་པ་དང་ལྡན་པ་ཞེས་བྱ་བ་ནི་གདམས་ངག་མནོས་པའི་མཁས་པའོ། །ཤེས་རབ་ཀྱིས་མཚོན་ཞེས་བྱ་བ་ནི་ཟག་པ་མེད་པའི་ཤེས་རབ་བོ། །བག་ལ་ཉལ་ཞེས་བྱ་བ་ནི་འདོད་པ་དང༌། ཁོང་ཁྲོ་བ་དང༌། སྲེད་པ་དང༌། ང་རྒྱལ་དང༌། མ་རིག་པ་དང༌། ལྟ་བ་དང༌། ཐེ་ཚོམ་ཞེས་བྱ་བ་བདུན་ནོ། །ཉེ་བའི་ཉོན་མོངས་པ་ཞེས་བྱ་བ་ནི་ཁྲོ་བ་དང་ཁོན་དུ་འཛིན་པ་དང༌། གཡོ་ལ་སོགས་པའི་རྒྱུ་མཐུན་པ་དག་གོ །ཀུན་ནས་དཀྲིས་པ་ཞེས་བྱ་བ་ནི་ངོ་ཚ་མེད་པ་དང་ཁྲེལ་མེད་པ་ལ་སོགས་པའོ། །ཤེས་རབ་ཀྱི་མཚོན་གྱིས་ཐབས་བསྟན་པའི་སྲིང་མོ་དག་དེ་ལྟ་བས་ན་ཞེས་བྱ་བ་ལ་སོགས་པ་གསུངས་སོ། །ཉེ་བར་ལེན་པའི་ཕུང་པོ་ཞེས་བྱ་བ་ནི་འདོད་པ་ཉེ་བར་ལེན་པ་ལ་སོགས་པ་ཉོན་མོངས་པ་རྣམས་ཀྱིས་ལེན་པར་བྱེད་པའི་ཕུང་པོའོ། །འབྱུང་བ་དང་འཇིག་པར་རྗེས་སུ་ལྟ་ཞེས་བྱ་བ་ནི་གང་གིས་འདུ་བྱེད་རྣམས་སྐད་ཅིག་རེ་རེ་ལ་སྐྱེ་བ་དང་འགག་པར་ལྟ་བའོ། །ཀུན་འབྱུང་བ་དང་ནུབ་པར་འགྱུར་བ་ཞེས་བྱ་བ་ཡང་དེ་བཞིན་དུ་ཤེས་པར་བྱའོ། །དྲན་པ་ཉེ་བར་གཞག་པ་བཞི་ཞེས་བྱ་བ་ནི་ལུས་དང༌། ཚོར་བ་དང་སེམས་དང༌། ཆོས་དྲན་པ་ཉེ་བར་གཞག་པའོ། །བྱང་ཆུབ་ཀྱི་ཡན་ལག་བདུན་ཞེས་བྱ་བ་ནི་དྲན་པ་ཡང་དག་བྱང་ཆུབ་ཀྱི་ཡན་ལག་ལ་སོགས་པ་སྟེ། བྱང་ཆུབ་རྣམ་གསུམ་གྱི་རྒྱུ་ཡིན་པའི་ཕྱིར་རོ། །ལེགས་པར་ཡིད་ལ་བྱས་ཞེས་བྱ་བ་ནི་རྟག་ཏུ་བསྒོམ་པའོ། །རྒྱུ་ཞེས་བྱ་བ་ནི་ཐབས་ཀྱི་རྒྱུའོ། །འདོད་པའི་ཟག་པ་ཞེས་བྱ་བ་ནི་འདོད་པ་ན་སྤྱོད་
པའི་ཉོན་མོངས་པ་དག་གོ །སྲིད་པའི་ཟག་པ་ཞེས་བྱ་བ་ནི་གཟུགས་ན་སྤྱོད་པའི་ཉོན་མོངས་པ་དག་གོ །མ་རིག་པའི་ཟག་པ་ཞེས་བྱ་བ་ནི་ཁམས་གསུམ་གྱི་མི་ཤེས་པའོ། །འདོད་ཆགས་དང་བྲལ་བ་ཞེས་བྱ་བ་ནི་ཉོན་མོངས་པ་ལ་དམིགས་པའི་ཉོན་མོངས་པ་སྤངས་པའི་ཕྱིར་རོ། །རྣམ་པར་གྲོལ་ཞིང་ཞེས་བྱ་བ་ནི་འདོད་པའི་ཁམས་ལའོ། །མཐར་ཐུག་པ་ཉིད་མ་ཐོབ་ཅེས་བྱ་བ་ལ། འདིར་མི་སློབ་པ་ཉིད་ནི་མཐར་ཐུག་པའོ། །འཇིག་རྟེན་འདིར་ཞེས་བྱ་བ་ནི་འདོད་པའི་ཁམས་སོ། །འོང་བར་འགྱུར་བ་ཞེས་བྱ་བ་ནི་སྐྱེ་བར་འགྱུར་བའོ། །གཉིས་སུ་འབྱེད་པ་ཞེས་བྱ་བ་ནི་ཉོན་མོངས་པ་དང་ཉོན་མོངས་པ་མ་ཡིན་པ་གཉིས་སུའོ། །ཕྱིར་མི་འོང་བ་ཉིད་དུ་ལུང་བསྟན་པའོ་ཞེས་བྱ་བ་ནི་ཕྱིར་མི་འོང་བའི་འབྲས་བུ་ཐོབ་པའོ། །རྣམ་པར་གྲོལ་ཞིང་ཞེས་བྱ་བ་ནི་ཁམས་གསུམ་པ་ལས་སོ། །མཐར་ཐུག་པ་ཉིད་ཐོབ་ཅེས་བྱ་བ་ནི་མི་སློབ་པ་ཉིད་ཐོབ་པའོ། །ལམ་གདགས་སུ་མེད་དེ་ཞེས་བྱ་བ་ནི་སྐྱེ་བ་གཞན་གཞག་ཏུ་མེད་པ་སྟེ། ཉོན་མོངས་པ་དང་ལས་ཀྱི་རྒྱུ་འགའ་ཡང་མེད་པའི་ཕྱིར་རོ། །མཆོག་ཉིད་དུ་ལུང་བསྟན་ཏོ་ཞེས་བྱ་བ་ནི་དམ་པ་ཉིད་དུ་སྟེ་མི་སློབ་པ་ཉིད་དུའོ་ཞེས་བྱ་བའི་ཐ་ཚིག་གོ །རེ་ཞིག་འདུལ་བའི་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མཛད་དོ་ཞེས་བྱ་བ་ནི་འདུལ་བའི་དོན་ཉིད་དང་རྗེས་སུ་མཐུན་པའི་ཕྱིར་འདུལ་བས་དུས་ལས་ཡོལ་བར་གྱུར་ན་མི་རུང་ངོ་སྙམ་དུ་དགོངས་པའི་ཕྱིར་རོ། །བསྐོ་བར་མི་བྱ་བའོ་ཞེས་བྱ་བ་ནི་དགེ་སློང་མའི་སྟོན་པར་རོ། །འབྲེལ་པར་བྱས་པས་ཞེས་བྱ་བ་ནི་གཞན་དུ་འགྲོ་བར་བྱས་ནས་སོ། །གསོ་སྦྱོང་བཅོ་ལྔ་པ་ཞེས་བྱ་བ་ནི་གསོ་སྦྱོང་བཅོ་ལྔ་པ་ཉིད་ལ་གདམས་ངག་ཚོལ་བར་ངེས་པའི་ཕྱིར་དང༌། དེའི་ཚེ་དགེ་འདུན་ཐམས་ཅད་འདུས་པའི་ཕྱིར་རོ། །དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ན་ཞེས་བྱ་བ་ནི་དགེ་སློང་མ་ལ་བསྟན་པ་ནི་དགེ་འདུན་མཐུན་པའི་བྱ་བ་ཡིན་པའི་ཕྱིར་རོ། །མ་དུལ་བ་ཞེས་བྱ་བ་ནི་ལུས་དང་ངག་དང་གཉིས་ཀྱིས་ཉེ་བར་མ་ཞི་བའོ། །མ་ཞི་བ་ཞེས་བྱ་བ་ནི་ཡིད་ཀྱིས་སོ། །འདམ་ལས་མ་རྒལ་བ་ཞེས་བྱ་བ་ནི་འདོད་པའི་འདམ་ལས་སོ། །ཡོངས་སུ་མྱ་ངན་ལས་མ་འདས་པ་ཞེས་བྱ་བ་ནི་ཉོན་མོངས་པ་མ་ཞི་བའོ། །རྒྱ་ཆེར་ཐོན་པ་ཞེས་བྱ་བ་ནི་སོ་སོར་ཐར་པའི་མདོ་གདོན་པ་ལྔ་པོ་གླེང་གཞི་གདོན་
པ་ནས་རྩོད་པ་ཞི་བར་བྱེད་པའི་ཆོས་བདུན་གདོན་པའི་བར་དག་རྒྱ་ཆེར་ཐོན་པའོ། །ལོབས་པ་ཞེས་བྱ་བ་ནི་མངོན་སུམ་དུ་བྱས་ཤིང་ལྕེའི་རྩེ་མོས་གནས་པར་འགྱུར་པའོ། །དེ་དག་ནི་བླང་བ་དང་དོར་བ་ཡོངས་སུ་ཤེས་པས་བདག་ཉིད་བསྲུང་བ་ལ་དགོངས་པའི་ཆོས་སུ་བསྟན་ཏོ། །རྒྱལ་ཚབ་ལྟ་བུ་ཞེས་བྱ་བ་ནི་བསྟན་པའི་ཚུལ་ཁྲིམས་ཀྱིས་བཅོམ་ལྡན་འདས་རྒྱལ་པོའི་བཀའི་སྲས་ཞེས་བྱ་བའི་ཐ་ཚིག་གོ །གྲོང་ཁྱེར་བའི་སྐད་དང་ལྡན་པ་ཞེས་བྱ་བ་ནི་སྐད་མཁས་པའི་ཕྱིར་རྒྱལ་ཚབ་ལ་སོགས་པའི་སྒྲ་མི་བརྗོད་པའོ། །སུན་མ་ཕྱུང་བ་ཞེས་བྱ་བ་ནི་དང་པོ་ནས་སོ། །སུན་ཕྱུང་ན་ཡང་ལྟུང་བ་དེ་ཆོས་བཞིན་དུ་ཕྱིར་བྱས་པས་ནི་སུན་མ་ཕྱུང་བ་ཉིད་ཀྱི་གནས་སྐབས་གསལ་བར་བསྟན་པའོ། །རྗེས་དང་བཅས་ཞེས་བྱ་བ་ནི་འཛེམ་པ་དང་བཅས་པའོ། །གུས་པ་དང་བཅས་ཞེས་བྱ་བ་ནི་རྗེ་དཔོན་དུ་བྱས་པ་དང་བཅས་པའོ། །རེག་པ་ཞེས་བྱ་བ་ནི་ཁྲུས་དང་ཉེ་རེག་དང་འཐོར་འཐུང་གི་རེག་པའོ། །ཡུན་རིང་དུ་འཚེ་བར་གྱུར་ཅིག་ཅེ་བྱ་བ་ནི་འཕགས་པའི་ཆོས་སོ། །ཚེ་རིང་དུ་སྐྱོང་བར་གྱུར་ཅིག་ཅེས་བྱ་བ་ནི་ཚེ་ལྷག་པར་འཕེལ་བར་འགྱུར་ཅིག་པའོ། །ལམ་ཕྲན་ཅེས་བྱ་བ་ནི་ལམ་སྲང་ཕྲ་མོའོ། །བུལ་ཞེས་བྱ་བ་ནི་བརྗེད་ངས་པའོ། །ཆུང་བ་ཞེས་བྱ་བ་ནི་བློ་ཆུང་བའོ། །རིགས་གཉིས་པ་ཞེས་བྱ་བ་ནི་རྒྱལ་རིགས་སོ། །ལུགས་སུ་འབྱུང་བ་ཞེས་བྱ་བ་ནི་མ་རིག་པའི་རྐྱེན་གྱིས་འདུ་བྱེད་རྣམས་ཞེས་བྱ་བ་ལ་སོགས་པ་འཁོར་བར་འཇུག་པའི་ལུགས་སུ་འབྱུང་བའོ། །ལུགས་ལས་བཟློག་པ་ཞེས་བྱ་བ་ནི་མ་རིག་པ་འགགས་པས་འདུ་བྱེད་རྣམས་འགག་ཅེས་བྱ་བ་ལ་སོགས་པ་འཁོར་བའི་ལུགས་ལས་བཟློག་པའོ། །བསྲབས་པ་ཞེས་བྱ་བ་ནི་ཆུང་བའོ། །ཡོངས་སུ་ཟད་པ་ཞེས་བྱ་བ་ནི་ཞིང་ལ་སོགས་པ་དག་ལས་འབྲས་བུ་མི་འབྱུང་བའོ། །ཡོངས་སུ་གཏུགས་ཞེས་བྱ་བ་ནི་གཞི་ཉམས་པ་སྟེ་ཞིང་ལ་སོགས་པ་མི་རུང་བར་འགྱུར་ཞེས་བྱ་བའི་ཐ་ཚིག་གོ །སྒྲུབ་པ་གཅེས་པ་ཡིན་གྱི་ཞེས་བྱ་བ་ནི། ཚུལ་ཁྲིམས་དང༌། ཐོས་པ་དང༌། བསྒོམ་པ་ལ་སོགས་པ་གཙོ་བོ་ཡིན་ནོ་ཞེས་བྱ་བའི་ཐ་ཚིག་གོ །འདོད་བྲལ་ཞེས་བྱ་བ་ནི་འདོད་པ་བསྟེན་པ་དང་བྲལ་བའོ། །དྲན་པ་དང་ལྡན་པ་ཞེས་བྱ་བ་ནི་དྲན་པ་ཉེ་བར་གནས་པའོ། །ཤེས་བཞིན་ཅན་ཞེས་བྱ་བ་ནི་ཤེས་རབ་
ཉེ་བར་གནས་པ་སྟེ། དེ་གཉིས་ཀྱིས་ནི་དྲན་པ་ཉེ་བར་གཞག་པ་ལ་སོགས་པ་སྒོམ་པ་སྟོན་ཏོ། །གནོད་ལྡན་ཞེས་བྱ་བ་ནི་སྐྱེ་བ་ལ་སོགས་པ་གནོད་པ་བརྒྱ་དག་གིས་གང་བའོ། །སྡུག་བསྔལ་གང་ཡིན་བསྟེན་མི་བྱ། །ཞེས་བྱ་བ་ནི་འཁོར་བ་ལ་སྙིང་པོར་གཟུང་བར་མི་བྱའོ། །བསྟན་ཏོ་ཞེས་བྱ་བ་ནི་ལུང་ཕོག་པའོ། །སྟེན་པར་བྱེད་བསྙེན་པར་བྱེད། བསྙེན་བཀུར་བྱེད་ཅེས་བྱ་བ་ནི་བསྙེན་བཀུར་བྱེད་པ་ཆུང་ངུ་དང༌། འབྲིང་དང༌། ཆེན་པོའོ། །སྨད་པ་ཞེས་བྱ་བ་ནི་སྤ་གོང་བའོ། །བསྟོད་པ་ཞེས་བྱ་བ་ནི་གཟེངས་བསྟོད་པའོ། །བྱིས་པ་བསྟོད་པ་གང་ཡིན་པ་དང་ཞེས་བྱ་བ་ལ་སོགས་པའི་ཚིགས་སུ་བཅད་པ་གཅིག་གིས་ནི་སྨད་པའི་ཞར་ལ་བདག་ཉིད་ཆེན་པོ་ལ་སྨོད་པ་བས་ཀྱང་བྱིས་པ་ལ་བསྟོད་པ་འབྲས་བུས་ཟིལ་གྱིས་གནོན་པར་འགྱུར་བར་སྟོན་ཏོ། །འདིར་ནི་ཞེས་བྱ་བ་ནི། བསྟོད་པ་དང་སྨོད་པའི་སྐབས་འདིར་རོ། །མཁས་སྨོད་མཆོག་ཡིན་གྱི་ཞེས་བྱ་བ་ནི་དེའི་རྒྱུ་ལས་མཐོ་རིས་དང་བྱན་གྲོལ་ལ་སོགས་པའི་འབྲས་བུ་ཆེན་པོ་ཐོབ་པའི་ཕྱིར་རོ། །བྱིས་པ་བསྟོད་པ་མ་ཡིན་ནོ་ཞེས་བྱ་བ་ནི་མཆོག་མ་ཡིན་པ་སྟེ། བྱིས་པ་ནི་མི་ཤེས་པ་ཡིན་པས་ཉེས་པ་འབའ་ཞིག་སྤྱོད་པ་ཡིན་པའི་ཕྱིར་དེས་བསྟོད་ན་ངན་སོང་ལ་སོགས་པ་དག་ཏུ་ལྟུང་བའི་ཕྱིར་རོ། །གང་གིས་བྱིས་པ་ཉིད་རེག་ཅེས་བྱ་བ་ལ་སོགས་པ་ཚིགས་སུ་བཅད་པ་གཅིག་གིས་ནི་ཉེས་པ་ཉིད་དུ་ཤེས་ཏེ་ཡོངས་སུ་སྤངས་ནས་ཡོན་ཏན་མངོན་པར་འཕེལ་བར་འགྱུར་བ་ཁོང་དུ་ཆུད་པར་བྱ་བའི་ཕྱིར་བསྟན་ཏོ། །བྱིས་པ་ཉིད་རིག་ཅེས་བྱ་བ་ནི་བདག་ཉིད་བྱིས་པ་ཉིད་དུ་རིག་པའོ། །དེ་ལ་ཞེས་བྱ་བ་ནི་བདག་ཉིད་བྱིས་པ་ཉིད་ཡིན་པ་དེ་ལའོ། །དེས་ན་ཞེས་བྱ་བ་ནི་བྱིས་པ་ཉིད་དུ་རིག་པ་དེས་ནའོ། །མཁས་པར་རློམ་བྱེད་པ་ཞེས་བྱ་བ་ནི་བདག་ཉིད་མཁས་པར་ང་རྒྱལ་བྱེད་པའོ། །དེ་འདིར་ཤིན་ཏུ་བྱིས་པ་ཡིན་ཞེས་བྱ་བ་ནི་མཁས་པ་མ་ཡིན་པར་མཁས་པར་རློམ་པར་བྱེད་པས་མཁས་པ་ལས་ཐག་རིང་དུ་གྱུར་པའི་ཕྱིར་རོ། །རྡུལ་ཞེས་བྱ་བ་ནི་འདོད་ཆགས་ཆེན་པོ་ལ་སོགས་པའོ། །དྲི་མ་ཞེས་བྱ་བ་ནི་ཆུང་དུ་སྟེ་ཤིན་ཏུ་མི་མངོན་པའི་ཕྱིར་རོ། །ནང་གི་རྡུལ་ཞེས་བྱ་བ་ནི་འདོད་ཆགས་ལ་སོགས་པའི་ཉེས་པའོ། །ཕྱིར་རོལ་གྱི་རྡུལ་ཞེས་བྱ་བ་ནི་ས་
རྡུལ་ལོ། །བློ་ལ་སྣང་བར་གྱུར་ཏོ་ཞེས་བྱ་བ་ནི་མངོན་སུམ་དུ་གྱུར་པའོ། །རྡུལ་འདིར་འདོད་ཆགས་ཞེས་བྱ་བ་ལ་སོགས་པ་ལ། འདིར་ཞེས་བྱ་བ་ནི་རྡུལ་སྤངས་སོ། །དྲི་མ་སྤང་ངོ་ཞེས་བྱ་བའི་ཚིག་གཉིས་པོ་འདི་ལའོ། །ཅི་ཕྱིར་ཞ་ན། དེའི་ཕྱིར་རྡུལ་ནི་འདོད་ཆགས་མིང་སྟེ་རྡུལ་གྱི་མིང་ཞེས་བྱ་བ་གསུངས་ཏེ། འདི་ལྟར་རྡུལ་ཞེས་བྱ་བའི་སྒྲ་ནི་འདོད་ཆགས་ཀྱི་མིང་ཡིན་ཏེ། རབ་ཏུ་འབྱུང་བ་ནི་དེ་སྤངས་པའི་ཕྱིར་རོ། །རྡུལ་ཞེས་བྱ་བའི་སྒྲ་ས་རྡུལ་གྱི་སྒྲ་མ་ཡིན་ཏེ། གཙོ་བོ་མ་ཡིན་པས་དེ་སྤངས་ཀྱང་དགོས་པ་ཅི་ཡང་མེད་པའི་ཕྱིར་རོ། །དེ་བས་བཅོམ་ལྡན་འདས་ཀྱིས་འདིར་རྡུལ་ཞེས་བྱ་བ་ནི་འདོད་པ་ཡིན་པར་དགོངས་ཀྱི་དེ་ས་རྡུལ་ནི་མ་ཡིན་ནོ། །དེ་བས་ན་མཁས་པ་གང་གིས་འདོད་ཆགས་ཀྱི་མཚན་ཉིད་རྡུལ་དེ་རྣམ་པར་སྤངས་ཏེ་རྒྱུད་ལས་རྩ་བ་དང་བཅས་པ་འབྱིན་པར་བྱེད་པའི་མཁས་པ་དེ་དག་བདེ་བར་གཤེགས་པའི་བསྟན་པ་འཕགས་པའི་བདེན་པ་བསྟན་པ་ལ་རྟག་ཏུ་བག་ཡོད་པར་འགྱུར་ཏེ་རྗེས་སུ་བསྒྲུབ་པ་ལྷུར་ལེན་པར་འགྱུར་རོ་ཞེས་བྱ་བའི་ཐ་ཚིག་གོ །ཟག་པ་ཞེས་བྱ་བ་ནི་རང་གི་ལྟ་བར་མི་ནུས་པ་སྟེ། ལྡོག་པའི་ཆོས་ནི་ལྡོག་པ་ཉིད་དུ་སྣང་བའི་ཕྱིར་རོ། །ཟབ་པར་སྣང་བ་ཞེས་བྱ་བ་ནི་ཡུལ་དེའི་ཤེས་པ་དཀོན་པའི་ཕྱིར་རོ། །མཐོང་བར་དཀའ་བ་ཞེས་བྱ་བ་ནི་གང་དག་གིས་མཐོང་བའི་ལམ་ལ་སོགས་པ་ནས་མཐོང་བ་དེ་དག་གིས་ཀྱང་དཀའ་བས་མཐོང་བའི་ཕྱིར་རོ། །རྟོགས་པར་དཀའ་བ་ཞེས་བྱ་བ་ནི་རྟོགས་པར་བྱེད་པ་དེ་དག་གིས་ཀྱང་བསྒོམ་པའི་ལམ་ལ་སོགས་པ་ལ་དཀའ་བས་རྟོགས་པའི་ཕྱིར་རོ། །བརྟག་པར་མི་ནུས་པ་ཞེས་བྱ་བ་ནི་བྱིས་པ་དག་གིས་སྲིད་པ་ཙམ་དུ་ཡང་བརྟག་པར་མི་ནུས་པའི་ཕྱིར་རོ། །རྟོག་གེའི་སྤྱོད་ཡུལ་མ་ཡིན་པ་ཞེས་བྱ་བ་ནི་སྐར་མཁན་དང་རྩིས་མཁན་ལ་སོགས་པ་བྱིས་པའི་རྟོག་གེས་དེ་ལ་མི་འཇུག་པའི་ཕྱིར་རོ། །ཞིབ་མོ་བརྟགས་པ་མཁས་པ་མཛངས་པས་རིག་པར་བྱ་བ་ནི་བློ་ཞིབ་མོ་དག་དང་བློ་བརྟན་པ་དག་དང༌། བསྟན་བཅོས་མཁས་པའི་མཁས་པ་དང༌། བསྟན་བཅོས་མ་ཐོས་ཀྱང་སྔོན་གོམས་པའི་ཤེས་པ་དང་ལྡན་པ་མཛངས་པ་དག་གིས་རིག་པར་བྱ་བའི་ཐ་ཚིག་གོ །སྨས་པ་ཞེས་བྱ་བ་ནི་སེམས་རབ་ཏུ་བསྡངས་པའོ། །ལོ་ཞེས་བྱ་བའི་སྒྲ་ནི་མི་གནས་པའི་ཚིག་ཡིན་ནོ། །གསོལ་ལོ་ཞེས་བྱ་བ་ནི་གསོལ་བ་
འདེབས་པའོ། །ཡ་མཚན་ཅན་ཞེས་བྱ་བ་ནི་གཞན་མུ་སྟེགས་ཅན་རབ་ཏུ་བྱུང་བ་སྤྱིའི་མིང་ཡིན་ཏེ། ཅིའི་ཕྱིར་ཡ་མཚན་ཅན་ཞེས་བྱ་ཞེ་ན་འདུལ་བ་རྣམ་པར་བཤད་པ་ལས་པཱ་ཥ་ཎ་ཊི་ཀ་ཞེས་བྱ་བ་ནི་རྡོའི་རྒྱབ་ཡིན་ཏེ། ཇི་ལྟར་རྡོའི་རྒྱབ་ཏུ་ས་བོན་བཏབ་པས་མྱུ་གུ་སྐྱེ་མི་ནུས་པ་དེ་བཞིན་དུ་གཞན་མུ་སྟེགས་ཅན་དག་གིས་ཀྱང་ཐར་པའི་མྱུ་གུ་སྐྱེད་མི་ནུས་པས་རྡོ་རྒྱབ་པ་ཞེས་བྱ་བར་གསུངས་སོ། །དགུ་བཅུ་རྩ་དྲུག་ཅེས་བྱ་བ་ནི་རྫོགས་བྱེད་ལ་སོགས་པ་སྟོན་པ་དྲུག་དང༌། དེ་དག་རེ་རེ་ལས་ཡ་མཚན་ཅན་བཅོ་ལྔ་བཅོ་ལྔར་གྱེས་པའི་ཕྱིར་བསྡོམས་ན་དགུ་བཅུ་རྩ་དྲུག་ཡོད་པའོ། །བྲིད་ཅེས་བྱ་བ་ནི་བསླུས་པའོ། །ཚིག་གཞན་དག་ཅེས་བྱ་བ་ནི་རྫས་ཀྱི་མཐའ་པ་དང་བྱ་བའི་མཐའ་བ་དག་གོ །ཡི་གེ་གཞན་དག་ཅེས་བྱ་བ་ནི་ཚིག་འདྲ་ཡང་ཡི་གེ་གཞན་དག་གིས་སོ། །ཚིག་དང་ཡི་གེ་གཞན་དག་གིས་ཞེས་བྱ་བ་ནི་གཉི་ག་དག་གིས་སོ། །ལུས་ཀྱིས་ཉེས་པར་སྤྱོད་པ་གསུམ་ཞེས་བྱ་བ་ནི་སྲོག་གཅོད་པ་དང་མ་བྱིན་པར་ལེན་པ་དང༌། འདོད་པས་ལོག་པར་གཡེམ་པའོ། །ངག་གིས་ཉེས་པར་སྤྱོད་པ་བཞི་ཞེས་བྱ་བ་ནི་བརྫུན་དུ་སྨྲ་བ་དང༌། ཕྲ་མ་དང༌། ངག་རྩུབ་པོ་དང༌། ཚིག་འཁྱལ་པའོ། །ཡིད་ཀྱིས་ཉེས་པར་སྤྱོད་པ་གསུམ་ཞེས་བྱ་བ་ནི་བརྣབ་སེམས་དང༌། གནོད་སེམས་དང༌། ལོག་པར་ལྟ་བའོ། །ཡོངས་སུ་འཛིན་ཞེས་བྱ་བ་ནི་སྐྱོན་དེ་ཕུང་པོ་ལྔ་ཡོངས་སུ་འཛིན་པའི་ཕྱིར་རོ། །རྗེས་སུ་བསྐོར་ཏོ་ཞེས་བྱ་བ་ནི་ཡང་བསྐོར་བའོ། །སེམས་བསྒྱུར་བ་ཞེས་བྱ་བ་ནི་སེམས་ཡོངས་སུ་བསྒྱུར་བ་སྟེ་རྣོན་པོར་གྱུར་པའོ། །ཆོས་འདི་ལྟ་བུ་དང་ལྡན་པ་མ་གཏོགས་སོ་ཞེས་བྱ་བ་ནི་གདུལ་བའི་བྱ་བ་དང་འབྲེལ་བའི་ཕྱིར་རོ། །གང་དག་བསྐོ་བར་བྱེད་པ་དེ་དག་ལ་ཉེས་བྱས་སུ་གྱུར་པ་ཞེས་བྱ་བ་ནི་ཡུལ་དང་དུས་དང༌། ཚོགས་པ་དང༌། གང་ཟག་ལས་ཤིན་ཏུ་འདས་པའི་ཕྱིར་ཁ་ན་མ་ཐོ་བ་དེར་འགྱུར་རོ། །དེར་བསྐོས་པས་དེས་དགེ་སློང་མ་ལ་སྟོན་པ་ལྟུང་བྱེད་དུ་འགྱུར་རོ་ཞེས་བྱ་བ་ནི་མི་རིགས་པའི་རྣམ་པས་བྱས་པ་ནི་མ་བྱས་པ་ཉིད་ཡིན་པའི་ཕྱིར་དེ་མ་བསྐོས་པ་ཉིད་ཡིན་པས་དངོས་གཞིའི་ཁ་ན་མ་ཐོ་པར་འགྱུར་རོ། །ཕམ་པར་འགྱུར་བའི་ཆོས་བརྒྱད་ཅེས་བྱ་བ་ནི་ཐུན་མོང་བ་བཞི་དང༌། རེག་པ་དང༌། ལུས་བཀན་པ་དང༌། འཆབ་པ་དང༌། ཟློག་པ་
ཞེས་བྱ་བ་ནི་ཐུན་མོང་མ་ཡིན་པ་བཞི་སྟེ་བརྒྱད་དོ། །ལྕི་བའི་ཆོས་བརྒྱད་ཅེས་བྱ་བ་ནི་དགེ་སློང་རྣམས་ལས་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་མའི་དངོས་པོ་ཡོངས་སུ་བཙལ་བ་དང༌། དགེ་སློང་རྣམས་ལ་ཟླ་བ་ཕྱེད་ཕྱེད་ཅིང་གདམས་ངག་དང་རྗེས་སུ་བསྟན་པ་ཡོངས་སུ་བཙལ་པ་དང༌། དགེ་སློང་མེད་པའི་གནས་སུ་དབྱར་གནས་པར་ཁས་བླང་བར་མི་བྱ་བ་དང༌། གཉི་གའི་དགེ་འདུན་ལས་གནས་གསུམ་གྱི་དགག་དབྱེ་བྱ་བ་དང༌། དགེ་སློང་ལ་ཚུལ་ཁྲིམས་དང༌། ལྟ་བ་དང༌། ཆོ་ག་དང༌། འཚོ་བ་ཉམས་པས་གླེང་བ་དང༌། དྲན་པར་མི་བྱ་བ་དང༌། དགེ་སློང་ལ་སྤྱོ་བ་དང༌། ཁྲོ་བ་དང༌། ཚིག་རྩུབ་པོ་མི་བྱ་བ་དང༌། དགེ་སློང་གསར་བུ་ལ་ཡང་གུས་པར་སྨྲ་བ་དང༌། ཕྱག་དང་ལྡང་བ་དང༌། ཐལ་མོ་སྦྱར་བ་དང༌། གུས་པའི་ལས་བྱ་བ་དང༌། ལྕི་བའི་ཆོས་ལས་འདས་པས་ཟླ་བ་ཕྱེད་དུ་གཉིས་ཀའི་དགེ་འདུན་ལ་མགུ་བར་བྱ་བ་སྤྱད་པར་བྱ་བའོ།། སྟོན་པ་ཕྱི་མ་ཞེས་བྱ་བ་ནི་སྔ་མ་ལྟ་བུ་མཚམས་ཀྱི་ནང་ན་ཡེ་མེད་ན་དེའི་འོག་ཏུ་གཟོད་འདི་ཕྱིས་བསྐོ་བར་བྱ་བ་ཡིན་པས་ཕྱི་མ་ཞེས་བྱ་བའོ། །སྔ་མ་གཅིག་ཙམ་ཞིག་ཡོད་ན་ཡང་ཕྱི་མ་འདི་བསྐོས་ན་བསྐོ་བའི་དགེ་འདུན་ལ་ཡང་ཉེས་བྱས་སུ་འགྱུར་ལ། དེ་བསྐོས་པའི་ལས་ཀྱང་མི་འཆགས་ལ། དེས་བསྟན་ན་ཡང་ལྟུང་བྱེད་ཉིད་དུ་འགྱུར་རོ། །ཚོགས་སམ་ཞེས་བྱ་བ་ནི་བྱ་བ་གཅིག་གམ་ཞེས་བྱ་བའི་ཐ་ཚིག་གོ །ཡོངས་སུ་དག་གམ་ཞེས་བྱ་བ་ནི་ཕམ་པར་འགྱུར་བ་མ་བྱུང་ངམ། ལྟུང་བ་གཞན་དག་ཀྱང་བཤགས་པ་དང༌། བྱིན་གྱིས་བརླབ་པ་གཉིས་ཀྱིས་ཕྱིར་བཅོས་པ་བྱས་སམ་ཞེས་བྱའོ། །མཐུན་ནམ་ཞེས་བྱ་བ་ནི་ལྟ་བ་མཐུན་ནམ་ཞེས་བྱ་བའོ། །ཁ་ན་མ་ཐོ་བ་མེད་དམ་ཞེས་བྱ་བ་ནི་ཐབ་མོ་ལ་སོགས་པའི་སྐྱོན་དང་བྲལ་ལམ་ཞེས་བྱ་བའི་ཐ་ཚིག་གོ །ཁྱེད་ཅག་ལ་ཞེས་བྱ་བ་ལ་སོགས་པ་ལྷག་མ་རྣམས་ཀྱིས་ནི་ཁྱེད་ཅག་དགེ་སློང་མའི་གདམས་ངག་དང་རྗེས་སུ་བསྟན་པ་ནི་དགེ་འདུན་ཁོ་ན་ལས་འཐོབ་ཀྱི་ཇི་སྐད་བསྟན་པ་བཞིན་དུ་ཟུང་ལ་བག་ཡོད་པར་སྒྲུབས་ཤིག་ཅེས་བསྟན་ཏོ། །འབྲས་ཆན་རྩུབ་མོ་ཞེས་བྱ་བ་འབྲས་རྩུབ་མོའི་ཆན་ནོ། །རྩ་བས་བསྐོལ་བ་ཞེས་བྱ་བ་ནི་རྩབ་མོ་བསྐོལ་བའོ། །རྗེའུ་ཁ་གཅིག་ལ་ནང་གཉིས་ཡོད་པ་ཞེས་བྱ་བ་ནི་རྫེའུ་ཁ་གཅིག་ལ་ལྟོ་གཉིས་
ཡོད་པའོ། །ཞོའི་ཚོད་མ་ཞེས་བྱ་བ་ནི་གཞི་ཞོ་ལས་བླངས་པའོ། །ཚང་བང་ཞེས་བྱ་བ་ནི་གཡོས་ཀྱི་གནས་སོ། །ཕོ་ཤའི་ཁུ་ཤ་ཞེས་བྱ་བ་ནི་ཤའི་དུམ་བུ་དང་བཅས་པའོ། །བུ་ལོན་འཕྲོག་པ་ཞེས་བྱ་བ་ནི་བུ་ལོན་དེད་པའོ། །ནོར་འཕྲོག་པ་ཞེས་བྱ་བ་ནི་ནོར་སྤྱོད་སྤྱོད་པའོ། །ཉེ་དུའི་སྟོབས་ཞེས་བྱ་བ་ནི་ཉེ་དུའི་ཐ་སྙད་དོ། །ལག་སྟོབས་ཞེས་བྱ་བ་ནི་འཁལ་འཐག་ལ་སོགས་པ་ལག་པའི་ཐ་སྙད་དོ། །གྲུ་བོ་ཆེ་སྤྱོད་པ་ཞེས་བྱ་བ་ནི་རྒྱ་མཚོའི་གྲུ་བོ་ཆེར་འཇུག་པའོ། །བདག་ཉིད་འཛིན་པར་ཞེས་བྱ་བ་ནི་སྲུང་བར་བྱེད་པའོ། །རིན་མེད་པར་ཞེས་བྱ་བ་ནི་རིན་གྱིས་མ་བསླུས་པར་རོ། །ཁུར་ཞེས་བྱ་བ་ནི་བམ་པོའོ། །བསྡོམས་ཏེ་ཞེས་བྱ་བ་ནི་བསྡུས་ཏེའོ། །ཤིང་གིས་ཤིང་གི་ཞེས་བྱ་བ་ནི་སྙིང་པོ་མེད་པའོ། །བཟའ་བའི་ཟོང་ཞེས་བྱ་བ་ནི་ཏིལ་དང་གྲོན་དང་ཞུན་མར་ལ་སོགས་པ་བཙོང་བའི་གནས་སོ། །ཆོས་ཞེས་བྱ་བ་ནི་མིའི་འཚེ་བ་ཉིད་དོ། །རིགས་པས་ཞེས་བྱ་བ་ནི་འཇིག་རྟེན་གྱི་ཚུལ་གྱིས་སོ། །དབྱིག་ཚོང་བ་ཞེས་བྱ་བ་ནི་གསེར་དངུལ་འཚོང་བའོ། །ལོང་གཏམ་སྨྲ་བ་ཞེས་བྱ་བ་ནི་རང་དགར་གཏམ་ཟེར་བའོ། །གླང་པོ་ཆེའི་གཉར་ཞོན་པ་ཞེས་བྱ་བ་ནི་གླང་པོ་ཆེའི་རྒྱབ་ཏུ་ཞོན་པའོ། །ཁྱོགས་སྤྱི་ལ་ཞེས་བྱ་བ་ནི་མིས་བསྐུར་བའོ། །བྱི་དོར་བ་ཞེས་བྱ་བ་ནི་བཅོས་ལེགས་བྱེད་པའོ། །ཆུ་འཕྱག་པར་བྱེད་པའི་ཞེས་བྱ་བ་ནི་གྲུའི་ནང་དུ་འོངས་པ་འཕྱག་པར་བྱེ་པའོ། །རིན་པོ་ཆེ་ཆེན་པོ་ཞེས་བྱ་བ་ནི་རིན་ཐང་ཆེ་བའོ། །ཆེ་བ་ཞེས་བྱ་བ་ནི་དུག་ལ་སོགས་པ་སེལ་བའི་མཐུ་ཆེ་བའོ། །མཐོན་པོར་འགྲོ་བ་ཞེས་བྱ་བ་ནི་ཡ་རབས་ཀྱི་རིགས་འགྲུབ་པའི་ཕྱིར་རོ། །སྐལ་བ་ཅན་དུ་འགྱུར་བ་ཞེས་བྱ་བ་ནི་ཤིན་ཏུ་གཞོན་པ་ལ་སོགས་པ་སྐལ་བ་དང་ལྡན་པ་ཉིད་དུ་འགྱུར་བའི་ཕྱིར་རོ། །རྣམ་པར་སྨིན་པ་བདེ་བ་ཞེས་བྱ་བ་ནི་ལོངས་སྤྱོད་ཆེ་བ་ལ་སོགས་པའི་བདེ་བ་བསྐྱེད་པའི་ཕྱིར་རོ། །ཕྱི་མ་ལ་མཐོ་རིས་སུ་འགྲོ་བ་ཞེས་བྱ་བ་ནི་མངོན་སུམ་དང་བརྒྱུད་པ་དག་གིས་མཐོ་རིས་སུ་འགྲུབ་པའི་ཕྱིར་རོ། །འཇིགས་པ་ཆེན་པོ་ཞེས་བྱ་བ་ནི་སྲོག་འཆད་པའི་ཕྱིར་རོ། །ཆེ་བ་ཞེས་བྱ་བ་ནི་རང་བཞིན་རྒྱ་ཆེན་པོའི་ཕྱིར་རོ། །ཉ་ཆེན་དང་ཉ་ཆེན་མིད་དང་ཉ་ཆེན་མིད་པ་མིད་ཅེས་བྱ་བ་དག་ནི། ཉ་བོ་ཆེའི་བྱེ་བྲག་གོ །ཆུ་རླབས་ཞེས་བྱ་བ་ནི་རླབས་འཕྱོ་བའོ། །དབའ་ཀློང་ཞེས་བྱ་བ་ནི་ཆུ་
འཁོར་བའོ། །རི་དག་ལ་ཐུག་པ་ཞེས་བྱ་བ་ནི་གདོང་ཐུག་ཏུ་ཐུག་པའོ། །རླུང་ནག་པོ་ཞེས་བྱ་བ་ནི་རླུང་ནག་པོ་དྲག་པའོ། །ཉག་ཐག་གཅིག་བཀྲོལ་ཞིང་ཞེས་བྱ་བ་ནི་སྐམས་ལ་འདུག་པའི་ཕུར་པ་ལས་སོ། །འགྱོད་པ་ཞེས་བྱ་བ་ནི་ཡིད་ལ་གཅགས་པའོ། །ཐོ་འཚམས་པ་ཞེས་བྱ་བ་ནི་ལོག་པའི་ལ་སོགས་པའི་བྱམས་པ་རྨོངས་པར་བྱེད་པའོ། །རིན་པོ་ཆེ་བཞི་ཞེས་བྱ་བ་ནི་གསེར་དང༌། དངུལ་དང༌། བཻཌཱུཪྻ་དང༌། ཤེལ་ལོ། གཅིག་ལ་གཅིག་སྦྲེལ་ཏེ་ཞེས་བྱ་བ་ནི་ཕན་ཚུན་བཅིངས་ཏེའོ། །ནུབ་པར་འགྱུར་ཞེས་བྱ་བ་ནི་ལོག་པའོ། །འདུ་ཤེས་མེད་པའི་སྙོམས་པར་འཇུག་པ་བསྐྱེད་ནས་ཞེས་བྱ་བ་ནི་འདུ་ཤེས་བཅས་པའི་སྙོམས་པར་འཇུག་པ་བསྒོམ་པས་སོ། །གཞན་དག་ཀྱང་ཡོད་དེ་ཞེས་བྱ་བ་ནི་སེམས་འཁྲུག་པ་ལ་སོགས་པ་དག་གོ །སྟན་ཕྱེད་ལས་འཕགས་པ་བྱས་ཏེ་ཞེས་བྱ་ནི་བཅོམ་ལྡན་འདས་ལ་གུས་པས་སྟན་ཕྱེད་ལས་འཕགས་པའོ། །བསེལ་དད་ཡོན་ཏན་ལྡན་ཞེས་བྱ་བ་ནི་བསིལ་བའི་མཐུ་དང་ལྡན་པའོ། །དྲི་མེད་གསེར་རྟག་གསལ་ཞེས་བྱ་བ་ནི་དྲི་མ་མེད་པའི་གསེར་ཡང་རྟག་ཏུ་གསལ་བ་སྟེ། དཔེར་ན་དག་པའི་བཻཌཱུཪྻ་རྟག་ཏུ་འོད་གསལ་བ་བཞིན་ནོ། །བྱིས་པའི་སྐྱེ་བོ་ཀུན་ཞེས་བྱ་བ་ནི་ཐོས་པ་དང་མི་ལྡན་པའི་སོ་སོའི་སྐྱེ་བོའོ། །སྡིག་པ་རྟག་ཏུ་མཚུངས་མེད་ཅེས་བྱ་བ་ནི་དགྲ་བཅོམ་པ་དག་ལ་སེམས་སྡང་བའོ། །གོར་མའི་རི་མོ་རྟག་པ་བཞིན་ཞེས་བྱ་བ་ན་སེམས་སྡང་བ་བརྟན་པ་ཉིད་དུ་སྟོན་ཏོ། །འཕགས་པའི་སྐྱེ་བོ་ཞེས་བྱ་བ་ནི་བདེན་པ་མཐོང་བ་དག་གོ །རྟག་ཏུ་ཐུགས་རྗེ་མངའ་ཞེས་བྱ་བ་ནི་སྙིང་རྗེ་དང་ཐུགས་རྗེ་ཆེན་པོ་གཉིས་ཅིག་ཅར་བསྟན་ཏོ། །དགྲ་བཅོམ་པ་དག་གི་བཟོད་པ་བརྟན་པ་ལགས་ཞེས་བྱ་བ་ལ། བཟོད་པ་ཞེས་བྱ་བ་ནི་གཞན་གྱིས་སྐུར་བ་བཏབ་པ་ལ་སོགས་པ་བཟོད་པ་སྟེ། དེ་ཡང་དགྲ་བཅོམ་པ་དག་གི་རྒྱུད་ལ་རྟག་ཏུ་གནས་པ་ཡིན་ཏེ། དེའི་སླད་དུ་བདག་གིས་བྱས་པ་ལྟ་བུ་ལ་བཟོད་པ་མཛད་དུ་གསོལ་ཞེས་བྱ་བར་བསམས་པ་ཡིན་ནོ། །ལྔ་བརྒྱ་ཞེས་བྱ་བ་ནི་གྲངས་སོ། །རྟ་ཅང་ཤེས་ཞེས་བྱ་བ་ནི་རྟའི་གཙོ་བོ་གཅེས་པའོ། །སྐད་འབྱིན་པར་མི་བྱེད་ཅེས་བྱ་བ་ནི་དེའི་མཐུས་ཟིལ་གྱིས་གནོན་པའི་ཕྱིར་རོ། །རྟེའུ་ཞེས་བྱ་བ་ནི་ཕྲུ་གུའོ། །སྣ་སྒྲ་ཞེས་བྱ་བ་ནི་ཕྲྭ་ཕྲྭ་
ཟེར་བའོ། །རྩྭ་ཞེས་བྱ་བ་ནི་རྩི་བོའོ། །ཚངས་ཞེས་བྱ་བ་ནི་ནས་ལ་སོགས་པ་འབྲུའོ། །དེ་ན་གནས་པ་ཞེས་བྱ་བ་ནི་གནས་དེ་ན་འཁོད་པའོ། །འདོད་པ་ན་གནས་ཞེས་བྱ་བ་ནི་དགའ་ནའོ། །སྒྲོ་བ་ཞེས་བྱ་བ་ནི་ཀོ་ལྤགས་ཀྱི་སྣོད་དོ། །སྲན་ཐུབ་ཅེས་བྱ་བ་ནི་མོ་སྲན་སྡེའུའི་ཕུབ་མའོ། །བཟངས་ཆས་ཞེས་བྱ་བ་ནི་སྲན་མ་དང་འབྲུ་མ་ཡོས་ཥཋ་ཀ་དག་བཀྲུས་ཏེ་བཙོས་པའོ། །ཟིལ་གྱིས་སྨིན་པ་ཞེས་བྱ་བ་ནི་སྦྲང་རྩིས་སྦྲུས་པའོ། །གསེར་འབུམ་ཞེས་བྱ་བ་ནི་ཞོ་གཉིས་ཀྱི་ཚད་འབུམ་མོ། །ཆས་ཞེས་བྱ་བ་ནི་འབྲུ་ལ་སོགས་པའོ། །རྨའོ་ཞེས་བྱ་བ་ནི་དྲིའོ་ཞེས་བྱ་བའོ། །འདུལ་སྦྱོང་བ་ཞེས་བྱ་བ་ནི་འདུལ་བར་བྱེད་པའོ། །མགྱོགས་འགྲོ་ཞེས་བྱ་བ་ནི་བོད་པའོ། །རན་ཆས་ཆུ་མེད་པའི་རྫ་མཁན་བྲེས་སྣ་ཞེས་བྱ་བ་ནི་རྫ་མཁན་གྱི་བྲེས་རྩ་དང་ཆས་དང་ཆུ་མེད་པ་ནའོ། །མགོ་སྐ་མ་རུས་པ་གས་ཙམ་ཞེས་བྱ་བ་ནི་ཁྱོད་བཟའ་བ་དང་བཏུང་བ་མེད་པས་མགོ་སྐམས་ཤིང་རུས་པ་དང་པགས་པ་ཙམ་དུ་གྱུར་ཏོ་ཞེས་བྱ་བའི་ཐ་ཚིག་གོ །རང་སོས་གཏུབས་པའི་རྩྭ་དག་ཟ་བ་ཞེས་བྱ་བ་ནི་ཚོང་དུས་ལ་སོགས་པ་དག་ནས་རང་གི་སོ་དག་གིས་རྩྭ་དང་ལོ་ཏོག་དག་བཅད་ཅིང་ཟ་བར་གྱུར་པའོ། །དེ་ཚེ་མང་པོས་བསམས་མ་གྱུར་ཞེས་བྱ་བ་ནི་ཁྱོད་སྔོན་རྟེའུ་ཙམ་དང་ས་ཁལ་པ་ཙམ་དུ་བསམས་པས་སྐྱེ་བོ་མང་པོ་དག་གིས་གཅེས་པར་བསམས་པར་མ་གྱུར་ཏོ་ཞེས་བྱ་བའི་ཐ་ཚིག་གོ །དེ་ལྟར་སྔོན་ཕོངས་པ་དང་མ་བཀུར་བར་ཉེ་བར་བསྟན་ནས་ད་ལྟར་ཕུན་སུམ་ཚོགས་པ་དང༌། བཀུར་བ་བསྟན་པའི་ཕྱིར། འདི་ན་མགྱོགས་འགྲོ་སྟོང་གི་ཐོག་འདྲེན་ཞིང་ཞེས་བྱ་བ་ལ་སོགས་པ་གསུངས་ཏེ་རྟ་བཟང་པོ་སྟོང་ཕྲག་གི་ཐུ་བོར་བྱས་ཤིང་ཞེས་བྱ་བའི་ཐ་ཚིག་གོ །རྒྱལ་པོས་ཆིབས་རན་མཆོག་དག་ཉེར་བསྟབས་པ་ཞེས་བྱ་བ་ནི་རྒྱལ་པོས་རྩྭ་བཟང་པོ་དག་བྱིན་པའོ། །ཅིའི་ཕྱིར་མི་ཟ་བ་དྲིས་པ་བདག་ལ་སྨྲོས་ཞེས་བྱ་བ་ནི་དེ་ཅིའི་ཕྱིར་དེ་མི་ཟ་བ་དེ། ཁོ་བོས་འདྲིས་བདག་ལ་ལེགས་པར་སྨྲོས་ཤིག་ཅེས་བྱ་བའི་ཐ་ཚིག་གོ །དེ་ནས་ཞེས་བྱ་བ་ནི་འདུལ་སྦྱོང་བས་དྲིས་ནས་སོ། །རབ་མགྱོགས་ཞེས་བྱ་བ་ནི་འགྲོས་རབ་ཏུ་མགྱོགས་པའོ། །དྲང་པོ་ཞེས་བྱ་བ་ནི་ལུས་དང་སེམས་དྲང་པོའོ། །བརྟན་ལྡན་པ་ཞེས་བྱ་བ་ནི་བརྩོན་པ་
དང་ལྡན་པའོ། །མི་བཟོད་ཅེས་བྱ་བ་ནི་ནང་གི་བདག་ཉིད་ཀྱིས་འཁྲུག་པའོ། །འཁྲུག་བཅས་ཞེས་བྱ་བ་ནི་ཕྱི་རོལ་གྱི་བདག་ཉིད་ཀྱིས་སོ། །མགྱོགས་འགྲོ་མཆོག་གིས་ནི་ཞེས་བྱ་བ་ནི་རྟ་ཅང་ཤེས་ཀྱིས་སོ། །དེ་ལས་ཞེས་བྱ་བ་ནི་འདུལ་སྦྱོང་བ་ལ་གོ་བར་བྱས་པ་དེ་ལས་སོ། །ཉེར་ཞི་ཞེས་བྱ་བ་ནི་བདག་ཉིད་རིམ་པ་མ་ཡིན་པས་ཉོན་མོངས་པར་བྱས་པའི་ཉེས་པ་ཉེ་བར་ཞི་བར་འགྱུར་བའོ། །ལེགས་པར་བསམས་བྱས་ནས་ཞེས་བྱས་ནས་ཞེས་བྱ་བ་ནི་རྟ་རྣམས་ཀྱི་ནང་ན་གཙོ་བོ་ཡིན་པར་ངོ་ཤེས་པའི་བློ་དང་ལྡན་པའོ། །མི་མཆོག་ཅེས་བྱ་བ་ནི་རྒྱལ་བའི་ཁ་ལོ་སྒྱུར་བ་ཡིན་ནོ། །དེ་ཉིད་ཅེས་བྱ་བ་ནི་མ་ནོར་བར་ཤེས་པའོ། །མ་རིག་མིན་ཞེས་བྱ་བ་ནི་ཁྱོད་ཀྱིས་ཁོ་བོ་ཇི་ལྟ་བ་བཞིན་དུ་ཤེས་པ་ཁོ་ནའོ་ཞེས་བྱ་བའི་ཐ་ཚིག་གོ །ཤེས་ན་དོན་ཅི་ཡོད་ཅེ་ན། མཁས་པས་བརྙས་ནས་སྟེང་མི་རྒྱུ་ཞིང་ཞེས་བྱ་བ་གསུངས་ཏེ། མཁས་པས་བརྙས་ན་ཞེས་བྱ་བ་ནི་ངའི་ཡོན་ཏན་ཞེས་བྱ་བའི་མཁས་པ་དག་གིས་ང་ལ་མ་གུས་ཤིང་རྟ་ཕལ་གྱི་ཐང་དུ་ཆས་བྱིན་པ་ལ་སོགས་པ་བྱས་ནའོ། །ས་སྟེང་མི་རྒྱུ་ཞིང་ཞེས་བྱ་བ་ནི་སའི་སྟེང་ན་འདུག་པར་མི་བྱ་བའོ། །མྱུར་དུ་ཤི་ཡང་བླ་ཞེས་བྱ་བ་ནི་ཡོན་ཏན་རྒྱུས་ཤེས་བྱ་བས་བརྙས་ཤིང་སའི་སྟེང་ན་འདུག་པ་བས་ནི་མྱུར་དུ་ཤིང་ཡང་བླ་ཞེས་བྱ་བའི་ཐ་ཚིག་གོ །ཤེས་པས་བརྙས་པ་ནས་ཁྱོད་ཅིའི་ཕྱིར་མི་དགའ་ཞེ་ན། དེའི་ཕྱིར། སྐྱེ་བོ་ངན་པས་ཡུན་རིང་བརྙས་གྱུར་ཀྱང་ཞེས་བྱ་བ་ལ་སོགས་པ་གསུངས་ཏེ། སྐྱེ་བོ་ངན་པས་ཞེས་བྱ་བ་ནི་རྫ་མཁན་ལ་སོགས་པ་ངའི་ཡོན་ཏན་མི་ཤེས་པས་སོ། །ཡུན་རིང་གནས་གྱུར་ཀྱང་ཞེས་བྱ་བ་ནི་ཡུན་རིང་དུ་ཕུབ་མ་དང་སྲན་ཕུབ་ལ་སོགས་པ་བྱིན་པར་གྱུར་ཀྱང་ངོ༌། །གལ་ཏེ་ཡོན་ཏན་ཁྱོད་ལྡན་ཞེས་བྱ་བ་ནི་གལ་ཏེ་འདུལ་སྦྱོང་བ་ཁྱོད་ལེགས་ཉེས་ཤེས་པའི་ཡོན་ཏན་དང་ལྡན་པ་ཡིན་ནའོ། །དེ་བརྙས་མིན་ཞེས་བྱ་བ་ནི་སྐྱེ་བོ་ངན་པས་ཡུན་རིང་དུ་གནས་པའི་གྲངས་སུ་མ་བརྩི་ཤིག །དེ་ཅིའི་ཕྱིར་ཞེ་ན། དེས་ངའི་ཡོན་ཏན་མི་ཤེས་སོ་ཞེས་བྱ་བའི་ཐ་ཚིག་གོ །སྐྱེ་བོ་མཛེས་པས་ཞེས་བྱ་བ་ནི་འདུལ་སྦྱོང་བ་ཁྱོད་ལ་སོགས་པ་ངའི་ཡོན་ཏན་ཤེས་པས་སོ། །སྐད་ཅིག་བརྙས་པར་གྱུར་ན་ཞེས་བྱ་བ་ནི་སྐད་ཅིག་ཙམ་ཞིག་རྟ་ཕལ་གྱི་ཐང་དུ་རྩྭ་ལ་སོགས་པ་བྱིན་ནའོ། །ཞི་བ་ཞེས་བྱ་བ་ནི་འདུལ་
སྦྱོང་བ་ལ་བོད་པའི་ཚིག་སྟེ། དེས་པ་ཞེས་བྱ་བའི་ཐ་ཚིག་གོ །གལ་ཏེ་ཡོན་ཏན་ལྡན་ཞེས་བྱ་བ་ནི་གལ་ཏེ་འདུལ་སྦྱོང་བ་ཁྱོད་ལེགས་ཉེས་ཤེས་པའི་ཡོན་ཏན་དང་ལྡན་པ་ཡིན་ནོ། །དེ་བརྙས་མིན་ཞེས་བྱ་བ་ནི་སྐྱེ་བོ་མཛངས་པས་སྐད་ཅིག་བརྙས་པར་གྱུར་པ་དེའི་ནི་བརྙས་པའི་གྲངས་སུ་རྩིས་ཤིག །དེ་ཅིའི་ཕྱིར་ཞེ་ན། དེས་ངའི་ཡོན་ཏན་ཤེས་བཞིན་དུ་བརྙས་པའི་ཕྱིར་རོ་ཞེས་བྱ་བའི་ཐ་ཚིག་གོ །རིམ་པ་ཞེས་བྱ་བ་ནི་ལམ་དང་གྲོང་ཁྱེར་མཛེས་པར་བྱ་བ་དང༌། བསུ་བ་ལ་སོགས་པ་བསྙེན་བཀུར་བྱ་བའི་རིམ་པའོ། །སྲོག་ཤིང་རྒྱས་པ་ཞེས་བྱ་བ་ནི་རྩིབས་ཀྱི་ཤིང་བུ་བརྒྱ་དང་ལྡན་པའོ། །རྔ་ཡབ་གསེར་ཅན་ནོར་བུས་སྒྲས་པ་ཞེས་བྱ་བ་ནི་ཡུ་བ་གསེར་ལས་བྱས་པ་ནོར་བུ་རིན་པོ་ཆེས་སྤྲས་པའོ། །འདས་པ་ཞེས་བྱ་བ་ནི་ལམ་དང་གྲོང་ཁྱེར་མཛེས་པར་བྱས་པ་དང་བསུ་བའོ། །ལྷག་མ་ཞེས་བྱ་བ་ནི་ཕྱོགས་དེ་གང་དུ་གཞག་པའི་ཕྱོགས་དེ་ཟངས་མའི་གླེགས་བུ་དག་གིས་གཡོགས་པ་ལ་སོགས་པའོ། །ས་བདག་འདུལ་སྦྱོང་བཅས་པ་ཞེས་བྱ་བ་ནི་རྒྱལ་པོ་འདུལ་སྦྱོང་བའི་མི་དང་བཅས་པའོ། །དེ་ལ་ཆགས་ཞེས་བྱ་བ་ནི་རྟ་ཅང་ཤེས་ལ་དགའ་ཞིང་དྲུང་ན་འདུག་པའོ། །ཤིན་ཏུ་དྲི་ཞིམ་བྱུག་པ་མཆོག་འཆང་ཞིང་ཞེས་བྱ་བ་ནི་རྒྱལ་བའི་ལུས་གྱི་བྱེ་བྲག་སྟེ་ཤིན་ཏུ་དྲི་ཞིམ་པོའི་བྱུག་པ་མཆོག་གིས་བྱུགས་པའི་ལུས་དང་ལྡན་ཞིང་དེ་ན་སྡོད་ཅེས་བྱ་བའི་ཐ་ཚིག་གོ །ས་བདག་བཙུན་མོ་ཟིལ་དང་བཟང་ཆས་ཀྱི། །སྣོད་བཀང་མགྱོགས་འགྲོ་མཆོག་ཕྱིར་འཛིན་པར་བྱེད། ཅེས་བྱ་བ་ནི། རྒྱལ་པོའི་བཙུན་མོ་དམ་པས་ཟིལ་དངར་གྱིས་སྦྱིན་པའི་བཟང་ཆས་ཀྱིས་གསེར་གྱི་སྣོད་བཀང་སྟེ་རྟ་ཅང་ཤེས་ཀྱི་དྲུང་ན་འཛིན་པར་བྱེད་པ་སྟེ། འདི་ཡང་དེ་ལ་ཆགས་པའི་རྣམ་པ་གཞན་ཡིན་ན། །རྐང་པ་གཞག་སྟེ་ཞེས་བྱ་བ་ནི་གོམ་པ་བོར་ཏེའོ། །དུས་མ་ཡིན་པ་ཀུ་མུ་དའི་དུས་སྟོན་ཞེས་བྱ་བ་ནི་གློ་བུར་དུ་ཀུ་མུ་དའི་དུས་སྟོན་དང་འདྲ་བ་བྱས་པའོ། །མ་བསྐོས་པར་སྟོན་པའི་ལྟུང་བྱེད་དེ་ཉི་ཤུ་གཅིག་པའི་ཚིག་རྣམ་པར་བཤད་པ་རྫོགས་སོ།། །།ཨེ་སྦྱེ་ཞེས་བྱ་བ་ལ་སོགས་པ་ནི་དགེ་སློང་མ་དག་གི་མིང་ནས་བོད་པའོ། །འདྲེ་བ་ཞེས་བྱ་བ་ནི་ལན་འགའ་མཉམ་པའི་ཕྱིར་ཚངས་པར་སྤྱོད་པ་དང་ཚངས་པར་སྤྱོད་པ་མ་ཡིན་པ་འདྲེ་བའོ། །ལྷག་པར་འདྲེ་ཞེས་བྱ་བ་ནི་ལན་
འགའ་ལྷག་པའི་ཕྱིར་ཚངས་པར་སྤྱོད་པ་མ་ཡིན་པ་ཤས་ཆེར་སྤྱོད་པའོ། །མཚན་ཐོག་ཐག་ཆོས་ཉན་པ་ལ་ལྟུང་བ་མེད་པ་ནི་འཕོ་བ་མེད་པའི་ཕྱིར་རོ། །གཙུག་ལག་ཁང་གི་སྒོ་དྲུང་དུ་སྟོན་པ་ལ་ལྟུང་བ་མེད་པ་ནི་གནས་དང་ཉེ་བས་འཕོས་པར་མི་འགྱུར་བའི་ཕྱིར་རོ། །ཉི་མ་ནུབ་ཀྱི་བར་དུ་སྟོན་པའི་ལྟུང་བྱད་དེ་ཉི་ཤུ་གཉིས་པའི་ཚིག་རྣམ་པར་བཤད་པ་རྫོགས་སོ།། །།ཟས་ཅུང་ཟད་ཙམ་གྱི་ཕྱིར་ཞེས་བྱ་བ་ནི་ཟས་ཆུང་ངུ་ཞིག་གི་ཕྱིར་ཏེ་བཅའ་བ་ལ་སོགས་པའི་ཕྱིར་ཞེས་བྱ་བའི་ཐ་ཚིག་གོ །ཟས་ཅུང་ཟད་ཙམ་གྱི་ཕྱིར་སྟོན་པའི་ལྟུང་བྱེད་དེ་ཉི་ཤུ་གསུམ་པའི་ཚིག་རྣམ་པར་བཤད་པ་རྫོགས་སོ།། །། སྲེད་པ་སྤྱད་པ་ཞེས་བྱ་བ་ནི་འདོད་པ་མང་བའོ། །རབ་རླག་བྱུང་བ་ལ་སྦྱིན་པ་ལ་ལྟུང་བ་མེད་དེ། ཕོངས་པའི་དུས་ཡིན་པའི་ཕྱིར་དང༌། སྐྱོན་དུ་འགྱུར་བ་མེད་པའི་ཕྱིར་རོ། །ལེགས་པར་སྨྲ་བ་ལ་སྦྱིན་པ་ལ་སོགས་པ་ལྟུང་བ་མེད་པ་ནི་འཇིག་རྟེན་ལ་གྲགས་པའི་རྒྱུ་ཡིན་པའི་ཕྱིར་དང༌། སྐྱོན་དུ་འགྱུར་བ་མེད་པའི་ཕྱིར་རོ། །གོས་སྦྱིན་པའི་ལྟུང་བྱེད་དེ་ཉི་ཤུ་བཞི་པའི་ཚིག་རྣམ་པར་བཤད་པ་རྫོགས་སོ།། །།རབ་ཏུ་ཤེས་པ་ཞེས་བྱ་བ་ནི་ངོ་ཤེས་པའོ། །བརྒྱངས་ཏེ་ཞེས་བྱ་བ་ནི་གཏན་པ་བཏིང་སྟེའོ། །བྱེད་ན་ཞེས་བྱ་བ་ནི་འཚེམ་ནའོ། །ཁབ་སྲུབས་བརྩམས་ནས་མཐར་ཟིན་པའི་བར་དུ་བྱེད་ན་ཞེས་བྱ་བའི་ཐ་ཚིག་གོ །གོས་བྱེད་པའི་ལྟུང་བྱེད་དེ་ཉི་ཤུ་ལྔ་པའི་ཚིག་རྣམ་པར་བཤད་པ་རྫོགས་སོ།། །།དུས་ཞེས་བྱ་བ་ནི་དུས་བྱ་བར་བརྩམས་པའོ། །མགོ་སྣང་ཙམ་ཞེས་བྱ་བ་ནི་ཐག་རིང་པོ་ནས་མགོ་ཙམ་སྣང་བའོ། །དགེ་སློང་རྣམས་ཀྱིས་དགེ་སློང་མ་རྣམས་ཀྱི་ལམ་བརྒྱགས་བསྐུར་བར་བྱ་ཞིང་ཞེས་བྱ་བ་ལ་སོགས་པ་ནི་མཚན་ཐ་དད་ཡིན་པས་ལག་ཉར་བླང་བ་དང༌། བྱིན་ལེན་བྱ་བའི་ཆོ་ག་དེ་ཡིན་ནོ། །དགེ་སློང་མའི་དོན་མཐུན་ཞེས་བྱ་བ་ནི་དགེ་སློང་མ་དང་འདྲེས་པའི་དོན་མཐུན་ཏེ་དགེ་སློང་མ་གཅིག་པུས་ཀྱང་ཉེས་པ་སྐྱེད་པའི་ཕྱིར་རོ། །འཐམས་ནས་ཞེས་བྱ་བ་ནི་བརྡ་བྱས་ནས་སོ་ཞེས་བྱ་བ་འདུས་ནས་སོ། །གྲོང་རྒྱང་གྲགས་ཀྱིས་བར་དུ་ཚད་པ་བདུན་ཞེས་བྱ་བ་ནི་ལྟུང་བྱེད་དུ་མར་བསྟན་པའི་དཔེའོ། །གྲོང་སྨོས་པས་ནི་རྒྱང་གྲགས་ཀྱི་མཐའ་བསྟན་པའི་ཕྱིར་རོ། །དགེ་སློང་མ་དང་འགྲོན་ལམ་དུ་འཇུག་པའི་ལྟུང་བྱེད་དེ་ཉི་ཤུ་དྲུག་པའི་ཚིག་རྣམ་པར་བཤད་
པ་རྫོགས་སོ།། །།ཤོ་གམ་གཅིག་པ་ཞེས་བྱ་བ་ལ་སོགས་པ་ནི་གྲུ་དུ་མ་ཡིན་ཡང་ཤོ་གམ་ལ་སོགས་པ་གཅིག་ན་གཅིག་པ་ཉིད་དུ་སྟོན་ཏོ། །གྲོང་རྒྱང་གྲགས་ཀྱིས་བར་དུ་ཆོད་པ་བདུན་བདུན་ཞེས་བྱ་བ་ནི་ཆུའི་ནང་ན་འདུག་ཀྱང་རུང་ཆུའི་འགྲམ་ན་འདུག་ཀྱང་རུང་བར་ཤེས་པར་བྱའོ། །ཡོ་བ་ཞེས་བྱ་བ་ནི་ཆུའི་གཞུང་ཡོ་བའོ། །གཏིབ་ཆད་པ་ཞེས་བྱ་བ་ནི་ཆུ་ཀླུང་གི་འགྲམ་གཏིབ་ཆད་པ་ཉིད་དོ། །དཔའ་ཀློང་ཞེས་བྱ་བ་ནི་ཆུ་སྲུབས་ཆེན་པོ་གཅིག་ཏུ་འཁྱིལ་ཞིང་འཁྲུགས་པའོ། །རུ་སྐྱ་ཞེས་བྱ་བ་ནི་གྲུ་སྨད་ཀྱི་སྐྱ་བ་ཆེན་པོའོ། །གདོས་པ་ཞེས་བྱ་བ་ནི་གསོག་ཤིང་ངོ༌།། རུ་སྐྱ་འཛིན་པ་ཞེས་བྱ་བ་ནི་རླུང་གཡོར་ཐོགས་པའོ། །དགེ་སློང་མ་དང་ལྷན་ཅིག་གྲུར་འཇུག་པའི་ལྟུང་བྱེད་དེ་ཉི་ཤུ་བདུན་པའི་ཚིག་རྣམ་པར་བཤད་པ་རྫོགས་སོ།། །།དོན་གྱིས་ན་ཞེས་བྱ་བ་ནི་ནོར་དག་འཆར་ཀའི་ཡིན་པའི་ཕྱིར་རོ། །སྟན་ལ་ཞེས་བྱ་བ་ནི་གཞི་ལའོ། །ས་དང་ཁྲི་དང་ཁྲིའུ་ལ་སོགས་པ་གཞི་གང་ཡང་རུང་བ་ལའོ། །འདོམ་གང་གི་ནང་ཞེས་བྱ་བ་ནི་ཕྱོགས་བཞིར་འདོམ་གང་གི་ནང་ངོ༌། །སྒོ་གང་ལ་སོགས་པ་ལྟུང་བ་མེད་པ་ནི་དབེན་པ་ཉིད་མ་ཡིན་པས་ལམ་ཁ་དང་འདྲ་བའི་ཕྱིར་དངོས་གཞི་མེད་དོ། །སྨན་འཐག་ཏུ་འཇུག་པ་ནི་ཆོས་དང་ལྡན་པའི་ཕྱིར་ཉེས་བྱས་ཀྱང་མེད་དོ། །གཅིག་པུ་འདུག་པའི་ལྟུང་བྱེད་དེ་ཉི་ཤུ་བརྒྱད་པའི་ཚིག་རྣམ་པར་བཤད་པ་རྫོགས་སོ།། །།ཕྱག་དར་དང་བཅས་པ་ཞེས་བྱ་བ་ནི་ཕྱག་དར་གྱིས་གང་བའོ། །འགྲེང་ན་ཞེས་བྱ་བ་ནི་མཚོན་པ་སྟེ་སྤྱོད་ལམ་གང་ཡང་རུང་བས་ལྷན་ཅིག་འདུག་ནའོ། །གཅིག་པུ་འགྲེང་བའི་ལྟུང་བྱེད་དེ་ཉི་ཤུ་དགུ་པའི་ཚིག་རྣམ་པར་བཤད་པ་རྫོགས་སོ།། །།ངའི་སྨད་གཡོགས་ཞེས་བྱ་བ་ནི་བཅོམ་ལྡན་འདས་ཀྱིས་དེར་རབ་ཏུ་བྱུང་བའི་ཚེ་གང་གི་ན་བཟའ་དེ་དག་ལ་སྩལ་པའི་ཕྱིར་རོ། །མཚོན་གྱིས་དྲས་པ་ཞེས་བྱ་བ་ནི་མཚོན་གྱིས་ཁ་ཚར་དང་ཕུན་ཚང་དག་བཅད་པའོ། །ཚེ་དང་ལྡན་པ་འོད་སྲུངས་ཆེན་པོས་ཅང་མི་སྨྲ་བས་བཅོམ་ལྡན་འདས་ལས་མཉན་ཏོ་ཞེས་བྱ་བ་ནི་ཁྱིམ་བདག་འོག་ནས་འབྱུང་བ་དེ་ལ་ཕན་གདགས་པ་དང༌། སྦྱངས་པའི་ཡོན་ཏན་ཅན་དག་ལ་རྐྱེན་གྱི་དབང་གིས་ཡི་དམ་བརྟན་དུ་རུང་བའི་སྐབས་དབྱེ་བ་གླིང་བ་དང༌། བཅོམ་
ལྡན་འདས་ཀྱིས་བཀའ་སྩལ་པ་རིག་པའི་ཕྱིར་ཏེ་མཉན་ཏོ། །ཤཱཀྱའི་བུ་མོ་ཞེས་བྱ་བ་ནི་ཤཱཀྱའི་བུ་སྲིང་ངོ༌། །དབྱིག་གི་གདངས་དང་ལྡན་པ་ཞེས་བྱ་བ་ནི་གསེར་སྣོད་ལྟར་སྒྲ་མཐོ་ཞིང་ཟབ་པ་དང་ལྡན་པའི་ཕྱིར་རོ། །ཀླུའི་མིང་ཅན་ཞེས་བྱ་བ་ནི་ཀླུའི་རྒྱལ་པོ་འོད་སྲུངས་དང་མིང་མཐུན་པའི་ཕྱིར་རོ། །སྒྲ་ཐྲིག་ཐྲིག་ཟེར་བ་ཞེས་བྱ་བ་ནི་རྐང་པ་གཞག་པའི་ཤུགས་ལས་བྱུང་བའི་སྒྲའོ། །དོན་གྱི་དབང་ཞེས་བྱ་བ་ནི་འབྲས་བུའོ། །སྣང་བ་ཞེས་བྱ་བ་ནི་ཆོས་ཀྱི་སྒོ་མོ་མཐོང་བའོ། །རབ་ཏུ་བྱུང་ནས་ཡུན་རིང་དུ་ལགས་པ་ཞེས་བྱ་བ་ནི་གཞོན་ནུ་ནས་ཚངས་པར་སྤྱོད་པའོ། །ཚངས་པར་སྤྱོད་པ་མངོན་བར་སྤྱད་པ་ཞེས་བྱ་བ་ནི་འཕགས་པའི་ལམ་རྟོགས་པའོ། །བཀུར་བ་ཞེས་བྱ་བ་ནི་ཡིད་ཆེས་པར་བྱས་པའོ། །འདི་ནི་རེ་ཞིག་བྱུང་བ་ཡིན་ཏེ་ཞེས་བྱ་བ་ནི་དགེ་སློང་མས་ཀླུའི་མིང་ཅན་ཞེས་བྱ་བ་ཙམ་གྱིས་བསྔགས་པ་བརྗོད་པའི་ཕྱིར་རོ། །རེ་ཞིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ་ཞེས་བྱ་བ་ནི་དགེ་སློང་མས་སྦྱར་དུ་བཅུག་པ་མེད་པའི་ཕྱིར་རོ། །སྦྱོར་དུ་བཅུག་ཅེས་བྱ་བ་ནི་བསྐུལ་ཏེ་སྦྱོར་དུ་བཅུག་པའོ། །བཀྲ་ཤིས་ཞེས་བྱ་བ་ནི་ནང་གི་བདེ་བའོ། །བདེ་བ་ཞེས་བྱ་བ་ནི་ཕྱི་རོལ་གྱི་བདེ་བའོ། །ས་བོན་གྱི་སྐྱིན་པ་ཞེས་བྱ་བ་ནི་ས་བོན་བསབ་པ་ཙམ་མོ། །གལ་ཏེ་ཁྱོད་ཀྱི་ཚིག་སྔ་མ་བདེན་ན་ནི་ཕྱི་མ་བརྫུན་ལ་ཞེས་བྱ་བ་ལ་སོགས་པ་ནི་བརྫུན་དུ་སྨྲ་བའི་ཕྱིར་དེའི་ཚིག་ལ་ངེས་པ་མ་སྐྱེས་པས་ཐེ་ཚོམ་དང་བཅས་བཞིན་དུ་མི་འཇུག་པ་སྟེ་ལྟུང་བ་དང་བཅས་ན་མི་རུང་ངོ་སྙམ་དུ་བསམས་པའོ། །སྔར་ཁྱིམ་དུ་བོས་པ་ཞེས་བྱ་བ་ནི་སྔར་ཁྱིམ་དུ་མགྲོན་དུ་བོས་ཟིན་པའོ། །ཚུལ་ཁྲིམས་ཀྱི་སྦྱོར་དུ་བཅུག་པ་ཞེས་བྱ་བ་ནི་འདིར་ཚུལ་ཁྲིམས་ཞེས་སྨོས་པས་ནི་ཚུལ་ཁྲིམས་ཀྱི་འབྲས་བུ་དགྲ་བཅོམ་པ་ཉིད་ཀྱི་མཐར་ཐུག་པའི་བར་དང་བཅས་པ་བསྟན་པའོ། །ཐོས་པ་དང་ཞེས་བྱ་བ་ནི་དེ་དག་འཐོབ་པའི་ཐབས་བསྟན་ཏོ། །གང་ཕྱེ་ཞེས་བྱ་བ་ནི་ནས་དྲུས་པའི་ཕྱེའོ། །ཐ་མར་ཞེས་བྱ་བ་ནི་སར་པ་ཞུས་པའོ། །འགྱུར་བྱེད་ཀྱི་ལན་ཚྭ་ཞེས་བྱ་བ་ནི་དྲིང་ཞིང་བཙོ་མ་ཡིན་པའོ། །རྒྱམ་ཚ་ཞེས་བྱ་བ་ནི་ཚ་དཀར་པོའོ། །བ་ཚ་ཞེས་བྱ་བ་ནི་འབུས་པའོ། །རྒྱ་མཚོའི་ཚ་ཞེས་བྱ་བ་ནི་རྒྱ་མཚོའི་ནང་ནས་འབྱུང་བའོ། །ཟན་སྤགས་ཞེས་བྱ་བ་ནི་ཟན་དང་ལྷན་ཅིག་བཟའ་བ་ལྡུམ་ལ་སོགས་པའོ།
ཚོགས་པ་ཞེས་བྱ་བ་ནི་ཤ་ཚོག་གོ །བཙོས་པ་ཞེས་བྱ་བ་ནི་ཇུ་ཚེའི་རྣམ་པའོ། །ཞོ་ཐུག་ཅེས་བྱ་བ་ནི་ཞོ་སྐའོ། །མོན་ཁུར་ཞེས་བྱ་བ་ནི་བ་ལམ་མུན་བུ་ཕུ་ཐེའུའོ། །བརྔོ་ཚོད་ཞེས་བྱ་བ་ནི་ལྡམ་ལྡུམ་གྱིས་བརྔོས་པའི་ཚོད་མའོ། །ཧགས་ཚོད་ཅེས་བྱ་བ་ནི་ཧྭགས་དང་བསྲེས་པའི་ཚོད་མའོ། །གལ་ཏེ་དེ་ཤེས་བཞིན་དུ་ཞེས་བྱ་བ་ནི་དགེ་སློང་མས་སྦྱོར་དུ་བཅུག་པ་ཉིད་དུ་ཤེས་བཞིན་ཏེ་གཞན་དུ་ན་མ་ཡིན་ནོ། །བདེན་པ་ལ་ལྟུང་བ་མེད་དོ་ཞེས་བྱ་བ་ནི་སྒྲོ་བཏགས་པ་མེད་པའི་ཕྱིར་རོ། །དགེ་སློང་མས་སྦྱོར་དུ་བཅུག་པ་ཟ་བའི་ལྟུང་བྱེད་དེ་སུམ་ཅུ་པའི་ཚིག་རྣམ་པར་བཤད་པ་རྫོགས་སོ།། །།དབྱུང་བ་ཞེས་བྱ་བ་ནི་ལག་པ་ལ་སོགས་པས་དབྱུང་བའོ། །ལྟུང་བ་ཞེས་བྱ་བ་ནི་འོག་ཏུ་འགྲོ་བའོ། །རྣམ་པར་འཐོར་བ་ཞེས་བྱ་བ་ནི་ཐད་ཀར་འགྲོ་བའམ། སྡུག་བསྔལ་བའི་ལུས་རྣམ་པར་འཐོར་བའོ། །རྣམ་པར་འཇིག་པ་ཞེས་བྱ་བ་ནི་འདོར་བ་སྟེ་འཆི་འཕོ་བའི་མཚན་མ་བྱུང་ནས་སྐྱེ་བོ་བྱམས་པ་ལ་སོགས་པས་ཡོངས་སུ་སྤོང་བར་བྱེད་ཅེས་བྱ་བའི་ཐ་ཚིག་གོ །ཚོལ་བ་དང་ཆགས་པ་ཞེས་བྱ་བ་ནི་ལོངས་སྤྱོད་ལ་སོགས་པའོ། །གོང་དུ་ཁྱད་པར་ཞེས་བྱ་བ་ནི་རྒྱུན་དུ་ཞུགས་པ་ལ་སོགས་པའོ། །ཆ་ལྔ་པ་ཞེས་བྱ་བ་ནི་རིག་པ་ལྔ་པའོ། །ཤར་གྱི་ལུས་འཕགས་ཞེས་བྱ་བའི་གླིང་གི་མིང་སྟེ། འདི་ནས་ཤར་ཕྱོགས་ཡིན་པའི་ཕྱིར་དང༌། མི་ལུས་འཕགས་པ་དག་ན་གནས་པའི་ཕྱིར་རོ། །ནུབ་ཀྱི་བ་ལང་སྤྱོད་ཅེས་བྱ་བ་ནི་འདི་ནས་ནུབ་ཕྱོགས་ཡིན་པའི་ཕྱིར་དང༌། དེ་ན་ཉོ་ཚོང་གི་ཐ་སྙད་ལ་བ་ལང་དང་སྤྱོད་པའི་ཕྱིར་རོ། །བྱང་གི་སྒྲ་མི་སྙན་ཞེས་བྱ་བ་ནི་འདི་ནས་བྱང་ཕྱོགས་ཡིན་པའི་ཕྱིར་དང༌། མིའི་སེང་གེ་སྟེང་ན་སྒྲ་སྒྲོགས་པ་དག་གནས་པའི་ཕྱིར་རོ། །འཛམ་བུའི་གླིང་ཞེས་བྱ་བ་ནི་འཇིག་རྟེན་མངོན་པར་འགྲུབ་པའི་ཚེ་ན་སྐྱེས་པའི་ཤིང་ཆེན་པོ་འཛམ་བུ་ཞེས་བྱ་བས་མཚོན་པའི་ཕྱིར་རོ། །འདོད་ཆགས་དང༌། ཞེ་སྡང་དང༌། གཏི་མུག་དག་བྲི་བར་བྱའོ་ཞེས་བྱ་བ་ནི་ཉོན་མོངས་པའི་རྩ་བ་ཡིན་པའི་ཕྱིར་འཁོར་བ་ཉོན་མོངས་པའི་དབང་དུ་བསྟན་པའི་ཕྱིར་ཏེ། འདོད་ཆགས་ནི་ཕུག་རོན་གྱི་གཟུགས་སམ་བུད་མེད་ཀྱི་གཟུགས་སུ་བྲི་ཞེ་སྡང་ནི་སྦྲུལ་གྱི་གཟུགས་སུ་བྲི། གཏི་མུག་ནི་ཕག་གི་གཟུགས་སུ་བྲིའོ་ཞེས་བྱ་བ་འདུལ་བ་རྣམ་པར་
བཤད་པ་ལས་གསུངས་སོ། །སངས་རྒྱས་ཀྱི་སྐུ་གཟུགས་མྱ་ངན་ལས་འདས་པའི་དཀྱིལ་འཁོར་དཀར་པོ་སྟོན་པ་བྲི་བར་བྱའོ་ཞེས་བྱ་བའི་འཁོར་བ་ལས་ངེས་པར་འབྱུང་བའི་ཐབས་སྟོན་པར་མཛད་པ་བསྟན་པའི་ཕྱིར་རོ། །རྫུས་ཏེ་སྐྱེ་བའི་སེམས་ཅན་ཞེས་བྱ་བ་ནི་བར་མདོའི་སྲིད་པའི་སེམས་ཅན་ནོ། །ཟོ་ཆུན་ཁྱུད་མོའི་ཚུལ་གྱིས་ཞེས་བྱ་བ་ནི་ཇི་ལྟར་ཆུ་བཅུ་པའི་འཁྲུལ་འཁོར་གྱི་ཟོ་ཆུན་ཁྱུད་མོའི་ཟོ་བ་ཁ་ཅིག་འབྱུང་བར་བྱེད་པ་དེ་བཞིན་དུ་འགྲོ་བ་ལྔ་པའི་འཁོར་ལོའི་ཁོར་ཁོར་ཡུག་ཏུ་རྫུས་ཏེ་སྐྱེས་པའི་སེམས་ཅན་འཆི་འཕོ་བ་དང་སྐྱེ་བ་དག་ཀྱང་བྲི་བར་བྱ་སྟེ་སྐྱོ་བ་བསྐྱེད་པ་ཞེས་བྱ་བའི་ཐ་ཚིག་གོ །རྟེན་ཅིང་འབྲེལ་པར་འབྱུང་བའི་ཡན་ལག་བཅུ་གཉིས་ལུགས་སུ་འབྱུང་བ་དང་ལུགས་ལས་ཟློག་པ་དག་བྲི་བར་བྱའོ་ཞེས་བྱ་བ་ནི་འཁོར་བར་འཇུག་པ་དང་འཁོར་བ་ལས་བཟློག་པའི་རྒྱུ་བསྟན་པའི་ཕྱིར་ཏེ། དེ་ལ་མ་རིག་པ་ནི་བུད་མེད་ཉིད་མ་འདྲེས་པར་བྲི་བར་བྱའོ། །འདུ་བྱད་རྣམས་ནི་རྫ་མཁན་སྣོད་དག་མངོན་པར་འདུ་བྱེད་པའོ། །རྣམ་པར་ཤེས་པ་ནི་སྤྲེའུའི་གཟུགས་སུའོ། །མིང་དང་གཟུགས་ནི་བུད་མེད་དང་སྐྱེས་པའོ། །སྐྱེ་མཆེད་དྲུག་ནི་སྐྱེ་མཆེད་དྲུག་པོ་དག་ཡུལ་ཐ་དད་པ་ལ་ཆགས་པ་དག་གོ །རེག་པ་ནི་བུད་མེད་དང་སྐྱེས་པ་ལུས་གྱི་རིག་པ་ཀུན་དུ་སྤྱོད་པའོ། །ཚོར་བ་ནི་སྐྱེས་པ་སྡུག་བསྔལ་གྱི་ཚོར་བ་མྱོང་བར་བྱེད་པའོ། །སྲེད་པ་ནི་བུད་མེད་བུ་འཚོ་བའོ། །ལེན་པ་ནི་བུད་མེད་ལ་མངལ་གནས་པ་འཇུག་པའོ། །སྲིད་པ་ནི་མང་ལ་ན་གནས་པ་དེ་ཉིད་འབྲང་བའོ། །སྐྱེ་བ་ནི་འབྲངས་པ་དེ་ཉིད་སྐྱེ་བའོ། །རྒ་བ་ནི་སྐྱེས་པ་རྒས་ཤིང་འཁོགས་པའོ། །ཤི་བ་ནི་མི་ཤི་བའི་གཟུགས་སུ་བྲིའོ་ཞེས་འདུལ་བ་རྣམ་པར་བཤད་པ་ལས་གསུངས་སོ། །ཐམས་ཅད་ནི་མི་རྟག་པས་གཟུང་བར་བྲི་བར་བྱའོ་ཞེས་བྱ་བ་ནི་འཁོར་བ་ཐམས་ཅད་ལ་བྱང་ཆུབ་ཀྱི་མཐར་ཐུག་པ་མན་ཆད་ལ་འགའ་ཡང་རྟག་པར་གནས་པ་མེད་པར་བསྟན་པའི་ཕྱིར་རོ། །ཚིགས་སུ་བཅད་པ་གཉིས་བྲི་བར་བྱ་བ་ནི་འཁོར་བ་ལས་ངེས་པར་འབྱུང་བའི་ཐབས་རྒྱུ་དང་བཅས་པ་བསྟན་པའི་ཕྱིར་རོ། །འཇིག་རྟེན་གྱི་གཏམ་རྒྱུད་ཅེས་བྱ་བ་ནི་འཇིག་རྟེན་པའི་དོན་དང་འབྲེལ་བའི་གཏམ་རྒྱུད་དེ་ཀ་ཏམ་པའི་རི་ལ་སོགས་པ་ལྟ་བུའོ། །
ཆེར་ཞེས་བྱ་བ་ནི་ལྷག་པར་རོ། །ཆེས་བསྲབ་པ་ཞེས་བྱ་བ་ནི་སྦྱོར་བས་སོ། །ཆེས་ཆུང་བ་ཞེས་བྱ་བ་ནི་བསམས་པས་སོ། །ཀུན་ཤེས་པ་རྟོགས་པར་གྱུར་ན་ཞེས་བྱ་བ་ནི་བྱང་ཆུབ་རྟོགས་པར་གྱུར་ནའོ། །ལྔ་པ་ཚངས་པར་སྤྱོད་པ་བསླབ་པའི་གཞི་དག་ཅེས་བྱ་བ་ནི་ཇི་སྲིད་འཚོའི་བར་དུ་བསླབ་པའི་གཞི་ལྔ་ཡང་དག་པར་བླངས་པའི་དགེ་བསྙེན་གྱི་བྱེ་བྲག་སྟེ། དེ་ལ་དགེ་བསྙེན་གཞན་ནི་སྲོག་གཅོད་པ་སྤོང་བ་དང༌། མ་བྱིན་པར་ལེན་པ་སྤོང་བ་དང༌། བརྫུན་སྨྲ་བ་སྤོང་བ་དང༌། ཆང་དང་བཅོས་པའི་ཆང་མྱོས་པར་འགྱུར་བ་བག་མེད་པའི་གནས་སྤོང་བ་དང༌། ལྔ་པ་འདོད་པ་ལ་ལོག་པར་གཡེམ་པ་སྤོང་བའི་བསླབ་པའི་གཞི་དག་བླངས་པ་ཡིན་གྱི་འདི་ནི་ལྔ་པ་མི་ཚངས་པར་སྤྱོད་པ་སྤྲོས་པ་ལས་བྱུང་བའི་ཆོས་གཏན་སྤངས་པ་ཡིན་པས་ལྔ་པ་ཚངས་པར་སྤྱོད་ཅེས་བྱ་བ་སྟེ། ཁྱིམ་སྤངས་པའི་དགེ་བསྙེན་བསླབ་པའི་གཞི་ལྔ་བླངས་པ་ཡིན་ནོ། །སྐྲ་ཡེངས་ཞེས་བྱ་བ་ནི་སྐྲ་དག་འཛིངས་པའོ། །ཁྱིམ་གཅིག་པ་ཞེས་བྱ་བ་ནི་ཁང་པ་སློང་བའོ། །གསར་དུ་དུལ་བ་ཞེས་བྱ་བ་ནི་དང་པོར་ཞུགས་པའོ། །སྣོད་སྤྱད་ཅེས་བྱ་བ་ནི་རྫུ་འཕྲུལ་ལ་སོགས་པའོ། །གནས་མལ་ཞེས་བྱ་བ་ནི་ཁྱེའུ་ལ་སོགས་པའོ། །ལྷག་པའི་ཆོས་ཞེས་བྱ་བ་ནི་འཇུར་ལྷག་པའོ། །དེ་ནི་མེ་ཏོག་གི་ཡིན་གྱི་ཞེས་བྱ་བ་ནི་འཁོར་བའི་དབང་ཕྱུག་གོ །འབྲས་བུ་གཞན་འབྱུང་བར་འགྱུར་རོ་ཞེས་བྱ་བ་ནི་ཟག་པ་མེད་པ་རྒྱུན་དུ་ཞུགས་པའི་འབྲས་བུ་ལ་སོགས་པ་འཇིག་རྟེན་ལས་འདས་པའི་འབྲས་བུའོ། །གྲོང་ཁྱེར་གྱི་ཚོང་དཔོན་ཞེས་བྱ་བ་ནི་གྲོང་ཁྱེར་ན་གནས་པ་ཐམས་ཅད་ཀྱི་ཚོང་པ་རྣམས་ཀྱི་དཔོན་པོའོ། །བསོད་ནམས་ཆེ་བར་གྲགས་པ་ཞེས་བྱ་བ་ནི་བསོད་ནམས་ལྷག་པའོ། །འཕྲལ་ལ་ཞེས་བྱ་བ་ནི་རིམ་པ་མ་ཡིན་པར་ཡིན་ཏེ་མྱུར་བ་ཞེས་བྱ་བའི་ཐ་ཚིག་གོ །མངོན་པར་མཐོ་བས་ཞེས་བྱ་བ་ནི་དར་བའོ། །དཔལ་གྱིས་འབྱོར་པ་ཞེས་བྱ་བ་ནི་ཤིན་པ་བཟང་པོའོ། །འདི་ནི་རེ་ཞིག་བྱུང་བའོ་ཞེས་བྱ་བ་ནི་མགྲོན་དུ་པོས་པས་གཉིས་པ་ཟོས་པའི་ཕྱིར་རོ། །རེ་ཞིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ་ཞེས་བྱ་བ་ནི་འཇིག་རྟེན་དག་ཁ་ཟེར་བར་མ་གྱུར་པས་ཚུལ་དང་མི་མཐུན་པ་མ་སྐྱེས་པ་དགོངས་པའི་ཕྱིར་རོ། །ཨ་མྲ་ནའི་ཁུར་བ་ཞེས་བྱ་བའི་ཨ་མྲའི་
འབྲས་བུ་གཞོན་ནུ་དག་ལས་བྱས་པའི་བཅའ་བའོ། །བསླབ་པའི་གཞི་བཅའ་བར་བཞེད་ཅེས་བྱ་བ་ནི་བཅོམ་ལྡན་འདས་དང་མི་ཉེ་བ་ན་ཁྱིམ་བདག་དྲག་ཤུལ་ཅན་གྱི་ཚུལ་དང་མི་མཐུན་པར་སྨོད་པར་ནུས་ཀྱི་གཞན་དུ་ན་མི་ནུས་པས་དེའི་ཕྱིར་བཅོམ་ལྡན་འདས་དེར་མ་གཤེགས་སོ་ཞེས་བྱ་བར་བསམས་སོ། །ཀླན་ཀ་ཞེས་བྱ་བ་ནི་གླེང་བའོ། །སྤྱོས་ཞེས་བྱ་བ་ནི་ཉེ་བར་སྦྱར་བའོ། །ཡང་ཡང་ཟ་བ་ཞེས་བྱ་བ་ནི་གོང་ནས་གོང་དུ་མགྲོན་དུ་བོས་པའི་ཟས་ཟ་བའོ། །གཅིག་ཏུ་བརྩོན་པར་བགྱི་བ་ཞེས་བྱ་བ་ནི་ངེས་པར་བརྩལ་བར་བྱའོ། །དགེ་འདུན་བཀྲབས་པ་དག་ཅེས་བྱ་བ་ནི་བསྔོས་པ་དག་གོ །ཟན་གཅད་པ་བསྒྲུབས་ཞེས་བྱ་བ་ལ། བསྒྲུབས་ཞེས་བྱ་བ་ནི་བྱས་ཞེས་བྱ་བའི་ཐ་ཚིག་གོ །ངོས་ཀྱི་ཁྱིམ་ཚེས་དག་ཅེས་བྱ་བ་ནི་ངོས་ཀྱི་ཕྱོགས་དག་ན་འཁོད་པའི་སྡུམ་ཚེས་དག་གོ །ཕྱག་དར་རེ་ལྡེ་ཙམ་ཞེས་བྱ་བ་ནི་ཁྲུ་བཞི་ཙམ་ཕྱགས་ཞེས་བྱ་བའི་ཐ་ཚིག་གོ །བ་མལ་ཞེས་བྱ་བ་ནི་པ་ལང་གཅིག་གི་གནས་ནས་སོ། །དེའི་ཕྱེད་དུ་སོང་སྟེ་ཕྱིར་ལོག་ཅེས་བྱ་བ་ནི་དཔག་ཚད་ཕྱེད་ཀྱི་ཕྱེད་དུ་སོང་སྟེ་ཕྱིར་ལོག་ན་སྟེ། དཔག་ཚད་ཀྱི་བཞི་ཆར་སོང་ཞིང་ཕྱིར་ཡང་ལོག་ནའོ། །རས་ཡུག་ཕྲན་ནམ་རས་ཡུག་ཆེན་པོ་ཐོབ་ན་ཞེས་བྱ་བ་ནི་ཁྲུ་གང་གི་ཚད་ཡན་ཆད་དོ། །གོས་དང་བཅས་པ་ཞེས་བྱ་བ་ནི་གོས་ཡོད་པའོ། །གོས་མེད་པ་ཞེས་བྱ་བ་ནི་གོས་ཀྱིས་སྟོངས་པའོ། །གོས་དང་བཅས་ཤིང་གོས་ཀྱི་རིན་དང་ཡང་བཅས་པ་ཞེས་བྱ་བ་ནི་གོས་ཀྱང་ཡོད་ཅིང་གོས་ཀྱི་རིན་ཡང་ཡོད་པའོ། །གོས་མེད་ཅིང་གོས་ཀྱི་རིན་ཡང་མེད་པ་ཞེས་བྱ་བ་ནི་གོས་ཀྱིས་ཀྱང་སྟོངས་ཤིང་གོས་ཀྱི་རིན་གྱིས་ཀྱང་སྟོང་པའོ། །དེ་ལ་ཞེས་བྱ་བ་ལ་སོགས་པས་སྔ་མ་གོས་དང་བཅས་ཤིང་གཉིས་པ་གོས་དང་བཅས་པའམ་གོས་མེད་པའམ། གོས་དང་བཅས་ཤིང་གོས་ཀྱི་རིན་དང་ཡང་བཅས་པའམ་གོས་མེད་ཅིང་གོས་ཀྱི་རིན་ཡང་མེད་པའི་མུ་བཞི་པ་གཅིག་དང༌། སྔ་མ་གོས་མེད་ཅིང་གཉིས་པ་ཡང་གོས་མེད་པ་དང་གོས་དང་བཅས་པ་འམ། གོས་དང་བཅས་ཤིང་གོས་ཀྱི་རིན་དང་བཅས་པའམ། གོས་མེད་ཅིང་གོས་ཀྱི་རིན་ཡང་མེད་པའི་མུ་བཞི་པ་གཅིག་དང༌། སྔ་མ་གོས་དང་བཅས་ཤིང་གོས་ཀྱི་རིན་དང་ཡང་བཅས་ཤིང༌། གཉིས་པ་ཡང་གོས་དང་བཅས་ཤིང་གོས་ཀྱི་རིན་དང་ཡང་བཅས་
པའམ། གོས་དང་བཅས་པའམ། གོས་མེད་པ་འམ། གོས་མེད་ཅིང་གོས་ཀྱི་རིན་ཡང་མེད་པའི་མུ་བཞི་པ་གཅིག་དང༌། སྔ་མ་གོས་མེད་ཅིང་གོས་ཀྱི་རིན་ཡང་མེད་ཅིང་གཉིས་པ་ཡང་གོས་མེད་ཅིང་གོས་ཀྱི་རིན་ཡང་མེད་པ་འམ། གོས་དང་བཅས་པའམ། གོས་མེད་པའམ་གོས་དང་བཅས་ཤིང་གོས་ཀྱི་རིན་དང་ཡང་བཅས་པའི་མུ་བཞི་པ་གཅིག་སྟེ། སྤྱིར་མུ་བཞི་པ་བཞི་བསྟན་ཏོ། །གཉིས་པ་སྤང་བར་བྱ་བ་འམ། གཞན་ལ་སྦྱིན་པར་བྱའོ་ཞེས་བྱ་བ་ནི་གཉིས་པ་ཡང་གོས་མེད་པ་དང༌། གོས་ཀྱི་རིན་ཡང་མེད་པ་ཉིད་ཡིན་ན་ཉེས་བྱས་དང་ལྟུང་བྱེད་དུ་འགྱུར་བས་སྤང་བར་བྱ་བ་ཡིན་ནོ། །སྔ་མ་ནི་ལྟུང་བ་མེད་ཅེས་བྱ་བ་ནི་གོས་དང་བཅས་པའམ། གོས་མེད་པའམ་གོས་དང་བཅས་ཤིང་གོས་ཀྱི་རིན་དང་ཡང་བཅས་པ་འམ། གོས་མེད་ཅིང་གོས་ཀྱི་རིན་ཡང་མེད་པ་གང་ཡིན་ཡང་རུང་སྟེ། དང་པོ་ཡིན་པས་དེ་ལ་ཡང་ཡང་ཟ་བའི་ཉེས་པར་མི་འགྱུར་བའི་ཕྱིར་རོ། །ཡང་ཡང་ཟ་བའི་ལྟུང་བྱེད་དེ་སུམ་ཅུ་གཅིག་པའི་ཚིག་རྣམ་པར་བཤད་པ་རྫོགས་སོ།། །།འདུག་གནས་སོ་ཞེས་བྱ་བ་ནི་ཆོས་འདི་པ་དང་གཞན་མུ་སྟེགས་ཅན་དགེ་སྦྱོང་དང་བྲམ་ཟེ་རྣམས་ཀྱི་གནས་ཐུན་མོང་ངོ༌། །ཆོ་འཕྲུལ་ཆེན་པོ་ཞེས་བྱ་བ་ནི་སེམས་ཅན་སྡུད་པར་མཛད་པའི་ཡ་མཚན་བླ་ན་མེད་པའོ། །ཚར་གཅད་ཅེས་བྱ་བ་ནི་བསྡིགས་པའོ། །ཀུན་དུ་དགའ་བར་མཛད་ཅེས་བྱ་བ་ནི་རབ་ཏུ་དད་པར་མཛད་པའོ། །རངས་པར་མཛད་ཅེས་བྱ་བ་ནི་ཐ་མལ་བར་གནས་པར་མཛད་པའོ། །ཆོས་ཐོབ་པར་གྱུར་ཅིག་ཅེས་བྱ་བ་ནི་ཤིས་པ་བརྗོད་པའོ། །ངོ་ཚ་དང་ཁྲེལ་ཡོད་བོར་བ་ཞེས་བྱ་བ་ནི་འཇིག་རྟེན་གཉིས་ཀ་ལ་ལྟོས་པའི་འཛེམ་པ་དང་བྲལ་བའོ། །ཚྭ་སྒོ་ཅན་ཞེས་བྱ་བ་ནི་ལོག་པར་གཡེམ་པ་སྟེ་ཡོན་ཏན་གྱི་ཞིང་ཉིད་ལ་བྱས་པ་ལྟ་བུའི་འབྲས་བུ་མི་སྐྱེ་བའི་ཕྱིར་རོ། །དགོན་དུང་ཞེས་བྱ་བ་ནི་ངོ་ཚ་མེད་པའི་སྒྲིབ་པས་ཟིལ་གྱིས་ནོན་པའི་ཕྱིར་རོ། །ཐ་ཆད་ཅེས་བྱ་བ་ནི་དམ་པ་རྣམས་ཀྱིས་སྨད་པའི་ཕྱིར་རོ། །སྡིག་པ་ཅན་གྱིས་གཞི་ཞེས་བྱ་བ་ནི་དམ་པ་མ་ཡིན་པའི་ཆོས་ཉན་པ་ལ་སོགས་པ་དོན་མེད་པའི་རྒྱུར་གྱུར་པ་ཡིན་པའི་ཕྱིར་རོ། །ཕྲི་ཞེས་བྱ་བ་ནི་གཅད་པའོ། །ཤེས་པ་ཅན་རེམ་ཅིག་ཅེས་བྱ་བ་ནི་བརྡའི་ཚིག་སྟེ་བརྡེག་གོ་ཞེས་བྱ་བའི་ཐ་ཚིག་གོ །ཚེ་དང་ལྡན་པ་དག་ཤིན་ཏུ་རིམ་
ཅིག་ཅེས་བྱ་བ་ནི་དྲུག་སྡེ་དག་གི་བརྡའི་ཚིག་སྟེ་དེ་ངག་བརྡེག་པར་བསྐུལ་བའི་ཚིག་གོ །དགེ་སྦྱོང་གཡུལ་འགྱེད་པ་ཞེས་བྱ་བ་ནི་རབ་ཏུ་བྱུང་བ་དག་རྡོལ་ཐབས་འགྱེད་པས་སོ། །ཆར་འབབ་པར་འགྱུར་རོ་ཞེས་བྱ་བ་ནི་རབ་ཏུ་བྱུང་བ་རྡོལ་ཐབས་འགྱེད་པ་ངོ་མཚར་ཆེ་བར་སྣང་བ་ལས་བསམས་སོ། །མེ་མ་དག་ཞི་བར་མ་གྱུར་ཅིང་ཅེས་བྱ་བ་ནི་མེ་མ་ཤི་བའོ། །འཇིག་རྟེན་རྒྱང་པན་ཞེས་བྱ་བ་ནི་འཇིག་རྟེན་རྒྱང་པན་པའི་བསྟན་བཅོས་ཀློག་པ་སྟེ་མེད་པར་ལྟ་བ་ཞེས་བྱ་བའི་ཐ་ཚིག་གོ །འགྱེད་འདོད་ཅེས་བྱ་བ་ནི་རྩོད་པར་འདོད་པའོ། །འགྱེད་པ་ཡོ་བྱད་ཅེས་བྱ་བ་ནི་འགྱེད་པའི་ཚོགས་ཏེ་ཤང་ལང་དང་གཟུ་བོ་ལ་སོགས་པའོ། །ཁོ་བོ་ཁྱོད་དང་ལྷན་ཅིག་འགྱེད་པར་མི་འདོད་ཀྱི་ཞེས་བྱ་བ་ནི་ཁོ་བོ་དང་འགྱེད་པས་འདུལ་བ་མ་ཡིན་ནོ་སྙམ་དུ་བསམས་པའོ། །འགྱེད་པ་ལྷག་མ་དང་བཅས་པར་བཏང་ཞེས་བྱ་བ་ནི་དེའི་ཕྱོགས་ཐམས་ཅད་དུ་སུན་མ་ཕྱུང་བར་བཏང་བར་ཞེས་བྱ་བའི་ཐ་ཚིག་གོ །ཚོགས་ཅན་གཉིས་པ་ཞེས་བྱ་བ་ནི་དེ་བཞིན་གཤེགས་པ་ལ་ལྟོས་ནས་ཚོགས་དང་སྤྱོད་པ་གཉིས་པ་ཡིན་ནོ་ཞེས་བྱ་བའི་ཐ་ཚིག་གོ །ཆོས་ཀྱི་དམག་དཔོན་ཞེས་བྱ་བ་ནི་ལམ་གྱི་ཆོས་དང་བཤད་པའི་ཆོས་ཀྱི་ཡོངས་སུ་འདྲེན་པ་སྟེ་ཡང་དག་པར་རྗེས་སུ་བསྲུང་བའི་ཕྱིར་རོ། །ཆོས་ཀྱི་འཁོར་ལོ་རྗེས་བསྐོར་བ། །ཞེས་བྱ་བ་ནི་ལམ་གྱི་མཚན་ཉིད་ཀྱི་ཆོས་ཀྱི་འཁོར་ལོ་དང་པོ་བཅོམ་ལྡན་འདས་ཀྱིས་གདུལ་བའི་རྒྱུད་དག་ལ་འཇུག་པར་མཛད་པ་དེ་ཕྱིས་འདིས་ཡང་འཇུག་པར་བྱེད་པའི་ཕྱིར་རོ། །རིག་པའི་གནས་ཞེས་བྱ་བ་ནི་བསྟན་བཅོས་སོ། །དབྱུག་པའི་རིག་པ་ཞེས་བྱ་བ་ནི་དབྱུག་པ་དག་གིས་བརྡེག་པས་སོ། །ལུས་ལ་ཆོས་བཤད་ཅེས་བྱ་བ་ནི་ལུས་གནང་བར་བྱ་བའོ། །འདུག་གནས་གཅིག་ཏུ་ཞེས་བྱ་བ་ནི་མང་པོ་དག་གི་གནས་ཐུན་མོང་བ་གཅིག་ཏུའོ། །གདུགས་ཚོད་ཡོལ་ཞེས་བྱ་བ་ནི་ཟན་གྱི་དུས་ལས་སོ། །པུས་འཁྱུད་ཅེས་བྱ་བ་ནི་རྐེད་ཆིངས་སོ། །དེར་གནས་ཤིང་ཞེས་བྱ་བ་ནི་ནུབ་གཉིས་པར་རོ། །དེར་གནས་པ་ལ་ཉེས་བྱས་སུ་འགྱུར་ཞེས་བྱ་བ་ནི་གནས་པ་ཙམ་གྱིས་ལོངས་སྤྱོད་ཡོངས་སུ་རྫོགས་པར་མི་འགྱུར་བས་ཉེས་བྱས་སུ་འགྱུར་རོ། །དེར་ཟ་བ་ལ་ལྟུང་བྱེད་དུ་འགྱུར་ཞེས་བྱ་བ་ནི་ཟ་བས་ལོངས་སྤྱོད་ཡོངས་སུ་རྫོགས་པའི་ཕྱིར་དངོས་གཞི་ཉིད་དོ། །ཚོགས་ཀྱི་ཞེས་བྱ་བ་
ནི་ཚོགས་ཀྱི་འདུག་གནས་ཏེ་རབ་ཏུ་བྱུང་བའི་ཚོགས་ཁ་ཅིག་རྣམ་པར་བཅད་པ་ལ་ཕུལ་བའི་འདུག་གནས་ཡིན་ན་ཐུན་མོང་མ་ཡིན་པའི་ཕྱིར་དེ་ལ་མི་མཐུན་པར་མི་འགྱུར་བས་ལྟུང་བ་མེད་དོ། །ཉེ་དུའི་ཞེས་བྱ་བ་ནི་ཉེ་དུས་བྱེད་དུ་བཅུག་པའི་འདུག་གནས་ཏེ། དེ་ལ་བདག་ཉིད་ཡིན་པའི་ཕྱིར་དེ་ལ་མི་མཐུན་པར་མི་འགྱུར་བས་ལྟུང་བ་མེད་དོ། །སྦྱིན་བདག་ན་རེ་དེ་ཉིད་དུ་འདུག་ཤིག་ཅེས་ཟེར་བ་ལ་ལྟུང་བ་མེད་དོ། །དེར་སྦྱིན་བདག་གིས་མགྲོན་དུ་བོས་ན་དེ་དེར་གང་ཟག་ཉིད་དུ་འགྱུར་བས་ཐུན་མོང་པའི་ཕྱིར་ལྟུང་བ་མེད་དོ། །འདུག་གནས་སུ་ཟ་བའི་ལྟུང་བྱེད་དེ་སུམ་ཅུ་གཉིས་པའི་ཚིག་རྣམ་པར་བཤད་པ་རྫོགས་སོ།། །།རྩུབ་པའི་རི་ཞེས་བྱ་བ་ནི་རི་རྩུབ་མོ་མི་མཉམ་པ་སྟེ་དེས་ནི་བྱང་ལམ་གྱི་རི་རྩུབ་མོ་དག་གི་ཉེས་པ་བརྗོད་དོ། །འདིར་རྒྱུ་བསྟན་པའི་ཕྱིར། རྩུབ་པའི་རི་དག་ཇི་བཞིན་དུ། །རི་ལ་འཁོད་པའང་དེ་བཞིན་ནོ། །ཞེས་བྱ་བ་གསུངས་ཏེ། འདིས་ནི་བྱང་ལམ་གྱི་རི་རྩུབ་པོ་དག་ཇི་ལྟ་བ་བཞིན་དུ་རི་ལ་འཁོད་པའི་མི་དག་ཀྱང་དེ་བཞིན་ནོ་ཞེས་བྱང་ལམ་པའི་ཚོང་པ་དག་ལ་མཛའ་གཅུགས་ཀྱི་འཇམ་པ་ཉིད་མེད་པར་བསྟན་ཏོ། །བཅོས་མེད་མཛའ་གཅུགས་ཅན་ཉིད་ཡིན་པར་བསྟན་པའི་ཕྱིར། རི་ལ་འཁོད་པ་དང་པོར་ནི། །གསེར་དག་བདར་བ་ཇི་བཞིན་ཏེ། །ཞེས་བྱ་བ་གསུངས་ཏེ། རི་ལ་འཁོད་པའི་མི་བྱང་ལམ་པ་རི་ཁྲོད་པ་དག་ནི་དང་པོ་མཐོང་བའི་ཚེ་ན་གསེར་བཟང་བདར་གྱིས་བདར་བ་མཛེས་ཤིང་འོད་ཆགས་པ་བཞིན་དུ་ཚིག་འཇམ་པ་དང་ལུས་ཀྱི་ཚུལ་གུས་པར་སྟོན་ཏོ། །མི་ལ་འཚེ་བ་རྣམ་བརྟགས་ན། །རི་དག་ཇི་ལྟར་དེ་བཞིན་ནོ།། ཞེས་བྱ་བ་ནི་བྱང་ལམ་པའི་ཚོང་པ་ཁ་བྱམས་ཤིང་སྙིང་སྡང་བའི་མི་ལ་འཚེ་བ་དག་ནི་གཞན་གྱིས་བག་ཕབ་སྟེ་རང་བཞིན་ཇི་འདྲ་བ་རྣམ་པར་བརྟགས་ན་རི་དག་བརྐོས་ཤིང་བརྟགས་ན་ནང་ན་དབྱིག་ལ་སོགས་པའི་སྙིང་པོ་ཇི་ཡང་མེད་དོ། །ས་རྡུལ་དང་རྡོ་བ་ལ་སོགས་པ་བྱུང་བ་བཞིན་དུ་མཛའ་གཅུགས་ཀྱི་གཟུགས་མད་དོ་ཞེས་བྱ་བའི་ཐ་ཚིག་གོ །ཐབ་སྣོད་ལྟ་བུ་ཞེས་བྱ་བ་ནི་སྣོད་ཆེན་པོ་སྟེ་ཐབས་ཀྱི་སྒྱེད་པོ་ལ་གཟུགས་པའི་སྣོད་ཆེན་པོ་དང་འདྲ་བའི་ལྷུང་བཟེད་ཚད་ལས་འདས་པ་ཆེ་བར་ཞེས་བྱ་བའི་ཐ་ཚིག་གོ །ཉེ་འཁོར་ཐིབས་པོ་ཞེས་བྱ་བ་ནི་ཁོར་ར་ཁོར་ཡུག་ན་ཚང་ཚིང་ལ་སོགས་པ་
འཛིངས་པའི་ཐིབས་པོ་དག་ཡོད་པའི་ཕྱིར་རོ། །གཡར་ཞེས་བྱ་བ་ནི་བཀྲ་མི་ཤིས་པ་ཞེས་བྱ་བའི་ཐ་ཚིག་གོ །བུ་མོས་ཡོངས་སུ་དུབ་པ་ཞེས་བྱ་བ་ནི་བུ་མོས་སྐྱོ་བའོ། །དེས་ཚིགས་སུ་བཅད་པ་དག་སྨྲས་པ་ཞེས་བྱ་བ་ལ་སོགས་པ་ལ། རྒྱ་སྐྱེགས་ཤིང་གི་སོ་ཤིང་བྱེད་པ་དང༌། ནུབ་ཏུ་སྔས་བསྟན་ཏེ་ཉལ་བ་དང༌། ཤིན་ཏུ་གཉིད་ཆེ་བ་ཞོ་འཐུང་བ་དང༌། ཆུང་མ་གཡས་ཞར་ལེན་པར་བྱེད་པ་ན་དེ་དག་ནི་བཀྲ་མི་ཤིས་པ་ཡིན་པའི་ཕྱིར་ལྷ་ཆེན་པོ་ཞི་བའང་གནས་ནས་ཉམས་ཤིང་དྲུངས་ནས་འབྱིན་པར་འགྱུར་ན་གཞན་དག་ལྟ་སྨོས་ཀྱང་ཅི་དགོས་ཞེས་བྱ་བའི་ཐ་ཚིག་གོ །འགོག་ལ་འགོག་བྱེད་བབ་པ་དང༌། །རྡོ་ལ་ལྕགས་ནི་བབ་པ་ལྟར། །ཞེས་བྱ་བ་ནི་དཔེ་སྟེ། ཇི་ལྟར་ཆོམ་རྐུན་པ་ལ་ལམ་འགོག་པར་བྱེད་པ་ལ་ཆོམ་རྐུན་པ་ལས་འགོག་པར་བྱེད་པ་གཞན་བབ་པ་ན་གང་རྒྱལ་གང་ཕམ་པར་ཐེ་ཚོམ་ཟ་བ་དང༌། རྡོ་ལ་ལྕགས་བབ་པ་ན་གང་གང་གིས་ཆོམས་ཐེ་ཚོམ་ཟ་བ་ལྟར་རོ། །ཁྱོད་ཀྱང་ཆུང་མ་གསོད་བྱེད་མ། །དེ་ཡང་གཡས་ཞར་ཡིན་པས་ན། །ཁྱེད་གཉིས་གང་རྒྱལ་གང་ཕམ་ལྟའོ། །ཞེས་བྱ་བ་ནི་དོན་དེ་དཔེ་དེ་བཞིན་དུ་ཁྱོད་ཀྱང་ཆུང་མ་གསོད་པར་བྱེད་པ་ཡིན་ལ། བུ་མོ་དེ་གཡས་ཞར་ཡིན་པས་ན་ཁྱོད་གཉིས་འདུས་ན་གང་གསོན་གང་འཆི་བ་ཐེ་ཚོམ་གྱི་གནས་སུ་འགྱུར་རོ་ཞེས་བྱ་བའི་ཐ་ཚིག་གོ །འབྲས་ཐུག་པོ་ཆེ་དྲུས་པ་སྐམ་པོ་ཡུལ་མ་ག་དྷཱའི་བྲེའུ་ཆུང་གང་ལ་ནི་འབྲས་ཐུག་པོ་ཆེ་དྲུས་པ་སྐམ་པོ་མ་ག་དྷཱའི་སྲང་བཅུ་དྲུག་སྟེ། ཡུལ་མ་ག་དྷཱའི་སྲང་གཅིག་ལ་བོད་ཀྱི་སྲང་གཉིས་ཡོད་དོ། །བོད་ཀྱི་སྲང་ཚད་དུ་བརྩི་བ་ནི་སུམ་ཅུ་རྩ་གཉིས་ཡོད། །ཕུལ་ཚད་དུ་བརྩི་བ་ནི་བདུན་ཕུལ་དོ་དང་ཁྱོར་གང་ཡོད་དོ། །མ་ག་དྷཱའི་བྲེའུ་ཆུང་དོ་ལ་ནི་དེ་ཉིས་འགྱུར་ཡོད་དོ། །བཙོས་པ་ཞེས་བྱ་བ་ནི་འབྲས་སྐམ་བཙོས་པའི་ཆན་ནོ། །སྲན་ཚོད་དང་བཅས་ཚོང་མ་དང་བཅས་པ་བླུགས་ན་ཞེས་བྱ་བ་ནི་འདི་ལྟར་ཚོད་མ་མང་བ་ཡིན་མོད་ཀྱི། འོན་ཀྱང་ཚོད་མ་ཇི་ཙམ་གྱིས་འབྲས་ཆན་སྤགས་ནུས་པ་དེ་ཙམ་ཁོ་ནའི་ཚོད་མ་འདིར་གཟུང་གི་ལྷག་མ་ནི་མ་ཡིན་ནོ། །སྲན་ཚོད་དང་བཅས་ཞེས་བྱ་བ་ནི་གཤེར་ཚོད་དང་བཅས་པའོ། །ཚོད་མ་དང་བཅས་ཞེས་བྱ་བ་ནི་ཤོལ་ཚོད་ལ་སོགས་པ་སྔོ་ཚོད་ཀྱི་བྱ་ན་དང་བཅས་པའོ། །ཁའི་ཆའི་མཐའ་ཁོ་ན་ནས་ཞེས་བྱ་བ་
ནི་ལྷུང་བཟེད་ཀྱི་ཁའི་ཆའི་མཐའ་ཁོ་ན་ནས་ནང་རོལ་གྱི་ཞབས་ལ་སོགས་སུའོ། །མཐེ་བོའི་ལྟོ་གང་གིས་མི་རག་པ་ཞེས་བྱ་བ་ལ། མཐེ་བོའི་ལྟོ་གང་ཞེས་བྱ་བ་ནི་མཐེ་བོའི་ཚིགས་དང་པོའི་ཕྱོགས་གཅིག་ནས་བརྩམས་ཏེ་ཚིགས་དེ་ཉིད་ཀྱི་ཕྱོགས་གཅིག་གི་བར་ནི་མཐེ་བོའི་ལྟོ་སྟེ། མཐེ་བོའི་ཞེང་ཆད་ཀྱི་སོར་གཅིག་གི་ཚད་ཀྱིས་ཁའི་ཆའི་མཐའ་ཁོ་ན་ནས་ཟས་ལ་མི་རེག་མི་ཐུག་ཅེས་བྱ་བའི་ཐ་ཚིག་གོ །འདི་སྐད་བསྟན་ཏེ་དགེ་སློང་གི་ལྷུང་བཟེད་ཆེ་ཚད་བྱིན་གྱིས་བརླབ་ཏུ་རུང་བ་ནི་འབྲས་ཐུག་པོ་ཆེ་དྲུས་པ་སྐམ་ཡུལ་མ་ག་དྷཱའི་བྲེའུ་ཆུང་དོ་བཙོས་པའི་ཆན་དེའི་རྐྱེན་གྱི་ཚོད་མ་གང་ཡང་རུང་བ་དང་བཅས་པ་བླུགས་ན་མཐེ་བོའི་སོར་གཅིག་གིས་མ་གང་བ་ཡིན་ནོ། །ལྷུང་བཟེད་ཆུང་ཚད་ནི་དེའི་ཕྱེད་ཤོང་བའོ། །ལྷུང་བཟེད་འབྲིང་ཚད་ནི་དེ་གཉིས་ཀྱི་བར་གང་ཡང་རུང་བ་ཤོད་པའོ། །དགེ་སློང་གིས་ཅི་ཙམ་དུ་བྲེའུ་ཆུང་ཕྱེད་དང་ལྔ་ལས་ལྷག་པའི་བསོད་སྙོམས་ལེན་ན་ཐམས་ཅད་བུ་ལྟུང་བྱེད་དུ་འགྱུར་རོ་ཞེས་བྱ་བ་ནི་ལྷང་བཟེད་གང་ངམ་གཉིས་སམ་གསུམ་མམ་ལྷག་པ་ཞེས་བྱ་བ་ནི་སྤྱིའི་ཚད་ཡིན་ཏེ་འབྲས་ཐུག་པོ་ཆེ་སྐམ་ཡུལ་མ་ག་དྷཱའི་བྲེའུ་ཆུང་ཕྱེད་དང་ལྔ་བཙོས་པའི་ཆ་ཚོད་མ་མ་གཏོགས་པ་ལས་ལྷག་པའི་བསོད་སྙོམས་ནི་ལྟུང་བྱེད་འདིའི་དངོས་གཞིའི་བྱེད་པ་པོའོ་ཞེས་བྱ་བར་སྦྱར་རོ། །ཚོད་མ་ནི་མ་གཏོགས་པ་སྟེ། དགེ་སློང་ཇི་སྙེད་ཡོད་ཀྱང་རུང་འབྲས་ཐུག་པོ་ཆེ་སྐམ་ཡུལ་མ་ག་དྷཱའི་འབྲུ་ཆུང་ཕྱེད་དང་ལྔ་བཙོས་པའི་ཆན་ཚོད་མ་མ་གཏོགས་པ་དེ་ལས་ལྷག་པའི་བསོད་སྙོམས་ལེན་ན་ཐམས་ཅད་དུ་ལྟུང་བྱེད་དུ་འགྱུར་རོ། །སྦྱིན་བདག་གིས་ཅི་བདེར་བྱས་པ་ཞེས་བྱ་བ་ནི་བསམ་མི་དགོས་པར་བྱ་བའི་ཐ་ཚིག་གོ །བསླབ་པའི་གཞི་འདི་ནི་ཚོད་མི་ཤེས་པ་ཉིད་དགག་པའི་ཕྱིར་བཅའ་བ་མཛད་དོ། །ལྷུང་བཟེད་དོ་གསུམ་ཙམ་ལས་ལྷག་པར་ལེན་པའི་ལྟུང་བྱེད་དེ་སུམ་ཅུ་གསུམ་པའི་ཚིག་རྣམ་པར་བཤད་པ་རྫོགས་སོ།། །།སྟན་གཅིག་པའི་ཟས་ཞེས་བྱ་བ་ནི་གནས་བཏང་བའི་མཚན་ཉིད་ཀྱིས་སྤང་པ་མ་བྱས་པར་བཟའ་བའོ། །སྙིང་ལས་ཆུང་ངུ་ཞེས་བྱ་བ་ནི་བྱ་བ་ཉུང་བ་ཉིད་གྱིས་མངོན་པར་བརྩོན་པའོ། །ཚོར་བ་ཞེས་བྱ་བ་ནི་ཉམས་སུ་མྱོང་བའོ། །སྤངས་ཞེས་བྱ་བ་ནི་ཟས་ཡོངས་སུ་བཏང་བའོ། །ཇི་ཅམ་གྱིས་ཆོག་པ་
ཞེས་བྱ་བ་ནི་ཇི་ཙམ་འདོད་པའོ། །ཟས་བརྩམས་པ་ཞེས་བྱ་བ་ནི་ཟས་བཟའ་བར་བརྩམས་པའོ། །ཆུ་བཞིན་དུ་སྤོང་ཞེས་བྱ་བ་ནི་མཐར་གྱིས་ཆུའི་རྒྱུན་འབབ་པའི་ཚུལ་གྱིས་ལོ་མ་ལ་སོགས་པ་གང་དང་གང་འོང་བ་དེ་དང་དེས་སྤོང་བར་བྱེད་པ་ཞེས་བྱ་བའི་ཐ་ཚིག་གོ །སྐམ་ཚོད་ཅེས་བྱ་བ་ནི་ཚོད་མ་ཁུ་བ་མེད་པའོ།། བཅའ་བ་ལྔ་པོ་དག་གིས་ནི་སྤང་བར་མི་འགྱུར་ལ་ཞེས་བྱ་བ་ནི་བཅའ་བ་ལྔ་པོ་དག་ལ་ནི་ཟས་ཉིད་ཡོངས་སུ་རྫོགས་པ་མེད་པའི་ཕྱིར་ཟས་མ་ཡིན་པ་སྤངས་པས་ཟས་སྤངས་བར་མི་འགྱུར་བའི་ཕྱིར་བཅའ་བ་ལྔ་པོ་དག་ལ་ནི་སྤངས་པ་མེད་དོ། །བཟའ་བ་ལྔ་པོ་དག་གིས་ནི་སྤང་བར་འགྱུར་ཞེས་བྱ་བ་ནི་གཙོ་བོ་སྤངས་པས་གཙོ་བོ་མ་ཡིན་པ་ཡང་སྤང་བར་འགྱུར་བའི་ཕྱིར་བཟའ་བ་ལྔ་པོ་དག་སྤངས་ནས་བཅའ་བ་ལྔ་པོ་འཆའ་ན་ལྟུང་བྱེད་དུ་འགྱུར་རོ་ཞེས་བྱ་བའི་ཐ་ཚིག་གོ །བཅའ་བ་ལྔ་པོ་འཆོས་ནས་ནི་བཟའ་བ་ལྔ་པོ་དག་བཟའ་བར་བྱའི་ཞེས་བྱ་བ་ནི་བཅའ་བ་དག་མ་སྤངས་པའི་ཕྱིར་རོ། །བཅའ་བ་དག་ནི་བཅའ་བར་མི་བྱ་སྟེ། སྤངས་པའི་ཕྱིར་རོ་ཞེས་དོན་གྱི་ཤུགས་ཀྱིས་བསྟན་ཏོ། །བཟའ་བ་ལྔ་པོ་དག་ཟོས་ནས་ནི་བཅའ་བ་ལྔ་པོ་དག་བཅའ་བར་མི་བྱའོ་ཞེས་བྱ་བ་ནི་བཟའ་བ་གཙོ་བོ་སྤངས་པས་བཅའ་བ་གཙོ་བོ་མ་ཡིན་པ་ཡང་སྤངས་པའི་ཕྱིར་རོ། །བཟའ་བ་དག་ཀྱང་བཟའ་བར་མི་བྱ་བར་ཡང་དོན་གྱི་ཤུགས་ཀྱིས་བསྟན་ཏོ། །དེས་བསགས་པ་ཞེས་བྱ་བ་ནི་བཟའ་བ་འབགས་པའོ། །དེ་གོས་པ་ཞེས་བྱ་བ་ནི་བཟའ་བའི་སྣུམ་གྱིས་གོས་པའོ། །ཟས་ཡོད་པ་ཞེས་བྱ་བ་ལ་སོགས་པ་ལ་ཡང་བ་ཞེས་བྱ་བ་ནི་འདིར་ཟས་ལ་སོགས་པ་སྣང་བའི་སྤྱོད་ཡུལ་ན་ཡོད་པ་ཡིན་པར་ཤེས་པར་བྱའོ། །ཀུན་དུ་བརྩམས་པ་ཞེས་བྱ་བ་ནི་མ་བླངས་པ་དང་ཟས་སྤྱི་སྤུངས་ལ་སོགས་པར་གཞག་པས་སྟོབས་པར་བྱེད་ཅེས་བྱ་བའི་ཐ་ཚིག་གོ །སྤངས་པ་ཞེས་བྱ་ཐ་ཚིག་གོ །ཟས་མེད་པ་ཞེས་བྱ་བ་ལ་སོགས་པ་ལ་ཟས་ལ་ཐ་ཚིག་གོ །ཟས་མེད་པ་ཞེས་བྱ་བ་ལ་སོགས་པ་ལ་ཟས་ལ་སོགས་པ་མེད་ན་དོན་མེད་པས་སྤངས་ཀྱང་མ་སྤངས་པ་ཉིད་ཡིན་ནོ། །སྤངས་པ་མེད་པ་ཞེས་བྱ་བ་ནི་གནས་བཏང་བ་མེད་ན་སྤངས་པར་མི་འགྱུར་བས་མ་སྤངས་པ་ཡིན་ནོ། །རུང་བ་སྤོང་བར་བྱེད་པ་ཞེས་བྱ་བ་ལ་སོགས་པ་ལ་རུང་བ་ཞེས་བྱ་བ་ནི་བཟར་རུང་བའི་རྫས་ཀྱི་ངོ་
བོ་ཉིད་སྟོན་པའོ། །སྩོག་འཇོག་མ་བྱས་པ་ཞེས་བྱ་བ་ནི་གཡོས་བྱས་པའི་རྫས་བཟར་རུང་བ་ཉིད་སྤངས་ན་སྤངས་པ་ཡིན་གྱི་བཟར་མི་རུང་བ་ཉིད་ཀྱིས་ནི་སྤངས་པར་མི་འགྱུར་རོ་ཞེས་བྱ་བའི་ཐ་ཚིག་གོ །ཚིག་ལྷག་མ་མེད་པ་ཞེས་བྱ་བ་ལ་སོགས་པ་ནི་རེ་ཞིག་ཅེས་བྱ་བའི་ཚིག་མེད་པའོ།། ཐོང་ཞིག་ཅེས་བྱ་བ་ལ་སོགས་པ་ཚིག་ལྔ་ནི་འཇིག་རྟེན་ལ་གྲགས་པའི་དཔེ་ཡིན་ཏེ་མི་དགོས་སོ། །མི་ལེན་ཏོ་ཞེས་བྱ་བ་ལ་སོགས་པས་ཀྱང་སྤངས་པར་ཤེས་པར་བྱའོ། །བྱིན་ཅིག་ཅེས་བྱ་བ་གཞན་ལ་བྱིན་ཅིག་ཅེས་གཏོང་བར་བྱེད་པ་ཡིན་གྱི་བདག་ཉིད་ལ་བྱིན་ཅིག་ཅེས་བྱ་བ་ནི་མ་ཡིན་པར་ཤེས་པར་བྱའོ། །ཡང་དགེ་སློང་གང་ཞེས་བྱ་བ་ལ་སོགས་པ་ལ་ཟས་ཟོས་ཟིན་ཅིང་ཞེས་བྱ་བ་ནི་ཟས་ཟོས་ཟིན་པ་ལས་གཞན་ལས་སྤངས་པར་མི་འགྱུར་རོ་ཞེས་བྱ་བའི་ཐ་ཚིག་གོ །སྤངས་པ་ལས་ཞེས་བྱ་བ་ནི་ཟས་ཟོས་ཟིན་ཀྱང་སྤངས་པ་ཉིད་ལ་ཉེས་པ་མེད་དོ་ཞེས་བྱ་བར་དགོངས་པའོ། །བྱ་རོག་གི་སྒྲ་འབྱིན་པ་ཞེས་བྱ་བ་ནི་བྱ་རོག་གི་སྐྲོད་རད་ཀྱི་སྒྲའོ། །ལྷག་པོར་ཞེས་བྱ་བ་ནི་ལྷག་མར་བྱས་བཞིན་བོར་བ་སྟེ། ལྷག་བོར་བྱེད་པའི་དགེ་སློང་གིས་ཟོས་པའི་ལྷག་བོར་བ་ནི་ལྷག་བོར་བ་ཞེས་བྱའོ། །ཡོངས་སུ་རྫོགས་ཤིང་མཐར་ཐུག་པར་བྱས་པ་ཞེས་བྱ་བ་ནི་ཚིམ་ཞིང་བྱ་བ་རྫོགས་པར་བྱས་པའོ། །ཁམ་གཉིས་སམ་གསུམ་ཟོས་ནས་ཞེས་བྱ་བ་ནི་ལྷག་མ་ཉིད་ལ་འདོད་པ་ཆེ་བ་ལ་སོགས་པ་རྣམ་པར་གཅད་པ་བསྒྲུབ་པའི་ཕྱིར་རོ། །བཟའ་བར་མི་བྱ་བར་ཞེས་བྱ་བ་ནི་ཡིད་ཀྱིས་སྤངས་པའི་ཕྱིར་ཉེས་བྱས་སུ་འགྱུར་ན་མི་རུང་ངོ་ཞེས་བྱ་བའི་ཐ་ཚིག་གོ །ལག་པར་བྱིན་ནས་ཞེས་བྱ་བ་ནི་ལྷག་པོར་ཉིད་བསྒྲུབ་པའི་ཕྱིར་རོ། །རྒྱུ་ལྔས་ལྷག་པོར་མ་བྱས་པར་བརྗོད་པར་བྱ་སྟེ་ཞེས་བྱ་བ་ལ་སོགས་པ་ལ་མཚམས་ཀྱི་ཕྱི་རོལ་དུ་ཞེས་བྱ་བ་ནི་ཆུ་དང་ནམ་མཁའ་ལ་སོགས་པས་བར་དུ་ཆོད་པའི་ཕྱིར་རོ། །མི་འཐོབ་པའི་ཕྱོགས་སུ་ཞེས་བྱ་བ་ནི་ནམ་བླང་བའི་ཡུལ་མ་ཡིན་པའི་ཕྱིར་རོ། །རྒྱབ་ནས་དང༌། གློ་ནས་ཞེས་བྱ་བ་གཉིས་ནི་མདུན་ན་འདུག་པ་མ་ཡིན་པའི་ཕྱིར་རོ། །སྤྱོད་ལམ་ལས་ཉམས་པ་ཞེས་བྱ་བ་ནི་ཙོག་པུ་མ་ཡིན་པའི་ཕྱིར་ཏེ་ལྷག་མ་སྦྱིན་པའི་ཡུལ་མ་ཡིན་པའི་ཕྱིར་དེ་དག་ལྷག་བོར་མི་འཆགས་སོ། །ལྷུང་བཟེད་ཀྱི་གཞིར་ཞེས་བྱ་བ་ནི་ལྷུང་བཟེད་ཀྱི་སྣོད་དང་བྱུག་རིས་ལ་སོགས་
པ་འོག་གཞིར་ཏེ་ལྷག་བོར་བྱས་པ་ཟ་བ་ནི་མི་རྣམས་ཀྱིས་སྤྱོད་པ་ཡིན་པའི་ཕྱིར་རང་གི་ལུས་ཀྱིས་བླང་བར་བྱ་བ་ཡིན་པས་རང་གི་ལུས་ལས་གཞན་པ་དག་ལ་མི་འཆགས་སོ། །གཅིག་གིས་ལྷག་བོར་བྱས་པ་མང་པོ་དག་གིས་བཟའ་བར་བྱ་སྟེ་ཞེས་བྱ་བ་ནི་ཚངས་པ་མཚུངས་པར་སྤྱོད་པ་རྣམས་ནི་ཆོག་གཅིག་པའི་ཕྱིར་རོ། །ལྷག་བོར་མ་བྱས་པར་ཞེས་བྱ་བ་ནི་ལྷག་མ་དང་པོར་བ་ཉིད་ནི་ལྷག་པོར་ཏེ་གང་ལ་མ་བྱས་པ་ནི་ལྷག་བོར་མ་བྱས་པ་སྟེ། ལྷག་མ་བྱས་ཤིང་མ་བོར་བའོ། །ལྷག་མར་བྱས་ཤིང་ཞེས་བྱ་བ་ནི་ཁ་ཆུ་དང་འདྲེས་པའོ། །མ་བོར་བ་ཞེས་བྱ་བ་ནི་བསམ་པས་ཡོངས་སུ་མ་བཏང་བར་རོ། །ཡོངས་སུ་མ་བཏང་བར་ཞེས་བྱ་བ་ནི་བྱ་བར་ཡོངས་སུ་མ་བཏང་བར་རོ། །སྐྱོ་མ་ཞེས་བྱ་བ་ནི་ཕྱེས་བཏབ་པའོ། །མགུལ་དུ་བཏུང་བ་ལ་ནི་སྤངས་པ་མེད་དོ་ཞེས་བྱ་བ་ནི་སྐོམ་དུ་བཏུང་བ་ལ་དུས་ངེས་པ་མེད་པའི་ཕྱིར་ཏེ། སྤངས་ཀྱང་ཡང་ཉི་མ་གཞན་བཞིན་དུ་བཏུང་དུ་རུང་ངོ་ཞེས་བྱ་བའི་ཐ་ཚིག་གོ །སྟན་གཅིག་པའི་ཟས་ཀྱི་ལྟུང་བྱེད་དེ་སུམ་ཅུ་བཞི་པའི་ཚིག་རྣམ་པར་བཤད་པ་རྫོགས་སོ།། །།ཤན་པའི་གནས་སུ་བཏང་བ་ཞེས་བྱ་བ་ནི་ཤན་པའི་གནས་ཞེས་བྱ་བ་ནི་ཕྱུགས་གསོད་པའི་སྲང་ངོ༌། །དེར་བཏང་བ་ནི་དེར་བཀྱེ་བའོ། །དེས་བླའི་རབ་ཏུ་བྱུང་ཞིང་རྫོགས་པར་བསྙེན་པར་བྱས་ནས་འདོམས་པར་མི་བྱེད་རྗེས་སུ་སྟོན་པར་མི་བྱེད་པ་ནི་མི་རུང་ངོ་ཞེས་བྱ་བ་ནི་རབ་ཏུ་ཕྱུང་རྫོགས་པར་བསྙེན་པར་བྱས་ནས་འདོམས་པར་མི་བྱེད་རྗེས་སུ་སྟོན་པར་མི་བྱེད་པ་ནི་གཞན་མི་དགེ་བ་བཅུའི་ལས་ཀྱི་ལམ་འཁོར་དང་བཅས་པ་དག་ལ་ངེས་པར་སྦྱར་བས་དེ་བཞིན་གཤེགས་པའི་བསྟན་པ་བླ་ན་མེད་པ་སྒོ་ལོག་པར་འཇུག་ཏུ་བཅུག་པས་མི་རུང་གི་དེ་བས་སྔ་མ་ཆེས་བླའོ་ཞེས་བྱ་བའི་ཐ་ཚིག་གོ །ཁྱོད་ཉིད་ལྟུང་བ་དང་བཅས་པར་འགྱུར་བ་ཞེས་བྱ་བ་ནི་གཡོ་བྱེད་པའི་ཕྱིར་རོ་ཞེས་བྱ་བར་བསམས་སོ། །དུས་ཀྱིས་སྟོབས་ཞེས་བྱ་བ་ནི་ཚིག་ལ་མངོན་བར་ཞེན་པས་སྟོབས་པར་བྱེད་ཅེས་བྱ་བའི་ཐ་ཚིག་གོ །དེའི་ངག་གི་རྣམ་པར་རིག་བྱེད་ཀྱི་དུས་ལ་ལྟུང་བྱེད་དུ་འགྱུར་བར་ཤེས་པར་བྱའོ། །སྤངས་པ་ལ་སྟོབས་པའི་ལྟུང་བྱེད་དེ་སུམ་ཅུ་ལྔ་པའི་ཚིག་རྣམ་པར་བཤད་པ་རྫོགས་སོ།། །།ཀུན་དགའ་ར་བའི་ནང་ཞེས་བྱ་བ་ནི་གཙུག་
ལག་ཁང་གི་ནང་ངོ༌། །འདུས་ཤིང་ཟབ་ཞེས་བྱ་བ་ནི་དགེ་སློང་གི་ཚོགས་གསུམ་ལ་སོགས་པ་དང༌། དགེ་འདུན་ལས་ཐ་དད་པར་ཟ་བ་སྟེ་བཟའ་བར་བྱ་བ་བཟའ་ཞེས་བྱ་བའི་ཐ་ཚིག་གོ །འདུས་པ་ཆེན་པོ་ཞེས་བྱ་བ་ནི་སྟོང་ལ་སོགས་པའི་གྲངས་ཀྱི་སྐྱེ་བོ་མང་པོ་འདུས་པའོ། །ཀུན་དུ་འཚོ་དག་ལས་ཕྲོགས་ཏེ་བཅོམ་ལྡན་འདས་ཀྱི་ཉན་ཐོས་དགེ་འདུན་ལ་ཕུལ་ལོ་ཞེས་བྱ་བ་ནི་དགྲ་བཅོམ་པའི་བློས་ཕུལ་བ་ཡིན་པས། ཀུན་དུ་འཚོ་དག་ལ་དགྲ་བཅོམ་པ་མེད་པའི་ཕྱིར་དང༌། དགེ་འདུན་ལ་ཡོད་པའི་ཕྱིར་རོ་སྙམ་དུ་བསམས་པའོ། །ན་བ་དུས་སོ་ཞེས་བྱ་བ་ལ་སོགས་པ་ལ། ན་བ་དང་ལས་དང༌། ལམ་དང༌། གྲུར་ཞུགས་པའི་དུས་དག་ལ་ནི་ཕོངས་པར་གྱུར་པའི་ཕྱིར་ལྟུང་བ་མེད་དོ། །འདུས་པ་ཆེན་པོའི་དུས་ལ་ནི་སྦྱིན་པ་པོ་རྣམས་ཀྱི་བསོད་ནམས་ཀྱི་སྒོ་ཡིན་པའི་ཕྱིར་དང༌། ཕན་ཚུན་ཉིད་ཀྱིས་ཕོངས་པའི་དུས་ཡིན་པའི་ཕྱིར་ལྟུང་བ་མེད་དོ། །དགེ་སྦྱོང་གི་ཟས་སུ་སྟེ་ཞེས་བྱ་བ་ནི་མུ་སྟེགས་ཅན་གྱི་ལྟ་བའི་རྣམ་པ་གཅད་པའི་ཕྱིར་དང༌། བསྟན་པ་ལ་གཞུག་པར་བྱ་བའི་ཕྱིར་ལྟུང་བ་མེད་དོ། །དེ་ཡང་དགེ་སྦྱོང་ཞེས་བྱ་བའི་གྲངས་སུ་འགྲོའོ་ཞེས་བྱ་བ་ནི་འདོད་ཆགས་ལ་སོགས་པ་ཞི་བར་བྱ་བ་དང༌། རབ་ཏུ་བྱུང་བ་བླངས་པའི་ཕྱིར་རོ། །གཞིའི་གནས་ཞེས་བྱ་བ་ནི་གང་དུ་ངེས་པར་ཟ་བའོ། །ཁང་ཁྱིམ་གྱི་གནས་ཞེས་བྱ་བ་ནི་གང་དུ་ཟས་ངེས་པ་མེད་པའོ། །གཞིའི་གནས་སུ་ཟ་བདག་ལ་ཉེས་བྱས་སུ་འགྱུར་རོ་ཞེས་བྱ་བ་ནི་དེ་དག་གི་གནས་སྤོ་བ་མ་བྱས་པའི་ཕྱིར། དངོས་གཞི་མེད་དོ། །ཁང་ཁྱིམ་དུ་ཟ་བ་དག་ལ་ལྟུང་བྱེད་དུ་འགྱུར་རོ་ཞེས་བྱ་བ་ནི་དེ་དག་གི་སྤོ་བ་བྱས་པའི་ཕྱིར་རོ། །གསུམ་ཞིང་གཅིག་ལས་བྱེད་པ་ལ་ལྟུང་བ་མེད་པ་ནི་བདག་ཉིད་གསུམ་ལ་སོགས་པ་དང་ལྷན་ཅིག་ཟ་བར་མ་གྱུར་པའི་ཕྱིར་རོ། །གསུམ་རྫོགས་པར་བསྙེན་ཅིང་གཅིག་རྫོགས་པར་མ་བསྙེན་པ་ལ་ལྟུང་བ་མེད་པ་ནི་དགེ་སློང་གི་ཚོགས་འདུས་ཤིང་ཟ་བ་མ་ཡིན་པའི་ཕྱིར་རོ། །ཟས་བྲིམ་པར་བྱས་པ་ལ་ལྟུང་བ་མེད་པ་ནི་ཐ་དད་པར་ཟ་བ་མ་ཡིན་པའི་ཕྱིར་རོ། །སྦྱིན་བདག་ན་རེ་གང་དག་འདི་ན་འཁོད་པ་དེ་དག་ལ་སྦྱིན་ནོ་ཞེས་ཟེར་ན་ལྟུང་བ་མེད་དོ་ཞེས་བྱ་བ་ནི་སྦྱིན་བདག་གིས་ངེས་པར་བྱས་ན་རྙེད་པའི་མཚམས་ཐ་དད་པའི་ཕྱིར་གནས་གཅིག་པ་ཉིད་མ་ཡིན་པའི་ཕྱིར་རོ། །འདུས་
ཤིང་ཟ་བའི་ལྟུང་བྱེད་དེ་སུམ་ཅུ་དྲུག་པའི་ཚིག་རྣམ་པར་བཤད་པ་རྫོགས་སོ།། །།འདི་དག་སྐྱེས་པ་གང་དག་གིས་འདི་དག་སྐྱེས་མ་ཐག་གི་ཁ་ལན་ཚྭས་འགེགས་པར་མ་ནུས་པ་དེ་དག་གིས་ཅི་ཐོབ་ཅེས་བྱ་བ་ནི་གལ་ཏེ་བཀང་བར་གྱུར་ན་དེའི་མོད་ལ་ཤི་བར་གྱུར་པས་གནས་སྐབས་འདི་ལྟ་བུ་མཐོང་བར་མི་འགྱུར་བས་ལེགས་སོ་སྙམ་དུ་བསམས་པའོ། །བརླ་དབྲག་ཏུ་ཁྲོན་པ་བཅུག་སྟེ་འབྲང་བར་མི་ནུས་པ་དེ་དག་གིས་ཅི་ཐོབ་ཅེས་བྱ་བ་ནི་གལ་ཏེ་བླ་དབྲག་ཏུ་ཁྲོན་པའི་ཁ་གཏད་དེ་འབྲང་བར་གྱུར་པ་དེའི་མོད་ལ་ཤི་བར་གྱུར་པས་གནས་སྐབས་འདི་ལྟར་བུ་མཐོང་བར་མི་འགྱུར་བས་ལེགས་སོ་སྙམ་དུ་བསམས་པའོ། །གྲོང་ཁྱེར་གྱི་སྐབ་མོ་ཅན་དག་ཅེས་བྱ་བ་ནི་གྲོང་ཁྱེར་གྱི་མི་དག་སྟེ་གྲོང་ཁྱེར་རྡལ་ན་དེ་དག་ལ་སྐབ་མོའི་ཁྱིམ་ཡོད་པའི་ཕྱིར་རོ། །རྒྱུ་དང་མི་རྒྱུའི་འཇིག་རྟེན་ཞེས་བྱ་བ་ནི་སེམས་ཡོད་པ་དང་སེམས་མེད་འཇིག་རྟེན་དེ་རྒྱུ་བ་དང་གནས་པ་ཞེས་བྱ་བའི་ཐ་ཚིག་གོ །ཆོས་མངོན་བར་རྗོད་པར་བྱེད་ཅེས་བྱ་བ་ནི་མངོན་སུམ་དུ་བྱེ་དཔའོ། །གནས་ལྔ་ཞེས་བྱ་བ་ནི་གཞི་ལྔའོ། །སྦོབས་པ་ཞེས་བྱ་བ་ནི་ཤེས་རབ་ཀྱི་ཀུན་དུ་སྤྱོད་པའོ། །དུས་མ་ཡིན་པར་ཟ་བའི་ལྟུང་བྱེད་དེ་སུམ་ཅུ་བདུན་པའི་ཚིག་རྣམ་པར་བཤད་པ་རྫོགས་སོ།། །།འབྲས་ཆན་གཤེར་བ་ཞེས་བྱ་བ་ནི་འབྲས་ཀྱི་འོ་ཐུག་ལ་སོགས་པའོ། །འབྲས་ཆན་སྐམ་པོ་ཞེས་བྱ་བ་ནི་འབྲས་ཆན་ཉི་ཚེའོ། །རླུང་ལྡང་བ་ཞེས་བྱ་བ་ནི་རླུང་ཆེ་བའོ། །ཡུལ་ངན་འབྱུང་བ་ཞེས་བྱ་བ་ནི་ནམ་རྨུས་པ་འམ་ས་འགྲེད་པའོ། །ཆར་པ་འབབ་པ་ཞེས་བྱ་བ་ནི་ཆར་ཆུ་ཞོད་པའོ། །ལྷགས་པ་བྱུང་བ་ཞེས་བྱ་བ་ནི་སྐམ་ལྷགས་ཆེ་བའོ། །སྩོག་འཇོག་བྱེད་པ་ཞེས་བྱ་བ་ནི་རང་ཉིད་ཀྱིས་ལེགས་པར་བླངས་ཏེ་སྩོགས་པའོ། །སྩོག་འཇོག་བྱས་པ་རྣམ་པ་གཉིས་ཏེ་ཞེས་བྱ་བ་ནི་ཟས་ཀྱི་དུས་རྣམ་པ་གཉིས་ལས་ཡོལ་བ་ལས་སྩོག་འཇོག་བྱས་པ་རྣམ་པ་གཉིས་སུ་འགྱུར་རོ། །ལྷུང་བཟེད་ལ་སོགས་པ་སྩོག་འཇོག་བྱས་པས་འབགས་པ་ཟ་ན་ཐམས་ཅད་དུ་ཉེས་བྱས་སུ་འགྱུར་ཞེས་བྱ་བ་ནི་བཅའ་བ་དང༌། བཟའ་བ་ལ་སོགས་བྱས་པས་འབགས་པ་ཟ་ནའོ། །འདིས་ཡང་ལྷུང་བཟེད་ལ་སོགས་པ་ལ་བཅའ་བ་དང༌། བཟའ་བ་སྩོག་འཇོག་བྱས་པས་འབགས་པ་མགུལ་དུ་མིད་པར་མི་མངོན་པ་ལ་དངོས་གཞིའི་གནས་སུ་ཉེས་བྱས་སུ་གསུངས་སོ། །ཁ་ཅིག་
འདི་ལ་དངོས་གཞི་ཉིད་དུ་འདོད་པ་ནི་ལྷུང་བཟེད་ལ་སོགས་པ་ལ་བཅའ་བ་དང་བཟའ་བ་སྩོག་འཇོག་བྱས་པས་འབགས་པས་མགུལ་དུ་མིད་པ་ལས་བསམས་ཏེ་སྨྲ་བ་ཡིན་ནོ། །སྩོག་འཇོག་གི་ལྟུང་བྱེད་དེ་སུམ་ཅུ་བརྒྱད་པའི་ཚིག་རྣམ་པར་བཤད་པ་རྫོགས་སོ།། །། ཐམས་ཅད་དུར་ཁྲོད་པ་དང་ལྡན་པ་ཞེས་བྱ་བ་ནི་ལྷུང་བཟེད་ལ་སོགས་པ་ཐམས་ཅད་པ་དུར་ཁྲོད་པ་ཡིན་ཞེས་བྱ་བའི་ཐ་ཚིག་གོ །རྗེའུ་ཞེས་བྱ་བ་ནི་རྫ་བོ་ཆུང་ངུའོ། །གྱོ་མོ་ཁ་བཞོགས་ཏེ་ཞེས་བྱ་བ་ནི་བདར་ཏེའོ། །དགང་དཀའ་བ་ཞེས་བྱ་བ་ནི་ལྟོའོ། །བྱང་གི་སྒྲ་མི་སྙན་དུས་བྱིན་གྱིས་བརླབས་ཏེ་ཞེས་བྱ་བ་ནི་བྱང་གི་སྒྲ་མི་སྙན་གྱི་གླིང་ན་གྲགས་པའི་རང་ལེན་པ་མངོན་དུ་བྱས་ནས་ཞེས་བྱ་བའི་ཐ་ཚིག་གོ །མེས་རུང་བ་ཞེས་བྱ་བ་ནི་མེས་རེག་པའོ། །མཚོན་གྱིས་རུང་བ་ཞེས་བྱ་བ་ནི་མཚོན་གྱིས་རྨ་ཕྱུང་བའོ། །སེན་མོས་རུང་བ་ཞེས་བྱ་བ་ནི་སེན་མོས་རྨ་ཕྱུང་བའོ། །རྙིས་པས་རུང་བ་ཞེས་བྱ་བ་ནི་རྙིས་པ་ཉིད་དོ། །ནེ་ཚོས་རྨ་ཕྱུང་བས་རུང་བ་ཞེས་བྱ་བ་ནི་ནེ་ཚོས་ཟོས་པའོ། །ཕྱུང་བ་ཞེས་བྱ་བ་ནི་ས་ལས་བཏོན་པའོ། །གཤེགས་པ་ཞེས་བྱ་བ་ནི་ཚལ་བའོ། །བཅད་པ་ཞེས་བྱ་བ་ནི་གཏུབས་པའོ། །ཕུག་པ་ཞེས་བྱ་བ་ནི་བཙུགས་པའོ། །ས་བོན་གྱི་ཆོས་མེད་པ་ཉིད་ཅེས་བྱ་བ་ནི་ས་བོན་མི་སྐྱེ་བ་ཉིད་དོ། །ཕུང་པོར་བྱས་ཏེ་མེས་གནས་པ་གཉིས་སམ་གསུམ་དུ་རེག་པར་བྱས་ན་ཐམས་ཅད་དུ་རུང་བར་འགྱུར་རོ་ཞེས་བྱ་བ་ནི་མེས་རེག་པའི་ཕྱིར་བཀྲ་མི་ཤིས་པ་ཉིད་ཀྱི་ས་བོན་ཉིད་ཀྱི་ཐ་སྙད་ལས་ལོག་པའི་ཕྱིར་ཕུང་པོར་བྱས་ནས་ཡང་དང་ཡང་དུ་རེག་པས་རུང་བ་ཉིད་ཡིན་ནོ། །མཚོན་དང་སེན་མོས་ནི་རེ་རེ་ནས་སོ་ཞེས་བྱ་བ་ནི་རྨ་ཕྱུང་ན་སྙིང་པོ་མེད་པ་ནི་ཕྱིར་ས་བོན་ཉིད་ཐ་སྙད་ལྡོག་པས་གང་ལ་རྨ་ཕྱུང་བ་དེ་ཉིད་ལ་ས་བོན་ཉིད་མེད་པའི་ཕྱིར་རེ་རེ་ནས་རྨ་དབྱུང་བར་བྱའོ་ཞེས་བྱ་བའི་ཐ་ཚིག་གོ །དགེ་སློང་དག་གིས་དང་པོ་གཟུང་བར་བྱ་བ་ནི་བྱིན་ལེན་འཇིག་པ་སྤང་བའི་ཕྱིར་རོ། །སྩོག་འཇོག་བྱས་པ་ཡིན་ནོ་ཞེས་འདོར་བར་བྱེད་ནས་ཞེས་བྱ་བ་ནི་ཕྱེད་ཡོལ་ཕན་ཆད་སྩོག་འཇོག་ཏུ་འགྱུར་བའི་ཕྱིར་རོ། །དང་པོ་དགེ་སློང་དག་གིས་གཏང་བར་བྱ་ཞིང་ཕྱིས་ཁྱིམ་པ་དག་གིས་གཏང་བར་བྱ་སྟེ་ཞེས་བྱ་བ་ནི་སོག་འཇོག་བྱས་པར་མི་འགྱུར་བར་བྱ་བའི་ཕྱིར་བྱིན་ལེན་པ་བཞི་པོ་བསྒྲུབས་པ་
ཡིན་ནོ། །རུང་བའི་ཁང་པར་བཅུག་སྟེ་ཞེས་བྱ་བ་ནི་ཟས་སྐོམ་གྱི་ཁང་པར་རོ། །ལག་པ་ཁས་ཕུབ་པ་ཞེས་བྱ་བ་ནི་ལག་པ་ཁ་བུབ་ཏུ་བཞག་པ་སྟེ་དེ་ནི་ལེན་པ་ལ་མི་ཕྱོགས་པ་ཡིན་པའི་ཕྱིར་བྱིན་ལེན་མི་འཆགས་སོ། །ལེན་པ་ཡོད་པ་ཞེས་བྱ་བ་ནི་ལེན་ཤེས་པ་ཞེས་བྱ་བའི་ཐ་ཚིག་གོ །ཆུ་དང་སོ་ཤིང་མ་གཏོགས་ཏེ་ཞེས་བྱ་བ་ནི་ཟས་མ་ཡིན་པའི་ཕྱིར་ཉེས་བྱས་སུ་འགྱུར་བ་དེ་ཡང་བཀག་གོ །མིའི་ལག་པ་ཞེས་བྱ་བ་ནི་མིའི་ལག་མཐིལ་ལོ། །དེའི་བག་ཆགས་ཀྱིས་ཞེས་བྱ་བ་ནི་གོམས་པས་ཏེ་དེ་དང་མཐུན་པའི་འདུ་བྱེད་ཐོབ་པ་ཞེས་བྱ་བའི་ཐ་ཚིག་གོ །བྱིན་ལེན་མ་བྱས་པར་ཟ་བའི་ལྟུང་བྱེད་དེ་སུམ་ཅུ་དགུ་པའི་ཚིག་རྣམ་པར་བཤད་པ་རྫོགས་སོ།། །།ཁ་ཤིན་ཏུ་ཆེན་པོ་ཞེས་བྱ་བ་ནི་ཁ་ཆེ་བ་ཉིད་ཀྱིས་སོ། །གཞན་གྱི་ཁྱིམ་དག་ནས་ཞེས་བྱ་བ་ནི་ཉེ་དུ་མ་ཡིན་པའི་ཁྱིམ་དག་ནས་ཏེ་མ་བསྟབས་པའི་ཁྱིམ་དག་ནས་སོ། །དེ་ལ་ལྟུང་བ་ཇི་ལྟར་འགྱུར་ཞེ་ན་ཞེས་བྱ་བ་ལ་སོགས་པ། སློང་བ་དང་ཟ་བ་གཉིས་ཀའི་དུས་སུ་མིན་པ་ཡིན་ན་སྦྱོར་བ་ལ་ཉེས་བྱས་སུ་འགྱུར་ལ། དངོས་གཞི་ལ་ལྟུང་བྱེད་དུ་འགྱུར་ལ། གཅིག་མི་ན་པ་ཡིན་ན་ཉེས་བྱས་སུ་འགྱུར་རོ། །གཉིས་ཀ་ན་བ་ཡིན་ན་ལྟུང་བ་མེད་དོ། །བསྟབས་པར་བརྗོད་པར་བྱ་སྟེ་ཞེས་བྱ་བ་ནི་ཅི་བཞེད་འདྲི་བས་འདོད་པའི་དོན་ལ་སློང་བའི་སྐབས་བྱེ་བ་ཡིན་ནོ་ཞེས་བྱ་བར་དགོངས་པའོ། །ཅི་འདོད་པ་དེ་བསླང་བར་བྱ་ཞེས་བྱ་བ་ནི་བསྟབས་པས་རང་ཉིད་ཀྱིར་གྲུབ་པའི་ཕྱིར་རོ། །ཞོ་སྦྱིན་པ་ཆུར་ཁུ་ལ་སོགས་པ་སློང་བ་ལ་ལྟུང་བ་མེད་པ་ནི་དམན་པ་སློང་བའི་ཕྱིར་རོ། །བསོད་པ་སློང་བའི་ལྟུང་བྱེད་དེ་བཞི་བཅུ་པའི་ཚིག་རྣམ་པར་བཤད་པ་རྫོགས་སོ།། །།ནང་གིར་སྤྱད་པ་ཞེས་བྱ་བ་ནི་ལུས་ཀྱིས་ཉེ་བར་སྤྱད་པའོ། །ཕྱི་རོལ་གྱིར་སྤྱད་པར་ཞེས་བྱ་བ་ནི་ལུས་ཀྱི་ཡོ་བྱད་དུ་ཉེ་བར་སྤྱད་པའོ། །སྲོག་ཆགས་དང་བཅས་པའི་ཆུ་ལ་སྤྱོད་པའི་ལྟུང་བྱེད་དེ་བཞི་བཅུ་གཅིག་པའི་ཚིག་རྣམ་པར་བཤད་པ་རྫོགས་སོ།། །།བསམ་པའི་ནོར་བུ་རིག་པ་ཞེས་བྱ་བ་ནི་བསྟན་བཅོས་གང་གིས་བསམ་པའི་མཚན་མ་ནོར་བུ་དག་ཤེས་པའོ། །བུད་མེད་ནི་སྐྱེས་པའི་ཉལ་པོ་བྱ་བ་ཡིན་ལ་སྐྱེས་པ་ནི་བུད་མེད་ཀྱི་ཉལ་པོ་བྱ་བ་ཡིན་ནོ་ཞེས་བྱ་བ་ལ། ཉལ་པོའི་བྱ་བ་ཞེས་བྱ་བ་ནི་ལོངས་སྤྱོད་པ་དང་
བཅས་པ་སྟེ། རེག་པ་ནི་ཁམ་གྱི་ཟས་ཡིན་པའི་ཕྱིར་རོ། །ཉལ་པོ་བྱེད་པར་ཤོམ་པའི་ཁྱིམ་ན་འདུག་པའི་ལྟུང་བྱེད་དེ་བཞི་བཅུ་གཉིས་པའི་ཚིག་རྣམ་པར་བཤད་པ་རྫོགས་སོ།། །།འདོམ་གང་གི་ནང་དུ་འགྲེང་ནའོ་ཞེས་བྱ་བ་ནི་འདོམ་གང་གི་ནང་ཚུན་ཆད་དུ་འགྲེང་ཞིང་སྡོད་ན་ཉེ་འཁོར་དེ་ཙམ་ཡིན་པའི་ཕྱིར་འདོམ་གང་གི་ཕྱི་རོལ་དུ་ནི་ཉེས་བྱས་ཏེ་མཐོང་བ་དང་ཐོས་པ་ཚུན་ཆད་དོ་ཞེས་བྱ་བའི་ཐ་ཚིག་གོ །ཉལ་པོ་བྱེད་པར་ཤོམ་པའི་ཕྱིར་ན་འགྲེང་བའི་ལྟུང་བྱེད་དེ་བཞི་བཅུ་གསུམ་པའི་ཚིག་རྣམ་པར་བཤད་པ་རྫོགས་སོ།། །།ཤུལ་དག་ཏུ་ཇི་ཙམ་དུ་གཤེགས་པ་ཞེས་བྱ་བ་ནི་གཤེགས་དགོངས་ཀྱི་ཚད་ཇི་ཙམ་དུ་གཤེགས་ཞེས་བྱ་བའི་ཐ་ཚིག་གོ །ཚོགས་དག་ཅེས་བྱ་བ་ནི་འདིར་དགོངས་པ་ལམ་གྱི་གནས་དག་ཡིན་ནོ། །བཀྲེས་པ་ཞེས་བྱ་བ་ནི་ལྟོགས་པའོ། །སྤྲང་ཟན་ཞེས་བྱ་བ་ནི་སློང་མོའོ། །སྡུག་བསྔལ་ལ་རེག་པ་ཞེས་བྱ་བ་ནི་སྡུག་བསྔལ་དང་བཅས་པའོ། །སློང་པོར་ཁུར་བས་བྱུར་བུར་བྱས་ཞེས་བྱ་བ་ནི་ཤིང་གི་ལྷུང་བཟེད་བྱུར་བུར་བཀང་ཞེས་བྱ་བའི་ཐ་ཚིག་གོ །ཉོད་པ་ཉོད་དམ་ཞེས་བྱ་བ་ལ་ཉོད་པ་ཞེས་བྱ་བ་ནི་ཟས་སོ། །ཉོད་དམ་ཞེས་བྱ་བ་ནི་ཟོས་སམ་ཞེས་བྱ་བའི་ཐ་ཚིག་གོ །དེས་ནི་ཟན་ཟོས་སམ་ཞེས་བྱ་བར་བསྟན་ཏོ། །ཁྱིམ་བདག་སྒྲེ་བྱི་ཞེས་བྱ་བ་ནི་ཁྱིམ་ན་གནས་པ་ཁོ་ན་ཡིན་ལ་མགོ་འབའ་ཞིག་བྲེགས་ཞེས་བྱ་བའི་ཐ་ཚིག་གོ །དེས་ཚིགས་སུ་བཅད་པ་དག་སྨྲས་པ་ཞེས་བྱ་བ་ལ་སོགས་པ་ཚིགས་སུ་བཅད་པ་རྣམས་ཀྱིས་ནི་བྱས་པ་མི་ཤེས་པ་ཉིད་ཀྱིས་ཉེས་པར་སྟོན་ནོ། །བྱས་པ་མི་ཤེས་པ་ནི་སས་ཀྱང་འཛིན་པར་མི་བྱེད་པས་ན་ངན་པ་ཁྱོད་ལྟ་བུ་ཅིའི་ཕྱིར་ས་ལ་འབྱིང་བར་མི་བྱེད་པ་ངོ་མཚར་ཆེ་བར་བསྟན་པའི་ཕྱིར། ངན་པ་ཅིའི་ཕྱིར་ས་ལ་འབྱིང་མི་བྱེད། །ཅེས་བྱ་བ་གསུངས་སོ། །བྱས་པ་མི་ཤེས་པའི་ལྕེ་ཡང་འགས་པར་འགྱུར་བས་ངན་པ་ཁྱོད་ལྟ་བུ་བྱས་པའི་ལྕེ་མི་འགས་པ་ཡང་ངོ་མཚར་ཆེ་བར་བསྟན་པའི་ཕྱིར། ཅིའི་ཕྱིར་ལྕེ་ཡང་ཚལ་པ་བརྒྱར་མི་འགས་ཞེས་བྱ་བ་གསུངས་སོ། །བྱས་པ་མི་ཤེས་པའི་ལུས་ལ་གནོད་སྦྱིན་དག་རྡོ་རྗེ་ལ་སོགས་པ་འཕེན་པར་བྱེད་ན་ངན་པ་ཁྱོད་ལྟ་བུ་བྱས་པ་མི་ཤེས་པའི་ལུས་ལ་གནོད་སྦྱིན་དག་རྡོ་རྗེ་ལ་སོགས་པ་དག་མི་འཕེན་པ་ཡང་ངོ་མཚར་ཆེ་བར་
བསྟན་པའི་ཕྱིར། ཁྱོད་ཀྱི་ལུས་ལ་ཅིའི་ཕྱིར་གསང་བ་དག་ཅེས་བྱ་བ་ནི། །རྡོ་རྗེ་སེར་བ་མང་དུ་མངའ་མི་འཕེན། །ཞེས་བྱ་བ་གསུངས་ཏེ། གསང་བ་དག་ཅེས་བྱ་བ་ནི་གནོད་སྦྱིན་འཇིག་རྟེན་སྐྱོང་བ་དག་གོ །རྡོ་རྗེ་སེར་བ་ཞེས་བྱ་བ་ནི་རྡོ་རྗེ་ཆར་བ་ཕྱི་བརྒྱུད་དུ་བབ་པའོ། །ཇི་ལྟར་སེང་གེའི་ལྷག་མ་ཟ་བའི་ཝ། །སེང་གེ་ཉིད་ལ་གསོད་པར་འདོད་པ་ལྟར། །དེ་བཞིན་ཁྱོད་ཀྱང་སྟོབས་བཅུའི་ཁྱོད་ཟ་ཞིང༌། །སྟོབས་བཅུ་ཉིད་ལ་སྨོད་བྱེད་མ་འཕགས་པ། །ཞེས་བྱ་བ་ནི་བྱས་པ་མི་ཤེས་པའི་དཔེའོ། །མ་འཕགས་པ་ཞེས་བྱ་བ་ནི་བོད་པའི་ཚིག་སྟེ་ཉོན་མོངས་པ་ཅན་གྱི་བློ་དང་ལྡན་པ་ཞེས་བྱ་བའི་ཐ་ཚིག་གོ ། འདི་སྐད་བསྟན་ཏེ་ཀྭ་ཡེ་མ་འཕགས་པ་ཇི་ལྟར་འཇིག་རྟེན་འདི་ནི་སེང་གེའི་ལྷག་མ་ཟ་བའི་ཝ་ནི་བྱས་པ་མི་ཤེས་པར་ཕྱིར་སེང་གེ་དེ་ཉིད་ལ་གསོད་པར་འདོད་པ་དེ་བཞིན་དུ་ཁྱོད་ཀྱང་རྒྱལ་བ་སྟོབས་བཅུ་དང་ལྡན་པ་སློབ་མ་དང་བཅས་པའི་ཕམ་འབབས་ཟས་ནི་ཁྱོད་ཟ་ཞིང་སྟོབས་བཅུ་སློབ་མ་དང་བཅས་པ་ཉིད་ལ་སྨོད་པར་བྱེད་པས་བྱས་པ་མི་ཤེས་པ་ཡིན་ནོ་ཞེས་བསྟན་ཏོ། །གང་དུ་གང་ལ་ཉེ་བར་བསྟན་བྱས་ན། །མི་ངན་འདི་འདྲས་འཚོ་བ་ཐོབ་པ་ལས། །དེ་ནི་ངེས་པར་མཛའ་བཤེས་དགྲ་རྣམས་ལ། །མཉམ་མཛད་བློ་ལྡན་ཐམས་ཅད་མཁྱེན་པ་ཡིན། །ཞེས་བྱ་བ་ནི་སངས་རྒྱས་ལ་བརྟེན་ན་མི་ངན་པ་འདི་འདྲ་བ་དག་གིས་ཀྱང་འཚོ་བ་ཐོབ་པ་ལས་ན་སངས་རྒྱས་དེ་ནི་ངེས་པ་ཁོ་ནར་མཛའ་བཤེས་དང་དགྲ་བོ་རྣམས་ལ་མཉམ་པར་མཛད་པའི་བློ་དང་ལྡན་པ་ཐམས་ཅད་མཁྱེན་པ་ཡིན་པར་མངོན་ནོ་ཞེས་བྱ་བ་སྟོན་ཏོ། །གང་དུ་ཞེས་བྱ་བ་ནི་གནས་སོ། །གང་ལ་ཞེས་བྱ་བ་ནི་སངས་རྒྱས་ལའོ། །ཉེ་བར་བསྟེན་བྱས་ན་ཞེས་བྱ་བ་ནི་སྐྱབས་སུ་གསོལ་ནའོ། །མི་ངན་འདི་འདྲས་ཞེས་བྱ་བ་ནི་མི་ངན་པ་བྱས་པ་མི་ཤེས་པ་འདི་དྲ་བ་དག་གིས་སོ། །འཚོ་བ་དག་ཐོབ་པ་ལས་ཞེས་བྱ་བ་ནི་ཟན་རྙེད་པ་ལས་སོ། །དེ་ནི་ཞེས་བྱ་བ་ནི་སངས་རྒྱས་སོ། །མཉམ་མཛད་བློ་ལྡན་ཞེས་བྱ་བ་ནི་རྗེས་སུ་ཆགས་པ་དང་ཁོང་ཁྲོ་བ་མེད་པའི་ཕྱིར་སེམས་མཉམ་པར་མཛད་དོ། །མི་རྣམས་གང་དག་བྱས་པ་མི་ཤེས་པ། །དེ་དག་ཁྱི་བས་ཤིན་ཏུ་ངན་པར་བསམ། །ཞེས་བྱ་བ་ནི་མི་གང་དག་བྱས་པ་མི་ཤེས་པ་དེ་དག་ནི་ཁྱི་དག་པས་ཀྱང་ཤིན་ཏུ་ངན་པ་ཡིན་པར་ཁོ་བོས་བསམས་སོ་ཞེས་བྱ་བའི་ཐ་ཚིག་
གོ །འདིར་རྒྱུ་བ་སྟན་པའི་ཕྱིར། ཁྱི་ཡང་མི་ལ་བྱས་པ་ཤེས་སྣང་ན། །སྤྲུལ་འདྲའི་མི་དག་དུག་ནི་གཏོང་བར་བྱེད། །ཅེས་བྱ་བ་གསུངས་ཏེ། འདི་ལྟར་ཁྱི་ཡང་བདག་པོར་གྱུར་པའི་མི་དག་ལ་ཟས་ཀྱི་ལྷག་མ་ལ་སོགས་པ་ཅུང་ཟད་ཙམ་བྱིན་པའི་བྱས་པ་ཤེས་ཏེ། བདག་པོའི་ཁྱིམ་ལ་སོགས་པ་བསྲུང་བར་གནས་པའི་ཕྱིར་རོ། །མི་བྱས་པ་མི་ཤེས་པ་སྤྲུལ་དུག་མྱུར་དུ་ཁྱབ་པར་བྱེད་པ་དང་འདྲ་བའི་སྐྱེ་བོ་ངན་པ་དག་ནི་དུག་གཏོང་བར་བྱེད་དེ་ཡོན་ཏན་མ་ཡིན་པ་སྒྲོགས་པར་བྱེད་པའི་ཕྱིར་ཏེ། དེ་བས་མི་གང་དག་བྱས་པ་མི་ཤེས་པ་དེ་དག་ནི་ཁྱི་བས་ཀྱང་ཤིན་ཏུ་ངན་པར་བསམས་སོ་ཞེས་བྱ་བའི་ཐ་ཚིག་གོ །རེ་ཞིག་འདུལ་བ་ལ་བསླབ་པའི་གཞི་འཆའ་བར་མི་མཛད་དོ་ཞེས་བྱ་བ་ནི་བུད་མེད་ཀྱི་ཡུལ་ལ་སྦྱིན་པ་ལམ་ཞུགས་པའི་ཕྱིར་རོ་ཞེས་བྱ་བར་དགོངས་པས་སོ། །གཟུགས་ཅན་རྒྱན་ཞེས་བྱ་བ་ནི་མཆན་གྱི་ཕྱོགས་མཛེས་པའི་ཕྱིར་རོ། །གཟུགས་ཅན་གསལ་བ་ཞེས་བྱ་བ་ནི་ཐོན་ཀོར་མཛེས་པའི་ཕྱིར་རོ། །གཟུགས་ཅན་ལྟ་བུའི་ཆོས་དང་ལྡན་པ་ཞེས་བྱ་བ་ནི་འཇིག་རྟེན་ལ་བསོད་ནམས་གཟུགས་ཅན་དུ་གྲགས་པ་ལྟ་བུ་དང་ལྡན་པའོ། །བསྲེག་བྱས་བཏབ་པའི་མེ་ལྟ་བུ་ཞེས་བྱ་བ་ནི་ཞུན་མར་གྱི་རྒྱུན་གྱིས་བཏབ་པའི་མེ་ལྟ་བུའོ། །གསེར་གྱི་སྣོད་ན་འདུག་པའི་མར་མེ་ལྟ་བུ་ཞེས་བྱ་བ་ནི་འོད་གསལ་བའོ། །གསེར་གྱི་རི་བོ་འགྲོ་བ་ལྟ་བུ་ཞེས་བྱ་བ་ནི་བརྗིད་བག་ཆགས་པའོ། །གསེར་གྱི་མཆོད་སྡོད་ཞེས་བྱ་བ་ནི་གསེར་གྱི་ཀ་བའོ། །གྲགས་པ་དང༌། གསལ་བ་དང༌། མི་བསྙེངས་པ་དང༌། དྲི་མ་མེད་པ་དང༌། རྣམ་པར་དག་པའི་བློ་དང་ལྡན་པ་ཞེས་བྱ་བ་ནི་སངས་རྒྱས་བཅོམ་ལྡན་འདས་ཏེ། དེ་མཐོང་ཞེས་བྱ་བར་སྦྱར་རོ། །དེ་ལ་གྲགས་པ་ཞེས་བྱ་བ་ནི་རབ་ཏུ་གྲགས་པའོ། །གསལ་བ་ཞེས་བྱ་བ་ནི་སྤྱོད་པ་གཡེར་བའོ། །མི་བསྙེངས་པ་ཞེས་བྱ་བ་ནི་གགས་མེད་པའོ། །དྲི་མ་མེད་པ་ཞེས་བྱ་བ་ནི་ཉོན་མོངས་པ་མེད་པའོ། །རྣམ་པར་དག་པའི་ཞེས་བྱ་བ་ནི་ཟག་པ་མེད་པའོ། །དགེ་བའི་རྩ་བ་བསྩགས་པ་ཞེས་བྱ་བ་ནི་ཐར་པའི་ཆ་དང་མཐུན་པ་འཕངས་པའོ། །ཉམས་བད་བ་ཞེས་བྱ་བ་ནི་རུང་བ་ཉིད་དོ། །འདི་དག་དང་བདག་ཉིད་ཀྱི་ཀཱཪྵཱ་པ་ཎ་གཞན་དག་བསྲེས་ཏེ་ཞལ་ཟས་བསོད་པ་སྟ་གོན་གྱི་ས་ལ་ཞེས་བྱ་བ་ནི་བསླང་བ་སྟེ་ཁྱིམ་བདག་
གིས་འཕགས་པ་ཀུན་དགའ་བོ་ལ་སྔ་ནས་བསྟབས་ཟིན་པས་ཉེས་པ་མེད་པར་ཤེས་པར་བྱའོ། །དྲི་མའི་རྩབ་ཅན་ཞེས་བྱ་བ་ལ། རྡུལ་དང་སྣུམ་གྱི་དྲི་མ་ནི་འདིར་དྲི་མ་ཞེས་བྱ་བའོ། །དེར་རྡུལ་ཆགས་པ་ནི་རྫབ་པོ། །གཅེར་བུ་བ་དང་གཅེར་བུ་མ་ཞེས་བྱ་བ་ནི་སྒྲེན་མོའོ། །ཀུན་དུ་རྒྱུ་དང་ཀུན་དུ་རྒྱུ་མོ་ཞེས་སྨོས་པས་ནི་གཅེར་བུ་པ་དང་གཅེར་བུ་མ་ཉིད་ཡི་དམ་དུ་ཡང་དག་པར་བླང་བ་སྔོན་དུ་བཏང་བ་ཡིན་པར་བསྟན་ཏོ། །ཉེ་དུ་ཡིན་ན་ལྟུང་བ་མེད་པ་ནི་ཉེ་དུ་ཉིད་ཡིན་ན་མུ་སྟེགས་ཅན་ལ་མཆོད་པ་བྱེད་པ་ཡིན་པར་མི་འགྱུར་བས་ལྟུང་བ་མེད་དོ། །ནད་པ་ཡིན་ན་ལྟུང་བ་མེད་པ་ནི་སྙིང་བརྩེ་བར་བྱ་བ་ཡིན་པའི་ཕྱིར་རོ།། སྡིག་པ་ཅན་གྱི་ལྟ་བའི་རྣམ་པ་ལས་དབྲལ་བར་འདོད་པ་ཡིན་ན་ལྟུང་བ་མེད་དོ་ཞེས་བྱ་བ་ནི་ཆོས་ལ་གཞུག་པའི་ཕྱིར་རོ། །དུམ་བུར་བྱས་ཏེ་སྦྱིན་པ་ལ་ལྟུང་བ་མེད་པ་ནི་གུས་པ་མ་ཡིན་པའི་ཕྱིར་རོ། །གཞན་སྦྱིན་དུ་འཇུག་པ་ལ་ལྟུང་བ་མེད་དོ་ཞེས་བྱ་བ་ནི་ཕག་ནས་སྦྱིན་དུ་འཇུག་པའོ། །མངོན་སུམ་དུ་སྦྱིན་དུ་འཇུག་པ་ནི་ཉེས་བྱས་ཏེ་མཆོད་པའི་རྣམ་པ་ཡིན་པའི་ཕྱིར་རོ། །གཅེར་བུ་ལ་སྦྱིན་པའི་ལྟུང་བྱེད་དེ་བཞི་བཅུ་བཞི་པའི་ཚིག་རྣམ་པར་བཤད་པ་རྫོགས་སོ།། །།གསུས་པོ་ཆེ་ཞེས་བྱ་བ་ནི་ལྟོ་བ་ཆེ་བའོ། །ཏིལ་གྱི་ཆུ་ཞེས་བྱ་བ་ནི་ཤི་བ་དག་ལ་ཏིལ་དང་བཅས་པའི་ཆུ་སྦྱིན་པ་གང་ཡིན་པའོ། །གླང་པོ་ཆེའི་ཕྲུ་གུ་འདྲ་ཞེས་བྱ་བ་ནི་བ་གླང་གི་ཕྲུ་གུ་འདྲ་བའོ། །གཞལ་མེད་ཁང་འདྲ་ཞེས་བྱ་བ་ནི་ཁང་པ་བརྩེགས་པ་དང་མཉམ་པའོ། །གནོད་སྦྱིན་གདུག་པ་འདྲ་ཞེས་བྱ་བ་ནི་གནོད་སྦྱིན་གཙོ་བོ་དང་མཉམ་པའོ། །རས་ཡུག་ཆེན་གླེགས་པར་འཚལ་བ་ཞེས་བྱ་བ་ནི་རས་མཚོན་གྱིས་དྲས་པ་གྱོན་པའོ། །ཆས་པ་ཞེས་བྱ་བ་ནི་གཡུལ་འགྱེད་པ་ལ་མངོན་པར་ཕྱོགས་པའོ། །གཡུལ་འགྱེད་པར་མངོན་པར་དགའ་བ་ཞེས་བྱ་བ་ནི་གཡུལ་འགྱེད་པར་འདོད་པའོ། །དགེ་སློང་བསོད་སྙོམས་ལ་ཞུགས་པ་ལ་དམག་ལ་འགྲོ་བ་ལ་སོགས་པ་ལ་ནི་ཞར་ལ་དམག་མཐོང་བ་ཡིན་པས་ལྟུང་བ་མེད་དོ། །དམག་ལ་ལྟ་བའི་ལྟུང་བྱེད་དེ་བཞི་བཅུ་ལྔ་པའི་ཚིག་རྣམ་པར་བཤད་པ་རྫོགས་སོ།། །།ཕྲུ་བ་ཞེས་བྱ་བ་ནི་དམག་གོ །སྲོག་ཤིང་དག་ནས་ཞེས་བྱ་བ་ནི་འཕང་ལོ་འཛིན་པའི་ཤིང་དག་ནས་སོ། །རྒྱལ་པོ་ལ་སོགས་པ་ན་རེ་འདུག་ཤིག་ཅེས་ཟེར་བ་ལ་ལྟུང་བ་མེད་དོ་ཞེས་བྱ་བ་ནི་གཞན་གྱི་དབང་
ཡིན་པའི་ཕྱིར་རོ། །བར་ཆད་བརྒྱད་པོ་དག་ལས་བར་ཆད་གང་ཡང་རུང་བ་ཉེ་བར་གནས་པར་གྱུར་ན་ལྟུང་བ་མེད་དོ་ཞེས་བྱ་བ་ནི་སྡུག་བསྔལ་ཡོངས་སུ་བསྐྱབ་བའི་ཕྱིར་རོ། །དམག་གི་ནང་ན་གནས་པའི་ལྟུང་བྱེད་དེ་བཞི་བཅུ་དྲུག་པའི་ཚིག་རྣམ་པར་བཤད་པ་རྫོགས་སོ།། །། གཡུལ་ཞེས་བྱ་བ་ནི་ཟླ་བ་ལ་སོགས་པའི་རྣམ་པར་གནས་པའི་དམག་གོ །རྒྱལ་མཚན་གྱི་མཆོག་ཅེས་བྱ་བ་ནི་རྟགས་མཚན་ནོ། །དཔུང་གི་མཆོག་ཅེས་བྱ་བ་ནི་རུང་བའོ། །བཀོད་ཅིང་བཤམས་པའི་དམག་ཅེས་བྱ་བ་ནི་ནམ་མཁའ་ལྡིང་གི་འདབ་མ་ལ་སོགས་པ་ལྟ་བུར་གནས་པའི་དམག་གོ ། ལྟ་བ་ཉམས་སུ་མྱོང་བར་བྱས་ཞེས་བྱ་བ་ནི་དེའི་ནང་དུ་ཞུགས་ཏེ་བལྟ་བར་བྱའོ་ཞེས་བྱ་བའི་ཐ་ཚིག་གོ །གླང་པོ་ཆེ་བཅོས་མ་ཞེས་བྱ་བ་ནི་གླང་པོ་ཆེ་སྒྱུ་མ་སྟེ་ཀོ་བ་ལ་སོགས་པ་ལས་བྱས་པའོ། །རྫོང་ནས་རླུགས་ཏེ་བྱུང་ཞེས་བྱ་བ་ནི་མཁར་ནས་འཕུངས་ཏེ་བྱུང་བའོ། །ཁྲོམ་གྱི་རུ་སྣ་ཞེས་བྱ་བ་ནི་གཡུལ་འགྱེད་པའི་མིའོ། །ནང་པར་སྔ་བ་ཁོ་ནར་ཞེས་བྱ་བ་ནི་ནང་པར་གྱི་དུས་ཏེ་ཉི་མ་འཆར་ཀ་ཞེས་བྱ་བའི་ཐ་ཚིག་གོ །བཤམས་པ་འཁྲུག་ཏུ་འགྲོ་ཞེས་བྱ་བ་ལ། བཤམས་པ་འཁྲུག་ཅེས་བྱ་བ་ནི་བཤམས་པ་ཉམས་པའོ། །འགྲོ་བ་ཞེས་བྱ་བ་ནི་བྱེད་པའོ་ཞེས་ཁ་ཅིག་འཆད་དོ། །ཁ་ཅིག་ན་རེ་བཤམས་པ་འཁྲུག་ཅེས་བྱ་བ་ནི་བཤམས་བ་གློང་བའོ། །དེར་འཇུག་པ་ནི་འགྲོ་བའོ་ཞེས་ཟེར་རོ། །འབྲུའི་ཁ་ལྟ་བུ་ཞེས་བྱ་བ་ནི་མདུན་དུ་ཡང་རུ་བ་དངར་རྒྱབ་ཏུ་ཡང་རུ་བ་དངར་ལ། དབུས་ན་རྒྱལ་པོ་འདུག་པ་སྟེ་འབྲུའི་འབྲས་བུའི་རྣམ་པ་ལྟར་དམག་བཤམས་པའོ། །ཤིང་རྟའི་དབྱིབས་ལྟ་བུ་ཞེས་བྱ་བ་ནི་མདུན་དུ་ཡང་རུ་བ་དངར། གློར་ཡང་རུ་བ་དངར་ལ། རྒྱབ་ན་རྒྱལ་པོ་འདུག་སྟེ། ཤིང་རྟའི་དབྱིབས་འདྲ་བར་གྲུ་གསུམ་དུ་བཤམས་པའོ། །ཟླ་གམ་གྱི་རྣམ་པ་ལྟ་བུ་ཞེས་བྱ་བ་ནི་མདུན་དུ་ཡང་རུ་བ་དངར། རྒྱབ་ཏུ་ཡང་རུ་བ་དངར། གློར་ཡང་དངར་ལ། དབུས་ན་རྒྱལ་པོ་འདུག་པ་སྟེ་ཟླ་གམ་གྱི་རྣམ་པ་ལྟ་བུར་དམག་བཤམས་པའོ། །ནམ་མཁའ་ལྡིང་གི་འདབ་མ་ལྟ་བུ་ཞེས་བྱ་བ་ནི་གློར་རུ་བ་དངར་མདུན་ན་རྒྱལ་པོ་འདུག་པ་སྟེ། ནམ་མཁའ་ལྡིང་གི་འདབ་མ་ལྟར་གློ་གཡས་གཡོན་དུ་རིང་བར་དམག་བཤམས་པའོ། །གོ་བསྐོན་པ་དང་གོ་མ་བསྐོན་པ་ཞེས་བྱ་བ་ནི་བྱེ་
བྲག་གིས་ཆས་པ་དང་མ་ཆས་པ་ཡིན་པར་བསྟན་པའི་ཕྱིར་རོ། །ཤིང་རྟ་བཅས་པ་ཞེས་བྱ་བ་ནི་བརྒྱན་པའོ། །དཔུང་གི་ཡན་ལག་ཉམས་སུ་མྱོང་བར་བྱེད་པའི་ལྟུང་བྱེད་དེ་བཞི་བཅུ་བདུན་པའི་ཚིག་རྣམ་པར་བཤད་པ་རྫོགས་སོ།། །།སོར་མོ་གཅིག་གིས་རྡེག་པར་བྱེད་ན་ཞེས་བྱ་བ་ལ་སོགས་པ་ནི་གང་གི་ཚེ་སོར་མོ་ཐ་དད་པས་རྡེག་པར་བྱེད་པ་དེའི་ཚེ་ན། རྡེག་པར་ཐ་དད་པར་བསམས་པའི་ཕྱིར་ལྟུང་བ་ཡང་ཐ་དད་པར་འགྱུར་ལ། གང་གི་ཚེ་གཅིག་ཉིད་ཀྱིས་རྡེག་པར་བྱེད་པ་དེའི་ཚེ་ནི་རྡེག་པ་ཐ་དད་པར་སེམས་པ་མེད་པའི་ཕྱིར་ལྟུང་བ་ཡང་གཅིག་པ་ཉིད་དུ་ཤེས་པར་བྱའོ། །བརྣངས་པ་ཞེས་བྱ་བ་ནི་ཟས་མགུལ་བར་ཐོགས་པའོ། །ཐལ་ལྕག་གི་རིག་སྔགས་ཞེས་བྱ་བ་ནི། སྔགས་པ་གང་གིས་བཟླས་བརྗོད་བྱས་ནས་ཐལ་ལྕག་གིས་བསྣུན་ནས་འཚོ་བར་འདོད་པར་བྱེད་པ་སྟེ་འདི་ལ་ནི་འཁྲུག་པ་མེད་པའི་ཕྱིར་ལྟུང་བ་མེད་དོ། །རྡེག་པའི་ལྟུང་བྱེད་དེ་བཞི་བཅུ་བརྒྱད་པའི་ཚིག་རྣམ་པར་བཤད་པ་རྫོགས་སོ།། །།གཟས་ཞེས་བྱ་བ་ནི་བཤམས་པའོ། །ཐལ་མོ་ཞེས་བྱ་བ་ནི་ཐལ་ལྕག་གོ །ཐུར་མའི་ཆགས་པ་ཞེས་བྱ་བ་ནི་ཐུར་མའི་བམ་པོའོ། །ཐག་པའི་ཆུན་པོ་ཞེས་བྱ་བ་ནི་ཐག་པ་བསྡོམས་པའོ། །གཟས་པའི་ལྟུང་བྱེད་དེ་བཞི་བཅུ་དགུ་པའི་ཚིག་རྣམ་པར་བཤད་པ་རྫོགས་སོ།། །།སོ་སོར་བརྟག་གམ་ཞེས་བྱ་བ་ནི་མཐོ་བཙམས་པ་ཞེས་བྱ་བའོ། །རྣལ་འབྱོར་སྤྱོད་པའི་ས་ཞེས་བྱ་བ་ནི་བསམ་གཏན་པའི་ཡུལ་ཏེ། སྙོམས་པར་འཇུག་པ་ཞེས་བྱ་བའི་ཐ་ཚིག་གོ །རྒྱལ་བྱེད་ཀྱི་ཚལ་གྱི་མདོ་ཞེས་བྱ་བ་ནི་ཡང་དག་པར་ལྡན་པའི་ལུང་ལས་འབྱུང་སྟེ། གླེང་གཞི་ནི་མཉན་ཡོད་ན་སྟེ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ཀྱི་མ་ཡིན་པ་གང་ཡིན་པ་དེ་སྤོངས་ཤིག །ཁྱེད་ཀྱིས་ཆོས་དེ་སྤང་བར་བྱའོ། །ཁྱེད་ཀྱིས་ཆོས་དེ་སྤངས་ན་ཡུན་རིང་པོའི་དོན་དང་ཕན་པར་འགྱུར་རོ། །དགེ་སློང་དག་ཁྱེད་ཀྱི་མ་ཡིན་པ་གང་ཞེ་ན། དགེ་སློང་དག་མིག་ནི་ཁྱེད་ཀྱི་མ་ཡིན་ཏེ་སྤོངས་ཤིག །ཁྱེད་ཀྱིས་ཆོས་དེ་སྤང་བར་བྱའོ། །ཁྱེད་ཀྱིས་ཆོས་དེ་སྤངས་ན་ཡུན་རིང་པོའི་དོན་དང་ཕན་པར་འགྱུར་རོ། །དགེ་སློང་དག །རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ནི་ཁྱེད་ཀྱི་མ་ཡིན་ཏེ་སྤོངས་ཤིག།
ཁྱོད་ཀྱིས་ཆོས་དེ་སྤངས་ན་ཡུན་རིང་པོའི་དོན་དང་ཕན་པར་འགྱུར་རོ། །དགེ་སློང་དག་ཇི་སྙམ་དུ་སེམས། རྒྱལ་བྱེད་ཚལ་དེ་ན་རྩྭ་དང༌། ཤིང་དང༌། ལོ་མ་དང༌། འདབ་མ་གང་ཡིན་པ་དེ་སྐྱེ་བོས་བརྐུས་སམ། བསྲེགས་སམ། བཅད་དམ། བཤིག་གམ། ཆུད་གསན་ཏམ་རྐྱེན་ཇི་ལྟ་བ་བཞིན་དུ་བྱས་ན་འདི་ལྟར་ཁྱེད་འདི་སྙམ་དུ་བདག་གི་འདི་སྐྱེ་བོས་བརྐུས་སམ། བསྲེགས་སམ། བཅད་དམ། བཤིག་གམ། ཆུད་གསན་ཏམ་རྐྱེན་ཇི་ལྟ་བ་བཞིན་དུ་བྱས་སོ་སྙམ་དུ་སེམས་སམ། བཙུན་པ་མི་སེམས་སོ། །དེ་ཅིའི་སླད་དུ་ཞེ་ན་བཙུན་པའི་འདི་ལ་བདག་གམ་བདག་གི་མ་མཆིས་པའི་སླད་དུའོ། །དགེ་སློང་དག་དེ་བཞིན་དུ་ཁྱེད་ཀྱི་མ་ཡིན་པའི་དེ་སྤོངས་ཤིག །ཁྱེད་ཀྱིས་ཆོས་དེ་སྤང་བར་བྱའོ། །ཁྱེད་ཀྱིས་དེ་སྤངས་ན་ཡུན་རིང་པོའི་དོན་དང་ཕན་པར་འགྱུར་རོ། །དགེ་སློང་དག་ཇི་སྙམ་དུ་སེམས་མིག་རྟག་གམ་མི་རྟག་སྙམ། བཙུན་པ་མི་རྟག་གོ ། གང་མི་རྟག་པ་དེ་སྡུག་བསྔལ་ལམ་སྡུག་བསྔལ་མ་ཡིན་སྙམ། བཙུན་པ་སྡུག་བསྔལ་ལོ། །མི་རྟག་པ་སྡུག་བསྔལ་བ་གང་ཡིན་པ་དེ་ནི་རྣམ་པར་འགྱུར་བའི་ཆོས་ཡིན་ནོ། །འདི་ལྟར་དེ་ལ་འཕགས་པ་ཉན་ཐོས་ཐོས་པ་དང་ལྡན་པ་དག་འདི་ནི་བདག་གིའོ། །འདི་ནི་བདག་གི་བདག་གོ་ཞེས་བདག་ཏུ་ཁས་ལེན་ཏམ། བཙུན་པ་མི་ལེན་ཏོ། །དགེ་སློང་དག་ཇི་སྙམ་དུ་སེམས། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་རྟག་གམ་མི་རྟག་སྙམ། བཙུན་པ་མི་རྟག་གོ །གང་མི་རྟག་པ་དེ་སྡུག་བསྔལ་ལམ་སྡུག་བསྔལ་མ་ཡིན་སྙམ། བཙུན་པ་སྡུག་བསྔལ་ལོ། །མི་རྟག་པ་དང་སྡུག་བསྔལ་བ་གང་ཡིན་པ་དེ་རྣམ་པར་འགྱུར་བའི་ཆོས་ཡིན་ནོ། །འདི་ལྟར་དེ་ལ་འཕགས་པའི་ཉན་ཐོས་ཐོས་པ་དང་ལྡན་པ་དག་ནི་བདག་གིའོ། །འདི་ནི་བདག་གོ །འདི་ནི་བདག་གི་བདག་གོ་ཞེས་བདག་ཏུ་ཁས་ལེན་ཏམ། བཙུན་པ་མི་ལེན་ཏོ། །དགེ་སློང་ལྟ་བས་ན་མིག་ཅུང་ཟད་འདས་པའམ། མ་འོངས་པའམ། ད་ལྟར་བྱུང་བའམ། ནང་གིའམ། ཕྱི་རོལ་གྱི་འམ། རགས་པའམ། ཆ་ཕྲ་བའམ། ངན་པའམ། བཟང་པོའམ་ཐ་རིང་པོའམ། ཐག་ཉེ་བ་གང་ཡིན་པ་དེ་ནི་ཐམས་ཅད་འདི་ནི་བདག་གི་མ་ཡིན་ནོ། །འདི་ནི་བདག་མ་ཡིན་ནོ། །འདི་ནི་བདག་གི་བདག་མ་ཡིན་ནོ་ཞེས་
བྱ་བ་དེ་ལྟར་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་དུ་བལྟ་བར་བྱའོ། །དེ་བཞིན་དུ་རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ཅུང་ཟད་འདས་པའམ། མ་འོངས་པའམ། ད་ལྟར་བྱུང་བའམ། ནང་གི་འམ། ཕྱི་རོལ་གྱི་འམ། རགས་པ་འམ། ཆ་ཕྲ་བ་འམ། ངན་པ་འམ། བཟང་པོ་འམ། ཐག་རིང་བ་འམ། ཐག་ཉེ་བ་གང་ཡིན་པ་དེ་ཐམས་ཅད་ལ། འདི་ནི་བདག་གི་མ་ཡིན་ནོ། །འདི་ནི་བདག་མ་ཡིན་ནོ་ཞེས་བྱ་བ་དེ་ལྟར་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་དུ་བལྟ་བར་བྱའོ། །དགེ་སློང་དག་འདི་ལྟར་འཕགས་པ་ཉན་ཐོས་ཐོས་པ་དང་ལྡན་པ་ནི་ནང་གི་སྐྱེ་མཆེད་དྲུག་པོ་འདི་དག་ལ་འདི་ནི་བདག་གི་མ་ཡིན་ནོ། །འདི་ནི་བདག་མ་ཡིན་ནོ། །འདི་ནི་བདག་གི་བདག་མ་ཡིན་ནོ་ཞེས་བྱ་བར་ཡང་དག་པར་རྗེས་སུ་བལྟ་སྟེ། དེ་དེ་ལྟར་ཡང་དག་པར་རྗེས་སུ་ལྟ་ན་འཇིག་རྟེན་ལ་ཆུང་ཟད་ཀྱང་མི་ལེན་ཏོ། །མི་ལེན་ན་ཡོངས་སུ་གདུང་བར་མི་འགྱུར་རོ། །ཡོངས་སུ་གདུང་བ་མེད་ན་སོ་སོར་ཉིད་ལ་བདག་གི་ཟག་པ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་ཡོངས་སུ་མྱ་ངན་ལས་འདའོ་ཞེས་གསུངས་པ་ཡིན་ནོ། །མདོ་སྡེའི་མཐའ་ལ་རྟོན་ཅེས་བྱ་བ་ནི་ངེས་པའི་དོན་གྱི་མདོ་སྡེ་ལ་རྟོན་པའོ། །འཛུམ་ཕྱུང་ཞེས་བྱ་བ་ནི་བགད་པའོ། །གཞུག་པ་འཛུད་པ་ཞེས་བྱ་བ་ནི་ཡན་ལག་གི་རྣམ་པ་འཛུད་པའོ། །བཅབ་པའི་སེམས་ཞེས་བྱ་བ་ནི་མཁྱུད་པའི་བསམ་པའོ། །དགེ་སློང་གི་ཚུལ་གྱིས་བར་ཆད་ཅེས་བྱ་བ་ནི། ལམ་བསྒོམ་པའི་གེགས་སོ། །ཚངས་པར་སྤྱོད་པའི་བར་ཆད་ཅེས་བྱ་བ་ནི། དེ་དགེ་སློང་གི་དངོས་པོ་དང་མི་མཐུན་པའོ། །དགེ་འདུན་དབྱེ་བ་ཞེས་བྱ་བ་ནི་འཁོར་ལོ་དབྱེ་བའོ། །དགེ་འདུན་འཁྲུགས་པ་ཞེས་བྱ་བ་ནི་དགེ་འདུན་འཐབ་པའོ། དགེ་འདུན་གཉིས་སུ་འགྱུར་བ་ཞེས་བྱ་བ་ནི་ལས་དབྱེ་བའོ། །དགེ་འདུན་ཐ་དད་པར་འགྱུར་ཞེས་བྱ་བ་ནི་གནས་ལ་སོགས་པ་དབྱེ་བའོ། །གནས་ངན་ལེན་འཆབ་པའི་ལྟུང་བྱེད་དེ་ལྔ་བཅུ་པའི་ཚིག་རྣམ་པར་བཤད་པ་རྫོགས་སོ།། །།ཀླན་ཀ་ཚོལ་ཞེས་བྱ་བ་ནི་ཚོལ་བ་སྟེ། ཟན་བཅད་པའི་དོན་དུ་རྩོལ་བར་བྱེད་པའོ། །ཇི་ཙམ་འདོད་པ་ཞེས་བྱ་བ་ནི་ཇི་ཙམ་དགའ་བའོ། །སྨྲ་བ་ཞེས་བྱ་བ་ནི་ཕེབས་པར་སྨྲ་བའོ། །འདུག་པ་ཞེས་བྱ་བ་ནི་རྐུབ་ཚོས་འཇོག་པའོ། །
ཆེད་དུ་བསམས་ཏེ་དགེ་སློང་གི་ཟན་གཅོད་དུ་འཇུད་ན་ཞེས་བྱ་བ་ནི་ཟན་གཅོད་དུ་གཞུག་པའི་ཕྱིར་རྩོལ་བར་བྱེད་ཅེས་བྱ་བའི་ཐ་ཚིག་གོ །ཟན་གཅོད་དུ་འཇུད་པའི་ལྟུང་བྱེད་དེ་ལྔ་བཅུ་གཅིག་པའི་ཚིག་རྣམ་པར་བཤད་པ་རྫོགས་སོ།། །།དྲང་ཞེས་བྱ་བ་ནི་དྲང་བའོ། །བདེ་བ་ཞེས་བྱ་བ་ནི་འཇིགས་པ་མེད་པའོ། །ལམ་ཁ་ཞེས་བྱ་བ་ནི་ལམ་སྲོལ་ལོ། །བསྲེལ་བགྱིའོ་ཞེས་བྱ་བ་ནི་བསྐྱལ་བར་བྱ་བའོ། །དགེ་བའི་རྩ་བ་འདི་ཞེས་བྱ་བ་ནི་ཆགས་པ་མེད་པ་ལ་སོགས་པའོ། །ལེགས་པར་སྤྱད་པ་འདིར་ཞེས་བྱ་བ་ནི་ལུས་དང་ངག་གི་ལས་ཀྱིས་སོ། །བསྐལ་བ་བཅུ་གསུམ་དུ་ཞེས་བྱ་བ་ནི་བར་གྱི་བསྐལ་པ་བཅུ་གསུམ་དུའོ། །ལོག་པར་ལྟུང་བ་ཞེས་བྱ་བ་ནི་ངན་སོང་གི་འགྲོ་བའོ། །སྲིད་པ་ཐ་མ་ཞེས་བྱ་བ་ནི་སྐྱེ་བ་ཐ་མ་སྟེ་རྣམ་པར་སྨིན་པའི་འབྲས་བུའོ། །གནས་ཞེས་བྱ་བ་ནི་སེམས་ཀྱི་རྒྱུད་དེ་བདེ་བ་དང་སྡུག་བསྔལ་བ་ལ་སོགས་པ་འདུག་པའི་གནས་ཡིན་པའི་ཕྱིར་རོ། །གཟུགས་ཞེས་བྱ་བ་ནི་གཟུགས་ཀྱི་ལུས་སོ། །ལུས་ཐ་མ་ཐོབ་པ་ཞེས་བྱ་བ་ནི་སྲོག་ལ་སོགས་པ་མི་ལྡན་པའི་རྒྱུན་ནོ། །ལས་དེ་ཉིད་ཅེས་བྱ་བ་ནི་ཡིད་ཀྱི་ལས་སོ། །ཤིང་ལྗོན་པ་ཁོང་སྟོང་ཞེས་བྱ་བ་ནི་ཤིང་ལྗོན་པ་སྐམ་པའོ། །གྲངས་པ་དག་གིས་ཞེས་བྱ་བ་ནི་མི་གྲང་བཞིན་དུ་གྲངས་པར་འཆོས་པ་དག་གིས་ཏེ། གྲངས་པས་ཟིལ་གྱིས་གནོན་པ་དག་གིས་ཞེས་བྱ་བའི་ཐ་ཚིག་གོ །སྒྲ་ཅལ་ཞེས་ཟེར་བ་ཞེས་བྱ་བ་ནི་ཆུའི་ནང་དུ་ཤིང་སྒྱེལ་བའི་སྒྲ་མི་གསལ་བའོ། །ཅལ་ཅལ་ཟེར་བ་བྱུང་ངོ་ཞེས་བྱ་བ་ནི་རི་བོང་དང་དག་གིས་སྒྲ་དེ་ཐོས་ནས་ཅལ་ཅལ་ཟེར་བ་ཞེས་པའི་སྲོག་ཆགས་ཨ་ཙི་བ་ཞིག་ཡིན་པར་བརྟགས་ཏེ་བྱུང་ངོ༌། །འོང་ངོ་ཞེས་བྱ་བའི་ཐ་ཚིག་གོ །རི་དྲུང་དང་ཉེ་བ་ཞེས་བྱ་བ་ནི་རི་ཤོད་དང་ཉེ་བའོ། །རལ་པ་ཅན་ཞེས་བྱ་བ་ནི་པདྨའི་གེ་སར་དང་འདྲ་བའི་སྦུ་རལ་པ་མཐོན་པོ་དག་དེ་ལ་ཡོད་ཅེས་བྱ་བའི་ཐ་ཚིག་གོ །ཅོད་པན་ལྟ་བུ་དང་ལྡན་པ་ཞེས་བྱ་བ་ནི་ཅོད་པན་གྱི་རྣམ་པ་ལྟ་བུ་ཁ་དོག་དཀར་པོའི་སྤུ་དག་སྐྱེ་བ་དང་ལྡན་པ་ཞེས་བྱ་བའི་ཐ་ཚིག་གོ །རབ་ཏུ་གྲགས་པ་ཞེས་བྱ་བ་ནི་འཇིག་རྟེན་ན་གྲགས་པ་སྟེ་དེས་ཐམས་ཅད་དུ་འགྲོ་བར་མི་བྱའོ་ཞེས་བྱ་བར་བསམས་སོ། །རྐང་པ་བཞི་མེད་པ་ཞེས་བྱ་བ་ནི་རྐང་པ་བཞི་པས་སྟོང་པར་རོ། །རེ་ཞིག་འདུལ་བ་ལ་བསླབ་པའི་གཞི་འཆའ་བར་ནི་མི་མཛད་དོ། །
ཞེས་བྱ་བ་ནི་མེ་ལ་རེག་པའི་སྐབས་འཇིག་རྟེན་ན་སྨད་པར་འགྱུར་བ་མེད་པའི་ཕྱིར་རོ། །འབར་ཞེས་བྱ་བ་ནི་ཆུང་ཟད་འབར་བའོ། །རབ་ཏུ་འབར་བ་ཞེས་བྱ་བ་ནི་འབྲིང་ཚད་དུ་མཆེད་པའོ། །ཀུན་དུ་རབ་ཏུ་འབར་བ་ཞེས་བྱ་བ་ནི་ཆེར་འབར་བའོ། །མེ་ལྕེ་གཅིག་ཏུ་གྱུར་ཅིང་འབར་བ་ཞེས་བྱ་བ་ནི་ལྷན་ཅིག་ཏུ་འབར་བར་གྱུར་པའོ། །འཇིགས་པ་མེད་པ་ཞེས་བྱ་བ་ནི་ད་ལྟར་གྱི་འཇིགས་པའི་རྒྱུ་ལས་གྲོལ་བའོ། །བག་ཚ་བ་མེད་པ་ཞེས་བྱ་བ་ནི་མ་འོངས་པའི་འཇིགས་པའི་རྒྱུ་ལས་གྲོལ་བའོ། །ཉེས་པ་ཉེས་པའི་སྒོ་ནས་ཤོགས་ཤིག་ཅེས་བྱ་བ་ནི། སྐྱོན་སྐྱོན་ཉིད་དུ་སྨོད་ཅིག་ཅེས་བྱ་བའི་ཐ་ཚིག་གོ །གཞན་ལ་གཏོང་བས་རྩེ་བར་བྱེད་ཅེས་བྱ་བ་ནི་རྩེད་མོ་གང་ལ་བྱིས་པས་ཤིང་བུ་མེས་སྤར་ཏེ། གཅིག་གི་ལག་ནས་གཅིག་གི་ལག་ཏུ་གཞན་ལ་ཐོང་ཤིག་ཅེས་གཞན་ལ་གཏོང་བར་བྱེད་པ་ཡོད་པ་དེས་རྩེ་བར་བྱེད་པའོ། །ཟླ་བ་ཡང་བྱེད་ཅེས་བྱ་བ་ནི་ཟླ་བ་ལྟ་བུའི་འཁོར་ལོ་ཡང་བྱེད་པའོ། །ཉི་མ་ཡང་བྱེད་ཅེས་བྱ་བ་ཡང་ཉི་མ་ལྟ་བུའི་འཁོར་ལོ་ཡང་བྱེད་པའོ། །མགལ་མེའི་འཁོར་ལོ་ཡང་བྱེད་ཅེས་བྱ་བ་ནི་མགལ་མེ་རྫ་མཁན་གྱི་འཁོར་ལོ་འདྲ་བར་བསྐོར་བའོ། །རེག་གམ་ཞེས་བྱ་བ་ནི་རེག་པར་བྱེད་པའོ། །རེག་ཏུ་འཇུད་ན་ཞེས་བྱ་བ་ནི་རེག་ཏུ་འཇུད་པར་བྱེད་པའོ། །དབུ་སྐྲ་དང་སེན་མོའི་མཆོད་རྟེན་ཞེས་བྱ་བ་ནི་དེ་བཞིན་གཤེགས་པའི་དབུ་སྐྲ་དང༌། སེན་མོ་དག་བླངས་ནས་མཆོད་པའི་ཕྱིར། མཆོད་རྟེན་གང་དག་བྱས་པའོ། །དུས་ཡུན་རིང་དུ་བྱིན་གྱིས་བརླབ་པར་བྱའོ་ཞེས་བྱ་བ་ནི་ལས་ཟིན་གྱི་བར་གྱི་ཡུན་རིང་པོར་རོ། །དུས་བྱིན་གྱིས་བརླབས་པར་སྦར་བར་བྱེད་ན་ལྟུང་བྱེད་དུ་འགྱུར་རོ་ཞེས་བྱ་བ་ལ་སོགས་པ་ནི་དུས་ཀྱང་མེད་ལ་བྱིན་གྱིས་ཀྱང་མ་བརླབས་པར་སྤང་བར་བྱེད་པ་ལ་སོགས་པ་ལ་ལྟུང་བྱེད་དུ་འགྱུར་བར་གསུངས་སོ། །དུས་ཡོད་ལ་བྱིན་གྱིས་མ་བརླབས་པར་སྦར་བར་བྱེད་པ་ལ་སོགས་པ་ལ་ནི་ཉེས་བྱས་སུ་འགྱུར་བར་ཤེས་པར་བྱའོ། །མེ་མ་མུར་ཞེས་བྱ་བ་ནི་ཐལ་བར་གྱུར་པ་ལ་ཐུག་པའོ། །མེར་སྐྲ་ལ་སོགས་པ་འཇུད་པ་ཉེས་བྱས་ཞེས་གསུངས་པ་ནི་རེག་ཏུ་འཇུད་པ་དང་གཉིས་ཀྱིས་བཅུག་པ་མེད་པའི་ཕྱིར་ན་སྨད་དོ། །མེ་ལ་རེག་པའི་ལྟུང་བྱེད་དེ་ལྔ་བཅུ་གཉིས་པའི་ཚིག་རྣམ་པར་བཤད་པ་རྫོགས་སོ།། །།བྲེལ་བ་ཞེས་བྱ་བ་ནི་ཡིད་བྲེལ་བ་ཉིད་དོ། །
བསྐྱེད་པར་བྱའོ་ཞེས་བྱ་བ་ནི་དབྱུང་བར་བྱ་བའོ། །གྱ་ཚོམ་དུ་ཞེས་བྱ་བ་ནི་ཅི་དེ་རྒྱུ་དེ་ཉེ་བར་ཞི་བའམ་འོན་ཏེ་མ་ཞི་ཞེས་རྣམ་པར་མ་དཔྱད་པར་རོ། །ནན་གྱིས་ཞེས་བྱ་བ་ནི་རིགས་པས་ཡིན་ཡང་བཙན་ཐབས་ཀྱིས་མ་གུས་པས་སོ། །ཁོ་བོས་འདུན་པ་མ་ཕུལ་ལོ་ཞེས་བྱ་བ་ནི་ཡུལ་དེ་ལས་མ་དད་པའི་ཕྱིར་རོ། །ཁོ་བོས་འདུན་པ་ཉེས་པར་ཕུལ་ལོ་ཞེས་བྱ་བ་ནི་མ་བརྟགས་པར་ཕུལ་བའི་ཕྱིར་རོ། །སྤོང་བའི་ཆོས་སུ་བྱེད་ཅིང་ཞེས་བྱ་བ་ནི་སྟོན་ཅིང་འགོག་པར་བྱེད་ཅེས་བྱ་བའི་ཐ་ཚིག་གོ །འདུན་པ་ཕྱིར་སྒྱུར་བའི་ལྟུང་བྱེད་དེ་ལྔ་བཅུ་གསུམ་པའི་ཚིག་རྣམ་པར་བཤད་པ་རྫོགས་སོ།། །། རེ་ཞིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ་ཞེས་བྱ་བ་ནི་ནུབ་གཉིས་ལས་ལྷག་པར་མ་ཉལ་བའི་ཕྱིར་རོ། །ལོ་མ་མ་ཡིན་པའི་སྤྱིལ་བུ་ཞེས་བྱ་བ་ནི་སྤྲུལ་པ་བྱས་པའོ། །སྦྲུལ་དུག་མྱུར་དུ་ཁྱབ་པར་བྱེད་པའི་གཙོ་བོ་ཞེས་བྱ་བ་ནི་སྦྲུལ་དུག་མྱུར་དུ་ཁྱབ་པར་བྱེད་པ་ཆེན་པོའོ། །ཚད་ཅེས་བྱ་བ་ནི་ཁུང་ངོ༌། །དངོས་བཙན་པ་ཞེས་བྱ་བ་ནི་མངོན་སུམ་དུ་གྱུར་ན་ཕ་རོལ་གྱི་ཡུལ་འཁོར་ཕེབས་པར་ནུས་ན་བདག་ཉིད་མ་སོང་ན་ཕེབས་པར་མི་ནུས་སོ། །དགེ་སློང་མ་འོངས་པ་རྣམས་ལ་ནི་ཞེས་པར་མཛད་ལ་ཞེས་བྱ་བ་ནི་སྡོད་པར་མཛད་པའོ། །ཕྱིར་གཏོང་བར་མི་མཛད་ཅེས་བྱ་བ་ནི་འཇོག་པར་མཛད་པའོ། །དགྲ་བཅོམ་པའི་སྒོ་ང་དང་ལྡན་པ་ཞེས་བྱ་བ་ནི་དགྲ་བཅོམ་པའི་ས་བོན་དང་ལྡན་པའོ། །འཁྲུ་བའི་ནད་ཅེས་བྱ་བ་ནི་འཁྲུ་བག་གི་ནད་དོ། །ལྷན་ཅིག་འདུག་སྟེ་ཞེས་བྱ་བ་ནི་དཀྱིལ་འཁོར་གཅིག་ཏུའོ། །ཉེ་འཁོར་དུ་སྤང་བར་བྱའོ་ཞེས་བྱ་བ་ནི་གནས་ཁང་གི་སྒོ་དང་འབྲེལ་བའི་ཁྱམས་ཀྱི་ཕྱོགས་སུ་སྤང་བར་བྱ་བའོ། །དགེ་སློང་སྡིག་ཅན་ཞེས་བྱ་བ་ནི་སུན་འབྱིན་པའོ། །གནས་པར་ཁས་མ་བླངས་པ་ཞེས་བྱ་བ་ནི་དབྱར་གྱི་གནས་ཁས་མ་བླངས་པའོ། །གནས་གཅིག་ཏུ་ཉལ་བར་མི་བྱའོ་ཞེས་བྱ་བ་ནི་གནས་ཁང་གཅིག་ཏུ་ཉལ་བར་མི་བྱ་བའོ། །རྫོགས་པར་མ་བསྙེན་པ་དང་ལྷན་ཅིག་ཉལ་བའི་ལྟུང་བྱེད་དེ་ལྔ་བཅུ་བཞི་པའི་ཚིག་རྣམ་པར་བཤད་པ་རྫོགས་སོ།། །།སྡིག་པ་ཅན་གྱི་ལྟ་བ་རྣམ་པ་ཞེས་བྱ་བ་ལ། སྡིག་པ་ཅན་གྱི་ལྟ་བ་ཞེས་བྱ་བ་ནི་བར་དུ་གཅོད་པའི་ཆོས་ལ་སྐུར་བ་འདེབས་པས་ལོག་པའི་ཤེས་པ་ཡིན་གྱི། ལོག་པའི་ལྟ་
བ་ནི་མ་ཡིན་ཏེ། ལྟ་བ་ལོག་ན་སྡོམ་པ་ཡང་མེད་པར་འགྱུར་བའི་ཕྱིར་རོ། །རྣམ་པ་ཞེས་བྱ་བ་ནི་རྣམ་གྲངས་སོ། །བྱུང་སྟེ་ཞེས་བྱ་བ་ནི་སྐྱེས་པ་སྟེ་ཁྱིམ་པ་དག་གིས་ཀྱང་དགེ་སྦྱོང་གི་ཚུལ་གྱི་འབྲས་བུ་མཐོང་བའི་ཕྱིར་བར་དུ་གཅད་པའི་ཆོས་དེ་དག་བསྟེན་ཀྱང་བར་དུ་གཅོད་པར་མི་འགྱུར་རོ་སྙམ་པའི་ལྟ་བའི་རྣམ་པ་སྐྱེས་པའོ། །བར་དུ་གཅོད་པའི་ཆོས་ཞེས་བྱ་བ་ནི་དགེ་བའི་ཆོས་ཀྱི་གེགས་བྱེད་པའོ། །བར་དུ་གཅོད་པར་མི་འགྱུར་ཏེ་ཞེས་བྱ་བ་ནི་དགེ་བའི་ཆོས་ཀྱི་བགེགས་བྱེད་པར་མི་ནུས་སོ་ཞེས་བྱ་བའི་ཐ་ཚིག་གོ །བཅོམ་ལྡན་འདས་ལ་སྐུར་བ་མ་འདེབས་ཤིག་ཅེས་བྱ་བ་ནི་བཅོམ་ལྡན་འདས་ཀྱི་ཐམས་ཅད་མཁྱེན་པ་ཉིད་མ་སྤོང་ཤིག་ཅེས་བྱ་བའོ། །བཅོམ་ལྡན་འདས་ལ་སྐུར་བས་ལེགས་པར་མི་འགྱུར་རོ་ཞེས་བྱ་བ་ནི་རྣམ་པར་སྨིན་པ་མི་འདོད་པ་འབྱུང་བའི་ཕྱིར་རོ། །ཞལ་གྱི་བཞེས་པའི་ཕྱིར་སྐུར་པར་མི་འགྱུར་རོ་སྙམ་པ་ལ། དེའི་ཕྱིར་བཅོམ་ལྡན་འདས་ནི་དེ་སྐད་མི་གསུང་ངོ་ཞེས་བྱ་བ་གསུངས་སོ། །བཅོམ་ལྡན་འདས་དེ་སྐད་མི་གསུང་བར་ཇི་ལྟར་ཤེས་སྙམ་པ་ལ། དེའི་ཕྱིར་ཚེ་དང་ལྡན་པ་བར་དུ་གཅོད་པའི་ཆོས་རྣམས་ཀྱི་བར་དུ་གཅོད་པ་ཉིད་དོ་ཞེས་བཅོམ་ལྡན་འདས་ཀྱིས་རྣམ་གྲངས་དུ་མར་གསུངས་ཏེ། གང་གི་ཕྱིར་བར་དུ་གཅོད་པའི་ཆོས་རྣམས་ནི་ཚུལ་ཁྲིམས་འཆལ་བར་བྱེད་པ་ཡིན་པས་བཅོམ་ལྡན་འདས་ཀྱིས་གནས་དེ་ལྟ་བུ་བྱས་མ་ཐག་ཏུ་དགེ་སློང་དུ་མི་རུང་བར་འགྱུར། །དགེ་སྦྱོང་དུ་མི་རུང༌། ཤཱཀྱའི་སྲས་ཀྱི་མི་རུང༌། དགེ་སློང་གི་དངོས་པོ་ལས་ཉམས་པར་འགྱུར་ཏེ། དགེ་སྦྱོང་གི་ཚུལ་ཞིག་པར་འགྱུར་ཞིང་ཉམས་པས་བཅོམ་པ་ལྟུང་བ་ཕམ་པར་འགྱུར་བ་སྟེ། དེའི་དགེ་སྦྱོང་གི་ཚུལ་ཕྱིར་བསླབ་དུ་མེད་པར་འགྱུར་རོ་ཞེས་བྱ་བ་ལ་སོགས་པ་རྣམ་གྲངས་དུ་མས་བར་དུ་གཅོད་པ་ཉིད་ཡིན་པ་དེའི་ཕྱིར་བཅོམ་ལྡན་འདས་ལ་ནི་ལན་འགའ་ཡང་དེ་སྐད་མི་གསུང་ངོ༌། །ལུང་དང་འགལ་བ་ཉིད་དུ་བསྟན་ནས་མངོན་སུམ་དང་འགལ་བ་བསྟན་པའི་ཕྱིར། དེ་དག་བརྟེན་ན་བར་དུ་གཅོད་པ་ཉིད་དུ་འགྱུར་གྱི་ཞེས་བྱ་བ་གསུངས་ཏེ། མ་ཆགས་པ་ལ་སྩོགས་པ་དང་མངོན་སུམ་དང་འགལ་བའི་ཕྱིར་རོ། །ཐམས་ཅད་ཀྱི་ཐམས་ཅད་ཅེས་བྱ་བ་ནི་ནང་གི་བདག་ཉིད་ཀྱིས་སོ། །རྣམ་པ་ཐམས་ཅད་ཀྱི་ཐམས་ཅད་དུ་ཞེས་བྱ་བ་ནི་ཕྱི་རོལ་གྱི་བདག་ཉིད་ཀྱིས་སོ། །གཏམ་འདྲེ་བར་མི་བྱེད་ཅེས་བྱ་བ་
ནི་ལུང་འབོགས་པ་སྦྱིན་པས་སོ། །ཕེབས་པར་སྨྲ་བར་མི་བགྱི་ཞེས་བྱ་བ་ནི་དམིགས་ཀྱིས་འདྲི་བ་སྦྱིན་པས་སོ། །དཔེར་ན་གདོལ་བུ་བཞིན་དུ་ཞེས་བྱ་བ་ནི་ངེས་པ་ཁོ་ནར་ཡོངས་སུ་སྤང་བར་བྱ་བ་ཡིན་པར་བསྟན་པའི་ཕྱིར་རོ། །སྨད་པ་ཞེས་བྱ་བ་ནི་སྨད་པར་བྱ་བ་ཉིད་དུ་རྣམ་པར་གཞག་པ་སྟེ་བཤུང་ཞིང་སྨད་པ་ཡིན་ནོ། །མཆོག་ཏུ་སྨད་པ་ཞེས་བྱ་བ་ནི་གནས་ནས་དབྱུང་ཞིང་སྤང་བའོ། །དགེ་སློང་གི་ཚུལ་གྱིས་བར་དུ་གཅོད་པར་མི་འགྱུར་ཏེ་ཞེས་བྱ་བ་ལ། འདིར་དགེ་སློང་གི་ཚུལ་གྱིས་ཞེས་བྱ་བ་ནི་ཚུལ་ཁྲིམས་མ་འཆལ་བའོ། །ལྟ་བའི་རྣམ་པ་མི་གཏོང་བའི་ལྟུང་བྱེད་དེ་ལྔ་བཅུ་ལྔ་པའི་ཚིག་རྣམ་པར་བཤད་པ་རྫོགས་སོ།། །།དེ་སྐད་ཟེར་བ་ཞེས་བྱ་བ་ནི་བར་དུ་གཅོད་པའི་ཆོས་རྣམས་ལོག་པར་སྨྲ་བའོ། །ཆོས་བཞིན་མ་བྱས་པ་ནི་ཕྱིར་བཅོས་པ་མ་བྱས་པའོ། །ཆོས་དང་མཐུན་པར་མ་བྱས་པ་ཞེས་བྱ་བ་ནི་རང་བཞིན་ཕྱིར་མ་བླངས་པ་སྟེ་ལེགས་པར་མ་སྦྱངས་ཞེས་བྱ་བའི་ཐ་ཚིག་གོ །ན་བར་གྱུར་པ་དང་སྡིག་པ་ཅན་གྱི་ལྟ་བའི་རྣམ་པ་དེ་དང་དཔྲལ་བར་འདོད་པ་ལ་ལྟུང་བ་མེད་དོ་ཞེས་བྱ་བ་ནི་སྙིང་རྗེའི་དབང་ཡིན་པའི་ཕྱིར། ལྟུང་བ་མེད་དོ། །སྤངས་པའི་རྗེས་སུ་ཕྱོགས་པའི་ལྟུང་བྱེད་དེ་ལྔ་བཅུ་དྲུག་པའི་ཚིག་རྣམ་པར་བཤད་པ་རྫོགས་སོ།། །། རྫུ་འཕྲུལ་ཡང་མངོན་པར་བསྒྲུབས་སོ་ཞེས་བྱ་བ་ནི་བསྐྱེད་པའོ། །ཐོས་པའི་ཉེན་ཀོར་ནས་སྤངས་ཏེ་ཞེས་བྱ་བ་ནི་གང་དུ་ལས་དེ་མི་ཐོས་པ་དེར་བཀྲི་བར་བྱའོ་ཞེས་བྱ་བའི་ཐ་ཚིག་གོ །བསྙིལ་གྱིས་གཞན་དུ་སོང་ཤིག་ཅེས་བྱ་བ་ནི་ཐག་ཤིན་ཏུ་རིང་པོར་གཞན་སོང་ཤིག་ཅེས་བྱ་བའི་ཐ་ཚིག་གོ ། བསྙིལ་བ་སྡུད་པའི་ལྟུང་བྱེད་དེ་ལྔ་བཅུ་བདུན་པའི་ཚིག་རྣམ་པར་བཤད་པ་རྫོགས་སོ།། །།རི་རབ་ཀྱི་བང་རིམ་ཞེས་བྱ་བ་ནི་མཆོད་རྟེན་གྱི་བར་རིམ་ལྟར་བྱུང་བའི་བང་རིམ་མོ། །གཞལ་མེད་ཁང་པའི་ཆ་ལུགས་ཞེས་བྱ་བ་ནི་ལྷ་གང་དག་གཞལ་མེད་ཁང་ན་གནས་པ་དག་གི་ཆ་ལུགས་སོ། །རྒྱལ་རིགས་ནི་མངོན་པའི་ང་རྒྱལ་ཅན་ཡིན་པས་ཞེས་བྱ་བ་ནི་དཔའ་རྟུལ་ཕོད་པའི་ང་རྒྱལ་ཅན་ཏེ་གཟི་བྱིན་དང་ལྡན་པ་ཞེས་བྱ་བའི་ཐ་ཚིག་གོ །དག་པའི་མཐའ་ཅན་ཞེས་བྱ་བ་ནི་ཡིད་བརྟན་ཞིང་གསང་བ་ལ་གཏོགས་པ་རྒྱལ་པོའི་དྲུང་གི་མཐའ་ན་འདུག་པའོ། །དམ་པའི་ཆོས་ལ་གུས་པར་
མཛད་ཅེས་བྱ་བ་ནི་དེ་དག་དམ་པའི་ཆོས་མྱ་ངན་ལས་འདས་པ་ལམ་དང་བཅས་ཚོགས་དང་བཅས་པ་ལ་གུས་པར་མཛད་དོ་ཞེས་བྱ་བའི་ཐ་ཚིག་གོ །ཅིའི་ཕྱིར་ཞེ་ན། དེའི་ཕྱིར་དགྲ་བཅོམ་པ་དག་ཀྱང་བླ་མར་བྱེད་དེ་ཞེས་བྱ་བ་གསུངས་ཏེ་གང་གི་ཕྱིར་རིགས་གསུམ་དང་ལྡན་པའི་དགྲ་བཅོམ་པ་ཐམས་ཅད་མྱ་ངན་ལས་འདས་པའི་ཆོས་བླ་མར་སྒྲུབ་པར་བྱེད་ཅིང་དེའི་དོན་དུ་ཚོགས་ཆེན་པོ་སོགས་པར་བྱེད་པ་དེའི་ཕྱིར། སངས་རྒྱས་བཅོམ་ལྡན་འདས་རྣམས་ནི་དམ་པའི་ཆོས་ལ་གུས་པར་མཛད་དོ། །མྱ་ངན་སེལ་མཛད་པ་ཞེས་བྱ་བ་ནི་རྒ་བ་དང་འཆི་བ་དང༌། སྡུག་པ་དང་བྲལ་བ་ལ་སོགས་པའི་མྱ་ངན་གཏན་དུ་ཞི་བར་མཛད་པའི་ཕྱིར་རོ། །བདག་ལ་ལེགས་འདོད་ཅེས་བྱ་བ་ནི་བདག་ཉིད་ལ་ཕན་པར་འདོད་པའོ། །བདག་ཉིད་ཆེན་པོ་ཞེས་བྱ་བ་ནི་མི་སློབ་པ་ཉིད་དོ། །སངས་རྒྱས་བསྟན་པ་ཞེས་བྱ་བ་ནི་དེ་བཞིན་གཤེགས་པའི་ཆོས་གུས་པར་བསྟན་པའོ། །རབ་ཏུ་དང་སེམས་མེད་པ་ཞེས་བྱ་བ་ནི་མ་དད་པས་ཀུན་ནས་དཀྲིས་པའོ། །ཞེ་སྡང་ཅན་ཞེས་བྱ་བ་ནི་ཁོང་ཁྲོ་བ་དང་བཅས་པའོ། །འཁྲུགས་པ་ཞེས་བྱ་བ་ནི་ཁྲོ་བ་དང་བཅས་པའོ། །དམ་ཆོས་ཞེས་བྱ་བ་ནི་ལམ་དང་བསྟན་པའོ། །ཉེས་རྩོམ་ཞེས་བྱ་བ་ནི་ཁྲོ་བ་དང་ཞེ་སྡང་གི་རྗེས་སུ་འཇུག་པའོ། །བཏུལ་བྱས་ཤིང་ཞེས་བྱ་བ་ནི་སོ་སོར་གསལ་བར་བྱས་ཤིང་ངོ༌། །རབ་དང་མེད་པ་ཞེས་བྱ་བ་ནི་མ་དད་པའོ། །ཀུན་ནས་མནར་སེམས་ཞེས་བྱ་བ་ནི་ཁྲོ་བ་དང་ཞེ་སྡང་གི་བདག་ཉིད་དོ། །སྤོང་བ་ཞེས་བྱ་བ་ནི་མི་ཕྱོགས་པའོ། །ངམ་གྲོག་ཆུང་ངུ་དག་ཅེས་བྱ་བ་ནི་གཡང་ས་ཆུང་ངུ་དག་གོ །ངམ་གྲོག་ཆེན་པོ་དག་ཅེས་བྱ་བ་ནི་གཡང་ས་ཆེན་པོ་དག་གོ །ཉམས་པ་ཞེས་བྱ་བ་ནི་སྐྱེས་གནས་དང་བྲལ་བའོ། །ཤི་བ་ཞེས་བྱ་བ་ནི་ལུས་དང་བྲལ་བའོ། །བྲོས་པ་ཞེས་བྱ་བ་ནི་རང་དག་སོང་བའོ། །གཟུང་བ་ཞེས་བྱ་བ་ནི་མི་འདོད་བཞིན་དུ་ཁྲིད་པའོ། །མ་རུང་བས་སོ་ཞེས་བྱ་བ་ལ། བས་སོ་ཞེས་བྱ་བའི་སྒྲ་ནི་དེ་ལྟར་འགྱུར་སྲིད་པར་བསྟན་པའི་ཕྱིར་རོ། །མི་གཙོ་བོ་དག་ཅེས་བྱ་བ་ནི་རྒྱལ་པོ་ལ་སོགས་པའོ། །འཆོས་ཞེས་བྱ་བ་ནི་གཟུགས་བརྙན་བྱེད་པའོ། །འདོད་པ་ན་སྤྱོད་པའི་ལྷ་དྲུག་པོ་དག་ཅེས་བྱ་བ་ནི་རྒྱལ་ཆེན་བཞི་པ་དང༌། སུམ་ཅུ་རྩ་གསུམ་དང༌། མཐུན་འབྱུང་དང༌། དགའ་ལྡན་དང༌།
འཕྲུལ་དགའ་དང༌། གཞན་འཕྲུལ་དབང་བྱེད་ཅེས་བྱ་བ་འདོད་པ་ན་སྤྱོད་པ་དྲུག་པོ་དག་གོ །ལན་གསུམ་ཡོངས་སུ་སྦྱང་བ་བྱེད་དུ་བཅུག་སྟེ་ཞེས་བྱ་བ་ནི་མིའི་འཇིག་རྟེན་དུ་སྐྱེ་བར་བྱ་བའི་ཕྱིར་ལན་གསུམ་གྱི་བར་དུ་ཁས་ལེན་དུ་བཅུག་སྟེའོ། །དེ་ཡང་འདུལ་བའི་གཞི་ལས་བཟོད་ལྡན་དག་ཁོ་བོ་ནི་དགའ་ལྡན་གྱི་ལྷའི་རིས་འདི་ནས་འཕོས་ནས་མི་རྣམས་ཀྱི་ནང་དུ་རྒྱལ་པོ་ཟས་གཙང་གི་བཙུན་མོ་དམ་པའི་མངལ་དུ་ཉིང་མཚམས་སྦྱོར་བ་ལེན་པར་འགྱུར་གྱི་ཁྱེད་ཅང་ལས་གང་བདུད་རྩི་དོན་དུ་གཉེར་བ་དེས་ཀྱང་ཡུལ་དབུས་ཀྱི་གྲོང་ཁྱེར་ཆེན་པོ་དྲུག་ཏུ་ཉིང་མཚམས་སྦྱོར་བ་ལོང་ཤིག་ཅེས་ལན་གསུམ་ཁས་ལེན་དུ་བཅུག་གོ་ཞེས་གསུངས་པ་ཡིན་ནོ། །བླ་རེ་ཞེས་བྱ་བ་ནི་སྟེང་དུ་བྲི་བའི་བླ་རེའོ། །ཨེ་མའོ་གར་བྱས་སོ་ཞེས་བྱ་བ་ནི་ངོ་མཚར་ཆེ་བར་བསྟན་པའོ། །གད་མོའི་སྒྲ་ཆེན་པོ་ཞེས་བྱ་བ་ནི་གད་རྒྱངས་ཆེན་པོའོ། །བཅོས་སོ་ཞེས་གྲག་ཅེས་བྱ་བ་ལ་གྲག་ཅེས་སྨོད་པ་ནི་ལྐོག་ཏུ་གྱུར་པའི་དོན་བསྟན་པའི་ཕྱིར་རོ། །སྒྲ་མི་སྙན་ཞེས་བྱ་བ་ནི་རྒྱལ་པོ་སྒྲ་མི་སྙན་གྱི་བྱུང་བའི་མཐའ་དེས་བརྗོད་པའི་ཕྱིར་ཏེ། ཐ་དད་པ་མ་ཡིན་པར་གདགས་པའི་ཕྱིར་ཞེས་བྱ་བ་སྨོས་སོ། །ཆ་ལུགས་ཞེས་བྱ་བ་ནི་ཆ་ལུགས་ཀྱི་ཆེད་ཀྱི་གོས་སོ། །གསར་པ་གསར་པ་ཡིན་པར་དགོངས་སོ་ཞེས་བྱ་བ་ནི་དེ་དགའ་བ་ཡིན་པའི་ཕྱིར་དང༌། གཙོ་བོ་ཡིན་པའི་ཕྱིར་རོ། །བཙག་ཅེས་བྱ་བ་ནི་སའི་ཁམས་ཏེ། དེ་ནི་གྲགས་པའི་ཕྱིར་དཔེ་ཡིན་ནོ། །ཤིང་ཤུན་ཞེས་བྱ་བ་ནི་བསྐུ་བའི་ཚོན་ཏེ་དེ་ནི་མེ་ཏོག་ལ་སོགས་པའི་དཔེ་ཡིན་ནོ། །གྱོན་ནའོ་ཞེས་བྱ་བ་ནི་གོས་ཀྱི་ལོངས་སྤྱོད་ནི་ལུས་དཀྲི་བ་ཡིན་པས་དེ་བསྟན་པ་ཡིན་པས་དེ་བསྟེན་པའི་ཕྱིར་རོ། །ཐ་ན་ལྷུང་བཟེད་ཀྱི་ཁ་ཡོགས་ཀྱང་རུང་སྟེ་ཞེས་བྱ་བ་ནི་ཁ་ཅིག་ན་རེ་ལྷུང་བཟེད་ཀྱི་ཁ་ཡོགས་ཞེས་བྱ་བར་ཁྲུ་གང་གི་ཚད་ཙམ་ཡོད་པ་དེ་དང་མཉམ་པར་གོས་སར་པ་ཞིག་རྙེད་ན་ཡང་ཁ་བསྒྱུར་བར་བྱ་བའི་དོན་ཡིན་གྱི་ལྷུང་བཟེད་ཀྱི་ཁ་ཡོགས་དངོས་ནི་གོས་སུ་བགོ་བ་མ་ཡིན་པས་ཁ་བསྒྱུར་མི་དགོས་སོ་ཞེས་ཟེར་རོ། །ཁ་ཅིག་ན་རེ་ལྷུང་བཟེད་ཀྱི་ཁ་ཡོགས་ཀྱང་ཁ་བསྒྱུར་བ་ཉིད་ཡིན་ནོ་ཞེས་ཀྱང་ཟེར་རོ། །ཁ་མ་བསྒྱུར་བའི་གོས་གྱོན་པའི་ལྟུང་བྱེད་དེ་ལྔ་བཅུ་བརྒྱད་པའི་ཚིག་རྣམ་པར་བཤད་པ་རྫོགས་སོ།། །།བསྐལ་བ་དང་པོའི་མི་ཞེས་བྱ་བ་ནི་བསྐལ་བ་
ཐོག་མའི་མིའོ། །ལམ་ལམ་ལམ་ཞིང་འདུག་པ་ཞེས་བྱ་བ་ནི་འབར་ཞིང་འདུག་པའོ། །སྦྲུལ་དུག་མྱུར་དུ་ཁྱད་པར་བྱེད་པ་དང་སྦྲུལ་དུག་དྲག་པ་ཞེས་སྨོས་པ་ནི་ནོར་ནི་འཇིག་རྟེན་གཉི་གར་གནོན་པ་བྱེད་པ་ཡིན་པའི་ཕྱིར་སྤང་བར་བྱ་བ་ཉིད་དུ་བསྟན་པའི་ཕྱིར་རོ། །སྡིག་པའི་གྲོགས་པོ་ལྷས་བྱིན་གྱིས་ཉེ་བར་བསྐོར་བས་ཞེས་བྱ་བ་ནི་སྡིག་པའི་གྲོགས་པོས་ཟིན་པའོ། །ཁྱིམ་གྱི་འབྱོར་བ་དག་ཅེས་བྱ་བ་ནི་ཁྱིམ་གྱི་ལོངས་སྤྱོད་བཟའ་བ་དང༌། བཏུང་བ་ལ་སོགས་པ་དག་གོ །གཉའ་ཟུངས་བརྒྱུད་མོ་ཞེས་བྱ་བ་ནི་གཉའ་བ་ནས་དབུལ་བ་བརྒྱུད་པ་སྟེ་དང་པོས་གཉའ་བ་ནས་ཕུལ་ཏེ་གཉིས་པའི་ལག་ཏུ་བཏང་བ་ལ། གཉིས་པས་གཉའ་བ་ནས་བཟུང་སྟེ་གསུམ་པའི་ལག་ཏུ་བཏང་བ་ལ་སོགས་པའི་རིམ་གྱིས་ཞེས་བྱ་བའི་ཐ་ཚིག་གོ །མི་གོས་སྔོན་པོ་གྱོན་པ་ཞེས་བྱ་བ་ནི་གཤེད་མ་རྣམས་ཀྱི་རྟག་ཡིན་ནོ། །ཀ་ར་བཱི་རའི་མེ་ཏོག་དམར་པོ་དག་མགྲིན་པར་བཅིངས་པ་ཞེས་བྱ་བ་ནི་གསད་པ་དག་གི་རྟགས་ཡིན་ནོ། །བྱུང་རྒྱལ་དུ་སྨྲས་ཞེས་བྱ་བ་ནི་རྒྱུན་མི་འཆད་པར་གློང་པོས་སུ་སྨྲ་བའོ། །འདི་ནི་རེ་ཞིག་འབྱུང་བ་ཡིན་ཏེ་ཞེས་བྱ་བ་ནི་རིན་པོ་ཆེ་ལ་རེག་པའི་ཉེས་དམིགས་སྣང་བའི་ཕྱིར་རོ། །བསླབ་པའི་གཞི་འཆའ་བར་ནི་མི་མཛད་དོ་ཞེས་བྱ་བ་ནི་དགེ་སློང་རྣམས་ཀྱི་མ་རེག་ཕྱིར་རོ། །འཕོང་གི་དཔོང་ས་ཞེས་བྱ་བ་ནི་མཚོན་གྱི་སྒྱུ་རྩལ་ལ་བསླབ་པའི་གནས་སོ། །གཡོན་འཕངས་པ་ཞེས་བྱ་བ་ནི་ལག་པ་གཡོན་པས་མདའ་འཕགས་པ་སྟེ་ཉམ་ང་ལག་ཏུ་འཕེན་དུ་ཞེས་བྱ་བའི་ཐ་ཚིག་གོ །གཡས་འཕངས་ལ་སོགས་པ་ཡང་དེ་བཞིན་དུ་ཤེས་པར་བྱའོ། །གོམ་སྟངས་ཞེས་བྱ་བ་ནི་གཡས་བརྐྱང་ལ་སོགས་པར་རྐང་པ་གཞག་པར་བྱས་པའོ། །རྐེད་ཆིངས་ཀྱིས་བཅིངས་ཏེ་ཞེས་བྱ་བ་ནི་རྐེད་ཆིངས་ཀྱིས་བདག་ཉིད་ཀྱི་ལྟོ་ཕྱོགས་བཅིངས་པའོ། །བཅད་པ་བྱས་པས་ཞེས་བྱ་བ་ནི་དབྱུག་པ་ལ་སོགས་པའི་འབེན་བཙུགས་པ་བཅད་ཅེས་བྱ་བའི་ཐ་ཚིག་གོ །རེ་ཞིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ་ཞེས་བྱ་བ་ནི་རིན་པོ་ཆེ་ལ་མ་རེག་པའི་ཕྱིར་རོ། །རོལ་མོའི་དཔོང་ས་ཞེས་བྱ་བ་ལ། རོལ་མོ་ཞེས་བྱ་བ་ནི་ལྷ་རྣམས་ཀྱི་གཡོག་འཁོར་བ་དྲི་ཟ་ཞེས་བྱ་བ་ལ་གླུ་དང་རོལ་མོའི་སྒྲ་ལ་མཁས་པ་དེ་དག་གི་སྒྱུ་རྩལ་གླུ་དབྱངས་གང་ཡིན་པ་དེ་རོལ་མོ་ཞེས་བྱའོ། །
དེ་སྟོན་པའི་གནས་ནི་རོལ་མོའི་དཔོང་ས་ཡིན་ནོ། །དྲུག་ལྡན་ཞེས་བྱ་བ་ལ་སོགས་པ་ནི་སྒྲའི་བྱེ་བྲག་གོ །དེ་དག་འབྱིན་པ་ནི་བྱེད་པའོ། །བསླབ་པའི་གཞི་འཆའ་བར་ནི་མི་མཛད་དོ་ཞེས་བྱ་བ་ནི་རིན་པོ་ཆེ་ལ་རེག་པ་མེད་པའི་ཕྱིར་རོ། །གནོད་སྦྱིན་གྱི་ནོར་ཞེས་བྱ་བ་ནི་གནོད་སྦྱིན་གྱི་ཕྱིར་བྱིན་པའི་ནོར་རོ། །རྡུལ་གྱི་ཚོགས་ཞེས་བྱ་བ་ནི་ས་རྡུལ་གྱི་གནས་སོ། །བསླབ་པའི་གཞི་འཆའ་བར་མི་མཛད་དོ་ཞེས་བྱ་བ་ཡང་རིན་པོ་ཆེའི་ལ་སོགས་པ་ལ་རེག་པར་འཇིག་རྟེན་གྱིས་སྨད་པ་མ་གྱུར་པའི་ཕྱིར་རོ། །ཡོ་བྱད་རྣམ་པ་སྣ་ཚོགས་ཞེས་བྱ་བ་ནི་བུམ་པ་དང༌། རིལ་བ་ལ་སོགས་པ་ཁྲུས་ཀྱི་སྣོད་དག་གོ །སོ་ཕག་ཅེས་བྱ་བ་ནི་དྲུད་པར་བྱ་བའོ། །བསྐ་བ་ཞེས་བྱ་བ་ནི་སྤུ་དབྱི་བ་ལ་སོགས་པའི་སྨན་ནོ། །སྐྱེད་མོས་ཚལ་དུ་སྤྱད་པ་ཞེས་བྱ་བ་ནི་སྐྱེད་མོས་ཚལ་དུ་དགོས་པའོ། །གཡུལ་ངོར་སྤྱད་པའི་ཞེས་བྱ་བ་ནི་གཡུལ་ངོར་དགོས་པའོ། །རིན་པོ་ཆེ་ཞེས་བྱ་བ་ནི་དཀོན་མཆོག་ཞིང་རིན་ཆེན་གསེར་ལ་སོགས་པའོ། །རིན་པོ་ཆེར་སྨོས་པ་ཞེས་བྱ་བ་ནི་རིན་པོ་ཆེ་དང་འདྲ་བ་མཚོན་ཆ་དང་རོལ་མོའི་ཆ་སྤྱད་དོ། །རིན་པོ་ཆེ་དང་འདྲ་བར་བདེ་བ་བསྒྲུབ་པའི་ཕྱིར་རོ། །སྣ་མའི་ཡལ་ག་ཞེས་བྱ་བ་ནི་སྣ་མའི་ལྕུག་ཕྲན་གྱི་ཚོགས་སོ། །ཀུན་དགའི་ར་བ་གཏོགས་པ་ན་འདུག་པ་ཞེས་བྱ་བ་ནི་གཙུག་ལག་ཁང་གི་ས་གཞིར་གཙུག་ལག་ཁང་གི་ཕྱི་རོལ་དུ་ལྟུང་བའོ། །གནས་ཁང་དུ་གཏོགས་པ་ན་འདུག་པ་ཞེས་བྱ་བ་ནི་གནས་ཁང་གི་ནང་དུ་འདུག་པའོ། །རྒྱན་ལ་ཉེ་བར་སྤྱོད་པ་ཞེས་བྱ་བ་ནི་རྒྱན་འདོད་ཅིང་རྒྱན་དོན་དུ་གཉེར་བ་སྟེ། ཡང་དང་ཡང་དུ་རྒྱན་ཚོལ་ཞེས་བྱ་བའི་ཐ་ཚིག་གོ །ནོར་ཆུད་མི་ཟ་བ་ཞེས་བྱ་བ་ནི་ཇི་སྲིད་འཚོའི་བར་དུ་ནོར་ཉམས་པར་མི་འགྱུར་རོ་ཞེས་བྱ་བའི་ཐ་ཚིག་གོ །སྲེ་མོ་ལྟ་བུའི་རྐྱལ་བུ་ཞེས་བྱ་བ་ནི་སྲེ་མོའི་རྣམ་པ་འདྲ་བ་ཁ་རུབ་པའི་སྣོད་དོ། །འདི་ནི་སྤྲུལ་དུག་མྱུར་དུ་ཁྱབ་པར་བྱེད་པ་ཡིན་སྲེ་མོ་ལྟ་བུའི་རྐྱལ་བུ་ནི་དེ་ན་ར་དག་གིས་གང་བ་མ་ཡིན་གྱི་མི་ལེན་ཏོ་ཞེས་བྱ་བ་ནི་ལས་ཀྱི་དབང་གིས་དེ་ལྟར་མི་འཁྲུལ་བ་ཡིན་གྱི་དངོས་པོ་ཉིད་དེ་ལྟར་གྱུར་བ་ནི་མ་ཡིན་ནོ། །སུའི་ཡིན་པ་དེ་ལེན་པར་འགྱུར་གྲང་སྙམ་པ་ཞེས་བྱ་བ་ནི་སུས་ཐོབ་པར་འགྱུར་བ་དེས་ཕྱིས་ལེན་པར་འགྱུར་གྲང་སྙམ་པའོ། །ཆོ་ག་ཞེས་བྱ་བ་ནི་གྲུབ་པའི་མཐའི་གཞུང་ལགས་སོ། །མ་བདར་བ་ལེན་ན་ཉེས་
བྱས་སུ་འགྱུར་རོ་ཞེས་བྱ་བ་ནི་ནོར་བུ་མ་གྲུབ་པས་ཆེས་ན་སྨད་པའི་ཕྱིར་རོ། །ནོར་བུ་མཆིད་བུ་ལེན་ན་ཡང་ཉེས་བྱས་སུ་འགྱུར་རོ་ཞེས་བྱ་བ་ནི་བུ་དང་འདྲ་བའི་ཕྱིར་རོ། །སོག་མའི་ཕྲེང་བ་ལེན་ན་ཡང་ཉེས་བྱས་སུ་འགྱུར་རོ་ཞེས་བྱ་བ་ནི་རིན་པོ་ཆེའི་ཕྲེང་བ་དང་འདྲ་བའི་ཕྱིར་རོ། །འོད་མ་ཞེས་བྱ་བ་ནི་ཀུ་བ་འོད་མ་ཅན་ལ་འདིར་འོད་ཅེས་བྱ་བའི་གླིང་བུ་ནི་མ་ཡིན་ཏེ། དེ་ལ་རྒྱུད་ཀྱི་སྦྱོར་བ་མེད་པའི་ཕྱིར་རོ། །བ་ལ་རི་དང་མ་ཧ་ཏི་དང་སུ་ཀོ་ཤ་ཀ་ཞེས་བྱ་བ་དག་ཀྱང་རྒྱུད་ཅན་གྱི་བྱེ་བྲག་ཡིན་ནོ། །མཆུ་སྦྲང་ཞེས་བྱ་བ་ནི་ཤིང་བུ་ལས་བྱས་པ་རྒྱུད་གཅིག་པར་འདུག་པ་བྱིས་པ་དག་རྩེ་བའི་ཆ་སྤྱད་ཡིན་ནོ། སྒྲ་འབྱིན་པ་ཞེས་བྱ་བ་ནི་བུད་དུ་རུང་བའོ། །རྫ་རྔ་ཁ་གཅིག་པ་ལེན་ན་ཡང་ཉེས་བྱས་སུ་འགྱུར་རོ་ཞེས་བྱ་བ་ནི་སྒྲ་ཆུང་བའི་ཕྱིར་རོ། །གཞུའུ་ཞེས་བྱ་བ་ནི་རས་བལ་རྨལ་བ་ལ་དགོས་པའི་གཞུའོ། །མདའ་ལྟར་བཅོས་པ་ཞེས་བྱ་བ་ནི་ཤིང་བུ་ལ་སོགས་པ་དག་ལས་ལྟོང་ཙམ་གཏོད་ཅིང་འོལ་བྱི་ཙམ་མདའ་འདྲ་བ་བྱིས་པ་དག་འཕེན་པ་ཡང་ཡིན་ནོ། །སྐུ་གདུང་དང་བཅས་པ་ལེན་ན་ལྟུང་བྱེད་དུ་འགྱུར་ལ། སྐུ་གདུང་མེད་པ་ལེན་ན་ཉེས་སུ་འགྱུར་རོ་ཞེས་བྱ་བ་ནི་སྐུ་གཟུགས་རིན་པོ་ཆེ་ལས་བྱས་པ་ཉིད་ཡིན་ཡང་སྐུ་གདུང་མེད་ན་མཐར་ཐུག་པ་མ་ཡིན་པས་ན་སྨད་དོ། །སྟོན་པའི་འདུ་ཤེས་ཉེ་བར་གཞག་སྟེ་ལེན་ན་ལྟུང་བ་མེད་དོ་ཞེས་བྱ་བ་ནི་སྟོན་པའི་བློས་རིན་པོ་ཆེའི་བློ་ལྡོག་པའི་ཕྱིར་ལྟུང་བ་མེད་དོ་ཞེས་བྱ་བའི་ཐ་ཚིག་གོ །སྒྲ་འབྱིན་པའི་ཚལ་གསེབ་དག་ཏུ་ཞེས་བྱ་བ་ནི་སྒྲ་འབྱིན་པས་མཛེས་པ་བྱས་པའི་ཚལ་གསེབ་དག་ཏུའོ། །བྱ་དགའ་ཞེས་བྱ་བ་ནི་དགའ་བའི་སྦྱིན་པའོ། །ལོངས་པའི་གཞིར་གཏོགས་པའི་ལྟུང་བྱེད་དེ་ལྔ་བཅུ་དགུ་པའི་ཚིག་རྣམ་པར་བཤད་པ་རྫོགས་སོ།། །།ཆུ་དྲོན་གསུམ་ཞེས་བྱ་བ་ནི་ཁྲུས་ཀྱི་འབབ་ཆུ་གསུམ་མོ། །དེའི་ཚེ་ན་བདག་སྟོང་པར་བགྱིད་ལ་ཞེས་བྱ་བ་ནི་བསྡད་པར་བྱ་བའོ། །དྲི་མའི་རྫས་ཀྱིས་གོས་པའི་ལུས་ཞེས་བྱ་བ་ནི་དྲི་མའི་རྫས་ཀྱིས་འབགས་པའི་ལུས་སོ། །དྲི་མའི་རྫས་འཆང་བས་འདག་པར་འགྱུར་རམ་ཞེས་བྱ་བ་ནི་དེ་ལ་ཉོན་མོངས་པ་སྤོང་པར་འགྱུར་རམ་ཞེས་བྱ་བའོ། །སྐྱ་བོ་བསེང་བསེང་པོ་ཞེས་བྱ་བ་ནི་སྐྱ་བོའི་རྣམ་པའོ། །མངོན་པར་ལྟར་ཞེས་བྱ་བ་ནི་ཤིན་ཏུ་གཤེར་བའོ། །ཟླ་བ་ཕྱེད་ཅིང་ཁྲུས་བྱ་བར་གསུངས་པ་ཞེས་བྱ་བ་ནི་གང་གི་
ཉིན་མོ་ཁྲུས་བྱས་པར་གྱུར་པ་དེ་ཉིད་ཀྱི་ཉིན་མོ་ཡང་ཁྲུས་གཞན་མི་བྱ་སྟེ་ཉི་མ་དེ་ཉིད་ཀྱང་ཉི་མ་གཅིག་ཏུ་བརྩི་ཞིང་དེ་ནས་བརྩམས་ཏེ། ཞག་བཅོ་ལྔའི་མདུན་རོལ་ཞག་བཅུ་བཞི་པ་ཚུན་ཆད་ཀྱི་བར་དུ་ནི་ཁྲུས་བྱར་མི་རུང་གི་ཞག་བཅོ་ལྔ་ལ་ཁྲུས་བྱར་རུང་བར་གསུངས་པ་ཡིན་ནོ། །དེ་ལས་འདུམས་པར་བྱེད་ན་ཞེས་བྱ་བ་ནི་གང་གི་ཉིན་མོ་ཁྲུས་བྱས་པར་གྱུར་པ་དེ་ཉིད་ཀྱི་ཉིན་མོ་ཡང་ཉི་མ་གཅིག་ཏུ་བརྩི་ཞིང་དེ་ནས་བརྩམས་ཏེ་ཞག་བཅོ་ལྔ་པ་ལ་ཁྲུས་བྱ་བར་གསུངས་པ་དེ་ལས་འདུམས་པར་བྱེད་པ་སྟེ། ཞག་བཞི་བཅུ་པ་ཚུན་ཆད་དུ་ཁྲུས་བྱེད་ན་ལྟུང་བྱེད་དུ་འགྱུར་བར་གསུངས་པ་ཡིན་ནོ། །སོ་ག་རྣམས་ཀྱི་ཟླ་བ་ལྷག་མ་ཕྱེད་དང་གཉིས་ཞེས་བྱ་བ་ནི་ལོ་གའི་དུས་རྣམས་ལ་ཟླ་བ་གཉིས་ཡོད་དེ་དཔྱིད་ཟླ་ཐ་ཆུངས་ཚེས་བཅུ་དྲུག་ནས། དབྱར་ཟླར་བ་ཉའི་བར་གྱི་ཟླ་བ་གཅིག་དང༌། དབྱར་ཟླར་བ་ཚེས་བཅུ་དྲུག་ནས། དབྱར་ཟླ་འབྲིང་པོའི་ཉའི་བར་གྱི་ཟླ་བ་གཅིག་ནི་སོ་གའི་དུས་རྣམས་ཀྱི་ཟླ་བ་གཉིས་ཡིན་ནོ། །དེ་ལ་དཔྱིད་ཟླ་ཐ་ཆུངས་ཚེས་བཅུ་དྲུག་ནས། དཔྱིད་ཟླ་ཐ་ཆུངས་གནམ་སྟོང་གི་བར་གྱི་ཟླ་བ་ཕྱེད་བཞག་སྟེ་དེའི་ལྷག་མ་དབྱར་ཟླ་བ་ཚེས་ནས། དབྱར་ཟླ་འབྲིང་པོ་ཉའི་བར་གྱི་ཟླ་བ་ཕྱེད་དང་གཉིས་སོ། །དབྱར་རྣམས་ཀྱི་དང་པོ་ཞེས་བྱ་བ་ནི་སྐབས་འདིར་དབྱར་གནས་པར་ཁས་བླངས་པ་སྔ་མའི་དུས་རྣམས་ཀྱི་དང་པོ་ཟླ་བ་གཅིག་སྟེ། དབྱར་ཟླ་འབྲིང་པོའི་ཆོས་བཅུ་དྲུག་ནས། དབྱར་ཟླ་ཐ་ཆུངས་ཉའི་བར་གྱི་ཟླ་བ་གཅིག་གོ །དཔག་ཚད་གཅིག་ཏུ་སོང་ངམ་ཞེས་བྱ་བ་ནི་རང་གི་གནས་ནས་ཕར་སོང་ཡང་རུང༌། གཞན་གྱི་གནས་ནས་ཚུར་འོངས་ཀྱང་རུང་སྟེ་སྤྱིར་དཔག་ཚད་གཅིག་པ་རྐྱང་པར་སོང་བའོ། །དཔག་ཚད་ཕྱེད་དུ་སོང་སྟེ་ཕྱིར་འོངས་ཞེས་བྱ་བ་ནི་རང་གི་གནས་ནས་ཕར་སོང་སྟེ་ཕྱིར་འོངས་ཀྱང་རུང་གཞན་གྱི་གནས་ནས་ཚུར་འོངས་ཤིང་ཕྱིར་ལོག་ཀྱང་རུང་སྟེ་སྤྱིར་དཔག་ཚད་ཕྱེད་དུ་སོང་སྟེ་ཕྱིར་འོངས་པ་ལ་དཔག་ཚད་གཅིག་རངས་པར་སོང་བའི་ཚད་དང་མཉམ་པར་ཤེས་པར་བྱའོ། །གོས་ཀྱི་གྲྭ་ཞེས་བྱ་བ་ནི་གོས་ཀྱི་མཐའ་མའོ། །བསྒུལ་བ་ཞེས་བྱ་བ་ནི་བསྐྱོད་པའོ། །རྫི་ཆར་ཞེས་བྱ་བ་ནི་རླུང་དང་ཆར་འདྲེས་པ་སྟེ། དེའི་ཕྱིར་རླུང་དང་ཆར་གྱི་དུས་གཉིས་ལས་ཐ་དད་པར་གཞག་གོ །དབང་བསྐུར་བའི་ཁྲུས་དང་འཇུག་པའི་ཁྲུས་ཞེས་བྱ་བ་
གཉིས་ནི་རྒྱུའི་བྱེ་བྲག་གིས་ཐ་དད་པར་ཤེས་པར་བྱ་སྟེ། དབང་བསྐུར་བའི་ཁྲུས་ཞེས་བྱ་བ་ནི་བུམ་པ་ལ་སོགས་པས་ལུས་ཀྱི་སྟེང་ནས་དབང་བསྐུར་བའི་ཚུལ་དུ་ཆུ་བླུགས་ཤིང་དེས་བཀྲུའོ། །འཇུག་པའི་ཞེས་བྱ་བ་ནི་ཆུའི་ནང་དུ་འཇུག་ཅིང་ལུས་བཀྲུ་བའོ། །ཆུས་ལྟེ་བར་སོན་ན་ལྟུང་བྱེད་དུ་འགྱུར་རོ་ཞེས་བྱ་བ་ནི་ལུས་ཀྱི་ཕྱེད་གཤེར་ན་ཁྲུས་རྫོགས་པ་ཡིན་པས་ལྟུང་བྱེད་དུ་བསྟན་ཏེ། དེ་ཡང་དབང་བསྐུར་བས་སྤྱི་བོ་ནས་བརྩམས་ཏེ་ཆུས་ལྟེ་བར་སོན་པ་དང༌། འཇུག་པས་རྐང་མཐིལ་ནས་བརྩམས་ཏེ་ཆུས་ལྟེ་བར་སོན་པ་རྣམ་པ་གཉིས་ཀ་ལ་ཁ་ན་མ་ཐོ་བ་རེ་རེ་རྫོགས་པར་འགྱུར་རོ། །དབང་བསྐུར་བའི་ཁྲུས་ཀྱིས་ཁྲུས་བྱས་ནས་འཇུག་པ་ཁྲུས་ཀྱིས་ཁྲུས་བྱེད་ན་ཞེས་བྱ་བ་ལ་སོགས་པ་ནི་གལ་ཏེ་དབང་བསྐུར་བ་དང་འཇུག་པ་གཉིས་ཀ་དུས་གཅིག་ཏུ་ཁྲུས་རྩོམ་པ་ན། དེ་གཉིས་ལྟེ་བའི་ཕྱོགས་གཅིག་ཏུ་ཕྲད་པར་འགྱུར་བ་ལ་ནི་ཁ་ན་མ་ཐོ་བ་ཡོངས་སུ་རྫོགས་པར་གཅིག་ཏུ་འགྱུར་བར་སྟོན་ཏོ། །འདི་ལ་འགྱོད་པར་མི་བྱ་བར་ཞེས་བྱ་བ་ནི་ཁྲུས་ཀྱི་དོན་ཉིད་མ་ཡིན་པའི་ཕྱིར་རོ། །ཁྲུས་བྱེད་པའི་ལྟུང་བྱེད་དེ་དྲུག་ཅུ་པའི་ཚིག་རྣམ་པར་བཤད་པ་རྫོགས་སོ།། །།མདའ་ལྔ་འཕངས་པ་ཞེས་བྱ་བ་ནི་བྱ་བ་གང་ལ་མདའ་ལྔ་འཕེན་པར་བྱེད་པ་དེ་ནི་མདའ་ལྔ་འཕངས་པ་ཞེས་བྱ་བའོ། །ཚོད་ཡོད་པ་ཞིག་གོ་ཞེས་བྱ་བ་ནི་ཅུང་ཟད་རུང་ངོ་ཞེས་བྱ་བར་བསམས་པའོ། །རས་བལ་གྱི་གཞུའུ་བཞིན་དུ་བདུངས་ཏེ་ཞེས་བྱ་བ་ནི་ལག་པ་གཉིས་ཁོ་ནས་བདུངས་ཏེ་ཞེས་བྱ་བའི་ཐ་ཚིག་གོ །རྒྱུད་སྒྲ་བསྒྲེངས་ཞེས་བྱ་བ་ནི་གཞུ་རྒྱུད་ཀྱི་སྒྲ་བསྒྲེངས་པའོ། །འདིར་ནི་གཙོ་ཆེར་དུད་འགྲོ་གསོད་པ་ཉིད་དུ་དགོངས་པ་ཡིན་གྱི། སྲོག་ཆགས་དང་བཅས་པའི་ཆུ་ལ་སྤྱོད་པའི་སྐབས་མ་ཡིན་པར་བསྟན་པའི་ཕྱིར་དུད་འགྲོ་གསོད་པའི་ལྟུང་བྱེད་ལོགས་ཤིག་ཏུ་བཅའ་བ་མཛད་དོ། །དུད་འགྲོ་གསོད་པའི་ལྟུང་བྱེད་དེ་དྲུག་ཅུ་གཅིག་པའི་ཚིག་རྣམ་པར་བཤད་པ་རྫོགས་སོ།། །།དབང་པོ་ཡོངས་སུ་སྨིན་པར་ཞེས་བྱ་བ་ནི་དད་པ་ལ་སོགས་པའི་དབང་པོ་རྣམས་ཡོངས་སུ་སྨིན་ཅིང་འབྲས་བུ་ཐོབ་པ་དང་མཐུན་པའོ། །ངེས་པར་འཇུག་པ་ཞེས་བྱ་བ་ནི་མཐོང་བའི་ལམ་ལ་འཇུག་པའོ། །ཟག་པ་ཟད་པ་ཞེས་བྱ་བ་ནི་དགྲ་བཅོམ་པ་ཉིད་ཐོབ་པའོ། །དགེ་བའི་རྩ་བ་ཆད་པ་ཞེས་བྱ་བ་ནི་ལྟ་བ་ལོག་པའོ། །ཁྱེད་ཅག་ལོ་
ཉི་ཤུ་མ་ལོན་པར་རྫོགས་པར་བསྙེན་པས་ཁྱེད་ཅག་ངེས་པ་ལ་འཇུག་པ་དང་ཟག་པ་ཟད་པར་འགྱུར་རེ་སྐན་ཞེས་བྱ་བ་ནི་འཆར་ཀས་བསམས་བཞིན་དུ་ཅི་ནས་ཀྱང་དགེ་སློང་དེ་དག་ཐ་ན་ཡུད་ཙམ་ཞིག་ཀྱང་བདེ་བ་ལ་མི་རེག་པར་བྱ་བའོ་སྙམ་པ་དེ་ཉིད་རྐྱེན་དུ་བྱས་ཏེ་དེ་སྐད་སྨྲས་པར་ཟད་ཀྱི་ཡང་དག་པར་ན་བཙུན་པ་འཆར་ཀས་ལས་དང་པོ་པ་ལ་ཉེས་པ་མེད་པས་དེ་དག་རྫོགས་པར་བསྙེན་པ་ཡིན་པ་དང༌། རྫོགས་པར་མ་བསྙེན་པས་ཀྱང་ངེས་པ་ལ་འཇུག་པ་དང༌། ཟག་པ་ཟད་པ་ཐོབ་པར་འགྱུར་བའི་གྲུབ་པའི་མཐའ་ཁོང་དུ་ཆུད་པ་ནི་མ་ཡིན་ནོ། །བཅོམ་ལྡན་འདས་ཀྱིས་ལས་དང་པོ་པ་ལ་ལྟུང་བ་མེད་དོ་ཞེས་གསུངས་པ་དེ་མ་ཐོས་སམ་ཞེས་བྱ་བ་ནི་མཁན་པོ་ལ་ལྟུང་བ་མེད་པ་དང༌། དེར་འདུས་པའི་དགེ་འདུན་ལ་ཉེས་བྱས་མེད་པ་འདིར་སྐབས་མ་ཡིན་པས་མི་གཟུང་གི་འདིར་ནི་གང་ཟག་དེ་ཡང་རྫོགས་པར་མི་འགྱུར་ལ་ཞེས་གསུངས་པའི་ཉེས་པ་མེད་དོ་ཞེས་གསུངས་པ་དེ་མ་ཐོས་སམ་ཞེས་བྱ་བར་བསམས་པ་ཡིན་ནོ། །དེ་ལ་ལྟུང་བ་ཇི་ལྟར་འགྱུར་ཞེ་ན་ཞེས་བྱ་བ་ལ་སོགས་པ་ནི་མ་ཆགས་པ་དང་ཉམས་པ་གཉིས་ཀྱི་སྒོ་ནས་དགེ་སློང་མ་ཡིན་པའི་དོན་གྱིས་འགྱོད་པ་སྐྱེད་པ་ལས་ལྟུང་བྱེད་དུ་འགྱུར་བར་སྟོན་ཏོ། །དགེ་འདུན་ལྷག་མ་ལ་སོགས་པའི་དོན་གྱིས་འགྱོད་པ་སྐྱེད་པ་ལ་ནི་ཉེས་བྱས་སུ་འགྱུར་རོ། །དུས་ཕྱི་མ་ཡིན་པས་ཞེས་བྱ་བ་དང༌། མཚམས་མ་བཅད་པ་དང༌། དཀྱིལ་འཁོར་པ་བློ་མཐུན་པར་མ་བྱས་པ་ཡིན་པས་ཞེས་བྱ་བ་དང༌། དེ་གཉིས་ནི་ཚུལ་ཁྲིམས་འཆལ་པ་ཡིན་པས་ཞེས་བྱ་བའི་ཚར་རྣམས་ཀྱིས་ནི་བདག་ཉིད་ལོ་ཉི་ཤུ་མ་ལོན་པ་དང༌། ལས་ཀྱི་གནས་མཚམས་མ་བཅད་པ་དང༌། ལས་བྱེད་པ་ཚུལ་ཁྲིམས་འཆལ་པའི་སྒོ་ནས་མ་ཆགས་པ་བསྟན་ཏོ། །དེ་ནི་གཅན་སྒོ་ཡིན་པས་ཞེས་བྱ་བ་ནི་རྐུ་སེམས་ཀྱིས་བླངས་པས་ཞེས་བྱ་བ་དང༌། མིའི་ཆོས་བླ་མ་སྨྲས་པ་ཞེས་བྱ་བ་ཚར་རྣམས་ཀྱིས་ནི་ཉམས་པའི་དོན་གྱིས་འགྱོད་པ་སྐྱེས་པ་བསྟན་ཏོ། །རྫོགས་པར་མ་བསྙེན་ཞེས་བྱ་བ་ནི་དགེ་སློང་གི་དངོས་པོ་མ་སྐྱེས་པའོ། །ཉེས་པར་རྫོགས་པར་མ་བསྙེན་ཞེས་བྱ་བ་ནི་རྫོགས་པར་བསྙེན་པའི་ཆོ་ག་མ་ཚང་བར་བྱས་པའོ། །ཡང་རྫོགས་པར་བསྙེན་པར་བྱ་ཞེས་བྱ་བ་ནི་གལ་ཏེ་འདོད་ནའོ། །དཀྱིལ་འཁོར་བར་བློ་མཐུན་པར་མ་བྱས་པ་ནི་ལས་ཀྱིས་
མཐུན་པར་སྤོང་བའི་ཕྱིར་དཀྱིལ་འཁོར་བའི་མཚམས་བཅད་པའོ། དོན་གཞན་ཞེས་བྱ་བ་ནི་ན་ཚོད་ཤེས་པར་བྱ་བ་ལ་སོགས་པའི་དགོས་པ་གཞན་གྱིས་སོ། །འདུལ་བའི་ཡོ་བྱད་ཅེས་བྱ་བ་ལ་འདིར་འདུལ་བ་ཞེས་བྱ་བ་ནི་དགེ་བ་ལ་གཞུག་པའོ། །དེ་བསྒྲུབ་པ་ནི་ཡོ་བྱད་དེ་རྒྱུ་དེས་ཞེས་བྱ་བའི་ཐ་ཚིག་གོ །འདི་གཉིས་ལ་ནི་འགྱོད་པ་སྐྱེས་པའི་བསམ་པ་མེད་པས་ལྟུང་བ་མེད་དོ། །འགྱོད་པ་སྐྱེས་པའི་ལྟུང་བྱེད་དེ་དྲུག་ཅུ་རྩ་གཉིས་པའི་ཚིག་རྣམ་པར་བཤད་པ་རྫོགས་སོ།། །།སོར་མོས་ག་ག་ཚིལ་བྱེད་ཅེས་བྱ་བ་ནི་སོར་མོས་རེག་ནས་མཐར་གྱིས་སྤོ་བས་ལུས་ལ་འདྲུད་པ་སྟེ་བཞད་གད་དང་ལུས་ཀྱི་སྐྱི་གཡའ་བ་སྐྱེད་པར་བྱེད་ཅེས་བྱ་བའི་ཐ་ཚིག་གོ །ལུས་ཀྱི་ལས་དང༌། ལུས་ཀྱི་སྤྱོད་པ་དང༌། ལུས་ཀྱི་གཡོ་བ་ཞེས་བྱ་བ་ནི་སྦྱོར་བ་དང༌། དངོས་གཞི་དང༌། མཇུག་ཡིན་པར་ཤེས་པར་བྱའོ། །དེ་ལ་ལྟུང་བ་ཇི་ལྟར་འགྱུར་ཞེ་ན་ཞེས་བྱ་བ་ནི་རེག་པ་རེ་རེ་ལས་འགྱུར་བ་སྐྱེ་བའི་ཕྱིར་སོར་མོ་གཅིག་ལ་སོགས་པ་སྦྱོར་བ་གཅིག་པ་ཇི་སྙེད་ཀྱིས་རེག་ཀྱང་ལྟུང་བ་ཐ་དད་དུ་དབྱེ་བ་མེད་པ་དེ་ལྟུང་བྱེད་གཅིག་ཏུ་འགྱུར་རོ། །ལུས་མ་ཡིན་པས་ལུས་མ་ཡིན་པ་ལ་རེག་པ་དང༌། སྐྲ་དང༌། སེན་མོ་དང༌། སོ་དག་གིས་རེག་པ་ནི་ཉེས་བྱས་སོ། །ག་ག་ཚིལ་བྱེད་པའི་ལྟུང་བྱེད་དེ་དྲུག་ཅུ་རྩ་གསུམ་པའི་ཚིག་རྣམ་པར་བཤད་པ་རྫོགས་སོ།། །།མོས་པའི་ཏིང་ངེ་འཛིན་ཞེས་བྱ་བ་ནི་མོས་པ་ཡིད་ལ་བྱེད་པ་སྟེ། དེ་དག་ཐམས་ཅད་བདག་གི་ལུས་དང་འབྲེལ་པར་མོས་པའི་ཕྱིར་རོ། །སེམས་ནི་གློག་དང་འདྲ་ཞེས་བྱ་བ་ནི་གཡོ་བའི་ཕྱིར་རོ། ཏིང་ངེ་འཛིན་ནི་རྡོ་རྗེ་དང་འདྲ་ཞེས་བྱ་བ་ནི་ཉོན་མོངས་པའི་རི་བོ་ཐམས་ཅད་འཇོམས་པའི་ཕྱིར་རོ། །ཉོན་མོངས་པ་རྣམས་ནི་ཡེ་ཤེས་ཀྱིས་འཇོམས་སོ་ཞེས་བྱ་བ་ནི་ཉོན་མོངས་པ་རྣམས་གྱི་སྔོན་དུ་གཏི་མུག་འགྲོ་ལ་གཏི་མུག་གི་གཉེན་པོ་ནི་ཡེ་ཤེས་ཡིན་པའི་ཕྱིར་རོ། །རྩེ་ཞེས་བྱ་བ་ནི་བདག་འབའ་ཞིག་གོ །རྩེད་མོ་ཞེས་བྱ་བ་ནི་ཟླ་དང་ངོ༌། །དགའ་ཞེས་བྱ་བ་ནི་རང་གི་ལུས་འོག་ཏུ་ནུབ་པ་དང་སྟེང་དུ་བྱུང་བ་ལ་སོགས་པའོ། །སིམ་པ་ཞེས་བྱ་བ་ནི་བསིལ་བའོ། །སློབ་མའི་བསམ་པ་ཞེས་བྱ་བ་ནི་ལག་སྟངས་ལ་སོགས་པའོ། །བེམ་ཏོལ་གྱིས་བརྡེགས་ན་ཉེས་བྱས་སུ་འགྱུར་རོ་ཞེས་བྱ་བ་ནི་ཆུང་བའི་ཕྱིར་རོ། །བུམ་པ་ལ་སོགས་
པ་ལ་ཉེས་བྱས་སུ་འགྱུར་པ་ནི་ནང་དུ་མ་ཞུགས་པའི་ཕྱིར་རོ། །ཆུ་ལ་རྩེ་བའི་ལྟུང་བྱེད་དེ་དྲུག་ཅུ་རྩ་བཞི་པའི་ཚིག་རྣམ་པར་བཤད་པ་རྫོགས་སོ།། །།ཕན་པ་མཛད་པ་ཞེས་བྱ་བ་ནི་གནོད་པ་ཟློག་པའི་ཕྱིར་རོ། །ལེགས་པར་མཛད་པ་ཞེས་བྱ་བ་ནི་ཕན་པ་སྒྲུབ་པའི་ཕྱིར་རོ། །ཇི་ལྟར་ཕན་པ་དང་ལེགས་པ་མཛད་པ་ཡིན་ཞེ་ན། དེའི་ཕྱིར་འདི་ལྟར་བཅོམ་ལྡན་འདས་དེ་ནི་ཞེས་བྱ་བ་ལ་སོགས་པ་གསུངས་སོ། །སྡུག་བསྔལ་གྱི་ཆོས་ཞེས་བྱ་བ་ནི་སྐྱེ་བ་ལ་སོགས་པའི་སྡུག་བསྔལ་དག་གོ །སེལ་བར་མཛད་ཅེས་བྱ་བ་ནི་ཟློག་པར་མཛད་པའོ། །བདེ་བའི་ཆོས་ཞེས་བྱ་བ་ནི་ཡིད་བདེ་བ་ལ་སོགས་པ་དགའ་བ་དག་གོ །སྒྲུབ་པར་མཛད་པ་ཞེས་བྱ་བ་ནི་སྟོབས་པར་མཛད་པའོ། །སྡིག་པ་མི་དགེ་བའི་ཆོས་ཞེས་བྱ་བ་ནི་ཉོན་མོངས་པ་དང་ལས་དག་གོ །དགེ་བའི་ཆོས་ཞེས་བྱ་བ་ནི་ཡང་དག་པའི་ལྟ་བ་ལ་སོགས་པའོ། །མ་རྒལ་བ་ཞེས་བྱ་བ་ནི་ངན་འགྲོ་དག་ལས་མ་ཐར་བའོ། །མ་གྲོལ་བ་ཞེས་བྱ་བ་ནི་འདོད་པའི་འཆིང་བ་དག་ལས་སོ། །དབུགས་མ་ཕྱིན་པ་ཞེས་བྱ་བ་ནི་གཟུགས་དང་ལྡན་པའི་འདོད་ཆགས་ཀྱིས་ཏེ། བདེ་བ་དང་ཡིད་བདེ་བ་ལ་སོགས་པ་སྐྱོན་ལས་རྣམ་པར་མ་གྲོལ་བའི་ཕྱིར་རོ། །ཡོངས་སུ་མྱ་ངན་ལས་མ་འདས་པ་ཞེས་བྱ་བ་ནི་ཁམས་གསུམ་པ་ལས་རྣམ་པར་མ་གྲོལ་བ་སྟེ་ཡང་སྲིད་པ་ལ་སོགས་པའི་སྡུག་བསྔལ་མ་ལུས་པར་མ་སྤངས་པའི་ཕྱིར་རོ། །སྤྱི་བརྟོལ་ཅན་ཞེས་བྱ་བ་ནི་ཐུག་ཐུབ་ཅན་ནོ། །གཡོ་ཞེས་བྱ་བ་ནི་གཡོས་བསྐྱེད་པའི་ཡིད་ཀྱི་ལས་སོ། །གྱ་གྱུར་ཞེས་བྱ་བ་ནི་དེ་ཉིད་ཀྱིས་བསྐྱེད་པའི་ངག་གི་ལས་སོ། །ཡ་ཡོ་ཞེས་བྱ་བ་ནི་དེ་ཉིད་ཀྱིས་བསྐྱེད་པའི་ལུས་ཀྱི་ལས་སོ། །ཡང་དེ་གསུམ་ནི་གཡོ་ཆུང་ངུ་དང༌། འབྲིང་དང༌། ཆེན་པོར་ཤེས་པར་བྱའོ། །ཡ་མཚན་སྣ་ཚོགས་དང་ལྡན་པའི་མཆོད་སྦྱིན་ཞེས་བྱ་བ་ནི་གང་ལ་རབ་ཏུ་བྱུང་བ་ཐམས་ཅད་མཆོད་པར་བྱེད་པའོ། །རྣ་སྦྲང་ཞེས་བྱ་བ་ནི་མདའི་མདེའུ་རྔ་རྡོ་ཅན་ནོ། །མིའི་སྐལ་བ་བཟང་པོ་ཞེས་བྱ་བ་ནི་མི་རྣམས་ཀྱི་ནང་ན་ཤིན་ཏུ་བཟང་ཞིང་བསོད་ནམས་ལྷག་པར་འབར་བའོ། །གནས་གཅིག་ཏུ་ཉལ་བ་ཞེས་བྱ་བ་ནི་གཅིག་ནས་གཅིག་ཏུ་དུས་གཅིག་ཏུ་གློས་ཕབ་སྟེ། གཉིད་ལོག་པར་བྱེད་པའོ། །སྐས་བསྡུ་བར་བྱ་བའམ། སྒོ་གཏན་པས་གཅད་
པར་བྱ་བ་འམ། སྲུང་བ་དགེ་སློང་གཞག་པར་བྱའོ་ཞེས་བྱ་བ་ནི་གནོད་པ་བྱེད་པ་བཟློག་པའི་ཕྱིར་རོ། །སྲུང་བ་དགེ་སློང་གཞག་པ་ནི་འཁྲུལ་པ་མེད་པའི་ཕྱིར་རོ། །བར་ཁ་བ་ལ་སོགས་པ་ནི་དཔེ་ཙམ་དུ་ཟད་དེ་གཅིག་ནས་གཅིག་ཏུ་རྒྱུར་རུང་ན་གནས་གཅིག་པ་ཉིད་དུ་འགྱུར་ལ། སྐས་བསྡུ་བ་འམ། སྒོ་གཏན་པས་གཅད་པ་ལ་སོགས་པར་རྒྱུར་མི་རུང་ན་གནས་ཐ་དད་པར་བལྟའོ། །སྒོའི་ཕྱི་རོལ་ནས་གཅད་པ་དང་སྒོ་ནང་རོལ་ནས་གཅད་པར་བྱ་ཞེས་བྱ་བ་ནི་སྒོ་བདག་ཉིད་ཀྱི་དབང་དུ་བྱ་བའི་ཕྱིར་རོ། །ཁྱིམ་ཐབ་ཀྱིས་བསྲུངས་ན་ལྟུང་བ་མེད་དོ་ཞེས་བྱ་བ་ནི་བུད་མེད་ཀྱི་ཡུལ་ཁྱིམ་ཐབ་ཀྱིས་བསྲུངས་ན་དགེ་སློང་ལ་རྔོད་ཅིང་རྩོལ་བར་ཐུགས་མི་ཐུབ་པའི་ཕྱིར་རོ། །ཕྱོགས་དེ་རེ་ལྡེ་ལ་སོགས་པས་བསྐོར་བར་བྱ་བ་ནི་དེར་བཟློག་པའི་ཕྱིར་རོ། །སྐྱ་རེངས་ཤར་བ་ན་ཉེས་བྱས་ཉིད་དུ་འགྱུར་རོ་ཞེས་བྱ་བ་ནི་གནས་ཉིད་མེད་པའི་ཕྱིར་རོ། །ངེས་པར་སྐལ་བ་དང་ལྡན་པ་ཉིད་ཅེས་བྱ་བ་ནི་ངེས་པར་འགྱུར་བའོ། །འཁོར་བ་འཇིག་ཅེས་བྱ་བ་ལ་འཁོར་བ་ཞེས་བྱ་བ་ནི་སྐྱེ་བ་གཅིག་ནས་གཅིག་ཏུ་འཁོར་བའོ། །འཇིག་ཅེས་བྱ་བ་ནི་དེ་སྤོང་ཞིང་སེལ་བར་མཛད་པས་སྲིད་པ་སེལ་བར་མཛད་པ་སྟེ། སྲིད་པ་སེལ་ཞེས་བྱ་བའི་ཐ་ཚིག་གོ །མར་མེའི་སྙིང་པོ་བསྐུལ་བ་ཞེས་བྱ་བ་ནི་བཏེག་པའོ། །བུད་མེད་དང་ལྷན་ཅིག་ཉལ་བའི་ལྟུང་བྱེད་དེ་དྲུག་ཅུ་རྩ་ལྔ་པའི་ཚིག་རྣམ་པར་བཤད་པ་རྫོགས་སོ།། །།སྡངས་ཞེས་བྱ་བ་ནི་སེམས་ཀྱིས་སོ། །སྐྲག་ཅེས་བྱ་བ་ནི་ལུས་ཀྱིས་སོ། །གནོད་སྦྱིན་གོས་སྔོན་པོ་གྱོན་པ་ཞེས་བྱ་བ་ནི་ལག་ན་རྡོ་རྗེའི་འཁོར་གནོད་སྦྱིན་གོས་སྔོན་པོ་ཅན་དག་སྟེ། རྒྱལ་བྱེད་ཀྱི་ཚལ་གྱི་སྲུང་མ་གཉུག་མར་གནས་པ་ཡིན་ནོ། །ཉེས་པ་སྦོམ་པོར་འགྱུར་ཞེས་བྱ་བ་ནི་གསོད་པའི་ཕམ་པར་འགྱུར་བའི་སྐབས་ཀྱིའོ། །སྡངས་པ་ཞེས་བྱ་བ་ནི་འཇིགས་པ་བསྐྱེད་པའི་རྒྱུའོ། །བྱེད་ཅེས་བྱ་བ་ནི་བདག་ཉིད་ཀྱིས་སོ། །བྱེད་དུ་འཇུད་ཅེས་བྱ་བ་ནི་གཞན་ནོ། །ཐ་ན་བཞད་གད་བྱ་བར་བསམས་ཀྱང་རུང་སྟེ་ཞེས་བྱ་བ་ནི་ཐ་ན་རྒོད་བག་གི་བསམ་པས་ཀྱང་རུང་བའོ། །དེ་ལ་ལྟུང་བ་ཇི་ལྟར་རུང་བར་འགྱུར་ཞེ་ན་ཞེས་བྱ་བ་ནི་ཡིད་དུ་མི་འོང་བ་ཉེ་བར་སྒྲུབ་པར་བྱེད་པ་ལ་ནི་དངོས་གཞིར་འགྱུར། ཡིད་དུ་འོང་བ་ཉེ་བར་སྒྲུབ་པར་བྱེད་པ་ལ་ནི་ཉེས་བྱས་སུ་འགྱུར། སྐྱོ་བར་བྱ་བའི་ཆེད་དུ་ཉེ་བར་སྒྲུབ་པར་བྱེད་པ་ལ་ནི་ལྟུང་བ་མེད་པར་སྟོན་ཏོ། །
འདི་ལྟ་སྟེ་དཔེར་ན་ཞེས་བྱ་བ་ནི་ཡིད་དུ་འོང་བ་དང་ཡིད་དུ་མི་འོང་བ་ཞེས་བྱ་བ་ཇི་ལྟ་བུ་ཡིན་པའི་དཔེ་ཡིན་གྱི། ཡི་དགས་དང་ལྷ་ལ་སོགས་པའི་གཟུགས་ལ་སོགས་པའི་དཔེ་ནི་མ་ཡིན་ནོ། །སྐྱོ་བར་བྱ་བ་ཞེས་བྱ་བ་ནི་ཡིད་འབྱུང་བར་བྱ་བའོ། །སྡོངས་པར་བྱེད་པའི་ལྟུང་བྱེད་དེ་དྲུག་ཅུ་རྩ་དྲུག་པའི་ཚིག་རྣམ་པར་བཤད་པ་རྫོགས་སོ།། །།བཤུགས་ཞེས་བྱ་བ་ནི་སྟན་ལས་བསླང་བའོ། །དགེ་སྦྱོང་གི་འཚོ་བའི་ཡོ་བྱད་གང་ཡང་རུང་བ་ཞེས་བྱ་བ་ནི་རུང་བ་དང་ཚད་དང་ལྡན་པའོ། །འཇིགས་པ་ཞེས་བྱ་བ་ནི་ཆོམ་རྐུན་ལ་སོགས་པའོ། །སྦེད་པའི་ལྟུང་བྱེད་དེ་དྲུག་ཅུ་རྩ་བདུན་པའི་ཚིག་རྣམ་པར་བཤད་པ་རྫོགས་སོ།། །།ཁོ་བོ་ནི་དགེ་སློང་ཚུལ་ཁྲིམས་དང་ལྡན་པ་རྩྭས་བཅིངས་ན་ཡང་དུས་བྱེད་པར་འགྱུར་གྱི་ཞེས་བྱ་བ་ནི་ཚུལ་ཁྲིམས་དང་ལྡན་པའི་ཕྱིར་ཁོ་བོ་རྩོལ་བར་མི་བྱེད་པས་དེའི་ཕྱིར་རྩྭས་བཅིངས་ན་ཡང་འཆི་དགོས་པས་ཁོ་བོ་གཏམས་པ་མི་ལེན་ཏོ་ཞེས་བྱ་བའི་ཐ་ཚིག་གོ །གདེང་མེད་པར་ཞེས་བྱ་བ་ནི་མ་བསླངས་ཤིང་གནང་བར་མ་བྱས་པའོ། །དགའ་བ་དང་ཞེས་བྱ་བ་ལ་སོགས་པ་ནི་གང་གིས་གོས་སྤྱོད་པ་དེ་གལ་ཏེ་དགའ་བ་དང༌། གཅུགས་པ་དང༌། ཡིད་དུ་འོང་བ་ཡིན་ནོ། །བྱིན་པ་ལ་ཉེ་བར་འཚོ་བའི་ལྟུང་བྱེད་དེ་དྲུག་ཅུ་རྩ་བརྒྱད་པའི་ཚིག་རྣམ་པར་བཤད་པ་རྫོགས་སོ།། །། དེའི་ཚེ་ན་ནི་ཞེས་བྱ་བ་ནི་གང་གི་ཚེ་དེ་གཉིས་ཀྱིས་དེ་ལ་ཕམ་པར་འགྱུར་བའི་ཆོས་ཀྱིས་སྐུར་པ་བཏབ་པའི་ཚེ་ནའོ། །སྐུར་ན་ལྟུང་བྱེད་དོ་ཞེས་བྱ་བ་ནི་སྐུར་པ་གདབ་པའི་བསམ་པས་སྐུར་པ་འདེབས་པ་ལ་ཁ་ན་མ་ཐོ་བ་འདིར་འགྱུར་རོ། །ཉན་པ་པོ་སླུ་བའི་བསམ་པས་བརྫུན་དུ་སྨྲ་བ་ནི་ལྟུང་བྱེད་ཡིན་ཏེ། དེ་གཉིས་ཀྱི་བྱེ་བྲག་ནི་དེ་ཡིན་ནོ། །གཞི་བཅུས་ནི་ལྟུང་བར་འགྱུར་ལ་ཞེས་བྱ་བ་ནི་མ་མཐོང་བ་དང༌། མ་ཐོས་པ་དང༌། མི་དོགས་པ་ཞེས་བྱ་བ་ནི་གཞི་གསུམ་མོ། །ཐོས་ལ་དེ་ཡང་བརྗེད་པ་དང༌། དེ་དོགས་པ་དེ་ཡང་བརྗེད་ཅེས་བྱ་བ་ནི་གཞི་གཉིས་སོ། །ཐོས་པ་ལ་ཡིད་ཆེས་པ་དང༌། ཐོས་པ་ལ་ཡིད་མ་ཆེས་པ་ཞེས་བྱ་བ་ནི་གཞི་གཉིས་སོ། །ཐོས་པ་ལ་དོགས་པ་དང༌། ཐོས་པ་ལ་མི་དོགས་པ་ཞེས་བྱ་བ་ནི་གཞི་གཉིས་སོ། །དོགས་པ་ལ་དོགས་པ་ཞེས་བྱ་བ་ནི་གཞི་གཅིག་པ་སྟེ། དེ་ལྟར་གཞི་བཅུས་ལྟུང་བར་འགྱུར་རོ། །གཞི་ལྔས་ལྟུང་བར་མི་འགྱུར་ཞེས་བྱ་བ་ནི་མ་མཐོང་བ་དང༌། མ་ཐོས་པ་དང༌། མི་དོགས་པ་ཞེས་
བྱ་བ་གཞི་གསུམ་མོ། །ཐོས་ལ་དེ་ཡང་བརྗེད་པ་དང༌། དེ་དོགས་ལ་དེ་ཡང་བརྗེད་པ་ཞེས་བྱ་བ་ནི་གཉིས་ཏེ་དེ་ལྟར་གཞི་ལྔས་ལྟུང་བར་མི་འགྱུར་རོ། །གཞི་བཅུ་གཅིག་གིས་ལྟུང་བར་འགྱུར་ལ་ཞེས་བྱ་བ་ནི་འདིར་མཐོང་ལ་དེ་ཡང་བརྗེད་པ་ཞེས་བྱ་བ་སྔ་མ་བཅུའི་སྟེང་དུ་བསྣན་ཏོ་ཞེས་བྱ་བའི་ཐ་ཚིག་གོ །གཞི་དྲུག་ཅེས་བྱ་བར་ཡང་དེས་མཐོང་བ་དེ་ཡང་མ་བརྗེད་པ་ཞེས་བྱ་བ་སྔ་མ་ལྔའི་ཐོག་ཏུ་བསྣན་པར་ཤེས་པར་བྱའོ། །སྐུར་པ་འདེབས་པའི་ལྟུང་བྱེད་དེ་དྲུག་ཅུ་རྩ་དགུ་པའི་ཚིག་རྣམ་པར་བཤད་པ་རྫོགས་སོ།། །།བུ་ཞེས་བྱ་བ་ནི་ཁྱེའུ་དང་བུ་མོ་དག་གོ །ར་རོ་ཞེས་བྱ་བ་ནི་ཆང་གིས་མྱོས་པ་ཟིན་པའོ། །བར་སྐབས་སོ་ཞེས་བྱ་བ་ནི་བར་མདོའོ། །སྐྱེས་པ་མེད་པར་བུད་མེད་དང་ཞེས་བྱ་བ་ནི་གང་ལ་གྲོགས་སྐྱེས་པ་གཞན་མེད་པའི་ཐ་ཚིག་གོ །གང་བུད་མེད་བསེལ་བྱེད་དུ་འཇུད་པ་ལ་སོགས་པ་ནི་བར་ཆད་ཀྱི་དབང་གིས་འགྲོ་བ་ཡིན་པས་ལྟུང་བ་མེད་དོ། །བུད་མེད་དང་ལྷན་ཅིག་འགྲོ་བའི་ལྟུང་བྱེད་དེ་བདུན་ཅུ་པའི་ཚིག་རྣམ་པར་བཤད་པ་རྫོགས་སོ།། །།སྟོང་པར་འདོང་ཞེས་བྱ་བ་ནི་ཁུར་མེད་པའོ། །ཁུར་དག་གིས་འདོང་ཞེས་བྱ་བ་ནི་ཁུར་ཐོགས་ཏེ་འདོང་བའོ། །ཕྱི་བཞིན་འགྲོ་ཞེས་བྱ་བ་ནི་ཕྱི་བཞིན་འབྲང་པའོ། །སེམས་ནི་མར་དང་འདྲ་ཞེས་བྱ་བ་ནི་རྒྱུད་མཉེན་པའོ། །དོན་མཐུན་རྐུན་མ་ཞེས་བྱ་བ་ནི་ཆོམ་རྐུན་གྱི་ཚོགས་སོ། །རྐུན་མ་དང་ལྷན་ཅིག་འགྲོ་བའི་ལྟུང་བྱེད་དེ་བདུན་ཅུ་རྩ་གཅིག་པའི་ཚིག་རྣམ་པར་བཤད་པ་རྫོགས་སོ།། །།དགེ་སློང་གི་དངོས་པོར་རྫོགས་པར་བསྙེན་པར་བྱེད་ཅེས་བྱ་བ་ནི་དགེ་སློང་གི་སྡོམ་པའི་ཕྱིར་ཉེ་བར་ཁྲིད་པ་བྱེད་པའོ། །གཞན་ལས་ཚིག་གི་ལམ་ངན་ལ་སྨྲས་པ་དང། ངན་པ་འོངས་པ་དག་ཅེས་བྱ་བ་ལ། ཚིག་གི་ལམ་ཞེས་བྱ་བ་ནི་ཐབ་མོའི་རྒྱུའོ། །ངན་པ་སྨྲས་པ་ཞེས་བྱ་བ་ནི་བརྒྱད་བཀག་ལ་སོགས་པའི་ངག་གི་ལས་སོ། །ངན་པ་འོངས་ཞེས་བྱ་བ་ནི་བརྡེག་པ་ལ་སོགས་པ་ལུས་ཀྱི་ལས་མི་འདོད་པ་དག་གོ །མི་བཟོད་ཅེས་བྱ་བ་ནི་དང་དུ་ལེན་པར་མི་ནུས་པའོ།། ཟག་པ་དག་ལ་ཇི་མི་སྙམ་པར་བྱ་བ་ཡང་མི་བཟོད་ཅིང་ཞེས་བྱ་བ་ནི་འདོད་ཆགས་ལ་སོགས་པའི་ཟག་པ་བསྩལ་བར་བྱ་བ་ཡང་མི་ནུས་པའོ། །དང་དུ་ལེན་མི་ནུས་པའི་རང་བཞིན་ཅན་ཞེས་བྱ་བ་ནི་སེམས་ཀྱིས་བཟོད་པར་མི་ནུས་པའོ། །དགེ་སློང་དེ་དག་ཀྱང་ཞེས་བྱ་བ་ནི་ལས་བྱེད་པ་ལ་སོགས་པའོ། །སྨད་པར་
འགྱུར་ཞེས་བྱ་བ་ནི་ལྟུང་བ་དང་བཅས་པར་འགྱུར་པའོ། །དེ་ལ་ལྟུང་བ་ཇི་ལྟར་འགྱུར་ཞེ་ན་ཞེས་བྱ་བ་ལ། ལོ་ཉི་ཤུ་ཡང་མ་ལོན་པ་ལ་ལོ་ཉི་ཤུ་མ་ལོན་པར་ཡང་འདུ་ཤེས་ཤིང་དྲིས་ན་ཡང་བདག་ལོ་ཉི་ཤུ་ཡང་མ་ལོན་ནོ་ཞེས་ཟེར་བ་ནི་གང་ཟག་གཅིག་གོ །ལོ་ཉི་ཤུ་ཡང་མ་ལོན་ལ་ལོ་ཉི་ཤུ་མ་ལོན་པར་ཡང་འདུ་ཤེས་ཤིང་དྲིས་ན་ཡང་ཤེས་ཤིང་དྲན་ལ་ཡིད་གཉིས་མི་ཟ་སྟེ། བདག་ལོ་ཉི་ཤུ་མ་ལོན་ནོ་ཞེས་ཟེར་བ་ནི་གང་ཟག་གཉིས་པའོ། །ལོ་ཉི་ཤུ་མ་ལོན་པ་ལ་ལོ་ཉི་ཤུ་ལོན་པར་འདུ་ཤེས་ཤིང་དྲིས་ན་ཡང་བདག་པོ་ཉི་ཤུ་ལོན་ནོ་ཞེས་ཟེར་བ་ནི་གང་ཟག་གསུམ་པའོ། །ལོ་ཉི་ཤུ་མ་ལོན་པ་ལ་ལོ་ཉི་ཤུ་ལོན་པར་འདུ་ཤེས་ཤིང་དྲིས་ན་ཡང་ཤེས་ཤིང་དྲན་ལ་ཡིད་གཉིས་མི་ཟ་སྟེ། བདག་ལོ་ཉི་ཤུ་ལོན་ནོ་ཞེས་ཟེར་བ་ནི་གང་ཟག་བཞི་པའོ། །ལོ་ཉི་ཤུ་མ་ལོན་པ་ལ་དེས་མི་ཤེས་མི་དྲན་ཡིད་གཉིས་མི་ཟ་བ་ནི་གང་ཟག་ལྔ་པའོ། །ལོ་ཉི་ཤུ་ལོན་པ་ལ་ལོ་ཉི་ཤུ་མ་ལོན་པར་འདུ་ཤེས་ཤིང་དྲིས་ན་ཡང་བདག་ལོ་ཉི་ཤུ་མ་ལོན་ནོ་ཞེས་ཟེར་བ་ནི་གང་ཟག་དྲུག་པའོ། །ལོ་ཉི་ཤུ་ལོན་ལ་ལོ་ཉི་ཤུ་མ་ལོན་པར་འདུ་ཤེས་ཤིང་དྲིས་པ་ན། ཤེས་ཤིང་དྲན་ལ་ཡིད་གཉིས་མི་ཟ་སྟེ། བདག་ལོ་ཉི་ཤུ་ལོན་ནོ་ཞེས་ཟེར་བ་ནི་གང་ཟག་བདུན་པའོ། །ལོ་ཉི་ཤུ་ཡང་ལོན་ལ་ལོ་ཉི་ཤུ་ལོན་པར་འདུ་ཤེས་ཤིང་དྲིས་པ་ན་བདག་ལོ་ཉི་ཤུ་ལོན་ནོ་ཞེས་ཟེར་བ་ནི་གང་ཟག་བརྒྱད་པའོ། །ལོ་ཉི་ཤུ་ལོན་ལ་ལོ་ཉི་ཤུ་ལོན་པར་ཡང་འདུ་ཤེས་ཤིང་དྲིས་པ་ན། ཤེས་ཤིང་དྲན་ལ་ཡིད་གཉིས་མི་ཟ་སྟེ། བདག་ལོ་ཉི་ཤུ་ལོན་ནོ་ཞེས་ཟེར་བ་ནི་གང་ཟག་དགུ་པའོ། །ལོ་ཉི་ཤུ་ལོན་ལ་དེས་མི་ཤེས་མི་དྲན་ལ་ཡིད་གཉིས་ཟ་བ་ནི་གང་ཟག་བཅུ་པའོ། །དེ་ལ་དང་པོ་ཉིད་ནས་རྫོགས་པར་བསྙེན་ཅིང་ཞེས་བྱ་བ་ནི་དུས་ལས་གྱུར་པའི་ལས་སུ་རུང་བ་ཉིད་ཀྱང་མེད་པའི་ཕྱིར་དང༌། འདུ་ཤེས་ལས་སྐྱེས་པ་སྤྲོ་བ་ལས་གྱུར་པའི་ལུས་རུང་བ་ཉིད་ཀྱང་མེད་པའི་ཕྱིར་རྫོགས་པར་བསྙེན་པ་ཉིད་མ་ཆགས་ཏེ། ཟ་མ་ལ་སོགས་པ་དང་འདྲའོ་ཞེས་བྱ་བའི་ཐ་ཚིག་གོ །འགྲོགས་པ་དང་ལོངས་སྤྱོད་པ་ལ་ཡང་ལྟུང་བར་འགྱུར་ལ་ཞེས་བྱ་བ་ལ། འགྲོགས་པ་ལ་ལྟུང་བར་འགྱུར་བ་ལ་ཞེས་བྱ་བ་ནི་གསོལ་པ་ལ་སོགས་པའི་ལས་ཉམས་སུ་མྱོང་བ་ནི་དེ་དང་གཞན་དག་ལ་ཡང་ལྟུང་བར་མི་འགྱུར་རོ་ཞེས་བྱ་བའི་ཐ་ཚིག་གོ །ལོངས་སྤྱོད་པ་ལ་ལྟུང་བར་འགྱུར་ལ་ཞེས་བྱ་བ་ནི་གསོ་སྦྱོང་དང་དགག་དབྱེ་ཉམས་སུ་
མྱོང་བ་ན་དེ་དང་གཞན་དག་ལ་ཡང་ལྟུང་བར་འགྱུར་རོ་ཞེས་བྱ་བའི་ཐ་ཚིག་གོ །དེས་དགེ་འདུན་ལ་ཡང་འགལ་ཚབས་ཅན་དུ་འགྱུར་རོ་ཞེས་བྱ་བ་ནི་མི་འོས་པ་རྫོགས་པར་བསྙེན་པར་བྱེད་པའི་ཕྱིར་དགེ་འདུན་ཐམས་ཅད་ལྟུང་བ་དང་བཅས་པར་འགྱུར་རོ་ཞེས་བྱ་བའི་ཐ་ཚིག་གོ །ཤེས་ཞེས་བྱ་བ་ནི་ལོ་གྲངས་ཤེས་པའོ། །དྲན་ཞེས་བྱ་བ་ནི་ལོ་ཚིགས་དྲན་པའོ། །ཡིད་གཉིས་མི་ཟ་ཞེས་བྱ་བ་ནི་འདི་ལ་ཐམས་ཅད་དུ་ངེས་པ་དང་ལྡན་པ་སྟེ། ལོ་ཉི་ཤུ་ལོན་ནམ་མ་ལོན་སྙམ་དུ་ཡིད་གཉིས་མི་ཟ་བའོ། །དེའི་མོད་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་འཆགས་ཤིང་ཞེས་བྱ་བ་ནི་ལས་བྱེད་པ་དེའི་མོད་ལ་རེ་ཞིག་སྐྱེས་པའི་རྩལ་དང་སེམས་ལས་གྱུར་པའི་ཞིང་ཡོད་པའི་ཕྱིར་དགེ་སློང་གི་དངོས་པོ་ཆགས་ཤིང་ཕྱིས་ནི་གལ་ཏེ་འདུ་ཤེས་ཆད་ན་དགེ་སློང་གི་དངོས་པོ་སྔར་ཆགས་པ་ཡང་འཇིག་པར་འགྱུར་རོ་ཞེས་བྱ་བའི་ཐ་ཚིག་གོ །མི་ཤེས་ཞེས་བྱ་བ་ནི་ལོ་གྲངས་མི་ཤེས་པའོ། །མི་དྲན་ཞེས་བྱ་བ་ནི་ལོ་ཚིགས་མི་དྲན་པའོ། །ཡང་ན་མི་ཤེས་ཞེས་བྱ་བ་ནི་བདག་གིས་ལོ་དུ་ལོན་པ་བཙལ་ཀྱང་མི་ཤེས་པའོ། །མི་དྲན་ཞེས་བྱ་བ་ནི་སྔོན་ཞེས་པ་ཡང་དེའི་ཚེ་ན་བརྗེད་པའོ། །ཡིད་གཉིས་ཟ་ཞེས་བྱ་བ་ནི་བློ་ལ་ཐེ་ཚོམ་ཟ་བའོ། །གང་ཟག་བཅུ་གཉིས་པོ་དེ་དག་གི་བྱེ་བྲག་བསྟན་པའི་ཕྱིར་དེ་ལ་གང་ཟག་དང་པོ་གཉིས་པོ་གང་དག་ཡིན་པ་དེ་དག་ནི་ཞེས་བྱ་བ་ལ་སོགས་པ་གསུངས་སོ། །དེ་ལ་གང་ཟག་དང་པོ་གཉིས་སོ་ཞེས་བྱ་བ་ནི་ལོ་ཉི་ཤུ་ཡང་མ་ལོན་ལ་ལོ་ཉི་ཤུ་མ་ལོན་པར་ཡང་འདུ་ཤེས་ཤིང་དྲིས་ན་ཡང་བདག་ལོ་ཉི་ཤུ་མ་ལོན་ནོ་ཞེས་ཟེར་བ་གང་ཡིན་པ་དེ་དང༌། ལོ་ཉི་ཤུ་ཡང་མ་ལོན་ལ་ལོ་ཉི་ཤུ་མ་ལོན་པར་ཡང་འདུ་ཤེས་ཤིང་དྲིས་ན་ཡང་ཤེས་ཤིང་དྲན་ལ་ཡིད་གཉིས་མི་ཟ་སྟེ། བདག་ལོ་ཉི་ཤུ་མ་ལོན་ནོ་ཞེས་ཟེར་བ་གང་ཡིན་པ་དེ་གཉིས་ཡིན་པར་བལྟ་བར་བྱའོ། །རྐུ་ཐབས་སུ་གནས་པ་ཡིན་ཏེ་ཞེས་བྱ་བ་ནི་རྐུ་ཐབས་སུ་ཆོས་ཀྱི་ལོངས་སྤྱོད་ཉམས་སུ་མྱོང་བར་བྱེད་པ་ཡིན་ཏེ། ལན་གཉིས་སུ་རྐུ་ཐབས་སུ་ལས་ཉམས་སུ་མྱོང་བར་བྱེད་པའི་ཕྱིར་རོ། །བསྙིལ་བར་འོས་པ་དག་ཡིན་ནོ་ཞེས་བྱ་བ་ནི་རབ་ཏུ་བྱུང་བའི་སྡོམ་པ་འཆགས་པའི་རྟེན་མ་ཡིན་པའི་ཕྱིར་ཡོངས་སུ་སྤང་བར་འོས་པ་དག་ཡིན་ནོ། །མངལ་ན་གནས་པའི་ཟླ་བ་ཞེས་བྱ་བ་ནི་ཐོག་མ་མངལ་དུ་ཆགས་ནས་མངལ་གྱི་སྒོར་མ་བཙས་གྱི་བར་
གྱི་ཟླ་བ་དུ་ཡོད་པ་དག་གོ །ཤོལ་གྱི་ཟླ་བ་དག་ཅེས་བྱ་བ་ནི་ཟླ་བ་ལྷག་མ་དག་གོ །བརྩི་བར་བྱ་བ་སྟེ་ཞེས་བྱ་བའི་ཚིག་ནི་འདི་ལྟར་འཇིག་རྟེན་པའི་ཀུན་རྫོབ་ཀྱིས་མངལ་ན་གནས་པའི་ཚེ་ཟླ་བ་དང་ཟླ་བ་ལྷག་པ་དག་ལོགས་ཤིག་ཏུ་མི་བརྩི་མོད་ཀྱི་འོན་ཀྱང་ཡང་དག་པའི་སེམས་ལ་བརྩི་བར་བྱ་སྟེ། མངལ་ན་གནས་པའི་ཚེ་ཡང་ལུས་སྐྱེས་པ་ཡིན་ལ་ཤོལ་གྱི་ཟླ་བ་དག་འདས་པ་ན་ཡང་དུས་ལས་གྱུར་པའི་ལུས་རུང་བ་ཉིད་དུ་སྐྱེ་བའི་ཕྱིར་རོ་ཞེས་བསྟན་པའི་ཕྱིར་རོ། །ས་སྤོ་བར་བྱ་བ་ཞེས་བྱ་བ་ནི་དགེ་ཚུལ་ཉིད་དུ་བཀྲི་བར་བྱ་བའོ། །ཡང་རྫོགས་པར་བསྙེན་པར་བྱ་ཞེས་བྱ་བ་ནི་ལུས་གྱུར་པའི་ཞིང་ཉིད་ནི་སེམས་ཀྱི་བྱེ་བྲག་ནི་ལྷན་ཅིག་བྱེད་པའི་རྒྱུར་གྱུར་པ་ཉམས་པས་རྫོགས་པར་བསྙེན་པ་ཡང་ཉམས་པའི་ཕྱིར་རོ། །ཆོས་མངོན་པ་ལས་འདི་སྡོམ་པ་གཏོང་བའི་རྒྱུ་ཉིད་དུ་མ་བགྲངས་པ་ནི་མ་ངེས་པའི་ཕྱིར་རོ། །གལ་ཏེ་ཚང་ན་དེ་ལྟ་ན་ལེགས་ཞེས་བྱ་བ་ནི་དཔྱད་ཁོངས་སུ་གཞུག་པ་སྟེ། མངལ་ན་གནས་པའི་ཟླ་བ་དག་ཀྱང་ལས་ཀྱི་དབང་གིས་མང་ཉུང་མ་ངེས་པའི་ཕྱིར་རོ། །འདི་ལྟར་གང་ཟག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ཞིང་རྫོགས་པར་བསྙེན་པ་དགེ་སློང་གི་དངོས་པོ་འཐོབ་པ་ནི་དཀོན་པའི་ཕྱིར་རོ་ཞེས་བྱ་བ་ནི། འདི་ལྟར་དགེ་སློང་གི་དངོས་པོ་ཐོབ་པ་ལ་དོགས་པ་ལ་སོགས་པ་གཅད་པའི་ཕྱིར་ཏེ། འདི་ལྟར་འདུལ་བ་ལ་སོགས་པས་ཡོངས་སུ་བཏང་བ་བྱས་ནས་གལ་ཏེ་ཡང་བླངས་པ་བཅོས་པར་བྱེད་ན་དེའི་ཚེ་ན་བ་དང༌། འཆི་བ་དང༌། གྲོགས་མེད་པ་དང༌། ཡུལ་འཁྲུགས་པ་ལ་སོགས་པའི་དབང་གིས་ཕྱིར་ཐོབ་པར་ཤིན་ཏུ་དཀའ་བས་དེའི་ཕྱིར་དགེ་སློང་གི་དངོས་པོ་ཇི་ལྟར་ཐོབ་པའི་ལོ་ཚད་དྲན་བ་རྙེད་ན་ལེགས་པར་རྫོགས་པར་བསྙེན་པ་ཡིན་ཏེ། ཡང་རྫོགས་པར་བསྙེན་པར་བྱ་མི་དགོས་སོ་ཞེས་བྱ་བའི་ཐ་ཚིག་གོ །ཤེས་པར་བྱ་ཞེས་བྱ་བ་ནི་འདུ་ཤེས་ཐོབ་པར་བྱ་བའོ། །དྲན་པར་བྱ་ཞེས་བྱ་བ་ནི་སྔོན་གྱི་བྱུང་བའི་མཐའ་ཉེ་བར་བསྒྲུབ་པ་ལ་སོགས་པས་ལོའི་དྲན་པ་འཐོབ་པར་བྱའོ། །ཡིད་གཉིས་སྤང་བར་བྱ་ཞེས་བྱ་བ་ནི་ལོ་ལ་ངེས་པ་བསྐྱེད་པས་ཐེ་ཚོམ་སྤང་བར་བྱ་བའོ། །དེ་དག་ནི་འགྱོད་པ་ལ་སོགས་པ་བསལ་བའི་ཕྱིར་བསྒོ་བར་བྱ་བ་ཡིན་པར་ཤེས་པར་བྱའོ། །ལས་དང་པོ་པ་དང༌། སྨྱོས་པ་དང༌། སེམས་འཁྲུགས་པ་དང༌།
ཚོར་བ་དག་གིས་ཉེན་པ་ལ་ལྟུང་བ་མེད་དོ་ཞེས་བྱ་བ་ནི་མཁན་པོ་ལ་ལྟུང་བྱེད་མེད་པ་དང༌། དགེ་འདུན་ལ་ཉེས་པ་མེད་པ་དང༌། གང་ཟག་དེ་རྫོགས་པར་བསྙེན་པར་མི་འགྱུར་བ་མ་ཡིན་པའི་ཚིག་ཡིན་ནོ། །མ་ལེན་པར་རྫོགས་པར་བསྙེན་པར་བྱེད་པའི་ལྟུང་བྱེད་དེ་བདུན་ཅུ་གཉིས་པའི་ཚིག་རྣམ་པར་བཤད་པ་རྫོགས་སོ།། །།བམ་པོ་བཅོ་ལྔ་པ། རྣང་སྒལ་ཞེས་བྱ་བ་ནི་རྣང་གི་མཚམས་སོ། །སྤྱུར་བར་བྱེད་ཅེས་བྱ་བ་ནི་བདག་ཉིད་ཀྱིས་ཕུང་པོར་བྱེད་པའོ། །སྤྱུར་དུ་འཇུད་པར་བྱེད་ཅེས་བྱ་བ་ནི་གཞན་སྤུང་དུ་འཇུད་པར་བྱེད་པའོ། །ཡུར་བ་ཞེས་བྱ་བ་ནི་ཆུ་སྲོལ་ལོ། །རང་བཞིན་ཅན་ཞེས་བྱ་བ་ནི་ཤིན་ཏུ་འཐས་པའི་རང་བཞིན་ཅན་ནོ། །རང་བཞིན་ཅན་མ་ཡིན་པ་ཞེས་བྱ་བ་ནི་ཤིན་ཏུ་འཐས་པའི་རང་བཞིན་ཅན་མ་ཡིན་པ་གཞན་ནོ། །ཆར་ཆུ་ཞོད་ཅེས་བྱ་བ་ནི་ཆར་ཆེ་ཞིང་ལན་གསུམ་མམ་བཞི་ལ་སོགས་པ་ཆར་འབབ་པའོ། །ཆར་ཆུ་མ་ཞོད་ཅེས་བྱ་བ་ནི་དེ་ལས་བཟློག་པའོ། །ས་ཞག་ཅེས་བྱ་བ་ནི་ས་འགོག་པའོ། །གྲུགས་པ་ཞེས་བྱ་བ་ནི་གྱོང་གྲུགས་སུ་གྱུར་པ་སྟེ་ཉམས་པའི་ཤས་ཆེ་བས་དེ་ལ་ཉེས་བྱས་སུ་འགྱུར་རོ། །ཕུར་པ་འབྱིན་པ་ཞེས་བྱ་བ་ནི་འཆོས་པ་དང་འདྲ་བའི་ཕྱིར་ཉེས་བྱས་བྱེད་པ་ཡིན་ནོ། །ཤོད་དགོད་པའི་བསམ་པ་ཞེས་བྱ་བ་ནི་ཡི་གེ་ལ་སོགས་པ་བྲི་བའི་བསམ་པ་སྟེ་གཞིག་པའི་བསམ་པ་མེད་པའི་ཕྱིར་འདི་ལ་ལྟུང་བ་མེད་དོ། །ངོགས་ཞེས་བྱ་བ་ནི་ཆུ་ཀླུང་ཟློག་པར་བྱེད་པའོ། །འདམ་སྐྱོད་པ་ཞེས་བྱ་བ་ནི་འདམ་རྫབ་འཁྲུག་པར་བྱེད་པ་སྟེ། འཇིག་པར་བྱེད་པ་དང་འདྲ་པའི་ཕྱིར་དེ་ལ་ཉེས་བྱས་སུ་འགྱུར་རོ། །ཚྭ་སྒོ་ཞེས་བྱ་བ་ནི་ཆར་པ་ལ་སོགས་པ་ལས་གྱུར་པའི་ས་འབུས་པ་སྟེངས་མ་ཡིན་པའི་ཕྱིར་དེ་ལ་ཉེས་བྱས་སུ་འགྱུར་རོ། །རྡོ་བ་ཅན་ཞེས་བྱ་བ་ནི་རྡོ་བ་ཡོད་པའོ། །གལ་ཏེ་ས་ཆེས་མང་ལ་ཞེས་བྱ་བ་ནི་སའི་ཁམས་རང་བཞིན་ཅན་ཞེས་མང་བ་ཉིད་དུ་སྟོན་ཏོ། །བྱེ་མ་ཅན་ཞེས་བྱ་བ་ནི་བྱེ་མ་ཡོད་པའོ། །རྒྱུ་སྐར་གྱི་སྦྱོར་བ་ཞེས་བྱ་བ་ནི་རྒྱུ་སྐར་དང་འབྲེལ་པས་ཕོངས་པའི་དུས་ཡིན་པའི་ཕྱིར་འཇིག་རྟེན་གྱིས་སྨད་པར་འགྱུར་བས་འདི་ལ་ལྟུང་བ་མེད་དོ། །རུང་བར་བྱེད་པ་མེད་ན་ཞེས་བྱ་བ་ནི་དེ་ཡང་རྫོགས་པར་མ་བསྙེན་པ་གཞན་མེད་ན་གནང་གི་ཡོད་ན་མི་གནང་ངོ༌། །ས་རྐོ་བའི་ལྟུང་བྱེད་དེ་བདུན་ཅུ་རྩ་གསུམ་པའི་ཚིག་རྣམ་པར་བཤད་
པ་རྫོགས་སོ།། །།བདེ་བའི་སྨན་ཞེས་བྱ་བ་ནི། ཞུན་མར་དང་འབྲུ་མར་ལ་སོགས་པ་བདེ་བ་རྣམས་ཀྱིས་སྦྱང་དུ་རུང་བ་གང་ཡིན་པའོ། །དུས་སུ་རུང་བ་ཞེས་བྱ་བ་ནི་སྔ་དྲོའི་དུས་སུ་བཟར་རུང་བ་ཕྱེ་དང་སྣུམ་ཁུར་ལ་སོགས་པ་གང་ཡིན་པའོ། །ཐུན་ཚོད་དུ་རུང་བ་ཞེས་བྱ་བ་ནི་ཐུན་ཚོད་ཀྱི་མཐའི་དུས་ཚུན་ཆད་དུ་བཏུང་དུ་རུང་ལ་ལེགས་པར་སྦྱར་བའི་བཏུང་བ་ལ་སོགས་པ་གང་ཡིན་པའོ། །ཞག་བདུན་པ་ཞེས་བྱ་བ་ནི་ཞག་བདུན་པར་བྱིན་གྱིས་བརླབས་ཏེ་བཟའ་བ་བུ་རམ་ལ་སོགས་པ་གང་ཡིན་པའོ། །འཚོ་བའི་བར་དུ་བཅང་བ་ཞེས་བྱ་བ་ནི་དུས་ཐམས་ཅད་དུ་བྱིན་གྱིས་བརླབས་ཏེ་བཟའ་བ་ལན་ཚྭ་ལ་སོགས་པ་གང་ཡིན་པའོ། །གཤེགས་སྟོན་ཞེས་བྱ་བ་ནི་ཡོངས་སུ་རྫོགས་པའི་སྟོན་མོའོ། །ཧ་ཅང་སློང་བ་ཞེས་བྱ་བ་ནི་སྒྲུབ་དཀའ་པའི་ཟས་ཧ་ཅང་སློང་བའོ། །དཔུང་རྒྱན་དང་རྣ་ཆ་གདུབ་འཁོར་དང་ཕྲེང་བ་སྣ་ཚོགས་ཀྱིས་བརྒྱན་པ་དང༌། བྱུག་པས་བརྒྱན་པར་གྱུར་ཏེ་ཞེས་བྱ་བ་ནི་བརྒྱན་པར་གྱུར་ཏེ་ཞེས་བྱ་བའི་སྒྲ་ནི་རེ་རེ་དང་སྦྱར་རོ། །ཉེ་འཁོར་ཞེས་བྱ་བ་ནི་གམ་ཡོའོ། །ཚིགས་བཅད་དག་སྨྲས་པ་ཞེས་བྱ་བ་ལ་སོགས་པ་ལ། ཞེ་སྡང་གནས་སུ་གྱུར་ཅེས་བྱ་བ་ནི་ཞེ་སྡང་བར་བྱ་བའི་གནས་ཏེ་མི་སྡུག་པའོ། །ཧ་ཅང་སློང་བས་བདག་ལ་བསྡིགས་བྱེད་པ།། རལ་གྱི་རྡོ་དང་འབྲུ་མར་བདར་བ་བཞིན། །ཞེས་བྱ་བ་ནི་ཇི་ལྟར་རལ་གྱི་རྡོ་ཕྱེ་དང་འབྲུ་མར་གྱིས་བདར་བ་རྣོན་པོས་བསྡིགས་པར་བྱེད་ན་གནོད་པ་སྐྱེ་བར་འགྱུར་བ་དེ་བཞིན་ཁྱོད་ཧ་ཅང་སློང་བ་རལ་གྱི་ངང་འདྲ་བས་བདག་ལ་བསྡིགས་པར་བྱེད་དོ་ཞེས་བྱ་བའི་ཐ་ཚིག་གོ །གལ་ཏེ་ཁྱོད་གནས་ཕྱིན་ཆད་བདག་འོང་ན། །བདག་གི་ཀླད་པར་རྡོ་བས་བསྣུན་གྱིས་ཤིག །ཅེས་བྱ་བ་ནི་དེའི་ཕྱིར་གལ་ཏེ་ཁྱོད་ཀྱི་གནས་སུ་ཕྱིན་ཆད་བདག་འོང་བར་གྱུར་ན་བདག་གི་ཀླད་པར་རྡོ་བས་བསྣུན་ཅིག་ཅེས་བྱ་བའི་ཐ་ཚིག་གོ །ཚེར་མ་ནི་དགྲ་ཡིན་པས་ཞེས་བྱ་བ་ནི་མི་མཐུན་པ་ནི་དགྲ་ཡིན་པའོ། །ཕྲུ་གུ་ཞེས་བྱ་བ་ནི་བུའོ། །ཟླ་བ་བཞིར་མགྲོན་དུ་བོས་པ་ཞེས་བྱ་བ་ནི་དབྱར་གྱི་དུས་ཟླ་བ་གཅིག་དང༌། དབྱར་ཐུང་ངུའི་དུས་ཉིན་ཞག་གཅིག་དང༌། དབྱར་རིང་པོའི་དུས་ཟླ་བ་གཉིས་དང༌། ཞག་ཉི་ཤུ་རྩ་དགུ་པོ་དག་ཏུ་སྟེ། དབྱར་ཟླ་འབྲིང་པོ་ཉ་ནས་སྟོན་ཟླ་ཐ་ཆུངས་ཉའི་བར་གྱི་ཟླ་བ་བཞིར་རོ། །སོ་སོར་
མགྲོན་དུ་བོས་པ་མ་གཏོགས་ཏེ་ཞེས་བྱ་བ་ནི་སོ་སོར་མགྲོན་དུ་བོས་པ་ནི་གུས་པའི་ཕྱིར་དགེ་འདུན་སྤྱན་དྲངས་པའི་དུས་ལས་ལྷག་པ་ལ་ཡིན་པས་ལྟུང་བ་མེད་དོ། །ཡང་ཡང་མགྲོན་དུ་བོས་པ་མ་གཏོགས་ཏེ་ཞེས་བྱ་བ་ནི་ཡང་དང་ཡང་དུ་མགྲོན་དུ་བོས་པ་ན་འབད་པའི་ཕྱིར་དགེ་འདུན་སྤྱན་དྲངས་པའི་དུས་ལས་ལྷག་པ་བརྟེན་པ་ཡིན་པས་ལྟུང་བ་མེད་དོ། །དུས་ཀྱིས་མགྲོན་དུ་བོས་པ་མ་གཏོགས་ཞེས་བྱ་བ་ནི་དུས་ཀྱིས་མགྲོན་དུ་བོས་པ་ནི་མངོན་པར་ཞེན་པའི་དབང་གིས་དགེ་འདུན་སྤྱན་དྲངས་པའི་དུས་ལས་ལྷག་པ་ལ་བརྟེན་པ་ཡིན་པས་ལྟུང་བ་མེད་དོ། །རྟག་ཏུ་མགྲོན་དུ་བོས་པ་མ་གཏོགས་ཏེ་ཞེས་བྱ་བ་ནི་མངོན་སུམ་དུ་གཞན་ལ་བརྟེན་པ་ཡིན་པས་ལྟུང་བ་མེད་དོ། །དགེ་སློང་གིས་ཇི་ཙམ་ཅུང་ཟད་ཟླ་བ་བཞིར་མགྲོན་དུ་བོས་པ་ལས་ལྷག་པར་བདག་གིར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ་ཞེས་བྱ་བ་ནི་དབྱར་ཟླ་བ་བཞིར་མགྲོན་དུ་བོས་པ་ཡོངས་སུ་རྫོགས་པའི་འོག་ཏུ་སོ་སོར་མགྲོན་དུ་བོས་པ་ལ་སོགས་པ་དུས་མེད་པ་བཅའ་བ་དང་བཟའ་བ་ངན་པ་ཡང་རུང་བསོད་པ་ཡང་རུང་ལ་བསླངས་ཏེ་ཟན་སློང་བའི་ཚེ་ན་ཉེས་བྱས་སུ་འགྱུར་ལ། ཟོས་ན་ལྟུང་བྱེད་དོ་ཞེས་བྱ་བའི་ཐ་ཚིག་གོ །དགེ་སློང་གིས་ངན་པ་ལ་མགྲོན་དུ་བོས་པ་ན་བསོད་པ་སློང་ན་དེ་སློང་བ་ན་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་རོ་ཞེས་བྱ་བ་ནི་སྔར་མགྲོན་དུ་བོས་པའི་གནས་ཀྱི་ཡུལ་ལ་ཁ་ན་མཐོ་བ་འདི་རྣམ་པར་གཞག་གི་སྔར་མགྲོན་དུ་མ་བོས་པའི་གནས་ཀྱི་ཡུལ་ལ་བསོད་པ་སློང་བའི་ཁ་ན་མ་ཐོ་བར་འགྱུར་ཏེ། དེ་གཉིས་ཀྱི་བྱེ་བྲག་ནི་དེ་ཡིན་ནོ། །དགེ་སློང་གི་བསོད་པ་ལ་མགྲོན་དུ་མ་བོས་པ་ན་ངན་པ་སློང་ན་དེ་སློང་བ་ལ་ཉེས་བྱས་སུ་འགྱུར་ལ། ཟ་བ་ལ་ཡང་ཉེས་བྱས་སུ་འགྱུར་རོ་ཞེས་བྱ་བ་ཡང་སྔར་མགྲོན་དུ་བོས་པའི་གནས་ཀྱི་ཡུལ་ལ་ནི་མགྲོན་དུ་བོས་པ་ལས་རིང་དུ་འདུག་པའི་གནས་སྐབས་ཀྱི་ཁ་ན་མ་ཐོ་བ་འདི་རྣམ་པར་གཞག་གོ །སྔར་མགྲོན་དུ་མ་བོས་པའི་ཡུལ་ལ་ནི་བསོད་པ་སློང་བའི་སྐབས་ཀྱི་ཁ་ན་མ་ཐོ་བ་འདིར་འགྱུར་ཏེ། དེ་གཉིས་ཀྱི་བྱེ་བྲག་ཀྱང་དེ་ཡིན་ནོ། །དགེ་སློང་བསོད་སྙོམས་ལ་ཞུགས་པ་ན་བུད་མེད་ཀྱི་ཡུལ་ཟས་ཁྱེར་ཏེ་འོངས་ན་དགེ་སློང་གིས་སློང་མོ་ཆོ་ག་མི་འདོད་དོ་ཞེས་བརྗོད་པར་བྱ་སྟེ། གལ་ཏེ་བུད་མེད་ཀྱི་ཡུལ་ན་རེ་འཕགས་པ་ཅི་ཞིག་བཞེད་ཅེས་ཟེར་ན་
བསྟབས་པར་བརྗོད་པར་བྱའོ། །གང་འདོད་པ་དེ་བསླང་བར་བྱའོ་ཞེས་བྱ་བ་ནི་སྔར་ཟླ་བ་བཞིར་མགྲོན་དུ་བོས་པ་ཡོངས་སུ་རྫོགས་པའི་འོག་ཏུ་ཁྱིམ་དེ་ཉིད་ནས་སྦྱིན་བདག་དེ་སྐད་ཟེར་ན་བསྟབས་པ་ཡིན་པས་མགྲོན་དུ་གཉེར་བ་ལས་རིང་དུ་འདུག་པའི་ལྟུང་བྱེད་དུ་མི་འགྱུར་ལ། སྔར་མགྲོན་དུ་མ་བོས་པའི་ཁྱིམ་ནས་སྦྱིན་བདག་དེ་སྐད་ཟེར་ན་ཡང་བསྟབས་པ་ཡིན་པས་བསོད་པ་སློང་བའི་ལྟུང་བྱེད་དུ་མི་འགྱུར་ཏེ། དེ་གཉིས་ཀྱི་བྱེ་བྲག་ཀྱང་དེ་ཡིན་པར་ཤེས་པར་བྱའོ། །མགྲོན་དུ་གཉེར་བ་ལས་རིང་དུ་འདུག་པའི་ལྟུང་བྱེད་དེ་བདུན་ཅུ་རྩ་བཞི་པའི་ཚིག་རྣམ་པར་བཤད་པ་རྫོགས་སོ།། །། ཐུན་མོང་ཞེས་བྱ་བ་ནི་དགེ་སློང་དང་དགེ་སློང་མ་རྣམས་ཀྱི་ཐུན་མོང་ངོ༌། །གཉི་གའི་དགེ་འདུན་ཞེས་བྱ་བ་ནི་དགེ་སློང་དང་དགེ་སློང་མ་གཉི་གའི་དགེ་འདུན་ནོ། །ཁུར་བསླང་ཞེས་བྱ་བ་ནི་བྱིས་པ་ཞེས་བྱ་བ་ལ་སོགས་པའི་ཚིག་གི་ངོ་བོ་ཉིད་ཀྱི་ངག་གི་ཉེས་པར་སྤྱོད་པ་དག་གིས་ཕུང་པོར་བསྩགས་པའོ། མགོ་ཞེས་བྱ་བ་ནི་ལུས་སོ། །ནོད་དོ་ཞེས་བྱ་བ་ནི་ལེན་ཏོ་ཞེས་བྱ་བའི་ཐ་ཚིག་གོ །ཕྱུགས་ཆུང་ཞེས་བྱ་བ་ནི་ལོང་ཚོ་ལ་བབ་པ་གཞོན་ནུ་མའོ། །མདོ་སྡེ་མཐའ་དག་འཛིན་པ་ཞེས་བྱ་བ་ནི་མདོ་སྡེའི་གཞུང་འཛིན་པའོ། །འདུལ་བ་མཐའ་དག་འཛིན་པ་དང༌། མ་མོ་མཐའ་དག་འཛིན་པ་ཞེས་བྱ་བ་ཡང་འདུལ་བའི་གཞུང་དང་མ་མོའི་གཞུང་འཛིན་པའོ། །བློ་གྲོས་རྨོངས་པ་ཁ་ཅིག་མ་མོའི་ཞེས་བྱ་བ་ནི་བཅོམ་ལྡན་འདས་ཀྱིས་འདུལ་བ་མ་མོ་ཡིན་པར་གསུངས་ཀྱི། །ཆོས་མངོན་པ་ནི་བཅོམ་ལྡན་འདས་ཀྱིས་གསུངས་པ་མ་ཡིན་པས་མ་མོ་མ་ཡིན་ནོ་ཞེས་ཟེར་བ་དེ་དག་གི་གཞུང་ནི་འདིར་འདུལ་བ་མཐའ་དག་འཛིན་པ་ཞེས་གསུངས་པས་འདུལ་བའི་མ་མོ་ནི་ཡང་འདུལ་བ་མཐའ་དག་ཅེས་བྱ་བའི་ཁོངས་སུ་གཏོགས་པས་འདུལ་བའི་སྡེ་སྣོད་ཉིད་དུ་གསུངས་སོ། མ་མོ་མཐའ་དག་འཛིན་པ་ཞེས་བྱ་བ་ལོགས་ཤིག་ཏུ་གསུངས་པས་ཆོས་མངོན་པ་ཉིད་མ་ཡིན་པར་བསྟན་པས་བསལ་བར་ཤེས་པར་བྱའོ། །ཉེས་པར་བསམ་པ་སེམས་པ་ཞེས་བྱ་བ་ནི་བརྣབ་སེམས་ལ་སོགས་པ་ཡིད་གཉིས་པར་སྤྱོད་པ་གསུམ་སེམས་པའོ། །ཉེས་པར་སྨྲ་བར་བརྗོད་པ་ཞེས་བྱ་བ་ནི་བརྫུན་དུ་སྨྲ་བ་ལ་སོགས་པ་ངག་གི་ཉེས་པར་བརྗོད་པ་བཞི་བརྗོད་པའོ། །ཉེས་པར་བྱ་བའི་ལས་བྱེད་པ་ཞེས་བྱ་བ་ནི་སྲོག་གཅོད་པ་ལ་སོགས་པ་ལུས་
ཀྱི་ཉེས་པར་སྤྱོད་པ་གསུམ་བྱེད་པ་སྟེ། དེ་དག་གིས་ནི་ལྷན་ཅིག་སྐྱེས་པའི་ཤེས་རབ་དང་བྲལ་བ་བསྟན་ཏེ། །མདོ་སྡེ་འཛིན་པ་མ་ཡིན་པ་ཞེས་བྱ་བ་ནི་མདོ་སྡེའི་ཚིག་འཛིན་པ་མ་ཡིན་པའོ། །འདུལ་བ་འཛིན་པ་མ་ཡིན་པ་དང༌། མ་མོ་འཛིན་པ་མ་ཡིན་པ་དང་ཞེས་བྱ་བ་ཡང་འདུལ་བའི་ཚིག་འཛིན་པ་མ་ཡིན་པ་དང༌། མ་མོའི་ཚིག་འཛིན་པ་མ་ཡིན་ཏེ། དེ་དག་གིས་ནི་ལུང་ལས་སྐྱེས་པའི་ཤེས་རབ་དང་བྲལ་བ་བསྟན་ཏོ། །མདོ་སྡེ་ལ་མི་གསལ་བ་ཞེས་བྱ་བ་ནི་མདོ་སྡེའི་གོ་མི་ཤེས་པའོ། །འདུལ་བ་ལ་མི་གསལ་བ་དང༌། མ་མོ་ལ་མི་གསལ་བ་ཞེས་བྱ་བ་ཡང་འདུལ་བའི་དོན་མི་ཤེས་པ་དང༌། མ་མོའི་དོན་མི་ཤེས་པ་སྟེ། དེ་དག་གིས་ནི་བསམས་པ་ལས་བྱུང་བའི་ཤེས་རབ་དང་བྲལ་བ་བསྟན་ཏོ། །མདོ་སྡེ་ལ་མི་མཁས་པ་ཞེས་བྱ་བ་ནི་མདོ་སྡེའི་དོན་ཤེས་པ་ལ་ཤིན་ཏུ་མ་གོམས་པའོ། །འདུལ་བ་ལ་མི་མཁས་པ་དང༌། མ་མོ་ལ་མི་མཁས་པ་ཞེས་བྱ་བ་ཡང་འདུལ་བའི་དོན་ཤེས་པ་ལ་ཤིན་ཏུ་མ་གོམས་པ་དང༌། མ་མོའི་དོན་ཤེས་པ་ལ་ཤིན་ཏུ་མ་གོམས་པ་སྟེ། དེ་དག་གིས་ནི་བསམས་པ་ལས་བྱུང་བའི་ཤེས་རབ་ལ་གོམས་པ་དང་བྲལ་བ་བསྟན་ཏོ། །ཡང་དག་པ་ཁོ་ནར་བྱིས་པ་དང༌། གླེན་པ་དང༌། མི་གསལ་བ་དང༌། མི་མཁས་པ་ཡིན་ན་ལྟུང་བ་མེད་དོ་ཞེས་བྱ་བ་ནི་བསླབ་པ་ལ་ཉེ་བར་འཇོག་པ་སྤོང་བའི་བློ་མེད་པས་འདི་ལ་བསླབ་པ་ཉེ་བར་འཇོག་པ་སྤོང་བའི་ལྟུང་བ་ནི་མེད་ཀྱི་མིའི་སྐྱོན་ནས་སྨྲ་བའི་ལྟུང་བ་མེད་པ་མ་ཡིན་ནོ། །བསླབ་པ་ལ་ཉེ་བར་འཇོག་པའི་ལྟུང་བྱེད་དེ་བདུན་ཅུ་རྩ་ལྔ་པའི་ཚིག་རྣམ་པར་བཤད་པ་རྫོགས་སོ།། །།གྲོས་བྱེད་ཅེས་བྱ་བ་ནི་བློ་མཐུན་པར་བྱེད་པའོ། །འཇབ་ཅེས་བྱ་བ་ནི་སྒོ་དང་སྐར་ཁུང་ལ་སོགས་པ་ནས་བདག་ཉིད་སྦས་ཏེ་འཇབ་པའོ། །སྤན་སྤུན་ཞེས་བྱ་བ་ནི་རྩྭ་ལ་སོགས་པ་ཐིབས་པོ་དག་གོ །ཚད་ཚིང་ཞེས་བྱ་བ་ནི་ལྕུག་མ་དང་གེལ་བ་དག་ལ་སོགས་པ་ཐིབས་པོ་དག་གོ །ཉན་རྣ་ཞེས་བྱ་བ་ནི་འཇབ་ཅིང་དྲུང་དུ་འདུག་སྟེ་ཉན་པའོ། །དེ་ལྟ་བུའི་བསམ་པས་གཉེན་པོ་ཞེས་བྱ་བ་ནི་གྲོས་བྱེད་པ་དེ་དག་གི་མི་མཐུན་ཕྱོགས་སུ་གྱུར་པའི་དགེ་སློང་རྣམས་ཀྱི་བློའི་མི་མཐུན་ཕྱོགས་ཀྱིས་མི་མཐུན་པ་བསྒྲུབ་པར་བྱའོ་སྙམ་པའོ། །སྒྲ་ཐོས་ཞེས་བྱ་བ་ནི་སྒྲ་ཉི་ཚེ་ཐོས་པའོ། །སྒྲའི་དོན་གོ་བ་ཞེས་བྱ་བ་ནི་ཚིག་གི་
དོན་གོ་བའོ། །ནད་དང་བཅས་པ་མ་ཡིན་པ་ཞེས་བྱ་བ་ནི་མི་མཐུན་པའི་ཕྱོགས་མ་ཡིན་ནོ། །གྱ་ཚོམ་དུ་འཇུག་པ་ཞེས་བྱ་བ་ནི་འདི་ནི་ཅི་བྱེད་སྙམ་དུ་མ་བརྟགས་པར་འཇུག་ཅེས་བྱ་བའི་ཐ་ཚིག་གོ །མཉན་ནས་ཉེ་བར་ཞི་བར་བྱའོ་སྙམ་པ་ཞེས་བྱ་བའི་ཐབ་མོ་ཉེ་བར་ཞི་བར་བྱ་བའི་ཕྱིར་ཉན་པ་སྟེ། དེ་ལ་ནི་ཉན་རྣ་བ་ལས་གྱུར་པའི་ལྟུང་བར་མི་འགྱུར་རོ། །ཉན་རྣ་བ་ལས་གྱུར་པའི་ལྟུང་བྱེད་དེ་བདུན་ཅུ་རྩ་དྲུག་པའི་ཚིག་རྣམ་པར་བཤད་པ་རྫོགས་སོ།། །།བསླང་ཞེས་བྱ་བ་ནི་བསྒྲེངས་པའོ། །འདོད་པ་སྨོས་ཤིག་ཅེས་བྱ་བ་ནི་གང་ཅི་འདོད་པ་སྨྲོས་ཤིག་ཅེས་བྱ་བའི་ཐ་ཚིག་གོ ། གཏམ་རྣམ་པར་གཏན་ལ་འབེབས་པ་ཞེས་བྱ་བ་ནི་གཏམ་རྣམ་པར་དཔྱོད་པའོ། །མི་སྨྲ་བར་འགྲོ་བའི་ལྟུང་བྱེད་དེ་བདུན་ཅུ་རྩ་བདུན་པའི་ཚིག་རྣམ་པར་བཤད་པ་རྫོགས་སོ།། །།གླང་ཆེན་ལྷས་ཀྱི་བདག་པོ་ཞེས་བྱ་བ་ནི་དགེ་སློང་ནག་པའི་ཕའི་མིང་ངོ༌། །ནག་པ་ཞེས་བྱ་བ་ནི་དགེ་སློང་དེ་ཉིད་ཀྱི་མིང་ངོ༌། །འདི་ནི་ཆོས་སོ་ཞེས་བྱ་བ་ནི་དངོས་པོའི་དོན་གཞག་པ་སྟེ། ཆོས་མངོན་པའི་མཚན་ཉིད་དོ། །འདི་ནི་འདུལ་བའོ་ཞེས་བྱ་བ་ནི་ཚུལ་ཁྲིམས་རྣམ་པར་གཞག་པ་སྟེ་འདུལ་བའི་མཚན་ཉིད་དོ། །འདི་ནི་སྟོན་པའི་བསྟན་པའོ་ཞེས་བྱ་བ་ནི་བདེན་པ་བཞི་ཉེ་བར་སྟོན་པ་རྣམ་པར་གཞག་པ་སྟེ་མཚན་ཉིད་དོ། །གཅིག་པུས་དགེ་འདུན་ཟློག་པར་བྱེད་ཅེས་བྱ་བ་ནི་བློ་འབྱེད་པར་བྱེད་པའོ། །གཅིག་པུས་དགེ་འདུན་མི་མཐུན་པར་བྱེད་ཅེས་བྱ་བ་ནི་བྱ་བ་དང་བྱེད་པ་ལ་མི་མཐུན་པར་བྱེད་པའོ། །རྩོད་པ་བཟུང་སྟེ་རྩོད་ཅིང་འདུག་ཅེས་བྱ་བ་ནི་དགེ་འདུན་དང་ལྷན་ཅིག་འགལ་བར་བྱེད་ཅིང་འདུག་པའོ། །གཏམ་གྱི་འཇུག་སྡོད་པར་མི་བྱེད་ཅེས་བྱ་བ་ནི་དགེ་འདུན་གྱི་གཏམ་གྱི་བར་དུ་གཅོད་ཅིང་མི་སྡོད་པར་གློ་བུར་དུ་གཏམ་ཟེར་བའོ། །གུས་པར་མི་བྱེད་ཅེས་བྱ་བ་ནི་འཇིག་རྟེན་ཕ་རོལ་གྱིས་མི་འཇིགས་པ་ངོ་ཚ་བ་མེད་པའོ། །རྗེས་མི་བྱེད་ཅེས་བྱ་བ་ནི་འཇིག་རྟེན་འདིས་མི་འཇིགས་པའི་ངོ་ཚ་མེད་པའོ། །ཕྱིར་སྨྲ་བར་བྱའོ་སྙམ་དུ་སེམས་ཞེས་བྱ་བ་ནི་བཟློག་པར་བྱའོ་སྙམ་དུ་སེམས་པའོ། །དགེ་འདུན་ཞེས་བྱ་བ་ནི་དགེ་འདུན་གྱི་ཡུལ་ལའོ། །གང་ཟག་ལ་ཞེས་བྱ་བ་ཡང་གང་ཟག་གི་ཡུལ་ལོ། །དགེ་འདུན་གྱི་ཐ་སྙད་ཅེས་བྱ་བ་ནི་དགེ་འདུན་གྱིས་གང་ཟག་གི་ལས་བཅུ་གཉིས་ལ་སོགས་པར་བསྐོས་པའོ། །ཤད་
ཀྱིས་སྦྱང་བ་ཞེས་བྱ་བ་ནི་ལན་ནོ། །མ་གུས་པའི་ཚུལ་གྱི་ལྟུང་བྱེད་དེ་བདུན་ཅུ་རྩ་བརྒྱད་པའི་ཚིག་རྣམ་པར་བཤད་པ་རྫོགས་སོ།། །།ཟོང་ཟོང་མ་ཡིན་པར་གྱུར་ཅེས་བྱ་བ་ནི་ཆུད་ཟོས་པར་གྱུར་བའོ། །ཁྱེའུ་ཡི་གྲྭ་ཞེས་བྱ་བ་ནི་མཁན་པོའི་ཁྱིམ་མོ། །ཕྲུ་ཏོག་བཙུགས་ཞེས་བྱ་བ་ནི་ཐབ་ཏུའོ། །ཕྱི་བཞིན་འབྲང་ཞེས་བྱ་བ་ནི་དགོངས་མལ་ཤིན་ཏུ་སྤགས་པའོ། །སྲིད་པ་ཐ་མ་པ་ཞེས་བྱ་བ་ནི་སྐྱེ་བ་ཐ་མ་པ་ལས་གཞན་དུ་སྐྱེ་བར་མི་འགྱུར་བའོ། །གློ་བས་ཞེས་བྱ་བ་ནི་ཁྲེལ་བའོ། །ཆང་སར་པ་ཞེས་བྱ་བ་ནི་བུ་རམ་ཆང་གི་བྱེ་བྲག་སྟེ་ཤིན་ཏུ་མྱོས་པར་འགྱུར་བའོ། །ལེགས་འོངས་སྒྲ་ནི་བསྐྱུད་གྱུར་ན་ཞེས་བྱ་བ་ལ་བསྐྱུད་གྱུར་ཅེས་བྱ་བ་ནི་ཐ་སྙད་བརྗེད་པའོ། །ངེས་པར་ཞེས་བྱ་བ་ནི་གསལ་བར་རོ། །མ་ལེགས་ཞེས་བྱ་བ་ནི་སྡུག་བསྔལ་ལོ། །ལེགས་པ་ཞེས་བྱ་བ་ནི་བདེ་བའོ། །མགོན་ཞེས་བྱ་བ་ནི་ཡོངས་སུ་སྐྱོང་བའོ། །གང་དག་ཁྱོད་ཀྱིས་གསུང་དགའ་དང་ཞེས་བྱ་བ་ནི་སློབ་པ་དག་དང་སོ་སོའི་སྐྱེ་བོ་དགེ་བ་དག་གོ །འཕགས་པ་ཞེས་བྱ་བ་ནི་ཟག་པ་ཟད་པའོ། །དེ་དག་ལེགས་འོངས་ལགས་ཞེས་བྱ་བ་ནི་དེ་དག་གི་མིའི་ནང་དུ་འོངས་པ་དང་སོང་བ་ནི་ལེགས་པ་ཡིན་པའོ། །བདག་ནི་སྐལ་བ་དང་བྲལ་བ་སྟེ་ཞེས་བྱ་བ་ནི། བསོད་ནམས་ཉམས་པའོ། །བརྩེ་གནས་ཞེས་བྱ་བ་ནི་སྙིང་བརྩེ་བར་བྱ་བའོ། །དྲག་པོའི་གནས་ཐོབ་པ་ཞེས་བྱ་བ་ནི་ཉམ་ང་བའི་གནས་སྐབས་སུ་གྱུར་པའོ། །མྱ་ངན་ཟུག་རྔུས་གཟིར་བ་ལགས་ཞེས་བྱ་བ་ནི་མྱ་ངན་གྱི་ཕུར་པས་ཟུག་པའོ། །ཟད་པར་མི་འགྱུར་རོ་ཞེས་བྱ་བ་ནི་ཡོངས་སུ་གཏུགས་པར་མི་འགྱུར་བའོ། །ཀུན་དགའི་ར་བ་རྒྱལ་བུ་དུམ་བུ་ཞེས་བྱ་བ་ནི་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་ནུ་བོ་རྒྱལ་བུ་ནག་པོ་ཞེས་བྱ་བ་སྟེ་དེ་རྒྱལ་པོའི་བཙུན་མོའི་འཁོར་གྱི་ནང་དུ་སོང་བ་དང༌། བཙུན་མོའི་འཁོར་གྱིས་དེ་ལ་མེ་ཏོག་གིས་གཏོར་བ་རྒྱལ་པོས་ཐོས་ནས། རྒྱལ་པོས་དེའི་ལག་པ་དུམ་བུ་དུམ་བུར་གཏུབས་ཏེ་བཞག་པ་དང༌། དེས་བདེན་པའི་ཚིག་བརྗོད་ནས། དུམ་བུ་དེ་དག་ཕྱིར་འབྱོར་བར་འགྱུར་བ་ན་འཇིག་རྟེན་གྱིས་དེའི་མིང་དུམ་བུ་ཞེས་བྱ་བར་བཏགས་སོ། །དེ་སངས་རྒྱས་ལ་མངོན་པར་དད་པས་བཅོམ་ལྡན་འདས་ཀྱི་ཕྱིར་ཀུན་དགའི་རབ་བརྩིགས་ཏེ་མེ་ཏོག་དག་ཏུ་འབུལ་བས་ཀུན་དགའི་ར་བ་ཞེས་ཀྱང་བྱའོ། །ལྷ་མི་རྣམས་ཀྱི་
མཆོད་གནས་ཞེས་བྱ་བ་ནི་བརྒྱ་བྱིན་དང་ཚངས་པ་ལ་སོགས་པའོ། །དེ་དག་གི་མཆོད་པའི་གནས་ནི་འཕགས་པ་ཤཱ་རིའི་བུ་ལ་སོགས་པའོ། །དེ་དག་གིས་ཀྱང་ཆེས་མཆོད་པ་ནི་ཐུབ་པ་ཞི་བ་བདག་ཉིད་ཅེས་བྱ་བ་སྟེ། །བཅོམ་ལྡན་འདས་ཡིན་ནོ་ཞེས་བྱ་བའི་ཐ་ཚིག་གོ ། ཚུར་གཤེགས་སྦྱོན་ཞེས་བྱ་བ་ནི་ཚུར་གཤེགས་ཚུར་གཤེགས་ཞེས་བྱ་བའི་དོན་ཏེ་གུས་པར་སྒྲིམ་པའི་ཕྱིར་ལན་གཉིས་བཟླས་སོ། །མིག་ལ་ཕན་ཞེས་བྱ་བ་ནི་མིག་དང་མཐུན་པའོ། །ཟད་པར་སྔོན་པོའི་སྐྱེ་མཆེད་ཅེས་བྱ་བ་ནི་ཟད་པར་གྱི་སྐྱེ་མཆེད་བཅུའི་སྐབས་སོ། །ཐབས་ཀྱི་ཞགས་པ་ཞེས་བྱ་བ་ནི་ལས་སྦྱང་བ་ལ་སོགས་པའོ། །བདག་ནི་སྔོན་ཆད་ལེགས་འོངས་གྱུར་ཅེས་བྱ་བ་ནི་ཕ་གསོན་པའི་ཚེ་ནའོ། །ཀུན་མཁྱེན་ཞེས་བྱ་བ་ནི་བོད་པའི་ཚིག་གོ །ལྕགས་འདྲ་བ་དག་གིས་ནི་ཞེ་བྱ་བ་ནི་བདག་སོ་སོའི་སྐྱེ་བོའི་གནས་སྐབས་ན་ཉེས་པ་དུ་མས་གང་བའི་ཕྱིར་དང༌། ལས་སུ་མི་རུང་བའི་ཕྱིར་ལུས་ལྕགས་དང་འདྲ་བར་གྱུར་པའོ། །ཁྱོད་ཀྱི་གསུང་བདེན་པ་བཞི་བསྟན་པའི་མཆོག་ཐོས་པར་གྱུར་ནས། ད་ནི་གསེར་དང་འདྲ་བ་ཡི། །ཟག་པ་མེད་པའི་ལུས་ཀྱང་ཐོབ། །ཅེས་བྱ་བ་ནི་ཉོན་མོངས་པ་མེད་པའི་ལུས་ཐོབ་ཅེས་བྱ་བའི་ཐ་ཚིག་གོ །རིན་ཆེན་ལ་སོགས་པ་འཐོབ་པ་དང༌། །མཐོ་རིས་ཐར་པ་འཚལ་བ་ཡིས། །རྟག་ཏུ་ཕན་པ་བཞེད་པ་ཡི། །དགེ་བཤེས་བསྟེན་པར་བགྱི་བ་བཟང༌། །ཞེས་བྱ་བ་ནི་རིན་པོ་ཆེ་དང་རྒྱལ་སྲིད་ལ་སོགས་པ་འཇིག་རྟེན་པའི་ཚེ་འདིའི་དོན་འཐོབ་པར་འདོད་པ་དང༌། འཇིག་རྟེན་པའི་ཚེ་ཕྱི་མའི་དོན་མཐོ་རིས་འདོད་པ་དང༌། འཇིག་རྟེན་ལས་འདས་པའི་དོན་ཐར་པ་འདོད་པས་རྟག་ཏུ་ཕན་པ་བཞེད་པ་ཐུགས་རྗེ་དང་ལྡན་པ་དེ་བཞིན་གཤེགས་པ་རྣམས་བརྟེན་པར་བྱ་སྟེ་འདི་ལྟར་དགེ་བའི་བཤེས་གཉེན་རྣམས་དང༌། དགེ་བའི་བཤེས་གཉེན་རྣམས་ཀྱིས་ཟིན་པའི་སེམས་ཅན་རྣམས་བཟང་ཞིང་བདེ་བར་འགྱུར་བའི་ཕྱིར་རོ་ཞེས་བྱ་བའི་ཐ་ཚིག་གོ །ཀུན་དུ་མཛེས་ཞེས་བྱ་བ་ནི་རབ་ཏུ་བྱུང་བ་དང༌། རྫོགས་པར་བསྙེན་པ་ཐམས་ཅད་ཀྱིས་མཛེས་པ་ཡིན་པའོ། །གང་དུ་རྡིབ་པ་ཞེས་བྱ་བ་ནི་བཀུར་སྟི་མ་ཡིན་པ་ཐོབ་པའོ། །ཀླུ་ཨ་མྲའི་ཆུ་ངོགས་པ་ཞེས་བྱ་བ་ནི་རྫིང་གི་ཆུ་གང་ཤིང་ཨ་མྲས་མཚོན་
པ་དེ་ནི་ཨ་མྲའི་ཆུ་ཡིན་ལ། ཆུའི་ངོགས་ན་གནས་པའི་ཀླུ་གང་ཡིན་པ་དེ་ནི་ཀླུ་ཨ་མྲའི་ཆུའི་ངོགས་པ་ཞེས་བྱའོ། །ཁོན་མ་མཆིས་པ་རྣམས་ལ་ཁོན་དུ་འཛིན་ཞེས་བྱ་བ་ནི་ཡིད་སྡང་བ་མེད་པ་རྣམས་ལ་ཡིད་སྡང་བར་འཛིན་པའོ། །མི་འགྲན་པ་རྣམས་ལ་འགྲན་ཚོལ་ཞེས་བྱ་བ་ནི་གནོད་པ་མི་བྱེད་པ་རྣམས་ལ་གནོད་པ་བྱེད་པའོ། །མི་འཁུ་བ་རྣམས་ལ་འཁུ་ཞེས་བྱ་བ་ནི་མི་སླུ་བ་རྣམས་ལ་སླུ་བའོ། །གང་ཀླུ་ཨ་སྨྲའི་ཆུ་ངོགས་པ་འདུལ་བར་སྤྲོ་བ་དེས་ཚུལ་ཤིང་ལོང་ཤིག་ཅེས་བྱ་བ་ནི་འཕགས་པ་ལེགས་འོངས་ཀྱི་ཆེ་བ་ཉིད་བསྒྲག་པའི་ཕྱིར་ཏེ། འདི་ལྟར་གང་ལ་བཅོམ་ལྡན་འདས་དང་དགེ་སློང་གནས་བརྟན་གནས་བརྟན་དག་ཀྱང་མི་འཇུག་པ་དེ་འདིས་བྱས་སོ་ཞེས་བསྟན་པའི་ཕྱིར་རོ། །ཁྱོད་ཀྱིས་ལུས་ཀྱི་དབང་པོ་བསྲུང་བར་བྱའོ་ཞེས་བྱ་བ་ནི་དགྲ་བཅོམ་པ་དང་བག་ཡོད་པའི་ཕྱིར་དང༌། དགེ་འདུན་གྱི་ནང་ན་འཕགས་པ་ལེགས་འོངས་སེང་གེའི་སྒྲ་སྒྲོག་ཏུ་གཞུག་པའི་ཕྱིར་རོ། །བཀའ་ཉན་ཞེས་བྱ་བ་ནི་འདའ་བར་མི་བྱ་བའོ། །གཡོ་བར་མི་ནུས་ཞེས་བྱ་བ་ནི་འགུལ་བར་མི་ནུས་པའོ། །ཤི་བར་གཏམ་ཐོས་སམ་ཞེས་བྱ་བ་ནི་ཤི་བར་གྲགས་པ་ཐོས་སམ་ཞེས་བྱ་བའོ། །དུལ་བའི་གནས་ཞེས་བྱ་བ་ནི་གདུལ་བའོ། །ཉེ་བར་མ་ཞི་བ་ཞེས་བྱ་བ་ནི་སྐྱོན་ཅན་ནོ། །ཇི་བགྱི་བ་ཞེས་བྱ་བ་ནི་ཇི་ཞིག་བྱ་བའོ། །བྱ་མོ་ལབ་ཅེས་བྱ་བ་ནི་དགའ་བའི་སྦྱིན་པའོ། །ཀྲོག་ཀྲོག་དཀྲུགས་ཏེ་ཞེས་བྱ་བ་ནི་བསྡོམས་པའི་སྒྲ་ཀྲོག་ཀྲོག་དཀྲུགས་ཏེའོ། །ལོ་མ་མ་ཡིན་པའི་སྤྱིལ་བུ་ཞེས་བྱ་བ་ནི་རྡོ་ལ་སོགས་པ་ལས་བྱས་པའོ། །སྦྲུལ་ཕྲུ་གུ་ཞེས་བྱ་བ་ནི་སྦྲུལ་གྱི་ཕྲུ་གུའོ། །མ་བསམས་སོ་ཞེས་བྱ་བ་ནི་སོ་སོར་མ་བརྟགས་པའོ། །འབྲུའི་ཆང་དང་བཅོས་པའི་ཆང་མྱོས་པར་འགྱུར་བ་འཐུང་ཞེས་བྱ་བ་ལ། འབྲུའི་ཆང་དང་བཅོས་པའི་ཆང་གི་མཚན་ཉིད་ནི་མྱོས་པར་འགྱུར་བར་བྱ་བ་སྟེ་ར་རོ་བར་བྱེད་པའོ། །དེ་འཐུང་བ་ནི་མགུལ་དུ་མིད་པའོ། །མྱང་བ་ཞེས་བྱ་བ་ནི་མྱང་བར་བྱ་བ་མ་ཡིན་པས་མྱང་བ་སྟེ། རེག་བྱ་མིན་པར་ཤེས་པར་བྱའོ། །འབའ་ཞིག་ཅེས་བྱ་བ་ནི་དེ་ལ་སོགས་པ་དང་བྲལ་བའོ། །མ་འདྲེས་པ་ཞེས་བྱ་བ་ནི་མྱོས་པར་འགྱུར་བ་དང་བྲལ་བའོ། །དེ་ཇི་ལྟར་སྲིད་ཅེ་ན། དེའི་ཕྱིར་དེ་ཡང་
ཚ་ཉིད་དུ་གྱུར་པའོ་ཞེས་བྱ་བ་གསུངས་ཏེ་ཡང་མྱོས་པ་ཉིད་དུ་མི་འགྱུར་བ་ཡིན་ནོ། །ནུ་རྫི་ཞེས་བྱ་བ་ནི་སྙིགས་མའོ། །སྦང་མ་ཞེས་བྱ་བ་ནི་ཆང་གི་སྦང་མའོ། །ཚིགས་མ་ཞེས་བྱ་བ་ནི་མྱོས་པར་འགྱུར་བའི་ཚིགས་མའོ། །ཕབས་ཞེས་བྱ་བ་ནི་འབྲུའི་ཆང་དང་མནན་པའི་རྫས་ཏེ་འདི་ལ་ནི་མགུལ་པར་བཏུང་བ་མེད་པས་ཉེས་བྱས་སུ་གསུངས་སོ། །མེ་ཏོག་དང་འབྲས་བུ་མོས་པར་འགྱུར་བ་དག་ཟ་ན་ཉེས་བྱས་སུ་འགྱུར་རོ་ཞེས་བྱ་བ་ནི་ཡང་མགུལ་དུ་མིད་པའི་བཏུང་བ་མེད་པའི་ཕྱིར་རོ། །བསྐོལ་བ་འཐུངས་པ་ལ་ནི་མྱོས་པ་མེད་པའི་ཕྱིར་ལྟུང་བ་མེད་དོ། །ཁུར་བར་བསྲེལ་བ་དག་ལུས་དག་སྐུད་པ་ནི་ན་བའི་ཕྱིར་ཉེས་བྱས་ཀྱང་མེད་དོ། །མྱོས་པར་འགྱུར་བ་འཐུང་བའི་ལྟུང་བྱེད་དེ་བདུན་ཅུ་རྩ་དགུ་པའི་ཚིག་རྣམ་པར་བཤད་པ་རྫོགས་སོ།། །།མཆོག་ཐོབ་པ་ཞེས་བྱ་བ་ནི་བག་མར་འགྲོར་ཉེ་བའོ། །ལེགས་པར་སྦས་པ་ཞེས་བྱ་བ་ནི་གཞན་དག་གིས་ཟིལ་གྱིས་མི་ནོན་པའོ། །ལེགས་པར་བསྲུང་བ་ཞེས་བྱ་བ་ནི་བདག་ཉིད་གཞན་དག་དང་མི་སྤྱོད་པའོ། །གྲོང་བར་ཞེས་བྱ་བ་ནི་ཕྱོགས་སོ། །ཕས་དྲངས་ཚུས་དྲངས་ཞེས་བྱ་བ་ནི་ཕན་ཚུན་ནས་དྲངས་པའོ། །སྤོབས་པ་ཅན་ཞེས་བྱ་བ་ནི་སེལ་གྱི་ཞག་པར་རྟོགས་པའོ། །གྲོག་མ་ཕྲ་མོ་ཞེས་བྱ་བ་ནི་ཐུར་མས་མཚོན་དགོས་པ་ཆུང་ངུའོ། །ལུས་བརྟན་པ་ཞེས་བྱ་བ་ནི་སྟོབས་དང་ལྡན་པའོ། །མཁྲང་བ་ཞེས་བྱ་བ་ནི་ལུས་རྒྱས་ཤིང་ཧ་ཅང་གཞོན་ཤ་ཅན་མ་ཡིན་པའོ། །དམ་པ་ཞེས་བྱ་བ་ནི་ལུས་ཚིགས་ཤིན་ཏུ་འབྱོར་པའོ། །མགོ་དྲུང་བ་ཅན་གཅད་ཅེས་བྱ་བ་ནི་གཉའ་བ་གཅད་པའོ། །གསེར་གྱི་འོད་ལྟ་བུ་ཞེས་བྱ་བ་ནི་གསེར་གྱི་འོད་འབར་བ་ལྟ་བུར་སེར་ལམ་མེར་འདུག་པའོ། །ནད་ངན་ཞེས་བྱ་བ་ནི་གཞང་འབྲུམ་མོ། །དགེ་སློང་འདུག་པ་ལ་སྨྲ་བར་བྱའོ་ཞེས་བྱ་བ་ནི་དེ་ན་དགེ་སློང་གང་འདུག་པ་ལ་ཁོ་བོ་གྲོང་དུ་འགྲོ་བའོ་ཞེས་སྨྲ་བར་བྱའོ། །བཀའ་མཆིད་ཀྱང་སུ་མེད་ཅེས་བྱ་བ་ནི་སུ་ཞིག་སེམས་ཞེས་བྱ་བའོ། །སྡང་བ་མ་མཆིས་ཞེས་བྱ་བ་ནི་འདི་སྡང་བའི་སེམས་མེད་པའོ། །གནོད་པ་མ་བགྱིས་ཞེས་བྱ་བ་ནི་གནོད་པར་འགྱུར་བ་མ་བྱས་པའོ། །བ་ལང་གི་མཆོད་སྦྱིན་ཞེས་བྱ་བ་ནི་བ་ལང་མང་པོ་གསོད་པའོ། །བ་ལང་གི་འབུ་སྒྲ་ཞེས་བྱ་བ་ནི་བ་ལང་གི་སྒྲའོ། །རྔ་བྲན་ཞེས་བྱ་བ་ནི་བ་ལང་གཞོན་ནུའོ། །སེམས་པ་གཡོས་ཞེས་བྱ་བ་
ནི་ལས་འདུ་བྱེད་སེམས་པ་སྐྱེས་ཞེས་བྱ་བའི་ཐ་ཚིག་གོ །ལུས་ཀྱི་མཆོད་རྟེན་ཞེས་བྱ་བ་ནི་རང་སངས་རྒྱས་ཀྱི་སྐུ་གདུང་གི་མཆོད་རྟེན་ནོ། །དུས་མ་ཡིན་པར་འགྲོ་བའི་ལྟུང་བྱེད་དེ་བརྒྱད་ཅུ་པའི་ཚིག་རྣམ་པར་བཤད་པ་རྫོགས་སོ།། །།རྒྱུས་མི་ཤེས་ཞེས་བྱ་བ་ནི་དགེ་སློང་གི་རྣམ་པར་གཞག་པ་མངོན་པར་མི་ཤེས་པའོ། །ཅི་བདེ་གྱིས་ཤིག་ཅེས་བྱ་བ་ནི་གདན་དག་སྟོབས་ཤིག་ཅེས་བྱ་བའོ། །གཞན་དབང་ཐམས་ཅད་སྡུག་བསྔལ་ཏེ། །ཞེས་བྱ་བ་ནི་གཞན་ལ་རག་ལས་པ་ནི་དགའ་བ་མ་ཡིན་པའི་ཕྱིར་རོ། །བདག་དབང་ཐམས་ཅད་བདེ་བ་ཡིན། །ཞེས་བྱ་བ་ནི་ཅི་དགར་ཉེ་བར་སྤྱད་དུ་ཡོད་པས་དགའ་བ་ཡིན་པའི་ཕྱིར་རོ། །དེའི་ཕྱིར། ཐུན་མོང་དག་གིས་གནོད་བྱེད་དེ། །ཞེས་བྱ་བ་གསུངས་ཏེ། གཞན་ལ་རག་ལས་པའི་དོན་དག་གིས་ནི་གནོད་པ་སྐྱེད་པར་བྱེད་དོ། །དེ་ཅིའི་ཕྱིར་ཞེ་ན། འབྲེལ་བ་ཤིན་ཏུ་འདའ་བར་དཀའ། །ཞེས་བྱ་བ་གསུངས་ཏེ། གང་གི་ཕྱིར་ཐུན་མོང་བའི་རྫས་དང་འབྲེལ་པ་རྐྱན་དང་ཚོགས་པའི་དབང་གཞན་ལ་རག་ལས་པས་གནོད་པ་བྱེད་པ་ཡིན་པ་དེའི་ཕྱིར་ཐུན་མོང་གི་རྫས་དག་གིས་གནོད་པ་སྐྱེད་པར་བྱེད་དོ་ཞེས་བྱ་བའི་ཐ་ཚིག་གོ །ཟས་ཐོབ་ནས་ཞེས་བྱ་བ་ནི་ཟས་ཆུང་ཟད་བྲིམས་ནས་སོ། །ཟས་མ་ཐོབ་པ་ཁོ་ནར་ཞེས་བྱ་བ་ནི་ཟས་ཡེ་མ་བྲིམས་པ་ཁོ་ནར་རོ། །ཟང་ཟིང་གི་ཆེད་ལ་ཞེས་བྱ་བ་ནི་ཟང་ཟིང་གི་རྒྱུ་ལའོ། །ཆོས་ཀྱི་ཆེད་ལ་ཞེས་བྱ་བ་ཡང་ཆོས་ཀྱི་རྒྱུ་ལའོ། །རྒྱུ་བར་ཕྱེད་ཅེས་བྱ་བ་ནི་འགྲོ་བར་བྱེད་པའོ། །ཁྱིམ་པ་འདུག་པ་ལ་བསྒོ་བར་བྱའོ་ཞེས་བྱ་བ་ནི་ཁོ་བོ་ལ་མ་སྡོད་པར་བྲིམས་ཤིག་ཅེས་བསྒོ་བར་བྱ་སྟེ། སྦྱིན་བདག་ལ་དེ་སྐད་ཆེམས་གཞག་པར་བྱའོ།། སྔ་དྲོ་དང་ཕྱི་དྲོ་ཁྱིམ་དག་ཏུ་རྒྱུ་ཞིང་ཞེས་བྱ་བ་ནི་ཅིག་ཅར་གསུངས་པས་སྔ་དྲོ་དང་གཉི་ག་ཁྱིམ་པ་ལ་མ་བསྒོ་བར་ཁྱིམ་རྒྱུར་སོང་ན་དངོས་གཞི་གཅིག་ཏུ་འགྱུར་གྱི། སྔ་དྲོའམ་ཕྱི་དྲོ་ཁྱིམ་དུ་སོང་བ་ལ་ནི་ཉེས་བྱས་སུ་རིག་པར་བྱའོ། །གྲོང་རྒྱུ་བའི་ལྟུང་བྱེད་དེ་བརྒྱད་ཅུ་གཅིག་པའི་ཚིག་རྣམ་པར་བཤད་པ་རྫོགས་སོ།། །།རི་རབ་ཀྱི་བང་རིམ་ཞེས་བྱ་བ་ནི་རི་རབ་ལས་རིམ་པ་ཕྱིར་འཐོན་པ་བཞི་ཡོད་པ་ནི་རི་རབ་ཀྱི་བང་རིམ་ཞེས་བྱ་བའོ། །གསེར་གྱི་རི་བདུན་ཞེས་བྱ་བ་ནི་གཉའ་ཤིང་འཛིན་དང༌། གཤོལ་མདའ་འཛིན་དང༌། སེང་ལྡེང་ཅན་དང༌། བལྟ་ན་སྡུག་དང༌། རྟ་རྣ་དང༌། རྣམ་པར་འདུད་དང༌།
མུ་ཁྱུད་འཛིན་ཞེས་བྱ་བ་དག་གོ །མཚོ་ཆེན་པོ་མ་དྲོས་པ་དང༌། རྫིང་བུ་དལ་གྱིས་འབབ་པ་ན་ཞེས་བྱ་བ་ནི་དེ་དག་གི་དྲུང་ན་གནས་ཡོད་པའོ། །རིན་པོ་ཆེ་སྣ་བཞི་ཞེས་བྱ་བ་ནི་གསེར་དང༌། དངུལ་དང༌། བཻཌཱུཪྻ་དང༌། ཤེལ་ལོ། །བསྐལ་པར་གནས་པ་ཞེས་བྱ་བ་ནི་འདིར་བསྐལ་པ་བར་མ་བཞི་བཅུ་ལ་བསྐལ་པར་ཤེས་པར་བྱའོ། །ས་འཛིན་པ་ཞེས་བྱ་བ་ནི་ས་ཡོངས་སུ་སྐྱོང་བའོ། །འདབ་ཆགས་ཀྱི་རྒྱལ་པོ་འདབ་བཟངས་ཞེས་བྱ་བ་ནི་ནམ་མཁའ་ལྡིང་ངོ༌། །དེ་དབྱུང་བར་མི་ནུས་ཞེས་བྱ་བ་ནི་ཟིལ་གྱིས་མི་གནོན་པའོ། །ཁྱད་པར་ཅན་མ་ལགས་པ་ཞེས་བྱ་བ་ནི་སྐྱེས་བུ་དམ་པ་མ་ཡིན་པའོ།། ཁྱད་པར་ཅན་ཞེས་བྱ་བ་ནི་སྐྱེས་བུ་དམ་པའོ། །རྩི་བ་རར་དངར་ཞེས་བྱ་བ་ནི་འགྲོ་བའི་སྟ་གོན་བྱས་པའོ། །ལྔ་ཉིད་དུ་བསྒྲུབས་ཞེས་བྱ་བ་ནི་གསད་པ་སྟེ་འབྱུང་བ་ཆེན་པོ་བཞི་དང༌། ནམ་མཁའི་ཁམས་དང་ལྔའི་བག་ལ་ཞེས་བྱས་པའི་ཕྱིར་རོ། །སྦྱིན་བདག་སྦྱིན་ཞེས་བྱ་བ་ནི་གཞན་ལ་ཕན་གདགས་པའི་ཕྱིར་རོ། །བསོད་ནམས་དག་ཅེས་བྱ་བ་ནི་མཆོད་པའི་ཕྱིར་རོ། །ལོངས་སྤྱོད་ཀྱི་རྣམ་པར་སྨིན་པ་ཅན་ཞེས་བྱ་བ་ནི་འདྲ་བར་སྨིན་པས་རྣམ་པར་སྨིན་པ་སྟེ། །ལོངས་སྤྱོད་ཀྱི་འབྲས་བུ་ཡིན་ནོ། །གནོད་པ་མེད་པ་ཞེས་བྱ་བ་བདག་ལ་གནོད་པ་མེད་པ་སྟེ་གཏན་ཡོངས་སུ་བཏང་ཞིང་ཕྱིས་ལྟོས་པ་མེད་པ་དང༌། བདག་ལ་གནོད་པ་མེད་པ་སྟེ། གཞན་ལས་ཕྲོགས་པ་ལ་སོགས་པ་མ་ཡིན་པའོ། །འདོད་པར་བྱེད་པ་ཞེས་བྱ་བ་ནི་ཁོང་དུ་ཆུད་པར་བྱ་བའོ། །ཤིང་སཱ་ལ་ཆེན་པོ་ལྟ་བུ་ཞེས་བྱ་བ་ནི་འབྱོར་པ་རྒྱ་ཆེན་པོའོ། །ཨར་མོ་ནིག་ཅེས་བྱ་བ་ནི་ཐགས་མ་ཁྲ་བོའོ། །རྣམ་པར་རྒྱལ་བྱེད་ཡིད་དུ་འོང་བ་ཞེས་བྱ་བ་ནི་རྒྱལ་མཚན་མཛེས་པའོ། །ཤུར་བུས་ལྷས་པ་ཞེས་བྱ་བ་ནི་ཐགས་སུ་བཏགས་པའོ། །སྟན་སྦྱར་མ་དང༌། ནང་ཚངས་ཅན་དང༌། ཁྲ་བོ་དང༌། ཆེན་པོ་དང༌། བཟང་པོ་དང་ཞེས་བྱ་བ་ནི་འོག་རིམས་སུ་གདིང་བའི་སྟན་ནོ། །སུམ་ཚན་གྱི་གོས་ཀྱི་སྟེང་གཡོགས་ཞེས་བྱ་བ་ནི་སྟེང་རིམ་དུ་གདིང་བའི་སྟན་ཏེ་ཡུལ་སུམ་ཚན་ཞེས་བྱ་བ་ནས་བྱུང་བའི་རས་སོ། །སྟེང་ནས་བགོ་བའི་གོས་དང་བཅས་པ་ཞེས་བྱ་བ་ནི་ལུས་ཀྱི་སྟེང་ནས་བགོ་བའི་གོས་དང་བཅས་པའོ། །གཉིས་སུ་རྒྱབ་དམར་པོ་བཞག་པ་ཞེས་བྱ་བ་ནི་སྔས་དང་རྟེན་མའི་ཕྱོགས་སུ་སྔས་ནང་ཚངས་ཅན་
དམར་པོ་རེ་རེ་བཞག་པའོ། །རས་ཟུང་ཞེས་བྱ་བ་ནི་རས་ཡུག་གཉིས་སོ། །ཁར་བའི་ཟོ་བ་ཅན་ཞེས་བྱ་བ་ནི་འོ་མ་བཞོ་བའི་སྣོད་ཁར་བ་ལས་བྱས་པའི་ཟོ་བ་དང་བཅས་པའོ། །རས་བཅོས་བུ་ཕྲུགས་ཀྱིས་གཡོགས་པ་ཞེས་བྱ་བ་ནི་རས་ཟུང་གཅིག་གིས་གཡོགས་པའོ། །མགུལ་རྒྱན་དང་བཅས་པ་ཞེས་བྱ་བ་ནི་གསེར་གྱི་མགུལ་རྒྱན་ཅན་ནོ། །ལྷག་པ་ཅན་ཞེས་བྱ་བ་ནི་སྦྲང་རྩི་ལ་སོགས་པའོ། །གཞིབས་པ་ཞེས་བྱ་བ་ནི་ཨ་མྲའི་འབྲས་བུ་ལ་སོགས་པའོ། །ཕྱི་རོལ་པ་ཞེས་བྱ་བ་ནི་འཕགས་པའི་ལམ་མ་སྐྱེས་པའོ། །འདོད་པ་རྣམས་ལས་འདོད་ཆགས་དང་བྲལ་བ་ཞེས་བྱ་བ་ནི་འདོད་པའི་འདོད་ཆགས་སྤངས་པའོ། །སོ་སོའི་སྐྱེ་བོ་ཞེས་བྱ་བ་ནི་ངེས་པ་ལ་མ་ཞུགས་པ་སྟེ། འདིར་སོ་སོའི་སྐྱེ་བོ་ཞེས་སྨོས་པ་ནི་ཁ་ཅིག་ན་རེ་འདོད་ཆགས་དང་བྲལ་བ་དག་པས་ཀྱང་ཁྱད་པར་དུ་འཕགས་པ་ངོ་མཚར་ཆེ་བར་བསྟན་པའི་ཕྱིར་རོ། །ཁ་ཅིག་ན་རེ་རིགས་པ་ཐོབ་ནས་བརྩམས་ཏེ་འཕགས་པའི་ལམ་ཐོབ་པ་དག་བྱང་ཆུབ་སེམས་དཔའ་ཡིན་པར་རྟོགས་པ་བསལ་བའི་ཕྱིར་རོ་ཞེས་ཟེར་རོ། །འཛམ་བུའི་ཚལ་དུ་འོངས་པ་ཞེས་བྱ་བ་ནི་བྱང་ཆུབ་སེམས་དཔའ་སྲིད་པ་ཐ་མ་པ་འཛམ་བུ་གླིང་དུ་སྐྱེས་པའོ། །འདི་དྲང་སྲོང་གི་འོག་ཏུ་སྨོས་ལ་ཕྱི་མ་དག་ཏུ་མ་སྨོས་པ་ནི་སོ་སོའི་སྐྱེ་བོ་ཉིད་ཡང་དྲང་སྲོང་འདོད་ཆགས་དང་བྲལ་བ་དག་དང་འདྲ་བར་བསྟན་པའི་ཕྱིར་རོ། །རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་གཅིག་ལ་ཟན་བྱིན་པ་ཞེས་བྱ་བ་ལ། འདིར་ཟན་བྱིན་པ་ཞེས་བྱ་བ་ནི་བཏང་བ་ལས་བྱུང་བ་ནི་མ་ཡིན་ཏེ། མངོན་པར་རྟོགས་པ་ལ་ཞུགས་པ་ཉིད་ལ་དེ་མེད་པའི་ཕྱིར་རོ། །གཏན་གྱི་རྐྱེན་རིས་ཞེས་བྱ་བ་ནི་ཀུན་དགའི་ར་བ་དང༌། ཞིང་དང༌། ཟོང་ལ་སོགས་པ་སྦྱིན་བདག་གིས་ཡང་དང་ཡང་དུ་བསམ་མི་དགོས་པར་གཏན་གྱི་འཚོ་བ་འབྱོར་བར་འགྱུར་བའི་ཡོ་བྱད་དག་གོ །མཐུན་པའི་མཆོད་སྦྱིན་ཞེས་བྱ་བ་ནི་སྲོག་གཅོད་པ་ལ་སོགས་པ་མི་མཐུན་པ་དང་མ་འདྲེས་པའོ། །མི་རྟག་པར་རྗེས་སུ་ལྟ་བ་ཞེས་བྱ་བ་ནི་གང་དངོས་པོ་རྣམས་ལ་ལན་འགའ་འབྱུང་བར་ལྟ་བའོ། །ཟད་པར་རྗེས་སུ་ལྟ་ཞེས་བྱ་བ་ནི་གང་དངོས་པོ་འབྱུང་བ་རྣམས་ལ་ཟད་པར་ལྟ་བའོ། །འདོད་ཆགས་དང་བྲལ་བར་རྗེས་སུ་ལྟ་ཞེས་བྱ་བ་ནི་གང་འདོད་ཆགས་སྤོང་བར་ལྟ་བའོ། །འགོག་པར་
རྗེས་སུ་ལྟ་ཞེས་བྱ་བ་ནི་གང་དངོས་པོ་ཟག་པ་དང་བཅས་པ་རྣམས་སྤོང་བར་ལྟ་བའོ། །སྤོང་བར་རྗེས་སུ་ལྟ་ཞེས་བྱ་བ་ནི་གང་དངོས་པོ་ཟག་པ་དང་བཅས་པ་དང༌། ཟག་པ་མེད་པ་ཐམས་ཅད་ཕུང་པོ་ལྷག་མ་མེད་པའི་མྱ་ངན་ལས་འདས་པར་ལྟ་བའོ། །མདོ་འདི་ནི་ཁྱིམ་བདག་ངན་པ་བཟང་བྱིན་གཟུགས་དང་གཟུགས་མེད་པ་ཁམས་ཀྱི་འདོད་ཆགས་དང་བྲལ་བ་ལ་སྦྱར་བར་བྱ་བའི་ཕྱིར་གསུངས་སོ། །མེའི་བྱ་བ་ཞེས་བྱ་བ་ནི་སྲེག་པ་ལ་སོགས་པའི་མེའི་ལས་སོ། །རིམ་པ་གསུམ་པ་ཞེས་བྱ་བ་ནི་ཆ་གསུམ་པའོ། །ཆེས་འཕགས་པ་ཞེས་བྱ་བ་ནི་འཕང་མཐོ་བའོ། །ཆེས་གྱ་ནོམ་པ་ཞེས་བྱ་བ་ནི་ཆེས་གསལ་བའོ། །གཏམས་པ་བསྲུང་བ་ཞེས་བྱ་བ་ནི་གཏམས་པ་འཛིན་པའོ། །བརྒལ་ཞིང་བརྟག་པ་ཞེས་བྱ་བ་ནི་རིགས་པར་བདའ་བའོ། །རིགས་པས་བསྐྱེད་པ་མ་ཡིན་པ་ཞེས་བྱ་བ་ནི་མི་ཚངས་པར་སྤྱོད་པས་སོ། །ནོར་མང་བ་ཞེས་བྱ་བ་ནི་ཡུལ་གྱི་ལོངས་སྤྱོད་ཉེ་བར་གྱུར་པ་ཞེས་བྱ་བའི་ཐ་ཚིག་གོ །ཆོས་མངོན་པ་ཞེས་བྱ་བ་ནི་དངོས་པོའི་མཚན་ཉིད་དེ་ཆོས་མངོན་པའི་བསྟན་བཅོས་སོ། །འདུལ་བ་ལ་མངོན་པར་ཞེན་ཞེས་བྱ་བ་ནི་བསླབ་པའི་གཞིའི་མཚན་ཉིད་དེ་འདུལ་བའི་ཆོ་གའོ། །ཡང་ན་འདོད་ཆགས་ལ་སོགས་པ་འདུལ་བ་སྟེ་འཕགས་པའི་ལམ་མོ། །དུས་ཤེས་པ་ཞེས་བྱ་བ་ནི་དུས་དང་དུས་མ་ཡིན་པའི་བྱེ་བྲག་ལ་མཁས་པའོ། །དུས་རིག་པ་ཞེས་བྱ་བ་ནི་དུས་དང་དུས་མ་ཡིན་པར་རྗེས་སུ་བསྒྲུབ་པ་ལ་མཁས་པའོ། །ཝ་ལམ་ཅན་ཞེས་བྱ་བ་ནི་དུར་ཁྲོད་དོ། །བཙུན་མོའི་འཁོར་ལ་འོས་པའི་གོས་སོ་ཞེས་བྱ་བ་ནི་སྲབ་མོ་ལུས་སྣང་བ་ཆགས་པར་འགྱུར་བའོ། །ནམ་མ་ནངས་པ་ཞེས་བྱ་བ་ནི་མཚན་མོ་མ་ཟད་པའོ། །ནམ་མ་ནངས་པ་ཉིད་བསྟན་པའི་ཕྱིར་སྐྱ་རེངས་མ་ཤར་ཞེས་བྱ་བ་གསུངས་ཏེ། སྐྱ་རེངས་དང་པོ་མ་ཤར་བའོ། །རིན་པོ་ཆེ་དག་ཅེས་བྱ་བ་ནི་སྒྲོན་མ་ལ་སོགས་པའི་ཆོས་ཀྱི་ནོར་བུ་དང་མུ་ཏིག་ལ་སོགས་པ་དག་གོ །རིན་པོ་ཆེར་སྨོས་པ་དག་གོ་ཞེས་བྱ་བ་ནི་རལ་གྱི་དང་དུང་ལ་སོགས་པ་བསྲུང་བ་དག་རྩེད་མོའི་ཆེད་དག་གོ །མ་བསྡུས་པར་ཞེས་བྱ་བ་ནི་མ་བརྟུལ་བའོ། །རྒྱལ་པོ་ཞེས་བྱ་བ་ནི་དངོས་བརྩོན་པའོ། །སྒོ་གཏན་ཞེས་བྱ་བ་ནི་རྒྱལ་པོའི་བཙུན་མོའི་འཁོར་གྱི་
སྒོ་གཅད་པའི་ཤིང་ངོ༌། །སྒོ་གཏན་གྱི་ཉེ་འཁོར་ཞེས་བྱ་བ་ནི་གང་ན་སྒོ་གཏན་ཏེ་མེད་པ་དེ་ན་འོས་པའི་ཉེ་འཁོར་གྱི་གནས་སོ། །འདའ་བར་བྱེད་ཅེས་བྱ་བ་ནི་ལུས་ཀྱིས་འདའ་བར་བྱེད་པའོ། །བཙུན་མོའི་གན་དུ་སོང་བ་ཞེས་བྱ་བ་ནི་ཉེ་བར་སྤྱད་པའོ། །གསང་ཚིག་ཅེས་བྱ་བ་ནི་ཚིག་གསང་བ་དག་གོ།། གསད་པར་སེམས་པ་ཞེས་བྱ་བ་ནི་གསོད་པར་བྱེད་པའོ། །མཐོན་པོ་ཞེས་བྱ་བ་ནི་ཆེན་པོའོ། །གནས་དམའ་བ་ཞེས་བྱ་བ་ནི་གོ་འཕང་དམའ་བའོ། །འགྲོ་བ་ཞེས་བྱ་བ་ནི་གཡུལ་འགྱེད་པའི་ཕྱིར་འགྲོ་བའོ། །ལྡོག་པ་ཞེས་བྱ་བ་ནི་གཡུལ་ལས་ཕྱིར་ལྡོག་པའོ། །ཐོབ་རྒྱལ་དུ་བསྒྲགས་ནས་ཞེས་བྱ་བ་ནི་གང་གིས་གང་བླངས་པ་དེ་མནངས་སུ་ཁྱེར་ཅིག་ཅེས་བསྒྲགས་ནས་སོ། །དེའི་འོག་ཏུ་ཆད་པ་ཆེན་པོ་རྗེས་སུ་སྟོན་པར་བྱེད་ཅེས་བྱ་བ་ནི་རྫས་འདོར་དུ་འཇུད་པའི་ཕྱིར་གསང་བ་ལ་བསྔགས་པའི་བསྡིགས་མོ་བྱེད་པའོ། །ད་ནི་མཇུག་བསྡུ་བའི་སྒོ་ནས་ཉེས་དམིགས་ལྷག་པ་དག་བསྟན་པའི་ཕྱིར་དགེ་སློང་དག་དེ་ལྟར་ན་ཞེས་བྱ་བ་ལ་སོགས་པ་གསུངས་ཏེ། དེ་ལྟར་ན་ཞེས་བྱ་བ་ནི་བསྡུས་པའི་དོན་ཡིན་པར་ཤེས་པར་བྱའོ། །གླང་པོ་ཆེའི་གནོད་པ་ཞེས་བྱ་བ་ནི་གླང་པོ་ཆེའི་ཕན་ཕུན་ཏེ་དེས་གནོད་པར་འགྱུར་བའི་ཕྱིར་རོ། །རུང་བ་མ་ཡིན་པ་ཞེས་བྱ་བ་ནི་རྗེས་སུ་ཆགས་པ་དང་ཁོང་ཁྲོ་བ་ལ་སོགས་པའི་རྒྱུ་ཡིན་པའི་ཕྱིར་རོ། །ཚུལ་དང་མཐུན་པ་མ་ཡིན་པ་ཞེས་བྱ་བ་ནི་ཁྱིམ་པའི་ལམ་ཉིད་ཀྱིས་མི་མཐུན་པའོ། །དགེ་སློང་གི་ཚུལ་དང་མི་མཐུན་པ་ཞེས་བྱ་བ་ནི་དགེ་སློང་གི་ཚུལ་དང་འགལ་བའོ། །ད་ནི་གདུལ་བའི་དབང་གིས་རྒྱལ་པོའི་ཕོ་བྲང་དུ་འཇུག་པ་ལ་ཇི་ལྟར་ཚུལ་དང་མཐུན་པར་མི་འགྱུར་བ་དེ་བསྟན་པའི་ཕྱིར་ཡང་དག་པར་སྡུད་པར་བྱེད་པ་རྣམས་ཀྱིས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ་ཞེས་བྱ་བ་ལ་སོགས་རྒྱ་ཆེར་གསུངས་སོ། །མ་མཐོང་བའི་གྲོགས་ཞེས་བྱ་བ་ནི་མ་མཐོང་བར་སྙིང་དུ་སྡུག་པའོ། །ཆུ་ཞེང་ཞེས་བྱ་བ་ལ། ཆུ་ཞེས་བྱ་བ་ནི་སྲིད་དོ། །ཞེང་ཞེས་བྱ་བ་ནི་རྒྱའོ། །རང་གིས་མཚོན་འདེབས་པ་ཞེས་བྱ་བ་ནི་རང་ཉིད་གཡུལ་འགྱེད་པའོ། །ནོར་བུའི་ཁྲབ་ཅེས་བྱ་བ་ནི་རིན་པོ་ཆེའི་ཡ་ལད་དོ། །དུས་ཚིགས་སུ་རེག་ན་བདེ་བ་ཞེས་བྱ་བ་ནི་ཚ་བའི་དུས་སུ་རེག་པ་བསིལ་ལ་གྲང་བའི་དུས་སུ་
ནི་རེག་པ་དྲོ་བའོ། །གཅད་དཀའ་བ་ཞེས་བྱ་བ་ནི་རལ་གྲི་ལ་སོགས་པས་གཅད་དཀའ་བའོ། །དབུག་དཀའ་བ་ཞེས་བྱ་བ་ནི་མདའ་ལ་སོགས་པས་དབུག་དཀའ་བའོ། །དུག་འཇིལ་བ་ཞེས་བྱ་བ་ནི་དུག་གསོད་པའོ། །སྣང་བའི་བདག་ཉིད་ཅེས་བྱ་བ་ནི་འོད་གསལ་བའོ། །རིན་ཐང་མེད་པ་ཞེས་བྱ་བ་ནི་རིན་ཐང་གྲངས་མེད་པའོ། །ལྟ་བས་ཆོག་མི་ཤེས་པ་ཞེས་བྱ་བ་ནི་མིག་གི་བློ་དག་གི་ལྟ་བས་ངོམས་མི་ཤེས་པ་སྟེ་ཡུལ་དེས་སྐྱོ་ནས་གཞན་ལ་རྟོག་པར་མི་བྱེད་ཅེས་བྱ་བའི་ཐ་ཚིག་གོ །བྱས་ཟིན་ནས་ཞེས་བྱ་བ་ལ། བྱས་ཞེས་བྱ་བ་ནི་ཡན་ལག་དང་ཉིང་ལག་གཏོང་བའོ། །ཟིན་ནས་ཞེས་བྱ་བ་ནི་གསལ་བ་དང༌། སྤུ་རིས་དང༌། བཅད་པ་ལ་སོགས་པ་བྱི་དོར་ཟིན་པའོ། །ཁས་ལེན་པ་ཞེས་བྱ་བ་ནི་སྐྱབས་སུ་ཁས་ལེན་པའོ། །བསླབ་པའི་གཞི་ཞེས་བྱ་བ་ནི་བསྒྲུབ་པའི་གཞིའོ། །འབྱུང་བ་ཞེས་བྱ་བ་ནི་འཇིག་རྟེན་དང་རྗེས་སུ་མཐུན་པར་རྟེན་ཅིང་འབྲེལ་པར་འབྱུང་བས་སྐྱེ་བའོ། །ལྡོག་པ་ཞེས་བྱ་བ་ནི་འཇིག་རྟེན་གྱི་ལྡོག་པ་རྟེན་ཅིང་འབྲེལ་པར་འབྱུང་བས་འཁོར་བ་ལས་ཐར་པའོ། །མངོན་པར་སྤྲོ་བར་བྱ་ཞེས་བྱ་བ་ནི་བསྐུལ་བར་བྱ་བའོ། །གཙུག་ལག་ཁང་ལྔ་བརྒྱ་ཞེས་བྱ་བ་ནི་གནས་ཁང་ལྔ་བརྒྱའོ། །ཆུད་ཟ་བའི་མཚན་ཞེས་བྱ་བ་ནི་འཆི་ལྟས་སོ། །བསྙེན་བཀུར་ནི་བགྱིས་ལགས་ན་ཞེས་བྱ་བ་ནི་མགུ་བ་བྱས་ཟིན་པའོ། །བརྟུལ་ཅེས་བྱ་བ་ནི་ཕན་ཚུན་བྱས་པའོ། །ཁྱིམ་གྱི་ནང་ན་གནས་ཞེས་བྱ་བ་ནི་བཙུན་མོའི་འཁོར་གྱི་ནང་ན་གནས་པའོ། །དགེ་སློང་ཨུ་དྲ་ཡ་ན་ལ་ཚིགས་སུ་བཅད་པ་འདི་སྐད་ཅེས་སྨྲས་སོ་ཞེས་བྱ་བ་ལ་སོགས་པ་ལ། མི་དབང་ཞེས་བྱ་བ་ནི་ཀྱེ་རྒྱལ་པོ་ཞེས་བོད་པའི་ཚིག་གོ །བོར་བའི་བསོད་སྙོམས་ཚོལ་བ་ཞེས་བྱ་བ་ནི་ཡོངས་སུ་བཏང་བའི་ཟས་ཚོལ་བར་བྱེད་པའོ། །ཇི་ལྟར་ཡོངས་སུ་མི་གདུང་བ་ཞེས་བྱ་བ་ནི་ཇི་མྱ་ངན་མི་བྱེད་དམ་ཞེས་བྱ་བའི་ཐ་ཚིག་གོ །སྲང་ཚད་བརྒྱ་པ་ཞེས་བྱ་བ་ནི་སྲང་ཚད་བརྒྱའི་ཚད་དང་ལྡན་པའོ། །ཤས་བརླན་པ་ཞེས་བྱ་བ་ནི་ཤ་ཁུས་སྤངས་པའོ།། རླུང་མེད་ཅེས་བྱ་བ་ནི་བདེ་ཞིང་དྲོ་བའོ། །སྒོ་གཏན་བསྡམས་པ་ཞེས་བྱ་བ་ནི་སྒོ་བཅད་པའོ། །མཚུངས་པ་ཞེས་བྱ་བ་ནི་རིགས་མཉམ་པའོ། །ཡིད་དུ་འོང་བ་ཞེས་བྱ་བ་ནི་སྙིང་དུ་སྡུག་པའོ། །གུས་པར་ཉན་ཞེས་བྱ་བ་ནི་བསྒོ་བ་བཞིན་བྱེད་པའོ། །སྙན་སྨྲ་བ་ཞེས་བྱ་བ་ནི་སྙན་པར་སྨྲ་བའོ། །ནོར་མང་ལྡན་པའི་
མཛོད་ཅེས་བྱ་བ་ནི་ནོར་མང་པོས་གང་བའི་མཛོད་དོ། །ཅི་ཡང་མེད་པ་ཞེས་བྱ་བ་ནི་རྫས་ཅི་ཡང་མེད་པའོ། །ཨུ་དྲ་ཡ་ནས་སྨྲས་པ་ཞེས་བྱ་བ་ལ་སོགས་པ་ལ་རྒྱལ་པོ་ཞེས་བྱ་བ་ནི་བོད་པའི་ཚིག་གོ །གལ་ཏེ་གདུལ་དཀའ་བ་གཞན་གྱི་ཟས་ཀྱིས་འཚོ་བྱེད་ན། མ་གྲུབ་བས་ནི་དེ་འདུལ་ཏེ། །གཉའ་ཤིང་བ་ལང་འདུལ་བ་བཞིན། །ཞེས་བྱ་བ་ནི་སྐྱེས་བུ་གདུལ་བ་དཀའ་བའི་སེམས་ལེགས་པར་མ་དུལ་བ་ཆོག་མི་ཤེས་པར་གྱུར་ན་དེའི་ཕྱིར་དེ་རབ་ཏུ་བྱུང་སྟེ། གཞན་གྱིས་བྱིན་པའི་ཟས་ཀྱིས་འཚོ་བར་བྱེད་ན། གང་གི་ཚེ་གཞན་གྱི་ཟས་དེ་མ་གྲུབ་ཅིང་མ་ཐོབ་པས་དེའི་སེམས་གདུལ་དཀའ་བ་ཆོག་ཤེས་པ་ལ་འཇོག་ཅིང་འདུལ་བར་བྱེད་དེ། དཔེར་ན་བ་ལང་གདུལ་དཀའ་བ་གཉའ་ཤིང་གིས་མནན་པས་ལེགས་པར་འདུལ་བ་བཞིན་ནོ་ཞེས་བྱ་བའི་ཐ་ཚིག་གོ །དམན་པ་བཞིན་དུ་ཞེས་བྱ་བ་ནི་དབུལ་པོ་བཞིན་དུ་ཞེས་བྱ་བའི་ཐ་ཚིག་གོ །ཡིད་ཀྱིས་གང་དང་གང་འདོད་པ་ཞེས་བྱ་བ་ནི་སེམས་ཀྱིས་ཅི་དང་ཅི་འདོད་པའོ། །ཨུ་དྲ་ཡ་ནས་སྨྲས་པ་ཞེས་བྱ་བ་ལ་སོགས་པ་ལ། རྒྱལ་པོ་གང་ཞིག་འཇིག་རྟེན་ན། །ལུས་ཀྱིས་ཆོས་རེག་བཀྲེན་པ་མིན། །ཞེས་བྱ་བ་ནི་རྒྱལ་པོ་གང་ཞིག་ལུས་ཀྱིས་ཚུལ་ཁྲིམས་ལ་སོགས་པའི་ཆོས་ལ་རེག་འཛིན་པ་དེ་ནི་བཀྲེན་པ་དབུལ་བ་མ་ཡིན་པར་ཤེས་པར་བྱའོ་ཞེས་བྱ་བའི་ཐ་ཚིག་གོ །དེ་ཅིའི་ཕྱིར་ཞེ་ན། འདི་ལྟར། དེ་ནི་ངེས་པར་ལྷ་ཉིད་དང༌། །ཡང་ན་མྱ་ངན་འདའ་བར་འགྱུར། །ཞེས་བྱ་བ་གསུངས་ཏེ། གང་གི་ཕྱིར་དེ་ནི་ཉོན་མོངས་པ་ལྷག་མ་དང་བཅས་པ་ཉིད་དུ་རྣམ་པར་བཞག་ན་ཡང་ལྷ་ཉིད་དུ་མཐོ་རིས་སུ་གནས་པར་འགྱུར་བ་དང༌། ཉོན་མོངས་པ་ལྷག་མ་མེད་པར་རྣམ་པར་བཞག་ན་ནི་མྱ་ངན་ལས་འདའ་བར་འགྱུར་བའི་ཕྱིར་རོ། །མི་དབང་གང་ཞིག་ཆོས་སྤོང་ཞིང༌། །འདི་ལ་ཆོས་མིན་དགའ་བ་བྱེད་པ། །རྒྱལ་པོ་བཀྲེན་ཤེས་པར་བྱ། །མུན་ནས་མུན་པར་འགྲོ་བར་འགྱུར། །ཞེས་བྱ་བ་ནི་མིའི་དབང་པོ་རྒྱལ་པོ་གང་ཞིག་ཚུལ་ཁྲིམས་ལ་སོགས་པའི་ཆོས་སྤོང་ཞིང་དྲན་ནས་ཚེ་འདི་ལ་ཆོས་མ་ཡིན་པ་སྡིག་པ་ལ་དགའ་བར་བྱེད་པའི་རྒྱལ་པོ་དེ་ནི་དབང་ཕྱུག་ཡོད་ཀྱང་བཀྲེན་པར་ཤེས་པར་བྱ་སྟེ། འདི་ལྟར་མུན་པ་ནས་མུན་པར་འགྲོ་བར་འགྱུར་ཏེ་སྡུག་བསྔལ་ནས་སྡུག་བསྔལ་ཆེན་པོ་འཐོབ་པར་འགྱུར་རོ་ཞེས་བྱ་བའི་ཐ་ཚིག་
གོ །གང་འདོད་པར་ཞེས་བྱ་བ་ནི་གང་དག་འབར་རོ། །བཅུ་པའི་བཅུ་པོ་འདི་ཞེས་བྱ་བ་ནི་ལོ་བཅུ་པའི་ཚད་ཀྱི་གནས་སྐབས་བཅུ་པོ་འདི་ལྟ་སྟེ་བྱིས་པའི་གནས་སྐབས་དང༌། གཞོན་ནུའི་གནས་སྐབས་དང་ལང་ཚོའི་གནས་སྐབས་ལ་སོགས་པའོ། །རྩེད་མོ་ཞེས་བྱ་བ་ནི་དགའ་དགུར་སྤྱོད་པའོ། །དགའ་བ་ཞེས་བྱ་བ་ནི་ཡིད་བདེ་བའོ། །བུ་ཡིས་དགའ་བསྟོན་བྱེད་དེ། །ཞེས་བྱ་བ་ནི་བུ་ནི་ཕ་དགའ་བའི་རྒྱུ་ཡིན་པའོ། །ཆུང་མས་ཁེངས་པ་རྗོད་པར་བྱེད། །ཅེས་བྱ་བ་ནི་ཡང་ཆུང་མ་ནི་ཁྱོ་ང་རྒྱལ་སྐྱེད་པའི་རྒྱུ་ཡིན་པའོ། །མཐར་བྱེད་པ་ལས་ཞེས་བྱ་བ་ནི་འཆི་བ་ལས་སོ། །རིག་སྔགས་ཀུན་ཞེས་བྱ་བ་ནི་གསང་སྔགས་རྣམས་སོ། །དཔུང་དག་ཅེས་བྱ་བ་ནི་དམག་དག་གོ །དཔའ་བརྟུལ་ཞེས་བྱ་བ་ནི་རང་གིས་ཕ་རོལ་གནོན་པའོ། །སྐྱོབ་ནུས་མིན་ཞེས་བྱ་བ་ནི་སྲུང་བར་མི་ནུས་པའོ། །ཁྱབ་འཇུག་གི་བུ་དང༌། མུན་བྱད་ཀྱི་བུ་དང༌། སྒྲ་ངན་གྱི་བུ་དང༌། སྐྱ་བསེང་གི་བུ་དང་ཞེས་བྱ་བ་དག་གི་ནི་མི་རིགས་ཀྱི་བྱེ་བྲག་གོ །དེས་ཀྱང་འཆི་བ་བཟློག་མ་ནུས། །ཞེས་བྱ་བ་ནི་རྒྱལ་པོ་དེ་དག་གིས་ཀྱང་འཆི་བ་མི་འོང་བར་བཟློག་པར་མ་ནུས་སོ་ཞེས་བྱ་བའི་ཐ་ཚིག་གོ །སྡོམ་བརྩོན་ཞེས་བྱ་བ་ནི་སེམས་ཀྱི་ངེས་པའོ། །དཀའ་ཐུབ་ཅེས་བྱ་བ་ནི་ལུས་ཀྱི་ངེས་པའོ། །ལས་ཞེས་བྱ་བ་ནི་སྐྱེ་བོ་མགུ་བར་བྱ་བ་ལ་སོགས་པའོ། །བརྩོན་འགྲུས་ཞེས་བྱ་བ་ནི་སྤྲོ་བའོ། །བརྟུལ་བ་ཞེས་བྱ་བ་ནི་འགྱེད་བའོ། །འཁོར་ཚོགས་ཞེས་བྱ་བ་ནི་གཡོག་འཁོར་གྱི་ཚོགས་སོ། །རྒྱ་ཆེན་ནོར་དག་གིས་ཞེས་བྱ་བ་ནི་ནོར་རྒྱ་ཆེན་པོ་དག་གིས་སོ། །མི་ཚུགས་ཞེས་བྱ་བ་ནི་ཟིལ་གྱིས་མི་ནོན་པའོ། །ཐི་བའི་མདོག་འདྲ་བ་ཞེས་བྱ་བ་ནི་བསྲེགས་པའོ། །བོར་ཞིང་ཞེས་བྱ་བ་ནི་སྤངས་ཤིང་ངོ༌། །ཕྱོགས་ཕྱོགས་རྣམ་འཐོར་བ་ཞེས་བྱ་བ་ནི་ལྷུ་ཚིགས་དག་བྲལ་ཞིང་ཡུལ་ཐ་དད་པར་རྣམ་པར་འཐོར་བའོ། །དུང་གི་མདོག་འདྲ་བ་ཞེས་བྱ་བ་ནི་དཀར་པོའོ། །བོར་ཞིང་ཞེས་བྱ་བ་ནི་བཏང་ཞིང་ངོ༌། །ཀུ་བ་ལྟུང་བ་ལྟ་བུ་ཞེས་བྱ་བ་ནི་ཀུ་བ་ལྟུང་བ་ལྟ་བུར་སལ་འདུག་པ་ཞེས་བྱ་བའི་ཐ་ཚིག་གོ །ཚན་སྒྲིབ་པར་བྱེད་ཅིང་ཞེས་བྱ་བ་ནི་ཉི་མ་བྱུང་ན་གདུགས་ལ་སོགས་པས་སྒྲིབ་པར་བྱེད་པའོ། །གྲང་ན་གཡོགས་པར་བྱེད་པ་ཞེས་བྱ་བ་ནི་ལྷགས་པ་བྱུང་ན་གོས་ཀྱིས་དྲོ་བར་བྱེད་པའོ། །བདག་ཉིད་ཅེས་བྱ་བ་ནི་ལུས་སོ། །མི་འོས་ཇི་ཙམ་ཟས་
ཟོས་ཤིང༌། །གྱོན་ནམ་ཡང་ན་བྱིན་པ་དེ། །དེ་ཡི་རང་གིར་ཤེས་བྱ་སྟེ། །གཞན་ནི་བོར་ཏེ་འགྲོ་བར་འགྱུར། །ཞེས་བྱ་བ་ནི་མི་གོས་དང་ཟས་དང་གོས་ཀྱི་བདག་པོས་བདག་ཉིད་ཀྱིས་ཟས་ཇི་ཙམ་ཟོས་ཤིང་གོས་ཇི་ཙམ་གྱོན་པ་དང༌། གཞན་ལ་བྱིན་པ་གང་ཡིན་པ་དེ་ནི་དེའི་རང་གིར་ཤེས་པར་བྱའོ། །ལྷག་པ་གཞན་གྱི་འདིར་པོར་ཏེ་བདག་ཉིད་འཇིག་རྟེན་ཕ་རོལ་དུ་འགྲོ་བར་འགྱུར་རོ་ཞེས་བྱ་བའི་ཐ་ཚིག་གོ །ད་ནི་བླང་བར་བྱ་བ་བསྟན་པའི་ཕྱིར་རོ། མི་འོས་རྐུན་པོས་མི་འཕྲོགས་དང༌། །གཞན་དང་ཐུན་མོང་མ་ཡིན་པའི། །གཏེར་ནི་སྦྱིན་པའམ་ཡང་ན་ནི། །ལེགས་བྱས་གཞན་གྱིས་སྦ་བར་བྱ། །ཞེས་བྱ་བ་གསུངས་ཏེ། མི་འོས་པ་བསོད་ནམས་ཀྱི་གཏེར་ཆོམ་རྐུན་པས་མི་འདྲོགས་པ་དང༌། བུ་ལོན་པ་གཞན་དང་ཐུན་མོང་མ་ཡིན་པར་སྦྱིན་པས་སྦ་བར་བྱ་བའམ་ཡང་ན་ཚུལ་ཁྲིམས་དང་བསྒོམ་པའི་ལེགས་པར་བྱས་པ་གཞན་གྱིས་སྦ་བར་བྱ་སྟེ། བདག་ཉིད་ཀྱི་རྒྱུད་ལ་ཡོད་པར་བྱ་ཞེས་བྱ་བའི་ཐ་ཚིག་གོ །སྟག་གིས་རི་དགས་བསད་འདྲེན་ལྟར། །ན་རྒ་འཆི་བས་ཁྱོད་མྱུར་འདྲེན། །མཛའ་བཤེས་བློན་ཚོགས་ཀུན་འདུས་པས། །ཁྱོད་ཀྱི་ནད་ནི་སེལ་མི་ནུས། །ཞེས་བྱ་བ་ནི་དཔེར་ན་སྟག་གིས་རི་དགས་པས་དེ་རང་གི་གནས་སུ་འདྲེན་པར་བྱེད་པ་ལྟར་ཁྱོད་ཀྱང་ན་བ་དང༌། རྒས་པ་དང༌། འཆི་བས་མྱུར་དུ་བར་ཆད་མེད་པར་འཇིག་རྟེན་ཕ་རོལ་དུ་འདྲེན་པར་བྱེད་དེ། དེ་ལ་ཁྱོད་ཀྱི་ནད་ནི་མཛའ་བཤེས་དང་བློན་པོའི་ཚོགས་ཀུན་འདུས་པས་ཀྱང་སེལ་བར་མི་ནུས་སོ་ཞེས་བྱ་བའི་ཐ་ཚིག་གོ །བུ་ལ་སོགས་པ་ནོར་ལྷུར་ལེན་བསྟན་པའི་ཕྱིར། དེ་ལ་བཅད་ལྷག་ནོར་འབྲུ་དང༌། གསེར་དངུལ་གང་དག་ཡོད་པ་དང༌། བུ་དང་ཆུང་མ་འཁོར་བཅས་དག །བགོ་སྐལ་ཉིད་དུ་སེམས་པར་བྱེད། །ཅེས་བྱ་བ་གསུངས་ཏེ། ཤི་བ་དེ་ལ་སྤྱད་པའི་ལྷག་མ་ནོར་དང༌། འབྲུ་དང༌། གསེར་དངུལ་ལ་སོགས་པ་གང་དག་ཕྱིན་ཡོད་པ་ལ་བུ་དང༌། ཆུང་མ་གྲོགས་ཀྱི་འཁོར་དང་བཅས་པ་དག་རིགས་རྒྱུད་ཀྱིས་འཐོབ་པའི་ནོར་གྱི་བགོ་སྐལ་ཉིད་ཡིན་པས་སེམས་པར་བྱེད་དོ་ཞེས་བྱ་བའི་ཐ་ཚིག་གོ །གལ་ཏེ་ཕ་ཤི་བུ་ལོན་ཆགས། །བུ་སྡུག་དེ་ལ་མེ་མི་ཁྱེར། །ཤི་ནའང་མི་འཆི་མི་དུ་ཞིང༌། །བདག་གི་ཕའམ་རྗེར་མི་སྨྲ། །ཞེས་བྱ་བ་ནི་གལ་ཏེ་ཕ་ཤི་བ་ནི་དེ་ལ་གཞན་གྱི་བུ་ལོན་ཆགས་པ་ཡོད་
ན་བུ་སྡུག་པ་ཡང་བདག་ལ་གཞན་གྱི་ཕའི་བུ་ལོན་ཆགས་པ་བདས་ཀྱི་དོགས་པས། ཕ་ཤི་བ་དེ་ལ་རོ་བསྲེག་པའི་མེ་མདུན་དུ་ཁྱེར་ལ། ཕ་ཤི་ན་ཡང་མཆི་མའི་བཞིན་གྱིས་མི་ངུ་ཞིང༌། ཤི་བ་འདི་བདག་གི་ཕའམ་རྗེ་བོ་ཡིན་ནོ་ཞེས་ཀྱང་མི་སྨྲའོ་ཞེས་བྱ་བའི་ཐ་ཚིག་གོ །ཕྱུག་ཤེས་བདག་གི་ཕ་ཟེར་ཞིང༌། །སྐྲ་བཤིག་མཆི་མའི་བཞིན་གྱིས་དུ། །མེ་ཡང་མདུན་དུ་ཁྱེར་བྱེད་ཅིང༌། །ཀྱེ་མ་འདི་ནི་ལྷར་འགྱུར་ཟེར། །ཞེས་བྱ་བ་ནི་གལ་ཏེ་ཕ་ཤི་བ་དེ་ཕྱུག་པོ་ཡིན་པར་ཤེས་ཞེས་བྱ་བ་ནི་བུ་ནོར་འདོད་པས་བདག་གི་ཕ་ཡིན་ནོ་ཞེས་ཟེར་ཞིང་ཤི་ན་སྐྲ་བཤིག་ཅིང་མཆི་མའི་བཞིན་གྱིས་དུ་ལ། རོ་བསྲེག་པའི་ཕྱིར་མེ་ཡང་མདུན་དུ་ཁྱེར་བར་བྱེད་ཅིང་ཀྱེ་མ་ཕ་འདི་ལྷར་སྐྱེ་བར་གྱུར་ཅིག་ཅེས་ཟེར་བའོ། །མེ་བཏང་ཞེས་བྱ་བ་ནི་མེ་སྤར་ནས་སོ། །དེ་གཅིག་སྐྱེ་ཞིང་སྐྱེ་ཚེ་གཅིག །དེ་བཞིན་གཅིག་འཆི་འཆི་ཚེ་གཅིག །ཅེས་བྱ་བ་ནི་སེམས་ཅན་དེ་ནི་གཅིག་ཏུ་སྐྱེ་ཞིང་སྐྱེ་བའི་ཚེ་ན་ཡང་གཅིག་པུ་ཡིན། གཅིག་པུ་འཆི་ཞིང་འཆི་བའི་ཚེ་ན་ཡང་གཅིག་པུ་ཡིན་ཏེ་གྲོགས་གཞན་མེད་དོ་ཞེས་བྱ་བའི་ཐ་ཚིག་གོ །འདིར་སྐྱེ་འདིར་ཞེས་བྱ་བ་ནི་སྐྱེ་བ་པོས་འཁོར་བ་འདིར་རོ། །དེ་མཐོང་ཞེས་བྱ་བ་ནི་ན་བ་དང༌། རྒས་པ་དང༌། འཆི་བ་དང་བྲལ་བ་ལ་སོགས་པ་མཐོང་ནས་སོ། །འདི་ལ་ཞེས་བྱ་བ་ནི་ཚེ་འདི་ལའོ། །དམ་པ་རྣམས་ལ་རབ་འབྱུང་ཞེས་བྱ་བ་ནི་སྐྱེས་བུ་དམ་པ་རྣམས་རབ་ཏུ་འབྱུང་བར་བྱེད་པའོ། །ཁྱིམ་ན་འདུག་མི་བྱེད་ཅེས་བྱ་བ་ནི་ཁྱིམ་ན་གནས་པར་མི་བྱེད་ཅེས་བྱ་བའི་ཐ་ཚིག་གོ །རབ་ཏུ་འབྱུང་བའི་འབྲས་བུ་བསྟན་པའི་ཕྱིར། དེ་དག་ཆགས་པ་ཀུན་བྲལ་ནས། །ཕྱིན་ཆད་མངལ་གནས་འཇུག་མི་འགྱུར། །ཞེས་བྱ་བ་གསུངས་ཏེ། སྐྱེས་བུ་དམ་པ་དེ་དག་སྲེད་པ་ལ་སོགས་པའི་ཉེས་པ་ཐམས་ཅད་དང་བྲལ་ཞིང་སྤངས་ནས་ཕྱིན་ཆད་མངལ་གྱི་གནས་སུ་མི་སྐྱེ་ཞིང་འཇུག་པར་མི་འགྱུར་རོ་ཞེས་བྱ་བའི་ཐ་ཚིག་གོ །བར་ཆད་མ་མཆིས་པའི་སྦྱོར་བས་ཞེས་བྱ་བ་ནི་རྒྱུན་མི་འཆད་པས་སོ། །དུས་ཇི་ལྟ་བ་བཞིན་དུ་ཞེས་བྱ་བ་ནི་དཔྱིད་ལ་སོགས་པའི་དུས་སོ། །སྲེད་པ་ཕྱོགས་པ་དང་ལྡན་པ་ཞེས་བྱ་བ་ནི་མངོན་པར་འཕེལ་བའི་ངང་ཚུལ་དང་ལྡན་པའོ། །སོ་སོར་རྟོག་པའི་སྟོབས་ཞེས་བྱ་བ་ནི་དགེ་བའི་ཤེས་རབ་ཀྱི་སྟོབས་སོ། །རྡོ་གཅིག་གིས་ཞེས་བྱ་བ་ནི་གཅིག་གི་ཁར་རོ། །འགྱེས་རྔ་ཞེས་བྱ་བ་ནི་འགྱེས་པའི་རྔ་བོ་ཆེའོ། །ཕན་ཚུན་
ཞེས་བྱ་བ་ནི་འཁྲུག་ལོང་ངོ༌། །ཁྱིམ་དད་པར་བྱེད་པ་ཞེས་བྱ་བ་ནི་ཁྱིམ་དག་འདུལ་བའོ། །རབ་ཏུ་བྱུང་བ་ནི་གཞན་ལ་ཕན་པས་རྗེས་སུ་འཛིན་པ་ཞུགས་པ་ཡིན་པས་ཞེས་བྱ་བ་རབ་ཏུ་བྱུང་བ་ནི་གཞན་དག་ལ་ཕན་པས་ཡུན་རིང་པོར་བདེ་བས་རྗེས་སུ་འཛིན་ཅིང་ཕན་འདོགས་པར་བྱེད་པ་དེ་ཞུགས་པ་ཡིན་ན་ཞེས་བྱ་བའི་ཐ་ཚིག་གོ །གཉིས་ཀ་ནས་བཏུལ་ཞིང་ཞེས་བྱ་བ་ནི་སྐྱེས་པའི་སྒོ་དང་བུད་མེད་ཀྱི་སྒོ་གཉི་ག་ནས་བསྒྲུབས་པའོ། །བཞག་གོ་ཞེས་བྱ་བ་ནི་འཕགས་པའི་བདེན་པ་བཞི་པོ་དག་ལ་ངེས་པར་བྱས་པའོ། །ཁྱིམ་མི་དང་བཅས་པ་ཞེས་བྱ་བ་ནི་ཁྱིམ་གྱི་མི་དང་བཅས་པའོ། །དང་དུ་བླང་ཞེས་བྱ་བ་ནི་རིགས་པར་བཟུང་བ་སྟེ་དེ་ལྟར་བྱའོ་ཞེས་བྱ་བའི་ཐ་ཚིག་གོ །བཀུར་སྟིར་བྱས་ཞེས་བྱ་བ་ནི་སེམས་ཀྱིས་གུས་པར་བྱས་པའོ། །བླ་མར་བྱས་ཞེས་བྱ་བ་ནི་བློས་བཟུང་བའོ། །རི་མོར་བྱས་ཞེས་བྱ་བ་ནི་ལུས་ཀྱིས་ཕྱག་ལ་སོགས་པ་བྱས་པའོ། །མཆོད་པ་བྱས་ཞེས་བྱ་བ་ནི་མེ་ཏོག་དང༌། མཆོད་ཡོན་དང་གོས་ལ་སོགས་པ་ཡོ་བྱད་དག་གིས་མཆོད་པའོ། །མི་སྡུག་པ་ཞེས་བྱ་བ་ནི་གཟུགས་མི་སྡུག་པའོ། །ཡམ་སྲེག་ཤིང་ཞེས་བྱ་བ་ནི་སྦྱིན་སྲེག་གི་བུད་ཤིང་ངོ༌། །རྙིང་པ་ཞེས་བྱ་བ་ནི་སྔོན་གྱི་ལས་ཀྱི་འབྲས་བུའོ། །སར་པ་ཞེས་བྱ་བ་ནི་བསོད་ནམས་གསར་རོ། །སྐྱེད་མི་བྱེད་ཅེས་བྱ་བ་ནི་འཕེན་པར་མི་བྱེད་པའོ། །མཆི་མས་བརྣངས་པའི་བཞིན་ཞེས་བྱ་བ་ནི་ངུ་བ་བཞིན་ནོ། །བགགས་ཏེ་བསད་ཅེས་བྱ་བ་ནི་མགུལ་པ་བགགས་ཏེའོ། །གྲོང་སྤྲང་མོ་ཞེས་བྱ་བ་ནི་གྲོང་ཁྱེར་དུ་སྤྲང་མ་མོའོ། །མ་ལེགས་པ་བྱས་ཏེ་ཞེས་བྱ་བ་ནི་དགྲ་བཅོམ་པ་གསོད་པའི་སྦྱོར་བའི་སྦྱོར་བ་དེས་བྱས་པའི་ཕྱིར་རོ། །ལྷུང་བཟེད་ཀྱི་ཆུ་ཞེས་བྱ་བ་ནི་ལྷུང་བཟེད་བཀྲུ་བའི་ཆུའོ། །ཐབས་ཡིན་གྱི་སང་ཁོ་བོ་བདག་ཉིད་དང་གཉིས་འོང་ཞེས་བྱ་བ་ནི་སླན་ཆད་མ་བྱོན་ཅིག་ཅེས་ཟེར་བ་ནི་དེས་བདག་གཅིག་པུ་དེ་བཞིན་དུ་མ་འོངས་ཤིག་ཅེས་བཟློག་གོ །ཕྱིན་ཆད་བདག་གྲོགས་དང་བཅས་པ་མགྲོན་དུ་བོས་པ་ལྟ་སྙམ་དུ་བསམས་པའོ། །འགྲངས་ཞེས་བྱ་བ་ནི་ཚིམ་མོ་ཞེས་བྱ་བའི་ཐ་ཚིག་གོ །དང་པོའི་གོས་ཞེས་བྱ་བ་ནི་ཐོག་མ་གང་གྱོན་པའི་གོས་སོ། །སྣོག་ཟན་ཞེས་བྱ་བ་ནི་ཁྱིམ་བདག་མེད་པ་ན་བཟའ་བ་བསོད་པ་བྱེད་པའོ། །གདུང་བར་བགྱིད་པ་མང་པོ་དག་ཅེས་བྱ་བ་ནི་སྡུག་བསྔལ་བར་འགྱུར་བ་མང་པོ་དག་གོ །
མེ་ཏོག་དག་དགྲམ་པར་བྱས་ཞེས་བྱ་བ་ནི་མེ་ཏོག་དག་གཏོར་བར་བྱས་པའོ། །སྨྱོ་བྱེད་ལྡན་གྱུར་ཏམ་ཞེས་བྱ་བ་ནི་སྨྱོ་བྱེད་ཀྱི་གདོན་གྱིས་ཟིན་ཏམ་བྱ་བའོ། །མྱོས་པར་གྱུར་ཏམ་ཞེས་བྱ་བ་ནི་ཆང་ལ་སོགས་པས་འདུ་ཤེས་མེད་པར་གྱུར་ཙམ་ཞེས་བྱ་བའོ། །འཆར་ཀ་ནག་པོ་ཞེས་བྱ་བ་ནི་འཕགས་པ་འཆར་ཀ་སྔོན་བྱང་ཆུབ་སེམས་དཔའ་གཞོན་ནུ་རོལ་པའི་ཞམ་འབྲིང་དུ་སོང་བ་ན་སྤྲུལ་དུག་མྱུར་དུ་ཁྱབ་པར་བྱེད་པས་དབུགས་ཀྱིས་བསྲེགས་ནས་ནག་པོར་གྱུར་པས་མིང་འཆར་ཀ་ནག་པོ་ཞེས་བྱ་བར་ཡང་བཏགས་པའོ། །གསང་སྔགས་ཀྱི་ཕུར་བུ་ཕྱུང་ཞེས་བྱ་བ་ནི་གསང་སྔགས་ཀྱི་ལྷ་རྣམས་ཀྱི་མཐུ་ཉམས་པར་བྱས་པས་དེས་བཏབ་པའོ། །གང་སེམས་པ་ཞེས་བྱ་བ་ནི་ཡིད་ཀྱི་འདོད་པའོ། །གང་འདོད་པ་ཞེས་བྱ་བ་ནི་ཚིག་གི་འདོད་པའོ། །རླིག་པར་དུ་སོང་ཤིག་ཅེས་བྱ་བ་ནི་མདོམས་ཀྱི་ཕྲག་ཏུ་ཞུགས་ཤིག་ཅེས་བྱ་བའི་ཐ་ཚིག་གོ །ཁ་ཚིག་གི་ཞར་ལ་ཞེས་བྱ་བ་ནི་རིག་བྱེད་བརླག་པའི་ཆེད་དུའོ། །བློན་པོའི་སྐྱོན་ནི་ཆགས་པ་དང༌། །ཞེས་བྱ་བ་ནི་དབང་དུ་མི་འགྱུར་བའོ། །ཟས་ལ་སྐྱོན་ནི་ཆགས་པ་དག །ཅེས་བྱ་བ་ནི་དུག་ལ་སོགས་པ་དག་གོ །ཤེས་རབ་དང་ནི་འདུལ་ལ་མཁས། །ཞེས་བྱ་བ་ནི་ཤེས་རབ་དང་ཐ་སྙད་ལ་མཁས་པའོ། །མཛོད་གནས་ཞེས་བྱ་བ་ནི་ནོར་དང་ལྡན་པའོ། །གོ་འཕང་གནས་ཞེས་བྱ་བ་ནི་དམག་དང་ལྡན་པའོ། །མ་བརྡུངས་ཞེས་བྱ་བ་ནི་དུམ་བུར་མ་བྱས་པའོ། །མ་བསལ་བ་ཞེས་བྱ་བ་ནི་ཤིན་ཏེ་མ་མེད་པར་མ་བྱས་པའོ། །མ་བསྲོས་པ་ཞེས་བྱ་བ་ནི་མ་བསྐོར་བའོ། །མ་བཙིར་བ་ཞེས་བྱ་བ་ནི་འཁྲུལ་འཁོར་གྱིས་མ་བཙིར་བའོ།། ཕས་ཀྱིས་བསྔོ་བ་ཞེས་བྱ་བ་ནི་ཕ་རོལ་གྱིས་གནོད་པའོ། །ཡུལ་ཡོངས་སུ་བཏང་བ་ནི་མིང་ངོ་ཞེས་བྱ་བ་ནི་བླའི་ཞེས་བྱ་བའི་ཐ་ཚིག་གོ །བཞིན་གྱུར་ཅིང་ཞེས་བྱ་བ་ནི་བཞིན་གྱི་དབྱིབས་གྱུར་ཅིང་ངོ༌། །ཉམས་ཏེ་ཞེས་བྱ་བ་ནི་བཞིན་གྱི་མདོག་ཉམས་པའོ། །མཆི་མས་བརྣངས་པའི་སྙིང་གིས་ཞེས་བྱ་བ་ནི་ངུ་སྐད་ཀྱིས་འགགས་པའི་གྲེ་བའོ། །གལ་ཏེ་དགྲ་ཁྱོད་ཞུགས་གྱུར་ན། །ཞེས་བྱ་བ་ནི་དགྲ་བོ་རྣམས་ཀྱི་ནང་དུ་ཞུགས་པར་གྱུར་ནའོ། །ས་ཕུང་འཕེལ་བ་ཉིད་དུ་བྱ། །ཞེས་བྱ་བ་ནི་བསད་དེ་དུར་ཁྲོད་དུ་གཞག་པར་བྱ་ཞེས་བྱ་བའི་ཐ་ཚིག་གོ །དེའི་དོན་དུ་དེ་ནུབ་ཅེས་བྱ་བ་ནི་དགྲ་བོ་གཅིག་བུ་དེ་གསད་པའི་དོན་དུ་
སྟོང་དང་བཅས་པའི་གྲུ་དེ་ཆུའི་ནང་དུ་ནུབ་པར་བྱའོ་ཞེས་བྱ་བའི་ཐ་ཚིག་གོ །ལས་བདག་གིར་བྱ་བ་ཞེས་བྱ་བ་ནི་རག་ལས་པའོ། །ལས་ཀྱིས་རིང་དུ་འདྲེན་བྱེད་དེ། །ཞེས་བྱ་བ་ནི་ལས་ཀྱི་ཡུལ་ཐག་རིང་བར་འཁྲིད་པར་བྱེད་པའོ། །རིང་ནས་ལས་ཀྱིས་འདྲེན་པར་བྱེད། །ཅེས་བྱ་བ་ནི་ཡུལ་ཐག་རིང་པོ་ནས་ལས་ཀྱིས་འགུགས་པར་བྱེད་པའོ། །མི་མཆོག་ཁྱོད་ཀྱི་ཚུལ་དང་མཐུན་པ་ཡིན། །འཕགས་དངོས་མངོན་རྟགས་གང་ལགས་ཁྱོད་ཀྱིས་མཛད། །ཅེས་བྱ་བ་ལ། མི་མཆོག་ཅེས་བྱ་བ་ནི་བོད་པའི་ཚིག་གོ །ཁྱོད་ཀྱི་ཡུལ་དང་མཐུན་པ་ཞེས་བྱ་བ་ནི་ཁྱོད་ཀྱི་བྱ་བའི་ལས་ཀྱི་ཆ་ཡིན་པས་ལས་སོ། །དེ་ཡང་གང་ཞེ་ན། འཕགས་དངོས་མངོན་རྟགས་གང་ལགས་ཤེས། །ཞེས་བྱ་བ་ནི་སྟེ། སྐྱེས་བུ་དམ་པ་ཉིད་ཡིན་པར་ཉེ་བར་མཚོན་བར་བྱེད་པའི་ལས་གང་ཡིན་པའོ། །དེ་ཁྱོད་ཀྱིས་མཛད་ཅེས་བྱ་བ་ནི་ཆོས་ཀྱི་རྒྱལ་སྲིད་བྱེད་དུ་བཅུག་པ་དང༌། ཆོས་ཀྱི་དོན་དུ་རབ་ཏུ་བྱུང་བ་ལ་སོགས་པ་བྱས་པའོ། །ཞི་བ་དེ་ཡི་ཚུལ་མཐུན་གང་ལགས་པ། །དེ་ནི་དེ་རིང་ཉེ་བར་གཟིགས་པར་འགྱུར། །ཞེས་བྱ་བ་ལ། ཞི་བ་ཞེས་བྱ་བ་ནི་བོད་པའི་ཚིག་གོ །དེའི་ཚུལ་མཐུན་གང་ལགས་ཞེས་བྱ་བ་ནི་གཙུག་ཕུད་ཅན་དེའི་ཚུལ་དང་མཐུན་པས་ཆོས་མ་ཡིན་པས་རྒྱལ་སྲིད་བྱེད་དུ་བཅུག་པ་དང༌། ཕ་གསོད་པ་ལ་སོགས་པ་འཕགས་པའི་དངོས་པོ་མ་ཡིན་པའི་མངོན་རྟགས་གང་ཡིན་པ་སྟེ། དེ་ནི་དེ་རིང་ཁྱོད་ཀྱིས་གཟིགས་པར་འགྱུར་རོ་ཞེས་བྱ་བའི་ཐ་ཚིག་གོ །སྲས་ནི་ཁྱེད་གསོན་པར་མི་དགའ་སྟེ་ཞེས་བྱ་བ་ནི་ཁྱོད་ཀྱི་སྲས་གཙུག་ཕུད་ཅན་ནི་ཁྱོད་གསོན་བར་མི་དགའོ་ཞེས་བྱ་བའི་ཐ་ཚིག་གོ །བདག་ཅག་བྱུར་རན་ཅེས་བྱ་བ་ནི་བསོད་ནམས་ཆུང་བ་སྟེ། མི་དགའ་བཞིན་དུ་དབང་མེད་པར་ཁྱོད་གསོད་པའི་གཤེད་མར་བསྐོས་སོ་ཞེས་བྱ་བའི་ཐ་ཚིག་གོ །རྒྱལ་པོས་བསྐོས་རྣམས་ཀྱིས་ཞེས་བྱ་བ་ནི་རྒྱལ་པོ་གཙུག་ཕུད་ཅན་གྱིས་མངགས་པ་རྣམས་ཀྱིས་སོ། །མང་དུ་ཐོས་པ་མདོ་སྡེ་དང་མངོན་པ་ལ་སོགས་པའི་བསྟན་བཅོས་ལ་མཁས་པའོ། །མདུད་པ་ཞེས་བྱ་བ་ནི་བརྣབ་སེམས་དང༌། གནོད་སེམས་དང༌། ཚུལ་ཁྲིམས་དང༌། བརྟུལ་ཞུགས་མཆོག་ཏུ་འཛིན་པ་དང༌། །འདི་བདེན་སྙམ་དུ་ཞེན་མཆོག་ཏུ་འཛིན་པ་དབུས་ཀྱི་མདུད་པ་དག་གོ །སྦྱོར་བ་ཞེས་བྱ་བ་ནི་འདོད་པ་དང༌། སྲིད་པ་དང༌། ལྟ་བ་དང༌། མ་རིག་པའི་སྦྱོར་བ་དག་གོ །
ཟུག་རྔུ་ཞེས་བྱ་བ་ནི་འདོད་པའི་ཡོན་ཏན་དང༌། འདོད་པ་ལ་འདོད་ཆགས་ལ་སོགས་པ་ཉོན་མོངས་པ་དག་གོ །སྒྲིབ་པ་ཞེས་བྱ་བ་ནི་འདོད་པ་ལ་འདུན་པ་དང༌། གནོད་སེམས་དང༌། རྨུགས་པ་དང༌། གཉིད་དང༌། རྒོད་པ་དང༌། འགྱོད་པ་དང༌། ཐེ་ཚོམ་གྱི་སྒྲིབ་པ་དག་གོ ། རྒྱལ་པོའི་ཆོས་ཞེས་བྱ་བ་ནི་གྱ་གྱུ་ཅན་ལས་ཚེར་མ་ལྟ་བུར་དབྱུང་བར་བྱའོ་ཞེས་བསྟན་པ་ལ་སོགས་པའོ། །མཚམས་མེད་པ་ཞེས་བྱ་བ་ལ། མཚམས་ཞེས་བྱ་བ་ནི་བར་དུ་ཆོད་པའོ། །དེ་མེད་པར་འགྲོ་བ་དང༌། མཚམས་མེད་པ་ལ་སོགས་པ་གང་གིས་བར་ཆད་མེད་པ་ཁོ་ནར་སེམས་ཅན་དམྱལ་བར་ངེས་པར་འགྲོ་བའི་ལས་དེ་ནི་མཚམས་མེད་པ་ཞེ་བྱ་བའོ། །གཉིས་ཞེས་བྱ་བ་ནི་སྲོག་ཆགས་གཅིག་བསད་པ་ལ་ལས་ཀྱིས་དངོས་གཞི་གཉིས་མི་སྲིད་པས་འདིར་མཚམས་མེད་པ་གཅིག་ལ་མིང་གཉིས་སུ་བཏགས་པ་སྟེ་འགྱོད་པ་བསྐྱེད་པར་བྱ་བའི་ཕྱིར། མིང་གཉིས་སུ་བརྗོད་དོ། །སྡིག་པ་སྡིག་པ་ལས་ཤོགས་ཤིག་ཅེས་བྱ་བ་ནི་ཉེས་པ་ཉེས་པ་ཉིད་དུ་སྨད་པའི་ཕྱིར་བཤགས་པར་བྱའོ། །བསླབ་པ་ཉིད་ཅེས་བྱ་བ་ནི་དེའི་གྲོགས་ཀྱི་ལས་སྦྱོར་བའི་དུས་ན་སྐྱེ་བ་ངེས་པར་མྱོང་བར་འགྱུར་བ་རྣམས་རྣམ་པར་མ་ནན་པའོ། །ཡོངས་སུ་ཟད་པ་ཞེས་བྱ་བ་ནི་དངོས་གཞིའི་ཚེ་ན་སྐྱེ་བ་རྣམས་རྣམ་པར་མནན་པའོ། །ཡོངས་སུ་མཐར་ཐུག་པ་ཞེས་བྱ་བ་ནི་མཇུག་གི་ཚེ་ན་སྐྱེ་བ་རྣམས་རྣམ་པར་མནན་པའོ། །ཤེས་པ་ལ་མཁས་པ་ཞེས་བྱ་བ་ནི་མཛངས་པའོ། །སྐྱེ་བོའི་བཀའ་མཆིད་ཅེས་བྱ་བ་ནི་འཇིག་རྟེན་པའི་གཏམ་མོ། །རེ་ཞིག་ཉི་མ་དང་པོ་ལ་རླུང་མོ་ཆེ་བྱུང་ནས་ཞེས་བྱ་བ་ལ་སོགས་པ་ནི་གྲོང་ཁྱེར་བྱི་དོར་བྱ་བ་ནི་མེ་ཏོག་དང་གོས་ལ་སོགས་པའི་ཆར་འབབ་པ་ནི་སྐྱེ་བོའི་ཚོགས་དེའི་ལོངས་སྤྱོད་མྱོང་བར་འགྱུར་བའི་ལས་ངེས་པ་རྣམས་མཐར་ཐུག་པར་བྱ་བའི་ཕྱིར་འབབ་པར་ཤེས་པར་བྱའོ། །ཁར་ཕོར་ཞེས་བྱ་བ་ནི་ཁར་བའི་སྣོད་དོ། །བྱུར་བུར་གང་ཞེས་བྱ་བ་ནི་རྩེས་བཏགས་ཏེ་གང་བའོ།། གྲོང་མི་རྣམས་ལ་ཞེས་བྱ་བ་ནི་གྲོང་ཁྱེར་ན་གནས་པའི་མི་རྣམས་ལའོ། །གསོལ་བ་འདེབས་པ་སྟེ་ཞེས་བྱ་བ་ནི་གོ་བར་བྱེད་ཅེས་བྱ་བའི་ཐ་ཚིག་གོ །གནས་གཞི་ཞེས་བྱ་བ་ནི་ལྷ་ཁང་གི་གནས་ཞེས་བྱ་བའི་ཐ་ཚིག་གོ །འདོད་པས་འགྲོ་བ་ཞེས་བྱ་བ་ནི་འདོད་ཆགས་ཀྱིས་འགྲོའོ་ཞེས་བྱ་བའི་ཐ་ཚིག་
གོ །འདོད་པའི་དྲི་ང་ཞེས་བྱ་བ་ནི་འདོད་ཆགས་ཀྱི་དྲི་ངའོ། །གཞོལ་བ་ཞེས་བྱ་བ་ནི་སྡོང་པོའི་དྲི་མ་འདུད་པའོ། །འབབ་པ་ཞེས་བྱ་བ་ནི་བར་གྱི་ཡལ་གའི་གྲིབ་མ་ཆེས་འབབ་པའོ། །བབ་པ་ཞེས་བྱ་བ་ནི་སྟེང་གི་ཡལ་གའི་གྲིབ་མ་ཤིན་ཏུ་འབབ་པའོ། །བུ་མོ་བཟང་མོ་ཞེས་བྱ་བ་ནི་སྐྱོན་མེད་པ་སྟ་ཡ་རབས་མ་ཡིན་པ་དང༌། མ་རེག་ཅེས་བྱ་བའི་ཐ་ཚིག་གོ །སྡིག་པ་ཅན་གྱི་ལྟ་བའི་རྣམ་པ་ཞེས་བྱ་བ་ནི་རང་སངས་རྒྱས་ལ་བསྙེན་བཀུར་མ་ཡིན་པ་བྱས་པ་དེ་བདེ་བའི་རྒྱུ་ཉིད་དུ་ལྟ་བ་སྟེ། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་ལྟ་བ་སྐྱེས་ཞེས་བྱ་བའི་ཐ་ཚིག་གོ །དེ་ལྟར་ཨུ་དྲ་ཡ་ནའི་རྟོགས་པ་བརྗོད་པ་འདིས་སྔོ་བསངས་ཅན་ཀཽ་ཤཱམྦཱིར་ཞུགས་པའི་དོན་དང་ལྡན་པ་རྒྱ་ཆེར་བསྟན་ཏོ།། །།ད་ནི་ཇི་ལྟར་སྔོ་བསངས་ཅན་བསྟན་པ་དེ་དང་འདྲ་བ་བྱུང་བའི་མཐའ་བཙུན་མོ་དཔལ་ལྡན་བྱུང་བ་ལ་བརྟེན་ནས། རྒྱལ་པོའི་ཕོ་བྲང་དུ་འཇུག་པ་གནང་བ་དེ་རྒྱ་ཆེར་བསྟན་པར་བྱའོ། །ཀཽ་ཤཱམྦཱི་ན་ཁྱིམ་བདག་ནོར་བཟངས་ཞེས་བྱ་བ་ལ་སོགས་པ་ལ། གསེར་གཞག་པ་ཞེས་བྱ་བ་ནི་མི་སྤྱད་པར་སྦ་བའོ། །ཁྱིམ་ཁོལ་ཞེས་བྱ་བ་ནི་བཟའ་མི་ཙམ་གྱི་རྗེ་དཔོན་དེ་ཞིང་ལས་ཀྱིས་འཚོ་བའི་མི་དག་གོ །ཆོས་དང་རིག་པས་ཞེས་བྱ་བ་ལ་འདིར་ཆོས་ཞེས་བྱ་བ་ནི་ཆགས་པ་མེད་པ་ལ་སོགས་པའོ། །རིག་པ་ཞེས་བྱ་བ་ནི་འཇིག་རྟེན་གྱི་གདགས་པའོ། །རྒྱུ་བ་དང་གནས་པ་ལས་ཞེས་བྱ་བ་ལ་རྒྱུ་བ་ཞེས་བྱ་བ་ནི་འགྲོ་བའོ། །གནས་པ་ཞེས་བྱ་བ་ནི་འདུག་པའོ། །སྔོན་མ་བྱུང་བའི་རྟགས་དང་ཆ་ལུགས་ཅན་ཞེས་བྱ་བ་ནི་མ་གྲགས་པའི་རབ་ཏུ་བྱུང་བའི་ཆ་ལུགས་འཆང་བའོ། །འབྱོར་བ་ཐོབ་པ་དང་རྙེད་པ་ཐོབ་ཅིང་ཞེས་བྱ་བ་ལ། འབྱོར་ལ་ཐོབ་པ་ཞེས་བྱ་བ་ནི་སྒྲུབ་པར་བྱེད་པའི་དོན་གྲུབ་པའོ། །རྙེད་པ་ཐོབ་པ་ཞེས་བྱ་བ་ནི་གྲུབ་པའི་ཁེ་སྤོགས་བྱིན་པའོ། །ཤིན་ཏུ་ལྷམ་མེ་ཞེས་བྱ་བ་ནི་ལུས་དང་འབྲེལ་བའི་གཟི་བརྗིད་ཀྱིས་གསལ་བའོ། །ལྷན་ནེ་ཞེས་བྱ་བ་ནི་ལུས་ལས་ཕྱིར་བྱུང་བའི་གཟི་བརྗིད་ཀྱིས་ཕྱིས་གསལ་བའོ། །ལྷང་ངེ་ཞེས་བྱ་བ་ནི་དབྱིབས་དང་རྒྱན་གྱིས་མཛེས་པའོ། །མགྲོན་ཞེས་བྱ་བ་ནི་ཕན་གདགས་པའོ། །དབྱར་འདས་ནས་ཞེས་བྱ་བ་ནི་དབྱར་གྱི་དུས་འདས་ནས་སོ། །ཕྱིར་མི་འོང་བའི་འབྲས་བུ་མངོན་སུམ་དུ་བྱས་ཞེས་བྱ་བ་ནི་དེ་དག་སྔར་འཇིག་རྟེན་པའི་ལམ་གྱིས་འདོད་པའི་འདོད་ཆགས་དང་བྲལ་བའི་ཕྱིར་རོ།།
དཔེས་མཚོན་པ་གང་དག་འཇིག་རྟེན་པའི་ལམ་གྱིས་ཉོན་མོངས་པ་སྤོང་བ་མེད་པར་གནོད་པ་ཁོ་ནར་ནི་འགྱུར་ཏེ་ས་བོན་མ་བཙལ་བའི་ཕྱིར་རོ་ཞེས་ཟེར་བདག་གི་ལུགས་ནི་གཞུང་འདི་དང་འགལ་བར་ཤེས་པར་བྱའོ། །བགྲོད་པ་ཞེས་བྱ་བ་ནི་གཞིའི་གནས་ནས་དངོས་སུའོ། །འགྲོ་བ་ཞེས་བྱ་བ་ནི་ལམ་ཡོངས་སུ་ཞར་ལའོ། །གནས་པ་ཞེས་བྱ་བ་ནི་མི་གཡོ་བའི་ཚུལ་གྱིས་སོ། །དེ་ཐམས་ཅད་བྱས་ཤིང་བསྒྲུབས་ནས་ཞེས་བྱ་བ་ནི་གཙོ་ཆེར་བྱ་བ་ནི་བྱས་པ་མཐར་ཐུག་པར་བྱ་བ་ནི་བསྒྲུབས་ནས་སོ། །ཚལ་ཞེས་བྱ་བ་ནི་མེ་ཏོག་དང་འབྲས་བུ་མེད་པའི་ཚལ་ལོ། །རྒྱུན་ལུགས་ཉུང་ཞེས་བྱ་བ་ནི་སྐྱེ་བོའི་འདྲུལ་ཟགས་ཉུང་བའོ། །གླག་ཅོར་ཉུང་ཞེས་བྱ་བ་ནི་སྒྲ་ཆུང་བའོ། །མཚན་མོ་སྒྲ་ཆུང་བ་ཞེས་བྱ་བ་ནི་མེ་ལ་ཚེ་བྱེད་པའི་སྐྱེ་བོ་དང་བཙུན་མོའི་འཁོར་གྱི་སྐྱེ་བོ་དང༌། བྲམ་ཟེ་དང་ལ་སོགས་པའི་སྐྱེ་བོས་མཚན་མོ་ཤིན་ཏུ་གཙོ་དང་གླུ་དབྱངས་དང༌། གློག་གི་སྒྲ་ལ་སོགས་པས་འཁྲུག་པ་མེད་པའོ། །འུར་སྒྲ་ཞེས་བྱ་བ་ནི་རྫ་རྔ་བ་ཊ་ཧ་ལ་སོགས་པའི་སྒྲ་ཆུང་བའོ། །གནས་བརྟན་དག་གིས་ཀྱང་ཞེས་བྱ་བ་ནི་བཅོམ་ལྡན་འདས་བཞུགས་པའི་དུས་ནི་ཡང་དག་པར་སྡུད་པར་བྱེད་པ་དག་གིས་སོ། །རྟག་ཏུ་རྒྱུན་མི་ཆད་པར་ཞེས་བྱ་བ་ལ། རྟག་ཏུ་ཞེས་བྱ་བ་ནི་དུས་ཚིགས་ཐམས་ཅད་དུའོ། །རྒྱུན་མི་འཆད་པ་ཞེས་བྱ་བ་ནི་སྐད་ཅིག་མའི་རྒྱུན་གྱིས་དེ་སྐད་ཅིག་རེ་རེ་ལ་ཞེས་བྱ་བ་བའི་ཐ་ཚིག་གོ །བསོད་ནམས་འབའ་ཞིག་མངོན་པར་འཕེལ་བར་ཞེས་བྱ་བ་ནི་སྐྱེ་བ་སྐྱེ་བའི་རྒྱུན་མི་འཆད་པའི་ཕྱིར་རོ། །བསོད་ནམས་འབའ་ཞིག་ཉེ་བར་སྐྱེ་བ་ཞེས་བྱ་བ་ནི་གཞན་དང་གཞན་སྐྱེ་བའི་ཕྱིར་རོ། །རྫས་ལས་བྱུང་བ་ཞེས་བྱ་བ་ནི། ཕྱི་རོལ་གྱི་རྫས་ཀྱི་རྒྱུ་ལས་བྱུང་བ་སྟེ་ས་གཞི་ལ་སོགས་པ་ལ་ལྟོས་པའི་ཕྱིར་རོ། །བསོད་ནམས་བྱ་བའི་གཞི་ཞེས་བྱ་བ་ནི་བསོད་ནམས་ཞེས་བྱ་བ་ནི་དགེ་བའོ། །བྱ་བ་ནི་ཞེས་བྱ་བ་ནི་ལས་ཏེ། ལུས་ཀྱི་ལས་ལ་སོགས་པའོ། །གཞི་ཞེས་བྱ་བ་ནི་གནས་ཏེ་སེམས་པའི་ཡུལ་ཡིན་པས་བསོད་ནམས་བྱ་བའི་གཞིའོ། །དེ་ལ་རིག་བྱེད་ལས་བྱུང་བ་རྣམ་པ་བདུན་སྦྱིན་པ་ནི་བསོད་ནམས་ཀྱང་ཡིན་ཏེ། དགེ་བའི་སེམས་ཀྱིས་བསླང་བའི་ཕྱིར་རོ། །བྱ་བ་ཡང་ཡིན་ཏེ། ལུས་དང་ངག་དང་ཡིད་ཀྱི་ངོ་བོ་ཡིན་པའི་ཕྱིར་རོ། །གཞི་ཡང་ཡིན་ཏེ་ལུས་དང་ངག་གི་ལས་སེམས་པས་
ཡུལ་དུ་བྱ་བའི་ཕྱིར་རོ། །རྫས་ལས་བྱུང་བ་མ་ཡིན་པ་ལ་བྱ་བ་ནི་དགའ་བ་དང་མཆོག་ཏུ་དགའ་བ་རྒྱ་ཆེན་པོ་ངེས་པར་འབྱུང་བ་ལྡན་པ་དང༌། དེ་ལྟའོ་སྙམ་པ་དང༌། དེ་ལ་བསྙེན་བཀུར་བྱའོ་སྙམ་པ་དང༌། དེས་བསྟན་པ་རྗེས་སུ་བསྒྲུབ་བོ་སྙམ་པའོ། །དེ་ལྟ་བུའི་ལུས་ཀྱི་ལས་དང་ངག་གི་ལས་རྣམ་པར་རིག་བྱེད་དང༌། རིག་བྱེད་མ་ཡིན་པའི་ངོ་བོ་ཉིད་ནི་བསོད་ནམས་ཀྱང་ཡིན་ཏེ། དགེ་བའི་སེམས་ཀྱིས་ཀུན་ནས་བསླང་བའི་ཕྱིར་རོ། །བྱ་བ་ཡང་ཡིན་ཏེ། ལུས་དང་ངག་གི་ལས་ཀྱི་ངོ་བོ་ཉིད་ཡིན་པའི་ཕྱིར་རོ། །གཞི་ཡང་ཡིན་ཏེ་དེས་ཀུན་ནས་བསླང་བ་ནི་སེམས་པའི་ཡུལ་ཡིན་པའི་ཕྱིར་རོ། །ཡང་བསོད་ནམས་ཞེས་བྱ་བ་ནི་དགེ་བ་དག་རྗེས་སུ་བསྒྲུབ་པའོ། །དེའི་རྒྱུ་ནི་བསོད་ནམས་བྱ་བའི་གཞི་སྟེ། དངོས་གཞི་སྦྱིན་པ་དང་ངེས་པར་བྱ་བ་ལ་སོགས་པའི་རྒྱུ་དག་གིས་བསོད་ནམས་བསྒྲུབ་པའི་ཕྱིར་རོ། །ཡང་ན་བསོད་ནམས་ཞེས་བྱ་བ་ནི་སེལ་བར་བྱེད་པས་བསོད་ནམས་ཏེ། འཕགས་པའི་ལམ་མོ། །དེ་བསྒྲུབ་པར་བྱ་བ་ནི་བསོད་ནམས་བྱ་བའོ། །དེའི་རྩ་བ་བསོད་ནམས་བྱ་བའི་གཞི་སྟེ་སྦྱིན་པ་དང་ཚུལ་ཁྲིམས་ཀྱི་ལམ་ལེགས་པར་བསྒྲུབ་པའི་ཕྱིར་རོ། །ཡང་ན་བསོད་ནམས་ཞེས་བྱ་བ་ནི་སེམས་ཅན་སེལ་ཞིང་སྦྱོང་བར་བྱེད་ཅིང་བསོད་ནམས་ཏེ། མྱ་ངན་ལས་འདས་པའོ། །དེའི་དོན་བྱེད་པ་འཕགས་པའི་ལམ་ཡན་ལག་བརྒྱད་པ་ནི་བསོད་ནམས་བྱ་བའོ། །དེའི་གཞི་ནི་རྒྱུའོ། །ཡང་དེ་ཉིད་གཞི་སྟེ་དེ་ལ་ཡུལ་དང་གནས་ཡོད་པས་བསོད་ནམས་བྱ་བའི་གཞི་སྟེ། སྦྱིན་པ་དང་ཚུལ་ཁྲིམས་གཉིས་ཀྱིས་བརྒྱུད་པའི་འབྲས་བུ་ལམ་ཡིན་པའི་ཕྱིར་རོ། །འབྲས་བུ་ཆེ་བའོ་ཞེས་བྱ་བ་ནི་འཇིག་རྟེན་ཕ་རོལ་གྱི་འབྲས་བུ་རྒྱ་ཆེ་བའོ། །ཕན་ཡོན་ཆེ་བ་ཞེས་བྱ་བ་ནི་ཚེ་འདིའི་འབྲས་བུ་གསལ་བའོ། །སྣང་བ་ཆེ་བ་ནི་སྐྱེས་བུ་བྱེད་པའི་འབྲས་བུ་གསལ་བའོ། །རྒྱས་པ་ཆེ་བ་ཞེས་བྱ་བ་ནི་བདག་པོའི་འབྲས་བུ་རྒྱ་ཆེ་བའོ། །ཡང་ན་འབྲས་བུ་ཆེ་བའི་ཞེས་བྱ་བ་ནི་རྣམ་པར་སྨིན་པའི་འབྲས་བུས་སོ། །ཕན་ཡོན་ཆེ་བ་ཞེས་བྱ་བ་ནི་བྲལ་བའི་འབྲས་བུས་སོ། །སྣང་བ་ཆེ་བ་ཞེས་བྱ་བ་ནི་དཔའ་བརྟུལ་ལ་སོགས་པ་གང་ཡིན་པའི་འབྲས་བུས་སོ། །རྒྱས་པ་ཆེ་བ་ཞེས་བྱ་བ་ནི་འཁོར་རྒྱ་ཆེ་བའི་འབྲས་བུས་སོ། །གདགས་སུ་རུང་བ་ཞེས་བྱ་བ་ནི་བསྟན་པར་ནུས་སམ་ཞེས་
བྱ་བའོ། །བསོད་ནམས་སམ་ཞེས་བྱ་བ་ནི་བརྒྱ་འགྱུར་རམ་སྟོང་འགྱུར་ཞེས་བྱ་བ་ལ་སོགས་པའོ། བསོད་ནམས་ཀྱི་འབྲས་བུའམ་ཞེས་བྱ་བ་ནི་རྒྱལ་སྲིད་དམ་ལྷ་ཉིད་ཅེས་བྱ་བ་ལ་སོགས་པའོ། བསོད་ནམས་ཀྱི་འབྲས་བུ་རྣམ་པར་སྨིན་པ་ཞེས་བྱ་བ་ནི་རྣམ་པར་སྨིན་པའི་འབྲས་བུ་ཚེ་རབས་བཅུའམ། ཚེ་རབས་བརྒྱའམ། ཚེ་རབས་སྟོང་ཞེས་བྱ་བ་ལ་སོགས་པའོ། །བསོད་ནམས་ཀྱི་ཚད་གཟུང་པར་མི་ནུས་ཏེ་ཞེས་བྱ་བ་ནི་འཇིག་རྟེན་པས་མཐའ་རྟོགས་པར་མི་ནུས་པ་སྟེ། གྲངས་ལས་ཡང་དག་པར་འདས་པའི་ཕྱིར་རོ། །བསོད་ནམས་ཀྱིས་ཕུང་པོ་ཞེས་བྱ་བ་ནི། །མྱ་ངན་ལས་འདས་པའི་མཐའ་སྟེ། ཕུང་པོ་ཞེས་བྱ་བ་ནི་གྲངས་དང་ཐ་སྙད་དུ་འགྲོའོ་ཞེས་བྱ་བའི་ཐ་ཚིག་གོ །ཐ་མི་དད་པར་ཞེས་བྱ་བ་ནི་འདྲེས་པར་རོ། །འབབ་པ་ཞེས་བྱ་བ་ནི་འགྲོ་བའོ། །རྫས་ལས་བྱུང་བ་མ་ཡིན་ཞེས་བྱ་བ་ནི་རྫས་གང་དག་དང་བྲལ་བ་སྟེ། ས་གཞི་ལ་སོགས་པ་ལ་མི་ལྟོས་པའི་ཕྱིར་རོ། །གྲོང་ཚིགས་ག་གེ་མོ་ཞེས་བྱ་བ་ནི་གྲོང་གི་ཕྱོགས་གང་ཡང་རུང་བའོ། །དགའ་བ་དང་མཆོག་ཏུ་དགའ་བ་རྒྱ་ཆེན་པོ་ངེས་པར་འགྱུར་བ་དང་ལྡན་པ་ཐོབ་པར་བྱེད་པ་ཞེས་བྱ་བ་ལ། དགའ་བ་དང་མཆོག་ཏུ་དགའ་བ་དང་ཞེས་བྱ་བ་ནི། འཕགས་པའི་ལམ་ཐོབ་པའི་གང་ཟག་གི་ཡུལ་ལ་དགའ་བ་དང་མཆོག་ཏུ་དགའ་བ་འཐོབ་པའོ། །རྒྱ་ཆེན་པོ་ཞེས་བྱ་བ་ནི་བལྟ་བར་བྱ། བསྙེན་བཀུར་བྱ། ཆོས་མཉན་པར་བྱ་བའོ། དེའི་ཙིག་རྗེས་སུ་བསྒྲུབ་པར་བྱའོ་ཞེས་བྱ་བ་ལ་སོགས་པ་ལུས་ཀྱི་རྣམ་པར་རིག་བྱེད་དང་རྣམ་པར་རིག་བྱེད་མ་ཡིན་པ་ཀུན་ནས་སློང་ནུས་པ་ཁ་ཕྱིར་བལྟས་ཏེ་འཇུག་པ་དང༌། ཁ་ནང་དུ་བལྟས་ཏེ་འཇུག་པ་ཉིད་དོ། །སེམས་འབའ་ཞིག་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞིར་སྨྲ་བ་དག་ནི་རྒྱ་ཆེན་པོ་ཞེས་བྱ་བ་ཆེ་བ་སྟེ། རྒྱུད་ཡོངས་སུ་འགྱུར་བ་ཆ་ཕྲ་མོ་སྐྱེ་བར་ནུས་པའོ་ཞེས་ཟེར་ཏེ། དེ་དག་ལ་འདོད་ཆགས་ལ་སོགས་པ་ལ་ཞེན་པ་དང༌། དགེ་བའི་སེམས་ཉིད་དང་མི་ལྡན་པས་དགེ་བའི་སེམས་དེ་དང་སེམས་ལས་བྱུང་བ་ཤིན་ཏུ་ཕྲ་མོ་ཡང་རྒྱུད་ལས་འགྱུར་བ་མེད་པའི་ཕྱིར་རྟག་ཏུ་རྒྱུན་མི་འཆང་པར་བསོད་ནམས་འབའ་ཞིག་མངོན་པར་འཕེལ་བ་དང༌། བསོད་ནམས་འབའ་ཞིག་མངོན་པར་ཉེ་བར་སྐྱེ་བ་ཞེས་བྱ་བ་དེ་མི་རུང་སྟེ། དགེ་བ་དང་མི་དགེ་བའི་གནས་སྐབས་དག་ཕན་
ཚུན་འགལ་བའི་ཕྱིར་རོ། །གལ་ཏེ་སེམས་འབའ་ཞིག་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་བདུན་པ་ཡིན་པར་གྱུར་ན། དེ་ལྟར་རྫས་ལས་བྱུང་བ་མ་ཡིན་པ་བསོད་ནམས་བྱ་བའི་གཞི་བདུན་པ་ལ། སངས་རྒྱས་ལ་སྐྱབས་སུ་འགྲོ་ཞིང་བསླབ་པའི་གཞི་དག་ལེན་པར་བྱེད་པ་འདི་ནི་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་བདུན་པ་ཡིན་ནོ། བྱ་བ་དེ་རེ་ཞིག་མིག་གསུང་བ་དེར་ཡང་བསླབ་པའི་གཞི་དག་བླངས་ནས་ཀྱང་དགའ་བ་དང་མཆོག་ཏུ་དགའ་བ་རྒྱ་ཆེན་པོ་དགེ་བ་དེས་པར་འབྱུང་བ་དང་ལྡན་པ་འཐོབ་པར་བྱེད་པ་འདི་ནི་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་བདུན་པ་ཡིན་ནོ་ཞེས་སེམས་ཀྱི་བྱེ་བྲག་བསྟན་པའི་ཚིག་བཀའ་སྩལ་པའི་རིགས་ན། དེ་སྐད་མ་གསུངས་པས་སེམས་པའི་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞིར་མི་འགྱུར་རོ། གང་དག་རྣམ་པར་རིག་བྱེད་དང་རྣམ་པར་རེག་བྱེད་དང་རྣམ་པར་རིག་བྱེད་མ་ཡིན་པ་རྫས་ལས་བྱུང་བ་མ་ཡིན་པའི་བསོད་ནམས་བྱ་པའི་གཞིར་འདོད་པ་དེ་དག་ལ་ནི་སྐྱབས་སུ་འགྲོ་བ་དང་བསླབ་པའི་གཞི་བླང་པའི་ཚིག་ཉིད་ཀྱིས་རྣམ་པར་རིག་བྱེད་མ་ཡིན་པ་བརྗོད་བས་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་བསྟན་པ་གྲུབ་པས་དེའི་འོག་ཏུ་དགའ་བ་དང་མཆོག་ཏུ་དགའ་བ་རྒྱ་ཆེན་པོ་དགེ་བ་ངེས་པར་འབྱུང་བ་དང་ལྡན་པ་ཐོབ་པར་བྱེད་པ་ཞེས་བྱ་བའི་ཚིག་མ་སྨོས་ཀྱང་ཐམས་ཅད་ལེགས་པར་གནས་པ་ཡིན་ནོ། །དགའ་བ་ཞེས་བྱ་བ་ནི་དད་པ་ལ་སོགས་པ་དང་མཚུངས་པར་ལྡན་པའོ། །ངེས་པར་འབྱུང་བ་དང་ལྡན་པ་ཞེས་བྱ་བ་ནི་ངེས་པར་འགྲོ་བས་ན་ངེས་པར་འབྱུང་བ་སྟེ། འདོད་པ་དང་བྲལ་བའི་མིང་ངོ༌། །དེའི་དངོས་པོ་ནི་ངེས་པར་འབྱུང་བ་དང་ལྡན་པ་སྟེ་ཆགས་པ་མེད་པ་ཉིད་དོ། །དེ་དང་མཚུངས་པར་ལྡན་པའི་དགའ་བ་དང་མཆོག་ཏུ་དགའ་བ་ནི་ངེས་པར་འབྱུང་བ་དང་ལྡན་པ་ཡིན་ནོ། ཚུར་གཤེགས་པར་རྩོལ་བ་ཞེས་བྱ་བ་ནི་ཚུར་བྱོན་པར་བརྩམས་པའོ། གྲོང་ཚིགས་དེ་ཉིད་དུ་ཞེས་བྱ་བ་ནི་བདག་ཉིད་དུ་འདུག་པའི་གྲོང་གི་གནས་སུའོ། མཐོང་ནས་ཀྱང་དགའ་བ་དང་མཆོག་ཏུ་དགའ་བ་རྒྱ་ཆེན་པོ་དགེ་བ་ངེས་པར་འབྱུང་བ་དང་ལྡན་པ་ཐོབ་པར་བྱེད་པ་ཞེས་བྱ་བ་ནི་འཕགས་པ་འདི་ནི་ཞི་བ་ཉིད་ཀྱིས་འདི་ལས་བདག་གིས་ཆོས་མཉན་པར་བྱའོ་ཞེས་བྱ་བ་ལ་སོགས་པར་རིག་བྱེད་ཀུན་ནས་སློང་བའོ། །
ཐོས་ནས་ཀྱང་དགའ་བ་དང་མ་ཆོག་ཏུ་དགའ་བ་རྒྱ་ཆེན་པོ་དགེ་བ་ངེས་པར་འབྱུང་བ་དང་ལྡན་པ་ཐོབ་པར་བྱེད་པ་ཞེས་བྱ་བ་ནི་ཆོས་འདི་ནི་བཟང་གི་རྗེས་སུ་བསྒྲུབ་པར་བྱ་བ་ལ་སོགས་པའི་རྣམ་པའི་རིག་བྱེད་ཀུན་ནས་སློང་བའོ། །གཟུང་སླ་བར་བྱ་བ་དང་སྐྱེ་བོ་མ་ཐོས་པ་རྣམས་ཉན་དུ་གཞུག་པའི་ཕྱིར་སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ་ཞེས་བྱ་བ་ལ་སོགས་པ་ཚིགས་སུ་བཅད་པ་བརྩམས་སོ། །མཚོ་མཆོག་ཅེས་བྱ་བ་ནི་གཏིང་དང་ཕ་རོལ་མེད་པའི་ཕྱིར་རོ། །བཀྲ་ཤིས་ཞེས་བྱ་བ་ནི་རྒྱ་མཚོ་ནི་ལྷ་བརྒྱ་ཕྲག་དུ་མས་གང་བའི་ཕྱིར་རོ། །གཙང་མ་ཞེས་བྱ་བ་ནི་གཙང་བ་ཉིད་དེ། གཙང་བའི་གནས་སུ་བྱ་བ་གང་གཱ་ལ་སོགས་པ་ཐམས་ཅད་པས་ཀྱང་འདི་ཤི་བའི་རོ་དང་ལྷན་ཅིག་མི་གནས་པས་ཁྱད་པར་དུ་འཕགས་པའི་ཕྱིར་རོ། །ངོགས་བདེ་བ་ཞེས་བྱ་བའི་རིམ་གྱིས་གཞོལ་བའི་ཕྱིར་དང༌། ངོགས་ཐམས་ཅད་ཀྱི་གནས་ཡིན་པའི་ཕྱིར་རོ། །རིན་ཆེན་འབྱུང་གནས་ཞེས་བྱ་བ་ནི་རིན་པོ་ཆེ་འབྱུང་བའི་ཕྱིར་རོ། །འདིར་དོན་ནི་འདི་ཡིན་ཏེ་གང་གཱ་ལ་སོགས་པ་མི་དང་རི་དགས་ཀྱིས་བསྟེན་པའི་ཆུ་ཀླུང་ཐ་དད་པར་འབེབ་པར་གྱུར་པ་དག་རྒྱ་མཚོར་འགྲོ་བ་དེ་བཞིན་དུ་བསོད་ནམས་ཀྱི་རྒྱུན་ཐ་དད་པ་དག་ཀྱང་སྦྱིན་བདག་གོས་དང༌། ཟས་དང༌། སྐོམ་དང༌། མལ་ཆ་དང༌། སྟན་དང་གདིང་བ་སྦྱིན་པར་བྱེད་པའི་མི་ལ་རྣམ་པ་ཀུན་གྱི་སྒོ་ནས་འོང་བར་འགྱུར་རོ་ཞེས་བྱ་བའི་ཐ་ཚིག་གོ །ཆུ་ཀླུང་ཆུ་འབབ་རྒྱ་མཚོ་ཇི་བཞིན་ནོ། །ཞེས་བྱ་བ་ཡང་བཟླས་ཏེ་གསུངས་པ་ནི་བསོད་ནམས་ཀྱི་རྒྱུ་ཚད་མེད་པ་ཉིད་དུ་བསྟན་པའི་ཕྱིར་ཏེ། ཇི་ལྟར་ཆུ་ཀླུང་འབབ་ཅིང་ཆུས་གང་བ་ཐ་དད་པ་དག་ལ་ཚད་མེད་པ་བཞིན་དུ་བསོད་ནམས་ཀྱི་རྒྱུན་དེ་དག་ཀྱང་དེ་དང་འདྲའོ་ཞེས་བྱ་བའི་ཐ་ཚིག་གོ །སྐད་ཕྱུང་ཞེས་བྱ་བ་ནི་གདངས་ཕྱུང་བའོ། །དེའི་ཚེ་ཡང་རྒྱལ་པོ་ཤར་བས་གདངས་ལས་ཤེས་པར་འགྱུར་བ་ལ་ཞེས་བྱ་བ་ནི་སྐད་ཕྱུང་བ་འདིས་དེ་དག་སྤྱན་དྲངས་སོ་ཞེས་བཤད་པའི་ཕྱིར་རོ། །སྟོང་ཐུབ་ཅེས་བྱ་བ་ནི་གཅིག་པུས་སྟོང་ཐུབ་ཅིང་མི་འཕམ་པའོ། །མདའ་ལྔ་བརྒྱ་པའི་དོང་པ་གཉིས་ཞེས་བྱ་བ་ནི་མདའ་ལྔ་བརྒྱ་ལྔ་བརྒྱས་གང་བའི་དོང་པ་གཉིས་སོ། །དཔའ་བོ་ཡོངས་སུ་སྤང་བ་ཞེས་བྱ་བ་ནི་ལམ་དབྱེ་བའོ། །ཕན་ཚུན་མདའ་ཁར་དགྱེ་བ་ཞེས་བྱ་བ་ནི་མདའ་འཕངས་པའོ། །
ཁྱེད་ཀྱང་དུང་སྟེ་ངེད་ཀྱང་རུང༌། །ཞེས་བྱ་བ་ནི་ཁྱོད་གསོན་པར་གྱུར་ཀྱང་རུང་ངེད་གསོན་པར་གྱུར་ཀྱང་རུང་ཞེས་བྱ་བའི་ཐ་ཚིག་གོ །བེ་རེག་ཅེས་བྱ་བ་ནི་སྣུམ་ཁུར་ནང་ཚངས་ཅན་ནོ། །རི་ལུ་ཞེས་བྱ་བ་ནི་མོན་སྲན་གྲེའུ་ལ་སོགས་པ་ལས་བྱས་པའི་རི་ལུ་ཁ་རར་བཙོས་བའོ། །ཚོང་དུས་ཞེས་བྱ་བ་ནི་བཙོང་བའི་གནས་ཀྱི་ཚར་རོ། །ཞལ་ཏ་པ་ཞེས་བྱ་བ་ནི་ལས་བྱེད་པའོ། །བག་མ་བཏང་བ་ཞེས་བྱ་བ་ནི་བུ་མོ་སྦྱིན་པའོ། །བག་མ་ལེན་པ་ཞེས་བྱ་བ་ནི་བུ་མོ་བསུ་བའོ། །གྲོང་དཔོན་ཞེས་བྱ་བ་ནི་མིའི་གཙོ་བོའོ། །རྫིང་བུ་འབུ་ཞེས་བྱ་བ་ནི་ལྟེང་ཀ་ཁ་བསྲོ་བའོ། །གནད་གཅོད་ཁ་ཞེས་བྱ་བ་ནི་འཆི་བའི་རྒྱུར་འགྱུར་བའི་ལུས་ཀྱི་ཕྱོགས་ཀྱི་གནད་དེ་དག་ཏུ་སེམས་མེད་པའི་འགྱུར་བའི་ཚེ་ཞེས་བྱ་བའི་ཐ་ཚིག་གོ །གནས་སྐབས་དེ་ལྟར་བྱས་ན་ཞེས་བྱ་བ་ནི་ངེས་པར་བྱས་པས་ཏེ་ཁྲིམས་བཅས་ན་ཞེས་བྱ་བའི་ཐ་ཚིག་གོ །ཁྱིམ་བྱང་ཞེས་བྱ་བ་ནི་ཁྱིམ་ཁོལ་གྱི་མིང་བྱད་དོ། །དབྱངས་ཏེ་བཞག་ཅེས་བྱ་བ་ནི་འཕྱང་དུ་གཞུག་པའོ། །བདག་ཉིད་དང་མཉམ་པའི་སྔག་པ་ཞེས་བྱ་བ་ནི་བདག་ཉིད་ཕངས་པ་དང་འདྲ་བའི་ཕངས་པ་གཞན་ཞེས་བྱ་བའི་ཐ་ཚིག་གོ །གསོལ་བ་གདབ་པར་བརྩམས་པ་ཞེས་བྱ་བ་ལ་སོགས་པ་ལ། འཇིག་རྟེན་ན་ཞེས་བྱ་བ་ནི་འཇིག་རྟེན་གྱི་ཁམས་ནའོ། །དགེ་བ་རྣམས་ཞེས་བྱ་བ་ནི་སྐྱེས་བུ་དམ་པ་རྣམས་སོ། །དུལ་བ་རྣམས་ཞེས་བྱ་བ་ནི་ཚུལ་ཁྲིམས་དང་ལྡན་པ་རྣམས་སོ། །ཞི་བ་ཞེས་བྱ་བ་ནི་མཉམ་པར་གཞག་པའི་བསམ་གཏན་པ་རྣམས་སོ། །དབང་ཐུལ་རྣམས་ཀྱིས་ཞེས་བྱ་བ་ནི་མིག་ལ་སོགས་པའི་དབང་པོ་བསྲུངས་ཤིང་ཐུལ་བ་རྣམས་ཀྱིས་སོ། །མི་སྟོང་བས་ཞེས་བྱ་བ་ནི་འཇིག་རྟེན་ན་དེ་ལྟ་བུ་ཡོད་པས་ཞེས་བྱ་བའི་ཐ་ཚིག་གོ །བུའི་དོན་དུ་ཞེས་བྱ་བ་ནི་བུ་བསྐྱབ་པའི་དོན་དུའོ། །དེར་འདུད་ཀྱིས་ཞེས་བྱ་བ་ནི་དེ་དག་ལ་སྐྱབས་སུ་གསོལ་གྱི་ཞེས་བྱ་བའི་ཐ་ཚིག་གོ །བདག་གི་བྱིས་པ་བསྐྱབ་ཏུ་གསོལ་ཞེས་བྱ་བ་ནི་བྱིས་པ་སྐྱོབ་པར་གྱུར་ཅིག་ཅེས་བྱ་བའི་ཐ་ཚིག་གོ །ཆུ་ཀླུང་སྐལ་ལྡན་ཤིང་རྟ་པ། །ཞེས་བྱ་བ་ནི་གང་བའོ། །ཚིགས་སུ་བཅད་པ་གསོལ་བལ་སོགས་པ་ལ་ནོར་ཞེས་བྱ་བ་ནི་རྫས་སོ། །ལེགས་སྤྱད་ཅེས་བྱ་བ་ནི་ཤིན་ཏུ་གོམས་པའོ། །བདེ་སྤྱོད་ཅེས་བྱ་བ་ནི་བདེ་བ་སྐྱེ་བའོ། །རོ་རྣམས་ནང་ན་མངར་མཆོག་ཅེས་བྱ་བ་ནི་རོ་དག་པས་ཆེས་མངར་བའོ། །ཇི་ལྟར་འཚོ་ན་ཞེས་བྱ་
བ་ནི་རྣམ་པ་གང་གིས་འཚོ་ནའོ། །དད་པ་སྐྱེས་བུའི་ནོར་མཆོག་ཡིན། །ཞེས་བྱ་བ་ནི་དད་པ་ཕུན་སུམ་ཚོགས་པ་ཐམས་ཅད་ཀྱི་སྔོན་དུ་འགྲོ་བའི་ཕྱིར་རོ། །ཆོས་ལ་ལེགས་སྤྱད་བདེ་སྤྱོད་འགྱུར། །ཞེས་བྱ་བ་ནི་སྦྱིན་པ་དང་ཚུལ་ཁྲིམས་དང་སྒོམ་པ་ལ་སོགས་པ་དག་གིས་འཇིག་རྟེན་པ་དང་འཇིག་རྟེན་ལས་འདས་པའི་བདེ་བ་གྲུབ་པའི་ཕྱིར་རོ། །བདེན་པ་རོ་རྣམས་མངར་མཆོག་ཡིན། །ཞེས་བྱ་བ་ནི་བདེན་པར་སྨྲ་བ་དག་གིས་འདི་དང་ཕྱི་མའི་འབྲས་བུ་འདོད་པ་མངོན་པར་འགྲུབ་པའི་ཕྱིར་སྐྱེས་བུ་དམ་པ་རྣམས་ཡོངས་སུ་དགའ་བའི་ཕྱིར་རོ། །ཤེས་པས་འཚོ་ན་ཞེས་བྱ་བ་ནི་འཕགས་པའི་བདེན་པ་བཞི་ཡུལ་དུ་གྱུར་པ་མི་སློབ་པའི་ཤེས་རབ་ཀྱིས་འཚོ་ན་སྟེ། ཟག་པ་ཟད་ན་ཞེས་བྱ་བའི་ཐ་ཚིག་གོ །འཚོ་མཆོག་བསྟན་ཞེས་བྱ་བ་ནི་དགོས་པ་ཐམས་ཅད་གྲུབ་པའི་ཕྱིར་རོ། །གྲགས་པ་དང་ལྡན་པ་ཞེས་བྱ་བ་ནི་འཚོ་བ་གང་ལ་ཡོན་ཏན་བརྗོད་པའི་མཚན་ཉིད་ཀྱི་གྲགས་པ་ཡོད་པའོ། །སྙན་པ་ཞེས་བྱ་བ་ནི་མིའི་ཡོན་ཏན་གྲགས་པའོ། །མཛའ་བཤེས་ཇི་ལྟར་རྙེད་པར་འགྱུར་ཞེས་བྱ་བ་ནི་འཐོབ་པར་འགྱུར་བའོ། །ཚུལ་ཁྲིམས་ཀྱིས་ནི་གྲགས་ལྡན་འགྱུར། །ཞེས་བྱ་བ་ནི་ཕྱོགས་དང་ཕྱོགས་མཚམས་རྣམས་སུ་སྒྲས་ཁྱབ་པའི་ཕྱིར་རོ། །བདེན་པ་སྙན་པ་འཐོབ་འགྱུར་ཏེ། །ཞེས་བྱ་བ་ནི་མ་ལོག་པར་ཞུགས་པའི་ཕྱིར་རོ། །འདྲིས་པ་ཞེས་བྱ་བ་ནི་གོམས་པ་སྟེ་བྱམས་པའོ། །བཀུར་ཞེས་བྱ་བ་ནི་ཡང་དག་པར་གཟུང་བར་འོས་པའོ། །ཟིལ་གནོན་ཞེས་བྱ་བ་ནི་སྨས་ཤིང་ཉམས་པའོ། །དྲུག་གིས་འཇིག་རྟེན་འབྱུང་སྟེ་ཞེས་བྱ་བ་ནི་མངལ་ན་གནས་པའི་ཚེ་འབྱུང་བ་དྲུག་གིས་ཏེ། ས་དང༌། ཆུ་དང༌། མེ་དང༌། རླུང་དང༌། ནམ་མཁའ་དང༌། རྣམ་པར་ཤེས་པའི་ཁམས་ཀྱིས་སོ། །དྲུག་གིས་འདྲིས་པ་འཐོབ་པར་འགྱུར། །ཞེས་བྱ་བ་ནི་མིག་ལ་སོགས་པ་དབང་པོ་དྲུག་གི་ཐ་སྙད་གདགས་པའི་དོན་དུ་དེ་དག་ལ་སྦྱོར་བའི་ཕྱིར་རོ། །དྲུག་གིས་འཇིག་རྟེན་བཀུར་འགྱུར་ཏེ། །ཞེས་བྱ་བ་ནི་ཡང་དག་པར་མགུ་བར་འགྱུར་བའི་གཞི་དྲུག་གིས་ཏེ། བྱམས་པའི་ལུས་དང༌། ངག་དང༌། ཡིད་ཀྱི་ལས་དང༌། ཚུལ་ཁྲིམས་དང༌། རྙེད་པ་དང༌། ལྟ་བ་མཐུན་པ་ཉིད་ཀྱིས་སོ། །དྲུག་གིས་འཇིག་རྟེན་ཟིལ་གནོན་འགྱུར། །ཞེས་བྱ་བ་ནི་གཟུགས་དང༌། སྒྲ་དང༌། དྲི་དང༌།
རོ་དང༌། རེག་བྱ་དང༌། ཆོས་ཞེས་བྱ་བའི་ཡུལ་དྲུག་གིས་དེ་ཡིད་དུ་འོང་བ་དང༌། མི་འོང་བ་དག་གིས་རྗེས་སུ་ཆགས་པ་དང་ཁོང་ཁྲོ་སྐྱེད་པའི་ཕྱིར་རོ། །གདུགས་མཚན་གཡེང་བ་མ་མཆིས་པ། །གང་ཞིག་འདོད་པ་འདི་ལས་རྒལ། །ཞེས་བྱ་བ་ནི་ཞུ་བ་གཅིག་སྟེ། སེམས་ཅན་གང་ཞིག་ཉིན་མཚན་དུ་གཡེལ་བ་མེད་པར་བརྩོན་པས་ནང་གིར་བརྗོད་པར་འདོད་པའི་འདོད་པ་བཞི་པོ་འདོད་པ་དང༌། སྲིད་པ་དང༌། ལྟ་བ་དང༌། མ་རིག་པའི་མཚན་ཉིད་འདི་ལས་བརྒལ་བར་འགྱུར་ཞེས་བྱ་བའི་ཐ་ཚིག་གོ །དམིགས་ན་བརྟེན་པ་མ་མཆིས་པ། །ཟབ་མོར་གང་ཞིག་འབྱིང་མི་འགྱུར། །ཞེས་བྱ་བ་ནི་ཞུ་བ་གཉིས་ཏེ་སེམས་ཅན་གང་ཞིག་དམིགས་པ་མེད་པ་དང་རྟེན་མེད་པའི་འཁོར་བའི་སྡུག་བསྔལ་ཟབ་མོར་འབྱིང་བར་མི་འགྱུར་ཞེས་བྱ་བའི་ཐ་ཚིག་གོ །དེ་ལ་དམིགས་པ་མེད་པ་ཞེས་བྱ་བ་ནི་སྲིད་པའི་རྩེ་མོ་སྟེ། དེའི་གོང་ན་དམིགས་པའི་ཡུལ་གཞན་མེད་པའི་ཕྱིར་རོ། །རྟེན་མེད་པ་ཞེས་བྱ་བ་ནི་ངན་སོང་སེམས་ཅན་དམྱལ་བ་ཆེན་པོའི་གནས་ཏེ། དེའི་འོག་ཏུ་ནི་མི་མཐུན་པའི་ཕྱོགས་ཀྱི་རྟེན་གཞན་མེད་པའི་ཕྱིར་རོ། །ཟབ་མོ་ཞེས་བྱ་བ་ནི་རང་གི་དུས་ཀྱི་སྡུག་བསྔལ་ཟད་པའི་མཐའ་མེད་པའི་ཕྱིར་རོ། །རྣམ་ཀུན་ཚུལ་ཁྲིམས་ལྡན་པ་དང༌། །ཞེས་བྱ་བ་ལ་སོགས་པ་ལ། རྣམ་ཀུན་ཞེས་བྱ་བ་ནི་ལུས་དད་ངག་དང་ཡིད་ཀྱི་སྒོ་རྣམ་པ་ཐམས་ཅད་ནས་ཚུལ་ཁྲིམས་དང་ལྡན་པའོ། །ལེགས་མཉམ་གཞག་ཅེས་བྱ་བ་ནི་བསམ་གཏན་བཞི་ཐོབ་པའོ། །ཤེས་རབ་ལྡན་ཞེས་བྱ་བ་ནི་འཕགས་པའི་བདེན་པ་བཞི་མཐོང་བ་དང་ལྡན་པའོ། །ནང་དུ་སེམས་ཞེས་བྱ་བ་ནི་ཉོན་མོངས་པ་ལྷག་མ་སྤང་བའི་ཕྱིར་མངོན་པར་བརྩོན་པ་སྟེ་བསྒོམ་པའི་ལམ་ལ་གནས་པའོ། །དྲན་ལྡན་ཞེས་བྱ་བ་ནི་དྲན་པ་ཉེ་བར་གཞག་པ་སྟེ། ཡོངས་སུ་ཉམས་པའི་རྐྱེན་ལས་རྣམ་པར་གྲོལ་བའོ། །འདོད་པའི་འདུ་ཤེས་ཆགས་བྲལ་ཞིང༌། །ཞེས་བྱ་བ་ནི་འདོད་པ་ན་སྤྱོད་པའི་ཉོན་མོངས་པ་རྣམ་པར་གྲོལ་བའོ། །གཟུགས་ཀྱི་ཀུན་སྦྱོར་མཐར་གྱུར་པ། །ཞེས་བྱ་བ་ནི་གཟུགས་མེད་པ་ན་སྤྱོད་པའི་ཉོན་མོངས་པ་ལས་རྣམ་པར་གྲོལ་ལ་བས་ཏེ། མཉམ་པར་གཞག་པའི་ས་ཉིད་ཡིན་པས་གཅིག་ཏུ་བསྟན་ཏོ། །ཇི་ཡིས་འོད་པ་རྒལ་བར་འགྱུར། །ཞེས་བྱ་བ་ལ་སོགས་པ་ལ། འདིར་འོད་པ་ཞེས་བྱ་བ་ནི་ཁྱིམ་གྱི་འཆིང་བའོ།།
རྒྱ་མཚོ་ཞེས་བྱ་བ་ནི་ཁམས་གསུམ་པའི་ཉོན་མོངས་པ་མཐོང་བས་སྤང་བར་བྱ་བ་དག་གོ །སྡུག་བསྔལ་ཞེས་བྱ་བ་ནི་འདོད་པ་ན་སྤྱོད་པ་བསྒོམ་པས་སྤང་བར་བྱ་བའི་ཕུང་པོ་ལྔའོ། །ཡོངས་དག་ཅེས་བྱ་བ་ནི་འདིར་གཟུགས་དང་གཟུགས་མེད་པ་ན་སྤྱོད་པས་བསྒོམ་པས་སྤང་བར་བྱ་བའི་ཕུང་པོ་ལྔ་སྤོང་བའོ། །དང་པས་འོད་པ་རྒལ་བར་འགྱུར། །ཞེས་བྱ་བ་ནི་དད་པས་རབ་ཏུ་བྱུང་བ་ལ་བརྟེན་པས་དེའི་ཁྱིམ་གྱི་འོད་པ་གཏོང་བའི་ཕྱིར་རོ། །བག་ཡོད་པས་ནི་རྒྱ་མཚོ་རྒལ། །ཞེས་བྱ་བ་ནི་འདིར་བག་ཡོད་པ་ལྷུར་ལེན་པ་ལ་མཐོང་བའི་ལམ་སྐྱེ་བའི་སྒོ་ནས་མཐོང་བས་སྤང་བར་བྱ་བ་སྤོང་བར་འགྲུབ་པའི་ཕྱིར་རོ། །བརྩོན་པར་སྡུག་བསྔལ་བར་འགྱུར་ཏེ། །ཞེས་བྱ་བ་ནི་བརྩོན་འགྲུས་བརྩམས་པ་ལ་བདུད་འཁོར་དང་བཅས་པ་ཕམ་པས། འདོད་པའི་ཁམས་ན་སྤྱོད་པ་ལས་ཡང་དག་པར་འདའ་བར་འགྲུབ་པའི་ཕྱིར་རོ། །ཤེས་རབ་ཀྱིས་ནི་ཡོངས་དག་འགྱུར། །ཞེས་བྱ་བ་ནི་ཤེས་རབ་སྒྲོན་མས་མཉམ་པར་གཞག་པའི་སའི་ཉོན་མོངས་པའི་ཚེར་མ་ཕྲ་མོའི་རང་བཞིན་འབྱིན་པར་འགྲུབ་པའི་ཕྱིར་རོ། །མི་འཇིགས་པ་བསྐྱེད་པའི་ཕྱིར་དང༌། ཡིད་ཆེས་པར་བྱ་བའི་ཕྱིར། བདེ་འདུལ་གཏོང་བ་མ་གཏོགས་པའི། །ཆོས་གཞན་འབའ་ཞིག་ཡོད་དམ་ཞེས། །དགེ་སློང་བྲམ་ཟེ་སོ་སོ་ལ། །གཞན་དང་གཞན་དུ་ཁྱོད་དྲིས་ཤིག །ཅེས་བྱ་བ་བཀའ་སྩལ་ཏེ། བདེན་པ་ཞེས་བྱ་བ་ནི་ཚུལ་ཁྲིམས་སོ། །དུལ་བ་ཞེས་བྱ་བ་ནི་བསམ་གཏན་ནོ། །གཏོང་བ་ཞེས་བྱ་བ་ནི་ཤེས་རབ་འདིར་འཁོར་བ་གཏོང་བའི་ཕྱིར་ཏེ། དེ་གསུམ་གྱིས་ནི་བསླབ་པ་གསུམ་བསྟན་པར་ཤེས་པར་བྱའོ། །སོ་སོ་ལ་ཞེས་བྱ་བ་ནི་ཐ་དད་པ་ལའོ། །ལེགས་པར་རབ་ཏུ་བཤད་ཅེས་བྱ་བ་ནི་མ་ནོར་བར་བཀའ་སྩལ་པའོ། །ཀྱེ་མ་གནོད་སྦྱིན་བོང་བུ་བ། །ཞེས་བྱ་བའི་སྒྲ་ནི་བོད་པའི་ཚིག་སྟེ། ཐག་རིང་པོ་ནས་བོད་པའི་ཕྱིར་ཀྱེ་མ་ཞེས་སྐད་ཀྱི་གསང་བསྟོད་དེ་བརྗོད་པའོ། །ཀྱེ་མ་སྟོན་པ་བདག་དོན་དུ་ཞེས་བྱ་བ་ལ། ཀྱེ་མ་ཞེས་བྱ་བའི་སྒྲ་ནི་རབ་ཏུ་རངས་པའི་ཚིག་ཡིན་ནོ། །ཕྱི་མ་ཡིན་ཞེས་བྱ་བ་འཇིག་རྟེན་ཕ་རོལ་གྱིའོ། །གནོད་སྦྱིན་ཞེས་བྱ་བ་ནི་གསང་བའོ། །རང་གི་གནས་ཚོལ་ཞེས་བྱ་བ་ནི་བདག་ཉིད་ཁྱོད་འདམ་པའོ། །སེམས་བསྡུས་ཏེ་ཞེས་བྱ་བ་ནི་དེར་གཞོལ་བའོ། །བག་ཡོད་པར་ཞེས་བྱ་བ་
ནི་ལས་གཞན་མི་བྱེད་པར་རོ། །ཕྱིར་ཕྱོགས་ཏེ་ཞེས་བྱ་བ་ནི་ཡིད་བསད་དེའོ། །བག་ཚ་ཞིང་ཞེས་བྱ་བ་ནི་རྒྱལ་པོ་བཤེས་འཇིགས་པའོ། །ཡིད་མི་བདེ་ནས་ཞེས་བྱ་བ་ནི་སྡུག་པ་དང་བྲལ་བ་ནས་སོ། །མཚན་མོ་བ་ལང་གི་ལམ་དུ་རྩྭ་བཏིང་བ་ལ་གནས་པར་ཞལ་གྱིས་བཞེས་སོ་ཞེས་བྱ་བ་ནི་བ་ལང་ནི་འཇིག་རྟེན་བས་གཙང་བར་བཀུར་བ་དང༌། སྣང་ཡལ་ཆེ་བའི་ཕྱིར་ཏེ། དེས་ན་ལག་བརྒྱུད་འབྲོག་གནས་ཀྱིས་ཐོས་པ་གཅིག་ནས་གཅིག་ཏུ་བརྒྱུད་པས་ཐོས་ཤིང་སངས་རྒྱས་ལ་དམིགས་པའི་དྲན་པས་གུས་པ་དང་བཅས་པས་མཚན་མོ་གནས་པ་ན་རྒྱུད་ཡོངས་སུ་སྨིན་ཅིང་གཞན་ལ་གཡེང་བ་མེད་པས་སྔ་དྲོ་མཐོང་ན་བདེན་པ་དག་མཐོང་བར་འགྱུར་རོ་སྙམ་པས་དེའི་དོན་དུ་མཚན་མོ་བ་ལང་གི་ལམ་དུ་གནས་པར་ཞལ་གྱིས་བཞེས་ཀྱི་ཕྱིར་ནི་མ་ཡིན་ནོ། །ཁྱིམ་བདག་གིས་སོ་སོར་ཀུན་ནས་དགའ་བར་བྱས་ཞེས་བྱ་བ་ནི་ཇི་ལྟར་འདོད་པའོ། །ཡོངས་སུ་གདུང་བ་ཞེས་བྱ་བ་ནི་མྱ་ངན་ནོ། །ཚིགས་སུ་བཅད་པ་དག་བཀའ་སྩལ་པ་ཞེས་བྱ་བ་ལ་སོགས་པ་ལ། བྲམ་ཟེ་སྐྱེས་བུ་སྡིག་པ་མེད་པ་ཡོངས་སུ་མྱ་ངན་ལས་འདས་པ་འདོད་པའི་ཡོན་ཏན་དག་གིས་མ་གོས་པ་ཁམས་གསུམ་གྱི་ཕུང་པོ་དག་ལས་རྣམ་པར་གྲོལ་བ་གང་ཡིན་པ་དེ་ནི་རྣམ་པ་ཀུན་དུ་བདེ་བར་ཉལ་བ་ཡིན་ཏེ། འདོད་ཆགས་ལ་སོགས་པའི་ཡོངས་སུ་གདུང་བ་དག་ལས་རྣམ་པར་གྲོལ་བའི་ཕྱིར་རོ། །ཇི་ལྟར་བདེ་བར་ཉལ་བ་ཡིན་ཞེ་ན། དེའི་ཕྱིར། འདི་ལ་འདོད་པ་ཀུན་བཅད་ཅིང༌། །ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་སྲེད་པ་ཐམས་ཅད་བཅད་ཅིང་སེམས་ཀྱི་ཡོངས་སུ་གདུང་བ་བསལ་བ་ལུས་དང་ངག་གཉིས་ཀྱིས་ཉེ་བར་ཞི་བའི་སྐྱེས་བུ་ནི་ལེགས་པར་མཉམ་པར་གཞག་པ་ནི་ཞི་བ་ཐོབ་པའི་སེམས་ཟག་པ་མེད་པའི་སྒྲུབ་པ་མེད་པས་བདེ་བར་ཉལ་བ་ཡིན་ཏེ། གནོད་པ་ཐམས་ཅད་དང་བྲལ་བའི་ཕྱིར་རོ། །དེ་ནི་འཇིག་རྟེན་གྱི་ཆོས་ཉིད་ཡིན་ནོ་ཞེས་བྱ་བ་ནི་ཆུང་མ་ལ་ཟས་དང༌། གོས་ཀྱིས་མཁོ་བ་སྟོབས་པ་གང་ཡིན་པ་དེ་ནི་འཇིག་རྟེན་གྱི་རྣམ་པར་གཞག་པ་ཡིན་ནོ། །ལུས་རགས་པར་མངོན་པར་སྤྲུལ་ལ་ཞེས་བྱ་བ་ནི་འདོད་པ་ན་སྤྱོད་པའི་རེག་པར་རོ། །སའི་འདུ་ཤེས་སྐྱེད་དེ་ཞེས་བྱ་བ་ནི་འོག་གཞིའི་བློ་སྟེ་ཉེ་བར་ཞོག་ཤིག་པའོ། །འདུག་པའི་མཚན་མ་ཡིད་ལ་གྱིས་ཤིག་ཅེས་བྱ་བ་ནི་བདག་ཉིད་མི་གཡོ་བའི་བློ་སྔོན་
དུ་གྱིས་ཤིག་པ་སྟེ། འགྲོ་བའི་བློ་མ་བསྐྱེད་ཅིག་ཅེས་བྱ་བའི་ཐ་ཚིག་གོ །བདེ་བར་གྱུར་བས་ཞེས་བྱ་བ་ནི་ལུས་དང་སེམས་ལས་སུ་རུང་བས་སོ། །མངོན་པར་བརྗོད་པ་བགྱིད་དོ་ཞེས་བྱ་བ་ནི་ཐོས་པ་ཉམས་སུ་མྱོང་ཞིང་ཚིག་གི་དོན་མངོན་དུ་གྱུར་པ་སྟེ་དྲན་པའི་ཡུལ་དུ་གྱུར་ཅེས་བྱ་བའི་ཐ་ཚིག་གོ །མ་ངོམས་ཞེས་བྱ་བ་ནི་དེའི་དུས་ན་ཕྱིར་མ་ཕྱོགས་པའོ། །ཕྱིར་མ་སྤངས་ཞེས་བྱ་བ་ནི་སེམས་གཏན་དུ་ཕྱིར་མ་ལོག་པའོ། །མ་མྱོང་ངོ་ཞེས་བྱ་བ་ནི་མ་གྱུར་ཏོ་ཞེས་བྱ་བའི་ཐ་ཚིག་གོ །འཕགས་པའི་ཆོས་རྣམས་ཞེས་བྱ་བ་ནི་ཟག་པ་ཟད་པ་མེད་པའི་ཆོས་རྣམས་ཏེ་བདེན་པ་མཐོང་བ་ལ་སོགས་པའོ། །སེར་སྣ་འདུལ་བ་ཞེས་བྱ་བ་ནི་སེར་སྣ་སྤོང་བས་ཏེ། སྦྱིན་པ་ལ་བརྩོན་པའོ། །བཞིན་བསྒྱུར་ཏེ་ཞེས་བྱ་བ་ནི་མི་སྡུག་པར་རོ། །ལག་པ་གཉིས་བརྐྱང་ནས་ཞེས་བྱ་བ་ནི་བསྲང་ནས་སོ། །མིག་དམར་པོར་བྱས་ནས་ཞེས་བྱ་བ་ནི་མིག་ཁྲག་ཅན་དུ་བྱས་ནས་སོ། །མིག་གཉིས་བགྲད་དེ་ཞེས་བྱ་བ་ནི་གདངས་ཏེའོ། །འདྲ་བའི་གང་ཟག་ཅེས་བྱ་བ་ནི་མཚུངས་པའོ། །བརྟུལ་ཞུགས་ལྔ་ཞེས་བྱ་བ་ནི་སྲོག་གཅོད་པ་སྤོང་བ་ལ་སོགས་པའོ། །རྐང་ལག་དྲ་བ་ཅན་ཞེས་བྱ་བ་ནི་ངང་པ་བཞིན་དུ་རྐང་པ་དྲ་བར་འབྲེལ་པའོ། །ནགས་ན་ཤིང་ཤུན་པའི་གོས་གྱོན་པ་ཞེས་བྱ་བ་ནི་ནགས་ཁྲོད་ན་གནས་ཤིང་ཤིང་ཤུན་དང་ཤུན་པའི་གོས་གྱོན་པའོ། །འབྲས་བུ་ཟ་ཞེས་བྱ་བ་ནི་ཟས་སུའོ། །རི་དགས་གདུག་པ་རྣམས་དང་ལྷན་ཅིག་གནས་བླའི་ཞེས་བྱ་བ་ནི་སྟག་ལ་སོགས་པ་གཅན་གཟན་ཁྲོ་བོ་དག་དང་ལྷན་ཅིག་གནས་པ་བླའི་ཞེས་བྱ་བའི། །མཁས་པ་ཞེས་བྱ་བ་ནི་ཤེས་རབ་ཅན་ནོ། །འཇིག་རྟེན་ཕ་རོལ་འཇིགས་པས་ཞེས་བྱ་བ་ནི་ངན་སོང་གི་འཇིགས་པའོ། །རྒྱལ་སྲིད་ཕྱིར་ཞེས་བྱ་བ་ནི་རྒྱལ་སྲིད་ཀྱི་ཆད་དུའོ། །མངོན་པར་ཤེས་པ་ལྔ་ཞེས་བྱ་བ་ནི་རྫུ་འཕྲུལ་དང༌། ལྷའི་མིག་དང༌། ལྷའི་རྣ་བ་དང༌། ཕ་རོལ་གྱི་སེམས་ཤེས་པ་དང། སྔོན་གྱི་གནས་རྗེས་སུ་དྲན་པའོ། །གསོས་ཤེས་ཞེས་བྱ་བ་ནི་བཙོས་པའོ། །ཆོས་ཀྱི་རྒྱུད་ལས་བྱུང་བ་ཞེས་བྱ་བ་ནི། ཆོས་ཀྱི་རྒྱུད་སྐྱེད་པའོ། །ད་ནི་ཇི་ལྟར་སྡོ་བ་སངས་ཅན་ཤི་ནས་བཙུན་མོ་དཔལ་ལྡན་བྱུང་བ་དེ་ལ་བརྟེན་ནས་བཙུན་མོའི་འཁོར་གྱི་ནང་དུ་འཇུག་པ་རྗེས་སུ་
གནས་པ་དེ་བསྟན་པར་བྱ་སྟེ། སྣ་ཚོགས་གདུལ་ན་ཀུན་དུ་རྒྱུ་མ་དུ་ཞེས་བྱ་བ་ལ་སོགས་པ་ལ། མཛེས་པ་ཞེས་བྱ་བ་ནི་གཟུགས་ཀྱི་སྐུས་སོ། །དད་པར་འགྱུར་བ་ཞེས་བྱ་བ་ནི་གཟིགས་པ་དང༌། བསྐུམ་པ་དང༌། བརྐྱང་བ་ལ་སོགས་པའི་བྱ་བས་སོ། །དབང་པོ་ཞི་བ་ཞེས་བྱ་བ་ནི་དབང་བོ་མཉམ་པར་གཞག་པའོ། །ཐུགས་ཞི་བ་ཞེས་བྱ་བ་ནི་སེམས་མཉམ་པར་གཞག་པའོ། །སེམས་དུལ་བ་ཞེས་བྱ་བ་ནི་བསམ་གཏན་ལ་གནས་པའོ། །ཉེ་བར་ཞི་བ་ཞེས་བྱ་བ་ནི་འདོད་ཆགས་དང་བྲལ་བའོ། །དེས་ཚིགས་སུ་བཅད་པ་སྨྲས་པ་ཞེས་བྱ་བ་ལ་སོགས་པ་ལ། བྲམ་ཟེ་ཞེས་བྱ་བ་ནི་མ་དུ་ལ་བོད་པ་ཞེས་བྱ་བའི་ཐ་ཚིག་གོ །ཁྱིམ་ཐབ་ཅེས་བྱ་བ་ཡང་མ་དུ་ལ་བོད་པའི་ཚིག་ཡིན་ནོ། །དེ་ནི་གཞོན་ནུ་མི་བསྟེན་གྱི་ཞེས་བྱ་བ་ནི་དེ་ནི་བུ་མོ་བདག་གིར་མི་བྱེད་དོ་ཞེས་བྱ་བའི་ཐ་ཚིག་གོ །གལ་ཏེ་བརྟུལ་ཞུགས་ཐབས་ཀྱིས་བླངས་གྱུར་ན། །དེ་ནི་ཕྱིར་ཡང་འདོད་ཡོན་བསྟེན་པར་འགྱུར། །ཞེས་བྱ་བ་ནི་གལ་ཏེ་སྐྱེས་པ་ཉིད་མ་ཉམས་པ་མ་ཡིན་ཞིང་ཚངས་པར་སྤྱོད་པའི་བརྟུལ་ཞུགས་དགོས་པ་འབའ་ཞིག་གི་དབང་དུ་བྱ་བའི་ཐབས་ཀྱིས་བླངས་པར་གྱུར་ནས་དེས་དཔེ་མེད་པ་མཐོང་ན་ཕྱིར་ཡང་འདོད་པའི་ཡོན་ཏན་དག་པར་འགྱུར་རོ་ཞེས་བྱ་བའི་ཐ་ཚིག་གོ །ཆགས་པར་གྱུར་པའི་མལ་ནི་འཁྲུག་པར་འགྱུར་ཞེས་བྱ་བ་ནི། འགྱུར་བ་ལ་སོགས་པའི་བྱ་བ་དག་གིས་འཁྲུག་པར་འགྱུར་རོ་ཞེས་བྱ་བའི་ཐ་ཚིག་གོ །སྡང་བའི་མལ་ནི་གྱ་ཚོམ་པར་མ་འགྱུར་ཞེས་བྱ་བ་ནི་ཁྲོ་བའི་དབང་གིས་བར་མར་ལྷགས་པར་འགྱུར་བའོ། །རྨོངས་པའི་མལ་ནི་རྐང་པའི་མཐར་འགྲོར་འགྱུར་ཞེས་བྱ་བ་ནི་བརྣག་པའི་མི་མངའ་བས་རྟེན་མ་ལོགས་སུ་རྙིལ་བར་འགྱུར་བའོ། །ཤིན་ཏུ་ཆགས་བྲལ་ཞེས་བྱ་བ་ནི་འདོད་ཆགས་སྤངས་པ་ཡིན་གྱི་འདོད་ཆགས་རྣམ་པར་མནན་པའི་ནི་མ་ཡིན་ནོ། །སྐྱེས་བུ་ཆགས་པའི་རྗེས་ནི་གསལ་མི་འགྱུར། །ཞེས་བྱ་བ་ནི་རྩ་བ་རྟལ་བྱེད་པའི་ཕྱིར་སོར་མོའི་རྗེས་དག་མི་གསལ་བར་འགྱུར་བའོ། །ཞེ་སྡང་ལྡན་པའི་རྗེས་ནི་ཟབ་པ་ཡིན། །ཞེས་བྱ་བ་ནི་ཁྲོ་བའི་དབང་གིས་ཟབས་ཆེ་བའོ། །རྨོངས་པར་འགྱུར་བའི་རྗེས་ནི་ནོགས་པར་འགྱུར། །ཞེས་བྱ་བ་ནི་གཏི་མུག་ཆེན་པོའི་དབང་གིས་གཟུགས་བརྙན་ཕྱིས་པ་དང་འདྲ་བར་འགྱུར་རོ། །ཆགས་པའི་མི་ཡི་སྐད་ནི་
དར་ངར་པོ། །ཞེས་བྱ་བ་ནི་ཀུན་དུ་ཆགས་པར་འགྱུར་བའི་སྐད་ནི་སྔ་མ་བས་རྡོས་ཤིང་འདར་འདར་པོར་འགྱུར་བའི་ཕྱིར་རོ། །སྡང་བའི་མི་ཡི་སྐད་ནི་རྩུབ་པ་ཡིན། །ཞེས་བྱ་བ་ནི་ཞེ་སྡང་གི་སྒྲ་དྲག་པོ་འགྲུབ་པའི་ཕྱིར་རོ། །རྨོངས་པའི་མི་ཡི་སྐད་ནི་འཁྲུགས་པར་འགྱུར། །ཞེས་བྱ་བ་ནི་གཏི་མུག་གི་དབང་གིས་སྐད་མི་གསལ་བར་འགྱུར་བའོ། །རྔ་སྒྲ་ཞེས་བྱ་བ་ནི་སྐད་གསལ་ཞིང་སྙན་པའོ། །ཆགས་པའི་མིག་ནི་རིག་རིག་ལྟ་བར་བྱེད། །ཅེས་བྱ་བ་ནི་ཆགས་པ་ནི་རྒོད་བག་ཆེ་བའི་ཕྱིར་མི་བརྟན་པར་ལྟ་བར་བྱེད་དོ། །སྡང་པའི་མིག་ནི་དུག་དྲག་སྦྲུལ་བཞིན་ལྟ། །ཞེས་བྱ་བ་ནི་ཞེ་སྡང་གི་འབྲས་བུ་ནི་དྲག་ཤུལ་ཡིན་པའི་ཕྱིར། སྦྲུལ་གདུག་དྲག་པོ་བཞིན་དུ་དྲག་ཤུལ་དུ་ལྟ་བའོ། །རྨོངས་པའི་མིག་ནི་མུན་ཁྲོད་རྟོག་བཞིན་ལྟ། །ཞེས་བྱ་བ་ནི་གཏི་མུག་གི་མུན་པའི་རང་བཞིན་ཡིན་པའི་ཕྱིར་མུན་ཁྲོད་ནི་འཐོབ་ཅི་རྟོག་པ་བཞིན་དུ་ལྟ་བའོ། །གཉའ་ཤིང་གང་ཙམ་དུ་ལྟ་ཞེས་བྱ་བ་ནི་འདོམ་གང་ཙམ་དུ་ལྟ་བའོ། །ཇི་ལྟར་འདི་སྤྱན་ཇི་ལྟར་གཟིགས་པ་དང༌། །ཇི་ལྟར་འདི་སྐུ་བརྟན་པར་གཤེགས་པ་དང༌། །ཇི་ལྟར་འདི་ཡི་སྒྲོས་དང་ཞལ་དག་ནི། །རྡུལ་དང་བྲལ་བ་ཉིད་དུ་སྣང་བ་ལས། །ཞེས་བྱ་བ་ནི་ཇི་ལྟར་འདིའི་མིག་མི་རྒོད་པ་དང༌། ཇི་ལྟར་འདིའི་མིག་ལྟ་སྟངས་ཞི་ཞིང་མ་འཁྲུགས་པ་དང༌། ཇི་ལྟར་འདིའི་འགྲོ་བའི་ལུས་མི་གཡོ་བར་བརྟན་པར་འགྲོ་བ་དང༌། ཇི་ལྟར་འདིའི་མཆུ་གཉིས་དང་ཁ་དག་ཆགས་དང་བྲལ་བ་ཉིད་དུ་སྣང་བ་ལས་ན། འདི་གཞོན་ནུ་མི་འདོད་ཀྱི་ཕྱིར་ལོག་ལ་རང་གི་སྡུམ་པར་འདོང་ཞེས་བྱ་བའི་ཐ་ཚིག་གོ །གནས་འཇོག་གསེར་མདོག་ཨོ་ཏ་ལ་དག་ཀྱང༌། །བུ་ཡི་དོན་དུ་འདོད་པས་རྨོངས་འགྱུར་ཏེ། །འདི་ནི་ཆོས་བཞིན་ཕུལ་བས་ཞེས་བྱ་བ་ནི་གང་གི་ཕྱིར་དྲང་སྲོང་གནས་འཇོག་དང་ཨོ་ཏ་ལ་དག་ཀྱང་བུའི་དོན་དུ་འདོད་པས་རྨོངས་པར་འགྱུར་བ་དེའི་ཕྱིར་བུ་མོ་ཆོས་བཞིན་དུ་ཕུལ་བ་འདི་ལ་དོགས་པར་བྱར་ཅི་ཡོད་ཅེས་བྱ་བའི་ཐ་ཚིག་གོ །གལ་ཏེ་གནས་འཇོག་ལ་སོགས་པ་བུ་དག་གི་བུ་བསྐྱེད་པར་གྱུར་ཅེས་ཏེ་གཞན་དག་ཀྱང་བུ་དག་བསྐྱེད་པར་བྱ་འམ་ཞེ་ན། དེའི་ཕྱིར་ཐུབ་པ་རྣམས་ཀྱིས་རྟག་པར་རྒྱུན་དུ་བུ་དག་བསྐྱེད་པར་འགྱུར། །ཞེས་བྱ་བ་གསུངས་ཏེ། གང་གི་ཕྱིར་ཐུབ་པ་རྣམས་ཀྱིས་རྟག་པར་རྒྱུན་དུ་བུ་དག་བསྐྱེད་པར་འགྱུར་བ་དེའི་ཕྱིར་འདི་ཡང་བུའི་དོན་དུ་ཆུང་མ་ལེན་པར་འགྱུར་རོ་ཞེས་བྱ་བའི་ཐ་ཚིག་གོ །བདག་གི་བུ་མོ་ཞེས་བྱ་བ་ནི་ཁོ་བོའི་བུ་
མོའོ། །དམ་པ་ཞེས་བྱ་བ་ནི་བཟང་ཞིང་མཚན་དང་ལྡན་པའོ། །གཟུགས་ལྡན་ཞེས་བྱ་བ་ནི་གཟུགས་མཐོང་བའོ། །དར་བ་ཞེས་བྱ་བ་ནི་དར་ལ་བབ་པའོ། །མཁའ་ལ་དགུང་ཟླ་སྨིན་དྲུག་མཇལ་བ་ལྟར། །འདི་དང་ལྷན་ཅིག་ལེགས་པར་ཁྱོད་དགྱེས་མཛོད། །ཅེས་བྱ་བ་ནི་ཇི་ལྟར་ནམ་མཁའ་ལ་གཟའ་ཟླ་བ་དང༌། རྒྱུ་སྐད་སྨིན་དྲུག་ཕྲད་པ་མཛེས་པ་ལྟར་ཁྱོད་ཀྱང་བུ་མོ་འདི་དང་ལྷན་ཅིག་ལེགས་པར་དགའ་བར་བྱོས་ཤིག་ཅེས་བྱ་བའི་ཐ་ཚིག་གོ །བྲམ་ཟེ་ད་ཡིས་བདུད་ཀྱི་བུ་མོ་ནི། །སྲེད་པ་དགའ་བྱེད་དེ་བཞིན་དགའ་མོ་དག །ཕམ་བྱས་འདོད་པ་དག་ལ་ལན་འགའ་ཡང༌། །ང་ཡིས་འདུན་པས་སེམས་བསྐྱེད་མ་གྱུར་པས། །བཤང་དང་གཅི་བས་གང་བ་འདི་ལ་ནི། །རྐང་པས་སྤྲོ་བའང་མི་སྐྱེད་དོ། །ཞེས་བྱ་བ་ནི་གང་གི་ཕྱིར་ངས་བདུད་ཀྱི་བུ་མོ་སྲེད་མ་ལ་སོགས་པ་དག་ཕམ་པར་བྱས་ཤིང་འདོད་པའི་ཡོན་ཏན་དག་ལ་ལན་འགའ་ཡང་འདུན་པའི་སེམས་མ་བསྐྱེད་པ་དེའི་ཕྱིར་ཁྱོད་ཀྱི་བུ་མོ་བཤང་བ་དང༌། གཅི་བས་གང་བ་འདི་ལ་རྐང་པས་རེག་པར་ཡང་མི་སྤྲོ་ན་ལེན་པ་ལྟ་སྨོས་ཀྱང་ཅི་དགོས་ཞེས་བྱ་བའི་ཐ་ཚིག་གོ །བདག་གི་བུ་མོ་ཞེས་བྱ་བ་ལ་སོགས་པ་ལ། ཡན་ལག་ཉམས་གྱུར་ཅིང་ཞེས་བྱ་བ་ནི་ཡན་ལག་མ་ཚང་བར་གྱུར་ཅིང་ངོ༌། །འདོད་ལྡན་ཡོན་ཏན་བྲལ་བར་གཟིགས་སམ་ཅི། །ཞེས་བྱ་བ་ནི་བུད་མེད་འདོད་པ་སྤྱོད་པའི་ཡོན་ཏན་ཁ་དོག་དང་དབྱིབས་ཀྱི་མཚན་ཉིད་ལ་སོགས་པ་འདོད་པ་སྤྱོད་པ་དང་ལྡན་པའི་རྟགས་དག་དང༌། མི་ལྡན་པར་གཟིགས་སམ་ཅི་ཞེས་བྱ་བའོ། །འདུན་དྲག་ཅེས་བྱ་བ་ནི་འདུན་པ་ཤས་ཆེན་པོའི་བྲམ་ཟེ་རྨོངས་བ་གང་ཞིག་ཡུལ་འདོད་པ་དེ་ནི་ཁྱོད་ཀྱི་བུ་མོ་འདི་སྒྲུབ་ཅིས་ཞེས་བྱ་བ་ནི་སྐྱེ་བོ་རྨོངས་པ་གང་ཞིག་ཡུལ་འདོད་པ་དེ་ནི་ཁྱོད་ཀྱི་བུ་མོ་འདི་སྒྲུབ་ཅིང་འདོད་དེ་ཁྲོ་བ་ལ་སོགས་པའི་ཉེས་པ་དང་ལྡན་ནོ་ཞེས་བྱ་བའི་ཐ་ཚིག་གོ །ཡུལ་ལ་ཆགས་ཤིང་ཞེས་བྱ་བ་འདིས་ནི་ཉེ་བར་སྤྱོད་པ་ཉིད་ཡོད་པར་སྟོན་ཏོ། །ཁྲོ་བར་ཞུགས་གྱུར་པ་ཞེས་བྱ་བ་ནི་འདིས་ནི་ཀུན་ནས་མནར་སེམས་མང་བ་ཉིད་སྟོན་ཏོ། །འདིར་རྒྱུ་བསྟན་པའི་ཕྱིར། འདི་ལ་སྲབ་རྨོངས་སྐྱེ་བོ་ཆགས་བྲལ་མིན། །ཞེས་བྱ་བ་གསུངས་ཏེ། རབ་རྨོངས་ཞེས་བྱ་བ་ནི་ཁྱོན་ཡོངས་སུ་རྟོགས་པར་མི་ནུས་པའོ། །ང་ནི་སངས་རྒྱས་ཞེས་
བྱ་བ་ལ་སོགས་པས་ནི་གཞན་དག་ལས་དེ་བཞིན་གཤེགས་པའི་ཁྱད་པར་སྟོན་ཏེ། སངས་རྒྱས་ཇི་ལྟ་བུ་ཞིག་ཅེ་ན། དེའི་ཕྱིར་ཐུབ་གཙོ་ཞེས་བྱ་བ་ལ་སོགས་པ་གསུངས་ཏེ། ཐུབ་གཙོ་ནི་དྲང་སྲོང་གི་མཆོག་སྟེ་དཀའ་ཐུབ་ཀྱིས་མཆོག་ཏུ་གྱུར་བའོ། །མངའ་བདག་ཅེས་བྱ་བ་ནི་རང་བྱུང་སྟེ་རང་དབང་ཅན་ནོ། །དེས་ནི་མཐུ་ཐོགས་པ་མེད་པ་ཉིད་བསྟན་ཏོ། །ཇི་ལྟར་ན་ཐུབ་གཙོ་དང་མངའ་བདག་མིན་ཞེ་ན། དེའི་ཕྱིར། ང་ཡིས་བྱང་ཆུབ་བླ་མེད་ཞི་བ་བརྙེས། །ཞེས་བྱ་བ་གསུངས་ཏེ། བྱང་ཆུབ་ནི་ཟད་པ་དང་མི་སྐྱེ་བ་ཤེས་པའོ། །བླ་མེད་ཅེས་བྱ་བ་ནི་རིགས་མཆོག་གིས་བསྡུས་པའོ། །ཞི་བ་ཞེས་བྱ་བ་ནི་རབ་ཏུ་ཞི་བ་སྟེ། སྐྱོན་ཐམས་ཅད་ལས་ཡང་དག་པར་འདས་པའོ། །ཆགས་པ་མེད་པ་ཉིད་དུ་འཇིག་རྟེན་རྒྱུ། །ཞེས་བྱ་བ་ནི་སྲེད་པ་ལ་སོགས་པའི་སྐྱོན་དང་བྲལ་བས་གཞན་གྱི་དོན་དུ་རྒྱུའོ་ཞེས་བྱ་བའི་ཐ་ཚིག་གོ །ཀུན་དུ་གཟིགས་པ་བུད་མེད་བླངས་པ་མཛད་དོ་ཞེས་བྱ་བ་ལ་སོགས་པ་ལ། ཀུན་དུ་གཟིགས་པ་ཞེས་བྱ་བ་ནི་ཐམས་ཅད་མཁྱེན་པའོ། །ཇི་ནས་རྗེས་སུ་མཐུན་པར་སྤྱད་པར་གྱིས། །ཞེས་བྱ་བ་ནི་རྐྱེན་དུ་འབབ་པ་ཞེས་བྱ་བའི་ཐ་ཚིག་གོ །ཟད་གྱུར་ཅིག་ཅེས་བྱ་བ་ནི་ལྷུང་བཟེད་ལ་སོགས་པ་འདི་དག་ཟད་པར་གྱུར་ཅེས་བྱ་བའོ། །རིང་བསྲེལ་གཅིག་ཅེས་བྱ་བ་ནི་བདག་ཉིད་སྲུངས་ཞེས་བྱ་བའི་ཐ་ཚིག་གོ །རོགས་པ་ཞེས་བྱ་བ་ནི་བྲམ་ཟེའི་ཁྱེའུའོ། །ང་རྒྱལ་བཅག་པར་བྱ་བའི་ཕྱིར། །ཞེས་བྱ་བ་ནི་རློམ་པ་བཅག་པའི་ཕྱིར་རོ། །ཕན་ཚུན་བདེ་བ་ཉིད་ཀྱིས་ཞེས་བྱ་བ་ནི་གཅིག་ལ་གཅིག་བདེ་བ་ཉིད་ཀྱིས་སོ། །ཀུ་བའི་གཟིངས་ཞེས་བྱ་བ་ནི་ཀུ་བ་བཀྲམ་པའི་སྟེང་དུ་ཤིང་སྤྲེལ་པའོ། །ཁྱིམ་ཐབ་ཅེས་བྱ་བ་ནི་བདག་གིས་བྱེད་པའོ། །བདག་པོ་ཞེས་བྱ་བ་ནི་ཉེ་བར་སྤྱོད་པའོ། །གནས་ཞེས་བྱ་བ་ནི་རླུང་དང་ཉི་མ་ལ་སོགས་པ་གློ་བུར་གྱི་གནོད་པ་ལས་བསྲུངས་པའོ། །གླིང་ཞེས་བྱ་བ་ནི་རྒྱ་མཚོ་ལ་སོགས་པའི་ཆུའི་གནོད་པ་ལས་བསྲུངས་པའོ། །སྐྱོབ་པ་ཞེས་བྱ་བ་ནི་རིགས་མཐུན་པ་ལས་གྱུར་པའི་གནོད་པ་ལས་བསྲུངས་པའོ། །སྐྱབས་ཞེས་བྱ་བ་ནི་རིགས་མི་མཐུན་པ་ལས་གྱུར་པའི་གནོད་པ་ལས་བསྲུངས་པའོ། །དཔུང་གཉེན་ཞེས་བྱ་བ་ནི་ནང་གི་རིམས་ནད་ལ་སོགས་པའི་གནོད་པ་ལས་བསྲུངས་པའོ། །
ལྷོ་ལམ་ཞེས་བྱ་བ་ནི་ལྷོ་ཕྱོགས་ཀྱི་ལམ་མོ། །ཆགས་པར་གྱུར་པ་ཞེས་བྱ་བ་ནི་འདོད་ཆགས་བསྐྱེད་པའི་ཕྱིར་རོ། །རྒྱགས་པར་འགྱུར་བ་ཞེས་བྱ་བ་ནི་དྲེགས་པ་བསྐྱེད་པའི་ཕྱིར་རོ། །འདོད་པར་འགྱུར་བ་ཞེས་བྱ་བ་ནི་འདོད་པ་བསྐྱེད་པའི་ཕྱིར་རོ། །སྡུག་པར་འགྱུར་བ་ཞེས་བྱ་བ་ནི་ཕྲད་པར་འགྱུར་བའི་མཚན་ཉིད་ཀྱི་འདོད་པ་བསྐྱེད་པའི་ཕྱིར་རོ། །བྱམས་པར་འགྱུར་བ་ཞེས་བྱ་བ་ནི་ཉོན་མོངས་པ་ཅན་གྱི་དགའ་བ་བསྐྱེད་པའི་ཕྱིར་རོ། །བརྗོད་པར་འགྱུར་བ་ཞེས་བྱ་བ་ནི་སེར་སྣའི་མཚན་ཉིད་ཀྱི་འབད་པ་བསྐྱེད་པའི་ཕྱིར་རོ། །བརྒྱལ་བར་གྱུར་པ་ཞེས་བྱ་བ་ནི་འདོད་ཆགས་ལས་གྱུར་པའི་གཡོ་བའི་མཚན་ཉིད་ཀྱི་བརྒྱལ་བ་བསྐྱེད་པའི་ཕྱིར་རོ། །འཆི་བར་འགྱུར་བ་ཞེས་བྱ་བ་ནི་ཡོངས་སུ་མི་གཏོང་བའི་མཚན་ཉིད་ཀྱི་བྱམས་པ་བསྐྱེད་པའི་ཕྱིར་རོ། །བསྒྲུབ་པར་འགྱུར་བ་ཞེས་བྱ་བ་ནི་མ་ཐོབ་པ་ཐོབ་པར་འདོད་པ་བསྐྱེད་པའི་ཕྱིར་རོ། །ཀུན་དུ་སྦྱོར་བར་འགྱུར་ཞེས་བྱ་བ་ནི་ཕན་ཚུན་སྦྱོར་བ་བསྐྱེད་པའི་ཕྱིར་རོ། །གཉིད་ལོག་པ་ཞེས་བྱ་བ་ནི་གཉིད་ཀྱིས་ནོན་པའོ། །མལ་དུ་ཞུགས་པ་ཞེས་བྱ་བ་ནི་མལ་དུ་སྒྱེལ་བའོ། །འཛམ་བུའི་གླིང་དགའ་བར་འགྱུར་བ་ཁྱོད་ཀྱིས་བདག་ཅག་སྤངས་སམ་ཞེས་བྱ་བ་ནི་ཐག་རིང་པོར་ཡོངས་སུ་སྤངས་སམ་ཞེས་བྱ་བའོ། །འཕང་མཐོ་བ་ཞེས་བྱ་བ་ནི་གནམ་འཕང་མཐོ་བའོ། །ཐ་གྲུ་ཆེ་བ་ཞེས་བྱ་བ་ནི་རྒྱ་ཆེ་བའོ། །བྱི་ལ་འཛུལ་བ་ཞེས་བྱ་བ་ནི་བྱི་ལ་འགྲོ་བའི་སྒོའོ། །འོངས་ཤིང་འོངས་ཤིང་ཞེས་བྱ་བ་ནི་གཟུང་ཞིང་གཟུང་ཞིང་ངོ༌། །རྣམ་པར་རྒྱུ་བ་ཞེས་བྱ་བ་ནི་ཕན་ཚུན་འགྲོ་བའོ། །བདེ་བ་ཞེས་བྱ་བ་ནི་ཚིམ་པའི་བདེ་བ་ཐོབ་པའོ། །ནད་མེད་པ་ཞེས་བྱ་བ་ནི་བཀྲེས་པའི་ནད་དང་བྲལ་བའོ། །སྟོབས་དང་ལྡན་པ་ཞེས་བྱ་བ་ནི་སྤྲོ་བ་དང་ལྡན་པའོ། །དབང་པོ་ཚིམ་པ་ཞེས་བྱ་བ་ནི་ལུས་ཉེ་བར་བཙགས་པའོ། །ལེགས་པར་ཤིན་ཏུ་བཟུང་སྟེ་ཞེས་བྱ་བ་ནི་བླངས་ཏེའོ། །ཀུན་ཆུབ་པར་བྱས་ནས་ཞེས་བྱ་བ་ནི་ཡང་དང་ཡང་དུ་བསམས་ཤིང་ཡོངས་སུ་རྫོགས་པར་བྱས་ནས་སོ། །དལ་བུ་དལ་བུས་ཉལ་ལོ་ཞེས་བྱ་བ་ནི་དལ་བུས་རེག་པར་བྱས་ཤིང་འཁྱུད་དོ་ཞེས་བྱ་བའི་ཐ་ཚིག་གོ །ཡང་དག་པར་བསྒོ་ཡང་དག་པར་བསྟན་ཞེས་བྱ་བ་ནི་བྱེད་དུ་འཇུད་པའོ། །ལུས་ཀྱི་མཐུ་དང་སྟོབས་བསྐྱེད་ནས། །ཞེས་བྱ་བ་ལ། མཐུ་ཞེས་བྱ་བ་
ནི་བ་རྟན་པའོ། །སྟོབས་ཞེས་བྱ་བ་ནི་སྤྲོ་བའི་ནུས་པའོ། །སངས་རྒྱས་བསྟན་ལ་ཞེས་བྱ་བ་ནི་འཕགས་པའི་བདེན་པ་བཞི་བསྟན་པ་ལའོ། །མ་དད་ཅེས་བྱ་བ་ནི་ཡིད་མི་ཆེས་པའོ། །སྡུག་བསྔལ་ཞེས་བྱ་བ་ནི་སེམས་ཅན་དམྱལ་བ་ལ་སོགས་པའི་སྡུག་བསྔལ་ལོ། །ཕ་རོལ་འགྲོ་བ་ཞི་ཞེས་བྱ་བ་ནི་མྱ་ངན་ལས་འདས་པར་འགྱུར་བའོ། །ཉོན་མོངས་པ་ཞེས་བྱ་བ་ནི་བཀྲེན་པའོ། །ཐབས་སོམས་ཤིག་ཅེས་བྱ་བ་ནི་ཐབས་ཇི་ལྟར་བྱ་བ་ནི་སོམས་ཤིག་པའོ། །སྙིང་སྟོབས་ཅན་ཞེས་བྱ་བ་ནི་བརྟན་པའོ། །བྱུང་སྟེ་ཞེས་བྱ་བ་ནི་བསྟན་ཏེའོ། །དུས་ཚིགས་སར་པ་ཞེས་བྱ་བ་ནི་དུས་དང་པོར་འབྱུང་བའི་ལོ་མ་ལ་སོགས་པའོ། །རྒྱུ་མེད་པར་ཡང་ཞེས་བྱ་བ་ནི་བློ་སྔོན་དུ་མ་བཏང་བ་སྟེ་ཞར་ལ་ཞེས་བྱ་བའི་ཐ་ཚིག་གོ །ཤིང་བལ་ཞེས་བྱ་བ་ནི་རས་བལ་མར་མེ་ལ་སོགས་པ་ལ་དགོས་པའོ། །ཆོག་གིས་ཞེས་བྱ་བ་ནི་མཐར་ཐུག་གིས་སོ། །ཐོང་ཤིག་ཅེས་བྱ་བ་ནི་བཟློག་པའོ། །མེ་སྤར་བ་དེས་ཞེས་བྱ་བ་ནི་མཆེད་པ་དེས་སོ། །རྩིག་ངོས་སྐར་ཁུང་ནས་ཞེས་བྱ་བ་ནི་ར་བའི་སྐར་ཁུང་བུ་ག་ནས་སོ། །ཆུའི་སྟོར་ཁུང་ནས་ཞེས་བྱ་བ་ནི་ཆུ་འབབ་པའི་བུ་ག་ནས་སོ། །འབྲས་བུ་མེད་པར་དུས་ལ་བབ་ཕ་མ་ཡིན་ནོ་ཞེས་བྱ་བ་ནི་སྙིང་པོ་བླངས་པ་སྟེ། དགེ་སྦྱོང་གི་འབྲས་བུ་ལས་སྐྱེ་པའི་འབྲས་བུ་བླངས་པའི་ཕྱིར་རོ། །ཐ་མའི་ཆ་དང་ལྡན་པའི་ཀུན་དུ་སྦྱོར་བ་ལྔ་ཞེས་བྱ་བ་ནི་འདོད་པའི་ཁམས་ཀྱི་སྒྲིབ་པ་ལྔའོ། །རྫུས་ཏེ་སྐྱེ་ཞིང་ཞེས་བྱ་བ་ནི་སྐྱེ་གནས་གཞན་དུ་མི་སྐྱེ་བའི་ཕྱིར་རོ། །དེར་ཡོངས་སུ་མྱ་ངན་ལས་འདའ་བ་ཞེས་བྱ་བ་ནི་གཟུགས་ཀྱི་ཁམས་སོ། །ཀུན་དུ་སྦྱོར་བ་གསུམ་ཞེས་བྱ་བ་ནི་འཇིག་ཚོགས་ལ་ལྟ་བ་དང༌། ཚུལ་ཁྲིམས་དང༌། བརྟུལ་ཞུགས་མཆོག་ཏུ་འཛིན་པ་དང་ཐེ་ཚོམ་མོ། །ལན་ཅིག་འཇིག་རྟེན་འདིར་འོངས་ནས་ཞེས་བྱ་བ་ནི་མིའི་འཇིག་རྟེན་འདིར་རོ། །ལོག་པར་མི་ལྟུང་བའི་ཆོས་ཅན་ཞེས་བྱ་བ་ནི་སེམས་ཅན་དམྱལ་བ་ལ་སོགས་པར་མི་ལྟུང་བའི་ཕྱིར་རོ། །རྫོགས་པའི་བྱང་ཆུབ་ལ་ངེས་པར་གཞོལ་བ་ཞེས་བྱ་བ་ནི་གདོན་མི་ཟ་བར་ཉོན་མོངས་པ་ཐམས་ཅད་སྤངས་པས་མྱ་ངན་ལས་འདས་པའི་ཕྱིར་རོ། །རེ་ལྟར་ཐོགས་པ་ནི་སྲིད་པ་ལན་བདུན་པ་ཞེས་བྱ་བ་ནི་འདོད་པའི་ཁམས་ཀྱི་ལྷ་རྣམས་ཀྱི་ནང་དུ་
སྐྱེ་བ་ལན་བདུན་པ་དང༌། དེ་དག་གི་བར་མ་དོའི་སྲིད་པ་སྐྱེ་བ་ལན་བདུན་དང༌། མི་རྣམས་ཀྱི་ནང་དུ་སྐྱེ་བ་ལན་བདུན་དང༌། དེ་དག་གི་བར་མ་དོའི་སྲིད་པར་ལན་བདུན་ལེན་པའོ། །རང་གི་སྲོག་གི་ཕྱིར་ཡང་བསླབ་པ་དག་ལས་འདའ་བར་མི་བྱེད་པ་ཞེས་བྱ་བ་ནི་ཚུལ་ཁྲིམས་རྣམ་པར་དག་པ་སྟོན་ཏེ། ངལ་སེམས་དད་པ་ཞེས་བྱ་བ་ནི་དད་པ་ཀུན་དུ་སྤྱོད་པ་སྟོན་ཏོ། །གང་ལ་བད་སའི་རྒྱལ་པོ་ཤར་པ་ཞེས་བྱ་བ་ལ་སོགས་པ་ལ། ཆགས་པ་ལ་ཞེས་བྱ་བ་ནི་འདོད་པ་ལ་འདོད་ཆགས་ཀུན་དུ་སྤྱོད་པས་སོ། །ཞེན་པ་ཞེས་བྱ་བ་ནི་དྲུང་དུ་འགྲོ་བས་འདུན་པས་སོ། །ཆུམས་པ་ཞེས་བྱ་བ་ནི་ཡན་ལག་ནས་འཛིན་པས་སོ། །མདུད་པ་བོར་བ་ཞེས་བྱ་བ་ནི་གཉིས་སྤྲོད་པར་འདུན་པས་སོ། །བརྒྱལ་བ་ཞེས་བྱ་བ་ནི་སེམས་ཆགས་པ་ཉིད་ཀྱིས་སམ་ལུས་འགྱུར་བ་ཉིད་ཀྱིས་སོ། །ལྷག་པར་ཆགས་པ་ཞེས་བྱ་བ་ནི་མི་ཚངས་པར་སྤྱོད་པ་ལས་བྱུང་བ་མེད་པ་ཡོངས་སུ་མ་རྫོགས་པས་ན། བར་མི་ཆད་པར་འདུན་པས་སོ། །ལྷག་པར་ཆགས་ཤིང་འདུག་པ་ཞེས་བྱ་བ་ནི་གཞན་དག་དེ་ལ་སྤྱོད་པ་ཟློག་པས་འདུག་པས་སོ། །འཇིག་རྟེན་སྙིང་པོ་མེད་བྲེལ་ལ། །ཞེས་བྱ་བ་ནི་ལུས་སྙིང་པོ་མེད་པ་དོན་མེད་པ་འབྲས་བུ་མེད་པ་དང་བྲེལ་བ་ལའོ། །སྐལ་ལྡན་གཟུགས་བཞིན་ལྡན་པར་བྱེད། །ཅེས་བྱ་བ་ནི་སྙིང་པོ་དང་ལྡན་པའི་གཟུགས་ཉིད་དུ་རྟོག་པར་བྱེད་པའོ། །ཅིའི་ཕྱིར་དེ་ལྟར་ལྟ་ཞེ་ན། དེའི་ཕྱིར། །བྱིས་པ་ཉོན་མོངས་བཅིངས་གྱུར་ཅིང༌། །མུན་པས་ཡོངས་སུ་བསྐོར་བ་དག །དམ་པ་མིན་ལ་དམ་པར་ལྟ། །ཞེས་བྱ་བ་གསུངས་ཏེ། འདོད་ཆགས་ལ་སོགས་པའི་འཆིང་བས་བཅིངས་ཤིང་མི་ཤེས་པའི་མུན་པས་ཡོངས་སུ་བསྐོར་བ་དག་གོ །མཐོང་བ་རྣམས་ལ་ཅི་ཡང་མེད། །ཅེས་བྱ་བ་ནི་དེ་ཁོ་ན་ཉིད་མཐོང་བ་རྣམས་ལ་ནི་ལུས་ལ་སྡུག་པར་ལྟ་བ་ཅི་ཡང་མེད་པའོ། །འདི་སྐད་བསྟན་ཏེ་གང་གི་ཕྱིར་བྱིས་པ་དག་འདོད་ཆགས་ལ་སོགས་པས་བཅིངས་ཤིང་མི་ཤེས་མུན་པས་བྱས་པ་དེའི་ཕྱིར་ལུས་ལ་སོགས་པ་མི་སྡུག་པ་ཉིད་དུ་ལྟུང་བར་བྱེད་དོ། །གང་དག་དེ་ཁོ་ན་མཐོང་བ་དེ་དག་ལ་ནི་ལུས་ལ་སྡུག་བསྔལ་ཉིད་དུ་ལྟ་བ་ཅི་ཡང་མེད་དོ། །ཐམས་ཅད་མི་གཙང་བ་ཉིད་དུ་མཐོང་བའི་ཕྱིར་རོ། །ཕྱོགས་བཅུ་ནས་བསྐོར་རོ་ཞེས་བྱ་བ་ནི་བསྐོར་བའོ། །ཉོན་མོངས་
པ་ཅན་མ་ཡིན་པ་ཞེས་བྱ་བ་ནི་མདོག་མ་ཉམས་པའོ། །ལུས་མ་རྙིང་བ་ཞེས་བྱ་བ་ནི་ལུས་མ་གོང་བའོ། །སྙན་གསོལ་ཞེས་བྱ་བ་ནི་ཐུགས་པ་བདེ་བའམ་ཞེས་འདྲི་བའོ། །འདིར་ནི་སྐྱ་རེངས་ཐ་མ་མིན་པར་དགོངས་སོ་ཞེས་བྱ་བ་ནི་སྐྱ་རེངས་ཐ་མ་མ་ཤར་ན་འཇིག་རྟེན་ཕལ་ཆེར་མཚན་མོའི་ཐ་སྙད་མི་འཆད་པའི་ཕྱིར་རོ། །གྲོང་ཁྱེར་གྱི་སྒོ་གཏན་ལས་འདའ་ན་ཉེས་བྱས་སུ་འགྱུར་རོ་ཞེས་བྱ་བ་དང༌། །རྒྱལ་པོའི་ཕོ་བྲང་གི་སྒོ་གཏན་ལས་འདའ་ན་ཉེས་བྱས་སུ་འགྱུར་རོ་ཞེས་བྱ་བ་ནི་རྒྱལ་པོའི་བཙུན་མོའི་འཁོར་དང་འབྲེལ་བ་མེད་པར་དགོངས་པའོ། །བཙུན་མོའི་འཁོར་གྱི་སྒོ་གཏན་ལས་འདའ་ན་ལྟུང་བྱེད་དུ་འགྱུར་རོ་ཞེས་བྱ་བ་ནི་རྒྱལ་པོའི་བཙུན་མོའི་འཁོར་ནི་འཇིགས་པ་ཆེན་པོའི་གནས་ཡིན་པས། ཐག་རིང་པོ་ཉིད་སྤངས་པའི་ཕྱིར་ལྟུང་བྱེད་ཀྱི་རྒྱུ་ཡིན་ནོ། །རྒྱལ་པོའི་ཕོ་བྲང་དུ་ནུབ་མོ་འགྲོ་བའི་ལྟུང་བྱེད་དེ་བརྒྱད་ཅུ་གཉིས་པའི་ཚིག་རྣམ་པར་བཤད་པ་རྫོགས་སོ།། །། གུས་པར་བྱས་ཏེ་ཆོས་ཉན་པར་མི་བྱེད་ཅེས་བྱ་བ་ལ་སོགས་པ་ལ། དེ་ལ་གུས་པར་བྱས་ཏེ་ཞེས་བྱ་བའི་དོན་དུ་གཉེར་བ་ཉིད་ཀྱིས་གུས་པས་སོ། །བླ་མར་བྱས་ཏེ་ཞེས་བྱ་བ་ནི་ཆོས་དང་ཆོས་སྨྲ་བ་གཉིས་ལ་བླ་མར་བྱེད་པས་སོ། །རུ་ཤིང་ལྟར་བྱས་ཏེ་ཞེས་བྱ་བ་ནི་རུ་ཤིང་ལྟར་སྙིང་པོ་ཉིད་དུ་ཉེ་བར་འཇོག་པས་སོ། །ཡིད་ལ་བྱས་ཏེ་ཞེས་བྱ་བ་ནི་མི་བརྗེད་པའི་ཚུལ་གྱིས་ཡིད་ལ་ཞེན་པས་སོ། །སེམས་རྩེ་གཅིག་ཏུ་ཞེས་བྱ་བ་ནི་ཆོས་ལ་དམིགས་པའི་སེམས་ཀྱིས་སོ། །རྣ་བླགས་ཏེ་ཞེས་བྱ་བ་ནི་སྒྲ་གཞན་མི་ཉན་པའི་ཚུལ་གྱིས་ན་གནོད་པའོ། །སེམས་ཅན་ཐམས་ཅད་ཀྱིས་བསམས་ཏེ་ཞེས་བྱ་བ་ནི་བར་ཆད་མེད་པར་ཆོས་ལ་དམིགས་པའི་སེམས་ཀྱིས་སོ། །ད་གདོད་ཐོས་བསམ་ཅི་ན་ཞེས་བྱ་བ་ནི་ད་བསྟིང་བའི་ཚིག་སྟེ་ད་གདོད་གློ་བུར་དུ་ཐོས་པ་ལྟ་ཞེས་བྱ་བའོ། །མདོའི་ནང་དུ་གཏོགས་པ་ཞེས་བྱ་བ་ནི་མངོན་སུམ་དུ་མདོའི་ནང་དུ་བསྟན་པའོ། །མདོའི་ནང་དུ་འདུས་པ་ཞེས་བྱ་བ་ནི་བརྒྱུད་པའི་ཚུལ་གྱིས་དོན་གྱི་སྒོ་ནས་བསྟན་པའོ། །དེ་ལ་གལ་ཏེ་ཞེས་བྱ་བ་ལ་སོགས་པའི་ཚིག་ནི་འགྱོད་པའི་ཡུལ་བསྟན་པའི་ཕྱིར་རོ། །གཉིས་སམ་གསུམ་གྱི་ཚེ་ཞེས་བྱ་བའི་ཚིག་གིས་ནི་རྒྱུན་དུ་ཉན་པ་ན་ཡང་རྣ་མི་གཏོད་པས་མ་གུས་པར་མངོན་ལ། མ་གུས་པ་གུས་པ་བསྐྱེད་པའི་ཕྱིར་འགྱོད་
དུ་གཞུག་པར་སྟོན་ཏོ། །ཚེ་དང་ལྡན་པ་དེ་མི་ཤེས་འགྲོལ་བས། །ཞེས་བྱ་བ་ནི་དེ་ལ་ཆོས་འདི་ཡང་འདི་ན་ཡོད་དོ་ཞེས་བྱ་བར་ཤེས་པ་མེད་པས་ལྟུང་བ་དང་བཅས་པ་མ་ཡིན་པར་མི་འགྱུར་ཏེ། འདི་ལྟར་བྱའོ་སྙམ་པའི་སེམས་པ་ཡོད་པས་དེ་ནི་ལྟུང་བ་དང་བཅས་པ་ཉིད་ཡིན་པས་ཞེས་བྱ་བའི་ཐ་ཚིག་གོ །མ་རྙེད་དེ་རྙེད་པ་མ་ཡིན་ཞེས་བྱ་བ་ནི་དད་པ་ལ་སོགས་པ་ཁྱད་པར་དུ་འཕགས་པ་མ་རྙེད་པའི་ཕྱིར་རོ། །རྙེད་དེ་ཉེས་པ་རྙེད་དེ་ལེགས་པར་རྙེད་པ་མ་ཡིན་ནོ་ཞེས་བྱ་བ་ནི་མིང་ཉིད་ལ་སོགས་པ་ཡོངས་སུ་རྫོགས་པ་མ་རྙེད་པའི་ཕྱིར་རོ། །འདི་སྐད་བསྟན་ཏེ་གུས་པར་བྱས་ཏེ་ཆོས་ཉན་པར་མི་བྱེད་ཅིང༌། འདི་ལྟར་ཆོས་འདི་བདག་གིས་ད་གདོད་ཤེས་སོ་ཞེས་ཟེར་ན་ལན་ཅིག་སྨྲས་ན་ཡང་ལྟུང་བྱེད་དུ་འགྱུར་རོ། །འདོན་པ་ལན་གསུམ་ཐོས་པ་ཉིད་ཡིན་ན་མ་གུས་པ་འགྱོད་དུ་གཞུག་གོ །བསླབ་པའི་གཞིའི་དངོས་པོ་ལ་ཁྱད་དུ་གསོད་པའི་ལྟུང་བྱེད་ བརྒྱད་ཅུ་གསུམ ་པའི་ཚིག་རྣམ་པར་བཤད་པ་རྫོགས་སོ།། །།ཟན་ཡང་སློང་བར་བྱེད་ཅེས་བྱ་བ་ནི། །གཞན་ལ་སློང་བར་བྱེད་པའོ། །སྤུ་བུ་ཅན་ཞེས་བྱ་བ་ནི་འདམ་བུའི་རྣམ་པ་ཡ་ཏོག་ན་ཁ་ཡོད་པའོ། །ཆང་པ་ལྟ་བུ་ཞེས་བྱ་བ་ནི་ཆང་པའི་རྣམ་པ་ལྟ་བུ་གློན་ཁ་ཡོད་པའོ། །གཉི་ག་ཡིན་པར་དགོངས་སོ་ཞེས་བྱ་བ་ནི་གཉི་ག་ལ་འདོད་ཞེན་ཆེ་བ་ཉིད་དུ་འདྲ་བའི་ཕྱིར་རོ། །བྱེད་དུ་འཇུག་ན་ཞེས་བྱ་བ་ནི་རང་གིས་སམ་གཞན་ཏེ། བདག་ཉིད་ཀྱིས་བྱེད་དུའམ་གཞན་བྱེད་དུ་འཇུག་ན་ཞེས་བྱ་བའི་ཐ་ཚིག་གོ །བཅག་ན་ལྟུང་བྱེད་དོ་ཞེས་བྱ་བ་ནི་བྱེད་པ་དང་བྱེད་དུ་འཇུད་པ་གཉི་ག་ལ་ལྟུང་བྱེད་དུ་འགྱུར་བ་དེ་ནི་བཅག་པའི་འོག་ཏུ་བཤགས་པར་བྱ་སྟེ། དེ་ཡང་རུང་བ་མ་ཡིན་པའི་དངོས་པོ་ལ་ལྷག་པར་ཆགས་ཤིང་ལོངས་སྤྱོད་པ་བཟློག་པའི་ཕྱིར་རོ། །ལྟུང་བ་དེ་ཡང་བཤགས་པ་མ་ཡིན་པས་ཞེས་བྱ་བ་ནི་རྒྱུ་མ་བཟློག་པའི་ཕྱིར་རོ། །ཁབ་རལ་བཅོས་པའི་ལྟུང་བྱེད་དེ་བརྒྱད་ཅུ་བཞི་པའི་ཚིག་རྣམ་པར་བཤད་པ་རྫོགས་སོ།། །།ཁྲིད་དམའ་བ་ཞེས་བྱ་བ་ནི་ཁྲིའི་རྩ་བ་ཐུང་བའོ། །འདོད་པ་དྲི་ང་བ་མེད་པ་ཞེས་བྱ་བ་ནི་འདོད་པ་བརྟེན་པ་མེད་པའོ། །རྨོངས་པ་ཞེས་བགྱི་བའི་ཚལ་དེ་ནི་ཞེས་བྱ་བ་ནི་འདོད་ཆགས་ཀྱིས་རྣམ་པར་རྨོངས་པའི་ཕྱིར་རོ། །ལྷ་མོའི་ཚོགས་ཀྱིས་ཀུན་བསྒྲགས་ཤིང་ཞེས་བྱ་བ་ནི་གླུ་
དབྱངས་ཀྱི་སྒྲས་ཀུན་དུ་གང་བའོ། །ཤ་ཟ་མོ་བཞིན་ཡོངས་སུ་བསྐར་ན་ཞེས་བྱ་བ་ནི་ལུས་ཀྱིས་མངོན་པར་ཁྱབ་པའོ། །ཇི་ལྟར་འཆི་བ་འབྱུང་བར་འགྱུར་ཞེས་བྱ་བ་ནི་ཇི་ལྟར་འཁོར་བ་ལས་ངེས་པར་འགྱུར་ཞེས་བྱ་བའི་ཐ་ཚིག་གོ །དྲང་པོ་ཞེས་བྱ་བའི་ལམ་དེ་ནས་ཞེས་བྱ་བ་ནི་འཕགས་པའི་ལམ་ཡན་ལག་བརྒྱད་པ་དང་རྗེས་སུ་མཐུན་པའི་ཚུལ་ཁྲིམས་མི་ཚངས་པར་སྤྱོད་པ་ལ་སོགས་པ་སྤང་བའི་མཚན་ཉིད་ཀྱིས་ལམ་དེ་ནས་ཏེ། ཤེས་པའི་གཞི་ནི་ཚུལ་ཁྲིམས་ཡིན་པའི་ཕྱིར་རོ། །འཇིགས་མེད་ཕྱོགས་ཞེས་བྱ་བ་དེར། །ཞེས་བྱ་བ་ནི་མྱ་ངན་ལས་འདས་པར་ཏེ་ཉེས་པ་ཐམས་ཅད་སྤངས་པའི་ཕྱིར་རོ། །སྒྲ་མེད་ཅེས་བྱ་བའི་ཤིང་རྟ་ནི་ཞེས་བྱ་བ་ནི་ཡང་དག་པའི་ངག་དང༌། ལས་ཀྱི་མཐའ་དང༌། འཚོ་བ་དང་ཟག་པ་མེད་པའི་ཚུལ་ཁྲིམས་ཏེ། ཚུལ་ཁྲིམས་འཆལ་བའི་རྒྱུར་གྱུར་པ་འདོད་ཆགས་ལ་སོགས་པའི་སྒྲ་དེ་ན་མེད་པའི་ཕྱིར་རོ། །ཆོས་ཀྱི་རྟོག་པས་བསྐྱོད་གྱུར་པ།། ཞེས་བྱ་བ་ནི་ཡང་དག་པའི་རྟོག་པས་བསྐྱོད་གྱུར་ཏེ། དགེ་བའི་རྟོག་པ་ཡིན་པའི་ཕྱིར་རོ། །དེའི་དམིགས་པ་ངོ་ཚ་ཤེས་པ་ནི་འདྲེན་པའི་དམིགས་པ་ནི་ངོ་ཚ་ཤེས་པ་ཡིན་ཏེ། ངོ་ཚ་ཤེས་པའི་ཚུལ་ཁྲིམས་ཡོངས་སུ་དག་པའི་ཕྱིར་རོ། །དྲན་པ་དེའི་འཁོར་ཡིན་ཏེ་ཞེས་བྱ་བ་ནི་ཚུལ་ཁྲིམས་དེའི་འཁོར་ནི་དྲན་པ་ཡིན་ཏེ། དྲན་པས་ཡིད་ཀུན་དུ་བསྲུངས་པ་ལ་ཚུལ་ཁྲིམས་འཆལ་བའི་རྒྱུ་འདོད་ཆགས་ལ་སོགས་པ་མི་འབྱུང་བའི་ཕྱིར་རོ། །ཁ་ལོ་སྒྱུར་བ་ཤེས་རབ་ཡིན། །ཞེས་བྱ་བ་ནི་ཚུལ་ཁྲིམས་དེའི་ཁ་ལོ་སྒྱུར་བ་ནི་ཤེས་རབ་སྟེ་འཇིག་རྟེན་ལས་འདས་པའི་ཤེས་རབ་ཀྱིས་བསྐྱོད་པའི་ལམ་ནི་མྱ་ངན་ལས་འདས་པར་འགྲོ་བའི་ཕྱིར་རོ། །སྣ་འདྲེན་ཡང་དག་ལྟ་ཞེས་བྱ་བ་ནི་ཟག་པ་མེད་པའི་ཤེས་རབ་ཀྱིས་སྣ་འདྲེན་པ་ནི་ངེས་འབྱེད་ཀྱི་ཆ་དང་མཐུན་པར་རྟོགས་པ་ཡང་དག་པའི་ལྟ་བའི་ཟག་པ་དང་བཅས་པ་ཡིན་པར་ཤེས་པར་བྱ་བའི་ཐ་ཚིག་གོ །སྐྱེས་པའམ་བུད་མེད་གང་ལ་ཡང་རུང་ཞེས་བྱ་བ་སྤྱིར་སྨོས་པ་ནི་ཟ་མ་དང་མ་ནིང་ལ་སོགས་པ་ལ་འཕགས་པའི་ལམ་མི་སྐྱེ་བས་འདི་གཉིས་གང་ཡང་རུང་བ་ལ་འཕགས་པའི་ལམ་སྐྱེ་བར་བསྟན་པའི་ཕྱིར་རོ། །མང་སྔར་བསམ་གཏན་བྱེད་པ་ཞེས་བྱ་བ་ནི་བཞི་མདོ་ལ་སོགས་པ་མི་མང་པོ་འདུ་བའི་མིག་སྔ་ན་བསྒོམ་པའོ། །མགོ་ལོགས་དང་
རྐང་པ་ལོགས་སུ་རྐང་པ་གཉིས་བཀྲུ་བར་བྱས་ཏེ་ཞེས་བྱ་བ་ནི་སྤྲུལ་གྱི་འཇིགས་པ་མེད་པའི་ཕྱིར་དང༌། མི་སྣང་བར་ཚུལ་དང་མི་མཐུན་པ་མེད་པའི་ཕྱིར་རོ། །པུས་མོ་གཉིས་ཀོ་སྐོ་ལ་རེག་པའི་ཞེས་བྱ་བ་ནི་ཉལ་ཀར་པུས་མོ་གཉིས་བསྐུམས་པ་ནའོ། །དགེ་འདུན་གྱི་ཞེས་བྱ་བ་ནི་དགེ་འདུན་གྱི་ཡོ་བྱད་ཚུལ་དང་མཐུན་པ་ལས་ལྟུང་བར་མི་འགྱུར་གྱི་གང་ཟག་གི་ལས་ནི་བྱས་སུ་འགྱུར་རོ་ཞེས་བྱ་བའི་ཐ་ཚིག་གོ །ཁྲི་རྐང་འཆོས་པའི་ལྟུང་བྱེད་དེ་བརྒྱུད་ཅུ་ལྔ་པའི་ཚིག་རྣམ་པར་བཤད་པ་རྫོགས་སོ།། །།སྲིད་དུ་མཐོ་གང་གིས་སྲིངས་ཤིག་ཅེས་བྱ་བའི་སོ། །ཤིང་བལ་གྱིས་གོས་པར་བྱས་པའི་ལྟུང་བྱེད་དེ་བརྒྱད་ཅུ་དྲུག་པའི་ཚིག་རྣམ་པར་བཤད་པ་རྫོགས་སོ།། །།སྲིད་དུ་མཐོ་གང་གིས་སྲིངས་ཤིག་ཅེས་བྱ་བའི་ཚིག་ལོགས་ཤིག་ཏུ་བཀའ་སྩལ་བས། གདིང་བ་དུམ་བུ་གཉིས་སུ་བྱ་བར་གསུངས་ཏེ། རྐང་པའི་མཐའ་ལོགས་སུ་མཐུད་པར་བྱ་ཞིང་གདིང་བ་དུམ་བུ་ཉིད་དུ་མི་བྱའོ་ཞེས་བྱ་བ་བསྟན་པའི་ཕྱིར་རོ། །གདིང་བ་ལས་གྱུར་པའི་ལྟུང་བྱེད་དེ་བརྒྱད་ཅུ་བདུན་པའི་ཚིག་རྣམ་པར་བཤད་པ་རྫོགས་སོ།། །།གཡན་པ་དགབ་པ་སྟེ་གོས་བྱ་བ་ནི། ན་བའི་གོས་སོ་ཞེས་བྱ་བ་ནི་གཡན་པའི་ནད་ཅན་གྱི་ཟག་པ་ན། ཟག་པའི་ཉེས་པ་སྤང་བའི་ཕྱིར་བགོ་བའི་གོས་ཞེས་བྱ་བའི་ཐ་ཚིག་གོ །གཡན་པ་དགབ་པ་ལས་གྱུར་པའི་ལྟུང་བྱེད་དེ་བརྒྱད་ཅུ་བརྒྱད་པའི་ཚིག་རྣམ་པར་བཤད་པ་རྫོགས་སོ།། །།དབྱར་གྱི་གོས་རས་ཞེས་བྱ་བའི་ཆར་པ་སྐྱོབ་པའི་གོས་སོ་ཞེས་བྱ་བ་ནི་གང་གིས་ཆར་པའི་ཆུ་མངོན་པར་འཛིན་པར་བྱེད་པའོ། །དབྱར་གྱི་རས་ཆེན་ལས་གྱུར་པའི་ལྟུང་བྱེད་དེ་བརྒྱད་ཅུ་དགུ་པའི་ཚིག་རྣམ་པར་བཤད་པ་རྫོགས་སོ།། །།གཏུར་བུ་གཟིགས་ཤིག་དང་ངལ་བ་སོར་གཞུག་གོ་ཞེས་བྱ་བ་ནི་ཞོག་ཤིག་ཅེས་བྱ་བའི་ཐ་ཚིག་གོ །གདིང་བ་ལ་སོགས་པའི་ལྟུང་བྱེད་འདི་དག་ནི་དོན་མེད་པའི་ཕྱིར་བཅའ་བ་མཛད་དེ་འདི་དག་ལས་གཞན་པ་དོན་མེད་པ་དག་ཉེ་བར་འཇོག་པ་དང་འཆང་བ་ཡང་འདུལ་བ་མདོར་བསྡུས་པ་ལས་འདྲལ་བར་གསུངས་པའི་ཕྱིར་ཞེས་ཉེས་བྱས་སུ་བལྟ་བར་བྱའོ། །བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པའི་ལྟུང་བྱེད་དེ་དགུ་བཅུ་པའི་ཚིག་རྣམ་པར་བཤད་པ་རྫོགས་སོ།། །།འདུལ་བ་རྣམ་པར་འབྱེད་
པའི་ཚིག་རྣམ་པ་དུལ་བའི་ལྷས་ཉེ་བར་སྦྱར་བ་ལས་ལྟུང་བྱེད་འབའ་ཞིག་ཏུ་འགྱུར་བ་རྣམས་ཀྱི་ཚིག་རྣམ་པར་བཤད་པ་རྫོགས་སོ། སོ་སོར་བཤགས་པར་བྱས་ཞེས་བྱ་བ་ནི་སོ་སོར་བཤགས་པར་བྱ་བའི་ཁ་ནམ་ཐོ་བ་འདི་ལ་ཡོད་པས་སོ་སོར་བཤགས་པར་བྱ་བའོ།། ཨུཏྤ་ལའི་ཟེ་འབྲུའི་མདོག་འདྲ་བ། །ཞེས་བྱ་བ་ནི་ཁ་ཅིག་ན་ཨུཏྤ་ལའི་ཟེ་བ་དང་འདྲ་བར་མདོག་སེར་བ་ཞེས་ཟེར་བའོ། །ཁ་ཅིག་ན་རེ་མིག་སྨན་སྔོན་པོའི་མདོག་འདྲ་བའོ་ཞེས་ཟེར་རོ། ཁྱིམ་ན་འདུག་པའི་དམག་པ་ཞེས་བྱ་བ་ནི་གྱོས་སྒྱུག་གི་ཁྱིམ་དེ་ཉིད་ན་འདུག་ཅིང་གཞན་དུ་མི་འགྲོ་བའི་དམག་པའོ། །ཇོ་བོ་ཁྱོད་ཐུགས་མི་ཆེས་ན་ཞེས་བྱ་བ་ནི་ཡིད་མི་ཆེས་པའོ། །ཕྱི་མོ་ཞེས་བྱ་བ་ནི་མའི་མའོ། །མི་སྡུག་པ་ཐོབ་པ་ཞེས་བྱ་བ་ནི་བསམ་པ་ལས་བྱུང་བ་འདོད་པ་ན་སྤྱོད་པའོ། །རྨ་འབྱེད་ཅེས་བྱ་བ་ནི་གཅི་བའི་ལམ་བགྲོད་པའོ། །ཀུན་དགའ་བར་འགྱུར་བ་ཞེས་བྱ་བ་ནི་བུ་བཙས་པའི་རྒྱུ་ལས་རངས་པ་སྐྱེད་ཤིང་དགའ་བར་འགྱུར་བའོ། མངལ་ན་གནས་པ་མི་མངོན་པ་ཞེས་བྱ་བ་ནི་བུ་ཁྱེར་མཁས་པའོ། མི་རྣམས་ནང་པ་ན་མཆོག་གི་རབ་ཀྱི་མཆོག །ཅེས་བྱ་བ་ལ་སོགས་པ་ལ། མི་རྣམས་ཀྱི་ནང་མཆོག་ནི་བདེན་པ་མཐོང་བ་རྣམས་སོ། དེ་རྣམས་ཀྱི་རབ་ཀྱི་མཆོག་ནི་མཚུངས་མེད་རྒྱལ་བ་སྐྱོབ་པ་སྟེ། སངས་རྒྱས་བཅོམ་ལྡན་འདས་མཚུངས་པ་མེད་པ་བདུད་བཞི་ལས་རྒྱལ་བ་འགྲོ་བ་སྐྱོབ་པའོ། དེའི་ཉན་ཐོས་མ་མེ་ཏོག་མན་དྭ་ར་ཀ་རབ་འདྲ་བ་སྲིང་མོ་ཞེས་བྱ་བ་ནི་བོད་པའི་ཚིག་སྟེ། སངས་རྒྱས་བཅོམ་ལྡན་འདས་ཀྱིས་ཉན་ཐོས་མ་མེ་ཏོག་མན་དྭ་ར་ཀ་རབ་འདྲ་བ་སྲིང་མོ་ཞེས་བྱ་བ་ནི་བོད་པའོ། ཁྱེའུ་འདི་ཁྱོད་ཀྱིས་ཅི་ཞིག་ཅེས་བྱ་བ་ནི་ཁྱེའུ་གཞོན་ནུ་འདི་ཁྱོད་ཀྱི་ནིང་པོའམ། མིང་པའམ། ཁྱོད་ཀྱི་བུའམ། ཁྱོད་ཀྱི་སྐུད་པའམ། ཅིར་འོང་བ་ཞེས་བྱ་བའི་ཐ་ཚིག་གོ །བྲམ་ཟེ་འདི་ནི་བདག་གི་མིང་པོ་དང༌། མིང་པོའི་བུ་དང༌། བདག་གི་བུ་དང་སྐུད་པོ་ཡིན་ཞེས་བྱ་བ་ལ། བྲམ་ཟེ་ཞེས་བྱ་བ་ནི་བོད་པའི་ཚིག་གོ །ཁྱེའུ་འདི་ནི་བདག་གི་མིང་པོ་ཡིན། མིང་པོའི་བུ་ཡང་ཡིན། བདག་གི་བུ་ཡང་ཡིན། བདག་གི་སྐུད་པོ་ཡང་ཡིན་ནོ་ཞེས་སྟོན་ཏོ། །ཇི་ལྟར་བདག་གི་མིང་པོ་ཞེ་ན། དེའི་ཕྱིར་འདིའི་ཕ་གང་ཡིན་པ་དེ་བདག་གི་ཕ་ཡིན་ཏེ་ཞེས་བྱ་བ་གསུངས་ཏེ།
ཁྱེའུ་འདིའི་ཕ་གང་ཡིན་པ་དེ་བདག་གི་ཡང་ཕ་ཡིན་པས། འཇིག་རྟེན་གྱི་ཐ་སྙད་ཀྱིས་ཁྱེའུ་འདི་བདག་གི་མིང་པོ་ཡིན་ནོ། །ཁྱེའུ་འདིའི་མ་གང་ཡིན་པ་དེ་བདག་གི་མ་ཡང་ཡིན་པས། ཁྱེའུ་འདི་བདག་གི་མིང་པོ་ཡིན་ནོ་ཞེས་བྱ་བ་ཡང་ཞར་ལ་གྲུབ་པོ། ཇི་ལྟར་མིང་པོའི་བུ་དང་བདག་གི་བུ་དང་བདག་གི་སྐུད་པོ་ཡིན་ཞེ་ན། དེའི་ཕྱིར་མིང་པོར་གྱུར་ནས་ད་ལྟར་ཁྱོ་འདི་ཡིན་ཞེས་བྱ་བ་གསངས་ཏེ། གང་གི་ཕྱིར་ཁྱེའུ་འདིའི་ཕ་གང་ཡིན་པ་དེ་བདག་དང་མ་གཅིག་པས་བདག་གི་མིང་པོར་འགྱུར་བ་ཡིན་ལ། དེའི་བུ་འདི་ཡིན་པའི་ཕྱིར་ཁྱེའུ་འདིའི་མིང་པོའི་བུ་ཡང་ཡིན་ནོ། གང་གི་ཕྱིར་ཁྱེའུ་འདིའི་ཕ་ད་ལྟར་བདག་གི་ཁྱོ་ཡིན་ལ། དེའི་བུ་འདི་ཡིན་པས་བདག་གི་བུ་ཡར་པོ་ཡིན་འདིའི་ཕྱིར་འཇིག་རྟེན་གྱི་ཐ་སྙད་ཀྱིས་ཁྱེའུ་འདི་བདག་གི་བུ་ཡང་ཡིན་ནོ། གང་གི་ཕྱིར་ཁྱེའུ་འདིའི་ཕ་ད་ལྟར་བདག་གི་ཁྱོ་ཡིན་ལ། བདག་གི་ཁྱོ་དང་ཁྱེའུ་འདི་གཉིས་མ་གཅིག་པས་ཁྱིམ་ཐབ་ཀྱི་ནུ་བོ་ནི་འཇིག་རྟེན་གྱི་སྐུད་པོ་ཡིན་པ་དེའི་ཕྱིར་ཁྱེའུ་འདི་བདག་གི་སྐུད་པོ་ཡིན་ནོ་ཞེས་བསྟན་ཏོ། ཁྱེད་ལ་ཅི་འབབ་ཅེས་བྱ་བ་ནི་ཅི་ཞིག་མཇལ་དུ་གཞུག་ཅེས་བྱ་བའི་ཐ་ཚིག་གོ །བུད་མེད་ཀྱི་གཡོ་བདག་དང་བུད་མེད་ཀྱི་གྱ་གྱུ་དག་དང་བུད་མེད་ཁྱོ་ཡ་ཡོ་དག་ཅེས་བྱ་བ་ནི་གཡོས་ཀུན་ནས་བསླང་བའི་ལུས་དང་ངག་དང་ཡིད་ཀྱི་ལས་དག་ཡིན་པར་ཤེས་པར་བྱའོ། །རུས་པའི་འཁྲུལ་འཁོར་ཞེས་བྱ་བ་ནི་རུས་པའི་བོག་རེའོ། །སྤྱིལ་བུ་ལ་ཞེས་བྱ་བ་ནི་ཁྱིམ་ལའོ། །མི་གཙང་ཞེས་བྱ་བ་ནི་མི་གཙང་བ་སུམ་ཅུ་རྩ་དྲུག་གི་ཚོགས་ཡིན་པའི་ཕྱིར་རོ། །རུལ་བཞེས་བྱ་བ་ནི་ནད་རུལ་པའི་ཕྱིར་རོ། །དྲི་ང་བ་ཞེས་བྱ་བ་ནི་ཕྱི་ས་ལ་སོགས་པའི་དྲི་དང་ལྡན་པའི་ཕྱིར་རོ། གཞན་ལ་བརྟེན་ཞེས་བྱ་བ་ནི་གཞན་དང་འབྲེལ་པ་སྟེ། དེ་ལ་གཞན་ལ་བརྟེན་པ་ཡོད་པའི་ཕྱིར་རོ། བདག་གིར་བྱེད་ཅེས་བྱ་བ་ནི་སྐྱེས་པ་གཞན་དག་ལ་ཁྱིམ་ཐབ་ཏུ་འཛིན་པའི་བློ་སྐྱེད་པའི་ཕྱིར་རོ། གསོང་ལྡོང་པོ་ལ་མིག་ངལ་སྐྱེན་ལྡན། །ཞེས་བྱ་བ་ལ། གསོང་ལྡོང་ཞེས་བྱ་བ་ནི་སྦུབས་ཀྱི་ནད་དོ། ཕོལ་མིག་ཅེས་བྱ་བ་ནི་ཁ་ཡངས་པའི་ནད་དོ། ངལ་སྐྱེན་ཞེས་བྱ་བ་ནི་དུབ་པའི་ནད་དེ། དེས་ན་ཁྱོད་གསོང་ལྡོང་དང་ལྡན་པ་དང༌། ཕོ་ལ་མིག་དང་ལྡན་པ་དང༌། ངལ་སྐྱེན་པ་དང་ལྡན་པའོ་ཞེས་བྱ་བའི་ཐ་ཚིག་གོ །རྒྱུད་ལམ་དགུ་ནས་ཞེས་བྱ་བ་ནི་
མིག་དང༌། རྣ་བ་དང༌། སྣ་དང༌། ཁ་དང༌། བཤང་བའི་ལམ་དང༌། གཅི་བའི་ལམ་གྱི་རྒྱུད་ཀྱི་སྒོ་དག་ནས་སོ། །རབ་ཏུ་འཛག་པ་བཞིན་ཞེས་བྱ་བ་ནི་རྟག་ཏུ་མི་གཙང་བའི་རྒྱུན་འཛག་པའོ། །དབྱར་དུས་ཞེས་བྱ་བ་ནི་དབྱར་གྱི་དུས་སོ། །གཏི་མུག་གི་མུན་པས་བསྒྲིབས་པ་ཞེས་བྱ་བ་ནི་མི་ཤེས་པའི་མུན་པས་བསྒྲིབས་པའོ། །གླང་རྒན་ཞེས་བྱ་བ་ནི་བ་གླང་རྒན་པའོ། །ཁྱོལ་ཆགས་པར་བྱེད་ཅེས་བྱ་བ་ནི་འདོད་ཆགས་སྐྱེད་པར་བྱེད་པའོ། །སྐལ་བ་ཆེན་པོ་ཞེས་བྱ་བ་ནི་བསོད་ནམས་ཆེ་བ་སྟེ་བདག་ཉིད་ཆེན་པོ་ཞེས་བྱ་བའི་ཐ་ཚིག་གོ །གཞན་ལ་བརྟེན་ཞིང་ཞེས་བྱ་བ་ནི་འདིར་སྐྱེས་པ་གཞན་ལ་གཞོལ་བར་ཞེས་བྱ་བར་རིགས་ཤེས་པར་བྱའོ། །ཨུཏྤ་ལ་དག་གི་ལག་པ་ཞེས་བྱ་བ་ནི་ལག་པ་གང་བའོ། །ཆོལ་བར་གྱུར་ཞེས་བྱ་བ་ནི་བགྲོད་པ་མ་ཡིན་པའི་སྐྱེས་པ་དག་དང་ལྷན་ཅིག་འདྲེས་པར་གྱུར་བའོ། །སྨྱན་བྱེད་པ་ཞེས་བྱ་བ་ནི་འཕྱོན་མ་བྱེད་པའི་བུད་མེད་དང་སྐྱེས་པ་དག་སྡུད་པར་བྱེད་པའོ། །ལམ་པོ་ཆེ་ན་འདུག་པ་ཞེས་བྱ་བ་ནི་ལམ་པོ་ཆེའི་ནང་ན་རྣམ་པར་གནས་པའོ། །སྨད་པའི་གནས་ཞེས་བྱ་བ་ནི་སྐྱོན་གྱི་རང་བཞིན་ཡིན་པའི་ཕྱིར་རོ། །མི་རིགས་པ་ཞེས་བྱ་བ་ནི་ཚུལ་དང་མི་མཐུན་པ་ཉིད་ཀྱི་ཕྱིར་ཏེ་ཁམས་གསུམ་པ་ལས་འདོད་ཆགས་དང་བྲལ་བར་བྱ་བའི་ཕྱིར་རབ་ཏུ་བྱུང་བ་ནི་ཟས་འདོད་པ་དང་མི་མཐུན་པའི་ཕྱིར་རོ། །ཆོས་དེ་སོ་སོར་འཆགས་སོ་ཞེས་བྱ་བ་ནི་མཐོལ་བ་ཙམ་གྱིས་མཐོལ་བ་ལས་ལྟུང་བ་མ་ཡིན་གྱི་མཐོལ་ནས་དེའི་འོག་ཏུ་བཤགས་ན་ལྟུང་བ་ལས་ལྡང་བར་འགྱུར་བའོ། །སོ་སོར་བཤགས་པར་བྱ་སྟེ་ཞེས་བྱ་བ་ནི་དགེ་སློང་མང་པོ་རྣམས་ཀྱི་མདུན་དུ་ལྷན་ཅིག་མཐོལ་བར་བྱའོ། །དགེ་སློང་མ་ལས་ཟས་ལེན་པའི་སོ་སོར་བཤགས་པར་བྱ་བ་སྟེ་དང་པོའི་ཚིག་རྣམ་པར་བཤད་པ་རྫོགས་སོ།། །།འཆིང་བ་མཐའ་དག་ཡོད་པ་ཞེས་བྱ་བ་ནི་ཉོན་མོངས་པ་རྣམས་མ་བརྩེགས་པའོ། །བསྒོ་ཞིང་འདུག་ན་ཞེས་བྱ་བ་ནི་སྦྱིན་དུ་འཇུག་ཅིང་འདུག་ནའོ། །དགེ་སློང་དེ་རྣམས་ཀྱིས་འདི་སྐད་ཅེས་སྲིང་མོ་ཁྱོད་དགེ་སློང་རྣམས་ཟ་བའི་བར་དུ་རེ་ཞིག་སྡོད་ཅིག་ཅེས་བསྒོ་བར་བྱའོ་ཞེས་བྱ་བ་ནི་དགེ་འདུན་གྱི་གནས་བརྟན་ལ་སོགས་པ་ཐམས་ཅད་ཀྱིས་སོ་སོ་ནས་བཙལ་བར་བྱ་སྟེ། གཅིག་གིས་ཀྱེ་བསྒོ་ན་ཡང་བསྒོ་བ་ཉིད་ཡིན་ལ་གཞན་དུ་ན་སོ་སོར་ཉེ་བར་འགྱུར་རོ་ཞེས་བྱ་བའི་ཐ་ཚིག་གོ།།
གལ་ཏེ་དགེ་སློང་གཅིག་གིས་ཀྱང་དགེ་སློང་མ་དེ་ལ་དེ་སྐད་ཅེས་སྨྲ་བ་མ་སྤོབས་ན་ཞེས་བྱ་བ་ནི་གལ་ཏེ་དགེ་སློང་གཅིག་གིས་ཀྱང་ཚིག་འདི་མངོན་སུམ་དུ་བྱེད་མ་ནུས་ན་ཞེས་བྱ་བའི་ཐ་ཚིག་གོ །དགེ་སློང་རྣམས་ཁང་ཐོག་ན་ཟན་ཟ་ཞིང་ཞེས་བྱ་བ་ལ་སོགས་པ་ལ། དེ་ན་ཞེས་བྱ་བ་ནི་ཁང་ཐོག་ནའོ། །དགེ་སློང་དེ་དག་གིས་ཞེས་བྱ་བ་ནི་ཁང་ཐོག་ན་ཟན་ཟན་ཟ་བ་དེ་དག་གིས་སོ། །མ་བསྒོས་པར་ཟན་སོ་སོར་བཤགས་པར་བྱ་བར་འགྱུར་རོ་ཞེས་བྱ་བ་ནི་ཁང་ཐོག་ན་ཟན་ཟ་བ་རྣམས་ལ་ཁ་ན་མ་ཐོ་བ་འདིར་འགྱུར་ཏེ་དེ་དག་གི་མདུན་ན་དགེ་སློང་མ་བསྒོ་ཞིང་འདུག་པའི་ཕྱིར་རོ། །དྲི་བར་བྱའོ་ཞེས་བྱ་བ་ནི་ཁང་ཐོག་ན་ཟན་ཟ་བ་རྣམས་ལའོ། །མ་དྲིས་པར་ཟ་ན་ཉེས་བྱས་སུ་འགྱུར་རོ་ཞེས་བྱ་བ་ནི་དེ་དག་གི་མངོན་སུམ་མ་ཡིན་པའི་ཕྱོགས་ན་དགེ་སློང་མ་དེ་བསྒོ་ཞིང་འདུག་པའི་ཕྱིར་རོ། །དེའི་སྔོན་དུ་བོས་པ་དང་ཡང་དག་པར་འཛིན་དུ་འཇུག་པ་ལ་ལྟུང་བ་མེད་དོ་ཞེས་བྱ་བ་ནི། དེར་དེ་ལ་དང་པོ་ཉིད་ནས་བཅོལ་བའི་ཕྱིར་རོ། །བྱུག་རིས་སྟོན་པ་དང་མ་བྱིན་པ་ལ་སྦྱིན་དུ་འཇུད་པ་ལ་ལྟུང་བ་མེད་དེ་སྦྱིན་དུ་འཇུད་པའི་གཏོགས་འདོད་མེད་པའི་ཕྱིར་རོ། །སོ་སོར་བཤགས་པར་བྱ་བ་དང་པོ་དང་གཉིས་ནི་གྲོང་པའི་བཤེས་པ་ཡོད་པར་དོགས་པ་ལ་སོགས་པའི་སྐབས་བཟློག་པའི་ཕྱིར་བཅས་པ་མཛད་དོ། །གྲལ་རིམས་སུ་མ་འཚེམས་པར་འདྲིམ་དུ་འཇུད་པ་མ་བཟློག་པར་ཟ་བའི་སོ་སོར་བཤགས་པར་བྱ་བ་སྟེ་གཉིས་པའི་ཚིག་རྣམ་པར་བཤད་པ་རྫོགས་སོ།། །།བསླབ་པའི་སྡོམ་པ་ཞེས་བྱ་བ་ལ། བསླབ་པ་ཞེས་བྱ་བ་ནི་དགེ་འདུན་གྱི་རེས་པའོ། །དེས་བསྡམས་ཤིང་ཡོངས་སུ་སྤང་བ་ནི་བསླབ་པའི་སྡོམ་པའོ། །གསོལ་བ་འབའ་ཞིག་གི་ལས་བྱས་ཏེ་ཞེས་བྱ་བ་ནི་དགེ་འདུན་ལས་གསོལ་བ་ལས་བརྗོད་པ་མེད་པ་འབའ་ཞིག་པ་བྱའོ་ཞེས་བྱ་བའི་ཐ་ཚིག་གོ །ཁྱིམ་དུ་མཁོ་བར་མི་བྱ་ཞེས་བྱ་བ་ལ་སོགས་པ་ནི་བསོད་སྙོམས་ལེན་པ་ལ་སོགས་པ་ཞར་ལ་འབྱུང་བ་དགག་པའི་ཕྱིར་རོ། །བསླབ་པའི་སྡོམ་པས་བསྡམས་པ་ཞེས་བྱ་བ་ནི་བསླབ་པའི་སྡོམ་པས་བཟློག་པའོ། །ཚུལ་ཤིང་གིས་བཀོལ་གྱི་ཞེས་བྱ་བ་ནི་གྲངས་ཀྱིས་བཀོལ་བས་ཏེ། འཁོར་རྣམ་བཞི་ལས་ཕྱི་རོལ་དུ་བྱས་ཞེས་བྱ་བའི་ཐ་ཚིག་གོ །བཤོས་ཤིན་ཏུ་བཀག་ཀྱང་ཞེས་བྱ་བ་ནི་ཟན་ནི་བགོད་པའི་ཕྱིར་ཤིན་
ཏུ་བཀག་ཀྱང་ཞེས་བྱ་བའི་ཐ་ཚིག་གོ །བུམ་པས་བུམ་པ་འགེངས་ཏེ་ཞེས་བྱ་བ་ནི་ཇི་ལྟར་བུམ་པས་བུམ་པ་འགེངས་པར་བྱེད་པ་དེ་བཞིན་དུ་དགེ་བསྙེན་དག་གིས་ཀྱང་དགེ་སློང་དག་ལ་སྦྱིན་ལ་དགེ་སློང་དག་གིས་ཀྱང་དགེ་བསྙེན་ལ་སྦྱིན་པས་བླ་མ་དང་སློབ་མའི་བྱེ་བྲག་མེད་དོ་ཞེས་བྱ་བར་བསམས་པའོ། །ཁྱིམ་ནས་བྱུང་ནས་བླང་བར་བྱའོ་ཞེས་བྱ་བ་ནི་ཁྱིམ་ནས་བྱུང་བའི་འབྲས་བུ་དང་རྩ་བ་དང་ལྡམ་ལྡུམ་ལ་སོགས་པ་མོད་པ་བླངས་པ་ལ་འདུ་འགོད་མེད་པས་བླང་བར་གནང་བའོ། །ལོངས་སྤྱོད་འཕེལ་ཞེས་བྱ་བ་ནི་བརྟས་པའོ། །དགེ་སློང་གི་དགེ་འདུན་དོན་བཞེད་པ་ཞེས་བྱ་བ་ནི་ཡོ་བྱད་འཕེལ་བར་བཞེད་པའོ། །ཕན་པ་བཞེད་པ་ཞེས་བྱ་བ་ནི་ལུས་དང་འཁོར་ཕུན་སུམ་ཚོགས་པར་འདོད་པའོ། །ཐོས་པའི་ཉེ་འཁོར་ནས་བཀར་ཏེ་ཞེས་བྱ་བ་ནི་སྒྲའི་སྤྱོད་ཡུལ་ནས་སྤངས་ཏེའོ། །སྣང་བའི་ཉེ་འཁོར་དུ་བཞག་ནས་ཞེས་བྱ་བ་ནི་གསོལ་བའི་མཚན་མ་བསྟན་པར་བྱ་བའི་ཕྱིར་རོ། །འདིར་ཁ་ཅིག་གསོལ་བ་དང་གཉིས་ཀྱིས་ལས་སུ་སྨྲ་བ་དེ་ནི་མི་རུང་ངོ༌། །སོ་སོར་བཤགས་པར་བྱ་བ་འདི་ནི་ཚོད་མི་ཤེས་པ་དང༌། སྐུར་པ་འདེབས་པ་ལ་སོགས་པ་སྤང་བའི་ཕྱིར་བཅའ་བ་མཛད་དོ། །བསླབ་པ་དྲལ་ཏེ་ཁྱིམ་དུ་འཇུག་པའི་སོ་སོར་བཤགས་པར་བྱ་བ་སྟེ་གསུམ་པའི་ཚིག་རྣམ་པར་བཤད་པ་རྫོགས་སོ།། །།ཟླ་བའི་རྒྱབ་སུས་མཐོང་ཞེས་བྱ་བ་ནི་ཇི་ལྟར་སུས་ཡང་ཟླ་བའི་རྒྱབ་ཀྱི་ཆ་མི་དཔྱོད་ཀྱི་མདུན་གྱི་ཆ་མཐོང་བ་ཉིད་ཀྱིས་དགའ་བར་འགྱུར་བ་དེ་བཞིན་དུ་ནོར་ཉེ་བར་གནས་པ་འདི་ཉིད་བླང་བ་ཡིན་གྱི་ཕྱིས་ཅིར་འགྱུར་བར་དཔྱད་པར་བྱ་མི་དགོས་སོ་སྙམ་དུ་བསམས་པའོ། །ཆུ་དག་ཅེས་བྱ་བ་ནི་ཤིང་རྟའི་མདའ་དང་གཤོལ་མདའ་གཉའ་ཤིང་ལ་བཅིང་བའི་འབྲེང་བའོ། །ཤིང་རྟའི་མདའ་ཞེས་བྱ་བ་ནི་ཤིང་རྟའི་གདོང་གི་ཤིང་གཉའ་ཤིང་དང་འབྲེལ་བའོ། །བཅོས་པ་ཞེས་བྱ་བ་ནི་སྤྲོས་པ་བརྗོད་པ་ནའོ། །བསེལ་བ་དག་གིས་ཤེས་རབ་མདའ་བ་དག་གིས་སོ། །ནགས་ཉུལ་བ་ཞེས་བྱ་བ་ནི་ནགས་འཇིགས་པ་དང་བཅས་སམ་འཇིགས་པ་མེད་པ་ཉིད་རྟོག་པ་གང་ཡིན་པའོ། །དཔག་ཚད་ཕྱེད་ནས་བཟུང་སྟེ་ཁོར་ཁོར་ཡུག་ཏུ་ནགས་བྱུལ་བར་བྱའོ་ཞེས་བྱ་བ་ནི་ཕྱོགས་བཞིར་རྒྱང་གྲགས་བཞི་བཞིར་བྱུལ་བར་བྱ་ཞེས་བྱ་བའི་ཐ་ཚིག་གོ །འཇིགས་པ་ཐ་དད་པས་འཇིགས་སུ་
རུང་བ་དང་བཅས་པར་གྲགས་པ་ཞེས་བྱ་བ་ནི་འཆི་བའི་རྒྱུར་གྱུར་པ་སྦྲུལ་དང་སྡིག་པ་ལ་སོགས་པ་འཇིགས་པ་ཐ་དད་པ་སྡིག་པ་ལ་སོགས་པ་འཇིགས་པ་དང་འཁྲུག་པའི་རྒྱུར་གྱུར་པ་ཤ་སྦྲང་དང་སྦྲང་བུ་མཆུ་རིངས་ལ་སོགས་པ་འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པའོ།། ནགས་ཉུལ་བ་ཤི་འམ་བྲོས་ན་ལྟུང་བ་མེད་དོ་ཞེས་བྱ་བ་ནི་འདི་ལ་བྱུང་བའི་བློ་ཡོད་ན་ལྟུང་བ་མེད་དོ། །སོ་སོར་བཤགས་པར་བྱ་བ་འདི་ནི་སྦྱིན་བདག་ལ་གནོད་པ་དང༌། བདག་ཉིད་འགེངས་པའི་སྐུར་བ་བཟློག་པའི་ཕྱིར་བཅའ་བ་མཛད་དོ། །ནགས་བརྟག་པ་ལས་གྱུར་པའི་སོ་སོར་བཤགས་པར་བྱ་པ་སྟེ་བཞི་པའི་ཚིག་རྣམ་པར་བཤད་པ་རྫོགས་སོ།། །།རྣམ་པར་འབྱེད་པའི་ཚིག་རྣམ་པར་བཤད་པ་སློབ་དཔོན་དུལ་བའི་ལྷས་ཉེ་བར་སྦྱར་བ་ལས་སོ་སོར་བཤགས་པར་བྱ་བ་རྣམས་ཀྱི་ཚིག་རྣམ་པར་བཤད་པ་རྫོགས་སོ།། །།སྐྱོན་མེད་པ་ལ་འཇུག་པས་དགེ་སློང་ཉིད་ལ་དགོད་པ་ཞེས་བྱ་བ་ལ། སྐྱོན་མེད་པ་ཞེས་བྱ་བ་ནི་ངན་སོང་མྱོང་བར་འགྱུར་བའི་ལས་མི་བྱེད་པ་དང༌། མཐོང་བས་སྤང་བར་བྱ་བའི་ཉོན་མོངས་པ་ཀུན་དུ་མི་འབྱུང་བ་དང༌། སྲིད་པ་བརྒྱད་པ་ལ་སོགས་པ་མི་ལེན་པ་ལ་སོགས་པའི་སྐྱོན་མེད་པར་ལུས་ལ་ཁྱབ་པར་བྱེད་པ་སྟེ་མཐོང་བའི་ལམ་མོ། །དེ་སྐྱེ་བ་ནི་སྐྱོན་མེད་པར་འཇུག་པའོ། །མཐོང་བའི་ལམ་སྐྱེས་པས་དགེ་སློང་ཉིད་ལ་བཀོད་པ་ཞེས་བྱ་བ་ནི་མཐོང་བའི་ལམ་སྐྱེས་པས་དགེ་སློང་གི་སྡོམ་པ་ཉིད་ཐོབ་པ་སྟེ། སྨོན་ལམ་གྱི་དབང་གིས་དགེ་སྦྱོང་གི་ལམ་འཁོར་དང་བཅས་པ་ཐོབ་པས་དགེ་སྦྱོང་གི་དངོས་པོ་རྫོགས་པར་བསྙེན་པ་ཉིད་ལ་བཀོད་དོ་ཞེས་བྱ་བའི་ཐ་ཚིག་གོ །ཤམ་ཐབས་ཟླུམ་པོ་ཞེས་བྱ་བ་ནི་མ་མཐའི་ཁ་མཉམ་པར་འདུག་པའོ། །བསླབ་པར་བྱའོ་ཞེས་བྱ་བ་ནི་ནན་ཏན་བྱའོ། །ཧ་ཅང་རྩེངས་པ་ཞེས་བྱ་བ་ནི་ཟླུམ་པོ་ཡིན་དུ་ཟིན་ཀྱང་པུས་མོ་གཉིས་ལས་གོང་དུ་ཐལ་བ་ཡིན་ནོ། །ཁྱེད་ཅག་ཉིད་མི་ཤེས་པ་དང་བྲལ་བ་ཞེས་བྱ་བ་ནི་འདི་ལྟར་བྱས་ན་བཟང་ངོ་སྙམ་པས་དེ་མི་ཤེས་པ་དང་བྲལ་བ་ཡིན་ནོ། །བསླབ་པར་གྱུར་པ་ཞེས་བྱ་བ་ནི་མཛེས་པའི་ཕྱིར་དེ་ནི་རབ་ཏུ་བྱུང་བ་དག་གིས་རྗེས་སུ་སྒྲུབ་པ་མ་ཡིན་ནོ་ཞེས་བྱ་བ་ཁོང་དུ་ཆུད་པར་གྱུར་པའོ། །ཧ་ཅང་འཇོལ་བ་ཞེས་བྱ་བ་ནི་ལོང་བུའི་ཚིགས་ལ་རེག་པ་ཉིད་དུ་ཧ་ཅང་འཐོལ་བའོ། །མདུན་འཕྱང་བ་ཞེས་བྱ་
བ་ནི་མདུན་ནས་བརླ་དབྲག་ཏུ་གླང་པོ་ཆེའི་སྣ་ལྟར་ནར་བའོ། །གླང་པོ་ཆེའི་སྣ་ལྟར་ཞེས་བྱ་བ་ནི་གླང་པོ་ཆེའི་སྣ་འདྲ་བར་རོ། །གློ་དག་ཏུ་ལྟེབས་པ་ཞེས་བྱ་བ་ནི་གློའི་ཕྱོགས་དག་ཏུ་ནམ་མཁའ་ལྡིང་གི་གཤོག་པ་ལྟ་བུ་གདེངས་ཀ་བྱེད་པའོ། །ཏ་ལའི་ལོ་མ་ལྟར་ལྟ་བ་ཞེས་བྱ་བ་ནི་ཤིང་ཏ་ལའི་ལོ་མའི་ཚོགས་ལྟར་བསྡུས་པའོ། །འབྲུའི་ཕུར་མ་ལྟར་ཞེས་བྱ་བ་ནི་ནས་ཆན་གྱི་ཕུར་མའི་རྣམ་པ་ལྟར་བསྡུས་པའོ། །སྦྲུལ་མགོའི་གདེངས་ཀ་ལྟར་ཞེས་བྱ་བ་ནི་མདུན་གྱི་ལྟེ་བའི་འོག་ཏུ་ཤམ་ཐབས་ཀྱི་ནང་འབྲེལ་བའི་རིམ་པ་བསྡུས་ཏེ་སྦྲུལ་མགོའི་གདེངས་ཀ་ལྟར་ཕྱིར་བྱུང་བར་བྱེད་པའོ། །བསླབ་པ་བསྡུ་བའི་མདོ་ཞེས་བྱ་བ་ནི་བསླབ་པ་བགྲང་བའི་དོན་དུ་ཡང་དག་པར་སྡུད་པར་བྱེད་པས་མདོ་བྱས་པ་ཡིན་ནོ། །བསྡུས་པའི་མདོ་དང་པོའོ།། །།ཆོས་གོས་ཞེས་བྱ་བ་ནི་བླ་གོས་དང་སྣམ་སྦྱར་རོ། །ཤིན་ཏུ་བསྡམས་ཤིང་ཞེས་བྱ་བ་ནི་ལག་པ་དང་རྐང་པ་བརྐྱོང་བ་ལ་སོགས་པ་མི་བྱ་བར་མཉམ་པར་གཞག་ཅིང་ངོ༌། །ཆོས་གོས་བསྡུས་ཤིང་ཕྲག་པ་ལ་གཟར་ཏེ་ཞེས་བྱ་བ་ནི་མདུན་དང་རྒྱབ་ཏུ་ཕྲེང་བ་བཞིན་དུ་དཔྱངས་ཏེ་གཡས་གཡོས་སུ་བསྡུས་ཤིང་ཕྲག་གོང་དུ་བཀལ་བའོ། །ལེགས་པར་བགོས་ཤིང་ཞེས་བྱ་བ་ནི་ལུས་ལེགས་པར་གཡོགས་ཤིང་ངོ༌། །བྱུང་རྒྱལ་སྨྲས་པས་སྒྲ་འབྱིན་ཞིང་ཞེས་བྱ་བ་ནི་དོན་དང་མི་ལྡན་པའི་ཚིག་རྒོད་བག་གིས་བསྐྱོད་པ་སྨྲ་ཞིང་ངོ༌། །སྒྲ་བསྒྱུར་ཞིང་ཞེས་བྱ་བ་ནི་ཅ་ཅོ་བསྐྱུང་ཞིང་ངོ༌། །མིག་གཡེངས་ཤིང་ཞེས་བྱ་བ་ནི་མིག་གཞན་དུ་བལྟ་ཞིང་ངོ༌། །སྐར་མ་ལ་རྟོག་པ་ཞེས་བྱ་བ་ནི་སྐར་མཁན་དག་གོ །མིག་གཡེང་བར་མི་བྱ་བ་ཞེས་བྱ་བ་ནི་མིག་འཁྲུལ་པར་མི་བྱའོ། །གཉའ་ཤིང་གང་ཙམ་དུ་ལྟ་ཞིང་ཞེས་བྱ་བ་ནི་གཉའ་ཤིང་གང་ཙམ་དུ་བལྟ་བའི་ངང་ཚུལ་ཡོད་པའོ། །བསྡུ་བའི་མདོ་གཉིས་པའོ།། །།མགོ་གཡོགས་ཞེས་བྱ་བ་ནི་རས་ལ་སོགས་པས་མགོ་གཡོགས་པའོ། །ཤམ་ཐབས་བརྫེས་ཞེས་བྱ་བ་ནི་མདོམས་ཀྱི་ཕྱོགས་སྣང་བ་ཙམ་དུ་ཤམ་ཐབས་བརྫེས་པའོ། །མ་བརྫེས་བར་ཞེས་བྱ་བ་ནི་ཤམ་ཐབས་མ་བརྫེས་པར་རོ། །ཆོས་གོས་ཕྲག་པ་ལ་གཟར་ཏེ་ཞེས་བྱ་བ་ནི་ཆོས་གོས་ཟླུམ་པོར་གྱོན་པ་ལས་ཕྲག་པ་གཡོན་ལོགས་ཕྲག་པ་ལ་གཟར་བའོ། །མི་གཟར་བར་ཞེས་བྱ་བ་ནི་ཆོས་གོས་ཕྲག་པ་ལ་མི་གཟར་བའོ། །ལག་པ་གཉའ་གོང་དུ་བསྣོལ་ཞེས་བྱ་བ་ནི་ལག་ངར་གཉིས་
མདུན་དུ་བསྣོལ་ཏེ་སོར་མོ་གཉའ་གོང་དུ་གཞག་པའོ། །གཉའ་གོང་དུ་མི་བསྣོལ་བར་ཞེས་བྱ་བ་ནི་ལག་པ་གཉིས་སོ། །ལག་པ་ལྟག་པར་བསྣོལ་ཞེས་བྱ་བ་ནི་ལག་པ་ལྟག་པར་སྤྲད་དེ་སོར་མོ་བསྣོལ་བའོ། །ལྟག་པར་མི་བསྣོལ་བར་ཞེས་བྱ་བ་ནི་ལག་པ་གཉིས་ལྟག་པར་མི་བསྣོལ་བའོ། །བསྡུ་བའི་མདོ་གསུམ་པའོ།། །། མཆོང་ཞེས་བྱ་བ་ནི་མཆོང་ཞིང་འགྲོ་བའོ། །མི་མཆོང་ཞིང་ཞེས་བྱ་བ་ནི་མཆོང་ཞིང་མཆོང་ཞང་འགྲོ་བར་མི་བྱ་བའོ། །གོམ་པ་ཧ་ཅང་ཆེན་པོ་ཞེས་བྱ་བ་ནི་སྒྱིད་པ་ཧ་ཅང་བརྒྱངས་ཏེ་གོམ་པ་ཆེན་པོར་འདོར་བའོ། །བརྐྱང་བར་ཞེས་བྱ་བ་ནི་སྒྱིད་པ་ཧ་ཅང་བརྐྱང་སྟེ་གོམ་པ་ཆེན་པོར་འདོར་བའོ། །མི་བརྐྱང་བར་ཞེས་བྱ་བ་ནི་སྒྱིད་པ་བརྐྱང་བསྐུམ་བྱེད་ཅིང་གོམ་པ་ཆེན་པོར་འགྲོ་བར་མི་བྱ་བའོ། །ཙོག་པུར་ཁྱིམ་གཞན་དུ་འདོང་ནས་ཞེས་བྱ་བ་ནི་རྐུབ་ཚོས་ས་ལ་མ་རེག་པར་འདུག་སྟེ་འདོང་ནས་ཞེས་བྱ་བའི་ཐ་ཚིག་གོ །ཙོག་པུས་མ་ཡིན་པ་ཞེས་བྱ་བ་ནི་ཙོག་པུར་འགྲོ་བར་མི་བྱ་བའོ། །རྐང་པའི་བྲང་བ་དག་གིས་ཁྱིམ་གཞན་དུ་འདོང་བར་བྱེད་ཅེས་བྱ་བ་ནི་རྐང་པའི་རྟིང་པ་བཏེག་སྟེ་སོར་མོའི་བྲང་བསལ་ཕབ་ཅིང་འགྲོ་བའོ། །བྱིས་པ་ཁྱེའུ་མིག་མ་བཞིན་དུ་བརྩེ་བ་དག་ཅེས་བྱ་བ་ནི་གང་དག་མིག་མ་བཞིན་དུ་ལུས་དྲང་པོར་བརྩེ་བའི་ཕྱིར་རྐང་པའི་སོར་མོ་དག་གིས་རྒྱུག་ལ་དག་གོ །བྲང་བས་མ་ཡིན་པར་ཞེས་བྱ་བ་ནི་རྐང་པའི་རྟིང་པ་བཏེག་སྟེ་སོར་མོའི་བྲང་བསལ་ཕབ་ཅིང་འགྲོ་བར་མི་བྱ་བའོ། །ལག་པ་གཉིས་དཀུར་བརྟེན་ཏེ་ཞེས་བྱ་བ་ནི་ལག་པ་གཉིས་རྐེད་པའི་ཕྱོགས་སུ་གཏད་དེ་གྲུ་མོ་གཉིས་བརྐྱང་བའོ། །དཀུར་མི་བརྟེན་པར་ཞེས་བྱ་བ་ནི་ལག་པ་གཉིས་རྐེད་པའི་ཕྱོགས་སུ་བརྟེན་ཏེ་གྲུ་མོའི་ཕྱོགས་སྨྱུང་སྨྱུང་པོར་བྱས་ཏེ་འགྲོ་བར་མི་བྱ་བའོ། །བསྡུ་བའི་མདོ་བཞི་པའོ།། །། ལུས་སྒྱུར་ཞིང་ཞེས་བྱ་བ་ནི་རོ་སྟོང་སྒྱུར་ཞིང་ངོ༌། །ལུས་མི་སྒྱུར་བར་ཞེས་བྱ་བ་ནི་ལུས་སྒྱུར་བ་ཞེས་བྱ་བ་བྱ་བའི་བྱེ་བྲག་བྱེད་ཅིང་ཁྱིམ་གཞན་དུ་འགྲོ་བར་མི་བྱའོ། །ལག་པ་ཀྱོག་ཅིང་ཞེས་བྱ་བ་ནི་ལག་པ་ཀྱོག་པ་ཞེས་བྱ་བ་བྱ་བའི་བྱེ་བྲག་བྱེད་ཅིང་ངོ༌། །ལག་པ་མི་ཀྱོག་པ་ཞེས་བྱ་བ་ནི་ལག་པ་ཀྱོག་ཅིང་ཁྱིམ་གཞན་དུ་འགྲོ་བར་མི་བྱ་བའོ། །མགོ་བསྒྱུར་ཞེས་བྱ་བ་ནི་མགོ་བསྒྱུར་བར་བྱ་བའི་བྱེ་བྲག་བྱེད་ཅིང་ཁྱིམ་གཞན་དུ་འགྲོ་བའོ། །མགོ་མི་སྒྱུར་བར་ཞེས་བྱ་བ་ནི་མགོ་མི་བསྒྱུར་ཞིང་ཁྱིམ་གཞན་དུ་འགྲོ་བར་མི་བྱའོ། །ཕྲག་པ་སྤྲོད་ཅེས་བྱ་བ་ནི་གཞན་དང་ཕྲག་པ་སྤྲོད་པའོ། །ཕྲག་པ་མི་སྤྲོད་པར་ཞེས་བྱ་བ་ནི་གཞན་
དང་ཕྲག་པ་གཉིས་སྤྲད་ཅིང་ཁྱིམ་གཞན་དུ་འགྲོ་བར་མི་བྱ་བའོ། །ལག་པ་སྦྲེལ་ཞེས་བྱ་བ་ནི་གཞན་དང་ལག་པ་སྦྲེལ་བའོ། །ལག་པ་མི་སྦྲེལ་བར་ཞེས་བྱ་བ་ནི་གཞན་དག་དང་ལག་པ་སྦྲེལ་ཏེ་ཁྱིམ་གཞན་དུ་འགྲོ་བར་མི་བྱ་བའོ། །ཤིན་ཏུ་བསྡམས་ཤིང་ཁྱིམ་གཞན་དུ་འགྲོ་བར་བསླབ་པར་བྱའོ་ཞེས་བྱ་བ་མན་ཆད་འདི་ཡན་ཆད་ཐམས་ཅད་ཁྱིམ་གཞན་དུ་འགྲོ་བར་བྱའོ་ཞེས་བྱ་བར་སྦྱར་རོ། །བསྡུ་བའི་མདོ་ལྔ་པའོ།། །།མ་བསྒོ་བར་ཁྱིམ་གཞན་དུ་སྟན་ལ་མི་འདུག་པར་བསླབ་པར་བྱའོ་ཞེས་བྱ་བ་ནི་ཁྱིམ་བདག་གིས་མ་བསྒོ་བར་དགེ་སློང་ཁྱིམ་དུ་སྟན་ལ་འདུག་པར་མི་བྱའོ། །སྟན་ལ་མི་བརྟག་པར་ཁྱིམ་གཞན་དུ་སྟན་ལ་འདུག་པར་མི་བྱ་བར་བསླབ་པར་བྱ་བ་ནི་ཁྱིམ་གཞན་དུ་སྟན་ལ་མ་བརྟགས་པར་གྱ་ཚོམ་འདུག་པར་མི་བྱ་བའོ། །མངོན་པར་བྱུང་ནས་ལོ་བཅུ་གཉིས་ལོན་ཞེས་བྱ་བ་ནི་ཁྱིམ་ནས་མངོན་པར་བྱུང་ནས་ལོ་བཅུ་གཉིས་ལོན་ཞེས་བྱ་བའི་ཐ་ཚིག་གོ །རྫོགས་པར་སངས་རྒྱས་ནས་ལོ་དྲུག་ལོན་ནས་ཞེས་བྱ་བ་ནི་བཅུ་གཉིས་པོ་དེ་དག་ལས་ལོ་དྲུག་ཏུ་དཀའ་བ་སྤྱད་ནས་རྫོགས་པར་སངས་རྒྱས་ནས་ལོ་དྲུག་ལོན་ནས་ཞེས་བྱ་བའི་ཐ་ཚིག་གོ །ཡང་ན་དངོས་པོ་བསྟན་པའི་ཕྱིར་མངོན་པར་བྱུང་ནས་ལོ་བཅུ་གཉིས་ལོན་ཅིང་ཞེས་གསུངས་ལ། དེ་ལ་མངོན་པར་རྫོགས་པར་སངས་རྒྱས་པའི་ལོ་ནི་དྲུག་ཡོད་དོ་ཞེས་བྱ་བའི་ཐ་ཚིག་གོ །མཐོ་བཙམས་སོ་ཞེས་བྱ་བ་ནི་བརྙས་པའོ། །ལུས་ཐམས་ཅད་ཀྱི་ལྗིད་ཀྱིས་མི་དབབ་པར་བྱ་བ་ནི་རོ་སྟོད་རོ་སྨད་ཀྱི་ལུས་ཐམས་ཅད་ཀྱི་ལྗིད་ཀྱིས་དུས་གཅིག་ཏུ་མི་དབབ་པའི་ཐ་ཚིག་གོ །རྐང་པ་མི་བསྣོལ་བར་ཞེས་བྱ་བ་ནི་རྐང་པའི་སྟེང་དུ་རྐང་པ་གཞག་སྟེ་འདུག་པར་མི་བྱ་བའོ། །བརླ་མི་བསྣོལ་བར་ཞེས་བྱ་བ་ཡང་བརླའི་སྟེང་དུ་བརླ་གཞག་སྟེ་འདུག་པར་མི་བྱ་བའོ། །ལོང་བུའི་སྟེང་དུ་ལོང་བུ་མི་གཞག་པར་ཞེས་བྱ་བ་ཡང་ལོང་བུའི་སྟེང་དུ་ལོང་བུ་གཞག་སྟེ་འདུག་པར་མི་བྱ་བའོ། །རྐང་པ་མི་དགུག་པར་བྱ་ཞེས་བྱ་བ་ནི་རྐང་པ་གཉིས་བཀུག་སྟེ་འདུག་པར་མི་བྱ་བའོ། །རྐང་པ་མི་གདངས་པར་ཞེས་བྱ་བ་ནི་རྐང་པ་གཉིས་ཐད་ཀར་གདངས་ཏེ་འདུག་པར་མི་བྱ་བའོ། །མདོམས་མི་སྣང་བར་ཞེས་བྱ་བ་ནི་འཇུད་པའི་མཚན་གྱི་ཕྱོགས་མི་སྣང་བར་འདུག་པར་བྱའོ། །བསྡུ་བའི་མདོ་དྲུག་པའོ།། །།ཁང་བཟངས་པདྨ་ཅན་ཞེས་བྱ་བ་ནི་ཁང་བཟངས་པདྨའི་རྣམ་པ་འདྲ་བའི་ཕྱིར་དང༌། པདྨ་ལྟར་བྲིས་པའི་ཕྱིར་
རོ། །ཚོན་བརྒྱ་རྩ་གཅིག་གིས་བྲིས་པ་ཞེས་བྱ་བ་ནི་ཚོན་རྩི་བརྒྱ་རྩ་གཅིག་གིས་བྲིས་པའོ། །ལེགས་པར་ཟས་བླང་བར་བསླབ་པར་བྱའོ་ཞེས་བྱ་བ་ནི་བྱིན་ལེན་ལེགས་པར་བྱ་བའོ། །མུ་དང་ཁ་ད་ཆད་དུ་མ་ཡིན་པར་ཞེས་བྱ་བ་ནི་ལྷུང་བཟེད་ཀྱི་ཁའི་མུ་དང་ཁ་ད་ཆད་དུ་གང་བ་མ་ཡིན་པར་ཟས་བླང་བར་བྱ་བའོ། །ཚོད་མ་དང་མཉམ་པ་མ་ཡིན་པར་ཞེས་བྱ་བ་ནི་བཟའ་བ་གང་ལ་ཚོད་མ་དང་མཉམ་པ་ནི་ཚོད་མ་དང་མཉམ་པ་སྟེ་དེ་ལྟ་བུ་མ་ཡིན་པར་ཟས་བླང་བར་བྱ་བའོ། །མཐར་ཆགས་སུ་ཞེས་བྱ་བ་ནི་སྟན་ལ་འདུག་པའི་གྲལ་གྱི་རིམ་པ་བཞིན་དུ་ཟས་བླང་བར་བྱ་བའོ། །ལྷུང་བཟེད་ལ་བལྟ་ཞིང་ཞེས་བྱ་བ་ནི་ལྷུང་བཟེད་དང་འབྲེལ་པ་ཡིན་གྱི་ཟས་ལེགས་པར་བླང་བར་བྱ་བའོ། །བཅའ་བ་དང་བཟའ་བ་མ་འོངས་པར་ལྷུང་བཟེད་མི་བཟེད་པར་ཞེས་བྱ་བ་ནི་ཇི་སྲིད་དུ་བཅའ་བ་དང་བཟའ་བ་མངོན་སུམ་དུ་མ་འོངས་པ་དེ་སྲིད་དུ་ལྷུང་བཟེད་མི་བཟེད་པར་བསླབ་པར་བྱ་བའོ། །ཡང་འདོད་པའི་ཕྱིར་འབྲས་ཆན་གྱིས་ཚོད་མ་མི་དག་པ། ཚོད་མས་འབྲས་ཆན་མི་དགབ་པ་ཞེས་བྱ་བ་ནི་ཐོབ་པར་བྱའོ་སྙམ་པའི་བསམ་པས་འབྲས་ཆན་གྱི་ས་ཚོད་མ་མི་དག་པ། ཚོད་མས་འབྲས་ཆན་མི་དགབ་པར་བསླབ་པར་བྱ་བའོ། །བཅའ་བ་དང་བཟའ་བའི་སྟེང་དུ་ལྷུང་བཟེད་མི་གཟུང་བ་ཞེས་བྱ་བ་ནི་བཅའ་བ་དང་བཟའ་བ་དེའི་སྟེང་དུ་ལྷུང་བཟེད་གཟུང་བར་མི་བྱ་བའོ། །བསྡུ་བའི་མདོ་བདུན་པའོ།། །།རྣམ་པར་འགྱུར་བ་དག་གིས་ཟས་ཟ་བར་བྱེད་ནས་ཞེས་བྱ་བ་ནི་རྐང་ལག་རྐྱོང་བ་ལ་སོགས་པ་དང་དག་གིས་སོ། །ལེགས་པར་ཟས་བཟའ་བར་བསླབ་པར་བྱའོ་ཞེས་བྱ་བ་ནི་རྐང་ལག་རྐྱོང་བ་དང་ཁམ་ཆེ་ཆུང་ལ་སོགས་པ་མ་ཡིན་པས་ལེགས་པར་ཟས་བཟའ་བར་བསླབ་པར་བྱ་བ་སྟེ། འདི་ནི་བསླབ་པའི་གཞི་མགོ་མ་ལྔའི་ལུས་ལྟ་བུ་ཡིན་ནོ། །ཁམ་ཧ་ཅང་ཆུང་བ་ཞེས་བྱ་བ་ཡིན་པ་ལ། ཁམ་ཞེས་བྱ་བ་ནི་ཁར་ཚད་དུ་གཞུག་ཅིང་མིད་པའི་ཕྱིར་ཁམ་ཞེས་བྱ་སྟེ། ཧ་ཅང་ཆུང་བ་མ་ཡིན་པར་ཟས་བཟའ་བར་བསླབ་པར་བྱ་བའོ། །ཁམ་ཧ་ཅང་ཆེན་པོ་མ་ཡིན་པ་ཞེས་བྱ་བ་ནི་ཁམ་ཧ་ཅང་ཆེན་པོ་ཡང་མ་ཡིན་པར་ཟས་བཟའ་བར་བསླབ་པར་བྱ་བའོ། །ཁམ་རན་པ་ཞེས་བྱ་བ་ནི་རང་དང་མཐུན་པ་དང་འཇིག་རྟེན་དང་མཐུན་པའི་ཁམ་རན་པར་ཟས་བཟའ་བར་བསླབ་པར་བྱ་བའོ། །ཁམ་
མ་གཟས་པར་ཁ་མི་གདངས་ཞེས་བྱ་བ་ནི་ཇི་སྲིད་དུ་ཁམ་ཁའི་སྒོར་ཉེ་བར་མ་འོངས་པ་དེ་སྲིད་དུ་ཁའི་སྒོ་གདངས་པར་མི་བྱའོ། །སྐད་ཉམས་པར་གྱུར་ཅེས་བྱ་བ་ནི་སྒྲ་འགགས་པར་གྱུར་པའོ། །ཁ་ཁམ་གྱིས་བཀང་སྟེ་མི་སྨྲ་བར་བསླབ་པར་བྱའོ་ཞེས་བྱ་བ་ནི་ཁའི་ནང་ཁམ་གྱིས་གང་བཞིན་དུ་སྨྲ་བར་མི་བྱ་བའོ། །བསྡུ་བའི་མདོ་བརྒྱད་པའོ།། །།ཙུག་ཙུག་མི་བྱ་བ་ལ། ཙུག་ཙུག་ཅེས་བྱ་བ་ཏེ་པོར་སྐྱུར་བར་སྟོན་པའི་སྒྲ་ཙུག་ཙུག་ཅེས་བྱ་བ་མི་གསལ་བར་ཡང་དང་ཡང་དུ་བྱེད་པ་སྟེ། དེ་ལྟ་བུ་མི་བྱ་བར་ཟས་བཟའ་བར་བསླབ་པར་བྱའོ། །བལྕག་བལྕག་མི་བྱ་བ་ལ། བལྕག་བལྕག་ཅེས་བྱ་བ་ནི་ཏེ་པོར་མངར་བར་སྟོན་པའི་སྒྲ་ལ་བལྕག་ཟེར་བ་ཡང་དང་ཡང་དུ་བྱེད་པ་སྟེ། དེ་ལྟ་བུ་མི་བྱ་བར་ཟས་བཟའ་བར་བསླབ་པར་བྱའོ། །ཧུ་ཧུ་མི་བྱ་ཞེས་བྱ་བ་ལ་ཧུ་ཧུ་ཞེས་བྱ་བ་ནི་ཏེ་པོར་གྲང་བ་བསྲོ་བའི་ཕྱིར་ཁའི་དབུགས་ཧུ་ཞེས་བྱ་བའི་སྒྲ་མི་གསལ་བར་ཡང་དང་ཡང་དུ་བྱེད་པ་སྟེ། དེ་ལྟ་བུ་མི་བྱ་བར་ཟས་བཟའ་བར་བསླབ་པར་བྱ་བའོ། །ཕུ་ཕུ་མི་བྱ་ཞེས་བྱ་བ། ཕུ་ཕུ་ཞེས་བྱ་བ་ཏེ་པོར་ཚ་བ་བགྲང་བའི་ཕྱིར་ཕུ་ཞེས་བྱ་བ་ཁའི་དབུགས་ཀྱི་སྒྲ་མི་གསལ་བ་ཡང་དང་ཡང་དུ་བྱེད་པ་སྟེ། དེ་ལྟ་བུ་མི་བྱ་བར་ཟས་བཟའ་བར་བསླབ་པར་བྱ་བའོ། །ལྕེ་ཕྱུང་སྟེ་ཟས་མི་བཟའ་པར་བྱའོ་ཞེས་བྱ་བ་ནི་ཟན་ཟ་བ་ན་ལྕེ་ཕྱིར་ཕྱུང་སྟེ་བཟའ་བར་མི་བྱ་བའོ། །བསྡུ་བའི་མདོ་དགུ་པའོ།། །།འབྲུ་གནས་ཐ་དད་དུ་མི་བྱ་ཞེས་བྱ་བ་ནི་འབྲས་ཆན་ལ་སོགས་པའི་འབྲུ་དག་རེ་རེ་ནས་བཏུ་ཞིང་བཟའ་བར་མི་བྱ་བའོ། །འཕྱས་མི་གདགས་ཞེས་བྱ་བ་ནི་ཟས་ལ་འཕྱས་སྨོད་མི་བྱ་བའོ། །མཁུར་བ་མི་སྤོ་ཞེས་བྱ་བ་ནི་མཁུར་བ་གཉིས་བཀང་སྟེ་གཡས་གཡོས་བསྐྱེད་འབྲིར་སྤོ་བར་མི་བྱ་བའོ། །རྐན་མི་གཏོག་ཅེས་བྱ་བ་ནི་ལྕེས་རྐན་གཏོག་ཅིང་ཟན་བཟའ་བར་མི་བྱ་བའོ། །ཁམ་འཕྲོར་མི་བཅད་ཅེས་བྱ་བ་ནི་ཁམ་འཕྲོར་བཅད་ཅིང་ཟན་བཟའ་བར་མི་བྱ་བའོ། །བསྡུ་བའི་མདོ་བཅུ་པའོ།། །། ལག་པ་མི་ལྡག་ཅེས་བྱ་བ་ནི་ཟས་གང་ལ་ལག་པ་ལྡག་པ་ཡོད་པ་དེ་ནི་མི་ལྡག་པར་ཟས་བཟའ་བར་བྱ་བའོ། །ལྷུང་བཟེད་མི་བྱོག་ཅེས་བྱ་བ་ཡང་ཟས་གང་ལ་ལྷུང་བཟེད་བྱོག་པ་ཡོད་པ་དེ་སོར་མོས་མི་བྱོག་པར་ཟས་བཟའ་བའོ། །ལག་པ་མི་སྦྲུག་ཅེས་བྱ་བ་ནི་ལག་པ་ལ་ཟས་ཆགས་པ་མི་
སྤྲུག་པར་ཟས་བཟའ་བར་བྱ་བའོ། །ལྷུང་བཟེད་མི་བསྐྱམ་ཞེས་བྱ་བ་ནི་ལྷུང་བཟེད་ཀྱི་ནང་དུ་ཟས་ལ་སོགས་པ་བླུགས་ཏེ་མི་བསྐྱམ་པར་ཟས་བཟའ་བར་བྱ་བའོ། །ངན་འགྲོ་རྫོགས་པར་བྱེད་པ་རྫོགས་པར་བྱེད་ཀྱི་ཞེས་བྱ་བ་ནི་འདྲོ་བ་སྐྱོང་གི་བུ་རྫོགས་བྱེད་ཅེས་བྱ་བ་ངན་འགྲོ་རྫོགས་པར་བྱེད་པ་དེའི་ཡིན་ནོ་ཞེས་བྱ་བའི་ཐ་ཚིག་གོ །མཆོད་རྟེན་འདྲ་བ་བཅོམ་སྟེ་ཞེས་བྱ་བ་ནི་བཤིག་སྟེའོ། །བསྡུ་བའི་མདོ་བཅུ་གཅིག་པའོ།། །།དྲུང་ན་འདུག་པའི་དགེ་སློང་གི་ལྷུང་བཟེད་ལ་འཕྱས་གདགས་པའི་ཕྱིར་མི་བལྟ་ཞེས་བྱ་བ་ནི་གང་ལ་འཕྱས་གདགས་པའི་ཕྱིར་བལྟ་བའི་ཚུལ་ཡོད་པ་དེ་ནི་འཕྱས་གདགས་པའི་ཕྱིར་ལྟ་བ་སྟེ། དེས་དྲུང་ན་འདུག་པའི་དགེ་སློང་གི་ལྷུང་བཟེད་ལ་འཕྱས་གདགས་པའི་ཕྱིར་མི་བལྟ་བའོ། །ལག་པ་ཟས་དང་འབགས་པས་ཆུ་སྣོད་ལ་མི་བཟུང་ཞེས་བྱ་བ་ནི་ལག་པ་ཟས་དང་འབགས་པས་བཏུང་བའམ་གློར་གཞག་པའི་ཆུ་བྱ་མ་བུམ་ལ་སོགས་པ་ལ་མི་གཟུང་བའོ། །དྲུང་ན་འདུག་པའི་དགེ་སློང་ལ་ཟས་དང་འབགས་པའི་ཆུས་མི་གཏོར་ཞེས་བྱ་བ་ནི་དྲུང་ན་འདུག་པའི་དགེ་སློང་ལ་ཟས་དང་འབགས་པའི་ཆུས་མི་གཏོར་བར་བསླབ་པར་བྱ་བ་སྟེ། དྲུང་ན་འདུག་པ་ཞེས་བྱ་བ་དང༌། ཟས་དང་འབགས་པ་ཞེས་བྱ་བ་ནི་མཚོན་བཙམ་སྟེ་གཞན་ན་འདུག་པ་དང༌། ཟས་དང་མ་འབགས་པ་ཡང་དེ་བཞིན་ནོ། །ཁྱིམ་པ་འདུག་པ་ལ་མ་དྲིས་པར་ཆུ་ཟས་དང་འབགས་པ་ཁྱིམ་གཞན་དུ་མི་དབོ་ཞེས་བྱ་བ་ནི་ཁྱིམ་བདག་ལ་མ་དྲིས་པར་ཟས་དང་འབགས་པའི་ཆུ་དེ་ཁྱིམ་པའི་ཁྱིམ་དུ་མི་དབོ་བར་བསླབ་པར་བྱ་བའོ། །བསྡུ་བའི་མདོ་བཅུ་གཉིས་པའོ།། །།ལྷུང་བཟེད་ཀྱི་ནང་དུ་ཟས་ཀྱི་ལྷག་མ་བླུགས་ཏེ་མི་དོར་ཞེས་བྱ་བ་ནི་ཤིང་ཏོག་ལ་སོགས་པ་ཕྱད་ཕྱེད་ཟོས་པ་ངན་མར་གྱུར་པ་ལྷུང་བཟེད་ཀྱི་མི་དོར་བར་བྱ་བའོ། །ལྕགས་ཀྱི་བཙའ་ཞེས་བྱ་བ་ནི་ལྕགས་ཀྱི་དྲི་མའོ། །འོག་གཞི་མེད་པའི་ས་ཕྱོགས་སུ་ལྷུང་བཟེད་མི་གཞག་ཅེས་བྱ་བ་ནི་ལྷུང་བཟེད་ཀྱི་གདུ་བུ་དང་ལོ་མ་ལ་སོགས་པའི་འོག་གཞི་མེད་པའི་ས་ཕྱོགས་སུ་ལྷུང་བཟེད་མི་གཞག་པར་བསླབ་པར་བྱ་བའོ། །གད་ཀ་མ་ཡིན་པ་ཞེས་བྱ་བ་ནི་ངམ་གྲོག་གི་ཁ་མ་ཡིན་པར་རོ། །གཡང་ས་མ་ཡིན་པ་ཞེས་བྱ་བ་ནི་བྱིན་གྱིས་གཞོལ་བའི་གཡང་ས་མ་ཡིན་པར་རོ། །དཀན་གཟར་པོ་མ་ཡིན་པར་ཞེས་བྱ་བ་ནི་བང་རིམ་ལྟར་ཕྱིར་བྱུང་བའི་གཞི་གཟར་པོ་མ་ཡིན་པའོ། །འགྲེང་
སྟེ་ལྷུང་བཟེད་མི་བཀྲུ་ཞེས་བྱ་བ་ནི་དེ་ནི་ས་མཉམ་པར་བཀག་པ་ཡིན་ནོ། །གད་ཀ་མ་ཡིན་པ་དང༌། གཡང་ས་མ་ཡིན་པ་དང༌། དཀན་གཟར་པོ་མ་ཡིན་པར་ལྷུང་བཟེད་བཀྲུ་ཞེས་བྱ་བ་ནི། །གད་ཀ་དང་གཡང་ས་དང་དཀན་གཟར་པོར་ནི་འདུག་སྟེ་ལྷུང་བཟེད་བཀྲུ་བ་ཡང་བཀག་པ་ཡིན་ནོ། །འབབ་ཆུ་དྲག་པོ་ཞེས་བྱ་བ་ནི་ཤུགས་དྲག་ཏུ་འབབ་པ་སྟེ། ཤིང་ལ་སོགས་པ་ཁྱེར་བར་བྱེད་པའི་ཕྱིར་རོ། །རྒྱུན་ལས་བཟློག་པ་སྟེ་ཞེས་བྱ་བ་ནི་འབབ་པའི་རྒྱུན་ཕྱོགས་ལས་བཟློག་སྟེའོ། །འདི་ནི་ཆུའི་ཤུགས་ཀྱི་ས་ལྷུང་བཟེད་ཆག་པ་ལ་སོགས་པར་འགྱུར་བས་དགག་པ་མཛད་དོ། །བསྡུ་བའི་མདོ་བཅུ་གསུམ་པའོ།། །།མི་ན་བར་འདུག་པ་ལ་འགྲེང་སྟེ་ཆོས་མི་བཤད་ཅེས་བྱ་བ་ནི་ཉན་པ་པོ་མི་ན་བར་འདུག་པ་ལ་དགེ་སློང་འགྲེང་སྟེ་ཆོས་མི་བཤད་པར་བསླབ་པར་བྱ་བའོ། །མི་ན་བར་ཉལ་བ་ལ་འདུག་སྟེ་ཆོས་མི་བཤད་ཅེས་བྱ་བ་ནི་ཉན་པ་པོ་མི་ན་བར་ཉལ་བ་ལ་དགེ་སློང་འདུག་སྟེ་ཆོས་མི་བཤད་པར་བསླབ་པར་བྱ་བའོ། །མི་ན་བར་སྟན་མཐོན་པོ་ལ་འདུག་པ་ལ་སྟན་དམའ་བ་ལ་འདུག་སྟེ་ཆོས་མི་བཤད་ཅེས་བྱ་བ་ནི་ཉན་པ་པོ་མི་ན་བར་སྟན་མཐོན་པོ་ལ་འདུག་པ་ལ་དགེ་སློང་སྟན་མདའ་བ་ལ་འདུག་སྟེ་ཆོས་མི་བཤད་པར་བསླབ་པར་བྱ་བའོ། །མི་ན་བར་མདུན་དུ་འགྲོ་བ་འཕྱི་ནས་འགྲོ་ཞིང་ཆོས་མི་བཤད་ཅེས་བྱ་བ་ནི། ཉན་པ་པོ་མི་ན་བར་མདུན་དུ་འགྲོ་བ་ལ་དགེ་སློང་ཕྱི་ནས་འགྲོ་ཞིང་ཆོས་མི་བཤད་པར་བསླབ་པར་བྱ་བའོ། །མི་ན་བར་ལམ་ནས་འགྲོ་བ་ལ་ལམ་གྱི་འགྲམ་ནས་འགྲོ་ཞིང་ཆོས་མི་བཤད་ཅེས་བྱ་བ་ནི་ཉན་པ་པོ་མི་ན་བར་ལམ་ནས་འགྲོ་བ་ལ། དགེ་སློང་ལམ་གོ་ལ་བ་ནས་འགྲོ་ཞིང་ཆོས་མི་བཤད་པར་བསླབ་པར་བྱ་བའོ། །བསྡུ་བའི་མདོ་བཅུ་བཞི་པའོ།། །།མི་ན་བར་མགོ་གཡོགས་པ་ལ་ཆོས་མི་བཤད་ཅེས་བྱ་བ་ལ་སོགས་པ་ནི་ཉན་པ་པོ་མི་ན་བར་མགོ་གཡོགས་པ་དང༌། ཤམ་ཐབས་བརྫེས་པ་དང༌། ཆོས་གོས་གཟར་བ་དང༌། ལག་པ་གཉའ་གོང་དུ་བསྣོལ་བ་དང༌། ལག་པ་ལྟག་པར་བསྣོལ་བ་ལ་དགེ་སློང་གིས་ཆོས་མི་བཤད་པར་བསླབ་པར་བྱ་སྟེ། འདི་དག་ནི་རྒོད་བག་དང་མ་གུས་པའི་ཕྱིར་དགག་པ་མཛད་དོ། །བསྡུ་བའི་མདོ་བཅོ་ལྔ་པའོ།། །།མི་ན་བར་སྐྲ་དོ་ཀེར་ཅན་ལ་ཆོས་མི་བཤད་ཅེས་བྱ་བ་ལ་སོགས་པ་ནི་རྒོད་བག་དང་མ་གུས་པའི་ཆ་ལུགས་ཡིན་པའི་ཕྱིར་དགག་པ་མཛད་དོ། །སྐྲ་དོ་ཀེར་
ཅན་ཞེས་བྱ་བ་ནི་སྐྲ་གྱེན་དུ་གཙུག་ཏོར་ལྟར་བཅིངས་པའོ། །མགོ་དཀྲིས་པ་ཞེས་བྱ་བ་ནི་ཐོད་བཅིངས་པའོ། །བསྡུ་བའི་མདོ་བཅུ་དྲུག་པའོ།། །།མི་ན་བར་གླང་པོ་ཆེ་ཞོན་པ་ལ་ཆོས་མི་བཤད་ཅེས་བྱ་བ་ལ་སོགས་པ་ནི་རྒོད་བག་དང་མ་གུས་པ་ཡིན་པའི་ཕྱིར་དགག་པ་མཛད་དོ། །ཁྱོགས་ན་འདུག་པ་ཞེས་བྱ་བ་ནི་མིས་བཏེག་པའི་ཁྱོགས་ན་འདུག་པའོ། །བཞོན་པའི་སྟེང་ན་འདུག་པ་ཞེས་བྱ་བ་ནི་ཤིང་རྟ་ལ་སོགས་པ་མིས་བཏེག་པ་མ་ཡིན་པའི་སྟེང་ན་འདུག་པའོ། །མཆིལ་ལྷམ་གྱོན་པ་ཞེས་བྱ་བ་ནི་ཤིང་དང་ཀོ་བ་ལ་སོགས་པ་ལས་བྱས་པའི་མཆིལ་ལྷམ་གྱོན་པའོ། །བསྡུ་བའི་མདོ་བཅུ་བདུན་པའོ།། །མི་ན་བར་ལག་ན་ཁར་བ་ཐོགས་པ་ལ་ཆོས་མི་བཤད་ཅེས་བྱ་བ་ལ་སོགས་པ་ལ་ནི་རྒོད་བག་དང་མ་ཞི་བ་དང༌། མ་གུས་པའི་ཆ་ལུགས་ཡིན་པའི་ཕྱིར་དགག་པ་མཛད་དོ། །མཚོན་ཞེས་བྱ་བ་ནི་མདུང་དང་འཕང་མདུང་ལ་སོགས་པའོ། །དགྲ་ཆ་ཞེས་བྱ་བ་ནི་མདའ་གཞུའོ། །བསླབ་པ་བསྡུ་བའི་མདོ་བཅོ་བརྒྱད་པའོ།། །།སྔོན་ནི་བདག་ཅག་བསྲུང་བར་བྱས་པར་གྱུར་ཞེས་བྱ་བ་ནི་ཁྱིམ་ཉིད་ན་རྒྱལ་པོའི་ཕོ་བྲང་ལ་བརྟེན་པས་བསྐྱངས་པའི་ཕྱིར་རོ། །རྩྭ་སྔོན་པོ་ཡོད་པའི་ཕྱོགས་ཞེས་བྱ་བ་ནི་སྔོ་སྐྱེས་པ་སྟེ་དེ་ནི་བརྟེན་པ་ཡིན་པའི་ཕྱིར་དགག་པ་མཛད་དོ། །རླུགས་པ་ལ་སོགས་པ་ནི་མཁྲིས་པ་ལ་སོགས་པ་ཁར་དབྱུང་བ་དང༌། མ་ཞུ་བ་ཐུར་དུ་དབྱུང་བའོ། །བསྡུ་བའི་མདོ་བཅུ་དགུ་པའོ།། །།མི་གང་ཙམ་ཞེས་བྱ་བ་ནི་མིའི་ལུས་ཀྱི་སྲིད་ཙམ་མོ། །མཆོངས་པར་བྱས་ཏེ་ཞེས་བྱ་བ་ནི་གྱེན་དུ་མཆོངས་ཏེའོ། །འདུལ་བ་རྣམ་པར་འབྱེད་པའི་ཚིག་རྣམ་པར་བཤད་པ་སློབ་དཔོན་དུལ་བའི་ལྷས་མཛད་པ་ཉེ་བར་སྦྱར་བ་ལས་བསླབ་པའི་ཆོས་མང་པོ་རྣམས་ཀྱི་ཚིག་རྣམ་པར་བཤད་པ་རྫོགས་སོ།། །།ད་ནི་ལྟུང་བ་སྡེ་ལྔ་དང་འབྲེལ་བ་ལས་རྩོད་པ་བྱུང་བ་རྣམས་ཇི་ལྟར་ཞི་བར་འགྱུར་བ་དེ་བསྟན་པའི་ཕྱིར་རྩོད་པ་ཉེ་བར་ཞི་བར་བྱ་བའི་ཆོས་བདུན་སྟོན་ཏོ། །མངོན་སུམ་དུ་འདུལ་བ་ལ་མངོན་སུམ་དུ་འདུལ་བ་སྦྱིན་ནོ་ཞེས་བྱ་བ་ལ། མངོན་སུམ་དུ་ཞེས་བྱ་བ་ནི་རྒོལ་བ་དང་ཕྱིར་རྒོལ་བ་དག་གིས་མངོན་སུམ་དུ་འདུལ་བའི་ཞི་བ་གང་ལ་ཡོད་པ་དེ་ནི་མངོན་སུམ་དུ་འདུལ་བའོ། །འདུལ་བ་ཞེས་བྱ་བ་ནི་རྩོད་པ་ཞི་ཞིང་འདུལ་བའོ། །དེ་སྦྱིན་པར་འོས་པའི་གང་ཟག་གང་ཡིན་པའམ། རྩོད་པ་གང་ཡིན་
བ་དེ་ལ་ནི་མངོན་སུམ་དུ་འདུལ་བ་སྦྱིན་པར་བྱའོ་ཞེས་བྱ་བའི་ཐ་ཚིག་གོ །དེ་ལ་རྟག་པ་དང༌། མི་རྟག་པ་དང༌། ཡོད་པ་དང༌། མེད་པ་དང༌། སྡུག་བསྔལ་བ་དང༌། སྡུག་བསྔལ་མ་ཡིན་པ་ལ་སོགས་པ་དངོས་པོའི་ངོ་བོ་ཉིད་ཀྱི་སྐབས་སུ་འགྱེད་པའི་ཕྱིར་རྩོད་པ་བྱུང་ན། མདོ་སྡེ་དང༌། འདུལ་བ་དང༌། མ་མོ་འཛིན་པ་དག་གམ་མཁན་པོ་དང༌། སློབ་དཔོན་དག་གམ། དགེ་འདུན་ཐམས་ཅད་དམ། གནས་གཞན་གྱི་དགེ་འདུན་ནམ་གནས་བརྟན་གཙོ་བོའི་ངེས་པ་བསྐྱེད་པས་རྩོད་པ་དེ་ཞི་བར་འགྱུར་བས་དེའི་ཕྱིར་འགྱེད་པའི་ཕྱིར་རྩོད་པ་མངོན་སུམ་དུ་འདུལ་བ་བྱས་ཏེ་འདིར་དོན་ནི་འདི་ཡིན་ནོ། །དྲན་པས་འདུལ་བ་ལ་དྲན་པས་འདུལ་བ་སྦྱིན་ནོ་ཞེས་བྱ་བ་འདི་ནི་འདིས་དྲན་པར་བྱེད་པས་ན་དྲན་པ་སྟེ་ཡུལ་མ་བརྗེད་པ་ལ་དུས་གཞན་ན་ཉམས་སུ་མྱོང་བ་དང་བྱས་པ་ཤེས་པ་སྐྱེ་བ་བསྐུལ་བའི་གང་ཟག་གང་གི་རྒྱུད་ལ་རྣམ་པར་གནས་པའི་དྲན་པ་དེས་རྩོད་པ་ཞི་བར་བྱ་བ་གང་ལས་འདུལ་བ་ཡོད་པ་དེ་ནི་དྲན་པས་འདུལ་བའོ། །དེ་འོས་པའི་གང་ཟག་གང་ཡིན་པའམ་རྩོད་པ་གང་ཡིན་པ་དེ་ལ་དྲན་པས་འདུལ་བ་སྦྱིན་པར་བྱའོ་ཞེས་བྱ་བའི་ཐ་ཚིག་གོ །དེ་ལ་འདི་ལྟུང་བ་འབྱུང་ངོ་ཞེས་བྱ་བ་གདམས་ངག་འཇོག་པའམ། གསོ་སྦྱོང་དང་དགག་དབྱེ་གཞག་པས་མི་གདམས་པའི་ཕྱིར་རྩོད་པ་བྱུང་བ་དེ་ལ་ནི་ལྟུང་བ་མེད་པའམ། གཞན་བྱས་པའམ་མ་བྱས་པའི་ཕྱིར་བཅོས་ཟིན་པ་ལ་མི་གདམས་པ་བྱས་ན་བསྐུལ་བའི་གང་ཟག་གི་ཚུལ་ཁྲིམས་དང༌། ཐོས་པ་དང་ཏིང་ངེ་འཛིན་ལ་སོགས་པའི་ཡོན་ཏན་མཆོག་ཏུ་གྱུར་པ་དེ་ནི་ཚད་མར་གྱུར་པ་ན་དེས་དྲན་པ་གང་ཡིན་པ་དེས་རྩོད་པ་དེ་ཞི་བར་འགྱུར་བས་དེའི་ཕྱིར་མི་གདམས་པའི་ཕྱིར་རྩོད་པ་ལ་ནི་དྲན་པས་འདུལ་བ་བྱས་ཏེ་འདིར་དོན་ནི་དེ་ཡིན་ནོ། །མ་མྱོས་པས་འདུལ་བར་འོས་པ་ལ་མ་མྱོས་པས་འདུལ་བ་སྦྱིན་ཞེས་བྱ་བ་ནི་མ་མྱོས་པ་མྱོས་པ་ལ་སོགས་པ་མེད་པ་ཐ་སྙད་དུ་རུང་བ་བདག་ཉིད་དེས་རྩོད་པ་ཞི་བར་བྱ་བ་གང་ལ་འདུལ་བ་གང་ཡོད་པ་དེ་ནི་མ་མྱོས་པས་འདུལ་བའོ། །དེ་འོས་པས་མ་མྱོས་པས་འདུལ་བ་སྦྱིན་ཏེ་བྱའོ་ཞེས་བྱ་བའི་ཐ་ཚིག་གོ །དེ་ལ་སྨྱོས་པ་དང༌། སེམས་འཁྲུགས་པ་དང༌། ཚོར་བ་དག་གིས་ཉེན་པས་མྱོས་པའི་གནས་སྐབས་ན་བྱ་བ་མ་ཡིན་པ་སྤྱད་པ་དེའི་རྒྱུས་གདམས་ངག་ལ་སོགས་པ་གཞག་པས་མི་གདམས་པའི་ཕྱིར་རྩོད་པ་བྱུང་བ་དེ་ལ་ནི་
མྱོས་པའི་གནས་སྐབས་ན་ལྟུང་བ་མེད་པས་མ་མྱོས་པའི་བདག་ཉིད་ཀྱིས་གང་བྱས་པ་དེ་ཚད་མ་ཡིན་པས་མ་མྱོས་པས་ཞི་བར་བྱས་ཏེ། དེ་མི་གདམས་པའི་ཕྱིར་རྩོད་པ་ལ་ནི་མ་མྱོས་པ་འདུལ་བ་ཡང་བྱས་ཏེ་འདིར་དོན་ནི་དེ་ཡིན་ནོ། །གང་ཚུལ་ཤིང་མང་པོ་སྦྱིན་པར་འོས་པ་ལ་ཚུལ་ཤིང་མོང་པོ་སྦྱིན་ནོ་ཞེས་བྱ་བ་ནི་ཞི་བར་བྱ་བའི་ཕྱིར། ཚུལ་ཤིང་མང་པོ་བྲིམས་པས་རྩོད་པ་ཞི་བར་བྱ་བ་གང་ལ་ཡོད་པ་དེ་ནི་ཚུལ་ཤིང་མང་པོ་སྦྱིན་པར་འོས་པའོ། །དེ་འོས་པ་ལ་ནི་ཚུལ་ཤིང་མང་པོ་སྦྱིན་པ་གང་ཡིན་པའོ། །དེ་ལ་རྟག་པ་དང་མི་རྟག་པ་ལ་སོགས་པའི་རྒྱུ་ལ་འགྱེད་པའི་ཕྱིར་རྩོད་པ་བྱུང་བ་གང་གི་ཚེ། མཁན་པོ་དང་སློབ་དཔོན་དང་གནས་བརྟན་གྱི་མཐར་ཐུག་པའི་བར་དག་གིས་ངེས་པར་བྱ་བར་མ་ནུས་པ་དེའི་ཚེ་ན་བསམ་པ་བཙལ་བའི་ཕྱིར་ཚུལ་ཤིང་འབྲིམ་པར་བྱེད་ཅིང༌། ཕྱོགས་གང་ལ་ཚུལ་ཤིང་མང་བ་དེ་རྒྱལ་ཞིང་ཅིག་ཤོས་ཕམ་པར་གྱུར་པ་དེས་རྩོད་པ་ཞི་བར་འགྱུར་བ་དེའི་ཕྱིར་རྩོད་པ་ལ་ནི་ཚུལ་ཤིང་མང་པོ་སྦྱིན་པ་ཡང་བྱས་ཏེ་འདིར་དོན་ནི་དེ་ཡིན་ནོ། །དེའི་ངོ་བོ་ཉིད་ཚོལ་དུ་གཞུག་པར་འོས་པ་ལ་དེའི་ངོ་བོ་ཉིད་བཙལ་བ་སྦྱིན་ནོ་ཞེས་བྱ་བ་ནི་བསྐུལ་བའི་གང་ཟག་དེ་ལྟུང་བའི་ངོ་བོ་ཉིད་གང་ཡིན་པ་དང༌། རིགས་གང་ཡིན་པ་དང། གང་གིས་ཀུན་ནས་བསླང་བ་ལ་སོགས་པའི་ངོ་བོ་ཉིད་ཚོལ་དུ་གཞུག་པ་དེ་དང་མཐུན་པ་རྩོད་པ་ཞི་བར་བྱ་བ་གང་ལ་ཡོད་པ་དེ་ནི་ངོ་བོ་ཉིད་ཚོལ་དུ་གཞུག་པའོ། །དེ་འོས་པ་དེ་ལ་ངོ་བོ་ཉིད་བཙལ་བ་སྦྱིན་ནོ། །དེ་ལ་དགེ་སློང་གང་གིས་ལྟུང་བ་བྱས་ནས་དགེ་འདུན་གྱི་ནང་དུ་དྲིས་པ་ན་ཤེས་ལ། དེའི་འོག་ཏུ་སྦྱོང་བ་ལ་སོགས་པའི་དུས་ན་བརྗེད་ངེས་པའི་ཕྱིར་མི་ཤེས་ན་དེ་ལྟུང་བ་དེའི་ངོ་བོ་ཉིད་ཚོལ་དུ་གཞུག་པའི་ཕྱིར་དང༌། གུས་པ་བསྐྱེད་པའི་ཕྱིར་དང༌། ངོ་བོ་ཉིད་ཚོལ་དུ་གཞུག་པ་ཞེས་བྱ་བ་ནི་ཆད་པའི་ལས་བྱེད་དུ་གཞུག་སྟེ་དེས་ན་ལྟུང་བ་དེའི་རྒྱུས་མི་གདམས་པའི་ཕྱིར་རྩོད་པ་འབྱུང་བ་དེ་ཞི་བར་འགྱུར་བས། དེའི་ཕྱིར་མི་གདམས་པའི་ཕྱིར་རྩོད་པ་ལ་ནི་དེའི་ངོ་བོ་ཉིད་ཚོལ་དུ་གཞུག་པ་ཡང་བྱས་ཏེ་འདིར་དོན་ནི་དེ་ཡིན་ནོ། །གང་ཁས་བླང་བར་འོས་པ་ལ་ཁས་བླང་བར་བྱ་བའོ་ཞེས་བྱ་བ་ནི། བདག་ལ་ལྟུང་བ་བྱུང་ངོ་ཞེས་
ཁས་ལེན་པ་ནི་ཁས་བླང་བར་བྱ་བ་དེས་རྩོད་པ་ཞི་བར་བྱ་བ་གང་ལ་ཁས་བླངས་པ་ཡོད་པ་དེ་ནི་ཁས་བླང་བར་བྱ་བའོ། །དེ་འོས་པ་དེ་ལ་ནི་ཁས་བླང་བར་བྱ་བའོ། །དེ་ལ་ཁྱོད་ཀྱིས་ལྟུང་བ་བྱས་སོ་ཞེས་བསྐུལ་བ་ལས་རྒོལ་བ་དང་ཕྱིར་རྒོལ་བ་དང༌། དེའི་འཁོར་དགེ་སློང་གི་ཕྱོགས་གཅིག་ཏུ་གྱུར་པ་དག་ལྟུང་བའི་ཕྱིར་རྩོད་པ་བྱུང་ན། གང་གི་ཚེ་བསྐུལ་བའི་གང་ཟག་གིས་བདག་ལ་ལྟུང་བ་བྱུང་ངོ་ཞེས་ཁས་ལེན་པར་བྱེད་པ་དེའི་ཚེ་རྩོད་པ་ཞི་བར་བྱེད་པས་དེའི་ལྟུང་བའི་རྩོད་པ་ལ་ནི་ཁས་བླང་བར་བྱ་སྟེ་འདིར་དོན་ནི་དེ་ཡིན་ནོ། །རྩྭ་བཀྲམ་པ་ལྟ་བུར་འོས་པ་ལ་རྩྭ་བཀྲམ་པ་ལྟ་བུ་སྦྱིན་ནོ་ཞེས་བྱ་བ་ནི་རྩྭ་བཀྲམ་པ་དང་འདྲ་བར་ཕན་ཚུན་མཐུན་པར་བཀྲམ་ཞིང་འདུད་པར་བྱེད་པས་གླེང་བར་བྱ་བ་དང༌། གླེང་བ་པོ་ཕྱོགས་ཀྱི་དགེ་སློང་རྣམས་རྩོད་པ་ཞི་བར་བྱ་བ་གང་ལ་རྩྭ་བཀྲམ་པ་ལྟ་བུར་མཐུན་པར་བྱེད་པ་དེ་ནི་རྩྭ་བཀྲམ་པ་ལྟ་བུའོ། །དེ་འོས་པ་དེ་ལ་ནི་རྩྭ་བཀྲམ་པ་ལྟ་བུ་སྦྱིན་ནོ། །དེ་ལ་ཁྱོད་ཀྱིས་ལྟུང་བ་བྱས་སོ་ཞེས་ཕན་ཚུན་གླེངས་པ་ལས་རང་གི་ཕྱོགས་དང་གཞན་གྱི་ཕྱོགས་ཀྱི་རྣམ་པར་གནས་པས་དགེ་འདུན་ཐམས་ཅད་ལྟུང་བའི་ཕྱིར་རྩོད་པར་གྱུར་ན་གང་གི་ཚེ་ཕྱོགས་གཉི་གས་ཀྱང་ཕན་ཚུན་མཐུན་པར་ཁས་ལེན་པར་བྱེད་པ་དེའི་ཚེ་ན་དེ་དག་གི་རྩོད་པ་དེ་ཞི་བར་འགྱུར་བས་དེའི་ཕྱིར་ལྟུང་བའི་ཕྱིར་རྩོད་པ་ལ་ནི་རྩྭ་བཀྲམ་པ་ལྟ་བུ་ཡང་བྱ་སྟེ་འདིར་དོན་ནི་དེ་ཡིན་ནོ། །ཆོས་ཞེས་བྱ་བ་ནི་ཚུལ་བཞིན་དུའོ། །འདུལ་བ་ཞེས་བྱ་བ་ནི་འདུལ་བའི་ཚུལ་བཞིན་དུའོ། །སྟོན་པའི་བསྟན་པ་བཞིན་དུ་ཞེས་བྱ་བ་ནི་འཕགས་པའི་བདེན་པ་བཞི་བསྟན་པའི་མདོ་སྡེའི་མཚན་ཉིད་ཀྱི་ཚུལ་བཞིན་དུའོ། །གདུལ་བར་བྱ་ཞེས་བྱ་བ་ནི་སྦྱོར་བས་སོ། ཞི་བར་བྱ་ཞེས་བྱ་བ་ནི་དངོས་ཀྱིས་སོ། །རྣམ་པར་ཞི་བར་བྱའོ་ཞེས་བྱ་བ་ནི་མཇུག་གིས་སོ། །འགྱེད་པ་མངོན་སུམ་ཚུལ་ཤིང་དང༌། །མི་གདམས་དྲན་དང་མ་མྱོས་དང༌། །ལྟུང་བ་ཁས་བླངས་རྩྭ་བཀྲམ་དང༌། །དེ་ཉིད་ཚོལ་དུ་གཞུག་པའོ། །ངེས་ཕྱིར་དེ་ཉིད་མེད་ཕྱིར་དང༌། །མ་མྱོས་རང་གིས་ཁས་བླངས་དང༌། །རོ་གཅིག་ཡོངས་སུ་ཤེས་ཕྱིར་ཏེ། །བྱ་བ་ཀུན་ཡོད་བསྡུ་བ་ཡིན། །འདུལ་བ་རྣམ་པར་འབྱེད་པའི་ཚིག་རྣམ་
པར་བཤད་པ་སློབ་དཔོན་དུལ་བའི་ལྷས་ཉེ་བར་སྦྱར་བ་ལས་རྩོད་པ་ཞི་བར་བྱ་བའི་ཆོས་བདུན་གྱི་ཚིག་རྣམ་པར་བཤད་པ་རྫོགས་སོ།། །།ད་ནི་སོ་སོར་ཐར་པའི་མདོ་མདོར་བསྡུས་ཏེ་གདོན་པའི་སྒོ་ནས་དེ་བཞིན་གཤེགས་པ་བདུན་གྱི་འདུལ་བ་བསྟན་པར་བྱ་སྟེ། དེ་ལ་བཅོམ་ལྡན་འདས་དེ་བཞིན་གཤེགས་པ་རྣམ་པར་གཟིགས་ཀྱི་སློབ་མ་རྣམས་ནི་ཉེས་པ་ཆུང་བར་གྱུར་ཏེ། ཆོས་ལ་དགའ་བའི་འདོད་ཆགས་དང༌། །དམ་པ་མ་ཡིན་པའི་ཆོས་ལ་ཞུགས་པའི་མུ་སྟེགས་ཅན་རྣམས་ལ། འཚེ་བ་ལ་མངོན་པར་དགའ་བ་ཙམ་ཞིག་ཡོད་པས་དེ་དག་གི་ཉེས་པ་དེ་ཡོངས་སུ་སྤང་བའི་ཕྱིར་བཅོམ་ལྡན་འདས་དེས་སོ་སོར་ཐར་པའི་མདོ་འདི་ལྟར་མདོར་བསྡུས་ཏེ་ཟླ་བ་ཕྱེད་ཕྱེད་ཅིང་བཏོན་པར་གྱུར་ཏེ། བཟོད་པ་དཀའ་ཐུབ་བཟོད་པ་དམ་པ་ཡི། །མྱ་ངན་འདས་པ་མཆོག་ཅེས་རྒྱལ་བས་གསུངས། །རབ་ཏུ་བྱུང་བས་གཞན་ལ་གནོད་པ་དང༌། །གཞན་ལ་འཚེ་བ་དགེ་སྦྱོང་མ་ཡིན་ནོ། །ཞེས་བྱ་བའོ། །དེ་ལ་བཟོད་པ་ཞེས་བྱ་བ་ནི་བཟོད་པར་བྱེད་པ་སྟེ། གཞན་གྱི་ཉེས་པ་དང་དུ་ལེན་པའམ། གཞན་ལ་ཞེ་སྡང་མེད་པའོ། །དེ་ཉིད་དཀའ་ཐུབ་དམ་པ་ཡིན་ཏེ་སེམས་ཀྱི་ཞེ་སྡང་སྦྱོང་བར་བྱེད་པའི་ཕྱིར་དང༌། སྙིང་རྗེ་བསྐྱེད་པའི་ཕྱིར་རོ། །བཟོད་པའི་མྱ་ངན་ལས་འདས་པ་ཞེས་བྱ་བ་ལ། བཟོད་པ་ཞེས་བྱ་བ་ནི་བཟོད་པར་བྱེད་པ་སྟེ་སྡུག་བསྔལ་གྱི་བདེན་པའི་ཡུལ་གྱི་བདེན་པ་མི་རྟག་པ་དང༌། སྡུག་བསྔལ་བ་དང༌། སྟོང་པ་དང༌། བདག་མད་པ་དག་བཟོད་པའི་ཤེས་རབ་སྡུག་བསྔལ་ལ་ཆོས་ཤེས་པའི་བཟོད་པའོ། །དེ་སྔོན་དུ་བཏང་བའམ། དེས་ཉེ་བར་བསྟན་པའི་མྱ་ངན་ལས་འདས་པ་ནི་བཟོད་པའི་མྱ་ངན་ལས་འདས་པ་སྟེ་ཟག་པ་མེད་པའི་ལམ་གྱིས་ཐོབ་པའི་མྱ་ངན་ལས་འདས་པའོ། །དེ་མཆོག་ཅེས་སངས་རྒྱས་གསུང་ཞེས་བྱ་བ་ནི་བཟོད་པའི་མྱ་ངན་ལས་འདས་པ་དེ་དངོས་པོ་ཐམས་ཅད་ཀྱི་མཆོག་ཡིན་ནོ་ཞེས་སངས་རྒྱས་བཅོམ་ལྡན་འདས་རྣམས་ཀྱིས་བསྔགས་པ་སྟེ། འཇིག་རྟེན་པའི་ལམ་གྱིས་ཐོབ་པའི་མྱ་ངན་ལས་འདས་པ་ནི་གཏན་དུ་བ་མ་ཡིན་ལ། ཟག་པ་མེད་པའི་ལམ་གྱིས་ཐོབ་པའི་མྱ་ངན་ལས་འདས་པ་ནི་གཏན་དུ་བ་ཡིན་ཏེ། ཞི་བའི་ངོ་བོ་ཉིད་ཡིན་པའི་ཕྱིར་རོ། །ཇི་
ལྟར་ན་བཟོད་པ་དཀའ་ཐུབ་དམ་པ་ཡིན་ཏེ། དེའི་ཕྱིར་རབ་ཏུ་བྱུང་བས་གཞན་ལ་གནོད་པ་དང༌། གཞན་ལ་འཚེ་བ་དགེ་སྦྱོང་མ་ཡིན་ནོ། །ཞེས་གསུངས་ཏེ། གཞན་ལ་གནོད་པ་ཞེས་བྱ་བ་ནི་ཡིད་ཀྱིས་གནོད་པ་བྱེད་པའོ། །གཞན་ལ་འཚེ་བས་ཞེས་བྱ་བ་ནི་ལུས་དང་ངག་དང་གཉིས་ཀྱིས་འཚེ་བའོ། །དགེ་སྦྱོང་ཞེས་བྱ་བ་ནི་ཞི་བའི་བདག་ཉིད་དོ། །འདི་སྐད་བསྟན་ཏེ། གང་ཕྱིར་གཞན་ལ་གནོད་པ་དང༌། །གཞན་ལ་འཚེ་བས་རབ་ཏུ་བྱུང་བའི་དགེ་སྦྱོང་རྫོགས་པ་མ་ཡིན་པ་དེའི་ཕྱིར་བཟོད་པ་ནི་དཀའ་ཐུབ་དམ་པ་ཡིན་ལ། དེའི་འབྲས་བུ་བཟོད་པས་ཐོབ་པའི་མྱ་ངན་ལས་འདས་པ་ཡང་མཆོག་ཡིན་པས། དེའི་ཕྱིར་རབ་ཏུ་བྱུང་བས་བཟོད་པ་བསྟེན་པར་བྱའོ་ཞེས་བསྟན་ཏོ། །བཅོམ་ལྡན་འདས་དེ་བཞིན་གཤེགས་པ་གཙུག་ཏོར་ཅན་གྱི་སློབ་མ་རྣམས་ནི་ཉེས་པ་ཆུང་བར་གྱུར་ཏེ། གཞན་གྱི་ཉེས་པ་སྒྲོགས་པ་མང་བ་ཙམ་ཞིག་ཡོད་པས་དེ་དག་གི་ཉེས་པ་དེ་ཡོངས་སུ་སྤང་བའི་ཕྱིར། བཅོམ་ལྡན་འདས་དེས་སོ་སོར་ཐར་པའི་མདོ་འདི་ལྟར་མདོར་བསྡུས་ཏེ། ཟླ་བ་ཕྱེད་ཕྱེད་ཅིང་བཏོན་པར་གྱུར་ཏེ། མི་ལྡན་འགྲོ་བ་ཡོད་པ་ཡིས། །ཉམ་ང་བ་དག་ཇི་བཞིན་དུ། །མཁས་པ་འཚོ་བའི་འཇིག་རྟེན་འདིར། །སྡིག་པ་དག་ནི་ཡོངས་སུ་སྤོང༌། །སྐུར་པ་མི་གདབ་གནོད་མི་བྱ། །སོ་སོར་ཐར་པའང་བསྡམ་པར་བྱ། །ཟས་ཀྱི་ཚོད་ཀྱང་རིག་པར་བྱ། །རབ་མཐའི་གནས་སུ་གནས་པར་བྱ། །ལྷག་པའི་སེམས་ལ་ཡང་དག་སྦྱོར། །འདི་ནི་སངས་རྒྱས་བསྟན་པ་ཡིན། །ཞེས་བྱ་བའོ། །དེ་ལ། མིག་ལྡན་འགྲོ་བ་ཡོད་པ་ཡིས། །ཉམ་ང་བ་དག་ཇི་བཞིན་དུ་དུ། །ཞེས་བྱ་བ་ནི་ཇི་ལྟར་མི་མིག་དང་ལྡན་པ་ལོང་བ་མ་ཡིན་པ་འགྲོ་བ་ཡོད་པ་ཤེས་པས་ངམ་གྲོག་དང༌། ཚེར་མ་དང༌། སྡིག་སྤྲུལ་ལ་སོགས་པ་ཉམ་ང་བ་སྡུག་བསྔལ་གྱི་རྒྱུར་གྱུར་པའི་གནས་མི་མཉམ་པ་དག་ཡོངས་སུ་སྤོང་བར་བྱེད་པ་དེ་བཞིན་དུ། མཁས་པས་འཚོ་བའི་འཇིག་རྟེན་འདིར། །སྡིག་པ་དག་ནི་ཡོངས་སུ་སྤོང༌། །ཞེས་བྱ་བ་གསུངས་ཏེ། མཁས་པ་བློ་དང་ལྡན་པ་ཡང་འཚོ་བའི་འཇིག་རྟེན་འཁོར་བ་འདི་ན་སྡིག་པ་གང་དག་ཡིན་པ་དེ་དག་མྱུར་དུ་སྤོང་བར་བྱེད་དོ། །ཇི་ལྟར་སྡིག་པ་དེ་དག་ཡོངས་སུ་སྤང་བར་བྱ་ཞེ་ན། དེའི་ཕྱིར། སྐུར་པ་མི་གདབ་
གནོད་མི་བྱ། །ཞེས་བྱ་བ་ལ་སོགས་པ་གསུངས་ཏེ། སྐུར་པ་མི་གདབ་ཅེས་བྱ་བ་ནི་གཞན་ལ་ཡང་དག་པ་དང༌། ཡང་དག་པ་མ་ཡིན་པ་དང༌། བྱུང་བས་སྐུར་པ་མི་གདབ་པའོ། །གནོད་མི་བྱ་བ་ནི་གཞན་ལ་རྡེག་པ་དང་ཚིག་རྩུབ་པོ་ལ་སོགས་པས་གནོད་པར་མི་བྱ་བའོ། །སོ་སོར་ཐར་པའང་བསྡམ་པར་བྱ། །ཞེས་བྱ་བ་ལ། སོ་སོར་ཐར་པ་ཞེས་བྱ་བ་ནི་སྲོག་གཅོད་པ་དང༌། མ་བྱིན་པར་ལེན་པ་དང༌། མི་ཚངས་པར་སྤྱོད་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་འཁྱལ་པ་དང༌། ངག་རྩུབ་པོ་དག་སྤངས་པའི་སྔོམ་པའི་རིས་བདུན་པོ་དག་གོ །དེ་བསྡམ་པར་བྱ་བ་ནི་ཡོངས་སུ་བསྲུང་བར་བྱ་སྟེ། དེ་བཟློག་པའི་མཚན་ཉིད་དང༌། སྤྱད་པའི་མཚན་ཉིད་རྣམ་པ་གཉིས་ཀྱིས་ཚུལ་ཁྲིམས་ཀྱི་བསླབ་པའི་ཚུལ་ཁྲིམས་བསྟན་པར་བྱའོ། །ཟས་ཀྱི་ཚོད་ཀྱང་རིག་པར་བྱ། །ཞེས་བྱ་བ་ནི་འདི་ལྟར་དགེ་སློང་རྣམས་ཀྱིས་ཟས་རུང་བ་འདི་ལ་ཟས་ཀྱི་ཚོད་ཀྱང་ཤེས་པར་བྱ་སྟེ། ཇི་ཙམ་གྱིས་ལུས་ལྕི་བ་དང་རྨྱ་བར་མི་འགྱུར་བ་དེ་ཙམ་གྱི་ཚོད་ཡོངས་སུ་ཤེས་པར་བྱ་བའོ། །རབ་མཐའི་གནས་སུ་གནས་པར་བྱ། །ཞེས་བྱ་བ་ནི་རབ་ཀྱི་མཐར་གྱུར་པའི་ངས་དབེན་པར་གནས་པར་བྱ་སྟེ། འདིས་ནི་ལུས་དང་ཡུལ་ལེགས་པར་མཐུན་པ་དག་གི་ལམ་བསྒོམ་པའི་ཚོགས་བསྟན་པར་ཤེས་པར་བྱ་བའོ། །ལྷག་པའི་སེམས་ལ་ཡང་དག་སྦྱོར། །ཞེས་བྱ་བ་ལ། ལྷག་པའི་སེམས་ཞེས་བྱ་བ་ནི་སེམས་ཡོངས་སུ་སྦྱོང་བར་བྱེད་པ་སྟེ། གང་གིས་འདོད་ཆགས་ཀྱི་སྒྲིབ་པ་དང་གཏི་མུག་གི་སྒྲིབ་པ་ལས་སེམས་རྣམ་པར་སྦྱོང་བ་སྟེ། དེ་ཡང་ཟག་པ་དང་བཅས་པ་དང་ཟག་པ་མེད་པའི་བསམ་གཏན་ནོ། །དེ་ལ་ཡང་དག་པར་སྦྱོར་བ་ནི་ཡང་དག་པའི་རྣལ་འབྱོར་དུ་བྱ་བ་སྟེ། འདིས་ནི་ལྷག་པའི་སེམས་ཀྱི་བསླབ་པ་དང༌། ལྷག་པའི་ཤེས་རབ་ཀྱི་བསླབ་པ་བསྟན་པར་བྱའོ། །འདི་ནི་སངས་རྒྱས་བསྟན་པ་ཡིན། །ཞེས་བྱ་བ་ནི་དེ་བཞིན་གཤེགས་པས་མདོར་བསྟན་པ་འདི་ནི་ཚོགས་དང་བཅས་པའི་ལམ་བསྟན་པ་ཡིན་ཏེ། དེ་ཉིད་སངས་རྒྱས་བསྟན་པ་ཡིན་ནོ་ཞེས་བྱ་བའི་ཐ་ཚིག་གོ །བཅོམ་ལྡན་འདས་དེ་བཞིན་གཤེགས་པ་ཐམས་ཅད་སྐྱོབ་ཀྱི་སློབ་མ་རྣམས་ནི་ཉེས་བྱས་ཆུང་བ་ཡིན་ཏེ། འདི་ལྟར་ཁྱིམ་པའི་སྐྱེ་བོ་
དང་འགྲོགས་པར་དགའ་བ་ཙམ་ཞིག་ཡོད་པས་དེ་དག་གི་ཉེས་པ་དེ་ཡོངས་སུ་སྤང་བའི་ཕྱིར་བཅོམ་ལྡན་འདས་དེས་སོ་སོར་ཐར་པའི་མདོ་འདི་ལྟར་བསྡུས་ཏེ། ཟླ་བ་ཕྱེད་ཕྱེད་ཅིང་བཏོན་པར་གྱུར་ཏེ། ཇི་ལྟར་བུང་བ་མེ་ཏོག་ལས། །ཁ་དོག་དྲི་ལ་མི་གནོད་པར། །ཁུ་བ་གཞིབས་ནས་འཕུར་བ་ལྟར། །དེ་བཞིན་ཐུབ་པ་གྲོང་དུ་རྒྱུ། །ཞེས་བྱ་བའོ། །དེ་ལ་སྲོག་ཆགས་བུང་བ་མེ་ཏོག་ལས་ཁ་དོག་དང་དྲི་ལ་མི་གནོད་པར་ཁུ་བ་གཞིབས་ཏེ་འཕུར་བ་དེ་བཞིན་དུ་ཐུབ་པ་རབ་ཏུ་བྱུང་བ་བསོད་སྙོམས་ཀྱི་ཕྱིར་གྲོང་དུ་རྒྱུ་བ་ཡང་གྲོང་ནས་ཁ་དོག་དང་དྲི་ལྟ་བུ་སེམས་དང་ཚུལ་ཁྲིམས་ལ་མི་གནོད་པར་ཁུ་བ་ལྟ་བུ་ཟས་བླངས་ཏེ་འགྲོ་བར་བྱའོ་ཞེས་བྱ་བའི་ཐ་ཚིག་གོ །བཅོམ་ལྡན་འདས་དེ་བཞིན་གཤེགས་པ་འཁོར་བ་འཇིག་གི་སློབ་མ་རྣམས་ནི་ཉེས་པ་ཆུང་བར་གྱུར་ཏེ། གཞན་གྱི་སྐྱོན་དང་ཡོན་ཏན་ལ་རྟོག་པ་ཙམ་ཞིག་ཡོད་པས་དེ་དག་གི་སྐྱོན་དེ་ཡོངས་སུ་སྤང་བའི་ཕྱིར། བཅོམ་ལྡན་འདས་དེས་སོ་སོར་ཐར་པའི་མདོ་འདི་ལྟར་མདོར་བསྡུས་ཏེ། ཟླ་བ་ཕྱེད་ཕྱེད་ཅིང་བཏོན་པར་གྱུར་ཏེ། བདག་གི་རིགས་དང་མི་རིགས་ལ། །བརྟག་པར་བྱ་སྟེ་གཞན་རྣམས་ཀྱི། །མི་མཐུན་པ་དང་གཞན་དག་གི །བྱས་དང་མ་བྱས་གཞན་ལ་མིན། །ཞེས་བྱ་བའོ། །དེ་ལ་བདག་གི་རིགས་དང་མི་རིག་ལ་བརྟག་པར་བྱ་བ་ཞེས་བྱ་བ་ནི། བདག་ཉིད་ཀྱི་རིགས་དང་མི་རིགས་པ་ལ་སོ་སོར་བརྟག་པར་བྱའོ། །གཞན་རྣམས་ཀྱི་མི་མཐུན་པའི་ཞེས་བྱ་བ་ནི་མི་རིགས་པའོ། །གཞན་དག་གི་བྱས་དང་མ་བྱས་རྣམས་ལ་མིན་ཞེས་བྱ་བ་ནི་གཞན་དག་གི་རྫོགས་པ་དང་མ་རྫོགས་པ་ལ་བརྟག་པར་མི་བྱ་བའོ། །འདི་སྐད་བསྟན་ཏེ་གཞན་དག་གི་ཡོན་ཏན་དང་སྐྱོན་ལ་རྟོག་པ་ལ་ནི་རྗེས་སུ་ཆགས་པ་དང་ཁོང་ཁྲོ་བ་འབྱུང་བས་དེའི་ཕྱིར་གཞན་ལ་རྟོག་པ་སྤོངས་ཏེ། །བདག་ཉིད་ལ་བརྟག་ཅིང་བདག་ཉིད་ལ་ལེགས་པར་འདོད་པར་བྱས་ནས་ཕྱིས་གཞན་ལ་བརྟག་པའི་སྐབས་ཡོད་པར་འགྱུར་རོ་ཞེས་བསྟན་ཏོ། །བཅོམ་ལྡན་འདས་དེ་བཞིན་གཤེགས་པ་གསེར་ཐུབ་ཀྱི་སློབ་མ་རྣམས་ནི་ཉེས་པ་ཆུང་བ་ཡིན་ཏེ། སྲེད་པ་དང་བཅས་པས་བསམ་གཏན་སྐྱེད་པར་བྱེད་པ་ཙམ་ཞིག་ཡོད་པས་དེ་དག་གི་ཉེས་པ་དེ་ཡོངས་སུ་སྤང་བའི་ཕྱིར་བཅོམ་ལྡན་འདས་དེས་སོ་སོར་ཐར་པའི་མདོ་འདི་
ལྟར་བསྡུས་ཏེ་ཟླ་བ་ཕྱེད་ཕྱེད་ཅིང་བཏོན་པར་གྱུར་ཏེ། ལྷག་པའི་སེམས་ལ་བག་བྱ་སྟེ། །ཐུབ་པའི་ཐུབ་གཞི་རྣམས་ལ་བསླབ། །ཉེར་ཞི་རྟག་ཏུ་དྲན་ལྡན་པའི། །སྐྱོབ་པ་མྱ་ངན་མེད་པ་ཡིན། །ཞེས་བྱ་བ་ཡིན་ནོ། །དེ་ལ་ལྷག་པའི་སེམས་ཞེས་བྱ་བ་ནི་བསམ་གཏན་བཞི་པོ་དག་གོ ། དེ་ལ་བག་བྱ་སྟེ་ཞེས་བྱ་བ་ནི་སྲིད་པ་དང་ང་རྒྱལ་དང་ལྟ་བ་མཆོག་ཏུ་འཛིན་པ་སྤངས་ཏེ་བག་གྱིས་ཤིག་ཅེས་བྱ་བའོ། །སྤང་བ་བསྟན་ནས་བླང་བ་བསྟན་པའི་ཕྱིར། །ཐུབ་པའི་ཐུབ་གཞི་རྣམས་ལ་བསླབ། །ཅེས་བྱ་བ་གསུངས་ཏེ། ཐུབ་པ་ཞེས་བྱ་བ་ནི་མཁྱེན་པ་དང་ལྡན་པ་སྟེ། ཡང་དང་ཡང་དུ་མཛད་པའི་ཕྱིར་ཐུབ་པ་སྟེ་སངས་རྒྱས་བཅོམ་ལྡན་འདས་སོ། །ཐུབ་པ་དེའི་ཐུབ་གཞི་ནི་འཕགས་པའི་བདེན་པ་བཞི་པོ་དག་སྟེ་གང་དག་གིས་ཐུབ་པ་བསྐྱེད་པའོ། །འདི་རྣམས་ལ་བསླབ་པ་ནི་མཆོག་ཏུ་བསླབ་ཅིང་ནན་ཏན་གྱིས་ཤིག་ཅེས་བྱ་བའི་ཐ་ཚིག་གོ །དེ་ལ་བསླབ་ན་ཅིར་འགྱུར་ཞེ་ན། འབྲས་བུ་བསྟན་པའི་ཕྱིར། ཉེར་ཞི་རྟག་ཏུ་དྲན་ལྡན་པའོ། །སྐྱོབ་པ་མྱ་ངན་མེད་པ་ཡིན། །ཞེས་བྱ་བ་གསུངས་ཏེ། ཉེ་བར་ཞི་བ་དང་རྟག་ཏུ་དྲན་པ་དང་ལྡན་པ་གཉིས་ཀྱིས་སྐྱོབ་པ་ཉིད་དུ་བསྟན་པར་ཤེས་པར་བྱའོ། །དེ་ལ་ཉེ་བར་ཞི་བ་ཞེས་བྱ་བ་ནི་མ་ཉམ་པར་གཞག་པ་སྟེ་ལུས་དང་ངག་གཉིས་ཀྱིས་བསྡམས་པའོ། །རྟག་ཏུ་དྲན་པ་དང་ལྡན་པ་ཞེས་བྱ་བ་ནི་རྟག་ཏུ་དྲན་པ་ཉེ་བར་གཞག་པའོ། །སྐྱོབ་པ་ཞེས་བྱ་བ་ནི་རང་གི་སེམས་རྗེས་སུ་སྲུང་བའོ། །མྱ་ངན་མེད་པ་ཡིན་ཞེས་བྱ་བ་འདིས་ནི་སྐྱེ་བ་ཟད་པ་བསྟན་ཏེ་མྱ་ངན་ལས་འདས་པ་ཡིན་པར་ཤེས་པར་བྱའོ།། བཅོམ་ལྡན་འདས་དེ་བཞིན་གཤེགས་པ་འོད་སྲུངས་ཀྱི་སློབ་མ་རྣམས་ནི་ཉེས་པ་ཆུང་བ་ཡིན་ནོ། །སྦྱིན་པ་ལ་གུས་པ་དང་དགྲ་མང་བར་ལྔ་བ་ཙམ་ཞིག་ཡོད་པས་དེ་དག་གི་ཉེས་པ་ཡོངས་སུ་སྤང་བའི་ཕྱིར། བཅོམ་ལྡན་འདས་དེས་མཐར་ཐུག་པའི་ཆོས་བསྟན་པས་སོ་སོར་ཐར་པའི་མདོ་འདི་ལྟར་བསྡུས་པས་ཟླ་བ་ཕྱེད་ཕྱེད་ཅིང་བཏོན་པར་གྱུར་ཏེ། སྦྱིན་པས་བསོད་ནམས་རབ་ཏུ་འཕེལ། །ལེགས་བསྡམས་དགྲ་སྩོགས་མི་འགྱུར་རོ། །དགེ་དང་ལྡན་པས་སྡིག་པ་སྤོངས། །ཉོན་མོངས་པ་ཟད་པས་མྱ་ངན་འདས། །ཞེས་བྱའོ་།དེ་ལ་སྦྱིན་པ་ཞེས་བྱ་བ་ནི་སྦྱིན་པ་བྱེད་པའི་མི་སྟེ། དེས་ནི་
ལོངས་སྤྱོད་ཀྱི་འབྲས་བུ་ཅན་གྱི་བསོད་ནམས་ཀྱི་ལས་རབ་ཏུ་འཕེལ་བར་འགྱུར་རོ། །ཚུལ་ཁྲིམས་ལེགས་པར་བསྡམས་པས་ནི་དགྲ་སྩོགས་པར་མི་འགྱུར་ཏེ། ཚུལ་ཁྲིམས་ཀྱི་དགྲའི་རྒྱུ་གསོད་པ་དང་རྐུ་བ་དང་བུད་མེད་ལ་ཆགས་པ་ལ་སྩོགས་པ་མི་སྐྱེད་པའི་ཕྱིར་རོ། །དགེ་དང་ལྡན་པ་ཞེས་བྱ་བ་ནི་བསམ་གཏན་བཞི་ཐོབ་པས་ཏེ། དེས་ནི་འདོད་པ་ན་སྤྱོད་པའི་སྡིག་པ་ཁོང་ཁྲོ་བ་དང༌། ཕྲག་དོག་དང་ཁྲོ་བ་ལ་སོགས་པ་རྣམ་པར་སྨིན་པ་མི་འདོད་པར་གྱུར་པ་དག་ཡོངས་སུ་སྤོང་བར་འགྱུར་རོ། །འཕགས་པའི་ལམ་གྱི་ཉོན་མོངས་པ་ཐམས་ཅད་ཡོངས་སུ་ཟད་པས་ནི་ཕུང་པོའི་ལྷག་མ་དང་བཅས་པ་དང་ལྷག་མ་མེད་པའི་མྱ་ངན་ལས་འདའ་བ་འཐོབ་པར་འགྱུར་རོ། །དེ་ལྟ་བས་ན་སྦྱིན་པ་ནི་འཁོར་བའི་འབྲས་བུ་ཅན་ཡིན་པས་དེ་ལ་གདུང་བར་མི་བྱ་བའི་དགྲ་མང་བ་ནི་སྡོམ་བརྩོན་དང་མི་མཐུན་པ་ཡིན་པས་དེ་མི་བྱ་བའི་ཐ་ཚིག་གོ །བཅོམ་ལྡན་འདས་དེ་བཞིན་གཤེགས་པ་ཤཱ་ཀྱ་ཐུབ་པའི་བསྟན་པ་ལ་ཆུ་བུར་མ་བྱུང་བའི་ཚེ་ན་དེའི་སློབ་མ་རྣམས་ཉེས་པ་ཆུང་བར་འགྱུར་བས། བཅོམ་ལྡན་འདས་ཀྱིས་དེ་དག་སོ་སོར་ཐར་པ་འདི་ལྟར་མདོར་བསྡུས་ཏེ་ཚིགས་སུ་བཅད་པ་གསུམ་གྱིས་སྟོན་པར་གྱུར་ཏེ། སྡིག་པ་ཐམས་ཅད་མི་བྱ་སྟེ། དགེ་བ་ཕུན་སུམ་ཚོགས་པར་བྱ། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡིན། །ལུས་ཀྱི་སྡོམ་པ་ལེགས་པ་སྟེ། །ངག་གི་སྡོམ་པ་ལེགས་པ་ཡིན། །ཡིད་ཀྱི་སྡོམ་པའང་ལེགས་པ་སྟེ། །ཐམས་ཅད་དུ་ནི་སྡོམ་པ་ལེགས། །ཀུན་དུ་བསྡམས་པའི་དགེ་སློང་ནི། །སྡུག་བསྔལ་ཀུན་ལས་རབ་ཏུ་འགྲོལ། །ངག་རྣམས་བསྲུང་ཞིང་ཡིད་ཀྱིས་རབ་བསྡམས་ཏེ། །ལུས་ཀྱིས་མི་དགེ་བ་དག་མི་བྱེད་ཅིང༌། །ལས་ལམ་གསུམ་པོ་འདི་དག་རབ་སྦྱངས་ན། །དྲང་སྲོང་གསུངས་པའི་ལམ་ནི་ཐོབ་པར་འགྱུར། །ཞེས་བྱ་བའོ། །དེ་ལ།སྡིག་པ་ཐམས་ཅད་མི་བྱ་སྟེ། །ཞེས་བྱ་བ་འདི་ནི་ལྷག་པ་ཚུལ་ཁྲིམས་ཀྱི་བསླབ་པ་བསྟན་ཏོ། །དགེ་བ་ཕུན་སུམ་ཚོགས་པར་བྱ། །ཞེས་བྱ་བ་འདིས་ནི་ལྷག་པ་ཤེས་རབ་ཀྱི་བསླབ་པ་བསྟན་ཏེ། ཉོན་མོངས་པ་ཐམས་ཅད་སྤངས་པ་ནི་དོན་དམ་པའི་དགེ་བ་ཡིན་པའི་ཕྱིར་རོ། །རང་གི་སེམས་ནི་ཡོངས་སུ་གདུལ། །ཞེས་བྱ་བ་འདིས་ནི་ལྷག་པ་སེམས་ཀྱི་བསླབ་པ་བསྟན་ཏོ། །ལུས་ཀྱི་སྡོམ་པ་ལེགས་པ་སྟེ། །ཞེས་བྱ་བ་ལ་སོགས་
པ་རྣམ་པ་བཞིས་ནི་ཚུལ་ཁྲིམས་ཕུན་སུམ་ཚོགས་པ་བསྟན་ཏོ། །སྡུག་བསྔལ་ཀུན་ལས་རྣམ་པར་འགྲོལ། །ཞེས་བྱ་བ་འདིས་ནི་ཚུལ་ཁྲིམས་ཀྱི་སྐྱེས་བུ་བྱེད་པའི་འབྲས་བུ་ཐག་རིང་བ་བསྟན་ཏོ། །ཇི་ལྟར་ན་ཚུལ་ཁྲིམས་ཀྱིས་སྡུག་བསྔལ་ཀུན་ལས་རབ་ཏུ་འགྲོལ་བར་འགྱུར་ཞེ་ན་དེའི་ཕྱིར། ངག་རྣམས་བསྲུང་ཞིང་ཡིད་ཀྱིས་རབ་བསྡམས་ཏེ། །ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་ཚུལ་ཁྲིམས་ཕུན་སུམ་ཚོགས་པས་ངན་སོང་གི་སྒོ་སྦྱོངས་ཤིང་འཕགས་པའི་ལམ་ཐོབ་པ་དེས་སྡུག་བསྔལ་ཐམས་ཅད་ལས་རབ་ཏུ་འགྲོལ་བ་དེའི་ཕྱིར། འདི་ནི་ཚུལ་ཁྲིམས་ཀྱི་སྐྱེས་བུ་བྱེད་པའི་འབྲས་བུ་ཐག་རིང་བ་ཡིན་ནོ། །དེ་ལྟར་མདོར་བསྡུས་པ་དང་རྒྱས་པར་བསྟན་པ་དག་གིས་སངས་རྒྱས་བདུན་གྱི་སོ་སོར་ཐར་པ་གདོན་པ་བསྟན་ནས། ད་ནི་མཇུག་བསྡུ་བའི་སྒོ་ནས་ནན་ཏན་བྱ་བ་བསྟན་པའི་ཕྱིར། སངས་རྒྱས་རྣམ་གཟིགས་བཅུག་ཏོར་ཐམས་ཅད་སྐྱོབ། །འཁོར་བ་འཇིག་དང་གསེར་ཐུབ་འོད་སྲུངས་དང༌། །ཤཱཀྱ་ཐུབ་པ་གཽ་ཏམ་ལྷ་ཡི་ལྷ། །མི་འདུལ་ཁ་ལོ་སྒྱུར་བ་བླ་ན་མེད། །འདི་ལ་གུས་དང་བཅས་གྱུར་པས། །འདུས་མ་བྱས་པ་ཐོབ་པར་གྱིས། །འཇིག་རྟེན་མགོན་པོ་སྐྱོབ་པ་མཆོག །སངས་རྒྱས་དཔའ་བོ་བདུན་པོ་དག །གྲགས་ལྡན་རྣམས་ཀྱི་སོ་སོར་ཐར། །འདི་ནི་རབ་ཏུ་རྒྱས་པར་སྟོན། །འདི་ལ་སངས་རྒྱས་རྣམས་དང་གང༌། །སངས་རྒྱས་ཉན་ཐོས་རྣམས་ཀྱང་གུས། །འདི་ལ་གུས་དང་བཅས་གྱུར་པས། །འདུས་མ་བྱས་པ་ཐོབ་པར་གྱིས། །ཞེས་བྱ་བ་ཚིགས་སུ་བཅད་པ་གསུམ་ཡང་དག་པར་སྡུད་པར་བྱེད་པས་སྨྲས་སོ། །དེ་ལ་རྣམ་གཟིགས་ཞེས་བྱ་བ་ནི་རྣམ་པར་གཟིགས་ཤིང་རྟོགས་པའི་མཁྱེན་པ་ནི་རྣམ་པར་གཟིགས་པའོ། །དེ་གང་ལ་མངའ་བ་ནི་རྣམ་པར་གཟིགས་པ་དང་ལྡན་པ་སྟེ། མཁྱེན་པ་དང་ལྡན་པ་ཞེས་བྱ་བའི་ཐ་ཚིག་གོ །ལྷའི་ལྷ་ཞེས་བྱ་བ་ནི་སྙིགས་མ་ལྔ་ཤས་ཆེ་བའི་དུས་ན་སེམས་ཅན་ལ་ཕན་པ་རྫོགས་པར་མཛད་པའི་ཕྱིར་རོ། །བླ་ན་མེད་པ་ཞེས་བྱ་བ་ནི་དེ་བཞིན་གཤེགས་པ་སྐར་རྒྱལ་ལ་བསྟོད་པ་ནི་བརྩོན་འགྲུས་ཀྱིས་བསྐལ་པ་དགུ་བཅུ་འདུམས་པར་མཛད་པའི་ཕྱིར་རོ། །འཇིག་རྟེན་མགོན་པོ་ཞེས་བྱ་བ་ནི་ཁམས་གསུམ་པའི་མགོན་པོ་སྟེ་ཕན་པ་དཔག་ཏུ་མེད་པ་མཛད་པས་ཡོངས་སུ་སྐྱོབ་པར་མཛད་པའི་ཕྱིར་རོ། །སྐྱོབ་པ་ཞེས་བྱ་བ་ནི་མངའ་དབང་གི་
ཆོས་ཐམས་ཅད་ལ་དབང་ཕྱུག་བརྙེས་པའི་ཕྱིར་རམ། གདུལ་བའི་སྐྱེ་བོ་དུས་ལས་མི་ཡོལ་བས་ཡོངས་སུ་སྐྱོབ་པར་མཛད་པའི་ཕྱིར་རོ། །མཆོག་ཅེས་བྱ་བ་ནི་གཙོ་བོ་སྟེ་བླ་ན་མེད་པའི་མཁྱེན་པ་དང་ལྡན་པའི་ཕྱིར་རམ། རྗེས་སུ་མཐུན་པའི་ཕན་པ་མཛད་པ་ཡོངས་སུ་མཁྱེན་པའི་ཕྱིར་རོ། །སངས་རྒྱས་དཔའ་བོ་ཞེས་བྱ་བ་ནི་ཡེ་ཤེས་ལ་སོགས་པ་མི་དག་གི་འགྲོ་བ་ཐམས་ཅད་པས་དཔའ་བའི་སངས་རྒྱས་ཞེས་བྱ་བའི་ཐ་ཚིག་གོ །གྲགས་ལྡན་ཞེས་བྱ་བ་ནི་སྙན་པ་དང་ལྡན་པ་སྟེ། འཇིག་རྟེན་གསུམ་ལས་ཤིན་ཏུ་འདས་པའི་སྙན་པའི་ཚོགས་དང་ལྡན་པ་ཞེས་བྱ་བའི་ཐ་ཚིག་གོ །རྒྱས་པར་སྟོན་ཞེས་བྱ་བ་ནི་མདོར་བསྡུས་པའི་ཚུལ་རངས་པར་སྟོན་པའོ། །འདུས་མ་བྱས་པ་ཐོབ་པར་གྱིས་ཞེས་བྱ་བ་ནི་མྱ་ངན་ལས་འདས་པ་འདུས་མ་བྱས་པ་ཐོབ་པར་གྱིས་ཤིག་ཅེས་བྱ་བའི་ཐ་ཚིག་གོ །ཇི་ལྟར་འདི་ལ་གུས་པ་དང་བཅས་པས་འདུས་མ་བྱས་པ་ཐོབ་པར་བྱ་ཞེ་ན་དེའི་ཕྱིར། །བརྩམ་པར་བྱ་ཞིང་འབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། འདམ་བུའི་ཁྱིམ་ལ་ལྒང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་གྱུར་པ། །སྐྱེ་བོའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཞེས་བྱ་བ་གསུངས་ཏེ། འབྱུང་བར་བྱ་བ་ནི་དགོན་པ་ལ་སོགས་པ་བདེན་པར་སོང་ཤིག་ཅེས་བྱ་བའི་ཐ་ཚིག་གོ །འདུལ་བ་རྣམ་པར་འབྱེད་པའི་ཚིག་རྣམ་པར་བཤད་པ་སློབ་དཔོན་དུལ་བའི་ལྷས་ཉེ་བར་སྦྱར་བ་ལས་ཡང་དག་པར་རྫོགས་པའི་སངས་རྒྱས་བདུན་གྱི་སོ་སོར་ཐར་པ་བཏོན་པ་རྫོགས་སོ།། །།འདུལ་བ་རྣམ་པར་འབྱེད་པའི་ཚིག་རྣམ་པར་བཤད་པ་སློབ་དཔོན་དུལ་བའི་ལྷས་ཉེ་བར་སྦྱར་བ་རྫོགས་སོ།། །།དབང་ཕྱུག་དམ་པའི་མངའ་བདག་དཔལ་ལྷ་བཙན་པོའི་བཀའ་ལུང་གིས་འཕགས་པ་གཞི་ཐམས་ཅད་ཡོད་པར་སྨྲ་བའི་འདུལ་བ་འཛིན་པ་བྱེ་བྲག་ཏུ་སྨྲ་བའི་སློབ་དཔོན་ཛི་ན་མི་ཏྲ་དང༌། ཞུ་ཆེན་གྱི་ལོ་ཙཱ་བ་བནྡེ་ཀླུའི་རྒྱལ་མཚན་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།འདི་ལ་ཤློ་ཀ་ནི་ལྔ་སྟོང་ཚིག་བརྒྱ་ཡོད། བམ་པོ་ནི་བཅུ་བདུན་བྱས་སོ།། །།