འདུལ་བའི་མདོའི་རྒྱ་ཆེར་འགྲེལ་པ།
བམ་པོ་སུམ་ཅུ་དྲུག་པ། ལྟུང་བྱེད་གཞན་བྱེད་པའི་ཚུལ་གཞན་བརྗོད་པར་བྱ་སྟེ། རྒྱལ་པོའི་ཕོ་བྲང་གི་གནས་ལ་ཡང་ངོ་ཞེས་བྱ་བ་ནི། འབྲེལ་པ་ཉིད་ལ་ཞེས་བྱ་བར་སྦྱར་ཏེ། གལ་ཏེ་དགེ་སློང་ནུབ་མོ་རྒྱལ་པོའི་ཕོ་བྲང་གི་གནས་སུ་ལུས་ཀྱིས་འབྲེལ་པར་གྱུར་ཅིང་དེར་འདུ་ཤེས་པར་ཡང་མ་གྱུར་ན་དེའི་ཚེ་ཁ་ན་མཐོ་བ་འདིར་འགྱུར་རོ། །འདིར་གཞུང་ནི་དགེ་སློང་ནམ་མ་ལངས་པ་ལ་ནམ་མ་ལངས་པར་འདུ་ཤེས་བཞིན་དུ་རྒྱལ་པོའི་ཕོ་བྲང་གི་སྒོའི་གཏན་པ་ལས་འདའ་བར་བྱེད་ན་ལྟུང་བྱེད་དོ་ཞེས་གསུངས་པ་ཡིན་ནོ། །གྲོང་ཁྱེར་དང་ནི་ཉེས་བྱས་སོ་ཞེས་བྱ་བ་ནི། གྲོང་ཁྱེར་གྱི་གནས་དང་འབྲེལ་པ་ཉིད་ལ་ནི་སྦྱོར་བ་ལས་བྱུང་བའི་ཉེས་བྱས་སུ་འགྱུར་བའོ། །ཅི་གྲོང་ཁྱེར་དང་འབྲེལ་པ་ཉིད་ལ་བྱེ་བྲག་མེད་པར་ཉེས་བྱས་འདིར་འགྱུར་རམ་ཞེ་ན་དེའི་ཕྱིར། གལ་ཏེ་དེའི་དོན་ཉིད་ཡིན་ནའོ་ཞེས་བྱ་བ་སྨྲས་ཏེ། འབྲེལ་པ་གཉིས་པོ་བཙུན་མོའི་འཁོར་དང་རྒྱལ་པོའི་ཕོ་བྲང་དུ་འཇུག་པ་ཞེས་བྱ་བ་གང་ཡིན་པ་དེ་གཉིས་ལས་གལ་ཏེ་གཅིག་དང་འབྲེལ་པར་བྱ་བའི་དོན་གྱི་ཕྱིར་གྲོང་ཁྱེར་དེ་དག་དང་འབྲེལ་པར་
གྱུར་ན་དེའི་ཚེ་ཉེས་བྱས་སུ་འགྱུར་རོ། །འདི་སྐད་བསྟན་ཏེ། གལ་ཏེ་བཙུན་མོའི་འཁོར་གྱི་ནང་དུ་འཇུག་པའི་ཕྱིར་རམ། རྒྱལ་པོའི་ཕོ་བྲང་དུ་འཇུག་པའི་ཕྱིར་གྲོང་ཁྱེར་གྱི་སྒོར་འཇུག་ན་དེའི་ཚེ་ཉིས་བྱས་སོ། །ཅི་སྟེ་དགོས་པ་གཞན་གྱི་ཕྱིར་འཇུག་ན་དེའི་ཚེ་ལྟུང་བ་མེད་དོ། །དེ་བཞིན་དུ་རྒྱལ་པོའི་ཕོ་བྲང་ལས་གཞན་པའི་ཁྱིམ་དུ་སྐྱ་རེངས་མ་ཤར་བར་འཇུག་ན་ཡང་ཉེས་བྱས་སོ། །འདིར་གཞུང་ནི་བཙུན་པ་རེ་ཞིག་དགེ་སློང་རྒྱལ་པོའི་ཕོ་བྲང་མ་གཏོགས་པ་དེ་ལས་གཞན་པའི་ཁྱིམ་དག་ཏུ་དགུང་མ་སངས་སྐྱ་རེངས་མ་ཤར་བར་དབེན་པའི་མཐའི་སྒོ་གཏན་ཚུན་ཆད་ལས་འདའ་བར་བགྱིད་ན་ལྟུང་བ་ཅིར་འགྱུར་ཉེས་བྱས་སོ་ཞེས་གསུངས་པ་ཡིན་ནོ། །དབེན་པ་ཞེས་བྱ་བ་ནི་རྒྱུན་ལུགས་མེད་ཅིང་གཞན་དང་ཐུན་མོང་མ་ཡིན་པའོ། །མཐའ་ཞེས་བྱ་བ་ནི་རྒྱལ་པོའི་ཕོ་བྲང་དང་ཉེ་བ་སྟེ། དབེན་པའི་མཐའ་ནི་བཙུན་མོའི་འཁོར་གྱི་སྒོ་གཏན་ལ་བྱའོ། །འདི་ལ་དུས་མ་ཡིན་པར་འགྲོ་བའི་ལྟུང་བྱེད་ཀྱང་སྲིད་པར་བསྟན་པའི་ཕྱིར། འདི་ལ་ཅིག་ཤོས་ཀྱི་ཁ་ན་མ་ཐོ་བ་དེ་ཡང་ངོ་ཞེས་བྱ་བ་སྨྲས་ཏེ། རྒྱལ་པོའི་ཕོ་བྲང་ལ་སོགས་པར་སྐྱ་རེངས་དང་པོ་འཆར་བའི་མདུན་རོལ་དུ་དགེ་སློང་ལ་སོགས་པ་ལ་མ་སྨྲས་པར་འཇུག་པ་འདི་ཅིག་ཤོས་ཀྱི་ཁ་ན་མ་ཐོ་བ་དེ་
ཡང་ཡོད་དེ་དུས་མ་ཡིན་པར་འགྲོ་བའི་ལྟུང་བྱེད་ཀྱང་ཡོད་དོ་ཞེས་བྱ་བའི་ཐ་ཚིག་གོ །ཅི་བཙུན་མོའི་འཁོར་དང་རྒྱལ་པོའི་ཕོ་བྲང་ཞེས་བྱ་བ་སྔ་མ་དེ་གཉིས་དང་གྲོང་ཁྱེར་དང་འབྲེལ་པར་དེའི་དོན་ཉིད་དུ་འགྲོ་བ་གང་ཡང་རུང་བ་ལ་ཅིག་ཤོས་ཀྱི་ཁ་ན་མ་ཐོ་བ་དེ་ཡང་ཡོད་དམ་ཞེན་དེའི་ཕྱིར། གལ་ཏེ་རྒྱལ་པོ་དང་བཙུན་མོ་དང་གཞོན་ནུ་དང་ཞང་བློན་དང་བར་ཆད་དང་གདུལ་བའི་དབང་གིས་མ་ཡིན་པ་ལའོ་ཞེས་བྱ་བ་སྨྲས་ཏེ། འདིར་ལུང་ནི་རྒྱལ་པོས་བོས་པ་དང་བཙུན་མོ་དང་གཞོན་དུ་དང་ཞང་བློན་དག་བར་ཆད་བརྒྱད་པོ་དག་ལས་གང་ཡང་རུང་བ་ཉེ་བར་གནས་པར་གྱུར་ན་ཉེས་པ་མེད་དོ་ཞེས་གསུངས་པ་དང༌། འདུལ་བའི་དབང་གིས་འགྲོ་བའི་ལུང་ནི་འདིར་ཡང་འཕགས་པ་ཤཱ་རིའི་བུ་བྱུང་བའི་མཐའ་ལས་རྗེས་སུ་གནང་བ་ཡིན་ནོ། །མ་ཟླུགས་པར་རྒྱལ་པོའི་ཕོ་བྲང་དུ་འཇུག་པར་མི་བྱའོ་ཞེས་བྱ་བ་ནི། རྒྱལ་པོའི་ཕོ་བྲང་གི་ནང་དུ་མ་ཟླུགས་པར་གྱ་ཚོམ་དུ་འཇུག་པར་མི་བྱའོ།། འདིར་གཞུང་ནི་ཁྱོད་ཀྱིས་གྱ་ཚོམ་དུ་རྒྱལ་པོའི་ཕོ་བྲང་དུ་འཇུག་པར་མི་བྱ་བར་སྒོར་བསྡད་ནས། ཤཱཀྱའི་དགེ་སློང་འོངས་སོ་ཞེས་བརྗོད་པར་བྱ་ཞིང༌། གལ་ཏེ་སྤྱོན་ཅིག་ཅེས་ཟེར་ན་འཇུག་པར་བྱའོ་ཞེས་གསུངས་པ་ཡིན་ནོ། །རྒྱལ་པོའི་ཕོ་བྲང་དུ་ནུབ་མོ་འགྲོ་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་བསླབ་པའི་གཞིའི་དངོས་པོ་ལ་ཁྱད་དུ་གསོད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། སོ་སོར་ཐར་པའི་མདོ་གདོན་པ་འདོན་པའི་ཚེ་དེ་ལ་ལན་གཉིས་ཉམས་སུ་མྱོང་ཞིང་ཡིད་རྨོངས་པ་མ་ཡིན་པས་འདི་ལ་ཆོས་འདི་ཡོད་པར་བདག་གིས་ད་གདོད་ཤེས་སོ་ཞེས་ཟེར་བ་དེ་ལའོ་ཞེས་བྱ་བ་སྨྲས་ཏེ། བསླབ་པའི་གཞི་འདིའི་དངོས་པོ་ལ་ཁྱད་དུ་གསོད་པ་ཞེས་བྱ་བ་ནི་བསླབ་པའི་གཞིའི་དངོས་པོ་ཡོད་པ་ཁོ་ན་ལ་འདི་སྐད་ཅེས་ཚེ་དང་ལྡན་པ་དག་འདི་ལྟར་ཆོས་འདི་ཡང་མདོའི་ནང་དུ་འདུས་པར་བདག་གིས་ད་གདོད་ཤེས་སོ་ཞེས་ལོག་པར་བསྒྲུབ་པ་ཡིན་ནོ། །དེ་ལ་ཞེ་སྡང་གིས་ལོག་པར་བསྒྲུབས་ན་ནི་མ་གུས་པའི་ཚུལ་གྱིས་ལྟུང་བྱེད་ཀྱི་སྐབས་སུ་སྔར་ལྟུང་བ་བཅས་པ་ཉིད་དུ་འགྱུར་རོ། །བསླབ་པའི་གཞིའི་དངོས་པོ་ལ་ཁྱད་དུ་གསོད་པའི་ལྟུང་བ་བཅས་པ་ནི་ད་འདིར་རྣམ་པར་དབྱེ་བར་བྱའོ། །སོ་སོར་ཐར་པའི་མདོ་གདོན་པ་འདོན་པའི་
ཚེ་ཞེས་བྱ་བ་ནི་གསོ་སྦྱོང་གི་ལས་ཀྱི་ཚེ་སོ་སོར་ཐར་པའི་མདོ་གདོན་པ་འདོན་པ་ན་བསླབ་པའི་གཞིའི་དངོས་པོ་ལ་ཁྱད་དུ་གསོད་ན་ལྟུང་བྱེད་དུ་འགྱུར་གྱི་དུས་གཞན་གྱི་ཚེ་བརྗོད་ན་ནི་ཉེས་བྱས་སུ་འགྱུར་བའོ། །འདིར་སོ་སོར་ཐར་པའི་མདོ་གདོན་པ་འདོན་པ་ལ་ལོག་པར་བསྒྲུབ་པ་ནི་རྣམ་པ་གསུམ་སྣང་སྟེ། ཁྱད་དུ་གསོད་པ་དང་སྤོང་བ་དང་བསླབ་པའི་གཞིའི་དངོས་པོ་ལ་ཁྱད་དུ་གསོད་པའོ། །དེ་ལ་ཁྱད་དུ་གསོད་པ་ནི་སྔར་ཁྱད་དུ་གསོད་པའི་ལྟུང་བྱེད་བསྟན་པའི་སྐབས་སུ་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པ་ན་བསླབ་པ་ཁྱད་དུ་བསད་ནས་ཚེ་དང་ལྡན་པ་དག་གང་དགེ་སློང་རྣམས་འགྱོད་པ་དང༌། ཞུམ་པ་དང་བག་འཁུམས་པ་དང་གནོད་པ་དང་ཡིད་ལ་གཅགས་པར་འགྱུར་བ་བསླབ་པའི་གཞི་ཕྲན་ཚེགས་རབ་ཏུ་ཕྲ་བ་འདི་དག་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་ན་འདོན་ཅི་དགོས་ཞེས་དེ་སྐད་ཟེར་ན་ལྟུང་བྱེད་དོ་ཞེས་བསྟན་པ་ཡིན་ནོ། །སྤོང་བ་ནི་སྔར་བསླབ་པ་ལ་ཉེ་བར་འཇོག་པ་སྤོང་བའི་ལྟུང་བྱེད་བསྟན་པའི་སྐབས་སུ་དགེ་སློང་རྣམས་ཀྱིས་ཚེ་དང་ལྡན་པ་བསླབ་པ་འདི་ལ་སློབས་ཤིག་ཅེས་བསྒོ་ན་དེ་ལ་འདི་སྐད་ཅེས་བདག་ནི་དགེ་སློང་མདོ་སྡེ་འཛིན་པ་དང་འདུལ་བ་འཛིན་པ་དང་མ་མོ་འཛིན་པ་རྣམས་ལ་འདྲིའི་བར་དུ་བྱིས་པ་གླེན་པ་མི་གསལ་བ་མི་མཁས་པ་ཁྱེད་ཅག་གི་ཚིག་གིས་བསླབ་པ་འདི་ལ་མི་སློབ་བོ་ཞེས་དེ་སྐད་ཟེར་ན་ལྟུང་བྱེད་དོ་ཞེས་བསྟན་པ་ཡིན་ནོ། །བསླབ་པའི་གཞིའི་དངོས་པོ་ལ་ཁྱད་དུ་གསོད་པ་ནི་སྐབས་འདིས་སྟོན་ཏོ། །དེ་ལན་གཉིས་ཉམས་སུ་མྱོང་ཞིང་ཞེས་བྱ་བ་ནི། གང་གིས་སོ་སོར་ཐར་པའི་མདོ་གདོན་པ་འདོན་པ་ལན་གཉིས་ཉམས་སུ་མྱོང་བ་དེ་ནི་དེ་ལན་གཉིས་ཉམས་སུ་མྱོང་བ་སྟེ། དེ་ལན་གཉིས་ཉམས་སུ་མྱོང་བའི་དགེ་སློང་དེ་སྐད་ཟེར་བ་དེ་ལ་ཁ་ན་མ་ཐོ་བ་འདིར་འགྱུར་རོ། །ལན་གཉིས་ཉམས་སུ་མ་མྱོང་བ་ལ་ནི་ཉེས་བྱས་ཁོ་ནར་འགྱུར་ཏེ། འདིར་གཞུང་ནི་གལ་ཏེ་དགེ་སློང་རྣམས་ཀྱིས་ཀྱང་ཚེ་དང་ལྡན་པ་འདི་སྔོན་གསོ་སྦྱོང་གི་ལས་གཉིས་སམ་གསུམ་གྱི་ཚེ་འདུག་པར་ཤེས་ན་ལན་མང་དུ་ལྟ་ཅི་སྨོས་ཞེས་གསུངས་པ་ཡིན་ནོ། །ཡིད་རྨོངས་པ་མ་ཡིན་པས་ཞེས་བྱ་བ་ནི། ཡིད་རྨོངས་པས་དེ་སྐད་སྨྲས་པ་ལ་ནི་ལྟུང་བ་མེད་དོ། །འདིར་གཞུང་ནི་ལམ་གོལ་བར་རྒས་པ་མི་ཤེས་པ་ཡང་དག་པ་ཉིད་ལ་ནི་ལྟུང་བ་མེད་དོ་
ཞེས་གསུངས་པ་ཡིན་ནོ། །དེའི་ཕྱིར་ཡིད་རྨོངས་པ་མ་ཡིན་པས་བཞད་གད་ཙམ་གྱི་བསམ་པས་ཀྱང་འདི་ལ་ཆོས་འདི་ཡོད་པར་བདག་གིས་གཟོད་ཤེས་སོ་ཞེས་ཟེར་ཞིང་སོ་སོར་ཐར་པའི་མདོ་གདོན་པ་འདི་ལ་ཆོས་འདི་ཡང་ཡོད་ཅིང་བསླབ་པའི་གཞི་འདི་ཡང་ཡོད་པར་བདག་གིས་ད་གཟོད་ཤེས་སོ་ཞེས་ཟེར་བདེ་ནི་བསླབ་པའི་གཞིའི་དངོས་པོ་ལ་ཁྱད་དུ་གསོད་པ་ཡིན་ནོ། །དེ་སྐད་ཟེར་བའི་དགེ་སློང་དེ་ལ་ལྟུང་བྱེད་དུ་འགྱུར་ལ། གཞན་གྱི་ཚེ་བརྗོད་ན་ནི་ཉེས་བྱས་སོ། །བསླབ་པའི་གཞི་འདྲལ་བ་ཐམས་ཅད་ལ་མ་གུས་པའི་སེམས་བསྐྱེད་པ་དེ་ལ་ཡང་ཉེས་བྱས་སོ། །གལ་ཏེ་སངས་རྒྱས་བཅོམ་ལྡན་འདས་ལ་ཡང་མ་གུས་པའི་སེམས་བསྐྱེད་ན་དེའི་ཚེ་ལྟུང་བྱེད་དུ་ཡང་འགྱུར་རོ། །བརྫུན་དུ་སྨྲས་པ་ཉིད་ཡིན་པ་ནི་བརྫུན་དུ་སྨྲ་བའི་ལྟུང་བྱེད་གཞན་དུ་ཡང་འགྱུར་རོ། །མཚན་གཞན་གྱི་འདོན་པའི་ཚེ་ཐུན་མོང་བ་ལ་ནི་ཉེས་བྱས་སོ་ཞེས་བྱ་བ་ལ། མཚན་གཞན་གྱི་འདོན་པའི་ཚེ་ཞེས་བྱ་བ་ནི། དགེ་སློང་མ་རྣམས་ཀྱི་གསོ་སྦྱོང་འདོན་པའི་ཚེའོ། །ཐུན་མོང་བ་ལ་ནི་ཉེས་བྱས་སོ་ཞེས་བྱ་བ་ནི་དགེ་སློང་མའི་བསླབ་པའི་གཞི་དགེ་སློང་དང་ཐུན་མོང་གང་ཡིན་པ་ལ་འདི་སྐད་ཅེས་བདག་གིས་ད་གཟོད་ཤེས་སོ་ཞེས་བྱ་བ་ལ་སོགས་པ་ཟེར་ན་ཉེས་བྱས་སོ། །འདིར་གཞུང་ནི་བཙུན་པ་དགེ་སློང་མ་རྣམས་ཀྱིས་སོ་སོར་ཐར་པའི་མདོ་གདོན་པ་འདོན་པ་ན་འདི་སྐད་ཅེས་འདི་ལྟར་ཆོས་འདི་ཡང་མདོའི་ནང་དུ་གཏོགས་མདོའི་ནང་དུ་འདུས་པར་བདག་གིས་ད་གདོད་ཤེས་སོ་ཞེས་མཆིན་ལྟུང་བ་ཅིར་འགྱུར། གང་ཚེ་བསླབ་པ་ཐུན་མོང་བ་ལས་བསམ་ཏེ་སྨྲ་ན་ཉེས་བྱས་སོ་ཞེས་གསུངས་པ་ཡིན་ནོ། །མདོ་སྡེ་དང་ལྡན་པ་སྨྲ་བ་ན་ཡང་ངོ་ཞེས་བྱ་བ་ནི་མདོ་སྡེ་དང་ལྡན་པའི་བསླབ་པའི་གཞི་སྨྲ་བ་ན་དེ་སྐད་ཟེར་བ་ལ་ཡང་ཉེས་བྱས་སོ། །འདིར་གཞུང་ནི་འདུལ་བ་དང་ལྡན་པའི་མདོ་མ་གཏོགས་པ་ལ་འདི་སྐད་ཅེས་འདི་ལྟར་ཆོས་འདི་ཡང་ནང་དུ་གཏོགས་མདོའི་ནང་དུ་འདུས་པར་བདག་གིས་ད་གདོད་ཤེས་སོ་ཞེས་ཟེར་ན་ཉེས་བྱས་སོ་ཞེས་གསུངས་པ་ཡིན་ནོ། །ཐུན་མོང་མ་ཡིན་པ་ལ་ནི་ལྟུང་བ་མེད་དོ་ཞེས་བྱ་བ་ནི། མཚན་གཞན་གྱི་བསླབ་པའི་གཞི་ཐུན་མོང་མ་
ཡིན་པ་འདོན་པའི་ཚེ་འདི་ལྟར་ཆོས་འདི་ཡང་མདོའི་ནང་དུ་གཏོགས་མདོའི་ནང་དུ་འདུས་པར་བདག་གིས་ད་གདོད་ཤེས་སོ་ཞེས་ཟེར་བ་ལ་ལྟུང་བ་མེད་པའོ། །སོ་སོར་ཐར་པའི་མདོ་འདོན་པའི་ཚེ་མ་གུས་པར་ཉན་པ་ཉེ་པར་བསྒྲུབ་པ་འགྱོད་དུ་གཞུག་གོ་ཞེས་བྱ་བ་ནི། སོ་སོར་ཐར་པའི་མདོ་གདོན་པ་འདོན་པ་ན་འདི་ལྟར་ཆོས་འདི་ཡང་མདོའི་ནང་དུ་གཏོགས་མདོའི་ནང་དུ་འདུས་པར་བདག་གིས་ད་གདོད་ཤེས་སོ་ཞེས་བྱ་བ་ལ་སོགས་པའི་ཚིག་གིས་མ་གུས་པར་ཉན་པ་ཉེ་བར་སྒྲུབ་པར་བྱེད་པའི་དགེ་སློང་གང་ཡིན་པ་དེ། དེ་ན་གནས་པའི་དགེ་སློང་རྣམས་ཀྱིས་འགྱོད་དུ་གཞུག་པ་སྟེ། ཚིག་དངོས་སུ་སྨྲ་བསམ་གུས་པར་ཉན་པ་ཉེ་བར་བསྒྲུབ་པ་འབའ་ཞིག་ཏུ་ཡང་མ་ཟད་ཀྱི་ཚིག་བརྒྱུད་པས་མ་གུས་པར་ཉན་པ་ཉེ་བར་བསྒྲུབ་པ་ཡང་འགྱོད་དུ་གཞུག་གོ །ཚིག་བརྒྱུད་པའི་གཞུང་ནི་ཁོ་བོ་ལ་ལས་འདིས་ཅི་བྱ་ཁོ་བོ་འདོད་པའི་རྣམ་པར་རྟོག་པ་ལ་ཡང་རྣམ་པར་རྟོག་དགོས་སོ། །གནོད་སེམས་ཀྱི་རྣམ་པར་རྟོག་པ་དང་རྣམ་པར་འཚེ་བའི་རྣམ་པར་རྟོག་པ་ལ་ཡང་རྣམ་པར་རྟོག་དགོས་སོ་ཞེས་བྱ་བ་ལ་སོགས་པ་སྟེ་དེ་ཡང་འགྱོད་དུ་གཞུག་གོ །འདིར་འགྱོད་དུ་གཞུག་པ་ནི་ཚེ་དང་ལྡན་པ་ཁྱོད་མ་རྙེད་པའོ། །རྙེད་པ་མ་ཡིན་པའོ། །ཉེས་པ་རྙེད་པའོ། །ལེགས་པ་མ་རེང་པའོ་ཞེས་འགྱོད་དུ་གཞུག་གོ་ཞེས་བྱ་བ་གསུངས་པ་ཡིན་ནོ། །བསླབ་པའི་གཞིའི་དངོས་པོ་ལ་ཁྱད་དུ་གསོད་པའི་ལྟུང་བྱེད་དོ་ཞེས་བྱ་བ་དེ་བ་ཤད་ཟིན་ཏོ།། །།གང་ལ་ཁ་བར་ལ་འཆོས་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། བ་སོ་དང་རུས་པ་དང་རྭའི་ཁབ་རལ་བྱེད་དམ་བྱེད་དུ་གཅུག་བ་ལའོ་ཞེས་བྱ་བ་སྨྲས་ཏེ། བ་སོ་འམ་རུས་པ་འམ་རྭའི་ཁབ་རལ་བྱེད་དམ་བྱེད་དུ་བཅུག་པ་ལ་ཁ་ན་མ་ཐོ་བ་འདིར་འགྱུར་རོ་ཞེས་བྱ་བའི་ཐ་ཚིག་གོ །འདི་ལྟར་བསླབ་པའི་གཞི་འདི་མན་ཆད་ལས་ཤིང་བལ་གྱིས་གོས་པར་བྱས་པ་མ་གཏོགས་པའི་ལྟུང་བྱེད་རྣམས་ལ་བྱེད་དུ་གཞུག་པ་འབའ་ཞིག་གསུང་མོད་ཀྱི། རང་བྱེད་པ་ལ་ཁ་ན་མ་ཐོ་བ་ཆེས་ལྕིབས་དེས་ན་འདིར་བྱེད་པ་ཞེས་བྱ་བའི་སྒྲ་ཡང་བསྡུས་སོ། །བ་སོ་ལ་སོགས་པ་ནི་རིན་ཆེ་བའི་ཕྱིར་བཀག་གོ །ལྕགས་ལ་སོགས་པ་ནི་ཆེས་རིན་ཆེ་བའི་ཕྱིར། དེ་ཡང་འདིར་བཀག་བར་རིག་པར་བྱའོ། །རིན་པོ་ཆེ་ལས་
བྱས་བ་ནི་རུར་བ་མ་ཡིན་པའི་ཕྱིར་ཉེས་བྱས་བྱེད་པ་ཉིད་ཡིན་ནོ། །དེ་ལྟར་ཡང་འདིར་གཞུང་ནི་ཞུ་བ་ལས་བཙུན་པ་རེ་ཞིག་དགེ་སློང་གིས་རིན་པོ་ཆེ་ལས་བགྱིས་པའི་ཁབ་རལ་བགྱིད་དུ་སྩོལ་ན་ལྟུང་བ་ཅིར་འགྱུར་ཉེས་བྱས་སོ་ཞེས་གསུངས་པ་ཡིན་ནོ། །བྱས་ཟིན་པ་རྙེད་པ་དང་བྱས་ཟིན་པ་ལ་སྤྱོད་བདག་ལ་ནི་ལྟུང་བ་མེད་དོ་ཞེས་བྱ་བ་ནི། བྱས་ཟིན་པ་རྙེད་པ་དང་བྱས་ཟིན་པ་ལ་སྤྱོད་པ་ལ་ནི་ལྟུང་བ་མེད་པའོ། །འདིར་གཞུང་ནི་ཞུ་བ་ལས་བྱས་པ་རྙེད་པ་དང་བྱས་པ་ལ་སྤྱོད་པ་ལ་ལྟུང་བ་མེད་དོ་ཞེས་གསུངས་པ་ཡིན་ནོ། །བཅབ་པ་ཉིད་མ་དྲིས་པར་འཆགས་པ་བླང་བར་མི་བྱའོ་ཞེས་བྱ་བ་ནི། གང་གི་མདུན་དུ་ལྟུང་བ་འཆགས་པ་དེས་ཁབ་རལ་དེ་ཁྱོད་ཀྱིས་བཅག་གམ་ཞེས་དྲི་བར་བྱ་སྟེ། དེ་སྐད་མ་དྲིས་པར་ལྟུང་བ་འཆགས་པ་བླང་པར་མི་བྱའོ། །གལ་ཏེ་མ་བཅག་ན་མ་བཤགས་པ་ཉིད་ཡིན་ནོ་ཞེས་བྱ་བ་ནི། གལ་ཏེ་ཁབ་རལ་མ་བཅག་པར་ལྟུང་བ་འཆག་པར་བྱེད་ན་དེའི་ལྟུང་བ་དེ་མ་བཤགས་པ་ཉིད་ཡིན་པའོ། །འོག་མ་ལྔ་པོ་དག་ལ་ཡང་དེ་དག་དང་བཅས་པ་དང་ལྡན་པ་ཡིན་ནོ་ཞེས་བྱ་བ་ནི། བསླབ་པའི་གཞི་འདིའི་འོག་མ་བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པའི་གོང་མ་ལྔ་བོ་ཁྲིའི་རྐང་པ་འཆོས་པ་དང༌། ཤིང་བལ་གྱིས་གོས་པར་བྱས་པ་དང༌། གདིང་བ་ལས་གྱུར་པ་དང་དབྱར་གྱི་རས་ཆེན་ལས་གྱུར་པ་དང༌། གཡན་པ་དག་བ་པ་ལས་གྱུར་པ་དག་ལ་ཡང་དེ་དག་དང་ཞེས་བྱ་བ་བཅད་པ་ཉིད་མ་དྲིས་པར་འཆགས་པ་བླང་བར་མི་བྱའོ་ཞེས་བྱ་བ་དང༌། གལ་ཏེ་མ་བཅད་ན་བཤགས་པ་ཉིད་མ་ཡིན་ནོ་ཞེས་བྱ་བའི་མདོ་དེ་གཉིས་དང་བཅས་པ་ཉིད་ཅེས་བྱ་བའི་དོན་དང་ལྡན་པ་ཡིན་ཏེ་བཅད་པ་ཞེས་བྱ་བའི་སྒྲ་དང་སྦྱར་བ་ཡིན་གྱི། བཅག་པ་ཞེས་བྱ་བའི་སྒྲ་དང་སྦྱར་བ་མ་ཡིན་པའོ། །འདི་སྐད་བསྟན་ཏ། བཅད་པ་ཉིད་མ་དྲིས་པར་འཆགས་པ་བླང་བར་མི་བྱའོ། །གལ་ཏེ་མ་བཅད་ན་མ་བཤགས་པ་ཉིད་ཡིན་ནོ། །འདིར་གཞུང་ནི་རྣམ་པར་འབྱེད་པ་ལས་གང་གིས་མདུན་དུ་འཆགས་པར་བྱེད་པ་དེས་ཁྱོད་ཀྱིས་དངོས་པོ་དེ་བཅད་དམ་ཞེས་དྲི་བར་བྱའོ། །མ་དྲིས་པར་འཆགས་ན་ལྟུང་བ་དེ་ཡང་བཤགས་པ་མ་ཡིན་ལ་དགེ་སློང་དེ་ལ་ཡང་ཉེས་བྱས་སུ་འགྱུར་རོ་ཞེས་གསུངས་
པ་ཡིན་ནོ། །བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པའི་ལྟུང་བྱེད་ལ་ནི་སོ་སོར་ཐར་པའི་མདོ་ལས་འདི་སྐད་ཅེས་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་བྱེད་དམ་བདེ་བར་གཤེགས་པའི་ཆོས་གོས་ལས་ལྷག་པར་བྱེད་ན་ལྟུང་བྱེད་དོ་ཞེས་གསུངས་ཀྱི་བཅད་ནས་ལྟུང་བྱེད་དོ་ཞེས་བྱ་བ་ནི་མ་གསུངས་སོ། །དེ་བཞིན་དུ་རྣམ་པར་འབྱེད་པ་ལས་ཀྱང་བཅད་ནས་ཞེས་ཀྱང་མ་གསུངས་པས་དེའི་ཕྱིར་བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པ་ལས་གཞན་པ་དག་ལ་བཅད་པ་དང་ལྡན་པ་ཡིན་ནོ། །སྤྱིར་བཏང་བར་བྱས་ནས་དམིགས་ཀྱིས་བསལ་བ་བསྟན་པའི་ཕྱིར། གཉིས་པ་ལ་ནི་བསྡུས་པ་དང་ངོ་ཞེས་བྱ་བ་སྨྲས་ཏེ། བསླབ་པའི་གཞི་འདིའི་འོག་མའི་གཉིས་པ་ཤིང་བལ་གྱིས་གོས་པར་བྱས་པ་ཞེས་བྱ་བའི་བསླབ་པའི་གཞི་ལ་ནི་བསྡུས་པ་དང་ལྡན་པར་ཤེས་བར་བྱ་སྟེ་བསྡུས་པ་ཉིད་མ་དྲིས་པར་འཆགས་པ་བླང་པར་མི་བྱའོ། །གལ་ཏེ་མ་བསྡུས་ན་མ་བཤགས་པ་ཉིད་ཡིན་ནོ་ཞེས་བྱ་བར་སྦྱར་རོ། །བསྡུས་པ་ཞེས་བྱ་བ་ནི། གོས་པ་མེད་པར་བརྟུལ་བ་སྟེ་བསྡུས་ཞེས་བྱ་བའི་ཐ་ཚིག་གོ །ཁབ་རལ་འཆོས་པའི་ལྟུང་བྱེད་དོ་ཞེས་བྱ་བ་སྟེ་བཤད་ཟིན་ཏོ།། །།ཁྲིའི་རྐང་པ་འཆོས་པའི་ལྟུང་བྱེད་སྨྲ་བར་འདོད་ནས། ཇེ་འདི་བརྗོད་པར་བྱ་སྟེ། རྐང་པ་དམའ་བ་དང་ལྡན་པའི་ཁྲི་ལ་ཉལ་བར་མི་བྱའོ་ཞེས་བྱ་བ་ནི། ཁྲི་གང་ལ་རྐང་པ་ཐུང་དུས་དང་ཉེ་བ་ཡོད་པ་དེ་ནི་རྐང་པ་དམའ་བ་དང་ལྡན་པ་སྟེ། དེ་ལ་ཉལ་བར་མི་བྱ་བའོ། །ཁྲི་གང་ལ་འདུག་པའི་དགེ་སློང་འཆག་པའི་མགོས་ལ་ཐུག་པར་འགྱུར་བའི་ཁྲི་དེ་ལྟ་བུ་ལ་ཉལ་བར་མི་བྱ་བ་སྟེ། དེ་ནི་གླེང་གཞི་ལས་ཤེས་པར་བྱའོ། །མལ་དང་འབྲེལ་བའི་ཁྲིའི་ཉོན་ཀོར་གྱི་ཕྱོགས་སུ་རྐང་པ་བཀྲུ་བར་མི་བྱའོ་ཞེས་བྱ་བ་ནི། ཉལ་བའི་གནས་དང་འབྲེལ་པའི་ཁྲིའི་ཉེན་ཀོར་འབྲེལ་པའི་ཕྱོགས་སུ་རྐང་པ་བཀྲུ་བར་མི་བྱའོ།། ཁྱིམ་པའི་གནས་མལ་གྱི་གནས་གཞན་གྱི་ཉེན་ཀོར་གྱི་ཕྱོགས་སུ་ཡང་ཉེས་བྱས་སོ། །ཅི་དགེ་སློང་ཐམས་ཅད་ཀྱིས་བཀྲུ་བར་མི་བྱ་འམ་ཞེ་ན་དེའི་ཕྱིར། ལྟམ་ཡོད་པས་སོ་ཞེས་བྱ་བ་སྨྲས་ཏེ། དགེ་སློང་གང་ལ་ལྷ་མ་ཡུ་ཆད་ལ་སོགས་པ་ཉེན་ཀོར་ན་ཡོད་པ་དེ་ནི་ལྷམ་ཡོད་པ་སྟེ། དེས་ཕྱོགས་
དེར་རྐང་པ་བཀྲུ་བར་མི་བྱའོ། །གཞན་གྱིས་ནི་མགོ་ལོགས་དང་རྐང་པ་ལོགས་མ་གཏོགས་པར་རོ་ཞེས་བྱ་བ་ནི། ལྷམ་ཡོད་པ་ལས་གཞན་པ་ལྷ་མ་མེད་པས་ནི་མགོ་ལོགས་མ་གཏོགས་པ་དང༌། རྐང་པ་ལོགས་མ་གཏོགས་པ་གཡས་གཡོན་གྱི་ཕྱོགས་སུ་རྐང་པ་བཀྲུ་བར་མི་བྱ་བའོ།། འདིར་གཞུང་ནི་བཅོམ་ལྡན་འདས་ཀྱིས་བཀའ་སྩལ་པ། གང་དག་ལ་ལྷམ་མི་བདོག་པ་དེ་དག་གིས་མགོ་ལོགས་སམ་རྐང་པ་ལོགས་སུ་བཀྲུ་བར་བྱའོ་ཞེས་གསུངས་པ་ཡིན་ནོ། །མལ་སྟན་མཐོན་པོ་དང་མལ་སྟན་ཆེན་པོ་ལ་འདུག་པ་འམ་ཉལ་བར་མི་བྱའོ་ཞེས་བྱ་བ་ལ། མལ་སྟན་མཐོན་པོ་ཞེས་བྱ་བ་ནི་རྩ་བ་བུ་གར་གཞུག་པ་མ་གཏོགས་པ་ཁྲུ་གང་ལས་ལྷག་པའོ། །མལ་སྟན་ཆེན་པོ་ཞེས་བྱ་བ་ནི། གསེར་དང་དངུལ་དང་རིན་པོ་ཆེ་ལ་སོགས་པ་ལས་བྱས་པ་སྟེ་དེ་ལ་འདུག་པ་འམ་ཉལ་བར་མི་བྱའོ། །མལ་སྟན་ཞེས་སྨོས་པས་འདིར་སྟན་ཡང་འཕངས་པར་རིག་པར་བྱའོ། །ཁྱིམ་གཞན་དུ་གཞན་མེད་ན་སྔ་མ་ཤེས་བྱའོ་ཞེས་བྱ་བ་ནི། ཁྱིམ་པའི་ཁྱིམ་གཞན་དུ་མལ་སྟན་མི་མཐོ་བ་དང་མལ་སྟན་མི་ཆེ་བ་གཞན་མེད་ན་མལ་སྟན་མཐོན་པོ་དང་མལ་སྟན་ཆེན་པོ་ལ་སྔ་མ་ཤོས་བྱ་སྟེ། འདུག་པ་འམ་ཉལ་བར་མི་བྱའོ་ཞེས་ཚིག་གཉིས་སྨོས་པའི་སྔ་མ་ཤོས་འདུག་པ་ཞེས་བྱའི། ཕྱི་མ་ཤོས་ཉལ་བ་ཞེས་བྱ་བ་མི་བྱའོ། །འདིར་ལུང་ནི་ཀུན་དགའ་བོ་དེ་དག་ཐམས་ཅད་དུ་འབྱོར་པར་མི་འགྱུར་རོ་ཞེས་གསུངས་པ་ཡིན་ནོ། །རྐང་རྟེན་དང་བཅས་པ་ལམ་ལ་བཅའ་བར་བྱའོ་ཞེས་བྱ་བ་ནི། རྐང་རྟེན་དང་བཅས་པའི་མལ་ཁྲི་ལ་མལ་བཅའ་བར་བྱའོ་ཞེས་བྱ་བའི་ཐ་ཚིག་གོ །ཕྱོགས་གཅིག་མཐོ་བ་ཉིད་ཀྱིས་ནི་མལ་སྟན་མ་ཐོན་པོ་མ་ཡིན་པར་རིག་པར་བྱའོ། །འདིར་གཞུང་ནི་འདི་ལྟར་སྨན་པ་དེས་འཕགས་པ་ཁྱོད་ཀྱིས་མགོ་སྨད་དེ་ཉལ་བས་དེས་ཁྱོད་ཀྱི་ཁམས་མ་སྙོམས་པ་ཉིད་དུ་གྱུར་ཅིང་དྲོད་ཆུང་པར་ཡང་གྱུར་བས་རྐང་རྟེན་ཆུག་སྟེ་ཉོལ་ཅིག་ཅེས་སྨྲས་པ་དང༌། དགེ་སློང་དག་གིས་སྨྲས་པ་བཅོམ་ལྡན་འདས་ཀྱིས་རྗེས་སུ་མ་གནང་ངོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྐང་རྟེན་བཅུག་སྟེ་མལ་བཅའ་བར་རྗེས་སུ་གནང་ངོ་ཞེས་བྱ་བའི་
བར་དུ་གསུངས་པ་ཡིན་ནོ། །ཁྲི་བརྩེག་མའི་སྟེང་དུ་འདུག་པར་མི་བྱའོ་ཞེས་བྱ་བ་ལ་ཁྲི་བརྩེག་མ་ཞེས་བྱ་བ་ནི་ཁྲིའི་སྟེང་དུ་ཁྲི་བཞག་པ་སྟེ་དེ་ལ་འདུག་པར་མི་བྱའོ། །འདིར་གཞུང་ནི་དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། དགེ་སློང་དག་ཁྲིའི་སྟེང་དུ་ཁྲི་བཞག་པ་ལ་འཁོད་ན་ཉེས་དམིགས་འགའ་ཡོད་དོ་སྙམ་ནས་དེ་ལྟ་བས་ན་དགེ་སློང་གིས་ཁྲིའི་སྟེང་དུ་ཁྲི་བཞག་པ་ལ་འདུག་པར་མི་བྱའོ། །འདུག་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །གང་ལ་ཁྲིའི་རྐང་པ་འཆོས་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཚད་ལས་ལྷག་པར་བྱེད་དམ་བྱེད་དུ་འཇུག་པ་ལའོ་ཞེས་བྱ་བ་སྨྲས་ཏེ། འོག་ནས་འབྱུང་བའི་ཚད་ལས་ལྷག་པར་རང་གིས་བྱེད་དམ་གཞན་བྱེད་དུ་འཇུག་པ་ལའོ། །གཉིས་པའི་འོག་མ་གསུམ་པོ་དག་ལ་ཡང་ངོ་ཞེས་བྱ་བ་ལ། གཉིས་པ་ཞེས་བྱ་བ་ནི་བསླབ་པའི་གཞི་འདིའི་འོག་མ་གཉིས་པ་ཤིང་བལ་གྱིས་གོས་པར་བྱས་པ་དགག་པ་ཞེས་བྱ་བའི་བསླབ་པའི་གཞིའོ། །དེའི་འོག་མ་གསུམ་པོ་དག་ཅེས་བྱ་བ་ནི་གདིང་བ་ལས་གྱུར་པ་དང༌། གཡན་པ་དགབ་པ་ལས་གྱུར་པ་དང༌། དབྱར་གྱི་རས་ཆེན་ལས་གྱུར་པ་ཞེས་བྱ་བ་དག་སྟེ། བསླབ་པའི་གཞི་དེ་གསུམ་ལ་ཡང་ཚད་ལས་ལྷག་པར་བྱེད་དམ་བྱེད་དུ་འཇུག་པ་ལ་ལྟུང་བྱེད་དུ་འགྱུར་བའོ། །གང་གི་ཚད་ལས་ལྷག་པར་བྱེད་དམ་བྱེད་དུ་འཇུག་པ་ལ་ཞེ་ན། རྐང་པ་དག་གིའོ་ཞེས་འོག་ནས་འབྱུང་ངོ༌། །གང་གི་རྐང་པ་དག་ཅེ་ན་དེའི་ཕྱིར་ཁྲིའམ་ཁྲིའུ་དག་གིའོ་ཞེས་བྱ་བ་སྨྲས་སོ། །ཅི་ཐམས་ཅད་ཀྱི་འམ་ཞེ་ན་དེའི་ཕྱིར་དགེ་འདུན་གྱིའོ་ཞེས་བྱ་བ་སྨྲས་སོ། །འོག་མ་ལ་ཡང་ངོ་ཞེས་བྱ་བ་ནི་བསླབ་པའི་གཞི་འདིའི་འོག་མ་ཤིང་བལ་གྱིས་གོས་པར་བྱས་པ་ཞེས་བྱ་བའི་བསླབ་པའི་གཞི་ལ་ཡང་ཁྲིའམ་ཁྲིའུ་དག་ལའོ། །དགེ་འདུན་གྱིའོ་ཞེས་བྱ་བར་རིག་པར་བྱའོ། །གང་གི་ཚད་ལས་ལྷག་པར་བྱེད་དམ་བྱེད་དུ་འཇུག་པ་ལ་ཁྲིའི་རྐང་པ་འཆོས་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར་རྐང་པ་དག་གིའོ་ཞེས་བྱ་བ་སྨྲས་ཏེ། ཁྲི་འམ་ཁྲིའུ་དེའི་གནས་སྐབས་ལ་རྐང་པ་ཅི་ཙམ་གྱིས་འགྲུབ་པ་སྟེ། རྐང་པ་བཞིས་འགྲུབ་པ་ནི་དཔེར་ན་རྐང་པ་བཞི་པ་ལྟ་བུའོ། །གཉིས་སམ་གསུམ་གྱིས་འགྲུབ་
པ་ནི་དཔེར་ན་ཤིང་གི་ཁྲིའུ་ཁ་ཅིག་ལྟ་བུ་སྟེ་དེ་རྙེད་ཅེས་བྱ་བ་ནི་ཤུགས་ཀྱིས་ཁོང་དུ་ཆུད་པར་བྱའོ། །གཞན་གྱིས་བརྩམས་ལ་གཞན་གྱིས་ཟིན་པར་བྱེད་པ་ནི་ཉེས་བྱས་སོ། །རབ་ཏུ་བྱུང་བ་གཞན་ལ་ཡང་ཞེས་བྱ་བ་ཐམས་ཅད་ནི་ཁང་པ་དང་གཙུག་ལག་ཁང་དང་གདིང་བ་དག་ལས་ཁོང་དུ་ཆུད་པར་བྱའོ།། རྐང་པ་དེ་དག་གི་ཚད་གང་ཡིན་ཞེ་ན་དེའི་ཕྱིར། དེ་དག་གི་ཚད་ནི་བུ་གར་གཞུག་པའི་ཕྱོགས་མ་གཏོགས་པར་ཁྲུ་གང་ངོ་ཞེས་བྱ་བ་སྨྲས་ཏེ། རྐང་པ་དེ་དག་གི་ཚད་ནི་བུ་གར་གཞུག་པ་ཞེས་བྱ་བའི་ཕྱོགས་དག་མ་གཏོགས་པར་རྐང་པ་ཉིད་ཀྱི་ཕྱོགས་ཀྱི་སྲིད་ཁྲུ་གང་ངོ༌། །གལ་ཏེ་དེ་ལ་བུ་གར་གཞུག་པ་ཡོད་ན་ནི་བུ་གར་བཅུག་པའི་མཚམས་ནས་བརྩམས་ཏེ་ཁྲུ་གང་ངོ༌། །གལ་ཏེ་བུ་གར་གཞུག་པ་མེད་ན་ནི་བུ་གར་གཞུག་པའི་ཕྱོགས་ཀྱི་གོང་ཡན་ཆད་ཀྱི་ཆ་ལ་བུ་གར་གཞུག་པ་ཞེས་བྱ་སྟེ། དེ་མ་གཏོགས་སོ། །ཁྲུ་ཅི་ལྟ་བུས་ཞེ་ན། དེའི་ཕྱིར་བདེ་བར་གཤེགས་པའི་སུམ་ཆས་སོ་ཞེས་བྱ་བ་སྨྲས་ཏེ། བདེ་བར་གཤེགས་པའི་ཁྲུའི་སུམ་ཆར་གྱུར་པ་སྟེ། བདེ་བར་གཤགས་པའི་སོར་བརྒྱད་ཀྱིས་ཞེས་བྱ་བའི་ཐ་ཚིག་གོ །འོག་མ་དག་ལ་ཡང་ངོ་ཞེས་བྱ་བ་ནི། བསླབ་པའི་གཞི་འོག་མ་ཤིང་བལ་གྱིས་གོས་པར་བྱས་པ་དང༌། བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པ་ཞེས་བྱ་བའི་བསླབ་པའི་གཞི་གཉིས་མ་གཏོགས་པ་གདིང་བ་ལས་གྱུར་པ་དང༌། གཡན་པ་དགབ་པ་ལས་གྱུར་པ་དང་དབྱར་གྱི་རས་ཆེན་ལས་གྱུར་པ་ཞེས་བྱ་བའི་བསླབ་པའི་གཞི་གསུམ་པོ་དག་ལ་ཡང་ཁྲུ་ཚད་ནི་བདེ་བར་གཤེགས་པའི་ཁྲུའི་སུམ་ཆར་གྱུར་པས་རྣམ་པར་གཞག་པར་རིག་པར་བྱའོ། །ལ་ལ་ལ་ནི་རང་གི་ལུས་ཀྱི་ཚད་དང་མཐུན་པའི་གཞལ་བས་ཆོས་གོས་བཞིན་དུ་རྣམ་པར་གཞག་ཏུ་ཡང་རུང་སྟེ། བདེ་བར་གཤེག་པའི་ཁྲུའི་སུམ་ཆས་གཞལ་བས་ནི་མི་འབྲིང་གི་ཁྲུ་ཚད་རྣམ་པར་འཇོག་པར་བྱེད་དོ། །ཁྲི་རྐང་འཆོས་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་ཤིང་བལ་གྱིས་གོས་པར་བྱས་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཤིང་བལ་གྱིས་གོས་པར་བྱས་པ་ལའོ་ཞེས་བྱ་བ་སྨྲས་ཏེ། དགེ་འདུན་གྱི་ཁྲི་འམ་ཁྲིའུ་ངག་ལ་ཤིང་བལ་བརྡལ་བ་ལའོ། །ཅི་རང་ཉིད་ཀྱིས་གོས་པར་བྱས་པ་འམ་ཞེ་ན། དེའི་ཕྱིར་
རང་ངམ་བསྐོས་པས་སོ་ཞེས་བྱ་བ་སྨྲས་སོ། །འདིར་ཤིང་བལ་ཇི་ལྟ་བུ་ཞིག་ཡིན་པར་རིག་པར་བྱ་ཞེན་དེའི་ཕྱིར་ཤིང་བལ་ནི་ལྔ་སྟེ། ཤལ་མ་ལའི་དང༌། ཨརྐའི་དང༌། ཀ་ཤའི་དང༌། སོའུ་ཀའི་དང༌། ཨར་ཀའི་འོ་ཞེས་བྱ་བ་སྨྲས་ཏེ། ཚིག་དེ་དག་ནི་གོས་དང་ལུས་མ་རུངས་པར་འགྱུར་བ་དགག་པའི་ཕྱིར་རོ། །ཤིང་བལ་གྱིས་གོས་པར་བྱེད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། གདིང་བ་ལས་གྱུར་པའི་ལྟུ་བྱེད་སྨྲ་བར་འདོད་ནས་གདིང་བའོ་ཞེས་བྱ་བ་སྨྲས་ཏེ། ཚད་ལས་ལྷག་པར་བྱེད་དམ་བྱེད་དུ་འཇུག་ན་ཞེས་བྱ་བ་དེ་དང་སྦྱར་རོ། །དེའི་ཚད་གང་ཞེ་ན་དེའི་ཕྱིར་འདིའི་ཚད་ནི་སྲིད་དུ་ཁྲུ་གསུམ་མོ་ཞེས་བྱ་བ་སྨྲས་ཏེ། གདིང་བ་འདིའི་ཚད་ནི་སྲིད་དུ་ཁྲུ་གསུམ་དུ་རིག་པར་བྱའོ། །མི་ཆོག་ན་ཁྲུ་ཕྱེད་དང་དོ་མན་ཆད་བསྐྱེད་དོ་ཞེས་བྱ་བ་ནི། གང་ལ་ཁྲུ་གསུམ་གྱིས་མི་ཆོག་པ་དེས་ཅི་ཙམ་བསྐྱེད་པས་དོན་གྲུབ་བདེ་ཙམ་བསྐྱེད་པར་བྱ་སྟེ། ཁྲུ་ཕྱེད་དང་དོ་མན་ཆད་པ་སྐྱེད་པར་བྱའོ། །སྲིད་དུ་ཁྲུ་ཕྱེད་དང་དོ་བསྐྱེད་པར་བྱ་སྟེ། དེས་ན་གདིང་བའི་སྲིད་ཀྱི་ཚད་ནི་ཁྲུ་ཕྱེད་དང་ལྔའོ། །འདིའི་ཞེང་དུ་ནི་ཁྲུ་ངོ་དང་སོར་དྲུག་གོ་ཞེས་བྱ་བ་ནི། གདིང་བའི་ཞིང་གི་ཚད་ཅེས་བྱ་བར་སྦྱར་རོ། །དེ་ཆུང་དུ་ལ་བྱིན་གྱིས་རློབ་ན་ཉེས་བྱས་སོ་ཞེས་བྱ་བ་ནི་གདིང་བ་དེའི་ཆུ་ཞེང་གི་ཚད་ཇི་སྐད་བསྟན་པ་དེ་ལས་ཆུང་བ་ལ་བྱིན་གྱིས་རློབ་ན་ཉེས་བྱས་སུ་འགྱུར་བའོ། །འོག་མ་གཉིས་ལ་ཡང་ངོ་ཞེས་བྱ་བ་ནི། བསླབ་པའི་གཞི་འདིའི་འོག་མ་གཡན་པ་དགབ་པ་ལས་གྱུར་པ་དང་དབྱར་གྱི་རས་ཆེན་ལས་གྱུར་པ་ཞེས་བྱ་བ་གཉིས་ལས་ཡང་ཚད་པས་ཆུང་བ་ལ་བྱིན་གྱིས་རློབ་པ་ལ་ཉེས་བྱས་སུ་འགྱུར་བའོ། །འདིར་གཞུང་ནི་དབྱར་གྱི་རས་ཆེན་ཆུང་དུལ་བྱིན་གྱིས་རློབ་ན་ཉེས་བྱས་སོ། །གཡན་པ་དགབ་པ་ལ་ཡང་དེ་དང་འདྲའོ་ཞེས་གསུངས་པ་ཡིན་ཏེ། དེའི་རྗེས་སུ་འབྲང་བས་གདིང་བ་ལ་ཡང་དེ་སྐད་ཅེས་སྨྲས་སོ། །གདིང་བ་ལས་གྱུར་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གཡན་པ་དགབ་པ་ལས་གྱུར་པའི་ལྟུང་བྱེད་སྨྲ་བར་འདོད་ནས། གཡན་པ་དགབ་པའིའོ་ཞེས་བྱ་བ་སྨྲས་ཏེ། གཡན་པ་དགབ་པའི་ཚད་ལས་ལྷག་པར་བྱེད་དམ་བྱེད་དུ་འཇུག་ན་ལྟུང་བྱེད་དོ། དེའི་ཚད་ཅི་ཙམ་ཞེན་དེའི་ཕྱིར། ཁྲུ་དྲུག་
དང་གསུམ་མོ་ཞེས་བྱ་བ་སྨྲས་ཏེ། སྲིད་དུ་ནི་ཁྲུ་དྲུག་གོ །ཞེང་དུ་ནི་ཁྲུ་གསུམ་མོ། །གཡན་པ་དགབ་པ་ལས་གྱུར་པའི་ལྟུང་བྱེད་དོ་ཞེས་བྱ་བདེ་བཤད་ཟིན་ཏོ།། །།དབྱར་གྱི་རས་ཆེ་ལས་གྱུར་པའི་ལྟུང་བྱེད་སྨྲ་བར་འདོད་ནས། དབྱར་གྱི་རས་ཆེན་གྱིའོ་ཞེས་བྱ་བ་སྨྲས་ཏེ། ཚད་ལས་ལྷག་པར་བྱེད་དམ་བྱེད་དུ་འཇུག་ན་ལྟུང་བྱེད་དོ། །དེའི་ཚད་ཇི་ཙམ་ཞེན་དེའི་ཕྱིར། དགུ་དང་གསུམ་དང་སོར་བཅོ་བརྒྱད་དོ་ཞེས་བྱ་བ་སྨྲས་ཏེ། ཁྲུ་ཞེས་བྱ་བར་སྦྱར་རོ། །དབྱར་གྱི་རས་ཆེན་གྱི་སྲིད་དུ་ནི་ཁྲུད་གུའོ། །ཞེང་དུ་ནི་ཁྲུ་གསུམ་དང་སོར་བཅོ་བརྒྱད་དོ། །དབྱར་གྱི་རས་ཆེན་ལས་གྱུར་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པའི་ལྟུང་བྱེད་སྨྲ་བར་འདོད་ནས། སྟོན་པ་རང་གི་ཁྲུ་ལྔ་དང་གསུམ་པའི་ཆོས་གོས་སོ་ཞེས་བྱ་བ་སྨྲས་ཏེ། བདེ་བར་གཤེགས་པའི་ཆོས་གོས་ཀྱི་ཚད་ནི་སྲིད་དུ་སྟོན་པ་སངས་རྒྱས་བཅོམ་ལྡན་འདས་རང་གི་ཁྲུ་ལྔའོ། །ཞེང་དུ་ནི་ཁྲུ་གསུམ་མོ། གང་ལ་བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་དེའི་ལུས་ཙམ་མེད་པར་དེའི་ཚད་དམ་ལྷག་པའི་ཆོས་གོས་བྱེད་དམ་བྱེད་དུ་འཇུག་པ་ལའོ་ཞེས་བྱ་བ་སྨྲས་ཏེ། དེའི་ཚད་དམ་ཞེས་བྱ་བ་ནི། བདེ་བར་གཤེགས་པའི་ཆོས་གོས་ཀྱི་ཚད་དང་མཉམ་པའོ། །ལྷག་པ་ཞེས་བྱ་བ་ནི་བདེ་བར་གཤེགས་པའི་ཆོས་གོས་ཀྱི་ཚད་ལས་ལྷག་པ་སྟེ། དེ་ལྟ་བུའི་ཆོས་གོས་བྱེད་དམ་བྱེད་དུ་འཇུག་པ་ལ་ཁ་ན་མ་ཐོ་བ་འདིར་འགྱུར་རོ། །ཅི་དགེ་སློང་ཐམས་ཅད་ལ་འམ་ཞེ་ན་དེའི་ཕྱིར་དེའི་ལུས་ཙམ་མེད་པར་ཞེས་བྱ་བ་སྨྲས་ཏེ། དེའི་ལུས་ཞེས་བྱ་བ་ནི། བདེ་བར་གཤེགས་པའི་སྐུ་སྟེ་དགེ་སློང་གང་ལ་དེའི་སྐུ་ཙམ་གྱི་ལུས་ཡོད་པ་དེ་ནི་དེའི་ལུས་ཙམ་ཡོད་པའོ། །གང་ལ་དེའི་སྐུ་ཙམ་གྱི་ལུས་མེད་པ་དེ་ནི་དེའི་ལུས་ཙམ་མེད་པ་སྟེ། དེ་ལ་ཁ་ན་མ་ཐོ་བ་འདིར་འགྱུར་རོ་ཞེས་བྱ་བའི་ཐ་ཚིག་གོ །བདེ་བར་གཤེགས་པའི་སྐུའི་ཚད་ཙམ་གྱི་ལུས་ཡོད་པ་ལ་ནི་བདེ་བར་གཤེགས་པའི་ཆོས་གོས་ཀྱི་ཚད་ཙམ་གྱི་ཆོས་གོས་བྱེད་དམ་བྱེད་དུ་འཇུག་པ་ལ་ལྟུང་བ་མེད་དོ། ལྷག་པ་ལ་ནི་ཅི་རིགས་པ་ཁ་ན་མ་ཐོ་བར་འགྱུར་ཏེ། གང་ལ་བདེ་བར་
གཤེགས་པའི་སྐུའི་ཚད་ཙམ་གྱི་ལུས་མེད་པ་དེས་བདེ་བར་གཤེགས་པའི་སྐུའི་ཚད་ཀྱི་ཆོས་གོས་སམ་དེ་ལས་ལྷག་པའི་ཆོས་གོས་བྱེད་དམ་བྱེད་དུ་འཇུག་པ་ལ་ནི་ལྟུང་བྱེད་དོ། །བདེ་བར་གཤེགས་པའི་ཆོས་གོས་པས་ནི་ཆུང་ལ་རང་གི་ལུས་ལས་ནི་ཆེ་བའི་ཆོས་གོས་བྱེད་དམ་བྱེད་དུ་འཇུག་པ་ལ་ནི་ཉེས་བྱས་སོ། །གང་ལ་བདེ་བར་གཤེགས་པའི་སྐུའི་ཚད་ཙམ་མམ་དེ་ལས་ལྷག་པའི་ལུས་ཡོད་པ་དེས་རང་གི་ཁྲུ་ལྔ་དང་གསུམ་ལས་ལྷག་པའི་ཆོས་གོས་སུམ་འགྱུར་དང་བཞི་འགྱུར་ལ་སོགས་པ་བྱེད་དམ་བྱེད་དུ་འཇུག་ན་ལྟུང་བྱེད་དོ། །སུམ་འགྱུར་དུ་མཆོག་པ་མན་ཆད་ཉིས་འགྱུར་ཡན་ཆད་བྱེད་པ་ལ་ནི་ཉེས་བྱས་སུ་འགྱུར་བར་འདིར་དོན་ཅི་རིགས་པར་སྦྱར་རོ། །འདིར་གཞུང་ནི་གཏམ་གྱི་གཞི་ལས་ཚད་དང་ལྡན་པར་བགྱིད་པ་ལ་ལྟུང་བར་འགྱུར་བ་དང་ཚད་དང་ལྡན་པར་བགྱིད་པ་ལ་ལྟུང་བར་མི་འགྱུར་བ་འགའ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ་བདེ་བར་གཤེགས་པའི་ཆོས་གོས་ཀྱི་ཚད་དུ་བྱེད་ན་ལྟུང་བྱེད་དོ། །དཀྱིལ་འཁོར་གྱི་ཚད་དུ་བྱེད་ན་ལྟུང་བ་མེད་དོ་ཞེས་གསུངས་པ་ཡིན་ནོ། །དེ་ལ་བདེ་བར་གཤེགས་པའི་ཆོས་གོས་ཀྱི་ཚད་དུ་བྱེད་ན་ཞེས་བྱ་བ་ནི། རང་གི་ཁྲུ་ཚད་ལས་སུམ་འགྱུར་དུ་བྱེད་པ་ལ་ལྟུང་བྱེད་དུ་འགྱུར་བའོ། །དཀྱིལ་འཁོར་གྱི་ཚད་དུ་བྱེད་ན་ཞེས་བྱ་བ་ནི། རང་གི་ཁྲུ་ལྔ་དང་གསུམ་མན་ཆད་ཆུང་དུ་དང་ལྡན་པར་བྱེད་པ་ལ་ལྟུང་བ་མེད་པ་སྟེ། འདིར་དོན་དེ་ཡིན་པར་རིག་པར་བྱའོ། །དེ་བཅང་བར་མི་བྱའོ་ཞེས་བྱ་བ་ལ། དེ་ཞེས་བྱ་བ་ནི། བདེ་བར་གཤེགས་པའི་ཆོས་གོས་སམ་བདེ་བར་གཤེགས་པའི་ཆོས་གོས་ལས་ལྟག་པ་དེའོ། །བཅད་པར་མི་བྱའོ་ཞེས་བྱ་བ་ནི་ལུས་དང་འབྲེལ་པས་སམ་གཞན་ཡང་རུང་སྟེ། བྱིན་གྱིས་བརླབས་ནས་སམ་རྣམ་པར་བརྟགས་ནས་སམ་རྣམ་པར་མ་བརྟགས་པར་ཡང་བཅད་བར་མི་བྱའོ། །འདིར་གཞུང་ནི་གོས་ཀྱི་གཞི་ལས་བཙུན་པ་བདེ་བར་གཤེགས་པའི་ཆོས་གོས་ལྷག་ཉིད་དུ་འཆང་དུ་དབང་ངམ། ཉེ་བ་འཁོར་མི་དབང་ངོ་ཞེས་གསུངས་པ་ཡིན་ནོ། །བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ། །
ལྟུང་བྱེད་འབའ་ཞིག་ཏུ་འགྱུར་བ་རྣམས་རྫོགས་སོ་ཞེས་བྱ་བ་དངོས་པོ་སྤང་དུ་མེད་ཅིང་ལྟུང་བྱེད་འབའ་ཞིག་བཤགས་པར་བྱ་བ་ལྟུང་བྱེད་དགུ་བཅུ་པོ་དག་བཤད་ཟིན་ཏོ།། །།ལྟུང་བྱེད་རྣམས་སྨྲས་ནས། ད་ནི། གྲོང་དང་ཁྱིམ་གཞན་ཉིད་དང་ནི། སློབ་པ་རྣམས་དང་དགོན་པ་ནི། སངས་རྒྱས་ཕན་པ་གསུངས་པ་ཡིས། །སོ་སོར་བཤགས་པར་བྱ་བར་གསུངས། །ཞེས་བྱ་བའི་རིམ་གྱིས་དེའི་འོག་ཏུ་བསྟན་པ་སོགས་སོ་བཤགས་པར་བྱ་བའི་ཆོས་བཞི་པོ་དག་བརྗོད་པར་བྱའོ། །དགེ་སློང་མ་ལས་ཟས་ལེན་པའི་སོ་སོར་བཤགས་པར་བྱ་བ་ལ་བྱེད་པ་པོ་ཉིད་གང་ཡིན་ཞེ། ན་དེའི་ཕྱིར། ཤེས་གཙོ་བོ་ཞེས་བྱ་བ་སྨྲས་ཏེ། འདིར་ཡང་ཤེས་གཙོ་ཞེས་བྱ་བའི་མིང་དང་འདུ་ཤེས་གཙོ་ཆེར་བྱེད་པ་པོ་ཉིད་དོ་ཞེས་བྱ་བའི་མིང་ཅན་དུ་སྦྱོར་བར་བྱེད་དོ། །གང་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན། དེའི་ཕྱིར་དགེ་སློང་མ་ཉེ་དུ་མ་ཡིན་པ་ཉིད་ལའོ་ཞེས་བྱ་བ་སྨྲས་ཏེ། གལ་ཏེ་དགེ་སློང་མ་ཡང་དགེ་སློང་དེའི་ཉེ་དུ་མ་ཡིན་པ་ཉིད་ཡིན་ལ། དགེ་སློང་གིས་ཀྱང་འདི་བདག་གི་ཉེ་དུ་མ་ཡིན་པ་ཉིད་དོ་སྙམ་དུ་ཤེས་ན་ཉེ་དུ་མ་ཡིན་པ་ཉིད་དེ་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ། །ཅི་ཞིག་རྗེས་སུ་སྒྲུབ་ན་དེ་བྱེད་པ་པོ་ཉིད་ཡིན་ཞེ་ན་དེའི་ཕྱིར། རང་གིས་མི་འགྲིམ་པར་བསྒྲུབས་པའི་བཅའ་བ་དང་བཟའ་བ་བདག་ཉིད་གྲོང་ན་འདུག་པས་བླངས་ཏེ་ཟོས་ནའོ་ཞེས་བྱ་བ་སྨྲས་ཏེ། ཉེ་དུ་མ་ཡིན་པའི་དགེ་སློང་མ་གྲོང་ངམ་གཞན་གང་ཡང་རུང་བ་ན་འདུག་པས་རང་གི་ལག་གིས་མི་འགྲིམ་པའི་རྣམ་པས་བསྒྲུབས་ཤིང་ཕུལ་བའི་བཅའ་བ་དང་བཟའ་བ་ལྟུང་བ་འབྱིན་པར་བྱེད་པའི་དགེ་སློང་བདག་ཉིད་གྲོང་ན་འདུག་པས་རང་གི་ལག་གིས་བླངས་ཏེ་བཅའ་བ་དང་བཅའ་བ་དང་དེ་དག་གནས་གང་ཡང་རུང་བར་འདུག་སྟེ་ཟོས་ན་དགེ་སློང་མ་ལས་ཟས་ལེན་པའི་སོ་སོར་བཤགས་པར་བྱ་བར་འགྱུར་རོ་ཞེས་བྱ་བའི་ཐ་ཚིག་གོ །དེ་ལྟ་བས་ན་གལ་ཏེ་དགེ་སློང་ལམ་པོ་ཆེན་འདུག་པས་དགེ་སློང་མ་གང་ཡང་རུང་བ་ན་འདུག་པ་དེ་ལས་བཅའ་བ་དང་བཅའ་བ་ལེན་ཅིང་ཟ་བར་བྱེད་ན་དངོས་གཞིར་འགྱུར་རོ། །དེ་བཞིན་དུ་དགེ་སློང་ལམ་པོ་ཆེ་ན་འདུག་པ་མ་ཡིན་པས་དགེ་སློང་མ་ལམ་པོ་ཆེ་ན་འདུག་པ་དེ་ལས་བཅའ་བ་དང་
བཟའ་བ་ལེན་ཅིང་ཟ་བར་བྱེད་ན་ནི་ཉེས་བྱས་སུ་འགྱུར་རོ། །དགེ་སློང་གཙུག་ལག་ཁང་ན་འདུག་པས་དགེ་སློང་མ་གྲོང་ན་འདུག་པ་དེ་ལས་བཅའ་བ་དང་བཟའ་བ་ལེན་ཅིང་ཟ་བར་བྱེད་པ་དེ་ལ་ནི་ལྟུང་བ་མེད་དོ། །དེ་ལྟར་ཡང་འདིར་གཞུང་ནི་ཞུ་བ་ལས་བཙུན་པ་རེ་ཞིག་དགེ་སློང་མའི་དབྱར་ཁང་ན་མཆིས་པ་ལ་དགེ་སློང་མ་གྲོང་ན་མཆིས་པས་བཅའ་བ་དང་བཟའ་བ་རྩོལ་ལ་དེས་དེ་ན་མཆིས་པ་ལས་ལེན་ཅིང་བླངས་ནས་འཚལ་བར་བགྱིད་ན་ལྟུང་བ་ཅིར་འགྱུར། ལྟུང་བ་མེད་དོ་ཞེས་གསུངས་པ་ཡིན་ནོ། །དེ་ལས་བཟློག་པ་ལ་ནི་ཉེས་བྱས་སོ། །ཁ་ཅིག་ནི་འདི་སྐད་ཅེས་སྦྱིན་པ་མོ་དང་ལེན་པར་བྱེད་པ་གཉི་ག་ལམ་པོ་ཆེན་འདུག་པ་དག་ལ་ནི་ཁ་ན་མ་ཐོ་བ་རྫོགས་པར་འགྱུར་རོ། །ཡན་ལག་གཅིག་མ་ཚང་བ་ལ་ནི་ཉེས་བྱས་སོ། །ཡན་ལག་གཉི་ག་མཚང་བ་ལ་ནི་ལྟུང་བ་མེད་དོ་ཞེས་ཟེར་རོ། །དབྱར་ཁང་ནི་གྲོང་ཉིད་མ་ཡིན་ནོ་ཞེས་བྱ་བའི་གཞུང་ནི་ཞུ་བ་ལས་ལྟུང་བ་མེད་དོ་ཞེས་སྔར་བསྟན་མ་ཐག་པ་ཉིད་ཡིན་ནོ། །དགེ་སློང་གི་གནས་ཀྱང་མ་ཡིན་ནོ་ཞེས་བྱ་བ་ཡང་གྲོང་ཉིད་མ་ཡིན་པའོ། །འདིར་གཞུང་ནི་ཞུབ་ལས་བཙུན་པ་རེ་ཞིག་དགེ་སློང་གིས་དགེ་སློང་མ་ཉེ་དུ་མ་ལགས་པ་ཁྱིམ་གཞན་དུ་ཞུགས་པ་ལས་བཅའ་དབང་བཟའ་བ་བླངས་ཏེ་འཆོས་ཤིང་འཚལ་ན་ལྟུང་བར་ཡང་མི་འགྱུར་བ་འགའ་མཆིས་སམ། ཡོད་དེ་དགེ་སློང་གནས་ན་འདུག་པས་དགེ་སློང་མ་ཁྱིམ་གཞན་ན་འདུག་པ་ལས་ལེན་ནའོ་ཞེས་གསུངས་པ་ཡིན་ནོ། །ནམ་མཁའ་ནི་ཕྱེད་ཉིད་དོ་ཞེས་བྱ་བ་ནི། གྲོང་གི་སྟེང་གི་ནམ་མཁའ་ལ་འདུག་པས་བླངས་ཏེ་ཟ་ན་ཉེས་བྱས་སུ་འགྱུར་བའོ། །འཇོག་པར་བྱེད་པ་ཉེ་བར་མི་གནས་ན་གཞག་པ་ལེན་པ་ནི་དེ་ལས་མ་ཡིན་ནོ་ཞེས་བྱ་བ་ནི། འཇོག་པར་བྱེད་པའི་དགེ་སློང་མས་ཟས་གང་གྲོང་དུ་འཇོག་པར་བྱེད་པའི་དགེ་སློང་མ་དེས་ཟས་དེ་གྲོང་དུ་བཞག་ནས་གུད་དུ་སོང་སྟེ་དེ་ནས་ཉེ་བར་མི་གནས་ན་དགེ་སློང་དེས་ཟས་དེ་གྲོང་དེ་ནས་ལེན་པར་བྱེད་ཀྱང་དེས་ཟས་དེ་འཇོག་པར་བྱེད་བ་དེ་ལས་བླངས་པ་མ་ཡིན་ནོ། །འདིར་གཞུང་ནི་དགེ་སློང་མས་གྲོང་དུ་བཞག་པར་གྱུར་པ་དེས་དགེ་སློང་གིས་ཡིད་གཅུགས་པས་བླངས་ཏེ་ཟ་བར་བྱེད་ན་ལྟུང་བ་མེད་དོ་ཞེས་
གསུངས་པ་ཡིན་ནོ། །གལ་ཏེ་ཡིད་གཅུགས་པ་མེད་པས་ལེན་ན་ནི་མ་བྱིན་པར་ལེན་པར་གཏོགས་པའི་ཁ་ན་མ་ཐོ་བར་ཡང་འགྱུར་རོ། །དགེ་སློང་མ་ལས་ཟས་ལེན་པའི་སོ་སོར་བཤགས་པར་བྱ་བ་སྟེ་དང་པོའོ་ཞེས་བྱ་བ་དེ་བཤད་ཟིན་ཏོ། །གྲལ་རིམ་དུམ་ཕེབས་པར་འདྲིམ་དུ་འཇུག་པ་མ་བཟློག་པར་ཟའི་སོ་སོར་བཤགས་པར་བྱ་བ་ལ་བྱེད་པ་པོ་གང་ཡིན་ཞེ་ན། དེའི་ཕྱིར་དེའམ་དགེ་སློང་གཞན་ལ་འདི་ལ་བཅའ་བ་འམ་བཏུང་བའམ་སྲན་ཚོད་དམ་བཟའ་བ་འམ་ཡང་བྱིན་ཅིག་ཅེས་བྱ་བ་ལ་སོགས་པས་སྐོ་ཤམ་བྱེད་པ་ལ་ཞུགས་པའི་དགེ་སློང་མ་འདུག་པ་ནི་བྱེད་པ་པོ་ཡིན་ནོ་ཞེས་བྱ་བ་སྨྲས་ཏེ། དེ་འམ་ཞེས་བྱ་བ་ནི་ལྟུང་བ་འབྱིན་པར་བྱེད་པ་ཉིད་དུ་བརྗོད་པར་འདོད་པའི་དགེ་སློང་དེ་ལའོ། །དགེ་སློང་གཞན་ལ་ཞེས་བྱ་བ་ནི། དགེ་སློང་མང་པོ་གཞན་གང་ཡང་རུང་བ་ལའོ། །འདི་ལ་བཅའ་བ་བྱིན་ཅིག་ཅེས་བྱ་བ་ནས་བཟའ་བ་བྱིན་ཅིག་ཅེས་བྱ་བའི་བར་དང་ཡང་ལྷག་པར་བྱིན་ཅིག་ཅེས་བྱ་བ་ལ་སོགས་པས་ནི་སྐོ་ཤམ་བྱེད་པ་བསྟན་ཏོ། །སྩོགས་པ་ཞེས་བྱ་བའི་སྒྲས་ནི། ཟས་ལྷག་མ་དག་སྟོབས་པ་ཡང་བསྡུས་པའི་ཕྱིར་རོ། །སྐོ་ཤམ་བྱེད་པ་དེ་ལྟ་བུ་དེ་ལ་ཞུགས་པའི་དགེ་སློང་མ་གང་ཡིན་པ་དེ་འདུག་པ་གང་ཡིན་པ་དེ་ནི་ལྟུང་བ་འདིའི་བྱེད་པ་པོ་ཡིན་པར་ཤེས་པར་བྱའོ། །ཅི་དགེ་སློང་མ་དེ་ལྟར་གྱུར་པ་ཐམས་ཅད་ཀྱི་འདུག་པ་དེ་བྱེད་པ་པོ་ཉིད་ཡིན་ནམ་ཞེ་ན། དེའི་ཕྱིར་གལ་ཏེ་དེའི་ཚིག་གིས་སམ་དེའི་ཉེ་དུས་མགྲོན་དུ་བོས་པ་མ་ཡིན་ནའོ་ཞེས་བྱ་བ་སྨྲས་ཏེ། གལ་ཏེ་དགེ་སློང་མ་རྣམས་མགྲོན་དུ་བོས་བ་དགེ་སློང་མ་དེའི་ཚིག་གིས་མ་ཡིན་པ་དང༌། ཡོན་བདག་གང་གིས་དགེ་སློང་རྣམས་མགྲོན་དུ་བོས་པ་དེ་སྐོ་ཤམ་བྱེད་པ་ལ་ཞུགས་པའི་དགེ་སློང་མ་དེའི་ཉེ་དུ་མ་ཡིན་ན་དེའི་བྱེད་པ་པོའི་ཉིད་ཡིན་པའོ། །འདིར་གཞུང་ནི་དེའི་ཚིག་གིས་མགྲོན་དུ་བོས་པར་གྱུར་ན་ལྟུང་བ་མེད་དོ་ཞེས་གསུངས་པ་དང༌། ཞུ་བའི་གཞུང་ལས་ཉེ་དུའི་གནས་ལ་ལྟུང་བ་མེད་དོ་ཞེས་གསུངས་པ་ཡིན་ནོ། །སྤྱིར་བཏང་བ་བསྟན་ནས་དམིགས་ཀྱིས་བསལ་བ་བསྟན་པའི་ཕྱིར། བྱུག་རིས་སྟོན་པ་དང་མ་བྱིན་པ་ལ་སྤྱིན་དུ་འཇུག་པ་མ་གཏོགས་སོ་ཞེས་བྱ་བ་སྨྲས་སོ། །སྐོ་ཤམ་
ལ་ཞུགས་པ་སྔར་བསྟན་པ་ལས་འདི་གཉིས་འབྲི་བར་བྱའོ། །བྱུག་རིས་སྟོན་པ་ཞེས་བྱ་བ་ནི་ད་འདིར་བྲིམས་ཤིང༌། །དེའི་འོག་ཏུ་འདིར་བྲིམས་ཤིག་ཅེས་བྱ་བ་ལ་སོགས་པས་གྲལ་རིམ་བཞིན་དུ་མདུན་གྱི་བྱུག་རིས་སྟོན་པར་བྱེད་པའོ། །མ་བྱིན་པ་ལ་སྦྱིན་དུ་འཇུག་པ་ཞེས་བྱ་བ་ནི། གང་གི་ཚེ་བྱུག་རིས་སྔ་མ་ལས་ཐོད་རྒལ་དུ་འདས་ཏེ་བྱུག་རིས་འོག་མར་བྱིན་པར་གྱུར་པ་དེའི་ཚེ་ན་བྱུག་རིས་གོང་མ་བཀོལ་བ་ཤོས་དེར་སྦྱིན་དུ་འཇུག་པའོ། །ཅི་ཞིག་བྱས་ན་དེ་བྱད་པ་པོ་ཉིད་ཡིན་ཞེན་དེའི་ཕྱིར། དེ་ལ་དགེ་སློང་གང་ཡང་རུང་བ་ལྷན་ཅིག་མི་ཟ་བས་ཀྱང་རུང་བས་སྲིང་མོ་ཁྱོད་དགེ་སློང་རྣམས་ཟས་ཟོས་ཀྱི་བར་དུ་རེ་ཞིག་སྡོད་ཅིག་ཅེས་མ་བསྒོ་བར་དགེ་སློང་གསུམ་ལ་སོགས་པར་མགྲོན་དུ་བོས་པས་ཟོས་ནའོ་ཞེས་བྱ་བ་སྨྲས་ཏེ། དགེ་སློང་མ་དེ་ལམ་བསྒོ་བར་ཟོས་ན་ཁ་ན་མ་ཐོ་བ་འདིར་འགྱུར་རོ་ཞེས་བྱ་བར་སྦྱར་རོ། །དེ་ལ་ཞེས་བྱ་བ་ནི་དགེ་སློང་མ་དེ་ལ་སྟེ་དེ་ལ་མ་བསྒོ་བར་ཐོས་ན་ཁ་ན་མ་ཐོ་པ་འདིར་འགྱུར་རོ། །སུས་མ་བསྒོ་བར་ཞེ་ན། དེའི་ཕྱིར་དགེ་སློང་གིས་ཞེས་བྱ་བ་སྨྲས་སོ། །ཅི་ལྟུང་བ་འབྱིན་པར་བྱེད་པ་ཁོ་ནས་སམ་ཞེ་ན་མ་ཡིན་ཏེ་དེའི་ཕྱིར་གང་ཡང་རུང་བས་ཞེས་བྱ་བ་སྨྲས་སོ། །དགེ་སློང་སྟོན་མོ་དེའི་ནང་དུ་ཟན་ཟོས་ཟིན་ནས་སྔར་ལངས་བ་དེས་བསྒོ་བ་བྱས་ནས་ཡང་བསྒོ་བ་ཉིད་ཡིན་པས་དེའི་ཕྱིར་ལྷན་ཅིག་མི་ཟ་བས་ཀྱང་རུང་བས་ཞེས་བྱ་བ་སྨྲས་ཏེ། འདིར་གཞུང་ནི་དགེ་སློང་གཞན་དག་ཟོས་ཏེ་འབྱུང་ཞིང་གཞན་དག་འཇུག་པས་ཞེས་གསུངས་པ་ཡིན་ནོ། །གང་གི་ཚེ་དགེ་སློང་དེ་དག་ཐམས་ཅད་ལངས་པར་གྱུར་ཟིན་ཅིང་དགེ་སློང་གཞན་དག་ཅིག་འཁོད་པར་གྱུར་ན་དེ་ལ་ནི་ལྷན་ཅིག་མི་ཟ་བར་ཞེས་བྱ་བར་མི་བཟུང་སྟེ། ཟན་ཐ་དད་པའི་ཕྱིར་རོ། །འདིར་ཟན་གཅིག་པ་ཉིད་ཡན་ལག་ཏུ་བཞེད་པས་དེའི་ཕྱིར་ཟ་བར་བྱེད་པ་ཐམས་ཅད་མ་ལངས་པ་ཉིད་ན་འགའ་ཞིག་ལངས་པ་ནི་ལྷན་ཅིག་མི་ཟ་བ་ཉིད་ཡིན་པར་ཤེས་པར་བྱའོ། དགེ་སློང་དེ་དག་གིས་ཇི་སྐད་བསྒོ་བར་བྱ་ཞེ་ན། དེའི་ཕྱིར་སྲིང་མོ་ཁྱོད་དགེ་སློང་རྣམས་ཟན་ཟོས་ཀྱི་བར་དུ་རེ་ཞིག་སྡོད་ཅིག་ཅེས་བྱ་བ་སྨྲས་ཏེ། དེ་ཡང་བཟློག་པར་བྱ་བའི་ཚིག་གི་དཔེ་ཙམ་དུ་ཟད་དོ། །མ་བསྒོ་
བར་ཞེས་བྱ་བ་ནི། དགེ་སློང་མ་དེ་ལ་ཇི་སྐད་སྨོས་པའི་རྣམ་པ་དེ་དག་གིས་གལ་ཏེ་མ་བསྒོ་ཞིང་བརྡ་མ་སྤྲད་པར་རོ། །དགེ་སློང་གསུམ་ལ་སོགས་པ་མགྲོན་དུ་བོས་པས་ཟོས་ནའོ་ཞེས་བྱ་བ་ནི། གཉིས་མན་ཆད་ལ་ནི་ན་སྨད་པ་ཡིན་པས་གསུམ་ཡན་ཆད་མགྲོན་དུ་བོས་པ་ཇི་སྙེད་ཀྱིས་ཟོས་པ་དེ་དག་ཐམས་ཅད་ལ་ཁན་མ་ཐོ་བ་འདིར་འགྱུར་བའོ། །ཅི་མགྲོན་དུ་བོས་པ་གང་ཡང་རུང་བས་གང་ཡང་རུང་བ་ཟོས་པ་ལ་འམ་ཞེ་ན་དེའི་ཕྱིར་རིགས་ཀྱི་འོ་ཞེས་བྱ་བ་སྨྲས་ཏེ། གལ་ཏེ་བྲམ་ཟེ་དང་ཁྱིམ་བདག་གི་རིགས་ཀྱིས་མགྲོན་དུ་བོས་པ་དེས་སོ། །རིགས་ཀྱི་དྲུང་ཉིད་དུ་ཟོས་ན་སྟེ། གཞན་དུ་མ་ཡིན་ནོ། །དགོན་པ་དང་གཙུག་ལག་ཁང་ལ་སོགས་པར་སྦྱིན་བདག་རིགས་ཀྱི་མི་ཐམས་ཅད་འདུས་པ་འམ་དེས་བསྐོས་པ་ལ་སོགས་པས་ཟན་སྦྱར་བ་དེ་ཡང་རིགས་ཀྱི་ཟན་སྦྱར་བ་ཉིད་ཡིན་པར་རིག་པར་བྱ་སྟེ། དེའི་ཕྱིར་ཁྱིམ་དུ་ཞེས་མ་སྨོས་སོ། །རིགས་ཀྱི་ཟན་ལས་གཞན་པ་གཙུག་ལག་ཁང་ལ་སོགས་པའི་ཟན་དང༌། དགེ་སློང་གཅིག་གམ་གཉིས་མགྲོན་དུ་བོས་པ་ལ་ནི་འདིའི་རྗེས་སུ་འབྲངས་པས་ཉེས་བྱས་སུ་ཤེས་པར་བྱའོ། །འདིར་དགེ་སློང་མ་ཐག་ཇི་སྲིད་ན་འདུག་པར་གྱུར་པ་ཁ་ན་མ་ཐོ་བ་ཇི་ལྟ་བུའི་བྱེད་པ་པོ་ཡིན་ཞེ་ན། དེའི་ཕྱིར་གལ་ཏེ་ཚིག་དེ་ཉེ་བར་གདགས་སུ་རུང་ན་དངོས་གཞིའོ་ཞེས་བྱ་བ་སྨྲས་ཏེ། གལ་ཏེ་སྲིང་མོ་ཁྱོད་དགེ་སློང་རྣམས་ཟན་ཟོས་ཀྱི་བར་དུ་རེ་ཞིག་སྡོང་ཅིག་ཅེས་བྱ་བའི་ཚིག་དེ་དགེ་སློང་མ་དེ་ལ་ཉེ་བར་གདགས་ཤིང་བསྒོར་རུང་བའི་ཐག་དེ་ཙམ་ན་འདུག་པ་ལ་ཉེ་བར་མ་བརྟགས་ཤིང་མ་བསྒོ་ན་དངོས་གཞིའི་ལྟུང་བའི་བྱེད་པ་པོ་ཡིན་ནོ། །གལ་ཏེ་མི་རུང་ན་ཉེས་བྱས་ཀྱིའོ་ཞེས་བྱ་བ་ནི། གལ་ཏེ་དེ་སྐད་ཉེ་བར་གདགས་ཤིང་བསྒོར་མི་རུང་བའི་ཐག་དེ་ཙམ་ན་འདུག་པ་ལ་ཉེ་བར་མ་བརྟགས་ཤིང་མ་བསྒོ་ན་ཉེས་བྱས་ཀྱི་བྱེད་པ་པོ་ཡིན་ནོ། །འདིར་ཉེས་བྱས་ཀྱི་གཞུང་ནི་གང་དག་སྒོ་ཁང་ན་ཟ་བ་དེ་དག་གིས་དགེ་སློང་མ་དེ་ལ་བསྒོ་འམ་ཞེས་དྲི་བར་བྱ་སྟེ། མ་དྲིས་པར་ཟ་ན་ཉེས་བྱས་སུ་འགྱུར་རོ། །གང་དག་སྒོ་ཁང་ན་ཟ་བར་དེ་དག་གིས་དགེ་སློང་མ་དེ་ལ་བསྒོ་འམ་ཞེས་དྲི་བར་བྱ་སྟེ་མ་དྲིས་བར་ཟན་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །འདིར་དངོས་
གཞིའི་གཞུང་ནི་དགེ་སློང་དག་ཁ་ཅིག་ནི་ཁང་ཐོག་ན་ཟ་བར་བྱེད། ཁ་ཅིག་ནི་བར་ཁང་ན་ཟ་བར་བྱེད་ལ་དེ་ན་གལ་ཏེ་དགེ་སློང་མ་སྐོ་ཤམ་བྱེད་ཅིང་འདུག་པར་གྱུར་ན་དགེ་སློང་མ་དེ་དག་གིས་དགེ་སློང་མ་དེ་ལ་བསྐོ་བར་བྱའོ། །མ་བསྒོ་བར་ཟ་ན་སོ་སོར་བཤགས་པར་བྱ་བར་འགྱུར་རོ། །དགེ་སློང་དག་ཁ་ཅིག་ནི་འོག་ཁང་ན་ཟ་བར་བྱེད་ཁ་ཅིག་ནི་སྒོ་ཁང་ན་ཟ་བར་བྱེད་ལ་དེ་ན་གལ་ཏེ་དགེ་སློང་མ་སྐོ་ཤམ་བྱེད་ཅིང་འདུག་པར་གྱུར་ན་དགེ་སློང་དེ་དག་གིས་དགེ་སློང་མ་དེ་ལ་བསྒོ་བར་བྱའོ། །མ་བསྒོ་བར་ཟ་ན་སོ་སོར་བཤགས་པར་བྱ་བར་འགྱུར་རོ་ཞེས་གསུངས་པ་དེ་གཉིས་ཡིན་ནོ། །འདི་ལ་བསྒོ་བ་ཉིད་དུ་རྣམ་པར་གནས་པ་ནི་ཤེས་གཙོས་སོ་ཞེས་བྱ་བ་ལ། འདི་ལ་ཞེས་བྱ་བ་ནི། བསླབ་པའི་གཞི་འདི་ལའོ། །བསྒོ་བ་ཉིད་དུ་གནས་པ་ནི་ཤེས་གཅོས་ཏེ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་པས་འདུ་ཤེས་ཀྱི་དབང་གིས་གནས་པ་ཡིན་ནོ་ཞེས་བྱ་བའི་ཐ་ཚིག་གོ །དེའི་ཕྱིར་དྲི་བ་ལ་བརྩོན་པར་བྱའོ་ཞེས་བྱ་བ་ནི། གང་གི་ཕྱིར་འདུ་ཤེས་གཙོ་ཆེར་བྱེད་པ་པོ་ཉིད་ཡིན་པ་དེའི་ཕྱིར་དགེ་སློང་མ་དེ་ལ་བསྒོའམ་ཞེས་འདྲི་བ་ལ་བརྩོན་པར་བྱའོ། །འདིར་གཞུང་ནི་རྣམ་པར་འབྱེད་པ་ལས་དགེ་སློང་མ་དེ་ལ་བསྒོ་འམ་ཞེས་འདྲི་བར་བྱའོ་ཞེས་གསུངས་པ་ཡིན་ནོ། །འདི་ལ་རྒན་པ་མི་འཇུག་ན་གསར་བུས་འཇུག་པར་བྱའོ་ཞེས་བྱ་བ་ནི། དྲི་བ་འདི་ལ་རྒན་པས་འཇུག་པར་བྱའོ། །དེ་མི་འཇུག་ན་གསར་བུས་འཇུག་པར་བྱའོ། །གྲལ་རིམ་དུ་མ་ཕེབས་པར་འདྲིམ་དུ་འཇུག་པ་མ་བཟློག་པར་ཟ་བའི་སོ་སོར་བཤགས་པར་བྱ་བ་སྟེ་གཉིས་པའོ་ཞེས་བྱ་བ་དེ་བཤད་ཟིན་ཏོ།། །།བམ་པོ་སུམ་ཅུ་བདུན་པ། བསླབ་པ་དྲལ་ཏེ་ཁྱིམ་དུ་འཇུག་པའི་སོ་སོར་བཤགས་པར་བྱ་བ་སྨྲ་བར་འདོད་ནས། དད་པ་ཅན་ལ་གལ་ཏེ་བྱིན་ན་དེ་ཕོངས་པར་འགྱུར་བ་ལྟ་ན་ཁྱིམ་གྱི་བསླབ་པའི་སྡོམ་པ་སྦྱིན་པར་བྱའོ་ཞེས་བྱ་བ་སྨྲས་ཏེ། དད་པ་ཅན་ཞེས་བྱ་བ་ནི། ཁྱིམ་བདག་སྟེ་དེ་ལ་ཁྱིམ་གྱི་བསླབ་པའི་སྡོམ་པ་སྦྱིན་པར་བྱའོ་ཞེས་བྱ་བར་སྦྱར་རོ། །གལ་ཏེ་བྱིན་ན་དེ་ཕོངས་པར་འགྱུར་བ་ལྟ་ན་ཞེས་བྱ་བ་ནི་གལ་ཏེ་སྦྱིན་པ་བྱིན་ན་དད་པ་ཅན་དེ་ཡོ་བྱད་ཀྱིས་ཕོངས་པར་
འགྱུར་བ་ལྟ་ནའོ། །དེ་ལྟ་ན་དེ་ལ་ཁྱིམ་གྱི་བསླབ་པའི་སྡོམ་པ་སྦྱིན་པར་བྱ་སྟེ། ཁྱིམ་ལ་བརྟེན་པའི་བསླབ་པ་དེ་ཉིད་སྡོམ་པར་གྱུར་ཅིང་ངེས་པ་ཡིན་པས་སྡོམ་པ་སྟེ་དགེ་སློང་སྡོམ་པ་དེ་ལ་གནས་པ་སྦྱིན་པར་བྱའོ། །གང་གིས་ཤེ་ན་དེའི་ཕྱིར་གསོལ་བས་སོ་ཞེས་བྱ་བ་སྨྲས་ཏེ། གསོལ་བ་འབའ་ཞིག་གི་ལས་ཀྱིས་སོ་ཞེས་བྱ་བའི་ཐ་ཚིག་གོ །བག་ཡངས་སུ་བྱ་བ་ལ་ཡང་ངོ་ཞེས་བྱ་བ་ནི། སྡོམ་པ་དེ་བག་ཡངས་སུ་བྱ་ཞིང་གཞིག་པ་ཡང་གསོལ་བ་འབའ་ཞིག་གི་ལས་ཀྱིས་བྱ་བའོ། །བྱིན་པ་དེའི་སེམས་རྟོགས་ནས་ཁྱིམ་དུ་འགྲོ་བ་དང་སྟན་ལ་འདུག་པ་དང་ཆོས་བསྟན་པ་དག་བྱའོ་ཞེས་བྱ་བ་ལ། བྱིན་པ་དེ་ཞེས་བྱ་བ་ནི། གང་ལ་ཁྱིམ་གྱི་བསླབ་པའི་སྡོམ་པ་དེ་བྱིན་པ་དེ་ནི་བྱིན་པ་དེ་ཞེས་བྱའོ། །བྱིན་པ་དེའི་སེམས་རྟོགས་པས་དེའི་ཁྱིམ་དུ་འགྲོ་བ་དང༌། དེའི་སྟན་ལ་ལོངས་སྤྱོད་པ་དང༌། དེ་ལ་ཆོས་བསྟན་པ་དག་ཀྱང་བྱའོ། །ལྷུང་བཟེད་སྟོང་པས་འཇུག་པར་མི་བྱའོ་ཞེས་བྱ་བ་ནི། དགེ་སློང་གང་གི་ལྷུང་བཟེད་སྟོང་པ་དེ་ནི་ལྷུང་བཟེད་སྟོང་པ་སྟེ་ལྷུང་བཟེད་སྟོང་པ་དང་ལྡན་པའི་དགེ་སློང་དེས་བསླབ་པའི་སྡོམ་པ་བྱིན་པའི་ཁྱིམ་དུ་འཇུག་པར་མི་བྱའོ། །དེའི་བྱིས་པ་སློང་བ་དག་ལ་བསོད་སྙོམས་ལས་སྣུམ་ཁུར་བྱིན་པར་བྱ་ཞིང་རིལ་གྱིས་ནི་མི་སྦྱིན་ནོ་ཞེས་བྱ་བ་ནི། དགེ་སློང་བསོད་སྙོམས་བླངས་ཏེ་བསླབ་པའི་སྡོམ་པ་བྱིན་པའི་ཁྱིམ་དུ་སོན་པ་ན་བསླབ་པའི་སྡོམ་པ་བྱིན་པ་དེའི་བྱིས་པ་ཁ་ཟས་སློང་བ་དག་ལ་དགེ་སློང་དེས་རང་གི་བསོད་སྙོམས་དེ་ལས་སྣུམ་ཁུར་སྦྱིན་པར་དེ་ཡང་མཚོན་པ་ཙམ་དུ་ཟད་དེ་བཅའ་བར་བྱ་བ་གཞན་དག་ཀྱང་སྦྱིན་པར་བྱའོ། །བསོད་སྙོམས་རིལ་གྱིས་ནི་སྦྱིན་པར་མི་བྱ་སྟེ། གཞན་མུ་སྟེགས་ཅན་མ་དད་པ་དག་འཕྱ་བའི་ཉེས་པ་སྤང་བའི་ཕྱིར་རོ། །འདོད་ན་བག་ཡངས་སུ་བྱའོ་ཞེས་བྱ་བ་ནི། གལ་ཏེ་དང་པ་ཅན་དེ་བག་ཡངས་སུ་བྱ་བ་དེ་འདོད་པར་གྱུར་ན་དེའི་ཚེ་དེ་ལ་ཁྱིམ་གྱི་བསླབ་པའི་སྡོམ་པ་དེ་བག་ཡངས་སུ་བྱ་ཞིང་གཞིག་པར་བྱའོ། །གང་ལ་བསླབ་པ་དྲལ་ཏེ་ཁྱིམ་དུ་འཇུག་པའི་སོ་སོར་བཤགས་པར་བྱ་བ་འབྱུང་བར་འགྱུར་ཞེ་ན་དེའི་ཕྱིར། དེ་བྱིན་པའི་མདུན་རོལ་དུ་མགྲོན་དུ་མ་བོས་པས་བསླབ་པའི་སྡོམ་པ་བྱིན་པའི་
ཁྱིམ་ནས་བཅའ་བ་དང་བཟའ་བ་དག་བླངས་ཤིང་ཟོས་པ་ལ་སྟེག་གོན་དང་ལ་ཕུག་དང་ལྡམ་ལྡུམ་མོད་པ་དག་ནི་མ་གཏོགས་སོ་ཞེས་བྱ་བ་སྨྲས་ཏེ། བསླབ་པའི་སྡོམ་པ་བྱིན་པའི་ཁྱིམ་ནས་བཅའ་བ་དང་བཟའ་བ་དག་བླངས་ཤིང་ཟོས་པ་ལ་ཁ་ན་མ་ཐོ་བ་འདིར་འགྱུར་རོ་ཞེས་བྱ་བར་སྦྱར་རོ། །ཅི་དགེ་སློང་ཐམས་ཅད་ལ་ཁ་ན་མ་ཐོ་བ་འདིར་འགྱུར་རམ་ཞེ་ན་དེའི་ཕྱིར་དེ་བྱིན་པའི་མདུན་རོལ་དུ་མགྲོན་དུ་མ་བོས་པས་ཞེས་བྱ་བ་སྨྲས་ཏེ། བསླབ་པའི་སྡོམ་པ་དེ་བྱིན་པའི་མདུན་རོལ་དུ་མགྲོན་དུ་མ་བོས་པའི་དགེ་སློང་གིས་ཟོས་ན་ཁ་ན་མ་ཐོ་བ་འདིར་འགྱུར་གྱི་བསླབ་པའི་སྡོམ་པ་དེ་བྱིན་པའི་མདུན་རོལ་དུ་མགྲོན་དུ་མ་བོས་ན་ནི་བསླབ་པའི་སྡོམ་པ་བྱིན་པ་ན་ཟོས་ཀྱང་ལྟུང་བ་མེད་དོ། །བསླབ་པའི་སྡོམ་པ་བྱིན་པའི་ཁྱིམ་ནས་ཞེས་བྱ་བ་ལ། ཅི་ཙམ་དུ་གཡོས་མལ་གཅིག་པ་ཉིད་དང་ནོར་མ་བགོས་པ་ཉིད་ཡིན་པ་དེ་ཚུན་ཆད་ནི་འདིར་ཁྱིམ་གཅིག་ཉིད་ཡིན་པས་བསླབ་པའི་སྡོམ་པ་བྱིན་པའི་ཁྱིམ་དེ་ནས་སོ། །ཁྱིམ་དེ་ནས་དགེ་སློང་རང་གི་ལག་གིས་བཅའ་བ་དང་བཟའ་བ་དག་བླངས་ཤིང་ཟོས་པ་དེ་ལ་ཁ་ན་མ་ཐོ་བ་འདིར་འགྱུར་རོ། །ཅི་བཅའ་བ་དང་བཟའ་བ་གང་ཡང་རུང་བ་ཐམས་ཅད་ཟོས་པ་ལ་འམ་ཞེ་ན་དེའི་ཕྱིར་ག་གོན་དང་ལ་ཕུག་དང་ལྔ་མ་ལྡུམ་མོད་པ་དག་ནི་མ་གཏོགས་སོ་ཞེས་བྱ་བ་སྨྲས་ཏེ་གང་གིས་ག་གོན་ལ་སོགས་པ་འདི་དག་དང་དེ་དག་གི་ཚོད་ཅི་རན་དུ་ལེན་པས་དེ་ལ་གནོད་པ་འགར་ཡང་མི་འགྱུར་བ་ནི་མ་གཏོགས་ཏེ་འདི་ལྟར་དེ་དག་ནི་ཡོད་པ་ཉིད་ཡིན་པའི་ཕྱིར་དེ་ལ་ལྟུང་བ་མེད་དོ། །བསླབ་པ་དྲལ་ཏེ་ཁྱིམ་དུ་འཇུག་པ་གང་ཡིན་པ་དེ་ནི་ཤིན་ཏུ་ལྟོ་འདུན་ཅན་ཉིད་ཡིན་པས་དེའི་ཕྱིར་ལྟུང་བ་འདི་རྣམ་པར་གཞག་པ་མཛད་དོ། །བསླབ་པ་དྲལ་ཏེ་ཁྱིམ་དུ་འཇུག་པའི་སོ་སོར་བཤགས་པར་བྱ་བ་སྟེ་གསུམ་པའོ་ཞེས་བྱ་བ་དེ་བཤད་ཟིན་ཏོ།། །།ནགས་བརྟགས་པ་ལས་གྱུར་པའི་སོ་སོར་བཤགས་པར་བྱ་བ་སྨྲ་བར་འདོད་ནས། ནགས་ཉུལ་བའི་དགེ་སློང་བསྐོ་བར་བྱའོ་ཞེས་བྱ་བ་སྨྲས་ཏེ། ནགས་ཉུལ་བར་བྱེད་པས་ན་ནགས་ཉུལ་བ་སྟེ་ཅི་འདི་ན་ཆོམ་རྐུན་པ་དག་ཡོད་དམ་འོན་ཏེ་མེད་ཅེས་ནགས་རྟོག་པར་བྱེད་པ་ནི་ནགས་ཉུལ་བའི་དགེ་སློང་སྟེ་དེ་གསོལ་བ་
དང་གཉིས་ཀྱི་ལས་ཀྱིས་བསྐོ་བར་བྱའོ། །དགེ་ཚུལ་ལ་སོགས་པ་གཞན་ནི་ཡིད་བརྟན་དུ་རུང་བ་མ་ཡིན་པའི་ཕྱིར་འདིར་དགེ་སློང་ཁོ་ན་ལ་བརྟེན་པ་མཛད་དོ། །དེ་གང་གི་ཕྱིར་བསྐོ་བ་དེའི་ལས་བསྟན་པའི་ཕྱིར་དེས་དཔག་ཚད་ཕྱེད་ཁོར་ཁོར་ཡུག་ཏུ་བརྟག་པར་བྱའོ། །འཇིགས་པ་དང་བཅས་པ་ཉིད་ཡིན་ན་དུད་བརྡ་བརྟུལ་བར་བྱའོ། །བ་དན་སྔོན་པོ་བསྒྲེང་བར་བྱའོ། །འདག་མའི་ཆང་བུ་དག་ལམ་ཀར་གཞག་པར་བྱའོ་ཞེས་བྱ་བ་སྨྲས་ཏེ་དགེ་སློང་དེས་དཔག་ཚད་ཕྱེད་ཁོར་ཁོར་ཡུག་ཏུ་བརྟག་པར་བྱའོ། །གལ་ཏེ་ནགས་འཇིགས་པ་དང་བཅས་པ་ཉིད་ཡིན་ན་དུད་བརྡ་ལ་སོགས་པ་མདོ་ལས་ཇི་སྐད་སྨོས་པ་དག་བྱའོ། །གཞན་དུ་ན་དཀར་པོ་དག་གོ་ཞེས་བྱ་བ་ནི། གལ་ཏེ་ནགས་འཇིགས་པ་མེད་པར་གྱུར་ན་བ་དན་དཀར་པོ་དག་བསྒྲེང་བར་བྱའོ། །འདོད་པ་ཉིད་ཡིན་ན་དེ་ལ་ཁེའུ་སུས་དང་གྲོགས་དག་ཀྱང་སྦྱིན་པར་བྱའོ་ཞེས་བྱ་བ་ནི། ནགས་ཉུལ་བའི་དགེ་སློང་དེ་གལ་ཏེ་འདོད་པ་ཉིད་ཡིན་ན་དེ་ལ་ཁེའུ་སུས་ཀྱང་སྦྱིན་པར་བྱ། གྲོགས་དག་ཀྱང་བསྐོ་བར་བྱའོ། །ནགས་བརྟགས་པ་ལས་གྱུར་པའི་སོ་སོར་བཤགས་པར་བྱ་བ་འདི་ལ་བྱེད་པ་པོ་གང་ཡིན་ཞེ་ན་དེའི་ཕྱིར། ཤེས་གཙོ་བོ་ཞེས་བྱ་བ་སྨྲས་ཏེ། འདིར་ཡང་ཤེས་གཙོ་ཞེས་བྱ་བའི་མིང་དང་འདུ་ཤེས་གཙོ་ཆེར་བྱེད་པ་པོ་ཉིད་དོ་ཞེས་བྱ་བའི་མིང་ཅན་དུ་སྦྱོར་བར་བྱེད་དོ། །གང་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན། དེའི་ཕྱིར་ནགས་མ་བྱུལ་བ་ཉིད་ལའོ་ཞེས་བྱ་བ་སྨྲས་ཏེ། ནགས་འཇིགས་པ་མེད་པ་ཉིད་དུ་ངེས་པར་མི་ཤེས་པ་ཉིད་ལའོ། །རེ་ཞིག་བདག་གི་དོན་ནི་གྲུབ་ཟིན་གྱི། དགེ་འདུན་དང་སྦྱིན་པ་པོའི་གནོད་པ་བསྲུངས་པ་འདིས་ཁོ་བོ་ལ་ཅི་བྱ་ཞེས་བདག་ཉིད་བཀང་བ་ཙམ་གྱིས་ཆོག་པར་འཛིན་ཅིང་འཇིགས་པ་དང་བཅས་པའི་གནས་སུ་ཟས་བླངས་ཏེ་ཟ་བ་ལ་ཁ་ན་མ་ཐོ་བ་འདིར་འགྱུར་རོ། །དེ་ལྟར་ཡང་འདིར་གཞུང་ནི་དགེ་འདུན་གྱི་དགོན་པའི་གནས་དོགས་པ་དང་བཅས་པར་གྲགས་པ་འཇིགས་པ་དད་བཅས་པར་གྲགས་པ་འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་ཞིག་ཏུ་ཞེས་གསུངས་པ་ཡིན་ནོ། །འདིར་ནགས་ཞེས་བྱ་བ་ནི། དགོན་པར་གྱུར་པ་ཙམ་ཉིད་ལས་དགོངས་ཏེ་
གསུངས་པ་ཡིན་གྱི་ཤིང་ལྗོན་པའི་ཚོགས་ཐིབས་པོ་འབའ་ཞིག་ལ་ནི་མི་བྱའོ། །ཅི་ཞིག་བྱས་ན་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན་དེའི་ཕྱིར། ཀུན་དགའ་ར་བའི་ཕྱི་རོལ་གྱི་དགོན་པར་བཅའ་བ་དང་བཟའ་བ་བླངས་ཏེ་ཟོས་ནའོ་ཞེས་བྱ་བ་སྨྲས་ཏེ། གྲོང་གི་ཕྱི་རོལ་ནས་རྒྱང་གྲགས་གཅིག་གི་མཐའ་གང་ཡིན་པ་དེ་ནི་དགོན་པའི་དང་པོ་ཡིན་པས་དེའི་དགེ་སློང་ཀུན་དགའ་ར་བ་ན་གནས་པས་དེའི་ཕྱི་རོལ་དེར་བཅའ་བ་དང་བཟའ་བ་བླངས་ནས་གང་ཡང་རུང་བ་དེ་དག་ཟོས་ན་ཁ་ན་མ་ཐོ་བ་འདིར་འགྱུར་རོ། །བསྲུང་བ་བསྒྲུབས་ན་ཕྱེད་ཉིད་དོ་ཞེས་བྱ་བ་ནི། གང་གི་ཚེ་ནགས་དེ་འཇིགས་པ་མེད་པ་ཉིད་དུ་བྱུལ་བས་སྦྱིན་པ་པོ་དག་གི་བསྲུང་བ་བསྒྲུབས་པར་གྱུར་པ་དེའི་ཚེ་ཀུན་དགའ་ར་བའི་ཕྱི་རོལ་གྱི་དགོན་པ་དེར་བཅའ་བ་དང་བཟའ་བ་དག་ཟོས་ན་ཕྱེད་ཉིད་དེ་ཉེས་བྱས་བྱེད་པ་ཉིད་ཡིན་ནོ་ཞེས་བྱ་བའི་ཐ་ཚིག་གོ །འཇིགས་པ་དང་བཅས་པའི་གནས་ལས་གཞན་དུ་འཇུག་པ་ཉིད་དུ་ཡང་ངོ་ཞེས་བྱ་བ་ནི། དགོན་པ་དེའི་ཀུན་དགའ་ར་བའི་ཕྱི་རོལ་འཇིགས་པ་དང་བཅས་པའི་གནས་སུ་གྲགས་པ་དེ་ལས་གཞན་དུ་འདུག་སྟེ་ཟ་བ་ལ་ཡང་ཕྱེད་ཉིད་དོ་ཞེས་བྱ་བའི་རྗེས་བསྙེགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨྲས་སོ། །འདིར་མདོ་སྔ་མ་དང་འདི་གཉིས་ཀྱི་གཞུང་ནི་བཙུན་པ་རེ་ཞིག་དགེ་སློང་གིས་ཀུན་དགའ་ར་བའི་སླད་རོལ་དུ་རང་གི་སུག་པས་བཅའ་བ་དང་བཟའ་བ་བླངས་ཏེ་འཚལ་བར་བགྱིད་ཅིང་ཆོམ་རྐུན་པ་དག་ཀྱང་སླར་བཟློག་པར་བགྱིད། སྦྱིན་པ་པོ་སྦྱིན་བདག་ཀྱང་བདེ་བར་ཀུན་དགའ་ར་བར་འཛུད་པར་བགྱིད་ན་ལྟུང་བ་ཅིར་འགྱུར། ཉེས་བྱས་སོ་ཞེས་གསུངས་པ་ནི་མདོ་སྔ་མའི་གཞུང་ཡིན་ནོ། །ཤུལ་གྱི་ཕྱེད་དུ་མཆིས་ཏེ་འཚལ་ན་ལྟུང་བ་ཅིར་འགྱུར། ཉེས་བྱས་སོ་ཞེས་གསུངས་པ་ནི་མདོ་འདིའི་གཞུང་ཡིན་ནོ། །དགེ་སློང་མ་ལས་ཟས་ལེན་པའི་སོ་སོར་བཤགས་པར་བྱ་བ་དང་པོ་ལ་ནི་རང་གིས་ཞེས་སྨོས་པས་གཞན་ནི་ན་སྨད་པ་ཉིད་ཡིན་ནོ། །གཉིས་པ་ལ་སོགས་པ་སོ་སོར་བཤགས་པར་བྱ་བ་གསུམ་པོ་དག་ལ་ནི་རང་གིས་ཞེས་མ་སྨོས་པས་སྤྲིང་ཡིག་ལ་སོགས་པ་དང་མངགས་པས་བླངས་པ་ལ་ཡང་ཁ་ན་མ་ཐོ་བ་འདྲའོ། །ནགས་བརྟགས་པ་ལས་གྱུར་པའི་
སོ་སོར་བཤགས་པར་བྱ་བ་སྟེ་བཞི་པའོ་ཞེས་བྱ་བ་དེ་བཤད་ཟིན་ཏོ།། །།སོ་སོར་བཤགས་པར་བྱ་བ་རྣམས་རྫོགས་སོ་ཞེས་བྱ་བ་སོ་སོར་བཤགས་པར་བྱ་བའི་ཆོས་བཞི་པོ་དག་བཤད་ཟིན་ཏོ།། །།སོ་སོར་བཤགས་པར་བྱ་བའི་ཆོས་རྣམས་སྨྲས་ནས། ད་ནི། ཤམ་ཐབས་ལ་ནི་རྣམ་བདུན་དང༌། །སྟོད་གཡོགས་ལ་ཡང་རྣམ་གསུམ་དང༌། །ཤིན་ཏུ་བསྡམས་ལ་སོགས་པ་ལྔ། །མགོ་གཡོགས་ལ་སོགས་རྣམ་པ་ལྔ། །ཞེས་བྱ་བ་ལ་སོགས་པའི་རིམ་གྱིས་སོ་སོར་བཤགས་པར་བྱ་བའི་ཆོས་རྣམས་ཀྱི་འོག་ཏུ་བསྟན་པ་བསླབ་པའི་ཆོས་མང་པོ་དག་བསྡུ་བའི་ཕྱིར་ཤམ་ཐབས་ཅི་ནས་ཀྱང་ཟླུམ་པོར་འདུག་པར་འགྱུར་བ་དེ་ལྟར་བགོ་བར་བྱའོ་ཞེས་བྱ་བ་སྨྲས་ཏེ། ཟླུམ་པོ་ཞེས་བྱ་བ་ནི་མཐའི་ཁ་མཉམ་པར་འདུག་པའོ། །ཧ་ཅང་རྩེངས་པ་མ་ཡིན་པར་ཡང་ངོ་ཞེས་བྱ་བ་ལ་འདིར་ཧ་ཅང་རྩེངས་པ་ཞེས་བྱ་བ་ནི་པུས་མོ་གཉིས་ལས་གང་དུ་ཐལ་བ་ཉིད་དོ། །དེ་ལྟར་ཧ་ཅང་རྩེངས་པ་མ་ཡིན་པར་ཟླུམ་པོར་བགོ་བར་བྱའོ་ཞེས་བྱ་བའི་རྗེས་བསྙགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་ཏེ། ཧ་ཅང་རྩེངས་པ་མ་ཡིན་པ་ཞེས་བྱ་བ་ལ་སོགས་པ་མདོ་ལྷག་མ་དུག་ནི་ཟླུམ་པོ་ཞེས་བྱ་བའི་མདོ་སྔ་མ་དེའི་སྤྲོས་པ་ཡིན་གྱི་དེའི་རྣམ་པ་གཞན་བསྟན་པ་ནི་མ་ཡིན་ནོ། །ཧ་ཅང་འཇོལ་བ་མ་ཡིན་པར་རོ་ཞེས་བྱ་བ་ལ། ཧ་ཅང་འཇོལ་བ་ཞེས་བྱ་བ་ནི་ལོང་བུའི་ཚིགས་ལ་རེག་པ་ཉིད་དེ། དེ་ལྟ་བུམ་ཡིན་པར་ཤམ་ཐབས་ཟླུམ་པོར་བགོ་བར་བསླབ་པར་བྱའོ། །གྲ་གླང་པོ་ཆེའི་སྣ་ལྟར་ནར་བ་མ་ཡིན་པར་རོ་ཞེས་བྱ་བ་ལ། གྲྭ་ཞེས་བྱ་བ་ནི་ཕྱོགས་གཅིག་སྟེ་འདིར་ཁ་ཆར་དང་ཕུན་ཚར་གྱི་མཐའ་མ་བཅད་པའི་གྲ་དག་ནི་གླང་པོ་ཚེའི་སྣ་ལྟར་ནར་བདག་ཡོད་པས་དེ་ལྟ་བུ་མ་ཡིན་པར་ཤམ་ཐབས་ཟླུམ་པོར་བགོ་བར་བསླབ་པར་བྱའོ། །གོང་དུ་མ་ལྟེབས་པར་རོ་ཞེས་བྱ་བ་ནི། ལྟེ་བའི་གོང་རོལ་དུ་ཏ་ལའི་ལོ་མ་ལྟར་ལྟེབས་ཤིང་འདུག་པ་དེ་ལྟ་བུ་མ་ཡིན་པར་ཤམ་ཐབས་ཟླུམ་པོར་བགོ་བར་བསླབ་པར་བྱའོ། །ཕུར་མ་ལྟར་འདུག་པར་མ་ཡིན་པར་རོ་ཞེས་བྱ་བ་ནི། གློ་ནས་ཕྱི་རོལ་གྱི་རིམ་པའི་གྲྭ་ཕུར་མ་ལྟར་འདུག་པ་དེ་ལྟ་བུ་མ་ཡིན་པར་ཤམ་ཐབས་ཟླུམ་པོར་བགོ་བར་བསླབ་པར་བྱའོ། །སྤྲུལ་མགོའི་
གདེངས་ཀ་ལྟར་ཕྱིར་བྱུང་བ་མ་ཡིན་པར་རོ་ཞེས་བྱ་བ་ནི། མདུན་གྱི་ལྟེ་བའི་འོག་ཏུ་ཤམ་ཐབས་ཀྱི་ནང་དང་འབྲེལ་བའི་རིམ་པ་སྤྲུལ་མགོའི་གདེངས་ཀ་ལྟར་ཕྱིར་བྱུང་བདེ་ལྟ་བུམ་ཡིན་པར་ཤམ་ཐབས་ཟླུམ་པོར་བགོ་བར་བསླབ་པར་བྱའོ། །གོང་དུ་མ་ལྟེབས་པར་རོ་ཞེས་བྱ་བ་དང་འདི་གཉིས་ནི་སྟེང་གི་ཁང་ལོགས་ན་གནས་པའི་རྣམ་པ་ཡིན་ནོ། །ཆོས་གོས་ཅི་ནས་ཀྱང་དང་པོ་གསུམ་ལྟར་འགྱུར་བ་དེ་ལྟར་བགོ་བར་བྱའོ་ཞེས་བྱ་བ་ལ། ཆོས་གོས་ཞེས་བྱ་བ་ནི་བླ་གོས་དང་སྣམ་སྦྱར་རོ། །ཤམ་ཐབས་བྱིན་གྱིས་མ་བརླབས་པ་ལ་སོགས་པ་དག་ལ་ཡང་རྣམ་པ་འདི་དག་རིག་པར་བྱའོ། །དང་པོ་གསུམ་ཞེས་བྱ་བ་ནི་ཟླུམ་པོར་འདུག་པ་དང་ཧ་ཅང་རྩེངས་པ་མ་ཡིན་པ་དང་ཧ་ཅང་འཇོལ་བ་མ་ཡིན་པ་ཞེས་བྱ་བ་དེ་དག་གོ །ཤིན་ཏུ་བསྡམས་ཤིང་ཁྱིམ་གཞན་དུ་འགྲོ་བར་བྱའོ་ཞེས་བྱ་བ་ནི། རྣམ་པ་རབ་ཏུ་བརྟག་པ་ལ་སྦྱར་སྟེ། ལག་པ་དང་རྐང་པ་རྐྱོང་བ་ལ་སོགས་པ་མི་བྱ་བར་མཉམ་པར་གཞག་པའི་རྣམ་པས་ཁྱིམ་གཞན་དུ་འགྲོ་བར་བྱའོ་ཞེས་བྱ་བའི་ཐ་ཚིག་གོ །ལེགས་པར་བགོས་ཤིང་ངོ༌། །སྒྲ་བསྐྱུང་ཞིང་ངོ༌། །མིག་གཡེང་བར་མི་བྱ་ཞིང་ངོ༌། །གཉའ་ཤིང་གང་ཙམ་དུ་བལྟ་ཞིང་ངོ་ཞེས་བྱ་བ་ལ། ལེགས་པར་བགོས་བ་ཞེས་བྱ་བ་ནི། ཤམ་ཐབས་དང་སྟོད་གཡོགས་དག་གིས་གཡོགས་པར་བྱ་བའི་ལུས་མཉམ་པར་གཡོགས་ཤིང་ཞེས་བྱ་བའི་ཐ་ཚིག་གོ །སྒྲ་བསྐྱུང་བ་ཞེས་བྱ་བ་ནི་ཅ་ཅོ་བསྐྱུང་ཞིང་ངོ༌། །མིག་གཡེང་བར་མི་བྱ་བ་ཞེས་བྱ་བ་ནི་མིག་འཁྲུལ་པ་མེད་པར་རོ། །གཉའ་ཤིང་གང་ཙམ་དུ་ལྟ་བ་ཞེས་བྱ་བ་ནི། གང་ལ་གཉའ་ཤིང་གང་ཙམ་དུ་ལྟ་བའི་དང་ཚུལ་ཡོད་པ་དེ་ནི་གཉའ་ཤིང་གང་ཙམ་དུ་ལྟ་བ་སྟེ་དེ་ལྟར་རོ། །མགོ་མི་གཡོགས་པའི་རྣམ་པས་སོ་ཞེས་བྱ་བ་ནི། རས་ལ་སོགས་པས་མགོ་གཡོགས་པའི་རྣམ་པ་དེ་ལྟ་བུས་ཁྱིམ་གཞན་དུ་འགྲོ་བར་མི་བྱའོ། །མི་བརྫེ་བར་རོ་ཞེས་བྱ་བ་ནི། ཅི་ཙམ་གྱི་མའོ་མས་ཀྱི་ཕྱོགས་སྣང་བར་འགྱུར་བ་དེ་ཙམ་དུ་ཤམ་ཐབས་མི་བརྫེ་བར་རོ། །དེ་ལྟ་བས་ན་ཐ་མལ་བར་གནས་པ་ཆར་བ་ལ་སོགས་པའི་གནོད་པ་བྱུང་ན་ཡང་ཤམ་ཐབས་དང་ཆོས་གོས་བརྫེས་ཏེ་བགོ་བར་མི་བྱའོ། །ཚུལ་ཁྲིམས་ལ་སོགས་པའི་བར་ཆད་ཀྱི་དབང་
གིས་ནི་འགྲོ་བར་བྱའོ། །དེ་ལྟར་དྲུག་སྡེ་དག་ཤམ་ཐབས་བརྫེས་ཏེ་ཁྱིམ་གཞན་དུ་འགྲོ་བ་ན་བྲམ་ཟེ་ཁྱིམ་བདག་དད་པ་ཅན་དག་འདི་སྐད་ཅེས་འཕགས་པ་དག་ནི་མི་བཤང་བ་དང་གཅི་བ་བྱས་ནས་འགྲོ་བ་དང་འདྲའོ་ཞེས་འཕྱ་བར་བྱེད་དོ་ཞེས་གསུངས་པ་ཡིན་ནོ། །མི་གཟར་བར་རོ་ཞེས་བྱ་བ་ནི་ཆོས་གོས་ཕྲག་པའི་ཕྱོགས་སུ་གཟར་ཏེ་གཞག་པ་ཉིད་ནི་གཟར་བ་ཞེས་བྱ་སྟེ། དགེ་སློང་དག་ལ་ནི་ཕྲག་པ་གཡོན་པར་གཟར་བར་གྲགས་པ་ཉིད་ཡིན་པ་ཡུལ་ཛ་རྟ་དག་ན་ནི་ངོས་གཉི་གར་རོ། །གཉའ་གོང་དུ་མི་བསྣོལ་བར་རོ་ཞེས་བྱ་བ་ནི། ལག་པ་གཡས་པ་མདུན་དུ་བཏང་སྟེ་དཔུང་པ་འམ་ཕྲག་པ་འམ་གཉའ་བའི་ཕྱོགས་སུ་བཞག་ལ་གཡོན་པ་ཡང་གཡས་པ་བཞིན་དུ་བྱས་པ་དེ་ནི་གཉའ་གོང་དུ་བསྣོལ་བ་སྟེ་དེ་དེ་ལྟར་མི་བསྣོལ་བར་རོ། །ལྟག་པར་མི་བསྣོལ་བར་རོ་ཞེས་བྱ་བ་ནི། ལག་པ་ཅུང་ཟད་དམ། ཏེ་པོར་བརྐྱང་སྟེ་ལྟག་པ་འམ་དཔུང་མགོར་ལག་པ་གཉིས་ཕན་ཚུན་སྤྲད་ཅིང་བསྣོལ་བ་ནི་ལྟག་པར་བསྣོལ་བ་ཞེས་བྱའོ། །འདི་སྐད་བསྟན་ཏེ་ལྟག་པའི་ཕྱོགས་སུ་ལག་པ་ཕན་ཚུན་ནས་སྤྲད་ཏེ་སོར་མོ་བསྣོལ་བ་ཞེས་བྱ་སྟེ་དེ་ལྟར་མི་བསྣོལ་བར་རོ། །ད་ནི། མཆོང་ལ་སོགས་པ་རྣམ་པ་ལྔ། །ལུས་ལ་སོགས་པ་རྣམ་པ་ལྔ། །འདུག་པར་བྱ་བ་དགུ་དག་དང༌། །བྱིན་ལེན་བྱ་བ་བརྒྱད་རྣམས་སོ། །ཞེས་བྱ་བའི་རིམ་པ་བཤད་པར་བྱ་སྟེ། མི་མཆོང་བར་རོ་ཞེས་བྱ་བ་ནི། མཆོང་ཞིང་མཆོང་ཞིང་འགྲོ་བར་མི་བྱའོ། །མི་བརྐྱང་བར་རོ་ཞེས་བྱ་བ་ནི། སྒྱིད་པ་བརྐྱང་བསྐུམ་བྱེད་ཅིང་འགྲོ་བར་མི་བྱའོ། །ཙོག་བུས་མ་ཡིན་པའོ་ཞེས་བྱ་བ་ནི། ཙོག་བུས་འགྲོ་བར་མི་བྱའོ། །བྲང་བས་མ་ཡིན་པར་རོ་ཞེས་བྱ་བ་ནི། རྐང་པའི་རྟིང་པ་བཏེག་སྟེ་སོང་མོའི་བྲང་བས་སལ་ཕབ་སྟེ་འགྲོ་བར་མི་བྱའོ། །དཀུར་མི་བརྟེན་པར་རོ་ཞེས་བྱ་བ་ནི། ལག་པ་གཉིས་རྐེད་པའི་ཕྱོགས་སུ་བརྟེན་ཏེ་གྲུ་མོའི་ཕྱོགས་སྨྱང་སྨྱང་པོར་བྱས་ཏེ་འགྲོ་བར་མི་བྱའོ། །ལུས་མི་བསྒྱུར་བར་རོ་ཞེས་བྱ་བ་ནི། གང་དུ་འགྲོ་བ་དེ་ལུས་བསྒྱུར་ཞིང་འགྲོ་བ་ནི་ལུས་བསྒྱུར་ཞིང་འགྲོ་བ་ཞེས་བྱ་བ་སྟེ། དེ་ནི་བྱ་བའི་བྱེ་བྲག་ཡིན་པས་དེའི་ཕྱིར་ལུས་བསྒྱུར་བ་ཞེས་བྱ་བའི་བྱ་བ་དེ་བྱེད་ཅིང་ཁྱིམ་གཞན་དུ་འགྲོ་བར་མི་བྱའོ། །ལག་པ་མི་ཀྱོག་པར་རོ་ཞེས་བྱ་བ་ཡང༌། བྱ་བའི་བྱེ་
བྲག་ཡིན་ཏེ་ལག་པ་ཀྱོག་ཅིང་ཁྱིམ་གཞན་དུ་འགྲོ་བར་མི་བྱའོ། །མགོ་མི་བསྒྱུར་བར་རོ་ཞེས་བྱ་བ་ཡང་བྱ་བའི་བྱེ་བྲག་ཡིན་ཏེ། མགོ་བསྒྱུར་ཞིང་ཁྱིམ་གཞན་དུ་འགྲོ་བར་མི་བྱའོ། །ཕྲག་པ་མི་སྤྲད་པར་རོ་ཞེས་བྱ་བ་ནི། །གཞན་དག་དང་ཕྲག་པ་གཉིས་སྤྲད་ཅིང་ཁྱིམ་གཞན་དུ་འགྲོ་བར་མི་བྱའོ། །ལག་པ་མི་སྦྲེལ་བར་རོ་ཞེས་བྱ་བ་ནི་གཞན་དག་དང་ལག་པ་སྦྲེལ་ཏེ་ཁྱིམ་གཞན་དུ་འགྲོ་བར་མི་བྱའོ། །ཤིན་ཏུ་བསྡམས་ཤིང་ཁྱིམ་གཞན་དུ་འགྲོ་བར་བྱའོ་ཞེས་མན་ཆད་འདི་ཡན་ཆད་ཐམས་ཅད་ཁྱིམ་གཞན་དུ་འགྲོ་བར་བྱའོ་ཞེས་བྱ་བར་སྦྱར་རོ། །དེར་མ་བསྒོ་བར་སྟན་ལ་འདུག་པར་མི་བྱའོ་ཞེས་བྱ་བ་ནི། ཁྱིམ་གཞན་དེར་ཁྱིམ་བདག་གིས་མ་བསྒོ་བར་དགེ་སློང་སྟན་ལ་འདུག་པར་མི་བྱ་བ་སྟེ། ཅི་སྲིད་དུ་མ་བསྒོ་བ་དེ་སྲིད་དུ་སྟན་ལ་འདུག་པར་མི་བྱའོ་ཞེས་བྱ་བའི་ཐ་ཚིག་གོ །སྟན་ལ་མ་བརྟགས་པར་མི་བྱའོ་ཞེས་བྱ་བ་ནི། ཁྱིམ་གཞན་དེར་སྟན་ལ་མ་བརྟགས་པར་འདུག་པར་མི་བྱ་བའོ། །ལུས་ཐམས་ཅད་ཀྱི་ལྗིད་ཀྱིས་མི་དབབ་པར་རོ་ཞེས་བྱ་བ་ནི། ཁྱིམ་གཞན་དེར་སྟན་ལ་ཟོན་ཡོད་པར་དལ་བུས་ལུས་ཕབ་སྟེ་འདུག་པར་བྱའི། གྱ་ཙོམ་དུ་ལུས་ཐམས་ཅད་ཀྱི་ལྗིད་ཀྱིས་ཕབ་སྟེ། ཐིག་ཅེས་འདུག་པར་མི་བྱ་བའོ། །རྐང་པ་མི་བསྣོལ་བར་རོ་ཞེས་བྱ་བ་ནི། རྐང་པའི་སྟེང་དུ་རྐང་པ་བཞག་སྟེ་འདུག་པར་མི་བྱ་བའོ། །བརླ་མི་བསྣོལ་བར་རོ་ཞེས་བྱ་བ་ཡང༌། བརླའི་སྟེང་དུ་བརླ་བཞག་སྟེ་འདུག་པར་མི་བྱའོ། །ལོང་བུའི་སྟེང་དུ་ལོང་བུ་མི་གཞག་པར་རོ་ཞེས་བྱ་བ་ཡང༌། ལོང་བུའི་སྟེང་དུ་ལོང་བུ་བཞག་སྟེ་འདུག་པར་མི་བྱའོ། །རྐང་པ་མི་འགུག་པར་རོ། །རྐང་པ་མི་གདངས་པར་རོ། །མདོམས་མི་སྣང་བར་རོ་ཞེས་བྱ་བ་འདིས་ནི་བརླ་གཉིས་སམ་བྱིན་པ་གཉིས་སམ་རྐང་པ་གཉིས་སམ་ཡང་ན་ཐམས་ཅད་ཀྱང་རུང་སྟེ། ཐད་ཀར་གདངས་ཏེ་འདུག་པར་མི་བྱ་བ་བསྟན་ཏོ། །ལག་པ་ལ་འགྲམ་པ་བརྟེན་ཏེ་མི་བྱའོ་ཞེས་བྱ་བ་ནི་རྐོམ་ཚུགས་བཅས་ཏེ་སྟན་ལ་འདུག་པར་མི་བྱའོ། །སྟན་ཐབས་བསྐུར་བར་མི་བྱའོ་ཞེས་བྱ་བ་ནི། སྟན་གང་ལ་འདུག་འདུག་པ་དེ་རྒྱབ་ཀྱིས་ཁྱེར་ཞིང་འགྲོ་བར་མི་བྱའོ་ཞེས་བྱ་བའི་ཐ་ཚིག་གོ །ཐམས་ཅད་དུ་ལེགས་པར་ཁ་ཟས་བླང་པར་བྱའོ་ཞེས་བྱ་བ་ནི། གྲོང་འབའ་
ཞིག་ཏུ་མ་ཟད་ཀྱི་གཞན་དུ་ཡང་ངོ༌། །མུ་དང་ཁ་ད་ཆད་དུ་མ་ཡིན་པར་རོ་ཞེས་བྱ་བ་ལ། མུ་ཞེས་བྱ་བའི་སྒྲ་ནི་ཁ་ལོགས་ཀྱི་མུ་ལ་བྱ་སྟེ། ཅི་ནས་ཀྱང་མུ་དང་ཁ་ད་ཆད་དུ་གང་བར་འགྱུར་བ་དེ་ལྟར་བླང་བར་མི་བྱའོ། །ཅུང་ཞིག་མ་གང་བ་དེ་ཙམ་དུ་བྱས་ཏེ་བླང་བར་བྱ་བ་ཡིན་གྱི། ཁའི་མུ་ནས་མཐེ་བོའི་ལྟོ་གང་གིས་མ་གང་བར་བྱས་ཤིང་བླང་བ་ནི་མ་ཡིན་ཏེ། དེ་ནི་ལྷུང་བཟེད་ཀྱི་ཚད་བཤད་པར་ཟད་ཀྱི་ཟས་བླང་བའི་ཚད་ནི་མ་ཡིན་ནོ། །ཚོད་མ་དང་མཉམ་པ་མ་ཡིན་པར་རོ་ཞེས་བྱ་བ་ནི། བཟའ་བ་གང་ལ་ཚོད་མ་དང་མཉམ་པ་དེ་ནི་ཚོད་མ་དང་མཉམ་པ་སྟེ་དེ་ལྟར་བླང་བར་མི་བྱའོ། །འདིར་ཚོད་མ་ཞེས་བྱ་བ་ནི་བྱ་ན་ཐམས་ཅད་ཀྱི་དཔེ་ཡིན་ནོ། །ཚོད་མ་ཇི་ཙམ་གྱིས་མུ་དང་ཁ་ད་ཆད་དུ་འགྱུར་བ་དེ་འདིར་དགག་པ་ནི་མ་ཡིན་ཏེ། སྔར་མུ་དང་ཁ་ད་ཆད་ཉིད་བཀག་ཟིན་པའི་ཕྱིར་རོ། །གང་གི་ཕྱིར་བཟའ་བར་བྱ་བའི་ཟས་གཡོས་སུ་བྱས་ཟིན་པ་ཐམས་ཅད་བསོད་སྙོམས་ཉིད་དུ་བསྟན་པ་ཡིན་པ་དེའི་ཕྱིར་རང་ལ་དགོས་པའི་ཚད་ལས་ལྷག་པའི་ཚོད་མ་ལེན་པ་དེ་བཀག་པ་ཡིན་ནོ། །དེ་ལྟར་ཡང་འདིར་གཞུང་ནི་མ་མོ་ལས་ཇི་ཙམ་གྱིས་དེ་འཚོ་བར་འགྱུར་བ་དེ་ལས་ལྷག་པར་ལེན་ཏམ་ཟ་ན་ཐ་ན་ཁམ་གཅིག་ཙམ་ཡིན་དུ་ཟིན་ཀྱང་དད་པས་སྦྱིན་པར་བྱ་བ་ཆུད་གཟན་པར་བརྗོད་པར་བྱའོ་ཞེས་གསུངས་པ་ཡིན་ནོ། །གང་གི་ཚེ་ཚད་འཛིན་པར་མི་ནུས་སམ་ཕྱིར་བཟློག་པར་མི་ནུས་པས་ཡོན་བདག་གིས་ནན་གྱིས་བླུག་པ་དང་རྗེས་སུ་སྙིང་བརྩེ་བས་ལེན་ན་དེའི་ཚེ་འབྲས་ཆན་ལ་སོགས་པ་ལྷག་པར་ལེན་ཅིང་གཞན་ནམ་སུ་ཡང་རུང་བ་ལ་སྦྱིན་ནོ་སྙམ་པ་དེ་ལ་ནི་ལྟུང་བ་མེད་པར་རིག་པར་བྱའོ། །མཐར་ཆགས་སུའོ་ཞེས་བྱ་བ་ནི། སྟན་ལ་འདུག་པའི་གྲལ་གྱི་རིམ་བཞིན་དུ་ཟན་བླང་བར་བྱའོ། །འདིར་རྒན་རིམས་སུ་བྱ་བ་ནི་མ་ཡིན་གྱི་སྟན་ལ་འདུག་པའི་གྲལ་གྱི་རིམ་དུ་བྱ་བ་ཡིན་ཏེ། རྒན་རིམས་མ་ཡིན་པར་འདུག་པར་གྱུར་ན་ཡང་ཇི་ལྟར་འདུག་པ་བཞིན་རྒན་རིམས་མ་ཡིན་པར་བྲིམས་པར་བྱ་བའི་རྒན་རིམས་ལྟག་འོག་ན་འདུག་པ་ལ་ཐོད་རྒལ་དུ་བྲིམས་པར་མི་བྱ་སྟེ། དེ་ནི་སྔོན་དྲུག་སྡེ་དག་ཟན་ཟ་བ་ན་ཚོད་མ་འཕྲལ་དུ་བྲིམས་པ་མི་ནོད་པར་འོག་ཏུ་ཐག་རིང་དུ་ཐལ་བ་དང་ཕྱིར་འབོད་
པས་བྲིམས་པ་འཁྲུགས་ཤིང་ལང་ལོང་དུ་གྱུར་པའི་ཉེས་དམིགས་དེ་ལྟ་བུ་བསལ་བའི་ཕྱིར་རོ། །ལྷུང་བཟེད་ལ་ལྟ་ཞིང་ངོ་ཞེས་བྱ་བ་ནི། སྣོད་ཤེས་པར་བྱ་ཞིང་བླང་བ་དེ་གང་ལ་ལྷུང་བཟེད་ལ་ལྟ་བའི་འདུ་ཤེས་ཡོད་པའི་དགེ་སློང་དེ་ནི་ལྷུང་བཟེད་ལ་བལྟ་བའོ། །འདིར་ལྷུང་བཟེད་ལ་ལྟ་བ་ཞེས་བྱ་བ་ནི་ཡིད་ཀྱིས་བལྟ་བ་ལ་བྱའི་མིག་གི་དབང་པོས་བལྟ་བ་ལ་ནི་མ་ཡིན་ནོ། །དེ་ལྟ་བས་ན་ལྷུང་བཟེད་དང་འབྲེལ་པའི་ཡིད་ཀྱིས་ཟས་ལེགས་པར་བླང་བར་བྱ་བ་ཡིན་གྱི། ཐ་སྙད་ལས་བྱུང་བ་ན། གཉའ་ཤིང་གང་ཙམ་དུ་ལྟ་བའི་སྐབས་སུ་བཀག་ཟིན་ཏོ། །བཅའ་བ་དང་བཟའ་བ་མ་འོངས་པར་ལྷུང་བཟེད་མི་བཟེད་པར་རོ་ཞེས་བྱ་བ་ནི། ཇི་སྲིད་དུ་བཅའ་བ་དང་བཟའ་བ་མངོན་སུམ་དུ་མ་འོངས་པ་དེ་སྲིད་དུ་ལྷུང་བཟེད་མི་བཟེད་པར་བསླབ་པར་བྱ་བའོ། །ཡང་འདོད་པའི་ཕྱིར་འབྲས་ཆན་གྱིས་ཚོད་མ་མི་དགའ་ཚོད་མས་འབྲས་ཆན་མི་དགབ་པར་རོ་ཞེས་བྱ་བ་ནི། ཡང་ཐོབ་པར་བྱའོ་སྙམ་པའི་བསམ་པས་འབྲས་ཆན་གྱིས་ཚོད་མ་མི་དགབ་ཚོད་མས་འབྲས་ཆན་མི་དགབ་པར་བསླབ་པར་བྱའོ། །སྟེང་དུ་གཟུང་བར་མི་བྱའོ་ཞེས་བྱ་བ་ནི། བཅའ་བ་དང་བཟའ་བ་དེའི་སྟེང་དུ་ལྷུང་བཟེད་གཟུང་བར་མི་བྱ་བའོ། །ད་ནི། ཟས་ལ་ལེགས་པར་བྱ་བ་དྲུག །ཙུག་ཙུག་ལ་སོགས་རྣམ་པ་ལྔ། འབྲུ་ནས་ཐ་དད་བྱེད་པ་ལྔ། ལག་པ་བལྡག་ལ་སོགས་པ་ལྔ། །ཞེས་བྱ་བའི་གོ་རིམས་བཤད་པར་བྱ་སྟེ། ལེགས་པར་ཟས་བཟའ་བར་བྱའོ་ཞེས་བྱ་བ་ནི། མདོ་འོག་མ་ལྔའི་ལུས་ལྟ་བུ་ཡིན་ནོ། །ཁམ་ཧ་ཅང་ཆུང་བ་མ་ཡིན་པར་རོ་ཞེས་བྱ་བ་ལ། ཁམ་ཞེས་བྱ་བ་ནི་ཁར་ཁམ་ཚད་དུ་གཞུག་ཅིང་མེད་པར་བྱ་བའི་ཕྱིར་ཁམ་ཞེས་བྱ་བ་སྟེ། དེ་ཧ་ཅང་ཆུང་དུ་མ་ཡིན་པར་བསླབ་པར་བྱ་བའོ། །ཁམ་ཧ་ཅང་ཆེན་པོ་མ་ཡིན་པར་རོ་ཞེས་བྱ་བ་ནི། ཁམ་ཧ་ཅང་ཆེན་པོ་ཡང་མ་ཡིན་པར་ཟས་བཟའ་བར་བསླབ་པར་བྱ་བའོ། །ཁམ་རན་པར་རོ་ཞེས་བྱ་བ་ནི། རང་དང་མཐུན་པ་དང་འཇིག་རྟེན་དང་མཐུན་པའི་ཁམ་རན་པར་བཟའ་བར་བྱའོ། །ཁམ་མ་བཟས་པར་ཁ་མི་གདངས་སོ་ཞེས་བྱ་བ་སྟེ། ཇི་སྲིད་དུ་ཁམ་ཁའི་སྒོར་ཉེ་བར་མ་
འོངས་པ་དེ་སྲིད་དུ་ཁའི་སྒོ་གདངས་པར་མི་བྱ་བའོ། །ཁ་ཁམ་གྱིས་བཀང་སྟེ་མི་སྨྲ་བར་བྱའོ་ཞེས་བྱ་བ་ནི། ཁ་ཁམ་གྱིས་གང་བ་ནི་ཁམ་གྱིས་བཀང་བ་སྟེ། ཁ་དེས་ཚིག་སྨྲ་བར་མི་བྱ་བའོ། །ཙུག་ཙུག་མི་བྱའོ་ཞེས་བྱ་བ་ནི། ཙུག་ཙུག་ཟེར་ཞིང་བཟའ་བར་མི་བྱ་བའོ། ཅག་ཅག་མི་བྱའོ། །ཧུ་ཧུ་མི་བྱའོ། །ཕུ་ཕུ་མི་བྱའོ་ཞེས་བྱ་བ་དག་ནི། དེ་དག་སྐད་མི་བྱ་བར་ཟན་བཟའ་བར་བྱ་བ་སྟེ། དེ་དག་ནི་ཁའི་རྣམ་པར་འགྱུར་པའི་སྒྲའི་བྱེ་བྲག་ཡིན་ནོ། །ལྕེ་ཕྱུང་སྟེ་ཟས་མི་བཟའོ་ཞེས་བྱ་བ་ནི་ཟན་ཟ་བ་ན་ལྕེ་ཕྱིར་ཕྱུང་སྟེ་བཟའ་བར་མི་བྱ་བའོ། །འབྲུ་ནས་ཐ་དད་དུ་མི་བྱའོ་ཞེས་བྱ་བ་ལ་འབྲུ་ཞེས་བྱ་བ་ནི། འབྲས་ཆན་ལ་སོགས་པའི་འབྲུ་སྟེ་ཟན་གང་ལ་འབྲུ་སྟེ་དེ་ལྟ་བུ་ཡོད་པ་དེར་ག་རེ་རེ་ནས་བཏུ་ཞིང་བཟའ་བར་མི་བྱའོ། །འདིར་ནི་རྣམ་པར་འགྱུར་བ་བྱེད་པའི་ཕྱིར་དགག་པ་ཡིན་གྱི་རྟག་པའི་ཕྱིར་དགག་པ་ནི་མ་ཡིན་ནོ། །འཕྱས་མི་གདགས་སོ་ཞེས་བྱ་བ་ནི། ཟས་ལ་འཕྱ་སྨོད་མི་བྱ་བའོ། །མཁུར་བ་མི་སྤོའོ་ཞེས་བྱ་བ་ནི་མཁུར་བ་གཉིས་དགལ་བཞིན་དུ་བཀང་སྟེ་གཡས་གཡོན་སྤོ་བར་མི་བྱའོ་ཞེས་བྱ་བའི་ཐ་ཚིག་གོ །རྐན་མི་གཏོག་གོ་ཞེས་བྱ་བ་ནི། ལྕེས་རྐན་གཏོག་ཅིང་ཟན་བཟའ་བར་མི་བྱའོ། །ཁམ་འཕྲོར་བཅད་ཅིང་བཟའ་བར་མི་བྱའོ་ཞེས་བྱ་བ་ནི་ཁམ་འཕྲོར་བཅད་ཅིང་ཟན་བཟའ་བར་མི་བྱ་བའོ། །ལག་པ་མི་བལྡག་གོ །ལྷུང་བཟེད་མི་བྱོག་གོ །ལག་པ་མི་སྤྲུག་གོ །ལྷུང་བཟེད་མི་བསྐྱམ་མོ་ཞེས་བྱ་བ་ལ། ལག་པ་མི་བལྡག་གོ་ཞེས་བྱ་བ་ནི། ཟས་གང་ལ་ལག་པ་བལྡག་པ་ཡོད་པ་དེ་མི་བལྡག་པའོ། །ལྷུང་བཟེད་མི་བྱོག་གོ་ཞེས་བྱ་བ་ནི། སོར་མོས་མི་བྱོག་པའོ། །ལག་པ་མི་སྤྲུག་གོ་ཞེས་བྱ་བ་ནི། ལག་པ་ལ་ཟས་ཆགས་པ་སྤྲུག་པར་མི་བྱ་བའོ། །ཡང་ན་ལག་པ་ལ་ཟས་ཆགས་པ་ལྕེའི་སྟེང་དུ་སྤྲུགས་པར་མི་བྱ་བའོ། །ལྷུང་བཟེད་མི་བསྐྱམ་མོ་ཞེས་བྱ་བ་ནི། ལྷུང་བཟེད་ཀྱི་ནང་དུ་ཟས་ལ་སོགས་པ་བླུགས་ཏེ་བསྐྱམ་པར་མི་བྱ་བའོ། །ཡང་ན་ལྷུང་བཟེད་ཀྱི་ནང་དུ་ཟས་བླུགས་ཏེ་ལྕི་ཡང་ཅི་ཡོད་པ་ལག་སྲང་ལ་མི་གདབ་པའོ། །མཆོད་རྟེན་འདྲ་བར་བྱས་ཏེ་མི་གཞོམ་མོ་ཞེས་བྱ་བ་ནི། ཟན་ལ་མཆོད་རྟེན་གྱི་དབྱིབས་འདྲ་བར་བྱས་ཏེ་གཞོམ་ཞིང་བཟའ་བར་མི་བྱའོ།།
ད་ནི། འཕྱ་ལ་སོགས་པ་རྣམ་པ་བཞི། །ལྷུང་བཟེད་ལ་ཡང་རྣམ་པ་བཅུ། །འགྲེང་བར་བྱེད་ལ་སོགས་པ་ལྔ། །མགོ་གཡོགས་ལ་སོགས་རྣམ་པ་ལྔ། །ཞེས་བྱ་བའི་རིམ་པ་བཤད་པར་བྱ་སྟེ། དྲུང་ན་འདུག་པའི་དགེ་སློང་གི་ལྷུང་བཟེད་ལ་འཕྱས་གདགས་པའི་ཕྱིར་མི་བལྟའོ་ཞེས་བྱ་བ་ནི། གང་ལ་འཕྱས་གདགས་པའི་ཕྱིར་བལྟ་བའི་ངང་ཚུལ་ཡོད་བདེ་ནི་འཕྱས་གདགས་པའི་ཕྱིར་ལྟ་བ་སྟེ། དེས་དྲུང་ན་འདུག་པའི་དགེ་སློང་གི་ལྷུང་བཟེད་ལ་འཕྱས་གདགས་པའི་ཕྱིར་མི་བལྟ་བའོ། །དྲུང་ན་འདུག་པ་ཞེས་བྱ་བ་ནི་མཚོན་པ་ཙམ་དུ་ཟད་དོ། །ལག་པ་ཟས་དང་འབགས་པས་ཆུ་སྣོད་ལ་མི་བཟུང་ངོ་ཞེས་བྱ་བ་ནི། ལག་པ་ཟས་དང་འབགས་པས་བྱ་མ་བུམ་ལ་སོགས་པའི་ཆུ་སྣོད་ལ་མི་བཟུང་ངོ་ཞེས་བྱ་བའི་ཐ་ཚིག་གོ །དྲུང་ན་འདུག་པའི་དགེ་སློང་ལ་ཟས་དང་འབགས་པའི་ཆུས་མི་གཏོར་རོ་ཞེས་བྱ་བ་ལ་འདིར་ཡང་དྲུང་ན་འདུག་པ་ཞེས་བྱ་བ་ནི་མཚོན་པ་ཙམ་དུ་ཟད་དོ། །ཁྱིམ་ན་འདུག་པ་ལ་མ་དྲིས་པར་དེའི་ཁྱིམ་དུ་མི་དབོའོ་ཞེས་བྱ་བ་ནི། ཁྱིམ་བདག་ལ་མ་དྲིས་པར་ཟས་དང་འབགས་པའི་ཆུ་དེ་ཁྱིམ་པའི་ཁྱིམ་དུ་མི་དབོ་བར་བསླབ་པར་བྱ་བའོ། །ལྷུང་བཟེད་ཀྱི་ནང་དུ་ཟས་ཀྱི་ལྷག་མ་བླུགས་ཏེ་མི་དོར་བར་རོ་ཞེས་བྱ་བ་ནི། ཤིང་ཏོག་ལ་སོགས་པ་ཕྱད་ཕྱེད་ཟོས་པ་དང་ངན་མར་གྱུར་པ་ལྷུང་བཟེད་ཀྱིས་མི་འདོར་བར་བསླབ་པར་བྱ་བའོ། །ལྷུང་བཟེད་ལན་གསུམ་བཀྲུས་ཏེ་གཙུག་ལག་གི་ཚིགས་སུ་བཅད་པ་དག་གིས་བཟླས་བརྗོད་བྱས་པའི་ལྷུང་བཟེད་ཀྱི་ཆུ་སྦྱིན་པར་བྱའོ་ཞེས་བྱ་བ་ནི། ལྷུང་བ་ཟེད་ལན་གསུམ་དག་པར་བཀྲུས་ཏེ། དྲང་སྲོང་གིས་གསུངས་པའི་གཙུག་ལག་གི་ཚིགས་སུ་བཅད་པ་དག་གིས་བཟླས་བརྗོད་བྱས་པ་བྲམ་ཟེ་ལ་སོགས་པ་སློང་བ་དག་ལ་སྦྱིན་པར་བྱའོ། །འོག་གཞི་མེད་པའི་ས་ཕྱོགས་སུ་ལྷུང་བཟེད་མི་གཞག་པར་རོ་ཞེས་བྱ་བ་ནི། ལོ་མ་ལ་སོགས་པ་དག་གིས་མ་གཡོགས་པ་འོག་གཞི་མེད་པའི་ས་ཕྱོགས་སུ་ལྷུང་བཟད་མི་གཞག་པར་བསླབ་པར་བྱ་བའོ། །གད་ག་མ་ཡིན་པར་རོ་ཞེས་བྱ་བ་ནི། ངོས་ཆད་པའི་ངམ་གྲོག་གི་ཁ་མ་ཡིན་པར་ལྷུང་བཟེད་གཞག་པར་བསླབ་པར་བྱ་བའོ། །གཡང་ས་མ་ཡིན་པར་རོ་ཞེས་བྱ་བ་ནི། བྱིན་གྱིས་གཞོལ་བའི་གཡང་ས་མ་ཡིན་པར་ལྷུང་བཟེད་གཞག་
པར་བསླབ་པར་བྱ་བའོ། །དཀན་གཟར་པོ་མ་ཡིན་པར་རོ་ཞེས་བྱ་བ་ནི། བང་རིམ་གཞོ་བོ་མ་ཡིན་པར་ལྷུང་བཟེད་གཞག་པར་བསླབ་པར་བྱ་བའོ། །འགྲེང་སྟེ་ལྷུང་བཟེད་མི་བཀྲུ་བར་རོ་ཞེས་བྱ་བ་ནི། དགེ་སློང་གིས་འགྲེང་སྟེ་ལྷུང་བཟེད་མི་བཀྲུ་བར་བསླབ་པར་བྱ་བའོ། །དེ་དེ་གསུམ་དུ་བྱ་བར་རོ་ཞེས་བྱ་བ་ནི། ལྷུང་བཟེད་བཀྲུ་བདེ་གད་ཀ་མ་ཡིན་པ་དང་གཡང་ས་མ་ཡིན་པ་དང་དཀན་གཟར་པོ་མ་ཡིན་པ་དེ་གསུམ་དུ་བྱ་བར་བསླབ་པར་བྱ་བའོ། །དེས་འབབ་ཆུ་དྲག་པོའི་རྒྱུན་ལས་བཟློག་སྟེ་ཆུ་མི་བཅུ་བར་རོ་ཞེས་བྱ་བ་ནི། ལྷུང་བཟེད་དེས་འབབ་ཆུ་དྲག་པོའི་རྒྱུན་ལས་བཟློག་སྟེ་ཆུ་མི་བཅུ་བར་བསླབ་པར་བྱ་བའོ། །ལམ་གྱི་བཞི་མདོར་མི་བྱའོ་ཞེས་བྱ་བ་ནི། ཧ་ཅང་རྒྱུན་ལུགས་མང་བའི་ཕྱིར་རོ། །བཤང་གཅི་ཡན་ཆད་ནི་མིན་བ་ལའོ་ཞེས་བྱ་བ་ནི། འོག་ནས་འགྲེང་སྟེ་བཤང་གཅི་མི་བྱའོ་ཞེས་འབྱུང་བ་ཡན་ཆད་ནི་མིན་བར་རོ་ཞེས་བྱ་བའི་རྗེས་སུ་སྦྱར་བར་རིག་པར་བྱ་བའོ། །དེ་དག་ལ་ནི་མིན་བ་ལའོ་ཞེས་བྱ་བ་ནི། བཤང་གཅི་ཞེས་བྱ་བ་དང་འབྲེལ་བའི་རྣམ་པ་དེ་དག་ལ་མིན་བར་ཞེས་བྱ་བ་དང་རྗེས་སུ་སྦྱར་བར་རིག་པར་བྱའོ། །འདུག་པ་ལ་འགྲེང་སྟེ་ཆོས་མི་བཤད་པར་རོ་ཞེས་བྱ་བ་ནི། ཉན་པ་པོ་མིན་པར་འདུག་པ་ལ་དགེ་སློང་འགྲེང་སྟེ་ཆོས་མི་བཤད་པར་བསླབ་པར་བྱ་བའོ། །ཉལ་བ་ལ་འདུག་སྟེ་མི་བཤད་པར་རོ་ཞེས་བྱ་བ་ནི། ཉན་པ་པོ་མིན་བར་ཉལ་བ་ལ་དགེ་སློང་འདུག་སྟེ་ཆོས་མི་བཤད་པར་བསླབ་པར་བྱ་བའོ། །སྟན་མཐོན་པོ་ལ་འདུག་པ་ལ་སྟན་དམའ་བ་ལ་འདུག་སྟེ་མི་བཤད་པར་རོ་ཞེས་བྱ་བ་ནི། ཉན་པ་པོ་མིན་པར་སྟན་མཐོན་པོ་ལ་འདུག་པ་ལ་དགེ་སློང་སྟན་དམའ་བ་ལ་འདུག་སྟེ་ཆོས་མི་བཤད་པར་བསླབ་པར་བྱ་བའོ། །འདིར་སྟན་ཞེས་བྱ་བས་ནི་འདུག་པའི་ས་ཕྱོགས་ཀྱང་གཟུང་བར་རིག་པར་བྱའོ། །ངན་པ་དང་བཟང་པོ་ཡང་དེ་ཡིན་ནོ་ཞེས་བྱ་བ་ནི། སྟན་དམའ་བ་དང་མཐོ་བ་དེ་ཉིད་ཡིན་པར་རིག་པར་བྱའོ། །འདི་སྐད་བསྟན་ཏེ་གང་གི་ཚེ་སྟན་ཚད་མཉམ་པ་དེའི་ཚེ་ངན་པ་ནི་དམའ་བ་ཉིད་ཡིན་ལ་བཟང་པོ་ནི་མཐོན་པོ་ཉིད་ཡིན་པར་ཤེས་པར་བྱའོ། །འདིར་གཞུང་ནི་སྒུར་མཆོག་གིས་དེ་དག་ནི་སྟན་བཟང་པོ་ལ་མཆིས་ཏེ་ཆོས་ཉན་ལ་བདག་ནི་སྟན་ངན་པ་ལ་མཆིས་ཏེ་ཆོས་སྟོན་ཏོ་ཞེས་
གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དེ་ལྟར་ཆོས་བསྟན་པར་མི་བྱའོ་ཞེས་གསུངས་པ་ཡིན་ནོ། །མདུན་དུ་འགྲོ་བ་ལ་ཕྱི་ནས་འགྲོ་ཞིང་མི་བཤད་པར་རོ་ཞེས་བྱ་བ་ནི། ཉན་པ་པོ་མིན་བར་མདུན་དུ་འགྲོ་བ་ལ་དགེ་སློང་ཕྱི་ནས་འགྲོ་ཞིང་ཆོས་མི་བཤད་པར་བསླབ་པར་བྱ་བའོ། །ལམ་ནས་འགྲོ་བ་ལ་ལམ་གྱི་འགྲམ་ནས་འགྲོ་ཞིང་མི་བཤད་པར་རོ་ཞེས་བྱ་བ་ནི། ཉན་པ་པོ་མིན་བར་ལམ་ནས་འགྲོ་བ་ལ་དགེ་སློང་ལམ་གྱི་འགྲམ་ནས་འགྲོ་ཞིང་ཆོས་མི་བཤད་པར་བསླབ་པར་བྱ་བའོ། །མགོ་གཡོགས་པ་དང་བརྫེས་པ་དང་གཟར་བ་དང་གཉའ་གོང་དུ་བསྣོལ་བ་དང་ལྟག་པར་བསྣོལ་བ་ལ་མི་བཤད་པར་རོ་ཞེས་བྱ་བ་ནི། ཉན་པ་པོ་མིན་པར་མགོ་གཡོགས་པ་དང་བརྫེས་པ་དང་གཟར་བ་དང་གཉའ་གོང་དུ་བསྣོལ་བ་དང་ལྟག་པར་བསྣོལ་བ་ལ་དགེ་སློང་གིས་ཆོས་མི་བཤད་པར་བསླབ་པར་བྱ་བའོ། །འདི་ལྔའི་མཚན་ཉིད་ནི། སྔར་མགོ་གཡོགས་ལ་སོགས་རྣམ་པ་ལྔ། །ཞེས་བྱ་བའི་རིམ་གྱིས་བཤད་ཟིན་ཏོ།། །།ད་ནི། དོ་ཀེར་ཅན་ལ་སོགས་པ་དང༌། །གླང་ཆེན་ལ་སོགས་ཞོན་པ་ལྔ། །ལག་ན་འཁར་བ་ལ་སོགས་དྲུག །ན་བ་རྣམ་པ་བཞི་རྣམས་སོ། །ཞེས་བྱ་བའི་རིམ་པ་བཤད་པར་བྱ་སྟེ། མགོ་དོ་ཀེར་ཅན་དང་ཞྭ་གོན་པ་དང་ཅོད་པན་ཅན་དང་ཕྲེང་བ་ཅན་དང་དཀྲིས་པ་ལ་མི་བཤད་པར་རོ་ཞེས་བྱ་བ་ནི། ཉན་པ་པོ་མིན་བར་མགོ་དོ་ཀེར་ཅན་དང་མགོ་ཞྭ་གྱོན་པ་དང༌། མགོ་ཅོད་པན་ཅན་དང་མགོ་ཕྲེང་བ་ཅན་དང༌། མགོ་ཐོད་བཅིངས་པ་ལ་དགེ་སློང་གིས་ཆོས་མི་བཤད་པར་བསླབ་པར་བྱ་བའོ། །གླང་པོ་ཆེ་དང་རྟ་ཞོན་པ་དང་ཁྱོགས་དང་བཞོན་པའི་སྟེང་ན་འདུག་པ་དང་མཆིལ་ལྷམ་གྱོན་པ་ལ་མི་བཤད་པར་རོ་ཞེས་བྱ་བ་ནི། ཉན་པ་པོ་མིན་བར་གླང་པོ་ཆེ་ལ་ཞོན་པ་དང་རྟ་ཞོན་པ་དང་ཁྱོགས་ན་འདུག་པ་དང༌། བཞོན་པའི་སྟེང་ན་འདུག་པ་དང༌། མཆིལ་ལྷམ་གྱོན་པ་ལ་དགེ་སློང་གིས་ཆོས་མི་བཤད་པར་བསབ་པར་བྱ་བའོ། །ལག་ན་འཁར་བ་དང་གདུགས་དང་མཚོན་དང་རལ་གྲི་དང་དགྲ་ཆ་ཐོགས་པ་དང་གོ་ཆ་གྱོན་པ་ལ་མི་བཤད་པར་རོ་ཞེས་བྱ་བ་ནི། ཉན་པ་པོ་མིན་བར་ལག་ན་འཁར་བ་ཐོགས་པ་དང་ལག་ན་གདུགས་ཐོགས་པ་དང་ལག་ན་མཚོན་ཆ་ཐོགས་པ་དང༌། ལག་ན་རལ་གྲི་ཐོགས་པ་དང་ལག་ན་དགྲ་ཆ་ཐོགས་པ་དང་གོ་ཆ་གྱོན་པ་ལ་དགེ་
སློང་གིས་ཆོས་མི་བཤང་བར་བསླབ་པར་བྱ་བའོ། །འགྲེང་སྟེ་བཤད་གཅི་མི་བྱ་བར་རོ་ཞེས་བྱ་བ་ནི། དགེ་སློང་མིན་བར་འགྲེང་སྟེ་བཤང་གཅི་མི་བྱ་བར་བསླབ་པར་བྱ་བའོ། །ཆུའི་ནང་དུ་མི་བྱ་བར་རོ་ཞེས་བྱ་བ་ནི། དགེ་སློང་མིན་བར་ཆུའི་ནང་དུ་བཤང་གཅིག་མི་བྱ་བར་བསླབ་པར་བྱ་བའོ། །མི་དོར་བར་རོ་ཞེས་བྱ་བ་ནི། དགེ་སློང་མིན་བར་བཤད་གཅི་བྱས་པ་ཆུའི་ནང་དུ་མི་དོར་བར་བསླབ་པར་བྱ་བའོ། །མཆིལ་མ་དང་སྣབས་དང་སྐྱུགས་པ་དང་རླུགས་པ་ཡང་ངོ་ཞེས་བྱ་བ་ནི། དགེ་སློང་མིན་བར་ཆུའི་ནང་དུ་མཆིལ་མ་ལ་སོགས་པ་འདི་དག་མི་བྱ་ཞིང་མི་དོར་བར་བསླབ་པར་བྱ་བའོ། །རྩྭ་སྔོན་པོ་ཡོད་པའི་ས་ཕྱོགས་སུ་ཡང་མི་བྱ་མི་དོར་བར་རོ་ཞེས་བྱ་བ་ནི། དགེ་སློང་མིན་བར་རྩྭ་སྔོན་པོ་ཡོད་པའི་ས་ཕྱོགས་སུ་བཤད་གཅི་དང་མཆིལ་མ་དང་སྣབས་དང་སྐྱུགས་པ་དང་རླུགས་པ་དག་བདག་ཉིད་ཀྱིས་མི་བྱ་བ་དང་བྱས་ཟིན་པ་མི་དོར་བར་ཡང་བསླབ་པར་བྱ་བའོ། །གནོད་པ་བྱུང་བ་མ་གཏོགས་པར་ཤིང་ལ་མི་གང་ཙམ་ལས་མཐོར་མི་འཛེག་པར་རོ་ཞེས་བྱ་བ་ནི། དགེ་སློང་གནོད་པ་བྱུང་བ་མ་གཏོགས་པར་ཤིང་ལ་མི་གང་ཙམ་ལས་མཐོར་མི་འཛེག་པར་བསླབ་པར་བྱ་བའོ། །བསླབ་པ་རྣམས་ཀྱི་ཡུལ་གྱི་རབ་ཏུ་དབྱེ་བ་ནི་མདོར་བསྡུ་ན་རྣམ་པ་དགུ་སྟེ། གོས་བགོ་བ་དང། སྤྱོད་ཡུལ་དུ་འགྲོ་བ་དང༌། དེར་སྟན་ལ་འདུག་པ་དང༌། ཟས་བླངས་པ་དང༌། ཟན་ཟ་བ་དང༌། ལྟུང་བཟེད་སྤྱོད་པ་དང༌། ཆོས་བསྟན་པ་དང༌། བསྒྲུབ་པའི་ཚུལ་དང༌། རྒྱུ་བ་སྟེ་དེ་དག་ནི་ཤམ་ཐབས་ཟླུམ་པོར་བགོ་བར་བསླབ་པར་བྱ་ཞེས་བྱ་བ་ནས་གནོད་པ་བྱུང་བམ་གཏོགས་པར་ཤིང་ལ་མི་གང་ཙམ་ལས་མཐོར་མི་འཛེག་པར་བསླབ་པར་བྱའོ་ཞེས་བྱ་བའི་བར་དང་གོ་རིམས་བཞིན་དུ་སྦྱར་རོ། །བསླབ་པ་རྣམས་སོ་ཞེས་བྱ་བ་བསླབ་པའི་ཆོས་མང་པོ་རྣམས་བཤད་ཟིན་ཏོ། །དགེ་སློང་གི་རྣམ་པར་འབྱེད་པ་རྫོགས་སོ་ཞེས་བྱ་བ་དེ་བཤད་ཟིན་ཏོ།། །། དགེ་སློང་གི་རྣམ་པར་འབྱེད་པ་སྨྲས་ནས། ད་ནི་དགེ་སློང་མའི་རྣམ་པར་འབྱེད་པ་བརྗོད་པར་བྱ་སྟེ། གང་གི་ཕྱིར་ལུས་ཀྱི་བྱེ་བྲག་གིས་བསམ་པས་བྱེ་བྲག་ཏུ་འགྱུར་ལ། བསམས་པའི་བྱེ་བྲག་གིས་ལྟུང་བའི་བྱེ་བྲག་ཏུ་འགྱུར་ཞིང་ལྟུང་བའི་བྱེ་བྲག་གིས་བཅས་པའི་བྱེ་བྲག་ཏུ་འགྱུར་བའི་དགེ་སློང་
མ་རྣམས་ཀྱི་འདུལ་བ་ལོགས་ཤིག་ཏུ་རྣམ་པར་གཞག་པ་དེའི་ཕྱིར། དགེ་སློང་མ་རྣམས་ཀྱི་བསླབ་པའི་གཞི་དགེ་སློང་རྣམས་དང་མཐུན་པ་གང་ཡིན་པ་དེ་ནི་དགེ་སློང་གི་རྣམ་པར་འབྱེད་པ་རྣམ་པར་བཤད་པ་དེ་ཉིད་ཀྱིས་རྣམ་པར་ཕྱེ་བ་ཡིན་ནོ། །མི་མཐུན་པ་གང་ཡིན་པ་དེའི་བྱེ་བྲག་འདིར་བརྗོད་པར་བྱ་སྟེ། དེ་ལ་དགེ་སློང་ལ་ཚུལ་ཁྲིམས་རྣམ་པར་གཞག་པ་ལས་དགེ་སློང་མ་རྣམས་ཀྱི་མ་ཡིན་པ་ཡང་ཡོད་དེ། དཔེར་ན་ཀུན་དུ་སྤྱོད་པ་བསྔགས་པ་ལྟ་བུ་དང་ལ་ལ་ཉེས་པ་ཆུང་པ་ཉིད་དུ་རྣམ་པར་གཞག་པ་ཡང་ཡོད་དེ། དཔེར་ན་དགེ་སློང་ཁུ་བ་འབྱིན་པ་དགེ་འདུན་ལྷག་མར་འགྱུར་བ་དགེ་སློང་མ་རྣམས་ཀྱི་ལྟུང་བྱེད་དུ་འགྱུར་བ་ལྟ་བུ་དང་ལ་ལ་ཉེས་པ་ཆེ་བ་ཉིད་དུ་རྣམ་པར་གཞག་པ་ཡང་ཡོད་དེ། དཔེར་ན་དགེ་སློང་རྣམས་ཀྱི་ལུས་ཀྱིས་རེག་པའི་དགེ་འདུན་ལྷག་མ་དགེ་སློང་མ་རྣམས་ཀྱི་ཕམ་པར་འགྱུར་བ་ལྟ་བུ་སྟེ། དེ་དག་གི་བྱེ་བྲག་བརྗོད་པར་བྱའོ། །དེ་ལ་ལྟུང་བ་ལ་སྦྱོར་བའི་ཚིག་ཡན་ཆད་དགེ་སློང་མ་རྣམས་ཀྱིའོ་ཞེས་བྱ་བ་ནི། འདི་ནས་བརྩམས་ཏེ་འོག་ནས་ཉམས་པ་དང་མ་སྐྱེས་པ་དག་ལྟུང་བ་ལ་སྦྱོར་བ་ནི་ཉེས་བྱས་སོ་ཞེས་འབྱུང་བའི་ཚིག་ཡན་ཆད་ནི་དགེ་སློང་མ་རྣམས་ཀྱི་ཡིན་པར་བལྟ་བར་བྱའོ། །ལྟུང་བ་ལ་སྦྱོར་བའི་ཚིག་ཅེས་བྱ་བ་ནི་ལྟུང་བའི་སྦྱོར་བ་ཞེས་བྱ་བའི་སྒྲ་འདི་ཉིད་ཚིག་ཡིན་ནོ། །མི་ཚངས་སྤྱོད་དང་ལེན་པ་དང༌། །དེ་བཞིན་གསོད་དང་སྨྲ་བ་དང༌། །རེག་པ་དང་ནི་ལུས་བཀན་དང༌། །འཆབ་པ་དང་ནི་བཟློག་པའོ། །ཞེས་བྱ་བའི་རིམ་གྱིས་དགེ་སློང་མ་རྣམས་ཀྱི་ཕམ་པར་འགྱུར་བ་བརྒྱད་རྣམ་པར་གཞག་པ་དག་བསྡུ་བར་བྱའོ། །བཞི་པོ་དག་གོ་ཞེས་བྱ་བ་ནི། དགེ་སློང་གི་རྣམ་པར་འབྱེད་པར་ཕམ་པར་འགྱུར་བ་བཞི་པོ་མི་ཚངས་པར་སྤྱོད་པ་དང་མ་བྱིན་པར་ལེན་པ་དང༌། གསོད་པ་དང༌། སྨྲ་བ་ཞེས་བྱ་བ་གང་དག་བསྟན་པ་དེ་དག་ཐམས་ཅད་ནི་དགེ་སློང་མ་རྣམས་ཀྱི་ཡང་ཡིན་པར་བལྟ་བར་བྱའོ། །ད་ནི་ཕམ་པར་འགྱུར་བ་དག་གི་བྱེ་བྲག་བརྗོད་པར་བྱ་སྟེ། དགེ་སློང་གི་ལུས་ཀྱི་རེག་པའི་དགེ་འདུན་ལྷག་མ་དགེ་སློང་མ་རྣམས་ཀྱི་རེག་པའི་ཕམ་པར་འགྱུར་བར་གསུངས་པ་དང༌། དགེ་སློང་གི་མི་ཚངས་པར་སྤྱོད་པའི་ཕམ་པར་འགྱུར་བའི་སྦྱོར་བ་དགེ་སློང་མ་རྣམས་ཀྱི་ལུས་བཀན་པའི་ཕམ་པར་
འགྱུར་བར་གསུངས་པ་དང༌། དགེ་སློང་གི་གཞན་གྱི་གནས་ངན་ལེན་འཆབ་པའི་ལྟུང་བྱེད་དགེ་སློང་མ་རྣམས་ཀྱི་འཆབ་པའི་ཕམ་པར་འགྱུར་བར་གསུངས་པ་དང༌། དགེ་སློང་གི་སྤངས་པའི་རྗེས་སུ་ཕྱོགས་པའི་ལྟུང་བྱེད་དགེ་སློང་མ་རྣམས་ཀྱི་བཟློག་པའི་ཕམ་པར་འགྱུར་བར་གསུངས་པར་དེའི་རིམ་པས་དེ་དག་གི་མཚན་ཉིད་བརྗོད་པར་བྱའོ། །དེ་ལ་གང་ལ་རེག་པའི་ཕམ་པར་འགྱུར་ཞེ་ན་དེའི་ཕྱིར་བདག་གིར་བྱེད་པ་ལའོ་ཞེས་བྱ་བ་སྨྲས་ཏེ། རེག་པ་ཞེས་འོག་ནས་འབྱུང་བའོ། །ཡན་ལག་གང་གིས་ཤེ་ན་དེའི་ཕྱིར། མིག་ནས་པུས་མོའི་བར་གྱིས་སོ་ཞེས་བྱ་བ་སྨྲས་ཏེ། མིག་གི་གནས་མན་ཆད་ནས་པུས་མོའི་ལྷ་ང་ཡན་ཆད་ཀྱི་བར་དེས་སོ། །དེས་ཅི་ཞིག་བདག་གིར་བྱེད་པ་ལ་ཞེ་ན་དེའི་ཕྱིར་རེག་པའོ་ཞེས་བྱ་བ་སྨྲས་ཏེ། ནོམ་པར་བྱེད་ཉུག་པར་བྱེད་ལ་ཞེས་གསུངས་པ་ནི་འདི་དཔེ་ཡིན་ཏེ། འདི་ལྟར་ནོམ་པར་བྱེད་ཉུག་པར་བྱེད་ལ་ཞེས་བྱ་བ་དེའི་རྣམ་པར་བྱེད་པ་ནི་ལུས་ལ་ལུས་ཀྱིས་ཉེ་བར་གཞོལ་བར་བྱས་ལ་ཞེས་གསུངས་པ་ཡིན་ནོ། །གང་གི་རེག་པ་ཞེ་ན་དེའི་ཕྱིར་ཕོའིའོ་ཞེས་བྱ་བ་སྨྲས་ཏེ། སྐྱེས་པའིའོ། །ལུས་ཀྱི་དབང་པོའི་ཕྱོགས་ཀྱིས་བདག་གིར་བྱེད་པ་ལ་ཞེས་གང་གསུངས་པ་དེ་ལ་བསམས་པ་གང་གིས་ཤེ་ན་དེའི་ཕྱིར་འཁྲིག་པའི་འདོད་ཆགས་ཀྱིས་སོ་ཞེས་བྱ་བ་སྨྲས་ཏེ། གལ་ཏེ་དགེ་སློང་མས་འཁྲིག་པའི་འདོད་ཆགས་ཀྱི་བསམ་པས་ཕོའི་རེག་པ་བདག་གིར་བྱེད་ནའོ། །དེ་ལྟར་ཡང་འདིར་གཞུང་ནི་སོ་སོར་ཐར་པའི་མདོ་ལས་ཡང་དགེ་སློང་མ་གང་ཆགས་པར་གྱུར་པ་ཞེས་གསུངས་པ་ཡིན་ནོ། །ཆགས་པར་གྱུར་པ་ཞེས་བྱ་བ་ནི། ཆགས་པ་དང་ཀུན་ཏུ་ཆགས་པ་དང་ཀུན་ནས་དཀྲིས་ཤིང་འདོད་པའི་འདོད་ཆགས་ཀྱིས་ཟིལ་གྱིས་གནོན་པ་གང་ཡིན་པའོ་ཞེས་རྣམ་པར་འབྱེད་པ་ལས་འབྱུང་ངོ༌། །འདི་ལྟར་སོ་སོར་ཐར་པའི་མདོ་ལས་ཡང་དགེ་སློང་མ་གང་ཆགས་པར་གྱུར་ལ། སྐྱེས་པ་ཆགས་པར་གྱུར་པ་ཞེས་གསུངས་མོད་ཀྱི། འདིར་སྐྱེས་པའི་འདོད་ཆགས་ལ་ནི་བརྟེན་པར་མི་བྱ་སྟེ། འདི་ལྟར་དེ་དག་ཉིད་ཀྱིས་རྣམ་པར་འབྱེད་པ་ལས་ཆགས་པར་གྱུར་པས་སྐྱེས་པ་མ་ཆགས་པས་པུས་མོ་ཡན་ཆད་མིག་མན་ཆད་དུ་ནོམ་པར་བྱེད་ཉུག་པར་བྱེད་པ་བདག་གིར་བྱེད་ན་ཕམ་པར་འགྱུར་རོ་ཞེས་གསུངས་པའི་ཕྱིར་རོ།། །།བམ་
པོ་སུམ་ཅུ་བརྒྱད་པ། ཡན་ལག་གཞན་གྱིས་ནི་སྦོམ་པོའོ་ཞེས་བྱ་བ་སྨྲས་ཏེ། མིག་ནས་པུས་མོའི་བར་ལས་གཞན་པའི་ཡན་ལག་གི་ཕོའི་རེག་པ་འཁྲིག་པའི་འདོད་ཆགས་ཀྱིས་བདག་གིར་བྱེད་པ་ལ་ནི་ཉེས་པ་སྦོམ་པོར་འགྱུར་རོ། །སྐྲ་དག་དང་དེ་དང་འབྲེལ་པའི་གོས་ལ་རེག་པ་ལ་ཅི་ཞིག་ཏུ་རྣམ་པར་གཞག་ཅེ་ན། འདིར་ལེན་བུ་དང་དེ་དང་འབྲེལ་པའི་གོས་ནི་ལུས་དད་འདྲ་བ་ཉིད་ཡིན་པས་དེའི་ཕྱིར་དེ་དག་ལ་ཡང་དངོས་གཞིར་རྣམ་པར་གཞག་སྟེ་ཕམ་པར་འགྱུར་རོ་ཞེས་བྱ་བའི་ཐ་ཚིག་གོ །གཡོགས་པས་ནི་བར་དུ་གོས་ཀྱིས་ཆོད་པ་ཡིན་པས་སྦོམ་པོའོ་ཞེས་བྱ་བའི་ཐ་ཚིག་གོ །སེམས་གཞན་གྱི་ནི་ན་སྨད་དོ་ཞེས་བྱ་བ་ནི། འཁྲིག་པའི་འདོད་ཆགས་ཀྱི་སེམས་མ་ཡིན་པས་བདག་གིར་བྱེད་པ་ལ་ནི་གང་ལ་ཕམ་པར་འགྱུར་བར་གསུངས་པ་དེ་ལ་ནི་སྦོམ་པོར་ན་སྨད་ལ་གང་ལ་སྦོམ་པོར་གསུངས་པ་དེ་ལ་ནི་ཉེས་བྱས་སུ་ན་སྨད་དོ་ཞེས་བྱ་བའི་ཐ་ཚིག་གོ ། ཅི་ཐམས་ཅད་ལ་རྣམ་པ་དེ་དང་འདྲ་འམ་ཞེ་ན་དེའི་ཕྱིར་གལ་ཏེ་དེའི་ཚེ་དེ་ལ་སྐྱེས་པའི་དེ་དེས་ཤེས་པ་ནའོ་ཞེས་བྱ་བ་སྨྲས་ཏེ། གལ་ཏེ་དུས་དེའི་ཚེ་དགེ་སློང་མ་དེ་ལ་སྐྱེས་པའི་འདོད་པའི་འདོད་ཆགས་ཀྱི་བདག་ཉིད་ཀྱི་སེམས་དེ་ཡོད་པར་དགེ་སློང་མ་དེས་སྐྱེས་པ་འདི་བདག་ལ་ཆགས་སོ་སྙམ་དུ་ཤེས་པས་ན་འདི་ལྟར་དགེ་སློང་མ་དེ་ལ་འདོད་པའི་འདོད་ཆགས་ཀྱི་སེམས་མངོན་སུམ་དུ་མ་གྱུར་དུ་ཟིན་ཀྱང་རང་ལ་བསམ་པའི་ཉེས་པ་ཡོད་པ་ཁོ་ན་ཡིན་ཏེ། དེའི་ཕྱིར་འདིར་སྐྱེས་པའི་འདོད་པའི་འདོད་ཆགས་ཡན་ལག་ཉིད་ཡིན་ནོ། །གལ་ཏེ་མེད་ན་ནི་དེ་ལས་ཀྱང་ངོ་ཞེས་བྱ་བ་ནི། གལ་ཏེ་དེའི་ཚེ་སྐྱེས་པ་ལ་འདོད་པའི་འདོད་ཆགས་མེད་དམ་ཡོད་ན་ཡང་དེ་ལ་ཡིན་ནམ། དེ་ལ་མ་ཡིན་ན་ཡང་མི་ཤེས་ན་ནི་དེའི་ཚེ་ན་སྨད་པ་དེ་ལས་ཀྱང་ན་སྨད་པར་བྱ་སྟེ། གང་ལ་ན་སྨད་པ་ལ་སྦོམ་པོར་འགྱུར་བ་དེ་ལ་ནི་ཉེས་བྱས་སུ་འགྱུར་ལ། གང་ལ་ཉེས་བྱས་སུ་འགྱུར་བ་དེ་ལ་ནི་ཉེས་བྱས་ཐ་མོར་འགྱུར་རོ་ཞེས་བྱ་བའི་ཐ་ཚིག་གོ །བདག་གིར་མི་བྱེད་པ་ལ་ནི་ལྟུང་བ་མེད་དོ་ཞེས་བྱ་བ་ནི། ཇི་ལྟར་ཡང་བདག་གིར་བྱེད་པ་དང་དུ་མི་ལེན་པ་དེ་ལ་ནི་བཅས་པ་འདིར་གཏོགས་པའི་ཁ་ན་མ་ཐོ་བའི་ལྟུང་བ་ནི་མེད་དོ། གཞན་ཡིན་ན་བྱིས་པ་ལ་ཡང་རེག་པར་མི་བྱའོ་ཞེས་
འོག་ནས་འབྱུང་བ་དེའི་ཉེས་བྱས་ནི་ཡོད་དོ། །བུ་ལ་རེག་པ་ལ་ནི་སྐྱོན་ཆགས་པ་མེད་དོ་ཞེས་བྱ་བ་ནི། མས་བུ་ལ་བྱམས་པའི་སེམས་ཀྱིས་སེམས་གཞན་མ་ཡིན་པ་དང༌། རྣམ་པར་འགྱུར་བ་མེད་པའི་སེམས་ཀྱིས་བུ་ལ་རེག་པ་ལ་ནི་སྐྱོན་ཆགས་པ་མེད་དོ། །གཞན་ཡིན་ན་བྱིས་པ་ལ་ཡང་རེག་པར་མི་བྱའོ་ཞེས་བྱ་བ་ནི། རང་གི་བུ་ལས་གཞན་ཡིན་ན་བྱིས་པ་ལ་ཡང་ཕུ་ནུ་འམ་ཕ་ཁུ་འམ་མཚན་ཞང་ངམ་བུ་ཚ་ལ་སོགས་པ་ལ་བྱམས་པའི་སེམས་ལྟ་བུ་འམ་མཛའ་བ་ཤེས་སམ་དགེ་བའམ་རྣམ་པར་འགྱུར་བ་མེད་པའི་སེམས་ཀྱིས་ཀྱང་རེག་པར་མི་བྱ་བའོ། །མདོ་འདི་གཉིས་ཀྱི་གཞུང་ནི་ཕྲན་ཚེགས་དག་ལས་གང་གི་ཚེ་དགེ་སློང་མ་སྦེད་མ་ལས་འོད་སྲུངས་གཞོན་ནུ་བཅས་པ་དེའི་ཚེ་དེ་ལ་སྦེད་མ་རེག་པར་མི་བྱེད་པ་དང་དེ་དུ་བ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རེག་པར་བྱ་བ་དང་བསྣུན་པར་བྱ་བ་དང་བསྐྱེད་པར་བྱ་བར་རྗེས་སུ་གནང་ངོ་ཞེས་གསུངས་པའི་བར་དང༌། བུད་མེད་ནི་སྲེད་པ་ཅན་ཡིན་པས་དགེ་སློང་མ་རྣམས་ཀྱིས་དེ་ཕྲག་པ་ནས་ཕྲག་པར་བརྒྱུད་པར་བྱེད་དེ་དེ་ཕྲག་པ་ནས་ཕྲག་པར་བརྒྱུད་པ་ན་རྐ་བར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་མས་གཞན་གྱི་བུ་ལ་རེག་པར་མི་བྱའོ། །རེག་ན་འགལ་ཚབས་ཅན་དུ་ཡང་འགྱུར་རོ་ཞེས་གསུངས་པ་ཡིན་ནོ། །ཕོའི་འོ་ཞེས་སྨྲས་ན་ཕོ་ཅི་ཙམ་གྱི་ཁ་ན་མ་ཐོ་བ་ཡོངས་སུ་རྫོགས་པར་བྱེད་པ་ཉིད་ཡིན་ཞེ་ན་དེའི་ཕྱིར་འདོད་པ་དང་ལྡན་པ་ལ་བརྟེན་པ་དང་ཚིག་ལ་དེ་དང་ལྡན་པའི་དོན་ཡོངས་སུ་ཤེས་པར་བྱ་བའི་མཐུ་ཡོད་པ་ཉིད་ཀྱིས་ཕོ་ནི་ཡོངས་སུ་རྫོགས་པར་བྱེད་པ་ཉིད་ཡིན་ནོ་ཞེས་བྱ་བ་སྨྲས་སྟེ། འདོད་པ་དང་ལྡན་པའི་བསླབ་པའི་གཞི་རེག་པ་དང་མི་ཚངས་པར་སྤྱོད་པ་ལ་སོགས་པ་ལ་ནི་བསྟེན་པའི་མཐུ་ཡོད་པ་ཉིད་ཀྱི་ཕོ་ནི་ཁ་ན་མ་ཐོ་བ་ཡོངས་སུ་རྫོགས་པར་བྱེད་པ་ཉིད་ཡིན་ནོ། །ཆོས་སྟན་པ་ལ་སོགས་པ་ལ་ནི་དེ་དང་ལྡན་པའི་དོན་འདོད་པ་དང་ལྡན་པའི་ཚིག་བརྗོད་པའི་དོན་ཡོངས་སུ་ཤེས་ཤིང་གོ་བར་བྱ་བའི་མཐུ་ཡོད་པ་ཉིད་ཀྱི་ཕོ་ནི་ཁ་ན་མ་ཐོ་བ་ཡོངས་སུ་རྫོགས་པར་བྱེད་པ་ཉིད་ཡིན་ནོ། །མཐུ་མེད་པ་ཉིད་ཀྱི་ཕོ་ནི་ན་སྨད་པར་བྱེད་པ་ཉིད་ཡིན་ནོ། །དགེ་སློང་གི་རྣམ་པར་འབྱེད་པ་ལས་དེ་སྐད་དུ་མཐུ་ཡོད་པ་ལ་ཕམ་པར་འགྱུར་བ་གང་ཡིན་
པ་དེ་མཐུ་མེད་པ་ལ་ཉེས་པ་སྦོམ་པོར་འགྱུར་རོ་ཞེས་བྱ་བ་ལ་སོགས་པ་གསུངས་མོད་ཀྱི་འདྲ་བའི་ཕྱིར་འདིར་ཡང་དེ་ལ་བརྟེན་ཏོ། །རེག་པའི་ཕམ་པར་འགྱུར་བའོ་ཞེས་བྱ་བདེ་བཤད་ཟིན་ཏོ།། །།གང་ལ་ལུས་བཀན་པའི་ཕམ་པར་འགྱུར་ཞེ་ན་དེའི་ཕྱིར་ལུས་བཀན་པ་ལའོ་ཞེས་བྱ་བ་སྨྲས་སྟེ། ལུས་བཀན་པ་ཞེས་བྱ་བ་ནི་ཉལ་བའོ། །སུ་ཞེ་ན་དགེ་སློང་མ་ཞེས་བྱ་བར་ཤུགས་ཀྱིས་མངོན་ཏེ། འདིར་དགེ་སློང་མ་ལྟུང་བ་འབྱིན་པའི་དབང་དུ་བྱས་པའི་ཕྱིར་རོ། །སེམས་ཅི་ལྟ་བུས་ཤེན་དེའི་ཕྱིར་ཆགས་པར་གྱུར་པས་བསྟེན་པའི་ཕྱིར་ཉེ་བར་གནས་པའི་སྐྱེས་པ་ཆགས་པའི་ཕྱིར་རོ་ཞེས་བྱ་བ་སྨྲས་ཏེ། དགེ་སློང་མ་ཆགས་པར་གྱུར་པས་ལུས་བཀན་ནའོ། །ཟླ་ཇི་ལྟ་བུའི་ཕྱིར་ལུས་བཀན་ན་ཞེ་ན་དེའི་ཕྱིར་ལྟུང་བ་འབྱིན་པར་བྱེད་པའི་དགེ་སློང་མ་དེ་ལ་བརྟེན་པའི་ཕྱིར་ཉེ་བར་གནས་པའི་སྐྱེས་པ་ཆགས་པའི་ཕྱིར་རོ་ཞེས་བྱ་བ་སྨྲས་སྟེ། དགེ་སློང་མ་ཆགས་པར་གྱུར་པ་དེས་ཟླ་དེ་ལྟ་བུའི་ཕྱིར་ལུས་བཀན་ན་དེ་ཕམ་པར་འགྱུར་རོ། །ཆགས་པར་གྱུར་པས་ཞེས་བྱ་བ་ཅིའི་ཕྱིར་སྨོས་ཤེ་ན་ལན་འགའ་འཇིགས་པའི་དབང་གིས་ལུས་བཀན་པ་ཡང་སྲིད་ལ་ལན་འགའ་བ་སྲན་པའི་ཕྱིར་གལ་ཏེ་ཁྱོད་ཁོ་མོ་ལ་ཞོན་ཕོད་ན་ཁོ་མོ་ཉལ་ལོ་ཞེས་ལུས་བཀན་པ་ཡང་སྲིད་པས་དེའི་ཕྱིར་ཆགས་པར་གྱུར་པས་ཞེས་བྱ་བ་སྨོས་ཏེ། འཁྲིག་པའི་འདོད་ཆགས་ཀྱི་སེམས་ཀྱིས་སོ། །དེ་ལ་འཇིགས་པའི་དབང་གིས་ལུས་བཀན་པ་ལ་ནི་ལྟུང་བ་མེད་དོ། །བསྲན་པའི་ཕྱིར་ལུས་བཀན་པ་ལ་ནི་ཉེས་བྱས་སོ། །འོ་ན་བསྟེན་པའི་ཕྱིར་ཉེ་བར་གནས་པའི་སྐྱེས་པ་ཆགས་པའི་ཕྱིར་རོ་ཞེས་སྨོས་པ་འདི་ལ་ཆགས་པ་ཞེས་བྱ་བའི་ཚིག་ལྷག་སྟེ་བསྟེན་པའི་ཕྱིར་ཉེ་བར་གནས་པའི་སྐྱེས་པ་ཞེས་སྨོས་པ་ཉིད་ཀྱིས་དེ་དགེ་སློང་མ་དེ་ལ་ཆགས་པ་མ་སྨོས་ཀྱང་འགྲུབ་པའི་ཕྱིར་རོ་ཞེ་ན། དེ་ནི་དེ་ལྟ་མ་ཡིན་ཏེ། ལན་འགའ་དགེ་སློང་མ་དེ་རིང་ཞིག་ཐོགས་ཏེ་འོངས་ལ། སྐྱེས་པ་དེ་ཡུན་རིང་ཞིག་སྡོད་སྡོད་པས་སེམས་ཁྲོས་པར་གྱུར་ཏམ་སེམས་གཞན་སྐྱེས་པར་གྱུར་པ་ཡང་སྲིད་པས་དེའི་ཕྱིར་ཆགས་པ་ཞེས་བྱ་བའི་ཚིག་སྨོས་སོ། །ཅི་ཐམས་ཅད་དུ་ལུས་བཀན་པ་ཇི་སྐད་བསྟན་པ་དེ་ལ་ཁ་ན་མ་ཐོ་བ་འདིར་འགྱུར་རམ་ཞེ་ན་དེའི་ཕྱིར་དེས་སྤང་དུ་རུང་པ་ཉིད་ལའོ་
ཞེས་བྱ་བ་སྨྲས་ཏེ། བསྟེན་པའི་ཕྱིར་ཉེ་བར་གནས་པའི་སྐྱེས་པ་ཆགས་པར་གྱུར་པ་ངེས་དགེ་སློང་མ་དེ་ལ་གལ་ཏེ་སྤྲད་དུ་རུང་བ་ཉིད་ཡིན་ན་སྟེ་དེ་ལ་ཁ་ན་མ་ཐོ་བ་འདིར་འགྱུར་རོ་ཞེས་བྱ་བའི་ཐ་ཚིག་གོ །དེ་ལྟར་ཡང་འདིར་གཞུང་ནི་གང་དུ་སྐྱེས་པས་བུད་མེད་བགྲོད་དུ་རུང་བདེ་ལྟ་བུའི་ཕྱོགས་སུ་ལུས་བཀན་ན་ཞེས་གསུངས་པ་དང༌། ལྟུང་བ་བསྟན་པ་ལས་གང་དུ་སྐྱེས་པས་བུད་མེད་བགྲོད་དུ་རུང་བ་དེ་ལྟ་བུའི་ཕྱོགས་སུ་ཞེས་བྱ་བ་ནི། ཕྱིར་བཟློག་ཏུ་མེད་པའི་གནས་སུའོ། །ལུས་བཀན་པ་ཞེས་བྱ་བ་ཉལ་ན་སྟེ། དེ་ལྟར་གང་དུ་སྐྱེས་པས་བུད་མེད་བགྲོད་དུ་རུང་བ་དེ་ལྟ་བུའི་ཕྱོགས་སུ་ལུས་བཀན་ན་ཕམ་པར་འགྱུར་རོ་ཞེས་གསུངས་པ་ཡིན་ནོ། །ཆགས་པར་གྱུར་པས་ཆགས་པར་གྱུར་པ་དང་ལྟན་ཅིག་གཞོགས་སྟེགས་བྱེད་ན་སྤོམ་པོའི་ཞེས་བྱ་བ་ནི། དགེ་སློང་མ་ཆགས་པར་གྱུར་པས་སྐྱེས་པ་ཆགས་པར་གྱུར་པ་དང་ལྷན་ཅིག་གཞོགས་སྟེགས་བྱེད་ན་སྦོམ་པོར་འགྱུར་བའོ། གཞོགས་སྟེགས་ཞེས་བྱ་བ་ནི། ཧ་ཅང་བརྟད་པར་མི་འཇུག་ཅིང་བཙུན་སྦུ་མ་ཉམས་པར་འཇོ་སྒེག་དང་ཀུན་དུ་རྩེ་བ་ལ་སོགས་པའི་ལུས་དང་ངག་གི་ལས་སོ། །འདིར་གཞུང་ནི་ཆགས་པར་གྱུར་པས་སྐྱེས་པ་ཆགས་པར་གྱུར་པ་དང་ལྷན་ཅིག་གཞོགས་སྟེགས་བྱེད་ན་ཉེས་པ་སྦོམ་པོར་འགྱུར་རོ། །སྐྱེས་པ་འོང་བ་དང་འགྲོ་བ་བདག་གིར་བྱེད་ན་ཉེས་པ་སྦོམ་པོར་འགྱུར་རོ་ཞེས་བྱ་བའི་བར་དུ་གསུངས་པ་ཡིན་ནོ། །ཕྱར་གཡེང་ངོ་ཞེས་བྱ་བ་ཡང༌། དགེ་སློང་མ་ཆགས་པར་གྱུར་པས་སྐྱེས་པ་ཆགས་པར་གྱུར་པ་དང་ལྷན་ཅིག་ཕྱར་གཡེང་བྱེད་ན་སྦོམ་པོར་འགྱུར་རོ། །ཕྱར་གཡེང་ཞེས་བྱ་བ་ནི། ཤིན་ཏུ་བརྟད་པར་འཇུག་ཅིང་ཧྲལ་བག་བྱེད་པའོ། །རྩ་བ་ཧྲལ་ལོ་ཞེས་བྱ་བ་ཡང༌། དགེ་སློང་མ་ཆགས་པར་གྱུར་པས་སྐྱེས་པ་ཆགས་པར་གྱུར་པ་དང་ལྷན་ཅིག་ཅབ་ཧྲལ་བྱེད་ན་སྦོམ་པོར་འགྱུར་བའོ། །རྩ་བ་ཧྲལ་ཞེས་བྱ་བ་ནི་བཙུན་སྤུ་ཉམས་ཤིང་བསྟེན་པའི་ཕྱིར་གཞོལ་ལ་ངོ་ཚ་མེད་པར་ཞུགས་ཤིང་ཟེ་ལངས་པར་གྱུར་ནས། མགོ་འདར་བ་དང་ཚིགས་འགུལ་བ་དང༌། །ཚིགས་འཁྲུལ་པ་ཉིད་ལ་སོགས་པ་ལུས་དང་དག་གི་ལས་སོ། །དེ་དག་ཐམས་ཅད་ལ་ཡང་ཆགས་པར་གྱུར་པས་ཆགས་པར་གྱུར་པ་དང་
ལྷན་ཅིག་བྱེད་ན་ཞེས་བྱ་བར་སྦྱར་ཏེ། དེའི་ཕྱིར་གཞོགས་སྟེགས་དང་ཕྱར་གཡེང་དང་རྩ་བ་ཧྲལ་ཞེས་བྱ་བ་འདི་དག་ནི་ལུས་བཀན་པའི་སྦྱོར་བ་ཐམས་ཅད་ཀྱི་དཔེ་ཡིན་ཏེ། དེས་ན་འདིར་མ་ལ་ཤོམ་པར་བྱེད་པ་ལ་སོགས་པ་དག་ཀྱང་སྦོམ་པོར་འགྱུར་བའོ། །དེ་ལས་དུས་མལ་མནོས་ན་ཡང་ངོ་ཞེས་བྱ་བ་ནི། དགེ་སློང་མ་ཆགས་པར་གྱུར་པ་དེས་སྐྱེས་པ་ཆགས་པར་གྱུར་པ་དེ་ལ་སྐྱེད་མོས་ཚལ་ཆེ་གེ་མོ་ཞིག་ཏུ་ཤོག་ཤིག་ཅེ་འམ་ཁྱོད་ཀྱི་ཁྱིམ་ཆེ་གེ་མོ་ཞིག་ཏུ་ཁོ་མོ་འང་ངོ་ཞེས་དུས་མལ་ཚིག་གིས་ནོད་པ་དང༌། སྐྱེས་པ་ཆགས་པར་གྱུར་པས་ཁོ་བོ་སྐྱེད་མོས་ཚལ་ཆེ་གེ་མོ་ཞིག་ཏུ་འོང་གིས་ཁྱོད་ཀྱང་གནས་དེར་ཤོག་ཤིག་ཅེས་དུས་མལ་བཏབ་པ་ཚིག་གིས་ནོད་ན་སྦོམ་པོའོ། །བྱ་བས་དང་དུ་ལེན་ན་ནི་ཉེས་བྱས་སོ། །འདིར་གཞུང་ནི་སྤྱིར་བསྟན་པ་ལས་ཚིག་གིས་ཞེས་གསུངས་པ་ཡིན་ནོ། །བརྡའོ་ཞེས་བྱ་བ་ནི། བྱེད་པ་མནོས་ན་སྦོམ་པོའོ་ཞེས་བྱ་བར་སྦྱར་རོ། །བརྡ་ཞེས་བྱ་བ་ནི་དུས་ཚོད་ཀྱི་བརྡ་སྟེ། ཁོ་བོ་སྔ་དྲོ་སྟ་གོན་བྱེད་དོ་ཞེས་བྱ་བ་ལ་སོགས་པའི་དུས་ཚོད་ཀྱི་བརྡས་དུས་འདེབས་པར་བྱེད་པ་ལ་ཁོ་མོ་ཡང་སྟ་གོན་བྱེད་དོ་ཞེས་དུས་ཚོད་ཀྱི་བརྡ་ཚིག་གིས་ནོད་ན་སྦོམ་པོའོ། །མཚན་མའོ་ཞེས་བྱ་བ་ཡང༌། བྱེད་པ་མནོས་ན་སྦོམ་པོའི་ཞེས་བྱ་བར་སྦྱར་རོ། །མཚན་མ་ཞེས་བྱ་བ་ནི་ཆ་ལུགས་ཀྱི་མཚན་མ་སྟེ། ཁོ་བོ་གོས་འདི་ལྟ་བུ་གྱོན་པ་ཁྱོད་ཀྱིས་མཐོང་ན་སྟ་གོན་གྱིས་ཤིག་ཅེས་བྱ་བ་ལ་སོགས་པའི་མཚན་མ་བྱེད་པ་ནོད་ན་སྦོམ་པོའོ། །དེའི་འོང་བ་དང་འགྲོ་བའི་འཇུག་པ་བདག་གིར་བྱེད་ནའོ་ཞེས་བྱ་བ་ནི། སྐྱེས་པ་ཆགས་པར་གྱུར་པ་དེའི་འོད་པ་དང་འགྲོ་བའི་འཇུག་པ་བདག་གིར་བྱེད་ན་སྤོམ་པའོ་ཞེས་བྱ་བར་སྦྱར་རོ། །འོང་བ་ཞེས་བྱ་བ་ནི། གང་ན་དགེ་སློང་མ་དེ་འདུག་པ་དེར་འོང་པའོ། །འགྲོ་བ་ཞེས་བྱ་བ་ནི། དུས་མལ་བཏབ་པའི་གནས་སུ་འགྲོ་བའོ། །ལུས་བཀན་པ་འདི་དགེ་སློང་ལ་ནི་སྦོམ་པོ་སྟེ། བུད་མེད་དམ་སྐྱེས་པ་གང་ཡང་རུང་བའི་ཕྱིར་བཤམས་ན་ཡང་ངོ༌། གཞོགས་སྟེགས་ལ་སོགས་པའི་བྱ་བ་གཞན་ནི་ཚིག་ཏུ་མ་སྨྲས་ན་ནི་ཉེས་བྱས་སོ། །བུད་མེད་ལ་ཚིག་ཏུ་སྨྲས་ན་ནི་དགེ་འདུན་མའོ། །ལུས་བཀན་པའི་
ཕམ་པར་འགྱུར་བའོ་ཞེས་བྱ་བ་དེ་བཤད་ཟིན་ཏོ།། །།གང་ལ་ཁ་ན་མ་ཐོ་བའི་འཆབ་པའི་ཕམ་པར་འགྱུར་ཞེ་ན་དེའི་ཕྱིར་དགེ་སློང་མའི་ཕམ་པར་གྱུར་པ་འཆབ་པ་ལའོ་ཞེས་བྱ་བ་སྨྲས་ཏེ། དགེ་སློང་མ་དང་འགྲེལ་བའི་ཕམ་པར་གྱུར་བ་བརྒྱད་པོ་དག་ལས་གང་ཡང་རུང་བ་འཆབ་པ་ལ་ཁ་ན་མ་ཐོ་བ་འདིར་འགྱུར་རོ། །སུའི་ཕམ་པར་འགྱུར་ཞེ་ན་དེའི་ཕྱིར། འདིར་དགེ་སློང་མའི་ཞེས་སྨོས་ཏེ། དགེ་སློང་མ་གཞན་གྱིའོ། །འདིར་ཉིན་མཚན་གྱི་མཐར་ནི་ཁ་ན་མ་ཐོ་བ་རྫོགས་པར་འགྱུར་ལ་མདུན་རོལ་དུ་ནི་ན་སྨད་པའོ། །འདིར་གཞུང་ནི་གཏམ་གྱི་གཞིལ་ལས་དགེ་སློང་མས་དགེ་སློང་མ་མི་ཚངས་པར་སྤྱོད་པ་བྱེད་པ་མཐོང་ལ་དེ་བཅབས་ཤིང་འདུ་ཤེས་སྦས་ནས་སྐྱ་རེངས་ཤར་ན་ཕམ་པར་འགྱུར་རོ་ཞེས་གསུངས་པ་ཡིན་ནོ། །འདི་ལ་ན་སྨད་པ་ནི་སྦོམ་པོ་སྟེ། དགེ་སློང་མ་དང་འབྲེལ་པའི་ཁ་ན་མ་ཐོ་བ་འདི་ལ་ན་སྨད་ན་སྦྱོར་བ་ལས་འབྱུང་བའི་སྦོམ་པོ་ཡིན་པར་ཤེས་པར་བྱའོ། །འཆབ་པའི་ཕམ་པར་འགྱུར་བའོ་ཞེས་བྱ་བ་དེ་བཤད་ཟིན་ཏོ།། །།ཅི་ཞིག་བྱས་ན་བཟློག་པའི་ཕམ་པར་འགྱུར་ཞེ་ན་དེའི་ཕྱིར་དགེ་སློང་གནས་ནས་ཕྱུང་བ་བཟོད་པར་གསོལ་བ་ངེས་པར་ཕྱག་བྱ་བའི་འོས་མ་ཡིན་པའི་སྡོམ་པ་བྱིན་པར་ཤེས་བཞིན་དུ་དེ་ལས་བཟློག་པ་ཉིད་མི་གཏོང་ནའོ་ཞེས་བྱ་བ་སྨྲས་ཏེ། དགེ་སློང་གནས་ནས་ཕྱུང་བ་དགེ་འདུན་ལ་བཟོད་པ་གསོལ་བར་བྱའོ་ཞེས་བཟོད་པ་གསོལ་བར་ངེས་པར་གྱུར་པ་དགེ་སློང་མ་རྣམས་ཀྱིས་ཀྱང་དེ་ལ་ཕྱག་བྱ་བའི་འོས་མ་ཡིན་པའི་སྡོམ་པ་བྱིན་ཞིང་ཕྱག་བྱ་བའི་འོས་མ་ཡིན་པའི་སྡོམ་པ་བྱིན་པར་གྱུར་པ་གནག་ཡིན་པ་དེ་ལ་དགེ་སློང་མས་དེ་དག་ཐམས་ཅད་དེ་ལྟར་ཤེས་པར་གྱུར་ཅིང་ཤེས་ནས་ཀྱང་དགེ་སློང་མ་དེ་ས་དགེ་སློང་དེ་བཟོད་པར་གསོལ་བ་བྱེད་པ་དེ་ལས་ཟློག་པར་བྱེད་ཅིང༌། ཟློག་པར་བྱེད་པ་དེ་ཉིད་ལན་གསུམ་གྱི་བར་དུ་མི་གཏོང་ན་དགེ་སློང་མ་དེ་ཕམ་པར་འགྱུར་བའོ། འདི་སྐད་བསྟན་ཏེ། དགེ་སློང་གྲེ་སྐྱེས་དགེ་སློང་མ་རྣམས་དཔའ་དྲེ་ཞིང་གནས་ནས། བཅོམ་ལྡན་འདས་ཀྱི་བགས་དགེ་སློང་གི་དགེ་འདུན་གྱིས་གནས་ནས་དབྱུང་བའི་ལས་བྱས་ཤིང༌། དགེ་སློང་མའི་དགེ་འདུན་གྱིས་ཀྱང་ཕྱག་བྱ་བའི་འོས་མ་ཡིན་པའི་སྡོམ་པ་
བྱས་ནས། གཉི་གའི་དགེ་འདུན་གྱི་ཕྱི་རོལ་དུ་བྱས་པའི་དགེ་སློང་དེ་དགེ་སློང་གི་དགེ་འདུན་ལ་བཟོད་པ་གསོལ་ལོ་ཞེས་ངེས་པར་གྱུར་པ་ན་སྦོམ་དགའ་མོས་དོན་དེ་ཤེས་བཞིན་དུ་ཕྱིར་བཟློག་པ་དེ་ལ་དགེ་སློང་མའི་དགེ་འདུན་གྱིས་བཞམས་ཏེ་བསྒོ་བ་ལ་སོགས་པ་གསོལ་བ་དང་བཞིའི་ལས་ཀྱིས་བསྒོ་བ་ན་བཟློག་པ་དེ་ཉིད་མི་གཏོང་བ་དེ་ལ་ཕམ་པར་འགྱུར་བ་བཅས་པ་ཡིན་ནོ། །ཇི་ལྟར་མི་གཏོང་བ་ལ་ཞེ་ན་དེའི་ཕྱིར་དབྱེན་ལ་བརྟུལ་བ་ཉིད་དང་འདྲའོ་ཞེས་བྱ་བ་སྨྲས་ཏེ། ཇི་ལྟར་དགེ་འདུན་གྱི་དབྱེན་ལ་རྟུལ་བར་བྱེད་པ་དེ་མི་གཏོང་པ་ལ་ལྟུང་བར་འགྱུར་བ་དེ་དང་འདྲའོ་ཞེས་བྱ་བའི་ཐ་ཚིག་སྟེ། དེས་ན་དེ་དང་འདྲའོ་ཞེས་བྱ་བའི་སྒྲ་ནི་མཚུངས་པ་ཉིད་ཀྱི་དོན་ཡིན་པའི་ཕྱིར་རོ། །འདྲ་བར་གཞོམ་པ་དང་གསོལ་བ་སྔོན་དུ་བཏང་བའི་ལས་བྱས་ཏེ། ཇི་ལྟར་དབྱེན་གྱི་སྐབས་སུ་བཟློག་པའི་ཚུལ་གྱིས་མི་གཏོང་བར་རྗེས་སུ་བསྒྲུབ་པའི་རང་བཞིན་ནི་རྗེས་སུ་མཐུན་ནོ་ཞེས་བྱ་བ་ལ་སོགས་པའི་རྣམ་པ་ཇི་སྐད་བསྟན་པ་དེ་དག་ཐམས་ཅད་འདིར་ཡང་སྦྱར་བར་བྱའོ། །དེའི་ཕྱིར་རྣམ་པ་དེ་དག་ཐམས་ཅད་འདིར་ཅི་རིགས་པར་སྦྱར་བར་ཤེས་པར་བྱ་སྟེ། དེས་ན་དབྱེན་ལ་བརྟུལ་བ་ཉིད་དང་འདིར་སྦྱར་བ་ནི་མ་ཡིན་ནོ། །བཟློག་པའི་ཕམ་པར་འགྱུར་བའོ་ཞེས་བྱ་བ་དེ་བཤད་ཟིན་ཏོ། །དགེ་སློང་མའི་ཕམ་པར་འགྱུར་པ་རྣམས་རྫོགས་སོ་ཞེས་བྱ་བ་དགེ་སློང་མའི་ཕམ་པར་འགྱུར་བ་བརྒྱད་བཤད་ཟིན་ཏོ།། །།ད་ནི། སྨྱན་བྱེད་པ་དང་གཞི་མེད་དང༌། །གསུམ་པ་བག་ཙམ་ཆ་ལས་ལེན། །བཞི་པ་ཅི་ཡང་རུང་བར་བྱ། །ལྔ་པ་ཆགས་པ་མེད་པ་སྟེ། །མཚན་མོ་ཉིན་མོ་ལམ་འགྲོ་དང༌། །ཆུ་ཀླུང་ཕ་རོལ་ཡིད་མཐུན་དང༌། །ཤི་བའི་ནོར་རྫས་ལེན་པ་དང༌། །དགེ་སློང་མ་ལས་བཟོད་བྱེད་དང༌། །སྤོང་དང་འཐབ་ཀྲོལ་བྱེད་པ་དང༌། །བསྟེན་དང་བསྟེན་དུ་འཇུག་པ་དང༌། །དགེ་འདུན་དབྱེན་དང་དེ་རྗེས་ཕྱོགས། །སུན་འབྱིན་བཀའ་བློ་མི་བདེ་བའོ། །ཞེས་བྱ་བའི་རིམ་གྱིས་ཕམ་པར་འགྱུར་བ་དག་གི་འོག་ཏུ་བཀོད་པ་དགེ་སློང་མའི་དགེ་འདུན་ལྷག་མ་ཉི་ཤུ་པོ་དག་བཤད་པར་བྱ་སྟེ། དེ་ལ་དགེ་སློང་གི་དགེ་འདུན་ལྷག་མ་ལ་དགེ་སློང་མ་རྣམས་ཀྱི་ལྟུང་བ་གཞན་ཉིད་དུ་རྣམ་པར་གཞག་པ་ཡང་ཡོད་དེ། དཔེར་
ན་དགེ་སློང་གི་ཁུ་བ་འབྱིན་པའི་དགེ་འདུན་ལྷག་མ་དེ་དགེ་སློང་མ་རྣམས་ཀྱི་ལྟུང་བྱེད་དུ་རྣམ་པར་གཞག་པ་དང༌། དགེ་སློང་གི་ལུས་ཀྱིས་རེག་པའི་དགེ་འདུན་ལྷག་མ་དགེ་སློང་མ་རྣམས་ཀྱི་རེག་པའི་ཕམ་པར་འགྱུར་བར་རྣམ་པར་གཞག་པ་དང༌། དགེ་སློང་གིས་འཁྲིག་པ་དང་ལྡན་པ་སྨྲ་བའི་དགེ་འདུན་ལྷག་མ་དགེ་སློང་མ་རྣམས་ཀྱི་ཆགས་པར་གྱུར་པས་ཆགས་པར་གྱུར་པ་དང་ལྷན་ཅིག་གཞོགས་སྟེགས་དང་ཕྱར་གཡེང་དང་ཙ་བ་ཧྲལ་བྱེད་པ་སྦོམ་པོར་རྣམ་པར་གཞག་པ་ལྟ་བུའོ། །དགེ་སློང་གི་བསྙེན་བཀུར་བསྔགས་པའི་དགེ་འདུན་ལྷག་མ་ནི་དགེ་སློང་མ་རྣམས་ལ་མེད་དེ་འདི་ལྟར་བུད་མེད་ཀྱི་བསྙེན་བཀུར་ནི་སྐྱེས་པའི་ཡོ་བྱད་དུ་གྱུར་པ་ཡིན་པས་གཡོག་བྲན་གྱི་ཆར་གནས་པ་ཡིན་ལ། ལོངས་སྤྱོད་པར་བྱེད་པའི་སྐྱེས་པ་ནི་མཆོད་པར་བྱ་བའི་ཆར་གནས་པ་ཡིན་པས་དེའི་ཕྱིར། སྐྱེས་པས་བསྙེན་པ་བཀུར་བསྔགས་པ་ནི་རིགས་ཀྱི་བུད་མེད་ཀྱིས་ནི་མི་རིགས་པས་དེའི་ཕྱིར་དེ་ནི་དགེ་སློང་མ་རྣམས་ལ་མེད་དོ། །དགེ་སློང་གི་ཁང་པ་དང་གཙུག་ལག་ཁང་བྱེད་པའི་དགེ་འདུན་ལྷག་མ་དེ་གཉིས་ནི་དགེ་སློང་མ་རྣམས་ལ་བྱེད་པའི་མཐུ་མེད་པས་ཇི་ལྟར་སྐྱེས་པ་བཞིན་དུ་དེ་ལྟར་མངོན་པར་ཞེན་པ་མི་འབྱུང་སྟེ། བྱེད་དུ་འཇུག་ན་ཡང་བདག་པོ་ཉིད་མ་ཡིན་པའི་ཕྱིར་སྐྱེས་པ་དག་གིས་བྱེད་དུ་འཇུག་པ་སྡེ་ལྟར་མི་ནུས་པས་དེ་གཉིས་ཀྱང་དགེ་སློང་མ་རྣམས་ལ་རྣམ་པར་མི་གཞག་གོ །སྨྱན་བྱེད་པ་དང་གཞི་མེད་པ་དང་བག་ཙམ་དང་དགེ་འདུན་གྱི་དབྱེན་བྱེད་པ་དང་དེའི་རྗེས་སུ་ཕྱོགས་པ་དང༌། ཁྱིམ་སུན་འབྱིན་པ་དང་བཀའ་བློ་མི་བདེ་བ་ཞེས་བྱ་བའི་དགེ་འདུན་ལྷག་མ་རྣམས་ནི་དགེ་སློང་གི་དང་འདྲ་བས་འདིར་མིང་ཙམ་ཞིག་རྣམ་པར་གཞག་པར་བྱ་སྟེ། དེ་དག་གི་ངོ་བོ་ཉིད་སྔར་དགེ་སློང་གི་ཁ་ན་མ་ཐོབ་རྣམས་ཀྱི་སྐབས་སུ་བསྟན་ཟིན་པའི་ཕྱིར་རོ། །དགེ་སློང་དང་ཐུན་མོང་མ་ཡིན་པ་ཅི་ཡང་རུང་བ་ལེན་པ་དང༌། ཅི་ཡང་རུང་བ་ལེན་དུ་འཇུག་པ་དང༌། མཚན་མོ་འབྲལ་བ་དང༌། ཉིན་མོ་འབྲལ་བ་དང༌། ལམ་དུ་འཇུག་པ་དང༌། ཆུ་བརྒལ་བ་དང༌། རབ་ཏུ་འབྱིན་པ་དང༌། ཤི་བའི་ནོར་ལེན་པ་དང༌། བཟོད་པ་གསོལ་དུ་འཇུག་པ་དང༌། སྤོང་བ་དང༌། འཐབ་ཀྲོལ་བྱེད་པ་དང༌། བུད་མེད་དང་བསྟེན་པ་དང༌། བུད་མེད་དང་
བསྟེན་དུ་འཇུག་པ་ཞེས་བྱ་བ་དགེ་སློང་མའི་དགེ་འདུན་ལྷག་མ་དེ་དག་གི་ངོ་བོ་ཉིད་ནི་འདིར་རྒྱ་ཆེར་བསྟན་པར་བྱའོ། །དེ་ལ་ཐུན་མོང་བ་མིང་ཙམ་རྣམས་པར་གཞག་པ་དག་ཇེ་བསྟན་པའི་ཕྱིར་སྨྱན་བྱེད་པའོ་ཞེས་བྱ་བ་སྨྲས་ཏེ། དགེ་འདུན་ལྷག་མའི་ཁ་ན་མ་ཐོབ་པ་འདིའི་མཚན་ཉིད་སྡང་ཇི་སྐད་བསྟན་པ་དེ་ཉིད་དགེ་སློང་མ་རྣམས་ཀྱི་ཡང་ཡིན་པར་རིག་པར་བྱའོ། །སྐབས་འདི་དང་འོག་མ་དག་ལས་ཆོས་འདི་ནི་དང་བོས་ལྟུང་བར་འགྱུར་ལ་ཞེས་གསུངས་པའི་ཚིག་དེའི་རྣམ་པར་འབྱེད་པ་ནི་མདོ་ལ་ལྟུང་བར་འགྱུར་རོ་ཞེས་གསུངས་པ་ཡིན་ཏེ་དེའི་དོན་ནི་སྤྱད་པ་ཙམ་གྱི་ཁ་ན་མ་ཐོ་བ་འདིར་འགྱུར་གྱི་ཡང་དང་ཡང་ཕྱིར་བཟློག་ཅིང་མི་གཏོང་བ་ལ་ནི་མ་ཡིན་པར་རིག་པར་བྱའོ། །འབྱུང་བར་འགྱུར་བ་སྟེ་ཞེས་བྱ་བ་ནི་ལྟུང་བ་ལས་འབྱུང་བ་དང་རྗེས་སུ་མཐུན་པ་སྟེ་དེ་དག་ནི་ཕྱིར་བཅོས་པ་དང་བཅས་པ་ཡིན་གྱི་ཕམ་པར་འགྱུར་བ་དག་ད་ལྟར་ཕྱིར་བཅོས་སུ་མི་རུང་བ་ནི་མ་ཡིན་ནོ་ཞེས་བྱ་བའི་ཐ་ཚིག་གོ །དེ་ལྟར་ཡང་དེའི་རྣམ་པར་འབྱེད་པ་ནི་འབྱུང་བ་དང་བཅས་པའོ་ཞེས་གསུངས་པ་ཡིན་ནོ། །འདིར་དགེ་སློང་མ་ལ་བརྟེན་ཏེ་ཕྲན་ཚེགས་ལ་སོགས་པ་དག་ལས་ཅུང་ཟད་ལྷག་པར་གསུངས་པ་དག་བསྟེན་པའི་ཕྱིར་དགེ་སློང་མ་ལ་ཁྱིམ་པ་མོ་ཉིད་ཀྱི་བསྔགས་པ་བརྗོད་ན་སྦོམ་པོའི་ཞེས་བྱ་བ་སྨྲས་ཏེ། དགེ་སློང་མས་དགེ་སློང་མ་ལ་ཁྱིམ་པ་མོ་ཉིད་ཀྱི་བསྔགས་པ་བརྗོད་ཅིང་ཡང་དག་པར་འཛིན་དུ་འཇུག་ན་སྦོམ་པོའོ། །ཉོན་མོངས་པ་དག་གིས་གནོད་པར་གྱུར་པ་རྣམས་ཀྱིས་གོ་བར་བྱས་པ་ན་སྦོམ་དགའ་མོས་ཚིག་དེ་སྐད་བརྗོད་པ་ལས་འདི་བཅས་ཏེ། དེ་ནི་སྨྱན་བྱེད་པ་དང་རིགས་མཐུན་པ་ཉིད་ཡིན་པའི་ཕྱིར་འདི་གསུངས་སོ། །དགེ་སློང་དག་ལ་ཡང་དེའི་རྗེས་སུ་འབྲང་བས་ཉེས་བ་སྦོམ་པོར་འགྱུར་བར་ཤེས་པར་བྱའོ། །གཞན་སྨད་འཚོད་མ་ཉིད་བྱེད་དུ་འཇུག་པ་ཡང་ངོ་ཞེས་བྱ་བ་ཡང༌། སྦོམ་པོའི་ཞེས་བྱ་བར་སྦྱར་ཏེ། དགེ་སློང་མས་བུད་མེད་གཞན་སྨད་འཚོད་མ་ཉིད་བྱེད་དུ་འཇུག་ན་སྦོམ་པོར་འགྱུར་རོ། །སྨད་འཚོང་མ་ཞེས་བྱ་བའི་སྒྲ་ནི་འཇུད་མཐུན་མ་ཞེས་བྱ་སྟེ། འཇུད་པ་ཞེས་བྱ་བ་ནི་ཕོའི་དབང་པོ་ལ་བྱ་སྟེ། འཇུད་པར་བྱེད་པ་ཡིན་པས་འཇུད་པ་སྟེ་དེས་འཇུད་པ་གང་ལ་ཡོད་པ་དེ་ནི་འཇུད་མཐུན་མ་ཡིན་ཏེ་སྨད་འཚོང་མའོ། །
ཁ་ཅིག་ན་རེ་འཇུད་པ་ཞེས་བྱ་བའི་སྒྲ་ནི་མོའི་དབང་པོ་ལ་བྱ་སྟེ་དེ་གང་ལ་ཡོད་པ་དེ་ནི་འཇུད་མཐུན་མ་སྟེ་སྨད་འཚོང་མ་ཞེས་ཟེར་རོ། །བྲན་མོ་ཟོང་ཉིད་དུ་གཏོང་བ་ནི་དེ་ལས་ཕྱི་རོལ་དུ་གྱུར་པ་ཉིད་མ་ཡིན་ནོ་ཞེས་བྱ་བ་ནི། དགེ་སློང་མས་བྲན་མོ་ཟོང་གི་ཕྱིར་སྟུ་གླར་གཏོང་བ་ནི་གཞན་སྨད་འཚོངས་ཉིད་དུ་བྱེད་དུ་འཇུག་པ་ཞེས་བསྟན་པ་དེ་ལས་ཕྱི་རོལ་དུ་གྱུར་པ་ཉིད་མ་ཡིན་ཏེ་དོན་འདྲ་བས་འདི་ཡང་ཉེས་པ་སྦོམ་པོར་འགྱུར་རོ་ཞེས་བྱ་བའི་ཐ་ཚིག་གོ །འདི་ནི་གྲགས་པའི་དབང་གིས་ན་སྨད་འཚོང་མ་ཉིད་དུ་བྱེད་དུ་འཇུག་པ་ཞེས་བྱ་བ་ལས་ལོགས་ཤིག་ཏུ་མདོར་བྱས་ཏེ། འདི་ལྟར་ཟོང་དགྲམ་པའི་ཚུལ་གྱིས་འཇོག་པ་གང་ཡིན་པ་དེ་ནི་བྲན་མོ་ཟོང་ཉིད་དུ་གཏོང་བ་ཞེས་བྱའོ། །སྨད་འཚོང་མ་ཉིད་དུ་བྱེད་དུ་འཇུག་པ་ཞེས་བྱ་བ་ནི་རང་གི་ཁྱིམ་དག་ན་གནས་པ་དག་གིས་བྱེད་དོ། །སྨྱན་བྱེད་པའི་དགེ་འདུན་ལྷག་མའོ་ཞེས་བྱ་བ་དེ་བཤད་ཟིན་ཏོ།། །།གཞི་མེད་པའོ། །བག་ཙམ་ཞེས་བྱ་བ་ནི། དགེ་འདུན་ལྷག་མ་འདི་གཉིས་ཀྱི་མཚན་ཉིད་སྔར་དགེ་སློང་གི་སྐབས་སུ་ཇི་སྐད་བསྟན་པ་དག་དགེ་སློང་མ་རྣམས་ཀྱི་ཡང་ཡིན་པར་རིག་པར་བྱའོ། །ཐམས་ཅད་ལ་བྱེ་བྲག་ནི་ཡོད་པར་རིག་པར་བྱ་སྟེ། ཕོ་ཉིད་ལ་ནི་མོ་ཉིད་དོ། །དེ་ལ་ནི་ཕོ་ཉིད་དོ་ཞེས་བྱ་བ་ནི། ཕོ་ཉིད་ལ་ནི་མོ་ཉིད་ཅེས་བྱ་བར་ཤེས་པར་བྱ་ལ་མོ་ཉིད་ལ་ནི་ཕོ་ཉིད་ཅེས་བྱ་བར་ཤེས་པར་བྱ་སྟེ། ཕོའི་རྟགས་ཀྱི་གནས་སུ་ནི་མོའི་རྟགས་བལྟ་བར་བྱ་བ་ལ་མོའི་རྟགས་ཀྱི་གནས་སུ་ནི་ཕོའི་རྟགས་སུ་བལྟ་བར་བྱའོ་ཞེས་བྱ་བའི་ཐ་ཚིག་གོ །གཞི་མེད་པ་དང་བག་ཙམ་གྱི་དགེ་འདུན་ལྷག་མ་གཉིས་སོ་ཞེས་བྱ་བ་དེ་བཤད་ཟིན་ཏོ།། །། གང་ལ་ཅི་ཡང་རུང་བ་ལེན་པའི་དགེ་འདུན་ལྷག་མར་འགྱུར་ཞེ་ན་དེའི་ཕྱིར་ཅི་ཡང་རུང་བ་བདག་གིར་བྱེད་པ་ལའོ་ཞེས་བྱ་བ་སྨྲས་ཏེ། དགེ་སློང་མས་འཁྲིག་པ་དང་འབྲེལ་པའི་ཕྱིར་སྐྱེས་པ་ལས་གླ་ཅི་ཡང་རུང་བ་བདག་གིར་བྱེད་ན་དགེ་འདུན་ལྷག་མའོ། །དེའི་ཕྱིར་བསྐྱེད་པའི་ངོན་དུ་ཅི་ཡང་རུང་བ་ཞེས་སྨོས་སོ། །འདིར་བདག་གིར་བྱེད་ན་ཞེས་བྱ་བ་ནི་ལེན་པ་ལ་བྱ་སྟེ། དེ་ལྟར་ཡང་རྣམ་པར་འབྱེད་པ་ལས་བདག་གིར་བྱེད་པ་ལ་ནི་ལེན་པར་བྱེད་པའོ་ཞེས་གསུངས་སོ། །ཅི་ལྟ་བུར་གྱུར་པས་ཤེན་དེའི་ཕྱིར་དགེ་སློང་མ་ཆགས་པར་གྱུར་པས་སོ་ཞེས་བྱ་བ་སྨྲས་ཏེ། དགེ་སློང་མ་འཁྲིག་
པའི་འདོད་ཆགས་ཀྱིས་ཆགས་པར་གྱུར་པས་སོ། །འདི་དང་འོག་མ་དག་ལ་ཆགས་པར་གྱུར་པས་ཞེས་སྨོས་པ་ཐམས་ཅད་འཁྲིག་པའི་འདོད་ཆགས་ཀྱིས་ཆགས་པ་ཡིན་པར་རིག་པར་བྱའོ། །གང་ལས་བདག་གི་ཕྱེད་ཅེ་ན། །དེའི་ཕྱིར་སྐྱེས་པ་ཆགས་པར་གྱུར་པ་ལས་སོ་ཞེས་བྱ་བ་སྨྲས་ཏེ། སྐྱེས་པ་ཆགས་པར་གྱུར་པ་ལས་ཅི་ཡང་རུང་བ་བདག་གིར་བྱེད་ནའོ། །ཆགས་པར་མ་གྱུར་པས་ནི་སྦོམ་པོའི་ཞེས་བྱ་བ་ནི། དགེ་སློང་མ་ཆགས་པར་མ་གྱུར་པས་སྐྱེས་པ་ཆགས་པར་གྱུར་པ་ལས་ཅི་ཡང་རུང་བ་བདག་གིར་བྱེད་པ་ལ་ནི་སྦོམ་པོའོ། །ཆགས་པར་མ་གྱུར་པ་ལས་ནི་ཉེས་བྱས་སོ་ཞེས་བྱ་བ་ནི། སྐྱེས་པ་ཆགས་པར་མ་གྱུར་པ་ལས་དགེ་སློང་མ་ཆགས་པར་མ་གྱུར་པས་ཅི་ཡང་རུང་བ་བདག་གིར་བྱེད་པ་ནི་ཉེས་བྱས་ཏེ། ཆགས་པར་མ་གྱུར་པ་ལས་ནི་ཉེས་བྱས་སོ་ཞེས་གསུངས་པའི་ཕྱིར་རོ། །ཅི་ཡང་རུང་བ་བདག་གིར་བྱེད་པ་དང་སྐྱེས་པ་ཆགས་པར་གྱུར་པ་འདི་གཉིས་ནི། ཤེས་ཀྱང་རུང་དོགས་ཀྱང་རུང་ཡོད་ཀྱང་རུང་མེད་ཀྱང་རུང་སྟེ་གལ་ཏེ་དགེ་སློང་མ་ལ་ཡོད་པ་ཉིད་ལས་བསྟེན་པར་གྱུར་ན་དེ་ལྟ་ན་ཅི་སྐད་བསྟན་པའི་ཁ་ན་མ་ཐོ་བར་འགྱུར་ཏེ། འདི་ལྟར་འདིར་བསམ་པའི་ཉེས་པས་ལྟུང་བར་རྣམ་པར་གཞག་པར་མཛད་པའི་ཕྱིར་རོ། །མི་ཤེས་པའི་ཡུལ་ལ་ནི་ཡིད་ཀྱི་ཉེས་པ་མི་འབྱུང་ངོ༌། །ཅི་ཡང་རུང་བ་ལེན་པའི་དགེ་འདུན་ལྷག་མ་ལ་སོགས་པ་བཅུ་གསུམ་པོ་འདི་དག་ལ་དགེ་སློང་རྣམས་ཀྱི་ལྟུང་བ་ཇི་ལྟར་རྣམ་པར་གཞག་པར་བྱ་ཞེ་ན། དེ་ལ་མཚན་མོ་འབྲལ་བ་དང༌། ཉིན་མོ་འབྲལ་བ་དང༌། ལམ་དུ་འཇུག་པ་དང༌། ཆུ་རྒལ་བ་ཞེས་བྱ་བ་གཅིག་པུ་རྒྱུ་བའི་ལྟུང་བ་བཞི་པོ་དག་ལ་ནི་དགེ་སློང་རྣམས་ལ་གཅིག་པུ་འགྲོ་བ་ལ་ཉེས་པ་མེད་དོ། །ཤི་བའི་ནོར་ལེན་པ་ཞེས་བྱ་བ་ནི་དགེ་འདུན་ལྷག་མ་ནི་ཆོས་གོས་ཀྱི་རིན་བསྐུར་བ་ལས་བསླང་པའི་ཆོ་ག་གང་ཡིན་པ་དེ་ལས་བརྒལ་ན་ནི་སྤང་པའི་ལྟུང་བྱེད་དུ་འགྱུར་ལམ་བརྒལ་ན་ནི་ལྟུང་བ་མེད་དོ།། ལྷག་མ་བརྒྱད་པ་ཅི་ཡང་རུང་བ་ལེན་པ་དང་ལེན་དུ་འཇུག་པ་དང༌། རབ་ཏུ་འབྱིན་པ་དང་བཟོད་པ་གསོལ་དུ་འཇུག་པ་དང༌། སྤོང་བ་དང་འཐབ་ཀྲོལ་བྱེད་པ་དང་བུད་མེད་དང་བསྟེན་པ་དང༌། བུད་མེད་དང་བསྟེན་དུ་འཇུག་པ་ཞེས་བྱ་བའི་དགེ་འདུན་ལྷག་མ་དག་ལ་ནི་ཉེས་བྱས་སོ། །ཅི་ཡང་
རུང་བ་ལེན་པའི་དགེ་འདུན་ལྷག་མའོ་ཞེས་བྱ་བ་དེ་བཤད་ཟིན་ཏོ།། །།གང་ལ་ཅི་ཡང་རུང་བ་ལེན་དུ་འཇུག་པའི་དགེ་འདུན་ལྷག་མར་འགྱུར་ཞེ་ན་དེའི་ཕྱིར། ཆགས་པར་མ་གྱུར་པས་ཆགས་པར་གྱུར་པ་ལས་ཅི་ཡང་རུང་བ་བདག་གི་དབྱེར་པ་ལ་ཉེས་པ་མེད་དོ་ཞེས་དགེ་སློང་མ་ལ་གོ་བར་བྱེད་པ་ལའོ་ཞེས་བྱ་བ་སྨྲས་ཏེ། དགེ་སློང་མ་ཆགས་པར་མ་གྱུར་པས་སྐྱེས་པ་ཆགས་པར་གྱུར་པ་ལས་ཅི་ཡང་རུང་བ་བདག་གིར་བྱེད་པ་ལ་ཉེས་པ་མེད་དོ་ཞེས་དེ་སྐད་ཅེས་དགེ་སློང་མ་ལ་གོ་བར་བྱེད་པ་ལ་ཁ་ན་མ་ཐོ་བ་འདིར་འགྱུར་རོ། །དགེ་སློང་མ་ཆགས་པར་མ་གྱུར་པས་ཞེས་བྱ་བ་ནི། འདིར་འདོད་ཆགས་མངོན་སུམ་དུ་མ་གྱུར་པ་ལ་བྱའི་འདོད་ཆགས་དང་བྲལ་བ་ཉིད་ལ་ནི་མི་བྱའོ། །དེ་ལྟར་ཡང་སྦོམ་དགའ་མོས་གཙུག་དགའ་མོ་ལ་ཀྱེ་ཁྱོད་ཆགས་པར་མ་གྱུར་ན་ཁྱོད་ཆགས་པ་མེད་པས་ཆགས་པར་གྱུར་པ་ལས་ཅི་ཡང་རུང་བ་བདག་གིར་བྱར་རུང་ངོ་ཞེས་ཉེས་པ་སྦོམ་པོ་ཡང་དག་པར་ལེན་དུ་བཅུག་བདེ་ལ་ཁ་ན་མ་ཐོ་བ་འདིར་གསུངས་པ་ཡིན་པས། དེའི་ཕྱིར་དགེ་སློང་མས་དགེ་སློང་མ་ཆགས་པར་མ་གྱུར་པ་སྐྱེས་པ་ཆགས་པར་གྱུར་པ་ལས་ཅི་ཡང་རུང་བ་ལེན་དུ་འཇུག་ན་དགེ་འདུན་ལྷག་མའོ། །ཅི་ཡང་རུང་པ་ལེན་དུ་འཇུག་པའི་དགེ་འདུན་ལྷག་མའོ་ཞེས་བྱ་བ་དེ་བཤད་ཟིན་ཏོ།། །།མཚན་མོ་འབྲལ་བ་དང་ཉིན་མོ་འབྲལ་བ་དང་ལམ་དུ་འཇུག་པ་དང་ཆུ་རྒལ་བ་ཞེས་བྱ་བའི་དགེ་འདུན་ལྷག་མ་བཞི་པོ་དག་གི་ཐུན་མོང་གི་མཚན་ཉིད་ཅུང་ཞིག་བརྗོད་པར་བྱས་ཏེ། འོག་མ་བཞི་པོ་དག་ལ་ནི་དགེ་སློང་མ་མེད་པར་རོ་ཞེས་བྱ་བ་ནི། ཅི་ཡང་རུང་བ་ལེན་དུ་འཇུག་པའི་དགེ་འདུན་ལྷག་མ་འདིའི་འོག་མ་མཚན་མོ་འབྲལ་བ་དང༌། ཉིན་མོ་འབྲལ་བ་དང༌། ལམ་དུ་འཇུག་པ་དང༌། ཆུ་རྒལ་བ་ཞེས་བྱ་བའི་དགེ་འདུན་ལྷག་མ་བཞི་པོ་དག་ལ་ནི་རེ་རེ་ལ་ཡང་འགྲོགས་དགེ་སློང་མ་གཞན་མེད་པར་འགྲོ་ན་ཚིག་དེ་དག་ཏུ་འགྱུར་བར་ཤེས་པར་བྱ་བའོ། །དགེ་སློང་མ་ཉིད་ནི་སུམ་ཆ་དད་བྲལ་བ་ཉིད་ཡིན་ནོ་ཞེས་བྱ་བ་ནི། དགེ་སློབ་མ་ཉིད་ནི་དགེ་སློབ་མ་ཉིད་ཀྱི་སུམ་ཆད་དང་བྲལ་ཞིང་སུམ་གཉིས་ཡོད་པ་ཡིན་ཏེ་དེས་ན་མཚན་མོ་འབྲལ་བ་དང༌། ཉིན་མོ་འབྲལ་བ་དང༌། ལམ་དུ་འཇུག་པ་དང༌། ཆུ་རྒལ་བ་ཞེས་བྱ་བའི་དགེ་འདུན་ལྷག་མ་བཞི་པོ་དག་ལ་གྲོགས་དགེ་སློང་མ་མེད་པར་དགེ་སློབ་མ་དང་ལྷན་ཅིག་འགྲོ་ན་དགེ་སློབ་
མ་དེ་ནི་དགེ་སློང་མ་དང་བྲལ་བའི་སུམ་ཆ་རྗེས་སུ་གྲུབ་པ་ཡིན་ནོ། །དེ་ལྟར་གྱུར་ན་ལྟུང་བ་རྣམ་པར་གཞག་པ་ལ་དགེ་སློང་མ་དགེ་སློབ་མ་དང་ལྷན་ཅིག་མཚན་མོ་འབྲལ་བ་དང༌། ཉིན་མོ་འབྲལ་བ་དང༌། ལམ་དུ་འཇུག་པ་དང༌། ཆུ་རྒལ་བར་བྱེད་པ་ལ་དགེ་འདུན་ལྷག་མ་དང་ཉེས་པ་སྦོམ་པོ་གཉིས་སུ་ནི་མི་འགྱུར་ཏེ། འདི་ལྟར་དངོས་གཞིའི་གནས་སུ་ནི་ཉེས་བྱས་སུ་འགྱུར་ལ་ཉེས་པ་སྦོམ་པོའི་གནས་སུ་ནི་ཉེས་བྱས་ཕྲ་མོར་འགྱུར་རོ། །སུམ་གཉིས་རྗེས་སུ་བསྒྲུབ་པའི་ཕྱིར་འདིར་ལྟུང་བ་གཉིས་པོ་དག་གི་སྐབས་མེད་པར་ཤེས་པར་བྱའོ། །དགེ་ཚུལ་མ་ནི་སུམ་ཆའོ་ཞེས་བྱ་བ་ནི། དགེ་སློང་མ་དགེ་ཚུལ་མ་དང་ལྷན་ཅིག་མཚན་མོ་འབྲལ་བ་དང༌། ཉིན་མོ་འབྲལ་བ་དང༌། ལམ་དུ་འཇུག་པ་དང༌། ཆུ་རྒལ་བར་བྱེད་པ་ལ་དགེ་ཚུལ་མ་དེ་ནི་དགེ་སློང་མ་དང་ལྷན་ཅིག་འགྲོགས་པའི་སུམ་ཆས་རྗེས་སུ་བསྒྲུབ་ཅིང་སུམ་གཉིས་དང་བྲལ་བ་ཡིན་ཏེ། འདི་ལྟར་དགེ་ཚུལ་མ་དེ་ལ་དགེ་སློང་མ་ཉིད་དང་དགེ་སློང་མ་ཉིད་དག་མེད་པའི་ཕྱིར་རོ། །དེ་བས་ན་དགེ་སློང་མ་དགེ་ཚུལ་མ་དང་ལྷན་ཅིག་མཚན་མོ་འབྲལ་བ་ལ་སོགས་པ་ལ་ནི་འདིར་དངོས་གཞིའི་གནས་སུ་ནི་ཉེས་པ་སྦོམ་པོར་འགྱུར་ལ། སྦྱོར་བའི་གནས་སུ་ནི་ཉེས་བྱས་སུ་འགྱུར། སྦྱོར་བའི་སྦྱོར་བའི་གནས་སུ་ནི་ཉེས་བྱས་ཕྲ་མོར་འགྱུར་རོ། །མི་འདོད་བཞིན་དུ་བྲལ་བ་ལ་ནི་ཉེས་པ་མེད་དོ་ཞེས་བྱ་བ་ནི། དགེ་སློང་མ་ཁྲིམས་ཟླ་དགེ་སློང་མ་དང་ལྷན་ཅིག་མཚན་མོ་འབྲལ་བ་དང༌། ཉིན་མོ་འབྲལ་བ་དང༌། ལམ་དུ་འཇུག་པ་དང༌། ཆུ་རྒལ་བ་བྱེད་པ་ན་བདག་ཉིད་ཁྲིམས་ཟླ་དང་འབྲལ་བར་མི་འདོད་བཞིན་དུ་དབང་མེད་པར་ཁྲིམས་ཟླ་དང་བྲལ་བ་ལ་ནི་ཉེས་པ་མེད་དེ། ལྟུང་བར་མི་འགྱུར་རོ་ཞེས་བྱ་བའི་ཐ་ཚིག་གོ །འདིར་གཞུང་ནི་གལ་ཏེ་ཕྱི་བཞིན་འབྲང་བའི་དགེ་སློང་མ་བརྡེགས་སམ་ཤི་འམ་ཉམས་སམ་ལྟུང་བར་གྱུར་ཏམ་གཞན་གྱི་ཡུལ་འཁོར་རམ་གཞན་གྱི་ཡུལ་དུ་བྲོས་པར་གྱུར་ན་ལྟུང་བ་མེད་དོ་ཞེས་གསུངས་པ་ཡིན་ནོ། །ཉམས་ཞེས་བྱ་བ་ནི་བབས་པའོ། །ལྟུང་ཞེས་བྱ་བ་ནི་ཕམ་པར་འགྱུར་བའོ། །བར་ཆད་བྱུང་བའི་དབང་ཉིད་ཀྱིས་ཀྱང་ངོ་ཞེས་བྱ་བ་ལ། ཀྱང་ངོ་ཞེས་བྱ་བའི་སྒྲས་ནི་བྲལ་ཡང་ཉེས་པ་མེད་དེ་ཞེས་བྱ་བར་སྦྱར་རོ།།
དགེ་སློང་མ་ཁྲིམས་ཟླ་དགེ་སློང་མ་དང་ལྷན་ཅིག་ཏུ་མཚན་མོ་འབྲལ་བ་དང༌། ཉིན་མོ་འབྲལ་བ་དང༌། ལམ་དུ་འཇུག་པ་དང༌། ཆུ་རྒལ་བར་བྱེད་པ་ནི་དགེ་སྦྱོང་གི་ཚུལ་དང་ཚངས་པར་སྤྱོད་པའི་བར་ཆད་འབྱུང་བའི་དབང་ཉིད་ཀྱིས། ཁྲིམས་ཟླ་དང་བྲལ་བ་ལ་ཡང་ཉས་པ་མེད་དོ། །དགེ་འདུན་ལྷག་མ་བཞི་པོ་འདི་དག་ལ་གང་གི་ཚེ་སྦྱོར་བ་ཡིན་ལ་གང་གི་ཚེ་དངོས་གཞི་ཡིན་ཞེ་ན་དེའི་ཕྱིར། དུས་དང་འབྲེལ་པ་ལ་མཐའ་ཉིད་ཀྱི་མདུན་རོལ་དུ་ནི་སྦྱོར་བ་ཉིད་དོ་ཞེས་བྱ་བ་སྨྲས་ཏེ། དུས་དང་འབྲེལ་པ་ལ་ཞེས་བྱ་བ་ནི། །དུས་དང་འབྲེལ་པའི་བྱ་བ་ལ་སྟེ། མཚན་མོ་དང་ཉིན་མོའི་དུས་ལ་བརྟེན་པའི་བྱ་བའི་ཁྱད་པར་མཚན་མོ་འབྲལ་བ་དང༌། ཉིན་མོ་འབྲལ་བ་གཉིས་ལ་དེ་སྐད་ཅེས་བྱའོ། །མཐའ་ཉིད་ཅེས་བྱ་བ་ནི། མཚན་མོ་དང་ཉིན་མོའི་དུས་ཀྱི་མཐའ་སྐད་ཅིག་མ་ཉིད་དེ་མཐའ་ཉིད་ལ་བྲལ་བ་ལ་སོགས་པའི་བྱ་བ་གང་བྱུང་བ་དེ་ལ་ནི་དངོས་གཞི་ཉིད་དུ་འགྱུར་རོ། །མཐའ་དེ་ཉིད་ཀྱི་མདུན་རོལ་ཞེས་བྱ་བ་ནི། མཐའི་སྐད་ཅིག་མའི་མདུན་རོལ་གྱི་དུས་གང་ཡིན་པ་སྟེ། དེ་ལ་འབྲེལ་བ་ལ་སོགས་པའི་བྱ་བ་གང་བྱུང་བདེ་ལ་ནི་སྦྱོར་བ་ཉིད་དུ་འགྱུར་རོ། འདི་སྐད་བསྟན་ཏོ། །མཐར་གྱུར་པའི་དུས་ཀྱི་མདུན་རོལ་གྱི་དུས་སུ་བྱ་བ་གང་ཡིན་པ་དེ་ལ་ནི་སྦྱོར་བ་ཉིད་དོ། །མཐའི་དུས་སུ་གྱུར་པ་ཉིད་ལ་བྱ་བ་གང་ཡིན་པ་དེ་ལ་ནི་དངོས་གཞི་ཉིད་ཡིན་ནོ། །དེ་གང་ལ་ཤེས་ཤེན་དེའི་ཕྱིར་དབྱར་ཁང་དང་བྲལ་བར་གྱུར་ཅིང་གཞན་དུ་མཚན་མོ་སྐྱ་རེངས་འཆར་བར་བྱེད་ནའོ་ཞེས་གསུངས་པ་ལས་ཏེ། དགེ་སློང་མ་གཅིག་པུ་དབྱར་ཁང་གི་ཕྱི་རོལ་གཞན་དུ་མཚན་མོ་སྐྱ་རེངས་འཆར་བར་བྱེད་ན་ཐམས་ཅད་དུ་དགེ་འདུན་ལྷག་མར་འགྱུར་རོ་ཞེས་གསུངས་པ་དེ་གཉིས་ཀྱི་ནི་འདིར་ཉིན་མོ་འབྲལ་བ་དང༌། མཚན་མོ་འབྲལ་བ་གཉིས་བསྟན་ཏོ། །འདིར་མཐའ་ཙམ་ལ་དངོས་གཞིར་གསུངས་པས་དེའི་ཕྱིར་མདུན་རོལ་གྱི་དུས་ལ་ནི་སྦྱོར་བ་ཉིད་ཡིན་པ་ཁོ་ནས་སྦྱར་རོ། །ཉི་མ་ནུབ་པའི་མཐའ་ནི་ཉིན་མོའི་མཐའ་ཡིན་ནོ་ཞེས་བྱ་བ་ནི། ཉི་མ་ནུབ་ཁར་འཇུག་པའི་མཐའ་ནི་ཉིན་མོའི་མཐའོ། །དེ་ཕན་ཆད་ནི་མཚན་མོར་གཏོགས་པའི་ཁ་ན་མ་ཐོ་བར་འགྱུར་རོ་ཞེས་བྱ་བའི་ཐ་ཚིག་གོ །འོག་མ་བཞི་པོ་དག་གི་ཐུན་མོང་གི་མཚན་ཉིད་
བཤད་ཟིན་ཏོ།། །།ད་ནི་བཞི་པོ་དག་གི་སོ་སོའི་མཚན་ཉིད་བརྗོད་པར་བྱ་སྟེ། གང་ལ་མཚན་མོ་འབྲལ་བའི་དགེ་འདུན་ལྷག་མར་འགྱུར་ཞེན་དེའི་ཕྱིར་མཚན་མོ་དབྱར་ཁང་ལས་ཕྱི་རོལ་དུ་གྱུར་ནའོ་ཞེས་བྱ་བ་སྨྲས་ཏེ། དགེ་སློང་མ་མེད་པར་ཞེས་བྱ་བར་སྦྱར་རོ། །དགེ་སློང་མ་ཁྲིམས་ཟླ་དགེ་སློང་མ་གཞན་མེད་པར་མཚན་མོ་དབྱར་ཁང་ལས་ཕྱི་རོལ་དུ་བྲལ་བར་གྱུར་ན་མཚན་མོ་འབྲལ་བའི་ཁ་ན་མ་ཐོ་བ་འདིར་འགྱུར་རོ། །འདིར་དབྱར་ཁང་ཞེས་སྨོས་པ་ནི་ཁྱིམ་གཞན་དང་གྲོང་དང་སྐྱེད་མོས་ཚལ་དང་དགོན་པ་དང་འདྲོན་པའི་ཕྱོགས་ལས་ཕྱི་རོལ་དུ་གྱུར་པ་གཞན་ཐམས་ཅད་ཀྱི་དཔེ་ཡིན་ཏེ། དེ་ནི་བག་སར་གྱི་ཚུལ་དང་འདྲའོ། །གལ་ཏེ་བསྐོར་བ་མེད་ན་ནི་དབྱར་ཁང་གི་ཕྱི་རོལ་གྱི་ངོས་དེ་ནས་མཚམས་ཡིན་ནོ། །གལ་ཏེ་བསྐོར་བ་ཡང་ཡོད་ན་ནི་དེ་ཉིད་མཚམས་ཡིན་ནོ། །མཚན་མོ་འབྲལ་བའི་དགེ་འདུན་ལྟག་མའོ་ཞེས་བྱ་བ་དེ་བཤད་ཟིན་ཏོ།། །། གང་ལ་ཉིན་མོ་འབྲལ་བའི་དགེ་འདུན་ལྷག་མར་འགྱུར་ཞེ་ན་དེའི་ཕྱིར། ཉིན་མོ་ཞེས་བྱ་བ་སྨྲས་ཏེ། དབྱར་ཁང་ལས་ཕྱི་རོལ་དུ་གྱུར་ནའོ། །དགེ་སློང་མ་མེད་པར་རོ་ཞེས་བྱ་བར་སྦྱར་རོ། །དགེ་སློང་མ་ཁྲིམས་ཟླ་དགེ་སློང་མ་གཞན་མེད་པར་ཉིན་མོ་དབྱར་ཁང་ལས་ཕྱི་རོལ་དུ་བྲལ་བར་གྱུར་ན་ཉིན་མོ་བྲལ་བའི་ཁ་ན་མ་ཐོ་བ་འདིར་འགྱུར་རོ། །གཅིག་པུ་ཉེ་དུའི་ཁྱིམ་དུ་ཟན་གྱི་ཕྱིར་ལོ་ཉེས་བྱུང་བའི་ཚེ་ཉེ་དུ་རྣམས་དང་ལྷན་ཅིག་འབྲེལ་པའི་ཉེ་བར་སྤྱོད་པ་གནང་བ་ཐོབ་ན་འགྲོ་བར་བྱའོ་ཞེས་བྱ་བ་ནི། དགེ་སློང་མ་གཅིག་པུ་ཉེ་དུའི་ཁྱིམ་དུ་ཟན་གྱི་ཕྱིར་འགྲོ་བར་བྱའོ། །ཅི་དུས་ཐམས་ཅད་དུའམ་ཞེ་ན། མ་ཡིན་ཏེ་དེའི་ཕྱིར། ལོ་ཉེས་བྱུང་བའི་ཚེ་ཞེས་བྱ་བ་སྨྲས་སོ། །ཅི་དེའི་ཚེ་ཡང་དགེ་སློང་མ་ཐམས་ཅད་དམ་ཞེ་ན་མ་ཡིན་ཏེ་དེའི་ཕྱིར། ཉེ་དུ་རྣམས་དང་ལྷན་ཅིག་འབྲེལ་པའི་ཉེ་བར་སྤྱོད་པའི་གནང་བ་ཐོབ་ནའོ་ཞེས་བྱ་བ་སྨྲས་ཏེ། ཉེ་དུ་རྣམས་དང་ལྷན་ཅིག་འབྲེལ་བ་གང་ཡིན་པའི་འབྲེལ་པ་དེའི་ཉེ་བར་སྤྱོད་པ་སྟེ་འབྲེལ་པའི་ཉེ་བར་སྤྱོད་པ་དེའི་ཕྱིར། གནང་བ་དགེ་སློང་མའི་དགེ་འདུན་ལས་ཐོབ་ནའོ། །དེ་སྦྱིན་པར་བྱའོ་ཞེས་བྱ་བ་ནི། ལོ་ཉེས་བྱུང་བའི་ཚེ་ཉེ་དུ་རྣམས་དང་ལྷན་ཅིག་འབྲེལ་པའི་ཉེ་པར་སྤྱོད་པ་གནང་བ་དེ་དགེ་སློང་
མའི་དགེ་འདུན་གྱིས་དགེ་སློང་མ་དེ་ལ་སྤྱིན་པར་བྱ་བའོ། །ཉིན་མོ་འབྲལ་བའི་དགེ་འདུན་ལྷག་མའོ་ཞེས་བྱ་བ་དེ་བཤད་ཟིན་ཏོ།། །།གང་ལ་ལམ་དུ་འཇུག་པའི་དགེ་འདུན་ལྷག་མར་འགྱུར་ཞེ་ན་དེའི་ཕྱིར། ལམ་དུ་ཞུགས་པ་ལའོ་ཞེས་བྱ་བ་སྨྲས་ཏེ། དགེ་སློང་མ་མེད་པར་ཞེས་བྱ་བར་སྦྱར་རོ། ལམ་དུ་ཞུགས་ཏེ་འགྲོ་བ་ལ་ནི་ལམ་དུ་ཞུགས་པ་སྟེ། དགེ་སློང་མ་ཁྲིམས་ཟླ་དགེ་སློང་མ་གཞན་མེད་པར་ལམ་དུ་ཞུགས་ཏེ་འགྲོ་ན་རྒྱང་གྲགས་རེ་རེའི་མཐར་ནི་ལམ་དུ་འཇུག་པའི་དགེ་འདུན་ལྷག་མ་རེ་རེར་འགྱུར་ལ་རྒྱང་གྲགས་ཕྱེད་ཕྱེད་དུ་ནི་ཉེས་པ་སྦོམ་པོ་རེ་རེར་འགྱུར་རོ། །དེའི་ཕྱིར་གྲོང་གི་ཉེན་ཀོར་ལས་འདས་ན་ལམ་དུ་ཞུག་པ་ཡིན་ཏེ། གྲོང་ལ་སོགས་པའི་ཉེན་ཀོར་ནི་ཆོས་གོས་དང་འབྲལ་བའི་སྐབས་སུ་ཇི་སྐད་བསྟན་པ་རྣམ་པ་ཐམས་ཅད་འདིར་ཡང་དེ་བཞིན་དུ་གཟུང་བར་བྱ་སྟེ། སྐྱེད་མོས་ཚལ་དང༌། ལྷའི་གནས་དང༌། འདུན་ས་ལ་སོགས་པ་ནི་མ་གཏོགས་སོ། །སྐྱེད་མོས་ཚལ་ལ་སོགས་པ་ནི་གྲོང་གི་ཉེན་ཀོར་དང་འབྲེལ་དུ་ཟིན་ཀྱང་དེ་དག་གྲོང་གི་ཉེན་ཀོར་ཉིད་མ་ཡིན་ནོ། །སྦོམ་དགའ་མོ་གཅིག་པུ་གྲོང་ཁྱེར་ཆེན་པོ་དྲུག་པོ་དག་ཏུ་འཕྱན་པའི་གླེང་གཞི་དེ་ལས་བསླབ་པའི་གཞི་འདི་བཅས་སོ། །ལམ་དུ་འཇུག་པའི་དགེ་འདུན་ལྷག་མའོ་ཞེས་བྱ་བདེ་བཤད་ཟིན་ཏོ།། །།གང་ལ་ཆུ་རྒལ་བའི་དགེ་འདུན་ལྷག་མར་འགྱུར་ཞེ་ན་དེའི་ཕྱིར་ཆུ་ཀླུང་གི་ཕ་རོལ་དུ་རྒལ་བ་ལའོ་ཞེས་བྱ་བ་སྨྲས་ཏེ། དགེ་སློང་མ་མེད་པར་ཞེས་བྱ་བར་སྦྱར་རོ། །ལག་རྐྱལ་དག་གིས་ཕ་རོལ་དུ་ཕྱིན་ནའོ་ཞེས་འོག་ནས་འབྱུང་བའི་ཕྱིར་འདི་ནི་གྲུ་ལ་སོགས་པས་རྒལ་བའི་ཡུལ་ཡིན་ནོ། །དེ་ལྟ་བས་ན་ཕ་རོལ་དུ་མ་ཕྱིན་ཀྱང་དངོས་གཞི་ཁོ་ནར་འགྱུར་ཏེ། འདི་ལྟར་ཆུའི་ནང་དུ་འཇུག་པ་ཡིན་པའི་ཕྱིར་དགེ་སློང་མ་ཁྲིམས་ཟླ་དགེ་སློང་མ་གཞན་མེད་པར་གྲུ་ལ་སོགས་པའི་བཞོན་པས་རྒྱུན་ཕྱོགས་སམ་རྒྱུན་ལས་བཟློག་ཕྱོགས་སུ་འགྲོ་ན་གྲུ་ཚུགས་ཙམ་ལས་འདས་ན་ཁ་ན་མ་ཐོ་བ་ཡོངས་སུ་རྫོགས་པར་འགྱུར་རོ། །དེ་ལྟ་བས་ན་འདིར་ཕ་རོལ་དུ་ཞེས་སྨོས་པ་ནི་དཔེ་ཙམ་དུ་ཟད་པར་ཤེས་པར་བྱའོ། །ལག་རྐྱང་དག་གིས་ཕ་རོལ་དུ་ཕྱིན་ནའོ་ཞེས་བྱ་བ་ནི། ལག་པ་གཉིས་ཀྱི་ལག་རྐྱལ་དག་གིས་ཆུ་ཀླུང་གི་ཕ་རོལ་དུ་བརྒལ་བ་ལ་ནི་ཕ་རོལ་དུ་སོན་
བ་ཁོ་ན་ན་དངོས་གཞིར་འགྱུར་གྱི། ཆུ་ངོགས་སུ་ཞུགས་པ་ལ་སོགས་པས་ནི་མ་ཡིན་ནོ། །མདུན་རོལ་དུ་ནི་སྦོམ་པོའི་ཞེས་བྱ་བ་ནི། དགེ་སློང་མ་གཅིག་པུ་ལག་རྐྱལ་དག་གིས་ཆུ་ཀླུང་གི་ཕ་རོལ་དུ་འགྲོ་ན་ཕ་རོལ་དུ་ཕྱིན་པའི་མདུན་རོལ་དུ་ནི་སྤོམ་པོའོ། །ཡུང་ཕྲན་གྱི་ཕ་རོལ་དུ་ནི་ཉེས་བྱས་སོ་ཞེས་བྱ་བ་ནི། ཕྱིན་ན་ཞེས་བྱ་བར་སྦྱར་རོ། །ཡུར་ཕྲན་ཞེས་བྱ་བ་ནི། མཆོངས་པས་རྒལ་བར་ནུས་པ་སྟེ་དགེ་སློང་མ་གཅིག་པུ་རྒལ་བ་དེའི་ཕ་རོལ་དུ་ཕྱིན་ན་ཉེས་བྱས་སོ། །རྒྱུན་ལྷག་མ་དག་ལ་ནི་སྔ་མ་བཞིན་ཅི་རིགས་པར་སྦྱར་རོ། །ཆུ་རྒལ་བའི་དགེ་འདུན་ལྷག་མའོ་ཞེས་བྱ་བ་དེ་བཤད་ཟིན་ཏོ།། །།གང་ལས་རབ་ཏུ་འབྱིན་པའི་དགེ་འདུན་ལྷག་མར་འགྱུར་ཞེ་ན། དེའི་ཕྱིར་རབ་ཏུ་འབྱིན་པ་ལའོ་ཞེས་བྱ་བ་སྨྲས་ཏེ། རབ་ཏུ་འབྱིན་པ་ཞེས་བྱ་བ་ནི། ཁྱིམ་པའི་རྟགས་སྤོང་དུ་འཇུག་ཅིང་རབ་ཏུ་བྱུང་བའི་རྟགས་ཡང་དག་པར་ལེན་དུ་འཇུག་པའོ། །དེའི་ཕྱིར་འདིར་ནི་རབ་ཏུ་བྱུང་བ་འདི་པ་དང་སྐལ་བ་མཉམ་པ་ཉིད་དུ་བྱེད་པ་གཙོ་བོ་ཡིན་ནོ། །གལ་ཏེ་དང་པོ་ཁོ་ནར་དགེ་ཚུལ་ལ་སོགས་པའི་དངོས་པོ་བྱེད་ན་ཡང་ཁན་མ་ཐོ་བ་ཡོངས་སུ་རྫོགས་པར་འགྱུར་རོ། །ཉེ་བར་སྡུད་པ་ལ་སོགས་པ་ནི་འདིར་སྦྱོར་བའི་སྦྱོར་བ་ཉིད་དེ་ཉེས་བྱས་སོ། །ཞུ་བ་ལ་སོགས་པ་ནི་འདིར་སྦྱོར་བ་ཉིད་དེ་སྒོམ་པོའོ། །གང་ཞིག་ཅེ་ན་དེའི་ཕྱིར་ཚོགས་པ་ཡིད་མཐུན་པ་བདག་པོས་ཡོངས་སུ་བཏང་བ་རྒྱལ་པོས་རྗེས་སུ་གནང་བའོ་ཞེས་བྱ་བ་སྨྲས་ཏེ། བུད་མེད་དུ་གྱུར་པའི་གང་ཟག་གང་ལ་ཚོགས་པ་ཡིད་མཐུན་པ་ཉིད་དང་བདག་པོས་ཡོངས་སུ་བཏང་བ་ཉིད་དང་རྒྱལ་པོས་རྗེས་སུ་གནང་བ་ཉིད་ཀྱི་ཆོས་གསུམ་པོ་དེ་དག་ཡོད་པའི་བུད་མེད་དེ་ལྟ་བུ་རབ་ཏུ་འབྱིན་ན་རབ་ཏུ་འབྱིན་པའི་དགེ་འདུན་ལྷག་མར་འགྱུར་རོ། །ཡན་ལག་དེ་དག་ལས་གཅིག་ཡོད་ན་ནི་སྤོམ་པོ་སྟེ་དེའི་ཕྱིར་ཚོགས་པ་ཡིད་མཐུན་པ་ཉིད་ལ་སོགས་པའི་ཡན་ལག་གསུམ་པོ་དེ་དག་ལས་ཡན་ལག་གཅིག་ཡོད་ན་ཡང་སྦོམ་པོ་ཁོ་ནར་འགྱུར་བར་རིག་པར་བྱའོ། །སོགས་པ་ཡིད་མཐུན་པ་ཉིད་ལ་སོགས་པ་དག་ཅི་ཞིག་གི་ཕྱིར་བཤད་ན་དེའི་ཕྱིར། བསད་པའི་ཕྱིར་རོ་ཞེས་བྱ་བ་སྨྲས་ཏེ། བསད་པའི་ཕྱིར་ཚོགས་པ་ཡིད་མཐུན་པ་དང་བདག་པོས་ཡོངས་སུ་བཏང་བ་དང༌། རྒྱལ་པོས་
རྗེས་སུ་གནང་བའི་བུད་མེད་དེ་ལྟ་བུ་རབ་ཏུ་འབྱིན་ནའོ། །སྦྱོར་བ་གང་གིས་རབ་ཏུ་འབྱིན་ཞེ་ན་དེའི་ཕྱིར། མཁན་མོ་ཉིད་ཀྱིས་སོ་ཞེས་བྱ་བ་སྨྲས་ཏེ། དེའི་མཁན་མོ་ཉིད་བྱེད་ན་ཁ་ན་མ་ཐོ་བ་འདིར་འགྱུར་རོ། །འདིར་དེ་ལ་སྦྱོར་བའི་དགེ་སློང་མ་གཞན་ལ་ནི་ཉེས་བྱས་སོ། །མཁན་མོ་ཁྱད་པར་ཅི་ལྟ་བུ་ཅན་ཞིག་གིས་ཤེ་ན་དེའི་ཕྱིར། དེ་ཤེས་པ་ཉིད་ཀྱིས་སོ་ཞེས་བྱ་བ་སྨྲས་ཏེ། བུད་མེད་འདི་གསད་པའི་ཕྱིར་ཚོགས་པ་ཡིད་མཐུན་པ་དང་པ་དག་པོས་ཡོངས་སུ་བཏང་བ་དང༌། རྒྱལ་པོས་རྗེས་སུ་གནང་བའི་གཞི་དེ་དག་ཤེས་པ་ཉིད་ཀྱིས་ཏེ། འདིར་ཡང་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ། །རབ་ཏུ་འབྱིན་པའི་དགེ་འདུན་ལྷག་མའོ་ཞེས་བྱ་བ་དེ་བཤད་ཟིན་ཏོ།། །།བམ་པོ་སུམ་ཅུ་དགུ་པ། །གང་ལ་ཤི་བའི་ནོར་ལེན་པའི་དགེ་འདུན་ལྷག་མར་འགྱུར་ཞེ་ན་དེའི་ཕྱིར་ཤི་བའི་ནོར་ལེན་པ་ལའོ་ཞེས་བྱ་བ་སྨྲས་ཏེ། ཤི་བའི་ནོར་དེད་པ་ལ་སྟེ། དེད་པའི་ཚེའི་དུས་ཁོ་ན་ན་ཁ་ན་མ་ཐོ་བ་འདིར་འགྱུར་གྱི་ཐོབ་པའི་དུས་འབའ་ཞིག་ཏུ་མ་ཟད་དོ། །དེད་པའི་དུས་དེ་ན་ཐོ་འཚམས་པའི་བློ་དང༌། གྱ་ཙོམ་རབ་ཏུ་སྟོན་པར་བྱེད་པའི་བུད་མེད་རྣམས་ནི་སྐྱེས་པའི་ཆོས་ལྟར་ཐལ་བའི་ཕྱིར་རོ། །གང་གི་ཚེ་ནོར་གྱི་བདག་པོ་ཤི་བ་དེའི་རིགས་བརྒྱུད་མེད་ཅིང་བུ་ཚ་འགའ་ཡང་མ་ལུས་པ་དེའི་ཚེ་ན་དགེ་འདུན་ལྷག་མའོ། །གང་གི་ཚེ་རིགས་བརྒྱུད་ཡོད་པ་ལ་ནི་སྦོམ་པོའོ། །གཞན་ལེན་དུ་བཅུག་ན་ཡང་སྦོམ་པོ་ཁོ་ནའོ། །དགེ་འདུན་ལ་ཡང་རྙེད་པ་རྣམ་པ་འདི་ལྟ་བུར་འགྱུར་རམ་ཞེ་ན་དེ་དམིགས་ཀྱིས་བསལ་བའི་ཕྱིར་དགེ་འདུན་གྱི་ལ་ནི་ལྟུང་བ་མེད་དོ་ཞེས་བྱ་བ་སྨྲས་ཏེ། དགེ་འདུན་གྱིས་ཐོབ་པ་ནི་དགེ་འདུན་གྱི་སྟེ། དགེ་འདུན་གྱིས་འཐོབ་པའི་ཤི་བའི་ནོར་དེ་ལེན་པ་ལ་ནི་ལྟུང་བ་མེད་དོ། །ཅི་རྣམ་པ་ཐམས་ཅད་ལ་འམ་ཞེ་ན་དེའི་ཕྱིར། གལ་ཏེ་ཚོགས་ཆུང་དུས་ནའོ་ཞེས་བྱ་བ་སྨྲས་ཏེ། ཤི་བའི་ནོར་དགེ་འདུན་དབང་བ་དེ་གལ་ཏེ་ཚེགས་ཆུང་དུས་འཐོབ་པ་ལྟ་ན་དེ་དེད་ཅིང་ལེན་པ་ལ་ལྟུང་བ་མེད་དོ། །འདིར་ཚེགས་ཆུང་དུ་ཞེས་བྱ་བ་ནི་ཆོས་གོས་ཀྱི་རིན་རུང་བ་མ་ཡིན་པར་བསྐུར་བ་ཞེས་བྱ་བ་ལ་སོགས་པ་ལྟ་བུར་རིག་པར་བྱའོ། །གལ་ཏེ་ཚེགས་དང་བཅས་ཤིང་རང་གི་དོན་དང་བཅས་པ་ཉིད་དུ་ལེན་ན་ནི་དགེ་འདུན་ལྷག་མའོ། །
གཞན་གྱི་དོན་ཉིད་ཙམ་དུ་ཟད་ཀྱི་རང་གི་ཆ་དང་འབྲེལ་པའི་བསམ་པ་མེད་པ་ཉིད་ལ་ནི་སྦོམ་པོའོ། །ཤི་བའི་ནོར་ལེན་པའི་དགེ་འདུན་ལྷག་མའོ་ཞེས་བྱ་བ་དེ་བཤད་ཟིན་ཏོ།། །།གང་ལ་བཟོད་པ་གསོལ་དུ་འཇུག་པའི་དགེ་འདུན་ལྷག་མར་འགྱུར་ཞེན་དེའི་ཕྱིར། མཚམས་ཀྱི་ཕྱི་རོལ་དུ་བཟོད་པ་གསོལ་དུ་འཇུག་པ་ལའོ་ཞེས་བྱ་བ་སྨྲས་ཏེ། བསྡིགས་པ་ལ་སོགས་པའི་ཆད་པའི་ལས་ལ་རྣམ་པར་གཞག་པའི་དགེ་སློང་མ་མཚམས་ཀྱི་ཕྱི་རོལ་དུ་ཁྲིད་དེ་བཟོད་པ་གསོལ་དུ་གཞུག་ཅིང་དེ་ལས་བཟོད་པ་ལེན་པར་བྱེད་པའི་དགེ་སློང་མ་ལ་ཁ་ན་མ་ཐོ་བ་འདིར་འགྱུར་རོ། །མཚམས་ཀྱི་ནང་དུ་བཟོད་པ་གསོལ་དུ་འཇུག་པ་ལ་ནི་སྡིག་ཤིན་ཏུ་ཆེ་བར་སྣང་སྟེ། འདི་ལྟར་དེ་ནི་དགེ་འདུན་གྱི་དབྱེན་དང་རིགས་མཐུན་པ་ཡིན་པའི་ཕྱིར་རོ། །བུད་མེད་རྣམས་ཀྱི་སྒྲུབ་པ་འདི་ལ་ནི་མཐུན་པ་འབྱེད་པར་གྱུར་པ་དང་ལོག་པར་བསྒྲུབ་པ་ཤིན་ཏུ་སྟོབས་ཆེ་བ་དང་ཤིན་ཏུ་སྤྱི་བརྟོལ་ཆེ་བ་ཡིན་པས་དེའི་ཕྱིར་ཆད་པས་གཅོད་པར་བྱེད་པའི་དགེ་འདུ་རྣམ་ཚོགས་པའམ། ཆད་པས་གཅོད་པར་བྱེད་པ་གང་ཟག་དག་མ་ཚོགས་པར་འོག་ཐུག་ཐུབ་ཏུ་བཟོད་པ་གསོལ་དུ་འཇུག་པ་དེ་ལ་འདི་གཙོ་ཆེ་བ་ཡིན་ནོ། །ཡང་དགེ་སློང་མ་གང་གིས་དགེ་སློང་མ་གང་དགེ་སློང་མའི་དགེ་འདུན་མཐུན་པས་གནས་ནས་དབྱུང་བར་བྱ་བའི་ལས་བྱས་པར་ཤེས་བཞིན་དུ་དེ་མཚམས་ཀྱི་ཕྱི་རོལ་དུ་ཁྲིད་དེ་བཟོད་པར་བྱེད་ན་ཆོས་འདི་ཡང་དང་པོས་ལྟུང་བར་འགྱུར་ལ་འབྱུང་བར་འགྱུར་བ་སྟེ། དགེ་འདུན་ལྷག་མའོ་ཞེས་གསུངས་པ་དེར་མཚམས་ཀྱི་ཕྱི་རོལ་ཞེས་སྨོས་པ་ནི་གླེང་གཞིའི་དབང་གིས་མཛད་པར་ཟད་དེ། དེ་ལྟ་བས་ན་གང་ཡང་རུང་བར་བཟོད་པ་བྱེད་པ་ལ་ཁ་ན་མ་ཐོ་བ་འདིར་འགྱུར་རོ། །འདིར་གནས་ནས་དབྱུང་བའི་ལས་ཞེས་སྨོས་པ་ནི་ཆད་པའི་ལས་དག་གི་དཔེ་ཙམ་དུ་ཟད་དེ་ངེས་ན་དེ་ཉིད་མདོར་བྲིས་སོ། །བཟོད་པ་གསོལ་དུ་འཇུག་པའི་དགེ་འདུན་ལྷག་མའོ་ཞེས་བྱ་བ་དེ་བཤད་ཟིན་ཏོ།། །།གང་ལ་སྤོང་པའི་དགེ་འདུན་ལྷག་མར་འགྱུར་ཞེ་ན་དེའི་ཕྱིར། དཀོན་མཆོག་གཏོང་ངོ༌། །འདི་དང་མཚུངས་པ་ཉིད་ཀྱི་དགེ་སྦྱོང་གཞན་དག་ཀྱང་ཡོད་ཀྱིས་དེ་དག་ལ་ཚངས་པར་སྤྱོད་པ་ཉིད་སྤྱོད་དོ་ཞེས་བྱ་བའི་ཚིག་དེ་ལ་ཞུགས་པའི་མི་གཏོང་བ་ལའོ་ཞེས་བྱ་བ་སྨྲས་ཏེ། དཀོན་
མཆོག་གཏོང་ངོ་ཞེས་བྱ་བ་ནི་གཞན་མུ་སྟེགས་ཅན་ལས་རབ་དུ་བྱུང་བའི་དགེ་སློང་མ་ནག་མོ་ཞེས་བྱ་བ་དགེ་སློང་མ་རྣམས་དང་ལྷན་ཅིག་འཐབ་ཀྲོལ་བྱེད་ཅིང་སངས་རྒྱས་གཏོང་ངོ་ཆོས་གཏོང་ངོ༌། །དགེ་འདུན་གཏོང་ངོ་ཞེས་ཟེར་བ་དེ་ཉིད་ཡིན་ནོ། །འདི་དང་མཚུངས་པ་ཉིད་ཀྱི་དགེ་སྦྱོང་གཞན་དག་ཀྱང་ཡོད་ཀྱི་ཞེས་བྱ་བ་ནི་ཤཱཀྱའི་བུའི་དགེ་སྦྱོང་དང་ཉིད་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ་དེས་པ་དགེ་སྦྱོང་ཆོས་ཅན་མ་ཡིན་གྱི་དགེ་སྦྱོང་དང་བྲམ་ཟེ་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ་དེས་པ་དགེ་བའི་ཆོས་ཅན་གཞན་དག་ཀྱང་ཡོད་ཀྱིས་ཞེས་ཟེར་བ་ཡིན་ནོ། །དེ་དག་ལ་ཚངས་པར་སྤྱོད་པ་ཉིད་སྤྱོད་དོ་ཞེས་བྱ་བ་ནི་དགེ་སྦྱོང་དང་བྲམ་ཟེ་གཞན་དེ་དག་ལ་ཚངས་པར་སྤྱད་པའི་དངོས་པོ་ཉིད་ནི་ཚངས་པར་སྤྱད་པ་ཉིད་སྤྱད་པ་སྟེ་དེ་དག་གི་དྲུང་དུ་ཚངས་པར་སྤྱད་པ་ཉིད་སྤྱོད་དོ་ཞེས་ཟེར་བར་སྦྱར་རོ། །ཚིག་དེ་ལ་ཞུགས་པ་མི་གཏོང་བ་ལའོ་ཞེས་བྱ་བ་ནི། །ཚིག་དེ་ལ་ཞུགས་པ་གང་ཡིན་པ་དེ་མི་གཏོང་པ་ལ་ཁ་ན་མ་ཐོ་བ་འདིར་འགྱུར་བ་སྟེ། གལ་ཏེ་ཚིག་དེ་དག་ཐམས་ཅད་བརྗོད་ཀྱང་རུང་གཅིག་བརྗོད་ཀྱང་རུང་སྟེ། དངོས་གཞིའི་ཁ་ན་མ་ཐོ་བར་འགྱུར་རོ། །ཇི་ལྟར་མི་གཏོང་ཞེ་ན་དེའི་ཕྱིར་དགེ་འདུན་གྱི་དབྱེན་ལ་ཞུགས་པ་ལྟར་རོ་ཞེས་བྱ་བ་སྨྲས་ཏེ། ལྟར་རོ་ཞེས་བྱ་བའི་སྒྲས་ནི་འདྲ་བའི་དོན་ཏེ་ཅི་ལྟར་དགེ་འདུན་གྱི་དབྱེན་ལ་ཞུགས་པ་དེ་ལ་སྦྱོར་བ་དང་དངོས་གཞིར་འགྱུར་བ་ལྟར་འདི་ལ་ཡང་དེ་བཞིན་ནོ་ཞེས་བྱ་བའི་ཐ་ཚིག་གོ །འོག་མ་དག་ལ་ཡང་ངོ་ཞེས་བྱ་བ་ནི། བསླབ་པའི་གཞི་འདིའི་འོག་མ་འཐབ་ཀྲོལ་བྱེད་པ་ལ་སྩོགས་པ་དག་ལ་ཡང་མི་གཏོང་ན་དགེ་འདུན་གྱི་དབྱེན་ལ་ཞུགས་པ་ལྟར་སྦྱོར་བ་དང༌། དགེ་འདུན་ལྷག་མར་འགྱུར་རོ་ཞེས་བྱ་བར་སྦྱར་རོ། །སྦོང་བའི་དགེ་འདུན་ལྷག་མའོ་ཞེས་བྱ་བ་དེ་བཤད་ཟིན་ཏོ།། །།གང་ལ་འཐབ་ཀྲོལ་བྱེད་པའི་དགེ་འདུན་ལྷག་མར་འགྱུར་ཞེ་ན། དེའི་ཕྱིར། དགེ་སློང་མ་རྣམས་ལ་བདུན་པ་ལ་སོགས་པས་འགྲོ་པ་ཉིད་དུ་རྗེས་སུ་སྦྱོར་བ་ལའོ་ཞེས་བྱ་བ་སྨྲས་ཏེ། མདོ་སྔ་མ་ལས་མི་གཏོང་པ་ལའོ་ཞེས་བྱ་བ་དང་དགེ་འདུན་འབྱེད་པ་ལ་ཞུགས་པ་ལྟར་རོ་ཞེས་བྱ་བའི་རྗེས་སུ་སྦྱར་རོ། །གལ་ཏེ་དགེ་སློང་མ་འཐབ་ཀྲོལ་བྱེད་པ་ལ་དགེ་སློང་མ་རྣམས་ཀྱིས་ཆོ་ག་བཞིན་དུ་ཕྱིར་བཟློག་པ་ན་དགེ་སློང་མ་རྣམས་ལ་
འདུན་པ་ལ་སོགས་པས་འགྲོ་བ་ཉིད་རྗེས་སུ་སྦྱོར་བ་ལ་དགེ་སློང་མ་རྣམས་ཀྱིས་བཞམས་ཏེ་བསྒོ་པ་དང༌། གསོལ་བ་དང་བཞིའི་ལས་ཀྱིས་བསྒོ་བ་ཡང་དངོས་པོ་དེ་མི་གཏོང་བའི་དགེ་སློང་མ་དེ་ལ་ཁ་ན་མ་ཐོ་བ་འདིར་འགྱུར་རོ། །སྩོགས་པས་ཞེས་བྱ་བའི་སྒྲས་ནི་ཞེ་སྡང་དང་གཏི་མུག་དང་འཇིགས་པས་འགྲོ་བ་ཞེས་བྱ་བ་དག་ཀྱང་བསྡུ་སྟེ། དེ་དག་ནི་ཁྱིམ་སུན་འབྱིན་པའི་དགེ་འདུན་ལྷག་མའི་རྗེས་སུ་འབྲང་བས་ཤེས་པར་བྱའོ། །དོན་གང་ལ་འདུན་པ་ལ་སོགས་པས་འགྲོ་བ་ཉིད་དུ་རྗེས་སུ་སྦྱོར་བ་མི་གཏོང་བ་ལ་ཞེན་དེའི་ཕྱིར། དགེ་སློང་མ་རྣམས་དང་ལྷན་ཅིག་འཐབ་ཀྲོལ་དང་མཚང་འདྲུ་བ་དང་རྩོད་པ་དང་འགྱེད་པ་བཟློག་པ་ལའོ་ཞེས་བྱ་བ་སྨྲས་ཏེ། དགེ་སློང་མ་རྣམས་དང་ལྷན་ཅིག་ཅེས་བྱ་བ་ནི་ཚིག་བཞི་ཆར་དང་སྦྱར་རོ། །འཐབ་ཀྲོལ་ཞེས་བྱ་བ་ནི། རྩུབ་མོ་སྨྲ་བ་དང་ཕྱིར་སྨྲ་བའོ། །མཚང་འདྲུ་བ་ཞེས་བྱ་བ་ནི་རྩུབ་པོ་ཡང་རུང་འཇམ་པོ་ཡང་རུང་བའི་ཚིག་གམ་བྱ་བས་ཅོ་འདྲི་བའོ། །རྩོད་པ་ཞེས་བྱ་བ་ནི་ཁོན་དུ་འཛིན་ཅིང་གནས་པའོ། །འགྱེད་པ་ཞེས་བྱ་བ་ནི་ཤགས་འགྱེད་པའོ། །བཟློག་པ་ལའོ་ཞེས་བྱ་བ་ནི་དགེ་འདུན་མས་ཕུ་ནུ་མོ་ཁྱོད་འཐབ་ཀྲོལ་མ་བྱེད་ཅིག་ཅེས་བྱ་བ་ལ་སོགས་པས་བཟློག་པ་ན། འདི་ན་དགེ་སློང་མ་ཁ་ཅིག་ནི་འདུན་པས་འགྲོ། ཞེ་སྡང་གིས་འགྲོ། གཏི་མུག་གིས་འགྲོ། འཇིགས་པས་འགྲོ་སྟེ་འདི་ལྟར་དགེ་སློང་མ་ཁ་ཅིག་ནི་བཟློག་ཁ་ཅིག་ནི་མ་བཟློག་གོ་ཞེས་ཟེར་བ་ལ་དགེ་སློང་མ་རྣམས་ཀྱིས་བཞམས་ཏེ་བསྒོ་བ་དང༌། གསོལ་བ་དང་བཞིའི་ལས་ཀྱིས་བསྒོ་ཡང་མི་གཏོང་བ་དེ་ལ་ཁ་ན་མ་ཐོ་བ་འདིར་འགྱུར་རོ། །འཐབ་ཀྲོལ་ལ་སོགས་པ་བྱེད་པ་ལ་དགེ་སློང་དང་ལྷན་ཅིག་བྱེད་ན་ནི་འདིར་ལྕི་བའི་ཆོས་ཀྱི་ཁ་ན་མ་ཐོ་བ་འདིར་འགྱུར་རོ། །གང་ཟག་གཞན་དང་ལྷན་ཅིག་འཐབ་ཀྲོལ་ལ་སོགས་པ་བྱེད་པ་ལ་ནི་ཉེས་བྱས་སོ། །འཐབ་ཀྲོལ་བྱེད་པའི་དགེ་འདུན་ལྷག་མའོ་ཞེས་བྱ་བ་དེ་བཤད་ཟིན་ཏོ།། །།གང་ལ་བུད་མེད་དང་བསྟེན་པའི་དགེ་འདུན་ལྷག་མར་འགྱུར་ཞེ་ན་དེའི་ཕྱིར། །སྡེ་ཞིང་གནས་པ་ལའོ་ཞེས་བྱ་བ་སྨྲས་ཏེ། མི་གཏོང་བ་ལའོ་ཞེས་བྱ་བ་དང་དགེ་འདུན་གྱི་དབྱེན་ལ་ཞུགས་པ་ལྟར་རོ་ཞེས་བྱ་བའི་རྗེས་སུ་སྦྱར་ཏེ། དེ་ལ་ཁ་ན་མ་ཐོ་བ་
འདིར་འགྱུར་རོ། །སུ་དང་སྡེ་ཞིང་གནས་པ་ལ་ཞེ་ན་དེའི་ཕྱིར། དགེ་སློང་མ་དང་ངོ་ཞེས་བྱ་བ་སྨྲས་ཏེ། ལྷན་ཅིག་ཅེས་བྱ་བར་སྦྱར་རོ། །གླེང་གཞིའི་དབང་གིས་དགེ་སློང་མ་དང་ཞེས་གསུངས་པར་ཟད་ཀྱི་ཁྱིམ་པ་མོ་དང་མུ་སྟེགས་ཅན་མོ་དགེ་ཚུལ་མ་དང༌། དགེ་སློང་མ་དང་ལྷན་ཅིག་སྡེ་ཞིང་གནས་པ་ནི་ཤིན་ཏུ་སྡིག་ཆེ་བའི་ཕྱིར་དེ་ལ་ཡང་ཁ་ན་མ་ཐོ་བ་རྫོགས་པར་འགྱུར་རོ། །སྐྱེས་པ་དང་ལྷན་ཅིག་སྡེ་ཞིང་གནས་པ་ལ་ནི་ཕམ་པར་འགྱུར་བའི་སྦྱོར་བར་རིག་པར་བྱའོ། །རྣམ་པ་ཅི་ལྟ་བུས་སྡེ་ཞིང་གནས་པ་ལ་ཞེ་ན་དེའི་ཕྱིར། གཞོགས་སྟེགས་དང་ཕྱར་གཡེང་དང་ཙབ་ཧྲལ་གྱི་རྒྱུར་གྱུར་པ་དག་གིས་སོ་ཞེས་བྱ་བ་སྨྲས་ཏེ། གཞོགས་སྟེགས་ཀྱི་རྒྱུར་གྱུར་པ་ནི་མཐོ་འཚམ་པའོ། །ཕྱར་གཡེང་གི་རྒྱུར་གྱུར་པ་ནི་ཀུན་དུ་རྩེ་བའོ། །ཙབ་ཧྲལ་གྱི་རྒྱུར་གྱུར་པ་ནི་ཀུན་དུ་ཅ་ཅོ་འདོན་པ་ཡིན་པར་རིག་པར་བྱའོ། །ཆུང་ངུ་དང་འབྲིང་དང་ཆེན་པོའི་བྱེ་བྲག་གིས་ལྟུང་བ་གཞན་དུ་འགྱུར་རོ། །དགེ་སློང་མ་དང་ལྷན་ཅིག་ལུས་ཀྱི་རེག་པ་ནི་ཁ་ཅིག་ཏུ་ནི་སྦོམ་པོའོ། །ཁ་ཅིག་ཏུ་ནི་ཉེས་བྱས་སོ། །དགེ་སློང་མའི་ཕྱིར་ལུས་བཀན་པ་ནི་སྦོམ་པོའོ། །དེའི་ཕྱིར་མལ་ཤོམ་དུ་འཇུག་པ་ལ་སོགས་པ་བྱེད་པ་ནི་ཉེས་བྱས་སོ། །བུད་མེད་དང་བསྟེན་པའི་དགེ་འདུན་ལྷག་མའོ་ཞེས་བྱ་བ་དེ་བཤད་ཟིན་ཏོ།། །།གང་ལ་བུད་མེད་དང་བསྟེན་དུ་འཇུག་པའི་དགེ་འདུན་ལྷག་མར་འགྱུར་ཞེ་ན། དེའི་ཕྱིར་སྡེ་བ་དེ་ཡང་དག་པར་འཛིན་དུ་འཇུག་པ་ལའོ་ཞེས་བྱ་བ་སྨྲས་ཏེ། མི་གཏོང་བ་ལའོ་ཞེས་བྱ་བ་དང་དགེ་འདུན་གྱི་དབྱེན་ལ་ཞུགས་པ་ལྟར་རོ་ཞེས་བྱ་བར་སྦྱར་རོ། །གཞོགས་སྟེགས་དང་ཕྱར་གཡེང་དང་ཙབ་ཧྲལ་གྱི་རྒྱུར་གྱུར་པའི་རྒྱུན་སྔར་བསྟན་མ་ཐག་པ་དག་གིས་དགེ་སློང་མ་བུད་མེད་དང་སྡེ་ཞིང་གནས་བདེ་བཏང་སྟེ་ཐ་དད་དུ་གནས་པར་ཤེས་བཞིན་དུ་དགེ་སློང་མ་གང་གིས་འདི་སྐད་ཅེས་ཕུ་ནུ་མོ་ཁྱོད་གཉིས་ཐ་དད་དུ་གནས་པར་མ་བྱེད་ཅིག །ཁྱེད་གཉིས་ཐ་དད་དུ་གནས་ན་དགེ་བའི་ཆོས་རྣམས་འབྲི་བ་ཉིད་དུ་ཤེས་པར་བྱའོ། འཕེལ་བར་ནི་མ་ཡིན་ནོ། །ཁྱེད་གཉིས་སྡེ་ཞིང་གནས་པར་གྱིས་ཤིག་ཁྱེད་གཉིས་སྡེ་ཞིང་གནས་ན་དགེ་བའི་ཆོས་རྣམས་འཕེལ་བ་ཉིད་དུ་ཤེས་པར་བྱའི་འབྲི་བར་ནི་མ་ཡིན་ནོ་ཞེས་སྡེ་བདེ་ཡང་དག་པར་འཛིན་དུ་འཇུག་
བ་ལ་དགེ་འདུན་མས་བཞམས་ཏེ་བསྒོ་བ་དང་གསོལ་བ་དང་བཞིའི་ལས་ཀྱིས་བསྒོ་བ་ཡང་མི་གཏོང་བ་ལ་ཁ་ན་མ་ཐོ་བ་འདིར་འགྱུར་རོ། །བུད་མེད་དང་བསྟེན་དུ་འཇུག་པའི་དགེ་འདུན་ལྷག་མའོ་ཞེས་བྱ་བ་དེ་བཤད་ཟིན་ཏོ།། །།གང་ལ་དགེ་འདུན་གྱི་དབྱེན་བྱེད་བ་དང་དེའི་རྗེས་སུ་ཕྱོགས་པ་དང་ཁྱིམ་སུན་འབྱིན་པ་དང་བཀའ་བློ་མི་བདེ་བའི་དགེ་འདུན་ལྷག་མར་འགྱུར་ཞེན་དེའི་ཕྱིར། དགེ་འདུན་འབྱེད་པ་ལ་སོགས་པ་བཞི་ནི་དགེ་སློང་མའི་སྐབས་ལས་སོ་ཞེས་བྱ་བ་སྨྲས་ཏེ། མི་གཏོང་བ་ལའོ་ཞེས་བྱ་བ་དང་དགེ་འདུན་འབྱེད་པ་ལ་ཞུགས་པ་ལྟར་རོ་ཞེས་བྱ་བ་དང་སྦྱར་རོ། །དགེ་འདུན་མ་དགེ་བའི་ཕྱིར་འཇུག་ཅིང་རྩོད་པ་ཡང་དག་པར་བཟུང་ནས་རབ་ཏུ་འཛིན་ཅིང་འདུག་པ་གང་ཡིན་པ་དེ་ལ་དགེ་འདུན་མས་བཞམས་ཏེ་བསྒོ་བ་དང་གསོལ་བ་དང་བཞིའི་ལས་ཀྱིས་བསྒོ་ཡང་མི་གཏོང་བ་ལ་དགེ་འདུན་འབྱེད་པ་ལ་ཞུགས་པ་ལྟར་དགེ་འདུན་གྱི་དབྱེན་བྱེད་པའི་དགེ་འདུན་ལྷག་མར་འགྱུར་རོ། །དགེ་འདུན་གྱི་དབྱེན་བྱེད་པའི་དགེ་འདུན་ལྷག་མའོ། །དགེ་སློང་མའི་དགེ་འདུན་དབྱེ་བའི་ཕྱིར་ཞུགས་པའི་དགེ་སློང་མའི་རྗེས་སུ་ཕྱོགས་པའི་དགེ་སློང་མ་དེ་ལ་དགེ་འདུན་མས་བཞམས་ཏེ་བསྒོ་བ་དང༌། གསོལ་བ་དང་བཞིའི་ལས་ཀྱིས་བསྒོ་ཡང་མི་གཏོང་བ་ལ་དགེ་འདུན་འབྱེད་པ་ལ་ཞུགས་པ་ལྟར་རྗེས་སུ་ཕྱོགས་པའི་དགེ་འདུན་ལྷག་མར་འགྱུར་རོ། །དེའི་རྗེས་སུ་ཕྱོགས་པའི་དགེ་འདུན་ལྷག་མའོ། །ཁྱིམ་སུན་འབྱིན་པ་དང་སྡིག་པའི་ཆོས་ཀུན་དུ་སྤྱོད་པ་དགེ་འདུན་མས་བསྐྲད་པ་ན་སྐྲོད་པར་བྱེད་པའི་དགེ་སློང་མ་རྣམས་ལ་འདེ་ན་དགེ་སློང་མ་ཁ་ཅིག་ནི་འདུན་པས་འགྲོ། །ཞེ་སྡང་གིས་འགྲོ། གཏི་མུག་གིས་འགྲོ། འཇིགས་པས་འགྲོ་སྟེ་འདི་ལྟར་ཉེས་པ་འདྲ་བ་ཁོན་ལས་དགེ་སློང་མ་ཁ་ཅིག་ནི་བསྐྲད་ཁ་ཅིག་ནི་མ་བསྐྲད་དོ་ཞིས་ཟེར་བ་ལ་དགེ་འདུན་མས་བཞམས་ཏེ་བསྒོ་བ་དང༌། གསོལ་བ་དང་བཞིའི་ལས་ཀྱི་བསྒོ་ཡང་མི་གཏོང་བ་ལ་དགེ་འདུན་འབྱེད་པ་ལ་ཞུགས་པ་ལྟར་ཁྱིམ་སུན་འབྱིན་པའི་དགེ་འདུན་ལྷག་མར་འགྱུར་རོ། །ཁྱིམ་སུན་འབྱིན་པའི་དགེ་འདུན་ལྷག་མའོ། །དགེ་སློང་མ་འགའ་ཞིག་བཀའ་བློ་མི་བདེ་བའི་རང་བཞིན་ཅན་དུ་གྱུར་ལ་དེ་ལ་དགེ་སློང་མ་དག་གིས་གདོན་པར་གཏོགས་པ་བསླབ་པའི་གཞི་
རྣམས་དང་བདེ་བར་གཤེགས་པའི་མདོར་གཏོགས་པ་རྣམས་ཀྱིས་ཆོས་དང་མཐུན་པ་དང་འདུལ་བ་དང་མཐུན་པས་བསྒོ་ནང་གི་མི་ཉན་པ་དེ་ལ་དགེ་འདུན་མས་བཞམས་ཏེ་བསྒོ་བ་དང༌། གསོལ་བ་དང་བཞིའི་ལས་ཀྱིས་བསྒོ་ཡང་མི་གཏོང་བ་ལ་དགེ་འདུན་འབྱེད་པ་ལ་ཞུགས་པ་ལྟར་བཀའ་བློ་མི་བདེ་བའི་དགེ་འདུན་ལྷག་མར་འགྱུར་རོ། །བཀའ་བློ་མི་བདེ་བའི་དགེ་འདུན་ལྷག་མའོ། །དགེ་སློང་མའི་དགེ་འདུན་ལྷག་མ་རྣམས་རྫོགས་སོ་ཞེས་བྱ་བ་དགེ་སློང་མའི་དགེ་འདུན་ལྷག་མ་ཉི་ཤུ་པོ་དག་བཤད་ཟིན་ཏོ།། །།ད་ནི། དགེ་སློང་མའི་སྤང་པའི་ལྟུང་བྱེད་སུམ་བཅུ་རྩ་གསུམ་པོ་དག་བཤད་པར་བྱ་སྟེ། དེ་ལ་དང་པོ་བཅུ་ནི་དགེ་སློང་དང་ཐུན་མོང་མ་ཡིན་པས་དགེ་སློང་གི་སོ་སོར་ཐར་བའི་སྡོམ་གྱི་ཚིགས་སུ་བཅད་པ་དང་པོ་ལས། འཆང་བ་འབྲལ་བ་འཇོག་པ་དང༌། །འཁྲུར་འཇུག་པ་དང་ལེན་པ་དང༌། །སློང་དང་སྨད་གཡོགས་སྟོད་གཡོགས་བཅས། །རིན་ཐང་སོ་སོར་བསྐུར་བའོ། །ཞེས་གསུངས་པའི་རིམ་པ་དགེ་སློང་གི་རྣམ་པར་འབྱེད་པའི་སྐབས་སུ་མཚན་ཉིད་སྔར་ཇི་སྐད་བསྟན་པ་བཞིན་དུ་བལྟ་བར་བྱའོ། །དེ་དག་ཀྱང་གང་དག་ཡིན་པར་བལྟ་བར་བྱ་ཞེན་དེའི་ཕྱིར་བཅུ་པའོ་ཞེས་བྱ་བ་སྨྲས་ཏེ། འཆང་བ་དང་འབྲལ་བ་དང་འཇོག་པ་དང༌། འཁྲུར་འཇུག་པ་དང༌། ལེན་པ་དང་སློང་བ་དང་སློང་བར་རིགས་པ་དང༌། སྤགས་པ་སློང་བ་དང༌། སོ་སོ་ནས་སྤགས་པ་སློང་བ་དང༌། སྐུར་བའི་སྤང་བ་ཞེས་བྱ་བ་བཅུ་པ་དང་པོའོ། །གཞན་ཡང་སྤང་བའི་ལྟུང་བྱེད་རྣམ་པ་དགུ་ནི་དགེ་སློང་དང་ཐུན་མོང་མ་ཡིན་པས་དགེ་སློང་གི་རྣམ་པར་འབྱེད་པའི་སྐབས་སུ་མཚན་ཉིད་སྔར་ཇི་སྐད་བསྟན་པ་བཞིན་དུ་བལྟ་བར་བྱའོ། །དེ་དག་ཀྱང་གང་དག་ཡིན་པར་བལྟ་བར་བྱ་ཞེ་ན་དེའི་ཕྱིར། གསེར་དངུལ་ལ་རེག་པ་དང༌། མངོན་མཚན་ཅན་གྱིས་སྤྱོད་པ་དང༌། ཉོ་ཚོང་བྱེད་པ་དང༌། ལྷུང་བཟེད་ཚོལ་བ་དང༌། འཐག་ཏུ་འཇུག་པ་དང༌། འཐག་པ་བསྐྱེད་པ་དང༌། འཕྲོག་པ་དང༌། བསྔོས་པ་ལས་བསྒྱུར་བ་དང༌། སོགས་འཇོག་ལས་གྱུར་བའོ་ཞེས་བྱ་བ་སྨྲས་ཏེ། གྱུར་བ་ཞེས་བྱ་བའི་སྒྲ་འདིར་རེ་རེ་དང་སོ་སོར་སྦྱར་ཏེ། གསེར་དང་དངུལ་ལ་རེག་པ་ལས་གྱུར་བ་ཞེས་བྱ་བ་ལ་སོགས་པ་ལྟ་བུར་སྦྱར་རོ། །དེ་དག་གི་མཚན་ཉིད་
ཀྱང་དགེ་སློང་གི་རྣམ་པར་འབྱེད་པའི་སྐབས་སུ་སྡར་ཇི་སྐད་བསྟན་པ་ཁོན་བཞིན་དུ་བལྟ་བར་བྱའོ། །དེ་དག་ཐམས་ཅད་ལ་ཡང་བྱེ་བྲག་ནི་སྔར་མདོ་ལས། ཕོ་ཉིད་ལ་ནི་མོ་ཉིད་དོ། །དེ་ལ་ནི་ཕོ་ཉིད་དོ་ཞེས་བསྟན་པ་བཞིན་དུ་ཤེས་པར་བྱའོ། །བྱེ་བྲག་འདིར་འཁྲུར་འཇུག་པ་ལ་སོགས་པ་ལ་དམིགས་ཀྱིས་བསལ་བ་བསྟན་པའི་ཕྱིར། འཁྲུ་བ་ལ་སོགས་པ་ནི་དགེ་སློང་གིའོ་ཞེས་བྱ་བ་སྨྲས་ཏེ། དགེ་སློང་དབང་བའི་གོས་གང་ཡིན་བདེ་འཁྲུ་བ་དང་འཚེད་པ་དང་འཆག་པ་ནི་དགེ་སློང་མ་ལ་སྤང་བར་འགྱུར་གྱི་དགེ་སློང་མ་དབང་བའི་གོས་གང་ཡིན་པ་དེ་འཁྲུ་བ་དང་འཚེད་པ་དང་འཆག་པ་ནི་དེ་ལ་སྤང་བར་མི་འགྱུར་རོ། །དེ་ལས་ལེན་ནའོ་ཞེས་བྱ་བ་ཡང་དགེ་སློང་ལས་བླངས་ན་སྤང་བར་འགྱུར་བ་ཡིན་གྱི་དགེ་སློང་མ་ལས་བླངས་པ་ནི་མ་ཡིན་ནོ། །དགེ་སློང་མ་ལ་བྱིན་པའོ་ཞེས་བྱ་བ་ནི། འཕྲོག་པའི་སྤང་བ་ནི་དགེ་སློང་མ་ལ་བྱིན་པ་ཕྲོགས་ནས་སྤང་བར་འགྱུར་གྱི། དགེ་སློང་ལ་བྱིན་པ་ནི་མ་ཡིན་ནོ། །དགེ་སློང་གི་སྤང་བའི་ལྟུང་བྱེད་རྣམ་པ་བཅུ་གཅིག་ནི་དགེ་སློང་མ་རྣམས་དང་ཐུན་མོང་མ་ཡིན་ཏེ། དགེ་སློང་མ་རྣམས་ལ་འདིར་དེ་དག་རྣམ་པར་མི་གཞག་གོ །དེ་དག་ཀྱང་གང་ཞེ་ན། བཅུ་པ་གཉིས་པའི་སྡོམ་གྱི་ཚིགས་སུ་བཅད་པ་ལས། སྲིན་བལ་འབའ་ཞིག་ཆ་གཉིས་དང༌། །ལོ་དྲུག་པ་དང་མཐོ་གང་ལམ། །འཁྲུ་བ་དང་ནི་ཞེས་གསུངས་པ་རྣམ་པ་བདུན་པོ་སྲིན་བལ་གྱི་སྟན་དང༌། བལ་ནག་པོ་འབའ་ཞིག་གི་སྟན་དང༌། ཆ་གཉིས་བསྲེ་བ་དང༌། ལོ་དྲུག་ཏུ་བཅད་བ་དང༌། མཐོ་གང་དང༌། བལ་ཐོགས་པ་དང༌། བལ་རྨེད་དུ་འཇུག་པ་ཞེས་བྱ་བ་དག་དང་བཅུ་པ་གསུམ་པ་ལས། ལྷུང་བཟེད་འཆང་བ་དང༌། བརྟད་པ་ལས་བྱུང་བ་དང༌། ཞག་བདུན་ན་འབྲལ་བ་དང༌། དབྱར་གྱི་རས་ཆེན་གྱི་སྤང་བ་ཞེས་བྱ་བ་བཞི་པོ་དག་སྟེ། རྣམ་པ་བཅུ་གཅིག་པོ་དེ་དག་ནི་དགེ་སློང་མ་རྣམས་ལ་མེད་དོ། །ལྷ་རྟེན་བཅང་བར་མི་བྱའོ་ཞེས་བྱ་བ་ནི། སྤོམ་དགའ་མོ་མཉན་ཡོད་དུ་བསོད་སྙོམས་ལ་ཞུགས་པ་ན་དེས་ལྷ་བོན་མོ་ལྷ་རྟེན་ཐོགས་ཤིང་རྒྱུ་བ་ཞིག་མཐོང་ནས་སྦོམ་དགའ་མོས་བསམས་པ། ཐབས་འདི་ནི་བཟང་པོ་ཞིག་ཡིན་གྱིས་བདག་གིས་ཀྱང་སང་ཤེས་པར་བྱའོ་སྙམ་ནས་དེ་ཕྱི་
དེ་ཉིན་པར་ལྷ་རྟེན་ཐོགས་ཏེ་མཉན་ཡོད་དུ་ཞུགས་ནས་དེ་ཁྱེའུ་དང་བུ་མོ་དག་ལ་སྲུང་སྐྱོབ་བྱེད་ཅིང་དེས་གང་དང་གང་ལ་བསྲུང་བསྐྱབ་བྱས་པ་དེ་དང་དེ་དག་བདེ་བར་གནས་པར་གྱུར་ནས། དེའི་ཚེ་གང་དང་གང་དག་ལ་བསྲུང་བསྐྱབ་བྱ་དགོས་པར་འགྱུར་བ་དེ་དག་ཐམས་ཅད་ཀྱིས་སྤོམ་དགའ་མོ་སྲུང་སྐྱོབ་བྱེད་དུ་འཇུག་པར་བྱེད་ནས་ལྷ་བོན་མོ་འཕྱ་བར་གྱུར་པ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་མས་ལྷ་རྟེན་བཅང་བར་མི་བྱའོ་ཞེས་བྱ་བའི་བར་དུ་གསུང་ས་པ་ཡིན་ནོ། །བསྲུང་བསྐྱབ་ཅེས་བྱ་བ་ནི་ཡོངས་སུ་སྲུང་ཞིང་སྐྱོབ་པ་བྱེད་པའོ། །ལྷ་རྟེན་ཞེས་བྱ་བ་ནི། བསྲུང་བསྐྱབ་བྱ་བ་དེའི་ཕྱིར། སྣོད་ཟམ་ཏོག་མེ་ཏོག་ལ་སོགས་པས་བརྒྱན་ཅིང་ས་ལས་བྱས་པའི་གཟུགས་ཀྱིས་བཀང་བ་ཡིན་ནོ་ཞེས་ཟེར་རོ། །འཆད་བའི་སྤང་བ་ལ་སོགས་པ་བཅུ་དགུའོ་ཞེས་བྱ་བ་དགེ་སློང་མའི་སྤང་བའི་ལྟུང་བྱེད་དགེ་སློང་དང་ཐུན་མོང་བ་འཆང་བ་ལ་སོགས་པ་བཅུ་དགུ་པོ་དག་བཤད་ཟིན་ཏོ།། །།ད་ནི་དགེ་སློང་མའི་སྤང་བའི་ལྟུང་བྱེད་དགེ་སློང་དང་ཐུན་མོང་མ་ཡིན་པ་རྣམས་བཤད་པར་བྱ་སྟེ། དེ་དག་ནི་རྣམ་པ་བཅུ་བཞི་ཡོད་དེ། གང་ཞེ་ན་ལྷུང་བཟེད་འཆང་བ་དང༌། བྱིན་གྱིས་མི་རློབ་པ་དང༌། སྲ་བརྐྱང་འབྱིན་པ་དང༌། སྲ་བརྐྱང་མི་འབྱིན་པ་དང༌། རིན་པོ་ཆེ་སློང་བ་དང༌། གོས་ཟ་བ་ལས་གྱུར་པ་དང༌། གོས་རྒྱུ་ཟ་བ་ལས་གྱུར་པ་དང༌། མལ་ཆ་རྒྱུ་ཟ་བ་ལས་གྱུར་པ་དང༌། དབྱར་ཁད་རྒྱུ་ཟ་བ་ལས་གྱུར་པ་དང༌། སྐྱེ་བོ་མང་པོ་ལ་བསྔོས་པ་བྱིན་གྱིས་རློབ་པ་དང༌། དགེ་འདུན་ལ་བསྔོས་པ་བྱིན་གྱིས་རློབ་པ་དང༌། བཅིངས་པ་འགྲོལ་དུ་འཇུག་པ་དང༌། གོས་ལྕི་བ་བསྟེན་པ་དང༌། གོས་ཡང་བ་བསྟེན་པ་ལས་གྱུར་པ་དག་གོ །དེ་ལ་གང་ལ་ལྷུང་བཟེད་འཆང་བའི་སྤང་བར་འགྱུར་ཞེ་ན་དེའི་ཕྱིར། ལྷུང་བཟེད་ལྷག་པ་ཞག་གཅིག་ལས་འདས་པར་འཆང་བ་ལའོ་ཞེས་བྱ་བ་སྨྲས་ཏེ། བུད་མེད་རྣམས་ནི་ཡོ་བྱད་ལ་ལྷག་པར་ཆགས་པ་ཤིན་ཏུ་དམ་པས་ན་དེའི་ཕྱིར་ཞག་གཅིག་ལས་འདས་པར་འཆང་བ་ལ་ཁ་ན་མ་ཐོ་བ་འདི་རྣམ་པར་གཞག་གོ །ལྷུང་བཟེད་འཆད་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།གང་ལ་བྱིན་གྱིས་མི་རློབ་པའི་སྤང་བར་འགྱུར་ཞེ་ན་དེའི་ཕྱིར། བྱིན་
གྱིས་བརླབ་ཏུ་རུང་བ་ཉི་མ་དང་པོ་ལ་འམ་ཟླ་བ་ཕྱེད་ཕྱེད་ཅིང་བྱིན་གྱིས་མ་བརླབས་པ་ལའོ་ཞེས་བྱ་བ་སྨྲས་ཏེ། ཆོས་གོས་བྱིན་གྱིས་བརླབ་ཏུ་རུང་བ་ལྔ་པོ་དག་ལས་གང་ཡང་རུང་བ་མི་བདོག་པ་ཉིད་ཀྱིས་གང་གི་ཚེ་ཆོས་གོས་དེ་རྙེད་པར་གྱུར་པའི་ཉི་མ་དང་པོ་དེ་ཉིད་ལ་ཆོས་གོས་དེ་བྱིན་གྱིས་བརླབ་པར་བྱའོ། །ཉི་མ་དང་པོ་དེ་ཉིད་ལ་བྱིན་གྱིས་མ་བརླབས་ན་ཞག་གཅིག་གི་སྐྱ་རེངས་དང་པོ་ཤར་ན་སྤང་བར་འགྱུར་རོ། །ཉི་མ་དང་པོ་དེ་ཉིད་ལ་བྱིན་གྱིས་བརླབས་པའི་ཆོས་གོས་དེ་ཡང་དེ་ཕྱིན་ཆད་ཟླ་བ་ཕྱེད་ཕྱེད་ཅིང་བྱིན་གྱིས་བརླབ་པར་བྱའོ། །ཟླ་བ་ཕྱེད་ཕྱེད་ཅིང་བྱིན་གྱིས་མ་བརླབས་ན་ཞག་བཅུ་དྲུག་གི་སྐྱ་རེངས་དང་པོ་ཤར་ན་སྤང་བར་འགྱུར་རོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། དགེ་སློང་མ་ཆོས་གོས་བྱིན་གྱིས་བརླབ་ཏུ་རུང་བ་ལྔ་པོ་མེད་པ་ཉིད་ཀྱིས་ཉི་མ་གང་ལ་ཆོས་གོས་གང་ཡང་རུང་བ་ཞིག་རྙེད་ན་ཉི་མ་དེ་ཉིད་ལ་བྱིན་གྱིས་བརླབ་པར་བྱའོ། །བྱན་གྱིས་མ་བརླབས་ན་ཞག་གཅིག་གི་སྐྱ་རེངས་དང་པོ་ཤར་ན་སྤང་བར་འགྱུར་རོ། །ཆོས་གོས་བྱིན་གྱིས་བརླབས་པ་དེ་ཉིད་ཀྱང་དེ་ཕྱིན་ཆད་ཉི་མ་དང་པ་དེ་ཉིད་མ་གཏོགས་པའི་ཞག་བཅོ་ལྔ་པ་ལ་ཡང་བྱིན་གྱིས་བརླབ་པར་བྱའོ། །དེར་བྱིན་གྱིས་མ་བརླབས་ན་ཞག་བཅུ་དྲུག་པའི་སྐྱ་རེངས་དང་པོ་ཤར་ན་སྤང་བར་འགྱུར་རོ། །ཞག་བཅོ་ལྔ་པ་དེ་ཉིད་ནི་ཟླ་བ་ཕྱེད་པ་ཕྱི་མ་ཤོས་ཀྱི་ཉི་མ་དང་པོ་ཉིད་ཡིན་པར་རྣམ་པར་གཞག་སྟེ། དེ་ཕྱིན་ཆད་ཀྱང་ཚུལ་དེ་བཞིན་དུ་ཟླ་བ་ཕྱེད་ཕྱེད་ཅིང་བྱིན་གྱིས་བརླབ་པར་བྱའོ། །མདུན་རོལ་དུ་བྱིན་གྱིས་བརླབས་པ་ལ་ནི་ཉེས་པ་མེད་པས་ཟླ་བ་ཕྱེད་ཕྱེད་ཀྱི་གསོ་སྦྱོང་གི་དུས་སུ་བྱིན་གྱིས་བརླབས་ན་ཕྱིན་ཆད་འཁྲུལ་པ་མེད་པར་འོང་ངོ༌། །དགེ་སློང་ལ་ནི་ཆོས་གོས་བྱིན་གྱིས་བརླབ་ཏུ་རུང་བ་མེད་ན་ནམ་རྙེད་པའི་ཉིན་མོ་བྱིན་གྱིས་མ་བརླབས་ན་ཡང་ཞག་གཅིག་གི་སྐྱ་རེངས་ཤར་བས་སྤང་བར་མི་འགྱུར་ལ་ཉེས་བྱས་སུ་ནི་འགྱུར་རོ། །ཟླ་བ་ཕྱེད་ཕྱེད་ཅིང་བྱིན་གྱིས་མ་བརླབས་པ་ལ་ནི་ལྟུང་བ་མེད་དོ། །སྤང་བ་འོག་མ་རྣམས་ལ་ཡང་གོས་ལྕི་བ་བསྟེན་པ་དང་གོས་ཡང་བ་བསྟེན་པ་ཞེས་བྱ་བ་ཐ་མ་གཉིས་ནི་དགེ་སློང་ལ་ཉེས་པ་མེད་དོ། །སྲ་བརྐྱང་འབྱིན་པ་ལ་སོགས་པ་བཅུ་པོ་དག་ནི་དགེ་སློང་ལ་ཉེས་བྱས་སུ་འགྱུར་རོ། །བྱིན་གྱིས་མི་རློབ་པའི་སྤང་བའོ་
ཞེས་བྱ་བ་དེ་བཤད་ཟིན་ཏོ།། །།གང་ལ་སྲ་བརྐྱང་འབྱིན་པའི་སྤང་བར་འགྱུར་ཞེ་ན་དེའི་ཕྱིར་ད་ཕྱིད་ཟླ་ར་བ་ཉའི་ཉིན་མོའི་མདུན་རོལ་དུ་སྲ་བརྐྱང་འབྱིན་པ་ལའོ་ཞེས་བྱ་བ་སྨྲས་ཏེ། དཔྱིད་ཟླ་ར་བ་ཉའི་ཉིན་མོ་གང་ཡིན་པ་དེའི་མདུན་རོ་ལ་ཕན་ཆད་ཀྱི་དུས་གང་ཡང་རུང་བར་སྲ་བརྒྱང་འབྱིན་པའི་དགེ་འདུན་མ་ཐམས་ཅད་ལ་སོ་སོར་སྤང་བའི་ལྟུང་བྱེད་རེ་རེར་འགྱུར་ཏེ། ཅི་ཙམ་ཁོན་ནས་སྲ་བརྐྱང་འབྱིན་པ་ཆགས་པའི་དགེ་འདུན་མའི་ཚད་རྣམ་པར་ཆད་པ་དེ་ངག་དབང་བ་སྲ་བརྐྱང་གི་བདག་ཉིད་ཀྱིས་རྙེད་པ་དེ་སྤང་བར་འགྱུར་གྱི་གང་ཟག་སྒོ་སྒོའི་རྙེད་པ་ནི་སྤང་བར་མི་འགྱུར་རོ། །སྲ་བརྐྱང་གི་རྙེད་པ་དེ་ཡང་མ་བགོས་པའི་གནས་སྐབས་ཁོ་ན་སྤང་བར་བྱ་བ་ཉིད་ཡིན་གྱི་བགོས་བ་ལ་ནི་སྤང་བར་བྱ་བ་ཉིད་མེད་དེ། འདི་ལྟར་རྙེད་པའི་དངོས་པོ་གང་ཟག་གིར་གྱུར་བའི་ཕྱིར་ཏེ་དེའི་ཚེ་ནི། ལྟུང་བྱེད་འབའ་ཞིག་བཤགས་པར་བྱ་བ་ཡིན་ནོ། །དགེ་སློང་མ་ཆོམ་རྐུན་པས་བཅོམ་པའི་དོན་ཉིད་དུ་ནི་ལྟུང་བ་ཆེད་དོ་ཞེས་བྱ་བ་ནི། གང་གི་ཚེ་དགེ་སློང་མ་ཆོམ་རྐུན་པ་དག་གིས་བཅོམ་པར་གྱུར་ན་དེའི་དོན་ཉིད་དུ་མདུན་རོལ་དུ་སྲ་བརྐྱང་འབྱིན་པ་ལ་ནི་ལྟུང་བ་མེད་དོ། །སྲ་བརྐྱང་འབྱིན་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།གང་ལ་སྲ་བརྐྱང་མི་བྱ་བའི་སྤང་བར་འགྱུར་ཞེན་དེའི་ཕྱིར་མི་འབྱིན་པ་ལའོ་ཞེས་བྱ་བ་སྨྲས་ཏེ། ཆོས་གོས་གཏན་པ་ཞེས་བྱ་བར་སྦྱར་རོ། །མི་འབྱིན་པ་ཞེས་བྱ་བ་དེ་ཇི་ལྟ་བུ་ཞེ་ན། དགེ་འདུན་མ་ཆོས་གོས་གཏན་པ་འབྱིན་པའི་དུས་སུ་ཆོས་གོས་གཏན་པ་དབྱུང་བའི་ཕྱིར་ཚོགས་པ་སྦྱིན་པར་མི་བྱེད་པ་སྟེ། དགེ་སློང་མ་གང་གིས་དགེ་འདུན་མ་ཆོས་གོས་གཏན་པ་འབྱིན་པ་ལ་ཚོགས་པ་སྦྱིན་པར་མི་བྱེད་པ་དེ་ལ་ཁ་ན་མ་ཐོབ་འདིར་འགྱུར་རོ། །འདི་ལྟར་འོག་ནས་ཆོས་གོས་གཏན་པ་འབྱིན་པ་ཉམས་སུ་མྱོང་བར་མི་བྱེད་པའི་ལྟུང་བྱེད་ལ་ཡང་ཚོགས་པ་སྦྱིན་པར་མི་བྱེད་པ་ཉིད་ལྟུང་བྱེད་ཀྱི་རྒྱུ་ཡིན་པར་གསུངས་ན་དེ་དང་འདི་ལ་བྱེ་བྲག་ཅི་ཡོད་ཅེ་ན། དུས་ཀྱི་བྱེ་བྲག་གིས་དེ་གཉིས་ཀྱི་ཡུལ་ལ་བྱེ་བྲག་ཡོད་དེ། འདི་ལྟར་ཆོས་གོས་གཏན་པ་དབྱུང་བའི་དུས་ངེས་པ་ནི་དཔྱིད་ཟླ་ར་བ་ཉ་ཡིན་པས་དུས་དེར་དགེ་འདུན་མ་ཆོས་གོས་གཏན་པ་འབྱིན་པ་ལ་ཚོགས་པ་སྦྱིན་པར་མི་བྱེད་པ་ལ་ནི་སྤང་བའི་ལྟུང་བྱེད་དུ་འགྱུར་རོ། །དེའི་མདུན་རོལ་དུ་དགེ་སློང་མ་ཆོམ་
རྐུན་པས་བཅོམ་པ་ལ་སོགས་པའི་དོན་ཉིད་དུ་པག་ཡངས་སུ་བྱ་བའི་ཕྱིར་ཆོས་གོས་གཏན་པ་འབྱིན་པ་གང་ཡིན་པ་དེ་ལ་ཚོགས་པ་སྦྱིན་པར་མི་བྱེད་པ་ལ་ནི་ལྟུང་བྱེད་འབའ་ཞིག་ཏུ་འགྱུར་རོ། །སྲ་བརྐྱང་མི་འབྱིན་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།གང་ལ་རིན་པོ་ཆེ་སློང་པའི་སྤང་བར་འགྱུར་ཞེན་དེའི་ཕྱིར་དབྱིག་དང་གསེར་སློང་བ་ལའོ་ཞེས་བྱ་བ་སྨྲས་ཏེ། འདི་ལྟར་སོ་སོར་ཐར་པའི་མདོ་ལས་མངོན་མཚན་ཅན་ཞེས་སྨོས་ཏེ། ཡང་དགེ་སློང་མ་གང་བདག་གི་ཕྱིར་མངོན་མཚན་ཅན་སློང་ན་སྤང་བའི་ལྟུང་བྱེད་དོ་ཞེས་གསུངས་མོད་ཀྱི། དེའི་རྣམ་པར་འབྱེད་པ་ལས་མངོན་མཚན་ཅན་ཞེས་བྱ་བ་ནི། དབྱིག་གམ་གསེར་རོ་ཞེས་གསུངས་ཏེ། དེ་དག་ཐམས་ཅད་ཀྱང་རིན་པོ་ཆེ་མཚོན་པའི་དོན་དུ་བྱེ་བྲག་མེད་པའི་ཕྱིར་རོ། །འདིར་སློང་བ་ཞེས་བྱ་བའི་སྒྲ་ནི་སློང་བ་སྔོན་དུ་བཏང་ནས་ལེན་པ་ལ་བྱ་སྟེ་མ་བླངས་པ་ལ་སྤང་བར་བྱ་བའི་དངོས་པོ་ཉིད་མེད་པའི་ཕྱིར་རོ། །གསེར་དངུལ་ལ་རེག་པ་དང་མངོན་མཚན་ཅན་གྱི་སྤྱོད་པ་དང་ཉོ་ཚོང་བྱེད་པའི་སྤང་བ་གསུམ་ལ་ནི་སློང་བ་སྔོན་དུ་བཏང་བ་མེད་པས་དེའི་ཕྱིར་ཐ་དད་པར་རྣམ་པར་གཞག་གོ །དབྱར་ཁང་གི་དགོས་པའི་དབང་གིས་སློང་བ་དང་ལེན་པ་ལ་ནི་ཉེས་པ་མེད་དོ། །རིན་པོ་ཆེ་སློང་བའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།གང་ལ་གོས་ཟ་བ་ལས་གྱུར་བའི་སྤང་བར་འགྱུར་ཞེ་ན་དེའི་ཕྱིར། གཞན་གྱི་ཆེད་དུ་རྙེད་པའི་གོས་ཟས་སུ་བྱས་ཏེ་བཟའ་བའི་ཕྱིར་འཇོག་པ་ལའོ་ཞེས་བྱ་བ་སྨྲས་ཏེ། ཟས་ལས་གཞན་བ་གླེགས་བམ་བྲི་བ་ལ་སོགས་པའི་ཆེད་དུ་རྙེད་པའི་གོས་ཟས་སུ་བསྒྱུར་ཅིང་བྱས་ཏེ་བཟའ་བར་བྱའོ་ཞེས་དེའི་ཕྱིར་དེས་པར་འཇོག་པར་བྱེད་པ་ལ་སྤང་བར་འགྱུར་རོ། །གོས་ཟ་བ་ལས་གྱུར་བའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།གང་ལས་གོས་རྒྱུ་ཟ་བ་ལས་གྱུར་པ་དང༌། མལ་ཆ་རྒྱུ་ཟ་བ་ལས་གྱུར་པ་དང༌། དབྱར་ཁང་རྒྱུ་ཟ་བ་ལས་གྱུར་པའི་སྤང་བར་འགྱུར་ཞེ་ན་དེའི་ཕྱིར་གོ་རིམས་བཞིན་དུ་གོས་དང་མལ་ཆ་དང་དབྱར་ཁང་གི་ཆེད་དུ་ཡང་ངོ་ཞེས་བྱ་བ་སྨྲས་ཏེ། དེ་གསུམ་གྱི་ཆེད་དུ་ཡོ་བྱད་གང་ཡང་རུང་བ་རྙེད་པ་ཟས་སུ་བྱས་ཏེ། བཟའ་བའི་ཕྱིར་འཇོག་པ་ལ་ཁ་ན་མ་ཐོ་བ་འདི་གསུམ་དུ་འགྱུར་རོ། །དེ་གསུམ་གྱི་ཆེད་དུ་ཅི་ཞིག་རྙེད་པ་ཞེ་ན་དེའི་ཕྱིར་
གང་ཡང་རུང་བའོ་ཞེས་བྱ་བ་སྨྲས་ཏེ། ཡོ་བྱད་གང་ཡང་རུང་བ་རྙེད་པ་ཟས་སུ་བྱས་ཏེ་བཟའ་བའི་ཕྱིར་འཇོག་པ་ལའོ་ཞེས་བྱ་བའི་རྗེས་བསྙག་པའི་ཕྱིར་མདོ་སྔ་མ་ལས་ཡང་ངོ་ཞེས་བྱ་བའི་སྒྲ་སྨོས་སོ། །གོས་ཀྱི་ཆེད་དུ་ཡོ་བྱད་གང་ཡང་རུང་བ་རྙེད་པ་ཐས་སུ་བྱས་ཏེ་བཟའ་བའི་ཕྱིར་འཇོག་པ་ལ་ནི་གོས་རྒྱུ་ཟ་བ་ལས་གྱུར་བའི་སྤང་བར་འགྱུར་རོ། །མལ་ཆ་དང་སྟན་གྱི་ཆེད་དུ་ཡོ་བྱད་གང་ཡང་རུང་བ་རྙེད་པ་ཟས་སུ་བྱས་ཏེ་བཟའ་བའི་ཕྱིར་འཇོག་པ་ལ་ནི་མལ་ཆ་རྒྱུ་ཟ་བ་ལས་གྱུར་བའི་སྤང་བར་འགྱུར་བའོ། །དབྱར་ཁང་གི་ཆེད་དུ་ཡོ་བྱད་གང་ཡང་རུང་བ་རྙེད་པ་ཟས་སུ་བྱས་ཏེ་བཟའ་བའི་ཕྱིར་འཇོག་པ་ནི་དབྱར་ཁང་རྒྱུ་ཟ་བ་ལས་གྱུར་བའི་སྤང་བར་འགྱུར་རོ། །འདིར་ཟ་བ་ལས་གྱུར་བའི་ཁ་ན་མ་ཐོ་བ་ཐམས་ཅད་ལ་ཟས་ཟོས་ཟིན་པ་ཉིད་ལ་ནི་ལྟུང་བྱེད་འབའ་ཞིག་བཤགས་པར་བྱ་བ་ཡིན་ནོ། །མ་ཟོས་པ་ཉིད་ལ་ནི་དངོས་པོ་དེ་སྤངས་ནས་ལྟུང་བྱེད་དེ་བཤགས་པར་བྱ་བ་ཡིན་ནོ། །འདི་ལྟར་ཟ་བར་འདྲ་བས་ཁ་ན་མ་ཐོ་བ་ཡང་གཅིག་ཁོ་ནར་འགྱུར་བ་ཡིན་མོད་ཀྱི་འོན་ཀྱང་དངོས་པོ་ཐ་དད་པའི་སྒྲའི་རྗེས་སུ་འབྲང་བར་འཇུག་པའི་དགེ་སློང་མ་རྣམས་ལ་བསལ་བར་བྱ་བའི་ཕྱིར་བཞི་པོ་དེ་དག་བཅའ་བ་མཛད་ཅིང་སོ་སོར་རྣམ་པར་གཞག་གོ །གོས་རྒྱུ་ལ་སོགས་པ་ཟ་བ་ལས་གྱུར་བའི་སྤང་བའོ་ཞེས་བྱ་བ་གོས་རྒྱུ་ཟ་བ་ལས་གྱུར་བ་དང༌། མལ་ཆ་རྒྱུ་ཟ་བ་ལས་གྱུར་པ་དང༌། དབྱར་ཁང་རྒྱུ་ཟ་བ་ལས་གྱུར་པའི་སྤང་བ་གསུམ་དེ་བཤད་ཟིན་ཏོ།། །།གང་ལ་སྐྱེ་བོ་མང་པོ་ལ་བསྔོས་པ་བྱིན་གྱིས་རློབ་པའི་སྤང་བར་འགྱུར་ཞེ་ན་དེའི་ཕྱིར། དགེ་སློང་མའི་སྐྱེ་བོ་མང་པོའི་ཕྱིར་སྦྱོར་དུ་བཅུག་ནས་རང་ལ་ཡོངས་སུ་བསྒྱུར་བ་ལའོ་ཞེས་བྱ་བ་སྨྲས་ཏེ། དགེ་སློང་མའི་ངོ་བོ་ཉིད་ཀྱི་སྐྱེ་བོ་མང་པོའི་ཕྱིར་དངོས་པོ་སྦྱོར་དུ་བཅུག་པ་གང་ཡིན་པ་དེ་བདག་ཉིད་ལ་ཡོངས་སུ་སྒྱུར་བར་བྱེད་པ་ལ་ཁ་ན་མ་ཐོ་བ་འདིར་འགྱུར་རོ། །སྐྱེ་བོ་རྣམས་ཀྱི་ཚོགས་ནི་སྐྱེ་བོ་མང་པོ་སྟེ་སྐྱེ་བོ་བཞི་ཡན་ཆད་དོ། །དེ་ལྟར་ཡང་རྣམ་པར་འབྱེད་པ་ལས་སྐྱེ་བོ་མང་པོའི་ཕྱིར་ཞེས་བྱ་བ་ནི་དགེ་སློང་མའི་དགེ་འདུན་གྱི་ཕྱིར་ཡིན་ནོ་ཞེས་གསུངས་པ་ཡིན་ཏེ། སྐྱེ་བོ་མང་པོ་ཞེས་སྨོས་པ་ནི་དགེ་སློང་མའི་དགེ་འདུན་ལས་བཞིའི་ཚོགས་ཡན་ཆད་ཀྱི་ཕྱིར་སྦྱོར་དུ་བཅུག་པའི་དངོས་པོ་བདག་ཉིད་ལ་བསྒྱུར་བ་ལ་ཡང་ཁ་ན་མ་ཐོ་བ་འདྲ་བ་
ཡིན་ནོ། །གཞན་དུ་ན་དགེ་སློང་མའི་དགེ་འདུན་ཉི་ཚེ་སྨོས་པར་འགྱུར་གྱི་སྐྱེ་བོ་མང་པོ་མི་སྨོས་པར་འགྱུར་རོ། །དེ་ལྟར་ཡང་སོ་སོར་ཐར་བའི་མདོ་ལས་ཡང་དགེ་སློང་མ་གང་དགེ་སློང་མ་གློ་བུར་དུ་ལྷགས་པ་རྣམས་ཀྱི་ཕྱིར་རྙེད་པ་བླངས་ལ་གཅིག་པུ་ཟ་བར་བྱེད་ན་སྤངས་པའི་ལྟུང་བྱེད་དོ་ཞེས་གསུངས་པ་ཡིན་ནོ། །དགེ་སློང་གི་ཕྱིར་དང་རབ་ཏུ་བྱུང་བ་འདི་པ་བསྙེན་པར་མ་རྫོགས་པའི་ཕྱིར་དང༌། མུ་སྟེགས་ཅན་རབ་ཏུ་བྱུང་བའི་ཕྱིར་དང༌། ཁྱིམ་པའི་ཕྱིར་སྦྱོར་དུ་བཅུག་པ་རང་ལ་ཡོངས་སུ་བསྒྱུར་བ་ལ་ནི་ཉེས་བྱས་སོ། །སྐྱེ་བོ་མང་པོ་ལ་བསྔོས་པ་བྱིན་གྱིས་སློབ་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།གང་ལ་དགེ་འདུན་ལ་བསྔོས་པ་བྱིན་གྱིས་རློབ་པའི་སྤང་བར་འགྱུར་ཞེ་ན་དེའི་ཕྱིར། དགེ་འདུན་གྱི་ཕྱིར་ཡང་ངོ་ཞེས་བྱ་བ་སྨྲས་ཏེ། སྦྱོར་དུ་བཅུག་ནས་རང་ལ་ཡོངས་སུ་བསྒྱུར་བ་ལའོ་ཞེས་བྱ་བའི་རྗེས་བསྙགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །དགེ་སློང་མའི་དགེ་འདུན་ཕྱིར་སྦྱོར་དུ་བཅུག་པའི་རྙེད་པ་བདག་ཉིད་ལ་བསྒྱུར་ཞིང་འཇོག་པ་ལ་ཁ་ན་མ་ཐོ་བ་འདིར་འགྱུར་རོ། །དགེ་སློང་གི་ཕྱིར་བསྔོས་པ་ལ་སོགས་པ་ལ་ནི་འདིར་ཡང་སྔ་མ་བཞིན་དུ་ཉེས་བྱས་སུ་རིག་པར་བྱའོ། །འདིར་དགེ་འདུན་ཞེས་སྨོས་པ་ནི་གྲངས་ཆད་པ་མེད་པར་དགེ་འདུན་མ་སྤྱིའི་ཕྱིར་སྦྱོར་དུ་བཅུག་པ་ཡིན་ནོ། །སྔར་སྐྱེ་བོ་མང་པོ་ཞེས་སྨོས་པ་ནི་བཞི་ཡན་ཆད་གྲངས་ཆད་པ་ཁ་ཅིག་གི་ཕྱིར་སྦྱོར་དུ་བཅུག་པ་ཡིན་ནོ། །དེའི་ཕྱིར་གྲངས་ཆད་པ་མེད་པའི་ཚོགས་ཀྱི་ཕྱིར་སྦྱོར་དུ་བཅུག་པ་བདག་གཅིག་པུ་སྤྱོད་པ་ལ་ནི་འདིར་གཏོགས་པའི་ཁ་ན་མ་ཐོ་བར་འགྱུར་རོ། །གྲངས་ཆད་པའི་ཚོགས་ཀྱི་ཕྱིར་སྦྱོར་དུ་བཅུག་པ་བདག་གཅིག་པུ་སྤྱོད་པ་ལ་ནི་སྔ་མར་གཏོགས་པའི་ཁ་ན་མ་ཐོ་བར་འགྱུར་རོ། །དགེ་འདུན་ལ་བསྔོས་པ་བྱིན་གྱིས་རློབ་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།གང་ལ་བཅིང་བ་འགྲོལ་དུ་འཇུག་པའི་སྤང་པར་འགྱུར་ཞེ་ན་དེའི་ཕྱིར་ཚིག་ཉན་དུ་གཞུག་པའི་ཕྱིར་རྫས་བཅིངས་པ་འགྲོ་ལ་དུ་འཇུག་པ་ལའོ་ཞེས་བྱ་བ་སྨྲས་ཏེ། འཁྲིག་པའི་རོས་ཉེ་བར་འཚོ་བར་བྱ་བའི་ཆེད་དུ་ཚིག་ཉན་དུ་གཞུག་པའི་ཕྱིར་རྫས་ཀྱི་ཐུམ་བུ་ལ་སོགས་པ་བཅིངས་པ་འགྲོལ་དུ་འཇུག་པ་ལ་ཁ་ན་མ་ཐོ་བ་འདིར་འགྱུར་གྱི། རྫས་ལེགས་པར་གནས་པར་བྱ་བའི་ཕྱིར་བཅིངས་པ་འགྲོལ་དུ་
འཇུག་པ་ལ་ནི་ཉེས་པ་མེད་དོ། །འདིར་གཞུང་ནི་གཙུག་དགའ་མོས་སྤོས་འཚོང་གི་ཁྱེའུ་ལ་ཆགས་ནས་དེས་དེ་ཚིག་ཉན་དུ་གཞུག་པའི་ཕྱིར་དེ་ལས་རྫས་ཉོ་ཞིང་ཐུམ་བུ་བཅིངས་ཤིང་བཅིངས་ཤིང་ཡང་དང་ཡང་འགྲོལ་དུ་བཅུག་གོ་ཞེས་གསུངས་པ་ཡིན་ནོ། །ཚིག་ཉན་དུ་གཞུག་པའི་ཕྱིར་ཞེས་བྱ་བའི་གཞུང་ནི་ལྟུང་བ་བསྟན་པ་ལས་དགེ་སློང་མས་དེའི་ཚིག་ཉན་དུ་གཞུག་པའི་ཕྱིར། ཅི་ཙམ་དུ་ཐུམ་བུ་འཆིང་དུ་བཅུག་ཅིང་ཡང་དང་ཡང་འགྲོལ་དུ་འཇུག་ན་ཐམས་ཅད་སྤང་བའི་ལྟུང་བྱེད་དུ་འགྱུར་རོ་ཞེས་གསུངས་པ་ཡིན་ནོ། མཚན་ཐ་དད་པ་མ་ནིང་མ་ཡིན་པའི་སྐྱེས་པ་བསྟེན་པའི་མཐུ་ཡོད་པ་དེ་ལྟ་བུའི་ཟླ་པོ་ལ་བཅིངས་པ་འགྲོལ་དུ་འཇུག་ན་ཁ་ན་མ་ཐོ་བ་ཡོངས་སུ་རྫོགས་པར་འགྱུར་རོ། །མཚན་མཐུན་པ་ལ་སོགས་པ་ལ་ནི་ཉེས་བྱས་སོ། །འདིར་ཐུམ་བུ་ཞེས་སྨོས་པས་ནི་ནང་གི་སྙིམ་པ་ལ་སོགས་པ་དང༌། ཕྱི་རོལ་གྱི་སྤྲོག་མ་ལ་སོགས་པ་དག་གི་དཔེ་ཡིན་ནོ། །རང་དབང་པའི་ཐུམ་བུ་ལ་ཇི་ལྟ་བ་བཞིན་དུ་གཞན་དབང་པའི་ཐུམ་བུ་འཆིང་བ་དང་འགྲོལ་དུ་འཇུག་པ་ལ་ཡང་ཁ་ན་མ་ཐོ་བ་ཡོངས་སུ་རྫོགས་པར་འགྱུར་ཏེ། ཚིག་ཉན་དུ་གཞུག་པར་འདྲ་བའི་ཕྱིར་རོ། །དེ་ལ་ནི་དངོས་པོ་སྤང་བར་བྱ་བ་ནི་མེད་པས་ལྟུང་བྱེད་འབའ་ཞིག་བཤགས་པར་བྱའོ། །བཅིངས་པ་འགྲོལ་དུ་འཇུག་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།གང་ལ་གོས་ལྕི་བ་བསྟེན་པའི་སྤང་བར་འགྱུར་ཞེ་ན་དེའི་ཕྱིར། སྲང་བརྒྱ་པ་ལ་སོགས་པ་དང་ཀཱཪྵཱ་པ་ཎ་ཉི་ཤུ་ལ་སོགས་པ་རི་བའི་གོས་བདག་གིར་བྱེད་པ་ལའོ་ཞེས་བྱ་བ་སྨྲས་ཏེ། གོས་ལྕི་བ་ཞེས་བྱ་བ་ནི། །ལྗིད་ཀྱིས་ལྕི་བ་དང་རིན་ཐང་གིས་ལྕི་བ་སྟེ། དེ་གཉིས་ལ་ཁ་ན་མ་ཐོ་བ་འདིར་འགྱུར་རོ། དེ་ལ་ལྗིད་ཀྱིས་ལྕི་བ་ནི་སྲང་བརྒྱ་བ་ལ་སོགས་པ་སྟེ། གོས་གང་ལ་ལྗིད་སྲང་བརྒྱ་བ་ཡོད་པ་དང་སོགས་པའི་སྒྲས་སྲང་བརྒྱ་རྩ་གཅིག་ཡན་ཆད་ནས་གྲངས་མེད་པའི་མཐར་ཐུག་པ་དག་བསྡུའོ། །རིན་ཐང་གིས་ལྕི་བ་ནི་ཀཱཪྵཱ་པ་ཎ་ཉི་ཤུ་ལ་སོགས་པ་རི་བ་སྟེ། གོས་གང་རིན་ཐང་ཀཱཪྵཱ་པ་ཎ་ཉི་ཤུ་རི་བ་དང་སོགས་པའི་སྒྲས་ཀཱཪྵཱ་པ་ཎ་ཉི་ཤུ་རྩ་གཅིག་ཡན་ཆད་ནས་གྲངས་མེད་པའི་མཐར་ཐུག་པ་དག་བསྡུའོ། །དེ་ལྟ་བུའི་གོས་བདག་གིར་བྱེད་པ་ལ་སྤང་བའི་ལྟུང་བྱེད་དུ་འགྱུར་རོ། །བསླབ་པའི་གཞི་འདི་ནི་ཆོས་བྱིན་
གྱིས་རལ་གྲི་མཐུ་ཅན་གྱི་ཁྲོམ་ནས་ལ་བ་རིན་པོ་ཆེ་རིན་ཐང་ཆེན་པོ་རྙེད་ནས་དེས་ཀྱང་སྦོམ་དགའ་མོ་ལ་བྱིན་ནས་དེས་དེ་གྱོན་ཏེ་བསོད་སྙོམས་ལ་ཞུགས་པ་དེ་ལས་བཅས་ཏེ་ཡང་དགེ་སློང་མ་གང་གོས་ལྕི་བ་དང༌། རིན་ཐང་ཆེན་པོ་འཆད་པར་བྱེད་ན་སྤང་བའི་ལྟུང་བྱེད་དོ་ཞེས་གསུངས་པ་ཡིན་ནོ། །འཆང་བར་བྱེད་ན་ཞེས་བྱ་བའི་རྣམ་པར་འབྱེད་པ་ནི་བདག་གིར་བྱེད་ན་ཞེས་གསུངས་པ་ཡིན་ནོ། །དེའི་ཕྱིར་བདག་གིར་བྱེད་པ་ལས་ཀྱང་དངོས་གཞིར་འགྱུར་ན་གྱོན་པ་ལྟ་ལ་སྨོས་ཀྱང་ཅི་དགོས་ཏེ་གྱོན་པའི་རྩ་བ་བཅས་པའི་ཕྱིར་བདག་གིར་བྱེད་པ་ཡང་དགག་པ་མཛད་དོ། །བརྗེ་བའི་ཕྱིར་བདག་གིར་བྱེད་པ་ལ་ནི་ལྟུང་བ་མེད་དོ། །བཙོང་བ་ལ་སོགས་པའི་ཕྱིར་བདག་གིར་བྱེད་པ་ནི་ཐམས་ཅད་དུ་སྤང་བར་འགྱུར་རོ། །རུང་བར་བྱ་བ་གང་གིས་རིན་པོ་ཆེ་ལ་སོགས་པ་བླང་བར་གསུངས་བའི་རུང་བར་བྱ་བ་དོས་འདི་ཡང་བྱིན་གྱིས་བརླབས་ཏེ་ལེན་པ་ལ་ནི་ཉེས་པ་མེད་དོ། །གཞན་གྱིས་གོན་པ་ལ་ཡང་སྤང་བར་བྱ་བའི་དངོས་པོ་མེད་དུ་ཟིན་ཀྱང་ཁ་ན་མ་ཐོ་བ་ནི་ཡོངས་སུ་རྫོགས་པར་འགྱུར་རོ། །ལྗིད་དང་རིན་ཐང་གཉི་གའི་སྐབས་སུ་སོགས་པ་ཞེས་བྱ་བའི་སྒྲ་སྨོས་པ་ནི་བསླབ་པའི་གཞི་འོག་མ་ལ་ཡང་དེ་བཞིན་དུ་ཤེས་བར་བྱ་བའི་ཕྱིར་ཏེ། དེ་ལ་ནི་ལྗིད་ཀྱི་སོགས་པའི་སྒྲས་ནི་ཉུང་དུ་དག་བསྡུའོ། །རིན་ཐང་གི་སོགས་པའི་སྒྲས་ནི་སྔ་མ་བཞིན་དུ་མང་པོ་དག་བསྡུའོ། །གོས་ལྕི་བ་བསྟེན་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།གང་ལ་གོས་ཡང་བ་བསྟེན་པའི་སྤང་བར་འགྱུར་ཞེ་ན། དེའི་ཕྱིར་སྲད་ལྔ་པའི་མཐར་ཐུག་པའོ་ཞེས་བྱ་བ་སྨྲས་ཏེ། འདིར་གོས་ཡང་བ་ཞེས་བྱ་བ་ནི། ལྗིད་ཀྱིས་ཡང་བ་ཉི་ཆེ་ལ་བྱ་སྟེ། ལྗིད་སྲང་ལྔ་པ་ལ་སོགས་པའོ། །སོགས་པ་ཞེས་བྱ་བའི་སྒྲ་མདོ་སྔ་མ་ལས་སྨོས་པ་འདིར་ཡང་སྦྱར་བར་བྱ་སྟེ། སོགས་པ་ཞེས་བྱ་བའི་སྒྲས་འདིར་ནི་གྲངས་ཉུང་དུ་བཞི་དང་གསུམ་དང་གཉིས་དག་བསྡུ་བར་རིག་པར་བྱའོ། །མཐར་ཐུག་པའོ་ཞེས་སྨོས་པས་ནི་ལྗིད་སྲང་གཅིག་པ་འམ་གཞལ་དུ་མེད་པའི་གོས་ཀྱི་མཐར་ཐུག་པ་དག་བསྡུ་བར་ཤེས་པར་བྱའོ། །འདིར་གཞུང་ནི་ཡང་བ་ཞེས་བྱ་བ་ནི་སྲང་ལྔ་པ་འམ་ལྔ་ལས་ཆུང་བའོ་ཞེས་གསུངས་པ་ཡིན་ཏེ། འདིས་ནི་ཀ་ཤི་ཀའི་རས་ཕྲན་
དང༌། དར་ལ་དང་དར་གོས་ལ་སོགས་པ་ལྗིད་སྲང་ལྔ་པ་མན་ཆད་ནས་གཞལ་དུ་མེད་པའི་གོས་ཀྱི་བར་དག་བཀག་པ་ཡིན་ནོ། །འདིར་རིན་ཐང་གིས་ཡང་བར་ནི་མི་སྦྱར་ཏེ། ཀཱཪྵཱ་པ་ཎ་ཉི་ཤུ་མི་རི་བ་ཡན་ཆད་ལ་ཉེས་པ་མེད་དོ། །འདི་ལྟ་སྟེ་བུད་མེད་ནི་གོས་བཟང་པོ་གྱོན་ན་གསོ་རོ་སྐྱེ་བས་དེའི་ཕྱིར་གོས་འདི་གཉིས་བཀག་པ་ཡིན་ནོ། །གོས་ཡང་བ་བསྟེན་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།སྦང་བའི་ལྟུང་བྱེད་རྣམས་རྫོགས་སོ་ཞེས་བྱ་བ་དགེ་སློང་མའི་སྤང་བའི་ལྟུང་བྱེད་སུམ་ཅུ་རྩ་གསུམ་པོ་དག་བཤད་ཟིན་ཏོ།། །།ད་ནི་དགེ་སློང་མ་རྣམས་ཀྱི་ལྟུང་བྱེད་འབའ་ཞིག་ཏུ་འགྱུར་བ་བརྒྱ་བརྒྱད་ཅུ་པོ་དག་བཤད་པར་བྱ་སྟེ། དེ་ལ་བདུན་ཅུ་རྩ་གཉིས་སོ་ཞེས་བྱ་བ་ནི། སྔར་དགེ་སློང་གི་རྣམ་པར་འབྱེད་པའི་སྐབས་སུ་དགེ་སློང་གི་ལྟུང་བྱེད་འབའ་ཞིག་ཏུ་འགྱུར་བ་དགུ་བཅུ་བསྟན་པ་དག་ལས་བདུན་ཅུ་རྩ་གཉིས་ནི་དགེ་སློང་མ་རྣམས་དང་ཐུན་མོང་གི་མཚན་ཉིད་ཡིན་ཏེ། དེ་དག་གི་མཚན་ཉིད་ནི་སྔར་བསྟན་ཟིན་ཏོ་ཞེས་བྱ་བར་སྦྱར་རོ། །དགེ་སློང་གི་ལྟུང་བྱེད་འབའ་ཞིག་ཏུ་འགྱུར་བ་དགུ་བཅུ་པོ་དེ་དག་ལས་བཅོ་བརྒྱད་ནི་དགེ་སློང་མ་རྣམས་དང་ཐུན་མོང་མ་ཡིན་པས་དེ་དག་འདིར་དམིགས་ཀྱིས་བསལ་བ་བསྟན་པའི་ཕྱིར། མ་བསྐོས་པ་ལ་སོགས་པ་བཅུ་དང༌། བསྐྲད་པ་དང་ཡང་ཡང་ཟ་བ་དང༌། ཟས་བསོད་པ་སློང་བ་དང༌། འདུག་པ་དང་འགྲེང་བ་དང༌། ཕྱིར་མ་བླངས་པ་སྤྱོད་པ་དང༌། མ་ལོན་པ་དང་དབྱར་གྱི་རས་ཆེན་ལས་གྱུར་པ་ནི་མ་གཏོགས་སོ་ཞེས་བྱ་བ་སྨྲས་ཏེ། དགེ་སློང་གི་ལྟུང་བྱེད་དགུ་བཅུ་པོ་དེ་དག་ལས་བཅོ་བརྒྱད་པོ་འདི་དག་མ་གཏོགས་པ་ལྷག་མ་བདུན་ཅུ་རྩ་གཉིས་པོ་དག་ནི་དགེ་སློང་མ་རྣམས་ཀྱི་ཡང་ཡིན་པར་རིག་པར་བྱའོ། །བཅོ་བརྒྱད་པོ་དེ་དག་ཅིའི་ཕྱིར་མ་གཏོགས་ཤེ་ན། འདིར་ཁ་ཅིག་ནི་མི་སྲིད་པའི་ཕྱིར་དགེ་སློང་མ་རྣམས་ཀྱི་ལྟུང་བར་རྣམ་པར་མི་གཞག་པ་ཡང་ཡོད་དེ། འདི་ལྟ་སྟེ་མ་བསྐོས་པར་སྟོན་པ་དང༌། ཉི་མ་མ་ནུབ་ཀྱི་བར་དུ་སྟོན་པ་དང༌། ཟས་ཆུང་ཟད་ཙམ་གྱི་ཕྱིར་སྟོན་པ་ཞེས་བྱ་བའི་ལྟུང་བྱེད་གསུམ་པོ་དག་སྟེ། འདི་ལྟར་དགེ་སློང་མ་རྣམས་ཀྱིས་དགེ་སློང་དག་ལ་བསྟན་པར་བྱ་བ་མ་ཡིན་པའི་ཕྱིར་རོ། །གོས་སྦྱིན་བ་དང་གོས་བྱེད་པའི་ལྟུང་བྱེད་གཉིས་ན་དགེ་སློང་མ་རྣམས་
།ལ་རྣམ་པར་མི་གཞག་སྟེ། དགེ་སློང་རྣམས་ནི་འཁོར་གཙོ་བོར་གྱུར་པ་ཡིན་པའི་ཕྱིར་དང་མཆོད་པའི་གནས་ཉིད་ཡིན་པའི་ཕྱིར་དགེ་སློང་ལ་དགེ་སློང་མས་གོས་སྦྱིན་པ་དང༌། དགེ་སློང་གི་གོས་དགེ་སློང་མས་བྱེད་པ་ལ་ཚུལ་དང་མི་མཐུན་པ་མཚར་པོ་ཆེ་མེད་པའི་ཕྱིར་རོ། །འདྲོན་པ་མང་པོ་དང་ལྷན་ཅིག་འགྲོ་བ་དང་དགེ་སློང་མ་དང་ལྷན་ཅིག་གྲུར་འཇུག་པའི་ལྟུང་བྱེད་གཉིས་ཀྱང་དགེ་སློང་མ་རྣམས་ལ་རྣམ་པར་མི་གཞག་སྟེ། འདི་ལྟར་དགེ་སློང་མ་རྣམས་ནི་མཐུ་ཆུང་བའི་ཕྱིར་གཞན་ལ་བརྟེན་ཏེ་ལམ་དུ་འགྲོ་བ་ལ་བཞད་གད་དུ་འགྱུར་བ་མཚར་པོ་ཆེ་མེད་པའི་ཕྱིར་རོ། དབེན་པ་ན་འདུག་པ་དང་དབེན་པ་ན་འགྲེང་བའི་ལྟུང་བྱེད་གཉིས་ཀྱང་དགེ་སློང་མ་རྣམས་ལ་རྣམ་པར་མི་གཞག་སྟེ། འདི་ལྟར་དགེ་སློང་མ་བུད་མེད་དང་ལྷན་ཅིག་འདུག་པ་དང་དགེ་སློང་མ་དང་ལྷན་ཅིག་འགྲེང་བ་ལ་ཉེས་པ་ཅི་ཡང་མེད་པའི་ཕྱིར་རོ། །སྦྱོར་དུ་བཅུག་པའི་ཟས་ཟ་བའི་ལྟུང་བྱེད་ཀྱང་དགེ་སློང་མ་རྣམས་ལ་རྣམ་པར་མི་གཞག་སྟེ། འདི་ལྟར་སྐྱེས་པས་སྦྱོར་དུ་བཅུག་པ་བུད་མེད་ཟ་བ་ལ་སྨད་པ་མེད་པའི་ཕྱིར་རོ། །ཡང་ཡང་ཟ་བའི་ལྟུང་བྱེད་ཀྱང་དགེ་སློང་མ་རྣམས་ལ་རྣམ་པར་མི་གཞག་སྟེ། འདི་ལྟར་དགེ་སློང་མ་རྣམས་ནི་ཤས་ཆེར་མཆོད་པར་བྱ་བ་ཉིད་མ་ཡིན་པའི་ཕྱིར་དེ་དག་ལ་དེ་དབྱུང་དཀའ་བའི་ཕྱིར་རོ། །དབྱར་གྱི་རས་ཆེན་ལས་གྱུར་པའི་ལྷུང་བྱེད་ཀྱང་དགེ་སློང་མ་རྣམས་ལ་རྣམ་པར་མི་གཞག་སྟེ། འདི་ལྟར་དགེ་སློང་མ་རྣམས་ལ་དེ་འཆང་བ་ཉིད་ཀྱིས་ཀྱང་མ་བཅས་ལ། ཚད་ངེས་པ་ཡང་རྣམ་པར་མ་བཞག་པས་འདི་ལྟར་དེ་ལ་དངོས་གཞིའི་ལྟུང་བ་དག་ཏུ་མི་འགྱུར་བའི་ཕྱིར་རོ། །སྐྲོད་པ་དང་ཟས་བསོད་པ་སློང་བ་དང༌། ཉལ་པོ་བྱེད་པར་ཤོམ་པའི་ཁྱིམ་ན་འདུག་པ་དང༌། ཉལ་པོ་བྱེད་པར་ཤོམ་པའི་ཁྱིམ་ན་འགྲེད་པ་དང༌། ཕྱིར་མ་བླངས་པར་སྤྱོད་པ་དང༌། ལོ་ཉི་ཤུ་མ་ལོན་པ་བསྙེན་པར་རྫོགས་པར་བྱེད་པའི་ལྟུང་བྱེད་དག་ནི་ཆུང་ཟད་ཆ་མཐུན་པ་ལ་བརྟེན་པ་ཡིན་པའི་ཕྱིར་འདུལ་བ་མདོར་བསྡུས་པ་ལས་ཉེས་བྱས་སུ་གསུངས་པའི་ཕྱིར་དེ་དག་ཀྱང་དགེ་སློང་མ་རྣམས་ལ་ལྟུང་བྱེད་ཉིད་དུ་རྣམ་པར་མི་གཞག་གོ །དགེ་སློང་མའི་ལྟུང་བྱེད་དག་ལ་ནི་ཚུལ་ཁྲིམས་ལ་
ལ་དགེ་སློང་དང་མི་འདྲ་བ་ཉིད་ཀྱང་ཡོད་དེ་འདི་ལྟ་སྟེ་སྐྲོད་པའི་ལྟུང་བྱེད་དོ། །ལ་ལ་དགེ་སློང་ལ་མེད་པ་ཡང་ཡོད་དེ། འདི་ལྟ་སྟེ་བསླབ་པ་ལ་མ་བསླབས་པ་བསྙེན་པར་རྫོགས་པར་བྱེད་པ་སྟེ་སྐྱེས་པ་ལ་དགེ་སློང་མའི་བསླབ་པ་རྣམ་པར་མ་བཞག་པའི་ཕྱིར་རོ། །ལ་ལ་ཉེས་པའི་སྐབས་མེད་པས་ལྟུང་བར་མི་འགྱུར་བ་ཡང་ཡོད་དེ། འདི་ལྟ་སྟེ་འཁོར་མང་པོ་སྩོགས་པའི་ལྟུང་བྱེད་དོ། །ལ་ལ་ཇི་ལྟར་ཐོབ་པ་ལས་ཉེས་བྱས་སུ་འགྱུར་བ་ཡང་ཡོད་དེ་འདི་ལྟ་སྟེ་གཉིས་སྟེན་ཅིང་མལ་སྟན་གཅིག་ན་ཉལ་བའོ། །ལ་ལ་ལྷག་པ་ཡང་ཡོད་དེ་འདི་ལྟ་སྟེ་རྒྱ་སྐྱེགས་ཀྱི་ཆང་བུ་འཆང་བའོ། །ལ་ལ་ཆུང་པ་ཡང་ཡོད་དེ་སྒོག་སྐྱ་ཟ་བ་དང༌། མདོམས་ཀྱི་སྦུ་བྲེགས་པ་དང༌། ཐལ་མོས་བརྡེག་པ་དང༌། བསྟེན་པར་བྱ་བ་འཆོས་པ་ལ་སོགས་པ་སྟེ། འདིར་ཕྱོགས་ཙམ་ཞིག་བརྗོད་པ་ཡིན་གྱི། རྒྱ་ཆེར་ནི་བྱེ་བྲག་ཏུ་བཤད་པ་ལས་ཤེས་བར་བྱའོ།། །།བམ་པོ་བཞི་བཅུ་པ། །འདིར་དགེ་སློང་མའི་སྐབས་ལས་ཕྲན་ཚེགས་ལས་གསུངས་པ་ཅུང་ཞིག་བསྡུ་བར་བྱ་སྟེ། དགེ་སློང་གིས་རབ་ཏུ་བྱུང་བ་མོའི་ཕྱིར་ཟང་ཟིང་ཉེ་བར་བསྒྲུབ་ཏུ་རུང་སྟེ་ཆུང་མར་གྱུར་པ་ཉིད་ལ་ཡང་ངོ་ཞེས་བྱ་བ་ནི། དགེ་སློང་གི་རབ་ཏུ་བྱུང་བ་དགེ་སློང་མ་ལ་ཟང་ཟིང་ཉེ་བར་བསྒྲུབ་ཏུ་རུང་ངོ༌། །ཆུང་མར་གྱུར་པ་ཉིད་ལ་ཡང་ངོ་ཞེས་བྱ་བ་ལ། ཆུང་མར་གྱུར་པ་ཉིད་ལ་ཞེས་བྱ་བ་ནི། སྔོན་ཁྱིམ་པར་གནས་པའི་ཚེ་ཆུང་མ་ཉིད་དུ་གྱུར་པ་ཉིད་ལ་སྟེ། དེ་ལ་ཡང་དགེ་སློང་གིས་ཟང་ཟིང་ཉེ་བར་བསྒྲུབ་ཏུ་རུང་ངོ༌། །ཡང་ངོ་ཞེས་བྱ་བའི་སྒྲས་ནི་མ་དང་སྲིང་མོ་ལ་སོགས་པ་དག་ལྟ་ལ་སྨོས་ཀྱང་ཅི་དགོས་ཞེས་བྱ་བར་སྟོན་ཏོ། །འདི་སྐད་བསྟན་ཏེ། དགེ་སློང་གིས་སྔོན་ཆུང་མར་སྤྱད་པ་ཉིད་དགེ་སློང་མར་གྱུར་པ་ཡིན་ན་རབ་ཏུ་བྱུང་བ་དེ་ལ་ཡང་ཟང་ཟིང་ཉེ་བར་བསྒྲུབ་ཏུ་རུང་བ་ཁོ་ན་ཡིན་ཏེ། དགེ་སློང་གིས་དེ་ལ་ཉེ་བར་བསྒྲུབ་ཏུ་རུང་ངོ་ཞེས་གསུངས་པའི་ཕྱིར་རོ། །དེས་བླང་དུ་ཡང་ངོ་ཞེས་བྱ་བ་ནི། དགེ་སློང་མ་དེས་ཟང་ཟིང་ཉེ་བར་སྒྲུབ་པར་བྱེད་པའི་དགེ་སློང་དེ་ལས་ཟང་ཟིང་བླང་དུ་རུང་བ་ཁོ་ན་ཡིན་ནོ། །བུ་ཆུང་དུ་དང་ལྷན་ཅིག་ཉལ་བ་ནི་མ་གཏོགས་པ་ཉིད་མ་ཡིན་ནོ་ཞེས་བྱ་བ་ནི། བུས་པ་གང་མ་མེད་པར་མཚན་མོ་ཉལ་མི་ནུས་
པ་དེ་ནི་བུ་ཆུང་དུ་ཞེས་བྱ་སྟེ། མར་གྱུར་པའི་དགེ་སློང་མ་བུ་ཆུང་དུ་དེ་དང་ལྷན་ཅིག་ཉལ་བ་ནི་མ་གཏོགས་པ་ཉིད་མ་ཡིན་ཏེ། དགེ་སློང་མས་རང་གི་བུ་དེ་དང་མཚན་མོ་ལྷན་ཅིག་ཉལ་བར་བྱའོ་ཞེས་བྱ་བའི་ཐ་ཚིག་གོ །ཅི་དགེ་སློང་མ་ཐམས་ཅད་ལ་མ་གཏོགས་པ་ཉིད་མ་ཡིན་ནམ་ཞེ་ན་དེའི་ཕྱིར། གནང་བ་ཐོབ་བའོ་ཞེས་བྱ་བ་སྨྲས་ཏེ། དགེ་སློང་མ་གང་གིས་བུ་ཆུང་དུ་དང་ལྷན་ཅིག་ཉལ་བའི་གནང་བ་ཐོབ་པར་གྱུར་བ་དེ་ལ་མ་གཏོགས་པ་ཉིད་མ་ཡིན་ནོ། །དེ་ལ་གནང་བ་སྦྱིན་པར་རིགས་སམ་ཞེ་ན་དེའི་ཕྱིར་དེ་སྦྱིན་པར་བྱའོ་ཞེས་བྱ་བ་དེ་སྨྲས་ཏེ། དགེ་སློང་མའི་དགེ་འདུན་གྱིས་དགེ་སློང་མ་དེ་ལ་གནང་བ་དེ་སྦྱིན་པ་ཆོས་དང་མཐུན་པ་ཉིད་ཡིན་པའོ། །ད་ནི་ལྟུང་བྱེད་མཚན་ཉིད་ཐུན་མོང་བ་བདུན་ཅུ་རྩ་གཉིས་པོ་དག་ལས་གཞན་པ་དགེ་སློང་མའི་ལྟུང་བྱེད་ཐུན་མོང་མ་ཡིན་པ་བརྒྱ་རྩ་བརྒྱད་པོ་དག་བཤད་པར་བྱའོ། །དེ་ལ་དང་པོ་རེ་ཞིག་དེ་དག་ཐམས་ཅད་ཡུལ་གྱི་དབྱེ་བར་རྣམ་པར་གཞག་པར་བསྟན་པར་བྱ་སྟེ། མ་ལོན་པས་ཉེ་བར་འཇོག་པ་ལ་སོགས་པ་ནི་བརྟུལ་ཞུགས་ལས་གྱུར་པ་ཡིན་པར་ཤེས་པར་བྱའོ། རབ་ཏུ་བྱུང་བ་ལ་ཕན་མི་འདོགས་པ་ཞེས་བྱ་བ་ལ་སོགས་པ་ནི་བརྟུལ་ཞུགས་ལེན་དུ་བཅུག་པ་ཡལ་བར་འདོར་བ་ལས་གྱུར་པ་ཡིན་ནོ། །འདོད་པ་བསྟེན་པ་ལ་སོགས་པ་ནི་ཚངས་པར་སྤྱད་པ་ཡོངས་སུ་བསྲུངས་པ་ལས་གྱུར་པ་ཡིན་ནོ། །བྲོ་བརྡུང་བ་ལ་སོགས་པ་ནི་རྩེད་མོ་ལས་གྱུར་པ་ཡིན་ནོ། །གདུགས་ཐོགས་པ་ལ་སོགས་པ་ནི་ཡོ་ལང་ལས་གྱུར་བ་ཡིན་ནོ། །མ་བསྒོ་བར་ཁྱིམ་པའི་མལ་སྟན་ལ་འདུག་པ་ཞེས་བྱ་བ་ལ་སོགས་པ་ནི་སྟན་ལས་གྱུར་པ་ཡིན་ནོ། །སྐུད་པ་འཁལ་བ་ལ་སོགས་པ་ནི་ལག་བླས་ལས་གྱུར་པ་ཡིན་ནོ། །ཟོས་ཏེ་སྟན་ལས་ལངས་ནས་ཡང་བཟའ་བར་མི་བྱའོ་ཞེས་བྱ་བ་ལ་སོགས་པ་ནི་ཟ་བ་ལས་གྱུར་པ་ཡིན་ནོ། །སྨེ་གོས་བཅང་བར་བྱའོ་ཞེས་བྱ་བ་ལ་སོགས་པ་ནི་གོས་ལས་གྱུར་པ་ཡིན་ནོ། །བསྔགས་པ་ལ་སེར་སྣ་བྱེད་པ་ཞེས་བྱ་བ་ལ་སོགས་པ་ནི་སེར་སྣ་ལས་གྱུར་པ་ཡིན་ནོ། །དགེ་སློང་མ་སྐྲོད་པ་ཞེས་བྱ་བ་ལ་སོགས་པ་ནི་གནས་ཁང་ལས་གྱུར་པ་ཡིན་ནོ། །ལེགས་པར་མ་མཐོང་བས་གླེང་བ་ཞེས་བྱ་བ་ལ་སོགས་པ་ནི་སྡོམ་བ་ལས་གྱུར་པ་
ཡིན་ནོ། །དབྱར་གྱི་ནང་དུ་ལྗོངས་རྒྱུ་བ་ཞེས་བྱ་བ་ལ་སོགས་པ་ནི་རྒྱུ་བ་ལས་གྱུར་པ་ཡིན་ནོ། །བཤང་བ་འདོར་བ་ཞེས་བྱ་བ་ལ་སོགས་པ་ནི་བསྒྲུབ་པ་ལས་གྱུར་པའི་ཚུལ་ཡིན་པར་ཤེས་པར་བྱ་སྟེ། ལྟུང་བྱེད་འབའ་ཞིག་ཏུ་འགྱུར་བ་བརྒྱ་རྩ་བརྒྱད་པོ་དག་ནི་ཡུལ་དུ་གྱུར་པའི་སྤྱོད་པ་དེ་དག་ལ་རྣམ་པར་གཞག་པ་ཡིན་ནོ། །ད་འདི་མན་ཆད་ནི་དེ་དག་ངོ་བོ་ཉིད་ཀྱི་སྒོ་ནས་རྣམ་པར་བཤད་པར་བྱ་སྟེ། གང་ལ་མ་ལོན་པས་ཉེ་བར་འཇོག་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། རབ་ཏུ་འབྱིན་པ་དང་བསྙེན་པར་རྫོགས་པར་བྱེད་པ་ལའོ་ཞེས་བྱ་བ་སྨྲས་ཏེ། རབ་ཏུ་འབྱིན་པ་དང་རྫོགས་པར་བསྙེན་པར་བྱེད་པའི་ཡུལ་ལ་ཁ་ན་མ་ཐོ་བ་འདིར་འགྱུར་རོ། །གནས་སྐབས་གང་ལ་ཞེ་ན། དེའི་ཕྱིར་ལོ་བཅུ་གཉིས་མ་ལོན་པ་ཉིད་ལའོ་ཞེས་བྱ་བ་སྨྲས་ཏེ། གལ་ཏེ་རྫོགས་པར་བསྙེན་ནས་ལོ་བཅུ་གཉིས་མ་ལོན་པ་ཉིད་ཡིན་ནའོ། །གང་གིས་ཤེ་ན་དེའི་ཕྱིར་བདག་ཉིད་རྫོགས་པར་བསྙེན་པས་སོ་ཞེས་བྱ་བ་སྨྲས་སོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། དགེ་སློང་མ་བདག་ཉིད་རྫོགས་པར་བསྙེན་ནས་ལོ་བཅུ་གཉིས་མ་ལོན་པར་མཁན་པོ་ཉིད་ཀྱིས་གཞན་རབ་ཏུ་འབྱིན་པ་དང་རྫོགས་པར་བསྙེན་པར་བྱེད་པ་དེ་ལ་ལྟུང་བྱེད་འདི་རྣམ་པར་གཞག་གོ །མ་ལོན་པས་ཉེ་བར་འཇོག་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།འཁོར་ཉེ་བར་འཇོག་པའི་ལྟུང་བྱེད་སྨྲ་བར་འདོད་ནས་འཁོར་དང་འཁོར་མང་པོ་ཉེ་བར་གཞག་པའི་གནང་བ་སྦྱིན་པར་བྱའོ་ཞེས་བྱ་བ་སྨྲས་ཏེ། དགེ་སློང་མ་ལ་དགེ་སློང་མའི་དགེ་འདུན་གྱི་འཁོར་ཉེ་བར་བཞག་པའི་གནང་བ་དང་འཁོར་མང་པོ་ཉེ་བར་གཞག་པའི་གནང་བ་སྦྱིན་པར་བྱའོ། །ཅི་ཐམས་ཅད་ལ་སྦྱིན་པར་བྱ་བའམ་ཞེ་ན་དེའི་ཕྱིར་དེ་ཉེ་བར་འཇོག་ནུས་པ་ལའོ་ཞེས་བྱ་བ་སྨྲས་ཏེ། འཁོར་དེ་ཉེ་བར་འཇོག་པ་དང༌། འཁོར་མང་པོ་དེ་ཉེ་བར་འཇོག་ནུས་པའི་དགེ་སློང་མ་ལ་དགེ་སློང་མའི་དགེ་འདུན་གྱི་འཁོར་ཉེ་བར་གཞག་པའི་གནང་བ་དང་འཁོར་མང་པོ་ཉེ་བར་གཞག་པའི་གནང་བ་སྦྱིན་པར་བྱའོ། །འདིར་ནུས་པ་ཞེས་བྱ་བ་ལ་ནི། གཉི་ག་ལ་ཡང་ནད་གཡོག་དང་འགྱོད་པ་བསལ་བ་ལ་སོགས་པ་ནུས་པ་ཡིན་པར་རིག་པར་བྱའོ། འདིར་གཞུང་ནི་གང་གི་འཁོར་
ཉེ་བར་གཞག་པར་ནུས་པ་དེས་དགེ་འདུན་ལས་འཁོར་ཉེ་བར་གཞག་པའི་གནང་བ་ཐོབ་ནས་འཁོར་ཉེ་བར་གཞག་པར་བྱའོ་ཞེས་གསུངས་པ་ཡིན་ཏེ། འདིར་འཁོར་ཉེ་བར་གཞག་པར་གསོལ་བ་དང་གནང་བ་ནི། དགེ་འདུན་འཕགས་མ་རྣམས་བདག་ལ་གསན་དུ་གསོལ། བདག་དགེ་སློང་མ་མིང་འདི་ཞེས་བགྱི་བ་ལོ་བཅུ་གཉིས་ལོན་ལགས་ཏེ། འཁོར་ཉེ་བར་བཞག་པར་སྤྲོ་ན། བདག་དགེ་སློང་མ་མིང་འདི་ཞེས་བགྱི་བ་དགེ་འདུན་འཕགས་མ་རྣམས་ལ་འཁོར་ཉེ་བར་གཞག་པའི་གནང་བ་གསོལ་ན་ཞེས་བྱ་བ་ལ་སོགས་པ་ཡིན་ནོ། །འཁོར་མང་པོ་ཉེ་བར་གཞག་པའི་གཞུང་ནི་གང་གིས་འཁོར་མང་པོ་ཉེ་བར་གཞག་པར་ནུས་པ་ངེས་དགེ་འདུན་མ་ལས་འཁོར་མང་པོ་ཉེ་བར་གཞག་པའི་གནང་བ་ཐོབ་ནས་འཁོར་མང་པོ་ཉེ་བར་གཞག་པར་བྱའོ་ཞེས་གསུངས་པ་ཡིན་ཏེ། དེའི་གསོལ་པ་དང་གནང་བ་ནི་དགེ་འདུན་འཕགས་མ་རྣམས་བདག་ལ་གསན་དུ་གསོལ། བདག་དགེ་སློང་མ་མིང་འདི་ཞེས་བགྱི་བ་ལོ་བཅུ་གཉིས་ལོན་ལགས་ཏེ། འཁོར་མང་པོ་ཉེ་བར་གཞག་པར་སྤྲོ་ན། བདག་དགེ་སློང་མ་མིང་འདི་ཞེས་བགྱི་བ་དགེ་འདུན་འཕགས་མ་རྣམས་ལ་འཁོར་མང་པོ་ཉེ་བར་གཞག་པའི་གནང་བ་གསོལ་ན་ཞེས་བྱ་བ་ལ་སོགས་པ་ཡིན་ནོ། །ཅི་ནུས་པ་ཐམས་ཅད་ལ་གནང་བ་དེ་སྦྱིན་པར་བྱའམ་ཞེ་ན་དེའི་ཕྱིར་རྫོགས་པར་བསྙེན་ནས་ལོ་བཅུ་གཉིས་ལོན་པ་ཉིད་ལའོ་ཞེས་བྱ་བ་སྨྲས་ཏེ། དགེ་སློང་མ་གང་གིས་འཁོར་དང་འཁོར་མང་པོ་ཉེ་བར་འཇོག་པར་ཡང་ནུས་ལ་རྫོགས་པར་བསྙེན་ནས་ལོ་བཅུ་གཉིས་ལོན་པ་ཉིད་ཀྱང་ཡིན་ན་དེ་ལ་གནང་བ་སྦྱིན་པར་བྱའོ། །ལོ་བཅུ་གཉིས་ལོན་པ་ཉིད་ཀྱི་ཕྱིར་ལུང་ནི་དགེ་འདུན་འཕགས་མ་རྣམས་བདག་ལ་གསན་དུ་གསོལ། དགེ་སློང་མ་མིང་འདི་ཞེས་བགྱི་བ་འདི། རྔོ་ཡང་ཐོགས་ལ་ལོ་བཅུ་གཉིས་ཀྱང་ལོན་ལགས་ཏེ་ཞེས་བྱ་བ་ལ་སོགས་པ་གསུངས་པ་ཡིན་ནོ། །གནས་སྦྱིན་པ་ལ་ཡང་ལོ་བཅུ་གཉིས་ལོན་པ་ཉིད་དུ་རིག་པར་བྱའོ། །གཞན་གྱིས་གསོལ་བར་མི་བྱའོ་ཞེས་བྱ་བ་ནི། མི་ནུས་པ་དང་ལོ་བཅུ་གཉིས་མ་ལོན་པའི་དགེ་སློང་མའི་གཞན་གྱིས་གནང་བ་དེ་གསོལ་བར་མི་བྱའོ། །ཞར་ལ་བྱུང་བ་རྫོགས་
སོ།། །།གང་ལ་འཁོར་ཉེ་བར་འཇོག་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་སྔར་གནང་བ་མ་ཐོབ་པ་ལའོ་ཞེས་བྱ་བ་སྨྲས་ཏེ། དགེ་སློང་མ་གང་གིས་སྔར་འཁོར་ཉེ་བར་གཞག་པའི་གནང་བ་མ་ཐོབ་པ་དེ་ལ་ཁ་ན་མ་ཐོ་བ་འདིར་འགྱུར་རོ། །ཅི་ཞིག་བྱས་ན་དེ་ལ་དེར་འགྱུར་ཞེན་དེའི་ཕྱིར། འཁོར་ཉེ་བར་འཇོག་ནའོ་ཞེས་བྱ་བ་སྨྲས་ཏེ། སྔར་གནང་བ་མ་ཐོབ་པ་ལ་འཁོར་ཉེ་བར་འཇོག་པར་བྱེད་ནའོ། །འཁོར་ཉེ་བར་འཇོག་པ་ཞེས་བྱ་བ་ནི། རབ་ཏུ་འབྱིན་པ་དང་རྫོགས་པར་བསྙེན་པར་བྱེད་པ་དང་དགེ་སློབ་མར་བྱེད་པ་དང་གནས་སྦྱིན་པ་ཞེས་བྱ་བ་རྣམ་པ་བཞི་པོ་དག་གིས་རིག་པར་བྱའོ། འཁོར་ཉེ་བར་འཇོག་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་འཁོར་མང་པོ་ཉེ་བར་འཇོག་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཅིག་ཤོས་ནི་འཁོར་མང་པོའོ་ཞེས་བྱ་བ་སྨྲས་ཏེ། ཉེ་བར་འཇོག་པ་ལའོ་ཞེས་བྱ་བར་སྦྱར་རོ། །སྔར་གནང་བ་མ་ཐོབ་པ་ལའོ་ཞེས་བྱ་བ་དང་འཁོར་མང་པོ་ཉེ་བར་འཇོག་ནའོ་ཞེས་བྱ་བ་གཉིས་ཀྱང་དོན་གྱིས་བསྒྱུར་ཏེ་སྔ་མ་བཞིན་དུ་སྦྱར་རོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། ཅིག་ཤོས་ཞེས་བྱ་བ་འཁོར་མང་པོ་ཉེ་བར་འཇོག་པའི་ལྟུང་བྱེད་ནི་སྔར་གནང་བ་མ་ཐོབ་པ་ལའོ། །འཁོར་མང་པོ་ཉེ་བར་འཇོག་ན་འབྱུང་ངོ་ཞེས་བྱ་བའི་ཐ་ཚིག་གོ །འཁོར་མང་པོ་ཉེ་བར་འཇོག་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་ལོ་བཅུ་གཉིས་མ་ལོན་པ་རྫོགས་པར་བསྙེན་པར་བྱེད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཁྱིམ་སོ་བཟུང་བ་ལོ་བཅུ་གཉིས་ཉིད་ཀྱི་མདུན་རོལ་དུ་བསྙེན་པར་རྫོགས་པར་བྱེད་པ་ལའོ་ཞེས་བྱ་བ་སྨྲས་ཏེ། སྔར་རབ་ཏུ་བྱུང་བའི་གཞིར་རྫོགས་པར་བསྙེན་པ་ཆགས་པའི་ལོ་རྣམས་ཀྱི་དང་པོ་ནི་བཅུ་གཉིས་ཉིད་དོ་ཞེས་བསྟན་པས་དེའི་ཕྱིར། བུད་མེད་ཁྱིམ་སོ་བཟུང་བ་བག་མར་གཏང་བ་ནི་ན་ཚོད་ལོ་བཅུ་གཉིས་ལོན་པའི་མདུན་རོལ་དུ་རྫོགས་པར་བསྙེན་པར་བྱེད་པན་དགེ་སློང་མ་མཁན་མོ་ལ་ལྟུང་བྱེད་དུ་འགྱུར་ཞེས་བྱ་བའི་ཐ་ཚིག་གོ །ལོ་བཅུ་གཉིས་མ་ལོན་པ་རྫོགས་པར་བསྙེན་པར་བྱེད་པའི་ལྟུང་བྱེད་དུ་ཞེས་བྱ་བ་དེ་བཤད་ཟིན་ཏོ།། །།གང་ལ་ལོ་ཉི་ཤུ་མ་ལོན་པ་རྫོགས་པར་བསྙེན་པར་
བྱེད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར་གཞན་ནི་ལོ་ཉི་ཤུའིའོ་ཞེས་བྱ་བ་སྨྲས་ཏེ། མདུན་རོལ་དུ་ཞེས་བྱ་བར་སྦྱར་རོ། །རྫོགས་པར་བསྙེན་པར་བྱ་བའི་བུད་མེད་དེ་ཁྱིམ་སོ་བཟུང་བ་ལས་གཞན་པ་ཁྱིམ་སོ་མ་བཟུང་བ་ནི་ན་སོད་ལ་ཉི་ཤུ་ལོན་པའི་མདུན་རོལ་དུ་རྫོགས་པར་བསྙེན་པར་བྱེད་ན་དགེ་སློང་མ་མཁན་མོ་ལ་ལྟུང་བྱེད་དུ་འགྱུར་རོ་ཞེས་བྱ་བའི་ཐ་ཚིག་གོ །།ལྟུང་བྱེད་སྔ་མ་དང་འདི་གཉིས་ཀྱི་རྣམ་པ་གཞན་ནི་སྔར་དགེ་སློང་གི་རྣམ་པར་འབྱེད་པར་ལོ་མ་ཚང་བ་རྫོགས་པར་བསྙེན་པར་བྱེད་པའི་ལྟུང་བྱེད་བསྟན་པ་བཞིན་དུ་རིག་པར་བྱའོ། །ལོ་ཉི་ཤུ་མ་ལོན་བ་རྫོགས་པར་བསྙེན་བར་བྱེད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་ཁྱིམ་སོ་བཟུང་བ་ཚིགས་ལས་བཟླས་པའི་ལྟུང་བྱེད་དང་ཁྱིམ་སོམ་བཟུང་བ་ཚིགས་ལས་བཟླས་པའི་ལྟུང་བྱེད་གཉིས་སུ་འགྱུར་ཞེ་ན་དེའི་ཕྱིར། བསླབ་པ་མ་བྱིན་པ་གཉིས་མཁན་མོ་ཉིད་ཀྱིས་སོ་ཞེས་བྱ་བ་སྨྲས་ཏེ། རྫོགས་པར་བསྙེན་པར་བྱེད་པ་ལའོ་ཞེས་བྱ་བར་སྦྱར་རོ། །བུད་མེད་རྫོགས་བར་བསྙེན་པར་འདོད་པ་ཁྱིམ་སོ་བཟུང་བ་དང་ཁྱིམ་སོ་མ་བཟུང་བ་དགེ་སློབ་མའི་བསླབ་པ་མ་བྱིན་པ་གཉིས་ལ་མཁན་མོ་ཉིད་ཀྱིས་རྫོགས་པར་བསྙེན་བར་བྱེད་ན་དགེ་སློང་མའི་མཁན་མོ་ལ་ལྟུང་བྱེད་རྣམ་པ་གཉིས་སུ་འགྱུར་རོ་ཞེས་བྱ་བའི་ཐ་ཚིག་གོ །བསླབ་པའི་གཞི་འདི་གཉིས་ནི་སྦོམ་དགའ་མོས་བུད་མེད་ཁྱིམ་སོ་བཟུང་བ་ལོ་བཅུ་གཉིས་ལོན་པ་ཞིག་དང་ཁྱིམ་སོ་མ་བཟུང་བ་ལོ་ཉི་ཤུ་ལོན་པ་ཞིག་དགེ་སློབ་མའི་བསླབ་པའི་སྔོམ་པ་མ་བྱིན་པར་ཚིགས་ལས་བཟླས་ཏེ་ཐལ་ཕྱུང་རྫོགས་པར་བསྙེན་པར་བྱས་པ་ལས་བཅས་པ་ཡིན་ཏེ། འདིར་བྱུང་བའི་དབང་གིས་ཡུལ་ཐ་དང་བ་ལ་བརྟེན་ནས་བསླབ་པའི་གཞི་འདི་གཉིས་སོ་སོར་བཅའ་བ་མཛད་དོ། །བུད་མེད་ལ་ནི་ཚིགས་གསུམ་ཡོད་དེ་དགེ་ཚུལ་མ་ཉིད་དང་དགེ་སློབ་མ་ཉིད་དང་དགེ་སློང་མ་ཉིད་དོ། །དེ་ལ་དགེ་ཚུལ་མ་ཉིད་ལས་དགེ་སློབ་མ་ཉིད་དུ་མ་བྱས་པར་ཐལ་བྱུང་དགེ་སློང་མ་ཉིད་དུ་བྱེད་པ་ནི་ཚིགས་ལས་བཟླས་པ་ཞེས་བྱ་བ་སྟེ། ཚིགས་ལས་བཟླས་པ་གཅིག་ཡིན་ཡང་ཁྱིམ་སོ་བཟུང་བ་དང་མ་བཟུང་བའི་དབང་གིས་ཡུལ་ཐ་དད་པ་ལ་བརྟེན་ནས་བསླབ་པའི་གཞི་གཉིས་སུ་མཛད་དོ། །
ཚིགས་ལས་བཟླས་པའི་ལྟུང་བྱེད་གཉིས་སོ་ཞེས་བྱ་བ་ཁྱིམ་སོ་བཟུང་བའི་ཚིགས་ལས་བཟླས་པའི་ལྟུང་བྱེད་དང་ཁྱིམ་སོམ་བཟུང་བ་ཚིགས་ལས་བཟླས་པའི་ལྟུང་བྱེད་གཉིས་བཤད་ཟིན་ཏོ།། །།གང་ལ་བསླབ་པ་མ་བསླབས་པ་རྫོགས་པར་བསྙེན་པར་བྱེད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར་དེ་ལ་མ་སྤྱད་པ་ཉིད་དོ་ཞེས་བྱ་བ་སྨྲས་ཏེ། མཁན་མོ་ཉིད་ཀྱིས་རྫོགས་པར་བསྙེན་པར་བྱེད་པ་ལའོ་ཞེས་བྱ་བར་སྦྱར་རོ། །དགེ་སློབ་མའི་སྡོམ་པ་བྱིན་དུ་ཟིན་ཀྱང་དགེ་སློབ་མའི་བསླབ་པ་ཇི་སྐད་བསྟན་པ་དེ་ལ་ལོ་གཉིས་སུ་མ་སྤྱད་པ་ཉིད་མཁན་མོ་ཉིད་ཀྱིས་རྫོགས་པར་བསྙེན་པར་བྱེད་ན་དགེ་སློང་མ་མཁན་མོ་ལ་ལྟུང་བྱེད་དུ་འགྱུར་རོ་ཞེས་བྱ་བའི་ཐ་ཚིག་གོ །བསླབ་པའི་གཞི་འདི་ནི་སྦོམ་དགའ་མོས་གཞོན་ནུ་མ་ལོ་བཅོ་བརྒྱད་ལོན་པ་རབ་ཏུ་ཕྱུང་སྟེ་ལོ་གཉིས་སུ་དགེ་སློབ་མའི་བསླབ་པའི་སྡོམ་པ་བྱིན་ནས་ལོ་གཉིས་མ་ལོན་པ་ཁོ་ནར་རྫོགས་པར་བསྙེན་པར་བྱས་བ་ལས་བཅས་པ་ཡིན་ནོ། །བསླབ་པ་ལ་མ་བསླབས་པ་རྫོགས་པར་བསྙེན་པར་བྱེད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་བསླབ་པ་ལ་བསླབས་པ་རྫོགས་པར་བསྙེན་པར་མི་བྱེད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། སྤྱད་པ་ནི་མི་བྱེད་པ་ལའོ་ཞེས་བྱ་བ་སྨྲས་ཏེ། ལོ་གཉིས་སུ་དགེ་སློབ་མའི་སྤྱད་པ་ལ་སྤྱད་ཟིན་པ་ཉིད་མཁན་མོ་ཉིད་ཀྱིས་རྫོགས་པར་བསྙེན་པར་མི་བྱེད་ན་དགེ་སློང་མ་མཁན་མོ་ལ་ལྟུང་བྱེད་དུ་འགྱུར་རོ་ཞེས་བྱ་བའི་ཐ་ཚིག་གོ །དེ་ལྟར་ཡང་འདིར་གཞུང་ནི་ཡང་དགེ་སློང་མ་གང་གིས་ཆོས་དྲུག་ལ་བསླབས་པ་རྫོགས་པར་བསྙེན་པར་མི་བྱེད་ན་ལྟུང་བྱེད་དོ་ཞེས་གསུངས་པ་ཡིན་ནོ། །རྐྱེན་མ་ཚང་བའི་ཕྱིར་རྫོགས་པར་བསྙེན་པར་མི་བྱེད་པ་ལ་ནི་ཉེས་པ་མེད་དོ། །བསླབ་པ་ལ་བསླབས་པ་རྫོགས་པར་བསྙེན་པར་མི་བྱེད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་ཆོས་འཚོང་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། གལ་ཏེ་ཁོ་མོ་ལ་གོས་སྦྱིན་པ་ལྟ་ན་དེའི་ཕྱིར་ཁྱོད་རྫོགས་པར་བསྙེན་པར་བྱའོ་ཞེས་རྫོགས་པར་བསྙེན་པར་འདོད་པ་ལ་ཟེར་བ་ལའོ་ཞེས་བྱ་བ་སྨྲས་ཏེ། དེ་ལྟར་ཇི་སྐད་སྨོས་པའི་རྣམ་པ་དེ་ལྟ་བུ་རྫོགས་པར་བསྙེན་པར་འདོད་པ་ལ་ཟེར་བ་ལ་ཁ་ན་མ་ཐོ་བ་འདིར་འགྱུར་རོ། །རྣམ་པ་འདིས་ཆོས་འཚོང་བར་བྱེད་པ་ཡིན་
པས་ན་དེའི་ཕྱིར་ཆོས་འཚོང་པ་ཞེས་བྱའོ། །སྡོམ་པ་གཞན་བླངས་པའི་ཕྱིར་སྒྲུབ་པར་བྱེད་པ་ལ་གལ་ཏེ་ཁོ་མོ་ལ་གོས་ལ་སོགས་པ་སྦྱིན་པ་ལྟ་ན་དེའི་ཕྱིར་ཁྱོད་རབ་ཏུ་དབྱུང་བར་བྱའོ་ཞེ་འམ། ཀློག་ཏུ་གཞུག་གོ་ཞེས་བྱ་བ་ལ་སོགས་པ་ཟེར་བ་ལ་ནི་ཉེས་བྱས་སོ། །འདིར་གོས་ཞེས་སྨོས་པ་ནི་མཆོག་ཏུ་གྱུར་པ་རིན་པོ་ཆེ་ལ་སོགས་པ་དང་ཐ་མར་གྱུར་པ་ཐ་ན་རྐང་པ་མཉེ་བ་དག་ལ་སོགས་པའི་དཔེ་ཡིན་ཏེ། དེ་དག་ལ་ཡང་ལྟུང་བྱེད་ཁོ་ནར་འགྱུར་རོ། །བུད་མེད་རྣམས་ཀྱི་ལྷག་པར་ཆགས་པ་ནི་སྟོབས་ཆེ་བ་ཡིན་པའི་ཕྱིར་དེ་དག་ལ་ནི་ལྟུང་བྱེད་དུ་རྣམ་པར་གཞག་གི །སྐྱེས་བ་རྣམས་ཀྱི་ལྷག་པར་ཆགས་པ་ནི་སྟོབས་ཆུང་བའི་ཕྱིར་སྐྱེས་པ་ལ་ནི་འདི་དག་ཐམས་ཅད་ཉེས་བྱས་སོ། །ཆོས་འཚོང་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་འདྲིད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། རབ་ཏུ་བྱུང་བ་དང་མཐུན་པ་བསྟན་བས་ཁྱིམ་རྒྱས་པར་བྱ་བ་སྤང་དུ་བཅུག་ནས་རབ་ཏུ་མི་འབྱིན་པ་ལའོ་ཞེས་བྱ་བ་སྨྲས་ཏེ། ཁྱིམ་པ་མོ་ལ་རབ་ཏུ་འབྱུང་བ་དང་མཐུན་པའི་ཚིག་བསྟན་པའི་རྒྱུ་དེས་ཁྱིམ་རྒྱས་པར་བྱ་བ་སྤང་དུ་བཅུག་ཅིང་ཁྱིམ་རྒྱས་པར་བྱ་བ་སྤངས་ནས་རབ་ཏུ་མི་འབྱིན་པ་ལ་ཁ་ན་མ་ཐོ་བ་འདིར་འགྱུར་རོ། །བསླབ་པའི་གཞི་འདི་ནི་གཽ་ཏ་མ་སྐེམ་མོས་ཕྱུག་པོའི་ཡུགས་ས་མོ་མྱ་ངན་གྱི་ཟུག་རྡུས་གཟིར་བ་ཞིག་ལ་ཁྱོད་ཅིའི་ཕྱིར་རབ་ཏུ་མི་འབྱུང་ཞེས་སྨྲས་པ་དང༌། དེ་ན་རེ་གལ་ཏེ་འཕགས་མས་རབ་ཏུ་དབྱུང་བར་གནང་ན་བདག་ནི་རབ་ཏུ་འབྱུང་ངོ་ཞེས་ཟེར་བ་ལ་དེས་དེ་ལ་ཁྱིམ་རྒྱས་པར་བྱ་བ་འདི་དག་སྤོང་ན་དེས་ཁྱོད་རབ་ཏུ་འབྱུང་བར་འགྱུར་བ་མི་དཀའོ་ཞེས་སྨྲས་པ་དང༌། དེས་ཁྱིམ་རྒྱས་པར་བྱ་བ་སྤངས་པ་ན་དེས་དེ་རབ་ཏུ་མ་བྱུང་བ་ལས་བཅས་པ་ཡིན་ནོ། །རབ་ཏུ་འབྱུང་བ་དང་མཐུན་པ་བསྟན་པས་ཞེས་བྱ་བ་ནི་དེས་ཁྱོད་རབ་ཏུ་འབྱུང་བར་འགྱུར་བ་མི་དཀའོ་ཞེས་བྱ་བ་རེ་བར་གྱུར་པའི་ཚིག་དེ་ཡིན་པར་རིག་པར་བྱའོ། །གཞན་དུ་འདྲིད་པ་ལ་ནི་ཉེས་བྱས་སོ། །འདྲིད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་འཁོར་མང་པོ་སྩོགས་པའི་ལྟུང་བྱེད་དུ་འགྱུར་ཞེན་དེའི་ཕྱིར། ལོའི་རྗེས་སུ་རབ་ཏུ་འབྱིན་པ་ལའོ་ཞེས་བྱ་བ་སྨྲས་ཏེ། ལོ་གང་ལ་གཞན་རབ་ཏུ་བྱུང་བ་དེའི་ཕྱི་དེ་ལོ་ལ་ཡང་གཞན་རབ་ཏུ་
འབྱིན་པ་དེ་ལ་ཁ་ན་མ་ཐོ་བ་འདིར་འགྱུར་རོ། །ལོའི་རྗེས་སུ་ཞེས་སྨོས་པས་ནི་མཇུག་ཐོགས་ཞེས་བྱ་བར་སྟོན་ཏེ། དེ་བས་ན་ཕྱི་དེ་ལོ་ཉིད་ལ་ཅིག་ཅར་རམ་ཕྱིས་རབ་ཏུ་འབྱིན་པ་ལྟུང་བྱེད་ཁོ་ནར་འགྱུར་རོ། །ལོ་གསུམ་པ་ལ་སོགས་པ་དག་ལ་ནི་ལྟུང་བ་མེད་དོ། །འཁོར་མང་པོ་སྩོགས་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་མ་གནང་བ་སྡུད་པའི་ལྟུང་བྱེད་དུ་འགྱུར་ཞེན་དེའི་ཕྱིར། བདག་པོས་མ་གནང་བ་ཉིད་རབ་ཏུ་འབྱིན་པ་ལའོ་ཞེས་བྱ་བ་སྨས་ཏེ། གལ་ཏེ་ཆུང་མ་ཁྱིམ་ཐབ་ཀྱིས་རབ་ཏུ་འབྱུང་དུ་མ་གནང་བ་དེ་རབ་ཏུ་འབྱིན་པར་བྱེད་ན་དེ་ལ་ཁ་ན་མ་ཐོ་བ་འདིར་འགྱུར་རོ། །བདག་པོ་ལ་ནི་ཅི་ལྟར་ཆུང་མ་རབ་ཏུ་ཕྱུང་ན་གནོད་པར་འགྱུར་བ་དེ་ལྟ་བུ་ལ་སོགས་པ་རབ་ཏུ་ཕྱུང་ན་གནོད་བར་མི་འགྱུར་བས་དེའི་ཕྱིར་འདིར་ནི་ཁ་ན་མ་ཐོ་བ་ལྕི་བར་གསུངས་སོ། །རབ་ཏུ་འབྱིན་པ་ལའོ་ཞེས་བྱ་བ་འདི་ནི་བསླབ་པའི་གཞི་འོག་མ་བཞི་པོ་དག་ལ་ཡང་སྦྱར་པར་བྱའོ། །མ་གནང་བ་སྡུད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།སྐྱོན་ཅན་སྡུད་པ་ལས་གྱུར་པའི་ལྟུང་བྱེད་བཞི་པོ་དག་ལས། གང་ལ་འཁྲུལ་བ་མོ་སྡུད་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་འཁྲུལ་པ་མོའོ་ཞེས་བྱ་བ་སྨྲས་ཏེ། མཁན་མོ་ཉིད་ཀྱིས་རབ་ཏུ་འབྱིན་པ་ལ་ཁ་ན་མ་ཐོ་བ་འདིར་འགྱུར་རོ་ཞེས་བྱ་བར་སྦྱར་རོ། །གང་ལ་སྦྲུམ་མ་སྡུད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། སྦྲུམ་མའོ་ཞེས་བྱ་བ་སྨྲས་ཏེ། མཁན་མོ་ཉིད་ཀྱིས་རབ་ཏུ་འབྱིན་ཕ་ལ་ཁ་ན་མ་ཐོ་བ་འདིར་འགྱུར་རོ་ཞེས་བྱ་བར་སྦྱར་རོ། །གང་ལ་མྱ་ངན་གྱིས་གཟིར་བ་སྡུད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར་མྱ་ངན་གྱིས་གཟིར་བའོ་ཞེས་བྱ་བ་སྨྲས་ཏེ། མཁན་མོ་ཉིད་ཀྱིས་རབ་ཏུ་འབྱིན་པ་ལ་ཁ་ན་མ་ཐོ་བ་འདིར་འགྱུར་རོ་ཞེས་བྱ་བར་སྦྱར་རོ། །གང་ལ་ཙ་བཀྲོལ་ཅན་སྡུད་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་ཙབ་ཀྲོལ་ཅན་ནོ་ཞེས་བྱ་བར་སྨྲས་ཏེ། མཁན་མོ་ཉིད་ཀྱིས་རབ་ཏུ་འབྱིན་པ་ལ་ཁ་ན་མཐོ་བ་འདིར་འགྱུར་རོ་ཞེས་བྱ་བར་སྦྱར་རོ། །ཙབ་ཀྲོལ་ཅན་ནི་རབ་ཏུ་འབྱིན་པ་ལ་ལྟུང་བྱེད་དུ་འགྱུར་བར་མ་ཟད་ཀྱི་རྫོགས་པར་བསྙེན་པར་བྱེད་པ་ལ་ཡང་ལྟུང་བྱེད་དུ་འགྱུར་རོ། །སྦྲུམ་མ་རྫོགས་པར་བསྙེན་པར་བྱེད་པ་ལ་ནི་ཉེས་བྱས་སོ། །ཙབ་ཀྲོལ་
ཅན་ཞེས་བྱ་བ་ནི་རྣམ་པར་འབྱེད་པ་ལས་བུད་མེད་མ་རུངས་པའོ་ཞེས་གསུངས་པ་ཡིན་ཏེ། བསྟན་པ་ལ་བུད་མེད་ཙ་བཀྲོལ་ཅན་གཞུག་པ་ནི་ཤིན་ཏུ་ཚུལ་མ་ཡིན་པའི་ཕྱིར་རོ། །སྐྱོན་ཅན་སྡུད་པ་ལས་གྱུར་པའི་ལྟུང་བྱེད་བཞིའོ་ཞེས་བྱ་བ། འཁྲུལ་བ་མོ་སྡུད་པའི་ལྟུང་བྱེད་དང་སྦྲུམ་མ་སྡུད་པའི་ལྟུང་བྱེད་དང༌། མྱ་ངན་གྱིས་གཟིར་བ་སྡུད་པའི་ལྟུང་བྱེད་དང་ཙབ་ཀྲོལ་ཅན་སྡུད་པའི་ལྟུང་བྱེད་བཞི་བཤད་ཟིན་ཏོ།། །།ཡལ་བར་འདོར་བ་ལས་གྱུར་པའི་ལྟུང་བྱེད་བཞི་པོ་དག་ལས་གང་ལ་ཕན་མི་འདོགས་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། རབ་ཏུ་བྱུང་བ་དང་རྫོགས་པར་བསྙེན་པར་བྱས་པ་དག་ལ་ཕན་མི་འདོགས་པ་ལའོ་ཞེས་བྱ་བ་སྨྲས་ཏེ། མཁན་མོ་ཉིད་ཀྱིས་ཞེས་བྱ་བར་ཐམས་ཅད་ཀྱིས་དབང་དུ་བྱ་བར་རིག་པར་བྱའོ། །མཁན་མོ་ཉིད་ཀྱིས་རབ་ཏུ་ཕྱུང་བ་དང་རྫོགས་པར་བསྙེན་པར་བྱས་པ་དག་ལ་གདམས་ངག་ལ་སོགས་པས་ཡོངས་སུ་མི་སྐྱོ་ཞིང་ཕན་མི་འདོགས་པ་དག་ལྟུང་བྱེད་དུ་འགྱུར་རོ། །གང་ལ་མི་འདྲེན་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། བར་ཆད་མཐོང་ན་མི་འདྲེན་པ་ལའོ་ཞེས་བྱ་བ་སྨྲས་ཏེ། མཁན་མོ་ཉིད་ཀྱིས་རབ་ཏུ་ཕྱུང་བ་དང༌། རྫོགས་པར་བསྙེན་པར་བྱས་པ་དག་ལ་བདག་པོ་ལ་སོགས་པ་དག་གི་བར་ཆད་དུ་འགྱུར་བ་མཐོང་ན་བར་ཆད་ཀྱི་གནས་དེ་ལས་བར་ཆད་མེད་པའི་གནས་སུ་མི་འདྲེན་ཏམ། དེ་ཉིད་དུ་འཇིགས་པ་མེད་པར་མི་བྱེད་ན་དེ་ལ་ལྟུང་བྱེད་དུ་འགྱུར་རོ། །གང་ལ་མི་སློབ་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། དགེ་སློང་མའི་བསླབ་པ་མི་སློབ་པ་ལའོ་ཞེས་བྱ་བ་སྨྲས་ཏེ། མཁན་མོ་ཉིད་ཀྱིས་རབ་ཏུ་ཕྱུང་བ་དང་རྫོགས་པར་བསྙེན་པར་བྱས་པ་དག་ལ་དགེ་སློང་མའི་བསླབ་པ་མི་སློབ་པ་ལ་ཁ་ན་མ་ཐོ་བ་འདིར་འགྱུར་རོ། །འདི་སྐད་བསྟན་ཏེ། མཁན་མོ་ཉིད་ཀྱིས་རབ་ཏུ་བྱུང་བ་དང༌། རྫོགས་པར་བསྙེན་པར་བྱས་པ་དག་ལ་དགེ་སློང་མའི་བསླབ་བ་མི་སློབ་ན་མཁན་མོ་དེ་ལ་ལྟུང་བྱེད་དུ་འགྱུར་རོ་ཞེས་བྱ་བར་རྣམ་པར་གཞག་གོ །གང་ལ་ནད་གཡོག་མི་བྱེད་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་ནད་པ་དག་ལ་ནད་གཡོག་མི་བྱེད་པ་ལའོ་ཞེས་བྱ་བ་སྨྲས་ཏེ། མཁན་མོ་ཉིད་ཀྱིས་རབ་ཏུ་ཕྱུང་བ་དང་རྫོགས་པར་བསྙེན་པར་
བྱས་པའི་སློབ་མ་ནད་པ་དག་ལ་ནད་གཡོག་མི་བྱེད་པ་ལ་ཁ་ན་མ་ཐོ་བ་འདིར་འགྱུར་རོ། །རབ་ཏུ་ཕྱུང་བ་དང་རྫོགས་པར་བསྙེན་པ་དེ་དག་ཉི་ཚེར་ཡང་མ་ཟད་ཀྱི། འདི་ལྟར་ཉེ་གནས་དང་བཅས་པས་ཀྱང་ངོ་ཞེས་བྱ་བ་སྨྲས་ཏེ། གནས་སྦྱིན་པའི་སློབ་དཔོན་མ་གང་ལ་ཉེ་གནས་ཡོད་པ་དེ་ནི་ཉེ་གནས་དང་བཅས་པ་སྟེ། དེས་ཀྱང་རང་གི་ཉེ་གནས་རབ་ཏུ་ཕྱུང་བ་དང་རྫོགས་པར་བསྙེན་པ་དག་ལ་ནད་གཡོག་མི་བྱེད་པ་ལ་ཡང་ཁ་ན་མ་ཐོ་བ་འདིར་འགྱུར་རོ། །འདི་སྐད་བསྟན་ཏེ། གནས་པ་ཉིད་དུ་གཞག་པའི་ཉེ་གནས་ན་པ་དག་ལ་ནད་གཡོག་མི་བྱེད་པའི་གནས་སྦྱིན་པའི་སློབ། དཔོན་མོ་ལ་ཡང་ལྟུང་བྱེད་ཁོ་ནར་འགྱུར་རོ། །ཡལ་བར་འདོར་བ་ལས་གྱུར་པའི་ལྟུང་བྱེད་བཞིའོ་ཞེས་བྱ་བ་ཕན་མི་འདོགས་པའི་ལྟུང་བྱེད་དང་མི་འདྲེན་པའི་ལྟུང་བྱེད་དང༌། མི་སློབ་པའི་ལྟུང་བྱེད་དང༌། ནད་གཡོག་མི་བྱེད་པའི་ལྟུང་བྱེད་བཞི་བཤད་ཟིན་ཏོ།། །།གང་ལ་འདོད་པ་བསྟེན་པའི་ལྟུང་བྱེད་དུ་འགྱུར་ཞེན་དེའི་ཕྱིར། རང་གིས་བསྟེན་པར་བྱ་བའི་ནང་དུ་རྒྱ་སྐྱེགས་ཀྱི་ཆང་བུ་འཇུག་པ་ལའོ་ཞེས་བྱ་བ་སྨྲས་ཏེ། རང་གིས་ཞེས་བྱ་བ་ནི་རང་གིས་འཇུད་པ་ལ་བྱའི། །གཞན་འཇུད་དུ་བཅུག་པ་ནི་མ་ཡིན་ཏེ། བསྟེན་པར་བྱ་བའི་ནང་དུ་གཞན་འཇུད་དུ་བཅུག་པ་ལ་ནི་མི་ཚངས་པར་སྤྱོད་པར་གཏོགས་པའི་སྦོམ་པོར་འགྱུར་རོ། །བསྟེན་པར་བྱ་བ་ཞེས་བྱ་བ་ནི་མོའི་དབང་པོའོ། །ནང་དུ་ཞེས་བྱ་བ་ནི་བསྟེན་པར་བྱ་བའི་ནང་དུའོ། །རྒྱ་སྐྱེགས་ཀྱི་ཆང་བུ་ཞེས་བྱ་བ་ནི་རྒྱ་སྐྱེགས་ཀྱི་ཚིགས་མས་བསྐུས་པའི་ཆང་ཆང་སྟེ། དེ་རང་གིས་རང་གི་མོ་མཚན་གྱི་ནང་དུ་འཇུག་པ་ལ་ཁ་ན་མ་ཐོ་བ་འདིར་འགྱུར་རོ། །དེ་ལྟར་ཡང་སོ་སོར་ཐར་པའི་མདོ་ལས་རྒྱ་སྐྱེགས་ཀྱིས་བསྐུས་པ་འཆང་ན་ཞེས་གསུངས་པ་ཡིན་ཏེ། དེའི་རྣམ་པར་འབྱེད་པ་རྒྱ་སྐྱེགས་ཀྱི་ཚིགས་མས་བསྐུས་པའི་རྒྱ་སྐྱེགས་ཀྱི་ཚིགས་མའི་ཆང་བུ་བདག་ཉིད་འཆང་ན་ཞེས་གསུངས་པ་དེ་ཡིན་ནོ། །དེ་ལྟ་བས་ན་བསྟེན་པར་བྱ་བའི་ནང་དུ་འཇུད་པ་དེ་ལ་ཁ་ན་མ་ཐོ་བ་འདིར་འགྱུར་གྱི། བསྲེལ་བ་ཙམ་ལ་ནི་མ་ཡིན་ནོ། །དགེ་སློང་མ་རྣམས་ལ་ཁུ་བ་འབྱིན་པའི་ཁ་ན་མ་ཐོ་བ་ལོགས་ཤིག་ཏུ་མ་གསུངས་ཏེ། འདི་ལྟར་གཏམ་གྱི་གཞི་ལས་དགེ་སློང་གིས་བསམས་བཞིན་
དུ་ཁུ་བ་ཕྱུང་ན་དགེ་འདུན་ལྷག་མའོ། །དགེ་སློང་མས་ཕྱུང་ན་ལྟུང་བྱེད་དོ་ཞེས་གསུངས་པའི་ཕྱིར་ཏེ། བཀྲུ་བའི་ཕྱིར་སོར་གཉིས་ཙམ་གཞུག་པ་རྗེས་སུ་གནང་བའི་ཕྱིར་དེ་ཡན་ཆད་ནི་འདིར་དང་པོ་ཡིན་གྱི་པགས་པའི་རིམ་པ་ནི་དང་པོ་མ་ཡིན་ནོ། །འདིར་དེ་ཡན་ཆད་དུ་བྱེད་པ་ཐམས་ཅད་ནི་རྩོམ་པ་གཅིག་ཏུ་གྱུར་པས་བྱེད་ན་ནི་ལས་གཅིག་ཡིན་ཏེ། ཁུ་བ་འབྱིན་པ་ལས་གྱུར་བའི་ལྟུང་བྱེད་ཁོ་ནར་འགྱུར་རོ། །འདིར་རྒྱ་སྐྱེགས་ཀྱི་ཆང་བུ་ཞེས་སྨོས་པ་ནི་རྫས་འཇམ་པོ་ཧ་ཅང་མི་ཕྲ་བ་གཞན་དག་གི་དཔེ་ཡིན་ནོ། །མི་འཇམ་པ་དང་ཧ་ཅང་ཕྲ་མོ་ཉིད་ལ་ནི་དངོས་གཞིའི་མཐའི་ཉེས་བྱས་སོ། །ཕོ་ལ་ནི་རྒྱ་སྐྱེགས་ཀྱི་ཆང་བུ་གཞུག་པའི་གནས་གཉིས་ཡོད་དེ་ཁ་དང་བཤད་པའི་ལམ་སྟེ། དགེ་སློང་ལ་ནི་ཉེས་པ་སྦོམ་པོར་འགྱུར་རོ། །རྒྱུན་ལས་བཟློག་ཕྱོགས་སུ་བརྩལ་བར་མི་བྱའོ་ཞེས་བྱ་བ་ནི། འདི་མན་ཆད་ཉེས་བྱས་སུ་རིག་པར་བྱའོ།། འདི་དག་ནི་ཕྲན་ཚེགས་དག་ལས་འབྱུང་སྟེ། འདི་དག་ཀྱང་འདི་ལྟ་བུ་དང་མཐུན་པ་གཞན་དག་གི་དཔེ་ཡིན་ནོ། །མདོ་འདི་ནི་སྦོམ་དགའ་མོས་ཆུ་ཀླུང་གནས་ཅན་གྱི་ནང་དུ་ཞུགས་ཏེ་རྒྱུན་ལས་བཟློག་ཕྱོགས་སུ་རྩོལ་བར་བྱེད་པ་ན་དེ་ལ་དགེ་སློང་མ་རྣམས་ཀྱིས་ཅི་བྱེད་ཅེས་དྲིས་པ་དང༌། རེག་པ་བདག་གིར་བྱེད་དོ་ཞེས་ཟེར་བ་ལས་བསྡུས་པ་ཡིན་ནོ། །མངལ་གྱི་སྒོར་ཁུ་ཆུ་བླུགས་པར་མི་བྱའོ་ཞེས་བྱ་བ་དེ་ནི་སྦེད་མའི་གླེང་གཞི་ལས་སོ། །རྐེད་བཅིངས་ཀྱིས་གློ་བཅིང་བར་མི་བྱའོ་ཞེས་བྱ་བ་ནི། གློ་གཉིས་ཕྲ་མོར་འདུག་པར་བྱ་བའི་ཕྱིར་རྐེད་བཅིངས་ཀྱིས་གློ་བཅིང་བར་མི་བྱའོ། །གློ་བཅིང་བར་བྱ་བའི་རྫས་གང་ཡང་རུང་བ་ཐམས་ཅད་ལ་སྤྱིར་རྐེད་བཅིངས་ཞེས་བྱའོ། །བྲང་བཅིངས་ཀྱིས་ནུ་མ་གཉིས་མི་བྱའོ་ཞེས་བྱ་བ་ཡང་ཅིང་བར་ཞེས་བྱ་བར་སྦྱར་རོ། །འདིར་ཡང་ནུ་མ་གཉིས་འཕྱང་དུ་མི་གཏོང་བའི་ཆིངས་མའི་རྫས་གང་ཡང་རུང་བ་སྤྱི་ལ་བྲང་ཆིངས་ཞེས་བྱ་སྟེ། དེས་ནུ་མ་གཉིས་བཅིང་བར་མི་བྱའོ། །མཛེས་འགྱུར་གྱི་བར་ཆད་ཀྱིས་བར་དུ་གཅད་པར་མི་བྱའོ་ཞེས་བྱ་བ་ཡང་ནུ་མ་གཉིས་ཀྱིས་ཞེས་བྱ་བར་སྦྱར་རོ། །ནུ་མ་གཉིས་ཕན་ཚུན་མི་འབྱར་བའི་ཕྱིར་བར་དུ་གཅད་པའི་རྫས་ནི་མཛེས་འགྱུར་གྱི་བར་ཆད་ཅེས་བྱ་སྟེ། དེས་
ནུ་མ་གཉིས་ཀྱི་བར་དུ་གཅད་པར་མི་བྱའོ་ཞེས་བྱ་བའི་ཐ་ཚིག་གོ །འདིར་དེ་གསུམ་གྱི་གཞུང་ནི་དགེ་སློང་མས་རྐེད་ཆིངས་ཀྱིས་གློ་བཅིང་བར་མི་བྱའོ། །འཆིང་ན་འགལ་ཚབས་ཅན་དུ་འགྱུར་རོ། །དགེ་སློང་མས་བྲང་ཆིངས་དང་མཛེས་འགྱུར་གྱི་བར་ཆད་བཅང་བར་མི་བྱའོ། །འཆང་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །དེ་དག་ནི་དཔེའོ་ཞེས་བྱ་བ་ནི། རྐེད་ཆིངས་ལ་སོགས་པ་གསུམ་པོ་དེ་དག་ནི་དཔེ་ཡིན་ཏེ། དེ་དག་དང་གཞན་ཡང་སྐེ་རགས་དང་ལོག་ཏོ་ལ་སོགས་པའི་རྫས་གང་གིས་འཆིར་ན་ཡང་ཁ་ན་མ་ཐོ་བ་འདྲའོ། །འདོད་པ་བསྟན་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་འདོད་པ་བསྟེན་པ་ལྟར་བཅོས་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། སོར་མོའི་ཚིགས་གཉིས་ལས་ལྷག་པས་མོ་མཚན་གྱི་ནང་འཁྲུ་བ་ལོའི་ཞེས་བྱ་བ་སྨྲས་ཏེ། འདོད་པ་བསྟེན་བརྒྱ་སྐྱེགས་ཀྱི་ཆང་བུ་འཆང་བ་དང་འདྲ་བ་དང་དེའི་གཟུགས་བརྙན་དང་དེ་ལྟར་བཅོས་པ་ནི་འདོད་པ་བསྟེན་པ་ལྟར་བཅོས་པ་ཞེས་བྱ་བའོ། །སོར་མོ་རྣམས་ཀྱི་ཚོགས་གཉིས་ཀྱི་ཚད་གང་ཡིན་པ་དེ་ལས་ལྷག་པས་མོ་མཚན་གྱི་ནང་འཁྲུ་བར་བྱེད་ན་དེ་ལ་འདོད་པ་བསྟེན་པ་ལྟར་བཅོས་པའི་ཁ་ན་མ་ཐོ་བ་འདིར་འགྱུར་རོ། །འདིར་ཡང་རང་གིས་ཞེས་བྱ་བར་སྦྱར་ཏེ་གཞན་བྱེད་དུ་བཅུག་པ་ལ་ནི་མི་ཚངས་པར་སྤྱོད་པར་གཏོགས་པའི་ཉེས་པ་སྦོམ་པོར་འགྱུར་རོ། །འདི་ནི་སྦོམ་དགའ་མོས་རྨའི་སྦུབས་སུ་ལག་པ་བཅུག་སྟེ་རྩོལ་བ་ལས་མདོར་བྱས་པ་ཡིན་ནོ། །འདོད་པ་བསྟེན་པ་ལྟར་བཅོས་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །། གང་ལ་འདོད་པ་བསྟེན་པ་ལྟར་གནོད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། དེ་ལ་ལག་མཐིལ་གྱི་ཐལ་ལྕག་གིས་བསྣུན་པ་ལའོ་ཞེས་བྱ་བ་སྨྲས་ཏེ། མོ་མཚན་དེ་ལ་ལག་མཐིལ་གྱི་ཐལ་ལྕག་གིས་བསྣུན་པ་ལ་ཁ་ན་མ་ཐོ་བ་འདིར་འགྱུར་ཏེ། ཆགས་པར་གྱུར་པའི་སེམས་ཀྱིས་ཀྱང་རུང་ཆགས་པར་མ་གྱུར་པའི་སེམས་ཀྱིས་ཀྱང་རུང་སྟེ་བྱེ་བྲག་མེད་དོ། །ཇི་ལྟར་འདོད་པ་བསྟེན་པ་ལ་སྐྲངས་པའི་སྡུག་བསྔལ་ཉིད་ལ་སོགས་པ་གནོད་པར་འགྱུར་བ་དེ་བཞིན་དུ་ལག་པའི་མཐིལ་གྱི་ཐལ་ལྕག་གིས་བསྣུན་པ་ལ་ཡང་གནོད་པར་གྱུར་པ་ཡོད་པས་འདོད་པར་བསྟན་པ་ལྟར་གནོད་པ་ཞེས་
བྱ་སྟེ། དེ་ལས་ལྟུང་བྱེད་གང་བྱུང་བ་དེ་ནི་འདོད་པ་བསྟན་པ་ལྟར་གནོད་པའི་ལྟུང་བྱེད་ཅེས་བྱའོ། །འདོད་པ་བསྟེན་པ་ལྟར་གནོད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་བསྟེན་པར་བྱ་བ་འཆོས་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། དེ་ལ་སྤུ་འཐོག་པ་བྱེད་དམ་བྱེད་དུ་འཇུག་པ་ལའོ་ཞེས་བྱ་བ་སྨྲས་ཏེ། མོ་མཚན་དེ་ལ་རྨོངས་ཀྱི་སྤུ་འཐོག་ཅིང་བྲེག་བ་རང་གིས་བྱེད་དམ་གཞན་བྱེད་དུ་འཇུག་པ་ལ་ཁ་ན་མ་ཐོ་བ་འདིར་འགྱུར་རོ། །འདིར་རེག་པའི་ཁ་ན་མ་ཐོ་བ་ནི་རྣམ་པར་མི་གཞག་སྟེ། དེ་ལ་སྐྱེས་པས་རེག་ན་ནི་ཕམ་པར་འགྱུར་ལ། གལ་ཏེ་བུད་མེད་ཀྱིས་རིག་ན་ནི་སྦོམ་པོའོ་ཞེས་ཉེས་པ་སྔར་བསྟན་ཟིན་པའི་ཕྱིར་རོ། །འདི་ནི་མཛེས་པར་བྱ་བའི་ཕྱིར་དེ་སྤུ་ཉག་མ་འགའ་བཏོགས་པས་ནི་མཛེས་པར་བྱས་པ་མ་ཡིན་ཏེ། འདི་ལྟར་ཕལ་ཆེར་བཏོགས་ན་མཛེས་པར་བྱས་པ་ཡིན་ནོ། །ཕལ་ཆེར་བཏོགས་པ་ཞེས་བྱ་བ་ནི་འདིར་སུམ་ཆ་ཅིག་ལུས་བ་སྟེ་དེའི་ཚེ་ན་དངོས་གཞིའོ། །རྩོམ་པ་གཅིག་ཉིད་ཀྱིས་ལྷག་མའི་རྗེས་སུ་འཇུག་པར་རིག་པར་བྱའོ། །དགེ་སློང་ལ་ནི་འདི་ཉེས་བྱས་སོ། །གལ་ཏེ་འཁྲིག་པའི་འདོད་ཆགས་ཀྱིས་བྱེད་ན་ནི་ཕམ་པར་གཏོགས་པའི་སྦོམ་པོའོ། །གལ་ཏེ་ཁུ་བ་འབྱིན་པའི་འདོད་ཆགས་ཀྱིས་བྱེད་ན་ནི་དགེ་འདུན་ལྷག་མར་གཏོགས་པའི་སྦོམ་པོའོ། །ཐལ་ལྕག་གིས་བསྣུན་པ་དགེ་སློང་ལ་གལ་ཏེ་འདོད་ཆགས་ཀྱིས་བྱེད་ན་ནི་སྦོམ་པོའོ། །འདོད་ཆགས་མེད་ན་ནི་ཉེས་བྱས་སོ། །བསྟེན་པར་བྱེད་པ་འཆོས་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ད་འདི་མན་ཆད་ནི་རེག་པར་བྱ་བ་མ་ཡིན་པ་དང་བསྟེན་པའི་ལྟུང་བྱེད་བཅུ་གཅིག་སྟོན་ཏེ། དགེ་སློང་མས་སྐྱེས་པ་ལ་རེག་པར་བྱ་བ་མ་ཡིན་པ་དེ་དང༌། ལྷན་ཅིག་རེག་པའི་ཚུལ་གྱིས་བསྟེན་པ་གང་ཡིན་པ་དེ་ལས་གྱུར་པའི་ཁ་ན་མ་ཐོ་བ་དེ་དག་ནི། རེག་པར་བྱ་བ་མ་ཡིན་པ་དང་བསྟེན་པའི་ལྟུང་བྱེད་རྣམས་ཞེས་བྱའོ། །དེ་ལ་དེ་དག་གི་དང་པོ་ཇེ་བཤད་པར་བྱ་སྟེ། གང་ལ་ཁྱིམ་པ་དང་ལྷན་ཅིག་འགྲེང་པའི་ལྟུང་བྱེད་དུ་འགྱུར་ཞེན་དེའི་ཕྱིར། ཁྱིམ་པ་དང་ལྷན་ཅིག་དབེན་པ་སྐྱབས་ཡོད་པ་ན་འགྲེང་བ་ལའོ་ཞེས་བྱ་བ་སྨྲས་ཏེ། དགེ་སློང་མ་གཅིག་པུ་ཁྱིམ་པ་བསྟེན་པའི་མཐུ་ཡོད་པ་
གཅིག་དང་དབེན་པ་སྐྱབས་ཡོད་པ་ན། འདོམ་གང་གི་ནང་ཚུན་ཆད་ན་འདུག་གམ་འགྲེང་ཡང་རུང་སྟེ། དེ་ལ་ཁ་ན་མ་ཐོ་བ་འདིར་འགྱུར་རོ། །སྐྱེས་པ་བསྟེན་པའི་མཐུ་མེད་པ་ནི་ཉེས་བྱས་སོ། །དབེན་པ་སྐྱབས་ཡོད་པའི་མཚན་ཉིད་བསྟན་པའི་ཕྱིར། རྩིག་པ་དང་སབ་མ་དང་ཡོལ་བ་དང་ཐིབས་པོ་དང་མུན་པ་དག་གིས་ནི་དེ་ཉིད་འགྲུབ་བོ་ཞེས་བྱ་བ་སྨྲས་ཏེ། ལྔ་པོ་དེ་དག་གིས་ནི་དབེན་པ་སྐྱབས་ཡོད་པ་འགྲུབ་བོ། །གང་ལ་དགེ་སློང་དང་ལྷན་ཅིག་འགྲེང་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། དགེ་སློང་དང་པོ་ཞེས་བྱ་བ་སྨྲས་ཏེ། ལྷན་ཅིག་དབེན་པ་སྐྱབས་ཡོད་པ་ན་འགྲེང་བ་ལའོ་ཞེས་བྱ་བར་སྦྱར་རོ། །གང་ལ་བླ་གབ་མེད་པ་ན་ཁྱིམ་པ་དང་ལྷན་ཅིག་འགྲེང་པའི་ལྟུང་བྱེད་དུ་འགྱུར་ཞེན་དེའི་ཕྱིར། བླ་གབ་མེད་པ་ན་སྔ་མ་དང་ངོ་ཞེས་བྱ་བ་སྨྲས་ཏེ། བླ་གབ་མེད་པ་ཞེས་བྱ་བར་ཆད་མེད་པའི་ཕྱོགས་ན་སྔ་མ་དང་ངོ་ཞེས་བྱ་བ་ཁྱིམ་པ་དང་ལྷན་ཅིག་འགྲེང་བ་ལ་ཁ་ན་མ་ཐོ་བ་འདིར་འགྱུར་ཞེས་བྱ་བའི་ཐ་ཚིག་གོ །གང་ལ་བླ་གབ་མེད་པ་ན་དགེ་སློང་དང་ལྷན་ཅིག་འགྲེང་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཕྱི་མ་དང་པོ་ཞེས་བྱ་བ་སྨྲས་ཏེ། བླ་གབ་མེད་པ་ན་ལྷན་ཅིག་འགྲེང་བ་ལའོ་ཞེས་བྱ་བར་སྦྱར་རོ། །ཕྱི་མ་དང་ངོ་ཞེས་བྱ་བ་ནི་དགེ་སློང་དང་ངོ༌། །གསུམ་པོ་དེ་དག་ལ་ནི་འདུག་པ་ལ་ཡང་ལྟུང་བྱེད་ཁོ་ནར་འགྱུར་ཏེ། ཚུལ་དེ་དག་ནི་ཆེས་ལྕི་བ་ཡིན་པའི་ཕྱིར་རོ། །དེ་གྲོགས་དང་བཅས་པ་ཉིད་ཡིན་ན་ལྟུང་བ་མེད་དོ་ཞེས་བྱ་བ་ནི། དགེ་སློང་དེ་གྲོགས་དང་བཅས་པ་ཉིད་ཡིན་ནོ། །འདིར་གཞུང་ནི་གལ་ཏེ་དགེ་སློང་གྲོགས་དང་བཅས་པ་ཉིད་ཡིན་ན་ལྟུང་བ་མེད་ངོ་ཞེས་གསུངས་པ་ཡིན་ནོ། །དགེ་སློང་མ་ཁྲིམས་ཟླ་དང་བཅས་པ་ཉིད་ཡིན་ན་ཡང་ངོ་ཞེས་བྱ་བ་ཡང་ལྟུང་བ་མེད་དོ་ཞེས་བྱ་བར་སྦྱར་རོ། །ཐག་ཇི་སྲིད་ཀྱི་དབང་གིས་གྲོགས་དང་ཐ་དད་པ་ཉིད་མ་ཡིན་པར་སྣང་བའི་ཐག་དེ་ཙམ་ན་གྲོགས་འདུག་ན་ཁྲིམས་ཟླ་དང་བཅས་པ་ཉིད་ཡིན་ནོ། །གང་ལ་ཁྱིམ་པའི་རྣར་གཤུབ་ཅིང་སྨྲ་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཁྱིམ་པའི་རྣར་གཤུབ་ཅིང་སྨྲ་བ་ལའོ་ཞེས་བྱ་བ་སྨྲས་ཏེ། དགེ་སློང་མས་ཁྱིམ་པའི་རྣ་དྲུང་དུ་མ་རེག་པ་ཙམ་དུ་བསྙེན་ཏེ། ཕྲིན་ལ་སོགས་པ་སྨྲ་བ་ནི་རྣར་གཤུབ་ཅིང་སྨྲ་
བ་ཞེས་བྱ་སྟེ། དེ་ལ་ཁ་ན་མ་ཐོ་བ་འདིར་འགྱུར་རོ། །བྱེ་བྲག་མ་བསྟན་པས་དབེན་བ་སྐྱབས་ཡོད་པ་ཡང་རུང་ངོ༌། །བླ་གབ་མེད་པ་ཡང་རུང་གྲོགས་ཡོད་པ་ཡང་རུང་གཅིག་པུ་ཡང་རུང་བར་ཤེས་པར་བྱའོ། །འདིར་སྨྲ་བ་ཞེས་སྨོས་པ་ནི་དོན་དང་བཅས་པ་དང་དོན་མེད་པའི་ཚིག་ཐམས་ཅད་ཀྱི་དཔེ་ཡིན་ནོ། །གང་གི་ཚེ་གློ་ནས་རྣམ་རྣར་གཤུབ་པ་བྱེད་ན་དེའི་ཚེ་ཉན་པ་པོའི་དཔུང་མགོའི་ཕྱི་རོལ་གྱི་མཐའ་ལས་སྨྲ་བ་མོའི་ཀོ་སྐོའི་མཐའི་ཆ་འདས་ན་དེ་ནི་དེའི་རྣར་གཤུབ་ཅིང་སྨྲ་བའི་ལྟུང་བྱེད་ཀྱི་དང་པོར་རྣམ་པར་གཞག་པ་ཡིན་ནོ། །གང་གི་ཚེ་མདུན་རོལ་ནས་གཤུབ་ཅིང་སྨྲ་བར་བྱེད་ན་ནི་དེའི་ཚེ་ཉན་པ་པོའི་སྙིང་གའི་རུས་པ་ལས་འདས་ནའོ། །གང་གི་ཚེ་རྒྱབ་ལོགས་ནས་གཤུབ་ཅིང་སྨྲ་བར་བྱེད་ན་ནི་དེའི་ཚེ་མཆན་ཁུང་གི་ཐད་ཀ་ནི་སྙིང་གའི་ཐད་ཀ་དང་འདྲ་སྟེ་དེ་ནས་ཕྲག་པའི་ཕྱོགས་ལོགས་སུ་འདས་ན་དེ་དེའི་དང་པོ་ཡིན་པར་རྣམ་པར་གཞག་གོ། གང་ལ་ཁྱིམ་པ་ལས་རྣར་གཤུབ་ཅིང་སྨྲ་བ་ཉན་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། དེ་ལས་དེས་དེ་ཉན་པ་ལའོ་ཞེས་བྱ་བ་སྨྲས་ཏེ། ཁྱིམ་པ་དེ་ལས་རྣར་གཤུབ་པ་དེས་སྨྲ་བ་དེ་ཉན་པའི་དགེ་སློང་མ་ལ་ཁ་ན་མ་ཐོ་བ་འདིར་འགྱུར་རོ། །གང་ལ་དགེ་སློང་གི་རྣར་གཤུབ་ཅིང་སྨྲ་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། དགེ་སློང་གིའོ་ཞེས་བྱ་བ་སྨྲས་ཏེ། རྣར་གཤུབ་ཅིང་སྨྲ་བ་ལ་ཁ་ན་མ་ཐོ་བ་འདིར་འགྱུར་རོ་ཞེས་བྱ་བར་སྦྱར་རོ། །གང་ལ་དགེ་སློང་ལས་རྣར་གཤུབ་ཅིང་སྨྲ་བ་ཉན་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། དེ་ལས་ཀྱང་ངོ་ཞེས་བྱ་བ་སྨྲས་ཏེ། དགེ་སློང་དེ་ལས་སོ། །རྣར་གཤུབ་ཅིང་སྨྲ་བ་ཉན་པ་ལའོ་ཞེས་བྱ་བའི་རྗེས་བསྙགས་པའི་ཕྱིར་ཀྱང་ངོ་ཞེས་བྱ་བའི་སྒྲ་སྨོས་སོ། །གང་ལ་ཁྱིམ་པ་ལས་རིག་པ་ལེན་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཁྱིམ་པ་ལས་རིག་པ་ལེན་པ་ལའོ་ཞེས་བྱ་བ་སྨྲས་ཏེ། དགེ་སློང་མས་ཁྱིམ་པ་ལས་རིག་པ་གང་ཡང་རུང་བ་ལེན་པ་ལ་ལྟུང་བྱེད་འདིར་འགྱུར་རོ། །འདི་ནི་སྦོམ་དགའ་མོ་ཆགས་པར་གྱུར་པས་སྐྱེས་པ་ལས་རིག་པ་བླངས་ནས་དེའི་ཚིག་ཉན་དུ་གཞུག་པའི་ཕྱིར་ཡང་དང་ཡང་དུ་བཟླས་པ་འཆོལ་བར་བྱེད་པ་དེ་ལས་བཅས་པ་ཡིན་ནོ། །གང་ལ་ཁྱིམ་པ་ལས་རིག་པ་ཀློག་པའི་ལྟུང་
བྱེད་དུ་འགྱུར་ཞེ་ན། དེའི་ཕྱིར་དེ་ལས་དེ་ཀློག་པ་ལའོ་ཞེས་བྱ་བ་སྨྲས་ཏེ། ཁྱིམ་པ་དེ་ལས་རིག་པ་དེ་ཀློག་པ་ལ་ཁ་ན་མ་ཐོ་བ་འདིར་འགྱུར་རོ། །འདིར་རིག་པ་ཞེས་སྨོས་པ་ནི་ཀླག་པར་བྱ་བ་ཐམས་ཅད་ཀྱི་དཔེ་ཡིན་ནོ། །དགེ་སློང་གིས་དགེ་སློང་མ་ལ་ཀློག་ཏུ་འཇུག་པ་ལ་ནི་ལྟུང་བ་མེད་དེ་དེ་གཉིས་ནི་སློབ་མ་དང་སློབ་དཔོན་དུ་རིགས་པ་ཉིད་ཡིན་པའི་ཕྱིར་རོ། །གང་ལ་རྨ་བཅིངས་པ་འགྲོལ་དུ་འཇུག་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། སྒྱུ་ཐབས་ཀྱིས་རྨ་བཅིངས་ཤིང་བཅིངས་ཤིང་འགྲོལ་དུ་འཇུག་པ་ལའོ་ཞེས་བྱ་བ་སྨྲས་ཏེ། ཉོན་མོངས་པ་ཅན་གྱི་སྒྱུ་ཐབས་ཀྱི་སེམས་ཀྱིས་རང་གི་ལུས་ཀྱི་རྨ་བཅིངས་ཤིང་བཅིངས་ཤིང་སྐྱེས་པ་ལ་འགྲོལ་དུ་འཇུག་པ་ལ་ཁ་ན་མ་ཐོ་བ་འདིར་འགྱུར་རོ། །སྒྱུ་ཐབས་ཀྱིས་བུད་མེད་འགྲོལ་དུ་འཇུག་པ་ལ་ནི་ཉེས་བྱས་སོ། །འདི་ནི་སྦོམ་དགའ་མོའི་ལག་པ་གཡས་པར་ཕོལ་མིག་བྱུང་བའི་རྨ་དེ་སྨན་པས་ཟན་གྱིས་གླན་ནས་རས་མས་བཅིངས་པ་དང༌། དེ་ཧ་ཅང་ལྷོད་དོ་ཧ་ཅང་དམ་མོ་ཞེས་ཟེར་ཞིང་ཡང་དང་ཡང་འགྲོལ་དུ་བཅུག་པ་དེ་ལས་བཅས་པ་ཡིན་ནོ། །དེའི་ཕྱིར་དོན་བདེན་པ་ཉིད་ལ་ནི་ལྟུང་བ་མེད་དོ་ཞེས་བྱ་བ་ནི། གང་གི་ཕྱིར་སྒྱུ་ཐབས་ཀྱིས་ལྟུང་བྱེད་དུ་རྣམ་པར་གཞག་པ་དེའི་ཕྱིར་དམ་ཡང་དག་གམ་ལྷོད་ཡང་དག་པའི་བདེན་པ་ཉིད་ལ་ནི་ཉོན་མོངས་པ་ཅན་མ་ཡིན་པའི་སེམས་ཀྱིས་འགྲོལ་དུ་བཅུག་པ་ལ་ལྟུང་བ་མེད་དོ། །ཉོན་མོངས་པ་ཅན་གྱི་སེམས་ཀྱིས་ནི་ཕྱེད་འགྲོལ་དུ་བཅུག་ན་ཡང་ལྟུང་བྱེད་དོ། །ལན་མང་དུ་འགྲོལ་དུ་བཅུག་ན་ནི་ཇི་སྙེད་འགྲོལ་དུ་བཅུག་པ་དེ་སྙེད་ཀྱི་ལྟུང་བྱེད་དུ་འགྱུར་རོ། །འདི་དགེ་སློང་ལ་ནི་ཉེས་བྱས་སོ། །རིག་པར་བྱ་བ་མ་ཡིན་པ་དང་བསྟེན་པ་ལས་གྱུར་བའི་ལྟུང་བྱེད་བཅུ་གཅིག་གོ་ཞེས་བྱ་བ་ཁྱིམ་པ་དང་ལྷན་ཅིག་འགྲེང་བའི་ལྟུང་བྱེད་དང༌། དགེ་སློང་དང་ལྷན་ཅིག་འགྲེང་བའི་ལྟུང་བྱེད་དང༌། བླ་གབ་མེད་པ་ན་ཁྱིམ་པ་དང་ལྷན་ཅིག་འགྲེང་བའི་ལྟུང་བྱེད་དང༌། བླ་གབ་མེད་པ་ན་དགེ་སློང་དང་ལྷན་ཅིག་འགྲེང་བའི་ལྟུང་བྱེད་དང༌། ཁྱིམ་པའི་རྣར་གཤུབ་ཅིང་སྨྲ་བའི་ལྟུང་བྱེད་དང༌། ཁྱིམ་པ་ལས་རྣར་གཤུབ་ཅིང་སྨྲ་བ་ཉན་པའི་ལྟུང་བྱེད་དང༌། དགེ་སློང་ལས་རྣར་གཤུབ་ཅིང་སྨྲ་བ་ཉན་པའི་ལྟུང་བྱེད་དང༌། ཁྱིམ་པ་ལས་རིག་པ་ལེན་པའི་ལྟུང་
བྱེད་དང༌། ཁྱིམ་པ་ལས་རིག་པ་ཀློག་པའི་ལྟུང་བྱེད་དང༌། རྨ་བཅིངས་པ་འགྲོལ་དུ་འཇུག་པའི་ལྟུང་བྱེད་བཅུ་གཅིག་བཤད་ཟིན་ཏེ།། །།གང་ལ་བུ་འཚོ་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། བུ་འཚོ་བ་ལའོ་ཞེས་བྱ་བ་སྨྲས་ཏེ། བུ་ཕྲུག་འཚོ་ཞིང་རྩེ་བ་ལ་སོགས་པས་བསྙེན་བཀུར་བྱེད་པ་ལ་ཁ་ན་མ་ཐོ་བ་འདིར་འགྱུར་རོ། །དེ་ལྟར་ཡང་འདིར་གཞུང་ནི་སྦོམ་དགའ་མོས་ལྟུང་བཟེད་གཞག་སྟེ། ཆོས་གོས་དང་དག་ཕུད་ནས་ཁྱེའུ་བླངས་ཏེ། ཡུད་ཙམ་ཞིག་བཙས་སོ་ཞེས་གསུངས་པ་ཡིན་ནོ། །འདིར་ཁྱེའུ་ཞེས་སྨོས་པ་ནི་བུ་ཚོ་དང་མ་ནིང་དག་གི་དཔེ་ཡིན་ཏེ་ཚུལ་འདྲའོ། །རང་གི་བུ་དེ་ལ་རེག་པ་རྗེས་སུ་གནང་བའི་ཕྱིར་རང་གི་བུ་འཚོ་བ་ལ་ནི་ཉེས་པ་མེད་དོ། །དགེ་སློང་ལ་ནི་འདི་ཉེས་བྱས་སོ། །བུ་འཚོ་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ད་འདི་མན་ཆད་ནི་གནོད་པར་འགྱུར་བའི་སྒོ་སྦང་བའི་ལྟུང་བྱེད་གསུམ་བཤད་པར་བྱ་སྟེ། སྐྱེས་པས་གནོད་པར་འགྱུར་བའི་སྒོ་སྤང་པའི་ཕྱིར་བསླབ་པའི་གཞི་གསུམ་བཅས་པའི་ཕྱིར་རོ། །དེ་ལ་གང་ལ་ཁྱིམ་གཞན་དུ་མཚན་མོ་ཉལ་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཁྱིམ་བདག་ལ་མ་དྲིས་པར་ཁྱིམ་གཞན་དུ་མཚན་མོ་འདའ་བར་བྱེད་པ་ལའོ་ཞེས་བྱ་བ་སྨྲས་ཏེ། ཁྱིམ་བདག་ལ་མ་དྲིས་པར་རྩིག་པ་ལ་སོགས་པས་བསྐོར་བའམ། ཕྱུགས་ལྷས་སམ་འདྲོན་ཁང་ལ་སོགས་པ་ལ་ཁྱིམ་གཞན་དུ་མཚན་མོ་ཉལ་ཞིང་འདའ་བར་བྱེད་པ་ལ་ཁ་ན་མ་ཐོ་བ་འདིར་འགྱུར་རོ། །བུད་མེད་ལ་རག་ལས་པ་ཉིད་ཡིན་ན་དེ་ལ་དྲིས་ན་ལྟུང་བ་མེད་དོ་ཞེས་བྱ་བ་ནི་ཁྱིམ་གང་ན་བུད་མེད་དབང་ཆེ་ཞིང་ཁྱིམ་བདག་གིས་བུད་མེད་ཀྱི་ཚིག་ལས་འདའ་བར་མི་ནུས་པ་དེ་ནི་བུད་མེད་ལ་རག་ལས་པ་ཉིད་ཅེས་བྱ་སྟེ། དེར་ནི་བུད་མེད་ལ་དྲིས་ན་ཁྱིམ་བདག་ལ་མ་དྲིས་པར་མཚན་མོ་འདའ་བར་བྱེད་པ་ལ་ལྟུང་བ་མེད་པའོ། །གང་ལ་མཚན་མོ་མ་བརྟགས་པར་སྐྱབས་ཡོད་པར་ཉལ་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། མཚན་མོ་མ་བརྟགས་པར་སྐྱབས་ཡོད་པར་འདའ་བར་བྱེད་པ་ལའོ་ཞེས་བྱ་བ་སྨྲས་ཏེ། སྐྱབས་ཡོད་པའི་ཕྱོགས་མ་བརྟགས་པར་མཚན་མོ་ཉལ་ཞིང་འདའ་བར་བྱེད་པ་ལ་ཁ་ན་མ་ཐོ་བ་འདིར་
འགྱུར་རོ། །སྐྱབས་ཡོད་པ་ཞེས་བྱ་བ་ནི་མུན་ཁུང་དང་ཐིབས་པོ་ལ་སོགས་པ་གང་དུ་ཞུགས་ན་སྐྱེས་པ་ཡོད་པར་ཤེས་པར་མི་འགྱུར་བ་ལ་བྱའོ། གང་ལ་གནས་ཁང་དུ་དགེ་སློང་མ་གཞན་མེད་པར་མཚན་མོ་ཉལ་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། གནས་ཁང་དུ་དགེ་སློང་མ་གཞན་མེད་པར་མཚན་མོ་འདའ་བར་བྱེད་པ་ལའོ་ཞེས་བྱ་བ་སྨྲས་ཏེ། མཚན་མོ་གནས་ཁང་དུ་དགེ་སློང་མ་གཞན་མེད་པར་གཅིག་པུ་ཉལ་ཞིང་འདའ་བར་བྱེད་པ་ལ་ཁ་ན་མ་ཐོ་བ་འདིར་འགྱུར་རོ། །འདིར་གཙུག་ལག་གི་རྗེས་སུ་འབྲང་བས་གནས་ཁང་ཞེས་སྨོས་པར་ཟད་ཀྱི་གཡོགས་པའི་ཕྱོགས་གཞན་ལ་ཡང་ཁ་ན་མ་ཐོ་བ་འདྲའོ། །བསླབ་པའི་གཞི་འདི་གསུམ་ལ་མཚན་མའི་མཐའི་སྐད་ཅིག་ལ་ནི་ལྟུང་བྱེད་དོ། །མདུན་རོལ་དུ་ནི་ཉེས་བྱས་སོ། །དེ་ཤི་བ་ལ་སོགས་པ་ལ་ནི་ལྟུང་བ་མེད་དོ་ཞེས་བྱ་བ་ནི། དགེ་སློང་མ་གཞན་དེ་ཤིའམ་བབས་སམ་ཡུལ་གཞན་ལ་སོགས་པར་སོར་ངམ། རྐྱེན་གཞན་གྱིས་མེད་པར་གྱུར་ན་གཅིག་པུ་གནས་ཁང་དུ་མཚན་མོ་འདའ་བར་བྱེད་པ་ལ་ལྟུང་བ་མེད་པ་ཡིན་ཏེ་དེས་མི་འདོད་བཞིན་དུ་བྲལ་བ་བསྟན་ཏོ། །གནོད་པར་གྱུར་པའི་སྒོ་སྤང་བའི་ལྟུང་བྱེད་གསུམ་མོ་ཞེས་བྱ་བ་ཁྱམ་གཞན་དུ་མཚན་མོ་ཉལ་བའི་ལྟུང་བྱེད་དང་མཚན་མོ་མ་བརྟགས་པར་སྐྱབས་ཡོད་པར་ཉལ་བའི་ལྟུང་བྱེད་དང༌། གནས་ཁང་དུ་དགེ་སློང་མ་གཞན་མེད་པར་མཚན་མོ་ཉལ་བའི་ལྟུང་བྱེད་གསུམ་བཤད་ཟིན་ཏོ།། །།གང་ལ་ལོངས་སྤྱོད་ཅིང་གནས་བཏང་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། དགེ་སློང་མ་དང་ཁྲི་གཅིག་ལ་ལྷན་ཅིག་རེག་པ་དང་བཅས་ཤིང་མཚན་མོ་ཉལ་བ་ལའོ་ཞེས་བྱ་བ་སྨྲས་ཏེ། དགེ་སློང་མ་དང་ལྷན་ཅིག་ཁྲི་གཅིག་གི་སྟེང་དུ་ཤ་མཐང་རེག་པ་དང༌། བཅས་ཤིང་མཚན་མོ་ཉལ་བར་བྱེད་པ་ལ་ནི་ཁ་ན་མ་ཐོ་བ་འདིར་འགྱུར་རོ། །རེག་པ་དང་བཅས་ཤིང་ཞེས་བྱ་བ་ནི་རེག་པ་དང་བཅས་བཞིན་དུ་ཞེས་བྱ་བའི་ཐ་ཚིག་གོ །དེའི་ཕྱིར་རེག་པ་དང་བཅས་པ་ལ་ཁ་ན་མ་ཐོ་བ་རྫོགས་པར་འགྱུར་ཏེ། མ་རེག་པ་ལ་ལྟུང་བ་མེད་དོ་ཞེས་གསུངས་པའི་ཕྱིར་རོ། །དེ་དང་ངམ་དུ་མ་དང་ལྷན་ཅིག་ཀྱང་རུང་སྟེ། གཏུར་བུ་ལ་སོགས་པས་བར་དུ་ཆོད་ཅིང་དྲན་པ་ཉེ་བར་གཞག་སྟེ།
ལུས་ཀྱི་རེག་པ་རོ་མྱང་བ་མེད་པར་ཁྲི་མི་འགུལ་བ་ཐ་མལ་པ་འམ་སྟན་ལ་ནི་ལྟུང་བ་མེད་དོ་ཞེས་བྱ་བ་ལ། དེ་དང་ངམ་ཞེས་བྱ་བ་ནི་དགེ་སློང་མ་ཅིག་ཤོས་དེ་དང་ལྷན་ཅིག་ཉལ་བ་དེ་ལའོ། །དུ་མ་དང་ལྷན་ཅིག་ཀྱང་རུང་སྟེ་ཞེས་བྱ་བ་ནི་གཅིག་པུ་དང་ལྷན་ཅིག་ཉལ་བ་འབའ་ཞིག་ཏུ་ཡང་མ་ཟད་ཀྱི་གཉིས་ལ་སོགས་པ་དང་ལྷན་ཅིག་ཉལ་ཡང་རུང་བའོ། །ཅི་གྱི་ན་དེ་བཞིན་ཉལ་བ་ལ་འམ་ཞེ་ན་དེའི་ཕྱིར། གཏུར་བུ་ལ་སོགས་པས་བར་དུ་གཅད་ཅིང་ཞེས་བྱ་བ་སྨྲས་ཏེ། ཆོས་གོས་གྱི་གཏུར་བུ་དང༌། ལྷུང་བཟེད་ཀྱི་སྣོད་ལ་སོགས་པས་མལ་གྱི་བར་དུ་བཅད་པར་བྱས་པ་དེ་ལའོ། །དྲན་པ་ཉེ་བར་གཞག་སྟེ་ཞེས་བྱ་བ་ནི། ཇི་ནས་ཀྱང་ལུས་ཀྱི་རེག་པའི་རོ་མྱང་བ་མེད་པར་བྱ་བའི་ཕྱིར་དྲན་པ་ཉེ་བར་གཞག་པ་ལའོ། །ལུས་ཀྱི་རེག་པའི་རོ་མྱོང་བ་མེད་པར་ཞེས་བྱ་བ་ནི། གལ་ཏེ་གཏུར་བུ་ལ་སོགས་པས་བར་དུ་བཅད་ཟིན་ཀྱང་བརྒྱ་ལ་ལུས་རེག་པར་གྱུར་ན་རེག་པ་དེའི་རོ་མྱང་བ་མེད་པར་བྱེད་པ་སྟེ། འདི་ནི་དྲན་པ་ཉེ་བར་གཞག་པ་དེའི་འབྲས་བུ་ཡིན་ནོ། །དེ་བས་ན་རྣམ་པ་དེ་ལྟ་བུ་དྲན་པ་ཉེ་བར་གཞག་པར་བྱའོ། །གཞི་གང་ལ་དེ་དག་དང་ལྷན་ཅིག་ཉལ་བ་ལ་ལྟུང་བ་མེད་ཅེ་ན་དེའི་ཕྱིར་ཁྲི་མི་འགུལ་བ་ཐ་མལ་བ་ཞེས་བྱ་བ་སྨྲས་ཏེ། ཁྲི་རྐང་ས་ལ་བཙུགས་པ་མི་འགུལ་བ་དང་ཁྲི་ཕལ་པ་ཐ་མལ་བར་གྲགས་པ་ལའོ། །ཡང་ན་སྟན་ལ་ཡང་རུང་སྟེ་གཞི་དེ་ལྟ་བུ་དག་ལ་རྣམ་པ་ཇི་སྐད་བསྟན་པ་དེ་ལྟ་བུ་དག་གིས་ལྷན་ཅིག་ཉལ་བ་ལ་ནི་ལྟུང་བ་མེད་དོ། །འདིར་གཞུང་ནི་ཁྲི་མི་འགུལ་བ་ལ་གཏུར་བུ་ལ་སོགས་པས་བར་དུ་གཅད་ཅིང་དྲན་པ་ཉེ་བར་གཞག་སྟེ་ལུས་ཀྱི་རེག་པའི་རོ་མྱང་བ་མེད་པར་ཉལ་བ་ལ་ལྟུང་བ་མེད་དོ། །ཁྲི་ཐ་མལ་པ་ལ་ཡང་དེ་བཞིན་ནོ། །སྟན་ལ་ཡང་དེ་བཞིན་ནོ་ཞེས་གསུངས་པ་ཡིན་ནོ། །ཡོད་ན་ཉེས་བྱས་སོ་ཞེས་བྱ་བ་ནི། མལ་སོ་སོར་བྱ་པའི་སྐབས་ཡོད་ན་བར་དུ་བཅད་པ་ལ་སོགས་པས་ཉལ་བ་ལ་ནི་ཉེས་བྱས་ཀྱི་ཁ་ན་མ་ཐོ་བར་འགྱུར་རོ། །ལོངས་སྤྱོད་ཅིང་གནས་པ་བཏང་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ད་འདི་མན་ཆད་ནི་བྱི་དོར་བྱེད་པ་ལས་གྱུར་བའི་ལྟུང་བྱེད་བརྒྱད་སྟོན་ཏེ། དེ་ལ་གང་ལ་
དགེ་སློང་མ་བྱི་དོར་བྱེད་དུ་འཇུག་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། རང་གི་ལུས་ཀྱི་དྲིལ་ཕྱིས་དགེ་སློང་མ་བྱེད་དུ་འཇུག་པ་ལའོ་ཞེས་བྱ་བ་སྨྲས་ཏེ། རང་གི་ལུས་ལ་འདག་རྫས་ཀྱིས་དྲི་ལ་ཞིང་ཕྱི་བའི་དྲིལ་ཕྱི་དགེ་སློང་མ་གཞན་བྱེད་དུ་འཇུག་པ་ལ་ཁ་ན་མ་ཐོ་བ་འདིར་འགྱུར་རོ། །གང་ལ་དགེ་སློང་མ་བྱི་དོར་བྱེད་དུ་འཇུག་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། དགེ་སློང་མའོ་ཞེས་བྱ་བ་སྨྲས་ཏེ། རང་གི་ལུས་ཀྱི་དྲིལ་ཕྱི་དགེ་སློང་མ་བྱེད་དུ་འཇུག་པ་ལ་ཁ་ན་མ་ཐོ་བ་འདིར་འགྱུར་རོ། །གང་ལ་དགེ་ཚུལ་མ་བྱི་དོར་བྱེད་དུ་འཇུག་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། དགེ་ཚུལ་མའོ་ཞེས་བྱ་བ་སྨྲས་ཏེ། རང་གི་ལུས་ཀྱི་དྲིལ་ཕྱི་དགེ་ཚུལ་མ་བྱེད་དུ་འཇུག་པ་ལ་ཁ་ན་མ་ཐོ་བ་འདིར་འགྱུར་རོ། །གང་ལ་ཁྱིམ་པ་མོ་བྱི་དོར་བྱེད་དུ་འཇུག་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཁྱིམ་པ་མོའོ་ཞེས་བྱ་བ་སྨྲས་ཏེ། རང་གི་ལུས་ཀྱི་དྲིལ་ཕྱི་ཁྱིམ་པ་མོ་བྱེད་དུ་འཇུག་པ་ལ་ཁ་ན་མ་ཐོ་བ་འདིར་འགྱུར་རོ། །གང་ལ་མུ་སྟེགས་མོ་བྱི་དོར་བྱེད་དུ་འཇུག་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། མུ་སྟེགས་མའོ་ཞེས་བྱ་བ་སྨྲས་ཏེ། རང་གི་ལུས་ཀྱི་དྲིལ་ཕྱི་མུ་སྟེགས་ཅན་མོ་བྱེད་དུ་འཇུག་པ་ལ་ཁ་ན་མ་ཐོ་བ་འདིར་འགྱུར་རོ། །བྱུང་བའི་དབང་གིས་གང་ཟག་ཐ་དད་པས་བསླབ་པའི་གཞི་ལྔ་སོ་སོར་བཅའ་བ་མཛད་དོ། །གང་ལ་བུད་མེད་བཀྲུ་བཤལ་བྱེད་དུ་འཇུག་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། བཀྲུ་བཤལ་བྱེད་དུ་འཇུག་པ་ལའོ་ཞེས་བྱ་བ་སྨྲས་ཏེ། དགེ་སློང་མས་རང་གི་ལུས་ལ་ཆུ་འབའ་ཞིག་གིས་དྲི་མ་བཀྲུ་བཤལ་བྱ་བ་བུད་མེད་གཞན་བྱེད་དུ་འཇུག་པ་ཁ་ན་མ་ཐོ་བ་འདིར་འགྱུར་རོ། །སྔ་མ་ལྔ་ནི་བདག་རྫས་གང་ཡང་རུང་བ་གཞན་དག་གིས་དྲིལ་ཕྱི་བྱེད་དུ་འཇུག་པ་ལས་བཅས་པ་ཡིན་ནོ། །འདི་ནི་ཆུ་འབའ་ཞིག་གིས་བཀྲུ་བཤལ་བྱེད་དུ་འཇུག་པ་ལས་བཅས་པ་ཡིན་ཏེ་བྱེ་བྲག་ནི་དེ་ཡིན་ནོ། །དེ་ལྟར་ཡང་བཀྲུ་བཤལ་བྱེད་དུ་འཇུག་ན་ཞེས་གསུངས་པ་དེའི་རྣམ་པར་འབྱེད་པ་ནི་ཆུས་བཀྲུ་བཤལ་བྱེད་ན་ཞེས་གསུངས་པ་ཡིན་ནོ། །གང་ལ་རྫས་དྲི་ཞིམ་པོས་རང་གི་ལུས་སྐུད་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར། རྫས་དྲི་ཞིམ་པོ་དག་གིས་རང་གི་ལུས་སྐུད་པ་ལའོ་
ཞེས་བྱ་བ་སྨྲས་ཏེ། སོ་སོར་ཐར་པའི་མདོ་ལས་དྲི་དག་གིས་ཞེས་གསུངས་པ་དེའི་རྣམ་པར་འབྱེད་པ་ནི། རྫས་དྲི་ཞིམ་པོ་དག་གིས་ཞེས་གསུངས་པ་ཡིན་ཏེ། དགེ་སློང་མས་རང་གི་ལུས་རྫས་དྲི་ཞིམ་པོ་དག་གིས་སྐུད་པ་དེ་ལ་ཁ་ན་མ་ཐོ་བ་འདིར་འགྱུར་རོ། །གང་ལ་འབྲུ་མར་གྱི་ཚིགས་མས་རང་གི་ལུས་སྐུད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། འབྲུ་མར་གྱི་ཚིགས་མས་སོ་ཞེས་བྱ་བ་སྨྲས་ཏེ། རང་གི་ལུས་སྐུད་པ་ལའོ་ཞེས་བྱ་བར་སྦྱར་རོ། །རང་གིས་བྱེད་པའམ་གཞན་བྱེད་དུ་འཇུག་ན་ཡང་བུད་མེད་སྐུད་དུ་འཇུག་པ་ལ་ཁ་ན་མ་ཐོ་བ་འདིར་འགྱུར་གྱི། སྐྱེས་པ་བྱེད་དུ་འཇུག་པ་ལ་ནི་ཕམ་པར་འགྱུར་བ་ལ་སོགས་པའི་རྣམ་པར་འགྱུར་བའི་ཕྱིར་རོ། །དགེ་སློང་ལ་ནི་རྫས་དྲི་ཞིམ་པོས་རང་གི་ལུས་སྐུད་པ་འདི་ཉེས་བྱས་སོ། །མཚན་མཐུན་པ་བྱི་དོར་བྱེད་དུ་འཇུག་པ་ལ་ནི་ལྟུང་བ་མེད་དོ། །བྱི་དོར་བྱེད་པ་ལས་གྱུར་བའི་ལྟུང་བྱེད་བརྒྱད་དོ་ཞེས་བྱ་བ་དགེ་སློང་མ་བྱི་དོར་བྱེད་དུ་འཇུག་པའི་ལྟུང་བྱེད་དང༌། དགེ་སློང་མ་བྱི་དོར་བྱེད་དུ་འཇུག་པའི་ལྟུང་བྱེད་དང༌། དགེ་ཚུལ་མ་བྱི་དོར་བྱེད་དུ་འཇུག་པའི་ལྟུང་བྱེད་དང༌། ཁྱིམ་པ་མོ་བྱི་དོར་བྱེད་དུ་འཇུག་པའི་ལྟུང་བྱེད་དང༌། མུ་སྟེགས་མོ་བྱི་དོར་བྱེད་དུ་འཇུག་པའི་ལྟུང་བྱེད་དང༌། བུད་མེད་བཀྲུ་བཤལ་བྱེད་དུ་འཇུག་པའི་ལྟུང་བྱེད་དང༌། རྫས་དྲི་ཞིམ་པོས་རང་གི་ལུས་སྐུད་པའི་ལྟུང་བྱེད་དང༌། འབྲུ་མར་གྱི་ཚིགས་མས་རང་གི་ལུས་སྐུད་པའི་ལྟུང་བྱེད་བརྒྱད་བཤད་ཟིན་ཏོ། གང་ལ་ཆུ་ལ་ལོངས་སྤྱོད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ལག་ལ་སྦྲེལ་ཏེ་ཁྲུས་བྱེད་པ་ལའོ་ཞེས་བྱ་བ་སྨྲས་ཏེ། བུད་མེད་དང་ལྷན་ཅིག་གོ །སྐྱེས་པ་དང་ནི་མ་ཡིན་ནོ། །འདིར་ལྟེ་བར་སོན་ན་དངོས་གཞིའོ། །མདུན་རོལ་དུ་ནི་ཉེས་བྱས་སོ། །སྔར་དྲིས་སྐུད་པ་ལ་སོགས་པ་བསྟན་པ་ལ་ཡང་དེ་བཞིན་ཏེ། ལྟེ་བར་སོན་ན་དངོས་གཞིའོ། །མདུན་རོལ་དུ་ནི་ཉེས་བྱས་སོ། །ཆུ་ལ་ལོངས་སྤྱོད་པའི་ལྟུང་བྱེད་དོ་ཞེས་བྱ་དེ་བཤད་ཟིན་ཏོ།། །།ད་འདི་མན་ཆད་ནི་འཆོས་པ་ལས་གྱུར་པའི་ལྟུང་བྱེད་དྲུག་སྟོན་ཏེ། དེ་ལས་གང་ལ་པུ་ཤེལ་ཙེས་སྐྲ་འཆད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། བཅོས་པའི་ཕྱིར་པུ་ཤེལ་ཙེས་འཆད་པ་ལའོ་ཞེས་བྱ་བ་སྨྲས་ཏེ། བཅོས་
པའི་ཕྱིར་ཞེས་བྱ་བ་ནི་སྐྲ་བཅོས་པའི་ཕྱིར་ཞེས་བྱ་བར་ཤེས་པར་བྱ་སྟེ། དེའི་ཕྱིར་པུ་ཤེལ་ཅེས་སྐྲ་འཆད་པ་ལ་ཁ་ན་མ་ཐོ་བ་འདིར་འགྱུར་རོ། །གང་ལ་སོ་མངས་ཀྱིས་སྐྲ་འཆད་པ་དང་སྨྱིག་ཤད་ཀྱིས་སྐྲ་འཆད་པ་དང་གསུམ་ཆར་གྱིས་སྐྲ་འཆད་པ་དང༌། སྐྲ་བརྙན་ཐོགས་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། སོ་མངས་དང་སྨྱིག་ཤད་དང་གསུམ་ཞེས་བྱ་བ་དང་སྐྲ་བརྙན་གྱིས་ཀྱང་ངོ་ཞེས་བྱ་བ་སྨྲས་ཏེ། བཅོས་པའི་ཕྱིར་འཆད་པ་ལའོ་ཞེས་བྱ་བའི་རྗེས་པ་སྙགས་པའི་ཕྱིར་ཀྱང་ངོ་ཞེས་བྱ་བའི་སྒྲ་སྨོས་སོ། །སོ་མངས་དང་སྨྱིག་ཤད་དང་གསུམ་ཞེས་བྱ་བ་དང་སྐྲ་བརྙན་དེ་དག་ཉིད་དེ་དག་གིས་བཅོས་པའི་ཕྱིར་སྐྲ་འཆད་ཅིང་ཐོགས་པ་ལ་ཁ་ན་མ་ཐོ་བ་འདིར་འགྱུར་རོ། །གསུམ་ཞེས་བྱ་བ་ནི་པུ་ཤེལ་ཙེ་དང་སོ་མངས་དང་སྨྱིག་ཤད་ཀྱི་རྫས་གསུམ་ཆར་བསྡུས་པའོ། །དེ་དག་གིས་སྐྲ་བཤད་པ་ལ་སོགས་པའི་རྣམ་པ་གང་གིས་འཆོས་པར་བྱེད་པ་དེ་ལ་ཁ་ན་མ་ཐོ་བ་དེ་དག་ཏུ་འགྱུར་རོ། །བརྩམས་པ་ཙམ་གྱིས་ལྟུང་བར་འགྱུར་ཏེ། ཇི་སྲིད་དུ་མ་བཏང་གི་བར་དུ་ལྟུང་བ་གཅིག་ཏུ་ཟད་དེ་བྱ་བའི་ཕྱིར་རྩོམ་པ་གཅིག་ཏུ་གྱུར་པའི་ཕྱིར་རོ། །འདིར་གཞུང་ནི་པུ་ཤེལ་ཙེ་འཆང་ངམ་སོ་མངས་འཆང་ངམ་སྨྱིག་ཤད་འཆང་ངམ་སྐྲ་བརྙན་འཆང་ན་ཞེས་གསུངས་པ་ཡིན་ཏེ། སྐྲ་དེའི་རྣམ་པར་འབྱེད་པ་ནི་འཆོས་པར་བྱེད་ན་ཞེས་གསུངས་པ་སྟེ། བཅོས་པའི་ཕྱིར་འཆད་པ་ལ་སོགས་པར་བྱེད་ན་ཞེས་བྱ་བའི་ཐ་ཚིག་གོ །གང་ལ་ཁྱིམ་པའི་རྒྱན་ཐོགས་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཁྱིམ་པའི་རྒྱན་ཐོགས་པ་ལའོ་ཞེས་བྱ་བ་སྨྲས་ཏེ། ཁྱིམ་པའི་རྒྱན་གང་ཡིན་པ་དེ་ལ་ཐོགས་པ་ལ་ཁ་ན་མ་ཐོ་བ་འདིར་འགྱུར་རོ་ཞེས་བྱ་བའི་ཐ་ཚིག་གོ །ཁྱིམ་པའི་ཞེས་སྨོས་པས་ནི་རབ་ཏུ་བྱུང་བའི་རྒྱན་རྣམ་པར་བཅད་པའི་ཕྱིར་ཏེ། འདི་ལྟར་ཞི་བ་ལ་དགའ་བའི་རབ་ཏུ་བྱུང་བ་རྣམས་ཀྱི་ཆོས་གོས་ལ་སོགས་པ་དག་ལ་ཡང་རྒྱན་གྱི་བློ་སྐྱེ་བ་ཁོ་ནའི་ཕྱིར་རོ། །ཁྱིམ་པའི་རྒྱན་རིན་པོ་ཆེའི་རང་བཞིན་ལ་ནི་ཁ་ན་མ་ཐོ་བ་རྫོགས་པར་འགྱུར་རོ། །དེ་ལྟར་ཡང་ཁྱིམ་པའི་རྒྱན་ནི་མགུལ་རྒྱན་དང༌། གདུ་བུ་རྒྱན་ཅན་དང༌། དཔུང་རྒྱན་དང་དོ་ཤལ་དང་སེ་མོ་དོ་དང་མུ་ཏིག་གི་ཆུན་པོ་དག་གོ་ཞེས་རྣམ་པར་འབྱེད་
པ་ལས་གསུངས་སོ། །རིན་པོ་ཆེ་མ་ཡིན་པའི་རྒྱན་ལ་ནི་ཉེས་བྱས་སོ། །འདི་ལ་ནི་རིན་པོ་ཆེ་ལ་རེག་པའི་ལྟུང་བྱེད་གཞན་ཡང་རྫས་ཅི་ལྟ་བ་ལས་འབྱུང་བར་རིག་པར་བྱའོ། །འཆོས་པ་ལས་གྱུར་པའི་ལྟུང་བྱེད་དྲུག་གོ་ཞེས་བྱ་བ་པུ་ཤེལ་ཙེས་སྐྲ་འཆད་པའི་ལྟུང་བྱེད་དང༌། སོ་མངས་ཀྱིས་སྐྲ་འཆད་པའི་ལྟུང་བྱེད་དང༌། སྨྱིག་ཤད་ཀྱིས་སྐྲ་འཆད་པའི་ལྟུང་བྱེད་དང༌། གསུམ་ཆར་གྱིས་སྐྲ་འཆད་པའི་ལྟུང་བྱེད་དང༌། སྐྲ་བརྙན་ཐོགས་པའི་ལྟུང་བྱེད་དང༌། ཁྱིམ་པའི་རྒྱན་ཐོགས་པའི་ལྟུང་བྱེད་དྲུག་བཤད་ཟིན་ཏོ།། །།ད་འདི་མན་ཆད་ནི་རྒྱགས་པ་ལས་གྱུར་པའི་ལྟུང་བྱེད་གསུམ་སྟོན་ཏེ། དེ་ལ་གང་ལ་བྲོས་བརྡུང་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། བྲོ་བརྡུང་བ་ལའོ་ཞེས་བྱ་བ་སྨྲས་ཏེ། ཅི་ལྟར་ཞེ་ན་དེའི་ཕྱིར་ཡན་ལག་གང་ཡང་རུང་བས་སོ་ཞེས་བྱ་བ་སྨྲས་ཏེ། ཐ་ན་སྨིན་མ་བསྐྱོད་པ་ལ་སོགས་པས་ཀྱང་ངོ༌། གང་ལ་གླུ་ལེན་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། གླུ་ལེན་པ་ལའོ་ཞེས་བྱ་བ་སྨྲས་ཏེ། རང་ངོ༌། །ཇི་ལྟར་ཞེ་ན་དེའི་ཕྱིར་དེའི་བསམ་པས་མགྲིན་བསྒྱུར་གང་ཡང་རུང་བའོ་ཞེས་བྱ་བ་སྨྲས་ཏེ། དེའི་བསམ་པས་ཞེས་བྱ་བ་ནི་གླུ་བླངས་པའི་བསམ་པས་སོ། །མགྲིན་བསྒྱུར་གང་ཡང་རུང་བའོ་ཞེས་བྱ་བ་ནི་ཐ་ན་ཚིགས་སུ་བཅད་པ་ཙམ་འདོན་པ་ཡང་ངོ༌། །གང་ལ་རོལ་མོ་བྱེད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། རོལ་མོ་བྱེད་པ་ལའོ་ཞེས་བྱ་བ་སྨྲས་ཏེ། པི་ཝང་ལ་སོགས་པའི་རོལ་མོ་རང་གིས་བྱེད་པ་ལ་ཁ་ན་མ་ཐོ་བ་འདིར་འགྱུར་རོ། དགེ་སློང་ལ་ནི་འདིར་ཉེས་བྱས་སོ། །རྒྱགས་པ་ལས་གྱུར་པའི་ལྟུང་བྱེད་གསུམ་མོ་ཞེས་བྱ་བ་བྲོ་བརྡུང་བའི་ལྟུང་བྱེད་དང༌། གླུ་ལེན་པའི་ལྟུང་བྱེད་དང༌། རོལ་མོ་བྱེད་པའི་ལྟུང་བྱེད་གསུམ་བཤད་ཟིན་ཏོ།། །།བམ་པོ་བཞི་བཅུ་གཅིག་པ། ད་འདི་མན་ཆད་ནི་ལོངས་འཆོས་པ་ཉིད་ལས་གྱུར་པའི་ལྟུང་བྱེད་གསུམ་སྟོན་ཏེ། གང་ལ་གདུགས་ཐོགས་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ལོངས་སྤྱོད་དུ་གྱུར་པའི་གདུགས་ཐོགས་པ་ལའོ་ཞེས་བྱ་བ་སྨྲས་ཏེ། ལོངས་སྤྱོད་བྱེད་ཅིང་གདུགས་ཐོགས་པ་ལ་དངོས་གཞིར་འགྱུར་རོ། །བདག་གིར་བྱེད་པ་ཙམ་ལ་ནི་ཉེས་བྱས་སོ།།
སྦྱོར་བ་གཅིག་ཡིན་ན་ཤིན་ཏུ་ཡུན་རིང་པོར་ཐོགས་པ་ལ་ཡང་ལྟུང་བ་གཅིག་ཁོ་ནར་ཟད་དོ། །གང་ལ་མཆིལ་ལྷམ་གྱོན་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར། མཆིལ་ལྷམ་གྱོན་པ་ལའོ་ཞེས་བྱ་བ་སྨྲས་ཏེ། ལོངས་སྤྱོད་དུ་གྱུར་པའི་མཆིལ་ལྷམ་གྱོན་པ་ལ་ཁ་ན་མ་ཐོ་བ་འདིར་འགྱུར་རོ། །དབྱར་ཁང་དང་མལ་སྟན་བསྲུང་བའི་ཕྱིར་ནི་ལྟུང་བ་མེད་དོ་ཞེས་བྱ་བ་ནི། དབྱར་ཁང་དང་མལ་སྟན་ལ་བག་བྱ་བའི་ཕྱིར་མཆིལ་ལྷམ་གྱོན་པ་ལ་ནི་ལྟུང་བ་མེད་དོ། །དེ་ལས་གཞན་པ་ཐམས་ཅད་ལ་ནི་ལྟུང་བྱེད་ཁོ་ནར་འགྱུར་རོ། །གང་ལ་ཁྲིའུས་བསྙེན་བཀུར་བྱེད་དུ་འཇུག་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཁྲིའུའི་བསྙེན་བཀུར་ཉམས་སུ་མྱོང་བར་བྱེད་པ་ལའོ་ཞེས་བྱ་བ་སྨྲས་ཏེ། ཁྲི་ཚད་ཆུང་དུ་ནི་ཁྲིའུ་ཞེས་བྱ་སྟེ། དེ་ལ་བདག་ཉིད་འདུག་ཏུ་འཇུག་པའི་བསྙེན་བཀུར་གང་ཡིན་པ་དེ་ཉམས་སུ་མྱོང་བར་བྱེད་པ་ལ་ཁ་ན་མ་ཐོ་བ་འདིར་འགྱུར་རོ། །འདི་ནི་སྦོམ་དགའ་མོ་དགེ་སློང་མ་རྣམས་ལ་སྟོན་པར་བྱེད་ཅིང་དེས་དགེ་སློང་མ་འོངས་ཤིང་ལྷགས་པ་རྣམས་ལ་ཁོ་མོའི་ཕྱིར་ཕྱོགས་ག་གེ་མོ་ཞིག་ཏུ་ཁྲིའུ་ཤོམས་ལ་འདུག་ཏུ་ཆུ་གཤིག་ཅེས་བསྒོ་ཞིང་ཡང་ཕྱོགས་ག་གེ་མོ་ཞིག་དང་གནས་ཁང་གི་ཉེན་ཀོར་དང་ཁྱམས་དང་སྒོ་ཁང་དང་ཡང་ཐོག་དང་ཁང་སྟེང་ངམ་ཆེ་གེ་མོ་ཞིག་ཏུ་ཁྲིའུ་ཁྱེར་ལ་ཁོ་མོ་འདུག་ཏུ་ཆུག་ཤིག་ཅེས་ཟེར་བ་ལས་བཅས་པ་ཡིན་ཏེ། དེས་ཁྲིའུས་བསྙེན་བཀུར་བྱེད་དུ་འཇུག་པའི་ངོ་བོ་ཉིད་ཀྱང་བསྟན་བ་ཡིན་ནོ། །ལོངས་འཆོས་པ་ཉིད་ལས་གྱུར་པའི་ལྟུང་བྱེད་གསུམ་མོ་ཞེས་བྱ་བ་གདུགས་ཐོགས་པའི་ལྟུང་བྱེད་དང༌། མཆིལ་ལྷམ་གྱོན་པའི་ལྟུང་བྱེད་དང༌། ཁྲིའུས་བསྙེན་བཀུར་བྱེད་དུ་འཇུག་པའི་ལྟུང་བྱེད་གསུམ་བཤད་ཟིན་ཏོ།། །།གང་ལ་ཐུག་ཐུབ་ཏུ་ཕྱིས་གནོན་བྱེད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཁྱིམ་གཞན་དུ་མ་བསྒོ་བར་སྟན་ལ་འདུག་པ་ལའོ་ཞེས་བྱ་བ་སྨྲས་ཏེ། གང་གི་ཚེ་ཁྱིམ་གཞན་དུ་བདག་པས་མ་བསྒོ་བར་དེར་སྟན་ལ་འདུག་པ་ལ་ཐུག་ཐུབ་ཏུ་ཕྱིས་གནོན་བདེ་བའི་ལྟུང་བྱེད་དུ་འགྱུར་རོ། །ཐུག་ཐུབ་ཏུ་ཞེས་བྱ་བ་ནི། བཙན་ཐབས་སུའོ། །ཕྱིས་གནོན་བྱེད་པ་ཞེས་བྱ་བ་ནི་ཟིལ་གྱིས་གནོན་ཅིང་འདུག་པ་ལའོ། །དེ་ལས་ལྟུང་བྱེད་གང་འབྱུང་
བ་དེ་ནི་དེ་སྐད་ཅེས་བྱའོ། །རྩྭའི་ཆུན་བོ་དང་ཤིང་གི་དུམ་བུ་དང༌། སོ་ཕག་ལ་སོགས་པ་འདུག་པར་བྱ་བའི་ཆེད་དུ་ཕྱི་རོལ་དུ་བཤམས་པ་དེ་དག་ལ་འདུག་པ་ལ་ནི་ལྟུང་བ་མེད་དེ་ཐུག་ཐུབ་མ་བྱས་པའི་ཕྱིར་རོ། །མ་བཤམས་པ་ལ་འདུག་པ་ལ་ནི་ཉེས་བྱས་སོ། སོག་མའི་བུར་མ་ལ་སོགས་པ་རས་ཀྱིས་དཀྲིས་པའི་སྟན་འདུག་པར་བྱ་བའི་ཆེད་དུ་བོར་བདེ་ལ་འདུག་པ་ལ་ཡང་ཉེས་བྱས་སོ། །མ་བོར་བདེ་ལ་ནི་ཁ་ན་མ་ཐོ་བ་ཡོངས་སུ་རྫོགས་པར་འགྱུར་རོ། །སྟན་ནི་ཆེས་དཀའ་བ་ཡིན་པའི་ཕྱིར་དང་རྩྭའི་ཆུན་པོ་ལ་སོགས་པ་ནི་མི་དགོས་པ་དང་འདྲ་བ་ཉིད་ཡིན་པའི་ཕྱིར་རོ། །འདིར་སྟན་ཞེས་སྨོས་པས་ནི། །ཁྱིམ་པའི་མལ་སྟན་ཡང་བསྡུས་པ་ཡིན་ཏེ། དེ་ལ་འདུག་པ་དང་ཉལ་བ་དག་ལ་ཡང་ཁ་ན་མ་ཐོ་བ་རྫོགས་པར་འགྱུར་ཏེ། ཐུག་ཐུབ་ཅེས་ཤིན་ཏུ་ཆེ་བ་ཉིད་ཡིན་པའི་ཕྱིར་རོ། །ཐུག་ཐུབ་ཏུ་ཕྱིས་གནོན་བྱེད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་ཁྱིམ་པ་ལ་ལོག་ཐབས་བྱེད་པའི་ལྟུང་བྱེད་དུ་དུ་འགྱུར་ཞེ་ན་དེའི་ཕྱིར། ཆོས་ཉན་དུ་གཞུག་པའི་གནས་སྐབས་སུ་ཁྱིམ་པའི་སྟན་སྤྱད་པའི་ཁྱིམ་པ་ལ་མ་སྦྲན་པར་བོར་ཏེ་འགྲོ་བ་ལའོ་ཞེས་བྱ་བ་སྨྲས་ཏེ། ཆོས་ཉན་དུ་འཇུག་པའི་ཚེ་ཁྱིམ་པའི་སྟན་ཡོངས་སུ་སྤྱད་པ་ཁྱིམ་པ་ལམ་སྦྲན་པར་བོར་ཏེ། འགྲོ་བ་ལ་ཁ་ན་མ་ཐོ་བ་འདིར་འགྱུར་རོ། །འདི་ནི་སྦོམ་དགའ་མོ་ཁྱིམ་བདག་གི་ཁྱིམ་དག་ཏུ་སོང་སྟེ་ཁྱིམ་བདག་གི་ཆུང་མ་དག་གིས་སྟན་དག་བཤམས་པ་ན་དེ་དེ་ལ་འདུག་སྟེ། རྒྱ་ཆེར་ཆོས་སྟོན་པར་བརྩམས་པ་དང་ཁྱིམ་བདག་གི་ཆུང་མ་དག་འདི་སྙམ་དུ་ལས་བྱེད་པ་ཞིག་གོ་སྙམ་ནས་ལངས་ཏེ་དོང་བའི་ཚེ། དེས་ཀྱང་སྟན་དག་མ་སྦྲན་པར་གཅིག་བུ་ལངས་ཏེ་སོང་བ་དང་སྟན་དེ་དག་རྐུན་པོ་དག་གིས་ཁྱེར་ནས་ཁྱིམ་མི་དག་གིས་སྟན་བཙལ་ན་མ་རྙེད་དེ་སྦོམ་དགའ་མོ་ལ་འཕགས་མ་སྟན་དག་ཅིར་བགྱིས་ཞེས་དྲིས་བ་དང༌། དེས་སྨྲས་པ་ཇི་ལྟར་ཁྱེད་ཅག་གིས་ཁོ་མོ་ལ་མ་སྦྲན་པར་དོར་བ་བཞིན་དུ་ཁོ་མོ་ཡང་དེ་བཞིན་ནོ་ཞེས་ཟེར་བའི་གཞི་དེ་ལས་བཅས་པ་ཡིན་ནོ། །འདི་ནི་སྙིང་ནས་ལོག་ཐབས་བྱེད་པ་ཉིད་ལ་རྣམ་པར་གཞག་གོ །རབ་ཏུ་བྱུང་བ་འདི་པ་དང་ཕྱི་རོལ་བའི་རབ་ཏུ་བྱུང་
བ་དབང་པ་ཉིད་ལ་ནི་ཉེས་བྱས་སོ། །གང་གི་ཚེ་དངོས་གཞིར་འགྱུར་བའི་སོང་བའི་མཐར་ཐུག་པ་ཡིན་ཞེ་ན་དེའི་ཕྱིར། སྤངས་པའི་ཉེན་ཀོར་གྱི་མཐའ་ལའོ་ཞེས་བྱ་བ་སྨྲས་ཏེ། སྔར་གནས་མ་ལ་སྤངས་ཏེ་འགྲོ་བའི་ཉེན་ཀོར་གྱི་མཐའ་བསྟན་པ་གང་ཡིན་པ་དེ་ཉིད་འདིའི་ཉིན་ཀོར་གྱི་མཐའ་ཡིན་པར་རིག་པར་བྱ་སྟེ། འདོམ་བཞི་བཅུ་རྩ་དགུ་ཚུན་ཆད་ནི་དེའི་ཉེན་ཀོར་ཡིན་ནོ་ཞེས་བྱ་བ་ལ་སོགས་པ་ཡིན་ནོ། །ཁྱིམ་པ་ལ་ལོག་ཐབས་བྱེ་ན་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ད་འདི་མན་ཆད་ནི་ཁྱིམ་པ་མོའི་བཟོ་སྟོན་པའི་ལྟུང་བྱེད་གསུམ་སྟོན་ཏོ། །དེ་གང་ལ་སྐུད་པ་འཁལ་བའི་ལྟུང་བྱེད་དུ་འགྱུར་ཞེན་དེའི་ཕྱིར། སྐུད་པ་འཁལ་བ་ལའོ་ཞེས་བྱ་བ་སྨྲས་ཏེ། རྒྱུད་ཀྱི་རང་བཞིན་གང་ཡང་རུང་བ་བསྒྲུབ་པ་བྱས་ན་སྐུད་པ་བཀལ་བ་ཉིད་ཡིན་ཏེ། དེ་ལ་ཁ་ན་མ་ཐོ་བ་འདིར་འགྱུར་རོ། །འདི་ལྟར་རྣམ་པར་འབྱེད་པ་ལས་བདུན་པོ་དག་ལས་གང་ཡང་རུང་བཞེས་གསུངས་མོད་ཀྱི་དེ་ནི་དཔེ་ཙམ་དུ་ཟད་དེ་རུང་བམ་ཡིན་པའི་སྐུད་པ་འཁལ་བ་ལ་ཡང་ཐམས་ཅད་དུ་བཟོ་སྟོན་པའི་ཉེས་པ་འདྲ་བའི་ཕྱིར་རོ། །རྒྱ་ཅང་དང་ལྕག་པོད་ཀྱི་དོན་དུ་དབེན་པའི་ཕྱོགས་སུ་ནི་ལྟུང་བ་མེད་དོ་ཞེས་བྱ་བ་ནི། རྒྱ་ཅང་དང་ལྕག་བོད་ལ་སོགས་པ་ནི་སྐ་རགས་ཀྱི་རྣམ་པ་སྟེ་དེའི་ཆེད་དུ་ཆོས་དང་ལྡན་པའི་དགོས་པའི་དབང་གིས་དབེན་པའི་ཕྱོགས་སུ་སྐུད་པ་འཁལ་བ་ལ་ནི་ལྟུང་བ་མེད་དོ། །ཁྱིམ་པ་མོའི་བཟོ་སྟོན་པའི་ལྟུང་བྱེད་གསུམ་ཞེས་སྨོས་པ་ལ་དེ་དག་གི་དབང་པོ་ནི་སྐུད་པ་འཁལ་བའོ། །གཉིས་པ་ནི་ཁྱིམ་གྱི་བྱ་བ་བྱེད་པའོ། །གསུམ་པ་ནི་རྗེན་པ་འཚོད་པ་ལ་ཞེས་བྱ་བའོ། །དེ་ལ་དེ་དག་གི་དང་པོ་སྐུད་པ་འཁལ་བ་ཞེས་བྱ་བ་ནི་བཤད་ཟིན་ཏོ།། །།ལྷག་མ་གཉིས་པོ་དག་བརྗོད་པར་བྱ་བ་ཡིན་མོད་ཀྱི་སྐབས་འདིར་དེ་གཉིས་མི་བརྗོད་པར་དགེ་སློང་མའི་ཚོགས་ཀྱི་གོས་བདག་གིར་བྱེད་པའི་ལྟུང་བྱེད་དང༌། ཟས་འཚོད་བའི་ལྟུང་བྱེད་ཅེས་བྱ་བ་གཞན་གཉིས་བརྗོད་པར་བྱ་སྟེ། འདི་ལྟར་སྐུད་པ་དང་གོས་གཉིས་ནི་རྣམས་སུ་བྱ་བའི་རྒྱུ་དང་འབྲས་བུའི་ངོ་བོ་ཉིད་དུ་འབྲེལ་བའི་ཕྱིར་དང་རྣམ་པར་བསྒྲུབ་པར་འདྲ་བའི་ཕྱིར་ཏེ། ཇི་ལྟར་སྐུད་བ་འཁལ་བས་རྣམ་པར་བསྒྲུབ་པ་ཡིན་པ་དེ་བཞིན་དུ་
དགེ་སློང་མའི་ཚོགས་ཀྱི་གོས་བདག་གིར་བྱེད་པ་ཡང་དེ་དང་འདྲ་བའི་ཕྱིར་སྐུད་པ་འཁལ་བའི་འོག་ཏུང་གེ་སློང་མའི་ཚོགས་ཀྱི་གོས་བདག་གིར་བྱེད་པ་རྣམ་པར་གཞག་གོ །དགེ་སློང་མའི་ཚོགས་ཀྱི་གོས་བདག་གིར་བྱེད་པའི་ལྟུང་བྱེད་ཀྱི་འོག་ཏུ་ཟས་འཚོང་བའི་ལྟུང་བྱེད་བརྗོད་པར་བྱ་སྟེ། དེ་གཉིས་ཀྱང་རྣམ་པར་བསྒྲུབས་པར་འདྲ་བ་ཁོ་ན་ཡིན་ཏེ། ཇི་ལྟར་དགེ་སློང་མའི་ཚོགས་ཀྱི་གོས་བདག་གིར་བྱེད་པས་ནོར་རྣམ་པར་བསྒྲུབས་པར་འགྱུར་བ་དེ་བཞིན་དུ་ཟས་འཚོང་བས་ཀྱང་ནོར་རྣམ་པར་བསྒྲུབས་པའི་ཕྱིར་རོ། །ད་ནི་དེ་གཉིས་ཀྱི་དང་པོ་ཇེ་བསྟན་པར་བྱ་སྟེ། གང་ལ་དགེ་སློང་མའི་ཚོགས་ཀྱི་གོས་བདག་གིར་བྱེད་པའི་ལྟུང་བྱེད་དུ་འགྱུར་ཞེན་དེའི་ཕྱིར། དགེ་སློང་མའི་ཆོགས་ཀྱི་གོས་བདག་གིར་བྱེད་པ་ལའོ་ཞེས་བྱ་བ་སྨྲས་ཏེ། དགེ་སློང་མ་རྣམས་ཀྱི་གོས་བདག་གིར་བྱེད་པ་ལ་ཁན་མ་ཐོ་བ་འདིར་འགྱུར་རོ། །འདི་ནི་དགེ་སློང་མ་སྦོམ་དགའ་མོས་བཙུན་མོ་ཕྲེང་ལྡན་མ་ལ་བཅོམ་ལྡན་འདས་ཀྱིས་བདག་ཅག་ལ་སྨེ་གབ་འཆང་བར་རྗེས་སུ་གནང་ན་བདག་ཅག་ལ་མི་བདོག་གིས་དེ་ཁྱོད་ཀྱིས་སྩལ་བར་རིགས་སོ་ཞེས་སྨྲས་པ་དང༌། དེས་གོས་ཀྱི་སྦྲོག་མ་ཐམས་ཅད་དགེ་སློང་མ་རྣམས་ལ་བྱིན་པ་དེ་སྦོམ་དགའ་མོས་བདག་གིར་བྱས་སོ། །དེ་ནས་དགེ་སློང་མ་རབ་ཏུ་མང་པོ་དག་གིས་སྦོམ་དགའ་མོ་ལ་བསླངས་པ་དང༌། དེས་མ་སྟེར་བའི་གླེང་གཞི་ལས་བཅས་པ་ཡིན་ནོ། །འདི་ལ་མ་བྱིན་པར་ལེན་པ་ལས་གྱུར་བའི་ཁ་ན་མ་ཐོ་བར་ནི་མི་འགྱུར་ཏེ། བདག་གིས་བསླངས་ཤིང་བདག་གིས་ཐོབ་པ་ཉིད་བདག་གིར་བྱེད་པ་བྱུང་བའི་ཕྱིར་རོ། །ཚུལ་ཁྲིམས་འདི་ནི་ཡང་དག་པར་ན་བསྔོས་པ་ལས་བསྒྱུར་བའི་གཟུགས་བརྙན་དུ་གྱུར་པ་ཡིན་ཏེ། འདི་ལྟར་བསྔོས་པ་ལས་གྱུར་པའི་ཞེས་བྱ་བ་ནི། གཞན་ལ་བསྔོས་པ་གཞན་ལ་བསྒྱུར་བ་ཡིན་ལ། འདི་ནི་གཞན་ལ་ཡང་བྱིན་པའི་རྫས་བདག་ཁོ་ནས་བདག་གིར་བྱེད་པ་ཡིན་པས་དེ་དང་འདྲ་བའི་ཕྱིར་དེའི་གཟུགས་བརྙན་ཞེས་བྱའོ། །འདིར་ཚོགས་ཞེས་བྱ་བའི་སྒྲ་ནི་དགེ་འདུན་ལ་བྱ་སྟེ། དེ་ལྟར་ཡང་རྣམ་པར་འབྱེད་པ་ལས་ཚོགས་ཀྱི་གོས་ནི་དགེ་འདུན་གྱིའོ་ཞེས་གསུངས་པ་ཡིན་ནོ། །
གཅིག་གམ་གཉིས་སམ་གསུམ་གྱི་ལ་ནི་ཉེས་བྱས་སོ། །དགེ་སློང་མའི་ཚོགས་ཀྱི་གོས་བདག་གིར་བྱེད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་ཟས་འཚོང་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཟས་བཙོང་བ་བྱས་པ་ལའོ་ཞེས་བྱ་བ་སྨྲས་ཏེ། མར་དང་འབྲས་ཆན་དང་འབྲུ་མར་ལ་སོགས་པའི་ཟས་ཅི་ཙམ་ཡང་རུང་བ་བཙོངས་ན་དེ་ལ་ཁན་མ་ཐོ་བ་འདིར་འགྱུར་རོ། །ཚོང་བྱས་ཟིན་ན་དངོས་གཞིའོ། །དེའི་མདུན་རོལ་དུ་ནི་ཉེས་བྱས་སོ། །གལ་ཏེ་ཁེ་སྦོགས་ཀྱི་ཕྱིར་ཚོང་བྱེད་ན་ནི་སྤོགས་ཕྱིན་པའི་དུས་ན་ཡང་སྦང་བར་ཡང་འགྱུར་རོ། ཟས་འཚོང་བའི་ལྟུང་བྱེད་དེ་ཞེས་བྱ་བ་དེ་བཤད་ཟིན་ཏོ།། །།སྐབས་སུ་བཤད་པའི་ལྟུང་བྱེད་གཉིས་བསྟན་ནས་ད་ནི་ཁྱིམ་པ་མོའི་བཟོ་སྟོན་པའི་ལྟུང་བྱེད་གཉིས་པ་བརྗོད་པར་བྱ་སྟེ། གང་ལ་ཁྱིམ་གྱི་བྱ་བ་བྱེད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཁྱིམ་གྱི་བྱ་བ་ཡང་ངོ་ཞེས་བྱ་བ་སྨྲས་ཏེ། བྱས་པ་ལའོ་ཞེས་རྗེས་བསྙགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །ཁྱིམ་གྱི་བྱ་བ་ཞེས་བྱ་བ་ནི་འཕྲལ་གྱི་བྱ་བ་འདི་ལྟ་སྟེ། ཁྱིམ་དུ་ཆག་ཆག་གདབ་པ་དང་ཕྱག་དར་བྱ་བ་དང༌། བཅའ་བ་དང་བཟའ་བ་དང་བཏུང་བ་དང་བལྡག་པ་ལ་སོགས་པ་གཡོ་བ་དང་ལག་པ་དང་རྐང་པ་ལ་སོགས་པ་བཀྲུ་བ་དང༌། རིགས་ཀྱི་ལྷ་རྣམས་བརྗེད་པ་དང༌། བདུག་སྤོས་དང༌། གཏོར་མའི་ལས་བྱ་བ་དང༌། དྲ་བ་དང་སྐམ་པ་དང༌། མལ་ཆ་དང་སྟན་སྦྲུག་པ་དང༌། གཞག་པ་དང་བཤམ་པ་ལ་སོགས་པ་དང༌། མཆིལ་ལྷམ་དང་ཁྲུས་རས་དབུལ་བ་དང༌། གོས་བཟུང་བ་དང་ཁྲུས་ཀྱི་གོས་དབུལ་བ་ལ་སོགས་པ་སྟེ། དེ་དག་ཅི་ཙམ་བྱས་ཀྱང་རུང་སྟེ་བྱས་པ་ཉིད་ཡིན་ནོ། །ཆང་གི་ལས་མི་བྱའོ་ཞེས་བྱ་བ་ནི། མནན་བ་ལ་སོགས་པ་ཆང་གི་ཡོ་བྱད་ཀྱི་ལས་ནི་ཆང་གི་ལས་ཏེ། དགེ་སློང་མས་དེ་མི་བྱའོ། །མདོ་འདི་དང་མདོ་འོག་མ་ནི་ཕྲན་ཚེགས་དག་ལས་འབྱུང་ངོ༌། །ཆང་ཁང་བྱེད་དུ་མི་གཞུག་གོ་ཞེས་བྱ་བ་ནི། ཆང་ཁང་ཞེས་བྱ་བ་སྟོན་པ་གཞན་བྱེད་དུ་ཡང་མི་གཞུག་པ་སྟེ་རང་གིས་བྱེད་པ་ལ་ནི་ཁ་ན་མ་ཐོ་བ་ཆེས་ཤིན་ཏུ་ལྕི་བའི་ཕྱིར་དེ་ཡང་བཀག་པར་རིག་པར་བྱའོ། །ཁྱིམ་པ་མོའི་བཟོ་སྟོན་པའི་ལྟུང་བྱེད་གསུམ་
པ་བརྗོད་པར་བྱ་སྟེ། གང་ལ་རྗེན་པ་འཚོད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། རྗེན་པ་འཚོད་པ་ལའོ་ཞེས་བྱ་བ་སྨྲས་ཏེ། རྗེན་པ་ཞེས་བྱ་བ་ནི་སྔར་དགེ་སློང་གིས་བཙོས་པའི་སྐབས་སུ་མི་སྙི་བ་རྣམས་ཀྱི་ནི་སུམ་ཆབ་ངས་པ་ཉིད་ཀྱི་མདུན་རོལ་དུ་དེ་ཉིད་ཡིན་ནོ། །སྙི་བ་རྣམས་ཀྱི་ནི་ཁ་དོག་ཏུ་གྱུར་པའིའོ། །ཁུ་བ་རྣམས་ཀྱི་ནི་ལན་གཉིས་ཁོལ་བར་གྱུར་པའིའོ་ཞེས་སྨོས་པ་ཡིན་ཏེ། རྗེན་པ་དེ་ལྟ་བུ་བཙོས་ན་དངོས་གཞིའོ། །དགེ་སློང་གི་དགེ་འདུན་དང་མཁན་པོ་དང་སློབ་དཔོན་དང་ཚངས་པ་མཚུངས་པ་སྤྱོད་པ་རྣམས་ཀྱི་ཕྱིར་དབེན་པའི་ཕྱོགས་སུ་ནི་ལྟུང་བ་མེད་དོ་ཞེས་བྱ་བ་ནི། དེ་དག་གི་ཆེད་དུ་ཆོས་དང་ལྡན་པའི་དོན་གྱི་དབང་གིས་དབེན་པའི་ཕྱོགས་སུ་འཚོད་པ་ལ་ནི་ལྟུང་བ་མེད་པར་རིག་པར་བྱའོ། །ཚངས་པ་མཚུངས་པར་སྤྱོད་པ་ཞེས་སྨོས་པས་ནི་རབ་ཏུ་བྱུང་བ་འདི་བ་ཐམས་ཅད་བསྡུའི་ཁྱིམ་པ་ནི་མ་ཡིན་ནོ། །ཁྱིམ་པ་མོའི་བཟོ་སྟོན་པ་ལས་གྱུར་པའི་ལྟུང་བྱེད་གསུམ་མོ་ཞེས་བྱ་བ་སྐུད་པ་འཁལ་བའི་ལྟུང་བྱེད་དང༌། ཁྱིམ་གྱི་བྱ་བ་བྱེད་པའི་ལྟུང་བྱེད་དང༌། རྗེན་པ་འཚོད་པའི་ལྟུང་བྱེད་གསུམ་བཤད་ཟིན་ཏོ།། །།གང་ལ་ལྟེ་འདུན་ལས་གྱུར་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཟས་ཟོས་ནས་སྟན་ལས་ལངས་ཏེ་ཡང་ཟབ་ལའོ་ཞེས་བྱ་བ་སྨྲས་ཏེ། ཟས་ཀྱི་བྱ་བ་བྱས་པ་ན་སྟན་ལས་ལངས་ཏེ་སྟན་བཏང་བའི་འོག་ཏུ་ཡང་ཟས་ཟ་བར་བྱེད་པ་དེ་ལ་ཁ་ན་མ་ཐོ་བ་འདིར་འགྱུར་རོ། །ལྷག་པོར་མ་བྱས་པ་ཟ་བའི་ལྟུང་བྱེད་དང༌། འདི་ལ་བྱེ་བྲག་ཅི་ཡོད་ཅེ་ན་བྱེ་བྲག་ཡོད་དེ། ལྷག་བོར་མ་བྱས་པར་ཟ་བ་ཞེས་བྱ་བ་ནི་ཟས་ཟོས་ཟིན་ནས་དེ་དེ་ལས་མི་བཟའོ་ཞེས་སྤངས་ཏེ་སྟན་ལས་ལངས་པའི་འོག་ཏུ་ལྷག་པོར་མ་བྱས་པར་ཟ་བ་ལ་ཁ་ན་མ་ཐོ་བ་འདིར་འགྱུར་རོ། །འདི་ནི་ཟས་གཅིག་ཁོ་ན་ལ་ཟ་ཞིང་ལངས་ཏེ་འཆག་པ་དང་ཡང་ཟ་ཞིང་ལངས་ཏེ་འཆག་པ་ལ་ཁ་ན་མ་ཐོ་བ་འདིར་འགྱུར་བར་གཞག་པ་ཡིན་ནོ། །དེ་ཉིད་ལ་སྤངས་ཤིང་ལྷག་པོར་མ་བྱས་པར་ཟན་ནི་ལྟུང་བ་གཉི་ག་ཡང་དུས་གཅིག་ཏུ་འབྱུང་ངོ༌། །འདི་ནི་སྦོམ་དགའ་མོས་ནང་པར་སྔར་ལངས་ཏེ་བསོད་སྙོམས་བླངས་ནས་རང་གི་ཉེན་ཀོར་དུ་གཞག་སྟེ། ལྷུང་བཟེད་ཡང་བླངས་ཡང་བླངས་ཡང་ཟོས་ཡང་ཟོས་ཤིང་འཆག་པར་བྱེད་བཅགས་ནས་ཡང་ཟ་བར་བྱེད་ཡང་འཆག་པར་བྱེད་
ཡང་ཟ་བར་བྱེད་ཅིང་དྲོ་ཀའི་བར་དུ་མ་སྤངས་བར་དེ་ལྟར་བྱེད་པ་ལས་བཅས་པ་ཡིན་ཏེ་དེ་ཉིད་ལྟོ་འདུན་ལས་འགྱུར་པ་ཡིན་ནོ། །གལ་ཏེ་དགེ་སློང་དེ་ལྟར་བྱེད་ན་ནི་ཉེས་བྱས་སོ། །ལྟོ་འདུན་ཞེས་བྱ་བའི་སྒྲ་ནི་གདུ་བ་དང་བརྐམ་ཆགས་ཆེ་བ་ཞེས་བྱ་བའི་ཐ་ཚིག་གོ །ལྟོ་འདུན་ལས་གྱུར་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་ཚོགས་པར་དབྱུང་བ་མ་ཡིན་པའི་དྲི་བསྟེན་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་སྒོག་སྐྱའོ་ཞེས་བྱ་བ་དེ་སྨྲས་ཏེ། ཟ་བ་ལའོ་ཞེས་བྱ་བར་སྦྱར་རོ། །སྒོག་སྐྱ་ཅི་ཙམ་ཟོས་ཀྱང་རུང་སྟེ་ལྟུང་བྱེད་དུ་འགྱུར་རོ། །ན་བའི་ཕྱིར་ནི་ལྟུང་བ་མེད་དོ། །ཀུན་དོང་དང་ཀིའུ་དག་ཟ་བ་ལ་ནི་ཉེས་བྱས་སོ། །ཚོགས་པར་དབྱུང་བ་མ་ཡིན་པའི་དྲི་བསྟེན་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ད་འདི་མན་ཆད་ནི་བསུ་བེལ་བ་ལས་གྱུར་བའི་ལྟུང་བྱེད་གསུམ་སྟོན་ཏེ། དེ་ལ་གང་ལ་སྨེ་གབ་མི་འཆང་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར་སྨེ་གབ་མི་འཆང་བ་ལའོ་ཞེས་བྱ་བ་སྨྲས་ཏེ། ཟླ་མཚན་འཛག་པའི་དུས་སུ་མངལ་གྱི་སྒོར་སྨེ་གབ་ཅེས་བྱ་བ་གོས་ངན་མི་འདོགས་པ་ལ་ཁ་ན་མ་ཐོ་བ་འདིར་འགྱུར་རོ། །སྨེ་གབ་བཅང་བ་འདི་ནི་ཤམ་ཐབས་ལ་སོགས་པའི་གོས་གྱོན་ཞིང་སྣང་བ་ཁྲག་གིས་མ་རུང་བར་འགྱུར་བ་སྤང་བའི་ཕྱིར་རོ། །བསུ་བེལ་བ་ཞེས་བྱ་བ་ནི་གོས་མ་རུང་བར་གྱུར་པ་དེ་ཁྱིམ་པའམ་རབ་ཏུ་བྱུང་བ་གཞན་དག་གིས་ཚོར་བ་ལ་བྱའོ། །དེ་ཐག་གུས་བཏགས་ཏེ་བཞག་གོ་ཞེས་བྱ་བ་ནི། སྨེ་གབ་དེ་ཐག་གུས་རྐེད་པ་ལ་བཏགས་ཏེ་མངལ་གྱི་སྒོར་གཞག་པར་བྱའོ། །དེ་དུས་སུ་བཀྲུ་བ་དང་ཁ་བསྒྱུར་བར་བྱའོ་ཞེས་བྱ་བ་ནི། སྨེག་བ་དེའོ། །མདོ་དེ་གཉིས་ཀྱི་ལུང་ནི་ཕྲན་ཚོགས་དག་ལས་དགེ་སློང་དེ་ལྟ་བས་ན་དགེ་སློང་མས་སྨེ་གབ་དེ་བཞིན་བཅང་བར་མི་བྱ་བར་ཐག་གུས་རྐེད་པ་ལ་བཏགས་ཏེ་དེར་གླན་པར་བྱའོ། །དུས་དུས་སུ་བཀྲུ་བར་བྱ་ཁ་བསྒྱུར་བར་བྱའོ་ཞེས་གསུངས་པ་ཡིན་ནོ། །གང་ལ་ཆུ་གོས་མི་འཆང་བའི་ལྡང་བྱེད་དུ་འགྱུར་ཞེ་ན་དེའི་ཕྱིར། ཆུ་གོས་ཀྱང་ངོ་ཞེས་བྱ་བ་སྨྲས་ཏེ། མི་འཆང་བ་ལའོ་ཞེས་བྱ་བར་སྦྱར་རོ། །ཁྲུས་དང་ཆར་བའི་ཆུ་ལ་སོགས་པས་གང་གི་ཚེ་ལུས་གཤེར་བར་གྱུར་པ་དེའི་ཚེ་གང་གིས་ཆུ་གོས་མི་འཆང་མི་གྱོན་ཞིང་ངེས་ལུས་མི་འགེབས་
པ་ལ་ཁ་ན་མ་ཐོ་བ་འདིར་འགྱུར་རོ། །མདོམས་ཀྱི་སྤུ་མན་ཆད་ནས་པུས་མོའི་ལྷ་ང་ཡན་ཆད་ཀྱི་ཕྱོགས་མི་འགེབས་པ་ལ་དངོས་གཞིའོ། །གཉའ་བ་མན་ཆད་དང་ལོང་བུ་ཡན་ཆད་ཀྱི་ལུས་ཀྱི་ཕྱོགས་གཞན་མི་འགེབས་པ་ལ་ནི་ཉེས་བྱས་སོ། །འདི་ནི་དགེ་སློང་མ་རབ་ཏུ་མང་པོ་དག་བུད་མེད་ཁྱིམ་པ་མོ་དག་དང་ལྷན་ཅིག་ཆུ་ཀླུང་གནས་ཅན་གྱི་ནང་དུ་ཁྲུས་བྱེད་ཅིང་དེ་དག་ཁྲུས་བྱེད་པ་ན་བུད་མེད་དག་མཛུབ་མོས་གཏོད་ཅིང་རབ་ཏུ་བྱུང་བ་མེ་ཆེ་གེ་མོ་དག་གི་ནུ་མ་གཉིས་ནི་འདི་འདྲའོ། །ཆེ་གེ་མོ་ཞིག་གི་ལྟོ་བ་ནི་སྦྱར་ཀིའི་འདྲའོ། །ཆེ་གེ་མོ་ཞིག་གི་རྐེད་པ་ནི་སྦོམ་མོ། །ཆེ་གེ་མོ་ཞིག་གི་བརླ་ནི་གླང་པོ་ཆེའི་སྣ་འདྲའོ་ཞེས་ལུས་ཀྱི་ཡན་ལག་དང་གསང་བའི་ཕྱོགས་དག་གི་བརྗོད་པ་རྣམ་པ་མང་པོ་སྙད་འདོགས་པའི་གླེང་གཞི་ལས་བཅས་པ་ཡིན་ནོ། །འདིས་ནི་རོ་སྟོད་མ་གཡོགས་པའི་ཁ་ན་མ་ཐོ་བ་ཉིད་དུ་ཤེས་པར་བྱ་སྟེ། དེའི་ཕྱིར་དགེ་སློང་མ་རྣམས་ལ་དབྱར་གྱི་གོས་རས་ཆེན་མ་གསུངས་ཏེ་འདི་ཉིད་ཀྱིས་ཆོག་པའི་ཕྱིར་རོ། །དེ་གཉིས་བཅད་པར་བྱའོ་ཞེས་བྱ་བ་ནི། སྨེ་གབ་དང་ཆུ་གོས་དེ་གཉིས་བདོག་པས་བཅད་པར་བྱའོ། །གང་ལ་བཀྲུ་བཤལ་བ་ལ་གོས་འཁྲུར་འཇུག་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། བཀྲུ་བཤལ་བ་ལ་གོས་འཁྲུར་འཇུག་པ་ལའོ་ཞེས་བྱ་བ་སྨྲས་ཏེ། རང་གི་གོས་བྱིན་གྱིས་བརླབས་པ་རྙིང་པ་བཀྲུ་བར་འོས་པ་ཆོས་གོས་དང་གདིང་བ་དག་བཀྲུ་བཤལ་བ་ལ་འཁྲུར་འཇུག་པ་ལ་ཁ་ན་མ་ཐོ་བ་འདིར་འགྱུར་རོ། །འདིའི་བྱེ་བྲག་ཞིབ་ཏུ་ནི་འཁྲུར་འཇུག་པའི་སྦང་བའི་ལྟུང་བྱེད་ཀྱི་རྗེས་སུ་འབྲང་བ་ལས་ཤེས་པར་བྱའོ། །འདིར་གླེང་གཞི་ནི་དགེ་སློང་མ་བཅུ་གཉིས་སྡེ་དག་རྨི་ལམ་ན་གནོད་པ་མཐོང་བས་གོས་དག་ལ་གོས་པར་གྱུར་ནས། བཀྲུ་བཤལ་ལ་འཁྲུར་བཅུག་པ་དང༌། བཀྲུ་བཤལ་བ་དག་གིས་བླངས་ཏེ། ཁྱིམ་པའི་གོས་དག་དང་ལྷན་ཅིག་བཀྲུས་པ་ན་དེ་དག་གི་འཕགས་པས་ཁྱིམ་པའི་གོས་དཀར་པོ་དག་མི་གཙང་བས་མ་རུངས་པར་གྱུར་པ་དང་ཁྱིམ་པ་དགའ་བྱ་ཞིང་རབ་ཏུ་བྱུང་བ་དག་ནི་ཉེ་བར་མ་ཞིའོ་ཞེས་ཟེར་བའི་བར་ལས་བཅས་པ་ཡིན་ནོ། །ཕྱོགས་གཅིག་བཀྲུས་ན་ཡང་བཀྲུས་པ་ཉིད་ཡིན་ནོ། །བྱས་པ་ཉིད་ན་བྱེད་
དུ་བཅུག་པ་ཉིད་ཡིན་ནོ་ཞེས་བྱ་བ་དང་འབྲས་བུའི་མཐའ་ཚུན་ཆད་གཅིག་ཉིད་དོ་ཞེས་བྱ་བ་སྔར་བསྟན་པ་དག་ཀྱང་འདིར་དེ་བཞིན་དུ་རིག་པར་བྱའོ། །བཤད་པ་དང་གཅིག་བ་དང་ལྗན་ལྗིན་དང་འདམ་རྫབ་ལ་སོགས་པས་མ་རུངས་པ་འཁྲུར་བཅུག་པ་ཡང་ན་སྨད་པ་མེད་དོ། །གོས་ཁ་བསྒྱུར་བ་དང་མ་བསྒྱུར་བ་གཞན་བཙོ་བླག་མཁན་ལ་ཁ་བསྒྱུར་དུ་བཅུག་པ་ནི་ཅི་ལྟར་ཐོབ་པ་ལས་ཉེས་བྱས་སུ་རིག་པར་བྱའོ། །བསུ་བེལ་བ་ལས་གྱུར་པའི་ལྟུང་བྱེད་གསུམ་མོ་ཞེས་བྱ་བ་སྨེ་གབ་མི་འཆང་བའི་ལྟུང་བྱེད་དང༌། ཆུ་གོས་མི་འཆང་བའི་ལྟུང་བྱེད་དང༌། བཀྲུ་བཤལ་བ་ལ་གོས་འཁྲུར་འཇུག་པའི་ལྟུང་བྱེད་གསུམ་བཤད་ཟིན་ཏོ།། །།གང་ལ་ཆོས་ཀྱི་རྒྱལ་མཚན་ལ་མི་གུས་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། དགེ་སྦྱོང་གི་གོས་ཁྱིམ་པ་ལ་བགོ་བའི་ཕྱིར་སྦྱིན་པ་ལའོ་ཞེས་བྱ་བ་སྨྲས་ཏེ། དགེ་སྦྱོང་གི་གོས་སྣམ་སྦྱར་དང་བླ་གོས་ལ་སོགས་པ་ཁྱིམ་པ་ལ་བགོ་ཞིང་བསྐོན་པའི་ཕྱིར་སྦྱིན་པ་ལ་ཁ་ན་མ་ཐོ་བ་འདིར་འགྱུར་རོ། །སོ་སོར་ཐར་པའི་མདོ་ལས་བྱིན་ན་ཞེས་གསུངས་པ་དེའི་རྣམ་པར་འབྱེད་པ་ནི་བསྐོན་པར་བྱེད་ན་ཞེས་གསུངས་པ་ཡིན་ནོ། །ཚད་ནི་འཁོར་གསུམ་ཁེབས་པའི་མཐར་ཐུག་པ་ཡན་ཆད་ལ་ལྟུང་བྱེད་དོ། །ཁྲུ་གང་ཡན་ཆད་ལ་ནི་ཉེས་བྱས་སོ། །དེ་བས་ཆུང་བ་ལ་ནི་ལྟུང་བ་མེད་དོ། །བྱིས་པ་དག་བསྲུང་བའི་ཕྱིར་ཆོས་གོས་སྦྱིན་པར་རྗེས་སུ་གནང་བ་གང་ཡིན་པ་དེ་ལ་འཁོར་གསུམ་ཁེབས་པའི་མཐར་ཐུག་པ་བྱིན་པ་ལ་ནི་ལྟུང་བ་མེད་དོ། །ཆོས་ཀྱི་རྒྱལ་མཚན་ལ་མི་གུས་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །། གང་ལ་རྒྱལ་མཚན་བརྗེ་བའི་ལྟུང་བྱེད་དུ་འགྱུར་ཞེན་དེའི་ཕྱིར། དགེ་སློང་དང་ལྷན་ཅིག་སྣམ་སྦྱར་བརྗེ་བ་ལའོ་ཞེས་བྱ་བ་སྨྲས་ཏེ། དགེ་སློང་དང་སྣམ་སྦྱར་ཞེས་བྱ་བ་ཆོས་གོས་ཆེན་པོ་བརྗེ་བ་ལ་དངོས་གཞིའོ། །བླ་གོས་ལ་སོགས་པ་བརྗེ་བ་ལ་ནི་ཉེས་བྱས་སོ། །འདིར་ལེན་པ་ལ་ཁ་ན་མ་ཐོ་བ་འདིར་འགྱུར་གྱི་སྦྱིན་པ་ལ་ནི་མ་ཡིན་ནོ། །དེ་ལྟ་བས་ན་བཟང་ངན་བརྗེ་བ་མ་གཏོགས་པར་དགེ་སློང་ལ་སྣམ་སྦྱར་ལེན་པ་ལྟུང་བྱེད་དོ། །བརྗེ་བ་ཞེས་བྱ་བ་ནི་ལེན་པའི་དཔེ་ཙམ་དུ་ཟད་དོ། །རྒྱལ་མཚན་བརྗེ་བའི་ལྟུང་བྱེད་དུ་ཞེས་བྱ་བ་དེ་བཤད་ཟིན་ཏོ།། །།ད་འདི་མན་ཆད་ནི་སེར་སྣ་བྱེད་
པ་ལས་གྱུར་བའི་ལྟུང་བྱེད་ལྔ་སྟོན་ཏེ། དེ་ལ་གང་ལ་བསྔགས་པ་ལ་སེར་སྣ་བྱེད་པའི་ལྟུང་བྱེད་དུ་འགྱུར་ཞེན་དེའི་ཕྱིར། བསྔགས་པ་ལ་སེར་སྣ་བྱེད་པ་ལའོ་ཞེས་བྱ་བ་སྨྲས་ཏེ། དགེ་སློང་མ་གཞན་དག་གི་བསྔགས་པ་བརྗོད་པ་ན་ལུས་དང་ངག་གི་རྣམ་པར་འགྱུར་བ་མི་མཐུན་པར་གྱུར་པས་སེར་སྣ་བྱེད་པ་ལ་ཁ་ན་མ་ཐོ་བ་འདིར་འགྱུར་རོ། །ཡིད་ཙམ་གྱིས་སེར་སྣ་བྱེད་པ་ནི་བསྡམ་པར་བྱ་བ་ཉིད་ཡིན་ཏེ་ཉེས་བྱས་སོ། །ཐམས་ཅད་དུ་ཡང་བསྡམ་པར་བྱ་བ་ཞེས་བྱ་བ་ནི་ཡིད་ཀྱི་ཉེས་བྱས་ཡིན་པར་རིག་པར་བྱའོ། །བསླབ་པའི་གཞི་འོག་མ་བཞི་པོ་དག་ལ་ཡང་དེ་བཞིན་དུ་སྦྱར་བར་བྱའོ། །གང་ལ་ཁྱིམ་ལ་སེར་སྣ་བྱེད་པ་དང་གནས་ལ་སེར་སྣ་བྱེད་པ་དང་རྙེད་པ་ལ་སེར་སྣ་བྱེད་པ་དང༌། ཆོས་ལ་སེར་སྣ་བྱེད་པའི་ལྟུང་བྱེད་བཞིར་འགྱུར་ཞེན་དེའི་ཕྱིར། ཁྱིམ་པ་དང་གནས་དང་རྙེད་པ་དང་ཆོས་ལ་སེར་སྣ་བྱེད་པ་ལའོ་ཞེས་བྱ་བ་སྨྲས་ཏེ། འདིར་ཁྱིམ་ལ་སོགས་པ་རེ་རེ་ལ་སེར་སྣ་བྱེད་པ་ལའོ་ཞེས་བྱ་བར་སྦྱར་རོ། །འདིར་གླེང་གཞི་ནི་སྦོམ་དགའ་མོས། དགེ་སློང་མ་གཞན་དག་གི་ཡོན་ཏན་ཡང་དག་པར་བརྗོད་པ་ཐོས་པ་དང་སྨོད་པར་བྱེད་ནས་དེ་ལ་དགེ་སློང་མ་དག་གིས་འཕགས་མ་ཅིའི་ཕྱིར་སྨོད་པར་བྱེད་ཅེས་སྨྲས་པ་དང༌། སྦོམ་དགའ་མོས་སྨྲས་པ། ཁོ་མོ་ཤཱཀྱའི་རིགས་སུ་སྐྱེས་པ་སྡེ་སྣོད་གསུམ་དང་ལྡན་པ་ཡིན་ན་ཁོ་མོའི་བསྔགས་པ་མི་བརྗོད་པར་གཞན་དག་གི་བསྔགས་པ་བརྗོད་དོ་ཞེས་བྱ་བའི་བར་དང༌། སྦོམ་དགའ་མོས་དགེ་སློང་མ་གཞན་དག་ལ་ཁྱེད་ཅག་གིས་གང་ནས་བསོད་སྙོམས་བསོད་པ་རྙེད་ཅེས་དྲིས་པ་དང༌། དགེ་སློང་མ་རྣམས་ཀྱིས་ཐམས་ཅད་སྨྲས་པ་ན་སྦོམ་དགའ་མོ་སྨོད་ཅིང་དེ་དག་ཟློག་པར་བྱེད་དེ། ཁྱིམ་ག་གེ་མོ་ཞིག་ཏུ་ཁྱེད་ཅག་མ་འདོད་ཅིག་ཅེས་བྱ་བའི་བར་དང་སྦོམ་དགའ་མོས་དགེ་སློང་མའི་དབྱར་ཁང་བྱེད་དུ་བཅུག་ན་དེ་ནས་དགེ་སློང་མ་དག་གནས་ཤིང་བག་ཡངས་སུ་རྐང་བ་དག་གིས་འཆག་ཅིང་སྤྱོད་ལ། འོག་ཁང་གི་ཕྱོགས་གཞན་ཞིག་ན་སྦོམ་དགའ་མོ་གནས་པས་དེའི་ཚེ་སྦོམ་དགའ་མོ་དགེ་སློང་མ་དེ་དག་ལ་སྨོད་ཅིང་འདི་ལྟར་རྣམ་པར་འགྱུར་བར་བྱེད་འདི་རྣམ་པར་འགྱུར་བ་དག་
གིས་དྲེགས་ཤིང་འཆག་པ་དེ་དག་སུ་ཡིན་ཞེས་ཟེར་ནས་དགེ་སློང་མ་རྣམས་ཀྱིས་ཅི་འཕགས་མ་ཁྱོད་གནས་ལ་སེར་སྣ་བྱེད་དམ་ཞེས་སྨྲས་པ་དང༌། དེས་སྨྲས་པ། ཅིའི་ཕྱིར་ཁོ་མོ་མི་བྱེད་ཁོ་མོས་ཆོས་བཤད་དེ་ལྕེ་ལ་ཆུ་བུར་བྱུང་བྱུང་གི་བར་དུ་བསྒྲུབས་པ་ཡིན་ནོ་ཞེས་ཟེ་བའི་བར་དང་སྦོམ་དགའ་མོས་འདི་སྙམ་དུ་དགེ་སློང་མ་འདི་དག་སྔ་རབས་སུ་བསོད་སྙོམས་ལ་འཇུག་པས་དེ་ཁོ་མོས་རྙེད་པ་གལ་ཐོབ་སྙམ་ནས་ཟས་དང་གོས་ལ་གདུ་ཞིང་ཟས་དང་འབྲེལ་བའི་སེམས་ཀྱིས་མཚན་མོ་འདའ་བར་བྱེད་དོ་ཞེས་ཟེར་ཞིང་གཞན་དག་གིས་འགྲོ་བར་མ་བརྩམས་པའི་མདུན་རོལ་དུ་སྦོམ་དགའ་མོ་སྐྱ་རེངས་ཤར་བའི་དུས་ཀྱི་ཚེ་བསོད་སྙོམས་ལ་ཞུགས་པ་ན་བྲམ་ཟེས་མཐོང་ནས་མགོ་རེག་མོ་མཐོང་བ་བཀྲ་མི་ཤིས་སོ་ཞེས་ཟེར་ཏེ་བཟུང་ནས་ཤིན་ཏུ་བརྡེགས་སོ་ཞེས་བྱ་བའི་བར་དང་སྦོམ་དགའ་མོ་ལ་དགེ་སློང་མ་རྣམས་ཀྱིས་འཕགས་མས་བདག་ཅག་ལུང་དབོག་པར་འཚལ་ན་ལུང་དཔོག་ཏུ་གསོལ་ཞེས་གསོལ་བ་བཏབ་པ་དང༌། དེས་ཁོ་མོ་རོ་རྒྱབ་ནས་དུགས་གྱིས་ཤིག་ཅེས་ལས་བྱེད་དུ་བཅུག་པ་དང༌། དེ་དག་འདི་སྙམ་དུ་གང་གི་ཕྱིར་བདག་ཅག་ལ་ལུང་མི་དབོག་པ་ལས་ན་འཕགས་མ་ནི་ཆོས་ལ་སེར་སྣ་བྱེད་དོ་སྙམ་ནས། དེ་དག་གིས་དྲིས་པ་དང་དེས་སྨྲས་པ་དང༌། ཁོ་མོ་ཅིའི་ཕྱིར་མི་བྱེད་ཅེས་བྱ་བའི་བར་དུ་གསུངས་པ་ཡིན་ནོ། །སེར་སྣ་བྱེད་པ་ལས་གྱུར་པའི་ལྟུང་བྱེད་ལྔའོ་ཞེས་བྱ་བ་བསྔགས་པ་ལ་སེར་སྣ་བྱེད་པའི་ལྟུང་བྱེད་དང༌། ཁྱིམ་ལ་སེར་སྣ་བྱེད་པའི་ལྟུང་བྱེད་དང༌། གནས་ལ་སེར་སྣ་བྱེད་པའི་ལྟུང་བྱེད་དང༌། རྙེད་པ་ལ་སེར་སྣ་བྱེད་པའི་ལྟུང་བྱེད་དང༌། ཆོས་ལ་སེར་སྣ་བྱེད་པའི་ལྟུང་བྱེད་ལྔ་བཤད་ཟིན་ཏོ།། །།ད་འདི་མན་ཆད་ནི་སྐྲོད་པ་ལས་གྱུར་པའི་ལྟུང་བྱེད་གཉིས་སྟོན་ཏེ། དེ་ལ་གང་ལ་དབྱར་ཁང་ནས་སྐྲོད་པར་བྱེད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། དབྱར་ཁང་ནས་དགེ་སློང་མ་གང་ཡང་རུང་བས་སྐྲོད་པ་ལའོ་ཞེས་བྱ་བ་སྨྲས་ཏེ། གང་ཡང་རུང་བས་ཞེས་བྱ་བ་ནི་རང་གི་ལུས་དང་ངག་གམ་གཞན་ལ་བཅོལ་བའམ་སྤྲིང་ཡིག་ལ་སོགས་པའི་རྣམ་པ་གང་ཡང་རུང་བས་དགེ་སློང་མའི་དབྱར་ཁང་ནས་དགེ་སློང་མ་སྐྲོད་པར་བྱེད་པའི་དགེ་སློང་མ་དེ་ལ་ཁ་ན་མ་ཐོ་བ་
འདིར་འགྱུར་རོ། །འདི་ནི་སྦོམ་དགའ་མོས་དགེ་སློང་མ་སྔ་ན་འཁོད་པ་དག་རྐང་པ་དང་ལག་པ་དག་གིས་མནན་པ་དང་དེ་དག་གིས་སྨྲས་པ་འཕགས་མ་ཅིའི་ཕྱིར་གནོད་པར་བྱེད། དེས་སྨྲས་པ། སུ་ལ་གནོད་པ་དེ་དག་འགྲོ་ལ་རག་གོ །དེ་དག་འདི་སྙམ་དུ་གལ་ཏེ་ན་སྲོག་དང་ཕྲལ་བར་འོང་ངོ་སྙམ་ནས་སྟན་ལས་ལངས་ཤིང་ཐམས་ཅད་དོང་པ་ལས་བཅས་པ་ཡིན་ནོ། །དེ་ལྟར་གང་ཡང་རུང་བས་སྐྲོད་པ་ལ་ཁ་ན་མ་ཐོ་བ་འདིར་འགྱུར་རོ། །ལྷག་མ་ནི་དགེ་སློང་སྒྲོད་པའི་ལྟུང་བྱེད་ཀྱི་སྐབས་སུ་གལ་ཏེ་དེ་ལ་གནོད་པ་དང་དགེ་འདུན་འཁྲུག་པར་འགྱུར་བ་མ་ཡིན་ནའོ་ཞེས་བྱ་བ་ལ་སོགས་པ་སྔར་བསྟན་པ་བཞིན་དུ་སྦྱར་རོ། །གང་ལ་ཁྱིམ་གཞན་ནས་སྐྲོད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཁྱིམ་གཞན་ནས་དགེ་སློང་མ་སྔ་ན་གནས་པ་སྐྲོད་པ་ལའོ་ཞེས་བྱ་བ་སྨྲས་ཏེ། ཁྱིམ་པའི་ཁྱིམ་གཞན་སྔ་ན་གནས་པའི་དགེ་སློང་མ་ཐབས་གང་ཡང་རུང་བས་སྐྲོད་པ་ལ་ཁ་ན་མ་ཐོ་བ་འདིར་འགྱུར་རོ། །ཕྱིས་འོངས་པ་ནི་དེར་གཏོགས་པའི་ཤས་ཆུང་བས་དེ་སྐྲོད་པ་ལ་ནི་ཉེས་བྱས་སུ་ཤེས་པར་བྱའོ། །སྐྲོད་པ་ལས་གྱུར་པའི་ལྟུང་བྱེད་གཉིས་སོ་ཞེས་བྱ་བ་དབྱར་ཁང་ནས་སྐྲོད་པའི་ལྟུང་བྱེད་དང༌། ཁྱིམ་གཞན་ནས་སྐྲོད་པའི་ལྟུང་བྱེད་གཉིས་བཤད་ཟིན་ཏོ།། །གང་ལ་ཐོ་འཚམས་པ་ལས་གྱུར་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ལེགས་པར་མ་མཐོང་བ་ལ་སོགས་པས་གླེང་བ་ལའོ་ཞེས་བྱ་བ་སྨྲས་ཏེ། དགེ་སློང་མ་ལའོ་ཞེས་བྱ་བར་སྦྱར་རོ། །ལེགས་པར་མ་མཐོང་བ་ལ་སོགས་བས་དགེ་སློང་མ་ལ་ལྟུང་བ་གླེང་བ་ལ་ཁ་ན་མ་ཐོ་བ་འདིར་འགྱུར་རོ། །སྩོགས་པ་ཞེས་བྱ་བའི་སྒྲས་ནི་ལེགས་པར་མ་ཐོས་པ་དང་ལེགས་པར་མི་དོགས་པ་གཉིས་བསྡུའོ། །གཞི་ལེགས་པར་མེད་པ་བས་གཞི་མེད་པ་ཉིད་ཆེས་སྡིག་ཆེ་བས་དེའི་ཕྱིར་མ་མཐོང་བ་ལ་སོགས་པས་གླེང་བ་ལ་ནི་ཁ་ན་མ་ཐོ་བ་ཆེས་ཤིན་ཏུ་ཆེ་བར་འགྱུར་རོ། །ཕམ་པར་འགྱུར་བ་དང་དགེ་འདུན་ལྷག་མ་གཉིས་གླེང་བ་སྔར་བསྟན་ཟིན་པས་འདི་ནི་ལྟུང་བྱེད་ལ་སོགས་པའི་ལྟུང་བའི་སྡེ་ཚན་གཞན་གླེང་བའི་ཡུལ་ཡིན་ནོ། །དྲན་པར་བྱེད་པ་ལ་ཡང་གླེང་བའི་རྣམ་པ་ཡིན་པས་དྲན་པར་
བྱེད་པ་ལ་ཡང་ཁ་ན་མ་ཐོ་བ་འདིར་འགྱུར་རོ། །གླེང་བ་བས་གདམས་ངག་ལ་སོགས་པ་འཇོག་པ་དང་གྱོད་ལ་གདགས་པ་ཆེས་སྡིག་ཆེ་བས་དེ་གཉིས་ལ་ཡང་ཁ་ན་མ་ཐོ་བ་འདིར་འགྱུར་རོ། །འདིར་གླེང་གཞི་ནི་དེ་དག་གིས་ལེགས་པར་མ་མཐོང་བ་དང་ལེགས་པར་མ་ཐོས་པ་དང་ལེགས་པར་མི་དོགས་པས་དགེ་སློང་མ་ལ་དགེ་སློང་མ་ཆེ་གེ་མོ་ཞིག་འདི་འདྲའོ་ཞེས་གླེང་བར་བྱེད་ཅིང་དེའི་གསོ་སྦྱོང་དང་དགག་དབྱེ་འཇོག་པར་བྱེད་པ་དང་དེ་བཞིན་དུ་བརྫུན་གྱིས་དགེ་སློང་མ་རྣམས་ལ་གླེང་ཞིང་མི་མཐུན་པར་གནས་པར་བྱེད་དོ་ཞེས་བྱ་བ་ཡིན་ནོ། །ཐོ་འཚམས་པ་ལས་གྱུར་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་ལོག་པར་སྟོན་པའི་ལྟུང་བྱེད་དུ་འགྱུར་ཞེན་དེའི་ཕྱིར། མནའ་འདོར་བ་ལའོ་ཞེས་བྱ་བ་སྨྲས་ཏེ། གཞན་ཡིད་ཆེས་པར་བྱ་བའི་ཕྱིར་གཞན་གྱི་མདུན་དུ་མནའ་འདོར་བ་ལ་ཁ་ན་མ་ཐོ་བ་འདིར་འགྱུར་རོ། །ལོག་པར་སྟོན་པ་ཞེས་བྱ་བ་ནི་རབ་ཏུ་བྱུང་བ་རྣམས་ཀྱི་བསམ་པ་ནི་བདེན་པས་འཇུག་པ་ཡིན་ནོ། དེ་མ་ནས་ལོག་པར་སྟོན་པ་སྟེ། ཁོ་མོ་ཐམས་ཅད་ལ་བདེན་པས་འཇུག་པ་མ་ཡིན་གྱི། འདི་ལྟར་གང་ལ་མནའ་འདོར་བས་འཇུག་པ་དེ་གཅིག་པུ་བདེན་ནོ་ཞེས་བྱ་བར་འགྱུར་བས་དེའི་ཕྱིར་མནའ་འདོར་བས་ནི་རབ་ཏུ་བྱུང་བའི་བསམ་པ་ལོག་པར་སྟོན་པར་འགྱུར་རོ། །གཞན་གྱི་མདུན་མ་ཡིན་བས་མནའ་འདོར་བ་ནི་ཚིག་ཀྱལ་པ་ཙམ་དུ་ཟད་པས་སྔ་མའི་རྗེས་སུ་འབྲང་བས་ཉེས་བྱས་སུ་རིག་པར་བྱའོ། །ལོག་པར་སྟོན་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་མི་བརྟན་པས་རྣམ་པར་འགྱུར་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཁྲོ་བས་བདག་ཉིད་ལ་གནོད་པ་བྱེད་པ་ལའོ་ཞེས་བྱ་བ་སྨྲས་ཏེ། ཁྲོ་བས་བདག་ཉིད་ལ་གནོད་པ་བྱེད་ཅིང་རྡེག་པར་བྱེད་པ་ལ་ཁ་ན་མ་ཐོ་བ་འདིར་འགྱུར་རོ། །གནོད་པ་བྱེད་པ་ཞེས་བྱ་བའི་རྣམ་པར་འབྱེད་པ་ནི་རྡེག་པར་བྱེད་པའོ་ཞེས་གསུངས་པ་ཡིན་ནོ། །མི་བརྟན་པས་རྣམ་པར་འགྱུར་བ་ཞེས་བྱ་བ་ནི་མི་བརྟན་པ་ཉིད་ཀྱིས་རྣམ་པར་འགྱུར་བ་དེ་བྱས་པ་སྟེ། དེ་ལས་བྱུང་བའི་ལྟུང་བྱེད་ནི་མི་བརྟན་པས་རྣམ་པར་འགྱུར་བ་ལས་གྱུར་པའི་ལྟུང་བྱེད་ཅེས་བྱའོ། །མི་བརྟན་
པས་རྣམ་པར་འགྱུར་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ད་འདི་མན་ཆད་ནི་བླ་མར་གྱུར་པ་ལ་བརྙས་ཐབས་བྱེད་པའི་ལྟུང་བྱེད་གསུམ་སྟེ། དེ་ལ་གང་ལ་དགེ་སློང་མའི་ཚོགས་ལ་བརྙས་ཐབས་བྱེད་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་དགེ་སློང་མའི་ཚོགས་ལ་བརྙས་ཐབས་བྱེད་པ་ལའོ་ཞེས་བྱ་བ་སྨྲས་ཏེ། དགེ་སློང་མའི་ཚོགས་ཞེས་བྱ་བ་དགེ་སློང་མའི་དགེ་འདུན་ལ་བརྙས་ཐབས་བྱེད་པ་ལ་ཁ་ན་མ་ཐོ་བ་འདིར་འགྱུར་རོ། དགེ་སློང་མའི་ཚོགས་ཞེས་བྱ་བའི་རྣམ་པར་འབྱེད་པ་ནི་དགེ་སློང་མའི་དགེ་འདུན་ཞེས་གསུངས་པ་ཡིན་ནོ། །གཅིག་གམ་གཉིས་སམ་གསུམ་ལ་བརྙས་ཐབས་བྱེད་པ་ལ་ནི་ཉེས་བྱས་སོ། །བརྙས་ཐབས་བྱེད་པ་ཞེས་བྱ་བའི་རྣམ་པར་འབྱེད་པ་ནི་རྣམ་པ་སྣ་ཚོགས་ཀྱིས་སྨོད་པར་བྱེད་དེ། ཚུལ་འཆོས་པ་དང་ཁ་གསག་དང་གཞོགས་སློང་དང་ཐོབ་ཀྱིས་འཇལ་གྱིས་འཚོ་བར་བྱེད་དོ། །མི་གསལ་བ་རྨོངས་པ་ནི་མཁས་པ་ཡིན་ནོ། །ལྟུང་བ་ཡང་མི་ཤེས་ལྟུང་བ་མེད་པ་ཡང་མི་ཤེས་པ་ཡིན་ནོ། །འདི་ལ་བྱིན་པ་འམ་བྱས་པ་འམ་བསྙེན་བཀུར་ཀུན་དུ་སྤྱོད་པས་ཅི་བྱ། ལོག་པའི་ཆོས་ཀུན་དུ་དཀྲིས་པ་ཡིན་ནོ་ཞེས་གླེང་གཞི་ལས་གསུངས་པ་ཡིན་ནོ། །གང་ལ་དགེ་སློང་མའི་ཚོགས་ལ་སྤྱོ་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། སྤྱོ་བ་ལ་ཡང་ངོ་ཞེས་བྱ་བ་སྨྲས་ཏེ། དགེ་སློང་མའི་ཚོགས་ལའོ་ཞེས་པའི་རྗེས་བསྙགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །དགེ་སློང་མའི་ཚོགས་ལ་སྤྱོ་བར་བྱེད་པ་ལ་ཁ་ན་མ་ཐོ་བ་འདིར་འགྱུར་རོ། །སྤྱོ་བ་ཞེས་བྱ་བའི་རང་བཞིན་ནི་གླེང་གཞི་ལས་འཚོ་བའི་ཕྱིར་མགོ་བྲེགས་པ་མུ་གེའི་ཕྱིར་མགོ་བྲེགས་པ་སྡིག་པའི་ལས་ཅན་འཕགས་མ་མ་ཡིན་པ་ཟོལ་པ་མོ་ཕ་རོལ་སླུ་བ་ཡང་དག་པར་སྡོམ་པ་མ་ཡིན་ཚུལ་ཁྲིམས་འཆལ་པའོ་ཞེས་གསུངས་པ་ཡིན་ནོ། །གང་ལ་འཁོར་གཙོ་བོ་ལ་ཆུས་འཐོར་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། འཁོར་གཙོ་བོ་ལ་ཆུས་འཐོར་བ་ལའོ་ཞེས་བྱ་བ་སྨྲས་ཏེ། འཁོར་གཙོ་བོ་ཞེས་བྱ་བའི་སྒྲས་ནི་དགེ་སློང་བརྗོད་དེ་འཁོར་གཙོ་བོ་ཞེས་བྱ་བའི་རྣམ་པར་འབྱེད་པ་ལས་དགེ་སློང་ཞེས་གསུངས་པའི་ཕྱིར་རོ། །གལ་ཏེ་དགེ་སློང་མའི་ལུས་ལ་ཐིགས་པ་ཙམ་གྱིས་ཕོག་
པར་གྱུར་ན་ཡང་དེའི་ཚེ་ཆུས་གཏོར་བ་ཡིན་ཏེ་དེ་ལ་ཁ་ན་མ་ཐོ་བ་འདིར་འགྱུར་རོ། །བརྒྱལ་བ་ལ་ནི་ལྟུང་བ་མེད་དོ་ཞེས་བྱ་བ་ནི། དགེ་སློང་བརྒྱལ་བ་ལ་ཆུས་གཏོར་བ་ལ་ནི་ལྟུང་བ་མེད་པའོ། །དགེ་སློང་ལ་ཐུ་ཞེས་མི་བྱའོ་ཞེས་བྱ་བ་ནི། དགེ་སློང་ལ་མཆིལ་མས་གཏོར་བའི་ཐབས་སུ་ཐུ་ཞེས་མི་བྱའོ། །འདིར་གཞུང་ནི་ཕྲན་ཚེགས་དག་ལས་ཐུ་ཞེས་མི་བྱའོ་ཞེས་བྱ་བའི་དང་པོ་འདི་ནས་བསྟེན་པ་ཞེས་བྱ་བའི་བར་དུ་གསུངས་ཏེ། དེ་ལྟ་བས་ན་དགེ་སློང་མས་དགེ་སློང་ལ་མཆིལ་མས་གཏོར་བར་མི་བྱའོ། །འཐོར་བར་བྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །རབ་ཏུ་བྱུང་བ་འདི་པ་ལ་སྤྱོ་བར་མི་བྱའོ་ཞེས་བྱ་བ་ལ། རབ་ཏུ་བྱུང་བ་འདི་པ་ཞེས་བྱ་བའི་སྒྲས་ནི་དགེ་སློང་ལ་སོགས་པ་བཟུང་བར་རིག་པར་བྱ་སྟེ། དགེ་སློང་མའི་ཚོགས་ལ་སྤྱོ་བའི་ལྟུང་བྱེད་སྔར་ལོགས་ཤིག་ཏུ་བསྟན་ཟིན་པའི་ཕྱིར་རོ། །རབ་ཏུ་བྱུང་བ་འདི་པ་གཞན་ལ་སྤྱོ་བ་ཉེས་བྱས་སུ་རྣམ་པར་བཞག་གོ །དགེ་སློང་ལ་སྤྱོ་བ་ནི་ལྕི་བའི་ཆོས་ཡིན་པའི་ཕྱིར་ཟླ་བ་ཕྱེད་ཕྱེད་ཅིང་མགུ་བ་སྤྱོད་པ་ཡིན་ནོ། །དེ་ལ་གཉི་ག་ཡང་ངོ་ཞེས་བྱ་བ་ནི། རབ་ཏུ་བྱུང་བ་འདི་པ་དེ་ལ་བརྙས་ཐབས་དང་སྤྱོ་བ་ཞེས་བྱ་བ་ནི་བསླབ་པའི་གཞི་སྔ་མ་བསྟན་པ་གཉི་ག་ཡང་མི་བྱའོ་ཞེས་བྱ་བའི་ཐ་ཚིག་གོ །དགེ་སློང་གི་མདུན་དུ་སྤྱོད་ཡུལ་དུ་རྒྱུ་བར་མི་བྱའོ་ཞེས་བྱ་བ་ནི། དགེ་སློང་མས་དགེ་སློང་གི་མདུན་དུ་གྲོང་དུ་བསོད་སྙོམས་ལ་འདུག་པར་མི་བྱ་བའོ། །འདིར་གཞུང་ནི་དེ་ལྟ་བས་ན་དགེ་སློང་མས་དགེ་སློང་གི་སྤྱོད་ཡུལ་དུ་ཞུགས་པའི་མདུན་དུ་འགྲོ་བར་མི་བྱ་བར་དགེ་སློང་གི་སྤྱོད་ཡུལ་གང་སྤངས་པ་དེར་དགེ་སློང་གིས་འཇུག་པར་བྱའོ་ཞེས་གསུངས་པ་ཡིན་ནོ། །ཟམ་པ་མི་བརྟན་པར་དགེ་སློང་དང་ལྷན་ཅིག་འགྲོ་བར་མི་བྱའོ་ཞེས་བྱ་བ་ནི། དགེ་སློང་མས་ཟམ་པ་མི་བརྟན་པ་ལྡེག་པར་དགེ་སློང་དང་ལྷན་ཅིག་འགྲོ་བར་མི་བྱའོ། །འདིར་གཞུང་ནི་དེ་ལྟ་བས་ན་དགེ་སློང་མས་དགེ་སློང་དང་ལྷན་ཅིག་ཟམ་པ་གཅིག་ཏུ་འགྲོ་བར་མི་བྱའོ། །འགྲོ་ན་འགལ་ཚབས་ཅན་དུ་འགྱུར་རོ། །ཟམ་པ་བརྟན་ཞིང་ཞེང་ཆེན་པོ་གང་ཡིན་པ་དེ་དག་ཏུ་ནི་འགྲོ་བར་བྱ་སྟེ། འདི་ལ་
འགྱོད་པར་མི་བྱའོ་ཞེས་གསུངས་པ་ཡིན་ནོ། །དགེ་སློང་མཐོང་མ་ཐག་ཏུ་སྟན་ལས་ལྡང་བར་བྱའོ་ཞེས་བྱ་བའི་གཞུང་ནི་དེ་ལྟ་བས་ན་དགེ་སློང་མཐོང་མ་ཐག་ཏུ་སྟན་ལས་ལྡང་བར་བྱའོ། །མི་ལྡང་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །འདུག་བས་དེ་འགྲེང་བས་ཧ་ཅང་ཡུན་རིང་དུ་འདའ་བར་བྱེད་ན་སྟན་ལ་འདུག་ཏུ་གཞུག་གོ་ཞེས་བྱ་བ་ནི། དགེ་སློང་སྟན་ལ་འདུག་པས་དགེ་སློང་མ་དེ་འགྲེང་བའི་སྤྱོད་ལམ་གྱིས་ཧ་ཅང་ཡུན་རིང་དུ་འདའ་བར་བྱེད་ན་སྟན་ལ་འདུག་ཏུ་གཞུག་པའོ། །མི་བྱེད་ན་འདུག་པའི་ཕྱིར་ཞུས་ཏེ་དེ་ལ་འདུག་པར་བྱའོ་ཞེས་བྱ་བ་ནི། དགེ་སློང་གིས་དགེ་སློང་མ་ལ་སྟན་ལ་འདུག་ཏུ་གཞུག་པ་མི་བྱེད་ན། དགེ་སློང་མ་ཉིད་ཀྱིས་སྟན་ལ་འདུག་པར་བྱ་བའི་ཕྱིར། དགེ་སློང་ལ་ཞུས་ཏེ་གནང་ན་སྟན་དེ་ལ་འདུག་པར་བྱའོ། །འདིར་མདོ་དེ་གཉིས་ཀྱི་གཞུང་ནི་དེ་ལྟ་བས་ན་དགེ་སློང་གིས་དགེ་སློང་མ་ལ་ཆོས་ཉན་པར་འདོད་པ་ལ་འདུག་ཤིག་ཅེས་བསྒོ་བར་བྱའོ། །གལ་ཏེ་དགེ་སློང་ཡེངས་སམ་མི་དྲན་ན་དགེ་སློང་མས་འཕགས་པ་སྟན་ལ་མཆིས་སོ་ཞེས་ཞུས་ཏེ་འདུག་པར་བྱའོ་ཞེས་གསུངས་པ་ཡིན་ནོ། །བླ་མར་གྱུར་པ་ལ་བརྙས་ཐབས་བྱེད་པའི་ལྟུང་བྱེད་གསུམ་མོ་ཞེས་བྱ་བ་དགེ་སློང་མའི་ཚོགས་ལ་བརྙས་ཐབས་བྱེད་པའི་ལྟུང་བྱེད་དང༌། དགེ་སློང་མའི་ཚོགས་ལ་སྤྱོ་བའི་ལྟུང་བྱེད་དང༌། འཁོར་གཙོ་བོ་ལ་ཆུས་འཐོར་བའི་ལྟུང་བྱེད་གསུམ་བཤད་ཟིན་ཏོ།། །།གང་ལ་འཁྲུག་ལོང་ཡལ་བར་འདོར་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། དགེ་སློང་མ་རྣམས་ཀྱི་རྩོད་པ་མཐུ་ཡོད་བཞིན་དུ་ཉེ་བར་ཞི་བར་མི་བྱེད་པ་ལའོ་ཞེས་བྱ་བ་སྨྲས་ཏེ། ཉེ་བར་ཞི་བར་བྱ་བའི་མཐུ་ཡོད་བཞིན་དུ་དགེ་སློང་མ་རྣམས་ཀྱི་རྩོད་པ་ཉེ་བར་ཞི་བར་མི་བྱེད་པ་དེ་ལ་ཁ་ན་མ་ཐོ་བ་འདིར་འགྱུར་ཏེ། གལ་ཏེ་གང་གི་ཚེ་ལུས་རྣམ་པར་འགྱུར་བ་འམ་དག་རྣམ་པར་འགྱུར་བར་བྱེད་ཅིང་ཇི་སྲིད་དུ་བསམ་པ་གཏོང་བར་མི་བྱེད་པ་དེ་སྲིད་དུ་ནི་ལྟུང་བྱེད་གཅིག་ཁོ་ནར་ཟད་དོ། །གང་གི་ཚེ་ཉེ་བར་ཞི་བར་མི་བྱེད་པའི་བསམ་པ་བཏང་ནས་ཡང་བསམ་པ་གཞན་བསྐྱེད་པའི་ཚེ་ནི་ལྟུང་བྱེད་གཞན་དུ་ཡང་འགྱུར་རོ། །འཁྲུག་ལོང་ཡལ་བར་འདོར་བའི་ལྟུང་
བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་བློ་མཐུན་པར་མི་བྱེད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཞག་ལོན་པའི་འདུན་པ་སྦྱིན་པ་ལའོ་ཞེས་བྱ་བ་སྨྲས་ཏེ། ཞག་ལོན་པའི་འདུན་པ་སྦྱིན་པ་ཞེས་བྱ་བ་ནི་ཉི་མ་སྔ་མ་གཞན་ལ་འདུན་པ་ཕུལ་བ་དེ་ཉིད་ད་དུད་ཡང་ཡོད་པས་འདུན་པ་སྔ་མ་དེ་ཁོ་མོས་ད་དུང་ཕྱིར་མ་བླངས་པས་དེ་རིང་ཡང་བཟོད་འདུན་པ་འབུལ་ཅི་དགོས་ཞེས་ཟེར་ཞིང་འདུན་པ་ཕྱི་མ་མི་སྟེར་བ་ཡིན་ནོ། །དེས་ན་འདི་ལྟར་སྟོན་ཏེ། དགེ་འདུན་གྱི་ལས་གང་གི་ཕྱིར་ཉི་མ་སྔ་མ་གཞན་ལ་འདུན་པ་བླངས་པའི་ལས་དེ་དེའི་ཉིན་མོ་མ་བྱས་ཤིང་ཕྱིས་ཉི་མ་གཞན་ལ་བྱེད་པའི་ཚེ་ཡང་གཞི་ནས་འདུན་པ་བླང་བར་བྱ་དགོས་པས། དེའི་ཚེ་དེ་དགེ་འདུན་མས་འདུན་པ་ལེན་དུ་བཏང་བ་ན་སྔར་འདུན་པ་བྱིན་ཟིན་པ་དེ་ཉིད་བདག་གིས་ཕྱིར་མ་བླངས་པས་ད་དུང་ཡང་འདུན་པ་འབུལ་མི་དགོས་སོ་ཞེས་ཟེར་ཞིང་དགེ་འདུན་དང་བློ་མཐུན་པར་མི་ཕྱེད་པ་དེ་ལ་ཁ་ན་མ་ཐོ་བ་འདིར་འགྱུར་རོ། །འདིར་གླེང་གཞི་ནི་སྦོམ་དགའ་མོ་ལ་དགེ་སློང་མ་རྣམས་ཀྱིས་འཕགས་མ་དགེ་སློང་མའི་དགེ་འདུན་ཚོགས་ཀྱིས་ཚུར་ཤོག་ཤིག་ཅེས་བྱས་པ་དང༌། དེས་སྨྲས་པ་ཆོས་བཞིན་དུ་བྱེད་པའི་ལས་ལ་འདུན་པ་འབུལ་ལོ། །དགེ་འདུན་གྱིས་ལས་དེ་དེའི་ཉིན་མོ་མ་བྱས་ནས་ཕྱི་དེ་ཉིན་མོ་བྱ་བར་བརྩམས་ཏེ་ཡང་དགེ་སློང་མའི་དགེ་འདུན་འདུས་ནས་སྦོམ་དགའ་མོ་སྦྲན་པ་དང༌། དེ་འོང་དུ་མ་བཏུབ་ནས་དགེ་སྐོས་མས་ཅི་འཕགས་མ་འདུན་པ་འབུལ་བར་མི་འདོད་དམ་ཞེས་སྨྲས་པ་དང༌། དེས་སྨྲས་པ་ཁོ་མོའི་འདུན་པ་ཕུལ་ཟིན་ནོ། །ནམ་ཕུལ་ཉི་མ་སྔ་མ་ལའོ། །འཕགས་མས་ཞག་ལོན་པའི་འདུན་པ་འབུལ་དུ་རུང་ངམ། དེས་སྨྲས་པ་ཆག་གམ་རུལ་ཏམ་ཅི་ཉེས་ཞེས་ཟེར་བ་ལས་བཅས་པ་ཡིན་ནོ། །བློ་མཐུན་པར་མི་བྱེད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ད་འདི་མན་ཆད་ནི་ལྕི་བའི་ཆོས་ལས་འདས་པའི་ལྟུང་བྱེད་གསུམ་དང༌། ལྕི་བའི་ཆོས་དང་འབྲེལ་པའི་ཆོས་ལས་འདས་པའི་ལྟུང་བྱེད་གཅིག་སྟོན་ཏེ། ལྕི་བའི་ཆོས་ལས་འདས་པའི་ལྟུང་བྱེད་གསུམ་ནི་གདམས་ངག་ཉམས་སུ་མྱོང་བར་མི་བྱེད་པ་དང༌།
དགེ་སློང་མེད་པའི་གནས་སུ་དབྱར་གནས་པར་ཁས་ལེན་པ་དང༌། གཉི་གའི་དགེ་འདུན་ལ་དགག་དབྱེ་མི་བྱེད་པའོ། །ལྕི་བའི་ཆོས་དང་འབྲེལ་པའི་ཆོས་ལས་འདས་པའི་ལྟུང་བྱེད་ནི་དགེ་སློང་མེད་པར་གསོ་སྦྱོང་བྱེད་པའོ། །དེ་ལ་གང་ལ་གདམས་ངག་ཉམས་སུ་མྱོང་བར་མི་བྱེད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཟླ་བ་ཕྱེད་ཕྱེད་ཅིང་དགེ་སློང་རྣམས་ལས་གདམས་ངག་དང༌། རྗེས་སུ་བསྟན་པ་ངག་ཉམས་སུ་མྱོང་བར་མི་བྱེད་པ་ལའོ་ཞེས་བྱ་བ་སྨྲས་ཏེ། གསོ་སྦྱོང་གི་ཉིན་མོའི་ཟླ་བ་བྱེད་ཕྱེད་ཅིང་དགེ་སློང་རྣམས་ལ་འདི་ནི་བྱ་བའོ་འདི་ནི་བྱ་བ་མ་ཡིན་པའོ་ཞེས་བྱ་བའི་རང་བཞིན་གྱི་གདམས་ངག་དང་རྗེས་སུ་བསྟན་པ་ཉམས་སུ་མྱོང་བར་མི་བྱེད་པ་ལ་ཁ་ན་མ་ཐོ་བ་འདིར་འགྱུར་རོ། །རྐྱེན་མ་བྱུང་བར་གསོ་སྦྱོང་གི་ཉིན་མོ་ལས་འདས་ནས་སྐྱ་རེངས་འཆར་བའི་དུས་ན་ཁ་ན་མ་ཐོ་བ་འདིར་འགྱུར་རོ། །རྐྱེན་བྱུང་ན་ནི་ཉི་མ་འཆར་ཀའི་དུས་སུ་ཁ་ན་མ་ཐོ་བ་འདིར་འགྱུར་རོ། །གང་ལ་དགེ་སློང་མེད་པར་གསོ་སྦྱོང་བྱེད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། དགེ་སློང་དག་མེད་པར་གསོ་སྦྱོང་བྱེད་པ་ལའོ་ཞེས་བྱ་བ་སྨྲས་ཏེ། དགེ་སློང་མའི་དགེ་འདུན་གྱིས་སྔར་དགེ་སློང་གི་དགེ་འདུན་ལས་འདུན་པའི་གསོ་སྦྱོང་བླངས་ནས་གཟོད་གསོ་སྦྱོང་བྱ་དགོས་ཏེ། ཇི་སྲིད་དུ་དགེ་སློང་མའི་དགེ་འདུན་གྱིས་དགེ་སློང་གི་དགེ་འདུན་ལས་འདུན་པའི་གསོ་སྦྱོང་མ་བླངས་པ་དེ་སྲིད་དུ་གསོ་སྦྱོང་བྱར་མི་རུང་ངོ༌། །དེ་ལྟ་བས་ན་དགེ་སློང་རྣམས་ལས་འདུན་པའི་གསོ་སྦྱོང་བླང་བའི་ཕྱིར་དགེ་སློང་མ་གང་གིས་ཚོགས་པ་སྒྲུབ་པར་མི་བྱེད་པ་དེ་ནི་འདིར་དགེ་སློང་མེད་པར་གསོ་སྦྱོང་བྱེད་པ་ཞེས་བྱ་སྟེ། དེ་ལ་ཁ་ན་མ་ཐོ་བ་འདིར་འགྱུར་གྱི་དགེ་སློང་རྣམས་མངོན་སུམ་དུ་མི་འཁོད་པ་ཉིད་དུ་གསོ་སྦྱོང་བྱེད་པ་ལ་ནི་ཉེས་པ་མེད་དོ། །འདི་ནི་ལྕི་བའི་ཆོས་དང་འབྲེལ་བའི་ཆོས་ལས་འདས་པའི་ཁ་ན་མ་ཐོ་བ་ཡིན་གྱི་ལྕི་བའི་ཆོས་ལས་འདས་པའི་ཁ་ན་མ་ཐོ་བ་ཉིད་ནི་མ་ཡིན་ནོ། །འདིར་གཞུང་ནི་དགེ་སློང་མ་ཁྱོད་ཀྱིས་དགེ་སློང་དག་མེད་པར་གསོ་སྦྱོང་བྱས་པ་བདེན་ནམ་ཞེས་གསུངས་པ་དང༌། ཡང་དགེ་སློང་མ་གང་དགེ་སློང་དག་མེད་པར་གསོ་
སྦྱོང་བྱེད་ན་ལྟུང་བྱེད་དོ་ཞེས་གསུངས་པ་ཡིན་ནོ། །ལྕི་བའི་ཆོས་དང་འབྲེལ་པའི་ཆོས་ལས་འདས་པས་ཞེས་བྱ་བ་ནི་གདམས་ངག་ཉམས་སུ་མྱོང་བ་ཞེས་བྱ་བའི་ལྕི་བའི་ཆོས་དེ་དང་འབྲེལ་བ་དགེ་སློང་དང་ལྷན་ཅིག་གསོ་སྦྱོང་བྱ་བའི་མཚན་ཉིད་ཀྱི་ཆོས་དེ་ལས་འདས་ཤིང་དགེ་སློང་མེད་པར་གསོ་སྦྱོང་བྱེད་པ་ཡིན་ནོ། །གང་ལ་དགེ་སློང་མེད་པའི་གནས་སུ་དབྱར་གནས་པར་ཁས་ལེན་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། དགེ་སློང་མེད་པའི་གནས་སུ་དབྱར་གནས་པར་ཁས་ལེན་པ་ལའོ་ཞེས་བྱ་བ་སྨྲས་ཏེ། དགེ་སློང་མེད་པའི་གནས་ཞེས་བྱ་བ་ནི་གང་ན་ལས་བརྒྱ་རྩ་གཅིག་པོ་ཐམས་ཅད་མེད་པ་ལ་བྱའི། དགེ་སློང་དང་དངོས་པོ་མེད་པ་ལ་ནི་མི་བྱའོ། །འདི་སྐད་བསྟན་ཏེ་གནས་གང་ན་དགེ་སློང་བཞི་ཡན་ཆད་གནས་ཤིང་ལས་བྱེད་པ་མེད་པ་དེ་ནི་དགེ་སློང་མེད་པའི་གནས་ཞེས་བྱ་སྟེ། དེར་དབྱར་གནས་པར་ཁས་ལེན་པ་ལ་ཁ་ན་མ་ཐོ་བ་འདིར་འགྱུར་རོ། །གང་ལ་གཉི་གའི་དགེ་འདུན་ལ་དགག་དབྱེ་མི་བྱེད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། དབྱར་གནས་པས་གཉི་གའི་དགེ་འདུན་ལ་གནས་གསུམ་གྱི་དགག་དབྱེ་མི་བྱེད་པ་ལའོ་ཞེས་བྱ་བ་སྨྲས་ཏེ། དགེ་སློང་མ་དབྱར་གནས་པར་ཁས་བླངས་པས་གཉི་གའི་དགེ་འདུན་ལ་གནས་གསུམ་པོ་མཐོང་བ་དང་ཐོས་པ་དང་དོགས་པ་ཞེས་བྱ་བས་དགག་དབྱེ་མི་བྱེད་པ་ལ་ཁ་ན་མ་ཐོ་བ་འདིར་འགྱུར་རོ། །རྐྱེན་བྱུང་བ་ལ་སོགས་པ་དགག་དབྱེའི་ཉིན་མོ་ལས་འདས་པ་ལས་ཁ་ན་མ་ཐོ་བ་འདིར་འགྱུར་བ་ནི་གསོ་སྦྱོང་དང་འདྲའོ། །ལྕི་བའི་ཆོས་ལས་འདས་པ་ལས་གྱུར་པའི་ལྟུང་བྱེད་དག་གོ་ཞེས་བྱ་བ་ལྕི་བའི་ཆོས་ལས་འདས་པའི་ལྟུང་བྱེད་གསུམ་དང༌། ལྕི་བའི་ཆོས་དང་འབྲེལ་པའི་ཆོས་ལས་འདས་པའི་ལྟུང་བྱེད་གཅིག་བཤད་ཟིན་ཏོ།། །།ད་འདི་མན་ཆད་ནི་གཞན་ལ་གནོད་པར་སྤྱོད་པའི་ལྟུང་བྱེད་གསུམ་སྟོན་ཏེ། དེ་ལ་གང་ལ་དབུལ་པོ་སྲ་བརྐྱང་སྦྱོར་དུ་འཇུག་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། དབུལ་པོ་སྲ་བརྐྱང་སྦྱོར་དུ་བཅུག་པ་ལའོ་ཞེས་བྱ་བ་སྨྲས་ཏེ། དབུལ་པོ་ལ་རྙེད་པའི་དོན་ཏམ་བསོད་སྙོམས་ཀྱི་དོན་ཏམ་གཉི་གའི་དོན་དུ་སྲ་བརྐྱང་
སྦྱོར་དུ་བཅུག་ན་དངོས་གཞིའོ། །མདུན་རོལ་དུ་ནི་ཉེས་བྱས་སོ། །ཆོས་གོས་གཏན་པའི་ཟོང་ཙམ་དགེ་འདུན་གྱི་དོན་དུ་དབུལ་པོ་སྦྱོར་དུ་བཅུག་པ་ཡང་དངོས་གཞིའོ། །ཆོས་གོས་གཏན་པ་མི་ལྡང་བ་ཆུང་དུ་སྦྱོར་དུ་བཅུག་པ་ལ་ནི་ཉེས་བྱས་སོ། །གང་ཟག་དབུལ་པོ་དུ་མ་སྦྱོར་དུ་བཅུག་པ་ལ་ནི་གང་ཟག་རེ་རེ་ལས་ཁ་ན་མ་ཐོ་བ་རེ་རེར་འགྱུར་རོ། །འདིར་ཆོས་གོས་གཏན་པ་ཞེས་སྨོས་པ་ནི་དཔེ་ཙམ་དུ་ཟད་དེ་ཡོ་བྱད་གཞན་དག་ལ་ཡང་དེ་བཞིན་ནོ། །གང་ལ་ཆོས་གོས་གཏན་པ་དབྱུང་བའི་ཕྱིར་ཚོགས་པ་མི་སྦྱིན་པའི་ལྟུང་བྱེད་དུ་འགྱུར་ཞེན་དེའི་ཕྱིར། ཆོས་གོས་གཏན་པ་དབྱུང་བའི་ཕྱིར་བག་ཡངས་སུ་བྱ་བའི་ཚོགས་པ་མི་སྦྱིན་པ་ལའོ་ཞེས་བྱ་བ་སྨྲས་ཏེ། དཔྱིད་ཟླ་རབ་ཉའི་ཉིན་མོ་ཆོས་གོས་གཏན་པ་དབྱུང་བའི་དུས་སུ་ཆོས་གོས་གཏན་པ་དབྱུང་བའི་ཕྱིར་ཚོགས་པ་མི་སྦྱིན་པ་ལ་ནི་སྤང་པའི་ལྟུང་བྱེད་དུ་རྣམ་པར་གཞག་པས། འདི་ནི་བཅོམ་ལྡན་འདས་ཀྱིས་དགེ་སློང་མ་ཆོམ་རྐུན་པས་བཅོམ་པ་འམ་འགྲོ་བ་ལ་སོགས་པའི་དགོས་པའི་དབང་གིས་དཔྱིད་ཟླ་ར་བ་ཉ་ཚུན་ཆད་གློ་བུར་དུ་ཆོས་གོས་གཏན་པ་འབྱིན་པར་རྗེས་སུ་གནང་བའི་དུས་དེར་ཆོས་གོས་གཏན་པ་དབྱུང་བའི་ཕྱིར་བག་ཡངས་སུ་བྱ་བའི་ཚོགས་པ་མི་སྦྱིན་པ་ལ་ལྟུང་བྱེད་དུ་རྣམ་པར་གཞག་པ་ཡིན་ནོ། །དེ་ལྟ་བས་ན་སྤང་བའི་ལྟུང་བྱེད་དང་ལྟུང་བྱེད་འདི་གཉིས་ནི་དུས་ཀྱི་བྱེ་བྲག་གིས་ཐ་དད་པར་གྱུར་པ་ཡིན་ནོ། །གང་ལ་གོས་འགེད་པའི་ཕྱིར་ཚོགས་པ་མི་སྦྱིན་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར། གོས་འགེད་པའི་ཕྱིར་ཡང་ངོ་ཞེས་བྱ་བ་སྨྲས་ཏེ། བག་ཡངས་སུ་བྱ་བའི་ཚོགས་པ་མི་སྦྱིན་པ་ལ་ཞེས་བྱ་བའི་རྗེས་བསྙགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །འདིར་གོས་ཞེས་སྨོས་པ་ནི་དཔེ་ཙམ་དུ་ཟད་དེ་ཆོས་དང་ལྡན་པའི་རྙེད་པ་གཞན་བགོ་བའི་ཕྱིར་ཚོགས་པ་མི་སྦྱིན་པ་ལ་ཡང་ལྟུང་བྱེད་དུ་འགྱུར་རོ། །འདིས་ལེན་མི་འདོད་པ་ཉིད་ནི་མ་བྱས་པ་ཉིད་དོ་ཞེས་བྱ་བ་ནི། ཚོགས་པ་མི་སྦྱིན་པ་འདིས་རྙེད་པའི་སྐལ་བ་ལེན་མི་འདོད་པ་ཉིད་ནི་བསྡུ་བ་མ་བྱས་པ་ཉིད་ཡིན་ཏེ། །དེ་བས་ན་འདིར་རྙེད་པའི་སྐལ་བ་ལེན་མི་འདོད་པས་ཚོགས་པ་མི་སྦྱིན་པ་ལ་ནི་
ལྟུང་བ་མེད་དོ། །གཞན་ལ་གནོད་པར་སྤྱོད་པ་ལས་གྱུར་པའི་ལྟུང་བྱེད་གསུམ་མོ་ཞེས་བྱ་བ་དབུལ་པོ་ཆོས་གོས་གཏན་པ་སྦྱོར་དུ་བཅུག་པའི་ལྟུང་བྱེད་དང༌། ཆོས་གོས་གཏན་པ་དབྱུང་བའི་ཕྱིར་ཚོགས་པ་མི་སྦྱིན་པའི་ལྟུང་བྱེད་དང༌། གོས་འགེད་པའི་ཕྱིར་ཚོགས་པ་མི་སྦྱིན་པའི་ལྟུང་བྱེད་གསུམ་བཤད་ཟིན་ཏོ།། །།གང་ལ་དབྱར་ཁང་ཡལ་བར་འདོར་བ་ལས་གྱུར་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར། དབྱར་ཁང་མ་གཏད་པར་འགྲོ་བ་ལའོ་ཞེས་བྱ་བ་སྨྲས་ཏེ། དགེ་སློང་མ་རྣམས་ཀྱི་ཁྱམས་གྲུ་བཞི་ལ་སོགས་པའི་གནས་ནི་དབྱར་ཁང་ཞེས་བྱ་སྟེ། དེའི་ལྡེ་མིག་ལ་སོགས་པ་ཐན་ཁྱིམ་པ་ཡན་ཆད་ལ་ཡང་མ་གཏད་མ་བཅོལ་བར་གཞན་དུ་འགྲོ་བ་ལ་ཁ་ན་མ་ཐོ་བ་འདིར་འགྱུར་རོ། །དགེ་འདུན་གྱི་ཡང་རུང་གང་ཟག་གི་ཡང་རུང་སྟེ། གནས་མལ་བཞིན་དུ་གཞན་ལ་གཏད་པར་བྱའོ། །ཅི་ཙམ་དུ་སོང་ཞེ་ན། ཉེན་ཀོར་བཏང་ནའོ་ཞེས་བྱ་བ་སྨྲས་ཏེ། འདིར་ཉེན་ཀོར་ཞེས་བྱ་བ་ནི་དབྱར་ཁང་གི་འཕྲལ་གྱི་བྱ་བ་ཡོད་པའི་ཕྱོགས་ཏེ་དེ་བཏང་ནའོ། །དབྱར་ཁང་གླར་མི་གཏང་ངོ་ཞེས་བྱ་བ་ནི། གང་ཟག་གི་དབྱར་ཁང་གཞན་ལ་གླར་མི་གཏང་ངོ༌། །ཁང་ཁྱིམ་གྱི་གཞི་དང་ཚོང་ཁང་གི་གཞི་ཡང་ངོ་ཞེས་བྱ་བ་ལ། གླར་མི་གཏོང་ངོ་ཞེས་བྱ་བའི་རྗེས་བསྙགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །འདི་ཡང་གང་ཟག་གིའོ། །འདིར་མདོ་དེ་གཉིས་ཀྱི་གཞུང་ནི་ཕྲན་ཚེགས་དག་ལས་དེ་ལྟ་བས་ན་དགེ་སློང་མས་དབྱར་ཁང་གླར་མི་གཏང་ངོ༌། །གཏོང་ན་འགལ་ཚབས་ཅན་དུ་འགྱུར་རོ། །དེ་ལྟ་བས་ན་དགེ་སློང་མས་ས་གཞི་གླར་མི་གཏང་ངོ༌། །གཏོང་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །དབྱར་ཁང་ཡལ་བར་འདོར་བ་ལས་གྱུར་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ད་འདི་མན་ཆད་ནི་དུས་འདི་དང་ཕྱོགས་འདིར་ནི་འགྲོ་བར་བྱའོ། །འདིར་ནི་འགྲོ་བར་མི་བྱའོ་ཞེས་བྱ་བ་ལས་ལྟུང་བྱེད་གང་དག་རྣམ་པར་གཞག་པར་འགྲོ་བ་དང་མི་འགྲོ་བ་ལས་གྱུར་པའི་ལྟུང་བྱེད་བཞི་སྟོན་ཏེ། དེ་ལ་གང་ལ་དབྱར་གྱི་ནང་དུ་ལྗོངས་རྒྱུ་ཞིང་འགྲོ་བའི་ལྟུང་བྱེད་དུ་འགྱུར་ཞེ་ན་དེའི་
ཕྱིར། དབྱར་གྱི་ནང་དུ་ལྗོངས་རྒྱུ་ཞིང་འགྲོ་བ་ལའོ་ཞེས་བྱ་བ་སྨྲས་ཏེ། དབྱར་གྱི་ནང་ལོགས་སུ་ཡུལ་བལྟ་བའི་ཕྱིར་ལྗོངས་རྒྱུ་ཞིང་འགྲོ་བ་ལ་ཁ་ན་མ་ཐོ་བ་འདིར་འགྱུར་རོ། །ཉེས་པ་ལས་དབྱུང་བ་དང་རྫོགས་པར་བསྙེན་པར་བྱ་བ་དང་རྩོད་བཞི་པར་བྱ་བ་ལ་སོགས་པའི་ཆེད་དུ་བྱིན་གྱིས་བརླབས་ཏེ་འགྲོ་བ་ལ་ནི་མ་བཀག་གོ །གྱི་ན་ཡུལ་རྒྱུ་ཞིང་འཕྱན་དུ་འགྲོ་བ་བཀག་སྟེ། ལམ་དུ་ཞུགས་པའི་ཚེ་ནི་ཉེས་བྱས་སོ། །རྒྱང་གྲགས་ཀྱི་མཐའ་ལས་འདས་ན་ནི་དངོས་གཞིའོ། །འདི་དགེ་སློང་ལ་སོགས་པ་གཞན་ལ་ནི་ཉེས་བྱས་སོ། །བར་ཆད་ཉེ་བར་གནས་པ་ལ་ནི་ལྟུང་བ་མེད་དོ་ཞེས་བྱ་བ་ནི། བར་ཆད་བརྒྱད་པོ་དག་ལས་གང་ཡང་རུང་བ་བྱུང་ན་དབྱར་གྱི་ནང་ལོགས་སུ་འགྲོ་བ་ལ་ནི་ལྟུང་བ་མེད་དོ། །གང་ལ་དབྱར་གནས་པའི་འོག་ཏུ་མི་འགྲོ་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། དབྱར་གནས་པའི་འོག་ཏུ་དེར་མི་འགྲོ་བ་ལའོ་ཞེས་བྱ་བ་སྨྲས་ཏེ། དབྱར་གནས་པར་ཁས་བླངས་ནས་དགག་དབྱེ་བྱས་པའི་འོག་ཏུ་ཚེས་བཅུ་དྲུག་ལ་ལྗོངས་རྒྱུ་བ་དེར་མི་འགྲོ་བ་ལ་ཁ་ན་མ་ཐོ་བ་འདིར་འགྱུར་རོ། །འདིར་འགྲོ་བའི་ཚད་ནི་རྒྱང་གྲགས་ཀྱི་ཚད་ཀྱི་མཐའོ། །བུད་མེད་རྣམས་ནི་གནས་པ་ལྷག་པར་ཆགས་པ་ཤས་ཆེ་བས་བསླབ་པའི་གཞི་འདི་བཅས་སོ། །གཞན་ལ་ནི་འདི་ཉེས་བྱས་ཡིན་པར་འདུལ་བ་མདོར་བསྡུས་པ་ལས་ཤེས་པར་བྱའོ། །ཕྱོགས་ཀུན་ན་འཇིགས་པ་དང་བཅས་པ་འམ་ཞེ་འགྲས་པ་ཡོད་ན་ནི་ལྟུང་བ་མེད་དོ། །འཇིགས་པ་མེད་པའི་ལམ་གྲོགས་རྙེད་ལ་མི་འགྲོ་ན་ནི་ཁ་ན་མ་ཐོ་བ་རྫོགས་པར་འགྱུར་རོ། །ཚེས་བཅུ་དྲུག་གི་འོག་རོལ་ཏུ་ལམ་གྲོགས་ལ་སྡོད་པ་ལ་ནི་ཉེས་པ་མེད་དོ། །གང་ལ་དོགས་པ་དང་བཅས་པར་འགྲོ་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཡུལ་འཁོར་དོགས་པ་དང་བཅས་པར་འགྲོ་བ་ལའོ་ཞེས་བྱ་བ་སྨྲས་ཏེ། ལྗོངས་རྒྱུ་ཞིང་ཞེས་བྱ་བར་སྦྱར་རོ། །ཡུལ་འཁོར་ཆོམ་རྐུན་པའི་འཇིགས་པས་དོགས་པ་དང་བཅས་པ་ཉིད་དུ་ལྗོངས་རྒྱུ་ཞིང་འགྲོ་བ་ལ་ཁ་ན་མ་ཐོ་བ་འདིར་འགྱུར་རོ། །གང་ལ་མི་མཐུན་པ་དང་བཅས་པར་འགྲོ་བའི་ལྟུང་བྱེད་དུ་འགྱུར་ཞེ་ན་དེའི་
ཕྱིར། མི་མཐུན་པ་དང་བཅས་པར་ཡང་ངོ་ཞེས་བྱ་བ་སྨྲས་ཏེ། ཡུལ་འཁོར་དུ་འགྲོ་བ་ལའོ་ཞེས་བྱ་བའི་རྗེས་བསྙགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །ཡུལ་འཁོར་གང་ན་དགྲ་བོ་མི་མཐུན་པ་ཡོད་པ་དེ་ནི་མི་མཐུན་པ་དང་བཅས་པ་ཡིན་ཏེ། ཕྱོགས་འདིར་སུ་ཡང་འགྲོ་བར་མི་བྱའོ། །སུ་འགྲོ་བ་དེ་གསད་པར་བྱའོ་ཞེས་བྱ་བ་ལ་སོགས་པ་འགྲོ་བ་དགག་པའི་ཁྲིམས་སུ་བྱས་པ་ཡོད་པ་ལྟ་བུའོ། །གང་ལ་དོགས་པ་དང་བཅས་པ་ཡང་ཡིན་ལ་མི་མཐུན་པ་དང་བཅས་པ་ཡང་ཡིན་པའི་ཕྱོགས་དེར་འགྲོ་བ་ལ་ནི་ལྟུང་བྱེད་གཉི་ག་དུས་གཅིག་ཏུ་འབྱུང་ངོ༌། །འགྲོ་བ་དང་མི་འགྲོ་བ་ལས་གྱུར་པའི་ལྟུང་བྱེད་བཞིའོ་ཞེས་བྱ་བ་དབྱར་གྱི་ནང་དུ་ལྗོངས་རྒྱུ་ཞིང་འགྲོ་བའི་ལྟུང་བྱེད་དང༌། དབྱར་གནས་པའི་འོག་ཏུ་མི་འགྲོ་བའི་ལྟུང་བྱེད་དང༌། དོགས་པ་དང་བཅས་པར་འགྲོ་བའི་ལྟུང་བྱེད་དང༌། མི་མཐུན་པ་དང་བཅས་པར་འགྲོ་བའི་ལྟུང་བྱེད་བཞི་བཤད་ཟིན་ཏོ།། །།བམ་པོ་བཞི་བཅུ་གཉིས་པ། །ད་འདི་མན་ཆད་ནི་སྨྲ་བ་ལས་གྱུར་པའི་ལྟུང་བྱེད་གཉིས་སྟོན་ཏེ། དེ་ལ་གང་ལ་གཞན་གྱི་གནས་སུ་འཐབ་ཀྲོལ་བྱེད་པའི་ལྟུང་བྱེད་དུ་འགྱུར་ཞེན་དེའི་ཕྱིར། ལྷའི་གནས་ལ་སོགས་པ་དང་མུ་སྟེགས་ཅན་གྱི་གནས་སུ་སོང་སྟེ་རྩོད་པར་བྱེད་པ་ལའོ་ཞེས་བྱ་བ་སྨྲས་ཏེ། ལྷའི་གནས་ལ་སོགས་པ་ཞེས་བྱ་བ་ལ། སྩོགས་པ་ཞེས་བྱ་བའི་སྒྲས་ནི་རྒྱལ་པོའི་ཕོ་བྲང་ལ་སོགས་པ་དག་བསྡུའོ། །མུ་སྟེགས་ཅན་གྱི་གནས་ཞེས་བྱ་བ་ནི་མུ་སྟེགས་ཅན་གྱི་འདུག་གནས་སོ། །རྩོད་པར་བྱེད་པ་ཞེས་བྱ་བ་ནི་འཐབ་ཀྲོལ་བྱེད་པ་སྟེ། རྣམ་པར་འབྱེད་པ་ལས་རྩོད་པ་ནི་འཐབ་ཀྲོལ་ལོ་ཞེས་གསུངས་པའི་ཕྱིར་རོ། །གཞན་གྱི་གནས་སུ་སོང་སྟེ་གཞན་ཟིལ་གྱིས་གནོན་པ་འདི་ནི་ཧ་ཅང་སྤྱི་བརྟོལ་ཆེ་བ་ཡིན་པའི་ཕྱིར་དེ་ལ་ཁ་ན་མ་ཐོ་བ་འདིར་འགྱུར་རོ། །ཚིག་གི་དོན་གཅིག་བརྡ་སྤྲད་པའི་དུས་ཉིད་ན་ལྟུང་བྱེད་དུ་འགྱུར་རོ། །གང་ལ་སྐབས་མ་ཕྱེ་བར་འདྲི་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། སྐབས་མ་ཕྱེ་བར་འདྲི་བ་ལའོ་ཞེས་བྱ་བ་སྨྲས་ཏེ། དགེ་སློང་ལ་སོགས་པས་ཚིག་གི་སྐབས་མ་ཕྱེ་བར་དྲི་བ་འདྲི་བ་ལ་ཁ་ན་མ་ཐོ་བ་འདིར་འགྱུར་རོ། །འདིར་གླེང་གཞི་ལས་དགེ་
སློང་ལ་ཞེས་གསུངས་མོད་ཀྱི་ལྟུང་བ་རྣམ་པར་གཞག་པ་ལས་སྤྱིར་བསྟན་ཏོ། །ཇི་ལྟར་སྐབས་འབྱེད་དུ་གཞུག་པར་བྱ་ཞེ་ན་དེའི་ཕྱིར། སྟན་བཏིང་སྟེ་ཕན་ཚུན་ཀུན་དགའ་བར་བྱས་ནས་ལུང་དྲི་བའི་སྦྱོར་བས་སྐབས་འབྱེད་དུ་གཞུག་པར་བྱའོ་ཞེས་བྱ་བ་སྨས་ཏེ། དང་པོར་ཇེ་སྟན་བཏིང་སྟེ་དེའི་འོག་ཏུ་གཏམ་དྲི་བས་ཕན་ཚུན་ཀུན་དགའ་བར་བྱས་ནས་ལུང་དྲི་བ་ཞེས་བྱ་བ་མདོ་སྡེ་དང་འདུལ་བ་དང་ཆོས་མངོན་པ་ཅི་ཐོས་པ་ལ་སོགས་པ་དྲི་བའི་སྦྱོར་བར་གང་ཟག་ཕ་རོལ་པོ་སྐབས་འབྱེད་དུ་གཞུག་པར་བྱའོ། །འདིར་གཞུང་ནི་ཆོས་མངོན་པ་དང་འདུལ་བའི་ལུང་ཅི་དག་བླགས་ཞལ་སྟོན་ཅིང་མཁྱེན་ཞེས་དྲི་བས་སོ་ཞེས་གསུངས་པ་ཡིན་ནོ། །སྨྲ་བ་ལས་གྱུར་པའི་ལྟུང་བྱེད་གཉིས་སོ་ཞེས་བྱ་བ་གཞན་གྱི་གནས་སུ་འཐབ་ཀྲོལ་བྱེད་པའི་ལྟུང་བྱེད་དང༌། སྐབས་མ་ཕྱེ་བར་འདྲི་བའི་ལྟུང་བྱེད་གཉིས་བཤད་ཟིན་ཏོ།། །།ད་འདི་མན་ཆད་ནི་བཤད་པ་དང་ལྡན་པའི་ལྟུང་བྱེད་གསུམ་སྟོན་ཏེ། དེ་ལ་གང་ཕྱི་སར་གཅིག་པུ་འགྲོ་བའི་ལྟུང་བྱེད་དུ་འགྱུར་ཞེ་ན། དེའི་ཕྱིར། ཕྱི་སར་གཅིག་པུ་འགྲོ་བ་ལའོ་ཞེས་བྱ་བ་སྨྲས་ཏེ། དབྱར་ཁང་གི་ཉེ་འཁོར་འདོམ་གང་ལས་ལོགས་ཤིག་ན་ཆབ་ཀུང་ས་དཀན་བག་ཏུ་འདུག་པ་དེར་གཅིག་པུ་འགྲོ་བ་ལ་ཁ་ན་མ་ཐོ་བ་འདིར་འགྱུར་རོ། །འདིར་གལ་ཏེ་བུད་མེད་དུ་གྱུར་པ་མཐུ་དང་ལྡན་པ་ཡིན་ན་རབ་ཏུ་བྱུང་བ་འདི་པ་དང་ལྷན་ཅིག་འགྲོ་བ་ལ་ནི་ལྟུང་བ་མེད་དོ། །གང་ལ་རྩྭ་སྔོན་པོའི་སྟེང་དུ་བཤང་པ་འདོར་བའི་ལྟུང་བྱེད་དུ་འགྱུར་ཞེན་དེའི་ཕྱིར། རྩྭ་སྔོན་པོའི་སྟེང་དུ་བཤང་པ་འདོར་བ་ལའོ་ཞེས་བྱ་བ་སྨྲས་ཏེ། རྩྭ་སྔོན་པོའི་སྟེང་དུ་བཤང་བ་འདོར་བ་ལ་ཁ་ན་མ་ཐོ་བ་འདིར་འགྱུར་རོ། །འདིར་འདོར་བ་ཞེས་བྱ་བ་ནི་བཤང་བ་བྱེད་པ་དང་བྱས་ཟིན་པ་འདོར་བ་གཉི་ག་ལ་བྱའོ། །སྔོན་པོ་ལ་མི་གཙང་བས་ཕོག་ན་དངོས་གཞིའོ། །མདུན་རོལ་དུ་ནི་ཉེས་བྱས་སོ། །ནད་པ་ལ་ནི་ལྟུང་བ་མེད་དོ་ཞེས་བྱ་བ་ནི། རྩྭ་སྔོན་པོའི་སྟེང་དུ་བཤང་བ་འདོར་བ་ལའོ། །རྩྭ་སྔོན་པོས་ཐམས་ཅད་ཁྱབ་པ་ཉིད་ལ་ཡང་ངོ་ཞེས་བྱ་བ་ལ་ལྟུང་བ་མེད་དོ་ཞེས་བྱ་བའི་རྗེས་བསྙགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །ས་ཕྱོགས་ཐམས་ཅད་དུ་རྩྭ་སྔོན་པོས་ཁྱབ་པ་ཉིད་
ཡིན་ན་དེར་བཤང་བ་འདོར་བ་ལ་ནི་ལྟུང་བ་མེད་དོ། །གང་ལ་རྩིག་པའི་ཕག་ཏུ་མ་བལྟས་པར་བཤང་བ་འདོར་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། རྩིག་པའི་ཕག་ཏུ་མ་བལྟས་པར་བཤང་བ་འདོར་པ་ལའོ་ཞེས་བྱ་བ་སྨྲས་ཏེ། འདིར་རྩིག་པ་ཞེས་བྱ་བ་ནི་དབྱར་ཁང་གི་ར་བ་ལ་བྱའོ། །དེས་ན་དབྱར་ཁང་གིར་བའི་ཕྱི་རོལ་དུ་འདི་ན་འགའ་ཞིག་འདུག་པ་ལ་མི་ཕོག་གམ་ཞེས་མ་དཔྱད་མ་བལྟས་པར་བཤང་བ་འདོར་བ་ལ་ཁ་ན་མ་ཐོ་བ་འདིར་འགྱུར་རོ། །རྩིག་པ་པུ་ཤུ་བཏབ་པ་ལ་ནི་ལྟུང་བ་མེད་དོ་ཞེས་བྱ་བ་ནི། དབྱར་ཁང་གི་སྟེང་གི་རྩིག་པའི་བུ་ཤུ་བཏབ་པ་ཡིན་ན་གལ་ཏེ་པུ་ཤུ་མཐོ་ཆེས་པས་བལྟར་མི་སླེབ་པར་འགྱུར་ན། དེའི་ཚེ་ཕག་ཏུ་མ་བལྟས་པར་བཤང་བ་འདོར་བ་ལ་ལྟུང་བ་མེད་དོ། །གལ་ཏེ་བལྟར་ནུས་པ་ཡིན་ན་ནི་ཉེས་པ་ཁོ་ནར་འགྱུར་རོ། །མི་གཙང་པ་ལ་བོང་རྡོག་འཕང་བར་མི་བྱའོ་ཞེས་བྱ་བ་ནི། མི་གཙང་བའི་ཐལ་བའི་སྟེང་དུ་བོང་བ་ལ་སོགས་པ་འཕང་ཞིང་ཟེར་མ་འཐོར་བར་མི་བྱའོ། །འདིར་གཞུང་ནི་ཕྲན་ཚེགས་དག་ལས་ཚེ་དང་ལྡན་པ་འོད་སྲུངས་ཆེན་པོ་ལྗན་ལྗིན་གྱི་དྲུང་དུ་འགྲོ་བ་དེ་སྦོམ་དགའ་མོས་མཐོང་ནས། དེ་མྱུར་བ་མྱུར་བར་སོང་སྟེ་ལྗན་ལྗིན་དེའི་སྟེང་དུ་བོད་བས་ཅར་ཅེས་བསྣུན་པས་ཚེ་དང་ལྡན་པ་འོད་སྲུངས་ཆེན་པོའི་ཆོས་གོས་དང་ལྷུང་བཟེད་སྣོད་མི་གཅང་བའི་ཟེར་མས་མ་རུང་བར་གྱུར་པ་ན། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་མས་དགེ་སློང་ལ་མི་གཙང་བས་མ་རུང་བར་མི་བྱའོ། །བྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །བཤང་བ་ལས་གྱུར་པའི་ལྟུང་བྱེད་གསུམ་མོ་ཞེས་བྱ་བ་ཕྱི་སར་གཅིག་པུ་འགྲོ་བའི་ལྟུང་བྱེད་དང༌། རྩྭ་སྔོན་པོའི་སྟེང་དུ་བཤང་བ་འདོར་བའི་ལྟུང་བྱེད་དང༌། རྩིག་པའི་ཕག་ཏུ་མ་བལྟས་པར་བཤང་བ་འདོར་བའི་ལྟུང་བྱེད་གསུམ་བཤད་ཟིན་ཏོ།། །།ལྟུང་བྱེད་འབའ་ཞིག་ཏུ་འགྱུར་བ་རྣམས་རྫོགས་སོ་ཞེས་བྱ་བ་དགེ་སློང་མའི་ལྟུང་བྱེད་འབའ་ཞིག་ཏུ་འགྱུར་བ་བརྒྱ་རྩ་བརྒྱད་ཅུ་པོ་དག་བཤད་ཟིན་ཏོ།། །།ད་ནི། །འོ་མ་ཞོ་དང་མར་དང་ནི། །ཞུན་མར་འབྲུ་མར་དབུ་བ་དང༌། །སྦྲང་རྩི་ཉ་ཤ་ཤ་དང་ནི། །ཤ་སྐམ་བསླབ་པ་བྱིན་པའོ། །ཞེས་གསུངས་
པའི་རིམ་གྱིས་ལྟུང་བྱེད་རྣམས་ཀྱི་འོག་ཏུ་བསྟན་པ། དགེ་སློང་མའི་སོ་སོར་བཤགས་པར་བྱ་བ་བཅུ་གཅིག་པོ་དག་བཤད་པར་བྱ་སྟེ། དེ་ལ་གང་ལ་འོ་མ་སློང་བའི་སོ་སོར་བཤགས་པར་བྱ་བར་འགྱུར་ཞེ་ན། དེའི་ཕྱིར་གཞན་གྱི་ཁྱིམ་ནས་བདག་གི་དོན་དུ་འོ་མ་བསླངས་ཏེ་འཐུངས་པ་ལའོ་ཞེས་བྱ་བ་སྨྲས་ཏེ། གཞན་གྱི་ཁྱིམ་ནས་ཞེས་བྱ་བ་ནི་ཉེ་དུ་མ་ཡིན་པའི་ཁྱིམ་ནས་ཏེ། དེ་ནས་བདག་གི་དོན་དུ་འོ་མ་བསླངས་ཏེ་འཐུངས་པ་ལ་ཁ་ན་མ་ཐོ་བ་འདིར་འགྱུར་རོ། །གནས་སྐབས་གང་ལ་ཞེ་ན་དེའི་ཕྱིར། མི་ན་བས་སོ་ཞེས་བྱ་བ་སྨྲས་ཏེ། ན་བ་ལ་ནི་ཉེས་པ་མེད་དོ། །དེས་བླངས་པའི་ཚེ་ན་ཉེས་བྱས་སོ་ཞེས་བྱ་བ་ནི། མི་ན་བ་དེས་བླངས་པའི་ཚེ་ནི་ཉེས་བྱས་སུ་འགྱུར་རོ། །འཐུངས་ན་ནི་དངོས་གཞིའོ། །ན་བས་ནི་བསླངས་པ་དང་འཐུངས་པ་གཉི་ག་ལ་ཉེས་པ་མེད་དོ། །གང་ལ་སོ་སོར་བཤགས་པར་བྱ་བ་གཞན་དགུ་པོ་དག་ཏུ་འགྱུར་ཞེ་ན་དེའི་ཕྱིར། ཞོ་དང་མར་དང་ཞུན་མར་དང་འབྲུ་མར་དང༌། སྦྲང་རྩི་དང་བུ་རམ་གྱི་དབུ་བ་དང་ཉ་ཤ་དང་ཤ་དང་ཤ་སྐམ་རྣམས་ཀྱང་ངོ་ཞེས་བྱ་བ་སྨྲས་ཏེ། གཞན་གྱི་ཁྱིམ་ནས་བདག་གི་དོན་དུ་བླངས་ཏེ་འཐུངས་སམ་ཟོས་པ་ལའོ་ཞེས་བྱ་བའི་རྗེས་བསྙག་པའི་ཕྱིར་ཀྱང་ངོ་ཞེས་བྱ་བའི་སྒྲ་སྨོས་སོ། །ཞོ་ལ་སོགས་པ་རེ་རེ་ཡང་གཞན་གྱི་ཁྱིམ་ནས་བདག་གི་དོན་དུ་བླངས་ཏེ་ཟོས་སམ་འཐུངས་པ་ལ་ཁ་ན་མ་ཐོ་བ་དེ་དག་ཏུ་འགྱུར་རོ་ཞེས་བྱ་བར་སྦྱར་རོ། །འདིར་ཡང་མི་ན་བས་སོ་ཞེས་བྱ་བ་དང་དེས་བསླངས་པའི་ཚེ་ནི་ཉེས་བྱས་སོ་ཞེས་བྱ་བ་སྔ་མ་བཞིན་དུ་སྦྱར་རོ། །དེ་དག་ལས་གཞན་བླངས་ལ་གཞན་ཐོབ་པ་ལ་ནི་ན་སྨད་པ་མེད་དོ་ཞེས་བྱ་བ་ནི། འོ་མ་ལ་སོགས་པ་སྔར་བསྟན་པ་དེ་དག་ལས་གང་ཡང་རུང་བ་གཞན་བསླངས་ལ་གང་ཡང་རུང་བ་གཞན་ཐོབ་ཅིང་ཟོས་པ་ལ་ནི་ཉེས་པ་ན་སྨད་པ་མེད་དོ། །མི་བསོད་པ་ལ་ཡང་ངོ་ཞེས་བྱ་བ་ནི། བསླངས་ཏེ་ཐོབ་པ་ལ་ན་སྨད་པ་མེད་དོ་ཞེས་བྱ་བ་སྦྱར་ཏེ། འོ་མ་ལ་སོགས་པ་བསོད་པ་སློང་བ་ལ་མི་བསོད་པ་ཐོབ་པ་ལ་ཡང་ན་སྨད་པ་མེད་པའོ། །དེར་གཏོགས་པ་དེ་ལས་ཐོབ་པ་ལ་ཡང་ངོ་ཞེས་བྱ་བ་ལ། ན་སྨད་པ་མེད་དོ་ཞེས་བྱ་བའི་རྗེས་བསྙག་པའི་ཕྱིར་ཡང་ངོ་
ཞེས་བྱ་བའི་སྒྲ་སྨོས་སོ། །མི་བསོད་པར་གཏོགས་པ་དེ་བསླངས་པ་ལས་འོ་མ་ལ་སོགས་པ་བསོད་བ་དེ་ཐོབ་ཅིང་ཟོས་སམ་འཐུངས་པ་ལ་ཡང་ཉིས་པ་ན་སྨད་པ་མེད་དོ། །འོ་ན་ཟོས་སམ་འཐུངས་ན་དངོས་གཞིའོ་ཞེས་གསུངས་ན་ཅི་ལྟར་ཐོབ་པ་ལ་ན་སྨད་པ་མེད་ཅེས་བྱ་ཞེ་ན། དེ་ལ་ཉེས་པ་མེད་དོ། །ཐམས་ཅད་དུ་ཡང་ཐོབ་པ་ཞེས་སྨོས་པ་ནི་ཟབ་དང་འཐུང་བ་མཚོན་པར་རིག་པར་བྱ་སྟེ། ཐོབ་པའི་འབྲས་བུ་ནི་ཟབ་ཡིན་པས་དེའི་ཕྱིར་རྒྱུ་ལ་འབྲས་བུ་བཏགས་ནས་ཐོབ་པ་ལན་སྨད་པ་མེད་དོ་ཞེས་བརྗོད་ཀྱི་མ་ཐོ་བ་པ་ལ་ནི་མ་ཡིན་ནོ། །འོན་སློང་བ་དང་ཐོབ་པ་གཉིས་ལ་ཁ་ན་མ་ཐོ་བ་ཅིར་འགྱུར་ཞེ་ན་དེའི་ཕྱིར། དེ་ནི་ཉེས་བྱས་མེད་པ་ཉིད་དོ་ཞེས་བྱ་བ་སྨྲས་ཏེ། དེ་ནི་ཞེས་བྱ་བ་ནི་གཞན་བླངས་པའི་རྒྱུས་ཐོབ་པ་གང་ཡིན་པ་དང་གཞན་ཐོབ་པའི་རྒྱུར་སློང་བ་སྟེ། དེ་ནི་ཉེས་བྱས་བྱེད་པ་ཉིད་ཡིན་ནོ། །འདི་སྐད་བསྟན་ཏེ་བསོད་པ་བསླངས་པའི་རྒྱུས་མི་བསོད་པ་ཐོབ་པ་གང་ཡིན་པ་དང༌། བསོད་པ་ཐོབ་པའི་རྒྱུས་མི་བསོད་པ་སློང་བ་གང་ཡིན་པ་དེ་ནི་འདིར་ཉེས་བྱས་སུ་འགྱུར་རོ། །ལྷག་མ་ཐམས་ཅད་ནི་དགེ་སློང་གི་རྣམ་པར་འབྱེད་པར་ཟས་བསོད་པའི་སློང་བའི་ལྟུང་བྱེད་ཀྱི་སྐབས་སུ་སྦྱིན་པ་པོ་ཉེ་དུ་མ་ཡིན་པ་ཁྱིམ་པ་དང་མི་ན་བ་དང་ཅི་བདེར་བསྟབས་པ་མ་བྱས་པ་ཞེས་བྱ་བ་ལ་སོགས་པ་ཇི་སྐད་བསྟན་པ་བཞིན་དུ་རིག་པར་བྱའོ། །སོ་སོར་བཤགས་པར་བྱ་བ་བཅུ་གཅིག་པ་བསྟན་པར་བྱ་བའི་ཕྱིར། སེང་གེ་ལས་གྱུར་པའོ་ཞེས་བྱ་བ་སྨྲས་ཏེ། དགེ་སློང་པ་རྣམས་ཀྱི་སོ་སོར་བཤགས་པར་བྱ་བ་དམག་དཔོན་སེང་གེའི་གླེང་གཞི་ལས་བསྟན་པ་གང་ཡིན་པ་དེ་ཉིད་དགེ་སློང་མ་རྣམས་ཀྱི་ཡང་ཡིན་པར་རིག་པར་བྱའོ། །འདི་སྐད་བསྟན་ཏེ། དམག་དཔོན་སེང་གེ་ལ་བརྟེན་ནས་བསླབ་པའི་སྡོམ་པ་བྱིན་པ་དང་སྔར་མགྲོན་དུ་མ་བོས་པར་ཁྱིམ་ནས་བཅའ་བ་དང་བཟའ་བ་བླངས་ཤིང་ཟ་བ་ལ་སྟེ་ག་གོན་དང་ལ་ཕུག་དང་ལྡམ་ལྡུམ་མོད་པ་དག་ནི་མ་གཏོགས་སོ་ཞེས་སྔར་དགེ་སློང་རྣམས་ཀྱི་སོ་སོར་བཤགས་པར་བྱ་བའི་ཉེས་པ་བསྟན་པ་གང་ཡིན་པ་དེ་ཉིད་དགེ་སློང་མ་རྣམས་ཀྱི་ཡང་ཡིན་པར་ཤེས་པར་བྱའོ། །སོ་སོར་བཤགས་པར་བྱ་བ་
རྣམས་རྫོགས་སོ་ཞེས་བྱ་བ་དགེ་སློང་མའི་སོ་སོར་བཤགས་པར་བྱ་བ་བཅུ་གཅིག་པོ་དག་བཤད་ཟིན་ཏོ།། །།ད་འདི་དགེ་སློང་མ་རྣམས་ཀྱི་བསླབ་པའི་ཆོས་མང་པོ་དག་བཤད་པར་བྱ་སྟེ། དེ་དག་ནི་ཕལ་ཆེར་ཐུན་མོང་མ་ཡིན་པས་གཞན་ཐམས་ཅད་ནི་སྔར་དགེ་སློང་གི་རྣམ་པར་འབྱེད་པའི་སྐབས་སུ་བསྟན་པ་བཞིན་དུ་ཤེས་པར་བྱའོ། །ཐུན་མོང་མ་ཡིན་པ་ལས་ཉུང་ཤས་ཤིག་དང་དགེ་སློང་གི་ཡིན་ལ་དགེ་སློང་མའི་མ་ཡིན་པ་ཉུང་ཤས་ཤིག་ཡོད་པ་དེ་འདིར་བརྗོད་པར་བྱའོ། །དེ་ལ་སྔར། ཤམ་ཐབས་ལ་ནི་རྣམ་བདུན་དང༌། །ཞེས་སྨོས་པ་དགེ་སློང་མ་ལ་བརྒྱད་ཡོད་དེ་འདིར་ཐུན་མོང་མ་ཡིན་པ་གཅིག་བསྟན་པའི་ཕྱིར། ཤམ་ཐབས་རྐེད་པ་སྣང་བར་བགོ་བར་མི་བྱའོ་ཞེས་བྱ་བ་སྨྲས་ཏེ། རྐེད་པའི་ཕྱོགས་སྣང་བར་འགྱུར་བའི་ཉེས་པ་དགག་པའི་ཕྱིར་འདི་བཅའ་བ་མཛད་དོ། །གྲོང་དུ་འགྲོ་བའི་སྐབས་ཀྱི་ཐུན་མོང་མ་ཡིན་པ་བསྟན་པའི་ཕྱིར། ཆགས་པར་གྱུར་ཅིང་ཁྱིམ་གཞན་དུ་འགྲོ་བར་མི་བྱའོ་ཞེས་བྱ་བ་སྨྲས་ཏེ། དགེ་སློང་མ་འཁྲིག་པའི་འདོད་ཆགས་ཀྱིས་ཆགས་པར་གྱུར་བཞིན་དུ་ཁྱིམ་གཞན་དུ་འགྲོ་བར་མི་བྱའོ། །མི་འདོད་བཞིན་དུ་རྐྱེན་གྱི་དབང་གིས་འགྲོ་དགོས་ལ་ཡུལ་གྱི་དབང་གིས་འདོད་པའི་འདོད་ཆགས་སྐྱེས་པའི་རོ་མྱང་བར་མི་བྱེད་པ་ལ་ནི་ཉེས་པ་མེད་དོ། །གང་གི་ཚེ་དང་དུ་ལེན་པར་བྱེད་པ་དེའི་ཚེ་ནི་ཉེས་པ་ཁོ་ནར་འགྱུར་རོ། །འདིར་འགྲོ་བར་མི་བྱའོ་ཞེས་སྨོས་པ་ནི་དཔེ་ཙམ་དུ་ཟད་དེ་སོང་ཟིན་པའི་གནས་སྐབས་ལ་ཡང་ཁ་ན་མ་ཐོ་བ་ཁོ་ནར་འགྱུར་རོ། །འདིར་གླེང་གཞི་ནི་དེ་རྣམས་དེ་དག་ ཏུ་ཞུགས་པ་ན་སྐྱེས་བུ་གཟུགས་བཟང 
་བ་མཛེས་པ་བ་ལྟ་ན་སྡུག་པ་མཐོང་བ་དང་ཆགས་པར་གྱུར་ཏོ་ཞེས་གསུངས་པ་ཡིན་ནོ། །བསླབ་པ་ལྷག་མ་རྣམས་སྤྱིར་བསྡུ་བའི་ཕྱིར། དགེ་སློང་དག་ལས་གྱུར་པ་བཞིན་ནོ་ཞེས་བྱ་བ་སྨྲས་ཏེ། བསླབ་པ་གཞན་ནི་དགེ་སློང་དག་གི་གླེང་གཞི་ལས་གྱུར་པ་དགེ་སློང་གི་རྣམ་པར་འབྱེད་པའི་སྐབས་སུ་བསྟན་པ་བཞིན་དུ་དགེ་སློང་མ་དག་གི་གླེང་གཞི་ལས་གྱུར་པ་ཡང་དེ་བཞིན་དུ་ཤེས་པར་བྱའོ། །དགེ་སློང་གི་རྣམ་པར་འབྱེད་པའི་སྐབས་སུ་འཇུག་པར་བྱ་བ་དགུ་དག་དང་ཞེས་པའི་སྐབས་སུ་
མ་བསྒོ་བར་ཁྱིམ་པའི་ཁྱིམ་དུ་སྟན་ལ་མི་འདུག་པར་བསླབ་པར་བྱ་ཞེས་སྨོས་པ་དང་ན་བ་རྣམ་པ་བཞི་རྣམས་སོ་ཞེས་བྱ་བའི་སྐབས་སུ་མིན་པར་རྩྭ་སྔོན་པོ་ཡོད་པའི་ཕྱོགས་སུ་བཤང་བ་དང་གཅི་བ་དང་མཆིལ་མ་དང་སྣབས་དང་སྐྱུགས་པ་དང་རླུགས་པ་མི་དོར་པར་བསླབ་པར་བྱ་ཞེས་སྨོས་པ་གཉིས་ནི་འདིར་མ་གཏོགས་ཏེ། དེ་གཉིས་ནི་དགེ་སློང་མ་རྣམས་ཀྱི་ལྟུང་བྱེད་ཀྱི་སྐབས་སུ་ཐུག་ཐུབ་ཏུ་ཕྱིས་གནོན་བྱེད་པའི་ལྟུང་བྱེད་དང༌། རྩྭ་སྔོན་པོའི་སྟེང་དུ་བཤད་བ་འདོར་བའི་ལྟུང་བྱེད་ཅེས་བྱ་བས་བྱེ་བྲག་ཏུ་བཤད་ཟིན་པའི་ཕྱིར་རོ། །བསླབ་པ་རྣམས་སོ་ཞེས་བྱ་བ་དགེ་སློང་མའི་བསླབ་པའི་ཆོས་མང་པོ་དག་བཤད་ཟིན་ཏོ། །དགེ་སློང་མའི་རྣམ་པར་འབྱེད་པ་རྫོགས་སོ་ཞེས་བྱ་བ་དགེ་སློང་མའི་རྣམ་པར་འབྱེད་པའི་མདོ་རྣམས་བཤད་ཟིན་ཏོ།། །།ཉེ་བ་འཁོར་གྱིས་ཞུས་པ་ལས་ལྟུང་བའི་མཚན་ཉིད་རྣམ་པ་གཉིས་སུ་གསུངས་ཏེ། ཕམ་པར་འགྱུར་བ་ལ་སོགས་པ་དག་ལ་སོ་སོར་དེས་པ་དང་སྤྱིར་བསྟན་པའོ། །དེ་ལ་སོ་སོར་ངེས་པ་གང་ཡིན་པ་དེ་ནི་དེ་དག་ཉིད་དང་གཅིག་ཅར་རྣམ་པར་བཞག་ཟིན་ཏོ། །སྤྱིར་བསྟན་པ་གང་ཡིན་པ་དེ་འདི་མན་ཆད་དུ་རྣམ་པར་བཤད་པར་བྱའོ། །ད་ནི་རྣམ་པར་འབྱེད་པའི་ཤན་ཡིན་པའི་ཕྱིར་རྣམ་པར་འབྱེད་པ་བསྟན་པའི་འོག་ཏུ་སྤྱིར་བསྟན་པ་ཉིད་ཀྱིས་རྣམ་པར་བཀོད་དེ་དེའི་ཕྱིར། ཉམས་པ་དང་མ་ཆགས་པ་གཉིས་ལྟུང་བ་ལ་སྦྱོར་བ་ལ་ནི་ཉེས་བྱས་སོ་ཞེས་བྱ་བ་སྨྲས་ཏེ། ཉམས་པ་ཞེས་བྱ་བ་ནི་ཕམ་པར་གྱུར་པ་སྟེ། དགེ་སློང་གི་དངོས་པོ་ཡོངས་སུ་དག་པ་ལས་ཕྱིར་བཅོས་སུ་མི་རུང་བ་ཉིད་ཀྱིས་ཉམས་པ་ཡིན་ནོ། །དེའི་ཕྱིར་ཉོན་མོངས་པ་རྣམས་ཀྱིས་ཕམ་པར་བྱས་པ་ནི་ཚེ་དེ་ལ་ཉོན་མོངས་པ་རྣམས་སྤོང་བ་མི་སྲིད་པས་དེས་ན་ཕམ་པར་འགྱུར་བ་ཞེས་བྱའོ། །དགེ་སློང་ཕམ་པར་གྱུར་པ་ལ་ནི་སྡོམ་པ་ཡོད་དུ་ཟིན་ཀྱང་དེ་ལྟ་མོད་ཀྱི་དགོས་པ་མེད་པ་ཉིད་དུ་གྱུར་ཏེ་ཚངས་པ་མཚུངས་པར་སྤྱོད་པ་རྣམས་དང་ལྷན་ཅིག་གནས་པ་དང་ལོངས་སྤྱོད་པ་དག་མེད་པའི་ཕྱིར་རོ། །སྡོམ་པ་ཡང་དག་པར་བླང་བ་ནི་རྣམ་པར་གྲོལ་བའི་ཕྱིར་ཡིན་ན་དེས་རྣམ་པར་འགྲོ་ལ་བ་འཐོབ་པ་ཐག་རིང་དུ་སྤངས་པའི་ཕྱིར་
དེས་ན་དེའི་སྡོམ་པ་ནི་མེད་པ་དང་འདྲ་བ་ཡིན་ནོ། །མ་སྐྱེས་པ་ཞེས་བྱ་བ་ནི་སྡོམ་པ་ཐོབ་པ་སྟེ། རྐྱེན་འགའ་ཞིག་མ་ཚད་བས་དང་པོ་ཉིད་ནས་དགེ་སློང་ནས་དགེ་ཚུལ་དང་དགེ་སློང་དག་གི་སྡོམ་པ་གཉིས་མ་སྐྱེས་པ་ཡིན་ནོ། །ཉམས་པ་དང་མ་སྐྱེས་པའི་གང་ཟག་དེ་གཉིས་ནི་ལྟུང་བ་ལ་སྦྱོར་ཞིང་ལྟུང་བ་ཀུན་ནས་སློང་བར་བྱེད་པ་ཀུན་དུ་སྤྱོད་པས་ལྷག་པར་སྤྱོད་ཅིང་སྦྱོར་བར་བྱེད་ན་ཐམས་ཅད་དུ་ཉེས་བྱས་སུ་འགྱུར་རོ་ཞེས་བྱ་བའི་ཐ་ཚིག་སྟེ། འདིར་དོན་ནི་དེ་ཡིན་ནོ། །ཅི་འདི་སྒྲུབ་པ་ཡིན་ནམ་འོན་ཏེ་དགག་པ་ཡིན་ཞེ་ན། ཉམས་པ་ནི་དགག་པ་ཡིན་ཏེ། འདི་ལྟར་ཉམས་པ་ནི་བསྙེན་པར་རྫོགས་པ་ཅན་ཡིན་པས་བསྙེན་པར་རྫོགས་པ་ཅན་གྱིས་དགེ་སློང་དང་དགེ་སློང་མ་ཉིད་ནི་བསླབ་པ་དག་ལ་ཡན་ལག་ཡིན་པས་དེས་ན་ཉམས་པས་ལྟུང་བ་ལ་སྦྱོར་བའི་དུས་ན་ཡང་དང་ཡང་དུ་ཕམ་པར་འགྱུར་བ་དང༌། དགེ་འདུན་ལྷག་མ་ལ་སོགས་པ་དག་ཏུ་གྱུར་བར་ཐལ་བ་དེ་དགག་པའི་ཕྱིར་འདིར་ཉེས་བྱས་ཙམ་དུ་བསྟན་པས་དེ་འགོག་པར་བྱེད་པའི་ཕྱིར་རོ། །མ་སྐྱེས་པ་ནི་བསྒྲུབ་པ་ཡིན་ཏེ་འདི་ལྟར་དེས་དང་པོ་ཉིད་ནས་དགེ་ཚུལ་ཉིད་དང་དགེ་སློང་ཉིད་ཀྱི་དངོས་པོ་མ་ཐོ་བ་པས་མེད་པའི་ཕྱིར་དེས་ལྟུང་བ་ལ་སྦྱོར་བའི་དུས་ན་ཉེས་བྱས་སུ་འགྱུར་བར་བསྒྲུབ་པའི་ཕྱིར་རོ། །འོ་ན་སྡོམ་པ་མེད་པ་ལ་ལྟུང་བ་རྣམ་པར་གཞག་པ་ཡང་མེད་པ་མ་ཡིན་ནམ་ཞེ་ན། བདེན་མོད་ཀྱི་འོན་ཀྱང་རབ་ཏུ་བྱུང་བ་དང་བསྙེན་བར་རྫོགས་པའི་ཐ་སྙད་ལ་སྡོམ་པ་མ་སྐྱེས་པ་འདིས་རབ་ཏུ་བྱུང་བ་ཉིད་དང་དགེ་སློང་དེ་དང་སྡོམ་པ་ཆགས་པ་འདི་ཁས་བླངས་པར་གྱུར་པས་དེའི་ཕྱིར་ཐ་སྙད་དེ་ལ་བདག་ཉིད་སྟོན་པའི་གང་ཟག་མ་སྐྱེས་པ་ལ་ནི་སྡོམ་པ་ཡང་མ་ཡིན་སྡོམ་པ་མ་ཡིན་པ་ཡང་མ་ཡིན་པའི་ངོ་བོ་ཉིད་ཀྱི་རབ་ཏུ་བྱུང་བ་ཡོད་པས་དེ་ལ་ཉེས་བྱས་སུ་གཞག་པ་མཛད་དོ། །ཁྱིམ་པ་རང་གི་རྟགས་བླངས་པ་ལ་ནི་རབ་ཏུ་བྱུང་བ་དང་རྫོགས་པར་བསྙེན་པའི་ཐ་སྙད་ལ་བདག་ཉིད་སྟོན་པ་མེད་པས་སྡོམ་པ་ཡང་མ་ཡིན་སྡོམ་པ་མ་ཡིན་པ་ཡང་མ་ཡིན་པའི་ངོ་བོ་ཉིད་ཀྱི་རབ་ཏུ་བྱུང་བ་མེད་པས་དེ་ལ་ནི་ཉེས་བྱས་སུ་རྣམ་པར་གཞག་པ་མ་མཛད་དེ་བསོད་ནམས་མ་ཡིན་པ་ཡང་མང་པོ་སྐྱེའོ་ཞེས་བྱ་བ་འབའ་ཞིག་ཏུ་བརྗོད་པར་
རིགས་སོ། །འདིར་གཞུང་ནི་སྔར་ལྟུང་བ་བྱུང་བ་དང༌། རྐུ་ཐབས་སུ་གནས་པ་དང༌། དབང་པོ་འཁྲུགས་པ་དང་མ་ནིང་དང་དགེ་སློང་མ་སུན་ཕྱུང་བས་ཉམས་པར་བྱས་པ་ནི་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །རྐུ་ཐབས་སུ་གནས་པ་ཞེས་བྱ་བ་ལ་སོགས་པ་སྨོས་པ་ནི་ཕ་མ་བསད་པ་ལ་སོགས་པ་གཏན་གྱི་བར་ཆད་དང་ལྡན་པ་མ་སྐྱེས་པ་ཐམས་ཅད་ཀྱི་དཔེ་ཙམ་དུ་ཟད་དོ། །སྔར་ལྟུང་བ་བྱུང་བ་ཞེས་སྨོས་པས་ནི་ཉམས་པ་ལ་ཉེས་བྱས་སུ་འགྱུར་པའི་ཁུངས་བསྟན་ཏེ་འདི་ལྟར་སྔར་བསྙེན་པར་རྫོགས་པ་ཉིད་ཀྱི་ཚེ་ན་ཕམ་པར་འགྱུར་བའི་ལྟུང་བ་བྱུང་བ་གང་ཡིན་པ་དེ་ནི་སྔར་ལྟུང་བ་བྱུང་ཞེས་བྱའོ། །བསྙེན་པར་མ་རྫོགས་ཤིང་རབ་ཏུ་བྱུང་བས་བླངས་པ་ལས་འདས་པ་ལ་ཡང་ངོ་ཞེས་བྱ་བ་ལ་ཉེས་བྱས་སོ་ཞེས་བྱ་བའི་རྗེས་བསྙག་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །དེ་ནི་བསྙེན་པར་མ་རྫོགས་པ་ཡང་ཡིན་ལ་རབ་ཏུ་བྱུང་བ་ཡང་ཡིན་པས་ན་བསྙེན་པར་མ་རྫོགས་ཤིང་རབ་ཏུ་བྱུང་བ་ཞེས་བྱ་སྟེ། དགེ་ཚུལ་དང་དགེ་ཚུལ་མ་དང་དགེ་སློབ་མའོ། དེ་དག་གིས་བླངས་པ་ཞེས་བྱ་བ་ནི། དགེ་ཚུལ་གྱིས་སྲོག་གཅོད་པ་སྤོང་བ་ལ་སོགས་པ་བསླབ་པའི་གཞི་བཅུ་བླངས་པ་དང༌། དགེ་སློབ་ནས་ཆོས་དྲུག་དང་རྗེས་སུ་མཐུན་པའི་ཆོས་དྲུག་བླངས་པ་སྟེ། དེ་ལས་འདས་ཤིང་དྲལ་ན་ཡང་ཉེས་བྱས་ཁོ་ནའོ། །ལྟུང་བ་ལ་སྦྱོར་བ་ལ་ནི་ཉེས་བྱས་སོ་ཞེས་སྔར་སྨོས་པས་འདིར་ཡང་དེ་དག་ལྟུང་བ་ཐམས་ཅད་ལ་སྦྱོར་བ་ལ་ཉེས་བྱས་སུ་འགྱུར་པར་ཐལ་བ་བསལ་བའི་ཕྱིར་བླངས་པ་ལས་འདས་ཕ་ལས་ཉེས་བྱས་སུ་གསུངས་ཀྱི་དེའི་ཕྱོགས་དང་མཐུན་པ་ལ་ནི་ཡིད་ཀྱི་ཉེས་བྱས་སུ་འགྱུར་བར་འོག་ནས་སྟོན་ཏེ། དེའི་ཕྱོགས་མཐུན་པ་ལ་ནི་ཡིད་ཀྱིའོ་ཞེས་བྱ་བ་ལ། དེའི་ཕྱོགས་དང་མཐུན་པ་ཞེས་བྱ་བ་ནི་བསྙེན་པར་མ་རྫོགས་ཤིང་རབ་ཏུ་བྱུང་བ་དགེ་ཚུལ་དང་དགེ་ཚུལ་མ་དང་དགེ་སློབ་མས་བསླབ་པའི་གཞི་བླངས་པ་སྲོག་གཅོད་པ་སྤོང་བ་ལ་སོགས་པ་བཅུ་དང་ཆོས་དྲུག་དང་རྗེས་སུ་མཐུན་པའི་ཆོས་དྲུག་པོ་དག་ཉིད་མ་ཡིན་པ་དེ་དག་འདྲ་ཞིང་དེ་དག་གི་ཕྱོགས་ལ་བརྟེན་པ་གང་ཡིན་པ་དེ་ནི་དེའི་ཕྱོགས་དང་མཐུན་པ་ཞེས་བྱའོ། །དེ་དག་ལས་
འདས་ཤིང་འགལ་བར་བྱས་པ་ལ་ནི་ཡིད་ཀྱི་ཉེས་བྱས་སུ་འགྱུར་ཏེ་བསྡམ་པར་བྱ་བའི་ཉེས་བྱས་ཡིན་གྱི་བཤགས་པར་བྱ་བའི་ཉེས་བྱས་ནི་མ་ཡིན་ནོ་ཞེས་བྱ་བའི་ཐ་ཚིག་གོ །དེའི་ཕྱོགས་དང་མཐུན་པ་དེ་དག་གང་ཞེ་ན་དེ་བསྟན་པའི་ཕྱིར། །དགེ་སློང་མ་ཡི་འཆང་བ་དང༌། །འབྲལ་དང་མེ་ལ་རེག་པ་དང༌། །སྤངས་པ་ཟ་དང་ས་བོན་འཇིག །རྩྭ་སྔོན་ཡོད་པའི་ཕྱོགས་དག་ཏུ། །མི་གཙང་འདོར་དང་ཤིང་ལ་འཇོག །བླངས་པ་མདོར་གཏོགས་སློབ་མའི་མིན། །དགེ་ཚུལ་གཉིས་ཀྱིས་རིན་ཆེན་རེག །སྩེག་འཇོག་བྱས་པ་ཟ་བ་དང༌། །བྱིན་ལེན་མ་བྱས་ས་བརྐོ་དང༌། །སྐྱེ་བ་འཇིག་དང་བཅས་པ་མིན། །དབྱར་གནས་གཅིག་ཏུ་གནས་པ་དང༌། །གསོ་སྦྱོང་དགག་དབྱེར་བཅས་པ་དང༌། །དེ་ལ་སོགས་པ་དེ་ཡི་ནི། །བླངས་པའི་ཕྱོགས་དང་མཐུན་པ་ཡིན། །རྟགས་དང་སློང་དང་སྣོད་དང་ནི། །ལོངས་སྤྱོད་འཕྱར་གཡེང་འདོད་པ་དང༌། །གནོད་པ་དང་ནི་གནས་པ་དང༌། །མ་གུས་མི་སྦྱོང་གཞི་ལས་བྱུང༌། །ཞེས་བྱ་བ་སྨོས་སོ། །ད་འདི་མན་ཆད་ནི་བསྡུ་བའི་ཚིགས་སུ་བཅད་པ་དེ་དག་གི་རྣམ་པར་བཤད་པ་བརྗོད་པར་བྱ་སྟེ། འདི་དག་ནི་དགེ་སློང་མའི་བསླབ་པའི་གཞི་བླངས་པ་དེའི་ཕྱོགས་དང་མཐུན་པ་བསྡམ་པར་བྱ་བའི་ཉེས་བྱས་སུ་འགྱུར་བ་མ་ཡིན་ཏེ། གང་ཞེ་ན། འཆང་བ་དང༌། འབྲལ་བ་དང༌། མེ་ལ་རེག་པ་དང༌། སྤངས་པ་ཟ་བ་དང༌། ས་བོན་གྱི་ཚོགས་འཇིག་པ་དང༌། རྩྭ་སྔོན་པོའི་ཕྱོགས་སུ་མི་གཙང་བ་འདོར་བ་དང༌། ཤིང་ལ་འཛེག་པ་དང༌། བསླབ་པའི་གཞི་ཡང་དག་པར་བླངས་པ་མདོར་གཏོགས་པ་རྣམས་སོ། །དེ་ལ་འཆང་བ་དང་ཞེས་བྱ་བ་ནི་ཆོས་གོས་དང་ལྷུང་བཟེད་ལྷག་པར་འཆང་བའོ། །འབྲལ་བ་ཞེས་བྱ་བ་ནི་ཆོས་གོས་དང་འབྲལ་བའོ། །མེ་ལ་རེག་པ་ཞེས་བྱ་བ་ནི་མེ་འབུད་པ་ལ་སོགས་པའོ། །སྤངས་པ་ཟ་བ་ཞེས་བྱ་བ་ནི། ཟས་སྤངས་པ་ཟ་བའོ། །ས་བོན་གྱི་ཚོགས་འཇིག་པ་ཞེས་བྱ་བ་ནི། རུང་བར་མ་བྱས་པའི་ས་བོན་གྱི་ཚོགས་འཇིག་པའོ། །རྩྭ་སྔོན་པོའི་ཕྱོགས་སུ་མི་གཙང་བ་འདོར་བ་ཞེས་བྱ་བ་ནི། རྩྭ་སྔོན་པོ་ཡོད་
པའི་ས་ཕྱོགས་སུ་བཤང་བ་དང་གཅི་བ་དང་མཆིལ་མ་དང༌། སྣབས་དང་སྐྱུགས་པ་དང་རླུགས་པ་འདོར་བའོ། །ཤིང་ལ་འཛེག་པ་ཞེས་བྱ་བ་ནི་གནོད་པ་བྱུང་བ་མ་གཏོགས་པར་ཤིང་ལ་མི་གང་ཙམ་ལས་མཐོར་འཛེག་པའོ། །བསླབ་པའི་གཞི་ཡང་དག་པར་བླངས་པ་མདོར་གཏོགས་པ་ཞེས་བྱ་བ་ནི་དགེ་སློབ་མས་བསླབ་པའི་གཞི་ཡང་དག་པར་བླངས་པ་སོ་སོར་ཐར་པའི་མདོར་གཏོགས་པ་སྲོག་གཅོད་པ་སྤོང་བ་ལ་སོགས་པ་བཅུ་དང༌། ཆོས་དྲུག་དང་རྗེས་སུ་མཐུན་པའི་ཆོས་དྲུག་པོ་དག་གོ །དེ་དག་ཅིའི་ཕྱིར་དགེ་སློང་མའི་བསླབ་པའི་གཞི་བླངས་པ་དེའི་ཕྱོགས་དང་མཐུན་པར་བསྡམ་པར་བྱ་བའི་ཉེས་བྱས་སུ་འགྱུར་བ་མ་ཡིན་ཞེ་ན། འཆང་བ་ལ་སོགས་པ་བདུན་པོ་དག་ནི་དགེ་སློང་མས་དེ་དག་ལས་འདས་ཤིང་འགལ་བར་བྱས་ཀྱང་ཉེས་པ་ཅིར་ཡང་མི་འགྱུར་བས་དེའི་ཕྱིར་བསྡམ་པར་བྱ་བའི་ཉེས་བྱས་སུ་འགྱུར་བ་མ་ཡིན་ལ། བསླབ་པའི་གཞི་ཡང་དག་པར་བླངས་པ་མདོར་གཏོགས་པ་རྣམས་ནི་དགེ་སློབ་མས་དེ་དག་ལས་འདས་ཤིང་འགལ་བར་བྱས་ན་བཤགས་པར་བྱ་བའི་ཉེས་བྱས་སུ་འགྱུར་བས་དེ་ཡང་བསྡམ་པར་བྱ་བའི་ཉེས་བྱས་སུ་འགྱུར་བ་མ་ཡིན་པའི་ཕྱིར་རོ། །འདི་དག་ནི་དགེ་ཚུལ་དང་དགེ་ཚུལ་མ་གཉིས་ཀྱི་བསླབ་པའི་གཞི་བླངས་པ་དེའི་ཕྱོགས་དང་མཐུན་པ་བསྡམ་པར་བྱ་བའི་ཉེས་བྱས་སུ་འགྱུར་བ་མ་ཡིན་ཏེ། གང་ཞེ་ན་སྔར་དགེ་སློབ་མའི་སྐབས་སུ་འཆང་བ་ལ་སོགས་པ་བདུན་དང་དགེ་སློབ་མའི་བསླབ་པའི་གཞི་ཡང་དག་པར་བླངས་པ་མདོར་གཏོགས་པ་ཞེས་ཇི་སྐད་བསྟན་པ་དེ་དག་ཉིད་ནི་རིན་པོ་ཆེ་ལ་རེག་པ་དང༌། གསོག་འཇོག་བྱས་པ་ཟ་བ་དང་བྱིན་ལེན་མ་བྱས་པ་ཟ་བ་དང་ས་རྐོ་བ་དང༌། སྐྱེ་བའི་ཚོགས་འཇིག་པ་དང༌། དགེ་ཚུལ་གྱི་བསླབ་པའི་གཞི་ཡང་དག་པར་བླངས་པ་མདོར་གཏོགས་པ་དང་བཅས་པ་རྣམས་སོ། །དེ་ལ་རིན་པོ་ཆེ་ལ་རེག་པ་ཞེས་བྱ་བ་ནི་གསེར་དང་དངུལ་ལ་སོགས་པ་ལ་རེག་པའོ། །གསོག་འཇོག་བྱས་པ་ཟ་བ་ཞེས་བྱ་བ་ནི། སྔ་དྲོ་དང་ཕྱི་དྲོ་བའི་བཟའ་བ་དང་བཅའ་བ་ལ་སོགས་པ་གསོག་འཇོག་བྱས་པ་ཟ་
བའོ། །བྱིན་ལེན་མ་བྱས་པ་ཟ་བ་ཞེས་བྱ་བ་ནི། བྱིན་ལེན་མ་བྱས་པའི་ཟས་ཟ་བའོ། །ས་རྐོ་བ་ཞེས་བྱ་བ་ནི་ས་རྐོ་འམ་རྐོར་འཇུག་པའོ། །སྐྱེ་བའི་ཚོགས་འཇིག་པ་ཞེས་བྱ་བ་ནི་ཤིང་ལྗོན་པ་ལ་སོགས་པ་གཅོད་པའོ། །དགེ་ཚུལ་གྱི་བསླབ་པའི་གཞི་ཡང་དག་པར་བླངས་པ་མདོར་གཏོགས་པ་ཞེས་བྱ་བ་ནི་དགེ་ཚུལ་དང་དགེ་ཚུལ་མས་བསླབ་པའི་གཞི་ཡང་དག་པར་བླངས་པ་སོ་སོར་ཐར་པའི་མདོར་གཏོགས་པ་སྲོག་གཅོད་པ་སྤོང་བ་ལ་སོགས་པ་བཅུ་པོ་དག་སྟེ། དེ་ནི་སྐབས་འདིར་སྤུ་བའི་ཚིགས་སུ་བཅད་པ་ལས་མ་སྨོས་མོད་ཀྱི་སྔར་དགེ་སློབ་མའི་བསྡུ་བའི་ཚིགས་སུ་བཅད་པའི་སྐབས་སུ་བླངས་པ་མདོར་གཏོགས་པ་སློབ་མའི་མིན་ཞེས་སྨོས་པའི་རྗེས་ལས་དང་བར་རིག་པར་བྱའོ། །དེ་དག་ཅིའི་ཕྱིར་དགེ་ཚུལ་དང་དགེ་ཚུལ་མ་གཉིས་ཀྱི་བསླབ་པའི་གཞི་བླངས་པ་དའི་ཕྱོགས་དང་མཐུན་པ་བསྡམ་པར་བྱ་བའི་ཉེས་བྱས་སུ་འགྱུར་བ་མ་ཡིན་ཞེ་ན། དགེ་སློབ་མའི་སྐབས་སུ་བསྟན་པ་འཆང་བ་ལ་སོགས་པ་བདུན་པོ་དག་དང༌། དགེ་སློབ་མའི་གཞི་ཡང་དག་པར་བླངས་པ་མདོར་གཏོགས་པ་རྣམས་དང༌། རིན་པོ་ཆེ་ལ་རེག་པ་དང༌། གསོག་འཇོག་བྱས་པ་ཟ་བ་དང༌། བྱིན་ལེན་མ་བྱས་པ་ཟ་བ་དང༌། ས་རྐོ་བ་དང་སྐྱེ་བའི་ཚོགས་འཇིག་པ་ཞེས་བྱ་བ་ལྔ་པོ་དེ་དག་ནི་དགེ་ཚུལ་དང་དགེ་ཚུལ་མས་དེ་དག་ལས་འདས་ཤིང་འགལ་བར་བྱས་ཀྱང་ཉེས་པ་ཅིར་ཡང་མི་འགྱུར་བས་དེའི་ཕྱིར་བསྡམ་བར་བྱ་བའི་ཉེས་བྱས་སུ་འགྱུར་བ་མ་ཡིན་ལ། དགེ་ཚུལ་གྱི་བསླབ་པའི་གཞི་ཡང་དག་པར་བླངས་པ་མདོར་གཏོགས་པ་རྣམས་ནི་དགེ་ཚུལ་དང་དགེ་ཚུལ་མས་དེ་དག་ལས་འདས་ཤིང་འགལ་བར་བྱས་ན་བཤགས་པར་བྱ་བའི་ཉེས་བྱས་སུ་འགྱུར་བས་དེ་ཡང་བསྡམ་པར་བྱ་བའི་ཉེས་བྱས་སུ་འགྱུར་བ་མ་ཡིན་པའི་ཕྱིར་རོ། །འདི་སྐད་བསྟན་ཏེ། འཆང་བ་ལ་སོགས་པ་བདུན་དང་དགེ་སློབ་མའི་བསླབ་པའི་གཞི་ཡང་དག་པར་བླངས་པ་མདོར་གཏོགས་པ་རྣམས་མ་གཏོགས་པ་དེ་དག་གི་ལྷག་མ་དགེ་སློང་དང་དགེ་སློང་མའི་བསླབ་པའི་གཞིར་གཏོགས་པ་གཞན་གང་ཡིན་
བ་དེ་དག་ཐམས་ཅད་ནི་དགེ་སློབ་མའི་བསླབ་པའི་གཞི་ཡང་དག་པར་བླངས་པ་དེའི་ཕྱོགས་དང་མཐུན་པ་ཡིན་ཏེ། དགེ་སློབ་མས་དེ་དག་ལས་འདས་ཤིང་འགལ་བར་བྱས་ན་ཡིད་ཀྱི་ཉེས་བྱས་ཡིན་ཏེ། བསྡམ་པར་བྱ་བའི་ཉེས་བྱས་སུ་འགྱུར་རོ། །འཆད་བ་ལ་སོགས་པ་བདུན་ལ་ནི་ལྟུང་བ་མེད་དོ། །བསླབ་བའི་གཞི་ཡང་དག་པར་བླངས་པ་མདོར་གཏོགས་པ་ལ་ནི་བཤགས་པར་བྱ་བའི་ཉེས་བྱས་སུ་འགྱུར་རོ་ཞེས་བྱ་བའི་ཐ་ཚིག་གོ །འཆང་བ་ལ་སོགས་པ་བདུན་པོ་དེ་དག་ཉིད་དང་དགེ་སློབ་མའི་བསླབ་པའི་གཞི་ཡང་དག་པར་བླངས་པ་མདོར་གཏོགས་པ་རིན་པོ་ཆེ་ལ་རེག་པ་ལ་སོགས་པ་ལྔ་དང་དགེ་ཚུལ་གྱི་བསླབ་པའི་གཞི་ཡང་དག་པར་བླངས་པ་མདོར་གཏོགས་པ་དང་བཅས་པ་རྣམས་མ་གཏོགས་པ་དེ་དག་གི་ལྷག་མ་དགེ་སློང་དང་དགེ་སློང་མའི་བསླབ་པའི་གཞིར་གཏོགས་པ་གཞན་གང་ཡིན་པ་དེ་དག་ཐམས་ཅད་ནི་དགེ་ཚུལ་དང་དགེ་ཚུལ་མའི་བསླབ་པའི་གཞི་ཡང་དག་པར་བླངས་པ་དེའི་ཕྱོགས་དང་མཐུན་པ་ཡིན་ཏེ། དགེ་ཚུལ་དང་དགེ་ཚུལ་མས་དེ་དག་ལས་འདས་ཤིང་འགལ་བར་བྱས་ན་ཡིད་ཀྱི་ཉེས་བྱས་ཡིན་ཏེ། བསྡམ་པར་བྱ་བའི་ཉེས་བྱས་སུ་འགྱུར་རོ། །འཆང་བ་ལ་སོགས་པ་བདུན་པ་དང༌། །དགེ་སློབ་མའི་བསླབ་པའི་གཞི་ཡང་དག་པར་བླངས་པ་རྣམས་དང༌། རིན་པོ་ཆེ་ལ་རེག་པ་ལ་སོགས་པ་ལྔ་ལ་ནི་ལྟུང་བ་མེད་དོ། །དགེ་ཚུལ་གྱི་བསླབ་པའི་གཞི་ཡང་དག་པར་བླངས་བ་མདོར་གཏོགས་པ་ལ་ནི་བཤགས་པར་བྱ་བའི་ཉེས་བྱས་སུ་འགྱུར་རོ་ཞེས་བྱ་བའི་ཐ་ཚིག་གོ །འོ་ན་དགེ་སློབ་མ་དང་དགེ་ཚུལ་དང་དགེ་ཚུལ་མའི་བསླབ་པའི་གཞི་བླངས་པ་དེའི་ཕྱོགས་དང་མཐུན་པ་བསྡམ་པར་བྱ་བའི་ཉེས་བྱས་སུ་འགྱུར་བ་དེ་དག་གང་ཞེ་ན། ལྟུང་བ་མེད་པ་དང་བཤགས་པར་བྱ་བའི་ཉེས་བྱས་སུ་འགྱུར་བ་ཇི་སྐད་བསྟན་པ་དེ་དག་མ་གཏོགས་པ་དགེ་སློང་དང་དགེ་སློང་མའི་སོ་སོར་ཐར་པ་རྣམ་པ་གཉིས་ལས་གསུངས་པའི་ལྷག་མ་གང་ཡིན་པ་སྟེ། འདི་ལྟ་སྟེ་དབྱར་གནས་གཅིག་ཏུ་གནས་པར་ཁས་བླངས་པ་དང༌། གསོ་སྦྱོང་བྱ་བ་དང༌། དགག་དབྱེ་བ་དང༌། དེ་ལ་སོགས་
བདག་ནི་བསྙེན་པར་མ་རྫོགས་ཤིང་རབ་ཏུ་བྱུང་བ་དེའི་བསླབ་པའི་གཞི་ཡང་དག་པར་བླངས་པ་དེའི་ཕྱོགས་དང་མཐུན་པ་ཡིན་ཏེ། །དེ་ལས་འདས་ཤིང་འགལ་བར་བྱས་ན་ཡིད་ཀྱི་ཉེས་བྱས་ཡིན་ཏེ། བསྡམ་པར་བྱ་བའི་ཉས་བྱས་སུ་འགྱུར་རོ་ཞེས་བྱ་བའི་ཐ་ཚིག་གོ །བསྩོགས་པ་ཞེས་བྱ་བའི་སྒྲས་ནི། རྟགས་དང་སླང་དང་སྣོད་དང་ནི། །ཞེས་བྱ་བ་ལ་སོགས་པ་བཞི་བཅུ་པོ་དག་ལས་བྱུང་བ་བསྡམ་པར་བྱ་བའི་ཉེས་བྱས་ཀྱི་ཕྱོགས་སུ་གཏོགས་པ་གང་དག་ཡིན་པ་དེ་དག་བསྡུ་སྟེ། བཞི་བཅུ་བོ་དག་ལས་བྱུང་བ་གང་ཞེ་ན། རྟགས་ཀྱི་གཞི་ལས་བྱུང་བ་དང༌། སློང་བའི་གཞི་ལས་བྱུང་བ་དང༌། སྣོད་ཀྱི་གཞི་ལས་བྱུང་བ་དང༌། ལོངས་སྤྱོད་ཀྱི་གཞི་ལས་བྱུང་བ་དང༌། ཕྱར་གཡེང་གི་གཞི་ལས་བྱུང་བ་དང༌། འདོད་པའི་གཞི་ལས་བྱུང་བ་དང༌། གནོད་པའི་གཞི་ལས་བྱུང་བ་དང༌། གནས་པའི་གཞི་ལས་བྱུང་བ་དང༌། མ་གུས་པའི་གཞི་ལས་བྱུང་བ་དང༌། མི་སྦྱོང་བའི་གཞི་ལས་བྱུང་བའོ། །ཁ་ན་མ་ཐོ་བ་དང་གཞི་དང་རྒྱུ་དང་རྒྱུ་མཚན་དེ་དག་ལས་བྱུང་བ་དེ་ནི་རྟགས་ཀྱི་གཞི་ལ་སོགས་པ་ལས་བྱུང་བ་ཡིན་ཏེ། དེ་དག་བསྡམ་པར་བྱ་བའི་ཉེས་བྱས་སུ་གཏོགས་པ་གང་དག་ཡིན་པ་དེ་དག་ནི་དེའི་ཕྱོགས་དང་མཐུན་པ་ཡིན་ཏེ། དེ་ལ་ནི་ཡིད་ཀྱི་ཉེས་བྱས་སུ་འགྱུར་རོ་ཞེས་བྱ་བར་སྦྱར་རོ། །དེ་ལ་རྟགས་ཀྱི་གཞི་ལས་བྱུང་བ་གང་གི་ཕྱོགས་དང་མཐུན་པ་དེ་ཉིད་ཡིན་ཞེ་ན། འདི་ལྟར་རབ་ཏུ་བྱུང་བའི་རྟགས་ཡང་དག་པར་ལེན་ཏོ་ཞེས་གསུངས་བའི་ཚིག་གང་ཡིན་པ་དེ་ནི་རེ་ཞིག་བླངས་པ་ཡིན་པས། དེའི་ཕྱིར་མུ་སྟེགས་ཅན་གྱི་རྟགས་འཆང་བ་ནི་ཇི་ལྟར་ཁྱིམ་པའི་རྟགས་འཆང་བ་དེ་བཞིན་དུ་རབ་ཏུ་བྱུང་བའི་རྟགས་ཡང་དག་པར་བླངས་པ་ལས་འདས་པ་ཡིན་པས་དེ་ལ་ནི་བཤགས་པར་བྱ་བའི་ཉེས་བྱས་སུ་འགྱུར་རོ། །རྫས་རུང་བ་མ་ཡིན་པ་རྔ་མོའི་བལ་ལ་སོགས་པ་ལས་བྱས་པའི་ཆོས་གོས་ཚད་པས་ཆུད་བ་དང་ཆེ་བའི་བདག་ཉིད་ཀྱི་ཡོ་བྱད་དག་འཆང་བ་དང་བྱེད་པ་དང༌། སེན་མོའི་བཅོས་པ་རྗེས་སུ་མ་གནང་བ་དག་དང༌། ཆ་ལུགས་ཉམས་པར་འགྱུར་བ་སྐྲ་ཆན་པས་
འདྲེག་པ་དག་དང་རྗེས་སུ་མ་གནང་བའི་ཕྱོགས་ཀྱི་སྤུ་འདྲེག་པ་ལ་སོགས་པ་དག་ནི་རྟགས་བླངས་པ་དེའི་ཕྱོགས་དང་མཐུན་པ་ཡིན་པས། དེ་ལ་ནི་བསྡམ་པར་བྱ་བའི་ཉེས་བྱས་སུ་འགྱུར་རོ། །ལྷུང་བཟེད་ཀྱང་རུང་པ་མ་ཡིན་པ་མིའི་མགོ་སྣོད་ལྟ་བུ་ཐོགས་ཤིང་བསོད་སྙོམས་ལ་རྒྱུ་བ་དང༌། རབ་ཏུ་བྱུང་བ་གཞན་གྱི་རྟགས་དང་འདྲ་བ་དང་ཁྱིམ་པའི་རྟགས་དང་འདྲ་བའི་ལྷུང་བཟེད་འཆང་བ་ཡང་རྟགས་ཡང་དག་པར་བླངས་པ་ལས་འདས་པ་ཡིན་པས། དེ་ལ་ནི་བཤགས་པར་བྱ་བའི་ཉེས་བྱས་སུ་འགྱུར་རོ། །ཟངས་མ་ལ་སོགས་པའི་རྫས་གཞན་ལས་བྱས་པ་དང་ཚད་པས་ཆུང་བ་དང་ཆེ་བ་དང་སྐྱ་བའི་ལྷུང་བཟེད་འཆང་བ་གང་ཡིན་པ་དེ་ནི་རྟགས་བླངས་པ་དེའི་ཕྱོགས་དང་མཐུན་པ་ཡིན་པས་དེ་ལ་ནི་བསྡམ་པར་བྱ་བའི་ཉེས་བྱས་སུ་འགྱུར་རོ། །སློང་བའི་གཞི་ལས་བྱུང་བ་གང་གི་ཕྱོགས་དང་མཐུན་པ་ཡིན་ཞེ་ན། གསེར་དང་དངུལ་ལ་སོགས་པ་རིན་པོ་ཆེ་སློང་བ་ནི་གསེར་དངུལ་འཛིན་པ་སྤོང་བའི་བསླབ་པའི་གཞི་ཡང་དག་པར་བླངས་པ་ལས་འདས་པ་ཉིད་ཡིན་པས། དེ་ལ་ནི་བླངས་ན་བཤགས་པར་བྱ་བའི་ཉེས་བྱས་སུ་འགྱུར་རོ། །ཆོས་གོས་ལ་སོགས་པ་སློང་བ་ནི་དེའི་ཕྱོགས་དང་མཐུན་པ་ཡིན་པས་དེ་ལ་ནི་བསྡམ་པར་བྱ་བའི་ཉེས་བྱས་སུ་འགྱུར་རོ། །སྣོད་ཀྱི་གཞི་ལས་བྱུང་བ་གང་གི་ཕྱོགས་དང་མཐུན་པ་ཉིད་ཡིན་ཞེ་ན། རིན་པོ་ཆེ་ལས་བྱས་པའི་ཁབ་རལ་ལ་སོགས་པ་བྱེད་དུ་འཇུག་པ་ནི་གསེར་དངུལ་འཛིན་པ་སྤོང་པའི་བསླབ་པ་ཡང་དག་པར་བླངས་པ་ལས་འདས་པ་ཉིད་ཡིན་པས་དེ་ལ་བྱས་ན་བཤགས་པར་བྱ་བའི་ཉེས་བྱས་སུ་འགྱུར་རོ། །བ་སོ་ལ་སོགས་པ་རྗེས་སུ་གནང་བ་མ་ཡིན་པའི་རྫས་གཞན་ལས་བྱས་པའི་ཁབ་རལ་ལ་སོགས་པ་བྱེད་པ་ནི་དེའི་ཕྱོགས་དང་མཐུན་པ་ཡིན་པས་དེ་ལ་ནི་བསྡམ་པར་བྱ་བའི་ཉེས་བྱས་སུ་འགྱུར་རོ། །ལོངས་སྤྱོད་ཀྱི་གཞི་ལས་བྱུང་བ་གང་གི་ཕྱོགས་དང་མཐུན་པ་ཉིད་ཡིན་ཞེ་ན། དུས་མ་ཡིན་པར་ཟ་བ་དང་འབྲུའི་ཆང་དང་བཅོས་པའི་ཆང་མྱོས་པར་འགྱུར་བ་བག་མེད་པའི་གནས་ནི་དེ་དག་སྤོང་བའི་བསླབ་པའི་གཞི་ཡང་དག་པར་བླངས་པ་ལས་
འདས་པ་ཉིད་ཡིན་པས། དེ་ལ་ནི་བཤགས་པར་བྱ་བའི་ཉེས་བྱས་སུ་འགྱུར་རོ། །སྒོག་སྐྱ་ལ་སོགས་པ་ཟ་བ་ན་དེའི་ཕྱོགས་དང་མཐུན་པ་ཡིན་པས། དེ་ལ་ནི་བསྡམ་པར་བྱ་བའི་ཉེས་བྱས་སུ་འགྱུར་རོ། །ཕྱར་གཡེང་གི་གཞི་ལས་བྱུང་བ་གང་གི་ཕྱོགས་དང་མཐུན་པ་ཉིད་ཡིན་ཞེ་ན། མལ་སྟན་ཆེན་པོ་དང་མལ་སྟན་མཐོན་པོ་དང༌། གླུ་གར་དང་རོལ་མོའི་སྒྲ་དང༌། ཁ་དོག་དང་སྤོས་དང༌། བྱུག་པ་ཐོགས་པ་ལ་སོགས་པ་དེ་སྤོང་བ་ནི་བསླབ་པའི་གཞི་ཡང་དག་པར་བླངས་པ་ལས་འདས་པ་ཉིད་ཡིན་པས། དེ་ལ་ནི་བཤགས་པར་བྱ་བའི་ཉེས་བྱས་སུ་འགྱུར་རོ། །འཁྲུ་བ་དང་རྐྱལ་བ་དང་ཆུ་ལ་རྩེ་བ་ལ་སོགས་པ་དང༌། རྒྱགས་པ་དང་ལོངས་སྤྱོད་པ་དང་རྒོད་པ་ལ་སོགས་པ་ནི་དེའི་ཕྱོགས་དང་མཐུན་པ་ཡིན་པས། དེ་ལ་ནི་བསྡམ་པར་བྱ་བའི་ཉེས་བྱས་སུ་འགྱུར་རོ། །འདོད་པའི་གཞི་ལས་བྱུང་བ་གང་གི་ཕྱོགས་དང་མཐུན་པ་ཉིད་ཡིན་ཞེ་ན། མི་ཚངས་པར་སྤྱོད་པ་ནི་དེ་སྤོང་བའི་བསླབ་པའི་གཞི་ཡང་དག་པར་བླངས་པ་ལས་འདས་པ་ཉིད་ཡིན་པས། དེ་ལ་ནི་བཤགས་པར་བྱ་བའི་ཉེས་བྱས་སུ་འགྱུར་རོ། །བསམས་བཞིན་དུ་ཁུ་བ་འབྱིན་པ་ལ་སོགས་པ་ནི་དེའི་ཕྱོགས་དང་མཐུན་པ་ཡིན་པས། དེ་ལ་ནི་བསྡམ་པར་བྱ་བའི་ཉེས་བྱས་སུ་འགྱུར་རོ། །ཁང་པ་དང་ཁང་ཆེན་རྩིག་པ་ཡང་འདོད་པའི་གཞི་ལས་བྱུང་བ་ཡིན་ཏེ། འདི་ལྟར་ཁྱིམ་བྱེད་པ་ནི་ཁྱིམ་ནས་རབ་ཏུ་བྱུང་བ་ཡང་དག་པར་བླངས་པ་ལས་འདས་པ་ཉིད་ཡིན་པས། དེ་ལ་ནི་བཤགས་པར་བྱ་བའི་ཉེས་བྱས་སུ་འགྱུར་བ་ཡང་ཡོད་ལ། ཁ་ཅིག་དེའི་ཕྱོགས་དང་མཐུན་པ་ཡིན་པས་དེ་ལ་བསྡམ་པར་བྱ་བའི་ཉེས་བྱས་སུ་འགྱུར་བ་ཡང་ཡོད་དོ། །གནོད་པའི་གཞི་ལས་བྱུང་བ་གང་གི་ཕྱོགས་དང་མཐུན་པ་ཉིད་ཡིན་ཞེ་ན། གནོད་པའི་གཞི་ལས་བྱུང་བ་ནི་དགེ་འདུན་གྱི་དབྱེན་བྱེད་པ་དང༌། དེའི་རྗེས་སུ་ཕྱོགས་པ་དང༌། ཁྱིམ་སུན་འབྱིན་པ་ལས་གྱུར་པ་སྟེ། དེ་ལ་དགེ་འདུན་སྤོང་བ་དང༌། ཆོས་ལ་འགལ་བ་དང༌། སངས་རྒྱས་ཀྱི་བཀའ་ལས་འདའ་བ་ཡོད་པས་དཀོན་མཆོག་གསུམ་སྤོང་བ་ན་མྱ་ངན་ལས་འདའ་བའི་བསམ་པས་
གསུམ་ལ་སྐྱབས་སུ་འགྲོ་བའི་རྒྱུས་རབ་ཏུ་བྱུང་བ་དང་དགེ་ཚུལ་དང་དགེ་སློབ་མའི་སྡོམ་པ་ཡང་དག་པར་བླངས་པ་ཐམས་ཅད་ལས་འདས་པ་ཉིད་ཡིན་པས། དེ་ལ་ནི་བཤགས་པར་བྱ་བའི་ཉེས་བྱས་སུ་འགྱུར་རོ། །གཞི་དེ་ལས་སྐུར་བ་འདེབས་པ་དང་ཚིག་རྩུབ་མོ་སྨྲ་བ་ལ་སོགས་པ་ཡང་གནོད་པའི་གཞི་ལས་བྱུང་བ་ཡིན་པས་དེ་ནི་དེའི་ཕྱོགས་དང་མཐུན་པ་ཡིན་པས། དེ་ལ་ནི་བསྡམ་པར་བྱ་བའི་ཉེས་བྱས་སུ་འགྱུར་རོ། །གནས་པའི་གཞི་ལས་བྱུང་བ་གང་གི་ཕྱོགས་དང་མཐུན་པ་ཉིད་ཡིན་ཞེ་ན། གནས་པའི་གཞི་ལས་བྱུང་བ་ཞེས་བྱ་བ་ནི། དགེ་འདུན་གྱིས་སྤངས་པའི་གང་ཟག་བསྙིལ་བ་ལ་སོགས་པ་དང་ལྷན་ཅིག་གནས་པ་སྟེ། དེ་ལ་ནི་མཚན་མི་མཐུན་པ་དང་ལྷན་ཅིག་ཉལ་བའི་བདག་ཉིད་ཀྱི་གནས་པ་ནི་མི་ཚངས་པར་སྤྱོད་པ་སྤོང་བའི་བསླབ་པའི་གཞི་ཡང་དག་པར་བླངས་པ་ལས་འདས་པ་ཉིད་ཡིན་པས། དེ་ལ་ནི་བཤགས་པར་བྱ་བའི་ཉེས་བྱས་སུ་འགྱུར་རོ། །བསྙེན་པར་མ་རྫོགས་པ་ཁྱིམ་པ་དང་མུ་སྟེགས་ཅན་དང་ལྷན་ཅིག་གནས་པ་དང༌། རབ་ཏུ་བྱུང་བ་འདི་པ་བསྙིལ་བ་ལ་སོགས་པ་དང་ལྷན་ཅིག་གནས་པ་ནི་འདོད་ཆགས་དང་བྲལ་བའི་མི་མཐུན་པའི་ཕྱོགས་སུ་གྱུར་པས་སྡོམ་པ་ཐམས་ཅད་འཇིག་པའི་ཕྱོགས་དང་མཐུན་པ་ཡིན་པས། དེ་ལ་ནི་བསྡམ་པར་བྱ་བའི་ཉེས་བྱས་སུ་འགྱུར་རོ། །མ་གུས་པའི་གཞི་ལས་བྱུང་བ་གང་གི་ཕྱོགས་དང་མཐུན་པ་ཉིད་ཡིན་ཞེ་ན། མ་གུས་པའི་གཞི་ལས་བྱུང་བ་ཞེས་བྱ་བ་ནི། སངས་རྒྱས་དང་ཆོས་དང་དགེ་འདུན་ལམ་གུས་པ་ལས་གྱུར་བ་སྟེ། དེ་ལ་དཀོན་མཆོག་གསུམ་ལ་མ་གུས་པ་ནི་གསུམ་ལ་སྐྱབས་སུ་སོང་བས་སྡོམ་པ་ཡང་མ་ཡིན་སྡོམ་པ་མ་ཡིན་པ་ཡང་མ་ཡིན་པའི་ངོ་བོ་ཉིད་ཀྱི་རབ་ཏུ་བྱུང་བ་དང༌། དགེ་ཚུལ་དང་དགེ་སློབ་མའི་སྡོམ་པ་ཡང་དག་པར་བླངས་པ་ལས་འདས་པ་ཉིད་ཡིན་པས། དེ་ལ་ནི་བཤགས་བར་བྱ་བའི་ཉེས་བྱས་སུ་འགྱུར་རོ། །མཁན་པོ་དང་སློབ་དཔོན་རྣམས་དང་ཚངས་པ་མཚུངས་པར་སྤྱོད་པ་གཞན་ལ་མ་གུས་པ་ལ་སོགས་པ་ནི་སྡོམ་པ་ཐམས་ཅད་འཇིག་པའི་ཕྱོགས་དང་མཐུན་པ་ཡིན་པས། དེ་ལ་ནི་བསྡམ་པར་བྱ་བའི་ཉེས་བྱས་སུ་འགྱུར་རོ། །མི་
སྦྱོང་བའི་གཞི་ལས་བྱུང་བ་གང་གི་ཕྱོགས་དང་མཐུན་པ་ཉིད་ཡིན་ཞེ་ན། མི་སྦྱོང་བ་ཞེས་བྱ་བ་ནི་གསོ་སྦྱོང་དང་དགག་དབྱེ་མི་བྱེད་པ་དང༌། མི་གནས་པར་འདུག་པ་ལ་སོགས་པས་བདག་ཉིད་ཀྱི་ཚུལ་ཁྲིམས་རྣམ་པར་དག་པར་མི་བྱེད་པ་སྟེ། གཞི་དེ་ལས་བྱུང་བའི་ཉེས་པ་ནི་མི་སྦྱོང་བའི་གཞི་ལས་བྱུང་བ་ཞེས་བྱའོ། །དེ་ལ་གཞི་དེས་བསླབ་པའི་གཞི་ཡང་དག་པར་བླངས་པ་འདྲལ་བར་བྱེད་པ་ནི་བསླབ་པའི་གཞི་ཡང་དག་པར་བླངས་པ་ལས་འདའ་བ་ཉིད་ཡིན་པས། དེ་ལ་ནི་བཤགས་པར་བྱ་བའི་ཉེས་བྱས་སུ་འགྱུར་རོ། །གསོ་སྦྱོང་ལ་སོགས་པ་ལས་གཡེལ་པ་ནི་བསླབ་པའི་སྡོམ་པ་ཐམས་ཅད་འཇིག་པའི་ཕྱོགས་དང་མཐུན་པ་ཡིན་པས། དེ་ལ་ནི་བསྡམ་པར་བྱ་བའི་ཉེས་བྱས་སུ་འགྱུར་རོ། །བསྙེན་པར་མ་རྫོགས་ཤིང་རབ་ཏུ་བྱུང་བ་རྣམས་ལ་ཡང་གསོ་སྦྱོང་དང་དགག་དབྱེ་དང་གནས་བཅའ་བ་ལ་སོགས་པ་ཡོད་དེ། འདིར་དེ་དག་གི་སྔགས་ཀྱང་ཆེ་གེ་མོ་ཞིག་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅོ་ལྔ་པ་ལགས་ཏེ། བདག་དགེ་ཚུལ་མིང་འདི་ཞེས་བགྱི་བའི་གསོ་སྦྱོང་ཡང་བཅོ་ལྔ་པ་ལགས་ན། བདག་དགེ་ཚུལ་མིང་འདི་ཞེས་བགྱི་བ་བར་ཆད་ཀྱི་ཆོས་རྣམས་ཡོངས་སུ་དག་པར་བདག་ཉིད་མཆིའོ་ཞེས་བྱ་བ་ལ་སོགས་པ་ཡོད་པའི་ཕྱིར་རོ། །མ་གུས་པའི་གཞི་ལས་བྱུང་བ་གང་གི་ཕྱོགས་དང་མཐུན་པ་ཉིད་ཡིན་ཞེ་ན། མ་གུས་པའི་གཞི་ལས་བྱུང་པ་ཞེས་བྱ་བ་ནི། སངས་རྒྱས་དང་ཆོས་དང་དགེ་འདུན་ལ་མ་གུས་པ་ལས་གྱུར་བ་སྟེ། དེ་ལ་སྐྱབས་སུ་འགྲོ་བ་ཞེས་བྱ་བ་ནི་སྡོམ་པ་མ་ཡིན་པ་ཡང་མ་ཡིན་པའི་ངོ་བོ་ཉིད་ཀྱི་རབ་ཏུ་བྱུང་བ་དང༌། དགེ་ཚུལ་ཉིད་ལ་སོགས་པའི་སྡོམ་པ་ཡང་དག་པར་བླངས་པའི་ཡན་ལག་ཡིན་པས་དེ་ཉམས་པའི་ཕྱོགས་དང་མཐུན་པ་ཉིད་ཡིན་ནོ། །གནས་སྦྱིན་པའི་སློབ་དཔོན་ལ་མ་གུས་པ་ནི་སྡོམ་པ་ཐམས་ཅད་འཇིག་པའི་ཕྱོགས་དང་མཐུན་པ་ཡིན་ཏེ། གནས་མེད་པར་ཚངས་པ་མཚུངས་པར་སྤྱོད་པ་རྣམས་དང་ལྷན་ཅིག་ཆོས་དང་ཟང་ཟིང་ལ་ལོངས་སྤྱོད་པ་མི་སྲིད་པའི་ཕྱིར་རོ། །མཁན་པོ་ལ་མ་གུས་པ་ནི་མཁན་པོ་བདག་གི་མཁན་པོ་མཛད་དུ་གསོལ་ཞེས་
བྱ་བ་སྔོན་དུ་འགྲོ་བའི་ཁས་ལེན་པ་དེ་འཇིག་པའི་ཕྱོགས་དང་མཐུན་པ་ཡང་ཡིན་ནོ། །གནས་སྦྱིན་པ་ལ་མ་གུས་པ་ནི་སྡོམ་པ་ཐམས་ཅད་འཇིག་པའི་ཕྱོགས་དང་མཐུན་པ་ཉིད་ཡིན་ཏེ། གང་ཟག་གཞན་ཡང་གནས་སྦྱིན་པ་དང༌། བསླབ་པ་ཕྱིན་པ་ནི་འདྲ་བ་ཉིད་དོ་ཞེས་བྱ་བ་ནི་ལྟུང་བ་ལ་སྦྱོར་བ་དགེ་སློང་དང་འདྲ་བ་ཉིད་དོ་ཞེས་བྱ་བར་སྦྱར་རོ། །བསླབ་པ་བྱིན་པ་ནི་ཐམས་ཅད་དུ་ལྟུང་བ་ལ་སྦྱོར་བ་དགེ་སློང་དང་འདྲ་བ་ཉིད་དུ་རིག་པར་བྱ་སྟེ། ཇི་ལྟར་དགེ་སྦྱོང་མི་ཚངས་པར་སྤྱོད་པ་ལ་སོགས་པ་ལ་སྦྱོར་བ་ལ་ཕམ་པར་འགྱུར་བ་ལ་སོགས་པའི་ལྟུང་བ་འབྱུང་བ་དེ་བཞིན་དུ་བསླབ་པ་བྱིན་པ་ལ་ཡང་དེ་བཞིན་ནོ། །ཇི་ལྟར་དགེ་སློང་གིས་དགེ་སློང་ལ་རྡེག་པ་དང་གཟས་པ་དང་འགྱོད་པ་སྐྱེད་པ་དང༌། སྐྲོད་པ་ལ་སོགས་པ་བྱེད་པ་ལ་ལྟུང་བྱེད་དུ་འགྱུར་བ་དེ་བཞིན་དུ་དགེ་སློང་གིས་བསླབ་པ་བྱིན་པ་ལ་དེ་དག་བྱས་ན་ཡང་དགེ་སློང་ལ་ལྟུང་བྱེད་དུ་འགྱུར་རོ། །བསླབ་པ་བྱིན་པ་མོ་དང་དགེ་སློང་མ་ཡང་དེ་བཞིན་དུ་ཕན་ཚུན་འདྲ་བ་ཉིད་དུ་རིག་པར་བྱའོ། །བསྙེན་པར་མ་རྫོགས་པ་དང་ལྡན་པ་ཉིད་ཀྱང་ངོ་ཞེས་བྱ་བ་ལ། བསླབ་པ་བྱིན་པ་ད་དགེ་སློང་གཞན་གྱི་ཡུལ་ལ་བསྙེན་པར་མ་རྫོགས་པ་དང་ལྡན་པ་ཉིད་ཀྱང་ཡིན་ནོ་ཞེས་བྱ་བར་སྦྱར་རོ། །བསླབ་པ་བྱིན་པ་དེ་དགེ་སློང་གཞན་གྱི་ཡུལ་ལ་ནི་བསྙེན་པར་མ་རྫོགས་པ་དང་འདྲ་བ་ཉིད་ཡིན་ལ། རང་གི་ཡུལ་ལ་ནི་བསྙེན་པར་རྫོགས་པ་ཉིད་ཡིན་ནོ་ཞེས་བྱ་བའི་ཐ་ཚིག་གོ །དེས་ན་བསླབ་པ་བྱིན་པ་དེ་དགེ་སློང་གི་ཡུལ་ལ་དེས་བྱིན་ལེན་བསྟབས་ན་ཡང་བྱིན་ལེན་དུ་རུང་ལ་དེས་རེག་ན་ཡང་བྱིན་ལེན་འཇིག་པ་དང༌། དེ་ལ་ཕྲ་མ་བྱས་ན་ཡང་དགེ་སློང་ལ་ཕྲ་མ་བྱས་པའི་ལྟུང་བྱེད་དུ་མི་འགྱུར་བ་དང༌། དེ་དང་ལྷན་ཅིག་ཉལ་ན་ཡང་ཞག་གསུམ་འདས་ནས་ལྟུང་བྱེད་དུ་འགྱུར་བ་དང༌། དེ་ལ་དགེ་སློང་གི་གནས་ངན་ལེན་བརྗོད་པ་དང་མིའི་ཆོས་བླ་མ་བརྗོད་ན་ཡང་ལྟུང་བྱེད་དུ་འགྱུར་བ་དང༌། དེ་དང་ཚིག་མཐུན་པ་དང་ཚིག་ལྷག་པར་ཟློས་པ་ལས་ཀྱང་ལྟུང་བྱེད་དུ་འགྱུར་ཏེ། དེ་དག་ལ་སོགས་པ་ཇི་ལྟར་བསྙེན་པར་མ་རྫོགས་པའི་གང་ཟག་གི་དབང་གིས་དགེ་སློང་གི་ཡུལ་ལ་ཁ་ན་མ་ཐོ་བ་གང་དག་འགྱུར་བར་འགྱུར་བ་དེ་
དག་བསླབ་པ་བྱིན་པའི་གང་ཟག་གི་དབང་གིས་ཀྱང་དགེ་སློང་གི་ཡུལ་ལ་འབྱུང་བར་འགྱུར་རོ། །དེ་བཞིན་དུ་འདིར་བསླབ་པ་བྱིན་པའི་རང་གི་ཡུལ་ལ་གསོ་ག་འཇོག་བྱས་པ་དང་ལག་ཉར་བླངས་པ་ལ་སོགས་པའི་ཉེས་པར་གྱུར་པ་དེ་རང་བཞིན་དུ་གནས་པའི་དགེ་སློང་དག་ལ་ཉེས་པར་མི་འགྱུར་ཏེ། བསླབ་པ་བྱིན་པ་ནི་ཆོ་ག་ཉམས་པ་ཡིན་པའི་ཕྱིར་རོ། །བསླབ་པ་བྱིན་པ་རང་གི་ཡུལ་ལ་ནི་བསྙེན་པར་རྫོགས་པའི་སྡོམ་པ་ཡོད་དེ། བསྙེན་པར་རྫོགས་པའི་བསླབ་པའི་གཞི་ཐམས་ཅད་ཀྱང་དགེ་སློང་དང་འདྲ་བར་བསྲུངས་དགོས་སོ། །དེ་ལྟ་བས་ན་མདོ་སྔ་མ་ཤོས་ཀྱིས་ནི་བསླབ་པ་བྱིན་པ་དེ་ལྟུང་བ་སྦྱོར་བ་ལ་ནི་དགེ་སློང་དང་འདྲ་བ་ཉིད་དུ་བསྟན་ལ། མདོ་འདིར་ནི་དགེ་སློང་གཞན་གྱི་ཡུལ་ལ་དགེ་སློང་ཐ་མལ་པ་གཞན་དང་མི་འདྲ་བར་བསྟན་ཏོ། །དེ་ལ་ནི་མ་ཡིན་ནོ་ཞེས་བྱ་བ་ནི། བསླབ་པ་བྱིན་པ་དེ་ལ་བསླབ་པ་བྱིན་པ་གཞན་ནི་བསྙེན་པར་མ་རྫོགས་པ་དང་ལྡན་པ་ཉིད་མ་ཡིན་ཏེ། རང་བཞིན་འདྲ་བའི་ཕྱིར་རོ། །འདིར་གཞུང་ནི་བཙུན་པ་རེ་ཞིག་དགེ་སློང་ལ་རྒྱུ་དུས་གསོག་འཇོག་བགྱིས་པར་འགྱུར། གསུམ་གྱིས་ཏེ་གང་ཞེན་བདག་ཉིད་ཀྱིས་གསོག་འཇོག་བྱས་པ་དང༌། དགེ་སློང་གིས་གསོག་འཇོག་བྱས་པ་དང༌། དགེ་སློང་གི་དགེ་འདུན་གྱིས་གསོག་འཇོག་བྱས་པའོ། །བཙུན་པ་རེ་ཞིག་དགེ་སློང་མ་ལ་རྒྱུ་དུས་གསོག་འཇོག་བགྱིས་པར་འགྱུར། གསུམ་གྱིས་ཏེ་གསུམ་གང་ཞེན་བདག་ཉིད་ཀྱིས་གསོག་འཇོག་བྱས་པ་དང༌། དགེ་སློང་མས་གསོག་འཇོག་བྱས་པ་དང༌། དགེ་སློང་མའི་དགེ་འདུན་གྱིས་གསོག་འཇོག་བྱས་པའོ། །བཙུན་པ་རེ་ཞིག་བསླབ་བ་བྱིན་པ་ལ་རྒྱུ་དུས་གསོག་འཇོག་བགྱིས་པར་འགྱུར། བཞི་སྟེ་བཞི་གང་ཞེ་ན་བདག་ཉིད་ཀྱིས་གསོག་འཇོག་བྱས་པ་དང༌། བསླབ་པ་བྱིན་པས་གསོག་འཇོག་བྱས་པ་དང། དགེ་སློང་གིས་གསོག་འཇོག་བྱས་པ་དང༌། དགེ་སློང་གི་དགེ་འདུན་གྱིས་གསོག་འཇོག་བྱས་པའོ། །བཙུན་པ་རེ་ཞིག་བསླབ་པ་བྱིན་པ་མོ་ལ་རྒྱུ་དུས་གསོག་འཇོག་བགྱིས་པར་འགྱུར། བཞི་སྟེ་བཞི་གང་ཞེན་བདག་ཉིད་ཀྱིས་གསོག་འཇོག་བྱས་པ་དང༌། བསླབ་
པ་བྱིན་པ་མོས་གསོག་འཇོག་བྱས་པ་དང༌། དགེ་སློང་གིས་གསོག་འཇོག་བྱས་པ་དང༌། དགེ་སློང་གི་དགེ་འདུན་གྱིས་གསོག་འཇོག་བྱས་པའོ་ཞེས་གསུངས་པ་ཡིན་ནོ། །དགེ་སློབ་མ་ལ་ཡང་ངོ་ཞེས་བྱ་བ་ལ་ཡང་ངོ་ཞེས་བྱ་བའི་སྒྲས་ནི་བསླབ་པ་བྱིན་པ་ཞེས་སྨོས་པ་དང་བསྙེན་པར་མ་རྫོགས་པ་དང་ལྡན་པ་ཉིད་མ་ཡིན་ནོ་ཞེས་བྱ་བར་སྦྱར་རོ། །དེ་ལྟ་བས་ན་དགེ་སློབ་མའི་ཡུལ་ལ་ནི་བསླབ་པ་བྱིན་པ་མོ་བསྙེན་པར་རྫོགས་པ་དང་ལྡན་པ་ཉིད་མ་ཡིན་ནོ། འདིར་གཞུང་ནི་ཞུ་བ་ལས་བཙུན་པ་རེ་ཞིག་དགེ་སློབ་མ་ལ་རྒྱུ་དུས་གསོག་འཇོག་བགྱིས་པར་འགྱུར། ལྔ་སྟེ་ལྔ་གང་ཞེ་ན། བདག་ཉིད་ཀྱིས་གསོག་འཇོག་བྱས་པ་དང༌། དགེ་སློབ་མས་གསོག་འཇོག་བྱས་པ་དང༌། བསླབ་པ་བྱིན་པ་མས་གསོག་འཇོག་བྱས་པ་དང༌། དགེ་སློང་མས་གསོག་འཇོག་བྱས་པ་དང༌། དགེ་སློང་མའི་དགེ་འདུན་གྱིས་གསོགས་འཇོག་བྱས་པའོ་ཞེས་གསུངས་པ་ཡིན་ནོ། །འགྲོ་བ་གཞན་གྱི་རྣམ་པ་བསྟེན་པ་ནི་དགེ་སློང་གི་འདུ་ཤེས་ཡོད་པ་ལའོ་ཞེས་བྱ་བ་ནི། ལྟུང་བ་ལ་སྦྱོར་བ་འདྲ་བ་ཉིད་དོ་ཞེས་བྱ་བར་སྦྱར་རོ། །དགེ་སློང་གསང་སྔགས་དང་སྨན་དང་ལས་ལ་སོགས་པའི་དབང་གིས་འགྲོ་བ་གཞན་གྱི་རྣམ་པ་ཞེས་བྱ་བ་དུད་འགྲོ་ལ་སོགས་པའི་གཟུགས་སུ་བསྒྱུར་ནས་གཟུགས་དེས་མི་ཚངས་པར་སྤྱོད་པ་ལ་སོགས་པ་བྱ་བ་མ་ཡིན་པ་བྱེད་པ་ན་དེ་བྱེད་པའི་ཚེ་གལ་ཏེ་བདག་ཉིད་དགེ་སློང་ཡིན་པའི་འདུ་ཤེས་ཡོད་པར་གྱུར་ན་དེའི་ཚེ་དགེ་སློང་དེ་ལྟུང་བ་ལ་སྦྱོར་བ་ལ་ནི་དགེ་སློང་གཞན་དག་དང་འདྲ་བ་ཉིད་ཡིན་ཏེ། ཇི་ལྟར་དགེ་སློང་གཞན་དག་ལྟུང་བ་ལ་སྦྱོར་བ་ལ་གཞི་ཇི་ལྟ་བ་ལས་ཁ་ན་མ་ཐོ་བར་འགྱུར་བ་དེ་བཞིན་དུ་དེ་ལ་ཡང་འགྱུར་རོ་ཞེས་བྱ་བའི་ཐ་ཚིག་གོ །མེད་པ་ནི་ན་སྨད་པ་ཉིད་དོ་ཞེས་བྱ་བ་ནི། དེའི་ཚེ་ལྟུང་བ་འབྱིན་པ་དེ་ལ་དགེ་སློང་བདག་ཉིད་དགེ་སློང་ཡིན་པའི་འདུ་ཤེས་མེད་ཅིང་བརྗོད་པར་གྱུར་བ་ཉིད་ཡིན་ན་ནི་ལྟུང་བ་ལ་སྦྱོར་བ་དེའི་ཚོགས་འོག་མར་ན་སྨད་པ་ཉིད་དོ། །སྦྱོར་བ་ཙམ་ཁོ་ན་ལ་ཁ་ན་མ་ཐོ་བ་འདིར་འགྱུར་གྱི་དངོས་གཞི་ཉིད་དུ་ནི་མི་འགྱུར་རོ། །འདི་ནི་གང་གི་ཚེ་དགེ་སློང་དུད་འགྲོ་ལ་སོགས་པའི་གཟུགས་ཀྱིས་མི་ཚངས་པར་སྤྱོད་པ་བྱེད་
འདོད་པ་དེའི་ཚེ་སྲིད་དོ། །འདིར་དགེ་སློང་ལ་ཇི་ལྟ་བ་བཞིན་དུ་དགེ་སློང་མ་དང་དགེ་སློབ་མ་དང༌། བསླབ་པ་བྱིན་པ་དང་དགེ་ཚུལ་དང་དགེ་ཚུ་ལམ་དག་ལ་ཡང་དེ་བཞིན་དུ་ཅི་རིགས་སུ་སྦྱར་རོ། །ཚིགས་སྔ་མར་སྦྱར་བ་བྱས་པ་ལ་ཡང་ངོ་ཞེས་བྱ་བ་ནི་ན་སྨད་པ་ཉིད་དོ་ཞེས་བྱ་བའི་རྗེས་བསྙག་པའི་ཕྱིར་ཡང་ངོ་ཞེས་བྱ་བའི་སྨྲ་སྨོས་སོ། །ཚིགས་སྔ་མར་སྦྱོར་བ་བྱས་པ་ཞེས་བྱ་བ་ནི་ཁྱིམ་པ་འམ། དགེ་ཚུལ་ལམ་དགེ་སློབ་མ་ཉིད་ཅེས་བྱ་བའི་ཚིགས་སྔ་མ་དག་ཏུ་སྦྱོར་བའི་ཁ་ན་མ་ཐོ་བ་བྱས་པ་སྟེ། ཚིགས་སྔ་མར་སྦྱོར་བ་བྱས་པ་དེའི་ཁ་ན་མ་ཐོ་བ་དེ་ནི་ན་སྨད་པར་བྱ་བ་ཉིད་ཡིན་ནོ། །འདི་སྐད་བསྟན་ཏེ། ཁྱིམ་པ་ཉིད་ཅེས་བྱ་བའི་ཚིགས་སུ་རྫས་རྐུབ་ལ་སོགས་པའི་ཕྱིར་སྦྱོར་བ་བྱས་པ་གང་ཡིན་པ་དེའི་སྦྱོར་བ་དེ་ཁོ་ནས་དགེ་ཚུལ་ཉིད་དམ་དགེ་སློང་མ་ཉིད་དམ་དགེ་སློང་ཉིད་ཅེས་བྱ་བའི་ཚིགས་ཕྱི་མ་དག་ཏུ་དངོས་གཞིའི་ཁ་ན་མ་ཐོ་བ་འགྲུབ་པར་འགྱུར་པའི་སྦྱོར་བ་ཚིགས་སྔ་མར་བྱས་པ་དེ་ནི་ན་སྨད་པ་ཉིད་ཡིན་ཏེ། ཚིགས་འོག་མར་འགྱུར་བ་ཉིད་ཡིན་ནོ། །དེ་བཞིན་དུ་དགེ་ཚུལ་ཉིད་དམ་དགེ་ཚུལ་མ་ཉིད་དམ་དགེ་སློབ་མ་ཉིད་ཅེས་བྱ་བའི་ཚིགས་སུ་རྫས་རྐུ་བ་ལ་སོགས་པའི་ཕྱིར་སྦྱོར་བ་བྱས་པ་གང་ཡིན་པའི་སྦྱོར་བ་དེ་ཁོ་ནས་བསྙེན་པར་རྫོགས་པ་ཉིད་ཀྱི་ཚིགས་ཕྱི་མར་དངོས་གཞིའི་ཁ་ན་མ་ཐོ་བ་འགྲུབ་པར་འགྱུར་བའི་སྦྱོར་བ་ཚིགས་སྔ་མར་བྱས་པ་དེ་ཡང་ན་སྨད་པ་ཉིད་ཡིན་ཏེ། ཚིགས་འོག་མར་འགྱུར་བ་ཉིད་ཡིན་ནོ་ཞེས་བྱ་བའི་ཐ་ཚིག་གོ །དེ་གང་ཡང་འདིར་གཞུང་ནི་བསྙེན་པར་མ་རྫོགས་པས་རྐུ་བ་ལ་སྦྱོར་ཞིང་བསྙེན་པར་མ་རྫོགས་པའི་ཕྱིར་རྐུ་བར་བྱེད་ན་ཉེས་བྱས་སུ་འགྱུར་རོ། །བསྙེན་པར་མ་རྫོགས་པས་རྐུ་བ་ལ་སྦྱོར་ཞིང་བསྙེན་པར་རྫོགས་པར་བྱེད་པའི་ཕྱིར་རྐུ་བར་བྱེད་ན་ཉེས་བྱས་སུ་འགྱུར་རོ། །བསྙེན་པར་མ་རྫོགས་པས་རྐུ་བ་ལ་སྦྱོར་ཞིང་བསྙེན་པར་རྫོགས་པའི་ཕྱིར་རྐུ་བར་བྱེད་ན་ཉེས་པ་སྦོམ་པོར་འགྱུར་རོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །འདིར་དེའི་ཕྱིར་ཞེས་བསྟན་པར་ཤེས་པར་བྱ་སྟེ། ཚིགས་སྔ་མར་སྦྱོར་བ་ཙམ་གྱི་དབང་ཁོ་ན་ལས་མེད་ན་དེའི་ཚེ་སྦྱོར་བ་ན་
སྨད་དོ། །ཡོད་ན་ནི་ཁ་ན་མ་ཐོ་བ་རྫོགས་པར་འགྱུར་རོ། །འདི་སྐད་བསྟན་ཏེ། བསྙེན་པར་རྫོགས་པའི་ཕྱིར་རྐུ་བར་བྱེད་ན་ཞེས་བྱ་བར་སྦྱར་ཏེ། དེའི་ཕྱིར་རམ་དེའི་རྒྱུད་དེ་བཀྲུས་པ་ཡིན་གྱི་བསྙེན་པར་རྫོགས་པར་བྱེད་པའི་ཚེ་ན་དེ་ལ་རྐུ་བའི་བྱ་བ་ཡང་མེད་ལ་རྐུ་བའི་བསམ་པ་ཡང་མེད་པ་དེ་ལ་སྦྱོར་བ་སྔ་མ་དེ་ན་སྨད་པ་ཉིད་དོ། །གང་གི་ཚེ་བསྙེན་པར་རྫོགས་པའི་དུས་ན་དྲན་པར་གྱུར་པའི་ཚེ་བརྒྱལ་འགྱོད་པ་སྐྱེས་པར་གྱུར་ན་ཡང་དེའི་ཚེ་སྦྱོར་པ་སྔ་མ་དེན་སྨད་པ་ཉིད་ཡིན་པས་དེས་ན་ཉེས་པ་སྦོམ་པོར་རྣམ་པར་གཞག་པར་མཛད་དོ། །དེ་ལྟ་མ་ཡིན་དུ་ཟིན་ན་ལུང་ལས་བསྙེན་པར་མ་རྫོགས་པས་རྐུབ་ལ་སྦྱོར་ཞིང་བསྙེན་པར་རྫོགས་པས་རྐུ་བར་བྱེད་ན་ཞེས་གསུངས་པར་འགྱུར་བ་ཞིག་ན་དེ་སྐད་མ་གསུངས་པས། དེའི་ཕྱིར་འདིར་ནི་བསྙེན་པར་རྫོགས་པའི་ཕྱིར་རྐུ་བར་བྱེད་ན་ཉེས་པ་སྦོམ་པོར་འགྱུར་རོ་ཞེས་བྱ་བར་སྦྱར་རོ། ཕྱི་མ་ལ་ཡང་དེ་དང་ལྡན་པ་ཉིད་ཡིན་ནོ་ཞེས་བྱ་བ་ལ། ཕྱི་མ་ཞེས་བྱ་བ་ནི་ཚིགས་ཕྱི་མ་སྟེ་བསྙེན་པར་རྫོགས་པ་ཉིད་དོ། །དེ་ལ་ཡང་ཚིགས་སྔ་མ་དེ་དང་ལྡན་པ་ཉིད་ཡིན་ཏེ། དགེ་སློང་མ་དང་དགེ་ཚུལ་གྱི་ཚིགས་དང་ལྡན་པ་ཉིད་ཡིན་པས་ཉེས་བྱས་རྫོགས་པར་འགྱུར་རོ། །འདི་སྐད་བསྟན་ཏེ། །བསྙེན་པར་རྫོགས་པ་ཉིད་ཅེས་བྱ་བའི་ཚིགས་སུ་སྦྱོར་བ་བྱས་པ་གང་ཡིན་པ་དེ་ཙམ་གྱི་དབང་གིས་དེའི་འོག་ཏུ་བསླབ་བ་ཕུལ་ལམ་བབས་ནས་དགེ་སློང་མ་ཉིད་དམ་དགེ་ཚུལ་མ་ཉིད་དམ་ཁྱིམ་པ་ཉིད་ཀྱི་ཚིགས་དག་ཏུ་དངོས་གཞིའི་གནས་སྐབས་སུ་ནི་བསྙེན་པར་མ་རྫོགས་པ་གཉིས་ལ་ནི་ཉེས་བྱས་སོ། །ཁྱིམ་པ་ལ་ནི་ལྟུང་བ་མེད་དོ། །བསྙེན་པར་རྫོགས་པའི་སྦྱོར་བར་གྱུར་པ་ནི་སྦོམ་པོ་འོ། །ལྷག་མ་རྣམས་ཀྱི་སྦྱོར་བར་གྱུར་པ་ནི་བསྙེན་པར་མ་རྫོགས་པ་གཉིས་ཀྱི་ནི་ཉེས་བྱས་སོ། །ཁྱིམ་པ་ལ་ནི་ལྟུང་བ་མེད་དོ། །རྫས་བཀག་པ་བས་བཟང་པོ་ལ་ཡང་དེ་དང་ལྡན་པ་ཉིད་ཡིན་ནོ་ཞེས་བྱ་བ་ནི། རྫས་རིན་ཆུང་དུ་ལ་སོགས་པ་ལས་སྟན་བྱེད་པ་བཀག་པའི་ཕྱིར་རྫས་དེ་བས་བཟང་པོ་རིན་ཆེ་བ་ལ་སོགས་པ་ལ་སྟན་བྱེད་པ་ལ་ཡང་བཀག་པ་དེ་དང་ལྡན་པ་ཉིད་ཡིན་ནོ་ཞེས་བྱ་བའི་ཐ་ཚིག་གོ །འདི་ལྟ་སྟེ་དཔེར་ན། ལུག་བལ་ནག་
པོ་འབའ་ཞིག་དང་རྫས་རིན་ཆུང་དུ་ལས་སྟན་བྱེད་པ་བཀག་སྟེ་དེ་དག་ལས་སྟན་བྱེད་པ་སྤང་བའི་ལྟུང་བྱེད་དུ་འགྱུར་བ་བཞིན་དུ་སྲིན་བལ་དང་རྫས་རིན་པོ་ཆེ་ལས་སྟན་བྱེད་པ་ཡང་བཀག་སྟེ། དེ་དག་ལས་སྟན་བྱེད་ན་ཡང་སྤང་བའི་ལྟུང་བྱེད་ཁོ་ནར་འགྱུར་བ་ལྟ་བུ་སྟེ། དེས་ན་ལྟུང་བའི་ཕྱིར་ནི་རྫས་བཟང་པོ་ཡང་རྫས་ངན་པ་དང་འདྲ་བར་རིག་པར་བྱའོ། །འདྲ་བ་ལ་ཡང་ངོ་ཞེས་བྱ་བ་ནི་རྫས་བཟང་ངན་འདྲ་བ་ལ་ཡང་བཀག་པ་དེ་དང་ལྡན་པ་ཉིད་ཡིན་ནོ་ཞེས་བྱ་བར་སྦྱར་རོ། །སྲིན་བལ་ལ་སོགས་པའི་རྫས་རིན་པོ་ཆེ་བཀག་པ་དེ་དང་འདྲ་བར་རིན་ཆེ་བ་མོན་དར་ལ་སོགས་པའི་རྫས་ལ་ཡང་བཀག་པ་དང་ལྡན་པ་ཉིད་ཡིན་ཏེ། གཉི་ག་སྤང་བར་འགྱུར་བར་འདྲའོ་ཞེས་བྱ་བའི་ཐ་ཚིག་གོ །འདི་ལྟ་སྟེ་དཔེར་ན། སྲིན་བལ་འབའ་ཞིག་ལས་སྟན་བྱེད་པ་ལ་སྤང་བའི་ལྟུང་བྱེད་དུ་འགྱུར་བ་དེ་བཞིན་དུ་མོན་དར་དང་དུ་གུ་ལའི་རས་དང་བལ་ནག་པོ་འབའ་ཞིག་དག་ལས་སྟན་བྱེད་པ་དང༌། དེ་བཞིན་དུ་མོན་དར་དང་སྲིན་བལ་ལ་སོགས་པ་བསྲིས་པ་ལས་སྟན་བྱེད་པ་དང་བལ་དཀར་པོ་དང་བཅས་པ་འམ་བལ་དཀར་པོ་ཚད་ཉུང་དུ་དག་དང་བསྲེས་པ་ལས་སྟན་བྱེད་པ་ལ་ཡང་སྤང་བ་ཁོ་ནར་འགྱུར་བ་ལྟ་བུའོ།། །།བམ་པོ་བཞི་བཅུ་གསུམ་པ། མཚན་གྱུར་པ་ནི་དེའི་ཞིང་ཉིད་ཡིན་ནོ་ཞེས་བྱ་བ་ནི་ལྟུང་བ་དེའི་ཞིང་ཉིད་ཡིན་ནོ་ཞེས་བྱ་བར་སྦྱར་ཏེ། འདི་ནི་སྦྱོར་བ་དང་དངོས་གཞིའི་ལྟུང་བ་གཉི་གའི་ཞིང་ཉིད་ཡིན་ནོ་ཞེས་བྱ་བ་སྤྱིར་སྦྱར་རོ། །འོག་གི་མདོ་ལས་ན་སྨད་པའི་དོན་གྱི་སྦྱོར་བ་གང་ཡིན་པ་ཉིད་ལས་སོ་ཞེས་འབྱུང་བ་དེའི་ཡུལ་ལ་ནི་སྦྱོར་བའི་ལྟུང་བའི་ཞིང་ཉིད་ཡིན་པར་བསྟན་ཏོ། །དེའི་འོག་མའི་མདོ་ལས་བྱས་པ་ནི་དེ་ཉིད་ཡིན་ནོ་ཞེས་འབྱུང་བ་དེའི་ཡུལ་ནི་དངོས་གཞིའི་ལྟུང་བའི་ཞིང་ཉིད་ཡིན་པར་སྟོན་ཏོ། །དེ་བས་ན་མཚན་གྱུར་པ་ཞེས་བྱ་བ་ནི། ཕོ་མོ་ཕན་ཚུན་མཚན་གྱུར་པ་སྟེ། དེ་ལྟར་མཚན་གྱུར་བ་དེ་ནི་ལྟུང་བའི་སྦྱོར་བ་དང་དངོས་གཞིའི་ཞིང་ཉིད་ཡིན་ཏེ་མཚན་དེ་ལ་ལྟུང་བ་དེ་དག་འབྱུང་བར་འགྱུར་རོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། ལྟུང་བ་གང་ཀུན་ནས་བསླང་བའི་ཕྱིར་སྦྱོར་བ་བྱས་པ་དེའི་དངོས་གཞི་གང་ཡིན་པ་
དེ་ཉིད་ཀྱི་ཞིང་ནི་མཚན་གཞན་དུ་གྱུར་པ་དེ་ཉིད་ཀྱང་ཡིན་ནོ། །དེ་ལྟར་ན་མཚན་གྱུར་ན་མཚན་སྔ་མའི་གནས་སྐབས་སུ་སྦྱོར་བ་གང་བརྩམས་པ་དེ་ཉིད་ཀྱི་དངོས་གཞིའི་ཞིང་མཚན་ཕྱི་མའི་གནས་སྐབས་ཡིན་པ་ཡང་ཡོད་དེ། འདི་ལྟ་སྟེ་དཔེར་ན། དགེ་སློང་གསོད་པའི་སྦྱོར་པ་ལ་ཞུགས་པའི་ཚེ་སྦྱོར་བ་དེ་མཐར་ཐུག་པ་དང་མགོ་མཉམ་དུ་དགེ་སློང་མར་གྱུར་ན་དགེ་སློང་མའི་མཚན་དེ་གསོད་པའི་སྦྱོར་བ་དེའི་དངོས་གཞིའི་ཞིང་ཉིད་ཡིན་པ་དང་དེ་བཞིན་དུ་དགེ་སློང་མ་གསོད་པའི་སྦྱོར་བ་ལ་ཞུགས་པའི་ཚེ་སྦྱོར་བ་དེ་མཐར་ཐུག་པ་དང་མགོ་མཉམ་དུ་དེ་དགེ་སློང་དུ་གྱུར་ན་དགེ་སློང་གི་མཚན་དེ་གསོད་པའི་སྦྱོར་བ་དེའི་དངོས་གཞིའི་ཞིང་ཉིད་ཡིན་པ་ལྟ་བུའོ། །གལ་ཏེ་ན་ལྟུང་བ་ན་སྨད་པའི་ཞིང་ཉིད་དུ་འགྱུར་བ་ཡང་ཡོད་དེ། འདི་ལྟ་སྟེ་དཔེར་ན། དགེ་སློང་ཁུ་བ་འབྱིན་པའི་སྦྱོར་བ་ལ་ཞུགས་པའི་ཚེ་སྦྱོར་བ་དེ་མཐར་ཐུག་པ་དང་མགོ་མཉམ་དུ་དེ་དགེ་སློང་མར་གྱུར་ན་དེ་ལ་སྦྱོར་བ་དེའི་དངོས་གཞིའི་ལྟུང་བྱེད་དུ་འགྱུར་བ་ལྟ་བུ་དང༌། དགེ་སློང་མ་ལུས་བཀན་པའི་སྦྱོར་བ་ལ་ཞུགས་པའི་ཚེ་སྦྱོར་བ་དེ་མཐར་ཐུག་པ་དང་མགོ་མཉམ་དུ་དེ་དགེ་སློང་དུ་གྱུར་པ་ན་དེ་ལ་སྦྱོར་བ་དེའི་དངོས་གཞི་ཉེས་པ་སྦོམ་པོར་འགྱུར་པ་ལྟ་བུའོ། །དེ་ལྟར་སྤྱིར་བཏང་བ་བྱས་ནས། དེའི་དམིགས་ཀྱིས་བསལ་བ་བསྟན་པའི་ཕྱིར། ན་སྨད་པའི་དོན་གྱི་སྦྱོར་བ་གང་ཡིན་པ་ཉིད་ལས་སོ་ཞེས་བྱ་བ་སྨྲས་ཏེ། ལྟུང་བ་ན་སྨད་པ་ཉིད་དོན་ཡིན་ཏེ། དེའི་སྦྱོར་བ་གང་ཡིན་པ་དེ་ནི་ན་སྨད་པའི་དོན་གྱི་སྦྱོར་བའོ། །ན་སྨད་པའི་དོན་གྱི་སྦྱོར་བ་གང་ཡིན་པ་ཉིད་བྱེད་བཞིན་པ་ལས་མཚན་གྱུར་པ་དེ་ལ་ནི་ན་སྨད་པ་གང་གི་སྦྱོར་བ་བྱས་པ་དེ་ཉིད་ཀྱི་དངོས་གཞི་འབྱུང་གི །ལྷག་པའི་དངོས་གཞི་ནི་མི་འབྱུང་ངོ༌། །འདི་ལྟ་སྟེ་དཔེར་ན། དགེ་སློང་གཉིས་ཁྲི་གཅིག་ལ་རེག་པ་དང་བཅས་བཞིན་དུ་སྐྱ་རེངས་མ་ཤར་པའི་མདུན་རོལ་དུ་ཉལ་བ་ཉེས་བྱས་ཀྱི་སྦྱོར་བ་ཡིན་པ་དེ་ལས་དེ་གཉིས་དགེ་སློང་མར་གྱུར་ཏེ་སྐྱ་རེངས་ཤར་ན་ཡང་ཉེས་བྱས་ཁོ་ནར་ཟད་ཀྱི་ལྟུང་བྱེད་དུ་ནི་མི་འགྱུར་བ་ལྟ་བུའོ། །འདི་སྐད་བསྟན་ཏེ། ལྷག་པའི་དོན་གྱི་སྦྱོར་བ་ལས་མཚན་གྱུར་པ་ལ་ནི་ལྟུང་བ་ན་སྨད་པ་འབྱུང་བར་འགྱུར་གྱི།
ན་སྨད་པའི་དོན་གྱི་སྦྱོར་བ་ལ་མཚན་གྱུར་པ་ལ་ནི་ལྷག་པ་འབྱུང་བར་མི་འགྱུར་བས་འདིར་ཡང་ན་སྨད་པའི་དོན་གྱི་སྦྱོར་བ་གང་ཡིན་པ་ཉིད་ལས་མཚན་གྱུར་པ་ལ་དངོས་གཞི་ཡང་ན་སྨད་པ་ཉིད་འབྱུང་གོ །ལྷག་པ་མི་འབྱུང་བར་བསྟན་ཏོ། །བྱས་པ་ནི་དེ་ཉིད་ཡིན་ནོ་ཞེས་བྱ་བ་ནི། ཁ་ན་མ་ཐོ་བ་ཞེས་བྱ་བར་སྦྱར་རོ། །མཚན་མ་གྱུར་པའི་གནས་སྐབས་སུ་ཁ་ན་མ་ཐོ་བ་གང་བྱས་པ་དེ་ནི་ཕྱིས་མཚན་གྱུར་ན་ཡང་ཁ་ན་མ་ཐོ་བ་ཉིད་ཡིན་ནོ་ཞེས་བྱ་བའི་ཐ་ཚིག་གོ །བྱས་པ་ནི་ཞེས་བྱ་བ་ནི་སྔར་མཚན་མ་གྱུར་པའི་གནས་སྐབས་སུ་ཁ་ན་མ་ཐོ་བ་གང་བྱས་པའོ། །དེ་འདི་ཡིན་ནོ་ཞེས་བྱ་བ་ནི་ཕྱིས་མཚན་གྱུར་པའི་འོག་ཏུ་ཡང་ཁ་ན་མ་ཐོ་བ་ཉིད་ཡིན་པའོ། །འདི་ལྟ་སྟེ་དཔེར་ན། དགེ་སློང་མ་རེག་པའི་ཕམ་པར་འགྱུར་བ་གང་ཡིན་པ་དེ་ཉིད་བྱེད་བཞིན་དུ་དེ་མཚན་གྱུར་ཅིང་དགེ་སློང་དུ་གྱུར་ན་རེག་པ་དེ་དགེ་སློང་དེ་ལ་ལུས་ཀྱིས་རེག་པའི་དགེ་འདུན་ལྷག་མར་གཏོགས་པའི་སྦོམ་པོར་འགྱུར་ཏེ། འདི་ལྟར་དགེ་སློང་སྐྱེས་པ་དང་ལྷན་ཅིག་ལུས་ཀྱིས་རེག་པའི་རོ་ཉམས་སུ་མྱོང་བར་བྱེད་པ་ཡང་ལུས་ཀྱིས་རེག་པའི་ལྷག་མའི་སྦོམ་པོར་གསུངས་པའི་ཕྱིར་རོ། །དགེ་སློང་མ་རེག་པའི་ཕམ་པར་འགྱུར་བའི་སྦྱོར་བ་བྱེད་བཞིན་དུ་དེ་མཚན་གྱུར་ཅིང་དགེ་སློང་དུ་འགྱུར་ན་སྦྱོར་བ་དེ་དགེ་སློང་དེ་ལ་ལུས་ཀྱིས་རེག་པའི་དགེ་འདུན་ལྷག་མར་གཏོགས་པའི་ཉེས་བྱས་སུ་འགྱུར་ཏེ། འདི་ལྟར་སྦོམ་པོར་འགྱུར་པའི་སྦྱོར་བ་ཉེས་བྱས་ཡིན་པའི་ཕྱིར་རོ། །དགེ་སློང་མ་ལུས་བཀན་པའི་ཕམ་པར་འགྱུར་པ་གང་ཡིན་པ་དེ་ཉིད་བྱེད་བཞིན་དུ་དེ་མཚན་གྱུར་ཅིང༌། དགེ་སློང་དུ་གྱུར་ན་ལུས་བཀན་པ་དེ་དགེ་སློང་དེ་ལ་མི་ཆངས་པར་སྤྱོད་པར་གཏོགས་པའི་སྦོམ་པོར་འགྱུར་ཏེ། འདི་ལྟར་དགེ་སློང་གིས་སྐྱེས་པའི་ཕྱིར་ལུས་བཀན་བ་མི་ཚངས་པར་སྤྱོད་པའི་ཕམ་པར་གཏོགས་པའི་སྤོམ་པོར་གསུངས་པའི་ཕྱིར་རོ། །དགེ་སློང་མ་འཆབ་པའི་ཕམ་པར་འགྱུར་བ་གང་ཡིན་པ་དེ་ཉིད་བྱེད་བཞིན་དུ་དེ་མཚན་གྱུར་ཅིང༌། དགེ་སློང་དུ་གྱུར་ན་འཆབ་པ་དེ་དགེ་སློང་དེ་ལ་གནས་ངན་ལེན་འཆབ་པའི་ལྟུང་བྱེད་དུ་གཏོགས་པའི་ཉེས་བྱས་སུ་འགྱུར་ཏེ། འདི་ལྟར་དགེ་སློང་གི་གནས་ངན་ལེན་བཅབས་
པའི་ལྟུང་བྱེད་དུ་འགྱུར་ལ། དགེ་སློང་མའི་གནས་ངན་ལེན་བཅབས་ན་ཉེས་བྱས་སུ་འགྱུར་བས་དེ་མཚན་གྱུར་པའི་ཚེ་ན་གང་གིས་གནས་ངན་ལེན་བཅབས་པའི་དགེ་སློང་མ་དེ་དང་མཚན་མི་མཐུན་པས། དེ་ཉེས་བྱས་སུ་གསུངས་པའི་ཕྱིར་རོ། །དགེ་སློང་མ་བཟློག་པའི་ཕམ་པར་འགྱུར་བ་གང་ཡིན་པ་དེ་ཉིད་བྱེད་བཞིན་དུ་དེ་མཚན་གྱུར་ཅིང་དགེ་སློང་དུ་གྱུར་ན་བཟློག་པ་དེ་དགེ་སློང་དེ་ལ་སྤངས་པའི་རྗེས་སུ་ཕྱོགས་པའི་ལྟུང་བྱེད་དུ་འགྱུར་རོ། །དགེ་སློང་སྤང་པའི་རྗེས་སུ་ཕྱོགས་པའི་ལྟུང་བྱེད་གང་ཡིན་པ་དེ་ཉིད་འབྱིན་བཞིན་དུ་དེ་མཚན་གྱུར་ཅིང༌། དགེ་སློང་མར་གྱུར་ན་སྤངས་པའི་རྗེས་སུ་ཕྱོགས་བ་དེ་དགེ་སློང་མ་དེ་ལ་བཟློག་པའི་ཕམ་པར་འགྱུར་བའི་སྦོམ་པོར་འགྱུར་ཏེ། དེ་ཡང་བཟློག་པའི་ཚུལ་གྱིས་རྗེས་སུ་ཞུགས་ན་ནི་སྦོམ་པོ་ཉིད་ཡིན་ལ་མ་ཞུགས་ན་ནི་ཉེས་བྱས་སོ། །དེ་བཞིན་དུ་དགེ་སློང་ཁུ་བ་འབྱིན་པའི་དགེ་འདུན་ལྷག་མ་གང་ཡིན་པ་དེ་ཉིད་བྱེད་བཞིན་དུ་དེ་མཚན་གྱུར་ཅིང༌། དགེ་སློང་མར་གྱུར་ན་ཁུ་བ་འབྱིན་པའི་ལྟུང་བྱེད་དུ་འགྱུར་རོ། །དགེ་སློང་ཡང་ཡང་ཟ་བའི་ལྟུང་བྱེད་འབྱིན་བཞིན་དུ་དེ་མཚན་གྱུར་ཅིང་དགེ་སློང་མར་གྱུར་ན། ཡང་ཡང་ཟ་བ་དེ་དགེ་སློང་མ་དེ་ལ་ཉེས་བྱས་སུ་འགྱུར་རོ། །དགེ་སློང་མ་ཅི་ཡང་རུང་བ་ལེན་པའི་དགེ་འདུན་ལྷག་མ་འབྱིན་བཞིན་དུ་དེ་མཚན་གྱུར་ཅིང༌། དགེ་སློང་དུ་གྱུར་ན་ཅི་ཡང་རུང་བ་ལེན་པ་དེ་དགེ་སློང་དེ་ལ་ཉེས་བྱས་སུ་འགྱུར་བ་ལ་སྩོགས་པ་ལྟ་བུའོ། །རྣམ་པ་དེའི་དམིགས་ཀྱིས་བསལ་བ་བསྟན་པའི་ཕྱིར། ན་སྨད་པ་ནི་རང་གི་ཉིད་དོ་ཞེས་བྱ་བ་སྨྲས་ཏེ། མཚན་གྱུར་ན་ཞེས་བྱ་བར་སྦྱར་རོ། །མཚན་མ་གྱུར་པའི་གནས་སྐབས་སུ་ན་སྨད་པའི་ཁ་ན་མ་ཐོ་བ་གང་བྱེད་བཞིན་དུ་དེ་མཚན་གྱུར་ན་རང་གི་ཁ་ན་མ་ཐོ་བ་ཉིད་དུ་འགྱུར་གྱི་ལྷག་པར་མི་འགྱུར་རོ། །འདི་ལྟ་སྟེ་དཔེར་ན། དགེ་སློང་མ་ཁུ་བ་འབྱིན་པའི་ལྟུང་བྱེད་བྱེད་བཞིན་དུ་དེའི་མཚན་གྱུར་ཏེ་དགེ་སློང་དུ་གྱུར་ན་ཁུ་བ་འབྱིན་པ་དགེ་སློང་དེ་ལ་ཡང་ལྟུང་བྱེད་ཁོ་ནར་འགྱུར་གྱི་དགེ་འདུན་ལྷག་མ་ཉིད་དུ་མི་འགྱུར་བ་ལྟ་བུའོ། །འདི་སྐད་བསྟན་ཏེ་མཚན་གྱུར་པའི་དབང་གིས་ན་ལྟུང་བྱེད་བསླབ་པ་ནི་ན་སྨད་པ་ཉིད་དུ་འགྱུར་གྱི་ན་སྨད་པ་ནི་ལྷག་པ་
ཉིད་དུ་མི་འགྱུར་རོ། །ཁ་ཅིག་ནི་མཉམ་པ་ཁོ་ན་ཡང་ཡོད་དེ་དཔེར་ན་སྲོག་གཅོད་པ་ལ་སོགས་པ་ལྟ་བུའོ། །དེ་ཡང་ལུས་ཀྱི་བྱེ་བྲག་ལས་བསམ་པའི་བྱེ་བྲག་ཏུ་འགྱུར་ལ། བསམ་པའི་བྱེ་བྲག་ལས་ལྟུང་བའི་བྱེ་བྲག་ཏུ་འགྱུར་བའི་ཕྱིར་རོ། །དེས་ན་ལུས་དང་བསམ་པ་དག་གི་ལྟུང་བ་ན་སྨད་པའི་རྒྱུའི་དངོས་པོར་བསྒྲུབ་པར་འགྱུར་གྱི་ལྷག་པའི་རྒྱུའི་དངོས་པོར་བསྒྲུབ་པར་ནི་མི་འགྱུར་རོ། །ལན་འགའ་ནི་ལྟུང་བ་ལྷག་པར་སྤྱོད་པའི་གནས་སྐབས་སུ་མཚན་གྱུར་ན་ལྟུང་བ་ན་སྨད་པར་འགྱུར་རོ། །ལན་འགའ་ནི་དངོས་གཞིའི་ལྟུང་བ་བྱུང་ཞིང་ལྷག་པར་སྤྱོད་པ་ལས་འདས་པ་ན་རང་གི་ལྟུང་བ་ཉིད་དུ་འགྱུར་གྱི་ན་སྨད་པ་ཉིད་དུ་ནི་མི་འགྱུར་རོ། །ཞག་བཅུར་མ་ལོན་པ་ནི་ཆ་ཉིད་དོ་ཞེས་བྱ་བ་ནི། དགེ་སློང་གིས་ལྷུང་བཟེད་ལྷག་པ་ཞག་བཅུ་ལས་འདས་པར་བཅངས་ན་སྤང་བར་འགྱུར་ལ་དགེ་སློང་མས་ནི་ཞག་གཅིག་ལས་འདས་པར་བཅངས་ན་སྤང་བར་འགྱུར་བ་དེ་ལ་གལ་ཏེ་དགེ་སློང་གིས་ལྷུང་བཟེད་ལྷག་པ་ཞག་བཅུ་མ་ལོན་པར་ཞག་དགུ་ཚུན་ཆད་དུ་བཅངས་པ་ལས་གནས་སྐབས་དེར་མཚན་གྱུར་ཏེ། དགེ་སློང་མར་གྱུར་ན་ཞག་དགུ་པོ་དེ་དག་ནི་དགེ་སློང་མའི་ལྷུང་བཟེད་ཐོབ་མ་རྙེད་པའི་ཉི་མ་དང་པོ་དེ་ཉིད་ཀྱི་ཆ་ཡིན་ཞིང་དེའི་ཁོངས་སུ་གཏོགས་པ་ཉིད་ཡིན་པས་ཞག་དགུ་ཐལ་བ་དེ་དག་གིས་སྤང་བར་མི་འགྱུར་རོ། །ཞག་བཅུ་ལོན་ན་ནི་འཆང་བའི་དུས་རྫོགས་པ་ཡིན་ནོ། །ལྷུང་བཟེད་འཆང་བའི་ཡུལ་ལ་དགེ་སློང་དང་དགེ་སློང་མའི་ཆོ་ག་ཐ་དད་པས་མདོ་འདི་བརྗོད་ཀྱི་གོས་ལ་སོགས་པ་འཆང་བའི་ཕྱིར་ནི་མ་ཡིན་ཏེ་ཆོ་ག་འདྲ་བའི་ཕྱིར་རོ། །འདི་སྐད་བསྟན་ཏེ། དགེ་སློང་གི་འཆང་བའི་དུས་ཞག་གཅིག་ནས་དགུའི་བར་དག་འདས་པ་ན་དེ་དགེ་སློང་མ་ཉིད་དུ་གྱུར་ན་ཞག་དགུ་པོ་དེ་དག་ཞག་གཅིག་པོའི་ཁོངས་སུ་གཏོགས་པས་དེ་ལ་ཉེས་པ་མེད་དོ། །འདིར་གཞུང་ནི་བཙུན་པ་རེ་ཞིག་དགེ་སློང་གིས་ལྷུང་བཟེད་རྙེད་པ་ན་མཆན་གྱུར་ཏེ་དགེ་སློང་མར་གྱུར་ནས། དགུང་གཅིག་ལས་ལྷག་པར་འཆང་ན་ལྟུང་བཅིར་འགྱུར་སྤང་བའི་ལྟུང་བྱེད་དུ་འགྱུར་རོ། །བཙུན་པ་དགེ་སློང་གིས་ལྷུང་བཟེད་ལྷག་པ་དགུང་གཅིག་ལས་ལྷག་པར་འཆང་བ་ལ་སྤང་བའི་ལྟུང་བྱེད་དུ་འགྱུར་བ་མཆིས་སམ། ཡོད་དེ་
དགེ་སློང་གིས་ལྷུང་བཟེད་རྙེད་པ་ན་མཚན་གྱུར་ཏེ། དགེ་སློང་མར་གྱུར་ནའོ་ཞེས་གསུངས་པ་ཡིན་ནོ། །ཞིང་མ་ཡིན་པ་ཉིད་ལ་ནི་ཉམས་སོ་ཞེས་བྱ་བ་ནི་མཚན་གྱུར་པ་ཞེས་བྱ་བ་དང༌། བྱས་པ་ཞེས་བྱ་བར་སྦྱར་རོ། །མཚན་གྱུར་ན་སྔར་མཚན་མ་གྱུར་པའི་གནས་སྐབས་སུ་ཁ་ན་མ་ཐོ་བ་ཐུན་མོང་མ་ཡིན་པ་གང་བྱས་པ་དེའི་ཞིང་མ་ཡིན་པས་ཕྱིས་མཚན་གྱུར་པའི་ལུས་ཁ་ན་མ་ཐོབ་ཐུན་མོང་མ་ཡིན་པའི་ཞིང་མ་ཡིན་པ་ཉིད་ལ་ནི་སྔར་མཚན་མ་གྱུར་པའི་གནས་སྐབས་སུ་ལྟུང་བ་ཐུན་མོང་མ་ཡིན་པ་བྱས་པ་དེ་ཉམས་ཤིང་ཞིག་པ་དང་མེད་པར་རིག་པར་བྱ་སྟེ། ལྟུང་བདེ་གཤགས་བར་བྱ་མི་དགོས་སོ་ཞེས་བྱ་བའི་ཐ་ཚིག་གོ །འདི་ལྟ་སྟེ་དཔེར་ན། ལྟུང་བ་ཐུན་མོང་མ་ཡིན་པར་སྔར་མ་གནང་བ་མ་ཐོབ་པར་འཁོར་ཉེ་བར་འཇོག་པས་ལྟུང་བྱེད་དང་ཤམས་ཐབས་རྐང་པ་སྣང་བར་བགོ་བར་མི་བྱའོ་ཞེས་བྱ་བའི་བསླབ་པ་ལ་སོགས་པ་ལས་འདས་པའི་དགེ་སློང་མ་མཚན་གྱུར་ཏེ། དགེ་སློང་དུ་གྱུར་པའི་ལྟུང་བ་ཐུན་མོང་མ་ཡིན་པ་དེ་དག་གི་ཞིང་མ་ཡིན་པ་ཉིད་ལ་ལྟུང་བ་དེ་དག་མེད་པ་ལྟ་བུའོ། །འདིར་གཞུང་ནི་གཏམ་གྱི་གཞི་ལས་དགེ་སློང་ལྟུང་བ་ཐུན་མོང་མ་ཡིན་པ་སྡེ་བཞི་པོ་དག་བྱུང་བ་མཚན་གྱུར་ཏེ། དགེ་སློང་མར་གྱུར་ན་དེ་ལྟུང་བ་དེ་དག་ལས་བྱུང་བར་བརྗོད་པར་བྱའོ། །དགེ་སློང་མ་ལྟུང་བ་ཐུན་མོང་མ་ཡིན་པ་སྡེ་ལྔ་པོ་དག་བྱུང་བ་དེ་མཚན་གྱུར་ཏེ། དགེ་སློང་དུ་གྱུར་ན་དེ་ལྟུང་བ་དེ་དག་ལས་བྱུང་བར་བརྗོད་པར་བྱའོ་ཞེས་གསུངས་པ་ཡིན་ནོ། །དེ་ལ་ཉེས་པ་བཅབས་པ་མ་ཡིན་པ་མ་ཡིན་ནོ་ཞེས་བྱ་བ་ནི། མཚན་གྱུར་ན་བྱས་པ་ནི་དེ་ཉིད་དོ་ཞེས་བྱ་བ་དང་ཞིང་མ་ཡིན་པ་ཉིད་ལ་ནི་ཉམས་སོ་ཞེས་བྱ་བ་དེ་ལ་ཉེས་པ་བཅབས་པ་བྱས་པ་ཡང་ཉམས་པ་མ་ཡིན་པ་མ་ཡིན་ཏེ་ཉམས་པ་ཁོ་ན་ཡིན་ནོ། །དེས་ན་དགེ་སློང་གིས་དགེ་འདུན་ལྷག་མ་བཅབས་ནས་མཆན་གྱུར་ཏེ། དགེ་སློང་མ་ཉིད་དུ་གྱུར་ན་དེས་སྦོ་བའི་ལས་ཉིད་སྤྱད་པར་བྱ་མི་དགོས་ཏེ། མཚན་མ་གྱུར་པ་ཉིད་ལ་འཆབ་པའི་ཉེས་པ་སྲིད་པའི་ཕྱིར་རོ། །མགུ་བ་སྤྱད་པ་ནི་དོན་མེད་པ་ཉིད་ཡིན་ནོ་ཞེས་བྱ་བ་ནི། མཚན་གྱུར་ན་སྔར་མཚན་མ་གྱུར་པའི་གནས་སྐབས་སུ་ཉེས་པ་ལས་དབྱུང་བའི་ཕྱིར་མགུ་བ་སྤྱད་པ་ཞག་དྲུག་གམ་ཟླ་བ་ཕྱེད་རིལ་གྱིས་སྤྱད་ཀྱང་རུང་དེ་ལས་ཤས་ཀྱིས་སྤྱད་ཀྱང་
རུང་སྟེ་སྔར་མགུ་བ་སྤྱད་པ་དེ་ཕྱིས་མཆན་གྱུར་པའི་གནས་སྐབས་ན་དོན་མེད་པ་ཉིད་ཡིན་ནོ། །འདིར་གཞུང་ནི་སྤོ་བའི་གཞིའི་ཞུ་བ་ལས་བཙུན་པ་རེ་ཞིག་དགེ་སློང་སྤོ་བ་ལ་ཐུག་པ་མཚན་གྱུར་ཏེ་དགེ་སློང་མར་གྱུར་ན། ཅི་དེས་གཉི་གའི་དགེ་འདུན་ལ་ཟླ་བ་ཕྱེད་མགུ་བ་སྤྱད་པ་སྤྱད་པར་བགྱི་འཚལ་ལམ་སྤྱད་པར་བྱ་དགོས་སོ། །བཙུན་པ་རེ་ཞིག་དགེ་སློང་མ་གཉི་གའི་དགེ་འདུན་ལ་མགུ་བ་སྤྱད་པ་མཚན་གྱུར་ཏེ། དགེ་སློང་དུ་གྱུར་ན་ཅི་དེས་དགེ་འདུན་ལ་ཞག་དྲུག་མགུ་བ་སྤྱད་པ་སྤྱད་པར་བགྱི་འཚལ་ལམ། སྤྱད་པར་བྱ་དགོས་སོ་ཞེས་གསུངས་པ་ཡིན་ནོ། །དེ་ལ་དགེ་སློང་སྤོ་བ་ལ་ཐུག་པ་མཚན་གྱུར་ཏེ། དགེ་སློང་མར་གྱུར་ན་ཅི་དེས་གཉི་གའི་དགེ་འདུན་ལ་ཟླ་བ་ཕྱེད་མགུ་བ་སྤྱད་པ་སྤྱད་པར་བགྱི་འཚལ་ལམ་ཞེས་བྱ་བའི་མདོ་སྔ་མ་ཤོས་ཀྱིས་ནི་ཉེས་པ་བཅབས་པ་ཉམས་པར་བསྟན་ཏེ། འདི་ལྟར་མགུ་བ་སྤྱད་པ་འབའ་ཞིག་བསྟན་གྱི་སྦོ་བ་མ་བསྟན་པའི་ཕྱིར་རོ། །དགེ་སློང་མ་གཉི་གའི་དགེ་འདུན་ལ་མགུ་བ་སྤྱད་པ་མཚན་གྱུར་ཏེ། དགེ་སློང་དུ་གྱུར་ན་ཅི་དེས་དགེ་འདུན་ལ་ཞག་དྲུག་མགུ་བ་སྤྱད་པ་སྤྱད་པར་བགྱི་འཚལ་ལམ་ཞེས་བྱ་བའི་མདོ་ཕྱི་མ་ཤོས་ཀྱིས་ནི་མགུ་བ་སྤྱད་བ་དོན་མེད་པར་བསྟན་ཏེ། འདི་ལྟར་སྡར་གཉི་གའི་དགེ་འདུན་ལ་ཟླ་བ་ཕྱེད་མགུ་བ་སྤྱད་དུ་ཟིན་ཀྱང་ཡང་དགེ་འདུན་ལ་ཞག་དྲུག་མགུ་བ་སྤྱད་པར་བྱ་དགོས་པར་བསྟན་པའི་ཕྱིར་རོ། །ཅིའི་ཕྱིར་བྱས་པ་ནི་དེ་ཉིད་ཡིན་ནོ། །ཞིང་མ་ཡིན་པ་ལ་ནི་ཉམས་སོ། །མགུ་བ་སྤྱད་པ་ནི་དོན་མེད་པ་ཉིད་ཡིན་ནོ་ཞེ་ན། འདི་ལྟར་འདི་ལ་ཆོ་ག་རྣམས་གྱུར་ཏོ་ཞེས་བྱ་བ་སྨྲས་ཏེ། མཚན་གྱུར་པ་འདི་ལ་གང་གི་ཕྱིར་ཆོག་སྤྱད་པ་རྣམས་གྱུར་པ་དེའི་ཕྱིར་དེ་དག་རྣམ་པར་གཞག་པ་མཛད་དོ། །དེའི་ཚེའི་ལུས་བྱེད་པ་པོ་ཉིད་ཡིན་ནོ་ཞེས་བྱ་བ་ནི། གང་གི་ཚེ་གསང་པར་བྱ་བ་ལ་སོགས་པ་ཡུལ་གང་ལས་ལྟུང་བ་འབྱུང་བར་འགྱུར་བའི་ཡུལ་གྱི་ལུས་གང་ཡིན་པ་དེ་དང་ལྟུང་བ་འབྱིན་པར་བྱེད་པའི་རྒྱུད་ཀྱིས་ལུས་ཀྱི་དངོས་པོ་མཚན་གྱུར་ཏེ། ཕོ་འམ་མོའི་ལུས་སུ་གནས་པའི་ལུས་དེ་ཉིད་ལྟུང་བ་དེའི་བྱེད་པ་པོ་ཉིད་ཡིན་ཏེ། ཡུལ་གང་ལས་ལྟུང་བ་འབྱུང་བའི་ལུས་དང་རྒྱུད་གང་ལ་ལྟུང་བ་འབྱུང་བའི་ལུས་དེ་གཉིས་གནས་སྐབས་གྱུར་པ་ན་གང་གིས་གནས་སྐབས་
སུ་གནས་པའི་ལུས་དེ་ཉིད་ཡུལ་དང་རྒྱུད་ཀྱི་ལྟུང་བ་གང་ཡིན་པ་དེའི་བྱེད་པ་པོ་ཉིད་ཡིན་པར་རྣམ་པར་གཞག་གོ །འདི་ལྟ་སྟེ་དཔེར་ན། གསད་པར་བྱ་བ་དགྲ་བཅོམ་པ་ཉིད་མ་ཡིན་པའི་གནས་སྐབས་ལ་ལྟུང་བ་འབྱིན་པར་བྱེད་པས་གསད་པའི་སྦྱོར་བ་བརྩམས་ནས་གསད་པར་བྱ་བ་དེས་དགྲ་བཅོམ་པ་ཉིད་ཐོབ་པའི་གནས་སྐབས་སུ་ལྟུང་པ་འབྱིན་པར་བྱེད་པ་དེས་དགྲ་བཅོམ་པ་དེ་གསོད་པར་བྱེད་ན་དེའི་ཚེ་དགྲ་བཅོམ་པ་དེའི་ལུས་དེ་ལྟུང་བ་འབྱིན་པར་བྱེད་པའི་རྒྱུད་ལས་སྲོག་གཅོད་པའི་ལྟུང་བ་དང་མཚམས་མེད་པའི་ལས་གཉི་ག་འབྱུང་བའི་བྱེད་པ་པོ་ཉིད་ཡིན་པ་ལྟ་བུ་དང༌། གསད་པར་བྱ་བ་དགྲ་བཅོམ་པ་ཉིད་མ་ཡིན་པའི་གནས་སྐབས་ལ་ལྟུང་བ་འབྱིན་པར་བྱེད་པས་གསད་པའི་སྦྱོར་བ་བརྩམས་ནས་འགྱོད་པ་དྲག་པོ་བསྐྱེད་པ་ལ་སོགས་པ་སྦྱོར་བ་དེ་ལས་ཕྱིར་ལོག་ནས་དེའི་འོག་ཏུ་གསད་པར་བྱ་བ་དེས་དགྲ་བཅོམ་པ་ཉིད་ཐོབ་ནས་གསད་པའི་སྦྱོར་བ་སྔ་མ་དེ་ཉིད་ཀྱིས་དེའི་ཚེ་དགྲ་བཅོམ་པ་དེ་ཤི་བར་གྱུར་ན་དེའི་ཚེ། དགྲ་བཅོམ་པའི་ལུས་དེ་ལྟུང་བ་འབྱིན་པར་བྱེད་པའི་རྒྱུད་ལ་སྲོག་གཅོད་པ་འབའ་ཞིག་གི་བྱེད་པ་པོ་ཉིད་ཡིན་གྱི་མཚམས་མེད་པའི་ལས་ཀྱི་བྱེད་པ་པོ་ཉིད་མ་ཡིན་པ་ལྟ་བུ་དང༌། དེ་བཞིན་དུ་དགེ་སློང་གིས་སྐྱེས་པའི་ལུས་ལ་རེག་པའི་སྦྱོར་བ་བརྩམས་པ་ན་སྐྱེས་པ་དེ་མཚན་གྱུར་ཏེ། བུད་མེད་དུ་གྱུར་ན་བུད་མེད་ཀྱི་ལུས་ལ་རེག་པ་དེ་ནི་ལྟུང་བ་འབྱིན་པར་བྱེད་པ་དེའི་རྒྱུད་ལ་བུད་མེད་ཀྱི་ལུས་ལ་རེག་པ་ལས་དགེ་འདུན་ལྷག་མའི་ལྟུང་བ་གང་འབྱུང་བ་དེའི་བྱེད་པ་པོ་ཉིད་ཡིན་གྱི་སྦོམ་པོའི་བྱེད་པ་པོ་ཉིད་མ་ཡིན་པ་ལྟ་བུ་དང༌། དེ་བཞིན་དུ་དགེ་སློང་གིས་བུད་མེད་ཀྱི་ལུས་ལ་རེག་པའི་སྦྱོར་བ་བརྩམས་པ་ན་བུད་མེད་དེ་མཚན་གྱུར་ཏེ། སྐྱེས་པར་གྱུར་ན་སྐྱེས་པའི་ལུས་ལ་རེག་པ་དེ་ནི་ལྟུང་བ་འབྱིན་པར་བྱེད་པ་དེའི་རྒྱུད་ལ་སྐྱེས་པའི་ལུས་ལ་རེག་པ་ལས་སྦོམ་པོའི་ལྟུང་བ་གང་བྱུང་བབ་དེའི་བྱེད་པ་པོ་ཉིད་ཡིན་གྱི་དགེ་འདུན་ལྷག་མའི་བྱེད་པ་པོ་ཉིད་མ་ཡིན་པ་ལྟ་བུ་དང༌། དེ་བཞིན་དུ་དགེ་སློང་དུ་གྱུར་པས་བུད་མེད་ཀྱི་ལུས་ལ་རེག་པའི་ཕྱིར་སྦྱོར་བ་བརྩམས་ནས་དགེ་སློང་དེ་མཚན་གྱུར་ཏེ། དགེ་སློང་མར་གྱུར་ན་བུད་མེད་ཀྱི་ལུས་ལ་རེག་པ་དེ་དགེ་སློང་མ་དེའི་རྒྱུད་ལ་བུད་མེད་ཀྱི་ལུས་ལ་རེག་པ་ལས་གྱུར་པའི་
ཕམ་པའི་སྦོམ་པོ་ཞེས་བྱ་བ་གང་བྱུང་བ་དེའི་བྱེད་པ་པོ་ཉིད་ཡིན་གྱི་རེག་པའི་དགེ་འདུན་ལྷག་མའི་བྱེད་པ་པོ་ཉིད་མ་ཡིན་པ་ལྟ་བུ་དང༌། དེ་བཞིན་དུ་དགེ་སློང་མར་གྱུར་པས་སྐྱེས་པའི་ལུས་ལ་རེག་པའི་ཕྱིར། སྦྱོར་བ་བརྩམས་ནས་དགེ་སློང་མ་དེ་མཚན་གྱུར་ཏེ། དགེ་སློང་དུ་གྱུར་ན་སྐྱེས་པའི་ལུས་ལ་རེག་པ་དེ་དགེ་སློང་དེའི་རྒྱུད་ལ་སྐྱེས་པའི་ལུས་ལ་རེག་པ་ལས་གྱུར་པའི་ལྷག་མའི་སྦོམ་པོ་ཞེས་བྱ་བ་གང་འབྱུང་བ་དེའི་བྱེད་པ་པོ་ཉིད་ཡིན་གྱི་རེག་པའི་ཕམ་པར་འགྱུར་པའི་བྱེད་པ་པོ་ཉིད་མ་ཡིན་པ་ལྟ་བུ་དང༌། དེ་བཞིན་དུ་དགེ་སློང་ལ་རྡེག་པའི་ཕྱིར་སྦྱོར་བ་བརྩམས་ནས། དགེ་སློང་དེ་མཚན་གྱུར་ཏེ་དགེ་སློང་མར་གྱུར་པ་ལ་རྡེག་པར་བྱེད་ན་དགེ་སློང་མའི་ལུས་དེ་ལྟུང་བ་འབྱིན་པར་བྱེད་པ་དེའི་རྒྱུད་ལ་ཉེས་བྱས་ཀྱི་བྱེད་པ་པོ་ཉིད་ཡིན་པ་ལ་སོགས་པ་ལྟ་བུའོ། །གཞན་ལས་སྐྱེས་པ་ནི་རང་གི་འགྲོ་བ་ཉིད་མ་ཡིན་པ་མ་ཡིན་ནོ་ཞེས་བྱ་བ་ནི། མི་དུད་འགྲོའི་འགྲོ་བའམ་མི་མ་ཡིན་པའི་འགྲོ་བ་གཞན་ལས་སྐྱེས་པ་འམ། མི་མ་ཡིན་པ་མིའི་འགྲོ་བ་འམ་དུད་འགྲོའི་འགྲོ་བ་གཞན་ལས་སྐྱེས་པ་འམ། དུད་འགྲོ་མིའི་འགྲོ་བའམ་མི་མ་ཡིན་པའི་འགྲོ་བ་གཞན་ལས་སྐྱེས་པ་ནི་རང་ཉིད་འགྲོ་བ་གར་གཏོགས་པའི་རང་གི་འགྲོ་བ་ཉིད་མ་ཡིན་པ་མ་ཡིན་ཏེ། རང་གི་འགྲོ་བ་ཉིད་ཡིན་ནོ། །དཔེར་ན་མེ་མ་ཡིན་པ་མོའི་མངལ་ནས་སྐྱེས་པའི་མིའི་རྒྱུད་དུ་དབང་བའི་རྫས་ལ་དེར་འདུ་ཤེས་པས་བརྐུས་ན་མི་ཉིད་ལས་བརྐུས་པ་ཡིན་པས་ཕམ་པ་ཁོ་ནར་འགྱུར་བ་ལྟ་བུ་དང༌། དེ་བཞིན་དུ་མི་མ་ཡིན་པ་མོའི་མངལ་ནས་སྐྱེས་པའི་མངལ་ན་གནས་པ་མིའི་ངོ་བོ་ཉིད་བསད་ན་མི་ཉིད་བསད་པ་ཡིན་པས་ཕམ་པ་ཁོ་ནར་འགྱུར་བ་ལྟ་བུ་དང༌། དེ་བཞིན་དུ་མིའི་བུད་མེད་ཀྱི་མངལ་ནས་སྐྱེས་པའི་མངལ་ན་གནས་པ་མི་མ་ཡིན་པའི་ངོ་བོ་ཉིད་བསད་ན་མི་མ་ཡིན་པ་ཉིད་བསད་པ་ཡིན་པས་སྦོམ་པོར་འགྱུར་བ་ལྟ་བུ་དང༌། དེ་བཞིན་དུ་གང་ཡང་རུང་བའི་སྐྱེ་གནས་ནས་སྐྱེས་པའི་དུད་འགྲོའི་ངོ་བོ་ཉིད་བསད་ན་དུད་འགྲོ་ཉིད་བསད་པ་ཡིན་པས་ལྟུང་བྱེད་དུ་འགྱུར་བ་ལྟ་བུ་སྟེ། འདི་ལྟར་མི་ལ་སོགས་པ་དེ་དུད་འགྲོ་ལ་སོགས་པ་ལས་སྐྱེས་པ་ཡིན་མོད་ཀྱི་འོན་ཀྱང་དེ་བདག་ཉིད་འགྲོ་བ་གར་སྐྱེས་པའི་འགྲོ་བདེ་ཉིད་དུ་གཏོགས་པ་ཡིན་པའི་ཕྱིར་རོ། །འགྲོ་བ་གཞན་གྱི་
རྣམ་པ་བརྟེན་པ་བསད་པ་ལ་ཡང་ངོ་ཞེས་བྱ་བ་ལ། རང་གི་འགྲོ་བ་ཉིད་མ་ཡིན་པ་མ་ཡིན་ནོ་ཞེས་བྱ་བའི་རྗེས་བསྙགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །དཔེར་ན་མིག་སྨན་དང་སྔགས་ལ་སོགས་པའི་དང་ང་གིས་མི་མ་ཡིན་པ་དང་དུད་འགྲོ་འགྲོ་བ་གཞན་གྱི་ལུས་གྱི་རྣམ་པ་བསྟེན་པ་བསད་ན་མི་ཉིད་བསད་པ་ཡིན་པས་ཕམ་པ་ཁོ་ནར་འགྱུར་བ་ལྟ་བུ་དང༌། དེ་བཞིན་དུ་མི་མ་ཡིན་པ་མི་དང་དུད་འགྲོའི་འགྲོ་བ་གཞན་གྱི་ལུས་ཀྱི་རྣམ་པ་བསྟན་པ་བསད་ན་མི་མ་ཡིན་པ་ཉིད་བསད་པ་ཡིན་པས། སྦོམ་པོར་འགྱུར་བ་ལྟ་བུ་དང༌། དེ་བཞིན་དུ་དུད་འགྲོ་མི་དང་མི་མ་ཡིན་པའི་འགྲོ་བ་གཞན་གྱི་ལུས་ཀྱི་རྣམ་པ་བསྟེན་པ་བསད་ན་དུད་འགྲོ་ཉིད་བསད་པ་ཡིན་པས་ལྟུང་བྱེད་དུ་འགྱུར་བ་ལྟ་བུའོ། །མདོ་འདི་ནི་མ་བྱིན་པར་ལན་པ་ལ་སོགས་པ་ལྟུང་བྱེད་ཀྱི་སྡེ་ཐམས་ཅད་ལ་སྦྱར་བ་མ་ཡིན་གྱི་སྲོག་གཅོད་པའི་སྐབས་འབའ་ཞིག་དང་སྦྱར་རོ། །འདིར་ལྟུང་བ་རྣམ་པར་གཞག་པ་ནི་དངོས་པོའི་དབང་གིས་རྣམ་པར་གཞག་པ་ཡིན་གྱི་འདུ་ཤེས་ཀྱི་དབང་ཁོ་ནས་རྣམ་པར་གཞག་པ་ནི་མ་ཡིན་ནོ། །དེ་ལྟ་བས་ན་དགེ་སློང་གིས་མིའི་འགྲོ་བར་གཏོགས་པ་མི་མ་ཡིན་པ་དང་དུད་འགྲོའི་འགྲོ་བ་གཞན་གྱི་ལུས་ཀྱི་རྣམ་པ་བསྟེན་པ་ཞིག་གསོད་ན་དེར་འདུ་ཤེས་པས་ཀྱང་རུང་གཞན་དུ་འདུ་ཤེས་པས་ཀྱང་རུང་སྟེ་གསད་པའི་དུས་ན་དངོས་གཞིའི་ཕམ་པ་ཁོ་ནར་འགྱུར་རོ། །སྦྱོར་བ་ལ་ནི་མིའི་འགྲོ་བར་གཏོགས་པར་འདུ་ཤེས་ན་ནི་སྦོམ་པོའོ། །མི་མ་ཡིན་པ་དང་དུད་འགྲོའི་འགྲོ་བར་གཏོགས་པར་འདུ་ཤེས་ན་ནི་ཉེས་བྱས་སོ། །མི་མ་ཡིན་པའི་འགྲོ་བར་གཏོགས་པ་མི་དང་དུད་འགྲོའི་འགྲོ་བ་གཞན་གྱི་ལུས་ཀྱི་རྣམ་པ་བསྟེན་པ་ཞིག་གསོད་ན་དེར་འདུ་ཤེས་པས་ཀྱང་རུང་གཞན་དུ་འདུ་ཤེས་པས་ཀྱང་རུང་སྟེ། གསད་པའི་དུས་ན་དངོས་གཞི་ལ་ནི་སྦོམ་པོར་འགྱུར་རོ། །སྦྱོར་བ་ལ་མིའི་འགྲོ་བར་གཏོགས་པར་འདུ་ཤེས་ན་ནི་སྦོམ་པོའོ། །མི་མ་ཡིན་པ་དང་དུད་འགྲོའི་འགྲོ་བར་གཏོགས་པར་འདུ་ཤེས་ན་ནི་ཉེས་བྱས་སོ། །དུད་འགྲོའི་འགྲོ་བར་གཏོགས་པ་མི་དང་མི་མ་ཡིན་པའི་འགྲོ་བ་གཞན་གྱི་ལུས་ཀྱི་རྣམ་པ་བསྟེན་པ་ཞིག་གསོད་ན་དེར་འདུ་ཤེས་པས་ཀྱང་རུང་གཞན་དུ་འདུ་ཤེས་པས་ཀྱང་རུང་སྟེ། གསད་པའི་དུས་ན་དངོས་གཞི་ལ་ནི་ལྟུང་བྱེད་དུ་
འགྱུར་རོ། །སྦྱོར་བ་ལ་ནི་མིའི་འགྲོ་བར་གཏོགས་པར་འདུ་ཤེས་ན་ནི་སྦོམ་པོའོ། །མི་མ་ཡིན་པ་དང་དུད་འགྲོའི་འགྲོ་བར་གཏོགས་པར་འདུ་ཤེས་ན་ནི་ཉེས་བྱས་སོ། །འདིར་ལྷ་སྦྱིན་དུ་འདུ་ཤེས་པས་མཆོད་སྦྱིན་བསད་པ་ལ་ཕམ་པར་མི་འགྱུར་བ་ལྟ་བུར་ཐལ་བར་ཡང་མི་འགྱུར་སྟེ། དེ་གཉིས་ནི་རྒྱུད་ཐ་དད་པ་ཡིན་པའི་ཕྱིར་ལྷ་སྦྱིན་དུ་འདུ་ཤེས་པས་མཆོད་སྦྱིན་པས་དཔལ་ལ་ཕམ་པར་མི་འགྱུར་བར་རིགས་སོ། །འདིར་ནི་རྒྱུད་གཅིག་ཡིན་པའི་ཕྱིར་སྦྱོར་བ་ལ་འདུ་ཤེས་ལོག་པའི་དབང་གིས་ནི་སྦྱོར་བའི་ཁ་ན་མ་ཐོ་བ་ཆེ་ཆུང་དུ་འགྱུར་བར་ཟད་ཀྱི་དངོས་གཞི་ལ་སྲོག་གཅད་པའི་དབང་གིས་ནི་དངོས་པོ་ཇི་ལྟ་བ་ལས་ཁ་ན་མ་ཐོ་བར་འགྱུར་རོ། །འདིར་ཁུངས་ནི་ཨུ་ཏྲ་ཡ་ནའི་རྟོགས་པ་བརྗོད་བ་དྲན་པར་བྱ་སྟེ། འདི་ལྟར་གཙུག་ཕུད་ཅན་གྱིས་ཕས་དགྲ་བཅོམ་བ་ཉིད་ཐོབ་པར་མ་ཤེས་སུ་ཟིན་ཀྱང་པས་བུ་ལ་ཁྱོད་ཀྱིས་མཚམས་མེད་པ་གཉིས་བྱས་ཏེ་ཕ་གསད་པའི་ཕྱིར་དང་དགྲ་བཅོམ་པ་གསད་པའི་ཕྱིར་རེ་ཞེས་སྤྲིངས་བ་ལ་སོགས་པ་ལྟ་བུའོ། །མ་བྱིན་པར་ལེན་པ་དང་ལུས་ཀྱིས་རེག་པ་དང་གོས་སློབ་བ་དང་གོས་སྦྱིན་པ་དང་བསོད་པ་སློང་བ་དང་ཉལ་པོ་བྱེད་པར་ཤོམ་པའི་ཁྱིམ་ན་འགྲེང་བ་དང་འདུག་པ་ལ་སོགས་པ་གཞན་ལ་ནི་འདི་གཞན་དུ་རྣམ་པར་གཞག་སྟེ། རེ་ཞིག་མ་བྱིན་པར་ལེན་པ་ལ་ནི་བརྐུ་བར་བྱས་པའི་རྫས་གང་ཡིན་པ་དེ་མིའི་རྒྱུད་དུ་གཏོགས་པ་དབང་བ་ཡིན་ན་མི་དེ་འགྲོ་བ་གཞན་གྱི་རྣམ་པ་བསྟེན་དུ་ཟིན་ཀྱང་ལྟུང་བྱེད་པའི་འབྱིན་པར་བྱེད་པས་མིའི་རྒྱུད་དུ་གཏོགས་པས་ཡོངས་སུ་བཟུང་བ་ཡིན་པར་འདུ་ཤེས་ན་ནི་དེ་ལ་ནི་དངོས་པོ་ཇི་ལྟ་བ་བཞིན་དུ་ཁ་ན་མ་ཐོ་བར་འགྱུར་རོ། །གལ་ཏེ་དེ་ལྟར་མི་ཤེས་ན་ནི་མཚན་ཉིད་ཇི་ལྟ་བ་བཞིན་དུའོ། །ལུས་ཀྱིས་རེག་པ་ལ་སོགས་པ་དག་ལ་ནི་ཐ་སྙད་ཀྱི་ཕྱིར་རྣམ་པར་གཞག་གོ །གནས་སྐབས་གཞན་ཐོབ་པ་ནི་གཞན་ཉིད་མ་ཡིན་ནོ་ཞེས་བྱ་བ་ནི། དགྲ་བཅོམ་བ་ཉིད་མ་ཡིན་པ་ལ་སོགས་པའི་ལུས་གཅིག་གིས་དགྲ་བཅོམ་པ་ཉིད་ལ་སོགས་པའི་གནས་སྐབས་གཞན་ཐོབ་ན་དེའི་རྒྱུད་ནི་གཞན་ཉིད་མ་ཡིན་ནོ། །དེ་ལྟ་བས་ན་གང་གིས་དགྲ་བཅོམ་པ་མ་ཡིན་པའི་གནས་སྐབས་སུ་བསད་པའི་ཕྱིར། སྦྱོར་བ་བྱས་ནས་དེས་དགྲ་བཅོམ་བ་ཉིད་ཐོབ་པ་ན་གསོད་པར་བྱེད་ན་དེ་ལ་ཕམ་པ་དང་མཚམས་
མེད་པ་གཉི་ག་འབྱུང་བ་ཁོ་ནར་འགྱུར་ཏེ། དགྲ་བཅོམ་པའི་གནས་སྐབས་གཞན་ཐོབ་པ་དེ་རྒྱུད་གཞན་ཉིད་མ་ཡིན་པའི་ཕྱིར་རོ། །ཉེས་པ་དེ་མེད་པ་ཉིད་ལ་འོང་བ་ནི་ཐ་དད་དོ་ཞེས་བྱ་བ་ལ། ཉེས་པ་དེ་མེད་པ་ཞེས་བྱ་བ་ནི། གང་ཟག་གང་ལ་སྟན་ལ་སོགས་པ་བྱེད་པའི་ཉེས་པར་འབྱུང་བ་དེ་མེད་པའོ། །དེའི་དངོས་པོ་ནི་དེ་ཉིད་དོ། །ཉེས་པ་དེ་མེད་པ་ཉིད་ཀྱི་གནས་སྐབས་ཅན་དེ་ལ་གནས་སྐབས་གཞན་དུ་ཉེས་པ་གང་འོང་ཞིང་ཐོབ་པ་དེ་ནི་ཐ་དད་པ་ཉིད་ཡིན་ཏེ་ལས་དེ་ཐ་དད་པའི་ངོ་བོ་ཉིད་ཡིན་པར་རིག་པར་བྱའོ། །དེས་ན་ཉེས་པ་དེ་ཡོད་པ་ཉིད་ཀྱི་གནས་སྐབས་སུ་ལས་གང་བྱས་པ་དེ་དེའི་འོག་ཏུ་ཉེས་པ་དེ་མེད་པ་ཉིད་ཀྱི་གནས་སྐབས་སུ་གྱུར་ནས། ཡང་དེའི་འོག་ཏུ་ཉེས་པ་དེ་ཡོད་པའི་གནས་སྐབས་སུ་གྱུར་པ་ཉིད་ལ་ཉེས་པ་འོང་བར་གྱུར་ན་སྔར་ཉེས་པ་དེ་ཡོད་པ་ཉིད་ཀྱི་གནས་སྐབས་སུ་ལས་གང་བྱས་པ་དང༌། ཕྱིས་ཡང་དེའི་འོག་ཏུ་ཉེས་པ་དེ་ཡོད་པའི་གནས་སྐབས་སུ་གྱུར་པ་ན་ལས་གང་བྱེད་པའི་ལས་དེ་དག་ནི་ཕན་ཚུན་ཐ་དད་པར་ཤེས་པར་བྱའི་གཅིག་པ་ཉིད་ནི་མ་ཡིན་ཏེ། འདི་ལྟར་བར་དུ་ཉེས་པ་དེ་མེད་པ་ཉིད་ཀྱི་གནས་སྐབས་ལྟུང་བའི་ཞིང་མ་ཡིན་པར་གྱུར་པ་དེས། ཉེས་པ་ཡོད་པའི་གནས་སྔ་ཕྱི་དེ་གཉིས་ཀྱི་བར་དུ་ཆོད་པའི་ཕྱིར་རོ། །འདི་ལྟ་སྟེ་དཔེར་ན། དགེ་སློང་གིས་སྟན་གཅིག་ལོ་དྲུག་མ་ལོན་པར། ལོ་དྲུག་པོ་དེ་ཉིད་ཀྱི་ནང་དུ་སྟན་གཞན་གཅིག་བརྩམས་ནས་ཁྱིམ་པར་བབས་ཤིང་ཡང་ཕྱིས་བསྙེན་པར་རྫོགས་ནས། དེས་སྟན་གཞན་ཞིག་བྱེད་ཅིང་དེ་ཟིན་པར་བྱས་ནས་དེའི་འོག་ཏུ་དུས་མ་ཡིན་པ་ཁོ་ནར་སྔར་སྟན་བརྩམས་པ་དེ་ཡང་ཟིན་པར་བྱེད་ན་དེའི་ཚེ་རྩོམ་པ་དང་ཟིན་པར་བྱེད་པའི་མཚན་ཉིད་སྔ་ཕྱིའི་ཆ་དེ་གཉིས་ལྟུང་བ་ཐ་དད་པའི་བྱེད་པ་པོ་ཉིད་ཡིན་ཏེ་དེ་ལ་སྔར་མ་བབས་པའི་མདུན་རོལ་དུ་དུས་མ་ཡིན་པར་སྟན་གཞན་རྩོམ་པའི་ཆ་སྔ་མ་དེ་ནི་སྦྱོར་བ་ལས་བྱུང་བའི་ཉེས་བྱས་ཀྱི་བྱེད་པ་པོ་ཉིད་ཡིན་ནོ། །ཕྱིས་བསྙེན་པར་རྫོགས་ནས་སྟན་གཞན་ཞིག་བྱེད་ཅིང་དེ་ཟིན་པར་བྱས་པ་དེ་ལ་ནི་ཉེས་པ་མེད་དོ། །དེའི་འོག་ཏུ་དུས་མ་ཡིན་པ་ཁོ་ནར་སྔར་སྟན་བརྩམས་པ་དེ་ཡང་ཟིན་པར་བྱེད་པའི་ཆ་ཕྱི་མ་དེ་ནི་སྤང་པའི་ལྟུང་བྱེད་ཀྱི་དངོས་གཞིའི་བྱེད་པ་པོ་ཉིད་ཡིན་པ་ལྟ་བུ་དང༌། དེ་བཞིན་དུ་དགེ་སློང་མ་ཉིད་དུ་གྱུར་ནས་ཡང་དགེ་སློང་ཉིད་དུ་གྱུར་ན་ཡང་འདི་ལྟར་
དེ་བཏང་བའི་བསམ་པ་མ་སྐྱེས་པ་ཉིད་ཡིན་མོད་ཀྱི་འོན་ཀྱང་རིགས་མི་མཐུན་པའི་གནས་སྐབས་གཞན་གྱིས་བར་དུ་ཆོད་པའི་ཕྱིར་སྔར་བརྩམས་པ་དང་ཕྱིས་ཟིན་པར་བྱེད་པ་དེ་དག་ཕན་ཚུན་ཐ་དད་པ་ཉིད་ཡིན་གྱི་གཅིག་པ་ཉིད་ནི་མ་ཡིན་པ་ལྟ་བུའོ། །བཏང་བ་ཡང་ངོ་ཞེས་བྱ་བ་ནི། གང་བརྩམས་པའི་ལས་དེ་བསམ་པ་ཐག་པ་ནས་བཏང་བ་གང་ཡིན་པའི་ལས་དེ་ཡང་ཐ་དད་པ་ཡིན་ཏེ། བྱེད་འདོད་པ་ལོག་པའི་ཕྱིར་རོ། །འདི་ལྟ་སྟེ་དཔེར་ན། ཁང་པའམ་སྟན་བརྩམས་ནས་བཏང་སྟེ་ཡང་བྱེད་ན་སྔར་བརྩམས་པ་དང་ཕྱིས་ཟིན་པར་བྱེད་པའི་གནས་སྐབས་དེ་གཉིས་སྦྱོར་བ་དང་དངོས་གཞིའི་ལྟུང་བ་ཐ་དད་པའི་བྱེད་པ་པོ་ཉིད་ཡིན་པ་ལྟ་བུའོ། །གཞི་གཅིག་ལ་དུ་མ་ཉིད་བཅས་པ་ལ་ནི་ཇི་སྙེད་པ་དེ་སྙེད་ཀྱི་ཉེས་པར་འགྱུར་རོ་ཞེས་བྱ་བ་ནི། གང་དུ་གཞི་གཅིག་ལ་བསླབ་པའི་གཞི་དུ་མ་བཅས་པར་གྱུར་པ་དེ་ལ་ནི་ཇི་སྙེད་བཅས་པར་གྱུར་པ་དེ་སྙེད་ཁོ་ནའི་ལྟུང་བདག་འབྱུང་བར་འགྱུར་བའོ། །འདི་ལྟ་སྟེ་དཔེར་ན། བརྫུན་དུ་སྨྲ་བ་དང༌། སྐྱོན་ནས་སྨྲ་བ་བཀག་པ་གཞི་གཅིག་ལ་བརྫུན་གྱིས་སྐྱོན་ནས་སྨྲས་ན་ཤེས་བཞིན་དུ་བརྫུན་དུ་སྨྲ་བའི་ལྟུང་བྱེད་དང༌། སྐྱོན་ནས་སྨྲ་བའི་ལྟུང་བྱེད་གཉིས་འབྱུང་བ་ལྟ་བུ་དང༌། དགེ་ཚུལ་བསྙིལ་བ་དང་ལྷན་ཅིག་ཞག་གསུམ་ཉལ་བ་ལ་བསྙེན་པར་མ་རྫོགས་པ་དང་ལྷན་ཅིག་ཉལ་བའི་ལྟུང་བྱེད་དང་བསྙིལ་བ་སྡུད་པའི་ལྟུང་བྱེད་གཉིས་འབྱུང་བ་ལྟ་བུ་དང༌། དེ་བཞིན་དུ་བུད་མེད་བསྙེན་པར་མ་རྫོགས་པ་དང་ལྷན་ཅིག་ཞག་གསུམ་ཉལ་བ་ལ་བསྙེན་པར་མ་རྫོགས་པ་དང་ལྷན་ཅིག་ཉལ་བའི་ལྟུང་བྱེད་དང་བུད་མེད་དང་ལྷན་ཅིག་ཉལ་བའི་ལྟུང་བྱེད་གཉིས་འབྱུང་བ་ལྟ་བུའོ། །འདིར་གཞུང་ནི་ཞར་བ་ལོངས་ཤིག་ཅེས་ཟེར་བ་ལ་དེ་ཞར་བ་མ་ཡིན་ན་ལྟུང་བྱེད་གཉིས་སུ་འགྱུར་ཏེ་ཤེས་བཞིན་དུ་བརྫུན་དུ་སྨྲ་བ་དང་མིའི་སྐྱོན་ནས་སྨྲ་བ་ལས་སོ། །དགེ་སློང་གིས་དགེ་སློང་མ་བྲམ་ཟེའི་རིགས་ཅན་མོ་ལ་ཁྱོད་ཀྱིས་འབྲེག་མཁན་གྱི་ལས་བྱས་སོ་ཞེས་སྨྲས་ན་ལྟུང་བྱེད་དང་ཉེས་བྱས་སུ་འགྱུར་ཏེ་ཤེས་བཞིན་དུ་བརྫུན་སྨྲ་བ་ལས་ལྟུང་བྱེད་དང་སྐྱོན་ནས་སྨྲ་བ་ལས་ཉེས་བྱས་སོ། དགེ་སློང་མ་རྒྱལ་རིགས་ཀྱི་རིགས་ཅན་མོ་ལ་ཡང་དེ་བཞིན་ནོ་ཞེས་གསུངས་པ་དང༌། དགེ་སློང་བསྙེན་པར་མ་རྫོགས་པའི་གང་ཟག་དང་ལྷན་ཅིག་དགུང་གསུམ་མཆིས་ཉལ་བ་ལ་ལྟུང་བྱེད་གཉིས་
འབྱུང་བ་འགའ་མཆིས་སམ། ཡོད་དེ་ཞག་གཉིས་དགེ་ཚུལ་དང་ལྷན་ཅིག་ཉལ་བ་ལ་ཞག་གསུམ་པ་ལ་ཁྱིམ་པ་མོ་དང་ལྷན་ཅིག་ཉལ་བ་ལའོ་ཞེས་བྱ་བ་སོགས་པ་གསུངས་པ་ཡིན་ནོ། །དེའི་ཆ་ནི་དེར་གཏོགས་སོ་ཞེས་བྱ་བ་ནི། ཁ་ན་མ་ཐོ་བ་ལྕི་བ་མཚུངས་པར་སྤྱོད་པ་ལ་སོགས་པ་དེའི་ཆ་ཞེས་བྱ་བ་ཤན་ནམ་ལྷག་མ་ནི་དེ་དང་རིགས་མཐུན་པའི་ཁ་ན་མ་ཐོ་བ་ཡང་བ་ནི་དེར་གཏོགས་པ་སྟེ། མི་ཚངས་པར་སྤྱོད་པ་ལ་སོགས་པར་གཏོགས་པའི་ཁ་ན་མ་ཐོ་བ་ལྕི་བ་དང་འདྲེལ་བར་རིགས་པར་བྱའི་རིགས་མི་མཐུན་པ་དང་འབྲེལ་པ་ནི་མ་ཡིན་ནོ། །དེ་ལ་རེ་ཞིག་མི་ཚངས་པར་སྤྱོད་པའི་ཆ་གང་ཞེ་ན། ཁུ་བ་འབྱིན་པ་དང་ལུས་ཀྱིས་རེག་པ་དང་འཁྲིག་པ་དང་ལྡན་པར་སྨྲ་བ་དང་བསྙེན་བཀུར་བསྔགས་པ་དང༌། སྨྱན་བྱེད་པ་དང་འཁྲུར་འཇུག་པ་དང༌། ལེན་པ་དང༌། བལ་རྨེལ་དུ་འཇུག་པ་དང༌། ཚིག་དྲུག་གམ་ལྔ་ལས་ལྷག་པར་ཆོས་སྟོན་པ་དང༌། མ་བསྐོས་པར་སྟོན་པ་ལ་སོགས་པ་བཅུ་དང༌། ཉལ་པོ་བྱེད་པར་ཤོམ་པའི་ཁྱིམ་ན་འདུག་པ་དང༌། ཉལ་པོ་བྱེད་པར་ཤོམ་པའི་ཁྱིམ་ན་འགྲེང་བ་དང་གཅེར་བུ་པའམ་གཅེར་བུ་མ་ལ་སྦྱིན་པ་དང༌། བུད་མེད་དང་ལྷན་ཅིག་ཉལ་བ་དང་སྐྱེས་པ་མེད་པར་བུད་མེད་དང་ལྷན་ཅིག་ལམ་དུ་འགྲོ་བ་དང་དུས་མ་ཡིན་པར་གྲོང་དུ་འགྲོ་བ་དང༌། དགེ་སློང་མ་ལས་ཟས་ལེན་པའི་སོ་སོར་བཤགས་པར་བྱ་བ་དང༌། གྲལ་རིམས་སུ་མ་ཕེབས་པར་འགྲིམ་དུ་འཇུག་པ་མ་བཟློག་པར་ཟ་བའི་སོ་སོར་བཤགས་པར་བྱ་བ་དང་ཤིན་ཏུ་བསྔགས་ཤིང་ཁྱིམ་གཞན་དུ་འགྲོ་བ་ཞེས་བྱ་བ་ནས། མ་བསྒོ་བར་ཁྱིམ་པའི་ཁྱིམ་དུ་སྟན་ལ་མི་འདུག་པར་བསླབ་པར་བྱའོ་ཞེས་བྱ་བ་དེ་ཉིད་མ་གཏོགས་པ་དེ་ཡན་ཆད་དག་གོ །མ་བྱིན་པར་ལེན་པའི་ཆ་གང་ཞེ་ན། བྱིན་པ་ཕྲོགས་ཏེ་སྤྱོད་པ་དང་བསྔོས་པ་ལས་བསྒྱུར་བ་དང་སྐྲོད་པ་དང་སྦེད་པ་དང༌། ཕྱིར་མ་བླངས་པར་སྤྱོད་པ་དང་རྐུན་མ་དང་ལྷན་ཅིག་ལམ་དུ་འགྲོ་བ་དང༌། མ་བསྒོ་བར་ཁྱིམ་པའི་ཁྱིམ་དུ་སྟན་ལ་འདུག་པའོ། །མི་གསོད་པའི་ཆ་གང་ཞེ་ན། རྩོད་པ་དང་བཅས་པའི་གཞི་མི་གཏོང་བ་དག་དང༌། ས་བོན་གྱི་ཚོགས་དང༌། སྐྱེ་བའི་ཚོགས་འཇིག་པ་དང༌། བསྒོ་བ་བཅག་པ་དང༌། ཕྱིས་གནོན་བྱེད་པ་དང༌། རྩ་བ་འབྱུང་བ་ལ་འདུག་པ་དང༌། སྲོག་ཆགས་དང་བཅས་པ་ལ་སྤྱོད་པ་དང༌།
དམག་ལ་ལྟ་བ་དང༌། དམག་གི་ནང་ན་གནས་པ་དང༌། བཤམ་པ་དཀྲུགས་པ་དང༌། བརྡེག་པ་དང་གཟས་པ་དང་ཟས་གཅོད་དུ་འཇུག་པ་དང༌། དུད་འགྲོ་གསོད་པ་དང་འགྱོད་པ་སྐྱེས་པ་དང་གག་ཚིལ་བྱེད་པ་དང་སྔངས་པར་བྱེད་པ་དང་ས་བརྐོ་བའོ། །མིའི་ཆོས་བླ་མ་སྨྲ་བའི་ཆ་གང་ཞེ་ན། གཞི་མེད་པ་དང་བག་ཙམ་དང་འདུན་པ་ལ་སོགས་པས་འགྲོའོ་ཞེས་བྱ་བའི་ཚིག་དང་བཤེས་ངོར་བྱེད་པ་དང་འཕྱ་བ་དང་གཞོགས་འཕྱས་བྱེད་པ་དང༌། དགེ་འདུན་གྱི་དབྱེན་དང་བརྫུན་གྱི་ལྷག་མ་དང་མིའི་ཆོས་བླ་མ་བདེན་པ་སྨྲ་བའོ། །ཕམ་པར་འགྱུར་བས་སྐུར་པ་འདེབས་པའི་ཆ་གང་ཞེ་ན། དགེ་འདུན་ལྷག་མས་སྐུར་པ་འདེབས་པའོ། །དགེ་འདུན་གྱི་དབྱེན་བྱེད་པའི་ཆ་གང་ཞེ་ན། དགེ་སློང་ལ་ཕྲ་མ་བྱེད་པ་དང་སྐྱོ་སྔོགས་བྱེད་པ་དང་དད་པ་ཕྱིར་བསྒྱུར་བ་དང་ལྟ་བར་གྱུར་པ་མི་གཏོང་བ་དང༌། སྤངས་པའི་རྗེས་སུ་ཕྱོགས་པ་དང༌། བསྙིལ་བ་སྡུད་པ་དང༌། གནས་ངན་ལེན་བརྗོད་པ་དང༌། ཁྱད་དུ་གསོད་པ་དང༌། འདུས་ཤིད་ཟ་བ་དང་མི་སྨྲ་བར་འགྲོ་བའོ། །བཀའ་བློ་མི་བདེ་བའི་ཆ་གང་ཞེ་ན། བསླབ་པ་ལ་ཉེ་བར་འཇོག་པ་སྤོང་བ་དང་མ་གུས་པའི་ཚུལ་ལོ། །ལྟུང་བྱེད་ཀྱི་ཆ་གང་ཞེ་ན། གསོག་འཇོག་བྱས་པ་ཟ་བ་ནི་ནང་དུ་བཙོས་པ་དང༌། ནང་དུ་ཞག་ལོན་པ་དང༌། དགེ་སློང་གིས་བཙོས་པ་ཟ་བའོ། །ཆའི་ངོ་བོ་ཉིད་བརྗོད་དེ་མི་ཚངས་པར་སྤྱོད་པ་སྤྱད་པའི་ཕྱིར་འགྲོ་བ་གང་ཡིན་པ་དེ་ནི་ཉེས་བྱས་སོ། །བདག་ཉིད་ཀྱི་ཀུན་དུ་སྤྱོད་པ་བསྔགས་པ་གང་ཡིན་པ་དེ་ནི་དགེ་འདུན་ལྷག་མའོ། །གནས་ངན་ལེན་སྨྲ་བ་གང་ཡིན་པ་དེ་ནི་གཞན་ཡིན་ནོ། །བདག་ཉིད་ཀྱི་དོན་དུ་བུད་མེད་ལ་གཞོལ་བ་གང་ཡིན་པ་དེ་ནི་ཕམ་པར་འགྱུར་བར་གཏོགས་པའི་སྦོམ་པོའོ། །འཁྱུད་པ་དང་འོ་བྱེད་པ་དང་ཉལ་བ་དང་མཚན་ཉིད་ཀྱི་ཕྱི་རོལ་དུ་སྦྱོར་བ་དག་གང་ཡིན་པ་དེ་ནི། ལུས་ཀྱིས་རེག་པའི་བདག་ཉིད་གཞན་ཡིན་ནོ། །མཚན་གྱི་ནང་དུ་རེག་ལ་གལ་ཏེ་རྨ་ཉམས་པ་མ་ཡིན་པ་གང་ཡིན་པ་དེ་ནི་ཕམ་པར་འགྱུར་བའོ། །གལ་ཏེ་ཉམས་པ་ཡིན་ན་གཞན་དང་ལྷན་ཅིག་རྩོལ་བར་མ་བྱུང་བའི་མདུན་རོལ་དུ་ནི་སྦོམ་པོའོ། །བྱུང་ན་ནི་དགེ་འདུན་ལྷག་མའོ། །མོང་འདིར་མ་བརྗོད་པ་ནི་ཅུང་ཟད་ཀྱང་མི་བརྗོད་ཀྱི། ཧ་ཅང་ཐལ་བར་
འགྱུར་བ་སེལ་བར་བྱེད་དེ། ཁུ་བ་འབྱིན་པ་ལ་སོགས་པ་མི་ཚངས་པར་སྤྱོད་པར་གཏོགས་པའི་སྦོམ་པོ་ལ་སོགས་པ་ལ་ཁ་ན་མ་ཐོ་བ་གཞན་དུ་ཐལ་བར་འགྱུར་བ་དེ་དེའི་ཆ་ནི་དེར་གཏོགས་སོ་ཞེས་བྱ་བའི་མདོ་འདིས་སྦོམ་པོ་ལ་སོགས་པ་གཞན་ཁ་ན་མ་ཐོ་བ་གཞན་དུ་འགྱུར་པ་དམིགས་ཀྱིས་པ་སྩལ་ཏོ། །དེས་ན་ཁུ་བ་འབྱིན་པ་ལ་སོགས་པ་ནི་མི་ཚངས་པར་སྤྱོད་པ་ལ་སོགས་པའི་ཆ་དག་ཡིན་གྱི་ཆ་དེ་དག་གི་ཆ་གཞན་དུ་ནི་མི་རིགས་ཏེ་ཐུག་པ་མེད་པའི་སྐྱོན་དུ་འགྱུར་བའི་ཕྱིར་རོ། །དེས་ན་ཁུ་བ་འབྱིན་པ་ལ་སོགས་པའི་ཆ་གང་ཡིན་པ་དེ་ནི་དེ་དག་ཉིད་ཀྱི་ཡིན་གྱི་མི་ཚངས་པར་སྤྱོད་པའི་ནི་མ་ཡིན་ནོ། །དེའི་ཆ་གང་ཡིན་པ་ནི་ཁུ་བ་འབྱིན་པ་ལ་སོགས་པ་དེ་དག་ཉིད་ཀྱི་ཡིན་གྱི་ཉེས་པ་སྦོམ་པོའོ་ཞེས་བྱ་བ་ལ་སོགས་གཞན་ཉིད་ནི་མ་ཡིན་ནོ། །ཕྱུང་བ་ཐམས་ཅད་ལ་མཐའ་ཉིད་མ་གཏོགས་པ་ནི་དགེ་འདུན་ལྷག་མའོ་ཞེས་བྱ་བ་ནི། ཁུ་བ་ཕྱུང་པ་ཐམས་ཅད་ལ་མཐའ་ཉིད་ཅེས་བྱ་བ་ཕམ་པར་འགྱུར་བ་ཉིད་མ་གཏོགས་པ་ལ་ནི་དགེ་འདུན་ལྷག་མ་ཁོ་ནར་འགྱུར་བའོ། །ཞུ་བ་ཁ་ཅིག་དང་འདུལ་བྱེད་ལ་སོགས་པ་གཞན་དག་ལས་ཁུ་བ་འབྱིན་པའི་རྣམ་པ་གསུངས་པ་དག་དང་མ་གསུངས་པའི་རྣམ་པ་སྲིད་པར་འགྱུར་བ་གང་ཡིན་པ་དཔེར་ན་སྤྱད་མི་བཟོད་པའི་བུད་མེད་དང་ལྷན་ཅིག་ཉམས་པར་བྱེད་པ་དང་མགོ་བཅད་པའི་ཁ་ལ་སོགས་པ་དག་ཏུ་ཉམས་པར་བྱེད་པ་ནི་སྦོམ་པོར་འགྱུར་ལ། ཁུ་བ་འབྱིན་པས་འདུན་པས་ཁུ་བ་ཕྱུང་ལ་ཕམ་པ་ཉིད་མ་ཡིན་པ་ཐམས་ཅད་ནི་ཁུ་བ་འབྱིན་པའི་དགེ་འདུན་ལྷག་མར་ཤེས་པར་བྱའོ། །མདོ་འདི་ནི་སྔར་དེའི་ཆ་ནི་དེར་གཏོགས་སོ་ཞེས་བསྟན་པ་དེའི་སྤྲོས་པ་ཡིན་ནོ། །འདིར་གང་དག་དགེ་འདུན་ལྷག་མར་མི་འགྱུར་ཏེ། དེ་ནི་བྱ་བ་གཞན་ཡིན་ནོ་སྙམ་དུ་སེམས་པ་དེའི་བསམ་པ་བཟློག་པའི་ཕྱིར་ཏེ། སྦྱོར་བ་གང་ལ་དངོས་གཞི་གཞན་དུ་གྱུར་པ་ཁ་ཅིག་ལ་དགེ་འདུན་ལྷག་མ་ལ་སོགས་པའི་ལྟུང་བ་གཞན་གང་དུ་ཡང་རྣམ་པར་མ་བཞག་བས་དེ་ལ་ན་སྨད་པའི་ལྟུང་བ་རྣམ་པར་བཞག་པ་ཡང་ཡོད་དེ་དཔེར་ན་ཁྲི་ལས་ལྡང་བ་དང་ཤམ་ཐབས་གྱོན་པ་ལ་སོགས་པ་ལྟ་བུའོ། །སྦྱོར་བ་གང་དངོས་གཞིར་གྱུར་པའི་ལྟུང་བ་གཞན་དུ་རྣམ་པར་གཞག་པ་དེ་ལ་ནི་དེ་ཉིད་དུ་འགྱུར་བ་ཡང་ཡོད་དེ་དཔེར་ན་
བསྙེན་བཀུར་བསྔགས་པ་ལ་སོགས་པ་ལྟ་བུའོ། །དེ་ལྟ་བས་ན་མི་ཚངས་པར་སྤྱོད་པའི་བསམ་པས་བུད་མེད་ལ་རེག་པ་ནི་རེག་པའི་དགེ་འདུན་ལྷག་མ་ཡིན་གྱི་ཕམ་པའི་སྦོམ་པོ་མ་ཡིན་ནོ། །མི་ཚངས་པར་སྤྱོད་པའམ་འཁྱུད་པ་ལ་སོགས་པ་བྱ་བར་བསམས་ཏེ་དཔེ་ན་པ་སྐྱབས་ཡོད་པ་ན་བུད་མེད་གཅིག་པུ་དང་ལྷན་ཅིག་འདུག་པའམ་འགྲེང་བ་ཉམས་སུ་མྱོང་བར་བྱེད་པ་ནི་ལྟུང་བྱེད་ཁོ་ན་ཡིན་གྱི་མི་ཚངས་པར་སྤྱོད་པ་དང་དགེ་འདུན་ལྷག་མའི་སྦྱོར་བའི་ཉེས་བྱས་ནི་མ་ཡིན་ནོ། །འོ་ན་གང་ལ་མི་ཚངས་པར་སྤྱོད་པའི་རྩོམ་པ་ལ་ཞུགས་པ་ལ་ཁུ་བ་འབྱིན་པའི་དུས་ན་དགེ་འདུན་ལྷག་མའི་བྱ་བ་ལ་གནས་པའི་སྦྱོར་བ་དེ་ལ་ཁ་ན་མ་ཐོ་བ་གང་གི་སྦྱོར་བ་ཡིན་པར་ཤེས་པར་བྱ་ཞེ་ན། སྦྱོར་བ་སྔ་མ་ནི་ཕམ་པར་འགྱུར་བའི་སྦྱོར་བ་ཉིད་ཡིན་ལ་གང་ཚུན་ཆད་དེ་ལ་ཁུ་བ་དབྱུང་བའི་བསམ་པ་སྐྱེས་པ་དེ་ཚུན་ཆད་ནི་དགེ་འདུན་ལྷག་མའི་སྦྱོར་བ་ཡིན་ནོ། །དེ་ལྟར་ནི་དེ་ལ་ཉེས་པ་སྦོམ་པོ་གཉིས་སུ་འགྱུར་བ་ཕམ་པར་འགྱུར་བའི་ཉེས་པ་སྦོམ་པོ་དང་དགེ་འདུན་ན་ལྷག་མར་འགྱུར་བའི་ཉེས་པ་སྤོམ་པོའོ། །འདིར་གཞུང་ནི་བུད་མེད་ཇི་ལྟ་བུ་དང་མི་ཚངས་པར་སྤྱོད་པར་བགྱིད་ན་མཐར་འགྱུར་བ་ལགས། ཡན་ལག་ཐམས་ཅད་དང་དུ་བླང་དུ་རུང་བ་གང་ཡིན་པ་དང་ངོ༌། །དུད་འགྲོའི་སྐྱེ་གནས་པ་ལ་ཡང་དེ་བཞིན་དུ་བརྗོད་པར་བྱའོ། །གལ་ཏེ་དང་དུ་བླང་དུ་མི་རུང་ན་དེ་དང་ལྷན་ཅིག་ཉམས་པར་བྱེད་པ་དེ་ལ་ཁུ་བ་བྱུང་ན་ནི་དགེ་འདུན་ལྷག་མར་འགྱུར་རོ། །གལ་ཏེ་ཁུ་བ་མ་བྱུང་ན་ནི་ཉེས་པ་སྦོམ་པོར་འགྱུར་རོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །གཞུང་གཞན་ལས་ཀྱང་ཇི་ཙམ་གྱིས་ན་སྦུབས་ཉམས་པར་བརྗོད་པར་བགྱི། །གང་གི་ཕྱིར་དེའི་རྨའི་སྒོའི་ཐན་ཀོར་ཉམས་པར་གྱུར་ན་སྟེ་དེ་ལ་ཉམས་པར་བྱེད་ན་ཉེས་པ་སྦོམ་པོར་འགྱུར་རོ། །ཁུ་བ་འབྱིན་ན་ནི་དགེ་འདུན་ལྷག་མར་འགྱུར་རོ་ཞེས་གསུངས་སོ།། བྱ་བ་དུ་མའི་འབྲས་བུས་ལྟུང་བ་རྣམ་པར་མི་གཞག་གོ་ཞེས་བྱ་བ་ནི། བྱ་བ་འབྲས་བུ་ཐ་དད་པས་བར་ཆོད་པ་འབྲས་བུ་ཐ་དད་པར་འགྲུབ་པ་དུ་མ་དག་གི་འབྲས་བུ་གཅིག་ཏུ་བསྡུས་པས་དངོས་གཞིའི་ལྟུང་བ་རྣམ་བར་མི་གཞག་སྟེ། དེ་དག་གི་འབྲས་བུ་ནི་ཐ་དད་པ་ཉིད་ཡིན་ནོ། །
དཔེར་ན་ཉུང་དུ་ཉུང་དུར་བརྐུས་པ་གཅིག་ཏུ་བསྡོམས་པས་མ་ཤ་ཀ་ལྔ་ལ་སོགས་པའི་ཚད་དུ་ཆོག་པ་གང་ཡིན་པ་དེས་ཕམ་པར་མི་འགྱུར་བ་ལྟ་བུ་དང༌། ཁང་པ་ཆུང་དུ་དུ་མའི་གཞི་བསྡོམས་པས་ཚད་ལས་ལྷག་པར་གྱུར་པ་གང་ཡིན་པ་དེས་དགེ་འདུན་ལྷག་མར་མི་འགྱུར་བ་ལྟ་བུ་དང༌། དེ་བཞིན་དུ་གོས་ཀྱི་དུམ་བུ་ཚད་དུ་མི་ཆོག་པ་དུས་མཚང་བར་བཅངས་ཏེ་གཏོང་བར་བྱེད་ཅིང་ཡང་གོས་ཀྱི་དུམ་བུ་གཞན་ཞིག་དུས་གཞན་དུ་བཅངས་ཏེ་གཏོང་བར་བྱེད་པ་དང༌། ཡང་དུས་གཞན་དུ་བཅངས་ཏེ་གཏོང་བར་བྱེད་པའི་དུས་དེ་དག་གི་སྤྱིར་བསྡོམས་ན་འཆང་བའི་དུས་ལས་ལྷག་ཏུ་ཟིན་ཀྱང་དེ་ལྟ་མོད་ཀྱི་བཅངས་པའི་ཞག་དེ་དག་གི་འབྲས་བུ་ཐ་དད་པའི་ཕྱིར་སྤང་བའི་ལྟུང་བྱེད་དུ་མི་འགྱུར་བ་ལྟ་བུ་དང༌། དེ་བཞིན་དུ་ལམ་ན་པ་ལ་ཐོག་པ་ཡང་ཉིན་རེ་ཞིང་ཆུང་ཟད་ཆུང་ཟད་དུ་ཁྱེར་བའི་ལམ་སྤྱིར་བསྡོམས་པས་རྒྱང་གྲགས་ཀྱི་མཐའ་ལས་འདས་སུ་ཟིན་ཀྱང་བྱ་བ་ཐ་དད་པ་དེ་དག་གི་འབྲས་བུ་གཅིག་ཏུ་བསྡོམས་པས་སྤང་བའི་ལྟུང་བྱེད་དུ་མི་འགྱུར་བ་ལྟ་བུ་དང༌། ཞག་བརྒྱུད་མ་མ་ཡིན་པར་སྐབས་སྐབས་སུ་གཞན་དུ་སོང་བའི་ཞག་སྤྱིར་བསྡོམས་པས་ཞག་དྲུག་ལས་ལྷག་ཏུ་ཟིན་ཀྱང་དེས་ཞག་དྲུག་གི་འབྲལ་བའི་སྤང་བར་མི་འགྱུར་བ་ལྟ་བུ་དང༌། དུས་གཞན་དང་གཞན་དུ་ཚིག་རེ་རེ་སྨྲས་པའི་ཚིག་རྣམས་སྤྱིར་བསྡོམས་པའི་ཚིག་ལྔའམ་དྲུག་ལས་ལྷག་ཏུ་ཟིན་ཀྱང་ཚིག་ལྔའམ་དྲུག་ལས་ལྷག་པར་ཆོས་སྟོན་པའི་ལྟུང་བྱེད་དུ་མི་འགྱུར་བ་ལ་སོགས་པ་ལྟ་བུའོ། །འདིར་གཞུང་ནི་མ་བྱིན་པར་ལེན་པ་ལས་བཅོམ་ལྡན་འདས་ཀྱིས། དགེ་སློང་མ་ཤ་ཀ་ལྔ་བརྐུས་ན་མཐར་འགྱུར་རོ་ཞེས་གང་གསུངས་པ་དེ་ལ་བཙུན་པ་དགེ་སློང་གིས་རྐུ་སེམས་ཀྱིས་མ་ཤ་ཀ་བརྒྱའམ་སྟོང་སྙེད་བརྐུས་ཀྱང་མཐར་མི་འགྱུར་བ་མཆིས་སམ། ཡོད་དེ་མ་ཤ་ཀ་བཞི་བཞི་རྐུ་ཞིང་ནམ་ཡང་ལྔ་མ་ཡིན་ན་སྟེ། སྦྱོར་བའི་སྦྱོར་བ་ལ་ནི་ཉེས་པ་སྦོམ་པོ་རེ་རེར་འགྱུར་རོ་ཞེས་གསུངས་པ་ཡིན་ནོ། །འདི་ལྟར་མ་བྱིན་པར་ལེན་པའི་སྐབས་སུ་དེ་སྐད་གསུངས་མོད་ཀྱི་བྱེ་བྲག་མེད་པའི་ཕྱིར་ཐམས་ཅད་ཀྱི་དབང་དུ་བྱས་ཏེ་ཉེ་བར་སྦྱར་རོ། །ཕྱེད་བྱས་པ་ལ་བྱེད་པ་ནི་ཕྱེད་ཉིད་དོ་ཞེས་བྱ་བ་ལ། འདིར་ཕྱེད་བྱས་པ་ལ་ཞེས་བྱ་བའི་ཕྱེད་ཀྱི་སྒྲ་ནི་ཡན་ལག་
གི་ཚིག་སྟེ་ལྟུང་བ་ཀུན་ནས་སློང་བར་བྱེད་པའི་ལས་བརྩམས་པ་ཕྱེད་བྱས་པ་དེ་ལ་བྱེད་པ་ཞེས་བྱ་བ་ལྷག་མ་སྒྲུབ་པར་བྱེད་པ་གང་ཡིན་པ་སྟེ། ལྷག་མ་སྒྲུབ་པར་བྱེད་པ་དེ་ལ་ནི་ཕྱེད་ཉིད་དེ་ལས་དེའི་སྒྲུབ་པ་ཕྱེད་བྱས་པ་ཉིད་ཡིན་ནོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ་ཕྱེད་བྱས་ཟིན་པའི་ལྷག་མ་ཕྱེད་སྒྲུབ་པར་བྱེད་པ་དེ་ལ་ནི་དང་པོ་བརྩམས་ཚུན་ཆད་ནས་མཐར་ཐུག་པའི་བར་ལ་ཉེས་པའི་དངོས་གཞི་ཞེས་བྱ་བ་གང་འབྱུང་བ་དེ་ཚིགས་འོག་མར་ན་སྨད་པར་བྱའོ་ཞེས་བྱ་བའི་ཐ་ཚིག་གོ །དཔེར་ན་གོས་རྙིང་པ་ཆུང་ཟད་བཀྲུས་པ་དང་བཙོས་པ་དང་འཆག་པ་ཞིག་དགེ་སློང་མ་ཉེ་དུ་མ་ཡིན་པ་ལ་འཁྲུར་བཅོལ་ཏམ་འཚེད་དུ་བཅོལ་ཏམ་འཆག་དུ་བཅོལ་ན་ཉེས་བྱས་སུ་འགྱུར་བ་ལྟ་བུ་དང༌། །སྲིན་བལ་རྙིང་པ་དང༌། ལུག་གི་བལ་ནག་པོ་རྙིང་པ་ལས་སྟན་བྱས་ན་ཉེས་བྱས་སུ་འགྱུར་བ་ལྟ་བུ་དང༌། ལུག་གི་བལ་ཆུང་ཟད་བཀྲུས་པ་དང་བཙོས་པ་དང་རྨེལ་བ་ཞིག་དགེ་སློང་མ་ཉེ་དུ་མ་ཡིན་པ་ལ་འཁྲུར་བཅོལ་ཏམ་འཚེད་དུ་བཅོལ་ཏམ་རྨེལ་དུ་བཅོལ་ན་ཉེས་བྱས་སུ་འགྱུར་བ་ལྟ་བུའོ། །ཁ་ན་མ་ཐོ་བ་ན་སྨད་པ་དག་གི་ཆ་ཉིད་ནི་ན་སྨད་པ་ཡིན་ནོ་ཞེས་བྱ་བ་ནི། ཕམ་པར་འགྱུར་བ་ལ་སོགས་པ་དངོས་གཞིའི་ཁ་ན་མ་ཐོ་བ་དག་ལས་ན་སྨད་པ་སྦོམ་པོའི་ཁ་ན་མ་ཐོ་བ་ལ་སོགས་པ་དག་གི་ཆ་ཉིད་ནི་ན་སྨད་པ་ཉིད་ཡིན་ཏེ། ན་སྨད་པའི་ལྟུང་བྱེད་པ་པོ་ཉིད་ཡིན་ནོ་ཞེས་བྱ་བའི་ཐ་ཚིག་གོ །དཔེར་ན་ཉེས་པ་སྦོམ་པོ་དང༌། ལྟུང་བྱེད་དང༌། སོ་སོར་བཤགས་པར་བྱ་བ་དང༌། ཉེས་བྱས་དག་གིས་སྐུར་པ་བཏབ་པ་ལ་ཉེས་བྱས་སུ་འགྱུར་བ་ལྟ་བུའོ། །མཚམས་མེད་པ་གསུམ་པོ་ཕ་བསད་པ་དང་མ་བསད་པ་དང་དགྲ་བཅོམ་པ་བསད་པ་དག་གིས་སྐུར་པ་འདེབས་པ་དེ་ལ་ནི་དགེ་འདུན་ལྷག་མར་འགྱུར་ཏེ་དེ་གསུམ་ཕམ་པར་འགྱུར་བ་ཡིན་པའི་ཕྱིར་རོ། །མཚམས་མེད་པ་གཉིས་པོ་དགེ་འདུན་གྱི་དབྱེ་ན་བྱེད་པ་དང༌། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དག་གིས་སྐུར་པ་འདེབས་པ་དེ་ལ་ནི་ཉེས་བྱས་སུ་འགྱུར་ཏེ་དེ་གཉིས་སྦོམ་པོ་ཡིན་པའི་ཕྱིར་རོ། །འདི་སྐད་བསྟན་ཏེ། ཕམ་པར་འགྱུར་བ་དང༌། དགེ་འདུན་ལྷག་མ་དག་གིས་སྐུར་པ་འདེབས་པ་ནི་གོ་རིམས་བཞིན་
དུ་དགེ་འདུན་ལྷག་མ་དང་ལྟུང་བྱེད་དག་ཏུ་འགྱུར་ལ། དེ་དག་པས་ན་སྨད་པ་ཉེས་པ་སྦོམ་པོ་དང་ལྟུང་བྱེད་དང་སོ་སོར་བཤགས་པར་བྱ་བ་དང༌། ཉེས་བྱས་དག་གིས་སྐུར་པ་འདེབས་པ་ལ་ནི་ཆ་ཉིད་ན་སྨད་པ་ཡིན་པའི་ཕྱིར་ཉེས་བྱས་སུ་འགྱུར་རོ། །ཐམས་ཅད་ལ་ཐེ་ཚོམ་ཟ་བས་ཞུགས་པ་ནི་བསམ་པ་དང་བཅས་པ་ཡིན་ནོ་ཞེས་བྱ་བ་ནི། གཞི་ཐམས་ཅད་ལ་ཐེ་ཚོམ་ཟ་བ་བཞིན་དུ་འཇུག་པའི་གང་ཟག་གི་འདི་མ་ཡིན་ནམ་འོན་ཏེ་མི་མ་ཡིན་འདི་བདག་གི་མ་ཡིན་ནམ་འོན་ཏེ་བདག་གི་མ་མ་ཡིན། འདི་བདག་གི་ཕ་ཡིན་ནམ་འོན་ཏེ་བདག་གི་ཕ་མ་ཡིན། འདི་དགྲ་བཅོམ་པ་ཡིན་ནམ་འོན་ཏེ་དགྲ་བཅོམ་པ་མ་ཡིན། འདི་དེ་ཡིན་ནམ་འོན་ཏེ་དེ་མ་ཡིན་ཞེས་བྱ་བ་ལ་སོགས་པར་གཞི་ཐམས་ཅད་ལ་ཐེ་ཚོམ་ཟ་བས་ཞུགས་པའི་གང་ཟག་དེ་ནི་བསམ་པ་དང་བཅས་པ་ཡིན་ཏེ། དེ་ལྟར་ཐེ་ཚོམ་ཟ་བས་ཞུགས་པའི་གང་ཟག་དེས་གཞི་དེ་གང་ཡིན་བྱེ་བྲག་མ་ཕྱེད་དུ་ཟིན་ཀྱང་སྲོག་གཅོད་པ་ལ་ཞུགས་པའི་དུས་ན་གང་ཡིན་ཡང་བློས་གསད་པར་བྱའོ་སྙམ་པའི་གསོད་སེམས་ཀྱི་བསམ་པ་ཡོད་པས། དེའི་ཕྱིར་ཐེ་ཚོམ་ཟ་བས་ཞུགས་པ་ནི་བསམ་པ་དང་བཅས་པ་ཡིན་ནོ། །དེ་ལྟ་མ་ཡིན་དུ་ཟིན་ན་གསོད་པ་ལ་འཇུག་པར་ཡང་མི་འགྱུར་རོ། །འདི་མི་ཡིན་ནམ་འོན་ཏེ་མི་མ་ཡིན་སྙམ་དུ་ཐེ་ཚོམ་ཟ་བཞིན་དུ་བསད་པ་ལ་ནི་གསད་པར་བྱ་བའི་གཞི་ཇི་ལྟ་བ་ལས་ལྟུང་བར་འགྱུར་ཏེ། མི་ཡིན་ན་ནི་ཕམ་པར་འགྱུར་ལ་མི་མ་ཡིན་པ་ཞིག་ན་ནི་ན་སྨད་པར་འགྱུར་རོ། །འདི་བདག་གི་མ་ཡིན་ནམ་འོན་ཏེ་བདག་གི་མ་མ་ཡིན་ཞེས་བྱ་བ་ལ་སོགས་པར་ཐེ་ཚོམ་ཟ་བཞིན་དུ་བསད་པ་ལ་ནི་གསད་པར་བྱ་བའི་གཞི་དེ་བདག་གི་མའམ་ཕའམ་དགྲ་བཅོམ་པ་ཡིན་ན་ནི་ཕམ་པ་དང་མཚམས་མེད་པར་ཡང་འགྱུར་རོ། །གང་ལ་བདག་ཆགས་པ་དེ་འདི་ཡིན་ནམ་འོན་ཏེ་མ་ཡིན། འདི་བུད་མེད་ཡིན་ནམ་འོན་ཏེ་མ་ཡིན་སྙམ་དུ་ཐེ་ཚོམ་ཟ་བཞིན་དུ་ལུས་ཀྱིས་རག་པའམ་མི་ཚངས་པར་སྦྱང་ན་གཞི་ཇི་ལྟ་བ་ལས་ཁ་ན་མ་ཐོ་བར་འགྱུར་རོ། །ལྷག་མ་རྣམས་ལ་ཡང་དེ་བཞིན་དུ་ཅི་རིགས་པར་སྦྱར་རོ། །སྦྱོར་བ་ལ་ནི་འདུ་ཤེས་ཡན་ལག་ཡིན་ནོ་ཞེས་བྱ་བ་ནི། སྦྱོར་བ་ལ་ནི་འདུ་ཤེས་
ཡན་ལག་ཡིན་གྱི་དོན་ཉིད་ནི་མ་ཡིན་ཏེ། དཔེར་ན་དུད་འགྲོ་ལ་མིང་འདུ་ཤེས་བར་བསད་ན་སྦྱོར་བ་ལ་སྦོམ་པོ་ཉིད་དུ་འགྱུར་བ་དང་མི་ལ་དུད་འགྲོར་འདུ་ཤེས་པས་བསད་ན་སྦྱོར་བ་ལ་ཉེས་བྱས་སུ་འགྱུར་བ་དང༌། དེ་བཞིན་དུ་མི་མ་ཡིན་པ་ལ་མིར་འདུ་ཤེས་པས་བསད་ན་སྦྱོར་བ་ལ་སྦོམ་པོར་འགྱུར་བ་དང༌། མི་ལ་མི་མ་ཡིན་པའི་འདུ་ཤེས་ཀྱིས་བསད་ན་སྦྱོར་བ་ལ་ཉེས་བྱས་སུ་འགྱུར་བ་ལྟ་བུའོ། །མ་བྱིན་པར་ལེན་པ་དང་མིའི་ཆོས་བླ་མ་སྨྲ་བ་དང༌། ལུས་ཀྱིས་རེག་པ་ལ་སོགས་པ་དག་ལ་ཡང་དེ་བཞིན་དུ་ཅི་རིགས་པར་སྦྱར་རོ། །བསམས་པ་ལ་ནི་དེ་ཉིད་དོ་ཞེས་བྱ་བ་ནི། དངོས་གཞི་ལ་དོན་ཉིད་ཡན་ལག་ཡིན་པར་སྟོན་ཏེ་སེམས་ཅན་ནམ་རྫས་ལ་བསམས་ཏེ་ཞུགས་པ་གང་ཡིན་པ་དེ་ལ་ནི་བསམས་པའི་དོན་གྱི་རང་གི་ངོ་བོ་ཉིད་ཡན་ལག་དེ་ཉིད་ཡིན་ནོ། །འདི་སྐད་བསྟན་ཏེ་ལྟུང་བ་འབྱིན་པར་བྱེད་པས་གང་ལ་བསམས་ཏེ་འཇུག་ཅིང་བསམས་ཏེ་ཞུགས་པའི་དངོས་པོ་དེ་ཉིད་ཡན་ལག་ཡིན་ཏེ། གལ་ཏེ་དོན་དེ་ཉིད་ཡིན་ན་དེའི་ཚེ་དངོས་གཞིར་འགྱུར་ལ། གལ་ཏེ་མ་ཡིན་ན་ནི་མི་འགྱུར་རོ། །འདི་ལྟ་སྟེ་དཔེར་ན། གཉིས་འཁོད་པ་ལས་གཅིག་གསད་པར་བྱའོ་སྙམ་པ་ལས་ཅིག་ཤོས་བསད་པ་དང༌། དགྲ་བཅོམ་པ་གསད་པར་བྱའོ་སྙམ་པ་ལས་དགྲ་བཅོམ་པ་མ་ཡིན་པ་བསད་པ་དང་མ་གསད་པར་བྱའོ་སྙམ་པ་ལས་མ་མ་ཡིན་པ་དང་ཕ་གསད་པར་བྱའོ་སྙམ་པ་ལས་ཕ་མ་ཡིན་པ་བསད་པ་དང༌། མི་གསད་པར་བྱའོ་སྙམ་པ་ལས་མི་མ་ཡིན་པ་བསད་པ་དང༌། མི་མ་ཡིན་པ་གསད་པར་བྱའོ་སྙམ་པ་ལས་མི་བསད་པ་ལ་སོགས་པ་ནི་སྦྱོར་བའི་ལྟུང་བ་ཁོ་ན་ཡིན་གྱི་དངོས་གཞིར་ནི་མི་འགྱུར་རོ། །དེ་བཞིན་དུད་འགྲོ་བསད་དོ་སྙམ་པ་ལས་མི་བསད་ན་ཡང་ཉེས་བྱས་སོ། །ཤིང་ལྗོན་པ་ལ་སོགས་པ་སེམས་མེད་པ་གཅད་དོ་སྙམ་པ་ལས་མ་ལ་སོགས་པ་བསད་ན་ཡང་སྦྱོར་བ་ཞེས་བྱ་བའི་ཉེས་བྱས་སོ། །ཤིང་སྐམ་ལ་སོགས་པ་བཅད་པ་ན་ཉེས་པ་ཅིར་ཡང་མི་འགྱུར་བ་བཅད་དོ་སྙམ་པ་ལས་མ་ལ་སོགས་པ་བསད་པ་ལ་ནི་སྦྱོར་བར་ཡང་མི་འགྱུར་ལ་དངོས་གཞིར་ཡང་མི་འགྱུར་རོ། །དེ་བས་ན་དངོས་གཞིའི་སྐབས་སུ་ནི་གཞི་གང་ལ་བསམས་ཏེ་ཞུགས་པའི་གཞི་དེ་ཉིད་ཡན་ལག་ཡིན་ནོ། །དེའི་བྱེ་བྲག་གཞན་བསྟན་པའི་ཕྱིར་རོ། །མི་ཚངས་པར་
སྤྱོད་པ་དང་ཁུ་བ་འབྱིན་པ་གཉིས་ལ་ནི་མ་ཟད་དོ་ཞེས་བྱ་བ་སྨྲས་ཏེ། མི་ཚངས་པར་སྤྱོད་པ་དང་ཁུ་བ་འབྱིན་པ་གཉིས་ལ་ནི་བསམས་པ་འབའ་ཞིག་ཡན་ལག་ཡིན་པར་མ་ཟད་ཀྱི་བསམ་པ་མ་ཡིན་པའི་དོན་གཞན་ཡན་ལག་ཡིན་ནོ། །བུད་མེད་ལ་སོགས་པ་གང་ཡང་བསམ་པའི་དོན་དེ་ཉིད་ཡན་ལག་ཡིན་པར་མ་ཟད་ཀྱི་བསམས་པའི་དོན་གཞན་ཡང་ཡན་ལག་ཡིན་ཏེ། འདི་གཉིས་ལ་ནི་ཡུལ་གང་རུང་གི་རེག་པ་བདག་གིར་བྱེད་པ་གཙོ་བོ་ཡིན་པའི་ཕྱིར་རོ། །དེས་ན་གང་བསམས་པའི་བུད་མེད་དེ་ཉིད་དང་མི་ཚངས་པར་སྦྱང་ན་ཡང་ཕམ་པར་འགྱུར་ལ། དེ་ཉིད་དང་སྤྱད་དོ་སྙམ་པ་ལས་ནོར་ཏེ་གཞན་ཞིག་དང་སྤྱད་ན་ཡང་ཕམ་པ་ཁོ་ནར་འགྱུར་རོ། །བསམ་པ་སེམས་ཅན་དུ་བགྲང་བའི་ཡན་ལག་རྐེད་པ་ལ་སོགས་པ་ལ་དྲུད་པས་ཁུ་བ་ཕྱུང་བ་ལ་ཡང་དགེ་འདུན་ལྷག་མར་འགྱུར་ལ། བསམ་པ་མ་ཡིན་པ་སེམས་ཅན་དུ་བགྲང་བའི་ཡན་ལག་རྐེད་པ་ལ་སོགས་པ་ལ་དྲུང་པས་ཁུ་བ་ཕྱུང་བ་ལ་ཡང་དགེ་འདུན་ལྷག་མར་འགྱུར་བ་དང༌། བསམ་པ་སེམས་ཅན་དུ་བགྲང་བ་མ་ཡིན་པ་བུམ་པ་ལ་སོགས་པ་ལས་ཀྱང་སྦོམ་པོར་འགྱུར་ལ། བསམ་པ་དེ་དང་ནོར་པ་སེམས་ཅན་དུ་བགྲང་བ་མ་ཡིན་པ་གཞན་ལས་ཀྱང་སྦོམ་པོར་འགྱུར་བ་འདྲ་བའི་ཕྱིར་རོ། །མི་བདེན་པ་ལ་ནི་ཉན་པ་པོ་ཡང་ངོ་ཞེས་བྱ་བ་ལ། མ་ཟད་དོ་ཞེས་བྱ་བའི་རྗེས་བསྙག་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །མི་བདེན་པ་ལ་ཞེས་བྱ་བ་བརྫུན་དུ་སྨྲ་བའི་ཡུལ་ལ་ཡང་བསམས་པ་ཡན་ལག་ཡིན་པར་མ་ཟད་ཀྱི་མ་བསམས་པ་ཡང་ཡན་ལག་ཡིན་ཏེ། དེས་ན་ཉན་པ་པོ་གང་ལ་བརྫུན་སྨྲ་བར་བསམས་པ་དེ་ཉིད་ལ་སྨྲས་ན་ཡང་ཁ་ན་མ་ཐོ་བར་འགྱུར་བར་མ་ཟད་ཀྱི་ཉན་པ་པོ་མ་བསམས་པ་གཞན་ལ་མིའི་ཆོས་བླ་མར་གྱུར་པའི་བརྫུན་སྨྲས་ན་དེ་ཡང་ཕམ་པར་འགྱུར་ལ། བརྫུན་གཞན་སྨྲས་ན་ནི་གཞི་ཇི་ལྟ་བ་ལས་སོམ་པོ་དང་ལྟུང་བྱེད་དུ་འགྱུར་རོ། །ཡན་ལག་ཐམས་ཅད་དང་དུ་བླང་དུ་རུང་བ་ཉིད་ནི་བསྟན་པའི་ཕྱིར་མཐུ་དང་ལྡན་པ་ཉིད་ཡིན་ནོ་ཞེས་བྱ་བ་ནི། མི་ཚངས་པར་སྤྱོད་པ་དང་ལུས་ཀྱིས་རེག་པ་ལ་སོགས་པའི་ཡུལ་ལ་ཕོ་མོས་གང་ཡང་རུང་བའི་ཟླ་དེའི་ཡན་ལག་ཐམས་ཅད་དང་དུ་
བླང་དུ་རུང་བ་ཉིད་ཡིན་ན་དེ་བསྟེན་པའི་ཕྱིར་མཐུ་དང་ལྡན་པ་ཉིད་ཡིན་པར་ཁས་བླངས་ཏེ་དེ་ལས་ཁ་ན་མ་ཐོ་བ་རྫོགས་པར་འགྱུར་རོ་ཞེས་བྱ་བའི་ཐ་ཚིག་གོ །འོག་མ་དག་ལ་ནི་གཞན་ལ་ན་སྨད་པ་ཉིད་དོ་ཞེས་བྱ་བ་འདི་ནི་དབང་དུ་བྱ་བའི་མདོ་ཡིན་ཏེ། འདི་མན་ཆད་ནས་འོག་གི་མདོ་ལས་རྫུ་འཕྲུལ་གྱི་ཆོས་ཅན་ཉིད་མ་ཡིན་པ་ནི་རེག་པ་མ་ཡིན་པའི་ཡན་ལག་ཡིན་ནོ་ཞེས་བྱ་བ་ལ་སོགས་པ་སྤྱིར་བསྟན་པ་རྫོགས་པའི་བར་གྱི་མདོ་འོག་མ་དག་ལ་ནི་གཞན་ལ་ན་སྨད་པ་ཉིད་དོ་ཞེས་བྱ་བའི་ཚིག་འདིའི་དབང་དུ་བྱས་ཏེ་སྟོན་ཏོ་ཞེས་བྱ་བའི་ཐ་ཚིག་གོ །དུ་མ་མ་ཚང་བ་ལ་ནི་དེ་བས་ཀྱང་ངོ་ཞེས་བྱ་བ་འདི་ཡང་དབང་དུ་བྱ་བའི་མདོ་ཡིན་ཏེ། འདི་མན་ཆད་ནས་འོག་གི་མདོ་ལས་རྫུ་འཕྲུལ་གྱི་ཆོས་ཅན་ཉིད་མ་ཡིན་པ་ནི་རེག་པ་མ་ཡིན་པའི་ཡན་ལག་ཡིན་ནོ་ཞེས་བྱ་བ་ལ་སོགས་པ་སྤྱིར་བསྟན་པ་རྫོགས་པའི་བར་གྱི་མདོ་འོག་མ་དག་ལ་ཡན་ལག་དུ་མ་མ་ཚང་བ་ལ་ནི་ན་སྨད་པ་དེ་བས་ཀྱང་ན་སྨད་དོ་ཞེས་བྱ་བའི་ཚིག་འདིའི་དབང་དུ་བྱས་ཏེ་སྟོན་ཏོ་ཞེས་བྱ་བར་སྦྱར་རོ། །དེ་ལ་མདོ་སྔ་མ་ཤོས་ཀྱི་ཡུལ་ནི་འདི་ལྟ་སྟེ་དཔེར་ན། ལུས་ཀྱིས་རེག་པ་དང་གག་ཚིལ་བྱེད་པའི་ཁ་ན་མ་ཐོ་བ་གཉིས་ལ་རེག་པར་བྱ་བ་དང་རེག་པར་བྱེད་པའི་ལུས་གཉི་ག་ཡན་ལག་ཡིན་པས་གཉི་གའི་ལུས་མ་ཉམས་པ་ཡིན་ན་ནི་དངོས་གཞིར་འགྱུར་བས་དེ་ལ་ན་སྨད་པ་མེད་དོ། །དེ་ལ་གལ་ཏེ་གང་ཡང་རུང་བ་ཅིག་གི་ལུས་རྨ་ལ་སོགས་པས་ཉམས་པ་ཡིན་ན་དེ་ནི་ཡན་ལག་མ་ཚང་བ་ཡིན་པས་གཞན་ཞེས་བྱ་སྟེ། ཡན་ལག་ཚང་བ་ལ་ལྟོས་ན་གཞན་ཡིན་པའི་ཕྱིར་རོ། །གཞན་དེ་ལ་ནི་ལུས་ཀྱིས་རེག་པ་ལ་ནི་སྦོམ་པོར་ན་སྨད་པ་ཉིད་ཡིན་ལ། །གག་ཚིལ་བྱེད་པ་ལ་ནི་ཉེས་བྱས་སུ་ན་སྨད་པ་ཉིད་ཡིན་ནོ་ཞེས་བྱ་བ་ལྟ་བུའོ། །མདོ་ཕྱི་མ་ཤོས་ཀྱི་ཡུལ་ནི་འདི་ལྟ་སྟེ་དཔེར་ན་དེ་གཉི་གའི་ལུས་རྨ་ལ་སོགས་པས་ཉམས་པ་ཡིན་ན་དེ་ནི་ཡན་ལག་དུ་མ་མ་ཚང་བ་ཞེས་བྱ་སྟེ། ཡན་ལག་གཅིག་མ་ཚང་བ་སྔ་མ་ཤོས་ལ་ལྟོས་ན་དུ་མ་མ་ཚང་བ་ཡིན་པའི་ཕྱིར་རོ། །དུ་མ་མ་ཚང་བ་དེ་ལ་ནི་ལུས་ཀྱིས་རེག་པ་ལ་ནི་སྔར་སྦོམ་པོར་ན་སྨད་པ་དེ་བས་ཀྱང་ན་སྨད་པ་དེ་ཉེས་བྱས་སུ་འགྱུར་བ་ཡིན་ལ།
ག་ག་ཚིལ་བྱེད་པ་ལ་ནི་སྔར་ཉེས་བྱས་སུ་ན་སྨད་པ་དེ་བས་ཀྱང་ན་སྨད་དེ་ཉེས་བྱས་ཕྲ་མོ་ཉིད་ཡིན་ནོ་ཞེས་བྱ་བ་ལྟ་བུར་སྦྱར་རོ། །མི་ལ་དུད་འགྲོ་ཡང་ངོ་ཞེས་བྱ་བ་ནི། མིའི་གནས་སུ་དུད་འགྲོ་ཞེས་སྨོས་པ་ལ་ཡང་ན་སྨད་པ་དེ་བས་ཀྱང་ན་སྨད་པ་ཉིད་ཡིན་ནོ་ཞེས་བྱ་བར་སྦྱར་རོ། །འདི་སྐད་བསྟན་ཏེ། གང་ལ་མིའི་འགྲོ་བ་པོ་ཡན་ལག་ཉིད་ཡིན་པ་དེ་ལ་དུད་འགྲོའི་སྐྱེ་གནས་ཀྱི་འགྲོ་བ་ལ་ན་སྨད་པ་དེ་བས་ཀྱང་ན་སྨད་པ་ཉིད་ཡིན་ཏེ་ཉེས་བྱས་སུ་འགྱུར་རོ། །དཔེར་ན་དུད་འགྲོ་དང་ལྷན་ཅིག་ལུས་ཀྱིས་རེག་པ་དང༌། འཁྲིག་པ་དང་ལྡན་པ་སྨྲ་བ་དང༌། བདག་ཉིད་ཀྱི་བསྙེན་བཀུར་བསྔགས་པ་ལ་ཉེས་བྱས་སུ་འགྱུར་གྱི། ཇི་ལྟར་མི་མ་ཡིན་པ་མཐུ་མེད་པ་དང་ལྷན་ཅིག་ལུས་ཀྱིས་རེག་པ་ལ་སོགས་པ་བྱེད་པ་ལ་ན་སྨད་དེ་སྦོམ་པོར་འགྱུར་བ་ལྟ་བུ་མ་ཡིན་ཏེ། འདིར་ནི་ན་སྨད་པ་དེ་བས་ཀྱང་ན་སྣང་པ་ཉིད་དོ་ཞེས་པའོ། །རྫུ་འཕྲུལ་གྱི་ཆོས་ཅན་ཉིད་མ་ཡིན་པ་ནི་རེག་པ་མ་ཡིན་པའི་ཡན་ལག་མ་ཡིན་ནོ་ཞེས་བྱ་བ་ལ། རྫུ་འཕྲུལ་གྱི་ཆོས་ཅན་ཉིད་ཅེས་བྱ་བ་ནི་གང་ལ་རྫུ་འཕྲུལ་གྱི་ཆོས་ཡོད་པ་དེ་ནི་རྫུ་འཕྲུལ་གྱི་ཆོས་ཅན་ནོ། །དེའི་དངོས་པོ་ནི་དེ་ཉིད་དེ་རྫུ་འཕྲུལ་ཐོབ་པའོ། །གང་ལ་རྫུ་འཕྲུལ་གྱི་ཆོས་དེ་མེད་པ་དེ་ནི་རྫུ་འཕྲུལ་གྱི་ཆོས་ཅན་མ་ཡིན་པའོ། །དེའི་དངོས་པོ་ནི་དེ་ཉིད་དེ་རྫུ་འཕྲུལ་མ་ཐོབ་པའོ། །དེ་ནི་རེག་པ་མ་ཡིན་པའི་ཡན་ལག་ཡིན་ཏེ། རེག་པ་མ་ཡིན་པ་ཞེས་བྱ་བ་ནི་མི་ཚངས་པར་སྤྱོད་པ་དང་ལུས་ཀྱིས་རེག་པའི་བདག་ཉིད་ཀྱི་རེག་པ་མ་ཡིན་པ་དེ་ལས་གཞན་པ་སྟེ། འཁྲིག་པ་དང་ལྡན་པ་སྨྲ་བ་དང༌། བསྙེན་བཀུར་བསྔགས་པའི་བདག་ཉིད་ཀྱིས་སྨྲ་བའོ། །འདི་སྐད་བསྟན་ཏེ། རྫུ་འཕྲུལ་གྱི་ཆོས་ཅན་ཉིད་མ་ཡིན་པ་ནི་འཁྲིག་པ་དང་ལྡན་པ་སྨྲ་བ་དང༌། བསྙེན་བཀུར་བསྔགས་པ་ལས་གྱུར་པའི་དགེ་འདུན་ལྷག་མ་གཉིས་ཀྱི་ཡན་ལག་ཡིན་ཏེ། དེ་ལ་དགེ་སློང་གིས་འཁྲིག་པ་དང་ལྡན་པ་དང་བསྙེན་བཀུར་བསྔགས་པ་སྨྲས་ན། དགེ་འདུན་ལྷག་མ་ཁོ་ནར་འགྱུར་ཏེ་ན་སྨད་པ་མེད་དོ། །དེ་ལས་གཞན་པ་རྫུ་འཕྲུལ་གྱི་ཆོས་ཅན་ཉིད་ལ་ནི་ཡན་ལག་མ་ཚང་བས་དེ་ལ་ནི་ན་སྨད་པ་ཉིད་དེ། རྫུ་འཕྲུལ་གྱི་ཆོས་ཅན་མོ་ཉིད་ལ་ནི་བརྟུལ་དུ་མི་རུང་སྟེ་བཟུང་བར་མི་ནུས་པའི་ཕྱིར་དང༌། དེའི་ལུས་ལ་འཁྲིག་པའི་བསམ་པ་ཤས་ཆེན་པོ་མི་སྐྱེ་བས་དེའི་ཕྱིར་དེ་ལ་ན་སྨད་པར་ཤེས་སོ། །འདིར་
གཞུང་ནི་འདུལ་བྱེད་དག་ལས་སྨྲ་བའི་སྐབས་ནས་རྫུ་འཕྲུལ་གྱི་རྣམ་པར་འཕྲུལ་བའི་ཆོས་ཅན་མོ་ལ་སྨྲས་ན་སྦོམ་པོའོ། །རྫུ་འཕྲུལ་གྱི་རྣམ་པར་འཕྲུལ་བའི་ཆོས་ཅན་མོ་མ་ཡིན་པ་ལ་སྨྲས་པ་དགེ་འདུན་ལྷག་མའོ་ཞེས་གསུངས་པ་ཡིན་ནོ། །རེག་པ་ནི་ཐམས་ཅད་ལ་འདྲ་བའི་ཕྱིར་ཏེ། ཁ་ཅིག་ལ་ནི་ཕམ་པར་འགྱུར་ལ་ཁ་ཅིག་ལ་ནི་དགེ་འདུན་ལྷག་མར་འགྱུར་རོ།། །།བམ་པོ་བཞི་བཅུ་བཞི་པ། རེག་པར་བྱ་བ་ཉིད་ནི་མ་ཉམས་པའོ་ཞེས་བྱ་བ་ནི་བསྟེན་པར་བྱ་བའི་ལུས་ཞེས་བྱ་བར་སྦྱར་ཏེ། གང་ལ་བསྟེན་པར་བྱ་བའི་ལུས་ཀྱི་རེག་པ་ཉིད་ཡན་ལག་ཏུ་རྣམ་པར་གཞག་པ་དེ་ལ་མ་ཉམས་ཤིང་ཉམས་པར་མ་གྱུར་པའི་རེག་པ་དང་བྱ་བ་ཉིད་དང་ཡན་ལག་ཡིན་པར་རིག་པར་བྱ་སྟེ། འདིར་ལུས་ཀྱིས་རེག་པའི་བདེ་བ་ཉམས་སུ་མྱོང་བ་གཙོ་བོ་ཡིན་པའི་ཕྱིར་རོ། འདིར་དཔེ་ནི་རྨ་དང་ནད་ལ་སོགས་པས་ཉམས་པ་མཚན་མི་མཐུན་པའི་ཡན་ལག་གི་ལུས་ལ་རེག་ན་དགེ་སློང་ལ་ནི་དགེ་འདུན་ལྷག་མར་གཏོགས་པའི་སྦོམ་པོར་འགྱུར་ལ། དགེ་སློང་མ་ལ་ནི་ཕམ་པར་གཏོགས་པའི་སྦོམ་པོར་འགྱུར་རོ་ཞེས་བྱ་བའི་ཐ་ཚིག་གོ །ཤུ་བ་ཅན་དང་གཡན་པ་ཅན་དང་ཁྱི་རྡོ་ཅན་གྱིས་རེག་ན་ཡང་དེ་བཞིན་དུ་སྦོམ་པོའོ། །གང་གི་ཆོ་རེག་པར་བྱེད་པ་བདག་ཉིད་ཀྱི་ལུས་ཏེ་དེ་ལྟར་གྱུར་ན་དེའི་ཆོ་ཡང་སྦོམ་པོ་ཁོ་ནའོ། །གཉི་གའི་ལུས་དེ་ལྟར་གྱུར་ན་ནི་ཉེས་བྱས་སོ། །རྣམ་པར་བསྔོས་པ་མོ་དང་རྣམ་པར་རངས་པ་མོ་དང༌། རྣམ་པར་འབུས་གཞིགས་པ་མོ་དང༌། རྣམ་པར་བམ་པ་མོ་དང༌། རྣམ་པར་ཟོས་པ་མོ་དང༌། རྣམ་པར་དམར་བ་མོ་དང༌། རྣམ་པར་འཐོར་བ་མོ་དག་ལ་འཁྱུད་པ་ལ་ནི་སྦོམ་པོའོ། །འདིར་རྣམ་པར་འཐོར་བ་མོ་ཞེས་བྱ་བ་ནི། ཇི་ཙམ་གྱིས་མི་ཚངས་པར་སྤྱོད་པའི་ཕམ་པར་འགྱུར་བ་འབྱུང་བ་དེ་ཙམ་གྱིས་དམ་དུམ་དུ་འཐོར་བ་ཉིད་ཡིན་པར་ཁས་བླངས་བར་རིགས་ཏེ། དེ་ཡང་རོ་སྟོད་ནི་མགོ་མགྲིན་པ་དང་བཅས་པ་ཡིན་ལ་རོ་སྨད་ནི་ཐམས་ཅད་ཡོད་པའི་དུམ་བུ་ཡིན་པར་རིག་པར་བྱའོ། །འདི་ལྟར་འདིར་ཡང་མི་ཚངས་པར་སྤྱོད་པ་དང་འདྲ་བར་མཐུ་ཡོད་པ་ཉིད་ཡན་ལག་ཡིན་པས་དེ་བས་ཆུང་བའི་དམ་དུ་མ་ནི་མཐུ་དང་ལྡན་པ་ཉིད་མ་ཡིན་ནོ། །འདིར་རོ་ཉིད་ལ་ནི་ན་
སྨད་པ་མེད་པའི་ཕྱིར་ངེས་རྣམ་པར་བསྔོས་པ་ལ་སོགས་པ་དག་ལ་སྦོམ་པོར་གསུངས་སོ། །ག་ག་ཚིལ་བྱེད་པ་ལ་ཡང་ངོ་ཞེས་བྱ་བ་ནི། །སོར་མོས་ག་ག་ཚིལ་བྱེད་པ་ལ་ཡང་རེག་པར་བྱ་བ་ཉིད་ནི་མ་ཉམས་པའོ་ཞེས་བྱ་བའི་རྗེས་བསྙག་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །འདིར་ཡང་གཉི་གའི་ལུས་མ་ཉམས་པ་ཉིད་ལ་ནི་ན་སྨད་པ་མེད་དོ། །གཅིག་གི་ལུས་ཉམས་པའི་རྣམ་པ་ཇི་སྐད་བསྟན་པ་དེ་ལྟ་བུ་ལ་གག་ཚིལ་བྱེད་པ་ལ་ནི་ན་སྨད་དོ། །གཉི་གའི་ལུས་ཇི་སྐད་བསྟན་པ་དེ་ལྟ་བུར་ཉམས་པ་བདག་ལ་ནི་ན་སྨད་པ་དེ་བས་ཀྱང་ན་སྨད་དོ་ཞེས་བྱ་བར་སྦྱར་རོ། །སེན་མོ་དང་སོ་དང་ཤ་མེད་པའི་རུས་པ་དང་སྤུ་དག་ནི་གཞན་དང་ལྡན་པ་ཉིད་དོ་ཞེས་བྱ་བ་ནི། མ་ཉམས་པའོ་ཞེས་བྱ་བ་ལ་ལྟོས་ཏེ་གཞན་པ་ཉིད་དོ་ཞེས་བྱ་བ་སྨོས་སོ། །དེ་ལྟ་བས་ན་སེན་མོ་ལ་སོགས་པ་མ་ཉམས་པ་དག་ཀྱང་གཞན་དང་ལྡན་པ་ཉིད་ཡིན་ཏེ་སྔར་མ་ཉམས་པའོ་ཞེས་སྨོས་པ་དེ་ལས་གཞན་པ་ཉམས་པ་དང་ལྡན་པ་ཉིད་ཡིན་པས་རིག་པ་དང༌། ག་ག་ཚིལ་བྱེད་པ་དག་ལ་ཉམས་པ་དང་འདྲ་བར་ལྟུང་བའི་བྱེད་པ་པོ་ཉིད་ཡིན་ནོ། །དེས་ན་དེ་དག་ལ་ཡན་ལག་གཞན་གྱིས་སམ་དེ་དག་གི་ཡན་ལག་གཞན་ལ་རེག་པ་དང་གག་ཚིལ་བྱེད་པ་དག་ལ་ནི་གོ་རིམས་བཞིན་དུ་སྦོམ་པོ་དང་ཉེས་བྱས་སུ་འགྱུར་རོ། །སེན་མོ་ལ་སོགས་པ་དག་གིས་སེན་མོ་ལ་སོགས་པ་དག་ལ་རེག་པ་དང་གག་ཚིལ་བྱེད་པ་དག་ལ་ནི་གོ་རིམས་བཞིན་དུ་ཉེས་བྱས་དང་ཉེས་བྱས་ཕྲ་མོར་འགྱུར་རོ། །མིའི་འགྲོ་བ་པ་ནི་ཐ་སྙད་དུ་བྱ་བ་ཉིད་ཡིན་ནོ་ཞེས་བྱ་བ་ནི། མིའི་འགྲོ་བར་གཏོགས་པའི་གང་ཟག་མིའི་འགྲོ་བ་པ་དེ་ནི་ཐ་སྙད་དུ་བྱ་བའི་ཡན་ལག་ཉིད་ཡིན་པའོ། །འདི་སྐད་བསྟན་ཏེ། ཐ་སྙད་དུ་བྱ་བའི་ཁ་ན་མ་ཐོ་བ་གང་དག་བསྟེན་པ་འཁྲིག་པ་དང་ལྡན་པ་སྨྲ་བ་དང་བསྙེན་བཀུར་བསྔགས་པ་དང༌། བརྫུན་དུ་སྨྲ་བ་དང༌། སྐྱོན་ནས་སྨྲ་བ་དང༌། དགེ་སློང་ལ་ཕྲ་མ་བྱེད་པ་དང་གནས་ངན་ལེན་བརྗོད་པ་དང༌། མིའི་ཆོས་བླ་མ་བརྗོད་པ་ལ་སོགས་པ་དེ་དག་ལས་གྱུར་པའི་ཁ་ན་མ་ཐོ་བ་དེ་དག་ཐམས་ཅད་ལ་མིའི་འགྲོ་བ་བའི་སྲོག་ཆགས་དག་ཁ་ན་མ་ཐོ་བ་ཡོངས་སུ་རྫོགས་པའི་ཡན་ལག་ཉིད་ཡིན་ནོ། །འགྲོ་བ་གཞན་དུ་གཏོགས་པ་དག་ནི་ན་སྨད་པ་ཉིད་ཡིན་ནོ། །འདི་ལྟར་མིའི་འགྲོ་བར་སྐྱེས་པ་ནི་ཐ་སྙད་ཐམས་ཅད་ལ་རུང་བ་
ཉིད་ཡིན་པའི་ཕྱིར་དེ་དག་ཉིད་ཀྱིས་ཐ་སྙད་རྫོགས་པར་འགྲུབ་ཀྱི་འགྲོ་བ་གཞན་དུ་གཏོགས་པ་དག་གིས་ནི་མ་ཡིན་པའི་ཕྱིར་རོ། །དེའི་ཕྱིར་མི་མ་ཡིན་པ་མཐུ་དང་མི་ལྡན་པ་ལ་ནི་ལུས་ཀྱིས་རེག་པ་དང་འཁྲིག་པ་དང་ལྡན་པ་སྨྲ་བ་དང༌། བསྙེན་བཀུར་བསྔགས་པ་ནི་སྦོམ་པོའོ།། སྨྱན་བྱེད་པ་ལ་ནི་གལ་ཏེ། མོ་མི་མ་ཡིན་པའམ་ཕོ་མི་མ་ཡིན་པའམ། ཕོ་མོ་གཉི་ག་མི་མ་ཡིན་པར་གྱུར་ན་ཡང་དེའི་ཕྱིར་སྦོམ་པོའོ། །ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། མི་འམ་ཅི་དང༌། ཡི་དགས་དང༌། ཤ་ཟ་དང༌། གྲུལ་བུམ་དང༌། ལུས་སྲུལ་པོ་ལ་སོགས་པ་དག་ལ་སློང་བ་དང༌། སོ་སོ་ནས་སྦགས་པ་སློང་བ་དང༌། སྨད་གཡོགས་སྟོང་གཡོགས་དང་བཅས་པ་སློང་བ་ལ་སོགས་པས་གོས་ཐོབ་པ་དང༌། དེ་དག་དང་ལྷན་ཅིག་ཏུ་མངོན་མཚན་ཅན་གྱིས་སྤྱོད་པ་དང༌། ཉོ་ཚོང་བྱས་ཏེ་ཐོབ་པ་དང༌། དེ་དག་ལས་རྒྱུ་སྤུན་སློང་བ་དང༌། རིག་པའི་ཕོ་དེ་དག་དང་ལྷན་ཅིག་ཏུ་བུད་མེད་ལ་ཆོས་སྟོན་པ་དང༌། དེ་དག་དང་ཚིག་མཐུན་པ་དང༌། ཚིག་ལྷག་པར་ཟློས་པ་དང༌། དེ་དག་ལ་གནས་ངན་ལེན་བརྗོད་པ་དང༌། མིའི་ཆོས་བླ་མ་བརྗོད་པ་དང༌། དེ་དག་མོ་དང་ལྷན་ཅིག་དབེན་པ་ན་འདུག་པ་དང༌། དེ་དག་གིས་བྱེད་དུ་བཅུག་པའམ་དེ་དག་དབང་པའི་འདུག་གནས་གཅིག་ཏུ་ཉི་མ་གཉིས་སུ་ཟན་ཟོས་པ་དང༌། དེ་དག་ལས་ལྟུང་ཟེད་དོ་གསུམ་ཙམ་ལས་ལྷག་པར་ལེན་པ་དང༌། དེ་དག་ལས་ཟས་བསོད་པ་སློང་བ་དང༌། དེ་དག་ཉེལ་པོ་བྱེད་པར་ཤོམ་པའི་ཁྱིམ་ན་འདུག་པ་དང༌། འགྲེང་པ་དང་དེ་དག་དང་ལྷན་ཅིག་གནས་གཅིག་ཏུ་ཞག་གསུམ་ཉལ་བ་དང༌། དེ་དག་དང་ལྷན་ཅིག་ལམ་དུ་འགྲོ་བ་དང༌། གྲུར་འཇུག་པ་དང༌། དེ་དག་གི་ཁྱིམ་དུ་དུས་མ་ཡིན་པར་འགྲོ་ཞིང་སྒོའི་གཏན་པ་ལས་འདས་པ་ལ་ནི་ཉེས་བྱས་སོ། །རང་བཞིན་ཉམས་པ་ནི་མ་ཡིན་ནོ་ཞེས་བྱ་བ་ནི། མིའི་འགྲོ་བ་པ་ཡིན་ཡང་རང་བཞིན་ཉམས་པ་སྨྱོས་པ་དང༌། སེམས་འཁྲུགས་པ་དང༌། ཚོར་བས་ཉན་པ་དག་ནི་ཐ་སྙད་དུ་བྱ་བ་ཉིད་ཀྱི་ཡན་ལག་མ་ཡིན་ནོ། །འདི་ལྟར་གཞན་ལ་གོ་བར་བྱ་བའི་ཕྱིར་ལུས་དང་དག་གི་ཐ་སྙད་བྱེད་པ་ཡིན་ན་རང་བཞིན་ཉམས་པ་དག་ནི་གསལ་བའི་ངོ་བོ་ཉིད་ཉམས་པའི་ཕྱིར་གོ་བར་བྱ་བ་གང་ཡིན་པ་དེ་ལ་བྱ་བ་དང་བྱ་བ་མ་
ཡིན་པའི་བློ་མེད་པས་དེའི་ཕྱིར་རང་བཞིན་ཉམས་པ་ནི་ཐ་སྙད་དུ་བྱ་བའི་ཡན་ལག་མ་ཡིན་པ་ཉིད་དུ་ཤེས་སོ། །སྨྱན་བྱེད་པའི་ཡུལ་ལ་ཐ་མལ་པར་གནས་པ་ལས་ཕྲིན་བླངས་ཏེ། ཐ་མལ་པར་གནས་པ་ལ་ཕྲིན་ཕར་བསྐྱལ་ཅིང་སྨྱོན་པ་ལ་ཕྲིན་ཕྱིར་བསྐྱལ་བ་ནི་སྦོམ་པོའོ་ཞེས་བྱ་བ་ལ་སོགས་པར་སྦྱར་རོ། །ཕྲད་པ་ལ་འདི་སྐད་གསུངས་པར་ཤེས་པར་བྱ་སྟེ། འདིར་མ་ནོས་པ་ལ་སོགས་པ་ལ་ནི་རང་བཞིན་དུ་གནས་པ་ལ་ནི་སྦོམ་པའོ། །གཞན་ཉིད་ལ་ནི་ཉེས་བྱས་སོ། །གཞི་མེད་པ་དང་བག་ཅམ་གྱིས་སྐུར་པ་འདེབས་པ་ནི་སྨྱོན་པ་ལ་སོགས་པ་དེ་དག་ལ་ནི་སྦོམ་པོའོ། །མི་སྨྱོན་པ་དག། དང་ལྷན་ཅིག་མངོན་མཚན་ཅན་གྱིས་སྤྱོད་པ་དང༌། ཉོ་ཚོང་བྱས་ཏེ་ཐོབ་པ་དང༌། དེ་དག་གི་སྐྱོན་ནས་སྨྲས་པ་དང༌། དེ་དག་གི་རྩོད་པ་ལ་སྐྱོ་སྔོགས་བྱེད་པ་དང༌། རིག་པའི་སྐྱེས་པ་དེ་དག་དང་ལྷན་ཅིག་ཏུ་བུད་མེད་ལ་ཆོས་སྟོན་པ་དང༌། དེ་དག་དང་ཚིག་མཐུན་པ་དང༌། ཚིག་ལྷག་པར་ཟློས་པ་དང༌། དེ་དག་ལ་གནས་ངན་ལེན་བརྗོད་པ་དང༌། མིའི་ཆོས་བླ་མ་བརྗོད་པ་དང༌། དེ་དག་དབང་བའི་རྙེད་པའམ་དེ་དག་གིས་གཞན་གྱི་རྙེད་པ་བཤེས་ངོར་བྱས་སོ་ཞེས་སྐུར་པ་འདེབས་པ་དང༌། དེ་དག་ལ་བསླབ་པ་ཁྱད་དུ་གསོད་པ་དང༌། དེ་དག་ལས་འཕྱ་འམ་གཞོགས་འཕྱས་བྱེད་པ་དང༌། བསྒོ་བ་རྣ་ལ་གཟོན་པ་དང༌། སྐྲོད་པ་དང་དེ་ལྟ་བུའི་དགེ་སློང་མ་དག་ལ་སྟོན་པ་དང༌། དེ་ལྟ་བུ་དག་ལ་ཟས་ཅུང་ཟད་ཙམ་གྱི་ཕྱིར་སྟོན་ཏོ་ཞེས་སྐུར་པ་འདེབས་པ་དང༌། དེ་ལྟ་བུའི་དགེ་སློང་མ་དག་ལ་གོས་སྦྱིན་པ་དང༌། གོས་བྱེད་པ་དག་དང༌། དེ་ལྟ་བུའི་དགེ་སློང་མ་དག་དང་ལྷན་ཅིག་ལམ་དུ་འགྲོ་བ་དང༌། གྲུར་འཇུག་པ་དང༌། དེ་ལྟ་བུའི་བུད་མེད་དང་དགེ་སློང་མ་དང་དབེན་པ་ན་འདུག་པ་དང༌། འགྲེང་བ་དང༌། དེ་ལྟ་བུའི་དགེ་སློང་མས་སྦྱོར་དུ་བཅུག་པའི་ཟས་ཟ་བ་དང༌། དེ་ལྟ་བུའི་འདུག་གནས་སུ་ཉི་མ་གཉིས་པར་ཟན་ཟ་བ་དང༌། དེ་ལྟ་བུ་དག་ཉལ་པོ་བྱེད་པར་ཤོམ་པའི་ཁྱིམ་ན་འདུག་པ་དང༌། འགྲེང་བ་དང༌། དེ་ལྟ་བུ་དག་གི་དམག་ལ་ལྟ་བ་དང༌། གནས་པ་དང་དཀྲུགས་པ་དང༌། དེ་ལྟ་བུར་བསྙེན་པར་རྫོགས་པ་དག་ལ་རྡོག་པ་དང༌། གཟས་པ་དང༌། སྔངས་པར་བྱེད་པ་དང༌། སྤེད་པར་
བྱེད་པ་དང༌། ཕྱིར་མ་བླངས་པར་སྤྱོད་པ་དང༌། གཞི་མེད་པར་སྐུར་པ་འདེབས་པ་དང༌། ཟན་གཅོད་དུ་འཇུག་པ་དང༌། དེ་ལྟ་བུར་བསྙེན་པར་རྫོགས་པ་དང་ལྷན་ཅིག་ལམ་དུ་འགྲོ་བ་དག་ལ་ནི་ཉེས་བྱས་སོ། །མ་ནིང་དང་མཚན་གཉིས་པ་དག་ནི་དེ་དང་ལྡན་པ་ཉིད་དོ་ཞེས་བྱ་བ་ནི། དེ་གཉིས་ནི་སྨྱོན་པ་དང་ལྡན་པ་ཉིད་ཡིན་ཏེ། ཇི་ལྟར་སྨྱོན་པ་ལ་སོགས་པ་དག་ཐ་སྙད་དུ་བྱ་བ་མ་ཡིན་པ་བཞིན་དུ་མ་ནིང་དང་མཚན་གཉིས་པ་དག་ཀྱང་དེ་བཞིན་ནོ་ཞེས་བྱ་བའི་ཐ་ཚིག་གོ །དེ་གཉིས་ཀྱི་ལུས་དང་སེམས་དག་ནི་ཐ་སྙད་བྱར་མི་རུང་བ་ཉིད་ཡིན་པའི་ཕྱིར་ཏེ། དེ་གཉིས་ཀྱི་ལུས་ནི་མིའི་ཐ་སྙད་དུ་བྱ་བ་དག་ལས་རྣམ་པར་ཉམས་པས་རོ་ལྟ་བུ་ཡིད་ལ་སྣང་ངོ༌། །སེམས་ནི་གདོན་གྱིས་བརླམས་པ་དང་འདྲ་བར་མི་གསལ་བས་ནད་པ་ལྟ་བུ་ཡིན་ནོ། །ཟ་མ་ནི་དེ་ལྟ་མ་ཡིན་ཏེ། དེ་ལ་མི་ཁྱད་པར་ཅན་གྱི་ཐ་སྙད་དུ་བྱ་བ་སྲིད་པའི་ཕྱིར་རོ། །མཚན་མེད་པ་ནི་འདིར་མ་ནིང་སྨོས་པ་ལས་ཐ་མི་དད་པ་ཡིན་པས་ལོགས་ཤིག་ཏུ་མ་སྨོས་སོ། །ཉམས་པའི་མ་ནིང་ནི་ཇི་སྲིད་དུ་རྣམ་པར་འགྱུར་བ་རྩོམ་པར་མི་བྱེད་པ་དེ་སྲིད་དུ་དེ་ཐ་སྙད་བྱར་མི་རུང་བ་ཉིད་མ་ཡིན་ནོ། །རྣམ་པར་འགྱུར་བ་བསྟེན་པའི་དུས་ན་ནི་དེ་ཡང་ཐ་སྙད་དུ་བྱར་མི་རུང་བ་ཉིད་ཡིན་ནོ། །བུད་མེད་དང་ལྡན་པ་ལུས་ཀྱིས་རེག་པ་ལ་སོགས་པའི་བསླབ་པའི་གཞི་འདི་དག་ལ་མ་ནིང་དང་མཚན་གཉིས་པ་དག་གི་རྣམ་པ་བསྟན་ཏེ་མཚན་གཉིས་པའི་རྣམ་པ་དེ་ལྟ་བུ་ལ་ནི་མཚན་གཞན་དོན་མེད་དོ་ཞེས་བྱ་བ་དང༌། མ་ནིང་གི་མ་ནིང་ཕོ་དང་མ་ནིང་མོ་དང་སྤྲུལ་པ་ཡང་དེ་བཞིན་ནོ་ཞེས་བསྟན་པ་ཡིན་ཏེ། དེ་ལས་གོས་ལ་སོགས་པ་སློང་བའི་ཕྱིར་མདོ་འདི་བྱས་སོ། །དེའི་ཕྱིར་དེའི་སྐབས་ཀྱི་དཔེ་བརྗོད་པར་བྱ་སྟེ་ཁྱིམ་པ་དག་དང་ཆུང་མ་མ་ནིང་དང༌། མཚན་གཉིས་པ་ལས་གོས་སློང་བ་དང༌། སྨད་གཡོགས་དང༌། སྟོད་གཡོགས་བཅས་པ་ལས་ལྷག་པར་ལེན་པ་དང་སྦྱིན་བདག་དེ་གཉིས་སམ་ཐག་པ་དེ་གཉིས་ལས་རིན་དང་སོ་སོ་བ་དང་འཐག་ཏུ་འཇུག་པ་དང༌། འཐག་པ་བསྐྱེད་པ་དང༌། མ་ནིང་ཕོ་དང་མ་ནིང་མོ་དང༌། གེལ་འདམས་པ་དང་མཚན་གཉིས་པ་ཉལ་པོ་བྱེད་པར་ཤོམ་པའི་ཁྱིམ་ན་འདུག་པ་དང་འགྲེང་བ་དང༌། དེ་དག་ལ་རྡེག་པ་དང༌། གཟས་པ་དང༌།
མ་ནིང་ཕོ་དང་མ་ནིང་མོ་དང༌། མཚན་གཉིས་པ་དང་ལྷན་ཅིག་ཉལ་བ་དང་དེ་དག་དང་ནུབ་གསུམ་ལས་ལྷག་པར་ཉལ་བ་དང་མ་ནིང་ཕོ་དང་མཚན་གཉིས་པ་དང་ལྷན་ཅིག་སྐྱེས་པ་མེད་པར་ལམ་དུ་འགྲོ་བ་ལ་ནི་ཉེས་བྱས་སོ། །རེག་པ་ནི་ཐ་སྙད་དང་འདྲའོ་ཞེས་བྱ་བ་ནི། ལུས་ཀྱིས་རེག་པ་ཡང་ཐ་སྙད་དང་འདྲ་བར་བལྟ་བར་བྱ་སྟེ། ཐ་སྙད་ཀྱི་བསླབ་པའི་གཞི་དག་ལ་ལྟུང་བ་གང་རྣམ་པར་གཞག་པ་དེ་འདི་ལ་ཡང་དེ་བཞིན་དུ་རིག་པར་བྱ་སྟེ། མི་མ་ཡིན་པ་མཐུ་མེད་པ་ལ་རེག་པ་དང་སྨྱོས་པ་དང་སེམས་འཁྲུགས་པ་དང་ཚོར་བས་ཉེན་པ་ལ་རེག་པ་ལ་ཡང་སྦོམ་པོར་འགྱུར་བས་དེའི་ཕྱིར། མདོ་འདིས་རེག་པ་ནི་ཐ་སྙད་དང་འདྲའོ་ཞེས་བསྟན་པ་ཡིན་གྱི། རེག་པ་ཉིད་ཐ་སྙད་དང་འདྲ་བ་ནི་མ་ཡིན་ནོ། །ཇི་ལྟར་སྨྲ་བ་ལ་སོགས་པའི་ཐ་སྙད་དུ་གྲགས་པ་ལྟར་ལུས་ཀྱིས་རེག་པ་ཡང་རེག་པ་ཉིད་དེ་འདྲ་བ་མ་ཡིན་ཏེ། འདི་ལྟར་འཁྲིག་པ་དང་ལྡན་པ་སྨྲ་བ་ནི་ཀུན་དུ་སྨྲ་བར་གྱུར་པ་ཡིན། བསྙེན་བཀུར་བསྔགས་པ་ནི་གོ་བར་བྱེད་པ་ཡིན། ཉལ་པོ་བྱེད་པར་ཤོམ་པའི་ཁྱིམ་ན་འདུག་པ་དང་འགྲེང་བ་ནི། ཉན་རྣ་ལས་གྱུར་པ་ཡིན་གྱི། ལུས་ཀྱིས་རེག་པ་ནི་ལུས་ཀྱིས་རེག་པའི་བདེ་བ་ཉམས་སུ་མྱོང་བ་ཙམ་ཡིན་པས་དེའི་ཕྱིར། འདིས་ཐ་སྙད་ཉིད་རེག་པ་དང་འདྲ་བར་བསྟན་པ་ནི་མ་ཡིན་ནོ། །ལྟུང་བ་རྣམ་པར་གཞག་པ་འདྲ་བ་བསྟན་པ་ལ་ཡང་འཇིག་རྟེན་གྱི་ཐ་སྙད་ཀྱི་དོན་དུ་ལུས་ཀྱིས་རེག་པ་དཔེར་ན་བསླང་བར་འདོད་པའི་བུད་མེད་ལ་ཐ་སྙད་ཀྱི་དོན་དུ་ལག་ནས་འཛིན་པ་གང་ཡིན་པ་དང༌། སྔོན་སྤྱད་པ་ཡུན་རིང་ཞིག་མཐོང་བ་ཉིད་ན་ཀུན་ནས་འཁྱུད་པ་གང་ཡིན་པ་ནི་འཇིག་རྟེན་ཁོ་ན་ལས་ཐ་སྙད་དུ་བྱ་བ་ཉིད་དུ་གྲགས་པ་ཡིན་པས་དེ་དག་གི་དོན་དུ་རེག་པ་ལ་ལྟུང་བ་མེད་པའི་ཕྱིར། འདི་དག་གི་དོན་དུ་རེག་པ་ལ་ཡང་ཐ་སྙད་དང་འདྲ་བར་ལྟུང་བར་གཞག་པ་ནི་མ་ཡིན་ནོ། །ཕྱི་རོལ་པ་དང་རབ་ཏུ་བྱུང་བ་དང་མ་སྐྱེས་པ་དང་ཉམས་པ་དག་ནི་ཕྱེད་ཉིད་ཁྱིམ་པའོ་ཞེས་བྱ་བ་ནི། འདི་གསུམ་གྱི་གཞི་ལས་དགེ་སློང་གི་ལྟུང་བ་གང་དག་རྣམ་པར་གཞག་པ་དེ་དག་ནི་ཕྱེད་ཉིད་དུ་ན་སྨད་དོ། །དེ་དག་ཕྱེད་ཁྱིམ་པ་ཡིན་པའི་ཕྱིར་རོ། །མུ་སྟེགས་ཅན་གྱི་དགེ་སྦྱོང་ལས་ཆོས་གོས་དང་ལྷུང་བཟེད་བསླངས་ཏེ་ཐོབ་པ་དང༌། དེ་ལས་སྟོད་གཡོགས་
དང་སྨད་གཡོགས་དང་བཅས་པ་ལས་ལྷག་པར་ལེན་པ་དང༌། རིན་ཐང་སོ་སོ་བ་དང་སྐུར་པ་ཡང་སྦྱིན་བདག་དང་ཕོ་ཉ་པ་དང་ཞལ་ཏབ་གང་ཡང་རུང་བ་ཅིག་མུ་སྟེགས་ཅན་གྱི་དགེ་སྦྱོང་ཡིན་པ་དད་བདག་པོ་མུ་སྟེགས་ཅན་གྱི་དགེ་སྦྱོང་གི་འདུག་གནས་སུ་ཞག་གཉིས་པ་ལ་ཟན་ཟོས་པ་ལ་ཉེས་བྱས་སུ་འགྱུར་རོ། །སྔོན་ལྟུང་བ་བྱུང་བ་དང་པོ་འཁྲུགས་པ་དང་རྐུ་ཐབས་སུ་གནས་པ་དང༌། མ་ནིང་དང་དགེ་སློང་མ་སུན་ཕྱུང་བ་དག་དང་ལྷན་ཅིག་མངོན་མཚན་ཅན་གྱིས་སྤྱོད་པ་དང༌། ཉོ་ཚོང་བྱས་ཏེ་ཐོབ་པ་ལ་ཡང་ཉེས་བྱས་སོ། །ཕྱི་རོལ་པའི་རབ་ཏུ་བྱུང་བ་ལས་ལྷུང་བཟེད་དོ་གསུམ་ལས་ལྷག་པར་བླངས་ཏེ་ཟོས་པ་ལ་ཡང་ཉེས་བྱས་སོ། །དེ་དག་ཉལ་པོ་བྱེད་པར་ཤོམ་པའི་ཁྱིམ་ན་འདུག་པ་དང་འགྲེང་བ་ལ་ཡང་ཉེས་བྱས་སོ། །དེ་དག་གིས་སྦྱོར་དུ་བཅུག་པའི་ཟས་ཟ་བ་ལ་ཡང་ཉེས་བྱས་སོ། །དགེ་སློང་དང་དགེ་སློང་མ་བསྙེན་པར་རྫོགས་པ་ཅན་མ་ཉམས་པ་ཉིད་ནི་བསླབ་པ་དག་ལ་ཡན་ལག་ཡིན་ནོ་ཞེས་བྱ་བ་ནི། དགེ་སློང་དང་དགེ་སློང་མ་བསྙེན་པར་རྫོགས་པ་ཅན་མ་ཉམས་པ་ཉིད་ནི་དགེ་སློང་དང་དགེ་སློང་མའི་བསླབ་པ་དག་ལ་ཡན་ལག་ཡིན་ཏེ། ཆོས་གཞན་པའི་རབ་ཏུ་བྱུང་བ་ཉིད་ཀྱང་མ་ཡིན་ལ། དགེ་ཚུལ་ལ་སོགས་པ་ཉིད་ཀྱང་མ་ཡིན། མ་ཆགས་པ་དང༌། ཁས་བླངས་པ་དང༌། ཉམས་པ་བསྙེན་པར་རྫོགས་པའི་རྟགས་ཅན་ཉིད་ཀྱང་མ་ཡིན། དགེ་སློང་མ་སུན་ཕྱུང་བ་དང་དགེ་སློང་སུན་ཕྱུང་བ་བསྙེན་པར་རྫོགས་པའི་རྟགས་ཅན་ཉིད་ཀྱང་མ་ཡིན་སྔོན་བསྙེན་པར་རྫོགས་ནས་ཕམ་པར་འགྱུར་བ་བྱུང་བ་ཉིད་ཀྱང་བསླབ་པ་དག་ལ་ཡན་ལག་མ་ཡིན་ནོ། །ཡན་ལག་མ་ཡིན་པ་དེ་ལྟ་བུ་རབ་ཏུ་བྱུང་ཞིང་བསྙེན་པར་རྫོགས་པ་ལ་གཞི་མེད་པ་དང་བག་ཙམ་དག་གིས་སྐུར་པ་འདེབས་པ་ལ་ནི་སྦོམ་བོའོ། །དང་པོ་འཁྲུགས་པ་དང༌། རྐུ་ཐབས་སུ་གནས་པ་དང༌། མི་མ་ཡིན་པ་ལྷ་དང་ཀླུ་དང་གནོད་སྦྱིན་དང་སྲིན་པོ་དང༌། ཤ་ཟ་དང༌། གྲུལ་བུམ་དང༌། ལུས་སྲུལ་པོ་དང༌། ཡི་དགས་ལ་སོགས་པ་རབ་ཏུ་བྱུང་ཞིང་བསྙེན་པར་རྫོགས་པ་རྣམས་དང༌། འདི་ལས་ཕྱི་རོལ་པའི་དགེ་སྦྱོང་རྣམས་དང༌། འདི་པའི་དགེ་སློབ་མ་དང་དགེ་ཚུལ་དང་དགེ་ཚུལ་མ་རྣམས་ལ་གཞི་མེད་པ་
དང་བག་ཙམ་གྱིས་སྐུར་བ་འདེབས་པ་ལ་ཡང་སྦོམ་པོ་ཁོ་ནའོ། །སྔོན་ལྟུང་བ་བྱུང་བའི་དགེ་སློང་མ་དང་རྐུ་ཐབས་སུ་གནས་པ་མོ་དང༌། དང་པོ་འཁྲུགས་པ་མོ་དང༌། དགེ་སློང་སུན་བྱུང་བ་མ་མོ་དང༌། མི་མ་ཡིན་པ་མ་རབ་ཏུ་བྱུང་ཞིང་བསྙེན་པར་རྫོགས་པ་དང༌། དགེ་སློབ་མ་དང༌། དགེ་ཚུལ་མ་དང༌། ཀུན་དུ་རྒྱུ་མོ་ལ་སོགས་པ་འདི་ལས་ཕྱི་རོལ་པའི་དགེ་སྦྱོང་མ་ལ་གོས་རྙིང་པ་འཁྲུ་བ་དང༌། འཚེད་པ་དང༌། འཆག་པ་དང༌། བལ་འཁྲུ་བ་དང༌། འཚེད་པ་དང་རྨེལ་དུ་བཅུག་ན་ཉེས་བྱས་སོ། །དེ་དག་ལས་ལེན་པ་དང་སློང་བ་དང༌། སྨད་གཡོགས་སྟོད་གཡོགས་དང་བཅས་པ་དང༌། རིན་ཐང་སོ་སོ་བ་དང་སྐུར་བ་ཐོབ་ན་ཡང་ཉེས་བྱས་སོ། །སྔོན་ལྟུང་བ་བྱུང་བ་དང་དང་པོ་འཁྲུགས་པ་དང༌། རྐུ་ཐབས་སུ་གནས་པ་དང༌། དགེ་སློང་མ་སུན་ཕྱུང་བ་དག་ལས་བྱིན་ཕྲོགས་བྱེད་པ་དང༌། དེ་དག་གི་སྐྱོན་ནས་སྨྲ་བ་དང༌། དེ་དག་ལ་ཕྲ་མ་བྱེད་པ་དང༌། དེ་དག་གི་རྩོད་པ་ལ་སྐྱོ་སྔོགས་བྱེད་པ་དང༌། དེ་དག་གི་གནས་ངན་ལེན་བརྗོད་པ་དང༌། དེ་དག་ལ་མིའི་ཆོས་བླ་མ་བརྗོད་པ་ཡང་ཉེས་བྱས་སོ། །དེ་དག་གི་ཚོགས་དབང་བ་འམ། དེ་དག་གི་རྙེད་པ་བཤེས་ངོར་བྱས་སོ་ཞེས་སྐུར་བ་འདེབས་པ་དེ་དག་གི་ཁས་བླངས་པ་ཉིད་ཀྱིས་རྣམ་པར་གཞག་པའི་བསླབ་པ་ལ་ཁྱད་དུ་གསོད་པ་དང༌། དེ་དག་ལ་འཕྱ་འམ་གཞོགས་འཕྱས་བྱེད་པ་དང༌། དེ་དག་གི་གཙུག་ལག་ཁང་དུ་གནས་མལ་མ་བརྟུལ་བར་འགྲོ་བ་དང༌། དེ་དག་གི་གཙུག་ལག་ཁང་ནས་བཏིང་བམ་བོར་བར་འགྲོ་བ་དང༌། དགེ་འདུན་གྱི་གཙུག་ལག་ཁང་དེ་དག་ལ་ཕྱིས་གནོན་བྱེད་པ་དང༌། དེ་དག་གི་གཙུག་ལག་ཁང་དུ་དགེ་སློང་མ་ཉམས་པ་ལ་ཕྱིས་གནོན་བྱེད་པ་དང༌། དགེ་འདུན་གྱི་གཙུག་ལག་ཁང་ནས་དེ་དག་སྐྲོད་པ་དང༌། དེ་དག་གི་གཙུག་ལག་ཁང་ནས་དགེ་སློང་མ་ཉམས་པ་སྐྲོད་པ་དང༌། དེ་དག་གི་གཙུག་ལག་ཁང་དུ་རྩ་བ་འབྱུང་བ་ལ་འདུག་པ་ཡང་ཉེས་བྱས་སོ། །སྔོན་ལྷུང་བ་བྱུང་བ་མོ་དང༌། དང་པོ་འཁྲུགས་པ་མོ་དང༌། རྐུ་ཐབས་སུ་གནས་པ་མོ་དང༌། དགེ་སློང་སུན་ཕྱུང་བ་མོ་དང༌། འགྲོ་བ་གཞན་དུ་གཏོགས་པའི་དགེ་སློང་མ་ལམ་བསྐོས་པར་སྟོན་པ་དང༌། དགེ་སློང་མ་དེ་དག་ལ་སྟོན་པ་ལ་ཟང་ཟིང་ཅུང་ཟད་ཙམ་གྱི་ཕྱིར་སྟོན་ཏོ་ཞེས་སྐུར་པ་
འདེབས་པ་དང༌། དགེ་སློབ་མ་དང༌། དགེ་ཚུལ་མ་དང༌། སྔོན་ལྟུང་བ་བྱུང་བའི་དགེ་སློང་མ་རྣམས་ལ་གོས་སྦྱིན་པ་དང༌། དེ་དག་གི་གོས་བྱེད་པ་དང༌། དེ་དག་དང་ལྷན་ཅིག་ལམ་དང་གྲུར་འགྲོ་བ་དང༌། དབེན་པ་ན་འདུག་པ་དང༌། འགྲེང་བ་དང༌། དེ་དག་གིས་སྦྱོར་དུ་བཅུག་པའི་ཟས་ཟ་བ་དང༌། དེ་དག་ལ་རྡེག་པ་དང༌། གཟས་པ་དང༌། དེ་དག་གིས་གནས་ངན་ལེན་འཆབ་པ་དང༌། དེ་དག་གི་ཟན་གཅོད་དུ་འཇུག་པ་དང༌། དེ་དག་ལས་འདུན་པ་ཕྱིར་བསྒྱུར་བ་དང༌། དེ་དག་ལ་འགྱོད་པ་བསྐྱེད་པ་དང༌། ག་ག་ཚིལ་བྱེད་པ་དང༌། སྔངས་པར་བྱེད་པ་ཡང་ཉེས་བྱས་སོ། །ཡོ་བྱད་སྦེད་པ་ནི་ཆོས་འདི་བའི་རབ་ཏུ་བྱུང་བ་དང་བསྙེན་པར་རྫོགས་པ་མ་གཏོགས་པ་གཞན་ཐམས་ཅད་ཀྱི་སྦེད་པ་ལ་ཉེས་བྱས་སོ། །ཆོས་འདི་པའི་སྦེད་པ་ལ་ནི་ལྟུང་བྱེད་ཉིད་དོ། །དེ་དག་ལས་བྱིན་ཕྲོགས་བྱེད་པ་དང༌། གཞི་མེད་པར་སྐུར་བ་འདེབས་པ་པ་དང༌། བསླབ་པ་ལ་ཉེ་བར་འཇོག་པ་སྤོང་བ་ཡང་ཉེས་བྱས་སོ། །དགེ་ཚུལ་དང་དགེ་ཚུལ་མ་དགེ་སློང་མའི་རྩོད་པའམ། །དེ་དག་དགེ་སློང་དག་རྩོད་པ་ལ་ཉན་རྣ་བྱེད་པ་ཡང་ཉེས་བྱས་སོ། །མི་མ་ཡིན་པ་རབ་ཏུ་བྱུང་ཞིང་བསྙེན་པར་རྫོགས་པ་དག་རྩོད་པ་ལ་ཉན་རྣ་བྱེད་པ་ཡང་ཉེས་བྱས་སོ། །དགེ་ཚུལ་མ་དང་དགེ་སློབ་མ་དང་མ་ནིང་མོ་དང༌། རྐུ་ཐབས་སུ་གནས་པ་མོ་དང༌། དང་པོ་འཁྲུགས་པ་མོ་དག་ལམ་པོ་ཆེན་འདུག་པ་བསོད་སྙོམས་ཀྱི་ཕྱིར་གྲོང་དུ་འགྲོ་བ་དག་ལས་བཅའ་བ་དང་བཟའ་བ་རང་གི་ལག་གིས་བླངས་ཏེ་འཆོས་སམ་ཟོས་ན་ཡང་ཉེས་བྱས་སོ། །དེ་དག་གྲལ་རིམས་སུ་མ་ཕེབས་པར་འབྲིམ་དུ་འཇུག་པ་མ་བཟློག་པར་ཟ་བ་ལ་ཡང་ཉེས་བྱས་སོ། །མཚན་དང་ཁས་བླངས་པ་དག་གིས་ནི་རང་གི་ཕྱོགས་ཉིད་ཀྱི་ཁོངས་སུ་གཏོགས་སོ་ཞེས་བྱ་བ་ནི། ཕོ་དང་མོའི་མཚན་དང་ལྟ་བ་ཁས་བླངས་པ་དང་མ་བླངས་པ་དག་གིས་ནི་རང་གི་ཕྱོགས་ཉིད་ཀྱི་ཁོངས་སུ་གཏོགས་པར་འགྱུར་ཏེ། རང་གི་ཕྱོགས་ཉིད་དང་ཕྱོགས་གཅིག་ཡིན་ནོ་ཞེས་བྱ་བའི་ཐ་ཚིག་གོ །རང་གི་ཕྱོགས་ཉིད་ཀྱི་ཁོངས་སུ་གཏོགས་པ་གང་ཡིན་པ་དེ་ལས་ནི་རང་གི་ཕྱོགས་དང་མཐུན་པ་ལ་བརྟེན་པའི་ཁ་ན་མ་ཐོ་བར་འགྱུར་བ་ཉིད་དུ་རིག་པར་
བྱའོ། །འདི་སྐད་བསྟན་ཏེ། རང་གི་ཕྱོགས་དང་མཐུན་པའི་དགེ་སློང་དང་དགེ་ཚུལ་ལ་སོགས་པའི་གང་ཟག་དག་གི་ཕྱིར་དེ་དག་ལ་རྡེག་པ་དང་གོས་སྦེད་པ་ལ་སོགས་པའི་ལྟུང་བ་གང་ཡིན་པ་དེ་དག་ནི་མཚན་མཐུན་པ་དང་ལྟ་བ་མཐུན་པ་ཉིད་ཀྱི་མཚན་མཐུན་པ་དང་ལྟ་བ་མཐུན་པ་ཉིད་དུ་ཁས་བླངས་པ་ཉིད་གང་ཡིན་པ་དེ་ལ་ཡན་ལག་ཡིན་ནོ། །དེ་ལྟ་བས་ན་རང་གི་ཕྱོགས་ཉིད་ཀྱི་ཁོངས་སུ་གཏོགས་པ་མ་ཡིན་པ་ལ་ནི་ཚིགས་འོག་མར་འགྱུར་རོ། །ཇི་ལྟར་རང་གི་ཕྱོགས་ལ་ལོག་པར་སྒྲུབ་པ་སྨད་པར་བྱ་བ་ཉིད་ཡིན་པ་དེ་ལྟར་གཞན་ལ་ལོག་པར་བསྒྲུབ་པ་ནི་སྨད་པར་བྱ་བ་ཉིད་མ་ཡིན་པའི་རྣམ་པ་དེ་ལས་འདི་ལྟར་ཤེས་སོ། །དགེ་སློང་མ་རྣམས་ལ་ཡང་ཐམས་ཅད་དུ་རྣམ་པ་འདི་བཞིན་དུ་རིག་པར་བྱའོ། །འདིར་དཔེ་དག་བརྗོད་པར་བྱ་སྟེ་ཁས་བླངས་པས་ཁས་མ་བླངས་པ་ལ་གོས་བྱིན་ནས་ཕྲོགས་པ་དང༌། ཁས་མ་བླངས་པས་ཁས་བླངས་པ་ལ་གོས་བྱིན་ནས་ཕྲོགས་པ་དང༌། དགེ་སློང་མ་དང་དགེ་སློབ་མ་དག་ལ་སྐྱོན་ནས་བརྗོད་པ་དང་དེ་གཉིས་ལ་ཕྲ་མ་བྱས་པ་དང༌། སྐྱོ་སྡོགས་བྱས་པ་དང༌། དེ་དག་གི་གནས་ངན་ལེན་བརྗོད་པ་དང༌། དགེ་སློང་མའི་དགེ་འདུན་དབང་བའི་རྙེད་པ་དགེ་སློང་མས་བཤེས་ངོར་བྱས་ཏེ་གཞན་དུ་བསྒྱུར་རོ་ཞེས་སྐུར་པ་འདེབས་པ་དང༌། དེ་དག་གི་བསླབ་པ་ལ་ཁྱད་དུ་གསོད་པ་དང༌། དགེ་སློང་མའི་དགེ་འདུན་གྱི་གཙུག་ལག་ཁང་གི་གནས་མལ་མ་བརྟུལ་བར་འགྲོ་བ་དང༌། དགེ་སློང་མའི་གཙུག་ལག་ཁང་ནས་བཏིང་བ་མ་བརྟུལ་བར་འགྲོ་བ་དང༌། དགེ་སློང་མའི་གཙུག་ལག་ཁང་དུ་ཕྱིས་གནོན་བྱེད་པ་དང༌། དེ་ནས་སྐྲོད་པ་དང་དེར་རྩ་བ་འབྱུང་བ་ལ་འདུག་པ་དང༌། ཁས་བླངས་པས་ཁས་མ་བླངས་པའི་དགེ་སློང་མ་རྣམས་ལ་མ་བསྐོས་པར་སྟོན་པ་དང༌། གོས་སྦྱིན་པ་དང་གོས་བྱེད་པ་དག་དང༌། ཁས་མ་བླངས་པས་ཁས་བླངས་པའི་དགེ་སློང་མ་རྣམས་ལ་མ་བསྐོས་པར་སྟོན་པ་དང༌། གོས་སྦྱིན་པ་དང་གོས་བྱེད་པ་དག་དང༌། ཁས་མ་བླངས་པས་ཁས་བླངས་པ་ལ་ཟང་ཟིང་ཆུང་ཟད་ཙམ་གྱི་ཕྱིར་སྟོན་ཏོ་ཞེས་སྐུར་པ་འདེབས་པ་དང༌། ཁས་བླངས་པས་ཁས་མ་བླངས་པ་ལ་ཟང་ཟིང་ཅུང་ཟད་ཙམ་གྱི་ཕྱིར་སྟོན་ཏོ་ཞེས་སྐུར་པ་འདེབས་པ་དང༌། ཁས་མ་བླངས་པ་ཁས་བླངས་པ་མོ་དང་ལྷན་ཅིག་ལམ་དང་
གྲུར་འགྲོ་བ་དང༌། ཁས་བླངས་པ་ཁས་མ་བླངས་པ་མོ་དང་ལྷན་ཅིག་ལམ་དང་གྲུར་འགྲོ་བ་དང༌། ཁས་མ་བླངས་པས་ཁས་བླངས་པ་མོས་སྦྱོར་དུ་བཅུག་པ་ཟ་བ་དང༌། ཁས་བླངས་པས་ཁས་མ་བླངས་པ་མོས་སྦྱོར་དུ་བཅུག་པ་ཟ་བ་དང༌། ཁས་མ་བླངས་པས་ཁས་བླངས་པའི་ཁྱིམ་ནས་ལྷུང་བཟེད་དོ་གསུམ་ཙམ་ལས་ལྷག་པར་ལེན་པ་དང༌། ཁས་བླངས་པས་ཁས་མ་བླངས་པའི་ཁྱིམ་ནས་ལྷུང་བཟེད་དོ་གསུམ་ཙམ་ལས་ལྷག་པར་ལེན་པ་དག་ནི་ཉེས་བྱས་སོ། །བྱིན་ལེན་ནི་རྣམ་པ་ཐམས་ཅད་དུ་རང་གི་ཕྱོགས་ཉིད་ཀྱི་ཁོངས་སུ་གཏོགས་པ་མ་ཡིན་པས་བྱས་ན་མ་བྱས་པ་ཉིད་ཡིན་ནོ། །ཁས་མ་བླངས་པས་ཁས་བླངས་པའི་ཟས་བསོད་པ་བླངས་པ་ཟོས་པ་དང༌། ཁས་བླངས་པས་ཁས་མ་བླངས་པའི་ཟས་བསོད་བ་བླངས་པ་ཟོས་པ་དང༌། དགེ་སློང་མ་དང་བསླབ་པ་བྱིན་པ་མོ་ལ་རྡེག་པ་དང་གཟས་པ་དག་དང༌། དེ་གཉིས་ཀྱི་གནས་ངན་ལེན་བཅབས་པ་དང༌། ཁས་བླངས་པས་ཁས་མ་བླངས་པ་མོ་ལས་ཟས་ལེན་པ་དང༌། ཁས་མ་བླངས་པས་ཁས་བླངས་པ་མོ་ལས་ཟས་ལེན་པ་དང༌། ཁས་མ་བླངས་པས་ཁས་བླངས་པ་ལ་འདུན་པ་བྱིན་ནས་ཕྱིར་བསྒྱུར་བ་དང༌། ཁས་བླངས་པས་ཁས་མ་བླངས་པ་ལ་འདུན་པ་བྱིན་ནས་ཕྱིར་བསྒྱུར་བ་དང༌། དགེ་སློང་མ་དང་བསླབ་པ་བྱིན་པ་མོ་ལ་འགྱོད་པ་སྐྱེད་པ་དང༌། སྔངས་པར་བྱེད་པ་དང༌། སྐུར་བ་འདེབས་པ་དག་དང༌། ཁས་བླངས་པས་ཁས་མ་བླངས་པའི་ཡོ་བྱད་སྦེད་པ་དང༌། བྱིན་ཕྲོག་བྱེད་པ་དང༌། ཁས་མ་བླངས་པས་ཁས་བླངས་པའི་ཡོ་བྱད་སྦེད་པ་དང༌། བྱིན་ཕྲོག་བྱེད་པ་དང༌། ཁས་བླངས་པས་ཁས་མ་བླངས་པའི་བསླབ་པ་ལ་ཉེ་བར་འཇོག་པ་སྤོང་བ་དང༌། ཁས་མ་བླངས་པས་ཁས་བླངས་པའི་བསླབ་པ་ལ་ཉེ་བར་འཇོག་པ་སྤོང་བ་དང༌། དགེ་སློང་མ་དང་ལྷན་ཅིག་དགེ་སློང་རྩོད་པ་ལ་ཉན་རྣ་བྱེད་པ་དང༌། དགེ་སློང་མ་རྣམས་ཀྱི་ཐུན་མོང་མ་ཡིན་པ་སྟོན་པ་ལ་ཁོ་བོ་འདི་ལ་མི་སློབ་པོ་ཞེས་ཟེར་བ་དག་ཀྱང་ཉེས་བྱས་སོ། །འདིར་གཏོགས་པ་ལ་ཁྱིམ་པ་ལ་ནི་རྟགས་ཅན་ཉིད་ནི་ན་སྨད་དོ་ཞེས་བྱ་བ་ནི། དགེ་སློང་དང་དགེ་སློང་མ་ཉིད་ཀྱི་རྒྱུ་མཚན་གྱི་ཁ་ན་མ་ཐོ་བ་འདིར་གཏོགས་པ་ལ་ཁྱིམ་པ་རབ་ཏུ་མ་བྱུང་བའི་གང་ཟག་གི་རྟགས་
ཅན་ཉིད་ནི་ན་སྨད་པར་བྱ་བ་སྟེ། ཇི་ལྟར་འདིར་ཕྱི་རོལ་པའི་རབ་ཏུ་བྱུང་བ་ལ་ན་སྨད་པ་ཉིད་བཞིན་དུ་ཁྱིམ་པ་ལ་ཡང་དེ་བཞིན་ཏེ་ཕྱི་རོལ་པའི་རབ་ཏུ་བྱུང་བའི་རྒྱུ་མཚན་ལས་ན་སྨད་པ་དེ་བས་ཀྱང་ཁྱིམ་པ་ལ་ཆེས་ན་སྨད་པར་ཤེས་པར་བྱའོ། །ཁྱིམ་པར་གྱུར་པའི་སྐྱེས་པ་དང་བུད་མེད་ལ་གཞི་མེད་པ་དང༌། བག་ཙམ་དག་གིས་སྐུར་བ་འདེབས་པ་དང༌། རྡེག་པ་དང་གཟས་པ་ལ་སོགས་པའི་ཚུལ་གཞན་ལ་ཡང་ཉེས་བྱས་ཕྲ་མོར་འགྱུར་རོ་ཞེས་བྱ་བ་དེ་གོ་བར་བྱ་བའི་ཕྱིར་མདོ་འདི་བྱས་སོ། །མི་མ་ཡིན་པ་རྟགས་ཅན་མ་ཡིན་པ་ལ་སྐྱོན་ནས་སྨྲ་བ་དང་ཕྲ་མ་བྱས་པ་ནི་ཉེས་བྱས་ཕྲ་མོའོ། མི་མ་ཡིན་པ་ཁྱིམ་པ་རྣམས་ལ་འཕྱ་བ་དང་ཁྱིམ་པའི་གནས་མལ་མ་བརྟུལ་བར་འགྲོ་བ་དང་མི་མ་ཡིན་པ་ཁྱིམ་པ་རྣམས་སྐྲོད་པ་དང༌། དེ་དག་དང་དུད་འགྲོ་དང་ཡི་དགས་མི་མ་ཡིན་པ་གཞན་དག་ལ་རྡེག་པ་དང་གཟས་པ་དག་དང༌། མི་མ་ཡིན་པ་དང་མི་ལ་སོགས་པའི་ཁྱིམ་པ་དེ་གཉི་གས་སྦྱོར་དུ་བཅུག་པ་ཟ་བ་དང༌། དེ་དག་ལ་འགྱོད་པ་སྐྱེད་པ་དང༌། ག་ག་ཚིལ་བྱེད་པ་དང༌། སྐུར་བ་འདེབས་པ་ལ་ཡང་ཉེས་བྱས་ཕྲ་མོའོ། །འདིར་མི་མ་ཡིན་པ་དང་ལྡན་པའི་དཔེ་དག་ལ་ནི་རྒྱུ་གཉིས་ཀྱིས་ན་སྨད་པར་ཤེས་པར་བྱ་སྟེ། ཁྱིམ་པ་ཉིད་ཡིན་པའི་ཕྱིར་དང་མི་མ་ཡིན་པ་ཉིད་ཡིན་པའི་ཕྱིར་རོ། །དེས་ན་ན་སྨད་པ་བས་ཀྱང་ཆེས་ན་སྨད་པའི་ཉེས་བྱས་ཕྲ་མོར་ཤེས་པར་བྱའོ། །རབ་ཏུ་བྱུང་བའི་རྫས་དག་ལ་ནི་རུང་བ་ཉིད་དང་ཚད་དང་ལྡན་པ་ལ་སོགས་པ་ཉིད་དོ་ཞེས་བྱ་བ་ནི། རབ་ཏུ་བྱུང་བའི་རྫས་ལྷུང་བཟེད་དང་ཆོས་གོས་ལ་སོགས་པ་དག་ལ་ནི་རུང་བ་ཉིད་དང༌། ཚད་དང་ལྡན་པ་ལ་སོགས་པ་ཉིད་ཅེས་བྱ་བ་དེ་གཉིས་ལྟུང་བའི་ཡན་ལག་ཡིན་ཏེ་རུང་བ་ཉིད་དང་ཚད་དང་ལྡན་པ་ལ་སོགས་པ་ཉིད་ཅེས་བྱ་བའི་ཡན་ལག་དེ་གཉིས་དང་བྲལ་བ་རུང་བ་མ་ཡིན་པ་ཉིད་དང་ཚད་དང་ལྡན་པ་མ་ཡིན་པ་ལ་ནི་ཚིགས་འོག་མར་ན་སྨད་པ་ཉིད་ཡིན་གྱི། ལྟུང་པའི་དངོས་གཞིར་ནི་མི་འགྱུར་རོ། །དེ་ལ་རུང་བ་མ་ཡིན་པ་ཉིད་ཅེས་བྱ་བ་ནི་གོས་གང་ཐག་བས་མ་བཏགས་པ་དང༌། བ་ལང་དང་རྔ་མོ་དང་ར་དང་རི་དགས་ཀྱི་བལ་ལས་བྱས་པ་དང༌། ཨརྒའི་ཤིང་བལ་ལས་བྱས་པ་གང་ཡིན་པ་དང་རྒྱུ་སྤུན་གཉིས་ལས་གང་ཡང་རུང་བ་བ་
ལང་དང་རྔ་མོ་དང་ར་དང་རི་དགས་ཀྱི་བལ་ལ་སོགས་པ་དང་འདྲེས་པ་ཉིད་གང་ཡིན་པ་དེ་ཡང་རུང་བ་མ་ཡིན་པ་ཉིད་དོ། །ལྷུང་བཟེད་རུང་བ་མ་ཡིན་པ་ནི་སོ་མ་བཏང་བ་དང་དཀར་པོ་དང་རིན་པོ་ཆེ་ལ་སོགས་པ་ལས་བྱས་པའོ། །དེ་དག་ལས་བཟློག་པ་ནི་ཆོས་གོས་དང་ལྷུང་བཟེད་ལ་སོགས་པ་རུང་བ་ཉིད་ཡིན་ནོ། །ཚད་དང་ལྡན་པ་ལ་སོགས་པ་ཉིད་ཅེས་བྱ་བ་ལ་ཚད་དང་ལྡན་པ་ཞེས་བྱ་བ་ནི་ཆོས་གོས་རང་གི་ཁྲུ་ཚད་དང་ལྡན་པ་དང༌། གོས་ལྷག་ཀྱང་ཁྲུ་གང་གི་ཚད་དང་ལྡན་པའོ། །ལྷུང་བཟེད་ཀྱང་བྱིན་གྱིས་བརླབ་ཏུ་རུང་བ་གསུམ་གྱི་ཚད་དང་ལྡན་པའོ། །སོགས་པ་ཞེས་བྱ་བའི་སྒྲས་ནི་ཚད་པས་ལྷག་པ་བསྡུས་ཏེ་ཆོས་གོས་རང་གི་ཁྲུ་ཚད་ལས་ལྷག་པ་དང༌། གོས་ལྷག་ཀྱང་ཁྲུ་གང་གི་ཚད་ལས་ལྷག་པ་དང༌། ལྷུང་བཟེད་ཀྱང་བྱིན་གྱིས་བརླབ་ཏུ་རུང་བ་གསུམ་གྱི་ཚད་ལས་ལྷག་པའོ། །དེ་ལྟར་ན་རབ་ཏུ་བྱུང་བའི་རྫས་དག་ལ་ནི་རུང་བ་ཉིད་དང་ཚད་དང་ལྡན་པའམ། ཚད་ལས་ལྷག་པ་ཉིད་ལ་དངོས་གཞིའི་ཁ་ན་མ་ཐོ་བར་འགྱུར་རོ། །འདིར་དགེ་ཚུལ་ལ་སོགས་པ་དབང་བའི་རྫས་དག་ལ་ཡང་ཡན་ལག་དེ་གཉིས་འཇུག་པར་བསྟན་པའི་ཕྱིར་རབ་ཏུ་བྱུང་བའི་རྫས་དག་ལ་ཞེས་སྨོས་ཏེ། བསྙེན་པར་རྫོགས་པའི་ཞེས་མ་སྨོས་སོ། །འདིར་ཚད་ལས་ལྷག་པ་ཡན་ལག་ཡིན་པའི་གཞུང་ནི་སྲིན་བལ་གྱི་སྟན་གྱི་སྐབས་ནས་བདེ་བར་གཤེགས་པའི་གདན་གྱི་ཚད་བགྱིད་ན་ལྟུང་བ་ཅིར་འགྱུར་སྤང་བའི་ལྟུང་བྱེད་དོ་ཞེས་གསུངས་པ་ཡིན་ཏེ། དེས་ན་ལྷག་པ་ནི་ན་སྨད་པའི་རྒྱུར་མི་འགྱུར་རོ། །ཆོས་གོས་དང་ལྷུང་བཟེད་རུང་བ་ཉིད་མ་ཡིན་པ་ཉིད་དང་ཚད་པས་ཆུང་བ་ལ་ནི་ན་སྨད་པར་འགྱུར་ཏེ། དེས་ན་ཆོས་གོས་རུང་བ་མ་ཡིན་པ་དང་ཚད་པས་ཆུང་བ་བྱིན་གྱིས་བརླབས་པ་དེ་དང་བྲལ་ན་ཡང་ཉེས་བྱས་སོ། །ཞག་བཅུ་ལས་ལྷག་པར་འཆང་བ་དང་རྙིང་པ་དགེ་སློང་མ་ཉེ་དུ་མ་ཡིན་པ་ལ་འཁྲུར་བཅོལ་བ་དང་དགེ་སློང་མ་ཉེ་དུ་མ་ཡིན་པ་ལས་བླངས་པ་དང་ཁྱིམ་བདག་དང་ཁྱིམ་བདག་གི་ཆུང་མ་དག་ལས་བླངས་པ་དང༌། བ་ལང་གི་སྤུ་དང་གསོ་མ་ལ་སོགས་པ་དང་བསྲེས་པའི་སྲིན་བལ་དང་ལུག་གི་བལ་ནག་པོ་འབའ་ཞིག་ཤས་ཆེ་བའི་སྟན་བྱེད་པ་དང་ཐག་པས་མ་བཏགས་པའི་གོས་དང་
འདྲེས་པའི་སྟན་བྱེད་པ་ཡང་ཉེས་བྱས་ཏེ་འདི་ལ་ནི་རྫས་ཆུང་བས་ན་སྨད་པར་བྱ་བ་ཡང་ཡིན་གྱི་རུང་བ་མ་ཡིན་པ་ཉིད་འབའ་ཞིག་གི་ཕྱིར་ནི་མ་ཡིན་ནོ། །འཐག་ཏུ་བཅུག་པ་དང་འཐག་པ་བསྐྱེད་པ་དང་བྱིན་ཕྲོགས་བྱས་པ་དང་བརྟད་པ་ལས་བྱུང་བ་ཞག་བཅུ་ལས་ལྷག་པར་འཇོག་པ་དང༌། དབྱར་གྱི་རས་ཆེན་རུང་བ་མ་ཡིན་པ་དུས་ལས་སྔར་ཚོལ་བ་དང༌། དུས་ལས་ཡོལ་བར་འཇོག་པ་དང༌། གནས་མལ་མ་བསྡུས་པར་འགྲོ་བ་དང༌། ཁྲི་དང་ཁྲིའུ་རུང་བ་མ་ཡིན་པའི་ཁྲི་རྐང་ཁྲུ་གང་ལས་ལྷག་པར་བྱེད་པ་དང༌། རིན་པོ་ཆེའི་ཁྲི་འམ་ཁྲིའུ་བྱེད་པ་དང༌། ཟས་རུང་བ་མ་ཡིན་པ་གསོག་འཇོག་བྱས་པ་དང༌། བཟའ་བ་དང་བཅའ་བ་རུང་བ་མ་ཡིན་པ་གཅེར་བུ་པ་དང་གཅེར་བུ་མ་ལ་སྦྱིན་པ་ཡང་ཉེས་བྱས་ཏེ། དེ་ནི་སྦྱིན་པ་པོ་འབའ་ཞིག་ཏུ་མ་ཟད་ཀྱི་སྦྱིན་པར་བྱེད་པ་ལ་ཡང་ཉེས་བྱས་སོ། །གོས་རུང་བ་མ་ཡིན་པ་དང༌། ཆུང་བ་ཁ་མ་བསྒྱུར་བར་གྱོན་པ་ལ་ཡང་ཉེས་བྱས་སོ། །དེ་བཞིན་དུ་ལྷུང་བཟེད་རུང་བ་མ་ཡིན་པ་དང་ཆུང་བ་ཞག་བཅུ་འམ་ཞག་གཅིག་ལས་ལྷག་པར་འཆང་བ་དང༌། ལྷག་པ་བཙལ་བ་ལ་ཡང་ཉེས་བྱས་སོ། །རིན་པོ་ཆེ་ལ་སོགས་པ་ལས་བྱས་པའི་ཁབ་རལ་ལ་སོགས་པ་བྱེད་པ་དང༌། ཡོ་བྱད་རུང་བ་མ་ཡིན་པ་སྦེད་པ་དང༌། ནོར་བུ་དང༌། བ་སོ་དང༌། རིན་པོ་ཆེ་ལས་བྱས་པའི་ཁྲི་རྐང་ཚད་ལས་ལྷག་པར་བྱེད་པ་དང༌། རིན་པོ་ཆེ་ལ་སོགས་པ་རུང་བ་མ་ཡིན་པ་ལས་བྱས་པའི་ཁྲི་དང་ཁྲིའུ་ལ་ཤིང་བལ་གྱིས་གོས་པར་བྱེད་པ་དང༌། གོས་རུང་བ་མ་ཡིན་པ་ཨརྒའི་ཤིང་བལ་དང༌། རྔ་བལ་ལ་སོགས་པ་རུང་བ་མ་ཡིན་པས་སྟན་ལ་སོགས་པ་བྱེད་པ་ལ་ཡང་ཉེས་བྱས་སོ། །ད་ནི་ཡན་ལག་གཉིས་ཀྱི་དཔེ་མདོར་བསྡུས་པ་བསྟན་པར་བྱ་སྟེ་གོས་རུང་བ་མ་ཡིན་པ་དང་ཚད་ལས་ཆུང་བ་ཞག་བཅུ་ལས་ལྟག་པར་འཆང་བ་དང༌། ཁྱིམ་བདག་དང་ཁྱིམ་བདག་གི་ཆུང་མ་དག་ལས་ལེན་པ་དང༌། ལྷུང་བཟེད་གཅིག་སློང་བ་དང་གོས་གཅིག་འཁྲུར་འཇུག་པ་ཡང་ཉེས་བྱས་སོ། གཞན་གྱི་དོན་དུ་བྱིན་ཕྲོགས་བྱེད་པ་དང༌། བརྟད་པ་ལས་བྱུང་བ་ཞག་བཅུ་ལས་ལྷག་པར་འཇོག་པ་དང༌། དབྱར་གྱི་རས་ཆེན་ཆུང་དུ་སྡར་ཚོ་ལྦ་དང་ཕྱིས་འཆང་བ་དང༌། གཉི་ག་ལས་གཅིག་
ལེན་པ་ལ་ཡང་ཉེས་བྱས་སོ། །རང་གི་དོན་དེ་ཉིད་གཙོ་ཆེར་ཡོད་པའོ་ཞེས་བྱ་བ་ནི། ཁ་ན་མ་ཐོ་བ་གང་ལ་རྣག་གི་དོན་དེ་ཉིད་གཙོ་ཆེར་ཡོད་པ་དེ་ལ་རང་གི་དོན་ཉིད་ཁ་ན་མ་ཐོ་བ་ཡོངས་སུ་རྫོགས་པར་བྱེད་པ་ཡིན་གྱི་གཞན་གྱི་དོན་ནི་ཁ་ན་མ་ཐོ་བ་ཡོངས་སུ་རྫོགས་པར་བྱེད་པ་མ་ཡིན་ཏེ། རང་གི་དོན་མ་ཡིན་པར་གཞན་གྱི་དོན་དུ་བྱེད་པ་དེ་ནི་ཚིགས་འོག་མར་ན་སྨད་པའི་བྱེད་པ་པོ་ཡིན་ནོ། །འདིར་དཔེ་བརྗོད་པར་བྱ་སྟེ་གཞན་གྱི་དོན་དུ་འཁྲིག་པ་དང་ལྡན་པ་སྨྲ་བ་དང༌། བསྙེན་བཀུར་བསྔགས་པ་དག་ནི་སྦོམ་པོའོ། །གཞན་གྱི་དོན་དུ་དགེ་སློང་མ་ཉེ་དུ་མ་ཡིན་པ་ལ་གོས་འཁྲུར་འཇུག་པ་ལ་སོགས་པ་ནི་ཉེས་བྱས་སོ། །འདིར་དགེ་འདུན་གྱི་དོན་དུ་བྱེད་དུ་འཇུག་པ་ཡང་གཞན་གྱི་དོན་ཁོ་ན་ཡིན་ནོ། །རང་དང་གཞན་གཉི་གའི་དོན་དུ་བྱེད་དུ་འཇུག་པ་ལ་ཡང་གཞན་གྱི་དོན་ཁོ་ན་ཡིན་ཏེ། དེ་ལ་བདག་ཉིད་མ་གཏོགས་པར་དོན་དུ་གཉེར་བ་གཞན་ཡོད་པའི་ཕྱིར་རོ། །དེ་ལྟ་བས་ན་དགེ་འདུན་གྱི་དོན་དང་རང་དང་གཞན་གཉི་གའི་དོན་དུ་འཁྲིག་པ་དང་ལྡན་པ་སྨྲ་བ་དང༌། བསྙེན་བཀུར་བསྔགས་པ་དག་ཀྱང་སྦོམ་པོར་རིག་པར་བྱ་སྟེ། ཡོན་བདག་གིས་དགེ་སློང་གཞན་གཅིག་གམ་དུ་མའི་ཕྱིར་སྤགས་པའི་གོས་གང་ཡིན་པ་དང་དེ་དག་གི་ཕྱིར་བསྔོས་པའི་ལྷུང་བཟེད་དང་ཆོས་གོས་ལ་སོགས་པ་ཡོ་བྱད་གང་དག་ཡིན་པ་དེ་དག་ཡོན་བདག་གིས་དགེ་སློང་གཞན་གང་དག་ལ་སྤགས་ཤིང་བསྔོས་པའི་དགེ་སློང་དེ་དག་ཉིད་ཀྱི་དོན་དུ་དགེ་སློང་གཞན་ཞིག་གིས་ཡོན་བདག་དེ་ལ་བསྐུལ་ཏེ། དགེ་སློང་གཞན་དེ་དག་གིས་ཡོ་བྱད་དེ་དག་ཐོབ་ན་ཡང་དེའི་ཚེ་སྐུལ་མ་བྱེད་བྱེད་པའི་དགེ་སློང་གཞན་དེ་ལ་ཉེས་བྱས་སོ། །དགེ་སློང་དང༌། དགེ་སློབ་མ་དང་དགེ་ཚུལ་དང་དགེ་ཚུལ་མ་དང་དགེ་སྦྱོང་དག་བྲམ་ཟེ་གཞན་དག་དང༌། སྔོན་ལྟུང་བ་བྱུང་བ་ལ་སོགས་པ་དག་གི་དོན་དུ་བྱེད་དུ་བཅུག་པ་ཡང་དེ་བཞིན་ནོ། །དགེ་སློང་གཞན་གཅིག་གམ་དུ་མའི་དོན་དུ་སྲིན་བལ་དང་བལ་ནག་པོ་འབའ་ཞིག་དང་ཆ་གཉིས་ལས་ལྷག་པའི་སྟན་བྱེད་དུ་འཇུག་པ་ལ་ཡང་ཉེས་བྱས་སོ། །གཞན་གྱི་དོན་དུ་ལྷུང་བཟེད་ལྷག་པ་ཚོལ་བ་དང་འཐག་ཏུ་འཇུག་པ་དང༌། འཐག་པ་བསྐྱེད་པ་དང་ཁབ་རལ་
བྱེད་དུ་འཇུག་པ་དང༌། ཤིང་བལ་གྱིས་གོས་པར་བྱེད་པ་ལ་སོགས་པ་ཡང་ཉེས་བྱས་སོ། །གཞན་གྱི་དོན་དུ་དགེ་སློང་མ་ལས་ཟས་ལེན་པ་དང༌། གྲལ་རིམས་སུམ་ཕེབས་པ་འབྲིམ་དུ་འཇུག་པ་མ་བཟློག་པ་ཡང་ཉེས་བྱས་སོ། །རྣམ་པར་རིག་བྱེད་ལ་ནི་དོན་གོ་བའོ་ཞེས་བྱ་བ་ནི། ངག་གི་རྣམ་པར་རིག་བྱེད་ཀྱིས་སྨྲ་བ་དང་སློང་བ་ལ་སོགས་པ་ལ་ནི་གཞན་གྱི་དོན་གོ་བ་ཉིད་དངོས་གཞིར་འགྱུར་བའི་ཡན་ལག་ཡིན་ཏེ། རྣམ་པར་རིག་བྱེད་ཀྱི་འབྲས་བུ་ནི་དོན་གོ་བ་ཡིན་པའི་ཕྱིར་རོ། །དོན་མ་གོ་བ་ལ་ནི་ན་སྨད་དོ། །དེས་ན་སྙོམས་པར་ཞུགས་པ་ལ་འཁྲིག་པ་དང་ལྡན་པ་སྨྲ་བ་དང༌། བསྙེན་བཀུར་བསྔགས་བ་དག་ལ་ནི་སྦོམ་པོའོ། །དེ་བཞིན་དུ་གཉིད་ལོག་པ་དང༌། སྙོམས་པར་ཞུགས་པ་དང་གླེན་པ་དང་འོན་པ་དག་ལ་གཞི་མེད་པ་དང་བག་ཙམ་གྱིས་སྐུར་པ་འདེབས་པ་ཡང་སྦོམ་པོའོ། །གླེན་པ་དང་འོན་པ་དག་དང་ལྷན་ཅིག་མངོན་མཚན་ཅན་གྱིས་སྤྱོད་པ་དང་ཉོ་ཚོང་བྱེད་པ་ལ་ནི་ཉེས་བྱས་སོ། །འཐག་པ་དང་འཐག་པ་བསྐྱེད་དུ་གཞུག་པའི་ཕྱིར་དེ་གཉིས་ལ་གོ་བར་བྱེད་པ་དང་དབུས་པ་དང་མཐའ་ཁོབ་པ་དག་ལ་སྐད་གཞན་གྱིས་སྐྱོན་ནས་སྨྲས་ཏེ། དོན་མ་གོ་ན་ཡང་ཉེས་བྱས་སོ། །དེ་གཉིས་ལ་ཕྲ་མ་བྱེད་པ་དང༌། གླེན་པ་དང་འོན་པ་གཉིས་ལ་སྐྱོ་སྔོགས་བྱེད་པ་དང༌། བུད་མེད་གཉིད་ལོག་པ་ལ་ཆོས་སྟོན་པ་དང༌། ངོ་ཚ་མེད་པ་དང་མཐའ་ཁོབ་པ་དང་གླིང་གཞན་ནས་སྐྱེས་པ་དང་གཉིད་ལོག་པ་དང་མྱོས་པ་དང་བག་མེད་པ་དང་སྙོམས་པར་ཞུགས་པ་དང་གླེན་པ་དང་འོན་པའི་རིག་པའི་སྐྱེས་པ་དང་ལྷན་ཅིག་ཆོས་སྟོན་པ་ཡང་ཉེས་བྱས་སོ། །གླེན་པ་དང་འོན་པ་དག་དང་ཚིག་མཐུན་པ་དང་ཚིག་ལྷག་པར་ཟློས་པ་ཡང་ཉེས་བྱས་སོ། །ངོ་ཚ་མེད་པ་དང༌། མཐའ་ཁོབ་པ་དང་དབུས་པ་དག་ལ་སྐད་གཞན་གྱིས་གནས་དན་ལེན་བརྗོད་པ་དང༌། འོན་པ་དང་གླེན་པ་དག་ལ་མིའི་ཆོས་བླ་མ་བརྗོད་པ་དང༌། ངོ་ཚ་མེད་པ་དང་མཐའ་ཁོབ་པ་དང་དབུས་བདག་ལ་སྐད་གཞན་གྱིས་བཤེས་ངོར་བྱས་སོ་ཞེས་སྐུར་པ་འདེབས་པ་དང༌། གླེན་པ་དང་འོན་པ་དག་ལ་བསླབ་པ་ཁྱད་དུ་གསོད་པ་དང༌། འཕྱ་བ་དང་གཞོགས་འཕྱས་བྱེད་པ་དང༌། བསྒོ་བ་རྣ་ལག་ཟོན་པ་ཡང་ཉེས་བྱས་སོ། །དེ་དག་ལ་མ་བསྐོས་པར་སྟོན་པ་དང༌། དེ་དག་ལ་ཟས་
ཅུང་ཟད་ཙམ་གྱི་ཕྱིར་སྟོན་ཏོ་ཞེས་སྐུར་པ་འདེབས་པ་དང༌། དེ་དག་གིས་སྦྱོར་དུ་བཅུག་པ་ཟ་བ་དང༌། མེ་འབུད་དུ་བཅུག་པ་དང༌། འགྱོད་པ་སྐྱེད་པ་དང༌། སྔངས་པར་བྱེད་པ་དང༌། གཞི་མེད་པར་སྐུར་པ་འདེབས་པ་དང་སྐད་གཞན་གྱིས་བསླབ་པ་ལ་ཉེ་བར་འཇོག་པ་སྤོང་པ་ཡང་ཉེས་བྱས་སོ། །སྨྲ་བ་པོ་ཉིད་ལ་ཡོད་པ་སྟེ་གསོད་པ་དང་རང་གི་དོན་དུ་རྐུ་བ་དག་ལས་གཞན་པའི་འོ་ཞེས་བྱ་བ་ལ། སྨྲ་བའི་དངོས་པོ་ནི་སྨྲ་བ་ཉིད་དེ་ཚིག་བརྗོད་པར་ནུས་པའོ། །གང་ཟག་གང་ལ་དེ་ཡོད་པ་དེ་ནི་སྨྲ་བ་པོ་ཉིད་དོ། །གང་ཟག་སྨྲ་བ་པོ་ཉིད་དེ་ལ་དོན་གོ་བ་གང་ཡིན་པ་དེ་ནི་རྣམ་པར་རིག་བྱེད་ཀྱི་ཡན་ལག་ཡིན་གྱི། ལྐུགས་པ་དང་ཀླ་ཀློ་ལ་སོགས་པའི་གང་ཟག་དོན་དེ་དང་འབྲེལ་པ་སྨྲ་མི་ཤེས་ཤིང་སྨྲ་བ་པོ་ཉིད་མ་ཡིན་པ་གཞན་དག་ལ་དོན་གོ་བ་ཡོད་པ་གང་ཡིན་པ་དེ་ནི་རྣམ་པར་རིག་བྱེད་ཀྱི་ཡན་ལག་མ་ཡིན་ཏེ། དེ་དག་ལ་དོན་གོ་བ་ཡོད་པ་ནི་འཇིག་རྟེན་གྱི་ཐ་སྙད་ལ་ཉེ་བར་སྦྱར་དུ་རུང་བ་ཉིད་མ་ཡིན་པའི་ཕྱིར་བུམ་པའི་ནང་གི་མར་མེ་དང་འདྲའོ། །དེའི་ཕྱིར་འདིར་སྨྲ་བ་པོ་ཉིད་ལ་ཡོད་པའི་དོན་གོ་བ་གང་ཡིན་པ་དེ་ནི་རྣམ་པར་རིག་བྱེད་ཀྱི་ཡན་ལག་ཡིན་པར་བསྟན་ཏོ། །གསོད་པ་དང་རང་གི་དོན་དུ་རྐུ་བ་དག་ལས་གཞན་པའི་འོ་ཞེས་བྱ་བ་ནི། སྨྲ་བ་པོ་ཉིད་མ་ཡིན་པ་ལ་ཡོད་པའི་དོན་གོ་བ་གང་ཡིན་པ་དེ་ནི་གསོད་པ་དང་རང་གི་དོན་དུ་རྐུ་བ་དག་ལས་གཞན་པ་དག་ལ་ཡན་ལག་མ་ཡིན་གྱི་དེ་གཉིས་ལ་ནི་ཡན་ལག་ཡིན་པར་རིག་པར་བྱའོ། །དེ་ལྟ་བས་ན་ལྐུགས་པ་ལ་སོགས་པ་དག་ལ་དོན་གོ་བ་ཡོད་པ་གང་ཡིན་པ་དེ་ནི་འདི་ལྟར་སྨྲ་བ་པོ་ཉིད་མ་ཡིན་དུ་ཟིན་ཀྱང་བསོད་པ་རང་གི་དོན་དུ་རྐུ་བའི་ཡུལ་ལ་ནི་རྣམ་པར་རིག་བྱེད་ཀྱི་ཡན་ལག་ཡིན་ནོ། །དེས་ན་ལྐུགས་པ་ལ་གཞི་མེད་པ་དང་བག་ཙམ་གྱིས་སྐུར་བ་འདེབས་པ་ལ་ནི་སྤོམ་པོའོ། །ལྐུགས་པ་དང་ལྷན་ཅིག་མངོན་མཚན་ཅན་གྱིས་སྤྱོད་པ་དང༌། ཉོ་ཚོང་བྱེད་པ་དང་འཐག་ཏུ་གཞུག་པ་དང༌། འཐག་པ་བསྐྱེད་པའི་ཕྱིར་གོ་བར་བྱེད་པ་དང༌། སྐྱོན་ནས་སྨྲ་བ་དང་ཕྲ་མ་བྱེད་པ་དང༌། སྐྱོ་སྔོགས་བྱེད་པ་དང་སྟོན་པ་དང་ཀློག་པ་དག་དང་དེ་དག་ལ་གནས་ངན་ལེན་དང༌། མིའི་ཆོས་བླ་མ་བརྗོད་པ་དང༌། བཤེས་དོར་བྱས་སོ་ཞེས་བྱ་བ་སྨྲས་ཏེ།
བསླབ་བ་ཁྱད་དུ་གསོད་པ་དང༌། འཕྱ་བ་དང་གཞོགས་འཕྱས་བྱེད་པ་དང༌། བསྒོ་བ་རྣལ་གཟོན་པ་དང༌། དེ་དག་ལ་མ་བསྐོས་པར་སྟོན་པ་དང༌། དེ་དག་ལ་སྟོན་པ་ལ་ཟང་ཟིང་ཅུང་ཟད་ཙམ་གྱི་ཕྱིར་སྟོན་ཏོ་ཞེས་སྐུར་པ་འདེབས་པ་དང༌། དེ་དག་གིས་སྦྱོར་དུ་བཅུག་པ་ཟབ་དང༌། དེ་དག་ནི་འདུད་དུ་བཅུག་པ་དང༌། དེ་དག་གི་བསླབ་པ་ལ་ཉེ་བར་འཇོག་པ་སྤོང་བ་ལ་ཡང་ཉེས་བྱས་སོ། །ཡད་དག་པར་ལེན་པར་བྱད་པ་ལ་ནི་དེར་མ་ཟད་དོ་ཞེས་བྱ་བ་ནི། སྡོམ་པ་ལ་སོགས་པ་ཡང་དག་པར་ལེན་པར་བྱེད་པ་ལ་ནི་སྔར་སྨྲ་བ་པོ་ཉིད་ལ་ཡོད་པའི་དོན་གོ་བཞེས་བསྟན་པ་གང་ཡིན་པ་དེ་ཡན་ལག་ཡིན་པར་མ་ཟད་ཀྱི། སྨྲ་བ་པོ་ཉིད་མ་ཡིན་པ་ལ་ཡོད་པའི་དོན་གོ་བ་གང་ཡིན་པ་དེ་ཡང་ཡན་ལག་ཡིན་ཏེ་འདི་ལྟར་གོ་བར་བྱེད་པ་ལྐུགས་པའམ། སྨྲ་བ་པོ་ཉིད་མ་ཡིན་པ་གཞན་དག་ལ་ཡང་སྲོག་གཅོད་པ་སྤོང་བ་ལ་སོགས་པ་ཡང་དག་པར་ལེན་པ་འབྱུང་བའི་ཕྱིར་རོ། །དེ་ན་སྣོད་ཡིན་ནོ་ཞེས་བྱ་བ་ན། སྨྲ་བ་པོ་ཉིད་ལ་ཡོད་པའི་དོན་གོ་བ་གང་ཡིན་པ་དེ་ནི་སྣོད་ཡིན་ཏེ་རྣམ་པར་རིག་བྱེད་ཀྱི་ཡན་ལག་ཏུ་རུང་བ་ཡིན་ནོ། །དེས་ན་སྨྲ་བ་པོ་དོན་གོ་བར་ནུས་པའི་གང་ཟག་གང་ཡིན་པ་དེ་ནི་རྣམ་པར་རིག་བྱེད་ཀྱི་ཡན་ལག་ཡིན་གྱི་གླེན་པ་དང་འོན་པ་དག་ཀྱང་མ་ཡིན་ལ། ཀླ་ཀློ་ལ་སོགས་པས་སྨྲས་པ་དེ་བརྡ་མི་ཕྲད་པ་དང་རྣ་བའི་སྦུབས་བཀག་པ་དང༌། ལྐུགས་པ་དང་རྒྱུ་གཞན་གྱིས་སྨྲ་མི་ཤེས་པ་དག་ཀྱང་རྣམ་པར་རིག་བྱེད་ཀྱི་ཡན་ལག་མ་ཡིན་ནོ། །འདི་ལྟར་མདོ་འདིའི་དོན་དེ་དག་ཐམས་ཅད་སྔར་སྨྲ་བ་པོ་ཉིད་ལ་ཡོད་པ་སྟེ་ཞེས་བྱ་བའི་མདོ་དེས་གྲུབ་ཟིན་མདོ་ཀྱི་འོན་ཀྱང་ཚིག་གི་ཡུལ་གཞན་བསྟན་པའི་ཕྱིར་མདོ་འདི་བྱས་ཏེ་འདི་ལྟར་སྨྲ་མི་ཤེས་པས་ནི་བདག་ཉིད་ཀྱི་འམ་གཞན་གྱི་ལྟུང་བ་མ་བརྗོད་ཀྱང་ཉེས་པ་འགར་ཡང་མི་འགྱུར་རོ་ཞེས་བྱ་བ་དེ་བསྟན་པའི་ཕྱིར་རོ། །འདི་ལྟར་སྨྲ་བ་པོ་ཉིད་ལ་ཡོད་པ་སྟེ་ཞེས་བྱ་བའི་མདོ་སྔ་མས་སྨྲ་བ་པོ་ཉིད་ལ་དོན་གོ་བ་ཡོད་པ་གང་ཡིན་པ་དེ་ནི་རྣམ་པར་རིག་བྱེད་ཀྱི་ཡན་ལག་ཡིན་ནོ་ཞེས་བསྟན་པ་དེས་ནི་གླེན་པ་ལ་སོགས་པ་ལ་བརྗོད་པ་དོན་མེད་པ་ཙམ་ཞིག་བསྟན་པར་ཟད་ཀྱི་ད་ལ་ལྟུང་བ་མ་བརྗོད་པ་ལ་ཉེས་པ་འགའ་ཞིག་ཏུ་འགྱུར་རམ་འོན་ཏེ་མི་འགྱུར་ཞེས་བྱ་བ་
དེ་མ་བསྟན་པས་དེའི་ཕྱིར་མདོ་འདིས་ནི་གླེན་པ་ལ་སོགས་པ་ལ་ལྟུང་བ་མ་བརྗོད་པ་ཉེས་པ་མེད་པར་བསྟན་ཏོ། །འོ་ན་བདག་ཀྱང་ཅི་ལྟུང་པ་བཤགས་པ་དང་བྱིན་གྱིས་བརླབ་བ་གཉིས་ཀྱིས་ཕྱིར་གསོ་བར་བྱའོ་ཞེས་གསུངས་ན་མ་བརྗོད་པ་ལ་ཉེས་པ་མེད་པར་ཇི་ལྟར་རུང་ཞེ་ན། དེ་ལྟ་བུ་ཡང་ཡོད་མོད་ཀྱི་འོན་ཀྱང་གང་གི་མདུན་དུ་བཤགས་པར་བྱ་བའི་གང་ཟག་གཞན་ཡོད་ན་ནི་མདུན་དུ་མ་བརྗོད་ན་ཉེས་པར་འགྱུར་བ་ཁོ་ན་ཡིན་གྱི་གླེན་པ་ལ་སོགས་པའི་མདུན་དུ་ནི་བརྗོད་ཀྱང་ཕྱིར་གསོ་བར་འགྱུར་བ་མི་སྲིད་དེ། སྣོད་མ་ཡིན་པ་ལ་རྣམ་པར་རིག་བྱེད་མི་འབྱུང་བའི་ཕྱིར་རོ། །ངག་གིའོ་ཞེས་བྱ་བ་ནི་ངག་གི་རྣམ་པར་རིག་བྱེད་ཡན་ལག་ཡིན་གྱི། སྤྲིང་ཡིག་དང་ལག་ཡིག་དང་ལག་རྩིས་ལ་སོགས་པ་ནི་མ་ཡིན་ཏེ། འདི་ལྟར་སྤྲིང་ཡིག་ལ་སོགས་པས་ནི་དོན་གསལ་བར་གོ་བར་མི་ནུས་པའི་ཕྱིར་རོ། །འོག་ནས་ཀྱང་རང་གིའོ་ཞེས་བྱ་བ་དང༌། བདག་ཉིད་དང་འབྲེལ་པའོ་ཞེས་བྱ་བ་ལ་སོགས་པའི་རྣམ་པར་འབྱུང་བས་དེའི་ཕྱིར། འདི་ལྟར་ཁོང་དུ་ཆུད་པར་བྱ་སྟེ་དང་པོ་ཁོ་ནར་གཞན་གྱིས་དག་གི་རྣམ་པར་རིག་བྱེད་དག་གོ་བའི་སྐད་ཅིག་དེ་ཉིད་ལ་དངོས་གཞིར་འགྱུར་རོ། །སྨྲ་བར་འདོད་པའི་དོན་བརྗོད་པའི་ཚིག་གི་ཡན་ལག་ཇི་སྙེད་པ་དག་དང་ལག་པ་ལ་སོགས་པའི་ཡན་ལག་གཅིག་གམ་དུ་མ་བསྐུལ་བ་ཇི་སྙེད་པ་དེ་དག་ཐམས་ཅད་ནི་དང་པོ་ཁོ་ནར་དོན་གོ་བའི་དངོས་གཞི་དེ་ཉིད་ཀྱི་ཁོངས་སུ་འདུས་པ་ཡིན་ནོ། །དང་པོ་དོན་མ་གོ་ན་ནི་ལུས་བསྐུལ་བ་དང་ཚིག་གིས་ཇེ་ཉོན་ཅིག་སེམས་གཏོད་ཅིག་ཅེས་བྱ་བ་ལ་སོགས་པ་ལྷག་པ་ཐམས་ཅད་ཀྱང་སྦྱོར་བ་ཡིན་པར་རིག་པར་བྱ་སྟེ། ཐམས་ཅད་རྩོམ་པ་གཅིག་ཏུ་གྱུར་པ་ཉིད་ཡིན་པའི་ཕྱིར་རོ། །འདིར་དཔེ་ནི་སྤྲིང་ཡིག་དང་ལག་ཡིག་དང་ལག་རྩིས་དག་གིས་འཁྲིག་པ་དག་དང་ལྡན་པ་སྨྲ་བ་དང༌། བསྙེན་བཀུར་བསྔགས་པ་དང་གཞི་མེད་པ་དང་བག་ཙམ་དག་གིས་སྐུར་པ་འདེབས་པ་གོ་བར་བྱེད་པ་ནི་སྦོམ་པོའོ། །དགེ་སློང་མ་ཉེ་དུ་མ་ཡིན་པ་ལ་གོས་འཁྲུར་འཇུག་པ་ལ་སོགས་པ་དང༌། དེ་ལས་གོས་ལེན་པ་དང༌། ཁྱིམ་བདག་དང་ཁྱིམ་བདག་གི་ཆུང་མ་དག་ལས་སློང་བ་དང་རིན་སྤགས་པ་དང་སོ་སོ་ནས་སྤགས་པ་ཐོབ་པ་དང༌།
ལྷུང་བཟེད་སློང་བ་དང༌། འཐག་ཏུ་འཇུག་པ་དང་འཐག་པ་བསྐྱེད་པ་དང་འཕྲོག་པ་དང་བརྫུན་སྨྲ་བ་དང་སྐྱོན་ནས་སྨྲ་བ་དང་ཕྲ་མ་བྱེད་པ་དང་སྐྱོ་སྔོགས་བྱེད་པ་དང་སྟོན་པ་དང་ཟློས་པ་དང༌། གནས་ངན་ལེན་བརྗོད་པ་དང༌། མིའི་ཆོས་བླ་མ་བརྗོད་པ་དག་དང་བཤེས་དོར་བྱས་སོ། །བསླབ་པ་ཁྱད་དུ་གསོད་པ་དང༌། ཤིང་ལྗོན་པ་གཅོད་པ་དང༌། འཕྱ་བ་དང་གཞོགས་འཕྱས་བྱེད་པ་དང་བསྒོ་བ་རྣལ་ག་ཟོན་པ་དང༌། སྐྲོད་པ་དང་རིམ་པ་གསུམ་ལས་ལྷག་པར་རྩིག་པ་དང༌། མ་བསྐོས་པར་སྟོན་པ་དང༌། ཟས་ཅུང་ཟད་ཙམ་གྱི་ཕྱིར་སྟོན་ཏོ་ཞེས་སྐུར་པ་འདེབས་པ་དང༌། དགེ་སློང་མས་སྦྱོར་དུ་བཅུག་པའི་ཟས་ཟ་བ་དང༌། ཟན་གཅོད་དུ་འཇུག་པ་དང་མེ་ལ་རེག་ཏུ་འཇུག་པ་དང་འགྱོད་པ་སྐྱེད་པ་དང༌། སྔངས་པར་བྱེད་པས། ཡོ་བྱད་སྦེད་པ་དང༌། སྐུར་པ་འདེབས་པ་དང༌། ས་རྐོ་བ་དང༌། ཤིང་བལ་གྱིས་གོས་པར་བྱེད་པ་དང་དགེ་སློང་མའི་ལག་ནས་ཟས་ལེན་པ་དང༌། མ་བཟློག་པར་ཟ་བ་དག་ཀྱང་ཉེས་བྱས་སོ། །རང་གིའོ་ཞེས་བྱ་བ་ནི། རང་གི་ངག་གི་རྣམ་པར་རིག་བྱེད་ཡན་ལག་ཡིན་གྱི། མངགས་པས་གཅིག་ནས་གཅིག་ཏུ་བརྒྱུད་པ་མངགས་པ་ལ་སོགས་པ་གསུམ་པ་དག་ནི་མ་ཡིན་ནོ། །འདི་ཡང་དཔེ་བརྗོད་པར་བྱ་སྟེ་མ་དགས་པས་གཅིག་ནས་གཅིག་ཏུ་བརྒྱུད་དེ་འཁྲིག་པ་དང་ལྡན་པ་སྨྲ་བ་དང་བསྙེན་བཀུར་བསྔགས་པ་དང་གཞི་མེད་པ་དང་བག་ཙམ་གྱིས་སྐུར་བ་འདེབས་པ་ལ་ནི་སྦོམ་པོའོ། །ཉེ་དུ་མ་ཡིན་པའི་དགེ་སློང་མ་ལ་གོས་འཁྲུར་འཇུག་པ་ལ་སོགས་པ་དང་དེ་ལས་གོས་ལེན་པ་དང༌། ཁྱིམ་བདག་དང་ཁྱིམ་བདག་གི་ཆུང་མ་དག་ལས་སློང་བ་དང༌། རིན་སྤགས་པ་དང༌། སོ་སོ་ནས་སྤགས་པ་ཐོབ་པ་དང༌། ལྷུང་བཟེད་འཚོལ་བ་དང༌། འཐག་ཏུ་འཇུག་པ་དང༌། འཐག་པ་བསྐྱེད་པ་དང༌། འཕྲོག་པ་དང༌། བརྫུན་སྨྲ་བ་དང༌། སྐྱོན་ནས་སྨྲ་བ་དང༌། ཕྲ་མ་བྱེད་པ་དང༌། སྐྱོ་སྔོགས་བྱེད་པ་དང༌། སྟོན་པ་དང༌། ཟློས་པ་དང༌། གནས་ངན་ལེན་བརྗོད་པ་དང༌། མིའི་ཆོས་བླ་མ་བརྗོད་པ་དག་དང༌། བཤེས་ངོར་བྱས་སོ་ཞེས་ཟེར་བ་དང༌། བསླབ་པ་ལ་ཁྱད་དུ་གསོད་པ་དང༌། ཤིང་ལྗོན་པ་གཅོད་པ་དང༌། འཕྱ་བ་དང་གཞོགས་འཕྱས་བྱེད་པ་དང༌། བསྒོ་བ་རྣ་ལ་གཟོན་
པ་དང༌། སྐྲོད་པ་དང༌། རིམ་པ་གསུམ་ལས་ལྷག་པར་རྩིག་པ་དང༌། མ་བསྐོས་པར་སྟོན་པ་དང༌། ཟས་ཅུང་ཟད་ཙམ་གྱི་ཕྱིར་སྟོན་ཏོ་ཞེས་སྐུར་བ་འདེབས་པ་དང༌། དགེ་སློང་མས་སྦྱོར་དུ་བཅུག་པའི་ཟས་ཟ་བ་དང༌། ཟན་གཅོད་དུ་འཇུག་པ་དང༌། མེ་ལ་རེག་ཏུ་འཇུག་པ་དང༌། འགྱོད་པ་སྐྱེད་པ་དང༌། སྔངས་པར་བྱེད་པ་དང༌། ཡོ་བྱད་སྦེད་པ་དང༌། སྐུར་བ་འདེབས་པ་དང༌། ས་རྐོ་བ་དང༌། ཤིང་བལ་གྱིས་གོས་པར་བྱེད་པ་དག་དང༌། དགེ་སློང་མའི་ལ་གནས་ཟས་ལེན་པ་དང༌། མ་བཟློག་པར་ཟས་ཟ་བ་དག་ཀྱང་ཉེས་བྱས་སོ། །བདག་ཉིད་དང་འབྲེལ་པའོ་ཞེས་བྱ་བ་ནི། བདག་ཉིད་དང་འབྲེལ་པའི་རང་གི་ངག་གི་རྣམ་པར་རིག་བྱེད་ཡན་ལག་ཡིན་གྱི། གཞན་ལ་སྙད་འདོགས་པ་ནི་མ་ཡིན་ནོ། །འདི་སྐད་བསྟན་ཏེ། ལྟུང་བ་འབྱིན་པར་བྱེད་པ་གང་ཡིན་པ་དེ་ནི་བདག་ཉིད་ཀྱི་རང་གི་ངག་གི་རྣམ་པར་རིག་བྱེད་ཀྱིས་བདག་འདི་སྐད་ཟེར་རོ་ཞེའམ་བདག་གིས་བྱེད་དུ་གཞུག་གོ་ཞེའམ་བདག་གི་ཕྱིར་གྱིས་ཤིག་ཅེས་བྱ་བ་ལ་སོགས་པ་བདག་ཉིད་དང་འབྲེལ་པའི་རང་གི་ངག་གི་རྣམ་པར་རིག་བྱེད་ཡན་ལག་ཡིན་གྱི། སྤྲིང་ཡིག་ལ་སོགས་པས་དེ་སྐད་ཟེར་རོ་ཞེ་འམ་ཆེ་གེ་མོ་ཞིག་འདི་སྐད་ཟེར་རོ་ཞེས་བྱ་བ་ལ་སོགས་པ་གཞན་ལ་སྙད་འདོགས་པའི་ངག་གི་རྣམ་པར་རིག་བྱེད་ནི་མ་ཡིན་ནོ། །འོ་ན་སྔར་རང་གི་དོན་དེ་ཉིད་གཙོ་ཆེར་ཡོད་པའོ་ཞེས་སྨོས་པ་དེ་ཉིད་ཀྱིས་བདག་ཉིད་དང་འབྲེལ་པའོ་ཞེས་བྱ་བ་འདིའི་དོན་འགྲུབ་སྟེ། འདི་ལྟར་བདག་ཉིད་འབྲེལ་བའི་ངག་གི་རྣམ་པར་རིག་བྱེད་ཉིད་རང་གི་དོན་ཉིད་གཙོ་ཆེར་ཡོད་པ་ཡིན་ནོ་ཞེ་ན། དེ་ནི་དེ་ལྟ་མ་ཡིན་ཏེ་རང་གི་དོན་དུ་ཡང་ཚིག་གཞན་ལ་སྙད་འདོགས་པས་རིག་པར་བྱེད་པ་ཡོད་དེ། འདི་ལྟ་སྟེ་དཔེར་ན། ལྷས་སྦྱིན་ན་རེ་ཁོ་བོ་འདོད་ཆགས་དང་བྲལ་བ་ཉིད་དོ་ཞེས་ཟེར་རོ་ཞེས་རྣམ་པར་རིག་བྱེད་པ་ལྟ་བུའོ། །དེ་ལྟ་བས་ན་རང་གི་དོན་ཉིད་གཙོ་ཆེར་ཡོད་པའོ་ཞེས་སྨོས་པ་དེས་བདག་ཉིད་དང་འབྲེལ་པའོ་ཞེས་བྱ་བའི་དོན་འདི་མི་འགྲུབ་པས་དེའི་ཕྱིར་མདོ་འདི་ལོགས་ཤིག་ཏུ་བྲིས་སོ། །འདིར་ཡང་དཔེ་བརྗོད་པར་བྱ་སྟེ། གཞན་ལ་སྙད་འདོགས་པས་འཁྲིག་པ་དང་ལྡན་པ་སྨྲ་བ་དང༌། བསྙེན་བཀུར་
བསྔགས་པ་དང་གཞི་མེད་པ་དང་བག་ཙམ་དག་གིས་སྐུར་བ་འདེབས་པ་ལ་ནི་སྦོམ་པོའོ། །དགེ་སློང་མ་ཉེ་དུ་མ་ཡིན་པ་ལ་གོས་འཁྲུར་འཇུག་པ་ལ་སོགས་པ་དང༌། དེ་ལས་གོས་ལེན་པ་དང༌། ཁྱིམ་བདག་དང་ཁྱིམ་བདག་གི་ཆུང་མ་དག་ལས་སློང་བ་དང༌། རིན་སྤགས་པ་དང༌། སོ་སོ་ནས་སྤགས་པས་འཐོབ་པ་དང་ལྷུང་བཟེད་ཚོལ་བ་དང་འཐག་ཏུ་འཇུག་པ་དང་འཐག་པ་བསྐྱེད་པ་དང༌། འཕྲོག་པ་དང་བརྫུན་དུ་སྨྲ་བ་དང༌། སྐྱོན་ནས་སྨྲ་བ་དང༌། ཕྲ་མ་བྱེད་པ་དང༌། སྐྱོ་སྔོགས་བྱེད་པ་དང༌། སྟོན་པ་དང༌། ཟློས་པ་དང༌། གནས་ངན་ལེན་བརྗོད་པ་དང༌། མེའི་ཆོས་བླ་མ་བརྗོད་པ་དག་དང༌། བཤེས་ངོར་བྱས་སོ་ཞེས་ཟེར་ན། བསླབ་པ་ཁྱད་དུ་གསོད་པ་དང༌། ཤིང་ལྗོན་པ་གཅོད་པ་དང༌། འཕྱ་བ་དང་གཞོགས་འཕྱས་བྱེད་པ་དང༌། བསྒོ་བ་རྣ་ལ་གཟོན་པ་དང༌། སྐྲོད་པ་དང་རིམ་པ་གསུམ་ལས་ལྷག་པར་རྩིག་པ་དང༌། མ་བསྐོས་པར་སྟོན་པ་དང༌། ཟས་ཅུང་ཟད་ཙམ་གྱི་ཕྱིར་སྟོན་ཏོ་ཞེས་སྐུར་བ་འདེབས་པ་དང༌། དགེ་སློང་མས་སྦྱོར་དུ་བཅུག་པའི་ཟས་ཟ་བ་དང༌། ཟན་གཅོད་དུ་འཇུག་པ་དང༌། མེ་ལ་རེག་ཏུ་འཇུག་པ་དང༌། འགྱོད་པ་སྐྱེད་པ་དང༌། སྡངས་པར་བྱེད་པ་དང༌། ཡོ་བྱད་སྤེད་པ་དང༌། ས་རྐོ་བ་དང༌། ཤིང་བལ་གྱིས་གོས་པར་བྱེད་པ་དག་དང༌། དགེ་སློང་མའི་ལག་ནས་ཟས་ལེན་པར་བྱེད་པ་དང་མ་བཟློག་པར་ཟས་ཟ་བ་དག་ཀྱང་ཉེས་བྱས་སོ། །རང་གིས་བསྐོས་པ་ཉིད་བྱེད་དུ་བཅུག་པ་ཡིན་ནོ་ཞེས་བྱ་བ་ནི། གསོད་པ་དང་རང་གི་དོན་དུ་རྐུ་བ་དག་ལས་གཞན་པའོ་ཞེས་བྱ་བར་སྦྱར་རོ། །གསོད་པ་དང་རང་གི་དོན་དུ་རྐུ་བ་དག་ལས་གཞན་པའི་དོན་ལ་མ་མངགས་པ་ལ་སོགས་པ་གཞན་བྱེད་དུ་གཞུག་ཅིང་རྗེས་སུ་བསྒྲུབ་ཏུ་གཞུག་པ་གང་ཡིན་པ་དེ་ལ་རང་གིས་བསྐོས་པ་ཉིད་ཅེས་བྱ་བ་རང་གིས་མངོན་སུམ་དུ་བྱད་དུ་བཅུག་པ་ཉིད་ཡན་ལག་ཡིན་ཏེ། ལྐོག་ནས་བྱེད་དུ་བཅུག་པ་ལ་ནི་དེ་ལྟར་མངོན་པར་ཞེན་པ་མི་འབྱུང་བའི་ཕྱིར་རོ། །འདིར་ཡང་དཔེ་བརྗོད་པར་བྱ་སྟེ། རང་གིས་མངོན་སུམ་དུ་བསྐོས་པ་མ་ཡིན་པ་ལྐོག་ནས་བསྐོས་པས་བྱེད་དུ་བཅུག་པས་འཁྲིག་པ་དང་ལྡན་པ་སྨྲ་བ་དང༌། བསྙེན་བཀུར་བསྔགས་པ་དང༌། གཞི་མེད་པ་དང་བག་ཙམ་དག་གིས་སྐུར་བ་འདེབས་པ་ལ་ནི་
སྦོམ་པོའོ། །ཉེ་དུ་མ་ཡིན་པའི་དགེ་སློང་མ་ལ་གོས་འཁྲུར་འཇུག་པ་ལ་སོགས་པ་དང༌། དེ་ལས་གོས་ལེན་པ་དང༌། ཁྱིམ་བདག་དང་ཁྱིམ་བདག་གི་ཆུང་མ་དག་ལས་སློང་བ་དང༌། རིན་སྦགས་པ་དང་སོ་སོ་ནས་སྤགས་པ་ཐོབ་པ་དང༌། །ལྷུང་ཟེད་འཚོལ་བ་དང༌། འཐག་ཏུ་འཇུག་པ་དང་འཐག་པ་བསྐྱེད་པ་དང་འཕྲོག་པ་དང་བརྫུན་དུ་སྨྲ་བ་དང་སྐྱོན་ནས་སྨྲ་བ་དང༌། ཕྲ་མ་བྱེད་པ་དང༌། སྐྱོ་སྔོགས་བྱེད་པ་དང༌། སྟོན་པ་དང་ཟློས་པ་དང་གནས་ངན་ལེན་བརྗོད་པ་དང༌། མིའི་ཆོས་བླ་མ་བརྗོད་པ་དག་དང༌། བཤེས་དོར་བྱས་སོ་ཞེས་ཟེར་བ་དང༌། བསླབ་པ་ལ་ཁྱད་དུ་གསོད་པ་དང༌། ཤིང་ལྗོན་པ་གཅོད་པ་དང༌། འཕྱ་བ་དང་གཞོགས་འཕྱས་བྱེད་པ་དང༌། བསྒོ་བ་རྣལ་གཟོན་པ་དང༌། སྐྲོད་པ་དང༌། རིམ་པ་གསུམ་ལས་ལྷག་པར་རྩིག་པ་དང༌། མ་བསྐོས་པར་སྟོན་པ་དང༌། ཟས་ཅུང་ཟད་ཙམ་གྱི་ཕྱིར་སྟོན་ཏོ་ཞེས་སྐུར་བ་འདེབ་པ་དང༌། དགེ་སློང་མས་སྦྱོར་དུ་བཅུག་པའི་ཟས་ཟ་བ་དང༌། ཟན་གཅོད་དུ་འཇུག་པ་དང་མེ་ལ་རེག་ཏུ་འཇུག་པ་དང༌། འགྱོད་པ་སྐྱེད་པ་དང་སྡངས་པར་བྱེད་པ་དང༌། ཡོ་བྱད་སྦེད་པ་དང༌། སྐུར་བ་འདེབས་པ་དང་ས་རྐོ་བ་དང་ཤིང་བལ་གྱིས་གོས་པར་བྱེད་པ་དང༌། རིན་པོ་ཆེ་ལ་རེག་ཏུ་འཇུག་པ་ལ་སོགས་པ་དང༌། དགེ་སློང་མའི་ལག་ནས་ཟས་ལེན་པ་དང༌། མ་བཟློག་པར་ཟ་བ་དག་ཀྱང་ཉེས་བྱས་སོ། །རྣམ་པར་འབྱེད་པར་གཏོགས་པ་ཕལ་ཆེ་བ་སྤྱིར་བསྟན་པ་རྣམས་རྫོགས་སོ་ཞེས་བྱ་བ་ཉེ་བ་འཁོར་གྱིས་ཞུས་པས་ལས་གསུངས་པ་རྣམ་པར་འབྱེད་པར་གཏོགས་པ་ཤས་ཆེ་བ་བསླབ་པའི་གཞི་ཐམས་ཅད་ལ་སྤྱིར་བསྟན་པའི་མདོ་རྣམས་བཤད་ཟིན་ཏོ།། །།བམ་པོ་བཞི་བཅུ་ལྔ་པ། རྣམ་པར་འབྱེད་པ་ལ་སོགས་པ་དང་འབྲེལ་པའི་མདོ་རྣམས་རྒྱ་ཆེར་བཀྲོལ་ནས། ད་ནི་འདུལ་བའི་གཞིར་གཏོགས་པ་དག་བརྗོད་པར་བྱ་སྟེ། དེ་ལ་ཇེ་དང་པོར་གསོ་སྦྱོང་གི་གཞིར་གཏོགས་པ་དག་བཤད་པར་བྱའོ། །བཅོམ་ལྡན་འདས་ཀྱིས་གསོ་སྦྱོང་ནི་རྣམ་པ་གཉིས་སུ་གསུངས་ཏེ། ཞི་གནས་ཀྱི་གསོ་སྦྱོང་དང་མཐུན་པའི་གསོ་སྦྱོང་ངོ༌། །དེ་ལ་གཙོ་བོ་ཡིན་པའི་ཕྱིར་དང༌།
བརྗོད་པར་བྱ་བ་ཉུང་བའི་ཕྱིར། ཇེ་དང་པོར་ཞི་གནས་ཀྱི་གསོ་སྦྱོང་རྣམ་པར་བཤད་པར་བྱའོ། །དེའི་ཕྱིར་སྤྱོད་ཡུལ་དུ་ཞུགས་པས་རྣལ་འབྱོར་བསྒོམ་པར་མི་བྱའོ་ཞེས་བྱ་བ་སྨྲས་ཏེ། དགེ་སློང་སྤྱོད་ཡུལ་དུ་གྲོང་དུ་ཞུགས་ཤིང་གྲོང་དུ་བྱུང་བ་ལམ་དུ་འགྲོ་བས་རྣལ་འབྱོར་ཏིང་ངེ་འཛིན་བསྒོམ་པར་མི་བྱ་གོམས་པར་མི་བྱའོ་ཞེས་བྱ་བའི་ཐ་ཚིག་གོ །འདིས་ནི་བཅོམ་ལྡན་འདས་ཀྱིས་རྣལ་འབྱོར་བསྒོམ་པར་བྱའོ་ཞེས་གསུངས་ནས་དགེ་སྦྱོང་དག་སྤྱོད་ཡུལ་དུ་ཞུགས་ན་ཡང་སྒོམ་པར་བྱེད་པ་དང་དེ་དག་གླང་པོ་ཆེ་འཁྲུལ་པ་དང་ལྷན་ཅིག་འགྲོ་བ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སྤྱོད་ཡུལ་དུ་ཞུགས་པས་རྣལ་འབྱོར་བ་བསྒོམ་པར་མི་བྱའོ་ཞེས་བྱ་བའི་བར་དུ་གསུངས་པ་དེ་བསྡུས་པ་ཡིན་ནོ། །འདིས་ནི་གོམས་པར་བྱེད་པ་བཀག་པ་ཡིན་གྱི། གདུལ་བའི་དོན་དུ་རྫུ་འཕྲུལ་གྱི་རྣམ་པར་འཕྲུལ་པ་ལ་སོགས་པ་བསྟན་བའི་ཕྱིར་སེམས་རྩེ་གཅིག་པ་ཉིད་མངོན་དུ་བྱ་བ་ནི་བཀག་པ་མ་ཡིན་ཏེ། དེ་ལ་སྐྱོན་ཆགས་པ་མེད་པའི་ཕྱིར་རོ། །མངོན་པར་འདུ་བར་ཡང་མི་བྱའོ་ཞེས་བྱ་བ་ནི། རྣལ་འབྱོར་བསྒོམ་པར་ཞེས་བྱ་བར་སྦྱར་རོ། །མི་རྣམས་མངོན་པར་འདུ་བའི་གནས་གང་དུ་འདུ་བ་དང་འོང་པ་དང་འགྲོ་བ་ཡོད་པ་དེར་ཡང་རྣལ་འབྱོར་བསྒོམ་པར་མི་བྱའོ། །འདིར་གཞུང་ནི་དགེ་སློང་དག་སྒོ་གང་དུ་རྣལ་འབྱོར་སྒོམ་པར་བྱེད་པ་ན་དེ་དག་གཉིད་ཡུར་བ་དང་མ་དད་པ་དག་འདི་སྐད་ཅེས་འཕགས་པ་དག་ཅི་ཁྱེད་ཅག་འདུ་བར་ཉལ་བའི་བརྟུལ་ཞུགས་ཅན་ཡིན་ནམ་ཞེས་ཅོ་འདྲི་བར་བྱེད་པའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་བ་དང༌། བཅོམ་ལྡན་འདས་ཀྱིས་བཀའ་སྩལ་པ། སྒོ་གང་དུ་རྣལ་འབྱོར་བསྒོམ་པར་མི་བྱའོ། །དེ་བཞིན་དུ་ཁྱམས་ལ་སོགས་པ་དག་ཏུ་ཡང་བསྒོམ་པར་མི་བྱའོ་ཞེས་གསུངས་པ་ཡིན་ནོ། །སྒོ་བཅད་ན་ནི་ཁྱམས་ལ་སོགས་པ་དག་ཏུ་མངོན་པར་འདུ་བ་ཉིད་རྒྱུན་ཆད་པར་འགྱུར་བས་དེའི་ཚེ་ཁྱམས་ལ་སོགས་པ་ཡང་རྣལ་འབྱོར་བསྒོམ་པ་ལ་ཉེས་པ་མེད་དེ་གཉི་ག་བསྒྲུབ་པའི་ཕྱིར་མངོན་པར་འདུ་བར་ཡང་མི་བྱའོ་ཞེས་བྱ་བའི་ཚིག་སྨོས་སོ། །རྣམ་པར་གཡེང་བར་བྱེད་པ་དང་གཏུམ་པོ་དང་གྱ་ཚོམ་པ་དག་ཡོངས་
སུ་སྤང་བར་རིགས་སོ་ཞེས་བྱ་བ་ལ། རྣམ་པར་གཡེང་བར་བྱེད་པ་ཞེས་བྱ་བ་ནི། གནས་ཁང་སྟེ་དེར་མི་ལ་སོགས་པའི་སྒྲ་འབྱུང་བས་རྣམ་པར་གཡེང་བར་བྱེད་པའི་ཕྱིར་རོ། །དེ་དག་གནས་ཁང་དུ་སྒོམ་པར་བྱེད་པ་ན་བསམ་གཏན་དག་གི་ཆོར་མ་ནི་སྒྲ་ཡིན་པས་སེམས་རྩེ་གཅིག་པ་ཉིད་དུ་མི་བཏུབ་པ་ནས་བཅོམ་ལྡན་འདས་ཀྱིས་བཀའ་སྩལ་པ། གནས་ཁང་དུ་རྣལ་འབྱོར་བསྒོམ་པར་མི་བྱའོ་ཞེས་བྱ་བའི་བར་དུ་གསུངས་པ་ཡིན་ནོ། །གཏུམ་པོ་ཞེས་བྱ་བ་ནི་སེང་གེ་དང་སྟག་ལ་སོགས་པ་སྲོག་ཆགས་གཏམ་པོ་དག་སྟེ། གཏུམ་བརླང་ཆེ་བའི་ཕྱིར་རོ། །དེ་དག་དགོན་པར་སྒོམ་པར་བྱེད་ན་ཆོམ་རྐུན་པ་རྣམས་དང་གཡོན་ཅན་རྣམས་དང༌། སེང་གེ་རྣམས་དང༌། སྟག་རྣམས་དང༌། གུང་རྣམས་དང༌། གཟིག་རྣམས་ཀྱིས་བགྲོད་པར་གྱུར་པའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་བ་ནས་བཅོམ་ལྡན་འདས་ཀྱིས་བཀའ་སྩལ་པ། དགོན་པར་རྣལ་འབྱོར་བསྒོམ་པར་མི་བྱའོ་ཞེས་བྱ་བའི་བར་དུ་གསུངས་པ་ཡིན་ནོ། །གྱ་ཚོམ་པ་ཞེས་བྱ་བ་ནི། ཀྱལ་ཀ་ཅན་དང་ནལ་ཕྲུག་ལ་སོགས་པ་དག་སྟེ། གྱ་ཚོམ་དང་སྨྱོན་ཐབས་ཆེ་བའི་ཕྱིར་རོ། །དེ་དག་གྲོང་གི་ཉེན་འཁོར་དུ་དོ་ང་སྟེ། སྒོམ་པར་བྱེད་པ་དག་ལ་མ་དད་པ་དག་འདི་སྐད་ཅེས་འཕགས་པ་དག་འདི་ཅི་ཁྱེད་ཅག་འགའ་ཤི་བ་དང་ལྡན་པ་ཡིན་ནམ་ཞེས་ཅོ་འདྲི་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་ནས། བཅོམ་ལྡན་འདས་ཀྱིས་བཀའ་སྩལ་པ། སྤོང་ཁང་བརྩིག་པར་བྱའོ་ཞེས་བྱ་བའི་བར་དུ་གསུངས་པ་ཡིན་ཏེ། མདོ་འདིས་ནི་དེ་དག་བསྡུས་པ་ཡིན་ནོ། །དེའི་ཕྱིར་སྤང་ཁང་གི་སྐབས་བསྟན་པའི་ཕྱིར། སྤོང་ཁང་བརྩིག་པར་བྱའོ་ཞེས་བྱ་བ་སྨྲས་ཏེ། བསྒོམ་པའི་གནས་བརྩིག་པར་བྱའོ་ཞེས་བྱ་བའི་ཐ་ཚིག་གོ །དེའི་རྣམ་པ་ཅི་འདྲ་ཞེ་ན། དེའི་ཕྱིར། གནས་ཁང་གཉིས་ཀྱི་བར་དུ་སྤང་གདོད་དོ་ཞེས་བྱ་བ་སྨྲས་ཏེ། ངོས་ཡ་གཅིག་ཏུ་ཡང་གནས་ཁང་གཅིག་བརྩིགས་ལ་ངོས་ཡ་གཅིག་ཏུ་ཡང་གནས་ཁང་གཅིག་རྩིག་ཅིང་བར་དུ་སྲང་གདོད་པར་བྱ་བ་སྟེ། འདི་ནི་སྤོང་ཁང་དུ་ཆུང་དུའི་རྣམ་པ་ཡིན་ནོ། ལྔའམ་དྲུག་གིའོ་ཞེས་བྱ་བའི་བར་དུ་སྲང་གདོད་དོ་ཞེས་བྱ་བར་
སྦྱར་ཏེ། ངོས་ཡ་གཅིག་ཏུ་ཡང་གནས་ཁང་ལྔ་བརྩིགས་ལ་ངོས་ཡ་གཅིག་ཏུ་ཡང་གནས་ཁང་ལྔ་བརྩིག་ཅིང་བར་དུ་སྲང་གདོད་པར་བྱ་བའམ། ཡང་ན་ངོས་ཡ་གཅིག་ཏུ་ཡང་གནས་ཁང་དྲུག་བརྩིགས་ལ་ངོས་ཡ་གཅིག་ཏུ་ཡང་གནས་ཁང་དྲུག་བརྩིག་ཅིང་བར་དུ་སྲང་གདོད་པར་བྱ་བ་སྟེ། གནས་ཁང་བཅུ་བའམ་གནས་ཁང་བཅུ་གཉིས་པ་འདི་ནི་སྤང་ཁང་འབྲིང་གི་རྣམ་པ་ཡིན་ནོ། །འདི་ཡང་གནས་ཁང་བཞི་པ་ཡན་ཆད་བཅུ་པ་མན་ཆད་འབྲིང་པོ་གཞན་དག་གི་དཔེ་ཙམ་དུ་ཟད་དེ་དེ་དག་ཀྱང་གང་ཡང་རུང་ངོ༌། །སྒོ་གླེགས་སྒྲ་མི་འབྱུང་བ་དང་དྲང་བའི་ཐབས་ཀྱང་ངོ་ཞེས་བྱ་བ་ནི། བྱའོ་ཞེས་བྱ་བར་སྦྱར་ཏེ། འོག་ནས་སྒོ་ཁང་བྱའོ་ཞེས་འབྱུང་བ་ཡན་ཆད་ཀུན་འདིའི་རྗེས་སུ་སྦྱར་རོ། །གང་ལ་སྒྲ་མི་སྙན་པ་འབྱུང་བ་དེ་ལ་དེ་མི་འབྱུང་བའི་ཐབས་སུ་བྱའི། གང་ལ་སྒྲ་སྙན་པ་འབྱུང་བ་དེ་ལ་ནི་ཅི་དགར་བྱས་ཏེ་ཅི་ནས་ཀྱང་གནོད་པར་མི་འགྱུར་བ་དེ་ལྟར་ཐབས་བྱ་བའོ། །འདིས་ནི་བཅོམ་ལྡན་འདས་ཀྱིས་བཀའ་སྩལ་པ་སྒོ་གདོད་པར་བྱ་བའོ། །དགེ་སློང་དག་སྒྲོ་གླེགས་མི་འཇུད་ནས་བཅོམ་ལྡན་འདས་ཀྱིས་བཀའ་སྩལ་པ། སྒོ་གླེགས་གཞུག་པར་བྱའོ། །གཅད་དཀའ་ནས་བཅོམ་ལྡན་འདས་ཀྱིས་བཀའ་སྩལ་པ། ལག་གཟུངས་གདགས་པར་བྱའོ། །སྒྲ་འཁྲོལ་ནས་བཅོམ་ལྡན་འདས་ཀྱིས་བཀའ་སྩལ་པ། འོག་ཏུ་གོ་བའི་དུམ་བུ་གཞུག་པར་བྱའོ། །འབྱེད་དཀའ་ནས་བཅོམ་ལྡན་འདས་ཀྱིས་བཀའ་སྩལ་པ། ལག་གཟུངས་གདགས་པར་བྱའོ། །འབྱེད་པ་ན་སྒྲ་འཁྲིག་ནས་བཅོམ་ལྡན་འདས་ཀྱིས་བཀའ་སྩལ་པ། རས་མས་དཀྲི་བར་བྱའོ་ཞེས་གསུངས་པ་བསྡུས་པ་ཡིན་ནོ། །དེ་ལ་སྐྲ་མི་འབྱུང་བའི་ཐབས་ཤེས་པར་བྱ་བས་ནི་འོག་ཏུ་ཀོ་བའི་དུམ་བུ་གཞུག་པ་དང་རས་མས་དཀྲི་བར་བྱའོ་ཞེས་གསུངས་པ་བསྡུས་པ་ཡིན་ནོ། །དྲང་བའི་ཐབས་ཞེས་བྱ་བས་ནི་ཕྱི་ནང་གཉིས་སུ་ལག་གཟུངས་གཉིས་གདགས་པར་བྱའོ་ཞེས་གསུངས་པ་བསྡུས་པ་ཡིན་ནོ། །གོང་དུ་སུམ་ཆ་བོར་བར་སྐར་ཁུང་ཕྱི་རུབ་ལ་ནང་ཡངས་པ་ཡང་བཟང་ངོ་ཞེས་བྱ་བ་ནི། རྩིག་ངོས་ཀྱི་གོང་གི་ཆར་སུམ་ཆ་བོར་ཞིང་འོག་
ཏུ་ཡང་སུམ་གཉིས་ལུས་པའི་ཕྱོགས་གང་ཡང་རུང་བ་དེར་སྐར་ཁུང་བཏོད་ན་བཟང ་སྟེ་དམས་ན་ནི་
ཆོམ་རྐུན་པ་དང༌། གཡོན་ཅན་དང་སེང་གེ་ལ་སོགས་པ་དག་འཛུལ་བའི་ཕྱིར་རོ། །མཐོས་ན་ནི་སྣང་བ་གསལ་བར་མི་འགྱུར་རོ། །སྐར་ཁུང་དབྱིབས་ཇི་ལྟ་བུར་བྱ་ཞེ་ན། དེའི་ཕྱིར་ཕྱི་རུ་བལ་ནང་ཡངས་པ་བཟང་ངོ༌། །དྲ་བ་དང་སྒོ་གླགས་དང་འཕྲེད་གཉན་དང་གནམ་གཟེར་དང་འཁོར་གཏན་དང་དབྱུ་གུ་སྐམ་ཁ་ཉེ་བར་གཞག་གོ་ཞེས་བྱ་བ་ནི། བྱའོ་ཞེས་བྱ་བར་སྦྱར་རོ། །འདིས་ནི་ཁྭ་དང་མཆིལ་པ་དང་ཕུག་རོན་དག་འཇུག་ནས། བཅོམ་ལྡན་འདས་ཀྱས་བཀའ་སྩལ་པ། སྐང་ཁུང་དྲ་བ་ཅན་དུ་བྱའོ། །སྦྲང་བུ་ཏྲེ་མ་བུ་ག་དང་ཏྲེ་ལ་ཏཱ་ཀ་དག་འཇུག་ནས། བཅོམ་ལྡན་འདས་ཀྱིས་བཀའ་སྩལ་པ། སྒོ་གླེགས་གཞུག་པར་བྱའོ། །རླུང་གིས་འཕྱེ་ནས་བཅོམ་ལྡན་འདས་ཀྱིས་བཀའ་སྩལ་པ། འཕྲེད་གཏན་གཞུག་པར་བྱའོ། །གཅད་དཀའ་ནས་བཅོམ་ལྡན་འདས་ཀྱིས་བཀའ་སྩལ་པ། གནམ་གཟེར་དང་འཁོར་གཏན་གཞུག་པར་བྱའོ། །དབྱེ་དཀའ་ནས་བཅོམ་ལྡན་འདས་ཀྱིས་བཀའ་སྩལ་པ། དབྱུ་གུ་སྐམ་ཁ་ཅན་ཉེ་བར་གཞག་པར་བྱའོ་ཞེས་གསུངས་པ་བསྡུས་པ་ཡིན་ཏེ། །འཕྲེད་གཏན་དང་གནམ་གཟེར་དང་འཁོར་གཏན་དག་གིས་ནི་གཅད་པར་བྱའོ། །དབྱུ་གུ་སྐ་མཁས་ནི་དབྱེ་བར་བྱའོ་ཞེས་བྱ་བར་སྦྱར་རོ། །མི་ཤོང་ན་སྟེང་དུ་ཁང་མོ་ཆེ་བྱའོ་ཞེས་བྱ་བ་ནི། གལ་ཏེ་དགེ་སློང་དག་མང་བ་ཉིད་ཀྱི་ཕྱིར་སྤོང་ཁང་དུ་སྤོང་བ་དག་མི་ཤོང་བ་ལྟ་ན་དེའི་ཆེ་སྟེང་དུ་ཁང་མོ་ཆེ་བྱའོ། །ཡང་ན་ཡང་ཐོག་གོ་ཞེས་བྱ་བ་ནི་བྱའོ་ཞེས་བྱ་བར་སྦྱར་རོ། །མདོ་དེ་གཉིས་ཀྱིས་ནི་གཞུང་ཁ་ཅིག་ལས་དེ་དག་དེར་མི་ཤོང་ནས། བཅོམ་ལྡན་འདས་ཀྱིས་བཀའ་སྩལ་པ། ཐོག་ཏུ་ཁང་མོ་ཆེ་བྱའོ་ཞེས་གསུངས་པ་དང༌། གཞུང་ཁ་ཅིག་ལས་དེ་དག་དེར་མི་ཤོང་ནས། བཅོམ་ལྡན་འདས་ཀྱིས་བཀའ་སྩལ་པ། སྟེང་དུ་རིམ་ཁང་གཉིས་པ་བྱའོ་ཞེས་གསུངས་པ་བསྡུས་པ་ཡིན་ཏེ། དེ་གཉིས་ཀ་ཡང་འགལ་བ་མེད་པས་འདིར་མདོར་བསྡུས་སོ། །འཛེག་པའི་ཕྱིར་ཐེམ་སྐས་སོ་ཞེས་བྱ་བ་ནི། བྱའོ་ཞེས་བྱ་བར་སྦྱར་ཏེ་འཛེག་པའི་ཕྱིར་དེར་ཐེམ་སྐས་བྱའོ་ཞེས་བྱ་བའི་ཐ་ཚིག་གོ །མི་ལྟུང་བར་བྱ་བའི་ཕྱིར་ཁ་ཁྱེར་གྱིས་བསྐོར་བར་བྱའོ་ཞེས་བྱ་བ་ནི། ཐེམ་སྐས་ལ་ཞེས་བྱ་བར་སྦྱར་ཏེ། མི་དག་མི་ལྟུང་
པར་བྱ་བའི་ཕྱིར་ཐེམ་སྐས་ལ་ཁ་ཁྱེར་གྱིས་བསྐོར་བར་བྱ་བའོ། །དེ་མི་འགུལ་བར་བྱ་བའི་ཕྱིར་ལྕགས་ཀྱི་གཟེར་བུ་དག་གིས་གདབ་པོ་ཞེས་བྱ་བ་ནི། ཁ་ཁྱེར་དེ་མི་འགུལ་བར་བྱ་བའི་ཕྱིར། ལྕགས་ཀྱི་གཟེར་བུ་དག་གིས་གདབ་པར་བྱ་བའོ། །དེ་དག་གིས་ནི་དང་འཛེག་དཀའ་ནས་བཅོམ་ལྡན་འདས་ཀྱིས་བཀའ་སྩལ་པ། ཐེམ་སྐས་བྱའོ། །ལྟུང་བར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ཁ་ཁྱེར་གྱིས་བསྐོར་བར་བྱའོ། །དེ་འགུལ་ནས་བཅོམ་ལྡན་འདས་ཀྱིས་བཀའ་སྩལ་པ། ལྕགས་ཀྱི་གཟེར་བུ་དག་གིས་གདབ་པར་བྱའོ་ཞེས་གསུངས་པ་དེ་བསྡུས་པ་ཡིན་ནོ། །ཕྱི་རོལ་དུ་སྤོང་ཁང་ཆེན་པོའམ་གནས་ཁང་གི་ཚར་དག་ཀྱང་ངོ་ཞེས་བྱ་བ་ནི། བྱའོ་ཞེས་བྱ་བའི་རྗེས་བསྙགས་པའི་ཕྱིར་ཀྱང་ངོ་ཞེས་བྱ་བའི་སྒྲ་སྨོས་སོ། །སྤོང་ཁང་གི་ཕྱི་རོལ་དུ་སྤོང་ཁང་ཆེན་པོའམ་གནས་ཁང་གི་ཚར་དག་བྱ་བའོ། །འདིར་ཡང་འམ་ཞེས་བྱ་བའི་སྒྲ་ནི་ཚིག་གཉི་ག་ཡང་བསྡུ་བའི་ཕྱིར་རོ། །འདིས་ནི་འོན་ཀྱང་མ་ཤོད་ནས་བཅོམ་ལྡན་འདས་ཀྱིས་བཀའ་སྩལ་པ། ཕྱི་རོལ་དུ་སྤོང་ཁང་ཆེན་པོ་བྱའོ་ཞེས་གསུངས་པ་དང༌། གཞུང་ཁ་ཅིག་ལས་འོན་ཀྱང་མ་ཤོད་ནས་བཅོམ་ལྡན་འདས་ཀྱིས་བཀའ་སྩལ་པ། ཕྱི་རོལ་དུ་གནས་ཁང་གི་ཚར་དག་བྱའོ་ཞེས་གསུངས་པ་བསྡུས་པ་ཡིན་ནོ། །སྒོའི་ཐད་ཀར་སྒོ་གདོད་པར་མི་བྱའོ་ཞེས་བྱ་བ་ནི། གནས་ཁང་ཐམས་ཅད་ལ་སྒོ་གཅིག་གི་བྱང་ཐད་དུ་སྒོ་གཞན་གདོད་པར་མི་བྱ་བའོ། །འདི་ནི་དེ་དག་ཉེན་ཀོར་དུ་འགྱུར་བའི་སྒོ་དག་འདོད་ཅིང་ཕན་ཚུན་སྣང་ནས། བཅོམ་ལྡན་འདས་བཀའ་སྩལ་པ། སྒོ་དག་གཟུར་ཏེ་གདོད་པར་བྱའོ་ཞེས་གསུངས་པ་བསྡུས་པ་ཡིན་ནོ། །སྒོ་ཁང་བྱའོ་ཞེས་བྱ་ནི། སྤོང་ཁང་ལ་སྒོ་ཁང་བྱའོ། །ཕུག་ཀྱང་ངོ་ཞེས་བྱ་བ་ནི། དེའི་ཉེན་ཀོར་གྱི་ཆེད་དུ་ས་ཕུག་ལ་སོགས་པ་ཡང་བྱ་བའོ། །འདུག་པའི་ཆེད་དུ་སའི་སྟེགས་བུ་དག་དང་ཁྲིའུ་ཡང་བྱའོ་ཞེས་བྱ་བ་ནི། འདུག་པར་བྱ་བའི་ཆེད་དུ་ས་ལས་བྱས་པའི་སྟེགས་བུ་དག་དང་ཁྲིའུ་ཡང་བྱ་བའོ། །དེ་ནི་ཁོར་ཁོར་ཡུག་ ཏུ་ཁྲུ་བཞིས་འཁོར་བར་བཟང ་ངོ་ཞེས་བྱ་བ་ནི། ཁྲིའུ་དེ་ནི་ངོས་བཞི་ཁོར་ཁོར་ཡུག་ཁྲུ་བཞིས་འཁོར་བ་བཟང་སྟེ། ཁྲུ་བཞིས་ངོས་རེ་ལ་ཁྲུ་རེའི་ཚད་དུ་བྱའོ་ཞེས་
བྱ་བའི་ཐ་ཚིག་གོ །ཐགས་མ་ནི་རྣམ་པ་ལྔའོ་ཞེས་བྱ་བ་ནི། ཁྲིའུའི་སྟེང་དྲ་བར་བརྒྱུ་བའི་ཐགས་མ་རྒྱུ་ནི་རྣམ་པ་ལྔ་ཡོད་པའོ། །ལྔ་གང་ཞེ་ན། དེའི་ཕྱིར་མུན་ཛའི་དང་ཤ་ནའི་དང་གྲེས་མའི་དང་རས་མའི་དང་སྦ་ཕྲ་མོའིའོ་ཞེས་བྱ་བ་སྨྲས་ཏེ། རུང་བར་གྲགས་པ་བསྟན་པའི་ཕྱིར་མུན་ཛ་ལ་སོགས་པ་སྨོས་པར་ཟད་ཀྱི་འདིས་ཐ་གུ་ལ་སོགས་པ་བཀག་པ་ནི་མ་ཡིན་པར་ཤེས་པར་བྱའོ། །དེར་སྟན་ནང་ཚངས་ཅན་དག་གདིང་ངོ་ཞེས་བྱ་བ་ནི། ཁྲིའུ་དེའི་སྟེང་དུ་རས་བ་ལ་སོགས་པས་བརྫངས་པའི་སྟན་ནང་ཚངས་ཅན་དག་གདིང་བར་བྱ་བའོ། །དེའི་ཁོར་ཁོར་ཡུག་ ཏུ་མཐོ་གང་ལྷག་པ་ཉིད་བཟང ་ངོ་ཞེས་བྱ་བ་ནི། ཁྲིའུ་དེའི་ཁོར་ཁོར་ཡུག་ཏུ་སྟན་ནང་ཚངས་ཅན་དེའི་མཐའ་མ་མཐོ་རེ་རེ་ལྷག་ན་ བཟང་བ་སྟེ་དེ་ལྟར་ཁོར་ཁོར་ཡུག་ཏུ ་མཐོ་རེ་རེ་ལྷག་པར་བྱས་ན་འདུག་བ་ལ་སོགས་པ་ལ་ཁྲིའུ་དེ་མི་གནོད་ཅིང་སྟན་ནང་ཚངས་ཅན་དེའི་ཐ་མའི་རེག་པ་ཡང་འོག་ནས་གནོད་པར་མི་འགྱུར་རོ། །དེ་ལྟ་བས་ན་རྫས་སྲིད་དུ་ཁྲུ་བཞི་བ་ཞེང་དུ་ཁྲུ་དོ་ཡོད་པ་ཉིས་བལྟབ་ཏུ་བྱས་ཏེ་དྲུབ་པར་བྱའོ་ཞེས་བྱ་བའི་ཐ་ཚིག་གོ །སྟན་ནང་ཚངས་ཅན་དེའི་ནང་དུ་ཅིས་དགང་ཞེ་ན་དེའི་ཕྱིར། ཨརྒའི་དང་ཀ་ཤའི་དང་ཨེར་ཀའི་དང་སྤྲ་བའི་དང་ཤལ་མ་ལི་དག་གི་བལ་གྱིས་དགང་ངོ་ཞེས་བྱ་བ་སྨྲས་སོ། །ཡང་ན་བལ་དང་ཤ་ན་དང་རས་བལ་དང་རས་མ་དག་དང་ལོ་མའི་ཚོགས་དག་གིས་ཀྱང་ངོ་ཞེས་བྱ་བ་ཡང་སྨྲས་ཏེ། ཨརྒ་ལ་སོགས་པའི་བལ་གྱིས་བཀང་ན་ བཟང་ངོ༌། གྲགས་པ་བསྟན་པའི་ཕྱིར་དེ་དག་སྨོས་ཕར་ཟད་ཀྱི་གྲངས་དེ་དག་ཏུ ་ཆད་པ་ནི་མ་ཡིན་ཏེ། དེས་ན་ཤིང་བལ་གཞན་དག་གིས་བཀང་ན་ཡང་རུང་བ་ཁོ་ན་ཡིན་ནོ། །དོན་ཇི་ལྟ་བ་བཞིན་དུ་འདུག་པར་བྱ་བའི་ཕྱིར་མདོ་མདོར་བྱ་རོག་རྐང་དག་བྱའོ་ཞེས་བྱ་བ་ལ་དོན་ཇི་ལྟ་བ་བཞིན་དུ་ཞེས་བྱ་བ་ནི། སྟན་ནང་ཚངས་ཅན་གྱི་ནང་གི་ཕྱོགས་ཐམས་ཅད་དུ་ཤིང་བ་ལ་དག་ཁོད་སྙོམས་པར་འགྱུར་བ་སྟེ། དེ་ལྟར་ཁོང་སྙོམས་པར་འདུག་ཅིང་ཅི་ནས་ཀྱང་ཤིང་བལ་དེ་དག་སྟན་ནང་ཚངས་ཅན་གྱི་ཕྱོགས་པ་ཐམས་ཅད་དུ་སྙོམས་པར་ཁྱབ་ཅིང་གཞན་དུ་མི་འཆུགས་པར་བྱ་བའི་ཕྱིར་སྟེང་གི་མདོ་མདོར་སྲུབས་བྱ་རོག་གི་རྐང་པ་འདྲ་བ་དག་གིས་གཟུངས་གདབ་པར་བྱ་བའོ་ཞེས་བྱ་བའི་ཐ་ཚིག་གོ །
བསྒོམ་པ་ན་གཉིད་ཀྱི་གནོད་པ་བསལ་བའི་ཕྱིར། གཉིད་བྲོ་ན་གདོས་བུས་གདགས་པར་བྱའོ་ཞེས་བྱ་བ་སྨྲས་ཏེ། གདོས་བུ་ཞེས་བྱ་བ་ནི་ཤིང་བལ་ལ་སོགས་པ་ལས་བྱས་པའི་གདོས་བུ་ཆུ་ཚོད་ཀྱི་སྣོད་འདྲ་བ་ཆུད་དུ་མ་སྟེ་དེ་ལུང་མིག་ནས་སྐུད་པས་བཏགས་ཏེ་བསམ་གཏན་པ་རྣམས་གཉིད་བྲོ་ན་གདོས་བུ་དེ་རང་གྲི་རྣ་བ་ལ་བཏགས་ཏེ་དབྱང་བར་བྱ་བའོ། །འདིར་གཞུང་ནི་གཉིད་བྲོ་ན་གདོས་བུ་གདགས་པར་བྱའོ། །དེ་ལྟུང་ནས་བཅོམ་ལྡན་འདས་ཀྱིས་བཀའ་སྩལ་པ། སྐུད་པས་བཅིངས་ཏེ་རྣ་བ་ལ་གདགས་ཤིང་བསྲེལ་བར་བྱའོ་ཞེས་གསུངས་པ་ཡིན་ནོ། །དབྱུ་གུ་དལ་བུས་གཟུགས་པར་བྱའོ་ཞེས་བྱ་བ་ནི། སྤང་བ་པ་ཡུར་ན་སྤང་བའི་ཞལ་ཏ་པས་དབྱུ་གུ་དག་གིས་དལ་བུས་ཅི་ནས་དེའི་སེམས་གནས་པ་ཉིད་འདྲོགས་པར་མི་འགྱུར་བ་དེ་ལྟར་དལ་བུས་གཟུགས་པར་བྱའོ། །འདི་ནི་སྤོང་བའི་ཞལ་ཏ་བའི་ལས་ཡིན་ཏེ་དེས་དབྱུ་གུས་དལ་བུས་བཙུགས་པ་དེས་དེའི་གཉིད་སད་པར་འགྱུར་རོ། །སྣད་པར་མི་འགྱུར་བར་བྱ་བའི་ཕྱིར་བྲེའི་བཅད་འཕྲོ་ལྟ་བུ་རས་མ་དག་གིས་དཀྲིས་པས་སོ་ཞེས་བྱ་བ་ནི། དབྱུ་གུ་དེས་སྤོང་བའི་ལུས་སྣང་བར་མི་འགྱུར་བར་བྱ་བའི་ཕྱིར་དབྱུ་གུ་དེའི་རྩེ་མོ་བྲེ་ཞེས་བྱ་བ་གཞལ་སྣོད་ཀྱི་རྣམ་པ་དེའི་བཅད་འཕྲོ་ལྟར་མཉམ་པར་བྱ་ཞིང་དེ་ཡང་རས་མ་དག་གིས་དཀྲིས་པས་དལ་བུས་གཟུགས་པར་བྱ་བའོ། །རས་མ་ཞེས་སྨོས་པ་ནི་ངས་བལ་ལ་སོགས་པ་གཞན་དག་གི་དཔེ་ཙམ་དུ་ཟད་དོ། །འདིར་གཞུང་ནི་འོན་ཀྱང་ཡུར་ནས་བཅོམ་ལྡན་འདས་ཀྱིས་བཀའ་སྩལ་པ། དབྱུ་གུས་གཟུགས་པར་བྱའོ། །དགེ་སློང་དག་གིས་སྨྱིག་མ་བཙལ་ཏེ་དེས་འཛུགས་པ་ན་རྨ་བྱུང་ནས་བཅོམ་ལྡན་འདས་ཀྱིས་བཀའ་སྩལ་པ། བྲེའི་བཅད་འཕྲོ་ལྟ་བུར་བྱའོ། །འོན་ཀྱང་སྣད་ནས་བཅོམ་ལྡན་འདས་ཀྱིས་བཀའ་སྩལ་པ། རས་མ་དག་གིས་དཀྲིས་ནས་དལ་བུས་ཁད་ཀྱིས་ཁད་ཀྱིས་གཟུགས་པར་བྱའོ་ཞེས་གསུངས་པ་ཡིན་ནོ། །ཕོ་ལོང་འཕང་བར་བྱའོ་ཞེས་བྱ་བ་ནི། སྤོང་བ་པ་ཡུར་བ་སྤོང་བའི་ཞལ་ཏ་པས་ཕོ་ལོང་འཕང་བར་བྱའོ། །ཡང་ཕྱིར་འོང་བར་བྱ་བའི་ཕྱིར་ཐ་གུས་གདགས་པར་བྱའོ་ཞེས་བྱ་བ་ནི། ཕོ་ལོང་དེ་ཡང་ཕྱིར་དྲང་བར་བྱ་བའི་ཕྱིར་ཐ་གུ་ཕྲ་མོ་རིང་པོས་བཏགས་ཏེ་འཕང་བར་བྱའོ། །དེ་ལྟར་བྱས་ན་ཡང་དང་
ཡང་དུ་འཕང་ཞིང་ཕྱིར་བླངས་སླ་བར་འགྱུར་རོ། །འདིར་གཞུང་ནི་འོན་ཀྱང་ཡུར་ནས། བཅོམ་ལྡན་འདས་ཀྱིས་བཀའ་སྩལ་པ། ཕོ་ལོང་འཕང་བར་བྱའོ། །དགེ་སློང་དག་གིས་མུན་ཁུང་ན་མི་མཐོང་ནས་བཅོམ་ལྡན་འདས་ཀྱིས་བཀའ་སྩལ་པ། ཐ་གུས་བཏགས་ཏེ་འཕང་བར་བྱ་ཞིང་དེ་ནས་ཡང་ཕྱིར་དྲང་བར་བྱའོ་ཞེས་གསུངས་པ་ཡིན་ནོ། །མདུན་དུ་མར་མེ་གཞག་པར་བྱའོ་ཞེས་བྱ་བ་ནི། འོན་ཀྱང་ཡུར་ན་སྤང་བའི་ཞལ་ཏ་པས་དེའི་མངོན་སུམ་དུ་མར་མེ་གཞག་པར་བྱའོ། །འདིར་གཞུང་ནི་འོན་ཀྱང་ཡུར་ནས་བཅོམ་ལྡན་འདས་ཀྱིས་བཀའ་སྩལ་པ། མདུན་དུ་མར་མེ་གཞག་པར་བྱའོ་ཞེས་གསུངས་པ་ཡིན་ནོ། །འོན་ཀྱང་གཉིད་མ་སངས་ན་རྐང་པ་དབྱུང་ངོ༌། །འོན་ཀྱང་མ་སངས་ན་ཡ་གཅིག་ཀྱང་ངོ་ཞེས་བྱ་བ། རྐང་པ་ཡ་གཅིག་ཀྱང་དབྱུང་བར་བྱ་བའོ། །འདིར་གཞུང་ནི་འོན་ཀྱང་ཡུར་ནས་བཅོམ་ལྡན་འདས་ཀྱིས་བཀའ་སྩལ་པ། རྐང་པ་ཡ་གཅིག་བརྐྱང་བར་བྱའོ། །འོན་ཀྱང་ཡུར་ནས་བཅོམ་ལྡན་འདས་ཀྱིས་བཀའ་སྩལ་པ། རྐང་པ་ཡ་གཅིག་ཀྱང་བརྐྱང་བར་བྱའོ་ཞེས་གསུངས་པ་ཡིན་ནོ། །མི་འཐོམ་པར་བྱ་བའི་ཕྱིར་འཕྲེང་ཐག་དེ་ལྟ་བུ་ལ་བསྐོན་པའི་སྤུ་གུ་འམ་དེ་ལ་བཏགས་པའི་ཐ་གུ་ལ་འཇུས་ཏེ་བཅག་པར་བྱའོ་ཞེས་བྱ་བ་ནི། དགེ་སློང་སྤང་བ་པ་མུན་ཁུང་ན་འཆག་པ་ལམ་མི་རྩོལ་ཞིང་མི་འཐོམ་པར་བྱ་བའི་འཆགས་མགོ་མཇུག་སླེབས་པའི་འཕྲེང་ཐག་ཐང་ཆད་རབ་ཏུ་བརྒྱངས་པ་དེ་ལྟ་བུ་ལ་སྨྱིག་མའི་སྤུ་གུ་ལ་སོགས་པ་བསྐོན་པ་ལ་འཇུས་ཏེ་བཅག་པར་བྱ་བ་འམ་ཡང་ན་སྤུ་གུ་དེ་ལ་བཏགས་པའི་བ་གུ་ལ་འཇུས་ཏེ་སྤུ་གུ་ཕར་ཁྲིད་ཚུར་ཁྲིད་ཅིང་བཅག་པར་བྱ་བའོ། །འདིར་གཞུང་ནི་འོན་ཀྱང་ཡུར་ནས་བཅོམ་ལྡན་འདས་ཀྱིས་བཀའ་སྩལ་པ། ལངས་ཏེ་བཅག་པར་བྱའོ། །དགེ་སློང་དག་འཆག་པ་ན་འཐོམ་ནས་བཅོམ་ལྡན་འདས་ཀྱིས་བཀའ་སྩལ་པ། འཕྲེང་ཐག་ལ་འཇུ་པར་བྱའོ། །དེ་དག་ལག་པས་ཆང་རྒྱུད་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། སྤུ་གུ་བསྐོན་ལ་སྐུད་པས་བཏགས་པ་ལ་འཇུས་ཏེ་བཅག་པར་བྱའོ་ཞེས་གསུངས་པ་ཡིན་ནོ། །འདི་ལྟར་གཙུག་ལག་ལས་སྤུ་གུ་ལ་འཇུས་ཏེ་ཞེས་མ་གསུངས་མོད་ཀྱི་འོན་ཀྱང་རུང་བར་སྣང་བས་དེས་ན་ལོགས་ཤིག་ཏུ་སྨོས་སོ། །མཆིལ་ལྷམ་ཅན་གྱིས་
བཅག་པར་མི་བྱའོ་ཞེས་བྱ་བ་ནི། སྤོང་བ་པ་ཉི་ཚེར་མ་ཟད་ཀྱི་གཞན་ཐམས་ཅད་ཀྱིས་ཀྱང་མི་བྱ་སྟེ། འདི་ནི་ཐམས་ཅད་དུ་མ་གུས་པར་འགྱུར་བ་ཡིན་པས་ན་མ་གུས་པ་ཡོངས་སུ་སྤང་པར་བྱ་བའི་ཕྱིར་བཀག་པ་ཡིན་ནོ། །རྐང་པ་གཉིས་ལ་རྡུལ་མི་འགོ་པར་བྱ་བའི་ཕྱིར་པར་ཏང་གདིང་བར་བྱའོ་ཞེས་བྱ་བ་ནི། འཆག་པའི་ཚེ་རྐང་པ་གཉིས་ལ་རྡུལ་མི་འགོ་བར་བྱ་ཞིང་རྐང་པ་རྡུལ་ཅན་གྱིས་སྐྱིལ་མོ་ཀྲུང་བཅས་པ་ན་གོས་མ་རུང་བར་མི་བྱ་བའི་ཕྱིར། འཆག་སར་པར་ཐང་གདིང་བར་བྱའོ། །འདིར་པར་ཐང་ཞེས་སྨོས་པ་ནི་དབྱམ་པོ་དང་སྟན་གཞན་དག་གི་དཔེ་ཡིན་ནོ། །སྤོང་བ་པས་ཞག་གསུམ་ཞིང་རྐང་པ་གཉིས་བསྐུ་བར་བྱའོ་ཞེས་བྱ་བ་ནི། ཞག་གསུམ་གསུམ་ཞིང་རྐང་པ་གཉིས་བསྐུ་བར་བྱའོ། །འདིར་བསྐུ་བ་ཙམ་དུ་གསུངས་པར་ཟད་ཀྱི་འབྲུ་མར་ལ་སོགས་པས་ཧ་ཅང་སྣུམ་པོར་བྱ་བ་ནི་མ་ཡིན་ཏེ། འདི་ལྟར་དིང་སང་ཡང་ཡུལ་དབུས་ན་དང་པོར་རྐང་པ་གཉིས་འཁྲུ་ཞིང་ཕྱིས་ཅུང་ཟད་ཙམ་སྐུད་པར་བྱེད་དེ་དེས་ན་གོས་ལ་སོགས་པ་སྣུམ་པོ་ཉིད་དུ་མི་འགྱུར་རོ། །མ་ནུས་ན་དེར་ཡང་ཉལ་བར་བྱའོ་ཞེས་བྱ་བ་ནི། གཉིད་བྲོ་བ་བསང་བར་མ་ནུས་ན་རྣལ་འབྱོར་གྱི་གནས་དེར་ཡང་ཉལ་བ་ལ་ཉེས་པ་མེད་པའོ། །སྒོ་བཅད་པར་རོ་ཞེས་བྱ་བ་ནི། སྒོ་གླེགས་ལ་སོགས་པས་སྒོ་བཅད་པ་དེར་ཉལ་བ་ལ་ཉེས་པ་མེད་པའོ། །འདི་ནི་གཞན་དག་མ་དད་པར་འགྱུར་བ་དང་མཐོ་བཙམས་པར་འགྱུར་པ་སྤང་པའི་ཕྱིར་རོ། །གློས་ཀྱང་ཕབ་སྟེའོ་ཞེས་བྱ་བ་ནི། ཉལ་དུ་རུང་ངོ་ཞེས་བྱ་བའི་ཐ་ཚིག་གོ །སྤོང་པའི་ཕྱིར་ཞལ་ཏབ་བསྒོ་བར་བྱའོ་ཞེས་བྱ་བ་ནི། དགེ་སློང་སྤོང་བ་པ་རྣམས་ཀྱི་ཕྱིར་སྤོང་པའི་ཞལ་ཏ་བྱེད་པ་ནི་སྤོང་པའི་ཞལ་ཏ་བཞེས་བྱ་སྟེ། དེ་དགེ་འདུན་གྱིས་གསོལ་བ་དང་གཉིས་ཀྱི་ལས་ཀྱིས་བསྒོ་བར་བྱ་བའོ། །དེའི་བྱ་བ་ནི་ལངས་མ་ཐག་ཁོ་ནར་ཆགས་ཆག་གདབ་པ་དང་ཕྱག་དར་བྱ་བ་དང་ལྕི་བ་སར་བའི་བྱུག་པས་བསྐུ་པར་བྱའོ་ཞེས་བྱ་བ་ལ། དེའི་བྱ་བ་ཞེས་བྱ་བ་ནི། སྤོང་བའི་ཞལ་ཏ་པ་དེས་ལས་སུ་བྱ་བ་སྟེ་དེས་བྱ་བའི་ལས་འོག་ནས་འབྱུང་བ་ཐམས་ཅད་དང་སྤྱིར་སྦྱར་རོ། །ལངས་མ་ཐག་ཁོ་ནར་ཞེས་བྱ་བ་ནི་ནམ་ལངས་མ་ཐག་ཁོ་ནར་ལངས་ནས་སོ། །ཆག་ཆག་གདབ་པ་ལ་སོགས་པ་ནི་གནས་གང་དུ་སྤོང་བ་པ་དག་སྤོང་པར་བྱེད་པ་དེར་ཆག་ཆག་ལ་སོགས་པ་གདབ་
པའོ། །སྟན་བཤམ་པར་བྱའོ་ཞེས་བྱ་བ་ནི། དེར་སྟན་དག་གདིང་པར་བྱ་བའོ། །མི་གཙང་བའི་སྐྱབས་གཉིས་བྱི་དོར་བྱའོ་ཞེས་བྱ་བ་ནི། བཤད་པ་དང་གཅི་བའི་ས་གཉིས་བྱི་དོར་བྱ་བའོ། །ཆག་ཆག་ལ་སོགས་བས་སོ་ཞེས་བྱ་བ་ལ་སོགས་པའི་སྒྲས་ནི་ཕྱག་དར་བྱ་བ་དང༌། ལྕི་བ་སར་པའི་བྱུག་པས་བསྐུ་བདག་བསྡུ་སྟེ། དེ་དག་གིས་ཕྱི་རོལ་ཆེ་ཆུང་གིས་དག་བྱི་དོར་བྱའོ། །བོང་རྡོག་དང་ས་དང་ཆུ་དག་གཞག་པར་བྱའོ་ཞེས་བྱ་བ་ནི། དག་པར་བྱ་བའི་ཕྱིར་ཆབ་ཁུངས་དག་ཏུ་དེ་དག་གཞག་པར་བྱ་བའོ། །འདི་སྐད་བསྟན་ཏེ། ཆབ་ཁུངས་དེར་བོང་རྡོག་དང་ས་དང་དུས་དད་མཐུན་པའི་ཆུ་དག་གཞག་པར་བྱའོ། །བསྡུ་བའི་ཕྱིར་གཎྜཱི་བརྡུང་ངོ་ཞེས་བྱ་བ་ནི། རྣལ་འབྱོར་གྱི་གནས་དེར་སྤོང་བ་པ་དག་བསྡུ་བའི་ཕྱིར་གཎྜཱི་བརྡུང་བར་བྱ་བའོ། །དེའི་གནས་ནི་ཁང་སྟོང་ངོ་ཞེས་བྱ་བ་ནི། གཎྜཱི་བརྡུང་བའི་གནས་ནི་ཁང་སྟེང་ཡིན་ནོ། །དེ་ཡང་ཕྱོགས་མཐོན་པོ་གང་ཡང་རུང་བ་དག་གི་དཔེ་ཡིན་ནོ། །དགེ་འདུན་བསྡུ་བའི་ཕྱིར་ནི་རྒྱུད་གསུམ་དང་དེ་སྙེད་ཀྱི་ཏོག་དག་གོ་ཞེས་བྱ་བ་ནི། དགེ་འདུན་བསྡུ་བའི་ཕྱིར་གཎྜཱི་བརྡུང་བ་ལ་ནི་བསླབ་པའི་རྒྱུན་ལན་གསུམ་བརྡུང་ཞིང་མཇུག་ཏུ་ཏོག་ཀྱང་དེ་སྙེད་བྱ་སྟེ། མཇུག་ཏུ་ཏོག་སྒྲ་ཆེན་པོ་ནན་གསུམ་བྱ་བའི་ཐ་ཚིག་གོ། ལས་བྱ་བའི་དོན་དུ་ནི་རྒྱུད་གཅིག་དང་ཏོག་གསུམ་མོ་ཞེས་བྱ་བ་ནི། ལས་བྱ་བའི་དོན་དུ་གཎྜཱི་བ་རྡུང་བ་ལ་ནི་རྒྱུད་གཅིག་དང་ཏོག་གསུམ་བརྡུང་ངོ་ཞེས་བྱ་བའི་ཐ་ཚིག་གོ །ཁ་ཅིག་ལས་ནི་རྒྱུད་གསུམ་དང་ཏོག་གཉིས་སོ་ཞེས་བྱ་བ་ནི། ལུགས་ཁ་ཅིག་ལས་ལས་བྱ་བའི་དོན་དུ་གཎྜཱི་བརྡུང་བ་ལ་ནི་རྒྱུད་གསུམ་དང་ཏོག་གཉིས་ཞེས་ཀྱང་འབྱུང་ངོ༌། །ཤི་བ་ལ་ཕྲག་པ་དབྱུང་བའི་དོན་དུ་ནི་བྱི་བའོ་ཞེས་བྱ་བ་ནི། ཤི་བའི་དོན་དུ་འདུས་ཤིང་ཁྱོགས་ཕྲག་པས་འདེགས་པ་ལ་སོགས་པའི་དོན་དུ་གཎྜཱི་བརྡུང་བ་ནི་བྱི་བོ་སྟ། བྱི་བོ་ཞེས་བྱ་བ་ནི། རྒྱུད་ཉི་ཚེ་བརྡུང་ཞིང་མཇུག་ཏུ་ཏོག་མི་བརྡུང་བ་ཡིན་ནོ། །ཁ་ཅིག་ལས་ནི་རྒྱུད་གཅིག་དང་ཏོག་གཅིག་གོ་ཞེའོ་ཞེས་བྱ་བ་ནི། ལུགས་ཁ་ཅིག་ལས་ཤི་བའི་དོན་དུ་གཎྜཱི་བརྡུང་བ་ནི་རྒྱུད་གཅིག་དང་ཏོག་གཅིག་གོ་ཞེས་ཀྱང་འབྱུང་ངོ༌། །སྤོང་བ་པའི་དོན་དུ་ནི་ཁར་གསིལ་ལོ་ཞེས་བྱ་བ་ནི། སྤོང་བ་པ་སྤོང་བ་ལ་འདུ་བའི་དོན་དུ་ནི་ཁར་གསིལ་
གྱིས་གཎྜཱིའི་བྱི་བོ་བྱའོ་ཞེས་བྱ་བའི་ཐ་ཚིག་གོ །ཁ་ཅིག་ལས་ནི་གཎྜཱི་ཆུང་དུ་ཞེའོ་ཞེས་བྱ་བ་ནི། ལུག་ཁ་ཅིག་ལས་ནི་སྤོང་པ་པའི་དོན་དུ་གཎྜཱི་ཆུང་དུ་བརྡུང་ངོ་ཞེས་ཀྱང་འབྱུང་ངོ༌། །གནོད་པ་བྱུང་བ་ལ་ནི་ཅི་ཙམ་གྱིས་ཆོག་པའོ་ཞེས་བྱ་བ་ནི། གནོད་པ་བྱུང་བའི་ཚེ་གཎྜཱི་བརྡུང་བ་ནི་ཇི་ཙམ་གྱིས་ཆོག་པ་དེ་ཙམ་དུ་བརྡུང་བར་བྱ་སྟེ། ནམ་ཞི་བར་གྱུར་གྱི་བར་དུ་བརྡུང་ངོ་ཞེས་བྱ་བའི་ཐ་ཚིག་གོ །ཟན་གྱི་ཕྱིར་འདུ་བའི་དོན་དུ་གཎྜཱི་དང་གཎྜཱི་ཆུང་དུ་གཉིས་ཀ་བརྡུང་ངོ་ཞེས་བྱ་བ་ནི། ཟན་གྱི་ཕྱིར་འདུ་བ་གང་ཡིན་པ་དེའི་དོན་དུ་ནི་གཎྜཱི་དང་གཎྜཱི་ཆུང་དུ་གཉི་ག་བརྡུང་བར་བྱའོ། །ཅི་དེ་གཉིས་ཅིག་ཆར་རམ་མཇུག་ཐོགས་སུ་བརྡུང་བར་བྱ་ཞེ་ན་མ་ཡིན་ཏེ་དེའི་ཕྱིར། བར་དུ་བཅད་དེའོ་ཞེས་བྱ་བ་སྨྲས་སོ། །ཇི་ཙམ་གྱིས་བར་དུ་བཅད་དེ་ཞེན་དེའི་ཕྱིར། པས་སོ་ཞེས་བྱ་བ་སྨྲས་ཏེ། དུས་ཇི་ཙམ་གྱིས་སངས་རྒྱས་མཆོད་པ་དང༌། ལྟུང་བཟེད་བཀྲུ་བ་ལ་སོགས་པའི་ལས་འགྲུབ་པར་འགྱུར་བའི་དུས་དེ་ཙམ་གྱི་མདུན་རོལ་དུ་གཎྜཱི་ཆུང་དུ་བརྡུངས་ལ། ཁང་སྐྱོང་དང་གཙང་སྦྱོར་ལ་སོགས་པས་སངས་རྒྱས་མཆོད་པ་དང༌། ལྷུང་བཟེད་བཀྲུ་བ་ལ་སོགས་པའི་ལས་བྱས་ནས། དེའི་འོག་ཏུ་གདུགས་ཚོད་ལ་བབ་པའི་ཚེ་གཎྜཱི་ཆེན་པོ་བརྡུང་ཞིང་དགེ་འདུན་ཐམས་ཅད་ཟས་ཀྱི་ཕྱིར་བསྡུ་བར་བྱའོ་ཞེས་བྱ་བའི་ཐ་ཚིག་གོ །འདུས་པ་ཆེ་བའི་ཚེ་གཎྜཱི་བརྡུངས་པས་གོ་བར་མི་འགྱུར་བ་ལྟ་ན་དུང་བསྒྲིལ་ཏེ་བུད་པར་བྱའོ་ཞེས་བྱ་བ་ནི། ཟན་གྱི་ཕྱིར་འདུ་བའི་དོན་དུ་གཎྜཱི་བརྡུངས་པ་ནས་དགེ་འདུན་འདུས་པ་ཕལ་ཆེ་བའི་ཚེ་གཎྜཱི་བརྡུངས་པས་ཐོས་ཤིང་གོ་བར་མི་འགྱུར་བ་ལྟ་ན་དུང་ཆེན་པོ་གཉིས་གཅིག་ཏུ་བསྒྲིལ་ཏེ་བུད་པར་བྱའོ། །རྔ་བོ་ཆེ་དག་བརྡུང་བར་བྱའོ་ཞེས་བྱ་བ་ནི། དེའི་ཚེ་རྔ་བོ་ཆེ་དག་ཀྱང་སྒྲ་ཆེར་བརྡུང་བར་བྱའོ། །འདིར་གཞུང་ནི་གླེང་གཞི་དག་ལས་དགེ་སློང་རྣམས་ཀྱི་འདུས་པ་ཆེན་པོའི་ཚེ་ཅ་ཅོ་ཆེན་པོ་བྱུང་ནས་བཅོམ་ལྡན་འདས་ཀྱིས་བཀའ་སྩལ་པ། གཎྜཱི་ཆུང་དུ་བརྡུངས་ནས་གཎྜཱི་བརྡུང་བར་བྱའོ། །འོན་ཀྱང་དགེ་སློང་ཉིན་མོ་སྤྱོད་པ་ལ་ཞུགས་པ་གཞན་དག་གིས་མ་ཐོས་ནས་བཅོམ་ལྡན་འདས་ཀྱིས་བཀའ་སྩལ་པ། དུང་བསྒྲིལ་ལ་དག་བུད་པར་བྱའོ། །རྔ་བོ་ཆེ་དག་བརྡུང་བར་བྱའོ་ཞེས་
གསུངས་པ་ཡིན་ནོ། །སྐབས་འདི་དག་ཏུ་བརྡུང་བ་ནི་དཔེ་ཙམ་དུ་ཟད་དེ་གནས་མལ་མནོད་པ་ལ་སོགས་པའི་དོན་དག་ལ་ཡང་གཎྜཱི་ལ་སོགས་པ་བརྡུང་དགོས་པའི་ཕྱིར་རོ། །གཎྜཱི་བརྡུངས་པར་མི་འགྲོ་བར་མི་བྱའོ་ཞེས་བྱ་བ་ནི། གཎྜཱི་གང་དང་གང་དུ་བརྡུངས་པ་དེར་རྣ་ལ་གཟན་ཞིང་མི་འགྲོ་བར་མི་བྱའི་འགྲོ་བ་ཁོ་ནར་བྱ་བའོ། །རྣམ་པར་འབྱེད་པ་ལ་སོགས་པ་ལས་ཀྱང་གཎྜཱིའི་ཕྱིར་འགྲོ་བར་བྱའོ་ཞེས་གསུངས་པའི་ཚིག་སྣང་ངོ༌། །གཎྜཱི་བརྡུང་བ་ནི་འདུ་བའི་ཕྱིར་སྦྲན་པ་ཡིན་པས་དེའི་ཕྱིར་འདིར་དོན་ཅི་ཞིག་བྱུང་ཞེས་ངེས་པར་ཤེས་པར་བྱ་བའི་ཕྱིར་དེར་འགྲོ་པར་བྱའོ། །འདི་ལྟར་དེར་བདག་གིས་དོན་མེད་པས་ཁོ་བོ་མི་གཏོགས་ཀྱིས་འགྲོ་བར་མི་བྱའོ་སྙམ་དུ་བསམ་པར་མི་བྱའོ། །མི་མྱུར་བར་མི་བྱའོ་ཞེས་བྱ་བ་ནི། གཎྜཱིའི་ཕྱིར་མྱུར་བ་ཁོ་ནར་འགྲོ་བར་བྱའོ་ཞེས་བྱ་བར་སྦྱར་རོ། །བྱ་བ་འགྲུབ་པའི་དུས་ཀྱི་ལྷག་མ་ལུས་ཙམ་ན་རྒྱུན་ཆགས་གསུམ་པ་གདོན་ཅིང་ཅི་བདེར་བྱའོ་ཞེས་བྱ་བ་ནི། སྤོང་བའི་ཞལ་ཏ་བས་དུས་ཅི་ཙམ་གྱིས་དགེ་སློང་སྤོང་བ་པ་དག་གིས་མཆོད་རྟེན་ལ་ཕྱག་བྱ་བ་དང་ལྟུང་བཟེད་བཀྲུ་བ་དང༌། བསོད་སྙོམས་ལ་འགྲོ་བ་ལ་སོགས་པའི་བྱ་བ་འགྲུབ་པའི་དུས་ཀྱི་ལྷག་མ་དེ་ཙམ་ལུས་པ་ན་རྒྱུན་ཆགས་གསུམ་པ་གདོན་ཅིང་སྤོང་བ་པ་དག་ཅི་བདེར་བྱའོ། །སྤོང་བའི་ཞལ་ཏ་པས་ཚེ་དང་ལྡན་པ་དག་ད་ནི་ཅི་བདེར་སྤྱོད་ཅིག་ཅེས་བག་ཡངས་སུ་བྱ་བའི་ཐ་ཚིག་གོ །དེ་རན་པར་བྱའོ་ཞེས་བྱ་བ་ནི། རྒྱུན་ཆགས་གསུམ་པ་གདོན་པ་དེ་ཧ་ཅང་ཉུང་བ་ཡང་མ་ཡིན་ཧ་ཅང་མང་བ་ཡང་མ་ཡིན་པར་ཅི་རན་ཅིག་གདོན་པར་བྱ་བའོ། །ཡོན་བཤད་པར་བྱའོ་ཞེས་བྱ་བ་ནི། རྒྱུན་ཆགས་གསུམ་པ་བཏོན་པའི་འོག་ཏུ་སྦྱིན་པའི་ཕན་ཡོན་བཤད་པར་བྱ་བའོ། །དེ་ཡང་ཇི་ལྟར་བྱ་ཞེན་དེའི་ཕྱིར། རན་པར་རོ་ཞེས་བྱ་བ་སྨྲས་ཏེ། མང་ཉུང་རན་པར་བྱའོ། །འདིར་གཞུང་ནི་འདི་ལྟར་དེ་དག་དུས་རྟིང་ལ་ཐུག་པ་ན་ཅི་བདེར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། དུས་རྟིང་ལ་ཐུག་པན་ཅི་བདེར་མི་བྱ་བར་དུས་ཤེས་པར་བྱས་ནས་ཅི་བདེར་བྱ་སྟེ། གང་དག་དགེ་འདུན་ལས་འཐོབ་པ་དེ་དག་ཀྱང་ཁྲུས་བྱས་ཏེ་དགེ་འདུན་གྱི་ནང་དུ་འདུ་ཁོམ་པ་དང་གང་དག་
བསོད་སྙོམས་པ་དེ་དག་ཀྱང་རྐང་པ་དང༌། ལག་པ་བཀྲུས་ཏེ་གྲོང་དུ་བསོད་སྙོམས་ལ་འཇུག་ཁོམ་པར་བྱའོ་ཞེས་གསུངས་པ་ཡིན་ནོ། །མཚན་མོའི་མཇུག་ཏུ་ཡང་དུས་ཇི་ཙམ་གྱིས་མཚན་འདའ་བར་འགྱུར་བ་དེ་ཙམ་ན་ཅི་བདེར་བྱའོ། །སྤོང་བའི་ཞལ་ཏ་བ་སྔར་འདུ་ཞིང་མཇུག་ཏུ་འགྱེས་པར་བྱའོ་ཞེས་བྱ་བ་ནི། སྤོང་བའི་ཞལ་ཏ་བྱེད་པའི་དགེ་སློང་དེ་དགེ་སློང་སྤོང་བ་པ་དག་མ་འདུས་པའི་མདུན་དུ་འདུ་བར་བྱ་ཞིང་དེ་དག་གྱེས་པའི་མཇུག་ཏུ་འགྱེས་པར་བྱ་བའོ། །གལ་ཏེ་རྐྱེན་དེ་ལྟ་བུ་བྱུང་ན་ལྡེ་མིག་སྦས་པ་བསྟན་པར་བྱའོ་ཞེས་བྱ་བ་ནི། སྤོང་བའི་ཞལ་ཏ་པ་དེ་ལ་གལ་ཏེ་དོན་གློ་བུར་གྱི་དབང་གིས་སྔར་འདུར་མི་ཁོམ་པ་དེ་ལྟ་བུའི་རྐྱེན་དག་བྱུང་ན་སྤོང་བའི་གནས་ཀྱི་ལྡེ་མིག་གང་དུ་སྦས་པ་དེ་དགེ་སློང་སྤོང་བ་བདག་ལ་བསྟན་པར་བྱའོ། །འདི་སྐད་བསྟན་ཏེ། སྔར་ལྡེ་མིག་འགའ་ཞིག་གི་ལག་ཏུ་གཞག་གམ་ཕྱོགས་གཞིག་ཏུ་སྦས་ནས་བདག་ཉིད་སྔར་འགྲོ་མི་ཁོམ་ན་དེས་དགེ་སློང་སྦོང་བ་པ་གཞན་དག་སྣང་ན་ལྡེ་མིག་འདིའི་ལག་ན་ཡོད་དོ་ཞེ་འམ། ཕྱོགས་འདི་ན་འདུག་གོ་ཞེས་བསྟན་པར་བྱའོ། །གསོ་སྦྱོང་གི་གཞི་ལས་ཞི་གནས་ཀྱི་གསོ་སྦྱོང་གི་སྐབས་སོ་ཞེས་བྱ་བ་དེ་བཤད་ཟིན་ཏོ།། །།ད་ནི་གསོ་སྦྱོང་གི་གཞི་ལས་མཐུན་པའི་གསོ་སྦྱོང་གི་སྐབས་བརྗོད་པར་བྱ་སྟེ། དེ་ལ་དང་པོར་མཐུན་པའི་གསོ་སྦྱོང་གི་གནས་བསྟན་པའི་ཕྱིར། གསོ་སྦྱོང་གི་གནས་ལ་བློ་མཐུན་པར་བྱའོ་ཞེས་བྱ་བ་སྨྲས་ཏེ། གནས་གང་དུ་གསོ་སྦྱོང་མངོན་དུ་བྱེད་པའི་གནས་དེ་ནི་གསོ་སྦྱོང་གི་གནས་ཞེས་བྱ་སྟེ། གནས་དེར་གསོ་སྦྱོང་བྱ་བར་དགེ་འདུན་གྱིས་གསོལ་བ་དང་གཉིས་ཀྱི་ལས་ཀྱིས་བློ་མཐུན་པར་བྱའོ། །གསོ་སྦྱོང་གི་གནས་ཇི་ལྟ་བུ་དེ་ལ་བློ་མཐུན་པར་བྱ་ཞེ་ན་དེའི་ཕྱིར། གནས་ཐམས་ཅད་གྲུབ་པའམ་བྱས་པའམ་ཟིན་པ་ལའོ་ཞེས་བྱ་བ་སྨྲས་ཏེ། གནས་གང་ལ་ཐམས་ཅད་གྲུབ་པའམ་ཐམས་ཅད་བྱས་པ་འམ་ཐམས་ཅད་ཟིན་པ་ཡོད་པ་དེ་ནི་གནས་ཐམས་ཅད་གྲུབ་པའམ་བྱས་པའམ་ཟིན་ཏེ། གསོ་སྦྱོང་གི་གནས་རྣམ་པ་ཐམས་ཅད་ཡོངས་སུ་གྲུབ་པ་གང་ཡིན་པ་དེ་ལ་བློ་མཐུན་པར་བྱའོ། །དེ་ལ་གྲུབ་པ་ཞེས་བྱ་བ་ནི། འཆགས་པའི་བསྐལ་པའི་ཚེ་རད་གྲུབ་པའམ། དེའི་འོག་ཏུ་གཏིབ་ཆད་པ་ཉིད་ལ་སོགས་པས་རང་གྲུབ་པ་སྟེ། དཔེར་ན་རིའི་བྱ་སྐྱིབས་ལ་
སོགས་པ་ལྟ་བུ་སྟེ། གཞན་གྱིས་བསྩལ་བ་ལ་མི་ལྟོས་པའི་ཕྱིར་རོ། །བྱས་པ་ཞེས་བྱ་བ་ནི། སྐྱེས་བུའི་བྱེད་པས་མངོན་པར་བསྒྲུབས་པའོ། །ཟིན་པ་ཞེས་བྱ་བ་ནི། བྱ་བ་བྱེད་པའི་གནས་ལ་སོགས་པར་རུང་བའོ། །ཕྱི་རོལ་ཉེན་ཀོར་འདོམ་གང་དང་ལྡན་པའོ་ཞེས་བྱ་བ་ནི། ཕྱི་རོལ་དུ་གྱུར་པའི་ཉེན་ཀོར་འདོམ་གང་ཙམ་དང་བཅས་པ་གང་ཡིན་པ་དེ་ནི་ཕྱི་རོལ་ཉེན་ཀོར་འདོམ་གང་དང་ལྡན་པ་ཞེས་བྱའོ། །ཅི་མི་འདོད་བཞིན་དུ་ཡང་བློ་མཐུན་བར་བྱ་འམ་ཞེ་ནམ་ཡིན་ཏེ་དེའི་ཕྱིར། དགེ་འདུན་འདོད་ནའོ་ཞེས་བྱ་བ་སྨྲས་ཏེ། གལ་ཏེ་དགེ་འདུན་བཞེད་ནའོ། །གསོ་སྦྱོང་གི་གནས་ཞེས་སྨོས་པས་དགག་དབྱེ་ལ་སོགས་པའི་ལས་གཞན་ནི་དེ་ར་མི་བྱའོ་སྙམ་དུ་དོགས་པ་བསལ་བའི་ཕྱིར། ལས་གཞན་གྱི་གནས་ཀྱང་དེ་ཡིན་ནོ་ཞེས་བྱ་བ་སྨྲས་ཏེ། དགག་དབྱེ་ལ་སོགས་པའི་འོ། །གསོ་སྦྱོང་གི་གཞི་ལས་དེ་བཅས་པའི་ཕྱིར་དེ་སྐད་ཅེས་བྱའོ། །མཚམས་གཅད་པར་བྱའོ་ཞེས་བྱ་བ་ནི། གནས་དེའི་ཕྱོགས་བཞིའི་མཚམས་གསོལ་བ་དང་གཉིས་ཀྱི་ལས་ཀྱིས་གཅད་པར་བྱའོ། །དཔག་ཚད་ཕྱེད་དང་གསུམ་གྱི་མཐའ་ཚུན་ཆད་དུའོ་ཞེས་བྱ་བ་ནི། ཕྱོགས་བཞིར་དཔག་ཚད་ཕྱེད་དང་གསུམ་གྱི་མཐའ་ཚུན་ཆད་དུ་མཚམས་གཅད་པར་བྱའོ་ཞེས་བྱ་བའི་ཐ་ཚིག་གོ །ཕྱོགས་ཕྱོགས་སུ་ཕ་བོང་དང་རྩིག་པ་དང་ཀ་བ་དང་ཤིང་ལྗོན་པ་དང་རབ་དང་བྱ་སྐྱིབས་དང་ལམ་པོ་ཆེ་དང་ཁྲོན་པ་ལ་སོགས་པ་དེ་ཤེས་པའི་དགེ་སློང་རྣམས་ཀྱིས་བརྟགས་ནས་དགེ་འདུན་གྱི་མདུན་དུ་མཚན་མ་བརྟན་པོ་བརྗོད་དེ་ལས་བྱའོ་ཞེས་བྱ་བ་ནི། ཕྱོགས་བཞིར་ཕ་བོད་དང་རྩིག་པ་ལ་སོགས་པ་དེ་ཤེས་པའི་དགེ་སློང་དེ་ཡུལ་དེ་ན་གནས་པ་འམ་གཉུག་མར་གནས་པ་རྣམས་ཀྱིས་བརྟགས་ནས་དགེ་འདུན་གྱི་སྤྱན་སྔར་ཕ་བོང་ལ་སོགས་པའི་མཚན་མ་བརྟན་པོ་ཡུན་རིང་དུ་གནས་པ་བརྗོད་དེ་དེའི་འོག་ཏུ་མཚམས་བཅད་པའི་ཕྱིར་ལས་བྱ་བའོ། །དེར་གནང་བ་བྱས་ན་ཆོས་གོས་དག་དང་འབྲལ་བར་མི་འགྱུར་རོ་ཞེས་བྱ་བ་ནི། མཚམས་དེར་གལ་ཏེ་ཆོས་གོས་དག་དང་མི་འབྲལ་བའི་གནང་བ་བྱས་པར་གྱུར་ན་གཟོད་ཆོས་གོས་དག་དང་འབྲལ་བར་མི་འགྱུར་བ་ཡིན་གྱི་མཚམས་བཅད་པ་ཙམ་གྱིས་འབྲལ་བར་མི་འགྱུར་བ་ནི་མ་ཡིན་ནོ་ཞེས་བྱ་བའི་ཐ་ཚིག་གོ །
དེ་བྱའོ་ཞེས་བྱ་བ་ནི། ཆོས་གོས་དག་དང་འབྲལ་བར་མི་འགྱུར་བའི་གནང་བ་དེ་བྱ་བའོ། །ཐམས་ཅད་ཀྱི་ཆེད་དུ་དཀྱིལ་འཁོར་བར་བློ་མཐུན་པར་བྱའོ་ཞེས་བྱ་བ་ནི། སྔར་མཚམས་ཆེན་པོ་བཅད་ཟིན་ནས་དེའི་འོག་ཏུ་ལས་ཐམས་ཅད་ཀྱི་ཆེད་དུ་ཞེས་བྱ་བ་གསོ་སྦྱོང་འབའ་ཞིག་གི་ཆེད་དུ་མ་ཟད་ཀྱི་འདུལ་བ་དང་ལྡན་པའི་ལས་ཐམས་ཅད་ཀྱི་ཆེད་དུ་མཚམས་ཆུང་ངུ་གཅད་ཅིང་དཀྱིལ་འཁོར་བར་བློ་མཐུན་པར་བྱའོ། །སྔ་མ་བག་ཡངས་སུ་མ་བྱས་པར་བཅད་པ་གཞན་མི་འཆགས་སོ་ཞེས་བྱ་བ་ནི། སྔར་ཕྱོགས་བཞིར་མཚམས་ཆེན་པོ་བཅད་པ་དེ་བག་ཡངས་སུ་མ་བྱས་ཤིང་མ་གྲོལ་བར་ཕྱོགས་དེ་ཉིད་དུ་མཚམས་ཆུང་གཞན་གཅད་ཅིང་དཀྱིལ་འཁོར་བར་བློ་མཐུན་པར་བྱ་བ་མི་འཆགས་པ་སྟེ། དེ་ལྟ་བས་ན་དཀྱིལ་འཁོར་བའི་མཚམས་སུ་བློ་མཐུན་པར་མ་བྱས་པར་གལ་ཏེ་ཕྱིས་དཀྱིལ་འཁོར་བར་བློ་མཐུན་པར་བྱ་བའི་འདོད་པ་སྐྱེ་ན་དེའི་ཚེ་མཚམས་སྔ་མ་དགྲོལ་བར་བྱའོ། །མཚམས་སྔ་མ་དགྲོལ་དུ་མི་རུང་བ་མ་ཡིན་པར་བསྟན་པའི་ཕྱིར། མཚམས་དག་དགྲོལ་བར་བྱའོ་ཞེས་བྱ་བ་སྨྲས་ཏེ། གལ་ཏེ་དགེ་འདུན་དུ་གྱུར་པའི་དགེ་སློང་དག་མཚམས་ཆུང་ངུ་གཅོད་ཅིང་དཀྱིལ་འཁོར་བར་བློ་མཐུན་པར་བྱེད་འདོད་ན་དེ་དག་གི་སྔར་གཅད་པའི་མཚམས་དག་དགྲོལ་བར་བྱ་བའོ། །ཚིག་གཅིག་གིས་མཚམས་གཉིས་བཅད་པ་དང་དགྲོལ་དུ་རུང་ངོ་ཞེས་བྱ་བ་ནི། དཀྱིལ་འཁོར་བ་གཅིག་ཏུ་ལས་བྱེད་པ་གཅིག་གིས་གསོལ་བ་དང་ལས་བརྗོད་པའི་ཚིག་གཅིག་གིས་མཚམས་གཉིས་ཅིག་ཅར་བཅད་པ་དང༌། ཅིག་ཅར་དགྲོལ་དུ་རུང་བའོ། །འདིར་གཞུང་ནི་མཚམས་གཉིས་ཀར་དགེ་འདུན་བཀོད་ནས་ལས་བྱེད་པའི་དགེ་སློང་གིས་མཚམས་གཉི་གར་ཤིང་ངམ་དབྱུག་པ་འམ་རེ་ལྡེས་མནན་ནས་གསོལ་པ་བྱས་ཏེ་ལས་བྱའོ་ཞེས་གསུངས་པ་ཡིན་ནོ། །མཚམས་མ་བཅད་པའི་གནས་སུ་ནི་ལས་ལ་རྩིག་པ་མཚམས་ཡིན་ནོ་ཞེས་བྱ་བ་ནི། མཚམས་མ་བཅད་པའི་གནས་གང་ཡིན་པ་དེར་ནི་ལས་བྱ་བའི་ཡུལ་ལ་གཙུག་ལག་ཁང་གི་རྩིག་པ་ཉིད་མཚམས་ཡིན་པའོ། །འདིར་ཆོས་གོས་དང་འབྲལ་བའི་མཚམས་བསྩལ་བའི་ཕྱིར་ལས་ལ་ཞེས་སྨོས་ཏེ། ཆོས་གོས་དང་འབྲལ་བའི་མཚམས་ཀྱི་རྣམ་པ་ནི་སྔར་
མཚམས་བྱས་པའོ་ཞེས་བྱ་བ་ལ་སོགས་པས་བསྟན་ཟིན་ཏོ། །འདིར་ལས་ལ་ཞེས་སྨོས་པས་ནི་ལས་ཀྱི་གཞིར་སྤྱིར་བསྟན་པ་གསོལ་བ་དང་གཉིས་དང་གསོལ་བ་དང་བཞིའི་ལས་བརྒྱ་རྩ་གཅིག་པོ་དག་ཉི་ཚེ་གཟུང་བར་མ་ཟད་ཀྱི་འདུལ་བ་དང་ལྡན་པའི་ལས་ཐམས་ཅད་བསྡུས་པར་རིག་པར་བྱའོ། །དེ་ལྟར་གྱུར་ན་དབྱར་གནས་པ་འདྲལ་བ་ལ་ཡང་རྣམ་པ་འདི་ཉིད་ཡིན་ཏེ། འདི་ལྟར་དབྱར་གནས་པར་ཁས་བླངས་པའི་མཚམས་གང་ཡིན་པ་དེ་ཉིད་ཀྱང་འདི་ཡིན་ལ་མཚམས་འདིར་རྙེད་པ་བགོ་བ་དང༌། ཤི་བའི་ཡོ་བྱད་བྱིན་གྱིས་བརླབ་བ་ཡང་འདུས་པ་ཡིན་ནོ། །དེ་ལྟར་ཡང་ཚེ་དང་ལྡན་པ་ཉེ་དགའ་གཙུག་ལག་ཁང་ནས་ཐག་རིང་པོ་ན་འདུག་པས་ཁོ་བོ་མཚམས་སུ་གཏོགས་པས་རྙེད་པ་དབང་ངོ་ཞེས་སྨྲས་པ་ཡིན་ནོ། །ཝ་ཁ་ནས་ཆུ་འཛག་པ་གང་དུ་བབ་པ་ཡང་ངོ་ཞེས་བྱ་བ་ཡང༌། མཚམས་མ་བཅད་པའི་གནས་སུ་ནི་ལས་ལ་དེ་ཚུན་ཆད་ཀྱང་མཚམས་ཡིན་ནོ་ཞེས་བྱ་བར་སྦྱར་རོ། །འདི་སྐད་བསྟན་ཏེ། ཁང་སྟེང་གི་ཆུ་ཁུང་དུ་ཝ་བཙུགས་པའི་ནང་ནས་ཆུ་འཛག་པའི་གནས་གང་དུ་སླེབས་པ་ཚུན་ཆད་ཀྱང་མཚམས་ཀྱི་ཁོངས་སུ་གཏོགས་པ་ཡིན་ནོ། །ཡང་ངོ་ཞེས་བྱ་བའི་སྒྲས་ནི་གལ་གཉིས་སུ་བརྟགས་པ་མ་ཡིན་གྱི་འདི་ཡང་མཚམས་གཅིག་ཡིན་ནོ་ཞེས་བྱ་བར་སྟོན་ཏོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། མདོ་སྔ་མས་ནི་མཚམས་མ་བཅད་པའི་གནས་རྩིག་པས་བསྐོར་བ་ལ་ནི་གཙུག་ལག་ཁང་གི་རྩིག་པ་ཉིད་ལས་ལ་མཚམས་ཡིན་པར་བསྟན་ཏོ། །མདོ་འདིས་ནི་མཚམས་མ་བཅད་པའི་གནས་རྩིག་བསམ་བསྐོར་བ་ལ་ནི་ཝ་ཁ་ནས་ཆུ་འཛག་པའི་སྣ་གང་དུ་བབ་པ་ཆུན་ཚད་ལས་མཚམས་ཡིན་པར་བསྟན་ཏོ། །གྲོང་ལ་ནི་ཉེན་ཀོར་གྱི་མཐའ་ཚུན་ཆད་དོ་ཞེས་བྱ་བ་ནི། གྲོང་ལ་ནི་སྔར་འབྲལ་བའི་སྐབས་སུ་གྲོང་གི་ཉེན་ཀོར་བསྟན་པའི་དེའི་མཐའ་ཚུན་ཆད་མཚམས་ཡིན་པའོ། །དགོན་པ་ལ་ནི་ཕྱོགས་ཕྱོགས་སུ་རྒྱང་གྲགས་ཀྱི་མཐའ་ཚུད་ཆད་དོ་ཞེས་བྱ་བ་ནི། དགོན་པ་ལ་ནི་དབུས་ནས་ཕྱོགས་ཕྱོགས་སུ་རྒྱང་གྲགས་གཅིག་གི་མཐའ་ཚུན་ཆད་མཚམས་ཡིན་ཏེ་དེས་ན་ཕྱོགས་གཉིས་བསྡོམས་པ་ནི་སྤྱིར་རྒྱང་གྲགས་གཉིས་ཀྱི་སྲིད་མཚམས་ཡིན་ནོ། །གསོ་སྦྱོང་
གི་གཞི་ལས་མཐུན་པའི་གསོ་སྦྱོང་གི་གནས་ཀྱི་སྐབས་སོ་ཞེས་བྱ་བ་མཐུན་པའི་གསོ་སྦྱོང་ལ་གནས་གྱི་སྐབས་དང་ཚོགས་པའི་སྐབས་ལ་སོགས་པ་མང་དུ་ཡོད་པ་ལས་གནས་ཀྱི་སྐབས་བཤད་ཟིན་ཏོ།། །།ད་ནི་ཚོགས་པའི་སྐབས་བརྗོད་པར་བྱ་སྟེ། འདི་ལྟར་གསོ་སྦྱོང་དང་དགག་དབྱེའི་དབང་དུ་མཛད་དེ་འདུན་པ་འབུལ་བ་གསུངས་མདོ་ཀྱི་ལས་གཞེན་ཐམས་ཅད་ལ་ཡང་ཡོད་པས་ཐམས་ཅད་ཀྱི་དབང་དུ་བྱས་ཏེ་བསྟན་པའི་ཕྱིར། འདུན་པ་འབུལ་བ་ལས་དེ་དང་མཐུན་པ་འགྲུབ་པོ་ཞེས་བྱ་བ་སྨྲས་ཏེ། གང་ཟག་གང་འདུན་པ་འབུལ་བར་བྱེད་པའི་གང་ཟག་དེ་དང་མཐུན་པ་འགྲུབ་པོ། །མཚམས་བཅད་པ་ལ་ནི་མི་འགྲུབ་པོ་ཞེས་བྱ་བ་ནི། མཚམས་བཅད་པའི་ལས་ལ་ནི་གང་ཟག་གང་འདུན་པ་འབུལ་བར་བྱེད་པའི་གང་ཟག་དེ་དང་མཐུན་པ་མི་འགྲུབ་པོ། །འདིར་གཞུང་ནི་ཉེ་བ་འཁོར་ལས་ཐམས་ཅད་ནི་འདུན་པ་དང་བཅས་པ་ཡིན་ཏེ་མཚམས་གཅོད་པ་ནི་མ་གཏོགས་སོ་ཞེས་གསུངས་པ་ཡིན་ནོ། །བསླབ་པ་བྱིན་པ་དེ་ལས་བླང་དུ་རུང་ངོ་ཞེས་བྱ་བ་ནི། བསླབ་པ་བྱིན་བ་ལས་འདུན་པ་དེ་བླང་དུ་རུང་བར་རིག་པར་བྱའོ། །བསླབ་པ་བྱིན་པ་ལས་འདུན་པ་བླང་བ་སུ་ལ་རུང་ཞེ་ན་དེའི་ཕྱིར། དེ་ལ་དགེ་སློང་གི་འདུ་ཤེས་ཉེ་བར་གཞག་པ་ལའོ་ཞེས་བྱ་བ་སྨྲས་ཏེ། དགེ་སློང་གང་གིས་བསླབ་པ་བྱིན་པ་དེ་ལ་དགེ་སློང་གི་འདུ་ཤེས་ཉེ་བར་གཞག་པ་དེ་ལ་དེ་ལས་འདུན་པ་བླང་དུ་རུང་ངོ༌། །འདིར་གཞུང་ནི་བཙུན་པ་བསླབ་པ་བྱིན་པ་ལ་འདུན་པ་དབུལ་དུ་རུང་ངམ། ཉེ་བ་འཁོར་མི་རུང་སྟེ་གལ་ཏེ་ཆོས་ཉིད་ལ་རེག་ན་ནི་རུང་ངོ༌། །བཙུན་པ་བསླབ་པ་བྱིན་པ་ལས་འདུན་པ་བླང་དུ་རུང་ངམ། ཉེ་བ་འཁོར་རུང་སྟེ་གལ་ཏེ་དེ་ལ་དགེ་སློང་གི་འདུ་ཤེས་ཡོད་ནའོ་ཞེས་གསུངས་པ་ཡིན་ནོ། །དབུལ་དུ་མི་རུང་ངོ་ཞེས་བྱ་བ་ནི། བསླབ་པ་བྱིན་པ་དེ་ལ་འདུན་པ་དབུལ་དུ་མི་རུང་བ་སྟེ། བསླབ་པ་བྱིན་པ་དེ་དགེ་སློང་རང་བཞིན་དུ་གནས་པའི་གན་དུ་འདུན་པ་ལེན་པ་འོངས་ན་ཡང་དེ་ལ་འདུན་པ་དབུལ་དུ་མི་རུང་ལ། འདུན་པ་ལེན་པས་དགེ་སློང་ལས་འདུན་པ་བླངས་ཏེ་དགེ་འདུན་གྱི་ནང་དུ་དགེ་སློང་ལ་བརྗོད་པ་ན་ཡང་བསླབ་པ་བྱིན་པ་ལ་བརྗོད་པར་མི་རུང་སྟེ། གཞན་ལ་བརྗོད་པ་དེས་ཐོས་པ་ལ་ནི་ཉེས་པ་མེད་དོ། །
ཡོངས་སུ་དག་པ་དང་དགག་དབྱེ་ལ་ཡང་དེ་བཞིན་ནོ། །སྨྱོས་པའི་གནང་བ་ཐོབ་པ་ནི་མི་མཐུན་པ་ཉིད་དུ་མི་འགྱུར་རོ་ཞེས་བྱ་བ་ནི། སྨྱོས་པའི་གནང་བ་བྱིན་པའི་གང་ཟག་དང་ལྷན་ཅིག་པས་ནི་མི་མཐུན་པ་ཉིད་དུ་མི་འགྱུར་རོ། །དེ་ལྟ་བས་ན་མཚམས་གཅིག་ཉིད་ཡིན་ན་ཡང་དེ་ལས་མཐུན་པ་དང་ཡོངས་སུ་དག་པ་དང་དགག་དབྱེ་མ་བླངས་པ་ལ་ཉེས་པ་མེད་དོ། །ཡོངས་སུ་དག་པ་ཕུལ་བ་དང་ཡང་གཅིག་པ་ཉིད་དོ་ཞེས་བྱ་བ་ནི། འགྲུབ་པོ་ཞེས་བྱ་བའི་རྗེས་བསྙག་པའི་ཕྱིར་ཡང་ཞེས་བྱ་བའི་སྒྲ་སྨོས་ཏེ། ཡོངས་སུ་དག་པ་ཕུལ་བའི་གང་ཟག་ནི་ཡོངས་སུ་དག་པར་གྱུར་པའི་དགེ་འདུན་དང་མཐུན་པ་གཅིག་ཏུ་འགྱུར་རོ། །དོན་གང་ལ་གཅིག་པ་ཉིད་དུ་འགྱུར་ཞེ་ན་དེའི་ཕྱིར། གསོ་སྦྱོང་དང་དགག་དབྱེ་ལའོ་ཞེས་བྱ་བ་སྨྲས་ཏེ། གཅིག་པ་ཉིད་དུ་འགྱུར་རོ། །འདི་སྐད་བསྟན་ཏེ། གསོ་སྦྱོང་དང་དགག་དབྱེ་ལ་ཡོངས་སུ་དག་པ་ཕུལ་བ་དེ་ནི་ཡོངས་སུ་དག་པར་གྱུར་པའི་དགེ་འདུན་དང་ལྷན་ཅིག་བྱ་བ་གཅིག་པ་ཉིད་ཡིན་ནོ། །ཅི་ཞིག་བྱས་པས་ཤེ་ན་དེའི་ཕྱིར། དེ་ཕུལ་བས་སོ་ཞེས་བྱ་བ་སྨྲས་ཏེ། ཡོངས་སུ་དག་པ་དང་དགག་དབྱེ་ཕུལ་བས་སོ། །དེ་ལ་ཡོངས་སུ་དག་པ་ཕུལ་བ་ནི། ཚེ་དང་ལྡན་པ་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅོ་ལྔ་པ་ལགས་ལ། བདག་དགེ་སློང་མིང་འདི་ཞེས་བགྱི་བའི་གསོ་སྦྱོང་ཡང་བཅོ་ལྔ་པ་ལགས་ཏེ། བདག་དགེ་སློང་མིང་འདི་ཞེས་བགྱི་བ་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་བདག་མཆིའོ། །བདག་གི་གསོ་སྦྱོང་ཡང་ཡོངས་སུ་དག་སྟེ་ཡོངས་སུ་དག་པ་བརྗོད་དོ། །བརྗོད་པ་ཡང་རིག་པར་བགྱིད་དོ་ཞེས་བྱ་བ་ཡིན་ནོ། །དགག་དབྱེ་ཕུལ་བ་ནི་ཚེ་དང་ལྡན་པ་དགོངས་སུ་གསོལ། དེང་དགེ་འདུན་གྱི་དགག་དབྱེ་བཅོ་ལྔ་པ་ལགས་ལ། བདག་དགེ་སློང་མིང་འདི་ཞེས་བགྱི་བའི་དགག་དབྱེ་ཡང་བཅོ་ལྔ་པ་ལགས་ཏེ། བདག་དགེ་སློང་མིང་འདི་ཞེས་བགྱི་བ་མཐོང་བ་དང་ཐོས་པ་དང་དོགས་པའི་གནས་གསུམ་གྱིས་དགེ་འདུན་ལ་དགག་དབྱེ་བགྱིད་དོ། །དགག་དབྱེ་ཡང་བརྗོད་དོ། །བརྗོད་པ་ཡང་རིག་པར་བགྱིད་དོ་ཞེས་བྱ་བ་ཡིན་ནོ། །དེ་བཞིན་དུ་དེ་གཉིས་ལ་བྱའོ་ཞེས་བྱ་བ་ལ། དེ་བཞིན་དུ་ཞེས་བྱ་བ་ནི། ཡོངས་སུ་དག་
བ་དང་དགག་དབྱེ་གཉིས་དབུལ་ལོ། །དེ་གཉིས་ལ་ཞེས་བྱ་བ་ནི། གསོ་སྦྱོང་དང་དགག་དབྱེ་ལའོ། །ལེན་པར་བྱེད་པའི་ཡུལ་ལ་ཆོ་ག་དེ་གཉིས་རུང་བ་ཉིད་དུ་བསྟན་པ་ཡིན་ཏེ། ཡོངས་སུ་དག་པ་དང་ལེན་པ་དང་དགག་དབྱེ་ལེན་པའི་དགེ་སློང་དེས་གང་ཟག་གང་ལས་དེ་གཉིས་བླངས་པ་དེ་དགེ་འདུན་གྱི་དབུས་སུ་དགེ་སློང་ལ་བརྗོད་པར་བྱའོ་ཞེས་བྱ་བའི་ཐ་ཚིག་གོ །དགེ་འདུན་གྱིས་དེ་མནོད་དུ་རུང་བ་བསྟན་པའི་ཕྱིར། ཆོ་ག་དེ་མནོད་པར་བྱའོ་ཞེས་བྱ་བ་སྨྲས་ཏེ། ཡོངས་སུ་དག་པ་དང་དགག་དབྱེ་ཕུལ་བས་གསོ་སྦྱོང་དང་དགག་དབྱེ་བྱ་བའི་ཆོ་ག་དེ་དགེ་འདུན་དུ་གྱུར་པའི་དགེ་སློང་དག་གིས་མནོད་ཅིང་ཁས་བླང་བར་བྱ་བའོ། །ཚོགས་ཐ་དད་པ་འདུན་པ་ལ་སོགས་པས་མཐུན་པར་བྱས་ཏེ། ལས་བྱེད་པ་ལ་མི་རུང་བ་མེད་དོ་ཞེས་བྱ་བ་ནི། ཚོགས་ཐ་དད་པ་དགེ་འདུན་མཚམས་གཅིག་གི་ནང་ན་ཚོམས་སོ་སོར་གནས་པས་འདུན་པ་དང་ཡོངས་སུ་དག་པ་དང་དགག་དབྱེ་ལ་སོགས་པ་ཕན་ཚུན་དབུལ་བས་མཐུན་པར་བྱས་ཏེ། ལས་ཐ་དད་པ་མང་པོ་སོ་སོ་ན་བྱེད་པ་ལ་མི་རིགས་པ་མེད་པར་ཤེས་པར་བྱའོ། །འདིར་གཞུང་ནི་ཞུ་བ་ལས་བཙུན་པ་དགེ་སློང་ཕྱོགས་གཅིག་ན་མཆིས་པས་གནས་བཞི་པོ་དག་ཏུ་སོ་སོར་ཐར་པའི་མདོ་བཏོན་ལ་གསོ་སྦྱོང་ཡང་བགྱིས་པར་འགྱུར་ཞིང་དགེ་སློང་དེ་དག་ལ་ཡང་འགལ་ཚབས་ཅན་དུ་མི་འགྱུར་བ་མཆིས་སམ་ཉེ་བ་འཁོར་ཡོད་དེ། འདི་ལྟར་སོ་སོར་ཐར་པའི་མདོ་འདོན་པའི་དགེ་སློང་གིས་གནས་བཞི་པོ་དག་ཅིག་ཅར་དུ་ཤིང་ངམ་དབྱུག་པ་འམ་རེ་ལྡེས་མནན་ཏེ་སོ་སོར་ཐར་པའི་མདོ་འདོན་པ་ནའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །བརྗོད་པར་བྱ་བ་རྩོམ་པ་འདྲ་བ་རྣམས་ཅིག་ཅར་བརྗོད་པ་ལ་ཡང་མེད་དོ་ཞེས་བྱ་བ་ནི། མི་རུང་བ་ཞེས་བྱ་བར་སྦྱར་ཏེ། བརྗོད་པར་བྱ་བ་རྩོམ་པ་འདྲ་བ་འདི་ལྟ་སྟེ་འདུན་བ་དང་ཡོངས་སུ་དག་པ་བརྗོད་པ་དང་འདུན་པ་དང་དགག་དབྱེ་རིག་པར་བྱ་བ་དང་ཁར་བ་དང་འདྲ་བའི་གནང་བ་གསོལ་བ་ལ་སོགས་པ་ལྟ་བུའི་དོན་རྣམས་ཅིག་ཅར་དུས་གཅིག་ཏུ་བརྗོད་པ་ལ་ཡང་མི་རུང་བ་མེད་པར་ཤེས་པར་བྱ་སྟེ་ཐབས་གཅིག་གིས་བསྒྲུབ་པར་བྱ་བ་ཉེད་དོ་ཞེས་བྱ་བའི་ཐ་ཚིག་གོ །འདིར་གཞུང་ནི་ཚེ་དང་ལྡན་པ་དགོས་སུ་གསོལ་དེང་དགེ་
འདུན་གྱི་གསོ་སྦྱོང་བཅོ་ལྔ་པ་ལགས་ལ་བདག་དགེ་སློང་བྲོ་འཚལ་བ་སྡུག་བསྔལ་བ་བྲོ་ཚབས་ཆེ་བ་མིང་འདི་ཞེས་བགྱི་བའི་གསོ་སྦྱོང་ཡང་བཅོ་ལྔ་པ་ལགས་ཏེ་བདག་དགེ་སློང་བྲོ་འཚལ་བ་སྡུག་བསྔལ་བ་བྲོ་ཚབས་ཆེ་བ་མིང་འདི་ཞེས་བགྱི་བ་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་བདག་ཉིད་མཆིའོ། །དགེ་འདུན་ཆོས་བཞིན་དུ་མཛད་པ་ལ་འདུན་པ་འབུལ་ལོ། །བདག་གི་གསོ་སྦྱོང་ཡང་ཡོངས་སུ་དག་གོ །འདུན་པ་དང་ཡོངས་སུ་དག་པ་ཡང་བརྗོད་དོ། །བརྗོད་པ་ཡང་རིག་པར་བགྱིད་དོ་ཞེས་གསུངས་པ་དང༌། དེ་བཞིན་དུ་ཚེ་དང་ལྡན་པ་དགོངས་སུ་གསོལ། དེང་དགེ་འདུན་གྱི་དགག་དབྱེ་བཅོ་ལྔ་བ་ལགས་ལ། བདག་དགེ་སློང་བྲོ་འཚལ་བ་སྡུག་བསྔལ་བ་བྲོ་ཚབས་ཆེ་བ་མིང་འདི་ཞེས་བགྱི་བའི་དགག་དབྱེ་ཡང་བཅོ་ལྔ་པ་ལགས་ཏེ། བདག་དགེ་སློང་བྲོ་འཚལ་བ་སྡུག་བསྔལ་བ་བྲོ་ཚབས་ཆེ་བ་མིང་འདི་ཞེས་བགྱི་བ། དགེ་འདུན་ཆོས་བཞིན་དུ་མཛད་པ་ལ་འདུན་པ་འབུལ་ལོ། །མཐོང་བ་དང་ཐོས་པ་དང་དོགས་པའི་གནས་གསུམ་གྱིས་དགེ་འདུན་ལ་དགག་དབྱེ་བགྱིད་དོ། །འདུན་པ་དང་དགག་དབྱེ་ཡང་བགྱིད་དོ། །བརྗོད་པ་ཡང་རིག་པར་བགྱིད་དོ་ཞེས་གསུངས་པ་དང༌། དེ་བཞིན་དུ་ཚེ་དང་ལྡན་པ་དགོངས་སུ་གསོལ། དེང་དེ་གེ་འདུན་གྱི་གསོ་སྦྱོང་ཡང་བཅོ་ལྔ་པ་ལགས་ལ། གནས་ག་གེ་མོ་ཞིག་ན་དགེ་སློང་བྲོ་འཚལ་བ་སྡུག་བསྔལ་བ་བྲོ་ཚབས་ཆེ་བ་མིང་འདི་ཞེས་བགྱི་བའི་གསོ་སྦྱོང་ཡང་བཅོ་ལྔ་པ་ལགས་ཏེ། གནས་ག་གེ་མོ་ཞིག་ན་དགེ་སློང་བོས་འཚལ་བ་སྡུག་བསྔལ་བ་བྲོ་ཚབས་ཆེ་བ་མིང་འདི་ཞེས་བགྱི་བ་དེ་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་ཉིད་མཆིའོ། །དགེ་འདུན་ཆོས་བཞིན་དུ་མཛད་པ་ལ་འདུན་པ་འབུལ་ལོ། །དེའི་གསོ་སྦྱོང་ཡང་ཡོངས་སུ་དག་གོ །འདུན་པ་དང་ཡོངས་སུ་དག་པ་ཡང་བརྗོད་དོ། །བརྗོད་པ་ཡང་རིག་པར་བགྱིད་དོ་ཞེས་གསུངས་པ་དང༌། དེ་བཞིན་དུ་ཚེ་དང་ལྡན་པ་དགོངས་སུ་གསོལ། དེང་དགེ་འདུན་གྱི་དགག་དབྱེ་བཅོ་ལྔ་པ་ལགས་ལ། གནས་ཆེ་གེ་མོ་ཞིག་ན་དགེ་སློང་བྲོ་འཚལ་བ། སྡུག་བསྔལ་བ་བྲོ་ཚབས་ཆེ་བ་མིང་འདི་ཞེས་བགྱི་བའི་དགག་དབྱེ་ཡང་བཅོ་
ལྔ་པ་ལགས་ཏེ་གནས་ག་གེ་མོ་ཞིག་ན་དགེ་སློང་བྲོ་འཚལ་བ་སྡུག་བསྔལ་བ་བྲོ་ཚབས་ཆེ་བ་མིང་འདི་ཞེས་བགྱི་བདེ་དགེ་འདུན་ཆོས་བཞིན་དུ་མཛད་པ་ལ་འདུན་པ་འབུལ་ལོ། །མཐོང་བ་དང་ཐོས་པ་དང་དོགས་པའི་གནས་གསུམ་གྱིས་དགེ་འདུན་ལ་དགག་དབྱེ་བགྱིད་དོ། །འདུན་པ་དང་དགག་དབྱེ་ཡང་བརྗོད་དོ། །བརྗོད་པ་ཡང་རིག་པར་བགྱིད་དོ་ཞེས་གསུངས་པ་ཡིན་ནོ། །འདིར་བརྗོད་པར་བྱ་བ་རྩོམ་པ་འདྲ་བ་རྣམས་ཞེས་སྤྱིར་སྨོས་པ་ནི་ཁར་བ་དང་འདྲ་བའི་གནང་བ་གསོལ་བ་ལ་སོགས་པ་ཡང་བསྡུ་བའི་ཕྱིར་ཏེ། དེས་ན་འདིར་འདུན་པ་དང་ཡོངས་སུ་དག་པ་ལ་སོགས་པ་འགའ་ཞིག་གི་བྱེ་བྲག་ལ་བརྟེན་པ་མ་བྱས་སོ། །གཅིག་གིས་དུ་མའི་དེ་དག་ལ་ལེན་པ་ལ་ཡང་མེད་དོ་ཞེས་བྱ་བ་ནི། མིན་རུང་བ་ཞེས་བྱ་བར་སྦྱར་ཏེ། དགེ་སློང་གཅིག་གིས་དགེ་སློང་དུ་མའི་རྒྱུད་དུ་གཏོགས་པའི་འདུན་པ་དང་དགག་དབྱེ་ལ་སོགས་པ་ལེན་པ་ལ་ཡང་མི་རུང་བ་མེད་དོ་ཞེས་བྱ་བའི་ཐ་ཚིག་གོ། །།བམ་པོ་བཞི་བཅུ་དྲུག་པ། འདི་ལ་བརྗོད་ནུས་པའི་ཚིག་གིས་གཟུང་ངོ་ཞེས་བྱ་བ་ནི། དགེ་སློང་དུ་མའི་རྒྱུད་དུ་གཏོགས་པའི་འདུན་པ་ལ་སོགས་པ་ལེན་པ་འདི་ལ་གྲངས་ཀྱི་བྱེ་བྲག་ཡོངས་སུ་ཆད་པ་མེད་དེ། འདི་ལྟར་ཇི་སྙེད་བརྗོད་ནུས་པ་དེ་སྙེད་ཀྱི་ཚིགས་ཀྱིས་གཟུང་བར་བྱའོ། །འདི་སྐད་བསྟན་ཏེ། འདུན་པ་ལ་སོགས་པ་ལེན་པ་དེས་འདུན་པ་ལ་སོགས་པ་འབུལ་བར་བྱེད་པའི་དགེ་སློང་ཇི་སྙེད་ཀྱི་མིང་ལ་སོགས་པ་དག་བརྗོད་པར་ནུས་པ་དེ་སྙེད་ཀྱི་འདུན་པ་ལ་སོགས་པ་བླང་བར་བྱའོ། །མི་ནུས་ན་དེ་དག་དབུལ་བ་གང་ཡང་རུང་བས་འགྲུབ་པོ་ཞེས་བྱ་བ་ནི། འདུན་པ་ལ་སོགས་པ་དབུལ་བར་བྱེད་པའི་དགེ་སློང་ན་ཚབས་ཆེ་བ་ལ་སོགས་པའི་རྐྱེན་གྱིས་དེར་འགྲོ་འམ་སྨྲ་བར་མི་ནུས་ན་འདུན་པ་ལ་སོགས་པ་དེ་དག་གི་དབུལ་བ་དེ་དག་ཇི་སྐད་སྨོས་པའི་སྔགས་དག་ལས་གཞན་པ་ལུས་དང་ངག་གི་རྣམ་པར་རིག་བྱེད་གང་ཡང་རུང་བས་ཕུལ་ན་ཡང་འགྲུབ་པའོ། །ལུས་ཀྱིས་ཀྱང་ངོ་ཞེས་བྱ་བ་ནི། ལུས་ཀྱི་མཚན་མ་ལ་སོགས་པ་བྱས་པས་ཀྱང་འགྲུབ་ཏུ་རུང་བའོ། །ཀྱང་ངོ་ཞེས་བྱ་བའི་སྒྲས་ནི་དག་གིས་ལྟ་སྨོས་ཀྱང་ཅི་དགོས་ཞེས་བྱ་བར་སྟོན་ཏོ། །
ཇི་ལྟར་ཡང་མི་ནུས་ན་ཡང་ན་དགེ་འདུན་དེར་འགྲོ་བར་བྱ། ཡང་ན་དེ་ཁྲི་ལས་བླང་བར་བྱའོ་ཞེས་བྱ་བ་ནི། འདུན་པ་ལ་སོགས་པ་འབུལ་བར་བྱེད་པ་དེས་ལུས་ཀྱིས་ཀྱང་མི་ནུས་ན་ཡང་ན་དགེ་འདུན་ནད་པའི་གནས་དེར་འགྲོ་བར་བྱའོ། །ཡང་ན་ནད་པ་དེ་ཁྲི་ལས་དགེ་འདུན་གྱི་དབུས་སུ་བླང་བར་བྱའོ། །དེ་བླངས་ནས་རྒྱུག་པར་མི་བྱའོ་ཞེས་བྱ་བ་ནི། འདུན་པ་ལ་སོགས་པ་ལེན་པར་བྱེད་པ་དེས་འདུན་པ་ལ་སོགས་པ་དེ་མནོས་ནས་དགེ་འདུན་གྱི་ནང་དུ་མ་བརྗོད་ཀྱི་བར་དུ་རྒྱུག་ཅིང་འགྲོ་བར་མི་བྱ་བའོ། །མགྱོགས་པར་མི་བྱའོ་ཞེས་བྱ་བ་ལ་སོགས་པ་འོག་མ་ཐམས་ཅད་ཀྱང་འདུན་པ་བླངས་ནས་མ་ཕུལ་གྱི་བར་དུ་ཞེས་བྱ་བར་སྦྱར་ཏེ། མགྱོགས་པ་ཞེས་བྱ་བ་ནི། རྒྱུག་པས་ཆུང་ཟད་ངལ་བའི་འགྲོས་སོ། །མཆོང་བར་མི་བྱའོ་ཞེས་བྱ་བ་ལ། མཆོངས་པར་བྱེད་པ་ནི་མཆོང་བ་ཞེས་བྱའོ། །ཕྱི་རོལ་ལ་མཆོང་བར་མི་བྱའོ་ཞེས་བྱ་བ་ལ། ཕྱི་རོལ་ཞེས་བྱ་བ་ནི། གཙུག་ལག་ཁང་གི་ཕྱི་རོལ་གྱི་རྩིག་པའམ་ས་སྒལ་ཏེ་དེ་ལ་མཆོད་པར་མི་བྱ་བའོ། །བང་རིམ་ལ་མི་བྱའོ་ཞེས་བྱ་བ་ནི། མཆོད་བ་སྟེ་ཕྱི་རོལ་གྱིས་ཁྱམས་ཀྱི་བང་རིམ་ལའོ། །ནམ་མཁའ་ལ་འདུག་པར་མི་བྱའོ་ཞེས་བྱ་བ་ནི། ནམ་མཁའ་ལ་འདུག་བའམ་འགྲོ་བར་མི་བྱ་བའོ། །ཕྱི་རོལ་དུ་མི་བྱའོ་ཞེས་བྱ་བ་ནི། མཚམས་ནས་མཚམས་ཀྱི་ཕྱི་རོལ་དུ་འགྲོ་བར་མི་བྱའོ་ཞེས་བྱ་བའི་ཐ་ཚིག་གོ །སྐས་ཀྱི་རིམ་པ་གཞན་བཞག་ནས་གཞན་དུ་གོམ་པ་དོར་བར་མི་བྱའོ་ཞེས་བྱ་བ་ནི། སྐས་ཀྱི་གདང་བུ་གཞན་ཐོད་རྒལ་དུ་གཞག་སྟེ་གཞན་ལ་ཐོད་རྒལ་དུ་གོམ་པ་དོར་བར་མི་བྱ་བའོ། །ཐེམ་སྐས་ཀྱི་ཐེམ་པར་མི་བྱའོ་ཞེས་བྱ་བ་ནི། གཞན་གཞག་ནས་གཞན་དུ་གོམ་པ་དོར་བར་མི་བྱ་བའོ། །ཆུ་ལྐོག་མ་ནུབ་པ་ཙམ་ལ་འབོག་པར་མི་བྱའོ་ཞེས་བྱ་བ་ནི། འགྲོ་བའི་ལམ་གཞན་ཡོད་ན་སྟེ། མེད་ན་ནི་ཉེས་པ་མེད་དོ། །གཉིད་ལོག་པ་དང་སྙོམས་པར་འཇུག་པར་མི་བྱའོ་ཞེས་བྱ་བ་ནི། །གཉིད་ལོག་པ་དང་ཏིང་ངེ་འཛིན་ལ་སྙོམས་པར་འཇུག་པ་དག་མི་བྱ་བའོ། །དེ་གཞིས་ནི་མ་ཀླས་པ་ཉིད་ཡིན་པས་དེའི་སྒོ་ནས་སྨད་པར་བྱ་བ་ཉིད་ཡིན་ནོ་ཞས་བྱ་བ་ནི། གཉིད་ལོག་པ་དང་སྙོམས་པར་འཇུག་པ་
དེ་གཉིས་ནི་མ་ཀླས་པ་ཉིད་ཡིན་པས་དེའི་སྒོ་ནས་ཀྱང་སྨད་པར་བྱ་བ་ཉིད་ཡིན་ནོ། །ཀྱང་ཞེས་བྱ་བའི་སྒྲས་ནི། དེ་གཉིས་ལྟུང་བ་འབྱིན་པར་བྱེད་པ་ཉིད་ཡིན་པས་དེའི་སྒོ་ནས་སྨད་པར་བྱ་བ་ཉིད་ཡིན་པ་འབའ་ཞིག་ཏུ་མ་ཟད་ཀྱི་མ་ཀླས་པ་ཉིད་ཀྱི་སྒོ་ནས་ཀྱང་སྨད་པར་བྱ་བ་ཉིད་ཡིན་པར་སྟོན་ཏོ། །བྱ་བ་བརྩམས་པ་ཐམས་ཅད་ཀྱི་ཐམས་ཅད་དུ་བར་དུ་གཅོད་པའི་ཕྱིར་རོ། །མ་ཀླས་པ་ཉིད་ཅེས་བྱ་བ་ནི་བསྟན་པ་དེ་ལ་ཐེ་ཚོམ་ཟ་བ་ཉིད་དང་མ་ངེས་པ་ཉིད་དང་མ་མོས་པ་ཉིད་དང་མ་གུས་པ་ཉིད་ཀྱིས་བར་མ་དོན་འདོམ་པ་ལའོ། །དགེ་སློང་ལ་བརྗོད་པར་བྱའོ་ཞེས་བྱ་བ་ནི། འདུན་པ་ལ་སོགས་པ་ལེན་པར་བྱེད་པ་དེས་འདུན་པ་ལ་སོགས་པ་མནོས་པ་དེ་དགེ་འདུན་གྱི་ནང་དུ་སོན་ནས་དགེ་སློང་ལ་བརྗོད་པར་བྱ་སྟེ། །སྐབས་གང་དུ་བྱ་ཞེ་ན། གང་གི་ཚེ་དགེ་འདུན་གྱི་གནས་བརྟན་གྱིས་འདུན་པ་དང་ཡོངས་སུ་དག་པ་ལ་སོགས་པ་བརྗོད་པའི་འོག་ཏུའོ། །འདིར་གཞུང་ནི་དེས་དྲུང་ན་འདུག་པའི་དགེ་སློང་ལ་ཚེ་དང་ལྡན་པ་དགེ་སློང་མ་ལྷགས་པ་རྣམས་ལ་འདུན་པ་དང་ཡོངས་སུ་དག་པ་བརྗོད་དོ། །བརྗོད་པ་ཡང་རིག་པར་བགྱིད་དོ་ཞེས་བྱ་བ་གསུངས་པ་ཡིན་ནོ། །ཁ་ཅིག་ལས་དགེ་འདུན་ལ་ཞེའོ་ཞེས་བྱ་བ་ནི། ལུགས་ཁ་ཅིག་ལས་དགེ་འདུན་ལ་བརྗོད་པར་བྱའོ་ཞེས་ཀྱང་འབྱུང་ངོ༌། །བཙུན་པ་རྣམས་དགོངས་སུ་གསོལ་ཞེས་བྱ་བས་བརྩམ་མོ་ཞེས་བྱ་བ་ནི། གལ་ཏེ་དགེ་འདུན་ལ་བརྗོད་པར་བྱན་འདུན་པ་ལ་སོགས་པ་ལེན་པའི་དགེ་སློང་དེས་དགེ་འདུན་གྱི་དབུས་སུ་དགེ་འདུན་བཙུན་པ་རྣམས་དགོངས་སུ་གསོལ་ཞེས་བྱ་བའི་ཚིག་འདིས་མགོ་བརྩམས་ནས་འདུན་པ་ལ་སོགས་པ་བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ་ཞེས་བྱ་བའི་ཚིག་གིས་བརྩམ་པར་མི་བྱ་སྟེ། མདོ་འདི་ནི་ཚིག་དག་པར་བྱ་བའི་ཕྱིར་བྱས་སོ། །དགེ་འདུན་གྱི་ནང་དུམ་ཕྱིན་པར་དུས་བྱས་སམ་ཁྱིམ་པ་ཉིད་ལ་སོགས་པར་ཁས་བླངས་ན་མ་བླངས་པ་ཉིད་ཡིན་ནོ་ཞེས་བྱ་བ་ནི། འདུན་པ་ལ་སོགས་པ་ལེན་པར་བྱེད་པའི་དགེ་སློང་དེ་དགེ་འདུན་གྱི་ནང་དུ་མ་ཕྱིར་པར་ཤི་འམ་བབས་པ་ལ་སོགས་པར་གྱུར་ན་དགེ་འདུན་གྱིས་འདུན་པ་ལ་སོགས་པ་མ་བླངས་པ་ཉིད་ཡིན་པས་གཟོད་གཞི་ནས་བླང་
དགོས་སོ་ཞེས་བྱ་བའི་ཐ་ཚིག་གོ །སོགས་པ་ཞེས་བྱ་བའི་སྒྲས་ནི་བསླབ་པ་འབུལ་བའི་ཚིག་དག་ཏུ་གཏོགས་པ་དགེ་ཚུལ་ཉིད་ཅེས་བྱ་བ་ལ་སོགས་པ་ནས། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་ཞེས་བྱ་བའི་མཐར་ཐུག་པའི་བར་དག་བསྡུའོ། །ཕྱིན་ནས་བླངས་པ་ཉིད་ཡིན་ནོ་ཞེས་བྱ་བ་ནི། འདུན་པ་ལ་སོགས་པ་ལེན་པའི་དགེ་སློང་དེ་དགེ་འདུན་གྱི་ནང་དུ་ཕྱིན་ནས་དུས་བྱས་སམ། ཁྱིམ་པ་ཉིད་ལ་སོགས་པར་ཁས་བླངས་ན་མ་བརྗོད་ཅིང་གོ་བར་མ་བྱས་སུ་ཟིན་ཀྱང་འདུན་པ་ལ་སོགས་པ་བླངས་པ་ཉིད་ཡིན་པས་ད་གཟོད་བླང་མི་དགོས་སོ། །འདི་ལ་ཐེ་ཚོམ་མེད་པར་བྱའོ་ཞེས་གོ་བར་བྱ་བའི་ཕྱིར་བརྗོད་པ་ཡིན་པས་དགེ་འདུན་གྱི་ནང་དུ་འོངས་པ་ཉིད་དགེ་འདུན་གྱི་ཁོངས་སུ་གཏོགས་པ་ཡིན་པས་ཐམས་ཅད་ལ་ཐེ་ཚོམ་མེད་པ་ཉིད་སྐྱེའོ། །གཞན་གྱིས་ཚེས་བཅོ་ལྔ་ལ་དགེ་སློང་བཟུང་ན་དེ་ལ་དགེ་སློང་འདི་བདག་ཅག་གི་ཚངས་པ་མཚུངས་པར་སྤྱོད་པ་ཡིན་གྱིས་ཐོང་ཤིག་ཅེས་བརྗོད་པར་བྱའོ་ཞེས་བྱ་བ་ནི། རྒྱལ་པོ་ལ་སོགས་པ་གཞན་གྱི་གསོ་སྦྱོང་གི་ཉིན་མོ་དགེ་སློང་བཟུང་ན་དགེ་སློང་རྣམས་ཀྱིས་གཞན་དེ་ལ་མངོན་སུམ་དུ་འམ་ཕྲིན་པ་བཏང་སྟེ། དགེ་སློང་འདི་བདག་ཅག་གི་ཚངས་པ་མཚུངས་པར་སྤྱོད་པ་ཡིན་གྱིས་ཐོང་ཤིག་ཅེས་བརྗོད་པར་བྱའོ། །མ་བཏང་ན་བདག་ཅག་འདི་དང་ལྷན་ཅིག་བྱ་བ་ཅུང་ཞིག་ཡོད་དོ་ཞེས་སྔ་མ་དང་བཅས་ཏེའོ་ཞེས་བྱ་བ་ནི། དེ་སྐད་བརྗོད་ཀྱང་མ་བཏང་ན་བདག་ཅག་དགེ་འདུན་དགེ་སློང་འདི་དང་ལྷན་ཅིག་བྱ་བ་ཆུང་ཞིག་ཡོད་དོ་ཞེས་ཚིག་སྔ་མ་དང་བཅས་ཏེ་བརྗོད་པར་བྱ་བའོ། །སྔ་མ་དང་བཅས་ཏེ་ཞེས་བྱ་བ་ནི་མདོ་སྔ་མ་ལས་ཐོང་ཤིག་ཅེས་བྱ་བ་སྨོས་པའི་ཚིག་སྔ་མ་དེ་དང་བཅས་ཏེ་བརྗོད་པར་བྱའོ་ཞེས་བྱ་བའི་ཐ་ཚིག་གོ །འོན་ཀྱང་མ་བཏང་ན། དེ་ལྟ་ན་ཡང་དཀྱིལ་འཁོར་བ་བྱའོ་ཞེས་བྱ་བ་ནི། ཚིག་ཕྱི་མ་ཤོས་སྐད་བརྗོད་ཀྱང་མ་བཏང་ན་དེའི་ཚེ་དགེ་འདུན་གྱིས་དཀྱིལ་འཁོར་བའི་མཚམས་སུ་གསོ་སྦྱོང་བྱའོ་ཞེས་བྱ་བའི་ཐ་ཚིག་གོ །དེ་བཏང་བའི་ཕྱིར་སྔར་མི་འབད་པར་མི་བྱའོ་ཞེས་བྱ་བ་ནི། གཞན་གྱིས་བཟུང་པའི་དགེ་སློང་དེ་བཏང་བའི་ཕྱིར་དགེ་འདུན་དུ་གྱུར་བའི་དགེ་སློང་རྣམས་ཀྱིས་གསོ་སྦྱོང་ལ་སོགས་པའི་
ཉི་མ་ལམ་བབ་པའི་མདུན་རོལ་དུ་སྔ་ནས་ཀྱང་མི་འབད་པར་མི་བྱ་སྟེ་འབད་པར་བྱའོ་ཞེས་བྱ་བའི་ཐ་ཚིག་གོ །འཕྲིགས་པས་མི་མཐུན་པ་ཉིད་དུ་འགྱུར་རོ་ཞེས་བྱ་བ་ནི། མཚམས་ཀྱི་ནང་ན་དགེ་སློང་དངོས་སུ་འཁོད་པར་ཤེས་པ་རྣམས་ཀྱིས་འདུན་པ་ལ་སོགས་པ་མ་བླངས་པས་དགེ་འདུན་གྱིས་ལས་མི་མཐུན་པ་ཉིད་ཀྱིས་ཉེས་པར་འགྱུར་བ་འབའ་ཞིག་ཏུ་མ་ཟད་ཀྱི་འདི་ལྟར་མཚམས་ཀྱི་ནང་དུ་དགེ་སློང་གློ་བུར་བ་འགའ་ཞིག་འོངས་པ་མཐོང་ངམ་ཐོས་སམ་ཁར་གསིལ་གྱི་སྒྲ་གྲག་གམ་གཏུར་བུ་ལ་སོགས་པ་མཐོང་བའི་མཚན་མའི་སྒོ་ནས་དགེ་སློང་ཞིག་ཡོད་པར་འཕྲིགས་ནས་དེའི་འདུན་པ་ལ་སོགས་པ་མ་བླངས་ན་ཡང་དགེ་འདུན་གྱི་ལས་མི་མཐུན་པ་ཉིད་ཀྱིས་ཉེས་པར་འགྱུར་རོ་ཞེས་བྱ་བའི་ཐ་ཚིག་གོ །ཐ་དད་པ་ཉིད་དུ་འདོད་པས་མངོན་པར་བརྟགས་ཏེ་ལས་བྱེད་ན་ཉེས་པ་སྦོམ་པོའོ་ཞེས་བྱ་བ་ནི། དེས་པའམ་འཕྲིགས་པ་མ་ལྷགས་པ་རྣམས་དང་ཐ་དད་པ་ཉིད་དུ་འདོད་པས་མ་འོངས་ཀྱང་བླའོ་སྙམ་དུ་མངོན་པར་བརྟགས་ཏེ་ལོགས་ཤིག་ཏུ་ལས་བྱེད་པ་ནི་དགེ་འདུན་གྱིས་དབྱེན་གྱི་བསམ་པ་ཅན་ཡིན་པར་ཡིད་ལ་སྣང་སྟེ། དེ་བས་ན་གང་དག་མ་ལྷགས་པ་དེ་དག་ཀྱང་རུང་གིས་ཐག་རིང་པོ་ན་འཁོད་ཅིག་སྙམ་ནས་དེ་དག་གི་འདུན་པ་ལ་སོགས་པ་མི་ལེན་པར་ལས་བྱེད་པ་དེ་དག་ལ་དགེ་འདུན་གྱི་དབྱེན་པ་བརྟུལ་བའི་སྐབས་སུ་གཏོགས་པའི་ཉེས་པ་སྤོམ་པོར་འགྱུར་རོ། །འདིར་ལས་ཞེས་སྨོས་པ་ནི་འདུལ་བར་གཏོགས་པ་མཐུན་པ་དང་འབྲེལ་བའི་ལས་སུ་བྱ་བ་ཐ་ན་རབ་ཏུ་བྱུང་བ་ལ་ལྟོས་པ་ཞུ་པའི་མཐར་ཐུག་པ་ཡན་ཆད་ཀུན་བསྡུའོ། །རྟོག་པ་ཉིད་ནི་ཐེ་ཚོམ་ཟ་བའམ་ངེས་པར་བྱེད་པ་ལ་ནི་ཉེས་པར་བྱེད་པ་མི་འབྱུང་བ་མ་ཡིན་ནོ་ཞེས་བྱ་བ་ནི། རྟོག་པ་ཉིད་ཅི་འདི་རུང་ངམ། འོན་ཏེ་མི་རུང་སྙམ་དུ་རྣམ་པ་དེ་ལྟར་ཐེ་ཚོམ་དུ་གྱུར་ནས་ཐེ་ཚོམ་ཟ་ཞིང་ཡིད་གཉིས་བྱེད་པ་དང་ངེས་པར་མེད་པ་འདི་གདོན་མི་ཟ་བར་རུང་ངོ་ཞེས་ངེས་པར་བྱེད་པ་གང་ཡིན་པ་དེ་གཉིས་ལ་ནི་ཉེས་པའི་བྱེད་པ་མི་འབྱུང་བ་མ་ཡིན་ཏེ། གཉི་ག་ལ་ཡང་མཚན་ཉིད་ཇི་ལྟར་ཐོབ་པའི་ཁ་ན་མ་ཐོ་བ་ཁོ་ནར་འགྱུར་རོ། །དེ་ལྟར་ཡང་འདིར་གཞུང་ནི་ཅི་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་བ་དང་སོ་སོར་ཐར་བའི་མདོ་གདོན་
པ་འདོན་དུ་རུང་ངམ་འོན་ཏེ་མི་རུང༌། དེ་དག་མེད་པར་བདག་ཅག་གིས་དགག་དབྱེ་བྱར་རུང་ངམ། འོན་ཏེ་མི་རུང་སྙམ་དུ་རྟོག་པ་ཉིད་ན་ཐེ་ཚོམ་ཟ་བ་གང་ཡིན་པ་དང་དེ་དག་མེད་པར་བདག་ཅག་གིས་གདོན་པ་དང་དགག་དབྱེའི་བར་དག་བྱར་རུང་ངོ་ཞེས་ངེས་པར་བྱེད་པ་གང་ཡིན་པ་དེ་ལ་ནི་ཉེས་པའི་བྱེད་པ་མི་འབྱུང་བ་མ་ཡིན་ཏེ། འདི་ལྟར་ཐེ་ཚོམ་ཟ་བཞིན་དུ་བྱེད་པ་དང་ངེས་པ་མེད་པར་ངེས་པར་བྱེད་པ་ལ་ནི་དགེ་འདུན་མི་མཐུན་པའི་ཉེས་པ་ཁོ་ནར་འགྱུར་རོ་ཞེས་གསུངས་པ་ཡིན་ནོ། །དེ་ལྟ་བས་ན་འདི་ནི་ཐམས་ཅད་ཀྱི་དབང་དུ་བྱས་པ་ཡིན་པས་སྤྱིར་མདོར་བྱས་སོ། །བསམ་པ་ཐག་པ་ནས་ཡོངས་སུ་བཙལ་ཞིང་གོབ་ལོབ་མ་བྱས་ན་དག་པའི་བྱེད་པ་ཡིན་ནོ་ཞེས་བྱ་བ་ནི། བསམ་པ་ཐག་པ་ནས་སྒྱུ་མེད་པར་དགེ་སློང་མ་ལྷགས་པ་རྣམས་ཡོངས་སུ་བཙལ་ཞིང་གོབ་ལོབ་མ་བྱས་ན་དེ་དག་མཚམས་ཀྱི་ནང་ན་འཁོད་དུ་ཟིན་ཀྱང་དེ་དགེ་སློང་དེ་དག་ལ་དག་ཅིང་ལྟུང་བ་མེད་པ་དང་མཐུན་པ་ཉིད་དུ་འགྱུར་བའི་བྱེད་པ་ཡིན་ནོ་ཞེས་བྱ་བའི་ཐ་ཚིག་གོ །བཙལ་བ་དང་བོད་པ་དང་མཐོན་པོར་འདུག་སྟེ་ཕྱོགས་སུ་བལྟ་བ་དག་གིས་ནི་དེ་ཡིན་ནོ་ཞེས་བྱ་བ་ནི། རྣམ་པ་དེ་གསུམ་གྱི་རིམ་གྱིས་ནི་ཡོངས་སུ་བཙལ་བ་ཉིད་ཡིན་ཏེ། དེ་དག་གིས་མ་རྙེད་ན་མ་ལྷགས་པ་དག་མཚམས་ཀྱི་ནང་ན་འཁོད་ཅིང་དེ་དག་གི་འདུན་པ་ལ་སོགས་པ་མ་བླངས་སུ་ཟིན་ཀྱང་མི་མཐུན་པར་མི་འགྱུར་རོ། །དེ་ལ་བཙལ་བ་ཞེས་བྱ་བ་ནི། ཕྱོགས་དེ་དང་དེ་དག་ཏུ་བྱུལ་བའོ། །བོད་པ་ཞེས་བྱ་བ་ནི། སྐད་ཀྱིས་བོད་པའོ། །མཐོན་པོར་འདུག་སྟེ་ཕྱོགས་སུ་བལྟ་བ་ཞེས་བྱ་བ་ནི། ས་ཕྱོགས་མཐོན་པོར་འགྲེང་སྟེ་མིག་རྒྱང་གིས་ཕྱོགས་ཕྱོགས་སུ་བལྟ་བར་བྱ་བའོ། །དེ་གསུམ་ཡང་གོ་རིམས་བཞིན་དུ་བྱ་སྟེ་དང་པོར་ཇེ་བཙལ་བར་བྱའོ། །བཙལ་བམ་རྙེད་ན་བོད་པར་བྱའོ། །དེས་ཀྱང་མ་རྙེད་ན་ཕྱོགས་ཆེས་མཐོན་པོར་འགྲེང་སྟེ་ཕྱོགས་བཞིར་བལྟ་བར་བྱའོ། །འདིར་གཞུང་ནི་ཞུ་བ་ལས་བཙུན་པ་བཅོམ་ལྡན་འདས་ཀྱིས་དགེ་སློང་གྲོང་མཐའ་པ་མ་ལགས་པ་དགོན་པ་ན་གནས་པ་དེ་དག་ཐམས་ཅད་གསོ་སྦྱོང་གི་གནས་གཅིག་ཏུ་འདུ་བར་བྱའོ་ཞེས་བཀའ་སྩལ་ནས་གལ་ཏེ་དེ་དག་མི་གདའ་ན་བཙལ་བར་བགྱི་ཞིང་གལ་ཏེ་དེ་དག་མ་རྙེད་ན་བོད་བར་བགྱིའོ། །གལ་ཏེ་དེ་དག་
གིས་མཐོས་ན་གསོ་སྦྱོང་བགྱིས་ཞེས་བགྱི་འམ་ཉེ་བ་འཁོར་བྱས་ཞེས་བྱའོ་ཞེས་གསུངས་པ་དང༌། འོག་མ་ཤོས་ཀྱི་གཞུང་ནི་ཕྱོགས་བཞིར་བལྟ་སྟེ་གསོ་སྦྱོང་བྱའོ་ཞེས་གསུངས་པ་ཡིན་ནོ། །གསོ་སྦྱོང་གི་གཞི་ལས་མཐུན་པའི་གསོ་སྦྱོང་གི་ཚོགས་པའི་སྐབས་སོ་ཞེས་བྱ་བ་དེ་བཤད་ཟིན་ཏོ།། །།ད་ནི་ཇི་ལྟར་མཐུན་པའི་གསོ་སྦྱོང་བྱ་བའི་ཆོ་གའི་སྐབས་བསྟན་པའི་ཕྱིར་གསོ་སྦྱོང་བྱའོ་ཞེས་བྱ་བ་སྨྲས་ཏེ། གསོ་སྦྱོང་ཞེས་བྱ་བ་ནི་ཚུལ་ཁྲིམས་གསོ་ཞིང་སྦྱོང་བ་སྟེ། གསོ་བར་བྱེད་ཅེས་བྱ་བའི་ཐ་ཚིག་གོ །དུས་གང་གི་ཚེ་ཞེ་ན་དེའི་ཕྱིར། ཟླ་བ་ཕྱེད་ཕྱེད་ཀྱི་ཚེས་བཅོ་ལྔ་ལའོ་ཞེས་བྱ་བ་སྨྲས་ཏེ། ཚེས་བཅོ་ལྔ་ཞེས་སྨོས་པས་བཅུ་བཞིའི་གསོ་སྦྱོང་ཡང་བསྡུས་པར་རིག་པར་བྱ་སྟེ། འདི་ལྟར་ཚེས་གཅིག་ནས་བཅོ་ལྔའི་བར་གྱི་ཉི་མ་གང་ཡང་རུང་བ་ལས་ཉི་མ་གཅིག་ཆད་པས་སྤྱིར་ཞག་བཅུ་བཞི་ཡོད་པའི་ཕྱིར། འཇིག་རྟེན་པའི་དབང་དུ་བྱས་ནས་བཅོམ་ལྡན་འདས་ཀྱིས་ཀྱང་སོ་སོར་ཐར་པའི་མདོ་ལས་གསོ་སྦྱོང་བཅུ་བཞི་པ་ཞེས་གསུངས་པར་ཟད་ཀྱི་དངོས་སུ་ན་ཟླ་བའི་ངོ་དེས་ཚེས་གྲངས་གང་ལ་ཉི་མ་གཅིག་ཆད་པ་དེ་ཉིད་ས་སྟོང་དུ་དོར་པར་ཟད་ཀྱི་གསོ་སྦྱོང་གི་ཉི་མ་འདི་ལ་ཉི་མ་ཆད་པ་མ་ཡིན་པས་གསོ་སྤྱོད་བཅུ་བཞི་པ་ཞེས་བྱ་བའི་ཉི་མ་དེ་ཉིད་ཚེས་བཅོ་ལྔ་པ་ཡིན་པའི་ཕྱིར་རོ། །རྣམ་པ་གང་གིས་གསོ་སྦྱོང་བྱ་ཞེ་ན་དེའི་ཕྱིར། སོ་སོར་ཐར་པའི་མདོ་གདོན་པས་སོ་ཞེས་བྱ་བ་སྨྲས་ཏེ། སེམས་དྲང་པོར་བསྒྲུབ་པ་ལ་སོགས་པ་དང་འགལ་བ་བཟློག་པ་ལ་སོགས་པའི་རྣམ་པ་གཞན་གྱིས་ཀྱང་ཚུལ་ཁྲིམས་གསོ་བར་བྱེད་པ་ཡོད་པས་དེ་དག་བསལ་བའི་ཕྱིར། སོ་སོར་ཐར་པའི་མདོ་གདོན་པས་སོ་ཞེས་བྱ་བ་སྨོས་སོ། །དགག་དབྱེ་བྱས་ནས་འདི་མ་གྲུབ་པ་ཉིད་མ་ཡིན་ནོ་ཞེས་བྱ་བ་ནི། དགག་དབྱེ་བྱས་ནས་གསོ་སྦྱོང་འདི་མ་གྲུབ་པ་ཉིད་མ་ཡིན་ཏེ་གྲུབ་པ་ཉིད་ཡིན་ནོ། །དེ་ལྟ་བས་ན་དགག་དབྱེ་བྱས་ནས་ཡང་གསོ་སྦྱོང་མི་བྱ་སྟེ། འདི་ལྟར་དགག་དབྱེ་ཉིད་ཀྱིས་གསོ་སྦྱོང་གྲུབ་པར་རིག་པར་བྱའོ། །འདིར་གཞུང་ནི་ཕྲན་ཚེགས་དག་ལས་དགེ་སློང་དག་དགག་དབྱེ་བྱས་ནས་གསོ་སྦྱོང་བྱེད་པ་དང༌། བཅོམ་ལྡན་འདས་ཀྱིས་བཀའ་སྩལ་པ། འགག་དབྱེ་བྱས་ནས་ཡང་གསོ་སྦྱོང་མི་བྱའོ་ཞེས་གསུངས་པ་ཡིན་ནོ། །གསོལ་བ་དང་རྣམ་པར་གཞག་པ་འཛིན་དུ་གཞུག་པ་སྔར་
བྱ་ཞིང་དེ་གདོན་ཏོ་ཞེས་བྱ་བ་ནི། སོ་སོར་ཐར་བའི་མདོ་གདོན་པའི་ཚེ་དང་པོར་གསོལ་བ་དང་རྣམ་པར་གཞག་པ་འཛིན་དུ་གཞུག་པར་བྱས་ནས། དེའི་རྗེས་ལ་སོ་སོར་ཐར་པའི་མདོ་གདོན་པའོ། །དེ་ལ་གསོལ་བ་ནི་སོ་སོར་ཐར་པའི་མདོ་ལས་དགེ་འདུན་བཙུན་པ་རྣམས་གསན་དུ་གསོལ། དེང་དགེ་འདུན་གྱི་གསོ་སྦྱོང་བཅུ་བཞི་པའམ་བཅོ་ལྔ་པ་ལགས་ཏེ། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་བརྗོད་ཅིག་དང༌། དགེ་འདུན་གསོ་སྦྱོང་མཛད་དེ་སོ་སོར་ཐར་པའི་མདོ་འདོན་པ་གདོན་ཏོ། །འདི་ནི་གསོལ་བའོ་ཞེས་གསུངས་པ་ཡིན་ནོ། །རྣམ་པར་གཞག་པ་འཛིན་དུ་གཞུག་པ་ནི་སོ་སོར་ཐར་བའི་མདོ་ལས་ཚེ་དང་ལྡན་པ་དག་བདག་ཅག་གསོ་སྦྱོང་བྱ་སྟེ། སོ་སོར་ཐར་བའི་མདོ་གདོན་པ་གདོན་གྱིས་ཁྱེད་ཅག་སུ་ལ་ལྟུང་བ་ཡོད་པ་དེས་མཐོལ་ཤིང་ལྟུང་བ་མེད་ན་ཅང་མ་སྨྲ་ཤིག །ཅང་མི་སྨྲ་ན་བདག་གིས་ཚེ་དང་ལྡན་བདག་ཡོངས་སུ་དག་པར་རིག་པར་བྱའོ། །ཇི་ལྟར་སོ་སོར་དྲིས་ནས་དགེ་སློང་གིས་ལན་བཏབ་པ་དེ་བཞིན་དུ་དགེ་སློང་གི་འཁོར་འདི་ལྟ་བུར་ཡང་ལན་གསུམ་གྱི་བར་དུ་བསྒྲག་པར་བྱ་བ་ཡིན་ནོ། །ཡང་དགེ་སློང་གང་དགེ་སློང་གི་འཁོར་འདི་ལྟར་བུར་ལན་གསུམ་གྱི་བར་དུ་བསྒྲགས་པ་ན་ལྟུང་བ་ཡོད་ལ་དྲན་བཞིན་དུ་མི་མཐོལ་ན་དེ་ཤེས་བཞིན་དུ་བརྫུན་སྨྲ་བ་ཡིན་ནོ། །ཚེ་དང་ལྡན་པ་དག་ཤེས་བཞིན་དུ་བརྫུན་སྨྲ་བ་ནི་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་སོ། །དེ་བས་ན་དགེ་སློང་ལྟུང་བ་བྱུང་བ་རྣམ་པར་དག་པར་འདོད་པས་ལྟུང་བ་ཡོད་ལ་དྲན་བཞིན་མཐོང་བ་མཐོལ་བར་བྱའོ། །མཐོལ་ན་བདེ་བ་ལ་རེག་པར་གནས་པར་འགྱུར་རོ། །མ་མཐོལ་མ་བཤགས་ན་ནི་མི་འགྱུར་རོ་ཞེས་གསུངས་པ་ཡིན་ནོ། །གླེང་གཞི་གདོན་པ་དང་གསོལ་བ་ལ་ནི་ཚིག་ཏུ་བརྗོད་པ་ཉིད་ཀྱིས་བསྒྲུབ་པར་བྱ་བ་ཉིད་ཡིན་ནོ་ཞེས་བྱ་བ་ནི། གླེང་གཞི་གདོན་པ་དང་གསོལ་བ་འདི་གཉིས་ནི་ཚིག་ཏུ་བརྗོད་པ་ཉིད་ཀྱིས་བསྒྲུབ་པར་བྱ་བ་ཉིད་ཡིན་པའོ། །འདི་སྐད་བསྟན་ཏེ། དེ་གཉིས་ནི་མདོ་ལས་བྱུང་བའི་གོ་རིམས་བཞིན་དུ་ཁ་ཏོན་དུ་རྒྱ་ཆེར་གདོན་པར་བྱ་བ་ཡིན་གྱི་ཐོས་པ་བསྒྲགས་པས་བསྒྲུབ་པར་བྱ་བ་ནི་མ་ཡིན་ནོ། །ལྷག་མ་ནི་ཐོས་པ་བསྒྲགས་པས་ཀྱང་ངོ་ཞེས་བྱ་བ་ནི། གླེང་གཞི་འདོན་པ་དང་
གསོལ་བའི་ལྷག་མ་དག་ནི་ཐོས་པ་བསྒྲགས་པས་ཀྱང་བསྒྲུབ་པར་བྱར་རུང་བ་ཉིད་ཡིན་ནོ། །ཀྱང་ངོ་ཞེས་བྱ་བའི་སྒྲས་ནི་ཚིག་ཏུ་བརྗོད་པས་ཀྱང་བསྒྲུབ་པར་བྱར་རུང་བ་ཉིད་ཡིན་ནོ་ཞེས་བྱ་བར་སྟོན་ཏོ། །བརྩམས་པའི་སྡེ་ཚན་ནི་རྫོགས་པར་བྱ་དགོས་སོ་ཞེས་བྱ་བ་ནི། ཕམ་པར་འགྱུར་བ་དང་དགེ་འདུན་ལྷག་མ་དང་མ་ངེས་པའི་སྡེ་ཚན་ནི་ཡང་ན་ནི་ཐོས་པ་བསྒྲགས་པས་བསྒྲུབ་པོ། །ཚིག་ཏུ་བརྗོད་པས་གདོན་པ་བརྩམས་ན་ནི་གང་བརྩམས་པ་དེའི་སྡེ་ཚན་ལྷག་པ་རྫོགས་པར་བྱ་དགོས་པ་སྟེ། ཕམ་པར་འགྱུར་བའི་སྡེ་ཚན་ལས་ཅུང་ཞིག་ཚིག་ཏུ་བརྗོད་པས་བཏོན་ནས་ལྷག་མཐོས་པ་བསྒྲགས་པས་བསྒྲུབ་པར་མི་བྱ་བ་དང་དགེ་འདུན་ལྷག་མའི་སྡེ་ཚན་དང་མ་ངེས་པའི་སྡེ་ཚན་ལས་ཀྱང་དེ་བཞིན་ཏེ། འདི་ལྟར་ཕྱེད་བཏོན་ཅིང་ཕྱེད་འཇོག་པ་ནི་སྨད་པར་བྱ་བ་ཉིད་ཡིན་པའི་ཕྱིར་རོ། །བཞི་པ་ལ་རེག་ན་རིལ་གྱིས་སོ་ཞེས་བྱ་བ་ལ། བཞི་པ་ཞེས་བྱ་བ་ནི། སོ་སོར་ཐར་པའི་མདོ་གདོན་པ་ནི་རྣམ་པ་ལྔ་པོ་གླེང་གཞི་གདོན་པ་དང་ཕམ་པར་འགྱུར་བ་གདོན་པ་དང་དགེ་འདུན་ལྷག་མ་གདོན་པ་དང༌། མ་ངེས་པ་གདོན་པ་དང༌། རིལ་གྱིས་གདོན་པ་ཞེས་བྱ་བའི་གོ་རིམས་ལ་ལྟོས་པ་ཡང་མ་ཡིན། ལྟུང་བྱེད་སྡེ་ལྔ་པོ་ཕམ་པར་འགྱུར་བའི་སྡེ་ཚན་དང་དགེ་འདུན་ལྷག་མའི་སྡེ་ཚན་དང༌། ལྟུང་བའི་སྡེ་ཚན་དང་སོ་སོར་བཤགས་པར་བྱ་བའི་སྡེ་ཚན་དང་བསླབ་པའི་སྡེ་ཚན་ཞེས་བྱ་བའི་གོ་རིམས་ལ་ལྟོས་པ་ཡང་མ་ཡིན་གྱི། སོ་སོར་ཐར་པ་ལས་བྱུང་བའི་སྡེ་ཚན་དྲུག་པོ་ཕམ་པའི་སྡེ་ཚན་དང༌། དགེ་འདུན་ལྷག་མའི་སྡེ་ཚན་དང༌། མ་ངེས་པའི་སྡེ་ཚན་དང༌། ལྟུང་བྱེད་ཀྱི་སྡེ་ཚན་དང༌། སོ་སོར་བཤགས་པར་བྱ་བའི་སྡེ་ཚན་དང༌། བསླབ་པའི་སྡེ་ཚན་ཞེས་བྱ་བའི་གོ་རིམས་ལ་ལྟོས་པ་ཡིན་ནོ། དེ་བས་ན་འདིར་བཞི་པ་ཞེས་སྨོས་པ་ནི་ལྟུང་བྱེད་ཀྱི་སྡེ་ཚན་ཡིན་ཏེ། སྤང་བའི་ལྟུང་བྱེད་དང་ལྟུང་བྱེད་འབའ་ཞིག་ཏུ་འགྱུར་བའི་སྡེ་ཚན་རྣམས་སོ། །དེ་ལ་རེག་ན་ཞེས་བྱ་བ་ནི། སྤང་བའི་ལྟུང་བྱེད་ཀྱི་མགོ་ཚིག་ཏུ་བརྗོད་པས་གདོན་པར་བརྩམས་ནའོ། །རིལ་གྱིས་སོ་ཞེས་བྱ་བ་ནི། དེ་ལྟར་བཞི་པ་ལ་རེག་ན་དེ་མན་ཆད་བར་དུ་མི་གཅད་པར་རྫོགས་ཀྱི་བར་དུ་རིལ་གྱིས་ཚིག་ཏུ་བརྗོད་པས་གདོན་པར་བྱ་དགོས་སོ་ཞེས་བྱ་བའི་ཐ་ཚིག་གོ །དེ་ལྟར་བཞི་པ་ལས་རེག་ན་འདིར་སོ་སོར་བཤགས་པར་བྱ་བའི་སྡེ་ཚན་ལ་སོགས་པ་ཡང་
ཐོས་པ་བསྒྲགས་པས་བསྒྲུབ་ཏུ་མི་རུང་སྟེ་ལས་ཕལ་ཆེར་བྱས་པ་མ་རྫོགས་པར་དོར་བ་ནི་མ་ལེགས་པར་ཡིད་ལ་སྣང་པའི་ཕྱིར་རོ། །དེ་ལྟ་བས་ན་སོ་སོར་ཐར་བའི་མདོ་གདོན་པ་ལྔ་པོ་དག་ལ་གླེང་གཞི་ཚིག་ཏུ་བརྗོད་པས་བཏོན་ནས་ལྷག་མ་ཐོས་པ་བསྒྲགས་པས་བསྒྲུབ་པར་བྱར་རུང་ངོ༌། །དེ་བཞིན་དུ་ཕམ་པར་འགྱུར་བ་རྣམས་སམ། དགེ་འདུན་ལྷག་མ་རྣམས་སམ། མ་ངེས་པ་དག་ཚིག་ཏུ་བརྗོད་པས་བཏོན་ནས་ལྷག་མ་ཐོས་པ་བསྒྲགས་པས་བསྒྲུབ་ཏུ་ཡང་རུང་གི །ལྔ་པ་རིལ་གྱིས་གདོན་པ་ཞེས་བྱ་བ་ནི་ཡང་ན་ནི་ཐོས་པ་བསྒྲགས་པས་བསྒྲུབ་ཅིང་ཚིག་ཏུ་བརྗོད་པས་གདོན་པ་ཡེ་མི་བརྩམ་མོ། །བརྩམས་ན་ནི་བར་དུ་གཅད་དུ་མི་རུང་སྟེ་རིལ་གྱིས་རྫོགས་ཀྱི་བར་དུ་བརྗོད་པས་གདོན་པར་བྱའོ། །འདི་ལ་ཟླ་བ་ཕྱེད་འདས་པའི་སོ་སོར་བརྟག་པར་བྱའོ་ཞེས་བྱ་བ་ནི། གསོ་སྦྱོང་འདི་ལ་ཟླ་བ་ཕྱེད་བཟླས་པའི་ཉེས་པ་བདག་ལ་ཅི་བྱུང་བ་དེ་དག་སོ་སོར་བརྟག་པར་བྱའོ། །གང་གི་ཚེ་ཞེ་ན་དེའི་ཕྱིར་འདུ་བར་འགྱུར་བ་དེར་རོ་ཞེས་བྱ་བ་སྨྲས་ཏེ། དགེ་སློང་རྣམས་སོ་སོར་ཐར་པའི་མདོ་འདོན་པའི་ཕྱིར་འདུ་བ་གང་ཡིན་པ་དེར་འདུ་བའི་མདུན་རོལ་དུ་འདུ་བ་ལ་སྦྱོར་བའི་ཚེའོ། །ཅི་སོ་སོར་བརྟགས་ནས་ལྟུང་བ་ཕྱིར་མ་བཅོས་པ་ཁོ་ནར་འདུག་པར་བྱའམ་ཞེ་ན་དེའི་ཕྱིར། ཤེས་པ་ཕྱིར་བཅོས་ཏེ་ཐམས་ཅད་དུ་འདུག་པར་བྱའོ་ཞེས་བྱ་བ་སྨྲས་ཏེ། ལྟུང་བ་ངེས་པར་ཤེས་པ་འམ་ཡིད་གཉིས་དང་བཅས་པར་ཤེས་པ་བཤགས་པ་དང་བྱིན་གྱིས་བརླབ་པ་གཉིས་ཀྱིས་ཕྱིར་བཅོས་ཏེ་གསོ་སྦྱོང་གི་གནས་འབའ་ཞིག་ཏུ་མ་ཟད་ཀྱི་དགག་དབྱེ་ལ་སོགས་པ་ལས་ཀྱི་གནས་ཐམས་ཅད་དུ་ཆོ་ག་དེ་ལྟ་བུས་འདུག་པར་བྱའོ། །འདུག་པ་ན་དྲན་ནམ་ཡིད་གཉིས་ཟན་དྲུང་ན་མོ་ལ་བྱིན་གྱིས་བརླབ་པར་བྱའོ་ཞེས་བྱ་བ་ནི། དགེ་སློང་དེ་སོ་སོར་ཐར་བའི་མདོ་གདོན་པའི་གནས་སུ་འདུག་པ་ན་གལ་ཏེ་ལྟུང་བའི་ཡུལ་དྲན་ནམ་དེ་ལ་ཡིད་གཉིས་ཟན་ལྟག་འོག་དྲུང་ན་འདུག་པའི་དགེ་སློང་དེ་ལ་བྱིན་གྱིས་བརླབ་པར་བྱ་སྟེ། མདུན་ནས་བྱའི། གློ་ནས་མི་བྱའོ། །དེའི་སྔགས་ནི་ཚེ་དང་ལྡན་པ་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅོ་ལྔ་པ་ལགས་ལ། བདག་དགེ་སློང་མིང་འདི་ཞེས་བགྱི་པའི་གསོ་སྦྱོང་ཡང་བཅོ་ལྔ་པ་ལགས་ཏེ། བདག་དགེ་སློང་མིང་
འདི་ཞེས་བགྱི་བ་དགེ་འདུན་གྱི་ནང་དུ་ལྟུང་བ་འདི་དང་འདི་ལྟ་བུ་ཞིག་དྲན་ཏེ་བདག་ལྟུང་བ་འདི་ཚེ་དང་ལྡན་པའི་མདུན་དུ་བྱིན་གྱིས་བརླབས་ལ་དེང་གསོ་སྦྱོང་བགྱིའོ། །སང་ནང་པར་ལྟུང་བ་དེ་ཆོས་བཞིན་དུ་སླར་བགྱིའོ་ཞེས་བྱ་བ་དང༌། ཚེ་དང་ལྡན་པ་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅོ་ལྔ་པ་ལགས་ལ། བདག་དགེ་སློང་མིང་འདི་ཞེས་བགྱི་བའི་གསོ་སྦྱོང་ཡང་བཅོ་ལྔ་པ་ལགས་ཏེ། བདག་དགེ་སློང་མིང་འདི་ཞེས་བགྱི་བ་དགེ་འདུན་གྱི་ནང་དུ་ལྟུང་བ་འདི་དང་འདི་ལྟ་བུ་ཞིག་ལ་ཡིད་གཉིས་སུ་གྱུར་ན་བདག་ལྟུང་བ་དེ་ཚེ་དང་ལྡན་པའི་མདུན་དུ་བྱིན་གྱིས་བརླབས་ལ་དེང་གསོ་སྦྱོང་བགྱིའོ། །སང་ནང་པར་དགེ་སློང་མདོ་སྡེ་འཛིན་པ་དང་འདུལ་བ་འཛིན་པ་དང་མ་མོ་འཛིན་པ་རྣམས་ལ་དྲིས་ཏེ་དོགས་པ་དང་ཡིད་གཉིས་བསལ་ལ་ལྟུང་བ་དེ་སླར་ཆོས་བཞོན་དུ་བགྱིའོ་ཞེས་བྱ་བ་ཡིན་ནོ། །ལས་བྱེད་པས་ནི་སེམས་ཀྱིས་སོ་ཞེས་བྱ་བ་ནི། འདུག་པ་ན་ལྟུང་བ་དྲན་ནམ་ཡིད་གཉིས་ཟ་ན་བྱིན་གྱིས་བརླབ་པར་བྱའོ་ཞེས་བྱ་བར་སྦྱར་རོ། །གལ་ཏེ་ལས་བྱེད་པ་ལྟུང་བའི་ཡུལ་ལ་དྲན་ནམ་དེ་ལ་ཡིད་གཉིས་ཟ་ན་དེས་དེའི་ཚེ་རང་གི་སེམས་ཀྱིས་བྱིན་གྱིས་བརླབ་པར་བྱའོ། །དེའི་སྔགས་ནི་དེང་དགེ་འདུན་གྱིས་གསོ་སྦྱོང་བཅོ་ལྔ་པ་ཡིན་ལ། བདག་དགེ་སློང་ལས་བྱེད་པ་མིང་འདི་ཞེས་བགྱི་བའི་གསོ་སྦྱོང་ཡང་བཅོ་ལྔ་པ་ཡིན་ཏེ། བདག་དགེ་སློང་ལས་བྱེད་པ་མིང་འདི་ཞེས་བྱ་བ་དགེ་འདུན་གྱི་ནང་དུ་ལྟུང་བ་འདི་དང་འདི་ལྟ་བུ་ཞིག་དྲན་ཏེ། བདག་དགེ་སློང་ལས་བྱེད་པ་མིང་འདི་ཞེས་བྱ་བས་ལྟུང་བ་དེ་རང་གི་སེམས་ཀྱིས་བྱིན་གྱིས་བརླབས་ལ་དེང་གསོ་སྦྱོང་བྱའོ། །སང་ནང་པར་ལྟུང་བ་དེ་ཆོས་བཞིན་དུ་ཕྱིར་བྱའོ་ཞེས་བྱ་བ་དང༌། དེང་དགེ་འདུན་གྱི་གསོ་སྦྱོང་བཅོ་ལྔ་པ་ཡིན་ལ། བདག་དགེ་སློང་ལས་བྱེད་པ་མིང་འདི་ཞེས་བྱ་བའི་གསོ་སྦྱོང་ཡང་བཅོ་ལྔ་པ་ཡིན་ལ། བདག་དགེ་སློང་ལས་བྱེད་པ་མིང་འདི་ཞེས་བྱ་བ་དགེ་འདུན་གྱི་ནང་དུ་ལྟུང་བ་འདི་དང་འདི་ལྟ་བུ་ཞིག་ལ་ཡིད་གཉིས་སུ་གྱུར་ན་བདག་དགེ་སློང་ལས་བྱེད་པ་མིང་འདི་ཞེས་བྱ་བས་ལྟུང་བ་དེ་རང་གི་སེམས་ཀྱིས་བྱིན་གྱིས་བརླབས་ལ་གསོ་སྦྱོང་བྱའོ། །སང་ནང་པར་དགེ་སློང་མདོ་སྡེ་འཛིན་པ་དང་འདུལ་བ་འཛིན་པ་དང་མ་མོ་འཛིན་པ་རྣམས་ལ་དྲིས་ཏེ་དོགས་པ་དང་ཡིད་གཉིས་བསལ་
ལ་ལྟུང་བ་དེ་ཆོས་བཞིན་དུ་ཕྱིར་བྱའོ་ཞེས་གསུངས་པ་ཡིན་ནོ། །འདི་དང་སྔ་མའི་བྱིན་གྱིས་བརླབས་པའི་སྐབས་དེ་དག་ཏུ་ཧ་ཅང་ཡུན་རིང་ན་མི་མཛེས་པས་སྔགས་ལན་རེ་བཟླས་པས་ཆོག་སྟེ་ལན་གསུམ་དུ་མི་དགོས་སོ། །གལ་ཏེ་ཚེས་བཅོ་ལྔ་ལ་བདག་གཅིག་པུ་དེ་དང་མི་ལྡན་པར་ཤེས་ན་འགྲོགས་བཤེས་ལ་དྲང་པོར་འབད་པར་བྱའོ་ཞེས་བྱ་བ་ནི། གལ་ཏེ་དགེ་སློང་གིས་གསོ་སྦྱོང་གི་ཉིན་མོ་བདག་གཅིག་པུ་ལྟུང་བདེ་དང་མི་ལྡན་ཞིང་དགེ་འདུན་གཞན་ཐམས་ཅད་ལྟུང་བ་མཐུན་པ་དང་ལྡན་པར་ཤེས་ན་དེའི་ཚེ་དེས་བེན་དུ་མི་དོར་བར། གྲོགས་པོ་འགྲོགས་པ་ཤེས་གཅིག་ལ་དྲང་པོར་འབད་ཅིང་བརྩལ་བར་བྱའོ་ཞེས་བྱ་བའི་ཐ་ཚིག་གོ །ཇི་ལྟར་བརྩལ་བར་བྱ་ཞེ་ན་དེའི་ཕྱིར་ཚེ་དང་ལྡན་པ་འདི་དང་འདི་ལྟར་བྱེད་པ་གང་ཡིན་པ་དེས་ཅིར་འགྱུར། ལྟུང་བ་དང་བཅས་པར་རོ། །འོ་ན་ཚེ་དང་ལྡན་པས་ཀྱང་འདི་དང་འདི་ལྟར་བྱས་སམ་བྱས་སོ། །འོ་ན་ཚེ་དང་ལྡན་པ་ཡང་ལྟུང་བ་དང་བཅས་པ་ཡིན་ནོ། །ཚེ་དང་ལྡན་པ་ཁོ་བོ་གཅིག་པུར་མ་ཟད་ཀྱི་དགེ་འདུན་ཐམས་ཅད་དོན་དེ་དང་ལྡན་པ་ཡིན་ནོ། །ཀྱེ་ཚེ་དང་ལྡན་པ་ཇེ་ཁྱོད་རང་གི་ལྟུང་བ་ཆོས་བཞིན་དུ་ཕྱིར་གྱིས་ཤིག །དགེ་འདུན་ཐམས་ཅད་ཀྱིས་ཁྱོད་ལ་ཅིར་འགྱུར་ཞེས་བྱ་བའི་རྩོམ་པས་མིག་ལམ་དུ་ལྷག་མ་འདོད་པ་རྣམས་འཆགས་སུ་གཞུག་གོ་ཞེས་བྱ་བ་སྨྲས་ཏེ། ཇེ་དང་པོར་དགེ་འདུན་ཐམས་ཅད་ལྟུང་བ་དང་བཅས་སོ་ཞེས་དུམ་པ་ཚོགས་སུ་མི་གླེང་པར་དགེ་འདུན་ཐམས་ཅད་ལྟུང་བ་མཐུན་པ་དང་བཅས་པར་འགྱུར་བ་ཞིག་ཅི་ལས་གྱུར་པའི་གཞི་དེ་རང་གི་ཡིད་ལ་བཞག་སྟེ་གྲོགས་པོ་མཛའ་བཤེས་དེ་ལ་འདི་སྐད་ཅེས། ཚེ་དང་ལྡན་པ་འདི་དང་འདི་དག་བྱེད་པ་གང་ཡིན་པ་དེས་ཅིར་འགྱུར་ཞེས་དྲི་བར་བྱའོ། །གྲོགས་པོ་ན་རེ། ལྟུང་བ་དང་བཅས་པར་རོ་ཞེས་ཟེར་ན། དེ་ལ་འདི་སྐད་ཅེས་འོ་ན་ཚེ་དང་ལྡན་པས་ཀྱང་འདི་དང་འདི་ལྟར་བྱས་སམ་ཞེས་དྲི་བར་བྱའོ། །གྲོགས་པོ་ན་རེ་བྱས་སོ་ཞེས་ཟེར་ན་དེ་ལ་འདི་སྐད་ཅེས་འོ་ན་ཚེ་དང་ལྡན་པ་ཡང་ལྟུང་བ་དང་བཅས་པ་ཡིན་ནོ་ཞེས་བརྗོད་པར་བྱའོ། །གྲོགས་པོ་ན་རེ། ཚེ་དང་ལྡན་པ་ཁོ་བོ་གཅིག་པུར་མ་ཟད་ཀྱི་དགེ་འདུན་ཐམས་ཅད་དོན་དང་ལྡན་པ་ཡིན་ནོ་ཞེས་ཟེར་ན། དེ་ལ་འདི་སྐད་ཅེས། ཀྱེ་ཚེ་དང་ལྡན་པ་དེ་ཁྱོད་རང་གི་ལྟུང་བ་ཆོས་བཞིན་དུ་ཕྱིར་གྱིས་ཤིག་དགེ་འདུན་
ཐམས་ཅད་ཀྱིས་ཁྱོད་ལ་ཅིར་འགྱུར་ཞེས་བསྐུལ་ཞིང་ལྟུང་བ་འཆགས་སུ་གཞུག་གོ །དེ་ལྟ་བུའི་རིམ་པ་རྩོམ་པས་གྲོགས་པོ་དེ་དགེ་འདུན་གཞན་ཐམས་ཅད་ཀྱི་མིག་ལམ་དུ་ལྟུང་བ་འཆགས་སུ་གཞུག་གོ །དེ་ལྟུང་བ་འཆགས་པ་དགེ་འདུན་གཞན་གྱིས་མཐོང་ན་ཁྱོད་ཅི་འཆགས་ཞེས་འདྲི་བར་འགྱུར་བས་དེས་ཀྱང་ཁོ་བོ་གཞི་འདི་ལས་གྱུར་པའི་ལྟུང་བ་འཆགས་སོ་ཞེས་ཐམས་ཅད་ལ་གོ་བར་བྱའོ། །དེས་ན་དགེ་འདུན་ལྷག་མ་གཞན་ཡང་དེ་ལྟར་ན་བདག་ཅག་ཀྱང་ལྟུང་བ་དེ་དང་ལྡན་ནོ་སྙམ་དུ་དྲན་པར་འགྱུར་བས། དེ་དག་ལས་ལྟུང་བ་དེ་ཆོས་བཞིན་དུ་ཕྱིར་འཆགས་བར་འདོང་པ་རྣམས་དགེ་སློང་ལྟུང་བ་དང་མི་ལྡན་པ་དེས་ལྟུང་བ་དེ་ཆོས་བཞིན་དུ་ཕྱིར་འཆགས་སུ་གཞུག་གོ་ཞེས་བྱ་བ་བར་སྦྱར་རོ། །འདི་ལ་མི་འདོད་པ་དེ་ལས་གླེང་བར་མི་བྱའོ་ཞེས་བྱ་བ་ནི། གསོ་སྦྱོང་དང་དགག་དབྱེ་འདི་ལ་ཉེས་པ་གླེང་བར་མི་འདོད་པའི་དགེ་སློང་ལྟུང་བ་དང་བཅས་པ་དེ་ལ་གླེང་བར་མི་བྱ་བ་སྟེ། གལ་ཏེ་དགེ་སློང་དེ་མི་འདོད་ན་དེའི་ཚེ་དེ་ལ་གླེང་བར་མི་བྱའོ། །འོ་ན་ཇི་ལྟར་མ་དག་པ་རྣམས་དང་ལྷན་ཅིག་གསོ་སྦྱོང་ལ་སོགས་པའི་ལས་ཉམས་སུ་མྱོང་བར་བྱར་རུང་ཞེ་ན། དེའི་ཕྱིར་གལ་ཏེ་ཚེས་བཅོ་ལྔ་ལ་ཐམས་ཅད་ཀྱིས་ལྟུང་བ་ཤེས་སམ་ཡིད་གཉིས་སུ་གྱུར་ན་ལེན་པར་བྱེད་པ་བསྒྲུབ་པའི་ཕྱིར་དགེ་སློང་འགའ་ཞིག་རང་གི་ཕྱིར་བཅོས་པའི་འདོན་དུ་གནས་གཞན་དག་ཏུ་གཏང་བར་བྱའོ་ཞེས་བྱ་བ་སྨྲས་ཏེ། གལ་ཏེ་གསོ་སྦྱོང་གི་ཉིན་མོ་དགེ་འདུན་ཐམས་ཅད་ཀྱིས་བདག་ཅག་ལ་ལྟུང་བ་མཐུན་པ་ཡོད་པར་ཤེས་སམ། ཡིད་གཉིས་སུ་གྱུར་ན་དགེ་སློང་ལྟུང་བ་དང་བཅས་པ་དེ་དག་རང་གི་ལྟུང་བ་གང་གི་མདུན་དུ་འཆགས་པ་ལེན་པར་བྱེད་པའི་གང་ཟག་ལྟུང་བ་མེད་པ་གཅིག་བསྒྲུབ་པའི་ཕྱིར། བདག་ཅག་གི་ནང་ནས་དགེ་སློང་འགའ་ཞིག་དེ་རང་གི་ལྟུང་བ་ཕྱིར་བཅོས་པའི་དོན་དུ་གནས་གང་ན་ལྟུང་བ་མཐུན་པ་མེད་པའི་དགེ་སློང་འདུག་པའི་གནས་གཞན་དུ་གཏད་བར་བྱའོ། །དེས་དེར་རང་གི་ལྟུང་བ་ཕྱིར་བཅོས་ཏེ་སླར་འཁོར་ནས་དེའི་མདུན་དུ་དགེ་སློང་གཞན་ཐམས་ཅད་ཀྱིས་རང་རང་གི་ལྟུང་བ་ཆོས་བཞིན་དུ་ཕྱིར་བཅོས་པར་བྱ་སྟེ་དེ་ལྟར་ན་གསོ་སྦྱོང་འགྲུབ་པར་འགྱུར་རོ། །མ་གྲུབ་ན་བྱིན་གྱིས་བརླབ་པའི་ཕྱིར་གསོལ་བ་བྱ་བ་འདོད་པར་བྱའོ་ཞེས་
བྱ་བ་ནི། ཇི་སྐད་བསྟན་པའི་ཆོ་ག་དེ་མ་གྲུབ་ན་དགེ་སློང་གི་དགེ་འདུན་གྱིས་ལྟུང་བ་བྱིན་གྱིས་བརླབ་པའི་ཕྱིར་གསོལ་བའི་ལས་བྱ་བ་འདོད་པར་བྱ་སྟེ། གསོལ་བས་ལྟུང་བ་བྱིན་གྱིས་བརླབས་ལ་གསོ་སྦྱོང་ངམ་དགག་དབྱེའི་ལས་མི་བཤོལ་བར་བྱའོ། །གང་ཟག་རེ་རེ་ཞིང་བྱིན་གྱིས་བརླབས་ན་ཡང་དག་པར་འགྱུར་མོད་ཀྱི་རེ་རེ་ནས་བྱ་བ་ཚེགས་ཆེ་བས་འདིར་ཡང་སྤྱིར་བྱིན་གྱིས་བརླབས་པའི་ཕྱིར་འདོད་པར་བྱའོ་ཞེས་སྨོས་ཏེ། དགེ་སློང་ཐམས་ཅད་ཀྱིས་གསོལ་བ་འབའ་ཞིག་གི་ལས་ལ་མོས་པར་བྱའོ་ཞེས་བྱ་བའི་ཐ་ཚིག་གོ །འདིའི་སྔགས་ནི་དགེ་འདུན་བཙུན་པ་རྣམས་གསན་དུ་གསོལ། དེང་དགེ་འདུན་གྱི་གསོ་སྦྱོང་བཅོ་ལྔ་པ་ལགས་ལ། བདག་ཅག་དགེ་འདུན་ཐམས་ཅད་ནི་ལྟུང་བ་དང་བཅས་པར་གྱུར་ན་གང་གི་མདུན་དུ་བདག་ཅག་བཤགས་པར་བགྱི་བ་བདག་ཅག་ལས་དགེ་སློང་གནས་གཞན་དུ་མཆིས་ལ་ལྟུང་བ་དེ་ཆོས་བཞིན་དུ་སླར་བགྱིད་པར་སྤྲོ་བསུ་ཡང་མ་མཆིས་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང་དགེ་འདུན་གྱིས་དེང་ལྟུང་བ་དེ་བྱིན་གྱིས་བརླབས་ཏེ་གསོལ་སྦྱོང་མཛད་ལ། སླད་ཀྱི་ལྟུང་བ་དེ་ཆོས་བཞིན་དུ་སླར་མཛད་དོ། །འདི་ནི་གསོལ་བའོ་ཞེས་བྱ་བ་དང༌། དགེ་འདུན་བཙུན་པ་རྣམས་གསན་དུ་གསོལ། དེང་དགེ་འདུན་གྱི་གསོ་སྦྱོང་བཅོ་ལྔ་པ་ལགས་པ་བདག་ཅག་དགེ་འདུན་ཐམས་ཅད་ནི་ཡིད་གཉིས་དང་བཅས་པར་གྱུར་ན་གང་གི་མདུན་དུ་བདག་ཅག་བཤགས་པར་བགྱི་བ་བདག་ཅག་ལས་དགེ་སློང་གནས་གཞན་དུ་མཆི་ལ། དགེ་སློང་མདོ་སྡེ་འཛིན་པ་དང༌། འདུལ་བ་འཛིན་པ་དང༌། མ་མོ་འཛིན་པ་རྣམས་ལ་དྲིས་ཏེ་དོགས་པ་དང་ཡིད་གཉིས་བསལ་ལ་ལྟུང་པ་དེ་ཆོས་བཞིན་དུ་སླར་བགྱིད་པར་སྤྲོ་བ་སུ་ཡང་མ་མཆིས་ན་གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དེར་ལྟུང་བདེ་བྱིན་གྱིས་བརླབས་ཏེ་གསོ་སྦྱོང་མཛད་ལ་སླད་ཀྱིས་དགེ་སློང་མདོ་སྡེ་འཛིན་པ་དང༌། འདུལ་བ་འཛིན་པ་དང༌། མ་མོ་འཛིན་པ་རྣམས་ལ་དྲིས་ཏེ་དོགས་པ་དང་ཡིད་གཉིས་བསལ་ལ་ལྟུང་བ་དེ་ཆོས་བཞིན་དུ་སླར་མཛད་དོ། །འདི་ནི་གསོལ་བའོ་ཞེས་བྱ་བ་ཡིན་ནོ། །བཞི་པས་ཉུང་བ་ཉིད་ལ་ཡང་གཙུག་ལག་ཁང་གི་བྱ་
བ་གནས་པ་ཁོ་ན་ཡིན་ནོ་ཞེས་བྱ་བ་ནི། གཙུག་ལག་ཁང་གཅིག་ན་དགེ་སློང་གསུམ་མམ་གཉིས་སམ་གཅིག་ཁོ་ན་འདུག་ན་ཡང་དེས་ཕྱག་དར་ལ་སོགས་པ་གཙུག་ལག་ཁང་གི་བྱ་བ་གདོན་མི་ཟ་བར་བྱ་དགོས་སོ་ཞེས་བྱ་བའི་ཐ་ཚིག་གོ །སྟན་ཐབས་ཉམས་པར་མི་བྱའོ་ཞེས་བྱ་བ་ནི། བཞི་པས་ཉུང་པ་ཉིད་གནས་སུ་ཟིན་ཀྱང་དེར་དགེ་སློང་མ་འོངས་པ་དག་འོད་སྲིད་པས་དེའི་དོན་དུ་སྟན་ཐབས་གཞིག་པར་མི་བྱ་བའོ། །ཆག་ཆག་དང་ཕྱག་དར་དང་ལྕི་བ་སར་པས་བྱུག་པར་བྱ་བ་དང་སེང་གེའི་ཁྲི་བཤམས་པ་དང་མར་མེ་གཟུགས་པ་དང་ཆོས་ཉན་དུ་གཞུག་པ་དག་བྱས་ལ་ཕྱོགས་ཆེས་མཐོན་པོར་འདུག་སྟེ་ཕྱོགས་བཞིན་རྣམ་པར་བལྟ་བར་བྱའོ་ཞེས་བྱ་བ་ནི། བཞི་བས་ཉུང་བ་གནས་པའི་དགེ་སློང་དེས་རང་གི་གཙུག་ལག་ཁང་དེར་གསོ་སྦྱོང་གི་ཉིན་མོ་ཆག་ཆ་ག་ལ་སོགས་པ་དག་བྱས་ལ་ཕྱོགས་ཆེས་མཐོན་པོར་འདུག་སྟེ་དགེ་སློང་མ་འོངས་པ་དག་འོང་ངམ་མི་འོང་ཕྱོགས་བཞིར་རྣམ་པར་བལྟ་བར་བྱའོ། །ཆག་ཆག་ལ་སོགས་པའི་ལས་དེ་དག་ཐམས་ཅད་ནི་གོ་རིམས་དེ་ཁོ་ན་བཞིན་དུ་བྱ་བ་ཡིན་ནོ། །དེ་ལྟར་རྣམ་པར་ལྟ་བ་ན་དགེ་སློང་འོང་བ་སྣང་ན་ཀྱེ་ཚེ་དང་ལྡན་པ་མྱུར་བ་མྱུར་བར་ཤོག་ཤིག་དེང་དགེ་འདུན་གྱི་གསོ་སྦྱོང་ངམ་དགག་དབྱེ་བཅོ་ལྔ་པ་ཡིན་ནོ་ཞེས་བརྗོད་པར་བྱའོ། །འདིར་གཞུང་ནི་མ་མོ་ལས་དགེ་སློང་གཅིག་པུ་གནས་ན་གནས་པ་གང་ཡིན་པ་དེ་གསོ་སྦྱོང་བཅོ་ལྔ་པ་དེ་ཉིད་ཀྱི་ཚེ་ནང་པར་སྔར་ལངས་ཏེ། མཆོད་རྟེན་དང་གཙུག་ལག་ཁང་དང་འཁོར་ས་དང་གསོ་སྦྱོང་གི་གནས་དག་ཆག་ཆག་གདབ་ཅིང་ཕྱག་དར་བྱ། ལྕི་བ་འཇམ་པོའི་བྱུག་པས་བྱུག་པར་བྱའོ། །གྲལ་རིམས་བཞིན་དུ་སྟན་དག་བཤམ་པར་བྱ་གཙང་མ་སའི་རིལ་པ་སྤྱི་ལུགས་དང་ཆབ་ཁུང་སའི་རིལ་བ་སྤྱི་ལུགས་དག་ཆུས་དགང་བར་བྱ། མེ་ཉེ་བར་གཞག་པར་བྱ། མར་མེའི་ཀོང་བུ་སྙིང་པོ་དང་སྡོང་བུ་བཤམ་པར་བྱ། ཚུལ་ཤིང་གི་བམ་པོ་པར་གཞག་པར་བྱ་ཞིང་གལ་ཏེ་དགེ་སློང་གསོ་སྦྱོང་མ་བྱས་པ་དག་འོངས་ན། དེ་དག་ཐམས་ཅད་ཀྱིས་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པར་བྱའོ། །འོན་ཏེ་མི་འོང་ན་ཕྱོགས་ཆེས་མཐོན་པོ་གང་ཡིན་པ་དེར་འདུག་སྟེ་ཕྱོགས་བཞི་ཀུན་དུ་རྣམ་པར་བལྟ་བར་བྱའོ། །གལ་ཏེ་
འགའ་ཞིག་འོང་ན་ཚེ་དང་ལྡན་པ་མྱུར་དུ་ཤོག་ཤིག་དང་གསོ་སྦྱོང་བྱའོ་ཞེས་བོད་པར་བྱའོ། །ཇི་སྟེ་མི་འོད་ན་དེས་དྲོ་ལ་བབ་ཀྱི་བར་དུ་བསྡད་དེ་དེ་ནས་བབས་ལ་སྟན་ལ་འདུག་སྟེ་རྒྱུན་ཆགས་གསུམ་པ་གདོན་པར་བྱ་ཡོན་བཤད་པར་བྱ་ཞིང༌། དེང་དགེ་འདུན་གྱི་གསོ་སྦྱོང་བཅོ་ལྔ་པ་ཡིན་ལ། བདག་དགེ་སློང་མིང་འདི་ཞེས་བྱ་བའི་གསོ་སྦྱོང་ཡང་བཅོ་ལྔ་པ་ཡིན་ཏེ། བདག་དགེ་སློང་མིང་འདི་ཞེས་བྱ་བ་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་ཀྱང་བདག་སྨྲས་པ་དག་ཡོངས་སུ་དག་པར་ལྷ་རྣམས་ཀྱིས་གཟུང་དུ་གསོལ། བདག་དགེ་འདུན་སློང་མིང་འདི་ཞེས་བྱ་བས་ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པར་བྱ་བའི་ཕྱིར། དེང་གསོ་སྦྱོང་བྱིན་གྱིས་བརླབ་པོ། །གང་གི་ཚེ་དགེ་འདུན་ཚོགས་པ་རྙེད་པ་དེའི་ཚེ་དགེ་འདུན་དང་ལྷན་ཅིག་ཏུ་གསོ་སྦྱོང་རྒྱ་ཆེར་ཉམས་སུ་མྱོང་བར་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་ཡང་བྱའོ་ཞེས་ལན་གཉིས་ལན་གསུམ་དུ་བརྗོད་པར་བྱའོ་ཞེས་གསུངས་པ་ཡིན་ནོ། །བཞིར་མ་ཚང་ན་དུས་ཀྱི་བར་དུ་བསྡད་དེ་བྱིན་གྱིས་བརླབ་པར་བྱའོ་ཞེས་བྱ་བ་ནི། དགེ་སློང་བཞིར་མ་ཚང་ན་གསོ་སྦྱོང་དང་དགག་དབྱེའི་དུས་སྐྱ་རེངས་མ་ཤར་ཚུན་ཆད་དུ་བསྡད་དེ་གསོ་སྦྱོང་དང་དགག་དབྱེ་བྱིན་གྱིས་བརླབ་པར་བྱའོ་ཞེས་བྱ་བའི་ཐ་ཚིག་གོ །འདི་གཉིས་ཀྱི་སྔགས་ནི། དེང་དགེ་འདུན་གྱི་གསོ་སྦྱོང་བཅོ་ལྔ་པ་ཡིན་ལ། བདག་དགེ་སློང་མིང་འདི་ཞེས་བྱ་བའི་གསོ་སྦྱོང་ཡང་བཅོ་ལྔ་པ་ཡིན་ཏེ། བདག་དགེ་སློང་མིང་འདི་ཞེས་བྱ་བ་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་ཀྱང་བདག་སྨྲ་ཞིང་གསོ་སྦྱོང་བྱིན་གྱིས་བརླབ་པོ། །གང་གི་ཚེ་དགེ་འདུན་ཚོགས་པ་རྙེད་པ་དེའི་ཚེ་ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པར་བྱ་བ་དེའི་ཕྱིར། དགེ་འདུན་དང་ལྷན་ཅིག་གསོ་སྦྱོང་བྱའོ་ཞེས་ལན་གསུམ་བཟླས་པ་དང༌། དེང་དགེ་འདུན་གྱི་དགག་དབྱེ་བཅོ་ལྔ་པ་ཡིན་ལ། བདག་དགེ་སློང་མིང་འདི་ཞེས་བྱ་བའི་དགག་དབྱེ་ཡང་བཅོ་ལྔ་པ་ཡིན་ཏེ། བདག་དགེ་སློང་མིང་འདི་ཞེས་བྱ་བས་དགག་དབྱེ་བྱིན་གྱིས་བརླབ་པོ། །གང་གི་ཚེ་དགེ་འདུན་ཚོགས་པ་རྙེད་པ་དེའི་ཚེ་མཐོང་བ་དང་ཐོས་པ་དང་དོགས་པའི་གནས་གསུམ་གྱིས་དགེ་འདུན་ལ་དགག་དབྱེ་བྱའོ་ཞེས་ལན་གསུམ་བཟླས་པ་ཡིན་ནོ།
དེ་འབའ་ཞིག་ན་འདུག་སྟེའོ་ཞེས་བྱ་བ་ནི། གལ་ཏེ་གཅིག་པུ་འདུག་ན་སྟན་དེ་ལ་འདུག་སྟེ། གསོ་སྦྱོང་དང་དགག་དབྱེ་བྱིན་གྱིས་བརླབ་བོ། །ལྷག་མ་གཞན་དང་བཅས་པ་ཉིད་ཡིན་ན་མདུན་དུའོ་ཞེས་བྱ་བ་ནི། དགེ་སློང་ལྷག་མ་གཞན་ཅིག་ཡོད་ན་དེའི་མདུན་དུ་ཙོག་ཙོག་པོར་འདུག་སྟེ། གསོ་སྦྱོང་དང་དགག་དབྱེ་བྱིན་གྱིས་བརླབ་པར་བྱའོ། །གསུམ་ལ་ནི་རྣམ་པ་གཞན་དུ་བསྟན་པའི་ཕྱིར། གསུམ་ནི་འཁོད་དེའོ་ཞེས་བྱ་བ་སྨྲས་ཏེ། ཇི་ལྟར་དགེ་འདུན་རིམ་བཞིན་དུ་འཁོད་པ་དེ་བཞིན་དུ་འཁོད་དེ་བྱིན་གྱིས་བརླབ་པར་བྱའོ་ཞེས་བྱ་བའི་ཐ་ཚིག་གོ །བཞིའི་དགག་དབྱེ་ཡང་དེ་བཞིན་ནོ་ཞེས་བྱ་བ་ནི། ཇི་ལྟར་དགེ་སློང་གསུམ་གྱིས་གསོ་སྦྱོང་བྱིན་གྱིས་བརླབ་པར་བྱ་བ་བཞིན་དུ་དགེ་སློང་བཞིས་དགག་དབྱེ་བྱིན་གྱིས་བརླབ་པར་བྱ་བ་ཡང་དེ་བཞིན་ནོ་ཞེས་བྱ་བའི་ཐ་ཚིག་གོ །དེའི་ཚེ་གནས་ན་སོ་སོར་ཐར་པའི་མདོ་གདོན་ནུས་པ་མེད་པར་ཤེས་ན་གསོ་སྦྱོང་ལ་བསྡད་པར་མི་བྱའོ་ཞེས་བྱ་བ་ནི། གཙུག་ལག་ཁང་ལ་སོགས་པའི་གནས་གང་ན་གསོ་སྦྱོང་གི་དུས་དེའི་ཚེ་སོ་སོར་ཐར་པའི་མདོ་གདོན་པ་ནུས་པ་མེད་པར་ཤེས་ན་དེའི་ཚེ་གནས་དེར་གསོ་སྦྱོང་ལ་བསྡད་པར་མི་བྱ་སྟེ། གསོ་སྦྱོང་གི་དུས་ཀྱི་བར་དུ་དེར་བསྡད་བར་མི་བྱའོ་ཞེས་བྱ་བའི་ཐ་ཚིག་གོ །གང་ན་དེ་ལས་འདའ་བ་དེར་ཉེ་བར་འགྲོ་བར་མི་བྱའོ་ཞེས་བྱ་བ་ནི། གནས་གང་ན་སོ་སོར་ཐར་པའི་མདོ་གདོན་ནུས་པ་མེད་པ་འམ། དགེ་འདུན་མེད་པས་གསོ་སྦྱོང་ལས་འདའ་ཞིང་གསོ་སྦྱོང་མི་བྱེད་པ་དེར་ཉེ་བར་འགྲོ་བར་མི་བྱའོ། །གནས་པར་ཁས་བླངས་པ་ཕྱི་མའི་གོང་མ་བསྲུང་བར་མི་བྱའོ་ཞེས་བྱ་བ་ནི། དབྱར་གནས་པར་ཁས་བླངས་པ་ཕྱི་མ་ཤོས་ཀྱི་སྔ་མ་སྟེ། དབྱར་གནས་པར་ཁས་བླངས་པ་སྔ་མ་ཤོས་བསྲུང་བར་མི་བྱ་བའོ། །འདི་སྐད་བསྟན་ཏེ། དབྱར་ཟླ་འབྲིང་པོའི་ཉ་ནས་དབྱར་ཟླ་ཐ་ཆུངས་ཉ་ལ་ཐུག་གི་བར་གྱི་ཞག་སུམ་ཅུ་བསྲུང་བར་མི་བྱའི། གཞན་ནི་བསྲུང་བར་བྱ་བ་ཁོ་ནའོ། །དེ་ལས་ཡང་ཟླ་བ་གཉིས་ལས་ལྷག་པའོ་ཞེས་བྱ་བ་ནི། དབྱར་གནས་པར་ཁས་བླངས་པ་ཕྱི་མ་ཤོས་དེ་ལ་ཡང་ཟླ་བ་གཉིས་བསྲུང་གི་གཉིས་ལས་ལྷག་པ་གསུམ་པ་བསྲུང་བར་མི་བྱ་བའོ། །འདི་སྐད་བསྟན་ཏེ། དབྱར་ཟླ་ཐ་ཆུངས་ཉ་ནས་སྟོན་ཟླར་བ་ཉའི་བར་དང༌། སྟོན་ཟླར་བ་ཉ་ནས་སྟོན་ཟླ་འབྲིང་པོ་ཉའི་བར་གྱི་ཟླ་བ་གཉིས་བསྲུང་བར་
བྱའི། སྟོན་ཟླ་འབྲིང་པོ་ཉ་ནས་སྟོན་ཟླ་ཐ་ཆུངས་ཉའི་བར་གྱི་ཟླ་བ་གཅིག་སྲུང་བར་མི་བྱའོ། །གནས་དང་ལས་དང་རྙེད་པ་དང་བསྙེན་བཀུར་བ་བསྟབས་པས་འདོན་པར་བྱེད་པ་གཉེར་བར་བྱའོ་ཞེས་བྱ་བ་ནི། གནས་གང་ན་སོ་སོར་ཐར་པའི་མདོ་འདོན་པར་བྱེད་པ་མེད་པའི་དགེ་སློང་རྣམས་ཀྱིས་གནས་གཞན་ནས་འདོན་པར་བྱེད་པ་གཉེར་པ་ནི། གནས་ལ་སོགས་པ་འདི་ཞེས་བསྟན་པས་གཉེར་བར་བྱའོ། །འདིར་གནས་ཞེས་བྱ་བ་ནི་གནས་ཁང་དང་མལ་ཆ་དང༌། སྟན་དང་བགོ་བ་ལ་སོགས་པ་ཡིན་པར་རིག་པར་བྱའོ། །ལས་ཞེས་བྱ་བ་ནི་ལག་གི་བླ་ལ་སོགས་པ་གང་ཟག་གི་ལས་དེ་དག་ཏུ་མི་བསྒོ་ཞིང་ཡིད་དལ་དུ་གཞག་པ་བསྟབས་པའོ། །རྙེད་པ་ཞེས་བྱ་བ་ནི་ཆོས་གོས་དང་བསོད་སྙོམས་དང་སྣུམ་བག་ལ་སོགས་པའོ། །བསྙེན་བཀུར་བ་ཞེས་བྱ་བ་ནི། གཡོག་བྱེད་པ་གང་ཡིན་པའོ། །དེ་དག་བསྟབས་པས་གཉེར་ཞིང་ཁས་ལེན་དུ་གཞུག་པར་བྱའོ།། གལ་ཏེ་བརྩལ་བ་འདིས་ཀྱང་མ་གྲུབ་ན་སྔར་བསྟན་པའི་ཆོག་དག་བྱ་བའོ། །འདིར་གནས་ལ་སོགས་པ་བསྟབས་པ་ཞེས་བྱ་བ་ནི། དེ་དག་དང་མི་འབྲལ་བར་ངེས་པར་བྱ་བའོ། །མདོ་སྡེ་འཛིན་པ་འོང་བ་གདུགས་དང་རྒྱལ་མཚན་དང་བ་དང་ལ་སོགས་པ་དག་གིས་བསུ་བར་བྱའོ་ཞེས་བྱ་བ་ནི། དོན་གྱི་སྒོ་དང་ཚིག་གི་སྒོ་ནས་མདོ་སྡེ་འཛིན་པར་བྱེད་པས་མདོ་སྡེ་འཛིན་པ་སྟ་གང་ཟག་མདོ་སྡེ་འཛིན་པ་དེ་འོང་བ་ཐོས་ནས་དགེ་འདུན་དུ་གྱུར་པའི་དགེ་སློང་དག་གིས་གདུགས་དང་རྒྱལ་མཚན་དང་བ་དང་ལ་སོགས་པ་དག་གིས་བསུ་བར་བྱའོ། །འདུལ་བ་དང་མ་མོ་ཡང་ངོ་ཞེས་བྱ་བ་ནི། འཛིན་པ་ཞེས་བྱ་བར་སྦྱར་ཏེ། དོན་གྱི་སྒོ་དང་ཚིག་གི་སྒོ་ནས་འདུལ་བ་དང་མ་མོ་འཛིན་པར་བྱེད་པས་འདུལ་བ་དང་མ་མོ་འཛིན་པ་སྟེ། གང་ཟག་འདུལ་བ་འཛིན་པ་འམ་མ་མོ་འཛིན་པ་དེ་འོད་བ་ཐོས་ན་ཡང་དགེ་འདུན་དུ་གྱུར་བའི་དགེ་སློང་དག་གིས་གདུགས་དང་རྒྱལ་མཚན་དང་བ་དང་ལ་སོགས་པ་དག་གིས་བསུ་བར་བྱའོ། །ལམ་ཇི་སྲིད་དུ་ཞེ་ན་དེའི་ཕྱིར་དཔག་ཚད་ཕྱེད་དང་གསུམ་དུའོ་ཞེས་བྱ་བ་སྨྲས་ཏེ། ལམ་དེ་སྲིད་དུ་བསུ་བར་བྱའོ། །མ་ནུས་ན་རྒྱང་གྲགས་ལྔར་རོ་ཞེས་བྱ་བ་ནི། དཔག་ཚད་ཕྱེད་དང་གསུམ་དུ་མ་ནུས་ན་རྒྱང་གྲགས་ལྔར་བསུ་བར་བྱའོ། །གསུམ་མམ་དཔག་ཆད་ཕྱེད་དང་རྒྱང་གྲགས་ཕྱེད་
དམ་ཁྱམས་སུ་ཡང་རུང་ངོ་ཞེས་བྱ་བ་ནི། མ་ནུས་པ་འདིར་དེ་དག་ཙམ་དུ་འང་བསུ་བར་བྱའོ། །གསུམ་ཞེས་བྱ་བ་ནི་རྒྱང་གྲགས་སོ། །ཇི་ལྟར་བསུ་བ་ཐག་དེ་སྲིད་ནས་ཅི་ཞིག་བྱ་ཞེ་ན་དེའི་ཕྱིར། ངག་གིས་བཤེས་པའི་ཚིག་གིས་བསུས་ནས་ལྷུང་བཟེད་དང་ཆོས་གོས་བླང་བར་བྱའོ་ཞེས་བྱ་བ་སྨྲས་ཏེ། ངག་གིས་བཤེས་པའི་ཚིག་གིས་ཞེས་བྱ་བ་ནི་བྱོན་པ་ལགས་སོ་ཞེས་བྱ་བ་ལ་སོགས་པ་ཚིག་སྙན་པས་སོ། །ཁྲུས་བྱའོ་ཞེས་བྱ་བ་ནི། བསྐུ་མཉེ་དང་དྲིལ་ཕྱི་བྱ་ཞིང་དུས་དང་མཐུན་པའི་ཆུས་ཁྲུས་བྱ་བའོ། །དགེ་འདུན་ལ་ཡང་སྣུམ་བག་གི་རྙེད་པའོ་ཞེས་བྱ་བ་ནི། དེའི་ཕྱིར་དགེ་འདུན་ཐམས་ཅད་ལ་ཡང་སྣུམ་བག་གི་རྙེད་པ་དབུལ་བར་བྱ་བའོ། །གནས་ལ་སོགས་པ་བསྟབས་པ་སྦྱིན་ནོ་ཞེས་བྱ་བ་ནི། གནས་དང་ལས་དང་རྙེད་པ་དང་བསྙེན་བཀུར་པ་བསྟབས་པ་སྦྱིན་པའོ། །ཆོས་མཉན་པ་ཡང་ངོ་ཞེས་བྱ་བ་ཡང་སྦྱིན་ནོ་ཞེས་བྱ་བར་སྦྱར་ཏེ། དེར་ཐམས་ཅད་ཀྱིས་སྤྲོ་བ་བསྐྱེད་པར་བྱ་ཞིང་སེང་གེའི་ཁྲི་བཤམས་པ་ལ་སོགས་པ་བྱའི། ཐམས་ཅད་ཀྱིས་བརྗོད་པར་ནི་མི་བྱ་སྟེ་ཅ་ཅོར་འགྱུར་བའི་ཕྱིར་རོ། །དགེ་སློང་ཕྲག་དོག་ཅན་ལ་འདི་དག་སྟོན་པ་འཛིན་པ་ཡིན་ནོ་ཞེས་གོ་བར་བྱའོ་ཞེས་བྱ་བ་ནི། དགེ་སློང་ཕྲག་དོག་ཅན་གཞན་མཁས་ཤིང་བཀུར་གྱི་དོགས་པའམ་མདོ་སྡེ་འཛིན་པ་ལ་སོགས་པ་འདི་དག་སྟོན་པ་འཛིན་པ་ཉིད་ཡིན་ནོ་ཞེས་གོ་བར་བྱ་བའོ། །འདིར་གཞུང་ནི་འདི་ནི་སྟོན་པའོ། །འདི་ནི་རྟེན་ཏེ་འདི་ལྟ་སྟེ། མདོ་སྡེ་དང་འདུལ་བ་དང་མ་མོ་ཞེས་གསུངས་པ་ཡིན་ནོ། །གསོ་སྦྱོང་དང་དགག་དབྱེ་མ་བྱས་པས་དེའི་ཉིན་མོ་རང་གི་དེ་ཡོད་པའི་གནས་ནས་འགྲོ་བར་མི་བྱ་སྟེ། གལ་ཏེ་དེ་ཉིད་ཀྱི་ཚེ་རྣམ་པ་དེ་ལྟ་བུར་ཕྱིན་པ་འམ་འཐབ་ཀྲོལ་ཅན་དག་དད་འབྲེལ་བ་འམ། སྤྱོད་པ་བཟང་པོ་དག་དང་ཕྲད་པ་དེ་ལྟ་བུར་འགྲོ་བ་ཉིད་མ་ཡིན་།ནའོ་ཞེས་བྱ་བ་ནི། དགེ་སློང་གང་གིས་གསོ་སྦྱོང་དང་དགག་དབྱེ་མ་བྱས་པ་དེས་གསོ་སྦྱོང་དང་དགག་དབྱེ་དེའི་ཉིན་མོ་གནས་གང་ན་རང་གི་གསོ་སྦྱོང་དང་དགག་དབྱེ་དེ་ཡོད་པའི་གནས་དེ་ནས་གནས་གཞན་དུ་འགྲོ་བར་མི་བྱའོ། །དེ་ཡང་གལ་ཏེ་དེ་ཉིད་ཀྱི་ཚེ་རྣམ་པ་དེ་ལྟ་བུར་ཕྱིན་པར་འགྲོ་བ་ཉིད་མ་ཡིན་ན་སྟེ། གལ་ཏེ་གསོ་སྦྱོང་དང་དགག་དབྱེའི་དུས་དེ་ཉིད་ཀྱི་ཚེ་གནས་གང་ན་རང་གི་གསོ་སྦྱོང་དང་དགག་དབྱེ་དེ་ཡོད་པའི་གནས་རྣམ་པ་དེ་ལྟ་བུར་ཕྱིན་པར་འགྲོ་བ་ཉིད་མ་
ཡིན་ན་དེའི་ཚེ་འགྲོ་བར་མི་བྱའི་གལ་ཏེ་དེ་ཉིད་ཀྱི་ཚེ་རྣམ་པ་དེ་ལྟ་བུར་ཕྱིན་པར་འགྲོ་བ་ཉིད་ཡིན་ན་ནི་འགྲོ་བ་ལ་ཉེས་པ་མེད་དོ། །གཞན་ཡང་འཐབ་ཀྲོལ་ཅན་དག་དང་འབྲལ་བར་འགྲོ་བ་ཉིད་མ་ཡིན་ན་སྟེ། གནས་དེ་ན་གང་ཟག་འཐབ་ཀྲོལ་བྱེད་པའི་རང་བཞིན་ཅན་དག་ཡོད་པ་དེ་དག་དང་འབྲལ་བའི་ཕྱིར་འགྲོ་བ་ཉིད་མ་ཡིན་ན་དེའི་ཚེ་འགྲོ་བར་མི་བྱའི་གལ་ཏེ་འཐབ་ཀྲོལ་ཅན་དག་དང་འབྲལ་བར་འགྲོ་བ་ཉིད་ཡིན་ན་ནི་འགྲོ་བ་ལ་ཉེས་པ་མེད་དོ། །གཞན་ཡང་སྤྱོད་པ་བཟང་པོ་དག་དང་ཕྲད་པ་དེ་ལྟ་བུར་འགྲོ་བ་ཉིད་མ་ཡིན་ན་སྟེ། གནས་གཞན་དུ་སོང་ན་ཚངས་པ་མཚུངས་པར་སྤྱོད་པའི་དགེ་སློང་སྤྱོད་པ་བཟང་པོ་གྱ་ནོམ་པ་དག་དང་ཕྲད་པར་འགྱུར་བ་དེ་ལྟ་བུར་འགྲོ་བ་ཉིད་མ་ཡིན་ན་དེའི་ཚེ་འགྲོ་བར་མི་བྱའི་གལ་ཏེ་སྤྱོད་པ་བཟང་པོ་དག་དང་ཕྲང་པ་དེ་ལྟ་བུར་འགྲོ་བ་ཉིད་ཡིན་ན་ནི་འགྲོ་བ་ལ་ཉེས་པ་མེད་དོ། །འདི་སྐད་བསྟན་ཏེ། གནས་གང་ན་རང་གི་གསོ་སྦྱོང་དང་དགག་དབྱེ་འམ་གཞན་གང་ཡང་རུང་བ་ཡོད་པའི་གནས་དེ་ནས་གསོ་སྦྱོང་དང་དགག་དབྱེའི་ཉིན་མོ་གསོ་སྦྱོང་དང་དགག་དབྱེ་མ་བྱས་པར་གནས་གཞན་དུ་འགྲོ་བར་མི་བྱའོ། །གལ་ཏེ་གསོ་སྦྱོང་དང་དགག་དབྱེའི་ཉི་མ་དེ་ཉིད་ལ་རང་གི་གསོ་སྦྱོང་དང་དགག་དབྱེ་ཡོད་པའི་གནས་རྣམ་པ་དེ་ལྟ་བུ་གཞན་དུ་ཕྱིན་པར་འགྱུར་ན་ནི་དེའི་ཚེ་ཉེས་པ་ཅི་ཡང་མེད་དོ། །ཡང་ན་གང་ཟག་འཐབ་ཀྲོལ་ཅན་གནས་དེ་ན་འཁོད་པ་དག་དང་བྲལ་བང་གྱུར་པ་ལྟ་ན་དའི་ཚེ་འགྲོ་བ་ལ་ཉེས་པ་མེད་དོ། །ཡང་ན་དགེ་སློང་སྤྱོད་པ་བཟང་པོ་ཡོངས་སུ་དག་པ་ལྟ་བ་མཐུན་པ་དག་དང་འཕྲད་པར་འགྱུར་བའི་བསམ་པས་འགྲོ་ན་རང་གི་གསོ་སྦྱོང་དང་དགག་དབྱེ་མེད་པའི་གནས་སུ་འགྲོ་ན་ཡང་དེའི་ཚེ་ཉེས་པ་མེད་དེ། འདི་ལྟར་གཅིག་པུ་རབ་ ཏུ་ཞི་བའི་སེམས་ཀྱིས་སྤྱོད་པ་བཟང ་པོའི་ནང་ན་གནས་པའི་ཚུལ་ཁྲིམས་གསོ་སྦྱོང་བྱས་པ་དང༌། རྣམ་པར་དག་པ་ཅི་འདྲ་བ་དེ་ལྟ་བུར་ནི་སོ་སོར་ཐར་པའི་མདོ་བཏོན་ཅིང་དགག་དབྱེ་བྱས་པ་འཐབ་ཀྲོལ་ཅན་ངག་དང་ལྷན་ཅིག་གནས་པའི་ཚུལ་ཁྲིམས་གསོ་སྦྱོང་བྱས་པ་དང་རྣམ་པར་དག་པར་མི་འགྱུར་བའི་ཕྱིར་རོ། འདིར་གཞུང་ནི་དགེ་སློང་དང་བཅས་པའི་གནས་དང༌། གནས་མ་ཡིན་པ་ནས་ཀྱང་གང་ན་དགེ་སློང་ཚུལ་ཁྲིམས་ཡོངས་སུ་དག་པ་ལྟ་བ་མཐུན་པ་དག་འཁོད་པར་དགེ་སློང་དང་
བཅས་པའི་གནས་སུ་འགྲོ་བར་བྱའོ་ཞེས་གསུངས་པ་ཡིན་ནོ། །འདིར་ཡང་དགེ་སློང་དང་བཅས་པའི་གནས་ཞེས་བྱ་བ་ནི་གང་ན་དགེ་སློང་དག་གིས་གནས་པར་བྱེད་པ་ཡིན་ཏེ། གང་ན་གསོ་སྦྱོང་ལ་ལོགས་པ་ལས་ཐམས་ཅད་བྱེད་པའི་གནས་དེ་ནི་དགེ་སློང་དག་གིས་གནས་པར་བྱེད་པ་ཞེས་བྱ་སྟེ། གནས་ཀྱི་བྱ་བ་ཡོངས་སུ་རྫོགས་པར་བྱེད་པའི་ཕྱིར་རོ། །གནས་པ་མ་ཡིན་ཞེས་བྱ་བ་ནི། གང་ན་ལས་མི་བྱེད་པའི་གནས་ལ་བྱ་སྟེ། གནས་ཀྱི་བྱ་བ་ཐམས་ཅད་མེད་པའི་ཕྱིར་རོ། །དེ་ལྟ་བས་ན་གནས་པ་མ་ཡིན་པ་ནས་ཀྱང་དགེ་སློང་དང་བཅས་པའི་གནས་དགེ་སློང་འཐབ་ཀྲོལ་ཅན་ཡོད་པར་འགྲོ་བར་མི་བྱའོ། །དེ་ཉིད་ཀྱི་ཕྱིར་གསོ་སྦྱོང་དང་དགག་དབྱེ་དག་བཤོལ་བར་གསུངས་སོ། །གང་གི་ཕྱིར་དེར་འགྲོ་བ་བཀག་པ་དེའི་ཕྱིར་སྤྱོད་པ་བཟང་པོ་ཅན་གྱི་དགེ་སློང་དང་བཅས་པ་ནས་འཐབ་ཀྲོལ་ཅན་གྱི་དགེ་སློང་དང་བཅས་པར་འགྲོ་བར་མི་བྱའོ་ཞེས་བྱ་བ་སྨྲས་ཏེ། སྤྱོད་པ་བཟང་པོ་ཅན་གྱི་དགེ་སློང་དང་བཅས་པའི་གནས་ནས་སམ་གནས་མ་ཡིན་པ་ནས་ཀྱང་འཐབ་ཀྲོལ་ཅན་གྱི་དགེ་སློང་དང་བཅས་པའི་གནས་སུ་འགྲོ་བར་མི་བྱ་ན། གནས་པ་མ་ཡིན་པར་ལྟ་སྨོས་ཀྱང་ཅི་དགོས་ཞེས་བསྟན་ཏོ། །དགེ་སློང་མེད་པར་འགྲོ་བར་མི་བྱའོ་ཞེས་བྱ་བའི་ཉེས་པ་གཞན་སྟོན་པའི་ཚིག་བསྡུ་བའི་ཕྱིར། དགེ་སློང་དང་བཅས་པ་ནས་དགེ་སློང་མེད་པར་ལྷག་མ་རྣམས་དང་ལྷན་ཅིག་མ་ཡིན་པའམ་གནོད་པ་དང་ལུས་དང་སེམས་ཤིན་ཏུ་སྦྱངས་པའི་དབང་མ་གཏོགས་པར་འགྲོ་བར་མི་བྱའོ་ཞེས་བྱ་བ་སྨྲས་ཏེ། དགེ་སློང་དང་བཅས་པའི་གནས་ནས་དགེ་སློང་མེད་པར་འགྲོ་བར་ནི་བྱའོ། །ཅི་དགེ་སློང་དང་བཅས་པའི་གནས་ན་གནས་པའི་དགེ་སློང་རྣམས་དང་ཡང་ལྷན་ཅིག་ཏུ་འགྲོ་བར་མི་བྱའམ་ཞེ་ན། དེའི་ཕྱིར་ལྷག་མ་རྣམས་དང་ལྷན་ཅིག་མ་ཡིན་པར་ཏེ། ལྷག་མ་རྣམས་དང་ལྷན་ཅིག་ཏུ་ནི་འགྲོ་བར་བྱའོ། །ཅི་ལྷག་མ་རྣམས་དང་ལྷན་ཅིག་མ་ཡིན་པར་རྣམ་པ་ཐམས་ཅད་དུ་འགྲོ་བར་མི་བྱའམ་ཞེ་ན་དེའི་ཕྱིར་གནོད་པ་མ་གཏོགས་པར་འགྲོ་བར་མི་བྱའོ་ཞེས་བྱ་བ་སྨྲས་ཏེ། ཚུལ་ཁྲིམས་དང་སྲོག་ལ་སོགས་པའི་བར་ཆད་ཀྱི་དབང་གིས་ནི་འགྲོ་བར་བྱའོ། །ཅི་དགོས་པའི་དབང་གིས་ཀྱང་འགྲོ་བར་མི་བྱ་འམ་ཞེ་ན་དེའི་ཕྱིར། ལུས་དང་སེམས་ཤིན་
ཏུ་སྦྱངས་པའི་དབང་མ་གཏོགས་པར་འགྲོ་བར་མི་བྱའོ་ཞེས་བྱ་བ་སྨྲས་ཏེ། གལ་ཏེ་དེར་སོང་ནས་ལུས་དང་སེམས་ཤིན་ཏུ་སྦྱངས་པ་སྐྱེ་བར་འགྱུར་ཞིང༌། ལུས་དང་སེམས་དག་དགེ་བ་བྱ་བ་ལ་ལས་སུ་རུང་ཞིང་བཏུབ་པ་དང༌། མི་གཡོ་བ་ཉིད་དུ་འགྱུར་ན་དེའི་དབང་གིས་ནི་དགེ་སློང་དང་བཅས་པའི་གནས་ནས་དགེ་སློང་མེད་པའི་གནས་སུ་འགྲོ་བར་བྱ་སྟེ། འདི་ལྟར་གསོ་སྦྱོང་དང་དགག་དབྱེ་དག་པས་ཀྱང་འདིས་ཚུལ་ཁྲིམས་གསོ་བ་ཆེས་ལྷག་པར་སྐྱེ་བར་འགྱུར་བའི་ཕྱིར་རོ། །དེ་ལྟ་བས་ན་ལུས་དང་སེམས་ཤིན་ཏུ་སྦྱངས་པ་བསྐྱེད་པའི་ཕྱིར་གསོ་སྦྱོང་དང་དགག་དབྱེ་དག་བྱིན་གྱིས་བརླབས་པ་ཙམ་དུ་བཤོལ་བ་རིགས་པ་ཁོ་ན་ཡིན་ནོ། །འགྲོ་བའི་ཕྱིར་གནས་པ་གསོ་སྦྱོང་དང་དགག་དབྱེ་མ་བྱས་པ་དོར་བར་མི་བྱའོ་ཞེས་བྱ་བ་ནི། དེའི་ཉིན་མོ་ཞེས་བྱ་བར་སྦྱར་ཏེ། མཁན་པོ་ལ་སོགས་པ་གནས་གང་ཡིན་པས་བདག་ཉིད་གཞན་དུ་འགྲོ་བའི་ཕྱིར། སློབ་མ་གནས་བ་གསོ་སྦྱོང་དང་དགག་དབྱེ་མ་བྱས་པ་དག་དོར་ཞིང་སྤང་བར་མི་བྱའོ་ཞེས་བྱ་བའི་ཐ་ཚིག་གོ །རྐྱེན་དེ་ལྟ་བུ་ཉིད་ཡོང་ན་སྤྱོད་པ་བཟང་པོ་དང་ལྡན་པ་དང་གནོད་པ་དང་ལྡན་པའི་གནས་བསྟན་ནས་དེར་འགྲོར་གཞུག་པར་བྱའོ་ཞེས་བྱ་བ་ནི། གལ་ཏེ་གནས་དེ་ལས་གཞན་དུ་མི་འགྲོ་ན་ཚུལ་ཁྲིམས་དང་སྲོག་ལ་སོགས་བའི་བར་ཆད་ཀྱི་རྐྱེན་དེ་ལྟ་བུ་ཡོད་པར་གྱུར་ན། དེའི་ཉིན་མོ་གནས་པ་ལ་གང་ན་དགེ་སློང་སྤྱོད་པ་བཟང་པོ་དང་ལྡན་པ་དང་སོ་སོར་ཐར་པའི་མདོ་འདོན་པ་དང་ལྡན་པ་འདུག་པའི་གནས་དེ་བསྟན་ནས་གནས་ཆེ་གེ་མོ་ཞིག་ཏུ་སོང་ཤིག་ཅེས་དེར་འགྲོར་གཞུག་ཅིང་བདག་ཉིད་ཀྱང་དེའི་ཉིན་མོ་འགྲོ་བར་བྱའོ། །འདིར་གཞུང་ནི་དེ་ན་དགེ་སློང་གི་དགེ་འདུན་གནས་བརྟན་དང་བཅས་སོ་སོར་ཐར་པ་དང་བཅས་ཤིང་དགེ་སློང་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ་ངེས་པ་དགེ་བའི་ཆོས་ཅན་དག་འཁོད་ཀྱིས། དེ་དག་གིས་འགྱོད་པ་མ་བསྐྱེད་པ་ནི་བསྐྱེད་པར་མི་འགྱུར་ལ། སྐྱེས་པ་ནི་སེལ་བར་འགྱུར་རོ་ཞེས་གསུངས་པ་ཡིན་ནོ། །སོ་སོར་ཐར་བ་དང་ལ་ཞེས་བྱ་བ་འདིས་ནི་དགེ་འདུན་གྱི་གནས་བརྟན་འདོན་པ་དང་ལྡན་པ་ཏིང་དུ་བསྟན་ལ། ཚུལ་ཁྲིམས་དང་ལྡན་པ་ཞེས་བྱ་བ་ལ་སོགས་པས་ནི་སྤྱོད་པ་བཟང་པོ་དང་ལྡན་པ་ཉིད་དུ་བསྟན་ཏེ། བསྒོ་པ་དེ་
ལས་འདའ་བར་མི་བྱའོ་ཞེས་བྱ་བ་ནི། གནས་ཀྱི་བསྒོ་བ་དེ་ལས་གནས་པས་འདའ་བར་མི་བྱ་བ་སྟེ། གནས་ཀྱི་བསྒོ་བ་དེ་གནས་པས་བསྒྲུབ་པར་བྱའོ་ཞེས་བྱ་བའི་ཐ་ཚིག་གོ །།བམ་པོ་བཞི་བཅུ་བདུན་པ། ཕྱིས་འོངས་པ་རྣམས་ཀྱི་དོན་དུ་དེ་གཉིས་ཡང་བྱར་རུང་ངོ་ཞེས་བྱ་བ་ནི། གལ་ཏེ་དགེ་སློང་དག་ཕྱིས་ལྷགས་པར་གྱུར་ན་དེ་དག་གི་དོན་དུ་དགེ་སློང་སྔ་མ་གསོ་སྦྱོང་དང་དགག་དབྱེ་བྱས་ཟིན་པ་རྣམས་ཀྱིས་ཡང་གསོ་སྦྱོང་དང་དགག་དབྱེ་དེ་གཉིས་བྱར་རུང་ངོ༌། །གལ་ཏེ་ལེགས་པར་ན་དེ་ལ་ཅི་དགར་འཇུག་པར་བྱའོ་ཞེས་བྱ་བ་ནི། གལ་ཏེ་དགེ་སློང་སྔ་མ་རྣམས་ཀྱིས་གསོ་སྦྱོང་དང་དགག་དབྱེ་དེ་གཉིས་ལེགས་པར་བྱས་པ་ཡིན་ན། དེའི་ཚེ་ཕྱིས་འོངས་པ་རྣམས་ཀྱི་དོན་དུ་གསོ་སྦྱོང་དང་དགག་དབྱེ་བྱ་བ་དེ་ལ་ཅི་དགར་འཇུག་པར་བྱའི། མི་མཐུན་པ་ཉིད་ལ་སོགས་པའི་ཉེས་པ་ཡོད་ན་ནི་ཅི་དགར་འཇུག་པར་མི་བྱ་སྟེ། འདི་ལྟར་གདོན་མི་ཟ་བར་ཡང་འཇུག་པར་བྱ་བའོ། །འདུ་བ་མཐུན་པ་དག་ལ་ཡང་ངོ་ཞེས་བྱ་བ་ནི། གཉུག་མར་གནས་པ་རྣམས་ནི་གཉུག་མར་གནས་པ་རྣམས་དང་འདུ་བ་མཐུན་པ་ཡིན་ལ་གློ་བུར་དུ་ལྷགས་པ་རྣམས་ཀྱང་གློ་བུར་དུ་ལྷགས་པ་རྣམས་དང་འདུ་བ་མཐུན་པ་ཡིན་པས། གཉུག་མར་གནས་པ་བྱས་ཟིན་པ་རྣམས་གློ་བུར་དུ་ལྷགས་པ་དག་ལ་ཅི་དགར་འཇུག་པ་དང༌། གློ་བུར་དུ་ལྷགས་པ་བྱས་ཟིན་པ་རྣམས་གཉུག་མར་གནས་པ་ལྷགས་པ་རྣམས་ལ་ཅི་དགར་འཇུག་པ་འབའ་ཞིག་ཏུ་མ་ཟད་དེ། འདི་ལྟར་འདུ་བ་མཐུན་པ་ལྷགས་པ་རྣམས་ལ་ཅིང་གར་འཇུག་པར་བྱ་སྟེ། གཉུག་མར་གནས་པ་རྣམས་ཀྱང་གཉུག་མར་གནས་པ་ལྷགས་པ་རྣམས་ལ་ཅི་དགར་འཇུག་པར་བྱ་བ་དང༌། གློ་བུར་དུ་ལྷགས་པ་རྣམས་ཀྱང་གློ་བུར་དུ་ལྷགས་པ་རྣམས་ལ་ཅི་དགར་འཇུག་པར་བྱ་བ་དང༌། གཉུག་མར་གནས་པ་རྣམས་ཀྱང་གློ་བུར་དུ་ལྷགས་པ་རྣམས་ལ་ཅི་དགར་འཇུག་པར་བྱ་བ་དང༌། གློ་བུར་དུ་ལྷགས་པ་རྣམས་ཀྱང་གཉུག་མར་གནས་པ་རྣམས་ལ་ཅི་དགར་འཇུག་པར་བྱའོ། །གཞན་གྱིས་ཚོགས་པ་གསོལ་བར་བྱའོ་ཞེས་བྱ་བ་ནི། གང་ཟག་ཅི་དགར་འཇུག་པ་དེ་དག་ལས་གཞན་པ་གདོན་མི་ཟ་བར་འཇུག་པ་གང་ཡིན་པ་དེ་དག་གིས་དགེ་འདུན་ལ་ཚོགས་
པ་གསོལ་བར་བྱ་བའོ། །དེ་མ་ཐོབ་ན་མཚམས་གཞན་དུ་བྱའོ་ཞེས་བྱ་བ་ནི། དགེ་འདུན་ལས་ཆོགས་པ་དེ་མ་ཐོབ་ན་མཚམས་གཞན་དུ་གསོལ་སྤྱོང་དང་དགག་དབྱེ་དག་བྱ་བ་སྟེ། དེ་ནི་མི་མཐུན་པ་ཉིད་ཀྱི་ཉེས་པ་སྤང་བའི་ཕྱིར་རོ། །གསོ་སྦྱོང་དང་དགག་དབྱེ་དག་ཉི་ཚེར་མ་ཟད་ཀྱི་ལས་ཐམས་ཅད་ལ་ཡང་དེ་བཞིན་ནོ། །བྱེད་པའི་ཚེ་འོངས་ན་ལྷག་མ་ཉམས་སུ་མྱོང་བས་འགྲུབ་པོ་ཞེས་བྱ་བ་ནི། དགེ་འདུན་སྔ་མ་དག་དགག་དབྱེ་བྱེད་པའི་ཚེ། དགེ་སློང་གང་ཕྱིས་འོངས་ན་དེས་རང་གི་དགག་དབྱེ་དག་གི་གོང་མ་དགེ་སློང་རྒན་རབས་པ་རྣམས་ཀྱི་དགག་དབྱེ་མ་སླེབས་པ་ཉམས་སུམ་མྱོང་བ་ཉིད་ཡིན་ཡང་ལྷག་མ་ཉམས་སུ་མྱོང་བས་དགག་དབྱེ་འགྲུབ་པོ། །དེ་བཞིན་དུ་དགེ་འདུན་སྔ་མ་གསོ་སྦྱོང་བྱེད་པའི་ཚེ་དགེ་སློང་གང་ཕྱིས་འོངས་ན་དེས་དགེ་སློང་སྔ་མ་དག་གིས་སོ་སོར་ཐར་པའི་མདོ་ཇི་ཙམ་བཏོན་པ་མ་བསླབས་པ་ཉམས་སུ་མ་མྱོང་བ་དེའི་ལྷག་མ་འདོན་པ་དེའི་འཕྲོ་ཙམ་ཉམས་སུ་མྱོང་བས་ཀྱང་གསོ་སྦྱོང་འགྲུབ་པོ། །འདི་སྐད་བསྟན་ཏེ། དགེ་འདུན་སྔ་མ་གསོ་སྦྱོང་དང་དགག་དབྱེ་བྱེད་པར་གྱུར་བ་ཉིད་ཀྱི་ཚེ། གལ་ཏེ་དགེ་སློང་དག་ཕྱིས་ལྷགས་ཤིང་དེར་ལས་ཀྱི་ལྷག་མ་ཉམས་སུ་མྱོང་ན་དེས་དེ་དག་འགྲུབ་སྟེ། གསོ་སྦྱོང་དང་དགག་དབྱེ་བྱས་པ་ཉིད་ཡིན་ནོ། །གནས་དེ་ནས་སུ་འགའ་ཡང་མ་སོང་བ་ཉིད་ཡིན་ན་ངེས་པ་ཡིན་ནོ་ཞེས་བྱ་བ་ནི། དགེ་སློང་སྔ་མ་གསོ་སྦྱོང་དང་དགག་དབྱེ་བྱས་ཟིན་པའི་གནས་དེ་ནས་དགེ་སློང་འགའ་ཡང་ལངས་ཏེ་མ་སོང་བ་ཉིད་ཡིན་ན། དེའི་ཚེ་དགེ་སློང་ཕྱི་མ་དག་གསོ་སྦྱོང་དང་དགག་དབྱེ་ལ་གནས་དེར་ལྷགས་པ་དག་ལ་ཚོགས་པ་སྦྱིན་པའི་ཕྱིར་སྔ་མ་དེ་དག་གནས་དེ་ཉིད་དུ་བསྡད་པར་བྱ་བ་ངེས་པ་ཡིན་ཏེ། ཅི་དགར་འཇུག་པར་བྱ་བ་མ་ཡིན་པའོ། །གློ་བུར་དུ་ལྷགས་པ་དག་ཆེས་མང་བ་ཉིད་ཡིན་ན་ཡང་ངོ་ཞེས་བྱ་བ་ནི། གལ་ཏེ་དགེ་སློང་གློ་བུར་དུ་ལྷགས་པ་དག་གཉུག་མར་གནས་པ་དག་པས་ཆེས་མང་བ་ཉིད་ཡིན་ན་དེའི་ཚེགས་སོ་སྦྱོང་དང་དགག་དབྱེའི་གནས་དེ་ནས་དགེ་སློང་གཉུག་མར་གནས་པ་འགའ་ཞིག་ལངས་ཏེ་སོང་དུ་ཟིན་ཀྱང་གློ་བུར་དུ་ལྷགས་པ་དག་ལ་ཚོགས་པ་སྦྱིན་པའི་ཕྱིར། གཉུག་མར་གནས་པ་མ་སོང་བ་ཐམས་ཅད་ཀྱིས་ཐམས་ཅད་གདོན་མི་ཟ་བར་གནས་དེར་འདུ་བར་བྱ་བ་ཡིན་
གྱི། རང་དགར་འཇུག་པར་བྱ་བ་མ་ཡིན་པ་སྟེ། མང་པོ་མཐུ་ཆེ་བ་ཉིད་ཡིན་པའི་ཕྱིར་རོ། །དུས་ཀྱི་ཕྱིར་ནི་ཆེས་མང་བ་རྣམས་ཀྱི་རྗེས་སུ་འཇུག་པར་བྱ་བ་ཉིད་ཡིན་ནོ་ཞེས་བྱ་བ་ནི། གལ་ཏེ་གཉུག་མར་གནས་པ་རྣམས་ཀྱི་ནི་ཚེས་བཅོ་ལྔ་ཡིན་ལ། གློ་བུར་དུ་ལྷགས་པ་རྣམས་ཀྱི་ནི་ཚེས་བཅུ་བཞི་ཡིན་པ་འམ། གཉུག་མར་གནས་པ་རྣམས་ཀྱི་ནི་ཚེས་བཅོ་ལྔ་ཡིན་ལ། གློ་བུར་དུ་ལྷགས་པ་རྣམས་ཀྱི་ནི་ཚེས་བཅུ་དྲུག་ཡིན་པ་ལྟ་བུར་དུས་ཀྱི་ཕྱིར་བློ་མི་མཐུན་ན། དེ་ལ་ནི་དགེ་སློང་གང་མང་བ་ཤོས་ཀྱི་ཕྱོགས་ཀྱི་རྗེས་སུ་འབྲང་བར་བྱ་བའོ། །ཇི་སྟེ་ཕྱོགས་གཉི་ག་གྲངས་མཉམ་པ་ཁོ་ན་ཡིན་ན་དེའི་ཚེ་ཇི་ལྟར་བྱ་ཞེ་ན་དེའི་ཕྱིར། མཉམ་པ་ཉིད་ཡིན་ན་གཉུག་མར་གནས་པ་རྣམས་ཀྱིའོ་ཞེས་བྱ་བ་སྨྲས་ཏེ། གལ་ཏེ་གྲངས་མཉམ་པ་ཉིད་ཡིན་ན་གཉུག་མར་གནས་པ་རྣམས་ཀྱི་རྗེས་སུ་འཇུག་པར་བྱ་བ་ཉིད་ཡིན་ནོ། །སྔར་ཚོགས་པ་སྦྱིན་པའི་སྐབས་སུ་ཕྱིས་འོངས་པ་རྣམས་ཀྱི་དོན་དུ་ཡང་བྱར་རུང་ངོ་ཞེས་བྱ་བ་དང༌། གལ་ཏེ་ལེགས་པར་ན་དེ་ལ་ཅི་དགར་འཇུག་པར་བྱའོ་ཞེས་བྱ་བའི་མདོ་དེ་དག་གིས་ཚོགས་པ་སྦྱིན་པ་ལ་ཅི་དགར་འཇུག་པར་བསྟན་པ་དེ་འདིར་དུས་ཀྱི་སྐབས་སུ་དམིགས་ཀྱིས་བསལ་བ་བསྟན་པའི་ཕྱིར་འདི་ལ་ཡང་ངོ་ཞེས་བྱ་བ་སྨྲས་ཏེ། དུས་ཀྱི་ཕྱིར་ནི་ཆེས་མང་པོ་རྣམས་ཀྱི་རྗེས་སུ་འཇུག་པར་བྱ་བ་ཉིད་ཡིན་ནོ་ཞེས་བྱ་བ་དང་མཉམ་པ་ཉིད་ཡིན་ན་གཉུག་མར་གནས་པ་རྣམས་ཀྱིའོ་ཞེས་བྱ་བའི་མདོ་སྔར་བསྟན་པ་འདི་གཉིས་ལ་ཡང་དེས་པར་འཇུག་པར་བྱ་བ་ཉིད་ཡིན་གྱི། ཅི་དགར་འཇུག་པར་བྱ་ནི་མ་ཡིན་ནོ་ཞེས་བྱ་བའི་ཐ་ཚིག་གོ །གསོ་སྦྱོང་གི་གཞི་ལས་མཐུན་པའི་གསོ་སྦྱོང་གི་ཆོ་གའི་སྐབས་སོ་ཞེས་བྱ་བ་དེ་བཤད་ཟིན་ཏོ།། །།ད་ནི་ཞི་གནས་ཀྱི་གསོ་སྦྱོང་དང་མཐུན་པའི་གསོ་སྦྱོང་གི་གཞི་དང་འབྲེལ་བ་རྣམ་པར་འབྱེད་པ་དང་ཕྲན་ཚེགས་ལ་སོགས་པའི་སྐབས་ནས་བྱུང་བ་བསྡུ་བར་བྱ་སྟེ། དེའི་ཕྱིར་ཏིང་ངེ་འཛིན་ལས་བསླང་བར་མི་བྱའོ་ཞེས་བྱ་བ་སྨྲས་ཏེ། དགེ་སློང་གིས་དགེ་སློང་ཏིང་ངེ་འཛིན་ལ་སྙོམས་པར་ཞུགས་པ་དོན་གང་ག་ཕྱིར་ཡང་བསླང་བར་མི་བྱའོ། །གདམས་ངག་མེད་པར་བསྒོམ་པར་མི་བྱའོ་ཞེས་བྱ་བ་ནི། དགེ་སློང་གིས་ལུང་མེད་པར་བསྒོམ་པར་མི་བྱ་བའོ། །གདོས་བུ་དང་ཕོ་ལོང་གི་སྤྱོར་བ་རིགས་པ་ཉིད་ཡིན་ནོ་ཞེས་བྱ་བ་ནི། སྔར་འདུལ་
པའི་གཞི་ལས་སྤོང་བ་པ་གཉིད་བྲོན་རྣ་བར་གདོས་བུ་གདགས་པ་དང་ཕོ་ལོང་འཕང་པའི་སྦྱོར་བ་བསྟན་པ་དེར་ད་བཟོ་མ་ཡིན་པར་ཚིག་གཞན་གྱིས་བསྣན་པའོ། །འདིར་གཞུང་ནི་ཕྲན་ཚོགས་དག་ལས་དགེ་སློང་དག་དེ་ལྟ་བས་ན་ཇི་ལྟར་ཆུ་ཀླུང་ཡིད་འོང་ལྡན་གྱི་ངོགས་ཀྱི་དགེ་སློང་དག་གིས་བརྩོན་འགྲུས་བརྩམས་པ་ལྟར་གདོས་བུ་དང་ཕོ་ལོང་གི་སྦྱོར་བས་བརྩོན་འགྲུས་བརྩམ་པར་བྱའོ་ཞེས་གསུངས་པ་ཡིན་ནོ། །བརྩོན་འགྲུས་ལྷོད་པར་མི་བྱའོ་ཞེས་བྱ་བ་ནི། བརྩོན་འགྲུས་ཞན་པར་མི་བྱ་བ་སྟེ། འདིར་གཞུང་ནི་དགེ་སློང་གིས་བརྩོན་འགྲུས་ལྷོད་པར་མི་བྱའོ། །བརྩོན་འགྲུས་ཀློད་པར་བྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །དེ་ནི་མདོ་སྡེ་ལས་གསུངས་པ་ཡིན་ནོ་ཞེས་བྱ་བ་ནི། བརྩོན་འགྲུས་མི་ཀློད་པར་བྱ་བ་དེ་ནི་མདོ་སྡེ་ལས་ཇི་སྐད་གསུངས་པ་དེ་བཞིན་དུ་རྗེས་སུ་བསྒྲུབ་པར་བྱ་བ་སྟེ། མདོ་སྡེ་ལས་འདི་ལ་དགེ་སློང་ཉིན་མོ་འདུག་པ་དང་འཆག་པ་དག་གིས་སྒྲིབ་པར་འགྱུར་བའི་ཆོས་རྣམས་ལ་སེམས་ཡོངས་སུ་སྦྱོང་བར་བྱེད་ཅིང་ཞེས་བྱ་བ་ལ་སོགས་པ་གསུངས་པ་ཡིན་ནོ། །འདིར་ཉལ་བ་མ་མོ་ལས་ལྷག་པར་གསུངས་པ་དེ་དག་བསྡུ་བའི་ཕྱིར། ལུས་དང་སེམས་དང་གོས་མ་འཕྱར་བས་ཉལ་བར་བྱའོ་ཞེས་བྱ་བ་སྨྲས་སྟེ། ལུས་དང་སེམས་དང་གོས་དག་རེ་རེ་ལ་མ་འཕྱར་བར་ཞེས་བྱ་བའི་སྒྲ་སོ་སོར་སྦྱར་བར་བྱའོ། །འདིར་གཞུང་ནི་ནམ་གྱི་གུང་ཐུན་ལ་གཙུག་ལག་ཁང་གི་ཕྱི་རོལ་དུ་རྐང་པ་བཀྲུས་ནས་གཙུག་ལག་ཁང་དུ་ཞུགས་ཏེ་བླ་གོས་བཞི་བལྟབ་དུ་བཏིང་ནས། སྣམ་སྦྱར་རིམ་པ་མང་དུ་བལྟབ་སྟེ་སྔས་སུ་བཅུག་ནས་གློ་གཡས་པ་ཕབ་སྟེ། རྐང་པ་རྐང་པའི་སྟེང་དུ་བཞག་ནས་ལུས་མ་འཕྱར་བ་དང༌། སེམས་མ་འཕྱར་བ་དང༌། གོས་མ་འཕྱར་བར་སྣང་བའི་འདུ་ཤེས་དང་དྲན་པས་ཉལ་བར་བྱ་ཞིང༌། དགེ་སློང་གིས་ཉིན་མོ་ཉལ་བར་མི་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །མིན་པས་ཉིན་མོ་ཉལ་བར་མི་བྱའོ་ཞེས་བྱ་བ་ནི། དགེ་སློང་མི་ན་པས་ཉིན་མོ་ཉལ་བར་མི་བྱ་བ་སྟེ། འདིར་ངལ་བ་དང་ལུས་ཉམ་ཆུང་བ་ཡང་ན་བ་དང་འདྲ་བར་རིག་པར་བྱའོ། །གཉིད་ཀྱིས་སྙོམ་པ་བྲང་མི་ཐུབ་པ་ཉིད་ཡིན་ན། དེ་བསང་པའི་ཕྱིར་དེས་དེ་ཙམ་ཞིག་བསྟན་པར་བྱའོ། །ཟས་ཀྱིས་སྙོམས་པ་བྲང་མི་བཟོད་པ་ཞིག་ཡིན་ན་ཡང་
དེ་བསང་པའི་ཕྱིར་དེས་དེ་ཙམ་ཞིག་བསྟེན་པར་བྱའོ། །མདོ་སྡེ་ལས་ཀྱང་མེར་འཇུག་གི་བུད་ནི་དཔྱིད་རྣམས་ཀྱི་ཟླ་བ་ཐ་མ་ལ་ཡུད་ཅམ་ཞིག་ཟས་ཀྱི་སྙོམ་པ་བསད་པར་བྱེད་དོ་ཞེས་གསུངས་སོ། །རོ་རྒྱབ་ན་བས་པུས་འཁྱུད་བཅད་པར་བྱའོ་ཞེས་བྱ་བ་ནི། དགེ་སློང་རོ་རྒྱབ་ན་བས་པུས་འཁྱུད་ཀྱི་རྫས་བཅད་པར་བྱའོ། །དབང་པོ་རྣམས་ནང་དུ་བསྡུས་པ་དང༌། ཡིད་ཕྱི་རོལ་དུ་མ་སོང་བ་དང༌། གསལ་བ་དང་དྲང་པོས་མི་ཐོགས་པར་བཅག་པར་བྱའོ་ཞེས་བྱ་བ་ལ། མིག་ལ་སོགས་པ་དབང་པོ་རྣམས་ནི་རང་བཞིན་གྱིས་ཕྱི་རོལ་དུ་འཕྲོ་བའི་བདག་ཉིད་ཅན་ཡིན་པས་དེ་དག་ཕྱི་རོལ་དུ་མི་འཕྲོ་བར་ནང་དུ་བསྡུས་ཏེ་བཅག་པར་བྱའོ། །ཡིད་ཕྱི་རོལ་དུ་མ་སོང་བ་ཞེས་བྱ་བ་ནི། འདི་ལྟར་ས་གཞི་གནས་པ་ལ་སོགས་པ་ཡང་དེའི་ཡུལ་ཡིན་པས་འཇིག་རྟེན་ལ་སེམས་པ་ལས་བཟློག་ཅིང་ཡིད་ནང་དུ་བསྡུས་ཏེ་བཅག་པར་བྱ་བའོ། །གསལ་བཞེས་བྱ་བ་ནི། སེམས་དང་བས་རབ་ཏུ་ཟིན་པའི་ལུས་ཀྱིས་སྤྲོ་བ་དང་བཅས་བཞིན་དུ་བཅག་པར་བྱའོ་ཞེས་བྱ་བའི་ཐ་ཚིག་གོ །དྲང་པོས་ཞེས་བྱ་བ་ནི་གོམ་པ་ཡ་ཡོ་མེད་པས་སོ། །མི་ཐོགས་པར་ཞེས་བྱ་བ་ནི། མལ་གཅིག་ཏུ་མི་སྡོད་པར་དྲག་དལ་རན་པར་བཅག་པར་བྱའོ། །མི་ནུས་ན་ཐག་གུས་བྲེས་ཏེའོ་ཞེས་བྱ་བ་ནི། དྲང་པོར་འཆག་མི་ནུས་ན་ཐག་གུ་བྲེས་ཏེ་བཅག་པར་བྱ་བའོ། །ཁ་ཐོན་པའི་འཆག་ས་ནི་ཁྲུ་བཅུ་གཉིས་སོ་ཞེས་བྱ་བ་ནི། འཆག་སའི་སྲིད་དུའོ། །སྤོང་བ་པའི་ནི་བཅོ་བརྒྱད་དོ་ཞེས་བྱ་བ་ནི། འཆག་སའི་སྲིད་དུ་ཁྲུའོ། །དེ་ཐག་གུས་གཞལ་ཏེ་བྱའོ་ཞེས་བྱ་བ་ནི། དགེ་སློང་གིས་འཆགས་དེ་ཐག་གུས་གཞལ་ཏེ་བྱ་བའོ། །འདིར་གཞུང་ནི་རྣམ་པར་འབྱེད་པ་ལས། དེ་དག་གིས་འཆགས་ཇི་ལྟ་བུ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། སྤོང་བ་པའི་འཆགས་ནི་ཁྲུ་བཅོ་བརྒྱད་དོ། །ཁ་ཏོན་པའི་ནི་ཁྲུ་བཅུ་གཉིས་ཏེ། དེ་དག་ཐག་གུས་གཞལ་ཏེ་བྱའོ་ཞེས་གསུངས་པ་ཡིན་ནོ། །དགེ་སློང་གིས་ཆོས་བཤད་པར་བྱའོ་ཞེས་བྱ་བ་ནི། དགེ་སློང་གིས་དུས་དུས་སུ་འཁོར་རྣམས་ལ་ཆོས་བཤད་པར་བྱ་བའོ། །འདུག་སྟེའོ་ཞེས་བྱ་བ་ནི། སེང་གེའི་ཁྲི་ལ་སོགས་པ་ལ་འདུག་སྟེ་ཆོས་བསྟན་པར་བྱ་བའོ། །གལ་ཏེ་དུ་མ་ཉིད་ན་གཅིག་གིས་སོ་ཞེས་བྱ་བ་ནི། གལ་ཏེ་ཆོས་སྟོན་པ་དུ་མ་ཉིད་ཡོད་ན་དང་པོར་གཅིག་གིས་བཤད་པར་བྱའོ། །ཆོས་སྟོན་པ་ནི་འདི་པའི་དགེ་
སློང་གི་འཁོར་དུ་གཏོགས་པ་དག་ཁོ་ནའི་ལས་ཡིན་གྱི་གཞན་གྱི་ནི་མ་ཡིན་ནོ། །འདི་པའི་དགེ་སློང་གི་འཁོར་དུ་གཏོགས་པ་ཞེས་བྱ་བ་ནི་ཆོས་འདི་པའི་རབ་ཏུ་བྱུང་བ་མཚན་མ་ཟུན་པ་དང་མཚན་མི་མཐུན་པ་དང༌། སྡོམ་པ་མཆོག་དང་མཆོག་མ་ཡིན་པ་དང་དགེ་ཚུལ་དང་དགེ་སློབ་མ་ལ་སོགས་པ་ཐམས་ཅད་ཡིན་པར་རིག་བར་བྱའོ། །གང་ཡང་རུང་བས་སོ་ཞེས་བྱ་བ་ནི། རྒན་པ་དང་མཚན་མཐུན་པ་དང་བསྙེན་པར་རྫོགས་པ་འབའ་ཞིག་གིས་བྱ་བར་མ་ཟད་ཀྱི། གསར་བུ་དང་མཚན་མི་མཐུན་པ་དང་རབ་ཏུ་བྱུང་ཞིང་བསྙེན་པར་མ་རྫོགས་པ་དག་གིས་ཀྱང་བྱར་རུང་སྟེ། དེ་དག་གི་ནང་ནས་ཆོས་སྟོན་བ་དུ་མ་ཡོད་དུ་ཟིན་ཀྱང༌། ཐམས་ཅད་ཀྱིས་མི་བྱ་པར་གང་ཡང་རུང་བ་ཆིག་གིས་བསྟན་པར་བྱའོ། །མ་གསོལ་བར་མི་བྱའོ་ཞེས་བྱ་བ་ནི། ཆོས་བསྟན་པར་བྱའོ། །གལ་ཏེ་དེའི་ཚིག་གིས་བྱུང་བ་མ་ཡིན་ནའོ་ཞེས་བྱ་བ་ནི། དགེ་སློང་གང་གིས་ཚིག་གིས་དགེ་འདུན་སྤྱན་དྲངས་པ་ལ་སོགས་པར་འགྲོ་བ་བྱུང་བའི་དགེ་སློང་དེས་ནི་གཞན་གྱིས་མ་གསོལ་བར་ཡང་ཆོས་བསྟན་པར་བྱ་སྟེ། འདི་ལྟར་དགེ་སློང་དེའི་ཚིག་ལས་གྱུར་པས་དེར་སྟོན་པ་དང་འདྲ་བར་མདུན་གྱིས་བལྟས་པར་གྱུར་བས་མདུན་གྱིས་བལྟས་པ་ཉིད་དགེ་སློང་དེ་ལ་གསོལ་བ་བཏབ་བ་ཉིད་ཡིན་པའི་ཕྱིར་རོ། །འདིར་བྱུང་བ་ཞེས་སྨོས་པས་ནི་དཔེ་ཙམ་དུ་ཟད་དེ། དེའི་ཚིག་ལས་གྱུར་པས་གནས་སྐབས་ཐམས་ཅད་ལ་ཡང་ཆོ་ག་དེ་བཞིན་ནོ། །གནས་སྐབས་ཐམས་ཅད་ལ་དགེ་འདུན་གནས་བརྟན་གྱི་ཚིག་ལས་གྱུར་པ་ཉིད་ཡིན་པར་རིག་པར་བྱའོ། །གནས་པ་རྣམས་ལ་ནི་གནས་ཀྱི་སའོ། །ཉེ་གནས་རྣམས་ལ་ནི་ཀློག་པའི་སློབ་དཔོན་གྱིས་སོ། །དགེ་སློང་མ་རྣམས་ལ་ནི་དགེ་སློང་རྣམས་ཀྱིས་སོ། །བསྙེན་པར་མ་རྫོགས་ཤིང་རབ་ཏུ་བྱུང་བ་རྣམས་ལ་ནི་བསྙེན་པར་རྫོགས་པའི་ཚིག་ལས་གྱུར་པ་ཉིད་ཡིན་པར་རིག་པར་བྱ་སྟེ། གནས་སུ་གྱུར་པ་ཉིད་ཡིན་ཕྱིར་རོ། །གྲྭས་མི་བྱའོ་ཞེས་བྱ་བ་ནི། ཆོས་བསྟན་པར་བྱ་ཏེ། ཆོས་སྟོན་པའི་གྲྭ་གཞན་ཅིག་ཉེ་འཁོར་ན་འདུག་པའི་དྲུང་རང་གིས་གྲྭ་གཞན་བཙུགས་ཏེ་ཆོས་བསྟན་པར་མི་བྱ་བའོ། །འདིར་འཁོར་འདུས་པ་བཀག་པ་ནི་མ་ཡིན་གྱི། གང་དུ་ཆོས་སྟོན་བའི་སྒྲ་ཕན་ཚུན་གྲགས་པར་འགྱུར་བའི་གནས་དེར་གཞན་ཆོས་སྟོན་པའི་གྲའི་དྲུང་དུ་དགེ་སློང་གཞན་གྱིས་གྲྭ་
གཞན་བཙུགས་ཏེ་ཆོས་བསྟན་པར་མི་བྱ་བ་ཡིན་ནོ། །འདི་ལྟར་བཅོམ་ལྡན་འདས་ཀྱིས་ཆོས་ཉན་པའི་གྲལ་གྱི་རྣམ་པ་ཁྱམས་སུ་ཟླ་གམ་གྱི་རྣམ་པ་ལྟ་བུའམ་རྫིང་བུའི་རྣམ་པ་ལྟ་བུར་རྗེས་སུ་གནང་བས། དེའི་ཕྱིར་ལང་ལོང་འདི་བཀག་པ་ཡིན་ཏེ། དགེ་སློང་དག་ལང་ལོང་དག་གིས་ཆོས་སྟོན་པར་བྱེད་པ་ན་ཅ་ཅོར་གྱུར་པའི་ཕྱིར་རོ་ཞེས་གླེང་གཞི་ལས་གསུངས་པ་ཡིན་ནོ། །གྲྭ་ཕྱེད་ཀྱིས་མི་བྱའོ་ཞེས་བྱ་བ་ནི། གྲྭ་གཅིག་གི་ནང་དུལ་ལ་གྲྭ་ཕྱེད་ལ་སྟོན་པར་བྱེད་ཅིང་ལ་ལ་གྲྭ་བྱེད་ལ་སྟོན་པར་བྱེད་པ་དེ་ལྟར་མི་བྱ་བའོ། །འདིར་དེ་གཉིས་ཀྱི་གཞུང་ནི་གྲྭས་སྨྲ་བར་མི་བྱ་གྲྭ་ཕྱེད་ཀྱིས་སྨྲ་བར་མི་བྱ་བ་སྟེ། སྨྲ་ན་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །གཉིས་ཀྱིས་གཅིག་ཏུ་མི་བྱའོ་ཞེས་བྱ་བ་འདི་ནི། སྔར་གལ་ཏེ་དུ་མ་ཉིད་ན་གཅིག་གིས་སོ་ཞེས་སྨོས་པ་དེའི་སྤྲོས་པ་ཡིན་ཏེ། གྲྭ་ཡང་རུང་གྲྭ་ཕྱེད་ཀྱང་རུང་བ་གཅིག་ཏུ་གང་ཟག་གཉིས་ཀྱིས་ཆོས་བསྟན་པར་མི་བྱའོ། །འདིར་གཞུང་ནི་གཉིས་ཀྱིས་གྲྭ་གཅིག་ཏུ་སྨྲ་བར་མི་བྱའོ། །གང་སྨྲ་བར་བྱེད་པ་དེ་ལ་ཉེས་བྱེས་སུ་འགྱུར་རོ་ཞེས་གསུངས་པ་ཡིན་ནོ། །རྒན་རིམས་ཀྱིས་སོ་ཞེས་བྱ་བ་འདིར་ཡང་སྔར་གལ་ཏེ་དུ་མ་ཉིད་ཡིན་ན་གཅིག་གིས་སོ་ཞེས་སྨོས་པ་དེའི་རྗེས་སུ་སྦྱར་ཏེ། འདིར་ནི་ཆོས་སྟོན་པ་དུ་མ་ཡོད་ན་རྒན་རིམས་ཀྱིས་བསྟན་པར་བྱའོ་ཞེས་བྱ་བར་སྦྱར་གྱི། བསྟན་པར་མི་བྱའོ་ཞེས་དགག་པ་ནི་མ་ཡིན་ནོ། །གལ་ཏེ་མང་བ་ཉིད་ཡིན་ན་སྟན་གཉིས་སམ་གསུམ་གཞག་སྟེའོ་ཞེས་བྱ་བ་ནི། གལ་ཏེ་ཆོས་སྨྲ་བ་བདག་པས་རྒན་རབས་ཆོས་སྟོན་པ་དག་ཆང་བ་ཉིད་ཡིན་ན་དེ་དག་གི་གོ་གཉིས་སམ་གསུམ་གོང་དུ་གཞག་སྟེ་ཆོས་སྨྲ་བས་བསྟན་པར་བྱའོ། །ཅི་གང་ཡང་རུང་བས་སམ་ཞེ་ན་མ་ཡིན་ཏེ་དེའི་ཕྱིར་གལ་ཏེ་སྟན་དེ་དག་མི་འཐོབ་པ་ཡིན་ནའོ་ཞེས་བྱ་བ་སྨྲས་ཏེ། ཆོས་སྨྲ་བ་གང་གིས་ཆོས་སྨྲ་བ་རྒན་རབས་གཉིས་སམ་གསུམ་གྱི་སྟན་དེ་དག་མི་འཐོབ་པ་གང་ཡིན་པ་དེ་ནི་སྟན་དེ་དག་མི་འཐོབ་པ་སྟེ། དེས་རྒན་རབས་ཀྱི་སྟན་གཉིས་སམ་གསུམ་གོང་དུ་གཞག་སྟེ་ཆོས་བསྟན་པར་བྱའོ། གང་གིས་སྟན་གསུམ་མི་འཐོབ་པ་དེས་ཀྱང་སྟན་གསུམ་གཞག་པར་བྱ། གང་གཉིས་མི་ཐོབ་པ་དེས་ཀྱང་གཉིས་གཞག་པར་བྱ། གང་གིས་གཅིག་མི་ཐོབ་པ་དེས་ཀྱང་གཅིག་གཞག་པར་བྱ། གལ་ཏེ་དེ་གནས་བརྟན་ཡིན་ན་ནི་གྲལ་གྱི་གཙོ་བོར་འདུག་པར་བྱ་སྟེ། འདི་དག་ནི་ཁྲི་སྟན་དུ་མ་བཤམས་པར་སྤྱིར་འདུག་པའི་ཆོ་ག་ཡིན་ནོ། སེང་གེའི་ཁྲི་ལ་
ཡང་ངོ་ཞེས་བྱ་བ་ནི། འདུག་སྟེ་ཆོས་བསྟན་བར་བྱའོ། །སེང་གེའི་ཁྲི་སྟན་ལ་སོགས་པ་ཁྲི་སྟན་ལོགས་ཤིག་ཏུ་སྤགས་པ་ལ་ནི་གོང་དུ་རྒན་རབས་གཞན་གྱི་གོ་གཞག་མི་དགོས་སོ། །མཆིས་མའི་སྣོད་གཞག་བར་བྱའོ་ཞེས་བྱ་བ་ནི་མཆིལ་མདོར་བའི་ཕྱིར་རོ། །དེར་བཅལ་བླུགས་སོ་ཞེས་བྱ་བ་ནི། མཆིལ་མའི་སྣོད་དེར་ངོ༌། །དེར་བཅལ་ཅི་ཞིག་བླུགས་པར་བྱ་ཞེ་ན་དེའི་ཕྱིར། བྱེ་མ་འམ་ཐལ་བའོ་ཞེས་བྱ་བ་སྨྲས་ཏེ། དེ་གཉིས་ནི་དཔེ་ཙམ་དུ་ཟད་དེ། རྩྭ་ལ་སོགས་པ་གཞན་ཡང་རུང་བའི་ཕྱིར་རོ། །དེ་དུས་དུས་སྦྱང་བར་བྱའོ་ཞེས་བྱ་བ་ནི་མཆིལ་མའི་སྣོད་དེའོ། །ཚེས་བརྒྱད་དང་བཅུ་བཞི་དང་བཅོ་ལྔའི་ནུབ་མོ་ཆོས་ཉན་པར་བྱའོ་ཞེས་བྱ་བ་ནི། འདིར་གཞུང་ནི་དགེ་སློང་དག་དེ་ལྟ་བས་ན་ཚེས་བརྒྱད་དང་བཅུ་བཞི་དང་བཅོ་ལྔ་ལ་དགེ་སློང་རྣམས་གཅིག་ཏུ་འདུས་ཏེ་ཆོས་སྨྲ་བར་བྱ་བ་རྗེས་སུ་གནང་ངོ་ཞེས་གསུངས་པ་ཡིན་ནོ། །ནད་པས་དེ་མ་བྱས་པ་ལ་ནི་ཉེས་པ་མེད་དོ་ཞེས་བྱ་བ་ནི། ནད་པས་ཆོས་མཉན་པ་དེ་མ་མཉན་པ་དང་མ་བཏོན་པ་ལ་ཉེས་པ་མེད་པའོ། །དེ་སྨྲ་བའི་ཕྱིར་གསོལ་བ་འདེབས་པ་མི་མནོད་པར་མི་བྱའོ་ཞེས་བྱ་བ་ནི། ཆོས་དེ་བསྟན་པ་དང་གདོན་པ་སྨྲ་བའི་ཕྱིར་གཞན་གསོལ་བ་འདེབས་པ་ནི་དགེ་སློང་གིས་མི་མནོད་པར་མི་བྱ་སྟེ། ཁས་བླང་བར་བྱའོ་ཞེས་བྱ་བའི་ཐ་ཚིག་གོ །མི་ནུས་པ་ལ་སོགས་པ་ཡིན་ན་གསོལ་བ་འདེབས་པ་ལ་ཤད་ཀྱིས་སྤྱད་བར་བྱའོ་ཞེས་བྱ་བ་ནི། ན་སྟེ་མི་ནུས་པ་འམ་བྱ་བ་གཞན་གྱིས་བྲེལ་བར་གྱུར་བ་ཡིན་ན་དེའི་ཆོ་གསོལ་བ་འདེབས་པ་ལ་ཤད་ཀྱིས་སྤྱད་ཞིང་གོ་པར་བྱའོ་ཞེས་བྱ་པའི་ཐ་ཚིག་གོ །སྨྲ་བ་པོ་མེད་ན་རིམ་གྱིས་དྲན་པར་བྱ་ཞིང་ཐན་ཚིགས་སུ་བཅད་པ་རེ་རེ་ཙམ་ཡང་སྨྲ་པར་བྱའོ་ཞེས་བྱ་བ་ནི། གལ་ཏེ་ཆོས་སྨྲ་བ་པོ་མེད་པར་དགེ་སློང་ཐམས་ཅད་རྒ་ན་རིམས་ཀྱིས་དྲན་པར་བྱ་ཞིང་ཐ་ན་ཚིགས་སུ་བཅད་པ་རེ་རེ་ཙམ་ཡང་གདོན་པར་བྱ་བའོ། །དེར་མར་མེ་གཟུགས་སོ་ཞེས་བྱ་བ་ནི་ཆོས་ཉན་པ་དེར་རོ། །ཁྱམས་སུ་ཆོས་ཉན་པའི་གྲལ་ཟླ་གམ་གྱི་རྣམ་པ་ལྟ་བུ་འམ་རྫིང་བུའི་རྣམ་པ་ལྟ་བུར་བཤམ་པར་བྱའོ་ཞེས་བྱ་བ་ནི། གནས་ངོས་བཞི་ཀུན་ནས་སྟེང་གི་ཁྱམས་བཏགས་པའི་ནང་དུ་ཆོས་ཉན་པའི་གྲལ་ཟླ་གམ་ལྟ་བུའམ་གྲུ་བཞིར་བཤམ་པར་བྱ་བའོ། །དེ་ཡང་དཔེ་ཙམ་དུ་ཟད་དེ། ཡིད་དུ་འོང་བ་དང༌། མི་གནོད་པ་གཞན་དག་ཀྱང་རུང་བས་ངེས་པ་མེད་དོ། །བླ་གབ་མེད་པར་ཆོས་མཉན་ན་བླ་རེ་
གདགས་སོ་ཞེས་བྱ་བ་ནི། གལ་ཏེ་བླ་གབ་མེད་པར་ཆོས་ཉན་ན་བླ་རེ་གདགས་པར་བྱ་བའོ། །རླུང་དང་ཆང་འབབ་ན་བརྟུལ་ལོ་ཞེས་བྱ་བ་ནི་བླ་རེའོ། །དེར་ཆོས་ཉན་པ་དག་དོར་བར་མི་བྱའོ་ཞེས་བྱ་བ་ནི། བླ་རེ་བརྟུལ་ནས་རླུང་དང་ཆར་བ་བབ་པ་དེར་དགེ་སློང་ཆོས་སྨྲ་བ་དང་ཉན་པ་དག་དོར་བར་མི་བྱའོ། །དེར་གནས་བརྟན་དང་པོར་འདུག་སྟེ་ཡུད་ཙམ་ཞིག་ཅང་མི་སྨྲ་བར་བསྡད་ནས་ཆོས་སྨྲ་བར་བྱ་བ་འམ་གཞན་ལ་དགེ་སློང་ཆོས་སྨྲོས་ཤིག་ཅེས་གསོལ་བ་བྱའོ་ཞེས་བྱ་བ་ནི། ཆོས་སྨྲ་བའི་གནས་དེར་གནས་བརྟན་དང་པོར་འདུག་སྟེ་དུས་ཅུང་ཞིག་ཅང་མི་སྨྲ་བར་བསྡད་ནས། གནས་བརྟན་ཉིད་ཀྱིས་ཆོས་སྨྲ་བར་བྱའོ། །ཡང་ན་ཆོས་ཉན་པའི་མདུན་རོལ་ཏུ་གནས་བརྟན་གྱིས་དགེ་སློང་ཆོས་སྨྲ་བ་པོ་གཞན་ལ། ཀྱེ་དགེ་སློང་ཆོས་བསྟན་པར་གསོལ་ཞེས་གསོལ་བ་གདབ་ཅིང་གཞན་ཆོས་སྨྲར་གཞུག་པར་བྱའོ། །སྨྲ་བ་ན་སེམས་གཏད་དེ། གལ་ཏེ་ཆོས་ཡིན་ན་སྤྲོ་བར་བྱའོ་ཞེས་བྱ་བ་ནི། ཆོས་སྨྲ་བ་པོ་ཆོས་སྨྲ་བ་ན་ཐམས་ཅད་ཀྱིས་སེམས་གཏད་པར་བྱའོ། །གལ་ཏེ་ཆོས་སྨྲ་བ་ཡིན་ན་སྤྲོ་བར་བྱ་སྟེ། དགེ་སློང་ལེགས་སོ་ལེགས་སོ་ཆོས་བཟང་པོ་བཤད་དོ་ཞེས་ལེགས་སོ་ཞེས་བྱ་བ་སྦྱིན་པར་བྱའོ། །གལ་ཏེ་མ་ཡིན་ན་བཟློག་པར་བྱའོ་ཞེས་བྱ་བ་ནི། གལ་ཏེ་སྨྲ་བ་པོ་དེ་ཆོས་མ་ཡིན་པ་སྨྲ་ན་དེའི་ཚེ་བཟློག་པར་བྱ། དགེ་སློང་ཆོས་མ་ཡིན་པ་མ་སྨྲ་ཞིག་ཅེས་དགག་པར་བྱའོ། །དེར་ཁྱིམ་པ་ལྷགས་པ་རྣམས་ལ་ཆོས་དང་ལྡན་པའི་གཏམ་བྱའོ་ཞེས་བྱ་བ་ནི། ཆོས་མཉན་པ་དེར་གལ་ཏེ་མགོ་མ་བཙུགས་པའི་མདུན་དུ་འམ་རྫོགས་པའི་རྗེས་ལ་ཁྱིམ་པ་དག་ལྷགས་ན་དེའི་ཚེ་དེ་དག་ལ་ཆོས་དང་ལྡན་པའི་གཏམ་བྱ་བའོ། །མུ་སྟེགས་ཅན་ཀླན་ཀ་ཚོལ་ཞིང་གནས་ན་ལེགས་པར་ཚར་གཅད་ཅིང་ཁྲོ་བ་མི་བསྟན་པར་བཟོད་པར་བྱའོ་ཞེས་བྱ་བ་ནི། གནས་བརྟན་གྱིས་ཞེས་བྱ་བར་སྦྱར་རོ། །འདི་སྐད་བསྟན་ཏེ། གལ་ཏེ་མུ་སྟེགས་ཅན་དག་ཀླན་ཀ་ཚོལ་ཞིང་གནས་ཏེ། འདི་ནི་ཆོས་མ་ཡིན་ནོ། །འདི་ནི་འདུལ་བ་མ་ཡིན་ནོ་ཞེས་ཟེར་ན་དེའི་ཚེ་རིགས་པའི་ཚིག་གིས་ལེགས་པར་ཚར་གཅད་ཅིང་ཁྲོ་བ་མི་བསྟན་པར་བཟོད་པར་བྱའོ་ཞེས་བྱ་བའི་ཐ་ཚིག་གོ །སྟོན་པས་འཁོར་ཁྲིད་དེ་འགྲོ་བར་མི་བྱའོ་ཞེས་བྱ་བ་ནི། ཆོས་སྟོན་པའི་དགེ་སློང་གིས་ཆོས་བསྟན་ཟིན་ནས་འཁོར་རྣམས་ལ་ཆོས་བསྟན་པར་བྱའོ་ཞེས་དེ་ནས་ཁྲིད་དེ་འགྲོ་བར་མི་བྱ་བ་སྟེ། ཆོས་སྟོན་པ་ནི་གནས་
བརྟན་གྱི་ལས་ཡིན་པའི་ཕྱིར་རོ། །དེ་དག་འགྲོན་ཆོས་ཀྱི་སྒོར་གཟུད་པར་བྱའོ་ཞེས་བྱ་བ་ནི། འཁོར་དེ་དག་རང་དགར་འགྲོ་ཞིང་ཕྱི་བཞིན་འོང་ན་ཆོས་སྟོན་པས་ཁྱིམ་པ་དེ་དག་ལ་གཞོལ་བས་ཆོས་ཀྱི་སྒོར་གཟུད་པར་བྱ་བའོ། །ཞེས་དང་བཅས་པ་དང་གུས་པ་དང་བཅས་པ་དང་སེམས་དམའ་པས་འཇུག་པར་བྱའོ་ཞེས་བྱ་བ་ནི། ཆོས་སྨྲ་བས་འཁོར་གྱི་ནང་དུ་རྣམ་པ་འདི་ལྟ་བུས་འཇུག་པར་བྱ་བའོ། །ཞེས་དང་བཅས་པ་ཞེས་བྱ་བ་ནི་གཞན་ལ་བླ་མ་ཉིད་དུ་ལྟ་བའོ། །གུས་པ་དང་བཅས་པ་ཞེས་བྱ་བ་ནི་གཞན་ལ་འཇིགས་པའི་གནས་ཉིད་དུ་ལྟ་བའོ། །སེམས་དམའ་བ་ཞེས་བྱ་བ་ནི་རྒྱགས་པ་དད་ང་རྒྱལ་ངེས་པར་བཅོམ་པ་ཉིད་ཀྱིས་སོ། །གུས་པར་བཅས་ཏེ་བསྟན་པར་བྱའོ་ཞེས་བྱ་བ་ནི། ཆོས་ཞེས་བྱ་བར་སྦྱར་རོ། །གུས་པར་བྱ་བ་བསྟན་པའི་ཕྱིར་ཆོས་ལ་གུས་པ་དང་བཅས་པ་དང་བརྟན་པ་དང་བཅས་པ་དང་ཡིད་མི་གཡེང་བས་རིགས་པ་དང་གྲོལ་བའི་ཚིག་དག་གིས་སོ་ཞེས་བྱ་བ་སྨྲས་ཏེ། ཆོས་ལ་གུས་པ་དང་བཅས་པ་ཞེས་བྱ་བ་ནི། ཆོས་ལ་གུས་པ་ཉེ་བར་གཞག་སྟེའོ། །བརྟེན་པ་ཞེས་བྱ་བ་ནི་ཚིག་མི་གཡོ་བའོ། །ཡིད་བསྡུས་པས་ཞེས་བྱ་བ་ནི། གཞན་ལ་སེམས་མི་གཏོད་པས་སོ། །རིགས་པའི་ཚིག་དག་གིས་ཞེས་བྱ་བ་ནི། ཚད་མ་དང་ལྡན་པ་དག་གིས་སོ། །གྲོལ་བའི་ཚིག་དག་གིས་ཞེས་བྱ་བ་ནི། ཐོགས་པ་མེད་པར་བརྗོད་པ་དག་གིས་ཏེ། ཅི་མིང་ཆེ་གེ་ཞེས་བྱ་བ་ལ་སོགས་པ་དག་གིས་བར་དུ་མཆོད་པའོ། །དོན་ཇི་ལྟ་བ་བཞིན་དུ་ཐོགས་པ་མེད་པར་བརྗོད་བདག་གིས་སོ་ཞེས་བྱ་བ་ནི། དོན་ཡང་དག་པ་ཇི་ལྟ་བ་བཞིན་དུ་ཚིག་མ་འཁྲུལ་བ་དག་གིས་ཐོགས་པ་མེད་པར་བརྗོད་པ་དག་གིས་སོ། །མ་འདྲེས་པར་རོ་ཞེས་བྱ་བ་ནི་གཏམ་གཞན་དག་དང་མ་འདྲེས་པར་རོ། །འབྲེལ་བར་རོ་ཞེས་བྱ་བ་ནི་ཚིག་སྔ་མའི་དོན་དང་ཚིག་ཕྱི་མའི་དོན་འབྲེལ་བ་དང་བཅས་ཤིང་སྐབས་སུ་མ་ཆད་པར་རོ། །བྱམས་པ་དང་སྙིང་རྗེ་དང་ཟང་ཟིང་མེད་པའི་སེམས་ཀྱིས་སོ་ཞེས་བྱ་བ་ནི། བྱམས་པ་དང་སྙིང་རྗེ་དང་ཟང་ཟིང་མེད་པའི་སེམས་ཀྱིས་ཆོས་བསྟན་པར་བྱ་བའོ། །བྱམས་པའི་སེམས་ཀྱིས་ཞེས་བྱ་བ་ནི་རྗེས་སུ་ཆགས་པ་དང་ཁོང་ཁྲོ་བ་དང་བྲལ་ཞིང་མཛའ་བཤེས་དང་ལྡན་པའི་སེམས་ཀྱིས་སོ། །སྙིང་རྗེའི་སེམས་ཀྱིས་ཞེས་བྱ་བ་ནི། ཕན་པ་ཉེ་བར་བསྒྲུབ་པར་འདོད་པ་སྔོན་དུ་བཏང་བས་སོ། །ཟང་ཟིད་མེད་པའི་སེམས་ཀྱིས་སོ་
ཞེས་བྱ་བ་ནི། དེའི་རྒྱུད་དེ་ལས་སམ་གཞན་ལས་རྙེད་པ་དང་བཀུར་སྟི་དང་རིམ་གྲོ་འམ་བྱ་བ་གཞན་ཅུང་ཟད་ཀྱང་རྗེས་སུ་སྒྲུབ་པར་མི་འདོད་པས་སོ། །རངས་པ་དང་མོས་པ་དང་དགའ་བར་བྱེད་པས་སོ་ཞེས་བྱ་བ་ལ། རངས་པར་བྱེད་པ་ཞེས་བྱ་བ་ནི་ཉན་པ་པོ་རྣམས་ཀྱི་ཞུམ་པ་ཉིད་བསྩལ་བའི་ཕྱིར་རབས་པ་སྐྱེད་པར་བྱེད་ཅིང་ཆོས་བསྟན་པར་བྱ་བའོ། །མོས་པར་བྱེད་པས་ཞེས་བྱ་བ་ནི། དམ་པའི་ཆོས་ལ་མོས་པའི་གཉེན་པོར་མོས་པ་སྐྱེད་པར་བྱེད་ཅིང་ཆོས་བསྟན་པར་བྱ་བའོ། །དགའ་བར་བྱེད་པས་སོ་ཞེས་བྱ་བ་ནི་མི་རིགས་པར་བྱེད་པ་ཉིད་ཀྱི་གཉེན་པོར་དགའ་བར་བྱེད་ཅིང་ཆོས་བསྟན་པར་བྱ་བའོ། །འདི་སྐད་བསྟན་ཏེ། ཡང་དག་པས་གཟེངས་བསྟོད་པས་ནི་རེངས་པར་བྱ་བའོ། །བསམ་པ་དང་མཐུན་པས་ཆོས་སྟོན་པས་ནི་མོས་པར་བྱ་བའོ། །ཚད་མ་དང་ལྡན་པའི་དོན་སྟོན་པས་ནི་དགའ་བར་བྱ་བའོ། །དོན་གྱི་དབང་གིས་མ་རྫོགས་ན་གཞག་པར་བྱའོ་ཞེས་བྱ་བ་ནི། མི་ནུས་པ་ལ་སོགས་པའི་དོན་གྱི་དབང་གིས་ཆོས་ཉན་པའི་འཕྲོ་མ་རྫོགས་ན་གཞག་པར་བྱ་སྟེ། འདི་ལ་མི་རིགས་པ་མེད་པར་ཤེས་པར་བྱའོ། །ཆོས་འདི་ལྟར་མཉན་པར་བྱ་སྟེ། ཇི་ལྟར་རྗེས་དང་བཅས་པ་ལ་སོགས་པར་ཆོས་སྟོན་པར་བྱེད་པ་དེ་བཞིན་དུ་ཉན་པ་པོས་ཀྱང་སྔར་བསྟན་པའི་ཡོན་ཏན་དེ་དག་དད་ལྡན་པར་ཆོས་མཉན་པར་བྱའོ།། ཆོས་མཉན་པའི་མཇུག་ཏུ་རྒྱལ་པོ་དང་ལྷ་དང་སྦྱིན་བདག་གི་དོན་དུ་ཡོན་བསྔོ་ཞིང་བརྗོད་པར་བྱའོ། །འགྱེས་ཁར་ཅི་བདེར་བྱའོ། །དབྱངས་ཀྱིས་ཆོས་སྨྲ་བར་བྱའོ་ཞེས་བྱ་བ་ནི། དབྱངས་ཀྱི་ང་རོས་ཆོས་གདོན་ཅིང་སྨྲ་བར་བྱའོ། །ལངས་ནས་རྣམ་པར་དབྱེ་བར་བྱའོ་ཞེས་བྱ་བ་ནི། ཆོས་སྨྲ་བ་ལངས་ནས་དོན་མ་གོ་བ་དག་གོ་བར་བྱ་བའི་ཕྱིར་རྣམ་པར་དབྱེ་བར་བྱ་བའོ། །དོན་བཏུས་ཏེ་བརྗོད་པར་ཡང་བྱའོ་ཞེས་བྱ་བ་ནི། གཙུག་ལག་ཁང་ལས་དོན་བཏུས་ཏེ་རང་གིས་ཡི་གེ་མཛེས་པར་བྱ་བའི་ཕྱིར་སྙན་དང་གས་བསྡེབ་པར་ཡང་བྱ་བའོ། །གལ་གཟུང་བ་དང་གཞུང་གཟུགས་པར་ཡང་ངོ་ཞེས་བྱ་བ་ནི། ག་ལ་གཟུང་བ་དང་གཞུང་གཟུགས་པ་དེ་གཉིས་བྱ་སྟེ། གང་གི་ཚེ་ཞེ་ན་མདོའི་སྡེ་ལ་སོགས་པའི་ཆོས་ཀྱིའོ། །འདིར་གལ་གཟུང་བ་ཞེས་བྱ་བ་ནི། ཚིག་འདི་ནི་མི་རིགས་པ་སྟེ། སྒྲ་ངན་པ་ལ་སོགས་པའི་ཉེས་པས་སྐྱོན་ཆགས་པའི་ཕྱིར་རོ། །དོན་ཀྱང་སྔ་ཕྱི་འགལ་པ་དང་ལུང་གཞན་དང་
འགལ་ཏེ་གཏན་ཚིགས་འཐད་པ་མ་ཡིན་པ་ལ་སོགས་པས་སྐྱོན་ཆགས་པའི་ཕྱིར་རོ་ཞེས་བྱ་བ་ལ་སོགས་པ་ལྟ་བུ་ཡིན་པར་ཤེས་པར་བྱའོ། །གཞུང་གཟུགས་པ་ཞེས་བྱ་བ་ནི། དེ་ལྟར་ཆོས་ལ་གལ་གཟུང་བ་གང་ཡིན་པ་དེ་སྒྲ་དང་དོན་གྱི་ཉེས་པ་ཡོངས་སུ་སྤང་པས་རྣམ་པར་གཞག་ཅིང་གཞུང་གཟུགས་པའོ། །འདིར་ཆོས་སྟོན་པའི་སྐབས་ཇི་སྐད་བསྟན་པ་དེ་དག་གི་གཞུང་ནི། །དགེ་སློང་ཆོས་སྟོན་པས་རྗེས་དང་བཅས། གུས་པ་དང་བཅས་འཇིགས་པའི་དབང་དང་བཅས་ཤིང་སེམས་དམའ་བས་འཁོར་གྱི་ནང་དུ་ཞུགས་ཏེ་ཚིག་དང་ཡི་གེ་རིགས་པ་དང་གྲོལ་པ་དག་གིས་ཆོས་བསྟན་པར་བྱ་ཞིང༌། མདོ་སྡེ་དག་ལས་དོན་བླངས་ཏེ་དང་པོར་གཏམ་བྱ་ཞིང་བཤད་པར་བྱ་བ་བསྡོགས་པར་བྱའོ། །དོན་དང་ཚིག་འབྲུས་འཁོར་ལ་གོ་བར་བྱ་ཞིང་གྲྭས་བཤད་པར་མི་བྱ། གྲྭ་ཕྱེད་ཀྱིས་མི་བྱ། གཉིས་ཀྱིས་གྲྭ་གཅིག་ཏུ་བཤད་པར་མི་བྱ་འཁོར་ཁྲིད་དེ་འགྲོ་བར་མི་བྱའོ། །གལ་ཏེ་ཆོས་སྨྲ་བ་དག་མེད་པ་ན་དྲན་པར་བྱེད་པ་དག་གིས་དྲན་པར་བྱའོ། །དྲན་པར་བྱེད་པ་མེད་པ་ན་རིམ་གྱིས་ཐ་ན་ཚིགས་སུ་བཅད་པ་ཙམ་ཡང་བཀླག་པར་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །དགེ་འདུན་གྱི་གནས་བརྟན་གྱིས་སྨྱིག་མའི་ཐུར་མ་སྐུད་པ་ལ་བརྒྱུས་པ་སྤོ་བས་ཉི་མ་བགྲང་བར་བྱའོ་ཞེས་བྱ་བ་ནི། དགེ་འདུན་གྱི་གནས་བརྟན་གྱིས་ཉི་མ་བགྲང་བར་བྱའོ། །ཇི་ལྟར་ཞེ་ན། སྨྱིག་མའི་ཐུར་མ་སྐུད་པ་ལ་བརྒྱུས་པ་སྤོ་བས་སོ། །འདིར་གཞུང་ནི་གླེང་གཞི་དག་ལས་དེ་ལྟ་བས་ན་ཉི་མ་བགྲང་བར་བྱ་བ་རྗེས་སུ་གནང་ངོ་ཞེས་གསུངས་པ་དང༌། དེ་དག་ཐམས་ཅད་ཞག་པ་གྲང་བ་ལ་ཞུགས་པ་ནས། བཅོམ་ལྡན་འདས་ཀྱིས་བཀའ་སྩལ་པ། ཐམས་ཅད་ཀྱིས་བགྲང་བར་མི་བྱ་བར་གཉིས་ཀྱིས་བགྲང་བར་བྱ་སྟེ། དགེ་འདུན་གྱི་གནས་བརྟན་དང་དགེ་སྐོས་ཀྱིས་སོ། །དགེ་འདུན་གྱི་གནས་བརྟན་གྱིས་ཀྱང་མི་དྲན་ལ། དགེ་སྐོས་ཀྱིས་ཀྱང་མི་དྲན་པ་ནས། བཅོམ་ལྡན་འདས་ཀྱིས་བཀའ་སྩལ་པ། སྨྱིག་མའི་ཐུར་མ་བཅོ་ལྔ་སྐུད་པ་ལ་བརྒྱུས་པ་གཞག་པར་བྱ་ཞིང་དེ་དག་ལས་ཉི་མ་རེ་རེ་ཞིང་རེ་རེ་དྲང་བར་བྱའོ་ཞེས་བྱ་བའི་བར་དུ་གསུངས་པ་ཡིན་ནོ། །དགེ་སྐོས་ཀྱིས་དེ་ལས་བརྟགས་ཏེ་དགེ་འདུན་ལ་བརྗོད་པར་བྱའོ་ཞེས་བྱ་བ་ནི། དགེ་སྐོས་ཀྱིས་དགེ་འདུན་གྱི་གནས་བརྟེན་དེ་ལས་ཞག་
གྲངས་ཀྱི་ཉི་མ་དེ་བརྟགས་ཤིང་ཁོང་དུ་ཆུད་པར་བྱ་སྟེ། དགེ་འདུན་ལ་དེང་ནི་ཆོས་གྲངས་འདི་ལགས་སོ་ཞེས་ཉིན་རེ་ཞིང་དེ་བཞིན་བརྗོད་པར་བྱ་བའོ། །བྱེ་བྲག་ཏུ་བྱས་པའི་འོ་ཞེས་བྱ་བ་ནི། བྱེ་བྲག་ཏུ་བྱས་པའི་ཉི་མ་བརྗོད་བར་མི་བྱ་བར་བྱེ་བྲག་ཏུ་བྱས་པའི་ཉི་མ་བརྗོད་པར་བྱ་བའོ། །གང་གིས་བྱེ་བྲག་ཏུ་བྱས་པ་ཞེ་ན་དེའི་ཕྱིར། དོའི་དབྱེ་བས་སོ་ཞེས་བྱ་བ་སྨྲས་ཏེ། ཟླ་བ་ཡར་གྱི་ངོ་དང་མར་གྱི་ངོའི་དབྱེ་བས་བྱེ་བྲག་ཏུ་བྱས་པའི་ཚེས་གྲངས་བརྗོད་པར་བྱ་བའོ། གཙུག་ལག་ཁང་གི་བདག་པོ་དང་ལྷའི་ཕྱིར་ཚིགས་སུ་བཅད་པ་གདོན་པར་དགེ་སློང་རྣམས་ལ་བསྐུལ་བའི་ཚིག་བྱའོ་ཞེས་བྱ་བ་ནི། དགེ་སྐོས་ཀྱིས་དགེ་སློང་རྣམས་ལ་གཙུག་ལག་ཁང་གི་བདག་པོ་དང་ལྷ་རྣམས་ཀྱི་ཕྱིར་ཚིགས་སུ་བཅད་པ་གདོན་པར་བསྐུལ་བར་བྱ་བའོ། །གང་གི་ཚེ་ཞེ་ན་དེའི་ཕྱིར་མོད་ལའོ་ཞེས་བྱ་བ་སྨྲས་ཏེ། ཚེས་གྲངས་བརྗོད་པའི་མོད་ལའོ། །ཇི་ལྟར་བསྐུལ་པར་བྱ་ཞེ་ན། དེའི་ཕྱིར་དེད་ནི་ཡར་གྱི་ངོའི་ཚེས་གཅིག་ལགས་ཏེ། གཙུག་ལག་ཁང་གི་བདག་པོ་དང་གཙུག་ལག་ཁང་གི་ལྷ་རྣམས་ཀྱི་སླད་དུ་ཚིགས་སུ་བད་པ་རེ་རེ་ཀླག་ཏུ་གསོལ་ཞེས་སོ་ཞེས་བྱ་བ་སྨྲས་ཏེ། ཟླ་བའི་ངོའི་དབྱེ་བས་ཚེས་གྲངས་བརྗོད་པར་བྱ་ཞིང་ཚིགས་སུ་བཅད་པ་ཡང་གདོན་པར་བྱའོ། །གཙུག་ལག་ཁང་གི་བདག་པོས་སྤྱན་འདྲེན་པའི་ཚིག་ཀྱང་བརྗོད་པར་བྱའོ་ཞེས་བྱ་བ་ནི། གཙུག་ལག་ཁང་གི་བདག་པོས་དགེ་འདུན་བཤོས་ལ་སོགས་པ་ལ་སྤྱན་འདྲེན་བའི་ཚིག་ཀྱང་དགེ་སྐོས་ཀྱིས་དགོངས་ཀར་ཉིན་རེ་ལན་རེ་དགེ་འདུན་ལ་བརྗོད་པར་བྱ་བའོ། །ཇི་སྐད་དུ་ཞེ་ན་དེའི་ཕྱིར་ཡོན་བདག་མིད་འདི་ཞེས་བགྱི་བས་སད་དགེ་འདུན་བཤོས་ལ་སྤྱན་འདྲེན་ན་བཙུན་པ་རྣམས་ཀྱིས་དེ་ལ་དགེ་ལེགས་ཀྱི་ཡིད་དག་གིས་སོ་སོ་ནས་ཐུགས་བརྩེ་བར་མཛད་དུ་གསོལ་ཞེས་བྱ་བས་སོ། །ཉིན་ཞག་གཅིག་གིས་མི་ཆོག་པར་བྱའོ་ཞེས་བྱ་བ་ནི། ཟླ་བའི་ངོ་ལ་ཉིན་ཞག་གཅིག་གིས་ཞག་བཅོ་ལྔར་མི་ཆོག་པར་བྱ་བའོ། །གང་གི་ཚེ་ཞེ་ན་དེའི་ཕྱིར་དུས་ཚིགས་རྣམས་ཀྱི་ཟླ་བ་བྱེད་ལུས་བ་ཉིད་ལའོ་ཞེས་བྱ་བ་སྨྲས་ཏེ། དུས་ཚིག་དྲུག་པོ་དགུན་དང་དགུན་སྨད་དང་དཔྱིད་དང་སོས་ཀ་དང་དབྱར་དང་སྟོན་རྣམས་ལ་ཟླ་བ་གཉིས་གཉིས་ཡོད་དེ། སྟོན་ཟླ་ཐ་ཆུངས་ཉ་ནས་དགུན་ཟླ་འབྲིང་པོ་ཉའི་པར་གྱི་ཟླ་བ་གཉིས་ནི་དགུན་གྱི་དུས་ཚིགས་སོ། །དགུན་ཟླ་འབྲིང་པོ་ཉ་ནས་དཔྱིད་ཟླ་ར་བ་ཉའི་
བར་གྱི་ཟླ་བ་གཉིས་ནི་དགུན་སྨད་ཀྱི་དུས་ཚིགས་སོ། །དཔྱིད་ཟླར་བ་ཉ་ནས་དཔྱིད་ཟླ་ཐ་ཆུངས་ཉའི་བར་གྱི་ཟླ་བ་གཉིས་ནི་དཔྱིད་ཀྱི་དུས་ཚིགས་སོ། །དཔྱིད་ཟླ་ཐ་ཆུངས་ཉ་ནས་དབྱར་ཟླ་འབྲིང་པོ་ཉའི་བར་གྱི་ཟླ་བ་གཉིས་ནི་སོས་ཀའི་དུས་ཚིགས་སོ། །དབྱར་ཟླ་འབྲིང་པོ་ཉ་ནས་སྟོན་ཟླར་བ་ཉའི་བར་གྱི་ཟླ་བ་གཉིས་ནི་དབྱར་གྱི་དུས་ཚིགས་སོ། །སྟོན་ཟླར་བ་ཉ་ནས་སྟོན་ཟླ་ཐ་ཆུངས་ཉའི་བར་གྱི་ཟླ་བ་གཉིས་ནི་སྟོན་གྱི་དུས་ཚིགས་སོ། །དུས་ཚིགས་དྲུག་པོ་དེ་དག་རེ་རེ་ལ་ཟླ་བ་གཉིས་གཉིས་ཏེ་ཟླ་བ་ཕྱེད་བཞི་བཞི་ཡོད་པ་ལ། ཕྱེད་དང་པོ་གཉིས་དང་ཐ་མ་དང་གསུམ་ལ་ནི་ཞག་བཅོ་ལྔ་བཅོ་ལྔ་ཐུབ་པར་བརྩིའོ། །ཕྱེད་གསུམ་པ་ལ་ནི་ཞག་རེ་རེ་ཆད་ཅིང་བཅོ་ལྔ་མི་ཐུབ་པར་བཅུ་བཞི་ཐུབ་པར་བརྩི་སྟེ། དེ་དག་ནི་གསོ་སྦྱོང་བཅུ་བཞི་པ་ཡིན་པར་རིག་པར་བྱའོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། དབྱར་ཟླ་གསུམ་དང་དགུན་ཟླ་གསུམ་གྱི་ནི་ར་བ་དང་ཐ་ཆུངས། མར་གྱི་ངོས་བཅོ་ལྔ་མི་ཐུབ་པས་ར་བ་དང་ཐ་ཆུངས་གནམ་སྟོང་ནི་གསོ་སྦྱོང་བཅུ་བཞི་པ་ཡིན་ནོ། །སྟོན་ཟླ་གསུམ་དང་དཔྱིད་ཟླ་གསུམ་གྱི་ནི་འབྲིང་པོ་མར་གྱི་ངོས་བཅོ་ལྔ་མི་ཐུབ་པས། འབྲིང་པོ་གནམ་སྟོང་གསོ་སྦྱོང་བཅུ་བཞི་པ་ཡིན་ནོ། །ལྷག་མ་ཐམས་ཅད་ནི་གསོ་སྦྱོང་བཅོ་ལྔ་པ་ཡིན་ནོ། །ཟླ་བ་ཤོལ་དོར་བ་ནི་རྒྱལ་པོའི་རྗེས་སུ་འབྲང་བས་སོ་ཞེས་བྱ་བ་ནི། ཟླ་བ་ལྷག་པ་ཤོལ་དོར་བ་ནི་རྒྱལ་པོའི་རྗེས་སུ་འབྲང་བས་དོར་བར་བྱ་སྟེ། རྒྱལ་པོ་དང་མཐུན་པར་བྱའོ་ཞེས་བྱ་བའི་ཐ་ཚིག་གོ །རྒྱུ་སྐར་ནི་སྐར་མཁན་གྱི་རྗེས་སུ་འབྲང་བས་ཤེས་པར་བྱའོ་ཞེས་བྱ་བ་ནི། རྒྱུ་སྐར་ནི་སྐར་མཁན་གྱི་རྗེས་སུ་འབྲང་བས་ཤེས་པར་བྱ་སྟེ། དེ་དང་མཐུན་པར་བྱའོ་ཞེས་བྱ་བའི་ཐ་ཚིག་གོ །འདི་ལ་དགོས་པ་ནི་ཐ་སྙད་ལ་མཁས་པར་བྱའོ་ཞེས་བྱ་བ་ནི། ཆོས་གྲངས་བརྗོད་པར་བྱ་བ་ལ་སོགས་པ་འདི་ལ་དགོས་པ་ནི་འཇིག་རྟེན་པའི་ཐ་སྙད་ལ་མཁས་པར་བྱ་བ་དང༌། ཚེས་འདས་པ་སེམས་ལ་གཞག་པར་བྱ་བ་དང༌། གསོ་སྦྱོང་གི་ཉི་མ་ཡོངས་སུ་ཤེས་པར་བྱ་བ་ཡིན་ནོ། །མ་བརྟགས་ཤིང་གསོ་སྦྱོང་ལ་མ་བསྡད་པར་འདི་སྟོང་བ་ཞིག་གོ་སྙམ་ཞིང་མཚམས་གཅད་པར་མི་བྱའོ་ཞེས་བྱ་བ་ནི། དགེ་སློང་གློ་བུར་དུ་ལྷགས་པ་གནས་སྟོང་པར་ཞུགས་པ་དག་གིས་འདིར་མཚམས་བཅད་དམ། འོན་ཏེ་མ་བཅད་ཅེས་དེ་ལྟར་མ་བརྟགས་ཤིང་གསོ་སྦྱོང་གི་ཉིན་མོའི་བར་དུ་ཡང་མ་བསྡད་པར་གནས་འདི་སྟོང་པ་ཞིག་གོ་སྙམ་དུ་
བསམས་ཏེ་མཚམས་གཅད་པར་མི་བྱ་བ་སྟེ། བརྟགས་ཤིང་གསོ་སྦྱོང་གི་ཉི་མ་ལ་བབ་ཀྱི་བར་དུ་བསྡད་དེ་བྱའོ་ཞེས་བྱ་བའི་ཐ་ཚིག་གོ །བཅད་པ་ཉིད་དུ་ཤེས་པ་ཉིད་ནི་མི་འཆགས་པའི་ཡན་ལག་མ་ཡིན་ནོ་ཞེས་བྱ་བ་ནི། མཚམས་བཅད་པ་ཉིད་ལ་བཅད་པ་ཉིད་དུ་ཤེས་པ་ཉིད་ནི་མཚམས་གཞན་གཅད་པ་མི་འཆགས་པའི་ཡན་ལག་མ་ཡིན་ཏེ། མཚམས་སྔར་བཅད་ཟིན་པ་ཉིད་ཡིན་ན། དེ་བཅད་པ་ཉིད་དུ་ཤེས་ཀྱང་རུང་མི་ཤེས་ཀྱང་རུང་སྟེ། དེར་མཚམས་གཞན་གཅད་པ་མི་འཆགས་སོ། འདི་སྐད་བསྟན་ཏེ། སྔར་སྔ་མ་བག་ཡངས་སུ་མ་བྱས་པར་གཅད་པར་གཞན་མི་འཆགས་སོ། །ཞེས་གང་བསྟན་པ་དེ་ལ་ཤེས་པ་དེ་ཡན་ལག་མ་ཡིན་ཏེ། འདི་ལྟར་མཚམས་བཅད་ཟིན་པ་ཡོད་ན་ཤེས་ཀྱང་རུང་མི་ཤེས་ཀྱང་རུང་སྟེ་བཅད་པ་གཞན་མི་འཆགས་པ་ཁོ་ན་ཡིན་ནོ། །ཤེས་བཞིན་དུ་གཅད་ན་ནི་ཉེས་བྱས་སུ་འགྱུར་ལ། མི་ཤེས་པར་གཅད་ན་ནི་ལྟུང་བ་མེད་དེ། འདིར་བྱེ་བྲག་ནི་དེ་ཙམ་ཞིག་ཡོད་པར་ཟད་དོ། །དེ་མེད་པ་ཉིད་ཀྱིས་ཀྱང་བག་ཡངས་སུ་འགྱུར་རོ་ཞེས་བྱ་བ་ནི། སྔར་མཐུན་པའི་གསོ་སྦྱོང་གི་གནས་ཀྱི་སྐབས་སུ་མཚམས་དག་དགྲོལ་བར་བྱའོ་ཞེས་སྨོས་པ་དེ་ནི་ལས་ལ་ལྟོས་པ་ཡིན་གྱི། འདིར་ཀྱང་ཞེས་བྱ་བའི་སྒྲ་སྨོས་པས་ནི་མཚམས་དགྲོལ་བ་ལས་ལ་ལྟོས་པ་འབའ་ཞིག་ཏུ་ཡང་མ་ཟད་ཀྱི། འདི་ལྟར་དེ་མེད་པ་ཉིད་ཀྱིས་ཀྱང་རང་གྲོལ་བར་འགྱུར་རོ་ཞེས་སྟོན་ཏེ། དེ་ཞེས་བྱ་བའི་སོ་གྲས་ནི་མཚམས་དང་ལྡན་པར་གནས་པའི་དགེ་སློང་དང་དགེ་སློང་མ་རྣམས་བཟུང་སྟེ། མཚམས་དེ་གང་ཟག་དག་གི་ཡིན་པའི་གང་ཟག་དེ་དག་མཚམས་དེའི་ནང་ན་གཅིག་ཀྱང་མ་ལུས་ལ་མེད་པར་གྱུར་ན་དེ་དག་ནི་མེད་པ་ཉིད་ཀྱིས་མཚམས་དེ་ཡང་མཚམས་དང་ལྡན་པའི་གང་ཟག་དག་མེད་པ་བཞིན་དུ་རང་མེད་པར་འགྱུར་རོ་ཞེས་བྱ་བའི་ཐ་ཚིག་གོ །འདིར་ཡང་སྐྱ་རེངས་ཤར་བའི་དུས་ཉིད་ནི་མཚམས་དེ་བར་ཡངས་སུ་འགྱུར་བར་ཤེས་པར་བྱའོ། །དེ་མེད་པ་ཉིད་དུ་འགྱུར་བ་ནི་རྒྱུ་རྣམ་པ་ལྔ་སྟེ་དགེ་འདུན་ཐམས་ཅད་དོང་པ་དང༌། ཐམས་ཅད་མཚན་གྱུར་པ་དང༌། ཞིང་མ་ཡིན་པ་ཉིད་དུ་གྱུར་པ་དང༌། རྣམ་པར་འཁྲུལ་པར་གྱུར་པ་དང་ཤི་བས་སོ། །འོ་ན་དཀྱིལ་འཁོར་བ་ནི་མཚམས་ཀྱི་ཕྱི་རོལ་ཡིན་པས་དེ་མེད་པ་ཉིད་ཀྱིས་དུས་ཐམས་ཅད་དུ་བག་ཡངས་སུ་འགྱུར་བར་ཐལ་བར་མི་འགྱུར་རམ་ཞེ་ན། དེ་ལ་
ཉེས་པ་མེད་དེ་འདི་ལྟར་དཀྱིལ་འཁོར་བ་ནི་གནས་དང་འབྲེལ་པའི་ལས་ཀྱི་གནས་ཡིན་པའི་ཕྱིར་དེའི་གནས་རང་དབང་མེད་པ་ཡིན་པས་དེའི་ཕྱིར། གནས་དེ་མེད་པ་ཉིད་གང་ཡིན་པ་དེ་འདིའི་རེ་མེད་པ་ཉིད་ཡིན་པར་ཤེས་པར་བྱའོ། །གནས་ན་དགེ་སློང་དང་དགེ་སློང་མ་དེ་ཡོད་པ་ཉིད་ཡིན་ན། དཀྱིལ་འཁོར་པ་དག་ནི་དེ་མེད་དུ་ཟིན་ཀྱང་དེས་དེ་བག་ཡངས་སུ་མི་འགྱུར་རོ། །རུང་བའི་ཁང་པ་ཡང་ངོ་ཞེས་བྱ་བ་ཡང༌། དེ་མེད་པ་ཉིད་ཀྱིས་བག་ཡངས་སུ་འགྱུར་རོ། །ཡང་ངོ་ཞེས་བྱ་བའི་སྒྲས་ནི་ལས་ཀྱིས་ཀྱང་བག་ཡངས་སུ་འགྱུར་བར་སྟོན་ཏོ། །རུང་བའི་ཁང་པའི་རུང་བ་ཉིད་གང་ཡིན་པ་དེ་ཡང་དེ་མེད་པ་ཉིད་ཀྱིས་ཀྱང་བག་ཡངས་སུ་འགྱུར་རོ། །མཚམས་སུ་མཚམས་ཀྱིས་བསྐོར་དུ་མི་རུང་ངོ་ཞེས་བྱ་བ་ནི། མཚམས་གཞན་བཅད་ཟིན་པའི་ཐག་རུའི་ནང་དུ་མཚམས་གཞན་གྱིས་ཕྱོགས་འདྲེན་པར་བཅད་དུ་མི་རུང་བ་སྟེ། ལས་བྱས་སུ་ཟིན་ཀྱང་མ་བྱས་པ་ཉིད་ཡིན་ཏེ། གནས་གཞན་ནི་གནས་གཞན་གྱི་ཁོངས་སུ་གཏོགས་པ་མ་ཡིན་པའི་ཕྱིར་རོ། །དཀྱིལ་འཁོར་བ་དང་དགེ་སློང་མའི་དབྱར་ཁང་དག་དང་ཁྲོན་པ་དག་ལ་ནི་རུང་ངོ་ཞེས་བྱ་བ་ནི། དགེ་གསུམ་གྱི་ཡུལ་ལ་ཕྱིར་རོལ་མཚམས་གཅིག་གིས་བསྐོར་དུ་རུང་བའོ། །ལ་ཞེས་བྱ་བའི་སྒྲ་ནི་ཡུལ་དེ་ལ་ཞེས་བྱ་བར་སྦྱར་གྱི། དེའི་ཕྱིར་ཞེས་བྱ་བར་ནི་མི་སྦྱར་ཏེ། འདི་ལྟར་འདིར་དེའི་ཕྱིར་ཞེས་བྱ་བ་ཉིད་དུ་མི་རིགས་ཏེ། དཀྱིལ་འཁོར་བ་ལ་སོགས་པའི་ཕྱིར་ནི་མཚམས་གཞན་མཚམས་གཞན་གྱི་ཁོངས་སུ་མ་གཏོགས་པའི་ཕྱིར་རོ། །དཀྱིལ་འཁོར་བ་ལ་སོགས་པའི་ཡུལ་ལ་ནི་མཚམས་གང་ཡིན་པ་དེས་བསྐོར་དུ་རུང་སྟེ། དཀྱིལ་འཁོར་པ་ལ་སོགས་པའི་ཉེན་ཀོར་ནི་མཚམས་ཡིན་པའི་ཕྱིར་མཚམས་ཀྱི་ཁོངས་སུ་གཏོགས་སོ། །འདི་སྐད་བསྟན་ཏེ། དགེ་སློང་གི་གཙུག་ལག་ཁང་གི་ཉེན་ཀོར་ན་དཀྱིལ་འཁོར་བའི་མཚམས་དང༌། དགེ་སློང་མའི་དབྱར་ཁང་དང་ཁྲོན་པ་ཡོད་དུ་ཟིན་ཀྱང་དེའི་ཕྱི་རོལ་དུ་མཚམས་ཆེན་པོ་གཅད་དུ་རུང་ངོ༌། །ཤིང་ལྗོན་པ་གཅིག་ལ་མཚམས་གཞི་མན་ཆད་ཀྱི་མུ་ཐུག་དུ་མ་རྣམ་པར་གནས་སོ་ཞེས་བྱ་བ་ནི། ཤིང་ལྗོན་པ་གཅིག་ལ་ཕྱོགས་བཞིའི་མཚམས་བཞི་མན་ཆད་དུ་མའི་མུ་ཐུག་བྱར་རུང་ངོ་ཞེས་བྱ་བའི་ཐ་ཚིག་སྟེ། མཚམས་བཞི་ཆར་འདོམ་པ་ཡིན་ན་རུང་བར་ཁས་བླང་གི །ཐམས་ཅད་ལ་
ངེས་པ་ནི་མ་ཡིན་ཏེ། འདི་ལྟར་ཤིང་ལྗོན་པ་གཅིག་པུ་ཞིག་ཕྱོགས་ཕྱོགས་ཀྱི་མཚམས་འདོམ་པའི་དབུས་ན་འདུག་ན་ཤར་ཕྱོགས་པའི་ནུབ་ཕྱོགས་ཀྱི་མཚམས་ཀྱི་མུ་ཐུག་ཀྱང་དེ་ཡིན། ནུབ་ཕྱོགས་པའི་ཤར་ཕྱོགས་པའི་མུ་ཐུག་ཀྱང་དེ་ཡིན། ལྷོ་ཕྱོགས་པའི་བྱང་ཕྱོགས་ཀྱི་མུ་ཐུག་ཀྱང་དེ་ཡིན། བྱང་ཕྱོགས་བའི་ལྷོ་ཕྱོགས་ཀྱི་མུ་ཐུག་ཀྱང་དེ་ཡིན་པར་རྣམ་པར་གནས་པ་ལྟའོ། །འདི་ལ་ཐ་སྙད་དུ་རུང་བ་མཚན་མ་ཉིད་ཡིན་ནོ་ཞེས་བྱ་བ་ནི། མཚམས་འདི་ལ་འཇིག་རྟེན་གྱི་ཐ་སྙད་དུ་རུང་བ་ཤིང་ལྗོན་པ་ལས་སོགས་པ་མངོན་མཚན་དུ་རུང་བདག་མཚན་མ་ཉེད་ཡིན་གྱི་ཐ་སྙད་ལས་འདས་པ་མི་མ་ཡིན་པ་ལ་སོགས་པ་དག་ནི་བརྟན་པར་གནས་པ་ཉིད་ཡིན་དུ་ཟིན་ཀྱང་མཚན་མ་ཉིད་མ་ཡིན་ནོ། །རྡུ་འཕྲུལ་དང་སྒྱུ་མ་བྱས་པ་དག་ཀྱང་དེ་ལྟར་གྱུར་པ་ཉིད་མ་ཡིན་ནོ་ཞེས་བྱ་བ་ནི། རྫུ་འཕྲུལ་གྱིས་བྱས་པའི་མཚན་མ་དང་སྒྱུ་མས་བྱས་པའི་མཚན་མ་དག་ཀྱང་ཐ་སྙད་དུ་བྱ་བར་གྱུར་པའི་མཚན་མ་ཉིད་མ་ཡིན་ནོ། །ཟླ་བ་དང་ཉི་མ་དང་སྐར་མའི་འོད་དང་དབའ་ཀློང་གི་རླབས་དག་ཀྱང་མི་བརྟན་པ་ཉིད་ཡིན་ནོ་ཞེས་བྱ་བ་ནི། ཟླ་བ་དང༌། ཉི་མ་དང༌། སྐར་མ་དག་གི་འོད་གང་ཡིན་པ་དེ་དག་ཀྱང་མཚན་མ་ཉིད་མ་ཡིན་ཏེ་མི་བརྟན་པའི་ཕྱིར་རོ། །དེ་བཞིན་དུ་དཔའ་ཀློང་གི་རླབས་འགྲམ་དུ་བྱུང་བ་དག་ཀྱང་མཚན་མ་ཉིད་མ་ཡིན་ཏེ། མི་བརྟན་པ་ཉིད་ཀྱི་ཕྱིར་རོ། །མཚམས་སུ་ཆུ་ནི་མཚམས་གཞན་དང་འདྲའོ་ཞེས་བྱ་བ་ནི། མཚམས་ཀྱི་ནང་དུ་ཆུས་ཆོད་ན་མཚམས་གཞན་དང་འདྲ་བར་མཚམས་ཐ་དད་པ་ཉིད་ཡིན་ཏེ། ཆུ་ནི་གནས་མ་ཡིན་པའི་ཕྱིར་རོ། །མཚམས་བཅད་པའི་ནང་དུ་ཇི་སྲིད་དུ་ཆུས་ཆོད་པ་དེ་སྲིད་དུ་མཚམས་ཀྱི་ཡུལ་མ་ཡིན་ལ། ཆུ་ཆད་ན་ནི་སྔར་མཚམས་བཅད་པ་ཉིད་སྔ་མ་ཁོ་ན་བཞིན་དུ་མཚམས་ཉིད་དུ་རུང་བར་འགྱུར་རོ། །བར་དུ་ཆོད་ན་གཅིག་པ་ཉིད་མ་ཡིན་ནོ་ཞེས་བྱ་བ་ནི། མཚམས་གཅིག་པ་ཉིད་ཀྱི་ནང་དུ་ཆུ་ལ་སོགས་པས་བར་དུ་ཆོད་ན་གལ་ཏེ་ཕྱོགས་འགའ་ཡང་འབྲེལ་པ་མེད་ན་མཚམས་གཅིག་པ་ཉིད་མ་ཡིན་ཏེ། ངེས་ན་མི་མཐུན་པར་འགྱུར་པ་མེད་དོ། །ཕྱོགས་གཅིག་གིས་ཕྱོགས་མ་འབྲེལ་བའི་མཚམས་དུས་གཅིག་ཏུ་གཅད་དུ་མི་རུང་ངོ༌། །གལ་ཏེ་ཟམ་པ་བརྟན་པ་ཡིན་ན་ཡུལ་ཉིད་ཡིན་ནོ་ཞེས་བྱ་བ་ནི། །གལ་ཏེ་ཟམ་པ་ཆུས་མི་ཁྱེར་བ་བརྟན་པ་ཡོད་ན་དེས་འབྲེལ་པའི་ཕ་རོལ་གྱི་ཕྱོགས་གང་ཡིན་པ་དེ་
ཡང་མཚམས་བཅད་པའི་ནང་དུ་གཏོགས་ན་མཚམས་གཅིག་པའི་ཡུལ་ཉིད་ཡིན་པའོ། །འདིར་གཞུང་ནི་བཙུན་པ་ཆབ་ཀྱི་མཚམས་ལས་འདའ་བར་རུང་ངམ་ཉེ་བ་འཁོར་མི་རུང་ངོ༌། །གལ་ཏེ་ཟམ་པ་བརྟན་པོ་ཡོད་ན་ནུ་རུང་ངོ་ཞེས་གསུངས་པ་ཡིན་ནོ། །དེ་ཞིག་པ་ཡང་ཕྱིར་བྱས་ན་ནི་རྗེས་སུ་འཇུག་གོ་ཞེས་བྱ་བ་ནི། ཟམ་པ་དེ་ཞིག་པ་ཡང་ཕྱིར་བྱས་ན་ནི། མཚམས་ཀྱི་རྗེས་སུ་འཇུག་པ་སྟེ། ཆུས་ཆོད་པའི་ཕྱོགས་གཉི་ག་མཚམས་གཅིག་གི་ཁོངས་སུ་གཏོགས་པར་འགྱུར་རོ་ཞེས་བྱ་བའི་ཐ་ཚིག་གོ །ཇི་ལྟ་བུ་ཞིག་ཡང་ཕྱིར་བྱས་ན་ཞེ་ན་དེའི་ཕྱིར་སྦྱོར་བ་མ་བཏང་བ་ཉིད་དོ་ཞེས་བྱ་བ་སྨྲས་ཏེ། ཡང་ཕྱིར་བྱ་བ་གང་ལ་སྦྱོར་བ་བཏང་བ་མེད་པ་གང་ཡིན་པ་དེ་ནི་སྦྱོར་བ་མ་བཏང་བ་ཉིད་ཡིན་ཏེ། ཟམ་པ་ཞིག་ནས་ཡང་ཕྱིར་བྱ་བའི་སྦྱོར་པ་མ་བཏང་བ་ཉིད་གང་ཡིན་པ་དེ་ཡང་ཕྱིས་བྱས་ན། དེའི་ཚེ་མཚམས་ཉིད་རྗེས་སུ་འཇུག་གོ །དུས་ཇི་སྲིད་དུ་སྦྱོར་བམ་བཏང་བ་ཉིད་ཡང་ཕྱིར་བྱས་ན་རྗེས་སུ་འཇུག་ཅེ་ན། དེའི་ཕྱིར་ཞག་བདུན་ཕན་ཆད་ནི་མི་འཇུག་གོ་ཞེས་བྱ་བ་སྨྲས་ཏེ། ཞག་བདུན་ཚུན་ཆད་ཀྱི་བར་དུ་ཡང་ཕྱིར་བྱ་བའི་སྦྱོར་བ་མ་བཏང་བ་ཉིད་ལས་ཕྱིར་བྱས་ན་ནི་རྗེས་སུ་འཇུག་གི །ཞག་བདུན་དུ་སྦྱོར་བ་བཏང་ནས་ཕྱིས་ཡང་ཕྱིར་བྱས་ན་ཡང་རྗེས་སུ་འཇུག་པ་མེད་དེ། འདི་ལྟར་ཡུན་རིང་དུ་བཏང་བ་ཉིད་ཀྱི་ཕྱིར་རོ། །སྦྱོར་བ་གཏོད་བ་མ་བྱས་ན་ནི་ཞག་བདུན་ཕན་ཆད་དུ་ཕྱིར་བྱས་ན་ཡང་རྗེས་སུ་འཇུག་པར་འགྱུར་རོ། །ནམ་མཁའ་ནི་བར་དུ་ཆོད་པར་གྱུར་པ་ཡིན་པས་དེ་ལ་ཡོད་པ་ཉིད་ཀྱི་ཐ་སྙད་ཀྱང་མེད་ན་འབྲེལ་བ་ལྟ་ག་ལ་ཡོད་ཅེས་བྱ་བ་ལ། འདིར་ནམ་མཁའ་ཞེས་བྱ་བའི་སྒྲས་ནི་ནམ་མཁའི་ཁམས་བརྗོད་དེ། ནམ་མཁའ་ནི་བར་དུ་ཆད་པར་གྱུར་པ་ཐ་དད་པ་ཡིན་པས། ཆུ་བཞིན་དུ་མཚམས་གཞན་ཡིན་ཏེ། འདི་ལྟར་ནམ་མཁའ་དེ་ལ་ཡོད་པ་ཉིད་ཀྱི་ཐ་སྙད་ཀྱང་མེད་ན། ས་ལ་སོགས་པ་དང་ལྷན་ཅིག་འབྲེལ་བ་ལྷ་གལ་ལ་ཡོད། དེ་བས་ན་གནས་ཁང་གི་ནང་ན་འདུག་པའི་ནམ་མཁའ་ཡང་གནས་ཁང་དང་ལྷན་ཅིག་འབྲེལ་བ་མེད་དེ། མཚམས་གཅིག་པ་ཉིད་ཀྱང་མ་ཡིན་ནོ། །འདིར་གཞུང་ནི་བཙུན་མ་ནམ་མཁའ་ལ་མཆིས་པ་དག་དང༌། དོགས་ལ་མཆིས་པ་དག་ལྷན་ཅིག་ལས་བགྱིར་རུང་ངམ། ཉེ་བ་འཁོར་མི་རུང་ངོ༌། །བཙུན་པ་ནམ་མཁའ་ལ་མཆིས་
པ་དག་དང༌། ཤིང་ལྗོན་པ་ལ་མཆིས་པ་དག་ལྷན་ཅིག་ལས་བགྱིར་རུང་ངམ། ཉེ་བ་འཁོར་མི་རུང་ངོ་ཞེས་གསུངས་པ་ཡིན་ནོ། །དབུས་ནས་དཔག་ཚད་ཕྱེད་དང་གསུམ་གྱི་མཐའ་ལས་ལྷག་པར་མཚམས་བཅད་པ་མི་འཆགས་སོ་ཞེས་བྱ་བ་ནི། དབུས་ནས་བརྩམས་ཏེ་དཔག་ཚད་ཕྱེད་དང་གསུམ་གྱི་མཐའ་ཚུན་ཆད་དུ་མཚམས་བཅད་པ་འཆགས་ཀྱི། དེ་ཕན་ཆད་དེ་ལས་ལྷག་པར་མཚམས་གཅད་པ་མི་འཆགས་སོ། །འདིར་གཞུང་ནི་བཙུན་པ་མཚམས་ཆེན་པོའི་ཚད་ཇི་ཙམ་ལགས། ཉེ་བ་འཁོར་དཔག་ཚད་ཕྱེད་དང་གསུམ་མོ། །བཙུན་པ་དཔག་ཚད་ཕྱེད་དང་གསུམ་ཕན་ཆད་མཚམས་སུ་རུང་ངམ། ཉེ་བ་འཁོར་མི་རུང་ངོ་ཞེས་གསུངས་པ་ཡིན་ནོ། །འོག་དང་སྟེང་དུ་སྲ་བ་དང་འབྲེལ་པ་ལ་དེ་ཚུན་ཆད་གཞི་དང་འདྲ་བ་ཉིད་དོ་ཞེས་བྱ་བ་ནི། མཚམས་ཀྱི་འོག་དང་སྟེང་གི་ཕྱོགས་སུ་ས་དང་རྡོ་དང་རྩིག་པ་དང༌། ཤིང་ལྗོན་པ་དང་ཤིང་ལ་སོགས་པའི་རྫས་སྲ་བ་དང་འབྲེལ་པ་ལ་ནི་དཔག་ཚད་ཕྱེད་དང་གསུམ་གྱི་མཐའ་ཡན་ཆད་དང་མན་ཆད་ས་གཞི་དང་འདྲ་བ་ཉིད་དུ་མཚམས་ཀྱི་ཁོངས་སུ་གཏོགས་པ་ཉིད་ཡིན་ནོ། །འདི་སྐད་བསྟན་ཏེ་མཚམས་ཀྱི་མཐའ་དཔག་ཚད་ཕྱེད་དང་གསུམ་དུ་བསྟན་པ་དེ་ལ་ཕྱོགས་བཞིར་ཐད་ཀར་ས་གཞི་དང་འབྲེལ་པའི་རྫས་ཆུ་མ་གཏོགས་པ་རྩ་དང་ཤིང་ལྗོན་པ་དང་རྩིག་པ་དང་ཤིང་ལ་སོགས་པ་སྲ་བ་དཔག་ཚད་ཕྱེད་དང་གསུམ་ཚུན་ཆད་མཚམས་ཀྱི་ཁོངས་སུ་གཏོགས་པར་མ་ཟད་ཀྱི། སྟེང་དང་འོག་གི་ཕྱོགས་སུ་དེ་དང་འདྲ་སྟེ། དེའི་ཕྱིར་འོག་གི་ཕྱོགས་སུ་ཡང་སྲ་བ་དང་འབྲེལ་པའི་ཕྱོགས་དང༌། སྟེང་གི་ཕྱོགས་སུ་ཡང་རིའི་རྩེ་མོ་ལ་སོགས་པ་སྲ་བ་དང་འབྲེལ་པ་ཆུ་དང་ནམ་མཁས་པར་དུ་མཆོད་པ་དཔག་ཚད་ཕྱེད་དང་གསུམ་ཡན་ཆད་དང་མན་ཆད་མཚམས་ཀྱི་ཁོངས་སུ་གཏོགས་པ་ཡིན་པས། དེའི་ནང་དུ་དགེ་སློང་གཞན་འདུག་པར་ཤེས་བཞིན་དུ་འདུན་པ་ལ་སོགས་པ་མ་བླངས་པར་ལས་བྱེད་ན་མི་མཐུན་པ་ཉིད་དུ་འགྱུར་རོ། །བསྟེན་པར་མ་རྫོགས་པ་འདུག་ན་ནི་ལས་བརྗོད་པ་དེ་དག་གིས་མི་ཐོས་པར་བྱ་བར་ཟད་ཀྱི། དེ་དག་ལས་མི་མཐུན་པའི་ཉེས་པར་འགྱུར་བ་ནི་མེད་དོ། །བླ་འོག་གི་ཚད་ཇི་སྐད་བསྟན་པ་དེ་ནི་མཚམས་ཆེན་པོའི་དབང་དུ་བྱས་ཏེ་རྣམ་པར་གཞག་པ་ཡིན་གྱི་མཚམས་ཆུང་དུ་གཞན་ལ་ནི་དབུས་ནས་ཕྱོགས་བཞིར་ཐ་གྲུའི་རྒྱ་ཇི་ཙམ་ཡོད་པ་བླ་འོག་ཏུ་ཡང་དེ་ཙམ་མན་ཆད་དང་
ཡན་ཆད་ས་གཞི་དང་འདྲ་བ་མཚམས་ཀྱི་ཁོངས་སུ་གཏོགས་པ་ཉིད་ཡིན་ནོ། །དེ་ལྟར་གྱུར་ན་དཀྱིལ་འཁོར་པ་ལ་ནི་དབུས་ནས་ཕྱོགས་བཞིར་ས་གཞི་དང་འབྲེལ་པའི་ཚད་ཇི་ཙམ་ཡོད་པ་དེ་ཙམ་ཡན་ཆད་དང་མན་ཆད་དང་རྫས་སྲ་བ་དང་འབྲེལ་བ་མཚམས་དེའི་ཁོངས་སུ་གཏོགས་པ་ཡིན་གྱི། དེ་ལས་ལྷག་པ་ནི་རྫས་སྲ་བ་དང་འབྲེལ་པ་ཡོད་དུ་ཟིན་ཀྱང་མཚམས་དེའི་ཁོངས་སུ་མ་གཏོགས་སོ། །ས་གཞི་མཚམས་མ་བཅད་པ་དེ་ཉིད་དུ་ནི་མི་འབྲལ་བའི་གནང་བ་མི་འཆགས་སོ་ཞེས་བྱ་བ་ནི། ས་གཞི་གང་དུ་མཚམས་མ་བཅད་པ་ཉིད་ཀྱིས་ས་གཞི་དེ་ནི་ཆོས་གོས་དང་མི་འབྲལ་བའི་གནང་བ་མི་འཆགས་སོ། མི་འབྲལ་བའི་གནང་བའི་ཡུལ་ནི་ལས་གདགས་པས་རྣམ་པར་གཞག་པའི་གནས་ཡིན་གྱི། ངོ་བོ་ཉིད་ལས་བྱུང་བ་ནི་མ་ཡིན་ནོ། །འདིར་གཞུང་ནི་བཙུན་པ་རེ་ཞིག་གྲོང་དང་ལྷན་ཅིག་གཙུག་ལག་ཁང་དང་འབྲེལ་བའི་མཚམས་མཆིས་ན་གང་ཚུན་ཆད་དུ་ཆོས་གོས་དག་དང་མི་འབྲལ་བར་འཚལ་བར་བགྱི། གྲོང་གི་ཉེན་ཀོར་མ་གཏོགས་པ་ཚུན་ཆད་དུའོ་ཞེས་གསུངས་པ་ཡིན་ནོ། །གྲོང་གི་ཉེན་ཀོར་མ་གཏོགས་པ་ཞེས་གསུངས་པའི་ཚིག་དེ་ཉིད་ཀྱིས་གང་ན་མཚམས་གཅད་པ་མེད་པར་དེར་མི་འབྲལ་པའི་གནང་བ་མེད་པ་དེ་བསྟན་པ་ཡིན་ཏེ། མཚམས་མ་བཅད་པའི་ཕྱོགས་ནི་མཚམས་ཀྱི་ཕྱི་རོལ་ཡིན་པས། མཚམས་ཀྱི་ཕྱི་རོལ་དུ་ནི་འབྲལ་བར་འགྱུར་བའི་ཕྱིར་རོ། །བཅད་པ་ཞིག་ན་ཞིག་གོ་ཞེས་བྱ་བ་ནི། མཚམས་བཅད་པ་ལས་ཀྱིས་བཀྲོལ་བས་སམ། དེ་མི་གནས་པ་ཉིད་ཀྱིས་ཞིག་ན་ཆོས་གོས་དང་མི་འབྲལ་བའི་གནང་བ་ཐོབ་པ་ཡང་ཞིག་གོ་ཞེས་བྱ་བའི་ཐ་ཚིག་གོ །དེས་ནི་ངེ་མི་ཞིག་གོ་ཞེས་བྱ་བ་ནི། མི་འབྲལ་བའི་གནང་བ་ཞིག་པ་དེས་ནི་མཚམས་བཅད་པ་དེ་མི་ཞིག་པ་སྟེ། མཚམས་གཅད་པ་ནི་གནས་ཡིན་ལ་མི་འབྲལ་བའི་གནང་བ་ཐོབ་པ་ནི་གནས་པ་ཡིན་པས། གནས་ཞིག་ན་ནི་གནས་པ་ཡང་འཇིག་པར་རིགས་ཀྱི་གནས་པ་ཞིག་པས་ནི་གནས་འཇིག་པར་མི་རིགས་པའི་ཕྱིར་རོ། །མཆོད་རྟེན་དང་གཙང་ཁང་ཕྱུར་བུ་དང་འཁོར་ས་དང་གསོ་སྦྱོང་གི་གནས་དག་ཏུ་ཕྱག་དར་བྱ་བ་ཉིད་དོ་ཞེས་བྱ་བ་ལ། འདིར་གཞུང་ནི་མ་མོ་ལས་དེར་གསོ་སྦྱོང་བཅོ་ལྔ་པ་དེ་ཉིད་ཀྱི་ཚེ་ནང་བར་སྔར་ལངས་ཏེ་མཆོད་རྟེན་དང་གཙང་ཁང་ཕྱུར་བུར་ཕྱག་དར་བྱའོ། །འཁོར་ས་དང་གསོ་སྦྱོང་གི་
གནས་སུ་ཕྱག་དར་བྱའོ་ཞེས་གསུངས་པ་ཡིན་ནོ། །འདིར་ཕྱག་དར་བྱ་བ་ནི་གནས་ཁང་ངམ་ཁྱམས་སམ་རྫིང་བུའི་ཚད་ཙམ་ཞིག་ཕྱག་ན་ཕྱག་དར་བྱས་པ་ཉིད་ཡིན་ནོ། །དགེ་འདུན་ལ་འདུན་པ་ལ་སོགས་པ་ཕུལ་བ་ཉིད་ནི་ཕུལ་བ་ཉིད་ཡིན་ནོ་ཞེས་བྱ་བ་ནི། དགེ་སློང་ན་བ་ལ་སོགས་པས་དགེ་འདུན་ལ་འདུན་པ་ལ་སོགས་པ་ཕུལ་བ་ཉིད་ནི་ཕུལ་བའི་གྲངས་སུ་ཆུད་པ་ཉིད་ཡིན་པའོ། །འདིར་གཞུང་ནི། བཙུན་པ་རེ་ཞིག་དགེ་སློང་གིས་དགེ་འདུན་ཐམས་ཅད་འདུས་ཤིང་ཚོགས་པ་ལ་འདུན་པ་དང་ཡོངས་སུ་དག་པ་འབུལ་ན། འདུན་པ་དང་ཡོངས་སུ་དག་པ་ཕུལ་ཞེས་བགྱི་འམ་ཉེ་བ་འཁོར་ཕུལ་བ་ཞེས་གསུངས་པ་ཡིན་ནོ། །དེ་ལས་གང་ཡང་རུང་བས་དེ་བརྗོད་པར་བྱ་བ་ཉིད་ཡིན་ནོ་ཞེས་བྱ་བ་ནི། འདུན་པ་ལ་སོགས་པ་འབུལ་ཐར་བྱེད་པ་དེ་ཉིད་ཀྱིས་དགེ་འདུན་ལ་འདུན་པ་ལ་སོགས་པ་མངོན་སུམ་དུ་ཕུལ་ཟིན་མོད་ཀྱི། འོན་ཀྱང་དགེ་འདུན་དེ་ལས་གང་ཟག་གང་ཡང་རུང་བས་དེའི་འདུན་པ་ལ་སོགས་པ་དེ་དགེ་འདུན་ལ་བརྗོད་པར་བྱ་བ་ཉིད་ཡིན་ཏེ། བསྟན་པ་རྣམ་པར་གཞག་པ་རྗེས་སུ་བསྲུང་བའི་ཕྱིར་རོ། །ལས་ཐམས་ཅད་ལ་ཡང་མ་ལྷགས་པ་རྣམས་ཀྱིས་འདུན་པ་ལ་སོགས་པ་བརྗོད་པར་བྱ་སྟེ། ཟིན་ན་ཡང་བྱའོ།། །།བམ་པོ་བཞི་བཅུ་བརྒྱད་པ། མཚམས་ཀྱི་ཕྱི་རོལ་ན་གནས་པས་དེ་འབུལ་བ་དང་དབུལ་ཏུ་གཞུག་པར་མི་བྱའོ་ཞེས་བྱ་བ་ནི། མཚམས་ཀྱི་ཕྱི་རོལ་ན་འདུག་པའི་གང་ཟག་གིས་འདུན་པ་ལ་སོགས་པ་དེ་དགེ་འདུན་ལ་དབུལ་བར་མི་བྱ་ཞིང་ལེན་པར་བྱེད་པས་ཀྱང་དེ་དབུལ་དུ་གཞུག་པར་མི་བྱ་བའོ། །འདི་ནི་མི་འཆགས་པ་མི་བྱའོ་ཞེས་གསུངས་པའི་སྤྲོས་པ་ཡིན་ཏེ། འདི་ལྟར་མཚམས་གཞན་ན་གནས་པ་ནི་གང་ལ་ཡང་ཡན་ལག་ཉིད་མ་ཡིན་ནོ་ཞེས་གསུངས་པ་དེས་འདིར་མི་འཆགས་པར་བྱས་པ་ཉིད་ཡིན་ནོ། །བརྒྱུད་པས་མི་བྱའོ་ཞེས་བྱ་བ་ནི། དབུལ་བ་དང་དབུལ་དུ་གཞུག་པར་ཞེས་བྱ་བར་སྦྱར་རོ། །ལེན་པར་བྱེད་པས་གཞན་ལ་ཕུལ་ལ་ངེས་ཀྱང་གཞན་ཞིག་ལ་ཕུལ་པ་ནི་བརྒྱུད་པ་ཡིན་ཏེ། དེ་ཡང་སྤྲིང་ཡིག་ལ་སོགས་པ་དག་གི་དཔེ་ཡིན་ནོ། །ན་བ་དང་དབང་མེད་པ་དང་སྲོག་དང་ཚངས་པར་སྤྱོད་པའི་བར་ཆད་ཀྱིས་འཇིགས་པ་ལས་གཞན་པས་འབུལ་བ་ནི་ཉེས་བྱས་སོ་ཞེས་བྱ་བ་ནི། ན་བ་ལས་གཞན་པ་དང༌། དབང་མེད་པ་ལས་གཞན་པ་དང༌། སྲོག་གི་བར་ཆད་ཀྱིས་འཇིགས་པ་ལས་གཞན་
པ་དང༌། ཚངས་པར་སྤྱོད་པའི་བར་ཆད་ཀྱིས་འཇིགས་པ་ལས་གཞན་པའི་གང་ཟག་གིས་བདག་ཉིད་དགེ་འདུན་ཚོགས་པའི་ནང་དུ་མི་འདུ་བར་འདུན་པ་ལ་སོགས་པ་འབུལ་བ་ལ་ནི་ཉེས་བྱས་སུ་འགྱུར་ཏེ། དབུལ་བ་མི་འཆགས་པ་ནི་མ་ཡིན་ནོ། །འདིར་དབང་མེད་པས་ཞེས་སྨོས་པས་ནི་ཐ་ན་མཛའ་བཤེས་ཀྱི་དབང་གིས་བཟུང་བ་ཡན་ཆད་བསྡུའོ། །བར་ཆད་བྱེད་ཅེས་སྨོས་པས་ནི་རྒྱལ་པོ་དང་ཆོམ་རྐུན་པས་གནོད་པ་ལ་སོགས་པ་དག་བསྡུའོ། །འདིར་ཚངས་པར་སྤྱོད་པའི་བར་ཆད་ཅེས་བྱ་བ་ནི། དགེ་སློང་གི་དངོས་པོ་ལས་ཉམས་པར་འགྱུར་བ་འབའ་ཞིག་ཏུ་མ་ཟད་ཀྱི་འདི་ལྟར་ལས་ཉམས་སུ་མྱོང་བ་ཙམ་གྱི་དབང་གིས་དགེ་བའི་ཕྱོགས་ཀྱི་བར་ཆད་གང་འབྱུང་བར་འགྱུར་བ་དེ་ཡང་འདིར་ཚངས་པར་སྤྱོད་པའི་བར་ཆད་ཡིན་པར་རིག་པར་བྱ་སྟེ། དེ་ཙམ་གྱི་ཚངས་པར་སྤྱོད་པའི་ཚོགས་ལ་གནོད་པར་འགྱུར་བའི་ཕྱིར་རོ། །དེ་ལྟ་བས་ན་དགེ་བའི་ཕྱོགས་ཀྱི་བར་ཆད་ཙམ་གྱི་དབང་གིས་ཀྱང་འདིར་འདུན་པ་ལ་སོགས་པ་དབུལ་བ་ཉིད་དུ་བསྟན་པ་ཡིན་ནོ། །མ་བརྗོད་ན་ནི་མ་གུས་པ་ལས་སོ་ཞེས་བྱ་བ་ནི། ལེན་པར་བྱེད་པས་འདུན་པ་ལ་སོགས་པ་བླངས་པ་དགེ་འདུན་ལ་མ་བརྗོད་ན་ནི་མ་གུས་པའི་ལྟུང་བྱེད་ཀྱི་རྗེས་སུ་མཐུན་བ་ལས་ཉེས་བྱས་སུ་འགྱུར་པའོ། །དེས་འཇིགས་པས་མཚམས་ཀྱི་ཕྱི་རོལ་ནས་ཁྱེར་ཏེ་འོངས་པ་ལ་ནི་ཉེས་པ་མེད་དོ་ཞེས་བྱ་བ་ནི། འདུན་པ་ལ་སོགས་པ་ལེན་བར་བྱེད་པ་དེས་མཚམས་ཀྱི་ནང་ནས་འདུན་པ་ལ་སོགས་པ་བླངས་ནས། ཚངས་བར་སྤྱོད་པའི་བར་ཆད་ཀྱིས་འཇིགས་པ་དེས་མཚམས་ཀྱི་ཕྱི་རོལ་ནས་ཀྱོགས་ཏེ་འདུན་པ་ལ་སོགས་ཏེ་དེ་དག་དགེ་འདུན་གྱི་ནང་དུ་ཁྱེར་ཏེ་འོངས་པ་ལ་ནི་ཉེས་པ་མེད་དོ། །དགེ་སྐོས་ཀྱིས་གསོ་སྦྱོང་གི་ཚེ་ཚུལ་ཤིང་བྲིམ་པས་དགེ་སློང་རྣམས་བགྲང་བར་བྱའོ་ཞེས་བྱ་བ་ནི། དགེ་སྐོས་ཀྱིས་གསོ་སྦྱོང་གི་ཉིན་མོ་ཚུལ་ཤིང་བྲིམ་པས་དགེ་སློང་རྣམས་བ་གྲང་པར་བྱ་སྟེ། འོངས་པ་དང་མ་འོངས་པ་ཡོངས་སུ་ཤེས་པར་བྱ་བའི་ཕྱིར་རོ། །ལེགས་པར་ཐོན་པས་གདོན་ཏེ་ཚིག་ཕྱེད་ཀྱང་མ་འཁྲུལ་བ་ཉིད་ནའོ་ཞེས་བྱ་བ་ནི། སོ་སོར་ཐར་པའི་མདོ་ཁ་ཏོན་དུ་ལེགས་པར་ཐོན་པས་གསོ་སྦྱོང་གདོན་པར་བྱ་སྟེ། ཇི་ལྟར་ན་ལེགས་པར་ཐོན་པ་ཉིད་ཡིན་ཞེ་ན། ཚིག་ཕྱེད་ཀྱང་མ་འཁྲུལ་བ་ཉིད་ན་སྟེ། གང་ཚིག་ཕྱེད་ཀྱང་མི་འཁྲུལ་བདེ་ནི་ལེགས་པར་ཐོན་པ་ཉིད་ཡིན་
ཏེ་དེས་གདོན་པར་བྱའོ་ཞེས་བྱ་བའི་ཐ་ཚིག་གོ །འདིར་གསོ་སྦྱོང་ཞེས་བྱ་བའི་སྒྲ་ནི་སོ་སོར་ཐར་པའི་མདོ་ལ་བྱ་སྟེ། ཇི་ལྟར་སོ་སོར་ཐར་པའི་མདོ་འདོན་པས་གསོ་སྦྱོང་འགྲུབ་པར་འགྱུར་གྱིས་གསོ་སྦྱོང་ནི་གདོན་བར་བྱ་བ་མ་ཡིན་པས་དེའི་ཕྱིར་སོ་སོར་ཐར་པའི་མདོ་བཏོན་ན་གསོ་སྦྱོང་བཏོན་པ་ཉིད་དུ་འགྱུར་རོ། །དེ་ལྟར་ན་ཚིག་ཕྱེད་ཀྱང་མི་འཁྲུལ་བ་ཉིད་ཡིན་ན་ལེགས་པར་ཐོན་པ་ཉིད་ཡིན་པས་དེས་སོ་སོར་ཐར་པའི་མདོ་གདོན་པར་བྱའི། གཞན་དུ་ན་མ་ཡིན་ཏེ། གཞན་དུ་ནི་ཉེས་བྱས་སུ་འགྱུར་རོ། །གདོན་པ་དེ་སུའི་ལས་ཡིན་ཞེ་ན། དེའི་ཕྱིར་དགེ་འདུན་གྱི་གནས་བརྟན་གྱིའོ་ཞེས་བྱ་བ་སྨྲས་ཏེ། སོ་སོར་ཐར་པའི་མདོ་གདོན་པ་ནི་དགེ་འདུན་གྱི་གནས་བརྟན་གྱི་ལས་ཡིན་ནོ། །མི་ནུས་པ་ཉིད་ཡིན་ན་གཉིས་པའིའོ་ཞེས་བྱ་བ་ནི། གལ་ཏེ་དགེ་འདུན་གྱི་གནས་བརྟན་གྱིས་འདོན་པའི་ལས་མི་ནུས་པ་ཉིད་ཡིན་ན། དེའི་ཚེ་གདོན་པ་དེ་གནས་བརྟན་གཉིས་པའི་ལས་ཡིན་པའོ། དེས་ཀྱང་ན་གསུམ་པའི་འོ་ཞེས་བྱ་བ་ནི། གཉིས་པ་དེས་ཀྱང་མི་ནུས་པ་ཉིད་ཡིན་ན། གདོན་པ་དེ་གནས་བརྟན་གསུམ་པའི་ལས་ཡིན་པའོ། །དེས་ཀྱང་ན་རེས་ཀྱིས་སོ་ཞེས་བྱ་བ་ནི། གནས་བརྟན་གསུམ་པ་དེས་ཀྱང་མི་ནུས་པ་ཉིད་ཡིན་ན་དགེ་འདུན་ཐམས་ཅད་ཀྱིས་རེས་ཀྱིས་གདོན་པར་བྱ་བའོ། །མི་ནུས་ན་གཞན་ལ་བཅོལ་བར་བྱའོ་ཞེས་བྱ་བ་ནི། རེས་བབ་པའི་ཚེ་འདོན་མི་ནུས་ན་གདོན་གཞན་ལ་བཅོལ་བར་བྱ་བའོ། །མ་བཏུབ་ན་དགེ་འདུན་གྱིས་སོ་ཞེས་བྱ་བ་ནི་གང་ཟག་གིས་བཅོལ་ཏེ་མ་བཏུབ་ན་དེ་ལ་དགེ་འདུན་གྱིས་བཅོལ་བར་བྱ་བའོ། །རྟག་ཏུ་ཡང་ངོ་ཞེས་བྱ་བ་ནི། དེས་རྟག་ཏུ་གདོན་པར་ཡང་དགེ་འདུན་གྱིས་བཅོལ་བར་བྱ་བའོ། །རྡུགས་ན་ལྷག་མ་གཞན་གྱིས་སོ་ཞེས་བྱ་བ་ནི། བར་དུ་བརྗེད་པ་ལ་སོགས་པས་གདོན་པ་རྡུགས་ཤིང་རྒྱུན་ཆད་མ་ལྷག་པ་དགེ་སློང་གཞན་གྱིས་གདོན་པར་བྱ་བའོ། །དུམ་བུ་འཛིན་པ་ཉིད་ཡིན་ན་ཇི་སྙེད་ཀྱིས་འགྲུབ་པ་བདག་གིས་སོ་ཞེས་བྱ་བ་ནི། གལ་ཏེ་དགེ་སློང་རྣམས་ཀྱིས་སོ་སོར་ཐར་པའི་མདོ་འདོན་པ་རྣམས་པ་ལྔ་པོ་ངག་ལས་དུམ་བུ་རེ་རེ་འཛིན་ཅིང་ཐོན་པ་ཡིན་ན། འདོན་པར་བྱེད་པ་ཇི་སྙེད་ཀྱིས་གདོན་པ་གྲུབ་པར་འགྱུར་བའི་དགེ་སློང་དེ་སྙེད་ཀྱིས་རྗེས་སུ་བསྒྲུབ་པར་བྱའོ་ཞེས་བྱ་བའི་ཐ་ཚིག་གོ །འཇིགས་པ་དང་བཅས་པ་ཉིད་ཡིན་ན་གནས་ན་མཛེས་པ་འདོད་པས་གྲོང་དང་མི་ཉེ་བར་གསོ་སྦྱོང་བྱར་མི་
རུང་ངོ་ཞེས་བྱ་བ་ནི། ཆོམ་རྐུན་པ་ལ་སོགས་པའི་འཚེ་བས་ས་ཕྱོགས་འཇིགས་པ་དང་བཅས་པ་ཉིད་ཡིན་ན། ལམ་ཀ་ན་ནེ་ལུག་སིང་ལ་སོགས་པ་གནས་མཛེས་པ་ཡོད་པ་ལ་སྲེད་ཅིང་འདོད་པས་གྲོང་དང་ཐག་རིང་པོའི་གནས་དེར་གསོ་སྦྱོང་བྱར་མི་རུང་མི་རིགས་ཚུལ་མ་ཡིན་ནོ། །འདིར་གསོ་སྦྱོང་ཞེས་སྨོས་པ་ནི་དཔེ་ཙམ་དུ་ཟད་དེ། ལས་ཀྱི་སྦྱོར་བ་གཞན་དག་ལ་ཡང་དེ་བཞིན་ནོ། །འདྲོན་པ་མི་སྡོད་ན་འགྲོ་བཞིན་དུ་བྱའོ་ཞེས་བྱ་བ་ནི། ལམ་དུ་ལམ་གྲོགས་འདྲོན་པ་དག་སྡོད་དུ་མི་བཏུབ་ན་དགེ་སློང་རྣམས་ཀྱིས་འགྲོ་བཞིན་དུ་གསོ་སྦྱོང་བྱ་སྟེ། རྣམ་པ་གཞན་མ་གྲུབ་ན་འགྲོ་བཞིན་དུ་གསོ་སྦྱོང་བྱ་པ་ལ་མི་རིགས་པར་དོགས་པར་མི་བྱའོ། །འདིར་གཞུང་ནི་དགེ་སློང་དགའ་དྲོན་པ་དང་ལྷན་ཅིག་ལྗོངས་རྒྱུར་འཕགས་པ་ན་དེ་དག་གིས་ས་ཕྱོགས་ནེའུ་གསིང་ཅན་མཐོང་ནས་དེ་དག་དེར་གསོ་སྦྱོང་བྱེད་པར་བརྩམས་པ་ན་འདྲོན་པོ་དག་ཐལ་ནས་དེ་དག་ཕྱི་བཞིན་འདོད་བ་ན་ཆོམ་རྐུན་པ་དག་གིས་བཅོམ་པ་ནས། བཅོམ་ལྡན་འདས་ཀྱིས་བཀའ་སྩལ་པ། ནེའུ་གསིང་འདོད་བས་གསོ་སྦྱོང་མི་བྱ་བར་གྲོང་དང་ཉེ་བར་གསོ་སྦྱོང་བྱའོ་ཞེས་བྱ་བའི་བར་དུ་གསུངས་པ་དང༌། དགེ་སློང་དག་ཚོང་པ་འདྲོན་པ་དང་ལྷན་ཅིག་ལམ་དུ་འཕགས་ཏེ་ཞུགས་པ་ན། དགེ་སློང་རྣམས་ཀྱིས་ཚོང་པ་དག་ལ་སྨྲས་པ། བཞིན་བཟང་དག་ཁོ་བོ་ཅག་གསོ་སྦྱོང་བྱེད་ཀྱི་བར་དུ་ཡུད་ཙམ་ཞིག་སྡོད་ཅིག །དེ་དག་གིས་སྨྲས་པ། འཕགས་པ་དག་ཕྱོགས་འདི་ན་ཆོམ་རྐུན་པའི་འཇིགས་པ་མཆིས་ཀྱི་ཚུར་སྤྱོན་ཅིག་དང་ཕྱོགས་གཞན་དུ་བསྡད་པར་བགྱིའོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། འགྲོ་བཞིན་དུ་གསོ་སྦྱོང་བྱའོ་ཞེས་བྱ་པའི་བར་དུ་གསུངས་པ་ཡིན་ནོ། །སྒྲ་མི་འདོད་ན་མདོར་བསྡུ་བས་སོ་ཞེས་བྱ་བ་ནི། འདྲོན་པ་གང་དག་ལམ་དུ་ཞུགས་པ་དེ་དག་འཇིགས་ཡུལ་དུ་སྒྲ་མི་འདོད་ན་དགེ་སློང་རྣམས་ཀྱི་ས་འགྲོ་བཞིན་དུ་མདོར་བསྡུ་བས་གསོ་སྦྱོང་བྱ་བའོ། །དེ་ཙམ་ཡང་ན་བྱིན་གྱིས་བརླབ་པོ་ཞེས་བྱ་བ་ནི། མདོར་བསྡུ་བས་གསོ་སྦྱོང་བྱ་བ་ལ་སྒྲ་ཇི་ཙམ་འབྱུང་བར་འགྱུར་བའི་སྒྲ་དེ་ཙམ་ཡང་འདོན་བདག་མི་འདོད་ན། དེའི་ཚེ་དགེ་སློང་རྣམས་ཀྱིས་སོ་སོ་ནས་གསོ་སྦྱོང་བྱིན་གྱིས་བརླབ་པར་བྱ་སྟེ། འདི་ལྟར་དགེ་སློང་གཞན་དང་ལྷན་ཅིག་ཉིད་དུ་གསོ་སྦྱོང་བྱེད་པ་ལ་སྒྲ་ལས་གྲོལ་པ་མེད་པས་དེའི་ཕྱིར་
སོ་སོ་ནས་ཡིད་ཀྱིས་བྱིན་གྱིས་བརླབ་པར་བྱ་བའོ། །དད་པ་ཅན་དང་གཙོ་བོ་དག་དགའ་བར་འགྱུར་བ་ལྟན་ཆོ་ག་རྗེས་སུ་བསྒྲགས་པ་ལ་ཁ་ན་མ་ཐོ་བ་མེད་དོ་ཞེས་བྱ་བ་ནི། དགེ་སློང་གིས་དགེ་སློང་གི་བྱ་བ་ཆོག་དག་གཞན་ལ་རྗེས་སུ་བསྒྲགས་པ་ལ་ཁ་ན་མ་ཐོ་བ་མེད་པའོ། །སུ་ལ་ཞེན་དད་པ་ཅན་དང་གཙོ་བོ་དག་ལ་སྟེ་ཁྱིམ་བདག་དང་རྒྱལ་པོ་ལ་སོགས་པ་དག་ལའོ། །གང་གི་ཚེ་ཞེ་ན་དགའ་བར་འགྱུར་ན་སྟེ་དེའི་ཚེ་ཆོ་ག་ཞེས་བྱ་བ་ནི། དགེ་སློང་གི་བྱ་བ་དང༌། བྱ་བ་མ་ཡིན་པ་དག་དེ་དག་ལ་རྗེས་སུ་བསྒྲགས་པ་ལ་ཁ་ན་མ་ཐོ་པ་མེད་དོ། །དྲུང་དུ་གསོ་སྦྱོང་བྱེད་པ་ལ་ཡང་ངོ་ཞེས་བྱ་བ་ནི། དད་པ་ཅན་དང་གཙོ་པོ་དག་དགའ་བར་འགྱུར་བ་ལྟ་ན་དེ་དག་གི་དྲུང་དུ་གསོ་སྦྱོང་བྱེད་པ་ལ་ཡང་ཁ་ན་མ་ཐོ་བ་མེད་པའོ། །ཕོངས་པའི་ཚེ་ཁྱིམ་པའི་དྲུང་དུ་བཤགས་པར་བྱའོ་ཞེས་བྱ་བ་ནི། ཕོངས་པའི་དུས་ཀྱི་ཚེ་ན་ཁྱིམ་པའི་དྲུང་དུ་ཡང་ལྟུང་བ་བཤགས་ཤིང་ཕྱིར་བཅོས་པར་བྱར་རུང་བའོ། །གླེང་གཞི་ནི་ཆོམ་རྐུན་བ་དག་ལ་དེ་སྐད་གསུངས་པ་ཡིན་མོད་ཀྱི། ཁྱིམ་པ་གཞན་དག་ལ་ཡང་རུང་བ་ཉིད་ཡིན་པའི་ཕྱིར་འདིར་སྤྱིར་བསྡུས་སོ། །དེ་ལྟ་བས་ན་ཀྱལ་ཀ་ཅན་ལ་སོགས་པ་དང་རྩེ་དགོད་ལ་སོགས་པ་དང་རབ་ཏུ་བྱུང་ཞིང་བསྙེན་པར་མ་རྫོགས་པ་དག་གི་དྲུང་དུ་ཡང་ཉེས་པ་མེད་དོ། །དེ་ལ་ཆོ་ག་རྗེས་སུ་བསྒྲགས་པ་ལ་ཡང་ངོ་ཞེས་བྱ་བ་ནི། ཁྱིམ་པ་དེ་ལ་ཕོངས་པའི་ཚེ་རབ་ཏུ་བྱུང་བའི་བསླབ་པའི་ཆོ་ག་རྗེས་སུ་བསྒྲགས་པ་ལ་ཁ་ན་མ་ཐོ་བ་མེད་པའོ། །རྒྱལ་པོ་ལ་གོ་བར་བྱ་བ་ལ་ཡང་ངོ་ཞེས་བྱ་བ་ནི། རྒྱལ་པོ་ལ་བདག་ཅག་གི་སྟོན་པས་འདི་སྐད་གསུངས་སོ། །འདི་ལྟར་བཀག་གོ་ཞེས་བྱ་བ་ལ་སོགས་པ་རབ་ཏུ་བྱུང་བའི་བྱ་བ་དང༌། བྱ་བ་མ་ཡིན་པའི་ཆོ་ག་དེ་དག་གོ་བར་བྱེད་པ་ལ་ཡང་ཁ་ན་མ་ཐོ་བ་མེད་དེ། །གང་ལ་གོ་བར་བྱས་ན་ཆོས་དང་ལྡན་པའི་བྱ་བ་འགྲུབ་པར་འགྱུར་བ་དེ་ལ་གོ་བར་བྱས་པ་ལ་ཉེས་པ་མེད་པའོ། །གཞན་མ་རྫོགས་པ་ལ་མི་འཆགས་པ་མེད་དོ་ཞེས་བྱ་བ་ལ། གཞན་ཞེས་བྱ་བ་ནི། སོ་སོར་ཐར་པའི་མདོ་གདོན་པ་རྣམ་པ་ལྔ་པོ་དག་ལས་གླེང་གཞི་ནི་རྫོགས་པར་མི་གདོན་དུ་མི་རུང་བས། དེ་ལ་ལྟོས་ནས་ཕམ་པར་འགྱུར་བ་ལ་སོགས་པས་གདོན་པ་ལྷག་མ་བཞི་པོ་དག་ལ་གཞན་ཞེས་བྱ་སྟེ། དེ་དག་གདོན་པར་བརྩམས་ནས་མ་རྫོགས་པ་ལ་ནི་གདོན་པ་མི་འཆགས་པ་མེད་དེ། འོན་ཀྱང་བརྩམས་ན་རྫོགས་པར་བྱ་
དགོས་སོ། །རྫོགས་པར་མ་བྱས་ན་ཉེས་བྱས་སུ་འགྱུར་རོ། །ཆོས་མ་ཡིན་པས་མི་བྱའོ་ཞེས་གང་གསུངས་པ་དེ་ལ་གསོ་སྦྱོང་འདི་ལ་ཆོས་མ་ཡིན་པ་བསྟན་པའི་ཕྱིར། གདོན་པར་བྱ་བ་དང་དེའི་ཚད་དང་དུས་དང་འདོན་པར་བྱེད་པ་རྣམས་དེ་ཁོ་ན་བཞིན་ཉེ་བར་མ་བཟུང་བ་ནི་འདིར་ཆོས་མ་ཡིན་ནོ་ཞེས་བྱ་བ་སྨྲས་ཏེ། གདོན་པར་བྱ་བ་དང༌། དེའི་ཚད་དང༌། དེའི་དུས་དང༌། དེའི་འདོན་པར་བྱེད་པ་དག་དེ་ཁོ་ན་བཞིན་དུ་ཉེ་བར་མ་བཟུང་བ་ནི་གསོ་སྦྱོང་གི་སྐབས་འདིར་ཆོས་མ་ཡིན་པ་ཡིན་ནོ། །དེ་ལ་གདོན་པར་བྱ་བ་དེ་ཁོ་ན་བཞིན་དུ་ཉེ་བར་མ་བཟུང་བ་ནི། སོ་སོར་ཐར་པའི་མདོ་ལས་གཞན་པ་ཕྲེན་ཚེགས་ལ་སོགས་པ་འདོན་པའོ། །དེའི་ཚད་དེ་ཁོ་ན་བཞིན་ཉེ་བར་མ་བཟུང་བ་ནི་གླེང་གཞི་མི་འདོན་ཅིང་ལྷག་མ་རྣམས་ཀྱང་ཐོས་བ་བསྒགས་པས་སྒྲུབ་པར་མི་བྱེད་པའོ། །གསོལ་བ་མ་གཏོགས་པ་ནི་མི་མཐུན་པ་ཉིད་ཡིན་པར་རིག་པར་བྱ་སྟེ། གསོལ་བ་མ་བྱས་པར་བྱེད་པ་གང་ཡིན་པ་དེ་ནི་མ་བསྐོས་པར་བྱེད་པ་ཡིན་པའི་ཕྱིར་རོ། །དེའི་དུས་དེ་ཁོ་ན་བཞིན་ཉེ་བར་མ་བཟུང་བ་ནི་གསོ་སྦྱོང་གི་དུས་ལས་གཞན་པའི་དུས་སུ་བྱེད་པའོ། །འདོན་པར་བྱེད་པ་དེ་ཁོ་ན་བཞིན་ཉེ་བར་མ་བཟུང་པ་ནི་གང་ཟག་གང་དག་གི་དབང་དུ་གསོ་སྦྱོང་བྱེད་པ་བསྙེན་པར་རྫོགས་པ་དང་བཅས་པ་ལྟ་བ་དང༌། ཚུལ་ཁྲིམས་དག་གིས་རིགས་མཐུན་པ་དེ་དག་ལས་གཞན་པས་བྱེད་པའོ། །ཡང་ན་གང་གདོན་པར་བྱ་བ་དང་ཇི་སྙེད་གདོན་པར་བྱ་བ་དང༌། གང་གི་ཚེ་འདོན་པར་བྱེད་པ་དང༌། གང་དག་གིས་གདོན་པར་བྱ་བ་དེ་དག་ཡོངས་སུ་སྦངས་ཏེ། གདོན་པར་བྱ་བ་དང་ཚད་དང་དུས་དང་འདོན་པར་བྱེད་པ་གཞན་ཉིད་ཉེ་བར་འཛིན་པར་བྱེད་པ་དེ་ནི་འདིར་མི་འཆགས་པར་བྱེད་པ་ཆོས་མ་ཡིན་པར་ཤེས་པར་བྱའོ། །གནས་དེ་ནས་འགའ་ཡང་མ་སོང་བ་ཉིད་ཡིན་ན་ངེས་པ་ཡིན་ནོ་ཞེས་སྔར་གང་བསྟན་པ་དེ་ལ་སོང་བ་ཉིད་ཅེས་བྱ་བ་དེའི་ཚད་བསྟན་པའི་ཕྱིར། ཐོས་པའི་ཉེན་ཀོར་ལས་འདས་པ་ཉིད་ནི་སོང་བ་ཉིད་ཡིན་ནོ་ཞེས་བྱ་བ་སྨྲས་ཏེ། ཐོས་པའི་ཉེན་ཀོར་ཞེས་བྱ་བ་ཐོས་པའི་སྤྱོད་ཡུལ་གང་ཡིན་པ་དེ་ལས་འདས་ཏེ་སོང་བ་ནི་སོང་བ་ཉིད་ཡིན་ནོ། །གསོ་སྦྱོང་གི་གཞི་དང་འབྲེལ་པ་རྣམ་པར་འབྱེད་པ་ལ་སོགས་པའི་སྐབས་སོ་ཞེས་བྱ་བ། གསོ་སྦྱོང་གི་གཞི་དང་འབྲེལ་པ་རྣམ་པར་འབྱེད་པ་དང༌། ཕྲན་ཚེགས་དང་
འདུལ་བྱེད་དང༌། ཞུ་བའི་སྐབས་ནས་འབྱུང་བ་དག་བཤད་ཟིན་ཏོ། །གསོ་སྦྱོང་གི་བཞི་རྫོགས་སོ་ཞེས་བྱ་བ་དེ་བཤད་ཟིན་ཏོ།། །།ད་ནི་དབྱར་གྱི་གཞི་བསྡུ་བའི་ཕྱིར། དབྱར་གནས་པར་ཁས་བླང་བར་བྱའོ་ཞེས་བྱ་བ་སྨྲས་ཏེ། དབྱར་གནས་པར་བྱ་བ་ཉིད་ཀྱིས་ཁས་བླང་བར་བྱའོ། །དུས་ཇི་སྲིད་དུ་ཞེན་དེའི་ཕྱིར། ཟླ་བ་གསུམ་དུའོ་ཞེས་བྱ་བ་སྨྲས་སོ། །ཉི་མ་གང་ལ་ཞེ་ན་དེའི་ཕྱིར་ཚེས་བཅུ་དྲུག་ལའོ་ཞེས་བྱ་བ་སྨྲས་སོ། །ཟླ་བ་གང་གི་ཞེ་ན། དེའི་ཕྱིར་དབྱར་ཟླ་འབྲིང་པོ་ཉའི་ཕྱི་དེ་ཉིན་པར་གྱིའོ་ཞེས་བྱ་བ་སྨྲས་ཏེ། དབྱར་ཟླ་འབྲིང་པོ་ཉའི་ཕྱི་དེ་ཉིན་པར་ཞེས་བྱ་བ་ནི་དབྱར་ཟླ་འབྲིང་པོའི་ཚེས་བཅུ་དྲུག་སྟེ་དེ་ལའོ། །སྔགས་ལས་དབྱར་ཉེ་བར་བསྒྲུབ་པ་དབྱར་ཟླ་འབྲིང་པོ་ཚེས་བཅོ་ལྔ་ཞེས་གསུངས་པ་གང་ཡིན་པ་དེ་ལ་དབྱར་ཟླ་འབྲིང་པོ་ཚེས་བཅོ་ལྔ་ནི་དབྱར་ཉེ་བར་སྒྲུབ་པར་བྱེད་པ་ཡིན་པར་གསུངས་པས། ཚེས་བཅུ་དྲུག་ཕྱིན་ཆད་ནི་དབྱར་གྱི་དུས་ཉིད་ཡིན་པར་ཤེས་པར་བྱའོ། །གནས་པར་ཁས་བླངས་པ་སྔ་མའི་དུས་བསྟན་ནས། ཕྱི་མའི་དུས་བསྟན་པའི་ཕྱིར་དབྱར་ཟླ་ཐ་ཆུངས་ཉའི་འོ་ཞེས་བྱ་བ་སྨྲས་ཏེ། ཕྱི་དེ་ཉིན་པར་བགྱིའོ་ཞེས་བྱ་བར་སྦྱར་རོ། །དབྱར་ཟླ་ཐ་ཆུངས་ཉའི་ཕྱི་དེ་ཉིན་པར་ཞེས་བྱ་བ་ནི། དབྱར་ཟླ་ཐ་ཆུངས་ཆོས་བཅུ་དྲུག་སྟེ་དེ་ལའོ། །ཞག་བཅུ་འམ་ཟླ་བ་ཕྱེད་ཀྱིས་འབྱུང་བར་འགྱུར་བ་ཉིད་ན་གཙུག་ལག་ཁང་ཕྱི་དོར་བྱའོ་ཞེས་བྱ་བ་ནི། གནས་པར་ཁས་བླངས་པ་འབྱུང་བར་འགྱུར་བ་ཉིད་ཀྱི་མདུན་རོལ་དེ་ཙམ་ནས་སོ། །ཁ་ཅིག་ལས་ནི་བདུན་ནམ་བརྒྱད་ན་ཞེའོ་ཞེས་བྱ་བ་ནི། ལུགས་ཁ་ཅིག་ལས་དེ་ཙམ་ན་གནས་པར་ཁས་བླངས་པ་འབྱུང་བར་འགྱུར་བ་ཉིད་ཀྱི་མདུན་རོལ་དེ་ཙམ་ནས་གཙུག་ལག་ཁང་བྱི་དོར་བྱའོ་ཞེས་ཀྱང་འབྱུང་ངོ༌། །ཉི་མ་སྔ་མ་ལ་གནས་མལ་བསྔོག་གོ་ཞེས་བྱ་བ་ནི། ཚེས་བཅུ་དྲུག་ལ་གནས་པར་ཁས་བླངས་པ་དེའི་ཉི་མ་སྔ་མ་སྟེ། ཚེས་བཅོ་ལྔའི་ཉིན་པར་གནས་མ་ལ་བསྡོག་པར་བྱ་བ་སྟེ། བསྔོག་པ་ཞེས་བྱ་བ་ནི་བགོ་བའི་ཕྱིར་སྟ་གོན་བྱ་བའོ། །འདིར་གནས་མལ་ཞེས་བྱ་བའི་སྒྲས་ནི། གནས་དང་སྟན་ལ་སོགས་པ་གནས་མལ་ཐམས་ཅད་སྤྱིར་བཟུང་སྟེ། དེ་ལ་གནས་ཞེས་བྱ་བ་ནི། ཤིང་དྲུང་དང༌། ཁང་པ་དང་ལྔ་ཁང་དང་ཁང་པ་བརྩེགས་པ་དང༌། བསིལ་ཁང་དང་སབ་མོས་བསྐོར་བ་དང༌། བགམ་དང༌། ཁང་བཟངས་དང༌། སྒོ་ཁང་གི་སྟེང་གི་བསིལ་
ཁང་དང༌། ཁང་སྟེང་གི་ཡོལ་ཁང་དང༌། སྤང་ལེང་ཁང་དང༌། ས་ཕུག་དང༌། བྲག་ཕུག་དང༌། རི་ཕུག་དང༌། རྩྭའི་སྤྱིལ་བུ་དང༌། ལོ་མའི་སྤྱིལ་བུ་དང༌། འཆག་སར་བྱས་པ་དང༌། འཆགས་སར་མ་བྱས་པ་དང༌། བྱ་སྐྱིབས་སུ་བྱས་པ་དང༌། བྱ་སྐྱིབས་སུ་མ་བྱས་པ་དང༌། དེ་ལྟ་བུ་ལ་སོགས་པ་དགེ་འདུན་ལས་བྱུང་པ་དང༌། གང་ཟག་ལས་བྱུང་བའི་གནས་ཀྱི་རྣམ་པ་ཐམས་ཅད་སྤྱིར་བསྡུའོ། །སྟན་ཞེས་བྱ་བ་ནི། ཁྲི་དང་སྟན་དང༌། སྟན་ནང་ཚངས་ཅན་དང༌། ཕྱག་དར་ཁྲོད་དང༌། དར་དང༌། སྣམ་བུ་དང༌། རེའུ་རས་དང༌། དར་ལ་དང༌། མོན་དར་དང༌། བེའུ་རས་ཡུག་ཆེན་དང༌། བེའུ་རས་དམར་པོ་དང༌། བེའུ་ཕྲུག་དང༌། ལ་དམར་དང༌། ཡུལ་ཀ་ཤི་ཀའི་རས་ཕྲན་དང༌། ཁ་དོག་རན་པ་དང༌། ཁ་དོག་ངན་པ་དང༌། བལ་གོས་དང༌། ཤ་ནའི་རས་དང༌། ཟར་མའི་རས་དང༌། རས་གོས་དང༌། དུ་གུ་ལའི་རས་དང༌། ཀོ་ཏམ་པའི་རས་དང༌། ཉི་འོག་གི་གོས་དང༌། དེ་ལྟ་བུ་ལ་སོགས་པ་དགེ་འདུན་ལས་བྱུང་བ་དང༌། གང་ཟག་ལས་བྱུང་བའི་གོས་དང༌། མལ་ཆ་དང༌། སྟན་དང༌། དགེ་སྦྱོང་གི་འཚོ་བའི་ཡོ་བྱད་ཐ་ན་ཁྲིའུ་དང༌། ཆོལ་ཟངས་ཀྱི་བར་ཡན་ཆད་སྤྱིར་བསྡུས་ཏེ། གནས་དང་གོས་ཀྱི་རྣམ་པ་དེ་དག་ཐམས་ཅད་ལ་གནས་མལ་ཞེས་བྱའོ། །ཁྲིའུ་དང་ཆོལ་ཟངས་ཡན་ཆད་དོ་ཞེས་བྱ་བ་ནི། ཐན་ཁྲིའུ་དང་ཆོལ་ཟངས་ཀྱི་བར་ཡན་ཆད་སྦྱར་ཏེ། དེའི་ཉིན་མོ་བསྡོག་པར་བྱའོ་ཞེས་བྱ་བའི་ཐ་ཚིག་གོ །དེ་སྟོབས་པ་བསྐོ་བར་བྱའོ་ཞེས་བྱ་བ་ནི། གནས་མལ་དེ་སྟོབས་པའི་དགེ་སློང་སྤྲོ་བར་བྱས་ནས་གསོལ་བ་དང་གཉིས་ཀྱི་ལས་ཀྱིས་བསྐོ་བར་བྱའོ། །ཞེས་བྱ་བའི་ཐ་ཚིག་གོ །དེའི་སྔགས་ནི་མིང་འདི་ཞེས་བྱ་བ་ཁྱོད་དགེ་འདུན་ལ་དབྱར་གྱི་གནས་མལ་སྟོབས་པར་སྒྲོ་འམ་སྤྲོའོ། །དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་དགེ་འདུན་ལ་དབྱར་གྱི་གནས་མལ་སྟོབས་པར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དག་དགེ་འདུན་གྱིས་མིང་འདི་ཞེས་བགྱི་བ་གནས་མལ་སྟོབས་པར་བསྐོ་སྟེ། གནས་མལ་སྟོབས་པ་མིང་འདི་ཞེས་བགྱི་བ་དགེ་འདུན་ལ་དབྱར་གྱི་གནས་མལ་སྟོབས་སོ། །འདི་ནི་གསོལ་བའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དགེ་འདུན་
ལ་དབྱར་གྱི་གནས་མལ་སྟོབས་པར་སྤྲོ་ཏེ། དེའི་སླད་དུ་དགེ་འདུན་གྱིས་མིང་འདི་ཞེས་བགྱི་བ་གནས་མལ་སྟོབས་པར་བསྐོ་ན། ཚེ་དང་ལྡན་པ་གང་དག་མིང་འདི་ཞེས་བགྱི་བ་གནས་མལ་སྟོབས་པར་བསྐོ་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་མིང་འདི་ཞེས་བགྱི་བ་གནས་མལ་སྟོབས་པར་བསྐོས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་གསུངས་པ་ཡིན་ནོ། །མི་ནུས་ན་དུ་མའོ་ཞེས་བྱ་བ་ནི། གང་ཟག་གཅིག་གིས་དགེ་འདུན་ལ་གནས་མལ་སྟོབས་པར་མི་ནུས་ན་དགེ་སློང་དུ་མ་བསྐོ་བར་བྱ་བའོ། །བསྐོས་པའི་འོག་ཏུ་དེས་ཅི་ཞིག་བྱ་ཞེ་ན་དེའི་ཕྱིར། དེས་དྲི་དག་གིས་བསྐུས་པའི་ཚུལ་ཤིང་གཟེབ་ཀྱི་སྤྲོག་མར་རས་དཀར་པོ་བཏིང་པས་དཀྲིས་པ་དག་རྒན་རིམས་སུ་བཞག་ནས། ཚེ་དང་ལྡན་པ་དག་གནས་འདི་ན་ཁྲིམས་སུ་བྱ་བ་འདི་དང་འདི་ཡོད་དེ། ཁྱེད་ཅག་ལས་གང་ཁྲིམས་སུ་བྱ་བ་འདི་དང་འདིས་གནས་འདིར་གནས་པར་སྤྲོ་བ་དེས་ནི་ཚུལ་ཤིང་ལོངས་ཤིག་ཁྱེད་ཅག་ལས་སུས་ཀྱང་དབྱར་དགེ་འདུན་གྱི་ནང་དུ་འཁྲུག་ལོང་བསྐྱེད་པར་མི་བྱའོ། །ཁྱེད་ཅག་ལས་གང་གིས་འགའ་ཞིག་ལས་ཆུང་ཟད་ཤེས་པ་དེས་དེ་སྨྲོས་ཤིག །ཁྱེད་ཅག་ལས་གང་དབྱར་གྱི་ནང་དུ་དགེ་འདུན་ལ་འཁྲུག་ལོང་བསྐྱེད་པར་འགྱུར་བ་དེ་ལ་དགེ་འདུན་གྱིས་ཕྱིས་ཉེ་བར་བརྟགས་པར་དགོངས་སོ་ཞེས་དགེ་སློང་རྣམས་ལ་བསྒོ་བར་བྱའོ་ཞེས་བྱ་བ་སྨྲས་ཏེ། གནས་མལ་སྟོབས་པའི་དགེ་སློང་དེས་དེ་ལྟར་བྱའོ་ཞེས་བྱ་བའི་ཐ་ཚིག་གོ །དེའི་འོག་ཏུ་དགེ་སློང་གཞན་གྱིས་བླངས་པ་དང་ཁས་བླངས་པའི་ཕྱིར་དགེ་འདུན་ལ་གསོལ་བར་བྱའོ་ཞེས་བྱ་བ་ནི། གནས་མལ་སྟོབས་པའི་དགེ་སློང་དེ་ལས་གཞན་པའི་དགེ་སློང་གཞན་ཅིག་གིས་དགེ་འདུན་གྱི་ཚུལ་ཤིང་བླངས་པ་དང༌། དབྱར་གནས་པར་ཁས་བླངས་པའི་ཕྱིར་དགེ་འདུན་ལ་གསོལ་བ་འབའ་ཞིག་གི་ལས་གཅིག་བྱ་སྟེ། དོན་དེ་གཉི་ག་གསོལ་བ་འབའ་ཞིག་གི་ལས་ཅིག་གིས་ཅིག་ཅར་གོ་བར་བྱ་བའོ། །དེའི་སྔགས་ནི་དགེ་འདུན་བཙུན་པ་རྣམས་གསན་དུ་གསོལ། དེང་ནི་དགེ་འདུན་གྱིས་དབྱར་ཉེ་བར་བསྒྲུབ་པ་དབྱར་ཟླ་འབྲིང་པོ་ཆེས་བཅོ་ལྔ་ལ་གསན། གལ་ཏེ་དགེ་འདུན་གྱི་དུས་ལ་བབ་ཅིང་
བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དང་ཚུལ་ཤིང་བཞེས་ཏེ་སང་ནམ་ནངས་པར་གནས་པར་ཁས་བླང་ངོ༌། །འདི་ནི་གསལ་བའོ་ཞེས་གསུང་པ་ཡིན་ནོ། །དབྱར་ཕྱི་མ་ལ་ནི། དབྱར་ཉེ་བར་བསྒྲུབ་པ་དཔྱར་ཟླ་ཐ་ཆུངས་ཚེས་བཅོ་ལྔ་ལགས་ན་ཞེས་སྔགས་ཀྱིས་བྱེ་བྲག་ཏུ་བྱའོ། །གསོལ་བ་དེ་བྱས་མ་ཐག་ཁོ་ནར་ཚུལ་ཤིང་བྲིམ་མོ་ཞེས་བྱ་བ་ནི། དེ་ལྟར་གསོལ་བའི་ལས་བྱས་མ་ཐག་ཏུ་ཚུལ་ཤིང་བྲིམ་པར་བྱ་བའོ། །དང་པོར་སྟོན་པའི་བླང་ངོ་ཞེས་བྱ་བ་ནི། ཚུལ་ཤིང་བྲིམ་པའི་ཚེ་དང་པོ་ཁོ་ནར་ཚུལ་ཤིང་འདྲིམ་པར་བྱེད་བས་སྟོན་པ་སངས་རྒྱས་བཅོམ་ལྡན་འདས་ཀྱི་ཚུལ་ཤིང་དེ་བླང་བར་བྱ་བའོ། །གཞན་དག་གིས་ནི་སྟན་ལས་ཕྱེད་འཕགས་པས་སོ་ཞེས་བྱ་བ་ནི། སྟོན་པའི་ཚུལ་ཤིང་ལེན་པ་ལས་གཞན་པའི་དགེ་སློང་དག་གིས་ནི་རང་རང་གི་སྟན་ལས་བྱེད་འཕགས་པའི་སྤྱོད་ལམ་གྱིས་རང་རང་གི་ཚུལ་ཞིང་བླང་བར་བྱ་བའོ། །དགེ་ཚུལ་རྣམས་ཀྱི་ནི་སློབ་དཔོན་དང་མཁན་པོ་དག་གིས་སོ་ཞེས་བྱ་བ་ནི། སྟོན་པ་མན་ཆད་ནས་རྒན་རིམས་ཀྱི་དགེ་སློང་ཐམས་ཅད་ལ་ཚུལ་ཤིང་བྲིམ་པ་མཇུག་ཏུ་ཕྱིན་ནས་ཚུལ་ཤིང་འདྲིམ་པར་བྱེད་པ་དེས་ཡང་མགོ་ནས་བླངས་ཏེ། དགེ་སློང་གང་དག་ལ་སློབ་མ་དང་ཉེ་གནས་དགེ་ཚུལ་ཡོད་པ་དེ་དག་ལ་དགེ་ཚུལ་གྱི་ཚུལ་ཤིང་ལེན་དུ་གཞུག་ཅིང་སློབ་དཔོན་དང་མཁན་པོ་གང་དག་ལ་སློབ་མ་འམ་ཉེ་གནས་དགེ་ཚུལ་ཡོད་པ་དེའི་ཚུལ་ཤིང་མཁན་པོ་དང་སློབ་དཔོན་དག་གིས་བླང་བར་བྱ་བའོ། །མཇུག་ཏུ་གཉུག་མར་གནས་པ་རྣམས་ཀྱི་དེ་ཡང་དོ་ཞེས་བྱ་བ་ནི། དེ་ལྟར་དགེ་ཚུལ་རྣམས་ཀྱི་ཚུལ་ཤིང་བྲིམ་བ་ཟིན་པའི་མཇུག་ཏུ་གཙུག་ལག་ཁང་གི་སྲུང་མ་གཉུག་མར་གནས་པ་ལྷ་མོ་ཆེན་མོ་འཕྲོག་མ་ལ་སོགས་པ་དག་གི་ཚུལ་ཤིང་བྲིམ་པ་དེ་ཡང་བྱའོ། །དལ་བུས་གཞག་པ་བྱའོ་ཞེས་བྱ་བ་ནི། ཚུལ་ཤིང་སྡུད་པ་ན་ཐམས་ཅད་ཀྱིས་དལ་བུས་གཞག་པར་བྱ་བའོ། །བགྲངས་ནས་གནས་འདིར་དགེ་སློང་འདི་སྙེད་ཀྱིས་ཚུལ་ཤིང་བླངས་སོ་ཞེས་གོ་བར་བྱའོ་ཞེས་བྱ་བ་ནི། ཚུལ་ཤིང་བསྡུས་པའི་འོག་ཏུ་བགྲངས་ནས་དུ་བྱུང་བའི་སྡོམ་དགེ་འདུན་ལ་སྒྲ་དེ་སྐད་ཅེས་བརྗོད་ཅིང་གོ་པར་བྱའོ་ཞེས་བྱ་བའི་ཐ་ཚིག་གོ །གནས་ཀྱི་གཞི་བསྟབས་
པར་བྱའོ་ཞེས་བྱ་བ་ནི། གནས་པར་བྱ་བའི་གཞི་ནི་གནས་ཀྱི་གཞི་སྟེ་གནས་ཁང་ལ་སོགས་པའོ། །གནས་མ་ལ་སྟོབས་པས་དེ་དགེ་འདུན་ལ་བསྟབས་པར་བྱའོ། །དེ་དག་གི་སྒོ་ལྕགས་དང་ལྡེ་མིག་བླངས་པས་མདུན་དུ་འདུག་སྟེ་གནས་བརྟན་གཙུག་ལག་ཁང་ཆེ་གེ་མོ་ནི་རྙེད་པ་དང་བཅས་པ་གོས་ཀྱི་རིན་དང་བཅས་པ་ལགས་ཀྱིས་བཞེས་ཤིག་ཅེས་ཡོན་ཏན་ཇི་ལྟ་བ་བཞིན་དུ་མོས་པ་བསྐྱེད་ཅིང་ལེན་དུ་གཞུག་གོ་ཞེས་བྱ་བ་ནི། གནས་མལ་སྟོབས་པའི་དགེ་སློང་གང་གིས་དབྱར་གྱི་གནས་དེ་ན་ཡོད་པའི་གནས་ཀྱི་གཞི་བསྟབས་པར་བྱ་བ་ཉིད་དུ་འདོད་པ་གང་དག་ཡིན་པ་དེ་དག་གི་སྒོ་ལྕགས་དང་ལྡེ་མིག་ཐམས་ཅད་དེའི་ཚེ་བསྡུས་ཤིང་སྲེལ་བའི་དགེ་སློང་དེས་དང་པོར་དགེ་འདུན་གྱི་གནས་བརྟན་གྱི་མདུན་དུ་འདུག་སྟེ། གནས་ཀྱི་གཞི་དེ་དག་གི་ཡོན་ཏན་ཇི་ལྟ་བ་བཞིན་དུ་བརྗོད་ཅིང་མོས་པ་བསྐྱེད་པ་བརྩམས་པས་ལེན་དུ་གཞུག་པ་སྟེ། གནས་བརྟན་གཙུག་ལག་ཁང་ཆེ་གེ་མོ་ནི་རྙེད་པ་དང་བཅས་པ་གོས་ཀྱི་རིན་དང་བཅས་པ་ལགས་ཀྱིས་གལ་ཏེ་བཞེད་ན་བཞེས་ཤིག་ཅེས་ལེན་དུ་གཞུག་གོ །དེ་བཞིན་དུ་རྒན་རིམས་ཀྱིས་ཐམས་ཅད་ལ་གནས་ཀྱི་གཞི་ལྷག་མ་རྣམས་ཀྱང་ཡོན་ཏན་ཇི་ལྟ་བ་བཞིན་དུ་བརྗོད་ད་མོས་པ་བསྐྱེད་ཅིང་ལེན་དུ་གཞུག་གོ །དགེ་སློང་གང་གིས་གནས་ཀྱི་གཞི་གང་བླངས་པ་དེ་ལ་དེའི་སྒོ་ལྕགས་དང་ལྡེ་མིག་ཀྱང་གཏད་པར་བྱའོ། །བླངས་པ་ལ་སོགས་པ་ནི་ལྷུང་བཟེད་དང་འདྲ་བའོ་ཞེས་བྱ་བ་ནི། ཇི་སྐད་དུ་ལྷུང་བཟེད་འབྲེལ་པ་མེད་པ་བྲིམ་པའི་སྐབས་སུ་འདོད་ན་ལོངས་ཤིག་ཅེས་བྱ་བ་དང༌། བར་དུ་ཆོད་བས་བླངས་པ་མི་བསླང་ངོ་ཞེས་བྱ་བ་དང༌། ཚིག་གཉིས་པ་ལ་མི་སྦྱིན་ཞིང་གསུམ་པ་ལ་སྦྱིན་ནོ་ཞེས་བསྟན་པ་དེ་བཞིན་དུ་འདིར་གནས་ཀྱི་གཞི་སྟོབས་པ་ལ་ཡང་དེ་དག་ཐམས་ཅད་སྔ་མ་བཞིན་དུ་སྦྱར་བར་བྱའོ། །མཆོད་རྟེན་དང་དགེ་འདུན་གྱི་དོན་མ་ཡིན་པར་སོང་བར་ཤེས་པ་ལ་ནི་འཐེབ་ཉིད་ལས་བསྐོ་བར་བྱའོ་ཞེས་བྱ་བ་ནི། དགེ་སློང་མཆོད་རྟེན་གྱི་དོན་མ་ཡིན་པ་དང༌། དགེ་འདུན་གྱི་དོན་མ་ཡིན་པར་སྒོ་དོན་ལ་རང་དགར་གཞན་དུ་སོང་བ་ལ་ནི་གནས་ཀྱི་གཞིའི་སྐལ་བ་འཐེབ་ཡོད་ན་དེ་ལས་བསྐོ་བར་བྱ་བ་ཉིད་ཡིན་ནོ། །འདིར་འཐེབ་ཅེས་བྱ་བ་ནི། དགེ་སློང་གཉུག་མར་གནས་པ་རྣམས་ལ་
བསྐོས་ཟིན་པའི་འོག་ཏུ་ཡང་བསྐོ་བར་བྱ་བའི་ལྷག་མ་ཡོད་པ་ལ་བྱ་སྟེ། དེ་ལྟར་ལྷག་པའི་འཐེབ་ཡོད་ན་བསྐོ་བར་བྱའོ། །མཆོད་རྟེན་གྱི་དོན་དང་དགེ་འདུན་གྱི་དོན་དུ་སོང་བ་ལ་ནི་རྒན་རིམས་བཞིན་དུ་སྐལ་བ་བསྐོ་བར་བྱའོ། །འདིར་གཞུང་ནི། བཅོམ་ལྡན་འདས་ཀྱིས་གནས་བརྟན་ཉེ་དགའི་སྐབས་ལས་འདི་སྐད་ཅེས་གང་དགེ་འདུན་གྱི་འམ་མཆོད་རྟེན་གྱི་བྱ་བ་ལ་སོང་པ་དེ་ལ་ནི་རྒན་རིམས་བཞིན་དུ་གནས་མལ་བསྐོ་བར་བྱའོ། །གཞན་ལ་ནི་འཐེབ་ཇི་ལྟ་བ་བཞིན་དུ་འོ་ཞེས་གསུངས་པ་ཡིན་ནོ། །ཤིང་ལྗོན་པའི་དྲུང་དང་ནི་འུ་གསིང་གི་གཞི་དག་ལ་ཡང་རྒན་རིམས་བཞིན་དུ་བསྐོ་བར་བྱའོ་ཞེས་བྱ་བ་ནི། ཤིང་དྲུང་ལ་སོགས་པའི་གནས་མལ་གཞན་དག་ལ་ཡང་རྒན་རིམས་བཞིན་དུ་བསྐོ་བར་བྱ་བའོ། །གནས་ཁང་གིས་མི་ཆོག་ན་གཉིས་ལ་སོགས་པ་དག་ལ་ཐ་ན་དེའི་ས་གཞི་གདིང་བའི་ཚད་ཙམ་ཡང་ངོ་ཞེས་བྱ་བ་ནི། གལ་ཏེ་དགེ་སློང་རེ་རེ་ལ་གནས་ཁང་རེ་རེ་བསྐོར་མི་ཆོག་ན་དེའི་ཚེ་དགེ་སློང་གཉིས་ལ་སོགས་པ་དག་ལ་གཅིག་ཐུན་མོང་དུ་བསྐོ་སྟེ། གཉིས་ལ་འམ་གསུམ་ལ་འམ་བཞི་ལ་འམ། དེ་དག་ལ་སོགས་པ་དག་ལ་གནས་ཁང་གཅིག་ཏུ་ཐུན་མོང་དུ་བསྐོ་བར་བྱའོ། །འོན་ཀྱང་མི་ཆོག་ན་དེའི་ཚེ་མཐའ་བསྟན་པའི་ཕྱིར། ཐ་ན་དེའི་ས་གཞི་གདིང་བའི་ཚད་ཙམ་མོ་ཞེས་བྱ་བ་སྨོས་ཏེ། གནས་ཁང་གིས་གཞིར་སྟན་གདིང་བའི་ཚད་དུ་ཙམ་ཤོང་བ་དེ་སྙེད་ཀྱི་དགེ་སློང་དག་ལ་གནས་ཁང་གཅིག་བསྐོ་བར་བྱའོ། །ལྷུང་བཟེད་དང་བྱ་མ་བུམ་དང་འདག་རྫས་དང་སོ་ཤིང་དང་སྨན་གྱི་གནས་ལ་ལྟོས་པར་བྱའོ་ཞེས་བྱ་བ་ནི། གནས་ཁང་གཅིག་ཏུ་མལ་སྟན་གྱི་ཚད་དུ་ཤོང་པའི་དགེ་སློང་དེ་སྙེད་ལ་གནས་ཁང་གཅིག་ཐུན་མོང་དུ་བསྐོ་བར་བྱའོ་ཞེས་བསྟན་པ་དེ་ལ་གནས་ཁང་དེར་དགེ་སློང་དག་གི་ལྷུང་བཟེད་ལ་སོགས་པ་གཞག་པའི་གནས་ལ་ལྟོས་ཏེ་དེའི་ཕྱི་ན་མལ་སྟན་དུ་ཤོང་བ་དེ་སྙེད་ཀྱི་དགེ་སློང་དག་ལ་གནས་དེ་ཐུན་མོང་དུ་བསྐོ་བར་བྱའོ། །སྒོ་ཁང་དང་ཐེམ་སྐས་ཀྱི་ལྐོག་དང་ཁྱམས་དང་དཔོངས་དང་བཀད་ས་དང་བསྲོ་ཁང་གི་རབ་དག་ནི་བསྐོ་བར་མི་བྱའོ་ཞེས་བྱ་བ་ནི། མི་ཤོང་དུ་ཟིན་ཀྱང་འདི་དག་ནི་གང་ཟག་གི་གནས་ཁང་དུ་བསྐོ་བར་མི་བྱའོ། །ར་བ་ཞེས་བྱ་བའི་སྒྲས་ནི་དཔོངས་མན་ཆད་དང་སོ་སོར་སྦྱར་བར་བྱའོ།།
འདིར་གཞུང་ནི་རྣམ་པར་འབྱེད་པ་ལས་དགེ་སློང་དག་གནས་དྲུག་པོ་འདི་དག་ནི་བསྐོ་བར་མི་བྱ་བ་དག་སྟེ། སྒོ་གང་ཐམས་ཅད་དང་ཐེམ་སྐས་ཀྱི་ལྐོག་དང༌། ཁྱམས་དང་དཔོང་སའི་ར་བ་དང༌། བཀད་སའི་རབ་དང༌། བསྲོ་ཁང་གི་ར་བ་དག་སྟེ། སྐོ་བར་བྱེད་ན་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །མཚན་མོ་གནས་མལ་མི་བསྐོའོ་ཞེས་བྱ་བ་ནི། གནས་ཁང་ཉི་ཚེར་མ་ཟད་ཀྱི། ཁྲི་ལ་སོགས་པ་གཞན་ཐམས་ཅད་ལ་ཡང་དེ་བཞིན་ནོ། །ནད་པ་འདུག་པའི་གནས་ཁང་གཞན་ལ་མི་སྦྱིན་ནོ་ཞེས་བྱ་བ་ནི། ནད་པ་འདུག་པའི་གནས་ཁང་གཞན་ལ་མི་སྦྱིན་པ་སྟེ། གནས་ཁང་ཞེས་སྨོས་པས་ནི་ཁྲི་ལ་སོགས་པ་གཅད་པར་བསྟན་ཏོ། །དེ་ཉིད་ཐོབ་པ་མེད་པ་ན་མི་སྦྱིན་པར་མི་བྱའོ་ཞེས་བྱ་བ་ནི། གནས་པ་དེ་ཉིད་ཀྱིས་ཐོབ་པ་གང་ཡིན་པ་དེ་ནི་དེ་ཉིད་ཐོབ་པ་སྟེ་གནས་པ་ཉིད་ཐོབ་པའོ། །དེ་མེད་པ་ནི་ནད་པ་གང་གིས་རྒན་རིམས་སུ་གནས་ཁང་ན་སྔ་ནས་གནས་པ་ཐོབ་པ་མེད་པ་སྟེ། དེ་ལྟར་ན་ནད་པས་སྔ་ནས་གནས་ཁང་ན་གནས་པ་ཐོབ་པ་མེད་དུ་ཟིན་ཀྱང༌། གསར་དུ་གནས་ཁང་མི་སྦྱིན་པར་མི་བྱ་སྟེ་སྦྱིན་པ་ཁོ་ནར་བྱ་བའོ། །འདིར་གཞུང་ནི། དགེ་སློང་དག་གིས་དགེ་སློང་ནད་པའི་གནས་ཁང་གཞན་ལ་བསྐོ་པར་མི་བྱའོ། །བསྐོ་ན་འགལ་ཚབས་ཅན་དུ་འགྱུར་རོ། །འདི་ལྟར་དགེ་སློང་ནད་པ་ལ་གནས་ཁང་བསྟབས་པ་དང༌། གཡོག་བསྟབས་པ་དང༌། ལས་སུ་མི་བསྐོ་བར་བསྟབས་པར་བྱའོ་ཞེས་གསུངས་པ་ཡིན་ནོ། །འདིར་ནད་པ་ཞེས་བྱ་བ་ནི་སྤྱོར་བ་མི་བཟོད་པ་ཡིན་པར་རིགས་པར་བྱའོ། །དེ་དང་དེའི་གཡོག་ལས་བྱེད་དུ་མི་གཞུག་གོ་ཞེས་བྱ་བ་ནི། ནད་པ་དེའི་ནད་གཡོག་ལས་བྱེད་དུ་མི་གཞུག་པའོ། །མཛེ་ཅན་གྱིས་དགེ་འདུན་གྱི་གནས་མལ་སྤྱད་པར་མི་བྱའོ་ཞེས་བྱ་བ་ནི། དེས་དགེ་འདུན་གྱི་གནས་དང་མལ་ཆལ་སོགས་པ་སྤྱད་པར་མི་བྱའོ། །དེ་ལ་གནས་དཔེན་པ་སྦྱིན་ནོ་ཞེས་བྱ་བ་ནི། མཛེ་ཅན་དེ་ལ་མཐའ་ཁོབ་དབེན་པར་གནས་སྦྱིན་པར་བྱ་བའོ། །དགེ་འདུན་གྱིས་བསྟེན་པར་བྱ་བ་དང་བཅས་པར་ཐན་ཁྱམས་དང་ཁྱམས་གྲུ་བཞི་དང་སྒོ་ཁང་དང་བང་རིམ་དང་འཆགས་དང་ཤིང་དྲུང་གི་གནས་དེར་ཡང་འདུག་པར་མི་བྱའོ་ཞེས་བྱ་བ་ནི། མཛེ་ཅན་གྱིས་དགེ་འདུན་གྱི་གནས་དེ་ལྟ་བུར་འདུག་པར་མི་བྱའོ། །བཤད་བ་དང་གཅི་བའི་སྐྱབས་གཉིས་སུ་འཇུག་
པར་མི་བྱའོ་ཞེས་བྱ་བ་ནི། མཛེ་ཅན་གྱིས་དགེ་འདུན་གྱི་དེ་གཉིས་སུ་འཇུག་པར་མི་བྱ་བའོ། །དེ་ལ་གཡོག་བསྐོ་བས་སྙིང་བརྩེ་བར་བྱའོ་ཞེས་བྱ་བ་ནི། དགེ་འདུན་དུ་གྱུར་པའི་དགེ་སློང་དག་གིས་མཛེ་ཅན་དེ་ལ་གཡོག་བསྐོ་པས་རྗེས་སུ་སྙིང་བརྩེ་བར་བྱ་བ་སྟེ། མཛེ་ཅན་དེ་ནི་ནད་ཡུན་རིང་ཞིང་ཆེ་བ་ཡིན་པའི་ཕྱིར་དང༌། བསྟན་པ་ནི་སྙིང་རྗེས་རབ་ཏུ་ཕྱེ་བ་ཉིད་ཡིན་པའི་ཕྱིར་རོ། །འདིར་གཞུང་ནི། དགེ་སློང་མཛེ་ཅན་གྱིས་དགེ་འདུན་གྱི་གནས་མལ་ལ་སྤྱད་པར་མི་བྱ། ཁྱམས་ལ་སོགས་པའི་གནས་སུ་གནས་པར་མི་བྱ། དགེ་འདུན་གྱི་བཤད་བའི་གནས་དང༌། གཅི་བའི་གནས་སུ་འཇུག་པར་མི་བྱའོ། །དགེ་འདུན་གྱིས་དབེན་པའི་གནས་སུ་དེའི་གནས་སྦྱིན་པར་བྱ། གཡོག་ཀྱང་བྱའོ་ཞེས་གསུངས་པ་ཡིན་ནོ། །དུས་ཐམས་ཅད་དུ་དགོན་པ་པ་དག་ལ་ལྷུང་བཟེད་དང་ཆོས་གོས་གཞན་ཡོད་པའི་ཕྱིར་གནས་ཁང་བསྐོ་བར་བྱའོ་ཞེས་བྱ་བ་ནི། དབྱར་དག་ཉི་ཚེར་མ་ཟད་ཀྱི་དུས་གཞན་ཐམས་ཅད་དུ་ཡང་དགེ་སློང་དགོན་པ་བ་དག་ལ་ལྷུང་བཟེད་ལ་སོགས་པ་གཞག་པའི་ཕྱིར། གཙུག་ལག་ཁང་དུ་གནས་ཁང་བསྐོ་བར་བྱ་བའོ། །འདིར་གཞུང་ནི་དགེ་སློང་དགོན་པ་དག་གཙུག་ལག་ཁང་དུ་ལྷགས་ཏེ། གནས་ཁང་དག་རྙེད་པ་ན་དགེ་སློང་དག་ལས་མ་ཐོབ་ནས། བཅོམ་ལྡན་འདས་ཀྱིས་བཀའ་སྩལ་པ། གཙུག་ལག་ཁང་དུ་དགེ་སློང་དགོན་པ་པ་རྣམས་ཀྱི་ལྷུང་བཟེད་དང་ཆོས་གོས་གང་དུ་འཇོག་པའི་གནས་ཁང་བསྐོ་བར་བྱའོ་ཞེས་གསུངས་པ་ཡིན་ནོ། །དབྱར་གནས་པར་ཁས་བླངས་པ་ན་ཁ་ཅིག་གློ་བུར་དུ་འོང་སྲིད་པས་གནས་དང་གནས་མལ་གཞག་པར་བྱའོ་ཞེས་བྱ་བ་ལ། དབྱར་གནས་པར་ཁས་བླངས་པ་ཞེས་སྨོས་པས་དུས་ཐམས་ཅད་ནི་མ་ཡིན་པར་བསྟན་ཏེ། དབྱར་གནས་པར་ཁས་བླངས་པར་སྔ་མ་ཡང་རུང་ཕྱི་མ་ཡང་རུང་བར་དགེ་སློང་གློ་བུར་བ་དག་འོང་བར་ཤེས་ན་གནས་ཀྱི་གཞི་དང་ཁྲི་ལ་སོགས་པའི་གནས་མལ་དག་གཞག་བར་བྱའོ། །མང་པོ་དག་ལྷགས་ན་གནས་བདག་གིས་གཟོད་བསྐོ་བར་བྱའོ་ཞེས་བྱ་བ་ནི། དགེ་སློང་གློ་བུར་བ་མང་པ་དག་ལྷགས་ན་སྔར་གནས་པར་ཁས་བླངས་པ་དག་གིས་གནས་མ་ལ་གཟོད་བསྐོ་བར་བྱ་བའོ། །གནས་པར་ཁས་བླངས་པ་ཕྱི་མ་ཕྱིན་ཆད་མི་བྱའོ་ཞེས་བྱ་བ་ནི།
དབྱར་གནས་པར་ཁས་བླངས་པར་ཕྱི་མ་ཤོས་ཕྱིན་ཆད་ནི་གཟོད་བསྐོ་བར་མི་བྱ་སྟེ། གནས་པར་ཁས་བླངས་པ་གསུམ་པ་མེད་པའི་ཕྱིར་རོ། །འདིར་གཞུང་ནི་རྣམ་པར་འབྱེད་པ་ལས་དགེ་སློང་དག་ངས་དགེ་སློང་མ་འོངས་པ་རྣམས་ལ་བརྟེན་ནས་དབྱར་གནས་པར་ཁས་བླངས་པ་གཉིས་པ་བཅས་ཀྱི་གསུམ་པ་ནི་མ་ཡིན་ནོ་ཞེས་གསུངས་བ་ཡིན་ནོ། །མང་བ་ཉིད་ཡིན་ན་གཅིག་ལ་ཡང་གཉིས་ལ་སོགས་པ་ཁྱབ་པའི་པར་དག་གོ་ཞེས་བྱ་བ་ནི། གནས་ཀྱི་གཞི་མང་བ་དག་ཡིན་ན་དགེ་སློང་རེ་རེ་ལ་ཡང་གནས་ཀྱི་གཞི་གཉིས་ལ་སོགས་པ་ནས་དུ་ཙམ་བསྐོས་པ་གནས་ཐམས་ཅད་ལ་ཁྱབ་པར་འགྱུར་བ་དེ་སྙེད་ཀྱི་བར་དག་བསྐོ་བར་བྱའོ་ཞེས་བྱ་བའི་ཐ་ཚིག་གོ །ཞག་གཅིག་གི་དོན་དུ་གནས་མལ་མནོད་པར་མི་བྱའོ་ཞེས་བྱ་བ་ནི། ཞག་གཅིག་ལས་མི་གནས་ན་ཞག་གཅིག་གི་དོན་དུ་གནས་མལ་བགོ་བཤའ་མི་བྱའོ། །གནས་མལ་ཞེས་སྨོས་པ་ནི་དཔེ་ཙམ་དུ་ཟད་དེ་གཙུག་ལག་ཁང་ལ་སོགས་པ་ལ་ཡང་དེ་བཞིན་ནོ། །འདིར་གཞུང་ནི་ཕྲན་ཚེགས་དག་ལས་དགེ་སློང་དག་གིས་ཞག་གཅིག་གི་དོན་དུ་གནས་མལ་མནོད་པར་མི་བྱའོ་ཞེས་གསུངས་པ་ཡིན་ནོ། །རྙེད་པ་འདོད་པས་གཙུག་ལག་ཁང་མི་མནོད་དོ་ཞེས་བྱ་བ་ནི། རྙེད་པ་འདོད་པས་གཙུག་ལག་ཁང་ལ་སོགས་པ་གནས་དང༌། སྟན་ལ་སོགས་པ་མལ་ཆ་མནོད་པར་མི་བྱའོ། །འདིར་གཞུང་ནི། དེ་ནས་དུས་གཞན་ཞིག་ན་དགེ་སློང་རྣམས་ལ་རྒན་རིམས་བཞིན་དུ་གནས་མལ་སྟོབས་པར་བྱེད་པ་ན། བྲམ་ཟེ་ཞིག་གཙུག་ལག་ཁང་དུ་འོངས་ནས་དེས་དེ་མཐོང་བ་དང༌། གང་གི་ཕྱིར་འདི་བཞིན་བགོ་བཤའ་བྱེད་པའི་དང་ཚུལ་ཅན་ཤཱཀྱའི་སྲས་ཀྱི་དགེ་སྦྱོང་འདི་དག་ལ་སུ་ཞིག་མངོན་པར་དད་པར་མི་འགྱུར་སྙམ་དུ་དད་པ་སྐྱེས་པར་གྱུར་ནས། དེས་གཙུག་ལག་ཁང་བྱེད་དུ་བཅུག་སྟེ་དགེ་སློང་གིས་དགེ་འདུན་ལ་ཕུལ་བ་དང༌། དགེ་སློང་དག་གིས་སྨྲས་པ། ཧ་ཅང་ཡང་གཤེར་ཆེས་སོ་ཞེས་མི་ལེན་པ་དང༌། དེས་ཕྲུས་འདེབས་སུ་བཅུག་སྟེ་ཕུལ་ལོ། །དགེ་སློང་དག་གིས་སྨྲས་པ། ཧ་ཅང་དགོན་དུང་ཆེས་སོ་ཞེས་མི་ལེན་པ་དང༌། བྲམ་ཟེ་དེས་དེ་དག་རྙེད་པ་འདོད་པས་མི་ལེན་པར་རིག་ནས། བྲམ་ཟེ་དེ་ཤཱཀྱའི་སྲས་ཀྱི་དགེ་སྦྱོང་དག་ནི་རྙེད་པ་འདོད་པས་གཙུག་ལག་ཁང་ལེན་ཏོ་ཞེས་འཕྱ་བར་རྩོམ་པ་ནས། བཅོམ་
ལྡན་འདས་ཀྱིས་བཀའ་སྩལ་པ། དགེ་སློང་དག་གིས་རྙེད་པ་འདོད་པས་གཙུག་ལག་ཁང་དག་བླང་བར་མི་བྱ་བར། འདི་ལྟར་སྦྱིན་བདག་རྣམས་ལ་རྗེས་སུ་སྙིང་བརྩེ་བས་གཙུག་ལག་ཁང་དག་བླང་བར་བྱར་ཞས་གསུངས་པ་ཡིན་ནོ། །ཕོངས་པ་མེད་པའི་སེམས་ཀྱིས་ཀྱང་བླང་བར་བྱའོ། །ཐམས་ཅད་ཡོངས་སུ་སྤྱད་པར་བྱའོ་ཞེས་བྱ་བ་ནི། གང་ཟག་གཅིག་གིས་གནས་ཁར་དུ་མ་མནོས་ནའོ། །གཅིག་གིས་ཐམས་ཅད་ཇི་ལྟར་སྤྱད་པར་བྱ་ཞེན། དེའི་ཕྱིར་ལ་ལར་ཀླག་པ་དང༌། ཁ་ཏོན་དང༌། འདུག་པ་དང༌། བཅག་པ་དག་ལས་གང་ཡང་རུང་བ་བྱ། ལ་ལར་ལྷུང་བཟེད་དང་ཆོས་གོས་གཞག་པར་བྱ། ལ་ལར་མཚན་མེ་ཉལ་བར་བྱ། ལ་ལར་སྔ་དྲོ་དང་དུས་ཚིགས་དང་བྱི་དྲེ་འདུག་པས་དེ་ལ་སྦྱར་བར་བྱའོ་ཞེས་བྱ་བ་སྨྲས་ཏེ། ཐམས་ཅད་ཡོངས་སུ་སྤྱད་པར་བྱ་བ་དེ་ལ་ཐབས་དེ་ལྟར་སྦྱར་བར་བྱའོ། །དེ་ལ་གཞུང་ཁ་ཅིག་ལས་ནི། ལ་ལར་བཀླག་པར་བྱ། ལ་ལར་ཁ་ཏོན་བྱ། ལ་ལར་ལྷུང་བཟེད་དང་ཆོས་གོས་གཞག་བར་བྱ། ལ་ལར་ཉལ་བར་བྱའོ་ཞེས་གསུངས་སོ། །གཞུང་ཁ་ཅིག་ལས་ནི་ལ་ལར་སྔ་དྲོ་འདུག་པར་བྱ། ལ་ལར་གུང་ཚིགས་ལ་འཇུག་པར་བྱ། ལ་ལར་ཕྱི་དྲོ་འདུག་པར་བྱ། ལ་ལར་མཚན་མོ་འདུག་པར་བྱའོ་ཞེས་གསུངས་པས་དེའི་ཕྱིར་དེ་གཉི་ག་བསྡུ་བའི་ཕྱིར་མདོ་འདི་བྱས་སོ། །གནས་པར་ཁས་བླངས་པས་གནས་ཀྱི་གཞི་རལ་པ་དང་འདྲུམས་པ་བཅོས་པར་བྱའོ་ཞེས་བྱ་བ་ནི། དགེ་སློང་དབྱར་གནས་པར་ཁས་བླངས་པས་གནས་ཀྱི་གཞི་རལ་བ་དང་འདྲུམས་པ་ཕྱིར་བཅོས་པར་བྱའོ། །རལ་བཞེས་བྱ་བ་ནི་ཕྱོགས་གཅིག་ཆད་པའོ། །འདྲུམས་བཞེས་བྱ་བ་ནི་གས་པའོ། །དགེ་སློང་མ་དག་དབྱར་གནས་པ་རྣམས་ཀྱིས་དབྱར་ཁང་བཅོས་པར་བྱའོ་ཞེས་བྱ་བ་ནི། རལ་པ་དང་འདྲུམས་པ་སྟེ་དེ་ཡང་དབྱར་ཁང་གཅིག་ལ་ཡང་དགེ་སློང་མ་ཐམས་ཅད་སྤྱིས་ལོག་སྟེ་བཅོས་པར་བྱ་བ་ཡིན་གྱི། གནས་ཁང་གང་ན་གང་གནས་གནས་པ་དེས་དེ་ཉི་ཅོས་བཅོས་པ་མ་ཡིན་ནོ། །འཐབ་ཀྲོལ་ཅན་གྱིས་གནས་མི་ཐོབ་པར་བྱ་བའི་ཕྱིར་དགུན་མནོད་པ་དང་དཔྱིད་མནོད་པའི་གནས་མལ་ཡང་བསྟབས་པར་བྱའོ་ཞེས་བྱ་བ་ནི། གང་ཟག་འཐབ་ཀྲོལ་ཅན་དག་གཞན་ནས་འོངས་བས་མཚམས་ཀྱི་ནང་དུ་
གནས་མི་ཐོབ་པར་བྱ་བའི་ཕྱིར་དགུན་དང་དཔྱིད་མནོད་པར་གནས་མལ་གཉིས་ཀྱང་བསྟབས་པར་བྱའོ། །རིལ་གྱིས་བསྐོ་བར་བྱའོ་ཞེས་བྱ་བ་ནི། འཐབ་ཀྲོལ་ཅན་གྱི་གནས་མི་ཐོབ་པར་བྱ་པའི་ཕྱིར་གནས་མལ་རིལ་གྱིས་བསྐོ་བར་བྱའོ། །དེ་ཉིད་བསྟན་པའི་ཕྱིར། འདི་ལྟ་སྟེ་གཙུག་ལག་ཁང་དང་ཁང་ཁྱིམ་དག་གི་ཉེན་ཀོར་ཡང་བོ་ཞེས་བྱ་བ་སྨྲས་ཏེ། གཙུག་ལག་ཁང་དང་ཁང་ཁྱིམ་དག་གི་ཉེན་ཀོར་ཡང་མ་ལུས་པར་རིལ་གྱིས་བསྐོ་བར་བྱ་བའོ། །ཁྱམས་ཀྱི་དེ་ཡང་ངོ་ཞེས་བྱ་བ་ནི་ཁྱམས་ཀྱི་ཉེན་ཀོར་དེ་ཡང་རིལ་གྱིས་བསྐོ་བར་བྱ་བའོ། །དེ་དག་དོང་ང་ཉིད་ཀྱི་འོག་ཏུ་དེ་དག་མི་གཏད་པར་མི་བྱའོ་ཞེས་བྱ་བ་ནི། འཐབ་ཀྲོལ་ཅན་དེ་དག་དོང་བའི་འོག་ཏུ་གཙུག་ལག་ཁང་དང་ཁང་ཁྱིམ་དང་ཁྱམས་དེ་དག་གི་ཉེན་ཀོར་དེ་དག་སྔ་མ་ཁོ་ན་བཞིན་དུ་མི་གཏང་བར་མེ་བྱ་བ་སྟེ། ལྷུག་པར་གཏང་བར་བྱའོ། །རང་བཞིན་དུ་གནས་པའི་ཕྱིར་སྒྱུ་ཐབས་ཀྱིས་མི་བྱའོ་ཞེས་བྱ་བ་ནི། དགེ་སློང་རང་བཞིན་དུ་གནས་པ་ཚུལ་ཁྲིམས་དང་ལྡན་བ་འཐབ་ཀྲོལ་ཅན་མ་ཡིན་པའི་ཕྱིར། སྒྱུ་ཐབས་ཞེས་བྱ་བ་བགེགས་མི་བྱ་བ་སྟེ། འདི་ནི་བསྐོ་བའི་དུས་འབའ་ཞིག་ཏུ་མ་ཟད་ཀྱི། དུས་ཐམས་ཅད་དུ་ཡང་དེ་བཞིན་ནོ། །འབྱུང་བའི་དོན་དུ་ནི་མི་བསྐོའོ་ཞེས་བྱ་བ་ནི། དགེ་སློང་ད་ལྟར་མི་གནས་པ་ཕྱིས་འབྱུང་བར་འགྱུར་བའི་དོན་དུ་ནི་གནས་མལ་སྔ་ནས་བསྐོ་བར་མི་བྱའོ། །དེ་ཉིད་བསྟན་པའི་ཕྱིར། འདི་ནི་དུས་ཚིགས་དང་ཉིན་མཚན་དང་དེའི་ཡན་ལག་ཆེ་གེ་མོ་ཞིག་ནི་འབྱུང་བའི་འོ། །འདི་ནི་མཁན་པོ་དང་སློབ་དཔོན་ཆེ་གེ་མོ་ཞིག་འབྱུང་པའིའོ། །འདི་ནི་ལྷན་ཅིག་གནས་པ་ཉེ་གནས་ཆེ་གེ་མོ་ཞིག་འབྱུང་བའི་འོ། །འདི་ནི་གཏམ་འདྲེས་པ་དང་ཕེབས་པར་སྨྲ་བ་དང་འགྲོགས་བཤེས་དང་སྨོས་འགྲིན་ལ་སོགས་པ་ཆེ་གེ་མོ་ཞིག་འབྱུང་བའི་འོ་ཞེས་གཙུག་ལག་ཁང་དག་བསྐོ་བར་མི་བྱའོ་ཞེས་བྱ་བ་སྨྲས་ཏེ། གནས་ཁང་བསྐོ་བས་འདི་སྐད་ཅེས་གཙུག་ལག་ཁང་འདི་ནི་དགུན་དང༌། དགུན་སྨད་དང༌། དཔྱིད་དང༌། སོས་ཀ་དང༌། དབྱར་དང་སྟོན་གྱི་དུས་ཚིགས་ཆེ་གེ་མོ་ཞིག་ན་འབྱུང་བའི་གནས་སུ་བསྐོའོ། །གཙུག་ལག་ཁང་འདི་ནི་སང་དང་གནངས་དང་གཞེས་དང་ཚེས་གཅིག་དང་གཉིས་དང༌། གསུམ་ལ་སོགས་པའི་ཉིན་མཚན་ཆེ་གེ་མོ་ཞིག་ན་འབྱུང་བའི་གནས་སུ་བསྐོའོ། །གཙུག་ལག་ཁང་
འདི་ནི་སྔ་དྲོ་དང་གུང་ཚིགས་དང་ཕྱི་དྲོ་དང་ཐུན་དང་པོ་དང་གཉིས་པ་དང་གསུམ་པ་དང་བཞི་པ་ཞེས་བྱ་བ་ཉིན་མཚན་དེའི་ཡན་ལག་ཆེ་གེ་མོ་ཞིག་ན་འབྱུང་བའི་གནས་སུ་བསྐོའོ། །གཙུག་ལག་ཁང་འདི་ནི་མཁན་པོ་འམ་སློབ་དཔོན་ཆེ་གེ་མོ་ཞིག་འབྱུང་བའི་གནས་སུ་བསྐོའོ་ཞེས་བྱ་བ་ལ་སོགས་པ་ལྟ་བུ་ཕྱིས་འབྱུང་བའི་དོན་དུ་གཙུག་ལག་ཁང་དག་བསྐོ་བར་མི་བྱའོ། །མནོད་པར་མི་བྱའོ་ཞེས་བྱ་བ་ནི། གཞན་གྱིས་བསྐོས་ཀྱང་མནོད་པར་མི་བྱའོ། །འདིར་གཞུང་ནི་འབྱུང་བའི་དོན་དུ་གཙུག་ལག་ཁང་བསྐོ་བར་མི་བྱ། བསྐོར་གཞུག་པར་མི་བྱ་འོ་ཞེས་གསུངས་པ་ཡིན་ཏེ། དེ་ལ་མདོ་སྔ་མས་ནི་བསྐོ་བར་མི་བྱའོ་ཞེས་གསུངས་པས་བསྡུས་སོ། །མདོ་འདིས་ནི་བསྐོར་གཞུག་པར་མི་བྱའོ་ཞེས་གསུངས་པས་བསྡུས་སོ། །ཚད་གཞིག་པའི་ཕྱིར་དབྱུག་གུ་ཐོགས་པ་བསྐོ་བར་བྱའོ་ཞེས་བྱ་བ་ནི། བྱེའུ་ལ་སོགས་པའི་ཚད་གཙུག་ལག་ཁང་དུ་འཆའ་བ་གཞིག་པའི་ཕྱིར་དགེ་སློང་དབྱུག་གུ་ཐོགས་པ་བསྐོ་བར་བྱའོ། །དེས་ཇི་ལྟར་གཞིག་པར་བྱ་ཞེ་ན་དེའི་ཕྱིར། སྒོ་ང་མེད་པ་རྣམས་ནི་གདོན་པར་བྱའོ་ཞེས་བྱ་བ་སྨྲས་ཏེ། ཚང་སྒོ་ང་མེད་པ་རྣམས་ནི་དབྱུག་གུ་ཐོགས་པས་གདོན་ཅིང་དབྱུང་བར་བྱའོ། །ཕྲ་མོ་རྣམས་ཀྱི་ནི་མི་སྤེལ་བར་བྱ་བའི་ཕྱིར་སྐུད་པས་དཀྲིའོ་ཞེས་བྱ་བ་ནི། སྦྲང་བུ་ཏྲྱ་མ་བུ་ཀ་དང༌། ཏྲཻ་ལ་ཏ་ཀ་ལ་སོགས་པ་དག་གི་ཚང་གང་ཡིན་པ་དེ་དག་ནི་མི་འཕེལ་བར་བྱ་བའི་ཕྱིར་སྐུད་པས་དཀྲི་བར་བྱའོ། །འདིར་གཞུང་ནི་མི་འཕེལ་བར་བྱ་བའི་ཕྱིར་སྐུད་པས་དཀྲིའོ་ཞེས་གསུངས་པ་ཡིན་ཏེ། དེ་ལ་ཚང་སྐུད་པས་དཀྲིས་ན་དེ་དག་གིས་ཡང་ཕྱིར་སྐྱེད་པར་མི་ནུས་པའི་ཕྱིར་རོ། །གནས་མལ་ལ་སོགས་པ་སྦྱིན་ནོ་ཞེས་བྱ་བ་ལ། གོས་ལ་སོགས་པ་ཡང་བསྡུ་བའི་ཕྱིར་སོགས་པ་ཞེས་བྱ་བའི་སྒྲ་སྨོས་སོ། །ཡོད་པ་ཉིད་ན་དུ་མ་ཡང་ངོ་ཞེས་བྱ་བ་ནི། ཁྲི་ལ་སོགས་པ་ཡོད་པ་ཉིད་ཡིན་ན། གང་ཟག་གཅིག་ལ་ཡང་དུ་མ་སྦྱིན་པར་བྱ་བ་སྟེ། གལ་ཏེ་རྒན་རིམས་ཀྱིས་ཁྲི་ལ་སོགས་པ་ལན་གཉིས་བསྟབས་སུ་ཡོད་དམ་ལན་གསུམ་ལ་སོགས་པ་བསྟབས་སུ་ཡོད་ན་ཡང་དེ་བཞིན་དུ་བསྟབས་ཤིང་སྦྱིན་པར་བྱའོ། །གལ་ཏེ་ལན་གྲངས་གཞན་ལ་ཁྱེད་པར་བྲིམ་དུ་མེད་ན་ཡང་རྒན་རིམས་ནས་བརྩམས་ཏེ་ཇི་ཙམ་ཁྱེད་པ་ཡན་ཆད་ལ་བྲིམ་བར་དོན་གྱིས་ཤེས་
པར་བྱ་སྟེ། འདི་ལྟར་རྒན་རིམས་ནས་བརྩམས་ཏེ། རྙེད་པར་བྲིམ་མོ་ཞེས་གསུངས་པའི་ཕྱིར་རོ། །ཁྲི་ཆེན་པོ་དག་ཀྱང་བསྐོ་བར་བྱ་བ་ཉིད་ཡིན་ནོ་ཞེས་བྱ་བ་ནི། ཁྲིའི་ཚད་ཆེན་པོ་ནི་ཁྲི་ཆེན་པོ་སྟེ། གང་དག་ལ་མལ་ཡང་བཅར་རུང་བའོ། །དེ་བས་ན་ཁྲི་ཆེན་པོ་དེ་ལྟ་བུ་དག་ཀྱང་རྒན་རིམས་སུ་བསྐོར་བར་བྱའོ། །སྟན་དག་ཀྱང་ངོ་ཞེས་བྱ་བ་ཡང་བསྐོ་བར་བྱ་བ་ཉིད་ཡིན་ནོ། །འདིར་གཞུང་ནི་དེ་ལྟ་བས་ན་ཁྲི་ཆེན་པོ་དག་ཀྱང་རྒན་རིམས་བཞིན་དུ་བསྐོ་བར་བྱ་ཞིང་ཐ་ན་སྟན་དག་ཀྱང་ངོ་ཞེས་གསུངས་པ་ཡིན་ནོ། །དགེ་འདུན་གྱིས་གནས་མལ་གཡོགས་པ་དགེ་ཚུལ་མི་གཅང་བས་ཉམས་པར་བྱེད་པའི་ཆོས་ཅན་ལ་སུས་ཀྱང་མི་སྦྱིན་ནོ་ཞེས་བྱ་བ་ནི། དགེ་འདུན་གྱི་གནས་མལ་ཁྲི་ལ་སོགས་པ་གོས་ལ་སོགས་པས་གཡོགས་པ་དག་དགེ་ཚུལ་འོག་རྫིང་ཅན་ནམ་ཟ་གུ་མི་གཅང་བས་གནས་མལ་ཉམས་པར་བྱེད་པའི་ཆོས་ཅན་ལ་མི་སྦྱིན་པའོ། །སུས་ཀྱང་ཞེས་སྨོས་པའི་སྒྲས་ནི། གནས་མལ་སྟོབས་པ་འབའ་ཞིག་ཏུ་མ་ཟད་ཀྱི། གཞན་དག་གིས་ཀྱང་སྦྱིན་པར་མི་བྱའོ་ཞེས་བྱ་བར་སྟོན་ཏོ། །དགེ་སློང་མལ་ཡང་མི་སྦྱིན་ནོ་ཞེས་བྱ་བ་ནི། དགེ་འདུན་གྱིས་གནས་མལ་གཡོགས་པ་དག་དགེ་སློང་མ་མི་གཙང་བས་ཉམས་པར་བྱེད་པའི་ཆོས་ཅན་ལ་ཡང་སུས་ཀྱང་མི་སྦྱིན་པའོ། །འདིར་གནས་འབྱོར་ན་དེ་ལ་འདབ་ཏུ་གཙུག་ལག་ཁང་སྦྱིན་ནོ་ཞེས་བྱ་བ་ནི། དགེ་སློང་གི་གཙུག་ལག་ཁང་འདིར་གནས་ལྟག་པ་འབྱོར་པ་ཡོད་ན་དགེ་སློང་མ་རང་གི་ཚོགས་ཀྱི། དབྱར་ཁང་མེད་པ་ཆོམ་རྐུན་ལ་སོགས་པ་རྐྱེན་གྱི་དབང་གིས་ལོགས་ཤིག་ན་གནས་པ་གྲ་མི་ཐུབ་པ་དེ་ལ་དགེ་སློང་གི་གཙུག་ལག་ཁང་གི་འདབ་ཀྱི་ཕྱོགས་སུ་གནས་ཁང་སྦྱིན་པར་བྱ་བའོ། །གནས་མལ་ལྷག་པ་བཟང་པོ་མ་ཡིན་པ་ཡང་དོ་ཞེས་བྱ་བ་ནི། དགེ་སློང་མདོ་ལ་སྦྱིན་ནོ་ཞེས་བྱ་བར་སྦྱར་ཏེ། དགེ་འདུན་གྱི་གནས་མལ་མལ་ཆ་དང་སྟན་ལ་སོགས་པ་ཐ་ན་ཁྲིའུ་དང་ཆོལ་ཟངས་ཀྱི་བར་ཡན་ཆད་ཀྱང་དགེ་སློང་ཐམས་ཅད་ལ་ཁྱེད་པར་བྲིམས་ཏེ། གལ་ཏེ་ལྷག་མ་འཐེབ་ཡོད་ན་དེའི་ནང་ནས་བཟང་པོ་མ་ཡིན་པ་དགེ་སློང་མ་དེ་ལ་སྦྱིན་པར་བྱའོ། །དེ་ལྟར་གནས་མལ་སྟོབས་པའི་དགེ་འདུན་ལ་རྒན་རིམས་ཀྱིས་གནས་མལ་བསྟབས་ཟིན་ནས་ཐམས་ཅད་ལ་འདི་སྐད་ཅེས་ཁྱེད་ཅག་ལས་གང་གིས་ཀྱང་དགེ་འདུན་གྱི་གནས་མལ་ལ་
གདིང་བ་མེད་པར་ལོངས་སྤྱད་པར་མི་བྱ་གདིང་བ་རུང་བ་མ་ཡིན་པས་ལོངས་སྤྱད་པར་མི་བྱ་གདིང་བ་དྲི་མ་ཅན་གྱིས་ལོངས་སྤྱད་པར་མི་བྱའོ་ཞེས་གོ་བར་བྱའོ་ཞེས་བྱ་བ་ནི། དགེ་སློང་རྣམས་ལ་གདིང་བ་མེད་པ་དང་གདིང་བ་རུང་བ་མ་ཡིན་པ་དང་གདིང་བ་དྲི་མ་ཅན་གྱིས་དགེ་འདུན་གྱི་མལ་ཆ་དང་སྟན་ལ་སོགས་པ་སྤྱད་པར་མི་བྱ་བའི་བསླབ་པའི་གཞི་ཡོད་པའི་ཕྱིར་དེ་དག་ལ་བསྐུལ་ཞིང་ནན་ཏུར་བྱ་བའི་ཆེད་དུ་དེ་སྐད་གོ་བར་བྱའོ། །ཟླ་བ་ཕྱེད་བྱེད་ཅིང་སོ་སོར་བརྟག་པར་བྱའོ་ཞེས་བྱ་བ་ནི། དགེ་སློང་རྣམས་ཀྱིས་གནས་མལ་མནོས་པ་གནས་མལ་སྟོབས་པས་ཟླ་བ་ཕྱེད་བྱེད་ཅིང་བྱུལ་ཞིང་བརྟག་པར་བྱའོ། །དམ་ཚིག་ལས་འདས་ཤིང་སྤྱད་ན་གནས་པའི་གནས་ལ་གཞན་ནི་དགེ་འདུན་ལ་བརྗོད་དེ་དབྲོག་པར་བྱའོ་ཞེས་བྱ་བ་ནི། ཁྱེད་ཅག་ལས་གང་གིས་ཀྱང་དགེ་འདུན་གྱི་གནས་མལ་ལ་གདིང་བ་མེད་པར་ལོངས་སྤྱད་པར་མི་བྱ་ཞེས་བྱ་བ་ལ་སོགས་པའི་དམ་ཚིག་སྔར་བསྒོ་བ་དེ་ལས་འདས་ཤིང་སྤྱོད་པ་དག་བྱུང་ན་དེ་གལ་ཏེ་སློབ་མ་དང་ཉེ་གནས་སུ་གནས་པ་ཞིག་ཡིན་ན་ནི་དེའི་གནས་མཁན་པོ་དང་སློབ་དཔོན་གང་ཡིན་པ་ལ་བརྗོད་དེ་དགེ་འདུན་གྱིས་གནས་མལ་དེ་ཕྱིར་དབྲོག་པར་བྱའོ། །གལ་ཏེ་དེ་གནས་པ་མ་ཡིན་པ་གཞན་ཞིག་ཡིན་ན་ནི་དགེ་འདུན་ལ་བརྗོད་དེ་དགེ་འདུན་གྱིས་གནས་མལ་དེ་ཕྱིར་དབྲོག་པར་བྱའོ། །གནས་མལ་སྟོབས་པ་དེས་ཆེས་བཅོ་ལྔའི་ཉིན་མོ་དགེ་འདུན་ལ་གནས་མལ་བསྟབས་ཟིན་ནས་འདི་སྐད་ཅེས་བརྗོད་པར་བྱ་སྟེ། དགེ་འདུན་སང་སྦྱིན་བདག་ཆེ་གེ་མོ་དང་ཞལ་ཏ་བ་ཆེ་གེ་མོ་དང༌། སྤྱོད་ཡུལ་གྱི་གྲོང་ཆེ་གེ་མོ་དང༌། ནད་གཡོག་ཆེ་གེ་མོས་གནས་པར་ཞལ་གྱིས་བཞེས་པར་འགྱུར་རོ་ཞེས་བརྗོད་པར་བྱའོ་ཞེས་བྱ་བ་ནི། དབྱར་ཟླ་འབྲིང་པོ་ཉ་འམ་དབྱར་ཟླ་ཐ་ཆུངས་ཉའི་དུས་དེར་དེ་སྐད་བརྗོད་པར་བྱའོ། །དགེ་འདུན་དུ་གྱུར་བའི་དགེ་སློང་རྣམས་ཀྱིས་ཀྱང་དེའི་ཚེ་ཇི་ལྟར་སོ་སོར་བརྟགས་ཏེ་གནས་པར་ཁས་བླང་བར་བྱ་ཞེ་ན། དེའི་ཕྱིར་འགྱོད་པ་དང་གཞན་སྡུག་བསྔལ་བ་དང་ཡིད་མི་བདེ་བ་མི་སྐྱེད་པ་ཉིད་དང་སེལ་བ་ཉིད་དག་དང༌། བདེ་བ་དང་ཡིད་བདེ་བསྐྱེད་པ་ཉིད་དང་རྗེས་སུ་སྲུང་བ་ཉིད་དག་དང་ནད་གཡོག་ཉིད་ཚངས་པ་མཚུངས་པར་སྤྱོད་བདག་ལས་འབྱུང་བ་སོ་སོར་བརྟགས་པས་གནས་དང་སྤྱོད་ཡུལ་དང་བསོད་སྙོམས་དང༌། སྨན་སྦྱིན་པར་བྱེད་པ་ལ་རྣམ་པར་བལྟས་ཏེ་གནས་པར་ཁས་བླང་
བར་བྱའོ་ཞེས་བྱ་བ་སྨྲས་ཏེ། འགྱོད་པ་དང་འགྱོད་པ་ལས་གཞན་པའི་སྡུག་བསྔལ་དང༌། ཡིད་མི་བདེ་བ་མ་སྐྱེས་པ་མི་སྐྱེད་པ་ཉིད་དང༌། སྐྱེས་པ་སེལ་བར་བྱེད་པ་ཉིད་དག་ཚངས་པ་མཚུངས་པར་སྤྱོད་པ་དག་གིས་ཡུལ་ལས་འབྱུང་བར་འགྱུར་པ་སོ་སོར་བརྟགས་པས་གནས་ལ་རྣམ་པར་བལྟ་སྟེ། དེ་ལྟ་བུ་འབྱུང་བར་འགྱུར་ན་གནས་པར་ཁས་བླང་བར་བྱའོ། །དེ་བཞིན་དུ་བདེ་བ་དང་ཡིད་བདེ་བ་མ་སྐྱེས་པ་སྐྱེད་པ་ཉིད་དང༌། སྐྱེས་པ་རྗེས་སུ་སྲུང་བར་བྱེད་པ་ཉིད་དག་ཚངས་པ་མཚུངས་པར་སྤྱོད་པ་དག་གིས་ཡུལ་ལས་འབྱུང་བར་འགྱུར་བ་སོ་སོར་བརྟགས་པས་གནས་ལ་རྣམ་པར་བལྟས་ཏེ། དེ་ལྟ་བུ་འབྱུང་བར་འགྱུར་ན་གནས་པར་ཁས་བླང་ངོ༌། །དེ་བཞིན་དུན་བར་གྱུར་ན་ནད་གཡོག་ཉིད་ཚངས་པ་མཚུངས་པར་སྤྱོད་པ་དག་གིས་ཡུལ་ལས་འབྱུང་བར་འགྱུར་པ་སོ་སོར་བརྟགས་པས་གནས་ལ་རྣམ་པར་བལྟས་ཏེ། དེ་ལྟ་བུ་འབྱུང་བར་འགྱུར་ན་གནས་པར་ཁས་བླང་ངོ༌། །དེ་བཞིན་དུ་སྤྱོད་ཡུལ་གྱི་གྲོང་གང་ནས་བསོད་སྙོམས་ལ་སོགས་པ་ཐོབ་པར་འགྱུར་བ་སོ་སོར་བརྟགས་པས་སྤྱོད་ཡུལ་ལ་རྣམ་པར་བལྟས་ཏེ། དེ་ལྟ་བུ་ཡོད་པར་གྱུར་ན་གནས་པར་ཁས་བླང་ངོ༌། །དེ་བཞིན་དུ་སྦྱིན་བདག་གང་གིས་བསོད་སྙོམས་པར་ན་བའི་རྐྱེན་དང་སྨན་གྱི་ཡོ་བྱད་སྦྱོར་བ་ལ་སོ་སོར་བརྟགས་པས་བསོད་སྙོམས་དང་སྨན་སྦྱིན་པར་བྱེད་པ་ལ་རྣམ་པར་བལྟས་ཏེ། དེ་ལྟ་བུ་ཡོད་པར་གྱུར་ན་གནས་པར་ཁས་བླང་ངོ་ཞེས་བྱ་བར་སྦྱར་རོ། །དེ་དག་ཐམས་ཅད་མེད་ན་དེར་གནས་པར་ཁས་བླང་བར་མི་བྱའོ། །དེ་ལ་སྡུག་བསྔལ་ཞེས་བྱ་བ་ནི་ལུས་ཀྱིའོ། །ཡིད་མི་བདེ་བ་ཞེས་བྱ་བ་ནི་ཡིད་ཀྱིའོ། །མི་བསྐྱེད་པ་ཞེས་བྱ་བ་ནི་མ་སྐྱེས་པ་མི་སྐྱེད་པའོ། །སེལ་བ་ཉིད་ཅེས་བྱ་བ་ནི། སྐྱེས་པའི་ཕྱིར་འཆོས་པར་བྱེད་པའོ། །བདེ་བ་ཞེས་བྱ་བ་ནི་ལུས་ཀྱིའོ། །ཡིད་བདེ་བཞེས་བྱ་བ་ནི་ཡིད་ཀྱིའོ། །སྐྱེས་པ་ཉིད་ཅེས་བྱ་བ་ནི་མ་སྐྱེས་པ་སྐྱེད་པའོ། །རྗེས་སུ་བསྲུང་བ་ཉིད་ཅེས་བྱ་བ་ནི། ཚོགས་པ་སྐྱེས་པ་རྣམས་ཅི་ནས་ཀྱང་ཉམས་པར་མི་འགྱུར་བདེ་ལྟར་ཀུན་ཏུ་སྤྱོད་པའོ། །སོ་སོར་བརྟགས་པས་ཞེས་བྱ་བ་ནི། སོ་སོར་ཤེས་པར་བྱ་བས་སོ། །འདིར་གཞུང་ནི་དགེ་སློང་དེས་འདི་ལྟར་བརྟག་པར་བྱ་སྟེ། གནས་འདི་ན་བདག་གི་ཚངས་པ་མཚུངས་པར་སྤྱོད་པ་གང་དག་བདག་གིས་འགྱོད་པ་དང་སྡུག་བསྔལ་བ་དང་ཡིད་མི་བདེ་བ་མ་སྐྱེས་པ་མི་སྐྱེད་པ་ཉིད་དང༌།
སྐྱེས་པ་སེལ་བ་ཉེད་དང་བདེ་བ་དང་ཡིད་བདེ་བ་མ་སྐྱེས་པ་སྐྱེད་པ་ཉིད་དང༌། སྐྱེས་པ་རྗེས་སུ་བསྲུང་པ་ཉིད་དག་དང་བདག་ནན་ནད་གཡོག་བྱེད་པ་པོ་དེ་ལྟ་བུ་དག་ཡོད་དམ་ཞེས་སོ་སོར་བརྟགས་པས་གནས་ལ་རྣམ་པར་བལྟ་བར་བྱ་ཞིང་སྤྱོད་ཡུལ་འདི་ན་བདག་གས་བསོད་སྙོམས་དང་སྨན་སྦྱིན་པར་བྱེད་པ་ཡོད་དམ་ཞེས་སོ་སོར་བརྟགས་པས་སྤྱོད་ཡུལ་དང་སྦྱིན་བདག་ལ་རྣམ་པར་བལྟས་ཏེ། དེའི་འོག་ཏུ་གནས་པར་ཁས་བླང་བར་བྱའི། གཞན་དུ་ན་གནས་པར་ཁས་བླང་བར་མི་བྱའོ་ཞེས་གསུངས་པ་ཡིན་ནོ། །གང་དུ་གནས་པར་ཁས་བླང་བར་བྱ་ཞེ་ན། དེའི་ཕྱིར་གཡོགས་པར་དགེ་སློང་གི་མདུན་རོལ་དུའོ་ཞེས་བྱ་བ་སྨྲས་ཏེ། གནས་སྟེང་གཡོགས་པའི་ནང་གི་ཕྱོགས་དེར་དགེ་སློང་གི་མདུན་དུ་ཚེས་བཅུ་དྲུག་གི་ནང་པར་གནས་པར་ཁས་བླང་བར་བྱའོ། །དེའི་སྔགས་ནི་ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བགྱི་བ་མཚམས་ཀྱི་ནང་དང་བཅས་པའི་གནས་འདིར་འདི་ལྟ་སྟེ། གནས་རལ་བ་དང་འདྲུམས་པ་བཅོས་པའི་སླད་དུ་སྦྱིན་བདག་མིང་འདི་ཞེས་བགྱི་བ་དང༌། ཞལ་ཏ་བ་མིང་འདི་ཞེས་བགྱི་བ་དང༌། སྤྱོད་ཡུལ་གྱི་གྲོང་ཆེ་གེ་མོ་ཞེས་བགྱི་བ་དང་བྲོ་གཡོག་ཆེ་གེ་མོ་ཞེས་བགྱི་བས་དབྱར་སྔ་མ་ཟླ་བ་གསུམ་གནས་པར་ཁས་བླང་ངོ༌། །བདག་དབྱར་འདི་ན་མཆིས་ཤིང་བདག་གི་དབྱར་གནས་ནི་འདི་ལགས་སོ་ཞེས་ལན་གསུམ་བརྗོད་པར་བྱའོ་ཞེས་གསུངས་པ་ཡིན་ནོ། །དབྱར་ཕྱི་མ་ལ་ནི་དབྱར་ཕྱི་མ་ཟླ་བ་གསུམ་གནས་པར་ཁས་བླང་ངོ་ཞེས་སྔགས་ཀྱི་བྱེ་བྲག་ཏུ་བྱའོ། །གཙུག་ལག་ཁང་དུ་མར་མི་བྱའོ་ཞེས་བྱ་བ་ནི། གཙུག་ལག་ཁང་དུ་མར་མཚམས་དུ་མར་རྫས་གཅིག་གིས་མནན་ཏེ། དགེ་སློང་གིས་གནས་པར་ཁས་བླང་བར་མི་བྱའོ། །འདིར་གཞུང་ནི་དགེ་སློང་གིས་གཙུག་ལག་ཁང་གཉིས་སུ་དབྱར་གནས་པར་ཁས་བླང་པར་མི་བྱ་བའོ། །བྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །གང་ན་དགེ་སློང་མེད་པ་ཉིད་དང་སྒོ་གླེགས་མེད་པ་ཉིད་དང་བཅས་པར་ཡང་མི་བྱའོ་ཞེས་བྱ་བ་ནི། གཙུག་ལག་ཁང་གང་ན་འདི་གཉི་ག་མེད་པའི་གཙུག་ལག་ཁང་དེར་ཡང་གནས་པར་ཁས་བླང་བར་མི་བྱ་བའོ། །སྦྱིན་བདག་དང་ཞལ་ཏ་བ་དང་སྤྱོད་ཡུལ་གྱི་གྲོང་དང་ནད་གཡོག་དག་ཡོད་པ་ཉིད་ཡིན་ན་བརྗོད་པར་བྱའོ་ཞེས་བྱ་བ་ནི། གལ་ཏེ་གནས་དེ་
ན་དེ་དག་ཡོད་པ་ཉིད་ཡིན་ན་སྔར་ཚེས་བཅོ་ལྔའི་ཉིན་པར་གནས་མལ་སྟོབས་པས་ཀྱང་དགེ་འདུན་ལ་སང་སྦྱིན་བདག་ཆེ་གེ་མོ་དང་ཞལ་ཏ་བ་ཆེ་གེ་མོ་དང་སྤྱོད་ཡུལ་གྱི་གྲོང་ཆེ་གེ་མོ་དང་ནད་གཡོག་ཆེ་གེ་མོས་གནས་པར་ཞལ་གྱིས་བཞེས་པར་འགྱུར་རོ་ཞེས་བརྗོད་པར་བྱ་ཞིང༌། ཚེས་བཅུ་དྲུག་གི་ནང་པར་དགེ་འདུན་གནས་པར་ཁས་ལེན་པའི་སྔགས་བརྗོད་པའི་ཚེ་ཡང་དེ་སྐད་བརྗོད་པར་བྱའོ།། །།བམ་པོ་བཞི་བཅུ་དགུ་པ། བྱིན་གྱིས་མ་བརླབས་པར་མཚམས་ཀྱི་ཕྱི་རོལ་དུ་སྐྱ་རེངས་འཆར་བར་མི་བྱའོ་ཞེས་བྱ་བ་ནི། དགེ་སློང་དབྱར་གནས་པར་ཁས་བླངས་བས་ཞག་བདུན་ལ་སོགས་པར་བྱིན་གྱིས་མ་བརླབས་པར་མཚམས་ཀྱི་ཕྱི་རོལ་དུ་སྐྱ་རེངས་འཆར་བར་མི་བྱའོ། །སྐྱ་རེངས་མགར་ཚུན་ཆད་ཀྱི་དུས་སུ་མཚམས་ཀྱི་ཕྱི་རོལ་དུ་འདའ་བར་བྱེད་པ་ལ་ནི་ཉེས་པ་མེད་དེ། དེ་ལྟར་ཡང་གལ་ཏེ་འགྲོ་ན་དེར་ཡང་གནས་པར་མི་བྱའོ་ཞེས་གསུངས་པའི་ཕྱིར་རོ། །ཆོས་དང་ལྡན་པའི་དོན་ཏུ་ཞག་བདུན་བྱིན་གྱིས་བརླབ་པར་བྱའོ་ཞེས་བྱ་བ་ནི། ཆོས་དང་མི་འབྲལ་བ་ནི་ཆོས་དང་ལྡན་པ་སྟེ། དེའི་དོན་གྱི་ཆེད་དུ་མཚམས་ཀྱི་ཕྱི་རོལ་དུ་འགྲོ་ན་ཞག་གཅིག་གམ་གཉིས་སམ་བདུན་མན་ཆད་ཇི་ཙམ་གྱིས་དོན་དེ་འགྲུབ་པ་དེ་ཙམ་གྱི་དུས་མཚམས་ཀྱི་ནང་དུ་དགེ་སློང་གཅིག་གི་མདུན་དུ་བྱིན་གྱིས་བརླབས་ཏེ་འགྲོ་བར་བྱའོ། །འདིའི་སྔགས་ནི་ཚེ་དང་ལྡན་པ་དངོས་སུ་གསོལ། བདག་མིང་འདི་ཞེས་བགྱི་བ་མཚམས་ཀྱི་ནང་དང་བཅས་པའི་གནས་འདིར་དབྱར་སྔ་མ་ཟླ་བ་གསུམ་གནས་པར་ཁས་བླངས་པ་ལས་བདག་མེད་འདི་ཞེས་བགྱི་བ། བགྱི་བ་ཞིག་གི་སླད་དུ་དགུང་བདུན་མཚམས་ཀྱི་སླད་རོལ་དུ་མཆི་བ་དང༌། དེ་ཚུན་ཆད་ཀྱིས་སླར་མཆིས་པར་བྱིན་གྱིས་བརླབ་པོ། །བདག་དབྱར་འདི་ན་མཆིས་ཤིང་བདག་གི་དབྱར་གྱི་གནས་ནི་འདི་ལགས་སོ་ཞེས་ལན་གསུམ་བཟླས་སོ་ཞེས་གསུངས་པ་ཡིན་ནོ། །དབྱར་ཕྱི་མ་ལ་ནི་དབྱར་ཕྱི་མ་ཟླ་བ་གསུམ་གནས་པར་ཁས་བླང་པ་ལས་ཞེས་སྔགས་ཀྱི་བྱེ་བྲག་ཏུ་བྱའོ། །འདིར་ཞག་བདུན་ཞེས་སྨོས་པ་ནི་མཚོན་པ་ཙམ་དུ་ཟད་དོ། །ཞག་གཅིག་གམ་གཉིས་སམ་བདུན་མན་ཆད་ཇི་ཙམ་གྱིས་དོན་དེ་འགྲུབ་པ་དེ་ཙམ་གྱི་ཞག་གྲངས་སྨོས་པར་བྱའོ། །ཆོས་དང་ལྡན་པའི་དོན་བསྟན་པའི་ཕྱིར། འདི་ལྟ་སྟེ། དགེ་སློང་གི་ཀུན་དགའ་རབ་འབུལ་བ་དང་གཙུག་ལག་ཁང་ཞལ་བསྲོ་བ་དང་གནས་
མལ་འབུལ་པ་དང་བསླབ་པ་བརྟན་པོ་བཅའ་བ་དང་མཆོད་རྟེན་ཞལ་བསྲོ་བ་དང་མཆོད་སྡོང་གཟུགས་པ་དང་རྒྱལ་མཚན་བསྒྲེང་བ་དང་མཆོད་པ་བྱ་བ་དང༌། ཚོན་དང་ཙན་དན་དང་གུར་གུམ་གྱི་བྱུག་པས་སྐུད་པ་དང་ཀླག་པ་དང་འགྱོད་པ་བསལ་བ་དང་ལྟ་བའི་རྣམ་པ་སྤང་བ་དང་ཕྱོགས་དང་མཐུན་བ་བསྒྲུབ་པ་དང་བཟོད་པ་གསོལ་བ་དང་སྤོ་བ་ལ་སོགས་པ་བཞི་བྱ་བ་དང་དབྱུང་བ་དང་ནད་པ་དབུགས་དབྱུང་བ་དག་ལའོ་ཞེས་བྱ་བ་སྨྲས་ཏེ། དགེ་སློང་མཚམས་ཀྱི་ཕྱི་རོལ་ན་གནས་པ་གཞན་གྱི་ཆོས་དང་ལྡན་པའི་དོན་འདི་ལྟ་བུ་དག་བྱུང་ན་དེ་སྒྲུབ་པའི་དོན་དུ་དགེ་སློང་དབྱར་གནས་པར་ལས་བླང་པ་མཚམས་ཀྱི་ནང་ན་འདུག་པས་ཞག་བདུན་མན་ཆད་མཚམས་ཀྱི་ཕྱི་རོལ་དུ་འགྲོ་ཞིང་དེ་ཚུན་ཆད་ཀྱིས་ཕྱིར་འཁོར་བར་བྱིན་གྱིས་བརླབ་པོ་ཞེས་བྱ་བར་སྦྱར་རོ། །དགེ་སློང་གི་ཞེས་བྱ་བ་ནི། དགེ་སློང་མཚམས་ཀྱི་ཕྱི་རོལ་ན་གནས་པ་གཞན་གྱིའོ། །ཀུན་དགའ་རབ་འབུལ་ཞེས་བྱ་བ་ནི། མཚམས་ཀྱི་ནང་ན་བཞུགས་པའི་དགེ་འདུན་ལའོ། །གཙུག་ལག་ཁང་ཞལ་བ་སྲོ་བ་ཞེས་བྱ་བ་ནི། འཇུག་པ་དག་དང་གནས་པ་ལ་སོགས་པའི་ཆོ་ག་བྱ་བའོ། །གནས་མལ་འབུལ་བ་ཞེས་བྱ་བ་ནི། གནས་ཀྱི་གཞི་དང་མལ་ཆལ་སོགས་པ་དགེ་འདུན་ལ་འབུལ་བའོ། །བསླབ་པ་བརྟན་པོ་བཅའ་བ་ཞེས་བྱ་བ་ནི། བསྟན་པ་ལ་ཕན་པའི་གཙིགས་བརྟན་པོ་བཅའ་བའོ། །མཆོད་རྟེན་ཞལ་བསྲོ་བ་ཞེས་བྱ་བ་ནི། བརྩིགས་ནས་ཞལ་བསོ་བའི་ཆོ་ག་བྱ་བའོ། །མཆོད་སྡོང་གཟུགས་པ་ཞེས་བྱ་བ་ནི། མཆོད་རྟེན་གྱི་སྲོག་ཤིང་གཟུགས་པའོ། །རྒྱལ་མཚན་བསྒྲེང་བ་ཞེས་བྱ་བ་ནི། རྒྱལ་མཚན་བསྒྲེང་བ་དང་གདུགས་གདགས་པ་ལ་སོགས་པའོ། །མཆོད་པ་བྱ་བ་ཞེས་བྱ་བ་ནི། དཀོན་མཆོག་གསུམ་ལའོ། །ཚོན་གྱི་བྱུག་བས་སྐུད་པ་ཞེས་བྱ་བ་ནི། མཆོད་རྟེན་ལ་སོགས་པ་ལ་ཡུང་བ་དང་བ་བླ་ལ་སོགས་པའི་བྱུག་པས་སྐུད་པའོ། །ཙན་དན་དང་གུར་གུམ་གྱི་བྱུགས་པས་སྐུད་པ་ཞེས་བྱ་བ་ཡང་དེ་བཞིན་ནོ། །ཀླག་པ་ཞེས་བྱ་བ་ནི། མདོ་སྡེའི་སྡེ་ཚན་བཀླགས་པ་དང་བཏོན་པན་རྙེད་པ་གྲུབ་པ་ཡོད་པས་དཀོན་མཆོག་གསུམ་ལ་མཆོད་པ་བྱ་བ་འམ་ཀླག་པའི་ལུང་མནོད་པའོ། །འགྱོད་པ་བསལ་བ་ཞེས་བྱ་བ་ནི། ངན་པ་བྱས་པའི་དངོས་པོས་འགྱོད་པར་གྱུར་བ་བསལ་བའོ། །འདིར་ལྟ་བའི་རྣམ་པ་སྤང་བ་ཞེས་བྱ་བ་ནི། སྡིག་པ་ཅན་གྱི་ལྟ་བའི་རྣམ་པ་
སྐྱེད་པ་བསལ་བའོ། །ཕྱོགས་དང་མཐུན་པ་བསྒྲུབ་པ་ཞེས་བྱ་བ་ནི། ནན་ཏུར་གྱི་ལས་སམ་རྩོད་པ་འགའ་ཞིག་བྱུང་བ་ན་དེའི་ཚེ་ཆོས་ཀྱིས་ཕྱོགས་བཙལ་བར་རིགས་པའོ། །བཟོད་པ་གསོལ་བཞེས་བྱ་བ་ནི། སྔར་དགེ་འདུན་གྱིས་སྤངས་པ་ལ་སོགས་པ་ཕྱིར་དགེ་འདུན་ལ་བཟོད་པ་གསོལ་བའོ། །སྤོ་བ་ལ་སོགས་པ་བཞི་ཞེས་བྱ་བ་ནི། སྤོ་བ་དང་གཞི་ནས་སྤོ་བ་དང༌། མགུ་བར་བྱ་བ་དང༌། གཞི་ནས་མགུ་བར་བྱ་བ་སྟེ། ཡང་གཞི་ནས་བསླང་སྟེ་སྤོ་བ་དང༌། ཡང་གཞི་ནས་བསླང་སྟེ་མགུ་བར་བྱ་བ་ནི། གཞི་ནས་སྤོ་བ་དང༌། གཞི་ནས་མགུ་བར་བྱ་བ་ལས་ཐ་མི་དད་དོ། །དབྱུང་བཞེས་བྱ་བ་ནི། དགེ་འདུན་ལྷག་མའི་ལྟུང་བ་ལས་དབྱུང་བའོ། །ནད་པ་དབུགས་དབྱུང་བ་ཞེས་བྱ་བ་ནི་ནད་པའི་ནད་དྲི་བའོ། །དགེ་སློང་མའི་ལྕི་བའི་ཆོས་ཀྱི་མགུ་བར་བྱ་བ་འབུལ་བ་ལ་ཡང་ངོ་ཞེས་བྱ་བ་ནི། དགེ་སློང་མ་མཚམས་ཀྱི་ཕྱི་རོལ་ན་གནས་པ་གཞན་གྱི་ཆོས་དང་ལྡན་པའི་དོན་ནི་སྔར་དགེ་སློང་གི་སྐབས་སུ་བསྟན་པ་དེ་དག་ཉིད་ཀྱང་ཡིན་ལ། དེའི་སྟེང་དུ་འདིས་ཀྱང་བསྣན་པར་བྱ་བའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །དགེ་སློང་མ་རྣམས་ཀྱི་ལྕི་བའི་ཆོས་ལས་འདས་པ་གཉི་གའི་དགེ་འདུན་ལ་མགུ་བ་སྤྱད་པར་བྱ་དགས་པས་འདི་དང་སྔ་མ་དག་ལྟ་བུའི་ཆོས་དང་ལྡན་པའི་དོན་དག་བྱུང་ན་དེ་བསྒྲུབ་པའི་དོན་དུ་ཡང་དགེ་སློང་དབྱར་གནས་པར་ཁས་བླངས་པ་མཚམས་ཀྱི་ནང་ན་འདུག་པས་ཞག་བདུན་མན་ཆད་མཚམས་ཀྱི་ཕྱི་རོལ་དུ་འགྲོ་ཞིང་དེ་ཚུན་ཆད་ཀྱིས་ཕྱིར་འཁོར་བར་བྱིན་གྱིས་བརླབ་བོ་ཞེས་བྱ་བར་སྦྱར་རོ། །དགེ་སློབ་མའི་ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་དང་བསྙེན་པར་རྫོགས་པར་བྱ་བ་ལ་ཡང་ངོ་ཞེས་བྱ་བ་ནི། དགེ་སློབ་མ་མཚམས་ཀྱི་ཕྱི་རོལ་ན་གནས་པ་རྣམས་ཀྱིས་ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་མནོད་པ་དང༌། བསྙེན་པར་རྫོགས་པར་བྱ་བ་ཆོས་དང་ལྡན་པའི་དོན་དེ་གཉིས་བྱུང་ན་དེ་དག་བསྒྲུབ་པའི་དོན་དུ་ཡང་དགེ་སློང་དབྱར་གནས་པར་ཁས་བླངས་པ་མཚམས་ཀྱི་ནང་ན་འདུག་པས་ཞག་བདུན་མན་ཆད་མཚམས་ཀྱི་ཕྱི་རོལ་དུ་འགྲོ་ཞིང་དེ་ཚུན་ཆད་ཀྱིས་ཕྱིར་འཁོར་བར་བྱིན་གྱིས་བརླབ་བོ་ཞེས་བྱ་བར་སྦྱར་རོ། །དགེ་ཚུལ་གྱི་དེ་ལའོ་ཞེས་བྱ་བ་ནི། དགེ་ཚུལ་མཚམས་ཀྱི་ཕྱི་རོལ་ན་གནས་པ་རྣམས་ཀྱིས་བསྙེན་པར་རྫོགས་པར་བྱ་བ་ཆོས་དང་ལྡན་པའི་དོན་དེ་བྱུང་བ་ན་དེ་བསྒྲུབ་པའི་དོན་དུ་ཡང་དགེ་སློང་དབྱར་
གནས་པར་ཁས་བླངས་པ་མཚམས་ཀྱི་ནང་ན་འདུག་པས་ཞག་བདུན་མན་ཆད་མཚམས་ཀྱི་ཕྱི་རོལ་དུ་འགྲོ་ཞིང་དེ་ཚུན་ཆད་ཀྱིས་ཕྱིར་འཁོར་བར་བྱིན་གྱིས་བརླབ་པོ་ཞེས་བྱ་བར་སྦྱར་རོ། །དེ་ལ་ཞེས་བྱ་བ་ནི་བསྙེན་པར་རྫོགས་པར་བྱ་བ་ལའོ། །དགེ་ཚུལ་པའི་བསླབ་པའི་སྡོམ་པ་བྱིན་པ་ལའོ་ཞེས་བྱ་བ་ནི། དགེ་ཚུལ་མ་མཚམས་ཀྱི་ཕྱི་རོལ་ན་གནས་པ་རྣམས་ཀྱིས་བསླབ་པའི་སྡོམ་པ་སྦྱིན་པར་བྱ་བ་ཆོས་དང་ལྡན་པའི་དོན་དེ་བྱུང་ན་དེ་བསྒྲུབ་པའི་དོན་དུ་ཡང་དགེ་སློང་དབྱར་གནས་པར་ཁས་བླངས་པ་མཚམས་ཀྱི་ནང་ན་འདུག་པས་ཞག་བདུན་མན་ཆད་མཚམས་ཀྱི་ཕྱི་རོལ་དུ་འགྲོ་ཞིང་དེ་ཚུན་ཆད་ཀྱིས་ཕྱིར་འཁོར་བར་བྱིན་གྱིས་བརླབ་བོ་ཞེས་བྱ་བར་སྦྱར་རོ། །ཁྱིམ་པ་དང་ཁྱིམ་པ་མོའི་མགོ་དཀྲི་བ་དང་བང་བསང་བ་དང་སྐྲ་བསྐྱེད་པ་དང་སྐྲ་བྲེག་པ་དང་གདུབ་ཀོར་སྐྱེད་པ་དག་ལའོ་ཞེས་བྱ་བ་ནི། ཁྱིམ་པ་དང་ཁྱིམ་བ་མོ་མཚམས་ཀྱི་ཕྱི་རོལ་ན་གནས་པ་རྣམས་ཀྱིས་ཆོས་དང་ལྡན་པའི་དོན་འདི་ལྟ་བུ་དག་བྱུང་ན་དེ་བསྒྲུབ་པའི་དོན་དུ་ཡང༌། དགེ་སློང་དབྱར་གནས་བར་ཁས་བླངས་པ་མཚམས་ཀྱི་ནང་ན་འདུག་པས་ཞག་བདུན་མན་ཆད་མཚམས་ཀྱི་ཕྱི་རོལ་དུ་འགྲོ་ཞིང་དེ་ཚུན་ཆད་ཀྱིས་ཕྱིར་འཁོར་བར་བྱིན་གྱིས་བརླབ་བོ་ཞེས་བྱ་བར་སྦྱར་རོ། །མགོ་དཀྲི་བ་ཞེས་བྱ་བ་ནི། ཕྱིས་ཁྱེའུ་རྣམས་ཀྱིས་འཕྲུལ་བ་བསལ་བར་བྱ་བའི་ཕྱིར་མགོ་དཀྲི་བར་བྱེད་པ་གང་ཡིན་པའོ། །བང་བསང་བ་ཞེས་བྱ་བ་ནི། བུད་མེད་བུ་བཙས་རྣམས་ཀྱི་མངལ་གྱི་དྲི་མ་བསལ་བའི་ཕྱིར་ཁྲུས་བྱེད་པའོ། །སྐྲ་བསྐྱེད་པ་ཞེས་བྱ་བ་ནི། ཁྱེའུ་རྣམས་ཀྱི་སྐྲ་དེ་ཕན་ཆད་མི་བྲག་པར་གཞག་པར་བྱ་བའོ། །སྐྲ་བྲེག་པ་ཞེས་བྱ་བ་ནི། དེ་དག་ཉིད་ཀྱི་དང་པོའི་སྐྲ་དག་བྲེག་པར་བྱ་བའོ། །གདུབ་ཀོར་སྐྱེད་པ་ཞེས་བྱ་བ་ནི། རྣ་ཆ་གདུབ་ཀོར་གཞུག་པའི་ཕྱིར་རྣ་བའི་བུ་ག་སྐྱེད་པའོ། །བསྙེན་པར་མ་རྫོགས་པ་རྣམས་ཀྱིས་དགེ་འདུན་ལྷག་མའི་སྐབས་མ་གཏོགས་པ་སྔ་མ་དག་ལ་ཡང་ངོ་ཞེས་བྱ་བ་ནི། སྔར་དགེ་སློང་དང་དགེ་སློང་མའི་ཆོས་དང་ལྡན་པ་དོན་ཇི་སྐད་བསྟན་པ་དེ་དག་ལས་དགེ་འདུན་ལྷག་མའི་སྐབས་དང་སྦོ་བ་ལ་སོགས་པ་བཞི་དང་དབྱུང་བ་མ་གཏོགས་པ་ཀུན་དགའ་རབ་འབུལ་བ་ཞེས་བྱ་བ་ལ་སོགས་པ་ཐམས་ཅད་ནི་བསྙེན་པར་མ་རྫོགས་པ་དགེ་སློབ་མ་དང་དགེ་ཚུལ་དང་དགེ་ཚུལ་མ་དང་ཁྱིམ་པ་དང༌། ཁྱིམ་པ་མོ་རྣམས་ཆོས་དང་
ལྡན་པའི་དོན་ཡང་ཡིན་པས་བསྙེན་པར་མ་རྫོགས་པ་མཚམས་ཀྱི་ཕྱི་རོལ་ན་གནས་པ་རྣམས་ཀྱིས་ཆོས་དང་ལྡན་པའི་དོན་དེ་ལྟ་བུ་དག་བྱུང་ན་དེ་དག་བསྒྲུབ་པའི་དོན་དུ་ཡང་དགེ་སློང་དབྱར་གནས་པར་ཁས་བླངས་པ་མཚམས་ཀྱི་ནང་ན་འདུག་པས་ཞག་བདུན་མན་ཆད་མཚམས་ཀྱི་ཕྱི་རོལ་དུ་འགྲོ་ཞིང་དེ་ཚུན་ཆད་ཀྱིས་ཕྱིར་འཁོར་བར་བྱིན་གྱིས་བརླབ་བོ་ཞེས་བྱ་བ་སྦྱར་རོ། །དེ་ལྟ་ན་བཟོད་པ་གསོལ་བ་ཡང་དེ་དག་ལ་ཐལ་བར་འགྱུར་རོ་ཞེན་དེའི་ཕྱིར། ཁྱིམ་བ་དང་ཁྱིམ་པ་མོའི་བཟོད་པ་གསོལ་བ་ནི་ཁ་བསྲང་བའོ་ཞེས་བྱ་བ་སྨྲས་ཏེ། ཁྱིམ་པ་དང་ཁྱིམ་པ་མོའི་བཟོད་པ་གསོལ་བ་ནི། སྔར་དེ་དག་ལ་དགེ་འདུན་གྱིས་ལྷུང་བཟེད་ཁས་ཕུབ་པ་དག་ཕྱིར་ཁ་བསྲང་བར་གསོལ་བ་ཡིན་པར་བལྟ་བར་བྱ་སྟེ། ཁྱིམ་པ་དང་ཁྱིམ་པ་མོ་མཚམས་ཀྱི་ཕྱི་རོལ་ན་གནས་པ་རྣམས་ལ་ལྷུང་བཟེད་ཁས་ཕུབ་བ་ཕྱིར་ཁ་བསྲང་བ་རོ་གསོལ་བ་ཆོས་དང་ལྡན་པའི་དོན་དེ་ལྟ་བུ་དག་བྱུང་ན་དེ་དག་བསྒྲུབ་པའི་དོན་དུ་ཡང་དགེ་སློང་དབྱར་གནས་པར་ཁས་བླངས་པ་མཚམས་ཀྱི་ནང་ན་འདུག་པས་ཞག་བདུན་མན་ཚད་མཚམས་ཀྱི་ཕྱི་རོལ་དུ་འགྲོ་ཞིང་དེ་ཚུན་ཆད་ཀྱིས་ཕྱིར་འཁོར་བར་བྱིན་གྱིས་བརླབ་པོ་ཞེས་བྱ་བར་སྦྱར་རོ། །ཟས་དང་སྨན་དང་གཡོག་དག་མེད་ལ་དེ་དག་མེད་པར་འཆོ་མི་ནུས་ན་དེ་ལས་འདའ་བར་བྱའོ་ཞེས་བྱ་བ་ནི། དགེ་སློང་དབྱར་གནས་པར་ཁས་བླངས་པ་ལ་ཕྱིས་ཟས་དང་སྨན་དང་ནད་གཡོག་མེད་ལ་དེ་དག་མེད་པར་འཚོ་མི་ནུས་ན་དེའི་ཚེ་དབྱར་གནས་པར་ཁས་བླངས་པ་དེ་ལས་འདའ་བར་བྱའོ། །གལ་ཏེ་རྩ་བ་དང་འབྲས་བུ་ལ་སོགས་པས་འཚོ་བར་ནུས་ན་ནི་དེའི་ཚེ་གནས་པར་བྱའོ། །དགེ་སློང་གི་ཚུལ་དང་སྲོག་དང་ཚངས་པར་སྤྱོད་པའི་བར་ཆད་ཡོད་ན་ཡང་ངོ་ཞེས་བྱ་བ་ཡང་འདའ་བར་བྱའོ་ཞེས་བྱ་བར་སྦྱར་ཏེ། གནས་དེ་ན་དབྱར་གྱི་ནང་དེར་དགེ་སློང་གི་ཚུལ་ལ་སོགས་པའི་བར་ཆད་ཡོད་ན་ཡང་གནས་པར་ཁས་བླངས་པ་དེ་ལས་འདའ་བར་བྱའོ། །དགེ་འདུན་དབྱེ་བའི་ཕྱིར་རྟུལ་བརྗེས་སུ་མི་མཐུན་པའི་སེམས་བསྐྱེད་པ་དང་སྡིག་པ་ཅན་གྱི་ཚིག་བརྗོད་པ་དག་བྱུང་ནའོ་ཞེས་བྱ་བ་ཡང་འདའ་བར་བྱའོ་ཞེས་བྱ་བར་སྦྱར་ཏེ། གང་ཟག་བདག་ཉིད་གནས་དར་དབྱར་གནས་པན་དགེ་འདུན་དབྱེ་བའི་ཕྱིར་རྗེས་སུ་མི་མཐུན་པའི་སེམས་ཚུལ་དང་མཐུན་པ་མ་ཡིན་པ། ཨེ་མ་དགེ་འདུན་དབྱེ་བར་བྱའོ་སྙམ་པ་གང་ཡིན་པ་དང༌། སྡིག་པ་ཅན་གྱི་ཚིག་དེའི་
རྗེས་སུ་མཐུན་པ་དག་ཀྱང་རྗོད་པར་བྱེད་པ་ལྟ་ན་དེའི་ཚེ་མྱུར་བ་ཁོ་ནར་དབྱར་གནས་པ་དེ་དྲལ་ཏེ་གུད་དུ་འགྲོ་བར་བྱའོ། །དེ་ཞི་བར་བྱ་བའི་ཕྱིར་མཐུ་ཡོད་པ་ལྟ་ན་མི་འགྲོ་བོར་མི་བྱའོ་ཞེས་བྱ་བ་ནི། མཚམས་གཞན་ན་དགེ་འདུན་དབྱེ་བའི་ཕྱིར་རྟུལ་བ་དག་ཡོད་ལ་དེ་ཞི་བར་བྱ་བའི་ཕྱིར་རང་ལ་ནུས་པའི་མཐུ་ཡོད་པ་ལྟ་ན་དེར་མི་འགྲོ་བར་མི་བྱ་བར་འགྲོ་བ་ཁོ་ནར་བྱ་བའོ། །སོང་ན་མི་འདའ་བར་མི་བྱའོ་ཞེས་བྱ་བ་ནི། བྱིན་གྱིས་བརླབས་པའི་དུས་ལས་ཏེ། གལ་ཏེ་དེར་སོང་བ་ན་ཞག་བདུན་ལས་འདས་སུ་ཟིན་ཀྱང་བྱ་བ་དེ་ཉིད་ཀྱིས་དགེ་སློང་གི་དབྱར་རལ་བའི་ལྟུང་བར་མི་འགྱུར་རོ་ཞེས་གསུངས་པས་འདའ་བ་ལ་གཞོལ་བར་བསྟན་པའི་ཕྱིར་དགག་པ་གཉིས་བྱས་སོ། །དམ་བཅས་ན་དབྱར་གནས་པ་དང་གནས་སུ་མི་འབྲེལ་བར་མི་བྱའོ་ཞེས་བྱ་བ་ནི། གནས་འདིར་དབྱར་གནས་པར་བྱའོ་ཞེས་དམ་བཅས་ན་དབྱར་གནས་པར་རང་གི་གནས་སྐབས་དང་གནས་ཁང་ལ་སོགས་པ་གནས་སུ་འབྲེལ་བར་བྱ་བ་གང་ཡིན་པ་དེ་བར་ཆད་མེད་ན་གདོན་མི་ཟ་བར་བྱ་སྟེ། མི་བྱེད་ན་ཉེས་བྱས་སོ་ཞེས་བྱ་བའི་ཐ་ཚིག་གོ །གསོ་སྦྱོང་གཅིག་པ་ཉིད་ཀྱི་གནས་གཉིས་སུ་ནི་དེ་འབྱུང་བ་མེད་དོ་ཞེས་བྱ་བ་ནི། གསོ་སྦྱོང་གཅིག་པ་ཉིད་ཀྱི་གནས་གཉིས་ཡོད་ན་གནས་ཅིག་ཤོས་སུ་གནས་པར་བྱའོ་ཞེས་དམ་བཅས་ཤིང་གནས་ཅིག་ཤོས་སུ་གནས་པར་ཁས་ལེན་དུ་ཟིན་ཀྱང༌། དམ་བཅས་ན་དབྱར་གནས་པ་དང་གནས་སུ་འབྲེལ་བར་མི་བྱེད་པའི་ཉེས་པ་སྔར་བསྟན་པ་དེ་འབྱུང་བ་མེད་པའོ། །འདི་སྐད་བསྟན་ཏེ། གསོ་སྦྱོང་གཅིག་པའི་གནས་གཉིས་ལས་གཅིག་ཏུ་དབྱར་གནས་པར་དམ་བཅས་ནས། གཅིག་ཏུ་གནས་པར་ཁས་ལེན་པར་བྱེད་དུ་ཟིན་ཀྱང་དེ་ལ་དམ་བཅས་པ་ལས་འགལ་བའི་ཉེས་པ་མེད་དེ། འདི་ལྟར་གནས་དེ་གཉིས་གསོ་སྦྱོང་གཅིག་པ་ཡིན་པས་ཐ་དད་པ་མ་ཡིན་པའི་ཕྱིར་རོ། །རྙེད་པ་གཅིག་པ་ཉིད་ལ་ནི་ཡོད་དོ་ཞེས་བྱ་བ་ནི། གནས་དེ་གཉིས་གསོ་སྦྱོང་ནི་ཐ་དད་ལ། རྙེད་པ་གཅིག་པ་ཉིད་ཡིན་ན་དེའི་ཚེ་ཅིག་ཤོས་སུ་གནས་པར་དམ་བཅས་པ་ལས། ཅིག་ཤོས་སུ་གནས་པར་ཁས་ལེན་ན་དེའི་ཚེ་ཉེས་པ་སྔ་མ་དེ་འབྱུང་བ་ཁོ་ནར་འགྱུར་ཏེ། གནས་པའི་ལོངས་སྤྱོད་ཐ་དད་པས་གནས་ཐ་དད་པ་ཡིན་པའི་ཕྱིར་རོ། །རྙེད་པ་ཞེས་སྨོས་པས་ཡོན་བདག་གམ་རྙེད་པའི་ཚད་ནི་གཅིག་པ་ཉིད་དུ་མི་
བཟུང་སྟེ། ཐ་དད་པའི་ཕྱིར་རོ། །འདིར་གཞུང་ནི་འདི་ལྟར་དགེ་སློང་གིས་གནས་འདིར་དབྱར་སྔ་མ་ཟླ་བ་གསུམ་གནས་པར་བྱའོ་ཞེས་དམ་བཅས་ནས་གནས་དེ་གཉིས་རྙེད་པ་ནི་གཅིག་ལ། གསོ་སྦྱོང་ནི་ཐ་དད་པར་གྱུར་ནས་དེ་འདི་སྙམ་དུ་འདིར་གནས་ན་ཡང་རྙེད་པ་གཅིག་ཏུ་ཟད་ལ། ཕ་གིར་གནས་ན་ཡང་རྙེད་པ་གཅིག་ཏུ་ཟད་དོ་སྙམ་ནས། དེ་དམ་བཅས་ནས་མི་འགྲོ་ཞིང་དགེ་སློང་དེ་ལ་གནས་དེར་དབྱར་སྔ་མ་ཟླ་བ་གསུམ་ཡང་མི་སྣང༌། ཕྱི་མ་ཡང་མི་སྣང་ལ། དམ་བཅས་ན་ནི་ཉེས་བྱས་སོ་ཞེས་གསུངས་པ་ཡིན་ནོ། །གཞིར་གཏོགས་པའི་དབྱར་གྱི་གཞིའོ་ཞེས་བྱ་བ་ནི། འདུལ་བ་གཞིའི་སྐབས་སུ་གཏོགས་པའི་དབྱར་གྱི་གཞི་བཤད་ཟིན་ཏོ།། །།ད་ནི་གླེང་གཞི་ལ་སོགས་པའི་གནས་སྐབས་སུ་གཏོགས་པའི་དབྱར་གྱི་གཞི་བསྡུ་བའི་ཕྱིར། སྡེ་པ་ལྔ་ཆར་གྱིས་ཀྱང་གནས་པར་ཁས་བླང་བར་བྱ་བ་ཉིད་ཡིན་ནོ་ཞེས་བྱ་བ་སྨྲས་ཏེ། དགེ་སློང་དང་དགེ་སློང་མ་འབའ་ཞིག་གིས་གནས་པར་ཁས་བླང་བར་བྱ་བ་ཉིད་དུ་མ་ཟད་ཀྱི། འདི་ལྟར་དགེ་སློབ་མ་དང་དགེ་ཚུལ་དང་དགེ་ཚུལ་མ་དག་གིས་ཀྱང་གནས་པར་ཁས་བླང་བར་བྱ་བ་ཉིད་ཡིན་པའོ། །དགེ་ཚུལ་དག་འབའ་ཞིག་གིས་མ་ཡིན་ནོ་ཞེས་བྱ་བ་ནི། བསྙེན་པར་རྫོགས་པ་འགའ་ཡང་མེད་པའི་དགེ་ཚུལ་དག་འབའ་ཞིག་གིས་གནས་པར་ཁས་བླང་བར་བྱ་བ་ཉིད་མ་ཡིན་པའོ། །ལོ་མཚང་བ་དག་གིས་ཀྱང་ངོ་ཞེས་བྱ་བ་ནི། བསྙེན་པར་རྫོགས་པ་ལྟ་བུ་ཟིན་ཀྱང་མི་གནས་པར་འདུག་པའི་ལེ་མ་ཚང་བ་ཤ་སྟག་ཡིན་ན་དེ་དག་གིས་ཀྱང་གནས་པར་ཁས་བླང་བར་བྱ་བ་མ་ཡིན་ནོ། །དེ་དག་ལ་ཁས་བླངས་པ་མི་འཆགས་པ་ཉིད་ནི་མ་ཡིན་ནོ་ཞེས་བྱ་བ་ནི། དགེ་ཚུལ་འབའ་ཞིག་དང་ལོ་མཚང་པ་འབའ་ཞིག་པོ་དེ་དག་ལ་གནས་པར་ཁས་བླངས་པ་ཉིད་ནི་འཆགས་མོད་ཀྱི་འོན་ཀྱང་གནས་མེད་པའི་ཕྱིར་དང༌། བྱ་བ་དང་བྱ་བ་མ་ཡིན་པ་ཡོངས་སུ་ཤེས་པ་མེད་པའི་ཕྱིར་གནས་པར་ཁས་བླངས་པ་བཀག་གོ །གནས་མལ་མི་མནོད་པར་བྱ་བ་ཉིད་མ་ཡིན་ནོ་ཞེས་བྱ་བ་ནི། དེ་དག་གིས་གནས་པར་ཁས་བླངས་ན་གནས་མལ་མནོད་པར་བྱ་བ་ཉིད་ཡིན་ནོ། །སྟོབས་པ་མེད་ཀྱང་མ་ཡིན་ནོ་ཞེས་བྱ་བ་ནི། གནས་མལ་སྟོབས་པ་མེད་ཀྱང་གནས་མལ་མི་མནོད་པ་མ་ཡིན་ཏེ་མནོད་པར་བྱ་བ་ཁོ་ན་ཡིན་པའོ། །མ་བསྐོས་པར་བསྟབས་པར་མི་བྱའོ་ཞེས་བྱ་བ་ནི། དགེ་འདུན་གྱིས་གནས་མལ་སྟོབས་པ་མ་
བསྐོས་པའི་གང་ཟག་གིས་བསྙེན་པར་རྫོགས་པ་དང་བསྙེན་པར་མ་རྫོགས་ཤིང་རབ་ཏུ་བྱུང་བ་སུ་ལ་ཡང་གནས་མལ་བསྟབས་པར་མི་བྱའོ་ཞེས་བྱ་བའི་ཐ་ཚིག་གོ །འགྱོད་པ་ལ་སོགས་པས་སྡེ་སྣོད་འཛིན་པ་དང་འཐབ་ཀྲོལ་བྱེད་པ་དང་ཡོད་པ་དང་མེད་པ་དག་མ་བསྡུས་པ་ཉིད་མ་ཡིན་ནོ་ཞེས་བྱ་བ་ནི། སྔར་འགྱོད་པ་དང་གཞན་སྡུག་བསྔལ་བ་དང་ཡིད་མི་བདེ་བ་མི་བསྐྱེད་པ་ཉིད་དང་སེལ་བ་ཉིད་དག་ཅེས་སྨོས་པའི་མདོ་དེས་སྡེ་སྣོད་འཛིན་པ་ཡོད་པ་དང༌། འཐབ་ཀྲོལ་བྱེད་པ་མེད་པ་འདི་གཉིས་ཀྱང་མ་བསྡུས་པ་ཉིད་མ་ཡིན་ཏེ། བསྡུས་པ་ཉིད་ཡིན་པའོ། །ཇི་ལྟར་བསྡུས་ཤེ་ན། འདི་ལྟར་འགྱོད་པ་དང་གཞན་སྡུག་བསྔལ་བ་དང་ཡིད་མི་བདེ་བ་མ་སྐྱེས་པ་མི་སྐྱེད་པ་ཉིད་ཅེས་སྨོས་པས་ནི་འཐབ་ཀྲོལ་བྱེད་པ་མེད་པ་ཉིད་བསྡུས་པ་ཡིན་ལ། འགྱོད་པ་དང་གཞན་སྡུག་བསྔལ་དང་ཡིད་མི་བདེ་བ་སྐྱེས་པ་སེལ་བ་ཉིད་ཅེས་སྨོས་པས་ནི་སྡེ་སྣོད་འཛིན་པ་ཡོད་པ་ཉིད་བསྡུས་པ་ཡིན་ནོ། །གནས་པར་ཁས་མ་བླངས་པས་གནས་མི་གཏོང་ན་གནས་པ་ཉིད་ཡིན་ནོ་ཞེས་བྱ་བ་ནི། དགེ་སློང་དབྱར་གནས་པར་ཁས་མ་བླངས་པས་གལ་ཏེ་ཟླ་བ་གསུམ་དུ་གནས་ཏེ་མི་གཏོང་ན་གནས་པ་ཉིད་ཡིན་ནོ། །འདིར་གཞུང་ནི། ཁ་ཅིག་ལས་དགེ་སློང་དབྱར་གནས་པར་ཁས་མི་ལེན་པ་དག་ལ་དབྱར་རལ་བར་བརྗོད་པར་བགྱིའམ་གལ་ཏེ་དབྱར་གྱི་ནང་དུ་གནས་མི་གཏོང་ན་དབྱར་རལ་བར་བརྗོད་པར་བྱའོ་ཞེས་གསུངས་པ་ཡིན་ཏེ། འདིས་ནི་གནས་པར་ཁས་མ་བླངས་སུ་ཟིན་ཀྱང་དབྱར་གྱི་ནང་དུ་གནས་མི་གཏོང་ན་ཕྱི་རོལ་དུ་འགྲོ་བའི་ཕྱིར་བྱིན་གྱིས་བརླབ་པར་བྱ་དགོས་སོ་ཞེས་བསྟན་པར་རིག་པར་བྱའོ། །ནམ་མཁའ་ལ་གནས་པར་ཁས་བླངས་པ་མི་འཆགས་སོ་ཞེས་བྱ་བ་ནི། ནམ་མཁའ་ལ་དབྱར་གནས་པར་ཁས་བླང་བ་མི་འཆགས་པའོ། །གྲུ་ལ་ནང་དུ་འབྱམ་པ་ཉིད་དུ་ཤེས་ན་མི་འཆགས་ཏེ་ས་ལ་ཕྱིན་པ་དང༌། ས་ལ་གནས་པ་བརྟན་པོ་དང་འབྲེལ་པ་ནི་མ་གཏོགས་སོ་ཞེས་བྱ་བ་ནི། གྲུར་དགེ་སློང་གིས་གྲུ་དེ་དབྱར་གྱི་ནང་དུ་འབྱམ་པ་ཉིད་དུ་ཤེས་ན་དབྱར་གནས་པར་ཁས་བླངས་པ་མི་འཆགས་སོ། །ཅི་སྤྱིར་རམ་ཞེ་ན་མ་ཡིན་ཏེ་དེའི་ཕྱིར་ས་ལ་ཕྱིན་པ་དང༌། ས་ལ་གནས་པ་བརྟན་པོ་དང་འབྲེལ་པ་ནི་མ་གཏོགས་ཏེ་གྲུ་སྐམ་ས་ལ་ཕྱིན་པ་དང་སྐམ་ས་ལ་གནས་པའི་ཕུར་པ་ལ་སོགས་པ་བརྟན་པོ་དང་འབྲེལ་པ་ནི་མ་གཏོགས་ཏེ། དེར་ནི་དབྱར་གནས་པར་ཁས་བླངས་པ་འཆགས་སོ། །འདི་
སྐད་བསྟན་ཏེ། གལ་ཏེ་གྲུ་སྐམ་ས་ལ་ཕྱིན་པར་གྱུར་ཏམ། གྲུ་སྐམ་ས་ལ་གནས་པའི་དངོས་པོ་ཤིང་ལ་སོགས་པ་བརྟན་པོ་དང་འབྲེལ་ཞང་གནས་པར་ཁས་ལེན་པ་ན་དེ་དབྱར་གྱི་ནང་དུ་འབྱམ་པར་འགྱུར་བ་ཉིད་དུ་མི་ཤེས་ན་དེ་ལྟ་ན་དབྱར་གནས་པར་ཁས་བླངས་པ་འཆགས་ཀྱི། གཞན་དུ་ན་མི་འཆགས་སོ་ཞེས་བྱ་བའི་ཐ་ཚིག་གོ །འདིར་གཞུང་ནི་དགེ་སློང་དག་གྲུར་དབྱར་གནས་པར་ཁས་ལེན་པར་བགྱིད་ན་དབྱར་རལ་བར་བརྗོད་པར་བགྱི་འམ་རལ་པར་བརྗོད་པར་མི་བགྱི། བཀའ་སྩལ་པ། གལ་ཏེ་དབྱར་གྱི་ནང་དུ་འབྱམ་པར་འགྱུར་བ་ཉིད་དུ་ཤེས་ན་དབྱར་རལ་བར་བརྗོད་པར་བྱའོ། །འོན་ཏེ་མི་ཤེས་ན་ནི་དབྱར་རལ་བར་བརྗོད་པར་མི་བྱའོ་ཞེས་གསུངས་པ་དང་ཁ་ཅིག་ལས་བཙུན་པ་རེ་ཞིག་དགེ་སློང་གྲུ་ལ་དབྱར་གནས་པར་ཁས་ལེན་ན་དབྱར་གནས་པར་ཁས་བླངས་ཞེས་བགྱི་འམ། གལ་ཏེ་ས་ལ་བརྟེན་ཅིང་གནས་པ་ཡིན་ན་དབྱར་གནས་པར་ཁས་བླངས་ཞེས་བྱའོ། །བཙུན་ཕ་ཕུང་པའམ་ཞུགས་ཤིང་དང་འབྲེལ་པ་ལགས་ན་དབྱར་གནས་པར་ཁས་བླངས་ཞེས་བགྱི་འམ། ཉེ་བ་འཁོར་གནས་པར་ཁས་བླངས་ཞེས་བྱའོ་ཞེས་གསུངས་པ་ཡིན་ཏེ། དེ་གཉི་ག་འདིར་བསྡུས་པ་ཡིན་ནོ། །དེའི་ལྟ་བ་ལ་མངོན་པར་ཞེན་ནས་ཆོས་མ་ཡིན་པའི་ཕྱོགས་སུ་སོང་ན་སྐྱ་རེངས་ཤར་ན་འཇིག་གོ་ཞེས་བྱ་བ་ནི། ཆོས་མ་ཡིན་པའི་ཕྱོགས་དེའི་ལྟ་བ་ལ་མངོན་པར་ཞེན་ནས་ཆོས་མ་ཡིན་པའི་ཕྱོགས་སུ་སོང་ན་སྐྱ་རེངས་ཤར་ན་དབྱར་གནས་པར་ཁས་བླངས་པ་དེ་འཇིག་པའོ། །འདིར་གཞུང་ནི་གླེང་གཞི་དག་ལས་བཙུན་པ་རེ་ཞིག་དབྱར་གྱི་ནང་དུ་དགེ་འདུན་བྱེ་བར་གྱུར་ན། དེ་ན་གལ་ཏེ་དགེ་སློང་བསམས་བཞིན་དུ་ཆོས་ཀྱི་ཕྱོགས་ནས་ཆོས་མ་ཡིན་པའི་ཕྱོགས་སུ་མཆིན་དབྱར་རལ་བ་ཞེས་བགྱིའམ། ཉེ་བ་འཁོར་གལ་ཏེ་དེའི་ལྟ་བ་འདོད་ཅིང་དེར་ཡང་སོང་ན་སྐྱ་རེངས་ཤར་ན་དབྱར་རལ་བར་བརྗོད་པར་བྱའོ་ཞེས་གསུངས་པ་ཡིན་ནོ། །ཐེ་ཚོམ་ཟ་བ་ཉིད་ལ་ནི་མི་འཇིག་གོ་ཞེས་བྱ་བ་ནི། བདག་གནས་པར་ཁས་བླངས་སམ་འོན་ཏེ་མ་བླངས་སྙམ་དུ་ཐེ་ཚོམ་ཟ་བ་ཉིད་ལ་ནི་དབྱར་གནས་པར་ཁས་བླངས་པ་མི་འཇིག་པའོ། །མཐའི་ཞག་དྲུག་ལ་བྱིན་གྱིས་བརླབས་པ་མི་འཆགས་སོ་ཞེས་བྱ་བ་ནི། གནས་པར་ཁས་བླངས་ནས་ཟླ་བ་གསུམ་གྱི་མཐའི་ཞག་དྲུག་ལུས་པའི་ཚེ་ཕྱི་རོལ་དུ་འགྲོ་བའི་ཕྱིར་བྱིན་གྱིས་བརླབ་པ་མི་འཆགས་
པ་སྟེ། དུས་ཧ་ཅང་ཡུན་ཐུང་དུ་ལུས་པའི་ཕྱིར་རོ། །འདིར་གཞུང་ནི་ཞུ་བ་ལས། བཙུན་པ་གལ་ཏེ་དགུང་དྲུག་ན་འམ་ལྡན་འམ་གཅིག་ན་དགག་དབྱེ་འབྱུང་བར་འགྱུར་བའི་ཚེ་བྱིན་གྱིས་བརླབས་ཏེ་མཆི་ན། དབྱར་རལ་བར་བརྗོད་པར་བགྱི་འམ་ཉེ་བ་འཁོར་རལ་བར་བརྗོད་པར་བྱའོ་ཞེས་གསུངས་པ་ཡིན་ནོ། །བྱ་བ་མེད་པར་ཤེས་ནས་ཕྱིར་མི་ལྡོག་པ་དང་གནས་པ་དག་ལ་ནི་འཇིག་གོ་ཞེས་བྱ་བ་ནི། དགེ་སློང་གང་ཆོས་དང་ལྡན་པའི་དོན་ལ་མཚམས་ཀྱི་ཕྱི་རོལ་དུ་འགྲོ་བར་བྱིན་གྱིས་བརླབས་ཏེ། མཚམས་ཀྱི་ནང་ནས་འཕགས་པ་ན་དོན་དེ་གཞན་གྱིས་བསྒྲུབས་ཟིན་ནས་བསྒྲུབ་མི་དགོས་པའི་སྐབས་རྙེད་ཅིང༌། མཚམས་ཀྱི་ཕྱི་རོལ་དུ་བྱ་བ་མེད་པར་ཤེས་ནས་ཕྱིར་མི་ལྡོག་པར་མཚམས་ཀྱི་ཕྱི་རོལ་དུ་སྐྱ་རེངས་འཆར་བར་བྱེད་ན་སྔར་བྱིན་གྱིས་བརླབས་སུ་ཟིན་ཀྱང་དབྱར་གནས་པར་ཁས་བླངས་པ་དེ་འཇིག་གོ །དེ་བཞིན་དུ་དགེ་སློང་གང་ཆོས་དང་ལྡན་པའི་དོན་ལ་མཚམས་ཀྱི་ཕྱི་རོལ་དུ་ཞག་བདུན་མན་ཆད་འགྲོ་བར་བྱིན་གྱིས་བརླབས་ཏེ་སོང་བ་ན། དོན་དེ་ཉི་མ་དེ་ཉིད་ཀྱིས་གྲུབ་པར་གྱུར་ན་དེའི་མོད་ལ་ཕྱིར་མི་འོང་བར་མཚམས་ཀྱི་ཕྱི་རོལ་དུ་སྐྱ་རེངས་ཤར་གྱི་བར་དུ་གནས་པར་བྱེད་ན་སྔར་བྱིན་གྱིས་བརླབས་སུ་ཟིན་ཀྱང་དབྱར་གནས་པར་ཁས་བླངས་པ་དེ་འཇིག་གོ །ཞག་བདུན་བྱིན་གྱིས་བརླབས་པ་ལས་དོན་ཞག་གཅིག་གིས་གྲུབ་ནས་ཞག་གཉིས་སུ་གནས་པ་དང༌། ཞག་གཉིས་ཀྱིས་གྲུབ་ནས་ཞག་གསུམ་དུ་གནས་པ་དང༌། ཞག་གསུམ་གྱིས་གྲུབ་ནས་ཞག་བཞིར་གནས་པ་དང༌། ཞག་བཞིས་གྲུབ་ནས་ཞག་ལྔར་གནས་པ་དང༌། ཞག་ལྔས་གྲུབ་ནས་ཞག་དྲུག་དུ་གནས་པ་དང༌། ཞག་དྲུག་གིས་གྲུབ་ནས་ཞག་བདུན་དུ་གནས་པ་ལ་ཡང་དེ་བཞིན་ནོ། །འདིར་གཞུང་ནི་གལ་ཏེ་ཤུལ་གྱི་དབུས་ཁོ་ནར་དོན་དེ་བག་ཡངས་སུ་གྱུར་ན་དེས་མཆི་བར་བགྱི་འམ། ཉེ་བ་འཁོར་མི་བྱ་སྟེ། གལ་ཏེ་འགྲོ་ན་དབྱར་རལ་བའི་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །འདི་ལ་མཐར་ཐུག་པའི་མཐའ་ནི་ཞག་བདུན་ཉིད་དོ་ཞེས་བྱ་བ་ནི། བྱིན་གྱིས་བརླབས་པ་འདི་ལ་ཞག་གྲངས་ཀྱི་མཐར་ཐུག་པའི་མཐའ་ནི་ཞག་བདུན་ཉིད་ཡིན་ཏེ། དེས་ན་ཞག་གཅིག་དང་གཉིས་དང་གསུམ་དང་བཞི་དང་ལྔ་དང་དྲུག་ཀྱང་བྱིན་གྱིས་བརླབ་ཏུ་རུང་བ་ཉིད་ཡིན་ནོ། །ཅི་ཐམས་ཅད་ཀྱི་མཐའ་དེ་ཉིད་ཡིན་ནམ་ཞེ་ན་དེའི་ཕྱིར།
གནང་བ་མ་ཐོབ་པའི་མཐའ་དེ་ཉིད་ཡིན་ནོ་ཞེས་བྱ་བ་སྨྲས་ཏེ། ཞག་བཞི་བཅུའི་གནང་བ་མ་ཐོབ་པ་གཞན་དག་གི་མཐའ་ཞག་བདུན་ཡིན་ནོ། །གཞན་གྱི་ནི་ཞག་བཞི་བཅུའོ་ཞེས་བྱ་བ་ནི། གནད་བ་མ་ཐོབ་པ་ལས་གཞན་པ་ཞག་བཞི་བཅུ་བྱིན་གྱིས་བརླབས་པའི་གནང་བ་ཐོབ་པ་དག་གི་མཐའ་ནི་ཞག་བཞི་བཅུའོ། །ཞག་བཞི་བཅུ་བྱིན་གྱིས་བརླབས་པའི་གནང་བ་ཐོབ་པའི་དགེ་སློང་གིས་ཀྱང་ནམ་འགྲོ་བའི་ཚེ་མཚམས་ཀྱི་ནང་དུ་དགེ་སློང་གི་མདུན་དུ་བསྔགས་ཀྱིས་བྱིན་གྱིས་བརླབས་ཏེ་འགྲོ་བར་བྱའོ། །དེའི་སྔགས་ནི། ཚེ་དང་ལྡན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་མཚམས་ཀྱི་ནང་དང་བཅས་པའི་གནས་འདིར་དབྱར་སྔ་མ་ཟླ་བ་གསུམ་གནས་པར་ཁས་བླངས་པ་ལས་བདག་མིང་འདི་ཞེས་བགྱི་བ་དགེ་འདུན་གྱི་བགྱི་བ་ཞིག་གི་སླད་དུ་དགུང་བཞི་བཅུ་མཚམས་ཀྱི་སླད་རོལ་དུ་མཆི་བ་དང༌། དེ་ཚུན་ཆད་ཀྱིས་སླར་མཆི་བར་བྱིན་གྱིས་བརླབ་བོ་།བདག་དབྱར་འདི་ན་མཆིས་ཤིང་བདག་གི་དབྱར་གྱི་གནས་ནི་འདི་ལགས་སོ་ཞེས་ལན་གསུམ་བཟླས་པ་ཡིན་ནོ། །དབྱར་ཕྱི་མ་ལ་ནི་དབྱར་ཕྱི་མ་ཟླ་བ་གསུམ་གནས་པར་ཁས་བླངས་པ་ལ་ཞེས་སྔགས་ཀྱི་བྱེ་བྲག་ཏུ་བྱའོ། །ཞག་བཞི་བཅུ་བྱིན་གྱིས་བརླབ་པའི་གནང་བ་ཐོབ་པ་ལ་དེ་བས་ཉུང་བ་བྱིན་གྱིས་བརླབས་པ་ཡང་འཆགས་པ་ཉིད་ཡིན་ནོ། །དེ་སྦྱིན་ནོ་ཞེས་བྱ་བ་ནི། ཞག་བཞི་བཅུ་བྱིན་གྱིས་བརླབ་པའི་གནང་བ་དེ་དགེ་འདུན་གྱིས་གང་ཟག་ལ་སྦྱིན་པར་བྱ་བ་སྟེ། དེ་ནི་དང་པོ་སྤྲོ་བར་ཁས་ལེན་དུ་བཅུག་ནས་དེའི་འོག་ཏུ་རང་གིས་དགེ་འདུན་ལ་ལན་གསུམ་གསལ་ནས་དགེ་འདུན་གྱིས་གསོལ་བ་དང་གཉིས་ཀྱི་ལས་ཀྱིས་གནང་བ་སྦྱིན་པར་བྱའོ། །དེའི་སྔགས་ནི་ཚེ་དང་ལྡན་པ་ཁྱོད་ཞག་བཞི་བཅུ་བྱིན་གྱིས་བརླབས་ཏེ། དགེ་འདུན་གྱི་ཆེད་ལ་མཚམས་ཀྱི་ཕྱི་རོལ་དུ་འགྲོ་བར་སྤྲོ་འམ་སྤྲོའོ། །དགེ་འདུན་བཙུན་བ་རྣམས་གསན་དུ་གསོལ། བདག་དགེ་སློང་མིང་འདི་ཞེས་བགྱི་བ་མཚམས་ཀྱི་ནང་དང་བཅས་པའི་གནས་འདིར་དབྱར་སྔ་མ་ཟླ་བ་གསུམ་གནས་པར་ཁས་བླངས་ཏེ་བདག་དབྱར་འདི་ན་མཆིས་ཤིང་བདག་གི་དབྱར་གྱི་གནས་འདི་ལགས་པ་ལས། བདག་དགེ་སློང་མིང་འདི་ཞེས་བགྱི་བཞག་བཞི་བཅུ་བྱིན་གྱིས་བརླབས་ཏེ། དགེ་འདུན་གྱི་ཆེད་ལ་མཚམས་ཀྱི་སླད་རོལ་དུ་མཆི་བ་དང་དེ་ཚུན་གྱིས་སླར་མཆི་བར་སྤྲོ་ན།
ཐུགས་བརྩེ་བ་ཅན་དག་འདུན་བཙུན་པ་རྣམས་ཀྱིས་ཐུགས་བརྩེ་བ་ཉེ་བར་བཟུང་སྟེ། བདག་དགེ་སློང་མིང་འདི་ཞེས་བགྱི་བ་ལ་ཞག་བཞི་བཅུའི་གནང་བ་སྩལ་དུ་གསོལ་ལན་གསུམ་དུ་བཟླས། དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་མཚམས་ཀྱི་ནང་དང་བཅས་པའི་གནས་འདིར་དབྱར་སྔ་མ་ཟླ་བ་གསུམ་གནས་པར་ཁས་བླངས་ཏེ། འདི་དབྱར་འདི་ན་མཆིས་ཤིང་འདིའི་དབྱར་གྱི་གནས་འདི་ལགས་པ་ལས། དགེ་སློང་མིང་འདི་ཞེས་བགྱི་བ་འདི་དགེ་འདུན་གྱི་ཆེད་ལ་མཚམས་ཀྱི་སླད་རོལ་དུ་མཆི་བ་དང༌། དེ་ཚུན་ཆད་ཀྱིས་སླར་མཆི་བར་དགེ་འདུན་ལ་ཞག་བཞི་བཅུའི་གནང་བ་གསོལ་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། འདི་དབྱར་འདི་ན་མཆིས་ཤིང་འདིའི་དབྱར་གྱི་གནས་འདི་ལགས་པ་ལས་དགེ་འདུན་གྱི་ཆེད་ལ་མཚམས་ཀྱི་སླད་རོལ་དུ་མཆི་བ་དང༌། དེ་ཚུན་ཆད་ཀྱིས་སླར་མཆི་བར་དགེ་སློང་མིང་འདི་ཞེས་བགྱི་བ་ལ་དགེ་འདུན་གྱིས་ཞག་བཞི་བཅུའི་གནང་བ་གསོལ་ཏོ། །འདི་ནི་གསོལ་བའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་མཚམས་ཀྱི་ནང་དང་བཅས་པའི་གནས་འདིར་དབྱར་སྔ་མ་ཟླ་བ་གསུམ་གནས་པར་ཁས་བླངས་ཏེ་འདི་དབྱར་འདི་ན་མཆིས་ཤིང་འདིའི་དབྱར་གྱི་གནས་འདི་ལགས་པ་ལས། དགེ་སློང་མིང་འདི་ཞེས་བགྱི་བ་འདི་དགེ་འདུན་གྱི་ཆེད་ལ་མཚམས་ཀྱི་སླད་རོལ་དུ་མཆི་བ་དང༌། དེ་ཚུན་ཆད་ཀྱིས་སླར་མཆི་བར་དགེ་འདུན་ལ་ཞག་བཞི་བཅུའི་གནང་བ་གསོལ་ཏོ། །དེའི་སླད་དུ་འདིའི་དབྱར་འདི་ན་མཆིས་ཤིང་འདིའི་དབྱར་གྱི་གནས་འདི་ལགས་པ་ལས། དགེ་འདུན་གྱི་ཆེད་ལ་མཚམས་ཀྱི་སླད་རོལ་དུ་མཆི་བ་དང༌། དེ་ཚུན་ཆད་ཀྱིས་སླར་མཆི་བར་དགེ་སློང་མིང་འདི་ཞེས་བགྱི་བ་ལ་དགེ་འདུན་གྱིས་ཞག་བཞི་བཅུའི་གནང་བ་སྩོལ་ན། དགེ་སློང་མིང་འདི་ཞེས་བགྱི་བ་ལ་ཞག་བཞི་བཅུའི་གནང་བ་སྩལ་བར་ཚེ་དང་ལྡན་པ་གང་དག་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་མིང་འདི་ཞེས་བགྱི་བ་ལ་ཞག་བཞི་བཅུའི་གནང་བ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་
འཛིན་ཏོ་ཞེས་གསུངས་པ་ཡིན་ནོ། །དབྱར་ཕྱི་མ་ལ་ནི་དབྱར་ཕྱི་མ་ཟླ་བ་གསུམ་དུ་གནས་པར་ཁས་བླངས་ཏེ་ཞེས་སྔགས་ཀྱིས་བྱེ་བྲག་ཏུ་བྱའོ། །དེ་ལས་ལྷག་པར་ཕྱི་རོལ་དུ་གནས་པར་མི་བྱ་བ་ཉིད་དེ་ཞེས་བྱ་བ་ནི། ཞག་བཞི་བཅུ་པོ་དེ་ལས་ལྷག་པར་མཚམས་ཀྱི་ཕྱི་རོལ་དུ་གནས་པར་མི་བྱ་བ་སྟེ། དགེ་སློང་དག་གིས་གལ་ཏེ་འགྲོ་བའི་ཕྱིར་ཚེ་གུར་བྱིན་གྱིས་བརླབས་ཀྱང་རུང༌། ཅིག་ཅར་ཕྱིན་གྱིས་བརླབས་ཀྱང་རུང་སྟེ། ཇི་ལྟར་བྱིན་གྱིས་བརླབས་པ་དེ་ལས་ལྷག་པར་མཚམས་ཀྱི་ཕྱི་རོལ་དུ་འདུག་པར་མི་བྱའོ། །འདིར་གཞུང་ནི་ཉེ་བ་འཁོར་མཚམས་དེར་ཆེས་མང་དུ་འདའ་བར་བྱའོ་ཞེས་གསུངས་པ་ཡིན་ནོ། །དེ་ནི་སྡེ་བ་ལྔ་པོ་དག་གིས་ཡང་ཡིན་ནོ་ཞེས་བྱ་བ་ནི་བྱིན་གྱིས་བརླབས་པ་དེའོ། །དེ་ནི་མཚམས་ཀྱི་ནང་དུ་འཆགས་སོ་ཞེས་བྱ་བ་ནི། སྡེ་པ་ལྔ་པོ་དག་གིས་བྱིན་གྱིས་བརླབས་པ་དེ་ནི་མཚམས་ཀྱི་ནང་དུ་བྱས་ནས་མཚམས་ཀྱི་ཕྱི་རོལ་དུན་མི་འཆགས་སོ། །དགེ་སློང་གི་མདུན་དུ་འོ་ཞེས་བྱ་བ་ནི། དགེ་སློང་གི་མདུན་དུ་བྱིན་གྱིས་བརླབས་པ་ནི་འཆགས་སོ། །འདིར་དགེ་སློང་གི་མདུན་དུ་ཞེས་སྨོས་པ་ནི། དགེ་སློང་དང་དགེ་ཚུལ་གྱི་ཆོ་ག་ཡིན་ནོ། །དགེ་སློང་མ་དང་དགེ་སློབ་མ་དང་དགེ་ཚུལ་མ་རྣམས་ཀྱང་རང་གི་མཚམས་ཀྱི་ནང་དུ་དགེ་སློང་མའི་མདུན་དུ་བྱིན་གྱིས་བརླབ་པར་བྱའོ། །མུ་སྟེགས་ཅན་གྱི་ལྟ་བ་དང་བྲལ་བའི་ཕྱིར་དང་ཉེ་དུའི་བྱ་བ་དང་བདག་ཉིད་ཀྱི་ལུང་དང་རྟོགས་པ་ལ་ནི་མ་ནུར་ཟབ་བསལ་བའི་ཕྱིར་འགྲོ་བ་ལ་དེ་བྱ་བ་མ་བསྡུས་པ་ཉིད་དུ་དོགས་པར་མི་བྱའོ་ཞེས་བྱ་བ་ནི། སྔར་ཆོས་དང་ལྡན་པའི་དོན་དུ་ཞེས་སྨོས་པའི་མདོ་དེས་མུ་སྟེགས་ཅན་གྱི་ལྟ་བ་དང་དབྲལ་བ་ལ་སོགས་པའི་ཕྱིར་འགྲོ་བ་ལ་བྱིན་གྱིས་བརླབས་པ་དེ་བྱ་བ་ཡང་མ་བསྡུས་པ་ཉིད་དུ་དོགས་པར་མི་བྱ་སྟེ། བསྡུས་པ་ཉིད་དུ་ཤེས་པར་བྱའོ། །གནས་པར་ཁས་བླངས་པ་ཉིད་ལ་གནས་པ་སྤང་བར་མི་བྱ་བ་ཉིད་དོ་ཞེས་བྱ་བ་ནི། དབྱར་གནས་པར་ཁས་བླངས་པ་ཉིད་ལ་གནས་པའི་དགེ་སློང་སྤང་བར་འོས་པ་ཞིག་ཡིན་ན་ཡང་དབྱར་གྱི་ནང་དུ་སྤང་བར་མི་བྱ་བ་ཉིད་དོ། །འདིར་གཞུང་ནི་དགེ་སློང་གནས་པར་ཁས་བླངས་པས་སྤང་བར་བྱ་བ་དེ་དང་ལྷན་ཅིག་གནས་པར་བགྱི་འམ། བཀའ་སྩལ་པ་གནས་པར་བྱའོ། །དགག་དབྱེ་བྱས་ནས་ནི་གནས་པར་མི་བྱའོ་ཞེས་གསུངས་པ་ཡིན་ནོ། །གནས་པ་ནི་དཔེ་ཡིན་ནོ་ཞེས་བྱ་བ་ནི། སྔར་མདོ་ལས་དམ་བཅས་ནས་དབྱར་གནས་པ་དང་གནས་སུ་མི་འབྲེལ་བར་མི་
བྱའོ་ཞེས་སྨོས་པ་དེ་ནི་དཔེ་ཙམ་དུ་ཟད་དེ། གཞན་དག་ལ་ཡང་དམ་བཅས་བསྒྲུབ་པར་མི་བྱེད་ན་ཉེས་བྱས་སུ་འགྱུར་རོ་ཞེས་བྱ་བའི་ཐ་ཚིག་གོ །འདིར་གཞུང་ནི་བཅོམ་ལྡན་འདས་ཀྱིས་དམ་བཅས་པ་སྒྲུབ་པར་མི་བགྱིད་པ་ལས་ཉེས་བྱས་སུ་གསུངས་ན། བཙུན་པ་དམ་བཅའ་བ་དུ་མཆིས། ཉེ་བ་འཁོར་ལྔ་སྟེ་ལྔ་གང་ཞེ་ན། དབྱར་དམ་བཅའ་བ་དང༌། ལྷུང་བཟེད་དམ་བཅའ་བ་དང༌། ཆོས་གོས་དམ་བཅའ་བ་དང༌། བསོད་སྙོམས་དམ་བཅའ་བ་དང༌། ནད་པའི་སྨན་དམ་བཅའ་བའོ་ཞེས་གསུངས་པ་ཡིན་ཏེ། རྣམ་པ་དེ་དག་དམ་བཅའ་བ་ལས་ཁ་འོག་ཏུ་ལུས་འཁྲུས་པར་མི་བྱེད་ན་ཡང་ཉེས་བྱས་སུ་འགྱུར་རོ་ཞེས་བར་སྦྱར་རོ། །གླེང་གཞི་ལ་སོགས་པར་རྟོགས་པའི་དབྱར་གྱི་གཞིའོ་ཞེས་བྱ་བའི་གླེང་གཞི་དང་ཞུ་བ་ལ་སོགས་པའི་སྐབས་སུ་གཏོགས་པའི་དབྱར་གྱི་གཞི་བཤད་ཟིན་ཏོ།། །དབྱར་གྱི་གཞི་རྫོགས་སོ་ཞེས་བྱ་བ་དེ་བཤད་ཟིན་ཏོ།། །།ད་ནི་དགག་དབྱེའི་གཞི་བསྡུ་བར་བྱ་སྟེ། དེའི་ཕྱིར་མི་སྨྲ་བའི་ཡིད་དམ་བཅའ་བར་མི་བྱའོ་ཞེས་བྱ་བ་སྨྲས་སོ། །འདིས་དག་པ་དང་གྲོལ་བ་ཐོབ་པོ་སྙམ་ནས་ཉེས་པ་སྦོམ་པོའི་ཞེས་བྱ་བ་ནི། མི་སྨྲ་བ་འདིས་དག་པ་ཞེས་བྱ་བ་སྡིག་པ་མེད་པ་ཉིད་དང༌། གྲོལ་བ་ཞེས་བྱ་བ་མྱ་ངན་ལས་འདས་པ་དེ་གཉིས་འཐོབ་པར་འགྱུར་རོ་སྙམ་པའི་བློས་མི་སྨྲ་བའི་ཡིད་དམ་འཆའ་ན་དགེ་འདུན་འབྱེད་པ་ལས་རྟུལ་བའི་ཉེས་པ་སྦོམ་པོར་འགྱུར་རོ། །གཞན་དུ་ནི་ཉེས་བྱས་ཁོ་ནའོ་ཞེས་བྱ་བའི་ཐ་ཚིག་གོ །འདིར་གཞུང་ནི་མི་གཏི་མུག་ཅན་འདི་ནི་མུ་སྟེགས་ཅན་གྱི་རྒྱལ་མཚན་ཏེ། འདི་ལྟ་སྟེ་མི་སྨྲ་བའོ། །དེ་ལྟ་བས་ན་དགེ་སློང་གིས་མི་སྨྲ་བའི་ཡིད་དམ་བཅའ་བར་མི་བྱའོ། །དགེ་སློང་མི་སྨྲ་བའི་ཡིད་དམ་བཅའ་བར་བྱེད་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །དབྱར་གནས་པའི་དགེ་འདུན་ལ་མཐོང་བ་དང་ཐོས་པ་དང་དོགས་པ་དག་གི་དགག་དབྱེ་བྱའོ་ཞེས་བྱ་བ་ནི། དགེ་སློང་དབྱར་གནས་པར་ཁས་བླངས་པ་དབྱར་རལ་བ་ཡང་རུང་བས། དགེ་འདུན་ལ་ཚེ་དང་ལྡན་པ་དག་གིས་བདག་ལ་མཐོང་བའམ་ཐོས་པའམ་དོགས་པ་གང་ལགས་པ་དེ་ཚེ་དང་ལྡན་པ་དག་གིས་སྨྲོས་ཤིག་དང་བདག་གིས་ཀྱང་དེ་བཞིན་དུ་སྐབས་འབྱེད་དོ་ཞེས་དགེ་འདུན་ལ་གནས་གསུམ་གྱིས་དགག་དབྱེ་བྱ་བ་སྟེ། འདི་ལྟར་དབྱར་རལ་བས་ཀྱང་དགག་དབྱེ་བྱ་དགོས་སོ། །དུས་གང་གི་
ཚེ་ཞེ་ན་དེའི་ཕྱིར། དབྱར་རྣམས་ཀྱི་ཐ་མའི་ཉི་མ་ལའོ་ཞེས་བྱ་བ་སྨྲས་ཏེ། དབྱར་གནས་པར་ཟླ་བ་གསུམ་གྱི་ཉི་མའི་ཐ་མ་ལ་སྟེ། སྟོན་ཟླ་འབྲིང་པོ་ཉ་འམ་སྟོན་ཟླ་ཐ་ཆུངས་ཉའི་ཉི་མ་དེ་ལའོ། །སྤྱོད་ཡུལ་དུ་བརྗོད་པར་བྱའོ་ཞེས་བྱ་བ་ནི། གྲོང་ཁྱེར་དང་གྲོང་དང་ཚོང་དུས་ལ་སོགས་པར་སྦྲན་པར་བྱ་བ་སྟེ། ཅི་ཞིག་གི་ཕྱིར་ཞེན་སྤྱོད་ཡུལ་ན་གནས་པའི་སེམས་ཅན་རྣམས་ཀྱི་བསོད་ནམས་སྤེལ་བའི་ཕྱིར་རོ། །གང་གི་དུས་ནས་ཤེ་ན་དེའི་ཕྱིར། གང་ཚུན་ཆད་ནས་བྱི་དོར་བྱེད་པ་ནས་སོ་ཞེས་བྱ་བ་སྨྲས་ཏེ། ཉི་མ་གང་ཚུན་ཆད་ནས་གང་གཙུག་ལག་ཁང་བྱི་དོར་བྱེད་བ་དེ་ཚུན་ཆད་ནས་སོ། །དེ་ཡང་གང་ཚུན་ཆད་ནས་བྱེད་ཅེ་ན། སྔར་དབྱར་གྱི་གཞིའི་སྐབས་སུ་ཞག་བཅུ་འམ་ཟླ་བ་ཕྱེད་ཀྱིས་འབྱུང་བར་འགྱུར་བ་ཉིད་ན་གཙུག་ལག་ཁང་བྱི་དོར་བྱའོ། །ཁ་ཅིག་ལས་ནི་བདུན་ནམ་བརྒྱད་ན་ཞེའོ་ཞེས་སྨོས་པས། དབྱར་གནས་པར་ཁས་ལེན་པར་འབྱུང་བར་འགྱུར་བ་ཉིད་ཀྱི་མདུན་རོལ་ཞག་བཅུ་འམ་ཟླ་བ་ཕྱེད་དམ་ཞག་བདུན་ནམ་བརྒྱད་ནས་གཙུག་ལག་ཁང་བྱི་དོར་བྱེད་པ་དང་འདྲ་བ་འདིར་ཡང་དགག་དབྱེའི་ཉི་མ་འབྱུང་བར་འགྱུར་བ་ཉིད་ཀྱི་མདུན་རོལ། ཞག་བཅུ་འམ་ཟླ་བ་ཕྱེད་དམ་ཞག་བདུན་ནམ་བརྒྱད་ནས་སྤྱོད་ཡུལ་དུ་བརྗོད་པར་བྱའོ། །ཇི་སྐད་བརྗོད་པར་བྱ་ཞེན་དེའི་ཕྱིར་ད་ཕྱིན་ཆད་ཞག་འདི་ཙམ་ན་དགག་དབྱེ་མཛད་པར་འགྱུར་བ་ཁྱེད་ཅག་ལ་བརྗོད་པ་ཡིན་ནོ་ཞེས་སོ་ཞེས་བྱ་བ་སྨྲས་སོ། །གཙུག་ལག་ཁང་བརྒྱད་པར་བྱའོ་ཞེས་བྱ་བ་ནི། གང་ཚུན་ཆད་ནས་གཙུག་ལག་ཁང་བྱི་དོར་བྱ་བ་བསྟན་པ་དེ་ཆུན་ཆད་ནས་གཙུག་ལག་ཁང་གོས་ལ་སོགས་པས་བརྒྱན་པར་བྱའོ། །ཁང་པ་བརྩིགས་པ་དག་བརྩིག་གོ་ཞེས་བྱ་བ་ཡང་དེ་ཚུན་ཆད་ནས་སོ། །གཙང་ཁང་བྱུར་བུ་དག་ཀྱང་རི་མོ་བྲིའོ་ཞེས་བྱ་བ་ཡང་དེ་ཚུན་ཆད་ནས་སོ། །མཆོད་རྟེན་དག་གསོ་བ་དང་བྱི་བྱད་བྱའོ་ཞེས་བྱ་བ་ཡང༌། དེ་ཚུན་ཆད་ནས་དེ་གསོ་བར་ཞེས་བྱ་བ་ནི། རལ་བ་དང་འདྲུམས་པ་ལ་སོགས་པ་ཕྱིར་གསོ་བ་དང་དཀར་པོར་བྱའོ། །བྱི་བྱད་ཅེས་བྱ་བ་ནི། རྡུལ་ལ་སོགས་པ་སྤྲུག་པ་དང་ཕྲེང་བ་རྒྱུ་རྙིང་པ་ལ་སོགས་པ་བསལ་བའོ། །སེང་གེའི་ཁྲི་བརྒྱན་པར་བྱའོ་ཞེས་བྱ་བ་ནི་ཚེས་བཅུ་བཞི་ནས་སོ། །དེ་མདོ་མཚན་ཐོག་ཐག་ཆོས་མཉན་པ་འབྱུང་བར་འགྱུར་གྱིས་དར་ཚེ་དང་ལྡན་པ་དག་གིས་ཚོགས་པ་སྦྱིན་པར་བྱའོ་ཞེས་སྤྱོད་ཡུལ་དུ་བརྗོད་ནས་མདོ་སྡེ་དང་འདུལ་བ་དང་མ་མོ་འཛིན་པ་གསོལ་བ་བཏབ་པ་དག་གིས་
ཚེས་བཅུ་བཞིའི་མཚན་ཐོག་ཐག་ཏུ་ཆོས་མཉན་པ་སྦྱིན་པར་བྱའོ་ཞེས་བྱ་བ་ནི། ཚེས་བཅུ་བཞིའི་ཉིན་མོ་སྤྱོད་ཡུལ་དུ་དེ་སྐད་སྤྲན་ནས་ཚེས་བཅུ་བཞིའི་ནུབ་མོ་ཐམས་ཅད་ཚོགས་པ་ན་དགེ་སློང་མདོ་སྡེ་དང་འདུལ་བ་དང་མ་མོ་འཛིན་པ་གསོལ་བ་བཏབ་པ་དག་གིས་མཚན་ཐོག་ཐག་ཏུ་ཁ་ཏོན་གདོན་པས་ཆོས་མཉན་པ་སྦྱིན་པར་བྱའོ། །གཞན་ལ་ནི་དེ་དག་གིས་ལས་ཀྱི་མདུན་རོལ་ཚུན་ཆད་དུ་ཆོས་དང་ལྡན་པའི་གཏམ་རྣམ་པར་གཏན་ལ་དབབ་པས་མཚན་འདའ་བར་བྱའོ་ཞེས་བྱ་བ་ནི། ཚེས་བཅོ་ལྔའི་ནུབ་མོ་མདོ་སྡེ་དང་འདུལ་བ་དང་མ་མོ་འཛིན་པ་དེ་དག་གིས་དགག་དབྱེའི་ལས་ལམ་བབ་པའི་མདུན་རོལ་ཚུན་ཆད་དུ་ཆོས་དང་ལྡན་པའི་གཏམ་རྣམ་པར་གཏན་ལ་དབབ་པས་དགག་དབྱེའི་ལས་རྩོམ་པ་ལ་ཐུག་པ་ཚུན་ཆད་དུ་མཚན་མོ་འདའ་བར་བྱའོ། །དེ་ཡང་གང་གི་ཚེ་ཞེ་ན་དེའི་ཕྱིར། དགག་དབྱེའི་ལས་ནི་སྐྱ་རེངས་འཆར་བའི་མདུན་དུའོ་ཞེས་བྱ་བ་སྨྲས་ཏེ། དགག་དབྱེའི་ལས་ནི་སྐྱ་རེངས་དང་པོ་མ་ཤར་བའི་མདུན་དུ་ཟིན་པར་བྱ་བར་རིག་པར་བྱའོ། །འདི་སྐད་བསྟན་ཏེ། དགག་དབྱེའི་ལས་ནི་ཅི་ནས་ཀྱང་སྐྱ་རེངས་དང་པོ་འཆར་བ་དང༌། དགག་དབྱེའི་ལས་ཀྱི་མཇུག་གི་ཆར་མི་འཕྲད་པར་དེ་ལྟར་སྐྱ་རེངས་དང་པོ་མ་ཤར་བར་ལས་ཐམས་ཅད་ཟིན་པར་བྱའོ། །ལས་དང་པོ་རྩོམ་པ་ཚུན་ཆད་དུ་ནི་ཆོས་བཤད་པར་བྱའོ་ཞེས་བྱ་བའི་ཐ་ཚིག་གོ །དགེ་སློང་དགག་དབྱེ་བྱེད་པ་བསྐོ་བར་བྱའོ་ཞེས་བྱ་བ་ནི། ལས་ཀྱི་དང་པོ་ཁོ་ནར་དགེ་སློང་དགག་དབྱེ་བྱེད་པ་སྤྲོ་བར་བྱས་ནས་གསོལ་བ་དང་གཉིས་ཀྱིས་བསྐོ་བར་བྱའོ། །དེའི་སྔགས་ནི་ཚེ་དང་ལྡན་པ་ཁྱོད་དབྱར་གནས་པའི་དགེ་འདུན་ལ་དགག་དབྱེ་བྱེད་པར་སྤྲོའམ། སྤྲོའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དབྱར་གནས་པའི་དགེ་འདུན་ལ་དགག་དབྱེ་བགྱིད་པར་སྤྲོ་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་དགག་དབྱེ་བགྱིད་པར་བསྐོ་སྟེ། དགེ་སློང་དགག་དབྱེ་བགྱིད་པ་མིང་འདི་ཞེས་བགྱི་བ་འདི་དབྱར་གནས་པའི་དགེ་འདུན་ལ་དགག་དབྱེ་བགྱིད་པར་འགྱུར་རོ། །འདི་ནི་གསོལ་བའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དབྱར་གནས་པའི་དགེ་འདུན་ལ་དགག་དབྱེ་བགྱིད་པར་སྤྲོ་སྟེ། དེའི་སླད་དུ་དགེ་འདུན་
གྱིས་དགེ་སློང་མིང་འདི་ཞེས་བགྱི་བ་དགག་དབྱེ་བགྱིད་པར་བསྐོ་ན། དགེ་སློང་མིང་འདི་ཞེས་བགྱི་བ་དགག་དབྱེ་བགྱིད་པར་བསྐོ་བར་ཚེ་དང་ལྡན་པ་གང་དག་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་མིང་འདི་ཞེས་བགྱི་བ་དགག་དབྱེ་བགྱིད་པར་བསྐོས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་གསུངས་པ་ཡིན་ནོ། །མི་ནུས་ན་དུ་མའོ་ཞེས་བྱ་བ་ནི། དགེ་འདུན་མང་བའི་ཕྱིར་དགག་དབྱེ་བྱེད་པ་གཅིག་གིས་མི་ནུས་ན། དགག་དབྱེ་བྱེད་པ་དུ་མ་ཡང་ཆོ་ག་སྔར་བསྟན་པས་ཅིག་ཅར་དུས་གཅིག་ཏུ་བསྐོར་རུང་ངོ༌། །དགག་དབྱེ་བྱ་བའི་ཕྱིར་གཞན་གྱིས་དགེ་འདུན་ལ་གསོལ་བ་བྱའོ་ཞེས་བྱ་བ་ནི། དགག་དབྱེ་བྱེད་པ་བསྐོས་ཟིན་པའི་འོག་ཏུ་དགེ་སློང་དགག་དབྱེ་བྱེད་པ་ཉིད་མ་ཡིན་པ་གཞན་ཅིག་གིས་དགག་དབྱེ་བྱ་བའི་ཕྱིར་དགེ་འདུན་ལ་གསོལ་བ་བྱའོ། །འདིའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། དེང་ནི་དགེ་འདུན་གྱི་དགག་དབྱེ་བཅོ་ལྔ་པ་ལགས་ཏེ། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དེང་དགེ་འདུན་དགག་དབྱེ་མཛད་དོ། །འདི་ནི་གསོལ་བའོ་ཞེས་གསུངས་པ་ཡིན་ནོ། །འདི་ལ་གྲལ་གྱི་ཆ་ལས་བྱར་རུང་ངོ་ཞེས་བྱ་བ་ནི། དགག་དབྱེ་བྱ་བ་འདི་ལ་གྲལ་གྱི་ཚར་གཅིག་ལ་དགག་དབྱེ་བྱེད་པ་དུ་མ་དག་གིས་སྟོད་སྨད་ཀྱི་ཚར་བཅད་དེ་དགག་དབྱེ་བྱར་རུང་ངོ༌། །རྩྭ་དཱུར་བ་བྲིམས་པ་དང་མདུན་དུ་འདུག་པ་ཡང་དགག་དབྱེ་བྱེད་པའི་ཡུལ་ཡིན་ནོ། །དེས་རྩྭ་དཱུར་བ་བྲིམ་པར་བྱའོ་ཞེས་བྱ་བ་ནི། དགག་དབྱེ་བྱེད་པ་དེས་ཇེ་དང་པོར་དགེ་འདུན་ཐམས་ཅད་ལ་རྩྭ་དཱུར་བ་ཁྱེད་པར་བྲིམ་པར་བྱའོ། །བྲིམ་པར་བྱའོ་ཞེས་བྱ་བའི་ཚིག་གིས་ན་སྔ་ནས་རྩྭ་དཱུར་བ་སྟ་གོན་བྱ་བ་ཡང་དེ་ཉིད་ཀྱི་ལས་ཡིན་ནོ། །དགག་དབྱེ་བྱས་ཟིན་གྱི་བར་དུ་དགེ་སློང་རེ་རེའི་མདུན་དུ་འདུག་པར་བྱའོ་ཞེས་བྱ་བ་ནི། དགག་དབྱེ་བྱེད་པས་དགེ་སློང་ཇི་སྙེད་ལ་དགག་དབྱེ་བྱེད་པར་འགྱུར་བ་དེ་སྙེད་ཀྱི་དགེ་སློང་རེ་རེའི་མདུན་དུ་འདུག་པར་བྱ་བ་སྟེ། ཇི་ལྟར་དགག་དབྱེ་བྱ་བ་ཙོག་ཙོག་པོར་འདུག་ཅིང་ལྷྭམ་བུད་དེ། བླ་གོས་ཕྲག་པ་གཅིག་ཏུ་བྱས་ཏེ་འདུག་པ་དེ་བཞིན་དུ་དགག་དབྱེ་བྱེད་པ་ཡང་འདུག་པར་བྱའོ། །རྩྭ་དཱུར་བ་སྔར་བྲིམས་པ་དེ་ནི་དགག་
དབྱེ་གོ་བར་བྱེད་པའི་དུས་ན་དགག་དབྱེ་བྱ་བ་དང༌། དགག་དབྱེ་བྱེད་པ་གཉི་གའི་ལག་པས་ཕན་ཚུན་ནས་གཟུང་བར་བྱའོ། །དེ་ལ་དགག་དབྱེ་གོ་བར་བྱ་བ་ནི་ལན་གསུམ་མོ་ཞེས་བྱ་བ་ནི། དགག་དབྱེ་བྱེད་པ་མདུན་ན་གནས་པ་དེ་ལ་དགེ་སློང་རེ་རེས་ཀྱང་དགག་དབྱེ་གོ་བར་བྱ་བའི་སྔགས་ལན་གསུམ་གསུམ་བརྗོད་པར་བྱའོ། །དེའི་སྔགས་ནི་ཚ་དང་ལྡན་པ་དགོངས་སུ་གསོལ། དེང་ནི་དགེ་འདུན་གྱི་དགག་དབྱེ་བཅོ་ལྔ་པ་ལགས་ཏེ། བདག་དགེ་སློང་མིང་འདི་ཞེས་བགྱི་བའི་དགག་དབྱེ་ཡང་བཅོ་ལྔ་པ་ལགས་ན། བདག་དགེ་སློང་མིང་འདི་ཞེས་བགྱི་བ་བདག་ལ་མཐོང་བ་དང་ཐོས་པ་དང་དོགས་པའི་གནས་གསུམ་གྱིས་དབྱར་གནས་པའི་དགེ་འདུན་ལ་དགག་དབྱེ་བགྱིད་ཀྱིས། ཚེ་དང་ལྡན་པ་རྣམས་ཀྱིས་བདག་ལ་གདམས་སུ་གསོལ། །ཚེ་དང་ལྡན་པ་རྣམས་ཀྱིས་བདག་ལ་རྗེས་སུ་བསྟན་དུ་གསོལ། ཚེ་དང་ལྡན་པ་རྣམས་ཀྱིས་བདག་ལ་རྗེས་སུ་གཟུང་དུ་གསོལ། ཐུགས་བརྩེ་བ་ཅན་ཚེ་དང་ལྡན་པ་རྣམས་ཀྱིས་ཐུགས་བརྩེ་བའི་སླད་དུ་བདག་ལ་ཐུགས་བརྩེ་བར་མཛད་དུ་གསོལ། ལྟུང་བ་ཤེས་ཤིང་མཐོང་ན་ཆོས་བཞིན་དུ་འདུལ་བ་བཞིན་དུ་སླར་བགྱིའོ། །ལན་གསུམ་དུ་བཟླས། ཐབས་ཡིན་ནོ། །ལེགས་སོ་ཞེས་གསུངས་པ་ཡིན་ནོ། །དེ་ཙམ་གྱིས་ནད་པ་ང་ལ་བ་དང་གནས་མལ་ཕན་ཚུན་དུ་འགྱུར་བ་དང་དུས་ལས་ཡོལ་བ་དང་གནོད་པ་འབྱུང་ན་གཉིས་སོ་ཞེས་བྱ་བ་ནི། ལན་གསུམ་བཟླས་པ་དེ་ཙམ་གྱིས་ནད་པ་ངལ་བ་འབྱུང་བའམ་གནས་མལ་ཕན་ཚུན་དུ་འགྱུར་བ་འབྱུང་བ་འམ་དུས་ལས་ཡོལ་བ་འབྱུང་བ་འམ། གནོད་པ་འབྱུང་བ་ལྟ་ན་དགག་དབྱེ་གོ་བར་བྱ་བའི་སྔགས་ལན་གཉིས་བཟླས་པར་བྱའོ། །དེ་ལ་ནད་པ་ངལ་བ་འབྱུང་བ་ནི། ནད་པ་སྡུག་བསྔལ་གྱི་ཚོར་བས་ངལ་བར་འགྱུར་བ་སྟེ། རླུང་ལ་སོགས་པས་ཀྱང་ནད་པ་ངལ་བར་འགྱུར་བ་སྲིད་པས། དེས་ན་འདིར་གཞང་འབྲུམ་གྱི་ནད་འབའ་ཞིག་གི་དབང་དུ་མ་བྱས་སོ། །གནས་མལ་ཕན་ཚུན་དུ་འགྱུར་བ་འབྱུང་བ་ནི། གནས་ཁང་དང༌། མལ་ཆ་དང་སྟན་ལ་སོགས་པ་ཆུད་ཟ་བར་འགྱུར་བ་སྟེ། རླུང་ལ་སོགས་པས་ཀྱང་གནས་མལ་ཕན་ཚུན་དུ་འགྱུར་བ་སྲིད་པས་དེས་ན་འདིར་ཆར་པ་འབའ་ཞིག་གི་དབང་དུ་མ་བྱས་སོ། །དུས་ལས་ཡོལ་བ་འབྱུང་བ་ནི་དགག་དབྱེའི་དུས་ལས་ཡོལ་བ་འབྱུང་བ་སྟེ། སྨོན་ལམ་ཀློག་པ་དང་ཆོས་ཉན་པ་
སྨྲ་བ་དང་ཆོས་དང་ལྡན་པའི་གཏམ་རྣམ་པར་གཏན་ལ་འབེབས་པ་དང་རྩོད་པ་ཉེ་བར་ཞི་བར་བྱེད་པས་ཀྱང་མཚན་འདའ་བར་འགྱུར་སྲིད་པས་དེས་ན་འདིར་སྤྱིར་བསྟན་ཏོ། །གནོད་པ་འབྱུང་བ་ནི། ཉམ་ངབ་འབྱུང་བ་སྟེ། རྒྱལ་པོ་དང་ཆོམ་རྐུན་པ་དང་གྲོང་པའི་མི་དང་གདུག་པ་དང་ཀླུ་དང་མེ་དང་ཆུ་ལ་སོགས་པའི་གནོད་པས་སྲོག་དང་དགེ་སྦྱོང་གི་ཚུལ་དང་ཚངས་པར་སྤྱོད་པའི་བར་ཆད་དུ་འགྱུར་བ་ཡང་སྲིད་པས་དེས་ན་འདིར་སྤྱིར་བསྟན་ཏོ། །དེ་ཙམ་གྱིས་ན་ཡང་ལན་གཅིག་གོ་ཞེས་བྱ་བ་ནི། ལན་གཉིས་བཟླས་པ་དེ་ཙམ་གྱིས་ཀྱང་ནད་པ་ལ་ངལ་བ་ལ་སོགས་པ་འབྱུང་བར་འགྱུར་བ་ལྟ་ན་དགག་དབྱེ་གོ་བར་བྱ་བའི་སྔགས་ལན་གཅིག་བཟླས་པར་བྱའོ། །དེས་གྲལ་རྫོགས་ན་གཞན་ལའོ་ཞེས་བྱ་བ་ནི། དགག་དབྱེ་བྱེད་པ་དེས་དགེ་སློང་གི་གྲལ་གྱི་དགག་དབྱེ་བྱེད་པ་གཞན་གཅིག་ལ་རང་གི་དགག་དབྱེ་བྱའོ། །མེད་ན་གཞན་ལའོ་ཞེས་བྱ་བ་ནི། དགག་དབྱེ་བྱེད་པ་གཞན་དེ་མེད་ན་དགག་དབྱེ་བྱེད་པ་དེས་དགེ་སློང་གཞན་གཅིག་གི་མདུན་དུ་རང་གི་དགག་དབྱེ་བྱའོ། །དགེ་འདུན་ཐམས་ཅད་ཀྱི་དགག་དབྱེ་བྱས་པ་དེ་ཉིད་དགེ་འདུན་ལ་གོ་བར་བྱའོ་ཞེས་བྱ་བ་ནི། དགེ་སློང་གི་དགེ་འདུན་ཐམས་ཅད་ཀྱིས་དགག་དབྱེ་བྱས་ཟིན་པའི་རྗེས་ལ། དགག་དབྱེ་བྱེད་པས་དགེ་འདུན་ཐམས་ཅད་ཀྱིས་དགག་དབྱེ་བྱས་པ་དེ་ཉིད་དགེ་སློང་གི་དགེ་འདུན་ལ་གོ་བར་བྱ་བའོ། །དེའི་སྔགས་ནི་དགེ་འདུན་བཙུན་པ་རྣམས་གསན་དུ་གསོལ། འདི་ལྟར་གནས་འདི་ན་དབྱར་གནས་པའི་དགེ་འདུན་གྱིས་དགག་དབྱེ་མཛད་ལགས་སོ་ཞེས་གསུངས་པ་ཡིན་ནོ། །ཐམས་ཅད་ཀྱིས་ལགས་པར་དགག་དབྱེ་མཛད་དོ། །ཤིན་ཏུ་དགག་དབྱེ་མཛད་དོ་ཞེས་བསྒྲུབ་པར་བྱའོ་ཞེས་བྱ་བ་ནི་དེ་དགག་དབྱེ་བྱེད་པས་དགེ་འདུན་ཐམས་ཅད་ཀྱིས་དགག་དབྱེ་བྱས་པ་དེ་ཉིད་དགེ་སློང་གི་དགེ་འདུན་ལ་གོ་བར་བྱས་མ་ཐག་ཏུ་དགེ་སློང་འདུས་པ་ཐམས་ཅད་ཀྱིས་འདི་སྐད་ཅེས། ལེགས་པར་དགག་དབྱེ་མཛད་དོ། །ཤིན་ཏུ་དགག་དབྱེ་མཛད་དོ་ཞེས་བྱ་བའི་སྔགས་འདིས་དགག་དབྱེ་བྱེད་པའི་ཚིག་དེ་བསྒྲུབ་པར་བྱའོ། །ལེགས་པར་དགག་དབྱེ་མཛད་དོ་ཞེས་བྱ་བ་ནི། མཛེས་ཤིང་ཁ་ན་མ་ཐོབ་མེད་པར་རོ། །ཤིན་ཏུ་དགག་དབྱེ་མཛད་དོ་ཞེས་བྱ་བ་ནི། འདི་ལ་བདག་ཅག་ཐེ་ཚོམ་མེད་དོ་ཞེས་བསྒྲུབ་པར་བྱ་བའོ། །རང་གི་རྫས་གང་ཡང་རུང་བ་ཐན་ཁབ་ཙམ་གྱིས་ཀྱང་དགེ་འདུན་
ལ་རྫས་ཀྱི་དགག་དབྱེ་བརྩམ་པར་བྱ་སྟེ། དེ་བླངས་ན་ཚིག་གིས་སོ་ཞེས་བྱ་བ་ནི། དེ་ལྟར་ཐམས་ཅད་ཀྱིས་ལེགས་པར་དགག་དབྱེ་མཛད་དོ། །ཤིན་ཏུ་དགག་དབྱེ་མེད་དོ་ཞེས་བསྒྲུབས་མ་ཐག་ཏུ་དགག་དབྱེ་བྱེད་པ་དེས་རང་གི་རྫས་ཀྱི་དགེ་འདུན་ལ་རྫས་ཀྱི་དགག་དབྱེ་བ་རྩམ་པར་བྱའོ། །རྫས་ཀྱི་དགག་དབྱེ་ཞེས་བྱ་བ་ནི། སྦྱིན་པར་བྱ་བའི་རྫས་གང་ལ་དགེ་འདུན་སྤྱན་དྲང་བའོ། །གང་ཡང་རུང་བ་ཞེས་བྱ་བ་ནི། ཆུང་དུ་ཡང་རུང་བའོ། །ཐ་ན་ཁ་བ་ཙམ་གྱིས་ཀྱང་ཞེས་བྱ་བ་ནི་ཆུང་དུ་ན་ཁབ་ཀྱི་མཐའ་ཡན་ཆད་ཀྱང་རུང་བའོ། །ཇི་ལྟར་བྱ་ཞེ་ན། དེའི་ཕྱིར་དེ་བླངས་ནས་ཚིག་གིས་སོ་ཞེས་བྱ་བ་སྨྲས་ཏེ། དགག་དབྱེ་བྱེད་པ་དེས་ཁབ་ལ་སོགས་པ་དེ་ལག་ཏུ་བླངས་ནས་རྒན་རིམས་ཀྱི་མདུན་དུ་འདུག་སྟེ། དགེ་འདུན་ལ་ཚིག་གིས་རྫས་ཀྱི་དགག་དབྱེ་བརྩམ་པར་བྱའོ། །ཚིག་དེ་ཇི་ལྟ་བུ་ཞིག་ཅེ་ན་དེའི་ཕྱིར། བཙུན་པ་རྫས་འདི་ལྟ་བུས་ཀྱང་དབྱར་གནས་པའི་དགེ་སློང་གི་དགེ་འདུན་ལ་དགག་དབྱེ་བགྱིར་རུང་ངོ་ཞེས་བྱ་བ་སྨྲས་ཏེ། སྔགས་ཀྱི་ཚིག་འདིས་སོ། །འདི་ནི་སྦྱིན་པར་བྱེད་པ་རྣམས་ཀྱི་བསོད་ནམས་ཀྱི་འདུ་བའི་སྒོའི་བྱེ་བྲག་བསྟན་པའི་ཕྱིར་བཅས་ཏེ། འདི་ལྟར་དགག་དབྱེ་བྱས་པའི་དགེ་སློང་གི་དགེ་འདུན་ནི་དགེ་ལེགས་ཀྱི་བསམ་པ་ཅན་ཡིན་པའི་ཕྱིར། ཤིན་ཏུ་ཡོངས་སུ་དག་པ་དང་བྱམས་པའི་སེམས་དང་ལྡན་པ་ཡིན་པའི་ཕྱིར་ཤིན་ཏུ་དང་བར་འགྱུར་བ་ཡིན་པས། དེའི་ཕྱིར་བསོད་ནམས་ཀྱི་ཞིང་ཆེས་ཁྱད་པར་དུ་འཕགས་པ་ཡིན་པས་དེ་ལ་སྦྱིན་པ་བྱིན་ན་འབྲས་བུ་ཆེས་མང་པོར་འགྱུར་རོ། །དེའི་འོག་ཏུ་དགེ་ཚུལ་རྣམས་ལ་དགག་དབྱེ་བྱའོ་ཞེས་བྱ་བ་ནི། རྫས་ཀྱི་དགག་དབྱེ་བྱས་པ་དེའི་འོག་ཏུ་དགག་དབྱེ་བྱེ་དང་དེས་དགེ་ཚུལ་རྣམས་ལ་དགག་དབྱེ་བྱའོ། །དེའི་འོག་ཏུ་དགེ་སློང་མ་རྣམས་ལའོ་ཞེས་བྱ་བ་ནི། དགེ་ཚུལ་རྣམས་ལ་དགག་དབྱེ་བྱས་པའི་འོག་ཏུ་དགག་དབྱེ་བྱེད་པ་དེས་དགེ་སློང་མ་རྣམས་ལ་དགག་དབྱེ་བྱའོ། །རང་གི་ཕྱོགས་མ་རྫོགས་པར་ཕྱོགས་གཞན་ལ་འཇུག་པར་མི་རིགས་པས་དེས་ན་དགེ་ཚུལ་རྣམས་ཀྱི་འོག་ཏུ་དགེ་སློང་མ་རྣམས་ལ་དགག་དབྱེ་བྱ་བ་བསྟན་ཏེ། དགེ་སློང་མ་ཞེས་སྨོས་པ་ནི་རང་གི་ཕྱོགས་དང་མཐུན་པའི་དཔེ་ཙམ་དུ་ཟས་པས་དེས་ན་དགེ་སློང་མ་རྣམས་ཀྱི་འོག་ཏུ་དགེ་སློང་མ་རྣམས་ལ་བྱ་བ་དང༌། དེའི་འོག་ཏུ་དགེ་ཚུལ་མ་རྣམས་ལ་བྱ་བ་ཡང་མདོ་འདིས་བསྡུས་པ་ཡིན་ནོ། །
བྱིན་གྱིས་བརླབས་ཏེ་སོང་བས་དེར་སྔར་དགག་དབྱེ་བྱེད་པ་ན་དེ་དག་དང་ལྷན་ཅིག་བྱས་ན་དགག་དབྱེ་བྱས་པ་ཉིད་ཡིན་ནོ་ཞེས་བྱ་བ་ནི། གལ་ཏེ་དགེ་སློང་དབྱར་གྱི་ནང་དུ་ཞག་བདུན་ལ་སོགས་པ་བྱིན་གྱིས་བརླབས་ཏེ། གཙུག་ལག་ཁང་གཞན་དུ་སོང་བ་དེས་གནས་དེ་ན་གནས་པའི་དགེ་སློང་རྣམས་དབྱར་སྔ་མར་གནས་པར་ཁས་བླངས་པའི་དབང་གིས་སམ། ཚེས་གྲངས་ནོར་བའི་དབང་གིས་སམ། གང་ཟག་འཐབ་ཀྲོལ་ཅན་འོང་བར་གྲགས་པའི་དབང་གིས་གནས་དེར་དགེ་སློང་གློ་བུར་དུ་འོངས་པ་དེའི་དགག་དབྱེའི་དུས་པས། སྔར་མ་ཚོགས་ཏེ་དགག་དབྱེ་བྱས་པ་ན། གནས་དེར་དགེ་སློང་གློ་བུར་དུ་འོངས་པ་དེས་གཉུག་མར་གནས་པ་དེ་དག་དང་ལྷན་ཅིག་དགག་དབྱེ་བྱས་ནས་དེས་དགག་དབྱེ་བྱས་པ་ཉིད་ཡིན་ནོ་ཞེས་བྱ་བའི་ཐ་ཚིག་གོ །འདི་ནི་གང་དུ་གནས་པར་ཁས་བླངས་པ་དེ་ཉིད་དུ་དགག་དབྱེ་ངེས་པར་འཆགས་ཀྱི་གཞན་དུ་ནི་མི་འཆགས་སོ་སྙམ་དུ་དགོས་པ་བསལ་བའི་ཕྱིར་མདོར་བྱས་སོ། །འདིར་གཞུང་ནི། བཙུན་པ་རེ་ཞིག་དགག་དབྱེའི་གདུགས་ཀྱི་ལྷག་མ་བཅུ་མཆིས་ཤིང༌། དགེ་སློང་དེ་ཡང་བསྐོས་ཏེ་མཚམས་ཀྱི་སླང་རོལ་དུ་མཆིས་ནས་དེ་ནས་གདུགས་བདུན་ན་དགག་དབྱེ་བྱུང་ནས་དེ་དེར་དགག་དབྱེ་བགྱིད་ན། དགག་དབྱེ་བགྱིས་ཞེས་བགྱིའམ། ཉེ་བ་འཁོར་དགག་དབྱེ་བྱས་ཞེས་བྱའོ། །བཙུན་པ་རེ་ཞིག་དགག་དབྱེའི་གདུགས་ཀྱི་ལྷག་མ་བདུན་མཆིས་ཤིང་དགེ་སློང་དེ་ཡང་བྱིན་གྱིས་བརླབས་ཏེ། མཚམས་ཀྱི་སླད་རོལ་ཏུ་མཆིས་ནས་གང་དུ་མཆིས་པ་དེར་གདུགས་བཞི་ལ་དགག་དབྱེ་བྱུང་ནས་དེ་དེར་དགག་དབྱེ་བགྱིད་ན། དགག་དབྱེ་བགྱིས་ཞེས་བགྱིའམ། ཉེ་བ་འཁོར་དགག་དབྱེ་བྱས་ཞེས་བྱའོ་ཞེས་གསུངས་པ་ཡིན་ནོ།། །།བམ་པོ་ལྔ་བཅུ་པ། བུད་མེད་ལ་ནི་མ་ཡིན་ནོ་ཞེས་བྱ་བ་ནི་དགག་དབྱེ་བྱེད་པ་བུད་མེད་ཡིན་ན། དེ་ལ་དགེ་སློང་དང་དགེ་སློང་མ་ལ་སོགས་པས་དགག་དབྱེ་བྱས་ན་དགག་དབྱེ་བྱས་པ་ཉིད་མ་ཡིན་ནོ་ཞེས་སྨྲས་པ་ནི། དགག་དབྱེ་བྱེད་པ་གཟུང་གི་དགེ་འདུན་ནི་མ་ཡིན་ཏེ། བུད་མེད་ཀྱི་དགེ་འདུན་ལ་ཡང་སྐྱེས་པས་དགག་དབྱེ་ཡང་མི་བྱའོ། །དགག་དབྱེ་བྱེད་པ་ཉིད་ནི་སྐྱེས་པའི་དབང་དུ་བྱས་པ་ཉིད་ཡིན་པའི་ཕྱིར་རོ། །གྱུར་པ་ལ་ཡང་ངོ་ཞེས་བྱ་བ་ནི། དགེ་སློང་དགག་དབྱེ་བྱེད་པར་བསྐོས་པ་དེ་དགག་དབྱེ་བྱེད་པ་ན་མཚན་གྱུར་ཏེ། དགེ་སློང་མའི་
མཚན་དང་ལྡན་པར་གྱུར་ན་གང་ཟག་དེ་ལ་དགེ་སློང་དང་དགེ་སློང་མ་ལ་སོགས་པས་དགག་དབྱེ་བྱས་པ་ཉིད་མ་ཡིན་ནོ་ཞེས་བྱ་བར་སྦྱར་རོ། །ཡང་ངོ་ཞེས་བྱ་བའི་སྒྲ་ནི་མདོ་སྔ་མ་ལས་མ་ཡིན་ནོ་ཞེས་དགག་པའི་ཚིག་སྨོས་པ་དེའི་རྗེས་བསྙག་པའི་ཕྱིར་དང་མཚན་གྱུར་བ་ལ་དགག་དབྱེ་བྱས་ན་ཡང་དགག་དབྱེ་བྱས་པ་ཉིད་མ་ཡིན་ན། གལ་ཏེ་དང་པོ་ནས་བུད་མེད་ཉིད་དུ་གྱུར་པ་ལ་ལྟ་སྨོས་ཀྱང་ཅི་དོགས་ཞེས་བྱ་བར་སྟོན་ཏོ། །འདིར་གཞུང་ནི་དགག་དབྱེ་བྱེད་པ་མཚན་གྱུར་ན་དགག་དབྱེ་བྱས་པ་མ་ཡིན་པར་བརྗོད་པར་བྱའོ་ཞེས་གསུངས་པ་ཡིན་ནོ། །གནས་པར་མི་ནུས་པ་ཉིད་ཡིན་ན་སྤྱོད་ཡུལ་དུ་གྱུར་བའི་དགེ་སློང་ལ་ཚོགས་ཀྱི་དགག་དབྱེ་ས་གོ་བར་བྱའོ་ཞེས་བྱ་བ་ནི། གནས་པར་ཁས་བླངས་པའི་གནས་སུ་ཡུལ་འཁྲུག་པ་ལ་སོགས་པའི་རྒྱུས་གནས་པར་མི་ནུས་པ་ཉིད་ཡིན་ན་དེའི་ཚེ་རང་གི་མིག་ལྔའི་སྤྱོད་ཡུལ་དུ་གྱུར་པའི་དགེ་སློང་མདུན་ན་གནས་པ་དེ་ལ་དགེ་སློང་འགྲོ་བར་རྩོལ་བ་དེས་ཚོགས་ཀྱིས་དགག་དབྱེས་དགག་དབྱེ་བགྱིད་དོ་ཞེས་གོ་བར་བྱས་ཏེ་འགྲོ་བར་བྱའོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། ཡུལ་འཁྲུག་པ་ལ་སོགས་པའི་གནོད་པས་གནས་པར་མི་ནུས་ན་དགེ་སློང་དག་དང་ཕྲད་པ་ལ་ཚོགས་པའི་དགག་དབྱེ་བྱས་པས་གོ་བར་བྱ་བའམ། ཕན་ཚུན་གོ་བར་བྱ་པས་དགག་དབྱེ་གོ་བར་བྱས་ཏེ་འགྲོ་བར་བྱའོ། །ཚོགས་པའི་དགག་དབྱེའི་སྔགས་ནི། ཚེ་དང་ལྡན་པ་དགོངས་སུ་གསལ། །དེང་ནི་དགེ་འདུན་གྱི་དགག་དབྱེ་ལགས་ཏེ། བདག་དགེ་སློང་མིང་འདི་ཞེས་བགྱི་བའི་ཡང་དགག་དབྱེ་ལགས་ན། བདག་དགེ་སློང་མིང་འདི་ཞེས་བགྱི་བ་བདག་ལ་མཐོང་བ་དང་ཐོས་པ་དང་དོགས་པའི་གནས་གསུམ་གྱིས་དབྱར་གནས་པའི་དགེ་འདུན་དག་ཚོགས་པའི་དགག་དབྱེ་བགྱིད་ཀྱིས། ཚེ་དང་ལྡན་པ་རྣམས་ཀྱིས་བདག་ལ་གདམས་སུ་གསོལ། ཚེ་དང་ལྡན་པ་རྣམས་ཀྱིས་བདག་ལ་རྗེས་སུ་བསྟན་དུ་གསོལ། ཚེ་དང་ལྡན་པ་རྣམས་ཀྱིས་བདག་ལ་རྗེས་སུ་གཟུང་དུ་གསོལ། ཐུགས་བརྩེ་བ་ཅན་ཚེ་དང་ལྡན་པ་རྣམས་ཀྱིས་ཐུགས་བརྩེ་བའི་སླད་དུ་བདག་ལ་ཐུགས་བརྩེ་བར་མཛད་དུ་གསོལ། ལྟུང་བ་ཤེས་ཤིང་མཐོང་ན་ཆོས་བཞིན་འདུལ་བ་བཞིན་དུ་སླར་བགྱིའོ། །ལན་གསུམ་དུ་བཟླས། ཐབས་ཡིན་ནོ། །ལེགས་སོ་ཞེས་
གསུངས་པ་ཡིན་ནོ། །དབྱར་གྱི་ནང་དུ་བྱ་བས་འགྲོ་དགོས་ན་དགག་དབྱེ་བྱའོ་ཞེས་བྱ་བ་ནི། དགག་དབྱེའི་དུས་ལ་མ་བབ་བར་དབྱར་ཕྱིན་དུ་དགེ་སློང་བྱ་བའི་དབང་གིས་གནས་གཞན་དུ་འགྲོ་དགོས་པར་གྱུར་ན་ཚེས་བཅོ་ལྔ་འམ་བཅུ་བཞིའི་དུས་གང་ཡང་རུང་བ་ཅིག་དང་སྦྱར་ཏེ། དགག་དབྱེའི་ཚུལ་བཞིན་དུ་བྱ་ཞིང་འགྲོ་བར་བྱའོ། །འདི་སྐད་བསྟན་ཏེ། གནས་པར་ཁས་བླངས་པའི་དགེ་སློང་ལ་མི་འགྲོ་བར་མི་རུང་བའི་བྱ་བ་དེ་ལྟ་བུ་ཞིག་བྱུང་ན་རང་དགར་འགྲོ་བ་མ་ཡིན་པའི་དགེ་སློང་དེས་དབྱར་གྱི་ནང་དུ་དགག་དབྱེ་བྱེད་པ་ལ་མི་རིགས་པ་མེད་པར་བྱའོ། །འདིར་གཞུང་ནི་བཙུན་པ་འདི་ལྟར་དགེ་སློང་དག་ཁྲིམས་སུ་བགྱི་བ་འདི་ལྟ་བུ་བགྱིས་ན་དབྱར་གནས་པར་ཁས་ལེན་པར་བགྱིད་དེ། ཚེ་དང་ལྡན་པ་དག་གལ་ཏེ་བདག་དབྱར་གྱི་ནང་དུ་ཉེ་དུའི་གན་དུ་འགྲོ་བའི་དགག་དབྱེ་སྦྱིན་པ་ལྟ་ན་བདག་དབྱར་གནས་པར་ཁས་ལེན་ཏོ་ཞེས་མཆིན་བཙུན་པ་དགག་དབྱེ་སྩལ་བར་བགྱི་འམ། ཉེ་བ་འཁོར་སྦྱིན་པར་བྱའོ་ཞེས་གསུངས་པ་ཡིན་ནོ། །ཁྲིམས་སུ་བྱ་བ་མེད་བར་ཡང་དབྱར་གྱི་ནང་དུ་ཉེ་དུའམ་གཞན་གྱི་ཕྱིར་འགྲོ་ལ་དགག་དབྱེ་སྦྱིན་དུ་རུང་བས་དེའི་ཕྱིར་འདིར་སྤྱིར་མདོར་བྱས་སོ། །གཞི་འམ་གང་ཟག་གམ་གཉི་ག་བཞག་ནས་ཀྱང་ངོ་ཞེས་བྱ་བ་ཡང༌། དགག་དབྱེ་བྱར་རུང་ངོ་ཞེས་བྱ་བར་སྦྱར་རོ། །གཞི་ཞེས་བྱ་བ་ནི་ལྟུང་བ་ལ་བྱ་སྟེ། ལྟུང་བ་ཐམས་ཅད་བཞག་ནས་དགག་དབྱེ་བྱར་མི་རུང་གི །འདི་ལྟར་ཕམ་པར་འགྱུར་བའི་སྡེ་ཚན་མ་གཏོགས་པ་དགེ་འདུན་ལྷག་མ་ལ་སོགས་པ་ལྟུང་བའི་སྡེ་ཚན་གཞན་གང་ཡང་རུང་བ་ཅིག་བཞག་སྟེ་དགག་དབྱེ་བྱར་རུང་བའོ། །དེ་ཡང་ཇི་ལྟ་བུ་ཞེ་ན་བདག་ཕམ་པར་འགྱུར་བའི་སྡེ་ཚན་མ་གཏོགས་པ་ལྟུང་བྱེད་ཀྱི་སྡེ་ཚན་གཞན་ལས་གང་ཡང་རུང་བ་ཅིག་ནི་དགག་དབྱེ་མི་བྱེད་གྱིས་ཁྱེད་ཀྱིས་ཀྱང་གནས་གསུམ་གྱིས་བདག་ལམ་གླེང་ཤིག །ཕམ་པར་འགྱུར་བའི་སྡེ་ཚན་ལ་སོགས་པ་ལྟུང་བ་གཞན་ནི། དགག་དབྱེ་བྱེད་ཀྱིས་ཁྱེད་ཅག་གིས་ཀྱང་གནས་གསུམ་གྱིས་གླེངས་ཤིག་ཅེས་ཟེར་བ་དེས་ཀྱང་དགག་དབྱེ་བྱ་བར་རུང་བའོ། །འདིར་གཞུང་ནི་གལ་ཏེ་དགེ་འདུན་ལྷག་མ་ཤེས་ན་བྱིན་གྱིས་བརླབས་ཏེ་དགག་དབྱེ་བྱའོ། །ཕམ་པར་འགྱུར་བ་ཤེས་ན་ནི་བསྙིལ་བར་གསུངས་པས་བསྙིལ་ཏེ་དགག་དབྱེ་བྱའོ། །དེ་ལས་གཞན་པ་དག་ཤེས་ན་ནི་བཤགས་
ཉེ་དགག་དབྱེ་བྱའོ་ཞེས་གསུངས་པ་ཡིན་ནོ། །གང་ཟག་ཅེས་བྱ་བ་ནི་འདིར་གང་ཟག་གང་ལས་ལུས་ཀྱིས་རེག་པ་ལ་སོགས་པའི་ལྟུང་བ་བྱུང་བར་གྱུར་པའི་གང་ཟག་དེ་ལ་བྱའི་གླེང་བ་པོ་དང་གླེང་བར་བྱ་བ་མ་ཡིན་ནོ། །དེ་ཡང་ཇི་ལྟ་བུ་ཞེ་ན་གང་ཟག་བུད་མེད་གང་གི་ཡུལ་ལས་ལུས་ཀྱིས་རེག་པ་ལ་སོགས་པ་བྱུང་པའི་གང་ཟག་གང་ཡང་རུང་བ་གཅིག་ནི་དགག་དབྱེ་མི་བྱེད་ཀྱིས་ཁྱེད་ཅག་གིས་ཀྱང་གནས་གསུམ་གྱི་བདག་ལམ་གླེང་ཤིག །དེ་ལས་གཞན་པའི་གང་ཟག་ཐམས་ཅད་ཀྱི་འབྱུང་པའི་མཐའ་ནི་དགག་དབྱེ་བྱེད་ཀྱིས་ཁྱེད་ཅག་གིས་ཀྱང་གནས་གསུམ་གྱིས་གླེངས་ཤིག་ཅེས་ཟེར་བ་དེས་ཀྱང་དགག་དབྱེ་བྱར་རུང་བའོ། །གཉི་ག་ཞེས་བྱ་བ་ནི། གཞི་དང་གང་ཟག་གཉི་ག་སྟེ་གཞི་འདི་དང་གང་ཟག་འདི་ནི་དགག་དབྱེ་མི་བྱེད་ཀྱིས་ཁྱེད་ཀྱིས་ཀྱང་གནས་གསུམ་གྱིས་བདག་ལ་མ་གླེང་ཤིག །གཞི་དེ་དང་གང་ཟག་ད་ལས་གཞན་པའི་གཞི་དང་གང་ཟག་གི་བྱུང་བའི་མཐའ་ཐམས་ཅད་ནི་དགག་དབྱེ་བྱེད་ཀྱིས་ཁྱེད་ཀྱིས་ཀྱང་གནས་གསུམ་གྱིས་གླེངས་ཤིག་ཅིག་ཟེར་ན་དེས་ཀྱང་དགག་དབྱེ་བྱར་རུང་བའོ། །དེ་དག་མནོད་པར་བྱའོ་ཞེས་བྱ་བ་ནི། དེ་ལྟར་གཞིའམ་གང་ཟག་གམ་གཉི་ག་བཞག་སྟེ། དགག་དབྱེ་བྱེད་པ་དེ་དག་དགེ་འདུན་དུ་འགྱུར་པའི་དགེ་སློང་དག་གིས་མནོད་ཅིང་ཁས་བླང་བར་བྱ་བའོ། །གཞག་པར་བྱ་བ་མཐའ་མ་གཏོགས་པ་ཉིད་ཁས་བླངས་པར་བྱ་བའོ་ཞེས་བྱ་བ་ནི། གཞག་པར་བྱ་བ་རྣམ་པ་གསུམ་སྔར་བསྟན་པ་ལས་གཞི་ཞེས་སྨོས་པ་དང་སྦྱར་ཏེ། གཞག་པར་བྱ་བ་བཞི་ཞེས་བྱ་བ་ལྟུང་བའི་སྡེ་ཚན་དེ་ལས་མཐའ་ཞེས་བྱ་བ་ན། ཕམ་པར་འགྱུར་བའི་སྡེ་ཚན་མ་གཏོགས་པ་དེ་ལས་གཞན་པ་དགེ་འདུན་ལྷག་མ་ལ་སོགས་པའི་སྡེ་ཚན་གང་ཡང་རུང་བ་འཇོག་ཅིང་དགག་དབྱེ་བྱེད་ན། དགག་དབྱེ་བྱེད་པ་རྣམ་པ་དེ་ལྟ་བུ་དེ་ནི་དགེ་འདུན་དུ་གྱུར་པའི་དགེ་སློང་དག་དང༌། དགག་དབྱེ་བྱེད་པའི་དགེ་སློང་གིས་ཀྱང་ཁས་བླང་བར་བྱའོ། །ཇི་ལྟར་ཁས་བླང་བར་བྱ་ཞེ་ན་དེའི་ཕྱིར་ཚེ་དང་ལྡན་པ་ཁོ་བོ་ཅག་ནི་ཚེ་དང་ལྡན་པས་ཅི་ནས་ཀྱང་གཞི་འཇོག་པར་བྱེད་ཅིང་གང་ཟག་འཇོག་པར་མི་བྱེད་པ་དེའི་དོན་དུ་འདུས་ཤིང་འདུག་པ་མ་ཡིན་གྱི་འདི་ལྟར་བཅོམ་ལྡན་འདས་ཀྱིས་ཚུལ་ཁྲིམས་རྣམ་པར་དག་པར་བྱ་བའི་ཕྱིར་ནི་གསོ་སྦྱོང་གསུངས་ལ་ཆོས་
རྣམ་པར་དག་པར་བྱ་བའི་ཕྱིར་ནི་དགག་དབྱེ་གསུངས་པས་གལ་ཏེ་འདོད་ན་དགག་དབྱེ་གྱིས་ཤིག་ཅེས་སོ་ཞེས་བྱ་བ་སྨྲས་ཏེ། ཚེ་དང་ལྡན་པ་ཞེས་བྱ་བའི་བོད་པའི་ཚིག་གོ །ཁོ་བོ་ཅག་ནི་ཞེས་བྱ་བ་ནི། དགེ་འདུན་དུ་གྱུར་པའི་དགེ་སློང་རྣམས་སོ། །ཅི་ནས་ཀྱང་ཞེས་བྱ་བ་ནི། ཀྱེ་མ་ཞེས་བྱ་བའི་ཐ་ཚིག་གོ །གཞི་འཇོག་པར་བྱེད་ཅིང་ཞེས་བྱ་བ་ནི། ལྟུང་བ་སྡེ་ལྔ་པོ་དག་ལས་ཕམ་པར་འགྱུར་བ་མ་གཏོགས་པ་ལྟུང་བ་གཞན་གང་ཡང་རུང་བ་ཅིག་གི་དགག་དབྱེ་མི་བྱེད་ཅིང་ངོ༌། །གང་ཟག་འཇོག་པར་མི་བྱེད་པ་ཞེས་བྱ་བ་ནི། གང་ཟག་གང་ལས་ལུས་ཀྱིས་རེག་པ་ལ་སོགས་པའི་ལྟུང་བ་བྱུང་བར་གྱུར་པའི་གང་ཟག་དེའི་དགག་དབྱེ་བྱེད་པར་འགྱུར་བའོ། །དེའི་དོན་དུ་ཞེས་བྱ་བ་ནི། ཇི་སྐད་བསྟན་པ་ཐག་པ་དེ་གཉིས་ཀྱི་དོན་དུའོ། །འདུས་ཤིང་ཞེས་བྱ་བ་ནི། གནས་གཅིག་ཏུ་འདུས་པར་གྱུར་པའོ། །འདུག་པ་ཞེས་བྱ་བ་ནི་འཁོད་པའོ། །མ་ཡིན་གྱི་ཞེས་བྱ་བ་ནི། དེ་ལྟ་བུ་མ་ཡིན་པར་དགག་པའོ། །ཚུལ་ཁྲིམས་རྣམ་པར་དག་པར་བྱ་བའི་ཕྱིར་ནི་གསོ་སྦྱོང་གསུངས་ལ་ཞེས་བྱ་བ་ནི། གསོ་སྦྱོང་བྱས་ན་ཁ་ན་མ་ཐོ་བ་མེད་པ་ཉིད་ཙམ་ལ་རྣམ་པར་དག་པ་ཞེས་བྱའོ། །ཆོས་རྣམ་པར་དག་པར་བྱ་བའི་ཕྱིར་ནི་དགག་དབྱེ་གསུངས་པ་ཞེས་བྱ་བ་ནི། གླེང་བ་དང་གདམས་ངག་དང་རྗེས་སུ་བསྟན་པ་དག་ལ་ཡང་དག་པར་ཞུགས་པ་ཉིད་དང་དྲང་པོ་ཉིད་དུ་གྱུར་ན། སེམས་དང་སེམས་ལས་བྱུང་བ་དག་གི་ཆོས་རྣམ་པར་དག་པར་འགྱུར་བའོ། །གལ་ཏེ་འདོད་ན་དགག་དབྱེ་གྱིས་ཤིག་ཅེས་བྱ་བ་ནི། གལ་ཏེ་བདག་ལ་ཕམ་པར་འགྱུར་བ་གཞི་པོ་དག་གི་ཡོངས་སུ་མ་དག་པ་ཉིད་མེད་པར་སེམས་ཤིང་གལ་ཏེ་གཞི་དང་གང་ཟག་གང་ཡང་གཞག་པ་མེད་པས་དགག་དབྱེ་བྱེད་པར་འདོད་ན་ཡང་དགག་དབྱེ་གྱིས་ཤིག །ཚེ་དང་ལྡན་པས་ཅི་ནས་ཀྱང་གཞི་འཇོག་པར་བྱེད་ཅིང༌། གང་ཟག་འཇོག་པར་མི་བྱེད་པ་དེ་ཁོ་བོ་ཅག་ལ་དགོས་པ་མེད་ཀྱི། འདི་ལྟར་ཚེ་དང་ལྡན་པ་ཉིད་རྣམ་པར་དག་པར་བྱ་དགོས་སོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། འདི་ལ་གཞི་ཁ་ཅིག་གཞག་པ་ཁོ་བོ་ཅག་ལ་དགོས་པ་མེད་དེ། ཁོ་བོ་ཅག་ནི་ཚེ་དང་ལྡན་པས་ཅི་ནས་ཀྱང་གཞི་འཇོག་པར་བྱེད་ཅིང༌། གང་ཟག་འཇོག་པར་མི་བྱེད་པ་དེའི་དོན་དུ་འདུས་ཤིང་འདུག་པ་མ་ཡིན་གྱི། འདི་ལྟར་ཚེ་དང་
ལྡན་པ་ཉིད་རྣམ་པར་དག་པ་དགོས་པས། གལ་ཏེ་བདག་ལ་ཕམ་པར་འགྱུར་བ་བཞི་པོ་དག་གི་ཡོངས་སུ་མ་དག་པ་ཉིད་མེད་པར་སེམས་ན། དེའི་ཕྱིར་དགག་དབྱེ་གྱིས་ཤིག །ཁོ་བོ་ཅག་ལ་གཞག་པ་དགོས་པ་མེད་ཀྱིས་གལ་ཏེ་གཞག་པ་མེད་པ་ཁོ་ནར་དགག་དབྱེ་བྱེད་པར་འདོད་ན་ཡང་དགག་དབྱེ་གྱིས་ཤིག་ཅེས་བྱ་བའི་ཐ་ཚིག་གོ །གང་ཟག་འཇོག་པར་བྱེད་ཅིང་གཞི་འཇོག་པར་མི་བྱེད་པ་དང༌། གཞི་ཡང་འཇོག་པར་བྱེད་ཅིང་གང་ཟག་ཀྱང་འཇོག་པར་བྱེད་པའི་འོ་ཞེས་བྱ་བ་ཡང་དེའི་དོན་དུ་འདུས་ཤིང་འདུག་པ་མ་ཡིན་གྱི་ཞེས་བྱ་བ་ལ་སོགས་པར་སྦྱར་ཏེ། ཆོ་དང་ལྡན་པ་ཁོ་བོ་ཅག་གི་ཚེ་དང་ལྡན་པས་ཅི་ནས་ཀྱང་གང་ཟག་འཇོག་པར་བྱེད་ཅིང༌། གཞི་འཇོག་པར་མི་བྱེད་པ་དེའི་དོན་དུ་འདུས་ཤིང་འདུག་པ་མ་ཡིན་གྱི། འདི་ལྟར་བཅོམ་ལྡན་འདས་ཀྱིས་ཚུལ་ཁྲིམས་རྣམ་པར་དག་པར་བྱ་བའི་ཕྱིར་ནི་གསོ་སྦྱོང་གསུངས་ལ། ཆོས་རྣམ་པར་དག་པར་བྱ་བའི་ཕྱིར་ནི་དགག་དབྱེ་གསུངས་པས། གལ་ཏེ་འདོད་ན་དགག་དབྱེ་གྱིས་ཤིག་ཅེས་བྱ་བ་དང༌། ཚེ་དང་ལྡན་པ་ཁོ་བོ་ཅག་ནི་ཚེ་དང་ལྡན་པས་ཅི་ནས་ཀྱང་གཞི་ཡང་འཇོག་པར་བྱེད་ཅིང་གང་ཟག་ཀྱང་འཇོག་པར་བྱེད་པ་དེའི་དོན་དུ་འདུས་ཤིང་འདུག་པ་མ་ཡིན་གྱི། འདི་ལྟར་བཅོམ་ལྡན་འདས་ཀྱིས་ཚུལ་ཁྲིམས་རྣམ་པར་དག་པར་བྱ་བའི་ཕྱིར་ནི་གསོ་སྦྱོང་གསུངས་ལ། ཆོས་རྣམ་པར་དག་པར་བྱ་བའི་ཕྱིར་ནི་དགག་དབྱེ་གསུངས་པས། གལ་ཏེ་འདོད་ན་དགག་དབྱེ་གྱིས་ཤིག་ཅེས་བྱ་བར་མདོའི་ཚིག་གཉིས་དང་གོ་རིམས་བཞིན་དུ་སྦྱར་ཏེ། ཁས་བླངས་པ་ཉིད་ན་གཞག་པའམ་བཞག་པ་བསྙོན་པས་ནི་ཁས་བླངས་པ་ཉམས་པར་མི་འགྱུར་རོ་ཞེས་བྱ་བ་ནི། དེ་ལྟར་གང་ཟག་གང་གཞིའམ་གང་ཟག་གམ་གཉི་ག་བཞག་ནས་དགག་དབྱེ་བྱེད་པ་དེ་དག་དགེ་འདུན་དུ་གྱུར་པའི་དགེ་སློང་རྣམས་དང་དགག་དབྱེ་བྱེད་པའི་དགེ་སློང་གིས་མནོས་ཤིང་ཁས་བླངས་པ་ཉིད་ན། གལ་ཏེ་གང་ཟག་དེ་གཞག་པའམ་བཞག་པ་བསྙོན་པར་བྱེད་དེ། བདག་གིས་བཞག་པ་ཉིད་མ་ཡིན་ཏེ་ཅུང་ཟད་ཀྱང་མ་བཞག་གམ་ཞེའམ། བདག་གིས་བཞག་སྟེ་འདི་མ་བཞག་གི་གཞན་གཞག་གོ་ཞེས་བསྙོན་ན་དེ་གཉི་ག་བསྙོན་ཀྱང་རུང༌། གང་ཡང་རུང་བ་ཅིག་བསྙོན་ཀྱང་རུང་སྟེ། དེས་ནི་སྔར་དགེ་འདུན་དུ་གྱུར་པའི་
དགེ་སློང་རྣམས་དང་དགག་དབྱེ་བྱེད་པའི་དགེ་སློང་གིས་དེའི་དགག་དབྱེ་ཁས་བླངས་པ་གང་ཡིན་པ་དེ་དག་ཉམས་པར་མི་འགྱུར་ཏེ། དགག་དབྱེ་བྱས་པ་ཉིད་ཁོ་ན་ཡིན་པས་ཡང་གཟོད་དགག་དབྱེ་བྱ་མི་དགོས་སོ་ཞེས་བྱ་བའི་ཐ་ཚིག་གོ །དེ་ལ་སྔ་མའམ་འདིའི་རྣམ་པ་དེ་ལྟ་བ་ཅུང་ཟད་ཀྱང་མེད་དོ་ཞེས་ཟེར་ན་བརྫུན་ཉིད་དོ་ཞེས་བྱ་བ་ནི། སྔར་བསྟན་མ་ཐག་པའི་བསྙེན་པ་དེ་ལ་སྔ་མ་ཞེས་བྱ་བ་གཞག་པ་ཞེས་བྱ་བ་སྔར་བསྟན་པའི་དེའི་རྣམ་པ་དེ་ལྟ་བུ་ཅུང་ཟད་ཀྱང་མེད་དོ་ཞེས་ཟེར་བའམ། འདི་ཞེས་བྱ་བ་གཞག་པ་ཞེས་བྱ་བ་ཕྱིས་བསྟན་པ་འདིའི་རྣམ་པ་དེ་ལྟ་བུ་ཅུང་ཟད་ཀྱང་མེད་དོ་ཞེས་ཟེར་ན་བསྙོན་པའི་ཡུལ་དེ་ལ་གཞག་པ་དང་གཞག་པའི་རྣམ་པ་དེ་ལྟ་བུ་ཅུང་ཟད་ཀྱང་མེད་དོ་ཞེས་ཟེར་བ་དེ་ནི་བརྫུན་ཉིད་ཡིན་ཏེ། ལོག་པ་ཉིད་དང་བརྫུན་སྨྲ་བའི་ཁ་ན་མཐོ་བའི་བྱེད་པ་པོ་ཉིད་ཡིན་ནོ་ཞེས་བྱ་བའི་ཐ་ཚིག་གོ །གལ་ཏེ་གནས་པར་ཁས་བླངས་པ་དག་གིས་དགེ་སློང་འཐབ་ཀྲོལ་བྱེད་པ་དག་འོང་བར་འགྱུར་ཞིང་ཐོས་པར་གྱུར་ནས། གལ་ཏེ་གསོ་སྦྱོང་གཉིས་སམ་གསུམ་ཐལ་བར་གྱུར་ན་དགག་དབྱེ་བྱའོ་ཞེས་བྱ་བ་ནི། གལ་ཏེ་དབྱར་གནས་པར་ཁས་བླངས་པའི་དགེ་སློང་དག་གིས་རང་གི་གནས་དེར་དགག་དབྱེ་བྱེད་པའི་དུས་སུ་གནས་གཞན་ནས་དགེ་སློང་འཐབ་ཀྲོལ་བྱེད་པ་དག་འོང་བར་འགྱུར་ཞིང༌། དེ་དག་འོངས་ནས་བདག་ཅག་གིས་དགག་དབྱེ་བྱས་པའི་ཚེ་དེ་དག་འཐབ་ཀྲོལ་བྱེད་པར་འགྱུར་བ་ཐོས་པར་གྱུར་ན། གལ་ཏེ་ངས་པར་ཁས་བླངས་པ་དེ་དག་གིས་གནས་དེར་གནས་པར་ཁས་བླངས་པ་ཚུན་ཆད་དུ་གསོ་སྦྱོང་ལན་གཉིས་སམ་གསུམ་བྱས་ཤིང་ཐལ་བར་གྱུར་ན། དེའི་ཚེ་དེ་དག་གིས་དགག་དབྱེའི་དུས་ལ་མ་བབ་ཀྱང་རུང་སྟེ། ཅི་ནས་ཀྱང་དགེ་སློང་འཐབ་ཀྲོལ་བྱེད་པ་དེ་དག་གནས་དེར་མ་འོངས་པའི་མདུན་རོལ་དུ་ཟླ་བ་ཉ་ཤི་གཅིག་གི་དུས་དང་སྦྱར་ཏེ། དགག་དབྱེ་བྱའོ་ཞེས་བྱ་བའི་ཐ་ཚིག་གོ །གཉིས་ཐལ་བར་གྱུར་ན་ཞེས་སྨོས་པས་ནི་ཕྱེད་བྱས་པ་ཉིད་བསྟན་ལ། གསུམ་ཐལ་བར་གྱུར་ན་ཞེས་སྨོས་པས་ནི་ཕལ་ཆེར་བྱས་པ་ཉིད་དུ་བསྟན་ཏེ། ཐམས་ཅད་ལ་ཡང་ཕྱེད་བྱས་པ་ནི་བྱས་པ་ཉིད་ཡིན་ནོ་ཞེས་འཇིག་རྟེན་པའི་གྲགས་པ་ཡིན་ལ། ཕལ་ཆེར་བྱས་པ་ནི་བྱས་པ་ཉིད་ཡིན་ནོ་ཞེས་འཕགས་པའི་གྲགས་པ་ཡིན་པས། འདིར་
ཡང་གསོ་སྦྱོང་ལན་གཉིས་བྱས་པས་ནི་དབྱར་གནས་པ་བྱས་པ་ཉིད་ཡིན་པས། འཇིག་རྟེན་པའི་གྲགས་པས་གྲགས་པ་ཉིད་ཡིན་ལ། གསོ་སྦྱོང་ལན་གསུམ་བྱས་པས་ནི་དབྱར་གནས་པར་བྱས་པ་ཉིད་ཡིན་པར་འཕགས་པའི་གྲགས་པས་གྲགས་པ་ཉིད་ཡིན་པས། རྐྱེན་དེ་ལྟ་བུའི་དབང་གིས་དུས་དེ་ཙམ་གྱིས་དགག་དབྱེ་བྱས་ན་ཡང་དབྱར་གནས་པའི་ཡོན་ཏན་དང་དགག་དབྱེའི་ཡོན་ཏན་ཐོབ་པར་འགྱུར་རོ། །དགག་དབྱེ་ནི་ཚེས་བཅོ་ལྔ་ལ་བྱ་བ་ཡིན་པས། འདིར་ཡང་ཚེས་བཅོ་ལྔ་ལ་ལྟོས་པར་བྱ་བ་ཉིད་ཡིན་ནོ། །ཚེས་བཅོ་ལྔ་སྨོས་པས་བཅུ་བཞི་ཡང་བཟུང་བ་ཡིན་ཏེ། དེ་ཉིད་བཅོ་ལྔ་ཡིན་ནོ་ཞེས་སྔར་བསྟན་པའི་ཕྱིར་རོ། །མ་གྲུབ་ན་དཀྱིལ་འཁོར་པ་ལྔའམ་དྲུག་ཏུ་བློ་མཐུན་པར་བྱའོ་ཞེས་བྱ་བ་ནི། གལ་ཏེ་སྔར་བསྟན་པའི་ཐབས་དེས་སམ། བར་ཆད་ཀྱི་རྐྱེན་གཞན་གྱི་དབང་གིས་དགག་དབྱེ་དེ་ལྟར་བྱ་བར་མ་གྲུབ་པའི་སྐབས་སུ་དགེ་སློང་འཐབ་ཀྲོལ་བྱེད་པ་དག་དེར་ལྷགས་པར་གྱུར་ན། གནས་པར་ཁས་བླངས་པ་དེ་དག་དགག་དབྱེ་བྱེད་པའི་ཚེ་དཀྱིལ་འཁོར་པའི་མཚམས་ལྔའམ་དྲུག་ཏུ་བློ་མཐུན་པར་བྱ་ཞིང་དགག་དབྱེ་སོ་སོར་བྱའོ། །ངག་གིས་བཤེས་པའི་ཚིག་གིས་བསུས་ནས་ལྷུང་བཟེད་དང་ཆོས་གོས་བླང་པར་བྱའོ། །གནས་ཁང་དང་ཁྱམས་དང་ཁང་པ་བརྩེག་པ་དག་བསྐོ་བར་བྱ། ཁྲུས་དང་སྣུམ་བག་གི་རྙེད་པ་བསྟབས་པར་བྱའོ། །ཆོས་མཉན་པ་སྦྱིན་པར་བྱ་ཞིང་དེ་ལྟ་བུའི་མགུ་བར་འགྱུར་བ་དག་བྱའོ་ཞེས་བྱ་བ་ནི། དགག་དབྱེ་མ་བྱས་པའི་སྐབས་ངེས་འཐབ་ཀྲོལ་བ་དག་འོངས་ན་དེ་དག་ལ་ངག་གིས་བཤེས་པའི་ཚིག་གིས་བསུས་ནས་ལྷུང་བཟེད་དང་ཆོས་གོས་བླང་བར་བྱ། གནས་ཁང་དང་ཁྱིམས་དང་ཁང་པ་བརྩེག་པ་དག་བསྐོ་བར་བྱ། ཁྲུས་དང་སྣུམ་བག་གི་རྙེད་པ་བསྟབས་པར་བྱའོ། །ཆོས་མཉན་པ་སྦྱིན་པར་བྱ་ཞིང་དེ་ལྟ་བུ་ལ་སོགས་པའི་གཅམ་གསག་མགུ་བར་འགྱུར་བའི་སྦྱོར་བ་གཞན་དེ་དག་ཀྱང་བྱའོ། །བདག་ཉིད་ཀྱི་དངོས་པོར་མ་གྲུབ་ན་དཀྱིལ་འཁོར་པ་དག་ཏུ་གསོ་སྦྱོང་བྱའོ་ཞེས་བྱ་བ་ནི། དེ་ལྟར་བྱས་ཀྱང་གལ་ཏེ་བདག་ཉིད་དང་མཐུན་པའི་དངོས་པོར་མ་གྲུབ་ན་དཀྱིལ་འཁོར་པ་དག་ཏུ་གསོ་སྤྱོད་བྱའོ། །འོ་ན་དེང་ཁྱོད་ཀྱིས་དགག་དབྱེ་མ་ཡིན་ནམ་ཞེས་ཟེར་བ་དག་ལ་ཚེ་དང་ལྡན་པ་དག་སྡོད་ཅིག་
ཁྱེད་ཅག་གློ་བུར་དུ་ལྷགས་པ་ཡིན་གྱིས་དོན་འདི་ནི་གཉུག་མར་གནས་པ་དག་གིས་ཡིན་ནོ་ཞེས་ལན་གདབ་པར་བྱའོ་ཞེས་བྱ་བ་ནི། གལ་ཏེ་འཐབ་ཀྲོལ་བྱེད་པ་དག་འདི་སྐད་ཅེས། འོ་ན་ཁྱེད་ཅག་དེང་དགག་དབྱེ་ཡིན་ན་ཅིའི་ཕྱིར་གསོ་སྦྱོང་བྱེད་ཅེས་ཟེར་ན། དེ་སྐད་ཟེར་པའི་འཐབ་ཀྲོལ་བྱེད་ན་དེ་དག་ལ་གཉུག་མར་གནས་པ་དེ་དག་གིས་འདི་སྐད་ཅེས་ཚེ་དང་ལྡན་པ་དག་སྡོད་ཅིག །ཁྱེད་ཅག་ནི་གློ་བུར་དུ་ལྷགས་པ་ཡིན་པས། གློ་བུར་དུ་ལྷགས་པ་རྣམས་ཀྱིས་དོན་འདི་བསམ་མི་དགོས་སོ། །དོན་འདི་ནི་གཉུག་མར་གནས་པ་དག་གིས་ཡིན་པས་དེང་དགག་དབྱེ་བྱེད་དམ་སང་ངམ་ཉི་མ་གཞན་ལ་བྱེད་པ་དེ་ནི་གཉུག་མར་གནས་པ་དག་གིས་བསམ་པ་ཡིན་ནོ་ཞེས་ལན་གདབ་པར་བྱའོ། །དོང་བ་དག་ན་དགག་དབྱེ་བྱའོ་ཞེས་བྱ་བ་ནི། འཐབ་ཀྲོལ་བྱེད་པ་དེ་དག་གནས་དེ་ནས་དོང་བའི་འོག་ཏུ་གསོ་སྦྱོང་གི་དུས་སུ་དགག་དབྱེ་བྱ་སྟེ། དགག་དབྱེའི་ལས་འདི་ནི་གསོ་སྦྱོང་དང་རིགས་མཐུན་པ་ཉིད་ཡིན་པའི་ཕྱིར་རོ། །དགག་དབྱེའི་གཞིའོ་ཞེས་བྱ་བ་དེ་བཤད་ཟིན་ཏོ།། །།ད་ནི་དགག་དབྱེའི་གཞི་དང་འབྲེལ་པ་ཕྲན་ཚེགས་ལ་སོགས་པའི་སྐབས་ནས་འབྱུང་བ་བསྡུ་བར་བྱ་སྟེ། དེའི་ཕྱིར་ནང་དང་བཅས་པས་བཟོད་པ་མ་བྱས་པར་དགག་དབྱེ་མི་བྱའོ་ཞེས་བྱ་བ་སྨྲས་ཏེ། ཞེ་འགྲས་པ་དང་བཅས་པ་དག་གིས་ཕན་ཚུན་བཟོད་པ་མ་བྱས་པར་གྱ་ཚོམ་དུ་དགག་དབྱེ་མི་བྱའོ། །ཞག་བཅུ་འམ་ཟླ་བ་ཕྱེད་ཀྱིས་དེ་འབྱུང་བར་འགྱུར་བ་ཉིད་ན་དེའི་དུས་ཡིན་ནོ་ཞེས་བྱ་བ་ནི། ཞག་བཅུ་འམ་ཟླ་བ་ཕྱེད་ཀྱིས་དགག་དབྱེ་དེ་འབྱུང་བར་འགྱུར་བ་ཉིད་ན་བཟོད་པ་བྱ་བ་དེའི་དུས་ཡིན་པའོ། །ཁ་ཅིག་ལས་ནི་བདུན་ནམ་བརྒྱད་ན་ཞེའོ་ཞེས་བྱ་བ་ནི། གཞུང་ཁ་ཅིག་ལས་ནི་ཞག་བདུན་ནམ་བརྒྱད་ན་དགག་དབྱེ་འབྱུང་བར་འགྱུར་བ་ཉིད་ནི་བཟོད་པ་བྱ་བ་དེའི་དུས་ཡིན་ནོ་ཞེས་འབྱུང་ངོ༌། །འདུས་པ་ནི་མ་ཡིན་ནོ་ཞེས་བྱ་བ་ནི། དེའི་དུས་ཞེས་བྱ་བར་སྦྱར་ཏེ། འདི་ལྟར་ལུང་ལས་དགག་དབྱེའི་དོན་དུ་འདུས་པ་ནི་བཟོད་པ་བྱ་བ་དེའི་དུས་མ་ཡིན་ནོ་ཞེས་གསུངས་མོད་ཀྱི། འོན་ཀྱང་འདུས་པ་ཐམས་ཅད་ཀྱང་དེའི་དུས་སུ་མི་རུང་སྟེ། འདི་ལྟར་བཟོད་པར་བྱ་བས་ཀྱང་དེར་སེམས་གཏོད་པར་མི་ནུས་ལ། བཟོད་པ་བྱེད་པའི་སེམས་ཀྱང་སྐྱབས་པར་འགྱུར་བས་དེའི་ཕྱིར་
འདིར་བྱེ་བྲག་མེད་པར་མདོར་བསྡུས་སོ། །དེས་བཟོད་པ་མ་བྱས་པར་མི་བྱའོ་ཞེས་བྱ་བ་ནི། ནང་དང་བཅས་པ་དེས་བཟོད་བ་མ་བྱས་པར་དགག་དབྱེ་མི་བྱ་བའོ། །དེའི་ཚེ་འདུས་པ་ཐམས་ཅད་ཀྱིས་ཕན་ཚུན་ཀུན་དགའ་བར་མ་བྱས་པར་མི་བྱའོ་ཞེས་བྱ་བ་ནི། དགག་དབྱེའི་དུས་དེའི་ཚེ་གནས་དེར་འདུས་པའི་དགེ་སློང་ཐམས་ཅད་ཀྱིས་ཕྱག་ལ་སོགས་པས་ཕན་ཚུན་ཀུན་དགའ་བར་མ་བྱས་པར་འཕྲལ་ལ་གྱ་ཚོམ་དུ་དགག་དབྱེ་མི་བྱའོ། །གཤེ་བ་ལ་བཟོད་པ་མི་གསོལ་བར་མི་བྱའོ་ཞེས་བྱ་བ་ནི། དགག་དབྱེའི་དུས་འབའ་ཞིག་ཏུ་མ་ཟད་ཀྱི་དུས་གཞན་གྱི་ཚེ་ཡང་ངོ༌། །འདི་ནི་གནོད་པ་བྱེད་པའི་འཁོན་དུ་འཛིན་པ་སྤང་བའི་ཕྱིར་རོ། །དགེ་སློང་མས་དགེ་སློང་ལ་གནས་ཀྱི་ཕྱི་རོལ་དུ་བཟོད་པ་གསོལ་བར་མི་བྱ་བའོ་ཞེས་བྱ་བ་ནི། དགེ་སློང་གིས་གནས་ཀྱི་ནང་དུ་བཟོད་པ་གསོལ་བར་བྱའོ། །རྐང་པ་གཉིས་ལ་ཕྱག་བྱས་ཏེ་མི་བྱའོ་ཞེས་བྱ་བ་ནི། དགེ་སློང་མས་དགེ་སློང་ལ་བཟོད་པ་གསོལ་བའི་ཚེ་ན་དགེ་སློང་མས་དགེ་སློང་གི་རྐང་པ་གཉིས་ལ་ཕྱག་བྱས་ཏེ་བཟོད་པ་གསོལ་བར་མི་བྱའོ། །འདི་ནི་བཟོད་པ་མི་བླང་དུ་མི་རུང་བའི་མགོན་དུ་གཉའ་སྒྲོན་པའི་སྒྱུ་ཐབས་སྤང་པའི་ཕྱིར་རོ། །བཟོད་ན་ཕྱག་བྱས་ཏེ་འགྲོ་བར་བྱའོ་ཞེས་བྱ་བ་ནི། དགེ་སློང་གིས་བཟོད་ན་དགེ་སློང་མས་དགེ་སློང་གི་རྐང་པ་གཉིས་ལ་མགོ་བོས་ཕྱག་བྱས་ཏེ་འགྲོ་བར་བྱ་བའོ། །བཟོད་པ་གསོལ་བར་བྱེད་པ་དེ་ལ་དགེ་སློང་གིས་མ་གུས་པར་བྱས་ཏེ་འགྲོ་བར་མི་བྱ་བའོ་ཞེས་བྱ་བ་ནི། དགེ་སློང་མ་བཟོད་པ་གསོལ་བར་བྱེད་པ་དེ་ལ་དགེ་སློང་གིས་མ་གུས་པ་བྱས་ཏེ་འགྲོ་བར་མི་བྱ་བའོ། །འདུལ་བར་མི་བྱའོ་ཞེས་བྱ་བ་ནི། དགེ་སློང་མ་བཟོད་པ་གསོལ་བར་བྱེད་པ་དེ་ལས་དགེ་སློང་གིས་འདའ་བར་མི་བྱ་སྟེ། བཟོད་པ་དང་དུ་བླང་བར་བྱ་བའོ། །བཟོད་པར་བྱ་བ་ལ་སྔར་ཤེས་པ་ཤད་ཀྱིས་སྤྱོད་དུ་གཞུག་པར་བྱའོ་ཞེས་བྱ་བ་ནི། བཟོད་པ་གསོལ་བར་བྱེད་པའི་གང་ཟག་གང་གིས་གང་ཟག་གང་ལ་བཟོད་པ་གསོལ་བར་བྱ་བ་དེ་ལ་དུམ་བུ་ཚུགས་སུ་འཕྲལ་ལ་བཟོད་པ་གསོལ་བར་མི་བྱ་བར་བཟོད་པ་གསོལ་བའི་མདུན་རོལ་དུ་སྔར་གང་ཟག་ཤད་ཀྱིས་སྦྱོང་པར་བྱེད་པའི་ཐབས་ཤེས་པ་གཅིག་ཤད་ཀྱིས་སྤྱོད་དུ་བཅུག་ནས། དེའི་འོག་ཏུ་གཟོད་རང་གིས་བཟོད་པ་གསོལ་
པར་བྱའོ། །འདི་ནི་བཟོད་པ་གསོལ་བ་ཐམས་ཅད་ཀྱི་སྐབས་ཡིན་ནོ། །མི་འདོད་པ་ཐབས་བཙལ་བ་ལ་མི་འབད་པར་མི་བྱའོ་ཞེས་བྱ་བ་ནི། བཟོད་པ་གསོལ་བར་བྱ་བ་དེ་བཟོད་པར་མི་འདོད་ན་བཟོད་པ་གསོལ་བར་བྱེད་བས་ཐབས་གང་གིས་དེས་བཟོད་པར་འགྱུར་བའི་ཐབས་དེ་ཡོངས་སུ་བཙལ་བ་ལ་མི་འབད་པར་མི་བྱ་སྟེ་འབད་པར་བྱའོ་ཞེས་བྱ་བའི་ཐ་ཚིག་གོ །མི་བསྒྱང་ངོ་ཞེས་བྱ་བ་ནི། ཐབས་བཙལ་བ་དེ་ཡུན་རིང་དུ་མི་བསྡད་པའོ། །ཀུན་ནས་དཀྲིས་པ་དང་མ་བྲལ་གྱི་བར་དུ་མི་བསྡད་པར་མི་བྱའོ་ཞེས་བྱ་བ་ནི། ཁྲོ་བའི་ཀུན་ནས་དཀྲིས་པ་ཞི་པར་མ་གྱུར་གྱི་བར་དུ་མི་བསྡད་པར་མི་བྱ་ཞིང་བསྡད་པར་བྱ་སྟེ། ཀུན་ནས་དཀྲིས་པ་དང་བྲལ་ནས་ཕྱིས་བཟོད་པ་གསོལ་བར་བྱའོ། །བཟོད་པ་གསོལ་བར་བྱེད་པ་ལ་མི་བཟོད་པར་མི་བྱའོ་ཞེས་བྱ་བ་ནི། གཅིག་བཟོད་པར་བྱེད་པ་ནི་ཅིག་ཤོས་ཀྱིས་ཀྱང་བཟོད་པར་བྱ་བའོ། །དགག་དབྱེའི་གཞི་དང་འབྲེལ་པའི་ཕྲན་ཚོགས་ལ་སོགས་པའི་སྐབས་སོ་ཞེས་བྱ་བ་ནི། དགག་དབྱེའི་གཞི་དང་འབྲེལ་པ་ཕྲན་ཚེགས་ལ་སོགས་པའི་སྐབས་ནས་འབྱུང་བ་བཤད་ཟིན་ཏོ། །དགག་དབྱེའི་གཞི་རྫོགས་སོ་ཞེས་བྱ་བ་དེ་བཤད་ཟིན་ཏོ།། །།ད་ནི་སྲ་བརྐྱང་གི་གཞི་བཤད་པར་བྱ་སྟེ། དེའི་ཕྱིར་སྲ་བརྐྱང་གདིང་བར་བྱའོ་ཞེས་བྱ་བ་སྨྲས་ཏེ། དགེ་འདུན་དུ་གྱུར་པའི་དགེ་སློང་དག་གིས་སྲ་བརྐྱང་ཞེས་བྱ་བའི་ཆོས་གོས་འོག་ནས་འབྱུང་བའི་ཆོ་གས་གདིང་བར་བྱ་བའོ། །ཇི་ལྟར་ན་ཆོས་གོས་ལ་སྲ་བརྐྱང་ཞེས་བྱ་ཞེ་ན། སྲ་བརྐྱང་ཞེས་བྱ་བ་ནི་གཏན་པ་སྟེ། འདི་ལྟར་འདི་ནི་གོས་དྲ་བའི་ཕྱིར་གོས་འདིང་བར་བྱེད་ཅིང་རྐྱོང་བར་བྱེད་པ་མི་འཁུམས་པར་བྱེད་པའི་ཆོས་ཅན་ཤིང་ལ་སོགས་པ་ལས་བྱས་པའི་སྤང་ལེབ་ལ་སྲ་བརྐྱང་ཞེས་བྱའོ། །དེ་བཞིན་དུ་སྤང་ལེབ་དེས་ཆོས་གོས་དྲ་བའི་ཕྱིར་ཆོས་གོས་རྐྱོང་བར་བྱེད་པ་དེ་ནི་ཕྲན་ཚེགས་དག་ལས་ཀྱང་སྲ་བརྐྱང་ཞེས་གསུངས་ཏེ། དེ་ལྟ་བས་ན་དགེ་སློང་དག་གིས་སྲ་བརྐྱང་ཉེ་བར་གཞག་པར་རྗེས་སུ་གནང་ངོ་ཞེས་གསུངས་སོ། །ཆོས་གོས་འདི་ཡང་སྲ་བརྐྱང་དང་འདྲ་བས་སྲ་བརྐྱང་ཞེས་བྱ་བ་སྟེ། ཇི་ལྟར་སྤང་ལེབ་ཀྱིས་གོས་འདིང་ཞིང་མི་འཁུམས་པར་སྲ་བརྐྱང་གཅིག་ལ་རྐྱོང་བར་བྱེད་པས་སྤང་ལེབ་དེ་སྲ་བརྐྱང་ཞེས་བྱ་བ་དེ་བཞིན་དུ། ཆོས་གོས་
འདིས་ཀྱང་དགེ་འདུན་དབྱེར་མེད་པ་དང་རོ་གཅིག་པ་དང་བྱ་བ་གཅིག་པ་དང༌། རྙེད་པ་དང་ཕན་ཡོན་འདྲ་བར་སྒྲུབ་པའི་སྒོ་ནས་གཏན་པ་གཅིག་ལ་འཇོག་པར་བྱེད་པས་དེའི་ཕྱིར་ཆོས་གོས་འདི་ཡང་སྲ་བརྐྱང་དང་འདྲ་བས་སྲ་བརྐྱང་ཞེས་བྱའོ། །དེ་ལྟར་གང་གི་ཕྱིར་སྤང་ལེབ་དེས་གོས་རྐྱོང་བར་བྱེད་པས་སྲ་བརྐྱང་ཞེས་བྱ་བ་དེའི་ཕྱིར། འདིར་ཆོས་གོས་འདིས་ཀྱང་དགེ་སློང་རྣམས་བརྐྱང་བའི་མཚན་ཉིད་ཀྱི་བྱ་བ་ལ་སྦྱོར་བར་བྱེད་པས་སྲ་བརྐྱང་ཞེས་བྱའོ། །དེ་ལྟར་ནས་སྲ་བརྐྱང་དང་འདྲ་བར་ཆོས་གོས་འདི་ཡང་བྱ་བ་གཅིག་པ་ཉིད་ཀྱིས་དགེ་འདུན་མཐའ་དག་ལ་ཁྱབ་པར་བྱེད་པས་སྲ་བརྐྱང་ཞེས་བྱའོ། །ཅིའི་ཕྱིར་དེ་གདིང་བར་བྱ། བཏིང་བ་ལ་འབྲས་བུ་ཅི་ཡོད་ཅེ་ན། དེའི་ཕྱིར་གསུམ་པོ་དག་ཇི་ལྟ་བ་བཞིན་དུ་སྲ་བརྐྱང་བཏིང་ན་ཡང་ཡང་ཟ་བ་དང༌། འདུས་ཤིང་ཟ་བ་དང༌། མ་སྨྲས་པར་གྲོང་དུ་འགྲོ་བ་དང༌། གོས་སློང་བ་ལ་ཡང་ཉེས་པ་མེད་ལ་དེ་ལྷག་མ་དག་དང་རྙེད་པ་ཐུན་མོང་དུ་འགྱུར་རོ་ཞེས་བྱ་བ་སྨྲས་ཏེ། གསུམ་པོ་དག་ཇི་ལྟ་བ་བཞིན་དུ་ཞེས་བྱ་བ་ལ། གསུམ་པོ་དག་ཅེས་བྱ་བ་ནི། འཆང་བ་དང་འབྲལ་བ་དང་འཇོག་པ་ཞེས་བྱ་བ་དག་གོ །དེ་དག་ཇི་ལྟ་བ་ཞེས་བྱ་བ་ནི། སྔར་སྤང་པའི་ལྟུང་བྱེད་ཀྱི་སྐབས་སུ་འདིར་གསུམ་ནི་སྲ་བརྐྱང་བཏིང་བ་ལ་མི་འབྱུང་ངོ་ཞེས་སྨོས་པའི་མདོ་དེས་གཏན་པ་བཏིང་བ་ལ་འཆད་བ་དང་འབྲལ་བ་དང་འཇོག་པ་ཞེས་བྱ་བ་གསུམ་པོ་དག་ལ་ཉེས་པ་མེད་པར་བསྟན་པ་ཇི་ལྟ་བའོ། །དེ་བཞིན་དུ་སྲ་བརྐྱང་བཏིང་བ་ཡང་ཡང་ཟ་བ་དང་འདུས་ཤིང་ཟ་བ་དང༌། མ་སྨྲས་པར་གྲོང་དུ་འགྲོ་བ་དང༌། གོས་སློང་བ་ལ་ཡང་ཉེས་པ་མེད་ལ་སྲ་བརྐྱང་བཏིང་པའི་དགེ་སློང་དེ་སྲ་བརྐྱང་བཏིང་བའི་དགེ་སློང་ལྷག་མ་གཞན་དག་དང་རྙེད་པ་ཐུན་མོང་དུ་འགྱུར་བའི་ཕན་ཡོན་ལྔ་ཡང་ཡོད་དོ། །དེ་ལྷག་མ་དག་དང་རྙེད་པ་ཐུན་མོང་དུ་འགྱུར་རོ་ཞེས་བྱ་བ་ལ། དེ་ཞེས་བྱ་བ་ནི་སྲ་བརྐྱང་བཏིང་བའི་དགེ་སློང་དེ་སྟེ། དེས་ཇི་སྲིད་དུ་སྲ་བརྐྱང་འབྱིན་པར་མི་བྱེད་པ་དེ་སྲིད་ཀྱི་བར་དུ་ཡུལ་གཞན་ན་འདུག་ཀྱང་རུང་སྟེ། སྲ་བརྐྱང་བཏིང་བའི་དགེ་སློང་ལྷག་མ་གཞན་དག་དང་སྲ་བརྐྱང་དང་འབྲེལ་པའི་རྙེད་པ་ཐུན་མོང་དུ་འགྱུར་བའོ། །སྲ་བརྐྱང་བཏིང་བ་ལ་ཕན་ཡོན་བཅུ་ཡོད་པ་ལས། འཆང་བ་དང་འབྲལ་བ་དང་
འཇོག་པ་དང༌། ཡང་ཡང་ཟ་བ་དང་འདུས་ཤིང་ཟ་བ་དང༌། མ་སྨྲས་པར་གྲོང་དུ་འགྲོ་བ་དང༌། གོས་སློང་བ་དག་ལ་ཉེས་པ་མེད་པ་དང༌། དགེ་སློང་ལྷག་མ་དག་དང་རྙེད་བ་ཐུན་མོང་དུ་འགྱུར་བ་ཞེས་བྱ་བ་ཕན་ཡོན་བརྒྱད་ནི་དེ་ལྟར་དངོས་སུ་བསྟན་ཏོ། །སྨད་གཡོགས་སྟོད་གཡོགས་དང་བཅས་པའི་ཆོས་གོས་ཀྱིས་ལྗོངས་རྒྱུ་ཞིང་འགྲོ་བ་གང་ཡིན་པ་དང༌། རུང་བར་མ་བྱས་པའི་གོས་ཇི་ཙམ་འདོད་པ་འཆང་བ་ཞེས་བྱ་བ་གང་ཡིན་པའི་ཕན་ཡོན་ཐ་མ་གཉིས་ནི་འདིར་མདོ་འདིས་མངོན་སུམ་དུ་བསྡུ་བ་མ་བྱས་ཏེ། སྔར་འཆང་བ་དང་འབྲལ་བ་དང༌། འཇོག་པའི་སྤོང་བའི་ཆོ་ག་བསྟན་པའི་སྐབས་དག་ཏུ་གསུམ་པོ་བསྟན་པ་ཉིད་ཀྱིས་བསྡུ་བ་བྱས་ཟིན་པའི་ཕྱིར་རོ། །ཇི་ལྟར་བྱ་ཞེ་ན། འདིར་འབྲལ་བའི་ཉེས་པ་ཡོངས་སུ་སྤང་བའི་ཕྱིར་ལྗོངས་རྒྱུ་བའི་ཚེ་ཡང་སྣམ་སྦྱར་ཁྱེར་བར་བྱེད་ལ། འཆང་བ་དང་འཇོག་པའི་ཉེས་པ་ཡོངས་སུ་སྤང་བའི་ཕྱིར་ནི་གོས་རུང་བར་བྱེད་པ་ཡིན་པས། དེ་ལ་འདི་ལྟར་གང་གིས་སྲ་བརྐྱང་བཏིང་བ་དེ་ལ་འབྲལ་བའི་ཉེས་པ་མེད་པས། དེ་ལ་སྣམ་སྦྱར་བསྐུར་བ་དགོས་པ་མེད་པ་དེས་ཅི་ཞིག་བྱ། དེ་བཞིན་དུ་དེ་ལ་འཆང་བ་དང་འཇོག་པའི་ཉེས་པ་ཡང་མེད་པས། དེ་ལ་གོས་རུང་བར་བྱ་བ་དགོས་པ་མེད་པས་དེས་ཀྱང་ཅི་ཞིག་བྱ་སྟེ། དེ་ལྟར་ན་སྔར་གསུམ་པོ་བསྟན་པ་ཉིད་ཀྱིས་དེ་གཉིས་བསྡུ་བ་བྱས་ཟིན་པ་ཡིན་ནོ། །འོ་ན་ཇི་ལྟར་འབྲལ་བའི་ཉེས་པ་མེད་ཀྱང་སྟོད་གཡོགས་དང་སྨད་གཡོགས་དང་བཅས་པའི་ཆོས་གོས་ཁྱེར་ཞིང་ལྗོངས་རྒྱུར་འགྲོ་བ་དེ་བཞིན་དུ་སྣམ་སྦྱར་བསྐུར་བ་ལ་ཡང་ཅིའི་ཕྱིར་གུས་པར་མི་བྱ་ཞེ་ན། དེ་ནི་དེ་ལྟ་མ་ཡིན་ཏེ། སྟོད་གཡོགས་སྨད་གཡོགས་དང་བཅས་པས་ཆོས་གོས་བསྐུར་བ་ནི་ངོ་ཚ་བའི་གནས་གཡོགས་པར་བྱ་བའི་ཕྱིར་དང༌། རབ་ཏུ་བྱུང་བའི་རྟགས་ཡང་དག་པར་བསྲུང་བར་བྱ་བའི་ཕྱིར་ཡིན་གྱི། སྣམ་སྦྱར་བསྐུར་བ་ལ་ནི་དགོས་པ་མེད་པའི་ཕྱིར་རོ། །བཅོམ་ལྡན་འདས་ཀྱིས་སྟོད་གཡོགས་སྨད་གཡོགས་དང་བཅས་པའི་ཆོས་གོས་བསྐུར་ཞིང་ལྗོངས་རྒྱུར་འགྲོ་བ་ལོགས་ཤིག་ཏུ་གསུངས་པ་དེ་ནི་སྣམ་སྦྱར་ཁྱེར་བའི་ཁུར་ལས་ཐར་བར་བྱ་བའི་ཕན་ཡོན་བསྟན་པའི་ཕྱིར་རོ། །རུང་བར་མ་བྱས་པའི་གོས་བཅང་བ་ལོགས་ཤིག་ཏུ་གསུངས་པ་དེ་ནི་རུང་བར་བྱེད་པའི་བྱ་བ་ལས་ཐར་པ་
དང་ཤིན་ཏུ་སྦྱངས་པའི་བདེ་བའི་ཕན་ཡོན་བསྟན་པའི་ཕྱིར་རོ། །སྲ་བརྐྱང་གདིང་བར་བྱའོ་ཞེས་སྨོས་ན་གང་ཟག་གང་གིས་གདིང་བར་བྱ་ཞེ་ན། ལྡོག་པའི་སྒོ་ནས་དེ་བསྟན་པའི་ཕྱིར་དབྱར་གནས་པའི་ཁས་མ་བླངས་པ་དང་དབྱར་ར་ལ་བ་དང་དབྱར་ཕྱི་མར་གནས་བར་ཁས་བླངས་པ་དང་དབྱར་གནས་གཞན་དུ་གནས་པར་ཁས་བླངས་པ་དག་ལ་དེ་མི་འབྱུང་ངོ་ཞེས་བྱ་བ་སྨྲས་ཏེ། དེ་དག་སྲ་བརྐྱང་གདེང་པ་མི་འབྱུང་ཞིང་སྲ་བརྐྱང་གི་ཕན་ཡོན་ཡང་མེད་དོ། །དབྱར་གནས་པར་ཁས་མ་བླངས་པ་དང༌། དབྱར་རལ་བ་གཉིས་ནི་གཉི་ག་ལ་ཚོགས་པ་ཡོངས་སུ་རྫོགས་པ་མེད་དེ། སྔ་མ་ཤོས་ལ་ནི་གནས་པར་ཁས་བླངས་པ་མེད་པའི་ཕྱིར་རོ། །ཕྱི་མ་ཤོས་ནི་རལ་བའི་ཕྱིར་རོ། །དབྱར་གནས་གཞན་དུ་གནས་པར་ཁས་བླངས་པ་ལ་ཡང་དེ་མི་འབྱུང་སྟེ། སྲ་བརྐྱང་བཏིང་བར་གཏོགས་པའི་དགེ་འདུན་དང་ལྷན་ཅིག་དབྱར་གྱི་ཚོགས་པ་མེད་པའི་ཕྱིར་རོ། །དེ་བས་ན་དབྱར་གནས་པར་ཁས་མ་བླངས་པ་དང༌། དབྱར་རལ་བ་དང་དབྱར་གནས་གཞན་དུ་གནས་པར་ཁས་བླངས་པ་དག་ལ་ནི་རེ་ཞིག་སྲ་བརྐྱང་གདིང་བ་དེ་མི་འབྱུང་སྟེ། སྲ་བརྐྱང་གདིང་བ་ནི་དངོས་གཞིའི་ཆོ་ག་ལ་བརྟེན་པ་ཡིན་པའི་ཕྱིར་རོ། །དབྱར་ཕྱི་མར་གནས་པར་ཁས་བླངས་པ་དེ་ནི་དངོས་གཞིའི་ཆོ་གར་གཏོགས་པ་མ་ཡིན་ཏེ། གང་གི་ཚེ་དགེ་འདུན་ཐམས་ཅད་དབྱར་གནས་པ་སྔ་མར་གནས་པར་ཁས་ལེན་པ་ན་དེ་དགེ་འདུན་གྱི་རྣམ་པར་གཞག་པ་དེ་ལས་འདས་ཏེ། དབྱར་གནས་པ་ཕྱི་མར་གནས་མཁས་ལེན་པ་དེའི་ཚེ་ན་དགེ་འདུན་དང་ལྷན་ཅིག་ཚོགས་པའི་དབྱར་གནས་པ་དེ་ལ་མེད་པས་དེའི་ཕྱིར་དེ་ལ་ཡང་སྲ་བརྐྱང་གདིང་བ་དེ་མི་འབྱུང་ངོ༌། །ས་གཞན་ལ་གནས་པ་དག་ལ་ཡང་ངོ་ཞེས་བྱ་བ་ཡང༌། སྲ་བརྐྱང་གདིང་བ་མི་འབྱུང་ངོ་ཞེས་བྱ་བར་སྦྱར་ཏེ། ས་གཞན་ན་གནས་པ་དག་ཅེས་བྱ་བ་ནི། ཆད་པས་བཅད་པ་དང་སྤོ་བ་བྱེད་པ་ལ་སོགས་པ་དག་སྟེ། དེ་དག་ནི་དགེ་སློང་རང་བཞིན་དུ་གནས་བ་དག་དང་རིས་མི་མཐུན་པ་ཡིན་པས་དེ་དག་ལ་ཡང་སྲ་བརྐྱང་གདིང་བ་མི་འབྱང་ངོ༌། །འདི་ལྟར་དགེ་ཚུལ་ལ་སོགས་པ་དག་ལ་ཡང་སྲ་བརྐྱང་གདིང་བ་མི་འབྱུང་བར་གསུངས་མོད་ཀྱི། དེ་
དག་འདིར་མ་སྨོས་པ་ནི་དེ་དག་ལ་ལས་ལ་འཇུག་པ་མེད་པས་དེའི་ཕྱིར་དེ་དག་ནི་མ་སྨོས་ཀྱང་གྲུབ་པ་ཉིད་དོ། །དེ་དག་ཉིད་འཐོབ་པ་ཡིན་ན་མི་འབྱུང་ངོ་ཞེས་བྱ་བ་ནི། ས་གཞན་ན་གནས་པ་དེ་དག་ཉིད་འཐོབ་བ་ནི་དེ་དག་ཉིད་འཐོབ་པ་སྟེ། དེ་དག་འཐོབ་པ་ཉིད་ཡིན་ན་དེ་དག་ལ་སྲ་བརྐྱང་གདིང་བ་མི་འབྱུང་བའོ། །ཐ་མ་མ་གཏོགས་པ་དག་དང་ས་གཞན་ན་གནས་པ་དག་དང་དགེ་ཚུལ་ནི་རྙེད་པ་དབང་ངོ་ཞེས་བྱ་བ་ནི། སྔར་དབྱར་གནས་པར་ཁས་མ་བླངས་པ་དང་དབྱར་རལ་བ་དང༌། དབྱར་ཕྱི་མ་གནས་པར་ཁས་བླངས་པ་དང༌། གནས་གཞན་དུ་གནས་པར་ཁས་བླངས་པ་དག་ལ་དེ་མི་འབྱུང་ངོ་ཞེས་ཚིག་བཞི་སྨོས་པའི་ཐ་མ་གནས་གཞན་དུ་གནས་པར་ཁས་བླངས་པ་ཞེས་བྱ་བ་མ་གཏོགས་པ་དེའི་ལྷག་མ་གསུམ་པོ་དག་དང༌། ས་གཞན་ན་གནས་པ་དག་དང༌། དགེ་ཚུལ་དག་ནི་འདི་ལྟར་སྲ་བརྐྱང་བཏིང་བའི་ཕན་ཡོན་མི་འཐོབ་པ་ཡིན་མོད་ཀྱི། འོན་ཀྱང་དེ་དག་སྲ་བརྐྱང་བཏིང་བའི་རྙེད་པའི་སྐལ་པ་ནི་དབང་བ་སྟེ། འདི་ལྟར་དེ་དག་ནི་དབྱར་གནས་པ་དག་དང༌། དོན་གཅིག་པ་ཉིད་ཡིན་པས་བཟློག་པར་མི་བྱའོ། །ས་གཞན་ན་གནས་པ་དག་ཅེས་སྨོས་པས་གནས་ནས་ཕྱུང་བ་ཡང་རྙེད་པ་དབང་བ་ཉིད་དུ་ཐལ་བར་འགྱུར་བས་དེ་བསལ་བའི་ཕྱིར་གནས་ནས་ཕྱུང་བ་ནི་མི་དབང་ངོ་ཞེས་བྱ་བ་སྨྲས་ཏེ། གནས་ནས་ཕྱུང་བ་ནི་དགེ་འདུན་ལས་ཐ་དད་དུ་གྱུར་པ་ཉིད་ཡིན་པས་དེའི་ཕྱིར་དེ་ནི་སྲ་བརྐྱང་བཏིང་བའི་རྙེད་པ་མི་དབང་བ་ཉིད་དུ་རིག་པར་བྱའོ། །ཆད་པས་བཅད་པ་དང་སྤོ་བ་ལ་སོགས་པ་བྱེད་པ་ནི་དགེ་འདུན་ལས་ཐ་དད་དུ་གྱུར་པ་ཉིད་མ་ཡིན་པས་དེའི་ཕྱིར་དེ་དག་ནི་སྲ་བརྐྱང་བཏིང་བའི་རྙེད་པ་དབང་བ་ཡིན་ནོ། །བྱེ་བ་དག་ན་ཆོས་མ་ཡིན་པའི་ཕྱོགས་དང་མཐུན་པ་དག་ཏུ་སོང་བ་ནི་དེ་ཉིད་ཀྱིས་འཐོབ་པ་དང་འདྲའོ་ཞེས་བྱ་བ་ནི། ལྟ་བ་ཁས་ལེན་པས་དགེ་འདུན་དུ་གྱུར་པའི་དགེ་སློང་གཉིས་སུ་བྱ་བ་དག་ན། དེ་ན་ཆོས་མ་ཡིན་པའི་ཕྱོགས་དང་མཐུན་པར་གནས་པའི་དགེ་སློང་དག་གི་ནང་དུ་ལྟ་བ་ཁས་ལེན་པར་སོང་བའི་གང་ཟག་ནི་སྲ་བརྐྱང་བཏིང་བའི་རྙེད་པ་ལ་དེ་ཉིད་ཀྱིས་འཐོབ་པ་དང་འདྲའོ་ཞེས་བྱ་བར་སྦྱར་ཏེ། དེ་ཉིད་ཀྱིས་ཞེས་བྱ་བ་ལ། དེ་ཞེས་བྱ་བའི་སྒྲ་ནི་གནས་ནས་
ཕྱུང་བ་ལ་སྙེགས་ཏེ་དེའི་དངོས་པོ་ནི་དེ་ཉིད་དོ། །བྱེ་བ་དག་ན་ཆོས་མ་ཡིན་པའི་ཕྱོགས་དང་མཐུན་པ་དག་ཏུ་སོང་བའི་རྙེད་པ་ཐོབ་པ་ནི་སྤངས་པའི་རྙེད་པ་འཐོབ་པ་དང་འདྲ་སྟེ། ཇི་ལྟར་སྤངས་པ་ལ་སྲ་བརྐྱང་གདིང་བ་མི་འབྱུང་ཞིང་འབྱུང་བ་ཡང་མེད་པར་གྱུར་པས་དེས་སྲ་བརྐྱང་བཏིང་བའི་རྙེད་པ་མི་འཐོབ་པ་དེ་བཞིན་དུ་འདིས་ཀྱང་མི་འཐོབ་བོ་ཞེས་བྱ་བའི་ཐ་ཚིག་གོ །ཕན་ཡོན་གང་གི་ཕྱིར་སྲ་བརྐྱང་གདིང་བ་དང༌། དགེ་སློང་གང་དག་གིས་སྲ་བརྐྱང་གདིང་བ་དེ་སྐབས་དང་བཅས་པར་བསྟན་ནས། ད་ནི་འདིར་དངོས་པོ་གང་གདིང་བར་བྱ་བ་དེ་ལ་སྲ་བརྐྱང་ཉིད་དུ་བཞེད་པ་དེ་བརྗོད་པར་བྱ་སྟེ། དངོས་གཞིའི་དུས་ཀྱི་དགག་དབྱེའི་མཐང་དབྱར་གྱི་རྒྱུ་ལས་བྱུང་བ་འདིང་བའི་ཉི་མའི་མཐར་གྲུབ་པར་གོས་ཀྱི་རྙེད་པར་བགྲང་བའི་ཆོས་གོས་གསུམ་མོ་ཞེས་བྱ་བ་ལ། དངོས་གཞིའི་དུས་ཞེས་བྱ་བ་ནི། དབྱར་རྣམ་པ་གཉིས་པོ་སྔ་མ་དང་ཕྱི་མ་དེ་ལས་འདིར་དངོས་གཞིའི་དུས་ཞེས་སྨོས་པས་ནི་དབྱར་སྔ་མའི་ཟླ་བ་གསུམ་གཟུང་བ་ཡིན་ཏེ། འདི་ལྟར་དབྱར་ཕྱི་མར་གནས་པར་ཁས་བླངས་པ་ལ་སྲ་བརྐྱང་གདིང་བ་མི་འབྱུང་ངོ་ཞེས་གསུངས་པའི་ཕྱིར་དང་སྟོན་ཟླ་འབྲིང་པོ་ཚེས་བཅུ་དྲུག་ནི་སྲ་བརྐྱང་གདིང་བའི་ཉི་མ་ཉིད་ཡིན་པར་གསུངས་པའི་ཕྱིར་རོ། །དངོས་གཞིའི་དུས་དེའི་དགག་དབྱེ་ཞེས་བྱ་བ་ནི། དབྱར་སྔ་མ་ཟླ་བ་གསུམ་པོ་དག་གི་མཇུག་ཏུ་སྟོན་ཟླ་འབྲིང་པོ་ཉ་ལ་དགག་དབྱེ་བྱེད་པ་གང་ཡིན་པའོ། །མཐར་ཞེས་བྱ་བ་ནི་དངོས་གཞིའི་དུས་ཀྱི་དགག་དབྱེ་དེ་ཉིད་མཐའ་ཡིན་ཏེ། དབྱར་སྔ་མའི་ཟླ་བ་གསུམ་པོ་དེ་དག་གི་མཐའ་ཡིན་པའི་ཕྱིར་ཏེ། མཐའ་དེ་ཚུན་ཆད་དུ་གོས་ཀྱི་རྙེད་པ་བྱུང་བ་དང་སྦྱར་རོ། །དབྱར་གྱི་རྒྱུ་ལས་བྱུང་བ་ཞེས་བྱ་བ་ནི། དབྱར་སྔ་མ་ཟླ་བ་གསུམ་པོ་དེ་དག་བསྡུས་པའམ་སོ་སོའི་རྒྱུ་ལས་བྱུང་བའི་གོས་ཀྱི་རྙེད་པ་གང་ཡིན་པའོ། །གང་ལ་རྙེད་པ་དབྱར་སྔ་མ་ཟླ་པ་གསུམ་པོ་དེ་དག་བསྡུས་པའི་རྒྱུ་ལས་བྱུང་བ་ཡིན་ཞེ་ན། འདི་ལྟ་སྟེ་དབྱར་གནས་པའི་རྒྱུ་ལས་བྱུང་བའི་རྙེད་པ་གང་ཡིན་པའོ། །གང་ལ་རྙེད་པ་དབྱར་སྔ་མ་ཟླ་བ་གསུམ་པོ་དག་སོ་སོའི་རྒྱུ་ལས་བྱུང་བ་ཡིན་ཞེ་ན། འདི་ལྟ་སྟེ་གློ་བུར་དུ་བྱུང་བའི་རྙེད་པ་གང་ཡིན་པ་སྟེ། དེ་ཡང་
དབྱར་དེ་ལས་བྱུང་བའི་རྙེད་པ་ཡིན་གྱི། དུས་གཞན་གྱི་རྒྱུ་ལས་བྱུང་བའི་རྙེད་པ་ནི་མ་ཡིན་ནོ། འདིང་བའི་ཉིན་མོའི་མཐར་གྲུབ་པ་ཞེས་བྱ་བ་ནི་དབྱར་སྔ་མ་ཟླ་བ་གསུམ་པོ་དེ་དག་གི་དགག་དབྱེ་སྟོན་ཟླ་འབྲིང་པོ་ཉ་ལ་བྱས་ནས། སྟོན་ཟླ་འབྲིང་པོ་ཚེས་བཅུ་དྲུག་ལ་སྲ་བརྐྱང་གདིང་པའི་ཉི་མ་དེའི་མཐའ་ཚུན་ཆད་དུ་དབྱར་སྔ་མ་ཟླ་བ་གསུམ་པོ་དེ་དག་བསྡུས་པའམ་སོ་སོའི་རྒྱུ་ལས་བྱུང་བའི་གོས་རྙེད་པ་གང་ཡིན་པའོ། །གོས་ཀྱི་རྙེད་པར་བགྲང་བ་ཞེས་བྱ་བ་ནི། གོས་ཀྱི་རྙེད་པ་དངོས་སུ་གཏོགས་པའམ། དེའི་དོན་དུ་གཏོགས་པའི་རྙེད་པ་གང་ཡིན་པའོ། །ཆོས་གོས་གསུམ་པོ་ཞེས་བྱ་བ་ནི། གོས་ཀྱི་རྙེད་པ་བགྲང་བ་དེ་ལས་བསྒྱུར་བའི་ཆོས་གོས་གསུམ་པོ་སྣམ་སྦྱར་དང་བླ་གོས་དང་མཐང་གོས་གང་ཡིན་པ་སྟེ། ཆོས་གོས་གསུམ་པོ་དེ་དག་འདིར་དགེ་སློང་རྣམས་ཀྱིས་གནས་བསྡུ་བ་དང༌། བདེ་བར་གནས་པར་བྱ་བ་དང༌། སྦྱིན་པ་པོ་རྣམས་ཀྱིས་སྦྱིན་པར་བྱ་བའི་ཆོས་ཡོངས་སུ་སྤྱད་པར་བྱ་བའི་སྲ་བརྐྱང་གདིང་བར་བྱའོ་ཞེས་བྱ་བར་སྦྱར་རོ། །དེ་ལ་དངོས་གཞིའི་དུས་ཞེས་སྨོས་པས་ནི། སྔར་གལ་ཏེ་གནས་པར་ཁས་བླངས་པ་དག་གིས་དགེ་སློང་འཐབ་ཀྲོལ་བྱེད་པ་དག་འོང་བར་ཐོས་པར་གྱུར་ན། གལ་ཏེ་གསོ་སྦྱོང་གཉིས་སམ་གསུམ་ཐལ་བར་གྱུར་ན་དགག་དབྱེ་བྱའོ་ཞེས་སྨོས་པ་དང༌། དོང་བ་དག་ན་དགག་དབྱེ་བྱའོ་ཞེས་སྨོས་བས། འཐབ་ཀྲོལ་བྱེད་པ་ལ་སོགས་པའི་རྒྱུས་དགག་དབྱེའི་ཉི་མ་བས་སྔར་རམ་ཕྱིས་དགག་དབྱེ་བྱ་བར་བསྟན་པ་གང་ཡིན་པ་དེ་བསལ་བར་ཤེས་པར་བྱའོ། །དབྱར་གྱི་རྒྱུ་ལས་བྱུང་བ་ཞེས་སྨོས་པས་ནི་དུས་གཞན་གྱི་རྒྱུ་ལས་བྱུང་བའི་གོས་ཀྱི་རྙེད་པ་བསལ་ཏོ། །གདིང་བའི་ཉི་མའི་མཐར་གྲུབ་པ་ཞེས་སྤོས་པས་ནི། དབྱར་གྱི་རྒྱུ་ལས་བྱུང་བའི་རྙེད་པ་དུས་གཞན་དུ་གྲུབ་པ་བསལ་ཏོ། །གོས་ཀྱི་རྙེད་པ་བགྲང་བར་ཞེས་སྨོས་པས་ནི། གོས་ཀྱི་དོན་ལས་གཞན་པའི་མཁར་ལེན་དང་གཙུག་ལག་ཁང་བརྒྱན་པ་ལ་སོགས་པའི་དོན་དུ་འབྱུང་བའི་རྙེད་པ་བསལ་ཏོ། །འདི་སྐད་བསྟན་ཏེ། དབྱར་སྔ་མ་ཟླ་བ་གསུམ་པོ་སྟོན་ཟླ་འབྲིང་པོ་ཚེས་བཅུ་དྲུག་གི་ཉི་མ་དང་བཅས་པ་དག་བསྡུས་པའམ་སོ་སོའི་རྒྱུ་ལས་བྱུང་བའི་གོས་ཀྱི་རྙེད་པ་གང་ཡིན་པ་དེ་ལས་བསྒྱུར་བའི་ཆོས་གོས་གསུམ་པོ་གང་ཡིན་
པ། དེ་དག་འདིར་སྲ་བརྐྱང་གདིང་བར་བྱ་བ་ཡིན་ནོ། །གཙུག་ལག་ཁང་གང་ན་གོས་ཀྱི་རྙེད་པ་ངེས་པ་གང་ཡིན་པ་དེ་ཡང་འདིར་བསྡུས་པར་ཤེས་པར་བྱ་སྟེ། དེ་ལྟ་བས་ན་དེ་དང་འབྲེལ་པ་ཡང་གདིང་བར་བྱའོ། །གོས་ཀྱི་དོན་དུ་རྙེད་པའི་རིན་དག་གིས་བསྒྲུབ་པའི་ཆོས་གོས་གསུམ་པོ་གང་དག་ཡིན་པ་དེ་དག་ཀྱང་གདིང་བར་བྱ་སྟེ། གོས་ཀྱི་རིན་ནི་གོས་ཀྱི་དོན་དུ་བྱིན་པ་ཡིན་པའི་ཕྱིར་རོ། །ལུང་ལས་ཆོས་གོས་གསུམ་ཞེས་དངོས་སུ་གང་གསུངས་པ་མེད་མོད་ཀྱི། སྔགས་ཀྱི་སྒོ་ནས་གསུམ་དུ་གསུངས་པར་མངོན་ཏེ། དེ་ག་ལས་ཤེས་ཤེ་ན། ཚེ་དང་ལྡན་པ་དག་བདག་སང་སྲ་བརྐྱང་གདིང་བར་འགྱུར་གྱི། ཁྱེད་ཅག་གིས་རང་གི་ཆོས་གོས་རྣམས་དབྱུང་བར་བྱའོ་ཞེས་གསུངས་པའི་ལུང་ལས་ཤེས་ཏེ། གལ་ཏེ་གཅིག་བུ་ཞིག་གདིང་བར་བྱ་བ་ཉིད་ཡིན་ན་ནི་དེའི་ཚེ་རང་རང་གི་ཆོས་གོས་གཅིག་དབྱུང་བར་བྱའོ་ཞེས་གཅིག་གི་ཚིག་ཏུ་གསུངས་པར་འགྱུར་བ་ཞིག་ན། ལུང་ལས་རང་རང་གི་ཆོས་གོས་རྣམས་དབྱུང་བར་བྱའོ་ཞེས་མང་པོའི་ཚིག་ཏུ་གསུངས་པའི་ཕྱིར་རོ། །གཅིག་ཅིག་བྱིན་གྱིས་བརླབས་པ་ལ་གསུམ་ཆར་གྱི་དབྱུང་བ་ཡང་མི་རིགས་པའི་ཕྱིར་རོ། །དེ་ལྟར་ཡང་འདིར་གཞུང་ནི། བཙུན་པ་གང་ཟག་གིས་སྣམ་སྦྱར་གྱི་སྲ་བརྐྱང་གདིང་དུ་རུང་ངམ་ཉེ་བ་འཁོར་མི་རུང་ངོ༌། །གལ་ཏེ་དགེ་འདུན་ལ་ཕུལ་ན་ནི་རུང་ངོ༌། །བླ་གོས་དང་མཐང་གོས་ཀྱང་དེ་བཞིན་ནོ་ཞེས་གསུངས་པ་ཡིན་ཏེ། བླ་གོས་དང་མཐང་གོས་གཉིས་སྨོས་པས་ཆོས་གོས་གསུམ་ཆར་སྲ་བརྐྱང་ཉིད་དུ་གདིང་བར་མངོན་ནོ། །དེ་ལྟ་བས་ན་དགེ་སློང་མ་རྣམས་ཀྱི་ཡང་ཆོས་གོས་ལྔ་ཆར་སྲ་བརྐྱང་ཉིད་དུ་གདིང་བར་འདིས་བསྟན་པ་ཡིན་ནོ། དགེ་འདུན་གྱིའོ་ཞེས་བྱ་བ་ནི། དགེ་འདུན་གྱི་ཆོས་གོས་གསུམ་སྲ་བརྐྱང་དུ་གདིང་བ་ཡིན་ཏེ། དེ་ནི་དགེ་འདུན་གྱིས་བྱིན་གྱིས་བརླབ་པར་བྱ་བ་དག་ཡིན་པའི་ཕྱིར་རོ། །ཆོས་གོས་གང་གདིང་བར་འོས་པ་དེ་བསྟན་པའི་ཕྱིར་བཤད་བརྡབ་མ་བྱས་པ་དང་ཡ་ཡོར་མ་གྱུར་བ་དང་མ་རྨུགས་པ་དང་མ་ཟེགས་པའོ་ཞེས་བྱ་བ་སྨྲས་ཏེ། བཤད་བརྡབ་མ་བྱས་པ་ཞེས་བྱ་བ་ལ་བཤད་བརྡབ་ཅེས་བྱ་བ་ནི། སྣམ་བུ་བཞིན་དུ་སྤུ་བཤད་ཅིང་བརྡབས་པ་སྟེ། དེ་ལྟར་མ་བྱས་པ་གང་ཡིན་པ་དེ་ནི་བཤད་
བརྡབ་མ་བྱས་པའོ། །ཡ་ཡོར་མ་གྱུར་བ་ཞེས་བྱ་བ་ལ་ཡ་ཡོར་ཞེས་བྱ་བ་ནི་གྲྭ་དག་འཕྱངས་པའི་ཕྱིར་མི་མཉམ་པར་འདུག་པའོ། །ཁ་ཅིག་ན་རེ། འཐག་པའི་ཚེ་བར་བར་དུ་རྒྱུ་སྦུན་མ་བཅུག་ཅིང་སེང་སེང་བོར་གྱུར་པའོ་ཞེས་ཀྱང་ཟེར་ཏེ། དེ་ལྟར་མ་བྱས་པ་གང་ཡིན་པ་དེ་ནི་ཡ་ཡོར་མ་གྱུར་པའོ། །མ་རྨུགས་པ་ཞེས་བྱ་བ་ལ། རྨུགས་པ་ཞེས་བྱ་བ་ནི་སྲིལ་དང་བྱ་དང་བྱི་བ་དང༌། ཨུད་ཙ་ཏིང་ཀ་དང་བྱེ་བ་ལ་སོགས་པས་མཆུས་རྨུགས་པ་སྟེ། དེ་ལྟར་མ་བྱས་པ་གང་ཡིན་པ་དེ་ནི་མ་རྨུགས་པའོ། །མ་ཟེགས་པ་ཞེས་བྱ་བ་ལ། ཟེགས་པ་ཞེས་བྱ་བ་ནི་ཤ་སྲབ་པ་སྟེ། དེ་ལྟར་མ་བྱས་པ་གང་ཡིན་པ་དེ་ནི་མ་ཟེགས་པའོ། །ཁ་བསྒྱུར་བའོ་ཞེས་བྱ་བ་ནི། བཀྲུ་བཤལ་འབའ་ཞིག་དང་ཁ་བསྒྱུར་བ་བྱས་པ་སྟེ། བཀྲུ་བཤལ་འབའ་ཞིག་བྱས་པ་ཞེས་བྱ་བ་ནི། བཅག་པ་དང་བརྡབ་པ་མེད་པར་བཀྲུ་བཤལ་བྱས་པ་ཉི་ཚེ་བྱས་པའོ། །ཁ་བསྒྱུར་བ་ཞེས་བྱ་བ་ནི། དེ་ལྟར་བཀྲུ་བཤལ་འབའ་ཞིག་བྱས་པའི་འོག་ཏུ་ཁ་བསྒྱུར་བའི་མཚན་ཉིད་ཀྱིས་ཁ་དོག་བསྒྱུར་བར་བྱས་པའོ། ཆོས་གོས་མ་བརྡབས་པ་རུང་བ་ཞེས་གསུངས་པ་གང་ཡིན་པ་དེ་ཉིད་འདིས་བསྡུས་པ་ཡིན་ནོ། །འདིར་གཞུང་ནི། ཆོས་གོས་མ་བརྡབས་པ་རུང་བ་གང་ཡིན་ཞེ་ན། མ་བརྡབས་པ་ནི་བཅགས་པའོ། །དེ་ཉིད་རུང་བ་ཡིན་པས་མ་བརྡབས་པ་རུང་བའོ་ཞེས་གསུངས་པ་ཡིན་ཏེ། ཆོས་གོས་ཁ་བསྒྱུར་བ་གང་ཡིན་པ་དེ་ཡང་དེ་ཡིན་པས་ཁ་བསྒྱུར་བ་མི་གདིང་བར་མི་བྱའོ། །ཡོངས་སུ་མ་སྤྱད་པའོ་ཞེས་བྱ་བ་ནི་སུས་ཀྱང་ཡོངས་སུ་མ་སྤྱད་པ་སྟེ། ཡོངས་སུ་སྤྱད་པ་ཞེས་བྱ་བ་ནི་རྙིང་པར་གྱུར་པ་ཡིན་པས། ཆོས་གོས་རྙིང་པར་གྱུར་པས་སྲ་བརྐྱང་འདིང་བར་བྱེད་ན་མ་བཏིང་བར་བརྗོད་པར་བྱའོ། །དེ་ལྟར་ཡང་གཞུང་ནི་ཆོས་གོས་རྙིང་བར་གྱུར་པ་གང་ཞེ་ན། དགེ་སློང་གིས་སྤྱད་པའི་ཆོས་གོས་གསུམ་གང་ཡིན་པའོ་ཞེས་གསུངས་པ་ཡིན་ནི། །སྲ་བའོ་ཞེས་བྱ་བ་འདིས་ནི་ཆོས་གོས་དེངས་པ་བསལ་ཏོ། །འདིར་གཞུང་ནི་དགེ་སློང་བྲམ་ཟེའི་བུ་མོས་ཞུས་པ་ལས། ཆོས་གོས་དེངས་པ་གང་ཞེ་ན། ཆོས་གོས་གང་དགེ་སློང་གི་ལུས་ལས་དེངས་པའོ་ཞེས་གསུངས་པ་ཡིན་ཏེ། དེངས་པ་ནི་ཟད་པ་ཡིན་པས་དེ་ལྟར་མ་གྱུར་པ་ཞེས་བྱ་བའི་ཐ་ཚིག་གོ །
མཐུད་མ་ཅན་དང་ལྷན་རིངས་ཅན་དང་ལྷན་པ་ཅན་དང་ཆག་ཅན་དང༌། གཟུངས་ཅན་མ་ཡིན་པའོ་ཞེས་བྱ་བ་ལ། མ་ཡིན་པའོ་ཞེས་བྱ་བའི་སྒྲ་འདི་ལྔ་ཆར་དང་སོ་སོར་སྦྱར་རོ། །མཐུད་མ་ཅན་ཞེས་བྱ་བ་ནི། དུམ་བུ་རིགས་མི་མཐུན་པས་མཐུད་མ་བྱས་པ་སྟེ། དེ་ལྟ་བུ་མ་མཐུད་པ་ནི་མཐུད་མ་ཅན་མ་ཡིན་པའོ། །ལྷན་རིངས་ཅན་ཞེས་བྱ་བ་ནི་ལྷན་པ་རིང་པོས་གླན་པ་སྟེ། དེ་ལྟ་བུས་མ་གླན་པ་ནི་ལྷན་རིངས་ཅན་མ་ཡིན་པའོ། །ལྷན་པ་ཅན་ཞེས་བྱ་བ་ནི་གང་ལ་ཆུ་བུར་གྱི་རྣམ་པ་ལྟར་གློ་བའི་ལྷན་པ་གཞན་གྱིས་གླན་པ་སྟེ། དེ་ལྟ་བུས་མ་གླན་པ་ནི་ལྷན་པ་ཅན་མ་ཡིན་པའོ། །ཆ་ག་ཅན་ཞེས་བྱ་བ་ནི། ཆོས་གོས་དག་གི་མཐའ་ཐོག་ཐག་ཏུ་སྐུད་པའི་ཚོམས་ཀྱིས་ཆ་ག་བཏབ་པ་སྟེ། དེ་ལྟ་བུས་མ་བཏབ་པ་ནི་ཆ་ག་ཅན་མ་ཡིན་པའོ། །གཟུངས་ཅན་ཞེས་བྱ་བ་ནི། མཐའ་ཟགས་པ་དག་ལ་སྐུད་པས་དཀྲིས་ཤིང་གཟུངས་བཏབ་པ་སྟེ། དེ་ལྟ་བུས་གཟུངས་མ་བཏབ་པ་ནི་གཟུངས་ཅན་མ་ཡིན་པའོ། །སྤངས་པ་དང་རྒྱུ་མ་བརྟགས་པ་དང་བྲལ་ཕྲད་མ་ཡིན་པའོ་ཞེས་བྱ་བ་ལ། འདིར་ཡང་མ་ཡིན་པ་ཞེས་བྱ་བའི་སྒྲ་སོ་སོར་སྦྱར་སྟེ། སྤངས་པ་མ་ཡིན་པ་དང༌། རྒྱུ་མ་བརྟགས་པ་མ་ཡིན་པ་དང་བྲལ་ཕྲད་མ་ཡིན་པ་ཞེས་བྱ་བར་སྦྱར་རོ། །སྤངས་པ་ཞེས་བྱ་བ་ནི་ཆོས་གོས་གཞག་པ་སྟེ། འདིར་གཞུང་ནི་དགེ་སློང་བྲམ་ཟེའི་བུ་མོས་ཞུས་པ་ལས། ཆོས་གོས་བཞག་པ་གང་ཞེ་ན། ཆོས་གོས་གང་ཞག་བཅུ་འདས་པ་དང༌། ཞག་གཅིག་བྲལ་བའོ་ཞེས་གསུངས་པ་ཡིན་ཏེ། དེ་ལྟར་མ་གྱུར་པ་ནི་སྤངས་པ་མ་ཡིན་པའོ། །རྒྱུ་མ་བརྟགས་པ་ཞེས་བྱ་བ་ནི་རུང་བ་མ་ཡིན་པ་སྟེ། འདིར་གཞུང་ནི་དེ་ཉིད་ལས་རྒྱུ་མ་བརྟགས་པ་ནི་རུང་བ་མ་ཡིན་པའོ་ཞེས་གསུངས་པ་ཡིན་ཏེ། དེ་ལྟ་བུ་མ་ཡིན་པ་ནི། རྒྱུ་མ་བརྟགས་པ་མ་ཡིན་པའོ། བྲལ་ཕྲད་ཞེས་བྱ་བ་ནི། ཕྱག་དར་ཁྲོད་ལ་བྱ་སྟེ། འདི་ལྟར་སྔར་བོར་བའི་ཚེ་ན་བ་དག་པོ་དང་བྲལ་བ་ཡིན་ལ། ཕྱིས་བླངས་པའི་ཚེ་ན་བདག་པོ་གཞན་དང་ཕྲད་པའི་ཕྱིར་རོ། །འདིར་གཞུང་ནི་དགེ་སློང་བྲམ་ཟེའི་བུ་མོས་ཞུས་པ་ལས། ཆོས་གོས་བྲལ་ཕྲད་གང་ཞེ་ན། ཆོས་གོས་གང་ལམ་ཀ་ནས་བྱུང་བ་སྟེ། ལམ་དུ་བོར་བ་ལས་རྙེད་པའོ་ཞེས་གསུངས་པ་ཡིན་ནོ། །
དེ་ལྟ་བུ་མ་ཡིན་པ་ནི་བྲལ་ཕྲད་མ་ཡིན་པའོ། །སྤངས་པ་ཞེས་བྱ་བ་ནི་ད་ལྟ་སྤོང་བར་འགྱུར་བ་འབའ་ཞིག་ཏུ་མ་ཟད་ཀྱི། སྔོན་ལན་ཅིག་སྤངས་པར་གྱུར་པ་ཡང་མི་རུང་ངོ༌། །དྲས་ཤིང་དྲུབས་པའོ་ཞེས་བྱ་བ་ནི། བྱིན་གྱིས་བརླབ་ཏུ་རུང་བ་སྟེ། དེའི་ཕྱིར་སྦྱར་མ་ཡང་བྱིན་གྱིས་བརླབ་ཏུ་རུང་བར་གསུངས་པ་གང་ཡིན་པ་དེ་ཡང་འདིས་བསྡུས་པ་ཡིན་ནོ། །ཟིན་པའོ་ཞེས་བྱ་བ་ནི་ཡོངས་སུ་རྫོགས་པར་ཟིན་པ་ཞེས་བྱ་བའི་ཐ་ཚིག་གོ །ལྔ་པའོ་ཞེས་བྱ་བ་ནི་སྲིད་དུ་ཁྲུ་ལྔ་པ་སྟེ། འདིས་ཞེང་དུ་ཁྲུ་གསུམ་པ་ཡང་བསྡུས་པ་ཡིན་ནོ། །ལྷག་མ་ཡང་ངོ་ཞེས་བྱ་བ་ནི། ཁྲུ་ཚད་ལྷག་པ་དང༌། སུམ་ཕྲུགས་ལྷག་མ་ཡང་རུང་བ་སྟེ། སྲ་བརྐྱང་འདི་ལ་དགེ་འདུན་གྱིས་ཁྱབ་པར་བྱ་བ་ཡིན་པའི་ཕྱིར་ལྷག་པ་ལ་ཡང་ཉེས་པ་མེད་དོ། །དགེ་འདུན་ནང་ན་ཉུང་བ་དགེ་སློང་བཞི་ཡོད་ན་དེའི་ཕྱིར་དགེ་སློང་བཞིའི་ཚད་ཀྱི་ཆོས་གོས་སུམ་ཕྲུགས་བཞི་མན་ཆད་གདིང་བར་བྱའོ། །ཁ་ཅིག་ན་རེ་ཆོས་གོས་སུམ་ཕྲུགས་བཞི་པས་ལྷག་པར་བཏིང་བ་ལ་ཡང་ཉེས་པ་མེད་དེ། སྦྱིན་པ་པོ་རྣམས་ཀྱི་བསོད་ནམས་སྤེལ་བའི་ཕྱིར་དང༌། དགེ་སློང་རྣམས་ཀྱིས་རྙེད་པ་སྒྲུབ་པའི་ཕྱིར་རོ་ཞེས་ཟེར་ཏེ། དེ་ལྟ་བས་ན་ཆོས་གོས་སུམ་ཕྲུགས་ཇི་སྙེད་འབྱོར་པ་དེ་སྙེད་ཀྱི་གདིང་དུ་རུང་ངོ༌། །སྔར་མ་བཏིང་བའོ་ཞེས་བྱ་བ་ནི། ལོ་གཞན་ལ་སྲ་བརྐྱང་ཉིད་དུ་སྔར་མ་བཏིང་བའི་ཆོས་གོས་རུང་གི །སྔར་བཏིང་བ་ནི་མི་རུང་ངོ༌། །བཏིང་བའོ་ཞེས་བྱ་བ་ནི། སྤྲོག་མའི་ནང་དུ་བཏིང་བའོ། །གཟེབས་ཀྱི་སྤྲོག་མའི་ནང་དུ་བརྐྱང་བ་ཞེས་བྱ་བའི་ཐ་ཚིག་གོ །དུ་མ་ཡང་ངོ་ཞེས་བྱ་བ་ནི། ཆོས་གོས་སུམ་ཕྲུགས་ཞེས་བྱ་བར་སྦྱར་ཏེ། དགེ་འདུན་གྱི་ཚོགས་དུ་མ་ཡོད་པའི་ཕྱིར། ཆོས་གོས་སུམ་ཕྲུགས་དུ་མ་ཡང་གདིང་དུ་རུང་ངོ༌། །དེ་ཇི་སྙེད་པས་གདིང་བར་བྱའོ་ཞེས་བྱ་བ་ནི། ཆོས་གོས་སུམ་ཕྲུགས་ཏེ་ཇི་སྙེད་ཡོད་པ་དེ་སྙེད་འདིང་བར་བྱེད་པའི་དགེ་སློང་ཡང་བསྐོ་བར་བྱའོ་ཞེས་བྱ་བའི་ཐ་ཚིག་གོ ། དེ་ནི་ཆོས་གོས་གཞན་བྱིན་གྱིས་བརླབས་པ་ཡིན་པས་དེའི་ཕྱིར་བྱིན་གྱིས་བརླབས་པ་དག་བྱུང་ནས་སོ་ཞེས་བྱ་བ་ནི། གང་གི་ཕྱིར་སྲ་བརྐྱང་གདིང་བ་དེ་ནི་ཆོས་གོས་གཞན་བྱིན་གྱིས་བརླབས་པ་ཡིན་པས། དེའི་ཕྱིར་སྲ་བརྐྱང་འདིང་བའི་ཉིན་པར་དགེ་སློང་རང་རང་གི་ཆོས་གོས་སྔར་
བྱིན་གྱིས་བརླབས་པ་དག་དབྱུང་བར་བྱ་ཞིང་དེ་དག་ཕྱུང་ནས་གཟོད་སྲ་བརྐྱང་གདིང་བར་བྱའོ། །ཞག་མ་ལོན་པར་ཚོགས་པས་མོས་པར་བྱའོ་ཞེས་བྱ་བ་ནི། སྲ་བརྐྱང་འདིང་བའི་ཉི་མ་དེ་ཕན་ཆད་ནས་དབྱར་གྱི་ནང་གི་ཉི་མ་གང་ཚུན་ཆད་ཀྱི་བར་གྱི་ཉི་མ་གང་ལ་ཆོས་གོས་དེ་སྦྱོར་བའི་ཉི་མ་དེ་ཉིད་ལ་དབྱར་གནས་པར་ཁས་བླངས་པའི་དགེ་འདུན་དུ་གྱུར་པའི་དགེ་སློང་ཐམས་ཅད་མཚམས་ཀྱི་ནང་དུ་ཚོགས་པས་ཆོས་གོས་དེ་དབྱར་གནས་པའི་དགེ་འདུན་གྱི་གནས་བསྡུ་བ་དང༌། དགེ་སློང་རྣམས་བདེ་བར་གནས་པར་བྱ་བ་དང༌། སྦྱིན་པ་པོ་རྣམས་ཀྱི་སྦྱིན་པར་བྱ་བའི་ཆོས་ཡོངས་སུ་སྤྱད་པར་བྱ་བའི་སྲ་བརྐྱང་དུ་གདིང་བར་དགེ་སློང་ཐམས་ཅད་ཀྱིས་མོས་པར་བྱ་བའོ། །འདིར་གཞུང་ནི་ཇེ་དང་པོ་ཁོ་ནར་ཚོགས་པས་ཆོས་གོས་འདི་ནི་དབྱར་གནས་པའི་དགེ་འདུན་གྱིས་ཆོས་གོས་ཀྱི་རྙེད་པ་གྲུབ་པ་ལགས་ཏེ། གལ་ཏེ་དགེ་འདུན་བཞེད་ན་ཆོས་གོས་འདིས་དགེ་འདུན་གྱིས་སྲ་བརྐྱང་འདིང་བར་འགྱུར་རོ་ཞེས་མོས་པར་བྱའོ། །དེའི་འོག་ཏུ་ཉི་མ་གཞན་ལ་གནས་མལ་བཤམ་པར་བྱའོ་ཞེས་གསུངས་པ་ཡིན་ནོ། །ཉི་མ་གང་ལ་མོས་པར་བྱས་པའི་ཉི་མ་དེ་ཉིད་དམ་ཉི་མ་གཉིས་པ་ལ་བློ་མཐུན་པར་བྱ་བ་ཁོ་ནར་ངེས་པ་མེད་དེ། གདིང་བའི་ཉི་མ་ལ་མ་བབ་པ་ཚུན་ཆད་ནམ་དགའ་བ་ན་བྱར་རུང་ངོ༌། །མཚམས་ཀྱི་ནང་དུ་བློ་མཐུན་པར་བྱའོ་ཞེས་བྱ་བ་ནི། དེ་ལྟར་མོས་པར་བྱས་པའི་འོག་ཏུ་ཆོས་གོས་དེ་སྲ་བརྐྱང་ཉིད་དུ་བྱ་བར་དགེ་འདུན་གྱིས་མཚམས་ཀྱི་ནང་དུ་གསོལ་བ་དང་གཉིས་ཀྱི་ལས་ཀྱིས་བློ་མཐུན་པར་བྱའོ། །འདིའི་སྔགས་ནི་དགེ་འདུན་བཙུན་པ་རྣམས་གསན་དུ་གསོལ། འདི་ལྟར་གནས་འདི་ནི། དབྱར་གནས་པའི་དགེ་འདུན་གྱི་གོས་ཀྱི་རྙེད་པའི་ཆོས་གོས་པ་གྱིས་པ་འདི་དགེ་འདུན་གྱིས་སྲ་བརྐྱང་དུ་བྱ་བར་བཞེད་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། འདི་ལྟར་གནས་བསྡུ་བ་དང༌། དགེ་སློང་རྣམས་བདེ་བར་གནས་པར་བགྱི་བ་དང༌། སྦྱིན་པ་པོ་རྣམས་ཀྱི་སྦྱིན་པར་བྱ་བའི་ཆོས་ཡོངས་སུ་སྤྱད་པའི་སླད་དུ་ཆོས་གོས་འདི་སྲ་བརྐྱང་བགྱི་སྟེ། གནས་གང་དུ་སྲ་བརྐྱང་བཏིང་བར་ཆོས་གོས་རྙིང་པ་རྣམས་དང་ཡང་མི་འབྲལ་ན་གསར་པ་རྣམས་
དང་ལྟ་ཅི་སྨོས། འདི་ནི་གསོལ་བའོ། །དགེ་འདུན་བཙུན་པ་རྣམས་གསན་དུ་གསོལ། འདི་ལྟར་གནས་འདིར་དབྱར་གནས་པའི་དགེ་འདུན་གྱིས་གོས་ཀྱི་རྙེད་པའི་ཆོས་གོས་བགྱིས་པ་འདི་དགེ་འདུན་གྱིས་སྲ་བརྐྱང་ཉིད་དུ་བྱ་བར་བཞེད་པས། དེའི་སླད་དུ་འདི་ལྟར་གནས་བསྡུ་བ་དང་དགེ་སློང་རྣམས་བདེ་བར་གནས་པར་བགྱི་བ་དང༌། སྦྱིན་པ་པོ་རྣམས་ཀྱི་སྦྱིན་པར་བྱ་བའི་ཆོས་ཡོངས་སུ་སྤྱད་པའི་སླད་དུ་དགེ་འདུན་གྱིས་ཆོས་གོས་འདི་སྲ་བརྐྱང་དུ་བགྱིས་ཏེ། གནས་གང་དུ་སྲ་བརྐྱང་བཏིང་བར་ཆོས་གོས་རྙིང་པ་རྣམས་དང་ཡང་མི་འབྲལ་ན། གསར་པ་རྣམས་དང་ལྟ་ཅི་སྨོས་ཏེ། ཆོས་གོས་འདི་སྲ་བརྐྱང་དུ་བགྱི་བར་ཚེ་དང་ལྡན་པ་གང་དག་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །དགེ་འདུན་གྱིས་བཟོད་ཅིང་གནང་ན་དགེ་འདུན་གྱིས་ཆོས་གོས་འདི་སྲ་བརྐྱང་དུ་བགྱིས་ལགས་ཏེ། འདི་ལྟར་ཅང་མི་གསུང་པས་དེ་དེ་བཞིན་དུ་འཛིན་ཏོ་ཞེས་གསུངས་པ་ཡིན་ནོ། །འདིང་བ་ཡང་ངོ་ཞེས་བྱ་བ་ནི། མཚམས་ཀྱི་ནང་དུ་བསྐོ་བར་བྱའོ་ཞེས་བྱ་བར་སྦྱར་ཏེ། འདི་ནི་སྤྲོ་བར་བྱས་ནས་གསོལ་བ་དང་གཉིས་ཀྱི་ལས་ཀྱིས་བསྐོ་བར་བྱའོ། །འདིའི་སྔགས་ནི། མིང་འདི་ཞེས་བྱ་བ་ཁྱོད་དབྱར་གནས་པའི་དགེ་འདུན་གྱི་སྲ་བརྐྱང་འདིང་བར་སྤྲོ་འམ། སྤྲོའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དབྱར་གནས་པའི་དགེ་འདུན་གྱི་སྲ་བརྐྱང་འདིང་བར་སྤྲོ་ན། གལ་ཏེ་དགེ་འདུན་གྱི་དུས་ལ་པ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་མིང་འདི་ཞེས་བགྱི་བ་སྲ་བརྐྱང་འདིང་བར་བསྐོ་སྟེ། དགེ་སློང་སྲ་བརྐྱང་འདིང་བ་མིང་འདི་ཞེས་བགྱི་བ་འདི་དབྱར་གནས་པའི་དགེ་འདུན་གྱི་སྲ་བརྐྱང་འདིང་བར་འགྱུར་རོ། །འདི་ནི་གསོལ་བའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དབྱར་གནས་པའི་དགེ་འདུན་གྱི་སྲ་བརྐྱང་འདིང་བར་སྤྲོ་ན། དེའི་སླད་དུ་དགེ་འདུན་གྱིས་དགེ་སློང་མིང་འདི་ཞེས་བགྱི་བ་སྲ་བརྐྱང་འདིང་བར་བསྐོ་སྟེ། དགེ་སློང་སྲ་བརྐྱང་འདིང་བ་མིང་འདི་ཞེས་བགྱི་བ་འདི། དབྱར་གནས་པའི་དགེ་འདུན་གྱི་སྲ་བརྐྱང་འདིང་བར་འགྱུར་ན།
དགེ་སློང་མིང་འདི་ཞེས་བགྱི་བ་སྲ་བརྐྱང་འདིང་བར་བསྐོ་བར་ཚེ་དང་ལྡན་པ་གང་དག་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་མིང་འདི་ཞེས་བགྱི་བ་སྲ་བརྐྱང་འདིང་བར་བསྐོས་ལགས་ཏེ། འདི་ལྟར་ཅང་མི་གསུངས་པས་དེ་དེ་བཞིན་དུ་འཛིན་ཏོ་ཞེས་གསུངས་པ་ཡིན་ནོ།། །།བམ་པོ་ལྔ་བཅུ་གཅིག་པ། སྲ་བརྐྱང་འདིང་བའི་དགེ་སློང་རྣམ་པ་ཇི་ལྟ་བུ་ལས་བསྐོ་བར་བྱ་ཞེ་ན། དེའི་ཕྱིར། གང་ལ་སྟེ་འབྱུང་བའོ་ཞེས་བྱ་བ་སྨྲས་ཏེ། གང་ཟག་རྣམ་པ་ཇི་ལྟ་བུ་ལ་སྲ་བརྐྱང་འདིང་བ་དེ་འབྱུང་བ་སྟེ། སྔར་དབྱར་གནས་པར་ཁས་མ་བླངས་པ་དང་དབྱར་རལ་བ་དང་དབྱར་ཕྱི་མར་གནས་པར་ཁས་བླངས་པ་དང་དབྱར་གནས་གཞན་དུ་གནས་པར་ཁས་བླངས་པ་དང༌། ས་གཞན་ལ་གནས་པ་དང་དེ་དག་ཉིད་ཐོབ་པ་དང༌། བསྙེན་པར་མ་རྫོགས་པ་དང་ཆོས་མ་ཡིན་པའི་ཕྱོགས་དང་མཐུན་པར་སོང་བ་ཞེས་སྨོས་བས་དེ་དག་ལས་གཞན་པའི་གང་ཟག་སྲ་བརྐྱང་འདིང་བར་བསྐོར་བར་བྱའོ། །དེ་ལ་གཏད་པར་བྱའོ་ཞེས་བྱ་བ་ནི། སྲ་བརྐྱང་འདིང་བར་བསྐོས་པའི་དགེ་སློང་དེ་ལ་དགེ་འདུན་གྱིས་ཉི་མ་གང་ལ་ཆོས་གོས་དེ་དགེ་འདུན་གྱིས་སྲ་བརྐྱང་འདིང་བར་གསོལ་བ་དང༌། གཉིས་ཀྱི་ལས་ཀྱིས་བློ་མཐུན་པར་བྱས་པ་དེ་ཉིད་ཀྱི་ཉིན་མོ་གཏད་པར་བྱ་བ་སྟེ། ཆོས་གོས་བློ་མཐུན་པར་བྱས་པ་ཉི་མ་གཞན་དུ་གཞག་པར་མི་རིགས་པའི་ཕྱིར་རོ། །ཇི་ལྟར་གཏད་པར་བྱ་ཞེ་ན། དེའི་ཕྱིར་གསོལ་བ་བྱས་ཏེ་ཞེས་བྱ་བ་སྨྲས་ཏེ། གསོལ་བ་འབའ་ཞིག་གི་ལས་བྱས་ཏེ་གཏད་བར་བྱའོ་ཞེས་བྱ་བའི་ཐ་ཚིག་གོ །འདིའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། ཆོས་གོས་འདི་ནི་དགེ་འདུན་གྱིས་སྲ་བརྐྱང་དུ་འདིང་བར་བློ་མཐུན་པར་བགྱིས་པ་ལགས། དགེ་སློང་མིང་འདི་ཞེས་བགྱི་བ་འདི་ནི་སྲ་བརྐྱང་འདིང་བར་བསྐོས་པ་ལགས་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། འདི་ལྟར་གནས་བསྡུ་བ་དང་དགེ་སློང་རྣམས་བདེ་བར་གནས་པར་བགྱི་བ་དང༌། སྦྱིན་པ་པོ་རྣམས་ཀྱི་སྦྱིན་པར་བྱ་བའི་ཆོས་ཡོངས་སུ་སྤྱད་པའི་སླད་དུ་དགེ་འདུན་གྱིས་ཆོས་
གོས་འདི་སྲ་བཀྱང་འདིང་བར་དགེ་སློང་མིང་འདི་ཞེས་བགྱི་བ་ལ་གཏོད་ཅིང༌། སྲ་བརྐྱང་འདིང་བ་དགེ་སློང་མིང་འདི་ཞེས་བགྱི་བ་ཆོས་གོས་འདིས་དབྱར་གནས་པའི་དགེ་འདུན་གྱི་སྲ་བརྐྱང་འདིང་བར་འགྱུར་ཏེ། གནས་གང་དུ་སྲ་བརྐྱང་བཏིང་བར་ཆོས་གོས་རྙིང་པ་རྣམས་དང་ཡང་མི་འབྲལ་ན། གསར་པ་རྣམས་དང་ལྟ་ཅི་སྨོས། འདི་ནི་གསོལ་བའོ་ཞེས་གསུང་པ་ཡིན་ནོ། །བཀྲུ་བ་དང་དྲུབ་པ་དང་ཁ་བསྒྱུར་པ་དག་ལ་དེས་སྔོན་དུ་འགྲོ་བར་བྱའོ་ཞེས་བྱ་བ་ནི། གལ་ཏེ་ཆོས་གོས་ནི་སྔར་བྱས་མ་ཟིན་པོ་ད་གཟོད་བྱ་དགོས་པ་ཞིག་ཡིན་ན། འདིང་བར་བྱེད་པ་དེས་བཀྲུ་བ་ལ་སོགས་པ་དག་ལ་སྔོན་དུ་འགྲོ་བར་བྱའོ། །གཉིས་སམ་གསུམ་རྗེས་སུ་བསྒྲུབས་པས་སོ་ཞེས་བྱ་བ་ནི། བཀྲུ་བ་ལ་སོགས་པ་དེ་དག་ལས་གཉིས་སམ་གསུམ་གྱི་ལས་རྗེས་སུ་བསྒྲུབ་པས་གདོན་མི་ཟ་བར་སྔོན་དུ་འགྲོ་བར་བྱའོ། །ཟིན་པ་ཞིག་དྲུབ་ན་རང་གིས་ཁ་བ་སྲུབས་གཉིས་སམ་གསུམ་དྲུབ་པར་བྱའོ་ཞེས་བྱ་བ་ནི། གལ་ཏེ་ཆོས་གོས་དེ་བྱས་ཟིན་པ་ཞིག་དྲུབ་ན་དེའི་ཚེ་སྲ་བརྐྱང་འདིང་བས་དེའི་འོག་ཏུ་སྲུབས་གཅིག་གམ་གཉིས་ཙམ་དྲུབ་པར་བྱ་བའོ། །འདིར་གཞུང་ནི་དགེ་སློང་སྲ་བརྐྱང་འདིང་བས་སྲ་བརྐྱང་དུ་འདིང་བའི་ཆོས་གོས་བཀྲུ་བར་བྱ་བ་དང་དྲུབ་པར་བྱ་བ་དང་ཁ་བསྒྱུར་བར་བྱ་བ་ལ་སྔོན་དུ་འགྲོ་བར་བྱའོ། །གལ་ཏེ་བྱས་ཟིན་པ་ཞིག་རྙེད་ན་དེའི་འོག་ཏུ་ཁབ་སྲུབས་གཉིས་སམ་གསུམ་དྲུབ་པར་བྱའོ་ཞེས་གསུངས་པ་ཡིན་ནོ། །མནོས་པ་དང་རང་བྱེད་པ་དང་དེའི་མཇུག་དག་ཏུ་གོ་རིམས་བཞིན་དུ་འདིང་བར་འགྱུར་རོ། །གདིང་རོ་བཏིང་ངོ་སྙམ་དུ་སེམས་བསྐྱེད་པར་བྱའོ་ཞེས་བྱ་བ་ལ། མནོས་པ་ཞེས་བྱ་བ་ནི་དང་པོ་དགེ་འདུན་ལས་སྲ་བརྐྱང་དུ་གདིང་བའི་ཆོས་གོས་མནོས་པའི་ཆེའོ། །རང་བྱེད་པ་ཞེས་བྱ་བ་ནི་གལ་ཏེ་ཆོས་གོས་དེ་སྔར་བྱས་མ་ཟིན་བ་ཞིག་ན་སྲ་བརྐྱང་འདིང་བ་རང་གིས་བཀྲུ་བ་དང་དྲུབ་པ་དང་ཁ་བསྒྱུར་བ་དག་ལ་སྔོན་དུ་འགྲོ་བར་བྱ་བ་དང༌། ཟིན་པ་ཞིག་དྲུབ་ན་རང་གིས་ཁབ་སྲུབས་གཉིས་སམ་གསུམ་འདྲུབ་པར་བྱེད་པའི་ཚེའོ། །དེའི་མཇུག་དག་ཏུ་ཞེས་བྱ་བ་ནི། སྲ་བརྐྱང་གདིང་བར་བྱ་བ་དེ་བཏིང་ཟིན་པའི་ཚེའོ། །གོ་རིམས་བཞིན་དུ་ཞེས་བྱ་བ་ནི། མནོས་པའི་ཚེ་ན་གདིང་བར་འགྱུར་རོ་སྙམ་དུ་སེམས་བསྐྱེད་པར་བྱ་སྟེ་མ་བརྩམས་པའི་ཕྱིར་རོ། །རང་
བྱེད་པའི་ཚེ་ན་གདིང་ངོ་སྙམ་དུ་སེམས་བསྐྱེད་པར་བྱ་སྟེ། འདིང་བའི་ལས་བརྩམ་པའི་ཕྱིར་རོ། །དེའི་མཇུག་དག་ཏུ་བཏིང་ངོ་སྙམ་དུ་སེམས་བསྐྱེད་པར་བྱ་སྟེ་ཟིན་པའི་ཕྱིར་རོ། །དང་པོ་ཉམས་ན་མི་འབྱུང་བ་མ་ཡིན་ནོ་ཞེས་བྱ་བ་ནི། མནོས་པའི་ཚེ་ན་འདིང་བར་འགྱུར་རོ་སྙམ་དུ་སེམས་བསྐྱེད་པར་བྱ་བ་དེ་མ་བྱས་ཏེ་ཉམས་ན་ཡང་འོག་མ་གཉིས་བྱས་ན་སྲ་བརྐྱང་གདིང་བ་མི་འབྱུང་བ་མ་ཡིན་ཏེ་འབྱུང་ངོ༌། །ཚེ་དང་ལྡན་པ་དག་བདག་སང་སྲ་བརྐྱང་འདིང་བར་འགྱུར་གྱི་ཁྱེད་ཅག་གིས་རང་རང་གི་ཆོས་གོས་རྣམས་དབྱུང་བར་བྱའོ་ཞེས་ཚོགས་པ་ལ་བརྗོད་པར་བྱའོ་ཞེས་བྱ་བ་ནི། སྟོན་ཟླ་འབྲིང་པོ་ཚེས་བཅུ་དྲུག་ལ་སྲ་བརྐྱང་གདིང་བར་འགྱུར་བའི་མདུན་རོལ། སྟོན་ཟླ་འབྲིང་པོ་ཚེས་བཅོ་ལྔའི་དགོངས་ཀར་སྲ་བརྐྱང་འདིང་བའི་དགེ་སློང་དེས་དགེ་འདུན་ཐམས་ཅད་མཚམས་ཀྱི་ནང་དུ་ཚོགས་པ་ལ་དེ་སྐད་བརྗོད་པར་བྱ་བ་སྟེ། རང་རང་གི་ཆོས་གོས་གསུམ་པོ་དག་སྔར་བྱིན་གྱིས་བརླབས་པའི་སྔགས་ཕྱུང་ཤིག་ཅེས་བྱ་བའི་ཐ་ཚིག་གོ །འདུ་བའི་སྐབས་རྗེས་སུ་བསྒྲུབ་པར་བྱའོ་ཞེས་བྱ་བ་ནི། ཚེས་བཅུ་དྲུག་གི་ནང་པར་སྲ་བརྐྱང་གདིང་བའི་དོན་དུ་དགེ་འདུན་འདུ་བ་དེའི་སྐབས་ནི་གནས་མལ་བཤམ་པ་དང་གཎྜཱི་བརྡུང་བ་དང་དྲིས་པའི་ཚིག་གིས་ཡང་དག་པར་བསྒོམ་དག་སྟེ། དེ་དག་སྲ་བརྐྱང་འདིང་བའི་དགེ་སློང་དེས་རྗེས་སུ་བསྒྲུབ་ཅིང་ལས་སུ་བྱ་བའོ། །དྲིས་པའི་ཚིག་གིས་ཡང་དག་པར་བསྒོ་བ་ཞེས་བྱ་བ་ནི། ཚེ་དང་ལྡན་པ་ཅིའི་ཕྱིར་གཎྜཱི་བརྡུངས་ཞེས་དྲིལ་བ་ལ་འདིའི་ཕྱིར་རོ་ཞེས་དགེ་སློང་རྣམས་ལ་ལན་བཏབ་པའི་ཚིག་གིས་དགེ་སློང་རྣམས་གནས་དེར་འདུ་བར་ཡང་དག་པར་བསྒོ་བར་བྱ་བའོ། །དྲི་དང་མེ་ཏོག་གིས་མཆོད་ཅིང་བདུག་སྤོས་དྲི་ཞིམ་པོས་བདུགས་པ་དུ་མ་གཟེབ་ཀྱི་སྦྲོག་མར་ལྷན་ཅིག་བཞག་པ་ཐོགས་ཏེ་རྒ་ན་རིམས་སུ་འདུག་པས་གདིང་བར་བསྒྲུབ་པར་བྱའོ་ཞེས་བྱ་བ་ན། སྲ་བརྐྱང་འདིང་བའི་ཆོས་གོས་སུམ་ཕྲུགས་དྲི་དང་མེ་ཏོག་གིས་མཆོད་ཅིང་བདུག་སྤོས་དྲི་ཞིམ་པོས་བདུག་པ་ཕྲུགས་གཅིག་གམ་གཉིས་སམ་དུ་མ་ཇི་སྙེད་འབྱོར་བ་གཟེབ་ཀྱི་སྤྲོག་མ་གཅིག་ཏུ་ལྷན་ཅིག་བཞག་པ་སྲ་བརྐྱང་འདིང་བར་བྱེད་པའི་དགེ་སློང་གི་པང་བར་ཐོགས་ཏེ་དགེ་སློང་རྒན་རིམས་ཀྱི་མདུན་དུ་འདུག་པས་སྲ་བརྐྱང་གདིང་བར་བསྒྲུབ་
བར་བྱའོ། །དུས་གང་གི་ཚེ་ཞེ་ན་དེའི་ཕྱིར། ཚེས་བཅུ་དྲུག་ལའོ་ཞེས་བྱ་བ་སྨྲས་ཏེ་ཆོས་བཅུ་དྲུག་གི་ནང་པར་རོ། །ཟླ་བ་གང་གི་ཚེ་ཞེ་ན་དེའི་ཕྱིར། སྟོན་ཟླ་འབྲིང་པོའོ་ཞེས་བྱ་བ་སྨྲས་ཏེ། སྟོན་ཟླ་འབྲིང་པོ་ཚེས་བཅུ་དྲུག་ལའོ། །ཅི་ཞིག་གིས་བསྒྲུབ་བར་བྱ་ཞེ་ན་དེའི་ཕྱིར། ལན་གསུམ་བཟླས་པས་སོ་ཞེས་བྱ་བས་སྨྲས་སོ། །ཅི་ཞིག་ལན་གསུམ་བཟླས་པ་ཞེ་ན་དེའི་ཕྱིར། གདིང་ངོ་ཞེས་བྱ་བ་སྨྲས་ཏེ། ཇེ་དང་པོར་དགེ་སློང་ཐམས་ཅད་ལ་གདིང་ངོ་ཞེས་བྱ་བའི་སྔགས་ལན་གསུམ་བཟླས་པས་བསྒྲུབ་པར་བྱ་བ་སྟེ། འདིའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། ཆོས་གོས་འདི་ནི་དགེ་འདུན་གྱིས་སྲ་བརྐྱང་དུ་བློ་མཐུན་པར་བགྱིས་པ་ལགས། བདག་དགེ་སློང་མིང་འདི་ཞེས་བགྱི་པ་ནི་སྲ་བརྐྱང་འདིང་བར་བསྐོས་པ་ལགས་ཏེ། འདི་ལྟར་གནས་བསྡུ་བ་དང༌། དགེ་སློང་རྣམས་བདེ་བར་གནས་པར་བགྱི་བ་དང༌། སྦྱིན་པ་པོ་རྣམས་ཀྱིས་སྦྱིན་པར་བྱ་བའི་ཆོས་ཡོངས་སུ་སྤྱད་པའི་སླད་དུ། བདག་སྲ་བརྐྱང་འདིང་བ་དགེ་སློང་མིང་འདི་ཞེས་བགྱི་པས་ཆོས་གོས་འདིས་དགེ་འདུན་གྱི་སྲ་བརྐྱང་གདིང་བར་བགྱིའོ། །གནས་གང་དུ་སྲ་བརྐྱང་བཏིང་བར་ཆོས་གོས་རྙིང་པ་རྣམས་དང་ཡང་མི་འབྲལ་ན། གསར་པ་རྣམས་དང་ལྟ་ཅི་སྨོས་ཞེས་ལན་གསུམ་བཟླས་སོ་ཞེས་གསུངས་པ་ཡིན་ནོ། །དགེ་སློང་རེ་རེའི་མདུན་དུ་འདུག་སྟེ་བཏིང་ངོ་ཞེས་གོ་བར་བྱའོ་ཞེས་བྱ་བ་ནི། དེ་ལྟར་དགེ་འདུན་ཐམས་ཅད་ལ་གདིང་ངོ་ཞེས་བྱ་བའི་སྔགས་ལན་གསུམ་བཟླས་པས་བསྒྲུབས་ནས་དེའི་འོག་ཏུ་སྲ་བརྐྱང་འདིང་བའི་དགེ་སློང་དེས་གནས་བརྟན་མན་ཆད་ནས་དགེ་སློང་ཐམས་ཅད་ཀྱི་མདུན་དུ་རྒན་རིམས་ཀྱིས་འདུག་སྟེ། དགེ་སློང་རེ་རེ་ལ་ཡང་བཏིང་ངོ་ཞེས་བྱ་བའི་སྔགས་ལན་གསུམ་གསུམ་བཟླས་པས་བསྒྲུབ་པར་བྱ་བའོ། །འདིའི་སྔགས་ནི་གནས་བརྟན་ནམ་བཙུན་པའམ་ཚེ་དང་ལྡན་པ་དགོངས་སུ་གསོལ། ཆོས་གོས་འདི་ནི་དགེ་འདུན་གྱི་སྲ་བརྐྱང་དུ་བློ་མཐུན་པར་བགྱིས་པ་ལགས། བདག་དགེ་སློང་མིང་འདི་ཞེས་བགྱི་བ་ནི་སྲ་བརྐྱང་འདིང་བར་བསྐོས་པ་ལགས་ཏེ། དེའི་སླད་དུ་འདི་ལྟར་གནས་བསྡུ་བ་དང༌། དགེ་སློང་རྣམས་ལ་བདེ་བར་གནས་པར་བགྱི་བ་དང༌། སྦྱིན་པ་པོ་རྣམས་ཀྱིས་སྦྱིན་པར་བྱ་བའི་ཆོས་ཡོངས་སུ་སྤྱད་པའི་སླད་དུ། བདག་སྲ་བརྐྱང་འདིང་བ་དགེ་སློང་
མིང་འདི་ཞེས་བགྱི་པས་ཆོས་གོས་འདིས་དགེ་འདུན་གྱི་སྲ་བརྐྱང་བཏིང་ལས་ཏེ། གནས་གང་དུ་སྲ་བརྐྱང་བཏིང་བར་ཆོས་གོས་རྙིང་པ་རྣམས་དང་ཡང་མི་འབྲལ་ན། གསར་པ་རྣམས་དང་ལྟ་ཅི་སྨོས་ཞེས་ལན་གསུམ་བཟླས་པར་བྱའོ་ཞེས་གསུངས་པ་ཡིན་ནོ། །གཞན་གྱིས་ནི་ལེགས་པར་བཏིང་ངོ་ཤིན་ཏུ་བཏིང་ངོ་འདི་ལ་རྙེད་པ་དང་ཕན་ཡོན་གང་ཡོད་པ་དེ་བདག་གི་ཡིན་ནོ་ཞེས་བྱ་བ་ནི། དེ་ལྟར་སྲ་བརྐྱང་འདིང་བར་བྱེད་པའི་དགེ་སློང་དེས་གནས་བརྟན་མན་ཆད་ནས་དགེ་སློང་ཐམས་ཅད་ཀྱི་མདུན་དུ་རྒན་རིམས་ཀྱིས་འདུག་སྟེ། དགེ་སློང་རེ་རེ་ལ་བཏིང་ངོ་ཞེས་བྱ་བའི་སྔགས་ལན་གསུམ་གསུམ་བཟླས་པས་བསྒྲུབས་པ་ན། གནས་བརྟན་ལ་སོགས་པ་དགེ་སློང་གཞན་དེ་རེས་ཀྱང་དེའི་འཕྲལ་འཕྲལ་ལ་སྔགས་འདི་ལ་ན་རེ་རེ་བཟླས་པར་བྱའོ། །འདིའི་སྔགས་ནི། ལེགས་པར་བཏིང་ངོ་ཤིང་ཏུ་བཏིང་ངོ༌། །འདི་ལ་རྙེད་པ་དང་ཕན་ཡོན་གང་ཡོད་པ་དེ་བདག་གི་ཡིན་ནོ་ཞེས་གསུངས་པ་ཡིན་ནོ། །འདི་ལ་རྗེས་སུ་ཡི་རང་བ་ནི་ཉམས་སུ་མྱོང་བ་དང་འདྲའོ་ཞེས་བྱ་བ་ནི། གང་ལ་ལས་སྲ་བརྐྱང་འདིང་བ་འདི་ཉམས་སུ་མྱོང་བ་ལ་སྲ་བརྐྱང་བཏིང་བའི་ཕན་ཡོན་དང་རྙེད་པ་འབྱུང་བར་དེ་བཞིན་དུ་གང་ལ་ལ་སྲ་བརྐྱང་འདིང་པ་ན་གཉིད་ལོག་པ་ལ་སོགས་པའི་དབང་གིས་སྲ་བརྐྱང་བཏིང་བ་འདི་ཉམས་སུ་མ་མྱོང་བས་གཉིད་སད་པ་ལ་སོགས་པའི་དུས་ན་སྲ་བརྐྱང་བཏིང་བར་ཐོས་ནས་འདི་ལ་རྗེས་སུ་ཡི་རང་བར་བྱེད་པ་དེ་ལ་ཡང་སྲ་བརྐྱང་བཏིང་བའི་ཕན་ཡོན་དང་རྙེད་པ་འབྱུང་བར་འགྱུར་རོ། །འདི་སྐད་བསྟན་ཏེ། གང་གི་སྲ་བརྐྱང་འདིང་བ་མངོན་སུམ་དུ་གྱུར་བ་ན་གཉིད་ལ་སོགས་པའི་དབང་གིས་ལས་ཉམས་སུ་མ་མྱོང་ཡང་བྱིས་སད་པ་ན་རྗེས་སུ་ཡི་རང་བ་བྱེད་ན་རྗེས་སུ་ཡི་རང་བ་དེ་ནི་ལས་ཉམས་སུ་མྱོང་བ་དང་འདྲ་བར་ཤེས་པར་བྱའོ། །འདིར་གཞུང་ནི་མ་མོ་ལས་དེ་ཐོས་ནས་ལེགས་པར་བཏིང་ངོ་ཤིན་ཏུ་བཏིང་ངོ་ཞེས་རྗེས་སུ་ཡི་རང་བར་བྱེད་པ་དེ་དག་གིས་ཀྱང་སྲ་བརྐྱང་བཏིང་བར་བརྗོད་པར་བྱའོ་ཞེས་གསུངས་པ་ཡིན་ནོ། །གང་གིས་དེའི་རྗེས་སུ་ཡི་རང་བར་བྱ་ཞེ་ན། དེའི་ཕྱིར་མངོན་སུམ་དུ་གྱུར་པས་སོ་ཞེས་བྱ་བ་སྨྲས་ཏེ། དེ་བཏིང་བའི་ཕྱིར་ཚོགས་པ་བྱིན་པས་སོ། །ད་ནི་སྲ་བརྐྱང་གདིང་བའི་དགེ་སློང་གིས་དགེ་འདུན་གྱི་སྲ་བརྐྱང་དུ་བཏིང་བའི་ཆོས་གོས་དེ་ཇི་ལྟར་ཡོངས་སུ་
བསྐྱང་པའི་ཆོ་ག་བཤད་པར་བྱ་སྟེ། དེའི་ཕྱིར་དུས་དུས་སུ་བསང་བར་བྱ་བ་སྲད་པར་བྱ་སྤྲུག་པར་བྱའོ་ཞེས་བྱ་བ་སྨྲས་ཏེ། སེར་བུའི་དད་ལ་བསད་པ་དང་ཉི་མ་ལ་བསྲད་པ་དང༌། རྡུལ་སྤྲུག་པར་བྱ་བའོ། །ཁྱིམ་དུ་བ་ཅན་དང་རྡུལ་ཅན་དུ་གཞག་པར་མི་བྱའོ་ཞེས་བྱ་བ་ནི། གནས་ཁང་ལ་སོགས་པ་གང་དུ་དུ་བ་འཐུལ་བ་དང་རྡུལ་འཐུལ་བ་དེར་གཞག་པར་མི་བྱའོ། །རྒྱལ་པོའི་ཕོ་བྲང་དུ་གཞག་པར་མི་བྱའོ་ཞེས་བྱ་བ་ཡང་སྲ་བརྐྱང་དུ་གདིང་བའི་ཆོས་གོས་དེའོ། །དེ་དང་འབྲལ་བར་མི་བྱའོ་ཞེས་བྱ་བ་ནི། སྲ་བརྐྱང་འདིང་བའི་དགེ་སློང་དེ་སྲ་བརྐྱང་དུ་བཏིང་བའི་ཆོས་གོས་དེ་དང་མཚམས་ཀྱི་ཕྱི་རོལ་དུ་སྐྱ་རེངས་ཀྱིས་ཆོད་པར་འབྲལ་བར་མི་བྱའོ། །ཁྱེར་ཏེ་གཞན་དུ་འགྲོ་བར་མི་བྱ་བའོ་ཞེས་བྱ་བ་ནི། དེས་སྲ་བརྐྱང་དུ་བཏིང་བའི་ཆོས་གོས་དེ་ཁྱེར་ཏེ་མཚམས་ཀྱི་ཕྱི་རོལ་གྱི་གཙུག་ལག་ཁང་གཞན་ནམ་གྲོང་གཞན་དུ་འགྲོ་བར་མི་བྱ་བའོ། །མི་གཙང་བའི་སྐྱབས་སུ་འཇུག་པར་མི་བྱའོ་ཞེས་བྱ་བ་ནི། དེས་ཆོས་གོས་དེ་ཁྱེར་ཏེ་ཕྱི་རོལ་ཆེ་ཆུང་གི་གནས་སུ་འཇུག་པར་མི་བྱའོ། །བླ་གབ་མེད་པར་འདུག་པར་མི་བྱའོ་ཞེས་བྱ་བ་ཡང་དེ་ཁྱེར་ཏེ་ཞེས་བྱ་བར་སྦྱར་རོ། །སྲ་བརྐྱང་འདིང་བའི་དགེ་སློང་ལས་གཞན་པའི་གང་ཟག་གིས་ཆོས་གོས་དེ་གཞག་པ་དང་བསྲེལ་བ་དང་བསྐུར་བར་མི་བྱའོ། །དེ་དག་ནི་སྲ་བརྐྱང་གདིང་བའི་ཆོ་ག་ཡིན་ཏེ། དཔེར་ན་གོས་གདིང་བ་དང་འདྲ་བའི་སྲ་བརྐྱང་སྤང་ལེབ་ཡིན་པ་དང་འདྲ་བར་དབྱར་གནས་པར་ཁས་བླངས་པའི་དགེ་སློང་རྣམས་གྱི་ཕན་ཡོན་དང་རྙེད་པ་འབྱུང་བའི་སྲ་བརྐྱང་ཡང་ཆོས་གོས་འདི་ཡིན་པས། དེའི་ཕྱིར་སྲ་བརྐྱང་དང་འདྲ་བས་སྲ་བརྐྱང་བ་ཞེས་བྱ་སྟེ། དེ་གདིང་བའི་ཆོ་ག་ནི་ཇི་སྐད་བསྟན་པ་དེ་དག་ཡིན་ནོ། །སྲ་བརྐྱང་བཏིང་བའི་ཆོ་ག་བཤད་ཟིན་ཏོ།། །།ད་ནི་སྲ་བརྐྱང་དབྱུང་བའི་ཆོ་ག་བཤད་པར་བྱ་སྟེ། དེའི་ཕྱིར་དབྱུང་བ་ནི་རྣམ་པ་གཉིས་ཏེ། རང་འཇུག་པ་དང་འབྲལ་བ་དང་བཅོས་མའོ་ཞེས་བྱ་བ་སྨྲས་ཏེ། རང་འཇུག་པ་དང་འབྲལ་བ་ཞེས་བྱ་བ་ནི། བྱེད་རྒྱུ་མེད་པར་རང་ཉིད་འདིང་བའི་འཇུག་པ་དང་འབྲལ་བའོ། །བཅོས་མ་ཞེས་བྱ་བ་ནི། ལས་ལ་སོགས་པའི་ཚོགས་བློ་སྔོན་དུ་བཏང་སྟེ་དབྱུང་བའོ། །རང་འཇུག་པ་དང་བྲལ་བ་རྣམ་པ་གང་གིས་འགྲུབ་པར་འགྱུར་ཞེ་ན་དེའི་ཕྱིར་རང་འཇུག་པ་དང་འབྲལ་བ་ནི། སྲ་བརྐྱང་པས་མཚམས་
གཞན་དུ་ཕྱིན་པ་དང་བྱིན་གྱིས་རློབ་པར་བྱེད་པ་མེད་པར་མཚམས་ཀྱི་ནང་དུ་སྐྱ་རེངས་ཤར་བ་དང༌། དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པའོ་ཞེས་བྱ་བ་སྨྲས་ཏེ། རང་འཇུག་པ་དང་འབྲལ་བ་ནི་གནས་སྐབས་གསུམ་པོ་འདི་དག་ལ་འབྱུང་སྟེ། སྲ་བརྐྱང་བས་མཚམས་ཀྱི་གནས་གཞན་དུ་ཕྱིན་པ་དང༌། མཚམས་གང་དུ་དེ་བཏིང་བའི་མཚམས་དེར་བྱིན་གྱིས་རློབ་པར་བྱེད་པའི་དགེ་སློང་ཐམས་ཅད་མ་ལུས་པར་མེད་པའི་ཚེ་དེར་སྐྱ་རེངས་ཤར་བ་དང༌། བྱིན་གྱིས་རློབ་པར་བྱེད་པའི་དགེ་འདུན་གྱི་ན་མཚམས་ཀྱི་དཀྱིལ་འཁོར་གྱི་ཁོངས་སུ་གཏོགས་པ་གང་ཟག་གང་ལ་རྒྱུན་བཅད་པའི་གནས་སྐབས་ནའོ། །དེ་ལ་དང་པོ་གཉིས་ཀྱིས་ནི་དེར་གཏོགས་པའི་དགེ་འདུན་ཐམས་ཅད་ཀྱི་སྲ་བརྐྱང་བཏིང་བ་རང་འཇུག་པ་དང་བྲལ་བར་འགྱུར་ལ། ཐ་མལ་ནི་གང་ཟག་གང་དེའི་དཀྱིལ་འཁོར་གྱི་ཁོངས་སུ་གཏོགས་པ་རྒྱུན་ཆད་པ་དེ་ཉི་ཚེ་བའི་སྲ་བརྐྱང་བཏིང་བ་རང་འཇུག་པ་དང་འབྲལ་བར་འགྱུར་ཏེ། སྲ་བརྐྱང་བཏིང་བ་ནི་དབྱར་གྱི་གནས་ཀྱི་རྗེས་སུ་འཇུག་པ་ཡིན་པའི་ཕྱིར་རོ། །གང་གི་ཕྱིར་ཇི་ལྟར་སྲ་བརྐྱང་གདིང་བ་དེའི་ཕྱིར་དབྱར་གནས་པའི་གནས་ལས་གཞན་པའི་གནས་སུ་མི་འབྱུང་བ་དེ་བཞིན་དུ་དབྱུང་བ་ཡང་གནས་གཞན་དུ་གནས་པ་ཉིད་ན་འཇིག་བར་འགྱུར་བ་དེའི་ཕྱིར་སྲ་བརྐྱང་དེས་མཚམས་གཞན་དུ་ཕྱིན་ན་སྲ་བརྐྱང་དབྱུང་བ་རང་འཇུག་པ་དང་འབྲལ་བར་འགྱུར་རོ། །གང་གི་ཕྱིར་བྱིན་གྱིས་རློབ་པར་བྱེད་པའི་དགེ་སློང་ཐམས་ཅད་སྲ་བརྐྱང་བཏིང་བའི་གནས་དེ་ནས་བྲལ་བར་གྱུར་པ་ཉིད་ཡིན་ན། ཇི་ལྟར་སྣམ་སྦྱར་ལ་སོགས་པ་བྱིན་གྱིས་བརླབས་པའི་ཆོས་གོས་གཞན་དག་གིས་རྒྱུན་བཅད་པ་ཉིད་དང༌། མཚམས་ཐ་དད་པ་ན་གནས་པ་ཉིད་དུ་འགྱུར་བ་དེ་བཞིན་དུ། སྲ་བརྐྱང་འདི་ཡང་རྒྱུན་ཆད་པ་ཉིད་ན་དེ་ལ་འབྲལ་བའི་སྤང་བ་ཉིད་དུ་འབྱུང་ཞིང༌། སྤང་པ་ཉིད་དུ་གྱུར་པའི་ཆོས་གོས་ལ་ཇི་ལྟར་སྲ་བརྐྱང་གདིང་བ་ཉིད་མི་འབྱུང་བ་དེ་བཞིན་དུ། བྱུང་བ་ཡང་འཇིག་པར་འགྱུར་བ་དེའི་ཕྱིར་བྱིན་གྱིས་རློབ་པར་བྱེད་པ་མེད་པར་མཚམས་ཀྱི་ནང་དུ་སྐྱ་རེངས་ཤར་ན་ཡང་སྲ་བརྐྱང་དབྱུང་བ་རང་འཇུག་པ་དང་བྲལ་བར་འགྱུར་རོ། །གང་གི་ཕྱིར་དགེ་སློང་གང་དབྱར་གནས་པར་ཁས་བླངས་པའི་དགེ་འདུན་གྱིས་དབྱར་གྱི་གནས་དེའི་མཚམས་ཀྱི་དཀྱིལ་
འཁོར་གྱི་ཁོངས་སུ་གཏོགས་པ་དེས་དཀྱིལ་འཁོར་དེ་གཏན་གཏོང་ཞིང་རྒྱུན་གཅོད་པར་བྱེད་པ་དེ་ལ་དགེ་སློང་ལྷག་མ་གཞན་དག་སྲ་བརྐྱང་བཏིང་བ་དེ་ལ་བག་ཡངས་སུ་གནས་པ་གང་ཡིན་པ་ཉིད་དང༌། དགེ་སློང་དེ་དག་ལ་སྲ་བརྐྱང་བཏིང་བ་དེ་ཕན་ཡོན་དང་རྙེད་པའི་གཞིར་གནས་པ་གང་ཡིན་པ་དེ་ཉིད་འཇིག་པར་འགྱུར་པ་དེའི་ཕྱིར་དཀྱིལ་འཁོར་ཀྱི་ཁོངས་སུ་གཏོགས་པ་བཅད་ན་ཡང་སྲ་བརྐྱང་དབྱུང་བ་རང་འཇུག་པ་དང་འབྲལ་བར་འགྱུར་རོ། །འདི་སྐད་བསྟན་ཏེ། གང་གི་ཕྱིར་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པ་ཞེས་བྱ་བའི་གང་ཟག་གཅིག་གིས་སྲ་བརྐྱང་བཏིང་བ་དེ་འཇིག་པར་འགྱུར་བ་དེའི་ཕྱིར་གང་ཟག་གང་དབྱར་གནས་པར་ཁས་བླངས་པའི་དགེ་འདུན་གྱི་དབྱར་གྱི་གནས་དེའི་མཚམས་ཀྱི་དཀྱིལ་འཁོར་གྱི་ཁོངས་སུ་གཏོགས་པ་གཏན་པ་བཏང་ཞིང་རྒྱུན་བཅད་པ་དེ་ལ་སྲ་བརྐྱང་དབྱུང་བའི་འཇུག་པ་དང་བྲལ་བར་འགྱུར་ཏེ། བཏིང་བའི་རྒྱུན་དང་འབྲལ་བ་དང་རྗེས་སུ་འཇུག་པ་དང་བྲལ་བར་འགྱུར་རོ་ཞེས་བྱ་བའི་ཐ་ཚིག་སྟེ། རོ་གཅིག་པའི་དངོས་པོ་ཉིད་མེད་པར་འགྱུར་བའི་ཕྱིར་རོ། །རང་འཇུག་པ་དང་བྲལ་བ་རྣམ་པ་གསུམ་སྨོས་པ་དེ་དག་ལས་དང་པོ་གཉིས་ཀྱི་མཚན་ཉིད་ནི་རྒྱས་པར་བཤད་ཟིན་ན། དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པ་ཞེས་སྨོས་པ་དེ་རྣམ་པ་གང་གིས་དུས་གང་གི་ཚེ་ན་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པར་འགྱུར་བ་དེ་མ་བསྟན་པས། དེའི་ཕྱིར་བྱེ་བྲག་ཏུ་རྟོགས་པར་བྱ་བའི་ཕྱིར་འདིར་སྐབས་གཞན་བསྟན་པར་བྱ་སྟེ། དེའི་ཕྱིར་མ་ལྟ་བུའི་ཚིག་དྲུག་སྟེ། སྦྱོར་བས་འགྲོ་བ་དང༌། ངེས་པར་བྱེད་པ་དང༌། མཐར་ཐུག་པར་འགྱུར་བ་དང༌། ཞིག་པར་འགྱུར་བ་དང༌། བསམ་པའི་རྒྱུན་ཆད་པ་དང༌། མཚམས་ལས་འདའ་བའོ་ཞེས་བྱ་བ་སྨྲས་སོ། །དེ་དག་ནི་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པ་ཞེས་བྱ་བ་དེའི་བྱེ་བྲག་ཏུ་བཤད་པར་གྱུར་པ་དག་ཡིན་ཏེ། ཚིག་དེ་དག་ནི་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པའི་གང་ཟག་དེའི་སྲ་བརྐྱང་དབྱུང་བ་རང་འཇུག་པ་དང་འབྲལ་བར་འགྱུར་པ་དག་གིས་མ་དང་འདྲ་ཞིང་མའི་གནས་ལྟ་བུ་དག་ཡིན་པས་དེའི་ཕྱིར་མ་ལྟ་བུའི་ཚིག་དྲུག་ཅེས་བྱ་སྟེ། སྦྱོར་བས་འགྲོ་བ་ལ་སོགས་པ་དྲུག་པོ་དག་བྱུང་བ་ནི་དེའི་དཀྱིལ་
འཁོར་གྱི་ཁོངས་སུ་གཏོགས་བ་ཆད་པ་དེ་ཡང་འབྱུང་བའི་ཕྱིར་རོ། །དེ་ལ་སྦྱོར་བས་འགྲོ་བ་ཞེས་བྱ་བ་ནི། སྦྱོར་བ་ངེས་པས་མཚམས་ལས་འདའ་ཞིང་འགྲོ་བའོ། །ངེས་པར་བྱེད་པ་ཞེས་བྱ་བ་ནི། མཚམས་ཀྱི་ཕྱི་རོལ་དུ་ངེས་པ་མེད་པར་བྱེད་པའོ། །མཐར་ཐུག་པར་གྱུར་པ་ཞེས་བྱ་བ་ནི། ཆོས་གོས་བརྩམས་པ་ཟིན་པར་བྱས་པའོ། །ཞིག་པར་གྱུར་པའོ་ཞེས་བྱ་བ་ནི་ཆོས་གོས་བརྩམས་པ་མ་ཟིན་པའི་བར་སྐབས་སུ་རྐྱེན་འགའ་ཞིག་གིས་རྒྱུན་ཆད་པར་གྱུར་པའོ། །བསམ་པའི་རྒྱུན་ཆད་པ་ཞེས་བྱ་བ་ནི། ཆོས་གོས་ལ་རེ་བ་བྱུང་བ་རྒྱུན་ཆད་པར་གྱུར་པའོ། །མཚམས་ལས་འདའ་བ་ཞེས་བྱ་བ་ནི། ཐེ་ཚོམ་ཟ་བའི་སྦྱོར་བས་མཚམས་ལས་འདའ་བར་བྱེད་པའོ། །དེ་དག་གིས་དེའི་དཀྱིལ་འཁོར་གྱི་ཁོངས་སུ་གཏོགས་པ་དེ་ཇི་ལྟར་ཆད་པར་བརྗོད་པར་བྱ་ཞེ་ན་དེའི་ཕྱིར། དེ་ལ་དེའོ་ཞེས་བྱ་བ་སྨྲས་ཏེ། གང་ཟག་གང་སྦྱོར་བས་འགྲོ་བ་ལ་སོགས་པ་རང་འཇུག་པ་དང་བྲལ་བའི་རྒྱུ་ཀུན་དུ་སྤྱོད་པ་དེ་ལ་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པ་དེ་རྣམ་པར་གཞག་གི་དགེ་འདུན་ཐམས་ཅད་ལ་ནི་དེ་རྣམ་པར་མི་གཞག་སྟེ། ཇི་ལྟར་སྲ་བརྐྱང་གིས་མཚམས་གཞན་དུ་ཕྱིན་པ་དང་བྱིན་གྱིས་རློབ་པར་བྱེད་པ་མེད་པར་མཚམས་ཀྱི་ནང་དུ་སྐྱ་རེངས་ཤར་བ་ཞེས་བྱ་བ་སྔར་བསྟན་པ་གཉིས་ཀྱིས་དགེ་འདུན་ཐམས་ཅད་ལ་སྲ་བརྐྱང་དབྱུང་བར་རང་འཇུག་པ་དང་བྲལ་བར་འགྱུར་བ་དེ་ལྟར་འདིས་ནི་མི་འགྱུར་བའོ། །འདི་སྐད་བསྟན་ཏེ། གང་ཟག་གང་ལ་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པར་གྱུར་པ་དེ་ཉིད་ལ་སྲ་བརྐྱང་འབྱུང་བར་རང་འཇུག་པ་དང་བྲལ་བར་འགྱུར་བ་ཏེ། དེ་ཉིད་ཀྱི་སྲ་བརྐྱང་བཏིང་བ་ལས་གྱུར་པའི་རྙེད་པ་དང་ཕན་ཡོན་དག་ལྡོག་པར་འགྱུར་གྱི། དེས་དགེ་འདུན་གཞན་གྱི་ནི་ལྡོག་པར་མི་འགྱུར་རོ། །དེ་ལྟར་ན་མ་ལྟ་བུའི་ཚིག་དྲུག་པོ་དེ་དག་གིས་དེའི་དཀྱིལ་འཁོར་གྱི་ཁོངས་སུ་གཏོགས་པ་དེ་ཆད་པར་འགྱུར་བ་དེ་བསྟན་ཏོ། །དུས་གང་གི་ཚེ་མ་ལྟ་བུའི་ཚིག་དྲུག་པོ་དེ་དག་གིས་དེའི་དཀྱིལ་འཁོར་གྱི་ཁོངས་སུ་གཏོགས་པ་དེ་ཆད་པར་འགྱུར་ཞེ་ན་དེའི་ཕྱིར། མཚམས་ལས་འདས་པ་ན་དེ་འགྲུབ་པོ་ཞེས་བྱ་བ་སྨྲས་ཏེ། དེའི་དཀྱིལ་འཁོར་གྱི་ཁོངས་སུ་གཏོགས་པའི་མཚམས་ལས་འདས་པ་ན་དེ་ཆད་པ་དེ་འགྲུབ་
པོ། །ཅི་གང་ཡང་རུང་བས་མཚམས་ལས་འདའ་ན་འམ་ཞེ་ན། མ་ཡིན་ཏེ་དེའི་ཕྱིར། ཕྱིར་མི་འོང་བའི་སེམས་ཀྱིས་སོ་ཞེས་བྱ་བ་སྨྲས་ཏེ། དབྱར་གནས་པར་ཁས་བླངས་པའི་དགེ་འདུན་གྱིས་མཚམས་ཀྱི་དཀྱིལ་འཁོར་གང་ན་སྲ་བརྐྱང་དུ་བཏིང་བའི་ཆོས་གོས་འདུག་པ་དེར་ཕྱིར་མི་འོང་བར་དམ་བཅས་པའི་སེམས་ཀྱིས་མཚམས་ལས་འདས་ཏེ་འགྲོ་ན་དེའི་ཚེ་དེའི་དཀྱིལ་འཁོར་གྱི་ཁོངས་སུ་གཏོགས་པ་དེ་ཆད་པར་འགྱུར་ཏེ། འདིས་ནི་སྦྱོར་བས་འགྲོ་བ་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པ་བསྟན་ཏོ། །ཅི་སྦྱོར་བས་འགྲོ་བ་འབའ་ཞིག་གིས་དོ་ཆད་པར་ཟད་དམ་ཞེ་ན་མ་ཡིན་ཏེ་དེའི་ཕྱིར། མཚམས་ཀྱི་ཕྱི་རོལ་དུ་དེ་སྐྱེས་ན་ཡང་ངོ་ཞེས་བྱ་བ་སྨྲས་ཏེ། མཚམས་ཀྱི་ནང་ནས་འགྲོ་བའི་ཚེ་ན་ཕྱིར་མི་འོང་བའི་སེམས་མ་སྐྱེས་སུ་ཟིན་ཀྱང་མཚམས་ཀྱི་ཕྱི་རོལ་དུ་སོན་པ་དེ་ཉིད་ན་ཕྱིར་མི་འོང་བར་ངེས་པའི་སེམས་དེ་སྐྱེས་ན་ཡང༌། དེའི་ཚེ་དེའི་དཀྱིལ་འཁོར་གྱི་ཁོངས་སུ་གཏོགས་པ་དེ་ཆད་པར་འགྱུར་ཏེ། འདིས་ནི་ངེས་པར་བྱེད་པས་དེའི་དཀྱིལ་འཁོར་གྱི་ཁོངས་སུ་གཏོགས་པར་ཆད་པ་བསྟན་ཏོ། །ཅི་བྱེ་བྲག་མེད་པ་ཁོ་ནས་མཚམས་ལས་འདས་པའི་དུས་དང༌། མཚམས་ཀྱི་ཕྱི་རོལ་དུ་ཕྱིར་མི་འོང་བའི་སེམས་སྐྱེས་པ་ན་དེ་ཆད་པར་འགྱུར་རམ་ཞེ་ན་མ་ཡིན་ཏེ། དེའི་ཕྱིར་ཆོས་གོས་བྱ་བའི་བསམ་པས་རྗེས་སུ་འབྲེལ་པ་མེད་ན་དེའི་ཚེ་ཉིད་ནའོ་ཞེས་བྱ་བ་སྨྲས་ཏེ། ཆོས་གོས་བྱའོ་སྙམ་དུ་སེམས་པའི་ཆོས་གོས་བྱ་བའི་བསམ་པ་གང་ཡིན་པ་དེས། དེར་རོ་གཅིག་པ་ཉིད་ཀྱི་རྗེས་སུ་འབྲེལ་པ་ཞེས་བྱ་བ་རྗེས་སུ་འཇུག་པ་ཉིད་དང་རྗེས་སུ་སོང་པ་ཉིད་གང་ཡིན་པའི་རྗེས་སུ་འབྲེལ་བ་དེ་མེད་ན། མཚམས་ལས་འདས་པའི་དུས་དང་མཚམས་ཀྱི་ཕྱི་རོལ་དུ་ཕྱིར་མི་འོང་བའི་སེམས་སྐྱེས་པའི་དུས་དེའི་ཚེ་ཉིད་ན་དེའི་དཀྱིལ་འཁོར་གྱི་ཁོངས་སུ་གཏོགས་པ་དེའི་ཆད་པར་འགྱུར་ཏེ། འདིས་ནི་སྦྱོར་བས་འགྲོ་བ་དང་ངེས་པར་བྱེད་པར་དེ་གཉིས་ཀྱི་བྱེ་བྲག་གི་གནས་སྐབས་བསྟན་ཏོ། ཅི་ཆོས་གོས་བྱ་བའི་བསམ་པས་རྗེས་སུ་འབྲེལ་པ་མེད་པ་འབའ་ཞིག་གིས་དེའི་ཚེ་ཆད་པར་འགྱུར་བར་ཟད་དམ་ཞེ་ན་མ་ཡིན་ནོ། །དེའི་ཕྱིར་ཡོད་ན་བྱེད་པར་འགྱུར་བ་ཉིད་ཆད་ནའོ་ཞེས་བྱ་བ་སྨྲས་ཏེ། གལ་ཏེ་ཆོས་གོས་བྱ་བའི་བསམ་པས་རྗེས་སུ་འབྲེལ་པ་ཡོད་ན་ནི་དེའི་ཚེ་དེའི་དཀྱིལ་འཁོར་གྱི་ཁོངས་སུ་གཏོགས་པ་དེ་ཆད་པར་མི་འགྱུར་
ཏེ། གང་གི་ཚེ་ཆོས་གོས་བྱེད་པར་འགྱུར་བ་ཉིད་རྒྱུན་ཆད་པར་འགྱུར་བ་དེ་ཉིད་ཀྱི་ཚེ་དེའི་དཀྱིལ་འཁོར་གྱི་ཁོངས་སུ་གཏོགས་པ་དེ་ཡང་ཆད་པར་འགྱུར་ཏེ། འདིས་ཀྱང་སྦྱོར་བས་འགྲོ་བ་དང་ངེས་པར་བྱེད་པ་དེ་གཉིས་ཀྱི་བྱེ་བྲག་གི་གནས་སྐབས་གཞན་བསྟན་ཏོ། །ཅི་མཚམས་ལས་འདས་པའི་དུས་དང་མཚམས་ཀྱི་ཕྱི་རོལ་དུ་ཆོས་གོས་བྱ་བའི་བསམ་པས་རྗེས་སུ་འབྲེལ་པ་མེད་པ་འབའ་ཞིག་གིས་དེ་ཆད་པར་འགྱུར་བར་ཟད་དམ་ཞེ་ན་མ་ཡིན་ཏེ་དེའི་ཕྱིར། ཕྱིར་འོངས་ན་ཡང་ངོ་ཞེས་བྱ་བ་སྨྲས་ཏེ། སྲ་བརྐྱང་གདིང་བའི་མཚམས་སུ་ཕྱིར་འོངས་ན་ཡང་ཆོས་གོས་བྱེད་པར་འགྱུར་བའི་བསམ་པས་རྗེས་སུ་འབྲེལ་པ་ཉིད་ཆད་པར་གྱུར་ན་དེའི་ཚེ་ཡང་དེའི་དཀྱིལ་འཁོར་གྱི་ཁོངས་སུ་གཏོགས་པ་དེ་ཆད་པར་འགྱུར་ཏེ། གང་ཟག་དེ་ཉི་ཚེ་ལ་སྲ་བརྐྱང་དབྱུང་བ་རང་འཇུག་པ་དང་འབྲལ་བར་འགྱུར་རོ་ཞེས་བྱ་བའི་ཐ་ཚིག་གོ །འདིས་ཀྱང་སྦྱོར་བས་འགྲོ་བ་དང་ངེས་བར་བྱེད་པ་དེ་གཉིས་ཀྱི་བྱེ་བྲག་གི་གནས་སྐབས་གཞན་བསྟན་ཏོ། །བྱེད་པར་འགྱུར་བ་ཉིད་ཆད་ནའོ་ཞེས་གང་སྨོས་པ་དེ་ལ་བྱེད་པར་འགྱུར་བ་ཉིད་ཆད་པའི་གནས་སྐབས་དུ་ཡོད་ཅེ་ན། དེའི་ཕྱིར་བྱེད་པར་འགྱུར་བའི་མཐར་ཐུག་པ་དང་བརྩམས་པ་ཞིག་པ་དང་བསམ་པའི་རྒྱུན་ཆད་པ་གསུམ་ལ་དེ་གནས་སོ་ཞེས་བྱ་བ་སྨྲས་ཏེ། ཆོས་གོས་བྱའོ་སྙམ་དུ་བསམས་པ་གང་ཡིན་བ་དེ་མཐར་ཐུག་པར་གྱུར་པ་དང༌། བརྩམས་པ་ཞིག་པར་གྱུར་པ་དང༌། བསམ་པའི་རྒྱུན་ཆད་པར་གྱུར་བ་ཞེས་བྱ་བ་དེ་གསུམ་གྱི་གནས་སྐབས་ལ་བྱེད་པར་འགྱུར་བ་ཆད་པ་དེས་གནས་པར་སྦྱར་རོ། །འདི་སྐད་བསྟན་ཏེ། ཆོས་གོས་བྱེད་པར་འདོད་པ་དེ་མཐར་ཐུག་པར་གྱུར་པའི་དུས་དང༌། དེ་བརྩམས་པ་ཞིག་པར་གྱུར་པའི་དུས་དང༌། དེའི་བྱ་བའི་བསམ་པའི་རྒྱུན་ཆད་པར་གྱུར་པའི་དུས་ན་ཡང་བྱེད་པར་འགྱུར་བ་ཞེས་བྱ་བ་དེ་རྒྱུན་ཆད་པར་རིག་པར་བྱའོ། །དེ་ལྟ་བས་ན་ཕྱིར་མི་འོང་བའི་སེམས་ཀྱིས་མཚམས་ལས་འདའ་ཞིང་འགྲོ་བ་འམ། མཚམས་ཀྱི་ཕྱི་རོལ་དུ་ཕྱིར་མི་འོང་བའི་སེམས་སྐྱེས་པའི་གང་ཟག་ཆོས་གོས་བྱེད་པར་འགྱུར་བ་ཉིད་མཐར་ཐུག་པར་འགྱུར་བ་འམ། བརྩམས་པ་ཞིག་པར་གྱུར་བ་འམ། བྱ་བའི་བསམ་པ་རྒྱུན་ཆད་པར་གྱུར་པ་གང་ཡིན་པ་དེ་ནི་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་
པ་ཡིན་པས། དེ་ལ་སྲ་བརྐྱང་དབྱུང་བ་རང་འཇུག་པ་དང་འབྲལ་བར་འགྱུར་རོ། །འདིས་ནི་མཐར་ཐུག་པར་གྱུར་པ་དང༌། ཞིག་པར་གྱུར་པ་དང༌། བསམ་པའི་རྒྱུན་ཆད་པས་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པ་བསྟན་ཏོ། །ཅི་ངེས་པར་གྱུར་པས་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པར་འགྱུར་བ་ཟད་དམ་ཞི་ན་མ་ཡིན་ཏེ། དེའི་ཕྱིར་ཡིད་གཉིས་ནི་ངེས་པར་འབྱིན་པར་བྱེད་པ་དང་འདྲའོ་ཞེས་བྱ་བ་སྨྲས་ཏེ། ཕྱིར་མི་འོང་བའི་སེམས་ཀྱིས་མཚམས་ལས་འདའ་ཞིང་འགྲོ་བ་དང༌། མཚམས་ཀྱི་ཕྱི་རོལ་དུ་ཕྱིར་མི་འོང་བའི་སེམས་སྐྱེས་པ་དེ་གཉིས་ནི་ངེས་པ་དེས་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་ཅིང་སྲ་བརྐྱང་དབྱུང་བ་རང་འཇུག་པ་དང་བྲལ་བར་བྱེད་པ་དེ་བཞིན་དུ། ཡིད་གཉིས་ཀྱིས་མཚམས་ལས་འདའ་ཞིང་འགྲོ་བ་དང༌། མཚམས་ཀྱི་ཕྱི་རོལ་དུ་ཡིད་གཉིས་ཟ་བས་ཀྱང་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་ཅིང་སྲ་བརྐྱང་དབྱུང་བ་རང་འཇུག་པ་དང་འབྲལ་བར་འགྱུར་བ་སྟེ། ཅིའི་ཕྱིར་འོང་བར་བྱ་འམ་འོན་ཏེ་ཕྱིར་འོང་བར་མི་བྱ་སྙམ་པ་དེ་ལྟ་བུའི་སེམས་གཅིག་ཏུ་མ་ངེས་པས་མཚམས་ལས་འདའ་ཞིང་འགྲོ་བ་དང༌། མཚམས་ཀྱི་ཕྱི་རོལ་དུ་སོན་པ་ན་དེ་ལྟ་བུའི་སེམས་སྐྱེས་པས་ཀྱང་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་ཅིང་གང་ཟག་དེའི་སྲ་བརྐྱང་དབྱུང་བ་རང་འཇུག་པ་དང་འབྲལ་བར་འགྱུར་རོ། །འདིར་གཞུང་ནི་མཚམས་ཀྱི་ཕྱི་རོལ་དུ་འགྲོ་བ་ན་དེ་འདི་སྙམ་དུ་ཅིའི་ཕྱིར་འོང་བར་བྱ་ཞིང་ཆོས་གོས་བྱ་འམ། འོན་ཏེ་ཕྱིར་འོང་བར་མི་བྱ་ཞིང་ཆོས་གོས་མི་བྱ་སྙམ་དུ་སེམས་པས་མཚམས་ལས་འདའ་བར་བྱེད་ན་དེའི་སྲ་བརྐྱང་དབྱུང་བ་རང་འཇུག་པ་དང་བྲལ་བ་ནི་མཚམས་ལས་འདའ་བའི་མཐའ་ལས་བྱུང་བ་ཡིན་ནོ་ཞེས་གསུངས་པ་ཡིན་ཏེ། འདིས་ནི་མཚམས་ལས་འདའ་བས་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པ་བསྟན་ཏོ། །མ་ལྟ་བུའི་ཚིག་དྲུག་པོ་མདོ་དང་སྦྱར་བའི་གནས་སྐབས་བསྟན་ནས། ད་ནི་ཚིག་དྲུག་པོ་དེ་དག་གིས་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པར་འགྱུར་ཞིང་སྲ་བརྐྱང་དབྱུང་བ་རང་འཇུག་པ་དང་བྲལ་བར་འགྱུར་བ་ལུང་གི་ཚིག་དང་སྦྱར་བས་བསྒྲུབ་པར་བྱ་སྟེ། དེ་ལ་ཆོས་གོས་བྱ་བའི་
བསམ་པ་མེད་པ་དང་ཕྱིར་འོང་བའི་སེམས་མེད་པས་མཚམས་ལས་འདས་ན་ནི། དེའི་སྲ་བརྐྱང་དབྱུང་བ་རང་འཇུག་པ་དང་བྲལ་བ་དེ་དབྱུང་བས་འགྲོ་བའི་མཐའ་ལས་བྱུང་བ་ཡིན་ནོ། །མཚམས་ཀྱི་ཕྱི་རོལ་དུ་སོན་པ་ན་ཕྱིར་མི་འོང་བའི་སེམས་སྐྱེས་སམ། ཕྱིར་འོང་བ་ལ་ཐེ་ཚོམ་ཟ་བའི་སེམས་སྐྱེས་ཤིང་ཆོས་གོས་བྱ་བའི་བསམ་པས་རྗེས་སུ་འབྲེལ་པ་མེད་པར་གྱུར་ན་ནི། དེའི་སྲ་བརྐྱང་དབྱུང་བ་རང་འཇུག་པ་དང་བྲལ་བ་དེ་ངེས་པར་བྱེད་པའི་མཐའ་ལས་བྱུང་བ་ཡིན་ནོ། །ཆོས་གོས་བྱ་བའི་བསམ་པས་རྗེས་སུ་འབྲེལ་པ་ཡོད་ཅིང་ཕྱིར་མི་འོང་བའི་སེམས་ཀྱིས་སམ་ཐེ་ཚོམ་ཟ་བའི་སེམས་ཀྱིས་འགྲོ་བར་བྱེད་པ་དང༌། མཚམས་ཀྱི་ཕྱི་རོལ་དུ་སོན་པ་ན་ཆོས་གོས་བྱ་བའི་བསམ་པར་རྗེས་སུ་འབྲེལ་པ་ཡོད་ཅིང་ཕྱིར་མི་འོང་བའི་སེམས་སམ་ཐེ་ཚོམ་ཟ་བའི་སེམས་སྐྱེས་པ་ལ་ནི། གལ་ཏེ་མཐར་ཐུག་པར་གྱུར་པ་ཆོས་གོས་བྱེད་པར་གྱུར་པ་ཉིད་ཆད་པར་གྱུར་ན་ནི་དེའི་སྲ་བརྐྱང་དབྱུང་བ་རང་འཇུག་པ་དང་བྲལ་བ་དེ་མཐར་ཐུག་པར་གྱུར་པའི་མཐའ་ལས་བྱུང་བ་ཡིན་ནོ། གལ་ཏེ་བརྩམས་པ་ཞིག་བར་གྱུར་པས་ཆོས་གོས་བྱེད་པར་འགྱུར་བ་ཉིད་ཆད་པར་གྱུར་ན་ནི། དེའི་སྲ་བརྐྱང་དབྱུང་བ་རང་འཇུག་པ་དང་བྲལ་བ་དེ་ཞིག་པར་གྱུར་པའི་མཐའ་ལས་བྱུང་བ་ཡིན་ནོ། །གལ་ཏེ་བསམ་པའི་རྒྱུན་ཆད་པས་ཆོས་གོས་བྱེད་པར་འགྱུར་བ་ཉིད་ཆད་པར་གྱུར་ན་ནི། དེའི་སྲ་བརྐྱང་དབྱུང་བ་རང་འཇུག་པ་དང་བྲལ་བ་དེ་བསམ་པའི་རྒྱུན་ཆད་པའི་མཐའ་ལས་བྱུང་བ་ཡིན་ནོ། །ཆོས་གོས་བྱ་བའི་བསམ་པ་ལ་ཐེ་ཚོམ་ཟ་ཞིང་ཕྱིར་མི་འོང་བའི་སེམས་ཀྱིས་སམ། ཕྱིར་འོང་བ་ལ་ཐེ་ཚོམ་ཟ་བའི་སེམས་ཀྱིས་མཚམས་ལས་འདས་པ་དང་ཆོས་གོས་བྱ་བའི་བསམ་པ་མེད་ཅིང་ཕྱིར་མི་འོང་བའི་སེམས་ཀྱིས་སམ་ཕྱིར་འོང་བ་ལ་ཐེ་ཚོམ་ཟ་བའི་སེམས་ཀྱིས་མཚམས་ལས་འདས་ན་ནི། དེའི་སྲ་བརྐྱང་དབྱུང་བ་རང་འཇུག་པ་དང་བྲལ་བ་དེ་མཚམས་ལས་འདའ་བའི་མཐའ་ལས་བྱུང་བ་ཡིན་ནོ། །སྲ་བརྐྱང་དབྱུང་བ་རང་འཇུག་པ་དང་བྲལ་བ་བཤད་ཟིན་ཏོ།། །།ད་ནི་བྱ་བ་ངེས་པའི་སྒོ་ནས་བཅོས་མ་བརྗོད་པར་བྱ་སྟེ། དེའི་ཕྱིར་ལས་ལས་གཞན་པའི་བྱ་བ་རྗེས་སུ་བསྒྲུབ་པར་མི་བྱའོ་ཞེས་བྱ་བ་སྨྲས་ཏེ། ལས་ཞེས་
བྱ་བ་ནི་གསོལ་བ་དང་བཞིའི་ལས་འོག་ནས་འབྱུང་བ་སྟེ། དེ་ལས་གཞན་པ་སྦྱོང་བས་འགྲོ་བ་ལ་སོགས་པ་རྗེས་སུ་བསྒྲུབ་པར་མི་བྱའོ། །འདི་སྐད་བསྟན་ཏེ། ལས་ཀྱི་མཚན་ཉིད་ཀྱི་བྱ་བ་མ་གཏོགས་པ་བྱ་བ་གཞན་གྱིས་སྲ་བརྐྱང་དབྱུང་བ་བཅོས་མ་མི་བྱ་བ་སྟེ། འདི་ལྟར་སེམས་བསྐྱེད་བས་ཀྱང་དབྱུང་བ་འགྲུབ་པའི་ཕྱིར་རོ། །འདིར་སེམས་བསྐྱེད་པ་ཞེས་བྱ་བ་ནི་བདག་ལ་སྲ་བརྐྱང་མི་དགོས་སོ་སྙམས་དུ་ལྟོས་པ་མེད་པའི་སེམས་བསྐྱེད་པའོ། །དེའི་དུས་ནི་དཔྱིད་ཟླར་བ་ཉའོ་ཞེས་བྱ་བ་ནི། སྲ་བརྐྱང་དབྱུང་བའི་ཕྱིར་ལས་བྱ་བ་དེའི་དུས་ནི་དཔྱིད་ཟླ་ར་བ་ཉ་སྟེ་དེའི་དུས་སུ་དེ་བྱའོ། །མོད་ལའོ་ཞེས་བྱ་བ་ནི། ལོ་གཉིས་ལ་སོགས་པ་དང་འབྲེལ་པའི་དཔྱིད་ཟླ་ར་བ་ཉར་ཐལ་བར་འགྱུར་བ་བསལ་བའི་ཕྱིར་ཚིག་འདི་སྨོས་ཏེ། དབྱར་དེ་ཉིད་ཀྱི་བར་དུ་མཆོད་པའི་མོད་ལ་འབྱུང་བའི་དཔྱིད་ཟླ་ར་བ་ཉ་ཁོ་ན་ལ་སྲ་བརྐྱང་དབྱུང་བར་བྱའོ། །དུས་དེའི་མདུན་རོལ་དུ་སྲ་བརྐྱང་འདིར་བའི་དགེ་སློང་གིས་དེར་གཏོགས་པའི་དགེ་འདུན་ཐམས་ཅད་ལ་སང་སྲ་བརྐྱང་འབྱིན་པར་འགྱུར་གྱི་ཁྱེད་ཅག་གིས་རང་གི་ཆོས་གོས་དག་བྱིན་གྱིས་བརླབ་པར་བྱའོ་ཞེས་བརྗོད་པར་བྱའོ། །དཔྱིད་ཟླ་ར་བ་ཉལ་གསོ་སྦྱོང་བྱས་པའི་རྗེས་ལ་གསོལ་བ་དང་བཞིའི་ལས་ཀྱིས་སྲ་བརྐྱང་དབྱུང་བར་བྱ་སྟེ། འདིའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། འདི་ལྟར་གནས་འདིར་དགེ་སློང་གིས་དགེ་འདུན་གྱི་སྲ་བརྐྱང་བཏིང་བ་ལས། དེའི་རྗེས་སུ་འཇུག་པའི་དུས་ཚེས་བཅོ་ལྔ་ལགས་ཏེ། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང་དགེ་འདུན་གྱིས་སྲ་བརྐྱང་འབྱིན་པར་མཛད་དོ། །འདི་ནི་གསོལ་བའོ། །དགེ་འདུན་བཙུན་པ་རྣམས་གསན་དུ་གསོལ། འདི་ལྟར་གནས་འདིར་དགེ་སློང་གིས་དགེ་འདུན་གྱི་སྲ་བརྐྱང་བཏིང་བ་ལས་དེའི་རྗེས་སུ་འཇུག་པའི་དུས་ཚེས་བཅོ་ལྔ་ལགས་ཏེ། དེའི་སླད་དུ་དགེ་འདུན་གྱིས་སྲ་བརྐྱང་འབྱིན་ན་སྲ་བརྐྱང་འབྱིན་པར་ཚེ་དང་ལྡན་པ་གང་དག་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་སྲ་བརྐྱང་ཕྱུང་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་
ཏོ་ཞེས་གསུངས་པ་ཡིན་ནོ། །བཅོམ་པའི་དོན་ཉིད་དུ་ནི་སྔར་ཡང་ངོ་ཞེས་བྱ་བ་ནི། དའི་དུས་ཡིན་ནོ་ཞེས་བྱ་བར་སྦྱར་ཏེ། དགེ་སློང་ཆོམ་རྐུན་གྱིས་བཅོམ་པ་དག་གི་དོན་དུ་ནི་དཔྱིད་ཟླ་ར་བའི་ཉ་བས་སྔར་ཡང་དབྱུང་བའི་དུས་ཡིན་ཏེ། དེའི་དོན་དུ་ཡང་ཟླ་བ་ཉ་ཤིའི་གསོ་སྦྱོང་གི་དུས་གཅིག་དང་སྦྱར་ཏེ། སྔར་གསོ་སྦྱོང་བྱས་ལ་དེའི་མོད་ལ་གསོལ་བ་དང་བཞིའི་ལས་ཀྱིས་དབྱུང་བར་བྱའོ། །འདིའི་སྔགས་ནི་དགེ་འདུན་བཙུན་བ་རྣམས་གསན་དུ་གསོལ། འདི་ལྟར་གནས་འདིར་དགེ་སློང་གིས་དགེ་འདུན་གྱི་སྲ་བརྐྱང་བཏིང་བ་ལས་ཆོམ་རྐུན་གྱིས་བཅོམ་པའི་དགེ་སློང་རྣམས་ལྷགས་ལ། གལ་ཏེ་དགེ་འདུན་གྱི་དུས་ལ་བ་བཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང༌། ཆོམ་རྐུན་གྱིས་བཅོམ་པའི་དགེ་སློང་རྣམས་ལ་བརྟེན་ཏེ་དགེ་འདུན་གྱིས་སྲ་བརྐྱང་འབྱིན་པ་མཛད་དོ། །འདི་ནི་གསོལ་བའོ། །དགེ་འདུན་བཙུན་པ་རྣམས་གསན་དུ་གསོལ། འདི་ལྟར་གནས་འདིར་དགེ་སློང་གིས་དགེ་འདུན་གྱིས་བརྐྱང་བཏིང་བ་ལས་ཆོམ་རྐུན་གྱིས་བཅོམ་པའི་དགེ་སློང་རྣམས་ལྷགས་ཏེ། དེའི་སླད་དུ་ཆོམ་རྐུན་གྱིས་བཅོམ་པའི་དགེ་སློང་རྣམས་ལ་བརྟེན་ནས་དགེ་འདུན་གྱིས་སྲ་བརྐྱང་འབྱིན་པ་མཛད་ན། ཆོམ་རྐུན་གྱིས་བཅོམ་པའི་དགེ་སློང་རྣམས་ལ་བརྟེན་ཏེ་སྲ་བརྐྱང་འབྱིན་པར་ཚེ་དང་ལྡན་པ་གང་དག་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས་ཆོམ་རྐུན་གྱིས་བཅོམ་པའི་དགེ་སློང་རྣམས་ལ་བརྟེན་ནས་དགེ་འདུན་གྱིས་སྲ་བརྐྱང་ཕྱུང་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་གསུངས་པ་ཡིན་ནོ། །དེ་ཉམས་སུམ་མྱོང་བ་དང་ལྡན་པ་ལ་ནི་མ་ཐོས་ཀྱི་བར་དུ་ཕན་ཡོན་རྗེས་སུ་འཇུག་གོ་ཞེས་བྱ་བ་ནི། གང་གིས་སྔར་དུས་མ་ཡིན་པ་དེར་སྲ་བརྐྱང་དབྱུང་བ་ཉམས་སུ་མ་མྱོང་བ་དང་ལྡན་པ་དེ་ལ་ནི་ཇི་སྲིད་དུ་སྲ་བརྐྱང་ཕྱུང་བ་དེས་མ་ཐོས་ཀྱི་བར་དུ་མཚམས་ཀྱི་ནང་ངམ་ཕྱི་རོལ་ན་འདུག་ཀྱང་རུང་སྟེ། སྲ་བརྐྱང་བཏིང་བ་དེའི་ཕན་ཡོན་རྗེས་སུ་འཇུག་ཅིང་ཡོད་དོ། །ནམ་ཐོས་པའི་ཚེ་ན་ནི་དེའི་ཕན་ཡོན་ལྡོག་ཅིང་མེད་པར་འགྱུར་རོ། །འདི་ནི་སྲ་བརྐྱང་དབྱུང་བ་ཐོས་པའི་མཐའ་ལས་བྱུང་བ་ཡིན་ཏེ། འདི་ཡང་མ་ལྟ་བུའི་
ཚིག་ཡིན་ནོ། །གཙུག་ལག་ལས་སྲ་བརྐྱང་དབྱུང་བ་ཐོས་པའི་མཐའ་ལས་བྱུང་བ་ནི་འདུན་པ་ཡིན་ནོ་ཞེས་གསུངས་པ་དེ་འདི་ཡིན་པར་རིག་པར་བྱའོ། །ཅི་གནས་སྐབས་ཐམས་ཅད་ལ་མ་ཐོས་ཀྱི་བར་དུ་ཕན་ཡོན་དེ་རྗེས་སུ་འཇུག་གམ་ཞེ་ན་དེའི་ཕྱིར། རྗེས་སུ་འབྲེལ་བ་མེད་ནའོ་ཞེས་བྱ་བ་སྨས་ཏེ། རྗེས་སུ་འབྲེལ་བའི་ཤན་མེད་ན་མ་ཐོས་ཀྱི་བར་དུ་རྗེས་སུ་འཇུག་གི་ཐོས་ན་ནི་ལྡོག་གོ །རྗེས་སུ་འབྲེལ་བ་ཞེས་བྱ་བ་ནི། གོས་ལ་རེ་བ་ཡོད་པ་དང་གོས་བརྩམས་པ་མ་ཞིག་པ་དང་གོས་བརྩམས་པ་མཐར་ཐུག་པར་མ་གྱུར་པའི་ཤན་ཡོད་ནའོ། །དེ་མེད་པ་ནི་རྗེས་སུ་འབྲེལ་པ་མེད་པ་ཞེས་བྱའོ། །རྗེས་སུ་འབྲེལ་པ་ཡོད་པ་ལ་ཇི་སྲིད་དུ་ཕན་ཡོན་དེ་རྗེས་སུ་འཇུག་ཅེ་ན་དེའི་ཕྱིར་ཡོད་ན་མ་ཆད་ཀྱི་བར་དུའོ་ཞེས་བྱ་བ་སྨྲས་ཏེ། རྗེས་སུ་འབྲེལ་པ་ཡོད་པ་ལ་ནི་རྗེས་སུ་འབྲེལ་པ་ཡོད་པ་དེ་ཉིད་མ་ཆད་ཀྱི་བར་དུ་དེའི་ཕན་ཡོན་རྗེས་སུ་འཇུག་གོ །དེ་ཆད་ན་ནི་ཕན་ཡོན་དེ་ལྡོག་གོ །འདིར་གཞུང་ནི་ཞུ་བ་ལས་ས་བརྐྱང་དབྱུང་བ་ཐོས་པའི་མཐའ་ལས་བྱུང་བ་གང་ཞེ་ན། མཚམས་ཀྱི་ཕྱི་རོལ་དུ་ཤན་མེད་པའི་རྒྱུད་ཀྱིས་ཐོས་པ་དང་གོས་ལ་རེ་བ་ཆད་པ་དང༌། ཤན་ཡོད་པ་ན་གོས་ཟིན་པར་གྱུར་པ་སྟེ། གལ་ཏེ་གོས་ལ་རེ་བ་ཡོད་པ་དང་བརྩམས་པ་ནི་ཤན་གྱི་རྒྱུན་ཡོད་པར་བརྗོད་པར་བྱ་སྟེ། དེ་བཞིན་དུ་དེ་འཇུག་གོ་ཞེས་གསུངས་པ་ཡིན་ཏེ། འདིས་ཆོག་གོ་སྙམ་དུ་བསམ་པ་བརྟུལ་ན་རྙེད་པ་འབྱུང་བར་སྣང་བ་ཡང་རུང༌། གོས་བརྩམས་པ་ཉིད་སྣང་དུ་ཟིན་ཀྱང་རུང་བསམ་པ་མཐར་ཐུག་པ་དང་རེ་བ་ཆད་པ་ཡིན་པར་རིག་པར་བྱ་བའོ། །དེ་གཉིས་ནི་མཐར་ཐུག་པའི་མཐའ་ལས་བྱུང་བ་དང་རེ་བ་ཆད་པའི་མཐའ་ལས་བྱུང་བའི་རྣམ་པ་གཞན་གཉིས་ཡིན་ནོ། །ཞིག་པར་གྱུར་པའི་མཐའ་ལས་བྱུང་བའི་རྣམ་པ་གཞན་ཡང་འདིར་འབྱུང་བར་རིག་པར་བྱའོ། །མ་ཕྱུང་ན་ཐམས་ཅད་ཀྱི་དེའི་དུས་ཀྱི་རྙེད་པ་བསྒོ་བར་མི་བྱའོ་ཞེས་བྱ་བ་ནི། སྲ་བརྐྱང་གི་ཆོས་གོས་དེ་མ་ཕྱུང་ན་དགེ་སློང་ཐམས་ཅད་ཀྱི་སྲ་བརྐྱང་བཏིང་བའི་དུས་དེའི་རྙེད་པ་བསྒོ་བར་མི་བྱ་བ་སྟེ། འདི་ལྟར་སྲ་བརྐྱང་ཞེས་བྱ་བའི་ཆོས་གོས་དེ་ནི་ཆོས་གོས་བྱིན་གྱིས་བརླབ་ཏུ་རུང་བ་གཞན་དག་གི་གཏེར་གྱི་གནས་ལྟ་བུ་ཡིན་པས། གང་གི་ཚེ་དེ་འདིང་བར་བྱེད་པ་ཐམས་ཅད་ཀྱིས་དེ་ཕྱུང་བར་འགྱུར་བ་དེའི་ཚེ་ན་སྲ་བརྐྱང་བཏིང་བའི་
དུས་ལས་བྱུང་བའི་རྙེད་པར་བསྒོ་བར་བྱའི། དེ་མ་ཕྱུང་བའི་སྔོན་རོལ་དུ་ནི་བསྒོ་བར་མི་བྱའོ་ཞེས་བྱ་བའི་ཐ་ཚིག་གོ །གཞིར་གཏོགས་པའི་སྲ་བརྐྱང་གི་གཞིའོ་ཞེས་བྱ་བ་འདུལ་བ་གཞིའི་སྐབས་སུ་གཏོགས་པའི་སྲ་བརྐྱང་གི་གཞི་བཤད་ཟིན་ཏོ།། །།ད་ནི་སྲ་བརྐྱང་གི་གཞི་ཞུ་བ་ལ་སོགས་པར་གཏོགས་པ་བསྡུ་བར་བྱ་སྟེ། དེ་ལ་སྔར་སྲ་བརྐྱང་གདིང་བར་བྱའོ། །ཚེས་བཅུ་དྲུག་ལའོ། །སྟོན་ཟླ་འབྲིང་པོའི་ཞེས་སྨོས་པས། སྟོན་ཟླ་འབྲིང་པོ་ཚེས་བཅུ་དྲུག་ལ་སྲ་བརྐྱང་གདིང་བའི་དུས་ཡིན་ན་ཤོལ་གྱི་ཟླ་བ་ནི་རྒྱལ་པོའི་རྗེས་སུ་འབྲང་བར་བྱའོ་ཞེས་སྨོས་པས་གལ་ཏེ་སྟོན་ཟླ་འབྲིང་པོ་གཉིས་སུ་རྒྱལ་པོས་བྱས་ན་དེའི་ཚེ་ཟླ་བ་དེ་གཉིས་གང་ལ་སྲ་བརྐྱང་གདིང་བར་བྱ་ཞེ་ན་དེའི་ཕྱིར། དགག་དབྱེ་ཇི་ལྟ་བ་བཞིན་དུ་གདིང་ངོ་ཞེས་བྱ་བ་སྨྲས་ཏེ། དགག་དབྱེའི་ཉི་མའི་རྗེས་སུ་འབྲང་བས་སྲ་བརྐྱང་གདིང་བར་བྱའི་ཤོལ་གྱི་ཟླ་བའི་རྗེས་སུ་འབྲང་བས་ནི་མི་བྱའོ། །དེས་ན་རྒྱལ་པོའི་རྗེས་སུ་འབྲང་བས་ན་དབྱར་ཟླ་འབྲིང་པོ་ཉ་ནས་དབྱར་ཟླ་ཐ་ཆུངས་ཉའི་བར་གྱི་ཟླ་བ་གཅིག་དང༌། དབྱར་ཟླ་ཐ་ཆུངས་ཉ་ནས་སྟོན་ཟླ་ར་བ་ཉའི་བར་གྱི་ཟླ་བ་གཅིག་དང༌། སྟོན་ཟླ་ར་བ་ཉ་ནས་སྟོན་ཟླ་འབྲིང་ཕོ་ཉའི་བར་གྱི་ཟླ་བ་གསུམ་པོ་དག་ཐལ་བའི་རྗེས་ལ་སྟོན་ཟླ་འབྲིང་པོ་ཉ་ནས་སྟོན་ཟླ་ཐ་ཆུངས་ཉའི་བར་གྱི་ཟླ་བ་དེ་ངོ་གཉིས་སུ་གྱུར་ན། དེའི་ཚེ་སྟོན་ཟླ་འབྲིང་པོ་ཉའི་ཉིན་མོ་དགག་དབྱེ་བྱས་པའི་ཕྱི་དེ་ཉིན་པར་སྟོན་ཟླ་འབྲིང་པོ་ཚེས་བཅུ་དྲུག་ཅེས་བྱ་བའི་ཉི་མ་དང་པོ་དེ་ལ་སྲ་བརྐྱང་གདིང་བར་བྱའོ། །སྔར་ཡང་མ་ཡིན་ཕྱིས་ཀྱང་མ་ཡིན་ཏེ། འདི་ལྟར་འཐབ་ཀྲོལ་ཅན་དག་འོང་དུ་དོགས་པའི་དབང་གིས་སྔར་དགག་དབྱེ་བྱེད་པ་ཡང་ཡོད་ལ། འཐབ་ཀྲོལ་ཅན་དག་མ་དོང་བའི་དབང་གིས་ཕྱིས་དགག་དབྱེ་བྱེད་པ་ཡང་ཡོད་པས་སྔ་ཕྱི་དེ་གཉིས་ཀྱི་དུས་ལ་ལྟོས་པའི་ཚེས་བཅུ་དྲུག་ལ་སྲ་བརྐྱང་གདིང་བར་མི་བྱའོ། །གསོ་སྦྱོང་གི་མཐའ་མ་ཡིན་པ་ལ་མི་བྱའོ་ཞེས་བྱ་བ་ནི། སྲ་བརྐྱང་གདིང་བ་ཞེས་བྱ་བར་སྦྱར་ཏེ། འདིར་གསོ་སྦྱོང་ཞེས་བྱ་བའི་སྒྲ་ནི་ཚེས་བཅོ་ལྔའི་གསོ་སྦྱོང་གི་དུས་སུ་དགག་དབྱེ་བྱས་པའོ། །དེའི་མཐའ་ཞེས་བྱ་བ་ནི་སྟོན་ཟླ་འབྲིང་པོ་ཉལ་དགག་དབྱེ་བྱས་པ་དེ་ཉིད་ཀྱི་ཕྱི་དེ་ཉིན་པར་སྟེ། སྟོན་ཟླ་འབྲིང་པོ་ཚེས་བཅུ་དྲུག་གོ །དེ་བས་ན་སྟོན་ཟླ་འབྲིང་
པོ་ཆོས་བཅུ་དྲུག་མ་ཡིན་པའི་དུས་གཞན་ལ་སྲ་བརྐྱང་གདིང་བར་མི་བྱའོ། །དབྱུང་བ་ཡང་ངོ་ཞེས་བྱ་བ་ནི། སྲ་བརྐྱང་དབྱུང་བ་ཡང་གསོ་སྦྱོང་གི་མཐའ་མ་ཡིན་པ་ལ་མི་བྱ་བ་སྟེ། འདིར་ནི་དེའི་མཐའ་ཞེས་བྱ་བ་གསོ་སྦྱོང་གི་ཉི་མ་དེ་ཉིད་དང་སྦྱར་རོ། །དེའི་ཕྱིར་གསོ་སྦྱོང་གི་མཐའ་མ་ཡིན་པ་ལ་མི་བྱའོ་ཞེས་དགག་པ་གཉིས་བྱས་སོ། །དེ་ལྟ་ན་ཡང་དབྱུང་བ་ཡང་གསོ་སྦྱོང་གི་མཐའ་ཁོ་ན་ལ་བྱ་བར་བསྟན་པས་གདིང་བ་དང་འདྲ་བར་ཚེས་བཅོ་ལྔ་ལ་གསོ་སྦྱོང་བྱས་བའི་ཕྱི་དེ་ཉིན་པར་ཚེས་བཅུ་དྲུག་ལ་དབྱུང་བར་ཐལ་བར་འགྱུར་བ་བསལ་བའི་ཕྱིར། འདི་ནི་ཉི་མ་དེ་ཉིད་ཀྱིའོ་ཞེས་བྱ་བ་སྨྲས་ཏེ། སྲ་བརྐྱང་དབྱུང་བ་འདི་ནི་གསོ་སྦྱོང་གི་ཉི་མ་ཚེས་བཅོ་ལྔ་ཞེས་བྱ་བ་དེ་ཉིད་ལ་གསོ་སྦྱོང་བྱས་པའི་རྗེས་ལ་སྲ་བརྐྱང་དབྱུང་བ་ཡིན་གྱི། ཚེས་བཅུ་དྲུག་ལ་དབྱུང་བ་ནི་མ་ཡིན་ནོ་ཞེས་བྱ་བའི་ཐ་ཚིག་གོ །བརྩམས་པ་འདི་ནི་དགེ་སློང་ཆོམ་རྐུན་གྱིས་ཆོམས་པ་ལ་སོགས་པ་ལ་བརྟེན་ནས་དུས་མ་ཡིན་པར་དབྱུང་བའི་ཆེད་དུ་བྱས་པ་ཡིན་གྱི། དུས་སུ་དབྱུང་བ་ལ་ནི་སྲ་བརྐྱང་དབྱུང་བའི་ཉི་མ་ངེས་པ་ཡོད་པའི་ཕྱིར་འདིར་མདོར་བརྩམ་མི་དགོས་ཏེ། སྲ་བརྐྱང་དུས་སུ་དབྱུང་བའི་ཉི་མ་ནི་དཔྱིད་ཟླར་བ་ཉ་ལ་གསོ་སྦྱོང་བྱས་པའི་རྗེས་ལ་དབྱུང་བ་ཡིན་ནོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། སྲ་བརྐྱང་གདིང་བ་ནི་སྟོན་ཟླ་འབྲིང་པོ་ཉ་ལ་དགག་དབྱེ་བྱས་ནས་སྟོན་ཟླ་འབྲིང་བོ་ཆོས་བཅུ་དྲུག་ལ་གདིང་བར་བྱའོ། །དུས་མ་ཡིན་པར་དབྱུང་པ་ལ་ནི་ཟླ་བའི་ངོ་དེས་པ་མེད་དེ་གསོ་སྦྱོང་གི་ཉི་མ་གཅིག་དང་སྦྱར་ཏེ། གསོ་སྦྱོང་བྱས་ནས་དེའི་མོད་ལ་དབྱུང་བར་བྱའི། གསོ་སྦྱོང་གི་དུས་མ་ཡིན་པར་ནི་དབྱུང་བར་མི་བྱའོ། །དུས་སུ་དབྱུང་བ་ནི་དཔྱིད་ཟླ་ར་བ་ཉ་ལ་གསོ་སྤྱོད་བྱས་ནས་དེའི་ཉི་མ་ཉིད་ལ་དབྱུང་བར་བྱའོ། །གལ་ཏེ་གཉུག་མར་གནས་པ་དག་གིས་སྟོན་ཟླ་འབྲིང་པོ་ཉལ་དགག་དབྱེ་བྱས་ནས་སྟོན་ཟླ་འབྲིང་པོ་ཆོས་བཅུ་དྲུག་ལ་སྲ་བརྐྱང་བཏིང་པའི་འོག་ཏུ་དགེ་སློང་གློ་བུར་པ་གཉུག་མར་གནས་པ་དག་པས་ཆེས་མང་བ་དག་དེར་ལྷགས་ཤིང་དེ་དག་ན་རེ། དེང་ཚེས་བཅོ་ལྔའི་གསོ་སྦྱོང་ཡིན་ནོ་ཞེས་ཟེར་ན་དུས་ཀྱི་ཕྱིར་ནི་མང་པོ་དག་གི་རྗེས་སུ་འཇུག་པར་བྱ་བ་ཡིན་པས་དེར་སྲ་བརྐྱང་གདིང་བའི་ཉི་མ་ལ་གཉུག་མར་གནས་པ་དག་གསོ་སྦྱོང་བྱེད་ན་དེ་དག་གིས་དེ་
ལ་ཇི་ལྟར་བསྒྲུབ་པར་བྱ་ཞེ་ན། དེའི་ཕྱིར་ཡང་གསོ་སྦྱོང་བྱས་ན་ཕྱུང་བ་ཉིད་ཡིན་ནོ་ཞེས་བྱ་བ་སྨྲས་ཏེ། འདིས་ཀྱང་རྣམ་པར་གཞན་ཀྱིས་དབྱུང་བ་རང་འཇུག་པ་དང་བྲལ་བ་རྣམ་པར་གཞག་གོ །འདི་ལྟར་དེང་གསོ་སྦྱོང་གི་ཉི་མ་ཡིན་ནོ་སྙམ་པའི་བློས་ཡང་གསོ་སྦྱོང་བྱས་ན་སྲ་བརྐྱང་བ་བཏིང་བ་རང་བྱུང་བར་འགྱུར་ཏེ། འདི་ལྟར་བདག་ཅག་གིས་དུས་མ་ཡིན་པར་སྲ་བརྐྱང་གདིང་ངོ་སྙམ་དུ་དེ་ལ་མི་ལྟོས་པའི་བློ་སྐྱེས་པའི་ཕྱིར་རོ། །ཡང་ཉི་མ་གཉིས་པ་ལ་སྲ་བརྐྱང་གདིང་བར་བྱ་སྟེ། དེའི་ཚེ་ན་སྟོན་ཟླ་འབྲིང་པོ་ཚེས་བཅུ་དྲུག་ཡིན་པའི་བློ་སྐྱེས་པའི་ཕྱིར་རོ། །བཀྲ་ཤིས་ཀྱི་གསོ་སྦྱོང་དེའི་ཉིན་མོ་བྱས་པ་ལ་ནི་འདིར་ཐལ་བར་མི་འགྱུར་ཏེ། དེ་ན་དུས་མ་ཡིན་པར་བཏིང་བའི་བློ་མེད་པའི་ཕྱིར་རོ། །བཏིང་ནས་བྱེ་བ་དག་ལ་ནི་དེ་ཐ་དད་པར་འགྲུབ་པོ་ཞེས་བྱ་བ་ནི། སྲ་བརྐྱང་བཏིང་ནས་དེའི་འོག་ཏུ་དགེ་འདུན་བྱེ་བར་གྱུར་ན་དགེ་སློང་དེ་དག་ལ་སྲ་བརྐྱང་དབྱུང་བདེ་ཐ་དད་པར་འགྲུབ་སྟེ། ཕྱོགས་གཅིག་གིས་ཕྱུང་ཟིན་ནས་ཕྱོགས་ཅིག་ཤོས་ཀྱིས་ཀྱང་དབྱུང་དགོས་ཏེ། འདི་ལ་གདིང་བ་གཅིག་ཡིན་པའི་ཕྱིར་ཕྱོགས་ཅིག་ཤོས་ཀྱིས་ཀྱང་ཕྱུང་བ་ཉིད་ཡིན་ནོ་སྙམ་དུ་ཤེས་པར་མི་བྱའོ། །ཆོས་སྨྲ་བ་དགྲ་ཡོད་པས་དེ་གདིང་ངོ་ཞེས་བྱ་བ་ནི། གནས་གང་དུ་དབྱར་གནས་བར་ཁས་བླངས་ནས་སམ་དགག་དབྱེ་བྱས་ནས་དགེ་འདུན་བྱེ་བར་གྱུར་པ་དེ་ན་ཆོས་སྨྲ་བ་དག་ཡོད་ལ། ཆོས་མ་ཡིན་པ་སྨྲ་བ་དག་ཀྱང་ཡོད་ན་ཆོས་སྨྲ་བ་དག་ཡོད་པའི་ཕྱོགས་དེས་སྲ་བརྐྱང་དེ་གདིང་བར་བྱ། དབྱུང་བར་བྱ། ཡོངས་སུ་བརྐྱང་བར་བྱའོ། །འདིར་གཞུང་ནི་དབྱར་གནས་པའི་དགེ་འདུན་བྱེ་ན་གང་གིས་སྲ་བརྐྱང་གདིང་བར་བགྱི། གང་དག་ཆོས་སྨྲ་བ་དག་གིས་སོ་ཞེས་གསུངས་པ་དང༌། དེ་དགེ་སློང་བྲམ་ཟེའི་བུ་མོས་ཞུས་པ་ལས་ཀྱང་དགེ་འདུན་བྱེ་ན་སུས་སྲ་བརྐྱང་གདིང་བར་བགྱི། ཆོས་སྨྲ་བ་དག་གིས་ཏེ། ཆོས་སྨྲ་བ་དེས་ནི་དབང་བྱེད་པ་ཉིད་ཡིན་པའི་ཕྱིར་ཏེ། ཐམས་ཅད་ལ་ཡང་གདིང་བ་དབྱུང་བར་ནི་མི་འགྱུར་རོ་ཞེས་གསུངས་པ་ཡིན་ནོ། །དེར་གཞན་དག་གིས་བྱས་ཀྱང་གནས་ཀྱི་རྙེད་པ་ནི་དེ་དག་ལ་འོས་བ་ཉིད་ཡིན་ནོ་ཞེས་བྱ་བ་ནི། གནས་དེར་དགེ་སློང་དུས་འདིར་གནས་པ་ལ་རྙེད་པ་འདི་སྦྱིན་པར་བྱའོ་ཞེས་རྣམ་པ་དེ་ལྟར་གནས་ན་
གནས་པའི་རྒྱུ་ལས་བྱུང་བའི་རྙེད་པ་དགེ་སློང་རྣམས་ལ་རྣམ་པར་གཞག་པ་གང་ཡིན་པའི་གནས་ཀྱི་རྙེད་པ་དེ་ནི་ཆོས་མ་ཡིན་པ་སྨྲ་བ་གཞན་དག་གིས་སྲ་བརྐྱང་གདིང་བ་བྱས་ཀྱང༌། གནས་ཀྱི་རྒྱུ་ལས་བྱུང་བའི་རྙེད་པ་སྟོན་ཟླ་འབྲིང་པོ་ཉའི་མཐར་ཐུག་པའི་དུས་ཚུན་ཆད་དུ་བྱུང་བ་གང་ཡིན་པ་དེ་ནི་ཆོས་སྨྲ་བ་དེ་དག་ལ་འོས་པ་ཉིད་ཡིན་གྱི། ཆོས་མ་ཡིན་པ་སྨྲ་བ་དག་ལ་ནི་འོས་པ་མ་ཡིན་ཏེ། ཕྱོགས་གཞན་དུ་གནས་པའི་ཕྱིར་རོ། །གནས་ཀྱི་རྙེད་པ་ཞེས་སྨོས་པས་ནི་རྙེད་པ་གཞན་གཅད་པའི་ཕྱིར་ཏེ། དེས་ན་སྲ་བརྐྱང་བཏིང་བའི་རྒྱུ་ལས་བྱུང་བའི་རྙེད་པ་འབྱུང་བ་གང་ཡིན་པ་དེ་ནི་ཐམས་ཅད་ལ་འོས་པ་ཉིད་ཡིན་ནོ། །རང་བཞིན་དུ་གནས་པའི་གནས་སུ་དེ་སྤངས་པ་རྣམས་ལ་མི་འབྱུང་ངོ་ཞེས་བྱ་བ་ནི། རང་བཞིན་དུ་གནས་པའི་གནས་སུ་སྲ་བརྐྱང་འདིང་བར་བྱེད་པ་དེ་སྤངས་པ་རྣམས་ལ་མི་འབྱུང་ངོ་ཞེས་བྱ་བའི་ཐ་ཚིག་གོ །བསམ་པས་གནས་པ་ནི་བཏིང་བ་ཡིན་ནོ་ཞེས་བྱ་བ་ནི། འདི་ལས་བདག་གི་རྙེད་པ་དང་ཕན་ཡོན་འབྱུང་ངོ་སྙམ་དུ་དེ་ལྟར་བསམ་པས་དོན་དུ་གཉེར་བར་འཇུག་པ་དེ་ནི་སྲ་བརྐྱང་བཏིང་བའི་ངོ་བོ་ཉིད་ཡིན་ནོ། །ལྷན་ཅིག་ཏུ་བྱ་བ་ལ་འདུན་པ་ཕུལ་བའི་དབང་གིས་ལྷག་མ་རྣམས་ཀྱིས་བྱས་ན་བྱས་པ་ཉིད་ཡིན་ནོ་ཞེས་བྱ་བ་ནི། བསམ་པས་གནས་པ་ནི་བཏིང་པ་ཡིན་ལ་དེ་དང་བྲལ་བ་ནི་ཕྱུང་བ་ཡིན་པས། དེའི་ཕྱིར་གཞན་དག་དང་ལྷན་ཅིག་བྱ་བ་གང་ཡིན་པའི་བྱ་བ་དེ་དགེ་སློང་འདུན་པ་བླངས་པ་ལྷག་མ་དག་གིས་བྱས་ན་འདུན་པ་འབུལ་བར་བྱེད་པས་ཀྱང་འདུན་པ་ཕུལ་བའི་དབང་གིས་བྱས་པ་ཉིད་ཡིན་ནོ། །དེ་དང་བྲལ་བ་ནི་ཕྱུང་བ་ཡིན་ནོ་ཞེས་བྱ་བ་ནི། བསམ་པས་གནས་པ་དེ་དང་བྲལ་བ་ནི་སྲ་བརྐྱང་ཕྱུང་བ་ཡིན་ནོ། །དེའི་ཕྱིར་འདུན་པ་མ་ཕུལ་བ་ལ་ནི་འདུག་ཏུ་ཟིན་ཀྱང་གཉིད་ལོག་གམ་སྙོམས་པར་ཞུགས་ན་མ་ཐོས་ཀྱི་བར་དུ་བཏིང་བ་དང་ཕྱུང་བ་མི་འབྱུང་ངོ་ཞེས་བྱ་བ་ནི། གང་གི་ཕྱིར་བསམ་པ་གནས་པ་ནི་བཏིང་བ་ཡིན་ལ་དེ་དང་བྲལ་བ་ནི་བྱུང་བ་ཡིན་པ་དེའི་ཕྱིར་གང་གིས་འདུན་པ་མ་ཕུལ་བ་ལ་ནི་དགེ་འདུན་གྱི་ནང་དུ་འདུག་ཏུ་ཟིན་ཀྱང་གཉིད་ལོག་གམ་སྙོམས་པར་ཞུགས་ན་ཇི་སྲིད་དུ་སྲ་བརྐྱང་བཏིང་བ་འམ་ཕྱུང་བ་མ་ཐོས་ཀྱི་བར་དུ་དེ་ལ་སྲ་བརྐྱང་བཏིང་བ་འམ་བྱུང་བ་མི་འབྱུང་སྟེ་འདུན་པ་མ་ཕུལ་བའི་
ཕྱིར་རོ། །ཐོས་ན་ནི་བཏིང་བ་དང་ཕྱུང་བ་འབྱུང་བར་འགྱུར་རོ། །འདུན་པ་ཕུལ་བ་ལ་ནི་གཉིད་ལོག་གམ་སྙོམས་པར་ཞུགས་སུ་ཟིན་ཀྱང་མ་ཐོས་པའི་མདུན་དུ་ཡང་བཏིང་བ་དང་ཕྱུང་བ་འབྱུང་བ་ཁོ་ནང་འགྱུར་རོ། །མཚམས་གཅིག་པ་ཉིད་ཡིན་ན་དེར་གནས་གཞན་དུ་གནས་པ་རྣམས་ཀྱང་བཏིང་བའི་ཕྱིར་གནས་པ་ཉིད་ཡིན་ནོ་ཞེས་བྱ་བ་ནི། མཚམས་གཅིག་གི་ནང་ན་གནས་དུ་མ་ཡོད་ན་དབྱར་དེར་ཁ་ཅིག་ནི་གནས་གཅིག་ཏུ་གནས་ཤིང་ལྷག་མ་ཡང་གཞན་དུ་གནས་ན་དེ་དག་ཐམས་ཅད་སྲ་བརྐྱང་བཏིང་བའི་ཕྱིར་གནས་པ་ནི་ཡིན་ལ། རྙེད་པའི་ཕྱིར་གནས་པ་ནི་མ་ཡིན་ཏེ། དེ་དག་ལ་གནས་ཀྱི་རྙེད་པ་ནི་བདག་པོས་ཇི་ལྟར་རྣམ་པར་གཞག་པ་བཞིན་དུ་རྣམ་པར་གནས་སོ། །འདི་སྐད་བསྟན་ཏེ། མཚམས་གཅིག་གི་ནང་ན་གནས་དུ་མ་ཡོད་པ་དེར་ཅིག་ཅར་དབྱར་གནས་པར་ཁས་བླངས་པ་དག་སྲ་བརྐྱང་བཏིང་བའི་ཕྱིར་ཐམས་ཅད་དུ་གནས་པ་ཉིད་ཡིན་ན། དེས་ན་གནས་གཅིག་ཏུ་སྲ་བརྐྱང་བཏིང་ཡང་ཐམས་ཅད་དུ་བཏིང་བར་འགྱུར་ཏེ་འདིར་དོན་ནི་དེ་ཡིན་ནོ། །དབྱར་དག་ལ་ནི་མཚམས་གཅིག་པ་ཉིད་གྱིས་གནས་གཅིག་ཡིན་པས། དབྱར་གྱི་འོག་ཏུ་སྲ་བརྐྱང་འདིང་བའི་དུས་ཀྱི་བར་དུ་ཡང་མཚམས་གཅིག་གོ་ཞེས་བྱ་བའི་ཐ་ཚིག་གོ །འདིར་གཞུང་ནི་བཙུན་པ་རེ་ཞིག་དགེ་སློང་དག་མཚམས་ཀྱི་ནང་དུ་གནས་བཞི་འམ་ལྔ་བགྱིས་ཏེ་དབྱར་གནས་པར་ཁས་ལེན་ཅིང་དགག་དབྱེ་བགྱིས་ནས་སྲ་བརྐྱང་བཏིང་བར་བགྱིད་ན་གནས་དེ་དག་ཐམས་ཅད་དུ་སྲ་བརྐྱང་བཏིང་བར་འགྱུར་རམ། ཉེ་བ་འཁོར་ཐམས་ཅད་དུ་སྲ་བརྐྱང་བ་ཏིང་བར་འགྱུར་རོ་ཞེས་གསུངས་པ་ཡིན་ནོ། །དེ་ནི་བཏིང་བའི་ཚེ་དེ་ན་གནས་དེ་ཉིད་ཡིན་ནོ་ཞེས་བྱ་བ་ནི། གནས་གཞན་དེ་ནི་གནས་དེ་ཉིད་ཡིན་ཏེ། དེ་ཉིད་གནས་འདི་ཡིན་གྱི་གནས་ཐ་དད་པ་མ་ཡིན་ནོ། །གང་གི་ཚེ་ཞེ་ན། བཏིང་བའི་ཆོ་ན་སྟེ་སྲ་བརྐྱང་བཏིང་བའི་ཚེ་ནའོ། །དེའི་ཚེ་ན་མཚམས་གཅིག་པ་དེ་ན་སྟེ་མཚམས་གཅིག་པ་ཡིན་ནའོ། །དེ་ལྟར་གནས་གཞན་དུ་སྲ་བརྐྱང་འདིང་བར་བྱེད་པ་ཡང་དེའི་ཚེ་ན་དེ་ཉིད་དུ་འདིང་བར་བྱེད་པ་ཡིན་ནོ། །འདི་སྐད་བསྟན་ཏེ། འདི་ལྟར་དབྱར་དག་ལ་གནས་དུ་མ་མཚམས་ཐ་དད་པ་དག་སྲ་བརྐྱང་འདིང་བའི་དུས་སུ་སྟོན་ཟླ་འབྲིང་པོ་ཆོས་
བཅུ་དྲུག་ལ་མཚམས་རྣམས་བསྐྱེད་དེ། གནས་དེ་དག་ཐམས་ཅད་མཚམས་གཅིག་ན་གནས་པར་གྱུར་ན་དེའི་ཚེ་གནས་གང་ཡང་རུང་བར་སྲ་བརྐྱང་འདིང་བར་བྱེད་ན། གནས་གཞན་ཐམས་ཅད་དུ་དབྱར་གནས་པའི་དགེ་སློང་ཐམས་ཅད་ཀྱིས་སྲ་བརྐྱང་བཏིང་བར་རིག་པར་བྱ་སྟེ། འདིང་བའི་དུས་ན་མཚམས་གཅིག་ཡིན་པའི་ཕྱིར་རོ། །འདིར་གཞུང་ནི་ཉེ་བ་འཁོར་དགེ་སློང་གི་དགེ་འདུན་ཟླ་བ་གསུམ་གནས་པས་དཔྱར་གྱི་ཟླ་བ་གསུམ་འདས་ནས་དེ་ཉིད་ཀྱི་ཚེས་བཅུ་དྲུག་ལ་མཚམས་ཆེན་པོ་བཤིག་སྟེ། གནས་བཞིའམ་ལྔ་མཚམས་གཅིག་ཏུ་བྱས་ནས་སྲ་བརྐྱང་འདིང་བར་བྱེད་ན་གནས་དེ་དག་ཐམས་ཅད་དུ་སྲ་བརྐྱང་བཏིང་བར་བརྗོད་པར་བྱའོ་ཞེས་གསུངས་པ་ཡིན་ནོ། །བཏིང་ནས་མཚམས་ཐ་དད་པར་བྱས་ན་གང་ཡང་རུང་བ་དེ་ལས་དེའི་གནས་ཡིན་ནོ་ཞེས་བྱ་བ་ནི། མཚམས་གཅིག་ཏུ་གནས་དུ་མ་གང་ཡང་རུང་བར་སྲ་བརྐྱང་བཏིང་ནས་ཕྱིས་མཚམས་ཐ་དད་པར་བྱས་ན། སྲ་བརྐྱང་བཏིང་བའི་གནས་དུ་མ་དེ་ལས་གནས་གང་ཡང་རུང་བ་ཆོས་གོས་དེའི་གནས་ཡིན་པ་སྟེ། གནས་གང་དུ་ཆོས་གོས་གདིང་བའི་ལས་བྱས་པའི་གནས་དེ་ཉིད་དེའི་གནས་མ་ཡིན་གྱི། གནས་གང་ཡང་རུང་བར་བཞག་ན་ཡང་རང་གི་གནས་ཁོན་ན་གནས་པ་ཡིན་ནོ། །འདིར་གཞུང་ནི་བཙུན་པ་གལ་ཏེ་སྲ་བརྐྱང་བཏིང་ནས་མཚམས་ཆེན་པོ་བཤིག་སྟེ། སོ་སོའི་མཚམས་འགུམས་བར་བགྱིད་ན་སྲ་བརྐྱང་ཕྱུང་བར་བརྗོད་པར་བགྱིའམ་ཉེ་བ་འཁོར་མི་བྱའོ། །གནས་དེ་དག་ཐམས་ཅད་དུ་སྲ་བརྐྱང་གདིང་བར་འགྱུར་རམ། ཉེ་བ་འཁོར་སྲ་བརྐྱང་བཏིང་བར་འགྱུར་རོ་ཞེས་གསུངས་པ་ཡིན་ནོ། ཐ་དད་པ་ཉིད་ཡིན་ན་གནས་སོ་སོར་དེ་དབྱུང་ངོ་ཞེས་བྱ་བ་ནི། སྲ་བརྐྱང་བཏིང་བའི་གནས་མང་པོ་དག་གིས་མཚམས་ཐ་དད་པ་ཉིད་ཡིན་ན། གནས་སོ་སོ་སོ་སོར་སྲ་བརྐྱང་དེ་དབྱུང་དགོས་ཀྱི་ཐམས་ཅད་ཀྱིས་གཅིག་ཏུ་དབྱུང་དུ་ནི་མི་རུང་ངོ༌། །གལ་ཏེ་གནས་གང་སྲ་བརྐྱང་གཞག་པའི་གནས་དེར་སྲ་བརྐྱང་འབྱིན་པར་བྱེད་ན། གནས་གཞན་ན་གནས་པའི་དགེ་སློང་དག་གིས་སྲ་བརྐྱང་དེ་རང་གི་གནས་དུ་སྤོ་བར་བྱའོ། །ཡང་ན་རང་གི་གནས་ནས་དགེ་སློང་འགའ་ཞིག་སྲ་བརྐྱང་གི་གན་དུ་གཞག་པར་བྱ་སྟེ། དེས་སྐྱ་རེངས་འཆར་བའི་དུས་
སུ་འབྲལ་བའི་ཉེས་པ་སེལ་བར་བྱེད་དོ། །གཞན་དུ་ན་སྐྱ་རེངས་འཆར་བའི་དུས་སུ་སྲ་བརྐྱང་དབྱུང་བར་འཇུག་པ་དང་བྲལ་བར་འགྱུར་བ་དང་འབྲལ་བའི་ཉེས་པར་ཡང་འགྱུར་རོ། །འདིར་གཞུང་ནི་བཙུན་པ་གལ་ཏེ་སྲ་བརྐྱང་བཏིང་ནས་མཚམས་ཆེན་པོ་བཤིག་སྟེ་སོ་སོའི་མཚམས་ཀུན་ནས་སྲ་བརྐྱང་འབྱིན་པར་བགྱིད་ན་གནས་དེ་དག་ཐམས་ཅད་དུ་སྲ་བརྐྱང་ཕྱུང་བར་འགྱུར་རམ། ཉེ་བ་འཁོར་མི་འགྱུར་ཏེ། གང་དག་འབྱིན་པར་བྱེད་པ་དེ་དག་གིས་ནི་སྲ་བརྐྱང་ཕྱུང་བར་འགྱུར་ལ། གང་དག་འབྱིན་པར་མི་བྱེད་པ་དེ་དག་གིས་ནི་སྲ་བརྐྱང་ཕྱུང་བར་མི་འགྱུར་རོ། །མཚམས་གཅིག་པ་ཉིད་དུ་ནི་ཕྱུང་ན་ཐམས་ཅད་ཀྱིས་སྲ་བརྐྱང་ཕྱུང་བར་འགྱུར་རོ་ཞེས་གསུངས་པ་ཡིན་ནོ། །བྱེ་བ་ཉིད་ན་ཕྱོགས་སོ་སོའོ་ཞེས་བྱ་བ་ནི། གནས་གཅིག་ཏུ་གཏོགས་པ་ཉིད་ཡིན་ན་དགེ་འདུན་བྱེ་ཞིང་ཕྱོགས་གཉིས་སུ་གྱུར་ན། ཕྱོགས་གཅིག་གིས་ཕྱུང་བས་ཕྱོགས་ཅིག་ཤོས་ཀྱིས་ཕྱུང་བར་མི་འགྱུར་རོ་ཞེས་བྱ་བའི་ཐ་ཚིག་གོ །འདིར་གཞུང་ནི་དགེ་སློང་བྲམ་ཟེའི་བུ་མོས་ཞུས་པ་ལས། སྲ་བརྐྱང་བཏིང་བའི་གནས་སུ་དགེ་འདུན་བྱེ་ན། དེར་ཕྱོགས་གཅིག་གམ་ཅིག་ཤོས་ཀྱིས་སྲ་བརྐྱང་འབྱིན་པར་བགྱིད་ན་དེ་དག་ཐམས་ཅད་ཀྱིས་སྲ་བརྐྱང་ཕྱུང་བར་བརྗོད་པར་བགྱིའམ། ཉེ་བ་འཁོར་མི་བྱ་སྟེ། གང་དག་འབྱིན་པར་བྱེད་པ་དེ་དག་གིས་ནི་སྲ་བརྐྱང་ཕྱུང་བར་འགྱུར་ལ། གང་དག་མི་བྱེད་པ་དེ་དག་གིས་ནི་སྲ་བརྐྱང་ཕྱུང་བར་མི་འགྱུར་རོ་ཞེས་གསུངས་པ་ཡིན་ནོ། །མ་བཏིང་བས་ཕྱུང་བ་ནི་མ་ཕྱུང་བ་མ་ཡིན་ནོ་ཞེས་བྱ་བ་ནི། གནས་གཞན་དུ་དབྱར་གནས་པར་ཁས་བླངས་པ་གང་དག་ལ་སྲ་བརྐྱང་གདིང་བ་མེད་པ་དེ་དག་ནི་མ་བཏིང་བ་ཞེས་བྱ་སྟེ། མ་བཏིང་བའི་གང་ཟག་དེ་དག་གིས་སྲ་བརྐྱང་ཕྱུང་པ་གང་ཡིན་པ་དེ་ནི་མ་ཕྱུང་བ་མ་ཡིན་ཏེ། ཕྱུང་བ་ཉིད་ཡིན་ནོ། །འདིར་གཞུང་ནི་བཙུན་པ་རེ་ཞིག་དབྱར་གནས་པའི་དགེ་སློང་དག་གིས་སྲ་བརྐྱང་བཏིང་ནས་མཚམས་ཀྱི་སླད་རོལ་དུ་མཆིས་ཤིང་ལྟོས་པ་མ་མཆིས་པར་གྱུར་ནས། དགེ་སློང་གློ་བུར་བ་དག་ལྷགས་ཏེ་སྲ་བརྐྱང་འབྱིན་པར་བགྱིད་ན་སྲ་བརྐྱང་ཕྱུང་བར་བརྗོད་པར་བགྱི་འམ། ཉེ་བ་འཁོར་ཕྱུང་བར་བརྗོད་པར་བྱའོ་ཞེས་གསུངས་པ་ཡིན་ནོ། །མི་འབྱུང་
བ་ཉིད་ཀྱིས་ཁ་བསྐང་དུ་མི་རུང་བ་ཉིད་མ་ཡིན་ནོ་ཞེས་བྱ་བ་ནི། གནས་གཞན་དུ་དབྱར་གནས་པར་ཁས་བླངས་པ་གང་ལ་སྲ་བརྐྱང་འདིང་བ་འབྱུང་བ་མེད་པ་དེ་ནི་མི་འབྱུང་བ་ཉིད་ཅེས་བྱ་སྟེ། མི་འབྱུང་བ་ཉིད་ཀྱི་གང་ཟག་དེས་སྲ་བརྐྱང་འདིར་བར་བྱེད་པའི་དགེ་སློང་དགེ་འདུན་དུ་མ་ལངས་པའི་ཁ་བསྐང་དུ་མི་རུང་བ་ཉིད་མ་ཡིན་ཏེ་རུང་ངོ༌། །འདིར་གཞུང་ནི་བཙུན་པ་རེ་ཞིག་དགེ་སློང་གིས་གཅིག་པུ་དབྱར་གནས་པར་ཁས་ལེན་ཅིང༌། དེས་དགུང་བླ་གསུམ་པོ་དག་འདས་ནས་དགག་དབྱེ་བགྱིས་ཏེ། དགེ་འདུན་ལ་སྲ་བརྐྱང་འདིང་བའི་ཆོས་གོས་འབུལ་བར་བགྱིད་ཅིང་དེར་དགེ་སློང་གློ་བུར་བ་དག་ལྷགས་ཤིང་དེ་དག་སྲ་བརྐྱང་འདིང་བའི་རྗེས་སུ་ཞུགས་ཏེ་དོང་ན་ཆོས་གོས་དེ་སུས་འཐོབ་པར་འགྱུར་ལགས། ཉེ་བ་འཁོར་དགེ་སློང་དེ་ཉིད་ཀྱིས་སོ་ཞེས་གསུངས་པ་ཡིན་ནོ། །མ་བཏིང་བ་ཉིད་ཀྱིས་དབྱུང་བར་མི་རུང་བ་ཉིད་མ་ཡིན་ནོ་ཞེས་བྱ་བ་ནི། གང་ལ་སྲ་བརྐྱང་གདིང་བ་མེད་པ་དེ་ནི་མ་བཏིང་བ་ཞེས་བྱ་སྟེ། མ་བཏིང་བའི་གང་ཟག་དེས་སྲ་བརྐྱང་འབྱིན་པ་དགེ་འདུན་དུ་མ་ལངས་པའི་ཁ་བསྐང་དུ་མི་རུང་བ་ཉིད་མ་ཡིན་ཏེ་རུང་ངོ༌། །འདི་ནི་སྔར་དགེ་སློང་གློ་བུར་བ་དག་ལྷགས་ཤིང་དེ་དག་སྲ་བརྐྱང་འདིང་བའི་རྗེས་སུ་ཞུགས་ཏེ་དོང་ན་ཞེས་གསུངས་པ་དེ་ཉིད་ལས་སྲ་བརྐྱང་འབྱིན་པར་བྱེད་ན་ཡང་རུང་བར་དོན་གྱིས་མངོན་པས་མདོར་བྲིས་ཏེ། འདི་ལྟར་ཁ་བསྐང་བ་མེད་ན་དབྱུང་བའི་ལས་འབྱུང་བ་ཡང་མེད་པའི་ཕྱིར་རོ། །སྲ་བརྐྱང་བཏིང་བ་སྣམ་སྦྱར་མེད་པར་གྲོང་དུ་འཇུག་པ་ལ་སོགས་པ་དང་སུམ་མདོ་ཚུན་ཆད་དུ་འཇུག་པ་ལ་ཡང་ཉེས་པ་མེད་དོ་ཞེས་བྱ་བ་ནི། དགེ་སློང་སྲ་བརྐྱང་བཏིང་བའི་སྣམ་སྦྱར་མེད་པར་གྲོང་དུ་འཇུག་པ་ལ་སོགས་པ་ལ་ཉེས་པ་མེད་དོ། །སོགས་པ་ཞེས་བྱ་བའི་སྒྲས་ནི་གྲོང་ཁྱེར་དུ་འཇུག་པ་ལ་སོགས་པ་བསྡུའོ། །སུམ་མདོ་ཆུན་ཆད་དུ་འཇུག་པ་ཞེས་བྱ་བ་ནི། ལམ་པོ་ཆེའི་སུམ་མདོ་ཚུད་ཆད་དུ་འདུག་པ་ལ་ཡང་ཉེས་པ་མེད་དོ་ཞེས་བྱ་བའི་ཐ་ཚིག་གོ །འདི་ནི་དོན་ལ་ཐོབ་པས་གསལ་བར་བྱ་བའི་ཕྱིར་མདོར་བྲིས་ཏེ། སྔར་གསུམ་པོ་འདི་དག་ནི་སྲ་བརྐྱང་བཏིང་བ་ལ་མི་འབྱུང་ངོ་ཞེས་སྨོས་པས་བསྟན་ཟིན་པའི་ཕྱིར་རོ། །འདིར་གཞུང་ནི་བཙུན་བ་སྲ་བརྐྱང་བཏིང་བའི་
གནས་ན་རྐྱེན་དུ་དག་བག་ཡངས་སུ་འགྱུར་ལགས། ཉེ་བ་འཁོར་བཅུ་སྟེ་བཅུ་གང་ཞེ་ན། ཡང་ཡང་ཟ་བ་དང༌། འདུས་ཤིང་ཟ་བ་དང༌། མ་སྨྲས་པར་རྒྱུ་བ་དང༌། སྨད་གཡོགས་སྟོད་གཡོགས་དང་བཅས་པས་ཅི་བདེར་ལྗོངས་རྒྱུ་བ་དང༌། མཚན་མོས་འབྲལ་བ་མེད་པ་དང། ཞག་བཅུས་འདའ་བ་མེད་པ་དང༌། ཟླ་བས་འདའ་བ་མེད་པ་དང༌། གོས་ཅི་ཙམ་གྱིས་ཆོག་པ་དག་སློང་བ་དང༌། གོས་རུང་བར་མ་བྱས་པ་ཇི་ཙམ་འདོད་པ་དག་འཆང་བ་དང༌། སྟོན་ཟླ་འབྲིང་པོ་ཚེས་བཅུ་དྲུག་ནས་དཔྱིད་ཟླ་ར་བ་ཉའི་བར་དུ་དབྱར་གནས་པའི་དགེ་འདུན་གྱི་རྙེད་པ་མི་བསྒོ་བའོ་ཞེས་གསུངས་པ་དང༌། གཞན་ཡང་བཅོམ་ལྡན་འདས་ཀྱིས་དགེ་སློང་གིས་ཁྱིམ་གཞན་དུ་སྨད་གཡོགས་དང་སྟོད་གཡོགས་ཀྱིས་འདུག་པར་བྱའོ་ཞེས་གང་གསུངས་ན། བཙུན་པ་སུམ་མདོ་དང་བཞི་མདོ་དག་ཏུ་སྨད་གཡོགས་དང་སྟོད་གཡོགས་ཀྱིས་མཆིས་སུ་རུང་ངམ། ཉེ་བ་འཁོར་སྲ་བརྐྱང་བཏིང་ན་རུང་ངོ་ཞེས་གསུངས་པ་ཡིན་ཏེ། དེ་གཉི་གའི་འདིར་བསྡུས་པ་ཡིན་ནོ། །དགེ་འདུན་ཐམས་ཅད་དབྱར་ཕྱི་མར་གནས་པར་ཁས་བླངས་པ་དག་ལ་ཡང་སྲ་བརྐྱང་གདིང་བ་འཆགས་སོ། །དེ་གདིང་པའི་དུས་ནི་སྟོན་ཟླ་ཐ་ཆུངས་ཚེས་བཅུ་དྲུག་གོ །དཔྱིད་ཟླ་འབྲིང་བོ་ཉལ་དེ་དབྱུང་ངོ༌། །སྲ་བརྐྱང་འདིང་བའི་དགེ་སློང་གཞན་དུ་གྱུར་ན་དེ་སྤེད་པ་བསྐོ་པར་བྱའོ། །སྲ་བརྐྱང་གི་གཞི་ཞུ་བ་ལ་སོགས་པའི་སྐབས་སོ་ཞེས་བྱ་བ་ནི། སྲ་བརྐྱང་གི་གཞི་ཞུ་བ་ལ་སོགས་པའི་སྐབས་སུ་གཏོགས་པ་བཤད་ཟིན་ཏོ། །སྲ་བརྐྱང་གི་གཞི་རྫོགས་སོ་ཞེས་བྱ་བ་དེ་བཤད་ཟིན་ཏོ།། །།བམ་པོ་ལྔ་བཅུ་གཉིས་པ། ད་ནི་གོས་ཀྱི་གཞི་བསྡུ་བར་བྱ་སྟེ་དེའི་ཕྱིར། མཚོན་གྱིས་མ་དྲས་པའི་གོས་སྤྱད་པར་མི་བྱའོ་ཞེས་བྱ་བ་སྨྲས་ཏེ། མཚོན་གྱིས་མ་དྲས་པ་ཞེས་བྱ་བ་ནི། ཁ་ཚར་དང་ཕུན་ཚར་མ་བཅད་པ་སྟེ་དེ་ནི་ཁྱིམ་པའི་གོས་ཡིན་པའི་ཕྱིར་བཀག་གོ །འདིར་གཞུང་ནི་དེ་ལྟ་བས་ན་དགེ་སློང་དག་གིས་ཁྱིམ་བདག་གི་གོས་མཚོན་གྱིས་དྲས་པ་དག་ཁ་དོག་ངན་པ་བྱས་ཏེ་བཅང་བར་གནང་ངོ་ཞེས་གསུངས་པ་ཡིན་ནོ། །དྲས་ཤིང་དྲུབས་པ་ཆོས་གོས་ཉིད་དུ་བྱིན་གྱིས་བརླབ་པར་བྱའོ་
ཞེས་བྱ་བ་ནི། གླགས་བུར་དྲས་ཤིང་དྲུབས་པ་ཞེས་བྱ་བའི་ཐ་ཚིག་སྟེ། དེ་ཆོས་གོས་ཉིད་དུ་བྱ་བའི་ཕྱིར་བྱིན་གྱིས་བརླབ་པར་བྱའོ། །རྣམ་པ་གང་གིས་དྲུབས་པ་ཞེན་དེའི་ཕྱིར་སྣམ་ཕྲན་སྣྲེལ་ཞི་ཉིད་དང་ལྷག་མ་མཉམ་པ་ཉིད་དང་དབུས་ནས་གཞན་དུ་ཚལ་བུའི་འཕྲོ་ཕྱོགས་ཕྱོགས་སུ་ལྟ་བ་ཉིད་དང་མཐའ་བསྐོར་བ་ཉིད་དག་གིས་སོ་ཞེས་བྱ་བ་སྨྲས་ཏེ། ཞེང་དུ་བཏང་བའི་གླེགས་བུའི་ཚད་དག་ནི་སྔར་ཟླ་བས་སྤང་བ་རྣམ་པར་འབྱེད་པའི་སྐབས་སུ་གླེགས་བུ་ཕྱེད་དང་གསུམ་པ་ཉིད་དང་གླེགས་བུ་ཕྱེད་དང་བཞི་པ་ཉིད་དང༌། གླགས་བུ་ཕྱེད་དང་ལྔ་པ་ཉིད་ཅེས་བྱ་བ་ལ་སོགས་པས་བཤད་པའི་རྣམ་པ་ཡིན་ནོ། །སྲིད་དུ་བཏང་བའི་གླེགས་བུའི་ཚད་དག་ནི་སྣམ་ཕྲན་སྣྲེལ་ཞི་ཉིད་དང༌། ལྷག་མ་མཉམ་པ་ཉིད་དང༌། དབུས་ནས་གཞན་དུ་གླེགས་བུའི་འཕྲོ་ཕྱོགས་ཕྱོགས་སུ་ལྟ་བ་ཉིད་ཅེས་བྱ་བ་རྣམ་པ་འདི་གསུམ་ལྟར་བྱའོ། །མཐའ་བསྐོར་བ་ཉིད་ཅེས་བྱ་བ་ནི་མཐའ་ཐམས་ཅད་བསྐོར་བ་སྟེ། མཐའ་ཞེས་སྨོས་པའི་ཕྱིར་རོ། །དེ་ལྟ་བས་ན་མདོ་འདི་ནི་སྲིད་དུ་བཏང་བའི་གླེགས་བུའི་ཚད་དག་དང་མཐའ་སྐོར་གྱི་དབང་དུ་བྱས་པ་ཡིན་ནོ། །དེ་ལ་སྣམ་ཕྲན་སྣྲེལ་ཞི་ཉིད་ཅེས་བྱ་བ་ལ། འདིར་སྣམ་ཕྲན་ཞེས་བྱ་བའི་སྒྲ་ནི་སྲིད་དུ་བཏང་བའི་ཚལ་བུ་ལ་བྱའོ། སྣྲེལ་ཞི་ཞེས་བྱ་བ་ནི་སྲིད་དུ་བཏང་བའི་སྣམ་ཕྲན་དག་གི་ཚལ་བུ་རྣམས་ཀྱིས་སྣ་དྲང་ཐང་དུ་མ་བབ་པར་མཐོན་དམན་མི་མཉམ་པ་ཉིད་ཀྱིས་འགྲུས་ཐབས་ཉིད་དུ་འདུག་པའོ། །དེའི་དངོས་པོ་ནི་དེ་ཉིད་དོ། །ལྷག་མ་མཉམ་པ་ཉིད་ཅེས་བྱ་བ་ལ་ལྷག་མ་ཞེས་བྱ་བ་ནི། ཞེང་དུ་ཐལ་རངས་སུ་བཏང་བའི་སྣམ་ཕྲན་དག་གི་འཕྲོས་ནོན་པའི་ལྷག་མ་སྟེ། ཞེང་དུ་ཐལ་རངས་སུ་བཏང་བའི་སྣམ་ཕྲན་དག་གི་འཕྲོས་མ་ནོན་པའི་ཕྱོགས་ཚུན་ཆད་ཀྱི་གླེགས་བུ་དག་གོ །མཉམ་པ་ཞེས་བྱ་བ་ནི་ལྷག་མ་དེ་དག་ཕན་ཚུན་སྲིད་མཉམ་པར་བྱའོ། །དེའི་དངོས་པོ་ནི་དེ་ཉིད་དོ། །དབུས་ནས་གཞན་དུ་ཚལ་བུའི་འཕྲོ་ཕྱོགས་ཕྱོགས་སུ་ལྟ་བ་ཉིད་ཅེས་བྱ་བ་ལ། དབུས་ཞེས་བྱ་བ་ནི་ཞེང་དུ་ཐལ་རངས་སུ་བཏང་བའི་སྣམ་ཕྲན་དབུས་མ་གཉིས་ཀྱི་བར་གྱི་གླེགས་བུའོ། །དེ་ནས་གཞན་དུ་གླེགས་བུའི་འཕྲོ་ཞེས་བྱ་བ་ནི། དབུས་ནས་གཡས་གཡོན་གཞན་དུ་སྣམ་ཕྲན་ཞེང་དུ་ཐལ་རངས་སུ་བཏང་བ་
དག་གིས་གླེགས་བུའི་འཕྲོའོ། །ཕྱོགས་ཕྱོགས་སུ་ལྟ་བ་ཞེས་བྱ་བ་ནི། གཡས་གཡོན་གྱི་གླེགས་བུ་ཐམས་ཅད་ལ་ཁྱབ་པར་བྱ་བའི་ཕྱིར་ཕྱོགས་ཕྱོགས་སུ་ཞེས་ཟློས་བུར་བྱ་སྟེ། གཡས་ཕྱོགས་ཀྱི་ཚལ་བུ་རྣམས་ཀྱི་འཕྲོ་ཡང་གཡས་ཕྱོགས་སུ་ཕྱི་བརྒྱུད་དུ་བ་ལྟ་ལ། གཡོན་ཕྱོགས་ཀྱི་ཚལ་བུ་རྣམས་ཀྱི་འཕྲོ་ཡང་གཡོན་ཕྱོགས་སུ་ཕྱི་བརྒྱུད་དུ་བལྟ་བའོ། །དེའི་དངོས་པོ་ནི་དེ་ཉིད་དོ། །དེ་ལྟར་སྣམ་ཕྲན་སྣྲེལ་ཞི་ཉིད་དང་ལྷག་མ་མཉམ་པ་ཉིད་དང༌། དབུས་ནས་གཞན་དུ་ཚལ་བུའི་འཕྲོ་ཕྱོགས་ཕྱོགས་སུ་ལྟ་བ་ཉིད་ཅེས་བྱ་བ་དེ་གསུམ་གྱིས་ནི་སྲིད་དུ་བཏང་པའི་གླེགས་བུ་དག་དྲུབ་པ་བསྟན་ཏོ། །མཐའ་བསྐོར་བ་ཉིད་ཅེས་བྱ་བ་ནི་ཆུ་ཞེང་གི་མཐའ་འཁོར་བར་ཀུན་དགའ་བོ་མཐའ་སྐོར་གྱིས་བསྐོར་བའོ། །དེའི་དངོས་པོ་ནི་དེ་ཉིད་དོ། །དེ་ལྟར་རྣམ་པ་བཞི་པོ་དེ་དག་བསྡུས་པས་དྲུབས་པའི་ཆོས་གོས་གང་ཡིན་པ་དེ་བྱིན་གྱིས་བརླབ་པར་བྱའོ། །འདི་སྐད་བསྟན་ཏེ། ཇི་ལྟར་སྲིད་དུ་བཏང་བའི་ཚལ་བུ་རྣམས་ཀྱི་སྣ་མཐོ་དམན་དུ་འདུག་པས་སྣམ་ཕྲན་སྣལ་ཞི་ཉིད་དུ་འགྱུར་བ་དེ་ལྟར་ཆོས་གོས་དེ་དྲུབ་པར་བྱའོ། །ཚལ་བུ་གཅིག་གི་སྣ་གླེགས་བུའི་འཕྲོས་ནོན་པའི་ལྷག་མ་མ་ནོན་པ་ཇི་ཙམ་ཡོད་པ་དེ་ཙམ་དུ་དེ་ལས་གཞན་པའི་གླེགས་བུ་ལྷག་མ་དག་ཀྱང་དེ་དང་མཉམ་པར་བྱའོ། །དབུས་ཀྱི་སྣམ་བུ་ལ་ལྟོས་ནས་གཡས་གཡོན་གྱི་ཕྱོགས་གཉིས་སུ་གླེགས་བུའི་འཕྲོ་ཕྱོགས་སུ་བལྟ་བར་བྱའོ། །ངས་བཞི་ཀུན་ནས་འཁོར་བར་ཀུན་དགའ་བོའི་མཐའ་སྐོར་གྱིས་འཕྲོ་ཐམས་ཅད་བསྐོར་བར་བྱའོ། །ཆོ་ག་འདི་ནི་རབ་ཏུ་བྱུང་བ་གཞན་དག་ལས་དགེ་སློང་རྣམས་ཀྱིས་ཆོས་གོས་ཐ་དད་པར་བསྒྲུབ་པའི་ཕྱིར་རོ། །གོས་གང་ལ་ཆོས་གོས་ཀྱི་དོན་དུ་རྣམ་པ་དེ་ལྟ་བུར་བྱིན་གྱིས་བརླབ་པར་བྱ་ཞེ་ན། དེའི་ཕྱིར་མཐང་གོས་དང་བླ་གོས་དང་སྣམ་སྦྱར་ལའོ་ཞེས་བྱ་བ་སྨྲས་ཏེ། གསུམ་ཆར་ལ་ཡང་རྣམ་པ་དེ་ལྟ་བུར་དྲུབ་ཅིང་བྱིན་གྱིས་བརླབ་པར་བྱའོ། །མཐང་གོས་ཞེས་བྱ་བ་ནི། ནང་དུ་བགོ་བར་བྱ་བའོ། །བླ་གོས་ཞེས་བྱ་བ་ནི་ལུས་ཀྱི་སྟོད་དུ་བགོ་བར་བྱ་བའོ། །སྣམ་སྦྱར་ཞེས་བྱ་བ་ནི་སྣམ་ཕྲན་ཏུ་དྲས་ཏེ་སྦྱར་བ་ལས་གོས་ཀྱི་རིགས་གང་འབྱུང་བའོ། །དགེ་སློང་མས་ནི་ཤིང་ང་དབུང་ཆད་དང་རྡུལ་གཟན་རྣམ་པ་
གང་ཡང་རུང་བའོ་ཞེས་བྱ་བ་ནི། དགེ་སློང་མས་སྔར་བསྟན་པའི་ཆོས་གོས་གསུམ་དང་འདི་གཉིས་དང་ལྔ་བྱིན་གྱིས་བརླབ་པར་བྱའོ། རྣམ་པ་གང་ཡང་རུང་བ་ཞེས་བྱ་བ་ནི། དྲས་ཤིང་དྲུབས་པ་མ་ཡིན་ཡང་རུང་བའོ། །འདིར་གཞུང་ནི་དགེ་སློང་མ་ཆོས་གོས་ཟིན་པས་སྲས་བརྐྱང་ཕྱུང་ནས་གལ་ཏེ་ཆོས་གོས་ལྔ་པོ་གང་ཡང་རུང་བདག་ལས་ཆོས་གོས་གཅིག་དང་ནུབ་ཅིག་མཚམས་ཀྱི་ཕྱི་རོལ་དུ་བྲལ་ན་སྤང་པའི་ལྟུང་བྱེད་དོ་ཞེས་གསུངས་པ་ཡིན་ནོ། །ཆོས་གོས་ལྔ་པོ་དག་ཅེས་བྱ་བ་ནི་སྣམ་སྦྱར་དང་བླ་གོས་དང་མཐང་གོས་དང་ཤིང་ང་དཔུང་བཅད་དང་རྡུལ་གཟན་ཞེས་བྱ་བ་དག་གོ །བརྙན་པོ་ཡོད་ཅིང་བདོག་ནའོ་ཞེས་བྱ་བ་ནི། གལ་ཏེ་ཆོས་གོས་དྲས་ཤིང་དྲུབས་པ་བརྙན་པོ་ཡང་ཡོད་ཅིང་བདོག་ན། དེའི་ཚེ་དེ་ཡང་བྱིན་གྱིས་བརླབ་པར་བྱའོ། །གལ་ཏེ་མི་བདོག་ན་ནི་དྲས་ཤིང་དྲུབས་པ་མ་ཡིན་པ་ལ་ཡང་བྱིན་གྱིས་བརླབ་པར་བྱ་བ་སྟེ། ཆོས་གོས་བྱིན་གྱིས་མ་བརླབས་པས་འདུས་པར་མི་བྱའོ། །དེ་དག་གཞག་སྟེ་སྐྱ་རེངས་འཆར་བ་འདའ་བར་མི་བྱའོ་ཞེས་བྱ་བ་ནི། ཆོས་གོས་བྱས་པ་གསུམ་མམ་ལྔ་པོ་དེ་དག་གཞག་སྟེ་སྐྱ་རེངས་འཆར་པ་འདའ་བར་མི་བྱའོ། །བརྙན་པོ་ཡང་ཡོད་ཅིང་བདོག་ནའོ། །འདི་སྐད་བསྟན་ཏེ། ཆོས་གོས་ཡོད་ན་སྐྱ་རེངས་འཆར་བའི་དུས་སུ་ཆོས་གོས་བྱིན་གྱིས་མ་བརླབས་པས་འདའ་བར་མི་བྱའོ། །གཞན་མེད་ན་ཁ་མ་བསྒྱུར་བ་ལ་ཡང་བྱིན་གྱིས་བརླབས་པ་འཆགས་སོ་ཞེས་བྱ་བ་ནི། ཁ་བསྒྱུར་བ་འམ་བརྙན་པོ་གཞན་མེད་ན་ཁ་མ་བསྒྱུར་བའི་གོས་ལ་ཡང་བྱིན་གྱིས་བརླབས་པ་འཆགས་པའོ། །མ་དྲས་པ་ལ་ཡང་ངོ་ཞེས་བྱ་བ་ནི། དྲས་པ་གཞན་མེད་ན་མ་དྲས་པ་ལ་ཡང་བྱིན་གྱིས་བརླབས་པ་འཆགས་པའོ། །དེ་ལ་གལ་ཏེ་འབྱོར་ན་ལྷན་ཐབས་གླན་ནོ་ཞེས་བྱ་བ་ནི། མ་དྲས་པ་དེ་ལ་གལ་ཏེ་ལྷན་ཐབས་ཞེས་བྱ་བ་གླེགས་བུའི་འཕྲོ་བདོག་ན་གླན་བར་བྱ་བའོ། །ཁྱིམ་དུ་རུང་བའི་རྣམ་པ་ལ་ཡང་ངོ་ཞེས་བྱ་བ་ལ། ཁྱིམ་དུ་རུང་བ་ཞེས་བྱ་བ་ནི་ཁྱིམ་པའི་ཁྱིམ་དུ་སྤྱད་དུ་རུང་བའོ། །རྣམ་པ་ཞེས་བྱ་བ་ནི། དེ་ལྟ་བུའི་གོས་ཀྱི་རྣམ་པ་སྟེ་ཁ་ཚར་དང་ཕུན་ཚར་གྱི་མཐའ་གཅད་དུ་རུང་བ་དག་སློང་གི་ཆོས་གོས་ཀྱི་རྣམ་པ་ཉིད་དུ་མ་རེད་པ་ཞེས་བྱ་བའི་ཐ་ཚིག་སྟེ། གཞན་མེད་ན་དེ་ལ་
ཡང་བྱིན་གྱིས་བརླབས་པ་འཆགས་པའོ། །ཕྱིང་པ་དང་ལ་བ་དང་བེའུ་ཕྲུག་དང་ཀླ་མ་དང་སེངས་པ་ནི་མི་དྲ་བར་ལྷན་ཐབས་གླན་ཞིང་དྲུབ་པ་ཞེས་བྱ་བ་ནི། ཆོས་གོས་ཉིད་དུ་བྱིན་གྱིས་བརླབ་པར་བྱའོ། །འདི་ལྟར་གཞན་ལས་སྤུ་ཅན་ནི་ཆོས་གོས་གསུམ་པོ་ཉིད་དུ་བྱིན་གྱིས་བརླབ་པར་མི་བྱའོ་ཞེས་གསུངས་མོད་ཀྱི། འོན་ཀྱང་ལ་པ་དང་བེའུ་ཕྲུག་དག་ལ་སྤུ་བྱི་བ་ཡང་སྲིད་པས་འདིར་དེ་གཉིས་བཟུང་ངོ༌། །འདིར་གཞུང་ནི་དགེ་སློང་དག་ལྔ་པོ་འདི་དག་ནི་མི་འདྲ་བ་དག་ཡིན་ཏེ། ཕྱིང་བ་ཐམས་ཅད་དང༌། ལ་བ་ཐམས་ཅད་དང༌། བེའུ་ཕྲུག་ཐམས་ཅད་དང། ཀླམ་པ་ཐམས་ཅད་དང༌། གོས་སེངས་པ་ཐམས་ཅད་དེ། ལྷན་ཐབས་གླན་ཏེ་བཅང་པར་བྱའོ་ཞེས་གསུངས་པ་ཡིན་ནོ། །གནས་མལ་མི་གཙང་བས་གོས་པར་གྱུར་ན་དེའི་མདོ་ལ་སྦྱར་བར་བྱའོ་ཞེས་བྱ་བ་ནི། དགེ་འདུན་གྱིའམ་གང་ཟག་གི་མལ་ཆ་དང་སྟན་ལ་མི་གཙང་བས་གོས་པར་གྱུར་ན་དེའི་མོད་ཁོ་ན་ལ་མི་བརྐྱང་བར་བཀྲུ་བར་བྱ་བའོ། །དགེ་འདུན་གྱི་རྩྭའི་ཁྲི་དང་ཁྲིའུ་མ་གཏོགས་པ་སྟན་ཡན་ཆད་ལ་དེ་མ་ཡིན་པའི་གདིང་བ་མེད་པ་དང་གདིང་གཡོགས་ལ་མང་བར་ཆང་མ་བཅུག་བར་ཉེ་བར་སྤྱད་པར་མི་བྱའོ་ཞེས་བྱ་བ་ནི། དགེ་འདུན་གྱི་རྩྭའི་ཁྲི་དང་ཁྲིའུ་མ་གཏོགས་པ་ཐ་ན་སྟན་ཡན་ཆད་དགེ་འདུན་གྱི་གནས་མལ་དགེ་འདུན་གྱི་གདིང་པ་མ་ཡིན་པ་རང་གི་གདིང་བ་མེད་པར་ལོངས་སྤྱད་པར་མི་བྱ་བ་དང༌། དགེ་འདུན་གྱི་གདིང་གཡོགས་ལ་ཡང་གང་ཟག་གི་གོས་ཀྱི་བར་ཆད་མ་བཅུག་པར་སྤྱད་པར་མི་བྱ་བའོ། །རྩྭའི་ཁྲི་དང་ཁྲིའུ་ཞེས་བྱ་བ་ནི་རྩྭ་མུན་ཛ་དང་གྲེས་མ་ལ་སོགས་པའི་ཐག་པས་བརྒྱུས་པའི་ཁྲི་དང་ཁྲིའུ་སྟེ། དེ་ལ་ནི་གདིང་བ་གཞན་མེད་ཀྱང་རུང་ངོ༌། །སྟན་ཡན་ཆད་ཅེས་བྱ་བ་ནི། མལ་སྟན་ལྟ་ཞོག་གི་ཐ་མལ་པར་འདུག་པའི་སྟན་ཡན་ཆད་ལ་ཡང་གདིང་བ་མེད་པར་འདུག་པར་མི་བྱ་སྟེ། དེས་ན་འདིར་ཡན་ལག་གིས་རེག་པ་ཙམ་ལ་ཡང་གདིང་བ་གཞུག་དགོས་པར་རིག་པར་བྱའོ། །དེ་མ་ཡིན་པ་ཞེས་བྱ་བ་ནི། དགེ་འདུན་གྱི་གདིང་བ་མ་ཡིན་པའོ། །གདིང་བ་མེད་པར་ཉེ་བར་སྤྱད་པར་མི་བྱའོ་ཞེས་བྱ་བ་ནི། གང་ཟག་གི་གདིང་བ་མེད་པར་རོ། །གདིང་གཡོགས་ཞེས་བྱ་བ་ནི། འདིར་སྟེང་ནས་བགོ་བའི་གོས་དང་ཐང་ལ་གཞར་
བའི་གདང་བ་ལ་བྱ་སྟེ། དགེ་འདུན་གྱི་གདིང་གཡོགས་དེ་ལ་ཡང་གང་ཟག་གི་གོས་ཀྱི་བར་ཆད་མ་བཅུག་པར་ཉེ་བར་སྤྱད་པར་མི་བྱའོ། །ཐམས་ཅད་ཀྱི་ཁྲ་བོ་ཕལ་ཆར་མ་ཉམས་པ་ལ་ཡང་ངོ་ཞེས་བྱ་བ་ལ། ཐམས་ཅད་ཀྱི་ཞེས་བྱ་བ་ནི། དགེ་འདུན་གྱི་འབའ་ཞིག་ཏུ་མ་ཟད་ཀྱི་གང་ཟག་གི་ལ་སར་ངོ༌། །ཁྲ་བོ་ཞེས་བྱ་བ་ནི། པར་ཐང་དང་དྲེའུ་རྡོག་དང་ཟ་འོག་ལ་སོགས་པ་ཚོན་རིས་ཅན་ཐམས་ཅད་དོ། །ཕལ་ཆེར་མ་ཉམས་པ་ཞེས་བྱ་བ་ནི། ཧ་ཅང་རྙིང་པ་མ་ཡིན་པའོ། །དེ་ཡང་སྟན་ཡན་ཆད་ལ་དེ་མ་ཡིན་པའི་གདིང་བ་མེད་པ་དང༌། གདིང་གཡོགས་ལ་ཡང་བར་ཆད་མ་བཅུག་བར་ཉེ་བར་སྤྱད་པར་མི་བྱའོ། །སྐབས་འདིར་དེ་མ་ཡིན་པ་ཞེས་བྱ་བ་ནི། ཁྲ་བོ་མ་ཡིན་པ་དང༌། དགེ་འདུན་གྱི་མ་ཡིན་པ་གཉི་ག་གཟུང་ངོ༌། །ངན་ངོན་ཙམ་དང་དྲེ་མ་ཅན་གྱིས་མི་བྱའོ་ཞེས་བྱ་བ་ནི། གདིང་བ་ངན་ངོན་ཅན་དང་གདིང་བ་དྲི་མ་ཅན་གྱིས་དགེ་འདུན་གྱི་འམ་གང་ཟག་གི་གནས་མལ་ལ་སྤྱད་པར་མི་བྱ་བའོ།། གདིང་བ་བཅང་པར་བྱའོ་ཞེས་བྱ་བ་ནི། གང་ཟག་གིས་བཅང་བར་བྱ་བའོ། །དེ་ནི་སྟུག་ན་གཅིག་ཀྱང་རུང་ངོ་ཞེས་བྱ་བ་ནི། གདིང་བ་དེའོ། །སེངས་པ་ནི་ཉི་རིམ་མོ་ཞེས་བྱ་བ་ནི། སེངས་པ་ཞེས་བྱ་བ་ནི། སང་སེང་དུ་གྱུར་པ་ཡིན་ན་ཉི་རིམ་དུ་བྱ་དགོས་སོ། །ཁྲ་ཁྲ་པོ་མི་རུང་ངོ་ཞེས་བྱ་བ་ནི། སྟུག་པོ་ཡང་རུང་སེངས་བ་ཡང་རུང་སྟེ། གདིང་བ་ཁྲ་བོ་བཀྲ་བ་ཁྲ་ཁྲ་བོར་འདུག་པར་བཅང་བར་མི་བྱའོ། །དེ་ལ་གླེགས་བུའི་འཕྲོ་བྱའོ་ཞེས་བྱ་བ་ནི། གདིང་བ་དེ་ལ་ཆོས་གོས་ཀྱི་གླེགས་བུའི་ཚལ་པ་ལྟ་བུ་བྱའོ། །ཕྱོགས་གང་དུ་དུ་ཞིག་བྱ་ཞེ་ན། དེའི་ཕྱིར་འོག་རོལ་གྱིས་སུམ་ཆའི་དང་པོར་རོ་ཞེས་བྱ་བ་སྨྲས་ཏེ། འོག་རོལ་ཞེས་བྱ་བ་ནི། རྐང་པའི་མཐའ་ལོགས་སུའོ། །སུམ་ཆ་ཞེས་བྱ་བ་ནི་རྐང་པའི་མཐའ་ལོགས་སུ་སུམ་ཆ་བོར་ལ་སྟོད་དུ་སུམ་གཉིས་བོར་བའི་མཚམས་སུའོ། །དང་པོར་རོ་ཞེས་བྱ་བ་ནི། སུམ་ཆའི་མཚམས་དེ་ཉིད་འོག་རོལ་གྱི་ཆའི་དང་པོ་ཡིན་པས་དེ་ཉིད་དུ་བཅད་དེ་ཆོས་གོས་ཀྱི་ཚལ་བུ་འདྲ་བར་གླེགས་བུའི་འཕྲོ་གཅིག་བྱ་བར་ཟད་ཀྱི་མཐར་ཡང་མི་བྱ་དབུས་སུ་ཡང་མི་བྱའོ་ཞེས་བྱ་བའི་ཐ་ཚིག་གོ །གླེགས་བུ་གཅིག་པ་བྱིན་གྱིས་བརླབ་པར་མི་བྱའོ་ཞེས་བྱ་བ་ནི། གདིང་བ་སྟེ་དེའི་ཕྱིར་སྔར་འོག་རོལ་གྱི་སུམ་ཆའི་དང་པོར་རོ་ཞེས་སྨོས་པས་གླེགས་བུ་ཕྱེད་དང་གཉིས་བར་
བྱ་བར་བསྟན་པ་ཡིན་ནོ། །གཡན་པ་དགབ་པ་དེ་དང་ལྡན་པས་བཅང་བར་བྱའོ་ཞེས་བྱ་བ་ནི། དགེ་སློང་གཡན་པ་དང་ལྡན་པས་གཡན་པ་དགབ་པ་དེ་བཅང་བར་བྱ་བའོ། །དེ་ཞག་ལྔའམ་དྲུག་ཅིང་སྦྱང་བར་བྱ་བའོ་ཞེས་བྱ་བ་ནི། གཡན་པ་དགབ་པ་དེ་ཞག་ལྔའམ་དྲུག་ཅིང་བཀྲུ་བར་བྱ་བའོ། །སྲིན་བལ་གྱི་དང་བལ་གྱི་དང་ཤ་ནའི་དང་པར་མའི་རུང་ངོ་ཞེས་བྱ་བ་ནི། ཆོས་གོས་ཉིད་དང་གོས་ལྷག་ཉིད་དུ་ཡང་དེ་དག་ལས་བྱས་པའི་གོས་རུང་བའོ། །རྣམས་སུ་མ་བྱས་པ་དང་གོས་མ་ནི་མི་རུང་བའོ་ཞེས་བྱ་བ་ནི། དཔག་བསམ་ཤིང་ལས་བྱུང་བའི་གོས་ལ་སོགས་པ་དང༌། གསོམ་ལས་བྱུང་བའི་གོས་ནི་མི་རུང་བ་སྟེ། སྤང་པའི་ཞུ་བ་ལས་ཉེས་བྱས་བྱེད་པ་ཉིད་ཀྱིས་མི་རུང་བའི་ཁོངས་སུ་གསུངས་པའི་ཕྱིར་རོ། །སྐྲ་ལས་བྱས་པ་དང་གཅེར་བུ་པ་དང་བྱ་འུག་པ་པ་ཡང་དག་པར་ལེན་པ་ཡང་ངོ་ཞེས་བྱ་བ་ཡང༌། མི་རུང་ངོ་ཞེས་བྱ་བར་སྦྱར་རོ། །སྐྲའི་ལ་བ་བ་ཡང་དག་པར་ལེན་པ་དང་གཅེར་བུ་པ་ཡང་དག་པར་ལེན་པ་དང༌། བྱ་འུག་པ་ཡང་དག་པར་ལེན་པ་ནི་མི་རུང་ངོ༌། །འདིར་གཞུང་ནི་དགེ་སློང་བྲམ་ཟེའི་བུ་མོས་ཞུས་པ་ལས། མུ་སྟེགས་ཅན་གྱི་རྒྱལ་མཚན་གསུམ་པོ། གཅེར་བུ་པ་ཉིད་དང༌། བྱ་འུག་པ་པ་ཉིད་དང༌། སྐྲའི་ལ་པ་བ་ཉིད་འཆང་བར་བྱེད་ན་ཉེས་པ་སྦོམ་པོར་འགྱུར་རོ། །མུ་སྟེགས་ཅན་གྱི་རྒྱལ་མཚན་གསུམ་པོ་དག་མ་གཏོགས་པ་དེ་ལས་གཞན་པའི་མུ་སྟེགས་ཅན་གྱི་རྒྱལ་མཚན་འཚང་ན་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །གཞན་དེ་དག་ཀྱང་ཡང་དག་པར་བླངས་པ་སྔོན་དུ་གཏོང་བས་འཆང་ན་ནི་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །དེ་ལ་སྦོམ་པོའོ་ཞེས་བྱ་བ་ནི། སྐྲ་ལས་བྱས་པ་དང༌། གཅེར་བུ་པ་དང༌། བྱ་འུག་པ་པ་ཡང་དག་པར་ལན་པ་དེ་ལ་ནི་དགེ་འདུན་གྱི་དབྱེན་གྱི་ཕྱོགས་སུ་གཏོགས་པའི་ཉེས་པ་སྦོམ་པོར་འགྱུར་བར་རིག་པར་བྱའོ། །གཞན་བསྟན་པ་ནི་དེའོ་ཞེས་བྱ་བ་ནི་གསུམ་པོ་དེ་དག་ལས་གཞན་པའི་མུ་སྟེགས་ཅན་གྱི་རྒྱལ་མཚན་གཞན་བསྟན་པ་ན་མ་རུང་བ་དེ་སྟེ་ཉེས་བྱས་བྱེད་པ་ཉིད་ཡིན་ནོ། །དེ་དག་ཀྱང་ཡང་དག་བར་བླང་བ་སྔོན་དུ་བཏང་བས་འཆང་ན་ནི་སྦོམ་པོར་འགྱུར་བས་དེའི་ཕྱིར་ཡང་དག་པར་བླང་བ་སྡོམ་དུ་གཏོང་པ་ལས་གཞན་པ་ཡང་དག་པར་བླང་
བ་སྔོན་དུ་གཏོང་བ་མ་ཡིན་པས་འཆང་ན་དེ་ཡང་རུང་བ་མ་ཡིན་ཏེ་དེ་ནི་ཉེས་བྱས་བྱེད་པ་ཉིད་ཡིན་ནོ། །འདི་སྐད་བསྟན་ཏེ། མུ་སྟེགས་ཅན་གྱི་རྒྱལ་མཚན་གང་ཅི་ཡང་རུང་བ་འཆད་ན། ཡང་དག་པར་བླང་བ་སྔོན་དུ་བཏང་བས་ཀྱང་རུང༌། ཡང་དག་པར་བླང་བ་སྔོན་དུ་མ་བཏང་བས་ཀྱང་རུང་སྟེ། དེ་དག་ཐམས་ཅད་ལ་དག་པ་དང་གྲོལ་བར་འཛིན་པས་འཆང་བ་ནི་ཉེས་པ་སྦོམ་པོར་འགྱུར་རོ། །དག་པ་དང་གྲོལ་བར་འཛིན་པ་མེད་ན་ནི་སྐྲའི་ལབ་པ་དང་གཅེར་བུ་པ་དང༌། བྱ་འུག་པ་གསུམ་ནི་སྦོམ་པོ་ཉིད་དུ་ལོགས་ཤིག་ཏུ་གསུངས་པས། དེ་གསུམ་ལས་གཞན་པའི་མུ་སྟེགས་ཅན་གྱི་རྒྱལ་མཚན་ལ་དག་པ་དང་གྲོལ་བར་འཛིན་པ་མེད་ཅིང༌། ཡང་དག་པར་བླང་བ་སྔོན་དུ་མ་བཏང་བས་འཛིན་པ་ཐམས་ཅད་ལ་ནི་ཉེས་བྱས་སོ། །སྐྲ་འབལ་པ་དང་ལོ་མ་གྱོན་པ་དང་གཡང་གཞིའི་སྨད་གཡོགས་སྟོད་གཡོགས་དང་བཅས་པས་འཚོ་བ་དང་གསོ་རས་དང་ཡན་ལག་གི་སྦུབས་དང་གོས་ཐམས་ཅད་སྔོ་བ་དང༌། གདེངས་ཀ་ལྟ་བུ་དང་ཁ་ཚར་རིང་པོ་དང་རལ་ག་དང༌། གཙུག་ཏོར་དང༌། མགོ་དཀྲིས་པ་དང༌། ར་ཕྱར་དང་རྔ་བལ་གྱི་སྣམ་བུ་དང༌། མུ་སྟེགས་ཅན་གྱི་རྒྱལ་མཚན་ཡང་ངོ་ཞེས་བྱ་བ་མི་རུང་ངོ་ཞེས་བྱ་བར་སྦྱར་རོ། །སྐྲ་འབལ་པ་ཞེས་བྱ་བ་ནི། མུ་སྟེགས་ཅན་གྱི་བརྟུལ་ཞུགས་སྐྲ་འཐོག་པར་བྱེད་པའོ། །ལོ་མ་གྱོན་པ་ཞེས་བྱ་བ་ནི། ལོ་མ་དང་ཤུན་པ་ལ་སོགས་པ་གྱོན་པའོ། །གཡང་གཞིའི་སྨད་གཡོགས་སྟོད་གཡོགས་དང་བཅས་པས་འཚོ་བ་ཞེས་བྱ་བ་ནི། རི་དགས་ཀྱི་པགས་པའི་འོ། །གསོ་རས་ཞེས་བྱ་བ་ནི། གསོ་མ་ལས་བྱས་བའི་གོས་སེང་སེང་པོའོ། །ཡན་ལག་གི་གོས་སྦུབས་ཞེས་བྱ་བ་ནི། དོར་མ་ལ་སོགས་པའི་གོས་སོ། །གོས་ཐམས་ཅད་སྔོ་བ་ཞེས་བྱ་བ་ནི་གོས་རིལ་གྱིས་སྔོ་བ་བཀག་པ་ཡིན་གྱི། གོས་ཐམས་ཅད་སེར་བ་དང་དམར་བ་ནི་མ་བཀག་གོ །གདེངས་ཀ་ལྟ་བུ་ཞེས་བྱ་བ་ནི། གོས་ཀྱི་ཁ་ཚར་སྤྲུལ་མགོའི་གདེངས་ཀ་ལྟ་བུར་རིང་པོར་བྱེད་པའོ། །ཁ་ཚར་རིང་པོ་ཞེས་བྱ་བ་ནི། གོས་ཁ་ཚར་མ་བཅད་པའོ། །རལ་ག་ཞེས་བྱ་བ་ནི། ཤིང་ང་དཔུང་བཅད་ལས་གཞན་པའི་རྣམ་པ་ཡིན་པར་རིག་པར་བྱ་སྟེ། དཔེར་ན་ལྷམ་ཡུ་རིངས་ཀྱི་རྣམ་པ་ལས་ལྷམ་སྒྲོག་གུ་ཅན་གྱི་རྣམ་པ་ཅུང་ཟད་གཞན་
པ་དང་འདྲའོ། །གཙུག་ཏོར་ཞེས་བྱ་བ་ནི། གཙུག་ཏོར་མཐོན་པོའོ། །མགོ་དཀྲིས་པ་ཞེས་བྱ་བ་ནི། ཐོད་ལ་སོགས་པ་སྟེ་གཙུག་ཏོར་པ་ཡིན་ནོ། །ར་ཕྱར་ཞེས་བྱ་བ་ནི། ར་བ་ལ་ལས་བྱས་པའི་ཕྱར་བའོ། །རྡ་བལ་གྱི་སྣམ་བུ་ཞེས་བྱ་བ་ནི། རྔ་མོའི་བལ་ལས་བྱས་པའི་སྣམ་བུའོ། །མུ་སྟེགས་ཅན་གྱི་རྒྱལ་མཚན་ཞེས་བྱ་བ་ནི། དེ་དག་ལས་གཞན་པ་ཡིན་པར་རིག་པར་བྱའོ། །བུ་ལ་སའི་འདབ་མ་གང་ཙམ་དང་མར་མེའི་སྙིང་པོ་ཙམ་དེས་ཀྱང་སྙོམས་པར་བྱ་བའི་ཕྱིར་བགོ་བཤའ་བྱའོ་ཞེས་བྱ་བ་ནི། ཟས་ནི་ཐ་ན་ཤིང་པུ་ལ་སའི་ལོ་མ་གང་ཙམ་ངེས་ཀྱང་དབང་བ་ཐམས་ཅད་ལ་སྙོམས་པར་བྱ་བའི་ཕྱིར་བགོ་བཤའ་བྱའོ། །གོས་ནི་ཐན་མར་མེའི་སྙིང་པོ་ཙམ་དེས་ཀྱང་དབང་བ་ཐམས་ཅད་ལ་སྙོམས་པར་བྱ་བའི་ཕྱིར་བགོ་བཤའ་བྱའོ། །འདིར་གཞུང་ནི་ཕྲན་ཚེགས་དག་ལས། དགེ་སློང་དག་ད་ལྟ་བས་ན་ཟས་ཀྱི་རྙེད་པ་བྱུང་ན་པུ་ལ་སའི་ལོ་མས་ཀྱང་སྙོམས་པར་བྱས་ཏེ་བགོ་བཤའ་བྱའོ། །གོས་ཀྱི་རྙེད་པ་བྱུང་ན་མར་མེའི་སྙིང་པོ་ཙམ་གྱི་སྦྱོར་བས་ཀྱང་སྙོམས་པར་བྱས་ཏེ་བགོ་བཤའ་བྱའོ་ཞེས་གསུངས་པ་ཡིན་ནོ། །ལ་བ་དང་དེ་ལྟ་བུ་དག་ནི་བཙོངས་ཏེའོ་ཞེས་བྱ་བ་ནི། བགོ་བཤའ་བྱའོ་ཞེས་བྱ་བར་སྦྱར་རོ། །ལ་བ་དང་ལ་བ་ལྟ་བུའི་གོས་གཞན་གང་དག་གཅད་དུ་མི་རུང་བ་དེ་དག་ནི་བཙོངས་ཏེ་བགོ་བཤའ་བྱའོ། །མི་གཤེག་པ་ཉིད་དོ་ཞེས་བྱ་བ་ནི། ལ་བ་དང་དེ་ལྟ་བུ་དག་ནི་དེ་ལས་གཞན་པའི་གོས་གཞན་དུ་མི་གཤེག་པ་ཉིད་ཡིན་ནོ། །རྙེད་པ་བགོ་བ་ལ་ལྔ་བྱའོ་ཞེས་བྱ་བ་ནི། རྙེད་པ་བགོ་བ་ལ་བྱ་བ་ལྔ་བྱ་བའོ།། རྙེད་པ་བགོ་པ་ལ་བྱ་བ་ལྔ་བྱ་བ་དེ་དག་གང་ཞེ་ན་དེའི་ཕྱིར། དེང་རྙེད་པ་བགོད་པར་འགྱུར་གྱིས་བར་ཁྱེད་ཅག་གིས་ཚོགས་པར་བྱའོ་ཞེས་དགེ་འདུན་ལ་བརྗོད་པར་བྱ་བ་དང༌། གཎྜཱི་བརྡུང་བ་དང༌། ཚུལ་ཤིང་བྲམ་པ་དང༌། བགྲང་བ་དང༌། སོ་སོའི་སྐལ་བ་བྲིམ་པའོ་ཞེས་བྱ་བ་སྨྲས་ཏེ། རྙེད་པ་བགོ་པའི་དུས་སུ་བྱ་བ་ལྔ་པོ་དེ་དག་གོ་རིམས་བཞིན་དུ་བྱའོ། །ཐ་མ་ཡན་ཆད་བྱེད་པ་ཉིད་མ་འོངས་པ་དབང་བ་ཉིད་ཡིན་ནོ་ཞེས་བྱ་བ་ནི། རྙེད་པ་བགོ་བའི་དུས་སུ་བྱ་བ་ལྔ་པོ་དེ་དག་གི་གོ་རིམས་ཀྱི་ཐ་མ་ནི་སོ་སོའི་སྐལ་བ་བྲིམ་པ་སྟེ། གོང་མ་བཞི་ལྟ་ཅི་སྨོས་ཀྱི། ཐ་མ་དེ་ཡན་ཆད་བྱེད་པ་ན་དགེ་
སློང་གཞན་གློ་བུར་དུ་འོངས་པ་ཡང་རྙེད་པའི་སྐལ་བ་དབང་བ་ཉིད་ཡིན་པའོ། །འདི་ནི་ངེས་པའི་རྙེད་པ་མ་ཡིན་གྱི། དགེ་འདུན་ཙམ་ལ་སྤྱིར་སྤགས་ཏེ་ཕུལ་བའི་རྙེད་པ་ཡིན་པར་ཤེས་པར་བྱ་སྟེ། དཔེར་ན་དུས་སྟོན་ཆེན་པོ་དག་གི་ཚེ་ལྟ་བུའོ། །དབྱར་གནས་པའི་རྒྱུ་ལས་བྱུང་བ་ལ་སོགས་པའི་རྙེད་པ་ངེས་པ་གཞན་དག་ལ་ནི་གློ་བུར་དུ་འོངས་ཀྱང་མི་དབང་བ་ཉིད་ཡིན་ནོ། །བྱ་བ་ལྔ་པོ་འཇུག་ཏུ་མ་བྱིན་པ་ཉིད་ལ་ནི་གློ་བུར་དུ་འོངས་པ་ཉིད་དབང་བར་བསྟན་ན། འཇུག་ཏུ་ཕྱིན་པ་ལ་ཇི་ལྟར་བསྒྲུབ་པར་བྱ་ཞེ་ན་དེའི་ཕྱིར། འཇུག་ཏུ་ཕྱིན་པ་ཉིད་ན་མི་དབང་ངོ་ཞེས་བྱ་བ་སྨྲས་ཏེ། བྱ་བ་ལྔ་པོ་ཐམས་ཅད་མཇུག་ཏུ་ཕྱིན་པ་ཉིད་ནི་འོངས་པ་དེ་ནི་དེར་རྙེད་པ་མི་དབང་ངོ༌། །དེ་ནི་རྙེད་པ་ཆུང་དུ་ལ་ཡང་ངོ་ཞེས་བྱ་བ་ནི། སྔར་བསྟན་པ་ལ་སོགས་པ་དེ་ནི་རྙེད་པ་ཆུང་དུ་ལ་ཡང་བྱའི། རྙེད་པ་ཆེན་པོ་འབའ་ཞིག་ལ་བྱ་བར་མ་ཟད་དོ། །རྙེད་པའི་བྱ་བ་དེར་ཞུགས་ནས་སོང་བ་ཉིད་ཡིན་ཡང་མི་དབང་བ་མ་ཡིན་ནི་ཞེས་བྱ་བ་ནི། དབྱར་གནས་པ་ལ་སོགས་པའི་རྒྱུ་གང་གིས་རྙེད་པ་འབྲིམ་པར་བྱེད་པའི་བྱ་བ་དེར་གལ་ཏེ་དགེ་སློང་དེ་ཞུགས་པར་གྱུར་ན་གནས་སྐབས་དེ་དང་བྱ་བ་དེ་བྱས་པ་ཡིན་པས། གཙུག་ལག་ཁང་གི་མཚམས་ལས་འདས་ཏེ་སོང་ཡང་རྙེད་པ་དེ་དབང་བ་ཡིན་ནོ། །དེའི་ཕྱིར་འགྲོ་བས་མནོད་པ་བཅོལ་བར་བྱ་བའོ་ཞེས་བྱ་བ་མི་གང་གི་ཕྱིར་རྙེད་པ་དེ་དབང་བ་དེའི་ཕྱིར་དགེ་སློང་འགྲོ་བས་རང་གི་སྐལ་བ་ནོད་པ་གཞན་ལ་བཅོལ་བར་བྱ་བའོ། །ཁས་བླངས་པ་དང་ལྡན་པར་མ་མནོས་ན་བསབ་པར་བྱ་བ་ཉིད་ཡིན་ནོ་ཞེས་བྱ་བ་ནི། མནོད་དོ་ཞེས་ཁས་བླངས་པ་དང་ལྡན་པས་གལ་ཏེ་རྙེད་པ་མ་མནོས་ན་དེའི་ཚེ་སྒོ་ནས་བསབ་པར་བྱ་བ་ཉིད་ཡིན་པའོ། །རྙེད་པ་ཆུང་ངུ་ལ་པ་ན་ལྔ་ལ་སོགས་པའོ་ཞེས་བྱ་བ་ནི། རྙེད་པ་ཆུང་ངུ་ལ་ཡང་གལ་ཏེ་མནོད་པར་ཁས་བླངས་པ་དང་ལྡན་པས་མ་མནོས་ན། བགོ་སྐལ་མཥ་ཀ་ལྔ་འམ་དེ་བས་ལྷག་པ་ཡིན་ན་དེ་ལ་བསབ་པར་བྱ་བ་ཉིད་ཡིན་པའོ། །མ་བཅོལ་ན་མནོད་པར་མི་བྱའོ་ཞེས་བྱ་བ་ནི། བདག་པོས་མ་བཅོལ་ན་དེའི་སྐལ་བ་མནོད་པར་མི་བྱའོ། །སློབ་དཔོན་ནམ་མཁན་པོའི་ནི་མནོད་པར་བྱའོ་ཞེས་བྱ་བ་ནི། དེ་གཉིས་ཀྱི་ན་མ་བཅོལ་ན་ཡང་ངོ༌། །ཡིད་གཅུགས་པའི་གནས་ཀྱི་དོན་དུ་ཡང་ངོ་ཞེས་བྱ་བ་ནི། གང་ཟག་གང་ཡིད་
གཅུགས་པའི་གནས་སུ་གྱུར་པ་ཡིན་ན་དེའི་དོན་དུ་ཡང་མ་བཅོལ་ཀྱང་མནོད་པར་བྱའོ། །རང་གི་ཕྱོགས་དང་མཐུན་པ་མ་ཡིན་པའི་དོན་དུ་མི་བྱའོ་ཞེས་བྱ་བ་ནི། བྱེ་བའི་ཕྱོགས་སུ་སོང་བའི་དོན་དུ་ཡང་མནོད་པར་མི་བྱ་བའོ། །དེ་ནི་གནས་མལ་ལ་ཡང་ངོ་ཞེས་བྱ་བ་ནི། མ་བཅོལ་ན་མནོད་པར་མི་བྱའོ་ཞེས་བྱ་བ་ལ་སོགས་པ་དེ་ནི་གནས་མལ་ལ་ཡང་རིག་པར་བྱ་བ་སྟེ། གང་གིས་བཅོལ་ཏམ་གང་ལ་ཡིད་གཅུགས་པ་ཡོད་པ་ནི་མངོན་སུམ་དུ་མ་གྱུར་ཀྱང་དེའི་དོན་དུ་མནོད་པར་བྱའོ། །ཟས་ལ་ཡང་ངོ་ཞེས་བྱ་བ་ནི། མ་བཅོལ་ན་མནོད་པར་མི་བྱ་བའོ་ཞེས་བྱ་བ་ལ་སོགས་པ་རིག་པར་བྱ་བ་སྟེ། དེ་དག་ནི་གཞན་གྱི་ཚིག་གི་སྐབས་མེད་པར་བྱ་བའི་ཕྱིར་རོ། །གཞན་གྱི་དོན་དུ་མནོད་པ་ཕ་རོལ་ལ་གོ་པར་བྱའོ་ཞེས་བྱ་བ་ནི། གཞན་གྱི་དོན་དུ་རྙེད་པ་དང་གནས་མལ་ལ་སོགས་པ་མནོད་པ་གང་ཟག་ཕ་རོལ་པོ་གཞན་དག་ལ་གོ་པར་བྱ་བ་སྟེ། འདི་ཡང་གཞན་གྱི་ཚིག་གི་སྐབས་མེད་པར་བྱ་བའི་ཕྱིར་རོ། །འདིར་གཞུང་ནི་ནོད་པར་བྱེད་པར་ཕ་རོལ་ལ་གོ་བར་བྱའོ་ཞེས་གསུངས་པ་ཡིན་ནོ། །མི་དབང་བས་ནང་དུ་ཞུགས་ཏེ་མི་བྱའོ་ཞེས་བྱ་བ་ནི། རྙེད་པ་མི་དབང་བས་གང་དག་དབང་བ་དེ་དག་གི་ནང་དུ་ཞུགས་ཏེ་སྐལ་བ་མནོད་པར་མི་བྱའོ། །འདིར་གཞུང་ནི། དེ་ལྟ་བས་ན་དགེ་སློང་གིས་གཞན་གྱི་རྙེད་པར་འཇུག་པར་མི་བྱའོ་ཞེས་གསུངས་པ་ཡིན་ནོ། །འདིར་དཔེ་གཞན་ཡང་ཚེ་དང་ལྡན་པ་ཉེ་དགའ་མགྲོན་དུ་མ་པོས་པས་ཟན་ཟོས་ནས་དེ་ནས་ཡོན་རས་ཡུག་ཆེན་མནོས་པ་ཡིན་ནོ། །དབང་བ་གཅིག་ཉིད་ཀྱིས་ཤིན་ཏུ་མང་པོ་ཐོབ་པ་ལ་མི་དབང་བའི་རྒྱུར་འགྱུར་བ་མེད་དོ་ཞེས་བྱ་བ་ནི། གང་ཟག་དབང་བ་གཅིག་ཉིད་ཀྱིས་རྙེད་པ་ཤིན་ཏུ་མང་པོ་ཐོབ་པ་ལ་མི་དབང་བའི་རྒྱུར་འགྱུར་བ་མེད་པའོ། །འདི་སྐད་བསྟན་ཏེ། གལ་ཏེ་གཙུག་ལག་ཁང་ན་དགེ་སློང་གཅིག་པུ་འདུག་པར་གྱུར་ལ། དེར་རྙེད་པ་ཤིན་ཏུ་མང་པོ་གྲུབ་པར་གྱུར་ཀྱང༌། དབང་བ་ཉུང་བ་མི་དབང་བའི་རྒྱུར་མི་འགྱུར་ཏེ། སྙེད་པ་དེ་དེ་ཉིད་ཀྱི་ཡིན་པར་རིག་པར་བྱའོ། །འདིར་ཁུངས་ནི་རྒན་ཞུགས་དེ་གཉིས་འདི་སྙམ་དུ་བདག་ཅག་གཉིས་ལ་རས་ཡུག་ཆེན་བརྒྱ་ཇི་ལྟར་འབྱུང་བར་འགྱུར་ཏེ། གཞན་ནས་འཇུག་ཏུ་གཞུག་པར་བྱའོ་སྙམ་དུ་སེམས་སོ་ཞེས་གསུངས་པ་དང༌། དེད་དཔོན་གྱིས་དགེ་
འདུན་གྱི་ཕྱིར་གཙུག་ལག་ཁང་དུ་རྙེད་པ་མང་པོ་བསྐུར་བ་ན། གཙུག་ལག་ཁང་དེ་ན་དགེ་སློང་གཅིག་བུ་ཞིག་གནས་པ་དེ་འགྱོད་པས་མི་ལེན་པ་ནས། བཅོམ་ལྡན་འདས་ཀྱིས་དེ་ནི་དེ་ན་གང་གནས་པ་དེའི་ཡིན་ནོ་ཞེས་རྗེས་སུ་གནང་བའི་བར་དུ་གསུངས་པ་ཡིན་ནོ། །བྱེ་བ་ན་ཆོས་མ་ཡིན་པའི་ཕྱོགས་དང་མཐུན་པ་དག་ཏུ་སོང་བ་དགེ་འདུན་གྱི་རྙེད་པ་མི་དབང་ངོ་ཞེས་བྱ་བ་ནི། དགེ་འདུན་བྱེ་བ་ན་གང་ཟག་གང་ཆོས་ཀྱི་ཕྱོགས་དང་མཐུན་པ་སྤངས་ཏེ་ཆོས་མ་ཡིན་པའི་ཕྱོགས་དང་མཐུན་པ་དག་ཏུ་སོང་བ་གང་ཡིན་པ་དེ་དགེ་འདུན་གྱི་རྙེད་པ་མི་དབང་པའོ། །དེའི་དུས་ཀྱི་རྙེད་པ་ལ་ནི་ཆེས་རིང་དུ་གནས་ན་གནས་པ་ཉིད་ཡིན་ནོ་ཞེས་བྱ་བ་ནི། དབྱར་གནས་པ་ལ་སོགས་པའི་དུས་དེར་འབྱུང་བའི་རྙེད་པ་ནི་དེའི་དུས་ཀྱི་རྙེད་པ་ཞེས་བྱ་སྟེ། དེ་ལ་ནི་གང་ཟག་དུས་ཆེས་ཡུན་རིང་དུ་དབྱར་གྱི་ནང་ན་གནས་གནས་ན། དུས་དེ་བས་ཐུང་བ་ཞིག་གནས་པར་མ་གྱུར་དུ་ཟིན་ཀྱང་དེ་རྙེད་པ་དེ་ལ་གནས་པ་ཉིད་ཡིན་པས་རྙེད་པ་དེའི་སྐལ་བ་དབང་བའོ། །འདི་སྐད་བསྟན་ཏེ། གང་དུས་ཆེས་ཡུན་རིང་དུ་འདུག་འདུག་ནས་གནས་གཞན་དུ་སོང་བ་དེ་ནི་དེའི་དུས་ཀྱི་རྙེད་པ་དབང་བ་ཉིད་ཡིན་ཏེ། དེ་ནི་སོང་བའི་དབང་དུ་བྱས་ཏེ་གསུངས་པ་ཡིན་ནོ། །བབས་པ་དང་ཤི་བར་གྱུར་པ་གཉིས་ཀྱིས་ཀྱང་ངོ་ཞེས་བྱ་བ་ནི། འདི་གཉིས་ཀྱང་ཆེས་རིང་དུ་གནས་གནས་པ་ཡིན་ན་དེས་དུས་ཀྱི་རྙེད་པ་དབང་བ་ཉིད་ཡིན་ནོ། །འདི་ལྟར་འདི་གཉིས་ལ་ཡང་རྙེད་པ་དགོས་པ་ཡོད་དེ་འགའ་ཞིག་ལ་དབུལ་ལམ། བུ་ལོན་པ་ཡོད་དམ། ནད་གཡོག་ལ་ཡོ་བྱད་དྲུག་མ་འབྱོར་ན་དེ་སྦྱིན་པར་བྱ་བ་ཉིད་དང༌། དགེ་སློང་རྣམས་ཀྱིས་ཤི་བའི་ཡོ་བྱད་དུ་བྱིན་གྱི་བརླབས་པ་ལ་སོགས་པར་ཤི་བའི་རྙེད་པའི་སྐལ་བ་དང་སྤྱད་པའི་སྒོ་དེ་ལྟ་བུ་དག་ཡོད་ལ། བབས་པ་ལ་ནི་དངོས་སུ་དགོས་པ་ཉིད་ཡོད་པའི་ཕྱིར་རོ། །རྙེད་པ་ནི་ཇི་ལྟར་རྣམ་པར་ངེས་པར་བྱེད་པ་ལྟར་རྣམ་པར་གཞག་གོ་ཞེས་བྱ་བ་ནི། རྙེད་པ་ནི་བདག་པོ་དག་གིས་རྙེད་པ་འདི་ནི་འདི་ལྟར་རྣམ་པར་ངེས་པར་བྱའོ་ཞེས་བསྔོས་ཤིང་ཇི་ལྟར་རྣམ་པ་ངེས་པར་བྱས་པ་དེའི་རྗེས་སུ་འབྲང་བས་རྣམ་པར་གཞག་པར་བྱ་བ་སྟེ། གཙུག་ལག་ཁང་འདི་ན་གནས་པའི་དགེ་སློང་རྣམས་ཀྱིས་གནས་མལ་དང་བསོད་སྙོམས་ལ་སོགས་པ་ལོངས་སྤྱད་པར་
བྱའོ་ཞེའམ། དགུན་ནམ་དགུན་སྨད་དམ་དཔྱིད་དམ་སོས་ཀ་འམ། དབྱར་རམ་སྟོན་གནས་པའི་དགེ་འདུན་རྣམས་ལ་རྙེད་པ་འདི་འབུལ་གྱི་འདི་ན་གནས་པའི་དུས་ཚིགས་འདིའི་ཁེངས་སུ་གཏོགས་པས་སྤྱད་པར་བྱའོ་ཞེའམ། གང་ལ་ལ་གནས་ཁང་འདི་འམ་ཁང་ཁྱིམ་འདི་ན་གནས་པ་དེ་ལ་རྙེད་པ་འདི་ཁུད་པར་འབུལ་གྱི་དེས་འདི་སྤྱད་པར་བྱའོ་ཞེས་དེ་ལྟར་ཡོན་བདག་གིས་གཙུག་ལག་ཁང་ངམ། དུས་ཚིགས་སམ། གནས་ཁང་དག་གི་དབང་དུ་བྱས་ཏེ་དགེ་འདུན་ནམ་གང་ཟག་གང་ལ་རྙེད་པ་བསྔོས་ཤིང་རྣམ་པར་ངེས་པར་བྱས་པ་དེ་ནི་དེ་ཁོ་ན་བཞིན་དུ་གཙུག་ལག་ཁང་དང༌། དུས་ཚིགས་དང༌། གནས་ཁང་དེ་ན་དགེ་འདུན་ནམ་གང་ཟག་སུ་གནས་པ་དག་གིས་འཁྲུལ་བ་མེད་པར་སྤྱད་པར་བྱ་བ་ཡིན་ཏེ། དེ་ནི་ཡོན་བདག་གིས་རྣམ་པར་ངེས་པར་བྱས་པའི་དབང་དུ་བྱས་པ་ཡིན་ནོ། །འཐོབ་པ་རྣམས་ཀྱིས་ཀྱང་ངོ་ཞེས་བྱ་བ་ནི། རྙེད་པ་ནི་ཇི་ལྟར་རྣམ་པར་ངེས་པར་བྱེད་པ་ལྟར་རྣམ་པར་གཞག་གོ་ཞེས་བྱ་བའི་རྗེས་བསྙག་པའི་ཕྱིར། ཀྱང་ངོ་ཞེས་བྱ་བའི་སྒྲ་སྨོས་སོ། །འདི་ནི་གང་གི་ཚེ་ཡོན་བདག་གིས་རྣམ་པར་ངེས་པར་མ་བྱས་པ་དེའི་ཚེ་རྙེད་པ་ཐོབ་པའི་གང་ཟག་རྣམས་ཀྱིས་རྣམ་པར་ངེས་པར་བྱས་པའི་དབང་དུ་བྱས་པ་ཡིན་ཏེ། ཁས་བླངས་པ་དང་ཁས་མ་བླངས་པའི་ཕྱོགས་གཉིས་ཀྱིས་ཁྱིམ་ཆེ་གེ་མོ་ནི་ཁྱེད་ཀྱིའོ། །ཁྱིམ་ཆེ་གེ་མོ་ནི་ངེད་ཀྱིའོ། །ལམ་པོ་ཆེ་འདི་ནི་ཁྱེད་ཀྱིའོ། །ལམ་པོ་ཆེ་འདི་ནི་ངེད་ཀྱིའོ་ཞེས་བྱ་བ་ལ་སོགས་པ་ལྟ་བུར་ཁྲིམས་སུ་བྱ་བ་བཅས་ན། གལ་ཏེ་ཕྱོགས་ཅིག་ཤོས་ཀྱི་རྣམ་པར་ངེས་པར་བྱས་པའི་ཁྱིམ་ལ་སོགས་པ་གང་ཡིན་པ་དེ་ནས་ཕྱོགས་ཅིག་ཤོས་ཀྱི་རྙེད་པ་གང་ཐོབ་པ་དེ་ནི་ཕྱོགས་དེ་མི་དབང་སྟེ། ཁྱིམ་ལ་སོགས་པ་དེ་ཕྱོགས་གང་གིར་རྣམ་པར་ངེས་པར་བྱས་པའི་ཕྱོགས་དེ་དབང་བར་རིག་པར་བྱའོ། །གལ་ཏེ་གཅིག་གི་ཕྱོགས་སུ་བྱས་པའི་ཁྱིམ་དུ་ཕྱོགས་གཉི་ག་དུས་གཅིག་ཏུ་ཚོགས་ཏེ། རྙེད་པ་མཉམ་དུ་གྲུབ་པར་གྱུར་ན་ཡང་རྙེད་པ་དེ་དག་ཁྱིམ་དེ་ཕྱོགས་གང་གི་རྣམ་པར་ངེས་པར་བྱས་པའི་ཕྱོགས་དེ་ཉི་ཚེ་དབང་གི །ཕྱོགས་ཅིག་ཤོས་མི་དབང་སྟེ། ཕྱོགས་དེས་ཐོབ་ཏུ་ཟིན་ཀྱང་ཕྱོགས་ཅིག་ཤོས་ལ་དབུལ་བར་བྱ་དགོས་སོ། །ཇི་སྟེ་དབང་བའི་ཕྱོགས་དེས་བྱིན་ན་ནི་མི་དབང་བའི་ཕྱོགས་ཀྱིས་
ཀྱང་ཅི་བདེར་ལོངས་སྤྱད་དུ་རུང་ངོ༌། །ལ་ལ་འདི་སྙམ་དུ་དོགས་ཏེ། ཁྱིམ་དེར་ཕྱོགས་གཉི་གས་རྙེད་པ་གྲུབ་པ་ན་ཕྱོགས་ཅིག་ཤོས་ཀྱིས་ཀྱང་རྙེད་པ་གྲུབ་པ་ཡིན་ན་དེའི་སྐལ་བ་ཅིག་ཤོས་ལ་དབུལ་ཅི་དགོས་སྙམ་དུ་དོགས་པ་བསལ་བའི་ཕྱིར། ཐམས་ཅད་ཀྱིས་ཕུལ་ན་ཡང་ངོ་ཞེས་བྱ་བ་སྨྲས་ཏེ། སྤྱིན་བདག་ཐམས་ཅད་ཀྱིས་གང་གི་ཚེ་རྙེད་པ་འབུལ་བར་བྱེད་དུ་ཟིན་ཀྱང་དེའི་ཚེ་འཐོབ་པ་རྣམས་ཀྱིས་རྣམ་པར་གཞག་པ་བྱས་པ་དེའི་རྗེས་སུ་འབྲང་བས་རྙེད་པ་རྣམ་པར་གཞག་པར་རིག་པར་བྱའོ། །འོ་ན་འདི་སྐད་ཅེས་གང་གི་ཚེ་དགེ་འདུན་གྱི་དབྱེ་བ་དེའི་ཚེ་དགེ་སློང་དག་གིས་ཁྱིམ་ཆེ་གེ་མོ་ནི་ཁྱེད་ཀྱིའོ། །ཁྱིམ་ཆེ་གེ་མོ་ནི་ངེད་ཀྱིའོ་ཞེས་དེ་དང་དེ་ལྟར་ཁྲིམས་སུ་བྱ་བ་བཅས་ནས་དབྱར་གནས་པར་ཁས་ལེན་པར་བྱེད་དོ་ཞེས་གསུངས་པས། འདིར་དབྱར་གྱི་དུས་སུ་བྱེ་བ་དག་གི་ཕྱོགས་གཉིས་ཀྱི་དབང་དུ་མཛད་དེ་གསུངས་པ་མ་ཡིན་ནམ་ཞེ་ན། འདིར་དབྱར་གྱི་དུས་སུ་བྱེ་བ་དག་གི་ཕྱོགས་གཉིས་ནི་དཔེ་ཙམ་དུ་ཟད་དེ། དགུན་ལ་སོགས་པ་དག་གི་དུས་ཚིགས་གཞན་དང་སྡེ་ཚན་གཞན་དག་ལ་ཡང་འདི་རུང་བས་དེའི་ཕྱིར། འདིར་སྤྱིར་མདོར་བསྡུས་སོ། །གལ་ཏེ་ཟས་ལ་ཡང་དེ་ལྟར་རྣམ་པར་ངེས་པར་བྱས་པར་གྱུར་ན་དེའི་ཚེ་ཕྱོགས་ཅིག་ཤོས་ཀྱིས་རྗེས་སུ་མ་གནང་ན། ཕྱོགས་གཞན་གྱིས་བཟའ་བར་མི་བྱ་སྟེ། དེ་ལྟ་བས་ན་རྙེད་པ་ཐམས་ཅད་ལ་ཡང་རྗེས་སུ་གནང་བ་ཉིད་ཡིན་ན་ནི་ཉེས་པ་མེད་པར་རིག་པར་བྱའོ། །དགེ་འདུན་ཡོངས་སུ་མ་བཅད་ན་ལས་ཀྱི་མཚམས་ཀྱིས་ཡོངས་སུ་བཅད་དོ་ཞེས་བྱ་བ་ནི། སྦྱིན་བདག་གིས་འདི་སྐད་ཅེས་བདག་གིས་དགེ་འདུན་ལ་ཕུལ་ལོ་ཞེས་ཟེར་ཞིང༌། དགེ་འདུན་གང་དག་ལ་འབུལ་བ་ཡོངས་སུ་མ་བཅད་པར་རྙེད་པ་རྣམ་པར་ངེས་པར་མ་བྱས་ན། དེའི་ཚེ་ལས་ཀྱི་མཚམས་ཀྱིས་དགེ་འདུན་ཡོངས་སུ་གཅད་པར་བྱ་སྟེ། ལས་ཀྱི་མཚམས་ཞེས་བྱ་བ་ནི། ལས་བྱར་རུང་བའི་མཚམས་ཏེ། མཚམས་ཆེན་པོ་བཅད་པའི་གནས་ན་ནི་དཔག་ཚད་ཕྱེད་དང་གསུམ་གྱི་མཐའ་ཚུན་ཆད་དོ། །མཚམས་མ་བཅད་པའི་གནས་རྩིག་པས་བསྐོར་བ་ན་ནི་ཕྱིར་འི་རྩིག་པའི་མཐའ་ཚུན་ཆད་དོ། །མཚམས་མ་བཅད་པའི་རྩིག་པས་མ་བསྐོར་བའི་གནས་ན་ནི་ཝ་ཁ་ནས་ཆུ་འཛག་པའི་སྣས་གར་སླེབ་པའི་མཐའ་ཚུན་ཆད་དོ། །དཀྱིལ་འཁོར་བའི་མཚམས་གཅད་པའི་གནས་
ན་ནི་དེ་ཉིད་ཀྱི་མཐའ་ཚུན་ཆད་དོ། །གྲོང་གི་གནས་ན་ནི་གྲོང་གི་ཉེ་འཁོར་གྱི་མཐའ་ཚུན་ཆད་དོ། །མཚམས་དེ་དག་གི་ཁོངས་སུ་གཏོགས་པའི་དགེ་སློང་རྣམས་ཀྱིས་རྙེད་པ་དེ་དབང་ངོ་ཞེས་བྱ་བའི་ཐ་ཚིག་གོ །འདི་ལ་གཅིག་ལ་སོགས་པ་དེ་ནི་དེ་ཉིད་དོ་ཞེས་བྱ་བ་ནི། དགེ་འདུན་གྱི་ཕྱིར་ཕུལ་པའི་རྙེད་པ་འདི་ལ་གང་ཟག་གཅིག་ལ་སོགས་པའི་དགེ་འདུན་དུ་མ་ལངས་པ་མཚམས་གཅིག་གི་ནང་དུ་གཏོགས་པ་རྣམས་ནི་དགེ་འདུན་ཉིད་དང་འདྲ་སྟེ། དེ་དག་རྙེད་པ་དེ་དབང་ངོ་ཞེས་བྱ་བའི་ཐ་ཚིག་གོ །དཔེར་ན་དགེ་སློང་སྐྱེས་པ་འམ་བུད་མེད་འགའ་ཞིག་ལ་བརྟེན་ནས་དབྱར་གནས་པར་ཁས་ལེན་ཅིང་གནས་དེ་ན་བུད་མེད་ལ་སོགས་པས་དགེ་འདུན་གྱི་ཕྱིར་རྙེད་པ་འབུལ་བར་བྱེད་ན་མཚམས་དེའི་ནང་དུ་གཏོགས་པ་རྣམས་ཀྱི་རྙེད་པ་དེ། གལ་ཏེ་བདག་གིས་འདི་ཉིད་ཀྱི་དགེ་འདུན་ལ་ཕུལ་ལོ་ཞེས་ཟེར་ལ། གལ་ཏེ་དེ་ན་གང་ཟག་གཞན་མེད་ན་ནི་རྙེད་པ་དེ་མཚམས་ཀྱིས་བསྟབས་པ་ཡིན་ནོ། །གལ་ཏེ་འདི་ཁྱོད་ཁོ་ན་ལ་ཕུལ་ལོ་ཞེས་ཟེར་ན་ནི་རྙེད་པ་དེ་རྟེན་གྱིས་བསྟབས་པ་ཡིན་ཏེ། རྟེན་གྱི་དབང་གིས་གྲུབ་ཅེས་བྱ་བའི་ཐ་ཚིག་གོ །ཆོས་ཀྱི་རྙེད་པ་ནི་དེ་སྨྲ་བ་རྣམས་དབང་བ་ཉིད་ཡིན་ནོ་ཞེས་བྱ་བ་ནི། ཆོས་ལ་ཕུལ་བའི་རྙེད་པ་ན་ཆོས་སྨྲ་བ་རྣམས་དབང་བ་ཉིད་ཡིན་པའོ། །འདུལ་བ་བྱེ་བྲག་ཏུ་བཤད་པ་དག་ལས་མྱ་ངན་ལས་འདས་པ་ལ་ཕུལ་བ་ནི་མཆོད་རྟེན་གྱི་དང་འདྲ་བར་གཞག་གོ་ཞེས་གསུངས་པས། དེའི་ཕྱིར་འདི་ནི་བཤད་པ་ལ་སོགས་པའི་ཆོས་ཀྱི་རྙེད་པ་ཡིན་པར་རིག་པར་བྱའི། མྱ་ངན་ལས་འདས་པའི་ཆོས་ཀྱི་རྙེད་པ་ནི་མ་ཡིན་ནོ། །གཙུག་ལག་གི་ཚིགས་སུ་བཅད་པ་གཅིག་འཛིན་པ་ནི་འདིར་དེ་ཉིད་ཀྱི་མཐའ་ཡིན་ནོ་ཞེས་བྱ་བ་ལ། གཙུག་ལག་ཅེས་བྱ་བ་ནི། དྲང་སྲོང་གིས་གསུངས་པ་སྟེ། དེའི་ཚིགས་སུ་བཅད་པ་གཅིག་འཛིན་པ་ནི་ཆོས་ཀྱི་རྙེད་པ་དབང་བ་འདི་ལ་ཆོས་སྨྲ་བ་དེ་ཉིད་ཀྱི་ཕྱིར་མཐའ་ཡིན་ནོ། །མདོ་འདི་ནི་རྩོད་པའི་གཞིའི་གཞུང་ལས་བྱུང་ངོ༌། །མཚན་མི་མཐུན་པའི་ཤི་བའི་ཡོ་བྱད་ལ་ཅིག་ཤོས་ཡོད་ན་མི་དབང་བ་ཉིད་དོ་ཞེས་བྱ་བ་ལ། མཚན་མ་མཐུན་པ་ཞེས་བྱ་བ་ནི་དགེ་སློང་དང་དགེ་ཚུལ་གྱི་རྒྱུད་དུ་གཏོགས་པའི་ཤི་བའི་ཡོ་བྱད་དེ་ལ་ནི། དགེ་སློང་མ་དང་དགེ་སློབ་མ་དང་དགེ་ཚུལ་མ་དག་མི་དབང་ངོ༌། །དེ་བཞིན་དུ་དགེ་སློང་མ་དང་དགེ་སློབ་མ་དང་
དགེ་ཚུལ་མའི་རྒྱུད་དུ་གཏོགས་པའི་ཤི་པའི་ཡོ་བྱད་དེ་ལ་ཡང་དགེ་སློང་དང་དགེ་ཚུལ་དག་མི་དབང་བ་ཉིད་ཡིན་ནོ། །ཅི་ཐམས་ཅད་དུ་ཡང་ཞེ་ན་མ་ཡིན་ཏེ། དེའི་ཕྱིར་ཅིག་ཤོས་ཡོད་ན་ཞེས་བྱ་བ་སྨྲས་ཏེ། ཅིག་ཤོས་ཞེས་བྱ་བ་མཚན་མཐུན་པ་ཡོད་ན་མཚན་མི་མཐུན་པ་མི་དབང་ངོ༌། །འདི་སྐད་བསྟན་ཏེ། གང་ན་མཚན་མཐུན་པ་ཡོད་པ་དེ་ན་མཚན་མི་མཐུན་པ་མི་དབང་ངོ༌། །གང་ན་མཚན་མཐུན་པ་མེད་པ་དེ་ན་ནི་མཚན་མི་མཐུན་པ་ཡང་དབང་ངོ༌། །མདོ་འདི་ནི་གླེང་གཞིའི་གཞུང་ལས་འབྱུང་ངོ༌། །གནས་ནས་ཕྱུང་བའི་ཡང་དེ་བཞིན་ནོ་ཞེས་བྱ་བ་ནི། གནས་ནས་ཕྱུང་བའི་རྒྱུད་དུ་གཏོགས་པའི་ཤི་བའི་ཡོ་བྱད་ལ་ཡང་གནས་ནས་མ་ཕྱུང་བ་ཅིག་ཤོས་ཡོད་ན་གནས་ནས་ཕྱུང་བ་མི་དབང་ལ། གནས་ནས་མ་ཕྱུང་བ་མེད་ན་ནི་གནས་ནས་ཕྱུང་བ་དབང་ངོ༌། །མེད་ན་ཡང་ངོ་ཞེས་བྱ་བ་ནི། མ་སྤངས་པའི་རྒྱུད་དུ་གཏོགས་པའི་ཤི་བའི་ཡོ་བྱད་ལ་ནི་མ་སྤངས་པ་ཅིག་ཤོས་མེད་ན་ཡང་སྤངས་པ་མི་དབང་བའོ། །ཅི་དུས་ཐམས་ཅད་དུ་འམ་ཞེ་ན་མ་ཡིན་ཏེ། དེའི་ཕྱིར་རྒྱུ་ལས་སེམས་མ་ལོག་ནའོ་ཞེས་བྱ་བ་སྨྲས་ཏེ། ལྟུང་བ་མ་མཐོང་བ་ལ་སོགས་པའི་རྒྱུ་གང་གིས་དེ་གནས་ནས་དབྱུང་བའི་ལས་བྱས་པའི་རྒྱུ་དེ་ལས་སེམས་མ་ལོག་ཅིང་བཟློག་པར་མ་བྱས་པ་དེ་གནས་ནས་མ་ཕྱུང་བའི་རྒྱུད་དུ་གཏོགས་པའི་ཤི་བའི་ཡོ་བྱད་ལ་གནས་ནས་མ་ཕྱུང་བ་ཅིག་ཤོས་མེད་ན་ཡང་མི་དབང་གི །རྒྱུ་ལས་སེམས་ལོག་ན་ནི་དབང་ངོ༌། །འདིར་གཞུང་ནི་གང་དབང་ལགས། དེ་དག་ལས་གང་གིས་དང་པོར་སྡིག་པ་ཅན་གྱི་ལྟ་བའི་རྣམ་པ་སྤོང་བར་བྱེད་པའོ་ཞེས་གསུངས་པ་ཡིན་ནོ། །དེའི་དེ་མནོད་པར་བྱ་བ་ཉིད་ལ་དེ་ནི་ཐ་དད་པ་ཉིད་མ་ཡིན་ནོ་ཞེས་བྱ་བ་ནི། སྤངས་པ་དེའི་ཤི་བའི་ཡོ་བྱད་དེ་མནོད་པར་བྱ་བ་ཉིད་ལས། སྤངས་པ་དེ་ནི་མ་སྤངས་པ་དང་ཐ་དད་པ་ཉིད་མ་ཡིན་ནོ། །འདི་སྐད་བསྟན་ཏེ། སྤངས་པ་དེ་དག་གི་ཤི་བའི་ཡོ་བྱེད་དེ་དག་མནོད་པར་བྱ་བ་ཉིད་ལ་སྤངས་པ་དེ་དག་ནི་མ་སྤངས་པ་དག་དང་ཐ་དད་པ་ཉིད་མ་ཡིན་པའི་ཕྱིར། སྤངས་པའི་ཤི་བའི་ཡོ་བྱད་པ་ནི། སྤངས་པ་ཅིག་ཤོས་ཡོད་ཀྱང་མ་སྤངས་པ་ཡང་དབང་སྟེ། སྤངས་པ་ནི་དགེ་འདུན་ལས་ཐ་དད་པ་ཉིད་མ་ཡིན་པའི་ཕྱིར་རོ། །ཐ་དད་པའི་ལ་ནི་ཐ་དད་པ་ཉིད་དོ་ཞེས་བྱ་བ་འདི་ནི། །ཁས་བླངས་པ་དང་ཁས་མ་བླངས་པའི་ཕྱོགས་ཐ་དད་པའི་ཤི་
བའི་ཡོ་བྱད་ལ་ནི་ཕྱོགས་དེ་གཉིས་ཐ་དད་པ་ཡིན་པས། ཕྱོགས་ཐ་དད་པའི་ཤི་བའི་ཡོ་བྱད་བླང་བར་བྱ་བ་ཉིད་ལ་ཐ་དད་པ་ཡིན་ཏེ། གཅིག་ལ་གཅིག་མི་དབང་པོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། གཞན་གྱི་ཕྱོགས་སུ་གཏོགས་པའི་ཤི་པའི་ཡོ་བྱད་ལ་གཞན་གྱི་ཕྱོགས་སུ་གཏོགས་པའི་གང་ཟག་མི་དབང་བས་ཆོས་དང་མཐུན་པའི་ཕྱོགས་སུ་གཏོགས་པའི་ཤི་པའི་ཡོ་བྱད་ལ་ཡང༌། ཆོས་མ་ཡིན་པ་དང་མཐུན་པའི་ཕྱོགས་སུ་གཏོགས་པ་མི་དབང་ལ། ཆོས་མ་ཡིན་པ་དང་མཐུན་པའི་ཕྱོགས་སུ་གཏོགས་པའི་ཤི་བའི་ཡོ་བྱད་ལ་ཡང་ཆོས་དང་མཐུན་པའི་ཕྱོགས་སུ་གཏོགས་བ་མི་དབང་ངོ༌། །འདིར་གཞུང་ནི་ཁས་བླངས་པ་རྣམས་ཀྱི་གནས་སུ་ཁས་མ་བླངས་པའི་དགེ་ཚུལ་འོངས་ཏེ་དུས་བྱས་པར་གྱུར་ན་ཞེས་བྱ་བ་ལ་སོགས་པ་གསུངས་པ་ཡིན་ནོ། །ཆོས་དང་མཐུན་པའི་ཕྱོགས་ཁས་བླངས་པ་ནི་ཁས་བླངས་པ་ཡིན་ལ། ཆོས་མ་ཡིན་པ་དང་མཐུན་པའི་ཕྱོགས་ཁས་བླངས་པ་ནི་ཁས་མ་བླངས་པ་ཡིན་པར་རིག་པར་བྱའོ། །རབ་ཏུ་བྱུང་བ་དང་ཚངས་པ་མཚུངས་པར་སྤྱོད་པ་ལས་གཞན་པ་དག་དེ་མི་དབང་བ་ཉིད་ཡིན་ནོ་ཞེས་བྱ་བ་ནི། རབ་ཏུ་བྱུང་བ་དང་ཚངས་པ་མཚུངས་པར་སྤྱོད་པ་ལས་གཞན་པ་ཉེ་དུ་ལ་སོགས་པ་དང་རྒྱལ་པོ་ཡང་རབ་ཏུ་བྱུང་བའི་ཤི་བའི་ཡོ་བྱད་དེ་མི་དབང་བ་ཉིད་ཡིན་ཏེ། དེ་ནི་རབ་ཏུ་བྱུང་བ་དང་ཚངས་པ་མཚུངས་པར་སྤྱོད་པ་དག་ཁོ་ན་དབང་བ་ཡིན་ནོ། །འདིར་རབ་ཏུ་བྱུང་བ་ཞེས་སྨོས་པ་ནི་དགེ་ཚུལ་དང་དགེ་ཚུལ་མ་དང་དགེ་སློབ་མ་ཡང་དབང་བ་ཉིད་དུ་བསྟན་པའི་ཕྱིར་རོ། །ཚངས་པ་མཚུངས་པར་སྤྱོད་པ་ཞེས་སྨོས་པ་ནི། གཞན་མུ་སྟེགས་ཅན་བསལ་བའི་ཕྱིར་རོ། །གསོལ་བ་འམ་དང་པོ་དང་ཐམས་ཕྱིན་གྱིས་བརླབས་ཟིན་པ་ནི་འོངས་པ་ནི་མི་དབང་ངོ་ཞེས་བྱ་བ་ནི། ཤི་པའི་ཡོ་བྱད་ལ་དགེ་འདུན་གྱིས་གསོལ་བས་བྱིན་གྱིས་བརླབས་སུ་ཟིན་ཀྱང་རུང༌། དང་པོ་དང་ཐ་མས་བྱིན་གྱིས་བརླབས་ཟིན་ཀྱང་རུང་སྟེ། དེའི་འོག་ཏུ་རབ་ཏུ་བྱུང་བ་ཚངས་པ་མཚུངས་པར་སྤྱོད་པ་འོངས་པ་དག་ནི་མི་དབང་བ་ཉིད་ཡིན་ནོ། །བྱིན་གྱིས་བརླབས་པ་དེ་གཉིས་མ་ཟིན་པའི་སྐབས་སུ་འོངས་པ་ནི་དབང་ངོ༌། །དང་པོར་ཤི་བའི་བསོད་ནམས་སུ་ཡོན་བཤད་པ་བྱས་ནས་ཕྱིས་བྱིན་གྱིས་བརླབ་པར་བྱའོ། །གལ་ཏེ་ཡོན་བཤད་པ་མ་བྱས་པར་བྱིན་གྱིས་
བརླབས་པ་དེ་གཉིས་བྱེད་ན་ནི། བྱིན་གྱིས་བརླབས་པ་དེས་ཕྱིས་འོངས་པ་དག་སྐལ་བ་མི་དབང་བ་ཉིད་དུ་ཡང་མི་འགྱུར་ལ་བྱིན་གྱིས་བརླབས་པ་དེ་ཡང་མི་འཆགས་སོ། །ཡོན་བཤད་པའི་འོག་ཏུ་བྱིན་གྱིས་རློབ་ན་ནི་བྱིན་གྱིས་བརླབས་པ་དེ་ཡང་འཆགས་ལ་ཕྱིས་འོངས་པ་དག་ཀྱང་སྐལ་བ་མི་དབང་པ་ཉིད་དུ་འགྱུར་རོ། །གསོལ་བས་བྱིན་གྱིས་བརླབ་པའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། འདི་ལྟར་གནས་འདིར་དགེ་སློང་ཉེ་དགའ་གུམ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་ཉེ་དགའ་གུམ་པའི་རྫས་བགོ་བར་བགྱི་བ་གུམ་པའི་ཡོ་བྱད་ཆོས་གོས་དང་ཆོས་གོས་མ་ལགས་པ་གདའ་བ་དང་མི་གདའ་བ་བྱིན་གྱིས་བརླབ་པོ། །འདི་ནི་གསོལ་པའོ་ཞེས་གསུངས་པ་ཡིན་ཏེ། འདིར་ཉེ་དགའ་ཞེས་སྨོས་པ་ནི། གླེང་གཞིའི་དབང་གིས་གསུངས་པར་ཟད་དེ། ལས་བྱ་བའི་སྐབས་སུ་ནི་གང་ཟག་གང་ཤི་བའི་ཡོ་བྱད་བྱིན་གྱིས་བརླབ་པར་བྱ་བ་དེ་ཉིད་ཀྱི་མིང་ནས་བརྗོད་པར་བྱའོ། །དང་པོ་དང་ཐ་མས་བྱིན་གྱིས་བརླབ་པ་བསྟན་པའི་ཕྱིར། དེ་ལས་འགའ་ཞིག་དགེ་འདུན་གྱི་རྒན་པ་དང་གསར་བུ་གཉིས་ལ་བྱིན་པ་ནི་དེ་ཞེས་བྱའོ་ཞེས་བྱ་བ་སྨྲས་ཏེ། དེ་ལས་ཞེས་བྱ་བ་ནི། ཤི་བའི་ཡོ་བྱད་དེ་ལས་སོ། །འགའ་ཞིག་ཅེས་བྱ་བ་ནི་དངོས་པོ་འགའ་ཞིག་གོ །རྒན་པ་ཞེས་བྱ་བ་ནི་གྲལ་གཙོའོ། །གསར་བུ་ཞེས་བྱ་བ་ནི་གྲལ་ཐ་མ་ན་འདུག་པ་སྟེ། དེ་གཉིས་ལ་ཤི་བའི་ཡོ་བྱད་དེ་ལས་དངོས་པོ་སྣ་རེ་ཞིག་སྦྱིན་པ་ནི་དང་པོ་དང་ཐ་མས་བྱིན་གྱིས་བརླབ་པ་དེ་ཞེས་བྱའོ། །འདིར་གཞུང་ནི་ཡོ་བྱད་ཅིག་བཙོངས་ཏེ་ཅུང་ཞིག་དགེ་འདུན་གྱི་རྒན་པ་དང་དགེ་འདུན་གྱི་གསར་བུ་ལ་བྱིན་ནས་ཞེས་གསུངས་པ་ཡིན་ནོ། །དེ་ལ་དང་པོ་དང་ཐ་མ་ཞེས་བྱ་བ་ནི། དགེ་འདུན་གྱི་རྒན་པ་ནི་དང་པོ་ཡིན་ལ། དགེ་འདུན་གྱི་གསར་བུ་ནི་ཐ་མ་ཡིན་ཏེ། ཤི་བའི་ཡོ་བྱད་ཀྱི་གནས་དེར་ཚོགས་པའི་དགེ་འདུན་ཚུལ་བཞིན་དུ་དངར་བ་རྣམས་ལས་དང་པོ་དང་ཐ་མ་དེ་གཉིས་ལ་ཤི་བའི་ཡོ་བྱད་དེ་ལས་དངོས་པོ་སྣ་རེ་ཕུལ་ན་ཆོ་ག་དེ་ཉིད་ཀྱིས་བྱིན་གྱིས་བརླབས་པ་ཡིན་ནོ། །ཡང་རྣམ་པ་གཅིག་ཏུ་ན་དང་པོ་དང་ཐ་མ་ཞེས་བྱ་བ། ཕྱོགས་གཅིག་དང་ཚིག་གཅིག་གིས་ཀྱང་བསྟན་ཏེ། ཐ་མ་ཞེས་བྱ་བ་ནི། རྒན་རབས་ནས་རྗེས་སུ་མཐུན་པར་བགྲངས་ནས་གསར་བུ་ཐ་མ་
ཡིན་པ། གཞོན་རབས་ནས་རྗེས་སུ་མི་མཐུན་པར་བགྲངས་ན་རྒན་པ་ཐ་མ་ཡིན་པས། དེ་ལྟར་ན་རྒན་པ་དང་གསར་བུ་གཉི་ག་ཐ་མ་ཞེས་བྱའོ། །དང་པོ་ཞེས་བྱ་བ་ནི་རྒན་རབས་ནས་རྗེས་སུ་མཐུན་པར་བགྲངས་ཏེ་གསར་བུ་ཐ་མར་བྱས་ན་དེ་ལ་ཤི་བའི་ཡོ་བྱད་སྣ་གཅིག་དང་པོར་སྤྱིན་དགོས་པས་དེ་དང་པོ་ཡིན་ལ། གཞོན་རབས་ནས་རྗེས་སུ་མི་མཐུན་པས་བགྲངས་ཏེ། རྒན་པ་ཐ་མར་བྱས་ན་དེ་ལ་ཡང་ཤི་བའི་ཡོ་བྱད་སྣ་གཅིག་དང་པོར་སྦྱིན་དགོས་པས། དེ་ལྟར་ན་རྒན་པ་དང་གསར་བུ་གཉི་ག་དང་པོ་ཞེས་བྱ་སྟེ། དེ་ནི་དང་པོ་དང་ཐ་མས་བྱིན་གྱིས་བརླབ་པར་བྱ་བ་ཡིན་ནོ། །གང་ན་བྱིན་གྱིས་བརླབ་པ་བྱ་བ་འདུག་པ་དེ་ནི་མཚམས་སུ་གཏོགས་པ་རྣམས་བྱིན་གྱིས་རློབ་པར་བྱེད་པ་ཡིན་ནོ་ཞེས་བྱ་བ་ནི། གནས་གང་ན་བྱིན་གྱིས་བརླབ་པར་བྱ་བའི་དངོས་པོ་འདུག་པ་དེའི་མཚམས་སུ་གཏོགས་པའི་རབ་ཏུ་བྱུང་བ་རྣམས་ནི་དེ་བྱིན་གྱིས་རློབ་པར་བྱེད་པ་ཡིན་ཏེ། དེ་དག་གི་དངོས་པོ་དེ་བྱིན་གྱིས་བརླབ་པར་བྱའོ་ཞེས་བྱ་བའི་ཐ་ཚིག་གོ །འདི་ལ་ཤི་བའི་གནས་ཉིད་ནི་རྒྱུ་མ་ཡིན་ནོ་ཞེས་བྱ་བ་ནི། ཤི་བའི་ཡོ་བྱད་བྱིན་གྱིས་བརླབ་པར་བྱ་བ་འདི་ལས། ཤི་བའི་གནས་ཉིད་ནི་རྒྱུ་མ་ཡིན་ཏེ། འདིར་ཤི་བ་དེའི་དབང་གིས་མཚམས་དེ་ན་གནས་པའི་དགེ་སློང་རྣམས་ཀྱིས་གནས་གཞན་ན་ཤི་བའི་ཡོ་བྱད་འདུག་པ་བྱིན་གྱིས་བརླབ་ཏུ་མ་རུང་བ་ཉིད་ཡིན་ལ། གནས་གཞན་དུ་ཤི་བ་དེའི་ཡོ་བྱད་མཚམས་འདི་ན་འདུག་པ་ནི་མཚམས་འདི་ན་གནས་པའི་དགེ་སློང་རྣམས་ཀྱིས་བྱིན་གྱིས་བརླབ་ཏུ་རུང་བ་ཉིད་དོ། །མཚམས་ཀྱི་བར་ན་འདུག་པ་ལ་ལུས་སམ་གཞན་གྱིས་རེག་པས་ཇི་ཙམ་ནོན་པ་དེར་གཏོགས་པ་རྣམས་སོ་ཞེས་བྱ་བ་ལ། མཚམས་ཀྱི་བར་ཞེས་བྱ་བ་ནི། མཚམས་གཞན་དང་གཞན་གྱི་བར་རོ། །དེ་དག་ན་བྱིན་གྱིས་བརླབ་པར་བྱ་བ་འདུག་པ་ནི་མཚམས་ཀྱི་བར་ན་འདུག་པའོ། །མཚམས་ཀྱི་བར་ན་འདུག་པའི་ཤི་བའི་ཡོ་བྱད་དེ་ལ་ཤི་བ་དེའི་ལུས་ཀྱིས་རེག་གམ་ཁྲི་དང་ཁྲིའུ་ལ་སོགས་པ་གཞན་གྱིས་རེག་པའི་ཤི་བའི་ཡོ་བྱད་བྱིན་གྱིས་བརླབ་པར་བྱ་བ་དེས་མཚམས་ཇི་ཙམ་ནོན་ཅིང་ཁྱབ་པའི་མཚམས་དེར་གཏོགས་པའི་དགེ་སློང་རྣམས་བྱིན་གྱིས་རློབ་པར་བྱེད་པ་ཡིན་ཏེ། མཚམས་དེ་ན་གནས་ཤིང་འཁོད་པ་དེ་དག་གིས་བྱིན་གྱིས་བརླབ་པར་བྱའི། མཚམས་གཞན་ན་གནས་པ་དག་གིས་ནི་མ་ཡིན་ནོ། །དེ་ལྟ་བས་ན་འདི་ལ་ནི་
བྱིན་གྱིས་བརླབ་པར་བྱ་བའི་རྫས་ཀྱི་དབང་གིས་རྣམ་པར་གཞག་གི་ཤི་བའི་རོའི་དབང་གིས་མ་ཡིན་ནོ། །གང་ན་ནོར་དང་འདྲ་བ་དེ་འདུག་པ་དེའི་ཁོངས་སུ་ཡོ་བྱད་གཏོགས་པ་ཉིད་ཡིན་ནོ་ཞེས་བྱ་བ་ནི། མཚམས་གང་ན་ནོར་དང་འདྲ་བ་དེ་འདུག་པའི་མཚམས་དེའི་ཁོངས་སུ་ཤི་བའི་ཡོ་བྱད་མཚམས་གཞན་ན་འདུག་པ་ཡང་གཏོགས་པས། དེས་ན་མཚམས་གང་ན་ནོར་དང་འདྲ་བ་དེ་འདུག་པའི་མཚམས་དེའི་ཁོངས་སུ་གཏོགས་པའི་དགེ་འདུན་གྱིས་མཚམས་དེ་ཉིད་ཀྱི་ནང་དུ་ནོར་དང་འདྲ་བ་དེ་བྱིན་གྱིས་བརླབས་ན་ཤི་བའི་ཡོ་བྱད་མཚམས་གཞན་ན་འདུག་པའི་ཆོས་གོས་དང་ཆོས་གོས་མ་ཡིན་པ་སྣང་བ་དང་མི་སྣང་བ་ཐམས་ཅད་བྱིན་གྱིས་བརླབ་པར་འགྱུར་རོ་ཞེས་བྱ་བར་སྦྱར་རོ། །ནོར་དང་འདྲ་བར་ཞེས་བྱ་བ་ནི། ཁྱིམ་པ་འམ་རབ་ཏུ་བྱུང་བ་གང་གི་ལག་ཏུ་གཞག་ཤིང་ཤི་བའི་ཡོ་བྱད་བྱིན་གྱིས་བརླབ་པར་བྱ་བ་གཞག་པའི་ཁྱིམ་པའམ་རབ་ཏུ་བྱུང་བ་དེ་ལ་བྱ་སྟེ། དེ་ནི་ནོར་དེའི་དངོས་པོ་དང་འདྲ་བའམ་དེའི་གཟུགས་བརྙན་ནམ། དེའི་རིང་ལུགས་ལྟ་བུ་ཡིན་པའི་ཕྱིར་རོ། །འདི་སྐད་བསྟན་ཏེ། འདི་ལྟར་གནས་གཞན་ན་ནོར་དང་འདྲ་པའི་གང་ཟག་དེ་འདུག་ན། དེས་གཞན་ཤི་བའི་ནོར་བྱིན་གྱིས་བརླབ་པར་བྱ་བདག་གནས་གཞན་དུ་བཞག་ཏུ་ཟིན་ཀྱང་ནོར་དང་འདྲ་བའི་གང་ཟག་དེ་འདུག་པའི་གནས་དེ་ཉིད་ན་བྱིན་གྱིས་བརླབ་པར་བྱ་བའི་ནོར་དེ་ཡང་འདུག་པ་ཉིད་དང་འདྲ་བར་བསྟན་པར་བྱ་སྟེ། དེས་ན་གནས་གང་ན་ནོར་དང་འདྲ་པའི་གང་ཟག་དེ་འདུག་པའི་གནས་དེ་ཉིད་དུ་ནོར་དང་འདྲ་པའི་གང་ཟག་དེ་ཉིད་བྱིན་གྱིས་བརླབས་ན། དེས་གཞན་ཤི་པའི་ཡོ་བྱད་ཆོས་གོས་དང་ཆོས་གོས་མ་ཡིན་པ་སྣང་བ་དང་མི་སྣང་བ་གནས་གཞན་དུ་གཞག་པ་ཐམས་ཅད་བྱིན་གྱིས་བརླབ་པ་ཉིད་དུ་འགྱུར་རོ། །དེའི་ཕྱིར་དེའི་ནོར་དང་འདྲ་བས་གཞན་ན་འདུག་པ་བྱིན་གྱིས་བརླབ་པར་བྱའོ་ཞེས་བྱ་བ་སྨྲས་ཏེ། དགེ་སློང་རྣམས་ཀྱིས་ནོར་དང་འདྲ་པའི་གང་ཟག་དྲུང་ན་འདུག་པས་གཞན་ཤི་བའི་ཡོ་བྱད་དེ་ལ་གཞག་པ་ཐག་རིང་པོ་ན་འདུག་པ་གསོལ་བ་འབའ་ཞིག་གི་ལས་ཀྱིས་བྱིན་གྱིས་བརླབ་པར་བྱ་བའོ། །འདིའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། འདི་ལྟར་གནས་འདིར་དགེ་སློང་གྲེ་སྐྱེས་གུམ་པར་གྱུར་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་
བར་མཛོད་ཅིག་དང༌། དགེ་འདུན་གྱིས་དགེ་སློང་ཀུན་དགའ་བོ་ནོར་དང་འདྲ་བས་དགེ་སློང་གྲེ་སྐྱེས་གུམ་པའི་རྫས་བགོ་བར་བགྱི་བ། གུམ་པའི་ཡོ་བྱད་ཆོས་གོས་དང་ཆོས་གོས་མ་ལགས་པ་གདའ་བ་དང་མི་གདའ་བ་བྱིན་གྱིས་བརླབ་བོ། །འདི་ནི་གསོལ་བའོ་ཞེས་གསུངས་པ་ཡིན་ནོ། །བསྐུར་བ་བསྐུར་པར་བྱ་བ་མ་སྤངས་པ་ནི་དེ་ཉིད་ཡིན་ནོ་ཞེས་བྱ་བ་ནི། བསྐུར་བའི་དངོས་པོ་གང་ཡང་རུང་བ་གང་ལ་བསྐུར་བར་བྱ་བའི་གང་ཟག་དེས་མ་སྤངས་པ་ནི་དེ་ཉིད་ཡིན་ཏེ། བསྐུར་པར་བྱ་བའི་དབང་བ་ཉིད་ཡིན་ནོ། །འདི་སྐད་བསྟན་ཏེ། གལ་ཏེ་སྐུར་བར་བྱེད་པས་བསྐུར་བར་བྱ་བ་ལ་དངོས་པོ་ཞིག་སྐུར་པར་བྱེད་ཅིང༌། བསྐུར་བར་བྱ་བ་དེས་ཀྱང་དངོས་པོ་དེ་སྤོང་བར་མི་བྱེད་ན། དངོས་པོ་དེ་བསྐུར་བར་བྱ་བ་དབང་བར་རིག་པར་བྱའོ། །དེ་ན་སྐབས་དེར་སྐུར་བ་བྱེད་པ་དང་བསྐུར་བར་བྱ་བ་གཉི་ག་ཤི་བར་གྱུར་ན་དངོས་པོ་དེ་སྐུར་བར་བྱེད་པ་ཉིད་ཤི་བའི་ཡོ་བྱད་དུ་འགྱུར་རོ། །སྤངས་པ་ནི་སྐུར་བར་བྱེད་པ་ཉིད་ཀྱིའོ་ཞེས་བྱ་བ་ནི། བསྐུར་བར་བྱ་བའི་གང་ཟག་དེས་སྤངས་པ་ནི་སྐུར་བར་བྱེད་པ་ཉིད་ཀྱི་རྒྱུད་དུ་དབང་བ་ཡིན་པར་རིག་པར་བྱ་སྟེ། དེས་ན་སྐབས་དེར་སྐུར་བར་བྱེད་པ་དང་བསྐུར་བར་བྱ་བ་གཉི་ག་ཤི་བར་གྱུར་ན་དངོས་པོ་དེ་སྐུར་བར་བྱེད་པ་ཉིད་ཀྱི་ཤི་བའི་ཡོ་བྱད་དུ་འགྱུར་རོ། །དེས་སྤངས་ན་ཡང་ངོ་ཞེས་བྱ་བ་ནི། སྐུར་བར་བྱེད་པ་དེས་དངོས་པོ་དེ་སྤངས་ན་ཡང་འོན་ཀྱང་དངོས་པོ་དེ་སྐུར་བར་བྱེད་པ་དེ་ཉིད་དབང་པར་འགྱུར་རོ། །འདི་སྐད་བསྟན་ཏེ། སྐུར་པར་བྱེད་པས་བསྐུར་བར་བྱ་བ་ལ་བསྐུར་བའི་དངོས་པོ་དེ་བསྐུར་བར་བྱ་བ་དེས་སྤངས་པར་གྱུར་པ། སྐུར་བར་བྱེད་པ་དེས་ཐོས་ནས་དེས་ཀྱང་བདག་གིས་སྔར་སྤངས་ཟིན་པ་འདིས་བདག་ལ་ཅི་ཞིག་བྱ་ཞེས་ཡང་སྤངས་པར་གྱུར་དུ་ཟིན་ཀྱང༌། དངོས་པོ་དེ་སྐུར་བར་བྱེད་པ་ཉིད་དབང་ངོ༌། །དེས་ན་སྐབས་དེར་སྐུར་བར་བྱེད་པ་དང་བསྐུར་བར་བྱ་བ་གཉི་ག་ཤི་བར་གྱུར་ན་དངོས་པོ་དེ་སྐུར་བར་བྱེད་པ་ཉིད་ཀྱི་ཤི་བའི་ཡོ་བྱད་དུ་འགྱུར་རོ། །འདིར་གཞུང་ནི་དགེ་སློང་གིས་དགེ་སློང་ལ་ཆོས་གོས་དག་བསྐུར་ནས། གང་ལ་བསྐུར་བ་དེས་སྤངས་ནས་གང་གིས་བསྐུར་བ་དེས་ཀྱང་སྤངས་ན། གང་ལ་བསྐུར་བ་དེ་ཡིར་བྱིན་གྱིས་རློབ་པ་ནི་བྱིན་གྱིས་མ་བརླབས་པ་ཡིན་ནོ། །གང་གིས་བསྐུར་བ་དེ་ཡི་ཕྱིར་བྱིན་གྱིས་རློབ་པར་བྱེད་ན་ནི་བྱིན་གྱིས་བརླབས་པ་ཡིན་ཏེ།
ལེགས་པར་བྱིན་གྱིས་བརླབས་པ་ཡིན་ནོ་ཞེས་གསུངས་པ་ཡིན་ཏེ། དེ་ཤི་བའི་ཡོ་བྱད་དུ་བྱིན་གྱིས་བརླབས་པ་ཉིད་ཀྱིས་སྐུར་བར་བྱེད་པ་དེ་ཉིད་ཀྱིར་བྱིན་གྱིས་བརླབས་པར་བྱའོ་ཞེས་བྱ་བའི་ཐ་ཚིག་གོ །ཕྱི་རོལ་དུ་ཡང་མཚམས་ཀྱི་ནང་དུ་འདུ་ཤེས་པ་དག་གིས་འབའ་ཞིག་གིས་བྱིན་གྱིས་རློབ་པ་མི་འཆགས་སོ་ཞེས་བྱ་བ་ནི། མཚམས་ཀྱི་ཕྱི་རོལ་དུ་མཚམས་ཀྱི་ནང་དུ་འདུ་ཤེས་པའི་གང་ཟག་རྣམས་ཀྱིས་འབའ་ཞིག་གིས་ཞེས་བྱ་བ་མི་མཐུན་པ་དག་གིས་བྱིན་གྱིས་རློབ་པར་བྱེད་ན་མི་འཆགས་སོ། །ཡང་ཞེས་བྱ་བའི་སྒྲས་ནི་མཚམས་ཀྱི་ནང་དུ་ཡང་མི་འཆགས་ཏེ། འབའ་ཞིག་གིས་བྱིན་གྱིས་རློབ་པ་ནི་མི་མཐུན་པ་ཉིད་ཡིན་པའི་ཕྱིར་རོ། །འདི་སྐད་བསྟན་ཏེ། མཚམས་ཀྱི་ཕྱི་རོལ་ལམ་མཚམས་ཀྱི་ནང་དུ་འདུ་ཤེས་པའི་གང་ཟག་རྣམས་ཀྱིས་མི་མཐུན་པས་བྱིན་གྱིས་རློབ་པ་མི་འཆགས་ན། མཚམས་ཀྱི་ཕྱི་རོལ་དུ་འདུ་ཤེས་པ་དག་གིས་ལྟ་མི་འཆགས་པ་སྨོས་ཀྱང་ཅི་དགོས་ཏེ་མི་འཆགས་པ་མི་བྱའོ་ཞེས་སྤྱིར་བསྟན་པ་དེས་འདི་ལ་ཉེས་བྱས་སུ་ཤེས་པར་བྱའོ། །ཡིད་གཉིས་ཟ་ན་ཡང་ཡིད་གཉིས་ནི་འདུ་ཤེས་དང་འདྲའོ་ཞེས་སྤྱིར་བསྟན་པ་དེས་དེ་ལ་ཡང་ཉེས་བྱས་སུ་འགྱུར་བར་ཤེས་པར་བྱའོ། །ཕྱི་རོལ་དུ་མཚམས་ཀྱི་ནང་དུ་འདུ་ཤེས་པ་འམ། ཡིད་གཉིས་ཟ་བས་རྐུ་སེམས་ཀྱིས་བྱིན་གྱིས་རློབ་པར་བྱེད་ན། རྐུ་སེམས་དེ་ལ་ཉེས་པ་སྦོམ་པོར་འགྱུར་རོ། །མཚམས་ཀྱི་ནང་དུ་རྐུ་སེམས་ཀྱིས་བྱིན་གྱིས་རློབ་པར་བྱེད་ན། བརྐུས་པའི་མདུན་རོལ་དུ་དེ་ལ་ཡང་ཉེས་པ་སྤོམ་པོར་འགྱུར་རོ། །བརྐུས་པ་ཉིད་ན་ནི་དངོས་པོ་ལས་རྣམ་པར་གཞག་གོ །དབྱུང་བ་དང་རིམ་གྲོ་དང་ཆོས་མཉན་པ་དང་ཡོན་བཤད་པ་མ་བྱས་པར་བྱིན་གྱིས་བརླབ་པར་མི་བྱའོ་ཞེས་བྱ་བ་ནི། མཚམས་དེར་ཤིན་ཤི་བའི་རོ་དབྱུང་བ་ལ་སོགས་པ་མ་བྱས་པར་ཤི་བའི་ཡོ་བྱད་བྱིན་གྱིས་བརླབ་པར་མི་བྱའོ། །ལྷུང་བཟེད་དང་ཆོས་གོས་ཁྱིམ་གཞན་ན་འདུག་པ་ཉིད་ནི་ཁྱིམ་བདག་གིས་གང་ལ་བྱིན་པ་དེ་དབང་བ་ཉིད་ཡིན་ནོ་ཞེས་བྱ་བ་ནི། གལ་ཏེ་ཤི་བའི་ལྷུང་བཟེད་དང་ཆོས་གོས་ལ་སོགས་པ་ཁྱིམ་པ་གཞན་ན་འདུག་པར་གྱུར་ན་དེ་དག་ནི་ཁྱིམ་བདག་དེས་རབ་ཏུ་བྱུང་བ་གང་ལ་བྱིན་པའི་རབ་ཏུ་བྱུང་བ་དེ་དབང་བ་ཉིད་ཡིན་ནོ། །གལ་ཏེ་དབང་ཞིང་དེས་ཕོངས་པ་ཡན་ནོ་ཞེས་བྱ་བ་ནི། ཁྱིམ་བདག་དེས་རབ་ཏུ་བྱུང་བ་གང་ལ་བྱིན་པའི་རབ་ཏུ་བྱུང་
བ་དེ་ཡང་གལ་ཏེ་མཚན་མཐུན་པ་ཞེས་བྱ་བ་ལ་སོགས་པ་རྣམས་པ་ལྔར་སྨོས་པ་དག་གིས་དབང་བ་ཉིད་ཡིན་ཞིང་ལྷུང་བཟེད་ལ་སོགས་པའི་དངོས་པོ་དེས་ཀྱང་ཕོངས་པ་ཡིན་ན་དེས་དེའི་ཚེ་བླང་བར་བྱའོ། །གལ་ཏེ་ཁྱིམ་བདག་སྦྱིན་པའི་ཕྱིར་འཇུག་པར་མི་བྱེད་ན་དེའི་ཚེ་སུ་དབང་བ་ཉིད་ཡིན་ཞེ་ན་དེའི་ཕྱིར། སྦྱིན་པར་མི་བྱེད་ན་བསླངས་པ་དང་ལྡན་པའོ་ཞེས་བྱ་བ་སྨྲས་ཏེ། འདིར་ཡང་དབང་ཞིང་དེས་ཕོངས་པར་ཞེས་བྱ་བར་སྦྱར་བར་རིག་པར་བྱའོ། །ཁྱིམ་བདག་གི་རང་དགར་སྦྱིན་པར་མི་བྱེད་ན་དེའི་ཚེ་དེ་དབང་ཞིང་དེས་ཕོངས་པའི་རབ་ཏུ་བྱུང་བ་གང་གིས་ཁྱིམ་བདག་དེ་ལ་བསླངས་པ་དང་ལྡན་པ་དེ་དབང་བ་ཉིད་ཡིན་ནོ། །ཅིག་ཅར་བསླངས་ན་ནི་སྤྱིར་དབང་ངོ༌། །མཐར་གྱིས་ན་དང་པོའོ་ཞེས་བྱ་བ་ནི། མཐར་གྱིས་སློང་ན་དང་པོར་གང་གིས་བསླངས་ན་དེར་དབང་བ་ཉིད་ཡིན་ནོ། །གལ་ཏེ་ལེན་པ་མེད་དམ་ལེན་པ་ཡོད་ཀྱང་རུང་སྟེ། ཁྱིམ་བདག་གིས་གང་ཟག་གང་ལ་ཡང་བྱེ་བྲག་ཏུ་མ་བྱས་པར་སུ་ཁྱེར་བ་ཁྱེར་ཅིག་སྙམ་དུ་བོར་བར་གྱུར་ན་དེ་ལ་སུ་དབང་བ་ཉིད་ཡིན་ཞེ་ན། དེའི་ཕྱིར་མེད་པ་ཉིད་ཡིན་ཞིང་མ་བསྔོས་པར་པོར་ན་སོང་བ་དང་ལྡན་པའོ་ཞེས་བྱ་བ་སྨྲས་ཏེ། ལེན་པ་མེད་ཅིང་གང་ཟག་ལ་བྱེ་བྲག་ཏུ་མ་བསྔོས་པར་པོར་ན་དེའི་ཚེ་དང་པོར་དེར་སོང་བ་ནི་སོང་བ་དང་ལྡན་པ་ཞེས་བྱ་བ་སྟེ། དེ་དབང་བ་ཉིད་ཡིན་ནོ། །དེའི་ཕྱིར་དེ་ནི་མཐར་གྱིས་དང་འདྲའོ་ཞེས་བྱ་བ་སྨྲས་ཏེ། ཇི་ལྟར་མཐར་གྱིས་སློང་བ་ལ་དང་པོར་གང་གིས་བསླངས་པ་དབང་བ་དང་འདྲ་བར་འདིར་ཡང་དེ་བཞིན་ནོ། །བུ་ལོན་པ་བྱུང་བ་ན་དེ་ལ་གཞལ་བར་བྱ་བའི་ཚད་ཀྱི་ཤི་བའི་ཡོ་བྱད་དེ་དབང་བ་ཉིད་ཡིན་ནོ་ཞེས་བྱ་བ་ནི། གལ་ཏེ་ཤི་བའི་འོག་ཏུ་བུ་ལོན་པ་བྱུང་ན་དེའི་ཚེ་བུ་ལོན་པ་དེ་ལ་ཤི་བ་དས་གཞལ་བར་བྱ་བའི་རྫས་ཀྱི་ཚད་ཀྱི་ཤི་བའི་ཡོ་བྱད་བུ་ལོན་པ་དེ་དབང་བ་ཉིད་ཡིན་ནོ། །མ་བགོས་པར་བྱུང་ན་དེ་ལ་གཞལ་བར་བྱ་བ་ཉིད་ཡིན་གྱི་བགོས་པའི་འོག་ཏུ་བྱུང་ན་ནི་དེ་ལ་མི་གཞལ་བར་བྱ་བ་ཉིད་དོ་སྙམ་དུ་དོགས་པ་བསལ་བའི་ཕྱིར་བགོས་ན་ཡང་ངོ་ཞེས་བྱ་བ་སྨྲས་ཏེ། གཞལ་བར་བྱ་བ་ཉིད་དོ་ཞེས་བྱ་བར་སྦྱར་རོ། །དེ་དང་ལྷན་ཅིག་རྣམ་པར་གཞག་པ་དེ་ལ་སྦྱིན་པར་བྱ་བ་ཉིད་དམ་བླང་བར་བྱ་བ་ཉིད་གང་ཡིན་པ་སྟེ། དེ་ཉིད་མ་ཡིན་ནོ་ཞེས་བྱ་བ་ནི། ཤི་བ་དེ་དང་བུ་ལོན་དེད་པ་དང་བུ་ལོན་འཇལ་བར་ལྷན་ཅིག་རྣམ་པར་གཞག་པ་
ཞེས་བྱ་བ་མངོན་སུམ་དུ་འཐམས་པ་དགེ་སློང་གིས་བུ་ལོན་དེད་པ་ལ་ཕར་གཞལ་བར་བྱ་བའི་རིན་དང༌། བུ་ལོན་འཇལ་བ་ལས་དགེ་སློང་གིས་ཚུར་བླང་བར་བྱ་བའི་སྤུ་གྱུར་པ་གང་ཡིན་པ་དེ་ཉིད་གཞལ་བ་དང་བླང་བར་བྱའི། ཤི་བ་དེས་བུ་ལོན་དད་པ་ལས་རྫས་གང་བླངས་པ་དང་བུ་ལོན་འཇལ་བ་ལ་གང་གཏད་པ་དེ་ཉིད་དངོས་སུ་གཞལ་ཞིང་བླང་བར་མི་བྱ་བའོ། །དཔེར་ན་ཤི་བས་ཚོང་བ་ལས་རས་ཡུག་ཆེན་བླངས་ཏེ་རིན་སྦྱིན་པར་བྱའོ་ཞེས་འཐམས་པ་ལ་ནི་རིན་སྦྱིན་པར་བྱའི། རས་ཡུག་ཆེན་དངོས་སྦྱིན་པར་མི་བྱ་བ་དང༌། ཐག་པ་ལ་རས་ཡུག་ཆེན་གྱི་དོན་དུ་རྒྱུ་སྤུན་གཏད་པ་ལས་ནི་རས་ཡུག་ཆེན་བླང་བར་བྱའི། རྒྱུ་སྤུན་བླང་བར་མི་བྱ་བ་ལྟ་བུའོ། །འདིར་གཞུང་ནི་དགེ་སློང་དག་གིས་ཕྲ་བ་བཀུག་པ་དང༌། དེ་ན་རེ་འཕགས་པ་དག་བདག་གིས་དེ་ལ་སྦོམ་པོར་དབུལ་བར་བགྱི་བ་ལགས་སོ་ཞེས་ཟེར་ནས། བཅོམ་ལྡན་འདས་ཀྱིས་བཀའ་སྩལ་བ། དེ་ལ་དགེ་སློང་ཤི་བས་ཅི་འདྲ་བ་གཏད་པས་དགུག་པར་བྱའོ་ཞེས་གསུངས་པ་ཡིན་ནོ། །དེས་ཚངས་པ་མཚུངས་པར་སྤྱོད་པ་རྣམས་ལ་བུ་ལོན་ཆགས་པ་ཉིད་དུ་མི་འགྱུར་རོ་ཞེས་བྱ་བ་ནི། ཤི་བ་ལ་བུ་ལོན་ཆགས་པ་དེས་ཚངས་པ་མཚུངས་པར་སྤྱོད་པ་རྣམས་ལ་བུ་ལོན་ཆགས་པ་ཉིད་དུ་མི་འགྱུར་བ་སྟེ། ཚངས་པ་མཚུངས་པར་སྤྱོད་པ་དག་གིས་རང་གི་ལྷུང་བཟེད་དང་ཆོས་གོས་ཀྱིས་ཤི་བདེའི་བུ་ལོན་གཞལ་བར་མི་བྱའོ་ཞེས་བྱ་བའི་ཐ་ཚིག་གོ། །།བམ་པོ་ལྔ་བཅུ་གསུམ་པ། ལག་གི་བླས་དཀོན་མཆོག་གི་བླངས་པ་ཉིད་ཡིན་ན་དེའི་ཇི་སྙེད་པ་དེ་སྙེད་མཉམ་པར་བསབ་པོ་ཞེས་བྱ་བ་ནི། གང་ཟག་ལག་གི་བླས་དཀོན་མཆོག་གསུམ་གྱི་དཀོར་བླངས་ཤིང་ཁྱེར་བ་ཉིད་ཡིན་ན། དཀོན་མཆོག་དེའི་དཀོར་ཇི་སྙེད་བླངས་པ་དེ་སྙེད་ལག་གི་བླ་དེའི་ཤི་བའི་ཡོ་བྱད་ལས་ཆ་མཉམ་པར་བྱས་ཏེ། དཀོན་མཆོག་ལ་དབུལ་ཞིང་དཀོར་བསབ་པར་བྱའོ། །འདི་ལྟར་གཙུག་ལག་ལས། གལ་ཏེ་དགེ་འདུན་གྱི་ནི་མཆོད་རྟེན་གྱིར་བྱེད། མཆོད་རྟེན་གྱི་ནི་དགེ་འདུན་གྱིར་བྱེད་ཅིང་དེ་བཞིན་དུ་ཆོས་ཀྱི་ཡང་འདྲེས་པར་བྱེད་ན། དེའི་ལྷུང་བཟེད་དང་ཆོས་གོས་ལས་ཆ་གསུམ་དུ་བྱས་ཏེ། ཇི་སྙེད་བླངས་པ་དེ་སྙེད་དེར་དབུལ་ཞིང་ལྷག་མ་དགེ་འདུན་ལ་དབུལ་ལོ་ཞེས་གསུངས་མོད་ཀྱི། དེ་ནི་ཐ་མལ་པའི་ཤེས་པས་གཟུང་བར་དཀའ་ལ། འདི་ལ་ལྷག་པར་ཕུལ་བ་ཡང་ཉེས་
པ་མེད་པས། དེའི་ཕྱིར་ཐམས་ཅད་འགེད་ལ་རག་གོ །ལག་གི་བླ་ཞེས་སྨོས་པ་ནི་དཔེ་ཙམ་དུ་ཟད་དེ་འདི་ལྟར་གཞན་དག་གིས་བརྐུས་ན་དེ་དག་ལ་ཡང་དེ་བཞིན་བྱར་རུང་ངོ༌། །ལག་གི་བླ་ཞེས་བྱ་བ་ནི། ལས་སར་པ་ལ་སྦྱོར་དུ་འཇུག་པས་ལག་གི་བླ་ཞེས་བྱའོ། །ནད་གཡོག་དང་བཅས་པ་ཉིད་ཡིན་ན་ཡོ་བྱད་དྲུག་དེ་དབང་བ་ཉིད་ཡིན་པས་བྱིན་གྱིས་བརླབ་པར་མི་བྱ་བ་ཉིད་དོ་ཞེས་བྱ་བ་ནི། གལ་ཏེ་ཤི་བ་དེ་ནད་གཡོག་དང་བཅས་པ་ཉིད་ཡིན་ན། ཤི་བ་དེའི་ཡོ་བྱད་དྲུང་ནི་ནད་གཡོག་དེ་དབང་བ་ཉིད་ཡིན་པས། དགེ་སློང་རྣམས་ཀྱིས་བྱིན་གྱིས་མི་བརླབ་པར་བྱ་བ་ཉིད་ཡིན་ནོ། །ཡོ་བྱད་དྲུག་ནི་ཆོས་གོས་གསུམ་དང་སྟན་དང་ལྷུང་བཟེད་དང་ཆུ་ཚགས་སོ། །དེ་ནི་རབ་དང་འབྲིང་དང་ཐ་མ་དང་བཅས་པ་ལས་སོ་ཞེས་བྱ་བ་ནི། དེ་དབང་བ་ཉིད་དོ་ཞེས་བྱ་བར་སྦྱར་ཏེ། ནད་གཡོག་དེ་ལ་ཡོ་བྱད་དྲུག་པོ་དག་ལས་ཁ་ཅིག་ནི་དགེ་སྦྱོང་གི་ཡོ་བྱད་དང་འཚོ་བའི་ཡོ་བྱད་རབ་ལས་སྦྱིན་པར་བྱའོ། །ཁ་ཅིག་ནི་འབྲིང་། ཁ་ཅིག་ནི་ཐ་མ་དང་ལྡན་པ་ལས་སྦྱིན་པར་བྱའོ། །དུ་མ་ཉིད་ཡིན་ན་དེ་ཐུན་མོང་ངོ་ཞེས་བྱ་བ་ནི། ནད་གཡོག་གཉིས་སམ་གསུམ་མམ་མང་པོ་ཉིད་ཡིན་ན་ཡོ་བྱད་དྲུག་པོ་དེ་དེ་དག་ནི་ཐུན་མོང་ཡིན་ནོ། །དེའི་དོན་དུ་སོང་བ་ཉིད་ཡིན་ལ་ནད་པ་ཤིན་སྦྱིན་པར་བྱ་བ་ཉིད་དོ་ཞེས་བྱ་བ་ནི། ནད་གཡོག་ནད་པ་དེའི་དོན་དུ་གཞན་དུ་སོང་བ་ཉིད་ཡིན་ལ། ཕྱི་ནས་ནད་པ་ཤི་བར་གྱུར་ན་ཡང་ཡོ་བྱད་དྲུག་པོ་སྦྱིན་པར་བྱ་བ་ཉིད་ཡིན་ནོ། །གལ་ཏེ་ནད་པའི་ཕྱིར་ནད་གཡོག་གཞན་དུ་སོང་པར་གྱུར་ན་དེ་ལྟ་ན་ཡང་ཡོ་བྱད་དྲུག་པོ་སྦྱིན་པར་བྱ་བ་ཉིད་ཡིན་གྱི་གཞན་དུ་མ་ཡིན་ནོ་ཞེས་བྱ་བའི་ཐ་ཚིག་གོ །རྫས་དེ་མི་དབང་བ་ལ་ནི་དེ་མི་སྦྱིན་ནོ་ཞེས་བྱ་བ་ནི། ཤི་བའི་རྫས་དེ་མི་དབང་བ་ཁྱིམ་པ་ལ་སོགས་པའི་གཡོག་ལ་ནི་ཡོ་བྱད་དྲུག་པོ་དེ་མི་སྦྱིན་པའོ། །འདིར་གཞུང་ནི་བཙུན་པ་བྲོ་གཡོག་ཁྱིམ་པ་ལགས་ན། དེ་ལ་བྲོ་གཡོག་གི་ཆོས་གོས་སྩལ་བར་བགྱི་འམ། བཀའ་སྩལ་བ་མི་བྱའོ། །དེ་བཞིན་དུ་ནད་གཡོག་དགེ་སློང་མ་དང་དགེ་སློབ་མ་དང་དགེ་ཚུལ་མ་ལ་ཡང་མི་སྦྱིན་ནོ་ཞེས་རྒྱ་ཆེར་གསུངས་པ་ཡིན་ནོ། །གང་ན་མཚན་མི་མཐུན་པ་དག་འབའ་ཞིག་ཡོད་ལ་མཚན་མཐུན་པ་དག་མེད་པ་དེར་ནི་མཚན་མི་མཐུན་པ་དག་ལ་ཡང་སྦྱིན་པར་བྱ་བ་ཉིད་ཡིན་ཏེ། དེ་དག་དེ་དབང་བའི་ཕྱིར་རོ། །གཞན་དུ་གནས་པར་ཁས་བླངས་པ་ལ་མི་སྦྱིན་པར་མི་
བྱའོ་ཞེས་བྱ་བ་ནི། ནད་གཡོག་གནས་གཞན་དུ་གནས་པར་ཁས་བླངས་པ་ལ་ཡོ་བྱད་དྲུག་པོ་དག་མི་སྦྱིན་པར་མི་བྱ་ཞིང་སྦྱིན་པར་བྱ་སྟེ། འདི་ལྟར་གཞན་དུ་གནས་པར་ཁས་བླངས་པ་ནི་མི་སྦྱིན་པའི་རྒྱུ་མ་ཡིན་པའི་ཕྱིར་རོ། །འདི་ལ་བསྙེན་པར་མ་རྫོགས་པ་ནི་ཐམས་ཅད་དབང་བ་ཉིད་དོ་ཞེས་བྱ་བ་ནི། ཤི་བའི་ཡོ་བྱད་བགོ་བ་འདི་ལ་བསྙེན་པར་མ་རྫོགས་བ་ནི་སོ་སོའི་སྐལ་བའི་ཆ་ཐམས་ཅད་བསྙེན་པར་རྫོགས་པ་དང་མཉམ་པར་དབང་སྟེ། དབྱར་གྱི་རྙེད་པ་ལ་སོགས་པ་གཞན་དག་ལ་སུམ་ཆ་དབྲི་བ་ལྟ་བུ་མ་ཡིན་ནོ། །ནད་པས་སྨྲས་པ་སྦྱིན་པ་ཕྲི་ཡང་ཇི་སྐད་སྨྲས་པ་བཞིན་དུ་བྱ་བ་ཉིད་དོ་ཞེས་བྱ་བ་ནི། ནད་པས་ནད་གཡོག་གམ་གཞན་གང་ལ་སྨྲས་པའི་གང་ཟག་དེས་སྦྱིན་པ་ཕྲི་ཡང་ནད་པས་ཇི་སྐད་སྨྲས་པ་ཁོ་ན་བཞིན་བྱ་དགོས་སོ། །ཇི་སྐད་བསྟན་ཏེ། གལ་ཏེ་ནད་པ་གང་ཟག་འགའ་ཞིག་ལ་དངོས་པོ་འགའ་ཞིག་བྱིན་ཅིག་ཅེས་ནད་གཡོག་གམ་གཞན་ལ་གཏད་པ་ལས་ནད་གཡོག་གམ་གཞན་དེས་ཕྲིར་ཟིན་ཀྱང་དེ་ལྟར་མི་བྱ་བར་སྔར་ནད་པས་བསྒོ་བ་ཁོ་ན་བཞིན་དུ་བྱ་དགོས་ཏེ་ཤི་པས་སྔར་ལྟོས་པ་མེད་པར་བྱིན་ཟིན་པའི་ཕྱིར་རོ། །ཤི་བ་ཉིད་ཀྱི་དུས་ན་རྫས་ཉིད་སྒྲུབ་པ་ལ་ནི་ནོར་བདག་མི་དབང་ངོ་ཞེས་བྱ་བ་ནི། ནད་པས་བདག་ཤི་བར་གྱུར་ན་དེའི་འོག་ཏུ་གཟོད་རྫས་འདི་ཉིད་གང་ཟག་ཆེ་གེ་མོ་ཞིག་ལ་སྦྱིན་པར་གྲུབ་པ་ལ་ནི་ཤི་བ་དེ་ནོར་བདག་ཏུ་མི་འགྱུར་བས་ནོར་དེ་དེ་ལ་མི་སྦྱིན་པར། དགེ་འདུན་གྱིས་བྱིན་གྱིས་བརླབ་པར་བྱའོ། །འདི་སྐད་བསྟན་ཏེ། གལ་ཏེ་བདག་ཤི་བར་གྱུར་ན་དེའི་ཚེ་ཆེ་གེ་མོ་ཞིག་ལ་བདག་གི་རྫས་འདི་སྦྱིན་པར་བྱ་ཞེས་ཟེར་བའི་རབ་ཏུ་བྱུང་བ་ནི་ནོར་དེའི་བདག་པོར་མི་འགྱུར་ཏེ། ཤི་བའི་ནོར་དེ་རབ་ཏུ་བྱུང་བ་གཞན་དབང་བས་དེ་དག་གིས་དེ་བྱིན་གྱིས་བརླབ་པར་བྱ་བ་ཉིད་ཡིན་ནོ། །ཁྱིམ་ན་གནས་པ་ནི་དབང་ངོ་ཞེས་བྱ་བ་ནི། ཁྱིམ་བ་ནི་གལ་ཏེ་བདག་ཤི་བར་གྱུར་ན་དེའི་འོག་ཏུ་གཟོད་རྫས་འདི་ཉིད་གང་ཟག་ཆེ་གེ་མོ་ཞིག་ལ་སྦྱིན་པར་བསྒྲུབ་ན། དེ་ཤི་བའི་ཚེ་ཡང་ནོར་དེའི་བདག་པོར་འགྱུར་རོ། །འདིར་གཞུང་ནི་ཕྲན་ཚོགས་དག་ལས་ཁྱིམ་པ་དག་ནི་ལྟོས་པ་དང་བཅས་པས་དུས་བྱེད་པ། རབ་ཏུ་བྱུང་བ་དག་ནི་ལྟོས་པ་མེད་པས་དུས་བྱེད་པའི་ཕྱིར་རོ་ཞེས་གསུངས་པ་ཡིན་ཏེ། དེ་ལྟ་བས་ན་ཁྱིམ་པ་ནི་ལྟོས་པ་དང་བཅས་པའི་ཕྱིར་དབང་ལ། རབ་ཏུ་བྱུང་བ་ནི་ལྟོས་པ་མེད་པའི་ཕྱིར་མི་དབང་ངོ༌། །ཁྱིམ་པས་བུ་དང་ཆུང་མ་
ཕུལ་ནས་ཤི་ན་ཅི་བདེར་བྱའོ་ཞེས་བྱ་བ་ནི། ཁྱིམ་པས་དགེ་འདུན་ལ་བུ་དང་ཆུང་མ་ཕུལ་ནས་ཁྱིམ་བ་ཉིད་ཤི་ན་དེའི་བུ་དང་ཆུང་མ་དག་ཅི་བདེར་བྱ་སྟེ། བདག་གིར་མི་བྱའོ་ཞེས་བྱ་བའི་ཐ་ཚིག་གོ །གླང་པོ་ཆེ་དང་རྟ་དང་པོར་བུ་དང་དྲེའུ་དང་གོ་ཆ་རྣམས་ནི་རྒྱལ་པོ་ལ་དབུལ་ལོ་ཞེས་བྱ་བ་ནི། གླང་པོ་ཆེ་ལ་སོགས་པ་ནི་རྒྱལ་པོ་ལ་དབུལ་ལོ། །དབྱིག་དང་གསེར་དང་གཞན་བྱས་པ་དང་མ་བྱས་པ་རྣམས་ན་གསུམ་ལའོ་ཞེས་བྱ་བ་ནི་དབུལ་ལོ་ཞེས་བྱ་བར་སྦྱར་ཏེ། དབྱིག་དང་གསེར་དང་དེ་དག་ལས་གཞན་པ་ཟངས་ཀྱི་རང་བཞིན་ལ་སོགས་པ་བརྡུངས་སུ་བྱས་པ་དང་མ་བྱས་པ་རྣམས་ནི་དཀོན་མཆོག་གསུམ་ལ་དབུལ་ལོ། །རིན་པོ་ཆེ་རྣམས་ཀྱང་ཞེས་བྱ་བ་ནི། ནོར་བུ་དང་བཻ་ཌཱུཪྻ་དང་དུང་གཡས་སུ་འཁྱིལ་བ་ལ་སོགས་པ་དག་ཀྱང་དཀོན་མཆོག་གསུམ་ལ་དབུལ་ལོ། །མུ་ཏིག་རྣམས་ནི་གལ་ཏེ་གཞན་ཡོད་ན་དེའི་སྐལ་བས་སམ་ལྷག་པ་ཉིད་ཡིན་ན་ཡང་རུང་གལ་ཏེ་མེད་ཀྱང་དེ་བཞིན་དུ་སངས་རྒྱས་ལའོ་ཞེས་བྱ་བ་ནི། མུ་ཏིག་རྣམས་ནི་གལ་ཏེ་མུ་ཏིག་ལས་གཞན་པ་བཻཌཱུཪྻ་ལ་སོགས་པའི་རིན་པོ་ཆེ་ཡོད་ན་དཀོན་མཆོག་གསུམ་པོ་དག་ལས་སངས་རྒྱས་དེའི་སྐལ་བས་མུ་ཏིག་རྣམས་བརྗེས་ཏེ་སངས་རྒྱས་བཅོམ་ལྡན་འདས་ལ་དབུལ་བར་བྱའོ། །སངས་རྒྱས་ཉག་གཅིག་གི་སྐུ་སྐལ་གྱི་རིན་པོ་ཆེ་གཞན་དག་པས་མུ་ཏིག་རིན་ཆེ་བའི་ཕྱིར་མུ་ཏིག་ལྷག་པ་ཉིད་ཡིན་ཡང་རུང་སྟེ། དེ་ལྟ་ན་ཡང་མུ་ཏིག་དེ་དག་ཐམས་ཅད་སངས་རྒྱས་ལ་དབུལ་ལོ། །གལ་ཏེ་མུ་ཏིག་ལས་གཞན་པའི་རིན་པོ་ཆེ་མེད་ན་ནི་དེ་བཞིན་དུ་སྐྱིན་པ་མེད་ཀྱང་བླ་སྟེ། དཀོན་མཆོག་གསུམ་ཆར་གྱི་སྐུ་སྐལ་གྱི་མུ་ཏིག་ཐམས་ཅད་སངས་རྒྱས་ཉག་གཅིག་ལ་དབུལ་ལོ། །ཚོན་རྩི་ཆེན་པོ་རྣམས་ཀྱང་ངོ་ཞེས་བྱ་བ་ནི། གང་ཀུས་དང་མཚལ་དང་མཐིང་ཤུན་ལ་སོགས་པ་ཡང་སངས་རྒྱས་ལ་དབུལ་ལོ་ཞེས་བྱ་བའི་རྗེས་བསྙག་པའི་ཕྱིར་ཀྱང་ངོ་ཞེས་བྱ་བའི་སྒྲ་སྨོས་སོ། །དེ་དག་ནི་བཏགས་ཏེ་དྲི་གཙང་ཁང་གི་ཞལ་ཞལ་དུ་བྱའོ་ཞེས་བྱ་བ་ནི། སངས་རྒྱས་ལ་ཕུལ་བའི་མུ་ཏིག་དེ་དག་ནི་བཏགས་ཏེ་དྲི་གཙང་ཁང་གི་ཞལ་ཞལ་དུ་བྱའོ། །དེ་མ་ཡིན་པ་སངས་རྒྱས་ཀྱི་ནི་སྐུ་གཟུགས་དང་དྲི་གཙང་ཁང་དང་མཆོད་རྟེན་གྱི་ཡོ་བྱད་དུ་བྱའོ་ཞེས་བྱ་བ་ནི། མུ་ཏིག་མ་ཡིན་པ་སངས་རྒྱས་ཀྱི་སྐུ་སྐལ་གྱི་རིན་པོ་ཆེ་གཞན་ནི་སྐུ་གཟུགས་ལ་སོགས་པའི་ཡོ་བྱད་དུ་སྦྱར་བར་བྱའོ། །ཆོས་
ཀྱིས་ནི་སངས་རྒྱས་ཀྱི་བཀའ་བྲི་བ་དང་སེང་གེའི་ཁྲི་དག་གིའོ་ཞེས་བྱ་བ་ནི། ཡོ་བྱད་དུ་སྦྱར་རོ་ཞེས་བྱ་བར་སྦྱར་ཏེ། ཆོས་ཀྱི་སྐུ་སྐལ་གྱི་རིན་པོ་ཆེ་དག་ནི་ངར་མ་བྲི་བ་དང་སེང་གེའི་ཁྲིའི་ཡོ་བྱད་དུ་སྦྱར་བར་བྱའོ། །ཐེག་པ་ནི་སྐུ་གཟུགས་ལའོ་ཞེས་བྱ་བ་ནི། ཁྱོགས་དང་ཤིང་རྟའི་ཐེག་པ་བཞོན་པ་དག་ནི་སྐུ་གཟུགས་ལ་དབུལ་བའོ། །རྒྱལ་མཚན་དང་དེའི་སྲོག་ཤིང་དག་ནི་རྒྱལ་མཚན་གྱི་དོན་དུའོ་ཞེས་བྱ་བ་ནི། རྒྱལ་མཚན་དང་རྒྱལ་མཚན་གྱི་སྲོག་ཤིང་དག་ནི་རྒྱལ་མཚན་ཉིད་ཀྱི་དོན་དུ་དབུལ་ལོ། །དེར་རུང་བའི་སྲོག་ཤིང་རྣམས་ཀྱང་ངོ་ཞེས་བྱ་བ་ནི། རྒྱལ་མཚན་གྱི་སྲོག་ཤིང་དུ་རུང་བའི་སྲོག་ཤིང་གཞན་དག་ཀྱང་སྐུ་གཟུགས་ལ་དབུལ་ལོ་ཞེས་བྱ་བའི་རྗེས་བསྙག་པའི་ཕྱིར། ཀྱང་ངོ་ཞེས་བྱ་བའི་སྒྲ་སྨོས་སོ། །གཞན་དག་དང་མཚོན་ཆ་རྣམས་ནི་དགེ་འདུན་ལའོ་ཞེས་བྱ་བ་ནི། དབུལ་ལོ་ཞེས་བྱ་བར་སྦྱར་ཏེ། རྒྱལ་མཚན་གྱི་སྲོག་ཤིང་དུ་རུང་བ་ལས་གཞན་པ་རྒྱལ་མཚན་གྱི་སྲོག་ཤིང་དུ་མི་རུང་བའི་སྲོག་ཤིང་ཐུང་དུ་དག་དང་མཚོན་ཆ་རྣམས་ནི་དགེ་འདུན་ལ་དབུལ་ལོ། །དེ་དག་ནི་འཁར་སིལ་གྱི་ཡུ་བ་དང་ཁབ་དང་གྲི་འུར་བྱས་ཏེ་བྲིམ་མོ་ཞེས་བྱ་བ་ནི། གཞན་དག་དང་མཚོན་ཆ་དེ་དག་ལས་སྲོག་ཤིང་གཞན་དེ་དག་ནི་འཁར་སིལ་གྱི་ཡུ་བར་བྱ། མཚོན་ཆ་རྣམས་ནི་ཁབ་དང་གྲིའུར་བྱས་ཏེ་དགེ་འདུན་ལ་བྲིམ་མོ། །དགེ་འདུན་གྱི་གཞན་ནི་གཞག་པ་དང་འགོ་བ་དང་བཟའ་བ་དག་ཏུ་ཅི་རིགས་པར་བྱའོ་ཞེས་བྱ་བ་ནི། དགེ་འདུན་གྱི་སྲོག་ཤིང་དང་མཚོན་ཆ་ལ་སོགས་པ་ཇི་སྐད་སྨོས་པའི་རྣམ་པ་དེ་དག་ལས་གཞན་པ་ཞིང་དང་རས་དང་འབྲས་ལ་སོགས་པ་དག་ནི་གཞག་པར་འོས་པ་དག་ཀྱང་གཞག་པར་བྱའོ། །བགོ་བར་འོས་པ་དག་ཀྱང་བགོ་པར་བྱའོ། །བཟའ་བར་འོས་པ་དག་ཀྱང་བཟའ་བར་བྱ་སྟེ། དེ་ལྟར་ཅི་རིགས་པར་བྱའོ། །ཞིང་དང་ཁང་ཁྱིམ་དང་ཚོང་ཁང་དང་གནས་མལ་དང་མགར་སྤྱད་དང་གསེར་མགར་གྱི་ལག་ཆ་དང་འདྲེག་མཁན་གྱི་ལག་ཆ་དང༌། རྫ་མཁན་གྱི་ལག་ཆ་དང༌། ཤིང་མཁན་གྱི་ལག་ཆ་དང༌། བསིལ་ཡབ་མཁན་གྱི་ལག་ཆ་དང་བྲན་དང་བྲན་མོ་དང་ལས་བྱེད་པ་དང་ཞོ་ཤས་འཚོ་བ་དང་པ་ལང་དང་མ་ཧེ་དང་ར་དང་ལུག་དང་སྨན་དང་སངས་རྒྱས་ཀྱི་བསྟན་བཅོས་ཀྱི་གླེགས་བམ་དང་མྱུར་དུ་མི་འགྲུབ་པའི་དམ་རྒྱ་དག་ནི་དང་པོར་འོས་པ་ཉིད་ཡིན་ནོ་ཞེས་བྱ་བ་ནི། དགེ་འདུན་གྱི་ཞིང་ལ་སོགས་པ་འདི་དག་ནི་དང་
པོར་འོས་པ་ཉིད་ཡིན་ཏེ། གཞག་པར་འོས་པ་ཉིད་ཡིན་ནོ། །རས་དང་རས་ཡུག་ཆེན་དང་བེའུ་རས་དང་མཆིལ་ལྷམ་དང་ལྷམ་སྒྲོ་གུ་ཅན་དང་འབྲུ་མར་དང་འབྲུ་མར་སྣོད་དང་བྱ་མ་བུམ་དང་རིལ་བ་སྤྱི་བླུགས་དང་གླེགས་བམ་གཞན་དང་དམ་རྒྱ་གཞན་དང་ཚོན་རྩི་གཞན་དག་ནི་གཉིས་པར་འོས་པ་ཉིད་ཡིན་ནོ་ཞེས་བྱ་བ་ནི། དགེ་འདུན་གྱི་རས་ལ་སོགས་པ་འདི་དག་ནི་གཉིས་པར་འོས་པ་ཉིད་ཡིན་ཏེ། བགོ་བར་འོས་པ་ཉིད་ཡིན་ནོ། །འབྲས་དང་ཏིལ་དང་ནས་དང་མོན་སྲན་སྡེའུ་དང་མོན་སྲན་གྲེའུ་དང་འབྲུ་གཞན་དང་བཟའ་བ་དང་བཏུང་བ་དག་ནི་གསུམ་པར་འོས་པ་ཉིད་ཡིན་ནོ་ཞེས་བྱ་བ་ནི་དགེ་འདུན་གྱི་འབྲས་ལ་སོགས་པ་འདི་དག་ནི་གསུམ་པར་འོས་པ་ཉིད་ཡིན་ཏེ། བཟའ་བར་འོས་པ་ཉིད་ཡིན་ནོ། །གཞིར་གཏོགས་པའི་གོས་ཀྱི་གཞིའོ་ཞེས་བྱ་བ་ལ་འདུལ་བའི་གཞིར་གཏོགས་པའི་གོས་ཀྱི་གཞི་བཤད་ཟིན་ཏོ།། །།ད་ནི་ཕྲན་ཚོགས་ལ་སོགས་པར་གཏོགས་པའི་གོས་ཀྱི་གཞི་བསྡུ་བའི་ཕྱིར་གླེགས་བུ་དང་གླེགས་བུ་ཕྱེད་དག་མཉམ་པར་བྱའོ་ཞེས་བྱ་བ་སྨྲས་ཏེ། གླེགས་བུ་རྣམས་ཀྱང་ལོགས་ཤིག་ཏུ་མཉམ་པར་བྱ། གླེགས་བུ་ཕྱེད་རྣམས་ཀྱང་ལོགས་ཤིག་ཏུ་མཉམ་པར་བྱའོ། །གླེགས་བུ་ཡང་གླེགས་བུ་རྣམས་དང་ལྷན་ཅིག་ཚད་མཉམ་པར་བྱ། གླེགས་བུ་ཕྱེད་རྣམས་ཀྱང་གླེགས་བུ་ཕྱེད་རྣམས་དང་ལྷན་ཅིག་ཚད་མཉམ་པར་བྱ་སྟེ། མཉམ་པ་འདི་ནི་མཛེས་པ་ཉིད་དུ་བྱ་བའི་ཕྱིར་རོ། །གཞལ་བའི་ཕྱིར་དེའི་ཚད་ཀྱི་ཆག་ཤིང་བཅང་བར་བྱའོ་ཞེས་བྱ་བ་ནི། གླེགས་བུ་དང་གླེགས་བུ་ཕྱེད་གཞལ་བའི་ཕྱིར་དེ་གཉིས་ཀྱི་ཚད་ཀྱི་ཆག་ཤིང་བཅང་བར་བྱའོ། །གལ་ཏེ་ཆག་ཤིང་གཅིག་གིས་གཉི་གའི་དགོས་པ་འགྲུབ་ན་ནི་གཉིས་མི་དགོས་སོ། །དེ་ལྟར་ཡང་གཞན་ལས་ཆག་ཤིང་གཅིག་ཁོ་ན་བཅང་བར་བྱའོ་ཞེས་གསུངས་ཏེ། བཅོམ་ལྡན་འདས་ཀྱིས་བཀའ་སྩལ་པ། ཆག་ཤིང་བྱ་ཞིང་དེའི་ཚད་ཀྱི་གླེགས་བུ་བྱའོ། །གླེགས་བུའི་ཚད་ཀྱི་གླེགས་བུ་ཕྱེད་གཅད་པར་བྱའོ་ཞེས་གསུངས་པ་ཡིན་ནོ། །ཚལ་བུ་དག་ཀྱང་ངོ་ཞེས་བྱ་བ་ནི་ཡང་མཉམ་པ་ཉིད་དུ་བྱ་བའོ། །དེའི་ཚད་ཀྱི་ཆག་ཤིང་བཅད་བར་བྱའོ་ཞེས་བྱ་བ་ནི་གཞལ་བའི་ཕྱིར་ཚལ་བུའི་ཚད་ཀྱི་ཆག་ཤིང་བཅང་བར་བྱ་བའོ། །དེའི་ཆེ་ཚད་ནི་སོར་བཞིའོ་ཞེས་བྱ་བ་ནི། ཚལ་བུ་དེའི་ཆེ་ཚད་ཀྱི་ཞེང་ནི་སོར་བཞིར་བྱའོ། །བྱ་རོག་གི་མཐོ་གང་ཡང་ངོ་ཞེས་བྱ་བ་ཡང་ཚལ་བུ་དེའི་
ཆེ་ཚད་ཀྱི་ཞེང་སྟེ། བྱ་རོག་གི་མཐོ་ཞེས་བྱ་བ་ནི་མཛུབ་མོའི་ཚིགས་དབུས་མའི་སྟེང་དུ་མཐེ་བོའི་ཚིགས་དབུས་མའི་ལྟོ་གཏད་དེ་རྒྱ་གྲམ་དུ་བྱ་རྐང་འདྲ་བར་གཞག་སྟེ། དེ་ལྟར་གཞག་པའི་མཐེབ་མཛུབ་གཉིས་ཀྱི་རྩེ་མོའི་བར་གྱི་ཚད་ནི་བྱ་རོག་གི་མཐོ་གང་ཞེས་བྱའོ། །དེ་ལ་དངོས་སུ་ན་སོར་བཞི་ཁོ་ན་ཡོད་དེ། རྣམ་པ་གཞན་གྱིས་བསྟན་པའི་ཕྱིར་དེ་སྐད་གསུངས་སོ། །ཆུང་ཚད་ནི་སོར་གཉིས་སམ་ཕྱེད་དང་གསུམ་མམ་མཐེབ་སོར་གཅིག་གོ་ཞེས་བྱ་བ་ནི། ཚལ་བུ་ཆུང་ཚད་ཀྱི་ཞིང་ནི་སོར་གཉིས་སམ་སོར་ཕྱེད་དང་གསུམ་མམ་མཐེ་བོའི་སོར་གཅིག་གོ །གཞུང་ཁ་ཅིག་ལས་ནི་ཆེ་ཚད་ནི་སོར་བཞིའོ། །ཆུང་ཚད་ནི་སོར་ཕྱེད་དང་གསུམ་མོ། །དེའི་བར་ནི་འབྲིང་ཚད་དོ་ཞེས་འབྱུང་སྟེ། གཞུང་ཁ་ཅིག་ལས་ནི་ཆེ་ཚད་ནི་སོར་བཞི་འམ་བྱ་རོག་གི་མཐོ་གང་ངོ༌། །ཆུང་ཚད་ནི་སོར་གཉིས་སམ་མཐེ་བོའི་ལྟོ་གང་ངོ༌། །དེའི་བར་ནི་འབྲིང་ཚད་དོ་ཞེས་གསུངས་སོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། སོར་བཞི་ནི་ཆོས་གོས་ཆེ་ཚད་ཀྱིའོ། །སོར་གསུམ་དང་སོར་ཕྱེད་དང་སོར་གཉིས་དང་མཐེབ་སོར་གཅིག་ནི་ཆོས་གོས་ཆུང་ཚད་ཀྱིའོ། །འབྲིང་གི་ནི་བར་མའོ། །ས་ལ་ཆོས་གོས་གདིང་བར་མི་བྱའོ་ཞེས་བྱ་བ་ནི། ས་ལ་ཆོས་གོས་གདིང་བར་མི་བྱ་བའོ། །དེའི་དོན་དུ་གཏན་པ་བྱའོ་ཞེས་བྱ་བ་ནི། ཆོས་གོས་གདིང་བ་དེའི་དོན་དུ་སྲ་བརྐྱང་བྱ་བའོ། །ཤིང་ལས་བྱས་པའམ་སྨྱིག་མ་ལས་བྱས་པའམ་གྲུ་བཞི་བཏོད་པའི་ཕྱིར་ཐག་གུ་གཞུག་པའི་བུ་ག་བཏོད་པ་ནི་དེ་ཞེས་བྱའོ་ཞེས་བྱ་བ་ནི། ཐང་བཅད་ཅིང་གདིང་བའི་ཕྱིར་ཐག་གུ་གང་ཡིན་པ་དེ་གཞུག་པའི་བུ་ག་གང་ལ་བཏོད་པ་དེ་ནི་གཏན་པ་ཞེས་བྱའོ། །དེའི་ཚད་ཇི་ཙམ་དུ་བྱ་ཞེ་ན་དེའི་ཕྱིར་ཆོས་གོས་ཇི་ཙམ་པར་རོ་ཞེས་བྱ་བ་སྨྲས་ཏེ། ཆོས་གོས་དང་འཚམ་བའི་ཚད་དུ་བྱའོ། །ཆོས་གོས་ཚད་ཐ་དད་པ་དུ་མ་ཡོད་པས་གཏན་པ་ཡང་དུ་མ་བྱ་དགོས་སོ། །གྲིའུས་བྲའོ་ཞེས་བྱ་བ་ནི་ཆོས་གོས་སོ། །དེ་བཅང་བར་བྱའོ་ཞེས་བྱ་བ་ནི་གྲིའུ་དེའོ། །དེ་དབྱིབས་ཇི་ལྟ་བུར་བྱ་ཞེ་ན་དེའི་ཕྱིར་བྱ་རོག་གི་མཆུ་ལྟ་བུ་འམ་བྱ་གག་གི་གཤོག་པ་ལྟ་བུར་རོ་ཞེས་བྱ་བ་སྨྲས་ཏེ། དབྱིབས་དེ་ལྟ་བུར་བྱའོ། །ཅི་ལས་བྱས་པ་ཞེན་དེའི་ཕྱིར། ལྕགས་ལས་བྱས་པ་ལས་གཞན་མ་ཡིན་ནོ་ཞེས་བྱ་བ་སྨྲས་ཏེ། ལྕགས་ལས་བརྡུངས་པ་ནི་ལྕགས་ལས་བྱས་པ་སྟེ། དེ་ལས་གཞན་པ་ལས་མི་བྱའོ། །ཡུ་བརྩི་ཅན་དང་ཁྲ་བོ་མི་བཅང་ངོ་ཞེས་བྱ་བ་ནི།
གྲིའུའི་ཡུབ་བསེ་རྩི་ཅན་དང་སྲ་རྩི་ལ་སོགས་པ་འཚོར་བག་ཅན་གྱིས་བསྐུས་པ་དར་ཚོན་རིས་དང་འབུར་ཤད་ལ་སོགས་པའི་རི་མོ་ཅན་བཅང་བར་མི་བྱའོ། །སོར་དྲུག་གི་ཚད་ལས་ལྷག་པ་མི་བཅང་ངོ་ཞེས་བྱ་བ་ནི། གྲིའུ་ཡི་སྲིད་ཀྱི་ཚད་སོར་དྲུག་ལས་ལྷག་པར་མི་བཅང་བའོ། །འདིར་གཞུང་ནི་གྲིའུ་ནི་གསུམ་སྟེ། ཆེན་པོ་དང་འབྲིང་དང་ཆུད་དུའོ། །ཆེན་པོ་ནི་སོར་དྲུག་གོ །ཆུང་ངུ་ནི་སོར་བཞིའོ། །དེའི་བར་ནི་འབྲིང་ངོ་ཞེས་གསུངས་པ་ཡིན་ནོ། །ཁ་ཅིག་ལས་ནི་བརྒྱད་ལས་མི་བཅང་ངོ་ཞེས་སོ་ཞེས་བྱ་བ་ནི། གཞུང་ཁ་ཅིག་ལས་ནི་གྲིའུ་སོར་བརྒྱད་ཀྱི་ཚད་ལས་ལྷག་པ་མི་བཅང་ངོ་ཞེས་འབྱུང་ངོ༌། །འདིར་གཞུང་ནི་ཆེན་པོ་ནི་སོར་བརྒྱད་དོ་ཞེས་གསུངས་པ་ཡིན་ནོ། །སོར་བཞི་པས་ཐུང་བ་ནི་དགོས་པ་མེད་དོ་ཞེས་བྱ་བ་ནི། དེ་བས་ཐུང་བ་ནི་ཅིར་ཡང་མི་མཁོ་བས་དེ་ཡང་བཅང་བར་མི་བྱ་བའོ། །ལྕི་བའི་བྱུག་པས་བསྐུས་པར་བཙེམ་མོ་ཞེས་བྱ་བ་ནི། ཆོས་གོས་སྲ་བརྐྱང་ལ་གྲིའུས་དྲས་པ་བཙེམ་པའི་གནས་ནི་དངོས་སུ་འམ་བརྒྱུད་པས་རྡུལ་ལྡང་བ་མེད་པར་བྱ་བའི་ཕྱིར་ལྕི་བའི་བྱུག་པས་བསྐུས་པར་བཙེམ་མོ། །འདི་ནི་རྡུལ་གྱིས་མ་རུང་བར་འགྱུར་བ་སྤང་བའི་ཕྱིར་རོ། །ལྕི་བ་མེད་ན་ཆག་ཆག་བཏབ་ཅིང་ཕྱགས་པར་རོ་ཞེས་བྱ་བ་ནི། བ་ལང་གི་ལྕི་བ་མེད་ན་ཆུས་ཆག་ཆག་བཏབ་ཅིང་ཕྱགས་མས་ཕྱགས་པའི་གནས་སུ་ཆོས་གོས་བཙེམ་མོ། །དེ་བཙེམ་པར་བྱའོ་ཞེས་བྱ་བ་ནི། དགེ་སློང་གིས་ཆོས་གོས་དེ་བཅོམ་དུ་རུང་བའོ། །འདིར་གཞུང་ནི་དགེ་སློང་དག་བྱ་གག་གི་གཤོག་ཤིང་ངམ་སྨྱིག་མའི་ཚལ་བུ་གང་ཡིན་པས་ཆོས་གོས་དག་བཙེམ་པར་བྱེད་དོ་ཞེས་གསུངས་པ་དང༌། གཞན་ལས་བཙེམ་པར་འོས་པ་བཙེམ་པར་བྱའོ་ཞེས་གསུངས་པས་དེའི་ཕྱིར་མདོ་འདི་བྱས་སོ། །ཁབ་ཀྱིས་ཀྱང་ངོ་ཞེས་བྱ་བ་ལ། ཀྱང་ངོ་ཞེས་བྱ་བའི་སྒྲས་ནི་བྱ་གག་གི་གཤོག་ཤིང་དང་སྨྱིག་མའི་ཚལ་བུ་འབའ་ཞིག་ཏུ་མ་ཟད་ཀྱི་ཁབ་ཀྱིས་ཀྱང་བཙེམ་དུ་རུང་བའོ། །དྲ་བའི་གཞུང་ནི་དགེ་སློང་དག་ལག་པ་དག་གིས་དྲ་བར་བྱེད་པ་ནི་མ་རུང་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། གྲིའུས་དྲ་བར་བྱའོ་ཞེས་གསུངས་པ་ཡིན་ནོ། །ཁབ་ཀྱི་གཞུང་ནི་དགེ་སློང་དག་བྱ་གག་གི་གཤོག་ཤིང་དང་སྨྱིག་མའི་ཚལ་བུས་ཆོས་གོས་འཚེམ་པ་ན། བཅོམ་ལྡན་འདས་ཀྱིས་བཀའ་སྩལ་པ། ཁབ་བཅང་བར་བྱའོ་ཞེས་གསུངས་པ་ཡིན་ནོ། །དེ་བཅང་བར་བྱའོ་ཞེས་བྱ་བ་ནི་ཁབ་དེའོ།།
ད་གན་དང་ཟངས་དང་འཁར་བ་དང་ལྕགས་ལས་བྱས་པ་ལས་གཞན་པ་མི་བཅང་ངོ་ཞེས་བྱ་བ་ནི། ར་གན་ལ་སོགས་པ་ལས་བྱས་པ་ལས་གཞན་པའི་ཁབ་བཅང་བར་མི་བྱ་བའོ། །ཁ་ཅིག་ལས་ཟངས་དང་ལྕགས་རྣོ་བ་དག་ལས་བྱས་པ་ཞེས་སོ་ཞེས་བྱ་བ་ནི། གཞུང་ཁ་ཅིག་ལས་ཁབ་ནི་རྣོ་ཟངས་དང་རྣོ་ལྕགས་ལས་བྱས་པ་བཅང་ངོ་ཞེས་འབྱུང་ངོ༌། །རྣོ་བ་ཞེས་བྱ་བ་ནི། དེ་གཉིས་ཀྱི་རིགས་ཀྱི་བདག་ཉིད་གཞན་ཞིག་ཡོད་དོ། །དེའི་ཁབ་རལ་སྤུ་གུ་ལྟ་བུའམ་ཆད་པ་ལྟ་བུར་བཅད་པར་བྱའོ་ཞེས་བྱ་བ་ནི། ཁབ་དེའི་ཁབ་རལ་སྤུ་གུའི་རྣམ་པ་ལྟ་བུ་དང༌། ཆད་པའི་རྣམ་པ་ལྟ་བུ་གློ་ནས་དབྱེར་རུང་བ་བཅང་བར་བྱ་བའོ། །དེ་ངོ་ཚ་མེད་པ་དང་དགེ་ཚུལ་དག་ལ་རག་ལས་པར་མི་བྱའོ་ཞེས་བྱ་བ་ནི། ཁབ་རལ་དེ་དགེ་སློང་ངོ་ཚ་མེད་པ་དང་དགེ་ཚུལ་དག་ལ་རག་ལས་པར་མི་བྱ་བའོ། །མི་བཤེས་པ་དང་མི་དྲན་པ་དང་རང་བཞིན་དུ་གནས་པ་མ་ཡིན་པ་དག་ལ་ཡང་ངོ་ཞེས་བྱ་བ་ནི། མི་བཤེས་པ་དང་དྲན་པ་དང་མི་ལྡན་པ་དང་རང་བཞིན་དུ་གནས་པ་མ་ཡིན་པ་དག་ལ་ཡང་ཁབ་རལ་དེ་རག་ལས་པར་མི་བྱ་བའོ། །ཁབ་དང་གྲིའུ་དག་བཙས་མི་ཟོས་པར་བྱ་བའི་ཕྱིར་སྤྲ་ཚིལ་གྱིས་བསྐུས་པའི་རས་མར་གཞུག་པར་བྱའོ་ཞེས་བྱ་བ་ནི། ཁབ་དང་གྲིའུ་དག་བཙའ་ཞེས་བྱ་བ་མཚོན་གྱི་དྲི་མས་མི་ཟོས་པར་བྱ་བའི་ཕྱིར་སྤྲ་ཚིལ་གྱིས་བསྐུས་པའི་རས་མར་གཞུག་པར་བྱ་བའོ། །འདིར་གཞུང་ནི་དགེ་སློང་རྣམས་ཀྱི་ཁབ་བཙས་ཟོས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། རས་མི་སྤྲ་ཚིལ་གྱིས་བསྐུ་བར་བྱ་ཞིང་དེར་ཁབ་དཀྲིས་ཏེ་གཞག་པར་བྱའོ་ཞེས་གསུངས་པ་དང༌། ཁ་ཅིག་ལས་ཁབ་དང་མཚོན་གཞག་པར་བྱའོ་ཞེས་གསུངས་པ་ཡིན་ནོ། །མི་འབྱིལ་བར་བྱ་བའི་ཕྱིར་ཆོས་གོས་ལ་སྒྲོག་རྟེན་བྱས་ཏེ་སྒྲོག་གཟུངས་གདགས་སོ་ཞེས་བྱ་བ་ནི། ཆོས་གོས་གྱོན་པ་ལུས་ལས་མི་འབྱིལ་བར་བྱ་བའི་ཕྱིར་ཆོས་གོས་ལ་སྒྲོག་རྟེན་བྱས་ཏེ་དེར་སྒྲོག་གཟུངས་གདགས་པའོ། །སྒྲོག་རྟེན་ཅེས་བྱ་བ་ནི། སྒྲོག་གཟུངས་ཀྱི་རྟེན་མ་ཆོས་གོས་ལ་ལྷན་པ་གྲུ་བཞིས་གླན་པའོ། །སྒྲོག་གཟུངས་ཞེས་བྱ་བ་ནི་འཛིན་པའི་ཐག་གུའོ། །སྒྲོག་གུ་ཡང་ངོ་ཞེས་བྱ་བ་ནི། མི་འབྱིལ་བར་བྱ་བའི་ཕྱིར་ཆོས་གོས་ལ་སྒྲོག་རྟེན་བྱས་ཏེ་གདགས་པའོ། །སྒྲོག་གུ་ཞེས་བྱ་བ་ནི་གཟུང་པའི་ཐག་གུའོ། །བཙོ་བླག་མཁན་ལ་གོས་ཁ་བསྒྱུར་བ་དང་ཁམ་
བསྒྱུར་བ་འཁྲུར་གཞུག་པར་མི་བྱའོ་ཞེས་བྱ་བའི་གཞུང་ནི། དྲུག་སྡེ་དག་བཙོ་བླག་མཁན་དག་ལ་གོས་དག་འཁྲུར་འཇུག་པ་ན། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གིས་གོས་དུར་སྨྲིག་དག་བཙོ་བླག་མཁན་དག་ལ་འཁྲུར་མི་གཞུག་པར། གཞོང་པ་འཇམ་པོར་རང་གིས་བཀྲུ་བར་བྱའོ་ཞེས་གསུངས་པ་དང༌། དྲུག་སྡེ་དག་གོས་དཀར་པོ་དག་བཙོ་བླག་མཁན་ལ་འཁྲུར་འཇུག་པ་ན། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་གིས་ཐམས་ཅད་ཀྱི་ཐམས་ཅད་དུ་བཅོ་བླག་མཁན་ལ་གོས་འཁྲུར་མི་གཞུག་གོ་ཞེས་གསུངས་པ་ཡིན་ནོ། །དེ་དང་འདྲ་བར་རང་གིས་མི་བྱའོ་ཞེས་བྱ་བ་ནི། གཙོ་བླག་མཁན་དེ་དང་འདྲ་བར་དགེ་སློང་རང་གིས་བཀྲུ་བར་མི་བྱ་བ་སྟེ། དེ་ནི་བརྡབ་པ་ལ་སོགས་བསམ་རུང་བར་འགྱུར་བ་སྤང་བའི་ཕྱིར་རོ། །དེའི་ངོགས་སུ་མི་བྱའོ་ཞེས་བྱ་བ་ནི། གཙོ་བླག་མཁན་དེའི་ངོགས་སུ་བཀྲུ་བར་མི་བྱའོ། །ཤིང་གི་ངོས་ལ་མི་བྱའོ་ཞེས་བྱ་བ་ནི། གོས་བཀྲུ་བར་མི་བྱ་བའོ། །གཞོང་པ་འཇམ་པོར་བཀྲུ་བར་བྱའོ་ཞེས་བྱ་བའི་གཞུང་ནི། གཞོང་པ་འཇམ་པོར་རང་གིས་བཀྲུ་བར་བྱའོ་ཞེས་གསུངས་པ་ཡིན་ནོ། །ཆུ་བདེ་བས་སོ་ཞེས་བྱ་བ་ནི། ཧ་ཅང་ཡང་མི་དྲོ་ཧ་ཅང་ཡང་མིག་རང་བ་སྟེ་དེ་ནི་དྲི་མ་འདག་པའི་ཐབས་བསྟན་པ་ཡིན་ནོ། །ལག་པ་གཉིས་ཀྱིས་མཐར་གྱིས་བསྒྱུར་ཞིང་ངོ་ཞེས་བྱ་བ་ནི་ལག་པ་གཉིས་ཀྱིས་མཐར་གྱིས་བསྒྱུར་ཞིང་བཀྲུ་བར་བྱ་བའོ། །མི་ནུས་ན་རྐང་བ་གཉིས་ཀྱིས་སོ་ཞེས་བྱ་བ་ནི། གལ་ཏེ་ལག་པ་གཉིས་ཀྱིས་མི་ནུས་ན་རྐང་པ་གཉིས་ཀྱིས་བཀྲུ་བར་བྱ་བའོ། །དེ་ལྟར་ཁྱིམ་པས་བཀྲུར་རུང་ངོ་ཞེས་བྱ་བ་ནི། ཇི་ལྟར་རང་གིས་བཀྲུ་བའི་ཆོ་ག་བསྟན་པ་དེ་ལྟར་ཁྱིམ་པས་ཀྱང་བཀྲུར་རུང་བའོ། །དེའི་གཞན་དུ་གྱུར་པར་སྤྱོད་པ་བསྲུང་བར་བྱའོ་ཞེས་བྱ་བ་ནི། ཆོ་ག་ཇི་སྐད་བསྟན་པ་ལས་གཞན་དུ་ཁྱིམ་པ་དེའི་ལོག་པར་སྤྱོད་པར་དགེ་སློང་གིས་བསྲུང་བར་བྱ་བའོ། །འདིར་གཞུང་ནི་གཞན་གྱིས་ལག་པ་གཉིས་ཀྱིས་ཀྱང་མི་ནུས་ལ། རྐང་པ་གཉིས་ཀྱིས་ཀྱང་མི་ནུས་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་གིས་ཞལ་ཏ་བྱས་ཏེ་གཞན་གྱིས་བཀྲུ་བར་བྱའོ་ཞེས་གསུངས་པ་ཡིན་ནོ། །ཕྱག་དར་ཁྲོད་ལེགས་པར་བཀྲུ་བ་དང་བཙེམས་པ་དག་ཁ་བསྒྱུར་བ་བཅང་བར་བྱའོ་ཞེས་བྱ་བ་ནི། ཕྱག་དར་ཁྲོད་ནི་ལེགས་པར་བཀྲུས་པ་དང༌། ལེགས་པར་
བཅོམ་པ་དང༌། ལེགས་པར་ཁ་བསྒྱུར་བར་བྱས་ཏེ་བཅང་བར་བྱའོ། །འདིར་གཞུང་ནི་དགེ་སློང་གིས་ཕྱག་དར་ཁྲོད་མི་གཙང་བས་གོས་པ་དག་བཅང་བར་མི་བྱ་བའོ། །གང་འཆང་ན་ཉེས་བྱས་སུ་འགྱུར་རོ། །ཕྱག་དར་ཁྲོད་པ་དག་ལེགས་པར་བཀྲུས་པ་དང༌། ལེགས་པར་བཙེམས་པ་དང༌། ལེགས་པར་ཁ་བསྒྱུར་བ་བྱས་ཏེ་བཅང་བར་བྱའོ་ཞེས་གསུངས་པ་ཡིན་ནོ། །མི་གཙང་བས་གོས་པའི་ཆོས་གོས་མི་བཅང་ངོ་ཞེས་བྱ་བ་ཡང༌། མོད་ལ་ལེགས་པར་བཀྲུས་ཏེ་བཅང་བར་བྱའོ་ཞེས་བྱ་བར་སྦྱར་རོ། །ཚོན་བཟང་བ་ཉིད་དུ་བྱ་བའི་ཕྱིར་གྲིབ་མ་དང་ཉི་མ་འདྲོས་པར་བརྡུང་ཞིང་བསྐམ་པར་བྱའོ་ཞེས་བྱ་བའི་གཞུང་ནི། རྣམ་པར་འབྱེད་པའི་སྟན་གྱི་བསླབ་པའི་གཞི་ལས། པིབ་པ་ལའི་ཚོན་བླངས་ཏེ་ཆམ་ཆོམ་བརྡུང་བར་བྱ་ཞིང་སྐམས་ཏེ་བསྐོལ་བར་བྱའོ་ཞེས་གསུངས་པ་ཡིན་ནོ། །ཚོན་བརྡུང་བ་དང་བསྐམ་པ་དང་གྲིབ་མ་དང་ཉི་མ་འདྲེས་མ་ལ་གཞན་དུ་བྱས་ན་ཉམས་པར་འགྱུར་རོ། །པིབ་པ་ལ་ཞེས་སྨོས་པ་ནི་ཚོན་གཞན་གྱི་དཔེ་ཡིན་ནོ། །གོས་དག་མེད་པར་བསྐོལ་ལོ་ཞེས་བྱ་བ་ནི། ཚོན་གྱི་ནང་དུ་གོས་དག་མ་བཅུག་པར་བསྐོལ་བར་བྱ་བའོ། །བྱེ་བྲག་གསུམ་མན་ཆད་དུའོ་ཞེས་བྱ་བ་ནི། བསྐོལ་ལོ་ཞེས་བྱ་བར་སྦྱར་རོ། །གང་གི་ཕྱིར་བྱེ་བྲག་གསུམ་མན་ཆད་དུ་བསྐོལ་དགོས་པ་དེའི་ཕྱིར། མང་བ་ཉིད་དུ་འདོད་པ་ཉིད་ཡིན་ན་ལན་གསུམ་བྱའོ་ཞེས་བྱ་བ་ལ། མང་བའི་དངོས་པོ་ནི་མང་བ་ཉིད་དོ། །དེ་འདོད་པ་ཉིད་ཡིན་ན་ལན་གསུམ་བསྐོལ་བར་བྱའོ། །ཕྱི་མ་ཆེས་ངན་པ་ཉིད་དོ་ཞེས་བྱ་བ་ནི། དང་པོ་བསྐོལ་བ་བས་ཕྱིས་བསྐོལ་བཤོས་ཆེས་ངན་པ་ཉིད་ཡིན་ནོ། །དེའི་ཕྱིར་ཐ་དད་པར་གཞག་གོ་ཞེས་བྱ་བ་ནི། གང་གི་ཕྱིར་ཕྱི་མ་ཆེས་ངན་པ་ཉིད་ཡིན་པ་དེའི་ཕྱིར་བསྐོལ་བ་རྣམས་སྣོད་ཐ་དད་པར་བླུགས་སོ། །འདི་ནི་དང་པོའོ་ཞེས་བྱ་བ་ལ་སོགས་པའི་ཡི་གེ་བྲིའོ་ཞེས་བྱ་བ་ནི། འདི་ནི་ཚོན་དང་པོའོ། །འདི་ནི་གཉིས་པའོ། །འདི་ནི་གསུམ་པའོ་ཞེས་དང་པོ་ལ་སོགས་པར་བསྐོལ་བའི་ཚོན་ཡོངས་སུ་ཤེས་པར་བྱ་བའི་ཕྱིར་སྣོད་ཀྱི་སྟེང་དུ་ཡི་གེ་བྲིའོ། །སྔར་དང་པོ་དང་སྦྱར་རོ་ཞེས་བྱ་བ་ནི། སྔར་ཚོན་དང་པོ་བསྐོལ་བ་དང་གོས་རྣམས་སུ་སྦྱར་བར་བྱ་བའོ། །གོས་ཀུན་ནས་བསུབས་པ་ལའོ་ཞེས་བྱ་བ་ནི། ཚོན་ལེགས་པར་འཇེན་པ་ཉིད་དུ་བྱ་བའི་ཕྱིར། ཚོན་གྱིས་ཀུན་ནས་བསུབས་པའི་གོས་དེ་ལ་ཚོན་དང་སྦྱར་བར་བྱའོ། །དེ་ལས་ཐུན་
ཇི་ཙམ་རན་པ་བཅུ་ཞིང་གཞོང་བར་བླུགས་སོ་ཞེས་བྱ་བ་ནི། ཚོན་བསྐོལ་བ་དེ་ལས་ཇི་ཙམ་གྱིས་གོས་ཕངས་པར་འགྱུར་བའི་ཐུན་དེ་ཙམ་བཅུ་ཞིང་གཞོང་བར་བླུགས་པར་བྱའོ། །གཤེར་ཆེས་ན་འཛག་ལ། སྐམས་ཆེས་ན་འདྲིས་པར་འགྱུར་བས་དེའི་ཕྱིར་རན་པར་རོ་ཞེས་བྱ་བ་ནི། ཕངས་པར་གྱུར་པའི་ཐུན་གཤེར་ཆེས་ན་གོས་ལས་འཛག་པར་འགྱུར་ལ། སྐམས་ཆེས་ན་གོས་འདྲིས་པར་འགྱུར་བས་དེའི་ཕྱིར་ཐུན་རན་པར་བླུགས་སོ། །གཟར་ཐག་ཐང་བཅད་པ་ཉིད་ལ་སྐམས་ན་བཟང་ངོ་ཞེས་བྱ་བ་ནི། གཟར་ཐག་ཐང་བཅད་ཅིང་བརྒྱངས་པ་ལ་སྐམས་ན་བཟང་བའོ། །ཇི་ལྟར་ཞེ་ན་དེའི་ཕྱིར་མཐའ་འབྱར་བས་སོ་ཞེས་བྱ་བ་སྨས་ཏེ། མཐའ་མ་རྣམས་འབྱར་བས་སོ། །ཇི་ལྟར་མཐའ་འབྱར་བར་བྱ་ཞེ་ན་དེའི་ཕྱིར། དབང་བུ་དག་གིས་སོ་ཞེས་བྱ་བ་སྨྲས་སོ། །གཟུང་དཀའ་བ་རྣམས་ནི་རྩྭ་བཏིང་བར་རོ་ཞེས་བྱ་བ་ནི། དབང་བུ་དག་གིས་གཟུང་དཀའ་བའི་གོས་རྣམས་ནི་རྩྭ་བཏིང་བའི་སྟེང་དུ་བསྐམ་པའོ། །ཚོན་ཕྱོགས་གཅིག་ཏུ་མི་འཚིགས་པར་བྱ་བའི་ཕྱིར་ཡང་དང་ཡང་བསྒྱུར་པར་བྱའོ་ཞེས་བྱ་བ་ནི། ཚོན་གྱིས་གོས་མཐའ་དག་ལ་ཁྱབ་པར་བྱ་བའི་ཕྱིར་ཡང་དང་ཡང་དུ་གོས་ཀྱི་བླ་འོག་བསྒྱུར་བར་བྱ་བ་སྟེ། དེས་ནི་ཕྱོགས་གཅིག་ ཏུ་འཚིགས་པར་མི་འགྱུར་རོ། །ཚོན་སར་པ་ནི་སར་པ་དག་ལ་བླུགས་ན་བཟང ་ངོ་ཞེས་བྱ་བ་ནི། ཚོན་སར་པ་ནི་གོས་སར་པ་དག་ལ་བླུགས་ན་བཟང་བའོ། །སྙིང་པ་ནི་རྙིང་པ་དག་ལ་འོ་ཞེས་བྱ་བ་ནི། ཚོན་རྙིང་པ་ནི་གོས་རྙིང་པ་དག་ལ་བླུགས་ན་བཟང་བའོ། །སར་པ་རྣམས་ནི་ཉི་མ་ལ་སྐམས་ནའོ་ཞེས་བྱ་བ་ནི། གོས་སར་པ་རྣམས་ནི་ཉི་མ་ལ་སྐམས་ན་བཟང་བའོ། །རྙིང་པ་རྣམས་ནི་གྲིབ་མ་ལའོ་ཞེས་བྱ་བ་ནི། སྐམས་ན་བཟང་ངོ་ཞེས་བྱ་བར་སྦྱར་རོ། །མི་འདྲིས་པར་བྱ་བའི་ཕྱིར་ཉི་མ་གཞན་ལ་ཆུའི་ཐུན་བླུགས་སོ་ཞེས་བྱ་བ་ནི། མི་འདྲིས་པར་བྱ་བའི་ཕྱིར་ཉི་མ་གཞན་ལ་ཆུའི་ཐུན་ཇི་ཙམ་གྱིས་བངས་པར་འགྱུར་བ་བླུགས་ཤིང་བསུངས་པ་དང་བསྐམ་པར་བྱའོ། །ཚོན་ཞག་ལོན་ན་སྲ་བར་འགྱུར་ལ་སྲ་བར་གྱུར་ན་ཆུའི་ཐུན་གྱིས་ཀྱང་རྟོལ་བར་ནུས་སོ། །བང་རིམ་དང་འཆག་སར་ཚོན་གྱི་ལས་མི་བྱ་བའོ་ཞེས་བྱ་བ་ལ། བང་རིམ་ཞེས་བྱ་བ་ནི། གཙུག་ལག་ཁང་གི་ཁྱམས་ཀྱིའོ། །གཙུག་ལག་ཁང་དུ་མི་བྱའོ་ཞེས་བྱ་བ་ཡང་ཚོན་གྱི་ལས་སོ། །དེའི་སྟེང་དུ་བྱའོ་
ཞེས་བྱ་བ་ནི། ཚོན་གྱི་ལས་ཏེ་གཙུག་ལག་ཁང་གི་སྟེང་དུ་བྱ་བ་སྟེ། དེ་ནི་དེའི་གནས་ཡིན་གྱི་བང་རིམ་ནི་མ་ཡིན་ནོ། །འཐོར་འཐུང་བྱ་བའི་ཉེན་ཀོར་དུ་མི་བྱའོ་ཞེས་བྱ་བ་ནི། ཆབ་ཀུང་ས་ལ་སོགས་པའི་ཉེན་ཀོར་དུ་ཚོན་གྱི་ལས་མི་བྱ་བའོ། །ཕྱོགས་དེར་ཞལ་ཞལ་བྱའོ་ཞེས་བྱ་བ་ནི། ཚོན་གྱི་ལས་བྱ་བའི་ཕྱོགས་དེར་ཞལ་ཞལ་བྱ་བའོ། །གལ་ཏེ་རྡོ་ཐལ་གྱིས་བྱུགས་པ་ཡིན་ན་བཀྲུ་བར་བྱའོ་ཞེས་བྱ་བ་ནི། གལ་ཏེ་ཕྱོགས་དེར་རྡོ་ཐལ་གྱིས་བྱུགས་པ་ཡིན་ནོ། དེའི་ཚེ་ཆུས་བཀྲུ་བར་བྱའོ། །གལ་ཏེ་བརྩམས་པ་ན་རླུང་དང་ཆར་འོང་ན་ཁྱམས་སུ་བྱའོ་ཞེས་བྱ་བ་ནི། གལ་ཏེ་ཚོན་གྱི་ལས་རྩོམ་པ་ན་རླུང་དང་ཆར་འོང་ན་དེའི་ཚེ་ཁྱམས་སུ་ཚོན་གྱི་ལས་བྱ་བའོ། །བྱས་ཟིན་ནས་ཕྱོགས་དེར་ལྕི་བ་འམ་སས་བྱུག་པར་བྱའོ་ཞེས་བྱ་བ་ནི། ཚོན་གྱི་ལས་བྱས་ཟིན་ནས་ཕྱོགས་དེར་ལྕི་བ་འམ་སས་བྱུག་པར་བྱ་བའོ། །བཅགས་པ་དང་བརྡབ་པ་རུང་བར་མ་གྱུར་བ་སྤྱད་པ་བསྟེན་པར་མི་བྱའོ་ཞེས་བྱ་བ་ནི། གོས་བཅགས་པ་དང་བརྡབ་པ་རུང་བར་མ་གྱུར་པ་སྤྱད་པ་བརྟེན་པར་མི་བྱ་བའོ། །འདིར་རུང་བ་གང་ཡིན་ཞེ་ན་དེའི་ཕྱིར་འདི་ལ་འཚེར་བ་ཉམས་པ་ནི་རུང་བ་ཡིན་ནོ་ཞེས་བྱ་བ་སྨྲས་ཏེ། གོས་འདི་ལ་འཚེར་བ་ཞེས་བྱ་བ་ནི། མདོག་གསལ་ཞིང་འཚེར་བ་ཉམས་པ་ནི་རུང་བ་ཡིན་ནོ། ཇི་ལྟར་འཚེར་བ་ཉམས་པར་བྱ་ཞེ་ན་དེའི་ཕྱིར། ཆུས་བརླན་པ་ཉིད་ནའོ་ཞེས་བྱ་བ་སྨྲས་ཏེ། གོས་ཀྱི་འཚེར་བ་ཆུས་བརླན་པ་ཉིད་ན་ཉམས་ཤིང་རུང་བ་ཡིན་ནོ། །ཟིལ་པས་བརླན་ན་ལག་པས་མཉེ་བས་ཉམས་པར་བྱ་སླའོ་ཞེས་བྱ་བ་ནི། གོས་ཟིལ་པས་བརླན་ན་ལག་པས་མཉེ་བས་འཚེར་བ་ཉམས་པར་བྱས་ལ་བ་ཉིད་ཡིན་ནོ། ཤམ་ཐབས་བགོས་པའི་སྟེང་དུ་སྐ་རགས་བཅིང་ངོ་ཞེས་བྱ་བ་ནི། ཤམ་ཐབས་བགོས་པའི་སྟེང་དུ་སྐ་རགས་བཅིང་བར་བྱ་བའོ། །ཅི་ཞིག་བཅིང་བར་བྱ་ཞེ་ན་དེའི་ཕྱིར་ཤུར་བུའམ་ལྕག་ཕོད་དམ་རྒྱ་ཅང་ངམ་ཤུར་བུ་ཕྲེ་འུས་སོ་ཞེས་བྱ་བ་སྨྲས་ཏེ། ཤུར་བུ་ཞེས་བྱ་བ་ནི། སྐུད་པ་མང་པོ་ལས་བཏགས་པ་སྲ་བ་མོ་ཞེང་ཆེ་བའོ། །ལྕག་པོད་ཅེས་བྱ་བ་ནི། ལྷས་མ་གྲུ་བཞིར་འདུག་པའོ། །རྒྱ་ཅང་ཞེས་བྱ་བ་ནི། སྐུད་པ་མང་པོ་ལས་བཏགས་པ་ཉིད་ཡིན་པ་དབུས་ཁོང་སྟོང་དུ་འདུག་པའོ། །ཤུར་བུ་ཕྲེའུ་ཞེས་བྱ་བ་ནི། སྐུད་པ་ཕྲ་མོ་ལས་བཏགས་ལ་མདོ་མདོར་བུ་གུ་ལྔའམ་དྲུག་རིམ་དུ་བྱས་པ་བཏོད་པའོ། །སྐ་རགས་མ་
བཅིངས་པར་གྲོང་དུ་འཇུག་པར་མི་བྱའོ་ཞེས་བྱ་བ་ནི། ཤམ་ཐབས་བགོས་པའི་སྟེང་དུ་སྐ་རགས་མ་བཅིངས་པར་གྲོང་དུ་འཇུག་པར་མི་བྱ་བ་སྟེ། འདི་ནི་ཤམ་ཐབས་བརླག་པར་འགྱུར་བ་སྤང་བའི་ཕྱིར་རོ། །ཁྲིས་གཅིག་གིས་ཀྱང་ངོ་ཞེས་བྱ་བ་ནི། གལ་ཏེ་སྐ་རགས་ཁྲིས་གཅིག་གིས་བཅིངས་ན་དེ་ལྟ་ན་ཡང་རུང་བའོ། །ཚོམ་བུ་ཅན་དང་ཚར་ཚར་ཅན་དང་ཟླ་གམ་ཅན་དང༌། གསེར་སྐུད་ནི་རྒྱན་མ་ཡིན་པ་མ་ཡིན་ནོ་ཞེས་བྱ་བ་ལ་ཚོམ་བུ་ཅན་ཞེས་བྱ་བ་ནི། གསེར་སྐུད་ཀྱི་ཤར་བུ་གསུམ་མམ་བཞིའི་ཚོམས་ལ་མདོ་མདོར་ནོར་བུའི་ཕྲས་སྒྲས་པའོ། །ཚར་ཚར་ཅན་ཞེས་བྱ་བ་ནི། གསེར་ལས་བྱས་པའི་ཚར་ཚར་གྲོག་སྒལ་གྱི་བར་རི་ལུ་ཅན་གསེར་སྐུད་ཀྱིས་བརྒྱུས་པ་ཐོག་མར་དྲིལ་བུ་གཡེར་སྣ་འཕྱང་བ་དག་བཏགས་པའི་འོག་པག་གང་ཡིན་པའོ། །ཟླ་གམ་ཅན་ཞེས་བྱ་བ་ནི། གསེར་ལས་བྱས་པའི་རྒྱན་ཟླ་གམ་གྲུ་གསུམ་དག་གིས་བརྒྱན་པའི་འོག་བག་གང་ཡིན་པའོ། །གསེར་སྐུད་ཅེས་བྱ་བ་ནི་གསེར་ལས་བྱས་པའི་ལུ་གུ་རྒྱུད་དོ། །དེ་དག་ནི་རྒྱན་མ་ཡིན་པ་མ་ཡིན་ཏེ་རྒྱན་ཁོ་ན་ཡིན་ནོ། །རྒྱན་ཐོགས་པ་བསྟེན་པར་མི་བྱའོ་ཞེས་སྨོས་པས་དེ་དག་བཀག་པར་རིག་པར་བྱའོ། །ཁྲ་བོར་བྱས་པ་ཡང་དེ་དང་འདྲའོ་ཞེས་བྱ་བ་ནི། ཟ་འོག་དང་ཚོན་རིས་དང་སྐུད་རིས་དང་ཕྲ་བཀོད་པ་ལ་སོགས་པས་ཁྲ་བོར་བྱས་པའི་གོས་ཀྱང་རྒྱན་དང་འདྲ་སྟེ། མདོ་འདི་ནི་གོས་ཀྱི་དོན་དུ་བྱས་པ་ཡིན་ནོ། །རྩྭ་ལས་བྱས་པ་དང་ཤིང་ལས་བྱས་པ་དང་གཞན་ཡང་རྒྱན་གྱི་ཁོངས་སུ་གཏོགས་པའི་ཕྱིར་རོ། །གཞི་མ་བཏིང་བའི་སར་ཆོས་གོས་གཞག་པར་མི་བྱའོ་ཞེས་བྱ་བ་ནི། རས་སམ་ལོ་མ་ལ་སོགས་པ་གཞི་མ་བཏིང་བའི་ས་ལ་ཆོས་གོས་གཞག་པར་མི་བྱ་བ་སྟེ། དེ་ནི་མ་རུང་བར་འགྱུར་བ་སྤང་བའི་ཕྱིར་རོ། །འདིར་གཞུང་ནི་རྣམ་པར་འབྱེད་པའི་སྟན་གྱི་བསླབ་པའི་གཞི་ལས། དགེ་སློང་རྣམས་ཆོས་གོས་དག་གྱོན་ཏེས་ལ་འཁོད་པ་ན་ཆོས་གོས་དག་མ་རུང་བར་གྱུར་བ་དང༌། བཅོམ་ལྡན་འདས་ཀྱིས་བཀའ་སྩལ་པ། དད་པ་སྦྱིན་པར་བྱ་བ་ཆུད་གཟན་པར་མི་བྱ་བར་འདི་ལྟར་སྟན་ནང་ཚངས་ཅན་ལ་འདུག་པར་བྱའོ། །སྟན་ནང་ཚངས་ཅན་ཇི་ལྟ་བུ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། རྩྭའི་ཆུན་པོ་བཅིངས་ཏེ་རས་མས་དཀྲི་བར་བྱའོ་ཞེས་གསུངས་པ་ཡིན་ནོ། །འདིར་སྟན་ནང་ཚངས་ཅན་ནི་དཔེ་ཙམ་
དུ་ཟད་དེ་སྟན་གཞན་ལ་ཡང་འདུག་པར་བྱའོ། །འདི་ནི་ཆོས་གོས་མ་རུང་བར་འགྱུར་བ་སྤང་བའི་ཕྱིར་རོ། །མི་གཙང་བའི་ཕྱོགས་སུ་མི་གཞག་གོ་ཞེས་བྱ་བ་ནི། ཆོས་གོས་དེ་བར་དུ་ཆོད་པར་གྱུར་ཀྱང་མི་གཞག་གོ །རྟུལ་བ་ཡོད་ན་ཁུར་ལྕི་པས་མི་མནན་ནོ་ཞེས་བྱ་བ་ནི། རྟུལ་བ་གཞན་ཡོད་ན་ཁུར་ལྕི་བས་ཆོས་གོས་མནན་པར་མི་བྱ་བའོ། །གཞན་དུ་སྤྱད་པས་ཡོངས་སུ་སྤྱད་པར་མི་བྱའོ་ཞེས་བྱ་བསྟོད་དུ་བགོ་བ་སྨད་དུ་བགོ་བ་དང་སྨད་དུ་བགོ་བ་སྟེང་དུ་བགོ་བ་ཡོངས་སུ་སྤྱད་པར་མི་བྱ་བའོ། །བཤང་བ་དང་གཅི་བ་བྱ་བ་དང་མི་གཙང་བའི་བྱི་དོར་བྱ་བ་དག་ཏུ་བླ་གོས་བགོ་བ་བསྟེན་པར་མི་བྱའོ་ཞེས་བྱ་བ་ནི། བཤང་བ་དང་གཅི་བ་བྱ་བ་དང་མི་གཙང་བའི་བྱི་དོར་བྱ་བ་དག་ཏུ་བླ་གོས་བགོ་བར་མི་བྱ་བའོ། །མི་གཙང་བའི་བྱི་དོར་བྱ་བ་དག་ཏུ་ཞེས་བྱ་བ་ནི། མི་གཙང་བའི་ངོ་བོ་ཉིད་གང་དག་ཡིན་པ་གཙུག་ལག་ཁང་དུ་ཆག་ཆག་གདབ་པ་དང་ཕྱག་དར་བྱ་བ་དང་རྐང་པ་བཀྲུ་བ་དང༌། ཆབ་ཀུང་ས་ཕྱགས་པ་དང་བཀྲུ་བཤལ་བྱ་བ་ལ་སོགས་པའི་བྱི་དོར་གྱི་ལས་དག་སྟེ། དེ་དག་ཏུ་བླ་གོས་བགོ་བར་མི་བྱ་བའོ། །དེར་ཉལ་བར་མི་བྱའོ་ཞེས་བྱ་བ་ནི། བླ་གོས་དེའི་སྟེང་དུ་ཉལ་བར་མི་བྱ་བའོ། །བསོད་སྙོམས་ལ་རྒྱུ་བ་དང༌། མཆོད་སྟོན་དང་མཆོད་རྟེན་ལ་ཕྱག་བྱ་བ་དང་རྗེས་བྱ་བ་དང་དགེ་འདུན་ཚོགས་པ་དང་གདམས་དག་དང་ཆོས་མཉན་པ་ཉམས་སུ་མྱོང་བ་ལས་གཞན་པའི་བྱ་བ་ལ་སྣམ་སྦྱར་བགོ་བར་མི་བྱའོ་ཞེས་བྱ་བ་ནི། བསོད་སྙོམས་ལ་རྒྱུ་བ་ལ་སོགས་པ་ཉམས་སུ་མྱོང་བར་བྱ་བ་ལས་གཞན་པའི་བྱ་བ་ལ་སྣམ་སྦྱར་བགོ་བར་མི་བྱ་བའོ། དེ་ལ་འདུག་པའམ་ཉལ་བར་མི་བྱའོ་ཞེས་བྱ་བ་ནི། སྣམ་སྦྱར་དེའི་སྟེང་དུ་འདུག་པ་དང་ཉལ་བར་མི་བྱ་བ་སྟེ། དེས་ན་གྭ་བརྫི་བ་ཡང་བཀག་པ་ཡིན་ནོ། །གཞུང་ནི་སྣམ་སྦྱར་ལུས་ལ་རེག་པར་མི་བྱ། གདིང་བར་མི་བྱ། རྒྱུན་དུ་བགོ་བས་ལོངས་སྤྱད་པར་མི་བྱ། སྣམ་སྦྱར་གྱི་སྟེང་དུ་འདུག་པར་མི་བྱ། ཉལ་བར་མི་བྱ། སྣམ་སྦྱར་གྱིས་རྩྭའམ་ལྕི་བའམ་ས་བསྐུར་བར་མི་བྱའོ་ཞེས་གསུངས་པ་ཡིན་ནོ། །འགའ་ཡང་བསྐུར་བ་ལ་སྦྱར་བར་མི་བྱའོ་ཞེས་བྱ་བ་ནི། སྣམ་སྦྱར་གྱིས་དངོས་པོ་འགའ་ཡང་བསྐུར་བ་ལ་སྦྱར་བར་མི་བྱ་བ་སྟེ། སྣམ་སྦྱར་གྱི་ནང་དུ་ཅི་ཡང་བཅུག་སྟེ་བསྐུར་བར་མི་བྱ་བའོ་ཞེས་བྱ་བའི་ཐ་ཚིག་གོ །ལུས་ལ་རེག་པར་བགོ་བར་མི་བྱའོ་ཞེས་བྱ་བ་ནི། སྣམ་སྦྱར་ལུས་ལ་རེག་པར་བགོ་བར་མི་
བྱའོ། །མཚན་ཁུང་གཡས་པའི་དྲོད་ཀྱིས་དེ་མ་རུང་བར་འགྱུར་རོ་ཞེས་བྱ་བ་ནི། མཆན་ཁུང་གཡས་པའི་དྲོད་ཅེས་བྱ་བ་མཆན་ཁུང་གཡས་པའི་རྡུལ་གྱིས་སྣམ་སྦྱར་དེ་མ་རུང་པར་འགྱུར་སྲིད་པའོ། །དེ་ལྟར་མི་འགྱུར་བར་བྱ་བའི་ཕྱིར་ཕྱོགས་དེར་དེ་ལ་གོས་གླན་པར་བྱའོ་ཞེས་བྱ་བ་ནི། མ་རུང་བ་དེ་ལྟར་མི་འགྱུར་བར་བྱ་བའི་ཕྱིར་མཆན་ཁུང་གཡས་པའི་ཕྱོགས་དེར་སྣམ་སྦྱར་དེ་ལ་གོས་གླན་པར་བྱའོ། །ཚད་ཇི་ཙམ་ཞེ་ན་དེའི་ཕྱིར་ཁྲུ་ཕྱེད་དང་དོ་དང་མཐོ་གང་ངོ་ཞེས་བྱ་བ་སྨྲས་ཏེ། དེའི་ཚད་ནི་སྲིད་དུ་ཁྲུ་ཕྱེད་དོ། །ཞེང་དུ་མཐོ་གང་ངོ༌། །ངོས་གཉིས་ཀར་སྐུད་པའི་གཟུངས་ཀྱིས་སྦྱར་རོ་ཞེས་བྱ་བ་ནི། གོས་དེ་ངོས་གཉིས་ཀར་ཁབ་སྲུངས་ཀྱི་སྐུད་པའི་གཟུངས་ཀྱིས་མདོ་མདོར་གཟུངས་གདབ་ཅིང་སྦྱར་བར་བྱའི། དངོས་སུ་བཅོམ་པར་ནི་མི་བྱའོ། །དུས་དུས་སུ་དེ་བཀྲུ་བ་དང་ཁ་བསྒྱུར་བར་བྱའོ་ཞེས་བྱ་བ་ནི་གོས་དེའོ། །དེའི་དེ་ནི་བཙག་གིས་སོ་ཞེས་བྱ་བ་ནི། གོས་དེའི་ཁ་བསྒྱུར་བ་དེ་ནི་བཙག་གིས་རིག་པར་བྱའོ། །གདོང་ཕྱིས་བཅང་བར་བྱའོ་ཞེས་བྱ་བ་ལ། གདོང་ཕྱིས་ནི་རས་ཕྱིས་ལ་སོགས་པ་དག་གི་དཔེ་ཡིན་ནོ། །ལུས་འཛག་པས་རྣག་གཟན་ནོ་ཞེས་བྱ་བ་ནི། བཅད་པར་བྱ་བ་སྟེ། དགེ་སློང་གི་ལུས་ཁྲག་གམ་རྣག་འཛག་པ་དེ་ནི་ལུས་འཛག་པ་ཞེས་བྱ་སྟེ། དེས་རྣག་གཟན་བཅང་བར་བྱའོ། །དེ་ཆོས་གོས་ཀྱི་ནང་དུ་བགོའོ་ཞེས་བྱ་བ་ནི། རྣག་གཟན་དེ་ཆོས་གོས་ཀྱི་ནང་རོལ་དུ་བགོ་བར་བྱ་བའོ། །འབྱང་ན་བསྐ་བའི་ཆུ་དང༌། སོ་ཕག་གི་ཕྱེ་མ་དང་སྦྱར་བའི་ཆུས་སྤངས་ཏེ་དལ་བུས་ཁད་ཀྱིས་ཁད་ཀྱིས་དགོག་པར་བྱའོ་ཞེས་བྱ་བ་ནི། རང་གཟན་དེ་ལུས་ལ་འབྱར་ན་ཤིང་པིབ་པ་ལ་ལ་སོགས་པའི་ཤུན་པ་དང་སྦྱར་བ་བསྐ་བའི་ཆུའམ། སོ་ཕག་གི་བྱེ་མ་དང་སྦྱར་བ་ཆུས་སྤངས་ཏེ་དལ་བུས་ཁད་ཀྱིས་ཁད་ཀྱིས་དགོག་པར་བྱའོ། །དེ་གཉིས་ཀྱིས་ནི་དྲི་མ་འདག་པ་དང་རྨ་འཚོ་བར་འགྱུར་རོ། །རྣག་དང་ཁྲག་ཀྱང་ངོ་ཞེས་བྱ་བ་ནི། བསྐ་བའི་ཆུ་དང་སོ་ཕག་གི་ཕྱེ་མ་དང་སྦྱར་བའི་ཆུས་སྤངས་ཏེ་དལ་བུས་ཁད་ཀྱིས་ཁད་ཀྱིས་དགོག་པར་བྱའོ། །དུས་དུས་སུ་དེ་བཀྲུ་བ་དང་བསྐམ་པ་དང་ཁ་བསྒྱུར་བར་བྱའོ་ཞེས་བྱ་བ་ནི་རྣག་གཟན་དེའོ། །དེའི་དེ་ནི་བཙག་གིས་བཟང་ངོ་ཞེས་བྱ་བ་ནི། རྣག་གཟན་དེའི་ཁ་བསྒྱུར་བ་དེའོ། །དེའི་དེ་ལ་ནི་སའི་སྙིང་པོ་བཟང་ངོ་ཞེས་བྱ་བ་ནི། འཛག་པ་དེའི་སྐམ་པ་དང་ཤ་བཀྲར་མི་འགྱུར་བ་དེའི་སྨན་དུ་ནི་སའི་སྙིང་
པོའི་ཕྱེ་མ་ བཟང་ངོ༌། །ཆོས་གོས་ངག་གར་བབ་བབ་ཏུ ་མི་གཞག་གོ་ཞེས་བྱ་བ་ནི། སྐད་འགའ་ཙམ་གཞག་པའི་གནས་དགག་པ་ནི་སྔར་བྱས་ཟིན་པས་འདི་ནི་མཛོད་དུ་གྱུར་པའི་གནས་གང་ཡིན་པ་དེའི་དགག་པ་ཡིན་ནོ། །དེའི་དོན་དུ་གདང་བུ་བཅའོ་ཞེས་བྱ་བ་ནི། ཆོས་གོས་གཞག་པ་དེའི་དོན་དུའོ། །དེའི་དོན་དུ་སྦུབས་ཁུང་བྱའོ་ཞེས་བྱ་བ་ནི། གོས་ཀྱི་གདང་བཅའ་བ་དེའི་དོན་དུ་ནི་རྩིག་ངོས་ལ་སྦུབས་ཁུང་གདོད་པར་བྱ་བའོ། །གང་གི་ཚེ་ཞེ་ན་དེའི་ཕྱིར་གཙུག་ལག་ཁང་རྩིག་པའི་ཚེ་ན་འོ་ཞེས་བྱ་བ་སྨྲས་ཏེ། དང་པོ་གཙུག་ལག་ཁང་གི་རྩིག་པ་བརྩིག་པའི་ཚེ་ཉིད་ན་སྦུབས་ཁུང་གདོད་པར་བྱའོ། །བརྩིགས་ཟིན་པའི་འོག་ཏུ་ནི་མི་བྱ་སྟེ། རྩིག་པ་བརྐོས་ན་གཙུག་ལག་ཁང་མ་རུང་བར་འགྱུར་པའི་ཕྱིར་རོ། །བྱས་ཟིན་ན་བུག་མི་བྱའོ་ཞེས་བྱ་བ་ནི། གཙུག་ལག་ཁང་བརྩིགས་ཟིན་ན་སྦུབས་ཁུང་བྱ་བའི་ཕྱིར་གཙུག་ལག་ཁང་ལ་བུག་གདོད་པར་མི་བྱ་བའོ། །ཁང་ཁྱིམ་ལ་ཡང་དེ་བཞིན་ནོ་ཞེས་བྱ་བ་ནི། གདང་བུ་བཅའ་བའི་ཕྱིར་དང༌། རྩིག་པའི་ཚེ་ན་སྦུབས་ཁུང་གདོད་པ་དང༌། བྱས་ཟིན་ན་བུ་གུ་མི་བྱ་བ་གཙུག་ལག་ཁང་བཞིན་ནོ། །དེ་ནི་ཤིང་བུའམ་ཐག་པས་འགྲུབ་པོ་ཞེས་བྱ་བ་ནི། དགོན་པར་ཡང་རུང་གཙུག་ལག་ཁང་དུ་ཡང་དུང་སྟེ། ཆོས་གོས་གཞག་པའི་གདང་བུ་དེ་ནི་ཤིང་བུའམ་ཐག་པས་འགྲུབ་པའོ། །གཏུར་བུས་གོས་དག་བསྐུར་ན་བཟང་ངོ་ཞེས་བྱ་བ་ནི། ཆོས་གོས་དག་ཆུད་ཟ་བར་འགྱུར་བ་སྤོང་བ་དང་འབྲེལ་པའི་ཕྱིར་རོ། །དེ་བྱའོ་ཞེས་བྱ་བ་ནི་གཏུར་བུ་དེ་བྱའོ། །ཁྲུ་གསུམ་དང་བྱེད་དང་གསུམ་གཉིས་ལྟེབ་ཏུ་བྱས་ཏེ་བཅོམ་མོ་ཞེས་བྱ་བ་ནི། གཏུར་བུ་དེ་སྲེད་དུ་ནི་ཁྲུ་གསུམ་མོ། །ཞེང་དུ་ནི་ཁྲུ་ཕྱེད་དང་གསུམ་ལས་ཉིས་ལྟབ་ཏུ་བྱས་ཏེ་བཅོམ་མོ། །དབུས་སུ་ཁ་གདོད་དོ་ཞེས་བྱ་བ་ནི། གཏུར་བུ་དེའི་དབུས་སུ་སྲིད་དུ་ཁ་གདོད་པར་བྱའོ། །ཁ་རན་བུག་ཅན་བྱའོ་ཞེས་བྱ་བ་ནི། གཏུར་བུ་དེའི་ཁ་དེར་ཁ་རན་བུ་གུ་ཅན་བྱ་བའོ། །ཁ་རན་བུ་གུ་ཅན་ཅི་ལས་བྱ་ཞེན་དེའི་ཕྱིར་ཐག་གུ་ལས་སོ་ཞེས་བྱ་བ་སྨྲས་སོ། །ཁ་བརྒྱུད་གཞན་ཡང་ངོ་ཞེས་བྱ་བ་ནི། ཁ་བརྒྱུ་བའི་སྲད་བུ་གཞན་ཡང་གདགས་པའོ། །སྤྱོད་པར་བྱ་བ་དག་སྟེང་དུ་གཞུག་གོ་ཞེས་བྱ་བ་ནི། གོས་སྤྱད་པར་བྱ་བ་དག་གཏུར་བུའི་ཁ་ལོགས་སུ་གཞུག་པའོ། །སང་འགྲོ་བར་འགྱུར་བ་ཉིད་ན་བླ་མ་ལ་ཞུས་པ་སྟེ་གནང་ན་འགྲོ་བར་བྱའོ་ཞེས་བྱ་བ་ནི། ཞག་གཅིག་གི་
འོག་ཏུ་འགྲོ་བར་འགྱུར་བའི་མདུན་རོལ་ནས་བླ་མ་ལ་ཞུས་ཏེ་གལ་ཏེ་གནང་ན་དེའི་འོག་ཏུ་འགྲོ་བར་བྱའོ། །རང་གི་གནས་སུ་ཆག་ཆག་ལ་སོགས་པ་བྱས་ཏེའོ་ཞེས་བྱ་བ་ནི། འགྲོ་གར་བདག་ཉིད་གང་ན་གནས་པའི་གནས་དེར་ཆག་ཆག་ལ་སོགས་པ་བྱས་ཏེ་གཞན་དུ་འགྲོ་བར་བྱ་བའོ། །སོགས་པ་ཞེས་སྨོས་པའི་སྒྲས་ནི་ཕྱག་དར་དང་ལྕི་བ་འཇམ་པོས་བྱུག་པར་བྱ་བ་དག་བསྡུའོ། །ལམ་དུ་ཆོས་དང་ལྡན་པའི་གཏམ་གྱིས་སམ་འཕགས་པའི་མི་སྨྲ་བ་ཉིད་ཀྱིས་འགྲོ་བར་བྱའོ་ཞེས་བྱ་བ་ནི། དགེ་སློང་ལམ་དུ་ཞུགས་པས་སོ། །ངལ་བསོ་བའི་གནས་སུ་གཙུག་ལག་ཁང་གི་ཚིགས་སུ་བཅད་པ་གདོན་ཏོ་ཞེས་བྱ་བ་ནི། གང་དུ་ངལ་བསོས་པའི་གནས་དེ་ནས་འགྲོ་བའི་ཚེ་དྲང་སྲོང་གིས་གསུངས་པའི་ཚིགས་སུ་གཅད་པ་གདོན་པའོ། །ཆུ་བཅུས་པར་ཡང་ངོ་ཞེས་བྱ་བ་ཡང༌། གནས་སུ་དྲང་སྲོང་གིས་གསུངས་པའི་ཚིགས་སུ་གཅད་པ་གདོན་པའོ་ཞེས་སུའི་ཕྱིར་ཞེ་ན། དེའི་ཕྱིར་ཆུ་དེ་གང་གི་ཡིན་པ་དེའི་ཕྱིར་རོ་ཞེས་བྱ་བ་སྨྲས་ཏེ། ཡུལ་གྱི་བདག་པོའམ་ཁྲོན་པའི་བདག་པོའོ། །ལྷ་རྣམས་ཀྱི་ཕྱིར་ཡང་གཞན་ནོ་ཞེས་བྱ་བ་ནི། ཆུ་བཅུས་པའི་གནས་སུ་ཆུའི་ལྷ་རྣམས་ཀྱི་ཕྱིར་ཡང་དྲང་སྲོང་གིས་གསུངས་པའི་ཚིགས་སུ་བཅད་པ་གཞན་གདོན་པའོ། །གནས་པར་ནི་རྒྱུད་ཆགས་གསུམ་པའོ་ཞེས་བྱ་བ་ནི། ཞག་ཏུ་གནས་པའི་གནས་སུ་ནི་དགོངས་ཀ་དང་ནང་པར་གྱི་དུས་གཉིས་སུ་རྒྱུད་ཆགས་གསུམ་པ་གདོན་པར་བྱ་བའོ། །དཔྱང་ཐག་བཅང་བར་བྱའོ་ཞེས་བྱ་བ་ནི། འབབ་ཆུ་དཀོན་པའི་ཡུལ་དུ་ཁྲོན་པ་ལ་ལྟོས་ཤིང་འགྲོ་བའི་ཚེ་ནའོ། །དེའི་ཚད་ནི་ཁྲུ་བརྒྱ་ཡན་ཆད་ནས་བརྒྱ་ལྔ་བཅུ་མན་ཆད་དོ་ཞེས་བྱ་བ་ནི་དཔྱད་ཐག་དེའི་སྲིད་ཀྱི་ཚད་དོ། །ཁ་ཅིག་ལས་ནི་ཡུལ་གྱི་རྗེས་སུ་མཐུན་པ་ཞེས་སོ་ཞེས་བྱ་བ་ནི། གཞུང་ཁ་ཅིག་ལས་དེ་སྐད་འབྱུང་སྟེ། ཡུལ་སེར་ཆེ་བར་ནི་དཔྱང་ཐག་ཐུང་དུ་ཡང་རུང་བའོ། །དེ་མེད་པར་ཁྲོན་པའི་ཆུ་མ་ཡིན་པ་དཀོན་པའི་ཡུལ་དུ་ཀུན་དུ་རྒྱུ་བར་མི་བྱའོ་ཞེས་བྱ་བ་ནི། དཔྱད་ཐག་དེ་མེད་པར་ཁྲོན་པའི་ཆུ་མ་ཡིན་པ་འབའ་ཆུ་ལ་སོགས་པའི་ཆུ་དཀོན་པའི་ཡུལ་དུ་ལྗོངས་རྒྱུ་ཞིང་འགྲོ་བར་མི་བྱའོ། །ལམ་དུ་འགྲོ་བས་ཆོས་གོས་སྤྲུགས་ཤིང་ཁྲུས་བྱ་བའམ་རྐ་ལག་བཀྲུས་ཏེ་ཆུ་ཐོགས་ནས་མཆིལ་ལྷམ་ཕྱིས་ཤིང་ཆོས་གོས་གསུམ་གྱོན་ཏེ་སྤྱོད་ལམ་ཞི་བས་གཙུག་ལག་ཁང་དུ་འཇུག་པར་བྱ་བའོ་ཞེས་བྱ་
པ་ནི། དགེ་སློང་ལམ་དུ་འགྲོ་བས་གཙུག་ལག་ཁང་གཞན་དུ་ཕྱིན་དུ་ཉེ་བ་ན། ཆོས་གོས་སྤྲུགས་ཤིང་ནུས་ན་ཁྲུས་བྱ་བའམ། མ་ནུས་ན་རྐང་པ་དང་ལག་པ་བཀྲུས་ཏེ་བཏུང་བའི་ཆུ་རུང་བ་ཐོགས་ནས་མཆིལ་ལྷམ་ཕྱིས་ཤིང་ཆོས་གོས་གསུམ་གྱོན་ཏེ་སྤྱོད་ལམ་ཞི་བས་གཙུག་ལག་ཁང་དུ་འཇུག་པར་བྱའོ། །འདིར་གཞུང་ནི་དགེ་སློང་དག་པས་དགེ་སློང་ལམ་དུ་འགྲོ་བའི་ཀུན་དུ་སྤྱོད་པའི་ཆོས་གོས་དག་བཅང་བར་བྱ་སྟེ། དགེ་སློང་ལམ་དུ་འགྲོ་བས་ཆུ་མཐོང་ན་ལྷུང་བཟེད་དང་ཆོས་གོས་ཕོག་སྟེ་ཕྱོགས་གཅིག་ཏུ་གཞག་པར་བྱའོ། །དེའི་འོག་ཏུ་ཆོས་གོས་དག་སྤྲུགས་པར་བྱ་ཞིང་ཁྲུས་བྱའོ། །ཡང་ན་རྐང་པ་དང་ལག་པ་དག་བཀྲུ་བར་བྱའོ། །ཆུ་བཙག་པར་བྱའོ། །རས་མ་སྤངས་ཏེ་མཆིལ་ལྷམ་གཉིས་བྱི་དོར་བྱའོ། །ལག་པ་བསྙལ་ནས་ལེགས་པར་གྱོན་པ་དང་ཤམ་ཐབས་ལེགས་པར་བ་གོས་པས་ཞི་བའི་སྤྱོད་ལམ་གྱིས་གཙུག་ལག་ཁང་དུ་འཇུག་པར་བྱའོ། །གཞན་དུ་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །རྒན་རིམས་བཞི་ལ་ཕྱག་བྱས་ནས་ཐ་མལ་པའི་ཕྱོགས་སུ་བསྡད་པར་བྱའོ་ཞེས་བྱ་བ་ནི། གཙུག་ལག་ཁང་གཞན་དུ་སོན་ནས་གཉུག་མར་གནས་པའི་དགེ་སློང་རྒན་རིམས་བཞི་ཙམ་ལ་ཕྱག་བྱས་ནས་ཐ་མལ་བའི་ཕྱོགས་ལྐོག་ཏུ་གྱུར་པ་མ་ཡིན་པ་དགེ་སློང་ཐམས་ཅད་འདུ་བའི་གནས་གང་ཡིན་པ་དེར་བསྡད་པར་བྱའོ། །སྒྲ་བསྐྱངས་པ་དང་མཛེས་པ་དང་ཤིན་ཏུ་བསྡམས་པ་དང་སྤྱོད་ལམ་རན་པར་རོ་ཞེས་བྱ་བ་ནི། དེ་ན་སྡོད་ཅིང་གཞན་དང་ཕྲད་པའི་ཚེ་དེ་ལྟར་བྱ་བ་སྟེ། སྒྲ་བསྐྱུངས་པ་ཞེས་བྱ་བ་ནི་མི་ཅོར་བའི་ཕྱིར་རོ། །མཛེས་པ་ཞེས་བྱ་བ་ནི་ཆ་ལུགས་འོ་གཟེ་བའི་ཕྱིར་རོ། །ཤིན་ཏུ་བསྡམས་པ་ཞེས་བྱ་བ་ནི་མཉམ་པར་གཞག་པའི་ཕྱིར་རོ། །སྤྱོད་ལམ་ངན་པ་ཞེས་བྱ་བ་ནི་བྱ་བ་ཚུལ་དང་མཐུན་པའི་ཕྱིར་རོ། །རྒྱུས་ཤེས་པ་དང་ལྡན་པས་བསུ་བར་བྱའོ་ཞེས་བྱ་བ་ནི། གཉུག་པར་གནས་པ་གང་གིས་གློ་བུར་དུ་འོངས་པ་དེ་ལ་འདི་ནི་ཆེ་གེ་མོ་ཞིག་གོ །གནས་ཆེ་གེ་མོ་ཞིག་ནས་འོངས་སོ། །ཆེ་གེ་མོ་ཞིག་དང་ལྷན་ཅིག་གནས་པའམ་ཉེ་གནས་ཡིན་ནོ་ཞེས་རྒྱུས་ཤེས་པ་དང་ལྡན་པ་དེས་དེ་བསུ་ཞིང་རང་གི་གནས་སུ་ངལ་སོར་གཞུག་པ་དང་ཆམ་དུ་དབབ་པར་བྱའོ། །མི་ཤེས་ན་མུ་གཅིག་པ་ཡིན་ཡང་བསུ་བར་མི་བྱའོ་ཞེས་བྱ་བ་ནི། རྒྱུས་མི་ཤེས་ན་མུ་གཅིག་པ་ཞེས་བྱ་བ་ཚངས་པ་མཚུངས་པར་སྤྱོད་པ་ཡིན་ཡང་རང་གི་གནས་སུ་བསུ་བར་མི་བྱ་བ་སྟེ། གཞན་དུ་
མུ་མི་གཅིག་པ་དག་བསུ་བར་མི་བྱ་བ་འབའ་ཞིག་ཏུ་མ་ཟད་དོ། །སྒོ་ཆོད་ཅིག་ཚོལ་ན་མ་སྦྱིན་ཅིག་ལེན་ན་བཟློག་ཤིག་ཅེས་བཅོལ་བ་ཁས་བླངས་ནས་ཡལ་བར་བོར་རམ། འདི་ཁོ་བོའི་གྲོགས་ཡིན་ནོ་ཞེས་བྱ་བ་ལ་སོགས་པའི་ཚིག་གིས་ཡིད་གཅུགས་པའི་དངོས་པོ་ཉིད་དུ་བསྒྲུབས་པ་ལས་རླག་པར་གྱུར་ན་གཞལ་བར་བྱ་བ་ཉིད་ཡིན་ནོ་ཞེས་བྱ་བ་ནི། གལ་ཏེ་དགེ་སློང་བྲང་བདག་གིས་དགེ་སློང་གཞན་ལ་འདི་སྐད་ཅེས་གནས་འདིའི་སྒོ་ཆོད་ལ། འདིར་ཁོ་བོ་དང་ཡིད་གཅུགས་སོ་ཞེས་ཟེར་བ་སུ་ཡང་མ་བཏང་ཤིག་ཁོ་བོའི་འམ་གཞན་གྱི་རྫས་ཆོལ་ན་དེ་ལ་མ་སྦྱིན་ཅིག །རང་ཐུག་ཐུབ་ཏུ་ལེན་ན་དེ་བཟློག་ཤིག་ཅེས་དེ་སྐད་དུ་བཅོལ་ནས་དགེ་སློང་གཞན་དེས་ཀྱང་དའི་ཚིག་ཁས་བླངས་ནས་དེའི་འོག་ཏུ་ཡལ་བར་དོར་ཏེ། སྒོ་ཡང་མ་བཅད་ཚོལ་ན་ཡང་བྱིན། ལེན་ན་ཡང་མ་བཟློག་པ་ལས་དགེ་སློང་བྲང་བདག་དེའི་རྫས་བརླག་པར་གྱུར་ན་དེའི་རྫས་ཅི་བརླག་པའི་སྐྱིན་པ་དགེ་སློང་གཞན་དེས་གཞལ་བྱར་བྱ་བ་ཉིད་ཡིན་ནོ། །གཞན་ཡང་དགེ་སློང་གཞན་ཞིག་གིས་དགེ་སློང་བྲང་བདག་གི་གནས་སུ་གང་ཟག་གཞན་ཞིག་ཁྲིད་དེ་འོངས་ཤིང་འདི་སྐད་ཅེས། འདི་ཁོ་བོའི་གྲོགས་ཡིན་གྱི་འདིའི་ནང་དུ་འཇུག་ན་སྒོམ་བཅད་ཅིག་ཚོལ་ན་བྱིན་ཅིག །ལེན་ན་མ་བཟློག་ཤིག་ཅེས་བྱ་བའི་ཚིག་གིས་ཡིད་གཅུགས་པའི་དངོས་པོ་ཉིད་དུ་བསྒྲུབས་པ་ལས། དེར་བྲང་བདག་དེ་ཡི་རྫས་བརླག་པར་གྱུར་ན་དེའི་རྫས་ཅི་བརླག་པའི་སྐྱིན་པ་དགེ་སློང་གཞན་དེས་གཞལ་བར་བྱ་བ་ཉིད་ཡིན་ནོ། །རྣམ་པ་འདི་གཉིས་ནི་གཉུག་མར་གནས་པ་དང་གློ་བུར་དུ་འོངས་པ་གཉི་ག་ལ་བྱེ་བྲག་མེད་པ་ཉིད་དུ་ཤེས་པར་བྱའོ། །ཡིད་ཆེས་པ་ལ་བརྟེན་པར་བྱའོ་ཞེས་བྱ་བ་ནི། ལྷུང་བཟེད་དང་ཆོས་གོས་ལ་སོགས་པ་ཐམས་ཅད་ནི་ཡིད་ཆེས་པ་ལ་བརྟེན་པར་བྱ་བའོ། །ཇི་ལྟ་བུ་ལ་ཞེ་ན་དེའི་ཕྱིར་གཞན་གྱིས་མི་ཤེས་པའི་བྱེ་བྲག་ཏུ་བརྟག་པ་ནི་ཐབས་ཡིན་ནོ་ཞེས་བྱ་བ་སྨྲས་ཏེ། གང་ཟག་གཞན་གྱིས་མི་ཤེས་པའི་བྱེ་བྲག་བརྟག་པ་དེ་ནི་སྨྲས་པའི་ཚིག་བདེན་ནམ་མི་བདེན་པ་བགམ་པར་བྱ་བའི་ཐབས་ཡིན་ནོ། །འདི་སྐད་བསྟན་ཏེ། གང་ཟག་ཡིད་མི་ཆེས་པ་ཞིག་ན་རེ་ནོར་བདག་ཆེ་གེ་མོ་ཞིག་གིས་ཆོས་གོས་དང་ལྷུང་བཟེད་ལ་སོགས་པ་ཡོ་བྱད་ཆེ་གེ་མོ་ཞིག་ཁོ་བོ་ལ་བྱིན་གྱིས་སྐུར་ཅིག་ཅེས་ཟེར་ན། ཡིད་མི་ཆེས་པ་དེ་ལ་གྱ་ཚོམ་དུ་བསྐུར་བར་མི་བྱ་
བར་དེས་རྒྱུས་མི་ཤེས་པའི་རྟགས་ཅི་ཡོད་པ་བརྟག་པའི་སྒོ་ནས་བདེན་ནམ་བརྫུན་པ་བགམ་པར་བྱ་ཞིང་རྟགས་ལ་མ་བབ་ཅིང་ཡིད་མ་ཆེས་ན་ནི་མི་བསྐུར་རོ། །རྟགས་ལ་བབ་ཅིང་ཡིད་ཆེས་ན་ནི་བསྐུར་བར་བྱའོ། །དབུལ་བར་བྱ་བ་ལྷུང་ནའོ་ཞེས་བྱ་བ་ནི། དབུལ་བར་བྱ་བའི་དངོས་པོ་འབུལ་བར་བྱེད་པས་འཛིན་མ་ནུས་ཏེ། ལེན་པར་བྱེད་པའི་ལག་ཏུ་མ་སོང་བར་ཆུ་ལ་སོགས་པའི་ནང་དུ་ལྷུང་ན་འབུལ་བར་བྱེད་པས་གཞལ་བར་བྱ་བ་ཉིད་ཡིན་ནོ། །གལ་ཏེ་མ་བླངས་པར་བཏང་ནའོ་ཞེས་བྱ་བ་ནི། གལ་ཏེ་གང་ལ་དབུལ་བར་བྱ་བ་དེས་མ་བླངས་པར་འབུལ་བར་བྱེད་པས་བཏང་ན་ནི་དེས་ན་འབུལ་བར་བྱེད་པས་གཞལ་བར་བྱ་བ་ཉིད་ཡིན་ནོ། །ཇི་སྟེ་གང་ལ་དབུལ་བར་བྱས་པ་དེས་བླངས་ནས་འདུལ་བར་བྱེད་པས་བཏང་ན་ནི། དེའི་ཚེ་འབུལ་བར་བྱེད་པས་གཞལ་བར་བྱ་བ་ཉིད་མ་ཡིན་གྱི། ལེན་པར་བྱེད་པས་གཞལ་བར་བྱ་བ་ཉིད་ཡིན་ནོ། །དེའི་ཕྱིར་སྦྱིན་པ་དང་ལེན་པའི་དུས་ན་དེ་ལ་བག་མེད་པར་མི་འགྱུར་བ་བྱ་བའི་ཕྱིར་དྲི་བར་བྱའོ་ཞེས་བྱ་བ་སྨྲས་ཏེ། འབུལ་བ་དང་ལེན་པའི་དུས་དེ་ལ་ཤོར་ཅིང་ལྷུང་བ་ཞེས་བྱ་བའི་བག་མེད་པ་དེ་མི་འགྲུབ་པར་བྱ་བའི་ཕྱིར་ཁྱོད་ཀྱིས་ཟིན་ཏམ་འོན་ཏེ་མ་ཟིན་ཅེས་བྱ་བའི་ཚིག་གིས་དྲི་བར་བྱའོ། །གལ་ཏེ་དྲིས་པ་ན་འདི་སྐད་ཅེས་ཁོ་བོས་ཟིན་ཏོ་ཞེས་ཟེར་ན་དེའི་ཚེ་བླངས་པའི་དངོས་པོ་དེ་ཤོར་ཅིང་ལྷུང་བ་ནི་ལེན་པར་བྱེད་པས་གཞལ་བར་བྱ་བ་ཉིད་ཡིན་ནོ། །གལ་ཏེ་ཁོ་བོས་མ་ཟིན་ཏོ་ཞེས་ཟེར་བའི་སྐབས་སུ་དབུལ་བར་བྱ་བའི་དངོས་པོ་ཤོར་ཅིང་ལྷུང་བར་གྱུར་ན་ནི་དེའི་ཆེ་འབུལ་བར་བྱེད་པས་གཞལ་བར་བྱ་བ་ཉིད་ཡིན་ནོ། །བརྙས་པ་མི་གཙང་བས་མ་རུང་བར་གྱུར་པ་བཀྲུ་བ་ལ་སོགས་པས་སེམས་གཟུང་བར་མ་གྲུབ་ན་རིན་སྦྱིན་ནོ་ཞེས་བྱ་བ་ནི། བརྙན་པོ་བྱས་པའི་རྫས་མི་གཙང་བས་མ་རུང་བར་གྱུར་བ་བཀྲུ་བ་ལ་སོགས་པས་བདག་པོའི་སེམས་གཟུང་བར་མ་གྲུབ་ན་དེའི་ཚེ་གང་ལས་བརྙས་པ་དེ་ལ་དེས་དེའི་རིན་སྦྱིན་པར་བྱའོ། །ཞར་ལ་བྱུང་བའི་སྐབས་རྫོགས་སོ།། །། བམ་པོ་ལྔ་བཅུ་བཞི་པ། རྒྱུས་ཤེས་པ་དང་ལྡན་པས་བསུ་བར་བྱའོ་ཞེས་གང་སྨྲས་པ་དེ་ལ་བསུ་བ་ཇི་ལྟར་བྱ་ཞོ་ན་དེའི་ཕྱིར། ལྷུང་བཟེད་དང་ཆོས་གོས་བླང་བར་བྱའོ། །སྟན་གདིང་བར་བྱའོ། །རྐང་པ་བཀྲུ་བས་མགྲོན་དུ་གཉེར་བར་བྱའོ་ཞེས་བྱ་བ་སྨྲས་ཏེ། འདི་དག་དང་འོག་ནས་འབྱུང་བ་དག་གིས་བསུ་
པར་བྱའོ། །ཆུས་ཀྱང་ངོ་ཞེས་བྱ་བ་ནི། བཏུང་བའི་དོན་གྱི་ཆུས་ཀྱང་མགྲོན་དུ་གཉེར་བར་བྱ་བའོ། །ཕྱག་བྱའོ་སྤྱོད་པ་བདེའམ་དྲིའོ། །ཅི་ནུས་ཀྱིས་ཡང་དག་པར་དགའ་བར་བྱའོ། །གནས་མལ་རྐྱེན་དུ་འབབ་པ་སྦྱིན་ནོ་ཞེས་བྱ་བ་དག་གིས་ཀྱང་བསུ་བར་བྱའོ། །འདིར་གཞུང་ནི་དགེ་སློང་གྲོང་མཐའ་ལས་དགེ་སློང་འོངས་ཤིང་ལྷགས་པ་དག་རྒན་རིམས་སུ་ཅི་རིགས་པར་བསུ་པར་བྱ་ཞིང་གནས་མལ་ཅི་བདོག་པ་ཡང་བསྟབས་པར་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །དགེ་འདུན་གྱི་གནས་བརྟན་གྱི་གན་དུ་འགྲོ་བར་བྱའོ་ཞེས་བྱ་བ་ནི་གློ་བུར་བྱའོ། །ཚིག་དེ་ནི་གློ་བུར་བ་ལམ་དུ་མི་འགྲོ་བ་དག་གི་ཕྱིར་གསུངས་པ་ཡིན་ནོ། །དེས་དེ་གནས་འཆའ་བ་ལ་སྦྱར་བར་བྱའོ་ཞེས་བྱ་བ་ནི། དགེ་འདུན་གྱི་གནས་བརྟན་དེས་གློ་བུར་དུ་འོངས་པ་དེའོ། །གལ་ཏེ་རྒན་ན་དེ་ལ་གནས་མལ་བསྟབས་པའི་ཕྱིར་དེའི་དགེ་སྐོས་ལའོ་ཞེས་བྱ་བ་ནི། གློ་བུར་དུ་འོངས་པ་དེ་ལ་གནས་མ་ལ་བསྟབས་པའི་ཕྱིར་དགེ་འདུན་གྱི་གནས་བརྟན་གྱིས་གནས་མལ་སྟོབས་པའི་དགེ་སྐོས་ལ་བསྐོ་བར་བྱའོ། །བབ་ཆོལ་ཏུ་གནས་མལ་གསོལ་བར་མི་བྱའོ་ཞེས་བྱ་བ་ནི། སྐབས་ལ་མ་བསྡད་པའི་གནས་མལ་བརྙ་བར་མི་བྱ་བ་སྟེ། དེ་ནི་ཧ་བ་ཤུར་ཅན་དུ་འགྱུར་བ་སྤང་བའི་ཕྱིར་རོ། །འདིར་གཞུང་ནི་དགེ་སློང་གློ་བུར་དུ་འོངས་པས་གལ་ཏེ་གནས་མལ་བསྐོ་བར་བྱེད་ན་ལེགས་པར་སོ་སོར་བརྟགས་ཏེ་མནོད་པར་བྱའོ་ཞེས་གསུངས་པ་ཡིན་ནོ། །གློ་བུར་དུ་འོངས་པའི་སྐབས་རྫོགས་སོ།། །།ཆོས་གོས་ཀྱི་མཐའ་ཟེགས་ན་མཐའ་སྐོར་གྱིས་གླན་ཞིང་ཕྱིར་བཅོས་སོ་ཞེས་བྱ་བ་ནི། ཆོས་གོས་ཀྱི་མཐའ་མ་ཟེགས་པར་གྱུར་ན་མཐའ་སྐོར་གྱི་ལྷན་རིངས་ཀྱིས་གླན་ཞིང་ཕྱིར་བཅོས་པར་བྱ་བའོ། །སྨྱུང་ཚེམས་ལྟ་བུ་དག་གིས་དེའི་གཟུངས་གདབ་པོ་ཞེས་བྱ་བ་ནི། ཁབ་སྲུབས་སྨྱུང་ཚེམས་འདྲ་བ་རིར་པོ་དག་དྲུབས་པས་མཐའ་སྐོར་དེའི་གཟུངས་གདབ་པའོ། །རོའི་གོས་ནི་བླ་ག་བ་མེད་པར་ཤིང་ལྗོན་པ་ལ་སོགས་པའི་སྟེང་དུ་ཉི་མ་བདུན་ནམ་བརྒྱད་དམ་ཁ་ཅིག་ལས་ལྔའམ་དྲུག་བཞག་སྟེ་འཁྲུར་བཅུག་ནས་སྤྱད་པར་བྱའོ་ཞེས་བྱ་བ་ནི། དུར་ཁྲོད་པས་རོའི་གོས་ནི་བླ་གབ་མེད་པར་ཞག་ལོན་པར་བཞག་སྟེ་སྤྱད་པར་བྱའོ། །ཕྱོགས་གང་དུ་ཞེ་ན། ཤིང་ལྗོན་པ་ལ་སོགས་པའི་སྟེང་དུའོ། །དུས་ཇི་སྲིད་དུ་ཞེ་ན། ཞག་བདུན་ནམ་བརྒྱད་དམ་གཞུང་ཁ་
ཅིག་ལས་ཞག་ལྔའམ་དྲུག་ཅེས་ཀྱང་འབྱུང་ངོ༌། །དེ་ནས་འཁྲུར་བཅུག་སྟེ་སྤྱད་པར་བྱའོ། །བདག་དུར་ཁྲོད་པའོ་ཞེས་གོ་བར་བྱས་ནས་འབོད་ན་གཙུག་ལག་ཁང་དང་ཁྱིམ་དག་ཏུ་འཇུག་པར་བྱའོ་ཞེས་བྱ་བ་ནི། དུར་ཁྲོད་པ་གཙུག་ལག་ཁང་དང་ཁྱིམ་གྱི་འདབ་ཏུ་ཕྱིན་པ་ན་གྱ་ཚོམ་དུ་འཇུག་པར་མི་བྱ་བར་བདག་དུར་ཁྲོད་པའོ་ཞེས་སྐད་ཀྱིས་བོད་ཅིང་གོ་བར་བྱས་ནས། གལ་ཏེ་བླས་ཚུར་ཤོག་ཅེས་འབོད་ན་གཟོད་གཙུག་ལག་ཁང་དང་ཁྱིམ་དག་ཏུ་འཇུག་པར་བྱ་བའོ། །དུར་ཁྲོད་པས་བདག་གིར་བྱ་བ་མ་བཏང་བ་ལ་ཡང་སྤྱད་པ་བསྟེན་པར་བྱའོ་ཞེས་བྱ་བ་ནི། སྦྱིན་བདག་གིས་སྟན་ཡན་ཆད་བདག་གིར་བྱ་བ་མ་བཏང་བ་ཐམས་ཅད་ཀྱི་ཐམས་ཅད་དུ་མ་བོར་བའི་ཡོ་བྱད་ལ་སྦྱིན་བདག་བསོད་ནམས་འདོད་པས་འདི་ལ་འདུག་ཅིག་འདི་སྤྱོད་ཅིག་ཅེས་མགྲོན་དུ་གཉེར་ན། དུར་ཁྲོད་པས་དེ་ལ་སྤྱད་པ་བསྟེན་པར་བྱ་བའོ། །བཏང་བ་ལ་ནི་མགྲོན་དུ་མ་གཉེར་ཀྱང་ཅི་དགར་སྤྱད་པར་བྱའོ་ཞེས་བྱ་བའི་ཐ་ཚིག་གོ །དགེ་འདུན་གྱི་གནས་མལ་ལ་སྤྱད་པར་མི་བྱའོ་ཞེས་བྱ་བ་ནི། དུར་ཁྲོད་པས་སོ། །མཆོད་རྟེན་ལ་འདོམ་གང་ཙམ་གྱིས་འགྱེད་དོ་ཞེས་བྱ་བ་ཡང་དུར་ཁྲོད་པས་སོ། །སྦྲང་ཡབ་བཅང་བར་བྱའོ་ཞེས་བྱ་བ་ནི། སྦྲང་བུ་ཟ་བའི་ཡུལ་དུ་དགེ་སློང་ཐམས་ཅད་ཀྱིས་སོ། །དེ་ཇི་ལྟ་བུ་ཞིག་ཅེ་ན། དེའི་ཕྱིར་བ་ལ་ལས་བྱས་པ་དང་ཤ་ན་ལས་བྱས་པ་དད་རས་བལ་ལས་བྱས་པའི་རས་མའམ་འདབ་མའི་དོག་པའོ་ཞེས་བྱ་བ་སྨྲས་སོ། །གླང་པོ་ཆེ་དང་རྟ་དང་བ་ལང་གི་སྤུ་ལ་སོགས་པ་ལས་བྱས་པ་མི་རུང་ངོ་ཞེས་བྱ་བ་ལ། སྤུ་ཞེས་བྱ་བའི་སྒྲ་ནི། གླང་པོ་ཆེ་ལ་སོགས་པ་གསུམ་ཆར་དང་སོ་སོར་སྦྱར་བར་བྱའོ། །སོགས་པ་ཞེས་སྨོས་པས་ནི། སྦྲང་བུ་དག་འཆི་བའི་བདག་ཉིད་གང་ཡིན་པ་དེ་ཡང་འདིར་བཀག་པ་ཡིན་ནོ། །ཐམས་ཅད་དུ་གང་ཟག་གི་ཁར་བརྩི་ཅན་ཉིད་དང་ཁྲ་བོ་ཉིད་མི་རུང་ངོ་ཞེས་བྱ་བ་ནི། སྦྲང་ཡབ་ཀྱི་ཡུ་བ་འབའ་ཞིག་ཏུ་མ་ཟད་ཀྱི་ལུས་བརྟེན་པའི་ཁར་བ་གཞན་ཐམས་ཅད་ལ་ཡང་གང་ཟག་གི་ཁར་བ་རྩི་ཅན་དང་ཁྲ་བོ་མི་རུང་བ་སྟེ། ཚོན་ལ་སོགས་པའི་ཕྱོགས་གཅིག་ཏུ་གྱུར་པ་ཡང་ཡན་ལག་ཏུ་གྱུར་པ་ཡིན་པའི་ཕྱིར་རོ། །སྦྲང་སྐྱབས་ཀྱང་ངོ་ཞེས་བྱ་བ་ཡང་བཅང་བར་བྱའོ། །དེ་ཇི་ལྟ་བུ་ཞིག་ཅེ་ན་དེའི་ཕྱིར་ཤིང་བུའི་སྟེང་དུ་རས་ཀྱིས་གཡོགས་པའོ་ཞེས་བྱ་བ་སྨྲས་སོ། །ཇི་ལྟར་ཤིང་བུ་ལ་གཡོགས་པར་བྱ་ཞེ་ན་དེའི་ཕྱིར་བཅིང་བས་སོ་ཞེས་བྱ་བ་སྨྲས་སོ། །
རས་ཇི་ཙམ་ཞིག་ཅི་ན་དེའི་ཕྱིར་ཁྲུ་བཞི་དང་དོ་པའོ་ཞེས་བྱ་བ་སྨྲས་ཏེ། སྲིད་དུ་ཁྲུ་བཞི་ལ་ཞེད་དུ་ཁྲུ་དོ་པའི་ཚད་དོ། །ངོས་ཅིས་གཡོགས་ཤེ་ན་དེའི་ཕྱིར་རས་ཁྲུ་བཅུ་གཉིས་པས་གཡོགས་སོ་ཞེས་བྱ་བ་སྨྲས་ཏེ། དེའི་སྲིད་དུ་ཁྲུ་བཅུ་གཉིས་ཀྱི་ཚད་ཡོད་པས་སོ། །ཇི་ལྟར་གཡོགས་པར་བྱ་ཞེ་ན་དེའི་ཕྱིར་འབྱར་བ་དང་བཅས་པར་རོ་ཞེས་བྱ་བ་སྨྲས་ཏེ། རས་ཀྱི་མཐའ་མ་རྣམས་འབྱར་བར་བྱའོ། །དེའི་མ་མཐའ་ནི་མལ་ཆས་སྦྱར་རོ་ཞེས་བྱ་བ་ནི། གཡོགས་མའི་རས་དེའི་མ་མཐའ་ནི་མལ་ཆས་སྦྱར་ཅིང་མཚམས་བསུབ་པར་བྱའོ། །སྒོ་བསེགས་ཁར་གདོད་དོ་ཞེས་བྱ་བ་ནི། སྦྲང་སྐྱབས་ཀྱི་སྒོ་སྣོལ་མར་གདོད་པར་རོ། །ཚ་བར་ནི་བསིལ་ཡབ་སྦྱར་རོ་ཞེས་བྱ་བ་ནི། ཚད་ཁུངས་སུ་ནི་བསིལ་ཡབ་སྦྱར་བར་བྱ་བའོ། །བསིལ་ཡབ་བཅང་བར་བྱའོ་ཞེས་བྱ་བ་ནི། རླུང་གཡབ་པ་ནི་བསིལ་ཡབ་བོ། །བསིལ་ཡབ་མཁན་གྱིས་བྱས་པའམ་ཏ་ལའི་ཆང་བུའོ་ཞེས་བྱ་བ་ལ། བསིལ་ཡབ་མཁན་གྱིས་བྱས་པ་ནི་བཅོས་མ་སྟེ་བསིལ་ཡབ་མཁན་གྱིས་བྱས་པའི་ཕྱིར་རོ། །ཏ་ལའི་ཆང་བུ་ནི་རང་འཁྲུངས་ཏེ་ཏ་ལའི་ལོ་མའི་ཚོགས་ཡིན་པའི་ཕྱིར་རོ། ཁྲ་ཁྲ་བོ་མི་རུང་ངོ་ཞེས་བྱ་བ་ནི། ཡུ་བ་ནི་སྔར་གྲིའུ་དང་སྦྲང་ཡབ་ཀྱི་སྐབས་སུ་བཀག་ཟིན་པས་འདི་ནི་བསིལ་ཡབ་ཀྱི་ལུས་སྤྱི་ལ་སྙེགས་སོ། །དགེ་འདུན་གྱིས་ནི་གཞན་ཡང་ངོ་ཞེས་བྱ་བ་ནི་དགེ་འདུན་གྱིས་ནི་བསིལ་ཡབ་མཁན་གྱིས་བྱས་པ་དང་ཏ་ལའི་ཆང་བུ་ལས་གཞན་པ་ཀོ་ལྤགས་ལས་བྱས་པ་དང་རྨ་བྱའི་གཤོག་པ་ལ་སོགས་པ་ལས་བྱས་པ་དང༌། ཁྲ་ཁྲ་བོ་མ་ཡིན་པ་ལས་གཞན་པ་ཁྲ་ཁྲ་བོར་འདུག་པ་དང་ཡུ་བ་རྩི་ཅན་དང་ཁྲ་བོ་ཡང་བཅང་བར་བྱ་སྟེ། དེ་ལྟ་བུ་ནི་གང་ཟག་ལ་བཀག་པའི་ཕྱིར་རོ། །ནོར་བུ་དང་རྔ་མའི་བསིལ་ཡབ་རྙེད་ན་མཆོད་རྟེན་ལ་དབུལ་ལོ་ཞེས་བྱ་བ་ནི། གལ་ཏེ་གང་ཟག་གིས་བསིལ་ཡབ་ཡུ་བ་ནོར་བུ་ལས་བྱས་པ་དངོས་རྡ་མ་ལས་བྱས་པ་མན་ཆད་རྙེད་ཅིང་མཆོད་རྟེན་གྱི་ཕྱིར་ལེན་པར་བྱེད་ན་དེའི་ཚེ་ཉེས་པ་མེད་པའོ། །མཆོད་རྟེན་གང་ལ་ཞེ་ན་དེའི་ཕྱིར་ཉན་ཐོས་ཀྱི་ལ་ཡང་ངོ་ཞེས་བྱ་བ་སྨྲས་ཏེ། སངས་རྒྱས་ཀྱི་འབའ་ཞིག་ཏུ་མ་ཟད་དོ། །འདིར་གཞུང་ནི་དགེ་སློང་གིས་རྔ་མའི་བསིལ་ཡབ་ཡུ་བ་ནོར་བུ་ཅན་བཅང་བར་མི་བྱའོ། །ཇི་སྟེ་དེ་སྙེད་ན་དེ་བླངས་ཏེ་སངས་རྒྱས་ཀྱི་མཆོད་རྟེན་ནམ་ཉན་ཐོས་ཀྱི་མཆོད་རྟེན་ལ་དབུལ་བར་བྱའོ་ཞེས་གསུངས་པ་ཡིན་ནོ། །སྟན་ནང་ཚངས་ཅན་དང་ལ་བ་དང་སྔས་ནང་
ཚངས་ཅན་དང་གོར་བུ་དག་བཅད་པར་བྱའོ་ཞེས་བྱ་བ་ནི། མ་མོ་ལས་བཅོམ་ལྡན་འདས་ཀྱིས་དགེ་སློང་རྣམས་ཀྱི་གནས་མལ་རྗེས་སུ་གནད་བ་འདི་ལྟ་སྟེ། ཁྲི་དང་ཁྲིའུ་དང་སྟན་ནང་ཚངས་ཅན་དང་ལ་བ་དང་སྔས་ནང་ཚངས་ཅན་དད་གོར་བུ་དང་སྟན་དང་བགོ་བ་དགེ་འདུན་གྱི་ཡང་རུང་གང་ཟག་གི་ཡང་རུང་བའོ་ཞེས་གསུངས་པ་ཡིན་ནོ། །བུ་དང་ཆུང་མའི་རྙེད་པ་ནི་སྦྱིན་པར་བྱེད་པའི་དབང་གིས་བསྒྲུབ་པོ་ཞེས་བྱ་བ་ནི། སྦྱིན་པར་བྱེད་པ་རང་གི་བུ་དད་ཆུང་མ་འབུལ་ན་སྦྱིན་པར་བྱེད་པས་ཇི་ལྟར་རྣམ་པར་ངེས་པར་བྱས་པ་དེ་བཞིན་དུ་རྣམ་པར་ངེས་པར་བྱའོ། །གལ་ཏེ་སླུ་བར་བྱེད་ན་དེ་ཇི་ཙམ་དུ་འདོད་པ་དེ་ཙམ་དུ་བཙོང་བ་ཉིད་ཡིན་ནོ་ཞེས་བྱ་བ་ནི། གལ་ཏེ་སྦྱིན་པར་བྱེད་པས་བུ་དང་ཆུང་མ་ཕུལ་བ་ཕྱིར་སླུ་བར་འདོད་ན། སྦྱིན་པར་བྱེད་པ་དེང་ནི་ཇི་ཙམ་དུ་འདོད་པ་དེ་ཙམ་དུ་བཙོང་བ་ཉིད་ཡིན་ཏེ། སྦྱིན་པར་བྱེད་པ་དེས་བུ་དང་ཆུང་མ་སླུ་བའི་ཕྱིར་ཇི་ཙམ་འགུལ་བ་དེ་ཙམ་བླངས་ཏེ་སླུར་སྦྱིན་པར་བྱའོ་ཞེས་བྱ་བའི་ཐ་ཚིག་གོ །འདིར་གཞུང་ནི་ཁྱིམ་བདག་མགོན་མེད་ཟས་སྦྱིན་གྱི་རྒྱལ་བྱེད་ཀྱི་ཚལ་དེར་དུས་སྟོན་ཆེན་པོ་བྱུང་བ་ན་དགེ་འདུན་ལ་བུ་དང་ཆུད་མ་ཕུལ་བའི་ཚེ། དགེ་སློང་རྣམས་ཀྱིས་ཇི་ལྟར་བསྒྲུབ་པར་བྱ་བ་མི་ཤེས་པ་ནས། བཅོམ་ལྡན་འདས་ཀྱིས་བཀའ་སྩལ་བ། ཁྱིམ་བདག་ལ་དྲི་བར་བྱའོ། །དེ་དག་གིས་ཁྱིམ་བདག་ལ་དྲིས་པ་དང་དེས་སྨྲས་པ་འཕགས་པ་དག་རིན་སྐྱེད་ཅིག་དང་བདག་གིས་རིན་དབུལ་ལོ། །དྲུག་སྡེ་དག་གིས་དེ་དང་ལྷན་ཅིག་གཏོད་པར་བརྩམས་པ་ན། དེ་ན་བུད་མེད་བུ་གཞོན་ནུ་ཅན་ཞིག་གིས་ཁྱིམ་བདག་མགོན་མེད་ཟས་སྦྱིན་དེའི་རྐང་པ་གཉིས་ལ་གཏུགས་ཏེ་སྨྲས་པ། རྗེའི་སྲས་བདག་ནི་བུ་གཞོན་ནུ་ཅན་ལགས་ན་བདག་མི་གཏོང་བར་ཅི་གནང་ཞེས་བྱ་བའི་བར་གྱི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་བ་དང༌། བཅོམ་ལྡན་འདས་ཀྱིས་བཀའ་སྩལ་བ། དགེ་སློང་དག་བུད་མེད་ནི་སྙིང་སྟོབས་ཆུང་བས་དངངས་པར་འགྱུར་གྱི་དེ་ལྟ་བས་ན་དགེ་སློང་དག་གིས་བུད་མེད་བསྐྱེད་པར་མི་བྱ་སྟེ། སྐྱེད་པར་བྱེད་ན་འགལ་ཚབས་ཅན་དུ་འགྱུར་རོ། །འདི་ལྟར་སྦྱིན་བདག་ཉིད་དད་ཅིང་དང་པའི་དབང་གིས་སྦྱིན་པར་བྱེད་པ་གང་ཡིན་པ་དེ་ཉིད་བླང་པར་བྱའོ་ཞེས་གསུངས་པ་ཡིན་ནོ། །ཡང་དང་ཡང་དབུལ་དུ་རུང་ངོ་ཞེས་བྱ་བ་ནི། ཕུལ་ཟིན་པའི་དངོས་པོ་ལེན་པ་པོ་དེ་ཉིད་ལ་ཡང་དང་ཡང་དུ་དབུལ་དུ་རུང་བ་སྟེ།
སྦྱིན་བར་བྱེད་པ་འདད་པ་སྤེལ་བའི་ཕྱིར་རོ། །ཤིང་ལྗོན་པ་ལ་ཕུལ་བ་གལ་ཏེ་རྒྱན་ཞིག་ཡིན་ན་དུས་སྟོན་གྱི་ཚེ་དེ་ཉིད་བརྒྱན་པར་བྱ་བའི་ཕྱིར་གཞག་གོ་ཞེས་བྱ་བ་ནི། སྦྱིན་བདག་གིས་གཙུག་ལག་ཁང་གི་ཤིང་ལྗོན་པ་ལ་རྫས་ཕུལ་བ་གལ་ཏེ་རྒྱན་ཞིག་ཡིན་ན་ནི་དུས་སྟོན་གྱི་ཚེ་ཤིང་ལྗོན་པ་དེ་ཉིད་བརྒྱན་པར་བྱ་བའི་ཕྱིར་གཞག་པར་བྱའོ། །ཤིང་ལྗོན་པ་དེ་རྡིབ་ན་དེ་དང་རིགས་མཐུན་པའི་ཤིང་ལྗོན་པ་གཞན་བརྒྱན་པར་བྱ་བའི་ཕྱིར་གཞག་པར་བྱའོ། །དེ་དང་རིགས་མཐུན་པ་གཞན་མེད་ན་རིགས་མི་མཐུན་པ་གཞན་བརྒྱན་པའི་ཕྱིར་གཞག་པར་བྱའོ། །རྩིག་པ་ལ་ནི་གལ་ཏེ་གནས་ཁང་གི་ནི་རི་མོ་བྱ་བའི་ཕྱིར་རོ་ཞེས་བྱ་བ་ནི། རྩིག་པ་ལ་ཕུལ་ན་གལ་ཏེ་རྩིག་པ་དེའི་གནས་ཁང་གི་ཡིན་ན་རྫས་དེ་གནས་ཁང་གི་རྩིག་པ་ལ་རི་མོ་བྲི་བའི་ཕྱིར་སྤྱད་པར་བྱའོ། །གལ་ཏེ་མ་ཡིན་ནམ། ཀ་བ་ལ་ན་ལས་སར་བའི་ཕྱིར་རོ་ཞེས་བྱ་བ་ནི། གལ་ཏེ་རྩིག་པ་དེ་གནས་ཁང་གི་མ་ཡིན་ནམ། ཀ་བ་ལ་ཕུལ་ན། རྩིག་པ་དེ་དང་ཀ་བ་དེ་ལ་ཕུལ་བའི་རྫས་ཏེ་མཁར་ལན་གྱི་ཕྱིར་གཞག་པར་བྱའོ། །ས་ལ་ནའོ་ཞེས་བྱ་བ་ནི། འདི་ནི་འོག་མ་རྣམས་ཀྱི་སྤྱིར་བསྟན་པ་ཡིན་ནོ། །མེ་ཁང་གི་ནི་སྣང་མར་རོ་ཞེས་བྱ་བ་ནི། མེ་འབུད་པའི་མེ་ཁང་གི་ས་ལ་ཕུལ་བའི་རྫས་ནི་དགེ་འདུན་གྱི་སྣང་མ་གང་དང་གང་དུ་དགོས་པའི་རྒྱུར་སྤྱད་ཀྱིས་མེ་ཁང་དེ་ཉི་ཚེའི་ནང་དུ་འདུད་པའི་སྣང་མར་བྱ་བ་འབའ་ཞིག་ཏུ་མ་ཟད་དོ། །ཡང་ན་སྣུམ་བག་གི་རྙེད་པར་རོ་ཞེས་བྱ་བ་ནི། མེ་ཁང་གིས་ལ་ཕུལ་བའི་རྫས་དེ་ཡང་ན་དགེ་འདུན་གྱི་སྣུམ་བག་གི་རྙེད་པ། ཤའམ། ཉ་ཤའམ། ཤ་སྐམ་མམ། ཞོ་འམ། འོ་མ་འམ། མར་རམ། ཞུན་མར་ལ་སོགས་པར་བསྒྱུར་ཞིང་སྤྱད་པར་བྱའོ། །རུང་བའི་ཁང་པ་ནི་ན་བའི་སྨན་དུ་གཞག་གོ་ཞེས་བྱ་བ་ནི། རུང་བའི་ཁང་པའི་ས་ལ་ཕུལ་བའི་རྫས་ནི་ན་བའི་སྨན་དུ་བསྒྱུར་ཞིང་གཞག་པའོ། །བཀད་སའི་ནི་ཟས་སུ་བྱའོ་ཞེས་བྱ་བ་ནི། བཀད་སའི་ཁང་པའི་ས་ལ་ཕུལ་བའི་རྫས་ནི། ཟས་སུ་བསྒྱུར་བར་བྱའོ། །སྐྱེ་མལ་གྱི་ནི་བཏུང་བར་རོ་ཞེས་བྱ་བ་ནི། སྐྱེ་མལ་གྱི་ས་ལ་ཕུལ་བའི་རྫས་ནི་བཏུང་བར་བསྒྱུར་བར་བྱའོ། །བསྲོ་གང་གི་གནས་ཀྱི་ནི་བསྲོ་གང་ངམ་སྣུམ་བག་གི་རྙེད་པར་རོ་ཞེས་བྱ་བ་ནི། བསྲོ་གང་གི་གནས་ཀྱི་ས་ལ་ཕུལ་བའི་རྫས་ནི་བསྲོ་གང་གི་ཡོ་བྱད་དམ་དགེ་འདུན་གྱི་སྣུམ་བག་གི་རྙེད་པར་བྱ་བའོ། །འཁོར་གྱི་ཁྱམས་དང་སྤོང་སའི་ར་བའི་ནི་སྣུམ་བག་གི་རྙེད་
པར་རོ་ཞེས་བྱ་བ་ནི། དེ་གཉིས་ཀྱིས་ལ་ཕུལ་བའི་རྫས་ནི་དགེ་འདུན་གྱི་སྣུམ་བག་གི་རྙེད་པར་བྱ་བའོ། །ཡང་ན་སྐྱེ་བའི་རབས་ཀྱི་སྡེ་བྲི་བར་བྱའོ་ཞེས་བྱ་བ་ཡང༌། སྔ་མ་དེ་གཉིས་ཀྱི་ས་ལ་ཕུལ་བའི་རྫས་དེའི་ཡང་ན་འདིར་སྤྱད་པར་བྱ་བའོ། །བང་རིམ་དང་འཆགས་དང་སྒོ་ཁང་དང་ཁྱམས་དག་ལ་ཕུལ་བ་ནི་བགོ་བའོ་ཞེས་བྱ་བ་ནི། དེ་དག་གི་ས་ལ་ཕུལ་བའི་རྫས་ནི་དགེ་འདུན་གྱིས་བགོ་བར་བྱ་བའོ། །རྫིང་བུའི་ཡང་ངོ་ཞེས་བྱ་བ་ནི། རྫིང་བུའི་ས་ལ་ཕུལ་བའི་རྫས་ཀྱང་བགོ་བར་བྱ་བའོ། །ཁ་ཅིག་ལས་དེ་ནི་ཕྱོགས་བཞིའི་དགེ་འདུན་གྱི་ཉིད་དུ་བཞག་གོ་ཞེས་སོ་ཞེས་བྱ་བ་ནི། གཞུང་ཁ་ཅིག་ལས་རྫིང་བུའི་ས་ལ་ཕུལ་བའི་རྫས་དེ་ནི་འདི་ལྟར་བྱའོ་ཞེས་འབྱུང་བའོ། །དཀོན་མཆོག་གི་དོན་དུ་བསླང་དུ་རུང་ངོ་ཞེས་བྱ་བ་ནི། དཀོན་མཆོག་གསུམ་གྱི་དོན་དུ་དགེ་སློང་གིས་གཞན་ལ་ཡོ་བྱད་བླང་དུ་རུང་བའོ། །བསྒྲག་ཏུ་ཡང་ངོ་ཞེས་བྱ་བ་ཡང་རུང་ངོ་ཞེས་བྱ་བར་སྦྱར་ཏེ། སྦྱིན་པར་བྱ་བ་དང༌། སྦྱིན་བདག་རྣམས་ཀྱི་མིང་ཉན་དུ་གཞུག་པ་ནི་བསྒྲག་པ་ཞེས་བྱ་བ་སྟེ། བསྔོ་བྱང་དང་སྨོན་ལམ་ཀླག་པ་ཞེས་བྱ་བའི་ཐ་ཚིག་གོ །གང་གི་ཆེ་བསྒྲག་པར་བྱ་ཞེ་ན་དེའི་ཕྱིར་ལེན་པའི་ཚེའོ་ཞེས་བྱ་བ་སྨྲས་ཏེ། རྙེད་པ་འབུལ་བ་ལེན་པའི་ཚེ་ནའོ། །མཐོང་བར་བྱ་བའི་ཕྱིར་འཕང་ལོ་ཞེས་བྱ་བ་ནི། སྒྲོག་པར་བྱེད་པ་གཞན་གྱིས་མཐོང་བར་བྱ་བའི་ཕྱིར་དེར་འཕང་ལོ་བྱ་བའོ། །འདིར་འཕང་ལོ་ཞེས་བྱ་བ་ནི། འཕང་ལོ་གཉིས་དང་ལྡན་པའི་ཤིང་རྟ་ཡིན་པར་དགོངས་ཏེ། དེའི་སྟེང་ནས་བསྒྲུབ་པར་བྱའོ། །ཆ་བ་དང་རླུང་དང་ཆར་པའི་གནོད་པས་མི་རེག་པར་བྱ་བའི་ཕྱིར་ཁང་པ་བརྩེགས་པ་སྒོ་བཞི་དང་ལྡན་པ་ཡང་ངོ་ཞེས་བྱ་བ་ནི། བྱའོ་ཞེས་བྱ་བར་སྦྱར་ཏེ། ཚ་བ་ལ་སོགས་པའི་གནོད་པས་སྒྲོག་པར་བྱེད་པའི་དགེ་སློང་ལ་མི་རེག་པར་བྱ་བའི་ཕྱིར་འཕང་ལོ་དེའི་སྟེང་དུ་ཁང་པ་བརྩེགས་པ་སྒོ་བཞི་དང་ལྡན་པར་བྱའོ། །དུས་སྟོན་གྱི་རྗེས་ལ་འཕང་ལོ་རྟུལ་ལོ་ཞེས་བྱ་བ་ནི། དུས་སྟོན་ཟིན་པའི་རྗེས་ལ་འཕང་ལོ་བརྟུལ་ཞིང་སྦ་བར་བྱ་བའོ། །སྣོད་སྤྱད་འདྲུབ་པས་རྙེད་པར་དྲུབ་པར་བྱའོ་ཞེས་བྱ་བ་ནི། དུས་སྟོན་དེ་ལ་རྙེད་པ་བྱུང་བ་གང་ཡིན་པ་དེ་དག་དགེ་སློང་སྣོད་སྤྱད་འདྲུབ་པས་དྲུབ་པར་བྱ་བའོ། །གཉི་ག་ལམ་བསྔོས་པ་སྟོན་པ་མཆོད་པའི་ཚེ་ཕུལ་བ་དགེ་འདུན་གྱི་ལ་དགེ་སློང་མ་རྣམས་ཀྱི་འཇུག་པ་མེད་དོ་ཞེས་བྱ་བ་ནི། དགེ་སློང་གི་དགེ་འདུན་དང་དགེ་སློང་མའི་དགེ་
འདུན་གཉི་ག་ལ་ཐུན་མོང་དུ་མ་བསྔོས་པའི་རྙེད་པ་དགེ་སློང་རྣམས་ཀྱིས་སྟོན་པ་སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའི་གནས་སྐབས་ཀྱང་སྟོན་པ་ཡིན་པས། དེ་མཆོད་པའི་ཚེ་བྱུང་བ་དགེ་འདུན་དབང་བ་ལ་ནི། དགེ་སློང་མ་རྣམས་ཀྱིས་འཇུག་པ་མེད་དེ་སྐལ་བ་མི་དབང་ངོ༌། །དེ་བཞིན་དུ་དགེ་སློང་མ་རྣམས་ཀྱིས་བྱས་པའི་ཚེ་དགེ་སློང་མ་ལ་བསྔོས་པའི་རྙེད་པ་བྱུང་བ་གང་ཡིན་པ་དེ་ལ་ནི་ཡང་དགེ་སློང་རྣམས་ཀྱིས་འཇུག་པ་མེད་དོ། །གཉི་གས་བྱས་པ་ན་གཉི་ག་ལ་བསྔོས་པའི་རྙེད་པ་བྱུང་བ་གང་ཡིན་པ་དེ་ལ་ནི་གཉི་གའི་འཇུག་པ་ཡོད་དེ། གཉི་ག་དབང་ངོ༌། །འདི་ལ་གཅིག་གི་ནང་དུ་དེ་དག་གིས་འཕང་ལོ་ཐ་དད་པ་བཙུགས་པ་ནི་ཉེས་བ་སྤོམ་པོའོ་ཞེས་བྱ་བ་ལ། འདི་ལ་ཞེས་བྱ་བ་ནི། སངས་རྒྱས་རྗེ་བཙུན་ལ་སོགས་པ་མཆོད་པ་ལའོ། །གཅིག་གི་ནང་དུ་ཞེས་བྱ་བ་ནི་མཆོད་པ་གང་དུ་དགེ་སློང་རྣམས་ཀྱིས་འཕོང་ལོ་བཙུགས་པ་དེ་ཉིད་ཀྱི་ནང་དུའོ། །དེ་དག་གིས་ཞེས་བྱ་བ་ནི་དགེ་སློང་མ་དག་གིས་ཏེ། དེར་དགེ་སློང་མ་དག་གིས་འཕང་ལོ་ཐ་དད་པ་གཞན་བཙུགས་ན་དེ་དག་ལ་དགེ་འདུན་གྱི་དབྱེན་གྱི་སྐབས་སུ་གཏོགས་པའི་ཉེས་པ་སྦོམ་པོ་འགྱུར་རོ། །གཞན་དུ་བཙུགས་པ་ལ་ནི་ཉེས་པ་མེད་དོ། །སྣོད་སྤྱད་འགེད་པས་བགོ་པར་བྱའོ་ཞེས་བྱ་བ་ནི། དུས་སྟོན་དེ་ལ་བྱུང་བའི་རྙེད་པ་གང་ཡིན་པ་དེ་དག་གང་ཟག་སྣོད་སྤྱད་འགེད་པས་བགོ་བར་བྱ་བའོ། །དེ་བསྐོ་བར་བྱའོ་ཞེས་བྱ་བ་ནི། དགེ་འདུན་གྱིས་ཀྱང་གང་ཟག་སྣོད་སྤྱད་བགེད་པ་དེ་སྤྲོ་བར་བྱས་ནས། གསོལ་བ་དང་གཉིས་ཀྱི་ལས་ཀྱིས་བསྐོ་བར་བྱ་བའོ། །འདིའི་སྔགས་ནི་མིང་འདི་ཞེས་བགྱི་བ་ཁྱོད་དགེ་འདུན་གྱི་སྣོད་སྤྱད་བགེད་པར་སྤྲོའམ། སྤྲོའོ། །དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་དགེ་འདུན་གྱི་སྣོད་སྤྱད་བགེད་པར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་མིང་འདི་ཞེས་བགྱི་བ་དགེ་འདུན་གྱི་སྣོད་སྤྱད་བགེད་པར་བགོ་སྟེ། སྣོད་སྤྱད་བགེད་པ་མིང་འདི་ཞེས་བགྱི་བས་དགེ་འདུན་གྱིས་སྣོད་སྤྱད་འགེད་པར་འགྱུར་རོ། །འདི་ནི་གསོལ་བའོ། །དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་དགེ་འདུན་གྱི་སྣོད་སྤྱད་བགེད་པར་སྤྲོ་སྟེ། དེའི་སླད་དུ་དགེ་འདུན་གྱིས་མིང་འདི་ཞེས་བགྱི་བ་དགེ་འདུན་གྱི་སྣོད་སྤྱད་བགེད་པར་
བསྐོ་སྟེ། སྣོད་སྤྱད་བགེད་པ་མིང་འདི་ཞེས་བགྱི་བས་དགེ་འདུན་གྱི་སྣོད་སྤྱད་བགེད་པར་འགྱུར་ན། ཚེ་དང་ལྡན་པ་གང་དག་མིང་འདི་ཞེས་བགྱི་བ་དགེ་འདུན་གྱི་སྣོད་སྤྱད་བགེད་པར་བསྐོ་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་མིང་འདི་ཞེས་བགྱི་པ་སྣོད་སྤྱད་བགེད་པར་བསྐོས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་གསུངས་པ་ཡིན་ནོ། །དེས་ཇི་ལྟར་བགོ་བར་བྱ་ཞེ་ན་དེའི་ཕྱིར་བཙོང་བར་བྱ་བ་རྣམས་བཙོངས་ཏེའོ་ཞེས་བྱ་བ་སྨྲས་ཏེ། བཙོང་བར་འོས་པ་ནི་བཙོང་བར་བྱ་བ་སྟེ། གོས་ལ་སོགས་པའོ། །དེ་དག་ནི་བཙོངས་ཏེ་བགོ་བར་བྱའོ། །སུ་ལ་བཙོངས་ཏེ་ཞེ་ན་དེའི་ཕྱིར། དགེ་འདུན་འདུས་པ་ལའོ་ཞེས་བྱ་བ་སྨྲས་ཏེ། གང་དུ་དགེ་འདུན་དུ་གྱུར་བའི་དགེ་སློང་རྣམས་འདུས་པར་གྱུར་པ་དེ་ལའོ། །ཇི་ལྟར་བཙོངས་ཏེ་ཞེ་ན་དེའི་ཕྱིར་བསྐྱེད་པས་སོ་ཞེས་བྱ་བ་སྨྲས་ཏེ། བཙོང་བར་བྱ་བའི་དངོས་པོའི་རིན་ཐང་དགེ་འདུན་གྱི་གནས་བརྟན་གྱིས་རན་པར་བཅད་པ་དེ་ལས་སུ་ཉོ་འདོད་པས་བསྐྱེད་པའི་ཐབས་དེས་བཙངས་ཏེའོ། །དེ་ཉིད་ཀྱིས་དེར་འདུ་བའི་སྐབས་རྗེས་སུ་བསྒྲུབ་པར་བྱའོ་ཞེས་བྱ་བ་ནི། སྣོད་སྤྱད་འགེད་པའི་གང་ཟག་དེ་ཉིད་ཀྱིས་དགེ་འདུན་གང་དུ་འདུ་བའི་གནས་དེར་འདུ་བའི་སྐབས་ཞེས་བྱ་བ་དགེ་འདུན་འདུ་བ་དང་འབྲེལ་པ་གནས་མལ་བཤམ་པ་དང་རྙེད་པ་བགོ་བ་ལ་ལྔ་བྱའོ་ཞེས་སྔར་བསྟན་པ་དེ་དག་རྗེས་སུ་བསྒྲུབ་པར་བྱ་སྟེ་ལས་སུ་བྱའོ་ཞེས་བྱ་བའི་ཐ་ཚིག་གོ །དགེ་འདུན་གྱི་གནས་བརྟན་གྱིས་རིན་ཐང་གདབ་པོ་ཞེས་བྱ་བ་ནི། བཙོང་བར་བྱ་བའི་དངོས་པོ་རྣམས་ཀྱིའོ། །རིན་ཐང་ཇི་ཙམ་དུ་གདབ་པར་བྱ་ཞེ་ན་དེའི་ཕྱིར་རན་པར་རོ་ཞེས་བྱ་བ་སྨྲས་ཏེ། དང་པོ་སུ་ལ་ཡང་བཙོང་བར་མ་བྲིམས་པའི་མདུན་དུ་དགེ་འདུན་གྱི་གནས་བརྟན་གྱིས་བཙོང་བར་བྱ་བའི་རྫས་རྣམས་ཀྱི་རིན་ཐང་རན་པར་གདབ་པར་བྱ་བའོ། །དས་ནི་དེ་ལ་མི་འབབ་པ་ཉིད་དོ་ཞེས་བྱ་བ་ནི། རིན་ཐང་བཏབ་པ་དེས་ནི་དགེ་འདུན་གྱི་གནས་བརྟན་དེ་ལ་རྫས་དེ་ཉོ་བ་དང་དེའི་རིན་གཞལ་བ་མི་འབབ་པ་ཉིད་དོ། །རིན་ཐང་བཏབ་པའི་འོག་ཏུ་བསྐྱེད་ན་ནི་དེ་ལ་ཡང་འབབ་པ་ཉིད་ཡིན་ནོ། །ཡང་མི་འབྱུང་བར་ངེས་བར་བྱས་ནས་བསྐྱེད་པ་ལ་དབབ་བོ་ཞེས་བྱ་བ་ནི། སྔར་དགེ་འདུན་གྱི་གནས་བརྟན་གྱིས་སྤྱིའི་རིན་ཐང་རན་པར་བཏབ་ནས་སྣོད་སྤྱད་བགེད་པའི་
གང་ཟག་གིས་རྫས་དེ་ལག་ན་ཐོགས་ཏེ། དགེ་འདུན་གྱི་གནས་བརྟན་མན་ཆད་གསར་བུ་ཡན་ཆད་དེ་ན་འདུས་པ་ཐམས་ཅད་ཀྱི་མདུན་དུ་རྫས་དེ་གཡར་སྔ་བྲིམ་ཞིང་རྫས་འདི་ནི་འདི་ཙམ་རིའོ་ཞེས་བསྒྲག་པར་བྱའོ། །དེའི་ཆོ་གང་ཟག་གིས་རྫས་དེའི་རིན་ཡང་བསྐྱེད་པ་གཞན་མི་འབྱུང་བར་ངེས་པར་བྱས་ནས། རྫས་དེའི་རིན་སྔར་བཅད་པ་ལས་བསྐྱེད་ན་དེ་ལ་རྫས་དེ་མི་ཉོར་མི་གནང་བ་དང་རིན་བསྐྱེད་པ་དང་བཅས་པ་མི་དབུལ་དུ་མི་གནང་བ་འབབ་པོ། །དེ་བཞིན་དུ་དེས་བསྐྱེད་པའི་གང་དུ་གཞན་གཅིག་གིས་ཡང་བསྐྱེད་པ་གཞན་མི་འབྱུང་བར་ངེས་པར་བྱས་ནས་བསྐྱེད་ན་དེ་ལ་འབབ་པོ། །དེ་བཞིན་དུ་དེས་བསྐྱེད་པའི་གོང་དུ་གཞན་གཅིག་གིས་ཡང་བསྐྱེད་པ་གཞན་མི་འབྱུང་བར་ངེས་པར་བྱས་ནས་བསྐྱེད་ན་དེ་ལ་འབབ་སྟེ། དེ་བཞིན་དུ་གོང་ནས་གོང་དུ་བསྐྱེད་ཅིང་ཐ་མར་དེ་ལས་ཟློ་ཞིང་གོང་དུ་སྐྱེད་པར་བྱེད་པས་སུའང་མ་བྱུང་ན་དེའི་ཚེ་སྣོད་སྤྱད་བགེད་པ་དེས་དགེ་འདུན་ཐམས་ཅད་གྱི་མགོ་འཇུག་ཏུ་ལན་ཅིག་བཟླས་ཏེ། རྫས་འདི་གང་ཟག་ཆེ་གེ་མོས་རིན་འདི་ཙམ་གྱིས་བསྐྱེད་དེ་ཉོས་སོ་ཞེས་སྤྱིར་བསྒྲགས་ཏེ་ཏོག་བརྡུངས་ནས་རྫས་དེ་གང་ཟག་དེའི་མདུན་དུ་བཞག་གོ །དེ་ཕྱིན་ཆད་ནི་གཞན་གྱིས་བསྐྱེད་ཅིང་ཉོར་མི་གནོང་ངོ༌། །མི་ཉོ་པས་བསྐྱེད་པར་མི་བྱའོ་ཞེས་བྱ་བ་ནི། གང་ཟག་གང་རྫས་དེ་ཉོ་པར་མི་འདོད་པ་དེ་ནི་མི་ཉོ་བ་ཞེས་བྱ་སྟེ། དེས་དེའི་ཚེ་བསྐྱེད་པར་མི་བྱའོ། །བུད་མེད་མི་བྱའོ་ཞེས་བྱ་བ་ནི། དགེ་སློང་བུད་མེད་ཉོ་བས་ནི་རིན་དེ་ལྟར་བསྐྱེད་པར་མི་བྱ་བ་སྟེ། གཞུང་ནི་སྔར་མགོན་མེད་ཟས་སྦྱིན་གྱི་བྱུང་བའི་མཐའ་བསྟན་པ་ཉིད་ཡིན་ནོ། །རིན་མ་ཕུལ་གྱི་བར་དུ་སྤྱད་པ་དང་བྱི་དོར་ཡང་མི་བྱའོ་ཞེས་བྱ་བ་ནི། གང་ཟག་གང་གིས་དགེ་འདུན་གྱི་རྫས་བསྐྱེད་དེ་ཉོས་པ་དེས་དགེ་འདུན་ལ་རིན་མ་ཕུལ་གྱི་པར་དུ་གོས་ལ་སོགས་པ་བགོ་བ་ལ་སོགས་པས་སྤྱད་པར་ཡང་མི་བྱ་ལ། བཀྲུ་བ་དང་ཁ་བསྒྱུར་བ་ལ་སོགས་པའི་བྱི་དོར་ཡང་མི་བྱའོ། །ཡང་ཞེས་བྱ་བའི་སྒྲས་ནི་བྱ་བ་གཞན་ཡང་དགག་པ་བསྟན་པའི་ཕྱིར་རོ། །བགོ་སྐལ་བ་རྣམས་མང་བ་ཉིད་ཡིན་ན་བཅུ་ལ་སོགས་པའི་ཚོམས་ཀྱིས་བགོ་བར་བྱའོ་ཞེས་བྱ་བ་ནི། བགོ་སྐལ་བ་ཞེས་བྱ་བ་རྙེད་པའི་བགོ་སྐལ་དབང་བའི་གང་ཟག་མང་བ་ཉིད་ཡིན་ན་བཅུ་ལ་སོགས་པའི་ཚོམས་ཀྱིས་བགོ་བར་བྱ་སྟེ། གང་ཟག་བཅུའི་སྐལ་བ་ཚོམས་གཅིག་ཏུ་བཅད་པའམ་ཉི་ཤུའི་སྐལ་
བ་ཚོམས་གཅིག་ཏུ་བཅད་བར་མ་སུམ་ཅུའི་སྐལ་བ་ཚོམས་གཅིག་ཏུ་བཅད་པ་ལ་སོགས་པ་དང་དེ་བཞིན་དུ་བརྒྱའི་སྐལ་བ་ཚོམས་གཅིག་ཏུ་བཅད་པའམ། ཉིས་བརྒྱའི་སྐལ་བ་ཚོམས་གཅིག་ཏུ་བཅད་པའམ། སུམ་བརྒྱའི་སྐལ་བ་ཚོམས་གཅིག་ཏུ་བཅད་པ་ལ་སོགས་པ་ལྟ་བུའོ། །ཕོག་པ་མ་བགོས་པར་ཚོམས་ལས་འགའ་ཞིག་ཤི་ན་དེའི་སྐལ་བ་ཚོམས་དེས་དབང་བ་ཉིད་ཡིན་ནོ་ཞེས་བྱ་བ་ནི། ཚོམས་གཅིག་གི་རྙེད་པའི་སྐལ་བ་ཕོག་བ་སྒོ་གསེས་སུ་མ་བགོས་པར་ཚོམས་དེ་ལས་གང་ཟག་འགའ་ཞིག་ཤིན་དེའི་སྐལ་བ་ཚོམས་དེ་པའི་གང་ཟག་དུ་ཡོད་པ་དག་སྤྱིར་དབང་བ་ཉད་ཡིན་ནོ། །བགོས་པའི་འོག་ཏུ་ཤིན་ནི་དེའི་སྐལ་པ་མཚམས་སུ་གཏོགས་པའི་རབ་ཏུ་བྱུང་བ་ཚངས་པ་མཚུངས་པར་སྤྱོད་པ་རྣམས་ཀྱིས་ཤི་བའི་ཡོ་བྱད་དུ་བྱིན་གྱིས་བརླབ་པར་བྱ་བའོ། །མྱ་ངན་ལས་འདའ་བའི་བསམ་པས་རབ་ཏུ་བྱུང་བ་ཚུལ་ཁྲིམས་དང་ལྡན་པ་ལ་ནི་གོས་སྟོང་ཕྲག་བརྒྱ་པ་དང་ཟས་རོ་བརྒྱ་པ་དང་ཁང་པ་བརྩེགས་པ་ལྔ་བརྒྱ་པ་ཡང་འོས་སོ་ཞེས་བྱ་བ་ནི། མྱ་ངན་ལས་འདའ་བའི་བསམ་པས་རབ་ཏུ་བྱུང་བའི་གང་ཟག་ཚུལ་ཁྲིམས་དང་ལྡན་པ་ལ་ནི་སྦྱིན་བདག་ལྷ་དང་བཅས་པའི་འཇིག་རྟེན་གང་ཡང་རུང་བས་གོས་དང་ཟས་དང་གནས་རྣམ་པ་དེ་ལྟ་བུ་དག་ཕུལ་ཡང་བླང་ཞིང་ལོངས་སྤྱད་པར་འོས་པ་ཡིན་ནོ། །གོས་གང་ཀཱར་ཥཱ་པ་ཎ་འབུམ་རི་བདེ་ནི་གོས་སྟོང་ཕྲག་བརྒྱ་པ་ཞེས་བྱའོ། །ཟས་གང་ལ་རོའི་རྣམ་པ་བརྒྱ་ཡོད་པ་དེ་ནི་ཁ་ཟས་རོ་བརྒྱ་པ་ཞེས་བྱའོ། །ཁང་པ་བརྩེགས་པ་གང་ལ་མི་ལྔ་བརྒྱའི་གནས་བཅར་རུང་བའམ། ཡང་ན་ནེ་ཙོའི་སྣ་ལྟ་བུ་ལྔ་བརྒྱ་ཡོད་པ་དེ་ནི་ཁང་པ་བརྩེགས་པ་ལྔ་བརྒྱ་པ་ཞེས་བྱའོ། །དགེ་འདུན་གྱི་རྫས་ཀྱང་ངོ་ཞེས་བྱ་བ་ཡང༌། འོས་སོ་ཞེས་བྱ་བར་སྦྱར་ཏེ། མྱ་ངན་ལས་འདའ་བའི་བསམ་པས་རབ་ཏུ་བྱུང་བ་ཚུལ་ཁྲིམས་དང་ལྡན་པ་ལ་ནི་དགེ་འདུན་གྱི་རྫས་ཀྱང་བླང་ཞིང་ལོངས་སྤྱད་པར་འོས་པ་ཡིན་ནོ། །དགེ་འདུན་གྱི་རྫས་རྣམ་པ་ཇི་ལྟ་བུ་ཞིག་འོས་ཤེ་ན་དེའི་ཕྱིར་མི་སློབ་པ་མན་ཆད་ཀྱིའོ་ཞེས་བྱ་བ་སྨྲས་ཏེ། མི་སློབ་པའི་དགེ་འདུན་མན་ཆད་ཀྱི་རྫས་ཏེ། དགྲ་བཅོམ་པའི་དགེ་འདུན་མངའ་པའི་རྫས་ཀྱང་འོས་པ་ཡིན་ནོ་ཞེས་བྱ་བའི་ཐ་ཚིག་གོ །ཚུལ་ཁྲིམས་དང་ལྡན་པ་རྣམ་པ་གང་ལ་ཞེ་ན་དེའི་ཕྱིར་སོ་སོའི་སྐྱེ་བོ་ལ་ཡང་ངོ་ཞེས་བྱ་བ་སྨྲས་ཏེ། ཡང་ངོ་ཞེས་བྱ་བའི་སྒྲས་འཕགས་པ་འབའ་ཞིག་ལ་འོས་པར་མ་
ཟད་དོ་ཞེས་བྱ་བར་བསྟན་ཏོ། །ཚུལ་ཁྲིམས་འཆལ་བ་ནི་མ་ཡིན་ནོ་ཞེས་བྱ་བ་ནི། གོས་སྟོང་ཕྲག་བརྒྱ་པ་ལ་སོགས་པ་དང་དགེ་འདུན་གྱི་རྫས་འོས་པ་མ་ཡིན་པའོ། །ལེ་ལོ་ཅན་ལ་ནི་བླངས་པ་དང་ཉེ་བར་སྤྱད་པ་བུ་ལོན་དུ་འགྱུར་རོ་ཞེས་བྱ་བ་ནི། ཚུལ་ཁྲིམས་དང་ལྡན་པ་ལེ་ལོ་ཅན་ཞེས་བྱ་བ་བསྒྲུབ་མི་ཕོད་པའི་རང་བཞིན་ཅན་ལ་ནི། བླངས་པ་ཞེས་བྱ་བ་བདག་གིར་བྱས་པ་དང༌། ཉེ་བར་སྤྱད་པ་ཞེས་བྱ་བ་ལོངས་སྤྱོད་པ་དག་བུ་ལོན་དུ་འགྱུར་ཞེས་བྱ་བ་ཚེ་རབས་གཞན་ལ་སྦྱིན་བདག་དེ་ལ་དཔྱ་འཇལ་པའམ། དེའི་བྲན་གཡོག་དང་ཕྱུགས་ལ་སོགས་པར་སྐྱེ་བར་འགྱུར་རོ་ཞེས་བྱ་བའི་ཐ་ཚིག་གོ །མཚམས་ཀྱི་ནང་ཉིད་ན་གང་ཟག་གི་གཙུག་ལག་ཁང་ངམ་དེའི་རྙེད་པས་འཚོ་བ་ལ་ནི་དགེ་འདུན་གྱི་རྙེད་པ་འོས་སོ་ཞེས་བྱ་བ་ནི། གང་ཟག་གང་དགེ་འདུན་གྱི་མཚམས་ཀྱི་ནང་ན་གང་ཟག་གི་གཙུག་ལག་ཁང་ཡོད་པ་དེའི་འཚོ་བས་འཚོ་བའམ། གང་ཟག་གི་གཙུག་ལག་ཁང་མཚམས་ཀྱི་ཕྱི་རོལ་ན་འདུག་པ་དེའི་རྙེད་པས་འཆོ་ཞིང་མཚམས་ཀྱི་ནང་ན་གནས་པ་དེ་ལ་མཚམས་དེར་གཏོགས་པའི་དགེ་འདུན་གྱི་རྙེད་པ་ཡང་འོས་པ་ཡིན་ཏེ། གང་ཟག་གིས་སྤྱད་པའི་རྙེད་པ་དང་དགེ་འདུན་གྱི་རྙེད་པ་གཉི་ག་དབང་ངོ་ཞེས་བྱ་བའི་ཐ་ཚིག་གོ །ངེས་པའི་གནས་ཁང་ན་ཡང་ངོ་ཞེས་བྱ་བ་ནི། སྦྱིན་བདག་གིས་གནས་ཁང་འདི་ན་སུ་གནས་པ་དེ་ལ་རྙེད་པ་འདི་ཙམ་ཞིག་ཁུད་པར་དབུལ་ལོ་ཞེས་ངེས་པར་བྱས་པའི་གནས་ཁང་དེ་ནི་སུ་གནས་པའི་གང་ཟག་དེ་ལ་ཡང་གནས་ཁང་དེའི་རྙེད་པ་དང་མཚམས་དེའི་དགེ་འདུན་གྱི་རྙེད་པ་གཉི་ག་འོས་པ་ཡིན་ཏེ། དེ་གཉི་ག་དབང་ངོ་ཞེས་བྱ་བའི་ཐ་ཚིག་གོ །དེ་རེ་མོར་བསྐོའོ་ཞེས་བྱ་བ་ནི། རྙེད་པ་ངེས་པའི་གནས་ཁང་དེ་དགེ་སློང་རྣམས་ལ་རེ་མོར་བསྐོ་བར་བྱ་བ་སྟེ། དེའི་རྙེད་པ་དགེ་འདུན་གྱིས་ཀྱང་མི་བསྐུར་ལ། དུས་ཐམས་ཅད་དུ་གང་ཟག་གཅིག་པུ་ལ་ཡང་མི་སྦྱིན་ནོ། །ལྕགས་ལས་བྱས་པའི་སྣོད་སྤྱད་དག་ལས་ལྷུང་བཟེད་དང་ལྷུང་བཟེད་ཆུང་དུ་དང་ཚྭ་སྣོད་དང་ཟོ་ཕོར་དང་ལྡེ་མིག་ཁྱོག་པོ་དང་གྲིའུ་དང་ཁབ་དང་སེན་མོ་གཅད་པ་དང་ནལ་ཟེ་དང་ཐལ་ཕྱགས་དང་སྟ་རེ་དང་སླང་དང་ཕོར་བུ་དག་ནི་བགོ་བར་བྱ་བ་ཉིད་དོ་ཞེས་བྱ་བ་ནི། ལྕགས་ལས་བྱས་པའི་སྣོད་སྤྱད་དག་ལས་དེ་དག་ནི་བགོ་བར་བྱ་བ་ཉིད་ཡིན་ནོ། །བོང་ཚོད་ཆེན་པོ་གཞན་དག་ནི་མི་བགོ་བར་ཕྱོགས་བཞིའི་དགེ་འདུན་གྱི་
ཉིད་དུ་གཞག་པར་བྱ་བའོ། །ལྷུང་བཟེད་ཆུར་དུ་ཞེས་བྱ་བ་ནི་བྱིན་གྱིས་བརླབ་ཏུ་མི་རུང་བ་ཆུང་དུའོ། །ཚྭ་སྣོད་ཅེས་བྱ་བ་ནི། ལན་ཚྭའི་སྣོད་ངོ༌། །ཟོ་པོར་ཅེས་བྱ་བ་ནི། ཁ་ཟླུམ་འདྲ་བ་མཐོན་པོ་ནང་ཟབས་རིང་བའོ། །ཐལ་ཕྱགས་ཞེས་བྱ་བ་ནི་མེ་འཇོག་པའོ། །སླང་ཞེས་བྱ་བ་ནི་དོག་ལེ་འདྲ་པའོ། །ཕོར་བུ་ཞེས་བྱ་བ་ནི་ཟླུམ་པོ་ཁ་རུབ་བོ། །སའི་སྣོད་སྤྱད་དག་ལས་ནི་ལྷུང་བཟེད་དང་ལྷུང་བཟེད་ཆུང་དུ་དང་བུམ་བུ་དང་བྱ་མ་བུམ་དང༌། གཞོང་པ་དང་རིལ་པ་སྤྱི་བླུགས་དང་ཆུ་སྣོད་དག་གོ་ཞེས་བྱ་བ་ནི། བགོ་བར་བྱ་བ་ཉིད་དོ་ཞེས་བྱ་བར་སྦྱར་རོ། །ཁྲི་ནི་རིན་པོ་ཆེ་ལས་བྱས་པ་ལ་སོགས་པ་མན་ཆད་ནས་ལྕགས་ལས་བྱས་པའི་བར་དག་གོ་ཞེས་བྱ་བ་ནི། ཁྲི་རིན་པོ་ཆེ་ལས་བྱས་པ་ནས་ལྕགས་ལས་བྱས་པའི་བར་ཡན་ཆད་བགོ་བར་བྱ་བ་ཉིད་ཡིན་ནོ། །ཇི་ལྟར་བྱ་ཞེ་ན་དེའི་ཕྱིར་བརྫེས་ཏེའོ་ཞེས་བྱ་བ་སྨྲས་ཏེ། རིན་དུ་བཙོངས་ཏེ་བགོ་བར་བྱའོ་ཞེས་བྱ་བའི་ཐ་ཚིག་གོ །ཤིང་ལས་བྱས་པ་ནི་མ་ཡིན་ནོ་ཞེས་བྱ་བ་ནི། ཁྲི་ནི་བགོ་བར་བྱ་བ་ཉིད་མ་ཡིན་ནོ། །ཚོན་རྩི་ནི་ལྔ་ལས་གཞན་པའོ་ཞེས་བྱ་བ་ནི། གུར་གུམ་ལ་སོགས་པ་ཚོན་ཆེན་པོ་སྣ་ལྔ་ལས་གཞན་བདག་བགོ་བར་བྱ་བ་ཉིད་དེ། ཅི་གནས་སྐབས་ཐམས་ཅད་དམ་ཞེ་ན་དེའི་ཕྱིར་མ་བསྐོལ་པའོ་ཞེས་བྱ་བ་སྨྲས་ཏེ། གལ་ཏེ་མ་བསྐོལ་ནའོ། །བསྐོལ་བ་ནི་ཁ་བསྒྱུར་བར་བྱ་བ་ལ་སྦྱར་བར་བྱ་བ་ཉིད་དོ་ཞེས་བྱ་བ་ནི། ཚོན་རྩི་ཆེན་པོ་བསྐོལ་བ་ནི་ཁ་བསྒྱུར་བར་འོས་པའི་གོས་ལ་སོགས་པ་ལ་སྦྱར་བར་བྱ་བ་ཉིད་དོ། །ཁ་བསྒྱུར་བར་བྱ་བ་གང་ལ་ཞེ་ན་དེའི་ཕྱིར་དགེ་འདུན་གྱི་ལའོ་ཞེས་བྱ་བ་སྨྲས་ཏེ། ཁ་བསྒྱུར་བར་བྱ་བ་གང་ཡིན་པ་དེ་གལ་ཏེ་དགེ་འདུན་གྱི་ཡིན་ན་དེ་ལ་སྦྱར་བར་བྱ་བ་ཉིད་དོ། །ཀུན་དགའ་ར་པ་དང་གཙུག་ལག་ཁང་དང་དེ་དག་གི་གཞི་དང་གནས་མལ་དག་ནི་བཙོར་བར་བྱ་བ་ཡང་མ་ཡིན་ནོ་ཞེས་བྱ་བ་ནི། ཀུན་དགའ་ར་བ་ཞེས་བྱ་བ་མེ་ཏོག་གི་ར་བ་ལ་སོགས་པ་དང་གཙུག་ལག་ཁང་ཞེས་བྱ་བ་གནས་ཁང་ལ་སོགས་དང་དེ་དག་གི་གཞི་ཞེས་བྱ་བ་ཀུན་དགའ་ར་བའི་དོན་དང་གཙུག་ལག་ཁང་གི་དོན་གྱིས་གཞི་དང་གནས་མལ་དེ་དག་ནི་བཙོང་བར་བྱ་བ་ཡང་མ་ཡིན་ནོ། །ཡང་ཞེས་བྱ་བའི་སྒྲས་ནི་བགོ་བར་བྱ་བ་ཡང་མ་ཡིན་པར་བསྟན་ཏོ། །གཞག་པར་བྱ་བ་ཉིད་མ་ཡིན་ནོ་ཞེས་བྱ་བ་ནི། དེ་དག་གཏར་གཞག་པར་བྱ་བ་ཉིད་ཀྱང་མ་ཡིན་ནོ་ཞེས་བྱ་བའི་ཐ་ཚིག་གོ །བྱིན་གྱིས་བརླབ་པར་བྱ་བ་ཉིད་མ་ཡིན་ནོ་
ཞེས་བྱ་བ་ནི། ཚོན་ཆེན་པོས་ཁ་བསྒྱུར་བ་ནི་གང་ཟག་གི་ཉིད་དུ་བྱིན་གྱིས་བརླབ་པར་བྱ་བ་མ་ཡིན་པའོ། །ཕ་མ་ལ་གོས་དང་ཟས་ཀྱིས་བསྟབས་པར་བྱའོ་ཞེས་བྱ་བ་ནི། ཕ་མ་དག་ལ་ཟས་དང་གོས་ཀྱིས་འཚོ་བའི་མཐུད་པ་གཏང་བར་བྱ་པའོ། །ཇི་ལྟར་གཏང་པར་བྱ་ཞེ་ན་དེའི་ཕྱིར་གལ་ཏེ་ལྷུང་བཟེད་དང་ཆོས་གོས་ལས་ལྷག་པའི་རྙེད་པ་མེད་ན་བསླངས་ཏེའོ་ཞེས་བྱ་བ་ནི། གལ་ཏེ་རང་ལ་ལྷུང་བཟེད་དང་ཆོས་གོས་ལས་ལྷག་པའི་རྙེད་པ་གཞན་མེད་ན་ཡོན་བདག་གཞན་ལ་བསླངས་ཏེ་གཏང་བར་བྱའོ། །མ་གྲུབ་ན་ཟན་གྱི་སྐལ་བ་ལས་ཕྱེད་སྤྱིན་ནོ་ཞེས་བྱ་བ་ནི། བསླངས་ཏེ་མ་གྲུབ་ན་རང་གི་ཟན་གྱི་སྐལ་བ་ལས་ཕྱེད་སྦྱིན་ནོ། །བྱེ་བྲག་ཤེས་པར་བྱ་པའི་ཕྱིར་ཆོས་གོས་དག་ལ་ཐིག་ལེ་བྱའོ་ཞེས་བྱ་བ་ནི། གང་ཟག་ཕན་ཚུན་འདྲ་བ་དག་དེ་དང་མི་ནོར་བར་བྱ་བའི་ཕྱིར་ཆོས་གོས་ཀྱི་མཐར་ཚོན་གྱི་ཐིག་ལེས་མཚན་མ་གདབ་པར་བྱ་པའོ། །འདིར་གཞུང་ནི་དགེ་སློང་དག་ཁྱེད་ཀྱིས་དགེ་སློང་མཛེས་དགའི་ཆས་གོས་དག་ལ་ཐིག་ལེ་བྱོས་ཤིག་དང་འདི་ནི་མཛེས་དགའོ། །འདི་ནི་བཅོམ་ལྡན་འདས་སོ་ཞེས་ཤེས་པར་འགྱུར་རོ་ཞེས་གསུངས་པ་ཡིན་ནོ། །དེ་དག་ལ་མཚན་མ་གདབ་པོ་ཞེས་བྱ་བ་ནི་ཆོས་གོས་དེ་དག་ལའོ། །སྣག་ཚའི་ཐིག་ལེ་ནི་དེ་ཞེས་བྱའོ་ཞེས་བྱ་བ་ནི། མཚན་མ་ཞེས་བྱ་སྟེ་ཆོས་གོས་ཀྱི་གྲར་སྣག་ཚའི་ཐིག་ལེ་གསུམ་བྱའོ་ཞེས་བྱ་བའི་ཐ་ཚིག་གོ །ལུང་དག་ཀྱང་ངོ་ཞེས་བྱ་བ་ནི། ཆོས་གོས་དག་ལ་གདགས་པ་སྟེ། འདི་ནི་མི་ནོར་བར་བྱ་བའི་མཚན་མའི་སྐབས་མ་ཡིན་གྱི་ཚོན་གྱི་ལས་བྱ་བ་ན་གཟང་ཐག་ལ་དབང་བུས་མཐའ་འབྱར་བར་བྱའོ་ཞེས་སྔར་བསྟན་པའི་སྐབས་ཏེ། གོས་གཟར་ཐག་ལ་གདགས་པའི་ཕྱིར་གོས་ཀྱི་གྲྭ་གྲྭར་ཐག་གུ་གདགས་པ་ལ་ལུང་ཞེས་བྱའོ། །ཁ་ཚར་དང་ཕུན་ཚར་གྱི་མཐར་རང་ཆག་བྱའོ་ཞེས་བྱ་བ་ནི། གོས་ཁ་ཚར་དང་ཕུན་ཚར་གཅད་པའི་འཕྲོ་རང་ཆག་བྱ་བ་སྟེ། དཔེར་ན་གདོང་ཕྱིས་ཀྱི་མཐར་བྱེད་པ་བཞིན་དུ་མཐའ་དྲིལ་སྟེ་དྲུབས་པ་ནི་རང་ཆག་ཞེས་བྱའོ། །སྣམ་སྦྱར་མ་ཡིན་པ་དག་ལ་དྲས་ཏེ་བྱིན་གྱིས་བརླབ་པར་ངེས་པ་མེད་དོ་ཞེས་བྱ་བ་ནི། སྣམ་སྦྱར་མ་ཡིན་པ་དེ་ལས་གཞན་པ་བླ་གོས་དང་མཐང་གོས་དག་ལའོ། །དྲས་ཤིང་དྲུབས་པ་ཆོས་གོས་ཉིད་དུ་བྱིན་གྱིས་བརླབ་པར་བྱའོ་ཞེས་བྱ་བས། དྲས་པ་ལ་བྱིན་གྱིས་བརླབ་པའི་ཆོ་ག་ངེས་
པར་མཛད་པ་དེ་ནི་སྣམ་སྦྱར་འབའ་ཞིག་གི་ཡིན་པར་རིག་པར་བྱའོ། །དེ་ལས་གཞན་པའི་ཆོས་གོས་དག་ལ་ནི་ཆོག་འདི་ངེས་པ་མེད་དོ། །དེ་བས་ན་ཆོས་གོས་རླག་པ་ཉིད་དམ་ཆོས་གོས་ཚིག་པ་ཉིད་ལ་སོགས་པའི་རྐྱེན་དེ་ལྟ་བུ་དག་ཡོད་ན་སྣམ་སྤྱར་ལ་ཡང་དྲས་ཤིང་དྲུབས་པ་ཆོས་གོས་ཉིད་དུ་བྱིན་གྱིས་བརླབ་པོ་ཞེས་བྱ་བའི་ཆོ་ག་འདི་ངེས་པ་མེད་དོ། །རྐྱེན་དེ་ལྟ་བུ་དག་མེད་ན་ནི་སྣམ་སྦྱར་ལ་དྲས་ཤིང་དྲུབས་པོ་ཆོས་གོས་ཉིད་དུ་བྱིན་གྱིས་བརླབ་བོ་ཞེས་བྱ་བའི་ཆོ་ག་འདི་ངེས་པ་ཁོ་ནའོ། །ཆོས་གོས་གཞན་ལ་ནི་རྐྱེན་དེ་ལྟ་བུ་དག་མེད་ན་ཡང་ཆོ་ག་འདི་ངེས་པ་མེད་དོ། །འདི་སྐད་བསྟན་ཏེ། སྣམ་སྦྱར་ལས་གཞན་པའི་ཆོས་གོས་བླ་གོས་དང་མཐང་གོས་དག་ལ་དྲས་ཤིང་དྲུབས་པ་ཆོས་གོས་ཉིད་དུ་བྱིན་གྱིས་བརླབ་པར་བྱའོ་ཞེས་བྱ་བའི་ཆོ་ག་ཡོད་པ་དེ་ནི་ངེས་པ་མ་ཡིན་ཏེ། དེ་ལ་ཅི་དགར་འཇུག་པའི་ཆོ་ག་ཡིན་ནོ། །སྣམ་སྦྱར་ལ་ནི་རྐྱེན་དེ་ལྟ་བུ་དག་ཡོད་ན་ནི་མ་དྲས་པར་བྱིན་གྱིས་བརླབ་པོ། །རྐྱེན་དེ་ལྟ་བུ་དག་མེད་ན་ནི་དྲས་པ་ལ་བྱིན་གྱིས་བརླབ་པ་ཁོ་ནར་ངེས་པ་ཡིན་ནོ། །ལུགས་འདི་བསྒྲུབ་པའི་ཕྱིར་འདིར་གཞུང་ནི་བཙུན་པ་ཆོས་གོས་མ་དྲས་པ་ལ་བྱིན་གྱིས་བརླབ་ཏུ་རུང་ངམ། ཉེ་བ་འཁོར་མི་རུང་ངོ༌། །རྐྱེན་དེ་ལྟ་བུ་དག་ཡོད་ན་ནི་རུང་ངོ་ཞེས་གསུངས་པ་ཡིན་ནོ། །དེ་ཇི་ལྟར་ཁུངས་སུ་རུང་ཞེན། འདི་ལྟར་འདིར་ཆོས་གོས་ཞེས་གསུངས་བ་ནི་སྣམ་སྦྱར་ཁོ་ན་ཡིན་པར་རྣམ་པར་གནས་པའི་ཕྱིར་རོ། །དེར་ཅི་མངོན་ཞེ་ན། འདི་ལྟར་བླ་གོས་དང་མཐང་གོས་གཉིས་མ་དྲས་པ་གང་ཡིན་པ་དེས་ནི་ཆ་ལུགས་རྫོགས་པ་དང༌། རབ་ཏུ་ཕྱུང་བ་འདི་པའི་ཆ་ལུགས་ལ་གནོད་པ་མེད་པས་དེའི་ཕྱིར་འདིར་དེ་གཉིས་ཀྱིས་ལྷག་མ་སྣམ་སྦྱར་ལ་ཆོས་གོས་ཞེས་གསུངས་པ་ཡིན་ནོ། །ལུང་ལས་ཀྱང་འདིར་ཆོས་གོས་ཞེས་བྱ་བ་སྣམ་སྦྱར་ཡིན་པར་གསུངས་ཏེ། མ་མོ་ལས་སྣམ་སྦྱར་ནི་དྲ་བར་བྱའོ། །བླ་གོས་ནི་ངེས་པ་མེད་དོ། །མཐང་གོས་ཀྱང་ངེས་པ་མེད་དོ་ཞེས་གསུངས་པ་ཡིན་ནོ། །རྐྱེན་དེ་ལྟ་བུ་དག་མེད་པར་མ་དྲས་པ་དེས་གྲོང་དང་ཁྱིམ་གཞན་དུ་འཇུག་པ་དང་འདུག་པར་མི་བྱའོ་ཞེས་བྱ་བ་ནི། རྐྱེན་དེ་ལྟ་བུ་དག་མེད་པར་ཞེས་བྱ་བ་རྐྱེན་གང་དག་གིས་སྣམ་སྦྱར་མེད་པར་གྲོང་དང་ཁྱིམ་གཞན་དུ་འཇུག་པ་དང་འདུག་ཏུ་རུང་བ་འདི་ལྟ་སྟེ། དགེ་སློང་དང་བཅས་པ་ཉིད་དང་སྒོ་གླེགས་དང་བཅས་པའི་གནས་དང༌། ཆར་པ་འབབ་པ་
དང༌། ཆར་པ་འབབ་པར་དོགས་པ་དང༌། བགྲོད་པར་བྱ་བ་ཆུ་ཀླུང་གིས་ཆོད་པ་ལྟ་བུ་ཉིད་མེད་པ་ན། གནང་བ་མ་ཡིན་པ་དང་སྲ་བརྐྱང་མ་བཏིང་བས་སྣམ་སྦྱར་མེད་པར་གར་ཡང་འགྲོ་བར་མི་བྱའོ་ཞེས་སྔར་འབྲལ་བའི་སྤང་བའི་རྣམ་པར་འབྱེད་པའི་སྐབས་སུ་བསྟན་པ་དེ་ལྟ་བུའི་རྐྱེན་དེ་དག་མེད་པར་སྣམ་སྦྱར་མ་དྲས་པ་དེས་གྲོང་དང་ཁྱིམ་གཞན་དུ་འཇུག་པ་དང་འདུག་པར་མི་བྱའོ། །དེ་ལྟར་ཡང་འདིར་གཞུང་ནི་བཙུན་པ་སྣམ་སྦྱར་གཞག་པར་བགྱི་བ་ལ་རྒྱུ་ངུ་དག་དང་རྐྱེན་དུ་དག་མཆིས། བཅོམ་ལྡན་འདས་ཀྱིས་བཀའ་སྩལ་པ། ཉེ་བ་འཁོར་ལྔ་སྟེ་ལྔ་གང་ཞེ་ན། དགེ་སློང་དང་བཅས་པ་ཉིད་དང༌། སྒོ་གླེགས་དང་བཅས་པའི་གནས་དང༌། ཆར་པ་འབབ་པ་དང༌། ཆར་པ་འབབ་པར་དོགས་པ་དང༌། གྲོང་གཞན་དུ་འགྲོ་བར་འདོད་པ་ཆུ་ཀླུང་གིས་ཆོད་པ་དང༌། ས་བརྐྱང་བཏིང་པའི་གནས་དང༌། གསོལ་བའི་ལས་ནི་ལྔ་པའོ་ཞེས་གསུངས་པ་ཡིན་ནོ། །འདིར་ལུང་ལས་ཀྱང་བཙུན་པ་ཆོས་གོས་མ་དྲས་པས་གྲོང་དུ་འཇུག་ཏུ་རུང་ང་མཉེ་བ་འཁོར་མི་རུང་ངོ༌། །རྐྱེན་དེ་ལྟ་བུ་དག་ཡོད་ན་ནི་རུང་ངོ་ཞེས་གསུངས་པ་ཡིན་ནོ། ལུང་དང་རིགས་པ་འདི་དང་སྔ་མ་གཉིས་ཀྱིས་ན་འདིར་ཆོས་གོས་སྨོས་པ་ནི་སྣམ་སྦྱར་ཡིན་པར་དགོངས་པར་རིགས་སོ། །མུ་སྟེགས་ཅན་གྱི་འདུག་གནས་སུ་ཡང་དེ་བཞིན་ནོ་ཞེས་བྱ་བ་ནི། རྐྱེན་དེ་ལྟ་བུ་དག་མེད་པར་སྣམ་སྦྱར་མ་དྲས་པ་དེས་མུ་སྟེགས་ཅན་གྱི་འདུག་གནས་སུ་འཇུག་པ་དང་འདུག་པར་མི་བྱ་བ་སྟེ། སྣམ་སྦྱར་མ་དྲས་པས་མུ་སྟེགས་ཅན་གྱི་འདུག་གནས་དེ་ན་མུ་སྟེགས་ཅན་དག་ཉེ་བར་མི་འཁོད་ཀྱང་འཇུག་པ་དང་འདུག་པར་མི་བྱ་བར་དགོངས་སོ། །འདི་སྐད་བསྟན་ཏེ། གལ་ཏེ་འདུག་གནས་དེ་ན་མུ་སྟེགས་ཅན་དག་ཉེ་བར་མི་གནས་སུ་ཟིན་ཀྱང་རྐྱེན་དེ་ལྟ་བུ་དག་མེད་ན་སྣམ་སྦྱར་མ་དྲས་པ་དེས་དེར་འཇུག་པ་དང་འདུག་པར་མི་བྱའོ། །རྐྱེན་དེ་ལྟ་བུ་དག་ཡོད་ན་ནི་བྱའོ། །འཁོད་ན་འཇུག་པ་དང་འདུག་པར་མི་བྱའོ་ཞེས་བྱ་བ་ནི། མུ་སྟེགས་ཅན་གྱི་འདུག་གནས་དེ་དག་ན་མུ་སྟེགས་ཅན་དག་འཁོད་ན་རྐྱེན་དེ་ལྟ་བུ་དག་ཡོད་ཀྱང་མུ་སྟེགས་ཅན་གྱི་འདུག་གནས་དེར་སྣམ་སྦྱར་མེད་པར་འཇུག་པ་དང་འདུག་པར་མི་བྱ་བ་སྟེ། འདི་ལྟར་ཆོས་གོས་དྲས་པ་ནི་ཀུན་དུ་རྒྱུ་ལ་སོགས་པ་མུ་སྟེགས་ཅན་རྣམས་ཀྱི་གོས་དང་འདྲ་བ་བསྟེན་པས་དེར་ཞུགས་པ་དང་
འདུག་པར་འགྱུར་པ་གང་ཡིན་པ་དེས་དེའི་ཕྱོགས་ཀྱི་ནང་དུ་བསྟེན་པ་ཡིན་པར་དོགས་པར་འགྱུར་བས་དེ་བས་ན་འདིར་དེ་དགག་པ་མཛད་དོ། །འདིར་གཞུང་ནི་བཙུན་པ་ཀུན་དུ་རྒྱུ་བའི་འདུག་གནས་སུ་སྣམ་སྦྱར་མ་མཆིས་པས་མཆིར་རུང་ངམ། ཉེ་བ་འཁོར་མི་རུང་ངོ༌། །གལ་ཏེ་ཀུན་དུ་རྒྱུ་དག་ཕྱི་རོལ་དུ་བྱུང་པར་གྱུར་ན་ནི་རུང་ངོ་ཞེས་གསུངས་པ་ཡིན་ཏེ། དེ་ན་མུ་སྟེགས་ཅན་དག་མི་འཁོད་ན་རྐྱེན་དེ་ལྟ་བུའི་དབང་གིས་འགྲོར་རུང་བའི་གཞུང་ཡིན་ནོ། །སྤུ་ཅན་ཆོས་གོས་གསུམ་ཉིད་དུ་བྱིན་གྱིས་མི་བརླབ་བོ་ཞེས་བྱ་བ་ནི། རྐྱེན་དེ་ལྟ་བུ་དག་མེད་ནའོ། །དེ་བགོ་བའི་གོས་སུ་མི་བསྟེན་ནོ་ཞེས་བྱ་བ་ནི། སྤུ་ཅན་དེ་མལ་ཆ་མ་ཡིན་པའི་གོས་སུ་ལུས་ལ་བགོ་པར་མི་བྱ་སྟེ། དེ་ཡང་རྐྱེན་དེ་ལྟ་བུ་དག་མེད་ནའོ། །སེང་བ་དག་བདག་གིར་བྱའོ་ཞེས་བྱ་བ་ནི། རུང་བར་བྱས་ཏེ་བཅང་བ་ལ་འདིར་བདག་གིར་བྱའོ་ཞེས་བྱ་བའི་སྒྲར་གསུངས་སོ། །དེ་ནི་རྣམ་པ་བཞིའོ་ཞེས་བྱ་བ་ནི། སེང་བ་དེ་ནི་རྣམ་པ་བཞི་ཡོད་པ་ཉིད་དོ། །བཞི་གང་ཞེན་དེའི་ཕྱིར་པ་ལ་ལས་བྱས་པ་དང་ཟར་མ་ལས་བྱས་པ་དང་དུ་གུ་ལ་ལས་བྱས་པ་དང་རས་བལ་ལས་བྱས་པའོ་ཞེས་བྱ་བ་སྨྲས་ཏེ། ཤན་ལ་སོགས་པ་ལས་བྱས་པའི་སེང་བ་ཡང་མི་རུང་བ་ནི་མ་ཡིན་མོད་ཀྱི། མི་སྡུག་པས་འདིར་གཞི་ལས་མ་སྨོས་སོ། །སྤུ་དམའ་བ་ལ་སོགས་པ་རས་ཀྱི་རྣམ་པ་ཡང་གཞན་དག་ཀྱང་ངོ་ཞེས་བྱ་བ་ཡང་བདག་གིར་བྱར་རུང་བའོ། །སྤུ་དམའ་བ་ཞེས་བྱ་བ་ནི་སླུ་ཐུང་དུ་སྟུག་པོ་ཕྱིང་དེ་འདུག་པ་སྟེ་བེའུ་རས་ལ་བྱའོ། །སྤུ་ཅན་གཞན་ཡང་རྣམ་པ་དེ་འདྲ་ན་བདག་གིར་བྱར་རུང་ངོ༌། །ལ་བ་ཡང་ངོ་ཞེས་བྱ་བ་ཡང་བདག་གིར་བྱར་རུང་བ་སྟེ། དེ་ནི་སྤུ་དམའ་བམ་ཡིན་པའི་ཕྱིར་བརྩམས་སོ། །གནོད་པ་མེད་ན་སྤུ་ཕྱིར་བསྟན་སྟེ་བགོ་བར་མི་བྱ་སྟེ་གཞན་དུ་ནའོ་ཞེས་བྱ་བ་ནི། ལ་བ་དེ་དྲི་མ་དང་ཤིག་ལ་སོགས་པའི་གནོད་པ་མེད་ན་སྤུ་ཕྱིར་བསྟན་ཏེ་ཕྱི་སློང་ཏུ་བགོ་བར་མི་བྱ་བའོ། །གནོད་པ་ཡོད་ན་ནི་ཉེས་པ་མེད་དོ། །འདིར་གཞུང་ནི་དྲི་མ་ཅན་དང་ཤིག་ཅན་ལ་ལྟུང་བ་མེད་དོ་ཞེས་གསུངས་པ་ཡིན་ནོ། །གཞན་དུ་ནའོ་ཞེས་བྱ་བ་ནི་ནང་སློག་ཏུ་གྱོན་པ་ལ་ཉེས་པ་མེད་དོ། །དེ་དེ་བཞིན་དུ་གྱོན་པས་བཅག་པར་མི་བྱའོ་ཞེས་བྱ་བ་ནི། ལ་བ་དེ་ཕྱི་སློག་ཏུ་དེ་བཞིན་དུ་གྱོན་པས་བཅག་པར་མི་བྱ་བ་སྟེ། འདིས་ནི་གནོད་པ་ཡོད་ན་ཞེས་བྱ་བ་དམིགས་ཀྱིས་བསལ་ཏེ། གནོད་པ་ཡོད་ཀྱང་
དེ་དེ་བཞིན་དུ་གྱོན་པས་བཅག་པར་མི་བྱའོ་ཞེས་བྱ་བའི་ཐ་ཚིག་གོ །འདིར་གཞུང་ནི་བཅོམ་ལྡན་འདས་ཀྱིས་དགེ་སློང་གིས་ལ་པ་སྤུ་ཕྱིར་བསྟན་ཏེ་བགོ་བར་མི་བྱའོ་ཞེས་གསུངས་པ་དང༌། དགེ་སློང་དག་གིས་བ་ལད་རྫིའི་ཁྱིམ་ནས་ལ་བའི་གོས་དག་རྙེད་ནས་དགེ་སློང་དེ་དག་ཤིག་མང་བས་ཤིག་དག་གིས་ཟོས་ནས་མོས་པར་མ་གྱུར་པའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཀའ་སྩལ་པ། ལ་བ་སྤུ་ཕྱིར་བསྟན་སྟེ་གྱོན་ལ་འདུག་པར་བྱ་ཞིང་ཉལ་བར་ཡང་བྱའོ། །བཅག་པར་མི་བྱའོ་ཞེས་གསུངས་པ་ཡིན་ནོ། །པར་སིག་གི་ལ་བ་དང་བེའུ་ཕྲུག་དང་པར་ཐང་ཁྲ་བོ་གང་ཟག་གིས་བདག་གིར་མི་བྱའོ་ཞེས་བྱ་བ་ནི། པར་སིག་གི་ཡུལ་ནས་བྱུང་བའི་ལ་བ་ནི་པར་སིག་གི་ལ་བ་ཞེས་བྱ་བ་སྟེ། ཧ་ཅང་རིན་ཆེ་བའི་ཕྱིར་དགག་པ་མཛད་དོ། །བེའུ་རས་ཀྱི་རིགས་སྤུ་དེ་པོར་རིང་པ་ནི་བེའུ་ཕྲུག་ཅེས་བྱ་སྟེ། དེ་ལ་མེ་ཏོག་གི་རྣམ་པ་ལྟ་བུའི་རི་མོ་སྣང་བས་དགག་པར་མཛད་དོ། པར་ཐང་ཁྲ་པོ་ནི་བཀྲ་བའི་ཕྱིར་བཀག་སྟེ། དེ་དག་གང་ཟག་གིས་བདག་གིར་མི་བྱའོ། །རྙེད་པ་དང་ཐོབ་པ་ཉིད་ལ་བྱེ་ཕྲག་མེད་པར་རིག་པར་བྱའོ། །འཆག་སར་པར་ཐང་ག་དིང་བ་ནོད་པར་བྱའོ་ཞེས་བྱ་བ་ཡང་གལ་ཏེ་ཁྲ་བོ་ཡིན་ན་བདག་གིར་མི་བྱའོ། །ཁྲ་བོ་མ་ཡིན་ན་ཅི་དགར་བྱའོ། །རྟག་ཏུ་མལ་གཅིག་ཏུ་བཅག་པར་མི་བྱའོ་ཞེས་བྱ་བ་ནི། བར་ཐང་གི་ཕྱོགས་གཅིག་ཁོ་ནའི་སྟེང་དུ་རྟག་ཏུ་བཅག་པར་མི་བྱ་བའོ། །ནུས་པ་ཉིད་ཡིན་ན་བརྩེམ་པ་དང་ལྷན་པ་རིང་པོ་དག་གླང་པས་ཕྱིར་བཅོས་པར་བྱའོ་ཞེས་བྱ་བ་ནི། པར་ཐང་དེ་རྙིངས་པར་གྱུར་པ་ན་གལ་ཏེ་ཕྱིར་བཅོས་ནུས་པ་ཉིད་ཡིན་ན་དེའི་ཚེ་བཙེམ་པ་དང་ལྷན་པ་རིང་པོས་གླན་པ་དག་གིས་ཕྱིར་བཅོས་པར་བྱ་བའོ། །མི་ནུས་པ་ཉིད་ན་འཆག་ས་དེ་ཉིད་དུ་ལྕི་བ་དང་སས་བྱུག་པར་བྱའོ་ཞེས་བྱ་བ་ནི། གལ་ཏེ་པར་ཐང་དེ་ཕྱིར་བཅོས་མི་ནུས་པ་ཉིད་ཡིན་ན་དེའི་ཚེ་འཆགས་དེ་ཉིད་དུ་ལྕི་བ་དང་སའི་བྱུག་པ་བསྲེས་པས་བྱུག་པར་བྱའོ། །གཞན་བཅང་བར་བྱའོ་ཞེས་བྱ་བ་ནི། སྤུ་ཅན་དང་སྤུ་དམའ་བ་ལ་སོགས་པ་སྔར་བསྟན་པ་དེ་དག་ལས་གཞན་པ་པར་སིག་གི་ལ་བ་ལ་སོགས་པ་བཅང་བའོ། །ཅི་བདག་ཉིད་ཀྱི་ཉིད་དུ་འམ་ཇི་ལྟར་བཅང་བར་བྱ་ཞེ་ན་དེའི་ཕྱིར་སྦྱིན་བདག་ལ་ཡིད་བརྟན་པས་སོ་ཞེས་བྱ་བ་སྨྲས་ཏེ། དེ་དབང་བའི་བསམ་པས་དེ་ལ་ཡིད་
བརྟན་ཏེ་བཅང་བང་བྱའོ། །སྣམ་སྦྱར་དང་བླ་གོས་དང༌། མཐང་གོས་དང༌། ཤམ་ཐབས་དང༌། ཤམ་ཐབས་ཀྱི་གཟན་དང་རྡུལ་གཟན་དང་རྡུལ་གཟན་གྱི་གཟན་དང་གདོང་ཕྱིས་དང་རྣག་གཟན་དང་གཡན་པ་དགབ་པ་དང་སྐྲ་བཟེད་དང་གདིང་བ་དང་དབྱར་གྱི་གོས་རས་ཆེན་བཅང་བར་བྱའོ་ཞེས་བྱ་བ་ནི། ཡོ་བྱད་བཅུ་གསུམ་པོ་དེ་དག་བཅང་བར་བྱ་བའོ། །ཆོས་གོས་གནང་པ་དེ་ཉིད་དུ་བྱིན་གྱིས་བརླབས་ཏེ་བཅང་བར་བྱའོ་ཞེས་བྱ་བ་ནི། སྣམ་སྦྱར་ལ་སོགས་པའི་ཆོས་གོས་གནང་པ་དག་སྣམ་སྦྱར་ལ་སོགས་པ་དེ་ཉིད་ཀྱི་མིང་དུ་བྱིན་གྱིས་བརླབས་ཏེ་བཅང་བར་བྱའོ། །དེ་དག་གི་སྔགས་ནི་ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བགྱི་བའི་ཆོས་གོས་བགྱིས་ལགས་པ་རུང་བ་སྤྱད་པར་འོས་པ་འདི་ཆོས་གོས་སྣམ་སྤྱར་དུ་བྱིན་གྱིས་བརླབ་པོ། །ལན་གསུམ་དུ་བཟླས། ཐབས་ཡིན་ནོ། །ལེགས་སོ། །དེ་བཞིན་དུ་བླ་གོས་དང༌། མཐང་གོས་དང༌། ཤམ་ཐབས་དང༌། ཤམ་ཐབས་ཀྱི་གཟན་དང་རྡུལ་གཟན་དང་རྡུལ་གཟན་གྱི་གཟན་དང་གདོང་ཕྱིས་དང༌། རྣག་གཟན་དང༌། གཡན་པ་དགབ་པ་དང༌། སྐྲ་བཟེད་དང༌། གདིང་བ་དང་དབྱར་གྱི་གོས་རས་ཆེན་ལ་ཡང་བརྗོད་པར་བྱའོ། །ཡོ་བྱད་ཀྱི་གོས་ཀྱང་ངོ་ཞེས་བྱ་བ་ཡང་བཅད་བར་བྱའོ་ཞེས་བྱ་བར་སྦྱར་རོ། །འདིའི་སྔགས་ནི་ཚེ་དང་ལྡན་པ་དག་དགོངས་སུ་གསོལ། གོས་འདི་བདག་དང་ཚངས་པ་མཚུངས་པར་སྤྱོད་པ་ལ་མཁོ་བའི་ཡོ་བྱད་ཀྱི་གོས་སུ་བྱིན་གྱིས་བརླབ་བོ། །ལན་གསུམ་བཟླས། ཐབས་ཡིན་ནོ། །ལེགས་སོ་ཞེས་གསུངས་པ་ཡིན་ནོ། །དེ་ནི་དཀར་པོ་ཉིད་དང་ཁ་ཚར་དང་ཕུན་ཚར་དང་བཅས་པ་ལ་ཡང་ཉེས་པ་མེད་དོ་ཞེས་བྱ་བ་ནི། ཡོ་བྱད་ཀྱི་གོས་འཆང་བ་དེའོ། །དགེ་འདུན་གྱི་ཡང་ངོ་ཞེས་བྱ་བ་ནི། དགེ་འདུན་གྱི་ཡོ་བྱད་ཀྱི་གོས་ཀྱང་དཀར་པོ་ཉིད་དང་ཁ་ཚང་དང་ཕུན་ཚར་དང་བཅས་པ་འཆང་བ་ལ་ཉེས་པ་མེད་པའོ། །འདིར་གཞུང་ནི་དེ་ལྟ་བས་ན་དགེ་འདུན་གྱི་གོས་དག་ནི་སར་པ་དང་ཁ་ཚར་དང་ཕུན་ཚར་རིང་པོ་དག་ཀྱང་བཅང་བར་གནང་ངོ་ཞེས་གསུངས་པ་ཡིན་ནོ། །གཞན་དུ་མ་ཡང་རུང་བར་བྱས་ཏེ་བཅང་བར་བྱའོ་ཞེས་བྱ་བ་ནི། སྣམ་སྦྱར་ལ་སོགས་པ་ཡོ་བྱད་བཅུ་གསུམ་དང་ཡོ་བྱད་ཀྱི་གོས་ལས་གཞན་པའི་གོས་དུ་མ་ཡང་རུང་བར་བྱས་ཏེ་བཅང་བར་བྱ་བའོ། །འདིའི་སྔགས་ནི་ཚེ་དང་ལྡན་པ་དགོངས་སུ་གསོལ།།
བདག་མིང་འདི་ཞེས་བགྱི་བའི་གོས་ལྷག་པ་རུང་བར་མ་བགྱི་བར་འོས་པ་འདི་མཁན་པོ་ལ་རུང་པར་བགྱིའོ། །མཁན་པོ་ལ་ཡིད་བརྟན་ཏེ་བཅང་བར་བགྱིའོ། །རྐྱེན་ཇི་ལྟ་བ་བཞིན་དུ་བགྱིའོ། །ལན་གསུམ་དྲུ་བཟླས། ཐབས་ཡིན་ནོ། །ལེགས་སོ་ཞེས་གསུངས་པ་ཡིན་ནོ། །འདིར་མཁན་པོ་ཞེས་སྨོས་པ་ནི་དཔེ་ཙམ་དུ་ཟད་དེ། མཁན་པོའམ་སློབ་དཔོན་རྣམས་སམ་བསྙེན་པར་རྫོགས་པ་གཞན་ཡང་རུང་ངོ༌། །སེམས་མི་བརྟན་པ་ལ་རུང་བར་མི་བྱའོ་ཞེས་བྱ་བ་ནི། སྨྱོན་པ་ལ་སོགས་པའི་མིང་གིས་ཆོས་གོས་དག་རུང་བར་མི་བྱ་བ་སྟེ། སྨྱོན་པ་ལ་སོགས་པ་དག་ནི་ཐ་སྙད་དུ་བྱ་བ་ཉིད་མ་ཡིན་པའི་ཕྱིར་རོ། །བསྙེན་པར་མ་རྫོགས་པ་ལ་མི་བྱའོ་ཞེས་བྱ་བ་ནི། དགེ་ཚུལ་ལ་སོགས་པ་བསྙེན་པར་མ་རྫོགས་པའི་མིང་གིས་རུང་བར་མི་བྱའོ། །འདིར་གཞུང་ནི་དགེ་སློང་དག་དགེ་ཚུལ་ལ་གོས་དག་རུང་བར་བྱེད་པ་ན་དེས་གོས་ཀྱི་ཕྲེད་བ་ཕུལ་བ་དང༌། བཅོམ་ལྡན་འདས་ཀྱིས་བཀའ་སྩལ་པ། བསྙེན་པར་རྫོགས་པ་ལ་གོས་དག་རུང་བར་མི་བྱ་བའོ་ཞེས་གསུངས་པ་ཡིན་ནོ། །མངོན་སུམ་དུ་མི་བྱའོ་ཞེས་བྱ་བ་ནི། གང་ལ་རུང་བར་བྱ་བ་དེའི་མངོན་སུམ་དུ་རུང་བར་མི་བྱ་བའོ། །ཡུལ་གཞན་དུ་གནས་པར་གྱུར་པ་ཉིད་ན་ཡང་རུང་བ་མི་ཉམས་སོ་ཞེས་བྱ་བ་ནི། གང་གི་མིང་གིས་མི་རུང་བར་བྱས་པ་དེ་ཡུལ་གཞན་དུ་གནས་པར་གྱུར་ཀྱང་རུང་བ་དེ་མི་ཉམས་པའོ། །ཤིན་ཉམས་སོ་ཞེས་བྱ་བ་ནི། གང་ལ་རུང་བར་བྱས་པ་དེ་ཤིན་རུང་བདེ་ཉམས་པའོ། །ཅི་གང་གི་ཚེ་ཤི་བ་དེའི་ཚེ་ཁོ་ན་དེ་ཉམས་སམ་ཞེ་ན་དེའི་ཕྱིར་ཤེས་ནའོ་ཞེས་བྱ་བ་སྨྲས་ཏེ། གལ་ཏེ་དེ་ཤི་བར་ཤེས་ནའོ། །འདི་ལ་རུང་བར་བྱེད་པ་བདག་པོ་ཉིད་དོ་ཞེས་བྱ་བ་ནི། རུང་བར་བྱས་པའི་དངོས་པོ་འདི་ལ་རུང་བར་བྱེད་པ་བདག་པོ་ཡིན་ཏེ་དེ་ཉིད་དབང་གི་གང་ལ་རུང་བར་བྱས་པ་དེ་མི་དབང་ངོ༌། །སྤངས་པ་བདག་གིར་མི་བྱའོ་ཞེས་བྱ་བ་ནི། དགེ་འདུན་གྱིས་སམ་གང་ཟག་གིས་གཞན་གྱི་རྫས་སྤངས་པ་བདག་གིར་མི་བྱ་བ་སྟེ། འདི་ལྟར་དེ་ནི་སྤང་བའི་ལྟུང་བྱེད་ཕྱིར་བཅོས་པའི་ཕྱིར་གཞག་པ་ཡིན་གྱི་སྦྱིན་པའི་ཕྱིར་གཞག་པ་ནི་མ་ཡིན་པའི་ཕྱིར་རོ། །དགེ་སློང་ལ་སྤང་བར་བྱའོ་ཞེས་བྱ་བ་ནི། དགེ་འདུན་ལ་ཡང་མི་སྤང་ལ་བསྙེན་པར་མ་རྫོགས་པ་ལ་ཡང་མི་སྤང་ངོ༌། །མི་གསལ་བ་ལ་ཡང་མི་བྱའོ་ཞེས་བྱ་བ་ནི། གླེན་པ་ལ་སོགས་པ་ལ་ཡང་སྤང་བར་མི་བྱ་བ་སྟེ། ཐ་སྙད་
མི་ཤེས་པའི་ཕྱིར་རོ། །མ་བྱིན་ན་སླང་ངོ་ཞེས་བྱ་བ་ནི། སྤངས་པའི་རྫས་གང་ལ་སྤངས་པ་དེས་ཕྱིར་མ་བྱིན་ན་སྤོང་བར་བྱེད་པས་ཕྱིར་བསླང་བར་བྱ་བའོ། །མཐུས་ཀྱང་དགུག་གོ་ཞེས་བྱ་བ་ནི། མ་བྱིན་ན་ཞེས་བྱ་བའི་རྗེས་བསྙེགས་པའི་ཕྱིར་ཀྱང་ཞེས་བྱ་བའི་སྒྲ་སྨོས་སོ། །གོས་དྲི་དག་གིས་གོས་པ་བ་གུས་ཏེ། བགོ་བར་བྱའོ་ཞེས་བྱ་བ་ནི། གོས་ག་བུར་ལ་སོགས་པའི་དྲི་དག་གིས་གོས་པ་བཀྲུས་ཏེ་བགོ་བར་བྱའོ། །ཕྱེ་མ་དག་གིས་ན་སྤྲུགས་ཏེའོ་ཞེས་བྱ་བ་ནི། གོས་ལ་སོགས་པའི་ཕྱེ་མ་དག་གིས་གོས་ན་སྦྲུགས་ཏེ་བགོ་བར་བྱ་བའོ། །སྣུམ་གྱིས་ན་རྩུབ་པར་བྱས་ཏེའོ་ཞེས་བྱ་བ་ནི། གོས་སྣུམ་གྱིས་གོས་ན་ཐལ་ཆུ་ལ་སོགས་པས་སྣུམ་ཕྱུང་སྟེ་བགོ་བར་བྱ་བའོ། །དེ་དག་ནི་མི་སྡུག་པའི་ཕྱིར་བསལ་བ་ཡིན་གྱི། གསོག་འཇོག་ཏུ་འགྱུར་བ་ནི་མ་ཡིན་ཏེ། གསོག་འཇོག་ནི་ཟས་དང་འབྲེལ་བ་ཡིན་པའི་ཕྱིར་རོ། །ཆར་འབབ་པའི་ཚེ་བླ་གབ་མེད་པར་དགེ་འདུན་གྱི་མི་བགོའོ་ཞེས་བྱ་བ་ནི་གོས་སོ། །བཀྲུ་བ་ཤལ་དང་ཚོན་དང་ལྷུང་བཟེད་ཀྱི་ལས་དང་ཤིང་འཆེག་བ་ལ་སོགས་པ་བྱེད་པའི་ཚེ་མི་བགོའོ་ཞེས་བྱ་བ་ཡང༌། བཀྲུ་བཤལ་ལ་སོགས་པའི་ལས་བྱེད་པའི་ཚེ་ཡང་དགེ་འདུན་གྱི་གོས་མི་བསྒོ་པའོ། །ལྷན་ཅིག་པ་ཉིད་ལ་ཞེས་མ་བགོ་ན་གཅིག་དང་དབྲལ་བའི་ཕྱིར་འདོམས་པ་ལ་བྱིན་པ་ནི་ཡང་དག་པ་ཉིད་ཀྱི་གྲངས་ཡིན་ནོ་ཞེས་བྱ་བ་ནི། རྫས་འདོམས་པར་བྱེད་པ་གཉིས་སམ་མང་པོ་དག་གིས་དགེ་སློང་ལ་རྫས་ཤིག་གཏམས་ནས་དེ་དག་གིས་དེང་ལྷན་ཅིག་ཚོགས་ཏེ་ལེན་དུ་འོངས་ན་བྱིན་ཅིག་ཅེས་མ་བསྒོ་ན། རྫས་བདག་གང་ཡང་རུང་བ་ཅིག་ལེན་དུ་འོངས་པའི་ཚེ་གཅིག་དང་འབྲལ་བའི་ཕྱིར་ཞེས་བྱ་བ་གྲོགས་གཞན་ཚེགས་མི་འབྱུང་ཞིང་གཞག་པའི་ཕྱིར་འདོམས་པར་བྱེད་པ་གང་ཡང་རུང་བ་ལེན་དུ་འོངས་པ་དེ་ལ་གཏམས་པའི་དགེ་སློང་གིས་རྫས་དེ་བྱིན་ན་ཡང་དག་པར་བྱིན་པའི་གྲངས་སུ་གཏོགས་པ་ཡིན་ཏེ། རུང་ངོ་ཞེས་བྱ་བའི་ཐ་ཚིག་གོ །འདིར་གཞུང་ནི་བཙུན་པ་རེ་ཞིག་སྐྱེ་བོ་བཞིས་གོས་གཏམས་པར་གྱུར་པ་གཅིག་གིས་ལེན་ན་བསྩལ་བར་བགྱིའམ། ཉེ་བ་འཁོར་སྦྱིན་པར་བྱའོ་ཞེས་གསུངས་པ་ཡིན་ནོ། །འདོམས་པར་བྱེད་པ་དང་བཅས་པ་ལ་མི་སྦྱིན་ནོ་ཞེས་བྱ་བ་ནི། འདོམས་པར་བྱེད་པ་མ་ཡིན་པ་དང་བཅས་ཏེ་ལྷན་ཅིག་ཏུ་ལེན་དུ་འོངས་ན་བསྐུར་བར་མི་བྱ་བ་སྟེ། དངོས་པོ་དེ་
བདག་པོ་མ་ཡིན་པ་གཞན་ལ་ཡང་སྦྱིན་པར་འགྱུར་བའི་ཕྱིར་རོ། །སྨྱོན་པས་ཉེ་དུ་མ་ཡིན་པ་དང་དེའི་ཁྱིམ་ནས་བླངས་པ་ལ་བླང་བར་མི་བྱའོ་ཞེས་བྱ་བ་ནི། སྨྱོན་པ་ལས་རྫས་བླང་བར་མི་བྱ་བ་སྟེ། སྨྱོན་པས་རང་གི་ཉེ་དུ་མ་ཡིན་པའི་ཁྱིམ་ནས་བླངས་པ་དང༌། སྨྱོན་པ་རང་གི་ཁྱིམ་ནས་བླངས་པ་ལས་རྫས་དགེ་སློང་གིས་བླང་བར་མི་བྱ་བའོ། །དེ་ནི་སྨྱོན་པ་ནི་ཐ་སྙད་བྱར་མི་རུང་བ་ཡིན་པས་བརྐུས་སོ་ཞེས་ཁ་ཟེར་བའི་ཉེས་པ་སྤང་བའི་ཕྱིར་རོ། །འདིར་གཞུང་ནི་གང་ལ་ཕའམ་མའམ་ཕུ་ནུའམ་བུ་སྲིད་མངོན་པའི་རང་གི་ཁྱིམ་ནས་སྤྱིན་པར་བྱེད་པ་དེ་ལས་ནི་བླང་བར་བྱའོ། །གང་ལས་བླང་བར་མི་བགྱི། གང་ན་ཕ་མ་ལ་སོགས་པ་མི་མངོན་པ་ནས་སོ་ཞེས་གསུངས་པ་ཡིན་ནོ། །བུ་བསྐྲད་པ་ལས་བླང་བར་བྱ་ཞེས་བྱ་བ་ནི། ཕས་བུ་རེ་ཞིག་བསྐྲད་པའི་ལག་ནས་རྫས་བླང་བར་བྱ་བ་སྟེ། བུ་དེ་ཕའི་ཁྱིམ་གྱི་བདག་པོ་ལས་དེ་མི་ལྡོག་པའི་ཕྱིར་རོ། །དུར་ཁྲོད་ནས་ཕྱིར་བཟློག་པ་ཡང་ངོ་ཞེས་བྱ་བ་ནི། དུར་ཁྲོད་དུ་རོ་བསྐྱལ་ནས་དེ་ནས་རོའི་གོས་ཕྱིར་བཟློག་པ་དགེ་སློང་ལ་དབུལ་ན་བླང་བར་བྱ་བའོ། །ཕྱིར་འགུགས་ན་སྦྱིན་པར་བྱ་བའོ་ཞེས་བྱ་བ་ནི། དུར་ཁྲོད་ནས་ཕྱིར་བཟློག་པའི་གོས་དགེ་སློང་ལ་ཕུལ་བ་དེ་དགེ་སློང་ལས་ཕྱིར་འགུགས་ན་ཕྱིར་སྦྱིན་པར་བྱ་བ་སྟེ། ངན་པ་ནོར་དུ་མི་ཆེ་བའི་ཕྱིར་རོ། །ཡང་རྙེད་ན་བླང་ངོ་ཞེས་བྱ་བ་ནི། དུར་ཁྲོད་ནས་ཕྱིར་བཟློག་པ་དགེ་སློང་ལ་ཕུལ་པ་དགེ་སློང་ལས་ཕྱིར་འགུགས་པ་དེ་ཡང་དགེ་སློང་ལ་འབུལ་ན་དགེ་སློང་གིས་བླང་བར་བྱ་སྟེ། དེས་ནི་དེས་ཁྲོ་བ་མི་བསྟན་པའི་ཕྱིར་རོ། །མཆོད་རྟེན་གྱི་དཀོར་དང་འབྱུང་ཁུངས་དང་རྩ་བ་དང་འབྲས་བུ་དང་བུར་མ་ཤིང་ལས་གཞན་པའི་ཟས་ཀྱི་དོན་དང༌། བསྐོ་བས་ཉེ་བར་འཚོ་བར་བྱ་བ་དང༌། ན་བའི་རུང་བ་ནི་བདག་གིར་བྱ་བའི་ཕྱིར་བགོ་བར་མི་བྱ་བ་ཉིད་ཡིན་ནོ་ཞེས་བྱ་བ་ནི། རྣམ་པ་དེ་ལྡ་ནི་བདག་གིར་བྱ་བའི་ཕྱིར་བགོ་བར་མི་བྱ་བ་ཉིད་ཡིན་ནོ་ཞེས་བྱ་བར་སྦྱར་རོ། །མཆོད་རྟེན་གྱི་དཀོར་ཞེས་བྱ་བ་ནི། འདིར་དེ་བཞིན་གཤེགས་པའི་མཆོད་རྟེན་གྱི་དཀོར་ལ་བྱ་སྟེ། དེ་ནི་གང་ཟག་གིས་བདག་གིར་བྱ་བའི་ཕྱིར་བགོ་བར་མི་བྱ་བ་ཉིད་དོ། །ཉན་ཐོས་དང་རང་སངས་རྒྱས་ཀྱི་མཆོད་རྟེན་གྱི་དཀོར་ནི་འདིར་མ་གཏོགས་ཏེ། དེ་ནི་དགེ་འདུན་གྱི་ཁོངས་སུ་གཏོགས་པས་དགེ་སློང་གིས་ནོར་ཉིད་དུ་བགོ་བར་བྱ་བ་ཉིད་ཡིན་པའི་ཕྱིར་རོ།།
དེ་བཞིན་གཤེགས་པའི་མཆོད་རྟེན་གྱིས་ནི་སངས་རྒྱས་དཀོན་མཆོག་ཉིད་དགེ་འདུན་ལས་ཐ་དད་པ་ཡིན་པས་དེ་ནི་བགོ་བར་མི་བྱ་བ་ཉིད་ཡིན་ནོ། །འབྱུང་ཁུངས་ཞེས་བྱ་བ་ནི། དགེ་འདུན་གྱི་འདུ་བའི་སྒོ་སྟེ། འདི་ལྟ་སྟེ་ཞིང་དང་ལོ་ཐོག་དང་ཀུན་དགའ་ར་བ་ལ་སོགས་པ་དང༌། འདུ་བའི་སྒོ་མི་ཟད་པ་ཉིད་དུ་ངེས་པར་བྱས་པ་གཞན་དག་དང༌། བ་ལང་དང༌། མ་ཧེ་ལ་སོགས་པ་དང༌། ལྷ་འབངས་དང་རྩེ་རྒོད་ལ་སོགས་པ་དག་སྟེ། དེ་དག་ཀྱང་བདག་གིར་བྱ་བའི་ཕྱིར་བགོ་བར་མི་བྱ་བ་ཉིད་ཡིན་ནོ། །རྩ་བ་དང་འབྲས་བུ་དང་བུ་རམ་ཤིང་ལས་གཞན་པའི་ཟས་ཀྱི་དོན་དུ་ཞེས་བྱ་བ་ལ། རྩ་བ་ལ་ཕུག་ལ་སོགས་པ་དང། འབྲས་བུ་ཤིང་ཐོག་ལ་སོགས་པ་དང༌། བུ་རམ་ཤིང་དག་གི་པ་གོས་ཀྱང་ཉེས་པ་མེད་དོ། །དེ་དག་ལས་གཞན་པ་ཟས་ཀྱི་དོན་དུ་སྦྱར་བ་གྲོ་ནས་ལ་སོགས་པ་གཙང་བག་དང༌། ཀཱར་ཥཱ་པ་ཎ་ལ་སོགས་པ་དཀོར་མཛོད་དང༌། མར་ལ་སོགས་པ་ཤེ་དང༌། སྒ་ཚ་ལ་སོགས་པ་སྤོད་དག་དང༌། དེ་དག་ལ་སོགས་པའི་དངོས་པོ་ཁའི་འདུ་བའི་སྒོ་དག་ནི་ཟས་ཀྱི་དོན་ཞེས་བྱའོ། །དེ་ལྟར་ཡང་གཙུག་ལག་ལས་ཁའི་འདུ་བའི་སྒོ་འཕྲོག་ན་ཞེས་བྱ་བའི་ཚིག་ཡོད་དེ་ཁར་བཟའ་བའི་དོན་གྱི་རྫས་རྣམས་ནི་ཁའི་འདུ་བའི་སྒོ་ཞེས་བྱ་སྟེ། དེ་དག་ཀྱང་བདག་གིར་བྱ་བའི་ཕྱིར་བགོ་བར་མི་བྱ་བ་ཉིད་ཡིན་ནོ། །གལ་ཏེ་གཙུག་ལག་ཁང་ན་ཁའི་འདུ་བའི་སྒོ་དེ་དག་དགེ་འདུན་གྱིས་སྤྱད་པ་ལས་ལྷག་པའི་མཐེབ་ཡོད་ན་ནི་འབྲུ་ལ་སོགས་པ་བཙོངས་ཏེ་གོས་ཀྱི་རིན་དག་བགོས་པ་ལ་ཉེས་པ་མེད་དོ། །རྟག་རེས་འཁོར་དང་ནད་གསོས་ཉིད་དུ་འབྲས་ལ་སོགས་པ་བྲིམ་པ་ལ་ཡང་ཉེས་པ་མེད་པ་ཁོ་ནའོ། །བསྐོ་བས་ཉེ་བར་འཚོ་པར་བྱ་བ་ཞེས་བྱ་བ་ནི། བསྐོ་བས་ཉེ་བར་འཚོ་བར་འགྱུར་བ་གང་ཡིན་པ་སྟེ། གནས་མལ་གཙུག་ལག་ཁང་དང་གནས་ཁང་དང་ཁང་ཁྱིམ་དང་ས་གཞི་ལ་སོགས་པ་དང་མལ་ཆ་དང་སྟན་དང་བགོ་བ་དང་གདིང་གཡོགས་ལ་སོགས་པ་དང༌། སྣོད་སྤྱད་ལ་སོགས་པ་དགེ་འདུན་གྱི་སྤྱི་བུངས་གང་ཟག་ལ་བསྐོ་ཞིང་སྤྱང་བར་བྱ་བ་དག་སྟེ། དེ་དག་ཀྱང་བདག་གིར་བྱ་བའི་ཕྱིར་བགོ་བར་མི་བྱ་བ་ཉིད་ཡིན་ནོ། །ན་བའི་རུང་བ་ཞེས་བྱ་བ་ནི། སྨན་དུ་གྱུར་པའི་སྨན་གང་དུ་གཏོགས་པའི་ཨ་རུ་ར་ལ་སོགས་པ་དག་སྟེ། དེ་དག་ཀྱང་བདག་གིར་བྱ་བའི་ཕྱིར་བགོ་བར་མི་བྱ་བ་ཉིད་དོ། །དེ་དག་ལས་ལྷག་
པའི་མཐེབ་ཡོད་ན་ནི་བསྒྱུར་ཞིང་དགེ་འདུན་མཆོད་སྟོན་གསོལ་བ་ལ་ནི་ཉེས་པ་མེད་དོ། །བདག་གིར་བྱ་བའི་ཕྱིར་བགོ་བར་མི་བྱ་བ་ཉིད་དོ་ཞེས་བྱ་བ་ནི། མཆོད་རྟེན་གྱི་དཀོར་ལ་སོགས་པ་ལྔ་པོ་དེ་དག་གང་ཟག་སྒོ་སྒོར་བཀུར་པའི་ཕྱིར་བགོ་བ་བཀག་པ་ཡིན་གྱི། ཞལ་ཏ་དང་བྱི་དོར་དང་བསྲུང་བསྐྱབ་བྱ་བའི་ཕྱིར་ལས་བགོས་ཏེ། ཆང་ཁྱུར་ལེན་པ་བཀག་པ་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །།བམ་པོ་ལྔ་བཅུ་ལྔ་པ། རྙེད་པ་ལ་ནི་དབྱར་གྱི་མཚམས་འཇུག་གོ་ཞེས་བྱ་བ་ནི། རྙེད་པ་འདི་དགེ་འདུན་གྱིའོ་ཞེས་དགེ་འདུན་ཙམ་གྱི་ཕྱིར་དབུལ་བའི་རྙེད་པ་གང་ཡིན་པ་དེ་ལ་ནི། དབྱར་གྱི་དུས་སུ་གྱུར་པའི་མཚམས་འཇུག་པ་སྟེ་དེ་དབང་བ་ཉིད་ཡིན་གྱི། རྙེད་པའི་དུས་སུ་བྱུང་བའི་མཚམས་ནི་མི་དབང་ངོ༌། །འདི་སྐད་བསྟན་ཏེ། དབྱར་གྱི་དུས་སུ་མཚམས་རྣམ་པར་གཞག་པར་གྱུར་པ་གང་ཡིན་པ་དེ་བཀྲོལ་ནས་མཚམས་དེར་དགེ་སློང་གང་དག་རྣམ་པར་གཞག་པ་དེ་དག་ལ་སྦྱིན་བདག་དེས་དགེ་འདུན་ཙམ་ལ་བསྔོ་བས་འབུལ་བའི་རྙེད་པ་བྱུང་བ་གང་ཡིན་པ་དེ་ནི་དབྱར་གྱི་མཚམས་སུ་གཏོགས་པའི་དགེ་སློང་རྣམས་ཉི་ཚེ་དབང་གི །དེའི་ཚེའི་མཚམས་རྣམ་པར་གཞག་པའི་དགེ་སློང་རྣམས་ནི་མི་དབང་ངོ༌། །འདིར་གཞུང་ནི་གཏན་པའི་གཞིའི་ཞུ་བ་ལས། དགེ་སློང་དག་དབྱར་གནས་པར་ཁས་བླངས་ནས་སྤྱོད་ཡུལ་གྱི་གྲོང་གི་ཉེན་ཀོར་དུ་མཚམས་བགྱིད་ཅིང་དེ་དག་གིས་དགག་དབྱེ་བགྱིས་ནས་ཕྱི་རོལ་གྱི་མཚམས་བགྱིས་ཏེ། དེར་ཡང་མིས་དགེ་འདུན་གཞན་བཙུད་ནས་དགེ་འདུན་ལ་ཆོས་གོས་དག་འབུལ་ན་གང་གིས་ཐོབ་པར་འགྱུར། གང་དག་དེར་དབྱར་གནས་པ་དག་གིས་སོ། །ཅིའི་ཕྱིར་ཞེན་རྙེད་པ་དེ་གནས་ཀྱིས་བསྟབས་པ་ཡིན་པའི་ཕྱིར་རོ་ཞེས་གསུངས་པ་ཡིན་ནོ། །འོ་ན་དགེ་སློང་གཞན་དེ་དག་གནས་དེར་སྦྱིན་བདག་གིས་བཙང་ལ། རྙེད་པ་ཡང་སྦྱིན་བདག་གི་དབང་གིས་རྣམ་པར་གཞག་པ་ཡིན་ན་ཅིའི་ཕྱིར་དེ་དག་མི་དབང་ཞེ་ན། སྨྲས་པ། སྦྱིན་བདག་གིས་འདི་སྙམ་དུ་ཁོ་བོས་དགེ་འདུན་ཙམ་གྱི་ཕྱིར་དབུལ་བར་བྱ་སྟེ། འདི་དག་རང་གིས་དབང་བ་ཉིད་དུ་རྣམ་པར་འཇོག་ཅིང་ལན་གྲང་སྙམ་པའི་ཕྱིར་ཏེ། དེས་ནི་སྦྱིན་བདག་གིས་དགེ་སློང་གཞན་དག་དེར་བཙུད་དུ་ཟིན་ཀྱང་དེ་དག་མི་དབང་བ་ཉིད་ཡིན་ནོ། །གལ་ཏེ་སྦྱིན་བདག་གིས་དགེ་སློང་
འདི་དག་དང་གཞན་དག་ལ་ཡང་དབུལ་ལོ་ཞེས་ཡོངས་སུ་ཆད་པར་བྱེད་ན་ནི་དེའི་ཚོ་གཞན་དག་ཀྱང་དབང་བར་ཐེ་ཚོམ་མེད་དོ། །རྙེད་པ་དེ་གནས་ཀྱིས་བསྟབས་པ་ཡིན་པའི་ཕྱིར་རོ་ཞེས་གསུངས་པ་ལ། འདིར་གནས་ཞེས་བྱ་བ་ནི་དབྱར་གྱི་གནས་ལ་བྱ་སྟེ། དབྱར་གྱི་གནས་དེས་བསྒྲུབས་པའི་རྙེད་པ་ནི་གནས་ཀྱིས་བསྟབས་པའི་རྙེད་པ་ཞེས་བྱའོ། །དབྱར་རལ་བ་ནི་མི་དབང་བ་ཉིད་མ་ཡིན་ནོ་ཞེས་བྱ་བ་ནི། ཡུན་རིང་དུ་གནས་གནས་པ་ཉིད་ཡིན་ན་དབྱར་དལ་ཡང་དགེ་སློང་དེ་གནས་ཀྱིས་བསྟབས་པའི་རྙེད་པ་མི་དབང་བ་ཉིད་མ་ཡིན་ཏེ་དབང་བ་ཁོ་ནའོ། །འདིར་གཞུང་ནི་གང་ལས་སྦྱིན་པར་བྱ་ཞེན། དབྱར་སྔ་མའམ་ཕྱི་མ་གང་ཡོད་པ་ལས་ཏེ། ཡུན་རིང་དུ་གནས་གནས་པ་ལས་སོ་ཞེས་གསུངས་པ་ཡིན་ནོ། །གནས་ནས་ཕྱུང་བ་ཉིད་ན་ནི་མི་དབང་ངོ་ཞེས་བྱ་བ་ནི། གནས་ནས་ཕྱུང་བ་ཉིད་དུ་གྱུར་བ་ན་དབྱར་གནས་པའི་རྙེད་པ་དེ་མི་དབང་བ་སྟེ། དེ་ནི་དགེ་འདུན་ལས་གནས་དང་ལོངས་སྤྱོད་ཕྱི་རོལ་དུ་གྱུར་བར་བྱས་པའི་ཕྱིར་རོ། །རྫས་ཀྱིས་མནན་པར་གནས་པར་ཁས་བླངས་པ་ནི་སྐལ་བ་གཅིག་ཁོ་ནའོ་ཞེས་བྱ་བ་ནི། མཚམས་དུ་མ་ཁྲི་ལ་སོགས་པའི་རྫས་གཅིག་གིས་མནན་པར་དབྱར་གནས་པར་ཁས་བླངས་པ་ནི་མཚམས་དུ་མ་མནན་པ་དེ་དག་ནས་རྙེད་པའི་ཆ་བསྡུས་ཏེ། སྤྱིར་མི་གཅིག་གིས་སྐལ་བ་གཅིག་དབང་བ་ཁོ་ན་སྦྱིན་པའོ། །འདི་སྐད་བསྟན་ཏེ། མཚམས་ཇི་སྙེད་མནན་པ་དེ་སྙེད་ཀྱི་རྙེད་པ་མི་དབང་གི །མཚམས་དུ་མ་མནན་པ་དེ་དག་ནས་ཆ་བསྡུས་ཏེ། སྐལ་བ་གཅིག་ཁོ་ན་དབང་ངོ༌། །སྐལ་པ་གཅིག་ཁོ་ནའོ་ཞེས་སྨོས་པ་དེས་གང་ནས་སྐལ་བ་གཅིག་ཁོ་ན་དེ་ལ་སྦྱིན་པར་བྱ་ཞེ་ན་དེའི་ཕྱིར་དེ་ལ་མནན་པ་རྣམས་སུ་བདག་ཉིད་བགྲང་བའི་ཆ་ཉིད་དོ་ཞེས་བྱ་བ་སྨྲས་ཏེ། མཚམས་དུ་མ་ཁྲི་ལ་སོགས་པས་མནན་ཏེ་གནས་པར་ཁས་བླངས་པའི་གང་ཟག་དེ་ལ་མཚམས་ཇི་སྙེད་མནན་པ་རྣམས་སུ་བདག་ཉིད་གཏོགས་པར་བགྲང་བའི་མཚམས་དེ་དག་ཐམས་ཅད་ནས་ཆ་རེ་རེ་ཉིད་དབང་སྟེ། དེ་དག་གི་ཆ་སྤྱིར་བསྡོམས་པ་ལས་མི་གཅིག་གི་སྐལ་བ་གཅིག་ཁོ་ན་སྦྱིན་པའོ། །འདི་སྐད་བསྟན་ཏེ། མཚམས་གཉིས་སམ་གསུམ་མམ་བཞི་ལ་སོགས་པ་ཇི་སྙེད་མནན་པའི་མཚམས་དེ་དག་ནས་ཕྱེད་དམ་སུམ་ཆའམ་བཞི་ཆ་ལ་སོགས་པའི་ཆ་རེ་རེ་དབང་སྟེ། དེ་དག་སྤྱིར་བསྡུས་པ་ལས་
སྐལ་བ་རངས་པ་གཅིག་ཁོ་ན་སྦྱིན་པར་བྱའོ། །འདིར་གཞུང་ནི་གཙུག་ལག་ཁང་གཅིག་གི་རྙེད་བའི་ཐར་གང་ཡིན་པ་དེ་དེས་གནས་ཇི་སྙེད་མནན་པ་དེ་སྙེད་ནས་ཆ་བསྡུས་ཏེ། དེ་ལས་སྐལ་པ་གཅིག་སྦྱིན་པར་བྱའོ་ཞེས་གསུངས་པ་ཡིན་ནོ། །གཞན་པ་གཅིག་ཏུ་གནས་པར་ཁས་བླངས་པ་ལ་ནི་ཡུན་རིང་བ་ཉིད་ཀྱིས་རྣམ་པར་གཞག་གོ་ཞེས་བྱ་བ་ནི། མཚམས་དུ་མ་ཁྲི་ལ་སོགས་པས་མནན་ཏེ་གནས་པར་ཁས་བླངས་པ་སྔར་བསྟན་པ་དེ་ལས་གཞན་པ་གཅིག་ཏུ་གནས་པར་ཁས་བླངས་པ་ཞེས་བྱ་བ་དབྱར་གནས་པར་ཁས་ལེན་པའི་དུས་དེ་ཉིད་ཀྱི་ཚེ་དང་བོར་གནས་གཅིག་ཏུ་གནས་པར་ཁས་བླངས་ནས་དེ་མ་ཐག་ཏུ་ཡང་གནས་གཞན་གཅིག་ཏུ་གནས་པར་ཁས་བླངས་ཤིང༌། དེའི་འོག་ཏུ་ཡང་གནས་གཞན་གཅིག་ཏུ་གནས་པར་ཁས་བླངས་ཏེ། དེ་ནས་ཡང་གནས་གཞན་གཅིག་ཏུ་གནས་པར་ཁས་བླངས་པ་སྟེ། དེ་ལྟར་གནས་ཐ་དད་པ་དུ་མང་གནས་པར་ཁས་བླངས་པ་ལ་ནི། གནས་དེ་དག་གང་དུ་དབྱར་ཡུན་རིང་དུ་གནས་གནས་པ་ཉིད་ཀྱིས་དེའི་རྙེད་པ་རྣམ་པར་གཞག་སྟེ། གང་དུ་ཡུན་རིང་དུ་གནས་གནས་པའི་གནས་དེ་གཅིག་བུ་ནས་དེའི་རྙེད་པའི་སྐལ་པ་རངས་པ་གཅིག་སྦྱིན་པར་བྱའི། གནས་དེ་དག་ཐམས་ཅད་ནས་སྐལ་བ་རེ་རེ་ཡང་མི་སྦྱིན་ལ། དེ་དག་ནས་ཆ་བསྡུ་པར་ཡང་མི་བྱའོ། །འདིར་གཞུང་ནི་ཚེ་དང་ལྡན་པ་ཉེ་དགས་རྙེད་པ་འདོད་པས་གཙུག་ལག་ཁང་གཉིས་སུ་ཚུལ་ཤིང་དང་གནས་མལ་བླངས་ཏེ་གནས་པར་ཁས་བླངས་པ་ན། དེས་གཙུག་ལག་ཁང་གཅིག་ནས་ཆོས་གོས་ཀྱི་རིན་ཐོབ་ལ་ཅིག་ཤོས་ནས་མ་ཐོབ་ནས་དེ་ནས་ཀྱང་རྙེད་པ་བསྒྲུབ་པ་ན། བཅོམ་ལྡན་འདས་ཀྱིས་བཀའ་སྩལ་པ། གང་དུ་གསོ་སྦྱོང་ལན་མང་དུ་བྱས་པ་དེ་ནས་རྙེད་བ་བླང་བར་བྱའོ་ཞེས་གསུངས་པ་ཡིན་ནོ། །དགེ་ཚུལ་དང་དགེ་ཚུལ་མ་དག་ནི་རྙེད་པ་ལ་སུམ་ཆ་དབྲི་བ་ཉིད་དོ་ཞེས་བྱ་བ་ནི་དེ་གཉིས་ནི་གོས་ཀྱི་རིན་རྙེད་པ་ལ་སུམ་ཆ་དབྲི་ཞིང་སུམ་གཉིས་དབང་བ་ཉིད་ཡིན་པའོ། །དབྱར་གནས་པ་ལ་སོགས་པ་དགེ་འདུན་གྱི་གོས་ཀྱི་རྙེད་པ་ལ་སུམ་ཆ་དབྲིའོ། །ཡོན་བདག་གིས་མངོན་སུམ་དུ་སྤྱིར་ཕུལ་བའི་རྙེད་པ་ལ་ནི་མི་དབྲིའོ། །ཟས་ལ་ནི་མཉམ་པ་ཉིད་དོ་ཞེས་བྱ་བ་ནི། དགེ་ཚུལ་དང་དགེ་ཚུལ་མ་དག་ཟས་ཀྱི་རྙེད་པ་ལ་ནི་བསྙེན་པར་རྫོགས་པ་དང་མཉམ་པར་དབང་བ་ཡིན་ནོ། །གོས་ལ་
སོགས་པ་ལ་ནི་མི་མཉམ་མོ། །བསྙེན་པར་རྫོགས་པ་ལ་འདོད་པ་དང་དགེ་སློང་མ་དག་ཀྱང་ངོ་ཞེས་བྱ་བ་ནི། དེ་གཉིས་ཀྱང་བསྙེན་པར་རྫོགས་པ་དག་དང་རྙེད་པ་མཉམ་པ་ཉིད་ཡིན་པ་སྟེ། འདིར་ནི་ཟས་ཀྱི་རྙེད་པ་འབའ་ཞིག་ཏུ་མ་ཟད་ཀྱི་རྙེད་པ་ཐམས་ཅད་མཉམ་པའོ། །བསྙེན་པར་རྫོགས་པར་འདོད་པ་ཞེས་བྱ་བ་ནི། དགེ་ཚུལ་དང་དགེ་སློབ་མ་ལ་བྱ་སྟེ། དགེ་ཚུལ་མ་ལ་ནི་དགེ་སློབ་མར་མ་བྱས་ཀྱི་བར་དུ་བསྙེན་པར་རྫོགས་པར་བྱར་མི་རུང་བའི་ཕྱིར་རོ། །འདིར་དགེ་སློབ་མ་ཡང་དངོས་སུ་སྨོས་པས་དགེ་ཚུལ་ཉི་ཚེ་བཟུང་སྟེ། དགེ་ཚུལ་ལོ་ཡང་ཚང་ལ་བསྙེན་པར་རྫོགས་པ་ཡང་འདོད་པ་རྣམས་ལ་བྱའི། ལོ་མཚང་པ་དང་ལོ་ཚང་ཡང་བསྙེན་པར་རྫོགས་པར་མི་འདོད་པ་རྣམས་ནི་སུམ་ཆ་དབྲི་བ་སྔར་བསྟན་པ་ཉིད་ཀྱི་ཁོངས་སུ་གཏོགས་སོ། །འདིར་གཞུང་ནི་སིལ་བུ་དག་ལས། དགེ་སློང་དང་དགེ་སློང་མ་དག་ནི་སྐལ་པ་མཉམ་པར་སྦྱིན་ནོ། །དགེ་ཚུལ་དང་དགེ་ཚུལ་མདག་ལ་ནི་སུམ་གཉིས་སྦྱིན་ནོ། །བསྙེན་པར་རྫོགས་པར་འདོད་པ་དང་དགེ་སློབ་མ་དག་ཀྱང་མཉམ་པར་སྦྱིན་ནོ་ཞེས་གསུངས་པ་ཡིན་ནོ། །དགེ་སློང་དང་དགེ་སློང་མ་རྣམས་ཀྱི་སྐལ་བ་བགོ་བ་ནི་གང་ཟག་ལས་ཡིན་གྱི་དགེ་འདུན་ལས་ནི་མ་ཡིན་ནོ་ཞེས་བྱ་བ་ནི། འདི་ལས་འདི་སྙེད་ནི་དགེ་སློང་གི་དགེ་འདུན་ལ་དབུལ་ལོ། །འདི་སྙེད་ནི་དགེ་སློང་མའི་དགེ་འདུན་ལ་དབུལ་ལོ་ཞེས་དེ་ལྟར་བྱེ་བྲག་ཏུ་མ་བྱས་པའི་རྙེད་པ་ནི་དགེ་སློང་གི་དགེ་འདུན་ལ་དང་དགེ་སློང་མའི་དགེ་འདུན་གཉིས་གང་ཟག་གི་གྲངས་ལས་བགོ་བར་བྱའི། །དགེ་འདུན་གྱི་གྲངས་ལས་ཕྱེད་ཕྱེད་དུ་མི་བགོ་བའོ། །འདི་སྐད་བསྟན་ཏེ། དགེ་སློང་དང་དགེ་སློང་མའི་རང་བཞིན་གྱི་གང་ཟག་ཇི་སྙེད་དེ་ལ་སྐལ་བ་དང་བ་དེ་སྙེད་ལ་མཉམ་པར་བྱའི། ཕྱེད་དགེ་སློང་གི་དགེ་འདུན་ལ་སྦྱིན་ཞིང་ཕྱེད་དགེ་སློང་མའི་དགེ་འདུན་ལ་སྦྱིན་པ་མ་ཡིན་ནོ། །འདིར་གཞུང་ནི་མགོའི་ཤས་ཀྱིས་བགོ་བར་བྱའོ་ཞེས་གསུངས་པ་ཡིན་ནོ། །ཟས་ཀྱི་མཇུག་ཐོག་ཀྱི་རྙེད་པ་བྱེ་བྲག་ཏུ་མ་བཅད་པ་དེ་ལས་དགེ་སློང་མ་ཟོས་པ་ཉིད་དག་ཀྱང་མི་འཇུག་པ་མ་ཡིན་ནོ་ཞེས་བྱ་བ་ལ། ཟས་ཀྱི་མཇུག་ཐོགས་ཀྱི་རྙེད་པ་ཞེས་བྱ་བ་ནི། ཟས་སྔར་ཟར་བཅུག་ནས་དེའི་འོག་ཏུ་ཟས་ཀྱི་རྗེས་ལ་དབུལ་བའི་རྙེད་པ་གང་ཡིན་པའོ། །བྱེ་བྲག་ཏུ་མ་བཅད་པ་ཞེས་བྱ་བ་ནི། འདི་དགེ་སློང་རྣམས་ཁོ་ན་ལ་དབུལ་ལོ་ཞེས་
སྦྱིན་བདག་གིས་བྱེ་བྲག་ཏུ་མ་བཅད་པའོ། །དེ་ལྟ་བུའི་རྙེད་པ་དེ་ལ་ནི་དེར་ཟན་ཟོས་པའི་དགེ་སློང་མ་རྣམས་ཀྱང་མི་དབང་བ་མ་ཡིན་ཏེ་དབང་ངོ་ཞེས་བྱ་བར་སྦྱར་རོ། །འདིར་གཞུང་ནི་དགེ་སློང་དྲུག་ཅུ་ལྗོངས་རྒྱུ་ཞིང་འགྲོ་བ་ན་རི་བྲགས་གཞན་ཞིག་ཏུ་ཕྱིན་ནས་དེ་ན་ཁྱིམ་བདག་དད་པ་ཅན་ཞིག་འདུག་པ་དེས་དེ་དག་ཁྱིམ་གཞན་དུ་ཟན་ལ་མགྲོན་དུ་བོས་ནས་དགེ་སློང་རེ་རེ་ལ་རས་ཡུག་ཆེན་བསྐོན་ནོ་སྙམ་དུ་བསམས་ཤིང་དེ་དག་ཀྱང་ཟན་བཟའ་བའི་ཕྱིར་ཞུགས་པ་དང༌། དགེ་སློང་མ་དྲུག་ཅུ་ཡང་རི་བྲགས་དེ་ཉིད་དུ་ལྷགས་ནས་དེ་དག་གིས་ཀྱང་དེར་ཟན་ཟོས་སོ། །དེ་ནས་ཁྱིམ་བདག་དེས་རས་ཡུག་ཆེན་དྲུག་ཅུ་རྒན་པའི་མཐར་གཞག་པ་དང་དགེ་སློང་དག་གིས་ཇི་ལྟར་བགོ་བར་བྱ་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། རྙེད་པ་འདི་གཉི་གའི་དགེ་འདུན་གྱི་ཡིན་པས་གཉི་གའི་དགེ་འདུན་གྱིས་མཉམ་པར་བགོ་བར་བྱའོ་ཞེས་གསུངས་པ་ཡིན་ནོ། །སྟན་དང་ཆུ་དང་བསོད་སྙོམས་དག་ལ་དགེ་སློང་དགེ་སློང་མ་དག་པས་གཙོ་བོ་ཉིད་མ་ཡིན་པ་མ་ཡིན་ནོ་ཞེས་བྱ་བ་ནི། སྟན་ལ་སོགས་བདག་ལ་དགེ་སློང་ནི་དགེ་སློང་མ་དག་པས་གཙོ་བོ་ཉིད་ཡིན་པའོ། །དགེ་སློང་མ་རྣམས་ཀྱི་ཚོགས་པ་ན་རྒན་པའི་མཐར་སྟན་དག་གཞག་གོ་ཞེས་བྱ་བ་ནི། དགེ་སློང་མ་རྣམས་ཀྱི་ཚོགས་པའི་དུས་ན་རྒན་པའི་མཐའ་ལོགས་སུ་གྲལ་གྱི་སྟན་དག་ལ་གཞག་པར་བྱ་སྟེ། འདི་ནི་བརྒྱ་ལ་དགེ་སློང་ནི་འགའ་འོང་བར་འགྱུར་སྲིད་པས་དེའི་ཕྱིར་རོ། །དགེ་སློང་དང་བཅས་པ་ཉིད་ན་དེ་དག་གིས་མི་ནུས་ན་དགེ་སློང་མས་ཡོན་བཤད་པར་བྱའོ་ཞེས་བྱ་བ་ནི། མཆོད་སྟོན་ལ་སོགས་པ་དག་ལ་དགེ་སློང་དང་བཅས་པ་ཉིད་ཡིན་ལ། དགེ་སློང་དེ་དག་གིས་ཡོན་བཤད་པར་བྱེད་མི་ནུས་ན་དགེ་སློང་མས་ཡོན་བཤད་པར་བྱར་རུང་བའོ། འདྲིམ་པར་བྱེད་པས་སྦྱིན་པའི་ཕྱིར་ཟས་ཉེ་བར་གཞག་པ་ན་དགེ་འདུན་གྱི་གནས་བརྟན་གྱིས་དང་པོར་སྙོམས་པར་བྲིམས་ཤིག་ཅེས་བསྒོ་བར་བྱའོ་ཞེས་བྱ་བ་ནི། །དགེ་འདུན་གྱི་གནས་བརྟན་གྱིས་ཟས་འདྲིམ་པར་བྱེད་པའི་གང་ཟག་གིས་དགེ་འདུན་ལ་ཟས་སྦྱིན་པའི་ཕྱིར་དགེ་འདུན་གྱི་མདུན་དུ་ཟས་ཉེ་བར་གཞག་པ་ན་དེ་ལ་དང་པོར་ཐམས་ཅད་ལ་སྙོམས་པར་བྲིམས་ཤིག་ཅེས་བསྒོ་བར་བྱ་བའོ། །དང་པོར་ཟས་ལེན་པའི་དང་པོར་དེ་ལ་དེ་སྐད་མ་བསྒོ་ན་ཉེས་བྱས་སོ། །དང་པོས་མ་
སྨྲས་ན་ཡང་དེའི་འོག་ཏུ་སྨྲ་པར་བྱ་བ་ཡིན་ཏེ། དེའི་ཚེ་ཡང་མ་སྨྲས་ན་ཉེས་བྱས་གཞན་དུ་འགྱུར་རོ། །འཁོར་ལ་བལྟས་ཏེ་མང་ལ་ཟས་ཉུང་བ་ཉིད་ཡིན་ན་དེའི་ཚེ་སྔ་མ་བརྗོད་ཅིང་ཁྱད་པར་ཤེས་སོ་ཞེས་བྱ་བ་ནི། དགེ་འདུན་གྱི་གནས་བརྟན་གྱིས་འཁོར་ལ་བལྟས་ཏེ་འཁོར་མང་ལ་ཟས་ཉུང་བ་ཉིད་ཡིན་ན་དེའི་ཚེ་དགེ་འདུན་གྱི་གནས་བརྟན་གྱིས་ཟས་འདྲིམ་པས་སྦྱིན་པའི་ཕྱིར་ཟས་ཉེ་བར་གཞག་པ་ན། དེ་ལ་དང་པོར་སྔ་མ་བརྗོད་ཅིང་ཁྱེད་པར་བྲིམས་ཤིག་ཅེས་བསྒོ་བར་བྱའོ་ཞེས་བྱ་བར་སྦྱར་རོ། །སྔ་མ་བརྗོད་ཅིང་ཞེས་བྱ་བ་ནི། འཁོར་མང་ལ་ཟས་ཉུང་བ་ཉིད་ཡིན་ན་ཞེས་སྔར་བསྟན་མ་ཐག་པ་དེ་ཉིད་བརྗོད་ཅིང་སྟེ། དགེ་སློང་དག་མང་ལ་ཟས་ཉུང་གིས་ཁྱེད་པར་བྲིམས་ཤིག་ཅེས་བསྒོ་བར་བྱ་བའོ། །འདི་སྐད་བསྟན་ཏེ། འཁོར་ལ་བལྟས་ཏེ་འཁོར་གྱི་རྫས་དག་མང་ལ་ཟས་ཉུང་བ་ཉིད་ཡིན་ན་དེའི་ཚེ་དགེ་འདུན་གྱི་གནས་བརྟན་གྱིས་ཟས་འདྲིམ་པའི་གང་ཟག་གིས་སྦྱིན་པའི་ཕྱིར་ཟས་ཉེ་བར་གཞག་པ་ན་དེ་ལ་སྔ་མ་བརྗོད་ཅིང་ཞེས་བྱ་བ་འཁོར་གྱི་རྫས་དག་མང་ལ་ཟས་ཉུང་བ་ཉིད་ཅེས་སྔར་བསྟན་པ་དེ་བརྗོད་ཅིང་ཁྱེད་པར་བྲིམས་ཤིག་ཅེས་བསྒོ་བར་བྱ་བའོ། །གཞན་ཉིད་ཡིན་ན་ཅི་འབྱོར་པ་ཞེས་སོ་ཞེས་བྱ་བ་ལ། གཞན་ཉིད་ཡིན་ན་ཞེས་བྱ་བ་ནི་འཁོར་གྱི་རྫས་དག་ནི་ཉུང་ལ་ཟས་ནི་མང་བ་ཉིད་ཡིན་པའོ། །ཅི་འབྱོར་པ་ཞེས་སོ་ཞེས་བྱ་བ་ནི། འཁོར་ལ་བལྟས་ཏེ་འཁོར་ཉུང་ལ་ཟས་མང་པ་ཉིད་ཡིན་ན་དེའི་ཚེ་དགེ་འདུན་གྱི་གནས་བརྟན་གྱིས་ཟས་འདྲིམ་པས་སྦྱིན་པའི་ཕྱིར་ཟས་ཉེ་བར་གཞག་པ་ན། དེ་ལ་དང་པོའི་འཁོར་ཉུང་ལ་ཟས་མང་བ་ཉིད་ཡིན་ནོ་ཞེས་བརྗོད་ཅིང་ཅི་འབྱོར་པ་བྲིམས་ཤིག་ཅེས་བསྒོ་བར་བྱ་བའོ། །རྒན་པའི་མཐར་སཾ་པྲཔྟ་ཞེས་མ་བརྗོད་པར་དང་པོར་བླང་བར་མི་བྱའོ་ཞེས་བྱ་བ་ནི། འདྲིམ་པར་བྱེད་པས་དགེ་འདུན་གྱི་རྒན་པའི་མཐའ་ལོགས་སུ་སཾ་པྲཔྟ་ཞེས་བྱ་བའི་སྔགས་མ་བརྗོད་ཀྱི་བར་དུ་དགེ་འདུན་གྱི་གནས་བརྟན་གྱིས་དང་པོར་ཟས་བླང་བར་མི་བྱ་བའོ། །སཾ་པྲཔྟ་ཞེས་བྱ་བའི་ཚིག་གི་དོན་ནི་མཉམ་པར་གྱུར་ཅིག་ཅེས་བྱ་སྟེ། བི་ཤཾ་པྲཔྟ་ཞེས་བྱ་བ་ནི་མི་མཉམ་པར་གྱུར་ཅེས་བྱ་སྟེ། དུག་ཏུ་གྱུར་ཅེས་བྱ་བའི་དོན་ཡིན་ནོ། །དུག་མེད་པར་གྱུར་པ་ནི་མཉམ་པར་གྱུར་པ་སྟེ་སཾ་པྲཔྟ་ཞེས་བྱ་བ་ཡིན་ནོ། །དེ་བས་ན་ཟས་འདྲིམ་པར་བྱེད་པའི་གང་ཟག་
གིས་དགེ་སློང་གི་མངོན་སུམ་དུ་སཾ་པྲཔྟ་ཞེས་བྱ་བའི་སྔགས་འདི་བརྗོད་ན། ཟས་དུག་ཅན་ཡང་དུག་མེད་པར་འགྱུར་རོ། །ཟས་བསྔོགས་པ་ན་བསྐོས་པ་དག་ལས་གཞན་པ་དག་ལྷགས་ན་དེ་ལ་སྦྲན་པར་བྱའོ་ཞེས་བྱ་བ་ནི། སྦྱིན་བདག་གིས་ཟན་དྲང་ལ་རག་པར་བསྔོགས་པ་ན། མགྲོན་དུ་བསྐོས་པའི་དགེ་སློང་དག་ལས་གཞན་པའི་དགེ་སློང་མགྲོན་དུམ་བསྐོས་པ་དག་ལྷགས་ན་དེའི་ཚེམ་གྲོན་དུ་བསྐོས་པའི་དགེ་སློང་དག་གིས་སྦྱིན་བདག་དེ་ལ་སྦྲན་པར་བྱ་བའོ། །དེ་ནི་ཕོངས་པ་སྤངས་པའི་ཕྱིར་དང་སྐྱངས་པ་སྤང་པའི་ཕྱིར་རོ། །དགེ་སློང་ཆོས་གོས་གསུམ་སྦྱིན་དུ་གཞུག་པར་མི་བྱའོ་ཞེས་བྱ་བ་ནི། དགེ་སློང་གིས་དགེ་སློང་ཆོས་གོས་གསུམ་སྦྱིན་དུ་མི་གཞུག་པའོ། །དགེ་འདུན་གྱིས་སོས་པར་གྱུར་པ་ཉིད་ན་འདི་ཕྱིར་སྦྱིན་ནོ་སྙམ་པ་དེ་ལས་གཞན་པའི་ཡིད་ཀྱིས་བླང་བར་མི་བྱའོ་ཞེས་བྱ་བ་ནི། དགེ་སློང་ནད་པས་དགེ་འདུན་ལ་ཆོས་གོས་གསུམ་ཡོན་དུ་ཕུལ་བ་ནི་དགེ་འདུན་གྱིས་གལ་ཏེ་ནད་པ་སོས་པར་གྱུར་ན་ཆོས་གོས་འདི་ཕྱིར་སྦྱིན་ནོ་སྙམ་པའི་སེམས་ཀྱིས་བླང་པར་བྱའི། དེ་ལས་གཞན་པའི་ཡིད་ཀྱིས་བླང་བར་མི་བྱའོ། །གང་ཟག་ལ་ཕུལ་བ་ཡང་དེ་བཞིན་དུ་བསྒྲུབ་པར་བྱའོ། །སྟོད་གཡོགས་དང་སྨད་གཡོགས་ཀྱིས་རོ་དོར་རོ་ཞེས་བྱ་བ་ནི། ཤི་བའི་རོ་ནི་སྟོད་གཡོགས་དང་སྨད་གཡོགས་ཀྱིས་གཡོགས་ཏེ་དོར་བར་བྱའི་སྒྲེན་མོར་མི་དོར་བ་སྟེ། དེ་ནི་མགོན་མེད་པར་ཐལ་བར་གྱུར་པའི་ཉེས་པ་སྤང་བའི་ཕྱིར་རོ། །འབྲིང་གིས་སོ་ཞེས་བྱ་བ་ནི། སྟོད་གཡོགས་དང་སྨད་གཡོགས་ངན་པ་ཡང་མ་ཡིན་པ་བཟང་པོ་ཡང་མ་ཡིན་པ་འབྲིང་གིས་དོར་བར་བྱའོ། །ལྷགས་མས་མི་བྱའོ་ཞེས་བྱ་བ་ནི། སྟོད་གཡོགས་དང་སྨད་གཡོགས་ལས་གཞན་པའི་རྫས་ལྷག་མས་རོ་དོར་བར་མི་བྱ་བའོ། །ཤམ་ཐབས་མ་བཅིངས་པར་གྲོང་དུ་འཇུག་པར་མི་བྱའོ་ཞེས་བྱ་བ་ནི། སྐེ་རགས་ཀྱིས་སོ། །ཁྲིས་གཅིག་གིས་ཀྱང་མི་བྱའོ་ཞེས་བྱ་བ་ནི། སྐེ་རགས་ཁྲིས་གཅིག་གིས་བཅིངས་པས་ཀྱང་གྲོང་དུ་འཇུག་པར་མི་བྱ་བའོ། །གོས་ཀྱི་གཞི་ཕྲན་ཚེགས་ལ་སོགས་པ་ཞུ་བ་དང་བཅས་པའི་སྐབས་སོ་ཞེས་བྱ་བ་གོས་ཀྱི་གཞི་དེ་དག་གི་སྐབས་ནས་འབྱུང་བདེ་བཤད་དོ། །གོས་ཀྱི་གཞི་རྫོགས་སོ་ཞེས་བྱ་བ་དེ་བཤད་ཟིན་ཏོ།། །།ད་ནི་ཀོ་ལྤགས་ཀྱི་གཞི་བཤད་པར་བྱ་སྟེ། དེ་ལ་དང་པོར་མཐའ་འཁོབ་ངེས་
པར་ཤེས་པར་བྱ་བའི་ཕྱིར་ཡུལ་དབུས་བསྟན་པར་བྱ་སྟེ། དེའི་ཕྱིར་ཡུལ་དབུས་ཀྱི་མཚམས་སོ་ཞེས་བྱ་བ་སྨྲས་ཏེ། བསྟན་པར་བྱའོ་ཞེས་བྱ་བར་སྦྱར་རོ། །དེ་གང་ཞེ་ན། དེའི་ཕྱིར་ཤར་དུ་ནི་ལི་ཁར་ཤིང་འཕེལ་གྱི་མདུན་གྱི་ནགས་ལི་ཁ་རའི་ཤིང་ཚད་ཚིང་ཅན་ཞེས་བྱའོ་ཞེས་བྱ་བ་སྨྲས་ཏེ། ཤར་ཕྱོགས་ན་ཡུལ་ལི་ཁར་ཤིང་འཕེལ་ཞེས་བྱ་བ་ཡོད་དེ། དེའི་མདུན་ན་ནགས་ལི་ཁ་རའི་ཤིང་ཚང་ཚིང་ཅན་ཞེས་བྱ་བ་ཡོད་པའི་ནུབ་ཀྱི་ཆ་ཚུན་ཆད་ནི་ཡུལ་དབུས་ཀྱི་ཤར་ཕྱོགས་ཀྱི་མཚམས་ཡིན་ནོ། །དེ་ཕན་ཆད་ནི་ཡུལ་མཐའ་འཁོབ་ཡིན་ནོ། །ནགས་ཞེས་བྱ་བ་ནི་འདིར་རྩྭ་དང་གེལ་པ་དང་བཅས་པའི་སའི་ཕྱོགས་ཀྱི་གཏོས་ཆེན་པོའོ། །ལྷོར་ནི་འདམ་བུ་ཅན་གྱི་ལྷོ་ན་ཆུ་ཀླུང་དེ་ཞེས་བྱ་བའོ་ཞེས་བྱ་བ་ནི། ལྷོ་ཕྱོགས་ན་གྲོང་ཁྱེར་འདམ་བུ་ཅན་ཞེས་བྱ་བ་ཡོད་དེ། དེའི་ལྷོ་ན་ཆུ་ཀླུང་འདམ་བུ་ཅན་ཞེས་བྱ་བ་ཡོད་པའི་བྱང་ཕྱོགས་ཀྱི་ཆ་ཚུན་ཆད་ནི་ཡུལ་གྱི་དབུས་ཀྱི་ལྷོ་ཕྱོགས་ཀྱི་མཚམས་ཡིན་ནོ། །དེ་ཕན་ཆད་ནི་ཡུལ་མཐའ་འཁོབ་ཡིན་ནོ། །ནུབ་ཏུ་ནི་བྲམ་ཟེའི་གྲོང་ཀ་བ་དང་ཉེ་བའི་ཀ་བ་ཞེས་བྱ་བ་གཉིས་སོ་ཞེས་བྱ་བ་ནི། ནུབ་ཕྱོགས་ན་བྲམ་ཟེའི་གྲོང་ཀ་བ་དང་ཉེ་བའི་ཀ་བ་ཞེས་བྱ་བ་གཉིས་ཡོད་དེ། དེའི་ཤར་གྱི་ཆ་ཚུན་ཆད་ནི་ཡུལ་དབུས་ཀྱི་ནུབ་ཕྱོགས་ཀྱི་མཚམས་ཡིན་ནོ། །དེ་ཕན་ཆད་ནི་ཡུལ་མཐའ་འཁོབ་ཡིན་ནོ། །བྱང་དུ་ནི་ཨུ་ཤི་རའི་རི་ཞེས་བྱ་བའོ་ཞེས་བྱ་བ་ནི། བྱང་ཕྱོགས་ན་རི་ཨུ་ཤི་རའི་རི་ཞེས་བྱ་བ་ཡོད་དེ། དེའི་ལྷོའི་ཆ་ཚུན་ཆད་ནི་ཡུལ་དབུས་ཀྱི་བྱང་ཕྱོགས་ཀྱི་མཚམས་ཡིན་ནོ། །དེ་ཕན་ཆད་ནི་ཡུལ་མཐའ་འཁོབ་ཡིན་ནོ། །མཐའ་ཁོབ་ཏུ་མཆིལ་ལྷམ་དག་བཅང་བར་བྱའོ་ཞེས་བྱ་བ་ནི། ཡུལ་མཐའ་ཁོབ་ཏུ་རྐང་པ་དག་བསྐྱབ་པའི་ཕྱིར་མཆིལ་ལྷམ་དག་བཅང་བར་བྱ་བའོ། །གནས་མལ་བསྐྱང་བའི་ཕྱིར་ཡང་ངོ་ཞེས་བྱ་བ་ནི། ཡུལ་དབུས་སུ་ཡང་གནས་མལ་བསྐྱང་བའི་ཕྱིར་མཆིལ་ལྷམ་ངག་བཅང་བར་བྱ་བའོ། གནས་མ་ལ་ཞེས་སྨོས་པས་ནི་ཁྲི་ལ་སོགས་པ་ཡང་བཟུང་བ་ཉིད་དུ་ཤེས་པར་བྱ་སྟེ། ཁྲི་ལ་སོགས་པ་དེ་ལ་ཡང་རྐང་པ་དག་གིས་བརྫི་བའི་གནས་སྐབས་སྲིད་པའི་ཕྱིར་རོ། །གནས་གཞན་དུ་སོད་བས་གནས་མལ་བསྐྱང་བའི་ཕྱིར་རྐང་པ་གཉིས་ལ་དེ་དག་བགོ་བར་རིགས་པར་སྣང་ངོ༌། །འདིར་གཞུང་ནི་བསོད་སྙོམས་པ་ཞིག་མཉན་ཡོད་དུ་བསོད་སྙོམས་ལ་
ཞུགས་པ་ན་དེ་མཆིལ་ལྷམ་མེད་པས་རྐང་པ་དག་སར་ཀ་བྱུང་བ་ཁྱིམ་བདག་དེས་མཐོང་ནས། དེས་དེ་ལ་སྨྲས་པ། འཕགས་པ་ཁྱོད་ལ་མཆིལ་ལྷམ་དག་ཡོད་དམ། མེད་དོ། །ཚུར་ཤོག་དང་སྦྱིན་དུ་གཞུག་གོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །མཆིལ་ལྷམ་ཇི་ལྟ་བུ་དག་བཅང་བར་བྱ་ཞེན་ངའི་ཕྱིར་ཆག་རིམ་མོ་ཞེས་བྱ་བ་སྨྲས་ཏེ། མཆིལ་ལྷམ་ཚིག་རིམ་ཅན་ཞེས་བྱ་བའི་ཐ་ཚིག་གོ །རྡོག་པ་གཞུག་པས་བཅོས་པར་བྱའོ་ཞེས་བྱ་བ་ནི། རྡོལ་པ་ཉིད་ན་རྡོག་པ་གཞུག་ཅིང་བཅོས་སུ་རུང་བའོ། །རིམ་པ་གཞན་ནི་མི་རུང་ངོ་ཞེས་བྱ་བ་ནི། མཐིལ་རིམ་པ་གཞན་གདགས་ཤིང་བཅོས་སུ་ནི་མ་རུང་པའོ། །འདིར་གཞུང་ནི་གལ་ཏེ་རྡོ་ལན་རྡོག་པ་བཅུག་སྟེ་བཅང་བར་བྱའོ་ཞེས་གསུངས་པ་ཡིན་ནོ། །རྡོལ་ན་ཞེས་བྱ་བ་ནི་བུ་གུ་བྱུང་ནའོ། །ཁྱིམ་པས་ཐ་ན་གོམ་པ་བདུན་དུ་བགོས་ན་རིམ་པ་མང་ཡང་རུང་ངོ་ཞེས་བྱ་བ་ནི། མཆིལ་ལྷམ་རིམ་པ་མང་པོ་གལ་ཏེ་ཁྱིམ་པས་ཐ་ན་གོམ་པ་བདུན་དུ་བགོས་ན་རིམ་པ་མང་ཡང་བཅང་དུ་རུང་བའོ། །འདིར་གཞུང་ནི་ཉེ་བ་འཁོར་ཁྱིམ་པས་ཐ་ན་གོམ་པ་བདུན་དུ་བགོས་པར་གྱུར་ནའོ་ཞེས་གསུངས་པ་ཡིན་ནོ། །རུང་བ་ཙམ་གྱིས་དོན་ཉིད་དུ་དེ་དང་སྦྱར་པའི་དབང་དུ་ལེན་པ་ན་མི་རུང་བ་བླངས་པ་ཉིད་མ་ཡིན་ནོ་ཞེས་བྱ་བ་ལ། རུང་བ་ཙམ་གྱི་དོན་ཉིད་དུ་ཞེས་བྱ་བ་ནི། རུང་པ་ཙམ་གྱིས་མཐིལ་དང་པོ་ལ་ལ་སོགས་པའི་དོན་དུ་ལེན་པ་གང་ཡིན་པ་དེ་ནི་རུང་བ་ཙམ་གྱི་དོན་ལེན་པ་སྟེ། དེའི་དངོས་པོ་ནི་དེ་ཉིད་དེ་དེར་རོ། །དེ་དང་སྦྱར་བའི་དབང་དུ་ལེན་པ་ཞས་བྱ་བ་ནི་རུང་བ་ཙམ་དེ་དང་བདག་ཉིད་དུ་སྦྱར་ཞིང་ཕྲད་པར་བྱ་བའི་ཕྱིར་ལེན་པའོ། །མི་རུང་བ་བླངས་པ་ཉིད་མ་ཡིན་ནོ་ཞེས་བྱ་བ་ནི། དེ་ལྟར་ལེན་པ་དེ་ནི་མི་རུང་བ་བླངས་པ་ཉིད་མ་ཡིན་ནོ། རུང་བ་ཁོ་ན་བླངས་པ་ཡིན་ནོ། །འདིས་ནི་ཆིག་རིམ་དུ་བྱས་ཏེ་བཅང་བར་བྱའོ་སྙམ་པས་རིམ་པ་མང་པོ་དག་སློང་གིས་བདག་གིར་བྱས་ན་མི་རུང་བ་བླངས་པ་ཉིད་མ་ཡིན་ནོ་ཞེས་གསུངས་པ་བསྡུས་པ་ཡིན་ནོ། །འདི་སྐད་བསྟན་ཏེ། འདི་ལ་མཐིལ་དང་བལ་ལ་སོགས་པ་རུང་བ་ཡོད་པ་གང་ཡིན་པ་དེ་བདག་གིས་འདི་ལས་བླང་ངོ་སྙམ་པའི་བསམ་པས་རུང་བ་དང་འདྲེས་པའི་མི་རུང་བ་ལེན་པ་གང་ཡིན་པ་ལ་ནི་བདག་གིར་བྱ་བ་མི་འབྱུང་བས་དེས་ནི་མི་རུང་བ་བླངས་པ་ཉིད་མ་ཡིན་ཏེ། རུང་བ་མ་ཡིན་པའི་དངོས་པོ་ལ་བདག་གིར་བྱ་བ་མི་འབྱུང་བའི་ཕྱིར་རོ། །འདིར་
གཞུང་ནི་བསོད་སྙོམས་པ་མཆིལ་ལྷམ་མེད་པ་ཞིག་མཉན་ཡོད་དུ་བསོད་སྙོམས་ལ་ཞུགས་པ་ན། དེ་ཁྱིམ་བདག་ཅིག་གིས་ཁྱིམ་དུ་ཁྲིད་དེ་ཟས་བསོད་པས་ཚིམ་པར་བྱས་ན། མཆིལ་ལྷམ་རིམ་པ་མང་པོ་དག་བྱིན་པ་དང༌། དགེ་སློང་དེས་སྨྲས་པ། ཁྱིམ་བདག་བཅོམ་ལྡན་འདས་ཀྱིས་རྗེས་སུ་མ་གནང་ངོ༌། །ངེས་སྨྲས་པ་འཕགས་པ་སོང་ལ་རིམ་གཅིག་པར་བྱས་ཏེ་བཅང་པར་གྱིས་ཤིག །དེས་བླངས་ཏེ་གཙུག་ལག་ཁང་དུ་སོང་ངོ་ཞེས་གསུངས་པ་ཡིན་ནོ། །འདི་ལ་རིམ་པ་གཅིག་པར་བྱས་ཏེ་བཅང་བར་བྱའོ་སྙམ་པའི་བསམ་པས་དགེ་སློང་གིས་མཆིལ་ལྷམ་རིམ་པ་མང་པོ་དག་བདག་གིར་བྱས་པ་གང་ཡིན་པ་དེ་ལ་ཉེས་པ་མེད་དོ། །ཁྲ་བོ་བཀྲ་བ་དག་མི་བཅང་ངོ་ཞེས་བྱ་བ་ནི། མཆིལ་ལྷ་དག་ཅེས་བྱ་བར་སྦྱར་ཏེ། འདི་མན་ཆད་ནས། འོག་གི་མདོ་ལས་སྒེག་རྫས་སུ་འགྱུར་བ་གཞན་དག་ཀྱང་ངོ་ཞེས་འབྱུང་བ་ཡན་ཆད་མཆིལ་ལྷམ་དག་ཅེས་བྱ་བར་སྦྱར་རོ། །ལུག་རུ་ལྟ་བུ་དག་མི་བཅང་ངོ་ཞེས་བྱ་བ་ནི། མཆིལ་ལྷམ་རྨ་བྱའི་གཤོག་པ་ལ་སོགས་པས་ལུག་རུའི་རྣམ་པ་ལྟར་གཉེར་མ་མཐོན་དམན་ཅན་དུ་བྱས་བ་དག་བཅང་བར་མི་བྱའོ། །ཨ་ཤྭ་ཏ་ཐ་དང་ཀ་ར་བཱི་རའི་འདབ་མ་ལྟ་བུ་དག་མི་བཅང་ངོ་ཞེས་བྱ་བ་ནི། མཆིལ་ལྷམ་ཤིང་ཨ་ཤྭ་ཏ་ཐ་དང་ཀ་ར་བཱི་རའི་འདབ་མ་ལྟ་བུའི་དབྱར་འདབ་ཅན་དག་བཅང་བར་མི་བྱ་བའོ། །གསེར་དང་དངུལ་གྱིས་སྤྲས་པ་དག་མི་བཅང་ངོ་ཞེས་བྱ་བ་ནི། མཆིལ་ལྷམ་གསེར་དང་དངུལ་གྱིས་བརྒྱན་བ་དག་མི་བཅང་བའོ། །ཁྲིག་ཁྲིག་ཟེར་བ་དག་མི་བཅང་ངོ་ཞེས་བྱ་བ་ནི། མཆིལ་ལྷམ་སྒྲ་ཁྲིག་ཁྲིག་ཟེར་བ་དག་མི་བཅང་བའོ། །ཀྲོག་ཀྲོག་ཟེར་བ་དག་ཀྱང་མི་བཅང་ངོ་ཞེས་བྱ་བ་ནི། མཆིལ་ལྷམ་སྒྲ་ཀྲོག་ཀྲོག་ཟེར་བ་དག་མི་བཅང་བའོ། །ཏུག་ཏུག་ཟེར་བ་དག་མི་བཅང་ངོ་ཞེས་བྱ་བ་ནི། མཆིལ་ལྷམ་སྒྲ་ཐྲིག་ཐྲིག་ཟེར་བ་དག་མི་བཅང་བའོ། །ཐྲིག་ཐྲིག་ཟེར་བ་དག་མི་བཅང་ངོ་ཞེས་བྱ་བ་ནི། མཆིལ་ལྷམ་སྒྲ་ཐྲིག་ཐྲིག་ཟེར་བ་དག་མི་བཅང་བའོ། །སྒེག་རྫས་སུ་འགྱུར་བ་གཞན་དག་ཀྱང་ངོ་ཞེས་བྱ་བ་ནི། སྒེག་རྫས་ཐམས་ཅད་དགག་པའི་ཕྱིར་ཚིག་འདི་སྨོས་སོ། །བོལ་ཀོ་བ་ཅན་ནི་མི་རུང་བ་ཉིད་མ་ཡིན་ནོ་ཞེས་བྱ་བ་ནི། དེ་ནི་སྒེག་རྫས་སུ་རྟོགས་པ་མ་ཡིན་པར་ཤེས་པར་བྱའོ། །སྣ་དང་རྟིང་པའི་སྦུབས་ཅན་བཅང་བར་བྱའོ་ཞེས་བྱ་བ་ནི། མཆིལ་ལྷམ་སྣའི་སྦུབས་ཅན་དང་རྟིང་པའི་སྦུབས་ཅན་བཅང་བར་བྱའོ། །འདིར་གཞུང་ནི་
དགེ་སློང་རྣམས་བྱ་རྒོད་ཀྱི་ཕུང་པོའི་རི་ལ་འཛེག་པ་ན་རྐང་བའི་སྣ་དག་འདྲུད་ནས། བཅོམ་ལྡན་འདས་ཀྱིས་བཀའ་སྩལ་པ། སྣ་སྦུབས་ཅན་བཅང་བར་བྱའོ་ཞེས་གསུངས་པ་དང༌། འབབས་པ་ན་རྟིང་པ་དག་འདུད་ནས་རྟིང་སྦུབས་ཅན་བཅང་བར་བྱའོ་ཞེས་གསུངས་པ་ཡིན་ནོ། །ཁ་ཆུ་ཆུས་བྱུང་ངོ་ཞེས་བྱ་བ་ནི། ལྷམ་གྱི་མིང་ཁ་ཆུ་ཆུས་བྱུང་ཞེས་བྱ་བ་དེ་བཅང་བར་བྱ་བའོ། །དེའི་མིང་ནི་དོན་ལས་བཏགས་པ་ཡིན་ཏེ། ཀླུའི་ཁ་ཆུའི་ཆུ་ལས་རྩྭ་དག་དུག་ཅན་དུ་གྱུར་ནས་རྩྭ་དེའི་གནོད་པ་བསལ་བའི་ཕྱིར་འཇིག་རྟེན་དུ་ལྷམ་དེ་བྱུང་བས་ལྷམ་དེའི་མིང་ཁ་ཆུ་ཆུས་བྱུང་ཞེས་བྱའོ། །ལྷམ་དེ་ནི་རྐང་པ་ཐམས་ཅད་ཕལ་ཆེར་གཡོགས་ལ་བོལ་གྱི་སྣར་མཐངས་ཕྱུང་བ་སྟེ། སྦུབས་མཐངས་ཅན་ཞེས་བྱ་བ་ཡིན་པར་རིག་པར་བྱའོ། །ལྷམ་ཡུ་ཆད་ཀྱང་ངོ་ཞེས་བྱ་བ་ཡང་བཅང་བར་བྱའོ་ཞེས་བྱ་བར་སྦྱར་རོ། །འདིར་གཞུང་ནི་གང་གི་ཚེ་ཀླུའི་རྒྱལ་པོ་སོགས་མ་མེད་ཀྱིས་སེར་བའི་ཆར་ཕབ་པ་དེའི་ཚེ། རྩྭ་དག་ཀྱང་དུག་ཅན་དུ་གྱུར་ནས་དེང་དགེ་སློང་དག་འཆག་བའི་རྐང་པ་དག་ལ་རྨད་ག་བྱུང་ཞིང་རྨ་དག་བྱེར་བར་འགྱུར་ནས། བཅོམ་ལྡན་འདས་ཀྱིས་བཀའ་སྩལ་པ། །ཁ་ཆུ་ཆུས་བྱུང་བ་བཅང་བར་བྱའོ། །ལྷམ་ཡུ་ཆད་བཅད་བར་བྱའོ་ཞེས་གསུངས་པ་ཡིན་ནོ། །ཆུལ་ཆབ་བྲོམ་འཆགས་པའི་ཡུལ་དུ་ནི་ཞྭ་དང་ལྷམ་སྒྲོག་གུ་ཅན་ཡང་ངོ་ཞེས་བྱ་བ་ནི་ཡུལ་གང་དུ་ཆུ་ལ་ཆབ་བྲོམ་འཆགས་པའི་ཡུལ་དེར་ནི་ཞྭ་དང་ལྷམ་སྒྲོག་གུ་ཅན་དག་བཅང་པར་བྱའོ། །དེ་གཉིས་ན་ལྷགས་པ་བསྐྱབ་པའི་ཕྱིར་བཅང་བར་གསུངས་པ་ཡིན་པས། ལྷགས་པ་དང་བྲལ་ན་དབྱར་གྱི་གོས་རས་ཆེན་བཞིན་དུ་གཞག་པར་རིག་པར་བྱའོ། །ནད་གསོ་བའི་དོན་དུ་ནི་དུས་ཐམས་ཅད་དུ་ཡང་བཅང་དུ་རུང་སྟེ། བཅས་པའི་ཁ་ན་མ་ཐོ་བ་དང་བཅས་པ་ཉིད་ཡིན་པའི་ཕྱིར་རོ། །བླ་མའི་དྲུང་དུ་མཆིལ་ལྷམ་བགོ་པར་བསྟེན་པར་མི་བྱའོ་ཞེས་བྱ་བ་ནི། སྟོན་པ་དང་མཁན་པོ་དང་སློབ་དཔོན་ལ་སོགས་པའི་དྲུང་དུ་མཆིལ་ལྷམ་བགོ་བར་བསྟེན་པར་མི་བྱའོ། །བཅོམ་ལྡན་འདས་ཉིད་ཀྱི་སྤྱན་སྔར་མཆིལ་ལྷམ་གྱོན་ཞིང་འཆག་པའི་དགེ་སློང་སྨད་པས་ན། དགེ་སློང་དག་ལ་ཡང་ཚུལ་དེ་ཉིད་སྨད་པ་ཡིན་པས་དེའི་ཕྱིར་མདོ་འདི་བྱས་སོ། །སེང་གེ་དང་སྟག་དང་གུང་དང་གླང་པོ་ཆེ་ཅང་ཤེས་དང་རྟ་ཅད་ཤེས་ཀྱི་ཡན་ལག་ཅུང་ཟད་ཀྱང་ལུས་ལ་གདགས་པར་མི་བྱ་བ་ཉིད་དོ་ཞེས་བྱ་བ་ནི། དེ་
དག་གི་ལྤགས་པ་དང་རྒྱུས་པ་ལ་སོགས་པ་ཅུང་ཟད་ཀྱང་དགེ་སློང་གི་ལུས་ལ་གདགས་པ་བསྟེན་པར་མ་བྱ་བའོ། དེ་དག་གིས་གླང་པོ་ཆོ་ཕལ་པ་དང་རྟ་དམུ་རྒོད་དང་དེ་ལས་གཞན་པའི་གཅན་གཟན་དག་ཀྱང་འབངས་པ་ཡིན་ནོ་ཞེས་བྱ་བ་ནི། སེང་གེ་ལ་སོགས་པ་དེ་དག་གིས་གླང་པོ་ཆེ་ཕལ་པ་ལ་སོགས་པ་དག་ཀྱང་བསྡུས་པར་རིག་པར་བྱ་བའོ། །འདིར་གཞུང་ནི་དེ་ལྟ་བས་ན་དགེ་སློང་གིས་རུང་བ་མ་ཡིན་པ་ལྔ་པོ་དག་གི་མཆིལ་ལྷམ་དག་བཅང་བར་མི་བྱ་བ་སྟེ། གླང་པོ་ཆེ་ཅང་ཤེས་ཀྱི་དང་རྟ་ཅང་ཤེས་ཀྱི་དང་སེང་གེའི་དང་སྟག་གི་དང་གུང་གིའོ་ཞེས་གསུངས་པ་ཡིན་ནོ། །མཆིལ་ལྷམ་དག་བརྡབ་པར་མི་བྱའོ་ཞེས་བྱ་བ་ནི། རྡུལ་ལ་སོགས་པ་སྤྲུག་པའི་ཕྱིར་ས་ལ་སོགས་པ་ལ་བརྡབ་པར་མི་བྱའོ། །རས་མ་གཤེར་བ་དག་གིས་དེ་དག་གི་རྡུལ་མེད་པར་བྱ་བའི་ཕྱིར་ཕྱི་བར་བྱའོ་ཞེས་བྱ་བ་ནི། མཆིལ་ལྷམ་དེ་དག་གི་རྡུལ་མེད་པར་བྱ་བའི་ཕྱིར་རས་མ་ཆུས་གཤེར་བར་བྱས་པ་དག་གིས་ཕྱི་བར་བྱ་བའོ། །དེ་བཅང་བར་བྱའོ་ཞེས་བྱ་བ་ནི། ཕྱི་བའི་རས་མ་དེའོ། །དེ་དག་བརྒྱུ་བར་བྱའོ་ཞེས་བྱ་བ་ནི། མཆིལ་ལྷམ་དེ་དག་གོ །མི་མཛེས་པའི་དངོས་པོ་དབེན་པའི་ཕྱོགས་སུ་བྱའོ་ཞེས་བྱ་བ་ནི། མཆིལ་ལྷམ་བརྒྱུས་པ་དང་ལྟུང་བཟེད་གླན་པ་ལ་སོགས་པ་མི་མཛེས་པའི་དངོས་པོ་ཐམས་ཅད་དབེན་པའི་ཕྱོགས་སུ་ལས་བྱ་བའོ།། དེའི་ཆེད་དུ་བསྙུང་བུ་དག་ཀོ་བ་བཅང་བར་བྱ་སྟེ་ང་གྲི་ནི་མ་ཡིན་ནོ་ཞེས་བྱ་བ་ནི། མཆིལ་ལྷམ་དེ་བརྒྱུ་བའི་དོན་དུ་བསྙུང་བུ་དང་ཀོ་བ་བཅང་བར་བྱ་བའོ། །དྲ་གྲི་ནི་མ་ཡིན་ནོ་ཞེས་བྱ་བ་ནི། ཀོ་བ་དྲ་བའི་གྲི་ཆེན་པོ་ནི་རྐྱེན་མ་ཡིན་པས་གཞན་གྱིས་མཐོང་བར་འགྱུར་བའི་ཉེས་པ་སྤང་པའི་ཕྱིར་བཀག་གོ །འདིར་གཞུང་ནི་བསྙུང་བུ་དང་ཀོ་བ་བཅང་པ་རང་ཞིང་དྲ་གྲི་ནི་མ་ཡིན་ནོ་ཞེས་གསུངས་པ་ཡིན་ནོ། །ཁྱིམ་གཞན་དང་ཆབ་ཀུང་ས་ལས་གཞན་པར་ཤིང་གི་མཆིལ་ལྷམ་བགོ་བར་མི་བྱའོ་ཞེས་བྱ་བ་ནི། དེ་གཉིས་མ་གཏོགས་པའི་གནས་གཞན་དུ་བགོ་བར་མི་བྱ་བའོ། །སྨྱུག་མའི་གླེགས་བུ་དང་མུན་ཛ་དང་སི་རི་དང་དར་བྷ་དག་གི་ཡང་མི་བྱའོ་ཞེས་བྱ་བ་ཡང༌། མཆིལ་ལྷམ་བགོ་བར་མི་བྱ་བའོ། །ཐག་གུའི་ཡང་ངོ་ཞེས་བྱ་བ་ཡང་མཆིལ་ལྷམ་བགོ་བར་མི་བྱ་བའོ། །རླུང་ཁྲག་ཅན་མ་ཡིན་པས་སོ་ཞེས་བྱ་བ་ནི། གང་ཟག་རླུང་ཁྲག་ཅན་མ་ཡིན་པས་ཐག་གུའི་མཆིལ་ལྷམ་བགོ་བར་མི་བྱའོ། །རླུང་ཁྲག་ཅན་
གྱི་ནད་པས་ནི་མི་འདྲུལ་བར་བྱ་བའི་ཕྱིར་ཐག་གུའི་མཆིལ་ལྷམ་བཅང་བར་བྱ་བའོ། །ཁྱིམ་གཞན་མེད་ན་ཀོ་ལྤགས་ལ་འདུག་པར་བྱའོ་ཞེས་བྱ་བ་ནི། ཁྱིམ་པའི་ཁྱིམ་གཞན་དུ་སྟན་གཞན་མེད་ན་ཀོ་ལྤགས་ཀྱི་སྟེང་དུ་འདུག་པར་བྱའོ། །དེར་ཡང་རྐྱེན་དེ་ལྟ་བུ་དག་མེད་ན་ཉལ་བར་མི་བྱ་བ་ཉིད་དོ་ཞེས་བྱ་བ་ནི། ཁྱིམ་གཞན་དེར་ཡང་ཁྲི་ལ་སོགས་པའི་མ་ལ་ཆ་གཞན་མི་འབྱོར་བའི་རྐྱེན་དེ་ལྟ་བུ་དག་མེད་ན་ཀོ་ལྤགས་དེའི་སྟེང་དུ་ཉལ་བར་མི་བྱ་བའོ་ཞེས་བྱ་བའོ། །ཀོ་ལྤགས་ཀྱི་ཐགས་མ་ཡང་ཀོ་ལྤགས་མ་ཡིན་པ་མ་ཡིན་ཏེ། ཀོ་ལྤགས་ཁོན་ཡིན་པས་དེའི་ཕྱིར་ཀོ་ལྤགས་ཀྱིས་བརྒྱུས་པའི་ཁྲི་དང་ཁྲི་རུལ་སོགས་པ་ལ་ཡང་འདུག་པར་མི་བྱའོ། །མིག་ལ་ཕན་པར་བྱ་བའི་ཕྱིར་དོམ་ལྤགས་བཅང་བར་བྱའོ་ཞེས་བྱ་བ་ནི། མིག་ལ་ཕན་པར་བྱ་བའི་ཕྱིར་དོམ་ལྤགས་བཅང་བར་བྱའོ། །འདིར་གཞུང་ནི་དོམ་ལྤགས་བླང་བར་རྗེས་སུ་གནང་ངོ་ཞེས་གསུངས་པ་ཡིན་ནོ། །རྐང་པའི་གནས་སུ་གདིང་བར་བྱའོ་ཞེས་བྱ་བ་ནི། དོམ་ལྤགས་བླངས་པ་དེ་སྟན་དང་རྐང་པའི་འོག་དང་ལྷམ་གྱི་ནང་ལ་སོགས་པར་གཞུག་པར་བྱའོ། །སངས་རྒྱས་ཀྱི་ནི་དྲི་གཙང་ཁང་གི་སྒོར་རོ་ཞེས་བྱ་བ་ནི། སངས་རྒྱས་མངའ་བའི་དོམ་ལྤགས་ནི་དྲི་གཙང་ཁང་གི་སྒོར་གདིང་བར་བྱ་བའོ། །མཆིལ་ལྷམ་དག་ཏུ་བགོ་བར་བྱའོ་ཞེས་བྱ་བ་ནི། མིག་ལ་ཕན་པར་བྱ་བའི་ཕྱིར་དོམ་ལྤགས་དེའོ། །རླུང་ནད་ཅན་གྱིས་ནི་འདུག་པ་དང་ཉལ་བར་ཡང་བྱའོ་ཞེས་བྱ་བ་ནི། གང་ཟག་རླུང་ནད་ཅན་གྱིས་ནི་དོམ་ལྤགས་དེའི་སྟེང་དུ་འདུག་པ་དང་ཉལ་བར་ཡང་བྱ་བའོ། །གཞང་འབྲུམ་ཅན་ཐམས་ཅད་ཀྱིས་ཀྱང་དེ་བཞིན་ནོ་ཞེས་བྱ་བ་ནི། གཞང་འབྲུམ་གྱི་ནད་ཅན་ཐམས་ཅད་ཀྱིས་ཀྱང་ངོམ་ལྤགས་དེ་སྔར་བསྟན་པ་བཞིན་དུ་རྐང་པའི་གནས་སུ་གདིང་བ་དང་མཆིལ་ལྷམ་དག་ཏུ་བགོ་བ་དང་འདུག་པ་དང་ཉལ་བར་ཡང་བྱའོ། །འདིར་གཞུང་ནི་དེ་ལྟ་བས་ན་དགེ་སློང་གཞང་འབྲུམ་ན་བས་ངོམ་ལྤགས་ཀྱི་མཆིལ་ལྷམ་དག་བཅང་བར་རྗེས་སུ་གནང་ངོ་ཞེས་གསུངས་པ་ཡིན་ནོ། །དེའི་རྗེས་སུ་འབྲང་བས་རྐང་པའི་གནས་སུ་གདིང་བ་དང་འདུག་པ་དང་ཉལ་བར་རིགས་ཏེ་ཕན་པའི་ཕྱིར་རོ། །དེ་ལ་དེ་ལྟར་སྦྱར་བར་བྱའོ་ཞེས་བྱ་བ་ནི། དོམ་ལྤགས་དེ་ལ་རྣམ་པ་དེ་ལྟར་ནན་ཏན་དུ་སྦྱར་བར་བྱའོ། །སྤུ་ལ་རེག་པས་ཕན་པར་བྱེད་པ་ཉིད་དུ་རིག་གོ་ཞེས་བྱ་བ་ནི། དོམ་ལྤགས་
ཀྱི་སྤུ་ལ་རེག་པས་ཕན་པར་བྱེད་པ་ཉིད་དུ་ཤེས་པའོ། །འདིར་གཞུང་ནི་དགེ་སློང་དག་དོམ་ལྤགས་ཀྱི་སྤུ་དག་འོག་ཏུ་སྟོན་པར་བྱེད་པ་དང༌། བཅོམ་ལྡན་འདས་ཀྱིས་བཀའ་སྩལ་པ། སྤུ་དག་གྱེན་དུ་བསྟན་པར་བྱའོ་ཞེས་གསུངས་པ་ཡིན་ནོ། །མཆིལ་ལྷམ་དག་རིམ་པ་མང་པོ་ཉིད་ཀྱིས་ཀྱང་ངོ་ཞེས་བྱ་བ་ཡང་པན་པ་བྱེད་པ་ཉིད་དུ་རིག་གོ་ཞེས་བྱ་བར་སྦྱར་ཏེ། དོམ་ལྤགས་ཆིག་རིམ་པ་ཡང་ཕན་པ་བྱེད་པ་ཉིད་ཡིན་པས་རིམ་པ་མང་པོ་ཉིད་ཅེས་སྨོས་པ་ནི་མཆོག་ཏུ་བསྟན་པའི་ཕྱིར་རོ། །དུ་མའི་སྟེང་དུ་གཞག་པས་ཀྱང་ངོ་ཞེས་བྱ་བ་ནི། ཀོ་ལྤགས་གཞན་རིམ་པ་དུ་མའི་སྟེང་དུ་དོམ་ལྤགས་རིམ་པ་གཅིག་གཞག་པས་ཀྱང་ཕན་པ་བྱེད་པ་ཉིད་དུ་རིག་གོ་ཞེས་བྱ་བར་སྦྱར་ཏེ། གལ་ཏེ་རིམ་པ་མང་པོ་ཉིད་མི་འབྱོར་ན། དེའི་ཚེ་རིམ་པ་གཞན་དག་གི་སྟེང་དུ་རིམ་པ་གཅིག་ཁོ་ན་ལ་བསྟེན་པར་བྱའོ། །འདིར་གཞུང་ནི་རིམ་པ་མང་པོ་དག་རྙེད་པ་མེད་ནས། བཅོམ་ལྡན་འདས་ཀྱིས་བཀའ་སྩལ་པ། སྟེང་དུ་གཅིག་རིམ་གཞུག་པར་བྱའོ་ཞེས་གསུངས་པ་ཡིན་ནོ། །ཨ་ཤྨ་པ་རན་ཏ་དག་ཏུ་ནི་ཀོ་ལྤགས་མི་བཅང་བར་མི་བྱའོ་ཞེས་བྱ་བ་ནི། ཡུལ་ཨཤྨ་པ་རན་ཏ་དག་ཏུ་ནི་ཀོ་ལྤགས་ཅི་དགའ་མགུར་བཅད་དུ་གནང་བས། དེ་ལ་གཞན་པ་བཀག་པ་འདི་དག་གསུངས་པར་སྦྱར་རོ། །འདིར་གཞུང་ནི་བེའུ་གསོད་པའི་གླེང་གཞི་ལས། དེ་ལྟ་བས་ན་དགེ་སློང་གིས་ཀོ་ལྤགས་བཅང་བར་མི་བྱའོ་ཞེས་གསུངས་པ་ཡིན་ནོ། །སེང་གེ་ལ་སོགས་པའི་མི་བཅང་ངོ་ཞེས་བྱ་བ་ཡང༌། ཀོ་ལྤགས་ཞེས་བྱ་བར་སྦྱར་ཏེ། སེང་གེ་དང་སྟག་ལ་སོགས་པ་ནས་གླང་པོ་ཆེ་ཕལ་པ་ལ་སོགས་པའི་མཐར་ཐུག་པའི་པར་དག་གི་ཀོ་ལྤགས་ཉེ་བར་གཞག་པར་མི་བྱའོ། །གང་གི་ཀོ་ལྤགས་མི་རུང་བ་ཉིད་ཡིན་པ་དེའི་རྒྱུས་པ་དང་རུས་པ་དང་སོ་དང་ཤ་ལ་སོགས་པ་ཡང་ངོ་ཞེས་བྱ་བ་ཡང༌། སྲོག་ཆགས་གང་གི་ཀོ་ལྤགས་མི་རུང་བ་དེའི་རྒྱུས་པ་ལ་སོགས་པ་ཡང་མི་རུང་བ་ཉིད་ཡིན་ནོ། །རྐྱལ་པ་བསྐ་བ་བཅང་བར་བྱའོ་ཞེས་བྱ་བ་ནི། ཆུ་ལ་རྐྱལ་པས་རྐྱལ་པ་བསྐ་བས་ཞེན་པར་བྱས་པ་བཅང་བར་བྱའོ། །ཡང་ན་རྐྱལ་སྐྱའོ་ཞེས་བྱ་བ་ཡང༌། ཆུ་ལ་རྐྱལ་པ་བཅང་བར་བྱའོ་ཞེས་བྱ་བར་སྦྱར་རོ། །རྐྱལ་པ་བསྐ་བས་ཞེན་པར་བྱས་པ་དཀར་པོ་ནི་རྐྱལ་སྐྱ་ཞེས་བྱའོ། །ཁྲ་བོ་བཀྲ་བ་མི་བཅང་ངོ་ཞེས་བྱ་བ་ནི། རྐྱལ་པ་དང་རྐྱལ་སྐྱའོ། །རྐྱལ་མ་
ཤེས་པས་སྟ་གོན་མ་བྱས་པར་ཆུའི་གཏིང་དུ་འཇུག་པར་མི་བྱའོ་ཞེས་བྱ་བ་ནི། གང་ཟག་རྐྱལ་མི་ཤེས་པས་སྟ་གོན་མ་བྱས་པར་ཞེས་བྱ་བ་རྐྱལ་པ་ལ་སོགས་པས་རྐྱལ་མ་བསླབས་པར་ཆུའི་གཏིང་དུ་འཇུག་པར་མི་བྱའོ། །འདིར་གཞུང་ནི་གང་རྐྱལ་མི་ཤེས་པ་དེས་རང་གི་ལུས་ཡོངས་སུ་གཏང་བར་མི་བྱའོ་ཞེས་གསུངས་པ་ཡིན་ནོ། །དབེན་པའི་ཕྱོགས་སུ་རྐྱལ་བ་བསླབ་པར་བྱའོ་ཞེས་བྱ་བ་ནི། དབེན་པའི་ཕྱོགས་སུ་རྐྱལ་བསླབ་པར་བྱ་བ་སྟེ། འདི་ནི་མི་མཛེས་པའི་དངོས་པོ་ཡོངས་སུ་སྤང་བར་བྱ་བའི་ཕྱིར་རོ། །དེ་མ་ཡིན་པའི་གཏིང་དུ་ཁྱུ་མཆོག་མ་གཏོགས་པའི་བ་ལང་ལ་བརྟེན་པར་མི་བྱའོ་ཞེས་བྱ་བ་ནི། བ་ལང་གིས་རྒལ་མི་ནུས་པས་གཏིང་དུ་གླང་ཁྱུ་མཆོག་མ་གཏོགས་པའི་བ་ལང་གཞན་ལ་བརྟེན་པར་མི་བྱའོ། །འདིར་བ་ལང་ཞེས་སྨོས་པ་ལ་དེ་ནི་རིགས་ཙམ་ལ་བྱ་སྟེ། བ་ཡང་རུང་གླང་ཡང་རུང་ངོ༌། །དེ་ལ་གལ་ཏེ་བ་ལ་བརྟེན་ན་ནི་བསླབ་པའི་གཞི་ལས་འགལ་བའི་ཉེས་བྱས་གཅིག་དང་མོ་ལ་རེག་པའི་ཉེས་བྱས་གཞན་གཅིག་དང་གཉིས་སུ་འགྱུར་རོ། །ཁྱུ་མཆོག་མ་གཏོགས་པ་ཞེས་བྱ་བ་ནི་དེ་མཐུ་དང་ལྡན་པས་ངལ་བར་མི་འགྱུར་བའི་ཕྱིར་རོ། །གླང་པོ་ཆེ་དང་རྟ་དང་མ་ཧེ་དང་གཡག་དག་ལ་བརྟེན་པར་བྱའོ་ཞེས་བྱ་བ་ནི་ཆུ་ཀླུང་རྒལ་བའི་ཕྱིར་རོ། །ཀོ་ལྤགས་ཀྱི་གཞི་རྫོགས་སོ་ཞེས་བྱ་བ་དེ་བཤད་ཟིན་ཏོ།། །།ད་ནི་སྨན་གྱི་གཞི་བསྡུ་བར་བྱ་སྟེ། དེའི་ཕྱིར་སྨན་བསྟེན་པར་བྱའོ་ཞེས་བྱ་བ་སྨྲས་ཏེ། བཟའ་བ་དང་བཏུང་བར་བྱའོ་ཞེས་བྱ་བའི་ཐ་ཚིག་གོ །དེ་ནི་རྣམ་པ་བཞིའོ་ཞེས་བྱ་བ་ནི། སྨན་དེ་ནི་རྣམ་པ་བཞི་ཡོད་དོ། །དུས་སུ་རུང་བ་དང༌། ཐུན་ཚོད་དུ་དུར་བ་དང༌། ཞག་བདུན་པ་དང༌། འཚོ་བའི་བར་དུ་བཅང་པ་ཉིད་དོ། །དེ་ལ་དུས་སུ་རུང་བ་ཞེས་བྱ་བ་ནི། འབྲས་ཆན་ལ་སོགས་པའི་རང་གི་གུང་ཚིགས་ཀྱི་དུས་ཚུན་ཆད་དུ་བྱེ་བྲག་མེད་པར་བསྟེན་པར་བྱ་བ་ཉིད་གང་ཡིན་པའོ། །ཐུན་ཚོད་དུ་རུང་བའོ་ཞེས་བྱ་བ་ནི། ཐུན་ཚོད་ཀྱི་མཐའི་དུས་ཚུན་ཆད་དུ་རང་གིས་བྱིན་གྱིས་བརླབས་ཏེ་བསྟེན་པར་བྱ་བ་གང་ཡིན་པའོ། །ཞག་བདུན་པ་ཞེས་བྱ་བ་ནི། ཞག་བདུན་གྱི་མཐའ་ཚུན་ཆད་དུ་མཚན་མོ་དང་ཉིན་མོའི་ངོ་བོ་ཉིད་ཀྱིས་དུས་སུ་རང་གིས་བྱིན་གྱིས་བརླབས་ཏེ་བསྟེན་པར་བྱ་བ་གང་ཡིན་པའོ། །འཚོ་བའི་བར་དུ་བཅད་པ་ཞེས་བྱ་བ་ནི། ཇི་སྲིད་འཚོའི་
དུས་ཀྱི་མཐའ་ཚུན་ཆད་དུ་རང་གིས་བྱིན་གྱིས་བརླབས་ཏེ་བསྟན་པར་བྱ་བ་གང་ཡིན་པའོ། །དང་པོ་མ་ཡིན་པ་ཉིད་དག་ནི་ནད་པའི་ཕྱིར་རོ་ཞེས་བྱ་བ་ལ་འདིར་དང་པོ་ཞེས་བྱ་བ་ནི། དུས་སུ་རུང་བ་སྟེ། དེ་མ་ཡིན་པ་ལྷག་མ་གསུམ་པོ་ཐུན་ཚོད་དུ་རུང་བ་དང༌། ཞག་བདུན་པ་དང་འཚོ་བའི་བར་དུ་བཅང་བདག་ཉིད་ནི་ནད་པའི་ཡུལ་ལ་བསྟེན་པར་བྱ་བ་ཉིད་ཡིན་གྱི། མིན་པའི་ཡུལ་ལ་ནི་མ་ཡིན་ནོ། །འདི་སྐད་བསྟན་ཏེ། ཐུན་ཚོད་དུ་རུང་བ་གང་ཡིན་པ་ནི་ཐུན་ཚོད་ཀྱི་མཐའི་དུས་སུ་རང་གིས་བྱིན་གྱིས་བརླབས་ཏེ་བསྟེན་པར་བྱ་བ་ཉིད་ཡིན་ནོ། །ཞག་བདུན་པ་གང་ཡིན་པ་ནི། ཞག་བདུན་གྱི་མཐའི་དུས་སུ་རང་གིས་བྱིན་གྱིས་བརླབས་ཏེ་བསྟེན་པར་བྱ་བ་ཉིད་ཡིན་ནོ། །འཚོ་བའི་བར་དུ་བཅང་བ་གང་ཡིན་པ་ནི་ཇི་སྲིད་འཚོ་བའི་བར་དུ་རང་གིས་བྱིན་གྱིས་བརླབས་ཏེ་བསྟེན་པར་བྱ་བ་ཉིད་ཡིན་ཏེ། དེ་དག་ནི་ནད་པའི་ཕྱིར་གནང་བ་ཡིན་གྱི། མིན་པའི་ཕྱིར་ནི་མ་ཡིན་ནོ། །དེས་ན་ཐུན་ཚོད་དུ་རུང་བ་དང༌། ཞག་བདུན་པ་དང༌། འཚོ་བའི་བར་དུ་བཅང་བའི་སྨན་དག་ནི་མིན་པས་ཐུན་ཚོད་དུ་རུང་བ་ཉིད་ལ་སོགས་པར་བྱིན་གྱིས་བརླབ་ཏུ་ཡང་མི་རུང་ལ་གཞན་གྱིས་བྱིན་གྱིས་བརླབས་པ་དག་ཀྱང་བཟར་མི་རུང་ངོ༌། །བྱིན་གྱིས་མ་བརླབས་པ་དག་ནི་དུས་མ་ཡིན་པར་བཟར་ཡང་རུང་ངོ༌། །འདིར་གཞུང་ནི་བཙུན་པ་ཐུན་ཚོད་དུ་རུང་བ་དང་ཞག་བདུན་པ་དང༌། འཚོའི་བར་དུ་བཅང་བའི་སྨན་བྱིན་ལེན་བགྱིས་པ་དང་བྱིན་གྱིས་བརླབས་པ་གང་དག་ལགས་པ་དེ་དག་བྲོ་མ་འཚལ་བས་ཡོངས་སུ་བཅད་དུ་རུང་ངམ། ཉེ་བ་འཁོར་མི་རུང་ངོ༌། བྱིན་ལེན་བགྱིས་པ་དང་བྱིན་གྱིས་བརླབས་པ་དེ་དག་བྲོ་འཚལ་བས་ཡོངས་སུ་སྤྱད་དུ་རུང་ངམ། ཉེ་བ་འཁོར་རུང་ངོ་ཞེས་གསུངས་པ་ཡིན་ནོ། །ཙོ་ཙ་དང་ཆུ་ཤིང་གི་འབྲས་བུ་དང་རྒྱ་ཤུག་དང་ཨ་ཤྭཏྠ་དང་ཨུ་དུམ་བཱ་ར་དང་རྩུབ་འགྱུར་དང་རྒུན་ཆུ་དང་འབྲ་གོའི་བཏུང་བ་རྣམས་ནི་ཐམས་ཅད་དུའོ་ཞེས་བྱ་བ་ནི། ཙོ་ཙ་ཞེས་བྱ་བའི་ཤིང་ཏོག་ལ་སོགས་པ་བརྒྱད་པོ་དེ་དག་གི་ཁུ་བ་ལས་སྐོམ་དུ་བྱས་པ་དག་ནི་ན་པ་དང་མིན་པ་དང་དུས་དང་དུས་མ་ཡིན་པ་ཐམས་ཅད་དུ་བཏུང་དུ་རུང་བ་ཡིན་པས། དེ་དག་ཀྱང་དང་བོ་ཉིད་མ་ཡིན་ནོ། །ཐུན་ཚོད་དུ་རུང་བ་ནི་བཏུང་བ་དག་གོ་ཞེས་འབྱུང་བའི་རྣམ་པས་ནི་འདིར་ཐུན་ཚོད་དུ་རུང་བ་ནི། དང་པོ་ཉིད་མ་ཡིན་པར་རྣམ་པར་གནས་པ་
ཉིད་ཡིན་ཏ། ཐུན་ཚོད་དུ་རུང་བ་ཉིད་དེ་དག་ནི་ཐམས་ཅད་དུ་རུང་བ་ཉིད་ཡིན་ནོ་ཞེས་བྱ་བའི་ཐ་ཚིག་གོ །བཅོས་པའི་ཚྭ་དང་འབྲུའི་ཚྭ་དང་ཞོག་ཆུ་དང་དར་བའི་དངས་མ་དང་རྩབ་མོ་ཆུས་བཏབ་པ་ཚགས་ཀྱིས་བཙགས་པ་ཤིན་ཏུ་སླ་བ་བཞིན་སྣང་བ་འདམ་པའི་ཉག་མའི་མདོག་ལྟ་བུ་དག་ཀྱང་དེ་དང་འདྲའོ་ཞེས་བྱ་བ་ནི། བཅོས་པའི་ཚྭ་ལ་སོགས་པ་ལྔ་པོ་ཆུས་བཏབ་པ་ལ་སོགས་པ་དེ་དག་ནི་ཤིང་ཏོག་ཙོ་ཙ་ལ་སོགས་པའི་བཏུང་བ་དང་འདྲའོ་ཞེས་བྱ་བར་སྦྱར་རོ། །བཅོས་པའི་ཚྭ་ཞེས་བྱ་བ་ནི། རྒུན་ཆང་དང་སྦྲང་ཆང་ལ་སོགས་པ་བཅོས་པའི་ཚྭའོ། །འབྲུའི་ཚྭ་ཞེས་བྱ་བ་ནི་ནས་ཆང་དང་འབྲས་ཆང་ལ་སོགས་པ་འབྲུའི་ཆང་ལས་བྱས་པའི་ཚྭའོ། །ཞོ་ག་ཆུ་ཞེས་བྱ་བ་ནི་ཞོ་ཁུའོ། །དར་བའི་དངས་མ་ཞེས་བྱ་བ་ནི་ཆུར་ཁུའོ། །རྩབ་མོ་ཞེས་བྱ་བ་ནི། འབྲས་དང་ཁྲེ་དང་གྲོ་ལ་སོགས་པ་བཙོས་པའི་ཁུ་བ་རྩི་མེད་པར་མནན་པའི་ཆར་ཁུའོ། །ཆུས་བཏབ་པ་ཞེས་བྱ་བ་ནི། ལྔ་པོ་དེ་དག་ནི་ཆུའི་རུང་བས་རུང་བར་བྱས་པའོ། །ཚགས་ཀྱིས་བཙགས་པ་ཞེས་བྱ་བ་ནི་རས་ཀྱི་ཚགས་ཀྱིས་བཙགས་པའོ། །ཤིན་ཏུ་སླ་བ་ཞེས་བྱ་བ་ནི་སྐ་བ་མ་ཡིན་པའོ། །བཞིན་སྣང་བ་ཞེས་བྱ་བ་ནི། བཞིན་གྱི་གཟུགས་བརྙན་སྣང་བའོ། །འདམ་བུའི་ཉག་མའི་མདོག་ལྟ་བུ་ཞེས་བྱ་བ་ནི། འདམ་བུའི་ཉག་མའི་མདོག་འདྲ་བ་སྟེ། ཅུང་ཟད་ཙམ་སེར་བའི་རྣམ་པ་ཡིན་ནོ། །དེ་དང་འདྲའོ་ཞེས་བྱ་བ་ནི། ཙོ་ཙ་ལ་སོགས་པའི་བཏུང་བ་དང་འདྲ་བ་སྟེ། བཅོས་པའི་ཚྭ་ལ་སོགས་པ་ལྔ་པོ་དེ་དག་བཅོས་པའི་ཚྭ་ལ་སོགས་པ་ཉིད་དུ་ཤིན་ཏུ་སྨིན་ཅིང་ཡོངས་སུ་གྲུབ་ཅེས་བྱ་བའི་ཐ་ཚིག་གོ །འདིར་གཞུང་ནི་དགེ་སློང་དག་ལྔ་པོ་འདི་དག་ནི་བཏུང་བ་སྐྱུར་བདག་ཡིན་ཏེ། འདི་ལྟ་སྟེ་བཅོས་པའི་ཚྭ་དང་འབྲུའི་ཚྭ་དང་ཞོག་ཆུ་དང་དར་བའི་དངས་མ་དང་རྩབ་མོ་ནི་ལྔ་པ་ཡིན་ཏེ། དེ་དག་ནི་ཆུས་བཏབ་པ་ཆགས་ཀྱིས་བཅགས་པ་ཤིན་ཏུ་སླ་བ་བཞིན་སྣང་བ་འདམ་བུའི་ཉག་མའི་མདོག་ལྟ་བུ་དག་ནི་དུས་སམ་དུས་མ་ཡིན་པར་ཡང་ནད་པའམ་ནད་པ་མ་ཡིན་པས་བཏུང་བར་བྱ་བདག་སྟེ་འདི་ལ་འགྱོད་པར་མི་བྱའོ་ཞེས་གསུངས་པ་ཡིན་ནོ། །དེ་ལྟ་བུ་ཉིད་ཀྱི་མདུན་རོལ་དུ་བསྙེན་པར་རྫོགས་པ་མཚན་མཐུན་པས་རེག་ཏུ་མི་རུང་ངོ་ཞེས་བྱ་བ་ལ། དེ་ལྟ་བུའི་དངོས་པོ་ནི་དེ་ལྟ་བུ་ཉིད་དོ། །དེ་ལྟ་བུ་ཉིད་ཀྱི་མདུན་
རོལ་དུ་ཞེས་བྱ་བ་ནི། ཆུས་བཏབ་པ་ལ་སོགས་པ་ཉིད་ཀྱི་མདུན་རོལ་ཏེ། ཆུས་མ་བཏབ་པ་ཉིད་ལ་སོགས་པའི་ཚེའོ། །དེའི་ཚེ་བཅོས་པའི་ཚྭ་ལ་སོགས་པ་དེ་དག་ལ་བསྙེན་པར་རྫོགས་པ་མཚན་མཐུན་པས་རེག་ཏུ་མི་རུང་བ་ཉིད་ཡིན་ནོ། །འདི་ལྟར་རེག་པ་ནི་རྣམ་པ་གཉིས་ཏེ། བྱིན་ལེན་བྱས་པ་སྔོན་དུ་བཏང་བ་དང༌། བྱིན་ལེན་བྱས་པ་སྔོན་དུ་མ་བཏང་བའོ། །དེ་ལ་བྱིན་ལེན་བྱས་པ་སྔོན་དུ་མ་བཏང་བ་ལ་རེག་པ་ལ་ནི་ལག་ཉར་བླངས་པའི་ཉེས་པས་གོས་པར་འགྱུར་བས། དེའི་ཕྱིར་འདིར་ནི་བྱིན་ལེན་བྱས་པ་སྔོན་དུ་བཏང་བའི་རེག་པ་འགོག་པར་བྱང་དོ། །འདི་སྐད་བསྟན་ཏེ། བཏུང་བ་ཇི་སྲིད་དུ་ཆུས་མ་བཏབ་ཅིང་ཆགས་ཀྱིས་མ་བཙགས་པ་བཏུང་དུ་རུང་བར་མ་གྱུར་ཅིང༌། ཤམ་ཐང་བྱེ་བར་མ་གྱུར་པ་དེ་སྲིད་དུ་བསྙེན་པར་རྫོགས་པ་མཚན་མཐུན་པས་སྔར་བྱིན་ལེན་མི་བྱའོ། །ཨ་རུ་ར་ལ་སོགས་པ་ལྔ་ཡང་ངོ་ཞེས་བྱ་བ་ནི། ཨ་རུ་ར་དང༌། སྐྱུ་རུ་ར་དང༌། བ་རུ་ར་དང༌། ན་ལེ་ཤམ་དང༌། པི་པི་ལིང་ཞེས་བྱ་བ་ལྔ་པོ་དག་ཀྱང་ཐམས་ཅད་དུ་རུང་བ་སྟེ། དང་པོ་ཉིད་མ་ཡིན་ནོ། །འདིར་གཞུང་ནི་ཕྲན་ཚེགས་དག་ལས། འབྲས་བུ་ལྔ་ནི་དུས་སམ་དུས་མ་ཡིན་པར་ཡང་ན་བའམ། མིན་པས་ཀྱང་བཟའ་བར་བྱ་བ་དག་ཡིན་ཏེ། ལྔ་གང་ཞེ་ན། ཨ་རུ་ར་དང༌། སྐྱུ་རུ་ར་དང༌། བ་རུ་ར་དང༌། ན་ལེ་ཤམ་དང༌། པི་པི་ལིང་ངོ་ཞེས་གསུངས་པ་ཡིན་ནོ། །བུ་རམ་ཡང་ངོ་ཞེས་བྱ་བ་ནི། བུ་རམ་བྱིན་གྱིས་མ་བརླབས་པ་ཡང་ཐམས་ཅད་དུ་རུང་བ་སྟེ། དང་པོ་ཉིད་མ་ཡིན་ནོ། །དེ་བྱིན་གྱིས་བརླབས་པ་བཟའ་བ་ལ་ལམ་དུ་ཞུགས་པ་དང་དགེ་སྐོས་དང་ལག་གི་བླ་རྣམས་ནི་ནད་པ་དང་འདྲ་བ་ཉིད་ཡིན་ནོ་ཞེས་བྱ་བ་ནི། བུ་རམ་དེ་ཞག་བདུན་པ་ལ་སོགས་པར་བྱིན་གྱིས་བརླབས་པ་བཟའ་བ་ལ་ཇི་ལྟར་ནད་པས་དུས་དང་དུས་མ་ཡིན་པ་ཐམས་ཅད་དུ་བཟར་རུང་བ་དེ་བཞིན་དུ་ལམ་དུ་ཞུགས་པ་དང་དགེ་སྐོས་དང་ལག་གི་བླ་དག་གིས་ཀྱང་བཟར་རུང་ངོ་ཞེས་བྱ་བའི་ཐ་ཚིག་གོ །ཟན་ཆད་པས་ཀྱང་དེ་དང་དུས་སུ་རུང་བ་མ་ཡིན་པར་བཟར་རུང་ངོ་ཞེས་བྱ་བ་ནི། དགེ་སློང་ཟན་ཆད་པས་ཀྱང་བུ་རམ་བྱིན་གྱིས་བརླབས་པ་དེ་ཡང་ནད་པ་དང་འདྲ་བ་ཉིད་དུ་བཟར་རུང་ལ། གཞན་ཡང་དུས་སུ་རུང་བ་མར་དང་འབྲུ་མར་ལ་སོགས་པ་ཡང་དུས་མ་ཡིན་པར་བཟར་རུང་ཞིང་ཞག་བདུན་པ་དང༌། འཚོ་བའི་བར་དུ་བཅང་བ་ཐམས་ཅད་
ཀྱང་བཟང་རུང་བའོ། །བུ་རམ་དང་འདྲ་བར་སྦྲང་རྩི་ཡང་དུས་མ་ཡིན་པར་ཡང་བཟང་རུང་སྟེ། བཅོམ་ལྡན་འདས་ཀྱིས་སྤྲེའུ་ལས་སྦྲང་རྩི་བཞེས་ཞིང་རུང་བར་བྱས་སོ་སྙམ་དུ་དགོངས་པའི་ཁྱེར་ཏེ། དེས་ན་བཏུང་བ་དང་འདྲ་བར་ཕྱེད་ཡོལ་ཕན་ཆད་ཀྱང་སྦྲང་རྩི་རུང་བར་བྱ་བར་རིགས་སོ། །ད་ནི་རྣམ་པ་བཞི་པོ་དག་བརྗོད་པར་བྱ་སྟེ། དེ་ལ་དུས་སུ་རུང་བ་ཞེས་བྱ་བ་ནི་བཟའ་བར་བྱ་བ་ཐམས་ཅད་དུས་སུ་བཟར་རུང་བ་ཉིད་ཡིན་པས་ལོགས་ཤིག་ཏུ་མི་བརྗོད་དེ་བྱེ་བྲག་མེད་པའི་ཕྱིར་རོ། །ཐུན་ཚོད་དུ་རུང་བ་དང༌། ཞག་བདུན་པ་དང༌། འཚོ་བའི་བར་དུ་བཅང་བ་དག་བརྗོད་པར་བྱ་སྟེ། དེའི་ཕྱིར་ཐུན་ཚོད་དུ་རུང་བ་ནི་བཏུང་བ་དག་གོ་ཞེས་བྱ་བ་སྨྲས་ཏེ། འདིར་ཐུན་ཚོད་དུ་རུང་བ་ནད་པས་བྱིན་གྱིས་བརླབ་པར་བྱ་བའི་གཞུང་ནི་ཁྱིམ་བའམ། དགེ་ཚུལ་གྱིས་སྦྱར་བ་ཚགས་ཀྱིས་བཙགས་པ་དག་ནི་ཐུན་ཚོད་དུ་རུང་བའོ་ཞེས་གསུངས་པ་ཡིན་ནོ། །ཐུན་ཚོད་དུ་རུང་བའི་བཏུང་བ་བྱིན་གྱིས་མ་བརླབས་པ་ཐམས་ཅད་ལ་རུང་བའི་གཞུང་ནི་འབྲས་བུ་བརྒྱད་པོ་ཁྱིམ་པའམ། དགེ་ཚུལ་གྱིས་སྦྱར་བ་ཚགས་ཀྱིས་བཙགས་པ་འདི་དག་ནི་དུས་སམ་དུས་མ་ཡིན་པར་ཡང་ན་བའམ་ན་བམ་ཡིན་པས་ཀྱང་བཏུང་བར་བྱ་བ་དག་ཡིན་ཏེ། འདི་ལ་འགྱོད་པར་མི་བྱའོ་ཞེས་གསུངས་པ་ཡིན་ནོ། །ཤིན་ཏུ་སླ་བའོ་ཞེས་བྱ་བ་ནི། ཐུན་ཚོད་དུ་རུང་བ་ནི་བཏུང་བ་དག་གོ་ཞེས་སྨོས་པ་དེའི་སྐ་བ་ཉིད་སྩལ་ཏོ། །དེའི་རྫས་དེ་ཉིད་མ་ཡིན་པའི་ཕྱིར་གལ་ཏེ་དུས་སུ་རུང་བ་ཡིན་ན་བསྙེན་པར་མ་རྫོགས་པས་སྦྱར་ཞིང་ཚགས་ཀྱིས་ཀྱང་བཙག་པར་བྱའོ་ཞེས་བྱ་བ་ལ། དེའི་རྫས་ཞེས་བྱ་བ་ནི་བཏུང་བ་དེའི་རྫས་སོ། །དེ་ཉིད་མ་ཡིན་པའི་ཕྱིར་ཞེས་བྱ་བ་ནི་བཏུང་བ་ཉིད་མ་ཡིན་པའི་ཕྱིར་རོ། །གལ་ཏེ་དུས་སུ་རུང་བ་ཡིན་ན་ཞེས་བྱ་བ་ནི། རྫས་གང་ལས་བཏུང་བར་བྱ་བའི་རྫས་དེ་གལ་ཏེ་དུས་སུ་རུང་བ་ཡིན་ན་སྟེ། དེའི་ཚེ་རྫས་དེ་བསྙེན་པར་མ་རྫོགས་པས་བསྐོལ་བ་ལ་སོགས་པ་སྦྱར་ཞིང་ཚགས་ཀྱིས་ཀྱང་བཙག་པར་བྱའོ། །དུས་མ་ཡིན་པར་རུང་བ་ཉིད་ཡིན་ན་ནི་བསྙེན་པར་རྫོགས་པས་སྦྱར་ཞིང་བཙགས་པ་ལ་ཡང་ཉེས་པ་མེད་དོ། །དེ་དག་ཏུ་གཞན་བལ་པོ་སེའུ་དང་མ་དུ་ལུང་ག་ལ་སོགས་པའི་རྫས་སོ་ཞེས་བྱ་བ་ནི། ཐུན་ཚོད་དུ་རུང་བའི་བཏུང་བ་དེ་དག་ཏུ་ཙོ་ཚ་ལ་སོགས་པའི་བཏུང་བ་དག་ལས་གཞན་པ། བལ་པོ་སེའུ་
དང་མ་དུ་ལུང་ག་ལ་སོགས་པའི་རྫས་དག་གིས་སྦྱོར་བར་བྱེད་ན་འདི་ལྟར་དེར་བལ་པོ་སེའུ་དང་མ་དུ་ལུང་ག་ལ་སོགས་པའི་རྫས་ཀྱི་ཟས་ཉིད་ཀྱིས་ཁྱབ་པར་བྱེད་དུ་ཟིན་ཀྱང་ཉེས་པ་མེད་པའོ། །སྩོགས་པ་ཞེས་བྱ་བའི་སྒྲས་ནི་རྩ་བ་དང་སྡོང་བུ་དང་འདབ་མ་དང་མེ་ཏོག་དང་འབྲས་བུ་ཟས་ཀྱི་དོན་དུ་ཁྱབ་པར་བྱེད་པ་གང་ཡིན་པ་དེ་དག་ཀྱང་བསྡུ་བར་རིག་པར་བྱའོ། །འདི་སྐད་བསྟན་ཏེ། ཙོ་ཙ་ལ་སོགས་པའི་བཏུང་བ་དག་ལས་གཞན་པའི་བཏུང་བ་བལ་པོ་སེའུ་དང་མ་དུ་ལུང་ག་ལ་སོགས་པས་སྦྱོར་བར་བྱེད་ན། འདི་ལྟར་དེར་བལ་པོ་སེའུ་དང་མ་དུ་ལུང་ག་ལ་སོགས་པའི་རྫས་ཀྱི་ཟས་ཉིད་ཀྱིས་ཁྱབ་པར་བྱེད་དུ་ཟིན་ཀྱང་ཉེས་པ་མེད་དོ། །འདིར་གཞུང་ནི་དགེ་སློང་དག་གིས་བུ་རམ་ཟོས་པ་དང༌། དེ་དག་ལ་སྐོམ་པའི་གནོད་པ་བྱུང་ནས། བཅོམ་ལྡན་འདས་ཀྱིས་བཀའ་སྩལ་པ། བུ་རམ་ཆུ་བྱས་ཏེ་བཏུང་བར་བྱའོ་ཞེས་གསུངས་པ་ཡིན་ནོ། །དེ་དུས་སུ་རུང་བ་ཉིད་ཡིན་ན་ཐུན་ཚོད་ཀྱི་མཐའ་མཐའ་ཡིན་ནོ་ཞེས་བྱ་བ་ནི། བཏུང་བའི་རྫས་དེ་རྒུན་ཆུ་ལ་སོགས་པ་དུས་སུ་རུང་བ་ཉིད་ཡིན་ན་མཚན་མོའི་ཐུན་ཚོད་ཀྱི་ཆའི་ཚད་ཀྱི་མཐའ་གང་ཡིན་པ་དེ་བཏུང་བ་དེ་བཏུང་བའི་མཐའ་ཡང་ཡིན་པར་རིག་པར་བྱའོ། །གཞན་ཉིད་ཡིན་ན་དེའི་གང་ཡིན་པའོ་ཞེས་བྱ་བ་ནི། བཏུང་པའི་རྫས་དེ་ལ་དུས་སུ་རུང་བ་ལས་གཞན་པ་དུས་མ་ཡིན་པར་རུང་བ་ཉིད་ཡིན་ན་རྫས་དེ་བཟའ་བའི་དུས་ཀྱི་མཐའ་ཞག་བདུན་པའམ་འཚོ་བའི་བར་དུ་བཅང་བའི་མཐའ་གང་ཡིན་པ་དེ་ཉིད་བཏུང་བ་དེའི་མཐའ་ཡང་ཡིན་པ་སྟེ། ཐུན་ཚོད་ཀྱི་མཐའ་དང་ལྷན་ཅིག་འགལ་བ་མེད་དོ། །གང་གི་ཕྱིར་ཞག་བདུན་པ་དང་འཚོའི་བར་བཅང་བའི་རྫས་ཐུན་ཆོད་ཀྱི་མཐའ་ལས་ཐལ་བར་བཟར་རུང་བ་ཉིད་ཡིན་ན་དུས་ཐམས་ཅད་དུ་ཉེས་པ་མེད་པའི་ཕྱིར་ནམ་ཡང་བཟར་མི་རུང་བ་ཉིད་དུ་མི་འགྱུར་བ་དེའི་ཕྱིར་དུས་སུ་རུང་བ་མ་ཡིན་པའི་རྫས་ལས་བྱས་པའི་བཏུང་བ་དེ་བཏུང་བ་ཉིད་ཀྱི་ཕྱིར་ནི་དུས་ཐམས་ཅད་པ་ཉིད་ཡིན་པར་ཤེས་པར་བྱ་ཞིང་བྱིན་གྱིས་བརླབས་པའི་ཕྱིར་ནི་ཐུན་ཚོད་དུ་རུང་བ་ཉིད་ཡིན་པར་ཤེས་པར་བྱའོ། །ད་ནི་འདིར་ལུགས་གཞན་དགག་པར་བྱ་བར་འདོད་ནས་གཞན་གྱི་ལུགས་བསྟན་པའི་ཕྱིར་ཁ་ཅིག་ན་རེ་མ་གྱུར་ན་དེ་ཡིན་གྱི་གྱུར་ན་གང་ཚུན་ཆད་དེ་ཡིན་པའོ་ཞེས་ཟེར་རོ་ཞེས་བྱ་བ་སྨྲས་ཏེ། འདིར་འདུལ་བ་འཛིན་པ་
ཁ་ཅིག་ན་རེ་འདི་ལ་གྱུར་པ་ཞེས་བྱ་བ་ནི། བཏུང་བ་བཞིན་སྣང་བ་ཉིད་ཀྱིས་མཚན་ཉིད་ཤིན་ཏུ་སླ་བ་དང༌། མྱོས་པར་མི་འགྱུར་བ་ཉིད་ལས་གཞན་དུ་གྱུར་པ་ཞེས་བྱ་སྟེ། མྱོས་པར་འགྱུར་བར་གྱུར་པ་ཞེས་བྱ་བའི་ཐ་ཚིག་གོ །དེས་ན་སྔར་མདོ་ལས་གཞན་ཉིད་ཡིན་ན་དེའི་གང་ཡིན་པའོ་ཞས་སྨོས་པས་བཏུང་པའི་རྫས་ཀྱི་མཐའ་གང་ཡིན་པ་དེ་ཉིད་བཏུང་བ་དེའི་མཐའ་ཡང་ཡིན་ནོ་ཞེས་གང་བསྟན་བདེ་གཅིག་ཏུ་ངེས་པར་རྣམ་པར་གནས་པ་མ་ཡིན་པར་ཤེས་པར་བྱ་སྟེ། འདི་ལྟར་ངོ་བོ་ཉིད་མ་གྱུར་ན་དི་བཏུང་བའི་མཐའ་ཡིན་གྱི། གྱུར་པ་སྐད་ཅིག་གང་ཚུན་ཆད་ཀྱི་འོག་ཏུ་ངོ་བོ་ཉིད་དེ་གྱུར་པའི་སྐད་ཅིག་དེ་ཉིད་བཏུང་བའི་མཐའ་ཡིན་པར་ཤེས་པར་བྱའོ་ཞེས་ཟེར་རོ། །དེ་ནི་མ་ཡིན་ཏེ་དུས་ལྷག་པ་ལ་བརྟེན་ན་མི་འཆགས་པར་འགྱུར་བའི་ཕྱིར་དང་དེ་འབྱུང་བར་འགྱུར་བ་ཕལ་པ་རྣམས་ཀྱི་བགྲོད་པ་མ་ཡིན་པའི་ཕྱིར་བྱིན་གྱིས་བརླ་བས་པར་བྱ་བ་ཉིད་མ་ཡིན་པར་འགྱུར་བའི་ཕྱིར་རོ་ཞེས་བྱ་བ་ནི། གྱུར་ན་གང་ཚུན་ཆད་དེ་ཡིན་པའོ་ཞེས་ཟེར་བ་དེ་ནི་མ་ཡིན་ཏེ། དུས་ལྷག་པ་ལ་བརྟེན་ན་མི་འཆགས་པར་འགྱུར་པའི་ཕྱིར་ཏེ། གང་ནས་བཏུང་བར་གྱུར་པར་འགྱུར་བ་དེ་ལས་ལྷག་པར་དུས་ལ་བྱིན་གྱིས་བརླབས་པ་བརྟེན་ན་བྱིན་གྱིས་བརླབ་པ་དེ་མི་འཆགས་པར་འགྱུར་བའི་ཕྱིར་རོ། །འདི་ལྟར་བྱིན་གྱིས་བརླབ་པ་ནི་རེ་ཞིག་བཟའ་བའི་ཕྱིར་ཡིན་པས་བཟར་རུང་བ་ཉིད་ཡིན་ན་ཡིན་ནོ། །དེའི་ཕྱིར་གང་གི་ཚེ་བཟར་རུང་བ་ཉིད་རྣམ་པར་ལོག་པ་དེའི་ཚེ་བྱིན་གྱིས་བརླབས་ཀྱང་རྣམ་པར་ལྡོག་པར་མི་འགྱུར་རམ། དེས་ན་སྐད་ཅིག་གང་ཚུན་ཆད་ཀྱི་འོག་ཏུ་བཏུང་བའི་ངོ་བོ་ཉིད་དུ་གྱུར་པར་འགྱུར་བའི་སྐད་ཅིག་དེ་ལས་གཞན་པའི་དུས་ལྷག་མ་དེ་ལ་ནི་བྱིན་གྱིས་བརླབ་པར་རྗེས་སུ་མ་གནང་བས། དེས་ན་འདིར་དུས་དེ་ཙམ་ཞིག་ཏུ་འགྱུར་པའི་ཕྱིར་རོ། །གལ་ཏེ་འདི་སྙམ་དུ་དུས་གང་ལ་བཏུང་བའི་ངོ་བོ་ཉིད་དུ་གྱུར་པར་འགྱུར་པའི་དུས་དེ་ཙམ་ཚུན་ཆད་ལ་བྱིན་གྱིས་བརླབས་པ་རྟེན་པར་བྱེད་པས་དེས་ན་ཉེས་པ་འདིར་མི་འགྱུར་རོ་སྙམ་དུ་སེམས་ན་དེའི་ཕྱིར། དེ་འབྱུང་བར་འགྱུར་བ་ཕལ་པ་རྣམས་ཀྱི་བགྲོད་པ་མ་ཡིན་པའི་ཕྱིར་ཞེས་བྱ་བ་སྨྲས་ཏེ། གང་གི་ཕྱིར་འབྱུང་བར་འགྱུར་བ་མ་འོངས་པའི་དངོས་པོ་དེ། ཕལ་པ་ཚུ་རོལ་མཐོང་བ་རྣམས་ཀྱི་བགྲོད་པ་
མ་ཡིན་ཞིང་ཡུལ་གྱི་དངོས་པོར་མི་འགྱུར་བ་དེའི་ཕྱིར་བྱིན་གྱིས་རློབ་པའི་དུས་ན་འགྱུར་བའི་དུས་ཡོངས་སུ་མི་ཤེས་པས་བྱིན་གྱིས་བརླབ་པའི་ཕྱིར་ཡོངས་སུ་གཟུང་བར་བྱ་བའི་དུས་གང་ཡིན་པ་དེ་མི་ཤེས་སོ། །དེ་མི་ཤེས་པའི་ཕྱིར་གདོན་མི་ཟ་བ་ཁོ་ནར་དུས་ལྷག་པ་ལ་བརྟེན་པར་འགྱུར་རོ། །དེས་ན་བྱིན་གྱིས་བརླབ་པར་བྱ་བ་ཉིད་མ་ཡིན་པར་འགྱུར་བའི་ཕྱིར་རོ། །འདིར་རོ་དང་ཕྱེ་མ་དང་སྦྱར་བའི་བཏུང་བདག་འདུས་པ་ཉིད་ཡིན་ནོ་ཞེས་བྱ་བ་ཡང༌། འདིར་ཞེས་བྱ་བ་ནི་ཐུན་ཚོད་དུ་རུང་བ་དག་སྟེ། དེར་བུ་རམ་ཤིང་ལ་སོགས་པའི་རོ་དག་ཀྱང་འདུས་པ་ཉིད་ཡིན་ལ། ཕྱེ་མ་དང་སྦྱར་བའི་བཏུང་བ་ཞེས་བྱ་བ་ནི། ཕྱེ་མ་ཆང་གི་སྣོད་ཀྱི་ནང་དུ་སྤངས་པ་ལ་ཆང་གི་དྲིས་གོས་པར་གྱུར་པ་དག་ལས་བཏུང་བར་བྱས་པ་དེ་ཡང་དེར་འདུས་པ་ཉིད་ཡིན་ནོ། མདོ་འདི་དང་མདོ་འོག་མ་གཉིས་ནི་སྔར་ཐུན་ཚོད་དུ་རུང་བ་ནི་བཏུང་བ་དག་གོ་ཞེས་སྨོས་པའི་མདོ་དེའི་སྤྲོས་པ་ཡིན་ནོ། །སྨན་རྩ་བས་ཤིན་ཏུ་སླ་བ་ཡང་ངོ་ཞེས་བྱ་བ་ཡང༌། ཐུན་ཚོད་དུ་རུང་བའི་བཏུང་བ་དག་ཏུ་འདུས་པ་ཉིད་ཡིན་ནོ་ཞེས་བྱ་བར་སྦྱར་རོ། །སྨན་རྩབས་ཞིས་བྱ་བ་དེ་ཇི་ལྟ་བུ་ཞིག་ཡིན་ཞེན་དེའི་ཕྱིར་དེ་ནི་རྩ་བ་ལ་སོགས་པའི་སྨན་བཀུས་པ་སྐྱུར་པོའི་ཞེས་བྱ་བ་སྨྲས་ཏེ། སྨན་རྩ་བས་ཞེས་བྱ་བ་དེ་ནི་རྩ་བ་དང་སྡོང་བུ་དང་འདབ་མ་དང་མེ་ཏོག་དང་འབྲས་བུའི་སྨན་ཆུས་སྤངས་ཤིང་བཀུས་པའི་ཁུ་བ་སྐྱུར་བག་ཅན་གྱུར་པ་ཡིན་པར་ཤེས་པར་བྱའོ། །ཐུན་ཚོད་དུ་རུང་བ་བསྟན་ནས། ད་ནི་ཞག་བདུན་པ་བཤད་པར་བྱ་སྟེ། དེའི་ཕྱིར་ཞུན་མར་དང་འབྲུ་མར་དང་སྦྲང་རྩི་དང་བུ་རམ་གྱི་དབུ་བ་དག་ནི་ཞག་བདུན་པའོ་ཞེས་བྱ་བ་སྨྲས་ཏེ། བུ་རམ་དང་ཧྭགས་དང་ལི་ཁར་ལ་སོགས་པ་ཐམས་ཅད་ནི་བུ་རམ་གྱི་དབུ་བ་ཉིད་ཀྱིས་འཕངས་སོ་ཞེས་བྱ་བ་ནི། བུ་རམ་གྱི་དབུ་བ་ཞེས་བྱ་བ་ཉིད་དེ་དག་ལས་བྱུང་བ་ཡིན་པའི་ཕྱིར་རོ། །ཁྱིམ་བདག་གླང་བུ་ལྟ་བུས་དགེ་སློང་ཟན་ཆད་པ་རྣམས་ཀྱིས་དུས་མ་ལགས་པར་ཅི་ཞིག་འཚལ་དུ་རུང་བ་ཞེས་ཞུས་བ་ན། བུ་རམ་དང་ཞུན་མར་དང་ཧྭགས་དང་ལི་ཁར་དང་བཏུང་བ་དག་གོ་ཞེས་གསུངས་པ་གང་ཡིན་པ་དེ་ལས་ནི་འདི་ལྟར་ཤེས་པར་བྱ་སྟེ། དེ་དག་ལས་བཏུང་བ་དག་སྐབས་གཞན་དུ་ཐུན་ཚོད་དུ་རུང་བ་ཉིད་དུ་གསུངས་པས། ལྷག་མ་ཞུན་མར་དང་བུ་རམ་ལ་སོགས་པ་དེ་དག་ནི་ཞག་བདུན་
པ་ཉིད་ཡིན་པར་གནས་ས། །བདུད་རྩི་ནི་ཞུན་མར་དང་འདྲ་བ་ཉིད་དོ་ཞེས་བྱ་བ་ནི། བཟའ་བར་བྱ་བ་ཉིད་དང་ཞག་བདུན་པ་ཉིད་ཀྱི་ཕྱིར་ཏེ། བདུད་རྩི་ནི་ཞུ་ན་མར་དང་ངོ་བོ་ཉིད་དང་འདྲ་བའི་ཕྱིར་རོ། །ཞག་བསྐོལ་ཞིང་བཙགས་པ་དག་ནི་འབྲུ་མར་དང་འདྲ་བ་ཉིད་དོ་ཞེས་བྱ་བ་ཡང༌། །བཟའ་བར་བྱ་བ་ཉིད་དང་ཞག་བདུན་པ་ཉིད་ཀྱི་ཕྱིར་ཏེ། གང་གི་ཚེ་ཞག་དག་བསྐོལ་ཞིང་བཙགས་པ་དེའི་ཚེ་གནས་བག་མེད་པ་ན་འབྲུ་མར་དང་འདྲ་བར་འགྱུར་བའི་ཕྱིར་རོ། །འདིར་གཞུང་ནི་ཞག་རྣམ་པ་ལྔ་པོ་འདི་དག་ནི་དུས་མ་ཡིན་པར་བསྐོལ། དུས་མ་ཡིན་པར་བཙགས། དུས་མ་ཡིན་པར་བྱིན་ལེན་བྱས། དུས་མ་ཡིན་པར་བྱིན་གྱིས་བརླབས་ན་ཡོངས་སུ་ལོངས་སྤྱད་པར་མི་བྱའོ། །དུས་སུ་བསྐོལ་ཞིང་དུས་མ་ཡིན་པར་བཙགས་དུས་མ་ཡིན་པར་བྱིན་ལེན་བྱས་དུས་མ་ཡིན་པར་བྱིན་གྱིས་བརླབས་ན་ཡང་ཡོངས་སུ་ལོངས་སྤྱད་པར་མི་བྱའོ། །དུས་སུ་བསྐོལ་དུས་སུ་བཙགས་ཤིང་དུས་མ་ཡིན་པར་བྱིན་ལེན་བྱས་དུས་མ་ཡིན་པར་བྱིན་གྱིས་བརླབས་ན་ཡང་ཡོངས་སུ་ལོངས་སྤྱད་བར་མི་བྱའོ། །དུས་སུ་བསྐོལ་དུས་སུ་བཙགས་དུས་སུ་བྱིན་ལེན་བྱས་ཤིང་དུས་མ་ཡིན་པར་བྱིན་གྱིས་བརླབས་ན་ཡང་ཡོངས་སུ་ལོངས་སྤྱད་པར་མི་བྱའོ། །དུས་སུ་བསྐོལ་དུས་སུ་བཙགས་དུས་སུ་བྱིན་ལེན་བྱས་དུས་སུ་བྱིན་གྱིས་བརླབས་ན་འབྲུ་མར་ཉིད་དུ་ལོངས་སྤྱོད་པས་ཞག་བདུན་པར་ཡོངས་སུ་ལོངས་སྤྱོད་པར་བྱའོ་ཞེས་གསུངས་པ་ཡིན་ནོ། །འདི་སྐད་བསྟན་ཏེ། བསྐོལ་བ་དང་བཙགས་པ་གཉིས་ནི་དུས་སུ་བྱས་ཀྱང་རུང༌། མ་བྱས་ཀྱང་རུང༌། དུས་མ་ཡིན་པར་བྱས་ཀྱང་རུང་ལ། བྱིན་ལེན་བྱས་པ་དང་བྱིན་གྱིས་བརླབས་པ་ནི་དུས་ཁོ་ནར་བྱ་དགོས་ཏེ། གང་གི་ཕྱིར་དུས་མ་ཡིན་པར་བྱིན་ལེན་བྱས་པ་དང་དུས་མ་ཡིན་པར་བྱིན་གྱིས་བརླབས་པ་ཡོངས་སུ་ལོངས་སྤྱད་པར་མི་བྱ་ཞིང༌། དུས་སུ་བྱིན་ལེན་བྱས་པ་དང་དུས་མ་ཡིན་པར་བྱིན་གྱིས་བརླབས་པ་ཡང་ཡོངས་སུ་ལོངས་སྤྱོད་པར་མི་བྱ་བ་དེའི་ཕྱིར་བྱིན་ལེན་དང་བྱིན་གྱིས་བརླབས་པ་གཉིས་ནི་དུས་ཁོ་ནར་བྱ་བ་ཡིན་ནོ། །ཆུ་བཙགས་པ་ལ་ནི་དུས་ངེས་པ་མེད་དོ། །ཞག་རྣམ་པ་ལྔ་ཞེས་གསུངས་པ་དེ་དག་ནི་གང་ཡིན། ཅི་དེ་དག་འབྲུ་མར་དང་འདྲ་བ་ཉིད་ཡིན་ནམ་འོན་ཏེ་འདྲ་བ་ཉིད་མ་ཡིན་ཞེ་ན། དེའི་ཕྱིར་
ཉའི་དང་རི་བོང་གི་དང་ཆུ་སྲིན་བྱིས་པ་གསོད་ཀྱི་དང་དོམ་གྱི་དང་ཕག་གིའོ་ཞེས་བྱ་བ་སྨྲས་ཏེ། དེ་ལྔའི་ཞག་ནི་འབྲུ་མར་དང་འདྲ་བ་ཉིད་ཡིན་ནོ། །དེ་དག་ནི་ནད་པ་ལ་ཕལ་ཆེར་སྦྱོར་བར་བྱེད་དོ་ཞེས་བྱ་བ་ནི། ཞག་རྣམ་པ་ལྔ་པོ་སྔར་བསྟན་པ་དེ་དག་ནི་འཇིག་རྟེན་ན་ནད་པ་ལ་ཕལ་ཆེར་ལན་མང་དུ་སྦྱོར་ཞིང་ལྡུད་པར་བྱེད་པས། དེའི་ཕྱིར་ཞག་རྣམ་པ་ལྔ་ཞེས་གསུངས་ཀྱི་འདི་ལ་དེས་པ་ནི་མེད་དོ། །སོས་པ་ཉིད་ནི་དེ་དག་ནད་པའི་ཕྱིར་སློང་ན་སྦྱིན་ནོ་ཞེས་བྱ་བ་ནི། ནད་པ་གང་གིས་བྱིན་གྱིས་བརླབས་པ་དེ་ཉིད་ནད་སོས་པ་ཉིད་ན་ཞག་རྣམ་པ་ལྔ་པོ་དེ་དག་གཞན་དག་ནད་པའི་ཕྱིར་སློང་ན་སྦྱིན་བར་བྱ་བའོ། །དེ་མེད་ན་སྨན་ཁང་དུའོ་ཞེས་བྱ་བ་ནི། སློང་བ་དེ་མེད་ན་དགེ་འདུན་གྱི་སྨན་ཁང་དུ་གཞག་བར་བྱ་བའོ། །སྨན་ཁུ་དང་མིག་སྨན་དག་ཀྱང་ངོ་ཞེས་བྱ་བ་ཡང༌། སོས་བ་ཉིད་ན་དེ་དག་ནད་པའི་ཕྱིར་སློང་ན་སྦྱིན་ནོ་ཞེས་བྱ་བ་དང༌། དེ་མེད་ན་སྨན་ཁང་དུ་བཞག་གོ་ཞེས་བྱ་བར་སྦྱར་རོ།། །། བམ་པོ་ལྔ་བཅུ་དྲུག་པ། ཞག་བདུན་པ་བསྟན་ནས། ད་ནི་འཚོ་བའི་བར་དུ་བཅང་བ་བཤད་པར་བྱ་སྟེ། དེའི་ཕྱིར་འཚོ་བའི་བར་དུ་བཅང་བ་ནི་རྩ་བ་དབ་སྡོང་བུ་དང་འདབ་མ་དང་མེ་ཏོག་དང་འབྲས་བུ་ཟས་ཀྱི་དོན་དུ་ཁྱབ་པར་བྱེད་པ་མ་ཡིན་པའོ་ཞེས་བྱ་བ་སྨྲས་ཏེ། གང་དག་ཟས་གྱི་དོན་དུ་ཁྱབ་པར་བྱེད་པ་མ་ཡིན་པ་དེ་དག་འཚོ་བའི་བར་དུ་བཅད་པ་ཡིན་ནོ་ཞེས་བྱ་བའི་ཐ་ཚིག་གོ །དེ་ལ་རྩ་བ་དག་གང་ཞེན་འདི་ལྟ་སྟེ། གླ་སྒང་དང་ཤུ་དག་དང་ཡུང་ང་དང་སྒེའུ་གཤེར་དང་བོད་དང་དཀར་པོ་དག་གོ་ཞེས་བྱབ་སྨྲས་ཏེ། དེ་དག་ནི་མཚོན་པ་ཙམ་དུ་ཟད་ཀྱི། རྩ་བའི་སྨན་ཟས་ཀྱི་དོན་དུ་ཁྱབ་པར་བྱེད་པ་མ་ཡིན་པ་གཞན་དག་ཀྱང་བསྡུའོ། །སྡོང་བུ་དག་གང་ཞེ་ན། ཙན་དན་དང༌། སྤྱི་མོ་དང༌། ཤུག་པ་དང༌། སླེ་ཏྲེས་དང༌། ཐང་ཤིང་དང༌། སྐྱེར་པ་དག་གོ་ཞེས་བྱ་བ་སྨྲས་ཏེ། དེ་དག་ཀྱང་མཚོན་པ་ཙམ་དུ་ཟད་ཀྱི་སྡོང་པུའི་སྨན་ཟས་ཀྱི་དོན་དུ་ཁྱབ་པར་བྱེད་པ་མ་ཡིན་པ་གཞན་དག་ཀྱང་བསྡུའོ། །འདབ་མ་དག་གང་ཞེ་ན། པ་ཤ་དང༌། ཀོ་ཤ་ཏ་ཀའི་དང༌། པ་ཏོ་ལའི་དང༌། ནི་མ་པ་དང༌། སབ་ཏ་པརྞའི་འདབ་མ་དག་གོ་ཞེས་བྱ་བ་སྨྲས་ཏེ། དེ་དག་ཀྱང་མཚོན་བ་ཙམ་དུ་ཟད་ཀྱི་འདབ་མའི་སྨན་ཟས་ཀྱི་དོན་དུ་ཁྱབ་པར་བྱེད་པ་མ་ཡིན་པ་གཞན་དག་ཀྱང་བསྡུའོ། །མེ་ཏོག་དག་གང་ཞེ་ན། མེ་ཏོག་ནི་པཱ་ཤ་ཀ་དང༌། ནི་མ་པ་དང༌།
དྷ་ཏ་ཀི་དང༌། ཀླུ་ཤིང་དང༌། པད་མའི་ཟེ་བ་དག་གོ་ཞེས་བྱ་བ་སྨྲས་ཏེ། དེ་དག་ཀྱང་མཚོན་པ་ཙམ་དུ་ཟད་ཀྱི། མེ་ཏོག་གི་སྨན་ཟས་ཀྱི་དོན་དུ་ཁྱབ་པར་བྱེད་པ་མ་ཡིན་པ་གཞན་དག་ཀྱང་བསྡུའོ། །འབྲས་བུ་དག་གང་ཞེ་ན། ཨ་རུ་ར་དང༌། སྐྱུ་རུ་ར་དང༌། བ་རུ་ར་དང༌། ན་ལེ་ཤ་མ་དང༌། པི་པི་ལིང་དག་གོ་ཞེས་བྱ་བ་སྨྲས་ཏེ། དེ་དག་ཀྱང་མཚོན་པ་ཙམ་དུ་ཟད་ཀྱི། འབྲས་བུའི་སྨན་ཟས་ཀྱི་དོན་དུ་ཁྱབ་པར་བྱེད་པ་མ་ཡིན་པ་གཞན་དག་ཀྱང་བསྡུའོ། །རྩ་བ་དང་སྡོང་བུ་དང་འདབ་མ་དང་མེ་ཏོག་དང་འབྲས་བུ་དག་བསྟན་ནས། འཚོ་བའི་བར་དུ་བཅད་བ་གཞན་བསྟན་པའི་ཕྱིར་ལྕི་བའོ་ཞེས་བྱ་བ་སྨྲས་སོ། །དེ་ཉིད་བསྟན་པའི་ཕྱིར་འདི་ལྟ་སྟེ། ཤིང་ཀུན་དང༌། པྲ་རྩི་དང༌། རྒྱ་སྐྱེགས་དང༌། སྤྲ་ཚིལ་དང་ཤིང་མ་ཞོའོ་ཞེས་བྱ་བ་སྨྲས་ཏེ། འདི་ལྟ་སྟེ་ཞེས་བྱ་བའི་སྒྲས་ནི་དཔེར་བསྟན་པའི་ཕྱིར་རོ། །ཤིང་མ་ཞོ་ཞེས་བྱ་བ་ནི། རྒྱ་སྐྱེགས་ལས་གཞན་པའི་ཤིང་དག་གི་ཤིང་ས་ཞོ་སྟེ། བསེ་རྩི་དང་ཐང་ཆུ་ལ་སོགས་པ་དག་གོ །འགྱུར་བྱེད་དོ་ཞེས་བྱ་བ་ནི། འགྱུར་བྱེད་ཀྱི་སྡེ་ཚན་སྟོན་ཏོ། །དེ་ཉིད་བསྟན་པའི་ཕྱིར་འདི་ལྟ་སྟེ། ཏིལ་གྱི་དང་རྒྱ་སྐྱེགས་ཀྱི་ཤིང་གི་དང༌། ས་ཚུར་གྱི་དང༌། ནས་ཀྱི་དང༌། ནས་ཀྱི་གྲ་མའི་དང༌། བ་ཤ་ཀའི་དང༌། ཐལ་བའི་འགྱུར་བྱེད་དོ་ཞེས་བྱ་བ་སྨྲས་སོ། །ལན་ཚྭའི་ཞེས་བྱ་བ་ནི། ལན་ཚྭའི་སྡེ་ཚན་སྟོན་ཏོ། །དེ་ཉིད་བསྟན་པའི་ཕྱིར། འདི་ལྟ་སྟེ། རྒྱམ་ཚ་དང་ཁ་རུ་ཚ་དང་ཚད་མར་དང་རྒྱ་མཚོའི་ཚ་དང་པ་ཚའོ་ཞེས་བྱ་བ་སྨྲས་སོ། །སྨན་ཁུའོ་ཞེས་བྱ་བ་ནི། སྨན་མི་བཏགས་པར་བསྐོལ་བ་དང་བགྲུང་བ་དང་བཀྲུ་བར་བྱ་བའི་སྡེ་ཚན་སྟོན་ཏོ། །དེ་ཉིད་བསྟན་པའི་ཕྱིར་འདི་ལྟ་སྟེ། ཤིང་ཨ་མྲ་དང༌། ནི་མ་བ་དང༌། ཀོ་ཤམ་པ་དང༌། ཤི་རི་ཤ་དང༌། འཛམ་བུ་དག་གོ་ཞེས་བྱ་བ་སྨྲས་སོ། །ཇི་ཙམ་གྱིས་ཆོག་བ་བསྟེན་ཏོ་ཞེས་བྱ་བ་ནི་སྨན་ཁུའོ། །བཀྲུས་ནས་ཡང་ངོ་ཞེས་བྱ་བ་ནི། ཇི་ཙམ་གྱིས་ཆོག་པ་ཁོ་ན་བསྟེན་པའོ། །མི་མཉེ་བ་ལ་ལན་ཅིག་བཀྲུའོ་ཞེས་བྱ་བ་ནི། གང་ལ་རེག་བས་མཉེ་བར་མེ་བྱ་བ་དེ་ནི་མི་མ་ཉེ་བ་ཞེས་བྱ་སྟེ། དེ་ལ་ནི་ལན་ཅིག་བཀྲུས་ཏེ་ཉིན་གཅིག་ལ་ལན་ཅིག་བཀྲུ་བའོ། །ངལ་བ་ལ་སོགས་པ་སྤང་བའི་ཕྱིར་ལན་དུ་མ་བཀྲུ་བ་བཀག་གོ །སྨན་ཁུ་དེ་ལྟར་བསྟེན་ནོ་ཞེས་བྱ་བ་ནི། རྣམ་པ་དེ་ལྟར་ཞེས་བྱ་བའི་ཐ་ཚིག་སྟེ། འདི་ནི་སྐམ་རྡོ་ལ་སོགས་བལ་
ཡང་དེ་བཞིན་ནོ། །སྨན་སྨོས་པས་དུག་སྨན་མ་བསྡུས་པ་ཉིད་མ་ཡིན་ནོ་ཞེས་བྱ་བ་ནི། འདིར་སྨན་ཞེས་སྨོས་པས་དུག་སྨན་ཡང་བསྡུས་པར་རིག་པར་བྱའོ། །དེ་ནི་འཚོ་བའི་བར་དུ་བཅང་བ་ཉིད་དོ་ཞེས་བྱ་བ་ནི། དུག་སྨན་དེ་ནི་འཚོ་བའི་བར་དུ་བཅང་བ་ཉིད་ཡིན་པའོ། །ཉེ་བ་འཁོར་བུ་རམ་ཤིང་ནི་དུས་སུ་རུང་བའོ། །ཁུ་བ་ནི་དུས་ཚོད་དུ་རུང་པའོ། །བུ་རམ་ནི་ཞག་བདུན་པའོ། །བུ་རམ་ཤིང་དང་བུ་རམ་གཉིས་བསྲེགས་པའི་ཐལ་བ་ནི་འཚོའི་བར་དུ་བཅང་བའོ་ཞེས་གསུངས་པ་དེར། ཐལ་བ་འཚོའི་བར་དུ་བཅང་བ་ཉིད་དུ་གསུངས་པས། ཐལ་བ་ཡང་དུག་སྨན་གྱི་ཁོངས་སུ་གཏོགས་པ་ཉིད་ཡིན་ལ། ས་ལ་སོགས་པ་ཟས་ཀྱི་དོན་དུ་ཁྱབ་པར་མི་བྱེད་པ་དག་ཀྱང་འཚོ་བའི་བར་དུ་བཅད་བ་ཉིད་དུ་རྣམ་པར་གནས་སོ་ཞེས་གསུངས་པས་དེའི་ཕྱིར་གཞུང་དེ་ནི་འདིར་ཁུངས་ཉིད་ཡིན་ནོ། །ནུ་ཞོས་འཚོ་བའི་བེའུ་རྣམས་ཀྱི་ལྕེ་བ་དང་གཅིན་དག་ནི་དེ་ཞེས་བྱའོ་ཞེས་བྱ་བ་ནི། དུག་སྨན་ཞེས་བྱའོ་ཞེས་བྱ་བར་སྦྱར་རོ། །འོག་ནས་ཐལ་བ་དང་ས་ཞེས་འབྱུང་བ་དག་ཀྱང་དུག་སྨན་ཞེས་བྱའོ་ཞེས་བྱ་བར་སྦྱར་རོ། །དེ་དག་ནི་དུག་ལ་ཕན་ནོ་ཞེས་བྱ་བ་ནི། ལྕི་བ་དང་གཅིན་ལ་སོགས་པ་དུག་སྨན་ཞེས་བྱ་བ་ཇི་སྐད་བསྟན་པ་དེ་དག་ནི་དུག་ཟོས་པ་ལ་ཕན་ནོ། །ཐལ་བའོ་ཞེས་བྱ་བ་ནི། ཐལ་བའི་སྡེ་ཚན་སྟོན་ཏེ། འདི་ཡང་དུག་སྨན་ཞེས་བྱའོ། །དེ་ཉིད་བསྟན་པའི་ཕྱིར་ཤིང་ཀན་ཙན་དང་ཀཱ་པཱི་ཏ་ལ་དང༌། ཨ་ཤྭ་ད་ཐ་དང༌། ཨུ་དུམ་བཱ་ར་དང༌། ནྱ་གྲོ་དྷ་རྣམས་ཀྱིའོ་ཞེས་བྱ་བ་སྨྲས་ཏེ། དེ་རྣམས་ཀྱི་ཐལ་བའོ། །དེའོ་ཞེས་བྱ་བ་ནི། ཐལ་བ་དེ་དུག་ལ་ཕན་པའོ། །ས་ནི་སོར་བཞིའི་འོག་གིས་བཟང་ངོ་ཞེས་བྱ་བ་ནི། དུག་ལ་ཕན་པའི་ས་ནི་སར་བཞིའི་འོག་གིས་བཟང་སྟེ། རླུང་དང་ཉི་མ་ལ་སོགས་པས་མ་ཉམས་པའི་ཕྱིར་རོ། །འདིར་གཞུང་ནི་དགེ་སློང་དག །དུག་སྨན་ཞེས་བྱ་བ་ནི། ལྕི་བ་དང་གཅིན་དང་ཐལ་བ་དང་ས་སྟེ། དེ་ལ་ལྕི་བ་ནི་བེའུ་འབྲངས་ནས་རིང་པོ་མ་ལོན་པའི་མའི་ནུ་ཞོས་འཚོ་བ་གང་དག་ཡིན་པ་དག་གི་སྟེ། གཅིན་ཡང་དེ་དག་ཉིད་ཀྱིའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །དེ་དགེ་བསྙེན་དད་པ་ཅན་ལས་བླང་ངོ་ཞེས་བྱ་བ་ནི། དུག་སྨན་དེ་དགེ་བསྙེན་དད་པ་ཅན་ལས་བླང་བར་བྱ་བ་སྟེ། དགེ་བསྙེན་ལ་དད་པ་བྲི་ཡང་སྲིད་པས་དེས་ན་འདིར་དད་པ་ཅན་ཞེས་སྨོས་ཏེ། དུག་སྨན་དེ་དག་ནི་རྐྱེན་དུ་འབབ་པ་
མ་ཡིན་པའི་ཕྱིར་གསང་སྟེ་བྱ་བ་ཡིན་པར་རིགས་པས་དེའི་ཕྱིར་དགེ་བསྙེན་དད་པ་ཅན་ལས་བླང་བ་དང་བྱིན་ལེན་ཡང་དེས་བསྟབས་པར་གསུངས་སོ། །འོག་ནས་ཤ་དང་ནས་ཀྱི་སྦྱོར་བ་འབྱུང་བ་དག་ཀྱང་དེ་ཁོ་ན་བཞིན་དུ་བྱ་བར་རིག་པར་བྱའོ། །དེས་བྱིན་ལེན་བསྟབས་པར་བྱའོ་ཞེས་བྱ་བ་ནི། དགེ་བསྙེན་དད་པ་ཅན་དེས་དུག་སྨན་དེའི་བྱིན་ལེན་བསྟབས་པར་བྱ་བའོ། །ཤའི་བདག་ཉིད་ཀྱི་སྨན་དེ་ཡང་ངོ་ཞེས་བྱ་བ་ཡང༌། དགེ་བསྙེན་དད་པ་ཅན་དེས་བྱིན་ལེན་བསྟབས་པར་བྱ་བའོ། །གལ་ཏེ་དགེ་བསྙེན་དད་པ་ཅན་ཡང་མེད་ལ། ནད་པ་ཡང་ནད་ལ་བར་གྱུར་ན་དེའི་ཚེ་གཞན་ལས་ཀྱང་བླང་བ་དང་བྱིན་ལེན་བྱ་སྟེ། གསོ་བའི་དོན་ནི་མ་གཏོགས་སོ་ཞེས་གསུངས་པའི་ཆོག་ལས་རིག་པར་བྱའོ། །འདིར་གཞུང་ནི་བཙུན་པ་བཅོམ་ལྡན་འདས་ཀྱིས་དགེ་སློང་ས་རིལ་དུག་སྨན་སྦྱིན་པར་བྱའོ་ཞེས་གསུངས་ན། བཙུན་པ་གང་གིས་བསྩལ་བར་བགྱི། ཉེ་བ་འཁོར་དགེ་བསྙེན་དད་པ་ཅན་གྱིས་སོ། །བཙུན་པ་ཅི་ལགས་དེ་ཡང་བྱིན་ལེན་བགྱིད་དུ་སྩལ་ཏམ། ཉེ་བ་འཁོར་དེ་ཡང་བྱིན་ལེན་བྱེད་དུ་གཞུག་གོ །བཙུན་པ་སུས་བྱིན་ལེན་བགྱིད་དུ་སྩལ། ཉེ་བ་འཁོར་དགེ་བསྙེན་དད་པ་ཅན་གྱིས་སོ་ཞེས་གསུངས་པ་ཡིན་ནོ། །ཐམས་ཅད་ཤན་པའི་གནས་ནས་བླང་ངོ་ཞེས་བྱ་བ་ནི། ཤ་རློན་པ་འབའ་ཞིག་ཏུ་མ་ཟད་ཀྱི། ཤའི་སྨན་ཐམས་ཅད་དགེ་བསྙེན་དད་པ་ཅན་གྱིས་ཤན་པའི་གནས་ནས་བླང་བའོ། །དེ་ནི་བྱ་བ་ཉིད་ཡིན་ནོ་ཞེས་བྱ་བ་ནི། དགེ་བསྙེན་དད་པ་ཅན་གྱིས་ཤན་པའི་གནས་ནས་ཤའི་སྨན་བླང་བ་དེ་ནི་བྱ་བ་མ་ཡིན་པ་མ་ཡིན་གྱི། བྱ་བ་ཉིད་ཡིན་ཏེ་དེ་ལ་བྱ་བའི་ཆ་མ་ཡིན་པར་དོགས་པར་མི་བྱའོ། །གལ་ཏེ་དུས་མ་ཡིན་པར་ནས་ལས་བྱས་པའི་སྨན་དགོས་པ་ཉིད་ཡིན་ན་དེའི་དོན་དུ་བ་ལང་རྒན་པའི་ལྕི་བའི་ནས་ཀྱིས་ཆོག་པར་བྱའི་གཞན་བཟའ་བར་མི་བྱའོ་ཞེས་བྱ་བ་ནི། གལ་ཏེ་དུས་མ་ཡིན་པར་ནས་ལས་བྱས་པའི་སྨན་དགོས་པ་ཉིད་ཡིན་ན། ནས་ལས་བྱས་པའི་སྨན་དེའི་དོན་དུ་བ་ལང་རྒན་རྒོན་གྱི་ལྕི་བའི་ནང་ནས་བྱུང་བའི་ནས་ཀྱིས་ཆོག་པར་བྱའི། ནས་གཞན་དག་ནི་དུས་མ་ཡིན་པར་བཟའ་བར་མི་བྱའོ། །དེས་མཆོག་ལ་ནད་པ་ཡང་ནད་ལ་བར་འགྱུར་བ་ལྟ་ན་དེའི་འོག་ཏུ་གཟོད་ན་བ་དུས་སོ་ཞེས་གསུངས་པ་དང་སྦྱར་ཏེ། ནས་གཞན་ལས་
བྱས་པའི་སྨན་ཡང་བཟའ་བར་བྱའོ། །གལ་ཏེ་སྐྱོ་མ་ཚགས་ཀྱིས་བཙགས་ན་སྟེ་གཞན་ནི་མ་ཡིན་ནོ་ཞེས་བྱ་བ་ནི། དུས་མ་ཡིན་པར་ནས་ལས་བྱས་པའི་སྨན་དགོས་པ་ཉིད་ཡིན་ན་དེའི་དོན་དུ་པ་ལང་རྒན་པའི་ལྕི་བའི་ནས་ཀྱིས་ཆོག་པར་བྱ་བ་དེ་ཡང་ནས་དེ་ལས་བྱས་པའི་སྐྱོ་མ་གལ་ཏེ་ཚགས་ཀྱིས་བཙགས་ན་དེས་ཆོག་པར་བྱ་བ་ཡིན་གྱི། ཚགས་ཀྱིས་བཙགས་པ་དེ་ལས་གཞན་པ་ཚགས་ཀྱིས་མ་བཙགས་པ་དག་ནི་བཟའ་བར་མི་བྱའོ། །གལ་ཏེ་ཤའི་སྨན་དགོས་པ་ཉིད་ཡིན་ན་མཚའི་རྟུག་པའི་ཤེས་སོ་ཞེས་བྱ་བ་ནི། གལ་ཏེ་དུས་མ་ཡིན་པར་ཤ་ལས་བྱས་པའི་སྨན་དགོས་པ་ཉིད་ཡིན་ན་དེའི་དོན་དུ་མཚའི་རྟུག་པའི་ནང་ནས་བྱུང་བའི་ཤས་ཆོག་པར་བྱའི། ཤ་གཞན་དུས་མ་ཡིན་པར་བཟའ་བར་མི་བྱའོ། །དེས་མཆོག་ལ་ནད་པ་ཡང་ནད་ལ་བར་འགྱུར་བ་ལྟ་ན་དེའི་འོག་ཏུ་གཟོད་ཤ་གཞན་ལས་བྱས་པའི་སྨན་ཡང་བཟའ་བར་བྱའོ། །གལ་ཏེ་ཁུ་བ་ཚགས་ཀྱིས་བཙགས་ན་སྟེ་གཞན་ནི་མ་ཡིན་ནོ་ཞེས་བྱ་བ་ནི། དུས་མ་ཡིན་པར་ཤ་ལས་བྱས་པའི་སྨན་དགོས་པ་ཉིད་ཡིན་ན་དེའི་དོན་དུ་མཚའི་རྟུག་པའི་ནང་ནས་བྱུང་བའི་ཤས་ཆོག་བར་བྱ་བ་དེ་ཡང་ཤ་དེ་ལས་བྱས་པའི་ཁུ་བ་གལ་ཏེ་ཚགས་ཀྱིས་བཙགས་ན་དེས་ཆོག་པར་བྱ་བ་ཡིན་གྱི། ཚགས་ཀྱིས་བཙགས་པ་དེ་ལས་གཞན་པ་ཚགས་ཀྱིས་མ་བཙགས་པ་དག་ནི་བཟའ་བར་མི་བྱའོ། །གཞན་དང་བཅས་པ་ལ་དེ་ལྷག་པར་སྤྱད་པ་ཡོད་དོ་ཞེས་བྱ་བ་ལ། གཞན་དང་བཅས་པ་ཞེས་བྱ་བ་ནི། དུས་སུ་རུང་བ་དང་བཅས་པའི་ཐུན་ཚོད་དུ་རུང་བ་དང༌། ཐུན་ཚོད་དུ་རུང་པ་དང་བཅས་པའི་ཞག་བདུན་པ་དང༌། ཞག་བདུན་པ་དང་བཅས་པའི་འཚོ་བའི་བར་དུ་བཅད་བའོ། །དེ་ལྷག་པར་སྤྱད་པ་ཡོད་དོ་ཞེས་བྱ་བ་ནི། ཐུན་ཚོད་དུ་རུང་བའི་དེ་ལ་དུས་སུ་རུང་བའི་ཟས་དེ་ལྷག་པར་སྤྱད་པ་ཡོད་པ་དང༌། ཞག་བདུན་པ་ལ་ཐུན་ཚོད་དུ་རུང་བའི་ཟས་དེ་ལྷག་པར་སྤྱད་པ་ཡོད་པ་དང༌། འཚོ་བའི་བར་དུ་བཅང་བ་ལ་ཞག་བདུན་པའི་ཟས་དེ་ལྷག་པར་སྤྱད་པ་ཡོད་པ་ཉིད་ཡིན་པའོ། །དེའི་ཕྱིར་དེ་དང་བཅས་པ་ལ་ཆོ་ག་སྔ་མས་འཇུག་པར་བྱའོ་ཞེས་བྱ་བ་ནི། གང་གི་ཕྱིར་གཞན་དང་བཅས་པ་ལ་དེ་ལྷག་པར་སྤྱད་པ་ཡོད་པ་དེའི་ཕྱིར་གཞན་དེ་དང་བཅས་པ་ཕྱི་མ་ལ་གཞན་གྱི་ཆོག་སྔ་མས་འཇུག་པར་བྱའོ་ཞེས་བྱ་
བར་སྦྱར་རོ། །དེ་དང་བཅས་ལ་ཞེས་བྱ་བ་ནི། དུས་སུ་རུང་བ་དེ་དང་བཅས་པའི་ཐུན་ཚོད་དུ་རུང་བ་དང༌། ཐུན་ཚོད་དུ་རུང་བ་དེ་དང་བཅས་པའི་ཞག་བདུན་པ་དང༌། ཞག་བདུན་པ་དེ་དང་བཅས་པའི་འཚོ་བའི་བར་དུ་བཅང་བ་ལའོ། །ཆོ་ག་སྔ་མས་འཇུག་པར་བྱའོ་ཞེས་བྱ་བ་ནི། ཐུན་ཚད་དུ་རུང་བ་ལ་ནི་དུས་སུ་རུང་བའི་ཆོ་གས་འཇུག་པར་བྱ་ཞིང་དུས་སུ་བཟའ་བར་བྱའི། ཐུན་ཚོད་དུ་བཟའ་བར་མི་བྱ་བ་དང༌། ཞག་བདུན་པ་ལ་ནི་ཐུན་ཚོད་དུ་རུང་བའི་ཆོ་གས་འཇུག་པར་བྱ་ཞིང༌། ཐུན་ཚོད་དུ་བཟའ་བར་བྱའི། ཞག་བདུན་པར་བཟའ་བར་མི་བྱ་བ་དང༌། འཚོ་བའི་བར་དུ་བཅད་བ་ལ་ནི་ཞག་བདུན་པའི་ཆོ་གས་འཇུག་པར་བྱ་ཞིང་ཞག་བདུན་པར་བཟའ་བར་བྱའི། འཚོ་བའི་བར་དུ་བཅད་བར་བཟའ་བར་མི་བྱ་བའོ། །འདིར་གཞུང་ནི་ཐུན་ཚོད་དུ་རུང་བ་དང༌། ཞག་བདུན་པ་དང༌། འཚོ་བའི་བར་དུ་བཅང་བ་དུས་སུ་རུང་བ་དང་འདྲེས་པ་དག་ནི་དུས་ཁོ་ནར་ཡོངས་སུ་ལོངས་སྤྱད་པར་བྱའི་དུས་མ་ཡིན་པར་ཡོངས་སུ་ལོངས་སྤྱད་པར་མི་བྱའོ། །ཞག་བདུན་པ་དང་འཚོ་བའི་བར་དུ་བཅང་བ་ཐུན་ཚོད་དུ་རུང་བ་དང་འདྲེས་པ་དག་ནི་ཐུན་ཚོད་ཁོ་ནར་ཡོངས་སུ་ལོངས་སྤྱད་པར་བྱའི། ཐུན་ཚོད་ཀྱི་མཐའ་ལས་ཡོལ་བར་ཡོངས་སུ་ལོངས་སྤྱད་པར་མི་བྱའོ། །འཚོ་བའི་བར་དུ་བཅང་བ་ཞག་བདུན་པ་དང་འདྲེས་པ་ནི་ཞག་བདུན་པ་ཁོ་ནར་ཡོངས་སུ་ལོངས་སྤྱད་པར་བྱའི། འཚོ་བའི་བར་དུ་བཅང་བ་ཡོངས་སུ་ལོངས་སྤྱད་པར་མི་བྱའོ་ཞེས་གསུངས་པ་ཡིན་ནོ། །རང་བཞིན་གཞན་དུ་མ་གྱུར་པ་ནི་སྔོན་གྱི་རང་བཞིན་མ་ཡིན་པ་ཉིད་མ་ཡིན་ནོ་ཞེས་བྱ་བ་ནི། དེ་སྨན་གཞན་དང་ལྷན་ཅིག་འདྲེས་ཀྱང་རང་གི་ངོ་བོ་ཉིད་ཀྱི་རྣམ་པ་ལས་གཞན་དུ་མ་གྱུར་པ་ནི་སྔོན་གྱི་རང་གི་ངོ་བོ་ཉིད་མ་ཡིན་པ་མ་ཡིན་ཏེ། སྔོན་གྱི་རང་གི་ངོ་བོ་ཉིད་ཁོ་ན་ཡིན་ནོ་ཞེས་བྱ་བའི་ཐ་ཚིག་གོ །དེའི་ཕྱིར་གཞན་དང་མ་འདྲེས་པ་ལ་ནི་རང་གི་ཆོ་གས་རུང་བར་བྱ་བ་མི་འགྲུབ་པ་མ་ཡིན་ནོ་ཞེས་བྱ་བ་ནི། གང་གི་ཕྱིར་རང་བཞིན་གཞན་དུ་མ་གྱུར་པ་ནི་སྔོན་གྱི་རང་བཞིན་མ་ཡིན་པ་ཉིད་མ་ཡིན་པ་དེའི་ཕྱིར་སྨན་དེ་སྨན་གཞན་དང་རེག་ཅིང་ཕྲད་པར་གྱུར་དུ་ཟིན་ཀྱང་གཞན་དང་མ་འདྲེས་ཤིང་རང་བཞིན་ཐ་དད་པར་གནས་པ་ལ་ནི་རང་གི་ཆོ་གས་རུང་བར་བྱ་བ་མི་འགྲུབ་པ་མ་ཡིན་ཏེ། འགྲུབ་པ་ཁོ་ན་ཡིན་ནོ། །འདི་
སྐད་བསྟན་ཏེ། དུས་སུ་རུང་པའི་ནང་ན་འདུག་པའི་ཐུན་ཚོད་དུ་རུང་བ་དུས་སུ་རུང་བ་དང་མ་འདྲེས་པ་ནི་ཐུན་ཚོད་དུ་རུང་བ་ཉིད་དུ་ཡོངས་སུ་ལོངས་སྤྱད་དུ་རུང་ལ། དེ་བཞིན་དུ་ཟུན་ཚོད་དུ་རུང་བའི་ནད་ན་འདུག་པའི་ཞག་བདུན་པ་ཐུན་ཚོད་དུ་རུང་བ་དང་མ་འདྲེས་པ་ནི་ཞག་བདུན་པ་ཉིད་དུ་ཡོངས་སུ་ལོངས་སྤྱོད་པར་རུང་བ་དང༌། ཞག་བདུན་པའི་ནང་ན་འདུག་པའི་འཚོ་བའི་བར་དུ་བཅད་བཞག་བདུན་པ་དང་མ་འདྲེས་པ་ནི་འཚོ་བའི་བར་དུ་བཅང་བ་ཉིད་དུ་ཡོངས་སུ་ལོངས་སྤྱད་པར་རུང་སྟེ། རང་རང་གི་ཆོ་གས་འཇུག་པར་བྱར་རུང་ངོ་ཞེས་བྱ་བའི་ཐ་ཚིག་གོ །བུ་རམ་བསྒོང་བའི་ཕྱིར་འབྲས་ཕྱེའི་ནང་དུ་གཞག་པ་ནི་བཀྲུ་བས་རང་ཁོ་ནའི་གྲངས་ཉིད་དུ་འགྲུབ་པོ་ཞེས་བྱ་བ་ནི། བུ་རམ་གོང་བུར་བྱ་བའི་ཕྱིར་འབྲས་ཕྱེའི་ནང་དུ་གཞག་སྟེ་གོང་བུར་གྱུར་པ་ན་འབྲས་ཕྱེའི་བག་ཆགས་པ་ནི་ཆུས་བཀྲུས་པས་ཞག་བདུན་པ་ཞེས་བྱ་བ་རང་ཁོ་ནའི་གྲངས་ཉིད་དུ་འགྲུབ་པར་འགྱུར་བའོ། །འགོར་གྱི་གཟུངས་ནི་བུ་རམ་ཉིད་དུ་ཤེས་པར་བྱའོ་ཞེས་བྱ་བ་ནི། གལ་ཏེ་བུ་རམ་བསྐོལ་བའི་དུས་ན་འགོར་དང་ལིང་ཉིད་དུ་མི་བཏུབ་པ་འགོར་དང་ལིང་ཉིད་དུ་བྱ་བའི་ཕྱིར་འབྲས་ཀྱི་བག་ཕྱེ་ལ་སོགས་པ་ལྡུགས་པ་དེ་ནི་བུ་རམ་ཉིད་ཡིན་པས་ཞག་བདུན་པ་ཉིད་ཡིན་གྱི། དུས་སུ་རུང་བ་ཉིད་ནི་མ་ཡིན་པར་ཤེས་པར་བྱའོ། །བྱིན་གྱིས་བརླབ་པ་ལ་ནི་སོག་འཇོག་མི་འབྱུང་ངོ་ཞེས་བྱ་བ་ནི། གལ་ཏེ་སྨན་ཞག་བདུན་པ་དང་འཚོའི་བར་དུ་བཅད་བར་བྱིན་གྱིས་བརླབས་པར་གྱུར་ན་དེ་ལ་དུས་དེ་ཙམ་གྱིས་སོག་འཇོག་གི་ཉེས་པ་འབྱུང་བར་མི་འགྱུར་བར། །འདིར་གཞུང་ནི་བཙུན་པ་པྲེ་འཚལ་བས་བྱིན་ལེན་བགྱིས་པ་དང༌། བྱིན་གྱིས་བརླབས་པ་ཡོངས་སུ་ལོངས་སྤྱད་དུ་རུང་ངམ། ཉེ་བ་འཁོར་རུང་ངོ་ཞེས་གསུངས་པ་ཡིན་ནོ། །བྲོ་འཚལ་བ་ཞེས་སྨོས་པས་ནི་ན་བ་ལ་རུང་བ་ཉིད་ཡིན་པར་བསྟན་ཏོ། །ནད་པའི་ཆེད་དུ་ཡོངས་སུ་ལོངས་སྤྱོད་པའི་ཕྱིར་རང་གིས་དུས་ཀྱི་མཐའི་བར་དུ་བྱིན་གྱིས་བརླབ་བར་བྱའོ་ཞེས་བྱ་བ་ནི། ཐུན་ཚོད་དུ་རུང་བ་དང༌། ཞག་བདུན་པ་དང༌། འཚོ་བའི་བར་དུ་བཅང་བ་དག་རང་རང་གི་དུས་ཀྱི་མཐའ་ཚུན་ཆད་དུ་བྱིན་གྱིས་བརླབ་པར་བྱ་བའོ། །དུས་སུ་རུང་བ་ནི་བྱིན་གྱིས་བརླབ་མི་དགོས་ཏེ་དེ་བྱིན་གྱིས་བརླབས་པ་དོན་མེད་པའི་ཕྱིར་
རོ། །དེ་དག་གི་སྔགས་ནི། ཚེ་དང་ལྡན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བའི་སྨན་ཐུན་ཚོད་དུ་རུང་བ་འདི་དག་བདག་དང་ཚངས་པ་མཚུངས་པར་སྤྱོད་པ་རྣམས་ཀྱིར་བགྱི་བར་ཐུན་ཚོད་དུ་རུང་བར་བྱིན་གྱིས་བརླབ་པོ། །ལན་གསུམ་དུ་བཟླས། ཐབས་ཡིན་ནོ། །ལེགས་སོ་ཞེས་གསུངས་པ་དང༌། ཞག་བདུན་པ་དང༌། འཚོ་བའི་བར་དུ་བཅང་བ་དག་ལ་ཡང་དེ་བཞིན་ནོ་ཞེས་གསུངས་པ་ཡིན་ནོ། །དུས་གང་གི་ཚེ་བྱིན་གྱིས་བརླབ་པར་བྱ་ཞེ་ན། དེའི་ཕྱིར་ཟས་སྔ་མའི་ཚེའོ་ཞེས་བྱ་བ་སྨྲས་ཏེ། གུང་ཚིགས་ཀྱི་མདུན་རོལ་དུ་ཟས་བཟའ་བ་ཐམས་ཅད་ཀྱི་དུས་གང་ཡིན་པ་དེ་ནི་ཟས་སྔ་མ་ལི་དུས་ཏེ་ཆོ་གའི་གཞི་ཞེས་བྱ་བ་ཡིན་པས་དུས་དེར་བྱིན་གྱིས་བརླབ་པར་བྱའོ། །ཇི་ལྟར་ཞེ་ན། དེའི་ཕྱིར་བྱིན་ལེན་བྱས་ཏེའོ་ཞེས་བྱ་བ་སྨྲས་ཏེ། བྱིན་ལེན་བྱས་ཏེ་བྱིན་གྱིས་བརླབ་པར་བྱའོ། །བྱིན་ལེན་མ་བྱས་པ་དང་སོག་འཇོག་དང་འདྲེས་པ་བསྲུང་བར་བྱ་བ་ཡིན་ནོ་ཞེས་བྱ་བ་ནི། བྱིན་གྱིས་རློབ་པའི་ཆེན་བྱིན་ལེན་མ་བྱས་པར་བྱིན་གྱིས་བརླབ་ཏུ་ཡང་མི་རུང་ལ། དྲི་མ་ལ་སོགས་པ་དང་འབགས་པས་སོག་འཇོག་དང་འདྲེས་པ་ལ་བྱིན་གྱིས་བརླབ་ཏུ་ཡང་མི་རུང་བས་དེའི་ཕྱིར་དེ་གཉིས་བསྲུང་བར་བྱ་བའོ། །དེའི་ཕྱིར་ལག་པ་གཉིས་བསྙལ་ནས་སོ་ཞེས་བྱ་བ་ནི། གང་གི་ཕྱིར་བྱིན་ལེན་མ་བྱས་པ་དང་སོག་འཇོག་དང་འདྲེས་པ་བསྲུང་བར་བྱ་བ་ཡིན་པ་དེའི་ཕྱིར་ལག་པ་གཉིས་བསྙལ་ནས་བྱིན་ལེན་བྱས་ཏེ་བྱིན་གྱིས་བརླབ་པར་བྱ་བའོ། །དེས་ན་བྱིན་ལེན་མ་བྱས་པ་དང་སོག་འཇོག་དང་འདྲེས་པ་མེད་པར་འགྱུར་རོ། །ལག་ཉར་བླངས་པ་དང་སོག་འཇོག་བྱས་པ་དང་བྱིན་ལེན་མ་བྱས་པ་དང་ནང་དུ་ཞག་ལོན་པ་དང་ནང་དུ་བཙོས་པ་དང་དགེ་སློང་གིས་བཙོས་པ་དག་ལ་བྱིན་གྱིས་བརླབ་པ་མི་འཆགས་སོ་ཞེས་བྱ་བ་ལ། འདིར་གཞུང་ནི་ཞུ་བ་ལས། བཙུན་པ་དུས་སུ་རུང་བ་དང་ཐུན་ཚོད་དུ་རུང་བ་དང་ཞག་བདུན་པ་དང་འཚོའི་བར་དུ་བཅང་བའི་སྨན་གང་དག་སུག་ཉར་བླངས་པ་དང་བྱིན་ལེན་མ་བགྱིས་པ་དང་ནང་དུ་དགུང་ལོན་པ་དང་ནང་དུ་བསྒྲལ་བ་དང་རང་གིས་བསྒྲལ་བ་དང་དགེ་སློང་གིས་བསྒྲལ་བ་དེ་དག་ཡོངས་སུ་ལོངས་སྤྱོད་པར་རུང་ངམ། ཉེ་བ་འཁོར་མི་རུང་ངོ་ཞེས་གསུངས་པ་ཡིན་ནོ། །
རོ་དང་སླ་བ་ཉིད་ཡོངས་སུ་གྱུར་ན་སོག་འཇོག་བྱས་པ་ཉིད་ཡིན་ནོ་ཞེས་བྱ་བ་ནི། བྱིན་གྱིས་བརླབས་པའི་བཏུང་བ་རྒུན་ཆུ་ལ་སོགས་པའི་རོ་མྱོས་པར་མི་འགྱུར་བ་ཉིད་ལ་མྱོས་པར་འགྱུར་པ་ཉིད་དུ་ཡོངས་སུ་གྱུར་པ་དང༌། སླ་བ་བཞིན་སྣང་བ་ལས་བཞིན་མི་སྣང་བ་ཉིད་དུ་ཡོངས་སུ་གྱུར་ན། དེའི་ཚེ་སོག་འཇོག་བྱས་པ་ཉིད་ཡིན་ཏེ། དེ་ཡང་བྱིན་ལེན་བྱས་ཤིང་བྱིན་གྱིས་བརླབས་པ་ལ་སོག་འཇོག་བྱས་པར་འགྱུར་གྱི་བྱིན་ལེན་མ་བྱས་པ་ལ་ནི་མི་འགྱུར་ཏེ། བྱིན་ལེན་མ་བྱས་པ་ལ་སོག་འཇོག་མི་སྲིད་པའི་ཕྱིར་རོ། །གལ་ཏེ་རོ་དང་སླ་བ་གཉི་ག་ཡོངས་སུ་གྱུར་ན་ཡང་བཏུང་བར་མི་བྱ་བ་ཉིད་ཡིན་ནོ། །རོ་འབའ་ཞིག་ཡོངས་སུ་གྱུར་ན་ཡང་བཏུང་བར་མི་བྱ་བ་ཉིད་ཡིན་ནོ། །ཇི་སྟེ་སླ་བ་འབའ་ཞིག་ཡོངས་སུ་གྱུར་པ་ཡང་བཏུང་བར་མི་བྱ་བ་ཉིད་ཡིན་ཏེ། བྱིན་ལེན་མ་བྱས་པའི་ཕྱིར་རོ། །དེ་བས་ན་བཏུང་བ་བྱིན་ལེན་བྱས་ཤིང་བྱིན་གྱིས་བརླབས་པ་རེ་དང་སླ་བ་ཉིད་ཡོངས་སུ་གྱུར་ན་རང་གི་དུས་ཀྱི་མཐའི་མདུན་རོལ་དུ་ཡང་སོག་འཇོག་བྱས་པ་ཉིད་དུ་འགྱུར་ཏེ། འདིར་དོན་ནི་དེ་ཡིན་ནོ། །འདི་གཉིས་ཀྱིས་ནི་ངོ་བོ་ཉིད་གྱུར་པར་བསྟན་ཏེ། དེས་ན་དེ་གཉིས་ལས་གཅིག་ཏུ་གྱུར་ན་ཡང་སོག་འཇོག་བྱས་པ་ཉིད་ཡིན་ནོ། །འདིར་གཞུང་ནི་སིལ་བུའི་བུ་རམ་གྱི་བཏུང་བའི་སྐབས་ནས། བཙུན་པ་བཏུང་བ་བཙགས་པ་དགུང་བདུན་པར་བྱིན་གྱིས་བརླབ་ཏུ་རུང་ངམ། ཉེ་བ་འཁོར་རུང་ངོ༌། །བཙུན་པ་ཡུན་ཇི་སྲིད་དུ་གཞག་པར་འཚལ་བར་བགྱི། ཉེ་བ་འཁོར་ཤིན་ཏུ་སླ་ཞིང་མི་སྐྱུར་ལ་རང་གི་ངོ་བོ་ཉིད་མི་སྤོང་བ་དེ་སྲིད་དུའོ་ཞེས་གསུངས་པ་ཡིན་ནོ།། བྱིན་གྱིས་བརླབས་པ་འོག་མ་དང་ལྷན་ཅིག་ཡོངས་སུ་ལོངས་སྤྱད་པར་མི་བྱའོ་ཞེས་བྱ་བ་ནི། ཐུན་ཚོད་དུ་རུང་བ་བྱིན་གྱིས་བརླབས་པ་དུས་སུ་རུང་བ་དང་ལྷན་ཅིག་ཡོངས་སུ་ལོངས་སྤྱད་པར་མི་བྱ་བ་དང༌། ཞག་བདུན་པར་བྱིན་གྱིས་བརླབས་པ་དུས་སུ་རུང་བ་དང་ཐུན་ཚོད་དུ་རུང་བ་དག་དང་ལྷན་ཅིག་ཡོངས་སུ་ལོངས་སྤྱད་པར་མི་བྱ་བ་དང༌། འཚོ་བའི་བར་དུ་བཅང་བར་བྱིན་གྱིས་བརླབས་པ་དུས་སུ་རུང་བ་དང་ཐུན་ཚོད་དུ་རུང་བ་དང་ཞག་བདུན་པ་རྣམས་དང་ལྷན་ཅིག་ཡོངས་སུ་ལོངས་སྤྱད་པར་མི་བྱ་སྟེ། འདིར་བྱེ་བྲག་ཏུ་མ་བཅད་པས་བྱིན་གྱིས་བརླབས་པ་དང་
སོག་འཇོག་གི་དུས་ལམ་བབ་པ་དང༌། ལྷན་ཅིག་ཅེས་བྱ་བར་ཤེས་པར་བྱའོ། །འདིར་གཞུང་ནི་མཽད་གལ་གྱི་བུ། དེ་ལ་ཐུན་ཚོད་དུ་རུང་བ་གང་ཡིན་པ་དང༌། ཞག་བདུན་པ་གང་ཡིན་པ་དང༌། འཚོའི་བར་དུ་བཅད་པ་གང་ཡིན་པ་དེ་དུས་སུ་རུང་བ་དང་འདྲེས་ན་ཡོངས་སུ་ལོངས་སྤྱད་པར་མི་བྱའོ། །ཞག་བདུན་པ་གང་ཡིན་པ་དང༌། འཚོའི་བར་དུ་བཅད་པ་གང་ཡིན་པ་དེ་ཐུན་ཚོད་དུ་རུང་བ་དང་འདྲེས་ན་ཡང་ཡོངས་སུ་ལོངས་སྤྱད་པར་མི་བྱའོ། །འཚོའི་བར་དུ་བཅད་པ་གང་ཡིན་པ་དེ་ཞག་བདུན་པ་དང་འདྲེས་ན་ཡང་ཡོངས་སུ་ལོངས་སྤྱད་པར་མི་བྱའོ་ཞེས་གསུངས་པ་ཡིན་ནོ། །སྨན་གྱི་གོ་རིམས་ནི་དཔེའོ་ཞེས་གསུངས་པ་ནི། སྔར་དེ་ནི་རྣམ་པ་བཞིའོ་ཞེས་སྨོས་པས་དུས་སུ་རུང་བ་དང་ཐུན་ཚོད་དུ་རུང་བ་དང༌། ཞག་བདུན་པ་དང་འཚོའི་བར་དུ་བཅང་བ་ཞེས་སྨན་རྣམ་པ་བཞི་སྨོས་པའི་གོ་རིམས་དེ་ནི་དཔེ་ཙམ་དུ་ཟད་དེ། དེས་ན་འདིས་མིག་སྨན་ལ་སོགས་པ་དག་ཀྱང་འཕངས་པ་ཉིད་ཡིན་ནོ། །དེའི་ཕྱིར་མིག་སྨན་བསྟེན་པར་བྱའོ་ཞེས་བྱ་བ་སྨྲས་ཏེ། མིག་སྨན་བསྟེན་དུ་རུང་བའོ། །སྨན་མ་ཡིན་པའི་དོན་དུ་མི་བྱའོ་ཞེས་བྱ་བ་ལ། སྒེག་པའི་དོན་ནི་སྨན་མ་ཡིན་པའི་དོན་ཏེ། དེའི་དོན་དུ་མིག་སྨན་བསྟེན་པར་མི་བྱ་བའོ། །དེའི་སྣོད་རིགས་པའོ་ཞེས་བྱ་བ་ནི། མིག་སྨན་དེའི་སྣོད་རུང་བ་ཉེ་བར་གཞག་པར་བྱ་བའོ། །གང་གིས་སྣོད་ཅི་ཡིན་ཞེ་ན། དེའི་ཕྱིར་མིག་སྨན་སྐྱེར་ཁཎྜའི་ནི་ཟ་མ་ཏོག་གོ་ཞེས་བྱ་བ་སྨྲས་སོ། །མིག་སྨན་རི་ལུའི་ནི་སྒྱེའུའོ་ཞེས་བྱ་བ་ནི། དེའི་སྣོད་སྒྱེའུའོ། །མིག་སྨན་དུ་བ་དང༌། སྦྲུས་པ་དང་ཕྱི་མ་རྣམས་ཀྱི་ནི་དོང་བུའོ་ཞེས་བྱ་བ་ནི། མིག་སྨན་དུ་བ་དང་མིག་སྨན་སྦྲུས་པ་དང་མིག་སྨན་ཕྱེ་མ་རྣམས་ཀྱི་སྣོད་ནི་སྨྱིག་མ་ལ་སོགས་པའི་དོང་བུའོ། །ཐུར་མ་བཅང་བར་བྱའོ་ཞེས་བྱ་བ་ནི། མིག་བསྐུ་བའི་ཕྱིར་རོ། །ཟངས་མ་དང་ལྕགས་དག་གིས་བཟང་ངོ་ཞེས་བྱ་བ་ནི། ཐུར་མའོ། །ཅི་དེ་གཉིས་ཐམས་ཅད་ཀྱི་བཟང་ངམ་ཞེ་ན། དེའི་ཕྱིར་རང་འཁྲུངས་དག་གོ་ཞེས་བྱ་བ་སྨྲས་ཏེ། རང་བཞིན་གྱིས་གྲུབ་པ་དག་གམ་བཞུས་ཏེ་བླུགས་པ་དག་གོ །ནད་པས་སྨན་གཞུག་པའི་ཕྱིར་མཆན་ཁུག་བཅང་པར་བྱའོ་ཞེས་བྱ་བ་ལ། མཆན་ཁུག་ཅེས་བྱ་བ་ནི། ལྕུག་མ་ལ་སོགས་པ་ལས་བྱས་པའི་སྨན་གྱི་སྣོད་
ཀོ་ལྤགས་ཀྱིས་བཅིངས་པ་རིམ་པ་རེ་རེ་ཡང་སྨན་ཐ་དད་པར་གཞུག་པར་བྱ་བའི་ཕྱིར་མིག་མང་པོ་ཡོད་ཅིང་ཁ་བཅད་དུ་རུང་བའོ། །དེར་མ་ཤོང་པ་ཉིད་ཡིན་ན་བྲུངས་སམ་ཐུམ་པོ་བྱས་ཏེ་བཅེར་རོ་ཞེས་བྱ་བ་ནི། མཆན་ཁུག་དེར་སྨན་མངས་ལ་སྣོད་ཆུངས་པས་མི་ཤོང་པ་ཉིད་ཡིན་ན་དེའི་ཚེ་སྨན་གྱི་ཐུམ་པོ་དག་བྲུངས་སུ་བྱས་ཏེ། གཅིག་གི་སྟེང་དུ་གཅིག་བཅེར་བར་བྱ་བའམ། ཕྱི་ཐུམ་གཅིག་ཏུ་བྱས་ཏེ་གཞག་པར་བྱའོ་ཞེས་བྱ་བའི་ཐ་ཚིག་གོ །བཅུག་པ་མི་འདྲུལ་བར་བྱ་བ་ཕྱིར་དུས་སུ་བསྐམ་མོ་ཞེས་བྱ་བ་ནི། སྨན་མཚན་ཁུག་ཏུ་བཅུག་པ་རླན་གྱིས་མི་འདྲུལ་བར་བྱ་བའི་ཕྱིར་དུས་དུས་སུ་བསྐམ་པར་བྱ་བའོ། །གང་དུ་བསྐམ་པར་བྱ་ཞེ་ན་དེའི་ཕྱིར་ཉི་གྲིབ་ལའོ་ཞེས་བྱ་བ་སྨས་ཏེ། ཉི་མ་དང་གྲིབ་མ་འདྲེས་མའི་ནང་དུ་བསྐམ་པར་བྱའོ། །བསྐམས་ན་མཐུ་འབྲིའོ་ཞེས་བྱ་བ་ནི། ཉི་མ་ཚ་བ་འབའ་ཞིག་ལ་བསྐམས་ན་སྨན་རྣམས་ཀྱི་མཐུ་འབྲི་བར་འགྱུར་བའོ། །འདིས་ནི་སྨན་ཐམས་ཅད་བསྐམ་པ་བསྟན་པ་ཡིན་གྱི་མཆན་ཁུག་གི་ཡུལ་འབའ་ཞིག་ཏུ་མ་ཟད་དོ། །མ་རུང་བར་འགྱུར་བའི་རྒྱུ་བྱུང་ན་རང་གིས་དྲུབ་པར་བྱའོ་ཞེས་བྱ་བ་ནི། རླུང་དང་ཆར་པ་ལ་སོགས་པ་སྨན་མ་རུང་བར་འགྱུར་བའི་རྒྱུ་བྱུང་ན་དགེ་སློང་རང་གིས་བསྡུ་ཞིང་དྲུབ་པར་བྱ་བའོ། །ཅི་གནས་སྐབས་ཐམས་ཅད་དུ་འམ་ཞེ་ན་དེའི་ཕྱིར། བསྙེན་པར་མ་རྫོགས་པ་མེད་ནའོ་ཞེས་བྱ་བ་སྨྲས་སོ། །སྨན་ཕོར་བཅང་བར་བྱའོ་ཞེས་བྱ་བ་ནི། ནད་པས་ཞེས་བྱ་བར་སྦྱར་རོ། །སྨན་གྱི་ནལ་ཟེ་ཡང་ངོ་ཞེས་བྱ་བ་ཡང༌། ནད་པས་བཅང་བར་བྱའོ་ཞེས་བྱ་བར་སྦྱར་རོ། །འགྲོར་མི་བཏུབ་པས་ཕུལ་བའི་བཏུང་ཕོར་རོ་ཞེས་བྱ་བ་ཡང༌། བཅང་ངོ་ཞེས་བྱ་བར་སྦྱར་རོ། །འགྲོར་མི་བཏུབ་པ་ཞེས་བྱ་བ་ལ། འགྲོ་བ་ཞེས་བྱ་བ་ནི་མིད་པའི་ཚེ་དང་དུ་འགྲོ་བའོ། །མི་བཏུང་པ་ཞེས་བྱ་བ་ནི། མིང་པའི་ཚེ་དང་དུ་འགྲོར་མི་བཏུབ་ཅིང་མགུལ་བར་ཐོགས་ཤིང་བརྣག་པ་སྟེ། གང་གིས་དེར་འགྲོར་མི་བཏུབ་པ་མགུལ་བའི་ནད་ཅེས་བྱ་བའི་ཐ་ཚིག་གོ །ཕུལ་བའི་བཏུང་ཕོར་ཞེས་བྱ་བ་ནི། གང་གིས་ཟས་ཟོས་པ་མགུལ་པར་ཐོགས་ཤིང་ཕུལ་བའི་ཕྱིར་ཕྱི་ནས་སྐོམ་འཐུང་བར་བྱེད་པའི་སྣོད་ཆུང་ངུ་མ་ལ་བྱའོ། །འདིར་གཞུང་ནི་གནས་བརྟན་ཁྱོད་ཅི་བསྙུང༌། ཚེ་དང་ལྡན་པ་འགྲོར་མི་བཏུབ་པའོ། །ཁྱོད་ཀྱིས་སྔོན་
ཅི་བགྱིས། ཕུལ་བའི་བཏུང་ཕོར་མ་བཅངས་སོ། །དེ་ཅིའི་ཕྱིར་མི་བཅང༌། བཅོམ་ལྡན་འདས་ཀྱིས་མ་གནང་ངོ་ཞེས་ཟེར་བའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་བ་དང༌། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། ཕུལ་བའི་བཏུང་ཕོར་བཅང་བར་རྗེས་སུ་གནང་ངོ་ཞེས་གསུངས་པ་ཡིན་ནོ། །འདིར་ནི་གླེང་གཞིའི་དབང་གིས་འགྲོར་མི་བཏུབ་པས་ཞེས་མདོར་བསྡུ་བ་བྱས་སོ། །ནད་པས་ལན་ཚྭ་བཅང་བར་བྱའོ་ཞེས་བྱ་བ་ནི། འགྲོར་མི་བཏུབ་པས་ཞེས་བྱ་བ་ལ་བསྩལ་བའི་ཕྱིར་འདིར་ནད་པས་ཞེས་བྱ་བ་སྨྲས་སོ། །དེའི་སྣོད་ནི་རྭའི་སྦུབས་བཟང་ངོ་ཞེས་བྱ་བ་ནི། ལན་ཚྭ་དེའིའོ། །རྭ་ཇི་ལྟ་བུ་བཟང་ཞེ་ན་དེའི་ཕྱིར། ལྕི་བས་ཀུན་ནས་བསྐོལ་བའོ་ཞེས་བྱ་བ་སྨྲས་ཏེ། དེ་ནི་སྣུམ་དང་དྲི་མའི་དྲི་ང་བ་སྤང་བའི་ཕྱིར་རོ། །དེ་མེད་པའི་ཉེས་པ་མི་འབྱུང་བར་བྱ་བའི་ཕྱིར་ཁ་དག་པ་གཞུག་གོ་ཞེས་བྱ་བ་ནི། ཁ་གབ་མེད་པའི་ཉེས་པ་མི་འགྱུར་བར་བྱ་བའི་ཕྱིར་སྟེ། རྡུལ་ཞུགས་པས་རྫས་མ་རུང་བར་འགྱུར་བ་ལ་སོགས་པའི་ཉེས་པ་སྤང་བའི་ཕྱིར་ཞེས་བྱ་བའི་ཐ་ཚིག་གོ །དེ་ཅི་ལས་བྱས་པ་ཞེ་ན་དེའི་ཕྱིར་དེ་ཉིད་ལས་བྱས་པའོ་ཞེས་བྱ་བ་སྨྲས་ཏེ། རྭ་ལྕི་བས་ཀུན་ནས་བསྐོལ་བ་ལས་བྱས་པའི་ཁ་གབ་གཞུག་པའོ། །དྲིས་བསྒོས་པའི་སའོ་ཞེས་བྱ་བ་ནི། ནད་པས་བཅང་ངོ་ཞེས་བྱ་བར་སྦྱར་ཏེ། དེ་ནི་ལག་པ་བསྙལ་བ་ལ་སོགས་པའི་ཆེད་དུ་དགོས་པའི་ཕྱིར་རོ། །ཆུ་བསྲོ་བའི་ཕྱིར་ལྕགས་ཀྱི་གར་བུའོ་ཞེས་བྱ་བ་ཡང༌། ནད་པས་བཅང་ངོ་ཞེས་བྱ་བར་སྦྱར་རོ། །ཐམས་ཅད་ཀྱིས་སྤྱད་པར་བྱའོ་ཞེས་བྱ་བ་ནི། ནད་པས་བཅང་བར་བྱ་བ་དེ་དག་ནི་ནད་པ་འབའ་ཞིག་གིས་སྤྱད་པར་མ་ཟད་ཀྱི། ན་བ་དང་མི་ན་བ་ཐམས་ཅད་ཀྱིས་སྤྱད་དུ་རུང་བའོ། །འདིར་གཞུང་ནི་བཅོམ་ལྡན་འདས་ཀྱིས་བསྲོ་གང་བྱའོ་ཞེས་གསུངས་པ་ཡིན་ནོ། །གནས་པར་བྱ་བའི་དགེ་སློང་དག་ཆུ་དྲོན་བསྐོལ་བས་ངལ་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། ལྕགས་ཀྱི་གར་པུ་བསྲེག་པར་བྱ་ཞིང་ལྕགས་ཐག་གིས་གདགས་པར་བྱའོ་ཞེས་གསུངས་པ་ཡིན་ནོ། །དེ་ལྟ་བས་ན་དགེ་འདུན་གྱིས་ཀྱང་བཅང་དུ་རུང་ངོ༌། །བསྲེགས་པ་གདགས་པའི་ཕྱིར་དེ་ལ་ལྕགས་ཐག་གདགས་སོ་ཞེས་བྱ་བ་ནི། ལྕགས་ཀྱི་གར་བུ་ད་
ལའོ། །ཚ་བའི་དུས་ནས་གཤེར་པས་དེ་མནན་ཏོ་ཞེས་བྱ་བ་ནི། ལྕགས་ཀྱི་གར་བུ་བསྲེག་པའི་ཚེ་ལྕགས་ཐག་ཚ་བར་གྱུར་པའི་དུས་ནས་གཤེར་པས་ལྕགས་ཐག་དེ་མནན་ཏོ། །བསྲེག་པ་ན་ཟས་དང་འབགས་པའི་གནས་མེད་དོ་ཞེས་བྱ་བ་ནི། ལྕགས་ཀྱི་གར་བུ་དེ་བསྲེགས་པ་ན་དེ་ལ་ཟས་དང་འབགས་པའི་གནས་མེད་པའོ། །དེ་བས་ན་འདིར་ལྕགས་ཀྱི་གར་བུ་དེ་རུང་བར་བྱ་བའི་ཕྱིར་འབད་པ་ནི་དོན་མེད་དོ། །རུང་བ་སྔར་བསྲོའོ་ཞེས་བྱ་བ་ནི། བཏུང་བར་བྱ་བ་ལ་སོགས་པའི་ཆུ་རུང་བ་ཤོས་སྔར་བསྲོ་བའོ། །ལོངས་སྤྱད་པ་ཕྱིས་སོ་ཞེས་བྱ་བ་ནི། ཆབ་ཁུངས་ལ་སོགས་པར་ཁྲུས་བྱ་བའི་ཆུ་ཕྱིས་བསྲོ་བའོ། །འདི་གཉིས་ནི་གཙང་སྦྲ་བྱ་བའི་ཕྱིར་རོ། །མདོམས་ཀྱི་གསོ་བ་བསྟན་པར་བྱའོ་ཞེས་བྱ་བ་ནི། ནད་པས་ཞེས་བྱ་བར་སྦྱར་རོ། །མདོམས་ཀྱི་གསོ་བ་ཞེས་བྱ་བ་ནི། མས་གཏོད་པ་ལ་སོགས་པའོ། །འདིར་གཞུང་ནི། གལ་ཏེ་སྨན་པ་ན་རེ་གཞན་གྱིས་འཚོ་བར་མི་འགྱུར་རོ་ཞེས་ཟེར་ན་མས་གཏང་བར་བྱའོ་ཞེས་གསུངས་པ་ཡིན་ནོ། །གཞན་གྱིས་འཚོ་བར་ནུས་པ་ཉིད་ན་དེ་ལ་སྦོམ་པོའོ་ཞེས་བྱ་བ་ནི། སྨན་གཞན་བྱ་བའི་ཐབས་ཀྱིས་ནད་དེ་ལས་འཚོ་བར་ནུས་པ་ཉིད་ཡིན་ན་མདོམས་ཀྱི་གསོ་བ་བསྟེན་པ་དེ་ལ་ཉེས་པ་སྦོམ་པོར་འགྱུར་རོ། །འདིར་གཞུང་ནི་མ་མོ་ལས། དེ་ལས་གཞན་པའི་སྨན་དག་གིས་འཚོ་ན་དགེ་སློང་གིས་མདོམས་ཀྱི་ལས་བྱེད་དུ་མི་གཞུག་གོ །གང་བྱེད་དུ་འཛུད་ན་ཉེས་པ་སྦོམ་པོར་འགྱུར་རོ། །མི་འཚོ་བ་ཉིད་ཡིན་ན་བྱེད་དུ་གཞུག་གོ་ཞེས་གསུངས་པ་ཡིན་ནོ། །འདི་ལ་ཟངས་མའམ་འཁར་བའི་སྦུ་གུ་བཟང་གི་ལྕགས་ཀྱིས་ནི་མི་རུང་ངོ་ཞེས་བྱ་བ་ནི། མདོམས་ཀྱི་གསོ་བ་འདི་ལའོ། །མཚོན་གྱིས་གསོ་བ་ཡང་དེ་དང་འདྲའོ་ཞེས་བྱ་བ་ནི། མཚོན་གྱིས་གསོ་བ་བསྟེན་པར་བྱའོ། །གཞན་གྱིས་འཚོ་བར་རུས་པ་ཉིད་ན་དེ་ལ་སྦོམ་པོའོ་ཞེས་བྱ་བར་སྦྱར་རོ། །འདིར་གཞུང་ནི་མ་མོ་ལས་རྟུལ་བ་གཞན་ཡོད་ན་དགེ་སློང་གིས་མཚོན་གྱི་ལས་བྱེད་དུ་མི་གཞུག་གོ །གང་བྱེད་དུ་འཇུག་ན་ཉེས་པ་སྦོམ་པོར་འགྱུར་རོ། །རྟུལ་བ་གཞན་མེད་ན་བྱེད་དུ་གཞུག་གོ་ཞེས་གསུངས་པ་ཡིན་ནོ། །གདོང་དུ་རྩྭའི་རྒྱུན་ལས་གཞན་པར་དེ་མི་བསྟེན་ནོ་ཞེས་བྱ་བ་ནི། གདོང་དུ་རྩྭའི་རྒྱུན་ལས་གཞན་པ་མཚོན་གྱིས་གསོ་བ་དེ་མི་བསྟེན་པའོ། །འདིར་
གཞུང་ནི་ཕྲན་ཚེགས་དག་ལས་དགེ་སློང་གི་གདོང་ནི་མེ་ལོང་ལྟ་བུ་ཡིན་པས་དེའི་ཕྱིར་དགེ་སློང་གིས་སྨན་པ་གདོང་དུ་མཚོན་གྱི་ལས་བྱེད་དུ་མི་གཞུག་གོ་ཞེས་གསུངས་པ་ཡིན་ནོ། །གཞང་འབྲུམ་གཅད་པར་མི་བྱའོ་ཞེས་བྱ་བ་ནི། གང་གི་ཕྱིར་མཚོན་གྱིས་གསོ་བ་མི་བྱའོ་ཞེས་བྱ་བ་དེའི་ཕྱོགས་གཅིག་ཏུ་གྱུར་པ་ནི། གདོང་དུ་མཚོན་གྱི་ལས་བྱེད་པ་དང་གཞང་འབྲུམ་གཅོད་པ་འདི་གཉིས་ཡིན་པས་དེའི་ཕྱིར་འདི་གཉིས་ལ་ཡང་སྦོམ་པོར་རིག་པར་བྱའོ། །མཚོན་ལས་གཞན་པས་ཀྱང་ངོ་ཞེས་བྱ་བ་ནི། མཚོན་ལས་གཞན་པས་ཀྱང་གཞང་འབྲུམ་གཅད་པར་མི་བྱའོ།། དེ་ནི་གསང་སྔགས་དང་སྨན་དག་གིས་གསོའོ་ཞེས་བྱ་བ་ནི། གཞང་འབྲུམ་དེའོ། །ཞེ་འགྲས་པས་གསོར་མི་གཞུག་གོ་ཞེས་བྱ་བ་ནི་གཞང་འབྲུམ་མོ། །གསོ་བའི་ཕྱིར་ནུབ་མོ་ཟ་བ་ནི་ཚུལ་དང་མི་མཐུན་པ་མ་ཡིན་ནོ་ཞེས་བྱ་བ་ནི། ནད་གསོ་བའི་ཕྱིར་ནུབ་མོ་ཟས་ཟ་བ་ནི་ཚུལ་དང་མི་མཐུན་པ་མ་ཡིན་ཏེ། མདོ་འདི་དང་འོག་མ་གཉིས་ནི་གསོ་བའི་དོན་དུ་ནི་མ་གཏོགས་སོ་ཞེས་གསུངས་པའི་སྤྲོས་པ་ཡིན་ནོ། །འདི་ལ་བྱིན་ལེན་མ་བྱས་པ་དང་སོག་འཇོག་བྱས་པ་དག་མི་རུང་བ་ཉིད་དུ་དོགས་པར་མི་བྱའོ་ཞེས་བྱ་བ་ནི། གསོ་བ་འདི་ལ་བྱིན་ལེན་མ་བྱས་པ་དང་སོག་འཇོག་བྱས་པའི་ཟས་དག་མི་རུང་བ་ཉིད་དུ་དོགས་པར་མི་བྱ་བའོ། །འདིར་གཞུང་ནི་བཅོམ་ལྡན་འདས་ཀྱིས་བཀའ་སྩལ་པ། མཚན་མོ་ཡང་བཏུང་བར་བྱའོ། །བྱིན་ལེན་སྟོབས་པ་མེད་ནས། བཅོམ་ལྡན་འདས་ཀྱིས་བཀའ་སྩལ་པ། བྱིན་ལེན་སྟོབས་པ་མེད་ན་བྱིན་ལེན་མ་བྱས་པར་ཡང་བཏུང་བར་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །གསོ་བའི་ཕྱིར་རེང་བུའི་དུ་བ་བརྡུབ་པར་བྱའོ་ཞེས་བྱ་བ་ནི། དུ་བ་བྱ་བའི་ཕྱིར་སྨན་ལས་རེང་བུ་བྱེད་པ་གང་ཡིན་པ་དེ་ནི་རེང་བུའི་དུ་བ་ཞེས་བྱ་སྟེ། རེང་བུ་ལས་བྱུང་བའི་དུ་བ་དེ་བརྡུབ་བར་བྱའོ། །འདིར་གཞུང་ནི་དེ་ལྟ་བས་ན་རེང་བུའི་དུ་བརྡུབ་པར་རྗེས་སུ་གནང་ངོ་ཞེས་གསུངས་པ་ཡིན་ནོ། །དེ་ནི་སྨན་གཅེའུས་འགྲུབ་བོ་ཞེས་བྱ་བ་ནི་དུ་བ་རྡུབ་པ་དེའོ། །ལྕགས་ལས་བྱའོ་ཞེས་བྱ་བ་ནི་སྨན་གཅེའུའོ། །སོར་བཅུ་གཉིས་པ་བཟང་ངོ་ཞེས་བྱ་བ་ནི། སྨན་གཅེའུ་དེའི་སྲིད་ཀྱི་ཚད་དུ་སོར་བཅུ་གཉིས་པ་བཟང་ངོ༌། །རྣོ་བ་དང་རྩུབ་པར་མི་བྱའོ་ཞེས་བྱ་བ་ནི། སྨན་
གཅེའུའི་སྦུབས་སོ། །ཞུན་མར་རམ་འབྲུ་མར་གྱིས་བསྐུས་ཏེ་ཤུབས་སུ་གཞུག་གོ་ཞེས་བྱ་བ་ནི་སྨན་གཅེའུའོ། །དེ་ནི་ཟུང་ང་འམ་ཆོས་གོས་ཀྱི་གདང་བུ་ལ་གཞག་གོ་ཞེས་བྱ་བ་ནི། སྨན་གཅེའུའི་ཤུབས་དེའོ། །དྲི་མ་མེད་པར་བྱ་བའི་ཕྱིར་མེར་གཞུག་གོ་ཞེས་བྱ་བ་ནི། སྨན་གཅེའུའོ། །སྣར་བླུགས་པའི་ལས་བྱའོ་ཞེས་བྱ་བ་ནི། སྣར་རྡུབ་པའི་ལས་སོ། །དེ་ནི་སྣར་བླུགས་པའི་སྤྱད་ཀྱིས་འགྲུབ་བོ་ཞེས་བྱ་བ་ནི། སྣར་བླུགས་པའི་ལས་དེའོ། །མཆུ་གཉིས་པ་མི་རྣོ་བ་བཟང་ངོ་ཞེས་བྱ་བ་ནི། སྣར་བླུགས་པའི་སྤྱད་ནི་ཁ་བྲག་མཆུ་གཉིས་པ་མི་རྣོ་བ་བཟང་ངོ༌། །དེ་བྱའོ་ཞེས་བྱ་བ་ནི། །སྣར་བླུགས་པའི་སྤྱད་དེའོ། །སྨན་གྱི་གོ་རིམས་ནི་དཔེའོ་ཞེས་སྨོས་པ་དེས་མཚོན་པ་གཞན་བསྟན་པའི་ཕྱིར་སྨན་གྱི་ཕྱིར་ཤ་རློན་པ་བསྟེན་པར་བྱའོ་ཞེས་བྱ་བ་སྨྲས་ཏེ། ཤ་རློན་པ་བཟའ་བར་བྱ་བའོ། །དེ་ཟ་མི་ནུས་ན་ཐབས་བྱའོ་ཞེས་བྱ་བ་ནི། ཤ་རློན་པ་དེ་ཟ་མི་ནུས་པའི་གང་ཟག་ལ་ཟར་གཞུག་པའི་ཐབས་བྱ་བའོ། །རས་ཀྱིས་མིག་གཉིས་དགབ་བོ་ཞེས་བྱ་བ་ནི། རས་ཀྱིས་མིག་གཉིས་བཀབ་སྟེ་ཤ་རློན་པ་ཡིན་པར་མི་ཤེས་པར་བྱ་ཞིང་ཁར་བསྙོད་པ་ནི་ཐབས་ཡིན་ནོ། །མི་རྒལ་བར་བྱ་བའི་ཕྱིར་དྲི་ཞིམ་པོས་བསྒོའོ་ཞེས་བྱ་བ་ནི། སྐྱུག་མི་བྲོ་བར་བྱ་བའི་ཕྱིར་ཐ་བ་ལ་སོགས་པའི་རྫས་དྲི་ཞིམ་པོས་ཤ་རློན་པ་ལ་བསྒོ་ཞིང་ཟར་གཞུག་པ་སྟེ། དེ་ཡང་ཐབས་ཡིན་ནོ། །ཤན་མེད་པ་ཉིད་ན་མདུན་དུ་བཟའ་བ་དང་བཅའ་བ་ཡིད་དུ་འོང་བ་གཞག་ཏེ་དགྲོལ་ལོ་ཞེས་བྱ་བ་ནི། ཤ་རློན་པའི་དུམ་གྲུགས་ལ་སོགས་པའི་ཤན་མེད་པ་ཉིད་ན་མདུན་དུ་བཟའ་བ་དང་བཅའ་བ་ཡིད་དུ་འོང་བ་དག་གཞག་སྟེ་མིག་རས་ཀྱིས་གཡོགས་པ་དགྲོལ་བར་བྱ་བ་སྟེ་དེ་ཡང་ཐབས་ཡིན་ནོ། །གཞན་གྱི་དོན་དེར་ན་སྦོམ་པོའོ་ཞེས་བྱ་བ་ནི། ཤ་རློན་པ་དེ་སྨན་གྱི་དོན་ལས་གཞན་པ་གསང་སྔགས་བསྒྲུབ་པ་ལ་སོགས་པའི་དོན་དེར་ཟན་དགེ་འདུན་གྱི་དབྱེན་གྱི་དགེ་འདུན་ལྷག་མའི་སྐབས་སུ་གཏོགས་པའི་ཉེས་བ་སྦོམ་བོར་འགྱུར་ཏེ། བདག་ཉིད་འདྲེའི་ནང་དུ་གཏོགས་པར་བྱེད་པའི་ཕྱིར་རོ། །མིའི་ཤ་ནི་ཐམས་ཅད་དུའོ་ཞེས་བྱ་བ་ནི། སྨན་གྱི་དོན་དང་སྨན་མ་ཡིན་པའི་དོན་ཐམས་ཅད་དུ་མི་ཤ་ཟོས་ན་ཉེས་པ་སྦོམ་པོར་འགྱུར་རོ། །འདིར་གཞུང་ནི་ཁྱིམ་བདག་གི་ཆུང་མ་སྡེ་ཆེན་མས་བརླའི་ཤ་
བཅད་དེ་གཡོག་མོ་ལ། བུ་མོ་ཕོ་ཤའི་ཁུ་ཤ་གྱིས་ལ། འཕགས་པ་ཆེ་གེ་མོ་ཞིག་གི་གན་དུ་ཁྱེར་ལ། བྱིན་ཅིག་ཅེས་བྱིན་པ་ནས། བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཤ་འདི་ནི་ཐ་ཆད་ཡིན་ཏེ། འདི་ལྟ་སྟེ་མིའི་ཤའོ། །དེ་ལྟ་བས་ན་དགེ་སློང་གིས་མི་ཤ་བཟའ་བར་མི་བྱའོ། །ཟན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །སྨན་གྱི་ཕྱིར་ཟ་བ་ཡང་བཅོམ་ལྡན་འདས་ཀྱིས་སྨད་པས་དེའི་ཕྱིར་འདིར་ཐམས་ཅད་དུའོ་ཞེས་མདོར་བསྡུ་བ་བྱས་སོ། །ཤ་བསྔོས་པར་ཤེས་ན་བཟའ་བར་མི་བྱའོ་ཞེས་བྱ་བ་ནི། ཟ་བ་པོའི་ཕྱིར་སྦྱིན་བདག་གིས་ཤ་བསྔོས་པར་ཟབ་པོས་མཐོང་བ་དང་ཐོས་དང་དོགས་པའི་སྒོ་ནས་ཤེས་ནས་དེས་ཤ་དེ་བཟའ་བར་མི་བྱ་བ་སྟེ། དེ་ལྟ་བས་ན་རབ་ཏུ་བྱུང་བ་རྣམས་ཀྱིས་ནི་ཤན་པའི་གནས་སམ་ཚོང་དུས་ནས་ཤ་རུང་བ་དགེ་བསྙེན་དད་པ་ཅན་གྱིས་བླངས་ཏེ་བཟའ་བར་རྗེས་སུ་གནང་ངོ༌། །སྟག་གི་གོང་མ་མི་བཟའོ་ཞེས་བྱ་བ་ནི། ཤ་ཤེས་ན་བཟའ་བར་མི་བྱ་བའོ། །འདིར་གཞུང་ནི་དགེ་སློང་དག་སྟག་ནི་རུལ་སྦེད་པ་ཡིན་པས་དེའི་ཕྱིར་དགེ་སློང་གིས་སྟག་གི་གོང་མའི་ཤ་བཟའ་བར་མི་བྱའོ་ཞེས་གསུངས་པ་ཡིན་ནོ། །དེ་ནི་ལྟོས་པ་དང་བཅས་པའི་ཕྱིར་བཀག་པས་དེའི་ཕྱིར་ལྟོས་པ་དང་བཅས་པ་གཞན་གྱིས་སྦས་པར་ཤེས་ན་ཡང་བཟའ་བར་མི་བྱ་བའོ། །གླང་པོ་ཆེ་དང་རྟ་དང་ཀླུ་རྣམས་ཀྱི་མི་བཟའོ་ཞེས་བྱ་བ་ནི། དེ་རྣམས་ཀྱི་ཤ་བཟའ་བར་མི་བྱ་བའོ། །རྨིག་གཅིག་པ་དང་ཝ་དང་སྤྲེའུ་དང་ཤིང་རྟ་མོ་དང་བྱ་རོག་དང་བྱ་རྒོད་དང་ཆུ་སྐྱར་དང་ཁྱི་དང་བྱ་ཁྲ་དང་འུག་པ་དང༌། དེ་དག་ལས་གཞན་པའི་བྱ་མི་རོ་ཟབ་དག་དང་བྱ་གར་དང་ཕ་ཝང་དང་སྐྱིན་ཀོར་དང་དྲེའུ་སྲིན་དང་སྲིན་བུ་རྣམས་ཀྱི་ཡང་མི་བཟའོ་ཞེས་བྱ་བ་ནི། དེ་དག་གི་ཤ་ཡང་ཤེས་ན་བཟའ་བར་མི་བྱའོ་ཞེས་བྱ་བར་སྦྱར་རོ། །རྨིག་གཅིག་པ་ཞེས་བྱ་བ་ནི། རྟ་དང་བོང་བུ་དང་དྲེའུ་དང་རྐྱང་ལ་སོགས་པའོ། །ཤིང་རྟ་མོ་ཞེས་བྱ་བ་ནི། བྱ་ཤིང་རྟ་མོའོ། །བྱ་རོག་ཅེས་བྱ་བ་ནི། ཁྭ་དང་ཕོ་རོག་གོ །དེ་དག་ལས་གཞན་པའི་བྱ་མི་རོ་ཟ་བ་དག་ཅེས་བྱ་བ་ནི། མི་རོ་ཟ་བའི་བྱ་སྔར་བསྟན་པ་དེ་དག་ལས་གཞན་པའི་བྱ་མི་རོ་ཟ་བ་ཐམས་ཅད་སྤྱིར་བཟུང་ངོ༌། །སྐྱིན་ཀོར་ཞེས་བྱ་བ་ནི། ཆུ་ན་གནས་པ་དང་སྐམ་ན་གནས་པའི་སྐྱིན་ཀོར་རོ། །དྲེའུ་
སྲིན་ཞེས་བྱ་བ་ནི། ས་ལས་སྐྱེས་པའི་སྲིན་བུ་རིང་པོའོ། །སྲིན་བུ་རྣམས་ཞེས་བྱ་བས་ནི་སྲིན་བུའི་རིགས་གཞན་དག་བསྟན་ཏོ། །རྣམས་ཞེས་མང་པོའི་ཚིག་ཏུ་བྱས་པས་ནི་ཤིང་སྲིན་དང་སྲིན་གྱི་མེ་དང་སྦྲུལ་དང་སྡིག་སྦྲུལ་དང་སྲེ་མོ་དང་བྱི་བ་ལ་སོགས་པ་གཞན་དག་ཀྱང་བསྡུའོ། །སྲིན་བུ་ཞེས་སྨོས་པས་ནི། སྲིན་པུ་པད་པ་ལ་སོགས་པ་ཡང་བསྡུའོ། །འདིར་གཞུང་ནི་བཙུན་པ་པད་པའི་ཤ་འཚལ་དུ་རུང་ངམ། ཉེ་བ་འཁོར་མི་རུང་ངོ༌། །དེ་བཞིན་དུ་དགེ་སློང་གིས་བྱ་གར་གྱི་ཤ་བཟའ་བར་མི་བྱའོ། །བྱ་རོག་ལ་སོགས་པའི་ཤ་ཡང་བཟའ་བར་མི་བྱའོ་ཞེས་བྱ་བ་ལ་སོགས་པ་དང༌། གཞུང་ཁ་ཅིག་ལས་སྲིན་བུ་རྣམས་ཀྱི་ཚིལ་འཚལ་བར་བགྱིའམ་འཚལ་བར་མི་བགྱི། བཀའ་སྩལ་པ། བཟའ་བར་མི་བྱའོ། །ནད་དང་བྲལ་བའི་ཕྱིར་ལུས་བསྐུ་བར་ནི་བྱའོ་ཞེས་བྱ་བ་གསུངས་པ་ཡིན་ནོ། །ཤའི་བྱིན་ལེན་སྟོབས་པ་ལ་བཅད་པ་ལས་བྱུང་བ་ཉིད་མ་ཡིན་ནམ་ཞེས་དྲི་བར་བྱའོ་ཞེས་བྱ་བ་ནི། རབ་ཏུ་བྱུང་བ་རྣམས་ལ་སྦྱིན་པ་དག་གིས་ཤའི་བྱིན་ལེན་བསྟབས་པ་ན་དེ་ལ་ཟ་བ་པོས་འདི་དགེ་སློང་གིས་བཟར་མི་རུང་བའི་ཤ་བཅད་པ་མི་ཤ་དང་སྟག་གི་གོང་མ་དང་གླང་པོ་ཆེ་དང་རྟ་དང་ཀླུ་དང་རྨིག་གཅིག་པ་ལ་སོགས་པའི་ཤམ་ཡིན་ནམ་ཞེས་དྲི་བར་བྱ་ཞིང༌། དེ་དག་ལས་བྱུང་བ་མ་ཡིན་ན་བཟའ་བར་བྱའོ། །ཚིག་དེ་ནི་མཚོན་པ་ཙམ་དུ་ཟད་དེ། འདི་ཅིའི་ཤ་ཞེས་དྲིས་ན་གཞན་མ་སྨོས་ཀྱང་ཉེས་པ་མེད་དོ། །དུ་མ་ཉིད་ན་དང་པོས་སོ་ཞེས་བྱ་བ་ནི། ཟ་བ་པོ་དུ་མ་ཉིད་ཡོད་ན་དང་པོས་དྲི་པར་བྱ་བ་སྟེ། དགེ་སློང་དུ་མ་ཚོགས་ན་དགེ་འདུན་གྱི་གནས་བརྟན་གྱིས་དྲི་བར་བྱའོ་ཞེས་བྱ་བའི་ཐ་ཚིག་གོ །ཉམས་ན་འོག་མས་སོ་ཞེས་བྱ་བ་ནི། ཤའི་སྐབས་དྲིའོ་ཞེས་བྱ་བར་སྦྱར་ཏེ། །གལ་ཏེ་དང་པོས་དྲི་བ་ཉམས་ཏེ་མ་དྲིས་ན་དེའི་འོག་མའི་དགེ་སློང་གིས་དྲི་བར་བྱ་བའོ། །གླང་པོ་ཆེ་དང་མིའི་འོ་མ་ངག་བཏུང་བར་མི་བྱ་བ་ཉིད་དོ་ཞེས་བྱ་བ་ནི། རབ་ཏུ་བྱུང་བས་བལ་གླང་མོ་དང་བུད་མེད་ཀྱི་འོ་མ་བཏུང་བར་མི་བྱའོ། །པགས་པ་དང་རྨ་བསྐུ་བ་དང་སྣར་བླུགས་པ་དང་མིག་སྐུད་ཅིང་བཟའ་བཏུང་མི་བྱེད་པ་ལ་སྐྱོན་ཆགས་པ་མེད་དོ་ཞེས་བྱ་བ་ནི། ཤ་དང་འོ་མ་རུང་བ་མ་ཡིན་པ་ལ་སོགས་པས་ཞེས་བྱ་བར་སྦྱར་ཏེ། དེ་དག་གིས་པགས་པ་སྐུད་པ་དང་རྨ་སྐུད་པ་དང་སྣར་བླུགས་པ་དང་
མིག་སྐུད་ཅིང་བཟའ་བཏུང་མི་བྱེད་པ་ལ་ནི་སྐྱོན་ཆགས་པ་མེད་དོ་ཞེས་བྱ་བའི་ཐ་ཚིག་གོ །འདིར་གཞུང་ནི་བཙུན་པ་སྨན་དུ་རུང་བ་མ་ལགས་པ་དག་དང་བསྐོལ་བའི་འབྲུ་མར་འཚལ་དུ་རུང་ངམ། ཉེ་བ་འཁོར་མི་རུང་ངོ༌། །ལུས་སྐུད་པ་དང་རྨའི་བསྐུ་མཉེ་བྱ་བ་དང༌། སྣར་བླུགས་པའི་ལས་བྱ་བ་ནི་ལྟུང་བ་མེད་དོ། །བཙུན་པ་བུད་མེད་ཀྱི་འོ་མ་འཚལ་དུ་རུང་ངམ། ཉེ་བ་འཁོར་མི་རུང་ངོ༌། །མིག་བསྐུ་བ་ལ་ནི་ལྟུང་བ་མེད་དོ་ཞེས་གསུངས་པ་ཡིན་ནོ། །ནད་པས་ནི་ཞུན་མར་དང་འབྲུ་མར་ཆད་དང་འདྲེས་པ་བཏུང་བར་བྱ་བ་ཉིད་དོ་ཞེས་བྱ་བ་ནི། གང་ཟག་ནད་པས་ནི་ཞུན་མར་དང་འབྲུ་མར་ཆང་དང་འདྲེས་པར་གྱུར་པ་བཏུང་བར་བྱ་བ་ཉིད་ཡིན་ནོ། །འདིར་གཞུང་ནི་བཙུན་པ་རེ་ཞིག་ཞུན་མར་དང་འབྲུ་མར་སྐྱེམས་དང་ལྷན་ཅིག་འདྲེས་པར་གྱུར་ན་འཚལ་དུ་རུང་ངམ། ཉེ་བ་འཁོར་རུང་སྟེ། དེ་ཡང་ནད་པས་ཡིན་གྱི་མི་ན་བས་ནི་མ་ཡིན་ནོ་ཞེས་གསུངས་པ་ཡིན་ནོ། །ཆང་མ་ཡིན་པ་ཉིད་ན་ཉེས་པ་མེད་པ་ཉིད་དོ་ཞེས་བྱ་བ་ནི། ཆང་དག་ཆང་མ་ཡིན་པ་ཉིད་དུ་གྱུར་ན་ཐམས་ཅད་ལ་ཉེས་པར་མི་འགྱུར་པ་སྟེ། འདིར་ཆང་མ་ཡིན་པ་ཉིད་ཅེས་བྱ་བས་ནི་དེའི་དྲི་དང་རོ་གཉི་ག་མེད་པར་གྱུར་པ་བསྟན་ཏེ། གལ་ཏེ་དྲི་དང་རོའི་མྱང་བ་མྱོས་པར་མི་བྱེད་པ་དག་ཅེས་གསུངས་པ་ལས་ཤེས་པར་བྱའོ། །དེ་ནི་བསྐོལ་བ་ལས་འགྲུབ་པོ་ཞེས་བྱ་བ་ནི། ཆང་མ་ཡིན་པ་ཉིད་དེ་ནི་བསྐོལ་བ་ལས་ཆང་ཡང་ཆང་མ་ཡིན་པར་འགྱུར་བའོ། །འདིར་གཞུང་ནི་བཙུན་པ་མྱོས་པར་འགྱུར་བའི་ལྟུང་བ་ཞུགས་ཀྱིས་བསྐོལ་ན་འཚལ་དུ་རུང་ངམ། ཉེ་བ་འཁོར་རུང་ངོ་ཞེས་གསུངས་པ་ཡིན་ནོ། །དེ་ནི་ནས་བརྔོས་པས་བཏབ་ཅིང་སའི་ནང་དུ་བཅུག་ན་ཚྭ་ཉིད་དུ་འགྱུར་རོ་ཞེས་བྱ་བ་ནི། ཆང་དེའི་ནང་དུ་ཡོས་བླུགས་ཏེ་སྣོད་དང་བཅས་པར་སའི་ནང་དུ་བཅུག་ན་ཚྭར་འགྱུར་བའོ། །རྒུན་གྱི་ཁུ་བ་ནི་བསྐོལ་ན་ཆང་ཉིད་དུ་མི་འགྱུར་རོ་ཞེས་བྱ་བ་ནི། རྒུན་གྱི་ཁུ་བ་བཙིར་མ་ཐག་ཏུ་བསྐོལ་ན་ཡུན་རིང་དུ་བཞག་ཀྱང་ཕྱེས་ཆང་དུ་མི་འགྱུར་ཏེ། དྲོན་ཞ་ཡིན་ནོ། །འདིར་གཞུང་ནི་བསྐོལ་ཏེ་གཞག་པར་བྱ་ཞིང་དགེ་འདུན་གྱི་དུས་མ་ཡིན་པའི་བཏུང་བར་འགྱུར་རོ་ཞེས་གསུངས་པ་ཡིན་ནོ། །ཐ་དད་པ་མ་ཡིན་པ་ཉིད་ལ་ནི་ཡོད་པ་ཉིད་མ་ཡིན་ནོ་ཞེས་བྱ་བ་ནི། དཔེར་ན་ཏིལ་དག་ལས་ཏིལ་
མར་ཐ་དད་པ་ཉིད་མ་ཡིན་པ་དང་བུ་རམ་ཤིང་དག་ལས་ཁུ་བ་ཐ་དད་པ་ཉིད་མ་ཡིན་པས། ཏིལ་དེ་ལ་ཡང་ཏིལ་མར་ཡོད་པ་ཉིད་མ་ཡིན་ལ། བུ་རུམ་ཤིང་དེ་ལ་ཡང་བུ་རམ་ཡོད་པ་ཉིད་མ་ཡིན་པ་ལྟ་བུའོ། །དེ་ལྟ་བས་ན་ཏིལ་བྱིན་ལེན་བྱས་པས་ཏིལ་མར་བྱིན་ལེན་བྱས་པར་མི་འགྱུར་ལ། བུ་རམ་ཤིང་བྱིན་ལེན་བྱས་པས་ཀྱང་བུ་རམ་བྱིན་ལེན་བྱས་པར་མི་འགྱུར་བར་ཤེས་པར་བྱའོ། །འདི་སྐད་བསྟན་ཏེ། དགེ་སློང་གིས་ཏིལ་བྱིན་ལེན་བྱས་ཏེ་བཙགས་ན་དེའི་ཏིལ་མར་གཟོད་བྱིན་ལེན་བྱ་དགོས་ལ། བུ་རམ་ཤིང་བྱིན་ལེན་བྱས་ཏེ་བཙིར་ན་དེའི་ཁུ་བ་གཟོད་བྱིན་ལེན་བྱ་དགོས་སོ། །དེས་ན་བྱིན་ལེན་བྱས་པའི་ཏིལ་དང་བུ་རམ་ཤིང་ནི་བཟར་རུང་ལ། དེ་ཉིད་བཙིར་ཅིང་བཙགས་པའི་ཏིལ་མར་དང་ཁུ་བ་ནི་ཡང་བྱིན་ལེན་མ་བྱས་པར་བཟར་མི་རུང་ངོ༌། །བག་ཆགས་སུ་གྱུར་པ་ཉིད་ནི་ཡོད་པ་ཉིད་དོ་ཞེས་བྱ་བ་ནི། བག་ཆགས་སུ་གྱུར་པ་ཉིད་ནི་ཡོད་པ་ཉིད་ཡིན་པའོ། །འདིར་གཞུང་ནི་བཙུན་པ་ཞག་རུང་བ་མ་ལགས་པ་དག་དང་བསྐོལ་བའི་དབོན་ཚ་འཚལ་དུ་རུང་ངམ་མི་རུང༌། བཀའ་སྩལ་པ། ནད་པས་ནི་བཟར་རུང་ལ་མིན་བས་ནི་མི་རུང་ངོ༌། །ཤ་ལ་ཡང་དེ་བཞིན་ནོ་ཞེས་ཞུ་བ་ལས་རྫས་རུང་བ་མ་ཡིན་པ་དང་འབགས་པ་བཟའ་བར་བྱ་བ་ཉིད་མ་ཡིན་ནོ་ཞེས་གསུངས་པ་དེ་འདིར་བསྡུས་པ་ཡིན་ནོ། །ཆང་གི་སྲེད་པ་དང་བྲལ་བར་བྱ་བའི་ཕྱིར་རྩ་བ་དང་སྡོང་བུ་དང་འདབ་མ་དང་མེ་ཏོག་དང་འབྲས་བུའི་སྨན་སྐམ་པོའི་ཕྱེ་མ་ཆང་གི་དྲིས་བསྒོས་པའི་ཆུ་དང་སྦྱར་བ་བཏུང་ངོ་ཞེས་བྱ་བ་ནི། ཆང་འདོད་པའི་སྲེད་པ་ཡོད་ན་དེ་དང་དབྲལ་བར་བྱ་བའི་ཕྱིར་ཆང་གི་ཡོ་བྱད་དུ་རུང་བའི་རྩ་བ་དང་སྡོང་བུ་དང་འདབ་མ་དང་མེ་ཏོག་དང་འབྲས་བུའི་སྨན་སྐམ་པོའི་ཕྱེ་མ་ཆང་གི་རླངས་པས་བསྒོས་པ་དང་སྦྱར་བའི་ཆུ་བཏུང་བར་བྱ་བ་སྟེ། དེ་ནི་ཕྱེ་མ་དང་སྦྱར་བའི་བཏུང་བ་ཞེས་བྱའོ། །འདིར་གཞུང་ནི་དེ་ལྟ་བས་ན་ཆང་ངུ་རུང་བའི་རྩ་བ་དང་སྡོང་བུ་ལ་སོགས་པའི་རྫས་སྐམ་པོ་གང་དག་ཡིན་པ་དེ་དག་ཕྱེ་མར་བྱས་ཏེ། རས་མ་དཀར་པོར་ཕུར་ནས་ཆང་གི་ཤུགས་དག་དང་བྲལ་བའི་སྣོད་མ་གང་བར་བཅང་བར་བྱ་ཞིང༌། དེ་ནས་ཕྱུང་སྟེ་བྱི་དོར་བྱས་ནས་ཟས་དང་མ་འབགས་པའི་ཆུ་དང་ལྷན་ཅིག་སྦྱར་ཞིང་བཙགས་ཏེ་བཏུང་བར་རྗེས་སུ་གནང་ངོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །
ཆང་གི་དྲིས་བསྒོ་བར་བྱའོ་ཞེས་གསུངས་ན། ཇི་ལྟར་བསྒོ་བར་བྱ་ཞེ་ན། དེའི་ཕྱིར་ཆང་དང་བཅས་པའི་སྣོད་དུ་དཔྱངས་ཏེ་གཞག་པས་བསྒོ་བར་བྱའོ་ཞེས་བྱ་བ་སྨྲས་ཏེ། སྨན་གྱི་ཕྱེ་མའི་ཕུར་མ་དེ་ཆང་དང་བཅས་པའི་སྣོད་ཀྱི་ནང་དུ་ཆང་ལ་མ་རེག་པར་དཔྱངས་ཏེ་གཞག་པས་བསྒོ་བར་བྱའོ། །རེག་པ་བསྲུང་ངོ་ཞེས་བྱ་བ་ནི། ཕྱེ་མའི་ཕུར་མ་དེ་ཆང་དང་རེག་པར་མི་འགྱུར་བར་བྱ་བའི་ཕྱིར་བསྲུང་བར་བྱ་བའོ། །དེའི་ཕྱིར་མ་གང་བ་དང་ཤུགས་དང་བྲལ་བ་ཉིད་དུའོ་ཞེས་བྱ་བ་ནི། གང་གི་ཕྱིར་རེག་པ་བསྲུང་དགོས་པ་དེའི་ཕྱིར་ཆང་གིས་མ་གང་བའི་སྣོད་ཆང་གི་ཤུགས་དང་བྲལ་བ་ཉིད་ཀྱི་ནང་དུ་དཔྱངས་ཏེ་གཞུག་པར་བྱའོ། །གཞན་དུ་ན་གྱེན་དུ་ལྡུད་པས་རེག་པར་འགྱུར་བའི་ཕྱིར་རོ། །དེ་བཞིན་དུ་རོ་མེད་པར་བྱེད་པ་དང་དུས་མ་ཡིན་པར་བཏུང་བ་ལ་ཟས་དང་ཡང་ངོ་ཞེས་བྱ་བ་ནི། ཇི་ལྟར་ཕྱེ་མ་ཆང་དང་རེག་པ་བསྲུང་བར་བྱ་བ་ཡིན་ཏེ་དེ་བཞིན་དུ་རྫས་གང་གིས་བཏུང་བ་དེ་རོ་མེད་པར་བྱེད་པར་འགྱུར་བའི་རྫས་དེ་དང་རེག་པ་ཡང་བསྲུང་བར་བྱ་བ་དང༌། དུས་མ་ཡིན་པར་བཏུང་བ་ལ་ཟས་དང་རེག་པ་ཡང་བསྲུང་བར་བྱ་བའོ། །མཛེས་པ་ཡང་བཟང་ངོ་ཞེས་བྱ་བ་ནི། ཕྱེ་མ་སྐམ་པོ་ཆང་གི་དྲིས་བསྒོས་པ་དང་སྦྱར་བའི་ཆུ་དེ་ཟས་དང་རེག་པ་དེ་ལས་དེ་ལྟར་བསྲུང་བར་བྱ་བ་ཉིད་མཛེས་པ་ཡིན་ཏེ་དེ་བཟང་བའོ། །དེའི་ཕྱིར་རས་མ་དཀར་པོས་བཙག་པར་བྱའོ་ཞེས་བྱ་བ་ནི། གང་གི་ཕྱིར་མཛེས་པ་བཟང་བ་དེའི་ཕྱིར་རས་མ་དཀར་པོས་བཙག་པར་བྱ་བའོ། །ནད་པས་ཆང་ནི་རྩྭ་མཆོག་གིས་ཀྱང་མི་བཏུང་ངོ་ཞེས་བྱ་བ་འདི་ནི། བཅས་པའི་ཁ་ན་མ་ཐོ་བ་དང་བཅས་པ་ཐམས་ཅད་ནད་པའི་ཡུལ་ལ་རྗེས་སུ་གནང་བ་དེའི་དམིགས་ཀྱིས་བསལ་བ་བསྟན་པ་ཡིན་ཏེ། ཇི་ལྟར་བཅོམ་ལྡན་འདས་ཀྱིས་ཤཱཀྱ་ན་བར་གྱུར་པ་དག་ལ་དེ་ཉིད་མ་གནང་བར་གསུངས་པ་ཡིན་ནོ། །དེ་ལྟར་ཡང་དགེ་སློང་གང་ང་ལ་སྟོན་པ་ཞེས་ཟེར་བ་ཁྱེད་ཅག་གིས་ཆང་ཐ་ན་རྩྭ་མཆོག་གིས་ཀྱང་མི་བླུད་མི་བཏུང་ངོ་ཞེས་གསུངས་པ་ཡིན་ནོ། །དགེ་བསྙེན་ཡན་ཆད་ཐམས་ཅད་ཀྱིས་མི་བླུད་དོ་ཞེས་བྱ་བ་ནི། དགེ་བསྙེན་གྱི་མཐའ་ཡན་ཆད་ཆོས་འདི་པ་བསླབ་པ་མ་བླངས་པ་ཐམས་ཅད་ཀྱིས་ཀྱང་ཆང་བླུད་པར་མི་བྱའོ། །འདིར་གཞུང་ནི་དགེ་བསྙེན་གྱིས་མི་བྱ་བའི་ལས་དྲུག་སྟེ། སེམས་ཅན་བཙོང་པ་དང༌།
མཚོན་ཆ་བཙོང་བ་དང༌། ཆང་བཙོང་བ་དང༌། དུག་བཙོང་བ་དང༌། རྒྱ་སྐྱེགས་ཀྱི་ལས་དང༌། ཏིལ་བཙིར་བའི་ལས་སོ་ཞེས་གསུངས་པ་ཡིན་ནོ། །རང་བཞིན་གྱི་ཁ་ན་མ་ཐོ་བ་དང་བཅས་པ་ལས་གཞན་པ་ཐམས་ཅད་ལ་གསོ་བའི་དོན་ཉིད་མ་གཏོགས་སོ་ཞེས་བྱ་བ་ནི་ལྷག་མའོ་ཞེས་བྱ་བ་ནི། བཅས་པའི་ཁ་ན་མ་ཐོ་བ་དང་བཅས་པ་ཐམས་ཅད་བཀག་པ་ལ་གསོ་བའི་དོན་ཉིད་དུ་ནི་མ་གཏོགས་ཏེ་དེའི་དོན་དུ་ནི་དགག་པ་མེད་དོ་ཞེས་གསུངས་པ་དེའི་ལྷག་མ་ནི་མྱོས་པར་འགྱུར་བའི་བཏུང་བ་བཀག་པ་འདི་ཡིན་ཏེ། འདི་ནི་གསོ་བའི་དོན་དུ་ཡང་བཀག་པར་ཤེས་པར་བྱའོ། །ནད་པ་གསོ་བའི་དོན་དེ་ཉིད་དུ་བཅས་པའི་ཁ་ན་མ་ཐོ་བ་དང་བཅས་པ་ལྷག་པར་སྤྱོད་པ་ལ་ནི་ལྟུང་བ་མེད་དེ། དཔེར་ན། ཤ་བསྔོས་པར་ཤེས་ན་བཟའ་བར་མི་བྱའོ་ཞེས་བྱ་བ་ལ་སོགས་པ་བཅག་པའི་ཁ་ན་མ་ཐོ་བ་དང་བཅས་པ་ཐམས་ཅད་གསོ་བའི་དོན་ཉིད་དུ་མ་གཏོགས་སོ་ཞེས་བསྟན་པ་དེའི་ལྷག་མ་དམིགས་ཀྱིས་བསལ་བ་ནི་མྱོས་པར་འགྱུར་བའི་ལྟུང་བ་མ་གཏོགས་སོ་ཞེས་བྱ་བ་འདི་ཡིན་ཏེ། སྡིག་པ་ཐམས་ཅད་ཀྱི་སྒོར་གྱུར་པ་ཡིན་པའི་ཕྱིར་དེ་ལ་དམིགས་ཀྱིས་བསལ་བ་མེད་དོ། །འདིར་གཞུང་ནི་བཙུན་པ་ནད་པའི་གཡོག་ཇི་ལྟར་བགྱི། ཉེ་བ་འཁོར་རང་བཞིན་གྱིས་ཁ་ན་མ་ཐོ་བ་དང་བཅས་པ་མ་གཏོགས་པར་ཅི་ནས་ཀྱང་ནད་པ་སོས་པར་འགྱུར་བ་ལྟར་རོ། །དེ་ལྟ་བས་ན་དགེ་སློང་གིས་སྒོག་སྐྱ་བཟའ་བར་མི་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །སྒོག་སྐྱ་དང་ཀུན་དོང་དང་ཀེའུ་བཟའ་བར་མི་བྱའོ་ཞེས་བྱ་བ་ནི། བཙོས་ཀྱང་རུང་མ་བཙོས་ཀྱང་རུང་བའོ། །ནད་པས་ནི་དབེན་པའི་ཕྱོགས་སུའོ་ཞེས་བྱ་བ་ནི། སྒོག་སྐྱ་ལ་སོགས་པ་བཟའ་བའོ། །ཟོས་ནས་སྒོག་སྐྱ་ནི་ཞག་བདུན། ཀུན་དོང་ཞག་གསུམ་ཀེའུ་ནི་ཞག་གཅིག་མ་ལོན་པར་གཙུག་ལག་ཁང་དུ་འཇུག་པར་མི་བྱའོ་ཞེས་བྱ་བ་ནི། ནད་པས་དབེན་པའི་ཕྱོགས་སུ་སྒོག་སྐྱ་ལ་སོགས་པ་ཟོས་ནས་གཙུག་ལག་ཁང་དུ་འཇུག་པར་མི་བྱའོ་ཞེས་བྱ་བར་སྦྱར་རོ། །ཟོས་མ་ཐག་ཏུ་འཇུག་པར་མི་བྱ་བར་མ་ཟད་ཀྱི་སྒོག་སྐྱ་ནི་ཟོས་ནས་ཞག་བདུན་མ་ལོན་པར་འཇུག་པར་མི་བྱའོ། །ཀུན་དོང་ནི་ཟོས་ནས་ཞག་གསུམ་མ་ལོན་པར་འཇུག་པར་མི་བྱའོ། །ཀེའུ་ནི་ཟོས་ནས་ཞག་གཅིག་མ་ལོན་པར་འཇུག་པར་མི་བྱའོ། །
གནས་མལ་ལ་མི་བྱའོ་ཞེས་བྱ་བ་ནི། ལོངས་སྤྱད་པར་རོ། །བཤད་པའི་སར་འཇུག་པར་མི་བྱའོ་ཞེས་བྱ་བ་ནི། དགེ་འདུན་གྱིའོ། །གཅི་བའི་སར་མི་བྱའོ་ཞེས་བྱ་བ་ཡང༌། དགེ་འདུན་གྱིར་འཇུག་པར་རོ། །དགེ་འདུན་གྱི་ནང་དུ་འགྲོ་བར་མི་བྱའོ་ཞེས་བྱ་བ་ཡང༌། ནད་པ་སྒོག་སྐྱ་ལ་སོགས་པ་ཟོས་པས་སོ། །མཆོད་རྟེན་གྱི་ཉེན་ཀོར་དུ་མི་བྱའོ་ཞེས་བྱ་བ་ནི། མཆོད་རྟེན་གྱི་ཉེན་ཀོར་དུ་འགྲོ་བར་མི་བྱའོ། །དེའི་ཐག་ནི་འདོམ་གང་ངོ་ཞེས་བྱ་བ་ནི། མཆོད་རྟེན་གྱི་ཉེན་ཀོར་དེའིའོ། །འདིར་གཞུང་ནི་མཆོད་རྟེན་གྱི་ཉེན་ཀོར་འདོམ་གང་སྤང་བར་བྱ་སྟེ། དགེ་སློང་དག་མཆོད་རྟེན་ནི་ལྟ་མངོན་པར་དད་པ་ཅན་དག་གིས་ཀུན་ནས་གང་བ་ཡིན་ལ། ལྷ་རྣམས་ནི་གཙང་སྦྲ་འདོད་པ་ཡིན་པས། དྲི་དེ་ནི་དེ་དག་དང་མི་མཐུན་པའི་ཕྱིར་རོ་ཞེས་གསུངས་པ་ཡིན་ནོ། །ཁྱིམ་པ་དག་ལ་ཆོས་བསྟན་པར་མི་བྱའོ་ཞེས་བྱ་བ་ཡང་ནད་བསྒོ་སྐྱ་ལ་སོགས་པ་ཟོས་པས་སོ། །ཁྱིམ་དག་ཏུ་འགྲོ་བར་མི་བྱའོ་ཞེས་བྱ་བ་ནི། ཁྱིམ་པའི་ཁྱིམ་དག་ཏུའོ། །སྐྱེ་བོས་གང་བའི་ཕྱོགས་སུ་མི་བྱའོ་ཞེས་བྱ་བ་ནི། སྐྱེ་བོས་གང་བའི་ཕྱོགས་སུ་ཡང་འགྲོ་བར་མི་བྱ་བའོ། །མཇུག་ཏུ་ཁྲུས་བྱའོ་ཞེས་བྱ་བ་ནི། ནད་པས་དེ་ལྟར་སྒོག་སྐྱ་ལ་སོགས་པ་བསྟེན་པའི་དགོས་པ་བསྒྲུབས་ཟིན་ནས་མཇུག་ཏུ་ཁྲུས་བྱ་བའོ། །གོས་དག་གི་དྲི་ནི་བཀྲུ་བ་དང་དུ་བདག་གིས་བསལ་ལོ་ཞེས་བྱ་བ་ནི། ནད་པས་སྒེག་སྐྱ་ལ་སོགས་པ་བསྟེན་པ་དེའི་གོས་དག་ལ་དྲི་ཆགས་པ་ནི་ཐབས་དེ་གཉིས་ཀྱིས་བསལ་བར་བྱ་བའོ།། །།བམ་པོ་ལྔ་བཅུ་བདུན་པ། རུང་བ་ཉིད་དུ་བྱིན་གྱིས་བརླབ་པར་བཙོས་པ་དང་གནས་པ་དག་ནི་ཕྱི་རོལ་དང་འདྲའོ་ཞེས་བྱ་བ་ནི། དཔེར་ན་དགེ་སློང་གི་གནས་ཉེན་ཀོར་འདོམ་གང་དང་བཅས་པ་ནས་ཕྱི་རོལ་དུ་གྱུར་པའི་ཀུན་དགའ་ར་བ་དང་འབྲོག་དགོན་པ་ལ་སོགས་པའི་གནས་གང་ཡིན་པ་དེར་ཟས་འཚོད་པ་དང་འཆང་བ་དག་ལ་ནང་དུ་བཙོས་པ་དང་ནང་དུ་ཞག་ལོན་པའི་ཉེས་པས་གོས་པར་མི་འགྱུར་བ་དེ་བཞིན་དུ་གཙུག་ལག་ཁང་གི་ནང་དུ་ཡང་རུང་བ་ཉིད་དུ་བྱིན་གྱིས་བརླབས་པའི་རུང་བའི་ཁང་བ་བྱས་ན་དེར་ཡང་ཉེས་པ་དེ་དག་མི་འབྱུང་བའོ། །རུང་བའི་ཁང་པ་དེ་བྱིན་གྱིས་བརླབ་ཏུ་རུང་བར་བསྟན་པའི་ཕྱིར་བྱིན་གྱིས་བརླབ་པར་བྱའོ་ཞེས་བྱ་བ་སྨྲས་ཏེ། རུང་བའི་
ཁང་པའོ་ཞེས་བྱ་བར་སྦྱར་རོ། །ཤིང་དྲུང་དང་གླང་པོ་ཆེའི་རབ་དང་མུ་སྟེག་ཅན་གྱི་འདུག་གནས་དང་རྒྱལ་པོའི་ཕོ་བྲང་ས་དང་དགེ་སློང་མའི་དབྱར་ཁང་དང་གཙུག་ལག་ཁང་གི་པང་རི་མ་དང་སྒོ་ཁང་དང་ཁྱམས་དང་བསྲོ་གང་དང་དཔོང་སའི་ར་བ་དག་ཏུ་མི་བྱའོ་ཞེས་བྱ་བ་ནི། རུང་བའི་ཁང་པ་བྱིན་གྱིས་བརླབ་པར་ཞེས་བྱ་བར་སྦྱར་རོ། །ཤིང་དྲུང་ལ་སོགས་པ་དེ་དག་ཏུ་རུང་བའི་ཁང་པ་བྱིན་གྱིས་བརླབ་པར་མི་བྱའོ་ཞེས་གསུངས་པའི་ཕྱིར་ཏེ། གཏུམ་ཕུགས་ཅན་དང་སྨྱོན་ཐབས་མཁན་དང་ཟིལ་གྱིས་གནོན་པར་བྱེད་པ་དག་ཡོངས་སུ་སྤང་བའི་ཕྱིར་རོ། །ཁ་ཅིག་ལས་བླ་གབ་མེད་པ་དང་མེ་ཁང་དང་མཆོད་རྟེན་གྱི་གཞི་དང་ཁྱིམ་བདག་གི་གཞིར་ཡང་ཞེས་སོ་ཞེས་བྱ་བ་ནི། གཞུང་ཁ་ཅིག་ལས་དེ་དག་ཏུ་ཡང་རུང་བའི་ཁང་པ་བྱིན་གྱིས་བརླབ་པར་མི་བྱའོ་ཞེས་འབྱུང་སྟེ། འདི་དག་དང་སྔར་སྨོས་པ་དག་ཏུ་རུང་བའི་ཁང་པ་བྱིན་གྱིས་བརླབ་བར་མི་བྱའོ། །དེང་གཡོས་དང་བཙོ་བ་ཡང་མི་བྱའོ་ཞེས་བྱ་བ་ནི། ཤིང་དྲུང་ལ་སོགས་པ་དང་བླག་བ་མེད་པ་དེང་རོ། །འདིར་གཡོས་ཞེས་བྱ་བ་ནི་འབྲས་ཆན་ལ་བྱ་བའོ། །དེ་ལས་གཞན་པ་ནི་བཙོ་བ་ཡིན་པར་ཤེས་པར་བྱའོ། །དགེ་སློང་གིས་དེ་གཉིས་ཕྱོགས་མི་དབེན་པར་གཞན་གྱི་ལག་ཏུ་ཡང་བྱེད་དུ་མི་གཞུག་ན་རང་གིས་བྱ་བ་ལྟ་ཅི་སྨོས་ཏེ། དང་པོ་ཉིད་ནས་བཀག་པའི་ཕྱིར་རོ། །དེ་ལྟ་བས་ན་དགེ་སློང་གིས་ཤིང་དྲུང་ལ་སོགས་པ་དང་བླ་གབ་མེད་པ་ལ་སོགས་པ་དེར་གཡོས་དང་བཙོ་བ་གཞན་བྱེད་དུ་ཡང་མི་གཞུག་སྟེ། ཚུལ་མ་ཡིན་པས་གཞན་དག་ལས་ཟིལ་གྱིས་གནོན་པ་དང་མི་གུས་པ་འབྱུང་བའི་ཕྱིར་རོ། །ཆོས་པའི་བྱི་དོར་ཡང་མི་བྱའོ་ཞེས་བྱ་བ་ནི། ཤིང་དྲུང་ལ་སོགས་པ་དང་བླ་གབ་མེད་པ་ལ་སོགས་པ་དེར་ཟས་ཚོས་ཟིན་པའི་བྱི་དོར་ཡང་མི་བྱའོ། །ཚོས་པ་ཞེས་བྱ་བ་ནི་མི་སྙི་བ་རྣམས་ཀྱི་ནི་སུམ་ཆ་བངས་པ་ན་ཚོས་པ་ཡིན་ནོ། །སྙི་བ་རྣམས་ཀྱི་ནི་ཁ་དོག་གྱུར་པ་ནི་ཚོས་པ་ཡིན་ནོ།། ཁུ་བ་རྣམས་ཀྱི་ནི་ལན་གཉིས་ཁོལ་བར་གྱུར་པ་ན་ཆོས་པ་ཡིན་ཏེ། ཆོས་པ་དེ་དག་དགེ་སློང་རང་གིས་གནས་དེ་དག་ཏུ་བྱི་དོར་བྱ་བ་བཀག་གོ །འདི་ལ་དུས་བཞི་ཡོད་དོ་ཞེས་བྱ་བ་ནི། རུང་བའི་ཁང་པ་བྱིན་གྱིས་བརླབས་པ་འདི་ལ་དུས་བཞི་ཡོད་པའོ། །དེ་དག་ཀྱང་གང་ཞེ་ན། དང་པོ་སོ་ཕག་
འགྲེམས་པའོ་ཞེས་བྱ་བ་ནི། རུང་བའི་ཁང་པ་བྱིན་གྱིས་བརླབས་པའི་དུས་གཅིག་ནི་རུང་བའི་ཁང་པ་དེ་ཉིད་ཐོག་མའི་རྩིག་པའི་ཚེ་དང་པོ་སོ་ཕག་གི་གཅལ་འགྲེམས་པའི་ཚེའོ། །ཕྱིས་ལས་སར་པ་དང་བཅས་པ་ཉིད་དོ་ཞེས་བྱ་བ་ནི། དང་པོ་སོ་ཕག་བཀྲམ་པའི་འོག་ཏུ་དེ་ཕྱིན་ཆད་ནས་ཇི་སྲིད་དུ་ལས་སར་པ་ཞེས་བྱ་བ་དེའི་མཁར་ལེན་གྱི་ལས་མ་རྫོགས་ཤིང་ད་དུང་ལས་སར་པའི་མཇུག་ཡོད་པ་ཉིད་ཀྱི་བར་གྱི་དུས་གང་ཡང་རུང་བ་དེ་ཡང་དུས་གཞན་ཅིག་ཡིན་པའོ། །གཞན་གྱི་ཚེ་དགེ་སློང་གནས་པ་ཉིད་དང་མ་བྲལ་བའོ་ཞེས་བྱ་བ་ནི། ལས་སར་པ་མཐར་ཕྱིན་པའི་འོག་ཏུ་དུས་གཞན་གྱི་ཆོག་ནས་དེར་དང་པོ་དགེ་སློང་ཞུགས་པ་ནས་ཕྱིས་ནམ་གྱི་ཆེ་དེ་ན་དགེ་སློང་འགའ་ཡང་མེད་པར་མ་གྱུར་པའི་བར་གྱི་དུས་གང་ཡང་རུང་བ་དེ་ཡང་དུས་གཞན་ཅིག་ཡིན་པའོ། །དེ་དག་མེད་པ་ནི་གནས་པའི་ཕྱིར་དགེ་སློང་དག་ཕྱིན་པའོ་ཞེས་བྱ་བ་ནི། དེ་ན་དགེ་སློང་སྔར་གནས་གནས་པ་དེ་དག་མེད་པ་ན་དགེ་སློང་ཕྱི་མ་གཞན་དག་དེར་གནས་པའི་ཕྱིར་གནས་དེར་ཕྱིན་པའི་ཚེ་ཁོ་ནའི་དུས་དེ་ཡང་དུས་གཞན་ཅིག་ཡིན་པ་སྟེ། དུས་བཞི་པོ་དེ་དག་ལས་གང་ཡང་རུང་བར་བྱིན་གྱིས་བརླབས་ཀྱང་རུང་གི །རུང་བའི་ཁང་པ་གཅིག་ལ་ཡང་དུས་དེ་བཞི་ཆར་དུ་བྱིན་གྱིས་བརླབས་པར་བྱ་བ་ནི་མ་ཡིན་ནོ། །དེ་དག་མེད་པ་ན་གནས་པའི་ཕྱིར་དགེ་སློང་དག་ཕྱིན་པ་ཞེས་སྨོས་པ་དེའི་ཕྱིན་པའི་དུས་ཀྱི་ཚིགས་ཅིས་བཟུང་ཞེ་ན། དེའི་ཕྱིར་བྱ་བ་གཞན་རྩོམ་པ་དང་ངལ་བསོ་བ་མ་བྱས་པ་ཚུན་ཆད་ནི་དེ་ཉིད་དོ་ཞེས་བྱ་བ་སྨྲས་ཏེ། དེ་གཉིས་དངོས་ནི་ད་དུང་མ་བྱས་ལ་དེ་གཉིས་ལ་བྱ་བའི་མཚམས་ལ་ཐུག་པ་ཚུན་ཆད་ཀྱི་དུས་ནི་དེར་ཕྱིན་པ་ཞེས་བྱ་བ་ཡིན་པར་སྦྱར་རོ། །བྱ་བ་གཞན་བརྩམ་པ་མ་བྱས་པ་ཚུན་ཆད་ཅེས་བྱ་བ་ནི། ཕྱིན་པ་དེ་དག་གིས་ཕྱིན་པ་ལས་གཞན་པའི་བྱ་བ་ཆུ་བཙག་པ་དང་གཙུག་ལག་ཁང་བསྒྲོ་བ་ལ་སོགས་པ་ཇི་སྲིད་དུ་མ་བརྩམས་པ་ཚུན་ཆད་དོ། །ངལ་བསོ་བ་མ་བྱས་པ་ཞེས་བྱ་བ་ནི། སྟན་ལ་སོགས་པ་འདུག་པར་བྱ་བ་ཇི་སྲིད་དུམ་བཤམས་པ་ཚུན་ཆད་དོ། །དེ་ལྟར་བྱ་བ་གཞན་བརྩམ་པ་དང་ངལ་བསོ་བ་དེ་གཉིས་མ་བྱས་པ་ཚུན་ཆད་ཀྱི་བར་གྱི་དུས་དེ་ནི་དེ་དག་མེད་པ་ན་གནས་པའི་ཕྱིར་དགེ་སློང་དག་ཕྱིན་པ་ཉིད་ཀྱི་དུས་ཡིན་པར་རིག་པར་བྱའོ། །ཐམས་
ཅད་ལ་དགེ་འདུན་གྱི་ལས་ཀྱིས་སོ་ཞེས་བྱ་བ་ནི། དུས་བཞི་པ་ཇི་སྐད་བསྟན་པ་དེ་དག་ཐམས་ཅད་ལ་དགེ་འདུན་གྱིས་གསོལ་བ་དང་གཉིས་ཀྱི་ལས་ཀྱིས་རུང་བའི་ཁང་པ་བྱིན་གྱིས་བརླབ་པར་བྱའོ། །དེའི་སྔགས་ནི་དགེ་འདུན་བཙུན་པ་རྣམས་གསན་དུ་གསོལ། གནས་ཐམས་ཅད་གྲུབ་བ་མ་བགྱིས་པའམ་ལགས་པ་ནང་མཚམས་དང་ཕྱི་རོལ་ཉེན་ཀོར་འདོམ་གང་དང་བཅས་པ་འདི་དགེ་འདུན་གྱི་རུང་བའི་ཁང་པར་བཞེད་ན་གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་གནས་ཐམས་ཅད་གྲུབ་པའམ་བགྱིས་པའམ་ལགས་པ་ནང་མཚམས་དང་ཕྱི་རོལ་ཉེན་ཀོར་འདོམ་གང་དང་བཅས་པ་འདི་དགེ་འདུན་གྱིས་རུང་བའི་ཁང་པར་བགྱིའོ། །འདི་ནི་གསོལ་བའོ། །དགེ་འདུན་བཙུན་པ་རྣམས་གསན་དུ་གསོལ། གནས་ཐམས་ཅད་གྲུབ་པའམ་བགྱིས་པའམ་ལགས་པ་ནང་མཚམས་དང་ཕྱི་རོལ་ཉེན་ཀོར་འདོམ་གང་དང་བཅས་པ་འདི་དགེ་འདུན་གྱི་རུང་བའི་ཁང་པར་བཞེད་དེ། དེའི་སླད་དུ་དགེ་འདུན་གྱི་གནས་ཐམས་ཅད་དུ་གྲུབ་པའམ་བགྱིས་པའམ། ལགས་པ་ནང་མཚམས་དང་ཕྱི་རོལ་ཉེན་ཀོར་འདོམ་གང་དང་བཅས་པ་འདི་དགེ་འདུན་གྱི་རུང་བའི་ཁང་པར་བགྱི་ན། ཚེ་དང་ལྡན་པ་གང་དག་གནས་ཐམས་ཅད་གྲུབ་པའམ་བགྱིས་པའམ། ལགས་པ་ནང་མཚམས་དང་ཕྱི་རོལ་ཉེན་ཀོར་འདོམ་གང་དང་བཅས་པ་འདི་དགེ་འདུན་གྱི་རུང་བའི་ཁང་པར་བགྱི་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །དགེ་འདུན་གྱིས་བཟོད་ཅིང་གནང་ནས། དགེ་འདུན་གྱི་གནས་ཐམས་ཅད་གྲུབ་པའམ། བགྱིས་པའམ། ལགས་པ་ནང་མཚམས་དང་ཕྱི་རོལ་ཉེན་ཀོར་འདོམ་གང་དང་བཅས་པ་འདི་དགེ་འདུན་གྱི་རུང་བའི་ཁང་བར་བགྱིས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་གསུངས་པ་ཡིན་ནོ། །འདིར་གནས་ཐམས་ཅད་གྲུབ་པའམ་བགྱིས་པའམ་ལགས་པ་ཞེས་ཚིག་གསུམ་སྨོས་པ་ནི་གནས་ལ་རྣམ་པ་དེ་ལྟ་བུ་གསུམ་སྲིད་པས་སྤྱིར་བསྟན་པའི་ཕྱིར་ཡིན་གྱི། ལས་བྱེད་པའི་དུས་ན་ནི་གནས་དེ་རྣམ་པ་དེ་གསུམ་གང་ཡིན་པ་གཅིག་སྨོས་པར་བྱ་སྟེ། དཔེར་ན་གནས་ཐམས་ཅད་
གྲུབ་པ་ནང་མཚམས་དང་ཕྱི་རོལ་ཉིན་ཀོར་འདོམ་གང་དང་བཅས་པ་འདི་ཞེས་བྱ་བ་ལྟ་བུར་སྦྱར་ཏེ་བརྗོད་པར་བྱའོ། །དང་པོ་གཉིས་ལ་ནི་གང་ཟག་གིས་ཀྱང་ངོ་ཞེས་བྱ་བ་ནི། བྱིན་གྱིས་བརླབས་པའི་དུས་དང་པོ་གཉིས་ཏེ། དང་པོ་སོ་ཕག་འགྲེམས་པའོ་ཞེས་བྱ་བ་དང༌། ཕྱིས་ལས་སར་པ་དང་བཅས་པ་ཉིད་དོ་ཞེས་བྱ་བ་དེ་གཉིས་ཀྱི་དུས་སུ་ནི་གང་ཟག་གིས་ཀྱང་ཕྱིན་གྱིས་བརླབ་ཏུ་རུང་བའོ། །གང་ཟག་ཇི་ལྟ་བུས་ཤེན་དེའི་ཕྱིར་ལག་གི་བླས་སོ་ཞེས་བྱ་བ་སྨོས་ཏེ། དང་པོ་ཤོས་ལ་ནི་འབའ་ཞིག་གིས་ཀྱང་ངོ་ཞེས་བྱ་བ་ནི། དང་པོ་གཉིས་ལས་ཀྱང་དང་པོ་ཤོས་ཏེ་དང་པོ་སོ་ཕག་འགྲེམས་པའོ་ཞེས་བྱ་བའི་དུས་དེར་ནི་གང་ཟག་གི་བླ་འབའ་ཞིག་གིས་ཀྱང་བྱིན་གྱིས་བརླབ་ཏུ་རུང་བའོ། །ཀྱང་ངོ་ཞེས་བྱ་བའི་སྒྲས་ནི་དགེ་སློང་གཞན་དང་ལྷན་ཅིག་པས་ཀྱང་རུང་བར་སྟོན་ཏོ། །ཇི་ལྟར་ཕྱིན་གྱིས་བརླབ་པར་བྱ་ཞེ་ན་དེའི་ཕྱིར་བརྗོད་པས་སོ་ཞེས་བྱ་བ་སྨྲས་ཏེ། སེམས་བསྐྱེད་པ་སྔར་བཏང་ནས་ཚིག་ཏུ་བརྗོད་པས་བྱིན་གྱིས་བརླབ་པར་བྱའི། ཅང་མི་སྨྲས་བས་ནི་མ་ཡིན་ནོ། །འདིར་གཞུང་ནི་འདི་ལྟར་དགེ་སློང་ལག་གི་བླས་རྡོ་བཏེག་པ་ན་དེའི་དང་པོར་གཞི་འདི་ནི་དགེ་འདུན་གྱི་དུང་བའི་ཁང་པར་འགྱུར་བའོ་སྙམ་དུ་སེམས་བསྐྱེད་པར་བྱ་ཞིང༌། ཚིག་ཏུ་ཡང་བརྗོད་པར་བྱའོ་ཞེས་གསུངས་པ་ཡིན་ནོ། །འདིར་གང་ཟག་གིས་བྱིན་གྱིས་བརླབ་པའི་ཆོ་ག་དང་སྔགས་ཀྱང་གཞུང་དེ་ཉིད་ཡིན་ནོ། །དུས་དང་པོར་བྱིན་གྱིས་བརླབས་པའི་རུང་བའི་ཁང་པ་འདིའི་མིང་ནི་བཏེག་པའི་མཐའ་ལས་བྱུང་བ་ཞེས་བྱའོ། །གཉིས་པ་ལ་ནི་དགེ་སློང་རབ་ཏུ་མང་པོ་དག་གིས་སེམས་བསྡུ་བས་སོ་ཞེས་བྱ་བ་ནི། བྱིན་གྱིས་བརླབས་པའི་དུས་གཉིས་པ་སྟེ། ཕྱིས་ལས་སར་པ་དང་བཅས་པ་ཉིད་དོ་ཞེས་བྱ་བའི་དུས་དེར་ནི་དགེ་སློང་རབ་ཏུ་མང་པོ་དག་གིར་རུང་བའི་ཁང་པར་སེམས་བསྡུ་བས་བྱིན་གྱིས་བརླབ་པར་བྱ་བ་སྟེ། འདིའི་སྔགས་ནི། ཚེ་དང་ལྡན་པ་དག་གཞི་འདི་དགེ་འདུན་གྱི་རུང་བའི་ཁང་པར་འགྱུར་བར་སེམས་བསྡུས་ཤིག་ཅེས་གསུངས་པ་ཡིན་ནོ། །དུས་གཉིས་བར་བྱིན་གྱིས་བརླབས་པའི་རུང་བའི་ཁང་བ་འདིའི་མིང་ནི་སེམས་བསྡུས་པའི་མཐའ་ལས་བྱུང་བ་ཞེས་བྱའོ། །གསུམ་པ་ལ་ནི་ལས་ཁོ་ནས་སོ་ཞེས་བྱ་བ་ནི། བྱིན་གྱིས་བརླབ་པའི་
དུས་གསུམ་པ་སྟེ། གཞན་གྱི་ཚེ་དགེ་སློང་གནས་པ་ཉིད་དང་མ་བྲལ་བའོ་ཞེས་བྱ་བའི་དུས་དེའི་ཚེ་ནི་དགེ་འདུན་གྱིས་གསོལ་བ་དང་གཉིས་ཀྱི་ལས་ཀྱིས་བྱིན་གྱིས་བརླབ་པ་ཁོ་ནར་བྱ་བའོ། །དུས་གསུམ་པར་བྱིན་གྱིས་བརླབས་པའི་རུང་བའི་ཁང་པ་འདིའི་མིང་ནི་ལས་ཀྱི་མཐའ་ལས་བྱུང་པ་ཞེས་བྱའོ། །བཞི་པ་ལ་ནི་ཇི་སྙེད་ཕྱིན་པ་དེ་སྙེད་ཀྱིས་རུང་བའི་ཁང་པ་ཉིད་དུ་བསྒྲག་པའི་ཚིག་ཅིག་ཅར་བརྗོད་པས་སོ་ཞེས་བྱ་བ་ནི། བྱིན་གྱིས་བརླབ་པའི་དུས་བཞི་པ་སྟེ། དེ་དག་མེད་པ་ན་གནས་པའི་ཕྱིར་དགེ་སློང་དག་ཕྱིན་པའོ་ཞེས་བྱ་བའི་དུས་དེར་ནི་དགེ་སློང་གསུམ་ལ་སོགས་པ་ཇི་སྙེད་དེར་ཕྱིན་པ་དེ་སྙེད་ཀྱིས་རུང་བའི་ཁང་པ་ཉིད་དུ་བསྒྲག་པའི་ཚིག་ཅིག་ཅར་བརྗོད་པས་བྱིན་གྱིས་བརླབ་པར་བྱའོ། །འདིའི་ཚེ་ཆོ་ག་དང་སྔགས་ནི། དགེ་སློང་ཕྱིན་པ་ཐམས་ཅད་ཀྱིས་གཞི་འདི་ནི་དགེ་འདུན་གྱི་རུང་བའི་ཁང་པར་འགྱུར་བའོ་ཞེས་ཚིགས་མཐུན་པར་ཅིག་ཅར་བརྗོད་པར་བྱའོ་ཞེས་གསུངས་པ་ཡིན་ནོ། །དུས་བཞི་པར་བྱིན་གྱིས་བརླབ་པའི་རུང་བའི་ཁང་པ་འདིའི་མིང་ནི་འཕྲལ་ལ་བྱུང་བའི་གནས་ཞེས་བྱའོ། །འཕྲལ་ལ་བྱུང་བ་ཞེས་བྱ་བ་ནི་ཆེད་དུ་མ་བསམས་པ་སྟེ། གནས་འདི་ཆེད་དུ་མ་བསམས་པར་བྱུང་པ་ཡིན་པས་འཕྲལ་ལ་བྱུང་བའི་གནས་ཞེས་བྱ་བའོ། །གཅིག་གིས་གཙུག་ལག་ཁང་དུ་མའི་བྱ་བ་བྱེད་པ་ལ་མི་མཛེས་པ་མེད་དོ་ཞེས་བྱ་བ་ནི། རུང་པའི་ཁང་པ་གཅིག་གིས་གཙུག་ལག་ཁང་དུ་མའི་བྱ་བ་ནང་དུ་བཅོ་བ་དང་ནང་དུ་ཞག་ལོན་པ་དག་བྱེད་པ་ལ་ནི་མི་མཛེས་པ་མེད་དེ་མཛེས་པ་ཁོ་ནའོ། །འདི་སྐད་བསྟན་ཏེ། གཙུག་ལག་ཁང་ཡུལ་ཐ་དད་པ་ན་གནས་པ་གནས་དེ་ཐ་དད་པ་དུ་མ་དག་ཏུ་རུང་བའི་ཁང་པ་གཅིག་བྱིན་གྱིས་བརླབས་པར་གྱུར་ན། དེས་གཙུག་ལག་ཁང་ཐམས་ཅད་ན་གནས་པ་དག་གིས་ནང་དུ་ཞག་ལོན་པ་དང་ནང་དུ་བཙོས་པ་ལ་སོགས་པའི་བྱ་བ་བྱེད་ན་དེ་མི་མཛེས་པ་མ་ཡིན་པར་ཤེས་པར་བྱ་བའོ། །གཅིག་གིས་གཙུག་ལག་ཁང་དུ་མའི་བྱ་བ་བྱེད་པའི་རུང་བའི་ཁང་བ་འདིའི་མིང་ནི་བ་ལང་གི་གནས་ལྟ་བུ་ཞེས་བྱ་སྟེ། རུང་བའི་ཁང་པ་གཅིག་ལ་གཙུག་ལག་ཁང་མང་པོ་བ་ལང་ལྟར་ཁ་ཐ་དད་པ་དག་ནས་འཁོད་པ་དེ་ནི་བ་ལང་གི་གནས་ལྟ་བུའོ། །འདིར་གཞུང་ནི་བ་ལང་གི་གནས་ལྟ་བུ་གང་ཞེ་ན། གཞི་གང་ལ་ཐ་དད་པ་དག་ནས་
འཁོད་པའོ་ཞེས་གསུངས་པ་ཡིན་ནོ། །དེ་ནི་ཐ་དད་པར་གྱུར་པའི་རུང་བ་ཉིད་དམ་བསྟན་ཏོ་ཞེས་བྱ་བ་ནི། གནས་པའི་གཞི་ཁ་ཐ་དད་པ་དག་ནས་འཁོད་པ་ཞེས་བསྟན་པའི་རུང་བའི་ཁར་པ་དེ་ནི་གཙུག་ལག་ཁང་གི་གནས་འབྲེལ་པ་མེད་པ་ཐ་དད་པར་གྱུར་པ་དག་གི་རུང་བའི་ཁང་པ་ཉིད་དུ་བསྟན་པ་མ་ཡིན་པར་ཤེས་པར་བྱ་སྟེ། འདི་ལྟར་གཙུག་ལག་ཁང་གི་གནས་འབྲེལ་པས་བྱིན་གྱིས་བརླབ་པའི་རུང་པའི་ཁང་པ་ཉིད་ཡིན་ནོ། །འདི་སྐད་བསྟན་ཏེ། རུང་པའི་ཁང་པ་དེ་ནི་གནས་པའི་གཞི་མ་འབྲེལ་པ་དེས་བྱིན་གྱིས་བརླབས་པ་མ་ཡིན་ནོ། །འདིར་གཞུང་ནི་འདི་ལྟར་མཚམས་གཅིག་ཏུ་གཙུག་ལག་ཁང་རབ་ཏུ་མང་པོ་ཁ་ཐ་དད་པ་དག་ཏུ་བཀོད་པར་གྱུར་ཅིང༌། དེར་རུང་བའི་ཁང་པ་གཅིག་ལ་བློ་མཐུན་པར་བྱས་ན་གཙུག་ལག་ཁང་དེ་དག་ཐམས་ཅད་ཀྱི་རུང་བའི་ཁང་པ་གཅིག་ཁོ་ན་ཡིན་ནོ་ཞེས་གསུངས་པ་ཡིན་ནོ། །པདྨའོ་ཞེས་བྱ་བ་ཡན་ཆད་མུ་གེའིའོ་ཞེས་བྱ་བ་ནི། འོག་གི་མདོ་གང་ནམ་པདྨའོ་ཞེས་འབྱུང་བ་ཡན་ཆད་འདི་མན་ཆད་ཀྱི་པར་ནས་ཅི་སྨོས་པ་ཐམས་ཅད་མུ་གེའི་དུས་ཀྱི་ཚེ་ན་གནང་བ་ཡིན་པར་རིག་པར་བྱའི། དུས་གཞན་གྱི་ཚེ་ན་མི་གནང་ངོ་ཞེས་བྱ་བར་སྦྱར་རོ། །དེ་ལྟར་ཡང་འདིར་གཞུང་ནི། ཀུན་དགའ་བོ་ངས་གྲོང་ཁྱེར་ཡངས་པ་ཅན་དུ་མུ་གེས་ཕོངས་པ་གནོད་པ་བྱུང་བ་ན་དགེ་སློང་རྣམས་ལ་དངོས་པོ་བརྒྱད་པོ་ནང་དུ་ཞག་ལོན་པ་དང༌། ནང་དུ་བཙོས་པ་དང༌། རང་གིས་བཙོས་པ་དང༌། དགེ་སློང་གིས་བཙོས་པ་དང༌། སྔ་དྲོ་བའི་ཟས་བྱིན་ལེན་བྱས་པ་དང་དེས་ན་མངོན་པར་བསྒྲུབས་པ་དང་ནགས་ཀྱི་རུས་པ་དང་པདྨ་གང་དག་རྗེས་སུ་གནང་བའི་དངོས་པོ་དེ་དག་དགེ་སློང་རྣམས་ད་དུང་ཡང་རུང་བ་དེ་ཉིད་ཀྱིས་ཡོངས་སུ་ལོངས་སྤྱོད་པར་བྱེད་དོ། །དགེ་སློང་ཁ་ཅིག་ནི་ཟ་བར་བྱེད་ཁ་ཅིག་ཟ་བར་མི་བྱེད་དོ། །དེས་ན་བཅོམ་ལྡན་འདས་ཀྱིས་གླེང་གཞི་དེ་ལ་དགེ་སློང་རྣམས་བསྡུས་ཏེ། དགེ་སློང་རྣམས་ལ་བཀའ་སྩལ་པ། དགེ་སློང་དག་ངས་གྲོང་ཁྱེར་ཡངས་པ་ཅན་དུ་མུ་གེས་ཕོངས་པ་གནོད་པ་བྱུང་བ་ན་དགེ་སློང་ཡངས་པ་ཅན་རྣམས་ལ་རྗེས་སུ་སྙིང་བརྩེ་བའི་ཕྱིར་དངོས་པོ་བརྒྱད་རྗེས་སུ་གནང་བ་གང་དག་ཡིན་པ་དེ་དག་མ་གེའི་ཚེ་ཡོངས་སུ་ལོངས་སྤྱད་པར་བྱའི། ལོ་ལེགས་པའི་ཚེ་ཡོངས་སུ་ལོངས་སྤྱད་པར་མི་བྱའོ། །གང་ཡོངས་སུ་ལོངས་སྤྱོད་པར་
བྱེད་པ་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །མུ་གེའི་ཚེ་དགེ་སློང་གིས་བཙོས་པ་དང་ལག་ཉར་བླངས་པ་དང་བྱིན་ལེན་མ་བྱས་པ་དག་བཟའ་བར་བྱའོ། །ནང་དུ་བཙོས་པ་དང་ཞག་ལོན་པའོ། །སྔ་དྲོ་བའི་ཟས་སོ་ཞེས་བྱ་བ་དེ་དག་ནི་ཟས་སྤངས་ནས་ཟ་བ་དང་ཡང་ཡང་ཟ་བ་གནང་བའོ། །བཏུང་བའི་དུས་ཐམས་ཅད་དུའོ་ཞེས་བྱ་བ་ནི། མུ་གེ་དང་ལོ་ལེགས་པའི་དུས་ཐམས་ཅད་དུ་ཡང་ཐུག་པ་དང་སྐྱོ་མ་ལ་སོགས་པའི་བཏུང་བ་ནི་སྤངས་ནས་ཟ་བ་དང་ཡང་ཡང་ཟ་བའི་སྐབས་སུ་གནང་བའོ། །འདིར་གཞུང་ནི་དེ་ལྟ་བས་ན་གྲོ་བཞིན་སྐྱེས་བྱེ་བ་ཉི་ཤུ་པ་ལ་བརྟེན་ཏེ་དགེ་འདུན་ཐམས་ཅད་ཀྱི་བཏུང་བ་བཏུང་བར་རྗེས་སུ་གནང་ངོ་ཞེས་གསུངས་པ་ཡིན་ཏེ། འདི་ཡང་སྤངས་པ་ཟ་བ་དང་ཡང་ཡང་ཟ་བ་བག་ཡངས་སུ་གནང་བ་ཡིན་ནོ། །སྔར་བྱིན་ལེན་བྱས་པ་སྤངས་ཏེ་ལངས་པས་སོ་ཞེས་བྱ་བ་ནི། ཟས་སྔར་བྱིན་ལེན་བྱས་པ་གང་ཡིན་བདེ་སྤངས་ཏེ་ལངས་པ་བཟའ་བར་བྱའོ། །འདི་ནི་སྤངས་ནས་ཟ་བའི་ལྟུང་བྱེད་ཀྱིས་དམིགས་ཀྱིས་བསལ་བའོ། །དེ་བླང་བའི་ཕྱིར་ལྡང་བར་བྱའོ་ཞེས་བྱ་བ་ནི། སྔར་བྱིན་ལེན་བྱས་པ་དེ་བླང་པའི་ཕྱིར་ལྡང་བར་བྱ་བ་སྟེ། འདི་ནི་ཟས་བརྩམས་པས་ལྡང་བར་མི་བྱའོ་ཞེས་བྱ་བ་དེའི་བག་ཡངས་སུ་བྱ་བ་ཡིན་ནོ། །ལྷག་མའོ་ཞེས་བྱ་བ་ནི། སྦངས་ཏེ་ལངས་པས་བཟའ་བར་བྱའོ་ཞེས་བྱ་བར་སྦྱར་ཏེ། དེས་བཟའ་བའི་ཕྱིར་སྟ་གོན་བྱས་པ་གང་ཡིན་པ་དེ་ལས་ལྷག་མ་ཡོད་པ་གང་ཡིན་པ་དེ་དགེ་སློང་སྤངས་ཏེ་ལངས་པས་བཟའ་བར་བྱ་བའོ། །འདི་དང་འོག་མ་ཡང་སྤངས་ནས་ཟ་བའི་ལྟུང་བྱེད་ཀྱི་དམིགས་ཀྱིས་བསལ་བའོ། །མངོན་པར་བསྒྲུབ་པའོ་ཞེས་བྱ་བ་ནི། གཞག་པའི་གནས་ནས་དྲངས་པ་སྤངས་ཏེ་ལངས་པས་བཟའ་བར་བྱའོ། །རང་གི་ཟས་ཀྱི་གནས་ནས་ལྷག་མ་དེ་དྲང་བ་ལ་ལས་མི་རིགས་པར་སེམས་པ་གང་ཡིན་པ་དེ་བསལ་བའི་ཕྱིར་དེ་བསྒྲུབ་པར་བྱའོ་ཞེས་བྱ་བ་སྨྲས་ཏེ། ལྷག་མ་དེ་དྲང་བར་བྱ་བྱའོ། །ནགས་ཀྱིས་རུས་པའོ་ཞེས་བྱ་བ་ནི། སྤངས་ཏེ་ལངས་པས་བཟའ་བར་བྱ་བའོ། །ནགས་ཀྱི་རུས་པ་ཞེས་བྱ་བ་ནི། དཔེར་ན་ཤའི་རུས་པ་ནི་རུང་བ་དག་ཡིན་པ་དེ་བཞིན་དུ། ནགས་ཀྱི་ཤིང་དག་གི་རུས་པ་ཡང་ཤིང་ཏོག་རུས་པ་ཅན་དག་ཡིན་པས། དེའི་ཕྱིར་ཤིང་ཏོག་རུས་པ་ཅན་དག་ནི་ནགས་ཀྱི་རུས་པ་ཡིན་ནོ། །ནགས་
ཀྱི་རུས་པ་ཞེས་བྱ་བ་ནི། ཅི་ཞིག་ཡིན་ཞེ་ན། དེའི་ཕྱིར་འདི་ལྟ་སྟེ། རྒུན་དང་བལ་པོ་སེའུ་དང་འབྲ་གོ་དང་སྟར་ག་དང་བཱ་ཏཱ་མ་དང་ཨུ་རུམ་ཡི་ཀ་དང་ཀུ་རུ་མ་ཡིག་དང་ཁམ་བུ་དང་རྒྱ་ཤུག་དང་སར་དག་ནི་དེ་ཞེས་བྱ་བའོ་ཞེས་བྱ་བ་སྨྲས་ཏེ། དེ་དག་ནི་ནགས་ཀྱི་དུས་པ་ཞེས་བྱའོ། །པདྨའོ་ཞེས་བྱ་བ་ནི། དེ་ཡང་ནགས་ཀྱི་རུས་པ་ཡིན་ཏེ་སྤངས་ཏེ་ལངས་པས་བཟའ་བར་བྱའོ། །པདྨ་ཞེས་བྱ་བ་དེ་ཅི་ཞིག་ཡིན་ཞེ་ན། དེའི་ཕྱིར་འདེ་ལྟ་སྟེ། པདྨའི་རྩ་བ་དང་པདྨའི་རྩ་ལག་དང་བེ་ཏཱ་དང་ཨུཏྤ་ལའི་རྩ་བ་དང་པདྨའི་སྙིང་པོ་དག་ནི་དེ་ཞེས་བྱའོ་ཞེས་བྱ་བ་ནི། དེ་དག་ནི་པདྨ་ཞེས་བྱའོ། །རྒུན་ལ་སོགས་བདེ་དག་ནི་རུས་པ་དང་བཅས་པ་རུས་པ་ལྟ་བུའི་རྩ་བ་དང་འབྲས་བུ་དག་ནི་དཔེ་ཡིན་ཏེ་རང་བཞིན་འདྲ་བའི་ཕྱིར་རོ། །གཞིར་གཏོགས་པའི་སྨན་གྱི་གཞིའོ་ཞེས་བྱ་བ་དེ་བཤད་ཟིན་ཏོ།། །།ད་ནི་སྨན་གྱི་གཞི་ཕྲན་ཚེགས་ལ་སོགས་པའི་སྐབས་བརྗོད་པར་བྱའོ། །དེ་ལ་རེ་ཞིག་འབྲེལ་པ་བསྟན་པར་བྱ་སྟེ། བཀྲེས་པ་དང་སྐོམ་པ་དག་ནི་ནད་དང་འདྲ་བ་ཡིན་ཏེ། ལུས་ལ་གནོད་པར་བྱེད་པ་ཉིད་ཡིན་པའི་ཕྱིར་རོ། །དེ་བས་ན་དེ་དག་གི་གཉན་པོར་གྱུར་པ་འཚོ་བ་ཙམ་སྒྲུབ་པར་བྱེད་པ་བཟའ་བར་བྱ་བ་དང་བཏུང་བར་བྱ་བ་དུས་སུ་རུང་བའི་སྨན་གྱི་ཁོངས་སུ་གཏོགས་པ་ཉིད་གང་དག་ཡིན་པ་དེ་དག་གི་འདུ་བའི་སྒོ་བསྟན་པའི་ཕྱིར། རྒྱལ་སྲིད་དང་དེའི་ཕྱེད་མནོད་པར་མི་བྱའོ་ཞེས་བྱ་བ་སྨྲས་ཏེ། རྒྱལ་སྲིད་དེའི་ཕྱེད་དོ། །དགེ་འདུན་གྱི་ཆེད་དུ་ཞིང་མནོད་པར་བྱའོ་ཞེས་བྱ་བ་ནི། རྒྱལ་པོ་ལ་སོགས་པས་ཕུལ་བའོ། །ཞིང་ཡང་ངོ་ཞེས་བྱ་བ་ནི། མནོད་བར་བྱའོ་ཞེས་བྱ་བར་སྦྱར་ཏེ། ཞིང་ནི་གྲོང་གི་ཡུལ་གཅིག་ཡིན་པའི་ཕྱིར་རོ། །དེ་ཡལ་བར་མི་དོར་རོ་ཞེས་བྱ་བ་ནི་ཞིང་དེའོ། །དེའི་ཐོག་ཤས་མནོད་དོ་ཞེས་བྱ་བ་ནི་ཞིང་དེའོ། །ཐོག་ཤས་བཙལ་ལོ་ཞེས་བྱ་བ་ནི། ཞིང་གི་ཐེག་ཤས་བཙལ་བར་བྱ་བའོ། །རྨོས་པས་དེ་གཙུག་ལག་ཁང་དུ་དབུལ་བར་བྱ་བ་ཉིད་དོ་ཞེས་བྱ་བ་ནི། ཞིང་པ་གང་གིས་ཞིང་དེ་སྨོས་པ་དེས་ཞིང་དེའི་ཐོག་ཤས་དེ་དགེ་འདུན་གྱི་གཙུག་ལག་ཁང་དུ་དབུལ་བར་བྱ་བ་ཉིད་དོ། །ནམ་གྱི་ཚེ་ཞེ་ན། དེའི་ཕྱིར་བདག་ཉིད་ཀྱི་བས་དང་པོར་རོ་ཞེན་བྱ་བ་སྨྲས་ཏེ། ཞིང་བས་བདག་ཉིད་ཀྱི་ཞིང་ཐོག་ཤས་པས་དགེ་འདུན་གྱི་ཐོག་ཤས་དང་པོར་དབུལ་བར་བྱ་བ་ཉིད་དོ། །བསྲུང་བའི་ཕྱིར་དགེ་སློང་དག་བསྐོའོ་
ཞེས་བྱ་བ་ནི། དགེ་འདུན་གྱི་ཐོག་ཤས་མནོད་པ་བསྲུང་བའི་ཕྱིར་དགེ་སློང་དག་བསྐོ་བར་བྱའོ། །འདུ་བ་དང་འགོད་པ་དང་གཉི་ག་ལས་གང་ཡང་རུང་བ་མི་མངོན་པས་རྩིས་གདབ་པར་མི་བྱའོ་ཞེས་བྱ་བ་ནི། གཙུག་ལག་ཁང་གདན་འདུ་བ་དང་འགོད་པ་དང་འདུ་འགོད་གཉིས་ལས་གང་ཡང་རུང་བའི་རྩིས་བྱ་མི་དགོས་ཤིང་མི་མངོན་པ་དེར་དགེ་སློང་དག་གིས་རྩིས་གདབ་པར་མི་བྱ་བར་མི་བྱ་བར་ཅི་འདུ་བ་དང་ཅི་འགོད་པའི་སྒོ་དེ་བཞིན་དུ་བསྡུ་ཞིང་སྤྱད་པར་བྱ་བའོ། །གཞན་ལ་ནི་དྲན་པ་དང་ཤེས་བཞིན་སྔོན་དུ་བཏང་སྟེ་དེ་ལ་འཇུག་པར་བྱའོ་ཞེས་བྱ་བ་ནི། གཙུག་ལག་ཁང་གང་ན་འདུ་བ་དང་འགོད་པ་དང་འདུ་འགོད་གཉིས་ལས་གང་ཡང་རུང་བའི་རྩིས་བྱ་དགོས་ཤིང་མངོན་པ་དེར་དགེ་སློང་དག་གིས་རྩིས་བྱ་བ་དེ་ལ་དྲན་པ་དང་ཤེས་བཞིན་སྔོན་དུ་བཏང་སྟེ་འཇུག་པར་བྱའོ། །དགེ་འདུན་གྱི་ཆེད་དུ་གཡོག་ཉེ་བར་གཞག་གོ་ཞེས་བྱ་བ་ནི། དགེ་འདུན་གྱི་ཆེད་དུ་ཡོན་བདག་གིས་གཡོག་ཕུལ་ན་ཉེ་བར་གཞག་པར་བྱ་བའོ། །འདིར་གཞུང་ནི། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ཆེད་དུ་གཡོག་བླང་བར་བྱའོ་ཞེས་གསུངས་པ་ཡིན་ནོ། །གང་ནས་གཙུག་ལག་ཁང་དུ་སྒྲ་མི་འབྱུང་བ་དེར་ལྷ་འབངས་ཀྱི་སྡུམ་པ་བྱེད་དུ་གཞུག་གོ་ཞེས་བྱ་བ་ནི། ལྷ་འབངས་ཀྱི་སྡུམ་པ་གང་ནས་ལྷ་རིས་པའི་གཏམ་ཐ་མལ་པའི་སྒྲ་དང༌། ཐབ་མོ་ལ་སོགས་པ་བླག་ཅོར་གྱི་སྒྲ་གཙུག་ལག་ཁང་དུ་མི་འབྱུང་མི་གྲག་པའི་ཕྱོགས་དེར་ལྷ་འབངས་ཀྱི་སྡུམ་པ་བྱེད་དུ་གཞུག་པའོ། །ཇི་སྙེད་དགོས་པ་འཇུག་པར་བྱའོ་ཞེས་བྱ་བ་ནི། ལྷ་འབངས་དང་རྩེ་རྒོད་ལ་སོགས་པ་མི་བླས་ཇི་སྙེད་དགོས་པ་གཙུག་ལག་ཁང་གི་ནང་དུ་འཇུག་པར་བྱའི། རིལ་གྱིས་ནི་མི་དགུག་གོ་ཞེས་བྱ་བའི་ཐ་ཚིག་གོ །ཟན་དང་གོས་སྦྱིན་པར་བྱ་བ་ཉིད་དོ་ཞེས་བྱ་བ་ནི། དགེ་འདུན་གྱི་གཡོག་དག་ལའོ། །གལ་ཏེ་ལས་བྱེད་ནའོ་ཞེས་བྱ་བ་ནི། གལ་ཏེ་གཡོག་དག་ལས་བྱེད་ན་དེ་དག་ལ་ཟས་དང་གོས་སྦྱིན་པར་བྱ་བ་ཉིད་དོ། །ན་བ་རྣམས་ལ་གཡོག་བྱའོ་ཞེས་བྱ་བ་ནི། གཡོག་དག་གལ་ཏེ་ནན་དེ་རྣམས་ཡལ་བར་མི་དོར་བར་སྨན་ལ་སོགས་པས་བསྙེན་བཀུར་བྱ་བའོ། །བ་ལང་དང་མ་ཧེ་དང་ར་དང་ལུག་དང་གླང་པོ་ཆེ་དང་རྟ་དང་རྔ་མོ་དང་བོ་བུ་དང་འབྲུ་རྣམས་དང་སྣོད་ཀྱང་ངོ་
ཞེས་བྱ་བ་ཡང༌། དགེ་འདུན་གྱི་ཆེད་དུ་བླང་བར་བྱ་བའོ། །འདིར་གཞུང་ནི་བཙུན་པ་དགེ་སློང་གིས་ལོངས་སྤྱོད་མཆོག་བླང་དུ་རུང་ངམ། ཀཱ་ཏྱཱ་ཡ་ན་དགེ་འདུན་གྱི་ཆེད་དུ་བླང་དུ་རུང་ངོ༌། །དེ་ལ་ལོངས་སྤྱོད་ནི་གྲོང་དང་ཞིང་དག་གོ །ལོངས་སྤྱོད་མཆོག་ནི་བ་ལང་དང་མ་ཧེ་དང་ར་དང་ལུག་དག་གོ །ཡོ་བྱད་མི་མ་ཡིན་པ་དག་གང་ཞེ་ན། གླང་པོ་ཆེ་དང་རྟ་དང་རྔ་མོ་དང་བོང་བུ་དང་ར་དང་ལུག་དང༌། མ་ཧེ་བཅོམ་ལྡན་འདས་ཀྱིས་རྗེས་སུ་གནང་བ་མཆོད་རྟེན་གྱི་ཡང་རུང་དགེ་འདུན་གྱི་ཡང་རུང་བ་དག་གོ་ཞེས་གསུངས་པ་ཡིན་ནོ། །དེ་དག་མཆོད་རྟེན་གྱིར་ཡང་མི་རུང་བ་མ་ཡིན་ནོ་ཞེས་བྱ་བ་ནི། གྲོང་ལ་སོགས་པ་དང་བ་ལང་ལ་སོགས་པ་དགེ་འདུན་གྱི་ཆེད་དུ་བླང་དུ་རུང་བ་དེ་དག་མཆོད་རྟེན་གྱི་ཆེད་དུ་ཡང་བླང་དུ་རུང་བ་ཁོ་ན་ཡིན་པའོ། །ཁ་གཟར་དང་ཚྭ་ཁུག་བཅང་བར་བྱའོ་ཞེས་བྱ་བ་ནི་གང་ཟག་གིས་ཀྱང་ངོ༌། །དེ་གཉིས་དང་ཕུལ་བའི་བཏུང་ཕོར་ལས་གཞན་པའི་ཁར་བའི་སྣོད་གང་ཟག་གིས་བཅང་པར་མི་བྱའོ་ཞེས་བྱ་བ་ནི། ཁ་གཟར་དང་ཚྭ་ཁུག་དེ་གཉིས་དང་ཕུལ་བའི་བཏུང་ཕོར་ལས་གཞན་པའི་ཁར་བའི་སྣོད་དག་གང་ཟག་གིས་བཅང་བར་མི་བྱའོ་ཞེས་བྱ་བ་བདག་གིར་མི་བྱ་བའོ། །འདི་ལྟར་ཁར་བའི་སྣོད་གཞན་ཡང་སྨན་ཕོར་དུ་ཡོངས་སུ་ལོངས་སྤྱད་པས་ཡོངས་སུ་ལོངས་སྤྱད་པར་བྱའོ་ཞེས་གསུངས་པས་དེའི་ཕྱིར་འདི་ནི་བདག་གིར་བྱ་བ་དགག་པའི་རྣམ་པ་ཡིན་ནོ། །ཀུན་དགའ་ར་བ་ཉེ་བར་གཞག་པར་བྱའོ་ཞེས་བྱ་བ་ལ། འདིར་ཉེ་བར་གཞག་པ་ཞེས་བྱ་བ་ནི་བཅད་བ་སྟེ་དེས་ན་དགེ་འདུན་ནམ། གང་ཟག་གིས་ཀྱང་གཡོག་བཅད་བར་བྱ་བའོ།། འདིར་གཞུང་ནི་ཡོ་བྱད་མི་དག་གང་ཞེ་ན། ཀུན་དགའ་ར་བ་པ་བཅོམ་ལྡན་འདས་ཀྱིས་རྗེས་སུ་གནང་བ་དགེ་འདུན་གྱི་ཡང་རུང་གང་ཟག་གི་ཡང་རུང་བའོ་ཞེས་གསུངས་པ་ཡིན་ནོ། །བསྲུང་བའི་ཕྱིར་བྱིས་པ་མཚན་མཐུན་པ་འབུལ་བ་དག་བླང་བར་བྱའོ་ཞེས་བྱ་བ་ནི། ཁྱིམ་བདག་གིས་བྱིན་པ་ཁྱེའུ་དང་བུ་མོ་དག་བསྲུང་བའི་ཕྱིར་དགེ་འདུན་ནམ། གང་ཟག་ལ་དབུལ་ན་མཚན་མཐུན་པ་དག་བླང་བར་བྱ་སྟེ། དགེ་སློང་རྣམས་ཀྱིས་ནི་ཁྱེའུ་དག་བླང་བར་བྱའོ། །དགེ་སློང་མ་རྣམས་ཀྱིས་ནི་བུ་མོ་དག་བླང་བར་བྱ་བའོ། །འདིར་གཞུང་ནི་བཅོམ་ལྡན་འདས་ལ་འཕྲོག་མ་སྐྱབས་སུ་སོང་ཞིང་
བསླབ་པའི་གཞི་དག་ལ་བཞག་ནས། དེས་བུ་དེ་དག་གནོད་སྤྱན་གདུག་པས་འཇིགས་པས་བསྲུང་བའི་ཕྱིར་དགེ་འདུན་ལ་ཕུལ་བ་ཐོས་ནས་དེ་དག་འདི་སྙམ་དུ་དེས་བསྲུང་པའི་ཕྱིར་དགེ་སློང་རྣམས་ལ་བུ་དག་རེ་ཞིག་འབུལ་བར་བྱེད་ན་བདག་ཅག་གིས་ཀྱང་ཅིའི་ཕྱིར་མི་འབུལ་སྙམ་ནས། དེ་དག་གིས་དབུལ་བར་བརྩམས་པ་དང༌། དགེ་སློང་དག་མི་ལེན་ནས། བཅོམ་ལྡན་འདས་ཀྱིས་བཀའ་སྩལ་པ། བླང་བར་བྱའོ་ཞེས་གསུངས་པ་ཡིན་ནོ། །དེ་དག་གི་ཆ་ལུགས་ནི་མགུལ་པར་ཆོས་གོས་བཏགས་པ་ཉིད་དོ་ཞེས་བྱ་བ་ནི། བྱིས་པ་དགེ་སློང་གིས་བླངས་པ་དེ་དག་གི་ཆ་ལུགས་ནི་མགུལ་བར་དགེ་སློང་གིས་ཆོས་གོས་ཀྱི་ཚལ་བུ་རེ་རེ་བཏགས་པ་ཡིན་ནོ། །རྐེད་པར་ཡང་རུང་ངོ་ཞེས་བྱ་བ་ནི། ཆོས་གོས་གདགས་པ་ཉིད་དོ། །ཕན་གདགས་པའི་སེམས་ཀྱིས་སོ་སོར་བསྐྱང་བར་བྱའོ་ཞེས་བྱ་བ་ནི། དགེ་སློང་རྣམས་ཀྱིས་བྱིས་པ་དེ་དག་ལ་ཕན་གདགས་པའི་སེམས་ཀྱིས་སོ་སོར་བསྐྱང་བར་བྱ་སྟེ། ཟང་ཟིང་དང་བཅས་པའི་སེམས་ཀྱིས་ནི་མ་ཡིན་ནོ། །དེའི་ཉེ་དུས་ཕུལ་བ་བླང་བར་བྱའོ་ཞེས་བྱ་བ་ནི། བྱིས་པ་དེ་དག་གི་ཉེ་དུས་གོས་ལ་སོགས་པ་དག་དགེ་སློང་ལ་ཕུལ་བ་བླང་བར་བྱའོ། །མཇུག་ཏུ་ནི་རིན་ཉིད་དུ་ཡང་ངོ་ཞེས་བྱ་བ་ནི། དེའི་ཉེ་དུ་དག་གིས་མཇུག་ཏུ་བྱིས་པ་ཕྱིར་ལེན་པའི་ཚེ་བྱིས་པའི་རིན་ཉིད་དུ་གོས་ལ་སོགས་པ་ཕུལ་བ་ཡད་བླང་བར་བྱ་སྟེ། དེ་ནི་དེ་དག་གིས་དད་པའི་དབང་དུ་བྱས་པ་ཉིད་ཡིན་པས། འདི་ལ་ལོག་པས་འཚོ་བ་ཉིད་ཡིན་པར་དོགས་པར་མི་བྱའོ། །དེ་དག་གིས་བྱས་པ་ཤེས་པས་ཀྱང་ངོ་ཞེས་བྱ་བ་ནི། བྱིས་པ་དེ་དག་གིས་བྱས་པ་ཤེས་པས་དགེ་སློང་ལ་གོས་ལ་སོགས་པ་ཕུལ་བ་ཡང་བླང་བར་བྱའོ། །དེའི་རིན་བདའ་བར་མི་བྱའོ་ཞེས་བྱ་བ་ནི། དགེ་སློང་གིས་བྱིས་པ་དེ་དག་ཡོངས་སུ་བསྐྱངས་པའི་རིན་དང་རྔན་པ་དང་གླ་བདའ་བར་མི་བྱའོ། །ཤིང་ཏོག་གི་རྙེད་པ་བདག་གིར་བྱའོ་ཞེས་བྱ་བ་ནི། གཞན་གྱིས་ཤིང་ཏོག་གི་རྙེད་པ་ཕུལ་བ་དག་བླང་བར་བྱའོ། །འདིར་གཞུང་ནི་བྲམ་ཟེ་དང་ཁྱིམ་བདག་དང་བ་ཅན་དག་གིས་དགེ་སློང་དག་ལ་ཤིང་ཏོག་དག་འབུལ་བར་བྱེད་བ་ན། དགེ་སློང་དག་མི་ལེན་པ་ནས། བཅོམ་ལྡན་འདས་ཀྱིས་བཀའ་སྩལ་པ། བླང་བར་བྱའོ་ཞེས་བྱ་བའི་བར་དུ་གསུངས་པ་ཡིན་ནོ། །ཞུན་
མར་དང་འབྲུ་མར་དང་སྦྲང་རྩི་དང་བུ་རམ་གྱི་དབུ་བའི་བུམ་པ་ཡང་ངོ་ཞེས་བྱ་བ་ཡང༌། བླང་བར་བྱའོ་ཞེས་བྱ་བར་སྦྱར་ཏེ། ཞུན་མར་ལ་སོགས་པས་གང་བའི་བུམ་པ་ནི་ཞུན་མར་ལ་སོགས་པའི་བུམ་པའོ། །འདིར་གཞུང་ནི་ཞུན་མར་དང་འབྲུ་མར་དང་སྦྲང་རྩི་དང་བུ་རམ་གྱི་དབུ་བའི་བུམ་པ་དགེ་འདུན་ལ་འབུལ་བ་ནི། བཅོམ་ལྡན་འདས་ཀྱིས་བཀའ་སྩལ་པ། བླང་བར་བྱ་ཞིང་བླངས་ནས་དགེ་སློང་དག་གམ་ཁྱིམ་པ་དག་གིས་བྲིམ་པར་བྱའོ་ཞེས་གསུངས་པ་ཡིན་ནོ། །དེ་དག་གི་སྣོད་ཀྱང་ངོ་ཞེས་བྱ་བ་ནི། ཞུན་མར་ལ་སོགས་པ་དེ་དག་གི་སྣོད་བུམ་པ་ལ་སོགས་པ་ཡང་འབུལ་ན་བདག་གིར་བྱ་བའོ། །དེ་དག་གཞག་པར་བྱའོ་ཞེས་བྱ་བ་ནི། ཞུན་མར་ལ་སོགས་པ་དང་དེ་དག་གི་སྣོད་དག་གོ །གང་དུ་གཞག་པར་བྱ་ཞེ་ན། དེའི་ཕྱིར་གཞི་ལའོ་ཞེས་བྱ་བ་སྨྲས་སོ། །བཤང་བ་དང་གཅི་བ་དང་ཆང་གི་བུམ་པ་དག་ནི་མི་མཁོ་བ་ཉིད་དོ་ཞེས་བྱ་བ་ནི། དེ་དག་ནི་མི་མཁོ་བ་ཉིད་ཡིན་པའི་ཕྱིར་གང་ཡང་ཉེ་བར་གཞག་པར་མི་བྱའོ། །དགེ་འདུན་གྱི་ཕྱིར་གཡོས་དང་འཚོད་པ་གང་ཡིན་པ་དག་གི་ཞལ་ཏ་བྱའོ་ཞེས་བྱ་བ་ནི། དགེ་འདུན་གྱི་ཕྱིར་ཡོན་བདག་གིས་འབྲས་ཆན་གྱི་གཡོས་དང་ཚོད་མ་ལ་སོགས་པ་འཚོད་པ་གང་ཡིན་པ་དག་གི་ཞལ་ཏ་བྱ་བ་སྟེ། འདིར་གཞན་བྱེད་དུ་གཞུག་པ་ཡིན་གྱི་རང་གིས་བྱ་བ་ནི་མ་ཡིན་ཏེ། དགེ་སློང་གིས་བཙོས་པའི་ཉེས་པར་འགྱུར་བའི་ཕྱིར་རོ། །ལྷུང་བཟེད་དུ་བསོད་སྙོམས་མ་བླུགས་པའི་མདུན་རོལ་བུམ་བཟུར་བ་ཉིད་ཀྱིས་བསོད་སྙོམས་ལ་འཇུག་པ་བསྟེན་པར་མི་བྱའོ་ཞེས་བྱ་བ་ནི། གྲོང་དུ་བསོད་སྙོམས་ལ་འགྲོ་བའི་ཚེ་ལྷུང་བཟེད་དུ་བསོད་སྙོམས་མ་བླུགས་པའི་མདུན་རོལ་དུ་ལྷུང་བཟེད་གློས་མ་བཟུར་བར་བསོད་སྙོམས་ལ་འཇུག་པར་མི་བྱ་བ་སྟེ། དེ་ནི་མི་གཙང་བས་གོས་པའི་ཉེས་པ་སྤང་བའི་ཕྱིར་རོ། ལྷུང་བཟེད་ཀྱི་ཁ་གཡོགས་བཅང་བར་བྱའོ་ཞེས་བྱ་བ་ནི། ལྷུང་བཟེད་ཀྱི་ནང་དུ་བསོད་སྙོམས་བླུགས་པ་གང་གིས་གཡོགས་པར་བྱེད་པ་དེ་ནི་ལྷུང་བཟེད་ཀྱི་ཁ་གཡོགས་ཞེས་བྱ་སྟེ། བཅང་བར་བྱའོ། །འདི་དང་ཁར་བའི་སྣོད་བཅང་བ་ལ་ཐུན་མོང་མ་ཡིན་པ་ཉིད་དུ་དོགས་པར་མི་བྱའོ་ཞེས་བྱ་བ་ནི། ལྷུང་བཟེད་ཀྱི་ཁ་གཡོགས་བཅང་བར་བྱའོ་ཞེས་བྱ་བ་འདི་དང་ཁ་གཟར་དང་ཚྭ་ཁུག་དག་དང་
ཕུལ་བའི་བཏུང་ཕོར་ལས་གཞན་པའི་ཁར་བའི་སྣོད་བཅང་བར་མི་བྱའོ་ཞེས་སྨོས་པ་དེ་ལ་དགེ་སློང་དང་དགེ་སློང་མ་དག་གི་ཐུན་མོང་མ་ཡིན་པ་ཉིད་དུ་དོགས་པར་མི་བྱ་བ་སྟེ། དགེ་སློང་མས་ཀྱང་ལྷུང་བཟེད་ཀྱི་ཁ་གཡོགས་བཅང་བར་བྱ་བ་དང༌། ཁ་གཟར་དང་ཚྭ་ཁུག་དག་དང་ཕུལ་བའི་བཏུང་ཕོར་ལས་གཞན་པའི་ཁར་བའི་སྣོད་བདག་གིར་མི་བྱའོ་ཞེས་བྱ་བའི་ཐ་ཚིག་གོ །ནད་པས་ཞྭ་བཅང་བ་ལ་མི་རུང་བ་ཉིད་དུ་ཡང་ངོ་ཞེས་བྱ་བ་ཡང་དོགས་པར་མི་བྱའོ་ཞེས་བྱ་བར་སྦྱར་ཏེ། དགེ་སློང་མ་ནད་པས་ཞྭ་བཅང་བ་ལ་མི་རུང་བ་ཉིད་དུ་དོགས་པར་མི་བྱ་བའོ། །འདི་སྐད་བསྟན་ཏེ། ཉེ་བ་འཁོར་རང་བཞིན་གྱིས་ཁ་ན་མ་ཐོ་བ་དང་བཅས་པ་མ་གཏོགས་པར་ཞེས་གསུངས་པས་ནད་པ་ལ་ཞྭ་བཅང་བར་རྗེས་སུ་གནང་བ་གང་ཡིན་པ་དེ་དགེ་སློང་མ་ལ་མི་རུང་བ་ཉིད་དུ་དོགས་པར་མི་བྱའོ། །འདིར་གཞུང་ནི་སྐྱེ་དགུའི་བདག་མོ་ཆེན་མོ་གླད་པ་ན་ནས། བཅོམ་ལྡན་འདས་ཀྱིས་བཀའ་སྩལ་པ། །ཞྭ་བཅང་བར་བྱའོ་ཞེས་བྱ་བ་གསུངས་པ་ཡིན་ནོ། དེ་ལྟ་བས་ན་ཆུ་ལ་ཆབ་བྲོམ་འཆགས་པའི་ཡུལ་དུ་དགེ་སློང་རྣམས་ལ་རྗེས་སུ་གནང་བ་གང་ཡིན་པ་དེ་དགེ་སློང་མ་རྣམས་ལ་ཡང་རྗེས་སུ་གནང་བར་ཤེས་པར་བྱའོ། །གསིལ་བྱེད་ཀྱི་སྒྲ་མ་ཕྱུང་བར་བསོད་སྙོམས་ལ་ཁྱིམ་དུ་འཇུག་པར་མི་བྱའོ་ཞེས་བྱ་བ་ལ། གསིལ་བྱེད་ཅེས་བྱ་བ་ནི། ཁར་གསིལ་གྱི་མིང་གཉིས་པ་ཡིན་ནོ། །དེས་སྒྲ་མ་ཕྱུང་བར་ཁྱིམ་དུ་བསོད་སྙོམས་ལ་འཇུག་པར་མི་བྱའོ། །དེ་བཅང་བར་བྱའོ་ཞེས་བྱ་བ་ནི། གསིལ་བྱེད་དེའོ། །འབྱུང་བ་དང་འཇུག་པ་ལ་མཁས་པས་འབད་པར་བྱའོ་ཞེས་བྱ་བ་ནི། བསོད་སྙོམས་པས་ཁྱིམ་ནས་ཕྱིར་འབྱུང་བ་དང། ཁྱིམ་དུ་འཇུག་པའི་ལམ་རྒྱུས་ལ་མཁས་པ་ཉིད་དུ་འབད་པར་བྱའོ། །ཇི་ལྟར་ཞེ་ན། དེའི་ཕྱིར་མཚན་མ་བྱ་བས་སོ་ཞེས་བྱ་བ་སྨྲས་ཏེ། མཚན་མ་གདབ་པར་བྱའོ། །ཅི་ཞིག་གིས་ཤེ་ན། དེའི་ཕྱིར་བསོད་སྙོམས་ཀྱི་འབྲམ་ཟེར་ལ་སོགས་པའོ་ཞེས་བྱ་བ་སྨྲས་ཏེ། སྐབས་སྐབས་སུ་ཕྱེ་ལ་སོགས་པའི་འབྲམ་ཟེར་གཞག་པ་ལ་སོགས་པས་སོ། །ཆོས་བཙོང་བས་འཚོ་བ་སྦྱར་བར་མི་བྱའོ་ཞེས་བྱ་བ་ནི། རྙེད་པའི་ཕྱིར་ཟོང་དུ་གྱུར་པའི་ཆོས་བསྟེན་པས་འཚོ་བ་སྦྱར་བར་མི་བྱ་སྟེ། དེ་ནི་ལོག་པས་འཚོ་བའི་ཕྱིར་དགག་པ་མཛད་དོ། །འདིར་གཞུང་ནི་མ་མོ་ལས་དེ་དག་ཆོས་ཀྱི་སྒོ་ནས་རྙེད་པ་
ཡོངས་སུ་ཚོལ་ཞིང་ཆོས་འཚོང་བས་འཚོ་བ་སྦྱོར་བར་བྱེད་པ་ན། བཅོམ་ལྡན་འདས་ཀྱིས་བཀའ་སྩལ་པ། ཆོས་ཀྱི་སྒོ་ནས་རྙེད་པ་ཡོངས་སུ་བཙལ་བར་མི་བྱ་ཞིང༌། ཆོས་འཚོང་བས་འཚོ་བ་སྦྱར་བར་མི་བྱའོ་ཞེས་གསུངས་པ་ཡིན་ནོ། །ཆུ་མེད་ན་ཞོག་ཆུ་ལ་སོགས་པའི་ཁུ་བས་རྐང་པ་དག་བཀྲུའོ་ཞེས་བྱ་བ་ནི། ཆུ་མེད་ན་ཞོ་ག་ཆུ་དང་ཆུར་ཁུ་དང་རྩབ་མོ་ལ་སོགས་པས་རྐང་པ་དག་བཀྲུར་རུང་བའོ། །རྐང་པ་བཀྲུ་བ་དེ་ནི་དཔེ་ཙམ་དུ་ཟད་དེ་བཤང་བ་དང་གཅི་བ་ལ་སོགས་པ་བྱ་བ་དག་ལ་ཡང་ཆུ་མེད་ན་དེ་དག་གིས་བཀྲུ་བ་ལ་ཡང་ཉེས་པ་མེད་དོ། །འདི་ནི་འོག་ནས་ཟས་རྐང་པས་བརྫི་བར་མི་བྱའོ་ཞེས་འབྱུང་བའི་དམིགས་ཀྱིས་བསལ་བ་ཡིན་ནོ། །རྩྭ་བ་མ་ལ་འདུག་པར་བྱའོ་ཞེས་བྱ་བ་ནི། སྟན་གཞན་མེད་ནའོ། །བླ་གབ་མེད་པའི་མཐའ་གཅིག་ཏུ་གཞག་གོ་ཞེས་བྱ་བ་ནི། རྩྭ་བམ་མི་སྤྱོད་པའི་ཚེ་ནའོ། །སྤུངས་ཏེ་ཡང་ངོ་ཞེས་བྱ་བ་ནི། སོ་སོར་བཞག་པ་འབའ་ཞིག་ཏུ་མ་ཟད་ཀྱི། སྤུངས་ཏེ་བཞག་ཏུ་ཡང་རུང་བའོ། །མཇུག་ཏུ་དོར་རོ་ཞེས་བྱ་བ་ནི། བྱ་བ་ཟིན་པའི་མཇུག་ཏུ་རྩྭ་བམ་དོར་བར་བྱ་བའོ། །མང་བ་ཉིད་ཡིན་ནའོ་ཞེས་བྱ་བ་ནི། དགེ་སློང་མང་བ་ཉིད་ཡིན་ལ་སྟན་གྱིས་མི་ཆོག་ན་རྩྭ་བམ་བྱའོ། །གྲལ་གྱི་ཚར་དུ་མ་ཉིད་ཀྱང་ངོ་ཞེས་བྱ་བ་ཡང༌། མང་བ་ཉིད་ཡིན་ན་བྱའོ་ཞེས་བྱ་བར་སྦྱར་ཏེ། དགེ་སློང་མང་པ་ཉིད་ཡིན་ན་གྲལ་གྱི་ཚར་དུ་མ་ཉིད་ཀྱང་བྱར་རུང་བའོ། །ཚད་ཇི་ཙམ་ཞེ་ན། དེའི་ཕྱིར་ལྔ་བརྒྱའི་ཚར་རོ་ཞེས་བྱ་བ་སྨྲས་ཏེ། གྲལ་ཚར་གཅིག་ལ་དགེ་སློང་ལྔ་བརྒྱ་བཀད་ས་མན་ཆད་ཀྱི་ཚར་རིང་པོར་བྱར་རུང་བའོ། །རྒན་པའི་མཐའ་རེ་རེར་སྤྱི་བུངས་བྱའོ་ཞེས་བྱ་བ་ནི། གྲལ་ཚར་དུ་ཡོད་པའི་རྒན་པའི་མཐར་རེ་རེར་བཟའ་བ་དང་བཅའ་བའི་འདྲི་མ་སྒོའི་ཟས་ཀྱི་སྤྱི་བུངས་རེ་རེ་བྱའོ། འདྲིམ་པ་དག་རྐུ་བ་ཉིད་ན་སྤྱན་པ་དག་བསྐོའོ་ཞེས་བྱ་བ་ནི། ཟས་འདྲིམ་པའི་ཐོར་བྱན་དང་ཕྱག་ཚང་དག་རྐུ་བ་ཉིད་ཡིན་ན་སྤྱན་པ་དགེ་སློང་དག་བསྐོ་བར་བྱའོ། །ཟན་གྱི་ལས་བྱེད་པ་དག་གིས་དང་པོར་བཟའ་བར་བྱའོ་ཞེས་བྱ་བ་ནི། གཙང་སྦྱོར་བ་ལ་སོགས་པ་ཟས་ཀྱི་ཞལ་ཏ་བྱེད་པ་དག་གིས་ཇེ་དང་པོར་འཚལ་མ་ཟོས་ཏེ་བྲིམ་པ་ལ་སོགས་པའི་ལས་བྱའོ་ཞེས་བྱ་བའི་ཐ་ཚིག་གོ །འདུས་པ་ཆེན་པོའི་ཚེ་རྒ་ན་རིམས་སུ་འཁོད་དུ་གཞུག་པའི་ཕྱིར་དང་
འདྲིམ་དུ་གཞུག་པའི་ཕྱིར་དགེ་སློང་དག་བསྐོའོ་ཞེས་བྱ་བ་ནི། དགེ་སློང་དག་གིས་འདུས་པ་ཆེན་པོའི་ཚེ་དགེ་སློང་དག་བསྐོ་བར་བྱའོ། །ཅི་ཞིག་གི་ཕྱིར་ཞེ་ན། རྒན་རིམས་སུ་འཁོད་དུ་གཞུག་པའི་ཕྱིར་སྟེ། གང་དང་གང་དག་རྒན་པ་དེ་དང་དེ་དག་དང་པོ་ཁོ་ནར་འཁོད་དུ་གཞུག་པའི་ཕྱིར་རོ། །རྒན་རིམས་སུ་འདྲིམ་དུ་གཞུག་པའི་ཡང་ཕྱིར་ཏེ། གང་དང་གང་དག་རྒན་པ་དེ་དང་དེ་དག་ལ་དང་པོ་ཁོ་ནར་བསོད་སྙོམས་ལ་སོགས་པ་འདྲིམ་དུ་གཞུག་པའི་ཕྱིར་རོ། །འདི་ལ་དགེ་སློང་མས་ནི་གཉིས་སམ་གསུམ་གཞག་སྟེ་ཅི་དགར་འཁོད་པར་བྱའོ་ཞེས་བྱ་བ་ནི། འདུས་པ་ཆེན་པོ་འདི་ལ་དགེ་སློང་མས་ནི་རྒན་པ་གཉིས་སམ་གསུམ་རྒན་རིམས་སུ་འཁོད་དུ་བཅུག་ནས་ལྷག་མ་གཞན་ཅི་དགེར་འཁོད་པར་བྱའོ། །སྒྲ་བསྐྱུངས་ཏེ་ཟན་གྱི་ཆེད་དུ་འགྲོ་བར་བྱའོ་ཞེས་བྱ་བ་ནི། ཟས་ཀྱི་ཆེད་དུ་འགྲོ་བའི་ཚེ་སྒྲ་བསྐྱུངས་ཏེ་འགྲོ་བར་བྱའོ། །ཤིན་ཏུ་བསྡམས་པ་དང་སྤྱོད་ལམ་མཛེས་པས་སོ་ཞེས་བྱ་བ་ཡང་ཟན་གྱི་ཆེད་དུ་འགྲོ་བར་བྱའོ། །མཛེས་པས་སོ་ཞེས་བྱ་བ་ཡང༌། ཟན་གྱི་ཆེད་དུ་འགྲོ་བར་བྱ་བའོ། །དེ་བཞིན་དུ་འདུག་པར་བྱའོ་ཞེས་བྱ་བ་ནི། སྒྲ་བསྐྱུངས་པ་དང་ཤིན་ཏུ་བསྡམས་པ་དང་སྤྱོད་ལམ་མཛེས་པ་དང་མཛེས་པས་ཟས་ཀྱི་ཆེད་དུ་འདུག་པར་བྱའོ། །ཟས་རྐང་པས་བརྫི་བར་མི་བྱའོ་ཞེས་བྱ་བ་ནི། འབྲས་ཆན་ལ་སོགས་པའི་ཟས་རྐང་པས་བརྫི་བ་དང་བགོམ་བར་མི་བྱ་བ་སྟེ། འདི་ནི་སྤྱིར་བཀག་པ་ཡིན་པས་གང་ཡང་རུང་བས་སོ། །ལྷུང་བཟེད་ཀྱི་གཞི་ལ་རྐང་པས་རེག་པར་མི་བྱའོ་ཞེས་བྱ་བ་ནི། ལྷུང་བཟེད་ཀྱི་གཞི་ཡང་མིག་དང་ཞ་ཉེའི་དབྱར་འདབ་དང་བྱུག་རིས་དང་རྩྭ་ལ་སོགས་པ་དག་ལ་རྐང་པས་རེག་པར་མི་བྱའོ། །དྲན་པ་ཉེ་བར་གཞག་སྟེ་བསོད་སྙོམས་བླང་བར་བྱའོ་ཞེས་བྱ་བ་ནི། འདིས་ནི་སྦྱིན་པར་བྱེད་པའོ། །བདག་ནི་ལེན་པའོ་སྙམ་དུ་བསོད་སྙོམས་དང་འབྲེལ་པར་སེམས་གཏང་པར་བསྟན་ཏོ། །སེམས་རྣམ་པར་མ་གཡིངས་བས་བསོད་སྙོམས་བླང་བར་བྱའོ་ཞེས་བྱ་བ་ནི། ཡུལ་གཞན་ལ་སེམས་འཕྲོ་བར་མི་བྱ་བས་བསོད་སྙོམས་བླང་བར་བྱའོ། །མི་འཕྲོ་བ་དང་འཚོ་བ་ཙམ་དང་དེ་མ་འདྲེས་པ་དང་མི་དཀྲུགས་པ་དང་ཤིན་ཏུ་དབེན་པ་དང་དུས་ལས་མ་ཡོལ་བར་བསྒྲུབ་པར་བྱའོ་ཞེས་བྱ་བ་ནི། བསོད་སྙོམས་ཞེས་བྱ་བར་སྦྱར་ཏེ། མི་
འཕྲོ་བར་བསྒྲུབ་པར་བྱ་བ་ནི། རྣམ་པར་མི་གཡེང་ཞིང་མི་འཕྲོ་པར་བསོད་སྙོམས་བཟའ་བར་བྱ་བའོ། །འཚོ་བ་ཙམ་དུ་བསྒྲུབ་པར་བྱ་བ་ནི། ལུས་འཚོ་བ་ཙམ་དུ་བསོད་སྙོམས་བཟའ་བར་བྱའི། ཕྱར་གཡེང་ལ་སོགས་པའི་ཕྱིར་མ་ཡིན་ནོ། །དེ་མ་འདྲེས་པར་བསྒྲུབ་པར་བྱ་བ་ནི། བསོད་སྙོམས་དེ་མ་འདྲེས་མ་བསླད་པར་བཟའ་བར་བྱ་བའོ། །མི་དཀྲུགས་པར་བསྒྲུབ་པར་བྱ་བ་ནི། ཐམས་ཅད་སྣོད་གཅིག་ཏུ་བླུགས་ཏེ་དཀྲུགས་ཤིང་བཟའ་བར་མི་བྱ་བའོ། །ཤིན་ཏུ་དབེན་པར་བསྒྲུབ་པར་བྱ་བ་ནི། གནས་དབེན་པར་བཟའ་བར་བྱའི། ལམ་པོ་ཚ་ལ་སོགས་པ་དག་ཏུ་བཟའ་བར་མི་བྱའོ།། དུས་ལས་མ་ཡོལ་བར་བསྒྲུབ་པར་བྱ་བ་ནི། དུས་ལས་མ་ཡོལ་བར་བཟའ་བར་བྱ་བ་སྟེ། ཕྱེད་ཡོལ་ཕན་ཆད་བཟའ་བར་མི་བྱའོ་ཞེས་བྱ་བའི་ཐ་ཚིག་གོ །གང་ལ་མགྲོན་དུ་བོས་པ་དེ་ལས་གཞན་རྙེད་པ་བདག་གིར་བྱེད་པ་ལ་མི་རིགས་པ་ཉིད་མེད་དོ་ཞེས་བྱ་བ་ནི། དགེ་འདུན་ནམ་གང་ཟག་ཐུག་པ་ལ་སོགས་པའི་དངོས་པོ་གང་ལ་མགྲོན་དུ་བོས་པས་ཐུག་པ་ལ་སོགས་པའི་དངོས་པོ་དེ་ལས་གཞན་པའི་བསོད་སྙོམས་རྙེད་པ་བདག་གིར་བྱེད་པ་ལ་མི་རིགས་པ་མེད་པའོ། །འདིར་གཞུང་ནི་འདྲེག་མཁན་རབ་ཏུ་བྱུང་བས་དགེ་འདུན་ཐུག་པ་ལ་སྤྱན་དྲངས་ནས་རོ་བསོད་པ་སྟ་གོན་བྱས་པ་དང༌། དགེ་སློང་དག་ཟས་གཞན་ལ་མགྲོན་དུ་བོས་བས་དེ་མི་ལེན་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ཟས་གཞན་ལ་མགྲོན་དུ་པོས་པས་གཞན་རྙེད་པ་བདག་གིར་བྱེད་པ་ལ་མི་རིགས་པ་མེད་དོ་ཞེས་གསུངས་པ་ཡིན་ནོ། །རང་གི་ཟས་ལ་གཞན་མནོས་པ་ཉེས་པ་མེད་དོ་ཞེས་བྱ་བ་ནི། རང་གི་ཟས་ཟ་བའི་ཚེ་གལ་ཏེ་གཞན་གྱིས་ཟས་གཞན་སྦྱིན་པར་བྱེད་ན་དེ་མནོས་པའི་ཉེས་པ་མེད་པ་ཉིད་ཡིན་པའོ། །གཞན་གྱིས་མགྲོན་དུ་བོས་པ་ནི་འདུག་པ་ལས་དེས་གནང་ན་གཞན་གྱིས་བྱིན་པ་ནི་དེའི་ཁོངས་སུ་གཏོགས་པ་དང་འདྲའོ་ཞེས་བྱ་བ་ནི། སྦྱིན་བདག་གཞན་གྱིས་མགྲོན་དུ་བོས་པ་ན་དགེ་སློང་འདུག་པ་ལ་སྦྱིན་བདག་དེས་གནང་ན་སྦྱིན་བདག་གཞན་གྱིས་ཟས་སྦྱིན་པ་ནི་སྦྱིན་བདག་གཞི་བོའི་དེའི་ཟས་ཀྱི་ཁོངས་སུ་གཏོགས་པ་དང་འདྲ་བའོ། །དེ་ལ་ནི་དམ་བཅས་པ་ལས་འདས་པ་དང་ཡང་ཡང་ཟ་བའི་ཉེས་པ་མི་འབྱུང་ངོ༌། །འདིར་གཞུང་ནི་དེ་ནས་བཅོམ་ལྡན་འདས་ཀྱིས་སྡིག་
བྱུང་བའི་གྱང་རྣམས་ཀྱི་བཀད་ས་གལ་བདེར་གཤེགས་ཏེ་བྱོན་ནས། དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །དེ་ནས་གྱད་ཀྱི་སྣ་ཆེན་པོ་ལ་གཏོགས་པ་སྣང་བྱེད་ཅེས་བྱ་བས་བཅའ་བ་དང་བཏུང་བ་དག་བིམ་པར་བརྩམས་པ་དང༌། དགེ་སློང་དག་འགྱོད་པས་མི་ལེན་ནས། བཅོམ་ལྡན་འདས་ཀྱིས་བཀའ་སྩལ་བ། སྦྱིན་བདག་ལ་དྲི་བར་བྱ་བའོ། །དགེ་སློང་དག་གིས་སྡིག་བྱུང་བའི་གྱད་རྣམས་ལ་དྲིས་པ་དང༌། དེ་དག་གིས་སྨྲས་པ། འཕགས་པ་དག་བཞེས་ཤིག་ཅེས་བྱ་བ་ལ་སོགས་པ་གསུངས་པ་ཡིན་ནོ། །དེར་འདི་ལྟ་སྟེ། སྡིག་བྱུང་བའི་གྱད་རྣམས་ཀྱིས་མགྲོན་དུ་བོས་པའི་དགེ་སློང་རྣམས་ལ་གྱད་ཀྱི་སྣ་ཆེན་པོ་ལ་གཏོགས་པ་སྣང་བྱེད་ཀྱིས་བཅའ་བ་དང་བཏུང་བ་དག་བྲིམས་པ་སྦྱིན་བདག་གིས་གནང་བ་དེ་ནི་སྦྱིན་བདག་གཞི་བོའི་ཁོངས་སུ་གཏོགས་པ་དང་འདྲའོ། །བསམས་པའི་དོན་གྱིས་སྒྲའི་སྦྱོར་བ་རྣམ་པར་གཞག་གི་གྲགས་པས་ནི་མ་ཡིན་ནོ་ཞེས་བྱ་བ་ནི། གང་གི་ཕྱིར་བརྡའི་དབང་གིས་སྒྲ་ཐམས་ཅད་དོན་ཐམས་ཅད་ཀྱི་བརྗོད་པ་དག་ཡིན་ལ། དོན་ཐམས་ཅད་ཀྱང་སྒྲ་ཐམས་ཅད་ཀྱི་བརྗོད་པར་བྱ་བ་དག་ཡིན་པ་དེའི་ཕྱིར། སངས་རྒྱས་ཚུར་ཤོག་ཅེས་བྱ་བ་ལ་སོགས་པས་བོད་ཅིང་ཅི་ཡང་རུང་བ་སྦྱིན་པར་བྱེད་པ་ནི་སྨྲ་བ་པོའི་བསམས་པའི་དོན་གྱི་རྣམ་པར་གཞག་གི་གྲགས་པས་ནི་མ་ཡིན་ཏེ། གལ་ཏེ་དེས་དེ་སྐད་འབོད་པ་དེ་སངས་རྒྱས་ཉིད་དུ་བསམས་པ་ཡིན་ན་ནི་སངས་རྒྱས་དཀོན་མཆོག་ཉིད་ལ་ཕུལ་བ་ཡིན་ནོ། །ཇི་སྟེ་གྲགས་པ་ཉིད་དུ་བསམས་པ་ཡིན་ན་ནི་གྲགས་པ་ཉིད་ལ་ཕུལ་བ་ཡིན་ནོ། །བླངས་པ་སྤང་བར་མི་བྱའོ་ཞེས་བྱ་བ་ནི། ཟས་དང་གོས་ལ་སོགས་པ་གཞན་ལས་བླངས་པའི་ཕྱིར་སྦྱིན་པར་མི་བྱའོ། །འདི་ལྟར་བསོད་སྙོམས་ལ་དེ་སྐད་གསུངས་པ་ཡིན་མོད་ཀྱི། གཞན་ལ་ཡང་རུང་བར་སྣང་བས་འདིས་སྤྱིར་མདོར་བསྡུས་སོ། །ལྟ་བ་དང་ཚུལ་ཁྲིམས་ཕུན་སུམ་ཚོགས་པ་དག་ལས་བླངས་པ་གཞན་གོ་རིམས་བཞིན་ལ་སྦྱིན་བ་དང་འཚོ་བར་བྱེད་པ་ལྷག་པ་ཁམ་གཅིག་ཡན་ཆད་ལེན་པ་དང༌། ཟ་བ་ནི་དད་པས་སྦྱིན་བར་བྱ་བ་ཆུད་གཟོན་པ་ཡིན་ནོ་ཞེས་བྱ་བ་ནི། སྦྱིན་བདག་ལྟ་བ་དང་ཚུལ་ཁྲིམས་ཕུན་སུམ་ཚོགས་བདག་ལས་བླངས་པ། གཞན་གོ་རིམས་བཞིན་ལ་སྦྱིན་པ་ཞེས་བྱ་བ། ལྟ་བ་ཕུན་སུམ་
ཚོགས་པ་ལས་བླངས་པ་ལྟ་བ་ཉམས་པ་ལ་སྦྱིན་པ་དང་ཚུལ་ཁྲིམས་ཕུན་སུམ་ཚོགས་པ་ལས་བླངས་པ་ཚུལ་ཁྲིམས་འཆལ་བ་ལ་སྦྱིན་པ་ནི། དད་པས་སྦྱིན་པར་བྱ་བ་ཆུད་གཟོན་པ་ཡིན་ནོ། །ལྟ་བ་ཕུན་སུམ་ཚོགས་པ་ཞེས་བྱ་བ་ནི། རྒྱུ་དང་འབྲས་བུ་ལ་སྐུར་བ་མི་འདེབས་པ་འཇིག་རྟེན་པའི་ལྟ་བ་ཡང་དག་པར་ལྡན་པའོ། །དེ་ལས་བཟློག་པ་ནི་ལྟ་བ་ཉམས་པའོ། །ཚུལ་ཁྲིམས་ཕུན་སུམ་ཚོགས་པ་ཞེས་བྱ་བ་ནི། སོ་སོར་ཐར་བའི་སྡོམ་པ་དང་ལྡན་པའོ། །དེ་ལས་བཟློག་པ་ནི་ཚུལ་ཁྲིམས་འཆལ་བའོ། །དེ་དག་ཀྱང་དཔེ་ཙམ་དུ་ཟེད་དེ། མཆོག་ལས་བླངས་པ་མཆོག་མ་ཡིན་པ་ལ་སྦྱིན་པ་ཡང་དེ་བཞིན་ནོ། །བདག་ཉིད་ཚིམ་པར་གྱུར་ཟིན་པས་འཚོ་བར་བྱེད་པ་ལྷག་པ་ཐ་ན་ཁམ་གཅིག་ཙམ་ཡན་ཆད་ལེན་པ་ཡང་དད་པས་སྦྱིན་པར་བྱ་བ་ཆུད་གཟོན་པ་ཡིན་ནོ། །བདག་ཉིད་ཚིམ་པར་གྱུར་ཟིན་པས་འཚོ་བར་བྱེད་པ་ལྷག་མ་ཐ་ན་ཁམ་གཅིག་ཙམ་ཡན་ཆད་ཟ་བ་ཡང་དད་པས་སྦྱིན་པར་བྱ་བ་ཆུད་གཟོན་པ་ཡིན་ནོ། །འདི་སྐད་བསྟན་ཏེ། ལྟ་བ་ཕུན་སུམ་ཚོགས་པ་ལས་བསམས་བཞིན་དུ་བླངས་ཏེ། ལྟ་བ་ཉམས་པ་ལ་སྦྱིན་པ་དང༌། ཚུལ་ཁྲིམས་ཕུན་སུམ་ཚོགས་པ་ལས་བསམས་བཞིན་དུ་བླངས་ཏེ། ཚུལ་ཁྲིམས་འཆལ་བ་ལ་སྦྱིན་པར་བྱེད་པ་དང༌། བདག་ཉིད་ཚིམ་པར་གྱུར་ཟིན་ནས་བསམས་པ་བཞིན་དུ་འཚོ་བར་བྱེད་པ་ལྷག་པ་ཐ་ན་ཁམ་གཅིག་ཡན་ཆད་ལེན་པ་དང༌། བདག་ཉིད་ཚིམ་པར་གྱུར་ཟིན་པས་བསམས་པ་བཞིན་དུ་འཚོ་བར་བྱེད་པ་ལྷག་པར་ཟས་ཐ་ན་ཁམ་གཅིག་ཙམ་ཡན་ཆད་ཟ་བ་ནི་དད་པས་སྦྱིན་པར་བྱ་བ་ཆུད་གཟོན་པ་ཡིན་ནོ། །ལུས་འཚོ་བ་ཙམ་ལ་ནི་དེ་དག་ཆུད་གཟོན་པར་མི་འགྱུར་རོ། །ལུས་འཚོ་བ་ཙམ་ལས་ལྷག་པ་ཐ་ན་ཁམ་གཅིག་ཡན་ཆད་ཙམ་ལ་ནི། དེ་ཆུད་གཟོན་པར་འགྱུར་རོ། །ཕ་མ་དང་ནད་པ་དང་རབ་ཏུ་འབྱུང་བར་འདོད་པས་དང་སྦྲུམ་པ་དག་དང་གདུལ་བ་དད་འདོད་པས་བསོད་སྙོམས་ལ་རེག་པ་དང་ཁྱིམ་པ་འོངས་པ་ལ་ནི་དེ་ལས་བགོ་བཤའ་བྱའོ་ཞེས་བྱ་བ་ནི། དེ་དག་ལ་བྱིན་པ་ནི་དད་པས་སྦྱིན་པར་བྱ་བ་ཆུད་གཟོན་པར་མི་འགྱུར་རོ་ཞེས་བྱ་བར་སྦྱར་རོ། །འདོད་པས་བསོད་སྙོམས་ལ་རེག་པ་ཞེས་བྱ་བ་ནི། གལ་ཏེ་ཁྱིམ་པ་བསོད་སྙོམས་འདོད་པས་དགེ་སློང་གི་བསོད་སྙོམས་
ལ་ལག་གིས་འཛིན་པའོ། །ཁྱིམ་པ་འོངས་པ་ཞེས་བྱ་བ་ནི། ཟས་ཀྱི་དུས་སུ་གློ་བུར་དུ་འོངས་པའོ། །དེ་དག་ཀྱང་དཔེ་ཙམ་དུ་ཟད་དེ། ཕུ་ནུ་ལ་སོགས་པ་ཉེ་དུ་གཞན་དག་ལ་ཡང་དེ་བཞིན་ནོ། །ཁམ་ཆང་གཅིག་ཟ་བ་པོ་རྣམ་པར་མ་བཅད་པར་གཞག་པར་བྱའོ་ཞེས་བྱ་བ་ནི། ཟས་ཀྱི་བྱ་བ་བྱེད་པའི་དང་པོར་ཟས་ཀྱི་ཁམ་ཆང་གཅིག་ཟ་བ་པོ་དམིགས་ཀྱིས་ངེས་པ་མེད་པས་སེམས་ཅན་ཐམས་ཅད་ལ་བསྔོས་ཏེ་གཞག་པར་བྱ་བའོ། །འདིར་གཞུང་ནི་ཅི་ནས་ཀྱང་ལྷག་མར་མ་གྱུར་པའི་ཁམ་ཆང་གཅིག་གཞག་པར་བྱའོ་ཞེས་གསུངས་པ་ཡིན་ནོ། །དུད་འགྲོ་ལ་ཡང་སྦྱིན་པར་བྱའོ་ཞེས་བྱ་བ་ནི། ཁམ་ཆང་གཅིག་གཞག་པ་དེའོ། །འདིར་གཞུང་ནི་དགེ་སློང་གིས་ཟོས་ནས་དུད་འགྲོ་ལ་ཁམ་མི་གཞག་པར་མི་བྱའོ་ཞེས་གསུངས་པ་ཡིན་ནོ། །བཟའ་བའི་ཕྱིར་ཉེ་བར་གཞག་པ་ལས་མ་རྫོགས་པར་སྦྱིན་པར་མི་བྱའོ་ཞེས་བྱ་བ་ནི། བདག་ཉིད་བཟའ་བའི་ཕྱིར་ཉེ་བར་གཞག་པའི་ཟས་ལས་བདག་ཉིད་ཀྱིས་ཟས་ཀྱི་བྱ་བ་མ་རྫོགས་ཀྱི་བར་དུ་ལྷག་མ་ཟ་བ་ལ་སོགས་པ་ལ་སྦྱིན་པར་མི་བྱའོ། །དད་པས་སྦྱིན་པར་བྱ་བ་དེ་ཉིད་ཀྱིས་མགྲོན་དུ་བོས་པ་ལ་ཡང་མི་བྱའོ་ཞེས་བྱ་བ་ནི། ཁྱོད་ཁོ་ནས་འདི་བཟའ་བར་བྱའོ་ཞེས་དད་པས་སྦྱིན་པར་བྱ་བ་ཉིད་ཀྱི་མགྲོན་དུ་བོས་པ་ལ་བཟའ་བའི་ཕྱིར་ཉེ་བར་གཞག་པའི་ཟས་ལས་ནི་རྫོགས་ཀྱང་སྦྱིན་པར་མི་བྱའོ། །ལྷུང་བཟེད་ཀྱི་གཞི་ནི་ལྷག་མ་བཟའ་བ་རྣམས་ལ་ཅི་བདར་བྱའོ་ཞེས་བྱ་བ་ནི། ལྷུང་བཟེད་ཀྱི་འོག་གཞི་ཉིད་དུ་ཁུར་སྐྱ་ལ་སོགས་པ་གདིང་བ་གང་ཡིན་པ་དང་དེ་དང་འབྲེལ་བ་འབྲས་ཆན་ལ་སོགས་པའི་ལྷག་མ་གང་ཡིན་པ་དེ་ནི་ལྷག་མ་ཟ་བ་རྣམས་ལ་ཅི་བདེར་སྦྱིན་པར་བྱ་བའོ། །གཉུག་མར་གནས་པ་རྣམས་ལ་གཏོར་མ་སྦྱིན་ནོ་ཞེས་བྱ་བ་ནི། གཙུག་ལག་ཁང་ན་གཉུག་མར་གནས་པའི་མི་མ་ཡིན་པ་དག་ལ་སྤྱི་བུངས་ལ་སོགས་པ་ལས་གཏོར་མ་སྦྱིན་པར་བྱའོ། །དེ་དག་གི་ཆོ་ག་རྗེས་སུ་འབྲང་བས་སྔ་དྲོ་ལ་སོགས་པར་རོ་ཞེས་བྱ་བ་ནི། གཉུག་མར་གནས་པ་དེ་དག་གི་ཟས་ཀྱི་ཆོ་གའི་རྗེས་སུ་འབྲང་བས། དེ་དག་ལ་གཏོར་མ་སྦྱིན་པ་ནི་སྔ་དྲོའམ་གུང་ཚིགས་སམ་ཕྱི་དྲོའམ་མཚན་མོ་ལ་སོགས་པར་གང་རིག་པར་བྱའོ། །ཆོ་ག་ཐ་དད་པ་ཉིད་ཡིན་ན་ཐ་དད་པར་རོ་ཞེས་བྱ་བ་ནི། གཙུག་ལག་ཁང་གང་ན་གཉུག་མར་གནས་
པ་ཁ་ཅིག་གི་ཆོ་ག་ཡང་གཞན་ཡིན་ལ། ཁ་ཅིག་གི་ཆོ་ག་ཡང་གཞན་ཡིན་ན། དེ་དག་ཆོ་ག་ཐ་དད་པ་ཉིད་ལ་དྲི་དང་མེ་ཏོག་དང་བདུག་པ་དང་གཏོར་མ་ལ་སོགས་པ་ཡང་རང་རང་གི་ཆོ་ག་བཞིན་ཐ་དད་པར་བྱའོ་ཞེས་བྱ་བའི་ཐ་ཚིག་གོ །ཨ་མྲ་རུས་པ་མ་ཆགས་པ་ཉིད་ཀྱི་གནས་སྐབས་སུ་བཟའ་བར་མི་བྱའོ་ཞེས་བྱ་བ་ནི། ཤིང་ཏོག་ཨ་མྲ་རུས་པ་མ་ཆགས་པའི་གནས་སྐབས་སུ་བཟའ་བར་མི་བྱའོ། །རྩ་བ་དང་སྡོད་བུ་དང་འདབ་མ་དང་མེ་ཏོག་དང་འབྲས་བུ་དང་བཅའ་བར་བྱ་བ་དང་འབྲས་ཆན་དང་ཟན་དྲོན་དང་ལྡེ་གུ་དང་ཤ་དང་སྣུམ་ཁུར་དང་འོ་མ་དང་ཞོ་དང་མར་དང་ཉ་ཤ་དང་ཤ་སྐམ་དག་ནི་མི་རུང་བ་ཉིད་མ་ཡིན་ནོ་ཞེས་བྱ་བ་ནི། རྩ་བ་ལ་སོགས་པ་དེ་དག་དགེ་སློང་རྣམས་ཀྱིས་བཟའ་བའི་ཕྱིར་མི་རུང་བ་ཉིད་མ་ཡིན་ཏེ་རུང་བ་ཁོ་ན་ཡིན་ནོ། །རྩ་བ་ལ་སོགས་པས་ནི་བཅའ་བ་དག་བསྟན་ཏོ། །འབྲས་ཆན་ལ་སོགས་པས་ནི་བཟའ་བ་དག་བསྟན་ཏོ། །འོ་མ་ལ་སོགས་པས་ནི་ཚོད་མ་དག་བསྟན་ཏོ། །གསོ་མ་དང་ཡུངས་ཀར་དད་རྩ་བ་དང་སྡོང་བུ་དང་འདབ་མ་དང་མེ་ཏོག་དང་འབྲས་བུ་ལ་སོགས་པའི་ཐུག་པ་དག་བསྟེན་པར་བྱ་བ་ཉིད་མ་ཡིན་པར་དོགས་པར་མི་བྱའོ་ཞེས་བྱ་བ་ནི། གསོ་མ་ལ་སོགས་པ་དེ་དག་གི་ཐུག་པ་དག་བསྟེན་པར་བྱ་བ་ཉིད་མ་ཡིན་པར་དོགས་པར་མི་བྱ་བ་སྟེ། བསྟེན་པར་བྱ་བ་ཉིད་ཁོ་ན་ཡིན་ནོ། །འདི་དག་སྨན་གྱི་སྐབས་ཡིན་མོད་ཀྱི་འཚོ་བ་ཙམ་གཞན་ལ་ཡང་རུང་བ་ཉིད་ཡིན་ནོ། །ཆུས་ཀྱང་སྦངས་ན་བཙག་ཏུ་གྱུར་པ་ཉིད་དོ་ཞེས་བྱ་བ་ནི། བཟའ་བ་དང་བཅའ་བ་དག་ནི་ཐ་ན་ཆུ་ཙམ་གྱིས་ཀྱང་སྤངས་ན་བཙག་ཏུ་གྱུར་པ་ཉིད་ཡིན་ཏེ། ཆུ་ཞེས་སྨོས་པ་ནི་མཐའ་བསྟན་པ་སྟེ། དེས་ཀྱང་འོ་མ་ལ་སོགས་པ་ཚོད་མའི་རྣམ་པ་གང་ཡང་རུང་བས་སྤངས་པ་ན་བཙག་ཏུ་གྱུར་པ་ཉིད་བསྟན་ཏོ། །རྐྱལ་པར་བླུགས་པ་ནི་མི་རུང་བ་ཉིད་མ་ཡིན་ནོ་ཞེས་བྱ་བ་ནི། ཚྭ་ལ་སོགས་བ་རྐྱལ་བ་དང་འབྲག་དང་གྲོད་པ་ལ་སོགས་པར་བླུགས་པ་དེ་དག་ནི་སྣོད་དེ་དག་ཀོ་ལྤགས་ཡིན་དུ་ཟིན་ཀྱང་མེ་རུང་བ་ཉིད་མ་ཡིན་ཏེ་རུང་བ་ཁོ་ནའོ། །སྣོད་དུ་ཟན་བཟར་རུང་ངོ་ཞེས་བྱ་བ་ནི། དེ་ལ་འགལ་བ་མེད་པའོ། །སྣོད་ཁྱད་པར་ཇི་ལྟ་བུ་ཅན་ཞེ་ན། དེའི་ཕྱིར་ཡོལ་གོར་རོ་ཞེས་བྱ་བ་སྨྲས་ཏེ། ཤིང་ལས་བྱས་པའི་ཡོལ་གོར་རོ། །རྡོ་ལས་བྱས་པར་ཡང་ངོ་
ཞེས་བྱ་བ་ནི། ཡོལ་གོར་ཟས་བཟར་རུང་བའོ། །ཟས་བྱས་པར་ཡང་ངོ་ཞེས་བྱ་བ་ན། སྣོད་དེར་སྔོན་ཟས་ཟོས་སུ་ཟིན་ཀྱང་ཡང་ཟས་ཀྱི་སྣོད་བྱར་རུང་བའོ། །ལྕགས་ཀྱི་ལྷུང་བཟེད་ལ་སོགས་པ་བཞིན་བཀྲུས་ཏེའོ་ཞེས་བྱ་བ་ནི། ཇི་ལྟར་ལྕགས་ཀྱི་ལྷུང་བཟེད་ལ་སོགས་བ་སྡར་ཟས་བླུགས་པ་ཡང་བཀྲུ་སྟེ། ཟས་ཀྱི་སྣོད་བྱེད་པ་དེ་བཞིན་དུ་ཤིང་དང་རྡོའི་ཡོལ་གོ་འདི་དག་ཏུ་སྔར་ཟས་བླུགས་པ་ཡང་བཀྲུས་ཏེ་ཟས་ཀྱི་སྣོད་དུ་བྱའོ། །བཀྲུ་བཤལ་ནི་གནས་པའི་ལས་ཡིན་ན་ཞེས་བྱ་བ་ནི། ལྷུང་བཟེད་ལ་སོགས་པའི་ལས་བཀྲུ་བཤལ་ནི་སློབ་མ་དང་ཉེ་གནས་དག་གི་ལས་ཡིན་པའོ། །ཟོས་ནས་ཀྱང་ངོ་ཞེས་བྱ་བ་ནི། ཟས་ཟོས་པའི་རྗེས་ལ་ལྷག་མ་ཅན་གྱི་ལྷུང་བཟེད་ལ་སོགས་པའི་བཀྲུ་བཤལ་ཡང་གནས་པ་དག་གི་ལས་ཡིན་ནོ། །འདིར་གཞུང་ནི་མཁན་པོ་དང་སློབ་དཔོན་དག་གི་སྣོད་དག་གནས་པ་དག་གིས་བཀྲུས་ཏེ་དབུལ་བར་བྱའོ། །ཟོས་ནས་ཀྱང་གནས་པ་དག་གིས་སྣོད་དང་བྱ་མ་བུམ་དག་བཀྲུས་ཏེ་བསྐུར་བར་བྱའོ་ཞེས་གསུངས་པ་ཡིན་ནོ། །གཞན་དང་ལྷན་ཅིག་སྣོད་གཅིག་ཏུ་བཟའ་བར་མི་བྱའོ་ཞེས་བྱ་བ་ནི། གཞན་གཉིས་པ་ལ་སོགས་པ་དང་ལྷན་ཅིག་སྣོད་གཅིག་གི་ནང་དུ་ཟས་བཟའ་བར་མི་བྱ་བའོ། །ལམ་དུ་སྣོད་དག་མེད་ན་བཟའ་བར་བྱའོ་ཞེས་བྱ་བ་ནི། ལམ་དུ་སྣོད་གཞན་དག་མེད་ན་གཞན་དང་ལྷན་ཅིག་སྣོད་གཅིག་ཏུ་བཟའ་བར་བྱའོ། །རིམ་གྱིས་ཟན་དུས་ལས་ཡོལ་བར་དོགས་ན་ལྷན་ཅིག་བཟའི། དུས་ལས་ཡོལ་བར་མི་འགྱུར་ན་ནི་དའི་ཚེ་ཡང་ལྷན་ཅིག་བཟའ་བར་མི་བྱ་བའོ། །ལམ་དུ་སུ་དང་ལྟན་ཅིག་ཏུ་སྣོད་གཅིག་ཏུ་བཟའ་བར་བྱ་ཞེ་ན། དེའི་ཕྱིར་དགེ་སློང་དང་ངོ་ཞེས་བྱ་བ་སྨྲས་སོ། །གཞན་གྱིས་ལག་བཏེག་ན། རང་གིས་གཞུག་གོ་ཞས་བྱ་བ་ནི། ལྷན་ཅིག་ཟ་བའི་ཚེ་དགེ་སློང་གཞན་གྱིས་ལག་བཏག་པ་ན་རང་གིས་ལག་གཞུག་པར་བྱ་བའོ། །དགེ་ཚུལ་དང་ནི་འོག་མ་བཞིན་ནོ་ཞེས་བྱ་བ་ནི། དགེ་ཚུལ་དང་འོག་མ་ཞེས་བྱ་བ་འོག་ནས་གཡོག་རྣམས་ལ་བཅངས་ཏེ་སྦྱིན་ནོ་ཞེས་འབྱུང་བ་བཞིན་དུ་སྡེར་ལ་མི་གདགས་པར་འཚལ་མ་ཕོག་ལ་སྩལ་ཏོ་ཞེས་བྱ་བའི་ཐ་ཚིག་གོ །མི་ལྡན་པ་ན་ལྷན་ཅིག་ཏུ་ཞེས་བྱ་བ་ནི། རྐྱེན་གྱི་དབང་གིས་འཆལ་མ་ཕོག་ལ་སྩལ་དུ་མི་ལྡན་ན་ལམ་དུ་སྣོད་གཞན་མེད་ན་དགེ་ཚུལ་དང་ཡང་ལྷན་ཅིག་སྣོད་གཅིག་ཏུ་བཟའ་བའོ། །
འདིར་གཞུང་ནི་དགེ་ཚུལ་ངག་ལ་སྣོད་དག་མེད་ནས། བཅོམ་ལྡན་འདས་ཀྱིས་བཀའ་སྩལ་བ། དེ་དག་ལ་བཅངས་ཏེ་ལག་ཏུ་སྦྱིན་པར་བྱའོ། །ལམ་འཇིགས་པ་དང་བཅས་ཤིང་འགྲོན་པ་དག་ཀྱང་ཐལ་ལམ་ཟས་བཅད་དུ་མི་རུང་ན་ལྷུང་བཟེད་བྱིན་གྱིས་བརླབས་པ་མི་གཏོང་བར་དེ་དག་དང་ལྷན་ཅིག་སྣོད་གཅིག་ཏུ་བཟའ་བར་བྱའོ་ཞེས་གསུངས་པ་ཡིན་ནོ། །གཡོག་རྣམས་ལ་བཅངས་ཏེ་སྦྱིན་ནོ་ཞེས་བྱ་བ་ནི། འཚལ་མ་ཕོག་ལ་སྩལ་བའོ། ཉེ་དུ་གཅུགས་པས་གསོལ་ན་ཐམས་ཅད་དུ་དབེན་པའི་ཕྱོགས་སུའོ་ཞེས་བྱ་བ་ནི། གལ་ཏེ་ཉེ་དུ་གཅུགས་པས་ལྷན་ཅིག་བཟའ་བར་གསོལ་ན་དེའི་ཆེ་ལམ་འབའ་ཞིག་ཏུ་མ་ཟད་ཀྱིས། གནས་ཐམས་ཅད་དུ་ཡང་དབེན་པའི་ཕྱོགས་སུ་ལྷན་ཅིག་ཏུ་བཟའ་བར་བྱའོ། །དེ་གཉིས་ལས་བྱིན་ལེན་བྱས་པ་འཇིག་པ་དང་བྱིན་ལེན་མ་བྱས་པ་དང་འདྲེ་བ་བསྲུང་བར་བྱ་བ་ཉིད་དོ་ཞེས་བྱ་བ་ནི། དགེ་ཚུལ་དང་ཉེ་དུ་དེ་གཉིས་དང་དེ་དག་དང་ལྷན་ཅིག་ཟ་བའི་ཚེ་བྱིན་ལེན་བྱས་པ་འཇིག་པ་དང༌། བྱིན་ལེན་མ་བྱས་པ་དང་འདྲེ་བ་བསྲུང་བར་བྱ་བ་ཉིད་ཡིན་ནོ། །ཇི་ལྟར་བསྲུང་བར་བྱ་བ་ཉིད་ཡིན་ཞེ་ན། དེའི་ཕྱིར་ལྷུང་བཟེད་བྱིན་གྱིས་བརླབས་ཏེ་ལག་པ་དག་བསྙལ་དུ་བཅུག་ནས་སོ་ཞེས་བྱ་བ་སྨྲས་ཏེ། རང་གི་ལྷུང་བཟེད་བྱིན་ལེན་བྱས་ཏེ། དེ་གཉིས་ལག་བསྙལ་དུ་བཅུག་ནས་ལྷན་ཅིག་བཟའ་བར་བྱའོ། །འདིར་གཞུང་ནི་ཕྱོགས་དབེན་པར་འདུག་སྟེ་ལག་པ་དག་བསྙལ་དུ་བཅུག་ནས་སྣོད་མི་གཏོང་བར་བཟའ་བར་བྱ་སྟེ། འདི་ལ་འགྱོད་པར་མི་བྱའོ་ཞེས་གསུངས་པ་ཡིན་ནོ། །མཆིལ་ལྷམ་དང་བཅས་པ་བཞིན་དུ་བཟའ་བར་མི་བྱའོ་ཞེས་བྱ་བ་ནི། མཆིལ་ལྷམ་དག་གྱོན་བཞིན་དུ་བཟའ་བར་མི་བྱའོ། །ནད་པས་ནི་མནན་ཏེའོ་ཞེས་བྱ་བ་ལ། འདིར་ནད་པ་ཞེས་བྱ་བ་ནི། ནད་པ་གང་ལ་རྐང་པས་ལ་གཞག་ན་མི་འཕྲོད་པ་དེ་ནད་པ་ཡིན་པར་ཁས་བླངས་ཏེ། དེས་ནི་མཆིལ་ལྷམ་གཉིས་ཕུད་པའི་སྟེང་དུ་རྐང་པ་གཉིས་ཀྱིས་མནན་ཏེ་བཟའ་བར་བྱ་བའོ། །སྒྲེན་མོ་དང་གོས་གཅིག་པས་མི་བྱའོ་ཞེས་བྱ་བ་ནི། བཟའ་བར་རོ། །ནད་པ་ལ་ནི་ལྟུང་བ་མེད་དོ་ཞེས་བྱ་བ་ལ། འདིར་ནད་པའི་ཚད་ནི་མི་ནུས་པ་ལ་བྱ་སྟེ། དེས་ནི་སྒྲེན་མོའམ་གོས་གཅིག་པས་ཟ་བ་ལ་ལྟུང་བ་མེད་དོ། །དེ་གཡོག་དག་གིས་སྐྱོར་བར་བྱའོ་ཞེས་བྱ་བ་ནི། ནད་པ་དེ་ནད་གཡོག་དག་གིས་ལུས་དང་གོས་ལ་
སོགས་པས་སྐྱོར་ཏེ་ཟར་གཞུག་པའོ། །འདིར་གཞུང་ནི་བཅོམ་ལྡན་འདས་ཀྱིས་བཀའ་སྩལ་པ། སྒྲེན་མོས་བཟའ་བར་མི་བྱའོ། །ནད་པས་སྦྱོར་མི་བཟོད་ནས་བཅོམ་ལྡན་འདས་ཀྱིས་བཀའ་སྩལ་པ། ནད་པ་ལ་ལྟུང་བ་མེད་དོ། །དེ་གཡོག་གིས་གོས་ཀྱིས་སྐྱེར་བར་བྱའོ་ཞེས་གསུངས་པ་ཡིན་ནོ། །ནུས་ན་རྡུལ་གཟན་ལ་བརྟེན་པར་བྱའོ་ཞེས་བྱ་བ་ནི། ནད་བས་ནུས་ན་རྡུལ་གཟན་ལ་བརྟེན་པར་བྱའོ། །གལ་ཏེ་ནུས་ན་ཆོས་གོས་སྟེང་མ་མེད་པར་བཟའ་བར་མི་བྱའོ། །གསང་བའི་ཕྱོགས་ཀྱང་ངོ་ཞེས་བྱ་བ་ནི། ནང་པས་ནས་ན་ཁོར་གསུམ་ཁེབས་པའི་མཐར་ཐུག་པའི་ཤམ་ཐབས་ལ་བརྟན་པར་བྱ་སྟེ། འདི་ནི་སྒྲེན་མོའི་སྐབས་དང་གོས་གཅིག་པའི་སྐབས་གཉི་གར་གཏོགས་པ་ཡིན་པར་རིག་པར་བྱའོ། །ཟན་གྱི་ཕྱིར་འདུག་པས་འདིའམ་འདི་ནས་བྱིན་ཅིག་ཅེས་འདྲིམ་མཁན་ལ་གོ་བར་མི་བྱའོ་ཞེས་བྱ་བ་ནི། ཟན་གྱི་ཕྱིར་འདུག་ཅིང་བཀད་པའི་གང་ཟག་གིས་དངོས་པོ་འདི་བྱིན་ཅིག་ཅེའམ། སྤྱི་བུངས་ལ་སོགས་པ་འདི་ནས་བྱིན་ཅིག་ཅེས་གང་ཟག་འདྲིམ་མཁན་ལ་བརྗོད་ཅིང་གོ་བར་མི་བྱའོ། །ནད་པས་འཕྲོད་པ་ལ་ནི་ལྟུང་བ་མེད་དོ་ཞེས་བྱ་བ་ནི། གལ་ཏེ་ནད་པས་ནད་དང་འཕྲོད་པ་ཁམས་སྙོམས་པར་འགྱུར་བའི་ཟས་འདི་བྱིན་ཅིག་ཅེ་འམ། འདི་ནས་བྱིན་ཅེས་གོ་བར་བྱས་པ་ལ་ལྟུང་བ་མེད་པའོ། །འདིར་གཞུང་ནི་ནད་པ་ལ་གལ་ཏེ་དེས་ཁམས་སྙོམས་པར་འགྱུར་ན་ལྟུང་བ་མེད་དོ་ཞེས་གསུངས་པ་དེ་འདིར་བསྡུས་པ་ཡིན་ནོ། །གཞུང་ཁ་ཅིག་ལས་དེའི་དཔེ་བསྟན་པ་དེ་བསྟན་པའི་ཕྱིར། དཔེར་ན་དྲོད་ཆུང་བས་ཚོས་པ་དད་དྲོད་ཆེ་བས་རློན་པ་ལྟ་བུའོ་ཞེས་བྱ་བ་སྨྲས་ཏེ། དྲོད་ཆུང་བས་ཚོས་པ་བྱིན་ཅིག་འདི་ནས་བྱིན་ཅིག་ཅེས་བྱ་བ་དང༌། དྲོད་ཆེ་བས་རློན་པ་བྱིན་ཅིག་འདི་ནས་བྱིན་ཅིག་ཅེས་གོ་བར་བྱས་པ་ལ་ལྟུང་བ་མེད་པ་ལྟ་བུའོ། །བདག་ཉིད་ལ་ནད་པའི་འདུ་ཤེས་དང་ཟས་ལ་སྨན་གྱི་འདུ་ཤེས་ཉེ་བར་གཞག་སྟེ་བཟའ་བར་བྱའོ་ཞེས་བྱ་བ་ནི། བཀྲེས་པ་དང་སྐོམ་པ་ནི་ནད་ཡིན་ལ། བདག་ལ་དེ་ཡོད་པས་བདག་ཉིད་ལ་ནད་པའི་འདུ་ཤེས་ཉེ་བར་གཞག་པ་དང༌། དེ་ཟས་ཀྱི་འཚོ་བས་ཟས་ལ་སྨན་གྱི་འདུ་ཤེས་ཉེ་བར་གཞག་སྟེ། ཟས་བཟའ་བར་བྱ་བའོ། །དྲན་པ་ཡང་ངོ་ཞེས་བྱ་བ་ཡང༌། ཟས་ལ་ཉེ་བར་གཞག་སྟེ་བཟའ་བར་བྱ་བའོ། །ཇི་ལྟར་ཞེ་ན། དེའི་ཕྱིར་འབྱུང་བ་དང་འདྲ་བ་དང་འགྱུར་བ་དང་
ཕྱིར་རྒོལ་བ་ཉིད་དང་རྒྱུ་མཐུན་པ་དང་བརྟེན་པའི་རྣམ་པ་དང་བཙལ་བ་དང་གཞན་ལ་རག་ལས་པ་ཉིད་དང་ནད་དང་བཅས་པ་ཉིད་དང་སོ་སོར་འགྲོ་བ་ཉིད་དག་གིས་མི་མཐུན་པ་ཉིད་དུ་གཞག་པའོ་ཞེས་བྱ་བ་སྨྲས་ཏེ། འབྱུང་བ་ལ་སོགས་པ་རྣམ་པ་བཅུ་པོ་དེ་དག་གིས་ཟས་ལ་མི་མཐུན་པའི་དྲན་པ་ཉེ་བར་གཞག་སྟེ་བཟའ་བར་བྱའོ་ཞེས་བྱ་བར་སྦྱར་རོ། །དེ་ལ་འབྱུང་བ་ཞེས་བྱ་བ་ནི། ཟས་འདི་མི་གཙང་བ་དང་ལུད་ལ་སོགས་པ་དག་ལས་འབྱུང་བའོ། །འདྲ་བ་ཞེས་བྱ་བ་ནི། འདི་ལྟ་སྟེ། འབྲས་ཆན་ནི་སྲིན་བུ་དང་འདྲ་བ་ཕྱེ་དག་ནི་རུས་ཕྱེ་དང་འདྲ་བ་ལ་སོགས་པའོ། །འགྱུར་བ་ཞེས་བྱ་བ་ནི། ཟས་ཟོས་ན་བད་ཀན་དང་སྣབས་དང་རྣག་དང་ཁྲག་ལ་སོགས་པར་འགྱུར་བའོ། །ཕྱིར་རྒོལ་བ་ཉིད་ཅེས་བྱ་བ་ནི། ཟས་ཀྱི་ཕྱིར། ཕྱིར་རྒོལ་བ་ཉིད་རྣམས་དང་རྗེས་སུ་འབྲེལ་བ་སྟེ། ཟས་ཀྱི་རྒྱུ་ལས་མ་ནི་བུ་དང་ལྷན་ཅིག་འཐབ་པར་བྱེད། བུ་ནི་མ་དང་ལྷན་ཅིག་འཐབ་པར་བྱེད་པ་ལ་སོགས་པའོ། །རྒྱུ་མཐུན་པ་ཞེས་བྱ་བ་ནི། ཟས་ནི་བཤང་བ་དང་གཅི་བ་ལ་སོགས་པ་ཤིན་ཏུ་སྨད་པ་དག་དང་རྒྱུ་མཐུན་པ་ཡིན་པའོ། །བརྟེན་པའི་རྣམ་པ་ཞེས་བྱ་བ་ནི། རྟེན་ཅིང་འབྲེལ་བར་འབྱུང་བ་སྟེ། ཟས་འདི་ཞིང་ལ་སོགས་པ་ལ་བརྟེན་ཏེ་བྱུང་བ་དང་དེ་དག་ལ་བརྟེན་ནས་སྲེད་པ་ལ་སོགས་པ་ཀུན་ནས་ཉོན་མོངས་པ་དག་འབྱུང་པའི་ཕྱིར་རོ། །བཙལ་བ་ཞེས་བྱ་བ་ནི། དེ་ཚེགས་ཆེན་པོས་སྒྲུབ་དགོས་པའོ། །གཞན་ལ་རག་ལས་པ་ཉིད་ཅེས་བྱ་བ་ནི། ཚོགས་ཆེན་པོས་འབྲུ་ལ་སོགས་པ་གྲུབ་ཀྱང་དེ་གཡོ་བ་ལ་སོགས་པ་མེད་ན་མི་ལྡན་པའི་ཕྱིར། གཞན་ལ་རག་ལས་པ་ཉིད་དུ་འགྱུར་བའོ། །ནད་དང་བཅས་པ་ཉིད་ཅེས་བྱ་བ་ནི། ཟས་ལོག་པར་ཞུ་བས་རིམས་ལ་སོགས་པ་ནང་མང་པོ་དུ་མ་དག་འབྱུང་བའི་ཕྱིར་རོ། །སོ་སོར་འགྲོ་བ་ཉིད་ཅེས་བྱ་བ་ནི། ཟས་འདི་རྣམ་པ་བཞིར་འགྲོ་བ་སྟེ། དེའི་ཆ་གཅིག་ནི་ལུས་ཀྱི་མེས་སྲེག་པར་བྱེད་པ་དང༌། གཉིས་པ་ནི་བཤང་བ་དང་གཅི་པར་འགྱུར་བ་དང༌། གསུམ་པ་ནི་སྲིན་བུ་དག་གིས་བཟའ་བར་འགྱུར་བ་དང༌། བཞི་པ་ནི་ལུས་རྟས་པར་བྱེད་པའོ།། །།བམ་པོ་ལྔ་བཅུ་བརྒྱད་པ། དྲན་པ་ཉེ་བར་གནས་པས་སོ་ཞེས་བྱ་བ་ནི། ཟས་ལ་སེམས་གཏད་པས་སོ། །སེམས་རྣམ་པར་མ་གཡེངས་པས་སོ་ཞེས་བྱ་བ་ནི། སེམས་ཅན་ཐམས་ཅད་ཀྱིས་ཟས་ལ་
གཏད་པས་སོ། །ཤེས་བཞིན་གྱིས་སྒྲ་བསྐྱུང་ཞིང་ངོ་ཞེས་བྱ་བ་ནི། བླག་ཅོར་མི་བྱ་བར་ཟས་བཟའ་བར་བྱ་བའོ། །དེ་མི་བྱ་བར་རོ་ཞེས་བྱ་བ་ནི། ལག་པ་དང་རྐང་པ་ལ་སོགས་པའི་སྒྲ་མི་བྱ་བར་རོ། །མི་དབྱུང་བར་ཐུག་པ་དག་གོ་ཞེས་བྱ་བ་ནི་སྒྲ་མི་དབྱུང་བར་ཐུག་པ་དག་བཏུང་བར་བྱའོ། །ཁྲུམ་ཁྲུམ་མི་བྱ་བར་རོ་ཞེས་བྱ་བ་ནི། སྒྲ་ཁྲུམ་ཁྲུམ་མི་བྱ་བར་ཁུར་བ་ལ་སོགས་པ་བཅའ་བར་བྱའོ། །སྒྲ་འབྱུང་བ་དག་ཆུ་ལ་སོགས་པས་སྙི་བར་བྱའོ་ཞེས་བྱ་བ་ནི། ཟས་བལྡད་ན་སྒྲ་འབྱུང་བ་དག་ཆུ་ལ་སོགས་པས་སྤང་བར་བྱ་བའོ། །བཟའ་བ་དེའི་དོན་དུ་རོལ་མོ་བྱེད་དུ་མི་འཇུག་གོ་ཞེས་བྱ་བ་ནི། ཟས་བཟའ་བ་དེའི་དོན་དུ་གླུ་གླིང་དང་སིལ་སྙན་ལ་སོགས་པའི་རོལ་མོ་བྱེད་དུ་གཞུག་ཅིང་བཟའ་བར་མི་བྱ་བའོ། །འདིར་གཞུང་ནི་ཨ་མྲས་བསྐྱངས་ཀྱིས་རང་གིས་མགྲོན་དུ་བོས་པའི་དགེ་འདུན་ཟན་ཟ་བ་ན་རོལ་མོ་བྱ་བར་བརྩམས་པ་དང༌། བཅོམ་ལྡན་འདས་ཀྱིས་བཀའ་སྩལ་བ། དགེ་སློང་གིས་རོལ་མོ་བྱེད་དུ་བཅུག་པ་བཞིན་དུ་བཟའ་བར་མི་བྱའོ། །ཟན་འགལ་ཚབས་ཅན་དུ་འགྱུར་རོ། །ཁང་པའི་དུས་སྟོན་དང་མཆོད་རྟེན་ལ་རོལ་མོ་བྱེད་དུ་བཅུག་པ་ལ་ནི་ལྟུང་བ་མེད་དོ་ཞེས་གསུངས་པ་ཡིན་ནོ། །ཁ་ནས་རོལ་མོ་བྱེད་པ་ཉིད་ལ་ནི་ཉེས་བྱས་ཕྲ་མོར་འགྱུར་རོ། །བཤད་པ་བྱེད་པ་ཉིད་ནི་མི་བྱའོ་ཞེས་བྱ་བ་ནི། ཆོས་བཤད་པ་དང་ཡོན་བཤད་པ་ལ་སོགས་པ་བྱེད་པ་ཉིད་ན་ཟན་བཟའ་བར་མི་བྱའོ། །དེ་སོ་སོར་རིག་པར་བྱའོ་ཞེས་བྱ་བ་ནི། ཡོན་བཤད་པ་དེ་སོ་སོར་རིག་པར་བྱའོ། །འདིར་གཞུང་ནི་དགེ་སློང་གིས་ཡོན་བཤད་པར་བྱེད་པ་ན་བཟའ་བར་མི་བྱའོ་ཞེས་གསུངས་པ་ཡིན་ནོ། །ཡོན་བཤད་པ་ཞེས་བྱ་བ་ནི། དགེ་བའི་རྩ་བ་བསྔོ་ཞིང་སྨོན་ལམ་འདེབས་པའོ། །དུས་ཡོལ་བར་གྱུར་ན་ཚིགས་སུ་བཅད་པ་གཉིས་སམ་གསུམ་དུའོ་ཞེས་བྱ་བ་ནི། གལ་ཏེ་དྲོའི་དུས་ཡོལ་བར་དོགས་པ་ཡོད་ན་དེའི་ཚེ་ཚིགས་སུ་བཅད་པ་གཉིས་སམ་གསུམ་བཤད་པ་བྱེད་ཀྱི་བར་དུ་བཟའ་བར་མི་བྱ་བའོ།། རྐྱང་པ་འཆད་ན་ཚིག་གཉིས་སམ་གསུམ་འཆད་ཀྱི་བར་དུ་བཟའ་བར་མི་བྱ་བ་ཡང་འདིའི་རྗེས་སུ་འབྲང་བས་ཤེས་པར་བྱའོ། །དེའི་འོག་ཏུ་ཟ་བ་ལ་ནི་ལྟུང་བ་མེད་དོ། །ཟོས་ནས་གཙུག་ལག་གི་ཚིགས་སུ་བཅད་པ་གདོན་ཏོ་ཞེས་བྱ་བ་ནི། ཟན་ཟོས་པའི་རྗེས་ལ་ལག་པ་བསྙལ། ལྷུང་བཟེད་
བཞག་ཁ་བཀྲུས་ནས་དྲང་སྲོང་གིས་གསུངས་པའི་ཚིགས་སུ་བཅད་པ་གདོན་པའོ། །ཟོས་ནས་མགྲོན་དུ་འབོད་པ་ལ་ཡོན་བཤད་པ་དང་ཆོས་བཤད་པ་དག་བྱའོ་ཞེས་བྱ་བ་ནི། ཟན་ཟོས་པའི་རྗེས་ལ་སྤྱིན་བདག་ལ་ཡོན་བཤད་པ་དང་ཆོས་བཤད་པ་དག་བྱའོ། །མདོ་སྡེའི་གཞུང་ལས་ལག་པ་བསྙལ་ལྷུང་བཟེད་བཞག་ནས་ཞེས་གསུངས་པ་བཞིན་དུ་ཤེས་པར་བྱ་སྟེ། ཁའི་ནང་ཡང་བཀྲུས་ནས་ཚིགས་སུ་བཅད་པ་གདོན་པར་བྱའོ། །ཐམས་ཅད་ཀྱིས་ཟོས་ཟིན་པ་ཉིད་དུ་ངེས་པར་ཤེས་ནས་སོ་ཞེས་བྱ་བ་ནི། དགེ་སློང་ཐམས་ཅད་ཀྱིས་ཟན་ཟོས་ཟིན་པ་ཉིད་དུ་ངེས་པ་ཤེས་ནས་ཡོན་བཤད་པ་དང་ཆོས་བཤད་པ་དག་བྱའོ། །ཇི་ལྟར་ངེས་པར་ཤེས་པར་བྱ་ཞེ་ན། དེའི་ཕྱིར་ཀུན་དུ་བལྟ་བས་སོ་ཞེས་བྱ་བ་སྨྲས་སོ། །གང་གིས་དེ་དག་བྱ་ཞེ་ན། དེའི་ཕྱིར་དུ་མ་ཉིད་ཡིན་ན་དང་པོས་སོ་ཞེས་བྱ་བ་སྨྲས་ཏེ། གལ་ཏེ་དགེ་སློང་དག་དུ་མ་ཉིད་ཡིན་ན་དེའི་ཚེ་དེ་དག་གི་གྲལ་གྱི་དང་བོ་པས་དེ་དག་བྱའོ། །མི་ནུས་ན་ནུས་པ་གཞན་ལ་བཅོལ་ལོ་ཞེས་བྱ་བ་ནི། གལ་ཏེ་དང་པོས་དེ་དག་མི་ནུས་ན་དགེ་སློང་དུ་མ་ཉིད་ཡོད་པ་གཞན་ལ་བཅོལ་བར་བྱ་བའོ། །གལ་ཏེ་མ་བྱས་པར་དགེ་སློང་རྣམས་འགྲོ་བའི་རྐྱེན་བྱུང་ན་འཁོར་ཟན་བཞི་ཡན་ཆད་སྦྱིན་ནོ་ཞེས་བྱ་བ་ནི། གལ་ཏེ་ཡོན་བཤད་པ་དང་ཆོས་བཤད་པ་དག་མ་བྱས་མ་རྫོགས་པར་དགེ་སློང་རྣམས་འགྲོ་དགོས་པའི་རྐྱེན་བྱུང་ན། དེའི་ཚེ་འཆད་པར་བྱེད་པའི་འཁོར་ཐ་ན་དགེ་སློང་བཞི་ཡན་ཆད་བཞག་སྟེ་གཞན་འགྲོ་བར་བྱ་བའོ། །དེ་ལ་རྐྱེན་བྱུང་ན་བྱིན་པ་ལ་ཞུས་ཏེའོ་ཞེས་བྱ་བ་ནི། འཁོར་དེ་ལ་འགྲོ་དགོས་པའི་རྐྱེན་ཞིག་བྱུང་ན། འཆད་པར་བྱེད་པ་གང་གི་འཁོར་དུ་བདག་ཉིད་བྱིན་པ་དེ་ལ་ཞུས་ཏེ་འཁོར་དེ་ཡང་འགྲོ་བར་བྱ་བའོ། །ཡོན་འཆད་པ་ན་དགའ་བོ་དང་ཉེ་དགའ་དག་གི་མིང་སྨོས་པར་བྱའོ་ཞེས་བྱ་བ་ནི། ཡོན་འཆད་པར་བྱེད་པ་ན་དེར་ཀླུའི་རྒྱལ་པོ་དགའ་བོ་དང་ཉེ་དགའ་གཉིས་ཀྱི་མིང་ཡང་སྨོས་པར་བྱ་བ་སྟེ། དེ་གཉིས་ནི་བཅོམ་ལྡན་འདས་ཀྱི་བསྟན་པ་ལ་མངོན་པར་དད་པ་ཉིད་ཡིན་པའི་ཕྱིར་དང༌། བསྟན་པ་ཡོངས་སུ་སྐྱོང་བར་བྱེད་པ་ཉིད་ཡིན་པའི་ཕྱིར་ཏེ། མིང་སྨོས་ན་དགའ་བ་ཡང་སྐྱེ་བའི་ཕྱིར་རོ། །འདིར་གཞུང་ནི་རྣམ་པར་འབྱེད་པ་ལས་ཡོན་འཆད་པའི་ཚེ་ན་ཀླུའི་རྒྱལ་པོ་
དགའ་བོ་དང་ཉེ་དགའ་གཉིས་ཀྱི་མིང་ཡང་སྨོས་པར་བྱའོ། །སྨོས་པར་མི་བྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །མིད་པ་གཉིས་པས་དུས་མ་ཡིན་པའི་སྒྲེགས་པ་དག་དང་པོ་གཉིས་སམ་གསུམ་པོར་ཏེ་ཁ་བཀྲུས་ནས་མིད་པར་བྱའོ་ཞེས་བྱ་བ་ནི། གང་ལ་མིད་པ་གཉིས་ཡོད་པ་དེ་ནི་མིད་པ་གཉིས་པ་སྟེ། དེས་ཟས་ཟོས་ནས་ཕྱི་དྲོ་དུས་མ་ཡིན་པར་བ་ལང་བཞིན་དུ་སྒྲེགས་པ་འབྱུང་ཞིང་ཟས་ཕྱིར་ཟློས་ཤིང་བལྡད་ན་དང་པོར་གཉིས་སམ་གསུམ་བོར་ཏེ། དེའི་འོག་ཏུ་ཁ་བཀྲུས་ནས་ཕྱེ་མ་རྣམས་མིད་པར་བྱ་བ་སྟེ། དེ་ནི་འཚག་འབྲི་ཞིང་སྦྱོར་མི་བཟད་པའི་ཉེས་པ་སྤང་བའི་ཕྱིར་རོ། །གཉིས་སམ་གསུམ་འདོར་བ་ནི་ཁ་ཆུ་ལ་སོགས་པས་གནོད་པ་ཉིད་སྤང་བའི་ཕྱིར་རོ། །ཁ་བཀྲུ་པ་ནི་ཁ་ལ་ཆགས་པ་དང་བྲལ་བར་བྱ་བའི་ཕྱིར་རོ། །དེ་ནི་པས་མ་ཡིན་པ་མ་ཡིན་ནོ་ཞེས་བྱ་བ་ནི། སྒྲེགས་པ་དང་འབྲེལ་པ་དེ་ནི་ཟས་ཁོ་ན་ཡིན་པའོ། །དེའི་ཕྱིར་གཞན་གྱི་དུས་མ་ཡིན་པ་དང་སྤངས་པའི་ཚེ་སྒྲེགས་པ་འབྱུང་ན་ཁ་བཀྲུ་བར་བྱའོ་ཞེས་བྱ་བ་ནི། གང་གི་ཕྱིར་སྒྲེགས་པ་དང་འབྲེལ་པ་དེ་ཟས་ཡིན་པ་དེའི་ཕྱིར་མིད་པ་གཉིས་པ་ལས་གཞན་བ་མིད་པ་གཅིག་པས་དུས་མ་ཡིན་པ་ཉིད་མ་ཡིན་པ་དང་ཟས་སྤངས་པའི་ཚེ་སྒྲེགས་པ་འབྱུང་ན་བ་བཀྲུ་བར་བྱའོ། ད་འདི་མན་ཆད་ན་ཟས་ཀྱི་རྒྱུན་ཐུན་པ་གང་དག་ཡིན་པ་དེ་དག་བརྗོད་པར་བྱའོ། །མ་བཤམས་པའི་ཕྱོགས་སུ་མཆིལ་མ་དོར་བར་མི་བྱའོ་ཞེས་བྱ་བ་ནི། གཙུག་ལག་ཁང་གི་ཕྱོགས་གང་དུ་དགེ་འདུན་གྱི་མཆིལ་མ་དོར་བའི་གནས་མ་བཤམས་པའི་ཕྱོགས་དེར་མཆིལ་མ་གྱ་ཚོམ་དུ་དོར་བར་མི་བྱ་བའོ་བྱི་དོར་བྱས་པར་ཡང་མི་བྱའོ་ཞེས་བྱ་བ་ནི། དགེ་འདུན་གྱི་ཕྱོགས་མ་ཡིན་ཡང་རུང་སྟེ། གང་དུ་གང་ཟག་གིས་ཀྱང་ཞལ་ཞལ་ལ་སོགས་པས་བྱི་དོར་བྱས་པའི་ཕྱོགས་དེར་ཡང་མཆིལ་མ་དོར་བར་མི་བྱའོ། །སོས་ལྕེ་བཙིར་ཏེ་ཡང་མི་བྱའོ་ཞེས་བྱ་བ་ནི། སོས་ལྕེ་བཙིར་ཏེ་མཆིལ་མ་བསླན་ཏེ་སྒྲ་ཙིད་ཅེས་ཀྱང་ཕྱོགས་དེར་དོར་བར་མེ་བྱ་བའོ། །དེ་དང་དེའི་སྒྲ་དཀོན་མཆོག་དང་བླ་མའི་མདུན་དུ་མི་བྱ་བའོ་ཞེས་བྱ་བ་ནི། མཆིལ་མ་དོར་བ་དེ་དང་མཆིལ་མ་དོར་བ་དེའི་སྒྲ་ཧག་ཐེ་ཞེས་བྱ་བ་དཀོན་མཆོག་དང་གནས་བརྟན་ལ་སོགས་པའི་དྲུང་དུ་མི་བྱ་བའོ། །ཟ་བའི་དྲུང་དུ་ཡང་མི་བྱའོ་ཞེས་
བྱ་བ་ནི། དེ་དང་དེའི་སྒྲའོ། །ལྷག་མ་ནི་དྲུང་དུ་ཡང་དང་ཡང་མི་བྱའོ་ཞེས་བྱ་བ་ནི། དཀོན་མཆོག་དང་བླ་མ་དང་ཟ་བའི་ལྷག་མ་དགེ་སློང་གཞན་དག་གི་མདུན་དུ་ཡང་དེ་དང་དེའི་སྒྲ་ཡང་དང་ཡང་མི་བྱ་བའོ། །མི་ནུས་ན་གཞན་དུ་འགྲོ་བར་བྱའོ་ཞེས་བྱ་བ་ནི། གལ་ཏེ་མཆིལ་མ་དོར་བ་དེ་དང་དེའི་སྒྲ་བྱ་བ་བཀག་པ་དེ་བསྲུང་པར་མི་ནུས་ན་དེའི་ཚེ་ཕྱོགས་གཞན་དུ་འགྲོ་བར་བྱའོ། །གཞན་ལ་མི་བདེ་བ་མི་བྱའོ་ཞེས་བྱ་བ་ནི། གཞན་ལ་མི་བདེ་བ་རྣམ་པ་ཐམས་ཅད་མི་བྱའོ། །འདིར་གཞུང་ནི་དགེ་སློང་གིས་ཟ་བའི་མདུན་དུ་མཆིལ་མ་དོར་བར་མི་བྱའོ། །འཐུང་བའི་མདུན་དུ་ཡང་མི་བྱའོ། །ས་གཞི་བྱི་དོར་བྱས་པར་ཡང་མི་བྱའོ། །དགེ་སློང་གིས་མ་བཤམས་པའི་ཕྱོགས་སུ་ཡང་མཆིལ་མ་དོར་བར་མི་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །འོག་མ་རྣམས་ཀྱིས་ནི་གཞན་ལ་མི་བདེ་བ་མི་བྱ་བ་བསྡུས་པ་ཡིན་ཏེ། སྡུར་སྒྲ་ཅན་གྱིས་ཉལ་བར་མི་བྱའོ་ཞེས་བྱ་བ་ནི་སྡུར་བའི་སྒྲ་ངར་རང་པོ་ཅན་གྱིས་ལྷག་མ་རྣམས་ཀྱི་དྲུང་དུ་ཡང་ཉལ་བར་མི་བྱའོ། །དེས་སྡུར་སྒྲ་སྤང་བའི་ཕྱིར་ཇི་ལྟར་བྱ་ཞེ་ན། དེའི་ཕྱིར་དེར་བཅག་པའམ་གཞན་དུ་འགྲོ་བར་བྱའོ་ཞེས་བྱ་བ་སྨྲས་ཏེ། བཅག་པས་གཉིད་བསྲུང་བའམ་གཞན་དུ་འགྲོ་བར་བྱ་བའོ། །དེའི་སྣོད་ནི་གླང་པོ་ཆེའི་རྨིག་མཐིལ་ལྟ་བུ་འམ་བརྩེ་གས་མའོ་ཞེས་བྱ་བ་ནི་མཆིལ་མ་དེའི་སྣོད་ཆོལ་ཟངས་ནི་སྔ་མ་ལྟ་བུའོ། །དེ་མེད་ན་ཕྱི་མ་ཤོས་སོ། །གླང་པོ་ཆེའི་རྨིག་མཐིལ་ལྟ་བུའོ་ཞེས་བྱ་བ་ནི། ཆོལ་ཟངས་ཀྱི་ཞབས་མཉམ་པའོ། །བརྩེགས་མ་ཞེས་བྱ་བ་ནི། བྷྲྀད་ག་ར་འམ་ལྕགས་སྐྱེད་ཀྱི་སྟེང་དུ་ཆོལ་ཟངས་གཞག་པའོ། །དེ་ཉི་བར་གཞག་པར་བྱའོ་ཞེས་བྱ་བ་ནི་མཆིལ་མ་སྣོད་དེའོ། །དེར་སོ་ཕག་གི་ཕྱེ་མའམ་བྱེ་མའམ་ཐལ་བ་དག་གིས་གཅལ་བླུགས་སོ་ཞེས་བྱ་བ་ནི། མཆིལ་མ་སྣོད་དེར་རོ། །དེར་སྦྲང་བུ་འདུ་བའི་གཉེན་པོ་གང་ཞེ་ན། དེའི་ཕྱིར་སྦྲང་བུ་དག་བསྐྲད་པ་ནི་གཉེན་པོ་ཡིན་ནོ་ཞེས་བྱ་བ་སྨྲས་ཏེ། སའམ་ལོ་མ་ལ་སོགས་པས་དགབ་པས་སོ། །དྲི་བ་བར་མི་འགྱུར་བ་དང་སྲོག་ཆགས་འབྱུང་བར་མི་འགྱུར་བར་བྱ་བའི་ཕྱིར་དུས་དུས་སུ་བཀྲུ་བ་དང་བསྐམ་པར་བྱའོ་ཞེས་བྱ་བ་ནི་མཆིལ་མའི་སྣོད་དེའོ། །དེའི་དུས་ཀྱི་ཆེད་དུ་གཞན་ཉེ་བར་གཞག་གོ་ཞེས་བྱ་བ་ནི། བཀྲུ་བ་དང་བསྐམ་པ་
དེའི་དུས་ཀྱི་ཆེད་ང་མཆིལ་མའི་སྣོད་ཀྱི་འཐེབ་གཞན་ཉེ་བར་གཞག་པར་བྱ་བའོ། །མི་བྲལ་བར་བྱ་བའི་ཕྱིར་གཙུག་ལག་ཁང་གི་གྲྭའི་ཀ་བ་བཞི་པོ་དག་གི་ངོས་སུ་ཡང་མཆིལ་མ་སྣོད་དག་གཞག་པར་བྱའོ་ཞེས་བྱ་བ་ནི། མཆིལ་མ་སྣོད་ཀྱིས་མི་བྲེལ་བར་བྱ་བའི་ཕྱིར་ཐན་ཕྱོགས་དེ་དག་ཏུ་ཡང་མཆིལ་མ་སྣོད་ཀྱི་འཐེབ་དག་གཞག་པར་བྱའོ། །རླུང་གི་ལས་སྒྲ་དང་བཅས་པར་མི་བྱའོ་ཞེས་བྱ་བ་ནི། འཕྱེན་སྒྲ་དང་བཅས་པར་མི་གཏོང་བའོ། །དཀོན་མཆོག་དང་བླ་མའི་མདུན་དུ་མི་གཏོང་དོ་ཞེས་བྱ་བ་ནི། སྒྲ་མེད་པར་ཡང་ངོ༌། །གཞན་གྱི་དྲུང་དུ་ཡང་དང་ཡང་དུ་མི་གཏོང་ངོ་ཞེས་བྱ་བ་ནི་དཀོན་མཆོག་དང་བླ་མ་ལས་གཞན་པའི་དྲུང་དུ་ཡང་སྒྲ་མེད་པ་ཡང་དང་ཡང་དུ་མི་གཏོང་ངོ༌། །ཤིང་ལྗོན་པའི་དུད་དུ་བཤང་བ་དང་གཅི་པ་དག་མི་བྱའོ་ཞེས་བྱ་བ་ནི། དེ་སྐྱེ་བོ་མང་པོ་འདུ་བའི་གནས་ཡིན་པའི་ཕྱིར་རོ། །དགོན་པ་དེ་དག་གི་སྐྱབས་མེད་པ་ཉིད་ཡིན་ན་མ་གཏོགས་སོ་ཞེས་བྱ་བ་ནི། གལ་ཏེ་དགོན་པའི་གནས་སུ་ཤིང་ལྗོན་པ་དེ་དག་གིས་ཁྱབ་ཅིང་སྐྱབས་མེད་པ་ཉིད་ཡིན་ན། ཤིང་ལྗོན་པ་དེ་དག་གི་དྲུང་དུ་ནི་མ་གཏོགས་སོ། །ཚེར་མ་ཅན་གྱི་ཡང་ངོ་ཞེས་བྱ་བ་ནི། ཤིང་ཚེར་མ་ཅན་གྱི་དྲུང་ཡང་མ་གཏོགས་ཏེ། དེར་སྐྱེ་བོ་དག་མི་འདུ་པའི་ཕྱིར་རོ། །བཤད་པའི་སྐྱབས་བྱའོ་ཞེས་བྱ་བ་ནི། བཤད་པའི་ཆབ་ཁུངས་བྱའོ། །གལ་ཏེ་གཙུག་ལག་ཁང་དུ་ནི་ནུབ་བམ་བྱང་གི་ཕྱོགས་སུའོ་ཞེས་བྱ་བ་ནི། གལ་ཏེ་གཙུག་ལག་ཁང་དང་འབྲེལ་བར་ཆབ་ཁུངས་བྱད་ན་གཙུག་ལག་ཁང་གི་ནུབ་བམ་བྱང་གི་ཕྱོགས་སུ་བྱའོ། །འདིར་ནུབ་དང་བྱང་ཞེས་བྱ་བ་ནི། ཉི་མ་ཤར་ནུབ་ཀྱི་འགྲོས་ཀྱི་ཕྱོགས་ལ་ལྟོས་པ་ནི་མ་ཡིན་གྱི། གཙུག་ལག་ཁང་གི་སྒོ་ཕྱོགས་བཞི་གར་ལྟ་ཡང་རུང་སྟེ། སྒོ་ནི་ཤར་ཕྱོགས་ཞེས་བྱའོ། །ཡས་ཀྱི་གཡས་རོལ་གྱི་ངོས་ནི་ལྷོ་ཕྱོགས་སོ། །རྒྱབ་ནི་ནུབ་ཕྱོགས་སོ། །ཡས་ཀྱི་གཡོན་རོལ་གྱི་ངོས་ནི་བྱང་ཕྱོགས་ཞེས་བྱ་བའོ། །དེ་བས་ན། འདིར་གཙུག་ལག་ཁང་གི་རྒྱབ་ཀྱི་ཕྱོགས་སམ་ཡས་ཀྱི་གཡོན་རོལ་གྱི་ཕྱོགས་ཀྱི་ཆབ་ཁུངས་བྱའོ། །རྐང་ཁྲུས་ས་དང་སྟོར་ཁུར་ས་ལ་སོགས་པ་མི་གཅང་བའི་ལས་ཁང་སྟང་དང་ཤོད་དུ་བྱའོ། །ཆོ་ག་ཐམས་ཅད་ཕྱོགས་འདི་གཉིས་སུ་བྱའོ། །སྒོ་ལོགས་དང་ཡས་ཀྱི་གཡས་རོལ་གྱི་
ཕྱོགས་ནི་ཕྱོགས་གཙོ་བོ་ཡིན་པའི་ཕྱིར་དེར་ཆབ་ཁུངས་ལ་སོགས་པ་བྱར་མི་རུང་པའོ། །གསོང་ལྡོང་ངམ་ཕུག་རྡུགས་སོ་ཞེས་བྱ་བ་ནི། ཆབ་ཁུངས་རྣམ་པ་དེ་གཉིས་གང་ཡང་རུང་བར་བྱ་བའོ། །གསོང་ལྡོང་ཞེས་བྱ་བ་ནི་ཁུང་ལ་སྟོར་ཁུང་གི་ཝ་བཙུགས་པའོ། ཕུག་རྡུགས་ཞེས་བྱ་བ་ནི། ཁུང་ལ་སྟོར་ཁུང་གི་ཝ་མ་བཙུགས་པ་ཁུང་ཉི་ཚེ་བརྐོས་པའོ། །འོག་ཏུ་ཤིང་ཚེར་མ་ཅན་དག་བསྐྱེད་པར་བྱའོ་ཞེས་བྱ་བ་ནི། ཆབ་ཁུང་ས་ཡང་ཐོག་ནས་བཏོད་ན་འོག་གི་ཁུང་གི་ཕྱོགས་སུ་ཤིང་ཚེར་མ་ཅན་དག་བསྐྱེད་པར་བྱ་བའོ། །ཐང་ལ་བྱེད་ན་ནི་མཐའ་འཁོར་བར་ཤིང་ཚེར་མ་ཅན་དག་པ་སྐྱེད་པར་བྱ་བའོ། །སྟེང་དུ་བུ་གའི་ཉེ་འཁོར་དུ་རྐང་རྟེན་དག་གཞུག་གོ་ཞེས་བྱ་བ་ནི། ཆབ་ཁུང་སའི་ནང་གིས་ས་གཞིའི་སྟེང་དུ་དོང་གི་བུ་གུའི་ཉེ་འཁོར་གཡས་གཡོས་སུ་འདུག་པའི་རྐང་པ་གཉིས་བརྟེན་པའི་རྐང་རྟེན་རྟུག་ཤིང་ངམ་རྡོ་ལེབ་བམ་སོ་ཕག་དག་གཞུག་པར་བྱ་བའོ། །རིལ་བ་སྤྱི་བླུགས་གཞག་པར་བྱའོ་ཞེས་བྱ་བ་ནི། ཆབ་ཁུང་སར་ཁྲུས་བྱ་བའི་རིལ་བ་སྤྱི་བླུགས་གཞག་པའི་གནས་བྱ་བའོ། །སྒོ་བསྣོལ་མར་གདོང་དོ་ཞེས་བྱ་བ་ནི། ཆབ་ཁུང་སའི་ར་པའི་སྒོའི་ལོགས་གཅིག་ནང་དུ་བསྣོལ་ལ་སྒོའི་ལོགས་གཅིག་ཕྱི་རོལ་ཏུ་བསྣོལ་ཞིང་ཅི་ནས་ཀྱང་སྒོ་དྲང་པོར་མི་འདུག་པས་ནང་དུ་ཞུགས་པའི་ཕྱི་རོལ་ནས་མི་སྣང་བ་དེ་ལྟར་སྒོ་གདོད་པར་བྱ་བའོ། །འདིར་གཞུང་ནི་དེ་དག་སྒོ་དྲང་པོར་གདོད་ཅིང་ཕྱི་རོལ་ནས་སྣང་བ་ནས། བཅོམ་ལྡན་འདས་ཀྱིས་བཀའ་སྩལ་པ། སྒོ་བསྣོལ་མར་གདོང་པར་བྱའོ་ཞེས་བྱ་བའི་བར་དུ་གསུངས་པ་ཡིན་ནོ། །སྒོ་གླེགས་གཞུག་གོ་ཞེས་བྱ་བ་ནི། ཆབ་ཁུང་སའི་ར་བ་ལའོ། །ཡང་མིག་དང་སྒོ་གཏན་དག་ཀྱང་གཞུག་གོ་ཞེས་བྱ་བ་ནི། སྒོ་གླེགས་དེ་ལའོ། །འཇུག་པར་འདོད་པས་སྒྲ་བྱའོ་ཞེས་བྱ་བ་ནི། ཆབ་ཁུང་སའི་ནང་དུ་འཇུག་པར་འདོད་པའི་གང་ཟག་གིས་སེ་གོལ་དང་ལུད་པ་ལ་སོགས་པའི་སྒྲ་དབྱུང་བར་བྱ་བའོ། །དེར་ཞུགས་པས་ཀྱང་ཐོས་ནའོ་ཞེས་བྱ་བ་ནི། ཆབ་ཁུང་ས་དེར་སྔར་ཞུགས་པའི་གང་ཟག་དེ་ན་འདུག་པས་ཀྱང་འཇུག་པར་འདོད་པའི་གང་ཟག་ཕྱིས་འོད་བས་སྒྲ་བྱས་པ་ཐོས་ན་སེ་གོལ་དང་ལུད་པ་ལ་སོགས་པའི་སྒྲ་དབྱུང་བའོ། །གོས་ལེགས་
པར་བརྗེས་པས་ཤེས་བཞིན་དུ་འཇུག་པར་བྱའོ་ཞེས་བྱ་བ་ནི། ཆབ་ཁུང་སར་རོ། །དཀྱིལ་དུ་འདུག་པར་བྱའོ་ཞེས་བྱ་བ་ནི། ཁུང་གི་དཀྱིལ་དུ་བབ་པར་རོ། །རྐང་རྟེན་གཉིས་ལ་མི་གོས་པར་ཁད་ཀྱིས་ཁད་ཀྱིས་བྱའོ་ཞེས་བྱ་བ་ནི། བཤད་པ་ཞེས་བྱ་བར་དོན་གྱིས་ཁོང་དུ་ཆུང་པར་བྱའོ། །མི་འོད་ན་བསྡད་པར་མི་བྱའོ་ཞེས་བྱ་བ་ནི། བཤང་བའི་ཤུགས་རང་མི་འབྱུང་ན། མཐུས་བརྩིར་བར་མི་བྱ་བའོ། །འོ་ན་དགག་པར་མི་བྱའོ་ཞེས་བྱ་བ་ནི། ཤུགས་འབྱུང་ན་ཕྱིར་དགག་པར་མི་བྱ་བའོ། །དེ་དང་འབྲེལ་པའི་དོན་ལས་གཞན་པས་དེའི་དྲུང་དུ་འདུག་པར་མི་བྱའོ་ཞེས་བྱ་བ་ནི། ཆབ་ཁུངས་དེ་དང་འབྲེལ་པའི་དོན་བཤང་བའི་བྱ་བ་ལས་གཞན་པའི་དགོས་པས་ཆབ་ཁུང་ས་དེའི་དྲུང་དུ་འདུག་པར་མི་བྱ་བའོ། །འདིར་གཞུང་ནི་དགེ་སློང་གིས་བཤང་བའི་སའི་ཉེན་ཀོར་དུ་འགྲེང་བར་མི་བྱ། འདུག་པར་མི་བྱ། ཉལ་བར་མི་བྱ། བཅག་པར་མི་བྱ། ཁ་ཏོན་མི་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །རྐང་པ་བཀྲུ་བ་དང་འཐོར་འཐུང་བྱ་བ་དག་ཏུ་ཡང་དེ་བཞིན་ནོ་ཞེས་བྱ་བ་ནི། དེ་དང་འབྲེལ་བའི་དོན་ལས་གཞན་པས་དེ་དག་གི་དྲུང་དུ་འདུག་པར་མི་བྱའོ། །འདིར་རྐང་པ་བཀྲུ་བས་ཞེས་བྱ་བས་ནི་རྐང་པ་ཁྲུས་ཀྱི་ས་དང་གཅི་བའི་སྐྱབས་གཉི་ག་བསྟན་ཏོ། །འཐོར་འཐུར་ཞེས་བྱ་བས་ནི་ཁ་གདོང་བཀྲུ་བ་དང་ལག་པ་བསྙལ་བའི་ས་བསྟན་ཏོ། །དགེ་སྐོས་ཀྱིས་ཉི་མ་རེ་རེ་ཞིང་བྱི་དོར་བྱའོ་ཞེས་བྱ་བ་ནི། དགེ་སྐོས་ཀྱིས་ཉི་མ་རེ་རེ་ཞིང་དགེ་འདུན་གྱི་བཤང་བའི་སྐྱབས་དང་གཅི་བའི་སྐྱབས་དང་རྐང་ཁྲུས་ས་དང་འཐོར་འཐུང་གི་ས་དག་གི་ཕྱོགས་སྦྱང་བར་འོས་པ་དག་སྦྱང་བར་བྱ་བའོ། །ས་དང་ལོ་མ་གཞག་པ་ཡང་ངོ་ཞེས་བྱ་བ་ནི། དགེ་སྐོས་ཀྱིས་བྱའོ་ཞེས་བྱ་བའི་རྗེས་བསྙག་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །ལོ་མ་ནི་ཕྱི་བར་བྱ་བའི་བོད་རྡོག་ལ་སོགས་པ་དག་གི་དཔེ་ཡིན་ནོ་ཞེས་བྱ་བ་ནི། གཙུག་ལག་ལས། ལོམ་ཞེས་སྨོས་པ་ནི་བཤད་པ་ཕྱི་བའི་བོང་རྡོག་ལ་སོགས་པ་གཞན་དག་གི་དཔེ་ཙམ་དུ་ཟད་དེ། གཞན་དག་ཀྱང་རུང་ངོ༌། །ཕྱོགས་མ་ཡིན་པར་གཅི་བར་མི་བྱའོ་ཞེས་བྱ་བ་ནི། གཅི་བའི་སྐྱབས་མ་ཡིན་པའི་ཕྱོགས་གཞན་དུ་གཅི་ན་གཅི་བར་མི་བྱའོ། །དུ་མར་མི་བྱའོ་ཞེས་བྱ་བ་ནི། ཕྱོགས་དུ་མར་གཅི་བར་མི་བྱ་བའོ། །རྒྱུན་གྱི་ཁུང་
སྒོར་གཞུག་གོ་ཞེས་བྱ་བ་ནི། གཅི་བའི་རྒྱུན་གྱིའོ། །གཅི་བའི་སྐྱབས་བྱའོ་ཞེས་བྱ་བ་ནི། གཅི་བའི་ཆབ་ཁུང་ས་བྱ་བའོ། །དེའི་གློར་རོ་ཞེས་བྱ་བ་ནི། བཤང་པའི་སྐྱབས་དེའི་གློར་གཅི་པའི་སྐྱབས་བྱེད་དུ་གཞུག་པའོ། །ཕུག་རྡུགས་སམ་ཝ་གཞུག་པར་བྱའོ་ཞེས་བྱ་བ་ནི། གཅི་བའི་ཕྱིར་རོ། །གཞན་ནི་འདྲའོ་ཞེས་བྱ་བ་ནི། འོག་ཏུ་ཤིར་ཚེར་མ་ཅན་དག་བསྐྱེད་དོ་ཞེས་བྱ་བ་ལ་སོགས་པ་ལྷག་མ་གཞན་ནི་བཤང་བའི་སྐབས་དང་འདྲའོ། །ས་དང་ལོ་མ་བཞག་པ་ཡང་ངོ་ཞེས་བྱ་བ་ནི་འདིར་ནི་དགོས་པའི་ཕྱིར་བཟློག་པར་བྱའོ། །འཁྲུ་པའི་ནད་ཅན་ལ་ནི་ཁྲིའུའི་བུ་གུ་བྱའོ་ཞེས་བྱ་བ་ནི་འཁྲུ་བའི་ནད་དང་ལྡན་པའི་གང་ཟག་ལ་ནི་དེ་བྱ་བའོ། །ཇི་ལྟར་བྱ་ཞེ་ན། དེའི་ཕྱིར་ཐགས་མ་བཤུགས་པས་སོ་ཞེས་བྱ་བ་སྨྲས་ཏེ། ཁྲིའུ་ཐགས་མས་བརྒྱུས་པ་དབུས་ནས་ཐགས་མ་ཕན་ཚུན་བཤུགས་ཏེ་དབུས་སུ་མཐོང་བས་གདོད་པར་བྱའོ། །མི་བཏུབ་ན་གཅད་དོ་ཞེས་བྱ་བ་ནི། གལ་ཏེ་བཤུགས་སུ་མི་བཏུབ་ན་དེའི་ཚེ་ཐགས་མ་དེ་གཅད་པར་བྱའོ། །གལ་ཏེ་ན་ན་ཐན་ཀོར་དུ་ལོ་མའི་ཆད་བུ་དག་གཞུག་གོ་ཞེས་བྱ་བ་ནི། གལ་ཏེ་བཤང་བ་བྱ་བའི་ཕྱིར་འདུག་པ་ན་རེག་པས་བཤང་བའི་ལམ་གྱི་ཐན་ཀོར་ན་ན་དེའི་ཚེ་ཐག་མའི་བུ་གུའི་ཐན་ཀོར་དུ་ལོ་མོའི་ཆད་བུ་དག་གཞུག་པར་བྱ་བའོ། །ས་སྣད་པ་བསྲུང་པར་བྱའོ་ཞེས་བྱ་བ་ནི། གནས་ཁང་ལ་སོགས་པས་ས་རྐོར་མི་རུང་བས་དེ་བསྲུང་བར་བྱ་དགོས་པའོ། །དེའི་ཕྱིར་འོག་གཞིར་གྱོ་མོའོ་ཞེས་བྱ་བ་ནི། གང་གི་ཕྱིར་ས་སྣང་པ་བསྲུང་བར་བྱ་བ་དེའི་ཕྱིར་ཁྲིའུའི་བུ་གུ་དེའི་འོག་གཞིར་གྱོ་མོ་གཞུག་པར་བྱའོ་ཞེས་བྱ་བར་སྦྱར་རོ། །ཧ་ཅང་མི་མཐོ་བ་བཟང་དོ་ཞེས་བྱ་བ་ནི། གྱོ་མོའོ། །དྲི་ང་བར་མི་འགྱུར་བར་བྱ་བའི་ཕྱིར་དུས་དུས་སུ་བཀྲུ་བ་དང་བསྐམ་པ་དང་ཡུངས་མར་གྱིས་བསྐུ་བར་བྱའོ་ཞེས་བྱ་བ་ནི། གྱོ་མོ་དེ་དྲིང་བར་མི་འགྱུར་བར་བྱ་བའི་ཕྱིར་དུས་དུས་སུ་བཀྲུ་བ་ལ་སོགས་པ་བྱ་བའོ།། དེའི་དུས་ཀྱི་ཆེད་དུ་གཞན་བསྒྲུབ་པོ་ཞེས་བྱ་བ་ནི། བཀྲུ་བ་དང༌། བསྐམ་པ་དང༌། ཡུངས་མར་གྱིས་བསྐུ་བ་དེའི་དུས་ཀྱི་ཆེད་དུ་གྱོ་མོའི་འཐེབ་གཞན་བསྒྲུབ་པར་བྱ་བའོ། །མ་འབྱོར་ན་གཞི་ཉིད་དུ་ལོ་ཆུབ་གཞག་པར་བྱའོ་ཞེས་བྱ་བ་ནི། གལ་ཏེ་དེའི་དུས་ཀྱི་ཆེད་དུ་གྱོ་མོ་གཞན་མ་འབྱོར་ན་
དེའི་ཚེ་གྱོ་མོ་བཀྲུས་པ་དང་བསྐམས་པ་དང་ཡུངས་མར་གྱིས་བསྐུས་པ་དེ་ཉིད་ཀྱི་སྟེང་དུ་བཤང་བའི་ལམ་གྱི་གཞི་ཉེད་དུ་ལོ་ཆུན་གཞག་པར་བྱ་ཞིང་དེའི་ལོ་ཆུན་སྟེང་དུ་བཤང་བ་བྱའོ། །ལོ་ཆུན་དེ་ཡང་བཤང་བ་དེ་ཉིད་དང་ལྷན་ཅིག་ཏུ་དོར་བར་བྱ་ཞིང་བཤང་བའི་དུས་གཞན་གྱི་ཚེ་ན་ཡང་ལོ་ཆུན་གཞན་གཞག་པར་བྱ་བའོ། །དུས་དེ་ལྟ་བུས་ན་གྱོ་མོ་དེ་ཉིད་ཀྱི་བཀྲུ་བ་ལ་སོགས་པའི་དོན་འགྲུབ་པར་འགྱུར་རོ། །འདིར་ལོ་ཆུན་ཞེས་བྱ་བ་ནི། ལོ་མ་མང་པོ་ཕན་ཚུན་གཤིབས་པའི་ཆུན་པོ་ལ་བྱའོ། །བཤང་བ་བྱས་ནས་དེ་བྱེད་པའི་བཤང་བའི་ལམ་ཕྱི་བར་བྱའོ་ཞེས་བྱ་བ་ནི། བཤད་བདེ་བྱད་པའི་ལམ་གྱི་པར་བྱ་བའོ། །ཅི་ཞིག་གིས་དེ་ཕྱི་བར་བྱ་ཞེ་ན། དེའི་ཕྱིར། རྣོན་པོ་དང་རྩྭའི་ཆང་བ་མ་ཡིན་པས་སོ་ཞེས་བྱ་བ་སྨྲས་ཏེ། རྫས་རྣོན་པོ་དང་རྩྭ་ལ་སོགས་པ་རྩུབ་པོས་ཕྱི་བར་མི་བྱ་སྟེ། དེ་ནི་སྣད་པའི་སྡུག་བསྔལ་སྤང་བའི་ཕྱིར་རོ། །འོ་ན་ཅི་བཟང་ཞེ་ན། དེའི་ཕྱིར། འདི་ལ་རས་མ་དང་ལོ་ཆུན་དང་ལོ་མའི་ཆང་དུ་དང་ཤིང་དང་བོང་རྡོག་དག་བཟང་བ་ཉིད་དོ་ཞེས་བྱ་བ་སྨྲས་ཏེ། ཕྱི་བ་འདི་ལ་རས་མ་ལ་སོགས་པ་དག་བཟང་བ་ཉིད་དོ། །དེ་དག་གིས་ཕྱི་བར་བྱའོ། །ས་གཉིས་ཀྱིས་བཀྲུ་བར་བྱའོ་ཞེས་བྱ་བ་ནི། རས་མ་ལ་སོགས་པས་ཕྱིས་པའི་འོག་ཏུ་ས་རྣམ་པ་གཉིས་ཀྱིས་བཤང་བའི་ལམ་བཀྲུ་བར་བྱའོ་ཞེས་བྱ་བར་སྦྱར་རོ། །སྔར་གཞག་པའི་ས་མ་འདྲེས་པ་དག་གིས་ཕྱིས་བཀྲུ་བར་བྱའོ་ཞེས་བྱ་བ་ནི། བཤང་བ་བྱེད་པའི་མདུན་རོལ་དུ་སྔར་གཞག་པའི་ས་ཕན་ཚུན་མ་འདྲེས་པ་དག་གིས་ཕྱིས་བཀྲུ་བར་བྱ་བའོ། །འཐོར་འཐུང་གིས་རྐང་རྟེན་དག་ཟེར་མ་དག་གིས་མི་ཉམས་པ་ཉིད་དུ་ཁད་ཀྱིས་དལ་བུས་དལ་བུས་སོ་ཞེས་བྱ་བ་ནི། འཐོར་འཐུང་བྱ་བའི་ཆེད་དུ་འཐོར་འཐུང་གི་སར་རྐང་རྟེན་བྱས་པ་དག་ཁྲུས་བྱེད་པའི་ཆུའི་ཟེར་མ་དག་གིས་མི་ཉམས་པ་ཉིད་དུ་ཁད་ཀྱིས་དལ་བུས་དལ་བུས་བཀྲུ་བཤལ་བྱ་བའོ། །བདུན་པོ་དག་གིས་གཡོན་པའོ་ཞེས་བྱ་བ་ནི། སའི་ཕུང་པོ་བདུན་བོ་དག་གིས་ལག་པ་གཡོན་པ་བཀྲུ་བར་བྱ་འོ། །བདུན་གྱིས་ནི་གཉི་གའི་ཞེས་བྱ་བ་ནི། སའི་ཕུང་བུ་གཞན་བདུན་གྱིས་ནི་ལག་པ་གཉི་ག་བཀྲུ་བར་བྱའོ། །ལག་ངར་གཉིས་ཀྱང་བཀྲུ་བར་བྱའོ་ཞེས་བྱ་བ་ནི། ལག་པ་གཉིས་བཀྲུས་པ་དེའི་རྗེས་ལའོ། །ཡང་ལག་པ་གཉིས་པས་སོ་ཞེས་བྱ་བ་ནི། ལག་
ངར་གཉིས་བཀྲུ་བདེའི་འོག་ཏུ་ཡང་ལག་པ་གཉིས་པས་བཀྲུ་བར་བྱ་བའོ། །གཞན་གྱིས་རིལ་པ་སྤྱི་བླུགས་སོ་ཞེས་བྱ་བ་ནི། དེའི་རྗེས་ལས་གཞན་གྱིས་རིལ་བ་སྤྱི་བླུགས་བཀྲུ་བར་བྱའོ། །རྐང་པ་གཉིས་བཀྲུའོ་ཞེས་བྱ་བ་ནི། དེའི་འོག་ཏུ་རྐང་པ་གཉིས་བཀྲུ་བར་བྱ་པའོ། །ལྟོ་འཛག་པས་ནི་ཐ་མའི་མདུན་དག་ཏུ་ཕྱི་བ་ཙམ་བྱས་ཏེ་འདུག་པ་ལ་ཉེས་པ་མེད་དོ་ཞེས་བྱ་བ་ནི། གང་ཟག་ལྟོ་འཛག་པས་ནི་ཐ་མའི་མདུན་དག་ཏུ་ཞེས་བྱ་བ། འཛག་པ་མཐར་ཐུག་ཅིང་ཆད་པའི་མདུན་རོལ་འཛག་པ་མཆད་པའི་གནས་སྐབས་དག་ཏུ་བཤང་བ་བྱས་པའི་རྗེས་ལ་རས་མ་ལ་སོགས་པས་བྱི་བ་ཙམ་བྱས་ཏེ་ས་ལ་སོགས་པས་མ་བཀྲུས་པར་འདུག་པ་ལ་ཉེས་པ་མེད་དོ། །ཆད་པའི་རྗེས་ལ་ནི་སྔ་མ་བཞིན་དུ་བཀྲུ་བར་བྱའོ། །དེ་ལས་གཞན་པས་ནི་ཆུ་ཡོང་ན་འཐོར་འཐུད་མ་བྱས་པར་ཡང་འདུག་པར་མི་བྱའོ་ཞེས་བྱ་བ་ནི། ལྟོ་འཛག་པ་དེ་ལས་གཞན་པའི་གང་ཟག་ལྟོ་འཛག་པ་མ་ཡིན་པས་ནི། ཆུ་ཡོད་ན་འཐོར་འཐུང་གི་བཀྲུ་བཤལ་མ་བྱས་པར་འདུག་པར་མི་བྱའོ། །ཆུ་མེད་ན་ནི་མ་བཀྲུས་ཀྱང་ཉེས་པ་མེད་དེ། དེ་ནི་མ་མོ་ལས་གསུངས་སོ། །སྨན་གྱི་གཞི་ཕྲན་ཚེགས་ལ་སོགས་པའི་སྐབས་སོ་ཞེས་བྱ་བ་ནི། སྨན་གྱི་གཞི་ཕྲན་ཚེགས་ལ་སོགས་པའི་སྐང་ས་ནས་འབྱུང་བ་བཤད་ཟན་ཏོ། །སྨན་གྱི་གཞི་རྫོགས་སོ་ཞེས་བྱ་བ་ནི་བཤད་ཟིན་ཏོ།། །།ད་ནི་ལས་ཀྱི་གཞི་བསྡུ་བའི་ཕྱིར་ཆོ་ག་ལས་འདས་ན་ལས་མི་ཆགས་སོ་ཞེས་བྱ་བ་སྨྲས་ཏེ། ལས་ཀྱི་རྒྱུར་གྱུར་པའི་ཆོ་ག་དགེ་འདུན་ཚང་བ་དང༌། ལས་བརྗོད་པ་དང༌། ལས་བྱེད་པ་ཉིད་ལ་སོགས་པ་ལས་འདས་ན། གསོལ་པ་དང༌། བརྗོད་པ་དང༌། སོ་སོར་ཐར་པ་གདོན་པ་དང༌། དགག་དབྱེའི་ལས་དང་དེ་དག་གི་འབྲས་བུ་བསྙེན་པར་རྫོགས་པ་ལ་སོགས་པ་ཡང་མི་འཆགས་སོ། །འདི་སྐད་བསྟན་ཏེ། ཆོ་ག་གང་གིས་ལས་བསྟན་པ་ཡོངས་སུ་དག་པ་དང་དགེ་འདུན་ཚང་བ་དང་ལས་བརྗོད་པ་དང་ལས་བྱེད་བ་ལ་སོགས་པ་གང་དག་ཡིན་པའི་ཆོ་ག་དེ་དག་ལས་འདས་ན། ལས་དེ་བྱས་པར་མི་འགྱུར་ཞིང་ལས་ཀྱི་འབྲས་བུ་ཡང་འགྲུབ་པར་མི་འགྱུར་རོ། །འདིར་ཆོ་ག་ནི་དགེ་འདུན་ཚང་བ་དང་ལས་བརྗོད་པ་དང་ལས་བྱེད་པ་ཉིད་དོ་ཞེས་བྱ་བ་ནི། ཆོ་གའི་རྣམ་པ་བསྟན་ཏེ། དགེ་འདུན་
ཚང་བ་ཞེས་བྱ་བ་ནི། དགེ་འདུན་ལྷག་མའི་ལྟུང་བ་ལས་དབྱུང་བ་ལ་ནི་དགེ་སློང་ཉི་ཤུ་ལ་སོགས་པའོ། །ཡུལ་དབུས་སུ་བསྙེན་པར་རྫོགས་པ་ལ་ནི་བཅུ་ལ་སོགས་པའོ། །མཐའ་འཁོབ་ཏུ་བསྙེན་པར་རྫོགས་པ་ལ་ནི་གཞན་མེད་ན་འདུལ་བ་འཛིན་པ་དང་ལྔ་ལ་སོགས་པའོ། །དགེ་སློང་མ་དགེ་འདུན་ལྷག་མ་རྣམས་ལས་དབྱུང་བ་ལ་ནི། མཚམས་ཀྱི་དགེ་འདུན་གཉི་ག་ཚོགས་པའོ། །དགེ་སློབ་མའི་སྔོམ་པ་སྦྱིན་པ་དང་ཚངས་བར་སྤྱོད་པ་ལ་ཉེ་བར་གནས་པའི་སྔོམ་པ་སྦྱིན་པ་དང༌། འཁོར་ཉེ་བར་འཇོག་པ་དང༌། འཁོར་མང་པོ་ཉེ་བར་འཇོག་པའི་གནང་བ་སྦྱིན་པ་ལ་ནི་ཡུལ་དབུས་སུ་དགེ་སློང་མ་བཅུ་གཉིས་ལ་སོགས་པའོ། །བསྙེན་པར་རྫོགས་པ་ལ་ནི་དགེ་སློང་བཅུ་དང༌། དགེ་སློང་མ་བཅུ་གཉིས་ལ་སོགས་པའོ། །ལས་གཞན་ཐམས་ཅད་ལ་ནི་བཞི་ལ་སོགས་པའོ་ཞེས་གསུངས་པའི་གྲངས་དེ་བཞིན་ཚང་བའོ། །ལས་བརྗོད་པ་ཞེས་བྱ་བ་ནི། གསོལ་བ་འབའ་ཞིག་གི་ལས་དང༌། གསོལ་བ་དང་གཉིས་ཀྱི་ལས་དང༌། གསོལ་བ་དང་བཞིའི་ལས་བརྗོད་པ་དག་ལས་གང་ལ་གང་བྱ་བར་གསུངས་པ་དེ་ལས་མཚང་པ་སྟེ་ལྷག་མ་ལ་ནི་ཉེས་པ་མེད་དོ། །ལས་བྱེད་པ་ཞེས་བྱ་བ་ནི། བསྙེན་པར་རྫོགས་པ་ལས་བྱ་བ་ལ་སོགས་པའོ། །ལས་ནི་གསོལ་བ་དང་བརྗོད་པ་དང་སོ་སོར་ཐར་པ་གདོན་པ་དང་དགག་དབྱེའོ་ཞེས་བྱ་བ་ནི། ལས་ཀྱི་རྣམ་པར་བསྟན་ཏེ། གསོལ་བ་ཞེས་བྱ་བ་ནི། གསོལ་བ་འབའ་ཞིག་གི་ལས་སོ། །བརྗོད་པ་ཞེས་བྱ་བ་ནི། ལས་བརྗོད་པ་དང་པོ་དང་གཉིས་པ་དང་གསུམ་པའོ། །སོ་སོར་ཐར་བ་གདོན་པ་ཞེས་བྱ་བ་ནི། གསོ་སྦྱོང་ངོ༌། །དགག་དབྱེ་ཞེས་བྱ་བ་ནི། དབྱར་གནས་པའི་དགེ་འདུན་ལ་གནས་གསུམ་གྱི་དགག་དབྱེ་བྱའོ། །ཐོས་པར་བྱ་བ་མ་ཡིན་པས་ཐོས་པས་ནི་མི་ཆགས་པར་མི་འགྱུར་རོ་ཞེས་བྱ་བ་ནི། ཐོས་པར་བྱ་བ་མ་ཡིན་པ་བསྙེན་པར་མ་རྫོགས་པ་ལ་སོགས་པས་ཐོས་པས་ནི་ལས་མི་འཆགས་པར་མི་འགྱུར་ཏེ་འཆགས་པ་ཁོ་ནའོ། །ལས་བྱེད་པ་ལ་སོགས་པ་དག་ལ་ལྟུང་བ་ཙམ་དུ་ནི་འགྱུར་རོ། །དེ་ལྟར་ཡང༌། ཀུན་དགའ་བོ་ཁྱོད་ཀྱིས་རྒྱལ་པོ་གསོ་སྦྱོང་གི་ཕྱིར་སོ་སོར་ཐར་པ་འདོན་པ་ཉན་དུ་མ་བཅུག་པ་ཉེས་སོ་ཞེས་གསུངས་པ་ཡིན་ནོ། །མི་འཆགས་པ་མི་བྱའོ་ཞེས་བྱ་བ་ནི།
ལས་གང་ལ་འཆགས་པ་མེད་པ་དེ་ནི་མི་འཆགས་བ་སྟེ། ལས་དེ་ནི་མི་བྱའོ། །དེ་ལྟར་ཡང་ཆོས་མ་ཡིན་པ་ལས་བྱེད་བ་ནི་མི་འཆགས་ལ། དེས་དགེ་འདུན་ལ་ཡང་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །ད་ནི་ཆོ་ག་ལས་འདས་ན་ལས་མི་འཆགས་སོ་ཞེས་སྨྲས་པ་གང་ཡིན་པ་དེ་བརྗོད་པར་བྱའོ། །ཆོས་མ་ཡིན་པས་མི་བྱའོ་ཞེས་བྱ་བ་ནི། ཆོས་མ་ཡིན་པས་ལས་མི་བྱ་བ་སྟེ། ཆོས་མ་ཡིན་པ་ཞེས་བྱ་བ་ནི། གླེང་བར་མ་བྱས། དྲན་པར་མ་བྱས་པར་མཐུས་མངོན་སུམ་དུ་མ་གྱུར་པར་ཆད་པའི་ལས་བྱེད་དུ་གཞུག་པ་ལ་སོགས་པའོ། །ལས་ཀྱི་གཞི་ལས་གཞན་པ་དག་ལ་ཆད་པའི་ལས་ནི་མངོན་སུམ་དུ་བྱེད་དུ་གཞུག་གོ་ཞེས་བྱ་བ་ལ་སོགས་པའི་ཆོ་ག་འབྱུང་བདེ་དག་ཀྱང་བསྡུ་བའི་ཕྱིར་མདོ་འདི་བྱས་སོ། །མི་མཐུན་པ་དག་མི་བྱའོ་ཞེས་བྱ་བ་ནི་ལས་སོ། །ཚོགས་ཀྱིས་མི་བྱའོ་ཞེས་བྱ་བ་ནི། ཚོགས་ཀྱིས་ཚོགས་པའི་ལས་དག་མི་བྱ་བ་སྟེ། འདི་ལྟར་ཚོགས་ཀྱིས་གཞིལ་སོགས་པའི་ལས་དག་བྱེད་ན་དགེ་འདུན་གྱི་དབྱེན་ཉིད་དུ་འགྱུར་པའི་ཕྱིར་རོ། །འདིར་ཚོགས་ཞེས་བྱ་བ་ནི་དགེ་འདུན་དུ་ལངས་པ་སྟེ། བཞི་ཡན་ཆད་དོ། །དེ་ནི་དགེ་སློང་དང་དགེ་སློང་མའི་ཡུལ་གཉིས་ཀ་ལ་བཞི་ཡན་ཆད་ཚོགས་ཡིན་པར་འདྲའོ། །དགེ་འདུན་དུ་མ་གྱུར་པ་དག་གིས་མི་བྱའོ་ཞེས་བྱ་བ་ནི། ལས་སོ། །ལས་གང་ལ་དུ་དག་དགེ་འདུན་ཉིད་ཡིན་ཞེ་ན་དེའི་ཕྱིར། དབྱུང་བ་ལ་ནི་ཉི་ཤུལ་སོགས་པ་དགེ་འདུན་ཉིད་དོ་ཞེས་བྱ་བ་སྨྲས་ཏེ། དགེ་སློང་དགེ་འདུན་ལྷག་མའི་ལྟུང་བ་ལས་དབྱུང་བའི་ལས་གང་ཡིན་པ་དེ་ལ་ནི་དགེ་སློང་ཉི་ཤུ་ལ་སོགས་པ་དགེ་འདུན་ཉིད་ཡིན་ནོ། །བསྙེན་པར་རྫོགས་པ་ལ་ནི་བཅུ་ལ་སོགས་པའོ་ཞེས་བྱ་བ་ནི། དགེ་སློང་ཡུལ་དབུས་སུ་བསྙེན་པར་རྫོགས་པར་བྱ་བའི་ལས་ལ་ནི་དགེ་སློང་བཅུ་ལ་སོགས་པ་དགེ་འདུན་ཉིད་ཡིན་པའོ། །མཐའ་འཁོབ་དག་ཏུ་མེད་ན་འདུལ་བ་འཛིན་པ་དང་ལྔ་ལ་སོགས་པའོ་ཞེས་བྱ་བ་ནི། དགེ་སློང་ཡུལ་མཐའ་འཁོབ་ཏུ་བསྙེན་པར་རྫོགས་པར་བྱ་བའི་ལས་ལ་ན་དགེ་སློང་བཅུ་ལ་སོགས་པ་མེད་ན་འདུལ་བ་འཛིན་པ་ཞེས་བྱ་བ་ལས་བྱེད་པ་ཉིད་དུ་གཏོགས་པར་ལྔ་ལ་སོགས་པ་དགེ་འདུན་ཉིད་ཡིན་ནོ། །ཡོད་ན་ནི་
གཞིའི་ཆོ་ག་ཁོ་ན་ལ་བརྟེན་པར་བྱའོ། །དེས་ན་དགེ་སློང་མ་དགེ་འདུན་ལྷག་མའི་ལྟུང་བ་བྱུང་བའི་མགུ་པ་དང་དབྱུང་བའི་ལས་ལ་ནི་མཚམས་གཉི་ག་ནད་དགེ་སློང་དང་དགེ་སློང་མ་གཉི་གའི་དགེ་འདུན་ཐམས་ཅད་ཚོགས་པ་དགེ་འདུན་ཉིད་ཡིན་ནོ། །དགེ་སློང་མ་ཡུལ་དབུས་སུ་བསྙེན་པར་རྫོགས་པར་བྱ་བའི་ལས་ལ་ནི་དགེ་སློང་བཅུ་ལ་སོགས་པ་དང་དགེ་སློང་མ་བཅུ་གཉིས་ལ་སོགས་པ་དགེ་འདུན་ཉིད་ཡིན་ནོ། །དགེ་སློང་མ་ཡུལ་མཐའ་འཁོབ་ཏུ་བསྙེན་པར་རྫོགས་པར་བྱ་བའི་ལས་ལ་ནི་མེད་ན་དགེ་སློང་འདུལ་བ་འཛིན་པ་ཉིད་གཏོགས་པར་ལྔ་ལ་སོགས་པ་དང༌། དགེ་སློང་མ་འདུལ་བ་འཛིན་པ་ཉིད་གཏོགས་པར་དྲུག་ལ་སོགས་པའི་གཉི་གའི་དགེ་འདུན་དགེ་འདུན་ཉིད་ཡིན་ནོ། །ཡོད་ན་ནི་གཞིའི་ཆོ་ག་ཁོ་ན་ལ་བརྟན་པར་བྱའོ། །དགེ་སློང་མའི་སྡོམ་པ་སྦྱིན་པ་ལ་ནི་དབུས་དང་མཐའ་འཁོབ་ཏུ་དགེ་སློང་མའི་གྲངས་བསྙེན་པར་རྫོགས་པར་བྱ་བའི་ལས་དང་འདྲ་པར་ཤེས་པར་བྱ་བའོ། །ལྷག་མ་ལ་ནི་བཞི་ལ་སོགས་པའོ་ཞེས་བྱ་བ་ནི། དབྱུང་བ་དང་བསྙེན་པར་རྫོགས་པར་བྱ་བའི་ལས་མ་གཏོགས་པ་དེ་དག་གི་ལྷག་མའི་ལས་ལ་ནི་དགེ་སློང་བཞི་ལ་སོགས་པ་དགེ་འདུན་ཉིད་ཡིན། དགག་དབྱེ་ལ་ནི་དགག་དབྱེ་བྱེད་པ་གཏོགས་པར་ལྔ་ལ་སོགས་པ་དགོ་འདུན་ཉིད་ཡིན་ནོ། །དགེ་སློང་མ་རྣམས་ཀྱི་ལས་ནི་ཐ་དད་པ་ཉིད་ངོ་ཞེས་བྱ་བ་ནི། དགེ་སློང་མ་རྣམས་ཀྱི་ལས་ནི་བསྙེན་པར་རྫོགས་པ་དང་དགག་དབྱེའི་ལས་མ་གཏོགས་པ་གཞན་ཐམས་ཅད་དགེ་སློང་དང་ཐ་དད་པ་ཉིད་དུ་བྱ་བ་ཉིད་ཡིན་ནོ། །དེ་ལྟར་ཡང་དགེ་སློང་རྣམས་ཀྱི་ལས་དག་ཀྱང་ཐ་དད་པ་ལ་དགེ་སློང་མ་རྣམས་ཀྱི་ལས་དག་ཀྱང་ཐ་དད་ངོ་ཞེས་གསུངས་པ་ཡིན་ནོ། །དགག་དབྱེ་ནི་དགེ་སློང་གི་དགེ་འདུན་ལ་ཡང་ངོ་ཞེས་བྱ་བ་ནི། དགེ་སློང་མ་རྣམས་ཀྱི་དགག་དབྱེ་ནི་དགེ་སློང་གི་དགེ་འདུན་ལ་ཡང་བྱ་དགོས་པའོ། །ཡང་ངོ་ཞེས་བྱ་བའི་སྒྲས་ནི། དགེ་སློང་མའི་དགེ་འདུན་ལ་ཡང་བྱ་དགོས་པར་བསྟན་ཏོ། །འདི་ལྟར་དགེ་སློང་མ་རྣམས་ཀྱི་དགག་དབྱེ་བ་ནི་གཉི་གའི་དགེ་འདུན་ལ་བྱ་དགོས་པའི་ཕྱིར་རོ། །གསོ་སྦྱོང་ནི་དེ་དང་མཐུན་པ་འགྲུབ་པ་རྣམས་ཀྱིས་སོ་ཞེས་བྱ་བ་ནི། དགེ་སློང་མ་རྣམས་ཀྱི་གསོ་སྦྱོང་ནི་མཐུན་པ་གྲུབ་པ་
རྣམས་ཀྱིས་བྱ་བར་རིག་པར་བྱ་སྟེ། སུ་དང་མཐུན་པ་ཞེ་ན། དགེ་སློང་གི་དགེ་འདུན་དེ་དང་སྟེ། དགེ་སློང་མ་དེ་དག་གི་གསོ་སྦྱོང་ཐ་དད་པ་ཡིན་མོད་ཀྱི། གལ་ཏེ་དགེ་སློང་གི་དགེ་འདུན་དང་མཐུན་པར་གྱུར་བ་རྣམས་ཀྱིས་གྲུབ་ཀྱི། མ་གྱུར་པ་རྣམས་ཀྱིས་མི་འགྲུབ་བོ། །ཇི་ལྟར་ན། དེ་དག་གིས་དགེ་སློང་གི་དགེ་འདུན་དང་གསོ་སྦྱོང་མཐུན་པ་བསྒྲུབ་པར་བྱ་ཞེན་དེའི་ཕྱིར། འདུན་པ་དང་གསོ་སྦྱོང་འབུལ་པས་དེ་བསྒྲུབ་བོ་ཞེས་བྱ་བ་སྨྲས་ཏེ། འདུན་པ་དང་གསོ་སྦྱོང་དག་འབུལ་ཞིང་སྟོབས་པས་དེ་མཐུན་པ་དེ་བསྒྲུབ་པར་བྱའོ། །དགེ་སློང་མའི་དགེ་འདུན་གྱི་འདུན་པ་དང་གསོ་སྦྱོང་དགེ་སློང་མ་གཉིས་ཀྱི་དགེ་འདུན་ལ་དབུལ་བར་བྱ་སྟོབས་པར་བྱ་ཐོབ་པར་བྱ་སྟེ། དེ་ལྟར་ན་དགེ་སློང་མ་རྣམས་ཀྱི་མཐུན་པར་འགྲུབ་པར་འགྱུར་རོ། །འདི་ལ་གཉིས་ཀྱིས་བྱའོ་ཞེས་བྱ་བ་ནི། འདུན་པ་དང་གསོ་སྦྱོང་དབུལ་པ་འདི་ལ་དགེ་སློང་མ་གཉིས་ཀྱིས་དགེ་སློང་མའི་དགེ་འདུན་ལས་བླང་ཞིང་དགེ་སློང་དགེ་འདུན་ལ་དབུལ་བར་བྱ་བའོ། །དེ་གཉིས་ནུས་པ་ཉིད་ཀྱིས་སོ་ཞེས་བྱ་བ་ནི། དགེ་སློང་མ་དེ་གཉིས་འདུན་པ་དང་གསོ་སྦྱོང་འབུལ་བར་ནུས་པ་ཉིད་ཀྱིས་དབུལ་པར་བྱའོ། །མེད་ན་གཅིག་གོ་ཞེས་བྱ་བ་ནི། དགེ་སློང་མ་གཉི་གས་ནུས་པ་ཉིད་མེད་ན་གཅིག་གིས་ནུས་པ་ཉིད་ལ་དབུལ་བ་བརྟེན་པར་བྱ་བ་ཁོ་ན་ཡིན་ནོ། །དགེ་སློང་གིས་དགེ་འདུན་གྱི་ལེན་པའི་དགེ་སློང་བསྐོ་བར་བྱའོ་ཞེས་བྱ་བ་ནི། དགེ་སློང་གི་དགེ་འདུན་གྱིས་དགེ་སློང་མའི་དགེ་འདུན་གྱིས་འདུན་པ་དང༌། དགེ་སློང་དགེ་སྦྱོང་མ་དེ་གཉིས་ལས་ལེན་པའི་དགེ་སློང་གཅིག་བསྐོ་བར་བྱ་བའོ། །དེ་སྒོ་གང་དུ་བསྡད་པར་བྱའོ་ཞེས་བྱ་བ་ནི། ལེན་པར་བསྐོས་པའི་དགེ་སློང་དེས་དེའི་ཚེ་ན་སྒོ་གང་དུ་བསྡད་པར་བྱ་བའོ། །འབྲོས་ན་ཤད་ཀྱིས་སྤྱོད་ངོ་ཞེས་བྱ་བ་ནི། གལ་ཏེ་ལེན་པར་བསྐོས་པའི་དགེ་སློང་དེ་འཇིགས་པ་དང་བཅས་པའི་ཕྱིར་འབྲོས་པར་བྱེད་ན་དེའི་ཚེ་དགེ་སློང་དེ་ལ་དགེ་སློང་མ་དེ་གཉིས་ཀྱིས་ཤད་ཀྱིས་སྦྱང་བར་བྱ་བའོ། །དེས་ཀྱང་དེ་བཞིན་ནོ་ཞེས་བྱ་བ་ནི། གལ་ཏེ་དེའི་ཚེ་ན་དགེ་སློང་མ་དེ་གཉིས་འབྲོས་ན་དགེ་སློང་དེས་ཀྱང་དེ་བཞིན་དུ་ཤད་ཀྱིས་སྦྱང་བར་བྱའོ། །འབྲོས་པར་མི་བྱའོ་ཞེས་བྱ་བ་ནི། ལེན་
པར་བྱེད་པའི་དགེ་སློང་དེ་དང་དབུལ་བར་བྱེད་པའི་དགེ་སློང་མ་དེ་གཉིས་འབྲོས་པར་མི་བྱ་བའོ། །མི་ཤེས་ན་མིང་རུས་དྲིའོ་ཞེས་བྱ་བ་ནི། དབུལ་བར་བྱེད་པའི་དགེ་སློང་མེད་གཉིས་ཀྱིས་ལེན་པར་བྱེད་པའི་དགེ་སློང་དེ་མི་ཤེས་ན་དེ་གཉིས་ཀྱིས་དེའི་མི་རུས་དྲི་བར་བྱའོ། །མ་གྲུབ་དང་དབྱུང་བ་ནི་གཉི་ག་རྫོགས་པ་ལའོ་ཞེས་བྱ་བ་ནི། དགེ་སློང་མ་རྣམས་ཀྱིས་དགེ་འདུན་ལྷག་མ་བྱུང་བའི་མགུ་བར་བྱ་བ་དང་དབྱུང་བ་ནི་དགེ་སློང་མའི་དགེ་འདུན་འབའ་ཞིག་ལ་བྱ་བ་མ་ཡིན་གྱི། དགེ་སློང་དང་དགེ་སློང་མ་གཉི་གའི་དགེ་འདུན་ཚོགས་པ་དུས་གཅིག་ཏུ་གནས་གཅིག་ན་འཁོད་པ་དག་ལ་བྱ་བའོ། །བསྙེན་པར་རྫོགས་པར་བྱ་བ་ལ་ཡང་ངོ་ཞེས་བྱ་བ་ནི། དགེ་སློང་མ་རྣམས་ཀྱིས་བསྙེན་པར་རྫོགས་པར་བྱ་བ་དེ་ཡང་གཉི་གའི་དགེ་འདུན་ཚོགས་པ་ལ་བྱ་བའོ། །འདི་ལ་དེ་དག་གི་ཚོགས་ནི་བཅུ་གཉིས་སོ་ཞེས་བྱ་བ་ནི། དགེ་སློང་མ་བསྙེན་པར་རྫོགས་པར་བྱ་བ་འདི་ལ་ཡུལ་དབུས་སུ་ནི་དགེ་སློང་མ་དེ་དག་གི་ཚོགས་བཅུ་གཉིས་ཡན་ཆད་དོ། །ཡུལ་མཐའ་འཁོབ་ཏུ་ནི་དགེ་སློང་མ་བཅུ་གཉིས་མེད་ན་འདུལ་བ་འཛིན་པ་ཉིད་གཏོགས་པར་དྲུག་ཡན་ཆད་དོ། །བཅུ་གཉིས་ཡོད་ན་ནི་གཞིའི་ཆོ་ག་ཁོ་ནས་བསྙེན་པར་རྫོགས་པར་བྱ་བའོ། །སྔོན་རོལ་གྱི་སྡོམ་པ་གཉིས་དང་འཁོར་དང་འཁོར་མང་པོ་ཉ་བར་གཞག་པའི་གནང་བ་སྦྱིན་པ་དང་བཅས་པའི་དགེ་འདུན་གྱི་མཐའོ་ཞེས་བྱ་བ་ནི། དགེ་སློང་མའི་ཚོགས་བཅུ་གཉིས་ཞེས་སྔར་བསྟན་པ་དེ་ནི་དགེ་སློང་མ་བསྙེན་པ་རྫོགས་པའི་སྔོན་རོལ་གྱི་སྡོམ་པ་གཉིས་པོ་བསླབ་པའི་སྡོམ་པ་དང༌། ཚངས་པར་སྤྱོད་པ་ལ་ཉེ་བར་གནས་པའི་སྔོམ་པ་དང༌། །བསྙེན་པར་རྫོགས་པའི་འོག་ཏུ་ལོ་བཅུ་གཉིས་ལོན་ཞིང་ནུས་པའི་ཚེ་འཁོར་ཉེ་བར་འཇོག་པའི་སྣང་བ་དང༌། འཁོར་མང་བོ་ཉེ་བར་འཇོག་པའི་སྣང་བ་ཞེས་བྱ་བ་སྔོམ་པ་གཉིས་དང༌། གནང་བ་གཉིས་པོ་བསྙེན་པར་རྫོགས་པ་དང་བཅས་པའི་དགེ་འདུན་མའི་གྲངས་ཀྱི་མཐའ་ཡིན་ནོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། དགེ་སློང་མ་བསྙེན་པར་རྫོགས་པའི་མདུན་རོལ་དུ་དགེ་སློབ་མའི་བསླབ་པའི་སྔོམ་པ་སྦྱིན་པ་དང༌། ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་སྦྱིན་པ་
དང། བསྙེན་པར་རྫོགས་ནས་ལོ་བཅུ་གཉིས་ལོན་ཞིང་ནུས་པའི་ཚེ་འཁོར་ཉེ་བར་འཇོག་པའི་གནང་བ་སྦྱིན་པ་དང༌། འཁོར་མང་པོ་ཉེ་བར་འཁོར་བའི་གནང་པ་སྤྱིན་པ་དང༌། གཉི་གའི་དགེ་འདུན་ལས་བསྙེན་པར་རྫོགས་པར་བྱེད་པའི་ལས་ལྔ་པོ་དེ་དག་ལ་དགེ་སློང་མའི་དགེ་འདུན་གྱི་གྲངས་ཡུལ་དབུས་སུ་ནི་བཅུ་གཉིས་ཡན་ཆད་དགེ་འདུན་ཉིད་ཡིན་ནོ། །མཐའ་འཁོབ་ཏུ་ནི་བཅུ་གཉིས་མེད་ན་འདུལ་བ་འཛིན་པ་ཉིད་གཏོགས་པར་དྲུག་ཡན་ཆད་དགེ་འདུན་ཉིད་དོ། །བཅུ་གཉིས་ཡོད་ན་མཐའ་འཁོབ་ཏུ་ཡང་གཞིའི་ཆོ་ག་ཉིད་ལ་བརྟེན་པར་བྱའོ། །ལྷག་མ་དག་གིས་ཚོགས་ནི་བཞིའོ་ཞེས་བྱ་བ་ནི། དགེ་སློང་མའི་ལས་ལྔ་པོ་ཇི་སྐད་བསྟན་པ་དེ་དག་གི་ལྷག་མ་དགེ་སློང་མའི་དགེ་འདུན་གྱིས་ལས་གཞན་ཐམས་ཅད་ལ་ནི་དགེ་སློང་མ་བཞིའི་ཚོགས་ཡན་ཆད་ཀྱིས་ལས་བྱར་རུང་པའོ། །དེ་ལྟར་ཡང་འདིར་གཞུང་ནི། དགེ་སློང་མ་རྣམས་ཀྱིས་ཚོགས་བཞི་ས་ལས་དག་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །གལ་ཏེ་དགེ་སློང་མ་ལས་བྱེད་པས་ལས་མི་ནུས་ན། དེས་དགེ་སློང་གིས་བྱས་པའི་ཚིག་ངེས་པར་བརྟགས་ན་རུང་ངོ་ཞེས་བྱ་བ་ནི། དགེ་སློང་མ་ལས་བྱེད་པས་ལས་བྱེད་མི་ནུས་ན་དེས་དགེ་སློང་གིས་ལས་བྱས་པའི་ཚིག་ངེས་པར་བརྟགས་ཤིང་ཐོས་ན་དེ་ལས་བྱས་པ་ཉིད་དུ་འགྱུར་བའོ། །འདི་སྐད་བསྟན་ཏེ། གལ་ཏེ་དགེ་སློང་མ་ལས་བྱེད་པས་ལས་མི་ནུས་ན། དེས་དགེ་སློང་ལས་བྱེད་པའི་ཚིག་མཉན་ཏེ་རུང་བར་རིག་པར་བྱའོ། །ཇི་ཙམ་ཡན་ཆད་ཅེ་ན་དེའི་ཕྱིར་འདི་ལྟར་ཅང་མི་གསུང་བས་ཞེས་བྱ་བའི་གོང་ཡན་ཆད་དོ་ཞེས་བྱ་བ་སྨྲས་ཏེ། དགེ་འདུན་འཕགས་མ་རྣམས་ཀྱིས་བཟོད་ཅིང་གནང་ནས་དགེ་འདུན་འཕགས་མ་རྣམས་ཀྱིས་ཚེ་གེ་མོ་ཞིག་ལགས་ཏེ་ཞེས་བྱ་བ་ཡན་ཆད་ནི་དགེ་སློང་གིས་བྱས་པ་མཉན་ན་རུང་ངོ༌། །འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་བྱ་བ་ནི། དགེ་སློང་མ་ལས་བྱེད་པ་ཉིད་ཀྱིས་ངེས་པ་ཁོ་ན་ར་བརྗོད་པར་བྱ་དགོས་སོ། །མི་འདུག་པར་འགྲེང་བ་ནི་ཁ་སྐོང་བ་ཉིད་མ་ཡིན་ནོ་ཞེས་བྱ་བ་ནི། དགེ་འདུན་མ་ཚང་བའི་ཚེ་ལས་ཀྱི་མཚམས་དེ་ཉིད་ན་དགེ་སློང་ས་ལ་མི་འདུག་པར་འགྲེང་བ་གང་
ཡིན་པ་དེ་ནི་དགེ་འདུན་ཚད་བར་བྱ་བའི་ཕྱིར་ལ་སྐོང་པ་ཉིད་མ་ཡིན་ཏེ། སྤྱོད་ལམ་ཐ་དད་པ་འདུག་པས་ཐ་དད་པ་ཉིད་དུ་སྣང་བའི་ཕྱིར་རོ། །གང་ལ་བྱ་བ་ཡང་མ་ཡིན་ནོ་ཞེས་བྱ་བ་ནི། གང་ཟག་གང་ལ་བསྐྲད་པ་ལ་སོགས་པའི་ལས་བྱ་བའི་གང་ཟག་དེ་ཉིད་ཀྱང་ཁ་སྐོང་པ་ཉིད་མ་ཡིན་པའོ། །དེའི་ཕྱིར་འདུན་པ་དང་ཡོངས་སུ་དག་པའི་ཆོ་ག་ལས་མ་ཡིན་པ་ཉིད་དོ་ཞེས་བྱ་བ་ནི། འདུན་པ་དང་ཡོངས་སུ་དག་པ་འབུལ་བར་བྱེད་པའི་གང་ཟག་གིས་འདུན་པ་དང་ཡོངས་སུ་དག་པ་ཕུལ་ནས་བདག་ཉིད་ལས་ཀྱི་གནས་སུ་མ་འོངས་ན་དེས་འདུན་པ་དང་ཡོངས་སུ་དག་པ་ཕུལ་བ་དེས་ཀྱང་ཁ་སྐོང་དུ་མི་རུང་བ་ཉིད་ཡིན་པའོ། །དེ་བས་ན་གང་ཟག་གསུམ་གྱིས་འདུན་པ་དང་ཡོངས་སུ་དག་པ་བླངས་ཏེ། གོས་སྤྱོད་དང་དགག་དབྱེ་ལ་སོགས་པ་ལས་གང་ཡང་མི་བྱའོ། །དེ་གཉིས་དབུལ་བར་བྱ་བ་ཉིད་མ་ཡིན་ནོ་ཞེས་བྱ་བ་ནི། དགེ་འདུན་གྱི་ཁ་སྐོང་བར་བྱེད་པའི་གང་ཟག་གིས་འདུན་པ་དང་ཡོངས་སུ་དག་པ་དེ་གཉིས་དབུལ་བར་བྱ་བ་ཉིད་མ་ཡིན་ཏེ། བདག་ཉིད་ལས་ཀྱི་གནས་སུ་འགྲོ་བར་བྱ་བ་ཉིད་ཡིན་ནོ་ཞེས་བྱ་བའི་ཐ་ཚིག་གོ །དགག་དབྱེ་བྱེད་པ་ཉིད་དུ་མི་བསྐོའོ་ཞེས་བྱ་བ་ནི། ཁ་སྐོང་བར་བྱེད་པ་དགག་དབྱེ་བྱེད་པ་ཉིད་དུ་མི་བསྒོ་པ་སྟེ། དགེ་སློང་གསུམ་གྱི་སྟེང་དུ་དགེ་སློང་གཅིག་གིས་ཁ་བསྐང་སྟེ། དགེ་འདུན་དུ་གྱུར་བའི་དུས་ན་དེ་དགག་དབྱེ་བྱེད་པ་ཉིད་དུ་བསྐོར་མི་རུང་སྟེ། འདི་ལྟར་དགེ་སློང་གསུམ་ལ་དགེ་སློང་གཅིག་གིས་དགག་དབྱེ་བྱར་མི་རུང་བའི་ཕྱིར་རོ། །དགེ་སློང་བཞིའི་སྟེང་དུ་ལྔ་པ་གཅིག་གིས་ཁ་བསྐང་ན་ནི་དེ་དག་དགག་དབྱེ་བྱེད་པ་ཉིད་དུ་བསྐོར་རུང་སྟེ། དགག་དབྱེ་བྱེད་པ་མ་གཏོགས་པར་བཞིའི་ཚོགས་དགེ་འདུན་དུ་གྱུར་པ་ཡོད་པའི་ཕྱིར་རོ། །བསྙེན་པར་མ་རྫོགས་པ་དང་ཉམས་པ་དང་མཚམས་མེད་པ་བྱས་པ་དང་སྡིག་པའི་ལྟ་བ་ཅན་དང་ས་གཞན་ན་གནས་པ་དང་ཐ་དད་པར་གནས་པ་རྣམས་ཀྱང་མ་ཡིན་ནོ་ཞེས་བྱ་བ་ནི། དེ་དག་ཀྱང་ཁ་སྐོང་བ་ཉིད་མ་ཡིན་པའོ། །སྡིག་པའི་ལྟ་བ་ཅན་ཞེས་བྱ་བ་ནི། ཚངས་པའི་དྲ་བ་ཞེས་བྱ་བའི་མདོ་སྡེ་ལས་གསུངས་པའི་ལྟ་བའི་རྣམ་པ་དྲུག་ཅུ་རྩ་གཉིས་པོ་ངག་ལས་གང་ཡང་རུང་བ་ཀུན་དུ་སྤྱོད་པའོ། །འདིས་ནི་ཐམས་
ཅད་ལྟ་བ་མཐུན་པ་ཚུལ་ཁྲིམས་ཡོངས་སུ་དག་པ་འདུས་པ་འཁོད་པ་དག་གིས་གསོ་སྦྱོང་དང་དགག་དབྱེ་དང་གསོལ་བ་དང་གཉིས་ཀྱི་ལས་དང་གསོལ་བ་དང་ང་ཞིའི་ལས་བྱའོ་ཞེས་གསུངས་པ་བསྡུས་པ་ཡིན་ནོ། །ས་གཞན་ན་གནས་པ་ཞེས་བྱ་བ་ནི། སྤོ་བ་ལ་སོགས་པ་ཆད་པའི་ལས་བྱེད་པའོ། །འདིས་ནི་བཞིའི་ཚོགས་ཀྱིས་ལས་བྱ་སྟེ། སྤོ་བ་བྱེད་པ་དང་བཞིས་བྱེད་ན་ཆོས་མ་ཡིན་པ་ལས་བྱེད་པ་ཡིན་ནོ། །གཞི་ནས་སྦོ་བ་བྱེད་པ་དང་མགུ་བ་སྤྱོད་པ་དང༌། གནས་ནས་ཕྱུང་བ་དང་བཞིས་བྱེད་ན་ཆོས་མ་ཡིན་པས་བྱེད་པ་ཡིན་ནོ་ཞེས་གསུངས་པ་བསྡུས་པ་ཡིན་ནོ། །འདིར་གནས་ནས་ཕྱུང་བ་ཞེས་སྨོས་པ་ནི་སྤོ་བ་བྱེད་པ་དག་གི་དཔེ་ཡིན་ནོ། །སྤོ་བ་བྱེད་པ་ལ་སོགས་པ་སྨོས་པས་ནི་བསླབ་པ་བྱིན་པ་ཡང་གཟུང་བར་གྲུབ་སྟེ། བསླབ་པ་བྱིན་པ་ནི་ཆེས་སྨན་པ་ཡིན་པའི་ཕྱིར་རོ། །ཐ་དད་པར་གནས་པ་ཞེས་བྱ་བ་ནི། འདིར་ཆོས་དང་མཐུན་པའི་ཕྱོགས་མ་ཡིན་པ་ཁས་བླངས་པ་ཡིན་པར་ཤེས་པར་བྱ་སྟེ། ཆོས་མ་ཡིན་པའི་ཕྱོགས་དང་མཐུན་པ་ཁས་བླངས་པའི་ཐ་དད་པར་གནས་པ་ནི་སྡིག་པའི་ལྟ་བ་ཅན་ཞེས་སྨོས་པ་ཉིད་ཀྱིས་བསྡུས་པའི་ཕྱིར་རོ། །དེ་བས་ན་ཆོས་མ་ཡིན་པའི་ཕྱོགས་དང་མཐུན་པ་ཁས་བླང་པ་དག་གི་ལས་དག་ལ་ཆོས་དང་མཐུན་པའི་ཕྱོགས་ཁས་བླངས་པའི་ཐ་དད་པར་གནས་པ་ཁ་སྐོང་བ་ཉིད་མ་ཡིན་ནོ་ཞེས་བྱ་བར་སྦྱར་རོ། །འཁྲུལ་པ་དང་བཅས་པ་ཡང་ངོ་ཞེས་བྱ་བ་ཡང༌། ཁ་སྐོང་བ་ཉིད་མ་ཡིན་ནོ་ཞེས་བྱ་བའི་རྗེས་བསྙག་པའི་ཕྱིར་རོ། །ཡང་ངོ་ཞེས་བྱ་བའི་སྒྲ་སྨོས་ཏེ། ཐམས་ཅད་ཚུལ་ཁྲིམས་ཡོངས་སུ་དག་པ་ཞེས་གསུངས་པས། དེའི་ཕྱིར་མདོ་འདི་བྱས་སོ། །འདིར་ཚུལ་ཁྲིམས་ཡོངས་སུ་དག་པ་ནི་ལྟུང་བ་ཐམས་ཅད་ཡོངས་སུ་དག་པས་ཡོངས་སུ་དག་པ་ཡིན་གྱི། ཕམ་པར་འགྱུར་བ་ཉིད་ཙམ་གྱིས་ནི་མ་ཡིན་ནོ། །དེ་ལྟར་ཡང་འདིར་གཞུང་ནི། སིལ་བུ་དག་ལས། བཙུན་པ་ཇི་ཙམ་གྱིས་རང་བཞིན་དུ་གནས་པ་མ་ལགས་པར་འགྱུར། ཉེ་བ་འཁོར་ཇི་ཙམ་གྱིས་ལྷག་པར་སྤྱད་པ་མ་ཡིན་པ་ལྷག་པར་སྤྱོད་ཅིང་དགེ་སློང་གི་བསླབ་པ་ལ་མི་སློབ་པ་སྟེ། ཉེ་བ་འཁོར་དེ་ཙམ་གྱིས་རང་བཞིན་དུ་གནས་པ་མ་ཡིན་པར་འགྱུར་རོ་ཞེས་གསུངས་པ་ཡིན་ནོ། །ཉེས་བྱས་ལ་
སོགས་པ་གང་ཡང་རུང་བས་འཁྲུལ་པར་གྱུར་ཅིང་ཇི་སྲིད་དུ་འཆགས་པར་མི་བྱེད་དམ་བྱིན་གྱིས་རློབ་པར་མི་བྱེད་པ་དེ་སྲིད་དུ་དེ་དགེ་སློང་གི་རང་བཞིན་ཡོངས་སུ་དག་པ་ལས་ཉམས་པ་ཡིན་པར་རིག་པར་བྱ་སྟེ། དེ་ཉིད་ཀྱིས་རང་བཞིན་དུ་གནས་པ་མ་ཡིན་བདེ་བསྟན་ཏོ། །རང་བཞིན་དུ་གནས་པ་མ་ཡིན་བདེ་ཉིད་ཀྱིས་ནི་ཕྱིར་ཟློག་པར་འོས་པ་ཉིད་མ་ཡིན་པར་གསུངས་ཏེ། དེ་ལྟར་ཡང་འདིར་གཞུང་ནི། བཙུན་པ་གང་ཟག་དུ་དག་གིས་སླར་བཟློག་པར་མི་འཆགས། ཉེ་བ་འཁོར་བཅུ་གཉིས་ཀྱིས་ཏེ་བྱིས་པ་དང་རྨོངས་པ་དང༌། མི་གསལ་བ་དང༌། མི་མཁས་པ་དང༌། ངོ་ཚ་མེད་པ་དང༌། ནད་དང་བཅས་པ་དང༌། མཚམས་ཀྱི་ཕྱི་རོལ་ན་གནས་པ་དང༌། གནས་ནས་ཕྱུང་བ་དང༌། ཚིག་ཡང་དག་པར་མ་བསྡམས་པ་དང༌། སྤྱོད་ལམ་ལས་ཉམས་པ་དང༌། རང་བཞིན་དུ་གནས་པ་མ་ཡིན་པ་དང༌། བསླབ་པ་བྱིན་པས་སོ་ཞེས་གསུངས་པ་ཡིན་ནོ། །དེ་དག་གིས་ཕྱིར་ཟློག་པ་མི་འཆགས་པས་དེའི་ཕྱིར་ཕམ་པར་འགྱུར་བ་མ་བྱུང་བ་ཙམ་ཉི་ཚེ་རང་བཞིན་དུ་གནས་པ་མ་ཡིན་ཏེ་ལྟུང་བ་ཐམས་ཅད་ཡོངས་སུ་དག་པར་རང་བཞིན་དུ་གནས་པ་ཞེས་བྱའོ། །འདི་ལྟར་ཕམ་པར་འགྱུར་བ་འབྱུང་བ་དང་ནི་ལྷན་ཅིག་འདུལ་བའི་ཐ་སྙད་བྱ་བ་མེད་པ་ཁོ་ན་ཡིན་པས་དེའི་ཡུལ་ལ་ནི་ཕྱིར་ཟློག་པ་མི་སྐྱེའོ་ཞེས་བྱ་བ་འདི་བསམ་པར་མི་བྱ་སྟེ། ཁྱམ་པ་དང་འདྲའོ། །གང་གིས་འཁྲུལ་པ་དང་བཅས་པ་ཡིན་ཞེ་ན། དེའི་ཕྱིར་བསྡམ་པར་བྱ་བས་ཀྱང་ཡིན་གྱི་བཤགས་པར་བྱ་བ་འབའ་ཞིག་གིས་ཡིན་པར་མ་ཟད་དོ་ཞེས་བྱ་བ་སྨྲས་ཏེ། བཤགས་པར་བྱ་བའི་ཉེས་བྱས་འབའ་ཞིག་གིས་འཁྲུལ་པ་དང་བཅས་པ་ཡིན་པར་མ་ཟད་ཀྱི། བསྡམ་པར་བྱ་བའི་ཉེས་བྱས་ཀྱིས་ཀྱང་འཁྲུལ་པ་དང་བཅས་པ་ཉིད་ཡིན་པར་འགྱུར་རོ། །འདི་ལ་ཁ་ཅིག་ན་རེ། གལ་ཏེ་ཉེས་བྱས་ཙམ་གྱིས་ཀྱང་ཁ་སྐོང་བ་ཉིད་དུ་རྣམ་པར་མི་གཞག་ན། དེའི་ཚེ་བཅོམ་ལྡན་འདས་ཀྱིས་བསྟན་པ་ལས་སོ་སོར་ཐར་པའི་སྡོམ་པ་དྲུངས་ནས་ཕྱུང་བར་འགྱུར་བས། དེའི་ཕྱིར་འདིར་འཁྲུལ་པ་དང་བཅས་པ་ཁ་སྐོང་བ་ཉིད་མ་ཡིན། བསྒྲུབ་པར་འདོད་ན་དེའི་ཚེ་ཕམ་པར་འགྱུར་བའི་ལྟུང་བ་གང་ཡང་རུང་བ་བྱུང་བ་ནི་འཁྲུལ་པ་དང་བཅས་པ་ཡིན་པས་དེ་ནི་ཁ་སྐོང་
བ་ཉིད་མ་ཡིན་པར་རིགས་ཀྱི། ལྟུང་བ་གཞན་བྱུང་བ་ནི་ཁ་སྐོང་བ་ཉིད་དུ་རུང་ངོ་ཞེས་ཟེར་བ་དག་ཡོད་ད། དེ་དག་ནི་རང་དགའ་དང་འདོད་རིས་ཀྱི་དབང་གིས་བདག་ཉིད་ཀྱང་རབ་ཏུ་ཉམས་པར་བྱེད་ཅིང་གཞན་ཡང་རབ་ཏུ་ཉམས་པའི་ལམ་ལ་འཇུག་པ། བདེ་བར་གཤེགས་པའི་བསྟན་པ་མར་གྱི་སྙིང་ཁུ་ལྟ་བུ་ལ་མི་གཙང་བའི་བཙོག་ཆུས་སླད་པར་བྱེད་པ་ཡིན་པས། འདིར་དེ་དག་གི་ལུགས་ཀྱི་རྗེས་མི་བསྙགས་པར། འཕགས་པ་གཞི་ཐམས་ཅད་ཡོད་པར་སྨྲ་བའི་འདུལ་བ་འཛིན་པ་ཆེན་པོ་སློབ་དཔོན་ཡོན་ཏན་འོད། བདག་དང་གཞན་གྱི་གྲུབ་པའི་མཐའ་རྒྱ་མཚོའི་ཕ་རོལ་ཏུ་སོན་པ། བདེ་བར་གཤེགས་པའི་ཆོས་འདུལ་བ་བདུད་རྩིའི་སྙིང་ཁུས་ཤེས་རབ་ཀྱི་དབང་པོ་རྒྱས་པར་གྱུར་པས་འདུལ་བའི་གཞུང་ལུགས་ཐམས་ཅད་དང་བསྟུན་ཏེ་མདོར་བྱས་པ་འདི་ཉིད་ཚད་མར་བལྟ་བར་བྱ་བའོ། །འདིར་ཉེས་བྱས་ལ་སོགས་པའི་འཁྲུལ་པ་དང་བཅས་པས་ནི་བཤགས་པ་དང་བྱིན་གྱིས་བསླབ་པ་དག་གིས་ཆོས་བཞིན་དུ་ཕྱིར་གསོ་བར་བྱ་སྟེ། དགེ་འདུན་གྱི་ཁ་སྐོང་བར་བྱའོ། །དེ་ལྟར་ཡང་འདིར་གཞུང་ནི། དགག་དབྱེའི་གཞི་ལས་གལ་ཏེ་བསྡམ་པར་བྱ་བ་ཤེས་ན། བསྡམ་པར་བྱས་ལ་དགག་དབྱེ་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །བཤགས་པ་མེད་པར་ཡང་དག་པར་འགྱུར་བསྲིང་པར་བསྟན་པའི་ཕྱིར་བྱིན་གྱིས་བརླབས་པས་དག་པ་ཉིད་དུ་འགྱུར་རོ་ཞེས་བྱ་བ་སྨྲས་ཏེ། དགེ་འདུན་ལྷག་མ་དང་སྤང་པའི་ལྟུང་བྱེད་ནི་བྱིན་གྱིས་བརླབ་སྟེ་འདུག་པར་བྱའོ། །ལྟུང་བྱེད་དང་སོ་སོར་བཤགས་པར་བྱ་བ་དང༌། བསླབ་པ་མང་པོ་རྣམས་ལས་བཤགས་པར་བྱ་བ་རྣམས་ནི་ལེན་པར་བྱེད་པ་ཡོད་ན་ངེས་པ་ཁོ་ནར་བཤགས་པར་བྱ་སྟེ་འདུག་པར་བྱ་བའོ། །ལེན་པར་བྱེད་པ་མེད་ན་ནི་བྱིན་གྱིས་བརླབས་ཏེ་འདུག་པར་བྱའོ། །བསྡམ་པར་བྱ་བ་རྣམས་ནི་བསྡམས་ཏེ་འདུག་པར་བྱ་བའོ། །ནུས་པ་ཉིད་ཡིན་ན་མི་འགྱུར་རོ་ཞེས་བྱ་བ་ནི། ལྟུང་བྱེད་ལ་སོགས་པ་བཤགས་པར་བྱ་བ་འཆགས་ནུས་པ་ཉིད་ཡིན་ན་བྱིན་གྱིས་བརླབས་པས་དག་པ་ཉིད་དུ་མི་འགྱུར་བའོ། །འདིར་གཞུང་ནི་དགག་དབྱེའི་གཞི་ལས། གལ་ཏེ་ཕམ་པར་འགྱུར་བ་
དག་ཤེས་ན། བསྙིལ་སྟེ་དགག་དབྱེ་བྱའོ། །གལ་ཏེ་དགེ་འདུན་ལྷག་མ་དག་ཤེས་ན་བྱིན་གྱིས་བརླབས་ཏེ་དགག་དབྱེ་བྱའོ། །གལ་ཏེ་སྤང་བདག་ཤེས་ན་བྱིན་གྱིས་བརླབས་ཏེ་དགག་དབྱེ་བྱའོ། །གལ་ཏེ་ལྟུང་བྱེད་དག་ཤེས་ན་བཤགས་ཏེ་དགག་དབྱེ་བྱའོ། །གལ་ཏེ་སོ་སོར་བཤགས་པར་བྱ་བདག་ཤེས་ན་སོ་སོར་བཤགས་ཏེ་དགག་དབྱེ་བྱའོ། །གལ་ཏེ་བཤགས་པར་བྱ་བའི་ཉེས་བྱས་དག་ཤེས་ན་བཤགས་ཏེ་དགག་དབྱེ་བྱའོ། །གལ་ཏེ་བསྡམ་པར་བྱ་བའི་ཉེས་བྱས་དག་ཤེས་ན་བསྡམས་ཏེ་དགག་དབྱེ་བྱའོ་ཞེས་གསུངས་པ་ཡིན་ནོ། །འདིར་ལྟུང་བྱེད་ལ་སོགས་པ་བཤགས་པར་གསུངས་པ་ནི་ཉི་མ་དེ་ཉིད་ལ་ཕྱིར་བཅོས་པར་ནུས་པའི་ཕྱིར་རོ། །དེ་བས་ན་བཤགས་པར་ནུས་པ་ཉིད་ཡིན་ན་བྱིན་གྱིས་བརླབས་པས་དག་པ་ཉིད་དུ་མི་འགྱུར་རོ་ཞེས་བསྟན་ཏོ། །ནུས་པ་ཉིད་གང་ཞེ་ན། དེའི་ཕྱིར་དེའི་ཚེ་ལེན་པ་ཡོད་ན་ལྟུང་བྱེད་འབའ་ཞིག་ཏུ་འགྱུར་བ་དང་སོ་སོར་བཤགས་པར་བྱ་བ་དང་ཕྱིར་བཅོས་པར་བྱ་བའི་ཉེས་བྱས་ནི་ནུས་པ་ཡིན་ཏེ་བཤགས་བ་ཙམ་ཡིན་པའི་ཕྱིར་རོ་ཞེས་བྱ་བ་སྨྲས་ཏེ། ཉི་མ་གང་ལ་ལས་བྱེད་པའི་ཉི་མ་དེའི་ཚེ་ལྟུང་བ་གང་དག་བཤགས་པ་ལེན་པ་ཉིད་ཡོད་ན་ཕྱིར་བཅོས་པར་བྱ་ནུས་པ་དེ་དག་ནི་ལྟུང་བྱེད་འབའ་ཞིག་ཏུ་འགྱུར་པ་དང༌། སོ་སོར་བཤགས་པར་བྱ་བ་དང༌། བཤགས་པའི་ཉེས་བྱས་རྣམས་ཏེ། འདི་ལྟར་དེ་དག་ནི་དེའི་མདུན་དུ་བཤགས་པ་ཙམ་གྱིས་ཕྱིར་བཅོས་པར་བྱ་བ་དག་ཡིན་པའི་ཕྱིར་རོ། །ལྟུང་བ་བྱུང་བ་ལ་འདུ་ཤེས་ཇི་ལྟ་བ་བཞིན་དུ་བསྒྲུབ་པར་བྱའོ་ཞེས་བྱ་བ་ནི། ལྟུང་བ་བྱུང་བའི་གང་ཟག་ལ་ནི་བྱེད་པ་པོ་རྣམས་ཀྱི་འདུ་ཤེས་ཇི་ལྟ་བ་བཞིན་དུ་འབྱུང་བ་དེའི་རྗེས་སུ་འབྲང་བས་དེ་དག་གིས་འཇུག་པར་བྱ་སྟེ། ལྷག་མ་དང་བཅས་པར་འདུ་ཤེས་པ་རྣམས་ཀྱིས་ནི་བྱིན་གྱིས་རློབ་ཏུ་གཞུག་པའམ། ཕྱིར་བཅོས་པར་བྱེད་དུ་བཅུག་ནས་དེ་དང་ལྷན་ཅིག་ལས་བྱའོ། །ལྷག་མ་མེད་པར་འདུ་ཤས་པ་རྣམས་ཀྱིས་ནི་དེ་མེད་པ་ལས་བྱའོ། །གཅིག་ལ་དེ་ལྟར་བསྙིལ་བ་དང་མི་བསྙིལ་བ་དང་ཕྱིར་བཅོས་པ་རྣམ་པ་དུ་མ་ནི་རིགས་པ་ཁོ་ནའོ་ཞེས་བྱ་བ་ནི། གང་ཟག་ལྟུང་བ་བྱུང་བ་གཅིག་ལ་དེ་ལྟར་བསྙིལ་བ་དང་མི་བསྙིལ་བ་ཞེས་བྱ་བ་ལས་སྤང་པ་དང་མི་སྤང་བ་
དང་ཕྱིར་བཅོས་པ་རྣམས་དུ་མ་ཞེས་བྱ་བ་ལྟུང་པ་གསོར་གཞུག་པ་རྣམས་པ་དུ་མ་བྱེད་དུ་གཞུག་པ་ནི་རིགས་པ་ཁོ་ན་ཡིན་ནོ། །འདི་སྐད་བསྟན་ཏེ། ལྷག་མ་མེད་པར་འདུ་ཤེས་པ་རྣམས་ཀྱིས་ནི་དེ་བསྙིལ་བར་བྱའོ། །ལྷག་མ་དང་བཅས་པར་འདུ་ཤེས་པ་རྣམས་ཀྱིས་ནི་བསྡུ་བར་བྱའོ། །བཤགས་པར་བྱ་བར་འདུ་ཤེས་པ་རྣམས་ཀྱིས་ནི། བཤགས་པའི་བདག་ཉིད་ཀྱི་ཕྱིར། བཅོས་པ་བྱེད་དུ་གཞུག་གོ །བསྡམ་པར་བྱ་བར་འདུ་ཤེས་པ་རྣམས་ཀྱི་ནི་བསྡམ་པའི་བདག་ཉིད་ཀྱི་ཕྱིར་བཅོས་པ་བྱེད་དུ་གཞུག་སྟེ། དེ་དག་ནི་རིགས་ཤིང་རུང་བ་ཉིད་ཡིན་པར་རིག་པར་བྱའོ། །དེ་དག་ནི་བྱེད་པ་པོ་ཉིད་མ་ཡིན་ནོ་ཞེས་བྱ་བ་ནི། མི་འདུག་པར་འགྲེང་བ་དང༌། གང་ལ་བྱ་བ་དང༌། འདུན་པ་དང་ཡོངས་སུ་དག་པ་དབུལ་བ་དང༌། བསྙེན་པར་མ་རྫོགས་པ་དང་ཉམས་པ་དང༌། མཚམས་མེད་པ་བྱས་པ་དང༌། སྡིག་པའི་ལྟ་བ་ཅན་དང༌། ས་གཞན་ན་གནས་པ་དང༌། ཐ་དད་པར་གནས་པ་དང༌། འཁྲུལ་པ་དང་བཅས་པ་དག་ནི་ཁ་སྐོང་བ་ཉིད་མ་ཡིན་ནོ་ཞེས་བསྟན་པ་དེ་དག་ནི་ལས་ཀྱི་བྱེད་པ་པོ་མ་ཡིན་ཏེ། དེ་དག་གིས་ལས་བྱར་མི་རུང་བའོ། །འདི་སྐད་བསྟན་ཏེ། མི་འདུག་པར་འགྲེང་བཞེས་བྱ་བ་ནས་འཁྲུལ་པ་དང་བཅས་པ་ཞེས་བྱ་བའི་བར་དུ་ཇི་སྐད་མདོ་ལས་བསྟན་པ་དེ་དག་གིས་ལས་བྱས་པ་ནི་ལས་མ་བྱས་པ་ཉིད་ཡིན་ནོ། །འདིར་གཞུང་ནི་གླེང་གཞི་དག་ལས་བཙུན་པ་བསླབ་པ་སྩལ་བ་ལས་དག་བགྱིས་ན་བགྱིས་ཞེས་བརྗོད་པར་བགྱིའམ། འོན་ཏེ་མ་བགྱིས་ཞེས་བརྗོད་པར་བགྱི། ཉེ་བ་འཁོར་མ་བྱས་ཞེས་བརྗོད་པར་བྱ་སྟེ། ཡང་བྱ་བ་དག་ཡིན་ནོ། །བཙུན་པ་ཟ་མ་དང་མ་ནིང་དང༌། དགེ་སློང་མ་སུན་ཕྱུང་བ་དང༌། མ་བཀུམ་པ་དང༌། ཕ་བཀུམ་པ་དང༌། དགྲ་བཅོམ་པ་བཀུམ་པ་དང༌། དགེ་འདུན་གྱི་དབྱེན་བགྱིས་པ་དང༌། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང༌། མུ་སྟེགས་ཅན་དང་མུ་སྟེགས་ཅན་ཞུགས་པ་དང༌། རྐུ་ཐབས་སུ་གནས་པ་དང༌། ཐ་དད་པར་གནས་པ་དང༌། གནས་པར་མི་བགྱི་བས་ལས་དག་བགྱིས་ན་བགྱིས་ཞེས་བརྗོད་པར་བགྱིའམ་མ་བགྱིས་ཞེས་བརྗོད་པར་བགྱི། ཉེ་བ་འཁོར་མ་བྱས་ཞེས་བརྗོད་པར་བྱ་བ་སྟེ།
ཡང་བྱ་བ་དག་ཡིན་ནོ་ཞེས་གསུངས་པ་ཡིན་ནོ། །གང་ཚོགས་ཀྱི་ཁ་བསྐང་བར་མི་འོས་པ་དེས་ལས་བྱ་བ་ཐག་རིང་དུ་སྤང་བར་བྱ་བ་ཁོ་ན་ཡིན་ཏེ། ལས་བྱེད་པ་ནི་ཚོགས་ཀྱི་ཁ་སྐོང་བ་གཞན་དག་པས་ཆེས་གཅེས་པ་ཡིན་པའི་ཕྱིར་དང༌། དགེ་འདུན་གྱི་གཙོ་བོར་གྱུར་པ་ཡིན་པའི་ཕྱིར་རོ། །འདི་ལྟར་དགེ་འདུན་ཐམས་ཅད་ཀྱིས་གང་བྱ་བ་དེ། ལས་བྱེད་པ་དེས་བྱ་དགོས་པས་དེའི་ཕྱིར་དེ་ནི་དགེ་འདུན་དུ་གྱུར་པ་ཉིད་ཡིན་ནོ། །ལྷག་མ་དང་བཅས་པར་ཕྱིར་བཅོས་པ་ལ་ཞུགས་པ་ནི་འདོན་པར་བྱེད་པ་ཉིད་ཡིན་ནོ་ཞེས་བྱ་བ་ནི། སྔར་དེ་དག་ནི་བྱེད་པ་པོ་ཉིད་མ་ཡིན་ནོ་ཞེས་སྨོས་པ་དེའི་དམིགས་ཀྱིས་བསལ་བ་ཡིན་ཏེ། དགེ་འདུན་ལྷག་མའི་ལྟུང་བ་བྱུང་བ་ཕྱིར་འཆོས་པ་ལ་ཞུགས་པ་སྤོ་བ་དང༌། གཞི་ནས་སྤོ་བ་དང༌། མགུ་བར་བྱ་བ་དང༌། གཞི་ནས་མགུ་བར་བྱ་བ་བྱེད་པ་དང༌། གནས་ནས་དབྱུང་བ་ལ་སོགས་པ་གསོ་བ་ལས་ཞུགས་པའི་གང་ཟག་གིས་ནི་སོ་སོར་ཐར་པའི་མདོ་གདོན་དུ་རུང་བ་ཉིད་ཡིན་པའོ། །དེ་དག་ལས་གཞན་པ་དེ་དག་གིས་ནི་ཐོས་པ་དང་བཅས་པར་མི་བྱའོ་ཞེས་བྱ་བ་ནི། ལྷག་མ་དང་བཅས་པ་ཕྱིར་འཆོས་པ་ལ་ཞུགས་པ་ཞེས་སྨོས་པ་དེ་ལས་གཞན་པ། བསྙེན་པར་མ་རྫོགས་པ་དང༌། ཉམས་པ་ལ་སོགས་པ་དེ་དག་གིས་ནི་ལས་ཐོས་པར་མི་བྱ་བའོ། །བསྙེན་པར་མ་རྫོགས་པ་དང༌། ཉམས་པ་ལ་སོགས་པ་དེ་དག་ལས་ཁ་ཅིག་དམིགས་ཀྱིས་བསལ་བ་བསྟན་པའི་ཕྱིར། མ་སྤངས་པ་དང་མ་ལོག་པ་མ་གཏོགས་སོ་ཞེས་བྱ་བ་སྨྲས་ཏེ། མ་སྤངས་པ་ཞེས་སྨོས་པས་ནི་སྤངས་པ་ཐ་དད་པ་དང༌། གནས་ནས་ཕྱུང་བ་གཉིས་དམིགས་ཀྱིས་བསལ་ཏེ། དེ་གཉིས་ནི་དགེ་སློང་གི་དགེ་འདུན་ལས་སྤངས་པའི་ཕྱིར་རོ། །མ་ལོག་པ་ཞེས་སྨོས་པས་ནི། ལོག་པ་ཉམས་པ་དང་མཚམས་མེད་པ་བྱས་པ་དང༌། བསྙེན་པར་རྫོགས་པ་ལས་བྲལ་བ་དམིགས་ཀྱིས་བསལ་ཏེ། ཉམས་པ་དང་མཚམས་མེད་པར་བྱེད་པ་གཉིས་ནི་ལོག་པ་ཡིན་ཏེ། གང་ལས་ཤེ་ན་བདེ་འགྲོར་འགྲོ་བ་དང༌། རང་བཞིན་དུ་གནས་པའི་རྗེས་སུ་མཐུན་པ་ཉིད་ལས་སོ། །བསྙེན་པར་རྫོགས་པ་ལས་བྲལ་བ་ནི་བསྙེན་པར་རྫོགས་པ་ལས་ལོག་པ་ཡིན་ནོ། །དེ་ལྟར་ན་འདིར་ཚིག་གི་དོན་འདི་
འབྱུང་སྟེ། མ་སྤངས་པ་དང་མ་ལོག་པ་མ་གཏོགས་པ་དེ་ལས་གཞན་པ་དག་གིས་ཐོས་པ་དང་བཅས་པར་ལས་མི་བྱའོ། །མ་སྤངས་པ་དང་མ་ལོག་པ་དང་ཞེས་བྱ་བ་འདིས་ནི་བསླབ་པ་བྱིན་པ་དང་དེའི་ངོ་བོ་ཉིད་ཚོལ་བ་བྱིན་པ་དང༌། བསྡིགས་པ་དང༌། སྨད་པ་དང༌། བསྐྲད་པ་དང༌། སྤངས་པ་དག་བསྟན་ཏེ། དེ་དག་གིས་ཐོས་པ་དང་བཅས་པར་ལས་བྱེད་པ་ལ་ཉེས་པ་མེད་དོ། །གནས་ནས་ཕྱུང་བ་ནི་རང་གི་ལས་ལ་ཡང་ངོ་ཞེས་བྱ་བ་ཡང༌། མ་གཏོགས་སོ་ཞེས་བྱ་བའི་རྗེས་བསྙེག་པའི་ཕྱིར་ཡང་ངོ་ཞེས་བྱ་བའི་སྦྲ་སྨོས་ཏེ། གནས་ནས་ཕྱུང་བ་དེའི་རང་གི་ལས་བཟོད་པ་གསོལ་བ་དེ་ནི་དེས་ཐོས་པ་དང་བཅས་པར་བྱའོ། ལས་གཞན་ནི་དེས་ཐོས་པར་མི་བྱའོ་ཞེས་བྱ་བའི་ཐ་ཚིག་གོ །ནང་དུ་དྲི་བའི་ཕྱིར་གསོལ་བ་ལ་སོགས་པ་བསྙེན་པར་རྫོགས་པར་བྱ་བ་ཡང་ངོ་ཞེས་བྱ་བ་ཡང་མ་གཏོགས་སོ་ཞིས་བྱ་བའི་རྗེས་བསྙེག་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །ནང་དུ་ཞེས་བྱ་བ་ནི་དགེ་འདུན་གྱི་ནང་དུའོ། །དྲི་བའི་ཕྱིར་ཞེས་བྱ་བ་ནི། དགེ་འདུན་གྱི་ནང་དུ་བར་ཆད་ཀྱི་ཆོས་གང་དག་ལས་ཀྱི་སློབ་དཔོན་གྱིས་དྲི་པའི་ཕྱིར་རོ། །གསོལ་བ་ཞེས་བྱ་བ་ནི། དེའི་ཕྱིར་གསོལ་བ་འབའ་ཞིག་གི་ལས་བྱེད་པ་གང་ཡིན་པ་སྟེ། ནང་དུ་དྲི་བའི་ཕྱིར་གསོལ་པ་འབའ་ཞིག་གི་ལས་བྱེད་པ་དེ་ནི་བསྙེན་པར་རྫོགས་པར་བྱ་བའི་གང་ཟག་གིས་ཐོས་ཀྱང་རུང་ངོ༌། །སོགས་པ་ཞེས་བྱ་བའི་སྒྲས་ནི་གསོལ་བ་དང་བཞིའི་ལས་ཀྱིས་བསྙེན་པར་རྫོགས་པར་བྱ་བ་དག་བསྡུས་ཏེ། དེ་དག་ཀྱང་བསྙེན་པར་རྫོགས་པར་བྱ་བའི་གང་ཟག་གིས་ཐོས་པར་བྱའོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། ལས་བྱེད་པའི་སློབ་དཔོན་གྱིས་དགེ་འདུན་གྱི་ནང་དུ་བར་ཆད་ཀྱི་ཆོས་རྣམས་དྲི་བའི་ཕྱིར་གསོལ་བ་འབའ་ཞིག་གི་ལས་བྱ་བ་དང༌། གསོལ་བ་དང་བཞིའི་ལས་ཀྱིས་བསྙེན་པར་རྫོགས་པར་བྱ་བའི་ལས་དེ་དག་ནི་བསྙེན་པར་རྫོགས་པར་བྱ་བའི་གང་ཟག་དེས་ཐོས་པ་དང་བཅས་པར་བྱའོ། །དེ་ལས་གཞེན་པ་ནི་ཐོས་པར་མི་བྱའོ།། །།བམ་པོ་ལྔ་བཅུ་དགུ་པ། ཐོས་པར་བྱ་བ་མ་ཡིན་པ་བསྙེན་པར་མ་རྫོགས་པ་ལ་སོགས་པའི་གང་ཟག་ལ་བསྙེན་པར་རྫོགས་པར་བྱ་བ་ལ་སོགས་པ་མངོན་སུམ་དུ་བྱ་བ་གང་ཡིན་པ་དང༌། བསྙིལ་བ་ལ་
སོགས་པ་རྗེས་སུ་བསྒྲག་པར་བྱ་བ་གང་ཡིན་པ་ལས་རྣམ་པ་གཉིས་བྱ་བ་དེ་ལ་མངོན་སུམ་དུ་བྱ་བ་དང༌། རྗེས་སུ་བསྒྲག་པར་བྱ་བ་དག་ཐབས་གང་གིས་བྱ་ཞེ་ན། དེའི་ཕྱིར་དེ་དག་བྱ་བ་ལ་ལྟ་བའི་ཉེན་ཀོར་དུ་བཞག་པས་ན་མངོན་སུམ་དུ་སྒྲུབ་བོ་གོ་བར་བྱ་བས་ན་རྗེས་སུ་བསྒྲག་པའོ་ཞེས་བྱ་བ་སྨྲས་ཏེ། དེ་དག་བྱ་བ་ལ་ཞེས་བྱ་བ་ནི་མངོན་སུམ་དུ་བྱ་བ་དང༌། རྗེས་སུ་བསྒྲག་པར་བྱ་བ་ལའོ། །མངོན་སུམ་དུ་བྱ་བ་ནི། བལྟ་བའི་ཉེན་ཀོར་དུ་བཞག་པས་བསྒྲུབ་པོ། །རྗེས་སུ་བསྒྲག་པ་ནི་གོ་བར་བྱ་བས་བསྒྲུབ་པོ། །འདི་སྐད་བསྟན་ཏེ། ཐོས་པར་བྱ་བ་མ་ཡིན་པའི་གང་ཟག་ལ་མངོན་སུམ་དུ་ལས་གང་བྱ་བ་དེ་ལ་ནི་བལྟ་བར་བྱ་བའི་ཉེ་ན་ཀོར་དུ་གཞག་པ་ཉིད་ཀྱིས་བསྒྲུབ་པར་བྱའོ། །དེ་བཞིན་དུ་ཐོས་པར་བྱ་བ་མ་ཡིན་པའི་གང་ཟག་ལ་རྗེས་སུ་བསྒྲག་པས་ལས་གང་བྱ་བ་དེ་ལ་ནི་གོ་བར་བྱ་བ་ཉིད་ཀྱིས་བསྒྲུབ་པར་བྱ་སྟེ། ཁྱོད་ལ་གསོལ་བ་དང་བཞིའི་ལས་བྱ་བ་ལས། གསོལ་བ་ནི་བྱས་ཟིན་ཏོ་ཞེས་བྱ་བ་ལ་སོགས་པས་གོ་བར་བྱ་བས་སོ། །སྨྱོས་པའི་གནང་བ་དང་ཕྱག་མི་བྱ་བ་དང་མི་སྨྲ་བར་དང་ལོངས་མ་སྤྱད་པ་དང༌། གཙུག་ལག་ཁང་གི་སྡོམ་པ་དག་ནི་མངོན་སུམ་དུ་མ་གྱུར་བར་རོ་ཞེས་བྱ་བ་ནི། སྨྱོས་པས་སྣང་བ་དང༌། ཕྱག་མི་བྱ་བའི་སྡོམ་པ་དང༌། མི་སྨྲ་པའི་སྡོམ་པ་དང༌། ལོངས་མི་སྤྱོད་པའི་སྡོམ་པ་དང༌། གཙུག་ལག་ཁང་གི་སྡོམ་པ་དག་ནི་མངོན་སུམ་དུ་མ་གྱུར་པར་བྱ་བའོ། །འདིར་གཞུང་ནི་མ་མོ་ལས་མངོན་སུམ་དུ་མ་གྱུར་པར་བྱ་བའི་ལས་བཅུ་གང་ཞེ་ན། ལྷུང་བཟེད་ཁས་ཕུབ་པ་དང༌། ལྷུང་བཟེད་ཁས་ཕུབ་པ་བག་ཡངས་སུ་བྱ་བ་དང། སློབ་པའི་སྡོམ་པ་དང༌། སློབ་པའི་སྡོམ་པ་བག་ཡངས་སུ་བྱ་བ་དང༌། དགེ་ཚུལ་གྱི་སྡོམ་པ་དང༌། སྨྱོས་པའི་གནང་བ་དང༌། ཕྱག་མི་བྱ་བའི་སྡོམ་པ་དང༌། མི་སྨྲ་བའི་སྡོམ་པ་དང༌། ལོངས་མི་སྤྱོད་པའི་སྡོམ་པ་དང༌། གཙུག་ལག་ཁང་གི་སྡོམ་པའོ་ཞེས་གསུངས་པ་ཡིན་ནོ། །ལྷུང་བཟེད་ཁས་དབུབ་པ་ནས་དགེ་ཚུལ་གྱི་སྡོམ་པའི་བར་གྱི་སྡོམ་པ་ལྔ་པོ་འདིར་ཅིའི་ཕྱིར་མདོར་མ་བསྡུས་ཤེ་ན། དེ་དག་ནི་བསྙེན་པར་མ་རྫོགས་པའི་ཡུལ་ཡིན་པས་དེ་དག་ལས་མངོན་སུམ་དུ་འགྱུར་བའི་དོགས་པ་མེད་པའི་ཕྱིར་རོ། །ལས་བཅུ་པོ་དེ་དག་ནི་ལྟ་བའི་ཉེན་ཀོར་དུ་གཞག་
པ་ཉིད་ཀྱིས་མངོན་སུམ་དུ་བསྒྲུབ་པར་མི་བྱའོ། །གོ་བར་བྱ་བས་རྗེས་སུ་བསྒྲགས་པས་ནི་བསྒྲུབ་པར་བྱ་བ་ཁོ་ན་ཡིན་ནོ། །ལྷུང་བཟེད་ཁས་དབུབ་པའི་སྡོམ་པ་ནི་ལི་ཙྪ་བཱི་ཆེན་པོ་པ་ལས་བཅས་པ་ལྟ་བུའོ། །ལྷུང་བཟེད་ཁས་ཕུབ་པ་བག་ཡོངས་སུ་བྱ་བའི་གནང་བ་ནི་ཉ་དེ་ཉིད་ལ་ལྷུང་བཟེད་ཕྱིར་བཟློག་པ་མཛད་པ་ལྟ་བུའོ། །སློབ་པའི་སྡོམ་པ་ནི་དམག་དཔོན་སེང་གེ་ལས་བཅས་པ་ལྟ་བུའོ། །སློབ་པའི་སྡོམ་པ་བག་ཡངས་སུ་བྱ་བ་ནི་དེ་ཉིད་ལ་སྡོམ་པ་གཞིག་པར་མཛད་པ་ལྟ་བུའོ། །དགེ་ཚུལ་གྱི་སྡོམ་པ་ནི། དགེ་ཚུལ་བསྙིལ་བ་མི་བསྡུ་བའི་སྡོམ་པའོ། །དེ་དག་ནི་རང་གིས་ཡང་དག་པར་བསྡམ་པ་ཡིན་གྱི། གཞན་ལ་སྤྱོ་བར་བྱ་བ་མ་ཡིན་པས་མངོན་སུམ་དུ་མ་གྱུར་པར་བྱ་བ་དག་ཡིན་ནོ། །སྨྱོས་པའི་གནང་བ་ནི་དགེ་སློང་བྱེ་མ་སྐྱེས་ལས་བཅས་པ་ལྟ་བུའོ། །ཕྱག་མི་བྱ་བའི་སྡོམ་པ་ནི། དགེ་སློང་གནས་ནས་ཕྱུང་བ་ལས་དགེ་སློང་མ་རྣམས་ཀྱིས་ཕྱག་བྱ་བའི་འོས་མ་ཡིན་པའི་སྡོམ་པ་བཅས་པའོ། །མི་སྨྲ་བའི་སྡོམ་པ་དང༌། ལོངས་མི་སྤྱོད་པའི་སྡོམ་པ་དང༌། གཙུག་ལག་ཁང་གི་སྡོམ་པ་ནི། ལྷུང་བཟེད་ཁ་སྦུབས་པའི་སྡོམ་པ་ནས་དགེ་ཚུལ་གྱི་སྡོམ་པའི་བར་གྱི་སྡོམ་པ་ལྔ་པོ་བཅས་པ་དེ་དག་དང་གཏམ་འདྲེ་བར་མི་བྱ་བ་དང༌། དེ་དག་གི་ལོངས་སྤྱོད་ལ་ལོངས་སྤྱོད་པར་མི་བྱ་བ་དང༌། དེ་དག་གི་གཙུག་ལག་ཁང་དུ་འགྲོ་བར་མི་བྱ་བའི་སྡོམ་པ་བཅས་པའོ། །བསྙེན་པར་རྫོགས་པ་རྣམས་ལ་ལས་དེ་དག་མངོན་སུམ་དུ་མ་གྱུར་བར་བྱའོ། །ལས་གཞན་ཐམས་ཅད་ནི་མངོན་སུམ་དུ་བྱའོ། །གསོལ་བ་མ་བྱས་པར་དེའི་དོན་དུ་བརྗོད་པར་མི་བྱའོ་ཞེས་བྱ་བ་ནི། གང་གི་དོན་དུ་ལས་བརྗོད་པ་དེ་བྱེད་པའི་གཞི་དེ་ལས་སྔར་གསོལ་བ་མ་བྱས་པར་ལས་བརྗོད་པར་མི་བྱ་བའོ། །སྔར་མི་མཐུན་པ་དག་མི་བྱའོ་ཞེས་སྨོས་པ་དེའི་མི་མཐུན་པའི་ངོ་བོ་ཉིད་བསྟན་པའི་ཕྱིར། དེའི་མཚམས་ཀྱི་ཁོངས་སུ་གཏོགས་པ་ཁ་སྐོང་བར་འོས་པས་ལུས་སམ་དེ་ལ་འདུན་པས་འདུས་པར་རྗེས་སུ་མ་ཞུགས་པ་ཉིད་དང་ཕྱིར་ཟློག་པར་བྱེད་པ་ཡང་གང་ལ་ལས་དེ་བྱེད་པ་དེ་ལས་གཞན་པས་གལ་ཏེ་མི་མཐུན་པ་དང་ཆོས་དང་ལྡན་ན་སྤྱོད་ལམ་ལས་མི་ཉམས་པ་དང༌། རང་བཞིན་དུ་གནས་པ་དང་
ངག་ཡང་དག་པར་བསྡམས་པས་མངོན་པར་མི་ཤེས་པ་དང༌། ནད་དང་བཅས་པ་མ་གཏོགས་པ་མི་མཐུན་པ་ཉིད་དོ་ཞེས་བྱ་བ་སྨྲས་ཏེ། མི་མཐུན་པ་ཉིད་ནི་རྣམ་པ་གཉིས་ཏེ། འདུས་པར་རྗེས་སུ་མ་ཞུགས་པ་ཉིད་དང༌། ཕྱིར་ཟློག་པར་བྱེད་པའོ། །དེ་ལ་འདུས་པར་རྗེས་སུ་མ་ཞུགས་པ་ཉིད་ཅེས་བྱ་བ་དེ་ཇི་བསྟན་པའི་ཕྱིར། དེའི་མཚམས་ཀྱི་ཁོངས་སུ་གཏོགས་པ་ཞེས་བྱ་བ་སྨྲས་ཏེ། མཚམས་གང་དུ་ལས་དེ་བྱེད་པ་དེའི་མཚམས་ཀྱི་ཁོངས་སུ་གཏོགས་པའི་དགེ་སློང་ངོ༌། །དགེ་སློང་ཁྱད་པར་ཇི་ལྟ་བུ་ཅན་ཞིག་ཅེ་ན་དེའི་ཕྱིར་ཁ་སྐོང་བར་འོས་པ་ཞེས་བྱ་བ་སྨྲས་ཏེ། ཚོགས་ཀྱི་ཁ་སྐོང་བའི་ཕྱིར་འོས་པ་ཉིད་ཡིན་གྱི། མི་འོས་པ་བསྙེན་པར་མ་རྫོགས་པ་དང༌། ཉམས་པ་ལ་སོགས་པ་དག་ནི་མ་ཡིན་ཏེ། དེ་ལྟ་བུའི་དགེ་སློང་དེ་འདུག་པར་རྗེས་སུ་མ་ཞུགས་པ་ཉིད་དོ། །རྣམ་པ་གང་གིས་འདུས་པར་རྗེས་སུ་མ་ཞུགས་པ་ཉིད་ཅེ་ན། དེའི་ཕྱིར་ལུས་སམ་འདུས་པས་ཞེས་བྱ་བ་སྨྲས་ཏེ། ལུས་ཀྱིས་འདུས་པར་རྗེས་སུ་མ་ཞུགས་པའམ་ལས་དེ་ལ་འདུན་པས་རྗེས་སུ་མ་ཞུགས་པ་སྟེ། དེ་ནི་འདུས་པར་རྗེས་སུ་མ་ཞུགས་པ་ཉིད་ཀྱིས་མི་མཐུན་པ་ཉིད་ཅེས་བྱ་སྟེ། དགེ་འདུན་འདུས་པའི་ནང་དུ་རྗེས་སུ་མ་ཞུགས་པ་ཉིད་ཀྱིས་མི་མཐུན་པ་ཉིད་ཡིན་ནོ། །ཕྱིར་ཟློག་པར་བྱེད་པ་ཞེས་བྱ་བ་ནི། ཕྱིར་ཟློག་པར་བྱེད་པ་ཡང་ངོ་ཞེས་བྱ་བ་སྟོན་ཏོ། །དེ་ཡང་མི་མཐུན་པ་ཉིད་ཡིན་ནོ་ཞེས་བྱ་བར་སྦྱར་རོ། །ཡང་ཞེས་བྱ་བའི་སྒྲས་ནི་ཕྱིར་ཟློག་པར་བྱེད་པ་ཡང་གལ་ཏེ་དེའི་མཚམས་གྱིས་ཁོངས་སུ་གཏོགས་པ་ཁོ་ན་ཡིན་ན་མི་མཐུན་པ་ཉིད་ཡིན་གྱི། དེའི་མཚམས་ཀྱི་ཁོངས་སུ་གཏོགས་པ་མ་ཡིན་ན་དེར་ཕྱིར་ཟློག་པ་མི་འཆགས་སོ་ཞེས་བྱ་བའི་ཆོས་གཞན་འདི་སྡུད་པར་བྱེད་དོ། །གང་གི་ཕྱིར་ཟློག་པར་བྱེད་ཅེ་ན་དེའི་ཕྱིར། གང་ལ་ལས་བྱེད་པ་དེ་ལས་གཞན་པས་ཞེས་བྱ་བ་སྨྲས་ཏེ། དེས་ཕྱིར་བཟློག་པ་ལ་འཆགས་ཀྱི། གང་ལ་ལས་དེ་བྱེད་པ་དེ་ཉིད་ཀྱི་ཕྱིར་ཟློག་པ་ནི་མི་འཆགས་སོ། །ཅི་ལས་ཐམས་ཅད་ལ་གང་ལ་བྱེད་བདེ་བསལ་བར་བྱའམ་ཞེ་ན་དེའི་ཕྱིར། གལ་ཏེ་མི་མཐུན་པ་དང་ཆོས་དང་ལྡན་ན་ཞེས་བྱ་བ་སྨྲས་ཏེ། མི་མཐུན་པ་ནི་ཆད་པའི་ལས་སོ། །ཆོས་དང་ལྡན་པ་ནི། འདུན་པ་ལེན་པ་དང༌།
དགེ་འདུན་ཚོགས་པ་དང༌། གསོལ་བ་བྱ་བ་ལ་སོགས་པ་རིགས་པ་དང་ལྡན་པ་སྟེ། གལ་ཏེ་ལས་དེ་དེ་ལྟ་བུ་ཡིན་ན། ལས་དེ་ལྟ་བུ་དེ་ལ་བསལ་ལོ། །གལ་ཏེ་གང་ལ་བྱེད་པའི་ལས་དེ་མི་མཐུན་པ་མ་ཡིན་པ་དང་ཆོས་དང་ལྡན་པ་མ་ཡིན་ན་ནི། དེས་ཕྱིར་ཟློག་པ་ཡང་འཆགས་སོ། །ཆད་པའི་ལས་དང༌། གསོལ་བ་ལས་གྲངས་སུ་གཞུག་པ་དག་ལ་ནི་གང་ལ་བྱེད་པ་དེས་ཕྱིར་ཟློག་པ་ནི་མི་འཆགས་སོ། །སྦྱིན་པ་དང་དབྱུང་བ་དང་བཟོད་པ་དང་བསྐོ་བ་དག་ལ་ནི་གང་ལ་བྱེད་པ་དེས་ཕྱིར་ཟློག་པ་འཆགས་སོ། །འདིར་སྦྱིན་པ་ཞེས་བྱ་བ་ནི། འཁར་བའི་གནང་བ་ལ་སོགས་པ་སྦྱིན་པ་ཡིན་པར་ཤེས་པར་བྱའོ། །འདིར་གཞུང་ནི་གླེང་གཞི་དག་ལ། བཙུན་པ་བཅོམ་ལྡན་འདས་ཀྱིས་གང་ལ་ལས་བྱེད་པ་དེས། ཕྱིར་ཟློག་པ་མི་འཆགས་སོ་ཞེས་གང་གསུངས་པ་དེ་ལ། བཙུན་པ་གང་ལ་ཆོས་མ་ལགས་པས་ལས་བགྱིད་པ་དེས་སླར་ཟློག་པ་ཡང་མི་འཆགས་སམ། ཉེ་བ་འཁོར་འཆགས་སོ། །བཙུན་པ་རེ་ཞིག་གང་ཟག་བཅུ་གཉིས་པོ་དག་བསྐོ་བ་ན། དེ་དག་འདི་སྐད་ཅེས་བདག་ཅག་མ་བསྐོ་ཤིག་ཅེས་མཆི་ན་དེ་དག་གིས་སླར་ཟློག་པ་ཡང་མི་འཆགས་སམ། ཉེ་བ་འཁོར་འཆགས་ཏེ། མི་འཆགས་སོ་ཞེས་བྱ་བ་དེ་ནི་ངས་ཆད་པའི་ལས་ལ་དགོངས་ཏེ་གསུངས་སོ་ཞེས་གསུངས་པ་ཡིན་ནོ། །གང་ཟག་རྣམ་པ་ཇི་ལྟ་བུས་ཕྱིར་ཟློག་པ་འཆགས་ཤེ་ན། དེ་བསྟེན་པའི་ཕྱིར་རོ། །སྤྱོད་ལམ་ལས་མ་ཉམས་པ་དང་རང་བཞིན་དུ་གནས་པ་དང་ངག་ཡང་དག་པར་བསྡམས་པས་ཞེས་བྱ་བ་སྨྲས་ཏེ། དེ་དག་གིས་ཕྱིར་ཟློག་པ་ནི་འཆགས་སོ། །དེ་དག་ཟློག་པ་ནི་མི་བཅན་པས་དེ་དག་གིས་ཕྱིར་ཟློག་པ་ནི་མི་འཆགས་སོ། །སྤྱོད་ལམ་ལས་མ་ཉམས་པ་ལ་སོགས་པ་རྣམ་པ་དེ་ལྟ་བུ་ཐམས་ཅད་ཀྱིས་ཕྱིར་ཟློག་པ་འཆགས་སམ་ཞེ་ན། དེའི་ཕྱིར་མངོན་པར་མི་ཤེས་པ་དང་ནང་དང་བཅས་པ་མ་གཏོགས་པ་ཞེས་བྱ་བ་སྨྲས་ཏེ། འདིར་མངོན་པར་མི་ཤེས་པ་ཞེས་བྱ་བ་ནི། འདུལ་བར་གཏོགས་པའི་བྱ་བ་དག་མངོན་པར་མི་ཤེས་པ་ཡིན་པར་ཤེས་པར་བྱ་སྟེ། འདིས་ནི་བྱིས་པ་དང་རྨོངས་པ་དང་མི་མཁས་པ་ཞེས་གང་གསུངས་པ་དེ་བསྡུས་སོ། །ནང་
དང་བཅས་པ་ཞེས་བྱ་བ་ནི་ཞེ་འགྲས་པ་སྟེ། གང་ཟག་ཕྱིར་ཟློག་པར་བྱེད་པ་དེ་དང༌། གལ་ཏེ་ཁོན་ཏུ་འཛིན་པ་ཡོད་ན་ཞེ་འགྲས་པའི་དངོས་པོས་རིགས་པ་རྗེས་སུ་བསྲུང་བར་བྱ་བ་སླ་བ་མ་ཡིན་པས་དེ་གཉིས་མ་གཏོགས་སོ། །གཞུང་ལས་བཙུན་པ་དུ་དག་གིས་སླར་ཟློག་པ་འཆགས་ཉེ་བ་འཁོར་བཞི་སྟེ། རང་བཞིན་དུ་གནས་པ་དང༌། དེའི་མཚམས་ན་གནས་པ་དང༌། སྤྱོད་ལམ་ལས་མ་ཉམས་པ་དང༌། ངག་ཡང་དག་པར་བསྡམས་པས་སོ་ཞེས་གསུངས་པ་ལ། འདིར་ངག་ཡང་དག་པར་བསྡམས་པ་ཉིད་ཀྱིས་མངོན་པར་མི་ཤེས་པ་དང༌། ནང་དང་བཅས་པ་གཉིས་བསལ་བར་རིག་པར་བྱའོ། །སིལ་བུ་དག་ལས་བཙུན་པ་ཇི་ཙམ་གྱིས་ན་ངག་ཡང་དག་པར་བསྡམས་པ་ལགས། ཉེ་བ་འཁོར་གང་ཚུན་ཆད་བརྫུན་དུ་སྨྲ་བའམ་ཕྲ་མ་ཅན་ནམ་ངག་རྩུབ་པོ་ཅན་ནམ་ཚིག་ཀྱལ་པ་ཅན་མ་ཡིན་ནའོ། །ཞེས་བྱ་བ་ལ་སོགས་པ་གསུངས་པ་དག་བསྡུ་པའི་ཕྱིར་བརྫུན་དུ་སྨྲ་བའི་རྗེས་སུ་མཐུན་པ་ཉིད་ནི་ངག་ཡང་དག་པར་མ་བསྡམས་པའོ་ཞེས་བྱ་བ་སྨྲས་ཏེ། བརྫུན་དུ་སྨྲ་བའི་རྗེས་སུ་མཐུན་པ་ཉིད་ཅེས་བྱ་བ་ནི། བརྫུན་དུ་སྨྲ་བ་ལས་སེམས་ཕྱིར་མ་བསྡུས་པ་ཉིད་དེ། དེ་ནི་ངག་ཡང་དག་པར་མ་བསྡམས་པ་ཡིན་གྱི། དྲན་པ་ཉམས་པ་གང་ཡང་རུང་བས་བརྫུན་དུ་གྱུར་པ་མ་ཡིན་ནོ། །ཅི་དེ་འབའ་ཞིག་གིས་ངག་ཡང་དག་པར་མ་བསྡམས་པ་ཡིན་ནམ་ཞེ་ན་དེའི་ཕྱིར། ཕྲ་མ་དང་ངག་རྩུབ་པོ་དང་ཚིག་ཀྱལ་པ་ཡང་ངོ་ཞེས་བྱ་བ་སྨྲས་ཏེ། རྗེས་སུ་མཐུན་པ་ཉིད་ནི་ངག་ཡང་དག་པར་མ་བསྡམས་པའོ་ཞེས་བྱ་བའི་རྗེས་བསྙག་པའི་ཕྱིར། ཡང་ངོ་ཞེས་བྱ་བའི་སྒྲ་སྨོས་ཏེ། དེ་དག་རེ་རེའི་རྗེས་སུ་མཐུན་པ་ཉིད་ཀྱང་འདིར་ངག་ཡང་དག་པར་མ་བསྡམས་པ་ཡིན་པར་བལྟ་བར་བྱའོ། །རང་བཞིན་དུ་གནས་པ་མ་ཡིན་པ་ཉིད་ཀྱང་དེ་དག་གིའོ་ཞེས་བྱ་བ་ནི། རང་བཞིན་དུ་གནས་པ་མ་ཡིན་པ་ཉིད་ཀྱང་བརྫུན་དུ་སྨྲ་བ་ལ་སོགས་པ་དེ་དག་གི་རྗེས་སུ་མཐུན་པ་ཉིད་ཡིན་པ་སྟེ། དེས་ན་ངག་ཡང་དག་པར་མ་བསྡམས་པ་དེ་ནི་རང་བཞིན་དུ་གནས་པ་མ་ཡིན་པ་ཞེས་ཀྱང་བྱའོ། །གཞན་དུ་ཡང་བྱ་བ་མ་ཡིན་པའོ་ཞེས་བྱ་བ་ནི། རང་བཞིན་དུ་གནས་པ་མ་ཡིན་པ་ལ། གཞན་ཡང་བྱ་བ་མ་ཡིན་པར་ལྟུང་བར་གྱུར་པ་དག་
ལྷག་པར་སྤྱོད་པའི་རྗེས་སུ་མཐུན་པ་ཉིད་ཀྱང་རང་བཞིན་དུ་གནས་པ་མ་ཡིན་པ་ཞེས་བྱའོ། །བྱ་བ་མི་བྱེད་པའོ་ཞེས་བྱ་བ་ནི། བྱ་བ་གང་ཡིན་པ་མི་བྱེད་པ་ཡང་རྗེས་སུ་མཐུན་པ་ཉིད་ཡིན་པ་སྟེ། དེས་ན་བསླབ་པ་ཐམས་ཅད་ལ་བརྩོན་པ་བཏང་ཞིང་སྤྲོ་བ་པོར་བ་ཡང་རང་བཞིན་དུ་གནས་པ་མ་ཡིན་པ་ཞེས་བྱ་བའོ། །དེ་བརྩམས་པ་འགྲོ་བའི་སེམས་ཀྱིས་བཏང་བ་ནི་སྤྱོད་ལམ་ལས་ཉམས་པ་ཡིན་ནོ་ཞེས་བྱ་བ་ནི། འདུག་པ་ཞེས་བྱ་བའི་སྤྱོད་ལམ་དེ་བརྩམས་ཤིང་སྔར་འདུག་པར་གྱུར་པ། གཞན་དུ་འགྲོ་བའི་སེམས་ཀྱིས་བཏང་བ་ནི་སྤྱོད་ལམ་ལས་ཉམས་པ་ཡིན་པའོ། །དགེ་འདུན་གྱི་ནང་ནས་སྟན་ལས་ལངས་པ་ནི་སྤྱོད་ལམ་ལས་ཉམས་པ་ཡིན་གྱི། དེ་ནས་གཞན་དུ་སོང་པ་འབའ་ཞིག་ཏུ་མ་ཟད་དོ། །འདིར་གཞུང་ནི་ཉེ་བ་འཁོར་གང་ཚུན་ཆད་དགེ་འདུན་གྱི་ནང་ནས་ལངས་པར་གྱུར་པའོ་ཞེས་གསུངས་པ་ཡིན་ནོ། །ལྟ་བ་དགེ་འདུན་ལ་བརྗོད་པར་བྱའོ་ཞེས་བྱ་བ་ལ། འདིར་ལྟ་བ་ཞེས་བྱ་བ་ནི། བློ་གྲོས་དང་བསམ་པ་ལ་བྱ་སྟེ། དགེ་འདུན་གྱི་བྱ་བ་དགོས་པ་ལ་ལྟ་བ་དགེ་འདུན་ལ་བརྗོད་པར་བྱ་བའོ། །གཞན་ལ་མི་བྱའོ་ཞེས་བྱ་བ་ནི། དགེ་འདུན་ལས་གཞན་པའི་ཚོགས་དགེ་འདུན་མ་ཡིན་པ་ལ་ལྟ་བ་བརྗོད་པར་མི་བྱའོ། །དེས་ན་གང་ཟག་གཅིག་པུ་ལ་ལྟ་བ་བརྗོད་པར་ག་ལ་བྱ་སྟེ། དགོས་པ་མི་འགྲུབ་པའི་ཕྱིར་རོ། །བསྙེན་པར་མ་རྫོགས་པ་ལ་མི་བྱའོ་ཞེས་བྱ་བ་ནི། དགེ་ཚུལ་གྱི་ཆོ་གས་ལ་ཡང་ལྟ་བ་བརྗོད་པར་མི་བྱ་བའོ། །ཁ་སྐོང་པར་འོས་པ་མ་ཡིན་པ་ལ་ཡང་ངོ་ཞེས་བྱ་བ་ནི། བསྙེན་པར་རྫོགས་པ་ཡིན་ཡང་དགེ་འདུན་གྱི་ཁ་སྐོང་བའི་འོས་མ་ཡིན་པ་ལ་ཡང་ལྟ་བ་བརྗོད་པར་མི་བྱ་བའོ། །ལྷག་མ་མ་ལུས་པ་ཉིད་མི་བྱའོ་ཞེས་བྱ་བ་ནི། ཕམ་པར་གྱུར་པ་ཡིན་པར་ཤེས་པའི་ལྟ་བ་ནི་དགེ་འདུན་ལ་ཡང་བརྗོད་པར་མི་བྱ་བའོ། །འདི་ཕམ་པར་འགྱུར་བ་བྱུང་བར་བདག་གིས་ཤེས་སོ་ཞེས་སུ་ལ་ཡང་བརྗོད་པར་མི་བྱ་བ་སྟེ། དགོས་པ་མེད་པའི་ཕྱིར་དང་འཐབ་ཀྲོལ་དུ་འགྱུར་བའི་ཕྱིར་རོ། །འདིར་གཞུང་ནི་མ་མོ་ལས། ཆོས་དང་ལྡན་པ་མ་ཡིན་པའི་ལྟ་བ་བརྗོད་པ་ལྔ་གང་ཞེ་ན། གནས་པར་མི་བྱ་བ་ལ་ལྟ་བ་བརྗོད་པ་དང༌། ཐ་དད་པར་གནས་བ་
ལ་ལྟ་བ་བརྗོད་པ་དང༌། བསྙེན་པར་མ་རྫོགས་པ་ལ་ལྟ་བ་བརྗོད་པ་དང༌། ཚོགས་ལ་ལྟ་བ་བརྗོད་པ་དང༌། ལྷག་མ་མ་ལུས་པའི་དངོས་པོའི་ལྟ་བ་བརྗོད་པ་སྟེ། ལྔ་པོ་དེ་དག་ནི་ཆོས་དང་ལྡན་པ་མ་ཡིན་པའི་ལྟ་བ་བརྗོད་པའོ། །དེ་ལས་བཟློག་པ་ལྔ་ནི་ཆོས་དང་ལྡན་པའི་ལྟ་བ་བརྗོད་པ་ཡིན་ནོ་ཞེས་གསུངས་པ་ཡིན་ནོ། །འདིར་ཚོགས་ཞེས་སྨོས་པ་ནི་དགེ་འདུན་དུ་མ་གྱུར་པ་དག་གཟུང་ངོ༌། །ལྷག་མ་མ་ལུས་པའི་དངོས་པོའི་ལྟ་བ་བརྗོད་པ་བཀག་པ་ལ་ནི་གང་ཟག་དེ་ལས་དེའི་རྒྱུས་གནོད་པ་འབྱུང་བ་སྤང་བའི་ཕྱིར་རོ། །འདིར་གཞུང་ནི་ཞུ་བ་ལས། སྔོན་ལྟུང་བ་བྱུང་བ་ལ་ལྟ་བ་བརྗོད་ན་ཉེས་བྱས་སོ། །རྐུ་ཐབས་སུ་གནས་པ་དང༌། དང་པོ་འཁྲུགས་པ་དང༌། བསླབ་པ་བྱིན་པ་དང༌། དགེ་ཚུལ་ལ་ལྟ་བ་བརྗོད་ན་ཉེས་བྱས་སུ་འགྱུར་རོ། །དེ་བཞིན་དུ་གནས་ནས་ཕྱུང་བ་ལ་ལྟ་བ་བརྗོད་ན་ཡང་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །དེ་བས་ན་ཐམས་ཅད་དུ་ཡང་ཁ་སྐོང་བར་འོས་པ་མ་ཡིན་པ་བཀག་པར་ཤེས་པར་བྱའོ། །བསྐོས་པ་བརྗེས་ནས་ཆེས་ལེགས་པ་དང་མང་དུ་བྱེད་པ་བསྐོ་བར་བྱའོ་ཞེས་བྱ་བ་ནི། སྔར་བསྐོས་པའི་གང་ཟག་བརྗེས་ནས་བྱ་བ་དེ་ལ་ཆེས་ལེགས་པར་བྱེད་པ་དང་ཆེས་མང་དུ་བྱེད་པའི་གང་ཟག་གཞན་ཡིན་པ་དེ་བསྐོ་བར་བྱ་བའོ། །དུས་ངེས་པར་བྱས་ཏེ་མི་བྱའོ་ཞེས་བྱ་བ་ནི། བསྐོ་བར་རོ། །གང་ལ་དུས་ངེས་པར་བྱ་སྟེ་བསྐོ་བར་མི་བྱ་ཞེ་ན། དེའི་ཕྱིར་ཡང་དང་ཡང་དུ་འམ་གཞན་ལའོ་ཞེས་བྱ་བ་སྨྲས་ཏེ། ཡང་དང་ཡང་དུ་ཞེས་བྱ་བ་ནི་དུས་གཞན་དུ་ཡང་དགོས་པ་བྱུང་ངོ་ཅོག་ཏུ། ཁྱོད་འབའ་ཞིག་བསྐོའོ་ཞེས་དེ་ལྟར་དུས་ངེས་པར་བྱས་ཏེ་མི་བསྐོ་བའོ། །གཞན་ལའོ་ཞེས་བྱ་བ་ནི། དགོས་པ་གཞན་དག་ལ་ཡང་ཁྱོད་ཁོ་ན་བསྐོའོ་ཞེས་དེ་ལྟར་དུས་ངེས་པར་བྱས་ཏེ་ཡང་མི་བསྐོ་བའོ། །གཞན་ལ་ཡང་ཇི་ཙམ་གྱིས་ཆོག་པ་ན་སྤང་བ་སྦྱིན་ནོ་ཞེས་བྱ་བ་ནི། ཡང་དང་ཡང་དུ་འམ་གཞན་ལ་ཞེས་སྨོས་པ་ལས་གཞན་པ་ལས་གཅིག་ལ་དུས་ངེས་པ་མེད་པར་བསྐོས་པ་དེ་ལས་ཡང་ཅི་རན་ཙམ་ན་བརྗེ་བར་བྱ་བ་སྟེ། ཁྱོད་འདི་ལས་དབྱུང་ངོ༌། །བསྙིལ་པའི་ཚུལ་དུ་ཡང་མི་བྱའོ། །བསྐོས་པ་མེད་ན་མདུང་དོར་བས་བགོའོ་ཞེས་བྱ་བ་ནི། སྣོད་སྤྱད་འགྱེད་པར་བསྐོས་པའི་གང་ཟག་མེད་ན་རྙེད་པ་དབང་བ་
རྣམས་ཀྱིས་མདུང་བགྱི་ཞིང་བགོ་བར་བྱ་བའོ། །དེ་ཡང་མདུང་འདོར་བའི་གང་ཟག་ཡོད་ན་ནི་དབང་བ་རྣམས་ཀྱི་མདུང་མཚན་མས་བཏབ་པ་མང་པོ་མདུང་འདོར་བའི་ལག་ཏུ་བྱིན་ནས། དེས་མིག་བཀབ་སྟེ་མདུང་རེ་རྫས་རེའི་སྟེང་དུ་བཞག་ཅིང༌། གང་ལ་བབ་པ་དེ་དེས་བླང་ངོ། །གལ་ཏེ་མདུང་འདོར་བ་མེད་ན་ནི་རྫས་རྣམས་ནི་མངོན་པར་བཞག་སྟེ། དབང་བ་རྣམས་ཀྱིས་རང་རང་གི་ལག་ཉར་རེར་བླང་ཞིང་གང་ཟིན་པ་དེ་དེས་བསྐུར་བར་བྱ་སྟེ། དེ་ནི་འཇིག་རྟེན་ན་མདུང་འགྱིད་པ་ཞེས་བྱའོ། །གང་ཁ་སྐོང་བར་མི་འོས་པ་དེ་མདུང་དོར་བར་ཡང་བྱའོ་ཞེས་བྱ་བ་ནི། གང་ཟག་བསྙེན་པར་མ་རྫོགས་པ་ལ་སོགས་པ་གང་དགེ་འདུན་གྱི་ཁ་སྐོང་བར་འོས་པ་མ་ཡིན་པ་དེ་རྙེད་པ་བགོ་བ་ལ་སོགས་པ་མདུང་དོར་བར་འོས་པ་ཡང་མ་ཡིན་པའོ། །དགེ་འདུན་གྱིས་དབྱེན་ལ་ཡང་འོས་པ་མ་ཡིན་པས་ཚུལ་ཤིང་དག་བྲིམ་པ་མི་འཆགས་སོ་ཞེས་བྱ་བ་ནི། དགེ་འདུན་ཕྱེ་བ་ནི་ཆོས་དང་ཆོས་མ་ཡིན་པའི་ཕྱོགས་སུ་གཏོགས་པ་བརྟགས་པའི་ཕྱིར་ཚུལ་ཤིང་དག་འབྲིམ་པ་ཡང་གང་ཟག་དགེ་འདུན་གྱི་ཁ་སྐོང་བར་འོས་པར་མ་ཡིན་པས་བྲིམས་པ་མི་འཆགས་པའོ། །འདིར་གཞུང་ནི་སིལ་བུ་དག་ལས། བཙུན་པ་རྐུ་ཐབས་སུ་གནས་པས་ཚུལ་ཤིང་བྲིམས་པས་དགེ་འདུན་དབྱེ་བར་འགྱུར་རམ། ཉེ་བ་འཁོར་མི་འགྱུར་རོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །ལས་ཀྱི་གཞི་གཞིར་གཏོགས་པའོ་ཞེས་བྱ་བ་ལ། ལས་ཀྱི་གཞི་འདུལ་བའི་གཞིའི་སྐབས་སུ་གཏོགས་པ་བཤད་ཟིན་ཏོ།། །།ད་ནི་ལས་ཀྱི་གཞི་ཞུ་བ་ལ་སོགས་པའི་སྐབས་ཕྱིར་བསྟན་པ་བསྡུ་བའི་ཕྱིར། བརྗོད་པ་ལྷག་མ་དག་གིས་ནི་མ་བྱས་པ་ཉིད་མ་ཡིན་ནོ་ཞེས་བྱ་བ་སྨྲས་ཏེ། གང་ལ་ལས་བརྗོད་པ་དག་ལྷག་པར་བྱེད་པ་དེ་ལ་ནི་ལས་མི་འཆགས་པ་ཉིད་མ་ཡིན་ཏེ། འཆགས་པ་ཁོ་ནའོ། །འདི་ལ་ཆོ་ག་ལས་འདས་ན་ལས་མི་འཆགས་སོ་ཞེས་བྱ་བའི་ཉེས་པར་འགྱུར་བར་དོགས་པར་མི་བྱའོ། །ཉམས་ན་མ་བྱས་པ་ཉིད་དོ་ཞེས་བྱ་བ་ནི། གང་ལ་ལས་བརྗོད་པ་ཇི་སྙེད་གསུངས་པ་དེ་ལས་ཉམས་ན་ནི་ལས་དེ་མ་བྱས་པ་ཉིད་དོ། །བྱེད་པ་ཉིད་ནི་སོང་ན་ཚིག་མ་རྫོགས་པ་རྣམ་པར་འཁྲུགས་པ་ཉིད་དོ་ཞེས་བྱ་བ་ནི། ལས་བྱེད་པ་ཉིད་ན་བྱེད་བ་
དག་སོང་ན་དེའི་ཚེ་གསོལ་བའི་བདག་ཉིད་ཀྱི་ཚིག་མ་རྫོགས་པ་གང་ཡིན་པ་དེ་རྣམ་པར་འཁྲུགས་པ་ཉིད་ཡིན་ཏེ། ཉམས་པ་དང་མ་བྱས་པ་ཉིད་ཡིན་ནོ་ཞེས་བྱ་བའི་ཐ་ཚིག་གོ །རྫོགས་པར་བྱས་པ་གང་ཡིན་པ་ད་ནི་བྱས་པ་ཉིད་ཁོ་ན་ཡིན་ནོ། །ལས་དེ་ལ་དགེ་འདུན་གྱི་ཚད་དག་ཏུ་མ་ལངས་པ་རྣམས་མ་ལུས་པ་ཉིད་ན་རྫོགས་པའོ་ཞེས་བྱ་བ་ནི། ལས་བྱེད་པ་ཉིད་ན་བྱེད་པ་དག་སོང་བའི་ཚེ་ལས་དེ་བྱ་བ་ལ་དགེ་འདུན་གྱི་མཐའ་བཅུའི་ཚོགས་ལ་སོགས་པ་དེའི་ཚད་དག་ཏུ་དེ་ནས་མ་ལངས་པ་རྣམས་མ་ལུས་པ་ཉིད་ཡིན་ན་ནི་ཚིག་རྫོགས་པ་དག་ཀྱང་རྣམ་པར་འཁྲུགས་པ་དག་ཡིན་ནོ། །འདིར་མ་ལངས་པ་ཞེས་བྱ་བ་ནི་སྟན་ལས་མ་འཕགས་པ་ཡིན་པར་རིག་པར་བྱའོ། །འདི་སྐད་བསྟན་ཏེ། ལས་བྱེད་པ་ན་གལ་ཏེ་དགེ་སློང་དག་དེའི་ནང་ནས་འགྲོ་བ་ན། ལས་དེ་ལ་དགེ་འདུན་གྱི་མཐའ་བཅུའི་ཚོགས་ལ་སོགས་པ་དག་ཕྱིན་མ་ལུས་པར་གྱུར་ན། ལས་ཀྱི་ཚིག་སྔར་རྫོགས་པ་ཡང་རྣམ་པར་འཁྲུགས་པ་ཉིད་དོ། །ལུས་པ་ཉིད་ན་མི་འགྱུར་རོ་ཞེས་བྱ་བ་ནི། ལས་དེ་བྱེད་ན་གལ་ཏེ་དགེ་སློང་ཁ་ཅིག་སོང་ཡང་དེ་ན་ལས་དེའི་ཚད་ཀྱི་དགེ་སློང་མ་ལངས་པ་ལྷག་མ་དག་ལུས་པ་ཉིད་ཡིན་ན་དེའི་ཚེ་ལས་ཀྱི་ཚིག་སྔར་རྫོགས་པ་རྣམ་པར་འཁྲུགས་པར་མི་འགྱུར་བ་ཉིད་དོ། གལ་ཏེ་དེ་ཡང་བྱེད་པར་འདོད་ན་ཚིག་གིས་རྣམ་པར་དཀྲུག་ཅིང་གསོལ་བས་དག་འདུན་ལ་བཙུན་པ་དག་ཡང་གསོལ་བ་བགྱིའོ་ཞེའམ་རྗེས་སུ་བསྒྲག་གོ་ཞེས་བྱ་བས་སོ་ཞེས་བྱ་བ་ནི། གལ་ཏེ་ལས་བྱེད་པ་དེའི་ཚིག་རྫོགས་པའི་ལས་དེ་ཡང་གཞི་ནས་བཟླས་ཏེ་བྱེད་པར་འདོད་པ་ན་ཚིག་རྫོགས་པ་རྣམ་པར་མ་འཁྲུགས་པ་དེ་དང་པོར་ཚིག་གིས་རྣམ་པར་དཀྲུག་ཅིང་དེའི་འོག་ཏུ་ལས་དེ་གཞི་ལས་བཟླས་པར་བྱའོ། །ཇི་ལྟར་ཚིག་གིས་རྣམ་པར་དཀྲུག་པར་བྱ་ཞེ་ན། གསོལ་བས་སོ། སུ་ལ་ཞེ་ན། དགེ་འདུན་ལའོ། །རྣམ་པ་གང་གིས་ཤེ་ན། དེའི་ཕྱིར་བཙུན་པ་དག་ཡང་གསོལ་བ་བགྱིའོ་ཞེ་འམ་རྗེས་སུ་བསྒྲག་གོ་ཞེས་བྱ་བས་སོ་ཞེས་བྱ་བ་སྨྲས་ཏེ། ཡང་གསོལ་བ་བགྱིའོ་ཞེས་བྱ་བ་ནི་གསོལ་བའི་བདག་ཉིད་ཀྱིས་ཚིག་རྫོགས་ཟིན་པ་དེ་ཡང་གཞི་ནས་བཟླས་པར་འདོད་ན་དེ་སྐད་བྱའོ། །རྗེས་སུ་བསྒྲག་གོ་ཞེས་བྱ་བ་ནི་གསོལ་པའི་བདག་ཉིད་དང་ལས་བརྗོད་པའི་བདག་
ཉིད་ཀྱི་ཚིག་གཉིས་རྫོགས་ཟིན་པ་དེ་ལས། ལས་བརྗོད་པ་འབའ་ཞིག་ཡང་གཞི་ནས་བཟླས་པར་འདོད་ན་དེ་སྐད་ཅེས་བྱའོ། །གལ་ཏེ་གསོལ་པའི་བདག་ཉིད་ཀྱི་ཚིག་དང༌། ལས་བརྗོད་པའི་བདག་ཉིད་ཀྱི་ཚིག་གཉི་ག་རྫོགས་ཟིན་པ་དེ་དག་ཡང་གཞི་ནས་བཟླས་པར་འདོད་ན་ནི་དེའི་ཚེ་གསོལ་བ་བགྱི་ཞིང་རྗེས་སུ་ཡར་བསྒྲག་གོ་ཞས་ཚིག་གཉི་ག་བརྗོད་པར་བྱའོ། །འདིར་དགེ་འདུན་ལ་ཞེས་སྨོས་པ་ནི་དཔེ་ཙམ་དུ་ཟད་དེ། དེས་ན་གང་ཟག་ལ་ལྷུང་བཟེད་ལ་སོགས་པ་བྱིན་གྱིས་བརླབས་པའི་ཚིག་རྫོགས་ཟིན་པ་དེ་ཡང་གཞི་ནས་བཟླས་པར་འདོད་ན་མང་གང་ཟག་དེ་ལ་བཙུན་པ་ཡང་རྗེས་སུ་བསྒྲག་གོ་ཞེས་བྱ་བའི་ཚིག་གིས་ཚོགས་སྔར་རྫོགས་པ་དེ་རྣམ་པར་དཀྲུག་པར་བྱ་ཞིང་དེའི་འོག་ཏུ་སྔགས་ཀྱི་ཚིག་གཞི་ནས་བཟླས་པར་བྱའོ། །དེ་བས་ན་འདིར་གལ་ཏེ་དེ་ཡང་བྱེད་པར་འདོད་ན་ཚིག་གིས་རྣམ་པར་དཀྲུག་ཅིང་གསོལ་བས་ཞེས་སྨོས་པ་ནི། དགེ་འདུན་འབའ་ཞིག་ལ་བྱ་བར་མ་ཟད་ཀྱི་གང་ཟག་ལ་ཡང་བྱར་རུང་སྟེ། དེའི་སྐབས་སུ་ཡང་གསོལ་བ་བགྱིའོ་ཞེས་བྱ་པའི་ཚིག་ནི་བརྗོད་མི་དགོས་ཏེ། དེ་ནི་གསོལ་བའི་བདག་ཉིད་ཀྱི་ལས་ཀྱི་སྐབས་ཡིན་པའི་ཕྱིར་རོ། །རྗེས་སུ་བསྒྲག་གོ་ཞེས་བྱ་པའི་ཚིག་ནི་བརྗོད་པར་བྱ་སྟེ། །དེ་ནི་བྱིན་གྱིས་བརླབ་པའི་སྔགས་དག་ལ་ཡང་རུང་པའི་ཕྱིར་རོ། །བཟློག་པའི་ཕྱིར་བསྒོ་བ་དང༌། བསྙིལ་བ་དང༌། དེའི་ངོ་བོ་ཉིད་ཚོལ་དུ་གཞུག་པ་དང༌། བསླབ་བ་དང་མཐུན་པ་དང༌། དེའི་གསོ་སྦྱོང་དང༌། མུ་སྟེགས་ཅན་གྱི་གནས་དང༌། དེ་ལས་གཞན་པའི་སྤོ་བ་དང༌། མགུ་བ་དང༌། ཡང་གཞི་ནས་བསླང་པ་དང༌། དྲན་པས་འདུལ་བ་དང༌། མ་མོས་པས་འདུལ་བ་སྦྱིན་པ་དང༌། བསྙེན་པར་རྫོགས་པར་བྱ་བ་དང༌། མཚམས་དགྲོལ་བ་དང༌། ནན་ཐུར་གྱི་ལས་དང༌། དབྱུང་བ་དག་ལ་ནི་བརྗོད་པ་གསུམ་མོ་ཞེས་བྱ་བ་ནི། ལས་སུམ་ཅུ་བསྟན་ཏེ། དེ་དག་ནི་གསོལ་བ་དང་བཞིའི་ལས་ཡིན་ནོ་ཞེས་བྱ་བར་སྦྱར་རོ། །དེ་ལས་བཟློག་པའི་ཕྱིར་བསྒོ་བས་ཞེས་བྱ་བ་ནི། དགེ་འདུན་འབྱེད་པ་ཉིད་ལ་སོགས་པའི་ཆོས་ལས་བཟློག་པའི་ཕྱིར་བསྒོ་པའི་ལས་བཅུ་བསྟན་ཏེ། དེ་དག་ཀྱང་གང་ཞེ་ན། འདི་ལྟ་སྟེ་དགེ་འདུན་གྱི་དབྱེན་བྱེད་པ་དང༌། དེའི་རྗེས་སུ་ཕྱོགས་པ་དང༌། ཁྱིམ་སུན་འབྱིན་པ་དང༌།
བཀའ་བློ་མི་བདེ་བ་དང༌། དགེ་སློང་དང་དགེ་ཚུལ་སྡིག་པ་ཅན་གྱི་ལྟ་བར་གྱུར་པ་མི་གཏོང་བ་དང༌། གནས་ནས་ཕྱུང་བའི་རྗེས་སུ་ཕྱོགས་པའི་དགེ་སློང་མ་དང༌། དགེ་སློང་མ་དཀོན་མཆོག་གཏོང་བ་ལ་སོགས་པ་བཞི་ལ་ཞུགས་པ་དག་བཟློག་པའི་ཕྱིར་བསྒོ་བ་སྟེ་དཀོན་མཆོག་གཏོང་བ་དང༌། འཐབ་ཀྲོལ་བྱེད་པ་དང༌། སྡེ་ཞིང་གནས་པ་དང༌། སྡེ་ཞིང་གནས་སུ་འཇུག་པའོ། བསྙིལ་བ་ཞེས་བྱ་བ་ནི་དགེ་ཚུལ་སྡིག་པ་ཅན་གྱི་ལྟ་བའི་རྣམ་པ་མི་གཏོང་བ་བསྙིལ་བའི་ལས་གཅིག་བསྟན་ཏོ། །དེའི་ངོ་བོ་ཉིད་ཚོལ་དུ་གཞུག་པ་སྦྱིན་པ་ཞེས་བྱ་བས་ནི། ལྟུང་བ་གང་བྱུང་བ་གསལ་བར་མི་དྲན་པ་ལ་དེའི་ངོ་བོ་ཉིད་ཆོལ་དུ་གཞུག་པའི་ལས་གཅིག་བསྟན་ཏོ། །བསླབ་པ་སྦྱིན་པ་ཞེས་བྱ་བས་ནི་ཕ་མ་པར་འགྱུར་བ་བྱུང་བ་ཉམས་པ་ལ་བསླབ་པ་སྦྱིན་པའི་ལས་གཅིག་བསྟན་ཏོ། །མཐུན་པ་སྦྱིན་པ་ཞེས་བྱ་བས་ནི། མཐུན་པ་སྦྱིན་པའི་ལས་གཅིག་བསྟན་ཏོ། །དེའི་གསོ་སྦྱོང་སྦྱིན་པ་ཞེས་བྱ་བས་ནི། མཐུན་པའི་གསོ་སྦྱོང་སྦྱིན་པའི་ལས་གཅིག་བསྟན་ཏོ། །མུ་སྟེགས་ཅན་གྱི་གནས་སྦྱིན་པས་ཞེས་བྱ་བས་ནི། མུ་སྟེགས་ཅན་རབ་ཏུ་འབྱུང་བར་འདོད་པ་ལ་ཟླ་བ་བཞིའི་བར་དུ་མཁན་པོས་སྦྱར་པའི་གོས་ཀྱི་གནས་པ་སྦྱིན་པའི་ལས་གཅིག་བསྟན་ཏོ། །དེ་ལས་གཞན་པའི་སྤོ་བ་སྦྱིན་པ་ཞེས་བྱ་བས་ནི། མུ་སྟེགས་ཅན་ལ་ཟླ་བ་བཞིའི་བར་དུ་མཁན་པོས་སྦྱར་བའི་གོས་ཀྱི་གནང་བ་སྦྱིན་པ་ལས་གཞན་པ་དགེ་འདུན་ལྷག་མ་བཅབས་པ་ལ་སྤོ་བ་སྦྱིན་པའི་ལས་གཅིག་བསྟན་ཏོ། །མགུ་བ་སྦྱིན་པ་ཞེས་བྱ་བས་ནི། དགེ་འདུན་ལྷག་མའི་ལྟུང་བའི་ཕྱིར་མགུ་བ་སྦྱིན་པ་དང༌། ལྕི་བའི་ཆོས་ལྷག་པར་སྤྱད་པའི་ཕྱིར་མགུ་བ་སྦྱིན་པའི་ལས་གཅིག་བསྟན་ཏོ། །ཡང་གཞི་ནས་བསླང་བ་སྦྱིན་པ་ཞེས་བྱ་བས་ནི། སྤོ་བ་དང་མགུ་བར་བྱ་བ་བྱེད་པའི་སྐབས་སུ་གལ་ཏེ་དགེ་འདུན་ལྷག་མ་དེ་ཉིད་ཀྱི་ལྟུང་བ་བྱུང་ན། གཞི་ནས་སྤོ་བ་དང༌། གཞི་ནས་མགུ་བར་བྱ་བ་དང༌། ཡང་གཞི་ནས་བསླང་སྟེ་སྤོ་བ་དང་གཞི་ནས་བསླང་སྟེ་ཡོངས་སུ་གནས་པ་དང༌། མགུ་བར་བྱ་བ་སྦྱིན་པའི་ལས་བཞི་བསྟན་ཏོ། །དྲན་པས་འདུལ་བ་སྦྱིན་པ་ཞེས་བྱ་བས་ནི། དྲན་པས་འདུལ་བར་འོས་པ་ལ་དྲན་པས་འདུལ་བ་སྦྱིན་པའི་ལས་གཅིག་བསྟན་ཏོ། །མ་མྱོས་པས་འདུལ་བ་སྦྱིན་པ་ཞེས་བྱ་བས་ནི། མ་མྱོས་པས་འདུལ་བར་འོས་པ་ལ་མ་
མྱོས་པས་འདུལ་བ་སྦྱིན་པའི་ལས་གཅིག་བསྟན་ཏོ། །བསྙེན་པར་རྫོགས་པར་བྱ་བ་ཞེས་བྱ་བས་ནི། དགེ་སློང་དང་དགེ་སློང་མ་བསྙེན་པར་རྫོགས་པར་བྱ་བའི་ལས་གཅིག་བསྟན་ཏོ། །མཚམས་དགྲོལ་བ་ཞེས་བྱ་བས་ནི། མཚམས་ཆེན་པོ་དང༌། མཚམས་ཆུང་དུ་དང༌། དཀྱིལ་འཁོར་པའི་མཚམས་དགྲོལ་བའི་ལས་གཅིག་བསྟན་ཏོ། །ནན་ཐུར་གྱི་ལས་ཞེས་བྱ་བས་ནི། ནན་ཐུར་དང་བཟོད་པར་བྱ་བའི་ལས་གཉིས་བསྟན་ཏེ། འདི་ལྟ་སྟེ། བསྡིག་པ་དང༌། སྨད་པ་དང༌། བསྐྲད་པ་དང༌། ཕྱིར་གྱེད་པ་དང༌། མ་མཐོང་བས་གནས་ནས་དབྱུང་བ་དང༌། ཕྱིར་མི་འཆོས་པས་གནས་ནས་དབྱུང་བ་དང༌། སྡིག་པ་ཅན་གྱི་ལྟ་བའི་རྣམ་པ་མི་གཏོང་བས་གནས་ནས་དབྱུང་བ་དང༌། གསོ་སྦྱོང་གཞག་པ་དང༌། དགག་དབྱེ་གཞག་པ་དག་ནི་ནན་ཐུར་གྱི་ལས་སོ། །གནས་ནས་ཕྱུང་བ་དེ་དག་ལ་བཟོད་པ་བྱ་བ་ནི་བཟོད་པ་བྱ་བའི་ལས་སོ། །དབྱུང་བ་ཞེས་བྱ་བས་ནི། དགེ་འདུན་ལྷག་མ་ལས་དབྱུང་བ་དང༌། སྲ་བརྐྱང་དབྱུང་བའི་ལས་གཉིས་བསྟན་ཏེ། ལས་སུམ་ཅུ་པོ་དེ་དག་ལ་ནི་གསོལ་བ་དང་བཞིའི་ལས་བྱའོ། །དེ་ལྟར་འདུལ་བའི་གཞུང་ལས་བགྲང་བ་དང༌། ཁྱིམ་གྱི་བསླབ་པའི་སྡོམ་པ་སྦྱིན་པ་དང༌། ཕྱག་མི་བྱ་བའི་བསླབ་པའི་སྡོམ་པ་སྦྱིན་པ་དང༌། །རྩོད་པ་སྤང་བར་བྱེད་པ་བསྐོ་པ་དང༌། བཟོད་པ་གསོལ་བ་ཞེས་བྱ་བ་དག་ཀྱང་གསོལ་བ་དང་བཞིའི་ལས་སུ་སྣང་བ་དེ་དག་ནི་འདིར་གསོལ་བ་དང་བཞིའི་ལས་སུ་མ་བྱས་སོ། །དེ་ལྟར་ག་ལས་ཤེས་ཤེ་ན། གཏམ་གྱི་གཞི་ལས་ལས་ཀྱི་གྲངས་བརྗོད་པ་ལས་འབྱུང་བ་སྟེ། བཙུན་པ་ལས་དག་དུ་མཆིས། ཉེ་བ་འཁོར་བརྒྱ་རྩ་གཅིག་གོ །བཙུན་པ་ལས་དུ་ངག་གིས་ལས་ཐམས་ཅད་བསྡུས། ཉེ་བ་འཁོར་གསུམ་གྱིས་ཏེ། གསུམ་གང་ཞེ་ན། གསོལ་བའི་ལས་དང༌། གསོལ་བ་དང༌། གཉིས་ཀྱི་ལས་དང༌། གསོལ་བ་དང་བཞིའི་ལས་ཀྱིས་སོ། །བཙུན་པ་ལས་བརྒྱ་རྩ་གཅིག་པོ་གང་དག་ལགས་པ་དེ་དག་ལ་གསོལ་བའི་ལས་དག་ནི་དུ་གསོལ་བ་དང་གཉིས་ཀྱི་ལས་དག་ནི་དུ་གསོལ་བ་དང་བཞིའི་ལས་དག་ནི་དུ་མཆིས། བཀའ་སྩལ་པ། ཉེ་བ་འཁོར་གསོལ་བའི་ལས་ནི་ཉི་ཤུ་རྩ་བཞིའོ། །གསོལ་བ་དང་གཉིས་ཀྱི་ལས་ནི་བཞི་བཅུ་རྩ་བདུན་ནོ། །གསོལ་བ་དང་
བཞིའི་ལས་ནི་སུམ་ཅུའོ་ཞེས་གསུངས་སོ། །དེ་ནི་བརྡ་ཕྲད་སླ་བར་བྱ་བའི་ཕྱིར། གསོལ་བ་དང༌། གསོལ་བ་དང་གཉིས་དང༌། གསོལ་བ་དང་བཞིའི་ལས་རྣམས་ཚིགས་སུ་བཅད་པ་དག་གིས་བསྡུ་བར་བྱ་སྟེ། དེའི་ཕྱིར། གསང་དང་ནང་དུ་དྲི་ཕྱིར་དང༌། །གསོ་སྦྱོང་དེ་ལ་ལྟུང་བཅས་དང༌། །དེ་ལ་དགེ་འདུན་ཡིད་གཉིས་དང༌། །རྩོད་དང་ངེས་ཉིད་མ་ཡིན་དང༌། །དེ་ཡི་དོན་དུ་ལྔ་པོ་དག །ཐམས་ཅད་དགག་དབྱར་གཏོགས་པ་ཡིན། །དབྱར་གནས་ཁས་བླངས་ཉིད་དང་ནི། །ཤི་བའི་རྫས་དང་ནོར་འདྲ་དང༌། །ཆོས་གོས་སྲ་བརྐྱང་གཏད་པ་དང༌། །ཆོས་གོས་སྦྱིན་པར་བྱ་བ་དང༌། །གནས་ངན་ལེན་ནི་བརྗོད་པ་དང༌། །གྲངས་སུ་གཞུག་པ་བཞི་དག་དང༌། །ཁྱིམ་གྱི་སྡོམ་དང་དེ་གཞིག་དང༌། །ལྷུང་གཟེད་ཁས་དབུབ་བྱ་བ་དང༌། །དེ་ཉིད་བཟློག་པར་བྱ་བ་དག །གསོལ་བ་འབའ་ཞིག་ལས་ཡིན་ནོ། །གནས་དང་མཚམས་ནི་གཉིས་པོ་དང༌། །མི་འབྲལ་སྨྱོས་དང་དགག་དབྱེ་དང༌། །གནས་མལ་སྟོབས་པར་བྱེད་པ་དང༌། །རུང་བའི་ས་གཞི་བསྒོ་བ་དང༌། །སྲ་བརྐྱང་དང་ནི་དེ་གདིང་དང༌། །སྤོང་དང་ལག་གི་བླ་དང་ནི། །གནས་ཁང་བསྐོ་ལ་སོགས་པ་དང༌། །གཟུ་དང་གསལ་དང་སྦེད་པ་དང༌། །ཚུལ་ཤིང་འདྲིམ་པར་བྱེད་པ་དང༌། །ཁང་པ་ཁང་ཆེན་བསྟན་པ་དང༌། །གླེང་དང་འབྲལ་བར་མི་འགྱུར་དང༌། །བསྟན་དང་ལྷུང་བཟེད་འབྲིམ་པ་དང༌། །མ་དད་གོ་བར་བྱ་བ་དང༌། །སྟོན་པ་དང་ནི་ནགས་ཉུལ་དང༌། །ཕྱག་མི་བྱ་དང་མང་ཕྱིར་དང༌། །ཁར་བ་འདྲ་བའི་ཕྱིར་དང་ནི། །རྙེད་པ་གཅིག་ཏུ་བྱ་ཕྱིར་དང༌། །བསླབ་པ་བྱིན་དང་ཉེར་གནས་དང༌། །བུ་དང་ཉེ་དུ་ཕྱིར་འགྲོ་བ། །གསོལ་དང་གཉིས་ཀྱི་ལས་ཡིན་ནོ། །བསྙེན་པར་རྫོགས་པར་བྱ་བ་དང༌། །མུ་སྟེགས་གནས་དང་མཚམས་དགྲོལ་དང༌། །མཐུན་སྦྱིན་གསོ་སྦྱོང་བདུན་པོ་དང༌། །བརྒྱད་དང་དྲན་དང་མ་མྱོས་དང༌། །དེ་ཉིད་ཚོལ་དུ་གཞུག་པ་དང༌། །བསྒོ་བར་བྱ་བ་རྣམས་དང་ནི། །ཉམས་པ་སྦྱིན་པར་བྱ་བ་དག ། གསོལ་དང་བཞིའི་ལས་ཡིན་ནོ། །ཞེས་བྱ་བ་སྨྲས་སོ། །ད་ནི་བསྡུ་བའི་ཚིགས་སུ་བཅད་པ་དེ་དག་གི་བཤད་པར་བྱའོ། །དེ་ལ་གསང་དང་ཞེས་བྱ་བས་ནི་ལས་གཅིག་བསྟན་ཏེ། གསང་སྟེ་སྟོན་པའི་སློབ་དཔོན་གྱིས་བར་ཆད་ཀྱི་ཆོས་རྣམས་གསང་སྟེ་དྲི་བའི་ཕྱིར་གསོལ་བ་འབའ་ཞིག་གི་
ལས་བྱ་བའོ། །ནང་དུ་དྲི་ཕྱིར་དང་ཞེས་བྱ་བས་ཀྱང་ལས་གཅིག་བསྟན་ཏེ། ལས་བྱེད་པའི་སློབ་དཔོན་གྱིས་བར་ཆད་ཀྱི་ཆོས་རྣམས་དགེ་འདུན་གྱི་ནང་དུ་འདྲི་བའི་ཕྱིར་གསོལ་བ་འབའ་ཞིག་གི་ལས་བྱ་བའོ། །གསོ་སྦྱོང་ཞེས་བྱ་བས་ཀྱང་ལས་གཅིག་བསྟན་ཏེ། སོ་སོར་ཐར་པའི་མདོ་གདོན་པའི་ཕྱིར་གསོལ་བ་འབའ་ཞིག་གི་ལས་བྱ་བའོ། །དེ་ལ་ལྟུང་བ་བཅས་དང་ཞེས་བྱ་བས་ཀྱང་ལས་གཅིག་བསྟན་ཏེ། གསོ་སྤྱོང་དེ་ལ་དགེ་འདུན་ཐམས་ཅད་ལྟུང་བ་དང་བཅས་པར་གྱུར་ན་གསོལ་བ་འབའ་ཞིག་གི་ལས་ཀྱིས་བྱིན་གྱིས་བརླབས་ཏེ་གསོ་སྦྱོང་བྱ་བའོ། །དེ་ལ་དགེ་འདུན་ཡིད་གཉིས་དང༌། །ཞེས་བྱ་བས་ཀྱང་ལས་གཅིག་བསྟན་ཏེ། གསོ་སྦྱོང་གི་ཚེ་ལྟུང་བ་དེ་ལ་དགེ་འདུན་ཐམས་ཅད་ལྟུང་བ་དང་བཅས་པར་གྱུར་ན་གསོལ་བ་འབའ་ཞིག་གི་ཟླས་ཀྱིས་བྱིན་གྱིས་བརླབས་ཏེ་གསོ་སྦྱོང་བྱ་བའོ། །དེ་ལ་དགེ་འདུན་ཡིད་གཉིས་དང། །ཞེས་བྱ་བས་ཀྱང་ལས་གཅིག་བསྟན་ཏེ། གསོ་སྦྱོང་གི་ཚེ་ལྟུང་བ་དེ་ལ་དགེ་འདུན་ཐམས་ཅད་ཡིད་གཉིས་དང་བཅས་པར་གྱུར་ན་གསོལ་བ་འབའ་ཞིག་གི་ལས་ཀྱིས་བྱིན་གྱིས་བརླབས་ཏེ་གསོ་སྦྱོང་བྱ་བའོ། །རྩོད་དང་ཞེས་བྱ་བས་ཀྱང་ལས་གཅིག་བསྟན་ཏེ། གསོ་སྦྱོང་གི་ཚེ་དགེ་འདུན་ལྟུང་བའི་ཕྱིར་རྩོད་པར་གྱུར་ན་གསོལ་བ་འབའ་ཞིག་གི་ལས་ཀྱིས་བྱིན་གྱིས་བརླབས་ཏེ་གསོ་སྦྱོང་བྱ་བའོ། །ངེས་ཉིད་མ་ཡིན་དང་ཞེས་བྱ་བས་ཀྱང་ལས་གཅིག་བསྟན་ཏེ། གསོ་སྦྱོང་གི་ཚེ་ལྟུང་བ་དེ་ནི་གང་ཡིན་པ་དེ་ནི་ལས་ཇི་ལྟར་ནི་ལྟུང་བར་འགྱུར་ཞེས་བྱ་བ་ལ་སོགས་པས་དེས་པ་ཉིད་མ་ཡིན་པར་གྱུར་ན། དེའི་ཚེ་གསོལ་བ་འབའ་ཞིག་གི་ལས་ཀྱིས་བྱིན་གྱིས་བརླབས་ཏེ་གསོ་སྦྱོང་བྱ་བའོ། །དེ་ཡི་དོན་དུ་ལྔ་པོ་དག །ཐམས་ཅད་དགག་དབྱེར་གཏོགས་པ་ཡིན། །ཞེས་བྱ་བ་ནི་ལས་ལྔ་བསྟན་ཏེ། གསོ་སྦྱོང་དེའི་དོན་དུ་ལས་ལྔ་པོ་དག་གསུངས་པ་ཐམས་ཅད་དགག་དབྱེར་ཡང་གཏོགས་པ་ཡིན་པའོ། །དབྱར་གནས་ཁས་བླངས་ཉིད་དང་ནི། །ཞེས་བྱ་བས་ནི་ལས་གཅིག་བསྟན་ཏེ། དབྱར་གནས་པར་ཁས་བླང་བའི་ཚེ་གསོལ་བ་འབའ་ཞིག་གི་ལས་བྱ་བའོ། །ཤི་བའི་རྫས་དང་ནོར་འདྲ་དང༌། །ཞེས་བྱ་བས་
ཀྱང་ལས་གཅིག་བསྟན་ཏེ། ཤི་བའི་རྫས་བགོ་བར་བྱ་བའམ། ཤི་བའི་ནོར་རྫས་གང་ཟག་གང་ལ་ཡོད་པ་དེ་གསོལ་བ་འབའ་ཞིག་གི་ལས་ཀྱིས་བྱིན་གྱིས་བརླབ་པར་བྱའོ། །ཆོས་གོས་སྲ་བརྐྱང་གཏད་པ་དང༌། །ཞེས་བྱ་བ་དང༌། ཆོས་གོས་སྦྱིན་པར་བྱ་བ་དང༌། །ཞེས་བྱ་བས་ཀྱང་ལས་གཅིག་བསྟན་ཏེ། དབྱར་གནས་པའི་དགེ་འདུན་གྱིས་ཆོས་གོས་སྲ་བརྐྱང་འདིང་བའི་དགེ་སློང་ལ་གཏད་པ་དང༌། གྱད་བུ་ནོར་ལྟ་བུ་ཆོས་གོས་གསུམ་ངན་པ་ལ་དགེ་འདུན་གྱིས་རས་ཡུག་ཆེན་གཅིག་སྦྱིན་པ་ལ་གསོལ་བ་འབའ་ཞིག་གི་ལས་བྱུ་བའོ། །གནས་ངན་ལེན་ནི་བརྗོད་པ་དང་ཞེས་བྱ་བས་ཀྱང་ལས་གཅིག་བསྟན་ཏེ། དགེ་སློང་དང་དགེ་སློང་མ་གང་དག་ཇི་ལྟར་སྐྱེ་བོ་ཕལ་པོ་ཆེའི་ཚོགས་མ་དད་པར་རིག་པར་འགྱུར་བ་དེ་ལྟ་དེ་ལྟར་ཁྱིམ་རྣམས་སུ་སྤྱོད་པར་བྱེད་པ་གསོལ་བ་འབའ་ཞིག་གི་ལས་ཀྱིས་ཁྱིམ་རྣམས་སུ་སོ་སོར་གོ་བར་བྱེད་དུ་གཞུག་པའོ། །གྲངས་སུ་གཞུག་པ་བཞི་དག་དང༌། །ཞེས་བྱ་བས་ནི་ལས་བཞི་བསྟན་ཏེ། ངོར་འཕྱ་བའི་གྲངས་སུ་གཞུག་པ་དང༌། གཞོགས་འཕྱས་བྱེད་པའི་གྲངས་སུ་གཞུག་པ་དང༌། བསྒོ་བ་རྣ་ལ་གཟོན་པའི་གྲངས་སུ་གཞུག་པ་དང༌། ཅང་མི་སྨྲ་བའི་རྣ་ལ་གཟོན་པའི་གྲངས་སུ་གཞུག་པ་དག་གསོལ་བ་འབའ་ཞིག་གི་ལས་ཀྱིས་དེ་དག་གི་གྲངས་སུ་གཞུག་པའོ། །ཁྱིམ་གྱི་སྡོམ་པ་དང་ཞེས་བྱ་བས་ནི་ལས་གཅིག་བསྟན་ཏེ། སྦྱིན་བདག་ལོངས་སྤྱོད་འགྲིབ་པ་ལ་དེའི་ཁྱིམ་དུ་ཟན་མི་ཟ་བར་གསོལ་བ་འབའ་ཞིག་གི་ལས་ཀྱིས་བསླབ་པའི་སྡོམ་པ་སྦྱིན་པར་བྱ་བའོ། །དེ་གཞིག་དང་ཞེས་བྱ་བས་ཀྱང་ལས་གཅིག་བསྟན་ཏེ། ཁྱིམ་གྱི་སྔོམ་པ་སྦྱིན་པ་དེ་ཉིད་ལོངས་སྤྱོད་འཕེལ་བ་ལ་གསོལ་བ་འབའ་ཞིག་གི་ལས་ཀྱིས་ཁྱིམ་གྱི་སྡོམ་པ་དེ་གཞིག་པར་བྱ་བའོ། །ལྷུང་བཟེད་ཁས་དབུབ་བྱ་བ་དང༌། །ཞེས་བྱ་བས་ཀྱང་ལས་གཅིག་བསྟན་ཏེ། ཁྱིམ་བདག་དགེ་སློང་ལ་ཡང་དག་པ་མ་ཡིན་པས་སྐུར་བ་འདེབས་པ་ལ་གསོལ་བ་འབའ་ཞིག་གི་ལས་ཀྱིས་ལྷུང་བཟེད་ཁ་དབུབ་པར་བྱ་བའོ། །དེ་ཉིད་བཟློག་པར་བྱ་བ་དག །ཅེས་བྱ་བས་ཀྱང་ལས་གཅིག་བསྟན་ཏེ། ལྷུང་བཟེད་ཁས་ཕུབ་པ་དེ་ཉིད་བཟོད་པ་གསོལ་བ་
ལ་གསོལ་བ་འབའ་ཞིག་གི་ལས་ཀྱིས་དེ་བཟློག་པར་བྱ་བ་སྟེ། ལས་ཉི་ཤུ་རྩ་བཞི་པོ་ཇི་སྐད་བསྟན་པ་དེ་དག་ནི་གསོལ་བ་འབའ་ཞིག་གི་ལས་ཡིན་ནོ། །གནས་དང་ཞེས་བྱ་བས་ནི་ལས་གཅིག་བསྟན་ཏེ། གསོ་སྦྱོང་གི་གནས་ལ་གསོལ་བ་དང་གཉིས་ཀྱི་ལས་ཀྱིས་བློ་མཐུན་པར་བྱ་བའོ། །མཚམས་ནི་གཉིས་པོ་དང་ཞེས་བྱ་བས་ཀྱང་ལས་གཅིག་བསྟན་ཏེ། དཀྱིལ་འཁོར་པའི་མཚམས་དང་མཚམས་ཆེན་པོ་དག་གསོལ་བ་དང་གཉིས་ཀྱི་ལས་ཀྱིས་གཅད་པར་བྱ་བའོ། །མི་འབྲལ་ཞེས་བྱ་བས་ཀྱང་ལས་གཅིག་བསྟེན་ཏེ། མཚམས་ཆེན་པོ་བཅད་པའི་ནང་དུ་གསོལ་བ་དང་གཉིས་ཀྱི་ལས་ཀྱིས་ཆོས་གོས་དག་དང་འབྲལ་བར་མི་འགྱུར་བའི་གནང་བ་སྦྱིན་པའོ། །སྨྱོས་དང་ཞེས་བྱ་བས་ཀྱང་ལས་གཅིག་བསྟན་ཏེ། དགེ་སློང་སྨྱོས་ཤིང་སེམས་འཁྲུགས་པ་ལས་ཀྱི་གནས་སུ་རང་རྡོ་བྱེད་པ་ལ་གསོལ་བ་དང་གཉིས་ཀྱི་ལས་ཀྱིས་མི་མཐུན་པར་མི་འགྱུར་བའི་གནང་བ་སྦྱིན་པའོ། །དགག་དབྱེ་དང་ཞེས་བྱ་བས་ཀྱང་ལས་གཅིག་བསྟན་ཏེ། དབྱར་གནས་པའི་དགེ་འདུན་ལ་དགག་དབྱེ་བྱེད་པའི་དགེ་སློང་གསོལ་བ་དང་གཉིས་ཀྱི་ལས་ཀྱིས་བསྐོ་བའོ། །གནས་མལ་སྟོབས་པར་བྱེད་པ་དང༌། །ཞེས་བྱ་བས་ཀྱང་ལས་གཅིག་བསྟེན་ཏེ། དབྱར་གནས་པར་ཁས་ལེན་བ་རྣམས་ལ་གནས་མ་ལ་སྟོབས་པའི་དགེ་སློང་གསོལ་བ་དང་གཉིས་ཀྱི་ལས་ཀྱིས་བསྐོ་བའོ། །རུང་བའི་ས་གཞི་བསྐོ་བ་དང༌། །ཞེས་བྱ་བས་ཀྱང་ལས་གཅིག་བསྟན་ཏེ། རུང་བའི་ཁང་བ་ལ་གསོལ་བ་དང༌། གཉིས་ཀྱི་ལས་ཀྱིས་བློ་མཐུན་ཕར་བྱ་བའོ། །སྲ་བརྐྱང་དང་ནི་ཞེས་བྱ་བས་ནི་ལས་གཅིག་བསྟན་ཏེ། དེ་དབྱར་གནས་པའི་དགེ་འདུན་གྱི་སྲ་བརྐྱང་ལ་གསོལ་བ་དང་གཉིས་ཀྱི་ལས་ཀྱིས་བློ་མཐུན་པར་བྱ་བའོ། །དེ་གདིང་བ་དང་ཞེས་བྱ་བས་ཀྱང་ལས་གཅིག་བསྟན་ཏེ། དབྱར་གནས་པའི་དགེ་འདུན་གྱི་སྲ་བརྐྱང་ག་དིང་བའི་དགེ་སློང་གསོལ་བ་དང་གཉིས་ཀྱི་ལས་ཀྱིས་བསྐོ་བའོ། །སྤོང་བ་དང་ཞེས་བྱ་བས་ཀྱང་ལས་གཅིག་བསྟན་ཏེ། སྤོང་བའི་ཞལ་ཏ་བྱེད་པ་གསོལ་བ་དང་གཉིས་ཀྱི་ལས་ཀྱིས་བསྐོ་བའོ། །ལག་གི་བླ་དང་ནི་ཞེས་བྱ་བས་ཀྱང་ལས་གཅིག་བསྟན་ཏེ། ལག་
གི་བླ་དང༌། ལག་དཔོན་གསོལ་པ་དང་གཉིས་ཀྱི་ལས་ཀྱི་བསྐོ་བའོ། །གནས་ཁང་བསྐོ་ལ་སོགས་པ་དང༌། །ཞེས་བྱ་བས་ནི་ལས་བཅུ་གཉིས་བསྟན་ཏེ། གནས་ཁང་བསྐོ་བ་དང་ཟས་ལ་བསྐོ་བ་དང༌། ཐུག་པ་འདྲིམ་པ་དང༌། བག་ཆོས་འདྲིམ་པ་དང༌། ཕྲན་ཚེགས་འདྲིམ་པ་དང༌། སྣོད་སྤྱད་འདྲུབ་པ་དང༌། གོས་སྤེད་པ་དང༌། གོས་འགྱེད་པ་དང༌། དབྱར་གྱི་རས་ཆེན་སྦེད་པ་དང༌། དབྱར་གྱི་རས་ཆེན་འགྱེད་པ་དང༌། མངག་གཞུག་པ་དང༌། མཛེས་ཆོས་དག་གསོལ་བ་དང་གཉིས་ཀྱི་ལས་ཀྱིས་བསྐོ་བའོ། །གཟུ་དང་ཞེས་བྱ་བས་ནི་ལས་གཅིག་བསྟན་ཏེ། དགེ་འདུན་ལ་རྩོད་པ་བྱུང་བ་མངོན་སུམ་གྱིས་འདུལ་བའི་གཟུ་བོ་གསོལ་བ་དང༌། གཉིས་ཀྱི་ལས་ཀྱིས་བསྐོ་བའོ། །གསལ་དང་ཞེས་བྱ་བས་ཀྱང་ལས་གཅིག་བསྟན་ཏེ། དགེ་འདུན་ལ་རྩོད་པ་བྱུང་བ་གཟུ་བོས་ཞི་བར་མ་ནུས་ཏེ། དེས་དགེ་འདུན་ལ་ཕུལ་བ་ན་དགེ་འདུན་གྱིས་རྩོད་པ་དེ་ཞི་བར་བྱེད་པའི་གང་ཟག་གསལ་བ་དང༌། གསལ་བའི་ཡང་གསལ་བ་གསོལ་བ་དང༌། གཉིས་ཀྱི་ལས་ཀྱིས་བསྐོ་བའོ། །སྤེད་པ་དང་ཞེས་བྱ་བས་ཀྱང་ལས་གཅིག་བསྟན་ཏེ། དགེ་འདུན་ལ་རྩོད་པ་བྱུང་བ་གང་ཟག་གསལ་བ་དང༌། གསལ་བའི་ཡང་གསལ་བས་ཞི་བར་མ་ནུས་ཏེ། དགེ་འདུན་ལ་ཕུལ་བ་ན་དགེ་འདུན་གྱིས་རྩོད་པ་སྤེད་པའི་གང་ཟག་གསོལ་བ་དང་གཉིས་ཀྱི་ལས་ཀྱི་བསྐོ་བའོ། །ཚུལ་ཤིང་འདྲིམ་པར་བྱེད་པ་དང༌། །ཞེས་བྱ་བས་ཀྱང་ལས་གཅིག་བསྟན་ཏེ། དགེ་འདུན་ལ་རྩོད་པ་བྱུང་བའི་ཚེ་ཚུལ་ཤིང་འདྲིམ་པའི་གང་ཟག་གསོལ་བ་དང་གཉིས་ཀྱི་ལས་ཀྱིས་བསྐོ་བའོ། །ཁང་པ་ཞེས་བྱ་བས་ཀྱང་ལས་གཅིག་བསྟན་ཏེ། དགེ་སློང་ཁང་པའི་གཞི་རུང་བ་བསྟན་པ་གསོལ་བ་ལ་གསོལ་བ་དང་གཉིས་ཀྱི་ལས་ཀྱིས་ཁར་བའི་གཞི་རུང་བ་བསྟན་པ་སྦྱིན་པའོ། །ཁང་ཆེན་བསྟན་པ་དང་ཞེས་བྱ་བས་ཀྱང་ལས་གཅིག་བསྟན་ཏེ། དགེ་སློང་གཙུག་ལག་ཁང་གི་གཞི་རུང་བ་བསྟན་པ་གསོལ་བ་ལ་གསོལ་བ་དང་གཉིས་ཀྱི་ལས་ཀྱིས་གཙུག་ལག་ཁང་གི་གཞི་རུང་བ་བསྟན་པ་སྦྱིན་པའོ། །གླེང་དང་ཞེས་བྱ་བས་ཀྱང་ལས་གཅིག་བསྟན་ཏེ། དགེ་སློང་ཁྱིམ་སུན་འབྱིན་པ་ལ་དགེ་སློང་
གི་ཆོས་མ་ཡིན་པ་རྣམ་པ་མང་པོ་གླེང་བས་གང་ཟག་གསོལ་བ་དང་གཉིས་ཀྱི་ལས་ཀྱིས་བསྐོ་བའོ། །འབྲལ་བར་མི་འགྱུར་དང་ཞེས་བྱ་བས་ཀྱང་ལས་གཅིག་བསྟན་ཏེ། རྒན་པོ་དང་ནད་པ་གསོལ་བ་དང་གཉིས་ཀྱི་ལས་ཀྱིས་ཆོས་གོས་སྣམ་སྦྱར་དང་བྲལ་བར་མི་འགྱུར་བའི་གནང་བ་སྦྱིན་པའོ། །སྟན་དང་ཞེས་བྱ་བས་ཀྱང་ལས་གཅིག་བསྟན་ཏེ། དགེ་སློང་ལག་གི་བླ་ལ་གསོལ་བ་དང་གཉིས་ཀྱི་ལས་ཀྱིས་ལོ་དྲུག་ཚུན་ཆད་དུ་སྟན་གནང་བ་སྦྱིན་པའོ། །ལྷུང་བཟེད་འདྲིམ་པ་དང་ཞེས་བྱ་བས་ཀྱང་ལས་གཅིག་བསྟན་ཏེ། ལྟུང་བཟེད་འབྲེལ་བ་མེད་པར་འདྲི་མ་བའི་གང་ཟག་གསོལ་བ་དང་གཉིས་ཀྱི་ལས་ཀྱིས་བསྐོ་བའོ། །མ་དད་གོ་བར་བྱ་བ་དང༌། །ཞེས་བྱ་བས་ཀྱང་ལས་གཅིག་བསྟན་ཏེ། དགེ་སློང་དང་དགེ་སློང་མ་སྐྱེ་བོ་ཕལ་པོ་ཆེ་མ་དད་པར་རིག་པར་འགྱུར་བ་དེ་ལྟར་ཁྱིམ་རྣམས་སུ་སྤྱོད་པ་དག་ཁྱིམ་རྣམས་སུ་སོ་སོར་གོ་བར་བྱེད་པའི་གང་ཟག་གསོལ་བ་དང་གཉིས་ཀྱི་ལས་ཀྱིས་བསྐོ་བའོ། །སྟོན་པ་དང་ནི་ཞེས་བྱ་བས་ཀྱང་ལས་གཅིག་བསྟན་ཏེ། དགེ་སློང་མའི་སྟོན་པ་གསོལ་བ་དང་གཉིས་ཀྱི་ལས་ཀྱིས་བསྐོ་བའོ། །ནགས་ཉུལ་དང་ཞེས་བྱ་བས་ཀྱང་ལས་གཅིག་བསྟན་ཏེ། སོ་སོར་བཤགས་པའི་ཉེས་པ་སྤང་བའི་ཕྱིར་གང་ཟག་ནགས་ཉུལ་བ་གསོལ་བ་དང་གཉིས་ཀྱི་ལས་ཀྱིས་བསྐོ་བའོ། །ཕྱག་མི་བྱ་བ་དང་ཞེས་བྱ་བས་ཀྱང་ལས་གཅིག་བསྟན་ཏེ། དགེ་སློང་དགེ་འདུན་གྱིས་གནས་ནས་ཕྱུང་བ་ལ་དགེ་སློང་མས་གསོལ་བ་དང་གཉིས་ཀྱི་ལས་ཀྱིས་ཕྱག་བྱ་པའི་འོས་མ་ཡིན་པའི་སྡོམ་པ་སྦྱིན་པའོ། །མང་ཕྱིར་དང་ཞེས་བྱ་བས་ནི་ལས་གཉིས་བསྟན་ཏེ། དགེ་སློང་མ་འཁོར་སྐྱོང་ནུས་པ་དང་ལོ་བཅུ་གཉིས་ལོན་པ་ལ་གསོལ་བ་དང་གཉིས་ཀྱི་ལས་ཀྱིས་འཁོར་དང༌། འཁོར་མང་པོ་ཉེ་བར་འཇོག་པའི་གནང་བ་སྦྱིན་པའོ། །འཁར་བ་ཞེས་བྱ་བས་ནི་ལས་གཅིག་བསྟན་ཏེ། དགེ་སློང་རྒན་པོ་དང་ན་བ་ལ་འཁར་བ་གནང་བ་གསོལ་བ་ལ་གསོལ་བ་དང་གཉིས་ཀྱི་ལས་ཀྱིས་འཁར་བའི་གནང་བ་སྦྱིན་པའོ། །དྲ་བའི་ཕྱིར་དང་ནི་ཞེས་བྱ་བས་ཀྱང་ལས་གཅིག་བསྟན་ཏེ། དགེ་སློང་རྒན་
པོ་དང་ན་པ་དྲ་བ་གནང་བ་གསོལ་བ་ལ་གསོལ་བ་དང་གཉིས་ཀྱི་ལས་ཀྱིས་དྲ་བ་གནང་བ་སྦྱིན་པའོ། རྙེད་པ་གཅིག་ཏུ་བྱ་ཕྱིར་དང༌། །ཞེས་བྱ་བས་ཀྱང་ལས་གཅིག་བསྟན་ཏེ། གཙུག་ལག་ཁང་མཚམས་ཐ་དད་པ་གཉིས་ཀྱི་རྙེད་པ་གཅིག་ཏུ་བྱ་བའི་ཕྱིར་གསོལ་བ་དང་གཉིས་ཀྱི་ཀྱི་ལས་བྱ་བའོ། །བསླབ་པ་བྱིན་དང་ཞེས་བྱ་བས་ཀྱང་ལས་གཅིག་བསྟན་ཏེ། དགེ་སློང་མའི་བསླབ་པའི་སྡོམ་པ་གསོལ་བ་ལ་གསོལ་བ་དང་གཉིས་ཀྱི་ལས་ཀྱིས་དགེ་སློང་མའི་བསླབ་པ་སྦྱིན་པའོ། །ཉེར་གནས་དང་ཞེས་བྱ་བས་ཀྱང་ལས་གཅིག་བསྟན་ཏེ། དགེ་སློབ་མ་བསྙེན་བར་རྫོགས་པར་བྱ་བའི་སྐབས་སུ་གསོལ་བ་དང་གཉིས་ཀྱི་ལས་ཀྱིས་ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་སྦྱིན་པའོ། །བུ་དང་ཞེས་བྱ་བས་ཀྱང་ལས་གཅིག་བསྟན་ཏེ། དགེ་སློང་མ་གསོལ་བ་དང་གཉིས་ཀྱི་ལས་ཀྱིས་བུ་དང་ལྷན་ཅིག་ཁྱིམ་གཅིག་ན་ཉལ་བའི་གནང་བ་སྦྱིན་པའོ། །ཉེ་དུ་དང་ཞེས་བྱ་བས་ཀྱང་ལས་གཅིག་བསྟན་ཏེ། དགེ་སློང་མ་མུ་གེའི་སྡུག་བསྔལ་བྱུང་བའི་ཚེ་གསོལ་བ་དང་གཉིས་ཀྱི་ལས་ཀྱིས་ཉེ་དུ་རྣམས་དང་ལྷན་ཅིག་འབྲེལ་བའི་ཉེ་བར་སྤྱོད་པ་གནང་བ་སྦྱིན་པའོ། །ཕྱིར་འགྲོ་དང་ཞེས་བྱ་བས་ཀྱང་ལས་གཅིག་བསྟན་ཏེ། དབྱར་གནས་པར་ཁས་བླངས་པ་དགེ་འདུན་གྱི་ཆེད་ལ་མཚམས་ཀྱི་ཕྱི་རོལ་དུ་འགྲོ་བ་ལ་གསོལ་བ་དང་གཉིས་ཀྱི་ལས་ཀྱིས་ཞག་བཞི་བཅུ་མཚམས་ཀྱི་ཕྱི་རོལ་དུ་འགྲོ་བའི་གནང་བ་སྦྱིན་པ་སྟེ། ལས་བཞི་བཅུ་རྩ་བདུན་པོ་ཇི་སྐད་བསྟན་པ་དེ་དག་ནི་གསོལ་བ་དང་གཉིས་ཀྱི་ལས་ཡིན་ནོ། །བསྙེན་པར་རྫོགས་པར་བྱ་བ་དང་ཞེས་བྱ་བས་ནི་ལས་གཅིག་བསྟན་ཏེ། དགེ་སློང་དང་དགེ་སློང་མ་གསོལ་བ་དང་བཞིའི་ལས་ཀྱིས་བསྙེན་པར་རྫོགས་པར་བྱ་བའོ། །མུ་སྟེགས་གནས་དང་ཞེས་བྱ་བས་ཀྱང་ལས་གཅིག་བསྟན་ཏེ། མུ་སྟེགས་ཅན་རབ་ཏུ་འབྱུང་བར་འདོད་པ་ལ་གསོལ་བ་དང་བཞིའི་ལས་ཀྱིས་ཟླ་བ་བཞིའི་བར་དུ་མཁན་པོས་སྦྱར་བའི་གོས་ཀྱི་གནས་པ་སྦྱིན་པའོ། །མཚམས་དགྲོལ་དང་ཞེས་བྱ་བས་ཀྱང་ལས་གཅིག་བསྟན་ཏེ། དཀྱིལ་འཁོར་པ་དང་མཚམས་ཆེན་པོའི་མཚམས་བཅད་པ་ལ་གསོལ་བ་དང་བཞིའི་
ལས་ཀྱིས་དགྲོལ་བའོ། །མཐུན་སྦྱིན་ཞེས་བྱ་བས་ཀྱང་ལས་གཅིག་བསྟན་ཏེ། གནས་ནས་ཕྱུང་བ་བཟོད་པའི་ལས་བྱ་བ་ལ་གསོལ་བ་དང་བཞིའི་ལས་ཀྱིས་མཐུན་པ་སྦྱིན་པའོ། །གསོ་སྦྱོང་ཞེས་བྱ་བས་ཀྱང་ལས་གཅིག་བསྟན་ཏེ། མཐུན་པ་སྦྱིན་པ་ལ་གསོལ་བ་དང༌། བཞིའི་ལས་ཀྱིས་མཐུན་པའི་གསོ་སྦྱོང་སྦྱིན་པའོ། །བདུན་པོ་དང་ཞེས་བྱ་བས་ནི་ལས་གཉིས་བསྟན་ཏེ། ནན་ཐུར་གྱི་ལས་བདུན་པོས་བསྡིགས་པ་དང༌། སྨད་པ་དང༌། བསྐྲད་པ་དང༌། ཕྱིར་འགྱེད་པ་དང༌། མ་མཐོང་བ་དང༌། ཕྱིར་མི་འཆོས་པ་དང༌། སྡིག་པ་ཅན་གྱི་ལྟ་བའི་རྣམ་པ་མི་གཏོང་བས་གནས་ནས་དབྱུང་བ་དང༌། གསོ་སྦྱོང་གཞག་པ་དང༌། དགག་དབྱེ་གཞག་པར་བྱ་བ་དག་ལ་གསོལ་བ་དང་བཞིའི་ལས་བྱ་བ་དང༌། གནས་ནས་ཕྱུང་བ་དེ་དག་ལ་བཟོད་པ་བྱ་བ་ལ་གསོལ་བ་དང་བཞིའི་ལས་བྱ་བའོ། །བརྒྱད་དང་ཞེས་བྱ་བས་ནི་ལས་བརྒྱད་བསྟན་ཏེ། སྤོ་བ་དང་མགུ་བར་བྱ་བ་དང་གཞི་ནས་སྤོ་བ་དང་གཞི་ནས་མགུ་བར་བྱ་བ་དང༌། ཡང་གཞི་ནས་བསླངས་ཏེ་སྤོ་བ་དང༌། ཡང་གཞི་ནས་བསླངས་ཏེ་མགུ་བར་བྱ་བ་དག་དང༌། དགེ་འདུན་ལྷག་མ་ལས་དབྱུང་བ་དང༌། སྲ་བརྐྱང་དབྱུང་བདག་ལ་གསོལ་བ་དང་བཞིའི་ལས་བྱ་བའོ། །དྲན་དང་ཞེས་བྱ་བས་ནི་ལས་གཅིག་བསྟན་ཏེ། དྲན་པས་འདུལ་བར་འོས་པ་ལ་གསོལ་བ་དང་བཞིའི་ལས་ཀྱིས་དྲན་བས་འདུལ་བ་སྦྱིན་པའོ། །མ་མྱོས་དང་ཞེས་བྱ་བས་ཀྱང་ལས་གཅིག་བསྟན་ཏེ། མ་མྱོས་པས་འདུལ་བར་འོས་པ་ལ་གསོལ་བ་དང་བཞིའི་ལས་ཀྱིས་མ་མྱོས་པས་འདུལ་བ་སྦྱིན་པའོ། །དེ་ཉིད་ཚོལ་དུ་གཞུག་པ་དང་ཞེས་བྱ་བས་ཀྱང་ལས་གཅིག་བསྟན་ཏེ། དེའི་ངོ་བོ་ཉིད་ཚོལ་དུ་གཞུག་པར་འོས་པ་ལ་གསོལ་བ་དང་བཞིའི་ལས་ཀྱིས་དེའི་ངོ་བོ་ཉིད་ཚོལ་དུ་གཞུག་པ་སྦྱིན་པའོ། །བསྒོ་བར་བྱ་བ་རྣམས་དང་ནི། །ཞེས་བྱ་བས་ཀྱང་བཟློག་པའི་ཕྱིར་བསྒོ་བར་བྱ་བའི་ལས་བཅུ་དང༌། བསྙིལ་བའི་ལས་གཅིག་བསྟན་ཏེ། དགེ་འདུན་གྱི་དབྱེན་བྱེད་པ་དང༌། དེའི་རྗེས་སུ་ཕྱོགས་པ་དང༌། ཁྱིམ་སུན་འབྱིན་པ་དང༌། བཀའ་བློ་མི་བདེ་བ་དང༌། དགེ་སློང་དང་དགེ་ཚུལ་
སྡིག་པ་ཅན་གྱི་ལྟ་བའི་རྣམ་པ་མི་གཏོང་བ་དང༌། གནས་ནས་ཕྱུང་བའི་རྗེས་སུ་ཕྱོགས་པའི་དགེ་སློང་མ་དང༌། དགེ་སློང་མ་དཀོན་མཆོག་གཏོང་བ་དང༌། འཐབ་ཀྲོལ་བྱེད་པ་དང༌། སྡེ་ཞིང་གནས་པ་དང༌། སྡེ་ཞིང་གནས་སུ་འཇུག་པ་དང༌། དགེ་ཚུལ་སྡིག་པ་ཅན་གྱི་ལྟ་བའི་རྣམ་པ་མི་གཏོང་བ་བསྙིལ་བ་དག་ལ་གསོལ་བ་དང་བཞིའི་ལས་བྱ་བའོ། །ཉམས་པ་སྦྱིན་པར་བྱ་བ་ནི། །ཞེས་བྱ་བས་ནི་ལས་གཅིག་བསྟན་ཏེ། ཕམ་པར་འགྱུར་བའི་ལྟུང་བ་བྱུང་བ་ལ་གསོལ་བ་དང་བཞིའི་ལས་ཀྱིས་བསླབ་པ་སྦྱིན་པ་སྟེ། ལས་སུམ་ཅུ་པོ་ཇི་སྐད་བསྟན་པ་དེ་དག་ནི་གསོལ་བ་དང་བཞིའི་ལས་ཡིན་ནོ། །ལས་རྣམ་པར་གཞག་པའི་སྐབས་ཀྱི་རྣམ་པར་དབྱེ་བ་ཇི་སྐད་བསྟན་པ་དེ་དག་ནི་སློབ་དཔོན་བཙུན་པ་ཡོན་ཏན་འོད་ཀྱིས་ཉེ་བར་སྦྱར་བའི་ལུགས་བཞིན་ནོ། །ལས་རྣམ་པར་གཞག་པའི་སྐབས་ཀྱི་རྣམ་པར་དབྱེ་བ་སློབ་དཔོན་དུལ་བའི་ལྷས་ཉེ་བར་སྦྱར་བའི་ལུགས་ནི་མདོ་འདི་གསུམ་ཡིན་ཏེ། ཆད་པ་དང་བསྒོ་བ་དང་རྩོད་པ་ཞི་པར་བྱ་བ་དང༌། ས་གོང་མར་སྤོ་བ་དང་དགེ་འདུན་ལ་མ་ཁོ་བ་རྣམས་པར་གཞག་པ་དབྱུང་བ་དག་ལ་ནི་གསོལ་བ་བརྗོད་པ་གསུམ་དང་བཅས་པའོ། །བསྐོ་བ་དང་རབ་ཏུ་བྱུང་བ་ལ་མཁོ་བ་རྣམ་པར་གཞག་པའི་བྱ་བ་དག་ལ་ནི་བརྗོད་པ་གཅིག་དང་བཅས་པའོ། །རྗེས་སུ་གནང་བ་དང༌། དགེ་འདུན་གྱིས་བྱིན་གྱིས་བརླབས་པ་དང༌། སྦྱིན་པ་དང༌། རང་གི་དོན་ལ་སྦྱར་བ་དང༌། བགྲང་བ་དང༌། ཁྱིམ་པའི་དོན་རྣམ་པར་གཞག་པ་བྱ་བ་དང་དབྱུང་བདག་ལ་ནི་འབའ་ཞིག་གོ །དེ་ལ་ཆད་པ་ཞེས་བྱ་བས་ནི། ཆད་པས་བཅད་པའི་ལས་བཅུ་གསུམ་བསྟན་ཏེ། དེ་བསླབ་པ་སྦྱིན་པ་ཉིད་དང་བསྙིལ་བ་ཉིད་དང༌། དེའི་ངོ་བོ་ཉིད་ཚོལ་དུ་གཞུག་པ་སྦྱིན་པ་དང༌། མུ་སྟེགས་ཅན་གནས་པ་སྦྱིན་པ་དང༌། དེ་ལས་གཞན་པའི་སྤོ་བ་སྦྱིན་པ་དང༌། མགུ་བར་བྱ་བ་སྦྱིན་པ་དང༌། གཞི་ནས་སྤོ་བ་སྦྱིན་པ་དང༌། གཞི་ནས་མགུ་བར་བྱ་བ་སྦྱིན་པ་དང༌། ཡང་གཞི་ནས་བསླངས་ཏེ་སྤོ་བ་སྦྱིན་པ་དང༌། ཡང་གཞི་ནས་བསླངས་ཏེ་མགུ་བར་བྱ་བ་སྦྱིན་པ་དང༌། དྲན་པས་འདུལ་བ་སྦྱིན་པ་དང༌། མ་མྱོས་
པས་འདུལ་བ་སྦྱིན་པ་དང༌། སྡིག་པ་ཅན་གྱི་ལྟ་བའི་རྣམ་པ་ལ་སོགས་པ་སྤང་པའི་ཕྱིར་ནན་ཐུར་གྱི་ལས་བདུན་པོ་དག་གོ །བསྒོ་བ་ཞེས་བྱ་བས་ནི་བཟློག་པའི་ཕྱིར་བསྒོ་པའི་ལས་བཅུ་བསྟན་ཏེ། དགེ་འདུན་གྱི་དབྱེན་བྱེད་པ་དང༌། དེའི་རྗེས་སུ་ཕྱོགས་པ་དང༌། ཁྱིམ་སུན་འབྱིན་པ་དང༌། བཀའ་བློ་མི་བདེ་བ་དང༌། དགེ་སློང་དང་དགེ་ཚུལ་སྡིག་པ་ཅན་གྱི་ལྟ་བའི་རྣམ་པ་མི་གཏོང་བ་དང༌། གནས་ནས་ཕྱུང་བའི་རྗེས་སུ་ཕྱོགས་པའི་དགེ་སློང་མ་དང་དཀོན་མཆོག་གཏོང་བ་དང༌། འཐབ་ཀྲོལ་བྱེད་པ་དང༌། སྡེ་ཞིང་གནས་པ་དང༌། སྡེ་ཞིང་གནས་སུ་འཇུག་པ་ཞེས་བྱ་བ་དག་གོ །རྩོད་པ་ཞི་བར་བྱ་བ་ཞེས་བྱ་བས་ནི། རྩོད་པ་ཞི་པར་བྱ་བའི་ལས་གཉིས་བསྟན་ཏེ། མཐུན་པ་སྦྱིན་པ་དང་མཐུན་པའི་གསོ་སྦྱོང་སྦྱིན་པ་ཞེས་བྱ་བའོ། །ས་གོང་མར་སྤོ་བ་ཞེས་བྱ་བས་ནི། ས་ཁྱད་པར་དུ་འཕགས་པ་གོང་མར་སྤོ་བའི་ལས་གསུམ་བསྟན་ཏེ། བསྙེན་པར་རྫོགས་པར་བྱ་བ་དང༌། དབྱུང་བ་དང༌། བཟོད་པར་བྱ་བ་ཞེས་བྱ་བ་དག་གོ །དགེ་འདུན་ལས་མཁོ་བ་རྣམ་པར་གཞག་པ་དབྱུང་བ་ཞེས་བྱ་བས་ནི། དགེ་འདུན་ལ་མཁོ་བའི་རྣམ་པར་གཞག་པ་བྱས་པ་དབྱུང་བའི་ལས་གཉིས་བསྟན་ཏེ། མཚམས་དགྲོལ་བ་དང༌། སྲ་བརྐྱང་དབྱུང་བ་ཞེས་བྱ་བའོ། །གསོལ་བ་བརྗོད་པ་གསུམ་དང་བཅས་པའོ་ཞེས་བྱ་བས་ནི། གསོལ་བ་ལས་བརྗོད་པ་གསུམ་དང་བཅས་པ་སྟེ། གསོལ་བ་དང་བཞིའི་ལས་ཞེས་བྱ་བའི་ཐ་ཚིག་གོ །དེ་ལ་ནན་ཐུར་གྱི་ལས་བདུན་པོ་དག་ནི་ཚུལ་གཅིག་པའི་ཕྱིར་ལས་གཅིག་ཏུ་བགྲང་ངོ༌། །བཟོད་པ་བྱ་བའི་ལས་དག་ཀྱང་ཚུལ་གཅིག་བའི་ཕྱིར་ལས་གཅིག་ཏུ་བགྲང་སྟེ། དེ་ལྟར་ལས་སུམ་ཅུ་པོ་དེ་དག་ནི་གསོལ་བ་དང་བཞིའི་ལས་ཡིན་པར་ཤེས་པར་བྱའོ། །དེ་དག་ནི་འབད་པ་ཆེན་པོས་བྱ་དགོས་པས་འདིར་མགོ་གཅིག་ཏུ་གསུངས་སོ། །བསྐོ་བ་ཞེས་བྱ་བས་ནི། བསྐོ་བ་དང་བློ་མཐུན་པར་བྱ་བའི་ལས་སུམ་ཅུ་རྩ་གཅིག་བསྟན་ཏེ། སྦོང་བའི་ཞལ་ཏ་བྱེད་པ་བསྐོ་བ་དང༌། ལག་གི་བླ་དང་ལག་དཔོན་བསྐོ་བ་དང༌། དགག་དབྱེ་བྱེད་པ་
བསྐོ་བ་དང༌། གནས་མལ་སྟོབས་པ་བསྐོ་བ་དང༌། རུང་བའི་ཁང་པ་ལ་བློ་མཐུན་པར་བྱ་བ་དང༌། གསོ་སྦྱོང་གི་གནས་ལ་བློ་མཐུན་བར་བྱ་བ་དང༌། སྲ་བརྐྱང་འདིང་བར་བསྐོ་བ་དང༌། སྲ་བརྐྱང་ལ་བློ་མཐུན་པར་བྱ་བ་དང༌། གནས་ཁང་བསྐོ་བ་བསྐོ་བ་དང༌། ཟས་ལ་བསྐོ་བ་བསྐོ་བ་དང༌། ཐུག་པ་འདྲིམ་པ་བསྐོ་བ་དང༌། བག་ཆོས་འདྲིམ་པ་བསྐོ་བ་དང༌། ཕྲན་ཚོགས་འདྲིམ་པ་བསྐོ་བ་དང༌། སྣོད་སྤྱད་འབྲུབ་བར་བསྐོ་བ་དང༌། གོས་སྦེད་པ་བསྐོ་བ་དང༌། ཆོས་གོས་འགེད་པ་བསྐོ་བ་དང༌། དབྱར་གྱི་རས་ཆེན་སྤེད་པ་བསྐོ་བ་དང༌། དབྱར་གྱི་རས་ཆེན་འགྱེད་པ་བསྐོ་བ་དང༌། མངག་གཞུག་པ་བསྐོ་བ་དང༌། མཛེས་ཆོས་བསྐོ་བ་དང༌། གཟུ་བོ་བསྐོ་བ་དང༌། གསལ་བ་དང་གསལ་བའི་གང་ཟག་གསལ་བ་བསྐོ་བ་དང༌། རྩོད་པ་སྦེད་པ་བསྐོ་བ་དང༌། ཁང་པ་བསྟན་པ་དང༌། གཙུག་ལག་ཁང་བསྟན་པ་དང༌། གླེང་བ་བསྐོ་བ་དང། ལྟུང་བཟེད་འབྲེལ་བ་མེད་པ་འདྲིམ་པར་བསྐོ་བ་དང༌། གནས་ངན་ལེན་བརྗོད་པ་བསྐོ་བ་དང༌། དགེ་སློང་མའི་སྟོན་པ་བསྐོ་བ་དང༌། ནགས་ཉུལ་བ་བསྐོ་བ་དང༌། ཚུལ་ཤིང་འདྲིམ་པ་བསྐོ་བ་དག་གོ །རབ་ཏུ་བྱུང་བ་ལ་མཁོ་བ་རྣམ་པར་གཞག་པའི་བྱ་བ་ཞེས་བྱ་བས་ནི། རབ་ཏུ་བྱུང་བ་ལ་མཁོ་བ་རྣམ་པར་གཞག་པའི་བྱ་བ་བཅུ་དྲུག་བསྟན་ཏེ། དཀྱིལ་འཁོར་བའི་མཚམས་དང༌། མཚམས་ཆེན་པོ་དང་མཚམས་བུ་ཆུང་བཅད་པ་དང༌། ཆོས་གོས་དང་མི་འབྲལ་བའི་གནང་བ་སྦྱིན་པ་དང༌། མྱོས་པའི་གནང་བ་སྦྱིན་པ་དང་སྣམ་སྦྱར་དང་མི་འབྲལ་བའི་གནང་བ་སྦྱིན་པ་དང༌། སྟན་གྱི་གནང་བ་སྦྱིན་པ་དང༌། ཕྱག་མི་བྱ་བའི་སྡོམ་པ་སྦྱིན་པ་དང༌། འཁོར་ཉེ་བར་འཇོག་པའི་གནང་བ་སྦྱིན་པ་དང༌། འཁོར་མང་པོ་ཉེ་བར་འཇོག་པའི་གནང་བ་སྦྱིན་པ་དང༌། འཁོར་བའི་གནང་བ་སྦྱིན་པ་དང༌། དྲ་བའི་གནང་བ་སྦྱིན་པ་དང༌། རྙེད་པ་གཅིག་ཏུ་བྱ་བའི་གནང་བ་སྦྱིན་པ་དང༌། བསླབ་པའི་སྡོམ་པ་སྦྱིན་པ་དང༌། ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་སྦྱིན་པ་དང༌། བུ་དང་ལྷན་ཅིག་ཉལ་བའི་གནང་བ་སྦྱིན་པ་དང༌། ཉེ་དུ་རྣམས་དང་ལྷན་ཅིག་འབྲེལ་བའི་ཉེ་བར་སྤྱོད་པ་གནང་བ་སྦྱིན་
བ་དང། མཚམས་ཀྱི་ཕྱི་རོལ་དུ་འགྲོ་བའི་གནང་བ་སྦྱིན་པ་དག་གོ །བརྗོད་པ་གཅིག་དང་བཅས་པའོ། །ཞེས་བྱ་བས་ནི་གསོལ་བ་ལས་བརྗོད་པ་གཅིག་དང་བཅས་པ་སྟེ། གསོལ་བ་དང་གཉིས་ཀྱི་ལས་ཞེས་བྱ་བའི་ཐ་ཚིག་གོ །དེ་ལ་ལག་གི་བླ་བསྐོ་བ་དང། ལག་དཔོན་བསྐོ་བ་གཉིས་ནི་ཚུལ་གཅིག་པའི་ཕྱིར་ལས་གཅིག་པར་བགྲང་ངོ༌། །གསལ་བ་བསྐོ་བ་དང༌། གསལ་པའི་ཡང་གསལ་བ་བསྐོ་བ་གཉིས་ཀྱང་ཚུལ་གཅིག་པའི་ཕྱིར་ལས་གཅིག་ཏུ་བགྲང་ངོ༌། །དཀྱིལ་འཁོར་བའི་མཚམས་བཅད་བ་དང༌། མཚམས་ཆེན་པོ་བཅད་པ་ལས་གསུམ་ཡང་ཚུལ་གཅིག་པའི་ཕྱིར་ལས་གཅིག་ཏུ་བགྲང་སྟེ། དེ་ལྟར་ལས་བཞི་བཅུ་རྩ་བདུན་པོ་དེ་དག་ནི་གསོལ་པ་དང་གཉིས་ཀྱི་ལས་ཡིན་པར་ཤེས་པར་བྱའོ། །དེ་དག་ནི་འབད་པ་འབྲིང་པོས་བྱ་དགོས་པས་འདིར་མགོ་གཅིག་ཏུ་གསུངས་སོ། །རྗེས་སུ་གནང་བ་ཞེས་བྱ་བས་ནི། རྗེས་སུ་གནང་བའི་ལས་བཞི་བསྟན་ཏེ། གསང་སྟེ་དྲི་བ་དང༌། ནང་དུ་དྲི་བ་དང༌། གསོ་སྦྱོང་བྱ་བ་དང༌། དགག་དབྱེ་བྱ་བ་རྗེས་སུ་གནང་བའོ། །དགེ་འདུན་གྱིས་བྱིན་གྱིས་བརླབས་པ་ཞེས་བྱ་བས་ནི། དགེ་འདུན་གྱིས་བྱིན་གྱིས་བརླབས་པའི་ལས་དགུ་བསྟན་ཏེ། གསོ་སྦྱོང་གི་ཚེ་དགེ་འདུན་ལྟུང་བ་དང་བཅས་པ་དང་ཡིད་གཉིས་དང་བཅས་པ་དང༌། རྩོད་བར་གྱུར་པ་དང༌། ངེས་པ་ཉིད་མ་ཡིན་པར་གྱུར་པ་དང༌། དགག་དབྱེའི་ཚེ་དགེ་འདུན་ལྟུང་བ་དང་བཅས་པ་དང༌། ཡིད་གཉིས་དང་བཅས་པ་དང༌། རྩོད་བར་གྱུར་པ་དང༌། ངེས་པ་ཉིད་མ་ཡིན་པར་གྱུར་པ་དང༌། ཤི་བའི་རྫས་དང་ནོར་དང་འདྲ་བ་བྱིན་གྱིས་བརླབ་པའོ། །སྦྱིན་པ་ཞེས་བྱ་བས་ནི། དགེ་འདུན་གྱི་ཆོས་གོས་སྦྱིན་པའི་ལས་གཅིག་བསྟན་ཏེ། དགེ་འདུན་གྱིས་སྲ་བརྐྱང་འདིང་བ་ལ་སྲ་བརྐྱང་གཏད་པ་དང༌། ཆོས་གོས་ངན་པ་ལ་རས་ཡུག་ཆེན་སྦྱིན་པའོ། །རང་གི་དོན་ལ་སྦྱར་བ་ཞེས་བྱ་བས་ནི། རང་གི་དོན་ལ་སྦྱར་བའི་ལས་གཉིས་བསྟན་ཏེ། གནས་ངན་ལེན་བརྗོད་པ་དང༌། ཚུལ་ཤིང་བླང་པ་དང༌། དབྱར་གནས་པར་ཁས་བླང་བ་ལ་སྦྱར་རོ། །བགྲང་བ་ཞེས་བྱ་བས་ནི། གྲངས་སུ་གཞུག་
པ་བཞི་བསྟན་ཏེ། དོར་འཕྱ་བའི་གྲངས་སུ་གཞུག་པ་དང༌། གཞོགས་འཕྱས་བྱེད་པའི་གྲངས་སུ་གཞུག་པ་དང༌། བསྒོ་བ་རྣ་ལ་གཟོན་པའི་གྲངས་སུ་གཞུག་པ་དང༌། ཅང་མི་སྨྲ་བའི་རྣལ་གཟོན་པའི་གྲངས་སུ་གཞུག་པའོ། །ཁྱིམ་པའི་དོན་རྣམ་པར་གཞག་པར་བྱ་བ་ཞེས་བྱ་བས་ནི་ཁྱིམ་པ་བསྲུང་བའི་དོན་དང༌། ལམ་བཟང་བོར་གཞག་པའི་དོན་རྣམ་པར་གཞག་པའི་ལས་གཉིས་བསྟན་ཏེ། ཁྱིམ་གྱི་སྡོམ་པ་སྦྱིན་པ་དང་ལྷུང་བཟེད་ཁས་དབུབ་པར་བྱ་བའོ། །དབྱུང་བ་ཞེས་བྱ་བས་ནི་ཁྱིམ་གྱི་དོན་རྣམ་པར་གཞག་པར་བྱས་པ་དབྱུང་བའི་ལས་གཉིས་བསྟན་ཏེ། ཁྱིམ་གྱི་སྡོམ་པ་གཞིག་པ་དང༌། ལྟུང་བཟེད་ཁས་ཕུབ་པ་བཟློག་བར་བྱ་བའོ། །འབའ་ཞིག་གོ་ཞེས་བྱ་བས་ནི། ལས་བརྗོད་པ་མེད་པ་སྟེ་གསོལ་བ་འབའ་ཞིག་གི་ལས་ཞེས་བྱ་བའི་ཐ་ཚིག་གོ །ད་ལ་ཤི་བའི་རྫས་བྱིན་གྱིས་བརླབ་པ་དང་ནོར་དང་འདྲ་བ་བྱིན་གྱིས་བརླབ་པ་གཉིས་ནི་ཚུལ་གཅིག་པའི་ཕྱིར་ལས་གཅིག་ཏུ་བགྲང་ངོ༌། །སྲ་བརྒྱང་གཏད་པ་དང་རས་ཡུག་ཆེན་སྦྱིན་པ་གཉིས་ཀྱང་ཚུལ་གཅིག་པའི་ཕྱིར་ལས་གཅིག་ཏུ་བགྲང་ངོ༌། །ཚུལ་ཤིང་བྲིམ་བ་དང་དབྱར་གནས་པར་ཁས་བླང་བ་ལ་སྦྱོར་བ་གཉིས་ཀྱང་ཚུལ་གཅིག་པའི་ཕྱིར་ལས་གཅིག་ཏུ་བགྲང་སྟེ། དེ་ལྟར་ལས་ཉི་ཤུ་རྩ་བཞི་བོ་དེ་དག་ནི་གསོལ་བ་འབའ་ཞིག་གི་ལས་ཡིན་པར་ཤེས་པར་བྱའོ། །དེ་དག་ནི་དགེ་འདུན་ལ་གོ་བར་བྱ་བ་ཙམ་དུ་ཟད་པས་འབད་པ་ཆུང་དུས་ཀྱང་འགྲུབ་པའི་ཕྱིར་འདིར་མགོ་གཅིག་ཏུ་གསུངས་སོ།། །།བམ་པོ་དྲུག་ཅུ་པ། ལྷག་པོར་མ་གཏོགས་པ་རང་གི་དོན་གྱི་སྔགས་བརྗོད་པ་ཡང་ངོ་ཞེས་བྱ་བ་ཡང༌། བརྗོད་པ་གསུམ་མོ་ཞེས་བྱ་བར་སྦྱར་ཏེ། ལྷག་པོར་བྱ་བར་གསོལ་བ་མ་གཏོགས་པར་རང་གི་དོན་གྱི་སྔགས་བརྗོད་པ་གང་ཡིན་པ་དེ་ཡང་ལན་གསུམ་བརྗོད་པར་བྱ་བའོ། །འདི་ལྟ་སྟེ། ཁར་བ་དང་དྲ་བ་ལ་སོགས་པ་གསོལ་བ་གང་དག་ཡིན་པ་དང༌། ཆོས་གོས་ལ་སོགས་པ་བྱིན་གྱིས་བརླབ་པ་གང་དག་ཡིན་པ་དང༌། སྐྱབས་སུ་འགྲོ་བ་དང༌། རབ་ཏུ་འབྱུང་བ་དང༌། སྡོམ་པ་ནོད་
པ་གང་དག་ཡིན་པ་དང༌། མཆོད་རྟེན་ལ་ཕྱག་བྱ་བ་དང༌། བདུག་པ་བསྲེག་པ་ལ་སོགས་པ་ཡང་དག་པར་བླང་བ་གང་དག་ཡིན་པ་དང༌། ལྷུང་བ་བཤགས་པ་དང༌། གསོ་སྦྱོང་དང་དགག་དབྱེ་དག་དང༌། གནས་པར་ཁས་བླང་པ་དང༌། མཚམས་ཀྱི་ཕྱི་རོལ་དུ་མི་འབྲལ་བར་བྱ་བའི་ཕྱིར་ཞག་གཅིག་ལ་སོགས་པ་བྱིན་གྱིས་བརླབ་པ་དང༌། ཡང་དག་པར་བླང་བ་གཞན་དག་དང༌། འདུན་པ་དང༌། ཡོངས་སུ་དག་པ་དག་དབུལ་བ་དང་དགག་དབྱེ་དབུལ་བ་དང་དགག་དབྱེ་རིག་པར་བྱ་བ་ལ་སོགས་པའི་སྔགས་བརྗོད་པ་གང་དག་ཡིན་བདེ་དག་ཐམས་ཅད་ནི་ལན་གསུམ་བཟླས་པར་བྱའོ་ཞེས་བྱ་བའི་ཐ་ཚིག་གོ །ལྷག་པོར་མ་གཏོགས་པར་སྨོས་པ་ནི་འབྲས་བུ་ཆུང་བས་ལན་ཅིག་གསོལ་བས་ཀྱང་འགྲུབ་པས་དེ་ལ་ནི་ལན་གསུམ་བརྗོད་མི་དགོས་སོ། །གཞན་གྱི་དོན་དུ་གང་ཟག་ལ་ཡང་ངོ་ཞེས་བྱ་བ་ནི། གཞན་གྱི་དོན་དུ་སྔགས་གང་ཟག་ལ་བརྗོད་པ་གང་ཡིན་པ་དེ་ལ་ཡང་ལན་གསུམ་ཁོ་ན་བརྗོད་པར་བྱ་བ་སྟེ། དེས་ན་གཞན་གྱི་དོན་དུ་དགེ་འདུན་ལ་བརྗོད་པ་ནི་ལན་ཅིག་ཁོ་ནས་ཆོག་གོ་ཞེས་བྱ་བའི་ཐ་ཚིག་གོ །འདི་ལྟ་སྟེ། འདུན་པ་དང༌། ཡོངས་སུ་དག་པ་དང་དགག་དབྱེ་བརྗོད་པ་དག་དགེ་སློང་ལ་བརྗོད་པར་བྱ་བའོ་ཞེས་བྱ་བའི་ཕྱོགས་ལ་ནི་ལན་གསུམ་བརྗོད་པར་བྱའོ། །དགེ་འདུན་ལ་བརྗོད་པར་བྱའོ་ཞེས་བྱ་བའི་ཕྱོགས་ལ་ནི་ལན་ཅིག་བརྗོད་པར་བྱ་སྟེ། གང་ཟག་ལ་ཞེས་སྨོས་པའི་ཕྱིར་རོ། །ལྷག་པོར་ཡང་མདུན་དུ་ཙོག་ཕུར་འདུག་སྟེའོ་ཞེས་བྱ་བ་ནི། རང་གི་དོན་གྱི་སྔགས་གང་ཟག་ལ་བརྗོད་པ་དང༌། གཞན་གྱི་དོན་དུ་སྔགས་གང་ཟག་ལ་བརྗོད་པ་རྣམ་པ་གཉིས་དང༌། ལྷག་པོར་བྱ་བའི་སྔགས་བརྗོད་བ་གང་ཡིན་པ་དེ་ཡང་གང་ཟག་གི་མདུན་དུ་ཙོག་པུར་འདུག་སྟེ་བརྗོད་པར་བྱའི་གཞན་གྱིས་ནི་མ་ཡིན་ནོ། །དགེ་འདུན་ལ་རག་ལས་པའི་རང་གི་དོན་གྱི་སྔགས་བརྗོད་པ་ནི་པ་གཏོགས་སོ། །ཞུ་བ་ཡང་ངོ་ཞེས་བྱ་བ་ནི། འདི་རབ་ཏུ་འབྱུང་ངམ་ཞེས་དགེ་སློང་གིས་དགེ་འདུན་ལ་ཞུ་བར་བྱེད་པ་ན། རབ་ཏུ་བྱུང་པར་འདོད་པའི་དགེ་བསྙེན་དེས་ཀྱང་རྒན་པའི་
མཐའ་ལོགས་སུ་ཙོག་པུས་འདུག་པར་བྱ་བའོ། །བསྙེན་པར་རྫོགས་པར་བྱེད་པ་ན་གསང་སྟེ་བསྟེན་པ་མ་གཏོགས་པ་ཕ་གུ་ལ་རྟིང་པ་གཉིས་ཀྱིས་སོ་ཞེས་བྱ་བ་ནི། བསྙེན་པར་རྫོགས་པའི་ལས་བྱེད་པ་ན་གསང་སྟེ་སྟོན་པའི་སློབ་དཔོན་གྱིས་གསང་སྟེ་བར་ཆད་ཀྱི་ཆོས་བསྟན་པའི་སྐབས་ཉི་ཚེ་མ་གཏོགས་པ། མཁན་པོར་གསོལ་བ་དང༌། བསྙེན་པར་རྫོགས་པར་གསོལ་པ་དང༌། ལས་ཀྱི་སློབ་དཔོན་གྱིས་བར་ཆད་དྲི་བ་མཉན་པ་དང༌། དེའི་ལན་འདེབས་པ་དང༌། བསྙེན་པར་རྫོགས་པར་བྱ་བ་ལ་སོགས་པའི་སྐབས་ཐམས་ཅད་དུ་བསྙེན་པར་རྫོགས་པར་བྱ་བའི་གང་ཟག་དེ་ཕ་གུའི་སྟེང་དུ་རྟིང་བ་གཉིས་ཀྱིས་འདུག་ཏུ་གཞུག་པར་བྱའོ། །ཆོས་གོས་དང་ལྷུང་བཟེད་བྱིན་གྱིས་བརླབ་པ་ནི་སྔར་བྱས་ཟིན་པས་དེ་ལ་ནི་ཆོ་ག་འདི་ཐལ་བར་མི་འགྱུར་རོ། །འདིར་ཕ་གུ་ཞེས་བྱ་བ་ནི་བོང་བ་ཡིན་པར་ཤེས་པར་བྱའོ། །བུད་མེད་ནི་སྟན་ནང་ཚངས་ཅན་ལ་སོགས་པའོ་ཞེས་བྱ་བ་ནི། བུད་མེད་བསྙེན་པར་རྫོགས་པར་བྱེད་པ་ནི་གསང་སྟེ་བསྟན་པ་མ་གཏོགས་པའི་གནས་སྐབས་ཇི་སྐད་བསྟན་པ་དེ་དག་ཏུ་སྟན་ནང་ཚངས་ཅན་ལ་སོགས་པ་ལ་ཅི་བདེར་འདུག་ཏུ་གཞུག་པ་ཡིན་གྱི། ཙོག་བུར་འདུག་ཏུ་ཡང་མི་གཞུག་གོ །སོགས་པ་ཞེས་སྨོས་པའི་སྒྲས་ནི་རྫས་འཇམ་པ་དང་ཡངས་པ་གཞན་དག་ཀྱང་བསྡུའོ། །གཞན་གཙོ་བོ་མ་ཡིན་པ་ཉིད་ལ་ནི་དགེ་འདུན་ལ་རྒན་པའི་མཐར་རོ་ཞེས་བྱ་བ་ནི། རང་གི་དོན་གྱི་སྔགས་དགེ་འདུན་ལ་བརྗོད་པ་ན་དགེ་འདུན་གྱི་རྒན་པའི་མཐའ་ལོགས་སུ་ཙོག་པུར་འདུག་སྟེ་བརྗོད་པར་བྱ་བའོ། །གཞན་གྱི་དོན་དུ་ནི་འགྲེང་སྟེ་འདུད་པ་དང་བཅས་པར་རོ་ཞེས་འོག་ནས་འབྱུང་བས། འདི་ནི་རང་གི་དོན་གྱི་སྔགས་བརྗོད་པའི་ཆོ་ག་ཡིན་པར་གནས་སོ། །གཞན་གཙོ་བོར་མ་ཡིན་པ་ཉིད་ལ་ནི་ཞེས་བྱ་བ་ནི་དགེ་འདུན་སྤྱི་ལ་རང་གི་དོན་གྱི་སྔགས་བརྗོད་པ་སྟེ། དེ་ལ་ནི་གང་ཟག་གཞན་འགའ་ཞིག་ལ་གཙོ་ཆེར་རག་ལས་པ་མ་ཡིན་གྱི། དགེ་འདུན་ལ་རག་ལས་པ་ཉིད་ཡིན་པའི་ཕྱིར་རོ། །དེས་ན་དགེ་འདུན་ལ་རང་གི་དོན་གྱི་སྔགས་བརྗོད་པ་འདི་ལྟ་སྟེ། སྔགས་བརྗོད་པའི་གང་ཟག་དག་
གིས་གསོལ་བ་དག་དང༌། སྤོ་བ་བྱེད་པ་ལ་སོགས་པའི་འདས་པ་བརྗོད་པ་དག་ནི་དགེ་འདུན་ལ་རྒན་པའི་མཐའ་ལོགས་སུ་ཙོག་པུར་འདུག་སྟེ་བརྗོད་པར་བྱའོ། །སྔགས་མ་བརྗོད་པའི་གང་ཟག་དག་གིས་གསལ་བ་གཞན་ལས་མཉན་ཏེ་བརྗོད་པར་བྱ་བ་དེ་ནི་གང་ཟག་ལ་རག་ལས་པ་ཡིན་པས་དེ་ནི་དེས་དེའི་མདུན་དུ་ཙོག་པུར་འདུག་སྟེ་བརྗོད་པར་བྱའོ། །འདུན་པ་དང་ཡོངས་སུ་དག་པ་དང༌། དགག་དབྱེ་བརྗོད་པ་གང་ཟག་ལས་ལེན་ཅིང་གང་ཟག་ལ་རྗོད་པར་བྱེད་པ་དེ་ཡང་གང་གི་མདུན་དུ་བརྗོད་པའི་གང་ཟག་དེ་ལ་རག་ལས་པ་ཡིན་པས་དེའི་མདུན་དུ་ཙོག་པུར་འདུག་སྟེ་བརྗོད་པར་བྱའོ། །འདི་ནི་བསྙེན་པར་རྫོགས་པའི་སྐབས་ནས་གསུངས་མོད་ཀྱི། ཐམས་ཅད་ལ་ཡང་འདྲ་བར་སྤྱིར་མདོ་འདི་བྱས་སོ། །འདིར་གཞུང་ནི་དེ་ནས་ལས་བྱེད་པའི་མདུན་དུ་ཕྱག་འཚལ་དུ་བཅུག་སྟེ། འདུག་ཏུ་གཞུག་ཅིང་འདུག་ཏུ་བཅུག་ནས་བསྙེན་པར་རྫོགས་པ་གསོལ་དུ་གཞུག་གོ་ཞེས་གསུངས་པ་ཡིན་ནོ། །གཞན་གྱི་དོན་དུ་ནི་འགྲེང་སྟེ་འདུན་པ་དང་བཅས་པར་རོ་ཞེས་བྱ་བ་ནི། གཞན་གྱི་དོན་དུ་དགེ་འདུན་ལ་སྔགས་བརྗོད་པ་ནི་འགྲེང་སྟེ། འདུད་བ་དང་བཅས་པ་ཞེས་བྱ་བ་ཐལ་མོ་སྦྱར་བ་ཉིད་དང༌། མགོ་སྨད་པ་ཉིད་ཀྱིས་བརྗོད་པར་བྱའོ། །འདི་སྐད་བསྟན་ཏེ། དགེ་འདུན་ལ་གཞན་གྱི་དོན་དུ་བརྗོད་པ་གང་ཡིན་པ་དེ་ནི་རྒན་པའི་མཐར་འགྲེང་སྟེ་འདུད་པ་དང་བཅས་པས་བརྗོད་པར་བྱ་སྟེ། འདི་ལྟ་སྟེ་ཞུ་བ་དག་དང༌། འདུན་པ་དང༌། ཡོངས་སུ་དག་པ་དང༌། དགག་དབྱེ་བརྗོད་པ་དགེ་འདུན་གྱི་ཕྱོགས་ལ་བྱ་བ་དང༌། དབྱར་གནས་པའི་དགེ་འདུན་གྱིས་དགག་དབྱེ་མཛད་ལགས་སོ་ཞེས་གོ་བར་བྱ་བ་དང༌། ཁྲིམས་སུ་བྱ་བ་བཟང་པོ་བརྗོད་པ་དང་རྫོད་པ་མི་སྐྱེད་པ་ཉིད་དང་ཚུལ་ཤིང་གི་གྲངས་དང༌། གནས་མལ་ལ་ལོག་པར་ལོངས་སྤྱོད་པར་བྱེད་པ་ཉིད་གོ་བར་བྱ་བ་དག་གོ །ཁ་ཅིག་ལས་གསང་སྟེ་བསྟན་པ་ཉིད་ནི་ལམ་གྱི་དབུས་ནས་ཞེས་སོ་ཞེས་བྱ་བ་ནི། གཞུང་ཁ་ཅིག་ལས་གསང་སྟེ་སྟོན་པའི་སློབ་དཔོན་གྱིས་གསང་སྟེ་བར་ཆད་ཀྱི་ཆོས་དྲིས་ནས་དགེ་འདུན་ལ་དགེ་འདུན་བཙུན་པ་
རྣམས་གསན་དུ་གསོལ། བདག་གི་མཁན་པོ་མིང་འདི་ཞེས་བགྱི་པས་མིང་འདི་ཞེས་བགྱི་པ་ལ་བར་ཆད་ཀྱི་ཆོས་རྣམས་གསང་སྟེ་བསྟན་ན་དེས་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་ཁོ་ན་ཉིད་མཆིན་ཅི་མཆི་ཤིག་གམ་ཞེས་ཞུ་བའི་སྔགས་འདི་ནི་ལམ་གྱི་དབུས་ནས་འགྲེང་སྟེ་འདུད་པ་དང་བཅས་པས་བརྗོད་པར་བྱའོ་ཞེས་འབྱུང་ངོ༌། །གཞན་ནི་ཇི་སྐད་བསྟན་པ་བཞིན་རྒན་པའི་མཐར་འགྲེང་སྟེ་འདུད་པ་དང་བཅས་པས་བརྗོད་པར་བྱའོ། །རྫས་བྱིན་གྱིས་བརླབ་པ་ཡང་ངོ་ཞེས་བྱ་བ་ཡང༌། འགྲེང་སྟེ་བྱའོ་ཞེས་བྱ་བར་སྦྱར་རོ། །མདུན་དུ་ཞེས་བྱ་བ་ནི་ཤུགས་ཀྱིས་འཐོབ་པོ། །འདིར་གཞུང་ནི་སྨན་བྱིན་གྱིས་བརླབ་པ་ལ་དགེ་སློང་གི་མདུན་དུ་འགྲེང་སྟེ་འདི་སྐད་བརྗོད་པར་བྱའོ་ཞེས་གསུངས་པ་ཡིན་ཏེ། དེའི་རྗེས་སུ་འབྲང་བས་ཐམས་ཅད་ཀྱི་དབང་དུ་བྱ་བའི་ཕྱིར་མདོ་འདི་བྱས་སོ། །དབྱུང་བར་བྱ་བ་ལ་ཡང་ཆོ་ག་དེ་བཞིན་དུ་ཤེས་པར་བྱའོ། །གང་གི་མདུན་དུ་བྱིན་གྱིས་བརླབ་པའམ་དབྱུང་བར་བྱ་བ་དེའི་སྤྱོད་ལམ་ཡང་དེ་ཁོ་ན་དང་འདྲའོ། །འདིར་རྫས་ཞེས་སྨོས་པ་ནི་ལྷུང་བཟེད་དང་ཆོས་གོས་དང་སྨན་ལ་སོགས་བདག་ཡིན་པར་རིག་པར་བྱའོ། །དེས་ན་ཉི་མ་དང་གསོ་སྤྱོང་དང་དགག་དབྱེ་དག་རྗེས་སུ་བསྒྲུབ་པ་དམིགས་ཀྱིས་བསལ་བ་ཡིན་ཏེ། གསོ་སྦྱོང་དང་དགག་དབྱེ་དག་བྱིན་གྱིས་བརླབ་བ་ནི་ཙོག་པུར་འདུག་སྟེ་བྱ་བར་གསུངས་པས། དེ་དེ་གཉི་ག་ཡང་འདུག་སྟེ་བྱའོ། །རུང་བར་བྱ་བ་ནི་དེ་ཉིད་དོ་ཞེས་བྱ་བ་ནི། གོས་རྣམ་པར་བརྟག་པ་ནི་བྱིན་གྱིས་བརླབ་པ་དེ་ཉིད་ཡིན་པར་རིག་པར་བྱའོ། །དེས་ན་རྣམ་པར་བརྟག་པ་དེ་ལ་ཡང་ཆོ་ག་དེ་བཞིན་དུ་ཤེས་པར་བྱའོ། །འདིར་གཞུང་ནི་སིལ་བུ་དག་ལས། འདི་ལྟར་རྣམ་པར་བརྟག་པར་བྱ་སྟ། དགེ་སློང་གི་མདུན་དུ་འགྲེང་སྟེ་བཙུན་པ་དགོངས་སུ་གསོལ་ཞེས་བྱ་བ་ལ་སོགས་པ་གསུངས་པ་ཡིན་ནོ། །དེ་གཟུང་སྟེ་བྱའོ་ཞེས་བྱ་བ་ནི། དགེ་སློང་དེ་གཉིས་ཀའི་ལག་པས་རྫས་དེ་བཟུང་སྟེ་བྱིན་གྱིས་བརླབ་པའི་སྔགས་དེ་བྱ་བའོ། །འདི་ནི་གོས་ཀྱི་དོན་དུ་གསུངས་པ་ཡིན་ནོ། །ལྷུང་བཟེད་དང་སྨན་བྱིན་གྱིས་བརླབ་པའི་ཕྱིར་ལྷུང་
བཟེད་དང་སྨན་ནི་ལག་པ་གཡོན་པར་བཞག་སྟེ། ལག་པ་གཡས་པས་བཀབ་ནས་སོ་ཞེས་བྱ་བ་སྨྲས་ཏེ། བྱིན་གྱིས་རློབ་ཏུ་འཇུག་པ་དང་བྱིན་གྱི་རློབ་པར་བྱེད་པ་གཉི་གས་དེ་ལྟར་བྱའོ། །སྨན་དབྱུང་བ་ནི་དེའི་རྗེས་སུ་འབྲང་བས་ཆོ་གོ་འདི་བཞིན་དུ་བྱ་བར་ཤེས་པར་བྱའོ། །ལྷུང་བཟེད་ཀྱི་དབྱུང་བ་ནི་ལག་པས་སྟེང་ནས་གཡོགས་པ་བཏང་སྟེ་ལག་པ་ཡ་རེས་ཁ་ནས་བཟུང་སྟེ་བྱའོ། །གཟུང་བར་བྱ་བ་མ་ཡིན་པ་ཉིད་ལ་ནི་མདུན་དུ་བཞག་སྟེའོ་ཞེས་བྱ་བ་ནི། གཟུང་བར་བྱ་བ་མ་ཡིན་པ་ཉིད་གསེར་དངུལ་ལ་སོགས་པ་རེག་ཏུ་མི་རུང་བ་དག་ནི་མདུན་དུ་བཞག་སྟེ་བྱིན་གྱིས་བརླབ་པར་བྱའོ། །ལས་ནི་འདུག་པ་ཉིད་ཀྱིས་སོ་ཞེས་བྱ་བ་ནི། གསོལ་བ་དང་གསོལ་བ་དང་གཉིས་དང་གསོལ་བ་དང་བཞིའི་ལས་ཐམས་ཅད་ནི་འདུག་པ་ཉིད་ཀྱིས་བྱའི། སྤྱོད་ལམ་གཞན་གྱིས་མི་བྱ་བའོ། །བརྟད་པ་བྱུང་ན་ནི་སྤྱོད་ལམ་གཞན་གྱིས་ཀྱང་གསོ་སྤྱོད་ལ་སོགས་པའི་ལས་བྱའོ། །དགེ་འདུན་ནམ་གཅིག་ཁོ་ན་ལ་མ་བརྟེན་པ་ལ་ནི་གང་ཟག་དགེ་སློང་ལ་བརྗོད་པར་བྱ་བ་ཉིད་དོ་ཞེས་བྱ་བ་ནི། སྐབས་གང་དུ་དགེ་འདུན་ཁོ་ན་ལ་བརྗོད་པར་བྱའོ་ཞེའམ། གང་ཟག་ཁོ་ན་ལ་བརྗོད་པར་བྱའོ་ཞེས་ངེས་པར་མ་བསྙེན་པ་དེར་ནི་གང་ཟག་དགེ་སློང་ལ་བརྗོད་པར་བྱ་བ་ཉིད་དུ་བསྟེན་པར་བྱའི་གཞན་ལ་ནི་མི་བྱ་སྟེ། དཔེར་ན་སྤོ་བ་བརྗོད་པ་དགེ་འདུན་ལ་བརྗོད་པར་བྱའོ། །གྲོང་དུ་འཇུག་པའི་ཕྱིར་ཞུ་བ་ནི་གང་ཟག་ལ་བརྗོད་པར་བྱའོ་ཞེས་དགེ་འདུན་དང་གང་ཟག་ལ་གོ་བར་བྱ་བ་ཉིད་དུ་ངེས་པར་བསྟེན་པ་མཛད་པ་དེར་ནི་དེ་ཁོ་ན་བཞིན་དུ་སོ་སོར་བརྗོད་པར་བྱའོ། །གང་དུ་དེ་ལྟར་སོ་སོར་ངེས་པར་བསྟེན་པ་དེར་ནི་གང་ཟག་དགེ་སློང་ལ་བརྗོད་པར་བྱ་བ་མཛད་པ། དཔེར་ན། རྫས་བྱིན་གྱིས་བརླབ་པ་དང་ཉི་མ་བྱིན་གྱིས་བརླབ་པ་དག་ལ་ནི་དགེ་སློང་དུ་གྱུར་པའི་གང་ཟག་ལ་བརྗོད་པར་བྱ་བ་ཉིད་ཡིན་པར་ཤེས་པར་བྱའོ། །ཆོས་གོས་དབྱུང་བ་དང་བྱིན་གྱིས་བརླབ་པ་ནི་ཉེ་བར་མི་གནས་ན་ཡིད་ཀྱིས་རྣམ་པར་བརྟགས་པས་འཆགས་སོ་ཞེས་བྱ་བ་ནི། དགེ་སློང་ཉེ་བར་མི་གནས་ན་ཆོས་གོས་བྱིན་གྱིས་
བརླབ་པ་དང་དབྱུང་བ་དག་རང་གི་ཡིད་ཀྱིས་རྣམ་པར་བརྟགས་པས་འཆགས་སོ། །ཆོས་གོས་ནི་བྱིན་གྱིས་བརླབ་པ་ལ་ཉེ་བར་གནས་པ་ལ་བྱིན་གྱིས་བརླབ་པར་བྱའོ། །དབྱུང་བ་ལ་ནི་ཉེ་བར་གནས་པ་མི་དགོས་སོ། །དེ་ལྟ་བས་ན་ཆོས་གོས་ཉེ་བར་མི་གནས་ཀྱང་དབྱུང་བ་འགྲུབ་པ་ཁོ་ནར་འགྱུར་རོ། །ཉེ་བར་གནས་ན་ནི་ལག་པས་བཟུང་སྟེ་དབྱུང་བར་བྱ་བ་ཉིད་ཡིན་ནོ། །འདིར་གཞུང་ནི་དགེ་སློང་དག་ལྔ་པོ་འདི་དག་ནི་སེམས་བསྐྱེད་པས་འགྲུབ་པ་ཡིན་ཏོ། གསོ་སྦྱོང་དང་དགག་དབྱེ་དང་ཆོས་གོས་བྱིན་གྱིས་བརླབ་པ་དང༌། ཆོས་གོས་རྣམ་པར་བརྟག་པ་དང༌། གང་ཟག་གིས་མགྲོན་དུ་བོས་པའོ་ཞེས་གསུངས་པ་ཡིན་ནོ། །དེ་ལ་གསོ་སྦྱོང་དང་དགག་དབྱེ་གཉིས་སེམས་བསྐྱེད་པས་འགྲུབ་པ་ནི་སྐབས་གཞན་དུ་མདོར་བྲིས་ཟིན་ཏོ། །ཆོས་གོས་བྱིན་གྱིས་བརླབ་པ་དང་རྣམ་པར་བརྟག་པ་སེམས་བསྐྱེད་པས་འགྲུབ་པ་ནི་སྐབས་འདིས་བསྟན་པ་ཡིན་ནོ། །གང་ཟག་གིས་མགོན་དུ་བོས་པ་སེམས་བསྐྱེད་པས་འགྲུབ་པ་ནི། ཅད་མི་གསུང་པས་ཞེས་མདོ་སྡེ་ལས་གསུངས་པ་ཡིན་ཏེ། བཅོམ་ལྡན་འདས་ཀྱིས་ཁྱིམ་བདག་མགོན་མེད་ཟས་སྦྱིན་ལ་ཅད་མི་གསུང་བས་གནང་ངོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །སྔ་མ་མ་ཕྱུང་ན་ཕྱི་མ་མི་འཆགས་སོ་ཞེས་བྱ་བ་ནི། དངོས་པོ་ལ་སྔར་བྱིན་གྱིས་བརླབས་པ་མ་ཕྱུང་བར་གཞན་བྱིན་གྱིས་རློབ་པར་བྱེད་པ་གང་ཡིན་པ་དེ་མི་འཆགས་སོ། །གཅིག་བུས་བྱིན་གྱིས་རློབ་ན་དེ་ལ་དང་པོར་བསམ་པ་འགྲུབ་ཅིང་ཚིག་ཏུ་བརྗོད་པར་བྱའོ་ཞེས་བྱ་བ་ནི། གལ་ཏེ་གཅིག་པུས་གསོ་སྦྱོང་ལ་སོགས་པར་བྱིན་གྱིས་རློབ་པར་བྱེད་ན། བྱིན་གྱིས་བརླབ་པའི་ཡུལ་དེ་ལ་སྔར་བསམ་པ་སྒྲུབ་ཅིང་བསམ་པ་ཉེ་བར་གཞག་པ་དང༌། བསམ་པ་སྔོན་དུ་བྱ་ཞིང་དེའི་ཚེ་འོག་ཏུ་ཚིག་ཏུ་ཡང་བརྗོད་པར་བྱ་བའོ། །འདི་སྐད་བསྟན་ཏེ། གལ་ཏེ་གྲོགས་མེད་པས་གཅིག་པུས་གསོ་སྦྱོང་ལ་སོགས་པ་བྱིན་གྱིས་རློབ་པར་བྱེད་ན་དེའི་ཚེ་ཇེ་དང་པོར་འདི་བྱིན་གྱིས་བརླབ་པོ་སྙམ་དུ་བསམ་པས་སྔོན་དུ་བྱ་ཞིང་དེའི་འོག་ཏུ་ཚིག་ཏུ་ཡང་བརྗོད་པར་བྱའོ། །འདིར་
གཞུང་ནི་དགེ་སློང་བྲམ་ཟེའི་བུ་མོས་ཞུས་པ་ལས་དེ་ལྟར་སེམས་བསྐྱེད་པར་བྱ་ཞིང་ཚིག་ཏུ་ཡང་བརྗོད་པར་བྱའོ་ཞེས་གསུངས་པ་ཡིན་ནོ། །དགེ་སློང་དང་འདུ་བ་ཉིད་ན་བླ་གོས་ཕྲག་པ་གཅིག་ཏུ་བྱས་པ་ཉིད་དོ་ཞེས་བྱ་བ་ནི། འཆགས་པ་ལ་སོགས་པ་དག་ལ་དགེ་སློང་དང་ལྷན་ཅིག་ཏུ་འདུ་བ་ཉིད་ན་བླ་གོས་ཕྲག་པ་གཅིག་ཏུ་བྱས་པ་ཉིད་ཀྱིས་ཀུན་ནས་གཡོགས་པ་དང་བྲལ་བ་ཉིད་རིགས་པར་བལྟ་བར་བྱའོ། །རང་གི་དོན་དུ་སྔགས་ལན་གསུམ་བརྗོད་པར་བྱེད་པ་ཉིད་ན་དེ་འོས་པ་ཉིད་ན་ཕྱག་བྱས་ཏེའོ་ཞེས་བྱ་བ་ནི། རང་གི་དོན་དུ་དགེ་འདུན་ནམ་གང་ཟག་གང་ལ་བརྗོད་པའི་བདག་ཉིད་དམ། གཞན་ཡང་རུང་བའི་སྔགས་ལན་གསུམ་བརྗོད་པ་ཉིད་ན་དེ་བརྗོད་པ་ཉིད་ཀྱི་མདུན་རོལ་དུ་གལ་ཏེ་ཟླ་དེ་ཕྱག་བྱ་བའི་འོས་ཉིད་ཡིན་ན་ཕྱག་བྱས་ཏེ་བརྗོད་པར་བྱ་བའོ། །གསང་སྟེ་སྟོན་པར་ཡང་ངོ་ཞེས་བྱ་བ་ཡང༌། ཕྱག་བྱས་ཏེ་བྱ་པར་རིགས་པའོ། །སྣམ་སྦྱར་དང་བཅས་པ་ཉིད་ནི་བསྙེན་པར་རྫོགས་པའི་ཕྱིར་འདུས་པ་ལ་ཡང་ངོ་ཞེས་བྱ་བ་ནི། བསྙེན་པར་རྫོགས་པར་བྱ་བའི་གང་ཟག་ལ་མཁན་པོས་ཆོས་གོས་གསུམ་བྱིན་གྱིས་རློབ་ཏུ་བཅུག་སྟེ། སྣམ་སྦྱར་དང་བཅས་པ་ཉིད་དུ་གྱུར་པ་ན་དེས་བདག་ཉིད་བསྙེན་པར་རྫོགས་པར་བྱ་བའི་ཕྱིར་འདུས་པའི་དགེ་འདུན་ལ་ཕྱག་བྱ་བ་ཉིད་དུ་རིགས་པའོ། །དང་པོར་གསུམ་མོ་ཞེས་བྱ་བ་ནི། བསྙེན་པར་རྫོགས་པར་བྱ་བའི་ཕྱིར་འདུས་པའི་དང་པོར་དགེ་སློང་དང་ཕྲད་དོ་ཅོག་ཐམས་ཅད་ལ་བསྙེན་པར་རྫོགས་པར་བྱ་བདེ་ཕྱག་ལན་གསུམ་གསུམ་བྱ་བར་རིགས་པ་ཡིན་ཏེ། འདི་ལྟར་ཕྱག་བྱས་པས་བདག་ཉིད་དགེ་འདུན་གྱི་ནང་དུ་འཇུག་པར་སྟོན་ཅིང༌། བསམ་པ་དྲག་པོས་དང་པོར་འཇུག་པར་རིགས་པས་དེའི་ཕྱིར་འདིར་དང་པོར་ལན་གསུམ་ཕྱག་བྱ་བར་གསུངས་སོ། །དེའི་དོན་ཉིད་དུ་དང་ཉི་མ་བརྗོད་པ་ལ་ཐལ་མོ་སྦྱར་བ་ཉིད་དོ་ཞེས་བྱ་བ་ནི། ཐལ་མོ་སྦྱར་པར་བྱེད་པའི་གང་ཟག་དེའི་དོན་འདི་ལྟ་སྟེ། རབ་ཏུ་དབྱུང་བའི་ཕྱིར་ཞུ་བ་དང༌། ཡང་དག་པར་བླང་བ་དང༌། མཁན་པོ་ཉིད་ལ་སོགས་པར་གསོལ་བ་དང༌། །སྦྱིན་པ་དག་དང༌།
བར་ཆད་དྲི་བ་དང༌། བསྙེན་བར་རྫོགས་པའི་ཕྱིར་འདུ་བ་དག་བསྒྲུབ་པའི་ཕྱིར་དགེ་འདུན་ནམ་གང་ཟག་འདུས་པར་གྱུར་པ་དེ་ནི་དོན་ཉིད་དུ་ཞེས་བྱ་བས་ཏེ། དེའི་དོན་ཉིད་དུ་འདུས་པའི་དགེ་འདུན་ནམ་གང་ཟག་དེ་དག་ལ་ཡང་ཐལ་མོ་སྦྱོར་བར་བྱེད་པའི་གང་ཟག་དེས་ཐལ་མོ་སྦྱར་བ་ཉིད་དུ་རིགས་པ་ཡིན་ནོ། །ཉི་མ་བརྗོད་པ་ལ་ཞེས་བྱ་བ་ནི། གསོ་སྤྱོད་དང་དགག་དབྱེའི་དུས་བྱིན་གྱིས་བརླབ་བ་དང༌། འདུན་པ་དང་ཡོངས་སུ་དག་པ་དང༌། དགག་དབྱེ་སྦྱིན་བ་དང༌། དབྱུང་བ་དག་དང༌། ཡོངས་སུ་གནས་པའི་དུས་འདས་པ་བརྗོད་པ་དག་དང༌། ཡོངས་སུ་གནས་པ་ལ་སོགས་པ་དབྱུང་བ་དེ་ལ་ཡང་དེང་ནི་ཟླ་བའི་ངོ་འདིའི་ཉི་མ་འདིའོ་ཞེས་བརྗོད་པ་དག་སྟེ་དེ་ལ་ཡང་ཐལ་མོ་སྤྱར་བ་ཉིད་དུ་རིགས་པ་ཡིན་ནོ། །གལ་ཏེ་གང་ཟག་གིས་རང་གི་དོན་དུ་བརྗོད་ན་གསོལ་བ་བཏབ་བས་མཇུག་ཏུ་ཐབས་ཡིན་ནོ་ཞེས་སོ་ཞེས་བྱ་བ་ནི། གལ་ཏེ་གང་ཟག་གིས་རང་གི་དོན་ཙམ་སྒྲུབ་པའི་ཕྱིར་བརྗོད་ན་གསོལ་བ་བཏབ་པའི་གང་ཟག་གིས་དེ་སྔགས་བརྗོད་དུ་བཅུག་པའི་མཇུག་ཏུ་ཐབས་ཡིན་ནོ་ཞེས་བརྗོད་པར་བྱ་བའོ། །ཐབས་ལས་བྱུང་བ་ནི་ཐབས་ཡིན་ཏེ། ཁྱོད་ཀྱིས་དེ་ལྟར་བྱས་པ་ནི་དོན་དེ་བསྒྲུབ་པའི་ཐབས་ཡིན་ནོ་ཞེས་བྱ་བའི་ཐ་ཚིག་གོ །དེའི་རྗེས་ལ་ཅིག་ཤོས་ཀྱིས་ལེགས་སོ་ཞེས་བྱ་བ་ནི། གསོལ་བ་བཏབ་པའི་གང་ཟག་དེས་ཐབས་ཡིན་ནོ་ཞེས་བྱ་བའི་ཚིག་བརྗོད་པ་དེའི་རྗེས་ལ་གསོལ་བ་འདེབས་པར་བྱེད་པའི་གང་ཟག་ཅིག་ཤོས་ཀྱིས་ལེགས་སོ་ཞེས་བརྗོད་པར་བྱ་བའོ། །ཐབས་ཡིན་ནོ་ཞེས་གང་སྨྲས་པ་དེ་ལེགས་ཏེ་དེ་ནི་ཐབས་ཡིན་ནོ་ཞེས་བྱ་བའི་ཐ་ཚིག་གོ །འདུན་པ་དང་ཞེ་སྡང་དང་གཏི་མུག་དང་འཇིགས་པས་འགྲོ་བ་དང་བྲལ་བས་བྱས་པ་དང་མ་བྱས་པ་དྲན་པར་ནུས་པ་སྤྲོ་བར་བྱས་ཏེ་བསྐོ་བའོ་ཞེས་བྱ་བ་ནི། གང་ཟག་བྱས་པ་དང་མ་བྱས་བ་དྲན་པར་ནུས་པ་བསྐོའོ། །ཁྱད་པར་ཇི་ལྟ་བུ་ཅན་ཞིག་ཅེ་ན། འདུན་བས་འགྲོ་བ་ལ་སོགས་པ་དང་བྲལ་བའོ། །ཇི་ལྟར་བསྐོ་ཞེ་ན། སྤྲོ་བར་བྱས་ཏེ་འོ། །བྱས་པ་ཉིད་ན་གནས་པ་བརྗོད་པར་བྱའོ་ཞེས་བྱ་བ་ནི། གསོལ་བ་དང་གཉིས་ཀྱི་ལས་སམ་
གསོལ་བ་དང་བཞིའི་ལས་བྱས་པ་ཉིད་ན་ལས་བྱེད་བས་ལས་བྱས་ཟིན་པའི་མཇུག་བསྡུ་བ་བརྗོད་པར་བྱ་བ་སྟེ། དཔེར་ན་དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་མིང་འདི་ཞེས་བགྱི་བ་རབ་ཏུ་ཕྱུང་བ་བསྙེན་པར་རྫོགས་པར་མཛད་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་གསུངས་པ་ལ་སོགས་པ་ལྟ་བུའོ། །གསོལ་བ་འབའ་ཞིག་གི་ལས་ལ་ནི་ཆོག་འདི་མེད་དེ། གསོལ་པ་ནི་གོ་བར་བྱ་བ་ཙམ་ཡིན་པའི་ཕྱིར་རོ། །མཚམས་གཅོད་པ་ཉིད་ནི་བཅད་པ་དང་འདྲ་བ་ཉིད་དུ་ཤེས་པར་བྱའོ་ཞེས་བྱ་བ་ལ། འདིར་མཚམས་གཅོད་པ་ཉིད་ཅེས་བྱ་བ་ནི་མཚམས་གཅོད་པར་རྩོམ་པ་ཉིད་དོ། །དེས་ན་མཚམས་གཅོད་པ་ཉིད་གང་ཡིན་པ་དེ་ནི་བཅད་པ་དང་འདྲ་བ་ཉིད་དུ་ཤེས་པར་བྱ་བ་སྟེ། ཇི་ལྟར་དགེ་འདུན་གྱིས་མཚམས་མ་མནན་པར་མཚམས་བཅད་ན་མཚམས་བཅད་པ་ཉིད་དུ་མི་འགྲུབ་པ་དེ་བཞིན་དུ། དགེ་འདུན་གྱིས་མཚམས་མ་མནན་པར་མཚམས་གཅོད་པ་རྩོམ་ན་རྩོམ་པ་དེ་ཡང་མི་འགྲུབ་པོ། །འདི་སྐད་བསྟན་ཏེ། ཇི་ལྟར་དགེ་འདུན་མཚམས་གཞན་ན་གནས་པས་མཚམས་གཅད་པ་ཉིད་མི་འགྲུབ་པ་དེ་བཞིན་དུ་མཚམས་གཅོད་པ་ཡང་མི་འགྲུབ་སྟེ། འདི་ལྟར་མཚམས་བཅད་པར་འདོད་པའི་ངོས་དང་ཉེ་བའི་ཕྱོགས་ཀྱི་མཚམས་གཞན་གང་ཡིན་པ་དེ་ན་གནས་པའི་དགེ་འདུན་གྱིས་མཚམས་གཅོད་པར་བྱེད་ན། དགེ་འདུན་དང་ཉེ་བའི་མདུན་གྱི་ཆའི་ཕྱོགས་དེ་ཡང་བཅད་པར་མི་འགྱུར་ཏེ། འདི་ནི་མཚམས་གཞན་ན་གནས་པ་ནི་གང་གི་ཡན་ལག་ཉིད་ཀྱང་མ་ཡིན་ནོ་ཞེས་འབྱུང་བ་དེའི་སྤྲོས་པ་ཡིན་ནོ། །སྡུད་པར་བྱེད་པས་གཎྜཱི་བརྡུངས་པ་དང་འདྲི་བ་ལ་བརྗོད་པ་རྗེས་སུ་སྒྲུབ་པ་དག་གིས་བསྡུ་བར་བྱ་བ་དག་ལ་གོ་པར་བྱའོ་ཞེས་བྱ་བ་ནི། དགེ་འདུན་སྡུད་པར་བྱེད་པའི་གང་ཟག་གིས་གཎྜཱི་བརྡུངས་པ་དང༌། ཅིའི་ཕྱིར་བརྡུངས་ཞེས་འདྲི་བ་དག་ལ་འདིའི་ཕྱིར་བརྡུངས་སོ་ཞེས་བརྗོད་པས་དེ་དག་དེར་འདུ་བར་རྗེས་སུ་བསྒྲུབ་བ་དག་གིས་བསྡུ་བར་བྱ་བའི་དགེ་སློང་དག་ལ་གོ་བར་བྱ་བའོ། །དེས་དེ་དག་གི་དོན་དུ་སྟན་བཤམ་
མོ་ཞེས་བྱ་བ་ནི། སྡུད་པར་བྱེད་པ་དེས་བསྡུ་བར་བྱ་བ་དེ་དག་གི་དོན་དུ་སྟན་བཤམ་པར་བྱའོ། །བསྐོས་པའི་བྱ་བ་དེའི་དོན་ཉིད་ལ་ནི་དེ་ཉིད་དོ་ཞེས་བྱ་བ་ནི། བསྐོས་པ་དེའི་བྱ་བ་ལག་གི་བླ་ལ་སོགས་པ་དོན་གང་གི་ཕྱིར་དེ་བསྐོ་བར་བྱ་བ་དེའི་དོན་ཉིད་ལ་གང་དུ་དགེ་འདུན་འདུ་བར་འགྱུར་པ་དེར་དགེ་འདུན་བསྡུ་བར་བྱ་བའི་སྐབས་རྗེས་སུ་བསྒྲུབ་པར་བྱ་བ་ནི་བསྐོ་བར་བྱ་བ་དེ་ཉིད་ཀྱི་ལས་ཡིན་པར་ཤེས་པར་བྱའོ། །ཐམས་ཅད་ལ་རྒན་རིམས་སུའོ་ཞེས་བྱ་བ་ནི། ཤིང་དྲུང་དང་ནེའུ་གསིང་གི་ཕྱོགས་དང༌། དགོན་པའི་ས་གཞི་དང་འདུག་པའི་གནས་ཐམས་ཅད་ལ་ནི་རྒན་རིམས་སུ་བསྐོ་བ་རིགས་པ་ཉིད་ཡིན་པའོ། །བླང་བར་བྱ་བ་ལ་ནི་འདོད་པ་མཆོག་ཉིད་ཡིན་ནོ་ཞེས་བྱ་བ་ནི། འདུ་བ་དང་ཕྱག་བྱ་བ་དང་མདུན་དུ་འགྲོ་བ་དག་ལ་ནི་རྒན་རིམས་སུ་ཁོ་ནས་རྣམ་པར་གཞག་གི་འདོད་པས་རྣམ་པར་མི་གཞག་གོ །བླང་བར་བྱ་བ་གནས་མལ་ལས་སོགས་པ་དག་ལ་ནི་འདོད་པས་མཆོག་ཉིད་དུ་རྣམ་པར་གཞག་གི་དངོས་པོ་ལས་རྣམ་པར་མི་གཞག་སྟེ། ལེན་པ་པོ་རྒན་པ་དེ་འདོད་པ་ཡིན་ན་ངན་པ་གང་ཡིན་པ་དེ་ཡང་དེ་ལ་སྦྱིན་པར་བྱ་བའི་ཕྱིར་མཆོག་ཉིད་ཡིན་གྱི། གང་ལ་ཐོབ་པ་བཟང་པོ་དེ་ནི་མཆོག་ཉིད་མ་ཡིན་ནོ། །འདིར་གཞུང་ནི་དངོས་པོ་ཆེན་པོ་གང་དག་ཡིན་པ་ལ་བྱི་དོར་བྱེད་པས་རྒན་པོ་དག་ངལ་བར་འགྱུར་བས་མི་འདོད་ན་དེ་དག་ལ་མི་འདོད་བཞིན་དུ་དེ་དག་སྦྱིན་པར་མི་བྱ་བར་གསར་བུ་དག་གིས་དེ་དག་བླང་བར་བྱའོ་ཞེས་གསུངས་པ་ཡིན་ནོ། །ལས་སྤྱིར་བསྟན་པའི་ཞེས་བྱ་བ་ལ། ལས་ཀྱི་གཞི་ཞུ་བ་ལ་སོགས་པའི་སྐབས་ནས་འབྱུང་བ་སྤྱིར་བསྟན་པ་བཤད་ཟིན་ཏོ།། །།ད་ནི་ལས་ཀྱི་གཞི་ཞུ་བ་ལ་སོགས་པའི་སྐབས་ཐུན་མོང་མ་ཡིན་པ་བསྡུ་བའི་ཕྱིར། བསྐོ་བ་ལས་བྱུང་བའི་ཕྱིར་མ་བཅོས་པས་ལས་ཉམས་སུ་མྱོང་བར་མི་བྱའོ་ཞེས་བྱ་བ་སྨྲས་ཏེ། བསྒོ་བ་ལས་བྱུང་བ་ཞེས་བྱ་བ་དགེ་འདུན་གྱི་དབྱེན་བྱེད་པ་དང་དེའི་རྗེས་སུ་ཕྱོགས་པ་དང༌། ཁྱིམ་སུན་འབྱིན་པ་དང༌། བཀའ་བློ་མི་བདེ་བའི་དགེ་འདུན་ལྷག་མ་བཞི་དང༌། སྡིག་པ་ཅན་གྱི་ལྟ་བའི་རྣམ་པ་མི་གཏོང་བའི་ལྟུང་བྱེད་དག་ལས་ཉེས་པ་གང་བྱུང་བ་དེ་བཤགས་པ་དང༌། བྱིན་
གྱིས་བརླབ་པ་དག་གིས་ཕྱིར་མ་བཅོས་པའི་གང་ཟག་གིས་དགེ་འདུན་དང་ལྷན་ཅིག་ལས་ཉམས་སུ་མྱོང་བར་མི་བྱ་བ་སྟེ། དེ་མྱོང་བར་བྱེད་ན་ཉེས་བྱས་སུ་འགྱུར་རོ། །གང་དག་གིས་དེ་ཁ་ན་མ་ཐོབ་དེ་ཕྱིར་མ་བཅོས་པར་ཤེས་བཞིན་དུ་དེ་དང་ལྷན་ཅིག་ལས་ཉམས་སུ་མྱོང་བར་བྱེད་བ་དེ་དག་ལ་ཡང་ཉེས་བྱས་སུ་འགྱུར་རོ། །གསོ་སྦྱོང་དང་དགག་དབྱེ་བྱེད་པ་དག་ནི་མ་གཏོགས་སོ་ཞེས་བྱ་བ་ནི། དེ་གཉིས་ཉམས་སུ་མྱོང་བ་ལ་ནི་ཉེས་བྱས་སུ་མི་འགྱུར་རོ་ཞེས་བྱ་བའི་ཐ་ཚིག་གོ །འདིར་གཞུང་ནི་རྣམ་པར་འབྱེད་པ་ལས་དགེ་སློང་གིས་ཇི་སྲིད་དུ་གཞི་དེས་མ་བཤགས་ཤིང་སོ་སོར་མ་བཤགས་པར་གསོལ་བ་དང་གསོལ་བ་དང་གཉིས་དང་གསོལ་བ་དང་བཞིའི་ལས་ཉམས་སུ་མྱོང་བར་བྱེད་ན་ཐམས་ཅད་དུ་ཉེས་བྱས་སོ་ཞེས་གསུངས་པ་ཡིན་ནོ། །མཚམས་གཞན་ན་གནས་པ་ནི་གང་གི་ཡན་ལག་ཉིད་ཀྱང་མ་ཡིན་ནོ་ཞེས་བྱ་བ་ནི། དགེ་འདུན་ནམ་གང་ཟག་མཚམས་གཞན་ན་གནས་པ་ནི་ལས་གང་གི་ཡན་ལག་ཉིད་ཀྱང་མ་ཡིན་ཏེ། བྱིན་ལེན་ལ་སོགས་པ་བྱས་ཀྱང་མ་བྱས་པ་ཉིད་དུ་ཤེས་པར་བྱའོ། །དེར་སོང་ན་ཚོགས་པའི་ཡན་ལག་ཉམས་སོ་ཞེས་བྱ་བ་ནི། འདུན་པ་དང་ཡོངས་སུ་དག་པ་དང་དགག་དབྱེ་ལེན་པས་གང་ཟག་གཞན་ལས་དེ་དག་བླངས་ནས་དགེ་འདུན་གྱི་ནང་དུ་མ་བརྗོད་བར་མཚམས་གཞན་དུ་སོང་ན་ཚོགས་པའི་ཡན་ལག་ཅེས་བྱ་བ་འདི་ལྟ་སྟེ། འདུན་པ་དང་ཡོངས་སུ་དག་པ་དང་དགག་དབྱེ་བླངས་པ་དེ་ཉམས་པ་ཡིན་ནོ།། དེ་ལྟ་བས་ན་ཉམས་པའི་ཉེས་པ་སྤང་བའི་ཕྱིར་འདུན་པ་ལ་སོགས་པ་ལེན་པ་དེས་ནམ་མཁའ་ལ་འདུག་པར་མི་བྱའོ་ཞེས་བྱ་བ་ལ་སོགས་པའི་བསླབ་པའི་གཞི་བཅའ་བ་མཛད་དོ། །འདིར་གཞུང་ནི་གླེང་གཞི་ངག་ལས། བཙུན་པ་དགེ་སློང་དག་གིས་འདུད་པ་བླངས་ཏེ། སྟེང་གི་ནམ་མཁའ་ལ་མཆིས་ན་འདུན་པ་འཚལ་ཏེ་མཆིས་ཞེས་བརྗོད་པར་བགྱིའམ། འཚལ་ཏེ་མ་མཆིས་ཞེས་བརྗོད་པར་བགྱི། ཉེ་བ་འཁོད་ཁྱེར་ཏེ་མ་འོངས་ཞེས་བརྗོད་པར་བྱ་སྟེ་ཡང་བླང་བར་བྱའོ། །བཙུན་པ་དགེ་སློང་ཡོངས་སུ་དག་པ་ལེན་པས་ཡོངས་སུ་
དག་པ་བླངས་ཏེ། སྟེང་གི་ནམ་མཁའ་ལ་འཚལ་ཏེ་མཆིས་ན་ཡོངས་སུ་དག་པ་འཚལ་ཏེ་མཆིས་ཞེས་བརྗོད་པར་བགྱིའམ། འཚལ་ཏེ་མ་མཆིས་ཞེས་བརྗོད་པར་བགྱི། ཉེ་བ་འཁོར་ཁྱེར་ཏེ་མ་འོངས་ཞེས་བརྗོད་པར་བྱ་སྟེ། ཡང་བླང་བར་བྱའོ་ཞེས་གསུངས་པ་དང༌། ཞུ་བ་ལས་ཀྱང་ཡོངས་སུ་དག་པ་བླངས་ནས་མཚམས་ཀྱི་སླང་རོལ་ན་མཆིས་ན་ཡོངས་སུ་དག་པ་རྒྱུན་ཆད་པར་བརྗོད་པར་བགྱིའམ། རྒྱུན་མ་ཆད་པར་བརྗོད་པར་བགྱི། བཀའ་སྩལ་པ། རྒྱུན་ཆད་པར་བརྗོད་པར་བྱའོ་ཞེས་གསུངས་པ་ཡིན་ནོ། །དེའི་དམིགས་ཀྱིས་བསལ་པ་ནི་དེས་འཇིགས་པས་མཚམས་ཀྱི་ཕྱི་རོལ་ནས་ཁྱེར་ཏེ་འོངས་པ་ལ་ནི་ཉེས་པ་མེད་དོ་ཞེས་གང་སྨོས་པ་དེ་ཡིན་པར་ཤེས་པར་བྱའོ། །གཅིག་ཏུ་རྐང་པ་ཡ་གཅིག་ལ་གཅིག་ཏུ་ཡ་གཅིག་ན་གཉི་གར་གནས་པ་ཉིད་དོ་ཞེས་བྱ་བ་ནི། མཚམས་གཅིག་ཏུ་གང་གི་རྐང་པ་ཡ་གཅིག་བཞག་ལ། མཚམས་གཅིག་ཏུ་རྐང་པ་ཡ་གཅིག་བཞག་ན་དེ་མཚམས་དེ་གཉི་གར་གནས་པ་ཉིད་ཡིན་པའོ། །ཐམས་ཅད་ནོན་པ་ལ་གནས་ན་ནོན་པ་ཉིད་དོ་ཞེས་བྱ་བ་ནི། མཚམས་དུ་མ་ནོན་བའི་རྫས་ལ་གནས་པ་གང་ཡིན་བ་དེས་ནི་ནོན་པའི་ཚེས་དེས་མཚམས་ཇི་ཙམ་ནོན་བ་ཉིད་ཡིན་པའི་མཚམས་དེ་དག་ཐམས་ཅད་དུ་གནས་པ་ཉིད་ཡིན་ནོ། །དུ་མར་གནས་པར་ཁས་བླངས་པ་ལ་ནི་འཆགས་པ་ཁོ་ནའོ་ཞེས་བྱ་བ་ནི། གང་གི་གནས་དུ་མར་གཅིག་ཏུ་རྐང་པ་ཡ་གཅིག་ཏུ་བཞག་ལ་གཅིག་ཏུ་ཡ་གཅིག་གཞག་པའམ་ཐམས་ཅད་ནོན་པ་ལ་གནས་པས་དབྱར་གནས་པར་ཁས་ལེན་པ་དེ་ལ་ནི་གནས་པར་ཁས་བླངས་པ་མི་འཆགས་བ་མ་ཡིན་ཏེ། འཆགས་པ་ཁོ་ན་ཡིན་ནོ། །གནས་མལ་དུ་མ་མནོད་པར་རིགས་པ་ཉིད་དེ་ཞེས་བྱ་བ་ནི། སྡར་བསྟན་པའི་ཚུལ་གྱིས་མཚམས་དུ་མར་གནས་པའི་དགེ་སློང་གིས་མཚམས་དེ་དག་གི་ཁོངས་སུ་གཏོགས་པའི་གཙུག་ལག་ཁང་གང་དག་ཡིན་པ་དེ་དག་གི་གནས་མལ་ཐམས་ཅད་ནོད་པར་བྱེད་ན་མི་རིགས་པ་མ་ཡིན་ཏེ། རིགས་པ་ཁོ་ན་ཡིན་ནོ་ཞེས་བྱ་བའི་ཐ་ཚིག་གོ །ཅི་དེས་གཙུག་ལག་ཁང་ཐམས་ཅད་དུས་མཉམ་
པར་གནས་པར་བྱ་བའམ། འོན་ཏེ་ཅི་དགར་གནས་པར་བྱ་ཞེ་ན། དེའི་ཕྱིར་དེས་ཅི་དགར་གནས་པར་བྱ་བ་ཉིད་དོ་ཞེས་བྱ་བ་སྨྲས་ཏེ། དེས་གཙུག་ལག་ཁང་གང་དུ་དུས་ཇི་སྲིད་གནས་པར་འདོད་པ་དེ་སྲིད་དེར་གནས་པར་བྱ་བ་ཉིད་ཡིན་ནོ། །རྒྱལ་བ་ནི་མི་མཐུན་པ་ཉིད་བྱེད་པ་མ་ཡིན་ནོ་ཞེས་བྱ་བ་ནི། རྒྱལ་བ་སངས་རྒྱས་བཅོམ་ལྡན་འདས་མཚམས་ཀྱི་ནང་ན་བཞུགས་ལ། དགེ་འདུན་འདུས་པར་རྗེས་སུ་མ་ཞུགས་པར་དགེ་འདུན་གྱི་ལས་བྱེད་པ་ནི་མི་མཐུན་པ་ཉིད་དུ་མི་འགྱུར་ཏེ། དེ་ནི་དཀོན་མཆོག་གཞན་ཡིན་པས་དགེ་འདུན་གྱི་ལས་མི་མཐུན་པར་བྱེད་པ་ཉིད་མ་ཡིན་ནོ་ཞེས་བྱ་བའི་ཐ་ཚིག་གོ །ཁ་སྐོང་པར་བྱེད་པ་ཉིད་མ་ཡིན་ནོ་ཞེས་བྱ་བ་ནི། རྒྱལ་བ་ནི་དགེ་འདུན་གྱི་ཁ་སྐོང་བར་བྱེད་པ་ཉིད་མ་ཡིན་ཏེ། ཁ་སྐོང་པར་བྱེད་པ་རྒྱལ་བས་ཁ་བསྐང་སྟེ་ལས་དག་མི་བྱ་བ་ཉིད་ཡིན་ནོ། །དེས་བྱ་བ་ལས་མ་ཡིན་པས་མི་འཆགས་སོ་ཞེས་བྱ་བ་ནི། ལས་དེས་བསྙེན་པར་རྫོགས་པ་ལ་སོགས་པ་བྱ་བ་རྣམ་པར་གཞག་པ་གང་ཡིན་པ་དེ་ལས་མ་ཡིན་པས་བྱ་བས་ན་མི་འཆགས་པའོ། །འདིར་གཞུང་ནི་བསྙེན་པར་རྫོགས་པར་བགྱི་བ་ལ་གསོལ་བ་དང་བཞིའི་ལས་མི་བགྱིད་ན། བསྙེན་པར་རྫོགས་ཞེས་བརྗོད་པར་བགྱིའམ། བསྙེན་པར་མ་རྫོགས་ཞེས་བརྗོད་པར་བགྱི། བཀའ་སྩལ་པ། བསྙེན་པར་མ་རྫོགས་ཞེས་བརྗོད་པར་བྱའོ་ཞེས་གསུངས་པ་ཡིན་ནོ། །དེ་བསྙེན་པར་རྫོགས་པར་བྱ་བའི་སྐབས་སུ་གསུངས་པ་ཡིན་མོད་ཀྱི། ཐམས་ཅད་ལ་འདྲ་པས་འདིར་སྤྱིར་མདོར་བྱས་སོ། །ཕལ་ཆེར་བྱས་པ་ཉིད་ཡིན་ཡང་ལས་ཡོངས་སུ་མ་རྫོགས་པའི་ཕྱིར་དེ་མ་བྱས་པ་ཉིད་ཡིན་པར་དོགས་པ་བསལ་བའི་ཕྱིར། ཚིག་ཕལ་ཆེར་བྱས་པ་ཉིད་ན་བྱས་པ་ཉིད་དོ་ཞེས་བྱ་བ་སྨྲས་ཏེ། གསོལ་བའི་བདག་ཉིད་དམ་བརྗོད་པའི་བདག་ཉིད་ཀྱི་ཚིག་ཕལ་ཆེར་བྱས་པ་ཉིད་ཅེས་བྱ་བ་སུམ་གཉིས་བརྗོད་ཟིན་ན་སུམ་ཆ་བརྗོད་པའི་ཚེ་ན་རིལ་གྱིས་བརྗོད་ཟིན་པ་ཉིད་ཡིན་ནོ། །གསོལ་བ་དང་བརྗོད་པ་དག་ལ་དོན་གྱི་སྐབས་གསུམ་ཡོད་དེ། དང་པོར་ནི་རང་གི་ངོ་བོ་ཙམ་བརྗོད་པ་སྟེ། དཔེར་ན། དགེ་འདུན་བཙུན་པ་རྣམས་
གསན་དུ་གསོལ། མིང་འདི་ཞེས་བགྱི་བ་འདི་མིང་འདི་ཞེས་བགྱི་བ་ལས་བསྙེན་པར་རྫོགས་པར་འཚལ་ཏེ། སྐྱེས་པ་ཡང་ལགས། སྐྱེས་པའི་དབང་པོ་དང་ཡང་ལྡན། ལོ་ཉི་ཤུ་ཡང་ལོན། འདིའི་ཆོས་གོས་གསུམ་དང་ལྷུང་བཟེད་ཀྱང་ཚང་བར་ཐད་ཀྱི་ཆོས་རྣམས་ཀྱང་ཡོངས་སུ་དག་གོ་ཞེས་ཁོ་ན་ཉིད་མཆི་ན་ཞེས་གསུངས་པ་ལྟ་བུའོ། །གཉིས་པ་ནི་བྱ་བ་བརྗོད་པ་སྟེ། དཔེར་ན་མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་གསོལ་ཏེ་ཞེས་གསུངས་པ་ལྟ་བུའོ། །གསུམ་པ་ནི་བྱེད་པ་བརྗོད་པ་སྟེ། དཔེར་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནད་བར་མཛོད་ཅིག་དང༌། དགེ་འདུན་གྱིས་མིང་འདི་ཞེས་བགྱི་བ་མཁན་པོ་མིང་འདི་ཞེས་བགྱི་བས་བསྙེན་པར་རྫོགས་པར་མཛད་དོ་ཞེས་གསུངས་པ་ལྟ་བུའོ། །དེ་ལ་དོན་གྱིས་སྐབས་གཉིས་བྱས་པ་ཉིད་ན་ལས་ཕལ་ཆེར་བྱས་པ་ཉིད་དུ་ཤེས་པར་བྱའོ། །ཅི་ཚིག་ཐམས་ཅད་ལ་ཕལ་ཆེར་བྱས་པ་ཉིད་ན་བྱས་པ་ཉིད་ཡིན་ནམ་ཞེ་ན། དེའི་ཕྱིར་འོག་མ་མེད་པ་ལའོ་ཞེས་བྱ་བ་སྨྲས་ཏེ། ཚིག་གང་ལ་ཚིག་འོག་མ་མེད་པ་དེ་ནི་འོག་མ་མེད་པ་སྟེ་དཔེར་ན་གསོལ་བ་འབའ་ཞིག་གི་ལས་ལ་ནི་དེ་ཉིད་འོག་མ་མེད་པ་ཡིན་ནོ། །གསོལ་བ་དང་གཉིས་ཀྱི་ལས་ལ་ནི་ལས་བརྗོད་པའི་འོག་མ་མེད་པ་ཡིན་ནོ། །གསོལ་བ་དང་བཞིའི་ལས་ལ་ནི་ལས་བརྗོད་པ་གསུམ་པ་འགམ་མེད་པ་ཡིན་ཏེ། དེ་དག་ལ་ཚིག་ཕལ་ཆེར་བྱས་པ་ཉིད་ན་བྱས་པ་ཉིད་ཡིན་གྱི་གཞན་ལ་ནི་མ་ཡིན་ནོ། །འདིར་གཞུང་ནི་གླེང་གཞི་དག་ལས་མཚམས་བཅད་པ་ལས་བཙུན་པ་རེ་ཞིག་མཚམས་འགུམ་པ་ན་དགེ་སློང་ལས་བགྱིད་པ་སྲོག་ཆད་ཅིང་དུས་བགྱིས་པར་གྱུར་ན། མཚམས་བཀུམ་པར་བརྗོད་པར་བགྱིའམ་མ་བཀུམ་པར་བརྗོད་པར་བགྱི། ཉེ་བ་འཁོར་གལ་ཏེ་མཚན་མ་དག་བརྗོད་པར་གྱུར་ན་ནི་ལས་ཕལ་ཆེར་བྱས་པས་བཅད་པར་བརྗོད་པར་བྱའོ། །བཟློག་པས་ནི་མ་བཅད་པར་བརྗོད་པར་བྱའོ། །དགེ་སློང་མའི་མཚམས་ལ་ཡང་དེ་བཞིན་ནོ་ཞེས་གསུངས་པ་ཡིན་ནོ། །དེ་ཉིད་ཐམས་
ཅད་དུ་རུང་བས་འདི་སྤྱིར་མདོར་བྱས་སོ། །མཚན་མ་དག་མ་བརྗོད་པ་ཉིད་ན་མ་བཅད་པ་ཡིན་ནོ་ཞེས་བྱ་བ་ནི། ཕལ་ཆེར་བྱས་པ་ཉིད་ཡིན་ན་བྱས་པ་ཉིད་ཡིན་དུ་ཟིན་ཀྱང་མཚམས་ཀྱི་སྐབས་སུ་ནི་ཕྱོགས་བཞིའི་མཚན་མ་དག་མ་བརྗོད་ན་མཚམས་བཅད་པའི་ལས་མ་བྱས་པ་ཉིད་ཡིན་ནོ། །ཡོངས་སུ་གནས་པས་ནི་ཉེ་བར་གནས་པའི་སྡོམ་པ་ལས་གཞན་པའོ་ཞེས་བྱ་བ་ནི། ཡོངས་སུ་གནས་པ་ནི་ཚངས་པར་སྤྱོད་པ་ཉེ་བར་གནས་པའི་སྡོམ་པ་ལས་གཞན་པའི་ལས་བྱས་པ་ཉིད་ན་ལས་བྱས་པ་ཉིད་ཡིན་པའོ། །འདིར་གཞུང་ནི་དགེ་སློང་བྲམ་ཟེའི་བུ་མོས་ཞུས་པ་ལས་ཡོངས་སུ་གནས་པས་དགེ་སློང་གནས་ནས་འབྱིན་ན། གནས་ནས་ཕྱུང་བར་བརྗོད་པར་བགྱིའམ། ཉེ་བ་འཁོར་གནས་པའི་སྡོམ་པ་མ་གཏོགས་པར་ལས་ཐམས་ཅད་བྱས་པར་བརྗོད་པར་བྱའོ་ཞེས་གསུངས་པ་ཡིན་ནོ། །དེ་ནི་དཔེ་ཙམ་དུ་ཟད་དེ་དགེ་འདུན་ལྷག་མ་སྤྱོད་པ་ལ་གནས་པ་གཞན་དག་ལ་ཡང་ཆོ་ག་འདི་རིག་པར་བྱའོ། །སྨྱོན་པས་བཏོན་པ་ཡང་ངོ་ཞེས་བྱ་བ་ནི། སྨྱོན་པས་སོ་སོར་ཐར་པའི་མདོ་གདོན་བ་བྱས་པ་ཡང་བྱས་པ་ཉིད་ཡིན་པའོ། །འདིར་གཞུང་ནི་སྨོད་པས་སོ་སོར་ཐར་པའི་མདོ་འདོན་ན་སོ་སོར་ཐར་པའི་མདོ་བཏོན་པར་བརྗོད་པ་བགྱིའམ། བཀའ་སྩལ་པ། བཏོན་པར་བརྗོད་པར་བགྱིའོ། །གསོ་སྦྱོང་བགྱིས་པར་བརྗོད་པར་བགྱིའམ། བཀའ་སྩལ་པ། བྱས་པར་བརྗོད་པར་བྱའོ་ཞེས་གསུངས་པ་ཡིན་ནོ། །སྨྱོན་པ་ནི་དཔེ་ཙམ་དུ་ཟད་དེ་དེས་ན་རང་བཞིན་ཉམས་པ་ཐམས་ཅད་ཀྱང་འཕངས་པ་ཡིན་ཏེ་འདྲ་བའི་ཕྱིར་རོ། །དབྱེན་རྗེས་སུ་སྒྲུབ་པ་ནི་གསོལ་བ་དང་འདྲའོ་ཞེས་བྱ་བ་ནི། བསྙེན་པར་མ་རྫོགས་པ་ལ་སོགས་པའི་རྒྱུ་གང་དག་གིས་གསོལ་བའི་ལས་བྱས་པ་མི་འཆགས་པ་ད་བཞིན་དུ་རྒྱུ་དེ་དག་ཉིད་ཀྱིས་དགེ་འདུན་གྱི་དབྱེན་གྱིས་སྦྱོར་བ་རྗེས་སུ་སྒྲུབ་པ་ཡང་མི་འཆགས་པ་སྟེ། དཔེར་ན་བདག་ཉིད་རིགས་པ་མ་ཡིན་པས་ཚུལ་ཤིང་དག་ལེན་པ་དང༌། འདྲིམ་པར་བྱེད་པ་རིགས་པ་མ་ཡིན་པས་གཞན་རིགས་པ་མ་ཡིན་པ་དག་ལེན་དུ་འཇུད་པ་དང༌། ཆོས་དང་ཆོས་མ་ཡིན་པ་དག་ལོག་པར་
སྒྲོགས་པར་བྱེད་ན། དབྱེན་རྗེས་སུ་བསྒྲུབ་པ་མ་འཆགས་པ་ལྟ་བུའོ། །འདིར་གཞུང་ནི་ཞུ་བ་ལས་གནས་ནས་ཕྱུང་བ་དང་ལྔས་དགེ་འདུན་འབྱེད་ན་དག་འདུན་མ་ཕྱེ་བར་བརྗོད་པར་བྱའོ། །རྐུ་ཐབས་སུ་གནས་པ་དང་དགུས་དགེ་འདུན་འབྱེད་ན་དགེ་འདུན་མ་ཕྱེ་བར་བརྗོད་པར་བྱའོ། །མཚན་གཉིས་པས་ཚུལ་ཤིང་ལེན་ཏམ་རྗེས་སུ་སྒྲོགས་ན། དགེ་འདུན་བྱེ་བར་བརྗོད་པར་བགྱིའམ། དགེ་འདུན་མ་ཕྱེ་བར་བརྗོད་པར་བགྱི། བཀའ་སྩལ་པ། དགེ་འདུན་མ་ཕྱེ་བར་བརྗོད་པར་བྱའོ་ཞེས་གསུངས་པ་ཡིན་ནོ། །འདི་ལ་མཚན་མི་མཐུན་པ་ཉིད་ནི་ཡན་ལག་མ་ཡིན་ནོ་ཞེས་བྱ་བ་ནི། དབྱེན་རྗེས་སུ་སྒྲུབ་པ་འདི་ལ་ཕོ་རྣམས་ལ་ནི་མོ་ཉིད་ཡན་ལག་མ་ཡིན་ལ། མོ་རྣམས་ལ་ཡང་ཕོ་ཉིད་ཡན་ལག་མ་ཡིན་ནོ། །འདིར་གཞུང་ནི་གཏམ་གྱི་གཞི་ལས། ཉེ་བ་འཁོར་དགེ་སློང་ཁོ་ནས་དགེ་སློང་གི་དགེ་འདུན་འབྱེད་བར་འགྱུར་གྱི། དགེ་སློང་མས་ཀྱང་མི་འགྱུར། དགེ་སློབ་མས་ཀྱང་མི་འགྱུར། དགེ་ཚུལ་གྱིས་ཀྱང་མི་འགྱུར། དགེ་ཚུལ་མས་ཀྱང་མི་འགྱུར་མོད་ཀྱི། འོན་ཀྱང་དག་འདུན་དབྱེ་བའི་ཕྱིར་བརྟུལ་བར་ནི་འགྱུར་རོ། །དགེ་སློང་མ་ཁོ་ནས་དགེ་སློང་མའི་དགེ་འདུན་འབྱེད་པར་འགྱུར་གྱི། དགེ་སློང་གིས་ཀྱང་མི་འགྱུར། དགེ་སློབ་མས་ཀྱང་མི་འགྱུར། དགེ་ཚུལ་གྱིས་ཀྱང་མི་འགྱུར། དགེ་ཚུལ་མས་ཀྱང་མི་འགྱུར་མོད་ཀྱི། འོན་ཀྱང་དགེ་འདུན་དབྱེ་བའི་ཕྱིར་བརྟུལ་བར་ནི་འགྱུར་རོ་ཞེས་གསུངས་པ་ཡིན་ནོ། །བཞད་གད་ཀྱི་དངོས་པོས་ནི་གང་གིར་ཡང་མི་འགྱུར་རོ་ཞེས་བྱ་བ་ནི། བཞད་གད་ཀྱི་དངོས་པོ་ཞེས་བྱ་བ་ཀུ་རེའི་བསམ་པ་ལས་བྱས་པ་ཐམས་ཅད་ནི་གང་གི་ཡན་ལག་ཏུ་ཡང་མི་འགྱུར་བའོ། །འདིར་གཞུང་ནི་དགེ་འདུན་གྱི་དབྱེན་གྱི་སྐབས་སུ་དགེ་སློང་བྲམ་ཟེའི་བུ་མོས་ཞུས་པ་ལས། གང་གིས་འཕྱར་གཡེང་གི་བསམ་པས་རྗེས་སུ་སྒྲོགས་ཤིང་ཚུལ་ཤིང་ལེན་དུ་སྩོལ་ན་དགེ་འདུན་བྱ་བར་བརྗོད་པར་བགྱིའམ། ཉེ་བ་འཁོར་མི་བྱའོ། །ལས་བགྱིད་པ་ལས་ལྟུང་བ་ཅིར་འགྱུར། དབྱེན་གྱི་སྐབས་ཀྱི་ཉེས་པ་སྦོམས་པོར་འགྱུར་རོ། །གལ་ཏེ་དགེ་འདུན་གྱིས་ཤེས་ན་
དགེ་འདུན་ཐམས་ཅད་ལ་ཡང་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །རྗེས་སུ་སྒྲོགས་ཤིང་ཞེས་བྱ་བའི་སྒྲ་ནི་ལས་བརྗོད་པ་ལ་བྱའོ། །མི་འཆགས་པའི་བློས་དབྱེན་དང་གནས་ནས་འབྱིན་པ་དག་ནི་སྦོམ་པོའི་ཞེས་བྱ་བ་ནི་དབྱེན་གྱི་ལས་དང་གནས་ནས་དབྱུང་བའི་ལས་མི་འཆགས་པར་ཤེས་བཞིན་དུ་མི་འཆགས་ཀྱང་བླའི་འོན་ཀྱང་བྱའོ་སྙམ་པའི་བློས་དབྱེན་དང་གནས་ནས་དབྱུང་བའི་ལས་བྱེད་དམ་དེའི་ཡན་ལག་གི་དངོས་པོ་སྒྲུབ་ན་ཐམས་ཅད་དུ་དབྱེན་གྱི་ཕྱོགས་ཀྱི་སྦོམ་པོར་འགྱུར་བའོ། །དགེ་འདུན་དུ་མ་གྱུར་པ་ཉིད་ནི་ཉེས་བྱས་སོ་ཞེས་བྱ་བ་ནི། གྲོགས་མེད་པ་ཉིད་དུ་བྱེད་པའམ་གཅིག་དང་ལྷན་ཅིག་གམ། གཉིས་དང་ལྷན་ཅིག་ཏུ་དབྱེན་དང་གནས་ནས་འབྱིན་པ་དག་བྱེད་ན་ཉེས་བྱས་སུ་འགྱུར་བའོ། །འདི་ནི་རྩེད་མོའི་རྣམ་པ་ཡིན་གྱི། རྗེས་སུ་བསྒྲུབ་པའི་རྣམ་པ་ནི་མ་ཡིན་པར་ཤེས་པར་བྱའོ། །འདིར་གཞུང་ནི་གཅིག་གིས་གཅིག་གནས་ནས་འབྱིན་ན་ཉེས་བྱས་སོ། །གཅིག་གིས་གཉིས་སམ། གཅིག་གིས་མང་པོའམ། གཅིག་གིས་བཞིའམ། གཉིས་ཀྱིས་གཉིས་སམ། གཉིས་ཀྱིས་མང་པོའམ། གཉིས་ཀྱིས་བཞིའམ། གཉིས་ཀྱིས་གཅིག་གམ། མང་པོས་མང་པོའམ། མང་པོས་བཞིའམ། མང་བོས་གཅིག་གམ། མང་པོས་གཉིས་གནས་ནས་འབྱིན་ན་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །ཐ་དད་པར་གནས་པ་དག་ལས་གཞན་པ་ཁ་སྐོང་བར་འོས་པ་མ་ཡིན་པ་དག་གི་ཚོགས་ཀྱིས་གསོལ་བ་དང་བརྗོད་པ་དག་ནི་མ་ཡིན་ནོ་ཞེས་བྱ་བ་ནི། ཐ་དད་པར་གནས་པ་དག་ལས་གཞན་པ་ཁ་སྐོང་བར་འོས་པ་མ་ཡིན་པ་མཚམས་མེད་པ་བྱས་པ་ལ་སོགས་པའི་ཚོགས་ཀྱིས་གསོལ་བ་དང་བརྗོད་པ་དག་བྱས་པ་ཉིད་ནི་བྱས་པ་ཉིད་མ་ཡིན་ནོ། །འདིར་ཐ་དད་པར་གནས་པ་དག་ཅེས་བྱ་བ་གང་ཡིན་པར་ཤེས་པར་བྱ་ཞེ་ན། འདི་ལྟར་ཁ་སྐོང་བར་འོས་པ་མ་ཡིན་པ་ཐམས་ཅད་ཀྱང་རྣམ་གྲངས་ཀྱི་ས་ཐ་དད་པར་གནས་པ་ཉིད་ཡིན་མོད་ཀྱི། འོན་ཀྱང་འདིར་ཆོས་མ་ཡིན་པའི་ཕྱོགས་ཁས་བླངས་པ་ནི་ཐ་དད་པར་
གནས་པ་ཉིད་ཡིན་པས་ཐ་དད་པ་ཉིད་དུ་གྱུར་པ་ཡིན་པར་རིག་བར་བྱའོ། །གསོ་སྦྱོང་དང་དགག་དབྱེ་དག་ལ་ཇི་ལྟར་བརྗོད་པར་བྱ་ཞེ་ན། བསྙེན་པར་རྫོགས་པ་དང་བཅས་པ་མ་ཉམས་བདག་གིས་བསླབ་པ་དག་ལ་གུས་པར་བྱ་དགོས་ལ། གསོ་སྦྱོང་དང་དགག་དབྱེ་དག་བྱ་བ་གང་ཡིན་པ་དེ་ནི་བསླབ་པའི་ཡན་ལག་དང་བསླབ་པ་རྗེས་སུ་སྐྱོང་བར་གྱུར་བ་དག་ཡིན་པས་དེའི་ཕྱིར་ཁ་སྐོང་བར་འོས་པ་མ་ཡིན་པས་གསོ་སྦྱོར་དང་དགག་དབྱེ་དག་བྱས་པ་ནི་མ་བྱས་པ་ཉིད་ཁོ་ན་ཡིན་ནོ། །རང་གི་འོས་པའི་དགེ་འདུན་གྱིས་ཉམས་སུ་མྱོང་བ་མི་འགྲུབ་པ་ཉིད་ན་མ་ཡིན་ནོ་ཞེས་བྱ་བ་ནི། ལས་དེ་ལ་རང་གི་འོས་པའི་དགེ་འདུན་བཞིའི་ཚོགས་ལ་སོགས་པའི་དགེ་འདུན་གང་ཡིན་པ་དེ་ལས་དེ་ཉམས་སུ་མྱོང་བ་མ་གྲུབ་བ་ཉིད་ན་ལས་དེ་བྱས་པ་ཉིད་མ་ཡིན་པའོ། །འདི་སྐད་བསྟན་ཏེ། གལ་ཏེ་དགེ་འདུན་གྱིས་ལས་དེ་མ་ཐོས་ན་ལས་དེ་བྱས་པ་ཉིད་མ་ཡིན་ནོ། །རང་གི་ཞེས་སྨོས་པས་ནི་དགེ་འདུན་ཉུང་བ་བསལ་ཏོ། །འོས་པ་ཞེས་སྨོས་པས་ནི་དང་པོར་ཉམས་པ་ལ་སོགས་པ་འོས་པ་མ་ཡིན་པ་དག་བསལ་ཏོ། །ཅི་ལས་ཐམས་ཅད་མ་ལུས་པའམ་ཞེ་ན། དེའི་ཕྱིར་གསོལ་བ་ཐོས་ན་དེ་གྲུབ་བ་ཉིད་ཡིན་ནོ་ཞེས་བྱ་བ་སྨྲས་ཏེ། དགེ་འདུན་དང་ཉན་དུ་གཞུག་པ་གང་ཞེ་ན་བསྙེན་པར་རྫོགས་པར་བྱ་བ་ལ་སོགས་པས་གསོལ་བ་ཙམ་ཐོས་ན་ཡང་ཉམས་སུ་མྱོང་བ་དེ་གྲུབ་པ་ཉིད་ཡིན་ཏེ། དེ་ཙམ་ཐོས་པས་ལས་དེ་བྱས་པ་ཉིད་ཡིན་ནོ། །སྐལ་བ་དང་ལྡན་པའི་རང་བཞིན་ཅན་ལ་མངག་པ་འདྲ་བས་རབ་ཏུ་འབྱིན་དུ་བཅུག་པ་ནི་ཆོ་ག་མ་ཡིན་པ་མ་ཡིན་ནོ་ཞེས་བྱ་བ་ནི། རབ་ཏུ་འབྱུང་བའི་སྐལ་བ་དང་ལྡན་པའི་རང་བཞིན་ཅན་གྱི་གང་ཟག་གང་ཁྱིམ་ནས་འབྱུང་བའི་སྐབས་མི་རྙེད་ན། སྐལ་བ་དང་ལྡན་པའི་རང་བཞིན་ཅན་གྱི་གང་ཟག་དེ་ལ་མངག་པ་འདྲ་བས་རབ་ཏུ་འབྱིན་དུ་འཇུག་བ་གང་ཡིན་པ་དེ་ནི་ཆོག་མ་ཡིན་པ་མ་ཡིན་ཏེ་ཆོ་ག་ཡིན་པ་ཁོ་ནར་བལྟ་བར་བྱའོ། །མངག་པ་འདྲ་བས་ཞེས་བྱ་བ་ནི། རབ་ཏུ་དབྱུང་བར་བྱ་བ་དེའི་གན་དུ་མངག་པ་རབ་ཏུ་དབྱུང་བ་གར་ཡིན་པ་དེ་ཉིད་བདག་ཡིན་ལ། བདག་གང་ཡིན་པ་དེ་ཉིད་རབ་ཏུ་དབྱུང་བ་དེ་ཡིན་ནོ་ཞེས་བྱ་བའི་སྒོ་
ནས་རབ་ཏུ་དབྱུང་བ་ཉིད་དང་འདྲ་བ་སྟེ་དེས་སོ། །དགེ་སློང་མས་རབ་ཏུ་དབྱུང་བར་བྱ་བ་དེའི་གན་དུ་མངག་པ་ཡང་དེ་དང་འདྲ་སྟེ། དེས་རབ་ཏུ་འབྱིན་དུ་གཞུག་པ་ནི་ཆོ་ག་ཡིན་ནོ། །འདིར་གཞུང་ནི་དེ་ལྟ་བས་ན་མངག་པ་དེ་ལྟ་བུ་བསྙེན་པར་རྫོགས་པར་བྱའོ། །བསྙེན་བར་རྫོགས་པར་མི་བྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་བའི་སྐབས་ཀྱིས་ཆོས་བྱིན་གྱི་སྐབས་རྗེས་སུ་གནང་བ་ཡིན་ནོ། །འདི་ལ་རབ་ཏུ་འབྱིན་དུ་གཞུག་པའི་རྣམ་པར་གཞག་པ་གང་ཞེ་ན། དེའི་ཕྱིར་མངག་པ་དེ་ལ་དེའི་སྐབས་རྗེས་སུ་བསྒྲུབ་པར་བྱའོ་ཞེས་བྱ་བ་སྨྲས་ཏེ། ཞུ་བ་དང་སྐྱབས་སུ་གཏང་བ་དང༌། དགེ་བསྙེན་གྱི་སྡོམ་པ་དང༌། རབ་ཏུ་དབྱུང་བ་དང༌། ཁས་བླངས་བ་ལ་སོགས་པ་མཁན་པོ་ལ་སོགས་པས་སྐལ་བ་དང་ལྡན་པའི་རང་བཞིན་ཅན་གྱི་རབ་ཏུ་དབྱུང་བ་དེ་ལ་བྱ་བ་གང་ཡིན་པ་དེ་དག་མངག་པ་དེ་ལ་རྗེས་སུ་བསྒྲུབ་པར་བྱ་སྟེ། མངག་པ་དེས་མཁན་པོ་ལ་སོགས་པ་ལས་ལུང་མནོས་ཏེ་དེར་སོང་ནས། རབ་ཏུ་དབྱུང་བདེ་ལ་དེ་དག་བསྒོ་བར་བྱ་བ་ཡིན་ཏེ། འདིར་རྣམ་པར་གཞག་པ་དེ་ནི་དེ་ཡིན་ནོ། །འདི་ལྟར་མངག་པའི་ལས་ཀྱིས་བསླབ་པ་སྤྱིན་པ་དེ་ནི་སློབ་དཔོན་དང་འདྲ་བས། དེའི་ཕྱིར་འདིར་མངག་པ་ཡང་བསྙེན་བར་རྫོགས་པས་བྱ་བར་རྣམ་པར་གཞག་གོ །ཅི་བྱེ་བྲག་མེད་བར་རམ་ཞེ་ན། དེའི་ཕྱིར་བུད་མེད་ལ་ནི་བུད་མེད་དང་སྐྱེས་པས་ཀྱང་ངོ་ཞེས་བྱ་བ་སྨྲས་ཏེ། རབ་ཏུ་དབྱུར་བར་བྱ་བ་བུད་མེད་ལ་ནི་མངག་པ་བུད་མེད་ཀྱིས་ཀྱང་བྱར་རུང༌། སྐྱེས་པས་ཀྱང་བྱར་རུང་ངོ༌། །སྐྱེས་པ་ལ་ནི་སྐྱེས་པ་ཁོ་ནས་སོ་ཞེས་བྱ་བ་ནི། བུད་མེད་ཀྱིས་མི་བྱ་སྟེ། མཐུ་དང་ལྡན་པའི་ཡུལ་ལ་དམན་པ་དབང་མེད་པའི་ཕྱིར་རོ། །དེ་ལ་མངག་པས་ཇི་ལྟར་བསྒྲུབ་པར་བྱ་ཞེ་ན། དེའི་ཕྱིར་གསོལ་བ་དང་ཁས་བླང་བ་དག་དེའི་མིང་ཁོ་ནས་བྱའོ་ཞེས་བྱ་བ་སྨྲས་ཏེ། མིང་འདི་ཞེས་བྱ་བ་དེ་རབ་ཏུ་འབྱུང་བར་གསོལ་ལོ། །རབ་ཏུ་འབྱུང་བ་ཡང་དག་པར་ལེན་ཏོ་ཞེས་དེ་ལྟར་དེའི་མིང་གིས་བྱའོ། །རབ་ཏུ་འབྱུང་བ་ཞུ་བ་ཡང་མངག་པས་དེའི་མིང་ཁོ་ནས་དགེ་འདུན་ལ་ཞུ་བར་བྱའོ། །བསྙེན་པར་རྫོགས་པ་མན་ཆད་གོང་མ་ཡང་ངོ་ཞེས་བྱ་བ་ནི་རབ་ཏུ་བྱུང་བའི་གོང་མ་བསྙེན་པར་
རྫོགས་པ་མན་ཆད་ཀྱང་སྐལ་བ་དང་ལྡན་པའི་རང་བཞིན་ཅན་ལ་མདག་པ་དང་འདྲ་བའི་གང་བྱ་བ་དེ་མི་རིགས་པ་མ་ཡིན་ཏེ་རགས་པ་ཁོ་ན་ཡིན་པའོ། །འདིར་གོང་མ་ཞེས་བྱ་བ་ནི་སྔར་རབ་ཏུ་བྱུང་བ་ཞེས་སྨོས་པས་དགེ་ཚུལ་གྱི་སྡེམ་བ་སྦྱིན་པ་བསྟན་པའི་གོང་མ་དགེ་ཚུལ་མའི་སྡོམ་པ་སྦྱིན་པ་དང༌། བསླབ་པའི་སྡོམ་པ་སྦྱིན་པ་དང༌། ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་སྦྱིན་པ་དང༌། བསྙེན་པར་རྫོགས་པར་བྱ་བ་དག་གོ །མི་ནོད་ནི་བྱིན་པ་ཉེད་མ་ཡིན་ནོ་ཞེས་བྱ་བ་ནི། བསླབ་པ་སྦྱིན་པ་དང༌། བསླབ་པ་གསོལ་བ་དང༌། སྡོམ་པ་སྦྱིན་པ་དག་ལ་ལས་བྱེད་པ་ན་དེ་དག་འདི་སྐད་ཅེས་བདག་ལ་བསླབ་བམ་སྦྱིན་ཅིག་བདག་བསྙེན་པར་རྫོགས་པ་མ་བྱེད་ཅིག་ཅེས་མི་ནོད་ན་སྦྱིན་པར་བྱེད་དུ་ཟིན་ཀྱང་བྱིན་པ་ཉིད་དུ་མི་འགྱུར་བའོ། །དེ་ལ་གསོལ་བ་ཉམས་སོ་ཞེས་བྱ་བ་ནི། མི་ནོད་པ་དེ་ལ་དེས་སྡར་གསོལ་བ་གང་ཡིན་པ་དེ་ཡང་ཉམས་པ་ཡིན་ཏེ། དེའི་ཕྱིར་བླང་བའི་འདོད་པ་དེ་ཡང་གསོལ་བར་བྱ་བ་ཉིད་ཡིན་ནོ། །སྔར་བཞམས་ཏེ་བསྒོ་བ་ཉིད་ཆོ་ག་ཡིན་ནོ་ཞེས་བྱ་བ་ནི། དེ་དག་ལ་བཞམས་ཏེ་བསྒོ་བར་བྱའོ་ཞེས་གསུངས་པ་དེ་ཉིད་ཆོག་ཡིན་པར་ཤེས་པར་བྱ་སྟེ། དེས་དེ་མ་བསྒྲུབས་ན་ཆོ་ག་ལས་འདས་ན་ལས་མི་འཆགས་སོ་ཞེས་བསྟན་བས་བསྒོ་བར་བྱ་བ་ལ་ཡང་སྔར་བཞམས་ཏེ་མ་བསྒོ་ན་ལས་མི་འཆགས་སོ། །གནས་ནས་དབྱུང་བ་ལ་ཡང་དེ་བཞིན་ནོ་ཞེས་བྱ་བ་ནི། གནས་ནས་དབྱུང་བ་ལ་ཡང་སྔར་བཞམས་ཏེ་བསྒོ་བ་ཉིད་ཆོ་ག་ཉིད་ཡིན་བ་སྟེ། དེས་ན་གནས་ནས་དབྱུང་བ་ལ་ཡང་བཞམས་ཏེ་བསྒོ་བ་མ་བྱས་པར་ལས་མི་འཆགས་སོ། །དགོངས་སུ་གསོལ་ཞེས་བྱ་བ་ལ་སོགས་པ་ལ་ནི་ཕ་རོལ་གྱི་སེམས་གཏང་པ་ཉིད་གཙོ་བོ་ཡིན་ནོ་ཞེས་བྱ་བ་ནི། དགོངས་སུ་གསོལ་ཞེས་བྱ་བ་ལ་སོགས་པ་བརྗོད་པར་བྱ་བདག་ལ་ཕ་རོལ་གྱིས་སེམས་གཏད་པ་ཉིད་གཙོ་བོ་ཡིན་ཏེ་གང་གི་ཕྱིར་དེ་ལྟར་མ་ཡིན་པ་དེའི་ཕྱིར་སེམས་གཏོད་པར་བྱེད་པ་དག་གིས་སེམས་གཏད་ན། ལས་བྱེད་པས་དགོངས་སུ་གསོལ་ཞེས་བྱ་བ་ལ་སོགས་པ་མ་བརྗོད་ཀྱང་ལས་མི་འཆགས་པར་དོགས་པར་མི་བྱའོ། །སོགས་པ་ཞེས་སྨོས་པའི་སྒྲས་ནི། དགེ་འདུན་བཙུན་པ་
རྣམས་གསན་དུ་གསོལ། བཙུན་པ་དགོངས་སུ་གསོལ། ཚེ་དང་ལྡན་པ་གསན་དུ་གསོལ། ཚེ་དང་ལྡན་པ་དག་སེམས་སྡུས་ཤིག །སེམས་སྡུས་ཤིག་ཅེས་བྱ་བ་སྔགས་དག་བསྡུ་བར་རིག་པར་བྱའོ། །དོན་གྱི་སྐབས་དག་གིས་གོ་རིམས་འཁྲུགས་པས་ནི་མི་འཆགས་པ་མ་ཡིན་ནོ་ཞེས་བྱ་བ་ནི། གསོལ་བའི་བདག་ཉིད་དམ་བརྗོད་པའི་བདག་ཉིད་ཀྱི་ཚིག་གི་གོ་རིམས་འཁྲུགས་པ། དཔེར་ན་མིང་འདི་ཞེས་བགྱི་བ་འདི་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་གསོལ་ཏེ་ཞེས་བརྗོད་པར་བྱ་བ་ལ། དགེ་འདུན་ལས་མིང་འདི་ཞེས་བགྱི་བ་འདི་མིང་འདི་ཞེས་བགྱི་བས་བསྙེན་པར་རྫོགས་པར་གསོལ་ཏེ་ཞེས་བྱ་བ་ལྟ་བུའི་ཚིག་གི་གོ་རིམས་འཁྲུགས་པས་ནི་ལས་མི་འཆགས་པར་མི་འགྱུར་རོ། །དེ་ཡང་ཚིག་གི་ཕྲད་སྔ་ཕྱི་འཁྲུགས་པས་གོ་པར་བྱེད་པ་མ་ཡིན་ན་ནི་མི་འཆགས་སོ། །གོ་བར་བྱེད་བ་ཡིན་ན་ནི་འཆགས་སོ། །དེ་ནི་མི་བྱ་བ་ཉིད་དོ་ཞེས་བྱ་བ་ནི། དགོངས་སུ་གསོལ་ཞེས་བྱ་བ་ལ་སོགས་པའི་ཚིག་མེད་པ་དང༌། དོན་གྱི་སྐབས་དག་གི་གོ་རིམས་འཁྲུགས་པ་དེ་ནི་མི་བྱ་བ་ཉིད་དེ། དེ་ནི་ཟུར་ཆག་པ་ཡིན་པས་དེ་ལྟར་བྱེད་ན་ཉེས་བྱས་སུ་འགྱུར་རོ། །མཚན་གཞན་ལ་བརྟེན་པས་ནི་མ་ཡིན་ནོ་ཞེས་བྱ་བ་ནི། དགེ་སློང་ཞེས་བརྗོད་པར་བྱ་བ་ལ་དགེ་སློང་མ་ཉིད་དུ་བརྗོད་པ་དང༌། དགེ་སློང་མ་ཞེས་བརྗོད་པར་བྱ་བ་ལ་དགེ་སློང་ཉིད་དུ་བརྗོད་པ་ལ་སོགས་པ་ནི་ལས་མི་འཆགས་པ་མ་ཡིན་པའོ། །འདི་སྐད་བསྟན་ཏེ། མཚན་གཞན་བརྗོད་པས་ནི་ལས་མི་འཆགས་པར་མི་འགྱུར་ཏེ། རྗོད་པ་ལ་ཉེས་བྱས་སུ་ནི་འགྱུར་རོ། །དགེ་སློང་དང་དགེ་སློང་མ་ཉིད་དག་གི་ལས་གཞན་བྱེད་པས་མ་ཡིན་ནོ་ཞེས་བྱ་བ་ནི། དགེ་སློང་ཉིད་ལ་དགེ་སློང་མ་ཉིད་ཀྱི་ལས་བྱེད་པ་མི་འཆགས་པ་མ་ཡིན་ལ། དགེ་སློང་མ་ཉིད་ལ་དགེ་སློང་ཉིད་ཀྱི་ལས་བྱེད་པ་ཡང་མི་འཆགས་པ་མ་ཡིན་པའོ། །དེ་ལྟ་བས་ན་དགེ་སློང་བསྙེན་པར་རྫོགས་པར་བྱ་བའི་ལས་ལ་དགེ་སློང་མ་རྣམས་ཀྱི་བསྙེན་པར་རྫོགས་པར་བྱ་བའི་ལས་ཀྱི་ཆོ་ག་གང་ཡིན་པ་དེ་བྱེད་ན་ཉམས་པ་ཅུང་ཟད་ཀྱང་མེད་ཀྱི། དགེ་སློང་མའི་དགེ་འདུན་པ་སོགས་པ་ལ་སོགས་པ་ལྷག་པ་དག་
ཡོད་པར་ཟད་དེ། ལྷག་བ་དག་གིས་ནི་མ་བྱས་པ་ཉིད་མ་ཡིན་པས་དེའི་ཕྱིར་དགེ་སློང་མའི་ལས་ཀྱིས་ནི་དགེ་སློང་ཉིད་དུ་འགྱུར་བར་ཤེས་པར་བྱའོ། །འདི་ལྟར་དགེ་སློང་མ་བསྙེན་པར་རྫོགས་པར་བྱ་བ་ལ་ནི་དགེ་སློང་གི་དགེ་འདུན་གཙོ་བོ་ཡིན་པས་དགེ་སློང་མའི་དགེ་འདུན་བ་སོགས་པ་ནི་ཚུལ་དང་མཐུན་པ་ཙམ་དུ་བྱ་བར་ཟད་པའི་དགེ་སློང་གི་ལས་ཀྱིས་ཀྱང་དགེ་སློང་མ་ཉིད་རུ་འགྱུར་བར་ཤེས་པར་བྱའོ། །དེ་ལྟར་ཡང་དགེ་སློང་རྣམས་ལས་དགེ་སློང་མས་བསྙེན་པར་རྫོགས་པ་དག་དགེ་སློང་མའི་དངོས་པོ་བཙལ་བར་བྱའོ་ཞེས་གསུངས་པ་ཡིན་ནོ། །འདིར་གཞུང་ནི་སིལ་བུ་དག་ལས་བཙུན་པ་རེ་ཞིག་དགེ་ཚུལ་དགེ་སློང་མའི་ལས་ཀྱིས་བསྙེན་པར་རྫོགས་པར་བགྱིད་ན། བསྙེན་པར་རྫོགས་པར་བརྗོད་པར་བགྱིའམ། ཉེ་བ་འཁོར་བསྙེན་པར་རྫོགས་པར་བརྗོད་པར་བྱ་སྟེ། བསྙེན་པར་རྫོགས་པར་བྱེད་པ་དག་ལ་ནི་འགལ་ཚབས་ཅན་དུ་འགྱུར་རོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །ལས་ཀྱི་གཞི་ཞུ་བ་ལ་སོགས་པའི་སྐབས་སོ་ཞེས་བྱ་བ་དེ་ཞུ་བ་ལ་སོགས་པའི་སྐབས་ནས་འབྱུང་བ་བཤད་ཟིན་ཏོ། །ལས་ཀྱི་གཞི་རྫོགས་སོ་ཞེས་བྱ་བ་དེ་བཤད་ཟིན་ཏོ།། །།བམ་པོ་དྲུག་ཅུ་གཅིག་པ། ད་ནི་ཕྱིར་བཅོས་པའི་བཞི་བསྡུ་བའི་ཕྱིར། གཞི་མ་ཞི་བར་ཤེས་ནས་གླེང་བ་པོས་སོ་སོར་ཤེས་པར་བྱས་ཤིང་མངོན་སུམ་དུ་འཇོག་པ་ལ་ནན་ཐུར་གྱི་ལས་བྱའོ་ཞེས་བྱ་བ་སྨྲས་ཏེ། ནན་ཐུར་གྱི་ལས་ཀྱི་རྒྱུ་འཐབ་ཀྲོལ་བྱེད་པ་ཉིད་ལ་སོགས་པའི་གཞི་དེ་མ་ཞི་ཉེ་བར་མ་ཞི་ཞིང་དེས་ཡོངས་སུ་མ་བཏང་ཕྱིར་མ་བཅོས་པར་ཤེས་ཤིང་རྣམ་བར་ཤེས་ལ་ཡིད་ཆེས་ཤིང་མངོན་པར་ཡིད་ཆེས་པར་འགྱུར་ནས། གླེང་བ་པོས་ཀྱང་རྒྱུ་འཐབ་ཀྲོལ་བྱེད་པ་ཉིད་ལ་སོགས་པ་དེ་ལེགས་པར་སོ་སོར་ཤེས་པར་བྱས་ཤིང༌། གླེང་བར་བྱ་བ་དེ་ཡང་དགེ་འདུན་གྱིས་མངོན་སུམ་དུ་འཇོག་ན། དེའི་ཚེ་དགེ་འདུན་གྱིས་དེ་ལ་ནན་ཐུར་གྱི་ལས་བྱའོ། །དགེ་འདུན་ཐམས་ཅད་ཀྱིས་རང་གིས་གླེང་བར་ནི་མི་བྱའོ། །གང་ལ་གླེང་བ་པོ་མ་བྱུང་བ་དེ་ལ་ཅི་དགེ་འདུན་གྱིས་བཏང་སྙོམས་སུ་བྱའམ། འོན་ཏེ་གླེང་བ་པོ་བསླང་སྟེ་འཇུག་པར་བྱ་ཞེ་ན། དེའི་ཕྱིར་གླེང་བ་པོ་རང་མ་བྱུང་ན་དགེ་འདུན་གྱིས་
བསླང་བར་བྱའོ་ཞེས་བྱ་བ་སྨྲས་ཏེ། འདིར་ལུང་ནི་བསྐྲད་པར་བྱ་བའི་ལས་ལས་ལམ་ཕྱེད་དུ་སོང་ལ། འགྲོ་འགྱོགས་དང་ནབ་སོ་གཉིས་ཀྱི་གླེང་བ་པོ་དགེ་སློང་བསྐོ་བར་བྱའོ་ཞེས་གསུངས་པ་ཡིན་ནོ། །དགེ་འདུན་ཐམས་ཅད་གཤེ་བ་གང་ཡིན་པ་དེ་ནི་མི་རིགས་ཤིང་མི་མཛེས་པས་དེའི་ཕྱིར་གླེང་བར་བྱ་བ་རྣམ་པ་དེ་ལྟ་བུ་མངོན་སུམ་དུ་གྱུར་པ་ལ་ནན་ཐུར་གྱི་ལས་བསྡིགས་པ་ལ་སོགས་པ་བདུན་པོ་དག་བྱའོ། །ནན་ཐུར་ཞེས་བྱ་བ་ནི། འོག་ཏུ་བཞག་ཅིང་བཤུད་བ་ཉིད་དུ་རྣམ་པར་གཞག་པར་ཞེས་བྱ་བའི་ཐ་ཚིག་གོ །འདུ་བ་མི་སྟེར་ན་གྲགས་པ་ཙམ་གྱིས་སོ་ཞེས་བྱ་བ་ནི། གླེང་བ་པོས་སོ་སོར་ཤེས་པར་བྱས་ཤིང་མངོན་སུམ་དུ་འཇོག་ན་ཞེས་སྨོས་པ་དེ་གཉིས་ཀྱི་དམིགས་ཀྱིས་བསལ་བ་ཡིན་ཏེ། འདི་ལྟར་གལ་ཏེ་མངོན་སུམ་ཉིད་མི་སྟེར་ན་དེའི་ཚེ་སོ་སོར་ཤེས་པར་བྱ་བ་ལ་སོགས་པ་བྱར་མི་ནུས་པས་དེའི་ཕྱིར་འཐབ་ཀྲོལ་བྱེད་པ་ཉིད་ལ་སོགས་པ་རྒྱུ་གྲགས་པ་ཙམ་གྱིས་མངོན་སུམ་གྱི་དངོས་པོ་མི་བསལ་བར་བསྡིགས་པ་ལ་སོགས་པའི་ལས་བྱའོ། །མ་མཐོང་བ་ལ་ནི་ཁས་ལེན་པ་ཡན་ལག་མ་ཡིན་ཏེ། ཡོད་པ་ཉིད་རྣམ་པར་བཤིག་པའི་ཕྱིར་རོ་ཞེས་བྱ་བ་ནི། གང་གི་ཚེ་ལྟུང་བ་མ་མཐོང་བས་གནས་ནས་དབྱུང་བའི་ལས་བྱེད་པའི་མ་མཐོང་བ་དེ་ལ་ནི་གྲགས་པ་དང་མངོན་སུམ་གྱི་དངོས་པོ་དེ་གཉིས་ཡན་ལག་ཡིན་གྱི་ཁས་ལེན་པ་ནི་ཡན་ལག་མ་ཡིན་ཏེ། འདི་ལྟར་བྱས་པ་ཡང་དག་པའི་ལྟུང་བ་མ་མཐོང་ཞིང་ལྟུང་བ་ཡང་དག་པ་མ་མཐོང་བ་དེ་ལ་གལ་ཏེ་དེ་བདེན་ཡང་དག་སྟེ། བདག་གིས་ལྟུང་བ་མ་མཐོང་ངོ་ཞེས་ལེན་ན་དེས་ལྟུང་བ་མཐོང་ཞིང་ཁས་བླངས་པ་ཡིན་པས་རྒྱུ་དེ་ཡོད་པ་ཉིད་རྣམ་པར་བཤིག་པའི་ཕྱིར་དེ་ལ་ནན་ཐུར་གྱི་ལས་མི་བྱ་བ་ཉིད་ཡིན་པས་དེའི་ཕྱིར་དེ་ཁས་ལེན་པ་ནི་ཡན་ལག་མ་ཡིན་ནོ། །སྐབས་མི་འབྱེད་ན་ཡང་མི་རིགས་པའི་ཕྱིར་རོ་ཞེས་བྱ་བ་ནི། སྐབས་མི་འབྱེད་ན་ཡང་གྲགས་པ་དང༌། མངོན་གསུམ་གྱིས་དངོས་པོ་དེ་གཉིས་ཡན་ལག་ཡིན་གྱི་ཁས་ལེན་པ་ནི་ཡན་ལག་མ་ཡིན་ནོ། །དེ་ཅིའི་ཕྱིར་ཞེ་ན། མི་རིགས་པའི་ཕྱིར་རོ། །འདིར་རྒྱུ་གཉིས་ཀྱིས་མི་རིགས་ཏེ། སྐབས་མི་འབྱེད་པའི་གང་ཟག་དེ་ལ་གླེང་བ་ཉིད་ཀྱང་མི་
བྱ་ན་ཁས་ལེན་བ་ལྟ་ག་ལ་ཡོད་དེ། དེའི་ཕྱིར་རྒྱུ་གཅིག་གིས་ཀྱང་མི་རིགས་ལ། གང་སྐབས་འབྱེད་པར་མི་བྱེད་པ་དེ་ལ་ཇི་ལྟར་བྱས་ཀྱང་སྐབས་རྙེད་ཅིང་གླང་བ་ལ་ཁས་བླང་ངོ་སྙམ་དུ་སེམས་པར་མི་འགྱུར་བས་དེའི་ཕྱིར་རྒྱུ་གཉིས་པ་དེས་ཀྱང་མི་རིགས་སོ། །གླེང་བ་པོ་རང་མ་ལངས་ན་བསྐོ་བས་བསླང་པར་བྱའོ་ཞེས་བྱ་བ་ནི། གལ་ཏེ་གླེང་བ་པོ་རང་མ་ལངས་ན་སྒྲོ་བར་བྱ་སྟེ། གསོལ་བ་དང་གཉིས་ཀྱི་ལས་ཀྱིས་བསྐོ་བར་བྱའོ། །དེའི་སྔགས་ནི་ཚེ་དང་ལྡན་པ་མིང་འདི་ཞེས་བྱ་བ་ཁྱོད་རེ་ལྡེ་རི་ལ་སོང་སྟེ་དགེ་སློང་འགྲོ་མགྱོགས་དང་ན་བ་སོལ་དགེ་སློང་གི་ཆོས་མ་ཡིན་པ་རྣམ་པ་མར་བོས་གླེང་བར་སྤྲོའམ། སྤྲོའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་གླེང་བ་པོ་མིང་འདི་ཞེས་བགྱི་བ་འདི་རེ་ལྡེའི་རིལ་མཆིས་ཏེ། དགེ་སློང་འགྲོ་མགྱོགས་དང་ནབ་སོ་ལ་དགེ་སློང་གི་ཆོས་མ་ལགས་པ་རྣམས་པ་མང་པོས་གླེང་བར་སྒྲོ་ན་ཞེས་བྱ་བ་ལ་སོགས་པ་གསུངས་པ་ཡིན་ནོ། །རྒྱུ་གང་གིས་ནན་ཐུར་གྱི་ལས་བྱ་བ་དེ་སྤྱིར་བསྟན་ནས། ནན་ཐུར་བྱས་པ་ཇི་ལྟར་གྱུར་པ་ལ་བཟོད་པར་བྱ་བ་དེ་བསྟན་པའི་ཕྱིར་རོ། །གཤེ་བ་དང་ཁྲོ་བ་དང་སྤྱོ་བ་ཉིད་དང་དགེ་འདུན་གྱི་རྙེད་པ་མེད་པ་དང༌། གནས་མེད་པར་བྱ་བར་སེམས་པ་ཉིད་དང་བླའི་གྲྭ་དང་འོག་གཟུ་དང་ཉེ་དུའི་གང་ཟག་རྟེན་ཉིད་དང༌། དགེ་འདུན་རྟེན་མ་ཡིན་པ་ཉིད་དུ་མི་འཛིན་པ་དང༌། ཁྱིམ་པ་དང༌། མུ་སྟེགས་ཅན་གྱི་རྒྱལ་མཚན་འཆང་བ་དང༌། མུ་སྟེགས་ཅན་ལ་བརྟེན་པ་དང༌། ཆོ་ག་མ་ཡིན་པ་སྤྱོད་པ་དང༌། དགེ་སློང་གི་བསླབ་པ་དག་ལ་མི་སློབ་པར་མི་བྱེད་པ་དང༌། སྐྲ་འགྲེང་བར་གྱུར་བ་དང༌། སྐྲ་འཕྱར་བར་གྱུར་པ་དང༌། དགེ་འདུན་ལ་སྤུ་སྙོལ་བར་བྱེད་པ་དང༌། འབྱུང་བར་བསྐྱོད་པ་དང༌། མཚུངས་པར་ཉེ་བར་སྟོན་པ་དང༌། རྒྱུ་ལས་ཕྱིར་བཟློག་པ་བཟོད་པ་གསོལ་བ་ལའོ་ཞེས་བྱ་བ་སྨྲས་ཏེ། མི་འཛིན་པ་དང་ཞེས་བྱ་བ་ནི། ཚིག་གོང་མ་བཞི་པོ་དང་སོ་སོར་སྦྱར་ཏེ། གཤེ་བ་དང་ཁྲོ་བ་དང་སྤྱོ་བ་ཉིད་མི་འཛིན་པ་དང༌། དགེ་འདུན་གྱི་རྙེད་པ་མེད་པ་དང༌། གནས་མེད་པར་བྱ་བར་སེམས་པ་ཉིད་མི་འཛིན་པ་དང༌། བླའི་གྲྭ་དང་འོག་གཟུ་དང་ཉེ་དུའི་གང་ཟག་རྟེན་ཉིད་དུ་མི་འཛིན་པ་དང༌།
དགེ་འདུན་རྟེན་མ་ཡིན་པ་ཉིད་དུ་མི་འཛིན་པ་ཞེས་བྱ་བར་སྦྱར་རོ། །མི་བྱེད་པ་ཞེས་བྱ་བ་ཡང་ཚིག་གོང་མ་གསུམ་དང་སོ་སོར་སྦྱར་ཏེ། ཁྱིམ་པ་དང་མུ་སྟེགས་ཅན་གྱི་རྒྱལ་མཚན་འཆད་བར་མི་བྱེད་པ་དང༌། མུ་སྟེགས་ཅན་ལ་བརྟེན་པ་དང༌། ཆོ་ག་མ་ཡིན་པ་སྤྱོད་པར་མི་བྱེད་པ་དང༌། དགེ་སློང་གི་བསླབ་པ་དག་ལ་མི་སློབ་པར་མི་བྱེད་པ་ཞེས་བྱ་བར་སྦྱར་རོ། །དེ་ལ་གཤེ་བ་དང་ཁྲོ་བ་དང་སྤྱོ་བ་ཉིད་མི་འཛིན་པ་ཞེས་བྱ་བ་ནི། ཁྱིམ་པ་དང་རབ་ཏུ་བྱུང་བ་དག་གིས་གཤེ་བ་དང༌། ཁྲོ་བ་དང༌། སྤྱོ་བ་ཉིད་མི་འཛིན་པ་སྟེ་དེ་དག་མི་འཛིན་ཞིང་བཟོད་པ་ཡང་གསོལ་བ་ལ་དགེ་འདུན་གྱིས་བཟོད་པའི་ལས་བྱའོ་ཞེས་བྱ་བར་སྦྱར་རོ། །དགེ་འདུན་གྱི་རྙེད་པ་མེད་པ་དང༌། གནས་མེད་པར་བྱ་བར་སེམས་པ་ཉིད་མི་འཛིན་པ་ཞེས་བྱ་བ་ནི་ཅི་ནས་ཀྱང་དགེ་འདུན་གྱི་རྙེད་པ་མེད་པར་བྱ་བ་དང༌། དགེ་འདུན་གྱི་གནས་མེད་པར་བྱའོ་སྙམ་དུ་སེམས་ལ་ཉིད་མི་འཛིན་པ་སྟེ། འདིར་དགེ་འདུན་ཞེས་སྨོས་པ་ནི་དཔེ་ཙམ་དུ་ཟད་དེ། དགེ་འདུན་དུ་གྱུར་ཀྱང་རུང་དགེ་འདུན་དུ་མ་གྱུར་ཀྱང་རུང་བའི་དགེ་སློང་བསྡུས་པ་འམ། རེ་རེ་ལ་དེ་ལྟར་སེམས་པ་ཉིད་མི་འཛིན་པ་སྟེ། དེ་ལྟར་མི་འཛིན་ཅིང་བཟོད་པ་ཡང་གསོལ་བ་ལ་དགེ་འདུན་གྱིས་བཟོད་པའི་ལས་བྱའོ། །བླའི་གྲྭ་དང་འོག་གཟུ་དང་ཉེ་དུའི་གང་ཟག་རྟེན་ཉིད་དུ་མི་འཛིན་པ་ཞེས་བྱ་བ་ནི། བླའི་གྲྭ་ཡང་རྟེན་ཉིད་དུ་མི་འཛིན། འོག་གི་གཟུ་བོ་ཡང་རྟེན་ཉིད་དུ་མི་འཛིན། ཉེ་དུ་ཁྱིམ་པ་དང་རབ་ཏུ་བྱུང་བའི་གང་ཟག་ཀྱང་རྟེན་ཉིད་དུ་མི་འཛིན་པ་སྟེ། དེ་དག་རྟེན་ཉིད་དུ་མི་འཛིན་ཞིང་བཟོད་པ་ཡང་གསོལ་བ་ལ་དགེ་འདུན་གྱིས་བཟོད་པའི་ལས་བྱའོ། །དགེ་འདུན་རྟེན་མ་ཡིན་པ་ཉིད་དུ་མི་འཛིན་པ་ཞེས་བྱ་བ་ནི། དགེ་འདུན་རྟེན་ཁོ་ན་ཡིན་པར་འཛིན་པ་སྟེ། དེ་ལྟར་འཛིན་ཅིང་བཟོད་པ་ཡང་གསོལ་བ་ལ་དགེ་འདུན་གྱིས་བཟོད་པའི་ལས་བྱའོ། །ཁྱིམ་པ་དང་མུ་སྟེགས་ཅན་གྱི་རྒྱལ་མཚན་འཆང་བར་མི་བྱེད་བ་ཞེས་བྱ་བ་ནི། ཁྱིམ་པའི་རྒྱལ་མཚན་འཆང་བར་མི་བྱེད་པ་དང༌། མུ་སྟེགས་ཅན་གྱི་རྒྱལ་མཚན་འཆང་བར་མི་བྱེད་པ་སྟེ་དེ་འཆང་བར་མི་བྱེད་ཅིང་བཟོད་པ་ཡང་གསོལ་བ་ལ་དགེ་འདུན་གྱིས་བཟོད་པའི་ལས་བྱའོ། །མུ་
སྟེགས་ཅན་ལ་བརྟེན་པ་དང་ཆོག་མ་ཡིན་པར་སྤྱོད་པར་མི་བྱེད་པ་ཞེས་བྱ་བ་ནི་མུ་སྟེགས་ཅན་ལ་རྟེན་པར་མི་བྱེད་པ་དང༌། སྤྱོད་པ་དང་སྤྱོད་ལམ་གྱི་རྣམ་པར་གཞག་པ་ཆོ་ག་མ་ཡིན་པ་དག་སྤྱོད་པར་མི་བྱེད་པ་སྟེ། དེ་དག་མི་བྱེད་ཅིང་བཟོད་པ་ཡང་གསོལ་བ་ལ་དགེ་འདུན་གྱིས་བཟོད་པའི་ལས་བྱའོ། །དགེ་སློང་གི་བསླབ་པ་དག་ལ་མི་སློབ་བར་མི་བྱེད་པ་ཞེས་བྱ་བ་ནི། སྦོང་བས་བསྡུས་པའི་བསླབ་བ་དག་ལ་སློབ་པ་ཁོ་ནར་བྱེད་པ་སྟེ། དེ་ལྟར་བྱེད་ཅིང་བཟོད་པ་ཡང་གསོལ་བ་ལ་དགེ་འདུན་གྱིས་བཟོད་པའི་ལས་བྱའོ། །སྐྲ་འགྲེང་བར་འགྱུར་བ་ཞེས་བྱ་བ་ནི་སྐྱ་དག་གྱེན་དུ་རྣམ་པར་འགྲེང་བར་གྱུར་པ་ཉིད་དོ། །སྐྲ་འཕྱར་བར་གྱུར་བ་ཞེས་བྱ་བ་ནི་སྐྲ་དག་ཐད་ཀར་རྣམ་པར་འཕྱར་བར་གྱུར་པ་ཉིད་དོ། །དེ་གཉིས་ཀྱིས་ནི་སྨ་བབ་པ་ཉིད་དུ་བསྟན་པ་ཡིན་ཏེ་འདི་ལྟར་སྨ་བབ་པ་ནི་སྐྲ་འགྲེང་བར་གྱུར་པ་དང༌། སྐྲ་འཕྱར་བར་གྱུར་པ་ཡིན་ནོ་ཞེས་གྲགས་པའི་ཕྱིར་ཏེ། དེ་ལྟར་གྱུར་ཅིང་བཟོད་པ་ཡང་གསོལ་བ་ལ་དགེ་འདུན་གྱིས་བཟོད་པའི་ལས་བྱའོ། །དགེ་འདུན་ལ་སྤུ་སྙོལ་བར་བྱེད་བ་ཞེས་བྱ་བ་ནི། དགེ་འདུན་གྱི་ཡུལ་ལ་སྤུ་འཁུམས་པར་བྱེད་པ་སྟེ། དེ་ནི་རྒྱགས་པ་མེད་པ་ཉིད་དུ་བསྟན་ཏེ། འདི་ལྟར་རྒྱགས་པ་དང་བཅས་པ་ནི་སྤུ་དག་ཏེ་པོར་ཤིན་ཏུ་སྤུངས་པར་སྟོན་པས་དེས་ན་འདི་ནི་དགེ་འདུན་ལ་རྒྱགས་པ་མེད་པ་ཉིད་དུ་བྱེད་པ་བསྟན་ཏེ། དེ་ལྟར་བྱེད་ཅིང་བཟོད་པ་ཡང་གསོལ་བ་ལ་དགེ་འདུན་གྱིས་བཟོད་པའི་ལས་བྱའོ། །འབྱུང་བར་བསྐྱོད་པ་ཞེས་བྱ་བ་ནི། ནན་ཐུར་བྱས་པ་ཉིད་ཅེས་བྱ་བ་རིགས་པ་མ་ཡིན་པ་དག་པ་མ་ཡིན་པ་སྨད་པ་ཞེས་བྱ་བའི་གནས་སྐབས་ཀྱི་བྱ་བྲག་དེ་ནས་རྣམ་པར་དག་པའི་ལམ་དུ་གནས་པར་འབྱུང་བ་ནི་འབྱུང་བ་ཞེས་བྱའོ། །དེ་སྒྲུབ་པར་བྱེད་པ་ནི་བསྐྱོད་པ་ཞེས་བྱ་སྟེ། དེ་ལྟར་བསྐྱོད་ཅིང་བཟོད་པ་ཡང་གསོལ་བ་ལ་དགེ་འདུན་གྱིས་བཟོད་པའི་ལས་བྱའོ། །མཚུངས་པར་ཉེ་བར་སྟོན་པ་ཞེས་བྱ་བ་ལ་མཚུངས་པ་ཞེས་བྱ་བ་ནི་ཡང་དག་པ་ཉིད་དུ་གྱུར་པར་འཇུག་པ་སྟེ། དགེ་འདུན་དང་འདྲེ་ཞིང་དགེ་འདུན་དང་ལྷན་ཅིག་མཚུངས་པར་འཇུག་པའོ། །དེས་ཉེ་བར་སྟོན་པ་ནི་གང་གིས་འདི་བདག་ཅག་དང་མཚུངས་པར་གྱུར་ཏོ་ཞེས་བྱ་བར་ཤེས་པར་
འགྱུར་བར་ལུས་འདུད་པ་དང་བཅས་པ་དང་རྗེས་དང་བཅས་པས་མཉེན་ཞིང་རྗེས་སུ་མཐུན་པའི་བྱ་བ་དང་མཛའ་བར་བྱས་པའི་སྤྱོད་པ་དང་ལྡན་ཞིང་གུས་པ་དང་རྗེས་གཉིས་ཀྱིས་བདག་ཉིད་དུ་གྱར་པའི་ནང་དུ་གནས་ཤིང་ཐ་དད་དུ་གྱུར་པ་ལས་ཕྱིར་ལྡོག་པར་སྟོན་པ་སྟེ། དེ་ལྟར་མཚུངས་པར་ཉེ་བར་སྟོན་ཅིང་བཟོད་པ་ཡང་གསོལ་བ་ལ་དགེ་འདུན་གྱིས་བཟོད་པའི་ལས་བྱའོ། །རྒྱུ་ལས་ཕྱིར་ལྡོག་པ་ཞེས་བྱ་བ་ནི། འཐབ་ཀྲོལ་བྱེད་པ་ཉིད་ལ་སོགས་པའི་རྒྱུ་གང་གིས་དེ་ལ་ནན་ཐུར་གྱི་ལས་བྱས་པར་གྱུར་པའི་རྒྱུ་དེ་ལས་ཕྱིར་ལྡོག་པ་སྟེ། དེ་ལས་ཕྱིར་ལྡོག་ཅིང་བཟོད་པ་ཡང་གསོལ་བ་ལ་དགེ་འདུན་གྱིས་བཟོད་པའི་ལས་བྱའོ། །བཟོད་པ་གསོལ་བ་ལའོ་ཞེས་བྱ་བ་ནི། ཇི་སྐད་སྨོས་པའི་རྣམ་པ་དེ་དག་དེ་ལྟར་གྱུར་དུ་ཟིན་ཀྱང་བཟོད་པ་མི་གསོལ་ན་དེ་ལ་དགེ་འདུན་གྱིས་བཟོད་པའི་ལས་མི་བྱའོ། །འདི་ལྟར་ཇི་སྐད་སྨོས་པའི་རྣམ་པ་དེ་དག་ཐམས་ཅད་ལྟར་ཡང་གྱུར་ལ། དགེ་འདུན་ལ་བཟོད་པ་གསོལ་བའི་སྔགས་ལན་གསུམ་བཟླས་པ་ཡང་བྱེད་ན། དེའི་ཚེ་དགེ་འདུན་གྱིས་དེ་ལ་གསོལ་བ་དང་བཞིའི་ལས་ཀྱིས་བཟོད་པར་བྱ་བའོ། །དེ་ལ་དགེ་འདུན་ལ་བཟོད་པ་གསོལ་བའི་སྔགས་ལན་གསུམ་བཟླས་པར་བྱ་བ་ནི། དགེ་འདུན་བཙུན་པ་རྣམས་གསོན་དུ་གསོལ། བདག་དགེ་སློང་དམར་སེར་ཅན་འཐབ་ཀྲོལ་བགྱིད་པ་མཚང་འདྲུ་བར་བགྱིད་པ་རྩོད་པར་བགྱིད་པ་འགྱེད་པར་བགྱིད་པ་རྩོད་པའི་གཞི་འགྱེད་པ་ལགས་ཏེ། དགེ་འདུན་གྱིས་བདག་ལ་བསྡིགས་པའི་ཕྲིན་ལས་མཛད་ལགས་ན་ཞེས་བྱ་བ་ལ་སོགས་པ་གསུངས་པ་ཡིན་ནོ། །དགེ་འདུན་གྱིས་དེ་ལ་གསོལ་བ་དང་བཞིའི་ལས་ཀྱིས་བཟོད་པ་བྱ་བའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། དགེ་སློང་དམར་སེར་ཅན་འདི་འཐབ་ཀྲོལ་བགྱིད་པ་མཚང་འདྲུ་བར་བགྱིད་པ། རྩོད་པར་བགྱིད་པ་འགྱེད་པར་བགྱིད་པ་རྩོད་པའི་གཞི་བགྱིད་པ་ལགས་ཏེ། འཐབ་ཀྲོལ་བགྱིད་པ་མ་བཏང་བ་འདི་ལ་དགེ་འདུན་གྱིས་བསྡིགས་པའི་ཕྲིན་ལས་མཛད་ལགས་ཏེ་ཞེས་བྱ་བ་ལ་སོགས་པ་གསུངས་པ་ཡིན་ནོ། །གསོལ་བའི་
ཞར་ལ་གཞན་བརྗོད་པར་བྱ་སྟེ། ལས་སྤྱིན་པ་དང་དབྱུང་བ་དང་བསྙེན་པར་རྫོགས་པར་བྱ་བ་དང་གཞག་པ་དང་བསྲང་བ་ཡང་ངོ་ཞེས་བྱ་བ་ནི། ལས་ཀྱི་སྦྱིན་པའམ། ལས་ཀྱི་བདག་ཉིད་སྤྱིན་པ་འདི་ལྟ་སྟེ། ཁང་བ་དང་གཙུག་ལག་ཁང་བསྟན་པ་ལ་སོགས་པའི་ལས་སྦྱིན་པ་དང༌། དགེ་འདུན་ལྷག་མ་ལས་དབྱུང་བ་དང༌། ཁྱིམ་གྱི་བསླབ་པ་གཞིག་པ་དང༌། ལྷུང་བཟེད་ཁས་ཕུབ་པ་ཕྱིར་བསྲང་བ་དག་ཀྱང་དགེ་འདུན་ལ་གསོལ་བའི་སྔགས་ལན་གསུམ་ཟློས་པ་ལ་སྦྱིན་པར་བྱ་བ་ཁོ་ན་ཡིན་ནོ། །དེའི་སྔགས་ནི་དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་ལག་གི་བླ་མིང་འདི་ཞེས་བགྱི་བས་ཁང་པའི་གཞི་རུང་བ་རྩོད་པ་མ་མཆིས་པ་བརྩམ་དུ་རུང་བ་ཞིག་བཙལ་ཏེ། བདག་དགེ་སློང་ལག་གི་བླ་མིང་འདི་ཞེས་བགྱི་བ་དགེ་འདུན་ལས་ཁང་པའི་བཞི་རུང་བ་རྩོད་པ་མ་མཆིས་པ་བརྩམ་དུ་རུང་བ་བསྟན་བ་གསོལ་ན། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ། བདག་དགེ་སློང་ལག་གི་བླ་མིང་འདི་ཞེས་བགྱི་བ་ལ་ཁང་པའི་བཞི་རུང་བ་རྩོད་པ་མ་མཆིས་པ་བརྩམ་དུ་རུང་བ་བསྟན་པ་སྩལ་དུ་གསོལ་ཞེས་བྱ་བ་ལ་སོགས་པ་གསུངས་པ་ཡིན་ནོ། །གཞི་མ་ཞི་བར་ཤེས་ནས་ཞེས་བྱ་བ་ལ་སོགས་པས་ནན་ཐུར་གྱི་ལས་ཀྱི་རྒྱུ་ཐུན་མོང་བ་བསྟན་ནས། ད་ནི་རྒྱུ་གང་ལ་ནན་ཐུར་གྱི་ལས་གང་དག་བྱ་བ་དེ་དག་གི་བྱེ་བྲག་བསྟན་པར་བྱ་སྟེ། འཐབ་ཀྲོལ་བྱེད་པ་ལ་ལས་ཀྱིས་བསྡིགས་པར་བྱའོ་ཞེས་བྱ་བ་ནི། གང་ཟག་འཐབ་ཀྲོལ་བྱེད་པ་ལ་གསོལ་བ་དང་བཞིའི་ལས་ཀྱིས་བསྡིགས་པར་བྱའོ། །དེའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། དགེ་སློང་དམར་སེར་ཅན་འདི་དག་ནི་འཐབ་ཀྲོལ་བགྱིད་པར་མཚང་འདྲུ་བར་བགྱིད་པ་རྩོད་པར་བགྱིད་པ་འགྱེད་པར་བགྱིད་པ་རྩོད་པའི་བཞི་བགྱིད་པ་ལགས་ཏེ་ཞེས་བྱ་བ་ལ་སོགས་པ་གསུངས་པ་ཡིན་ནོ། །དགེ་འདུན་ལྷག་མའི་ལྟུང་བ་ཕྱིར་མི་འཆོས་པར་རྒྱུན་དུ་བྱེད་པ་ལ་སྨད་པའོ་ཞེས་བྱ་བ་ནི། དགེ་འདུན་ལྷག་མའི་ལྟུང་བ་རྒྱུན་དུ་འབྱིན་ཅིང་སྔ་མ་ཕྱིར་མ་བཅོས་པར་
ཡང་དང་ཡང་དུ་འབྱིན་པ་ལ་ནི་གསོལ་བ་དང་བཞིའི་ལས་ཀྱིས་སྨད་པར་བྱའོ། །དེའི་སྔགས་ནི་དགེ་འདུན་བཙུན་པ་རྣམས་གསན་དུ་གསོལ། དགེ་སློང་དགེ་ལྡན་ལྟུང་བ་རྒྱུན་དུ་བགྱིད་པ་འདི་དགེ་འདུན་ལྷག་མའི་ལྟུང་བ་རྒྱུན་དུ་བགྱིད་དེ་ཞེས་བྱ་བ་ལ་སོགས་པ་གསུངས་པ་ཡིན་ནོ། །ཁྱིམ་སུན་འབྱིན་པ་ལ་ནི་བསྐྲད་པའོ་ཞེས་བྱ་བ་ནི། ཁྱིམ་སུན་འབྱིན་པ་མ་བཏང་བ་ལ་ནི་གསོལ་བ་དང་བཞིའི་ལས་ཀྱིས་བསྐྲད་པར་བྱའོ། །དེའི་སྔགས་ནི་དགེ་འདུན་བཙུན་པ་རྣམས་གསན་དུ་གསོལ། དགེ་སློང་འགྲོ་མགྱོགས་དང་ན་བ་སོ་འདི་གཉིས་ཁྱིམ་སུན་འབྱིན་པ་སྡིག་པའི་ཆོས་ཀུན་དུ་སྤྱོད་པ་ལགས་ཏེ་ཞེས་བྱ་བ་ལ་སོགས་པ་གསུངས་པ་ཡིན་ནོ། །དེའི་ཕྱིར་འདུ་བ་མི་སྦྱིན་པ་དང༌། སྐབས་མི་འབྱེད་པ་དག་ལ་ཡང་ངོ་ཞེས་བྱ་བ་ནི། བསྐྲད་པར་བྱ་བ་དེའི་ཕྱིར་འདུ་བ་མི་སྦྱིན་པ་དང༌། སྐབས་མི་འབྱེད་པ་དག་ལ་ཡང་གནས་ནས་བསྐྲད་པའི་ཕྱིར་གསོལ་བ་དང་བཞིའི་ལས་བྱའོ། །འདི་སྐད་བསྟན་ཏེ། གལ་ཏེ་ཁྱིམ་སུན་འབྱིན་པར་བྱེད་པ་དེ་བསྐྲད་པའི་ལས་བྱ་བའི་ཕྱིར། དགེ་འདུན་གྱི་ནང་དུ་འདུར་མི་བཏུབ་པའམ། སྐབས་མི་འབྱེད་དུ་ཟིན་ཀྱང་གྲགས་པ་ཙམ་གྱིས་དགེ་འདུན་གྱིས་བསྐྲད་པའི་ལས་བྱ་བ་ཁོ་ན་ཡིན་ནོ། །དེ་མཐོང་ངོ་ཞེས་ཟེར་བ་ཡང་དོ་ཞེས་བྱ་བ་ནི། ཁྱིམ་སུན་འབྱིན་པ་དེ་དགེ་འདུན་གྱི་ནང་དུ་འདུས་ཤིང་སྐབས་འབྱེད་དུ་ཟིན་ཀྱང་ལྟུང་བ་དེ་མ་མཐོང་ངོ་ཞེས་ཟེར་ན། དེ་ལྟར་ན་ཡང་གྲགས་བ་ཙམ་གྱིས་དགེ་འདུན་གྱིས་བསྐྲད་པའི་ལས་བྱའོ། །འདི་སྐད་བསྟན་ཏེ། གལ་ཏེ་ཁྱིམ་སུན་འབྱིན་པ་དེ་བདག་ཉིད་ལ་ཁྱིམ་སུན་འབྱིན་པ་ཉིད་མ་མཐོང་ངོ་ཞེས་ཟེར་ན། དེ་ལྟ་ན་ཡང་གྲགས་པ་ཙམ་གྱིས་དག་འདུན་གྱིས་བསྐྲད་པའི་ལས་བྱ་བ་ཁོ་ན་ཡིན་ཏེ། ཁྱིམ་པ་ལ་བརྙས་ཐབས་བྱེད་པ་ལ་ནི་ཕྱིར་འགྱེད་པའོ་ཞེས་བྱ་བ་ནི། ཁྱིམ་པ་ལ་མཐོ་བཙམས་པ་ནི་བརྙས་ཐབས་བྱེད་པ་སྟེ། གང་ཁྱིམ་པ་ལ་བརྙས་ཐབས་བྱེད་པ་དེ་ནི་དགེ་སྦྱོང་གི་ཆོས་ལས་འདས་པ་ཡིན་པས་དེ་ལས་ཕྱིར་བཟློག་པའི་ཕྱིར་དེ་ལ་ནི་ཕྱིར་འགྱེད་པའི་ནན་ཐུར་གྱི་ལས་བྱའོ། །ཕྱིར་འགྱེད་བ་ཞེས་བྱ་བ་ནི་ཁྱིམ་པའི་ཆད་པ་བསལ་པའི་ཕྱིར་དགེ་
སློང་དེ་ལ་ཇི་སྲིད་དུ་ཁྱོད་ཀྱིས་ལས་ཀྱི་མཐའ་འདི་མ་གཏོང་གི་བར་དུ་ཁྱོད་ཀྱི་ཡུལ་ལས་དེད་ཀྱི་མཛའ་གཅུགས་ཀྱི་དངོས་པོ་དང་དགའ་བའི་དངོས་པོ་ཕྱིར་བསྡུ་ཞིང་ངེད་ཕྱིར་འགྱེད་པར་བྱའོ་ཞེས་གསོལ་བ་དང་བཞིའི་ལས་ཀྱིས་བསྐོ་བའོ། །དེའི་སྔགས་ནི་དགེ་འདུན་བཙུན་པ་རྣམས་གསན་དུ་གསོལ། །དགེ་སློང་དམ་པ་འདི་ཁྱིམ་པ་ལ་བརྙས་ཐབས་བགྱིད་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་དམ་པ་ཁྱིམ་པ་ལ་བརྙས་ཐབས་བགྱིད་པ་ལ་སླར་འགྱེད་པའི་ཕྲིན་ལས་མཛད་དོ་ཞེས་བྱ་བ་ལ་སོགས་བ་གསུངས་པ་ཡིན་ནོ། །འདི་ལ་བཟོད་པ་གསོལ་བའི་ལས་ཀྱི་གནས་སུ་དེ་ལ་བཟོད་པ་གསོལ་དུ་གཞུག་གོ་ཞེས་བྱ་བ་ནི། ཕྱིར་འགྱེད་པའི་ལས་འདི་ལ་བཟོད་པ་གསོལ་བའི་ལས་ཀྱི་གནས་སུ་ཁྱིམ་པ་དེ་ལ་བཟོད་པ་གསོལ་དུ་གཞུག་པ་ཡིན་པར་བལྟ་བར་བྱ་བའོ། །འོན་ཀྱང་གསོལ་བ་བྱས་ཏེ་དེ་ཁྱིམ་པ་ལ་བཟོད་པ་གསོལ་དུ་གཞུག་པར་བྱ་སྟེ། ཁྱིམ་པས་བཟོད་པ་ཉིད་བཟོད་པ་བྱས་པར་ཡིན་པར་ཤེས་པར་བྱའོ། །ལྟུང་བ་གྲགས་པ་ཕྱིར་མ་བཅོས་པ་བསྡམས་པས་ཕྱིར་བཅོས་སུ་མི་རུང་བ་དང༌། མ་མཐོང་ངོ་ཞེས་ཟེར་ཞིང་ཕྱིར་འཆོས་པ་རྗེས་སུ་བསྒྲུབ་པར་མི་འདོད་པ་དང་སྡིག་པ་ཅན་གྱི་ལྟ་བ་མི་གཏོང་བ་ལ་ནི་གནས་ནས་དབྱུང་བ་བྱའོ་ཞེས་བྱ་བ་ནི། ཕྱིར་མི་འཆོས་པས་གནས་ནས་དབྱུང་བ་དང༌། མ་མཐོང་བས་གནས་ནས་དབྱུང་བ་དང༌། སྡིག་པ་ཅན་གྱི་ལྟ་བའི་རྣམ་པ་མི་གཏོང་བས་གནས་ནས་དབྱུང་བ་གསུམ་གོ་རིམས་བཞིན་དུ་བསྟན་ཏོ། །དེ་ལ་ལྟུང་བ་གྲགས་པ་ཕྱིར་མ་བཅོས་པ་བསྡམས་བས་ཕྱིར་བཅོས་སུ་མི་རུང་བ་ཞེས་བྱ་བས་ནི་ཕྱིར་མི་འཆོས་པས་གནས་ནས་དབྱུང་བ་བསྟན་ཏེ། ལྟུང་བ་གྲགས་པ་ཞེས་བྱ་བ་ནི་ལྟུང་བ་དེ་གནས་ནས་འབྱིན་པར་བྱེད་པས་ཤེས་པར་གྱུར་པ་གང་ཡིན་པའོ། །ཕྱིར་མ་བཅོས་པ་ཞེས་བྱ་བ་ནི་ལྟུང་བ་གྲགས་པ་དེ་ཞེས་བྱ་བར་སྦྱར་ཏེ། ལྟུང་བ་དེ་ཕྱིར་མ་བཅོས་ཤིང་མ་བཤགས་ཞེས་བྱ་བའི་ཐ་ཚིག་གོ །བསྡམས་པས་ཕྱིར་བཅོས་སུ་མི་རུང་བ་ཞེས་བྱ་བ་ནི། གལ་ཏེ་འདི་ལྟར་ལྟུང་བ་འདི་བསྡམས་པས་ཕྱིར་བཅོས་སུ་མི་རུང་གི་བཤགས་པར་བྱ་བ་མ་ཡིན་
ནོ་ཞེས་བྱ་བར་དགེ་འདུན་གྱིས་ཤེས་པ་སྟེ། དེ་ལྟར་ཤེས་ཀྱང་ལྟུང་བ་དེ་ཆོས་བཞིན་དུ་ཕྱིར་མི་འཆོས་པ་ལ་གསོལ་བ་དང་བཞིའི་ལས་ཀྱིས་གནས་ནས་དབྱུང་བར་བྱའོ། །དེའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། དགེ་སློང་འདུན་པ་འདི་ལ་ལྟུང་བ་བྱུང་ཡང་དེ་ཆོས་བཞིན་དུ་སྤར་མི་འཆོས་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དག་འདུན་གྱིས་གནང་པར་མཛོད་ཅིག་དང༌། དགེ་འདུན་གྱིས་དགེ་སློང་འདུན་པ་ལྟུང་བ་སླར་མི་འཆོས་པ་དེ་ལ་གནས་ནས་དབྱུང་བའི་ཕྲིན་ལས་མཛད་དོ་ཞེས་བྱ་བ་ལ་སོགས་པས་གསུངས་པ་ཡིན་ནོ། །མ་མཐོང་ཞེས་ཟེར་ཞིང་ཕྱིར་འཆོས་པ་རྗེས་སུ་བསྒྲུབ་པར་མི་འདོད་པ་ཞེས་བྱ་བས་ནི་མ་མཐོང་བས་གནས་ནས་དབྱུང་བ་བསྟན་ཏེ། མ་མཐོང་ཞེས་ཟེར་ཞིང་ཕྱིར་འཆོས་པ་རྗེས་སུ་བསྒྲུབ་པ་མི་འདོད་པའི་གང་ཟག་དེ་ལ་གསོལ་བ་དང་བཞིའི་ལས་ཀྱིས་གནས་ནས་དབྱུང་བར་བྱའོ། །དེའི་སྔགས་ནི་དགེ་འདུན་བཙུན་པ་རྣམས་གསན་དུ་གསོལ། དགེ་སློང་འདུན་པ་འདི་ལ་ལྟུང་བ་བྱུང་སྟེ། དེ་ལ་དགེ་སློང་རྣམས་ཀྱིས་གླེངས་ཤིང་དྲན་པར་བགྱིས་ཀྱང་ལྟུང་བ་མ་མཐོང་ངོ་ཞེས་མཆི་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་འདུན་པ་ལྟུང་བ་མི་མཐོང་བ་ལ་གནས་ནས་དབྱུང་པའི་ཕྲིན་ལས་མཛད་དོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །སྡིག་པ་ཅན་གྱི་ལྟ་བ་མི་གཏོང་ཞེས་བྱ་བས་ནི་སྡིག་པ་ཅན་གྱི་ལྟ་བའི་རྣམ་པ་མི་གཏོང་བས་གནས་ནས་དབྱུང་བ་བསྟན་ཏེ། སྡིག་པ་ཅན་གྱི་ལྟ་པའི་རྣམ་པ་མི་གཏོང་བ་དེ་ལ་གསོལ་བ་དང་བཞིའི་ལས་ཀྱིས་གནས་ནས་དབྱུང་བ་བྱའོ། །དའི་སྔགས་ནི་དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཆི་ལྟས་འདི་ལ་སྡིག་པ་ཅན་གྱི་ལྟ་པའི་རྣམ་པ་འདི་ལྟ་བུ་འདི་བྱུང་སྟེ་ཞེས་བྱ་བ་ལ་སོགས་པ་གསུངས་པ་ཡིན་ནོ། །འདི་ཉིད་དུ་ལྟུང་བ་འདི་ཕྱིར་བཅོས་པར་གྱིས་ཤིག །དགེ་འདུན་འདི་ཉིད་ཀྱིས་ཁྱོད་བག་ཡངས་སུ་བྱེད་པར་འགྱུར་རོ་ཞེས་བརྗོད་པར་བྱའོ་ཞེས་བྱ་བ་ནི། དེ་ལྟར་ནན་ཐུར་གྱི་ལས་བདུན་པ་དག་ལས་གང་ཡང་རུང་བ་བྱས་པའི་རྗེས་ལ་ལས་བྱེད་པའི་དགེ་འདུན་གྱིས་གང་ལ་བྱས་པའི་གང་ཟག་དེ་ལ་དེ་སྐད་
བསྒོ་བར་བྱའོ། །འདི་ཉིད་དུ་ཞེས་བྱ་བ་ནི་གནས་ཉིད་དུའོ། །ལྟུང་བ་འདི་ཕྱིར་བཅོས་པར་གྱིས་ཤིག་ཅེས་བྱ་བ་ནི། གནས་འདི་ཉིད་དུ་ལྟུང་བ་འདི་ཕྱིར་བཅོས་པར་བྱའོ། །གནས་གཞན་དུ་འཆོས་སུ་མི་གནང་པར་བསྟན་པ་ཡིན་ནོ། །དགེ་འདུན་འདི་ཉིད་ཀྱིས་ཁྱོད་པག་ཡོངས་སུ་བྱེད་པར་འགྱུར་རོ་ཞེས་བྱ་བ་ནི། དགེ་འདུན་འདི་ཉིད་ལ་རག་ལས་པ་ཡིན་གྱི། དགེ་འདུན་འདིས་མ་གནང་ན་འཚམས་གཞན་གྱི་དགེ་འདུན་གྱིས་བག་ཡོངས་སུ་བྱེད་པར་མི་འགྱུར་བར་བསྟན་པ་ཡིན་ནོ། །ལྟུང་བ་བཅབ་པར་མི་བྱའོ་ཞེས་བྱ་བ་ནི། རང་གི་ལྟུང་བའི་དབང་དུ་བྱས་པ་ཡིན་གྱི་གཞན་གྱི་འཆབ་པའི་ཉེས་པ་ནི་བསྟན་ཟིན་པའི་ཕྱིར་རོ། །དགེ་འདུན་ལྷག་མ་འབའ་ཞིག་ཏུ་མ་ཟད་ཀྱི་རང་གི་ལྟུང་བ་ཐམས་ཅད་ཀྱང་གང་ཟག་གི་མདུན་དུ་ལན་གསུམ་མཐོལ་ཤིང་བཤགས་པར་བྱ་བ་ཡིན་ནོ། །དེའི་སྔགས་ནི་ཚེ་དང་ལྡན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ་ལྟུང་བ་འདི་ལྟ་བུ་འདི་བྱུང་སྟེ། བདག་དགེ་སློང་མིང་འདི་ཞེས་བགྱི་བ་ལ་ལྟུང་བ་དེ་ཚེ་དང་ལྡན་པའི་མདུན་དུ་མཐོ་ལོ་འཆགས་སོ། །མི་འཆབ་པོ། །མཐོལ་ཞིང་བཤགས་ན་བདག་བདེ་བ་ལ་རེག་པར་གནས་པར་འགྱུར་གྱི། མ་མཐོལ་མ་བཤགས་ན་ནི་མི་འགྱུར་རོ། །ལན་གསུམ་དུ་བཟླས་ལྟུང་བ་མཐོང་ངམ། མཐོང་ངོ༌། །ཕྱིན་ཆད་སྡོམ་མམ། སྡོམ་མོ། །ལན་གསུམ་དུ་བཟླས། ཐབས་ཡིན་ནོ། །ལེགས་སོ་ཞེས་གསུངས་པ་ཡིན་ནོ། །གང་ལ་མཐོལ་བར་བྱ་བའི་གང་ཟག་མེད་ན་ནི་དེ་སྲིད་དུ་མ་མཐོལ་བ་ལ་ཉེས་པ་མེད་དོ། །དེ་ལྟར་ཡང་འདིར་གཞུང་ནི་བཙུན་པའི་ཞིག་ལྟུང་བ་དང་བཅས་པ་དགེ་སློང་མ་མཆིས་པའི་གནས་ན་གནས་པས་གང་ལ་ཡང་མ་བརྗོད་ན་བཅབས་པར་བརྗོད་པ་བགྱིའམ། ཉེ་བ་འཁོར་མི་བྱའོ་ཞེས་བྱ་བ་ལ་སོགས་པ་གསུངས་བ་ཡིན་ནོ། །ཐ་ན་མིང་གོ་བར་བྱ་བ་ཉིད་དོ་ཞེས་བྱ་བ་ནི། གལ་ཏེ་རྒྱ་ཆེར་གོ་བར་བྱེད་མ་ནུས་ན་ཐ་ན་ལྟུང་བྱེད་སྡེ་ལྔ་པོ་དག་ལས་གང་བྱུང་བའི་མིང་ཙམ་ཡང་གོ་བར་བྱ་བ་ཉིད་ཡིན་ནོ། །འདིར་གཞུང་ནི་བདག་ལ་ཕམ་པར་འགྱུར་བ་བྱུང་ངོ་ཞེ་འམ། སོ་སོར་བཤགས་པར་བྱ་བའི་རིགས་བརྗོད་པ་མ་བྱས་བ་གང་ཡིན་པ་དང༌། དགེ་སློང་སྟན་དེ་ཉིད་ལ་འདུག་པ་དེས་ཚེ་དང་ལྡན་པ་བདག་ལ་
དགེ་འདུན་ལྷག་མའི་ལྟུང་བ་བྱུང་ངོ་ཞེའམ། ལྟུང་བྱེད་ཀྱི་ལྟུང་བ་བྱུང་ངོ་ཞེས་བརྗོད་པར་བྱའོ་ཞེས་གསུངས་པ་ཡིན་ནོ། །རྒྱ་ཆེར་གོ་བར་བྱ་བར་ཤིན་ཏུ་རིགས་མོད་ཀྱི། ཐ་ན་ལྟུང་བའི་མིང་ཡང་བརྗོད་པར་བྱ་བ་ཉིད་དོ། །དེའི་གཞུང་ཡང་བཙུན་པ་བདག་གིས་བསླབ་པ་མ་ཕུལ་པར་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ཏོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །དེ་ལྟ་བས་ན་ཐ་མའི་མཐར་ཐུག་པའི་དབང་དུ་བྱས་ཏེ་མིང་ཙམ་གྱིས་རིག་པར་བྱ་བ་ཉིད་དུ་གསུངས་པ་ཡིན་ནོ། །ཉེས་བྱས་ནི་གང་ཡང་རུང་བས་སོ་ཞེས་བྱ་བ་ནི། ཉེས་བྱས་རིག་པར་བྱ་བ་ཉིད་ལ་ནི་བདག་ལ་ལྟུང་བ་བྱུང་ངོ་ཞེའམ། བདག་གིས་ཁ་ན་མ་ཐོ་བ་བྱས་སོ་ཞེས་བྱ་བ་རྣམ་པ་གང་ཡང་རུང་བས་རིག་པར་བྱ་བ་ཉིད་ཡིན་ནོ། །དེ་དག་གང་ལ་རིག་པར་བྱ་བ་ཉིད་ཡིན་ཞེ་ན། དེའི་ཕྱིར་རང་བཞིན་དུ་གནས་པ་ལའོ་ཞེས་བྱ་བ་སྨྲས་ཏེ། དགེ་སློང་རང་བཞིན་དུ་གནས་པ་ལ་རིག་པར་བྱ་བ་ཉིད་ཡིན་ནོ། །འདིར་གཞུང་ནི་ཞུ་བའི་གང་ཟག་གི་གཞི་ལས། ཉེ་བ་འཁོར་རང་བཞིན་དུ་གནས་པ་མཚམས་ཀྱི་ནང་དུ་འདུག་པ་ལའོ་ཞེས་གསུངས་པ་ཡིན་ནོ། །ཅི་ལྟ་བ་ལས་རང་གི་ཕྱོགས་མ་ཡིན་པ་ཡང་རང་བཞིན་དུ་གནས་པ་ཡིན་ནམ་ཞེ་ན་དེའི་ཕྱིར། ལྟ་བ་ཐ་མི་དད་པ་ལའོ་ཞེས་བྱ་བ་བ་སྨྲས་ཏེ། གལ་ཏེ་ལྟ་བ་ཐ་མི་དད་པ་ཡིན་ན་དེའི་ཚེ་དེའི་མདུན་དུ་རིག་པར་བྱ་བ་ཉིད་ཡིན་པའོ། །རབ་ཏུ་བྱུང་ཞིང་བསྙེན་པར་མ་རྫོགས་པ་མ་བསྙིལ་བ་ཡང་དག་པར་སྡོམ་པ་དང་ཁྱིམ་པ་ཡང་དག་པར་སྡོམ་པ་ཡང་རང་བཞིན་དུ་གནས་པ་ཉིད་ཡིན་ནམ་ཞེ་ན། དེའི་ཕྱིར་བསྙེན་པར་རྫོགས་པ་དང་བཅས་པ་ལའོ་ཞེས་བྱ་བ་སྨྲས་ཏེ། དེ་ལ་རིག་པར་བྱ་བ་ཉིད་ཡིན་ནོ། །དགེ་སློང་གིས་ཀྱང་དགེ་སློང་མ་ལ་རིག་པར་བྱ་བ་ཉིད་ཡིན་ལ། དགེ་སློང་མས་ཀྱང་དགེ་སློང་ལ་རིག་པར་བྱ་བ་ཉིད་ཡིན་ནམ་ཞེ་ན། དེའི་ཕྱིར་མཚན་མཐུན་པ་ལའོ་ཞེས་བྱ་བ་སྨྲས་སོ། །དེ་ལྟར་ན་འདྲ་བའི་ཕྱིར་བསྙེན་པར་མ་རྫོགས་པས་ཀྱང༌། བསྙེན་པར་མ་རྫོགས་པ་ལ་ལྟུང་བ་རིག་པར་བྱ་བ་དང༌། བཤགས་པར་བྱ་བའམ་ཞེ་ན། དེའི་ཕྱིར་དེ་ཉིད་ལ་འདི་དང་འོག་མ་བཅས་ཏེའོ་ཞེས་བྱ་བ་སྨྲས་ཏེ། བསྙེན་པར་རྫོགས་པ་དང་བཅས་པ་དེ་ཉིད་ལ་དགེ་ཚུལ་ལ་སོགས་པས་ལྟུང་བ་རིག་པར་བྱ་བ་འདི་ཉིད་ལྟུང་བ་བཤགས་པར་བྱ་
པ་འོག་ནས་འབྱུང་བ་དང་བཅས་ཏེ་བྱའོ། །རིས་མཐུན་པའི་ཡུལ་ལ་ཅིའི་ཕྱིར་མི་རུང་ཞེ་ན། དེའི་ཕྱིར་རབ་ཏུ་བྱུང་བ་བསྙེན་པར་མ་རྫོགས་པ་དག་ནི་བསྙེན་པར་རྫོགས་པའི་དགེ་འདུན་གྱིས་ཡངས་སུ་བཟུང་བ་ཙམ་ཡིན་པའི་ཕྱིར་རོ་ཞེས་བྱ་བ་སྨྲས་ཏེ། དེའི་ཕྱིར་དགེ་ཚུལ་ལ་སོགས་པའི་བྱ་བ་ཐམས་ཅད་ནི་བསྙེན་པར་རྫོགས་པ་ཉིད་ལ་རག་ལས་པ་ཁོ་ན་ཡིན་པར་རྣམ་པར་གནས་སོ། །དེ་ལྟར་ཡང་རབ་ཏུ་བྱུང་ཞིང་བསྙེན་པར་མ་རྫོགས་པ་དག་གིས་དགེ་འདུན་ལ་དགག་དབྱེ་བྱའོ་ཞེས་གསུངས་པ་ལས་ཤེས་སོ། །ཆོས་འདི་བ་ལ་དེ་བྱས་ན་བྱས་པ་ཉིད་དོ་ཞེས་བྱ་བ་ལ། ཆོས་འདི་པ་ཞེས་སྨོས་པས་ནི་བསྙེན་པར་རྫོགས་པ་མཚན་མི་མཐུན་པ་དང་རབ་ཏུ་བྱུང་ཞིང་བསྙེན་པར་མ་རྫོགས་པ་དང༌། ཁྱིམ་པ་དེ་བཞིན་གཤེགས་པའི་ཆོས་ཀྱི་ལྟ་བ་ཅན་ཐམས་ཅད་བསྡུ་སྟེ། ཆོས་འདི་པ་དེ་དག་ལ་ལྟུང་པ་རིག་པར་བྱ་བ་དེ་བྱས་ན་ཡང་བྱས་པ་ཉིད་ཡིན་ཏེ། དེ་ལ་རིག་པར་བྱས་ན་བཅབས་པར་མི་འགྱུར་རོ། །འོ་ན་དེ་ལྟན་བསྙེན་པར་རྫོགས་པ་དང་བཅས་པ་ལ་ཞེས་བྱ་བ་ལ་སོགས་པ་ངེས་པར་ཅིའི་ཕྱིར་བྱས་ཤེ་ན། སྔར་དེ་ལྟར་ངེས་པར་སྨྲས་པ་ནི་དགེ་འདུན་གྱིས་ཡུལ་ལ་མ་གུས་པ་སྤང་བའི་ཕྱིར་དེ་མི་རིགས་པར་བསྟན་པར་ཤེས་པར་བྱའོ། །འོ་ན་མདོ་འདི་ཅིའི་ཕྱིར་བྱས་ཤེ་ན། མ་བརྗོད་པ་བརྗོད་པར་བྱ་བའི་ཕྱིར་ཏེ། དེས་ན་མཚན་མི་མཐུན་པ་བསྙེན་པར་རྫོགས་པ་དག་ལ་རིག་པར་བྱེད་ན་ཡང་བཅབས་པར་ནི་མི་འགྱུར་ལ། རིག་པར་བྱེད་པ་ལས་ཉེས་བྱས་སུ་ནི་འགྱུར་རོ། །བསྙེན་པར་མ་རྫོགས་པ་དག་ལ་རིག་པར་བྱེད་པ་དག་ལ་ནི་བཅབས་པར་ནི་མི་འགྱུར་ལ། གནས་ངན་ལེན་རིག་པར་བྱེད་པ་ལས་ནི་ལྟུང་བྱེད་དུ་འགྱུར་རོ། །གནས་ངན་ལེན་མ་ཡིན་པ་བརྗོད་པ་ལས་ནི་ཉེས་བྱས་སུ་འགྱུར་རོ། །བསྙེན་པར་མ་རྫོགས་པ་མཚན་མཐུན་པ་དག་ལ་རིག་པར་བྱད་པ་ལ་ནི་འཆབ་པར་ཡང་མི་འགྱུར་ལ་ལྟུང་བར་ཡང་མི་འགྱུར་ཏེ། འདིར་རྣམ་པར་གཞག་པ་ནི་དེ་ཡིན་ནོ། །འདིར་གཞུང་ནི་ཉེ་བ་འཁོར་གྱིས་ཞུས་པའི་གང་ཟག་གི་གཞི་ལས་དགེ་སློང་ལ་བརྗོད་ན་བརྗོད་ཅེས་བགྱི་འམ། ཉེ་བ་འཁོར་བརྗོད་ཅེས་བྱའོ། །དེ་བཞིན་དུ་དགེ་སློབ་མ་དང་བསླབ་བ་བྱིན་པ་དང༌། དགེ་སློང་མ་དང་དགེ་ཚུལ་དང་དགེ་ཚུལ་མ་དང་དགེ་བསྙེན་དང་དགེ་བསྙེན་མ་ལ་བརྗོད་ན་བརྗོད་པར་བགྱིའམ། ཉེ་བ་འཁོར་བརྗོད་ཅེས་བྱའོ་ཞེས་གསུངས་པ་ཡིན་ནོ། །མཚམས་གཞན་ན་གནས་པ་
ལ་ཡང་ངོ་ཞེས་བྱ་བ་ཡང་རིག་པར་བྱས་ན་བྱས་པ་ཉིད་ཡིན་པ་སྟེ། འདི་ནི་མཚམས་གཞན་ན་གནས་པ་ནི་གང་གི་ཡན་ལག་ཉིད་ཀྱང་མ་ཡིན་ནོ་ཞེས་བྱ་བ་དེའི་དམིགས་ཀྱིས་བསལ་བ་ཡིན་ནོ། །འདིར་གཞུང་ནི་དེ་བཞིན་དུ་དོག་སལ་མཆིས་པ་ལ་ནམ་མཁའ་ལ་མཆིས་པས་སམ། ནམ་མཁའ་ལ་མཆིས་པ་ལ་དོགས་ལ་མཆིས་པས་བརྗོད་ན་བརྗོད་ཅེས་བགྱིའམ། ཉེ་བ་འཁོར་བརྗོད་ཅེས་བྱ་སྟེ། བརྗོད་པ་ལ་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །བསྒོ་བ་ལས་བྱུང་བ་རྣམས་ནི་དགེ་འདུན་ཐམས་ཅད་ལའོ་ཞེས་བྱ་བ་ནི། བསྒོ་བ་ལས་བྱུང་བའི་ལྟུང་བ་རྣམས་ནི་དགེ་འདུན་ཐམས་ཅད་ལ་རིག་པར་བྱ་བ་ཉིད་ཡིན་ཏེ། དགེ་འདུན་ལྷག་མཐུན་མོང་བ་བཞི་པོ་དགེ་འདུན་འབྱེད་པ་དང༌། དེའི་རྗེས་སུ་ཕྱོགས་པ་དང༌། ཁྱིམ་སུན་འབྱིན་པ་དང༌། བཀའ་བློ་མི་བདེ་བ་མི་གཏོང་བ་དང༌། དགེ་འདུན་ལྷག་མ་ཐུན་མོང་མ་ཡིན་པ་བཞི་པོ་དཀོན་མཆོག་གཏོང་བ་དང༌། འཐབ་ཀྲོལ་བྱེད་པ་དང༌། སྡེ་ཞིང་གནས་པ་དང༌། སྡེ་ཞིང་གནས་སུ་འཛུད་པ་དག་དང༌། ལྟུང་བྱེད་ཐུན་མོང་བའི་ལྟ་བའི་རྣམ་པ་མི་གཏོང་བ་དག་གིས་བསྒོ་བ་ལས་བྱུང་བའི་ལྟུང་བ་རྣམས་ཀྱི་ཕྱིར་བཅོས་ཤིང་བཤགས་པ་དང༌། དེ་དག་གི་རིག་པར་བྱ་བ་ཉིད་ཀྱང་དགེ་འདུན་ཐམས་ཅད་ལ་བྱ་བ་ཡིན་ནོ། །འདིར་གཞུང་ནི་དགེ་སློང་སྟན་དེ་ཉིད་ལ་འདུག་པ་དེས་ཚེ་དང་ལྡན་པ་དག་བདག་ལ་དགེ་འདུན་ལྷག་མའི་ལང་བ་བྱུང་ངོ་ཞེས་བརྗོད་པར་བྱ་སྟེ། གལ་ཏེ་རྗོད་པར་བྱེད་ན་དེ་ལྟ་ན་ལེགས། གལ་ཏེ་མི་བརྗོད་ན་དེ་ལ་ཉི་མ་དེ་ཉིད་ལས་བརྩམས་ཏེ་འཆབ་པ་འབྱུང་ངོ༌། །དགེ་སློང་དེས་ཚེ་དང་ལྡན་པ་དག་བདག་ལ་ལྟུང་བྱེད་བྱུང་ངོ་ཞེས་བྱ་བའི་བར་ངང་འབྱུང་ངོ་ཞེས་བྱ་བའི་བར་དུ་གསུངས་པ་ཡིན་ནོ། །སོ་སོར་བཤགས་པར་བྱ་བ་ནི་གནས་དེར་ཚོགས་པ་ལའོ་ཞེས་བྱ་བ་ནི། ཐམས་ཅད་ལ་ཞེས་བྱ་བར་སྦྱར་ཏེ། གནས་དེར་དགེ་སློང་གང་དག་ཚོགས་པ་དེ་དག་ཐམས་ཅད་འདིར་བསྡུ་བར་རིག་པར་བྱའི། དགེ་འདུན་ནི་མ་ཡིན་ནོ། །དེ་ལྟར་ཡང་འདིར་གཞུང་ནི། གནས་ཀྱི་ནང་དུ་སོང་བས་དགེ་སློང་གང་དག་མཐོང་བ་དེ་དག་གི་དྲུང་དུ་ཅི་ནས་ཀྱང་གནས་ཁང་ལ་སོགས་པ་ན་འཁོད་པ་དག་ལ་ཡང་གྲགས་པར་འགྱུར་བ་དེ་ལྟར་ཐོས་པ་དང་བཅས་པར་བརྗོད་པར་བྱའོ་ཞེས་གསུངས་པ་ཡིན་ནོ། །དེ་ལྟར་བྱས་ན་གལ་ཏེ་ཁ་ཅིག་ལ་གཉིད་ལོག་པ་དང་དྲེལ་བ་ལ་སོགས་
པའི་དབང་གིས་གྲགས་པར་མ་གྱུར་ན་ཡང་ཉིས་པ་མེད་དོ། །འདིར་གནས་ཀྱི་གཞི་སྨོས་པ་ནི་འདུ་བའི་གནས་ཀྱི་དཔེ་ཡིན་ཏེ། ཕྱོགས་གང་དུ་དགེ་སློང་དག་འདུ་བ་དེར་ཅི་ནས་ཀྱང་དགེ་ཚུལ་ལ་སོགས་པ་ཐོས་པར་བྱ་བ་མ་ཡིན་པ་དག་གིས་ཐོས་པར་མི་འགྱུར་བ་དེ་ལྟར་བྱའོ། །འདི་ནི་དུས་ཅུང་ཞིག་གནས་པ་ལ་ཡང་ཤེས་པར་བྱའོ། །དེར་འདི་ཇི་ལྟར་རིག་པར་བྱ་བ་ཉིད་ཡིན་ཞེ་ན། དེའི་ཕྱིར་ཚེ་དང་ལྡན་པ་དག་བདག་ལ་སྨད་པའི་གནས་སུ་གྱུར་པ་མི་རིགས་པ་སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་འཆགས་སོ་ཞེས་བྱ་བ་སྨྲས་ཏེ། སྤྱད་པ་དེ་ངེས་པར་སྨད་པ་ཉིད་དང་ཟས་ལ་གདུ་བ་ཉིད་ཡིན་པའི་ཕྱིར་སྨད་པ་ཡིན་ཏེ། འདི་ལྟར་ཟང་ཟིང་མེད་པའི་ཆོས་བསྒྲུབ་པའི་ཕྱིར་ཞུགས་པ་རྣམས་སྨད་པའི་གནས་དེ་ཉིད་ལ་རྒྱུག་པ་ནི་སྒྲུབ་པ་པོ་ལ་མི་རིགས་པ་ཡིན་ནོ། །འདི་ནི་སྨྲེ་སྔགས་འདོན་པའི་རྣམ་པ་བརྗོད་པས་སོ་སོར་བཤགས་པར་བྱ་བ་ཉིད་དུ་གསུངས་པ་ཡིན་གྱི་བཤགས་པ་ནི་མ་ཡིན་ནོ། །བཤགས་པ་ནི་ཇི་ལྟར་ལྟུང་བྱེད་ཀྱི་ལྟུང་བས་གཅིག་གི་མདུན་དུ་བཤགས་པར་བྱ་བར་གསུངས་པ་དང་འདྲའོ། །དེ་ནི་སྔགས་དང་འདྲ་བ་མ་ཡིན་ནོ་ཞེས་བྱ་བ་ནི། རིག་པར་བྱ་བ་དེ་ནི་རང་གི་དོན་དུ་སྔགས་ལན་གསུམ་བརྗོད་པ་དང་འདྲ་བ་མ་ཡིན་ཏེ། ལན་གཅིག་བརྗོད་པས་ཆོག་གོ །སྔགས་ནི་དགེ་སློང་གཞན་ལ་ལན་གསུམ་བརྗོད་པར་བྱ་བ་དེའི་མདུན་དུ་ཙོག་པུར་འདུག་སྟེ་ཐལ་མོ་སྦྱར་བར་བྱ་བ་ཡིན་ནོ། །ཡིད་ཀྱི་དེ་ལས་ནི་བསྡམས་པ་བྱས་ན་ལྡང་ངོ་ཞེས་བྱ་བ་ནི། ཡིད་ཀྱི་ཉེས་བྱས་བདམ་པར་བྱ་བ་དོན་གྱི་ཕྱིར་གཞན་ཤི་བར་འདོད་པ་ཞེས་བྱ་བ་ལ་སོགས་པ་དེ་ལས་ནི་ཡང་མི་བྱའོ་སྙམ་དུ་བསམ་པ་ལས་ཕྱིར་བཟློག་པའི་བསམ་པ་བྱས་ན་ལྟུང་བ་ལས་ཕྱིར་ལྡད་བར་འགྱུར་རོ། །གཞན་ལས་ནི་དེ་དང་བཅས་པའི་བཤགས་པའོ་ཞེས་བྱ་བ་ནི། ཡིད་ཀྱིས་ལྟུང་བདེ་ལས་གཞན་པ་བཤགས་པར་བྱ་བའི་ལྟུང་བ་ལས་ནི་བསྡམ་པར་བྱ་བ་དེ་དང་བཅས་པའི་བཤགས་པ་བྱས་ན་ལྡང་བ་སྟེ་དག་པ་དང་མ་དག་པ་དག་ནི་བསམ་པའི་གཞི་ལས་བྱུང་བ་ཡིན་པས་བསྡམ་པར་བྱ་བ་མེད་ན་བཤགས་པས་ཅིར་ཡང་མི་འགྱུར་རོ། །འདིར་གཞུང་ནི་ཕྱིན་ཆད་སྡོམ་མམ། སྡོམ་མོ་ཞེས་གསུངས་པ་ཡིན་ནོ། །ཚིག་ཏུ་བརྗོད་པ་ནི་སེམས་བཟློག་པ་སྔོན་དུ་བཏང་བ་ཡིན་གྱི་གཞན་དུ་ན་བརྫུན་དུ་སྨྲ་བ་ཁོ་ནར་འགྱུར་རོ། །དེ་ལྟར་ཡང་བསམ་པས་ལྟུང་
བ་ལས་ལྡང་བར་སྨྲའི། ཆད་པའི་ལས་ཀྱིས་ནི་མ་ཡིན་ནོ་ཞེས་གསུངས་པ་ཡིན་ནོ། །གང་ལ་བཤགས་པར་བྱ་ཞེ་ན་དེའི་ཕྱིར། དེ་གཅིག་བུ་ལྟ་བ་ཐ་མི་དད་པ་ལའོ་ཞེས་བྱ་བ་སྨྲས་ཏེ། དེ་ཞེས་བྱ་བའི་སྒྲས་ནི་རང་བཞིན་དུ་གནས་པ་ཞེས་བྱ་བ་ལ་སོགས་པ་སྔར་བསྟན་པའི་བྱེ་བྲག་དང་ལྡན་པའི་ལྟ་བ་ཐ་མི་དད་པ་བསྟན་ཏོ། །གཅིག་པུ་ཞེས་སྨོས་པའི་སྒྲས་ནི་མང་པོ་དག་བསལ་ཏེ། འདི་ལྟར་གང་ཟག་གཅིག་ལ་བཤགས་པར་བསྒྲུབ་པ་བསྟན་ཏོ། །དེ་ལྟ་བས་ན་རང་བཞིན་དུ་གནས་པ་བསྙེན་པར་རྫོགས་པ་དང་བཅས་པ་དང་མཚན་མཐུན་པར་ལྟ་བ་ཐ་མི་དད་པ་ཞེས་གང་གསུངས་པ་དེ་ལྟ་བུ་གཅིག་ལ་བཤགས་པར་བྱའོ། །ཅི་ཐམས་ཅད་ལ་འམ་ཞེ་ན་དེའི་ཕྱིར་ཁ་ན་མ་ཐོབ་མི་མཐུན་པ་ལའོ་ཞེས་བྱ་བ་སྨྲས་ཏེ། ལྟུང་བ་མི་འདྲ་བ་ལ་ཞེས་བྱ་བའི་ཐ་ཚིག་གོ །ཇི་ལྟར་ཁ་ན་མ་ཐོ་བ་མི་མཐུན་པ་ཉིད་ཡིན་ཞེ་ན་དེའི་ཕྱིར་སྡེ་ཚན་ལས་སོ་ཞེས་བྱ་བ་སྨྲས་ཏེ། གང་གི་མདུན་དུ་བཤགས་པར་བྱ་བ་དེ་དང་གལ་ཏེ་ལྟུང་བ་སྡེ་ཚན་ལས་མི་མཐུན་པ་ཡིན་ན་དེ་ལ་བཤགས་སུ་རུང་ངོ༌། །འདིར་གཞུང་ནི་གླེང་གཞི་དག་ལས་བཙུན་པ་ལྟུང་བ་རིས་མཐུན་པ་ཞེས་ཀྱང་བགྱི། ལྟུང་བ་རིས་མི་མཐུན་པ་ཞེས་ཀྱང་བགྱི་ན། བཙུན་པ་ལྟུང་བ་རིས་མཐུན་པ་ནི་གང་ལགས། རིས་མི་མཐུན་པ་ནི་གང་ལགས། ཉེ་བ་འཁོར་ཕམ་པར་འགྱུར་བ་གང་ཡིན་པ་དེ་ནི་ཕམ་པར་འགྱུར་བ་དང་རིས་མཐུན་པ་ཡིན་ལ། དེ་ལས་གཞན་པ་དང་རིས་མི་མཐུན་པ་ཡིན་ནོ། །དགེ་འདུན་ལྷག་མ་ནི་དགེ་འདུན་ལྷག་མ་དང་ངོ༌། ལྟུང་བྱེད་ནི་ལྟུང་བྱེད་དང་ངོ༌། །སོ་སོར་བཤགས་པར་བྱ་བ་ནི་སོ་སོར་བཤགས་པར་བྱ་བ་དང༌། ཉེས་བྱས་ནི་ཉེས་པ་དང་ངོ་ཞེས་གསུངས་པ་ཡིན་ནོ། །འདིས་ཉེས་བྱས་རང་དབང་ཅན་དག་བསྡུས་པར་རིག་པར་བྱ་སྟེ། ལྟུང་བ་གཞན་དང་འབྲེལ་བའི་ཉེས་བྱས་གང་ཡིན་པ་དེ་ནི་ལྟུང་བ་དེ་བཤགས་པ་ཉིད་ཀྱིས་དེ་ཡང་བཤགས་པར་བྱས་པར་འགྱུར་རོ། །ཅི་དེ་བཟླ་བར་མི་བྱ་བ་ཡིན་ན་མ་ཞེ་ན་དེའི་ཕྱིར་མེད་ན་ལྟུང་བ་ལས་སོ་ཞེས་བྱ་བ་སྨྲས་ཏེ། གང་གི་མདུན་དུ་བཤགས་པར་བྱ་བ་སྡེ་ཚན་ལས་ཁ་ན་མ་ཐོ་བ་མི་མཐུན་པ་མེད་ན་ལྟུང་བ་ལས་ཁ་ན་ཐོ་བ་མི་མཐུན་པའི་མདུན་དུ་བཤགས་པར་བྱའོ་ཞེས་བྱ་བའི་ཐ་ཚིག་གོ །འདིར་གཞུང་ནི་སིལ་བུ་དག་ལས་བཙུན་པ་ལྟུང་བ་མཐུན་པས་ལྟུང་བ་མཐུན་པའི་མདུན་དུ་ལྟུང་བ་བཤགས་སུ་རུང་
ངམ་ཉེ་བ་འཁོར་མི་རུང་ངོ༌། །རྐྱེན་དེ་ལྟ་བུ་དག་ཡོད་ན་རིས་མི་མཐུན་པར་བྱས་ཏེ་རུང་ངོ་ཞེས་གསུངས་པ་ཡིན་ནོ། །སྤོང་བ་ལས་ནི་སྤངས་པ་དང་བྲལ་བ་སྔོན་དུ་བཏང་བ་ལས་སོ་ཞེས་བྱ་བ་ནི། སྤངས་པའི་ལྟུང་བྱེད་ལས་ནི་རྫས་དེ་སྤངས་པ་དང༌། སྤངས་པ་དེ་དང་ཞག་གཅིག་འབྲལ་བར་བྱ་བ་དེ་གཉིས་སྔོན་དུ་བཏང་སྟེ་བཤགས་ན་ལྡང་བར་འགྱུར་རོ། །ཞག་དེ་ལ་ཆོས་གོས་གཞན་བྱིན་གྱིས་མི་བརླབ་པར་བྱིན་གྱིས་བརླབ་ཏུ་རུང་བའི་ཆོས་གོས་མེད་པར་གནས་པར་བྱའོ། །ཆོས་གོས་གཞན་བྱིན་གྱིས་མི་བརླབ་པར་བྱིན་གྱིས་བརླབ་ཏུ་རུང་བ་དང་བྲལ་བར་མི་འགྱུར་རོ། །ལྷག་མ་དང་བཅས་པར་གཏོགས་པའི་སྦོམ་པོ་ལྕི་བ་ལས་ནི་དགེ་འདུན་ལྔ་ལ་སོགས་པ་ཐམས་ཅད་ལའོ་ཞེས་བྱ་བ་ནི། ལྷག་མ་དང་བཅས་པར་གཏོགས་པ་ཞེས་བྱ་བ་ནི། འདིར་ཕྱིར་བཅོས་པའི་ལྷག་མ་དང་བཅས་པ་ཡིན་པའི་ཕྱིར་དགེ་འདུན་ལྷག་མའི་ལྟུང་བ་ཡིན་པར་ཤེས་པར་བྱའོ། །དེར་གཏོགས་པ་དེ་དང་འབྲེལ་པའི་སྦོམ་པོ་ལྕི་བ་ལས་ནི་མཚམས་དེར་གཏོགས་པའི་དགེ་འདུན་ལྔ་ལ་སོགས་པ་ཐམས་ཅད་ལ་བཤགས་པས་ལྡང་བར་འགྱུར་རོ། །དགེ་འདུན་ལྷག་མར་གཏོགས་པའི་སྦོམ་པོ་ཡང་བ་ལས་ནི་གང་ཟག་གཅིག་ལ་བཤགས་པས་ལྡང་བར་འགྱུར་རོ། །ལྷག་མ་མེད་པར་གཏོགས་པའི་སྦོམ་པོ་ལྕི་བ་ལས་ནི་མ་བཅད་པ་ལྷག་པ་ལའོ་ཞེས་བྱ་བ་ནི། འདི་ལ་ཕྱིར་བཙོས་པའི་ལྷག་མ་མེད་པའི། ཕྱིར་ལྷག་མ་མེད་པ་སྟེ། ཕམ་བར་འགྱུར་བ་དག་ཡིན་པར་ཤེས་པར་བྱའོ། །དེར་གཏོགས་པ་དེ་དང་འབྲེལ་བའི་སྦོམ་པོ་ལྕི་བ་ལས་ནི་མཚམས་དེར་གཏོགས་པའི་དགེ་འདུན་གནས་ཀྱི་གཞི་ནས་མཚམས་ཀྱི་ཕྱི་རོལ་དུ་མ་བཅད་པ་ལྔ་ལས་ལྷག་པ་དྲུག་གི་ཚོགས་ལ་སོགས་པ་ཐམས་ཅད་ལ་བཤགས་པས་ལྡང་བར་འགྱུར་རོ། །དེས་ན་དགེ་སློང་ཉུང་བའི་གནས་སུ་ནི་གནས་གཞན་ནས་དགེ་སློང་གཉེར་ཏེ་དགེ་འདུན་དྲུག་གི་ཚོགས་སུ་ཚང་བ་ཡན་ཆད་ལ་བཤགས་པར་བྱའི། དེར་དགེ་འདུན་གཞན་གཞག་སྟེ་དྲུག་གི་ཚོགས་ལ་སོགས་པ་ལོགས་ཤིག་ཏུ་བཅད་པ་ལ་བཤགས་པར་མི་བྱའོ། །ཡང་བ་དེ་ལས་ནི་བཞི་ལ་སོགས་པ་ལའོ་ཞེས་བྱ་བ་ནི། ལྷག་མ་མེད་པར་གཏོགས་པས་སྦོམ་པོ་ཡང་བདེ་ལས་ནི་མཚམས་དེར་གཏོགས་པའི་དགེ་འདུན་མ་བཅད་པ་བཞི་ལ་སོགས་པ་ཐམས་ཅད་ལ་བཤགས་པས་ལྡང་བར་འགྱུར་རོ། །སྦོམ་པོའི་ལྕི་བ་དང་ཡང་བ་ཇི་ལྟར་ཤེས་པར་བྱ་ཞེ་ན། ཁ་ན་མ་ཐོ་བ་མང་བ་ནི་ལྕི་བ་ཡིན་ལ། ཁ་ན་མ་
ཐོ་བ་ཉུང་བ་ནི་ཡང་བ་ཡིན་ཏེ། ཁ་ན་མ་ཐོ་བ་མང་བ་དང་ཉུང་བ་ཉིད་ནི་ཡུལ་དང༌། བསམ་པ་ཤས་ཆེ་བ་དང༌། ཤས་ཆུང་བ་གཉིས་ལས་ཤེས་པར་བྱ་སྟེ། དཔེར་ན་འཛག་སྣོད་དུ་ཁུ་བ་ཕྱུང་བ་ནི་ཡང་བ་ཡིན་ལ། དེ་བཞིན་དུ་རྩབ་དང་ཕུབ་མ་ལ་སོགས་པ་རྐུ་བ་ཡང་ཡང་བ་ཡིན། ལས་སུ་མི་རུང་བའི་ཡན་ལག་གི་རྣམ་པ་མཉེད་པ་ལ་སོགས་པ་ཡང་ཡང་བ་ཡིན་ནོ། བསྟེན་པར་བྱ་བ་མཐུ་མེད་པར་ཁུ་བ་འབྱིན་པ་ནི་ལྕི་བ་ཡིན་ལ། དེ་བཞིན་དུ་ཡན་ལག་མ་ཚང་བའི་རྫས་མང་པོ་རྐུ་བ་ཡང་ལྕི་བ་ཡིན། ལས་སུ་རུང་བའི་ཡན་ལག་གི་རྣམ་པ་ལ་རྩོལ་བ་ལ་སོགས་པ་ཡང་ལྕི་བ་ཡིན་ནོ། །འདིར་གཞུང་ནི་འདུལ་བྱེད་དག་ལས། སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་ཉེས་པ་སྦོམ་པོ་ཇི་ལྟར་བཤགས་པར་བགྱི། ཉེ་བ་འཁོར་ཉེས་པ་སྦོམ་པོ་ནི་བཞི་པོ་འདི་དག་ཡིན་ཏེ། ཕམ་པར་འགྱུར་བས་ཀུན་ནས་བསླང་བ་ལྕི་བ་དང༌། བམ་པར་འགྱུར་བས་ཀུན་ནས་བསླང་བ་ཡང་བ་དང༌། དགེ་འདུན་ལྷག་མས་ཀུན་ནས་བསླང་བ་ལྕི་བ་དང༌། དགེ་འདུན་ལྷག་མས་ཀུན་ནས་བསླང་བ་ཡང་བའོ། །ཉེ་བ་འཁོར་དེ་ལ་ཕན་པར་འགྱུར་བས་ཀུན་ནས་བསླང་བའི་ཉེས་པ་སྦོམ་པོ་ལྕི་བ་གང་ཡིན་པ་དེ་ནི་མཚམས་ཀྱི་ནང་དུ་དགེ་འདུན་ཐམས་ཅད་ཀྱི་མདུན་དུ་བཤགས་པར་བྱའོ། །ཕམ་པར་འགྱུར་བས་ཀུན་ནས་བསླང་བའི་ཉེས་པ་སྦོམ་པོ་ཡང་པ་གང་ཡིན་པ་དེ་ནི་མཚམས་ཀྱི་ཕྱི་རོལ་དུ་དགེ་སློང་བཞིའི་མདུན་དུ་བཤགས་པར་བྱའོ། །དེ་ལ་དགེ་འདུན་ལྷག་མས་ཀུན་ནས་བསླང་བའི་ཉེས་པ་སྦོམ་པོ་ལྕི་བ་གང་ཡིན་པ་དེ་ནི་མཚམས་ཀྱི་ཕྱི་རོལ་དུ་དགེ་སློང་ལྔའི་མདུན་དུ་བཤགས་བར་བྱའོ། །དགེ་འདུན་ལྷག་མས་ཀུན་ནས་བསླང་བའི་ཉེས་པ་སྦོམ་པོ་ཡང་བ་གང་ཡིན་པ་དེ་ནི་མཚམས་ཀྱིས་ནང་དུ་དགེ་སློང་གཅིག་གི་མདུན་དུ་བཤགས་བར་བྱའོ་ཞེས་གསུངས་པ་ཡིན་ནོ། །མཐར་དེ་ལ་བཙལ་བ་རྐྱེན་མ་འབྱོར་བ་ཉིད་ན་ལས་བྱས་པ་དང་འདྲའོ་ཞེས་བྱ་བ་ལ། མཐར་ཞེས་བྱ་བ་ནི། འཆི་བའི་སྲིད་པའི་གནས་སྐབས་ཀྱི་འཆི་བའི་སྐད་ཅིག་མ་ཐ་མར་རོ། །དེ་ལ་ཞེས་བྱ་བ་ནི་ཕྱིར་བཅོས་པ་ལའོ། །བཙལ་བ་ཞེས་བྱ་བ་ནི། དེའི་ཕྱིར་ལུས་དང་ངག་དག་གིས་བཙལ་བ་བརྩམས་པའོ། །རྐྱེན་མ་འབྱོར་བ་ཉིད་ན་ཞེས་བྱ་བ་ནི་བཤགས་པའི་རྐྱེན་མ་འབྱོར་པ་ཉིད་ན་སྟེ། དེའི་ཚེ་ན་ནི་ཕྱིར་བཅོས་བའི་
ལས་དེ་བྱས་པ་དང་འདྲ་བར་རིག་པར་བྱའོ། །འདིར་གཞུང་ནི་དགེ་སློང་ཞིག་དགེ་འདུན་ལྷག་མའི་ལྟུང་བ་བྱུང་ནས་དེ་ངོ་ཚེ་དང་བཅས་པས་ཡུལ་གཞན་དུ་ཕྱིར་བཅོས་པར་བྱའོ་སྙམ་པའི་བསམ་པས། དེ་ཡུལ་གཞན་དུ་སོང་བའི་སྐབས་སུ་སྟག་གིས་སྲོག་དང་ཕྲལ་བར་གྱུར་བ་ན། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་ནི་ལྟུང་བ་དེ་ལས་ལངས་པ་ཡིན་ཏེ། ད་ནི་བསམས་པས་ལྟུང་བ་ལས་ལྡང་བར་སྨྲའི། ཆད་བའི་ལས་ཀྱི་ནི་མ་ཡིན་ནོ་ཞེས་བྱ་བའི་བར་དུ་གསུངས་པ་ཡིན་ནོ། །འདི་ལྟར་དགེ་འདུན་ལྷག་མའི་སྐབས་སུ་དེ་སྐད་གསུངས་མོད་ཀྱི་ལྟུང་བ་ཐམས་ཅད་བཤགས་པ་ལ་ཡང་རུང་བའི་ཕྱིར་སྤྱིར་མདོར་བྱས་སོ། །སྨྱོས་པས་བྱས་པ་དེས་ཕྱིར་སངས་པ་འདུ་ཤེས་པ་ནི་ཉེས་བྱེད་དང་འདྲ་བ་ཉིད་དོ་ཞེས་བྱ་བ་ནི། སྨྱོས་པ་ལ་སོགས་པས་རང་བཞིན་ལས་ཉམས་པའི་གནས་སྐབས་སུ་ཁ་ན་མ་ཐོབ་གང་བྱས་པ་ནི་དེས་ཕྱིར་སངས་ཤིང་དྲན་པ་རྙེད་པ་ན་བདག་གིས་དེ་ལྟ་བུ་ཞིག་བྱས་སོ་སྙམ་དུ་འདུ་ཤེས་བ་ན་ཉེས་བྱེད་དང་འདྲ་བ་ཉིད་ཡིན་ཏེ། ཉེས་བྱེད་ཅེས་བྱེ་བ་ནི་ཉེས་པ་བྱེད་པས་ཉེས་བྱེད་དེ་ཉེས་བྱས་ལ་བྱའོ། །དེ་དང་འདྲ་བ་ཉིད་ཅེས་བྱ་བ་ནི་གང་ཟག་གཅིག་གི་མདུན་དུ་བཤགས་པར་བྱ་བའི་སྒོ་ནས་འདྲ་བ་སྟེ། བཤགས་པ་དེ་ཡང་ལོག་པ་བསལ་བར་བྱ་བའི་ཕྱིར་ཡིན་གྱི། ཕྱིར་བཅོས་པའི་ཕྱིར་ནི་མ་ཡིན་ཏེ། སྨྱོས་པ་དང་སེམས་འཁྲུགས་བ་དང་ཚོར་བས་ཉེན་པ་དག་ལ་ལྟུང་བ་མེད་པའི་ཕྱིར་རོ། །མིང་དང་རིགས་དང་ལྡན་པར་བརྗོད་ན་ལྟུང་བ་ལས་སོ་ཞེས་བྱ་བ་ནི་ལྡང་ངོ་ཞེས་བྱ་བར་ཤེས་པར་བྱ་སྟེ། མིང་དང་རིགས་དང་ལྡན་པར་བརྗོད་ན་ལྟུང་བ་ལས་ལྡང་བར་འགྱུར་རོ། །མིང་དང་ལྡན་པས་ཞེས་བྱ་བ་ནི། ཉེས་པ་སྦོམ་པོ་དང་དགེ་འདུན་ལྷག་མ་དང་སྤང་པའི་ལྟུང་བྱེད་དང་ལྟུང་བྱེད་འབའ་ཞིག་དང༌། སོ་སོར་བཤགས་པར་བྱ་བ་དང༌། ཉེས་བྱས་ཞེས་བྱ་བ་དག་གོ །རིགས་དང་ལྡན་པ་ཞེས་བྱ་བ་ནི་མི་ཚངས་པར་སྤྱོད་པས་ཀུན་ནས་བསླང་བ་ལ་སོགས་པ་དང༌། བསམས་བཞིན་དུ་ཁུ་བ་འབྱིན་པས་ཀུན་ནས་བསླང་བ་ལ་སོགས་པ་དང༌། འཆང་བས་ཀུན་ནས་བསླང་བ་ལ་སོགས་པ་དང༌། བརྫུན་དུ་སྨྲ་བས་ཀུན་ནས་བསླང་བ་ལ་སོགས་པ་དང༌། ཤ་མ་ཐབ་ཟླུམ་པོར་མ་བ་གོས་པས་ཀུན་ནས་བསླང་བ་ལ་སོགས་པ་དག་སྟེ། དེ་ལྟར་མིང་དང་རིགས་དང་ལྡན་པར་བརྗོད་པས་ལྟུང་བ་བཤགས་པར་བྱའོ། །བདག་ལ་བརྗོད་པ་ནི་སྔགས་ལས་ཤེས་པར་
བྱ་སྟེ། བདག་དགེ་སློང་མིང་འདི་ཞེས་བགྱི་བ་ལ་ལྟུང་བྱེད་བྱུང་སྟེ། བརྫུན་དུ་སྨྲ་བས་ཀུན་ནས་བསླང་བ་ལ་སོགས་པ་དགེ་འདུན་ལྷག་མ་ལ་ནི་དུས་འདི་སྲིད་ཅིག་བཅབས་པ་ཉིད་དམ། མ་བཅབས་པ་ཉིད་དང་ངོ་ཞེས་བྱ་བ་ནི་དགེ་འདུན་ལྷག་མ་ལ་ནི་གཞན་དང་ལྡན་པར་བརྗོད་པར་བྱ་སྟེ། གལ་ཏེ་འཆབ་པ་འཛིན་པར་བྱེད་ན་ནི་དུས་ཇི་སྲིད་འཆབ་པར་བྱེད་པ་ཞག་གཅིག་བཅབས་པ་འམ་ཞག་གཉིས་བཅབས་པ་ལ་སོགས་པ་དེ་དང་བརྗོད་པར་བྱའོ། །གལ་ཏེ་འཆབ་པ་འཛིན་པར་མི་བྱེད་ན་ནི་མ་བཅབས་པ་ཉིད་དང་བརྗོད་པར་བྱའོ། །དེ་ལས་སློང་བར་བྱེད་པ་ནི་དབྱུང་བའོ་ཞེས་བྱ་བ་ནི། དགེ་འདུན་ལྷག་མ་དེ་ལས་སློང་བར་བྱེད་པས་མིང་ནི་དབྱུང་བ་ཞེས་བྱ་བ་སྟེ། ལྟུང་བ་ལས་དབྱུང་བ་ཞེས་བྱ་བའི་ཐ་ཚིག་གོ །དབྱུང་བ་གང་ཞེ་ན། དེའི་ཕྱིར་དགེ་འདུན་ལས་ཞག་དྲུག་མགུ་བར་བྱ་བ་མནོས་ཏེ་སྤྱད་པ་ལའོ་ཞེས་བྱ་བ་སྨྲས་ཏེ། ལྟུང་བ་འབྱིན་པ་གང་གིས་དགེ་འདུན་ལས་ཞག་དྲུག་མགུ་བར་བྱ་བར་མནོས་ཏེ་སྤྱད་པ་དེ་ལྟུང་བ་དེ་ལས་སློང་བར་བྱེད་པ་གང་ཡིན་པ་དེ་ནི་དབྱུང་བ་ཡིན་ནོ། །འདི་སྐད་བསྟན་ཏེ། ཇི་སྲིད་དུ་ཞག་དྲུག་མགུ་བར་བྱ་བ་མ་སྤྱད་པ་དེ་སྲིད་དུ་འབྱུང་བ་མི་སྲིད་དོ། །དགེ་སློང་མས་ནི་ཟླ་བ་ཕྱེད་དོ་ཞེས་བྱ་བ་ནི། དགེ་སློང་མས་ནི་གཉི་གའི་དགེ་འདུན་ལས་ཟླ་བ་ཕྱེད་མགུ་བར་བྱ་བ་མནོས་ཏེ་སྤྱད་པ་ལ་ལྟུང་བ་དེ་ལས་འབྱིན་པ་དབྱུང་བ་ཡིན་ནོ། །ལྕི་བའི་ཆོས་ལས་འདས་ན་ཡང་དེ་སྤྱད་པར་བྱ་བ་ཉིད་ཡིན་ནོ་ཞེས་བྱ་བ་ནི། དགེ་སློང་མས་ལྕི་བའི་ཆོས་ལས་འདས་ན་ཡང་གཉི་གའི་དགེ་འདུན་ལས་ཟླ་བ་ཕྱེད་མགུ་བར་བྱ་བ་དེ་མནོས་ཏེ། སྤྱད་པར་བྱ་བ་ཉིད་ཡིན་ནོ། །ཡིད་མགུ་བར་བྱ་བའི་དངོས་པོ་ནི་མགུ་བར་བྱ་བ་འོ། །འདི་སྐད་བསྟན་ཏེ། དགེ་སློང་མས་ནི་དགེ་འདུན་ལྷག་མ་འབའ་ཞིག་ལ་གཉི་གའི་དགེ་འདུན་ལས་ཟླ་བ་ཕྱེད་མགུ་བར་བྱ་བ་དེ་མནོས་ཏེ། སྤྱད་པར་བྱ་བར་མ་ཟད་ཀྱི། ལྕི་བའི་ཆོས་ལས་འདས་ན་ཡང་གཉི་གའི་དགེ་འདུན་ལས་ཟླ་བ་ཕྱེད་མགུ་བར་བྱ་བ་མནོས་ཏེ། སྤྱད་པར་བྱའོ། །བཅབས་པའི་ཉེས་པ་མེད་ན་དེ་འཆགས་སོ་ཞེས་བྱ་བ་ནི། གལ་ཏེ་དགེ་འདུན་ལྷག་མའི་ལྟུང་བ་
བཅབས་པའི་ཉེས་པ་མེད་ན་དེའི་ཚེ་མགུ་བར་བྱ་བ་དེ་འཆགས་པའོ། །སྤོངས་དེ་མེད་པར་འགྱུར་རོ་ཞེས་བྱ་བ་ནི། སྤོ་བ་ཞེས་བྱ་བ་ནི། ཇི་སྲིད་བཅབས་པའི་དུས་དེ་སྲིད་དུ་ཆད་པའི་ལས་ཀྱིས་ཀུན་དུ་གནས་བ་དེས་བཅབས་པའི་ཉེས་པ་དེ་འབྱུང་ཞིང་མེད་པར་འགྱུར་བ་སྟེ། ཇི་སྲིད་དུ་སྦོ་བས་བཅབས་པའི་ཉེས་པ་མེད་པར་མ་བྱས་པ་དེ་སྲིད་དུ་མགུ་བར་བྱ་བ་མི་འཆགས་སོ། །བྱས་ན་ནི་འཆགས་སོ། །དེའི་རྗེས་སུ་འབྲང་བས་ལྟུང་བ་གཞན་དག་ལ་ཡང་སྔར་བཅབས་པའི་ཉེས་པ་ཕྱིར་བཅོས་པར་བྱ་ཞིང་ཕྱིས་ལྟུང་བ་ཕྱིར་བཅོས་པར་བྱ་བར་ཤེས་པར་བྱའོ། །སྤོ་བ་ཇི་ལྟ་བུ་ཞེ་ན། དེའི་ཕྱིར་དགེ་འདུན་ལས་དུས་དེ་སྲིད་མནོས་ཏེའོ་ཞེས་བྱ་བ་སྨྲས་ཏེ། ལྟུང་བ་འབྱིན་པར་བྱེད་པ་དེས་དུས་ཇི་སྲིད་དུ་བཅབས་པའི་དུས་དེ་སྲིད་དུ་སྤོ་བ་དགེ་འདུན་ལས་མནོས་ཏེའོ། །དེ་གཉིས་བྱེད་པ་ཉིད་ན་དགེ་འདུན་ལྷག་མ་དེ་བྱུང་ན་མནོས་ཏེ་བྱས་པ་དེ་གཉིས་ཞིག་པས་དེའི་ཕྱིར་གཞི་ནས་བརྩམས་པ་ཉིད་སྦྱིན་ནོ་ཞེས་བྱ་བ་ནི། དགེ་འདུན་ལྷག་མ་དེའི་ཕྱིར་བཅོས་པའི་ཕྱིར་སྤོ་བ་དང་མགུ་བར་བྱ་བ་དེ་གཉིས་བྱེད་པ་ཉིད་ན་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་རིགས་མཐུན་པ་ཡང་བྱུང་ན། སྤོ་བ་ལ་གནས་པ་མནོས་པ་དང་མགུ་བར་བྱ་བ་སྤྱད་པ་མནོས་ཏེ་བྱས་པ་དེ་གཉིས་ཉམས་པ་ཡིན་ནོ། །དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་མི་འདྲ་བ་བྱུང་བས་ནི་མི་ཉམས་སོ། །གང་གི་ཕྱིར་དགེ་འདུན་ལྷག་མའི་ལྟུང་བ་སྔ་མ་དང་འདྲ་བ་བྱུང་ན་སྤོ་བ་དང་མགུ་བར་བྱ་བ་མནོས་ཤིང་བྱས་པ་དེ་གཉིས་ཉམས་པ་དེའི་ཕྱིར་གཞི་ནས་བརྩམས་པ་ཉིད་སྦྱིན་པར་བྱ་སྟེ། དགེ་སློང་དེ་ལ་ཡང་གཞི་ནས་བརྩམས་ཏེ་སྤོ་བ་དང༌། མགུ་བར་བྱ་བ་གཉིས་སྦྱིན་པར་བྱའོ་ཞེས་བྱ་བའི་ཐ་ཚིག་གོ །བརྩམས་པ་ནི་མཐར་ཐུག་པར་བྱ་བ་དང་འདྲའོ་ཞེས་བྱ་བ་ནི། སྤོ་བ་དང་གཞི་ནས་སྤོ་བ་དང་ཡང་གཞི་ནས་བསླང་སྟེ་སྤོ་བ་དང༌། མགུ་བར་བྱ་བ་དང༌། གཞི་ནས་མགུ་བར་བྱ་བ་དང༌། ཡང་གཞི་ནས་བསླང་སྟེ་མགུ་བར་བྱ་བ་བརྩམས་པ་གང་ལ་དགེ་འདུན་ལྷག་མའི་ལྟུང་བ་རིགས་མཐུན་པ་བྱུང་ན་དེའི་ཚེ་སྤོ་བ་ལ་སོགས་པ་བརྩམས་པ་དེ་ནི་མཐར་ཐུག་པར་བྱ་བ་དང་འདྲ་སྟེ། མཐར་ཕྱིན་པར་བྱ་བ་དང་འདྲ་ཞིང་ཡོངས་སུ་རྫོགས་པར་བྱ་བ་དང་འདྲ་བར་བལྟ་བར་བྱ་སྟེ། ཡོངས་སུ་མི་གཏོང་ངོ་ཞེས་བྱ་བའི་ཐ་ཚིག་གོ །དེའི་ཕྱིར་དེ་མ་འཆགས་ན་དེའི་ཚེ་དང་པོ་ཡང་ཐ་དད་པར་བསླང་བར་བྱ་བ་ཉིད་དོ་ཞེས་བྱ་བ་ནི། གང་གི་ཕྱིར་བརྩམས་པ་ནི་མཐར་ཐུག་པ་དང་འདྲ་བ་དེའི་ཕྱིར་སྤོ་བ་ལ་སོགས་
པ་སྔར་བྱིན་པ་གང་ཡིན་པ་དེ་དགེ་འདུན་མ་ཚང་བ་ལ་སོགས་པའི་ཉེས་པས་མ་འཆགས་ཤིང༌། དེ་མ་འཆགས་པའི་གནས་སྐབས་སུ་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་རིགས་མཐུན་པར་བྱུང་ན་དེའི་ཚེ་དང་པོ་ཡང་དཔེར་ན་ལྟུང་བ་བར་མ་མ་བྱུང་ཡང་སྤོ་བ་དང་མགུ་བར་བྱ་བར་སྦྱིན་པར་བྱ་དགོས་པས་དེ་བཞིན་དུ་སྤོ་བ་དང་མགུ་བར་བྱ་བ་ཐ་དད་པར་གཞི་ནས་བསླངས་ཏེ་སྦྱིན་པར་བྱ་བ་ཉིད་ཡིན་ནོ། །ལྟུང་བ་པར་མ་ཕྱིར་བཅོས་པའི་ཕྱིར་གཞི་ནས་སྤོ་བ་ཉིད་ཀྱིས་དང་པོའི་གཞི་ནས་བསླང་སྟེ། སྤོ་བ་དང་མགུ་བར་བྱ་བ་སྦྱིན་པ་ལྟ་བུར་ནི་མི་བྱའོ། །འདི་སྐད་བསྟན་ཏེ། གང་གི་ཚེ་སྤོ་བ་སྔ་མ་མ་འཆགས་པ་དེའི་ཚེ་དགེ་འདུན་ལྷག་མའི་ལྟུང་བ་རིགས་མཐུན་པ་བྱུང་ན། སྤོ་བ་སྦྱིན་པར་བྱའི། གཞི་ནས་སྤོ་བ་སྦྱིན་པར་ནི་མི་བྱའོ། །གང་གི་ཚེ་གཞི་ནས་སྤོ་བ་སྦྱིན་པར་མ་འཆགས་ན་དེའི་ཚེ་གཞི་ནས་སྤོ་བ་དེ་ཉིད་གཟོད་སྦྱིན་པར་བྱའི། ཡང་གཞི་ནས་བསླང་སྟེ་སྤོ་བ་སྦྱིན་པར་ནི་མི་བའོ། །གང་གི་ཚེ་ཡང་གཞི་ནས་བསླང་སྟེ་སྤོ་བ་སྤྱིན་པ་མ་འཆགས་ན། དེའི་ཚེ་ཡང་གཞི་ནས་བསླང་སྟེ་སྦོ་བ་དེ་ཉིད་གཟོད་སྦྱིན་པར་བྱའི་མགུ་བར་བྱ་བ་སྦྱིན་པར་ནི་མི་བྱའོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། གལ་ཏེ་དགེ་སློང་གིས་སྤོ་བ་ལ་སོགས་པ་བླངས་པ་ལ་རྐྱེན་གཞན་གང་ཡང་རུང་བས་སྤོ་བ་དེ་མ་འཆགས་པར་དེའི་སྐབས་སུ་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ན་དེའི་ཚེ་དེ་ལ་ཡང་སྦོ་བ་ཉིད་སྦྱིན་པར་བྱའི། གཞི་ནས་སྤོ་བ་སྦྱིན་པར་ནི་མི་བྱ་སྟེ། སྤོ་བ་སྔ་མ་ཤོས་མ་འཆགས་པའི་ཕྱིར་རོ། །བར་མ་དེ་ཉིད་ཕྱིར་བཅོས་པར་བྱའོ་ཞེས་བྱ་བ་ནི། སྤོ་བ་སྔ་མ་ཤོས་མ་འཆགས་པའི་སྐབས་སུ་དགེ་འདུན་ལྷག་མའི་ལྟུང་བ་བར་མ་ལྟུང་བ་སྔ་མ་དང་འདྲ་བར་བྱུང་བ་དེ་ཡལ་བར་མི་འདོར་བར་ཕྱིར་བཅོས་པར་བྱ་བ་ཉིད་ཡིན་པའོ། །དེའི་ཕྱིར་དེའི་དོན་དུ་ཡང་བརྟེན་པར་བྱ་བ་ཉིད་ཡིན་ནོ་ཞེས་བྱ་བ་ནི། གང་གི་ཕྱིར་བར་མ་དེ་ཕྱིར་བཅོས་པར་བྱ་བ་དེའི་ཕྱིར་གཞི་ནས་བརྩམས་པས་གང་གི་ཚེ་ཡོངས་སུ་གནས་པ་ལ་སོགས་པ་མ་ཆགས་པ་ལེན་པར་བྱེད་པ་དེའི་ཚེ་ལྟུང་བ་ཕྱིས་བྱུང་བ་དེ་ཕྱིར་བཅོས་པ་དེའི་དོན་དུ་ཡང་སྔར་བྱུང་བ་ཡང་སླར་བླང་བར་བྱ་སྟེ་ལྟུང་བ་དེ་དག་ཐམས་ཅད་ཀྱི་ཡུལ་དུ་གྱུར་པ་ཕྱིར་བཅོས་པའི་ཕྱིར་སེམས་བསྐྱེད་དེ་རྒྱུད་དང་འདྲ་བའི་ཚུལ་གྱིས་ཚིག་གཅིག་ཁོ་ནས་སྤོ་བ་ལ་སོགས་པ་བླང་བར་བྱའོ། །དཔེར་ན་རྒྱུད་ལན་ཅིག་བརྐྱང་བས་རྒྱུ་དེ་ལ་སྐད་དང་
སྤྱད་པ་ལ་སོགས་པའི་བྱ་བ་དུ་མ་ཅིག་ཅར་བྱེད་པ་དེ་བཞིན་དུ། ལྟུང་བ་ཐམས་ཅད་ཕྱིར་བཅོས་པའི་ཕྱིར་ལན་ཅིག་ཁོ་ནར་སྤོ་བ་ལ་སོགས་པ་བླང་བར་བྱའོ། །འདི་སྐད་བསྟན་ཏེ། ལྟུང་བ་སྔ་མ་ཕྱིར་བཅོས་པར་བྱ་བའི་ཕྱིར་སྤོ་བ་ལ་སོགས་པ་ལེན་པ་གང་ཡིན་པ་དེ་ནི་ལྟུང་བ་ཕྱི་མ་དག་ཕྱིར་བཅོས་པར་བྱ་བ་ཉིད་ཀྱི་ཕྱིར་ཡང་བརྟེན་པར་བྱ་བ་ཉིད་ཡིན་པས་ལྟུང་བ་ཕྱི་མ་དག་གི་མིང་ཡང་དེར་བརྗོད་བར་བྱའོ། །དེ་བཅབས་པའི་དུས་ལྷག་པ་ཡང་དེར་གཞུག་པ་ཉིད་དོ་ཞེས་བྱ་བ་ནི། ལྟུང་བ་ཕྱིས་བྱུང་བ་དེ་བཅབས་པའི་དུས་ལྷག་པ་གང་ཡིན་པ་དེ་ཡང་ལྟུང་བ་སྔ་མ་བཅབས་པའི་དུས་དེ་ཉིད་དུ་གཞུག་ཅིང་བགྲང་བར་བྱ་བ་ཉིད་ཡིན་ནོ། །རྣམ་པ་གང་གིས་གཞུག་པར་བྱ་ཞེ་ན་དེའི་ཕྱིར། གཞི་ནས་སྤོ་བ་འམ་ཡང་གཞི་ནས་བསླང་སྟེ་ཡོངས་སུ་གནས་པའི་ཇི་ཙམ་ལེན་པས་སོ། །དེ་ལ་ལྷག་པ་ཞེས་སྨོས་པས་ནི་བཅབས་པའི་དུས་མཉམ་པ་གང་ཡིན་པ་དང་ཉུང་བ་གང་ཡིན་པ་དེ་གཉིས་ལྷག་པའི་ནང་དུ་བགྲང་བར་མི་བྱའོ། །དེས་ན་གང་ལ་ལྟུང་བ་སྔ་མ་བཅབས་པའི་དུས་ཟླ་བ་ཕྱེད་ཡོད་ལ། ལྟུང་བ་ཕྱི་མ་བཅབས་པའི་དུས་ཀྱང་ཟླ་བ་ཕྱེད་ཡོད་པ་དེ་ལ་ནི་ཟླ་བ་ཕྱེད་ཁོ་ན་སྤོ་བ་སྦྱིན་པར་བྱའོ། །གང་ལ་ལྟུང་བ་ཕྱི་མ་བཅབས་པའི་དུས་ཟླ་བ་གཅིག་ཡོད་པ་དེ་ལ་ནི་ཟླ་བ་གཅིག་ཁོ་ན་སྤོ་བ་སྦྱིན་པར་བྱ་སྟེ། དེས་ལྟུང་བ་སྔ་མ་ཟླ་བ་ཕྱེད་བཅབས་བ་དང༌། ལྟུང་བ་ཕྱི་མ་ཟླ་བ་གཅིག་བཅབས་པའི་ཉེས་པ་གཉི་ག་མེད་པར་འགྱུར་བར་ཤེས་པར་བྱའོ། །ཇི་ལྟར་ལྟུང་བ་ཕྱི་མ་བཅབས་པའི་དུས་ལྷག་པ་སྲིད་པར་འགྱུར་བ་བརྗོད་པར་བྱ་སྟེ། སྤྱོད་པ་ལ་ཞུགས་པ་ལ་མཐར་ཐུག་ནས་ལྟུང་བ་བར་མ་མ་བརྗོད་པ་དང་གཞན་དུ་ཡང་མ་བརྗོད་པས་སོ། །རྣམ་པ་གཞན་གྱིས་ཀྱང་འདི་ལྟ་སྟེ། སོ་བ་འམ་གཞི་ནས་སྤོ་བར་བྱེད་པས་ལྟུང་བ་རིགས་མཐུན་པ་བྱུང་ནས། ཐབ་ཀྲོལ་བྱེད་པ་འོང་བའི་ཕྱིར་སྤོ་བ་ལ་སོགས་པ་བཏང་སྟེ། ཡང་ཕྱིར་ལེན་པ་དེས་བཏང་བའི་གནས་སྐབས་སུ་བཅབས་པའི་དུས་ཆེས་རིང་དུ་སྒྲུབ་པར་བྱེད་པའོ། །མནོས་ཏེ་འོ་ཞེས་སྨྲས་ན་དགེ་འདུན་གྱིས་སྤོ་བ་དང་མགུ་བར་བྱ་བ་དེ་གཉིས་ཇི་ལྟར་སྦྱིན་པར་བྱ་བ་མ་བསྟན་པས་དེ་བརྗོད་བར་བྱ་སྟེ། དེ་གཉིས་ལས་ཀྱིས་སྦྱིན་ནོ་ཞེས་བྱ་བ་ནི། དགེ་འདུན་གྱིས་གང་ཟག་ལྟུང་བ་བྱུང་བ་དེ་ལ་ཡོངས་སུ་གནས་པ་དང༌། མགུ་བར་བྱ་བ་དེ་གཉིས་གསོལ་བ་དང་བཞིའི་ལས་ཀྱིས་སྦྱིན་པར་བྱ་བའོ། །དེ་ལ་ཡོངས་སུ་གནས་པ་སྦྱིན་པའི་སྔགས་ནི།
དགེ་འདུན་བཙུན་པ་རྣམས་གསན་དུ་གསོལ། །དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། ཟླ་བ་ཕྱེད་བཅབས་ཏེ། དགེ་སློང་འཆར་ཀ་འདི་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱད་བཅབས་པ་དེའི་སླད་དུ། དགེ་འདུན་ལས་ཟླ་བ་ཕྱེད་ཡོངས་སུ་གནས་པ་གསལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་འཆར་ཀ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་སྩོལ་ཏོ། །འདི་ནི་གསོལ་པའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །མགུ་བར་བྱ་བ་སྦྱིན་པའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། དགེ་སློང་འཆར་ཀ་འདི་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་དགེ་འདུན་ལས་ཞག་དྲུག་མགུ་བར་བགྱི་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་འཆར་ཀ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་བགྱི་བསྩོལ་ཏོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །གཞི་ནས་ཡོངས་སུ་གནས་པ་དང༌། གཞི་ནས་མགུ་བར་བྱ་བ་དང༌། ཡང་གཞི་ནས་བསླང་སྟེ་ཡོངས་སུ་གནས་པ་དང༌། ཡང་གཞི་ནས་བསླང་སྟེ་མགུ་བར་བྱ་བ་དག་ཀྱང་གསོལ་བ་དང་བཞིའི་ལས་ཀྱིས་སྦྱིན་པར་བྱ་སྟེ། དེ་ལ་གཞི་ནས་ཡོངས་སུ་གནས་པ་སྦྱིན་པའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ། ཟླ་བ་ཕྱེད་བཅབས་པས་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་ལ་ཟླ་བ་ཕྱེད་བཅབས་པ་དེའི་སླད་དུ་དགེ་འདུན་ལ་ཟླ་བ་ཕྱེད་སྤོ་བ་གསོལ་ན། དགེ་འདུན་གྱིས་དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ། ཟླ་བ་ཕྱེད་ཡོངས་སུ་གནས་
བསྩལ་ཏེ། འདི་ཡོངས་སུ་གནས་པ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པས་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། དགེ་འདུན་ལྟག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ། བཅབས་པ་དེའི་སླད་དུ་དགེ་འདུན་ལས་གཞི་ནས་ཡོངས་སུ་གནས་པ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་འཆར་ཀ་ལ་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ། བཅབས་པ་དེའི་སླད་དུ་གཞི་ནས་ཡོངས་སུ་གནས་པ་སྩོལ་ཏོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །གཞི་ནས་མགུ་བར་བྱ་བ་སྦྱིན་པའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་དགེ་འདུན་ལས་ཞག་དྲུག་མགུ་བར་བགྱི་བ་གསོལ་ན། དགེ་འདུན་གྱིས་དག་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་བགྱི་བ་སྩལ་ཏེ། འདི་མགུ་བར་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ། དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་བ་དེའི་སླད་དུ་དགེ་འདུན་ལས་གཞི་ནས་མགུ་བར་བགྱི་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་འཆར་ཀ་ལ་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་བ་དེའི་སླད་དུ་གཞི་ནས་མགུ་བར་བགྱི་བ་སྩལ་ཏོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །ཡང་གཞི་ནས་བསླང་སྟེ་ཡོངས་སུ་གནས་པ་སྦྱིན་པའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པས་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་
དགེ་འདུན་ལས་ཟླ་བ་ཕྱེད་ཡོངས་སུ་གནས་པ་གསོལ་ན། དགེ་འདུན་གྱིས་དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་བྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་བསྩལ་ཏེ།། འདི་ཡོངས་སུ་གནས་པར་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པའི་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པ་དེའི་སླད་དུ་དགེ་འདུན་ལས་གཞི་ནས་ཡོངས་སུ་གནས་པ་གསོལ་ནས་དགེ་འདུན་གྱིས་དགེ་སློང་འཆར་ཀ་འདི་ལ་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པ་དེའི་སླད་དུ་གཞི་ནས་ཡོངས་སུ་གནས་པ་སྩོལ་ཏེ། འདི་གཞི་ནས་ཡོངས་སུ་གནས་བ་བགྱིད་བཞིན་བ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ། བྱུང་ལ་བཅབས་པས་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་ལ་བཅབས་བ་དེའི་སླད་དུ་དགེ་འདུན་ལས་ཡང་གཞི་ནས་བསླང་སྟེ་ཡོངས་སུ་གནས་པ་གསོལ་ནས། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་འཆར་ཀ་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་ལ་བཅབས་པ་དེའི་སླད་དུ་ཡང་གཞི་ནས་བསླང་སྟེ་ཡོངས་སུ་གནས་པ་གསོལ་ཏོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ན། །ཡང་གཞི་ནས་བསླད་མགུ་བར་བྱ་བ་སྦྱིན་པའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། དེའི་སླད་དུ་དགེ་འདུན་ལས་ཞག་དྲུག་མགུ་བར་བགྱི་བ་གསོལ་ན། དགེ་འདུན་གྱིས་དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླར་དུ་ཞག་དྲུག་མགུ་བར་བགྱི་བ་སྩལ་ཏེ། །འདི་མགུ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ། དགེ་སློང་
འཆར་ཀ་འདི་དགེ་འདུན་གྱི་གན་དུ་མཆིས་ཏེ། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་བ་དེའི་སླད་དུ་དགེ་འདུན་ལས་གཞི་ནས་མགུ་བར་བགྱི་བ་གསོལ་ན། དགེ་འདུན་གྱིས་དགེ་སློང་འཆར་ཀ་འདི་ལ་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་བ་དེའི་སླད་དུ་གཞི་ནས་མ་བུ་བར་བགྱི་བ་སྩལ་ཏེ། འདི་གཞི་ནས་མགུ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་བྱང་བཟླས་ཏེ་བྱུང་ལ། དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་དེའི་སླད་དུ་དགེ་འདུན་ལས་ཡང་གཞི་ནས་བསླང་སྟེ། མགུ་བར་བགྱི་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་འཆར་ཀ་ལ་དགེ་འདུན་ལྷག་མའི་ལྟུང་བ་ལྟུང་བ་པར་མ་དང་འདྲ་བ་ཡང་བཟླས་ཏེ་བྱུང་བ་དེའི་སླད་དུ་ཡང་གཞི་ནས་བསླང་སྟེ་མགུ་བར་བགྱི་བ་སྩལ་ཏོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །ཡོངས་སུ་གནས་པར་བྱས་པ་ལས་མགུ་བར་བྱས་པ་སྦྱིན་པའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པས་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ། དགེ་འདུན་ལས་ཟླ་བ་ཕྱེད་ཡོངས་སུ་གནས་པ་གསོལ་ན། དགེ་འདུན་གྱིས་དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་སྩལ་ཏེ། དགེ་སློང་འཆར་ཀ་འདིས་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་བགྱིས་ལགས་ཏེ། དགེ་འདུན་ལས་ཞག་དྲུག་མགུ་བར་བགྱི་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ། ཟླ་བ་ཕྱེད་ཡོངས་སུ་གནས་པ་བགྱིས་པ་ལ་
ཞག་དྲུག་མགུ་བར་བགྱི་བ་སྩལ་ཏོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །གཞི་ནས་ཡོངས་སུ་གནས་པ་ལ་མགུ་བར་བྱ་བ་སྦྱིན་པའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པས་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་དགེ་འདུན་ལས་ཟླ་བ་ཕྱེད་ཡོངས་སུ་གསོལ་ན། དགེ་འདུན་གྱིས་དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ། ཟླ་བ་ཕྱེད་ཡོངས་སུ་གནས་པ་སྩལ་ཏེ། འདི་ཡོངས་སུ་གནས་པ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ། བཅབས་པས་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པ་དེའི་སླད་དུ་དགེ་འདུན་ལས་གཞི་ནས་ཡོངས་སུ་གནས་པ་གསོལ་ན། དགེ་འདུན་གྱིས་དགེ་སློང་འཆར་ཀ་འདི་ལ་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ། བཅབས་པ་དེའི་སླད་དུ་གཞི་ནས་ཡོངས་སུ་གནས་པ་སྩལ་ཏེ། དགེ་སློང་འཆར་ཀ་འདིས་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས་ལགས། ལྟུང་བ་པར་མའི་སླད་དུ་གཞི་ནས་ཡོངས་ཕུ་གནས་པ་ཡང་བགྱིས་ལགས་ཏེ། དགེ་འདུན་ལས་ཞག་དྲུག་མགུ་བར་བགྱི་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ། བཅབས་པ་དེའི་སླད་དུ་གཞི་ནས་ཡོངས་སུ་གནས་པ་ཡང་བགྱིས་པ་ལ་ཞག་དྲུག་མགུ་བར་བགྱི་བ་སྩོལ་ཏོ། །འདི་ནི་གསོལ་བའོ་
ཞེས་བྱ་བ་ལ་སོགས་པ་གསུངས་པ་ཡིན་ནོ། །ཡང་གཞི་ནས་བསླང་སྟེ་ཡོངས་སུ་གནས་པར་བྱ་བ་ལ་མགུ་བར་བྱ་བ་སྦྱིན་པའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པས་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ། དགེ་འདུན་ལས་ཟླ་བ་ཕྱེད་ཡོངས་སུ་གནས་པ་གསོལ་ན། དགེ་འདུན་གྱིས་དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པའི་དེའི་སླད་དུ་ཟླ་བ་ཕྱེད་ཡོངས་སུ་གནས་པ་སྩལ་ཏེ། འདི་ཡོངས་སུ་གནས་པ་བགྱིད་བཞིན་པ་ལས། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པས་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ། བཅབས་པ་དེའི་སླད་དུ་དགེ་འདུན་ལས་གཞི་ནས་ཡོངས་སུ་གནས་པ་གསོལ་ན། དགེ་འདུན་གྱིས་དགེ་སློང་འཆར་ཀ་འདི་ལ་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ། བཅབས་པའི་དེའི་སླད་དུ་གཞི་ནས་ཡོངས་སུ་གནས་བ་སྩལ་ཏེ། འདི་གཞི་ནས་ཡོངས་སུ་གནས་པ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་ལ་བཅབས་པས་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་ལ་བཅབས་པ་དེའི་སླད་དུ་དགེ་འདུན་ལས་ཡང་གཞི་ནས་བསླང་སྟེ་ཡོངས་སུ་གནས་པ་གསོལ་ནས། དགེ་འདུན་གྱིས་དགེ་སློང་འཆར་ཀ་འདི་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་ལ་བཅབས་པ་དེའི་སླད་དུ་ཡང་གཞི་ནས་བསླང་སྟེ་ཡོངས་སུ་གནས་པ་སྩལ་ཏེ། དགེ་སློང་འཆར་ཀ་འདིས་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས་ལགས། ལྟུང་བ་བར་མའི་སླད་དུ་གཞི་ནས་ཡོངས་སུ་གནས་པ་ཡང་བགྱིས་ལགས། ལྟུང་བ་ཡང་
བཟླས་པའི་སླད་དུ་ཡང་གཞི་ནས་བསླངས་ཏེ། ཡོངས་སུ་གནས་པ་ཡང་བགྱིས་ལགས་ཏེ། དགེ་འདུན་ལས་ཞག་དྲུག་མགུ་བར་བགྱི་བར་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ནད་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པ་དེའི་སླད་དུ་གཞི་ནས་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་ལ་བཅབས་པའི་སླད་དུ། ཡང་གཞི་ནས་བསླང་སྟེ་ཡོངས་སུ་གནས་པ་ཡང་བགྱི་བ་ལ་ཞག་དྲུག་མགུ་བར་བགྱི་བ་སྩོལ་ཏོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ།། །།བམ་པོ་དྲུག་ཅུ་གཉིས་པ། དབྱུང་བ་ཡང་ངོ་ཞེས་བྱ་བ་ཡང་དགེ་འདུན་གྱིས་གསོལ་བ་དང་བཞིའི་ལས་ཀྱིས་སྦྱིན་ནོ་ཞེས་བྱ་བའི་རྗེས་བསྙག་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །དེ་ལ་མགུ་བ་ཉི་ཚེ་བྱས་པ་དབྱུང་བའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ། དགེ་འདུན་ལས་ཞག་དྲུག་མགུ་བར་བགྱི་བ་གསོལ་ནས། དགེ་འདུན་གྱིས་དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་བགྱི་བསྩལ་ཏེ། དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་བགྱིས་ལགས་ཏེ། དགེ་འདུན་ལས་དབྱུང་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནོང་བར་མཛོད་ཅིག་དང༌། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བ་བགྱིས་པ་དབྱུང་བར་བགྱིའོ། །འདི་ནི་གསོལ་བའོ། །དགེ་འདུན་བཙུན་པ་རྣམས་གསན་
དུ་གསོལ། དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་འབྱུང་བ་དེའི་སླད་དུ་དགེ་འདུན་ལས་ཞག་དྲུག་མགུ་བར་བགྱི་བ་གསོལ་ན། དགེ་འདུན་གྱིས་དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་བགྱི་བ་སྩལ་ཏེ། དགེ་སློང་འཆར་ཀ་འདིས་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་བགྱིས་ལགས་ཏེ། དགེ་འདུན་ལས་དབྱུང་བར་གསོལ་ན། དེའི་སླད་དུ་དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྟག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་བགྱིས་པ་དབྱུང་བར་མཛད་ན། ཚེ་དང་ལྡན་པ་གང་དག་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་བགྱིད་པ་དབྱུང་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །འདི་ནི་ལས་བརྗོད་པ་དང་པོ་སྟེ། དེ་བཞིན་དུ་ལན་གཉིས་ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་བགྱིས་པ་ཕྱུང་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་གསུངས་པ་ཡིན་ནོ། །མགུ་བར་བྱ་བ་དང་གཞི་ནས་མགུ་བར་བྱ་བ་བྱས་པ་དབྱུང་བའི་སྔགས་ནི་དགེ་འདུན་བཙུན་པ་རྣམས་གསན་དུ་གསོལ། །དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་དགེ་འདུན་ལས་ཞག་དྲུག་མགུ་བར་བགྱི་བ་གསོལ་ནས། དགེ་འདུན་གྱིས་དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་བགྱི་བསྩལ་ཏེ། འདི་མགུ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ། དགེ་སློང་
འཆར་ཀ་འདི་དགེ་འདུན་གྱི་གན་དུ་མཆིས་ཏེ། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་བ་དེའི་སླད་དུ་དགེ་འདུན་ལས་གཞི་ནས་མགུ་བར་བགྱི་བ་གསོལ་ན། དགེ་འདུན་གྱིས་དགེ་སློང་འཆར་ཀ་འདི་ལ་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་དེའི་སླད་དུ་གཞི་ནས་མགུ་བར་བགྱི་བ་སྩལ་ཏེ། དགེ་སློང་འཆར་ཀ་འདིས་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་ཡང་བགྱིས་ལགས། ལྟུང་བ་བར་མའི་སླད་དུ་གཞི་ནས་མགུ་བ་ཡང་བགྱིས་ལགས་ཏེ། དགེ་འདུན་ལས་དབྱུང་བར་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནོང་བར་མཛོད་ཅིག་དང༌། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བ་ཡང་བགྱིས། ལྟུང་བ་བར་མའི་སླད་དུ་གཞི་ནས་མགུ་བ་ཡང་བགྱིས་པ་དབྱུང་བ་བགྱིའོ། །འདི་ནི་གསོལ་བའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་དབྱུང་བ་དེའི་སླད་དུ་དགེ་འདུན་ལས་ཞག་དྲུག་མགུ་བ་བགྱི་བ་གསོལ་ནས། དགེ་འདུན་གྱིས་དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བ་བགྱི་བ་སྩལ་ཏེ། འདི་མགུ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་བྱུང་ལ། དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ། དེའི་སླད་དུ་དགེ་འདུན་ལས་གཞི་ནས་མགུ་བར་བགྱི་བ་གསོལ་ནས། དགེ་འདུན་གྱིས་དགེ་སློང་འཆར་ཀ་འདི་ལ་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་བ་དེའི་སླད་དུ་གཞི་ནས་མགུ་བར་བགྱི་བ་སྩལ་ཏེ། དགེ་སློང་འཆར་ཀ་འདིས་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བ་ཡང་བགྱིས་ལགས། ལྟུང་བ་བར་མའི་སླད་དུ་གཞི་ནས་མགུ་བ་ཡང་བགྱིས་ལགས་ཏེ། དགེ་འདུན་
ལས་དབྱུང་བ་གསོལ་ན། དེའི་སླད་དུ་དགེ་འདུན་གྱིས་དགེ་སློང་འཆར་ཀ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བ་ཡང་བགྱིས། ལྟུང་བ་བར་མའི་སླད་དུ་གཞི་ནས་མགུ་བ་ཡང་བགྱིས་པ་དབྱུང་བར་མཛད་ན། ཚེ་དང་ལྡན་པ་གང་དག་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བ་ཡང་བགྱིས། ལྟུང་བ་བར་མའི་སླད་དུ་གཞི་ནས་མགུ་བ་ཡང་བགྱིས་བ་དབྱུང་བར་བཟོད་པ་དེ་དག་ནི་ཅང་མ་གསུངས་ཤིག་གང་དག་མི་བཟོད་པ་དེ་དག་ནི་གསུངས་ཤིག །འདི་ནི་ལས་བརྗོད་པ་དང་པོ་སྟེ་དེ་བཞིན་དུ་ལན་གཉིས་ལན་གསུམ་བཟླས། དགེ་འདུན་གྱིས་བཟོད་ཅིང་གནང་ནས། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བ་ཡང་བགྱིས། ལྟུང་བ་བར་མའི་སླད་དུ་གཞི་ནས་མགུ་བ་ཡང་དགྱེས་པ་ཡང་ཕྱུང་ལགས་ཏེ། འདི་ལྟར་ཅང་མི་གསུངས་བས་དེ་དེ་བཞིན་དུ་འཛིན་ཏོ་ཞེས་གསུངས་པ་ཡིན་ནོ། །མགུ་བར་བྱ་བ་དང་གཞི་ནས་མགུ་བར་བྱ་བ་དང༌། ཡང་གཞི་ནས་བསླང་སྟེ་མགུ་བར་བྱ་བ་བྱས་པས་དབྱུང་བའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་དགེ་འདུན་ལས་ཞག་དྲུག་མགུ་བར་བགྱི་བ་གསོལ་ནས། དགེ་འདུན་གྱིས་དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་བགྱི་བ་སྩལ་ཏེ། འདི་མགུ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ། དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། དགེ་འདུན་ལྷག་མའི་ལྟུང་བ་ལྷུང་བ་སྔ་མ་དང་འདྲ་བ་ཡང་བྱུང་བ་དེའི་སླད་དུ་དགེ་འདུན་ལས་གཞི་ནས་མགུ་བར་བགྱི་བ་གསོལ་ན། དགེ་འདུན་གྱིས་དགེ་སློང་འཆར་ཀ་འདི་ལ་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་བ་དེའི་སླད་དུ་གཞི་ནས་མགུ་བར་བགྱི་བ་སྩལ་ཏེ། འདི་གཞི་ནས་མགུ་བར་བགྱིད་
བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་ལ། དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་དེའི་སླད་དུ། དགེ་འདུན་ལས་ཡང་གཞི་ནས་བསླང་སྟེ། མགུ་བར་བགྱི་བ་གསོལ་ནས། དགེ་འདུན་གྱིས་དགེ་སློང་འཆར་ཀ་འདི་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་དེའི་སླད་དུ་ཡང་གཞི་ནས་བསླང་སྟེ་མགུ་བར་བགྱི་བ་སྩལ་ཏེ། དགེ་སློང་འཆར་ཀ་འདིས་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བ་ཡང་བགྱིས་ལགས། ལྟུང་བ་བར་མའི་སླད་དུ་གཞི་ནས་མགུ་བ་ཡང་བགྱི་བ་ལགས། ལྟུང་བ་ཡང་བཟླས་པའི་སླད་དུ་ཡང་གཞི་ནས་བསླང་སྟེ་མགུ་བ་ཡང་བགྱིས་ལགས་ཏེ། དགེ་འདུན་ལས་དབྱུང་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བ་ཡང་བགྱིས། ལྟུང་བ་བར་མའི་སླད་དུ་ཡང་གཞི་ནས་མགུ་བ་ཡང་བགྱིས། ལྟུང་བ་ཡང་བཟླས་པའི་སླད་དུ་ཡང་གཞི་ནས་བསླང་སྟེ་མགུ་བ་ཡང་བགྱིས་པ་དབྱུང་བར་བགྱིའོ། །འདི་ནི་གསོལ་བའོ། །དགེ་འདུན་བཙུན་པ་རྣམས་གསན་དུ་གསོལ། །དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་དགེ་འདུན་ལས་ཞག་དྲུག་མགུ་བར་བགྱི་བ་གསོལ་ནས། དགེ་འདུན་གྱིས་དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་བགྱི་བ་སྩལ་ཏེ། འདི་མགུ་བ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ། དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་བ་དེའི་སླད་དུ། དགེ་འདུན་ལས་གཞི་ནས་མགུ་བར་བགྱི་བ་གསོལ་
ནས། དགེ་འདུན་གྱིས་དགེ་སློང་འཆར་ཀ་འདི་ལ་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་དེའི་སླད་དུ་གཞི་ནས་མགུ་བར་བགྱི་བ་སྩལ་ཏེ། འདི་གཞི་ནས་མགུ་བར་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་ལ་དེའི་སླད་དུ་གཞི་ནས་མགུ་བར་བགྱི་བ་སྩལ་ཏེ། འདི་གཞི་ནས་མགུ་བར་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་ལ་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་དེའི་སླད་དུ་དགེ་འདུན་ལས་ཡང་གཞི་ནས་བཟླས་ཏེ་མགུ་བར་བགྱི་བ་གསོལ་ནས། དགེ་འདུན་གྱིས་དགེ་སློང་འཆར་ཀ་འདི་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་དེའི་སླད་དུ་ཡང་གཞི་ནས་བསླང་སྟེ་མགུ་བར་བགྱི་བ་སྩལ་ཏེ། དགེ་སློང་འཆར་ཀ་འདིས་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བ་ཡང་བགྱིས་ལགས། ལྟུང་བ་བར་མའི་སླད་དུ་གཞི་ནས་མགུ་བ་ཡང་བགྱིས་ལགས། ལྟུང་བ་ཡང་བཟླས་པའི་སླད་དུ་ཡང་གཞི་ནས་བསླང་སྟེ་མགུ་བ་ཡང་བགྱིས་ལགས་ཏེ། དགེ་འདུན་ལས་དབྱུང་བ་གསོལ་ན། དེའི་སླད་དུ་དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བ་ཡང་བགྱིས། ལྟུང་བ་བར་མའི་སླད་དུ་གཞི་ནས་མགུ་བར་ཡང་བགྱིས་ལགས། ལྟུང་བ་ཡང་བཟླས་པའི་སླད་དུ་ཡང་གཞི་ནས་བསླང་སྟེ་མགུ་བ་ཡང་བགྱིས་པ་དབྱུང་བ་མཛད་ན། ཚེ་དང་ལྡན་པ་གང་དག་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དའི་སླད་དུ་ཞག་དྲུག་མགུ་བ་ཡང་བགྱིས། ལྟུང་བ་བར་མའི་སླད་དུ་གཞི་ནས་མགུ་བ་ཡང་བགྱིས། ལྟུང་བ་ཡང་བཟླས་པའི་སླད་དུ་ཡང་གཞི་ནས་བསླང་སྟེ། མགུ་བ་ཡང་བགྱིས་པ་དབྱུང་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །འདི་ནི་ལས་བརྗོད་པ་དང་པོ་སྟེ་དེ་བཞིན་དུ་ལན་གཉིས་ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་
བ་དེའི་སླད་དུ་ཞག་དྲུག་མགུ་བ་ཡང་བགྱིས། ལྟུང་བ་བར་མའི་སླད་དུ་གཞི་ནས་མགུ་བ་ཡང་བགྱིས། ལྟུང་བ་ཡང་བཟླས་པའི་སླད་དུ་ཡང་གཞི་ནས་བསླང་སྟེ་མགུ་བ་ཡང་བགྱིས་པ་ཕྱུང་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་གསུངས་པ་ཡིན་ནོ། །ཡོངས་སུ་གནས་པ་དང་མགུ་བ་བྱས་པའི་དབྱུང་བའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པས་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་དགེ་འདུན་ལས་ཟླ་བ་ཕྱེད་ཡོངས་སུ་གནས་པ་གསོལ་ནས། དགེ་འདུན་གྱིས་དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་སྩལ་ཏེ། དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་བགྱིས་ལགས་ཏེ། དགེ་འདུན་ལས་ཞག་དྲུག་མགུ་བ་བགྱི་བར་གསོལ་ན། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་བགྱིས་པ་འདི་ལ་ཞིག་ཏུ་མགུ་བར་བགྱི་བསྩལ་ཏེ། དགེ་སློང་འཆར་ཀ་འདིས་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས་པ་ལགས། ཞག་དྲུག་མགུ་བར་ཡང་བགྱིས་ལགས་ཏེ། དགེ་འདུན་ལས་དབྱུང་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས། ཞག་དྲུག་མགུ་བར་ཡང་བགྱིས་པ་དབྱུང་བར་བགྱིའོ། །འདི་ནི་གསོལ་བའོ། །དགེ་འདུན་བཙུན་པ་རྣམས་གསན་དུ་གསོལ། །དགེ་སློང་འཆར་ཀ་འདི་ལ་ཆེ་གེ་
མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་འདི་ལ་ཟླ་བ་ཕྱེད་བཅབས་པས། དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་དགེ་འདུན་ལས་ཟླ་བ་ཕྱེད་ཡོངས་སུ་གནས་པ་གསོལ་ན། དགེ་འདུན་གྱིས་དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་སྩལ་ཏེ་དགེ་སློང་འཆར་ཀ་འདིས་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་བ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་བགྱིས་ལགས་ཏེ། དགེ་འདུན་ལས་ཞག་དྲུག་མགུ་བར་བགྱི་བ་གསོལ་ནས། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་བགྱིས་པ་འདི་ལ་ཞག་དྲུག་མགུ་བར་བགྱི་བ་སྩལ་ཏེ། དགེ་སློང་འཆར་ཀ་འདི་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ། ཟླ་བ་ཕྱེད་ཡོངས་སུ་གནས་པ་ཡང་བགྱིས་ལགས། ཞག་དྲུག་མགུ་བ་ཡང་བགྱིས་ལགས་ཏེ། དགེ་འདུན་ལས་དབྱུང་བ་གསོལ་ན། དེའི་སླད་དུ་དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་བའི་དགེ་འདུན་ལྷག་མའི་ལྟུང་བ་བྱུང་ལ། ཟླ་བ་ཕྱེད་བཅབས་པ་དེའི་སླད་དུ། ཟླ་བ་ཕྱེད་ཡོངས་སུ་གནས་པ་ཡང་བགྱིས། ཞག་དྲུག་མགུ་བ་ཡང་བགྱིས་པ་དབྱུང་བར་མཛད་ན། ཚེ་དང་ལྡན་པ་གང་དག་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས། ཞག་དྲུག་མགུ་བ་ཡང་བགྱིས་ལགས་པ་དབྱུང་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །འདི་ནི་ལས་བརྗོད་པ་དང་པོ་སྟེ། དེ་བཞིན་དུ་ལན་གཉིས་ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས། ཞག་དྲུག་མགུ་བ་ཡང་བགྱིས་པ་ཕྱུང་ལགས་ཏེ། འདི་
ལྟར་ཅང་མི་གསུང་པས། དེ་དེ་བཞིན་དུ་འཛིན་ཏོ་ཞེས་གསུངས་པ་ཡིན་ནོ། །ཡོངས་སུ་གནས་པ་དང་གཞི་ནས་ཡོངས་སུ་གནས་པ་དང་མགུ་བར་བྱས་པ་དབྱུང་བའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟང་བ་བྱུང་ལ་ཟླ་བ་ཕྱེད་བཅབས་པས་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་དགེ་འདུན་ལས་ཟླ་བ་ཕྱེད་ཡོངས་སུ་གནས་པ་གསོལ་ནས། དགེ་འདུན་གྱིས་དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་སྩལ་ཏེ། འདི་ཡོངས་སུ་གནས་པ་བགྱིད་བཞིན་བ་ལས་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པས་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པ་དེའི་སླད་དུ་དགེ་འདུན་ལས་གཞི་ནས་ཡོངས་སུ་གནས་པ་གསོལ་ན། དགེ་འདུན་གྱིས་དགེ་སློང་འཆར་ཀ་འདི་ལ་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པ་དེའི་སླད་གཞི་ནས་ཡོངས་སུ་གནས་པ་སྩལ་ཏེ། དགེ་སློང་འཆར་ཀ་འདིས་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ། ཟླ་བ་ཕྱེད་བཅབས་པའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པའི་སླད་དུ་གཞི་ནས་ཡོངས་སུ་གནས་པ་ཡང་བགྱིས་ལགས་ཏེ། དགེ་འདུན་ལས་ཞག་དྲུག་མགུ་བར་བགྱི་བ་གསོལ་ནས་དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ། བཅབས་པའི་སླད་དུ་གཞི་ནས་ཡོངས་སུ་གནས་པ་ཡང་བགྱིས་པ་འདི་ལ་ཞག་དྲུག་མགུ་བར་བགྱི་བ་སྩལ་ཏེ། དགེ་སློང་འཆར་ཀ་འདིས་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་ལ་
ཟླ་བ་བྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས་ལགས། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པའི་སླད་དུ་གཞི་ནས་ཡོངས་སུ་གནས་པ་ཡང་བགྱིས་ལགས། ཞག་དྲུག་མགུ་བ་ཡང་བགྱི་ལགས་ཏེ། དགེ་འདུན་ལས་དབྱུང་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དག་འདུན་ལྷག་མའི་ལྟུང་བ་བྱུང་ལ། ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པའི་སླད་དུ་གཞི་ནས་ཡོངས་སུ་གནས་པ་ཡང་བགྱིས། ཞག་དྲུག་མགུ་བ་ཡང་བགྱིས་པ་དབྱུང་བར་བགྱིའོ། །འདི་ནི་གསོལ་བའོ། །དགེ་འདུན་བཙུན་པ་རྣམས་གསན་དུ་གསོལ། །དགེ་སློང་འཆར་ཀ་འདི་ལ་ཆེ་གེ་མོ་ལས་བྱུར་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པས་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་དགེ་འདུན་ལས་ཟླ་བ་ཕྱེད་ཡོངས་སུ་གནས་པ་གསོལ་ནས། དགེ་འདུན་གྱིས་དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་ལ་ཟླ་བ་ཕྱེད་བཅབས་པའི་སླད་དུ་ཟླ་བ་ཕྱེད་ཡོངས་སུ་གནས་པ་སྩལ་ཏེ། འདི་ཡོངས་སུ་གནས་པ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པས་དག་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པ་དེའི་སླད་དུ་དགེ་འདུན་ལས་གཞི་ནས་ཡོངས་སུ་གནས་པ་གསོལ་ན། དགེ་འདུན་གྱིས་དགེ་སློང་འཆར་ཀ་འདི་ལ་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པ་དེའི་སླད་དུ་གཞི་ནས་ཡོངས་སུ་གནས་པ་སྩོལ་ཏེ། དགེ་སློང་འཆར་ཀ་འདིས་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པའི་སླད་དུ་གཞི་ནས་
ཡོངས་སུ་གནས་པ་ཡང་བགྱིས་ལགས་ཏེ། དགེ་འདུན་ལས་ཞག་དྲུག་མགུ་བར་བགྱི་བ་གསོལ་ནས། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པ་དེའི་སླད་དུ་གཞི་ནས་ཡོངས་སུ་གནས་པ་ཡང་བགྱིས་པ་འདི་ལ་ཞག་དྲུག་མགུ་བར་བགྱིས་པ་སྩལ་ཏེ། དགེ་སློང་འཆར་ཀ་འདི་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་གནས་པ་ཡང་བགྱིས་ལགས། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ། བཅབས་པའི་སླད་དུ་གཞི་ནས་ཡོངས་སུ་གནས་པ་ཡང་བགྱིས་ལགས། ཞག་དྲུག་མགུ་བར་ཡང་བགྱིས་ལགས་ཏེ། དགེ་འདུན་ལས་དབྱུང་བར་གསོལ་ན་དེའི་སླད་དུ་དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པའི་སླད་དུ་གཞི་ནས་ཡོངས་སུ་གནས་པ་ཡང་བགྱིས། ཞག་དྲུག་མགུ་བ་ཡང་བགྱིས་པ་དབྱུང་བ་མཛད་ན། ཚེ་དང་ལྡན་པ་གང་དག་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ། བཅབས་པའི་སླད་དུ་གཞི་ནས་ཡོངས་སུ་གནས་པ་ཡང་བགྱིས། ཞག་དྲུག་མགུ་བར་ཡང་བགྱིས་པ་དབྱུང་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །འདི་ནི་ལས་བརྗོད་པ་དང་པོ་སྟེ། དེ་བཞིན་ལན་གཉིས་ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བྱུང་ལ། བཅབས་
པའི་སླད་དུ་གཞི་ནས་ཡོངས་སུ་གནས་པ་ཡང་བགྱིས། ཞག་དྲུག་མགུ་བ་བགྱིས་པ་ཡང་བྱུང་ལགས་ཏེ། འདི་ལྟར་ཅད་མི་གསུང་བས་དེ་དེ་བཞིན་དུ་འཛིན་ཏེ་ཞེས་གསུངས་པ་ཡིན་ནོ། །ཡོངས་སུ་གནས་པ་དང་གཞི་ནས་ཡོངས་སུ་གནས་པ་དང༌། ཡང་གཞི་ནས་བསླང་སྟེ་ཡོངས་སུ་གནས་པ་དང་མགུ་བ་བྱས་པ་དང་དབྱུང་བའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པས་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་དགེ་འདུན་ལ་ཟླ་བ་ཕྱེད་ཡོངས་སུ་གནས་པ་གསོལ་ནས། དགེ་འདུན་གྱིས་དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་སྩལ་ཏེ། འདི་ཡོངས་སུ་གནས་པ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ། བཅབས་པས་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ། བཅབས་པ་དེའི་སླད་དུ་དགེ་འདུན་ལས་གཞི་ནས་ཡོངས་སུ་གནས་པ་གསོལ་ནས། དགེ་འདུན་གྱིས་དགེ་སློང་འཆར་ཀ་འདི་ལ་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པས་དེའི་སླད་དུ་གཞི་ནས་ཡོངས་སུ་གནས་པ་སྩལ་ཏེ། འདི་གཞི་ནས་ཡོངས་སུ་གནས་པ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་ལ་བཅབས་པས་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་ལ་བཅབས་པ་དེའི་སླད་དུ་དགེ་འདུན་ལ་ཡང་གཞི་ནས་བསླང་སྟེ། ཡོངས་སུ་གནས་པ་གསོལ་ནས་དགེ་འདུན་གྱིས་དགེ་སློང་འཆར་ཀ་འདི་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་ལ་བཅབས་པ་དེའི་སླད་དུ་ཡང་གཞི་ནས་བསླང་སྟེ་ཡོངས་སུ་གནས་པ་སྩལ་ཏེ། དགེ་སློང་འཆར་ཀ་འདིས་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་
ལ་ཟླ་བ་ཕྱེད་བཅབས་པ་དེའི་སླད་དུ། ཟླ་བ་ཕྱེད་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པ་དེའི་སླད་དུ་གཞི་ནས་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་ལ། བཅབས་པའི་སླད་དུ་ཡང་གཞི་ནས་བསླང་སྟེ། ཡོངས་སུ་གནས་པ་ཡང་བགྱིས་ལགས་ཏེ། དགེ་འདུན་ལས་ཞག་དྲུག་མགུ་བར་བགྱི་བ་གསོལ་ནས། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པ་དེའི་སླད་དུ་གཞི་ནས་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་ལ་བཅབས་པ་དེའི་སླད་དུ་ཡང་གཞི་ནས་བསླང་སྟེ་ཡོངས་སུ་གནས་པ་ཡང་བགྱིས་པ་འདི་ལ་ཞག་དྲུག་མགུ་བར་བགྱིས་པ་སྩལ་ཏེ། དགེ་སློང་འཆར་ཀ་འདིས་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས་ལགས། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པའི་སླད་དུ་གཞི་ནས་ཡོངས་སུ་གནས་པ་ཡང་བགྱིས་ལགས། དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་པའི་སླད་དུ་ཡང་གཞི་ནས་བསླང་སྟེ་ཡོངས་སུ་གནས་པ་ཡང་བགྱིས་ལགས། ཞག་དྲུག་མགུ་པ་ཡང་བགྱིས་ལགས་ཏེ་དགེ་འདུན་ལས་དབྱུང་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་བྱེད་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པའི་སླད་དུ་གཞི་ནས་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་ལ་བཅབས་པའི་སླད་དུ་ཡང་གཞི་
ནས་བསླང་སྟེ། ཡོངས་སུ་གནས་པ་ཡང་བགྱིས་ཞག་དྲུག་མགུ་པར་བགྱིས་པ་ཡང་དབྱུང་བར་བགྱིའོ། །འདི་ནི་གསོལ་བའོ། །དགེ་འདུན་བཙུན་པ་རྣམས་གསན་དུ་གསོལ། །དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པས་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་དགེ་འདུན་ལས་ཟླ་བ་ཕྱེད་ཡོངས་སུ་གནས་པ་གསོལ་ནས། དགེ་འདུན་གྱིས་དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་པའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་སྩལ་ཏེ། འདི་ཡོངས་སུ་གནས་པ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པས་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པས་དེའི་སླད་དུ་དགེ་འདུན་ལས་གཞི་ནས་ཡོངས་སུ་གནས་པ་གསོལ་ནས། དགེ་འདུན་གྱིས་དགེ་སློང་འཆར་ཀ་འདི་ལ་དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ། བཅབས་པ་དེའི་སླད་དུ་གཞི་ནས་ཡོངས་སུ་གནས་པ་སྩལ་ཏེ། འདི་གཞི་ནས་ཡོངས་སུ་གནས་པ་བགྱིད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་པར་མ་དང་འདྲ་བ་ཡང་བཟླས་ཏེ་བྱུང་ལ་བཅབས་བས་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། དགེ་འདུན་ལྷག་མའི་ལྟུང་བ་ལྟུང་བ་པར་མ་དང་འདྲ་བ་ཡང་བཟླས་ཏེ་བྱུང་ལ་བཅབས་པ་དེའི་སླད་དུ་དགེ་འདུན་ལས་ཡང་གཞི་ནས་བསླང་སྟེ་ཡོངས་སུ་གནས་པ་གསོལ་ནས། དགེ་འདུན་གྱིས་དགེ་སློང་འཆར་ཀ་འདི་ལ་དགེ་འདུན་ལྷག་མའི་ལྟུང་བ་ལྟུང་བ་པར་མ་དང་འདྲ་བ་ཡང་བཟླས་ཏེ་བྱུང་ལ་བཅབས་བ་དེའི་སླད་དུ་ཡང་གཞི་ནས་བསླད་སྟེ། ཡོངས་སུ་གནས་པ་སྩལ་ཏེ། དགེ་སློང་འཆར་ཀ་འདིས་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྷུང་བ་སྔ་མ་དང་འདྲ་བ་ཡང་བྱུང་ལ་བཅབས་པའི་སླད་དུ་གཞི་
ནས་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་ལ་བཅབས་པའི་སླད་དུ་ཡང་གཞི་ནས་བསླང་སྟེ་ཡོངས་སུ་གནས་པ་ཡང་བགྱིས་ལགས་ཏེ། དགེ་འདུན་ལས་ཞག་དྲུག་མགུ་བར་བགྱིས་པ་གསོལ་ནས། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བཟླས་ཏེ་བྱུང་ལ་བཅབས་པའི་སླད་དུ་ཡང་གཞི་ནས་བསླང་སྟེ་ཡོངས་སུ་གནས་པ་ཡང་བགྱིས་ལགས་པ་འདི་ལ་ཞག་དྲུག་མགུ་བར་བགྱི་བ་སྩལ་ཏེ། དགེ་སློང་འཆར་ཀ་འདི་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས་ལགས། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པའི་སླད་དུ་གཞི་ནས་ཡོངས་སུ་གནས་པ་ཡང་བགྱིས་ལགས། དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་ལ་བཅབས་པའི་སླད་དུ་ཡང་གཞི་ནས་བསླང་སྟེ་ཡོངས་སུ་གནས་པ་ཡང་བགྱིད་ལགས། ཞག་དྲུག་མགུ་བ་ཡང་བགྱིས་ལགས་ཏེ། དགེ་འདུན་ལས་དབྱུང་བ་གསོལ་ན། དེའི་སླད་དུ་དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས་ལགས། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པ་དེའི་སླད་དུ་གཞི་ནས་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་ལ་བཅབས་པའི་སླད་དུ་ཡང་གཞི་ནས་བསླང་སྟེ་ཡོངས་སུ་གནས་པ་ཡང་བགྱིས། ཞག་དྲུག་མགུ་བ་ཡང་བགྱིས་པ་དབྱུང་བ་མཛད་ན། ཚེ་དང་ལྡན་པ་གང་དག་དགེ་སློང་འཆར་ཀ་འདི་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པའི་སླད་དུ་
གཞི་ནས་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་ལ་བཅབས་པའི་སླད་དུ་གཞི་ནས་བསླང་སྟེ་ཡོངས་སུ་གནས་པ་ཡང་བགྱིས་ཞག་དྲུག་མགུ་བ་ཡང་བགྱིས་པ་དབྱུང་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །འདི་ནི་ལས་བརྗོད་པ་དང་པོ་སྟེ་དེ་བཞིན་དུ་ལན་གཉིས་ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་སྔ་མ་དང་འདྲ་བ་ཡང་བྱུང་ལ་བཅབས་པའི་སླད་དུ་གཞི་ནས་ཡོངས་སུ་གནས་པ་ཡང་བགྱིས། དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་ལ་བཅབས་པའི་སླད་དུ་ཡང་གཞི་ནས་བསླང་སྟེ་ཡོངས་སུ་གནས་པ་ཡང་བགྱིས། ཞག་དྲུག་མགུ་བ་ཡང་བགྱིས་པ་ཕྱུང་ལགས་ཏེ། འདི་ལྟར་ཅང་མི་གསུངས་པས་དེ་དེ་བཞིན་དུ་འཛིན་ཏོ་ཞེས་གསུངས་པ་ཡིན་ནོ། །ཡོངས་སུ་གནས་པ་དང་གཞི་ནས་ཡོངས་སུ་གནས་པ་དང་ཡང་གཞི་ནས་བསླང་སྟེ། ཡོངས་སུ་གནས་པ་དང༌། མགུ་བ་དང་གཞི་ནས་མགུ་བ་བྱས་པ་དང༌། ཡང་གཞི་ནས་བསླང་སྟེ་མགུ་བ་ཡང་བྱས་པ་དབྱུང་བའི་སྔགས་ཀྱང་དེ་བཞིན་དུ་ཅི་རིགས་པར་བརྗོད་པར་བྱའོ། །དེར་བསྡིགས་པ་ཡང་ངོ་ཞེས་བྱ་བ་ནི། དབྱུང་བ་དེར་བསྡིགས་པའི་སྔགས་ཀྱང་བརྗོད་པར་བྱ་སྟེ། དེའི་སྔགས་ནི། འཆར་ཀ་ཁྱོད་ཉོན་ཅིག །ཁྱོད་ཀྱིས་ལེགས་པ་མ་བྱས་སོ། །ལེགས་པ་ཤིན་ཏུ་མ་བྱས་སོ། །བྱ་བ་གཞན་ཡིན་ན་གཞན་བྱས་སོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་ཆོས་ནི་འདི་ལྟར། འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང་ཤེས་རབ་རྣམ་པར་གྲོལ་བའི་ཆོས་སྟོན་ཅིང༌། ཞེ་སྡང་འདོད་ཆགས་དང་བྲལ་བར་བྱས་པ་དང༌། གཏི་མུག་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང༌། ཤེས་རབ་རྣམ་པར་གྲོལ་བའི་ཆོས་སྟོན་བཞིན་དུ་ཁྱོད་ཀྱིས་མི་མཛེས་པ་
འདི་ལྟ་བུ་འདི་བྱས་པ་མི་རིགས་སོ། །མི་གཏི་མུག་ཅན་ཁྱོད་ཀྱིས་སྤྲུལ་ནག་པོ་དུག་མྱུར་དུ་ཁྱབ་པར་བྱེད་པ་དུག་དྲག་པ་དུག་རྣོ་བ་ལ་ལག་པ་གཉི་ག་བཟུང་བ་ནི་བླའི། ཀུན་དུ་ཆགས་པའི་སེམས་ཀྱིས་རང་གི་ཡན་ལག་གི་རྣམ་པ་ལ་བཟུང་བ་ནི་དེ་ལྟ་མ་ཡིན་ནོ། །མི་གཏི་མུག་ཅན་ཁྱོད་ལག་པ་གང་དག་གིས་བྲམ་ཟེ་དང་ཁྱིམ་བདག་དད་པ་ཅན་རྣམས་ལས་དད་པས་བྱིན་པ་བླང་བར་བྱ་བའི་ལག་པ་དེ་དག་ཉིད་ཀྱིས་མི་མཛེས་པ་འདི་ལྟ་བུ་འདི་བྱ་བ་མི་རིགས་སོ། །མི་གཏི་མུག་ཅན་ཁྱོད་ཀྱིས་དེ་ལྟར་བདག་ལ་བསྙེན་བཀུར་བྱ་བ་ཉམས་སུ་བླངས་པར་གྱུར་ཏོ། །འཆང་ཀ་གཉིས་པོ་འདི་དག་ནི་ཆོས་ཀྱི་སྒྲོན་མ་དང༌། ཆོས་ཀྱི་སྣང་བ་དང༌། ཆོས་ཀྱི་འོད་དང༌། ཆོས་ཀྱི་གསལ་བ་དང༌། ཆོས་ཀྱི་སྣང་གསལ་དང༌། ཆོས་ཀྱི་མར་མེ་དང༌། ཆོས་ཀྱི་རབ་གསལ་མེད་པར་བྱེད་པ་སྟེ། གཉིས་གང་ཞེ་ན། ལྟུང་བ་འབྱིན་པ་གང་ཡིན་པ་དག་ལྟུང་བ་བྱུང་ནས་ཆོས་བཞིན་དུ་ཕྱིར་མི་འཆོས་པ་གང་ཡིན་པའོ། །གཉིས་ནི་སྡིག་པའི་རྩ་བ་མི་རྐོ། རྒྱུན་ལས་བཟློག་པ་ལ་མི་འབད། འབབ་ཆུ་དང༌། འཁྲི་ཤིང་མི་སྐེམས། བདུད་མི་འདུལ། བདུད་ཀྱི་རྒྱལ་མཚན་མི་སྙོལ། ཆོས་ཀྱི་རྒྱལ་མཚན་མི་བསྒྲེང༌། སྡིག་པའི་རྒྱུན་མི་གཅོད། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཆོས་ཀྱི་འཁོར་ལོ་ཆོས་དང་མཐུན་པར་བསྐོར་བ་རྗེས་སུ་མི་བསྐོར་བ་སྟེ། གཉིས་གང་ཞེ་ན། ལྟུང་བ་འབྱིན་པ་གང་ཡིན་པ་དང༌། ལྟུང་བ་བྱུང་ནས་ཆོས་བཞིན་དུ་ཕྱིར་མི་འཆོས་པ་གང་ཡིན་པའོ། །གཉིས་ནི་ཀུན་ནས་ཉོན་མོངས་པར་འགྱུར་བ་དང༌། གཉིས་ཀྱི་ཟག་པ་འཕེལ་བར་འགྱུར་ཏེ། གཉིས་གང་ཞེ་ན། ལྟུང་བ་འབྱིན་པ་གང་ཡིན་པ་དང༌། ལྟུང་བ་བྱུང་ནས་ཆོས་བཞིན་དུ་ཕྱིར་མི་འཆོས་པ་གང་ཡིན་པའོ། །འཆར་ཀ་ཁྱོད་ཀྱིས་ལྟུང་བ་འདི་མ་བཤགས་ཤིང་སོ་སོར་མ་བཤགས་ན། མི་རྟག་པའི་འདུ་ཤེས་དང༌། མི་རྟག་པ་ལ་སྡུག་བསྔལ་བའི་འདུ་ཤེས་དང༌། སྡུག་བསྔལ་བ་ལ་བདག་མེད་པའི་འདུ་ཤེས་དང༌། ཟས་ལ་མི་མཐུན་པའི་འདུ་ཤེས་དང༌། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་དང༌། ཉེས་དམིགས་ཀྱི་འདུ་ཤེས་དང༌། སྤོང་བའི་འདུ་
ཤེས་དང༌། འདོད་ཆགས་དང་བྲལ་བའི་འདུ་ཤེས་དང༌། འགོག་པའི་འདུ་ཤེས་དང༌། འཆི་བའི་འདུ་ཤེས་དང༌། མི་སྡུག་པའི་འདུ་ཤེས་དང༌། རྣམ་པར་བསྔོས་པའི་འདུ་ཤེས་དང༌། རྣམ་པར་རྣགས་པའི་འདུ་ཤེས་དང༌། རྣམ་པར་བམ་པའི་འདུ་ཤེས་དང༌། རྣམ་པར་འབུས་གཞིགས་བའི་འདུ་ཤེས་དང༌། རྣམ་པར་ཟོས་པའི་འདུ་ཤེས་དང༌། རྣམ་པར་དམར་བའི་འདུ་ཤེས་དང༌། རྣམ་པར་འཐོར་བའི་འདུ་ཤེས་དང༌། རུས་གོང་གི་འདུ་ཤེས་དང༌། སྟོང་པ་ཉིད་དུ་སོ་སོར་རྟོགས་པའི་འདུ་ཤེས་ཀྱི་འོས་མ་ཡིན། བསམ་གཏན་དང་པོ་དང༌། གཉིས་པ་དང༌། གསུམ་པ་དང༌། བཞི་པ་དང༌། བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་དང༌། ནམ་མཁའ་མཐའ་ཡས་སྐྱེ་མཆེད་དང༌། རྣམ་ཤེས་མཐའ་ཡས་སྐྱེ་མཆེད་དང༌། ཅི་ཡང་མེད་པའི་སྐྱེ་མཆེད་དང༌། འདུ་ཤེས་མེད་འདུ་ཤེས་མིད་མིན་སྐྱེ་མཆེད་དང༌། རྒྱུན་དུ་ཞུགས་པའི་འབྲས་བུ་དང༌། ལན་ཅིག་ཕྱིར་འོང་བའི་འབྲས་བུ་དང༌། ཕྱིར་མི་འོང་བའི་འབྲས་བུ་དང༌། རྫུ་འཕྲུལ་གྱི་ཡུལ་དང༌། ལྷའི་རྣ་བ་དང༌། སེམས་ཀྱི་རྣམས་གྲང་དང༌། སྔོན་གྱི་གནས་དང༌། འཆི་འཕོ་དང༌། སྐྱེ་བ་དང༌། ཟག་པ་ཟད་པའི་འོས་མ་ཡིན་ནོ། །འཆར་ཀ་ལྟུང་བ་འདི་མ་བཤགས་ཤིང་སོ་སོར་མ་བཤགས་ན། འགྲོ་བ་གཉིས་ལས་གང་ཡང་རུང་བ་ཞིག་ཁྱོད་ཀྱི་འགྲོ་བ་ཡིན་པ་པར་ཤེས་པར་བྱ་སྟེ། སེམས་ཅན་དམྱལ་བ་འམ་དུད་འགྲོའོ། །བཅོམ་ལྡན་འདས་ཀྱིས་ཀྱང་ལས་ཀྱི་མཐའ་འཆབ་པའི་འགྲོ་བ་ནི་གཉིས་ཏེ། སེམས་ཅན་དམྱལ་བ་འམ་དུད་འགྲོའོ། །གང་དག་ངས་བཤད་པ་ལ་ཡིད་མི་ཆེས་པ་དེ་དག་ནི་འཆབ་པར་སེམས་སོ་ཞེས་གསུངས་སོ་ཞེས་གསུངས་པ་ཡིན་ནོ། །བསྡིགས་པ་དེ་ནམ་གྱི་ཚེ་བྱ་ཞེ་ན་དེའི་ཕྱིར། གསོལ་བ་དང་ལས་བརྗོད་པ་དང་པོའི་བར་དུའོ་ཞེས་བྱ་བ་སྨྲས་ཏེ། གསོལ་བ་བྱས་ནས་དེའི་རྗེས་ལ་བྱའོ་ཞེས་བྱ་བའི་ཐ་ཚིག་གོ །ལྟུང་བ་འབྱིན་བ་གནས་སྐབས་ཇི་ལྟར་འདུག་པ་ལ་བྱ་ཞེ་ན་དེའི་ཕྱིར་རྩྭ་བཀྲམ་པ་ལྟ་བུར་འགྱེལ་བ་ལའོ་གཟེངས་བསྟོད་པ་པའོ་ཞེས་བྱ་བ་སྨྲས་ཏེ། རྩྭ་བཅད་དེས་ལ་བཀྲམ་པ་ལྟར་ལུས་ཐམས་ཅད་ས་ལ་སྒྱེལ་བ་ལ་ཞེས་བྱ་བའི་ཐ་ཚིག་གོ །གཟེངས་བསྟོད་པ་ཡང་ངོ་ཞེས་བྱ་བ་ནི། དེ་ལ་གཟེངས་བསྟོད་པའི་
སྔགས་ཀྱང་བརྗོད་པར་བྱ་སྟེ། དེའི་སྔགས་ནི། འཆར་ཀ་ཁྱོད་ཀྱིས་ལེགས་པ་བྱས་སོ་ལེགས་པ་ཤིན་ཏུ་བྱས་སོ། །གཉིས་ནི་མཁས་པ། གཉིས་ནི་གསལ་བ། གཉིས་ནི་དགེ་བ། གཉིས་ནི་སྐྱེས་བུ་དམ་པ་སྟེ། གཉིས་གང་ཞེ་ན། ལྟུང་བ་མི་འབྱིན་པ་གང་ཡིན་པ་དང༌། ལྟུང་བ་བྱུང་ནས་ཆོས་བཞིན་དུ་ཕྱིར་འཆོས་པ་གང་ཡིན་པའོ། །གཉིས་ནི་སྡིག་པའི་རྩ་བ་རྐོ་བ། རྒྱུན་ལས་བཟློག་པ་ལ་འབད་པ། འབབ་ཆུ་དང་འཁྲི་ཤིང་སྐེམས་པ་དང༌། བདུད་འདུལ་བ། བདུད་ཀྱི་རྒྱལ་མཚན་སྙོལ་བ། ཆོས་ཀྱི་རྒྱལ་མཚན་སྒྲེང་བ། སྡིག་པའི་རྒྱུན་གཅོད་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཆོས་ཀྱི་འཁོར་ལོ་ཆོས་དང་མཐུན་པར་བསྐོར་བ་རྗེས་སུ་བསྐོར་བ་སྟེ། གཉིས་གང་ཞེ་ན། ལྟུང་བ་མི་འབྱིན་པ་གང་ཡིན་པ་དང༌། ལྟུང་བ་བྱུང་ནས་ཆོས་བཞིན་དུ་ཕྱིར་འཆོས་པ་གང་ཡིན་པའོ། །གཉིས་ནི་རྣམ་པར་བྱང་བར་འགྱུར་ཞིང་ཀུན་ནས་ཉོན་མོངས་པར་མི་འགྱུར་བ་དང༌། གཉིས་ཀྱི་ཟག་པ་འཕེལ་བར་མི་འགྱུར་བ་སྟེ། གཉིས་གང་ཞེ་ན། ལྟུང་བ་མི་འབྱིན་པ་གང་ཡིན་པ་དང༌། ལྟུང་བ་བྱུང་ནས་ཆོས་བཞིན་དུ་ཕྱིར་འཆོས་པ་གང་ཡིན་པའོ། །འཆར་ཀ་ཁྱོད་ལྟུང་བ་འདི་བཤགས་ཤིང་སོ་སོར་བཤགས་པས་མི་རྟག་པའི་འདུ་ཤེས་དང༌། མི་རྟག་པ་ལ་སྡུག་བསྔལ་བའི་འདུ་ཤེས་དང༌། སྡུག་བསྔལ་བ་ལ་བདག་མེད་པའི་འདུ་ཤེས་དང༌། ཟས་ལ་མི་མཐུན་པའི་འདུ་ཤེས་དང༌། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་དང༌། ཉེས་དམིགས་ཀྱི་འདུ་ཤེས་དང༌། སྤོང་བའི་འདུ་ཤེས་དང༌། འདོད་ཆགས་དང་བྲལ་བའི་འདུ་ཤེས་དང༌། འགོག་པའི་འདུ་ཤེས་དང༌། འཆི་བའི་འདུ་ཤེས་དང༌། མི་སྡུག་པའི་འདུ་ཤེས་དང༌། རྣམ་པར་བསྔོས་པའི་འདུ་ཤེས་དང༌། རྣམ་པར་རྣགས་པའི་འདུ་ཤེས་དང༌། རྣམ་པར་བམ་པའི་འདུ་ཤེས་དང༌། རྣམ་པར་གཞིགས་པའི་འདུ་ཤེས་དང༌། རྣམ་པར་ཟོས་པའི་འདུ་ཤེས་དང༌། རྣམ་པར་དམར་བའི་འདུ་ཤེས་དང༌། རྣམ་པར་འཐོར་བའི་འདུ་ཤེས་དང༌། རུས་གོང་གི་འདུ་ཤེས་དང༌། སྟོང་པ་ཉིད་དུ་སོ་སོར་རྟོགས་པའི་འདུ་ཤེས་ཀྱི་འོས་སུ་གྱུར་པ་
ཡིན། བསམ་གཏན་དང་པོ་དང༌། གཉིས་པ་དང༌། གསུམ་པ་དང༌། བཞི་པ་དང༌། བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་དང༌། ནམ་མཁའ་མཐའ་ཡས་སྐྱེ་མཆེད་དང༌། རྣམ་ཤེས་མཐའ་ཡས་སྐྱེ་མཆེད་དང༌། ཅི་ཡང་མེད་པའི་སྐྱེ་མཆེད་དང༌། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དང༌། རྒྱུན་དུ་ཞུགས་པའི་འབྲས་བུ་དང༌། ལན་ཅིག་ཕྱིར་འོང་བའི་འབྲས་བུ་དང༌། ཕྱིར་མི་འོང་བའི་འབྲས་བུ་དང༌། རྫུ་འཕྲུལ་གྱི་ཡུལ་དང༌། ལྷའི་རྣ་བ་དང༌། སེམས་ཀྱི་རྣམ་གྲངས་དང༌། སྔོན་གྱི་གནས་དང༌། འཆི་འཕོ་དང༌། སྐྱེ་བ་དང༌། འབྲས་བུའི་མཆོག་དགྲ་བཅོམ་པའི་འོས་སུ་གྱུར་པ་ཡིན་ནོ། །འཆར་ཀ་ལྟུང་བ་འདི་བཤགས་ཤིང་སོ་སོར་བཤགས་པས་འགྲོ་བ་གཉིས་པོ་ལས་གང་ཡང་རུང་བ་ཞིག་ཁྱོད་ཀྱི་འགྲོ་བ་ཡིན་པར་ཤེས་པར་བྱ་སྟེ། ལྷའམ་མིའོ། །བཅོམ་ལྡན་འདས་ཀྱིས་ཀྱང་ལས་ཀྱི་མཐའ་མི་འཆབ་པའི་འགྲོ་བ་ནི་གཉིས་ཏེ་ལྷའམ་མིའོ། །གང་དག་བས་བཤད་པ་ལ་ཡིད་ཆེས་པ་དེ་དག་ནི་འཆབ་པར་མི་སེམས་སོ་ཞེས་གསུངས་སོ། །ཡང་གསུངས་པ། །བཅབས་པ་ཆར་པ་བཞིན་དུ་འབབ། །བཤགས་པས་ཆར་བཞིན་འབབ་མི་འགྱུར། །དེ་ལྟ་བས་ན་བཤགས་པར་བྱ། །དེ་ལྟས་ཆར་བཞིན་དེ་མི་འབབ། །ཅེའོ། །ཚེ་དང་ལྡན་པ་འཆར་ཀ་ཁྱོད་ཕྱུང་ཟིན་གྱིས་བག་ཡོད་པར་སྒྲུབས་ཤིག་ཅེས་གསུངས་པ་ཡིན་ནོ། །གང་གི་ཚེ་གཟེངས་བསྟོད་པ་དེ་བྱ་ཞེ་ན་དེའི་ཕྱིར་བརྗོད་པ་བྱས་མ་ཐག་ཏུའོ་ཞེས་བྱ་བ་སྨྲས་ཏེ། ཕྱུང་ལགས་ཏེ་འདི་ལྟར་ཅང་མི་གསུངས་པས་དེ་དེ་བཞིན་དུ་འཛིན་ཏོ་ཞེས་བྱ་བའི་ཚིག་བརྗོད་པར་བྱས་མ་ཐག་ཏུའོ་ཞེས་བྱ་བའི་ཐ་ཚིག་གོ །ཕྱིར་བཅོས་པའི་གཞི་གཞིར་གཏོགས་པའོ་ཞེས་བྱ་བ་དེ་འདུལ་བའི་གཞིའི་སྐབས་སུ་གཏོགས་པ་བཤད་ཟིན་ཏོ།། །།ད་ནི་ཕྱིར་བཅོས་པའི་གཞི་ཞུ་བའི་སྐབས་བསྡུ་བའི་ཕྱིར་ཚུལ་ཁྲིམས་འཆལ་བ་བསྐྲད་པར་བྱའོ་ཞེས་བྱ་བ་ནི་སྨྲས་ཏེ། འདིར་ཚུལ་ཁྲིམས་འཆལ་བ་ཞེས་བྱ་བ་ནི་ཕམ་པར་གྱུར་པ་ཡིན་པར་ཤེས་པར་བྱའོ། །འདི་ལ་དགེ་འདུན་དབང་ངོ་ཞེས་བྱ་བ་ནི། ཚུལ་ཁྲིམས་འཆལ་བ་བསྐྲད་པ་འདི་ལ་དགེ་འདུན་དབང་བ་ཉིད་དེ། གཙུག་ལག་ཁང་གི་བྱ་བ་ནི་ཚོགས་ལ་རག་ལུས་པ་ཉིད་ཡིན་པའི་
ཕྱིར་དེ་ལ་དགེ་འདུན་དབང་བ་ཉིད་ཡིན་ནོ། །འདིར་གཞུང་ནི་བཅོམ་ལྡན་འདས་ཀྱིས་དགེ་སློང་ཚུལ་ཁྲིམས་འཆལ་བ་བསྐྲད་པར་བྱའོ་ཞེས་བཀའ་སྩལ་ན། གང་གིས་བསྐྲད་པར་བགྱིས། དགེ་འདུན་གྱིས་སོ་ཞེས་གསུངས་པ་ཡིན་ནོ། །དེས་དེ་ཡལ་བར་མི་དོར་རོ་ཞེས་བྱ་བ་ནི། དགེ་འདུན་དེས་ཚུལ་ཁྲིམས་འཆལ་བ་བསྐྲད་པ་དེ་ཡལ་བར་མི་དོར་བ་སྟེ་དགེ་འདུན་གྱིས་དེ་ལ་འབད་པར་བྱའོ་ཞེས་བྱ་བའི་ཐ་ཚིག་གོ །བསྙིལ་བ་ལ་བཟོད་པར་བྱ་བ་ཉིད་དོ་ཞེས་བྱ་བ་ནི། དགེ་ཚུལ་བསྙིལ་བའི་ལས་བྱས་པ་ལ་ཇི་ལྟར་ནན་ཐུར་བྱས་པ་གཞན་དག་ལ་བཟོད་པར་བྱ་བ་དེ་བཞིན་དུ་དེ་ལ་ཡང་བཟོད་པར་བྱ་བ་ཉིད་ཡིན་ནོ། །འདིར་གཞུང་ནི་དགེ་ཚུལ་བསྙིལ་བ་སྡུད་པའི་ལྟུང་བྱེད་ཀྱི་ཞུ་བ་ལས་དགེ་འདུན་གྱིས་དགེ་ཚུལ་བསྙིལ་བའི་ལས་ཀྱིས་བསྙིལ་བར་གྱུར་ཅིང་དེ་ཡང་འབྱུང་བར་བསྐྱོད་ན་བཟོད་པར་བགྱི་འམ། བཟོད་པར་མི་བགྱི། བཟོད་པར་བྱའོ་ཞེས་གསུངས་པ་ཡིན་ནོ། །ནན་ཐུར་བྱེད་པ་དེ་དག་གིས་མ་བསྐོས་ན་ནན་ཐུར་བྱས་པ་ལ་བཟོད་པ་མི་འཆགས་སོ་ཞེས་བྱ་བ་ནི། ནན་ཐུར་བྱེད་པའི་དགེ་སློང་རྣམས་ཀྱིས་ནན་ཐུར་བྱས་པའི་གང་ཟག་དེ་ལ་བཟོད་པ་གྱིས་ཤིག་ཅེས་མ་བསྐོས་པར་དགེ་སློང་གཞན་གྱིས་དེ་ལ་བཟོད་པ་ལེན་པར་བྱེད་པ་མི་འཆགས་པ་སྟེ། གལ་ཏེ་དགེ་སློང་གཞན་དག་ནན་ཐུར་བྱས་པ་དེ་ལ་བཟོད་པ་བྱེད་འདོད་ན་ཅི་ནས་ཀྱང་ནན་ཐུར་བྱེད་པ་དག་གིས་དེར་བསྐོས་པ་ཉིད་དུ་འགྱུར་བ་དེ་ལྟར་བྱ་ཞིང་དེ་ལ་བཟོད་པར་བྱའོ། །བསྐྲད་པས་སུན་ཕྱུང་བའི་གནས་སུ་གནས་པར་མི་བྱ་བ་ཉིད་དོ་ཞེས་བྱ་བ་ནི། ཁྱིམ་སུན་འབྱིན་པ་བསྐྲད་པ་ཉིད་ཀྱི་གནས་གང་སུན་ཕྱུང་བར་གྱུར་པའི་སྤྱོད་ཡུལ་གྱིས་གནས་དེར་དེས་གནས་པར་མི་བྱ་བ་ཉིད་དེ། དེས་དེ་དག་ནི་མ་དད་པ་ཡོངས་སུ་སྤང་བའི་ཕྱིར་གཞན་དུ་འགྲོ་བར་བྱའོ། །འདིར་གཞུང་ནི་རྣམ་པར་འབྱེད་པ་ལས་ཚེ་དང་ལྡན་པ་ཁྱོད་གནས་འདི་ནས་སོང་ཤིག་ཅེས་བྱ་བ་དང༌། དགེ་སློང་བྲམ་ཟེའི་བུ་མོས་ཞུས་པ་ལས་ཀྱང་བསྐྲད་པ་ཞེས་བྱ་བའི་དོན་ཅི་ལགས་ཉེ་བ་འཁོར་ལས་དེའི་མིང་ཡིན་ཏེ། འོན་ཀྱང་བསྐྲད་པར་བྱ་བ་ནི་དགེ་སློང་ཁྱིམ་སུན་འབྱིན་པ་གང་ཡིན་པ་དེ་ལ་བྱ་སྟེ་དེ་འདིར་གནས་པར་མི་བྱའོ་ཞེས་གསུངས་པ་ཡིན་ནོ། །གནས་ནས་ཕྱུང་བ་ཐམས་ཅད་ལ་གནས་པར་
བྱ་བ་མ་ཡིན་པ་ཉིད་དང་ལོངས་སྤྱོད་པར་བྱ་བ་མ་ཡིན་པ་ཉིད་དོ་ཞེས་བྱ་བ་ནི། ལྷན་ཅིག་གནས་པར་བྱ་བ་ཉིད་མ་ཡིན་པ་དང༌། ལྷན་ཅིག་ལོངས་སྤྱོད་པ་མ་ཡིན་པ་ཉིད་ཅེས་བྱ་བ་དེ་གཉིས་ནི་གནས་ནས་ཕྱུང་བ་ཐམས་ཅད་ལ་རིག་པར་བྱའི། ལྟ་བའི་རྣམ་པ་མི་གཏོང་བ་ཉིད་ཀྱི་གནས་ནས་ཕྱུང་བ་འབའ་ཞིག་ལ་དེ་གཉིས་རིག་པར་བྱ་བར་མ་ཟད་དོ། །དེ་ཡང་བསྐྲད་པར་བྱ་བ་ཡིན་ནོ། །འདིར་གཞུང་ནི། དགེ་སློང་བྲམ་ཟེའི་བུ་མོས་ཞུས་པ་ལས་གནས་ནས་ཕྱུང་བ་གྲོགས་དང་བཅས་པར་བརྗོད་པར་བགྱི་འམ། གྲོགས་མཆིས་པར་བརྗོད་པར་བགྱི། གནས་ནས་ཕྱུང་བ་ཐམས་ཅད་གཅིག་པུ་གྲོགས་མེད་པ་གཉིས་པ་མེད་པར་བརྗོད་པར་བྱའོ། །གནས་ནས་ཕྱུང་བ་ལོངས་སྤྱོད་དང་བཅས་པར་བརྗོད་པར་བགྱིའམ། ལོངས་སྤྱོད་མ་མཆིས་པར་བརྗོད་པར་བགྱི། གནས་ནས་ཕྱུང་བ་ཐམས་ཅད་ལོངས་སྤྱོད་མེད་པར་བརྗོད་པར་བྱའོ་ཞེས་གསུངས་པ་ཡིན་ནོ། །འདི་ལ་འདུ་ཤེས་ཀྱི་རྣམ་པར་གཞག་གོ་ཞེས་བྱ་བ་ནི། གནས་ནས་ཕྱུང་བ་སྤང་པ་འདི་ལ་འདུ་ཤེས་ཀྱི་རྣམ་པར་གཞག་པ་སྟེ། གང་གིས་འདི་གནས་ནས་ཕྱུང་བ་ཡིན་ནོ་ཞེས་བྱ་བར་ཤེས་ལ་དེ་མི་སྤོང་བ་དེ་ལ་ཉེས་པ་འདིར་འགྱུར་གྱི་མི་ཤེས་པ་ལ་ནི་མ་ཡིན་ནོ། །འདིར་གཞུང་ནི། གང་གིས་གནས་ནས་ཕྱུང་བར་ཤེས་པ་དེས་ལྷན་ཅིག་གནས་པ་དང༌། ལྷན་ཅིག་ལོངས་སྤྱོད་པར་མི་བྱའི། གང་གིས་གནས་ནས་ཕྱུང་བར་མི་ཤེས་པ་དང་ལྷན་ཅིག་གནས་པ་དང་ལྷན་ཅིག་ལོངས་སྤྱོད་པད་དག་ལ་ནི་ལྟུང་བ་མེད་དོ་ཞེས་གསུངས་པ་ཡིན་ནོ། །ཡོངས་སུ་སྤང་པར་བྱ་བ་ཐམས་ཅད་ཡོངས་སུ་སྤང་བ་དག་ལ་ཡང་འདིའི་རྗེས་སུ་འབྲང་བའི་རྣམ་པ་ཉིད་རིག་པར་བྱའོ། །བྱ་བ་ཉིད་ན་དེ་གཉིས་ཆོས་མ་ཡིན་པའི་ཕྱོགས་དང་ཅིག་ཤོས་སུ་ཡིན་གྱི་ཅིག་ཤོས་དང་ནི་མ་ཡིན་ནོ་ཞེས་བྱ་བ་ནི། ལས་བྱེ་བ་དང༌། འཁོར་ལོ་བྱེ་བ་དག་ལས་གང་ཡང་རུང་བ་བྱེ་བ་ཉིད་ན་གནས་པར་བྱ་བ་མ་ཡིན་པ་ཉིད་དང་ལོངས་སྤྱད་པར་བྱ་བ་མ་ཡིན་པ་ཉིད་དེ་གཉིས་ཆོས་མ་ཡིན་པའི་ཕྱོགས་དང་ཅིག་ཤོས་ཆོས་ཀྱི་ཕྱོགས་སུ་ལྷན་ཅིག་མི་བྱ་བ་ཡིན་གྱི། ཆོས་ཀྱི་ཕྱོགས་ཅིག་ཤོས་དང་ཆོས་མ་ཡིན་པའི་ཕྱོགས་སུ་ལྷན་ཅིག་བྱར་མི་རུང་བ་ནི་མ་ཡིན་ཏེ། ཆོས་ཀྱི་ཕྱོགས་ལ་ནི་ཉེས་པ་མེད་
པའི་ཕྱིར་རོ། །འདིར་གཞུང་ནི་ཁས་བླངས་པ་དག་ཁས་མ་བླངས་པ་དག་དང་ལྷན་ཅིག་ལོངས་སྤྱོད་པར་བྱེད་ན་ཉེས་བྱས་སོ། །ཁས་མ་བླངས་པ་དག་ཁས་བླངས་པ་དང་ལྷན་ཅིག་ལོངས་སྤྱོད་པར་བྱེད་པ་ལ་ནི་ལྷུང་བ་མེད་དོ་ཞེས་གསུངས་པ་ཡིན་ནོ། །ནན་ཐུར་བྱས་པ་གཞན་དག་ལ་དེ་གཉིས་མི་བྱའོ་ཞེས་བྱ་བ་ནི། གནས་ནས་བྱུང་བ་ལས་གཞན་པའི་ནན་ཐུར་བྱས་པ་བསྡིགས་པ་དང་སྨད་པ་དང་བསྐྲད་པ་དང་ཕྱིར་འགྱེད་པ་བྱས་པའི་ཡུལ་དག་ལ་ལྷན་ཅིག་གནས་པར་མི་བྱ་བ་ཉིད་དང་ལྷན་ཅིག་ལོངས་སྤྱད་པར་མི་བྱ་བ་ཉིད་དེ་གཉིས་མི་བྱ་བའོ། །འདིར་གཞུང་ནི་བསྡིགས་པའི་ལས་བགྱིས་པ་ལ་སྨད་པའི་ལས་བགྱིད་ན་བགྱིས་པར་བརྗོད་པར་བགྱིའམ། བཅོམ་ལྡན་འདས་ཀྱིས་བཀའ་སྩལ་པ། བྱས་པར་བརྗོད་པར་བྱ་སྟེ། བསྡིགས་པའི་ལས་ནི་བག་ཡངས་སུ་གྱུར་ཏོ་ཞེས་བྱ་བ་ལ་སོགས་པས། གནས་ནས་ཕྱུང་བ་ལས་གཞན་པའི་ནན་ཐུར་བྱས་པ་དག་ལ་ནན་ཐུར་གཞན་འཆགས་པར་གསུངས་ནས་གནས་ནས་ཕྱུང་བ་ལ་བསྡིགས་པའི་ལས་བགྱིད་ན་བགྱིས་པར་བརྗོད་པར་བགྱིའམ། ཉེ་བ་འཁོར་མི་བྱ་སྟེ། དེ་ཅིའི་ཕྱིར་ཞེ་ན། དེ་ནི་ལོངས་མི་སྤྱད་པར་བྱ་བའི་ཕྱིར་སོང་བ་ཡིན་པའི་ཕྱིར་རོ། །དེ་བཞིན་དུ་གནས་ནས་ཕྱུང་བ་ལ་སྨད་པ་དང་བསྐྲད་པ་དང་ཕྱིར་འགྱེད་པའི་ལས་བགྱིད་ན་བགྱིས་པར་བརྗོད་པར་བགྱིའམ། ཉེ་བ་འཁོར་མི་བྱ་སྟེ། དེ་ཅིའི་ཕྱིར་ཞེ་ན། དེ་ནི་ལོངས་མི་སྤྱད་པར་བྱ་བའི་ཕྱིར་སོང་བ་ཡིན་པའི་ཕྱིར་རོ་ཞེས་གསུངས་པ་ཡིན་ཏེ། དེའི་ཕྱིར་མདོ་འདི་བྱས་སོ། །དེས་འགྲོགས་བཤེས་ལ་བརྟེན་ཏེ་གནས་པར་བྱ་བ་ཉིད་དོ་ཞེས་བྱ་བ་ནི། ནན་ཐུར་བྱས་པ་དེས་འགྲོགས་བཤེས་ལ་བརྟེན་ཏེ་གནས་པར་བྱ་བ་ཉིད་ཡིན་པ་སྟེ། ཆད་པ་དང་བཅས་པ་ཉིད་ལ་ཡང་དེ་ལྟར་འགྱུར་རོ། །འདིར་གཞུང་ནི་མི་གནས་པར་འདུག་པར་མི་བྱའོ་ཞེས་གསུངས་པ་དེའི་དོན་ཅི་ལགས། གང་ཟག་གང་ལ་ལ་འགྲོགས་བཤེས་སམ་གུས་པ་འམ་ངོ་ཚ་ཤེས་པའམ་ཡིད་དུ་འཐད་པའི་སེམས་ཉེ་བར་གནས་པར་ཡོད་པ་དེ་ལ་གནས་ཏེ་འདུག་པར་བྱའོ་ཞེས་གསུངས་པའི་གཞུང་གནང་བ་ཡིན་ནོ། །ནན་ཐུར་བྱ་པས་སམ་ཉམས་པ་བསྐྲད་པར་བྱ་བས་འགྱུར་བ་བརྟེན་ན་ཡོ་བྱད་ཀྱང་ཕྱུང་སྟེ་
དོར་རོ་ཞེས་བྱ་བ་ནི། དགེ་སློང་གང་ལ་ནན་ཐུར་བྱ་བ་དེས་སམ། ཚུལ་ཁྲིམས་འཆལ་པ་ཉམས་པ་ལ་བསྐྲད་པར་བྱ་བ་དེས་དོམ་ཟུང་དང་ཁྲོ་བོ་ལ་སོགས་པར་འགྱུར་བ་བསྟན་ན་དེའི་ཚེ་དེའི་ཡོ་བྱད་ཀྱང་ཕྱུང་སྟེ་དོར་བར་བྱའོ། །མཐུས་བསྐྲད་པར་བྱའོ་ཞེས་བྱ་བ་ནི། སྔར་བསྟན་པའི་གང་ཟག་ནན་ཐུར་བྱ་བ་དང༌། ཚུལ་ཁྲིམས་འཆལ་བ་དེ་གཉིས་སོ། །འཇུས་པ་གཅད་པར་བྱའོ་ཞེས་བྱ་བ་ནི། གང་ཟག་དེ་གཉིས་བསྐྲད་པ་ན་ཀ་བ་ལ་སོགས་པ་གང་ལ་འཇུས་པ་དེ་ཡང་གཅད་པར་བྱའོ། །དེ་རྡིབ་བའི་ཆོས་མ་ཡིན་ན་དབྱུང་ངོ་ཞེས་བྱ་བ་ནི། གང་ལ་འཇུས་པ་གཅད་པར་བྱ་བ་དེ་རྡིབ་པར་འགྱུར་བ་ཉིད་མ་ཡིན་ན་དབྱུང་བར་བྱའོ། །འདིར་གཞུང་ནི། དེ་ལ་ཀ་བ་གཅད་པར་བྱ་སྒོ་སྐྱེས་དབྱུང་བར་བྱའོ་ཞེས་གསུངས་པ་ཡིན་ཏེ། དེའི་ཕྱིར་མདོ་དེ་གཉིས་བྱས་སོ། །དེ་དགེ་འདུན་གྱིས་ཕྱིར་བཅོས་སོ་ཞེས་བྱ་བ་ནི། བཅད་པ་དང་ཕྱུང་བ་དེ་དགེ་འདུན་གྱིས་ཕྱིར་བཅོས་པར་བྱའི། གང་གི་ཕྱིར་བཅད་པ་དང་ཕྱུང་བ་དེས་ནི་མ་ཡིན་ནོ། །ཇི་ལྟར་ཞེ་ན་དེའི་ཕྱིར། བཅོལ་ཏེའོ་ཞེས་བྱ་བ་སྨྲས་ཏེ། སྦྱིན་བདག་ལའོ། །མ་གྲུབ་ན་གཙུག་ལག་ཁང་གི་རྫས་ཀྱིས་སོ་ཞེས་བྱ་བ་ནི། བཅོལ་ཏེ་མ་གྲུབ་ན་གཙུག་ལག་ཁང་གི་རྫས་ཀྱིས་ཕྱིར་བཅོས་པར་བྱ་བའོ། །འཐབ་ཀྲོལ་བྱེད་པ་བསྐྲད་བ་ན་གཟུང་བར་མི་བྱའོ་ཞེས་བྱ་བ་ནི། དགེ་སློང་འཐབ་ཀྲོལ་བྱེད་པ་གཙུག་ལག་ཁང་ནས་བསྐྲད་པ་དང༌། དགེ་སློང་གཞན་གྱིས་ཕྱིར་གཟུང་པར་མི་བྱ་བ་སྟེ། དེ་ནི་ཕྲན་ཚེགས་དག་ལས་འབྱུང་ངོ༌། །འཐབ་ཀྲོལ་ལ་འབད་པས་མ་ལོག་ན་ཉེ་བར་ཞི་བར་བྱ་བའི་ཕྱིར་གནས་ནས་དབྱུང་བར་བྱའོ་ཞེས་བྱ་བ་ནི། འཐབ་ཀྲོལ་བྱེད་པ་ལ་བསྡིགས་པས་ཉེས་པར་ཞི་བར་བྱ་བའི་ཕྱིར་གནས་ནས་དབྱུང་བར་བྱའོ་ཞེས་བྱ་བ་ནི། འཐབ་ཀྲོལ་བྱེད་པ་ལ་བསྡིགས་པས་ཉེ་བར་ཞི་བར་བྱ་བ་བརྩམས་ཤིང་འབད་པས་འཐབ་ཀྲོལ་མ་ལོག་ཅིང་མ་བཏང་ན་ཉེ་བར་ཞི་བར་བྱ་བའི་ཕྱིར་དེ་གནས་ནས་དབྱུང་བའི་ལས་བྱའོ། །ཡང་དང་ཡང་དུ་དོན་གཞན་དང་གཞན་གྱི་ཕྱིར་འཐབ་ཀྲོལ་སྐྱེད་པར་བྱེད་པ་ཉིད་ལ་ནི་བསྡིགས་པའི་ལས་བྱའོ། །མི་གཏོང་བ་ལ་ནི་གནས་ནས་དབྱུང་བའི་ལས་བྱ་སྟེ། དེ་གཉིས་ཀྱི་ཡུལ་གྱི་བྱེ་བྲག་ནི་དེ་ཡིན་ནོ། །འདིར་གཞུང་ནི་གླེང་གཞི་དག་ལས། བཅོམ་
ལྡན་འདས་ཀྱིས་བཀའ་སྩལ་པ། འཐབ་ཀྲོལ་བྱེད་པ་དག་བཟློག་པར་བྱའོ། །དེ་དག་མི་བཟློག་པ་ན་མི་འཁོད་ནས། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་བཟློག་པ་ན་མི་འཁོད་ན་གནས་ནས་དབྱུང་བར་བྱའོ་ཞེས་གསུངས་པ་ཡིན་ནོ། །རྣམ་པར་གཏན་ལ་འབེབས་པ་ལས་གྱུར་པ་ལ་ཉེ་བར་ཞི་བས་སོ་ཞེས་བྱ་བ་ནི། འདི་ནི་འདི་ལྟ་བུ་ཡིན་ནོ། །འདི་ནི་འདི་ལྟ་བུ་མ་ཡིན་ནོ་ཞེས་བྱ་བ་ལ་སོགས་པས་དངོས་པོའི་རང་གི་ངོ་བོ་ངེས་པར་འཛིན་པ་ནི་རྣམ་པར་གཏན་ལ་འབེབས་པ་སྟེ། དེ་ལས་གྱུར་པའི་འཐབ་ཀྲོལ་འོག་ནས་འབྱུང་བའི་རྩོད་པ་ཉེ་བར་ཞི་བར་བྱ་བས་མི་ལྡོག་ན་ཉེ་བར་ཞི་བར་བྱ་བའི་ཕྱིར་གནས་ནས་དབྱུང་བའི་ལས་བྱའོ། །གནས་པ་ལ་གནས་ཀྱིས་འབད་པར་བྱའོ་ཞེས་བྱ་བ་ནི། སློབ་མ་དང་ཉེ་གནས་ཀྱི་རྣམ་པར་གཏན་ལ་འབེབས་པ་ལས་གྱུར་པའི་འཐབ་མོ་ལ་མཁན་པོ་དང་སློབ་དཔོན་གྱིས་ཡལ་བར་མི་འདོར་བར་འབད་པར་བྱ་བ་སྟེ། འདི་ལྟར་དེས་གཞན་ལ་བཅོལ་བས་འབད་པར་བྱ་བའམ་རང་གིས་བྱ་བས་ཀྱང་རུང་ངོ༌། །འཐབ་ཀྲོལ་གྱི་རྒྱུ་ཉེ་བར་སྒྲུབ་པ་ཡང་གནས་ནས་དབྱུང་བར་བྱ་བ་ཉིད་དོ་ཞེས་བྱ་བ་ནི། མི་གཏོང་ན་ཞེས་བྱ་བར་སྦྱར་ཏེ། འདིར་འཐབ་ཀྲོལ་གྱི་རྒྱུ་ཞེས་བྱ་བ་ནི། འཐབ་ཀྲོལ་བསྐྱེད་པའི་གཞི་བདེན་ཡང་རུང་བརྫུན་ཡང་རུང་བ་སྟེ་འཐབ་ཀྲོལ་གྱི་རྒྱུ་ཉེ་བར་སྒྲུབ་པར་བྱེད་པ་གང་ཡིན་པ་སྟེ། འཐབ་ཀྲོལ་གྱི་རྒྱུ་ཉེ་བར་སྒྲུབ་པ་ལས་བཟློག་པའི་ཕྱིར་འབད་པས་མ་ལོག་ན་དེ་ལ་ཡང་གནས་ནས་དབྱུང་བའི་ལས་བྱ་བ་ཉིད་ཡིན་གྱི་འཐབ་ཀྲོལ་བྱེད་པ་འབའ་ཞིག་ལས་བྱ་བར་མ་ཟད་དོ། །དགེ་སློང་མ་རྣམས་དང་འདྲེ་ཞིང་གནས་པ་ལ་ཡང་གནས་ནས་དབྱུང་བར་བྱའོ་ཞེས་བྱ་བ་ཡང་མི་གཏོང་ན་ཞེས་བྱ་བར་སྦྱར་ཏེ། འདིར་འདྲེ་ཞིང་གནས་པ་ཞེས་བྱ་བ་ནི། ཡང་དང་ཡང་དུ་སྡེ་ཞིང་གནས་པ་སྟེ། དགེ་སློང་གྲེ་སྐྱེས་ལྟ་བུའོ། །དགེ་སློང་གང་དགེ་སློང་མ་རྣམས་དང་ལྷན་ཅིག་འདྲེ་ཞིང་གནས་པ་ལ་འབད་པས་བཟློག་ཀྱང་མི་གཏོང་ན་དེ་ལ་ཡང་གསོལ་བ་དང་བཞིའི་ལས་ཀྱིས་གནས་ནས་དབྱུང་བར་བྱའི། གཞན་དག་ལ་བྱ་བ་འབའ་ཞིག་ཏུ་མ་ཟད་དོ། །དེའི་སྔགས་ནི་དགེ་འདུན་བཙུན་པ་རྣམས་གསན་དུ་གསོལ། ཚེ་དང་ལྡན་པ་གྲེ་སྐྱེས་འདི་དགེ་སློང་མ་རྣམས་དང་ལྷན་ཅིག་འདྲེ་ཞིང་
གནས་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་གྲེ་སྐྱེས་དགེ་སློང་མ་རྣམས་དང་ལྷན་ཅིག་འདྲེ་ཞིང་གནས་པ་ལ་གནས་པས་དབྱུང་བའི་ཕྲིན་ལས་མཛད་དོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །འདིས་གནས་ནས་ཕྱུང་བ་ལ་དགེ་སློང་མས་ཕྱག་བྱ་བའི་འོས་མ་ཡིན་པའི་སྡོམ་པ་བྱའོ་ཞེས་བྱ་བ་ནི། དགེ་སློང་མ་དང་འདྲེ་ཞིང་གནས་པའི་བདག་ཉིད་ཀྱི་རྒྱུ་འདིས་གནས་ནས་ཕྱུང་བའི་དགེ་སློང་ལ་དགེ་སློང་མ་རྣམས་ཀྱིས་ཀྱང་གསོལ་བ་དང་གཉིས་ཀྱི་ལས་ཀྱིས་ཕྱག་བྱ་བའི་འོས་མ་ཡིན་པའི་སྡོམ་པ་སྦྱིན་པར་བྱའོ། །དེའི་སྔགས་ནི་དགེ་འདུན་འཕགས་མ་རྣམས་བདག་ལ་གསན་དུ་གསོལ། །འཕགས་པ་དགེ་སློང་གྲེ་སྐྱེས་དགེ་སློང་མ་རྣམས་དང་ལྷན་ཅིག་འདྲེ་ཞིང་གནས་པས་དགེ་སློང་གི་དགེ་འདུན་གྱིས་གནས་ནས་དབྱུང་བའི་འཕྲིན་ལས་མཛད་ལགས་ཏེ། དེའི་སླད་དུ་དགེ་འདུན་འཕགས་མ་རྣམས་ཀྱིས་འཕགས་པ་དགེ་སློང་གྲེ་སྐྱེས་གནས་ནས་དབྱུང་བའི་འཕྲིན་ལས་མཛད་ལགས་པ་ལ་ཕྱག་བགྱི་བའི་འོས་མ་ལགས་པའི་སྡོམ་པ་གསོལ་ན། གལ་ཏེ་དགེ་འདུན་འཕགས་མའི་དུས་ལ་བབ་ཅིང་བཟོད་ན། དགེ་འདུན་འཕགས་མ་རྣམས་ཀྱིས་གནང་བར་མཛོད་ཅིག་དང༌། དགེ་འདུན་འཕགས་མ་རྣམས་ཀྱིས་འཕགས་པ་དགེ་སློང་གྲེ་སྐྱེས་གནས་ནས་དབྱུང་བའི་ཕྲིན་ལས་མཛད་ལགས་པ་ལ་ཕྱག་བགྱི་བའི་འོས་མ་ལགས་པའི་སྡོམ་པ་སྩོལ་ཏོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ།། །། བམ་པོ་དྲུག་ཅུ་གསུམ་པ། ནན་ཐུར་གྱི་རྒྱུ་གཞན་ལ་དེའི་དོན་དུ་བསམ་པས་གཞན་བྱེད་པ་ནི་འཆགས་སོ་ཞེས་བྱ་བ་ནི། ནན་ཐུར་གྱི་རྒྱུ་གཞན་ལ་ཞེས་བྱ་བ་བསྡིགས་པའི་ནན་ཐུར་གྱི་རྒྱུ་འཐབ་ཀྲོལ་བྱེད་པ་ཉིད་གང་ཡིན་པ་དེ་ལའོ། །དེའི་དོན་དུ་བསམ་པས་ཞེས་བྱ་བ་ནི། ནན་ཐུར་གྱི་རྒྱུ་ཉེ་བར་གནས་པ་དེའི་བདག་ཉིད་ཀྱི་རང་གི་ངོ་བོར་གྱུར་པའི་དོན་གང་ཡིན་པ་དེ་ནི་དེའི་དོན་ཏོ། །དེར་བསམ་པ་གང་ཡིན་པ་དེ་ནི་དེའི་དོན་དུ་བསམ་པ་སྟེ། ནན་ཐུར་གྱི་རྒྱུ་ཉེ་བར་གནས་པ་དེའི་དོན་དུ་བསམ་པས་ཞེས་བྱ་བའི་ཐ་ཚིག་གོ །གཞན་བྱེད་པ་ཞེས་བྱ་བ་ནི་བསྡིགས་པའི་ནན་ཐུར་གྱི་ལས་
ཀྱི་རྒྱུ་འཐབ་ཀྲོལ་བྱེད་པ་ཉིད་གང་ཡིན་པ་དེ་ལ་དེའི་དོན་དུ་བསམ་པས་དེའི་མིང་དང་ཚིག་ལས་གཞན་པས་སྒྲ་བསྐྲད་པའི་ནན་ཐུར་གྱི་ལས་བྱ་བའི་རྒྱུ་ཁྱིམ་སུན་འབྱིན་པ་ཉིད་གང་ཡིན་པའི་མིང་དང་ཚིག་གི་སྒྲ་གང་ཡིན་པ་བརྗོད་པའོ། །འཆགས་སོ་ཞེས་བྱ་བ་ནི། གཞན་གྱིས་མིང་དང་ཚིག་གི་སྒྲ་བརྗོད་པ་དེས་བསྡིགས་པའི་ནན་ཐུར་གྱི་ལས་བྱ་བའི་རྒྱུ་འཐབ་ཀྲོལ་བྱེད་པ་ཉིད་གང་ཡིན་པ་དེ་བརྗོད་པའི་ལས་འཆགས་པ་སྟེ། དེས་བསྡིགས་པའི་ལས་ཉིད་འཆགས་སོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། གལ་ཏེ་བསྡིགས་པའི་ནན་ཐུར་གྱི་རྒྱུ་ཉེ་བར་གྱུར་ལ། དེའི་དོན་དུ་བསམ་པས་བསྐྲད་པ་ལ་སོགས་པའི་མིང་གིས་ནན་ཐུར་གྱི་ལས་བྱེད་ན་དེ་ལྟ་ན་ཡང་བསྡིགས་པའི་ནན་ཐུར་གྱི་ལས་ཉིད་འཆགས་པར་འགྱུར་རོ། །གཞན་དུ་ན་མི་འཆགས་སོ་ཞེས་བྱ་བ་ནི། དེའི་དོན་དུ་བསམ་པ་མེད་པས་ནི་མི་འཆགས་པ་སྟེ། དེའི་མིང་གི་དོན་འདོད་པ་ཉིད་དུ་མི་སེམས་ན་ནན་ཐུར་གྱི་རྒྱུ་ཉེ་བར་གནས་པ་དེའི་ལས་མི་འཆགས་སོ། །འདི་སྐད་བསྟན་ཏེ། ནན་ཐུར་གྱི་རྒྱུ་ཉེ་བར་གནས་པ་དེའི་མིང་དང་དེའི་བརྗོད་པས་དོན་དེ་ལ་ནན་ཐུར་གྱི་ལས་གཞན་གྱི་མིང་དང་དོན་དུ་བརྗོད་པ་ན་སྔ་མ་ཉིད་ཡིན་པར་མི་སེམས་པར་གཞན་ཉིད་ཡིན་པར་སེམས་ན་ནི་ལས་དེ་མི་འཆགས་སོ། །འཐབ་ཀྲོལ་བྱེད་པ་ཉིད་ཀྱི་རྒྱུ་ལ་གང་གི་ཚེ་ནན་ཐུར་གྱི་ལས་བྱེད་པ་དེའི་ཚེ། གལ་ཏེ་བསྡིགས་པའི་སྒྲའི་དོན་དུ་བསམས་ཏེ་བསྐྲད་པའི་ལས་བྱེད་ན་དེས་ནི་བསྡིགས་པའི་ལས་འཆགས་སོ། །ཇི་སྟེ་འཐབ་གྲོལ་བྱེད་པ་ཉིད་ཀྱི་རྒྱུ་ལ་བསྐྲད་པའི་དོན་ཉིད་དུ་བསམས་ཏེ། བསྐྲད་པའི་ལས་བྱེད་ན་དེས་ནི་བསྡིགས་པའི་ལས་མི་འཆགས་སོ། །དེ་ལྟར་ཡང་ཉེ་བ་འཁོར་བསྡིགས་པ་ཡང་གཞན་ལ་སྨད་པ་ཡང་གཞན་བསྐྲད་པ་ཡང་གཞན་ཕྱིར་འགྱེད་པ་ཡང་གཞན་ཁོ་ན་ཡིན་ཏེ། དེ་དག་གི་རྒྱུ་ནི་ཐ་དད་པ་ཉིད་དོ་ཞེས་གསུངས་པ་ཡིན་ནོ།། གཞན་ལ་ཉམས་སོ་ཞེས་བྱ་བ་ནི། ནན་ཐུར་གཞན་བྱས་པ་ལ་སྔ་མ་ཉམས་པ་ཡིན་ཏེ། གཞན་མི་འཆགས་པ་ནི་མ་ཡིན་ནོ། །འདི་སྐད་བསྟན་ཏེ། ནན་ཐུར་གཞན་བྱས་ན་ནན་ཐུར་སྔར་བྱས་པ་ཉམས་སོ། །འདིར་གཞུང་ནི་དགེ་སློང་བྲམ་ཟེའི་བུ་མོས་ཞུས་པ་ལས་བཙུན་པ་རེ་
ཞིག་བསྡིགས་པའི་ལས་བགྱིས་པ་ལ་སྨད་པའི་ལས་བགྱིད་ན་བགྱིས་པར་བརྗོད་པར་བགྱིའམ། བཅོམ་ལྡན་འདས་ཀྱིས་བཀའ་སྩལ་པ། བྱས་པར་བརྗོད་པར་བྱ་སྟེ། བསྡིགས་པའི་ལས་ནི་བག་ཡངས་སུ་གྱུར་ཏོ། །བཙུན་པ་གནས་ནས་ཕྱུང་བ་ལ་བསྡིགས་པའི་ལས་བགྱིད་ན་བགྱིས་པར་བརྗོད་པར་བགྱིའམ། ཉེ་བ་འཁོར་མི་བྱ་སྟེ། དེ་ཅིའི་ཕྱིར་ཞེ་ན། དེ་ནི་ལོངས་མི་སྤྱོད་པའི་ཕྱིར་སོང་བའི་ཕྱིར་རོ་ཞེས་གསུངས་པ་ཡིན་ནོ། །གནས་ནས་ཕྱུང་བ་ལ་ནི་མི་འཆགས་སོ་ཞེས་བྱ་བ་ནི། གནས་ནས་དབྱུང་བའི་བདག་ཉིད་ཀྱི་ནན་ཐུར་བྱས་པ་ལ་ནི་བསྡིགས་པ་ལ་སོགས་པའི་ནན་ཐུར་གྱི་ལས་གཞན་མི་འཆགས་པའོ། །སྔ་མ་ཉམས་པར་ཡང་མི་འགྱུར་ཏེ། དེ་ལོངས་སྤྱོད་པའི་ཕྱིར་སོང་བ་ཉིད་ཡིན་པའི་ཕྱིར་རོ། །ཤེས་པ་དང་བསོད་ནམས་ཆེན་པོ་དང་མདོ་སྡེ་དང་འདུལ་བ་དང་མ་མོ་འཛིན་པ་དང་ཐོས་པ་མང་བ་དང་ཕྱོགས་མང་བ་དང་འཁོར་མང་བ་དག་ལ་ནི་སྦོམ་པོའོ་ཞེས་བྱ་བ་ནི། ཤེས་པ་དང་བསོད་ནམས་ཆེ་བ་དང་མདོ་སྡེ་འཛིན་པ་དང་འདུལ་བ་འཛིན་པ་དང་མ་མོ་འཛིན་པ་དང་ཐོས་པ་མང་བ་དང་ཕྱོགས་མང་བ་དང༌། འཁོར་མང་བ་དང་ཆོས་ཀྱིས་གནས་ནས་འབྱིན་ན་དབྱེན་གྱི་སྐབས་སུ་གཏོགས་པའི་ཉེས་པ་སྦོམ་པོར་འགྱུར་རོ། །ཐོས་པ་མང་བ་ཞེས་སྨོས་པས་མི་རྟོག་གེ་དང་སྒྲ་དང་དཔྱོད་པ་ལ་སོགས་པ་དག་ཀྱང་བསྡུས་པ་ཡིན་ནོ། །གལ་ཏེ་དབྱེ་བར་འདོད་པས་གནས་ནས་འབྱིན་ན་ནི་སྦོམ་པོའོ། །དབྱེ་བར་མི་འདོད་པས་གནས་ནས་འབྱིན་ན་ནི་སྦྱོར་བ་ལས་བྱུང་བའི་ཉེས་བྱས་སོ། །ཁྱིམ་པ་ནི་དཔེའོ་ཞེས་བྱ་བ་ནི། ཁྱིམ་པ་ལ་བརྙས་ཐབས་བྱེད་པ་ལ་ཕྱིར་འགྱེད་པའི་ལས་བྱའོ་ཞེས་གསུངས་པའི་སྐབས་སུ་ཁྱིམ་པ་ཞེས་སྨོས་པ་ནི་དགེ་སློང་ལ་སོགས་པ་ལྔ་བོ་དག་ནི་དཔེ་ཡིན་ནོ། །དགེ་སློང་ལ་སོགས་པ་ལྔ་པོ་དག་ལ་བརྙས་ཐབས་བྱེད་པ་ལ་ཡང་ཕྱིར་འགྱེད་པར་བྱའོ་ཞེས་བྱ་བ་ནི། ཁྱིམ་བ་ལ་བརྙས་ཐབས་བྱེད་པ་ལ་ཕྱིར་འགྱེད་པའི་ལས་བྱའོ་ཞེས་གང་གསུངས་པ་དེ་ནི་དཔེ་ཙམ་དུ་ཟད་དེ། དགེ་སློང་དང་དགེ་སློང་མ་དང་དགེ་སློང་མ་དང་དགེ་སློབ་མ་དང་དགེ་ཚུལ་མ་དག་ལ་བརྙས་ཐབས་བྱེད་པ་དག་ལ་ཡང་ཕྱིར་འགྱེད་པའི་ལས་བྱ་བ་ཁོ་ན་ཡིན་ནོ། །འདིར་གཞུང་ནི་བཙུན་
པ་བཅོམ་ལྡན་འདས་ཀྱིས་དགེ་སློང་ཁྱིམ་པ་ལ་བརྙས་ཐབས་བགྱིད་པ་ལ་ཕྱིར་འགྱེད་པའི་ལས་བྱའོ་ཞེས་གསུངས་ན། བཙུན་པ་དགེ་སློང་ལ་བརྙས་ཐབས་བགྱིད་པར་གྱུར་ན་དེ་ལ་ཡང་ཕྱིར་འགྱེད་པའི་ལས་བགྱིའམ། ཉེ་བ་འཁོར་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །ཁྲོ་བ་ནི་བརྙས་ཐབས་མ་ཡིན་པ་མ་ཡིན་ནོ་ཞེས་བྱ་བ་ནི། ཁྲོ་བ་ནི་བརྙས་ཐབས་བྱེད་པ་ཡིན་པས་དེ་ལ་ཡང་ཕྱིར་འགྱེད་པའི་ལས་བྱ་བ་ཉིད་ཡིན་ནོ། །ནན་ཐུར་གྱི་ལས་དག་ལ་ཐུན་མོང་མ་ཡིན་ག་དོགས་པར་མི་བྱའོ་ཞེས་བྱ་བ་ནི། ནན་ཐུར་གྱི་ལས་དག་ལ་དགེ་སློང་དང་དགེ་སློང་མ་ཐུན་མོང་མ་ཡིན་པར་དོགས་པར་མི་བྱ་སྟེ། དགེ་སློང་མ་རྣམས་ལ་ཡང་ན་ཐུར་གྱི་ལས་དག་བྱ་བ་ཉིད་ཡིན་ནོ། །རབ་ཏུ་བྱུང་ཞིང་བསྙེན་པར་རྫོགས་པ་ལ་ཡང་དེ་དག་བྱ་བ་ཉིད་ཡིན་ནོ་ཞེས་བྱ་བ་ནི། རབ་ཏུ་བྱུང་ཞིང་བསྙེན་པར་རྫོགས་པ་ལ་ཡང་ནན་ཐུར་གྱི་ལས་དག་བྱ་བ་ཉིད་ཡིན་པའོ། །ཁྱིམ་པ་ལ་མི་བྱའོ་ཞེས་བྱ་བ་ནི། ཁྱིམ་པ་ལ་ནན་ཐུར་གྱི་ལས་དག་མི་བྱ་བ་སྟེ། དེ་ལ་དགེ་འདུན་མི་དབང་བའི་ཕྱིར་རོ། །དགེ་སློང་ལ་ཕམ་པར་འགྱུར་བ་ཡང་དག་པ་མ་ཡིན་པས་སྐུར་པ་དང་གཤེ་བ་དང་སྤྱོ་བ་ལ་ལྷུང་བཟེད་ཁས་དབུབ་པར་བྱའོ་ཞེས་བྱ་བ་ནི། གསོལ་བ་འབའ་ཞིག་གི་ལས་ཀྱིས་ལྷུང་བཟེད་ཁས་དབུབ་པར་བྱའོ་ཞེས་བྱ་བར་སྦྱར་རོ། །སུ་ལ་ཁས་དབུབ་པར་བྱ་ཞེ་ན། དེའི་ཕྱིར་དགེ་སློང་ལ་ཕམ་པར་འགྱུར་བ་ཡང་དག་པ་མ་ཡིན་པས་སྐུར་པའི་ཁྱིམ་པ་ལའོ་ཞེས་བྱ་བར་སྦྱར་རོ། །འདིར་དགེ་སློང་ཞེས་སྨོས་པ་ནི་ཆོས་འདི་པའི་རབ་ཏུ་བྱུང་པའི་དཔེ་ཡིན་ནོ། །ཕམ་པར་འགྱུར་བ་ཞེས་སྨོས་པ་ཡང་དཔེ་ཡིན་ཏེ། ཚུལ་ཁྲིམས་ལྷུར་བྱ་བ་ཡིན་གྱི་ལྷུང་བ་ལྟུང་བྱ་བ་ནི་མ་ཡིན་ནོ། །དེས་ན་རབ་ཏུ་བྱུང་ཞིང་བསྙེན་པར་མ་རྫོགས་པ་ལ་སྐུར་པ་འདེབས་པ་ལ་ཡང་ལྷུང་བཟེད་ཁས་དབུབ་པར་བྱའོ། །ཡང་དག་མ་ཡིན་པས་སྐུར་བ་ཞེས་བྱ་བ་ནི། བརྫུན་གྱིས་སྐུར་པ་འདེབས་པ་སྟེ་དེ་ལའོ། །གཤེ་བ་དང་སྤྱོ་བ་ལ་ཞེས་བྱ་བ་ནི། རབ་ཏུ་བྱུང་བ་འདི་ལ་ཡང་དག་པ་ཡང་རུང་ཡང་དག་པ་མ་ཡིན་པ་ཡང་རུང་བས་གཤེ་བ་དང་སྤྱོ་བར་བྱེད་པས་ཁྱིམ་པ་ལ་ཡང་ལྷུང་བཟེད་ཁས་དབུབ་པར་བྱ་བའོ། །འདིར་གཞུང་ནི་ཆོས་གཉིས་དང་ལྡན་པའི་
ཁྱིམ་པ་དག་ལ་ལྷུང་བཟེད་ལས་དབུབ་པར་བྱ་སྟེ། གཉིས་གང་ཞེ་ན། དགེ་སློང་དག་ལ་གཤེ་བ་དང་སྤྱོ་པར་བྱེད་པ་དང༌། དགེ་སློང་དག་པ་ལ་གཞི་མེད་པར་ཕམ་པར་འགྱུར་བའི་ཆོས་ཀྱིས་སྐུར་པ་འདེབས་པ་ལའོ་ཞེས་གསུངས་པ་ཡིན་ནོ། །ཅི་ཁས་བུབ་ཏུ་གཞག་པས་ཁས་དབུབ་པར་བྱ་འམ། འོན་ཏེ་གཞན་གྱིས་ཤེ་ན་དེའི་ཕྱིར་རྣམ་པར་གཞག་པར་བྱ་བས་སོ་ཞེས་བྱ་བ་སྨྲས་ཏེ། འདིར་ལྷུང་བཟེད་བཟེད་པར་མི་བྱའོ་ཞེས་ཁྲིམས་སུ་བཅའ་བ་རྣམ་པར་གཞག་པར་བྱ་བས་ཡིན་གྱི། ལྷུང་བཟེད་ཀྱི་དབྱིབས་ཀྱིས་ནི་མ་ཡིན་ནོ། །རྣམ་པ་གང་གིས་དེ་རྣམ་པར་གཞག་པར་བྱ་ཞེ་ན་དེའི་ཕྱིར་གསོལ་བས་སོ་ཞེས་བྱ་བ་སྨྲས་ཏེ། གསོལ་བ་འབའ་ཞིག་གི་ལས་ཀྱིས་སོ། །དེའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །ལིཙྪ་བཱི་ཆེན་པོས་ཚེ་དང་ལྡན་པ་གྱད་བུ་ནོར་ལ་ཡང་དག་པ་མ་ལགས་པས་སྐུར་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱི་ལིཙྪ་བཱ་ཆེན་པོ་ལ་ལྷུང་བཟེད་ཁས་དབུབ་པར་བགྱིའོ། །འདི་ནི་གསོལ་བའོ་ཞེས་གསུངས་པ་ཡིན་ནོ། །གང་གི་ཕྱིར་དེ་ཁས་ཕུབ་པ་དེའི་དོན་བརྗོད་པར་བྱ་སྟེ། ལྷུང་བཟེད་ཁས་ཕུབ་པའི་ཁྱིམ་དུ་འགྲོ་བར་མི་བྱའོ། །སྟན་ལ་འདུག་པར་མི་བྱའོ། །སྦྱིན་པར་བྱ་བའི་ཆོས་བཤམས་པ་ལ་ཡོངས་སུ་ལོངས་སྤྱོད་པར་མི་བྱའོ། །བསོད་སྙོམས་ལང་བར་མི་བྱའོ། །ཆོས་བསྟན་པར་མི་བྱའོ་ཞེས་བྱ་བ་སྨྲས་ཏེ། སྦྱིན་པར་བྱ་བའི་ཆོས་བཤམས་པ་ལ་ཡོངས་སུ་ལོངས་སྤྱད་པར་མི་བྱའོ་ཞེས་སྨོས་པས་ནི་གཙུག་ལག་ཁང་ཡང་སྤང་བར་བྱས་པར་རིག་པར་བྱའོ། །དེ་ལྟར་ཡང་འདིར་གཞུང་ནི། སྦྱིན་པར་བྱ་བའི་ཆོས་སྔར་བཤམས་པ་དག་ལ་ཡོངས་སུ་ལོངས་སྤྱད་པར་མི་བྱའོ་ཞེས་གསུངས་པ་ཡིན་ནོ། །གང་དུ་ལས་བྱ་བ་དར་གཏོགས་པ་དག་ལ་ཁས་ཕུབ་པ་ཉིད་ཡིན་ནོ་ཞེས་བྱ་བ་ནི། གནས་ཀྱི་གཞི་གང་དུ་ལས་བྱ་བ་དེར་གཏོགས་པའི་ཁྱིམ་བདག་རྣམས་ལ་ལྷུང་བཟེད་ཁས་ཕུབ་པ་ཉིད་ཡིན་ནོ། །འདིར་གཞུང་ནི། དགེ་སློང་གིས་ཁྱིམ་བདག་བཞིའི་གནས་བཞི་པོ་དག་ཏུ་ལྷུང་བཟེད་བཞི་ཁས་དབུབ་པར་འགྱུར་བ་མཆིས་སམ། བཀའ་སྩལ་པ་ཡོད་དེ། ཁྲིའམ་ཁྲིའུའམ་
ཤིང་ངམ་རེ་ལྡེས་གནས་བཞི་པོ་དག་གི་མཚམས་དག་མནན་ཏེ་ཁས་དབུབ་པར་བྱེད་ནའོ་ཞེས་གསུངས་པ་ཡིན་ནོ། །ཐ་ན་གནས་ནས་ཕྱུང་བ་ཕན་ཆད་རང་གི་ཕྱོགས་དང་མཐུན་པ་མ་ཡིན་པའི་ཁྱིམ་དུ་དེ་མི་འཆགས་སོ་ཞེས་བྱ་བ་ནི། ཐ་ན་གནས་ནས་ཕྱུང་བ་ཕན་ཆད་ནས་རང་གི་ཕྱོགས་དང་མཐུན་པ་མ་ཡིན་པ་ཚུན་ཆད་ཀྱི་དགེ་སློང་གིས་ཡོན་བདག་གི་ཁྱིམ་དུ་ལྷུང་བཟེད་ཁས་དབུབ་པ་དེ་མི་འཆགས་སོ། །འདིར་གཞུང་ནི་དགེ་སློང་ཁས་བླངས་པ་དག་གིས་ཁས་མ་བླངས་པ་དག་གི་ཁྱིམ་བདག་རྣམས་ཀྱི་ཁྱིམ་དག་ཏུ་ལྷུང་བཟེད་ཁས་དབུབ་པར་བྱེད་ན་ཁས་མ་ཕུབ་པར་བརྗོད་པར་བྱའོ། །དེ་བཞིན་དུ་གནས་ནས་ཕྱུང་བ་དག་གིས་རང་བཞིན་དུ་གནས་པ་དག་གི་ཁྱིམ་བདག་རྣམས་ཀྱི་ཁྱིམ་དག་ཏུ་ལྷུང་བཟེད་ཁས་དབུབ་པ་བྱེད་ན་ཁས་མ་ཕུབ་པར་བརྗོད་པར་བྱའོ། །དེ་བཞིན་དུ་གནས་པར་མི་བྱ་བ་དག་གིས་ཁྱིམ་པ་དག་རྣམས་ཀྱི་ཁྱིམ་དག་ཏུ་ལྷུང་བཟེད་ཁས་དབུབ་པར་བྱེད་ན་ཁས་མ་ཕུབ་པར་བརྗོད་པར་བྱའོ་ཞེས་གསུངས་པ་ཡིན་ནོ། །དེ་འགའ་ཞིག་གིས་གོ་བར་བྱའོ་ཞེས་བྱ་བ་ནི། ལྷུང་བཟེད་ཁས་ཕུབ་པ་དེ་དགེ་སློང་འགའ་ཞིག་གིས་ཁྱིམ་བདག་དེ་ལ་དགེ་འདུན་གྱིས་ཁྱོད་ལ་ལྟུང་བཟེད་ཁས་ཕུབ་པོ་ཞེས་གོ་བར་བྱའོ། །བཟེད་པར་གསོལ་བ་དང་ལྡན་ན་གསལ་བས་བཟློག་པར་བྱའོ་ཞེས་བྱ་བ་ནི། ཁྱིམ་བདག་དེས་དགེ་སློང་གང་ལ་སྐུར་བའམ་གཤེ་བ་དང་སྤྱོད་བ་བྱས་པའི་དགེ་སློང་དེ་ལ་བཟོད་པ་གསོལ་ཟིན་པ་དང་ལྡན་ཞིང་དགེ་འདུན་ལ་ལྷུང་བཟེད་ཕྱིར་བཟློག་པར་གསོལ་བའི་སྔགས་ལན་གསུམ་ཡང་བརྗོད་ན་དེ་ལ་དགེ་འདུན་གྱིས་གསོལ་བ་འབའ་ཞིག་གི་ལས་ཀྱིས་ལྷུང་བཟེད་ཕྱིར་བཟློག་པར་བྱ་བའོ། །དེ་ལ་གསོལ་བའི་སྔགས་ལན་གསུམ་བཟླས་པ་ནི་དགེ་འདུན་བཙུན་པ་རྣམས་གསན་དུ་གསོལ། །བདག་ལི་ཙྪ་བཱི་ཆེན་པོ་མི་དགེ་བའི་གྲོགས་པོས་བསླུས་པས་འཕགས་པ་གྱད་བུ་ནོར་ལ་ཡང་དག་བ་མ་ལགས་པས་སྐུར་པས་དགེ་འདུན་གྱིས་བདག་ལ་ལྷུང་བཟེད་ཁས་དབུབ་པ་མཛད་དེ། བདག་ལྷུང་བཟེད་ཁས་ཕུབ་པ་དགེ་འདུན་ལས་ལྷུང་བཟེད་སླར་བཟློག་པར་གསོལ་ན། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བ་ཉེ་བར་བཟུང་སྟེ་ལྷུང་
བཟེར་སླར་བཟློག་ཏུ་གསོལ། །ལན་གསུམ་དུ་བཟླས་ཞེས་གསུངས་པ་ཡིན་ནོ། །གསོལ་བ་འབའ་ཞིག་གི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །ལི་ཙྪ་བཱི་ཆེན་པོ་མི་དགེ་བའི་གྲོགས་པོས་བསླུས་པ་འདིས། ཚེ་དང་ལྡན་པ་གྱད་བུ་ནོར་ལ་ཡང་དག་པར་མ་ལགས་པས་སྐུར་ཏེ། དགེ་འདུན་གྱིས་དེ་ལ་ལྷུང་བཟེད་ཁས་དབུབ་པ་མཛད་པ་ལས། ལི་ཙྪ་བཱི་ཆེན་པོ་ལྷུང་བཟེད་ཁས་ཕུབ་པ་དེ། དགེ་འདུན་ལས་ལྷུང་བཟེད་སླར་བཟློག་པ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་ལི་ཙྪ་བཱི་ཆེན་པོ་ལ་ལྷུང་བཟེད་སླར་བཟློག་པར་མཛད་དོ། །འདི་ནི་གསོལ་བའོ་ཞེས་གསུངས་པ་ཡིན་ནོ། །བཅབས་པའི་སེམས་མ་སྐྱེས་ན་མཐའ་ལས་ལྡང་བར་འགྱུར་རོ་ཞེས་བྱ་བ་ནི། གང་ལ་བཅབ་པའི་སེམས་གཅིག་ཀྱང་མ་སྐྱེས་ན་དེ་ཕམ་པར་འགྱུར་བའི་ལྟུང་བ་ལས་ལྡང་བར་འགྱུར་བའོ། །ཐབས་གང་གིས་ལྡང་བར་འགྱུར་ཞེན་དེའི་ཕྱིར་བསླབ་པ་སྤྱོད་པས་སོ་ཞེས་བྱ་བ་སྨྲས་སོ། །བསླབ་པ་སྤྱོད་པ་དེ་གང་གིས་བསྒྲུབ་པར་བྱ་ཞེ་ན། དེའི་ཕྱིར་དེ་ཐོབ་པས་སོ་ཞེས་བྱ་བ་སྨྲས་ཏེ། བསླབ་པ་ལ་སྤྱོད་པ་ཐོབ་པས་བསྒྲུབ་པར་བྱའི་མ་ཐོབ་པས་མ་ཡིན་ནོ། །སུ་ལས་ཐོབ་པ་ཞེ་ན་དེའི་ཕྱིར། དགེ་འདུན་ལས་སོ་ཞེས་བྱ་བ་སྨྲས་ཏེ། དགེ་འདུན་ལས་ཇི་སྲིད་འཚོའི་བར་དུ་བསླབ་པ་སྦྱིན་པར་ལན་གསུམ་གསོལ་ཏེ། ཐོབ་པས་ལྡང་བར་འགྱུར་རོ། །གསོལ་བའི་སྔགས་ལན་གསུམ་བཟླས་པ་ནི། དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་དགའ་བྱེད་ཀྱིས་བསླབ་པ་མ་ཕུལ་བར་མི་ཚངས་པར་སྤྱོད་པ་འཁྲིག་པའི་ཚེས་བསྟེན་ཀྱང་བཅབས་པའི་སེམས་གཅིག་ཙམ་གྱིས་ཀྱང་བཅབས་པར་མ་བགྱིས་ཏེ་བདག་དགེ་སློང་དགའ་བྱེད་དགེ་འདུན་ལས་ཇི་སྲིད་འཚོའི་བར་དུ་བསླབ་པ་གསོལ་ན། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ། བདག་དགེ་སློང་དགའ་བྱེད་ལ་ཇི་སྲིད་འཚོའི་བར་དུ་བསླབ་པ་སྩལ་དུ་གསོལ། །ལན་གསུམ་དུ་བཟླས་ཞེས་གསུངས་པ་ཡིན་ནོ། །དགེ་འདུན་གྱིས་དེ་ལ་ཇི་ལྟར་སྦྱིན་པར་བྱ་ཞེ་ན། དེའི་ཕྱིར་ལས་ཀྱིས་སྦྱིན་ནོ་ཞེས་བྱ་བ་སྨྲས་ཏེ། གསོལ་བ་དང་བཞིའི་
ལས་ཀྱིས་སྦྱིན་ནོ། །དེའི་སྔགས་ནི་དགེ་འདུན་བཙུན་པ་རྣམས་གསན་དུ་གསོལ། །དགེ་སློང་དགའ་བྱེད་འདིས་བསླབ་པ་མ་ཕུལ་བར་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ཀྱང་བཅབས་པའི་སེམས་གཅིག་ཙམ་གྱིས་ཀྱང་བཅབས་པར་མ་བགྱིས་ཏེ། དགེ་སློང་དགའ་བྱེད་འདི་དགེ་འདུན་ལས་ཇི་སྲིད་འཚོའི་བར་དུ་བསླབ་པ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བ་མཛོད་ཅིག་དང༌། དགེ་འདུན་གྱིས་དགེ་སློང་དགའ་བྱེད་ལ་ཇི་སྲིད་འཚོའི་བར་དུ་བསླབ་པ་སྩོལ་ཏོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །དུས་ཇི་སྲིད་དུ་ཞེ་ན། དེའི་ཕྱིར་ཇི་སྲིད་འཚོའི་བར་དུའོ་ཞེས་བྱ་བ་སྨྲས་སོ། །འདིར་གཞུང་ནི་ཕྲན་ཚོགས་དག་ལས། དགེ་སློང་དག་དགེ་སློང་དགའ་བྱེད་འདི་ལ་ཇི་སྲིད་འཚོའི་བར་དུ་བསླབ་པ་ཕྱིན་ཅིག་ཅེས་བྱ་བ་ལ་སོགས་པ་གསུངས་པ་ཡིན་ནོ། །གང་གི་ཚེ་དགྲ་བཅོམ་པ་ཉིད་ཐོབ་པ་དེའི་ཚེ་ན་ནི་བསླབ་པ་བྱིན་པ་ཞེས་མི་བྱ་སྟེ། འཁྲུལ་པའི་རྒྱུ་འདོད་ཆགས་ལ་སོགས་པ་ཐམས་ཅད་སྤངས་པའི་ཕྱིར་རོ། །ངོ་ཚ་དང་ལྡན་པ་དང་མདོ་སྡེ་འཛིན་པ་དང་འདུལ་བ་འཛིན་པ་དང་མ་མོ་འཛིན་པ་དང༌། ཤེས་པས་ནི་གཅིག་གི་མདུན་དུ་བཤགས་པས་དགེ་འདུན་ལྷག་མ་དག་གོ་ཞེས་བྱ་བ་ནི། དེ་དག་གིས་ནི་གང་ཟག་གཅིག་གི་མདུན་དུ་བཤགས་པས་ཆོག་གི །ཡོངས་སུ་གནས་པ་དང་མགུ་བ་དག་སྤྱད་པར་བྱ་མི་དགོས་པ་ཉིད་དོ། །བསམ་པས་ལྟུང་བ་ལས་ལྡང་གི་ཆད་པའི་ལས་ཀྱིས་ནི་མ་ཡིན་ནོ་ཞེས་བྱ་བ་ནི། བསམ་པའི་ཁྱད་པར་བསྐྱེད་པའི་ཕྱིར་ཆད་པའི་ལས་བྱ་བ་ཡིན་གྱི། གལ་ཏེ་ཆད་པའི་ལས་མེད་པར་བསམ་པའི་ཁྱད་པར་སྐྱེ་ན་ཆད་པའི་ལས་མི་དགོས་སོ། །འདིར་གཞུང་ནི། སིལ་བུ་དག་ལས་དེ་ལྟ་བས་ན་གང་དག་རྣམ་པ་དེ་ལྟ་བུར་རང་བཞིན་གྱིས་ངོ་ཚ་ཤེས་པ་དང་ལྡན་པ་དེ་དག་གིས་ནི་གཅིག་གི་མདུན་དུ་བཤགས་པར་རྗེས་སུ་གནང་ངོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །ལྟུང་བ་མིང་དང་རིགས་དང་ལྡན་པར་བརྗོད་པར་བྱའོ་ཞེས་གང་གསུངས་པ་དེ་ལ་འདིར་མིང་ནི་རྣམ་པ་ཇི་ལྟ་བུ་ཞིག་ཡིན། རིགས་ནི་རྣམ་པ་ཇི་ལྟ་བུ་ཞིག་ཡིན་པར་ཤེས་པར་བྱ་ཞེ་ན། དེའི་ཕྱིར་
འདིར་མིང་ནི་ལྟུང་བྱེད་ཀྱི་སྡེ་ཚན་ལས་མིང་ངོ༌། །བྱུང་བ་ནི་རིགས་སོ་ཞེས་བྱ་བ་སྨྲས་ཏེ། སྡེ་ཚན་ལ་བརྟེན་ནས་ལྟུང་བ་རྣམས་ཀྱི་མིང་དུ་གྲགས་པ་གང་ཡིན་པ་དེ་ནི་མིང་ཡིན་པར་ཤེས་པར་བྱའོ། །བྱུང་བ་གང་ཡིན་པ་དེ་ནི་རིགས་ཡིན་པར་ཤེས་པར་བྱའོ། །དས་ན་ཕམ་པར་འགྱུར་བ་དང། དགེ་འདུན་ལྷག་མ་དང༌། ལྟུང་བྱེད་དང༌། སོ་སོར་བཤགས་པར་བྱ་བ་དང༌། ཉེས་བྱས་ཞེས་བྱ་བ་ལྟུང་བྱེད་ཀྱི་སྡེ་ཚན་ལྔ་པོ་དག་ནི་མང་ངོ༌། །མི་གསོད་བ་ལ་སོགས་པའི་ཕམ་པར་འགྱུར་བ་འབྱུང་བ་དང༌། བསམས་བཞིན་དུ་ཁུ་བ་འབྱིན་པ་ལ་སོགས་པའི་དགེ་འདུན་ལྷག་མ་བྱུང་བ་དང༌། སྲ་བརྐྱང་ཕྱུང་ནས་ཞག་བཅུ་ལས་འདས་པར་གོས་རྣམ་པར་མ་བརྟགས་པ་འཆང་བ་ལ་སོགས་པའི་སྤང་བའི་ལྟུང་བྱེད་དང༌། ཤེས་བཞིན་དུ་བརྫུན་དུ་སྨྲ་བ་ལ་སོགས་པའི་ལྟུང་བྱེད་བྱུང་བ་དང༌། ཉེ་དུ་མ་ཡིན་པའི་དགེ་སློང་མའི་ལག་ནས་བཟའ་བ་དང་བཅའ་བ་ལེན་པ་ལ་སོགས་པའི་སོ་སོར་བཤགས་པ་བྱུང་བ་དང༌། ཤམ་ཐབས་ཟླུམ་པོར་མ་བགོས་པ་ལ་སོགས་པའི་ཉེས་བྱས་བྱུང་བ་ནི་རིགས་ཡིན་ནོ། །འདིར་གཞུང་ནི་བཙུན་པ་ལྟུང་བ་རྣམས་ཀྱི་མིང་ཞེས་ཀྱང་བགྱི། རིགས་ཞེས་ཀྱང་བགྱི་ན། བཙུན་པ་མིང་ནི་གང་ལགས། རིགས་ནི་གང་ལགས། ཉེ་བ་འཁོར་ཕམ་པར་འགྱུར་བ་ཞེས་བྱ་བ་ནི་མིང་ངོ༌། །བྱུང་བ་ནི་རིགས་སོ། །དགེ་འདུན་ལྷག་མ་ཞེས་བྱ་བ་ནི་མིང་ངོ༌། །བྱུང་བ་ནི་རིགས་སོ། །ལྟུང་བྱེད་དང་སོ་སོར་བཤགས་པར་བྱ་བ་དང་ཉེས་བྱས་ཞེས་བྱ་བ་ནི་མིང་ངོ༌། །བྱུང་བ་ནི་རིགས་སོ་ཞེས་གསུངས་པ་ཡིན་ནོ། །ཀཽ་ཤཱམྦཱི་པ་དང་དམར་སེར་ཅན་གྱི་གཞི་གཉིས་ལ་ཕྱིར་བཅོས་པའི་གཞི་ཞེས་བྱ་བའི་མིང་གཞན་དུ་བྱས་ཏེ་ཕྱིར་བཅོས་པར་བྱ་བའི་གང་ཟག་གི་བྱེ་བྲག་ཐམས་ཅད་བསྟན་པའི་ཕྱིར་རོ། །འཐབ་ཀྲོལ་བྱེད་པ་ལ་སོགས་པའི་གང་ཟག་གང་ཇི་སྙེད་ཕྱིར་བཅོས་པར་བྱ་བ་དེ་དག་ཐམས་ཅད་དེ་གཉིས་ཀྱིས་ཕྱིར་བཅོས་པར་གསུངས་པས། དེའི་ཕྱིར་དོན་དང་མཐུན་པའི་མིང་བསྟན་པར་བྱ་བའི་ཕྱིར་དེ་གཉིས་ལ་ཕྱིར་བཅོས་པའི་གཞི་ཞེས་བྱ་བའི་མིང་གཞན་དུ་བྱས་ཏེ། དེས་ན་མིང་བརྗོད་པ་ཁོ་ནས་བརྡ་ཕྲད་པ་སླ་བར་འགྱུར་རོ། །ཕྱིར་བཅོས་
པའི་གཞི་ཞུ་བ་ལ་སོགས་པའི་སྐབས་སོ་ཞེས་བྱ་བ་དེ་ཞུ་བ་ལ་སོགས་པའི་སྐབས་ནས་འབྱུང་བ་བཤད་ཟིན་ཏོ། །ཕྱིར་བཅོས་པའི་གཞི་རྫོགས་སོ་ཞེས་བྱ་བ་ཀཽ་ཤཱམྦཱི་པ་དང་དམར་སེར་ཅན་གྱི་གཞི་བཤད་ཟིན་ཏོ།། །།ད་ནི་དུས་དང་དུས་མ་ཡིན་པར་བསྡུས་པ་འབྱུང་བའི་གཞི་བསྡུ་བའི་ཕྱིར་འདི་ལ་དགེ་འདུན་ལྷག་མ་མི་ཤེས་པ་ཉིད་དང་བཅབས་པའི་སེམས་མ་བཞག་པས་བརྗོད་པ་དང་བྱས་སམ་མ་བྱས་ཇི་ཞིག་ཇི་ལྟ་བུ་ཞིག་ཅེས་དྲན་པར་མི་ནུས་པ་ཉིད་དང༌། བསྙེན་པར་རྫོགས་པ་ཉིད་དང༌། གནས་ནས་ཕྱུང་བ་ཉིད་ལ་འཆབ་པ་མ་འབྱུང་ངོ་ཞེས་བྱ་བ་སྨྲས་ཏེ། དེ་དག་ལ་དགེ་འདུན་ལྷག་མའི་ལྟུང་བ་འཆབ་པའི་ཉེས་པ་མི་འབྱུང་ངོ་ཞེས་བྱ་བར་སྦྱར་རོ། །འདི་ལ་དགེ་འདུན་ལྷག་མ་མི་ཤེས་པ་ཉིད་ཅེས་བྱ་བ་ལ། འདི་ལ་ཞེས་བྱ་བ་ནི་བསྒྲུབ་པ་འདི་ལའོ། །དགེ་འདུན་ལྷག་མ་མི་ཤེས་པ་ཉིད་ཅེས་བྱ་བ་ནི། དགེ་འདུན་ལྷག་མར་འགྱུར་རོ་ཞེས་བྱ་བར་མི་ཤེས་པར་ཉིད་དེ། ཤེས་ཏེ་སྦས་ན་ནི་འཆབ་པར་འགྱུར་བས་དེ་ལྟར་མི་ཤེས་པ་ཉིད་ཡིན་ན་དེ་ལ་འཆབ་པ་མི་འབྱུང་ངོ༌། །བཅབས་པའི་སེམས་མ་བཞག་པས་བརྗེད་པ་ཞེས་བྱ་བ་ནི། དགེ་སློང་གང་གིས་བཅབས་པའི་སེམས་སྔ་ནས་མ་གཞག་པས་དགེ་འདུན་ལྷག་མ་བྱུང་ནས་སྔར་ཤེས་པའི་དོན་དེ་ཉིད་དོགས་པ་མེད་པར་བརྗོད་པ་སྟེ། གང་གིས་བཅབས་པའི་སེམས་གཞག་པས་ནི་ཕྱིས་བརྗེད་པར་གྱུར་དུ་ཟིན་ཀྱང་འཆབ་པའི་ཉེས་པ་ཁོ་ནར་འགྱུར་བས་དེའི་ཕྱིར་བཅབས་པའི་སེམས་མ་བཞག་པ་ཞེས་བྱེ་བྲག་ཏུ་བྱས་ཏེ། དེ་ལྟར་བཅབས་པའི་སེམས་མ་བཞག་པས་བརྗེད་པ་དེ་ལ་ཡང་འཆབ་པ་མི་འབྱུང་ངོ༌། །བྱས་སམ་མ་བྱས་ཇི་ཞིག་ཇི་ལྟ་བུ་ཞིག་ཅེས་དྲན་པར་མི་ནུས་པ་ཉིད་ཅེས་བྱ་བ་ལ། བྱས་སམ་མ་བྱས་ཞེས་བྱ་བས་ནི་ཅི་བདག་གིས་དེང་ལས་ཤིག་བྱས་སམ་འོན་ཏེ་མ་བྱས་སྙམ་དུ་ལས་ཀྱི་འཇུག་པའི་སྐབས་ལ་དོགས་པ་བསྟན་ཏོ། །ཅི་ཞིག་ཅེས་བྱ་བ་ནི་བདག་ཉིད་དེང་བདག་ལས་ཤིག་བྱས་སོ་ཞེས་དེ་ལྟར་ལས་བྱས་པ་ཉིད་དུ་ཡིད་ལ་སྣང་བས་ན་བདག་གིས་ལས་དེའི་ངོ་བོ་ཉིད་ཅི་ཞིག་བྱས། ཅི་བདག་གིས་ཁུ་བ་འབྱིན་པའི་ངོ་བོ་ཉིད་དམ་ལུས་ཀྱིས་རེག་པའི་ངོ་བོ་ཉིད་ལ་སོགས་པའམ་ཅི་ཞིག་བྱས་
ཞེས་ངོ་བོ་ཉིད་ཀྱི་ཡུལ་ལ་དོགས་པ་བསྟན་ཏོ། །ཇི་ལྟ་བུ་ཞིག་ཅེས་བྱ་བས་ནི་བདག་གིས་དེང་ཁུ་བ་འབྱིན་པའམ་ལུས་ཀྱིས་རིག་པ་ལ་སོགས་པའི་ངོ་བོ་ཉིད་ཀྱི་ལས་བྱས་ན། ཅི་དེ་བསམས་བཞིན་དུ་བྱས་སམ་འོན་ཏེ། བསམས་བཞིན་དུ་མ་བྱས་སམ་ཅི་བར་དུ་གཅོད་པ་དང་བཅས་པར་བྱས་སམ་འོན་ཏེ་བར་དུ་ཆོད་པ་མེད་པར་བྱས། ཅི་གཉིད་ལོག་པས་བྱས་སམ། འོན་ཏེ་གཉིད་མ་ལོག་པས་བྱས་ཞེས་དེ་ལྟར་ལས་ཀྱི་ངོ་བོ་ཉིད་སྤྱིར་ཡིད་ལ་སྣང་བས་ཡུལ་ལ་སྤྱོད་པའི་སྐབས་ཀྱི་དོགས་པ་བསྟན་ཏེ། དེ་ལྟར་བྱས་སམ་མ་བྱས་ཇི་ཞིག་ཇི་ལྟ་བུ་ཞིག་ཅེས་དྲན་པར་མི་ནུས་པ་ཉིད་དེ་ལ་ཡང་འཆབ་པ་མི་འབྱུང་ངོ༌། །བསྙེན་པར་མ་རྫོགས་པ་ཉིད་ལ་ནི་དགེ་འདུན་ལྷག་མ་མེད་པས་དེ་ལས་ཡང་འཆབ་པ་མི་འབྱུང་ངོ༌། །གནས་ནས་ཕྱུང་བ་ཉིད་ནི་ཐ་དད་པར་གྱུར་པ་ཡིན་པས་ཕྱིར་བཅོས་པའི་གྲོགས་མེད་པའི་ཕྱིར་དེ་ལ་ཡང་འཆབ་པ་མི་འབྱུང་ངོ༌། །ཐ་སྙད་དུ་རུང་བའི་འདུ་ཤེས་ཉམས་པ་ཉིད་ལ་ནི་ཕམ་པར་འགྱུར་བ་མན་ཆད་ཀྱི་ལྟུང་བ་ཡང་མི་འབྱུང་ངོ་ཞེས་བྱ་བ་ནི། སྨྱོས་པ་དང་སེམས་འཁྲུགས་པ་ལ་སོགས་པ་ཐ་སྙད་དུ་རུང་བའི་འདུ་ཤེས་ཉམས་པ་ཉིད་ལ་ནི་ཕམ་པར་འགྱུར་བ་མན་ཆད་ཀྱི་ལྟུང་བ་ཡང་མི་འབྱུང་བའོ། །མན་ཆད་ཅེས་སྨོས་པས་ནི་ལྟུང་བ་ཐམས་ཅད་མི་འབྱུང་བར་བསྟན་ཏོ། །ཡང་ཞེས་བྱ་བའི་སྒྲ་ནི་འཆབ་པ་ཡང་མི་འབྱུང་ངོ་ཞེས་བྱ་བར་བསྟན་ཏོ། །མ་བཅབས་པ་ཉིད་ལ་ཡང་ངོ་ཞེས་བྱ་བ་ནི། དེ་ལ་ཕམ་པར་འགྱུར་བ་མན་ཆད་ཀྱི་ལྟུང་བ་ཡང་མི་འབྱུང་ངོ་ཞེས་བྱ་བའི་རྗེས་སྙག་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །འདིར་གཞུང་ནི་ལས་དང་པོ་པ་ལ་ལྟུང་བ་མེད་དོ་ཞེས་གསུངས་པ་ཡིན་ནོ། །མི་ཤེས་པ་ཉིད་ལ་ནི་མ་ཡིན་ནོ་ཞེས་བྱ་བ་ནི། འདི་ལྟུང་བ་ཡིན་ནོ་ཞེས་བྱ་བར་མི་ཤེས་པ་ཉིད་ལ་ནི་ལྟུང་བ་མི་འབྱུང་བ་མ་ཡིན་ཏེ་འབྱུང་བ་ཁོ་ན་ཡིན་པའོ། །འདིར་གཞུང་ནི་ཚེ་དང་ལྡན་པ་དེ་མི་ཤེས་པས་ནི་མི་འགྲོལ་ཏེ། དེ་ལ་ཉེས་པ་གང་བྱུང་བ་དེ་ཆོས་བཞིན་དུ་བྱེད་དུ་གཞུག་གི་སྟེང་དུ་ཞེས་གསུངས་པ་ཡིན་ནོ། །མངོན་པར་ཡིད་མི་ཆེས་པ་ཉིད་ལ་ཡང་ངོ་ཞེས་བྱ་བ་ཡང་མི་འབྱུང་བ་མ་ཡིན་ནོ་ཞེས་བྱ་བར་སྦྱར་ཏེ། འདོན་པ་དང་བརྗོད་པ་དག་ཐོས་པ་
ན་འདི་ལྟུང་བ་ཡིན་ནོ་ཞེས་བྱ་བར་མངོན་པར་ཡིད་མི་ཆེས་པ་ཉིད་ལ་ཡང་ལྟུང་བ་འབྱུང་བ་ཁོ་ནར་འགྱུར་རོ། །མངོན་པར་མི་ཤེས་པ་ཉིད་དུ་འདུ་ཤེས་པ་ལ་ཡང་ངོ་ཞེས་བྱ་བ་ཡང་མི་འབྱུང་བ་མ་ཡིན་ནོ་ཞེས་བྱ་བར་སྦྱར་ཏེ། འདོན་པ་བྱེད་པ་དང་རྗོད་པར་བྱེད་པ་ལ་འདི་བྱིས་པ་ཡིན་པས་ཆུང་ཟད་ཀྱང་སྨྲ་བ་མ་ཡིན་ནོ་ཞེས་དེའི་ཚིག་དག་ལ་མི་གུས་ཤིང་མངོན་པར་མི་ཤེས་པ་ཉིད་དུ་འདུ་ཤེས་པས་ལྟུང་བ་ལ་ཡང་མངོན་པར་ཡིད་མི་ཆེས་པ་ཉིད་ལ་ཡང་ལྟུང་བ་འབྱུང་བ་ཁོ་ནར་འགྱུར་ཏེ། དེ་དག་ནི་ལྟུང་བ་མི་འབྱུང་བའི་རྒྱུ་མ་ཡིན་ནོ་ཞེས་བྱ་བའི་ཐ་ཚིག་གོ །འདིར་གཞུང་ནི་ཀུན་ཤེས་པར་འདོད་པའི་དགེ་སློང་གིས་ཀྱང་བསླབ་པ་འདི་ལ་བསླབ་པར་བྱའོ་ཞེས་གསུངས་པ་ཡིན་ནོ། །ས་གཞན་ན་གནས་པ་ཉིད་ལ་ནི་སྔ་མ་ཡང་ངོ་ཞེས་བྱ་བ་ནི། བསྡིགས་པ་དང་སྨད་པ་དང་བསྐྲད་པ་དང༌། ཕྱིར་འགྱེད་པ་དང་བསླབ་པ་བྱིན་པས་གཞན་ན་གནས་པ་ཉིད་ལ་ནི་སྔ་མ་ཞེས་བྱ་བ་ལྟུང་བ་འབྱུང་བ་ཁོ་ནའོ་ཞེས་བསྟན་པ་དག་ནི་སྔ་མ་འཆབ་པ་ཞེས་བྱ་བ་ཡང་མི་འབྱུང་བ་མ་ཡིན་ཏེ་འབྱུང་བ་ཁོ་ན་ཡིན་པའོ། །ཡང་ངོ་ཞེས་བྱ་བའི་སྒྲས་ནི་ལྟུང་བ་ཡང་མི་འབྱུང་བ་མ་ཡིན་ཏེ་འབྱུང་བ་ཁོ་ནའོ་ཞེས་བྱ་བ་སྟོན་ཏེ། དེ་ལ་འཆབ་པ་དང་ལྟུང་བ་གཉིས་ཀ་འབྱུང་ངོ་ཞེས་བྱ་བའི་ཐ་ཚིག་གོ །འཆབ་པ་ལ་དགེ་འདུན་ལྷག་མ་ཉིད་ལ་ཡིད་གཉིས་ཟ་བ་ནི་ཤེས་པ་དང་འདྲའོ་ཞེས་བྱ་བ་ནི། ཡིད་གཉིས་ནི་འདུ་ཤེས་དང་འདྲ་བར་ཞེས་བྱ་བར་སྦྱར་ཏེ། འཆབ་པའི་ཡུལ་ལ་དགེ་འདུན་ལྷག་མ་ལ་ཡིད་གཉིས་ཟ་བཞིན་དུ་བཅབས་ན་དགེ་འདུན་ལྷག་མར་ཤེས་བཞིན་དུ་བཅབས་པ་དང་འདྲ་སྟེ། འཆབ་པའི་ཉེས་པར་འགྱུར་རོ་ཞེས་བྱ་བའི་ཐ་ཚིག་གོ །ས་གང་ལ་འཆབ་པ་མི་འབྱུང་བ་དེ་ལ་སྤྱད་པ་ཡང་ངོ་ཞེས་བྱ་བ་ནི། བསྙེན་པར་མ་རྫོགས་པ་དང་གནས་ནས་ཕྱུང་བ་དང༌། ཐ་སྙད་དུ་བྱར་རུང་བའི་འདུ་ཤེས་ཉམས་པ་ཞེས་སྨོས་པ་དེ་དག་ནི་འདིར་ཡང་ཞེས་བྱ་བའི་སྒྲར་བརྗོད་དེ། དེ་དག་ཇི་ལྟར་འཆབ་པ་འབྱུང་བའི་ཞིང་མ་ཡིན་པ་དེ་བཞིན་དུ་ཡོངས་སུ་གནས་པ་ལ་སོགས་པའི་སྤྱད་པའི་ཞིང་མ་ཡིན་ནོ། །མ་གུས་པས་སྤྱོད་པ་གཏོང་ན་ཉེས་བྱས་སོ་ཞེས་
བྱ་བ་ནི། ཡོངས་སུ་གནས་པ་དང་མགུ་བ་སྤྱོད་པ་མ་གུས་པས་གཏོང་ན་ཉེས་བྱས་སུ་འགྱུར་བའོ། །འཐབ་ཀྲོལ་བྱེད་པ་འོང་བས་གཏོང་བ་ལ་ནི་ཉེས་པ་མེད་དོ། །དེ་ལ་དེའི་སྡེ་པ་ལྷག་པར་སྤྱོད་པ་ཡང་ངོ་ཞེས་བྱ་བ་ནི། ཡོངས་སུ་གནས་པ་དང་མགུ་བ་སྤྱོད་པའི་གནས་སྐབས་དེ་ལ་དེའི་སྡེ་པ་ཞེས་བྱ་བ་དགེ་འདུན་ལྷག་མའི་སྡེ་ཚན་དུ་གཏོགས་པའི་དངོས་གཞི་འམ་ཉེས་པ་སྦོམ་པོ་འམ་ཉེས་བྱས་ལྷག་པར་སྤྱོད་ན་ཡང་ཉེས་བྱས་སུ་འགྱུར་བའོ། །ཡོད་ལ་ཕྱིར་མི་འཆོས་ན་ཡང་ངོ་ཞེས་བྱ་བ་ནི། ལེན་པར་བྱེད་པ་ཡོད་པ་ལ་སོགས་པས་ཕྱིར་འཆོས་པའི་ཐབས་ཡོད་པ་ལྟུང་བ་ཕྱིར་མི་འཆོས་ན་སྐྱ་རེངས་རེ་རེ་ཞིང་ཉེས་བྱས་རེ་རེར་འགྱུར་བའོ། །མི་སྤྱོད་པའི་ས་ནས་ཕྱིར་འོངས་པ་ནི་དེའི་གནས་སྐབས་ཉིད་ཡིན་ནོ་ཞེས་བྱ་བ་ནི། ཡོངས་སུ་གནས་པ་དང་མགུ་བ་སྤྱོད་པའི་གནས་སྐབས་བསྙེན་པར་རྫོགས་པ་དང་གནས་ནས་ཕྱུང་བ་དང་ཐ་སྙད་རུང་བའི་འདུ་ཤེས་ཉམས་པ་ཡོངས་སུ་གནས་པ་དང་མགུ་བ་མི་སྤྱོད་པའི་སར་སོང་ནས། མི་སྤྱོད་པའི་ས་དེ་ནས་ཕྱིར་འོངས་ནས་ཡོངས་སུ་གནས་པ་དང་མགུ་བ་སྤྱོད་པའི་གནས་སྐབས་ཉིད་ཡིན་པ་སྟེ། ལྟུང་བ་དང་བཅས་པའི་གནས་སྐབས་ཉིད་ཡིན་ནོ་ཞེས་བྱ་བའི་ཐ་ཚིག་གོ ། སྦྱང་བའི་གཞི་ལ་ལྷག་མ་རྗེས་སུ་བསྒྲུབ་པོ་ཞེས་བྱ་བ་ནི། བདག་ལ་ལྟུང་བའི་མིང་ནི་འདི་བྱུང༌། རིགས་ནི་འདི་བྱུང༌། དུས་ནི་འདི་སྲིད་དུ་བཅབས་པའི་མི་བཅབས་པ་དེའི་ཕྱིར་བདག་གིས་སྤྱད་པ་འདི་བླངས་ཏེ་འདི་སྲིད་ནི་སྤྱད་ཟིན་ཏོ། །ལྷག་མ་ནི་འདི་སྲིད་ཅིག་ལུས་སོ་ཞེས་སྤྱད་པ་གང་ལ་ཀུན་དུ་སྤྱད་པ་དེ་བརྟེན་པར་བྱ་བའི་དགེ་འདུན་ལ་བརྗོད་ཅིང་སྦྱངས་པའི་གཞི་ལ་ལྷག་མ་མ་སྤྱད་པ་ཇི་སྙེད་ཡོད་པ་བསྒྲུབ་པར་བྱ་བ་སྟེ། དེ་ལ་ལྷག་མ་གང་ཡོད་པ་དེ་སྤྱད་པར་བྱ་བའོ། །འདིར་གཞུང་ནི། ཡོངས་སུ་གནས་པར་བྱེད་པའི་གང་ཟག་གིས་གཞི་ཇི་ཙམ་སྦྱངས་ནས་རྣམ་པར་འཁྱམས་ཏེ་ཡང་ཕྱིར་འོངས་ནས་བསྙེན་པར་རྫོགས་ན་འདུལ་བ་དང་འགལ་བའི་ཁ་ན་མ་ཐོ་བའི་ཉེས་བྱས་བཤགས་ཏེ། སྤོ་བ་ལ་ཡོངས་སུ་གནས་པར་གྱུར་ན། སྤོ་བ་ལ་ཡོངས་སུ་གནས་པར་འགྱུར་རོ་ཞེས་གསུངས་པ་ཡིན་ནོ། །བཅབས་པའི་དུས་ངེས་པར་མི་
ཤེས་ན་ཉུང་བ་ཉིད་དུ་མི་འགྱུར་བ་ལ་བརྟེན་པར་བྱའོ་ཞེས་བྱ་བ་ནི། ལྟུང་བ་གང་ལ་བཅབས་པའི་དུས་ངེས་པ་ཉིད་དུ་མི་ཤེས་ཏེ་བདག་གིས་ལྟུང་བ་དེ་དུས་འདི་སྲིད་དུ་བཅབས་སོ་ཞེས་བྱ་བར་བཅབས་པའི་དུས་ངེས་པར་མི་ཤེས་བདེ་ལ་ཇི་ནས་ཀྱང་ཉུང་བ་ཉིད་དུ་མི་འགྱུར་བའི་དུས་དེ་སྲིད་ཅིག་ལ་བརྟེན་པར་བྱ་བ་སྟེ། ཇི་ནས་ཀྱང་བཅབས་པའི་དུས་པས་ཉུང་བ་ཉིད་དུ་མི་འགྱུར་བའི་དུས་དེ་སྲིད་ཅིག་ལ་བརྟེན་ཏེ། ཡོངས་སུ་གནས་པར་སྤྱད་པར་བྱའོ་ཞེས་བྱ་བའི་ཐ་ཚིག་གོ །ཡུལ་གང་ལ་ཉུང་བ་ཉིད་དུ་མི་འགྱུར་བའི་དུས་དེ་ལ་བརྟེན་པར་བྱ། དུས་དེ་ནི་ཇི་འདྲ་བ་ཞིག་ཅེ་ན་དེའི་ཕྱིར། སྤྱད་པར་བྱ་བ་ཉིད་ལ་དག་པའི་མཐའ་ཅན་ཉིད་ཀྱི་བྱེ་བྲག་གིའོ་ཞེས་བྱ་བ་སྨྲས་ཏེ། ཡུལ་གང་ལ་ཞེ་ན་སྤྱད་པར་བྱ་བ་ཉིད་ལའོ། །དུས་དེ་ཇི་འདྲ་བ་ཞིག་ཅེ་ན། དག་པའི་མཐའ་ཅན་ཉིད་ཀྱི་བྱེ་བྲག་གི་དུས་ཏེ་ཡུལ་དེ་ལ་ཉུང་བ་ཉིད་དུ་མི་འགྱུར་བའི་དུས་དེ་ལྟ་བུ་བརྟེན་པར་བྱའོ་ཞེས་བྱ་བར་སྦྱར་རོ། །འདིར་དུས་དེ་དོན་གཉིས་ལ་བརྟེན་ཏེ་བཅབས་པ་དང༌། སྤྱད་པར་བྱ་བ་ཉིད་ལའོ། །དེ་ལ་བཅབས་པ་ཞེས་བྱ་བ་ནི་དུས་འདི་སྲིད་བཅབས་པ་ཞེས་བྱའོ། །སྤྱད་པར་བྱ་བ་ཉིད་ཅེས་བྱ་བ་ནི་དུས་འདི་སྲིད་དུ་ཡོངས་སུ་གནས་པར་བྱའོ་ཞེས་བྱ་བའོ། །དེ་ལ་བཅབས་པ་ལ་ནི་ཡོངས་སུ་གནས་པ་དང་མགུ་བར་བྱ་བ་གཉི་གའི་དུས་ལ་བརྟེན་ཏོ། །སྤྱད་པར་བྱ་བ་ཉིད་ལ་ནི་ཡོངས་སུ་གནས་པའི་དུས་འབའ་ཞིག་ལ་བརྟེན་གྱི། མགུ་བར་བྱ་བའི་དུས་ལ་ནི་མི་བརྟེན་ཏེ། འདི་ལྟར་མགུ་བའི་དུས་ནི་ཞག་དྲུག་ཁོ་ནར་ངེས་པ་ཉིད་ཡིན་པའི་ཕྱིར་རོ། །དེ་བས་ན་འདིར་བཅབས་པའི་དུས་དེས་པར་མེ་ཤེས་པས་སྤྱད་པར་བྱ་བ་ཉིད་ཀྱི་ཡུལ་ལ་བརྟེན་པར་བྱ་སྟེ། ཡོངས་སུ་གནས་པ་སྤྱད་པར་བྱ་བ་ཉིད་ཀྱི་ཡུལ་ལའོ། །ཡུལ་དེ་ལ་དུས་ཇི་ལྟ་བུ་ལ་བརྟེན་པར་བྱ་ཞེ་ན། དེའི་ཕྱིར་དག་པའི་མཐའ་ཅན་ཉིད་ཀྱི་བྱེ་བྲག་གི་དུས་ལ་སྟེ། དག་པ་ཞེས་བྱ་བ་ནི་དྲི་མ་མེད་པ་བཅབས་པའི་ཉེས་པས་མགོས་པའི་དུས་ཏེ། སྔོན་དགེ་འདུན་ལྷག་མའི་ལྟུང་བ་མ་བྱུང་ཞིང་མ་བཅབས་པ་ཉིད་ཀྱི་དུས་སོ། །དེའི་མཐའ་ཞེས་བྱ་བ་ནི་དག་པ་ཡང་དེ་ཉིད་ཡིན་ལ་མཐའ་ཡང་དེ་ཉིད་ཡིན་ཏེ། དགེ་འདུན་ལྷག་མའི་ལྟུང་བ་མ་བྱུང་ཞིང་མ་བཅབས་པའི་དུས་དེའི་མཐའ་དགེ་
འདུན་ལྷག་མའི་ལྟུང་བ་བྱུང་ཞིང་བཅབས་པ་དེའི་སྔ་རོལ་ཁོ་ནའི་གནས་སྐབས་ཀྱི་དུས་སོ། །མཐའ་ཅན་ཞེས་བྱ་བ་ནི་ཡོངས་སུ་གནས་པའི་དུས་གང་ལ་དག་པའི་མཐའི་དུས་དེ་ཡོད་པ་དེ་ནི་དག་པའི་མཐའ་ཅན་ཏེ། བཅབས་པའི་དུས་དེས་པར་མི་ཤེས་པས་ཡོངས་སུ་གནས་པ་སྤྱད་པར་བྱ་བ་ཉིད་བརྩམས་པ་དེའི་དང་པོའི་ཁོངས་ན་སྔོན་དགེ་འདུན་ལྷག་མ་མ་བྱུང་གི་བཅབས་པའི་ཉེས་པས་མ་གོས་པའི་དུས་དག་པ་དེའི་མཐའ་ཡང་ཡོད་པ་ལ་བྱའོ། །དེའི་བྱེ་བྲག་གི་ཞེས་བྱ་བ་ནི་ཡོངས་སུ་གནས་པར་སྤྱད་པའི་དུས་ཀྱི་དང་པོ་དག་པའི་མཐའ་ཅན་དེའི་བྱེ་བྲག་གི་དུས་ཏེ། དག་པའི་དུས་ཀྱི་མཐའ་དང་བཅས་པ་དེ་ཚུན་ཆད་ནས་བཟུང་སྟེ། ནམ་དགེ་འདུན་ལྷག་མ་བྱུང་བ་བཅབས་པར་དྲན་ཞིང་མཐོལ་བའི་བར་གྱི་དུས་ཟླ་བ་བཞི་ལ་སོགས་པ་ཇི་སྲིད་དུ་ཡོངས་སུ་གནས་པ་སྤྱད་པར་བྱ་བ་ཉིད་ཀྱི་དུས་ལ་བྱའོ། །འདི་སྐད་བསྟན་ཏེ་བཅབས་བའི་དུས་དེས་པར་མི་ཤེས་པས་ཡོངས་སུ་གནས་པ་སྤྱད་པར་བྱ་བའི་དུས་ནི་སྔོན་ཡོངས་སུ་དག་པའི་དུས་ཀྱི་མཐའ་དང་བཅས་པ་ནས་བཟུང་སྟེ་ནམ་མཐོལ་བའི་བར་གྱི་དུས་ཀྱི་བྱེ་བྲག་དེ་སྲིད་ཀྱི་བར་དུ་སྤྱད་པར་བྱའོ། །ཡོངས་སུ་གནས་པ་སྤྱད་པའི་དུས་གང་ལ་དག་པའི་དུས་ཀྱི་མཐའ་དང་བཅབས་པའི་དུས་ཀྱི་བྱེ་བྲག་ཟླ་བ་བཞི་ལ་སོགས་པ་ཡོད་པ་དེ་ནི་དག་པའི་མཐའ་ཅན་ཉིད་ཀྱི་བྱེ་བྲག་གིས་དུས་ཞེས་བྱ་སྟེ། བཅབས་པའི་དུས་ངེས་པར་མི་ཤེས་པས་ཡོངས་སུ་གནས་པར་སྤྱད་པར་བྱ་བ་ཉིད་ཀྱི་ཡུལ་ལ་དུས་དེ་ལྟ་བུ་ལ་བརྟེན་པར་བྱའོ། །ཇི་ལྟར་ཉུང་བ་ཉིད་དུ་མི་འགྱུར་བ་དག་པའི་མཐའ་ཅན་ཉིད་ཀྱི་བྱེ་བྲག་གི་དུས་ལ་བརྟེན་པར་བྱ་ཞེན་དེའི་ཕྱིར། དག་པའི་མཐའ་ཅན་ཟླ་བ་བཞི་པའོ་ཞེས་བྱ་བ་སྨྲས་ཏེ། སྔར་བྱེ་བྲག་ཅེས་སྨོས་པ་དེ་གང་ཡིན་ཞེ་ན། ཟླ་བ་བཞི་ཞེས་བྱ་བ་འདི་དང་སྦྱར་ཏེ། དག་པའི་མཐའ་ཅན་ཉིད་ཀྱི་བྱེ་བྲག་གི་དུས་ཟླ་བ་བཞི་ལ་བརྟེན་བར་བྱ་བའོ། །ཟླ་བ་བཞི་ཞེས་སྨོས་པས་ནི་དཔེ་སྟེ་ཉུང་བ་ཉིད་དུ་མི་འགྱུར་བ་དག་པའི་མཐའ་ཅན་ཉིད་ཀྱི་བྱེ་བྲག་གི་དུས་ཟླ་བ་གསུམ་མམ་ལྔ་ལ་སོགས་པ་ལ་བརྟེན་པར་བྱའོ། །དུས་དེ་ཙམ་ཞིག་སྤྱོད་ན་ངེས་པ་ཁོ་ནར་བཅབས་པའི་དུས་ལས་ཉུང་བ་ཉིད་དུ་མི་འགྱུར་བར་བསམས་ནས་དག་པའི་མཐའ་ཅན་གྱི་བྱེ་བྲག་ཟླ་བ་
བཞི་ལ་སོགས་པ་སྨོས་ཀྱི། སྤྱད་པར་བྱ་བའི་དུས་དེ་ཁོ་ནར་དེས་པ་ཉིད་དུ་བསམས་པ་ནི་མ་ཡིན་ནོ། །ལྷག་པ་ལ་ནི་ཉེས་པ་མེད་པས་དེའི་ཕྱིར་དག་པའི་མཐའ་དང་བཅས་ཏེ། བཟུང་ནས་ཟླ་བ་བཞི་ལ་སོགས་པ་ལ་བརྟེན་པར་བྱས་སོ། །འོ་ན་བཅབས་པའི་དུས་ངེས་པར་མི་ཤེས་པས་ཉུང་བ་ཉིད་དུ་མི་འགྱུར་བའི་དུས་ལ་བརྟེན་པར་གང་གསུངས་པ་དེ་ལ་ཅི་ཉུང་བ་ཉིད་དུ་མི་འགྱུར་བའི་དུས་ཡོངས་སུ་ཆད་པ་ཞིག་ལ་བརྟེན་པར་བྱའམ་ཞེ་ན་མ་ཡིན་ཏེ། དེའི་ཕྱིར་བཅབས་པ་ནི་དཔག་ཏུ་མེད་པ་ལའོ་ཞེས་བྱ་བ་སྨྲས་ཏེ། བརྟེན་པར་བྱའོ་ཞེས་བྱ་བར་སྦྱར་རོ། །བཅབས་པའི་དུས་ངེས་པར་མི་ཤེས་ན་བཅབས་པའི་ཕྱིར་ནི་དུས་དཔག་ཏུ་མེད་པ་ལ་བརྟེན་པར་བྱའོ། །ཇི་ལྟར་ཞེ་ན་དེའི་ཕྱིར། བསམས་བཞིན་དུ་ཁུ་བ་ཕྱུང་བ་ལས་བྱུང་བ་དཔག་ཏུ་མེད་པར་ཞེས་སོ་ཞེས་བྱ་བ་སྨྲས་ཏེ། བསམས་བཞིན་དུ་ཁུ་བ་ཕྱུང་བ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་དུས་དཔག་ཏུ་མེད་པར་བཅབས་པ་ཞེས་བྱ་བར་སྦྱར་རོ། །སྔགས་བརྗོད་པའི་སྐབས་སུ་བསམས་བཞིན་དུ་ཁུ་བ་ཕྱུང་བ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་དུས་དཔག་ཏུ་མེད་པར་བཅབས་པས་ཞེས་བརྗོད་པར་བྱའོ། །ཅིའི་ཕྱིར་འདིར་ཡང་ཟླ་བ་བཞི་བཅབས་པས་ཞེས་མི་བརྗོད་ཅེ་ན། དེ་སྐད་བརྗོད་པ་ན་བདེན་པར་བརྗོད་པར་མི་འགྱུར་ཏེ། ངེས་པ་མེད་པ་ལ་དེས་པ་ཉིད་དུ་བརྗོད་པའི་ཕྱིར་ཏེ། དེ་བས་ན་འདི་སྐད་མི་བརྗོད་དོ། །དེ་ལྟར་ན་ཇི་སྐད་བསྟན་པའི་མདོ་རྣམ་པ་ལྔ་པོ་དེ་དག་ལས་ཚིག་གི་དོན་འདི་འབྱུང་སྟེ། ཡོངས་སུ་གནས་པ་གསོལ་བའམ། གཞི་ནས་ཡོངས་སུ་གནས་པ་གསོལ་བ་འམ་ཡང་གཞི་ནས་བསླང་སྟེ་ཡོངས་སུ་གནས་པ་གསོལ་བའམ། མགུ་བར་བྱ་བ་གསོལ་བའམ། གཞི་ནས་མགུ་བར་བྱ་བ་གསོལ་བ་འམ། ཡང་གཞི་ནས་བསླང་སྟེ་མགུ་བར་བྱ་བ་གསོལ་བ་འམ། ཡོངས་སུ་གནས་པར་སྦྱིན་པ་འམ། གཞི་ནས་ཡོངས་སུ་གནས་བ་སྦྱིན་པ་འམ། ཡང་གཞི་ནས་བསླང་སྟེ་ཡོངས་སུ་གནས་པ་སྦྱིན་པའམ་མགུ་བར་བྱ་བ་སྦྱིན་པ་འམ། གཞི་ནས་མགུ་བར་བྱ་བ་སྦྱིན་པ་འམ། ཡང་གཞི་ནས་བསླང་སྟེ་མགུ་བར་བྱ་བ་སྦྱིན་པའམ། ཡོངས་སུ་གནས་པ་གཏོང་བ་འམ། གཞི་ནས་ཡོངས་སུ་གནས་པ་གཏོང་
བའམ། ཡང་གཞི་ནས་བསླང་སྟེ། ཡོངས་སུ་གནས་པ་གཏོང་བའམ། མགུ་བར་བྱ་བ་གཏོང་བའམ། གཞི་ནས་མགུ་བར་བྱ་བ་གཏོང་བའམ། ཡང་གཞི་ནས་བསླང་སྟེ་མགུ་བར་བྱ་བ་གཏོང་བའམ་ཡོངས་སུ་གནས་པ་བརྗོད་པའམ་གཞི་ནས་ཡོངས་སུ་གནས་པ་བརྗོད་པའམ་ཡང་གཞི་ནས་བསླང་སྟེ་ཡོངས་སུ་གནས་པ་བརྗོད་པའམ། མགུ་བར་བྱ་བ་བརྗོད་པའམ། གཞི་ནས་མགུ་བར་བྱ་བ་བརྗོད་པའམ། ཡང་གཞི་ནས་བསླང་སྟེ་མགུ་བར་བྱ་བ་བརྗོད་པ་ན། གང་གི་ཚེ་བཅབ་པ་རྗོད་པར་བྱེད་པ་དེའི་ཚེ་ནི་སྔགས་ཀྱི་ཚིག་དུས་ཉུང་བ་ཉིད་དུ་མི་འགྱུར་བ་དཔག་ཏུ་མེད་པ་བཅབས་པས་ཞེས་བྱ་བ་ལ་བརྟེན་པར་བྱའོ། །གང་གི་ཚེ་ཡོངས་སུ་གནས་པ་ལ་སོགས་པར་སྤྱད་པར་བྱ་བ་ཉིད་རྗོད་པར་བྱེད་པ་དེའི་ཚེ་ནི་སྔགས་ཀྱི་ཚིག་དུས་ཉུང་བ་ཉིད་དུ་མི་འགྱུར་བ་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་ཞེས་བྱ་བ་ལ་བརྟེན་པར་བྱའོ། །གང་གི་ཚེ་མགུ་བར་བྱ་བ་ལ་སོགས་པ་སྤྱད་པར་བྱ་བ་ཉིད་རྗོད་པར་བྱེད་པ་དེའི་ཚེ་ནི་སྔགས་ཀྱི་ཚིག་དུས་ཞག་དྲུག་ཁོ་ན་ལ་བརྟེན་པར་བྱའོ། །དེ་དག་གིས་སྔགས་ཀྱི་ཚིག་འདི་ལྟར་སྦྱར་བར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། །བདག་དགེ་སློང་འཆར་ཀ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ན། དཔག་ཏུ་མ་མཆིས་པ་བཅབས་པས་བདག་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་དཔག་ཏུ་མ་མཆིས་པ་བཅབས་པ་དེའི་སླད་དུ་དགེ་འདུན་ལས་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་གསོལ་ན། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ། བདག་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་དཔག་ཏུ་མ་མཆིས་པ་བཅབས་པ་དེའི་སླད་དུ་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་སྩལ་དུ་གསོལ། ལན་གསུམ་དུ་བཟླས། གཞི་ནས་ཡོངས་སུ་གནས་པ་གསོལ་བ་དང༌། །ཡང་གཞི་ནས་བསླང་སྟེ་ཡོངས་སུ་གནས་པ་གསོལ་བའི་སྔགས་ལ་ཡང་དེ་བཞིན་དུ་སྦྱར་རོ། །དགེ་འདུན་བཙུན་པ་རྣམས་གསན་དུ་གསོལ། །དགེ་སློང་འཆར་ཀ་འདི་ལ་ཆེ་གེ་མོ་ལས་
བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་དཔག་ཏུ་མ་མཆིས་པ་བཅབས་པས་དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་དཔག་ཏུ་མ་མཆིས་པ་བཅབས་པ་དེའི་སླད་དུ་དགེ་འདུན་ལས་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་འཆར་ཀ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་དཔག་ཏུ་མ་མཆིས་པ་བཅབས་པ་དེའི་སླད་དུ་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་སྩོལ་ཏོ། །འདི་ནི་གསོལ་བའོ། །ལས་བརྗོད་པ་གསུམ་ཡང་དེ་བཞིན་དུ་བྱའོ། །གཞི་ནས་ཡོངས་སུ་གནས་པ་སྦྱིན་པ་དང༌། ཡང་གཞི་ནས་བསླང་སྟེ་ཡོངས་སུ་གནས་པའི་སྦྱིན་པའི་སྔགས་ལ་ཡང་དེ་བཞིན་དུ་སྦྱར་རོ། །དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་དཔག་ཏུ་མ་མཆིས་པ་བཅབས་པས་བདག་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་དཔག་ཏུ་མ་མཆིས་པ་བཅབས་བས་དེའི་སླད་དུ་དགེ་འདུན་ལས་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་གསོལ་ན། དགེ་འདུན་གྱིས་བདག་དགེ་སློང་འཆར་ཀ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། དཔག་ཏུ་མ་མཆིས་པ་བཅབས་པས་དེའི་སླད་དུ་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་སྩལ་ཏེ། བདག་དགེ་སློང་འཆར་ཀས་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་དཔག་ཏུ་མ་མཆིས་པ་བཅབས་བས་དེའི་སླད་དུ་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་བགྱིས་ལགས་ཏེ། དགེ་འདུན་ལས་ཞག་དྲུག་མགུ་བ་བགྱི་བ་གསོལ་ན་ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བ་ཉེ་བར་བཟུང་སྟེ། བདག་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ན་དཔག་ཏུ་མ་མཆིས་པ་བཅབས་པ་དེའི་སླད་དུ་དག་པའི་མཐའ་ཅན་ཟླ་བ་བཞི་ཡོངས་སུ་དག་པ་བགྱིས་ལགས་པ་
ལ་ཞག་དྲུག་མགུ་བ་བགྱི་བར་སྩལ་དུ་གསོལ། ལན་གསུམ་དུ་བཟླས། གཞི་ནས་མགུ་བར་བྱ་བ་གསོལ་བ་དང༌། ཡང་གཞི་ནས་བསླང་སྟེ་མགུ་བར་བྱ་བ་གསོལ་བའི་སྔགས་ལ་ཡང་དེ་བཞིན་དུ་སྦྱར་རོ། །དགེ་འདུན་བཙུན་པ་རྣམས་གསན་དུ་གསོལ། །དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། དཔག་ཏུ་མ་མཆིས་པ་བཅབས་པས་དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་དཔག་ཏུ་མ་མཆིས་པ་བཅབས་པ་དེའི་སླད་དུ་དགེ་འདུན་ལས་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་གསོལ་ན། དགེ་འདུན་གྱིས་དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་དཔག་ཏུ་མ་མཆིས་པ་བཅབས་པ་དེའི་སླད་དུ་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་སྩལ་ཏེ། དགེ་སློང་འཆར་ཀ་འདི་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་ལ་དཔག་ཏུ་མ་མཆིས་པ་བཅབས་པ་དེའི་སླད་དུ་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་བགྱིས་ལགས་ཏེ། དགེ་འདུན་ལས་ཞག་དྲུག་མགུ་བར་བགྱི་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་སློང་གིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་དཔག་ཏུ་མ་མཆིས་པ་བཅབས་པ་དེའི་སླད་དུ་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་བགྱིས་པ་ལ་ཞག་དྲུག་མགུ་བར་བགྱི་བ་སྩོལ་ཏོ། །འདི་ནི་གསོལ་བའོ། །ལས་བརྗོད་པ་གསུམ་ཡང་དེ་བཞིན་དུ་བྱའོ། །གཞི་ནས་མགུ་བར་བྱ་བ་སྦྱིན་པ་དང༌། ཡང་གཞི་ནས་བསླང་སྟེ་མགུ་བར་བྱ་བ་སྦྱིན་པའི་སྔགས་ལ་ཡང་དེ་བཞིན་དུ་སྦྱར་རོ། །དགེ་འདུན་བཙུན་པ་རྣམས་གསན་དུ་གསོལ། །བདག་དགེ་སློང་འཆར་ཀ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། དཔག་ཏུ་མ་མཆིས་པ་བཅབས་པས། བདག་དགེ་སློང་འཆར་ཀ་དགེ་འདུན་གྱི་གན་དུ་མཆིས་ཏེ། ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་དཔག་ཏུ་མ་མཆིས་པ་བཅབས་པ་དེའི་སླད་དུ་དགེ་འདུན་ལས་དག་པའི་མཐའ་ཅན་ཟླ་བ་བཞི་ཡོངས་སུ་
གནས་པ་གསོལ་ན། དགེ་འདུན་གྱིས་བདག་དགེ་སློང་འཆར་ཀ་ཆེ་གེ་མོ་ལས་བྱུང་པའི་དགེ་འདུན་ལྷག་མའི་ལྟུང་བ་བྱུང་ལ་དཔག་ཏུ་མ་མཆིས་པ་བཅབས་པ་དེའི་སླད་དུ་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་སྩལ་ཏེ། བདག་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་དཔག་ཏུ་མ་མཆིས་པ་བཅབས་པ་དེའི་སླད་དུ་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་བགྱིས་ལགས་ཏེ་དགེ་འདུན་ལ་ཞག་དྲུག་མགུ་བ་བགྱི་བ་གསོལ་ནས་དགེ་འདུན་གྱིས་བདག་དགེ་སློང་འཆར་ཀ་ཆེ་གེ་མོ་ལས་བྱུང་པའི་དགེ་འདུན་ལྷག་མའི་ལྟུང་བ་བྱུང་ལ་དཔག་ཏུ་མ་མཆིས་པ་བཅབས་པ་དེའི་སླད་དུ་དག་པའི་མཐའ་ཅན་ཟླ་བ་བཞི་ཡོངས་སུ་དག་པ་བགྱི་པ་ལ་ཞག་དྲུག་མགུ་བར་བགྱི་བ་སྩལ་ཏེ། བདག་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་དཔག་ཏུ་མ་མཆིས་པ་བཅབས་པ་དེའི་སླད་དུ་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་ཡང་བགྱིས་ལགས་ཞག་དྲུག་མགུ་བར་ཡང་བགྱིས་ཏེ། དགེ་འདུན་ལས་དབྱུང་བ་གསོལ་ན། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བ་ཉེ་བར་བཟུང་སྟེ། བདག་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། དཔག་ཏུ་མ་མཆིས་པ་བཅབས་པ་དེའི་སླད་དུ་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་ཡང་བགྱིས། ཞག་དྲུག་མགུ་བ་ཡང་བགྱིས་པ་ལ་དབྱུང་བ་སྩལ་དུ་གསོལ། །ལན་གསུམ་དུ་བཟླས། གཞི་ནས་ཡོངས་སུ་གནས་པ་བྱས་པས་མགུ་བ་བྱས་པ་དང༌། ཡང་གཞི་ནས་བསླང་སྟེ། ཡོངས་སུ་གནས་པ་བྱས་པས་མགུ་བ་བྱས་པ་དབྱུང་བར་གསོལ་བའི་སྔགས་ལ་ཡང་དེ་བཞིན་དུ་སྦྱར་རོ། །དགེ་འདུན་བཙུན་པ་རྣམས་གསན་དུ་གསོལ། །དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་དཔག་ཏུ་མ་མཆིས་པ་བཅབས་པའི་དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། དཔག་ཏུ་མ་མཆིས་པ་བཅབས་པ་དེའི་སླད་དུ་དགེ་འདུན་ལས་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་གསོལ་ན། དགེ་འདུན་གྱིས་དགེ་སློང་འཆར་
ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། དཔག་ཏུ་མ་མཆིས་པ་བཅབས་པ་དེའི་སླད་དུ་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་སྩལ་ཏེ། དགེ་སློང་འཆར་ཀ་འདིས་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་དཔག་ཏུ་མ་མཆིས་པ་བཅབས་པ་དེའི་སླད་དུ་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་བགྱིས་ལགས་ཏེ། དགེ་འདུན་ལས་ཞག་དྲུག་མགུ་བར་བགྱི་བ་གསོལ་ན། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་དཔག་ཏུ་མ་མཆིས་པ་བཅབས་པ་དེའི་སླད་དུ་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་བགྱིས་པ་འདི་ལ་ཞག་དྲུག་མགུ་བར་བགྱི་བསྩལ་ཏེ། དགེ་སློང་འཆར་ཀ་འདིས་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། དཔག་ཏུ་མ་མཆིས་པ་བཅབས་པ་དེའི་སླད་དུ་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་ཡང་བགྱིས་ལགས། ཞག་དྲུག་མགུ་བ་ཡང་བགྱིས་ལགས་ཏེ། དགེ་འདུན་ལས་དབྱུང་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། དཔག་ཏུ་མ་མཆིས་པ་བཅབས་པ་དེའི་སླད་དུ་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་ཡང་བགྱིས། ཞག་དྲུག་མགུ་བ་ཡང་བགྱིས་པ་དབྱུང་བར་བགྱིའོ། །འདི་ནི་གསོལ་བའོ། །ལས་བརྗོད་པ་གསུམ་ཡང་དེ་བཞིན་དུ་བྱའོ། །གཞི་ནས་ཡོངས་སུ་གནས་པ་བྱས་པས་མགུ་བ་བྱས་པ་དང༌། ཡང་གཞི་ནས་བསླང་སྟ་ཡོངས་སུ་གནས་པ་བྱས་པས་མགུ་བ་བྱས་པ་དབྱུང་བའི་སྔགས་ལ་ཡང་དེ་བཞིན་དུ་སྦྱར་རོ། །འདི་ལ་ཇི་སྙེད་ལ་སེམས་པ་དེ་སྙེད་དུ་གཏོགས་པ་ཉིད་རྗེས་སུ་བསྒྲུབ་པོ་ཞེས་བྱ་བ་ནི། ཡོངས་སུ་གནས་པ་དང་མགུ་བར་བྱ་བ་འདི་ལ་ལྟུང་བ་ཇི་སྙེད་པ་ལ་ཕྱིར་བཅོས་པར་སེམས་པ་དེ་སྙེད་དུ་གཏོགས་པ་ཉིད་རྗེས་སུ་བསྒྲུབ་པར་བྱ་སྟེ། ལྟུང་བ་མང་པོ་དག་ལ་ཡང་སྤོ་བ་དང༌། མགུ་བར་བྱ་བ་གཅིག་རྗེས་སུ་བསྒྲུབ་པར་བྱ་བ་ཉིད་ཀྱིས་ཆོག་གོ་ཞེས་བྱ་བའི་ཐ་ཚིག་གོ །ཚད་ནི་རྣམ་པ་གཉིས་ཏེ་མཚན་མོའི་ཚད་དང་ལྟུང་བའི་ཚད་
དོ། །དེ་ལ་མཚན་མོའི་ཚད་ངེས་པར་མི་ཤེས་པའི་ཆོ་ག་ནི་བསྟན་ཟིན་ཏོ། །ལྟུང་བའི་ཚད་ངེས་པར་མི་ཤེས་པའི་ཆོ་ག་བཤད་པར་བྱ་སྟེ། ངེས་པར་མི་ཤེས་ན་དེ་དཔག་ཏུ་མེད་པ་ལ་བརྟེན་པར་བྱའོ་ཞེས་བྱ་བ་ནི། ལྟུང་བའི་ཚད་ངེས་པར་མི་ཤེས་ན་ལྟུང་བ་དེ་དཔག་ཏུ་མེད་པ་བྱུང་ངོ་ཞེས་བྱ་བ་དེ་ལ་བརྟེན་པར་བྱ་སྟེ། ཕྱིར་བཅོས་པ་དང་འདྲ་བའི་ཕྱིར་དེ་ལྟར་ཤེས་པར་བྱའོ། །དེའི་སྐབས་སུ་སྔགས་ཀྱི་ཚིག་འདི་ལྟར་སྦྱར་བར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། །བདག་དགེ་སློང་འཆར་ཀ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་དཔག་ཏུ་མ་མཆིས་པ་བྱུང་ལ། ཟླ་བ་ཕྱེད་དམ་དཔག་ཏུ་མ་མཆིས་པ་བཅབས་པས་བདག་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་དཔག་ཏུ་མ་མཆིས་པ་བྱུང་ལ། ཟླ་བ་ཕྱེད་དམ་དཔག་ཏུ་མ་མཆིས་པ་བཅབས་པ་དེའི་སླད་དུ་དགེ་འདུན་ལས་ཟླ་བ་ཕྱེད་དམ་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་གསོལ་ན། །ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བ་ཉེ་བར་གཟུང་སྟེ། བདག་དགེ་སློང་འཆར་ཀ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་དཔག་ཏུ་མ་མཆིས་པ་བྱུང་ལ། ཟླ་བ་ཕྱེད་དམ་དཔག་ཏུ་མ་མཆིས་པ་བཅབས་པ་དེའི་སླད་དུ་ཟླ་བ་ཕྱེད་དམ་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་སྩལ་དུ་གསོལ། ལན་གསུམ་དུ་བཟླས། ཡོངས་སུ་གནས་པ་སྦྱིན་པ་ལ་སོགས་པ་ལྷག་མ་རྣམས་ལ་ཡང་དེ་བཞིན་དུ་སྦྱར་བར་བྱའོ། །མང་པོ་ཉིད་ལ་ནི་ཚད་ཤིན་ཏུ་མང་པོ་དང་ལྡན་བཞེས་སོ་ཞེས་བྱ་བ་ནི། ལྟུང་བ་དག་མང་པོ་ཉིད་ཡིན་ན་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་ཚད་ཤིན་ཏུ་མང་པོ་དང་ལྡན་པ་བྱུང་ལ་ཞེས་བྱ་བ་ལ་བརྟེན་པར་བྱའོ་ཞེས་བྱ་བའི་ཐ་ཚིག་གོ །དེའི་སྐབས་སུ་སྔགས་ཀྱི་ཚིག་འདི་ལྟར་སྦྱར་བར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་ཚད་ཤིན་ཏུ་མང་པོ་དང་ལྡན་པ་བྱུང་ལ། ཟླ་བ་ཕྱེད་དམ་དཔག་ཏུ་མ་མཆིས་པ་བཅབས་པས། བདག་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་ཚད་ཤིན་ཏུ་
མང་པོ་དང་ལྡན་པ་བྱུང་ལ་ཟླ་བ་བྱེད་དམ་དཔག་ཏུ་མ་མཆིས་པ་བཅབས་པས་དེའི་སླད་དུ་དགེ་འདུན་ལས་ཟླ་བ་ཕྱེད་དམ་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་གསོལ་ན། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བ་ཉེ་བར་གཟུང་སྟེ། བདག་དགེ་སློང་འཆར་ཀ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་ཚད་ཤིན་ཏུ་མང་པོ་དང་ལྡན་པ་བྱུང་ལ་ཟླ་བ་ཕྱེད་དམ་དཔག་ཏུ་མ་མཆིས་པ་བཅབས་པ་དེའི་སླད་དུ་ཟླ་བ་ཕྱེད་དམ་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་སྩལ་དུ་གསོལ། ལན་གསུམ་དུ་བཟླས། ཡོངས་སུ་གནས་པ་སྦྱིན་པ་ལ་སོགས་པ་ལྷག་མ་རྣམས་པ་ཡང་དེ་བཞིན་དུ་སྦྱར་རོ།། །།བམ་པོ་དྲུག་ཅུ་བཞི་པ། དུས་རྣམས་ནི་ལྷག་པས་སོ་ཞེས་བྱ་བ་ནི། ལྟུང་བ་བཅབས་པའི་དུས་ཐ་དད་པ་རྣམས་ནི་དེ་དག་གི་ནང་ནས་ལྟུང་བ་གང་གིས་བཅབས་པའི་དུས་ཡུན་རིང་ཞིང་ལྷག་པ་དེ་ལ་བརྟེན་པར་བྱའོ། །འདི་སྐད་བསྟན་ཏེ། ལྟུང་བ་དུ་མ་དང་བཅབས་པའི་དུས་ཐ་དད་པ་རྣམས་ལ་གང་གི་ཚེ་ཡོངས་སུ་གནས་པ་དང༌། མགུ་བར་བྱ་བ་སྦྱིན་པ་དེའི་ཚེ་ན་ལྟུང་བ་དེ་དག་གི་ནང་ནས་གང་གིས་བཅབས་པའི་དུས་ཡུན་རིང་བའི་ལྟུང་བ་གཅིག་གིས་དུས་ཀྱི་ལྟུང་བ་གཞན་དག་གི་དུས་ཀྱང་བརྗོད་པར་བྱ་བ་འགྲུབ་པར་འགྱུར་རོ། །མིང་དག་ལ་ནི་སོགས་པ་དང་ལྡན་པ་ཉིད་དུའོ་ཞེས་བྱ་བ་ནི། བསམས་བཞིན་དུ་ཁུ་བ་ཕྱུང་བ་ལ་སོགས་པ་ནི་འདིར་མིང་དུ་གསུངས་པར་རིག་པར་བྱ་སྟེ། སྡེ་ཚན་གྱིས་མིང་ལ་ཐ་དད་པ་མེད་པའི་ཕྱིར་རོ། །གང་གི་ཕྱིར་དགེ་འདུན་ལྷག་མ་ཞེས་བྱ་བ་དེ་ལ་དབྱེ་བ་འགའ་ཡང་མེད་པ་དེའི་ཕྱིར་བསམས་བཞིན་དུ་ཁུ་བ་ཕྱུང་བ་ལ་སོགས་པའི་མིང་དེ་དག་ལ་ནི་སོགས་པ་དང་ལྡན་པ་ཉིད་དུ་བརྟེན་པའོ། །དེའི་དོན་དུ་ལྟུང་བ་རྣམས་ཀྱི་མིང་སོ་སོར་བརྗོད་པར་བྱ་སྟེ། ཆེ་གེ་མོ་ལ་སོགས་པ་ཞེས་བྱ་བའི་དོན་གྱིས་ལྟུང་བ་གཞན་དག་གི་མིང་བརྗོད་པ་ལ་བརྟེན་པར་བྱའོ་ཞེས་བྱ་བའི་ཐ་ཚིག་གོ །དེའི་སྐབས་སུ་སྔགས་ཀྱི་ཚིག་འདི་ལྟར་སྦྱར་བར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་འཆར་ཀ་ལ་བསམས་བཞིན་དུ་ཁུ་བ་ཕྱུང་བ་ལ་སོགས་པའི་དགེ་འདུན་ལྷག་མའི་ལྟུང་བ་བྱུང་བ་ལ་སོགས་པ། ལུས་ཀྱི་རེག་པ་ལས་བྱུང་བའི་
དགེ་འདུན་ལྷག་མའི་ལྟུང་བ་དང༌། འཁྲིག་པ་དང་ལྡན་པ་སྨྲ་བ་ལས་བྱུང་བའི་དགེ་འདུན་ལྷག་མའི་ལྟུང་བ་དང༌། བསྙེན་བཀུར་བསྔགས་པ་ལས་བྱུང་བའི་དགེ་འདུན་ལྷག་མའི་ལྟུང་བ་དང༌། སྨྱན་བགྱིས་པ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། ཟླ་བ་ཕྱེད་དམ་དཔག་ཏུ་མ་མཆིས་པ་བཅབས་པ་དེའི་ཞེས་བྱ་བ་ལ་སོགས་པར་སྦྱར་རོ། །ཅི་བྱེ་བྲག་མེད་པར་དང་པོ་གང་ཡིན་པ་ཉིད་ལ་བརྟེན་པར་བྱའམ་ཞེ་ན། དེའི་ཕྱིར། ལྕི་བ་ཉིད་དང་བསམ་པ་དྲག་པོས་བྱས་པ་ཉིད་དག་གིས་དང་པོ་ཉིད་དུའོ་ཞེས་བྱ་བ་སྨྲས་ཏེ། འདིར་ལྕི་བ་ཉིད་ཅེས་བྱ་བ་ནི། གཞི་ལས་ལྟུང་བ་གང་ལ་ལྟུང་བ་དུ་མ་འབྱུང་བ་དེ་ནི་ལྕི་བ་ཉིད་དོ། །བསམ་པ་དྲག་པོས་བྱས་པ་ཉིད་ནི་ལྟུང་བ་གང་འདོད་ཆགས་སམ་ཞེ་སྡང་ངམ་གཏི་མུག་གི་བསམ་པ་དྲག་པོས་ཀུན་ནས་བསླང་བ་སྟེ། ལྟུང་བ་ཕྱིར་བཅོས་པའི་སྐབས་འདིར་ལྕི་བ་ཉིད་དང་བསམ་པ་དྲག་པོས་བྱས་པ་ཉིད་གང་ཡིན་པའི་མིང་དང་པོར་བརྗོད་པར་བྱའི། སྔར་ལྟུང་བ་གང་བྱུང་བ་དེའི་མིང་དང་པོར་ནི་སྨོས་པར་ནི་མི་བྱའོ། །འདིར་གཞུང་ནི་སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་དགེ་སློང་ལ་དགེ་འདུན་ལྷག་མའི་ལྟུང་བ་བྱུང་ཞིང་བསམ་བཞིན་དུ་ཁུ་བ་ཕྱུང་བ་ལས་བྱུང་བ་ནི་དགུང་གཅིག་བཅབས་ལ། འཛིན་པ་ལས་བྱུང་བ་ནི་དགུང་གཉིས་བཅབས་པ་ནས། བཀའ་བློ་མི་བདེ་བ་ལས་བྱུང་བ་དགུང་བཅུ་གསུམ་བཅབས་པའི་བར་དུ་བྱུང་ན། བཙུན་པ་ལྟུང་བ་དེ་དག་དུས་གཅིག་དང་སྐད་ཅིག་གཅིག་ལ་ལས་བགྱིད་པ་གཅིག་གིས་ཡོངས་སུ་གནས་པ་དང༌། གཞི་ནས་ཡོངས་སུ་གནས་པ་དང༌། མགུ་བར་བགྱི་བ་དང༌། གཞི་ནས་མགུ་བར་བགྱི་བ་སྩལ་ཞིང་དབྱུང་བར་བགྱི་བ་དང༌། ལས་དེ་དག་ཀྱང་བགྱིད་པར་བརྗོད་པ་དང་དེས་དགེ་འདུན་ལ་ཡང་འགལ་ཚབས་ཅན་དུ་མི་འགྱུར་བར་རུང་ངམ། ཉེ་བ་འཁོར་རུང་སྟེ། བསམས་བཞིན་དུ་ཁུ་བ་ཕྱུང་བ་ལས་བྱུང་བ་ཞག་གཅིག་བཅབས་པའི་ལྟུང་བ་གང་ཡིན་པ་ནས་བཀའ་བློ་མི་བདེ་བ་ལས་བྱུང་བ་ཞག་བཅུ་གསུམ་བཅབས་པའི་བར་གྱི་ལྟུང་བ་གང་ཡིན་པ་དེ་དག་ལས། དམ་པ་དང་རབ་ཏུ་དམ་པ་དང༌། ལྕི་བ་དང་ཞག་མང་དུ་བཅབས་པ་གང་ཡིན་པ་དེའི་ཕྱིར་ཡོངས་སུ་གནས་པ་དང་གཞི་ནས་ཡོངས་སུ་
གནས་པ་དང༌། མགུ་བར་བྱ་བ་དང་གཞི་ནས་མགུ་བར་བྱ་བ་སྦྱིན་ཞིང་དབྱུང་བར་བྱ་སྟེ། ལས་དེ་དག་ཀྱང་བྱས་པར་བརྗོད་པར་བྱ་ལ། དེས་དགེ་འདུན་ལ་ཡང་འགལ་ཚབས་ཅན་དུ་མི་འགྱུར་རོ་ཞེས་གསུངས་པ་ཡིན་ནོ། །འདིར་མངོན་པར་ཞེན་པས་བྱས་པས་ནི་དམ་པ་ཡིན་ལ། མངོན་པར་ཞེན་པ་ཤས་ཆེན་པོས་བྱས་པ་ནི་རབ་ཏུ་དམ་པ་ཡིན་པར་རིག་པར་བྱའོ། །སྤྱོད་པ་ལ་སྔོན་བྱུང་བ་གཞན་ཕྱིར་གསོ་བར་འདོད་པ་སྐྱེས་ན་ཐ་དད་པར་སྦྱིན་ཞིང་ཅིག་ཅར་སྤྱོད་དོ་ཞེས་བྱ་བ་ནི། ཡོངས་སུ་གནས་པ་དང་མགུ་བར་བྱ་བ་སྤྱོད་པའི་གང་ཟག་ལ་སྔོན་ལྟུང་བ་བྱུང་བ་གཞན་ཕྱིར་གསོ་བར་འདོད་པ་སྐྱེས་ན། དེ་ལ་ལྟུང་བ་དེའི་ཡོངས་སུ་གནས་པ་དང་མགུ་བར་བྱ་བ་སྦྱིན་པ་ནི་ཐ་དད་པར་སྦྱིན་པར་བྱ་ཞིང་སྤྱད་པ་ནི་ཅིག་ཅར་སྤྱད་དུ་རུང་བ་སྟེ། འདི་ལ་ལྟུང་བ་གཞན་ཡིན་པས་སྤྱད་པ་ཡང་ཐ་དད་པར་སྤྱད་པའི་ཆོ་ག་ཡིན་ནོ་སྙམ་དུ་བསམ་པར་མི་བྱའོ། །དེ་བཅབས་པ་ཉིད་ཡིན་ན་མགུ་བར་བྱ་བ་ལ་མི་སྲིད་དོ་ཞེས་བྱ་བ་ནི། ཅིག་ཅར་སྤྱད་པ་དེ་བཅབས་པའི་རྒྱུ་ལས་ཡོངས་སུ་གནས་པ་བྱེད་པ་ཉིད་ཡིན་ན། མགུ་བར་སྤྱོད་པ་དང་ཡོངས་སུ་གནས་པ་དེ་ཅིག་ཅར་སྤྱད་པ་དེ་མི་སྲིད་པ་སྟེ། མགུ་བར་བྱ་བ་ནི་སེམས་མགུ་བར་བྱ་བའི་ཕྱིར་ཡིན་ལ། ཡོངས་སུ་གནས་པ་བཅབས་པ་ནི་ཁ་ན་མ་ཐོ་བ་གཞོམ་པའི་ཕྱིར་ཡིན་པའི་ཕྱིར་རོ། །དེ་བས་ན་དེ་གཉིས་ཅིག་ཅར་སྤྱད་པ་ནི་མི་སྲིད་དོ། །དགེ་སློང་དག་ཁྱེད་ཀྱིས་གང་ཟག་དེ་ལ་ལྟུང་བ་གཉི་གའི་རྒྱུད་ལས་སྔ་མ་ལ་ནི་ཇི་ལྟར་བཅབས་པའི་སྤོ་བ་བྱིན་ཅིག །ཕྱི་མལ་ནི་ཞག་དྲུག་མགུ་བར་བྱ་བ་བྱིན་ཅིག་ཅེས་བྱ་བ་ལ་སོགས་པ་གསུངས་པ་གང་ཡིན་པ་དེས་ནི་མགུ་བར་སྤྱོད་པའི་གནས་སྐབས་སུ་ཡོངས་སུ་གནས་པ་ཡང་སྤྱད་པ་དེ་ལྟར་བསྟན་པར་ཤེས་པར་མི་བྱ་སྟེ། དེ་ན་ཕྱིར་བཅོས་པ་ཙམ་བསྟན་པ་ཡིན་པས་དེར་ནི་སྔར་བཅབས་པའི་ཕྱིར་ཡོངས་སུ་གནས་པ་བྱེད་དུ་བཅུག་པ་དེའི་འོག་ཏུ་དབྱུང་བའི་ཕྱིར་མགུ་བ་བྱེད་དུ་ཆུག་ཤིག་ཅེས་གསུངས་པ་ཡིན་གྱི། མགུ་བ་དང་ཡོངས་སུ་གནས་པ་གཉིས་ཅིག་ཅར་སྤྱོད་དུ་གཞུག་པ་ནི་མ་ཡིན་ནོ། །ཅིའི་ཕྱིར་གང་ཟག་གི་གཞི་ལ་དུས་དང་དུས་མ་ཡིན་པར་བསྡུས་པ་འབྱུང་བའི་གཞི་ཞེས་མིང་གཞན་དུ་བྱས་ཤེ་ན། དོན་དང་ལྡན་པར་བསྟན་པའི་ཕྱིར་ཏེ། དུས་དང་དུས་
མ་ཡིན་པར་ཞེས་བྱ་བ་ནི། འདི་ནི་ལྟུང་བ་བཅབས་པ་སྤྱད་པ་རྣམས་ཀྱི་ལྡང་བའི་དུས་སོ། །འདི་ནི་དུས་མ་ཡིན་ནོ་ཞེས་བྱ་བར་སྦྱར་རོ། །བསྡུས་པ་འབྱུང་བ་ཞེས་བྱ་བ་ནི། ལྟུང་བ་རྣམས་ཀྱི་ཆོག་མདོར་བསྡུས་པ་འདིས་ཅིག་ཅར་དོན་གཅིག་ཏུ་འབྱུང་བའོ། །དུས་དང་དུས་མ་ཡིན་པར་བསྡུས་པ་འབྱུང་བའི་གཞིའོ་ཞེས་བྱ་བ་གང་ཟག་གི་གཞི་འདུལ་བའི་གཞིའི་སྐབས་སུ་གཏོགས་པ་བཤད་ཟིན་ཏོ། །ད་ནི་དུས་དང་དུས་མ་ཡིན་པར་བསྡུས་པ་འབྱུང་བའི་གཞི་ཞུ་བའི་སྐབས་སུ་བརྗོད་པར་བྱ་སྟེ། ཉིན་མཚན་གྱི་ཐ་མའི་ཆ་མ་ཡིན་པ་ལ་འཆབ་པ་མི་འབྱུང་ངོ་ཞེས་བྱ་བ་ནི། ཉིན་མཚན་གྱི་ཐ་མའི་ཆ་མ་ཡིན་པ་ཞེས་བྱ་བ་སྐྱ་རེངས་འཆར་བའི་སྐད་ཅིག་གི་མདུན་རོལ་ཚུན་ཆད་དེ། དེ་ལ་འཆབ་པ་འབྱུང་བར་མི་འགྱུར་རོ། །སྐྱ་རེངས་ཤར་ན་ནི་འཆབ་པ་འབྱུང་བ་ཁོ་ནར་འགྱུར་རོ། །བརྗོད་པའི་ཡན་ལག་མེད་ན་དེའི་སེམས་མ་ཡིན་པ་ཉིད་འཆབ་པ་མ་ཡིན་ནོ་ཞེས་བྱ་བ་ནི། བརྗོད་པའི་ཡན་ལག་ཏུ་གྱུར་པ་རང་བཞིན་དུ་གནས་པ་དང༌། ལྟ་བ་ཐ་མི་དད་པ་དང༌། བསྙེན་པར་རྫོགས་པ་དང་བཅས་པ་དང༌། མཚན་ཐ་མི་དད་པ་དང༌། མཚམས་ཀྱི་ནང་ན་གནས་པ་ཞེས་བྱ་བ་ལ་སོགས་པའི་གང་ཟག་གང་ཡིན་པ་དེ་མེད་ན། ཉིན་མཚན་གྱི་མཐའ་མའི་ཆ་དེ་ལ་ཡང་དེའི་སེམས་མ་ཡིན་པ་ཉིད་ཅེས་བྱ་བ་བརྗོད་པ་དེའི་སེམས་མ་ཡིན་པ་ཉིད་ཡོད་ཀྱང་དེ་ལ་འཆབ་པ་མ་ཡིན་ནོ། །བརྗོད་པའི་ཡན་ལག་ཡོད་ལ་གལ་ཏེ་མི་བརྗོད་དོ་སྙམ་དུ་མི་བརྗོད་པའི་བསམ་པ་སྐྱེད་ན། དེའི་ཚེ་འཆབ་པ་ཁོ་ནར་འགྱུར་རོ། །བགྲོད་དུ་མེད་དམ་སོང་བའི་དབང་ནི་མེད་པ་དང་འདྲ་བ་ཉིད་དོ་ཞེས་བྱ་བ་ནི། བརྗོད་པའི་ཡན་ལག་ཡོད་དུ་ཟིན་ཀྱང་གལ་ཏེ་རྐྱེན་འགའ་ཞིག་གིས་བརྗོད་དུ་འགྲོ་བའི་གོ་སྐབས་མེད་དམ་བདག་ཉིད་གནས་དེ་ནས་གཞན་དུ་སོང་བར་གྱུར་ན་དེའི་དབང་གིས་ཡན་ལག་དེ་མེད་པ་ནི་དེའི་བརྗོད་པའི་ཡན་ལག་དེ་མེད་པ་དང་འདྲ་བ་ཉིད་ཡིན་ནོ། །འདི་སྐད་བསྟན་ཏེ། བརྗོད་པའི་ཡན་ལག་ཉེ་བར་གནས་སུ་ཟིན་ཀྱང་རྐྱེན་འགའ་ཞིག་གིས་བདག་ཉིད་དེར་བརྗོད་དུ་འགྲོ་བའི་སྐབས་མེད་དམ། བདག་ཉིད་གནས་དེ་ནས་གཞན་དུ་སོང་བར་གྱུར་བའི་དབང་དག་གིས་བརྗོད་པའི་ཡན་ལག་མེད་པ་ན་མི་བརྗོད་པའི་སེམས་གང་ཡིན་པ་དེ་ནི་འཆབ་པ་མ་
ཡིན་ནོ། །བགྲོད་དུ་མེད་པ་དང་སོང་བ་དང་གཉིས་ཀྱི་བརྗོད་པ་མ་གྲུབ་པ་འབའ་ཞིག་མེད་པ་དང་འདྲ་བ་ཉིད་ཡིན་པར་མ་ཟད་ཀྱི་འདི་ལྟར་དེའི་དོན་གྱི་དབང་གིས་བྱས་པ་ཡང་ངོ་ཞེས་བྱ་བ་ཡང་མེད་པ་དང་འདྲ་བ་ཉིད་ཡིན་ཏེ། དེའི་དོན་གྱི་དབང་གིས་ཞེས་བྱ་བ་ནི། འཆབ་པར་འགྱུར་དུ་དོགས་བའི་དོན་གྱི་དབང་གིས་ཏེ། བརྗོད་པའི་ཡན་ལག་ཏུ་གྱུར་པའི་གང་ཟག་ཉེ་བར་གནས་པ་ན་ལྟུང་བ་བྱུང་བ་དེ་འདི་སྙམ་དུ་གལ་ཏེ་དེའི་གན་དུ་སོང་ལ་མ་བརྗོད་ན་འཆབ་པའི་ཉེས་པར་འགྱུར་དུ་དོགས་པས་དེའི་དབང་གིས་དེར་མི་འགྲོ་འམ། གཞན་དུ་སོང་བས་བརྗོད་པ་མ་བྱས་ན་དེ་ལྟར་ན་ཡང་བཅབས་པར་མི་འགྱུར་བ་ཁོ་ན་ཡིན་ནོ། །འདི་སྐད་བསྟན་ཏེ་སོང་སྟེ་མ་བརྗོད་ན་བདག་ལ་བཅབས་པའི་ཉེས་པར་འགྱུར་རོ་སྙམ་དུ་དོགས་པའི་བསམ་པས་གལ་ཏེ་བརྗོད་པའི་ཡན་ལག་གི་དྲུང་དུ་མི་འགྲོ་འམ། གལ་ཏེ་གནས་དེ་ནས་གཞན་དུ་སོང་བར་གྱུར་ན། དེ་ལྟར་ན་ཡང་བརྗོད་པའི་ཡན་ལག་མེད་པ་དང་འདྲ་བ་ཉིད་དུ་རིག་པར་བྱ་སྟེ། དེའི་ཚེ་ཡང་འཆབ་པ་མི་འབྱུང་ངོ༌། །འདིར་གཞུང་ནི། བཙུན་པ་རེ་ཞིག་དགེ་སློང་ལྟུང་བ་དང་བཅས་པ། དགེ་སློང་མི་གནས་པའི་གནས་ན་མཆིས་ཤིང་གང་ལ་ཡང་བརྗོད་པར་མི་བགྱིད་ན། བཅབས་པར་བརྗོད་པར་བགྱི་འམ་ཉེ་བ་འཁོར་མི་བྱའོ། །བཙུན་པ་རེ་ཞིག་དགེ་སློང་ལྟུང་བ་དང་བཅས་པ་དགེ་སློང་རྣམས་དང་ལྷན་ཅིག་གདུགས་ཡོལ་བར་བགྱིས་ནས་མཚན་མོ་དགེ་སློང་མི་གནས་པའི་གནས་ན་མཆིས་ཤིང་གང་ལ་ཡང་བརྗོད་པར་མི་བགྱིད་ན་བཅབས་པར་བརྗོད་པར་བགྱིའམ། ཉེ་བ་འཁོར་མི་བྱའོ་ཞེས་གསུངས་པ་ཡིན་ནོ། །དོན་མེད་པ་ནི་ཉེས་བྱས་སོ་ཞེས་བྱ་བ་ནི། དོན་ཆུང་ཟད་ལ་ཡང་མི་ལྟོས་པར་མི་འགྲོ་འམ། གཞན་དུ་སོང་བས་ནི་ཉེས་བྱས་སུ་འགྱུར་བའོ། །མཐའི་མདུན་རོལ་དུ་ཡང་ངོ་ཞེས་བྱ་བ་ནི། ཉིན་མཚན་གྱི་མཐའི་མདུན་རོལ་དུ་བཅབས་པ་ཡང་ཉེས་བྱས་སུ་འགྱུར་བའོ། །འཆབ་པའི་སེམས་མ་བཏང་བ་ཉིད་ནི་དེའི་སེམས་ཉིད་ཡིན་ནོ་ཞེས་བྱ་བ་ནི་འཆབ་པ་ཀུན་དུ་སྤྱོད་པ་ཁོ་ན་ཉིན་མཚན་གྱི་མཐར་འཆབ་པའི་སེམས་ཡིན་ཞིང༌། འཆབ་པ་བསླང་བར་འགྱུར་བ་འབའ་ཞིག་ཏུ་མ་ཟད་ཀྱི། འདི་ལྟར་འཆབ་པའི་སེམས་ཀུན་དུ་མི་སྤྱོད་ཀྱང་སེམས་མ་བཏང་ཞིང་ཡོངས་སུ་མ་སྤངས་པ་ཉིད་ཀྱང་འཆབ་པ་དེའི་སེམས་ཉིད་
ཡིན་པར་རིག་པར་བྱའོ། །འདིར་གཞུང་ནི་གང་གི་མདུན་དུ་འཆབ་པ་འབྱུང་བར་འགྱུར། རང་བཞིན་དུ་གནས་པ་དང་མཚམས་ཀྱི་ནང་ན་གནས་པ་ལ་གལ་ཏེ་མི་བརྗོད་ན་དེ་ཕྱིན་ཆད་འཆབ་པ་འབྱུང་བར་འགྱུར་རོ་ཞེས་གསུངས་པ་ཡིན་ནོ། །འདིར་བརྗོད་པ་རྗེས་སུ་སྒྲུབ་པར་མི་བྱེད་པ་ཙམ་གང་ཡིན་པ་ཁས་བླང་བར་བྱའི། འཆབ་པ་ལ་ཕྱོགས་པ་ཉིད་ནི་མ་ཡིན་པས། དེའི་ཕྱིར་མདོ་འདི་བྱས་སོ། །དགེ་སློང་ཕམ་པར་གྱུར་པས་ལྟུང་བ་ཕྱིར་མ་བཅོས་པ་ལ་ནི་ཉེས་པ་མེད་དོ་ཞེས་བྱ་བ་ནི། དགེ་སློང་ཕམ་པར་གྱུར་པས་ལྟུང་བ་ཕྱིར་མ་བཅོས་པ་ལ་ནི་ཉེས་པ་མེད་པའོ། །འདི་ནི་ཡོད་ལ་ཕྱིར་མི་འཆོས་པ་ཡང་ཉེས་བྱས་སོ་ཞེས་སྔར་སྨྲས་པ་དེའི་དམིགས་ཀྱིས་བསལ་བ་ཡིན་ཏེ། དེའི་སྡོམ་པ་ནི་དགོས་པ་མེད་པ་ཉིད་དུ་གྱུར་པའི་ཕྱིར་དེ་ལ་ཉེས་པ་མེད་པ་ཉིད་དུ་རིག་པར་བྱའོ། །དུས་དང་དུས་མ་ཡིན་པར་བསྡུས་པ་བྱུང་བའི་གཞི་ཞུ་བའི་སྐབས་སོ་ཞེས་བྱ་བ་དེ་ཞུ་བའི་སྐབས་ནས་བྱུང་བ་བཤད་ཟིན་ཏོ། །དུས་དང་དུས་མ་ཡིན་པར་བསྡུས་པ་འབྱུང་བའི་གཞི་རྫོགས་སོ་ཞེས་བྱ་བ་གང་ཟག་གི་གཞི་བཤད་ཟིན་ཏོ།། །།ད་ནི་ས་གཞན་ན་གནས་པའི་སྤྱོད་པའི་གཞི་བསྡུ་བའི་ཕྱིར་ཡོངས་སུ་གནས་པ་དང་མགུ་བར་བྱ་བ་སྤྱོད་པ་དག་གིས། དགེ་སློང་རང་བཞིན་དུ་གནས་པ་ལས་མངོན་པར་སྨྲ་བ་དང་ཕྱག་དང་མངོན་དུ་ལྡང་བ་དང་ཐལ་མོ་སྦྱར་བ་དང་གུས་པའི་ལས་དག་བདག་གིར་མི་བྱའོ་ཞེས་བྱ་བ་སྨྲས་ཏེ། ཡོངས་སུ་གནས་པ་དང་མགུ་བར་བྱ་བ་སྤྱོད་པ་དག་གིས་ཞེས་སྨོས་པས་ནི་གཞི་ནས་སྤོ་བ་དང༌། ཡང་གཞི་ནས་བསླང་སྟེ་ཡོངས་སུ་གནས་པ་དང༌། གཞི་ནས་མགུ་བར་བྱ་བ་དང༌། ཡང་གཞི་ནས་བསླང་སྟེ་མགུ་བར་བྱ་བ་སྤྱོད་པ་དག་ཀྱང་བསྡུས་པ་ཡིན་ནོ། །མངོན་པར་སྨྲ་བ་ཞེས་བྱ་བ་ནི། ཕྱག་འཚལ་ལོ་ཞེས་ཟེར་བ་སྟེ། མངོན་པར་ཞེས་བྱ་བ་ནི། བརྗོད་པའི་ཚིག་ཡིན་ལ། སྨྲས་པ་ཞེས་བྱ་བ་ནི། ཕྱག་འཚལ་ལོ་ཞེས་བྱ་བའི་ཚིག་ཡིན་པར་སྦྱར་རོ། །ཕྱག་ཅེས་བྱ་བ་ནི་ལུས་འདུད་པའོ། །མངོན་དུ་ལྡང་བ་ཞེས་བྱ་བ་ནི། མིག་སྔར་བབ་ན་སྟན་ལས་ལྡང་བའོ། །ཐལ་མོ་སྦྱར་བ་ཞེས་བྱ་བ་ནི། ཐལ་མོ་སྦྱར་ཞིང་འདུད་པའོ། །གུས་པའི་ལས་དག་ཅེས་བྱ་བ་ནི་ལག་པ་རྐྱོང་བ་དང་བསྩུ་བ་ལ་སོགས་པ་མཆོད་པའི་ལས་
གཞན་དག་བསྡུའོ། །དེ་གཉིས་ཀྱིས་མི་བྱ་བ་གང་ཡིན་པ་དེའི་སྐབས་གཞན་དག་གིས་ཀྱང་དེ་དག་ལའོ་ཞེས་བྱ་བ་ལ། དེ་གཉིས་ཀྱིས་ཞེས་བྱ་བ་ནི་ཡོངས་སུ་གནས་པ་དང་མགུ་བར་བྱ་བ་སྤྱོད་པ་དེ་གཉིས་ཀྱིས་སོ། །མི་བྱ་བ་གང་ཡིན་པ་དེའི་སྐབས་ཞེས་བྱ་བ་ནི། དགེ་སློང་རང་བཞིན་དུ་གནས་པ་ལས་མངོན་པར་སྨྲ་བ་དང༌། ཕྱག་དང་མངོན་དུ་ལྡང་བ་དང་ཐལ་མོ་སྦྱར་བ་དང༌། གུས་པའི་ལས་དག་བདག་གིར་མི་བྱའོ་ཞེས་ཇི་སྐད་བསྟན་པ་དག་གོ །གཞན་དག་གིས་ཀྱང་ངོ་ཞེས་བྱ་བ་ནི། རང་བཞིན་དུ་གནས་པ་དག་གིས་ཀྱང་ངོ༌། །དེ་དག་ལའོ་ཞེས་བྱ་བ་ནི། གྲོ་བ་དང་མགུ་བར་བྱ་བ་སྤྱོད་པ་དེ་དག་ལ་མངོན་པར་སྨྲ་བ་ལ་སོགས་པ་དེ་དག་མི་བྱ་བའོ། །འདི་སྐད་བསྟན་ཏེ། རང་བཞིན་དུ་གནས་པ་དག་གིས་ཡོངས་སུ་གནས་པ་དང༌། མགུ་བར་བྱ་བ་སྤྱོད་པ་དེ་གཉིས་ལ་མངོན་པར་སྨྲ་བ་ལ་སོགས་པ་དེ་དག་མི་བྱའོ། །དེ་དང་ལྷན་ཅིག་ཏུ་གོམ་པ་བསྲི་བ་ཉིད་ལས་གཞན་པས་བཅག་པར་མི་བྱའོ་ཞེས་བྱ་བ་ནི། དེ་གཉིས་ཀྱིས་དགེ་སློང་རང་བཞིན་དུ་གནས་པ་དེ་དང་ལྷན་ཅིག་ཏུ་གོམ་པ་བསྲི་བ་ཉིད་མ་གཏོགས་པར་གོམ་པ་མཉམ་དུ་འདོར་བ་དང༌། གོམ་པ་མདུན་དུ་ཐལ་བར་འདོར་བ་དག་གིས་བཅག་པར་མི་བྱ་བའོ། །སྟན་ཆེས་དམའ་བ་ཉིད་ལས་གཞན་པས་འདུག་པར་ཡང་ངོ་ཞེས་བྱ་བ་ནི། ཡོངས་སུ་གནས་པ་དང་མགུ་བར་བྱ་བ་དེར་སྤྱོད་པ་དེ་གཉིས་ཀྱིས་དགེ་སློང་རང་བཞིན་དུ་གནས་པའི་དྲུང་དུ་སྟན་ཆེས་དམའ་བ་ཉིད་ལས་གཞན་པ་མཉམ་པའམ་མཐོ་བས་འདུག་པར་ཡང་མི་བྱ་ན། སྟན་གཅིག་ལ་ལྟ་སྨོས་ཀྱང་ཅི་དགོས་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། དེ་གཉིས་འདུག་པས་དགེ་སློང་རང་བཞིན་དུ་གནས་པ་དང་ལྷན་ཅིག་ཏུ་སྟན་ཆེས་དམའ་བ་ལ་འདུག་པར་བྱའི། མཉམ་པའམ་མཐོན་པོ་ལ་འདུག་པར་མི་བྱའོ། །ཕྱི་བཞིན་འབྲང་བའི་དགེ་སྦྱོང་གིས་བདག་ཉིད་ལས་གཞན་པས་ཁྱིམ་དག་ཏུ་འགྲོ་བ་ཡང་ངོ་ཞེས་བྱ་བ་ནི། ཡོངས་སུ་གནས་པ་དང་མགུ་བར་བྱ་བ་སྤྱོད་པ་དེ་གཉིས་ཀྱི་དགེ་སློང་རང་བཞིན་དུ་གནས་པ་དང་ལྷན་ཅིག་ཁྱིམ་དག་ཏུ་དེའི་ཕྱི་བཞིན་འབྲང་བའི་དགེ་སྦྱོང་གིས་བདག་ཉིད་ལས་གཞན་པ་དེའི་གྲོགས་སམ་དེའི་བླ་མའི་བདག་ཉིད་ཀྱིས་འགྲོ་བར་ཡང་མི་བྱ་
བའོ། །འདི་སྐད་བསྟན་ཏེ། དེ་གཉིས་གྲོང་དུ་འགྲོ་བས་རང་བཞིན་དུ་གནས་པའི་དགེ་སློང་གིས་ཕྱི་བཞིན་འབྲང་བའི་དགེ་སློང་གི་ཆོས་ཀྱིས་འགྲོ་བར་བྱའི། མདུན་དུ་འགྲོ་བའི་དགེ་སྦྱོང་གི་ཆོས་ཀྱིས་མི་བྱའོ། །གཡོགས་མ་གཅིག་ཏུ་མལ་བཤམ་པར་མི་བྱའོ་ཞེས་བྱ་བ་ནི། སྤོ་བ་དང་མགུ་བར་བྱ་བ་སྤྱོད་པ་དེ་གཉིས་ཀྱིས་དགེ་སློང་རང་བཞིན་དུ་གནས་པ་དང་ལྷན་ཅིག་ཏུ་ངོས་དང་སྟེང་གཡོགས་གཅིག་པའི་གནས་ཀྱི་ནང་ལ་མལ་བཅའ་བར་མི་བྱ་བའོ། །རབ་ཏུ་དབྱུང་བ་དང་བསྙེན་པར་རྫོགས་པ་དང་གནས་སྦྱིན་པ་དང་དགེ་ཚུལ་ཉེ་བར་གཞག་པ་དག་མི་བྱའོ་ཞེས་བྱ་བ་ནི། དེ་གཉིས་ཀྱིས་རབ་ཏུ་དབྱུང་བར་མི་བྱ། བསྙེན་པར་རྫོགས་པར་མི་བྱ། གནས་སྦྱིན་པར་མི་བྱ། དགེ་ཚུལ་ཉེ་བར་གཞག་པར་མི་བྱའོ། །གསོལ་བ་དང་བརྗོད་པ་དག་ཁས་མི་བླང་ངོ་ཞེས་བྱ་བ་ནི། དེ་གཉིས་ཀྱིས་དགེ་འདུན་གྱི་གསོལ་བ་དང་བརྗོད་པའི་ལས་དག་བྱེད་དུ་བཅུག་པ་ཁས་བླང་པར་མི་བྱ་བའོ། །འདི་སྐད་བསྟན་ཏེ། དེ་གཉིས་ཀྱིས་ཚོགས་ཀྱི་ཁ་སྐོང་བ་ཉིད་ཀྱི་ཡན་ལག་ཀྱང་མི་བྱའོ། །ལས་བྱེད་པ་དང་དགེ་སློང་མའི་སྟོན་པ་དང་དགེ་འདུན་གྱིས་ཡིད་བརྟན་པར་བསྐོ་བ་ཡང་ངོ་ཞེས་བྱ་བ་ཡང་ཁས་མི་བླང་ངོ་ཞེས་བྱ་བར་སྦྱར་ཏེ། དེ་གཉིས་ཀྱི་ལས་བྱེད་པར་བསྐོ་བ་དང༌། དགེ་སློང་མའི་སྟོན་པར་བསྐོ་བ་དང༌། དགེ་འདུན་གྱིས་ཡིད་བརྟན་པར་བསྐོ་བ་ཁས་བླང་བར་མི་བྱའོ། །དགེ་འདུན་གྱིས་ཡིད་བརྟན་པ་ཞེས་བྱ་བ་ནི། གནས་ཁང་བསྐོ་བ་ལ་སོགས་པའོ། །སྔར་བསྐོས་པས་ཀྱང་མི་བྱའོ་ཞེས་བྱ་བ་ནི། དེ་གཉིས་ལས་བྱེད་པ་ལ་སོགས་པ་དག་ཏུ་སྔར་བསྐོས་ན་ཡང་མི་བྱའོ། །དགེ་སློང་མ་རྣམས་ལ་བརྟེན་པར་མི་བྱ་བའོ་ཞེས་བྱ་བ་ཡང༌། སྔར་བསྐོས་ན་ཞེས་བྱ་བའི་རྗེས་བསྙགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །འདོན་པ་གཞན་ཡོད་ན་གསོ་སྦྱོང་ལ་སོ་སོར་ཐར་པ་གདོན་པར་མི་བྱའོ་ཞེས་བྱ་བ་ནི། འདོན་པར་བྱེད་པའི་དགེ་སློང་གཞན་ཡོད་ན་དེ་གཉིས་ཀྱིས་གསོ་སྦྱོང་ལ་སོ་སོར་ཐར་པའི་མདོ་གདོན་པར་མི་བྱ་བའོ། །དགེ་སློང་ལ་ཉམས་པས་གླེང་བར་མི་བྱའོ་ཞེས་བྱ་བ་ནི། དེ་གཉིས་ཀྱིས་དགེ་སློང་ལ་ཚུལ་ཁྲིམས་ཉམས་པ་དང་ལྟ་བ་ཉམས་པ་དང་ཆོ་ག་ཉམས་པ་དང་འཚོ་བ་ཉམས་པས་གླེང་བར་མི་བྱའོ། །
ཅི་ཐམས་ཅད་ལ་གླེང་བར་མི་བྱའམ་ཞེ་ན་དེའི་ཕྱིར་དགེ་འདུན་ལས་མ་བཀར་བ་ལའོ་ཞེས་བྱ་བ་སྨྲས་ཏེ། རང་བཞིན་དུ་གནས་པའི་དགེ་སློང་ལ་གླེང་བར་མི་བྱའོ། །དགེ་འདུན་ལས་བཀར་བ་དང་རང་བཞིན་དུ་གནས་པ་མ་ཡིན་པ་དག་ལ་ནི་བཀག་པ་མེད་དོ། །འདིར་གཞུང་ནི་དགེ་སློང་ཐ་དད་པར་གནས་པས་དགེ་སློང་རང་བཞིན་དུ་གནས་པའི་གདམས་ངག་གཞག་བར་མི་བྱ། གསོ་སྦྱོང་གཞག་པར་མི་བྱ། དགག་དབྱེ་གཞག་པར་མི་བྱ་ཞིང༌། རང་བཞིན་དུ་གནས་པའི་དགེ་སློང་ལ་གླེང་བར་མི་བྱ་དྲན་པར་མི་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །བརྗོད་པ་དང་བཅས་པ་ཉིད་དང་ཕུར་པ་དང་བཅས་པ་ཉིད་དག་མི་བྱའོ་ཞེས་བྱ་བ་ནི། དེ་གཉིས་ཀྱིས་དགེ་སློང་རང་བཞིན་དུ་གནས་པ་དགེ་འདུན་ལས་མ་བཀར་བ་ལ་བརྗོད་པ་དང་བཅས་པ་ཉིད་དང༌། ཕུར་པ་དང་བཅས་པ་ཉིད་དག་མི་བྱ་བའོ། །གདམས་ངག་དང་གསོ་སྦྱོང་དང་དགག་དབྱེ་དང་གསོལ་བ་དང་བརྗོད་པ་དག་གཞག་པར་མི་བྱའོ་ཞེས་བྱ་བ་ནི། དེ་གཉིས་ཀྱིས་དགེ་སློང་རང་བཞིན་དུ་གནས་པ་དགེ་འདུན་ལས་མ་བཀར་བའི་གདམས་ངག་གཞག་པར་མི་བྱ། གསོ་སྦྱོང་གཞག་པར་མི་བྱ། དགག་དབྱེ་གཞག་པར་མི་བྱ། གསོལ་བ་གཞག་པར་མི་བྱ། ལས་བརྗོད་པ་གཞག་པར་མི་བྱ་བའོ། །དེ་དང་བསྟེན་པར་མི་བྱའོ་ཞེས་བྱ་བ་ནི། དེ་གཉིས་ཀྱིས་དགེ་སློང་རང་བཞིན་དུ་གནས་པ་དེ་དང་བསྟེན་པར་མི་བྱ། བསྡོང་བར་མི་བྱ་སྟེ། མཇིང་བསྒྲིལ་བར་མི་བྱའོ་ཞེས་བྱ་བའི་ཐ་ཚིག་གོ །ཆད་པ་དེའི་རྒྱུ་བྱས་པ་སྤང་ངོ་ཞེས་བྱ་བ་ནི། དེ་གཉིས་ཀྱིས་ཡོངས་སུ་གནས་པ་དང༌། མགུ་བ་སྤྱད་པ་ལ་ཐུག་པའི་ཆད་པ་དེའི་རྒྱུ་དགེ་འདུན་ལྷག་མའི་ལྟུང་བ་བྱུང་བ་དང་བཅབས་པ་བྱས་པ་གང་ཡིན་པ་དེ་ལྟ་བུ་གཞན་དག་སྤང་བར་བྱ་བ་སྟེ། མི་སྤོང་ན་ཁ་ན་མ་ཐོ་བ་གཞན་དུ་འགྱུར་རོ། །ཉེས་པ་གཞན་ཡང་ངོ་ཞེས་བྱ་བ་ནི། ཆད་པའི་ལས་ཀྱི་རྒྱུར་གྱུར་པ་ལས་གཞན་གྱི་ཉེས་པ་ཡང་སྤང་བར་བྱ་བའོ། །འདིར་གཞུང་ནི་དགེ་འདུན་གྱིས་དབྱུང་བའི་ལས་བྱས་པ་དེས་ལྟུང་བ་དབྱུང་བར་མི་བྱ་ཞིང་དེ་དང་འདྲ་བ་གཞན་ཡང་མི་བྱའོ་ཞེས་གསུངས་པ་ཡིན་ནོ། །ཚངས་པ་མཚུངས་པར་སྤྱོད་པ་རྣམས་ལ་ཉེས་པ་དང་མཐུན་པ་ཉིད་མི་བྱའོ་ཞེས་བྱ་བ་ནི། དེ་གཉིས་ཀྱིས་ཚངས་པ་མཚུངས་པར་སྤྱོད་
པ་རྣམས་ཀྱི་ཡུལ་ལ་མགུས་པ་དང་བརྙས་ཐབས་ལ་སོགས་པ་མི་བྱ་བའོ། །བརྟུལ་ཞུགས་སྙིང་པོ་མེད་པར་འགྱུར་རོ་སྙམ་དུ་ཡིད་ལ་བྱའོ་ཞེས་བྱ་བ་ནི། དེ་གཉིས་ཀྱིས་འདི་སྙམ་དུ་བདག་ཅག་གིས་ཚངས་པར་མཚུངས་པར་སྤྱོད་པ་རྣམས་ཀྱི་ཡུལ་ལ་གུས་པ་དང་བཅས་པས་གནས་པར་བྱ་བ་ལ་སོགས་པ་སྔར་ཇི་སྐད་བསྟན་པ་དེ་དག་མ་བྱས་ན་སྤོ་བ་དང་མགུ་བ་བྱ་བ་སྤྱད་པ་ལ་སོགས་པའི་བརྟུལ་ཞུགས་ལ་སྙིང་པོ་མེད་ཅིང་གསོག་ཏུ་འགྱུར་རོ་སྙམ་དུ་དེ་ལྟར་ཡིད་ལ་ངེས་པར་བརྟག་པར་བྱ་བ་སྟེ། གུས་པར་བསྐྱེད་པར་བྱ་བའི་ཕྱིར་དེ་སྐད་བསྟན་ཏོ། །ནང་པར་སྔར་ལངས་ཏེ་སྒོ་དབྱེ་བ་དང༌། མར་མེའི་ཀོང་བུ་བསྩལ་བར་བྱའོ་ཞེས་བྱ་བ་ནི། དེ་གཉིས་ཀྱིས་ནང་པར་སྔར་ལྡང་བར་བྱ། གཙུག་ལག་ཁང་གི་སྒོ་དག་དབྱེ་བར་བྱ། མར་མེའི་ཀོང་བུ་བསྩལ་བར་བྱ་བའོ། །གཙུག་ལག་ཁང་དུ་ཆག་ཆག་དང་ཕྱག་དར་དང་ལྕིབ་འཇམ་པོའི་བྱུག་པས་བསྐུ་བ་དག་ཀྱང་ངོ་ཞེས་བྱ་བ་ཡང་དེ་གཉིས་ཀྱིས་བྱ་བའོ། །བཤང་བ་དང་གཅི་བའི་སྐྱབས་དག་སྦྱང་ངོ་ཞེས་བྱ་བ་ནི། དེ་གཉིས་ཀྱིས་དགེ་འདུན་གྱི་བཤང་བ་དང་གཅི་བའི་ཆབ་ཁུངས་དག་ཀྱང་བྱི་དོར་བྱ་བའོ། །ས་ཕྱགས་པ་དང་དུས་དང་མཐུན་པའི་ཆུ་དག་གཞག་པར་བྱའོ་ཞེས་བྱ་བ་ནི། བཤང་བ་དང་གཅི་བའི་སྐྱབས་དེ་གཉིས་ཀྱིས་ས་ཕྱགས་པ་དང༌། དེ་དག་ཏུ་དགུན་ནི་ཆུ་དྲོན་མོ་གཞག་པར་བྱ། ཚ་བའི་དུས་སུ་ནི་ཆུ་གྲང་མོ་གཞག་པར་བྱ་བའོ། །ཝའི་ཁ་དག་བསྩལ་ལོ་ཞེས་བྱ་བ་ནི། དེ་གཉིས་ཀྱིས་གཙུག་ལག་ཁང་གི་ཝའི་ཁ་དག་བསྩལ་བར་བྱ་བའོ། །སྟན་བཤམ་མོ་ཞེས་བྱ་བ་ནི་དེ་གཉིས་ཀྱིས་དགེ་འདུན་གྱི་ཁྲིའུ་ལ་སོགས་པའི་སྟན་དག་བཤམ་པར་བྱ་བའོ། །དུས་ཤེས་པར་བྱ་སྟེ་བདུག་སྤོས་དང་དེའི་པོག་ཕོར་དག་ཉེ་བར་གཞག་གོ་ཞེས་བྱ་བ་ནི། དེ་གཉིས་ཀྱིས་མཆོད་པའི་དུས་ཤེས་པར་བྱ་སྟེ། བདུག་སྤོས་དང་པོག་ཕོར་དག་སྟ་གོན་བྱ་བའོ། །གལ་ཏེ་ནུས་པ་ཉིད་ཡིན་ན་སྟོན་པའི་ཡོན་ཏན་ཡང་དག་པར་བསྒྲག་གོ་ཞེས་བྱ་བ་ནི། གལ་ཏེ་ནུས་ན་དེ་གཉིས་ཀྱིས་སྟོན་པ་སངས་རྒྱས་བཅོམ་ལྡན་འདས་ཀྱི་ཡོན་ཏན་ཡང་དག་པར་བསྒྲག་པར་བྱ་བའོ། །གལ་ཏེ་མི་ནུས་ན་སྨྲ་བ་པོ་གཞན་ལ་བཅོལ་ལོ་ཞེས་བྱ་བ་ནི། གལ་ཏེ་དེ་གཉིས་ཀྱིས་སྟོན་པའི་ཡོན་ཏན་
ཡང་དག་པར་སྒྲོག་མི་ནུས་ན་སྨྲ་བ་པོ་གཞན་ལ་བཅོལ་བར་བྱ་བའོ། །སྤྱི་བུངས་བཤམ་བན་གཎྜཱི་བརྡུང་ངོ་ཞེས་བྱ་བ་ནི། འབྲས་ཆན་ལ་སོགས་པའི་སྤྱི་བུངས་འོངས་ཤིང་བཤམས་ཟིན་པ་ནི་དེ་གཉིས་ཀྱིས་གཎྜཱི་བརྡུང་བར་བྱ་བའོ། །གལ་ཏེ་དགེ་སློང་རྣམས་ཚན་བསིལ་ཡབ་བྱའོ་ཞེས་བྱ་བ་ནི། གལ་ཏེ་དགེ་སློང་རྣམས་ཚ་བར་གྱུར་ན་དེ་གཉིས་ཀྱིས་བསིལ་ཡབ་ཀྱིས་གཡབ་པར་བྱ་བའོ། །དེ་དག་གིས་འདུག་པ་ལ་སོགས་པ་ནི་བསྙེན་པར་རྫོགས་པ་ཐམས་ཅད་ཀྱི་མཐའ་ཉིད་དོ་ཞེས་བྱ་བ་ནི། དེ་གཉིས་ཀྱིས་འདུག་པ་ལ་སོགས་བ་ནི་བསྙེན་བར་རྫོགས་པ་ཐམས་ཅད་ཀྱི་མཐའ་ཉིད་ཡིན་པ་སྟེ། དེ་ནི་གྲལ་རིམས་བསྟན་པའི་ཕྱིར་རོ། །དགེ་སློང་གི་གྲལ་དེར་ཐམས་ཅད་ཀྱི་ཐ་མར་འདུག་པ་དང་འགྲོ་བ་ལ་སོགས་པ་བྱའོ། །ཟས་ཀྱི་བྱ་བ་བྱས་ནས་གདན་ཆ་དབེན་པར་བརྟུལ་ལོ་ཞེས་བྱ་བ་ནི། དགེ་སློང་རྣམས་ཀྱིས་ཟས་ཀྱི་བྱ་བ་བྱས་ཟིན་ནས་དགེ་འདུན་གྱི་གདན་ཆ་དབྱམ་པོ་དང་གོར་བུ་དང་བར་ཏང་ལ་སོགས་པ་དག་དབེན་པའི་གནས་སུ་བསྡུ་བར་བྱ་བའོ། །ལྷུང་བཟེད་ཀྱི་གཞི་དོར་རོ་ཞེས་བྱ་བ་ནི། །ལྷུང་བཟེད་ཀྱི་གཞི་རྩྭ་ལ་སོགས་པ་དེ་དག་ཉིད་ཀྱིས་ཕྱི་རོལ་དུ་དོར་བར་བྱ་བའོ། །དུས་ཤེས་པར་བྱ་སྟེ་མཆོད་རྟེན་གྱི་ཕྱག་དར་བྱའོ་ཞེས་བྱ་བ་ནི། མཆོད་པའི་དུས་ཤེས་པར་བྱས་ཏེའོ། །ལྕིབ་འཇམ་པོའི་བྱུག་པས་བསྐུའོ་ཞེས་བྱ་བ་ནི་མཆོད་རྟེན་དག་ལའོ། །འདུ་བའི་དུས་སུ་བཤམ་པ་ལ་སོགས་པ་ནས་ཡོན་ཏན་གྱི་སྐབས་ཀྱི་བར་དག་གོ་ཞེས་བྱ་བ་ནི། དགེ་འདུན་འདུ་བའི་དུས་སུ་ཡང་སྟན་བཤམ་པ་ནས་སྟོན་པའི་ཡོན་ཏན་ཡང་དག་པར་བསྒྲག་པའི་བར་དག་བྱ་བ་སྟེ། སྔར་སྟན་བཤམ་མོ། །དུས་ཤེས་པར་བྱ་སྟེ། བདུག་སྤོས་དང་དེའི་པོག་ཕོར་དག་ཉེ་བར་གཞག་གོ །གལ་ཏེ་ནུས་པ་ཉིད་ཡིན་ན་སྟོན་པའི་ཡོན་ཏན་ཡང་དག་པར་བསྒྲག་གོ །གལ་ཏེ་མི་ནུས་ན་སྨྲ་བ་པོ་ལ་བཅོལ་ལོ་ཞེས་ཇི་སྐད་བསྟན་པ་དེ་དག་བྱའོ་ཞེས་བྱ་བའི་ཐ་ཚིག་གོ ། གལ་ཏེ་ནུས་པ་ཉིད་ཡིན་ན་ཉི་མ་བརྗོད་པ་ཡང་ངོ་ཞེས་བྱ་བ་ནི། གལ་ཏེ་ནུས་པ་ཉིད་ཡིན་ན་དེ་གཉིས་ཀྱིས་ཉི་མ་བརྗོད་པ་ཡང་བྱ་བའོ། །གལ་ཏེ་མི་ནུས་ན་དགེ་སློང་གཞན་ལ་བཅོལ་ལོ་ཞེས་བྱ་བ་ནི། གལ་ཏེ་ཉི་མ་བརྗོད་བར་མི་ནུས་ན་དེ་གཉིས་ཀྱིས་དགེ་སློང་གཞན་ལ་བཅོལ་བར་བྱ་བའོ། །དགོངས་
ཀར་དུས་དང་མཐུན་པའི་ཆུས་དགེ་སློང་རྣམས་ཀྱི་རྐང་པ་བཀྲུའོ་ཞེས་བྱ་བ་ནི། མཚན་མོ་དུས་དང་མཐུན་པའི་ཆུ་ཞེས་བྱ་བ་གྲང་བའི་དུས་སུ་ནི་དྲོ་བ། ཚ་བའི་དུས་སུ་ནི་བསིལ་བའི་དགེ་སློང་རྣམས་ཀྱི་རྐང་པ་དག་པར་བཀྲུ་པའོ། །རྐང་པ་དག་བསྐུའོ་ཞེས་བྱ་བ་ནི། དགོངས་ཀར་དགེ་སློང་རྣམས་ཀྱིའོ། །མི་འདོད་ན་སྣུམ་དབུལ་ལོ་ཞེས་བྱ་བ་ནི། དགེ་སློང་དག་རྐང་པ་བསྐུ་བར་མི་འདོད་ན་སྣུམ་དབུལ་བར་བྱ་བའོ། །དེ་ནི་གཙུག་ལག་ཁང་ཐ་མར་འོས་པ་ཉིད་ཡིན་ནོ་ཞེས་བྱ་བ་ནི། སྤང་དང་མགུ་བར་བྱ་བ་སྤྱོད་པ་དེའི་གནས་ཁང་ལ་སོགས་པ་གཙུག་ལག་ཁང་བསྙེན་པར་རྫོགས་པ་ཐམས་ཅད་ཀྱེ་ཐ་མར་བསྐོ་བར་བྱ་བ་ཉིད་ཡིན་པའོ། །སྤོ་བ་བྱེད་པ་ལ་སོགས་པ་ནང་ནི་ཆེ་རིམ་གྱིས་བསྐོ་སྟེ། མགུ་བར་བྱ་བ་སྤྱོད་པ་དག་པས་སྤོ་བ་ཐ་མ་ཉིད་ཡིན་ནོ། །སྤོ་བ་དག་པས་བསླབ་པ་བྱིན་པ་ཐ་མ་ཉིད་ཡིན་ཏེ། ལྟུང་བ་བྱུང་བ་ཆེས་དམན་བ་ཡིན་པའི་ཕྱིར་རོ། །ཐམས་ཅད་བས་གནས་ནས་ཕྱུང་བ་དག་ཐ་མ་ཉིད་ཡིན་ཏེ་སྤངས་པའི་ཕྱིར་རོ། །ཐམས་ཅད་དུ་རྙེད་པ་དབང་བ་ཉིད་ཡིན་ནོ་ཞེས་བྱ་བ་ནི། གནས་ནས་ཕྱུང་བ་མ་གཏོགས་པས་གཞན་ན་གནས་ན་དེ་དག་གོ །དགེ་བའི་ཕྱོགས་ལ་མི་གཡེལ་བར་བྱའོ་ཞེས་བྱ་བ་ནི། དེ་དག་དགེ་བའི་ཕྱོགས་ཀྱི་དུས་མ་ཡིན་པར་ཤེས་པར་མི་བྱ་སྟེ། འདི་ལྟར་དེ་དེའི་དུས་ན་རྟོགས་པའི་སྐལ་བ་ཅན་མ་ཡིན་དུ་ཟིན་ཀྱང་དེ་ལྟ་མོད་ཀྱི་ཚོགས་རྗེས་སུ་བསྒྲུབ་པའི་ཕྱིར་དགེ་བའི་ཕྱོགས་ལ་མི་གཡེལ་བར་བྱའོ། །ནམ་ཞིག་ན་རྟོགས་པའི་སྐལ་བ་ཅན་དུ་ཡང་འགྱུར་ཏེ། འདི་ལྟར་བཅོམ་ལྡན་འདས་ཀྱིས་བསམ་པས་ལྟུང་བ་ལས་ལྡང་བར་སྨྲའི། ཆད་པའི་ལས་ཀྱིས་ནི་མ་ཡིན་ནོ་ཞེས་གསུངས་པའི་ཕྱིར་རོ། །བསླབ་པ་བྱིན་པ་ལ་ཡང་རྟོགས་པ་གྲག་པས་དེས་ན་དགྲ་བཅོམ་པ་ཉིད་ཐོབ་པ་ན་སྤོ་བ་དང་མགུ་བར་བྱ་བ་སྤྱོད་པ་དེ་གཉིས་ཀྱང་བསླབ་པ་བྱིན་པ་དང་འདྲ་བར་རང་བཞིན་ཐོབ་ཅིང་ཆད་པའི་ལས་ལྷག་མ་སྤྱད་པར་བྱ་མི་དགོས་པ་ཉིད་ཡིན་ཏེ། དབྱུང་བ་ལ་སོགས་པ་བྱ་མི་དགོས་སོ། །འདི་ནི་དེའི་ངོ་བོ་ཉིད་ཚོལ་བ་བྱིན་པ་དང་བསླབ་པ་བྱིན་པ་དག་ཀྱང་དེ་དང་འདྲའོ་ཞེས་བྱ་བ་ནི། དགེ་སློང་རང་བཞིན་དུ་གནས་པ་ལས་མངོན་པར་སྨྲ་བ་ལ་སོགས་པ་དག་བདག་
གིར་མི་བྱའོ་ཞེས་ཇི་སྐད་བསྟན་པའི་སྤྱོད་པ་འདི་ལ་དེའི་ངོ་བོ་ཉིད་ཚོལ་བ་བྱིན་པ་དང་བསླབ་པ་བྱིན་པ་དག་ཀྱང་སྤོ་བ་དང་མགུ་བར་བྱ་བ་སྤྱོད་པ་དེ་དང་འདྲ་སྟེ་དེ་གཉིས་ཀྱི་སྤྱོད་པ་ཡང་འདི་དག་ཉིད་ཡིན་ནོ། །གདོན་པར་མི་བྱའོ་ཞེས་བྱ་བ་ནི། དེའི་ངོ་བོ་ཉིད་ཚོལ་བ་བྱིན་པ་དང་བསླབ་པ་བྱིན་པ་དེ་གཉིས་ཀྱིས་འདོན་པ་གཞན་མེད་ན་ཡང་གསོ་སྤྱོད་ལ་སོ་སོར་ཐར་པ་གདོན་པར་མི་བྱ་བའོ། །སྔ་མ་ནི་བཟོད་པ་གསོལ་བས་རང་བཞིན་འཐོབ་པོ་ཞེས་བྱ་བ་ནི། དེའི་ངོ་བོ་ཉིད་ཚོལ་བ་བྱིན་པ་དང་བསླབ་པ་བྱིན་པ་ཞེས་བྱ་བ་གཉིས་སྨོས་པའི་སྔ་མ་སྟེ། དེའི་ངོ་བོ་ཉིད་ཚོལ་བ་བྱིན་པ་ནི་རང་གིས་དགེ་འདུན་ལ་བཟོད་པ་གསོལ་ཞིང་དགེ་འདུན་གྱིས་གསོལ་བ་དང་བཞིའི་ལས་ཀྱིས་བཟོད་པ་བྱས་ན་རང་བཞིན་དུ་གནས་པ་ཉིད་འཐོབ་བོ། །རང་གི་བཟོད་པ་གསོལ་བའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །བདག་དགེ་སློང་འཆར་ཀ་དེའི་ངོ་བོ་ཉིད་ཚོལ་དུ་སྩལ་བ་ལ། སྐྲ་འགྲེང་བར་གྱུར། སྐྲ་འཕྱར་བར་གྱུར་ཅིང་དགེ་འདུན་ལ་སྤུ་སྙོལ་བར་བགྱིད། འབྱུང་བར་བསྐྱོད། མཚུངས་པར་ཉེ་བར་སྟོན་ཅིང་མཚམས་ཀྱི་ནང་དུ་མཆིས་ཏེ། བཟོད་པ་གསོལ་ཞིང་གཞི་གང་ལས་སྨ་དབབ་པའི་ཕྲིན་ལས་མཛད་པའི་གཞི་དེ་ལས་སླར་ལྡོག་ན། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བ་ཉེ་བར་བཟུང་སྟེ། བདག་དགེ་སློང་འཆར་ཀ་དེའི་ངོ་བོ་ཉིད་ཚོལ་དུ་སྩལ་བ་ལ་བཟོད་པ་མཛད་དུ་གསོལ། །ལན་གསུམ་བཟླས་ཞེས་གསུངས་པ་ཡིན་ནོ། །དགེ་འདུན་གྱིས་གསོལ་བ་དང་བཞིའི་ལས་ཀྱིས་བཟོད་པ་བྱ་བའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །དགེ་སློང་འཆར་ཀ་དེའི་ངོ་བོ་ཉིད་ཚོལ་དུ་སྩལ་བ་འདི་སྐྲ་འགྲེང་བར་གྱུར། སྐྲ་འཕྱར་བར་གྱུར་ཅིང་དགེ་འདུན་ལ་སྤུ་སྙོལ་བར་བགྱིད། འབྱུང་བར་བསྐྱོད། མཚུངས་བས་ཉེ་བར་སྟོན་ཅིང་མཚམས་ཀྱི་ནང་དུ་མཆིས་ཏེ་བཟོད་པ་གསོལ་ཞིང་གཞི་གང་ལས་སྨ་དབབ་པའི་ཕྲིན་ལས་མཛད་པའི་གཞི་དེ་ལས་སླར་ལྡོག་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་འཆར་ཀ་དིའི་ངོ་བོ་ཉིད་དུ་ཚོལ་དུ་སྩལ་བ་ལ་བཟོད་པ་མཛད་དོ། །འདི་
ནི་གསོལ་པའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །འོག་མ་ནི་དགྲ་བཅོམ་པ་ཉིད་ཀྱིས་སོ་ཞེས་བྱ་བ་ནི། བསླབ་པ་བྱིན་པ་ཞེས་བྱ་བ་ནི། བཟོད་པས་རང་བཞིན་མི་འཐོབ་ཀྱི་དགྲ་བཅོམ་པ་ཉིད་ཐོབ་པས་རང་བཞིན་དུ་གནས་པ་ཉིད་ཐོབ་པར་འགྱུར་བའོ། །སྒོ་དབྱེ་བ་ཡན་ཆད་དང་གཙུག་ལག་ཁང་ལ་སོགས་པ་ལ་ཡོངས་སུ་གནས་པ་དང་ལྡན་པ་དང་སྤྱོད་པ་དང་ལྡན་པ་དང་གཉིས་ཀྱང་ངོ་ཞེས་བྱ་བ་ནི། དེ་དང་འདྲའོ་ཞེས་བྱ་བར་སྦྱར་ཏེ། སྒོ་དབྱེ་བ་ཡན་ཆད་དང་གཙུག་ལག་ཁང་ལ་སོགས་པའི་སྤྱོད་པ་དེ་གཉིས་ལ་ཡོངས་སུ་གནས་པ་དང་ལྡན་པ་དང་སྤྱད་པ་དང་ལྡན་པ་དེ་གཉིས་ཡོངས་སུ་གནས་པ་དང་མགུ་བར་བྱ་བ་སྤྱོད་པ་དེ་དང་འདྲའོ་ཞེས་བྱ་བའི་ཐ་ཚིག་གོ །སྒོ་དབྱེ་བ་ཡན་ཆད་ཅེས་བྱ་བ་ནི། སྔར་མདོ་ལས་ནང་པར་སྔར་ལངས་ཏེ་སྒོ་དབྱེ་བ་དང་མར་མེའི་ཀོང་བུ་བསྩལ་བར་བྱའོ་ཞེས་བསྟན་པའི་སྐབས་སུ་སྒོ་དབྱེ་བ་ཞེས་སྨོས་པ་སྟེ་དེ་ཡན་ཆད་ནས་ཡོངས་སུ་གནས་པ་དང་མགུ་བར་བྱ་བ་སྤྱོད་པ་དག་གིས་དགེ་སློང་རང་བཞིན་དུ་གནས་པ་ལས་མངོན་པར་སྨྲ་བ་དང་ཕྱག་དང་མངོན་དུ་ལྡང་བ་དང་ཐལ་མོ་སྦྱར་བ་དང༌། གུས་པའི་ལས་དག་བདག་གིར་མི་བྱའོ་ཞེས་མགོར་སྨོས་པ་མན་ཆད་ཀྱི་བར་གྱི་མདོ་ཐམས་ཅད་དང་སྤྱིར་སྦྱར་རོ། །གཙུག་ལག་ཁང་ལ་སོགས་པ་ཞེས་བྱ་བ་ནི། སྔར་མདོ་ལས་དེའི་གཙུག་ལག་ཁང་ཐ་མར་འོས་པ་ཉིད་ཡིན་ནོ་ཞེས་བསྟན་པའི་སྐབས་སུ། གཙུག་ལག་ཁང་ཞེས་སྨོས་པ་སྟེ་དེ་ནི་གཙུག་ལག་ཁང་ཞེས་བྱ་བའི་སྒྲས་འཕངས་པ་ཡིན་ཏེ་ཉེ་བའི་ཕྱིར་རོ། །སྩོགས་པ་ཞེས་བྱ་བའི་སྒྲས་ནི་དེའི་འོག་གི་མདོ་ལས་ཐམས་ཅད་དུ་རྙེད་པ་དབང་བ་ཉིད་ཡིན་ནོ་ཞེས་བྱ་བ་དང༌། དགེ་བའི་ཕྱོགས་ལ་མི་གཡེལ་བར་བྱའོ་ཞེས་བསྟན་པའི་མདོ་དེ་གཉིས་འཕངས་པ་ཡིན་གྱི་གཞན་ནི་མ་ཡིན་ཏེ། ཡུལ་ཐ་དད་པ་ཡིན་ནོ་ཞེས་བྱ་བར་ཤེས་པར་བྱའོ། །དེ་ལྟར་ན་སྒོ་དབྱེ་བ་ཡན་ཆད་ཀྱི་མདོ་ཐམས་ཅད་དང༌། དེའི་གཙུག་ལག་ཁང་ཐ་མར་འོས་ཕ་ཉིད་ཡིན་ནོ་ཞེས་བྱ་བ་དང༌། ཐམས་ཅད་དུ་རྙེད་པ་དབང་བ་ཉིད་ཡིན་ནོ་ཞེས་བྱ་བ་དང༌། དགེ་བའི་ཕྱོགས་ལ་མི་གཡེལ་བར་བྱའོ་ཞེས་བྱ་བའི་མདོ་གསུམ་པོ་དེ་དག་གི་སྤྱོད་པ་ལ་ནི། སྤོ་བ་དང་ལྡན་པ་ཞེས་བྱ་བ་སྤོ་བ་བྱས་ཟིན་ལ། མགུ་བར་བྱ་བ་མ་བླངས་པ་དང༌། སྤྱད་པ་དང་ལྡན་པ་ཞེས་བྱ་
བ་མགུ་བར་བྱ་བ་སྤྱད་ཟིན་ལ། ད་དུང་མ་ཕྱུང་བའི་གང་ཟག་དེ་གཉིས་ཀྱང་སྤོ་བ་དང༌། མགུ་བར་བྱ་བ་སྤྱོད་པ་དེ་དང་འདྲ་བར་རིག་པར་བྱ་སྟེ། དེ་གཉིས་ནི་རང་བཞིན་དུ་གནས་པ་ཉིད་མ་ཡིན་པའི་ཕྱིར་དང༌། ལས་བྱས་པ་ཉིད་ཡིན་པའི་ཕྱིར་དེ་ལྟར་རྣམ་པར་གཞག་གོ །འདི་སྐད་བསྟན་ཏེ་ཡོངས་སུ་གནས་པ་བྱས་ལ་མགུ་བ་བྱ་བ་མ་སྦྱིན་གྱི་བར་དུ་ནི་རེ་ཞིག་ཆོ་ག་འདི་ཡིན་ལ། མགུ་བར་བྱ་བ་བྱིན་པ་ལ་ནི་སྒོ་དབྱེ་བ་ལ་སོགས་པ་སྔར་བསྟན་པའི་མདོ་ཚོགས་ཐམས་ཅད་བྱ་དགོས་པར་ཤེས་པར་བྱའོ། །མགུ་བར་བྱ་བ་སྤྱད་ཟིན་ལ། དབྱུང་བར་མི་བྱེད་པའི་བར་དུ་ནི་རེ་ཞིག་ཆོག་འདི་ཡིན་ལ། དབྱུང་བ་བྱས་ཟིན་པ་ལ་ནི་སྒེ་དབྱེ་བ་ལ་སོགས་པ་སྔར་བསྟན་པའི་ཆོ་ག་ཐམས་ཅད་བྱ་མི་དགོས་ཏེ་རང་བཞིན་དུ་གནས་པར་གྱུར་ཟིན་པའི་ཕྱིར་རོ་ཞེས་བྱ་བར་ཤེས་པར་བྱའོ། །བསྡིགས་པ་དང་སྨད་པ་དང་བསྐྲད་པ་དང་ཕྱིར་འགྱེད་པ་དང་གནས་ནས་ཕྱུང་བ་དག་ཀྱང་དེ་བཞིན་ནོ་ཞེས་བྱ་བ་ནི། དེ་དག་ཀྱང་སྒོ་དབྱེ་བ་ཡན་ཆད་དང་གཙུག་ལག་ཁང་ལ་སོགས་པ་ལ་ཡོངས་སུ་གནས་པ་དང་མགུ་བར་བྱ་བ་སྤྱོད་པ་དང་འདྲ་བར་རིག་པར་བྱ་བའོ། །དེ་དག་ལ་ཧ་ཅང་ཐལ་བར་འགྱུར་བ་དམིགས་ཀྱིས་བསལ་བའི་ཕྱིར་གདོན་པ་ནི་མི་བྱ་བ་ཉིད་དོ་ཞེས་བྱ་བ་སྨྲས་ཏེ། འདོན་པ་གཞན་མེད་ན་ཡང་དེ་དག་གིས་གསོ་སྦྱོང་ལ་སོ་སོར་ཐར་པ་གདོན་པ་མི་བྱ་བ་ཉིད་ཡིན་པའོ། །གཞན་དག་གིས་གནས་ནས་ཕྱུང་བ་སྤང་བར་བྱ་བ་ཁོ་ནའོ་ཞེས་བྱ་བ་ནི། རང་བཞིན་དུ་གནས་པ་གཞན་གྱིས་གནས་ནས་བྱུང་བ་ནི་སྤང་བར་བྱ་བ་ཁོ་ན་ཡིན་ཏེ། དེ་དང་ལྷན་ཅིག་ཏུ་བཅག་པ་དང་འདུག་པ་དང་འགྲོ་བ་ཇི་སྐད་བསྟན་བདག་ཀྱང་མི་བྱ་ཞིང་འདོན་པ་གཞན་མེད་པ་ན་དེས་སོ་སོར་ཐར་པའི་མདོ་གདོན་པ་ཡང་ཉམས་སུ་མྱོང་པར་མི་བྱའོ། །གཞན་ཡང་དེ་ལ་ལུས་སམ་ངག་གི་འདྲེ་པར་གྱུར་པ་ཆུད་ཟད་ཀྱང་སྤྱད་པར་མི་བྱའོ། །དེའི་དུས་ཉིད་ཀྱི་རྒྱུ་ལས་བྱུང་བའི་རྙེད་པ་ཡང་མི་དབང་བ་ཉིད་ཡིན་ནོ་ཞེས་བྱ་བ་ནི། དེ་གནས་ནས་ཕྱུང་བའི་དུས་ཉིད་ཀྱི་ཚེ་ན་དགེ་འདུན་ལ་རྙེད་པ་བྱུང་བ་གང་ཡིན་པ་དེ་ཡང་གནས་ནས་ཕྱུང་བ་དེ་མི་དབང་བ་ཉིད་ཡིན་པའོ། །འདི་སྐད་བསྟན་ཏེ། དེ་གནས་ནས་ཕྱུང་བའི་གནས་སྐབས་སུ་དགེ་འདུན་ལ་རྙེད་པ་བྱུང་བའི་དེའི་ཤས་གནས་ནས་ཕྱུང་བ་དེ་མི་དབང་བ་ཉིད་ཡིན་ནོ། །གནས་ནས་
མ་ཕྱུང་བའི་མདུན་རོལ་དུ་དབྱར་གནས་པ་ལ་སོགས་པའི་རྒྱུ་ལས་བྱུང་བའི་རྙེད་པ་གང་ཡིན་པ་དེ་ནི་དེ་ཡང་དབང་བ་ཉིད་ཡིན་ཏེ། དེའི་ཚེ་ན་དེ་རང་བཞིན་དུ་གནས་པ་ཉིད་ཡིན་པའི་ཕྱིར་རོ། །ཅི་མི་དབང་བ་ཉིད་དེ་གཏན་དུའམ་ཞེ་ན། དེའི་ཕྱིར་བྱ་བ་བཞིན་ནོ་ཞེས་བྱ་བ་སྨྲས་ཏེ། ཇི་ལྟར་དགེ་འདུན་བྱེ་བ་ན་ཆོས་དང་མཐུན་པའི་ཕྱོགས་ཀྱི་རྙེད་པ་ཆོས་མ་ཡིན་པའི་ཕྱོགས་དང་མཐུན་པའི་གང་ཟག་མི་དབང་བ་ལ་དེས་ཆོས་དང་མཐུན་པའི་ཕྱོགས་ཕྱིར་ཁས་བླངས་པ་ན་རྙེད་པ་དབང་བ་དེ་བཞིན་དུ་གནས་ནས་ཕྱུང་བ་འདི་ཡང་ཇི་སྲིད་དུ་གནས་ནས་ཕྱུང་བ་དེ་སྲིད་དུ་རང་བཞིན་དུ་གནས་པའི་དགེ་འདུན་གྱི་རྙེད་པ་མི་དབང་ལ་ནམ་བཟོད་པ་གསོལ་ཏོ། །གནས་སུ་ཆུད་པའི་དུས་ན་རྙེད་པ་དབང་ངོ༌། །བྱེ་བའི་རྙེད་པ་དེ་ཡང་འོག་མི་མདོ་ལས་རིག་པར་བྱའོ། །བྱེ་བ་དག་ན་ཆོས་མ་ཡིན་པའི་ཕྱོགས་དང་མཐུན་པ་ཡང་དེ་དང་འདྲའོ་ཞེས་བྱ་བ་ནི། དགེ་འདུན་བྱེ་བ་ན་ཆོས་མ་ཡིན་པའི་ཕྱོགས་དང་མཐུན་པ་ཡང་གནས་ནས་ཕྱུང་བ་དེ་དང་འདྲ་བ་སྟེ་གནས་ནས་ཕྱུང་པ་ལ་གང་དུ་སྤྱོད་པ་ཅི་བསྟན་པ་དེ་དག་ཐམས་ཅད་ཆོས་མ་ཡིན་པའི་ཕྱོགས་དང་མཐུན་པ་ལ་ཡང་བལྟ་བར་བྱ་བའོ། །དེ་ན་སྒོ་དབྱེ་བ་ཡན་ཆད་དང་གཙུག་ལག་ཁང་ལ་སོགས་པ་ལ་ཡང་ཆོས་མ་ཡིན་པའི་ཕྱོགས་དང་མཐུན་པ་དེ་གནས་ནས་ཕྱུང་བ་དང་འདྲ་ལ་གདོན་པ་ནི་མི་བྱ་བ་ཉིད་དོ་ཞེས་བྱ་བ་ལ་ཡང་ཆོས་མ་ཡིན་པའི་ཕྱོགས་དང་མཐུན་པ་དེ་གནས་ནས་ཕྱུང་བ་དང་འདྲ་བ་དང༌། གཞན་དག་གིས་གནས་ནས་ཕྱུང་བ་སྤང་བར་བྱ་བ་ཁོ་ནའོ་ཞེས་བྱ་བ་ལ་ཡང་ཆོས་མ་ཡིན་པའི་ཕྱོགས་དང་མཐུན་པ་དེ་གནས་ནས་ཕྱུང་བ་དང་འདྲ་བ་དང་དེའི་དོན་ཉིད་ཀྱི་རྒྱུ་ལས་བྱུང་བའི་རྙེད་པ་ཡང་མི་དབང་བ་ཉིད་ཡིན་ནོ་ཞེས་བྱ་བ་ལ་ཡང་ཆོས་མ་ཡིན་པའི་ཕྱོགས་དང་མཐུན་པ་དེ་གནས་ནས་ཕྱུང་བ་དང་འདྲ་བར་བསྟན་པར་ཤེས་པར་བྱའོ། །རང་བཞིན་དུ་གནས་པ་མ་ཡིན་པ་དག་ལ་སྤོ་བ་དང་མགུ་བར་བྱ་བ་དང་བསླབ་པ་བྱིན་པ་དག་མི་འཆགས་སོ་ཞེས་བྱ་བ་ནི། རང་བཞིན་དུ་གནས་པ་མ་ཡིན་པ་ཞེས་བྱ་བས་གཞན་ན་གནས་པ་དག་ལ་གང་ཟག་སྤོ་བ་དང་མགུ་བར་བྱ་བ་སྤྱོད་པ་དང་བསླབ་པ་བྱིན་པ་དག་གི་སྤོ་བ་དང༌། མགུ་བར་བྱ་བ་དང༌། བསླབ་པ་སྤྱོད་པ་དག་བྱེད་ན་མི་འཆགས་ཏེ།
ཡུན་རིང་པོར་སྤྱད་ཀྱང་དུས་ཆུང་ཟད་མ་སྤྱད་པ་ཉིད་དང་འདྲ་བར་འགྱུར་རོ། །དེ་ལྟར་ཡང་འདིར་གཞུང་ནི་སྤོ་བ་གསུམ་དང་རང་བཞིན་དུ་གནས་པ་གཅིག་གམ་སྤོ་བ་གཉིས་དང་རང་བཞིན་དུ་གནས་པ་གཉིས་སམ། སྤོ་བ་གཅིག་དང་རང་བཞིན་དུ་གནས་པ་གསུམ་ལ་སྤོ་བ་དང་མགུ་བ་བྱ་བ་དང༌། བསླབ་པ་སྤྱད་པར་མི་བྱའོ་ཞེས་གསུངས་པ་ཡིན་ནོ། །དེའི་ཕྱིར་འདིར་རང་བཞིན་དུ་གནས་པ་མ་ཡིན་པ་དག་ལ་ཞེས་སྨོས་པ་ནི་ས་གཞན་ན་གནས་པ་དག་ཡིན་པར་གསུངས་པ་ཡིན་ཏེ། དེ་པས་ན་རང་བཞིན་དུ་གནས་པ་མ་ཡིན་པ་དག་ལ་སྤོ་བ་ལ་སོགས་པ་དག་སྤྱད་པ་དེ་ནི་མ་སྤྱད་པ་ཁོ་ན་ཡིན་ཏེ། འདི་ལྟར་དེ་དག་ལ་དེ་མི་འཆགས་པའི་ཕྱིར་རོ། །དགེ་འདུན་མ་ཡིན་པ་ལ་ཡང་ངོ་ཞེས་བྱ་བ་ནི། སྤོ་བ་ལ་སོགས་པ་ལ་མི་འཆགས་པ་སྟེ། དགེ་འདུན་དུ་མ་གྱུར་པའི་གང་ཟག་གཅིག་གམ་གཉིས་སམ་གསུམ་དག་ལ་སྤོ་བ་དང་མགུ་བར་བྱ་བ་དང༌། བསླབ་པ་སྤྱོད་པ་ཡང་མི་འཆགས་སོ། །གནས་དེ་ན་འཁོད་པ་དག་ལས་ཡོངས་སུ་བཅད་པ་དག་ལ་ཡང་ངོ་ཞེས་བྱ་བ་ཡང་མི་འཆགས་སོ་ཞེས་བྱ་བར་སྦྱར་ཏེ། གནས་གང་དུ་སྤོ་བ་ལ་སོགས་པ་དེ་དག་སྤྱད་པར་བྱ་བའི་གནས་དེ་ན་འཁོད་པའི་དགེ་སློང་དག་ལས་དགེ་སློང་གཅིག་གམ་གཉིས་སམ་གསུམ་མམ་དགེ་འདུན་དུ་གྱུར་པ་ཡང་རུང་སྟེ། ལོགས་ཤིག་ཏུ་ཡོངས་སུ་སྤྱད་ཅིང་དཀར་བ་དག་ལ་སྤོ་བ་ལ་སོགས་པ་སྤྱོད་པ་མི་འཆགས་སོ། །མང་པོ་ཉིད་ཡོངས་སུ་སྤང་བར་མི་བྱའོ་ཞེས་བྱ་བ་ནི། གནས་དེ་ན་དགེ་སློང་མང་པོ་དག་འཁོད་ལ། འདིར་སྤྱད་པ་དཀའ་འོ་སྙམ་པའི་བློ་མང་བ་ཉིད་ཀྱིས་ཉེས་པས་སྤང་བར་མི་བྱའི་ཞེས་བྱ་བའི་ཐ་ཚིག་གོ །གནས་བརྟན་དང་སོ་སོར་ཐར་པ་དང་བཅས་པ་ཉིད་དུ་འབད་པར་བྱའོ་ཞེས་བྱ་བ་ནི། གནས་གང་ན་གནས་བརྟན་དང་བཅས་སོ་སོར་ཐར་པ་དང་བཅས་པའི་དགེ་འདུན་ཡོད་པའི་གནས་དེར་ཇི་ལྟར་སྤྱད་པར་འགྱུར་ཞིག་གུ་སྙམ་དུ་དེའི་དོན་དུ་འབད་པར་བྱའོ། །མ་གྲུབ་ན་གཞན་དུ་ན་ཡང་སྤྱད་པར་བྱ་བའོ། །གང་ན་གཞན་གསུམ་ལ་སོགས་པ་དེ་དག་གི་མིང་རྣམ་པ་ཐམས་ཅད་སྤྱོད་པ་དེར་དེ་སྤྱད་པར་མི་བྱའོ་ཞེས་བྱ་བ་ནི། གནས་གང་ན་གང་ཟག་གཞན་གསུམ་ལ་སོགས་པ་སྤོ་བ་དང་གཞི་ནས་སྤོ་བ་དང༌། ཡང་གཞི་ནས་བསླང་སྟེ་སྤོ་བ་དང༌།
མགུ་པར་བྱ་བ་དང༌། གཞི་ནས་མགུ་བར་བྱ་བ་དང༌། ཡང་གཞི་ནས་བསླང་སྟེ་མགུ་བར་བྱ་བ་དེ་དག་གིས་མིང་རྣམ་པ་ཐམས་ཅད་སྤྱོད་པའི་གནས་དེར་སྤོ་བ་ལ་སོགས་པ་དེ་སྤྱད་པར་མི་བྱ་སྟེ། ཚོགས་ཀྱིས་ཚོགས་ཀྱི་ལས་བྱར་མི་རུང་བའི་ཕྱིར་རོ། །དེ་བས་ན་གཙུག་ལག་ཁང་ན་གཞན་གསུམ་ལ་སོགས་པ་དེ་དག་གི་མིང་རྣམ་པ་ཐམས་ཅད་སྤྱོད་པ་དག་འཁོད་པ་དེར་གང་ཡང་སྤྱད་པར་མི་བྱ་བའོ། །གང་ན་གཞན་གསུམ་ལ་སོགས་པ་ཡོངས་སུ་གནས་པ་སྤྱད་པ་དེར་སྤོ་བ་སྤྱད་པར་མི་བྱའོ། །གང་ན་གཞན་གསུམ་ལ་སོགས་པ་གཞི་ནས་སྤོ་བ་སྤྱོད་པ་དེར་གཞི་ནས་ཡོངས་སུ་གནས་བ་སྤྱད་པར་མི་བྱའོ། །གང་ན་གཞན་གསུམ་ལ་སོགས་པ་ཡང་གཞི་ནས་བསླང་སྟེ་སྤོ་བ་སྤྱོད་པ་དེར་ཡང་གཞི་ནས་བསླང་སྟེ་སྤོ་བ་སྤྱད་པར་མི་བྱའོ། །དེ་བཞིན་དུ་གང་ན་གཞན་གསུམ་ལ་སོགས་པ་མགུ་བར་བྱ་བ་སྤྱོད་པ་དེར་མགུ་བར་བྱ་བ་སྤྱད་པར་མི་བྱའོ། །གང་ན་གཞན་གསུམ་ལ་སོགས་པ་གཞི་ནས་མགུ་བར་བྱ་བ་སྤྱད་པ་དེར་གཞི་ནས་མགུ་བར་བྱ་བ་སྤྱད་པར་མི་བྱའོ། །གང་ན་གཞན་གསུམ་ལ་སོགས་པ་ཡང་གཞི་ནས་བསླང་སྟེ་མགུ་བར་བྱ་བ་སྤྱོད་པ་དེར། ཡང་གཞི་ནས་བསླང་སྟེ་མགུ་བར་བྱ་བ་སྤྱད་པར་མི་བྱའོ། །དེ་བཞིན་དུ་གང་ན་གཞན་གསུམ་ལ་སོགས་པ་བསླབ་པ་སྤྱོད་པ་དེར་བསླབ་པ་སྤྱད་པར་མི་བྱའོ། །འདིར་གཞུང་ནི། གཙུག་ལག་ཁང་གཅིག་ཏུ་ཡོངས་སུ་གནས་པ་བྱེད་པ་བཞིས་ཡོངས་སུ་གནས་པ་སྤྱད་པར་མི་བྱའོ། །གཞི་ནས་ཡོངས་སུ་གནས་པ་བྱེད་པ་བཞིས་གཞི་ནས་ཡོངས་སུ་གནས་པ་སྤྱད་པར་མི་བྱའོ། །མགུ་བར་བྱ་བ་སྤྱོད་པ་བཞིས་མགུ་བར་བྱ་བ་སྤྱད་པར་མི་བྱའོ། །གཞི་ནས་མགུ་བར་བྱ་བ་སྤྱོད་པ་བཞིས་གཞི་ནས་མགུ་བར་བྱ་བ་སྤྱད་པར་མི་བྱའོ། །གཙུག་ལག་ཁང་གཅིག་ཏུ་བསླབ་པ་བྱིན་པ་བཞིས་བསླབ་པ་ལ་བསླབ་པར་མི་བྱའོ་ཞེས་གསུངས་པ་ཡིན་ནོ། །དང་པོ་གཉིས་ཀྱིས་གཞན་དུ་སྐྱ་རེངས་འཆར་བར་མི་བྱའོ་ཞེས་བྱ་བ་ནི། སྤོ་བ་སྤྱོད་པ་དང་མགུ་བར་བྱ་བ་སྤྱོད་པ་དང༌། བསླབ་པ་ལ་སྤྱོད་པ་ཞེས་བྱ་བ་གསུམ་སྨོས་པའི་དང་པོ་གཉིས་ཏེ། སྤོ་བ་སྤྱོད་པ་དང་མགུ་བར་བྱ་བ་སྤྱོད་པ་གཉིས་ཀྱིས་གནས་གད་དུ་སྤྱད་པར་བྱ་བ་ཡང་དག་པར་བླངས་པའི་གནས་དེ་ལས་
གཞན་པའི་མཚམས་སུ་སྐྱ་རེངས་འཆར་བར་མི་བྱ་བའོ། །བསླབ་པ་བྱིན་པ་ལ་ནི་ཆོ་ག་འདི་མེད་དེ། དེ་ནི་ཚེ་གཅིག་པ་ཡིན་པས་ཚེ་གཅིག་ཏུ་གནས་གཅིག་ཏུ་ངེས་པ་མེད་པའི་ཕྱིར་རོ། །འདུས་པའི་དགེ་འདུན་ལ་འདས་པ་དང་འབྱུང་བར་འགྱུར་བ་བརྗོད་པར་བྱ་བ་ཉིད་དོ་ཞེས་བྱ་བ་ནི། སྤོ་བ་དང་མགུ་བར་བྱ་བ་སྤྱོད་པ་དེས་གནས་གང་དུ་གཎྜཱི་བརྡུངས་པ་ན་མཚམས་དེར་གཏོགས་པའི་དགེ་སློང་གནས་དེར་ཇི་སྙེད་འདུས་པ་དེ་སྙེད་ཀྱི་དགེ་འདུན་ལ་རང་གིས་ཡོངས་སུ་གནས་པ་ལ་སོགས་པའམ་མགུ་བར་བྱ་བ་ལ་སོགས་པ་གང་བླངས་པ་དེའི་སྔར་འདས་བའི་ཞག་གྲངས་དང་ཕྱིས་འབྱུང་བར་འགྱུར་བའི་ཞག་གྲངས་སྔགས་ཀྱིས་བརྗོད་པར་བྱ་བ་ཉིད་ཡིན་པའོ། །འདུས་པའི་ཞེས་སྨོས་པས་ནི་འདིར་ལས་བཞིན་དུ་ཐམས་ཅད་མ་ཚོགས་པ་ན་བརྗོད་པ་མི་འཆགས་པ་མ་ཡིན་ཏེ། ཐམས་ཅད་མ་འདུས་ཀྱང་ཇི་སྙེད་འདུས་པ་ལ་བརྗོད་པར་བྱ་བ་བསྟན་ཏོ། །དགེ་འདུན་ལ་ཞེས་སྨོས་པས་ནི་གང་ཟག་ལ་བརྗོད་དུ་མི་རུང་སྟེ་བཞི་ཡན་ཆད་ཀྱི་ཚོགས་ལ་བརྗོད་པར་བྱ་བ་བསྟན་ཏོ། །དེའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །བདག་དགེ་སློང་མིང་འདི་ཞེས་བགྱི་བ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་ལ། ཟླ་བ་ཕྱེད་བཅབས་པས་བདག་དགེ་སློང་མིང་འདི་ཞེས་བགྱི་བ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་དགེ་འདུན་ལས་ཟླ་བ་ཕྱེད་ཡོངས་སུ་གནས་པ་གསོལ་ཏེ། དགེ་འདུན་གྱིས་བདག་དགེ་སློང་མིང་འདི་ཞེས་བགྱི་བ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། ཟླ་བ་ཕྱེད་བཅབས་པ་དེའི་སླད་དུ་ཟླ་བ་ཕྱེད་སྤོ་བ་སྩལ་བས་ཞག་འདི་སྙེད་ཅིག་ནི་བགྱིས་ལགས། བགྱི་བ་ནི་ཞག་འདི་སྙེད་ཅིག་མཆིས་ཏེ། དགེ་འདུན་བཙུན་པ་རྣམས་ཀྱིས་བདག་སྤོ་བ་བགྱིད་པར་གཟུང་དུ་གསོལ། ལན་གསུམ་དུ་བཟླས་ཞེས་གསུངས་པ་ཡིན་ནོ། །མགུ་བར་སྤྱད་པའི་སྐབས་སུ་ནི། དགེ་འདུན་བཙུན་པ་རྣམས་གསན་དུ་གསོལ། །བདག་དགེ་སློང་མིང་འདི་ཞེས་བགྱི་བལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། བདག་དགེ་སློང་མིང་འདི་ཞེས་བགྱི་བ་ཆེ་གེ་མོ་ལས་
བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་དགེ་འདུན་ལས་ཞག་དྲུག་མགུ་བར་བགྱི་བ་གསོལ་ཏོ། །དགེ་འདུན་གྱིས་བདག་དགེ་སློང་མིང་འདི་ཞེས་བགྱི་བ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་བགྱི་བ་སྩལ་བས། །ཞག་འདི་སྙེད་ཅིག་ནི་བགྱིས་ལགས། བགྱི་བ་ནི་ཞག་འདི་སྙེད་ཅིག་མཆིས་ཏེ། དགེ་འདུན་བཙུན་པ་རྣམས་ཀྱིས་བདག་མགུ་བར་བགྱི་བ་སྤྱད་པར་གཟུང་དུ་གསོལ། །ལན་གསུམ་དུ་བཟླས་ཞེས་གསུངས་པ་ཡིན་ནོ། །དུས་དཔག་ཏུ་མེད་པ་བཅབས་པས་དག་པའི་མཐའ་ཅན་ཟླ་བ་བཞི་སྤོ་བ་གསོལ་བ་དང༌། ལྟུང་བ་ཚད་ཤིན་ཏུ་མང་པོ་དང་ལྡན་པ་བྱུང་ལ་ཟླ་བ་ཁྱེད་དམ་དཔག་ཏུ་མེད་པ་བཅབས་པས་ཟླ་བ་ཕྱེད་དམ་དག་པའི་མཐའ་ཅན་ཟླ་བ་བཞི་ཡོངས་སུ་གནས་པ་གསོལ་བ་དང༌། གཞི་ནས་ཡོངས་སུ་གནས་པ་ལ་སོགས་པ་གསོལ་བ་དང༌། གཞི་ནས་མགུ་བར་བྱ་བ་ལ་སོགས་པ་གསོལ་བའི་སྔགས་བརྗོད་པ་ཡང་དེ་བཞིན་དུ་ཅི་རིགས་པར་སྦྱར་རོ། །དུས་ཇི་ཙམ་ཞིག་བརྗོད་པར་བྱ་ཞེ་ན་དེའི་ཕྱིར། གལ་ཏེ་ཡུན་རིང་དུ་སྤྱད་པར་བྱ་བ་ཉིད་མ་ཡིན་ན་ཉིན་རེ་ཞིང་ངོ་ཞེས་བྱ་བ་སྨྲས་ཏེ། གལ་ཏེ་སྤོ་བ་ཡུན་རིང་དུ་སྤྱད་པར་བྱ་བ་ཉིད་མ་ཡིན་ན་ཉིན་རེ་ལན་རེ་བརྗོད་པར་བྱ་བ་ཉིད་ཡིན་ནོ། །ཟླ་བ་ཕྱེད་ལས་ལྷག་པ་ནི་ཡུན་རིང་བ་ཉིད་ཡིན་པར་ཤེས་པར་བྱ་སྟེ། གསོ་སྦྱོང་གི་དུས་གཞན་གྱིས་མཆོད་པའི་ཕྱིར་རོ། །འདི་ལ་ནི་གསུམ་མམ་བཞི་ཞིང་ངོ་ཞེས་བྱ་བ་ནི། ཡུན་རིང་དུ་སྤྱད་པར་བྱ་བ་ཉིད་འདི་ལ་ནི་ཉི་མ་གསུམ་མམ་བཞི་ཞིང་ལན་རེ་བརྗོད་པར་བྱ་བ་ཉིད་ཡིན་ནོ། །དེ་གཉིས་ལ་དོན་དེས་བརྙས་ཐབས་མི་བྱའོ་ཞེས་བྱ་བ་ནི། སྤོ་བ་དང་མགུ་བར་བྱ་བ་སྤྱོད་པ་དེ་གཉིས་ལ་དགེ་འདུན་ལྷག་མ་ལ་སོགས་པ་ཀུན་དུ་སྤྱོད་པའི་དོན་དེས་གཞན་དག་གིས་བརྙས་ཐབས་མི་བྱ་བ་སྟེ། ལྟུང་བ་བྱུང་ནས་ཆོས་བཞིན་དུ་ཕྱིར་འཆོས་པ་ནི་མཁས་པ་གསལ་བ་དགེ་བ་སྐྱེས་བུ་དམ་པ་ཡིན་པའི་ཕྱིར་རོ།། །།བམ་པོ་དྲུག་ཅུ་ལྔ་པ། འཐབ་ཀྲོལ་བྱེད་པ་འོང་བར་ཐོས་ཤིང་གལ་ཏེ་དེས་འཇིགས་ན་དགེ་འདུན་ཚོགས་པ་འམ་གང་ཟག་ལ་ཕྱིར་གཏང་བར་བྱ་བ་ཉིད་ཡིན་ནོ་ཞེས་བྱ་བ་ནི། གང་ཟག་ཐམས་ཅད་ལ་འཐབ་
ཀྲོལ་བྱེད་ཅིང་ཕྱིར་རྒོལ་བའམ་དེ་དང་མི་མཛའ་བ་ཉིད་དུ་གནས་པའི་གང་ཟག་འཐབ་ཀྲོལ་བྱེད་པ་གཅིག་གམ་དུ་མ་འོང་བར་ཐོས་ཤིང་གལ་ཏེ་དེ་དག་གིས་གཞི་དེས་གླེང་བ་དང་འདྲ་བར་བྱེད་པས་འཇིགས་ན་དེའི་ཚེ་སྤོ་བ་དང་མགུ་བར་བྱ་བ་དང་སྤྱོད་པ་དེས་དགེ་འདུན་ཚོགས་པ་ཡང་རུང༌། གང་ཟག་ལ་ཡང་རུང་སྟེ། སྤོ་བ་དང་མགུ་བར་བྱ་བ་སྤྱོད་པ་དེ་སྔགས་ཀྱིས་ཕྱིར་གཏང་བར་བྱ་ཞིང་བདག་ཉིད་རང་བཞིན་དུ་གནས་པ་ཉིད་དུ་གཞག་པར་བྱ་བའོ། །དགེ་འདུན་ལ་ཕྱིར་གཏང་བའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །བདག་དགེ་སློང་མིང་འདི་ཞེས་བགྱི་བ་སྤོ་བ་བགྱིད་པས་དགེ་སློང་འཐབ་ཀྲོལ་བགྱིད་པ་མཚང་འདྲུ་བར་བགྱིད་པ་འཐབ་མོ་བགྱིད་པ། འགྱེད་པར་བགྱིད་པ། རྩོད་པར་བགྱིད་བ་དག་མཆི་ཞེས་ཐོས་ཏེ། དེ་དག་གིས་བདག་ལ་གཞི་འདི་གླེང་བར་འགྱུར། དྲན་པར་བགྱིད་པར་འགྱུར་བས་བདག་གིས་ཚེ་དང་ལྡན་པ་དག་གི་མདུན་དུ་སྤོ་བ་སླར་གཏང་བར་བགྱིའོ། །ཕྱི་རྒོལ་བ་མི་མཛའ་བ་དེ་དག་སླར་མཆིས་ནས་ཡང་སྤོ་བ་བླང་བར་བགྱིའོ། །དགེ་འདུན་བཙུན་པ་རྣམས་ཀྱིས་བདག་རང་བཞིན་དུ་གནས་པར་གཟུང་དུ་གསོལ། །ལན་གསུམ་དུ་བཟླས་ཞེས་གསུངས་པ་ཡིན་ནོ། །གཞི་ནས་སྤོ་བ་ལ་སོགས་པ་དང་མགུ་བར་བྱ་བ་ལ་སོགས་པ་སྤྱོད་པ་ཕྱིར་གཏང་བའི་སྔགས་ཀྱང་དེ་བཞིན་དུ་ཅི་རིགས་པར་སྦྱོར་རོ། །གང་ཟག་ལ་ཕྱིར་གཏང་བའི་སྔགས་ཀྱི་གཞུང་ནི་ཞུ་བ་ལས། བཙུན་པ་བཅོམ་ལྡན་འདས་ཀྱིས་གལ་ཏེ་ཡོངས་སུ་གནས་པ་བྱེད་པའི་དགྲ་བོ་འོངས་ན་དེས་སྤོ་བའི་སྤྱོད་པ་བག་ཡངས་སུ་བྱའོ་ཞེས་བཀའ་སྩལ་ན། དེས་དེ་ཇི་ལྟར་བག་ཡངས་སུ་བགྱི། ཉེ་བ་འཁོར་དགེ་སློང་དེས་ཆོས་གོས་ཕྲག་པ་གཅིག་ཏུ་བྱས་ཏེ། མཆིལ་ལྷམ་དག་ཕུད་ནས་དགེ་སློང་གི་དགེ་འདུན་དུ་ཙོག་པུར་འདུག་སྟེ་འདི་སྐད་ཅེས་བརྗོད་པར་བྱའོ། །བདག་དགེ་སློང་ཡོངས་སུ་གནས་པ་བགྱིས་པའི་དགྲ་བོ་དགེ་སློང་མཆིས་ཏེ། བདག་མིང་འདི་ཞེས་བགྱི་པ་སྤོ་བའི་སྤྱོད་པ་བག་ཡོངས་སུ་བགྱིད་ཅིང་སླར་ཡང་ལེན་བར་བགྱིའོ། །ཡང་བླངས་ཏེ་སྤྱོད་པར་བགྱིད་ན་ཚེ་དང་ལྡན་པ་དག་གིས་བདག་ངོ་ཚ་མ་མཆིས་པར་མི་གཟུང་དུ་གསོལ། །དེ་བཞིན་དུ་ལན་གཉིས་ལན་གསུམ་དུ་བཟླས། ཐབས་ཡིན་
ནོ་ལེགས་སོ་ཞེས་གསུངས་པ་ཡིན་ནོ། །དགྲ་བོ་སོང་ནས་ཕྱིར་ཡང་དེ་བཞིན་དུ་བླང་བར་བྱ་སྟེ། དེ་ནི་སྤོ་བ་དང་མགུ་བར་བྱ་བ་སྤྱོད་པ་གཉི་གའི་སྤྱོད་པ་ཡིན་ནོ། །འཇིགས་པ་དང་བྲལ་ན་དེ་ཉིད་དུ་ཕྱིར་བླང་བར་བྱའོ་ཞེས་བྱ་བ་ནི། གང་ཟག་འཐབ་ཀྲོལ་ཅན་དེ་སོང་ཞིང་འཇིགས་པ་དང་བྲལ་ན་གཙུག་ལག་ཁང་དེ་ཉིད་དུ་སྤོ་བ་དང་མགུ་བར་བྱ་བ་སྤྱད་པ་དེ་དགེ་འདུན་ཚོགས་པའམ་གང་ཟག་གི་མདུན་དུ་སྔགས་ཀྱི་ཡང་ཕྱིར་བླང་བར་བྱ་བའོ། །དེའི་སྔགས་ནི་དགེ་འདུན་བཙུན་པ་རྣམས་གསན་དུ་གསོལ། །བདག་དགེ་སློང་མིང་འདི་ཞེས་བགྱི་པ་སྤོ་བ་བགྱིད་པས། དགེ་སློང་འཐབ་ཀྲོལ་བགྱིད་པ་མཚང་འདྲུ་བར་བགྱིད་པ་འཐབ་མོ་བགྱིད་པ། འགྱེད་པར་བགྱིད་པ། རྩོད་པར་བགྱིད་པ་དག་མཆི་ཞེས་ཐོས་ཏེ། དེ་དག་གིས་བདག་ལ་གཞི་འདིས་གླེང་བར་འགྱུར་དྲན་པར་བགྱིད་པར་འགྱུར་བས། བདག་གིས་དེ་སྐད་ཐོས་ནས་དགེ་སློང་རྣམས་ཀྱི་མདུན་དུ་སྤོ་བ་སླར་བཏང་བ་ཕྱིར་རྒོལ་བ་མི་མཛའ་བ་དེ་དག་སླར་མཆིས་ལགས་པས་བདག་སྤོ་བ་ཡང་སླར་ལེན་ཏོ། །སྤོ་བ་ཞག་མ་འཁོར་བ་རྣམས་བགྱིའོ། །དགེ་འདུན་བཙུན་པ་རྣམས་ཀྱིས་བདག་ཡོངས་སུ་གནས་པར་བགྱིད་པར་གཟུང་དུ་གསོལ། །ལན་གསུམ་དུ་བཟླས་ཞེས་གསུངས་པ་ཡིན་ནོ། །གཞི་ནས་སྤོ་བ་ལ་སོགས་པ་དང་མགུ་བར་བྱ་བ་ལ་སོགས་པ་སྤྱོད་པ་ཕྱིར་བླང་བའི་སྔགས་ཀྱང་དེ་བཞིན་དུ་ཅི་རིགས་པར་སྦྱར་རོ། །ས་གཞན་ན་གནས་པའི་སྤྱོད་པའི་གཞིའོ་ཞེས་བྱ་བ་དེ་འདུལ་བའི་གཞིར་གཏོགས་པ་བཤད་ཟིན་ཏོ། །ད་ནི་ས་གཞན་དུ་གནས་པའི་སྤྱོད་པའི་གཞི་ཞུ་བའི་སྐབས་བསྡུ་བའི་ཕྱིར། སྤོ་བ་དང་མགུ་བར་བྱ་བ་སྤྱོད་པ་རང་བཞིན་དུ་གནས་པ་དང་ལྷན་ཅིག་ཏུ་གཡོགས་མ་གཅིག་པར་ཉལ་ན་ཉིན་མཚན་དེ་བཅད་དོ་ཞེས་བྱ་བ་སྨྲས་ཏེ། ཡོངས་སུ་གནས་པ་དང་མགུ་བར་བྱ་བ་སྤྱོད་པ་རང་བཞིན་དུ་གནས་པ་དང་ལྷན་ཅིག་ཏུ་གཡོགས་མ་གཅིག་པའི་གནས་སུ་ཉལ་ན་ཇི་སྲིད་ཧལ་པའི་ཉིན་མཚན་དེ་སྤོ་བར་བྱ་བ་དང༌། མགུ་བ་སྤྱོད་པར་བྱ་བའི་ཞག་ཏུ་བགྲང་བར་མི་བྱ་ཞིང་གཅད་པར་བྱ་བའོ། །འདིར་གཞུང་ནི་སྤོ་བ་བྱེད་པས་རང་བཞིན་དུ་གནས་པ་དང་ལྷན་ཅིག་ཏུ་གཡོགས་མ་གཅིག་པར་ཉལ་ན་དེའི་ཉིན་མཚན་
དེ་སྤོ་བ་དང་མགུ་པར་བྱ་བ་སྤྱོད་པར་མི་བགྲང་བར་ཉིན་མཚན་དེ་བཅད་དེ་བགྲང་བར་བྱའོ། །མགུ་བར་བྱ་བ་སྤྱོད་པ་ལ་ཡང་དེ་བཞིན་ནོ་ཞེས་གསུངས་པ་ཡིན་ནོ། །མཚམས་ཀྱི་ཕྱི་རོལ་དུ་ཡང་ངོ་ཞེས་བྱ་བ་ཡང༌། ཉལ་ན་ཉིན་མཚན་དེ་བཅད་དོ་ཞེས་བྱ་བའི་རྗེས་སྙགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །མ་བརྗོད་ན་ཡང་ངོ་ཞེས་བྱ་བ་ཡང༌། ཡོངས་སུ་གནས་པར་དང་མགུ་བར་བྱ་བ་སྤྱོད་པའི་ཞག་འདས་པ་དང༌། འབྱུང་བར་འགྱུར་བ་མ་བརྗོད་ན་ཡང་ཉིན་མཚན་དེ་གཅད་པར་བྱ་བའོ། །ཐོས་པར་བྱ་བ་དག་མཚམས་དེ་ན་ཉེ་བར་མི་འཁོད་ན་དེ་མི་འབྱུང་ངོ་ཞེས་བྱ་བ་ནི། མཚམས་གང་དུ་དེ་སྤྱད་པར་བྱ་བའི་མཚམས་དེ་ན་གང་ལ་བརྗོད་ཅིང་ཐོས་པར་བྱ་བའི་དགེ་སློང་དག་ཉེ་བར་མི་གནས་ན་མ་བརྗོད་པ་དེ་མི་འབྱུང་བའོ། །ཉི་མ་དེ་ཉིད་ལ་ཕྱིར་འོང་ན་མཚམས་གཞན་དུ་འགྲོ་བ་ལ་ཉེས་པ་མེད་དོ་ཞེས་བྱ་བ་ནི། གལ་ཏེ་ཉི་མ་དེ་ཉིད་ལ་ཕྱིར་འོང་ན་མཚམས་གཞན་དུ་འགྲོ་བ་ལ་ཉེས་པ་མེད་པའོ། །སྤོ་བ་བྱེད་པས་སྤོ་བ་བྱེད་པ་དང་ལྷན་ཅིག་གཡོགས་མ་གཅིག་པར་ཉལ་བར་མི་བྱའོ་ཞེས་བྱ་བ་ནི། སྤོ་བ་དང་མགུ་བར་བྱ་བ་སྤྱོད་པས་དེ་སྤྱོད་པ་གཞན་དང་ལྷན་ཅིག་ཏུ་གཡོགས་མ་གཅིག་པའི་གནས་སུ་ཞག་ལོན་པར་ཉལ་བར་མི་བྱ་བ་སྟེ། ཉིན་མཚན་བཅད་པར་ནི་མི་འགྱུར་མོད་ཀྱི། འོན་ཀྱང་ཉིན་མཚན་གྱི་མཐར་ཉེས་བྱས་ཡོངས་སུ་རྫོགས་པར་འགྱུར་ལ། དེའི་མདུན་རོལ་དུ་ནི་སྦྱོར་བ་ལས་བྱུང་བའི་ཉེས་བྱས་སུ་འགྱུར་རོ། །རང་བཞིན་དུ་གནས་པ་དང་ལྷན་ཅིག་ཉལ་བ་ལ་ཡང་ཁན་མ་ཐོ་བ་དེ་གཉིས་སུ་འགྱུར་བའི་སྟེང་དུ་དེའི་ཉིན་མཚན་བཅད་བ་ཡང་འགྱུར་རོ། །དེ་དང་མུ་སྟེགས་ཅན་སྤོ་བ་ལ་གནས་པ་དང་དེར་ལྷན་ཅིག་པ་ལ་ནི་ཉེས་པ་མེད་དོ་ཞེས་བྱ་བ་ནི། སྤོ་བ་དང་མགུ་བར་བྱ་བ་སྤྱོད་པ་དེ་དང་མུ་སྟེགས་ཅན་ཟླ་བ་བཞིའི་བར་དུ་མཁན་པོས་སྦྱར་བའི་གོས་ཀྱིས་སྤོ་བ་ལ་གནས་པ་དང་ལྷན་ཅིག་གཡོགས་མ་གཅིག་པའི་གནས་དེར་ཉལ་བ་ལ་ཉེས་པ་མེད་པའོ། །ཅིའི་ཕྱིར་སྤོ་བའི་གཞི་ལས་གཞན་ན་གནས་པའི་སྤྱོད་པའི་གཞི་ཞེས་མིང་གཞན་དུ་བྱས་ཤེ་ན། ས་གཞན་ན་གནས་པ་ཐམས་ཅད་ཀྱི་ཡུལ་བསྟན་པར་བྱ་བའི་ཕྱིར་སྤོ་བའི་ཕྱིར་གཞི་འདིའི་མིང་ས་གཞན་ན་གནས་པའི་སྤྱོད་པའི་གཞི་ཞེས་མིང་གཞན་དུ་བྱས་སོ། །མགུ་
བར་བྱ་བ་སྤྱོད་པ་དང་བསླབ་པ་བྱིན་པ་ལ་སོགས་པ་ས་གཞན་ན་གནས་པ་གང་ཇི་སྙེད་པ་དེ་དག་ཐམས་ཅད་གཞི་འདིས་སྤྱོད་པར་བསྟན་གྱི། སྤོ་བ་བྱེད་པས་འབའ་ཞིག་ཏུ་མ་ཟད་པས་དེའི་ཕྱིར་དོན་དེ་བསྟན་པའི་ཕྱིར། ས་གཞན་ན་གནས་པའི་སྤྱོད་པའི་གཞི་ཞེས་མིང་གཞན་དུ་བྱས་སོ། །ས་གཞན་ན་གནས་པའི་སྤྱོད་པའི་གཞི་ཞུ་བའི་སྐབས་སོ་ཞེས་བྱ་བ་དེ་ཞུ་བའི་སྐབས་ནས་འབྱུང་བ་བཤད་ཟིན་ཏོ། །ས་གཞན་ན་གནས་པའི་སྤྱོད་པའི་གཞི་རྫོགས་སོ་ཞེས་བྱ་བ་སྤོ་བའི་གཞི་བཤད་ཟིན་ཏོ།། །།ད་ནི་ཡོངས་སུ་སྤྱད་པའི་གཞི་བསྡུ་བར་བྱ་བ་སྟེ། འདིར་གཞི་དང་བཅས་པས་གླེང་བ་ལ་སོགས་པ་ནི་འཆགས་ལ་གཞི་མེད་པས་གླེང་བ་ལ་སོགས་པ་ནི་མི་འཆགས་སོ་ཞེས་འོག་ནས་འབྱུང་བས་གཞི་དང་བཅས་པ་ནི་གང་ཡིན། གཞི་མེད་པ་ནི་གང་ཡིན་ཞེ་ན་དེའི་ཕྱིར། མ་གྲགས་པ་ནི་གཞི་ཉིད་མ་ཡིན་ནོ་ཞེས་བྱ་བ་སྨྲས་ཏེ། མ་གྲགས་པ་ཞེས་བྱ་བ་མིའི་ཆོས་ལས་བླ་མར་གྱུར་པ་ཐ་སྙད་དུ་བྱ་བ་མ་ཡིན་པའི་མཐོང་བ་དང་ཐོས་པ་དང་དོགས་པ་ནི་གཞི་ཉིད་མ་ཡིན་ཏེ། གཞི་དེས་གླེང་བ་ལ་སོགས་པ་མི་བྱའོ་ཞེས་བྱ་བའི་ཐ་ཚིག་གོ །མ་གྲགས་པ་དེས་ཅིའི་ཕྱིར་གླེང་བར་མི་བྱ་ཞེ་ན། ཁ་ཅིག་མིའི་ཆོས་ལས་བླ་མ་དང་ལྡན་པས་ཞེས་གླེངས་པ་ན་དེའི་ཆོས་ལ་སྐུར་པ་འདེབས་པར་འགྱུར་པ་དང༌། ཁ་ཅིག་དེ་དང་མི་ལྡན་བཞིན་དུ་བདག་ཉིད་དེ་དང་ལྡན་པར་སྒྲོ་འདོགས་ཤིང༌། གཞན་ལ་སྐུར་པ་འདེབས་པའི་ཉེས་པ་སྤང་བའི་ཕྱིར་རོ། །འདིར་གཞུང་ནི་དགེ་སློང་དག་ལྷའི་མིག་ནི་ཐ་སྙད་དུ་བྱ་བ་མ་ཡིན་ཏེ། དེ་བས་ན་དགེ་སློང་གིས་ལྷའི་མིག་གིས་མཐོང་བས་གླེང་བར་མི་བྱའོ་ཞེས་བྱ་བ་ནས། དེ་བཞིན་དུ་ལྷའི་རྣ་བས་གླེང་བར་མི་བྱའོ་ཞེས་བྱ་བ་ལ་སོགས་པའི་བར་དུ་གསུངས་པ་ཡིན་ནོ། །དགག་དབྱེ་བརྗོད་པ་རྫོགས་ན་དགག་དབྱེ་གཞག་པ་མི་འཆགས་སོ་ཞེས་བྱ་བ་ནི། གང་ཟག་གང་གིས་དབྱར་གནས་པའི་དགེ་འདུན་ལ། ཚེ་དང་ལྡན་པ་དགོངས་སུ་གསོལ། །དེང་ནི་དགེ་འདུན་གྱི་དགག་དབྱེ་བཅོ་ལྔ་པ་ལགས་ཏེ། བདག་དགེ་སློང་མིང་འདི་ཞེས་བགྱི་བའི་དགག་དབྱེ་ཡང་བཅོ་ལྔ་པ་ལགས་ཏེ། བདག་དགེ་སློང་མིང་འདི་ཞེས་བགྱི་བ་བདག་ལ་མཐོང་བ་དང་ཐོས་པ་དང་དོགས་
པའི་གནས་གསུམ་གྱིས་དབྱར་གནས་པའི་དགེ་འདུན་ལ་དགག་དབྱེ་བགྱིད་ཀྱི་ཚེ་དང་ལྡན་པ་རྣམས་ཀྱིས་བདག་ལ་གདམས་སུ་གསོལ། ཚེ་དང་ལྡན་པ་རྣམས་ཀྱིས་བདག་ལ་རྗེས་སུ་བསྟན་དུ་གསོལ། ཚེ་དང་ལྡན་པ་རྣམས་ཀྱིས་བདག་ལ་རྗེས་སུ་གཟུང་དུ་གསོལ། ཐུགས་བརྩེ་བ་ཅན་ཚེ་དང་ལྡན་པ་རྣམས་ཀྱིས་ཐུགས་བརྩེ་བའི་སླད་དུ་ཉེ་བར་བཟུང་སྟེ་བདག་ལ་ཐུགས་བརྩེ་བར་མཛད་དུ་གསོལ། ལྟུང་བ་ཤེས་ཤིང་མཐོང་ན་ཆོས་བཞིན་དུ་སླར་བགྱིའོ། །ལན་གསུམ་དུ་བཟླས། ཐབས་ཡིན་ནོ། །ལེགས་སོ་ཞེས་བྱ་བའི་སྔགས་ཀྱིས་དགག་དབྱེ་བརྗོད་པ་རྫོགས་པར་བྱས་ནས། དེ་ལ་ཁྱོད་ཕྱིས་བདག་ལ་མཐོང་བ་དང་ཐོས་པ་དང་དོགས་པའི་གནས་གསུམ་གྱིས་དགག་དབྱེ་མ་བྱེད་ཅིག་ཅེས་དགག་དབྱེ་འཇོག་པར་མི་འཆགས་པའོ། །དགག་དབྱེ་བརྗོད་པ་མ་རྫོགས་པ་དགག་དབྱེ་འཇོག་པར་བྱེད་ན་ནི་འཆགས་སོ། དགག་དབྱེའི་སྔགས་ལན་གཅིག་བརྗོད་པ་ལ་ནི་དེའི་མཐར་ཕྱིན་པ་ཉིད་རྫོགས་པ་ཡིན་ནོ། །ལན་གཉིས་བརྗོད་པ་ལ་ནི་གཉིས་པའི་མཐར་ཕྱིན་པ་ཉིད་རྫོགས་པ་ཡིན་ནོ། །ལན་གསུམ་བརྗོད་པ་ལ་ཡང་གསུམ་པའི་མཐར་ཕྱིན་པ་ཉིད་རྫོགས་པ་ཡིན་ནོ། །བྱེད་པ་པོ་ནད་པ་དང་ལྡན་པ་ཉིད་ལ་ཡང་དེ་བཞིན་ནོ་ཞེས་བྱ་བ་ནི། དགག་དབྱེ་འཇོག་པ་གང་གི་བྱེད་པ་པོ་ནད་པ་ཡིན་པ་དེ་ནི་བྱེད་པ་པོ་ནད་པ་དང་ལྡན་པ་སྟེ་དེའི་དངོས་པོ་ནི་དེ་ཉིད་དོ། །དེས་དགག་དབྱེ་འཇོག་ཏུ་འཇུད་པ་ཡང་སྔ་མ་བཞིན་དུ་མི་འཆགས་པ་ཉིད་ཡིན་ནོ། །འདི་སྐད་བསྟན་ཏེ། ནད་པས་དགེ་སློང་གཞན་གྱི་དགག་དབྱེ་འཇོག་ཏུ་འཇུད་ཅིང་ཁྱོད་གནས་གསུམ་གྱིས་དབྱར་གནས་པའི་དགེ་འདུན་ལ་དགག་དབྱེ་མ་བྱེད་ཅིག་ཅེས་ཟེར་ན་དེ་མི་འཆགས་སོ། །ཅི་དེས་མངོན་སུམ་དུ་འཇོག་པ་མི་འཆགས་པར་མ་ཟད་དམ་ཞེ་ན། དེའི་ཕྱིར་མངགས་པས་ཀྱང་ངོ་ཞེས་བྱ་བ་སྨྲས་ཏེ། ནད་པས་དེ་མངགས་པས་དགག་དབྱེ་འཇོག་ཏུ་འཇུད་པ་ཡང་མི་འཆགས་སོ། །ཀྱང་ངོ་ཞེས་བྱ་བའི་སྒྲས་ནི། རང་གིས་འཇོག་ཏུ་འཇུད་ན་ཡང་མི་འཆགས་སོ་ཞེས་བྱ་བའི་ཐ་ཚིག་གོ །ནད་པ་ཉིད་ལ་ཡང་ངོ་ཞེས་བྱ་བ་ནི། གལ་ཏེ་གཞན་གྱིས་ནད་པའི་དགག་དབྱེ་འཇོག་པར་བྱེད་ན་དེས་ཀྱང་ནད་པའི་དགག་
དབྱེ་གཞག་པ་མི་འཆགས་པའོ། །འདིར་དགག་དབྱེ་ཞེས་སྨོས་པ་ནི་གསོ་སྦྱོང་དང་གདམས་ངག་གཞག་པའི་དཔེ་ཡིན་ནོ། །དེ་མནོད་པར་མི་བྱའོ་ཞེས་བྱ་བ་ནི། དགག་དབྱེ་གཞག་པ་མི་འཆགས་པར་བསྟན་པ་གང་ཡིན་པ་དེ་དགེ་འདུན་གྱིས་ཀྱང་མནོད་པར་མི་བྱ་བའོ། །ནད་བས་རང་ངམ་མངགས་པས་གཞན་གྱི་དགག་དབྱེ་འཇོག་ཏུ་འཇུད་པ་དང་གཞན་གྱིས་རང་ངམ་མངགས་པས་ནད་པའི་དགག་དབྱེ་འཇོག་ཏུ་འཇུད་པ་དེ་དག་དགེ་འདུན་གྱིས་ཇི་ལྟར་གནོད་པར་མི་བྱ་ཞེ་ན། དེའི་ཕྱིར། ཚེ་དང་ལྡན་པ་ནད་པ་ནི་སྦྱོར་མི་བཟོད་པ་ཡིན་གྱི་ཁྱོད་སྡོད་ཅིག་ཅེ་འམ་ཚེ་དང་ལྡན་པ་ཕོ་ཉ་ནད་པ་དེ་ལ་ནི་བརྒལ་ཞིང་བརྟགས་པ་མ་ཡིན་ནོ་ཞེས་ལན་གདབ་པར་བྱའོ་ཞེས་བྱ་བ་སྨོས་ཏེ། གལ་ཏེ་ནད་པར་རང་གིས་གཞན་གྱི་དགག་དབྱེ་འཇོག་ཏུ་འཇུད་ན་དེའི་ཚེ་དགེ་འདུན་གྱིས་ནད་པ་དེ་ལ་ཚེ་དང་ལྡན་པ་ནད་པ་ནི་སྦྱོར་མི་བཟོད་པ་ཡིན་གྱི་ཁྱོད་སྡོད་ཅིག་ཅེས་ལན་གདབ་པར་བྱའོ། །གལ་ཏེ་ནད་པས་མངགས་པས་གཞན་གྱི་དགག་དབྱེ་འཇོག་ཏུ་འཇུད་ན། དེའི་ཚེ་དགེ་འདུན་གྱིས་མངགས་པ་དེ་ལ་ཚེ་དང་ལྡན་པ་པོ་ཉ་ནད་བ་དེ་ལ་ནི་བརྒལ་ཞིང་བརྟག་པར་བྱ་བ་མ་ཡིན་ནོ་ཞེས་ལན་གདབ་པར་བྱའོ། །གལ་ཏེ་གཞན་གྱིས་རང་གི་ནད་པའི་དགག་དབྱེ་འཇོག་ཏུ་འཇུད་ན་དེའི་ཚེ་དགེ་འདུན་གྱིས་གཞན་དེ་ལ་ཚེ་དང་ལྡན་པ་ནད་པ་ལ་ནི་སྦྱོར་མི་བཟོད་པ་ཡིན་གྱིས་ཁྱོད་སྡོད་ཅིག་ཅེས་ལན་གདབ་པར་བྱའོ། །གལ་ཏེ་གཞན་གྱིས་མངགས་པས་ནད་པའི་དགག་དབྱེ་འཇོག་ཏུ་འཇུད་ན་དེའི་ཚེ་དགེ་འདུན་གྱིས་མངགས་པ་དེ་ལ་ཚེ་དང་ལྡན་པ་བོ་ཉ་ནད་པ་དེ་ལ་ནི་བརྒལ་ཞིང་བརྟག་པར་བྱ་བ་མ་ཡིན་ནོ་ཞེས་ལན་གདབ་པར་བྱའོ། །བྱས་པ་དང་བྱེད་པའི་རང་གི་ངོ་བོ་མ་རྟོགས་པ་ཉིད་ན་ཡང་གླེང་བ་མི་འཆགས་སོ་ཞེས་བྱ་བ་ལ་བྱས་པའི་རང་གི་ངོ་བོ་མ་རྟོགས་པ་ཉིད་ཅེས་བྱ་བ་ནི། འཕགས་པ་ཆེ་གེ་མོས་ཉེས་པ་བྱས་ཞེས་ནི་ཐོས་ཀྱི་ཉེས་པ་འདི་དང་འདི་ལྟ་བུ་བྱས་ཞེས་ནི་མ་ཐོས་སོ་ཞེས་ཟེར་བའོ། །བྱེད་པའི་རང་གི་ངོ་བོ་མ་རྟོགས་པ་ཉིད་ཅེས་བྱ་བ་ནི། འཕགས་པས་ཉེས་པ་འདི་དང་འདི་ལྟ་བུ་བྱས་ཞེས་ནི་ཐོས་ཀྱི། ཆེ་གེ་མོ་ཞིག་གིས་ཞེས་ནི་མ་ཐོས་སོ་ཞེས་ཟེར་བ་སྟེ། དེ་ལྟར་བྱས་པ་དང་བྱེད་པའི་རང་གི་ངོ་བོ་མ་རྟོགས་པ་
ཉིད་ཡིན་ན་ཡང་གླེང་བ་མི་འཆགས་སོ། །ལྷག་མས་ཀྱང་དུས་མ་ཡིན་པར་འཇུག་པར་མི་བྱའོ་ཞེས་བྱ་བ་ལ། ལྷག་མས་ཀྱང་ཞེས་བྱ་བ་ནི། བྱེད་པ་པོ་ནད་པ་ལ་སོགས་པས་གླེང་བ་དེ་ལས་གཞན་པས་ཀྱང་དུས་མ་ཡིན་པར་གླེང་བ་ལ་འཇུག་པར་མི་བྱའི་དུས་སུ་འཇུག་པར་བྱ་བའོ། །དྲན་པ་དང་ཤེས་བཞིན་ཉེ་བར་མི་གཞག་པར་མི་བྱའོ་ཞེས་བྱ་བ་ནི། དྲན་པ་དང་ཤེས་བཞིན་མངོན་དུ་མ་བྱས་པར་ཡང་གླེང་བ་ལ་འཇུག་པར་མི་བྱ་བའོ། །མཐའ་མ་ཡིན་པར་མི་བྱའོ་ཞེས་བྱ་ནི། གནས་གང་དུ་གླེང་པར་བྱ་བའི་གང་ཟག་དེའི་བསྲུང་བར་བྱ་བ་མཁན་པོ་འམ་སློབ་དཔོན་ནམ་དགེ་འདུན་ནམ་ཞེ་འགྲས་པ་ལ་སོགས་པ་སྤང་བར་བྱ་བ་དག་གི་མདུན་དུ་གླེངས་ན་དེས་བདག་ལ་བརྙས་པར་འགྱུར་རོ་སྙམ་པའི་བློ་སྐྱེ་བར་འགྱུར་བའི་གནས་དེ་ལས་གཞན་པའི་མཐའ་དབེན་པ་དེར་གླེང་བར་བྱ་བ་ལ་གླེང་བར་བྱའི། དེས་བསྲུང་བར་བྱ་བ་དག་གི་དབུས་སུ་གླེང་བར་མི་བྱ་བའོ།། ལྕགས་ཀྱི་གསལ་ཤིང་ཅན་ཉིད་ནི་དམ་པ་རྣམས་ཀྱིས་སྨད་པར་བྱ་བ་ཉིད་ཡིན་པའི་ཕྱིར་ཏེ། གང་ལྕགས་ལས་བྱས་པའི་གསལ་ཤིང་གིས་འཛུགས་པར་བྱེད་པ་དེ་ནི་ལྕགས་ཀྱི་གསལ་ཤིང་ཅན་ཏེ། མང་པོ་དག་གི་མདུན་དུ་གནད་དུ་ཕོག་པར་བྱེད་པ་གང་ཡིན་པའོ། །དེའི་དངོས་པོ་ནི་དེ་ཉིད་དེའི་གནད་དུ་ཕོག་པར་བྱེད་པ་དེ་ཉིད་དོ། །དེ་ནི་དམ་པ་རྣམས་ཀྱིས་སྨད་པར་བྱ་བ་ཉིད་ཡིན་པས་དེའི་ཕྱིར་མཐའ་མ་ཡིན་པར་གླེང་བ་ལ་འཇུག་པར་མི་བྱའོ། །སྐབས་འབྱེད་དུ་མ་བཅུག་པར་མི་བྱའོ་ཞེས་བྱ་བ་ནི། གང་དུ་གང་ཟག་གང་ལ་སྐབས་འབྱེད་དུ་མ་བཅུག་པར་གླེང་བ་ལ་འཇུག་པར་མི་བྱ་བ་སྟེ། དེ་ནི་རབ་ཏུ་འཁྲུག་པ་སྤང་བའི་ཕྱིར་རོ། །དགག་དབྱེ་ནི་དེ་ཉིད་ཡིན་ནོ་ཞེས་བྱ་བ་ནི། གང་གིས་དགག་དབྱེའི་ཚེ་དགེ་འདུན་ལ་དགག་དབྱེ་བྱས་པ་དེ་ནི་སྐབས་ཕྱེ་བ་ཉིད་ཡིན་པས་དེའི་ཕྱིར་དགག་དབྱེ་བྱེད་ན་གླེང་བ་ལ་འཇུག་པ་ལ་ནི་ཉེས་པ་མེད་དོ། །མི་དྲན་ན་དྲན་པར་བྱ་བའོ་ཞེས་བྱ་བ་ནི། གླེངས་པ་ནི་མི་དྲན་ན། དྲན་པར་བྱའོ། །དྲན་པར་བྱ་བ་ནི་གླེང་བའི་འཁོར་ཡིན་པས་དེའི་ཕྱིར་ཇི་ལྟར་གླེང་བ་ལ་དུས་མ་ཡིན་པར་འཇུག་པར་མི་བྱ་བ་དང་དྲན་པ་དང་ཤེས་བཞིན་ཉེ་བར་མ་བཞག་པར་མི་བྱ་བ་དང༌། མཐའ་མ་ཡིན་པར་མི་བྱ་བ་དང༌། སྐབས་
འབྱེད་དུ་མ་བཅུག་པར་དེ་མི་བྱ་བའོ་ཞེས་ཇི་སྐད་སྨོས་པ་དེ་དག་དྲན་པར་བྱ་བའི་སྐབས་འདིར་ཡང་གྲུབ་པ་ཡིན་ནོ། །དེ་མི་བྱེད་ན་དེ་ལ་བརྗོད་པ་དང་བཅས་པ་ཉིད་བྱའོ་ཞེས་བྱ་བ་ནི། སྐབས་འབྱེད་པ་དེ་མི་བྱེད་ན་གླེང་པར་བྱ་བ་དེ་ལ་བརྗོད་པ་དང་བཅས་པ་ཉིད་བྱའོ།། ཇི་ལྟར་བརྗོད་པ་དང་བཅས་པ་ཉིད་བྱ་ཞེ་ན་དེའི་ཕྱིར། ཚེ་དང་ལྡན་པ་ཁྱོད་ལ་བརྗོད་པ་དང་བཅས་པ་ཉིད་བྱས་ཁྱོད་ཀྱིས་གནས་འདི་ནས་མ་ཞུས་པར་འགྲོ་བར་མི་བྱའོ། །ཁོ་བོ་ལ་ཚེ་དང་ལྡན་པ་ལ་བརྗོད་པའི་ཕྱིར་བསྡོགས་པ་ཡོད་དོ་ཞེས་བྱ་བ་སྨྲས་ཏེ། བརྗོད་པར་བྱ་བ་ཉིད་དུ་ངེས་པ་ནི་བསྔོགས་པ་ཞེས་བྱའོ། །དེས་འདུལ་བར་མི་འགྱུར་ན་མི་གདམས་པ་ཉིད་དུའོ་ཞེས་བྱ་བ་སྨྲས་ཏེ། དེ་ལྟར་བརྗོད་པ་དང་བཅས་པ་ཉིད་བྱས་ཀྱང་གལ་ཏེ་འདུལ་བར་མི་འགྱུར་ན་དེའི་ཚེ་གླེང་བར་བྱ་བ་དེ་ལ་མི་གདམས་པ་ཉིད་དུ་བྱ་བའོ། །དེ་ལ་གཏམ་འདྲེ་བ་ལ་སོགས་པ་ཡང་བཟློག་པར་བྱའོ་ཞེས་བྱ་བ་ནི། མི་གདམས་པ་ཉིད་དུ་བྱས་པ་དེ་ལ་གདམས་ཤིང་རྗེས་སུ་བསྟན་པར་བྱ་བ་ཉིད་ཀྱིས་ཕན་གདགས་པ་བཟློག་པར་བྱ་བ་འབའ་ཞིག་ཏུ་མ་ཟད་ཀྱི་གཏམ་འདྲེ་པ་དང་ཕེབས་པར་སྨྲ་བར་དང་སོ་སོར་ཀུན་དགའ་བར་བྱ་བའི་ཐ་སྙད་ཀྱི་ཚིག་སྦྱིན་པ་ཡང་མི་བྱའོ། །དེ་ལྟར་ན་ཡང་གསོ་སྦྱོང་གཞག་གོ་ཞེས་བྱ་བ་ནི། དེ་ལྟར་སྨྲ་བར་མི་བྱ་བ་ཉིད་དུ་རྣམ་པར་གཞག་ཅིང་མི་གདམས་པར་བྱས་ཀྱང་འདུལ་བར་མི་འགྱུར་ཞིང་སྐབས་མི་འབྱེད་ན་དེའི་ཚེ་གསོལ་བ་དང་བཞིའི་ལས་ཀྱིས་དེའི་གསོ་སྦྱོང་གཞག་པར་བྱ་བའོ། །དེའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །དགེ་སློང་མིང་འདི་ཞེས་བགྱི་བ་འདི་གླེངས་ཤིང་དྲན་པར་བགྱིད་ཀྱང་སྐབས་འབྱེད་དུ་མི་བཏུབ་སྟེ། འདི་དགེ་སློང་རྣམས་ཀྱིས་སྨྲ་བར་མི་བགྱིད་པ་ཉིད་དུ་རྣམ་པར་བཞག་ཅིང་མི་གདམས་པར་བགྱིས་ཀྱང་སྐབས་མི་འབྱེད་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱི་དགེ་སློང་མིང་འདི་ཞེས་བགྱི་བའི་གསོ་སྦྱོང་གཞག་པར་བགྱིའོ། །འདི་ནི་གསོལ་བའོ། །དགེ་འདུན་བཙུན་པ་རྣམས་གསན་དུ་གསོལ། །དགེ་སློང་མིང་འདི་ཞེས་བགྱི་བ་འདི་གླེངས་
ཤིང་དྲན་པར་བགྱིས་ཀྱང་སྐབས་འབྱེད་དུ་མི་བཏུབ་སྟེ། འདི་དགེ་སློང་རྣམས་ཀྱིས་སྨྲ་པར་མི་བགྱི་བ་ཉིད་དུ་རྣམ་པར་གཞག་ཅིང་མི་གདམས་པར་བགྱིས་ཀྱང་སྐབས་མི་འབྱེད་དེ་དེའི་སླད་དུ་དགེ་འདུན་གྱིས་དགེ་སློང་མིང་འདི་ཞེས་བགྱི་བའི་གསོ་སྦྱོང་གཞག་པར་བགྱིད་ན། ཚེ་དང་ལྡན་པ་གང་དག་དགེ་སློང་མིང་འདི་ཞེས་བགྱི་བའི་གསོ་སྦྱོང་གཞག་པར་བཟོད་པ་དེ་དག་ནི་ཅིང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས་དགེ་འདུན་གྱི་དགེ་སློང་མིང་འདི་ཞེས་བགྱི་བའི་གསོ་སྦྱོང་གཞག་ལགས་ཏེ། འདི་ལྟར་ཅང་མི་གསུང་པས་དེ་དེ་བཞིན་དུ་འཛིན་ཏོ་ཞེས་གསུངས་པ་ཡིན་ནོ། །དེས་ཀྱང་ན་དགག་དབྱེ་བྱའོ་ཞེས་བྱ་བ་ནི། དེ་ལྟར་གསོ་སྦྱོང་གཞག་པ་དེས་ཀྱང་འདུལ་བར་མི་འགྱུར་ཞིང་སྐབས་མི་འབྱེད་ན་དེའི་ཚེ་གསོལ་བ་དང༌། བཞིའི་ལས་ཀྱིས་དེའི་དགག་དབྱེ་གཞག་པར་བྱའོ། །དེའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །དགེ་སློང་མིང་འདི་ཞེས་བགྱི་བ་འདི་གླེངས་ཤིང་དྲན་པར་བགྱིས་ཀྱང་སྐབས་འབྱེད་དུ་མི་བཏུ་བ་སྟེ། འདི་དགེ་སློང་རྣམས་ཀྱིས་སྨྲ་བར་མི་བགྱི་བ་ཉིད་དུ་རྣམ་པར་གཞག་ཅིང་མི་གདམས་པར་བགྱིས་ཀྱང་སྐབས་མི་འབྱེད་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱི་དགེ་སློང་མིང་འདི་ཞེས་བགྱི་བའི་དགག་དབྱེ་གཞག་པར་བགྱིའོ། །འདི་ནི་གསོལ་བའོ། །དགེ་འདུན་བཙུན་པ་རྣམས་གསན་དུ་གསོལ། །དགེ་སློང་མིང་འདི་ཞེས་བགྱིད་པ་འདི་གླེངས་ཤིང་དྲན་པར་བགྱིས་ཀྱང་སྐབས་འབྱེད་དུ་མི་བཏུབ་སྟེ། འདི་དགེ་སློང་རྣམས་ཀྱིས་སྨྲ་བར་མི་བགྱི་བ་ཉིད་དུ་རྣམ་པར་གཞག་ཅིང་མི་གདམས་པར་བགྱིས་ཀྱང་སྐབས་མི་འབྱེད་དེ་དེའི་སླད་དུ་དགེ་འདུན་གྱིས་དགེ་སློང་མིང་འདི་ཞེས་བགྱིས་པའི་དགག་དབྱེ་གཞག་པར་བགྱི་ན། ཚེ་དང་ལྡན་པ་གང་དག་དགེ་སློང་མིང་འདི་ཞེས་བགྱི་བའི་དགག་དབྱེ་གཞག་པར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག་ལན་གསུམ་དུ་བཟླས། དགེ་འདུན་གྱིས་བཟོད་ཅིང་
གནང་ནས། དགེ་འདུན་གྱིས་དགེ་སློང་མིང་འདི་ཞེས་བགྱི་བའི་དགག་དབྱེ་གཞག་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་གསུངས་པ་ཡིན་ནོ། །གསོ་སྦྱོང་དང་དགག་དབྱེ་གཞག་པ་ཞེས་བྱ་བ་ནི། གང་ཟག་འདི་འདུག་པ་དང་ལྷན་ཅིག་དགེ་སློང་རྣམས་ཀྱིས་གསོ་སྦྱོང་དང་དགག་དབྱེ་མི་བྱའོ་ཞེས་བྱ་བར་རིག་པར་བྱའོ། འཇོག་པར་བྱེད་པ་དག་གིས་གཞག་པ་དེ་དང་ལྷན་ཅིག་ཏུ་བྱ་བ་ཡང་འདིར་བཟོད་པ་ཡིན་ནོ་ཞེས་བྱ་བ་ནི། འཇོག་པར་བྱེད་པའི་དགེ་སློང་གང་དག་གིས་གསོ་སྦྱོང་དང་དགག་དབྱེ་གཞག་པ་གང་ཡིན་པ་དེ་གང་ཟག་དེ་དང་ལྷན་ཅིག་བྱ་བ་གང་ཡིན་པ་དེ་ཡང་སྐབས་འདིར་དེ་ལ་བཟོད་པ་བྱ་བ་ཡིན་གྱི། ཚིག་འབའ་ཞིག་གིས་བཟོད་པར་བྱ་ཞིང་བག་ཡོངས་སུ་བྱ་བར་མ་ཟད་དོ་ཞེས་བྱ་བའི་ཐ་ཚིག་གོ །འདིར་གཞུང་ནི། དྲུག་སྡེ་དག་གིས་དྲན་ཐོར་ཅན་གྱི་བསམ་པས་དགེ་སློང་གི་གསོ་སྦྱོང་གཞག་པ་དང༌། དགེ་སློང་རང་བཞིན་དུ་གནས་པ་ཐམས་ཅད་ཀྱིས་ཀྱང་ཁྱོད་ཀྱི་གསོ་སྦྱོང་དྲུག་སྡེ་དག་གིས་གཞག་གོ་ཞེས་གསོ་སྦྱོང་ལས་ཟློག་པར་བྱེད་ནས། ཡང་དྲུག་སྡེ་དག་གིས་གསོ་སྦྱོང་བྱའོ་ཞེས་བྱ་བ་སྨྲས་པ་ནས། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་དགེ་སློང་གང་དག་གིས་གསོ་སྦྱོང་གཞག་པ་དེ་དག་ཉིད་ཀྱིས་གསོ་སྦྱོང་བྱས་ན་བཟོད་པ་བྱས་པར་བརྗོད་པར་བྱའོ་ཞེས་བྱ་བའི་བར་དུ་གསུངས་པ་ཡིན་ནོ། །སྐབས་ཕྱེ་བ་ཉིད་ན་གལ་ཏེ་མཉན་པ་ཉིད་མ་ཡིན་ན་ཕུར་པ་དང་བཅས་པ་བྱའོ་ཞེས་བྱ་བ་ནི། གླེང་བར་བྱ་བ་དེས་སྐབས་ཕྱེ་བ་ཉིད་ན་གལ་ཏེ་དེ་མཉན་པ་ཉིད་དུ་མི་འགྱུར་ན། དེའི་ཚེ་དེ་ལ་ཕུར་པ་དང་བཅས་པ་ཉིད་དུ་བྱ་བ་སྟེ་ཕུར་པ་དང་བཅས་པའི་སྐབས་འདི་ནི་མ་མོ་ལས་འབྱུང་ངོ༌། །ཇི་ལྟར་ཕུར་པ་དང་བཅས་པར་བྱ་ཞེ་ན། དེའི་ཕྱིར་གནས་འདི་འམ་གཞན་དུ་འམ་གཞི་འདི་འམ་གང་རུང་བ་ལ་འདོད་པ་སྨྲ་བར་བྱའོ་ཞེས་བྱ་བ་དང༌། ལྟུང་བ་བཀལ་ཞིང་ཉེས་པ་བསྟན་ཏེ་བཏང་བས་སོ་ཞེས་བྱ་བ་སྨྲས་ཏེ། གང་ཡང་རུང་བ་ལ་ཞེས་བྱ་བ་ནི། གནས་སམ་གཞི་ལའོ། །ཉེས་པ་བསྟན་ཏེ་ཞེས་བྱ་བ་ནི། ལྟུང་བ་བཀལ་ཞིང་ཞེས་བྱ་བའི་རྣམ་
གྲངས་གཞན་བསྟན་ཏོ། །རྟ་དམུ་རྒོད་ཕུར་པ་དང་བཅས་པ་དང་འདྲ་བར་དེ་ཡང་དྲི་མ་དང་བཅས་པར་བཏང་བ་ཡིན་པས་དེའི་ཕྱིར་ཕུར་པ་དང་བཅས་པ་ཞེས་བྱའོ། །ཚུལ་ཁྲིམས་དང་ལྟ་བ་དང་ཆོ་ག་དང་འཚོ་བ་ཉམས་པས་གླེང་བ་ལ་སོགས་པ་དེ་དག་ཐམས་ཅད་བྱེད་པ་ནི་གཞི་དང་བཅས་པ་འཆགས་སོ་ཞེས་བྱ་བ་ནི། མཐོང་བ་དང་ཐོས་པ་དང་དོགས་པ་དག་གིས་གཞི་དང་བཅས་པ་ཚུལ་ཁྲིམས་དང་ལྟ་བ་དང་ཆོ་ག་དང་འཚོབ་ཉམས་པས་གླེང་བ་ལ་སོགས་པ་དེ་དག་ཐམས་ཅད་བྱེད་ན་འཆགས་པའོ། །སྩོགས་པ་ཞེས་བྱ་བའི་སྒྲས་ནི། དྲན་པར་བྱ་བ་དང་སྐབས་འབྱེད་དུ་གཞུག་པ་དང༌། བརྗོད་པ་དང་བཅས་པ་ཉིད་དང༌། མི་གདམས་པ་ཉིད་དང༌། གསོ་སྦྱོང་གཞག་པ་དང༌། དགག་དབྱེ་གཞག་པ་དང༌། ཕུར་པ་དང་བཅས་པ་བྱ་བ་དག་བསྡུ་སྟེ། དེ་དག་བྱ་བ་ཡང་གཞི་ཡོད་ན་འཆགས་ཀྱི། གཞི་མེད་པར་ཚུལ་ཁྲིམས་ལ་སོགས་པ་ཉམས་པས་གླེང་བ་ལ་སོགས་པ་བྱེད་ན་ནི་མི་འཆགས་སོ། །གཞི་ལེགས་པ་མ་ཡིན་པས་མི་བྱའོ་ཞེས་བྱ་བ་ནི། གླེང་བ་ལ་སོགས་པ་དེ་དག་ལེགས་པར་མ་མཐོང་བ་དང་ལེགས་པར་མ་ཐོས་པ་དང༌། ལེགས་པར་མི་དོགས་པས་མི་བྱ་བ་དེ་མི་གསལ་བར་མཐོང་བ་ནི་ལེགས་པར་མ་མཐོང་བའོ། །མི་གསལ་བར་ཐོས་པ་ནི་ལེགས་པར་མ་ཐོས་པའོ། །སྙིང་ཐ་དད་ཅིང་དད་པ་ཞན་པའི་ཡོངས་སུ་རྟོགས་པ་ནི་ལེགས་པར་མི་དོགས་པའོ། །འདི་ལ་དངོས་པོ་ལས་བདེན་པ་ཉིད་ཀྱི་རྒྱུ་མ་ཡིན་ནོ་ཞེས་བྱ་བ་ནི། གཞི་འདི་ལ་དངོས་པོ་ལས་བདེན་པ་ཉིད་ཀྱི་རྒྱུ་མ་ཡིན་གྱི། འདུ་ཤེས་ལས་བདེན་པ་ཉིད་ཀྱི་རྒྱུ་ཉིད་དུ་རྣམ་པར་གཞག་པ་སྟེ། དངོས་པོ་བདེན་པ་ཉིད་ཡིན་ཡང་གལ་ཏེ་མཐོང་བ་ལ་སོགས་པའི་འདུ་ཤེས་མེད་པས་གླེང་བར་བྱེད་ན་གཞི་མེད་པ་ཁོ་ནས་གླེང་བ་ལ་སོགས་པར་འགྱུར་ལ། དངོས་པོ་མི་བདེན་པ་ཉིད་ཡིན་ཡང་གལ་ཏེ་མཐོང་བ་ལ་སོགས་པའི་འདུ་ཤེས་ཀྱིས་གླེང་བར་བྱེད་ན་གཞི་དང་བཅས་པ་ཁོ་ནས་གླེང་བ་ལ་སོགས་པར་འགྱུར་རོ་ཞེས་བསྟན་པ་ཡིན་ནོ། །ཐོས་པ་ནི་རྣམ་པ་གསུམ་སྟེ་བྱ་བའི་མཚན་མ་དང་གཞན་ཕེབས་པར་སྨྲ་བ་དང་རང་གིས་རྗེས་སུ་ཐོས་པའོ་ཞེས་བྱ་བ་ལ། བྱ་བའི་མཚན་མ་ཞེས་བྱ་བ་ནི། བྱ་བ་དེ་སྒྲ་གང་དག་
གིས་འཇུག་པའི་སྒྲ་དེ་དག་དེར་བྱ་བ་དེ་དད་ལྷན་ཅིག་འབྱུང་བའི་རང་བཞིན་ཅན་གང་ཡིན་པ་དེ་ནི་བྱ་བའི་མཚན་མའི་སྒྲ་སྟེ་མི་ཚངས་པར་སྤྱོད་པ་དང་འཛིན་པ་ལ་སོགས་པའི་བྱ་བ་གང་བྱེད་པ་དེ་ལ་སྒྲ་ཤུབ་ཤུབ་པོ་དང༌། ཁུ་ཚུར་གྱིས་བརྡེགས་པ་དང་ལག་པས་བརྡེགས་པ་ལ་སོགས་པའི་སྒྲ་གྲགས་པ་གང་ཡིན་བ་དེ་ནི་བྱ་བའི་མཚན་མའི་སྒྲ་ཐོས་བ་ཡིན་ནོ། །གཞན་ཕེབས་པར་སྨྲ་བཞེས་བྱ་བ་ནི། གཞན་དག་མི་ཚངས་པར་སྤྱོད་པ་དང་འཛིན་པ་ལ་སོགས་པ་གང་བྱེད་པ་དེ་གཞན་ཕེབས་པར་སྨྲ་བ་ལས་ཐོས་པ་གང་ཡིན་པའོ། །རང་གི་རྗེས་སུ་ཐོས་པ་ཞེས་བྱ་བ་ནི། ཆེ་གེ་མོ་ཞིག་གིས་འདི་ལྟ་བུ་བྱས་སོ་ཞེས་གཞན་དག་ནི་ལོགས་ཤིག་ན་གཏམ་ཟེར་བ་རང་གིས་ལོགས་ཤིག་ནས་རྗེས་སུ་ཐོས་པ་གང་ཡིན་པའོ། །འདིར་གཞུང་ནི། འདི་ལ་དགེ་སློང་དག་གིས་རྣམ་པ་གང་དག་དང༌། རྟགས་གང་དག་དང༌། །མཚན་མ་གང་དག་གིས་ཕམ་པར་འགྱུར་བ་མཐའི་ལྟུང་བའི་བྱིན་པའི་རྣམ་པ་དེ་དག་དང༌། རྟགས་དེ་དག་དང༌། མཚན་མ་དེ་དག་གིས་ཕམ་པར་འགྱུར་བ་མཐའི་ལྟུང་བ་འབྱིན་པ་དེ་ཐོས་པ་དང་གཏམ་དེ་ཡང་དེ་ལས་བྱུང་ཞིང་དེའི་རང་བཞིན་གྱིས་ཉེ་པར་གནས་པ་ཡིན་པ་དང༌། དེ་བཞིན་དུ་དེས་དགེ་སློང་དེ་ཕམ་པར་འགྱུར་བ་མཐའི་ལྟུང་བ་བྱུང་དོ་ཞེས། ཡིད་ཆེས་པའི་ཚིག་ལས་ཐོས་པར་གྱུར་ན་གཞི་ངེས་གནས་དེའམ་གཞན་དུ་དེའི་གསོ་སྦྱོང་འཇོག་པར་བྱེད་ན། ཆོས་བཞིན་དུ་གསོ་སྦྱོང་འཇོག་པར་བྱེད་པ་ཡིན་ནོ་ཞེས་གསུངས་པ་ཡིན་ཏེ། དེར་ཇི་སྐད་གསུངས་པ་དེ་དག་གོ་རིམས་བཞིན་དུ་འདིར་བསྡུས་པ་ཡིན་ནོ། །ཡིད་མ་ཆེས་པ་ནི་གཞི་མ་ཡིན་ནོ་ཞེས་བྱ་བ་ནི། ཐོས་ཀྱང་ཡིད་མ་ཆེས་པ་གང་ཡིན་པ་དེ་ནི་གཞི་མ་ཡིན་པར་རིག་པར་བྱའོ། །འདིར་གཞུང་ནི། དེས་ཡིད་ཆེས་པའི་ཚིག་ལས་ཐོས་པ་མ་ཡིན་ན་ཞེས་གསུངས་པ་ཡིན་ནོ། །ཡོངས་སུ་སྦྱང་བའི་གཞིའོ་ཞེས་བྱ་བ་དེ་འདུལ་བ་གཞིའི་སྐབས་སུ་གཏོགས་པ་བཤད་ཟིན་ཏོ།། །།ད་ནི་ཡོངས་སུ་སྐྱང་བའི་གཞི་ཞུ་བའི་སྐབས་བསྡུ་བའི་ཕྱིར་ཤེས་པ་དུ་མ་ཉིད་ཡིན་ན་གླེང་བ་ལ་སོགས་པ་ལ་འདོད་པས་སོ་ཞེས་བྱ་བ་སྨྲས་ཏེ། གལ་ཏེ་གླེང་བར་བྱ་བ་དེའི་ལྟུང་པ་
ཤེས་པའི་དགེ་སློང་དུ་མ་ཉིད་ཡིན་ན་དེ་ལ་གླེང་བ་དང་དྲན་པར་བྱ་བ་དང༌། སྐབས་འབྱེད་དུ་གཞུག་པ་ལ་སོགས་པ་དེ་དག་རྒན་རིམས་ཀྱིས་འཇུག་པར་བྱ་བར་མ་ངེས་ཀྱི་གང་གླེང་བར་འདོད་པས་ཅི་དགར་འཇུག་པར་བྱ་བའོ། །འདིར་གཞུང་ནི་བརྫུན་དུ་སྨྲ་བའི་ལྟུང་བྱེད་ཀྱི་ཞུ་བ་ལས་བཙུན་པ་དགེ་སློང་དགེ་འདུན་གྱི་དབུས་སུ་བསླབ་པ་ལས་འདའ་བར་བགྱིད་ན་སུས་གླེང་བར་བགྱི། གང་འདོད་ཕས་སོ་ཞེས་གསུངས་པ་ཡིན་ནོ། །དགག་དབྱེ་མ་ཡིན་པར་དེ་གཞག་པར་མི་བྱའོ་ཞེས་བྱ་བ་ནི། དགག་དབྱེའི་ལས་ཀྱི་དུས་མ་ཡིན་པ་གཞན་དུ་དགག་དབྱེ་དེ་གཞག་པར་མི་བྱ་བའོ། །གསོ་སྦྱོང་མ་ཡིན་པར་དེ་མི་བྱའོ་ཞེས་བྱ་བ་ནི། གསོ་སྦྱོང་གི་ལས་ཀྱི་དུས་མ་ཡིན་པ་གཞན་དུ་གསོ་སྦྱོང་དེ་གཞག་པར་མི་བྱ་བའོ། །འཇོག་པར་བྱེད་པ་བུད་མེད་ཀྱིས་གཞན་སྐྱེས་པའི་གཞག་པ་ཉིད་བྱེད་དམ་བྱས་པ་ཉིད་ན་གཞག་པ་ཉིད་མ་ཡིན་ནོ་ཞེས་བྱ་བ་ནི། གསོ་སྦྱོང་དང་དགག་དབྱེ་འཇོག་པར་བྱེད་པས་དེ་དག་འཇོག་པར་བྱེད་པ་ཉིད་ནའམ། གཞག་པར་བྱས་པ་ཉིད་ཀྱི་འོག་ཏུ་གལ་ཏེ་མཚན་གྱུར་ཏམ་དང་པོ་ཉིད་ནས་བུད་མེད་དུ་གྱུར་པ་ཉིད་ཀྱིས་འཇོག་པར་བྱེད་པ་བུད་མེད་ཡིན་པར་གྱུར་ལ། གཞག་པར་བྱ་བ་གཞན་སྐྱེས་པ་ཡིན་པར་གྱུར་ན། དེ་ནི་འཇོག་པར་བྱེད་པ་བུད་མེད་ཉིད་ཀྱིས་གཞན་སྐྱེས་པའི་གསོ་སྦྱོང་དང་དགག་དབྱེ་གཞག་པ་ཉིད་བྱེད་དམ་བྱས་པ་ཉིད་ནི་གཞག་པ་ཉིད་མ་ཡིན་ཏེ། བུད་མེད་རྣམས་ནི་སྐྱེས་པའི་ཡུལ་ལ་དབང་མེད་པའི་ཕྱིར་གཞག་པ་མི་འབྱུང་བ་ཁོ་ན་ཡིན་ནོ། །སྐྱེས་པས་བུད་མེད་ཀྱི་འཇོག་པ་ནི་འབྱུང་བ་ཁོ་ན་ཡིན་ནོ། །འོ་ན་གང་གི་ཚེ་འཇོག་པར་བྱེད་པ་བུད་མེད་ཀྱིས་འཇོག་ཏུ་བཅུག་ནས་སྐྱེས་པ་ཉིད་དུ་གྱུར་ན་ཇི་ལྟར་བརྗོད་པར་བྱ་ཞེ་ན། འཇོག་པར་བྱེད་པ་བུད་མེད་ཉིད་ལ་གཞག་པ་དང་པོ་ནས་མི་འབྱུང་བས་ཕྱིས་སྐྱེས་པ་ཉིད་དུ་གྱུར་ཀྱང་རྗེས་སུ་འཇུག་པ་མེད་དོ། །དེ་ལྟ་བས་ན་བུད་མེད་ཀྱིས་འཇོག་ཏུ་བཅུག་ནས་སྐྱེས་པ་ཉིད་དུ་གྱུར་ཀྱང་གཞག་པ་ཉིད་མེད་དོ། །འདིར་གཞུང་ནི། དགག་དབྱེའི་གཞིའི་ཞུ་བ་ལས་བཙུན་པ་རེ་ཞིག་དགེ་སློང་གིས་དགེ་སློང་གི་དགག་དབྱེ་འཇོག་པར་བགྱིད་ཅིང༌། གང་གི་འཇོག་བར་བགྱིད་པ་དེའི་མཚན་གྱུར་ཏེ་དགེ་སློང་མར་གྱུར་ན་གཞག་
པར་བརྗོད་པར་བགྱིའམ། ཉེ་བ་འཁོར་གཞག་པར་བརྗོད་པར་བྱའོ། །འཇོག་པར་བགྱིད་པ་གང་ལགས་པ་དེ་མཚན་གྱུར་ཏེ་དེ་དགེ་སློང་མར་གྱུར་ན་གཞག་པར་བརྗོད་པར་བགྱིའམ་ཉེ་བར་འཁོར་གཞག་པར་བརྗོད་པར་མི་བྱའོ། །བཙུན་པ་རེ་ཞིག་དགེ་སློང་མས་དགེ་སློང་མའི་དགག་དབྱེ་འཇོག་པར་བགྱིད་ཅིང་གང་གིས་འཇོག་པར་བགྱིད་པ་དེ་མཚན་གྱུར་ཏེ་དགེ་སློང་དུ་གྱུར་ན་གཞག་པར་བརྗོད་པར་བགྱིའམ། ཉེ་བ་འཁོར་གཞག་པར་བརྗོད་པར་མི་བྱའོ། །འཇོག་པར་བགྱིད་པ་གང་ལགས་པ་དེ་མཚན་གྱུར་ཏེ་དགེ་སློང་དུ་གྱུར་ན་གཞག་པར་བརྗོད་པར་བགྱིའམ། ཉེ་བ་འཁོར་གཞག་པར་བརྗོད་པར་མི་བྱའོ། །དེ་བཞིན་དུ་དགེ་སློང་དང་དགེ་སློང་མས་དགག་དབྱེ་བྱེད་པ་ཡང་བརྗོད་པར་བྱའོ་ཞེས་གསུངས་པ་ཡིན་ནོ། །དེ་བཞིན་དུ་ཉམས་པས་ཀྱང་མ་ཡིན་ནོ་ཞེས་བྱ་བ་ནི། སྨྱོན་པ་ལ་སོགས་པས་གཞག་པ་ཉིད་ཀྱང་གཞག་པ་ཉིད་མ་ཡིན་པའོ། །ཚུལ་ཁྲིམས་མེད་པ་དང་གཅིག་པ་ཉིད་མ་ཡིན་པས་ཀྱང་མ་ཡིན་ནོ་ཞེས་བྱ་བ་ནི། ཉམས་པའམ་དང་པོ་ནས་སྡོམ་པ་མ་ཐོབ་པས་ཚུལ་ཁྲིམས་མེད་པ་ཉིད་དོ། །ཆོས་དད་ཆོས་མ་ཡིན་པའི་ཕྱོགས་སུ་གྱུར་པ་ཕན་ཚུན་བློ་གཅིག་པ་ཉིད་མ་ཡིན་བ་དེ་གཉིས་ཀྱིས་གཞག་པ་ཉིད་ཀྱང་གཞག་པ་ཉིད་མ་ཡིན་ནོ། །གཅིག་པ་ཉིད་མ་ཡིན་པའི་གཞུང་ནི་དགག་དབྱེའི་གཞིའི་ཞུབ་ལས་བཙུན་པ་རེ་ཞིག་ཁས་བླངས་པ་དག་གིས་ཁས་མ་བླངས་པ་དག་གི་དགག་དབྱེ་འཇོག་པར་བགྱིད་ན་གཞག་པར་བརྗོད་པར་བགྱིའམ། ཉེ་བ་འཁོར་གཞག་པར་བརྗོད་པར་མི་བྱའོ། །བཙུན་པ་རེ་ཞིག་ཁས་མ་བླངས་པ་དག་གིས་ཁས་བླངས་པ་དག་གི་དགག་དབྱེ་འཇོག་པར་བགྱིད་ན། གཞག་པར་བརྗོད་པར་བགྱིའམ། ཉེ་བ་འཁོར་གཞག་པར་བརྗོད་པར་མི་བྱའོ་ཞེས་གསུངས་པ་ཡིན་ནོ། །དེ་གཉིས་ཀྱི་ཡད་མ་ཡིན་ནོ་ཞེས་བྱ་བ་ནི། རང་བཞིན་ཉམས་པ་ཞེས་བྱ་བ་དེ་དང། ཚུལ་ཁྲིམས་མེད་པ་དང་གཅིག་པ་ཉིད་མ་ཡིན་པ་ཞེས་སྨོས་པའི་ཚོམས་དེ་གཉིས་ཀྱིས་གསོ་སྤྱོད་དང་དགག་དབྱེ་གཞན་གྱིས་གཞག་པ་ཉིད་ཀྱང་གཞག་པ་ཉིད་མ་ཡིན་པའོ། །ཅིའི་ཕྱིར་གསོ་སྦྱོང་གཞག་པའི་གཞི་འདིའི་མིད་ཡོངས་སུ་སྦྱང་བའི་གཞི་ཞེས་གཞན་དུ་བྱས་ཤེ་ན་
གཞི་འདིས་དགག་དབྱེ་གཞག་པ་དང་གདམས་ངག་གཞག་པ་དང༌། བརྗོད་པ་དང་བཅས་པ་དང༌། ཕུར་པ་དང་བཅས་པ་ལ་སོགས་པས་ཡོངས་སུ་སྦྱང་བར་བྱ་བ་ཐམས་ཅད་བསྡུས་པ་ཡིན་གྱི། གསོ་སྦྱོང་གཞག་པ་འབའ་ཞིག་ཏུ་མ་ཟད་ཀྱི། དེ་དག་ཐམས་ཅད་བསྟན་པའི་ཕྱིར། གསོ་སྦྱོང་གཞག་པའི་གཞི་འདིའི་མིང་ཡོངས་སུ་སྦྱང་བའི་གཞི་ཞེས་མིང་གཞན་དུ་བྱས་སོ། །ཡོངས་སུ་སྦྱང་བའི་གཞི་ཞུ་བའི་སྐབས་སོ་ཞེས་བྱ་བ་དེ་ཞུ་བའི་སྐབས་ནས་འབྱུང་བ་ཤད་ཟིན་ཏོ་ཡོངས་སུ་སྦྱང་བའི་གཞི་རྫོགས་སོ་ཞེས་བྱ་བ་གསོ་སྦྱང་གཞག་པའི་གཞི་བཤད་ཟིན་ཏོ།། །།ད་ནི་ལས་བྱེད་པའི་གཞི་སྨྲ་བར་འདོད་ནས་དགེ་འདུན་ཐ་དད་པ་ཉིད་དུ་ནུས་པ་ལ་མི་འདོད་པར་གླེང་བ་དང་གླེང་བར་བྱེད་པ་ན་ལོག་པར་མི་བྱའོ་ཞེས་བྱ་བ་སྨྲས་ཏེ། གང་ཟག་གང་གིས་དགེ་འདུན་ཐ་དད་པ་ཉིད་དུ་དབྱེ་བར་ནུས་པ་དེ་ལ་དེ་མི་འདོད་བཞིན་དུ་ཕར་གླེང་བར་མི་བྱ་ལ། དེས་ཚུར་གླེངས་པ་ན་ཡང་ལོག་ཐབས་མི་བྱ་པ་སྟེ། དེ་ནི་དེས་དགེ་འདུན་འབྱེད་པར་འགྱུར་བ་སྤང་པའི་ཕྱིར་རོ། །འདའ་བར་བྱ་བ་གང་ན་མི་མཐུན་པ་ཡོད་པ་དེ་དང་ལྷན་ཅིག་ཏུ་འཁོད་པར་མི་བྱའོ་ཞེས་བྱ་བ་ནི། གནས་གང་དུ་འདའ་བར་བྱེད་ཅིང་ངལ་བསོ་བར་བྱེད་པའི་གནས་དེ་ནི་འདའ་བར་བྱ་བ་ཞེས་བྱ་སྟེ། དབེན་པ་ཞེས་བྱ་བའི་ཐ་ཚིག་གོ །འདའ་བར་བྱ་བའི་གནས་གང་ན་མི་མཐུན་པ་ཞེས་བྱ་བར་དགྲ་བོ་ཡོད་པ་དེར་དེ་དང་ལྷན་ཅིག་ཏུ་འཁོད་པ་ཞེས་བྱ་བ་འདུག་པ་དང༌། འགྲེང་བར་མི་བྱ་བ་སྟེ་འཐབ་ཀྲོལ་གྱི་སྐབས་བཅད་པའི་ཕྱིར་འདི་བཅའ་བ་མཛད་དོ། །གཞན་དུ་ནི་གོ་གཉིས་སམ་གསུམ་གྱི་བར་དུ་བཅད་དེའོ་ཞེས་བྱ་བ་ནི། འདའ་བར་བྱ་བའི་གནས་དབེན་པ་སྔར་བསྟན་པ་དེ་ལས་གཞན་པའི་གནས་གང་ན་གང་ཟག་མི་མཐུན་པ་ཡོད་པ་དེ་དང་ལྷན་ཅིག་ཏུ་མི་འཁོད་དུ་མི་རུང་ན་གོ་གཉིས་སམ་གསུམ་གྱི་བར་དུ་བཅད་དེ་འཁོད་པར་བྱའོ། །འདི་ནི་ལུས་ཀྱིས་ཕ་རོལ་གནོད་པ་དང་རེག་པ་སྤང་བའི་ཕྱིར་རོ། །དེས་ཅིག་ཤོས་དང་ཡང་དེ་བཞིན་ནོ་ཞེས་བྱ་བ་ནི། མི་མཐུན་པའི་ཡུལ་གང་ལ་འདའ་བར་བྱ་བ་གང་ན་མི་མཐུན་པ་ཡོད་པ་དེ་དང་ལྷན་ཅིག་ཏུ་འཁོད་པར་མི་བྱ་བ་དང༌། གཞན་དུ་ནི་གོ་གཉིས་སམ་གསུམ་གྱིས་བཅད་དེ་འཁོད་པར་བྱའོ་ཞེས་བསྟན་པ་
གང་ཡིན་པ་དེ་མི་མཐུན་པར་དེས་ཀྱང་མི་མཐུན་པའི་ཡུལ་ཅིག་ཤོས་དང་དེ་བཞིན་དུ་བྱ་བའོ། །དེ་གཉིས་ཀྱི་གཙུག་ལག་ཁང་བར་དུ་ཆོད་པ་སྦྱིན་པར་བྱ་བ་ཉིད་དང་མནོད་པར་བྱ་བ་ཉིད་དོ་ཞེས་བྱ་བ་ནི། གང་ཟག་མི་མཐུན་པ་དེ་གཉིས་ཀྱི་གཙུག་ལག་ཁང་ཞེས་བྱ་བ་གནས་པའི་གཞི་གཡོགས་པའམ་མ་གཡོགས་པ་གང་ཡང་རུང་བ། བར་དུ་གཞན་གྱི་གནས་ཁང་གིས་ཆོད་པ་གནས་ཁང་བསྒོ་བས་ཀྱང་སྦྱིན་པར་བྱ་བ་ཉིད་ཡིན་ལ། རང་གིས་ཀྱང་མནོད་པར་བྱ་བ་ཉིད་ཡིན་ནོ། །བསྐོ་བས་དེ་ལས་གཞན་དུ་བསྐོས་ན་ཡང་ཉེས་བྱས་སུ་འགྱུར་ལ། ནོད་པས་དེ་མནོས་ན་ཡང་ཉེས་བྱས་སུ་འགྱུར་རོ། །དགེ་འདུན་ཐམས་ཅད་ཀྱིས་གྲོགས་བྱས་སམ་ལས་སུ་སྩལ་ཏེ། དེར་གནས་ཁང་སྦྱིན་པར་བྱེད་ན་ཡང་ཐམས་ཅད་ལ་ཉེས་བྱས་སུ་འགྱུར་རོ། །འདི་ནི་མི་མཐུན་པ་དེ་གཉིས་མི་འཕྲད་པར་བྱ་བའི་ཕྱིར་རོ། །ཆོས་དང་འདུལ་བ་ལ་གལ་ཏེ་དེ་དང་ལྡན་པར་ཤེས་ནས་ཆོས་མ་ཡིན་པ་ལ་མངོན་པར་ཞེན་པ་ལ་དགེ་འདུན་མཐུན་པ་མེད་དོ་ཞེས་བྱ་བ་ནི། དངོས་པོ་དང་འབྲེལ་བའི་རྣམ་པའི་འདུལ་བ་ལ་གལ་ཏེ་དེ་དང་ལྡན་པ་ཉིད་དུ་ཤེས་ན་ཞེས་བྱ་བ་ཆོས་དང་འདུལ་བ་ལ་གལ་ཏེ་མི་མཐུན་པ་དེ་དང་ལྡན་པར་ཤེས་ནས་ཆོས་མ་ཡིན་པ་ལ་མངོན་པར་ཞེན་པ་ལ་ཞེས་བྱ་བ་དེ་ལྟར་ཆོས་དང་འདུལ་བའི་རྣམ་པ་ལ་མི་མཐུན་པ་ཉིད་དང་ལྡན་པར་ཤེས་ནས་དེའི་འོག་ཏུ་ཆོས་མ་ཡིན་པ་ལ་མངོན་པར་ཞེན་པ་ལ་དེ་ལ་དགེ་འདུན་མཐུན་པ་མེད་དོ། །གང་གི་ཕྱིར་ཆོས་དང་འདུལ་བའི་ཕྱིར་དགེ་འདུན་མཐུན་པ་ཡིན་གྱི་དོན་གཞན་གྱི་ཕྱིར་མ་ཡིན་པ་དེའི་ཕྱིར་མི་མཐུན་པ་ལ་ནི་དགེ་འདུན་མཐུན་པ་འབྱེ་བར་མི་འགྱུར་རོ། །དེའི་ཕྱིར་དེ་ལས་གཞན་པ་དག་དང་ཚོགས་ཏེ་ལས་བྱས་ན་ཡང་མི་འཆགས་པ་ལ་ཕན་ཚུན་མི་མཐུན་པ་ཉིད་དུ་ཡང་མི་འགྱུར་རོ་ཞེས་བྱ་བ་ནི། གང་གི་ཕྱིར་ཇི་སྐད་བསྟན་པ་དེ་ལ་དགེ་འདུན་མཐུན་པ་མེད་པ་དེའི་ཕྱིར་ཆོས་མ་ཡིན་པ་ལ་མངོན་པར་ཞེན་པ་དེ་དག་དང༌། དེ་ལས་གཞན་བའི་ཆོས་ཀྱི་ཕྱོགས་དང་མཐུན་པ་དག་ཚོགས་ཏེ་ལས་བརྒྱ་རྩ་གཅིག་པོ་དག་བྱས་ན་ཡང་མི་འཆགས་ལ། མ་ཚོགས་པར་སོ་སོར་བྱེད་ན་ཡང་ཕན་ཚུན་མི་མཐུན་པ་ཉིད་དུ་མི་འགྱུར་ཏེ། ཕྱོགས་སོ་སོའི་ལས་
འཆགས་པར་འགྱུར་བའོ། །དེ་དག་དེའི་མི་མཐུན་པའི་ཕྱོགས་དང་འཐབ་པར་འགྱུར་བ་ཉིད་ནི་ཆོས་འདི་པ་དག་པའི་ཕྱག་མི་བྱ་བ་ཉིད་ཡིན་ནོ་ཞེས་བྱ་བ་ནི། ཆོས་མ་ཡིན་པ་ལ་མངོན་པར་ཞེན་པ་དེ་དག་དེའི་མི་མཐུན་པའི་ཕྱོགས་ཆོས་དང་མཐུན་པའི་ཕྱོགས་སུ་གཏོགས་པ་དང༌། ལྷན་ཅིག་འཐབ་པར་འགྱུར་བ་ཉིད་ན་དེ་དགལ་ཆོས་འདི་ལ་དགེ་སློང་དང་དགེ་སློང་མ་དང་དགེ་ཚུལ་དང༌། དགེ་ཚུལ་མ་དང༌། དགེ་སློབ་མ་དང༌། དགེ་བསྙེན་དང་དགེ་བསྙེན་མ་དག་གིས་ཕྱག་མི་བྱ་བ་ཉིད་ཡིན་པའོ། །མངོན་དུ་ལྡང་བ་དང་སྟན་ལ་བོད་པ་དང་གཏམ་འདྲེ་བ་དང༌། ཕེབས་པར་སྨྲ་བ་དང༌། ཀུན་དགའ་བར་འགྱུར་བ་དང༌། རྣམ་པར་བལྟ་བ་དང༌། ཅུང་ཟད་བལྟ་བ་དག་ཀྱང་མི་བྱའོ་ཞེས་བྱ་བ་ནི། ཇི་སྐད་སྨོས་པ་དེ་དག་ཐམས་ཅད་ཀྱང་ཆོས་མ་ཡིན་པ་ལ་མངོན་པར་ཞེན་པ་སྤང་བའི་ཕྱིར་རོ། །གཏམ་འདྲེ་བཞེས་བྱ་བ་ནི། ཚིག་གི་ལན་ལ་སོགས་པ་ཀུན་དུ་སྨྲ་བ་སྦྱིན་པའོ། །ཕེབས་པར་སྨྲ་བ་ཞེས་བྱ་བ་ནི། ཡིད་གཅུགས་པའི་གཏམ་བྱ་བའོ། །ཀུན་དགའ་བར་འགྱུར་བ་ཞེས་བྱ་བ་ནི། གཏམ་དྲི་བ་ལ་སོགས་པའི་ཐ་སྙད་བྱ་བའོ། །རྣམ་པར་བལྟ་བ་ཞེས་བྱ་བ་ནི། མིག་གིས་རྒྱུན་དང་ལྡན་པར་བལྟ་བའོ། །ཅུང་ཟད་བལྟ་བ་ཞེས་བྱ་བ་ནི། རྒྱུན་དང་ལྡན་པ་མ་ཡིན་པར་བལྟ་བའོ། །ལོག་པའི་ཐ་སྙད་ཀྱིས་གནས་མལ་ངན་པ་རྗེས་སུ་སྦྱིན་ནོ་ཞེས་བྱ་བ་ནི། ཆོས་མ་ཡིན་པ་ལ་མངོན་པར་ཞེན་པ་དེ་དག་ཉེ་བར་འོངས་ནའོ། །ཁ་ཅིག་ལས་ནི་ཚིག་གིས་ཐོས་པ་དད་བཅས་པར་གཞན་ལའོ་ཞེས་བྱ་བ་ནི། གཞུང་ཁ་ཅིག་ལས་ནི་ཆོས་མ་ཡིན་པ་ལ་མངོན་པར་ཞེན་པ་དེ་དག་འོངས་ན་ཚིག་གིས་ཅི་ནས་ཀྱང་དེ་དག་གིས་ཐོས་པ་དང་བཅས་པར་གང་ཟག་གཞན་ལ་བརྟེན་ཏེ་དེ་དག་འདི་ཙམ་འཐོབ་བོ་ཞེས་བྱ་བའི་ཚིག་གིས་གནས་མལ་ངན་པ་རྗེས་སུ་སྦྱིན་པར་བྱའོ་ཞེས་འབྱུང་ངོ༌། །གཙུག་ལག་ཁང་མཇུག་ཏུའོ་ཞེས་བྱ་བ་ནི། སྦྱིན་ནོ་ཞེས་བྱ་བར་སྦྱར་ཏེ་མཇུག་ཏུ་ཞེས་བྱ་བར་ནི་ཐ་མར་རོ། །ཁོ་བོ་ཅག་རྒན་ནོ་ཞེས་ཟེར་ན་ཁྱེད་ཀྱང་བདག་ཅག་ཤཱཀྱའི་སྲས་ཀྱི་དགེ་སློང་དག་ཡིན་ནོ་སྙམ་དུ་བདག་ཉིད་ཁས་འཆེའམ་ཁྱེད་ཅག་གང་དག་གི་སྤྱོད་ཚུལ་འདི་ལྟ་བུ་དང་གཏམ་འདི་ལྟ་བུ་འདི་ལ་ཡང་མི་
འཐོབ་པ་ཡིན་ན། ཁྱོད་ཀྱི་སྟོན་པ་ཐུགས་རྗེ་དང་ལྡན་པས་དེས་ན་འདི་རྗེས་སུ་གནང་ངོ་ཞེས་གཞན་ལ་ལན་གདབ་པར་བྱའོ་ཞེས་བྱ་བ་ནི། ཆོས་མ་ཡིན་པ་ལ་མངོན་པར་ཞེན་པ་དེ་དག་གནས་མལ་ངན་པ་དག་ཐ་མར་བྱིན་པ་ན། གལ་ཏེ་འདི་སྐད་ཅེས་ཁོ་བོ་ཅག་རྒན་རབས་ཡིན་ན་ཅིའི་ཕྱིར་གནས་མལ་འདི་ལྟ་བུ་ངན་པ་མཇུག་ཏུ་སྦྱིན་ཞེས་ཟེར་ན་དེ་དག་ལ་དངོས་སུ་ལན་མི་གདབ་པར་གང་ཟག་གཞན་ལ་བརྟེན་ཏེ་ལན་འདི་སྐད་གདབ་པར་བྱའོ་ཞེས་བྱ་བར་སྦྱར་རོ། །ཁྱེད་ཅག་ཀྱང་བདག་ཅག་ཤཱཀྱའི་སྲས་ཀྱི་དགེ་སྦྱོང་དག་ཡིན་ནོ་སྙམ་དུ་བདག་ཉིད་ཁས་འཆེའམ་ཞེས་བྱ་བ་ནི། ཁྱེད་ཅག་དེ་མ་ཡིན་ནོ་ཞེས་བྱ་བའི་ཟུར་ཡིན་ནོ། །སྤྱོད་ཚུལ་འདི་ལྟ་བུ་ཞེས་བྱ་བ་ནི། ཁྱེད་ཅག་གིས་སྤྱོད་པའི་སྤྱོད་པ་ལ་སོགས་པ་དང་གསོ་སྦྱོང་དད་དགག་དབྱེ་ཉམས་པ་གང་ཡིན་པ་དེ་དག་བརྗོད་པར་བྱའོ། །གཏམ་འདི་ལྟ་བུ་ལ་ཞེས་བྱ་བ་ནི་སྤྱོད་ཚུལ་དེ་ལ་ཉེས་དམིགས་གང་བྱུང་བ་སྟེ་སྟོན་པར་གུད་དུ་གཤེགས་པ་ལ་སོགས་པ་གང་ཡིན་པ་དེ་དག་བརྗོད་པར་བྱའོ། །འདི་ཡང་མི་ཐོབ་པ་ཡིན་ནོ་ཞེས་བྱ་བ་ནི། གནས་མལ་ངན་པ་མཇུག་ཏུ་བྱིན་པ་འདི་ཡང་ཁྱེད་ལ་མི་འོས་པ་ཡིན་ནོ་ཞེས་བྱ་བའི་ཐ་ཚིག་གོ །ཁྱེད་ཀྱི་སྟོན་པ་ཐུགས་རྗེ་དང་ལྡན་པ་ཞེས་བྱ་བ་ནི། དེ་དག་ཀྱང་ད་དུང་དེ་བཞིན་གཤེགས་པའི་ཉན་ཐོས་ཡིན་པས་སྟོན་པའི་ཆེ་བན་ཡིད་བརྗོད་པར་བྱའོ། །དེས་ན་ཞེས་བྱ་བ་ནི། སྟོན་པ་ཐུགས་རྗེ་དང་ལྡན་པའི་རྒྱུ་དེས་ནའོ། །འདི་རྗེས་སུ་གནང་ངོ་ཞེས་བྱ་བ་ནི། གནས་མལ་དན་པ་མཇུག་ཏུ་སྦྱིན་པ་ཞེས་བྱ་བ་འདི་རྗེས་སུ་གནང་ངོ་ཞེས་སོ། །གཞན་ལ་ལན་གདབ་པར་བྱའོ་ཞེས་བྱ་བ་ནི། དེ་དག་ལ་དངོས་སུ་ལན་མི་གདབ་པར་གང་ཟག་གཞན་ལ་བརྟེན་ཏེ་ལན་དེ་སྐད་ལན་གདབ་པར་བྱ་བའོ། །དགེ་སློང་མས་སྟན་ལས་ལྡང་བ་ལ་དབྲི་བར་མི་བྱའོ་ཞེས་བྱ་བ་ནི། དགེ་སློང་འཐབ་ཀྲོལ་བྱེད་པ་དེ་དག་ལ་དགེ་སློང་མས་ནི་སྟན་ལས་ལྡང་བ་གཞན་གྱི་ལུགས་ལས་དབྲི་བར་མི་བྱ་བའོ། །འདི་སྐད་བསྟན་ཏེ། དགེ་སློང་མས་ནི་འཐབ་ཀྲོལ་བྱེད་པ་དག་མཐོང་ན་དེ་ལྟར་ཡང་སྟན་ལས་ལྡང་བར་བྱའོ། །དགེ་བསྙེན་གྱིས་བསོད་སྙོམས་དབུལ་བར་བྱའོ་ཞེས་བྱ་བ་ནི་འཐབ་ཀྲོལ་ཅན་དེ་དག་ལའོ། །
བཟོད་པ་བྱས་པ་དེ་དག་ལ་མཐུན་པ་ཐོབ་པ་མེད་པར་མཐུན་པར་མི་འབྱུང་ངོ་ཞེས་བྱ་བ་ནི། ཆོས་མ་ཡིན་པ་ལ་མངོན་པར་ཞེན་པ་དེ་དག་གིས་དགེ་འདུན་ལ་བཟོད་པ་གསོལ་ཏེ། དགེ་འདུན་གྱིས་གསོལ་བ་དང་བཞིའི་ལས་ཀྱིས་བཟོད་པ་བྱས་སུ་ཟིན་ཀྱང་དེ་དག་རང་གིས་དགེ་འདུན་ལ་བཟོད་པ་གསོལ་ཏེ། དགེ་འདུན་གྱིས་གསོལ་བ་དང་བཞིའི་ལས་ཀྱིས་མཐུན་པ་སྦྱིན་པ་ཐོབ་པ་མེད་པར་དགེ་འདུན་དང་མཐུན་པ་མི་འབྱུང་བའོ། །དེ་དག་གིས་དགེ་འདུན་ལ་བཟོད་པ་གསོལ་བའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །བདག་དགེ་སློང་ཀཽ་ཤཱམྦཱི་བའི་དགེ་སློང་ནང་པར་སྔ་ཞིག་ཏུ་མདོ་སྡེ་དང་འདུལ་བ་དང་མ་མོའི་ལུང་རྣམ་པར་རྟོག་རྟོག་ན་འདི་སྙམ་བགྱིད་དེ་གང་ལས་བདག་ཅག་ལ་འཐབས་དང་མཚང་འདྲུ་བ་དང༌། རྩོད་པ་དང་འགྱེད་པ་འབྱུང་བའི་གཞི་ནི་འདི་ལྟ་སྟེ། ལྟུང་བ་བྱུང་ངམ་མ་བྱུང་བ་དང་གནས་ནས་ཕྱུང་ངམ་མ་ཕྱུང་བ་ལགས་ན། བདག་ཅག་ལ་ལྟུང་བ་བྱུང་གི་ལྟུང་བ་མ་བྱུང་བ་མ་ལགས་གནས་ནས་ཕྱུང་བ་ལགས་ཀྱི། གནས་ནས་མ་བྱུང་བ་མ་ལགས་ཏེ། གང་གནས་ནས་ཕྱུང་བ་ནི་ཆོས་དང་མཐུན་པའི་ལས་མ་འཁྲུགས་གཞག་པར་མི་འོས་པས་བགྱིས་སོ་སྙམ་བགྱིད་ནས་བདག་གྲོང་ཁྱེར་ཡངས་པ་ཅན་གྱི་དགེ་སློང་དང་སྡུམས་བགྱི་ཞིང་མཐུན་པར་བགྱིའོ་སྙམ་དུ་སྟེ། བདག་ཀཽ་ཤཱམྦཱི་པའི་དགེ་སློང་སྐྲ་འགྲེང་བར་གྱུར་སྐྲ་འཕྱར་བར་གྱུར་ཅིང་དགེ་འདུན་ལ་སུ་སྙོལ་བར་བགྱིད། འབྱུང་བར་སྐྱོད་མཚུངས་པ་ཉེ་བར་སྟོན་ལ་མཚམས་ཀྱི་ནང་དུ་མཆིས་ཏེ་བཟོད་པ་གསོལ་ཞིང་བཞི་གང་ལས་གནས་ནས་དབྱུང་བའི་ཕྲིན་ལས་མཛད་པའི་གཞི་དེ་ལས་སླར་ལྡོག་པར་བགྱིད་ན་ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་གནས་ནས་དབྱུང་བའི་ཕྲིན་ལས་མཛད་ལགས་པ་ལ་བཟོད་པ་མཛད་དུ་གསོལ། ལན་གསུམ་དུ་བཟླས་ཞེས་གསུངས་པ་ཡིན་ནོ། །དགེ་འདུན་གྱིས་གསོལ་པ་དང་བཞིའི་ལས་ཀྱིས་བཟོད་པ་བྱ་བའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །ཀཽ་ཤཱམྦཱི་པའི་དགེ་སློང་གནས་ནས་དབྱུང་བའི་ཕྲིན་ལས་མཛད་ལགས་པ་འདི་སྐྲ་འགྲེང་བར་གྱུར། སྐྲ་འཕྱར་བར་གྱུར་ཅིང༌། དགེ་འདུན་ལས་སྤུ་སྙོལ་བར་བགྱིད་ན།
འབྱུང་བ་སྐྱོད། མཚུངས་པར་ཉེ་བར་སྟོན་ལ་མཚམས་ཀྱི་ནང་དུ་མཆིས་ཏེ། བཟོད་པ་གསོལ་ཞིང་གཞི་གང་ལས་གནས་ནས་དབྱུང་བའི་ཕྲིན་ལས་མཛད་པའི་གཞི་དེ་ལས་སླར་ལྡོག་པར་བགྱིད་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་ཀཽ་ཤཱམྦཱི་པའི་དགེ་སློང་གནས་ནས་དབྱུང་བའི་ཕྲིན་ལས་མཛད་ལགས་པ་ལ་བཟོད་པ་མཛད་དོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །མཐུན་པ་གསོལ་བ་དང་མཐུན་པ་སྦྱིན་པའི་སྔགས་ནི་འོག་ནས་འབྱུང་ངོ། །གསོ་སྦྱོང་མེད་པར་རང་བཞིན་དུ་གནས་པ་ཉིད་མི་འཐོབ་པོ་ཞེས་བྱ་བ་ནི། མཐུན་པ་གསོལ་ཏེ་མཐུན་པ་ཐོབ་ཏུ་ཟིན་ཀྱང་ཇི་སྲིད་དུ་དགེ་འདུན་ལས་མཐུན་པའི་གསོ་སྦྱོང་གསོལ་ཞིང་མཐུན་པའི་གསོ་སྦྱོང་མ་ཐོབ་ཀྱི་བར་དུ་རང་བཞིན་དུ་གནས་པ་ཉིད་མི་འཐོབ་སྟེ། ཆོས་དང་ཟང་ཟིང་གི་ལོངས་སྤྱོད་གཉིས་ཀྱི་འོས་ཉིད་མ་ཡིན་ནོ་ཞེས་བྱ་བའི་ཐ་ཚིག་གོ །མཐུན་པའི་གསོ་སྦྱོང་ཞེས་བྱ་བ་ནི། དོན་དང་མཐུན་པར་བརྗོད་པ་ཡིན་ཏེ། མཐུན་པར་སྒྲུབ་པའི་ཕྱིར་གསོ་སྦྱོང་བྱ་བ་ཞེས་བྱ་བའི་ཐ་ཚིག་གོ །དེ་བྱིན་ནས་བྱའོ་ཞེས་བྱ་བ་ནི། མཐུན་པའི་གསོ་སྦྱོང་དེ་དེ་བཞིན་དུ་མི་བྱ་བར་བྱིན་ནས་གཟོད་བྱ་བའོ། །དེ་ནི་ལས་ཀྱིས་སོ་ཞེས་བྱ་བ་ནི། མཐུན་པའི་གསོ་སྦྱོང་སྦྱིན་པ་དེ་ནི་དེ་དག་གིས་གསོལ་ནས་དགེ་འདུན་གྱིས་གསོལ་བ་དང་བཞིའི་ལས་ཀྱིས་སྦྱིན་པའོ། །དེ་དག་གིས་གསོལ་བའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །བདག་ཀཽ་ཤཱམྦཱི་པའི་དགེ་སློང་ལ་དགེ་འདུན་གྱིས་གནས་ནས་དབྱུང་བའི་ཕྲིན་ལས་མཛད་ལགས་པས་བདག་དགེ་འདུན་གྱི་གན་དུ་མཆིས་ཏེ། བཟོད་པ་གསོལ་ན་དགེ་འདུན་གྱིས་བདག་ལ་བཟོད་པའི་ཕྲིན་ལས་མཛད་ལགས་ཏེ། བདག་བཟོད་པའི་ཕྲིན་ལས་མཛད་ལགས་པ་འཁོར་དང་བཅས་པ་དགེ་འདུན་གྱི་གན་དུ་མཆིས་ནས་མཐུན་པ་གསོལ་ན། དགེ་འདུན་གྱིས་བདག་འཁོར་དང་བཅས་པ་ལ་མཐུན་པ་སྩལ་ལགས་པས་བདག་ཀཽ་ཤཱམྦཱི་པའི་དགེ་སློང་འཁོར་དང་བཅས་པ་མཐུན་པ་སྩལ་བ་མཐུན་པའི་གསོ་སྦྱོང་དུ་གསོལ་ན་ཐུགས་བརྩེ་བ་ཅན་དགེ་འདུན་བཙུན་པ་རྣམས་
ཀྱིས་ཐུགས་བརྩེ་བའི་སླད་དུ་བདག་ཀཽ་ཤཱམྦཱི་པའི་དགེ་སློང་འཁོར་དང་བཅས་པ་མཐུན་པ་སྩལ་པ་ལས་མཐུན་པའི་གསོ་སྦྱོང་སྩལ་དུ་གསོལ། །ལན་གསུམ་དུ་བཟླས་ཞེས་གསུངས་པ་ཡིན་ནོ། །དགེ་འདུན་གྱིས་གསོལ་བ་དང་བཞིའི་ལས་ཀྱིས་མཐུན་པའི་གསོ་སྦྱོང་སྦྱིན་པའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །ཀཽ་ཤཱམྦཱི་པའི་དགེ་སློང་འདི་ལ་དགེ་འདུན་གྱིས་གནས་ནས་དབྱུང་བའི་ཕྲིན་ལས་མཛད་ལགས་པས་འདི་དགེ་འདུན་གྱི་གན་དུ་མཆིས་ཏེ། བཟོད་པ་གསོལ་ན་དགེ་འདུན་གྱིས་འདི་ལ་བཟོད་པའི་ཕྲིན་ལས་མཛད་ལགས་ཏེ། བཟོད་པའི་ཕྲིན་ལས་མཛོད་ལགས་པ་འཁོར་དང་བཅས་པ་འདི་དགེ་འདུན་གྱི་གན་དུ་མཆིས་ནས་མཐུན་པ་གསོལ་ཏེ། དགེ་འདུན་གྱིས་ཀཽ་ཤཱམྦཱི་པའི་དགེ་སློང་འཁོར་དང་བཅས་པ་འདི་ལ་མཐུན་པ་སྩལ་ལགས་པས། ཀཽ་ཤཱམྦཱི་པའི་དགེ་སློང་འཁོར་དང་བཅས་པ་མཐུན་པ་སྩལ་བ་འདི་མཐུན་པའི་གསོ་སྦྱོང་གསོལ་ན་གལ་ཏེ། དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་ཀཽ་ཤཱམྦཱི་པའི་དགེ་སློང་འཁོར་དང་བཅས་པ་མཐུན་པ་སྩལ་བ་ལ་མཐུན་པའི་གསོ་སྦྱོང་གསོལ་ཏོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །སྔ་མ་ཡང་ངོ་ཞེས་བྱ་བ་ནི། མཐུན་པ་སྦྱིན་པ་ཞེས་སྔར་བསྟན་པ་དེ་ཡང་དེ་དག་གིས་གསོལ་ནས་དགེ་འདུན་གྱིས་གསོལ་བ་དང་བཞིའི་ལས་ཀྱིས་སྦྱིན་པའོ། །དེ་དག་གིས་གསོལ་བའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །བདག་ཀཽ་ཤཱམྦཱི་པའི་དགེ་སློང་ལ་དགེ་འདུན་གྱིས་གནས་ནས་དབྱུང་བའི་ཕྲིན་ལས་མཛད་ལགས་པས་བདག་དགེ་འདུན་གྱི་གན་དུ་མཆིས་ཏེ་བཟོད་པ་གསོལ་ན། དགེ་འདུན་གྱིས་བདག་ལ་བཟོད་པ་མཛད་ལགས་ཏེ། བདག་ཀཽ་ཤཱམྦཱི་པའི་དགེ་སློང་བཟོད་པའི་ཕྲིན་ལས་མཛོད་ལགས་པ་འཁོར་དང་བཅས་པ་མཐུན་པ་གསོལ་ན། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་ཀཽ་ཤཱམྦཱི་པའི་དགེ་སློང་བཟོད་པའི་ཕྲིན་ལས་མཛད་ལགས་པ་འཁོར་དང་བཅས་པ་ལ་མཐུན་པ་སྩལ་དུ་གསོལ། །ལན་གསུམ་བཟླས་ཞེས་གསུངས་པ་ཡིན་ནོ། །དགེ་འདུན་གྱིས་
གསོལ་བ་དང་བཞིའི་ལས་ཀྱིས་མཐུན་པ་སྦྱིན་པའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །ཀཽ་ཤཱམྦཱི་པའི་དགེ་སློང་འདི་ལ་དགེ་འདུན་གྱིས་གནས་ནས་དབྱུང་བའི་ཕྲིན་ལས་མཛད་ལགས་པས་འདི་དགེ་འདུན་གྱི་གན་དུ་མཆིས་ཏེ། བཟོད་པ་གསོལ་ནས་དགེ་འདུན་གྱིས་འདི་ལ་བཟོད་པ་མཛད་ལགས་ཏེ། ཀཽ་ཤཱམྦཱི་པའི་དགེ་སློང་བཟོད་པའི་ཕྲིན་ལས་མཛད་ལགས་པ་འཁོར་དང་བཅས་པ་འདི་མཐུན་པ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་ཀཽ་ཤཱམྦཱི་པའི་དགེ་སློང་བཟོད་པའི་ཕྲིན་ལས་མཛད་ལགས་པ་འཁོར་དང་བཅས་པ་འདི་ལ་མཐུན་པ་སྩོལ་ཏོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ།། །།བམ་པོ་དྲུག་ཅུ་དྲུག་པ། མཐུན་པ་དང་བཀྲ་ཤིས་དང་གནོད་པར་བྱུང་བའི་དོན་དུ་གསོ་སྦྱོང་བྱར་རུང་ངོ་ཞེས་བྱ་བ་ལ། མཐུན་པའི་དོན་དུ་གསོ་སྦྱོང་བྱར་རུང་བ་ནི། བྱེ་བ་རྣམས་ཀྱི་མཐུན་པ་སྒྲུབ་པའི་ཕྱིར་མཐུན་པའི་གསོ་སྦྱོང་བྱར་རུང་བའི་སྐབས་འདིར་ཇི་སྐད་བསྟན་པ་ཉིད་ཡིན་ནོ། །བཀྲ་ཤིས་ཀྱི་དོན་དུ་གསོ་སྦྱོང་བྱར་རུང་བ་ནི། ཆོས་དང་འདུལ་བའི་སྐབས་སུ་ཆོས་མ་ཡིན་པ་དང་འདུལ་བ་མ་ཡིན་པའི་དོན་སྒྲོ་འདོགས་པ་བཀྲ་མི་ཤིས་པ་དང༌། དགེ་འདུན་བདེ་བའི་སྐབས་སུ་དགེ་འདུན་ལ་མི་བདེ་བ་ཡམས་ཀྱི་ནད་དང༌། སེར་བ་དང་བྱེ་བ་དང་ཆོམ་རྐུན་དང་དམག་དང་རླུང་ལ་སོགས་པ་ཕྱི་རོལ་གྱི་བཀྲ་མི་ཤིས་པ་འབྱུང་བ་དག་མཐོང་ན་བཀྲ་ཤིས་པར་སྒྲུབ་པའི་ཕྱིར་གསོ་སྦྱོང་བྱར་རུང་བའོ། །གནོད་པ་བྱུང་བའི་དོན་དུ་གསོ་སྦྱོང་བྱར་རུང་བ་ནི། རིམས་ཉིན་བཞི་པ་ལ་སོགས་པའི་གནོད་པ་བྱུང་བ་ན། དེ་དག་ཉེ་བར་ཞི་བར་བྱ་བའི་དོན་དུ་གསོ་སྦྱོང་བྱར་རུང་བའོ། །གྲོང་ཁྱེར་ཡངས་པ་ཅན་དུ་ཡང་དག་པར་སྡུད་པར་བྱེད་པ་ན། གསོ་སྦྱོང་བྱས་པ་གང་ཡིན་པ་དེ་ནི་མི་རུང་བའི་གཞི་བཅུ་བྱུང་བ་དེ་དག་ཉེ་བར་ཞི་བར་བྱ་བའི་ཕྱིར་ཏེ། དེ་ཡང་ཆོས་དང་འདུལ་བའི་སྐབས་སུ་ཆོས་མ་ཡིན་པ་དང༌། འདུལ་བ་མ་ཡིན་པའི་དོན་སྒྲོ་འདོགས་པ་བཀྲ་མི་ཤིས་པ་མཐོང་ནས། བཀྲ་ཤིས་པར་སྒྲུབ་པའི་ཕྱིར་བཀྲ་ཤིས་ཀྱི་གསོ་སྦྱོང་བྱ་བ་ཡིན་ནོ། །མི་
རུང་བའི་གཞི་བཅུ་གང་ཞེ་ན། སྔོམ་ལ། །ཧུ་ལུ་ཧུ་ལུ་ཡ་རང་དང༌། །ཀུན་སྤྱད་གནོད་དང་ལན་ཚྭ་དང༌། །ལམ་དང་སོར་གཉིས་དཀྲུགས་དང་གདིང༌། །གསེར་གྱི་རུང་བ་བྱས་པ་ནི། །འདི་ལ་རུང་མིན་གཞི་བཅུ་ཡིན། །དེ་ལ་ཧུ་ལུ་ཧུ་ལུའི་རུང་བ་ཞེས་བྱ་བ་ནི། ཡངས་པ་ཅན་བདག་ཆོས་མ་ཡིན་པ་དང་མི་མཐུན་པས་ལས་དག་བྱེད་ཅིང༌། འཇུག་ཏུ་ཐལ་མོ་བརྡབས་ཏེ། ཧུ་ལུ་ཧུ་ལུ་ཞེས་བྱ་བའི་སྒྲ་ཕྱུང་ནས་ལས་འདི་གྲུབ་བོ་ཞེས་ཟེར་བ་གང་ཡིན་པའོ། །ཡི་རང་བའི་རུང་བ་ཞེས་བྱ་བ་ནི། ཡངས་པ་ཅན་པ་དག་ཆོས་མ་ཡིན་པ་དང་མི་མཐུན་པས་ལས་དག་བྱས་ནས། དགེ་སློང་ལྷག་མ་རྣམས་རྗེས་སུ་ཡི་རང་བ་བྱེད་དུ་བཅུག་པ་གང་ཡིན་པའོ། །ཀུན་དུ་སྤྱད་པའི་རུང་བ་ཞེས་བྱ་བ་ནི། དེ་དག་གིས་གྲགས་པའི་དབང་གིས་ས་བརྐོས་པ་དང༌། རྐོར་བཅུག་པ་གང་ཡིན་པའོ། །གནོད་པའི་རུང་བ་ཞེས་བྱ་བ་ནི། དེ་དག་ན་བར་གྱུར་ནས་ཆང་འཐུངས་པ་གང་ཡིན་པའོ། །ལན་ཚྭའི་རུང་བ་ཞེས་བྱ་བ་ནི། དེ་དག་གིས་འཚོ་བའི་བར་དུ་བཅང་བར་བྱིན་གྱིས་བརླབས་པའི་ལན་ཚ་དུས་སུ་རུང་བ་དང༌། ལྷན་ཅིག་ཏུ་མིན་པར་ཡང་ཟོས་པ་གང་ཡིན་པའོ། ལམ་གྱི་རུང་བ་ཞེས་བྱ་བ་ནི་དེ་དག་གིས་རྒྱང་གྲགས་ཕྱེད་དུ་ཡང་སོང་སྟེ། འདུས་ཤིང་ཟ་བ་བྱས་པ་གང་ཡིན་པའོ། །སོར་གཉིས་ཀྱི་རུང་བ་ཞེས་བྱ་བ་ནི། དེ་དག་གི་སྤངས་པ་ན་ལྷག་པོར་བྱེད་དུ་མ་བཅུག་པར་སོར་མོ་གཉིས་ཀྱིས་རེག་པར་བྱས་ཏེ་བཟོད་པ་གང་ཡིན་པའོ། །དཀྲུགས་པའི་རུང་བ་ཞེས་བྱ་བ་ནི། དེ་དག་གིས་ཞོ་དང་འོ་མ་དག་དཀྲུགས་ཏེ་དུས་མ་ཡིན་པར་ཡང་འཐུངས་པ་གང་ཡིན་པའོ། །གདིང་བའི་རུང་བ་ཞེས་བྱ་བ་ནི། དེ་དག་གིས་གདིང་བ་སར་པ་ལ་གདིང་བ་རྙིང་བ་བདེ་བར་གཤེགས་པའི་མཐོ་གང་འཁོར་བསམ་གླན་པར་སྤྱད་པ་གང་ཡིན་པའོ། །གསེར་གྱི་རུང་བ་ཞེས་བྱ་བ་ནི། དེ་དག་གིས་ལྟུང་བཟེད་ཁྲིའུ་གོར་བུ་ཅན་གྱི་སྟེང་དུ་བཞག་སྟེ། དགེ་ཚུལ་གྱི་མགོའམ་ཕྲག་པར་བཀལ་ཏེ། བསྔགས་པ་བརྗོད་ཅིང་བྲམ་ཟེ་དང་ཁྱིམ་བདག་དག་ལས་དབྱིག་དང་གསེར་ལ་སོགས་པ་བསླངས་ཏེ་སྦྱང་པ་གང་ཡིན་པ་སྟེ། དེ་ནི་དེ་དག་གིས་རང་གི་ངོ་བོ་ཡིན་པར་བལྟ་བར་བྱའོ། །མཐུན་པའི་གསོ་སྦྱོང་ལ་སོགས་པ་དེ་དག་གང་གི་ཚེ་བྱ་ཞེ་ན།
དེའི་ཕྱིར་འདི་ལ་དུས་དེ་ཁོ་ནའི་རྒྱུ་ཉིད་དུའོ་ཞེས་བྱ་བ་སྨྲས་ཏེ། གསོ་སྦྱོང་བྱ་བ་འདི་ལ་དེ་དག་ཚེས་བཅུ་བཞིའམ་བཅོ་ལྔའི་དུས་དེ་ཁོ་ནའི་རྒྱུ་ཉིད་དུ་བྱ་བར་མ་ངེས་ཀྱི་མཐུན་པ་ལ་སོགས་པ་དེ་དག་གི་དུས་དེ་ཁོ་ནའི་རྒྱུ་ཉིད་དུ་བྱ་བ་ཡིན་ནོ། །འདིར་གཞུང་ནི་ཉེ་པ་འཁོར་གསོ་སྦྱོང་ནི་ལྔ་པོ་འདི་དག་ཡིན་ཏེ། བཅུ་བཞི་པ་དང་བཅོ་ལྔ་པ་དང༌། བཀྲ་ཤིས་ཀྱི་གསོ་སྦྱོང་དང༌། གནོད་པ་བྱུང་བའི་གསོ་སྦྱོང་དང༌། མཐུན་པའི་གསོ་སྦྱོང་ངོ༌། །དགེ་སློང་གིས་གསོ་སྦྱོང་མ་ཡིན་པར་གསོ་སྦྱོང་མི་བྱའོ། །བྱེད་ན་འགལ་ཚབས་ཅན་དུ་འགྱུར་རོ། །བཀྲ་ཤིས་ཀྱི་གསོ་སྦྱོང་དང༌། གནོད་པ་བྱུང་བའི་གསོ་སྦྱོང་དང༌། མཐུན་པའི་གསོ་སྦྱོང་ནི་མ་གཏོགས་སོ་ཞེས་བྱ་བ་གསུངས་པ་ཡིན་ནོ། །ལས་བྱེད་པའི་གཞིའོ་ཞེས་བྱ་བ་དེ་འདུལ་བའི་གཞིའི་སྐབས་སུ་གཏོགས་པ་བཤད་ཟིན་ཏོ།། །།ད་ནི་ལས་བྱེ་བའི་གཞི་ཞུ་བ་དང༌། བྲམ་ཟེའི་བུ་མོའི་སྐབས་བསྡུ་བའི་ཕྱིར། ཆོས་མ་ཡིན་པ་སྨྲ་བ་དག་གིས་དབྱེ་བའི་སེམས་ཀྱིས་མཚམས་ཀྱི་ནང་དུ་ལས་ཐ་དད་པར་བྱས་ན་དེ་དབྱེ་བ་ཡིན་ནོ་ཞེས་བྱ་བ་སྨྲས་ཏེ། ཆོས་མ་ཡིན་པ་སྨྲ་བ་དག་གིས་ཆོས་སྨྲ་བ་འདི་དག་བདག་ཅག་གི་ནང་དུ་ཞུགས་པས་ཅི་བྱས། དེ་དག་བདག་ཅག་ལས་ཐ་དད་པར་གྱུར་ཅིག་སྙམ་དུ་དབྱེ་བའི་མཚམས་ཀྱི་ནང་དུ་ཆོས་སྨྲ་བདག་ལས། ལས་ཐ་དད་པར་བྱས་ན་ལས་དེ་བྱེ་བ་ཡིན་ནོ་ཞེས་བྱ་བའི་ཐ་ཚིག་གོ །ཆོས་སྨྲ་བ་དག་གིས་མཚམས་ཀྱི་ནང་དུ་ཆོས་མ་ཡིན་པ་སྨྲ་བ་དག་ལས་ཐ་དད་པར་བྱས་པ་དེ་ནི། ལས་དེ་བྱེ་བར་མི་འགྱུར་ཏེ། དེ་དག་གིས་ལས་དེ་ཆོས་ལས་རྣམ་པར་མ་གཡོས་པ་ཁོ་ནར་བྱེ་བའི་ཕྱིར་རོ། །འདིར་གཞུང་ནི་སུ་དག་གིས་ཀཽ་ཤཱམྦཱི་པའི་དགེ་འདུན་ཕྱེ་བར་གྱུར། ཆོས་མ་ཡིན་པ་སྨྲ་བ་དག་གིས་མཚམས་ཀྱི་ནང་དུ་གནས་གཅིག་ཏུ་གསོ་སྦྱོང་མ་འདྲེས་པར་བྱས་པས་སོ་ཞེས་གསུངས་པ་ཡིན་ནོ། །འདི་ལ་སོ་སོའི་རང་གི་ལས་ནི་འཆགས་སོ་ཞེས་བྱ་བ་ནི། ལས་བྱེ་བའི་བདག་ཉིད་ཀྱི་དགེ་འདུན་གྱི་བྱེ་བ་འདི་ལ་ཕྱོགས་སོ་སོའི་ལས་ཐ་དད་པར་བྱས་པ་ནི་ཐ་དད་པར་འཆགས་སོ། །རང་གི་ཕྱོགས་དང་མཐུན་པ་མ་ཡིན་པ་ལ་ནི་མི་འཆགས་སོ་ཞེས་བྱ་བ་ནི། རང་གི་ཕྱོགས་དང་མཐུན་
པ་མ་ཡིན་པའི་གང་ཟག་ལ་བསྡིགས་པ་དང་སྨད་པ་དང་བསྐྲད་པ་དང༌། ཕྱིར་འགྱེད་པ་དང་གནས་ནས་དབྱུང་བའི་ལས་བྱེད་པ་ནི་མི་འཆགས་སོ། །འདིར་གཞུང་ནི་དགེ་འདུན་བྱེ་བར་གནས་པ་ན། ཕན་ཚུན་གྱི་ཕྱོགས་གནས་ནས་འབྱིན་པར་བགྱིད་ན། གནས་ནས་བྱུང་བར་བརྗོད་པར་བགྱི་འམ་བཀའ་སྩལ་བ། གནས་ནས་མ་ཕྱུང་བར་བརྗོད་པར་བྱའོ་ཞེས་གསུངས་པ་ཡིན་ནོ། །དགེ་འདུན་གྱི་ནི་ཆོས་སྨྲ་བས་བྱས་པ་ཉིད་ནི་བྱས་པ་ཉིད་ཡིན་ནོ་ཞེས་བྱ་བ་ནི། དགེ་འདུན་གྱི་མཚམས་བཅད་པ་ལ་སོགས་པའི་ལས་གང་ཡིན་པ་དེ་ནི་ཆོས་སྨྲ་བ་དག་གིས་བྱས་པ་ཉིད་ན་བྱས་པ་ཉིད་ཡིན་གྱི་ཆོས་མ་ཡིན་པ་སྨྲ་བ་དག་གིས་བྱས་པ་ཉིད་ན་ནི་བྱས་པ་ཉིད་མ་ཡིན་ནོ། །འདིར་གཞུང་ནི་དགེ་འདུན་བྱེ་བ་ན་གཅིག་གམ་ཅིག་ཤོས་ཀྱི་མཚམས་འགྲོལ་བར་བགྱིད་ན། མཚམས་བཀྲོལ་བར་བརྗོད་པར་བགྱི་འམ། གལ་ཏེ་ཆོས་སྨྲ་བས་འགྲོལ་བར་བྱེད་ན་བཀྲོལ་བར་བར་བརྗོད་པར་བྱའོ་ཞེས་གསུངས་པ་ཡིན་ནོ། །འདི་ལ་གལ་ཏེ་གཟུ་བོ་དག་ཡོད་ན་དགེ་སློང་མ་རྣམས་ལ་བསྟན་པར་བྱ་བ་ཉིད་ཡིན་ནོ་ཞེས་བྱ་བ་ནི། དགེ་འདུན་བྱེ་བ་འདི་ལ་གལ་ཏེ་དགེ་སློང་གཟུ་བོ་དག་ཡོད་ན་དེ་དག་གིས་དགེ་སློང་མ་རྣམས་ལ་བསྟན་པར་བྱ་བ་ཉིད་ཡིན་ནོ། །གལ་ཏེ་དེ་དག་མེད་ན་ཆོས་སྨྲ་བ་དག་ཉིད་ཀྱིས་སོ། །འདིར་གཞུང་ནི་ཞུ་བ་ལས་བཙུན་པ་རེ་ཞིག་ཀཽ་ཤཱམྦཱི་པའི་དགེ་སློང་ཕྱོགས་གཉིས་སུ་འདུས་ཤིང་མཆིས་པར་གྱུར་ན། ད་གཉིས་གང་གིས་དགེ་སློང་མ་རྣམས་ལ་བསྟན་པར་བགྱི། ཉེ་བ་འཁོར་གཟུ་བོ་དག་གིས་མཚམས་ཀྱི་ཕྱི་རོལ་དུ་སོང་སྟེ་བསྟན་པར་བྱ་བའོ་ཞེས་གསུངས་པ་དང༌། བྲམ་ཟེའི་བུ་མོས་ཞུས་པ་ལས་ཀྱང་གལ་ཏེ་གཟུ་བོ་དག་མེད་ན། ཆོས་སྨྲ་བ་དག་ཁོ་ནས་སོ་ཞེས་གསུངས་པ་ཡིན་ནོ། །དེ་དག་གི་ནི་ཆོས་ཀྱི་ཕྱོགས་དང་མཐུན་པ་དག་གིས་མི་མཐུན་པ་ཉིད་དོ་ཞེས་བྱ་བ་ནི། གཟུ་པོ་དེ་དག་གི་ལས་ནི་ཆོས་ཀྱི་ཕྱོགས་དང་མཐུན་པ་དག་གིས་མི་མཐུན་པ་ཉིད་དུ་འགྱུར་བ་སྟེ། དེ་དག་ནི་དགེ་འདུན་གྱི་ཁོངས་སུ་གཏོགས་པའི་ཕྱིར་དང༌། དགེ་འདུན་ལས་ཐ་མི་དད་པའི་ཕྱིར་རོ། །ཆོས་མ་ཡིན་པའི་ཕྱོགས་དང་མཐུན་པ་དག་གིས་ནི་མི་མཐུན་པ་ཉིད་དུ་མི་འགྱུར་བ་དེ་དག་ནི་
དགེ་འདུན་གྱི་ཁོངས་སུ་མ་གཏོགས་པའི་ཕྱིར་དང་དགེ་འདུན་ལས་ཐ་དད་པའི་ཕྱིར་རོ། །དེ་བས་ན་གཟུ་བོའི་དགེ་སློང་དག་གིས་ལས་ལ་ཆོས་སྨྲ་བ་དག་དང་མི་མཐུན་པ་ཉིད་སྤང་བར་བྱ་ཞིང་དེ་དག་དང་ལྷན་ཅིག་ལས་བྱས་ན་ཡང་འཆགས་སོ། །ཆོས་མ་ཡིན་པར་སྨྲ་བ་དག་དང་མི་མཐུན་པ་ཉིད་དུ་སྤང་བར་བྱ་མི་དགོས་ཏེ། དེ་དག་དང་ལྷན་ཅིག་ལས་བྱས་ན་ཡང་མི་འཆགས་སོ། །རྗེས་སུ་ཞུགས་ན་དེ་ཉིད་ཉམས་སོ་ཞེས་བྱ་བ་ནི། གཟུ་བོ་རྣམས་ཆོས་སྨྲ་བ་འམ། ཆོས་མ་ཡིན་པ་སྨྲ་བ་གང་ཡང་རུང་བའི་ཕྱོགས་ཀྱི་རྗེས་སུ་ཞུགས་ན། གཟུ་བོ་ཉིད་ཉམས་ཏེ་གཟུ་བོར་མི་རུང་ངོ་ཞེས་བྱ་བའི་ཐ་ཚིག་གོ །གཟུ་བོ་ཞེས་བྱ་བ་ནི། སྐམ་ལ་གནས་པ་སྟེ། དབུས་ན་གནས་པ་དང་ཞལ་ཅེ་བ་ཉིད་ཡིན་པས་འདི་ལྟར་དེ་དག་ནི་འཐབ་ཀྲོལ་གྱི་ལྗན་ལྗིན་གྱི་འདམ་རྫབ་སྤངས་པའི་སྐམ་སའི་དབུས་ན་གནས་པ་ཡིན་པས་གཟུ་བོ་དང་དབུས་ན་གནས་པ་དང་ཞལ་ཅེ་བ་ཡིན་པར་རིག་པར་བྱའོ། །ཕྱོགས་དེ་གཉིས་ལས་ཕྱོགས་གང་ཡང་རུང་བ་ཅིག་ཤོས་སུ་ཡང་མ་ལྷུང་ལ་ཅིག་ཤོས་སུ་ཡང་མ་ལྷུང་བ་ཉིད་ཀྱིས་སྐམ་ལ་གནས་པ་ནི་གཟུ་བོ་ཞེས་བྱའོ། །དེ་ལྟར་ཡང་འདིར་གཞུང་ནི་ཞུ་བ་ལས། ཡངས་པ་ཅན་གྱི་དགེ་སློང་དག་གི་ས་གཞི་བཅུ་ཕྱུང་བ་ན། དགེ་སློང་གནས་བརྟན་གང་དག་ཕྱོགས་ཅིག་ཤོས་སུ་ཡང་མ་གཏོགས་ལ་ཕྱོགས་གཉིས་པར་ཡང་མ་གཏོགས་པ་དེ་དག་ཅི་ལགས་པར་བརྗོད་པར་བགྱི། སྐམ་ས་ལ་གནས་པ་གཟུ་བོ་ཡིན་པར་བརྗོད་པར་བྱའོ་ཞེས་གསུངས་པ་ཡིན་ནོ། །དེ་མི་བྱའོ་ཞེས་བྱ་བ་ནི། གཟུ་བོ་ཉིད་ཉམས་པ་དེ་མི་བྱའོ། །འདིར་གཞུང་ནི། དགེ་འདུན་བྱེ་བར་རྣམ་པར་གནས་པ་ན། གཟུ་བོ་རྣམས་ཀྱིས་ཇི་ལྟར་བསྒྲུབ་པར་བགྱི། ཕྱོགས་ཅིག་ཤོས་སུ་རང་འགྲོ་བར་ཡང་མི་བྱ། མངག་པ་གཏང་བར་ཡང་མི་བྱ་ཞིང༌། ཕྱོགས་གཉིས་པར་ཡང་རང་འགྲོ་བར་ཡང་མི་བྱ། མདག་པ་གཏང་བར་ཡང་མི་བྱ་བར་ལུས་ཀྱིས་ཀྱང་བསྡམ་པར་བྱ། དག་གིས་ཀྱང་བསྡམ་པར་བྱ་ཞིང་མཚམས་ཀྱི་ཕྱི་རོལ་དུ་སོང་སྟེ་གསོ་སྦྱོང་བྱའོ་ཞེས་གསུངས་པ་ཡིན་ནོ། །དགེ་སློང་མའི་དགེ་འདུན་ཕྱོགས་དང་གཞན་གྱི་ཕྱོགས་སུ་རྣམ་པར་གནས་པ་ལ་གདམས་པར་བྱ་
བ་ཉིད་ཡིན་ནོ་ཞེས་བྱ་བ་ནི། དགེ་སློང་མའི་དགེ་འདུན་ལས་དང་འཁོར་ལོ་མ་བྱེ་བ་དགེ་སློང་གི་དགེ་འདུན་ལས་དང་འཁོར་ལོ་བྱེ་བའི་ཕྱོགས་དང་གཞན་གྱི་ཕྱོགས་ཀྱི་འགབ་ལ་བརྟེན་ཅིང་རྣམ་པར་གནས་པ་དག་ལ་ནི་དགེ་སློང་གི་དགེ་འདུན་གྱི་ཕྱོགས་བཟུང་བ་མེད་པར་ཅི་ནས་ཀྱང་དེ་དག་བྱེ་བར་མི་འགྱུར་བར་བྱ་བའི་ཕྱིར་གདམས་ཤིང་རྗེ་སུ་བསྟན་པར་བྱ་བ་ཉིད་ཡིན་ནོ། །འདིར་གཞུང་ནི་དགེ་སློང་མའི་དགེ་འདུན་ཕྱོགས་དང་ཕྱོགས་ལ་རྣམ་པར་གནས་པ་ལ་དགུང་ཟླ་ཕྱེད་ཕྱེད་ཅིང་གདམས་ངག་དང་རྗེས་སུ་བསྟན་པ་སྩལ་བར་བགྱིའམ། བཀའ་སྩལ་པ། དགེ་སློང་མའི་དགེ་འདུན་བྱེ་བར་མི་འགྱུར་བར་བྱ་བའི་ཕྱིར་སྦྱིན་པར་བྱའོ་ཞེས་གསུངས་པ་ཡིན་ནོ། །བྱེ་བ་ལ་ནི་དེ་ལྟ་མ་ཡིན་ནོ་ཞེས་བྱ་བ་ནི། དགེ་སློང་མའི་དགེ་འདུན་ལས་དང་འཁོར་ལོ་བྱེ་བ་ཕྱོགས་དང་གཞན་གྱི་ཕྱོགས་སུ་རྣམ་པར་གནས་པ་ལ་ནི་སྔ་མ་ལྟར་གདམས་པར་མི་བྱ་བ་ཉིད་ཡིན་པའོ། །གསོལ་བ་ན་མཐུན་པ་ཉིད་ལ་ངེས་པར་སྦྱར་བར་བྱ་བ་ཉིད་ཡིན་ནོ་ཞེས་བྱ་བ་ནི། དགེ་སློང་མ་བྱེ་བ་ཕྱོགས་དང་གཞན་གྱི་ཕྱོགས་སུ་རྣམ་པར་གནས་པ་དེ་དག་གདམས་ངག་གསོལ་བ་ན། སྲིད་མོ་དག་ཇེ་མཐུན་པར་གྱིས་ཤིག་ཅེས་མཐུན་པ་ཉིད་ལ་ངེས་པར་སྦྱར་བར་བྱའོ། །དབྱར་གྱི་རྙེད་པ་ནི་ཆོས་སྨྲ་བ་དབང་བ་ཉིད་དོ་ཞེས་བྱ་བ་ནི། དགེ་འདུན་བྱེ་བ་ན་དབྱར་གནས་པའི་རྒྱུ་ལས་བྱུང་བའི་རྙེད་པ་ནི་ཆོས་སྨྲ་བདག་དབང་བ་ཉིད་ཡིན་གྱི། ཆོས་མ་ཡིན་པ་སྨྲ་བ་དག་མི་དབང་བའོ། །གཉི་ག་འདུས་པ་ལ་བྱེ་བྲག་ཏུ་མ་བྱས་པར་བགོ་བཤའ་བྱ་བ་དགེ་འདུན་ལ་ཕུལ་བ་ཡང་ངོ་ཞེས་བྱ་བ་ནི། ཆོས་དང་ཆོས་མ་ཡིན་པ་སྨྲ་བའི་ཕྱོགས་གཉི་ག་འདུས་པ་ལ་བྱེ་བྲག་ཏུ་མ་བྱས་པར་དགེ་འདུན་ཙམ་ལས་ཕུལ་བའི་བགོ་བཤའ་བྱ་བ་ཆོས་གསོལ་སོགས་པ་དགེ་འདུན་ལ་ཕུལ་བ་ཡང་ཆོས་སྨྲ་བ་རྣམས་དབང་བའོ། །འདི་སྐད་བསྟན་ཏེ། དབྱར་གནས་པ་པའི་རྒྱུ་ལ་བརྟེན་ཏེ། དགེ་འདུན་ཙམ་ལ་འབུལ་བར་བྱེད་པའི་རྙེད་པ་གང་ཡིན་པ་དེ་ཡང་ཆོས་སྨྲ་བ་དག་ཁོ་ན་དབང་བ་ཡིན་གྱི། ཆོས་མ་ཡིན་པ་སྨྲ་བ་དག་ནི་མི་དབང་ངོ༌། །ཅི་ཐམས་ཅད་ལ་དེ་ལྟར་རྣམ་པར་གཞག་གམ་ཞེ་ན་དེའི་ཕྱིར། དེ་ལ་གལ་ཏེ་དགེ་འདུན་གྱི་ཚད་ཉིད་ཡིན་ན་
དེ་དག་གོ་ཞེས་བྱ་བ་སྨྲས་ཏེ། རྙེད་པ་དབང་བ་དེ་ལ་གལ་ཏེ་ཆོས་སྨྲ་བ་དག་བཞི་ཡན་ཆད་ཡིན་ན་རྙེད་པ་དེ་དེ་དག་དབང་བར་རྣམ་པར་གཞག་གོ །དེ་དག་ཉུང་བ་ཉིད་ཡིན་ན་ཇི་ལྟར་བསྒྲུབ་པར་བྱ་ཞེ་ན་དེའི་ཕྱིར། གལ་ཏེ་ཉུང་བ་ཉིད་ཡིན་ལ་ཅིག་ཤོས་ནི་དེ་ཉིད་ཡིན་ན་གང་གིས་ཕང་པར་ཕུལ་བའོ་ཞེས་བྱ་བ་སྨྲས་ཏེ། གལ་ཏེ་དེ་ན་ཆོས་སྨྲ་བ་དག་ནི་དགེ་འདུན་གྱི་ཚད་པས་ཉུང་བ་ཉིད་ཡིན་ལ། ཆོས་མ་ཡིན་པ་སྨྲ་བ་ཅིག་ཤོས་ནི་དགེ་འདུན་གྱི་ཚང་དེ་ཉིད་ཡིན་ན། ཕྱོགས་དེ་གཉིས་ཀྱི་གང་ཟག་གིས་ཕང་བར་རྙེད་པ་དེ་ཕུལ་བའི་ཕྱོགས་དེ་རྙེད་པ་དེ་དབང་ངོ༌། །ཕང་བ་ཞེས་སྨོས་པ་ནི་ལག་པ་དང་རྐང་པའི་དྲུ་བདག་གི་དཔེ་ཡིན་ནོ། །གལ་ཏེ་གཉི་གའི་ན་གཉི་གའོ་ཞེས་བྱ་བ་ནི། གལ་ཏེ་ཕྱོགས་གཉི་གའི་དགེ་སློང་གི་ཕང་པ་ལ་སོགས་པར་ཕུལ་ན་ཕྱོགས་གཉི་ག་དབང་བའོ། །དེ་ལ་ཕྱོགས་གཉི་གས་ཇི་ལྟར་བགོ་པར་བྱ་ཞེ་ན་དེའི་ཕྱིར། དེ་ལ་གང་ཟག་ལས་ཆ་ཉིད་ཡིན་གྱི་དགེ་འདུན་ལས་མ་ཡིན་ནོ་ཞེས་བྱ་བ་སྨྲས་ཏེ། ཕྱོགས་གཉི་ག་དབང་བའི་རྙེད་པ་དེ་ལ་ཕྱོགས་གཉི་གའི་གང་ཟག་ཇི་སྙེད་ཡོད་པ་དེ་སྙེད་ཀྱི་ཆ་ཉིད་དུ་བགོ་པར་བྱའི། ཆོས་དང་ཆོས་མ་ཡིན་པ་སྨྲ་བའི་དགེ་འདུན་གྱི་ཕྱོགས་གཉིས་ལས་ཕྱེད་ཕྱེད་དུ་བགོ་བ་ནི་མ་ཡིན་ནོ། །ལས་བྱེ་བའི་གཞི་ཞུ་བ་དང༌། བྲམ་ཟེའི་བུ་མོའི་སྐབས་སོ་ཞེས་བྱ་བ་དེ་དེ་གཉིས་ཀྱི་སྐབས་ནས་འབྱུང་བ་བཤད་ཟིན་ཏོ། །ལས་བྱེ་བའི་གཞི་རྫོགས་སོ་ཞེས་བྱ་བ་དེ་བཤད་ཟིན་ཏོ།། །།ད་ནི་འཁོར་ལོ་བྱེ་པའི་གཞི་སྨྲ་པར་འདོད་ནས། དེ་བསྡུ་པའི་ཕྱིར་དགེ་འདུན་གྱི་དབྱེན་ནི་ཆོས་ལས་ཐ་དད་པའི་དངོས་པོར་གསོལ་བས་སམ་དོན་དེས་ཚུལ་ཤིང་ལེན་དུ་འཇུག་པས་སོ་ཞེས་བྱ་བ་སྨྲས་ཏེ། དགེ་འདུན་གྱི་དབྱེན་ནི་རྒྱུ་གཉིས་ཀྱིས་འགྱུར་ཏེ། ཆོས་ལས་ཐ་དད་པའི་དངོས་པོར་གསོལ་བས་དབྱེན་བྱེད་པ་དང་དོན་དེས་ཚུལ་ཤིང་ལེན་དུ་འཇུག་པས་དབྱེན་བྱེད་པའོ། །དེ་ལ་ཆོས་ལས་ཐ་དད་པའི་དངོས་པོར་གསོལ་བས་དབྱེན་བྱེད་པ་ཞེས་བྱ་བ་ལ་འདིར་ཞེས་བྱ་བ་ནི། ཐར་བའི་ལམ་ཡང་དག་པ་ཉིད་དུ་གྱུར་པ་སྟེ། དེ་ལས་ཐ་དད་པའི་དངོས་པོར་བྱ་བའི་ཕྱིར་འགྱེད་པར་བྱེད་པའི་གང་ཟག་གིས་ཆོས་མ་ཡིན་པའི་ཕྱོགས་དང་མཐུན་པའི་
དགེ་འདུན་ལ་གསོལ་བས། དགེ་འདུན་འབྱེད་པར་བྱེད་པའོ། །དེའི་སྔགས་ནི་ཚེ་དང་ལྡན་པ་དག་དགེ་སྦྱོང་གཽ་ཏ་མ་ནི་ཤ་ཟ་སྟེ། བདག་ཅག་གིས་ཤ་བཟའ་བར་མི་བྱའོ། །དེ་ཅིའི་ཕྱིར་ཞེ་ན། གཞི་དེ་ལས་སྲོག་ཆགས་གསོད་པར་འགྱུར་བའི་ཕྱིར་རོ། །དགེ་སྦྱོང་གཽ་ཏ་མ་ནི་འོ་མ་འཐུངས་ཏེ། བདག་ཅག་གིས་བཏུང་བར་མི་བྱའོ། །དེ་ཅིའི་ཕྱིར་ཞེ་ན། གཞི་དེ་ལས་བེའུ་ལ་གནོད་པའི་ཕྱིར་རོ། །དགེ་སྦྱོང་གཽ་ཏ་མ་ནི་ལན་ཚྭ་ཟ་སྟེ། བདག་ཅག་གིས་བཟའ་བར་མི་བྱའོ། །དེའི་ཅིའི་ཕྱིར་ཞེ་ན། ཁུ་བ་ལས་གྱུར་པའི་ཕྱིར་རོ། །དགེ་སྦྱོང་གོ་ཏ་མ་ནི་གོས་དྲས་པ་གྱོན་ཏེ་བདག་ཅག་གིས་བགོ་བར་མི་བྱའོ། །དེ་ཅིའི་ཕྱིར་ཞེ་ན། གཞི་དེ་ལས་དད་པས་སྦྱིན་པར་བྱ་བ་ཆུད་ཟོས་པར་འགྱུར་བའི་ཕྱིར་རོ། །དགེ་སྦྱོང་གཽ་ཏ་མ་ནི་དགོན་པ་ན་གནས་པར་བྱེད་དོ། །བདག་ཅག་ནི་གྲོང་དུ་གནས་པར་བྱའོ། །དེ་ཅིའི་ཕྱིར་ཞེ་ན། གཞི་དེ་ལས་དད་པས་སྦྱིན་པར་བྱ་བ་ཡོངས་སུ་མ་སྤྱད་པར་འགྱུར་བའི་ཕྱིར་རོ། །ཆོ་དང་ལྡན་པ་དག་ཁྱེད་ཅག་ལས་གང་བརྟུལ་ཞུགས་ཀྱི་གནས་ལྔ་པོ་འདི་དག་གིས་དག་པ་དང་གྲོལ་བ་དང་ངེས་པར་འབྱུང་བར་འདོད་པ་དང༌། བཟོད་པ་དང༌། ལེགས་པར་འཛིན་པ་དེས་དགེ་སྦྱོང་གཽ་ཏ་མ་ལས་རིང་དུ་གྱིས་ཤིག །སོ་སོར་གྱིས་ཤིག །ཐ་དད་དུ་གྱིས་ཤིག་རྒྱང་སྲིངས་ཤིག་ཐག་སྲིངས་ཤིག །ལོགས་ཤིག་ན་འདུག་ཤིག་ཅེས་ཟེར་བ་ཡིན་ནོ། །དོན་དེས་ཚུལ་ཤིང་ལེན་དུ་འཇུག་པས་དབྱེན་བྱེད་པ་ཞེས་བྱ་བ་ལ་འདིར་དོན་དེས་ཞེས་བྱ་བ་ནི། ཆོས་ལས་ཐ་དད་པའི་དངོས་པོར་ཞེས་སྔར་སྨོས་པའི་དོན་དེ་ཉིད་ཀྱིས་ཏེ། དེ་ལས་ཐ་དད་པའི་དངོས་པོར་བྱ་བའི་ཕྱིར་འབྱེད་པར་བྱེད་པའི་གང་ཟག་གིས་ཆོས་མ་ཡིན་པའི་ཕྱོགས་དང་མཐུན་པའི་དགེ་འདུན་ལ་ཚུལ་ཤིང་ལེན་དུ་འཇུག་པས་དགེ་འདུན་འབྱེད་པར་བྱེད་པའོ། །དེའི་སྔགས་ནི་ཚེ་དང་ལྡན་པ་དག །དགེ་སྦྱོང་གཽ་ཏ་མ་ནི་ཤ་ཟ་སྟེ། བདག་ཅག་གིས་ཤ་བཟའ་བར་མི་བྱའོ། །དེ་ཅིའི་ཕྱིར་ཞེ་ན། གཞི་དེ་ལས་སྲོག་གཅོད་པར་འགྱུར་བའི་ཕྱིར་རོ། །དགེ་སྦྱོང་གཽ་ཏ་མ་ནིའོ་མ་འཐུངས་ཏེ། བདག་ཅག་གིས་བཏུང་བར་མི་བྱའོ། །དེ་ཅིའི་ཕྱིར་ཞེ་ན།
གཞི་དེ་ལས་བེའུ་ལ་གནོད་པའི་ཕྱིར་རོ། །དགེ་སྦྱོང་གཽ་ཏ་མ་ནི་ལན་ཚྭ་ཟ་སྟེ། བདག་ཅག་གིས་བཟའ་བར་མི་བྱའོ། །དེ་ཅིའི་ཕྱིར་ཞེ་ན། ཁུ་བ་ལས་གྱུར་པའི་ཕྱིར་རོ། །དགེ་སྦྱོང་གཽ་ཏ་མ་ནི་གོས་དྲས་པ་གྱོན་ཏེ། བདག་ཅག་གི་ས་བགོ་བར་མི་བྱའོ། །དེ་ཅིའི་ཕྱིར་ཞེ་ན། གཞི་དེ་ལས་དད་པས་སྦྱིན་པར་བྱ་བ་ཆུད་ཟོས་པར་འགྱུར་བའི་ཕྱིར་རོ། །དགེ་སྤྱོད་གོ་ཏམ་ནི་དགོན་པ་ན་གནས་པར་བྱེད་དེ། བདག་ཅག་གིས་གྲོང་དུ་གནས་པར་བྱའོ། །དེ་ཅིའི་ཕྱིར་ཞེ་ན། གཞི་དེ་ལས་དད་པས་སྦྱིན་པར་བྱ་བ་ཡོངས་སུ་མ་སྤྱད་པར་འགྱུར་བའི་ཕྱིར་རོ། །ཚེ་དང་ལྡན་པ་དག་ཁྱེད་ཅག་ལས་གང་བརྟུལ་ཞུགས་ཀྱི་གནས་ལྔ་པོ་འདི་དག་གིས་དག་པ་དང་གྲོལ་བ་དང༌། ངེས་པར་འགྱུར་བར་འདོད་པ་དང༌། བཟོད་པ་དང་ལེགས་པར་འཛིན་པ་དེས་ཚུལ་ཤིང་ལོངས་ཤིག་ཅེས་ཟེར་བ་ཡིན་ནོ། །དབྱེ་བར་བྱ་བ་དགེ་འདུན་གྱི་ཚད་ཉིད་མ་ཡིན་པ་དང་མཚམས་ཀྱི་ནང་ན་གཞན་དགེ་འདུན་གྱི་ཚད་དག་ཀྱང་མེད་པ་ཉིད་ཡིན་ན་དེ་མི་འཆགས་སོ་ཞེས་བྱ་བ་ནི། གལ་ཏེ་ཕྱོགས་གཉི་ག་ལ་སོ་སོ་ན་དགེ་འདུན་གྱི་ཚད་དུ་མེད་པ་ཉིད་ཡིན་ན་འབྱེད་པར་བྱེད་པ་དེས་དགེ་འདུན་དབྱེ་བ་དེ་མི་འཆགས་སོ། །འདིར་དགེ་འདུན་གྱི་ཚད་ནི་བཞི་ཡན་ཆད་དོ། །འབྱེད་པར་བྱེད་པ་ཉིད་ཀྱིས་ཆོས་མ་ཡིན་པའི་ཕྱོགས་ཀྱི་དགེ་འདུན་གྱི་ཁ་བསྐང་དུ་ཡང་མི་རུང་ངོ༌། །ཅི་འབྱེད་པ་ཐམས་ཅད་ལ་མཚམས་མེད་པར་འགྱུར་རམ་ཞེ་ན། དེའི་ཕྱིར། ཆོས་དང་ཆོས་མ་ཡིན་པ་གཉི་ག་དེ་བཞིན་ཉིད་དུ་ཤེས་ན་མཚམས་མེད་པའོ་ཞེས་བྱ་བ་སྨྲས་ཏེ། ཆོས་ཀྱང་ཆོས་ཉིད་དུ་ཤེས་ལ་ཆོས་མ་ཡིན་པ་ཡང་ཆོས་མ་ཡིན་པ་ཉིད་དུ་ཤེས་བཞིན་དུ་དགེ་འདུན་འབྱེད་པར་བྱེད་ན་དེ་ལ་མཚམས་མེད་པའི་ཁ་ན་མ་ཐོ་བར་འགྱུར་རོ། །ཆོས་ལ་ཆོས་མ་ཡིན་པར་འདུ་ཤེས་པ་དང༌། ཆོས་མ་ཡིན་པ་ལ་ཆོས་སུ་འདུ་ཤེས་པ་ལ་ནི་མཚམས་མེད་པར་མི་འགྱུར་ཏེ། དེ་ལ་བསམ་པས་ལོག་པར་བསྒྲུབ་པ་མེད་པའི་ཕྱིར་རོ། །དབྱེན་ལ་ཆོས་སུ་འདུ་ཤེས་པས་ཀྱང་ངོ་ཞེས་བྱ་བ་ཡང༌། མཚམས་མེད་པ་ཉིད་དུ་འགྱུར་རོ་ཞེས་བྱ་བར་སྦྱར་ཏེ། ཕུང་པོའི་ལྷག་མ་མེད་པའི་ཆུད་ཟ་བ་དེ་ལས་བཟློག་ཅིང་དབྱེན་བྱེད་པ།
འགྲོ་བ་རྣམས་ཐར་པ་ལས་བཟློག་པ་གང་ཡིན་པ་དེ་ནི་འདོད་པའི་ཁམས་ཀྱི་དབང་ཕྱུག་ལ་ཕན་པ་ཆེན་པོ་བྱེད་པ་ཡིན་ནོ་ཞེས་བྱ་བ་ལ་སོགས་པའི་རྣམ་པས་དབྱེན་ལ་ཆོས་སུ་འདུ་ཤེས་པས་དགེ་འདུན་གྱི་དབྱེན་བྱེད་ན་ངེས་ཀྱང་ཆོས་དང་ཆོས་མ་ཡིན་པ་དག་དེ་བཞིན་ཉིད་དུ་ཤེས་པ་ཡིན་པས་མཚམས་མེད་པར་འགྱུར་རོ། །ཡིད་གཉིས་ཟིན་འདུ་ཤེས་དང་འདྲ་བས་དེའི་ཕྱིར་འདི་ལ་ཡིད་གཉིས་ཟ་ན་ཡང་དེ་མཚམས་མེད་པ་ཉིད་དུ་འགྱུར་བར་རིག་པར་བྱའོ། །འཁོར་ལོ་བྱེད་པའི་གཞིའི་ཞེས་བྱ་བ་དེ་བཤད་ཟིན་ཏོ།། །།ད་ནི་རྩོད་པའི་གཞི་སྨྲ་བར་འདོད་ནས། རྩོད་པ་ནི་རྣམ་པ་བཞི་སྟེ། འགྱེད་པའི་ཕྱིར་རྩོད་པ་དང༌། མ་གདམས་པའི་ཕྱིར་རྩོད་པ་དང༌། ལྟུང་བའི་ཕྱིར་རྩོད་པ་དང༌། བྱེ་བའི་ཕྱིར་རྩོད་པ་སྟེ་དེ་ལ་འགྱེད་པའི་ཕྱིར་རྒྱུ་ལས་རྩོད་པ་ནི་འགྱེད་པའི་ཕྱིར་རྩོད་པའོ། །ལྷག་མ་རྣམས་ཀྱང་དེ་བཞིན་དུ་བརྗོད་པར་བྱའོ་ཞེས་གསུངས་པ་ལ་རྩོད་པ་བཞི་པོ་གང་དག་ཡིན་པ་དེ་དག་གི་རང་གི་ངོ་བོ་ངེས་པར་གཟུང་བའི་ཕྱིར། འཁྲུག་ལོང་གི་རྒྱུ་བཞིའོ་ཞེས་བྱ་བ་སྨྲས་ཏེ། ཚིག་གི་ཕྱིར་སེམས་གཞོལ་བ་གང་ཡིན་པ་དེ་ནི་འདིར་འཁྲུག་ལོང་ཞེས་བྱའི་ཁྲོ་བ་ནི་མ་ཡིན་ནོ། །ཚིག་ཅེས་བྱ་བ་ནི། དགྲ་བོས་མི་མཐུན་པར་སྨྲས་པ་གང་ཡིན་པ་དགོངས་ཀྱི་ཚིག་ཙམ་ནི་མ་ཡིན་ཏེ། དེའི་ཕྱིར་དེ་ལ་འཁྲུག་ལོང་ཉིད་དུ་ཉེ་བར་གདགས་སོ། །གལ་ཏེ་ཚིག་གི་ཕྱིར་སེམས་གཞོལ་བ་འཁྲུག་ལོང་ཡིན་ལ་དེ་ཉིད་རྩོད་པ་ཡིན་ན། འོ་ན་ཇི་ལྟར་གཙུག་ལས་དེ་ལ་བརྟེན་ཏེ་འཐབ་པ་དང་མཚང་འདྲུ་བ་དང༌། རྩོད་པ་དང༌། འགྱེད་པ་གང་ཡིན་པ་དེ་འགྱེད་པའི་ཕྱིར་རྩོད་པ་ཞེས་བྱའོ་ཞེས་གསུངས་ཤེ་ན། འདི་ལྟར་འཐབ་པ་ལ་སོགས་པ་ནི་ཚིག་གི་ཕྱིར་གཞལ་བའི་འཁྲུག་ལོང་འདིའི་འཁོར་ཡིན་ཏེ་དེ་དང་འབྲེལ་པ་ལས་འབྱུང་བའི་ཕྱིར་རོ། །ཡང་དག་པར་ན་འཁྲུག་ལོང་ཉིད་རྩོད་པ་ཡིན་ཏེ། འདི་ལྟར་རྩོད་པའི་གཞི་ཡིན་པས་གཞིར་གྱུར་པའི་དངོས་པོ་ནི་འགྱེད་པའི་ཕྱིར་རྩོད་པ་ཡིན་པར་རིག་པའི་ཕྱིར་རོ། །འཁྲུག་ལོང་གི་རྒྱུ་བཞི་པོ་དེ་དག་གང་ཞེ་ན་དེའི་ཕྱིར་དངོས་པོའི་དེ་བཞིན་ཉིད་ལ་ལོག་པར་བསྒྲུབ་པ་དང་སྤོང་བ་དང་ལྟུང་བ་དང་བཅས་པ་ཉིད་དང༌། ལས་ལ་མཐུན་པ་མི་སྤྱིན་
པའོ་ཞེས་བྱ་བ་སྨྲས་ཏེ། དངོས་པོའི་དེ་བཞིན་ཉིད་ཅེས་བྱ་བ་ནི། དེའི་རང་བཞིན་ཉིད་དེ་རང་གི་ངོ་བོ་ཞེས་བྱ་བའི་ཐ་ཚིག་གོ །དེ་ལ་ལོག་པར་བསྒྲུབ་པ་ཞེས་བྱ་བ་ནི། མ་ངེས་པ་ཉིད་དེ་ཆོས་ཡིན་ནོ་ཞེ་འམ། ཆོས་མ་ཡིན་ནོ་ཞེས་བྱ་བ་ལ་སོགས་པ་ལྷ་བུར་གཉིས་སུ་འདྲེན་པའོ། །དེ་ལྟར་དངོས་པའི་དེ་བཞིན་ཉིད་ལ་ལོག་པར་བསྒྲུབ་པ་དེ་ནི་འཁྲུག་ལོང་གི་རྒྱུ་དང་པོ་ཡིན་ནོ། །ཇི་ལྟར་ན་དངོས་པོའི་དེ་བཞིན་ཉིད་ལ་ལོག་པར་བསྒྲུབ་པ་དེ་འབའ་ཞིག་འཁྲུག་ལོང་དང་པོའི་རྒྱུར་བཞག་སྟེ། དེ་ལྟར་དངོས་པོའི་རྣམ་པ་འདི་ལྟ་བུ་ལ་སྤྱོད་པ་ལས་ཀྱང་འགྱེད་པ་འབྱུང་བའི་ཕྱིར་ཏེ། དེ་ཅིའི་ཕྱིར་ཁྱོད་ཀྱིས་འདི་བླངས་ཤེ་འམ་བྱིན་ཞེ་འམ་ལུས་སུ་བསྐོས་པ་འདི་མ་བྱས་ཞེས་འགྱེད་པ་གང་ཡིན་པ་དེ་ཡང་དངོས་པོའི་དེ་བཞིན་ཉིད་མ་ཡིན་པ་མ་ཡིན་ཏེ། འདི་ནི་བྱ་བའོ་ཞེ་འམ་བྱ་བ་མ་ཡིན་ནོ་ཞེས་ཞུགས་པའི་ཕྱིར་རོ་ཞེ་ན། འདི་ལྟར་འདིར་དེ་ལྟ་བུ་དང་མཐུན་པ་དག་མ་བསྡུས་པར་ཤེས་པར་མི་བྱ་སྟེ། དེས་ན་དངོས་པོའི་རང་གི་ངོ་བོ་ཁོ་ན་ལ་འགྱེད་པ་འདི་འབྱུང་བས་དེའི་ཕྱིར། དངོས་པོའི་དེ་བཞིན་ཉིད་ལ་ལོག་པར་བསྒྲུབ་པ་ལས་འགྱེད་པའི་ཕྱིར་རྩོད་པ་འདི་འབྱུང་བར་ཤེས་པར་བྱའོ། །སྤོང་བ་ཞེས་བྱ་བ་ནི། གདམས་ངག་ལ་སོགས་པ་འཇོག་པར་འགྱུར་བས་གཞན་སྤོང་བ་སྟེ། འདི་ནི་འཁྲུག་ལོང་གི་རྒྱུ་གཉིས་པ་ཡིན་ནོ། །རྒྱུ་དེ་ལས་མི་གདམས་པའི་ཕྱིར་རྩོད་པ་འབྱུང་བར་ཤེས་པར་བྱའོ། །ལྟུང་བ་དང་བཅས་པ་ཉིད་ཅེས་བྱ་བ་ནི། འཁྲུག་ལོང་གི་རྒྱུ་གསུམ་པ་ཡིན་ཏེ། དེ་ལ་ལྟུང་བའི་ཕྱིར་རྩོད་པ་འབྱུང་ངོ༌། །ལས་ལ་མཐུན་པ་མི་སྦྱིན་པ་ཞེས་བྱ་བ་ནི། གསོལ་བ་ལ་སོགས་པའི་ལས་ལ་མཐུན་པ་མི་སྦྱིན་པ་སྟེ་དེ་ནི་འཁྲུག་ལོང་གི་རྒྱུ་བཞི་པ་ཡིན་ཏེ། དེ་ལས་བྱ་བའི་ཕྱིར་རྩོད་པ་འབྱུང་ངོ༌། །འཁྲུག་ལོང་གི་རྒྱུ་བཞི་པོ་དེ་དག་གིས་བསྐྱེད་པའི་འཁྲུག་ལོང་བཞི་པོ་དེ་དག་ཇི་ལྟར་ཉེ་བར་ཞི་བར་འགྱུར་ཞེ་ན་དེའི་ཕྱིར། རྒྱུ་དང་པོ་ལས་བྱུང་བ་ནི་རྒྱུད་གཅིག་ཏུ་བྱ་བས་ཉེ་བར་ཞིའོ་ཞེས་བྱ་བ་སྨྲས་ཏེ། རྒྱུ་དང་པོ་ཞེས་བྱ་བ་དངོས་པོའི་དེ་བཞིན་ཉིད་ལ་ལོག་པར་བསྒྲུབ་པ་ཞེས་བྱ་བ་ལས་བྱུང་བའི་འཁྲུག་ལོང་འགྱེད་པའི་ཕྱིར་རྩོད་པ་ཞེས་
བྱ་བ་དེ་ནི་རྒྱུད་གཅིག་ཏུ་བྱ་བས་ཉེ་བར་ཞི་བར་འགྱུར་ཏེ། མངོན་སུམ་གྱིས་འདུལ་བར་འགྱུར་བ་ཞེས་བྱ་བ་ཡང་དེ་ཡིན་ནོ། །རྒྱུད་ཅེས་བྱ་བ་ནི་ངེས་པར་རྟོགས་པ་སྟེ། དངོས་པོ་གང་ལ་ངེས་པར་རྟོགས་པ་གཅིག་ཡོད་པའི་དངོས་པོ་དེ་ནི་རྒྱུད་གཅིག་ཅེས་བྱ་སྟེ་གཅིག་ཏུ་རྣམ་པར་གཞག་པར་བྱ་བའོ། །ངེས་པ་བསྐྱེད་པ་མཐའ་གཅིག་ཏུ་བྱ་བ་དེས་ཤེས་པའི་ཐ་ཚིག་གོ །འདི་ལྟར་དངོས་པོའི་རང་གི་ངོ་བོ་ལ་ལོག་པར་བསྒྲུབ་པ་ནི་ཐེ་ཚོམ་ཞེས་བྱ་སྟེ། ཐེ་ཚོམ་ནི་ངེས་པ་བསྐྱེད་པ་ལྡོག་པས་དེས་ན་རྒྱུད་གཅིག་ཏུ་བྱ་བས་ལོག་པར་བསྒྲུབ་པར་ཉེ་བར་ཞི་བར་འགྱུར་ཏེ་མཐའ་གཅིག་ཏུ་བྱེད་པའི་ཕྱིར་རོ། །རྒྱུ་གཉིས་པ་ལས་བྱུང་བ་ནི་འདི་དང་དག་པ་སྦྱིན་པས་སོ་ཞེས་བྱ་བ་ནི། རྒྱུ་གཉིས་པ་ཞེས་བྱ་བ་སྤོང་བ་ཞེས་བྱ་བ་ལས་བྱུང་བའི་འཁྲུག་ལོང་མི་གདམས་པའི་ཕྱིར་རྩོད་པ་ཞེས་བྱ་བ་ནི་རྒྱུ་གཅིག་ཏུ་ཞེས་བྱ་བ་ཞེས་སྨོས་པ་འདི་དང་དག་པ་སྦྱིན་པས་ཉེ་བར་ཞི་བར་འགྱུར་ཏེ། དྲན་པས་འདུལ་བ་དང་མ་མྱོས་པས་འདུལ་བ་ཞེས་བྱ་བ་ཡང་དེ་བཞིན་ནོ། །འདི་ལྟར་གླེང་བར་བྱ་བ་དེ་དང་འབྲེལ་བའི་དྲན་པ་གང་ཡིན་པ་དེས་འདི་འདུལ་བ་ལ་ནི་དྲན་པས་འདུལ་བའི་རྩོད་པ་ཉེ་བར་ཞི་བ་ཡིན་ལ། གླེང་བར་བྱ་བ་དེ་ཉིད་མྱོས་པའི་ཕྱིར་ཕྱིས་ངེས་པ་སྐྱེས་ཤིང་འདུ་ཤེས་མ་ཉམས་པའི་བདག་ཉིད་དུ་གྱུར་པ་གང་ཡིན་པ་དེ་ནི་འདིར་མ་མྱོས་པ་ཞེས་བྱ་སྟེ། དས་འདུལ་བ་ནི་འདིར་མ་མྱོས་པས་འདུལ་བའི་རྩོད་པ་ཉེ་བར་ཞི་བ་ཡིན་ནོ། །སྤོང་བ་ཞེས་བྱ་བ་ནི་རྒྱུ་དང་བཅས་པ་ཡད་ཡོད་ལ། རྒྱུ་མེད་པ་ཡང་ཡོད་དེ། དེ་ལ་རྒྱུ་དང་བཅས་པ་ཉིད་ཡིན་ན་ནི་རྒྱུད་གཅིག་ཏུ་བྱ་བས་དེ་ལས་བྱུང་བའི་རྩོད་པ་ཉེ་བར་ཞི་བ་ཉིད་དུ་འགྱུར་ཏེ་སྤོང་བར་འོས་པ་ཉིད་ངེས་པར་གྱུར་པའི་ཕྱིར་རོ། །རྒྱུ་མེད་པ་ཉིད་ཡིན་ན་ནི། དག་པ་སྦྱིན་པས་ཉེ་བར་ཞི་བར་འགྱུར་ཏེ། སྤོང་བའི་རྒྱུ་མེད་ན་དག་པ་རྣམ་པར་གནས་པའི་ཕྱིར་རོ། །དེ་ལྟར་ན་རྒྱུ་གཉིས་ཀྱིས་སྤང་བའི་རྒྱུ་ལས་བྱུང་བའི་རྩོད་པ་ཉེ་བར་ཞི་བར་བསྟན་ཏོ། །རྒྱུ་གསུམ་པ་ལས་བྱུང་བ་ནི་ཕྱིར་བཅོས་པ་དང་ངེས་པར་འཛིན་པ་ལ་སྦྱར་བ་ཉིད་སྦྱིན་པས་སོ་ཞེས་བྱ་བ་ནི། རྒྱུ་གསུམ་བ་ཞེས་བྱ་བ་ལྟུང་བ་དང་བཅས་པ་ཉིད་ཅེས་བྱ་བ་ལས་བྱུང་བའི་འཁྲུག་ལོང་
ལྟུང་བའི་ཕྱིར་རྩོད་པ་ཞེས་བྱ་བ་དེ་ནི་ཕྱིར་བཅོས་པ་ཞེས་བྱ་བ་བཤགས་པས་ཉེ་བར་ཞི་བར་བྱ་བ་དང་ངེས་པར་འཛིན་པ་ལ་སྦྱར་བ་ཉིད་སྦྱིན་པ་ཞེས་བྱ་བ་དེའི་ངོ་བོ་ཉིད་དུ་ཚོལ་དུ་གཞུག་པས་ཉེ་བར་ཞི་པར་བྱའོ། །ལྟུང་བ་དང་བཅས་པ་ཉིད་ནི་རྣམ་པ་གཉིས་ཏེ། རྣམ་པར་ཤེས་པས་ན་རང་གི་ངོ་བོའི་ཉེས་པ་དང༌། རྣམ་པར་མི་ཤེས་པ་ན་རང་གི་ངོ་བོའི་ཉེས་པས་སོ། །དེ་ལ་རྣམ་པར་ཤེས་པ་ན་རང་གི་ངོ་བོའི་ཉེས་པས་ལྟུང་བ་དང་བཅས་པ་ཉིད་ལ་ནི་ཕྱིར་བཅོས་པས་བསལ་བ་བྱས་ན་དེ་ལས་བྱུང་བའི་རྩོད་པ་ཉེ་བར་ཞི་བར་འགྱུར་རོ། །རྣམ་པར་མི་ཤེས་པ་ན་རང་གི་ངོ་བོའི་ཉེས་པས་ལྟུང་བ་དང་བཅས་པ་ཉིད་ལ་ནི་རང་གི་ངོ་བོ་ཉིད་བཙལ་ནས་བསལ་བར་ནུས་པས་དེ་ལ་ནི་ངེས་པར་འཛིན་པ་ལ་སྦྱར་བ་ཉིད་སྦྱིན་པས་དེ་ལས་བྱུང་བའི་རྩོད་པ་ཉེ་བར་ཞི་བར་འགྱུར་རོ། །དེ་ལྟར་ན་རྒྱུ་གཉིས་ཀྱིས་ལྟུང་བ་དང་བཅས་པ་ཉིད་ཀྱི་རྒྱུ་ལས་བྱུང་བའི་རྩོད་པ་ཉེ་བར་ཞི་བར་བསྟན་ཏོ། །ཐ་མ་ནི་སྤྱིན་དུ་གཞུག་པས་སོ་ཞེས་བྱ་བ་ནི། ཐ་མ་ཞེས་བྱ་བ་ལས་ལ་མཐུན་པ་མི་སྦྱིན་པ་ཞེས་བྱ་བའི་རྒྱུ་ལས་བྱུང་བའི་འཁྲུག་ལོང་བྱ་བའི་ཕྱིར་རྩོད་པ་ཞེས་བྱ་བ་དེ་ནི་ལས་ལ་མཐུན་པ་སྤྱིན་དུ་གཞུག་བས་ཉེ་བར་ཞི་བར་བྱ་སྟེ། མཐུན་པ་ཉིད་དུ་གྱུར་ན་བྱ་བའི་ཕྱིར་རྩོད་པ་ཉེ་བར་ཞི་པ་ཉིད་ཡིན་ནོ། །འོ་ན་རྒྱུད་གཅིག་ཏུ་བྱ་བས་ཉེ་བར་ཞི་བར་བྱའོ་ཞེས་གང་བསྟན་པ་དེ་ཇི་ལྟར་རྒྱུད་གཅིག་ཏུ་བྱ་ཞེ་ན་དེའི་ཕྱིར། འགྱེད་པ་གཉིས་རང་གིས་མ་ནུས་ན་ཆོགས་པར་དབྱུང་བ་ངག་གིས་ལེགས་པར་བསྒྲུབ་པོ་ཞེས་བྱ་བ་སྨྲས་ཏེ། གལ་ཏེ་འགྱེད་པར་བྱེད་པའི་གང་ཟག་དེ་གཉིས་རང་གིས་རྩོད་པ་དེ་ཉེ་བར་ཞི་བར་བྱེད་མི་ནུས་ན་ཚོགས་པར་དབྱུང་བ་དག་གིས་དོན་དེ་ལེགས་པར་བསྒྲུབ་ཅིང་མཐའ་གཅིག་ཏུ་བྱའོ། །འོ་ན་འགྱེད་པ་མང་པོ་དག་འབྱུང་ན་ཅིའི་ཕྱིར་འགྱེད་པ་གཉིས་ཞེས་གཉིས་ཀྱི་ཚིག་ཏུ་བྱས་ཤེ་ན། བདེན་མོད་ཀྱི་དེ་ནི་ཕྱོགས་གཉིས་སུ་རྣམ་པར་གནས་པས་དེ་ལ་གཉིས་ཉིད་དུ་གྱུར་པ་ཉིད་ཡིན་པའི་ཕྱིར་རོ། །ཚོགས་པར་དབྱུང་བ་ཇི་ལྟ་བུ་དག་གིས་ཤེ་ན། དེའི་ཕྱིར་དགེ་སློང་དག་གིས་སོ་ཞེས་བྱ་བ་སྨྲས་སོ། །དགེ་སློང་ཇི་ལྟ་བུ་དག་གིས་ཤེ་ན་དེའི་ཕྱིར་འདྲ་བ་དག་གིས་སོ་ཞེས་བྱ་བ་སྨྲས་
སོ། །སུ་འདྲ་བ་དག་གིས་ཤེ་ན་དེའི་ཕྱིར་དེ་གཉིས་སོ་ཞེས་བྱ་བ་སྨྲས་ཏེ་འགྱེད་པ་དེ་གཉིས་སོ། །ཇི་སྙེད་དག་གིས་ཤེ་ན་དེའི་ཕྱིར་གཅིག་ཡན་ཆད་ཀྱིས་སོ་ཞེས་བྱ་བ་སྨྲས་སོ། །གཅིག་ཡན་ཆད་དུའང་རུང་བ་ཞེས་བྱ་བའི་ཐ་ཚིག་གོ །དགེ་སློང་གཅིག་གམ་དུ་མ་ཇི་ལྟ་བུ་ལ་དེ་གཉིས་ཀྱིས་འདྲ་བར་བྱ་ཞེ་ན་དེའི་ཕྱིར། གཟུ་བོ་དག་ལས་འདྲ་བར་བྱའོ་ཞེས་བྱ་བ་སྨྲས་ཏེ། ཕྱོགས་གཉི་གའི་དབུས་ན་གནས་པ་ལ་བརྟན་པ་ནི་གཟུ་བོ་ཡིན་པར་རིག་པར་བྱའོ། །དེ་ལྟར་ཡང་འདིར་གཞུང་ནི་སོ་སོར་ཐར་པའི་སྐབས་ཀྱི་རྩོད་པ་ཞི་བར་བྱ་བ་ཞུ་བའི་གཞུང་ཁ་ཅིག་ལས་དགེ་སློང་གཟུ་བོ་གང་ཞེ་ན། ཕྱོགས་ཅིག་ཤོས་སུ་ཡང་མ་སོང་ལ་གཉིས་པར་ཡང་མ་སོང་བ་གང་ཡིན་པའོ་ཞེས་གསུངས་པ་ཡིན་ནོ། །དེ་དག་དགེ་འདུན་གྱིས་གཏན་དུ་བསྐོའོ་ཞེས་བྱ་བ་ནི། གཟུ་བོ་དེ་དག་དགེ་འདུན་གྱི་གནས་དེར་གཏན་དུ་དགེ་འདུན་གྱི་རྩོད་པ་བྱུང་ངོ་ཅོག་རྣམ་པར་ཞི་བར་བྱ་བའི་ཕྱིར་བསྐོ་བར་བྱའི། རྩོད་པ་གཅིག་གི་ཕྱིར་འཕྲལ་ལ་བསྐོ་བར་བྱ་བ་ནི་མ་ཡིན་ནོ། །དེ་ཡང་དགེ་འདུན་གྱིས་སྤྲོ་བར་བྱས་ནས་གསོལ་བ་དང་གཉིས་ཀྱི་ལས་ཀྱིས་བསྐོའོ། །དེའི་སྔགས་ནི་མིང་འདི་ཞེས་བྱ་བ་ཁྱོད་དགེ་འདུན་ལ་རྩོད་པ་བྱུང་བ་བྱུང་བ་རྣམས་མངོན་སུམ་གྱིས་འདུལ་བས་རྣམ་པར་ཞི་བར་བྱེད་པར་སྤྲོའམ། སྤྲོའོ། །དགེ་འདུན་བཙུན་པ་རྣམས་གསན་དུ་གསོལ། །གཟུ་བོ་མིང་འདི་ཞེས་བགྱི་བ་འདི་དགེ་འདུན་ལ་རྩོད་པ་བྱུང་བ་བྱུང་བ་རྣམས་མངོན་སུམ་གྱིས་འདུལ་བས་རྣམ་པར་ཞི་བར་བགྱིད་པ་སྤྲོ་ན། གལ་ཏེ། དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་གཟུ་བོ་མིང་འདི་ཞེས་བགྱི་བ་འདི་རྩོད་པ་རྣམ་པར་ཞི་བར་བགྱིད་པ་བསྐོ་བར་བགྱི་སྟེ། གཟུ་བོ་མིང་འདི་ཞེས་བགྱི་བ་འདི་དགེ་འདུན་ལ་རྩོད་པ་བྱུང་བ་བྱུང་བ་རྣམས་མངོན་སུམ་གྱིས་འདུལ་བས་རྩོད་པ་རྣམ་པར་ཞི་བར་བགྱིད་དོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །འདིར་འཐབ་མོ་མི་སྐྱེད་པ་བསྐོ་བར་བྱ་བ་ཉིད་དོ་ཞེས་བྱ་བ་ནི། གཟུ་བོ་བསྐོ་བ་འདིར་གང་ཟག་དེ་ལྟ་བུ་བསྐོ་བར་བྱ་བ་ཉིད་ཡིན་ནོ། །ངོ་ཚ་ཤེས་ཤིང་
བསླབ་པ་འདོད་པའོ་ཞེས་བྱ་བ་ནི། གཟུ་བོར་བསྐོ་བར་བྱ་བ་ཉིད་དོ་ཞེས་བྱ་བར་སྦྱར་ཏེ། འདིར་ངོ་ཚ་ཤེས་པ་ཞེས་བྱ་བ་ནི། བསླབ་པའི་གཞི་ཡང་དག་པར་བླངས་པ་ཐམས་ཅད་ལ་བག་རྐྱོང་བ་ཞུམ་པར་བྱེད་པ་ཡིན་གྱི་ཕམ་པར་འགྱུར་བ་ཙམ་ཉི་ཚེར་མ་ཟད་དོ། །མ་མོ་ལས་འདི་སྐད་དུ་གསུངས་ཏེ། དགེ་སློང་ཆོས་ཉི་ཤུ་རྩ་གཉིས་དང་ལྡན་པ་བཙལ་བར་བྱ་སྟེ། ཉི་ཤུ་རྩ་གཉིས་གང་ཞེ་ན། ཅི་ཚེ་དང་ལྡན་པ་དེ་ཚུལ་ཁྲིམས་དང་ལྡན་ཞིང་དང་པོ་ནས་ཕུན་སུམ་ཚོགས་པ་དང༌། ངོ་ཚ་ཤེས་ཤིང་འགྱོད་པ་དང་ལྡན་ལ་བསྡམས་པ་དང༌། བསླབ་པ་འདོད་པ་དང༌། འདུལ་བ་ལ་ཤིན་ཏུ་རྣམ་པར་ངེས་ཤིང་ཐོས་པ་འཛིན་པ་ཐོས་པ་བསགས་པ་དང༌། ལུང་ཐོན་པ་དང༌། རྩོད་པ་ལ་མཁས་པ་དང༌། རྩོད་པ་ཀུན་ནས་སློང་བ་ལ་མཁས་པ་དང༌། རྩོད་པའི་བྱེ་བྲག་ལ་མཁས་པ་དང༌། རྩོད་པ་འགོག་པ་ལ་མཁས་པ་དང༌། རྩོད་པ་འགགས་ནས་ཕྱིས་མི་འབྱུང་བ་ལ་མཁས་པ་དང༌། བསྟན་བཅོས་ལ་མཁས་པ་དང༌། གཞི་ལྷག་པར་སྤྱོད་པ་ལ་མཁས་ཤིང་ཉེས་རྩོམ་མེད་པར་སྨྲ་བ་དང༌། ཉེས་རྩོམ་བྱེད་དུ་མི་འཇུག་པ་དང༌། ལུས་དང་ངག་གིས་མི་འཇུག་པ་དང༌། སྨྲ་བར་བྱེད་ཅིང་སྨྲས་པ་བརྡ་ཕྲད་པར་བྱེད་པ་དང༌། གོ་བར་བྱེད་ཅིང་བསྒོ་བ་བརྡ་ཕྲད་པར་བྱེད་པ་དང༌། རྣམ་པར་རིག་པར་བྱེད་ཅིང་རྣམ་པར་རིག་པར་བྱས་པ་བརྡ་ཕྲད་པར་བྱེད་པ་དང༌། ངེས་པར་རྟོགས་པར་བྱེད་ཅིང་ངེས་པར་བརྟགས་པ་བརྡ་ཕྲད་པར་བྱེད་པ་དང༌། འདུན་པས་འགྲོ་བ་མ་ཡིན་པ་དང༌། ཞེ་སྡང་གིས་འགྲོ་བ་མ་ཡིན་པ་དང༌། གཏི་མུག་གིས་འགྲོ་བ་མ་ཡིན་པ་དང༌། འཇིགས་པས་འགྲོ་བ་མ་ཡིན་པ་སྟེ། གཟུ་བོ་ཆོས་ཉི་ཤུ་རྩ་གཉིས་པོ་དེ་དག་དང་ལྡན་པ་ནི་ཆོས་ཀྱི་ལོངས་སྤྱོད་དམ་ཟང་ཟིང་གི་ལོངས་སྤྱོད་ཀྱིས་ཕྱོགས་གཉི་ག་ལ་མི་བརྟེན་པ་ཡིན་ནོ་ཞེས་གསུངས་པ། དེ་དག་འདིར་ཅི་རིགས་པར་བསྡུས་པར་ཤེས་པར་བྱའོ། །འདུལ་བ་ལ་ཤིན་ཏུ་རྣམ་པར་ངེས་པའོ་ཞེས་བྱ་བ་ནི། ལྟུང་བ་དང་ལྟུང་བ་མ་ཡིན་པ་ལ་མཁས་པ་ཞེས་བྱ་བའི་ཐ་ཚིག་གོ །རྩོད་པ་བྱུང་བའི་སྤྱོད་པ་ལ་མཁས་པའོ་ཞེས་བྱ་བ་ནི། རྩོད་པ་ལ་མཁས་པ་དང༌། རྩོད་པ་ཀུན་ནས་སློང་
བ་ལ་མཁས་པ་དང༌། རྩོད་པའི་བྱེ་བྲག་ལ་མཁས་པ་དང༌། རྩོད་པ་འགོག་པ་ལ་མཁས་པ་དང༌། རྩོད་པ་འགགས་ནས་ཕྱིས་མི་འབྱུང་བ་ལ་མཁས་པའོ། །རྣམ་པར་ཞེན་པའོ་ཞེས་བྱ་བ་ནི་དོན་རྣམ་པར་ངེས་པས་མི་འགྱུར་བ་སྟེ། དེས་ནི་བསྟན་བཅོས་ལ་མཁས་པ་བསྡུས་སོ། །བརྟན་ཞིང་ཉེས་རྩོམ་མེད་པར་འཇུག་པའོ་ཞེས་བྱ་བ་ལ། བརྟན་པ་ཞེས་བྱ་བས་ནི་ལུས་དང་ངག་གིས་མི་འཇུག་པ་བསྡུས་སོ། །ཉེས་རྩོམ་མེད་པར་འཇུག་པ་ཞེས་བྱ་བས་ནི་གཞི་ལྷག་པར་སྤྱོད་པ་ལ་མཁས་ཤིང་ཉེས་རྩོམ་མེད་པར་སྨྲ་བ་དང་ཉེས་རྩོམ་བྱེད་དུ་མི་འཇུག་པ་བསྡུས་སོ། །སྙོམས་པའོ་ཞེས་བྱ་བ་ནི། འདུན་པ་དང་ཞེ་སྡང་དང་འཇིགས་པས་མི་འགྲོ་བ་བསྟན་ཏོ། །བརྡ་ཕྲད་པའོ་ཞེས་བྱ་བ་ནི། གཞན་གྱིས་བསྒོ་བ་བརྡ་ཕྲད་པར་བྱེད་པ་གང་ཡིན་པ་དེ་ནི། །བརྡ་ཕྲད་པ་སྟེ་དེས་ནི་སྨྲས་པ་བརྡ་ཕྲད་པར་བྱེད་པ་དང་བསྒོ་བ་བརྡ་ཕྲད་པར་བྱེད་པ་དང༌། རྣམ་པར་རིག་པར་བྱས་པ་བརྡ་ཕྲད་པར་བྱེད་པ་དང༌། ངེས་པར་བརྟགས་པ་བརྡ་ཕྲད་པ་ཞེས་བྱ་བའི་ཚིག་འོག་མ་བཞི་བསྡུས་སོ། །བརྡ་སྤྲོད་པར་བྱེད་པའོ་ཞེས་བྱ་བ་ནི། གཞན་ལ་གོ་བར་བྱེད་ནུས་པ་གང་ཡིན་པ་དེ་ནི་བརྡ་སྤྲོད་པར་བྱེད་པ་སྟེ། དེས་ནི་སྨྲ་བར་བྱེད་པ་དང་གོ་བར་བྱེད་པ་དང༌། རྣམ་པར་རིག་པར་བྱེད་པ་དང༌། ངེས་པར་རྟོགས་པར་བྱེད་པ་ཞེས་བྱ་བའི་ཚིག་གོང་མ་བཞི་བསྡུས་སོ། །མཁས་པའོ་ཞེས་བྱ་བ་ནི་རྨོངས་པ་མེད་ཅིང་མཁས་པ་སྟེ། དས་ནི་གཏི་མུག་གིས་འགྲོ་བ་མ་ཡིན་པ་ཞེས་བྱ་བ་ཡན་ཆད་བསྡུས་ཏེ། དེ་བས་ན་འདི་ཙམ་གྱིས་ཐམས་ཅད་བསྡུས་པར་རིག་པར་བྱའོ། །དེ་དག་གིས་ཉེ་བར་མ་ཞིན་དགེ་འདུན་ལ་དབུལ་ལོ་ཞེས་བྱ་བ་ནི། གཟུ་བོ་དེ་དག་གིས་རྩོད་པ་དེ་ཉེ་བར་མ་ཞིན་དགེ་འདུན་ལ་དབུལ་བར་བྱའོ། །དེས་མ་ནུས་ན་གསལ་བ་དག་བསྐོའོ་ཞེས་བྱ་བ་ནི། དགེ་འདུན་དེས་རྩོད་པ་དེ་ཉེ་བར་ཞི་བར་བྱེད་མ་ནུས་ན་དགེ་སློང་གསལ་བ་དག་བསྐོ་བར་བྱའོ། །གསལ་བ་དུ་དག་བསྐོ་བར་བྱ་ཞེ་ན་དེའི་ཕྱིར། དགེ་འདུན་གྱི་ཚད་ལས་མི་ཉུང་བ་དག་གོ་ཞེས་བྱ་བ་སྨྲས་ཏེ། མཚམས་ཀྱི་ཕྱི་རོལ་དུ་སོང་ན་དགེ་འདུན་དུ་ཚང་བ་དག་བསྐོའོ་ཞེས་བྱ་བའི་ཐ་ཚིག་གོ །དེ་ཡང་དགེ་འདུན་གྱིས་སྤྲོ་བར་བྱས་ནས། གསོལ་བ་དང་
གཉིས་ཀྱི་ལས་ཀྱིས་བསྐོའོ། །དེའི་སྔགས་ནི་མིང་འདི་ཞེས་བྱ་བ་ཁྱོད་དགེ་འདུན་ལ་རྩོད་པ་བྱུང་བ་རྣམ་པར་ཞི་བར་བྱེད་པ་སྤྲོ་འམ། སྤྲོའོ། །དགེ་འདུན་བཙུན་པ་རྣམས་གསན་དུ་གསོལ། །དགེ་སློང་གསལ་བ་མིང་འདི་ཞེས་བགྱི་བ་འདི་དགེ་འདུན་ལ་རྩོད་པ་བྱུང་བ་རྣམ་པར་ཞི་བར་བགྱིད་པར་སྤྲོ་ན་གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་མིང་འདི་ཞེས་བགྱི་བ་འདི་གསལ་བར་བསྐོ་བར་བགྱི་སྟེ། གསལ་བ་མིང་འདི་ཞེས་བགྱི་བ་འདི་དགེ་འདུན་ལ་རྩོད་པ་བྱང་བ་རྣམ་པར་ཞི་བར་བགྱིད་དོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །སྡེ་ཚན་དེས་མ་ནུས་ན་རང་གི་གསལ་བ་དག་བསྐོ་བ་ཉིད་དོ་ཞེས་བྱ་བ་ནི། གཟུ་བོའི་སྡེ་ཚན་ནམ་གསལ་བའི་སྡེ་ཚན་ནམ་གསལ་བའི་ཡང་གསལ་བའི་སྡེ་ཚན་གང་ཡང་རུང་བས་རྩོད་པ་དེ་ཉེ་བར་ཞི་བར་མ་ནུས་ན་སྡེ་ཚན་དེ་དག་གིས་གསོལ་བ་དག་བསྐོ་བར་རིག་པ་ཉིད་ཡིན་ཏེ། དགེ་འདུན་གྱི་ཚད་ལས་མི་ཉུང་བ་དག་གོ་ཞེས་སྔར་སྨོས་པའི་དགོས་པ་ནི་དེ་ཡིན་པར་ཤེས་པར་བྱའོ། །འདིར་གཞུང་ནི་ཁ་ཅིག་ལས། གཟུ་བོ་རྣམས་ཀྱིས་གསལ་བ་དག་བསྐོ་བར་གསུངས་ཏེ། གལ་ཏེ་དགེ་སློང་གཟུ་བོ་དག་གིས་རྩོད་པ་དེ་ཉེ་བར་ཞི་བར་བྱེད་མ་ནུས་ན། དགེ་སློང་གཟུ་བོ་རྣམས་ཀྱིས་དགེ་སློང་གསལ་བདག་བསྐོ་བར་བྱའོ་ཞེས་གསུངས་པ་དང༌། ཁ་ཅིག་ལས་དགེ་འདུན་གྱིས་གསལ་བ་དག་བསྐོ་བར་གསུངས་ཏེ། གལ་ཏེ་དགེ་འདུན་གྱི་རྩོད་པ་དེ་ཉེ་བར་ཞི་བར་བྱེད་མ་ནུས་ན། གལ་ཏེ་དགེ་འདུན་གྱིས་དགེ་སློང་གསལ་བདག་བསྐོ་བར་བྱའོ་ཞེས་གསུངས་པ་ཡིན་ཏེ་འདིར་དེ་གཉི་ག་ཡང་རུང་ངོ༌། །མི་ནས་ཤིང་གཞན་མི་བྱེད་ན་གང་ལས་བླངས་པ་དེ་ལ་དབུལ་ལོ་ཞེས་བྱ་བ་ནི། གསལ་བ་དང་གསལ་བའི་ཡང་གསལ་བ་གང་ཡིན་པ་དེ་དག་གིས་རྩོད་པ་དེ་ཉེ་བར་ཞི་བར་བྱེད་མ་ནུས་ཤིང༌། རང་གི་སྡེ་ཚན་ལས་སྡེ་ཚན་གཞན་བསྐོ་བར་ཡང་མི་བྱེད་ན། དེའི་ཚེ་དང་པོ་རྩོད་པ་དེ་གང་ལས་བླངས་པ་དེ་ཉིད་ལ་ཕྱིར་དབུལ་བར་བྱ་བ་སྟེ། གསལ་བའི་ཡང་གསལ་བ་དག་གིས་ནི་གསལ་བདག་ལའོ། །གསལ་བདག་གིས་ནི་གཟུ་བོ་དག་ལའམ། དགེ་
འདུན་དག་ལའོ། །གཟུ་བོ་དག་གིས་ནི་རྒོལ་བ་དང་ཕྱིར་རྒོལ་བ་དག་ལའོ། །གནས་བརྟན་དག་གིས་ནི་རྩོད་པ་སྦེད་པ་ལའོ། །དེས་ནི་དགེ་འདུན་དག་ལའོ། ཕྱིར་འོངས་ན་དགེ་འདུན་བཞི་པོས་རྩོད་པ་སྤེད་པ་བསྐོའོ་ཞེས་བྱ་བ་ནི། གསལ་བ་དག་ལས་རྩོད་པ་དེ་ཕྱིར་འོངས་ན། དགེ་འདུན་བཞི་པོས་རྩོད་པ་སྤེད་པ་བསྐོ་བར་བྱ་སྟེ། དེ་ཡང་དགེ་འདུན་གྱིས་སྤྲོ་བར་བྱས་ནས་གསོལ་བ་དང་གཉིས་ཀྱི་ལས་ཀྱིས་བསྐོ་བར་བྱའོ། །དེའི་སྔགས་ནི་མིང་འདི་ཞེས་བྱ་བ་ཁྱོད་དགེ་འདུན་གྱི་རྩོད་པ་སྤེད་པར་སྤྲོ་འམ། སྤྲོའོ། །དགེ་འདུན་བཙུན་པ་རྣམས་གསན་དུ་གསོལ། །དགེ་སློང་མིང་འདི་ཞེས་བགྱི་པ་འདི་དགེ་འདུན་གྱི་རྩོད་པ་སྦེད་པར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱི་གནང་བར་མཛོད་ཅིག་དང༌། དགེ་འདུན་གྱིས་མིང་འདི་ཞེས་བགྱི་བ་འདི་རྩོད་པ་སྦེད་པར་བསྐོ་བར་བགྱི་སྟེ། རྩོད་པ་སྦེད་པ་མིང་འདི་ཞེས་བགྱི་བ་འདི་དགེ་འདུན་ལ་རྩོད་པ་སྦེད་དེ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །དེས་གནས་བརྟན་དང་བཅས་སོ་སོར་ཐར་པ་དང་བཅས་པའི་དགེ་འདུན་གཞན་ལ་དབུལ་ལོ་ཞེས་བྱ་བ་ནི། རྩོད་པ་སྦེད་པ་དེས་རྩོད་པ་དེ་གནས་བརྟན་དང་བཅས། སོ་སོར་ཐར་པར་བཅས་པའི་དགེ་འདུན་གཞན་ལ་དབུལ་བར་བྱའོ། །སྔར་བྱུང་བ་བརྗོད་དེ་དུས་ཟླ་བ་གསུམ་དུ་དབུལ་ལོ་ཞེས་བྱ་བ་ནི། རྩོད་པ་སྤེད་པ་དེས་གནས་བརྟན་དང་བཅས། སོ་སོར་ཐར་བ་དང་བཅས་པའི་དགེ་འདུན་གཞན་ལ་བྱུང་བའི་མཐའ་སྔར་བརྗོད་དེ། དུས་ཟླ་བ་གསུམ་དུ་རྩོད་པ་དེ་དབུལ་བར་བྱ་བའོ། །དེའི་སྔགས་ནི་དགེ་འདུན་བཙུན་པ་རྣམས་གསན་དུ་གསོལ། རྩོད་པ་འདི་གནས་ཆེ་གེ་མོ་ཞེས་བགྱི་བར། གང་ཟག་ཆེ་གེ་མོ་ཞེས་བགྱི་བ་དང༌། མིང་འདི་ཞེས་བགྱི་བ་ལས། གཞི་འདིའི་སླད་དུ་བྱུང་ན་ཡུན་འདི་སྲིད་ཅིག་ལགས་ཏེ། རྩོད་པ་འདི་གཟུ་བོ་རྣམས་ལ་ཕུལ་ན། གཟུ་བོ་རྣམས་ཀྱིས་ཀྱང་རྣམ་པར་ཞི་བར་བགྱིད་རྔོ་མ་ཐོགས་ཏེ། དེ་དག་གིས་དགེ་འདུན་ལ་ཕུལ་ནས། དགེ་འདུན་གྱིས་ཀྱང་རྣམ་པར་ཞི་བར་བགྱིད་རྔོ་མ་ཐོགས་ཏེ། དགེ་འདུན་གྱིས་དགེ་སློང་གསལ་བ་དག་བསྐོས་ན། དགེ་སློང་གསལ་བ་རྣམས་
ཀྱིས་ཀྱང་རྣམ་པར་ཞི་བར་བགྱིད་རྔོ་མ་ཐོགས་ཏེ། དེ་དག་གིས་དགེ་སློང་གསལ་བའི་ཡང་གསལ་བ་དག་བསྐོས་ན། དགེ་སློང་གསལ་བའི་ཡང་གསལ་བ་དེ་དག་གིས་ཀྱང་རྣམ་པར་ཞི་བར་བགྱིད་རྔོ་མ་ཐོགས་ཏེ། དེ་དག་གིས་གསལ་བ་རྣམས་ལ་ཕུལ་བ་ལས་གསལ་བ་རྣམས་ཀྱིས་དགེ་འདུན་ལ་ཕུལ་ནས། དགེ་འདུན་གྱིས་བདག་དགེ་སློང་མིང་འདི་ཞེས་བགྱི་བ་མྱོང་བ་སྤེད་པར་བསྐོས་ཏེ། བདག་རྩོད་པ་སྦེད་པ་དགེ་སློང་མིང་འདི་ཞེས་བགྱི་བས་རྩོད་པ་འདི་གནས་བརྟན་དང་བཅས། སོ་སོར་ཐར་བ་དང་བཅས་པའི་དགེ་འདུན་ལ་དབུལ་ལོ། །དགེ་འདུན་བཙུན་པ་རྣམས་ཀྱིས་རྩོད་པ་འདི་ཟླ་བ་གསུམ་གྱི་མཐའ་ཚུན་ཆད་ཀྱིས་རྣམ་པར་ཞི་བར་མཛད་དུ་གསོལ་ཞེས་གསུངས་པ་ཡིན་ནོ། །དེ་ནི་དེའོ་ཞེས་བྱ་བ་ནི། དབུལ་བའི་བདག་ཉིད་ཀྱི་ལས་དེ་ནི་རྩོད་པ་སྤེད་པ་དེ་ཡིན་པ་སྟེ། དེ་དབུལ་བ་ཐམས་ཅད་བསྡུ་བའི་ཕྱིར་མདོ་འདི་བྱས་སོ། །ཕྱིར་ཕུལ་བ་ན་དེས་མདོ་སྡེ་དང་འདུལ་བ་དང་མ་མོ་འཛིན་པ་དག་ལའོ་ཞེས་བྱ་བ་ནི། གནས་བརྟན་དང་བཅས། སོ་སོར་ཐར་བ་དང་བཅས་པའི་དགེ་འདུན་གྱིས་རྩོད་པ་དེ་ཉེ་བར་ཞི་བར་བྱེད་མ་ནུས་ཏེ། རྩོད་པ་སྦེད་པའི་དགེ་སློང་དེ་ཉིད་ལ་ཕྱིར་ཕུལ་བ་ན། རྩོད་པ་སྦེད་པའི་དགེ་སློང་དེས་རྩོད་པ་དེ་མདོ་སྡེ་ལ་སོགས་པ་འཛིན་པ་དག་ལ་དབུལ་བར་བྱའོ། །ཟླ་བ་དྲུག་ཏུའོ་ཞེས་བྱ་བ་ནི། སྔར་བྱུང་བ་བརྗོད་དེ་དུས་ཟླ་བ་དྲུག་ཏུ་དབུལ་ལོ་ཞེས་བྱ་བར་སྦྱར་རོ། །དེའི་སྔགས་ནི་ཚེ་དང་ལྡན་པ་མདོ་སྡེ་འཛིན་པ་དང་འདུལ་བ་འཛིན་པ་དང་མ་མོ་འཛིན་པ་དག་གསན་དུ་གསོལ། རྩོད་པ་འདི་གནས་ཆེ་གེ་མོ་ཞེས་བགྱི་བར་གང་ཟག་ཆེ་གེ་མོ་དང༌། མིང་ཆེ་གེ་མོ་ཞེས་བགྱི་བ་ལས་གཞི་འདིའི་སླད་དུ་བྱུང་ནས། ཡུན་འདི་སྲིད་ཅིག་ལགས་ཏེ། རྩོད་པ་འདི་གཟུ་བོ་རྣམས་ལ་ཕུལ་ན། གཟུ་བོ་རྣམས་ཀྱིས་ཀྱང་རྣམ་པར་ཞི་བར་བགྱིད་རྔོ་མ་ཐོགས་ཏེ། དེ་དག་གིས་དགེ་འདུན་ལ་ཕུལ་ནས། དགེ་འདུན་གྱིས་ཀྱང་རྣམ་པར་ཞི་བར་བགྱིད་རྔོ་མ་ཐོགས་ཏེ། དགེ་འདུན་གྱིས་དགེ་སློང་གསལ་བ་དག་བསྐོས་ན། དགེ་སློང་གསལ་བ་རྣམས་ཀྱིས་ཀྱང་རྣམ་པར་ཞི་བར་བགྱིད་རྔོ་མ་ཐོགས་ཏེ། དེ་དག་གིས་དགེ་སློང་
གསལ་བའི་ཡང་གསལ་བ་དག་བསྐོས་ན། དགེ་སློང་གསལ་བའི་ཡང་གསལ་བ་དེ་དག་གིས་ཀྱང་རྣམ་པར་ཞི་བར་བགྱིད་རྔོ་མ་ཐོགས་ཏེ། དེ་དག་གིས་གསལ་བ་རྣམས་ལ་ཕུལ་བ་ལས་གསལ་བ་རྣམས་ཀྱིས་དགེ་སློང་ལ་ཕུལ་ནས། དགེ་འདུན་གྱིས་བདག་དགེ་སློང་མིང་འདི་ཞེས་བགྱི་བ་རྩོད་པ་སྦེད་པར་བསྐོས་ཏེ། བདག་རྩོད་པ་སྦེད་པ་དགེ་སློང་མིང་འདི་ཞེས་བགྱི་བས་རྩོད་པ་འདི་གནས་བརྟན་དང་བཅས་སོ་སོར་ཐར་བ་དང་བཅས་པའི་དགེ་འདུན་ལ་ཟླ་བ་གསུམ་གྱི་མཐའ་ཚུན་ཆད་དུ་ཕུལ་ན། གནས་བརྟན་དང་བཅས་སོ་སོར་ཐར་བ་དང་བཅས་པའི་དགེ་འདུན་གྱིས་ཀྱང་རྣམ་པར་ཞི་བར་བགྱིད་རྔོ་མ་ཐོགས་ཏེ། དེས་ཀྱང་བདག་རྩོད་པ་སྦེད་པ་མིང་འདི་ཞེས་བགྱི་བ་ལ་སྩལ་ནས། བདག་རྩོད་པ་སྦེད་པ་མིང་འདི་ཞེས་བགྱི་བས་རྩོད་པ་འདི་མདོ་སྡེ་འཛིན་པ་དང་འདུལ་བ་འཛིན་པ་དང༌། མ་མོ་འཛིན་པ་རྣམས་ལ་དབུལ་ལོ། །མདོ་སྡེ་འཛིན་པ་དང་འདུལ་བ་འཛིན་པ་དང་མ་མོ་འཛིན་པ་རྣམས་ཀྱིས་རྩོད་པ་འདི་ཟླ་བ་དྲུག་གི་མཐའ་ཚུན་ཆད་ཀྱིས་རྣམ་པར་ཞི་བར་མཛད་དུ་གསོལ་ཞེས་གསུངས་པ་ཡིན་ནོ། །དེ་དག་གིས་གནས་བརྟན་མཐུ་དང་ལྡན་པ་ལའོ་ཞེས་བྱ་བ་ནི། མདོ་སྡེ་འཛིན་པ་དང་འདུལ་བ་འཛིན་པ་དང༌། མ་མོ་འཛིན་པ་དེ་དག་གིས་རྩོད་པ་ཕྱིར་ཕུལ་བདེ་གནས་བརྟན་གྲགས་པ་བས་ཀྱང་ཆེས་གྲགས་པ། གཙོ་བོ་པས་ཀྱང་ཆེས་གཙོ་བོ་དེ་ལ་དབུལ་བར་བྱ་བའོ། །ཐུག་པ་མེད་པར་རོ་ཞེས་བྱ་བ་ནི་སྔར་བྱུང་བ་བརྗོད་དེ། དུས་ཐུག་པ་མེད་པར་དབུལ་ལོ་ཞེས་བྱ་བར་སྦྱར་ཏེ། གནས་གཞན་མེད་པའི་ཕྱིར་འདིར་དུས་དཔག་ཏུ་མེད་པ་ལ་བརྟེན་པ་མཛད་དོ། །འདིའི་སྔགས་ནི་གནས་བརྟན་གསན་དུ་གསོལ། །རྩོད་པ་འདི་གནས་ཆེ་གེ་མོ་ཞེས་བགྱི་བར་གང་ཟག་ཆེ་གེ་མོ་ཞེས་བགྱི་བ་དང༌། མིང་ཆེ་གེ་མོ་ཞེས་བགྱི་བ་ལས་གཞི་འདིའི་སླད་དུ་བྱུང་ནས་ཡུན་འདི་སྲིད་ཅིག་ལགས་ཏེ། རྩོད་པ་འདི་གཟུ་བོ་རྣམས་ལ་ཕུལ་ན་གཟུ་བོ་རྣམས་ཀྱིས་ཀྱང་རྣམ་པར་ཞི་བར་བགྱིད་རྔོ་མ་ཐོགས་ཏེ། དེ་དག་གིས་དགེ་འདུན་ལ་ཕུལ་ནས། དགེ་འདུན་གྱིས་ཀྱང་རྣམ་པར་ཞི་བར་བགྱིད་རྔོ་མ་ཐོགས་ཏེ། དགེ་འདུན་གྱིས་དགེ་སློང་གསལ་བདག་བསྐོས་ན། དགེ་སློང་གསལ་བ་རྣམས་
ཀྱིས་ཀྱང་རྣམ་པར་ཞི་བར་བགྱིད་རྔོ་མ་ཐོགས་ཏེ། དེ་དག་གིས་དགེ་སློང་གསལ་བའི་ཡང་གསལ་བ་དག་བསྐོས་ན། དགེ་སློང་གསལ་བའི་ཡང་གསལ་བ་དེ་དག་གིས་ཀྱང་རྣམ་པར་ཞི་བར་བགྱིད་རྔོ་མ་ཐོགས་ཏེ། དེ་དག་གིས་གསལ་བ་རྣམས་ལ་དུ་ལ་བ་ལས་གསལ་བ་རྣམས་ཀྱིས་དགེ་འདུན་ལ་ཕུལ་ནས། དགེ་འདུན་གྱིས་འདག་དགེ་སློང་མིང་འདི་ཞེས་བགྱི་བ་རྩོད་པ་སྦེད་པར་བསྐོས་ཏེ། བདག་རྩོད་པ་སྦེད་པ་དགེ་སློང་མིང་འདི་ཞེས་བགྱི་བས་རྩོད་པ་འདི་གནས་བརྟན་དང་བཅས་སོ་སོར་ཐར་བ་དང་བཅས་པའི་དགེ་འདུན་ལ་ཟླ་བ་གསུམ་གྱི་མཐའ་ཚུན་ཆད་དུ་ཕུལ་ན་དེས་ཀྱང་རྣམ་པར་ཞི་བར་བགྱིད་རྔོ་མ་ཐོགས་ཏེ། དེས་བདག་རྩོད་པ་སྦེད་པ་མིང་འདི་ཞེས་བགྱི་བ་ལ་སྩལ་ན། བདག་རྩོད་པ་སྦེད་པ་མིང་འདི་ཞེས་བགྱི་བས། རྩོད་པ་འདི་མདོ་སྡེ་འཛིན་པ་དང༌། འདུལ་བ་འཛིན་པ་དང༌། མ་མོ་འཛིན་པ་རྣམས་ལ་ཟླ་བ་དྲུག་གི་མཐའ་ཚུན་ཆད་དུ་ཕུལ་ན། དེ་དག་གིས་ཀྱང་རྣམ་པར་ཞི་བར་བགྱིད་རྔོ་མ་ཐོགས་ནས། དེ་དག་གིས་བདག་རྩོད་པ་སྤེད་པ་མིང་འདི་ཞེས་བགྱི་བ་ལ་སྩལ་ཏེ། བདག་རྩོད་པ་སྦེད་པ་མིང་འདི་ཞེས་བགྱི་བས། རྩོད་པ་འདི་གནས་བརྟན་ལ་དབུལ་ལོ། །གནས་བརྟན་གྱིས་རྩོད་པ་འདི་ཐུག་པ་མ་མཆིས་བ་ཚུན་ཆད་ཀྱི་རྣམ་པར་ཞི་བར་མཛད་དུ་གསོལ་ཞེས་གསུངས་པ་ཡིན་ནོ། །གནས་བརྟན་དེས་གདུལ་བར་བྱ་བ་དེ་གཉིས་ལ་ཇི་ལྟར་བསྒྲུབ་པར་བྱ་ཞེ་ན་དེའི་ཕྱིར། དེས་དེ་གཉིས་ལས་བདག་གིར་བྱ་བ་ཐན་འདག་རྫས་དང་སོ་ཤིང་ཡན་ཆད་ཅུང་ཟད་ཀྱང་སྤང་བར་བྱའོ་ཞེས་བྱ་བ་སྨྲས་ཏེ། གནས་བརྟན་དེས་གདུལ་བར་བྱ་བ་དེ་གཉིས་ལས་སོ། །ལྷན་ཅིག་འགྲེང་བ་དད་འདུག་པ་དང་ལྷན་ཅིག་འཆག་སར་འཆགས་པ་དང༌། གཏམ་འདྲེ་བ་དང་ཕེབས་པར་སྨྲ་བ་ཡང་ངོ་ཞེས་བྱ་བ་ཡང༌། དེས་དེ་གཉིས་ལས་སྤང་བར་བྱའོ་ཞེས་བྱ་བར་སྦྱར་རོ། །རྗེས་སུ་འབྲངས་ན་དེ་དག་ལ་འདི་སྐད་ཅེས་ཚེ་དང་ལྡན་པ་དག་ཁྱིད་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས་འཐབ་པར་གྱུར། མཚང་འདྲུ་པར་གྱུར། རྩོད་པར་གྱུར། འགྱེད་པར་གྱུར་ཅིང་གནས་པ་ནི་མ་རྙེད་དེ་རྙེད་
བ་མ་ཡིན་ནོ། །ཉེས་པ་རྙེད་ཀྱི་ལེགས་པ་རྙེད་པ་མ་ཡིན་གྱི་ཚེ་དང་ལྡན་པ་དག་མ་འཐབ་ཤིག །མཚང་མ་འདྲུ་ཤིག །མ་རྩོད་ཅིག །མ་འགྱེད་ཅིག །འགྱེད་པས་གཉི་ག་རྒྱལ་བ་མེད་དོ། །རྒྱུག་པས་གཉི་ག་རྒྱལ་བ་མེད་དེ་གཅིག་རྒྱལ་གཅིག་ཕམ་དུ་འགྱུར་རོ་ཞེས་བརྗོད་པར་བྱའོ་ཞེས་བྱ་བ་ནི། རྒོལ་བ་དང་ཕྱིར་རྒོལ་བའི་དགེ་སློང་དེ་དག་གནས་བརྟན་དེའི་རྗེས་སུ་འབྲང་བ་ན་དེས་དེ་དག་ལ་དེ་སྐད་ཅེས་བརྗོད་པར་བྱའོ། །ཆོས་མང་བའི་བློས་ལེགས་པར་གཞག་པ་ནི་ལེགས་པར་བསྒྲུབ་པའི་རྣམ་པ་གཞན་ཡིན་ནོ་ཞེས་བྱ་བ་ནི། ཚོགས་པར་དབྱུང་བདག་གིས་རྒྱུད་གཅིག་ཏུ་བྱའོ་ཞེས་བྱ་བ་ལ་སོགས་པ་ཇི་སྐད་བསྟན་པའི་རྣམ་པ་དག་གིས་འགྱེད་པའི་ཕྱིར་རྩོད་པ་ཉེ་བར་ཞི་བར་བྱ་བའི་རྣམ་པ་ཇི་སྐད་བསྟན་པ་དེ་དག་ལ་འདི་ལྟ་སྟེ། ཆེས་མང་བའི་བློས་ལེགས་པར་གཞག་པ་ཞེས་བྱ་བ་འདི་ནི་ལེགས་པར་བསྒྲུབ་པའི་རྣམ་པ་གཞན་ཡིན་པར་ཤེས་པར་བྱའོ།། །།བམ་པོ་དྲུག་ཅུ་བདུན་པ། འདི་ནི་ཆོས་རྣམ་པར་གཏན་ལ་དབབ་པ་ལ་སྲིད་ཀྱི་ཚུལ་ཁྲིམས་རྣམ་པར་གཏན་ལ་དབབ་པ་ལ་མི་སྲིད་དོ་ཞེས་བྱ་བ་ནི། ཆེས་མང་བའི་བློས་ལེགས་པར་གཞག་པ་འདི་ནི་ཞེས་བྱ་བར་སྦྱར་རོ། །ཆེས་རྣམ་པར་གཏན་ལ་དབབ་པ་ཞེས་བྱ་བ་ནི། དངོས་པོའི་དེ་བཞིན་ཉིད་ལ་ལོག་པར་བསྒྲུབ་པ་བསལ་བ་སྟེ། དེ་ལ་ནི་ཆེས་མང་བའི་བྲོས་ལེགས་པར་གཞག་པ་ཞེས་བྱ་བ་འདི་སྲིད་དེ། ཅི་འདི་ཆོས་ཡིན་ནམ་འོན་ཏེ་ཆོས་མ་ཡིན། འདུལ་བ་ཡིན་ནམ་འོན་ཏེ་འདུལ་བ་མ་ཡིན་ཞེས་བྱ་བ་ལ་སོགས་པ་ཆོས་རྣམ་པར་གཏན་ལ་དབབ་པ་ལ་ནི་ཆེས་མང་བདག་གི་བློས་ལེགས་པར་གཞག་ཏུ་རུང་བའི་ཕྱིར་རོ། །ཚུལ་ཁྲིམས་རྣམ་པར་གཏན་ལ་དབབ་བ་ཞེས་བྱ་བ་ནི་ལྟུང་བ་དང་བཅས་པ་ཉིད་བསལ་བ་སྟེ། དེ་ལ་ནི་ཆེས་མང་བའི་བློས་ལེགས་པར་གཞག་བཞེས་བྱ་བ་འདི་མ་སྲིད་དེ། ཅི་འདིས་གཞི་འདི་བྱས་སམ་འོན་ཏེ་མ་བྱས་ཞེས་བྱ་བ་ལ་སོགས་པས་ལྟུང་བ་དང་བཅས་པ་ཡིན་ནམ། ལྟུང་བ་མེད་པ་ཡིན་པ་རྣམ་པར་དཔྱད་པ་ལ་ནི་གླེང་བ་པོ་དང༌། གླེང་བར་བྱ་བ་གཉིས་ཀྱི་བློས་ལེགས་པར་གཞག་པར་ཟད་ཀྱི།
ཆེས་མང་པོ་དག་གི་བློས་ལེགས་པར་གཞག་ཏུ་མེད་བའི་ཕྱིར་རོ། །དེ་ཅིའི་ཕྱིར་ཞེ་ན། དེའི་ཕྱིར་དེའི་སྐབས་ཀྱི་ཤེས་བ་ནི་འགྱེད་བ་གཉིས་དང་འབྲེལ་བ་ཡིན་པའི་ཕྱིར་རོ་ཞེས་བྱ་བ་སྨྲས་ཏེ། དེའི་སྐབས་ཀྱི་ཤེས་པ་ཞེས་བྱ་བ་ཚུལ་ཁྲིམས་རྣམ་པར་གཏན་ལ་དབབ་པའི་ཡུལ་གྱི་སྐབས་ཀྱི་ཤེས་པ་ནི། འགྱེད་པ་གཉིས་ཞེས་བྱ་བ་གླེང་བ་པོ་དང་གླེང་བར་བྱ་བ་གཉིས་ཀྱི་རྒྱུད་དང་འབྲེལ་བ་ཡིན་པའི་ཕྱིར་ཏེ། འདུལ་བ་རྣམ་པར་གཏན་ལ་དབབ་པ་ནི་འདིས་གཞི་འདི་བྱས་སམ། འོན་ཏེ་མ་བྱས་ཞེས་གཏད་ལ་འབེབས་བ་ཡིན་པས། དེ་ནི་འགྱེད་པ་གཉིས་ལས་གཞན་པ་དག་གིས་ཤེས་པའི་ཡུལ་མ་ཡིན་པས་དེའི་ཕྱིར་འདུལ་བ་རྣམ་པར་གཏན་ལ་དབབ་པ་ལ་ནི་ཆེས་མེད་བའི་བློས་ལེགས་པར་གཞག་པ་དེ་མི་སྲིད་དོ། །ཅི་འདི་ལ་དེ་བཞིན་དུ་བརྟན་པར་བྱ་འམ་ཞེན་དེའི་ཕྱིར། རྒོལ་བ་དང་ཕྱིར་རྒོལ་བ་དག་གིས་དེ་གཅེས་པར་གཟུང་བ་ཉིད་དང་རབ་ཏུ་དམ་པ་ཉིད་དང་མི་བཟད་པ་ཉིད་ཡིན་ཞིང་དེ་དག་དབྱེ་བར་དོགས་པ་ཉིད་ཀྱིས་དེ་ལ་བརྟན་པར་བྱའོ་ཞེས་བྱ་བ་སྨྲས་ཏེ། གལ་ཏེ་རྒོལ་བ་དང་ཕྱིར་རྒོལ་བ་དག་གིས་མངོན་པར་ཞེན་པ་རྣོན་པོས་གཅོད་པ་དེ་གཅེས་པར་གཟུང་བ་ཉིད་དང། མངོན་པར་ཞེན་པ་མི་ཕྱེད་པས་རབ་ཏུ་དམ་པ་ཉིད་དང༌། མདོ་སྡེ་དང་འདུལ་བ་དང་མ་མོ་འཛིན་པ་ཉིད་དང༌། རྣམ་པར་གནོན་པ་ཉིད་ཀྱིས་དེ་མི་བཟད་པ་ཉིད་ཀྱང་ཡིན་ཞིང༌། གལ་ཏེ་རྩོད་པ་དེ་ཡལ་བར་བོར་ན་དེ་དག་འབྱེད་བར་དོགས་པ་ཉིད་ཀྱང་ཡོད་ན་དེའི་ཚེ་དགེ་འདུན་འབྱེ་བར་གྱུར་ན་མི་རུང་ངོ་སྙམ་པའི་བསམ་པས་ཆེས་མང་བའི་བློས་ལེགས་བར་གཞག་པ་ཞེས་བྱ་བ་ལེགས་པར་བསྒྲུབ་པའི་རྣམ་པ་གཞན་འདི་ལ་བརྟན་པར་བྱའི་གཞན་དུ་ན་མི་བྱའོ། །བསྡམ་པར་བྱ་བ་ཉིད་མ་ཡིན་པའི་དོན་ལའོ་ཞེས་བྱ་བ་ནི། འདི་ལྟུང་བ་ཡིན་ན་མ་མ་ཡིན་ཞེས་རྣམ་བར་གཏན་ལ་དབབ་པའི་དོན་ཏེ། གལ་ཏེ་ལྟུང་བ་ལས་བསྡམ་པར་བྱ་བའི་བདག་ཉིད་མ་ཡིན་གྱི། བཤགས་པར་བྱ་བའི་བདག་ཉིད་ཡིན་ན། དེས་ཀྱང་དོན་དེ་ལ་ཆེས་མང་བའི་བློས་ལེགས་པར་གཞག་པ་ཞེས་བྱ་བའི་ལེགས་པར་བསྒྲུབ་པའི་རྣམ་པ་གཞན་འདི་
ལ་བརྟེན་པར་བྱའི་བསྡམ་པར་བྱ་བའི་དོན་ཡིན་ན་དེ་ལ་ནི་རྣམ་པ་འདི་ལ་བརྟན་པར་མི་བྱ་སྟེ་ཕྲན་ཚིགས་ཙམ་དུ་ཟད་པའི་ཕྱིར་རོ། །ཅི་དང་པོ་ཉིད་ནས་འདི་ལ་བརྟེན་པར་བྱ་འམ་ཞེ་ན། དེའི་ཕྱིར་གནས་བརྟན་གྱི་མཐར་ཐུག་པ་དག་ཡོངས་སུ་ཉོན་མོངས་པར་གྱུར་བ་དག་ལའོ་ཞེས་བྱ་བ་སྨྲས་ཏེ། དགེ་འདུན་བཞི་བོ་དབ་གསལ་བ་ལ་སོགས་པའི་རིམ་གྱིས་གནས་བརྟན་གྱི་མཐར་ཐུག་པའི་བར་དག་གིས་ཡོངས་སུ་ཉོན་མོངས་པར་བརྩལ་ཀྱང་ཉེ་བར་མ་ཞི་བར་གྱུར་བ་ཉིད་ཡིན་ན། དེའི་ཚེ་གཟོད་ལེགས་པར་བསྒྲུབ་པའི་རྣམ་པ་གཞན་འདི་ལ་བརྟེན་པར་བྱའོ། །གང་གིས་འདི་ལ་བརྟེན་པར་བྱ་ཞེ་ན་དེའི་ཕྱིར། དགེ་འདུན་བཞི་པོས་སོ་ཞེས་བྱ་བ་སྨྲས་སོ། །དོན་འདི་ལ་ཆེས་མང་པོ་དག་ལ་འདྲང་བར་ཇི་ལྟར་ཤེས་པར་བྱ་ཞེན་དེའི་ཕྱིར། འདི་ལ་ཚུལ་ཤིང་བྲིམ་པས་བློ་གཟུང་བར་བྱ་བ་ཉིད་ཡིན་ནོ་ཞེས་བྱ་བ་སྨྲས་ཏེ། ཆེས་མང་པོའི་བློས་ལེགས་པར་གཞག་པ་འདི་ལ་ཚུལ་ཤིང་བྲིམ་པས་རྒོལ་བ་དང་ཕྱིར་རྒོལ་བ་དག་གིས་བློ་བཟུང་ཞིང་འདྲང་བར་བྱ་བ་ཉིད་ཡིན་ན། ཚུལ་ཤིང་བྲིམ་པ་བསྐོ་བར་བྱའོ་ཞེས་བྱ་བ་ནི། དགེ་འདུན་གྱིས་ཚུལ་ཤིང་བྲིམ་པའི་དགེ་སློང་སྤྲོ་བར་བྱས་ནས། གསོལ་བ་དང་གཉིས་ཀྱི་ལས་ཀྱིས་བསྡོ་བའོ། །འདིའི་སྔགས་ནི། མིང་འདི་ཞེས་བྱ་བ་ཁྱོད་དགེ་འདུན་ལ་ཚུལ་ཤིང་བྲིམ་པར་སྤྲོ་འམ་སྤྲོའོ། །དགེ་འདུན་བཙུན་པ་རྣམས་གསན་དུ་གསོལ། །དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་ཚུལ་ཤིང་འདྲིམ་པར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་མིང་འདི་ཞེས་བྱ་བ་འདི་ཚུལ་ཤིང་བྲིམ་པར་བསྐོ་བར་བགྱི་སྟེ། དགེ་སློང་ཚུལ་ཤིང་འདྲིམ་པ་མིང་འདི་ཞེས་བགྱི་བ་འདི་ཚུལ་ཤིང་འདྲི་མ་མོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །དེས་ཚུལ་ཤིང་རྣམ་པ་གཉིས་དག་ཉེ་བར་གཞག་གོ་ཞེས་བྱ་བ་ནི། དགེ་སློང་ཚུལ་ཤིང་བྲིམ་པ་དེས་ཆོས་དང་ཆོས་མ་ཡིན་པའི་ཕྱོགས་ཀྱི་ཚུལ་ཤིང་རྣམ་པ་གཉིས་དག་ཉེ་བར་གཞག་པར་བྱ་བའོ། །ཆོས་ཀྱི་ཚུལ་ཤིང་དག་
ནི་ཡ་ཡོ་མེད་པ་དང་ཁྱར་ཁྱོར་མེད་པ་དང་ཆས་ཆུས་མེད་པ་དང་ཁ་དོག་བཟང་བ་དད་དི་ཞིམ་པ་དང་རེག་པ་འཇམ་པ་ཉིད་དག་ཡིན་ལ་ཅིག་ཤོས་ཀྱི་ནི་བཟློག་པའོ་ཞེས་བྱ་བ་ལ། ཅིག་ཤོས་ཞེས་བྱ་བ་ནི་ཆོས་མ་ཡིན་པ་སྟེ། དེའི་ཚུལ་ཤིང་དག་ནི་ཡ་ཡོ་ཅན་དང་ཁྱར་ཁྱོར་ཅན་དང་ཆས་ཆུས་ཅན་དང་ཁ་དོག་དན་པ་དང་དྲི་ངན་བ་དང་རག་པ་རྩུབ་པ་ཉིད་དག་ཡིན་ནོ། །དགེ་འདུན་ལ་འདུ་བར་གསོལ་ལོ་ཞེས་བྱ་བ་ནི་ཚུལ་ཤིང་འདྲི་མ་པ་དེས་སོ། །ཇི་སྐད་དུ་ཞེ་ན་དེའི་ཕྱིར། ཚུལ་ཤིང་འདྲི་མ་པར་འགྱུར་གྱི་ཐམས་ཅད་ཀྱིས་འདུ་བར་བྱའོ་ཞེས་སོ་ཞེས་བྱ་བ་སྨྲས་སོ། །གལ་ཏེ་དེ་ལྟར་འདུ་བ་སྦྱིན་པས་ཚོགས་པ་ན་ཆོས་མ་ཡིན་པའི་ཚུལ་ཤིང་ལྷག་པར་འགྱུར་བར་སེམས་ན་བྲིམ་པར་མི་བྱའོ་ཞེས་བྱ་བ་ནི། གལ་ཏེ་དེ་ལྟར་འདུ་བ་རྗེས་སུ་སྦྱིན་པའི་རྣམ་པས་ཚོགས་པ་ན་ཚུལ་ཤིང་བྲིམ་པར་བྱ་བའི་ཚེ། འདྲིམ་པར་བྱེད་པས་ཆོས་མ་ཡིན་པའི་ཚུལ་ཤིང་ལྷག་པར་འགྱུར་བར་སེམས་ན་དེའི་ཚེ་བྲིམ་པར་མི་བྱའོ། །ཆོས་ཀྱི་ཚུལ་ཤིང་དག་ལྷག་པར་སེམས་ན་ནི་དེས་ན་བྲིམ་པར་བྱའོ། །འདྲི་མ་པའི་ཚེ་ན་ལག་པ་གཡས་པས་ཆོས་ཀྱི་ཚུལ་ཤིང་དག་པ་ཟུང་ཤིང་གཡོན་པས་ཅིག་ཤོས་དག་གོ་ཞེས་བྱ་བ་ནི། ཚུལ་ཤིང་འདྲི་མ་པའི་ཚེ་ན་ལག་པ་གཡས་པས་ཆོས་ཀྱི་ཚུལ་ཤིང་དག་བཟུང་ཤིང༌། ལག་པ་གཡོན་པས་ཅིག་ཤོས་ཆོས་མ་ཡིན་པའི་ཚུལ་ཤིང་དག་གཟུང་པར་བྱའོ། །དེ་དག་གཡོགས་ཏེ་སྔ་མ་དག་སྣང་བར་བྱས་ནས་བརྗོད་པར་བྱའོ་ཞེས་བྱ་བ་ནི། ཆོས་མ་ཡིན་པའི་ཚུལ་ཤིང་དེ་དག་གཡོགས་ཏེ། ཆོས་ཀྱི་ཚུལ་ཤིང་སྔ་མ་དག་སྣང་བར་བྱས་ནས་དགེ་འདུན་ལ་བརྗོད་པར་བྱ་བའོ། །ཇི་ལྟར་བརྗོད་པར་བྱ་ཞེ་ན་དེའི་ཕྱིར། གནས་བརྟན་འདི་དག་ནི་ཆོས་ཀྱི་ཚུལ་ཤིང་ཡ་ཡོ་མེད་པ་ཁྱར་ཁྱོར་མེད་པ་ཆས་ཆུས་མེད་པ་ཁ་དོག་བཟང་བ་དྲི་ཞིམ་པ་རེག་པ་འཇམ་པ་དག་ཡིན་གྱི་ལོང་ཤིག་ཅེས་སོ་ཞེས་བྱ་བ་སྨྲས་ཏེ་དེ་སྐད་བརྗོད་པར་བྱའོ། །ཅིག་ཤོས་ཆོལ་ན་ཚིག་གཉིས་ཀྱི་བར་དུ་མི་དབུལ་ལོ་ཞེས་བྱ་བ་ནི། གལ་ཏེ་ཅིག་ཤོས་མ་ཡིན་པའི་ཚུལ་ཤིང་ཚོལ་ན་ཚིག་གཉིས་
ཀྱི་རབ་དུ་མི་དབུལ་ལོ། །གཡོགས་ཕྱེ་སྟེ་གང་གིས་ཆོས་ཀྱི་མང་བར་འགྱུར་བ་དེ་ལྟར་བྲིམ་པར་བྱའོ་ཞེས་བྱ་བ་ནི། གལ་ཏེ་གཡོགས་ཏེ་བྲི་མན་ཆོས་ཀྱི་ཚུལ་ཤིང་མང་པར་འགྱུར་བ་ལྟ་ན་ཡང་གཡོགས་ཏེ་བྲི་མ་པར་བྱའོ། །ཇི་སྟེ་ཕྱེ་སྟེ་བྲི་མན། ཆོས་ཀྱི་ཚུལ་ཤིང་མང་བར་འགྱུར་བ་ལྟན་ཡང་ཕྱེ་སྟེ་བྲིམ་པར་བྱའོ། །ཆོས་ཀྱི་ཚུལ་ཤིང་བླངས་པ་དག་གི་སློབ་མ་ལ་སོགས་པ་དག་ཆོས་མ་ཡིན་པའི་ཚུལ་ཤིང་ལེན་པར་རྩོལ་བ་ལྟ་ན་དེའི་ཚེ་ཚུལ་ཤིང་འདྲི་མ་པས་དེ་དག་ལ་ཇི་ལྟར་བསྒྲུབ་པར་བྱ་ཞེ་ན་དེའི་ཕྱིར། ཚེ་དང་ལྡན་པ་ཁྱོད་ཀྱི་མཁན་པོ་དང་སློབ་དཔོན་དང༌། མཁན་པོ་གཅིག་པ་དད་སློབ་དཔོན་གཅིག་པ་དང༌། གཏམ་འདྲེས་པ་དང༌། ཕེབས་པར་སྨྲ་བ་དང༌། སྨོས་འདྲིན་དང༌། འགྲོགས་བཤེས་ཀྱིས་ཆོས་ཀྱི་ཚུལ་ཤིང་བླངས་ཀྱི་ཁྱོད་ཀྱིས་ཀྱང་ཆོས་ཀྱི་ཚུལ་ཤིང་ལོང་ཤིག་ཁྱོད་དེ་དག་དང་ལྷན་ཅིག་རྩོད་པར་གྱུར་ན་མ་ལེགས་སོ་ཞེས་རྣ་དྲུང་དུ་གཤུབ་པོ་ཞེས་བྱ་བ་སྨྲས་ཏེ། བརྡ་ཕྲད་པའི་ཕྱིར་རྣ་དྲུང་དུ་གཤུབ་ཅིང་དེ་སྐད་ཡང་དད་ཡང་དུ་བརྗོད་པར་བྱའོ། །ཆོས་མ་ཡིན་པའི་ཚུལ་ཤིང་བླང་བར་མི་བྱའོ་ཞེས་བྱ་བ་ནི། ལེན་ན་འདུལ་བ་དང་འགལ་བ་ཉེས་བྱས་ཀྱི་ལྟུང་བ་བཤགས་པར་བྱའོ་ཞེས་བྱ་བའི་ཐ་ཚིག་གོ །མདོ་སྡེ་དང་འདུལ་བ་དང་མ་མོ་འཛིན་པ་དག་ལ་མ་དྲིས་པར་མི་བྱའོ་ཞེས་བྱ་བ་ནི། ཚུལ་ཤིང་བླང་བར་ཞེས་བྱ་བར་སྦྱར་ཏེ། མདོ་སྡེ་འཛིན་པ་དག་ལ་སོགས་པ་ལ་དྲི་བ་ནི་ཆོས་ཡོངས་སུ་ཤེས་བར་བྱ་བའི་ཕྱིར་རོ། །དབྱེན་དུ་འགྱུར་བའི་བཟོད་པས་མི་བྱའོ་ཞེས་བྱ་བ་ནི། ཨེ་མའོ་བྱེ་བར་གྱུར་ན་ཛི་མ་རུང་སྙམ་པའི་མངོན་པར་འདོད་པས་ཀྱང་ཚུལ་ཤིང་བླང་བར་མི་བྱའོ། །ཆོས་མ་ཡིན་པས་མི་བྱའོ་ཞེས་བྱ་བ་ནི། ཨེ་མའོ་ཆོས་མ་ཡིན་པ་བྱུང་བར་གྱུར་ན་ཅི་མ་རུང་སྙམ་བས་ཚུལ་ཤིང་བླང་བར་མི་བྱ་བ་སྟེ། ཆོས་མ་ཡིན་པ་བྱུང་བར་འདོད་བས་བླང་བར་མི་བྱའོ། །དེ་གཉིས་འབྱུང་བར་འགྱུར་བ་ཉིད་དུ་ཤེས་ན་མི་བྱའོ་ཞེས་བྱ་བ་ནི། འདི་ལྟར་ཨེ་མའོ། །བྱེ་བར་གྱུར་ན་ཅི་མ་རུང་སྙམ་པ་དང༌། ཨེ་མའོ་ཆོས་མ་ཡིན་པ་བྱུང་བར་གྱུར་ན་ཅི་མ་རུང་སྙམ་པ་མེད་དུ་ཟིན་ཀྱང་དེ་གཉིས་འབྱུང་བར་འགྱུར་བ་ཉིད་དུ་ཤེས་ཏེ།
དོན་འདི་ལྟ་བུ་དང་འདི་ན་དགེ་སློང་གང་དག་དབྱེན་ལ་མངོན་པར་ཞན་པར་བྱེད་པ་དེ་ལྟ་བུ་དག་ཡོད་པས་སྟོན་པ་ཉིད་ཀྱང་འགའ་ཞིག་འབྱུང་བར་འགྱུར་རོ་སྙམ་དུ་ཤེས་ན། དེ་ལྟ་ན་ཡང་ཚུལ་ཤིང་དག་བླང་བར་མི་བྱ་བའོ། །མཉམ་པ་ཉིད་ན་ཉན་ཐོས་ཆེན་པོའི་ཕྱིར་ཆོས་ཀྱི་ཚུལ་ཤིང་གཅིག་བླང་ངོ་ཞེས་བྱ་བ་ནི། ཆོས་དང་ཆོས་མ་ཡིན་པའི་ཚུལ་ཤིང་དག་གྲངས་མཉམ་པ་ཉིད་ཡིན་ན། ཉན་ཐོས་ཆེན་པོ་བཙུན་པ་ཀུན་ཤེས་ཀཽཎྜི་ནྱ་ལ་བསྔོས་ཏེ་ཆོས་ཀྱི་ཚུལ་ཤིང་གཅིག་བླང་བར་བྱ་བ་སྟེ། དེ་ལྟར་ན་རྩོད་པ་དེ་ཆོས་ཀྱིས་ཉེ་བར་ཞི་བར་གྱུར་པ་ཡིན་ནོ། །ཆོས་མ་ཡིན་པའི་ཚུལ་ཤིང་ལྷག་ན་ནི་རྩོད་པ་དེ་ཆོས་མ་ཡིན་པས་ཉེ་བར་ཞི་བར་གྱུར་པ་ཡིན་ནོ། །ཆོས་མ་ཡིན་པས་ཉེ་བར་ཞི་བ་ལ་སྐྱོ་སྔོགས་མི་བྱའོ་ཞེས་བྱ་བ་ནི། ཆོས་ཀྱི་ཉེ་བར་ཞི་བ་ལ་སྐྱོ་སྡོགས་བྱེད་པ་ནི་ལྟུང་བྱེད་དུ་འགྱུར་བས་འདི་ནི་ཉེས་བྱས་སུ་གསུངས་སོ། །འགྱེད་པའི་ཕྱིར་རྩོད་པ་ཉེ་བར་ཞི་བ་བཤད་ཟིན་ཏོ།། །།མི་གདམས་པའི་ཕྱིར་རྩོད་པ་ནི་རྒྱུད་གཅིག་ཏུ་བྱ་བ་དང་དག་པ་སྦྱིན་པ་ཞེས་བྱ་བ་གཉིས་ཀྱིས་ཉེ་བར་ཞི་བར་བསྟན་པ་དེ་ལ་རྒྱུད་གཅིག་ཏུ་བྱ་བ་ནི་བསྟན་ཟིན་པས་དག་པ་སྦྱིན་པ་བརྗོད་པར་བྱ་སྟེ། དེའི་ཕྱིར། གླེང་བའི་ཁ་ན་མ་ཐོ་བ་མེད་པ་ལ་ནི་དག་པ་སྦྱིན་ནོ་ཞེས་བྱ་བ་སྨྲས་ཏེ། གལ་ཏེ་དགེ་སློང་དེ་ལ་ལྟུང་བ་གང་གིས་གླེང་བར་བྱ་བའི་ལྟུང་བ་དེའི་ཁ་ན་མ་ཐོ་བ་མེད་བར་གྱུར་ན་དེའི་ཕྱིར་དེ་ལ་དྲན་པས་འདུལ་བ་དང་མ་སྨྱོས་པས་འདུལ་བའི་བདག་ཉིད་ཀྱི་དག་བ་སྦྱིན་པར་བྱའོ། །གླེང་བ་དེ་ནི་རྣམ་པ་བཞི་སྟེ་གཞི་མེད་པ་དང༌། གཞན་རྗེས་སུ་བསྒྲུབ་པའི་དབང་གིས་དང་ཕྱིར་བཅོས་པ་ལ་མི་ལྟོས་པའི་ཕྱིར་དང་སྨྱོན་པས་བྱས་པས་སོ་ཞེས་བྱ་བ་ནི། གླེང་བའི་ཁ་ན་མ་ཐོ་བ་མེད་པ་དེ་ནི་རྣམ་པ་བཞི་སྟེ། གཞི་མེད་པ་ནི་ལྟུང་བ་མ་བྱུང་བ་ཉིད་ལ་གླེང་བ་གང་ཡིན་པའོ། །གཞན་རྗེས་སུ་བསྒྲུབ་པའི་དབང་གིས་ནི་དེས་གཞན་རྗེས་སུ་བསྒྲུབ་ལ། གཞན་གྱི་མ་གླེང་བར་བྱེད་པ་སྟེ། ལྟུང་བྱེད་ལ་དགེ་འདུན་ལྷག་མ་ལ་སོགས་པས་གླེང་བའོ། །ཕྱིར་བཅོས་པ་ལ་མི་ལྟོས་པའི་ཕྱིར་ནི་འདི་ལ་ལྟུང་བ་བྱུང་བར་འགྱུར་རོ་ཞེས་བྱ་བ་དེ་དེས་ཆོས་བཞིན་དུ་ཕྱིར་བཅོས་བ་ཉིད་ནི་
ཕྱིར་བཅོས་པ་ཉིད་ལ་མི་ལྟོས་པར་གླེང་བའོ། །སྨྱོན་པས་བྱས་པ་ནི་སྨྱོས་པའི་གནས་སྐབས་སུ་དེས་རུང་བ་མ་ཡིན་པ་ཀུན་དུ་སྤྱད་པ་དེས་གླེང་བར་བྱེད་པའོ། །དང་པོ་གསུམ་ལ་ནི་དྲན་པས་འདུལ་བ་སྦྱིན་ནོ་ཞེས་བྱ་བ་ནི། བཞི་མེད་པ་དང་གཞན་རྗེས་སུ་བསྒྲུབ་པའི་དབང་གིས་དང་ཕྱིར་བཅོས་པ་ལ་མི་ལྟོས་པའི་ཕྱིར་ཞེས་བྱ་བ་གསུམ་གྱིས་གླེང་བར་བྱ་བ་དེ་དག་ལ་ནི་དགེ་འདུན་གྱིས་དྲན་པས་འདུལ་བ་སྦྱིན་པར་བྱ་སྟེ་དེ་བྱིན་ན་དགེ་སློང་དེ་ལ་དགེ་སློང་དག་གིས་དྲན་པ་དང་ལྡན་པར་འཛིན་གྱི་ལྟུང་བ་དང་བཅས་པར་མི་འཛིན་ཏེ། གང་གི་ཕྱིར་འདི་ནི་དྲན་པ་དང་ལྡན་པ་ཡིན་པས་འདིས་ལྟུང་བ་བརྗོད་པས་དེ་མི་དྲན་ན། དེའི་ཕྱིར་འདི་ལ་ལྟུང་བ་མེད་དོ་ཞེས་དེ་ཉིད་ཀྱིས་འདི་ལ་རྩོད་པ་ཉེ་བར་ཞི་བ་ཡིན་ནོ། །དེ་ཡང་རང་གིས་དགེ་འདུན་ལ་གསོལ་ནས། དགེ་འདུན་གྱིས་གསོལ་བ་དང་བཞིའི་ལས་ཀྱིས་སྦྱིན་པར་བྱའོ། །དེའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་གྱད་བུ་ནོར་ལ་དགེ་སློང་མ་མཛའ་མོས་ཡང་དག་པ་མ་ལགས་པ་གསོབ་གསོག་བརྫུན་གྱིས་སྐུར་ཏེ། བདག་ལ་དགེ་སློང་དག་གིས་གཞི་དེས་གླེང་བས། བདག་དགེ་སློང་གྱད་བུ་ནོར་དགེ་འདུན་ལས་དྲན་པས་འདུལ་བ་གསོལ་ན། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ། བདག་དགེ་སློང་གྱད་བུ་ནོར་ལ་དྲན་པས་འདུལ་བ་སྩལ་དུ་གསོལ། །ལན་གསུམ་དུ་བཟླས། དགེ་འདུན་བཙུན་པ་རྣམས་གསན་དུ་གསོལ། །དགེ་སློང་གྱད་བུ་ནོར་འདི་ལ་དགེ་སློང་མ་མཛའ་མོས་ཡང་དག་པ་མ་ལགས་པ། གསོབ་གསོག་བརྫུན་གྱིས་སྐུར་ཏེ། འདི་ལ་དགེ་སློང་དག་གིས་གཞི་དེས་གླེང་བས་དགེ་སློང་གྱད་བུ་ནོར་འདི་དགེ་འདུན་གྱིས་དྲན་པས་འདུལ་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་གྱད་བུ་ནོར་འདི་ལ་དྲན་པས་འདུལ་བ་སྩལ་ཏོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །ཐ་མ་ལ་ནི་མ་སྨྱོས་པས་འདུལ་བའོ་ཞེས་བྱ་བ་ནི་སྨྱོན་པས་བྱས་པས་གླེང་བ་ལ་ནི་དགེ་འདུན་གྱིས་མ་མོས་པས་འདུལ་བ་སྦྱིན་པར་བྱ་བ་སྟེ། དེ་བྱིན་ན་དགེ་སློང་
དེ་ལ་དགེ་སློང་དེ་དག་གིས་རང་བཞིན་དུ་གནས་པ་ཉིད་དུ་འཛིན་གྱི་ལྟུང་བ་དང་བཅས་པར་མི་འཛིན་ཏེ། གང་གི་ཕྱིར་སྨྱོས་པའི་གནས་སྐབས་དང་ལྷན་ཅིག་ཐ་སྙད་འགའ་ཡང་མེད་པ་དེའི་ཕྱིར་སྨྱོས་པའི་གནས་སྐབས་སུ་ལྷག་པར་སྤྱོད་པ་བྱས་པས་གླེང་བ་ཡང་མེད་པ་ཁོ་ནར་འགྱུར་བས། རྩོད་པ་ཉེ་བར་ཞི་བར་འགྱུར་རོ། །དེ་ཡང་རང་གིས་དགེ་འདུན་ལ་གསོལ་ནས། དགེ་འདུན་གྱིས་གསོལ་བ་དང་བཞིའི་ལས་ཀྱིས་སྦྱིན་པར་བྱའོ། །དེའི་སྔགས་ནི་དགེ་འདུན་བཙུན་པ་རྣམས་གསན་དུ་གསོལ། །བདག་དགེ་སློང་བྱེ་མ་སྐྱེས་སྨྱོས་པ་སེམས་འཁྲུགས་པ་སྡུག་བསྔལ་གྱི་ཚོར་བས་གཟིར་བས། དགེ་སློང་གི་ཚུལ་མ་ལགས་པ་རྗེས་སུ་མཐུན་པ་མ་ལགས་པ་རུང་བ་མ་ལགས་པ་ཚུལ་དང་མཐུན་པ་མ་ལགས་པ་མང་དུ་སྤྱད་ཅིང་སྨྲས་ཏེ་བརྩལ་ནས་མིག་གྱུར། ཁ་ཆུ་ཟགས། བཞིན་བསྒྱུར། ས་ལ་འདྲེས་ལྡོག་གཉིད་ཀྱིས་མ་ལོག་ཀྱང་གཉིད་ཀྱིས་ལོག་པ་ལྟར་བཅོས། །མ་མྱོས་ཀྱང་མྱོས་པ་ལྟར་བཅོས། སྨྲ་བར་མ་བསམས་ཀྱང་སྨྲས་ཏེ། བདག་གིས་དྲན་པ་རྙེད་ན་བདག་ལ་དགེ་སློང་རྣམས་ཀྱིས་གཞི་དེས་གླེང་བས་བདག་དགེ་སློང་བྱེ་མ་སྐྱེས་དགེ་འདུན་ལས་མ་མྱོས་པས་འདུལ་བ་གསོལ་ན། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ། བདག་དགེ་སློང་བྱེ་མ་སྐྱེས་ལ་མ་མྱོས་པས་འདུལ་བ་སྩལ་དུ་གསོལ། ལན་གསུམ་དུ་བཟླས། དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་བྱེ་མ་སྐྱེས་སྨྱོས་པས་སེམས་འཁྲུགས་བ་སྡུག་བསྔལ་གྱི་ཚོར་བས་གཟིར་བ་འདིས། དགེ་སློང་གི་ཚུལ་མ་ལགས་པ་རྗེས་སུ་མཐུན་པ་མ་ལགས་པ། རུང་བ་མ་ལགས་པ་ཚུལ་དང་མཐུན་པ་མ་ལགས་པ། མང་དུ་སྤྱད་ཅིང་སྨྲས་ཏེ་བརྩལ་ནས་མིག་གྱུར། ཁ་ཆུ་ཟགས། བཞིན་བསྒྱུར། ས་ལ་འདྲིས་ལྡོག །གཉིད་ཀྱིས་མ་ལོག་ཀྱང་གཉིད་ཀྱིས་ལོག་པ་ལྟར་བཅོས། མ་མྱོས་ཀྱང་མྱོས་པ་ལྟར་བཅོས། སྨྲ་བར་མ་བསམས་ཀྱང་སྨྲས་ཏེ། འདིས་དྲན་པ་རྙེད་ན་འདི་ལ་དགེ་སློང་རྣམས་ཀྱིས་གཞི་དེས་གླེང་བས། དགེ་སློང་བྱེ་མ་སྐྱེས་འདི་དགེ་འདུན་ལས་མ་མྱོས་པས་འདུལ་
བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་བྱེ་མ་སྐྱེས་ལ་མ་མྱོས་པས་འདུལ་བ་སྩོལ་ཏོ། །འདི་ནི་གསོལ་པའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །མི་གདམས་པ་ལས་རྩོད་པ་ཉེ་བར་ཞི་བར་བྱ་བའི་ཆོ་ག་བཤད་ཟིན་ཏོ།། །།ལྟུང་བའི་ཕྱིར་རྩོད་པ་ནི་ཕྱིར་བཅོས་པས་ཉེ་བར་ཞི་པར་བྱའོ་ཞེས་བསྟན་པ་དེའི་རབ་ཏུ་དབྱེ་བ་བསྟན་པའི་ཕྱིར། ལྟུང་བ་དང་བཅས་པ་ཉིད་ཀྱི་ཕྱིར་འཁྲུག་ལོང་རྣམ་པ་གསུམ་སྟེ། འཕྲོས་པ་མེད་པ་དང༌། འཕྲོས་པ་དང་བཅས་པ་རྣམ་པ་གཉིས་པ་ཉི་ཚེ་བ་དང༌། དགེ་འདུན་མཐའ་དག་དང་འབྲེལ་པའོ་ཞེས་བྱ་བ་སྨྲས་ཏེ། དེ་ལ་ཕྱིར་འཕྲོས་པ་མེད་པ་ནི་ཕྱོགས་དང་གཞན་གྱི་ཕྱོགས་སུ་རྣམ་པར་གནས་པ་དང་བྲལ་བ་སྟེ་འདི་སྐད་བསྟན་ཏེ། གང་ལ་གླེང་བར་བྱ་བ་དང༌། གླེང་བ་པོ་གཉིས་འབའ་ཞིག་ཁོ་ན་ལ་འཁྲུག་ལོང་ཡོད་ཀྱི་གཞན་གང་ལ་ཡང་འཁྲུག་ལོང་མད་པ་དེ་ནི་འཕྲོས་པ་མེད་པའི་འཁྲུག་ལོང་ཡིན་ནོ། །ཉི་ཚེ་བ་ཞེས་བྱ་བ་ནི་གང་ལ་གླེང་བར་བྱ་བ་དང་གླེང་བ་པོ་གཉིས་འབའ་ཞིག་ཁོ་ནར་མ་ཟད་ཀྱི་དགེ་འདུན་གྱི་ཁོངས་སུ་གཏོགས་པ་ཁ་ཅིག་ལ་ཡང་འཁྲུག་ལོང་བྱུང་བའོ། །དགེ་འདུན་མཐའ་དག་དང་འབྲེལ་པ་ཞེས་བྱ་བ་ནི། གང་ལ་དགེ་སློང་གི་ཚོམས་གཅིག་ཀྱང་མ་ལུས་པར་དགེ་སློང་མཐའ་དག་ཕྱོགས་དང་གཞན་གྱི་ཕྱོགས་སུ་རྣམ་པར་གནས་པས་འཁྲུག་ལོང་དུ་གྱུར་པའོ། །དང་པོ་ལས་ནི་ཁས་བླངས་པའི་བྱ་བས་ཕྱིར་བཅོས་སོ་ཞེས་བྱ་བ་ནི། འཕྲོས་པ་མེད་པས་འཁྲུག་ལོང་དུ་གྱུར་པའི་འོག་ཏུ་ལྟུང་བའི་ཕྱིར་བཅོས་པ་ནི་ཁས་བླང་པའི་བྱ་བས་ལྟུང་བ་ཕྱིར་བཅོས་པར་བྱ་སྟེ། ཁས་བླངས་པ་ཙམ་གྱི་དབང་གིས་དེའི་ཕྱིར་བཅོས་པར་བྱ་བའི་ཕྱིར་རོ། །དེའི་མིང་ཅིའི་ཕྱིར་དེ་སྐད་ཅེས་བྱ་བར་རྣམ་པར་གཞག་ཅེ་ན། སྨྲས་པ། རྩོད་པ་ཞི་བར་བྱ་བ་གང་ལ་ཚེ་དང་ལྡན་པ་ཁྱོད་ལ་ལྟུང་བ་བྱུང་གི་ཆོས་བཞིན་དུ་ཕྱིར་གྱིས་ཤིག་ཅེས་གླེང་བ་པོས་ཚུལ་དེ་ལྟ་བུར་བྱས་པ། འཁྲུག་ལོང་མེད་པ་ལ་ཁས་བླང་པ་འབའ་ཞིག་གི་ཕྱིར་བཅོས་པར་བྱ་བ་དེ་ནི་ཁས་བླངས་པའི་བྱ་བས་རྩོད་བ་ཞི་བར་བྱ་བ་ཞེས་བྱ་བ་སྟེ། དེའི་ཕྱིར་དེའི་མིང་དེ་སྐད་ཅེས་བྱའོ།།
བྱ་བ་ཞེས་བྱ་བ་ནི་ཕྱིར་བཅོས་པར་བྱ་བའོ། །གཉིས་པ་ལས་ནི་མངོན་སུམ་གྱིས་འདུལ་བས་སོ་ཞེས་བྱ་བ་ནི། འཕྲོས་པ་དང་བཅས་པ་ཉི་ཚེ་བས་འཁྲུག་ལོང་དུ་གྱུར་པའི་འོག་ཏུ་ནི་མངོན་སུམ་གྱིས་འདུལ་བས་ཕྱིར་བཅོས་སོ། །འདི་སྐད་བསྟན་ཏེ། གཉིས་པ་ལས་འཁྲུག་ལོང་དུ་གྱུར་པའི་འོག་ཏུ་ལྷུང་བ་ཕྱིར་འཆོས་པར་བྱེད་པ་གང་ཡིན་པ་དེ་ནི་མངོན་སུམ་གྱིས་འདུལ་བས་རྩོད་པ་ཞི་བར་བྱེད་པ་ཡིན་ནོ། །ཅིའི་ཕྱིར་དེའི་མིང་དེ་སྐད་བྱས་ཤེ་ན། གླེང་བར་བྱ་བ་དང་གླེང་པ་པོ་དང་དེ་དག་གི་རྗེས་སུ་འབྲང་བ་རྣམས་ཀྱིས་རྒོལ་བ་དང་ལན་མངོན་སུམ་དུ་བྱུང་བ་གང་ཡིན་པ་དེ་ནི་སྔོན་དུ་བརྟན་བ་ཡིན་པའི་ཕྱིར་མིང་དེ་སྐད་ཅེས་བྱས་སོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། འདི་ལ་རྒོལ་བ་ལ་དང་ལན་གྱི་ཚིག་དག་མངོན་སུམ་དུ་བྱུང་བ་དག་གིས་འདུལ་ཞིང་ཞི་བ་ཡིན་གྱི། གླེང་བ་པོས་དམ་བཅས་པ་ཙམ་གྱིས་འདི་ལ་རྣམ་པར་ངེས་པར་སྦྱིན་པ་མ་ཡིན་པར་རིག་པར་བྱའོ། །གསུམ་པ་ལ་ནི་རྩྭ་བཀྲམ་པ་ལྟ་བུས་སོ་ཞེས་བྱ་བ་ནི། གསུམ་པ་ལས་འཁྲུག་ལོང་བྱུང་བའི་འོག་ཏུ་ལྟུང་བ་ཕྱིར་འཆོས་པར་བྱེད་པ་གང་ཡིན་པ་དེ་ནི་རྩྭ་བཀྲམ་པ་ལྟ་བུ་ཞེས་བྱ་བའི་རྩོད་པ་ཞི་བར་བྱེད་པ་ཡིན་ནོ། །ཅིའི་ཕྱིར་དེའི་མིང་དེ་སྐད་བྱས་ཤེ་ན། དཔེར་ན་རྩྭ་བཀྲམ་པ་ན་རྩྭ་ཐམས་ཅད་ཕན་ཚུན་ནས་རྩེ་སྤྲད་དུ་ཉལ་བ་དང་འདྲ་བར་ཕྱོགས་དང་གཞན་གྱི་ཕྱོགས་སུ་རྣམ་པར་གནས་པའི་དགེ་འདུན་དུ་གྱུར་པའི་དགེ་སློང་ཐམས་ཅད་འདི་ལ་འཁྲུག་ལོང་ཉེ་བར་ཞི་བའི་ཕྱིར་ཕན་ཚུན་ནས་འདུད་པར་འགྱུར་བས་དེའི་ཕྱིར་དེའི་མིང་དེ་སྐད་ཅེས་བྱ་བར་གཞག་གོ །འདི་ལ་མང་པོ་དག་གི་དོན་དུ་དགེ་འདུན་མ་ཡིན་པ་ལ་བཤགས་པར་བྱ་བ་དག་ནི། གཅིག་གིས་ཕྱིར་བཅོས་པར་བྱའོ་ཞེས་བྱ་བ་ནི། ཉེས་པ་སྦོམ་པོ་དང་དགེ་འདུན་ལྷག་མ་དང་དགེ་འདུན་ལྷག་མར་གཏོགས་པའི་ཉེས་པ་སྦོམ་པོ་ལྕི་བ་དགེ་འདུན་ལ་བཤགས་པར་བྱ་བ་དེ་དག་ལས་གཞན་པའི་ལྟུང་བ་དགེ་འདུན་མ་ཡིན་པ་ལ་བ་ཤགས་པར་བྱ་བ་དག་ནི་འདིར་གང་ཟག་མང་པོ་དག་གི་དོན་དུ་གང་ཟག་གཅིག་གིས་རྩྭ་བཀྲམ་པ་ལྟ་བུས་ཕྱིར་བཅོས་པ་བྱར་རུང་བའོ། །འདི་སྐད་བསྟན་ཏོ། མང་པོ་དག་གི་དོན་དུ་གཅིག་གིས་ཕྱིར་འཆོས་པར་བྱེད་ན་དེའི་ཚེ་ཡང་ལྟུང་བའི་ཕྱིར་རྩོད་པ་
ཉེ་བར་ཞི་བར་འགྱུར་རོ། །དུམ་དག་ཅིག་ཅར་དུ་ཡང་ངོ་ཞེས་བྱ་བ་ནི། འདིར་མང་པོ་དག་གི་དོན་དུ་ལྟུང་བ་དུ་མ་དག་ཅིག་ཅར་དུ་ཕྱིར་བཅོས་སུ་ཡང་རུང་བའོ། །གང་ཡིན་པའོ་ཞེས་སྨོས་པ་དང་ཤེས་པ་སྣང་བར་བྱ་བས་སོ་ཞེས་བྱ་བ་ནི། གཞི་འདི་ལས་ཁྱོད་ལ་ལྟུང་བ་བྱུང་བ་གང་ཡིན་པ་དང༌། ཁོ་བོ་ལ་ལྟུང་བ་བྱུང་བ་གང་ཡིན་པ་དེ་དག་ཚེ་དང་ལྡན་པ་དག་གི་མདུན་དུ་བཤགས་པ་དང་མི་བཅབས་པར་ཁོ་བོ་སྤྲོའོ་ཞེས་བྱ་བ་ལ་སོགས་པའི་སྔགས་སྨོས་པ་དང་ལྟུང་བའི་མིང་དང་རིགས་ལས་གཞན་ལྟུང་བའི་ངོ་བོ་ཉིད་ཤེས་པ་སྣང་བར་བྱ་ཞིང་གོ་བར་བྱ་བས་ཕྱིར་བཅོས་པར་བྱའོ་ཞེས་བྱ་བའི་ཐ་ཚིག་གོ །དེའི་སྔགས་ནི་ཆེ་དང་ལྡན་པ་དག་བདག་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་ནས། འཐབ་པར་གྱུར། མཚང་འདྲུ་བར་གྱུར། རྩོད་པར་གྱུར། འགྱེད་པར་གྱུར་ཅིང་གནས་ཏེ་ཕྱོགས་དང་གཞན་གྱི་ཕྱོགས་སུ་རྣམ་པར་གནས་པ་ནི་བདག་ཅག་གིས་མ་རྙེད་དེ་རྙེད་པ་མ་ཡིན་ནོ། །ཉེས་པ་རྙེད་ཀྱི་ལེགས་པ་རྙེད་པ་མ་ཡིན་ནོ། །ཁ་ན་མ་ཐོ་བ་སྦོམ་པོ་དང༌། ཁྱིམ་ན་གནས་པ་ལ་བརྟེན་པ་མ་གཏོགས་པར་གཞི་འདི་ལས་ཁྱོད་ལ་ལྟུང་བ་བྱུང་བ་གང་ཡིན་པ་དང༌། ཁོ་བོ་ལ་ལྟུང་བ་བྱུང་བ་གང་ཡིན་པ་དེ་དག་ཚེ་དང་ལྡན་པ་དག་གི་མདུན་དུ་བཤགས་པ་དང༌། མི་བཅབས་པར་ཁོ་བོ་སྤྲོའོ། །ཚེ་དང་ལྡན་པ་གང་དག་བདག་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བས་འཐབ་པར་གྱུར། མཚང་འདྲུ་བར་གྱུར། རྩོད་པར་གྱུར། འགྱེད་པར་གྱུར་ཅིང་གནས་ཏེ། ཕྱོགས་དང་གཞན་གྱི་ཕྱོགས་སུ་རྣམ་པར་གནས་པ་ནི་བདག་ཅག་གིས་མ་རྙེད་དེ་རྙེད་པ་མ་ཡིན་ནོ། །ཉེས་པ་རྙེད་ཀྱི་ལེགས་པ་རྙེད་པ་མ་ཡིན་ནོ། །ཁ་ན་མ་ཐོ་བ་སྦོམ་པོ་དང༌། ཁྱིམ་ན་གནས་པ་ལ་བརྟེན་པ་མ་གཏོགས་པར་གཞི་འདི་ལས་དེ་དག་ལ་ལྟུང་བ་བྱུང་བ་གང་ཡིན་པ་དང༌། ཁོ་བོ་ལ་ལྟུང་བ་བྱུང་བ་གང་ཡིན་པ་དེ་དག་ཚེ་དང་ལྡན་པ་དག་གི་མདུན་དུ་ཁོ་བོ་འཆགས་སོ། །མི་འཆབ་པོ། །མཐོལ་ཞིང་བཤགས་ན་བདག་བདེ་བ་ལ་རེག་པར་འགྱུར་རོ། །མ་མཐོལ་མ་བཤགས་ན་ནི་མི་འགྱུར་རོ། །ལྟུང་བ་མཐོང་ངམ། མཐོང་ངོ༌། །
ཕྱིན་ཆད་སྡོམ་མམ། སྡོམ་མོ་ཞེས་གསུངས་པ་ཡིན་ནོ། །ཕྱོགས་གཞན་གྱིས་ཀྱང་མཐུན་པ་དེ་དག་ལའོ་ཞེས་བྱ་བ་ནི། ཕྱོགས་གཞན་གྱིས་ཀྱང་བློ་གཅིག་ཏུ་གྱུར་པ་དེ་དག་ལ་དེ་ཕྱིར་བཅོས་པར་བྱའི། གཞན་གང་ལ་ཡང་མ་ཡིན་ནོ། །ཁས་མི་ལེན་པ་དང་དོན་མེད་པ་ལ་ནི་བཤགས་པ་མི་འཆགས་སོ་ཞེས་བྱ་བ་ནི། ཁ་ན་མ་ཐོ་བ་ཁས་མི་ལེན་པ་དང༌། ཁ་ན་མ་ཐོ་བ་མེད་པ་བཞིན་དུ་འཆགས་པ་གང་ཡིན་པ་དེ་ལ་ནི་བཤགས་པ་མི་འཆགས་པ་སྟེ། ལྟུང་བ་བྱུང་ལ་བདག་ལ་ལྟུང་བ་མ་བྱུང་ངོ་ཞེས་ཁས་མི་ལེན་པ་དང༌། ལྟུང་བ་མ་བྱུང་བ་ལ་བདག་ལ་ལྟུང་བ་བྱུང་ངོ་ཞེས་ཁས་ལེན་པར་བྱེད་པ་ནི་ཆོས་མ་ཡིན་པའོ་ཞེས་གསུངས་པ་དེ་བསྡུས་པ་ཡིན་ནོ། །འདིར་ལུང་ནི་འདི་ལྟར་དགེ་སློང་ཕམ་པར་འགྱུར་བའི་ལྟུང་བ་བྱུང་ལམ་བྱུང་ངོ་ཞེས་ཁས་འཆེ་བར་བྱེད་པ་དེ་ལ། དགེ་འདུན་གྱིས་ཁས་འཆེ་བར་བྱེད་དུ་འཇུད་པ་དེ་ནི་ཆེས་མ་ཡིན་པས་དམ་འཆར་གཞུག་པ་ཡིན་ནོ་ཞེས་གསུངས་པ་ཡིན་ནོ། །ལྷན་ཅིག་གིས་དངོས་པོས་གླང་བ་ཉིད་དུ་རུང་ངོ་ཞེས་བྱ་བ་ནི། གང་ཟག་གིས་གང་ཟག་ལ་གླེང་བར་བྱེད་པ་དང༌། གང་ཟག་གིས་གང་ཟག་གཉིས་ལ་དང༌། གང་ཟག་གིས་གང་ཟག་མང་པོ་ལ་དང༌། གང་ཟག་གིས་དགེ་འདུན་ལ་དང། གང་ཟག་གཉིས་ཀྱིས་གང་ཟག་ལ་དང༌། གང་ཟག་གཉིས་ཀྱིས་གང་ཟག་གཉིས་ལ་དང༌། གང་ཟག་གཉིས་ཀྱིས་གང་ཟག་མང་པོ་ལ་དང༌། གང་ཟག་གཉིས་ཀྱིས་དགེ་འདུན་ལ་དང༌། གང་ཟག་མང་པོས་གང་ཟག་ལ་དང༌། གང་ཟག་མང་པོས་གང་ཟག་གཉིས་ལ་དང། གང་ཟག་མང་པོས་གང་ཟག་མང་པོ་ལ་དང༌། གང་ཟག་མང་པོས་དགེ་འདུན་ལ་དང༌། དགེ་འདུན་གྱིས་གང་ཟག་ལ་དང༌། དགེ་འདུན་གྱིས་གང་ཟག་གཉིས་ལ་དང༌། དགེ་འདུན་གྱིས་གང་ཟག་མང་པོ་ལ་དང༌། དགེ་འདུན་གྱིས་དགེ་འདུན་ལ་གླེང་བར་བྱེད་ན་ཞེས་གླེང་བར་བྱ་བ་དང༌། གླེང་བར་བྱེད་པའི་སྐབས་ལྷན་ཅིག་གིས་དངོས་པོར་བསྟན་པ་དེ་དག་བསྡུའོ། །གླེང་པ་པོ་ཉིད་ཀྱང་དེ་བཞིན་ནོ་ཞེས་བྱ་བ་ནི། ལྷན་ཅིག་གིས་དངོས་པོས་རུང་བའོ། །འདི་ལ་གྲངས་ཀྱི་བྱེ་བྲག་ནི་ངེས་པ་མེད་དོ་ཞེས་བྱ་བ་ནི། གླེང་བར་བྱ་བ་དང་གླེང་བ་པོ་ཉིད་འདི་ལ་གླེང་བར་བྱ་བ་ཇི་སྙེད་པ་དེ་སྙེད་ཁོ་ནའི་གླེང་བ་པོ་དག་
གིས་བྱ་བར་མ་ངེས་པའོ། །གླེང་བ་པོ་ལུས་དང་ངག་དག་གིས་བསྡམས་པ་ཉིད་དང༌། སྡེ་སྣོད་དག་ཤེས་པ་ཉིད་དང༌། དགེ་འདུན་གྱི་ནང་དུ་བསམས་བཞིན་དུ་ཆོས་དང་འདུལ་བ་ལོག་པ་དང༌། དེ་ལས་བཟློག་པ་དག་མི་སྟོན་པ་ཉིད་ཅེས་བྱ་བ་གསུམ་དང་ལྡན་པ་ལ་གུས་པར་བྱའོ་ཞེས་བྱ་བ་ནི། གླེང་བ་པོ་ཡོན་ཏན་གསུམ་དང་ལྡན་པ་ལ་གུས་པར་བྱ་སྟེ་གསུམ་གང་ཞེ་ན། ལུས་དང་ངག་དག་གིས་བསྡམས་པ་ཉིད་དང༌། སྡེ་སྣོད་དག་ཤེས་པ་ཉིད་དང༌། དགེ་འདུན་གྱི་ནང་དུ་བསམས་བཞིན་དུ་ཤེས་བྱ་རྣམ་པར་གཞག་པའི་ཆོས་དང༌། ཚུལ་ཁྲིམས་རྣམ་པར་གཞག་པའི་འདུལ་བ་ཆོས་མ་ཡིན་པ་དང༌། འདུལ་བ་མ་ཡིན་པར་ལོག་པར་མི་སྟོན་ཅིང༌། དེ་ལས་བཟློག་པ་ཆོས་མ་ཡིན་པ་དང་འདུལ་བ་མ་ཡིན་པ་ཆོས་དང་འདུལ་བར་མི་སྟོན་པ་ཉིད་དོ། །ཚུལ་ཁྲིམས་འཆལ་བ་དང་ལོག་པར་སྟོན་པ་ལ་མཐུན་པར་མི་བྱའོ་ཞེས་བྱ་བ་ནི། གླེང་བ་པོ་ཚུལ་ཁྲིམས་འཆལ་བ་དང༌། ཆོས་དང་འདུལ་བ་ཆོས་མ་ཡིན་པ་དང་འདུལ་བ་མ་ཡིན་པར་ལོག་པར་སྟོན་པ་ལ་ནི་མཐུན་པར་མི་བྱ་སྟེ། མི་བགྲང་ཞིང་སྨད་པ་དང་དེའི་ཚིག་གིས་ཅུང་ཟད་ཀྱང་བསྒྲུབ་པར་མི་བྱའོ། །རྣམ་པ་དེ་ལྟ་བུ་མ་ཡིན་པ་སྡེ་སྣོད་དག་འཛིན་ཅིང་མི་ཤེས་པ་ལ་ནི་བློན་གདབ་པར་བྱའོ་ཞེས་བྱ་བ་ནི། གླེང་བ་པོ་ཚུལ་ཁྲིམས་འཆལ་བ་དང༌། ལོག་པར་སྟོན་པའི་རྣམ་པ་དེ་ལྟ་བུ་མ་ཡིན་པ་ལུས་དང་ངག་དག་གིས་བསྡམས་པ་དང༌། ཆོས་དང་འདུལ་བ་བཞིན་དུ་སྟོན་པ་སྡེ་སྣོད་དག་ཚིག་གི་སྒོ་ནས་འཛིན་ཅིང༌། དོན་གྱི་སྒོ་ནས་མི་ཤེས་པས། གླེང་བར་བྱེད་པ་ལ་ནི་དགེ་འདུན་གྱིས་བློན་གདབ་པར་བྱ་སྟེ། ཚིག་འཇམ་པོ་སྙན་པའི་རྣམ་པས་བཟློག་པར་བྱ་བ་ནི་བློན་གདབ་པའོ། །འོ་ན་གླེང་བ་པོ་ཡོན་ཏན་གསུམ་དང་ལྡན་པ་ལ་གུས་པར་བྱའོ་ཞེས་ཇི་སྐད་བསྟན་པ་དེ་ལ་བརྟག་པ་ཙམ་ཡང་མི་བྱ་འམ་ཞེ་ན་དེའི་ཕྱིར། དེ་ལ་བསམ་པ་རྟོགས་པར་བྱ་བའི་ཕྱིར་བརྒལ་ཞིང་བརྟག་པར་བྱའོ་ཞེས་བྱ་བ་སྨྲས་ཏེ། གླེང་བ་པོ་ཡོན་ཏན་གསུམ་དང་ལྡན་པ་སྨད་པར་བྱ་བ་མ་ཡིན་པ་དེ་ལ་བསམ་པར་ཤེས་པར་བྱ་བའི་ཕྱིར་བརྒལ་ཞིང་བརྟག་པར་བྱའོ་ཞེས་བྱ་བའི་ཐ་ཚིག་གོ །སེམས་ཀྱི་སྤྱོད་པ་ནི་གཡོ་བ་
ཡིན་པས་སྔར་སྡིག་པ་ལ་མ་ཞུགས་སུ་ཟིན་ཀྱང༌། ཕྱིས་འཇུག་པར་འགྱུར་སྲིད་པས་དེའི་ཕྱིར་སེམས་ཀྱི་སྤྱོད་པ་བག་མ་པའི་ཕྱིར་བརྒལ་ཞིང་བརྟག་པར་བྱའོ། །ཇི་ལྟར་བརྒལ་ཞིང་བརྟག་པར་བྱ་ཞེ་ན། དེའི་ཕྱིར་གནས་སུ་མི་གཞག་པས་སོ་ཞེས་བྱ་བ་སྨྲས་ཏེ། དུས་དང་ཡུལ་དང་སྤྱོད་ལམ་དང་རྗེས་སུ་བསྒྲུབ་པའི་གནས་སུ་ཚིག་མི་གཞག་པས་བརྒལ་ཞིང་བརྟག་པར་བྱ་སྟེ། འདི་ནི་ལོག་པའི་བསམ་པས་རྗེས་སུ་བཙལ་བར་བྱ་བ་ཡིན་གྱི། ཡང་དག་པའི་བསམ་པ་རྗེས་སུ་བཙལ་བར་བྱ་བ་ནི་མ་ཡིན་ནོ། །གལ་ཏེ་གང་ཟག་དེ་ལ་བརྒལ་ཞིང་བརྟག་པ་ན་དུས་ལ་སོགས་པའི་གནས་སུ་གླེང་བའི་ཚིག་འཇོག་པར་མི་བྱེད་ན། དེ་ལོག་པར་གླེང་བ་ལ་ཞུགས་པར་ངེས་པ་ཡིན་པས་དེའི་ཕྱིར། གནས་སུ་མི་འཇོག་ན་བསམ་པ་ལོག་པ་ཡིན་པར་ཤེས་པར་བྱའོ། །གང་དུ་མི་འཇོག་ན་བསམ་པ་ལོག་པར་མཚོན་པར་བྱ་བའི་གནས་དེ་གང་ཞེ་ན། དེའི་ཕྱིར་གནས་ནི་དུས་དང་ཡུལ་དང་སྤྱོད་ལམ་དང་རྗེས་སུ་བསྒྲུབ་པ་དག་གོ་ཞེས་བྱ་བ་སྨྲས་ཏེ། དུས་ཞེས་སྨོས་པས་ནི་མཚན་མོ་བྱས་པས་གླེང་བ་དང༌། ཉིན་མོ་བྱས་པས་གླེང་བ་ལ་སོགས་པ་བསྡུས་སོ། །ཡུལ་ཞེས་སྨོས་པས་ནི་ལྐོག་ཏུ་བྱས་པ་དང༌། གསལ་བར་བྱས་པ་དང༌། ལམ་དུ་བྱས་པ་དང༌། ལམ་གོལ་བར་བྱས་པ་དང༌། གྲོང་དུ་བྱས་པ་དང༌། དགོན་པར་བྱས་པ་ལ་སོགས་པ་བསྡུས་སོ། །སྤྱོད་ལམ་ཞེས་སྨོས་པས་ནི། འགྲོ་བ་དང༌། འགྲེང་བ་དང༌། འདུག་པ་དང་ཉལ་བར་བྱས་པས་གླེང་བ་བསྡུས་སོ། །རྗེས་སུ་བསྒྲུབ་པ་ཞེས་སྨོས་པས་ནི་ཕམ་པར་འགྱུར་བ་དང༌། དགེ་འདུན་ལྷག་མ་དང༌། ལྟུང་བྱེད་དང༌། སོ་སོར་བཤགས་པར་བྱ་བ་དང༌། ཉེས་བྱས་རྗེས་སུ་བསྒྲུབས་པས་གླེང་བར་བསྡུས་སོ། །གནས་གཞན་དུ་འཕོ་བ་དང་རྙོག་པ་ཅན་དུ་གྱུར་ན་གླེང་བ་མི་འཆགས་སོ་ཞེས་བྱ་བ་ནི། གལ་ཏེ་གླེང་བ་པོ་དེ་ལ་དེ་ལྟར་བརྒལ་ཞིང་བརྟགས་པས་ན། གནས་ནས་གནས་གཞན་དུ་འཕོ་བ་དང༌། འཁྲུག་པའི་རྙོག་པ་ཅན་དུ་གྱུར་ན་དེའི་ཚེ་དེ་ལ་གླེང་བ་མི་འཆགས་པ་ཉིད་ཡིན་ཏེ། གླེང་བའི་བྱ་བ་མ་བྱས་པ་ཉིད་དང་མ་བྱུང་བ་དང་མི་སྐྱེ་བ་ཉིད་ཡིན་ནོ། །གནས་ནས་གནས་གཞན་དུ་འཕོས་
ན་གླེངས་པ་ཉིད་དང༌། གླེང་བ་པོ་ཉིད་མེད་པ་ཡིན་ཏེ། དེ་ཉིད་ཀྱིས་འདིར་དགོས་པ་གྲུབ་པར་འགྱུར་ཏེ། འདི་ལྟར་དེ་ལྟར་ན། རྩོད་པ་ཉེ་བར་ཞི་བ་ཉིད་ཡིན་པ་དེའི་ཕྱིར། དེ་ལ་གླེང་བར་མི་འཆགས་སོ་ཞེས་སྨོས་སོ། །གླེང་བས་ཁས་བླངས་ན་མཐར་ཐུག་པ་ཡིན་ནོ་ཞེས་བྱ་བ་ནི། གང་ཟག་གང་ལ་གླེང་བ་དེས་ལྟུང་བ་དེ་ཁས་བླངས་པ་དེ་ནི་འདིར་རྩོད་པ་དེའི་མཐར་ཐུག་པ་ཡིན་ཏེ། ཁས་བླངས་ན་རྩོད་པ་དེ་ཉེ་བར་ཞི་བ་ཡིན་པའི་ཕྱིར་རོ། །སྨྲ་བ་པོ་བདེན་པ་མཐོང་བ་ཉིད་དང་ཡོན་ཏན་ལས་ཆེས་མཆོག་ཏུ་གྱུར་པ་ཁྱིམ་པ་ཡང་རུང་བ་གཞན་ཚད་མར་བྱའོ་ཞེས་བྱ་བ་ནི། གང་གི་ཚེ་གླེང་བའི་གང་ཟག་ཉེས་པ་ཁས་མི་ལེན་པ་དེའི་ཚེ་ཇི་ལྟར་ངེས་པར་བྱ་ཞེ་ན། སྨྲ་བ་པོ་བདེན་པ་མཐོང་བ་ཟག་པ་མེད་པའི་ལམ་མཐོང་བ་ཉིད་དམ། འདོད་པའི་ཁམས་ཀྱི་འདོད་ཆགས་དང་བྲལ་བ་ལ་སོགས་པ་ཡོན་ཏན་ལས་ཆེས་མཆོག་ཏུ་གྱུར་བ། རབ་ཏུ་བྱུང་བ་འབའ་ཞིག་ཏུ་མ་ཟད་ཀྱི་ཁྱིམ་པ་ཡང་རུང་བ་གཞན་དག་ཚད་མར་བྱས་ཏེ། དེ་དག་ཆེ་བཞིར་དྲི་བར་བྱའོ་ཞེས་བྱ་བའི་ཐ་ཚིག་གོ །འདིར་གཞུང་ནི་སྲིལ་བུ་དག་ལས་བཙུན་པ་རེ་ཞིག་དགེ་སློང་གཉིས་ལ་ཐ་དད་པར་སྨྲ་བ་དང༌། འགལ་བར་སྨྲ་བ་དང་མི་མཐུན་པར་སྨྲ་བ་དག་བྱུང་ན། གང་གི་ཚིག་གཟུང་བར་བགྱི། གང་ཚུལ་ཁྲིམས་དང་ལྡན་པའི་འོ། །གཉི་ག་ཚུལ་ཁྲིམས་དང་ལྡན་པ་ལགས་ན་གང་མང་དུ་ཐོས་པའིའོ། །གཉི་ག་མང་དུ་ཐོས་པ་ལགས་ན་གང་ཡང་དག་པར་བསྡམས་པའིའོ། །གཉི་ག་ཡང་དག་པར་བསྡམས་པ་ལགས་ན། གང་ཆེས་ཡང་དག་པར་བསྡམས་པའིའོ། །གཉི་ག་ཆེས་ཡང་དག་པར་བསྡམས་པ་ལགས་ན་དེ་ནི་གནས་མ་ཡིན་སྐབས་མ་ཡིན་ཏེ། གལ་ཏེ་གཉིས་ཆེས་ཡང་དག་པར་བསྡམས་པ་ལ་ཐ་དད་སྨྲ་བ་དང༌། འགལ་བར་སྨྲ་བ་དང་མི་མཐུན་པར་སྨྲ་བ་དག་འབྱུང་བ་དེ་ནི་གནས་མེད་དོ་ཞེས་གསུངས་པ་ཡིན་ནོ། །གཞན་དང་བཅས་པ་ཉིད་ཡིན་ན་ཚིག་བསྟུན་པར་བྱའོ་ཞེས་བྱ་བ་ནི། ཆེ་བཞི་དེ་ལ་གལ་ཏེ་གང་ཟག་གཞན་དང་བཅས་པ་ཉིད་ཡིན་ན། གཞན་དེ་ཡང་དྲི་བར་བྱ་ཞིང་དེའི་ཚིག་གིས་ཅིག་ཤོས་ཀྱི་ཚིག་གཟུང་བར་བྱའོ། །འདིར་གཞུང་ནི་བཙུན་པ་དགེ་བསྙེན་མ་དད་པ་ཅན་དགེ་སློང་རྣམས་ཀྱི་དྲུང་དུ་མཆིས་ཏེ། འདི་སྐད་ཅེས་
བཙུན་པ་དག་བདག་གིས་དགེ་སློང་ཞིག་རྒྱལ་རིགས་མོ་དང་ལྷན་ཅིག་མི་ཚངས་པར་སྤྱོད་པས་ཉམས་པར་བགྱིད་པ་མཐོང་ངོ་ཞེས་མཆི་ན། བགྱིད་དུ་སྩལ་ཅིང་དེ་ལ་དེའི་ངོ་བོ་ཉིད་ཚོལ་བ་དང༌། མཐུན་པར་སྩལ་བར་བགྱི་འམ། ཉེ་བ་འཁོར་མི་བྱ་སྟེ། དྲི་བར་བྱ་ཞིང་གལ་ཏེ་དེ་ནི་སྲིང་མོ་འགའ་ཞིག་ཀྱང་ཡོད་དོ་ཞེས་ཟེར་ན་གཉི་ག་ལ་དྲི་བར་བྱའོ། །གལ་ཏེ་མཐུན་ན་དགེ་བསྙེན་མ་དད་པ་ཅན་གྱི་ཚིག་གིས་བྱེད་དུ་གཞུག་ཅིང་དེ་ལ་དེའི་ངོ་བོ་ཉིད་ཚོལ་བ་དང་མཐུན་པ་ཡང་སྦྱིན་པར་བྱའོ། །གལ་ཏེ་འདིས་རྒྱལ་རིགས་མོ་དང་ལྷན་ཅིག་མི་ཚངས་པར་སྤྱོད་པ་མ་བྱས་ཀྱི། འདིས་བྲམ་ཟེ་མོ་དང་ལྷན་ཅིག་མི་ཚངས་པར་སྤྱོད་པ་བྱས་སོ་ཞེས་ཟེར་ན། དགེ་སློང་གིས་དམ་བཅས་པས་བྱེད་དུ་གཞུག་གོ་ཞེས་གསུངས་པ་མ་ཡིན་ནོ། །ཐེ་ཚོམ་ཉིད་དུ་གྱུར་ན་ཤེས་པ་ཉིད་མ་ཡིན་ནོ་ཞེས་བྱ་བ་ནི། གང་དོན་གང་ལ་ཐེ་ཚོམ་ཉིད་དུ་གྱུར་པ་དེས་དོན་དེ་ཤེས་པ་ཉིད་མ་ཡིན་ཏེ། འདིར་ངེས་པའི་ཤེས་པ་མ་སྐྱེས་པའི་ཕྱིར་རོ། །འདིར་གཞུང་ནི་དགེ་བསྙེན་མ་དད་པ་ཅན་གྱིས་དགེ་སློང་དུས་མ་ཡིན་པར་ལི་ཁ་རའི་ཆུ་འཐུང་བ་མཐོང་ནས། དེ་དགེ་སློང་རྣམས་ལ་འདི་སྐད་ཅེས་བདག་གིས་དགེ་སློང་དུས་མ་ལགས་པར་སྐྱོ་མ་འཐུང་བ་མཐོང་ངོ་ཞེས་མཆི་ན། ཆོས་བཞིན་དུ་བགྱིད་དུ་སྩལ་ཞིང་དེའི་ངོ་བོ་ཉིད་ཚོལ་བ་དང་མཐུན་པ་སྩལ་བར་བགྱིའམ། ཉེ་བ་འཁོར་མི་བྱ་སྟེ། དེ་དགེ་སློང་ལ་དྲི་བར་བྱ་ཞིང་གལ་ཏེ་དེ་སྐད་ཅེས་བདག་གིས་དུས་མ་ཡིན་པར་སྐྱོ་མ་མ་འཐུངས་ཀྱི། བདག་གིས་ལི་ཁ་རའི་ཆུ་འཐུངས་སོ་ཞེས་ཟེར་ན། དགེ་སློང་གིས་དམ་བཅས་པས་བྱེད་དུ་གཞུག་གོ་ཞེས་གསུངས་པ་ཡིན་ནོ། །དེ་ལས་ངེས་པར་གྱུར་པ་ནི་ཁས་བླངས་པ་དང་འདྲའོ་ཞེས་བྱ་བ་ནི། བདེན་པ་མཐོང་བ་ཉིད་དང་ཡོན་ཏན་ལས་ཆེས་མཆོག་ཏུ་གྱུར་པས་ཆ་བཞི་དེ་ལས་ངེས་པར་གྱུར་པ་ནི་རང་གིས་ཁས་བླངས་པ་དང་འདྲ་སྟེ། གླེངས་བས་ཁས་བླངས་ན་མཐར་ཐུག་པ་ཡིན་ནོ་ཞེས་བསྟན་པ་ཉིད་དུ་འགྱུར་བར་རིག་པར་བྱའོ། །གལ་ཏེ་དེ་ལྟར་ཁས་བླངས་པ་ལས་ངེས་པ་སྐྱེས་པར་གྱུར་པ་ན་གླེང་བར་བྱ་བ་དེ་ཕྱིས་མི་སྒྲུབ་ན་དེའི་ཚེ་ཇི་ལྟར་བསྒྲུབ་པར་བྱ་ཞེ་ན་དེའི་ཕྱིར། ལྟུང་བའི་ཕྱིར་རྩོད་པ་འདི་ལ་དེའི་ངོ་བོ་ཉིད་ཚོལ་བ་དང་
མཐུན་པ་སྦྱིན་པར་བྱ་བ་ཉིད་དོ་ཞེས་བྱ་བ་སྨྲས་ཏེ། རྒྱུ་ཡོད་པས་དགེ་འདུན་ལ་ལྟུང་བ་ཁས་བླངས་ནས་ཡང་ཁྱད་དུ་གསོད་པར་བྱེད་ན་དེ་ནི་དེའི་ངོ་བོ་ཉིད་ཚོལ་བ་དང་མཐུན་པ་སྦྱིན་པའི་རྒྱུ་ཡིན་ཏེ། དེ་ལ་ཁས་བླངས་པས་ནི་ཡོད་པ་བསྟན་པ་ཡིན་ལ། ཁྱད་དུ་གསོད་པས་ནི་མེད་པར་སྟོན་པ་ཡིན་པའི་ཕྱིར་རོ། །ངེས་པ་དང་བྲལ་བ་ནི་ཁྱད་དུ་གསོད་པ་ཡིན་ནོ་ཞེས་བྱ་བ་ལ། ངེས་པ་དང་བྲལ་བ་ཞེས་བྱ་བ་ནི་མི་དྲན་པ་སྟེ། དོན་བརྗོད་པས་ཁྱད་དུ་གསོད་པ་ཡིན་ནོ། །མ་མཐོང་བ་ལ་ནི་གནས་ནས་དབྱུང་བའི་ལས་བྱ་སྟེ། ལྟུང་བ་མ་མཐོང་བའི་ཕྱིར་རོ། །འདི་ནི་བརྗེད་པས་ཁྱད་དུ་གསོད་པ་ཡིན་པས་དེ་ལ་ནི་དེའི་ངོ་བོ་ཉིད་ཚོལ་བ་དང་མཐུན་པ་སྦྱིན་པར་བྱ་བ་ཉིད་དུ་བསྟན་ཏོ། །དགེ་འདུན་ལ་ཁས་བླངས་ནས་ཁྱད་དུ་གསོད་ན་ངེས་པར་འཛིན་དུ་གཞུག་པའི་ཕྱིར་ངེས་པར་སྦྱོར་བ་སྦྱིན་ནོ་ཞེས་བྱ་བ་ནི། དགེ་འདུན་ལ་ལྟུང་བ་ཁས་བླངས་ནས་ཡང་ཁྱད་དུ་གསོད་པར་བྱེད་ན། དེ་ངེས་པར་འཛིན་དུ་གཞུག་པའི་ཕྱིར་ངེས་པར་སྦྱོར་བ་སྦྱིན་པར་བྱ་སྟེ་འཛིན་དུ་གཞུག་གོ་ཞེས་བྱ་བའི་ཐ་ཚིག་གོ །ཅིའི་ཕྱིར་འདིའི་མིང་དེའི་ངོ་བོ་ཉིད་ཚོལ་བ་དང་མཐུན་པ་ཞེས་བྱ་ཞེ་ན་དེའི་ཕྱིར། དེ་ནི་དེའི་ངོ་བོ་ཉིད་ཚོལ་བ་ལ་ཕན་པ་ཡིན་པའི་ཕྱིར་དེའི་ངོ་བོ་ཉིད་ཚོལ་བ་དང་མཐུན་པ་ཉིད་ངོ་ཞེས་བྱ་བ་སྨྲས་ཏེ། ལྟུང་བ་དེའི་ངོ་བོ་ཉིད་ཚོལ་བ་ལ་ཕན་ཞིང་དེ་དང་རྗེས་སུ་མཐུན་པ་ཉིད་ཡིན་པའི་ཕྱིར། དེའི་ངོ་བོ་ཉིད་ཚོལ་བ་དང་མཐུན་པ་ཉིད་ཅེས་བྱའོ། །དེ་ནི་བསླབ་པ་སྦྱིན་པ་དང་སྤོ་བ་དང་མགུ་བ་སྦྱིན་པ་ལ་སོགས་པས་གཞན་ན་གནས་པའི་ཚུལ་དང་འདྲ་བ་ཡིན་པར་བལྟ་བར་བྱ་སྟེ། འདི་བླངས་པས་དེའི་ངོ་བོ་ཉིད་ཚོལ་བར་བྱེད་ལ། ལྟུང་བ་དེའི་ངོ་བོ་ཉིད་ཡོངས་སུ་ཤེས་ན་དགེ་འདུན་གྱིས་དེ་ལ་བཟོད་པ་བྱ་ཞིང་དེའི་འོག་ཏུ་རང་བཞིན་དུ་གནས་པ་ཉིད་དུ་འགྱུར་རོ། །ཁ་ཅིག་གིས་འདི་ནན་ཐུར་གྱི་ཚུལ་དུ་བསྟན་ཏོ་ཞེས་བྱ་བ་ནི། འདུལ་བ་འཛིན་པ་ཁ་ཅིག་གིས་དེའི་ངོ་བོ་ཉིད་ཚོལ་བ་དང་མཐུན་པ་སྦྱིན་པ་ཞེས་བྱ་བ་འདི་ནན་ཐུར་གྱི་ཚུལ་དུ་བསྟན་ཏེ། ཇི་ལྟར་བསྡིགས་པ་ལ་སོགས་པའི་ནན་ཐུར་གྱི་ལས་དག་མི་འདོད་བཞིན་དུ་དགེ་འདུན་གྱིས་བྱེད་པ་དེ་བཞིན་དུ་འདི་ཡང་དགེ་འདུན་གྱིས་སྦྱིན་པ་ཡིན་པས། ནན་ཐུར་གྱི་ཚུལ་དུ་སྟོན་ཅིང་སྤོ་བ་ལ་སོགས་པའི་ཚུལ་དུ་བསྟན་པ་ནི་
མ་ཡིན་ནོ་ཞེས་ཟེར་ཏེ། དེ་ལྟར་ཡང་ཅི་མངོན་ཞེ་ན། དགེ་འདུན་ཐམས་ཅད་འདུག་ཅིང་མཐུན་པར་གྱུར་པའི་འོག་ཏུ་དགེ་སློང་གཅིག་གིས་གསོལ་བ་བྱ་སྟེ་ལས་བྱ་བ། དགེ་འདུན་བཙུན་པ་རྣམས་གསན་དུ་གསོལ། །དགེ་སློང་ཤི་རི་ཀ་འདི་དགེ་འདུན་གྱི་དབུས་སུ་ཞེས་བྱ་བ་ལ་སོགས་པ་གསུངས་པ་ཡིན་གྱི་དགེ་སློང་ཤི་རི་ཀས་རྒན་པའི་མཐར་འདུག་སྟེ། དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་ཤི་རི་ཀ་དགེ་འདུན་གྱི་དབུས་སུ་ཞེས་བྱ་བ་ནས། ཐུགས་བརྩེ་བའི་སླད་དུ་བདག་ལ་དེའི་ངོ་བོ་ཉིད་ཚོལ་བ་དང་མཐུན་པ་སྩལ་དུ་གསོལ། །ཞེས་གསོལ་བར་བྱའོ་ཞེས་མ་གསུངས་པའི་ཕྱིར་རོ་ཞེས་ཟེར་རོ། །དེ་ནི་མི་བཟང་སྟེ་མདོ་སྡེ་དང་འགལ་བའི་ཕྱིར་རོ་ཞེས་བྱ་བ་ནི། འདུལ་བ་འཛིན་པ་ཁ་ཅིག་དེའི་ངོ་བོ་ཉིད་ཚོལ་བ་དང་མཐུན་པ་སྦྱིན་པ་འདི་ནན་ཐུར་གྱི་ཚུལ་དུ་སྟོན་པ་དེ་ནི་མི་བཟང་སྟེ། མདོ་སྡེ་དང་འགལ་བའི་ཕྱིར་རོ། །མདོ་སྡེ་ལས་ཀུན་དགའ་བོ་འདི་དགེ་སློང་དགེ་འདུན་གྱི་དབུས་སུ་ལྟུང་བ་ཁྱད་དུ་གསོད་པར་བྱེད་ཅིང་ཁྱད་དུ་གསོད་ནས་ཁས་ལེན་པར་བྱེད་ལ་ཁས་བླངས་ནས་ཡང་ཁྱད་དུ་གསོད་པར་བྱེད་པ་དེ་ལ་དགེ་སློང་རྣམས་ཀྱིས་འདི་སྐད་ཅེས་བརྗོད་པར་བྱ་སྟེ། ཚེ་དང་ལྡན་པ་ཁྱོད་དགེ་འདུན་གྱི་དབུས་སུ་ལྟུང་བ་ཁྱད་དུ་གསོད་པར་བྱེད་ཅིང་ཁྱད་དུ་བསད་ནས་ཁས་ལེན་པར་བྱེད་ལ། ཁས་བླངས་ནས་ཡང་ཁྱད་དུ་གསོད་པར་བྱེད་པ་ཡིན་པ་དེ་ནི་ཁྱོད་ཀྱིས་མ་རྙེད་དེ་རྙེད་པ་མ་ཡིན་ནོ། །ཉེས་པ་རྙེད་ཀྱི་ལེགས་པ་རྙེད་པ་མ་ཡིན་གྱི། ཚེ་དང་ལྡན་པ་ཁྱོད་དགེ་འདུན་གྱི་གན་དུ་སོང་ལ། དེའི་ངོ་བོ་ཉིད་ཚོལ་བ་དང་མཐུན་པ་ལེགས་པར་གསོལ་ཅིག །དེས་དགེ་འདུན་གྱི་གན་དུ་སོང་སྟེ། དེའི་ངོ་བོ་ཉིད་ཚོལ་བ་དང་མཐུན་པ་གསོལ་བར་བྱའོ། །དགེ་འདུན་གྱིས་ཀྱང་ཆོས་དང་འདུལ་བས་དེ་ལ་དེའི་ངོ་བོ་ཉིད་ཚོལ་བ་དང་མཐུན་པ་སྦྱིན་པར་བྱའོ་ཞེས་བྱ་བ་གསུངས་པའི་མདོ་སྡེ་འདི་དག་དང་འགལ་བས་ཁ་ཅིག་འདི་ནན་ཐུར་གྱི་ཚུལ་དུ་སྟོན་པ་དེ་ནི་མི་བཟང་སྟེ། འདི་ལྟར་གང་གསོལ་བ་བྱེད་པ་དེ་ནི་བདག་ཉིད་དག་པར་བྱ་བའི་ཕྱིར་ཡིན་གྱི་ནན་ཐུར་གྱི་ལས་ནི་མ་ཡིན་ནོ། །ཉེ་བར་ཞི་བ་ཉིད་ཀྱི་སྡེ་ཚན་ལས་ལོགས་ཤིག་ཏུ་མཛད་པར་ནི་མི་བཞེད་དོ་ཞེས་བྱ་བ་ནི་གལ་ཏེ་དེའི་ངོ་བོ་ཉིད་ཚོལ་
པ་དང༌། མཐུན་པ་སྦྱིན་པ་འདི་ནན་ཐུར་གྱི་ཚུལ་ཡིན་མོད་ཀྱི། རྩོད་པ་ཉེ་བར་ཞི་བའི་སྐབས་ཉིད་ཡིན་པ་ནན་ཐུར་གྱི་ལས་ཀྱི་སྡེ་ཚན་ལས་ལོགས་ཤིག་ཏུ་མཛད་ཅིང་དེ་དག་གི་ནང་དུ་མ་གསུངས་སོ་ཞེ་ན་དེ་ནི་མི་རུང་སྟེ། ལུང་ལས་དེ་ལྟར་མི་བཞེད་པའི་ཕྱིར་རོ། །ཇི་ལྟར་དེ་ནན་ཐུར་གྱི་ལས་ཉིད་ཡིན་ན། ནན་ཐུར་གྱི་ལས་ཀྱི་སྡེ་ཚན་གྱི་ནང་དུ་གསུངས་པར་འགྱུར་བའི་རིགས་ན་མ་གསུངས་པའི་ཕྱིར་རོ། །ཉེ་བར་ཞི་བ་ཉིད་ཡིན་པའི་ཕྱིར་ནི་ལོགས་ཤིག་ཏུ་བཞག་སྟེ། ནན་ཐུར་གྱི་ལས་ཀྱི་ནང་དུ་མ་བཞག་པས་དེའི་ཕྱིར་འདི་ནི་ནན་ཐུར་གྱི་ཚུལ་དུ་བསྟན་པ་མ་ཡིན་ནོ། །དེ་ལྟར་མི་བཞེད་དགེ་ལས་ཤེས་ཤེ་ན་དེའི་ཕྱིར། བསྡིགས་པ་ལ་སོགས་པ་ནི་དེ་ཉིད་ཡིན་པ་རྣམ་པར་མ་བཞག་པའི་ཕྱིར་རོ་ཞེས་བྱ་བ་སྨྲས་ཏེ། བསྡིགས་པ་དང་སྨད་པ་དང་ཕྱིར་བསྐྲད་པ་དང་ཕྱིར་འགྱེད་པ་དང༌། གནས་ནས་དབྱུང་བ་དེ་དག་ཀྱང་འཐབ་མོ་ལ་སོགས་པ་ཉེ་བར་ཞི་བར་བྱ་བ་ཉིད་ཡིན་མོད་ཀྱི། དེ་དག་ནི་དེ་ཉིད་ཀྱི་ནན་ཐུར་གྱི་ལས་ཀྱི་སྡེ་ཚན་དག་ལས་ལོགས་ཤིག་ཏུ་རྣམ་པར་མ་བཞག་པའི་ཕྱིར་རོ། །དེས་ན་ཉེ་བར་ཞི་བ་ཉིད་ཀྱིས་ནན་ཐུར་གྱི་ལས་ཀྱི་སྡེ་ཚན་དག་ལས་ལོགས་ཤིག་ཏུ་མཛད་པར་མི་བཞེད་དོ། །གལ་ཏེ་དེའི་ངོ་བོ་ཉིད་ཚོལ་བ་དང་མཐུན་པ་སྦྱིན་པ་འདི་ལྟུང་བ་མ་མཐོང་བའི་ཕྱིར་ཡིན་པས་ནན་ཐུར་གྱི་ལས་དང་རང་བཞིན་འདྲ་བ་ཉིད་དུ་འདོན་ན། དེའི་ཚེ་ཉེས་པ་གཞན་དུ་ཡང་ཐལ་བར་གྱུར་པར་བསྟན་པའི་ཕྱིར་དེ་ཤེས་བཞིན་དུ་ཁྱད་དུ་གསོད་དོ་སྙམ་ན། ཡིད་བཞིན་དུ་མ་མཐོང་བ་ཉིད་ཀྱི་ཤེས་པ་སྐྱེ་བའི་ཕྱིར་རོ་ཞེས་བྱ་བ་སྨྲས་ཏེ། གང་གི་ཚེ་ནན་ཏུར་གྱི་ལས་ཀྱི་ངོ་བོ་ཉིད་ལ་དེའི་ངོ་བོ་ཉིད་ཚོལ་བ་དང་མཐུན་པ་སྦྱིན་པར་བྱེད་པ་ན་ལྟུང་བ་དེ་ཤེས་བཞིན་དུ་ཁྱད་དུ་གསང་ངོ་སྙམ་པ་དེ་ལྟ་བུའི་བློ་དགེ་འདུན་ལ་སྐྱེ་བ་དེའི་ཚེ་ལྟུང་བ་མ་མཐོང་བ་ཉིད་དེ་ནི་ལྟུང་བ་མཐོང་བ་དེ་ཡོད་བཞིན་དུ་མ་མཐོང་ཞེས་ཟེར་བ་དེ་ལྟ་བུའི་བློ་དགེ་འདུན་རྣམས་ལ་སྐྱེ་བར་འགྱུར་བའི་ཕྱིར་རོ། །དེ་ལ་ལྟུང་བ་མ་མཐོང་བ་ལ་ནན་ཐུར་གྱི་ལས་ཀྱི་དབང་དུ་བྱ་བ་ལ་ནི། མ་མཐོང་བས་གནས་ནས་དབྱུང་བ་ཞེས་བྱ་བའི་ནན་ཐུར་གྱི་ལས་བཅའ་བ་མཛད་ཟིན་པས། དེས་ན་དེའི་ངོ་བོ་ཉིད་ཚོལ་བ་དང་མཐུན་པ་འདིའི་སྐབས་མེད་པ་ཉིད་དུ་འགྱུར་རོ། །དེ་ལྟ་བས་ན་ཁ་ཅིག་
དེའི་ངོ་བོ་ཉིད་ཚོལ་བ་དང་མཐུན་པ་འདི་ནན་ཐུར་གྱི་ལས་ཀྱི་ཚུལ་དུ་སྟོན་པ་དེ་མི་བཟང་སྟེ། འདི་ལྟར་ཤེས་ལ་མ་མཐོང་བ་ཉིད་ལ་ནི་འདི་ལ་ལྟུང་བ་ཡོད་བཞིན་དུ་མ་མཐོང་ངོ་སྙམ་པའི་ཤེས་པ་སྐྱེ་བ་ཉིད་ཀྱི་ཕྱིར་རོ། །ཉེ་བར་ཞི་བར་བྱ་བའི་ཕྱིར་འབད་པ་མི་བསྐྱེད་པར་མི་བྱའོ་ཞེས་བྱ་བ་ནི། རྩོད་པ་ཉེ་བར་ཞི་བར་བྱ་བའི་ཕྱིར་མི་འབད་པར་མི་བྱའོ་ཞེས་བྱ་བའི་ཐ་ཚིག་གོ །འདིར་གཞུང་ནི། དགེ་འདུན་དུ་གྱུར་པའི་དགེ་སློང་དག་གིས་དགེ་སློང་དག་བྱ་བའི་ཕྱིར་རྩོད་པ་དགེ་འདུན་མཐུན་པས་ཉེ་བར་ཞི་བར་བྱའོ་ཞེས་གསུངས་པ་ཡིན་ནོ། །གལ་ཏེ་འགའ་ཞིག་མཐུན་པ་སྦྱིན་པར་མི་བྱེད་ན་དེའི་ཚོད་ལ་འབད་པར་བྱ་བ་སྟེ། ཐམས་ཅད་དུ་རུང་བའི་ཕྱིར་སྤྱིར་མདོར་བྱས་སོ། །རྩོད་པའི་གཞི་འོ་ཞེས་བྱ་བ་དེ་འདུལ་བ་གཞིའི་སྐབས་ནས་འབྱུང་བ་བཤད་ཟིན་ཏོ།། །།ད་ནི་རྩོད་པའི་གཞི་ཞུ་བའི་སྐབས་བསྡུ་བའི་ཕྱིར། ཞི་བ་ཐམས་ཅད་ནི་བྱ་བའི་ཕྱིར་རྩོད་པར་འཇུག་གོ་ཞེས་བྱ་བ་སྨྲས་ཏེ། རྩོད་པ་ཞི་བར་བྱ་བ་བདུན་པོ་ཐམས་ཅད་ནི་བྱ་བའི་ཕྱིར་རྩོད་པ་ལ་འཇུག་གོ །རྣམ་པ་གང་གིས་རྩོད་པ་ཞི་བར་བྱ་བ་ཐམས་ཅད་བྱ་བའི་ཕྱིར་རྩོད་པ་འཇུག་ཅེ་ན། རྒྱུའི་སྒོ་ནས་ཏེ། རྒྱུ་གང་གིས་རྩོད་བ་ཞི་བར་བྱ་བ་བདུན་བོད་ག་འཇུག་པར་འགྱུར་བའི་རྒྱུ་དེ་ནི། བྱ་བའི་ཕྱིར་རྩོད་པ་ལ་ཡོད་དེ། འདི་ལྟར་སྤོང་བ་ལ་སོགས་པ་ནི་མཐུན་པ་མི་སྦྱིན་པའི་རྒྱུ་ཡིན་པ་དེའི་ཕྱིར། བྱ་བའི་ཕྱིར་རྩོད་པའི་རྒྱུ་མཐུན་པ་མི་སྦྱིན་པ་ཞེས་བྱ་བ་གང་ཡིན་པ་དེའི་སྒོ་ནས་འདིར་ཞི་བར་བྱ་བ་ཐམས་ཅད་འཇུག་གོ །ཇི་ལྟར་ཞེ་ན། གསོལ་བ་ལ་སོགས་པའི་ལས་ལ་མཐུན་པ་མི་སྦྱིན་པ་ནི་བྱ་བའི་རྩོད་པ་ཡིན་པས། དེ་ལ་ཇི་ལྟར་སྤོང་བ་ཉིད་ལ་བརྟེན་ཏེ་མཐུན་པ་མི་སྦྱིན་པ་དེ་བཞིན་དུ་མི་གདམས་པའི་ཕྱིར་རྩོད་པ་ཞི་བར་བྱ་བའི་དྲན་པ་དང་མ་སྨྱོས་པས་འདུལ་བ་གཉིས་ཀྱང་འདིར་འཇུག་གོ །ཇི་ལྟར་ལྟུང་བ་དང་བཅས་པ་ཉིད་ལ་དེ་བཞིན་དུ་ལྟུང་བའི་ཕྱིར་རྩོད་པ་ཞི་བར་བྱ་བའི་ཕྱིར་ཁས་བླང་པའི་བྱ་བ་དང༌། མངོན་སུམ་གྱིས་འདུལ་བ་དང༌། རྩྭ་བཀྲམ་པ་ལྟ་བུ་དག་ཀྱང་འཇུག་གོ །ཁས་ལེན་ཅིང་ཁྱད་དུ་གསོད་པ་ལ་དེའི་ངོ་བོ་ཉིད་ཚོལ་བ་དང་མཐུན་པ་ཡང་ངོ༌། །ཇི་ལྟར་རྣམ་པར་ངེས་པར་བྱ་བ་སྤོང་བ་དང༌། ལྟུང་བ་དང་བཅས་པ་འདི་གཉིས་ཀྱིས་མཐུན་པ་མི་སྦྱིན་པ་དེ་བཞིན་དུ་འགྱེད་པའི་ཕྱིར་རྩོད་པ་ཉེ་བར་ཞི་
བར་བྱེད་པའི་གང་མང་བ་བཙལ་བ་དང༌། མངོན་སུམ་གྱིས་འདུལ་བ་ཡང་འདིར་འཇུག་གོ །འདིར་གཞུང་ནི་བཙུན་པ་བཅོམ་ལྡན་འདས་ཀྱིས་རྩོད་པ་བཞི་པོ་གང་དག་གསུངས་པ་དང་རྩོད་བཞི་བ་བདུན་པོ་གང་དག་གསུངས་པ་དེ་དག་ལ། བཙུན་པ་དགེ་སློང་གིས་རྩོད་པ་བཞི་པོ་དག་རྩོད་པ་ཞི་བར་བགྱིད་པ་བདུན་པོ་གང་ཡང་རུང་བས་ཉེ་བར་ཞི་བར་བགྱི་བ་དང༌། ཉེ་བར་ཞི་བར་རུང་ངམ། ཉེ་བ་འཁོར་བྱ་བའི་ཕྱིར་རྩོད་པ་མ་གཏོགས་པ་མི་རུང་ངོ་ཞེས་གསུངས་པ་ཡིན་ནོ། །ཁ་སྐོང་བར་འོས་པ་མ་ཡིན་པ་ནི་དགེ་འདུན་གྱི་ཐ་སྙད་ལ་ཚོགས་པར་དབྱུང་བ་ཉིད་མ་ཡིན་ནོ་ཞེས་བྱ་བ་ནི། བསྙེན་པར་མ་རྫོགས་བ་དང༌། ཉམས་པ་ལ་སོགས་པ་གང་དགེ་འདུན་གྱི་ཁ་སྐོང་བར་འོས་པ་མ་ཡིན་པ་དེ་ནི་གཟུ་བོ་ལ་སོགས་པ་དགེ་འདུན་གྱི་ཐ་སྙད་ལ་ཡང་ཚོགས་པར་དབྱུང་བ་ཉིད་མ་ཡིན་ནོ། །གཞན་གྱི་དག་ལ་ནི་བསྙེན་པར་རྫོགས་པ་དང་བཅས་པ་རྣམས་ཀྱི་དབང་དུ་བྱའོ་ཞེས་བྱ་བ་ནི། བསྙེན་པར་མ་རྫོགས་པ་དགེ་ཚུལ་ལ་སོགས་པ་གཞན་གྱི་རྩོད་པ་དག་ལ་ནི་བསྙེན་པར་རྫོགས་པ་དང་བཅས་པ་རྣམས་ཀྱི་དབང་དུ་བྱ་སྟེ་དེ་དག་གིས་དེ་ཉེ་བར་ཞི་བར་བྱའོ། །བུད་མེད་རྣམས་ཀྱིས་ནི་སྐྱེས་པར་རིགས་པ་ཉིད་དོ་ཞེས་བྱ་བ་ནི། བུད་མེད་རྣམས་ཀྱི་རྩོད་པ་གང་ཡིན་པ་དེ་ནི་སྐྱེས་པ་རྣམས་ཀྱིས་ཉེ་བར་ཞི་བར་བྱ་བར་རིགས་པ་ཉིད་ཡིན་པའོ། །འདིར་གཞུང་ནི་དགེ་སློང་རྣམས་ཀྱི་རྩོད་པ་གང་ལགས་པ་དེ་དགེ་སློང་མ་རྣམས་ཀྱིས་སྤོང་དུ་རུང་ངམ། ཉེ་བ་འཁོར་མི་རུང་སྟེ། དགེ་སློང་རྣམས་ཀྱི་རྩོད་པ་ནི་དགེ་སློང་རྣམས་ཀྱིས་ཉེ་བར་ཞི་བར་བྱའོ། །དེ་བཞིན་དུ་དགེ་སློང་མ་རྣམས་ཀྱི་རྩོད་པ་ཡང་དགེ་སློང་རྣམས་ཀྱིས་ཉེ་བར་ཞི་བར་བྱའོ། །དེ་བཞིན་དུ་དགེ་སློང་མ་རྣམས་དང༌། དགེ་ཚུལ་རྣམས་དང༌། དགེ་ཚུལ་མ་རྣམས་ཀྱི་རྩོད་པ་ཡང་དགེ་སློང་རྣམས་ཀྱིས་ཉེ་བར་ཞི་བར་བྱའོ་ཞེས་གསུངས་པ་ཡིན་ནོ། །སྲོག་གམ་བསྙེན་པར་རྫོགས་པ་ལས་ཉམས་ན་ཉེ་བར་ཞི་བ་ཉིད་ཡིན་ནོ་ཞེས་བྱ་བ་ནི་སྲོག་ལས་ཉམས་སམ་བསྙེན་པར་རྫོགས་པ་ལས་ཉམས་ན་རྩོད་པ་ཉེ་བར་ཞི་བ་ཉིད་ཡིན་ནོ། །སྤང་བ་ཉིད་ནས་གཞན་གྱི་ཕྱོགས་ཉིད་ཀྱི་བར་དུ་གྱུར་ན་ཡང་ངོ་ཞེས་བྱ་བ་ནི། སྤང་བར་བྱ་བ་ཉིད་ནས་ཕྱོགས་ནས་ཕྱོགས་མ་ཡིན་པ་ཐ་དད་པར་གནས་པའི་བར་དུ་གྱུར་
ན་དེ་དག་ཐམས་ཅད་ལ་ཡང་རྩོད་པ་ཉེ་བར་ཞི་བ་ཉིད་ཡིན་པའོ། །གཞན་དུ་སོང་ངམ་ནད་ཀྱི་རྣམ་པ་ཡུན་རིང་པོས་བཏབ་ན་ཡང་ངོ་ཞེས་བྱ་བ་ཡང༌། རྩོད་པ་ཉེ་བར་ཞི་བ་ཉིད་ཡིན་པའོ། །གང་ཞིག་སྲོག་ལས་ཉམས་པ་ནས་ནད་ཀྱི་རྣམ་པ་ཡུན་རིང་པོས་བཏབ་པའི་བར་དུ་གྱུར་ན་རྩོད་པ་ཉེ་བར་ཞི་བ་ཉིད་ཡིན་ཞེ་ན། དེའི་ཕྱིར་དོན་སྦྱིན་པར་བྱེད་པའམ་མངོན་པར་བརྩོན་པའོ་ཞེས་སྨྲས་ཏེ། དོན་སྦྱིན་པར་བྱེད་པ་ནི་གླེང་བ་པོའོ། །མངོན་པར་བརྩོན་པ་ནི་གླེང་བར་བྱ་བ་སྟེ། དེ་གཉིས་གཉི་ག་འམ་གང་ཡང་རུང་བ་གཅིག་གོ །འདིར་ཉམས་པ་ལ་སོགས་པའི་གཞུང་ནི། བཙུན་པ་རྩོད་པ་བཞི་པོ་དག་ལས་རྩོད་པ་གང་ཡང་རུང་བ་བྱུང་ལ། རྩོད་པ་ཞི་བར་བགྱིད་པའི་ཆོས་བདུན་པོ་དག་ལས་རྩོད་པ་ཞི་བར་བགྱིད་པའི་ཚོས་གང་ཡང་རུང་བས་ཉེ་བར་ཞི་བར་མི་བགྱིད་ཅིང་ཉེ་བར་ཞི་བར་ཡང་བརྗོད་པར་བགྱི་བ་མཆིས་སམ། ཡོད་དེ་སྦྱིན་པར་བྱེད་པའི་དགེ་སློང་དུས་བྱེད་དམ། སྦྱིན་པའི་དགེ་སློང་དུས་བྱེད་དམ། སྦྱིན་པར་བྱེད་པའི་དགེ་སློང་ཁྱིམ་པ་ཉིད་དུ་དམ་འཆའ་འམ། དགེ་ཚུལ་ཉིད་དམ། དགེ་སློང་མ་སུན་ཕྱུང་བ་ཉིད་དམ། རྐུ་ཐབས་སུ་གནས་པ་ཉིད་དམ། མ་ནིང་ཉིད་དམ། མུ་སྟེགས་ཅན་ཉིད་དམ། མུ་སྟེགས་ཅན་ཞུགས་པ་ཉིད་དམ། མ་བསད་པ་ཉིད་དམ། ཕ་བསད་པ་ཉིད་དམ། དགྲ་བཅོམ་པ་བསད་པ་ཉིད་དམ། དགེ་འདུན་གྱི་དབྱེན་བྱས་པ་ཉིད་དམ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་ཉིད་དམ། གནས་པར་མི་བྱ་བ་ཉིད་དམ། ཐ་དད་དུ་གནས་པ་ཉིད་དུ་དམ་འཆའ་བར་བྱེད་དམ། དེ་བཞིན་དུ་སྦྱིན་པའི་དགེ་སློང་དེ་བདག་ཏུ་དམ་འཆའ་བར་བྱེད་དམ། སྦྱིན་པར་བྱེད་པའི་དགེ་སློང་ནད་ཀྱི་རྣམ་པ་ཡུན་རིང་པོས་ཐེབས་སམ། གཞན་དུ་སོང་ངམ། དེ་བཞིན་དུ་བྱིན་པའི་དགེ་སློང་དེ་ལྟར་གྱུར་ན་རྩོད་པ་དེ་ཉེ་བར་ཞི་བར་བརྗོད་པར་བྱའོ་ཞེས་བྱ་བ་གསུངས་པ་ཡིན་ནོ། །རྩོད་པའི་གཞི་ཞུ་བའི་སྐབས་སོ་ཞེས་བྱ་བ་དེ་ཞུ་བའི་སྐབས་ནས་བྱུང་བ་བཤད་ཟིན་ཏོ། །རྩོད་པའི་གཞི་རྫོགས་སོ་ཞེས་བྱ་བ་དེ་བཤད་ཟིན་ཏོ།། །།བམ་པོ་དྲུག་ཅུ་བརྒྱད་པ། ད་ནི་གནས་མལ་གྱི་གཞི་བསྡུ་བར་བྱ་སྟེ། དེ་ལ་དགེ་སློང་རྣམས་ཀྱིས་སུ་ལ་ནི་
ཕྱག་བྱ། སུ་ལ་ནི་ཕྱག་མི་བྱ་ཞེ་ན། ཇེ་དང་པོར་ཕྱག་བྱ་བ་དང༌། མི་བྱ་བ་བསྡུ་བའི་ཕྱིར་སོ་སོར་ཐར་པའི་སྡོམ་པས་མཆོག་ལ་རབ་ཏུ་བྱུང་བས་ཕྱག་བྱའོ་ཞེས་བྱ་བ་སྨྲས་ཏེ། སོ་སོར་ཐར་པའི་སྡོམ་པས་མཆོག་ཏུ་གྱུར་པ་དགེ་སློང་གང་ཡིན་པ་དེ་ལ་རབ་ཏུ་བྱུང་བ་དགེ་ཚུལ་གྱིས་ཕྱག་བྱ་བའོ། །སོ་སོར་ཐར་པའི་སྡོམ་པས་མཆོག་ཏུ་གྱུར་པ་དགེ་སློང་མ་ལ་ནི་དགེ་སློང་མ་དང་དགེ་ཚུལ་མས་ཕྱག་བྱའོ། །དགེ་སློང་མ་ལ་ནི་དགེ་ཚུལ་མས་ཕྱག་བྱའོ། །མཉམ་ན་རྒན་པ་ལའོ་ཞེས་བྱ་བ་ནི། སོ་སོར་ཐར་པའི་སྡོམ་པས་མཉམ་པ་ཡིན་ན་སོ་སོར་ཐར་པའི་སྡོམ་པ་དེ་ཉིད་ཀྱིས་རྒན་པ་དེ་ལ་གཞོན་པས་ཕྱག་བྱའོ། ན་ཚོད་ཀྱིས་ནི་མ་ཡིན་ནོ། །དེས་ན་དགེ་སློང་སོ་སོར་ཐར་པའི་སྡོམ་པས་མཉམ་པ་དག་ནི་སོ་སོར་ཐར་པའི་སྡོམ་པ་དེ་ཉིད་ཀྱིས་རྒན་པ་ལ་གཞོན་པས་ཕྱག་བྱའོ། །དགེ་སློང་མ་སོ་སོར་ཐར་པའི་སྡོམ་པས་མཉམ་པ་དག་ཀྱང་སོ་སོར་ཐར་པའི་སྡོམ་པ་དེ་ཉིད་ཀྱིས་རྒན་པ་དག་ལ་གཞོན་པས་ཕྱག་བྱའོ། །དགེ་སློབ་མ་སོ་སོར་ཐར་པའི་སྡོམ་པས་མཉམ་པ་དག་ཀྱང་སོ་སོར་ཐར་པའི་སྡོམ་པ་དེ་ཉིད་ཀྱིས་རྒན་པ་ལ་གཞོན་པས་ཕྱག་བྱའོ། །དགེ་ཚུལ་སོ་སོར་ཐར་པའི་སྡོམ་པས་མཉམ་པ་དག་ཀྱང་སོ་སོར་ཐར་པའི་སྡོམ་པ་དེ་ཉིད་ཀྱིས་རྒན་པ་ལ་གཞོན་པས་ཕྱག་བྱའོ། །དགེ་ཚུལ་མ་སོ་སོར་ཐར་པའི་སྡོམ་པས་མཉམ་བདག་ཀྱང་སོ་སོར་ཐར་པའི་སྡོམ་པ་དེ་ཉིད་ཀྱིས་རྒན་པ་ལ་གཞོན་པས་ཕྱག་བྱ་སྟེ། སྡོམ་པ་སྔར་བླངས་པ་ལ་ཕྱིས་བླངས་པས་ཕྱག་བྱའོ་ཞེས་བྱ་བའི་ཐ་ཚིག་གོ །མདོ་སྔ་མས་སོ་སོར་ཐར་པའི་སྡོམ་པས་མཆོག་ལ་རབ་ཏུ་བྱུང་བས་ཕྱག་བྱའོ་ཞེས་བསྟན་པ་ལ། དགེ་ཚུལ་ཕས་དགེ་སློབ་མ་དང༌། དགེ་སློང་མ་སོ་སོར་ཐར་པའི་སྡོམ་པས་མཆོག་ཡིན་པས། དགེ་ཚུལ་གྱིས་དགེ་སློང་མ་དང་དགེ་སློང་མ་ལ་ཕྱག་བྱ་བར་ཐལ་བར་འགྱུར་བ་དང༌། མདོ་འདིས་མཉམ་ན་རྒན་པ་ལའོ་ཞེས་བསྟན་པ་ལ་དགེ་སློང་དང་དགེ་སློང་མ་ཡང་སོ་སོར་ཐར་པའི་སྡོམ་པས་མཉམ་པ་ཡིན་པས། དགེ་སློང་མ་སོ་སོར་ཐར་པའི་སྡོམ་པས་རྒན་པ་ལ་དགེ་སློང་གིས་ཕྱག་བྱ་བར་ཐལ་བར་འགྱུར་བ་དང༌། དགེ་ཚུལ་དང༌། དགེ་ཚུལ་མལ་ཡང་སོ་སོར་ཐར་པའི་སྡོམ་པས་མཉམ་པ་ཡིན་པས། དགེ་ཚུལ་མ་སོ་སོར་ཐར་
པའི་སྡོམ་པས་རྒན་པ་ལ་དགེ་ཚུལ་གྱིས་ཕྱག་བྱ་བར་ཐལ་བར་འགྱུར་བདེ་བརྩལ་བའི་ཕྱིར་འདིར་མདོ་དེ་གཉིས་ཀྱིས་བྱེ་བྲག་བསྟན་པར་བྱ་སྟེ། དེའི་ཕྱིར་མཚན་ཐ་མི་དད་པ་ལའོ་ཞེས་བྱ་བ་སྨྲས་ཏེ། ཕོ་དང་མོའི་མཚན་དག་གིས་མཚན་མཐུན་པ་དག་ལ་ཆོ་ག་དེ་དག་རྣམ་པར་གཞག་གི་མཚན་མི་མཐུན་པ་དག་ལ་ནི་མ་ཡིན་ནོ། །དེས་ན་སོ་སོར་ཐར་པའི་སྡོམ་པས་རྒན་པ་ཐམས་ཅད་ལ་ཕྱག་བྱ་བ་མ་ཡིན་གྱི་མཚན་ཐ་མི་དད་པ་སོ་སོར་ཐར་པའི་སྡོམ་པས་རྒན་པ་ལ་ཕྱག་བྱའོ། །དེ་ལྟ་ན་ཇི་ལྟར་སྐྱེས་པས་བུད་མེད་ལ་ཕྱག་མི་བྱ་བ་དེ་བཞིན་དུ། བུད་མེད་ཀྱིས་ཀྱང་སྐྱེས་པ་ལ་ཕྱག་མི་བྱ་བར་ཐལ་བར་འགྱུར་ཏེ། དེས་ན་དགེ་ཚུལ་མས་ཀྱང་དགེ་ཚུལ་ལ་ཕྱག་མི་བྱ་བ་དང༌། དགེ་ཚུལ་མ་དང་དགེ་སློབ་མ་དང༌། དགེ་སློང་མས་ཀྱང་དགེ་སློང་ལ་ཕྱག་མི་བྱ་བར་འགྱུར་བ་བརྩལ་བའི་ཕྱིར། སྐྱེས་པ་མི་དམན་པ་ལ་བུད་མེད་ཀྱིས་སོ་ཞེས་བྱ་བ་སྨྲས་ཏེ། སྐྱེས་པ་སོ་སོར་ཐར་པའི་སྡོམ་པས་བུད་མེད་པས་མི་དམན་ན་གསར་བུ་ལ་ཡང་བུད་མེད་ཀྱིས་ཕྱག་བྱ་ན། དུས་མཉམ་པའམ་རྒན་པ་ལྟ་བུ་ལ་སྨོས་ཀྱང་ཅི་དགོས་ཏེ། དེས་ན་དགེ་ཚུལ་མས་ཀྱང་དགེ་ཚུལ་ལ་ཕྱག་བྱ་དགོས་ལ། དགེ་ཚུལ་མ་དང་དགེ་སློབ་མ་དང་དགེ་སློང་མས་ཀྱང་དགེ་སློང་ལ་ཕྱག་བྱ་དགོས་སོ། །དགེ་སློང་མ་དང༌། དགེ་སློང་མས་ནི་དགེ་ཚུལ་ལ་བཏུད་དེ་ཕྱག་བྱ་མི་དགོས་ལ། དགེ་ཚུལ་གྱིས་ཀྱང་དེ་གཉིས་ལ་བཏུད་དེ་ཕྱག་བྱ་མི་དགོས་སོ། །ཆོ་ག་དེ་དག་ཐམས་ཅད་ཀྱིས་དམིགས་ཀྱིས་བསལ་བ་བསྟན་པའི་ཕྱིར། ས་གཞན་ན་གནས་པ་དང་ཉམས་པ་དང་དགེ་སློང་མ་སུན་ཕྱུང་བ་དང༌། ཆོས་མ་ཡིན་པའི་ཕྱོགས་དང་མཐུན་པ་དང་ཐ་དད་པར་གནས་པ་དང༌། མཚམས་མེད་པ་བྱས་པ་དང༌། ཉལ་བ་དང་སྙོམས་པར་ཞུགས་པ་དང༌། བྲེལ་བ་དང༌། སེམས་གཞན་དུ་སོང་བ་དང༌། རྒྱབ་ཀྱིས་ཕྱོགས་པ་དང༌། ཁྱིམ་གཞན་ན་འདུག་པ་དང༌། ཟས་ཀྱི་གྲལ་ན་འདུག་པ་མ་གཏོགས་སོ་ཞེས་བྱ་བ་སྨྲས་ཏེ། ས་གཞན་ན་གནས་པ་ཞེས་བྱ་བ་ནི། སྤོ་བ་དང་གཞི་ནས་སྤོ་བ་དང་ཡང་གཞི་ནས་བསླང་སྟེ་སྤོ་བ་སྤྱོད་པ་དང༌། མགུ་བར་བྱ་བ་དང༌། གཞི་ནས་མགུ་བར་བྱ་བ་དང༌། ཡང་གཞི་ནས་བསླང་སྟེ་མགུ་བར་བྱ་བ་སྤྱོད་པ་དང༌། བསླབ་པ་
བྱིན་པ་དང༌། དེའི་ངོ་བོ་ཉིད་ཚོལ་བ་དང༌། མཐུན་པ་བྱིན་པ་དང༌། བསྡིགས་པ་དང༌། སྨད་པ་དང༌། བསྐྲད་པ་དང༌། ཕྱིར་འགྱེད་པ་དང༌། མ་མཐོང་བས་གནས་ནས་ཕྱུང་བ་དང༌། ཕྱིར་མི་འཆོས་པས་གནས་ནས་ཕྱུང་བ་དང༌། སྡིག་པ་ཅན་གྱི་ལྟ་བའི་རྣམ་པ་མི་གཏོང་བས་གནས་ནས་ཕྱུང་བ་ཞེས་བྱ་བ་ནན་ཐུར་བྱས་པ་དག་གོ །ཉམས་པ་ཞེས་བྱ་བ་ནི་གནས་པར་མི་བྱའོ། །དགེ་སློང་མ་སུན་ཕྱུང་བ་དང་མཚམས་མེད་པ་བྱས་པ་ཞེས་སྨོས་པས་ནི། མུ་སྟེགས་ཅན་ཞུགས་པ་དང༌། རྐུ་ཐབས་སུ་གནས་པ་དང༌། ཟམ་དང་མ་ནིང་ལ་སོགས་པ་སྡོམ་པའི་ཞིང་མ་ཡིན་པར་གྱུར་པ་དག་བསྡུས་སོ། །ཆོས་མ་ཡིན་པའི་ཕྱོགས་དང་མཐུན་པ་ཞེས་སྨོས་པ་ནི། ཐ་དད་པར་གནས་པའི་བྱེ་བྲག་གོ །ཆོས་མ་ཡིན་པའི་ཕྱོགས་དང་མཐུན་པའི་ཐ་དད་པར་གནས་པ་གང་ཡིན་པ་དེས་ནི། ཆོས་ཀྱི་ཕྱོགས་དང་མཐུན་པའི་ཐ་དད་པར་གནས་པ་ལ་ཕྱག་བྱ་བ་ཉིད་ཡིན་ནོ། །ཉལ་བ་ཞེས་བྱ་བ་ནི་གློས་ཕབ་སྟེ་ཉལ་བའོ། །སྙོམས་པར་ཞུགས་པ་ཞེས་བྱ་བ་ནི་ཏིང་ངེ་འཛིན་ལའོ། །བྲེལ་བ་ཞེས་བྱ་བ་ནི་བྱ་བ་རྗེས་སུ་བསྒྲུབ་པ་ལ་གཞོལ་བའོ། །སེམས་གཞན་དུ་སོང་བ་ཞེས་བྱ་བ་ནི། ཕྱག་འཚལ་བ་ལ་སེམས་གཏོད་པ་མི་སྦྱིན་པའོ། །རྒྱབ་ཀྱིས་ཕྱོགས་པར་ཞེས་བྱ་བ་ནི་མདུན་པར་བལྟ་བའོ། །ཁྱིམ་གཞན་ན་འདུག་པ་ཞེས་བྱ་བ་ནི་ཁྱིམ་པའི་ཁྱིམ་ན་འདུག་པའོ། །ཟས་ཀྱི་གྲལ་ན་འདུག་པ་ཞེས་བྱ་བ་ནི། ཟན་ཟ་བའི་གྲལ་ན་བཀོད་པའོ། །མ་གཏོགས་སོ་ཞེས་བྱ་བ་ནི་དེ་དག་ལ་དགེ་ཚུལ་དང༌། དགེ་ཚུལ་མ་དང༌། དགེ་སློབ་མ་དང། དགེ་སློང་མ་དང༌། དགེ་སློང་གང་གིས་ཀྱང་གཏུགས་ཏེ་ཕྱག་མི་བྱའོ། །ཁྱིམ་པས་རབ་ཏུ་བྱུང་བ་ལའོ་ཞེས་བྱ་བ་ནི། ཁྱིམ་པས་རབ་ཏུ་བྱུང་བ་མ་གཏོགས་པ་ཇི་སྐད་བསྟན་པ་དེ་དག་ལས་གཞན་པའི་རབ་ཏུ་བྱུང་བ་ཐམས་ཅད་ལ་ཕྱག་བྱའོ། །ཁྱིམ་གཞན་ན་ཡང་འདུག་པ་ཡང་མ་གཏོག་པར་མི་རིགས་ཏེ། ཁྱིམ་གཞན་ནི་ཁྱིམ་པ་རྣམས་ཀྱི་སྤྱོད་ཡུལ་ཡིན་པའི་ཕྱིར། རབ་ཏུ་བྱུང་བ་ཁྱིམ་གཞན་ན་འདུག་པ་དག་ལ་ཡང་ཁྱིམ་པས་ཕྱག་བྱ་དགོས་སོ། །དེ་ལྟར་ཡང་འདིར་གཞུང་ནི་ཁྱིམ་བདག་གི་ཆུང་མ་སྡེ་ཅན་མ་དད་པ་སྐྱེས་པས། གནས་ནས་ཕྱིར་ཕྱུང་སྟེ་བཅོམ་ལྡན་
འདས་ཀྱི་ཞབས་ལ་ཕྱག་བྱས་སོ་ཞེས་གྲགས་པ་ཡིན་ནོ། །མ་གཏོགས་པ་གཞན་ཐམས་ཅད་ལ་ནི་ཁྱིམ་པས་ཀྱང་ཕྱག་མི་བྱ་བར་རིགས་ཏེ། འདི་ལྟར་སྤོ་བ་ལ་སོགས་པ་སྤྱོད་པ་ནི་སྡིག་པ་ཆེན་པོ་དང་ལྡན་པ་ཡིན་པས་དེ་དག་ལ་ཡང་ཁྱིམ་པས་ཕྱག་མི་བྱ་བར་རིགས་ལ། ནན་ཐུར་བྱས་པ་དག་ཀྱང་སྤངས་པ་ཡིན་པའི་ཕྱིར་རོ། །འདིར་དེ་དག་གི་གཞུང་ནི་སངས་རྒྱས་བཅོམ་ལྡན་འདས་ལ། ཚེ་དང་ལྡན་པ་ཉེ་བ་འཁོར་གྱིས་ཞུས་པ། ཚེ་དང་ལྡན་པ་བཙུན་པ་ཕྱག་མི་བགྱི་བ་དུ་མཆིས། ཉེ་བ་འཁོར་སུམ་ཅུ་རྩ་གཉིས་ཏེ། སྡིག་པའི་ལས་བྱས་པ་དང༌། སྨད་པའི་ལས་བྱས་པ་དང༌། བསྐྲད་པའི་ལས་བྱས་པ་དང༌། ཕྱིར་འགྱེད་པའི་ལས་བྱས་པ་དང༌། མ་མཐོང་བས་གནས་ནས་ཕྱུང་བ་དང༌། ཕྱིར་མི་འཆོས་པས་གནས་ནས་ཕྱུང་བ་དང༌། སྡིག་པ་ཅན་གྱི་ལྟ་བའི་རྣམ་པ་མི་གཏོང་བས་གནས་ནས་ཕྱུང་བ་དང༌། སྤོ་བ་བྱེད་པ་དང༌། གཞི་ནས་སྤོ་བ་བྱེད་པ་དང༌། མགུ་བ་སྤྱོད་པ་དང༌། གཞི་ནས་མགུ་བ་སྤྱོད་པ་དང༌། བསླབ་པ་བྱིན་པ་དང༌། ཟ་མ་དང༌། མ་ནིང་དང༌། དགེ་སློང་མ་སུན་ཕྱུང་བ་དང༌། རྐུ་ཐབས་སུ་གནས་པ་དང༌། ཐ་དད་པར་གནས་པ་དང༌། གནས་པར་མི་བྱ་བ་དང༌། མ་བསད་པ་དང༌། ཕ་བསད་པ་དང༌། དགྲ་བཅོམ་པ་བསད་པ་དང༌། དགེ་འདུན་གྱི་དབྱེན་བྱས་པ་དང༌། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང༌། གཅེར་བུ་དང༌། གོས་གཅིག་པ་དང༌། ཉལ་བ་དང༌། སྙོམས་པར་ཞུགས་པ་དང༌། རྒྱབས་ཀྱིས་ཕྱོགས་པ་དང༌། སོ་ཤིང་ཟ་བ་དང༌། བཤད་པ་བྱེད་པ་དང༌། གཅི་བ་བྱེད་པ་དང༌། ཁྱིམ་གཞན་ན་འདུག་པའོ། །བཙུན་པ་ཕྱག་བགྱི་བ་དུ་མཆིས། ཉེ་བ་འཁོར་ལྔ་སྟེ། ཁྱིམ་པས་རབ་ཏུ་བྱུང་བ་ལ་དང༌། བསྙེན་པར་མ་རྫོགས་པས་བསྙེན་པར་རྫོགས་པ་ལ་དང༌། གཞོན་པས་རྒན་པ་ལ་དང༌། དགེ་སློང་མ་བསྙེན་པར་རྫོགས་ནས་ལོ་བརྒྱ་ལོན་པས། དགེ་སློང་དེ་རིང་བསྙེན་པར་རྫོགས་པ་ལ་དང༌། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ལྷ་དང་བཅས་པའི་འཇིག་རྟེན་གྱིས་ཕྱག་བྱའོ་ཞེས་གསུངས་པ་ཡིན་ནོ། །བྲེལ་བ་དང་སེམས་གཞན་དུ་སོང་བ་དང༌། ཟས་ཀྱི་གྲལ་ན་
འདུག་པ་དག་ནི་གཞུང་གཞན་ལས་བསྡུས་སོ། །ཐམས་ཅད་ཀྱིས་སངས་རྒྱས་ལའོ་ཞེས་བྱ་བ་ནི། ཁྱིམ་པ་ཡང་རུང་རབ་ཏུ་བྱུང་བ་ཡང་རུང༌། བུད་མེད་ཀྱང་རུང༌། སྐྱེས་པ་ཡང་རུང༌། རྒན་པ་ཡང་རུང༌། གཞོན་པ་ཡང་རུང་བ་ཐམས་ཅད་ཀྱིས་སངས་རྒྱས་བཅོམ་ལྡན་འདས་ལ་ཕྱག་བྱའོ། །གཙུག་ལག་ཁང་བྱ་བའོ་ཞེས་བྱ་བ་ནི། དགེ་སློང་གིས་གཙུག་ལག་ཁང་བྱ་བ་ལ་མི་རུང་བ་མེད་པའོ། །དེ་ལྟར་ཡང་འདིར་གཞུང་ནི་འདི་ལྟ་སྟེ། དགེ་སློང་ཀུན་དགའ་ར་བ་དེ་ཉིད་དུ་ཕྱོགས་བཞིའི་དགེ་སློང་གི་དགེ་འདུན་གྱི་ཕྱིར་གཙུག་ལག་ཁང་ཁ་སྲོ་བར་བྱེད་འདོད་དོ་ཞེས་གསུངས་པ་ཡིན་ནོ། །ངོས་གཅིག་གི་དབུས་སུ་དྲི་གཙང་ཁང་བྱ་བ་ཉིད་དོ་ཞེས་བྱ་བ་ལ། འདིར་ངོས་ཞེས་བྱ་བ་ནི་ཕྱོགས་ཏེ་ཤར་ལ་སོགས་པའི་ཕྱོགས་གཅིག་གི་དབུས་སུ་དྲི་གཙང་ཁང་བྱ་བ་ཉིད་ཡིན་ནོ། །དེའི་མདུན་དུ་སྒོ་ཁང་ངོ་ཞེས་བྱ་བ་ནི། དྲི་གཙང་ཁད་དེའི་མདུན་གྱི་བྱང་གཏད་ཀྱི་ངོས་སྒོ་གང་བརྩིག་པར་བྱའོ། །གྲུ་བཞི་བཟང་བ་ཉིད་དོ་ཞེས་བྱ་བ་ནི་གཙུག་ལག་ཁང་གི་དབྱིབས་ནི་གྲུ་བཞི་བཟང་བ་ཉིད་དེ། རྣམ་པ་གཞན་ཡང་བཀག་པ་ནི་མེད་པར་ཤེས་པར་བྱའོ། །ཁྱམས་གསུམ་པ་ཡང་ངོ་ཞེས་བྱ་བ་ཡང༌། གྲུ་བཞི་བཟང་ངོ་ཞེས་བྱ་བའི་རྗེས་སུ་སྦྱར་ཏེ། གྲུ་བཞི་ལ་ངོས་གསུམ་ནས་ཁྱམས་བཏགས་པ་བཟང་ངོ༌། །འདིར་གཞུང་ནི་བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་རྗེས་སུ་གནང་གི་བྱེད་དུ་ཆུག་ཤིག །དེ་ཇི་ལྟར་བྱེད་དུ་གཞུག་པ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་བ། གལ་ཏེ་གནས་ཁང་གསུམ་པ་བྱེད་དུ་འཇུག་ན་དབུས་སུ་དྲི་གཙང་ཁང་དུ་གཞུག་ཅིང་བློ་གཉིས་སུ་གནས་ཁང་གཉིས་སོ། །ཁྱམས་གསུམ་པ་ལ་ནི་དེ་བཞིན་དུ་གནས་ཁང་དགུ་དག་གོ །ཁྱམས་བཞི་པ་ལ་ནི་དབུས་སུ་སྒོ་གང་གི་བྱང་གཏད་དུ་དྲི་གཙང་ཁང་ངོ༌། །སྒོ་གང་གི་ངོས་གཉིས་སུ་གནས་ཁང་གཉིས་སོ་ཞེས་གསུངས་པ་ཡིན་ནོ། །མནོད་པར་བྱའོ་ཞེས་བྱ་བ་ནི་གཙུག་ལག་ཁང་ཞེས་བྱ་བར་སྦྱར་ཏེ། འདིའི་དོན་གྱིས་དེའི་ས་གཞི་ཉེན་ཀོར་དང་བཅས་པ་མནོད་པར་རིག་པར་བྱའོ། །གཙུག་ལག་ཁང་དུ་གནས་པར་བྱའོ་ཞེས་བྱ་བ་ནི། གཙུག་ལག་ཁང་བྱའོ་ཞེས་བྱ་བ་དང་མནོད་པར་བྱའོ་ཞེས་སྨོས་པ་དེ་ཉིད་ཀྱིས་གནས་
པར་བྱ་བ་མ་བསྡུས་ཏེ། དེ་གཉིས་ཀྱིས་གཞན་གྱི་དོན་དུ་བྱ་བ་དང༌། ནོད་པར་བསྟན་པ་ཡང་སྲིད་པས་འདི་ནི་བདག་ཉིད་གཙུག་ལག་ཁང་དུ་གནས་པར་རྗེས་སུ་གནང་བ་བསྟན་ཏོ། །གཞན་དག་དགེ་འདུན་གྱི་གཞིར་དགེ་འདུན་གྱི་ཕྱིར་རམ་གང་ཟག་དགེ་སློང་གི་ཕྱིར་གནས་ཀྱི་གཞི་བྱེད་པ་རྗེས་སུ་གནང་བར་བྱའོ་ཞེས་བྱ་བ་ནི། དགེ་འདུན་དུ་གྱུར་པའི་དགེ་སློང་དག་གིས་སོ། །གལ་ཏེ་སྦྱིན་བདག་ཡོད་ན་དེས་རྗེས་སུ་གནང་ནའོ་ཞེས་བྱ་བ་ནི། གལ་ཏེ་དགེ་འདུན་གྱི་གཞི་དེ་ལ་སྦྱིན་བདག་ཡོད་ན་དེས་རྗེས་སུ་གནང་ན་དགེ་འདུན་དུ་གྱུར་པའི་དགེ་སློང་དག་གིས་གཞན་དག་དགེ་འདུན་གྱི་གཞིར་དགེ་འདུན་གྱི་ཕྱིར་རམ། གང་ཟག་དགེ་སློང་གི་ཕྱིར་གནས་ཀྱི་གཞི་བྱེད་པ་རྗེས་སུ་གནང་བར་བྱའོ། །གྲོང་ཁྱེར་གྱི་ཕྱི་རོལ་ལམ་ནང་དུ་བསྟི་བའི་གནས་དག་རུང་ངོ་ཞེས་བྱ་བ་ནི། གྲོང་ཁྱེར་གྱི་ནང་ངམ་ཕྱི་རོལ་གང་དུ་དགེ་སློང་དག་བསོད་སྙོམ་ལ་སོགས་པའི་དོན་དུ་འཇུག་པ་རྣམས་ཀྱི་ཚ་བ་དང༌། ངལ་བ་ལ་སོགས་པ་བསལ་བའི་ཕྱིར། བསྟི་བའི་གནས་ཕྱིར་འོང་བའི་གནས་ཞེས་བྱ་བ་དེ་བྱེད་དུ་གཞུག་ཏུ་རུང་བའོ། །འདིར་གཞུང་ནི་གལ་ཏེ་བཅོམ་ལྡན་འདས་ཀྱིས་རྗེས་སུ་གནང་ན། བདག་གི་གྲོང་ཁྱེར་གྱི་སླད་རོལ་དུ་བསྟི་བའི་གནས་བགྱིད་དུ་སྩལ་ཏོ་ཞེས་བྱ་བ་ནས། ཁྱིམ་བདག་རྗེས་སུ་གནང་གིས་རྩིགས་ཤིག་ཅེས་བྱ་བའི་བར་དུ་གསུངས་པ་ཡིན་ནོ། །འདིར་གྲོང་ཁྱེར་གྱི་ཕྱི་རོལ་དུ་ཞེས་གསུངས་པ་ནི། བྱུང་བའི་དབང་གིས་སྨོས་པ་ཡིན་གྱི། གྲོང་ཁྱེར་གྱི་ནང་དུ་ཡང་འགལ་བ་མེད་པས་འདིར་གཉི་ག་མདོར་བསྡུས་སོ། །རང་གི་ཁྲོན་པར་བར་དུ་གཅོད་པའི་ཕྱིར་རྩིག་གུ་བྱ་བས་ཀུན་དུ་ཆགས་པའི་ཤེས་པས་བསལ་བར་བྱའོ་ཞེས་བྱ་བ་ནི། རང་གི་ཁྲོན་པ་རང་ཉིད་ཆུ་ཆུ་བའི་ཚེ། བུད་མེད་གཞན་ཡང་ཆུ་ཆུར་འོང་བ་ན། བུད་མེད་ལ་ཀུན་དུ་ཆགས་པའི་སེམས་སྐྱེད་པ་གཅིག་གིས་གཅིག་མི་མཐོང་བར་བར་དུ་གཅད་པའི་ཕྱིར་རྩིག་གུ་བྱ་བས་བུད་མེད་ལ་ལྟ་ཞིང་ཀུན་དུ་ཆགས་པའི་ཤེས་པ་སྐྱེ་བ་བསལ་བར་བྱ་སྟེ། གང་གི་ཚེ་བུད་མེད་ཆུའི་དོན་དུ་དེར་འོང་བ་ན་དེ་མཐོང་བས་འདོད་ཆགས་ཀྱི་ཤེས་པ་སྐྱེ་ན་རྩིག་པས་བར་དུ་བཅད་ན། ཉེས་པ་དེ་སྐྱེ་བར་མི་འགྱུར་རོ། །སྙིམ་པ་བཀང་སྟེ་བླུད་པས་བུད་མེད་རྗེས་སུ་
བཟུང་བར་བྱ་ཞིང་ཆུའི་རྒྱུན་མི་ཆད་པར་བླུགས་པས་མི་བྱའོ་ཞེས་བྱ་བ་ནི། བུད་མེད་ཀྱིས་ཆུ་སྙིམ་པ་གང་འཐུངས་ཟིན་ནས་སྙིམ་པ་གཉིས་པ་དགང་ཞིང་བླུད་པར་བྱའི། སྙིམ་པ་ནས་འཐུང་བཞིན་དུ་ཆུའི་རྒྱུན་ཕྱི་མ་ཡང་སྙིམ་པར་རྒྱུན་མི་འཆད་པར་བླུགས་པར་མི་བྱའོ་ཞེས་བྱ་བའི་ཐ་ཚིག་གོ །འདི་ནི་བུད་མེད་དགེ་སློང་ལ་ཆགས་པ་ཆུས་བརྣངས་ཏེ་ཤི་བར་བྱུང་བའི་མཐའ་ལས་བཅས་པ་ཡིན་ནོ། །དེའི་དུས་ཉིད་ཀྱི་དབྱར་གྱི་ནང་དུ་འོངས་པ་ནི་རྙེད་པ་དབང་ངོ་ཞེས་བྱ་བ་ནི། དབྱར་གྱི་རྙེད་པ་དེའི་དུས་ཉིད་ཀྱི་ཚེ་དབྱར་གྱི་ནང་དུ་འོངས་ཤིང་ཞག་བཞི་བཅུ་རྩ་དྲུག་ལས་ལྷག་པར་མཚམས་དེའི་ནང་དུ་གནས་ན། དབྱར་གནས་པར་ཁས་མ་བླངས་ཀྱང་རུང་དབྱར་རལ་ཡང་རུང་སྟེ། དབྱར་གྱི་རྙེད་པའི་སྐལ་བ་དབང་བའོ། །འདིར་རྙེད་པ་དབང་བའི་རྒྱུ་ནི་གནས་པ་ཡིན་གྱི། གནས་པར་ཁས་བླངས་པ་ནི་མ་ཡིན་ཏེ། གནས་པར་ཁས་མ་བླངས་ཀྱང་ཡུན་རིང་དུ་གནས་ན་ཇི་ལྟར་གནས་ཀྱང་རུང་སྟེ་རྙེད་པ་དབང་ངོ༌། །ཟ་ཞིང་རྙེད་པ་མ་བྱིན་པ་ལ་ནི་ལས་མི་རིགས་སོ་ཞེས་བྱ་བ་ནི། ཟན་ཙམ་གྱིས་འཚོ་ཞིང་རྙེད་པ་མ་བྱིན་པ་ནི། མཚམས་དེའི་དགེ་འདུན་གྱི་ལས་སུ་བསྐོ་བར་མི་རིགས་ཏེ་དེ་ལས་སུ་བསྐོ་བར་མི་བྱའོ། །འདི་ནི་དབྱར་གྱི་ནང་དུ་འོངས་པ་དག་གི་དབང་དུ་བྱས་ཏེ་གསུངས་པ་ཡིན་ནོ། །འདིར་གཞུང་ནི་དགེ་སློང་དེ་དག་གིས་རྙེད་པ་མ་ཐོབ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་ལས་སུ་བསྐོས་པ་བྱེད་ན་ནི་རྙེད་པ་ཡང་སྦྱིན་པར་བྱའོ། །ཇི་སྟེ་མི་བྱེད་ན་ནི་ཟན་ལ་ལྟོས་པ་ཙམ་གྱིས་གནས་པར་བྱ་སྟེ་ལས་དང་རྙེད་པ་ཡང་ངོ་ཞེས་གསུངས་པ་དང༌། གཞུང་གཞན་ལས་དགེ་སློང་དག་ཟས་ཀྱི་སྙེད་པ་དེ་དག་མི་ནོད་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་ལ་ཟས་ཀྱི་རྙེད་པ་སྦྱིན་པར་བྱའོ་ཞེས་གསུངས་པ་དེ་དག་འདིར་བསྡུས་པ་ཡིན་ནོ། །ལས་སུ་ནི་གཞོན་རིམས་ནས་མཐར་གྱིས་བསྐོའོ་ཞེས་བྱ་བ་ནི། ལས་ནི་གཞོན་རིམས་ནས་མཐར་གྱིས་བྱའོ། །རྙེད་པ་མི་འཐོབ་པ་ལ་ཟན་སྦྱིན་པར་བྱ་བ་ཉིད་དོ་ཞེས་བྱ་བ་ནི། ལས་མི་བྱེད་པས་རྙེད་པ་མི་འཐོབ་པ་ལ་ཟས་ནི་སྦྱིན་པར་བྱ་བ་ཉིད་ཡིན་པའོ། །གཞན་གྱི་རྙེད་པ་ལས་འདུ་བར་མི་བྱའོ་
ཞེས་བྱ་བ་ནི་དགེ་སློང་གཞན་གྱི་རྙེད་པའི་དུས་སུ་དགེ་སློང་གཞན་མ་གྲོན་དུ་མ་བོས་པས་དེར་བློ་སྔོན་དུ་བཏང་སྟེ་འདུ་བར་མི་བྱའོ། །དེའི་སྔོན་དུ་མ་སོང་བ་དྲོལ་བབ་ནས་གཙུག་ལག་ཁང་གཞན་དུ་ཟ་བ་ལ་ནི་ཉེས་པ་མེད་དོ་ཞེས་བྱ་བ་ནི། གལ་ཏེ་ཟན་གྱི་དོན་ཁོ་ནར་དེར་སོང་བ་མ་ཡིན་པ་ལ་གཙུག་ལག་ཁང་གཞན་དུ་སོང་ནས་དྲོ་ལ་བབ་སྟེ་དེར་ཟན་ཟོས་པ་ལ་ནི་ཉེས་པ་མེད་པའོ། །མུ་གེའི་ཚེ་རང་གི་མ་ཁྱེར་བ་ལ་ཡང་ངོ་ཞེས་བྱ་བ་ནི། མུ་གེའི་དུས་ཀྱི་ཚེ་རང་གི་གཙུག་ལག་ཁང་ནས་བརྒྱགས་མ་ཁྱེར་བར་གཙུག་ལག་ཁང་གཞན་དུ་ཟན་ཟོས་ན་བློ་སྔོན་དུ་བཏང་ཡང་ཉེས་པ་མེད་པའོ། །དགེ་སློང་གི་ཚོད་ཉིད་པས་ལྷག་པ་ཉིད་ལ་བླངས་པ་ཡང་ངོ་ཞེས་བྱ་བ་ནི། གཙུག་ལག་ཁང་གཞན་ན་དགེ་སློང་ཇི་སྙེད་འཁོད་པའི་ཟས་ཀྱི་ཚོད་ལས་ལྷག་པའི་མཐེབ་ཡོད་པ་ཉིད་ཡིན་ན། ཟས་ཀྱི་ཆེད་དུ་དེར་སོང་སྟེ་ཟས་བླངས་ན་ཡང་ཉེས་པ་མེད་དོ། །གཙུག་ལག་ཁང་ཡལ་བར་མི་དོར་རོ་ཞེས་བྱ་བ་ནི། དགེ་འདུན་དུ་གྱུར་པའི་དགེ་སློང་དག་གམ་གང་ཟག་གིས་ཀྱང་ངོ༌། །ཕྱིར་བཅོས་པའི་ཕྱིར་སྦྱིན་བདག་སྤྲོ་བར་བྱའོ་ཞེས་བྱ་བ་ནི། བྱེ་བྲག་ཏུ་མ་སྨོས་པས་གནས་པའི་གཞི་ཉི་ཚེར་མ་ཟད་ཀྱི། དགེ་འདུན་གྱི་གཙུག་ལག་ཁང་ཐམས་ཅད་ཀྱང་ངོ༌། །མ་གྲུབ་ན་དགེ་འདུན་གྱི་ལས་ཇི་ཙམ་གྱི་ནུས་པ་ངེས་པར་སྦྱར་རོ་ཞེས་བྱ་བ་ནི། སྦྱིན་བདག་མ་གྲུབ་ན་ཕྱིར་བཅོས་པའི་ཕྱིར་དགེ་འདུན་གྱི་རྫས་ལས་ཇི་ཙམ་གྱིས་ཆོག་པས་ཕྱིར་བཅོས་པར་བྱའོ། །རང་གིས་ཀྱང་ཕྱིར་བཅོས་པར་བྱའོ་ཞེས་བྱ་བ་ནི། ལག་གི་ལས་ཀྱི་ཚུལ་གྱིས་ཅི་ནུས་པས་ཀྱང་ངོ༌། །རྙེད་པ་ནོད་པས་གཙུག་ལག་ཁང་གི་བྱི་དོར་བྱའོ་ཞེས་བྱ་བ་ནི། གཙུག་ལག་ཁང་དེ་ནས་གང་རྙེད་པ་ནོད་པ་དེས་ལས་དེ་བྱ་བའོ། །དད་པའི་རྙེད་པ་ནི་གཙུག་ལག་ཁང་ཉིད་ཀྱི་མ་ཡིན་ནོ་ཞེས་བྱ་བ་ནི། དད་པའི་རྒྱུ་ལས་བྱུང་བའི་རྙེད་པ་གང་ཡིན་པ་སྦྱིན་བདག་དད་པས་དུས་ངེས་པ་མེད་པར་གང་ཟག་འགའ་ཞིག་ལ་འབུལ་བར་བྱེད་པ་དེ་ནི་གཙུག་ལག་ཁང་ཉིད་ཀྱི་རྙེད་པ་མ་ཡིན་ནོ། །གཙུག་ལག་ཁང་ནས་སྒོ་བཅད་དེ་འགྲོ་བར་བྱའོ་ཞེས་བྱ་བ་ནི། གཙུག་ལག་ཁང་ནས་གཞན་དུ་འགྲོ་བའི་ཚེ་སྒོ་བཅད་
དེ་འགྲོ་བར་བྱའོ། །སྲུང་མ་ཡང་བཞག་སྟེའོ་ཞེས་བྱ་བ་ནི་གཙུག་ལག་ཁང་གི་སྟེ། གཙུག་ལག་ཁང་གི་སྲུང་མ་ཡང་གཞག་སྟེ་གཞན་དུ་འགྲོ་བར་བྱ་བའོ། །དེ་ལས་ཟན་མེད་ན་སྦྱིན་ནོ་ཞེས་བྱ་བ་ནི། གལ་ཏེ་གཙུག་ལག་ཁང་གི་སྲུང་མ་དེ་ལ་ཟན་མེད་ན་སྦྱིན་པར་བྱའོ། །དེས་ཆོམ་རྐུན་པའི་རང་དབང་ཉིད་མེད་པར་ངེས་པར་མི་ཤེས་པར་སྒོ་དབྱེ་བར་མི་བྱའོ་ཞེས་བྱ་བ་ནི་གཙུག་ལག་ཁང་གི་སྲུང་མ་དེ་གཞན་དག་ཕྱི་རོལ་ནས་གཙུག་ལག་ཁང་གི་སྒོ་ཕྱེ་ཤིག་ཅེས་ཟེར་ན། ཆོམ་རྐུན་པའི་རང་དབང་ཉིད་མེད་པར་ངེས་པར་མི་ཤེས་པར་སྒོ་དབྱེ་བར་མི་བྱའོ། །འདིར་ངེས་པར་ཤེས་པར་བྱ་བའི་ཐབས་གང་ཡིན་ཞེ་ན་དེའི་ཕྱིར། ཁང་སྟེང་དུ་འཛེགས་ཏེ་བལྟ་བ་དང་ཁྱོད་རིམས་ཀྱིས་མ་བཏབ་བམ་ཞེས་བརྡ་སྐད་བརྗོད་པ་ནི་འདིར་ཐབས་ཡིན་ནོ་ཞེས་བྱ་བ་སྨྲས་ཏེ། ཁང་སྟེང་དུ་འཛེགས་ཏེ་བལྟ་བ་ཡང་ཐབས་ཡིན་ནོ། །ཁྱོད་རིམས་ཀྱིས་མ་བཏབ་བམ་ཞེས་བརྡ་སྐད་བརྗོད་ཅིང་དྲི་བར་བྱ་བ་ཡང་ཐབས་ཡིན་ནོ། །གནས་དང་མིང་དང་ཕ་མ་ལ་སོགས་པ་སོ་སོར་ཤེས་པར་བྱེད་དུ་གཞུག་པ་ཡང་ངོ་ཞེས་བྱ་བ་ཡང་ཐབས་ཡིན་ཏེ་ཁྱོད་གནས་གང་ན་འདུག་པ་ཞིག །ཁྱོད་ཀྱི་མིང་ཅི་ཁྱོད་ཀྱི་ཕ་མ་གང་ཡིན་ཞེས་བྱ་བ་ལ་སོགས་པ་དྲི་ཞིང་དེ་ལན་འདེབས་སུ་གཞུག་པ་ཡང་ཐབས་ཡིན་པར་ཤེས་པར་བྱའོ། །ཡིད་མི་ཆེས་ཤིང་འཇིགས་པ་དང་བཅས་པ་ཉིད་ལ་སྒོ་དབྱེ་བར་མི་བྱའོ་ཞེས་བྱ་བ་ནི། གང་ཟག་ཡིད་མི་ཆེས་ཤིང་འཇིགས་པ་དང་བཅས་པ་དེ་ཉིད་ལ་གཙུག་ལག་ཁང་གི་སྒོ་དབྱེ་བར་མི་བྱའོ། །དགོན་པ་པས་ཁྱི་བཅང་བར་བྱའོ། ཞེས་བྱ་བ་ནི། དགེ་སློང་དགོན་པ་བས་བསྲེལ་བྱ་བའི་ཕྱིར་རོ། །དེ་ནས་ནང་པར་སྔར་ལངས་མ་ཐག་ཁོ་ནར་གཙུག་ལག་ཁང་དང་མཆོད་རྟེན་གྱི་འཁོར་ས་བལྟ་བར་བྱའོ་ཞེས་བྱ་བ་ནི། ཁྱི་འཆང་བའི་གང་ཟག་དེས་ནང་པར་སྔར་ལངས་མ་ཐག་ཁོ་ནར་ཞེས་བྱ་བ་ནི། བྱ་བ་གཞན་དག་མ་བྱས་པའི་མདུན་རོལ་དུ་གཙུག་ལག་ཁང་དང་མཆོད་རྟེན་གྱི་འཁོར་ས་དག་ཁྱིས་སྨེ་བ་ལ་སོགས་པར་མ་བྱས་སམ་ཞེས་བལྟ་བར་བྱའོ། །གལ་ཏེ་དེས་བཤད་པ་བྱས་ན་དོར་བར་བྱ་ཞིང་གལ་ཏེ་གཅི་བ་བྱས་ན་ཕྱི་བར་བྱ། གལ་ཏེ་སྡེར་མོ་དག་གིས་བྲད་ན་མཉམ་པར་བྱའོ་ཞེས་བྱ་བ་ནི། གལ་ཏེ་ཁྱི་དེས་
གཙུག་ལག་ཁང་དང་མཆོད་རྟེན་གྱི་འཁོར་ས་དག་དེ་ལྟར་བྱས་ན་ཁྱི་འཆང་བའི་དགེ་སློང་དེས་དེ་ལྟར་བྱའོ། །དེ་དག་གི་གནས་དག་ཏུ་དཀྱིལ་འཁོར་བྱའོ་ཞེས་བྱ་བ་ནི། བཤང་བ་ལ་སོགས་པ་དེ་དག་གི་གནས་དག་ཏུ་དཀྱིལ་འཁོར་བྱའོ། །དེ་ཇི་ལྟར་གསོ་བར་བྱ་ཞེ་ན་དེའི་ཕྱིར་དེ་ལ་ལྷུང་བཟེད་ཀྱི་ལྷག་རོལ་སྦྱིན་ནོ་ཞེས་བྱ་བ་སྨྲས་ཏེ། ཁྱི་དེ་ལའོ། །གང་དུ་དེ་སྦྱིན་པ་བྱ་ཞེ་ན། དེའི་ཕྱིར་མཆོད་རྟེན་དང་གཙུག་ལག་ཁང་གི་ཉེན་ཀོར་གྱི་ཕྱི་རོལ་དུའོ་ཞེས་བྱ་བ་སྨྲས་ཏེ། མཆོད་རྟེན་དང་གཙུག་ལག་ཁང་དང༌། དེ་ཉིད་ཀྱི་ཉེན་ཀོར་གྱི་ཕྱི་རོལ་དུའོ། །སྤྱོད་ལམ་ཅི་འདོད་པས་ལུང་དཔོག་གོ་ཞེས་བྱ་བ་ནི། མཁན་པོ་དང་སློབ་དཔོན་གྱིས་སློབ་མ་དང༌། ཉེ་གནས་ལ་ཀླག་པའི་ལུང་དཔོག་པ་ནི་སྤྱོད་ལམ་བཞི་པོ་དག་ལས་ཅི་འདོད་པས་འབོགས་ན་ཡང་དེ་ལ་ཉེས་པ་མེད་པའོ། །གསར་བུས་མནོད་པའི་ཕྱིར་ནི་ཁམས་སྙོམས་པ་ཉིད་དྲིས་ཏེ་ཕྱག་བྱ་བ་སྔར་བཏང་བའི་སྤྱོད་ལམ་བསྟེན་པར་བྱའོ་ཞེས་བྱ་བ་ནི། གསར་བུས་བླ་མ་ལས་ཀླག་པའི་ལུང་མནོད་པའི་ཕྱིར་ནི། སྔར་ཕྱག་བྱས་ཏེ་བསྙུན་གསོལ་ནས་བྱ་བའི་སྤྱོད་ལམ་བསྟེན་པར་བྱའོ། །རྒན་པས་ནི་ཕྱག་མི་བྱ་བར་བསྙུན་གསོལ་ནས་སོ། །ཐལ་མོ་བསྣོལ་ཏེ་བཅད་དོ་ཞེས་བྱ་བ་ནི། ལག་པ་གཉིས་ཀྱི་ཐལ་མོ་བསྣོལ་ཏེ་བཅང་བའི་སྤྱོད་ལམ་བསྟེན་པར་བྱ་བའོ། །ལུས་དང་སེམས་བཏུང་ངོ་ཞེས་བྱ་བ་ནི། ལུས་འདུད་པ་དང༌། སེམས་འདུད་པར་བྱ་སྟེ། ང་རྒྱལ་གྱིས་ཁེངས་པ་སྤྲད་པའི་ཡན་ལག་ཀྱང་སེམས་དམའ་བ་ཉིད་ཡིན་ལ་གུས་པ་དང་བཅས་པ་ཉིད་ཀྱང་སེམས་དམའ་བ་ཉིད་ཡིན་ནོ། །དྲང་པོར་རོ་ཞེས་བྱ་བ་ནི། གྱ་གྱུ་མེད་པ་དང་སྒྱུ་དང་གཡོ་མེད་པར་བྱའོ། །ལུང་འབོགས་པར་བྱེད་པ་གནས་སྐབས་ཇི་ལྟ་བུ་ལ་སྤྱོད་ལམ་ཇི་ལྟ་བུ་བསྟེན་པར་བྱ་ཞེ་ན། དེའི་ཕྱིར་འཆགས་པ་ན་གོམ་པ་བསྲིབས་བཅག་པའོ་ཞེས་བྱ་བ་སྨྲས་ཏེ། ལུང་འབོགས་པར་བྱེད་སས་འཆག་པ་ན་ལུང་ནོད་པར་བྱེད་པས། གོམ་པ་ཕྱིར་བསྲིབས་བཅག་པའི་སྤྱོད་ལམ་བསྟེན་པར་བྱའོ། །འགྲེང་བ་ན་འགྲེང་བའོ་ཞེས་བྱ་བ་ནི། ལུང་འབོགས་པར་བྱེད་པ་འགྲེང་བ་ན་ལུང་ནོད་པར་བྱེད་
པས་ཀྱང་འགྲེང་བའི་སྤྱོད་ལམ་བསྟེན་པར་བྱའོ། །འདུག་པ་དང་ཉལ་བ་ན་འདུག་པའིའོ་ཞེས་བྱ་བ་ནི། ལུང་འབོགས་པར་བྱེད་པ་འདུག་པ་དང་ཉལ་བ་ན་ལུང་ནོད་པར་བྱེད་བས་འདུག་པའི་སྤྱོད་ལམ་བསྟེན་པར་བྱ་བའོ། །གང་དུ་འདུག་པའི་སྤྱོད་ལམ་བསྟེན་པར་བྱ་ཞེ་ན་དེའི་ཕྱིར། སྟན་ཆེས་དམའ་བ་ལའོ་ཞེས་བྱ་བ་སྨྲས་ཏེ། འདིར་ཆེས་རྒན་པས་ནི་རྗེས་སུ་གནང་བ་ལ་མི་ལྟོས་པ་ཉིད་ཀྱིས་རང་འདུག་པར་བྱའོ། །གསར་བུས་ནི་རྗེས་སུ་གནང་བ་ལྟོས་ཏེ་འདུག་པར་བྱ་བ་བསྟན་པའི་ཕྱིར། གསར་བུས་ནི་བསྒོ་ནའོ་ཞེས་བྱ་བ་སྨྲས་ཏེ། ལུང་འབོགས་པར་བྱེད་པས་བསྒོ་ཞིང་རྗེས་སུ་གནང་ན་འདུག་པར་བྱའོ། །མ་བསྒོ་བའི་ཆོ་ག་བསྟན་པའི་ཕྱིར་མ་བསྒོ་ན་ཙོག་པུས་སོ་ཞེས་བྱ་བ་སྨྲས་ཏེ། འདུག་པ་བསྟན་པར་བྱའོ་ཞེས་བྱ་བར་སྦྱར་རོ། །མནོད་པར་བྱ་བ་མང་བ་ཉིད་ན་ཞུ་བར་བྱའོ་ཞེས་བྱ་བ་ནི། ལུང་མནོད་པར་བྱ་བའི་གཞུང་མང་བ་ཉིད་ཡིན་ན། འདུག་པའི་ཕྱིར་ལུང་འབོགས་པར་བྱེད་པ་ལ་ཞུ་བར་བྱའོ། །འདིར་གཞུང་ནི། གལ་ཏེ་གསར་བུ་ཡིན་ལ་མང་དུ་མནོད་ན་སློབ་དཔོན་ལ་ཞུ་བ་སྟེ་སྟན་ཆེས་དམའ་བ་ལ་འདུག་ནས་ལུང་མནོད་པར་བྱའོ། །ཇི་སྟེ་ལུང་མནོད་པ་ནི་ཙོག་པུས་འདུག་སྟེའོ་ཞེས་གསུངས་པ་ཡིན་ནོ། །ཐོས་པའི་ཉེན་ཀོར་མ་གཏོགས་པ་སྣང་བའི་ཉེན་ཀོར་དུ་འདུག་སྟེ་ཁ་དོན་བྱའོ་ཞེས་བྱ་བ་ནི་ལུང་འབོགས་པར་བྱེད་པའོ། །གདམས་ངག་མཐའ་གཅིག་ཏུ་སོང་སྟེ་བསྒྲུབ་པར་བྱའོ་།ཞེས་བྱ་བ་ནི། བསྒོམ་པའི་གདམས་ངག་གོ །ལུང་འབོགས་པ་དང་མནོད་པ་ནི་ཤིན་ཏུ་ལེགས་པར་བཀླགས་པ་དང་ཤིན་ཏུ་ཡོངས་སུ་བྱ་བ་དང་ཐེ་ཚོམ་མེད་པར་བྱས་ཏེའོ་ཞེས་བྱ་བ་ལ། ལུང་འབོགས་པ་ཞེས་བྱ་བ་ནི། ཀློག་ཏུ་གཞུག་པ་ཞེས་བྱ་བ་ལ་སོགས་པའི་དོན་དུ་ལུང་འབོགས་པར་བྱེད་པས་ལུང་མནོད་པར་བྱེད་པ་ལ་ལུང་འབོགས་པའོ། །ལུང་མནོད་པ་ཞེས་བྱ་བ་ནི། དེའི་དོན་དུ་ལུང་འབོགས་པར་བྱེད་པ་ལས་ལུང་ནོད་པར་བྱེད་པས་ལུང་ནོད་པའོ། །ཤིན་ཏུ་ལེགས་པར་བཀླག་པ་ཞེས་བྱ་བ་ནི་ཤིན་ཏུ་ལེགས་པར་མནོད་པར་བྱས་པའོ། །ཤིན་ཏུ་ཡོངས་སུ་བྱང་བ་ཞེས་བྱ་བ་ནི། ཤིན་ཏུ་མཚན་མར་འདྲིས་པར་བྱས་པའོ། །ཐེ་ཚོམ་མེད་པར་བྱས་ཏེ་ཞེས་བྱ་བ་ནི། རྣམ་གྲངས་ཀྱི་ཕྱོགས་
ལ་སོགས་པ་དག་ལ་ཤིན་ཏུ་ངེས་པར་བྱས་ཏེའོ། །གནས་ཁང་དང་ཟས་ལ་བསྐོ་བ་དང་ཐུག་པ་དང་བག་ཆོས་དང་ཤིང་ཏོག་འདྲིམ་པ་བསྐོ་བར་བྱའོ་ཞེས་བྱ་བ་ནི། གང་ཟག་གནས་ཁང་བསྐོ་བ་དང༌། ཟས་ལ་བསྐོ་བ་དང༌། ཐུག་པ་འདྲིམ་པ་དང༌། བག་ཆོས་འདྲིམ་པ་དང༌། ཤིང་ཏོག་འདྲིམ་པ་དག་སྤྲོ་པར་བྱས་ཏེ། གསོལ་བ་དང་གཉིས་ཀྱི་ལས་ཀྱིས་བསྐོ་བར་བྱའོ། །དེ་ལ་གནས་ཁང་བསྒོ་བ་བསྐོ་བའི་སྔགས་ནི་མིང་འདི་ཞེས་བྱ་བ་ཁྱོད་དགེ་སློང་ལྷགས་པ་ལྷགས་པ་རྣམས་ལ་གནས་ཁང་བསྐོ་བར་སྤྲོའམ། སྤྲོའོ། །དགེ་འདུན་བཙུན་པ་རྣམས་གསན་དུ་གསོལ། །དགེ་སློང་མིང་འདི་ཞེས་བགྱི་བ་འདི་དགེ་སློང་ལྷགས་པ་ལྷགས་པ་རྣམས་ལ་གནས་ཁང་བསྐོ་བར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་མིང་འདི་ཞེས་བགྱི་བ་གནས་ཁང་བསྒོ་བ་བསྐོ་བར་བགྱི་སྟེ། དགེ་སློང་མིང་འདི་ཞེས་བགྱི་བ་འདི། དགེ་སློང་ལྷགས་པ་ལྷགས་པ་རྣམས་ལ་གནས་ཁང་བསྐོའོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །ཟས་ལ་བསྒོ་བ་བསྐོ་བའི་སྔགས་ནི། མིང་འདི་ཞེས་བྱ་བ་ཁྱོད་དགེ་སློང་རྣམས་ལ་ཟས་ལ་བསྐོ་བར་སྤྲོ་འམ། སྤྲོའོ། །དགེ་འདུན་བཙུན་པ་རྣམས་གསན་དུ་གསོལ། །མིང་འདི་ཞེས་བགྱི་བ་འདི་དགེ་སློང་རྣམས་ལ་ཟས་ལ་བསྐོ་བར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་དགེ་སློང་རྣམས་ལ་ཟས་ལ་བསྐོ་བར་བསྒོ་བར་བགྱི་སྟེ། དགེ་སློང་མིང་འདི་ཞེས་བགྱི་བ་འདི་དགེ་སློང་རྣམས་ལ་ཟས་ལ་བསྐོའོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །ཐུག་པ་འདྲིམ་པ་དང་བག་ཆོས་འདྲིམ་པ་དང་ཤིང་ཏོག་འདྲི་མ་པ་དག་བསྐོ་བའི་སྔགས་ཀྱང་ཟས་ལ་བསྒོ་བ་བསྐོ་བའི་སྔགས་ཇི་སྐད་སྨོས་པ་དེ་ཉིད་ཀྱིས་ཅི་རིགས་པར་སྦྱར་བར་བྱའོ། །བར་བུར་འདྲིམ་པར་ཡང་ངོ་ཞེས་བྱ་བ་ཡང་སྤྲོ་བར་བྱ་སྟེ། གསོལ་བ་དང་གཉིས་ཀྱི་ལས་ཀྱིས་བསྐོ་བར་བྱའོ། །དེ་བསྐོ་བའི་སྔགས་ཀྱང་ཟས་ལ་བསྒོ་བ་བསྐོ་བའི་སྔགས་
ཇི་སྐད་སྨོས་པ་དེ་ཉིད་ཀྱིས་ཅི་རིགས་པར་སྦྱར་བར་བྱའོ། །གཞུང་ཁ་ཅིག་ལས་ནི་བར་བུར་འདྲིམ་པ་ཞེས་བྱ་བ་འདིའི་མིང་ཕྲན་ཚེགས་འདྲིམ་པ་ཞེས་འབྱུང་ངོ༌། །བར་བུར་ཞེས་བྱ་བ་དེ་ཅི་ཡིན་ཞེ་ན་དེའི་ཕྱིར་ལྷག་རོལ་ཕྱི་དེ་ཉིན་པར་བྲིམ་པར་བྱ་བ་ནི་དེ་ཞེས་བྱའོ་ཞེས་བྱ་བ་སྨྲས་ཏེ། འདིར་གཞུང་ནི་བག་ཆོས་ལ་སོགས་པ་བྲིམ་པའི་ལྷག་རོལ་ལུས་པ་སུ་འང་འདྲིམ་པར་མི་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། བར་བུར་འདྲིམ་བར་བསྐོ་བར་བྱ་ཞིང་དེས་དེ་དག་ཕྱི་དེ་ཉིན་པར་བྲིམ་པར་བྱའོ་ཞེས་གསུངས་པ་ཡིན་ནོ། །སྣོད་སྤྱད་འདྲུབ་པའོ་ཞེས་བྱ་བ་ནི། སྤྲོ་བར་བྱ་སྟེ་གསོལ་བ་དང་གཉིས་ཀྱི་ལས་ཀྱིས་བསྐོ་བའོ། །དེའི་སྔགས་ནི། མིང་འདི་ཞེས་བྱ་བ་ཁྱོད་དགེ་འདུན་གྱི་སྣོད་སྤྱད་འདྲུབ་པར་སྤྲོ་འམ། སྤྲོའོ། །དགེ་འདུན་བཙུན་པ་རྣམས་གསན་དུ་གསོལ། །དགེ་སློང་མིང་འདི་ཞེས་བགྱི་བ་འདི་དག་དགེ་འདུན་གྱི་སྣོད་སྤྱད་འདྲུབ་པར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་དགེ་འདུན་གྱི་སྣོད་སྤྱད་འདྲུབ་པ་བསྐོ་པར་བགྱི་སྟེ་དགེ་སློང་མིང་འདི་ཞེས་བགྱི་བ་འདི་དགེ་འདུན་གྱི་སྣོད་སྤྱད་འདྲུབ་བོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །དབྱར་གྱི་རས་ཆེན་ནོ་ཞེས་བྱ་བ་ནི། དགེ་འདུན་གྱི་དབྱར་གྱི་རས་ཆེན་སྦེད་པ་དང་འགྱེད་པར་སྤྲོ་བར་བྱ་སྟེ། གསོལ་བ་དང་གཉིས་ཀྱི་ལས་ཀྱིས་བསྐོ་བའོ། །འདི་དང་འོག་ནས་གོས་སྦེད་པ་དང༌། གོས་འགེད་པ་ཞེས་འབྱུང་བ་གསུམ་ནི་གོས་ཀྱི་རྙེད་པ་འདྲུབ་པ་ཞེས་བྱ་བ་སྟེ། དེ་དག་བསྐོ་བའི་སྔགས་ནི་མིང་འདི་ཞེས་བྱ་བ་ཁྱོད་དགེ་འདུན་གྱི་དབྱར་གྱི་གོས་རས་ཆེན་སྦེད་པ་དང་འགེད་པ་སྤྲོའམ། སྤྲོའོ། །དགེ་འདུན་བཙུན་པ་རྣམས་གསན་དུ་གསོལ། །དགེ་སློང་མིང་འདི་ཞེས་བགྱི་བ་འདི་དགེ་འདུན་གྱི་དབྱར་གྱི་གོས་རས་ཆེན་སྦེད་པ་དང་འགེད་པར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་དག་དགེ་འདུན་གྱི་དབྱར་གྱི་གོས་རས་ཆེན་སྦེད་པ་དང༌། འགེད་པར་བསྐོ་བར་བགྱི་སྟེ། དགེ་སློང་མིང་འདི་
ཞེས་བགྱི་བ་དགེ་འདུན་གྱི་དབྱར་གྱི་གོས་རས་ཆེན་སྦེད་པ་དང་འགེད་དོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །སྲ་བརྐྱང་ངོ་ཞེས་བྱ་བ་ནི། སྲ་བརྐྱང་སྦེད་པ་སྤྲོ་བར་བྱས་ཏེ་གསོལ་བ་དང་གཉིས་ཀྱི་ལས་ཀྱིས་བསྐོའོ། །འདིར་སྲ་བརྐྱང་སྦེད་པ་ཞེས་བྱ་བ་ནི། ཆོས་གོས་སྲ་བརྐྱང་འདིང་བ་ཡིན་པར་དགོངས་སོ། །དེའི་སྔགས་ནི་མིང་འདི་ཞེས་བྱ་བ་ཁྱོད་དབྱར་གནས་པའི་དགེ་འདུན་གྱི་ཆོས་གོས་སྲ་བརྐྱང་འདིང་བར་སྤྲོའམ། སྤྲོའོ། །དགེ་འདུན་བཙུན་པ་རྣམས་གསན་དུ་གསོལ། །དགེ་སློང་མིང་འདི་ཞེས་བགྱི་བ་འདི་དབྱར་གནས་པའི་དགེ་འདུན་གྱི་ཆོས་གོས་སྲ་བརྐྱང་འདིང་བར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་མིང་འདི་ཞེས་བགྱི་བ་ཆོས་གོས་སྲ་བརྐྱང་གདིང་བར་བསྐོ་སྟེ། དགེ་སློང་ཆོས་གོས་སྲ་བརྐྱང་འདིང་བ་མིང་འདི་ཞེས་བགྱི་བ་འདིར་དབྱར་གནས་བའི་དགེ་འདུན་གྱི་ཆོས་གོས་སྲ་བརྐྱང་གདིང་པར་འགྱུར་རོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །གོས་དག་གོ་ཞེས་བྱ་བ་ནི། གོས་སྤེད་པ་སྤྲོ་བར་བྱས་ཏེ། གསོལ་བ་དང་གཉིས་ཀྱི་ལས་ཀྱིས་བསྐོ་བའོ། །བགེད་པ་ཡང་ངོ་ཞེས་བྱ་བ་ནི་གོས་དང་འགེད་པ་སྤྲོ་བར་བྱ་སྟེ། གསོལ་བ་དང་གཉིས་ཀྱི་ལས་ཀྱིས་བསྐོ་བའོ། །གོས་སྦེད་པ་དང་གོས་འགྱེད་པ་འདི་གཉིས་ནི་གོས་ཀྱི་རྙེད་པ་འདྲུབ་པའི་སྐབས་སུ་གཏོགས་པས་འདི་གཉིས་བསྐོ་བའི་སྔགས་ནི། གོས་ཀྱི་རྙེད་པ་འདྲུབ་པ་བསྐོ་བའི་སྔགས་ཇི་སྐད་སྨོས་པ་དེ་ཉིད་ཀྱིས་ཅི་རིགས་པར་སྦྱར་བར་བྱའོ། །དགེ་སྐོས་དང་མདག་གཞུག་པ་དག་གོ་ཞེས་བྱ་བ་ནི། དེ་གཉིས་སྤྲོ་བར་བྱས་ཏེ་གསོལ་བ་དང་གཉིས་ཀྱི་ལས་ཀྱིས་བསྐོ་བའོ། །འདི་གཉིས་བསྐོ་བའི་སྔགས་ཀྱང་སྣོད་སྤྱད་འདྲུབ་པ་བསྐོ་བའི་སྔགས་ཇི་སྐད་སྨོས་པ་དེ་གཉིས་ཀྱིས་ཅི་རིགས་པར་སྦྱར་བར་བྱའོ། །མངག་གཞུག་པ་ཞེས་བྱ་བ་ནི། དགེ་སྐོས་ཀྱི་འགབ་ལེན་ཅིང་དེའི་ངན་འགྲོགས་བྱེད་པའོ། །འདིར་གཞུང་ནི། དགེ་སློང་རྣམས་ཀྱི་ཟན་གྱི་གྲལ་དང་ཆོས་མཉན་པར་སུ་ཡང་སྟན་ཤོམ་པར་མི་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་
སྐོས་བསྐོ་བར་བྱ་ཞིང༌། དགེ་སྐོས་ཀྱིས་ཀུན་དུ་སྤྱད་པ་ཐམས་ཅད་བྱའོ། །དགེ་སྐོས་ལ་བྱ་བ་ཅུང་ཞིག་བྱུང་བ་ན་དེས་སུ་ཡང་མི་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། མངག་གཞུག་པ་བསྐོ་བར་བྱའོ་ཞེས་གསུངས་པ་ཡིན་ནོ། །སྡེར་སྤྱད་འདྲིམ་པའོ་ཞེས་བྱ་བ་ནི་སྤྲོ་བར་བྱ་སྟེ་གསོལ་བ་དང་གཉིས་ཀྱི་ལས་ཀྱིས་བསྐོ་བའོ། །དེའི་སྔགས་ནི་མིང་འདི་ཞེས་བྱ་བ་ཁྱོད་དགེ་འདུན་གྱི་སྡེར་སྤྱད་འདྲིམ་པར་སྤྲོའམ། སྤྲའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་སྡེར་སྤྱད་འདྲིམ་པར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་སྡེར་སྤྱད་འདྲིམ་པར་བསྐོ་བར་བགྱི་སྟེ། དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་སྡེར་སྤྱད་འདྲིམ་མོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །དེ་དག་བྲིམ་བ་དང་ཟན་གྱུ་ནས་བྲུབ་པ་ནི་དེའི་ལས་ཡིན་ནོ་ཞེས་བྱ་བ་ནི། སྡེར་སྤྱད་དེ་དག་བྲིམ་པ་དང་གདུགས་ཚོད་རྒྱུ་ནས་བྲུབ་པ་ནི། སྡེར་སྤྱད་འདྲིམ་པ་དེའི་ལས་ཡིན་ནོ། །འདིར་གཞུང་ནི་དེས་དགེ་སློང་རྣམས་ཀྱི་ཟན་གྱི་གྲལ་དུ་སྡེར་སྤྱད་དག་བྲིམ་པར་བྱ་ཞིང༌། ཟན་གྱུ་ནས་བྲུབ་པར་བྱའོ་ཞེས་གསུངས་པ་ཡིན་ནོ། །ཆུའི་ཞལ་ཏ་བའོ་ཞེས་བྱ་བ་ནི། སྤྲོ་བར་བྱ་སྟེ་གསོལ་བ་དང་གཉིས་ཀྱི་ལས་ཀྱིས་བསྐོ་པའོ། །དེ་བསྐོ་བའི་སྔགས་ཀྱང་ཟས་ལ་བསྒོ་བ་བསྐོ་བའི་སྔགས་ཇི་སྐད་སྨོས་པ་དེ་ཉིད་ཀྱིས་ཅི་རིགས་པར་སྤྲོ་བར་བྱའོ། །མཛེས་འཆོས་པས་སོ་ཞེས་བྱ་བ་ནི། སྤྲོ་བར་བྱ་སྟེ་གསོལ་པ་དང་གཉིས་ཀྱི་ལས་ཀྱིས་བསྐོ་བའོ། །དེ་བསྐོ་བའི་སྔགས་ཀྱང་དག་སྐོས་བསྐོ་བའི་སྔགས་ཀྱིས་ཅི་རིགས་པར་བསྐོ་བར་བྱའོ། །དེས་བལྟས་ཏེ་རབ་ཏུ་བྱུང་བ་རྣམས་མི་མཛེས་པ་བསྟན་ནས་སེ་གོལ་གྱི་སྒྲ་སྔོན་དུ་བཏང་སྟེ་མཛེས་པ་ལ་ངེས་པར་སྦྱར་བར་བྱའོ་ཞེས་བྱ་བ་ནི། མཛེས་འཆོས་དེས་སོ། །མཛེས་པ་ལ་ངེས་པར་སྦྱར་བའི་ངོ་བོ་ཉིད་བསྟན་པའི་ཕྱིར། འདི་ལྟ་སྟེ་ཟས་ལ་སྒྲ་བསྐྱུང་བ་ཉིད་དང་ཤིན་ཏུ་བསྡམས་པ་ཉིད་དང་ཤིན་ཏུ་ངོས་ཐུབ་པ་ཉིད་ཀྱིས་སོ། །མཆོད་རྟེན་ལ་
ཕྱག་བྱ་བ་སྒྲ་བསྐྱུང་བ་ཉིད་དང་རྒན་རིམས་ཀྱིས་སོ་ཞེས་བྱ་བ་སྨྲས་སོ། །བང་རིམ་གྱི་ཞལ་ཏ་པའོ་ཞེས་བྱ་བ་ནི། སྤྲོ་བར་བྱས་ཏེ་གསོལ་བ་དང་གཉིས་ཀྱི་ལས་ཀྱིས་བསྐོ་བའོ། །འདི་བསྐོ་བའི་སྔགས་ཀྱང་གནས་ཁང་བསྒོ་བ་བསྐོ་བའི་སྔགས་ཇི་སྐད་སྨོས་པ་དེ་ཉིད་ཀྱིས་ཅི་རིགས་པར་སྦྱར་བར་བྱའོ། །དེས་དང་པོར་ཟན་ཟོས་ཏེ་དབྱུ་གུ་བླངས་ནས། ཟན་ཟ་བ་དག་ལ་ཁྭ་དང་བྱེའུ་དང་ཕུག་རོན་ལ་སོགས་པ་དག་བཟློག་པར་བྱའོ་ཞེས་བྱ་བ་ནི་བང་རིམ་གྱི་ཞལ་ཏ་པ་དེས་སོ། །ཁྭ་ལ་སོགས་པ་དེ་དག་ནི་བང་རིམ་དག་ཏུ་གནས་འཆའ་བས་དེའི་ཕྱིར་དེས་ཤས་ཆེར་དེ་དག་ཟློག་པར་བྱེད་པས་བང་རིམ་གྱི་ཞལ་ཏ་པ་ཞེས་བྱའོ། །གནས་མལ་འབོགས་པ་དང་གནས་མལ་བྱི་དོར་འབོགས་པའོ་ཞེས་བྱ་བ་ནི། དེ་གཉིས་དབོག་བར་སྤྲོ་བར་བྱས་ཏེ། གསོལ་བ་དང་གཉིས་ཀྱི་ལས་ཀྱིས་བསྒོ་བར་བྱའོ། །གནས་མལ་ཞེས་བྱ་བ་ནི་ཁ་དང་ཁྲིའུ་དང་སྟན་ནང་ཚངས་ཅན་དང༌། མལ་ཆ་དང་སྟན་དང་གནས་མལ་ལ་སོགས་པའོ། །གནས་མལ་བྱི་བོ་ཞེས་བྱ་བ་ནི་ཁྲི་དང་ཁྲིའུ་དང་སྟན་ནང་ཚངས་ཅན་དང་མལ་ཆ་དང་སྟན་དང་གནས་ལ་སོགས་པ་མེད་པ་འདི་ལྟ་སྟེ། ཤིང་ལྗོན་པའི་དྲུང་དང༌། ནེའུ་གསིང་ལ་སོགས་པ་གཏན་གྱི་གནས་མལ་མ་ཡིན་པའོ། །དེ་གཉིས་བསྐོ་བའི་སྔགས་ནི་མིང་འདི་ཞེས་བྱ་བ་ཁྱོད་དགེ་འདུན་ལ་གནས་མལ་འབོགས་པར་སྤྲོའམ། སྤྲོའོ། །དགེ་འདུན་བཙུན་པ་རྣམས་གསན་དུ་གསོལ། །དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་གནས་མལ་དབོག་པ་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱི་དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་གནས་མལ་འབོགས་པར་བསྐོ་བར་བགྱི་སྟེ། དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་གནས་མལ་དབོག་གོ །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །ཟས་རུང་བ་དང་བཅས་པ་ཉིད་ཡིན་ན་མི་དག་འོད་བ་ལ་སྒེའུ་ཆུང་སྲུང་བའོ་ཞེས་བྱ་བ་ནི། ཟས་རུང་བ་དང་བཅས་པ་ཉིད་ཅེས་བྱ་བ་ཤ་དང་བཅས་པ་ཉིད་ཡིན་ན། དེར་མི་གཞན་དག་འོང་བ་དགག་པའི་ཕྱིར་སྒེའུ་ཆུང་སྲུང་བ་སྤྲོ་བར་བྱས་ཏེ།
གསོལ་པ་དང་གཉིས་ཀྱི་ལས་ཀྱིས་བསྐོ་བར་བྱའོ། །འདིར་སྒེའུ་ཆུང་ཞེས་བྱ་བ་ནི་འགག་སྒོ་ཡིན་པར་རིག་པར་བྱའོ། །འདིར་གཞུང་ནི་དགེ་སློང་དག་གྲལ་ན་ཟན་ཟ་བར་མི་དག་འོངས་ནས། བཅོམ་ལྡན་འདས་ཀྱིས་བཀའ་སྩལ་པ། སྒེའུ་ཆུང་སྲུང་བ་བསྐོ་བར་བྱའོ། །ཤ་དག་འདྲིམ་པ་ན་བྲམ་ཟེ་དང་ཁྱིམ་བདག་དག་འཕྱ་ནས། བཅོམ་ལྡན་འདས་ཀྱིས་བཀའ་སྩལ་པ། གང་གི་ཚེ་རུང་བ་ཡོད་པ་དེའི་ཚེ་སྒེའུ་ཆུང་སྲུང་བ་བསྐོ་བར་བྱའོ་ཞེས་གསུངས་པ་ཡིན་ནོ། །འདི་བསྒོ་བ་བསྐོ་བའི་སྔགས་ཀྱང་ཟས་ལ་བསྒོ་བ་བསྐོ་བའི་སྔགས་ཇི་སྐད་བསྟན་པ་དེ་ཉིད་ཀྱིས་ཅི་རིགས་པར་སྦྱར་བར་བྱའོ། །གནས་མལ་གྱི་གཞིའོ་ཞེས་བྱ་བ་དེ་འདུལ་བའི་གཞིའི་སྐབས་ནས་འབྱུང་བ་བཤད་ཟིན་ཏོ།། །།ད་ནི་གནས་མལ་གྱི་གཞི་ཕྲན་ཚེགས་ལ་སོགས་པའི་སྐབས་བསྡུ་བའི་ཕྱིར་ཕྱག་འཚལ་བའི་གནས་མུན་ཁྲོད་དུ་ཕྱག་དང་བཅས་པའི་ཚིག་བརྗོད་པར་བྱའོ་ཞེས་བྱ་བ་སྨྲས་ཏེ། ཕྱག་འཚལ་བའི་གནས་མུན་ཁྲོད་དུ་དགེ་སློང་གིས་ཕྱག་མི་བྱ་བར་ཕྱག་འཚལ་ལོ་ཞེས་བྱ་བའི་སྒྲ་དང་བཅས་པའི་ཚིག་བརྗོད་པར་བྱའོ། །ཉེན་ཀོར་དུ་གྱུར་པ་གཞན་གྱིས་ཕྱག་བྱ་བར་བརྩམས་པ་ལ་ཕྱག་མི་བྱ་བར་མི་བྱའོ་ཞེས་བྱ་བ་ནི། ཕྱག་བྱ་བར་འོས་པ་ཉེན་ཀོར་དུ་འོངས་པ་གཞན་གྱིས་ཕྱག་བྱ་བར་བརྩམས་པ་ལ་བདག་གིས་ཕྱག་བྱས་ཟིན་ཀྱང་བླ་སྟེ་ཡང་ཕྱག་བྱ་བའོ། །ཚངས་པའི་ཕྱག་གིས་ནི་དེ་བྱས་པ་ཉིད་ཡིན་ནོ་ཞེས་བྱ་བ་ནི། ཚངས་པའི་ཕྱག་བྱའོ། །ཚངས་པའི་ཕྱག་ཅེས་བྱ་བ་དགེ་འདུན་ཐམས་ཅད་གནས་གཅིག་ཏུ་ཚོགས་པ་ལ་སྤྱིར་ཕྱག་བྱ་བ་སྟེ་དེ་བྱས་ན་ཕྱག་དེ་བྱས་པ་ཉིད་ཡིན་པའོ། །ནང་དང་བཅས་པ་ལ་ཕྱག་མི་བྱའོ་ཞེས་བྱ་བ་ལ། འདིར་ནང་དང་བཅས་པ་ཞེས་བྱ་བ་ནི་གནོད་པ་བྱ་བའི་བསམ་པས་ཉེ་བར་གནས་པ་ཡིན་པར་རིག་པར་བྱའི། རྩོད་དོ་ཅོག་ཐམས་ཅད་ནི་མ་ཡིན་ནོ། །དེས་ན་གནོད་པ་བྱ་བའི་བསམ་པས་ཉེ་བར་གནས་པ་ལ་ཕྱག་བྱ་བར་མི་རུང་གི་རྩོད་བ་གཞན་ལ་ནི་རུང་ངོ༌། །འདིར་གཞུང་ནི་གཉིས་ལ་ཕྱག་བྱ་སྟེ། གློ་བུར་དུ་འོངས་པ་དག་དང་གཉུག་མར་གནས་པ་དག་གིས་ཕན་ཚུན་རྒན་རིམས་བཞིན་དུ་ཕྱག་བྱའོ། །ནང་དང་བཅས་པ་དང་སྤོ་བ་བྱེད་པ་དག་ནི་མ་གཏོགས་སོ་ཞེས་
གསུངས་པ་ཡིན་ནོ། །ཕྱག་འཚལ་པ་ལ་ཨ་རོག་གྱ་ཞེས་མི་བྱ་བར་མི་བྱའོ་ཞེས་བྱ་བ་ནི། གང་ཟག་ཕྱག་འཚལ་བ་ལ་ཨ་རོག་གྱ་ཞེས་བརྗོད་པར་བྱ་བ་ཁོ་ན་ཡིན་པའོ། །འདས་པ་ན་ཕྱག་བྱ་བ་ཡིན་པ་ལ་ནི་ཕྱག་མི་བྱ་བ་ཉིད་མ་ཡིན་ནོ་ཞེས་བྱ་བ་ནི། སྔོན་འདས་པའི་དུས་ན་དེ་ཕྱག་བྱ་བ་ཉིད་དུ་གྱུར་པ་ཡིན་ནོ། །ད་ལྟར་ཕྱག་བྱ་བ་ཉིད་མ་ཡིན་དུ་ཟིན་ཀྱང༌། སྔོན་གྱི་གནས་སྐབས་དེ་ཉིད་མངོན་སུམ་དུ་བྱས་ཏེ་ཕྱག་བྱ་བར་རུང་བས་དེའི་ཕྱིར་དེ་ལ་ནི་ཕྱག་མི་བྱ་བ་ཉིད་མ་ཡིན་ནོ། འདི་ནི་དགེ་སློང་རྒན་པོ་ཁྲོས་པའི་དབང་གིས་སྡོམ་པ་རྒྱུན་ཆད་དེ་སྦྲུལ་དུ་གྱུར་པ་ལ་དགེ་སློང་ཅིག་ཤོས་ཀྱིས་སྔོན་གྱི་རྒྱུད་དེ་ཉིད་མངོན་སུམ་དུ་བྱས་ཏེ། འདུད་པར་བྱའོ་ཞེས་གསུངས་པའི་གླེང་གཞི་ཡིན་ཏེ། ཐམས་ཅད་ལ་བྱེ་བྲག་མེད་པར་རུང་པས་འདིར་སྤྱིར་མདོར་བྱས་སོ། །སྦགས་པ་ལ་ཕྱག་མི་བྱའོ་ཞེས་བྱ་བ་ནི། གང་ཟག་སྦགས་པ་ལ་ཕྱག་མི་བྱའོ། །སྦགས་པས་མི་བྱའོ་ཞེས་བྱ་བ་ནི། གང་ཟག་སྦགས་པས་གཞན་ལ་ཕྱག་མི་བྱ་བའོ། །དེ་བདག་གིར་མི་བྱའོ་ཞེས་བྱ་བ་ནི། སྦགས་པས་ཕྱག་དེར་བདག་གིར་མི་བྱའོ། །སྦགས་པ་ལས་མི་བྱའོ་ཞེས་བྱ་བ་ནི། སྦགས་པ་གཞན་ལས་ཕྱག་དེ་བདག་གིར་མི་བྱའོ། །འདིར་གཞུང་ནི་བཅོམ་ལྡན་འདས་ཀྱིས་ནད་པ་ལ་བལྟ་བར་བྱའོ་ཞེས་གསུངས་པ་དང༌། ནད་པ་བལྟ་བའི་དགེ་སློང་རྒན་པོ་དག་དང༌། གསར་བུ་དག་ཀྱང་དོང་ནས་དེ་ནས་གསར་བུ་གང་དག་ཡིན་པ་དེ་དག་ནི་ནང་པ་དེ་ལ་ཕྱག་དག་འཚལ་བར་བྱེད་རྒན་པོ་གང་དག་ཡིན་པ་དེ་དག་ལ་ནི། ནད་པ་དེ་ཕྱག་དག་འཚལ་བར་བྱེད་པ་ན་དེ་སྐྱོ་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། སྦགས་པ་ལ་ཕྱག་མི་བྱའོ། །སྦགས་པས་ཕྱག་མི་བྱའོ། །སྦགས་པས་ཕྱག་བདག་གིར་མི་བྱའོ། །སྦགས་པ་ལས་ཕྱག་བདག་གིར་མི་བྱའོ། །སྦགས་པ་ལ་ཕྱག་འཚལ་ལམ། སྦགས་པས་ཕྱག་འཚལ་ལམ། སྦགས་པས་ཕྱག་བདག་གིར་བྱེད་དམ། སྦགས་པ་ལས་ཕྱག་བདག་གིར་བྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །སྦགས་པ་ནི་རྣམ་པ་གཉིས་ཏེ།
ཐ་ན་སོ་ཤིང་ཡན་ཆད་ཟ་བས་དང༌། ཐ་ན་དེའི་ས་བྱི་དོར་བྱེད་པ་ཡན་ཆད་མི་གཙང་བས་སོ་ཞེས་བྱ་བ་ནི། ཟ་བས་སྦགས་པ་ནི་ཐ་ན་སོ་ཤིང་ཡན་ཆད་ཟ་བས་སྦགས་པ་ཡིན་ནོ། །མི་གཙང་བས་སྤགས་པ་ནི་ཐན་མི་གཙང་བའི་ས་བྱི་དོར་བྱེད་པ་ཡན་ཆད་ཀྱིས་སྦགས་པ་ཡིན་ནོ། །འདི་ལ་གཅེར་བུ་ཉིད་དང་གོས་གཅིག་པ་ཉིད་ནི་སྦགས་པ་དང་འདྲའོ་ཞེས་བྱ་བ་ནི། ཕྱག་བྱ་བ་འདི་ལ་སྟེ། དེས་ན་གཅེར་བུ་ལ་ཕྱག་མི་བྱའོ། །གཅེར་བུས་ཕྱག་མི་བྱའོ། །གཅེར་བུས་ཕྱག་བདག་གིར་མི་བྱའོ། །གཅེར་བུ་ལས་ཕྱག་བདག་གིར་མི་བྱའོ། །དེ་བཞིན་དུ་གོས་གཅིག་པ་ལ་ཕྱག་མི་བྱ་འོ། །གོས་གཅིག་པས་ཕྱག་མི་བྱའོ། །གོས་གཅིག་པས་ཕྱག་བདག་གིར་མི་བྱའོ། །གོས་གཅིག་པ་ལས་ཕྱག་བདག་གིར་མི་བྱའོ། །ཕྱག་ནི་རྣམ་པ་གཉིས་ཏེ། ཡན་ལག་ལྔས་ཕྱག་འཚལ་བ་དང༌། སྦྲིད་པ་ལ་འཁྱུད་པས་ཕྱག་འཚལ་བའོ་ཞེས་བྱ་བ་ནི། དེ་གཉིས་གང་ཡང་རུང་བ་ཅིག་བྱས་ན་ཡང་ཕྱག་འཚལ་བ་ཉིད་ཡིན་ནོ། །སྦྲིད་པ་བྱུང་བ་ལ་སོས་ཞེས་བརྗོད་པར་མི་བྱ་སྟེ། རྒན་ཞུགས་དང་ཁྱིམ་པ་ལ་ནི་མ་གཏོགས་སོ་ཞེས་བྱ་བ་ནི། གང་ཟག་སྦྲིད་པ་བྱུང་བ་ལ་སོས་ཞེས་བརྗོད་པར་མི་བྱའོ། །གང་ཟག་རྒན་ཞུགས་དང་ཁྱིམ་པ་ལ་ནི་མ་གཏོགས་ཏེ། དེ་ཉིད་ལ་ནི་སོས་ཞེས་བརྗོད་དུ་རུང་བའོ། །གསར་བུ་དེ་ལ་ནི་ཨ་རོག་གྱ་ཞེས་བྱའོ་ཞེས་བྱ་བ་ནི། གསར་བུ་སྦྲིད་པ་བྱུང་བ་དེ་ལ་ནི་རྒན་པོས་ཨ་རོག་གྱ་ཞེས་བརྗོད་པར་བྱའོ། །རྒན་པ་ལ་ནི་ཕྱག་བྱའོ་ཞེས་བྱ་བ་ནི། རྒན་པོ་སྦྲིད་པ་བྱུང་བ་དེ་ལ་ནི་གསར་བུས་ཕྱག་བྱའོ། །སྦྲིད་བ་བྱུང་ན་ཡང་ངོ་ཞེས་བྱ་བ་ནི། གསར་བུ་སྦྲིད་པ་བྱུང་ན་ཡང་རྒན་པོ་ལ་ཕྱག་བྱའོ། །འདིར་གཞུང་ནི་གསར་བུས་སྦྲིད་པ་བྱུང་ན་ཕྱག་བྱའོ་ཞེས་གསུངས་པ་ཡིན་ནོ། །དེ་བཞིན་གཤེགས་པ་ལ་ཚེ་དང་ལྡན་པ་དང་མིང་དང་རུས་བརྗོད་པས་ཀུན་དུ་སྤྱད་པར་མི་བྱའོ་ཞེས་བྱ་བ་ནི་དེ་བཞིན་གཤེགས་པ་ལ་ཚེ་དང་ལྡན་པ་ཞེས་བརྗོད་པ་དང༌། མིང་ནས་བརྗོད་པ་དང༌། རུས་ནས་བརྗོད་པས་བོད་པར་མི་བྱའོ། །ཉེ་བའི་ཚིག་དང་བྲལ་བར་དེའི་མཚན་ནམ་གདུང་སྨོས་པར་མི་བྱའོ་ཞེས་བྱ་བ་ནི། ཉེ་
བའི་ཚིག་དང་བཅས་པར་མཚན་ནམ་གདུང་སྨོས་པར་མི་བྱའོ། །འདིར་གཞུང་ནི་འདི་ལྟར་ཉེ་བའི་ཚིག་དང་བཅས་པས་སྟོན་པར་མཚན་སྨོས་པར་བྱ་སྟེ། བཅོམ་ལྡན་འདས་ཤཱཀྱ་ཐུབ་པ་ཞེས་བརྗོད་པར་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །རྒན་པའི་མི་བྱའོ་ཞེས་བྱ་བ་ནི་ཉེ་བའི་ཚིག་དང་བྲལ་བར་མིང་དང་རུས་སྨོས་པར་རོ། །འདི་ལ་གནས་བརྟན་དང་ཚེ་དང་ལྡན་པ་ནི་ཉེ་བའི་ཚིག་ཉིད་ཀྱི་ཚུལ་དང་མཐུན་པ་ཡིན་ནོ་ཞེས་བྱ་བ་ནི་རྒན་པ་འདི་ལའོ། །སྔ་མ་ལ་ནི་མ་ཡིན་ནོ་ཞེས་བྱ་བ་ནི། དེ་བཞིན་གཤེགས་པ་ལ་སྟེ། སྟོན་པ་ལ་གནས་བརྟན་དང་ཚེ་དང་ལྡན་པ་ཞེས་བྱ་བ་ནི་ཉེ་བའི་ཚིག་ཉིད་ཀྱི་ཚུལ་དང་མཐུན་པ་མ་ཡིན་ནོ་ཞེས་བྱ་བའི་ཐ་ཚིག་གོ །ལག་གི་བླས་འགྲོ་བ་དང་འོང་བ་དང་ལྡན་པའི་གཞིར་གཙུག་ལག་ཁང་རབ་ཏུ་གནས་པར་བྱའོ་ཞེས་བྱ་བ་ནི། གང་དུ་འགྲོར་ཡང་ནུས་ལ་འོང་བར་ཡང་ནུས་པའི་གཞིར་རོ། །འདིར་གཞུང་ནི་མ་མོ་ལས་ཕྱོགས་གང་དུ་དང་པོ་གཙུག་ལག་ཁང་རབ་ཏུ་གནས་པར་བྱེད་པ་དེར་དགེ་སློང་ལག་གི་བླས། དང་པོ་ཁོ་ནར་གཙུག་ལག་ཁང་གི་གཞི་བརྟག་པར་བྱ་སྟེ་འོང་བ་དང་ལྡན་པ་དང༌། འགྲོ་བ་དང་ལྡན་པ་དང་ཞེས་བྱ་བ་ལ་སོགས་པ་གསུངས་བ་ཡིན་ནོ། །ཤིང་ལྗོན་པ་དང་རྫིང་བུ་དང་འཆགས་དག་ཀྱང་ངོ་ཞེས་བྱ་བ་ཡང་ལྡན་པར་ཞེས་བྱ་བར་སྦྱར་ཏེ་ཤིང་ལྗོན་པ་དང་རྫིང་བུ་དང་ལྡན་པ་དང་འཆགས་དང་ལྡན་པའི་གཞིར་གཙུག་ལག་ཁང་རབ་ཏུ་གནས་པར་བྱའོ། །ཉེན་ཀོར་དང་ངོ་ཞེས་བྱ་བ་ནི། ཉེན་ཀོར་དང་ལྡན་པའི་གཞིར་གཙུག་ལག་ཁང་རབ་ཏུ་གནས་པར་བྱ་བའོ། །རྒྱུན་ལུགས་དང་ཀླག་ཅོར་དང་སྒྲ་དང་ཏུག་རིང་ཆུང་བར་རོ་ཞེས་བྱ་བ་ནི། རྒྱུན་ལུགས་ཉུང་བ་དང་ཀླག་ཅོར་ཆུང་བ་དང༌། སྒྲ་ཆུང་བ་དང་ཏུག་རིང་ཆུང་བར་གཙུག་ལག་ཁང་རབ་ཏུ་གནས་པར་བྱའོ། །དེ་ལ་གང་དུ་སྐྱེ་བོ་མང་པོ་ཡང་དང་ཡང་དུ་འདུ་བར་མི་འགྱུར་བ་དེ་ནི་རྒྱུན་ལུགས་ཉུང་བའོ། །རང་དབང་དུ་གཏམ་ཟེར་བའི་ཕེབས་པར་སྨྲ་བ་ནི་ཀླག་ཅོར་རོ། །བྲམ་ཟེའི་ཀློག་པ་དང་འདུན་མའི་ཐ་སྙད་དང་གླང་པོ་ཆེ་དང་རྟ་ལ་སོགས་པའི་སྒྲ་ནི་སྒྲའོ། །རྫ་རྔ་ལ་སོགས་པའི་སྒྲ་སྐད་ནི་ཏུག་རིང་སྟེ་དེ་དག་ཆུང་
པར་རོ། །སྦྱིན་པ་པོས་རྗེས་སུ་གནང་ན་གཙུག་ལག་ཁང་བྱ་བའི་དངོས་པོ་ལས་དེ་བྱ་བའི་སྤྱད་བྱའོ་ཞེས་བྱ་བ་ནི། སྦྱིན་བདག་གིས་རྗེས་སུ་གནང་ན་གཙུག་ལག་ཁང་བྱེ་བའི་རྫས་གང་ཡིན་པ་དེ་ལས་ལག་གི་བླས་བྱ་བའི་སྤྱད་བྱ་བ་ལ་མི་རིགས་པ་མེད་པའོ། །འདིར་གཞུང་ནི་གལ་ཏེ་ཁྱིམ་བདག་གིས་རྗེས་སུ་སྟེར་ན་དེ་ཉིད་ལ་སྤྱད་ཉེ་བར་གཞག་པར་བྱའོ་ཞེས་གསུངས་པ་ཡིན་ནོ། །དེ་བཞག་པའི་ཁང་པ་སྦྱིན་ནོ་ཞེས་བྱ་བ་ནི། ལག་གི་བླས་བྱ་བའི་སྤྱད་དེ་གཞག་པའི་ཁང་པ་སྤྱིན་པར་བྱའོ། །འདིར་གཞུང་ནི་དེའི་ཁང་པ་ཡང་སྦྱིན་པར་བྱ་ཞིང་དེར་གཞག་པར་བྱའོ་ཞེས་གསུངས་པ་ཡིན་ནོ། །དེར་དགོས་པའི་འབྲུ་མར་ལ་སོགས་པ་ཚོད་རན་པར་ཉོའོ་ཞེས་བྱ་བ་ནི། ལག་གི་ལས་བྱ་བ་དེར་དགོས་པའི་འབྲུ་མར་ལ་སོགས་པ་ཇི་དགོས་པ་ཉོ་བར་བྱ་བའོ། །ལག་གི་བླས་སྤྱི་བུངས་ཅི་འདྲ་བ་དེ་འདྲ་བ་བཟའོ་ཞེས་བྱ་བ་ནི་ལག་གི་བླས་ཟན་ནི་དགེ་སློང་བཞི་པ་དག་གིས་ཟན་གྱི་སྤྱི་བུངས་ཅི་འདྲ་བར་བཟའ་བར་བྱའི་ལྷག་པར་མི་བྱ་བའོ། །གཙུག་ལག་ཁང་གི་སྤྱི་བུངས་ཀྱི་ཟན་ཐང་གང་དང་སྦྱར་ཞེ་ན། ལག་གི་བླ་དེ་གཙུག་ལག་ཁང་གང་དུ་གཏོགས་པའི་དགེ་སློང་གཞན་དག་གི་སྤྱི་བུངས་ཀྱི་ཟན་ཐང་དང་སྦྱར་ཏེ་བཟའོ། །གནས་དེའི་གཙུག་ལག་ཁང་མེད་པ་ཉིད་ཡིན་ན་ཉེན་ཀོར་གྱི་གཙུག་ལག་ཁང་གིའོ་ཞེས་བྱ་བ་ནི། གལ་ཏེ་གནས་དེ་ན་གཙུག་ལག་ཁང་གཞན་མེད་པ་ཉིད་ཡིན་ན་ཉེན་ཀོར་གྱི་གཙུག་ལག་ཁང་གི་ཟན་ཐད་ཇི་ཙམ་པ་དེ་ཙམ་བཟའ་བར་བྱ་བའོ། །སྣུམ་བག་གི་རྙེད་པ་ནོད་དེ་ཞེས་བྱ་བ་ནི། བྱ་ན་ཡང་དགེ་སློང་གཞན་གྱི་ཐང་བཞིན་དུ་མནོད་པའོ།། །།བམ་པོ་དྲུག་ཅུ་དགུ་པ། གཙུག་ལག་ཁང་དག་གི་བརྩེགས་མ་ཉིད་ཀྱི་མཐའ་ནི་ལྔའོ་ཞེས་བྱ་བ་ནི་དགེ་སློང་རྣམས་ཀྱིའོ། །དགེ་སློང་རྣམས་ཀྱི་བརྩེགས་མ་ཉིད་ནི་གསུམ་མོ་ཞེས་བྱ་བའི་མཐའོ། །འདིར་གཞུང་ནི་སིལ་བུ་དག་ལས་དགེ་སློང་རྣམས་ཀྱི་གཙུག་ལག་ཁང་ནི་ལྔ་བརྩེགས་སུ་བྱའོ། །དྲི་གཙང་ཁང་ནི་བདུན་བརྩེགས་སོ། །སྤོ་ཁང་སྟེང་གི་བསིལ་ཁང་ཡང་བདུན་བརྩེགས་སོ། །དགེ་སློང་མ་རྣམས་ཀྱི་གཙུག་ལག་ཁང་ནི་སུམ་བརྩེགས་སོ། །དྲི་གཙང་
ཁང་ནི་ལྔ་བརྩེགས་སོ། །སྒོ་ཁང་སྟེང་གི་བསིལ་ཁང་ཡང་ལྔ་བརྩེགས་སོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །དྲི་གཙང་ཁང་དང་སྒོ་ཁང་སྟེང་གི་བསིལ་ཁང་དག་གི་བརྩེགས་མ་གཉིས་ཀྱིས་ལྷག་པར་ཕྱའོ་ཞེས་བྱ་བ་ནི། གཙུག་ལག་ཁང་པས་བརྩེགས་མ་གཉིས་ཀྱིས་ལྷག་པར་བྱ་བ་སྟེ། དགེ་སློང་རྣམས་ཀྱི་ནི་བདུན་བརྩེགས་སོ། །དགེ་སློང་མ་རྣམས་ཀྱི་ནི་ལྔ་བརྩེགས་སོ། །དེ་དག་ལྕིབས་འཇིག་པ་ཉིད་ཡིན་ན་བརྩེགས་མ་གཞིག་པ་ལ་ཁ་ན་མ་ཐོ་བ་མེད་དོ་ཞེས་བྱ་བ་ནི། དགེ་སློང་དང་དགེ་སློང་མའི་གཙུག་ལག་ཁང་དེ་དག་ལྕིབས་འཇིག་པ་ཉིད་ཡིན་ན་བརྩེགས་མ་འཇིག་པ་ལ་ཁ་ན་མ་ཐོ་བ་མེད་པ་ཉིད་ཡིན་ཏེ། བརྩེགས་མ་ཇི་སྙེད་གཞིག་པ་གཅིག་གམ་དུ་མ་དེ་སྙེད་གཞིག་པར་བྱའོ། །བརྩམས་པ་བསྐྱེད་པ་འམ་བསྒྱུར་བར་བྱ་བའི་ཕྱིར་གཞིག་པར་ཡང་ངོ་ཞེས་བྱ་བ་ཡང་ཁ་ན་མ་ཐོ་བ་མེད་དོ་ཞེས་བྱ་བར་སྦྱར་ཏེ། གཙུག་ལག་ཁང་བརྩམས་པ་མཐར་ཐུག་པ་ཡོ་བྱད་ལ་སོགས་པ་དང་ལྡན་པས་ཆུང་དུ་ཆེན་པོར་བསྐྱེད་པར་བྱ་བའི་ཕྱིར་རམ། ཡོ་བྱད་ལ་སོགས་པ་དང་མི་ལྡན་པ་ཆེན་པོ་ཆུང་དུར་བསྐྱུང་བར་བྱ་བའི་ཕྱིར་གཞིག་པ་ལ་ཡང་ཁ་ན་མ་ཐོ་བ་མེད་དོ། །འདིར་གཞུང་ནི་གལ་ཏེ་བྱེད་དུ་འཇུད་མི་ནུས་ན་གཞིག་སྟེ་ཆུང་ངུར་བྱེད་དུ་གཞུག་སྟེ་འདི་ལ་འགྱེད་པར་མི་བྱའོ་ཞེས་བྱ་བ་གསུངས་པ་ཡིན་ནོ། །མཆོད་རྟེན་དང་སྐུ་གཟུགས་དག་ནི་བསྐྱེད་པ་ཉིད་ཀྱི་ཕྱིར་རོ་ཞེས་བྱ་བ་ནི། བརྩམས་པ་བཤིག་ན་ཁ་ན་མ་ཐོ་བ་མེད་པ་སྟེ། དེ་གཉིས་བརྩམས་པ་བསྐྱུང་བའི་ཕྱིར་བཤིག་པ་ནི་ཁ་ན་མ་ཐོ་བར་འགྱུར་རོ། །རྙིང་པ་ཉིད་ཀྱི་ཕྱིར་ནི་ཟིན་ཀྱང་མཉམ་པའི་ཕྱིར་ཡང་ངོ་ཞེས་བྱ་བ་ནི། མཆོད་རྟེན་དང་སྐུ་གཟུགས་དང་རྙིང་པ་ཉིད་གསར་བུས་བཅོས་པའི་ཕྱིར་ནི་བརྩམས་པ་འབའ་ཞིག་ཏུ་མ་ཟད་ཀྱི་ཟིན་ཀྱང་རུང་སྟེ། བརྩམས་པ་འམ་ཟིན་པ་དེ་དག་བསྐྱེད་པ་འབའ་ཞིག་གི་ཕྱིར་བཤིག་པ་ལ་ཁ་ན་མ་ཐོ་བ་མེད་པར་མ་ཟད་ཀྱི། སྔ་མ་དང་མཉམ་པར་བྱ་བའི་ཕྱིར་གཞིག་པ་ལ་ཡང་ཁ་ན་མ་ཐོ་བ་མེད་དོ། །རྙིང་པ་གང་ལ་ཕྱིར་བཅོས་པས་བསྐྱེད་པར་བྱ་མི་ནུས་པ་དེ་ལ་མཉམ་པ་ལ་ཁ་ན་མ་ཐོ་བ་མེད་པ་འདི་གསུངས་
པར་རིག་པར་བྱའོ། །ཕྱོགས་ཕྱིར་བཅོས་པའི་ཕྱིར་ཡང་ངོ་ཞེས་བྱ་བ་ནི། མཆོད་རྟེན་དང་སྐུ་གཟུགས་དག་གི་ཕྱོགས་གཅིག་རྙིང་པ་ཕྱིར་བཅོས་པར་བྱ་བའི་ཕྱིར་བཤིག་པ་ལ་ཡང་ཁ་ན་མ་ཐོ་བ་མེད་དོ། །འདིར་གཞུང་ནི་མཆོད་རྟེན་དང་སྐུ་གཟུགས་དག་རྙིང་པ་ན། བཅོམ་ལྡན་འདས་ཀྱིས་བཀའ་སྩལ་བ། ཕྱིར་བཅོས་པར་བྱའོ་ཞེས་གསུངས་པ་ཡིན་ནོ། །མདོ་སྔ་མའི་གཞུང་ནི། སྐྱང་ནུལ་གྱིས་སྐུ་གཟུགས་དག་རྙིང་པར་གྱུར་པ་ན། དགེ་སློང་དག་འགྱོད་པས་ཕྱིར་མི་འཆོས་པར་བྱེད་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ལྷག་པ་འམ་མཉམ་པར་བྱའི་ཆུང་བར་ནི་མི་བྱའོ་ཞེས་གསུངས་པ་ཡིན་ནོ། །གདུགས་ལ་སོགས་པ་དབོག་པ་ཡང་ངོ་ཞེས་བྱ་བ་ནི། རྙིང་པ་ཕྱིར་བཅོས་པའི་ཕྱིར་མཆོད་རྟེན་དང་སྐུ་གཟུགས་དག་ལས་དབོག་པ་ལ་ཁ་ན་མ་ཐོ་བ་མེད་པའོ། །སྩོགས་པ་ཞེས་བྱ་བའི་སྒྲས་ནི་ཆར་ཁབ་ལ་སོགས་པ་དག་ཀྱང་བསྡུའོ། །གཞན་གདགས་པའི་ཕྱིར་ཡང་ངོ་ཞེས་བྱ་བ་ནི། རྙིང་པ་ཕྱིར་བཅོས་པར་བྱ་བའི་ཕྱིར་དབོག་པ་ལ་ཁ་ན་མ་ཐོ་བ་མེད་པ་འབའ་ཞིག་ཏུ་མ་ཟད་ཀྱི། སར་པ་གཞན་གདགས་པའི་ཕྱིར་དབོག་པ་ལ་ཡང་ཁ་ན་མ་ཐོ་བ་མེད་པའོ། །དེའི་དོན་དུ་ཉེ་བར་མ་བཞག་པ་དབོག་པར་མི་བྱའོ་ཞེས་བྱ་བ་ནི། གཞན་གདགས་པ་དེའི་དོན་དུ་གདུགས་ལ་སོགས་པ་ཉེ་བར་མ་བཞག་པར་སྔ་མ་དབོག་པར་མི་བྱའོ། །འདིར་གཞུང་ནི་གཞན་དག་གིས་གདུགས་དག་ཕོག་པར་གྱུར་ནས། དེ་དག་པར་དུ་དུས་བྱེད་པར་གྱུར་པ་དང་བཅོམ་ལྡན་འདས་ཀྱིས་བཀའ་སྩལ་པ། ཇི་སྲིད་དུ་གཞན་དག་ཉེ་བར་མ་བཞག་པ་དེ་སྲིད་དུ་དབོག་པར་མི་བྱའོ་ཞེས་གསུངས་པ་ཡིན་ནོ། །སྐྱེས་པའི་རབས་ལ་སོགས་པའི་རི་མོ་དང་སངས་རྒྱས་ཀྱི་བཀའི་ཡི་གེ་དག་ཀྱང་དོ་ཞེས་བྱ་བ་ནི། དེ་དག་ཀྱང་རྙིངས་པ་བཅོས་པའི་ཕྱིར་ཕྱིད་པ་ལ་ཁ་ན་མ་ཐོ་བ་མེད་དོ། །ཅི་ཞིག་གི་ཕྱིར་ཕྱིར་པ་ལ་ཞེ་ན། དེའི་ཕྱིར་ཕྱིད་པའི་བྱེ་བྲག་ཁོ་ན་བྱ་བའི་ཕྱིར་རོ་ཞེས་བྱ་བ་སྨྲས་ཏེ། གཏམ་རྒྱུད་ཀྱི་རི་མོ་དང་ཡི་གེའི་གཞུང་བྱིད་པའི་བྱེ་བྲག་གང་ཡིན་པ་དེ་ཁོ་ན་ཕྱིར་བྲི་བའི་ཕྱིར་ཕྱིད་པ་ལ་ཁ་ན་མ་ཐོ་བ་མེད་དོ། །འདི་སྐད་བསྟན་ཏེ། གཏམ་རྒྱུད་ཀྱི་བྱེ་
བྲག་དང་ཡི་གེའི་བྱེ་བྲག་དེ་གཉིས་ཁོ་ན་ཕྱིར་བྲི་བའི་ཕྱིར་དེ་ལ་དཔྱིད་པར་བྱའི་གཞན་གྱི་ཕྱིར་ནི་མ་ཡིན་ནོ། །རྩོམ་པར་བྱེད་པས་མ་བྱས་ན་གཞན་གྱིས་ལྷག་མ་བྱའོ་ཞེས་བྱ་བ་ནི། གང་གིས་མཆོད་རྟེན་དང་གཙུག་ལག་ཁང་དག་རྩོམ་པར་བྱེད་པས་དེས་བརྩམས་ནས་ཟིན་པར་མ་བྱས་ན། གཞན་གྱིས་དེའི་ལྷག་མ་བྱ་བ་ལ་མི་རིགས་པ་མེད་པའོ། །གལ་ཏེ་དགེ་འདུན་གྱི་ཕྱིར་ཕྱེད་བརྩིགས་ན་མཁར་ལེན་སྦྱིན་པར་བྱ་བ་ཉིད་དོ་ཞེས་བྱ་བ་ནི། གལ་ཏེ་དགེ་འདུན་གྱི་ཕྱིར་སྦྱིན་བདག་གིས་གཙུག་ལག་ཁང་ལ་སོགས་པ་ཕྱེད་བརྩིགས་ན་དེའི་ཚེ་དགེ་འདུན་གྱིས་མཁར་ལེན་གཏང་བར་བྱ་བ་ཉིད་ཡིན་ཏེ་འདི་ལ་ཚུལ་དང་མི་མཐུན་པ་མེད་པར་ཤེས་པར་བྱའོ། །འདིའི་ཕྱིར་ཅེས་བྱ་བའི་སྒྲ་ནི་ཆ་ཤས་ལ་སྙེགས་ཀྱི་ཆ་མཉམ་པའི་ཕྱིར་ཁོ་ན་མ་ཡིན་ཏེ། ཆུང་ཟད་ཙམ་བརྩིགས་ན་ཞེས་བྱ་བའི་ཐ་ཚིག་གོ །འདིར་གཞུང་ནི་བཅོམ་ལྡན་འདས་ཀྱིས་བཀའ་སྩལ་པ། གཞི་མ་ཟིན་མ་ལ་དགེ་སློང་དག་གིས་མཁར་ལེན་གྱིས་བསླང་བར་བྱའོ། །དགེ་སློང་དག་ཉི་མ་རངས་པ་ཁོ་ནར་ལས་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། ཉི་མ་རངས་པ་ཁོ་ནར་ལས་མི་བྱ་བར་འདི་ལྟར་ལན་ཅིག་བྱའོ་ཞེས་བྱ་བ་གསུངས་པ་ཡིན་ནོ། །དེས་བཏང་བའི་དུས་ནི་གལ་ཏེ་དགུན་ཡིན་ན་ཟས་ཀྱི་འོག་རོལ་དུའོ། །གལ་ཏེ་སོག་ཡིན་ན་ཟས་ཀྱི་མདུན་རོལ་དུའོ་ཞེས་བྱ་བ་ནི། མཁར་ལེན་གྱིས་བཏང་བའི་དུས་སོ། །འདིར་གཞུང་ནི་དགེ་སློང་དག་སོག་ནི་ཟས་ཀྱི་འོག་རོལ་དུ་ལས་བྱེད་ལ། དགུན་ནི་ཟས་ཀྱི་མདུན་རོལ་དུ་ལས་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། དགུན་ནི་ཟས་ཀྱི་འོག་རོལ་དུ་ལས་བྱ་ལ་སོག་ནི་ཟས་ཀྱི་མདུན་རོལ་དུ་ལས་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །ཟས་ཀྱི་བྱ་བའི་དུས་ལུས་པར་རོ་ཞེས་བྱ་བ་ན། ཇི་སྲིད་དུ་ཟས་ཀྱི་བྱ་བ་ལྟུང་བཟེད་བཀྲུ་བ་ལ་སོགས་པ་དག་གི་དུས་ལས་ཡོལ་བར་འགྱུར་བ་དེ་སྲིད་དུ་ལས་མི་བྱའོ། །དེ་ལས་བྱི་དོར་མ་བྱས་པར་འཚོ་བ་ལ་འཇུག་པར་མི་བྱའོ་ཞེས་བྱ་བ་ནི། མཁར་ལེན་གྱི་ལས་དེ་ལས་བཀྲུ་བཤལ་ལ་སོགས་པ་བྱི་དོར་
མ་བྱས་པར་བསོད་སྙོམས་ལ་འགྲོ་བ་ལ་སོགས་པ་འཚོ་བ་ལ་འཇུག་པར་མི་བྱའོ། །དེའི་མཐའ་ནི་རྐང་ལག་བཀྲུས་པ་ཉིད་དོ་ཞེས་བྱ་བ་ནི། བྱི་དོར་བྱ་བ་དེའི་མཐའོ། །ལག་གི་བླས་ཁེའུ་སུས་སྦྱོར་དུ་གཞུག་གོ་ཞེས་བྱ་བ་ནི། གལ་ཏེ་དགེ་སློང་དག་ཟས་ཀྱི་མདུན་རོལ་དུ་ལས་བྱེད་ན་དེའི་ཚེ་ལག་གི་བླས་ཁེའུ་སུས་སྦྱོར་དུ་གཞུག་གོ །ཟས་ཀྱི་འོག་རོལ་དུ་ནི་སྐོམ་དང་རྐང་ལག་བསྐུ་མཉེ་བྱའོ་ཞེས་བྱ་བ་ནི། གལ་ཏེ་དགེ་སློང་དག་ཟས་ཀྱི་འོག་རོལ་དུ་ལས་བྱེད་ན་དེའི་ཚེ་ལག་གི་བླས་སྐོམ་ལ་སོགས་པ་སྦྱོར་དུ་གཞུག་པའོ། །གནས་ཁང་དག་གི་སྒོ་གདོད་དོ་ཞེས་བྱ་བ་ནི། དགེ་འདུན་གྱི་ཡང་རུང་གང་ཟག་གི་ཡང་རུང་ངོ༌། །སྒོ་གླེགས་གཞུག་གོ་ཞེས་བྱ་བ་ནི་སྒོར་རོ། །ལག་གཟུངས་དང་ཡང་མིག་དང་ཀོ་བའི་དུམ་བུ་དག་གོ་ཞེས་བྱ་བ་ནི། སྒོ་གླེགས་ལ་གཞུག་པར་བྱའོ། །སྐར་ཁུང་གདོད་དོ་ཞེས་བྱ་བ་ནི་གནས་ཁང་ལའོ། །ཕྱོགས་གང་དུ་གདོད་པར་བྱ་ཞེ་ན་དེའི་ཕྱིར། དཀྱིལ་དུའོ་ཞེས་བྱ་བ་སྨོས་ཏེ་རྩིག་ངོས་ཀྱིའོ། །དབྱིབས་ཅི་འདྲ་བ་ཞེ་ན་དེའི་ཕྱིར། ཕྱི་རུབ་ལ་ནང་ཡངས་པ་རྒྱ་མཚོའི་རྣམ་པ་ལྟ་བུའོ་ཞེས་བྱ་བ་སྨྲས་ཏེ། ཕྱི་རོལ་གྱི་ཁ་ཞུམ་ལ་ནང་ལོགས་ཡངས་པ་རྒྱ་མཚོ་ལྟར་བྱིན་གྱིས་ཡངས་པའོ། །དྲ་བ་གཞུག་གོ་ཞེས་བྱ་བ་ནི་སྐར་ཁུང་ལ་སྟེ། དྲ་བ་ཞེས་བྱ་བ་ནི་ཤར་བའོ། །སྒོ་གླེགས་སོ་ཞེས་བྱ་བ་ནི་སྐར་ཁུང་ལ་གཞུག་བར་བྱ་བའོ། །འཁོར་གཏན་དང་གནམ་གཟེར་དང་ཕྲེད་གཏན་དག་གོ་ཞེས་བྱ་བ་ནི། སྒོ་གླེགས་དེ་ལ་གཞུག་པར་བྱའོ། །དབྱུ་གུ་སྐམ་ཁ་བཅང་ངོ་ཞེས་བྱ་བ་ནི། སྒོ་དབྱེ་བའི་ཕྱིར་རོ། །གསོར་གྱིས་བཅུགས་པས་བརྒྱུའོ་ཞེས་བྱ་བ་ནི། ཐགས་མ་བརྒྱུ་བའི་ཐབས་ནི་གསོར་གྱིས་བཙུགས་པའི་ཐབས་ཀྱིས་བྱ་བའོ། །གནས་ཁང་གི་མདུན་དུ་ཁྱམས་བྱ་བའོ་ཞེས་བྱ་བ་ནི་སྒོ་ལོགས་སུའོ། །སོ་ཕག་གི་གཅལ་བདུན་ནམ་བརྒྱད་གཞུག་གོ་ཞེས་བྱ་བ་ནི། གནས་ཁང་བརྩིགས་པའི་འོག་གཞིའི་གཅལ་དུ་སོ་ཕག་རིམ་པ་བདུན་ནམ་བརྒྱད་གཞུག་པར་བྱའོ། །དེའི་སྟེང་དུ་ཀ་ཏན་གྱི་སྤང་ལེབ་པོ་ཞེས་བྱ་བ་ནི། སོ་ཕག་གི་གཅལ་དེའི་སྟེང་དུ་ཀ་ཏེན་གྱི་སྤང་ལེབ་གཞུག་པར་བྱའོ། །དེའི་སྟེང་དུ་ཀ་བའི་ཚར་དག་གོ་ཞེས་བྱ་བ་ནི།
ཀ་ཏན་གྱི་སྤང་ལེབ་དེའི་སྟེང་དུ་ཀ་བའི་ཚར་དག་གཟུགས་པའོ། །དེ་དག་གི་སྟེང་དུ་ཀ་ཞུའི་འདབ་མ་དག་གོ་ཞེས་བྱ་བ་ནི་ཀ་བའི་ཚར་དེ་དག་གི་སྟེང་དུ་ཀ་ཞུའི་འདབ་མ་དག་གཞུག་པའོ། །དེ་དག་གི་སྟེང་དུ་གདུང་མ་དག་གོ་ཞེས་བྱ་བ་ནི། ཀ་ཞུའི་འདབ་མ་དེ་དག་གི་སྟེང་དུ་གདུང་མ་དག་གཞག་བར་བྱའོ། །དེ་དག་གི་སྟེང་དུ་ཕྱམ་དག་གོ་ཞེས་བྱ་བ་ནི། གདུང་མ་དེ་དག་གི་སྟེང་དུ་ཕྱ་མ་དག་གཞག་པར་བྱ་བའོ། །དེ་དག་གི་སྟེང་དུ་སྤང་ལེབ་དག་གོ་ཞེས་བྱ་བ་ནི། ཕྱམ་དེ་དག་གི་སྟེང་དུ་སྤང་ལེབ་དགོད་པར་བྱའོ། །དེ་དག་གི་སྟེང་དུ་སོ་ཕག་ཆལ་པར་དགྲམ་མོ་ཞེས་བྱ་བ་ནི། སྤང་ལེབ་དེ་དག་གི་སྟེང་དུ་སོ་ཕག་ཚལ་པར་དགྲམ་བར་བྱའོ། །དེ་དག་གི་སྟེང་དུ་སོ་ཕག་གི་ཕྱེ་མའི་འཇིམ་པའོ་ཞེས་བྱ་བ་ནི། སོ་ཕག་བཀྲམ་པ་དེ་དག་གི་སྟེང་དུ་སོ་ཕག་གི་ཕྱེ་མའི་འཇིམ་པས་གླན་པར་བྱ་བའོ། །མི་ལྟུང་བར་བྱ་བའི་ཕྱིར་ལན་ཀན་བྱའོ་ཞེས་བྱ་བ་ནི་བརྩེགས་མ་དག་གི་སྟེང་དུའོ། །མི་འགུལ་བར་བྱ་བའི་ཕྱིར་ཤར་བ་གཞུག་གོ་ཞེས་བྱ་བ་ནི། ལན་ཀན་དེ་མི་འགུལ་བར་བྱ་བའི་ཕྱིར་རོ། །འདིར་ཤར་བ་ཞེས་བྱ་བ་ནི་ལན་ཀན་གྱི་ཤིང་རིང་པོ་རྣམ་པར་གཞག་པའི་བར་དུ་གཟུངས་ཀྱི་ཤིང་ཐུང་དུ་གང་དག་འཇུད་པ་དེ་དག་ལ་བྱའོ། །དེ་ལ་ལྕགས་ཀྱི་གཟེར་བུ་དག་གིས་སྦྱར་རོ་ཞེས་བྱ་བ་ནི། ཤར་བ་དེའི་སྟེང་དུ་ཤིང་དེ་ལ་ལྕགས་གཟེར་དག་གིས་གདབ་ཅིང་སྦྱར་བའོ། །འཛེག་པའི་ཕྱིར་ཐེམ་སྐས་བྱའོ་ཞེས་བྱ་བ་ནི་བརྩེགས་མ་དག་ལའོ། །འོག་ཏུ་རྡོ་ལས་བྱས་པ་བར་དུས་ལས་བྱས་པ་སྟེང་དུ་ཤིང་ལས་བྱས་པའོ་ཞེས་བྱ་བ་ནི་བརྩེགས་མ་དག་ཏུ་ཐེམ་སྐས་དག་གོ །ཡ་གང་ལས་འཛེག་པར་བྱའོ་ཞེས་བྱ་བ་ནི། ཐེམ་སྐས་མེད་ནའོ། །ཤིང་དང་སྨྱུག་མ་དང་ཐག་པ་ལས་བྱས་པ་ཡང་ངོ་ཞེས་བྱ་བ་ནི། ཡ་གད་ནི་དེ་གསུམ་གང་ལས་བྱས་པ་ཡང་རུང་བའོ། །རྫིང་བུ་དང་སྒོ་གང་དུ་རྫབ་མི་འབྱུང་བར་བྱ་བའི་ཕྱིར་སོ་ཕག་གི་གཅལ་གཞུག་གོ་ཞེས་བྱ་བ་ནི། རྫིང་བུ་དང་སྒོ་གང་དུ་རྫབ་འབྱུང་བ་ཟློག་པའི་ཕྱིར་སོ་ཕག་གི་གཅལ་དགྲམ་པར་བྱའོ། །དེའི་སྟེང་དུ་ཕག་གི་ཕྱེ་མའི་འཇིམ་པའོ་ཞེས་བྱ་བ་ནི། སོ་ཕག་གི་གཅལ་དེའི་སྟེང་དུ་སོ་ཕག་གི་ཕྱེ་མའི་འཇིམ་བས་བསྐུ་བའོ། །དེའི་སྟེང་དུ་རྡོ་
ཐལ་གྱིས་སོ་ཞེས་བྱ་བ་ནི། སོ་ཕག་གི་ཕྱེ་མའི་འཇིམ་པ་དེའི་སྟེང་དུ་རྡོ་ཐལ་གྱི་སྐྱང་ནུལ་གྱིས་བསྐུ་བར་བྱའོ། །མེད་ན་རྐང་པ་བསྐྱབ་པའི་ཕྱིར་ཤིང་གི་སྤང་ལེབ་བོ་ཞེས་བྱ་བ་ནི། གཅལ་ཇི་སྐད་བསྟན་པའི་རྫས་དེ་དག་མེད་ན། རྐང་པ་བསྐྱབ་པའི་ཕྱིར་ཤིང་གི་སྦང་ལེབ་གཞུག་པར་བྱའོ། །ཡང་ན་བར་བར་དུ་སོ་ཕག་དག་གོ་ཞེས་བྱ་བ་ནི་རྐང་པ་བསྐྱབ་པའི་ཕྱིར་གཞུག་པའོ། །མཆོད་རྟེན་ལ་ཡང་དེ་བཞིན་ནོ་ཞེས་བྱ་བ་ནི། རྫབ་མི་འབྱུང་བར་བྱ་བར་ཕྱིར་སོ་ཕག་གི་གཅལ་གཞུག་གོ་ཞེས་བྱ་བ་ནས། ཡང་ན་བར་བར་དུ་སོ་ཕག་གོ་ཞེས་བྱ་བའི་བར་དེ་དག་དེ་བཞིན་དུ་གཞུག་པའོ། །འདི་ལ་འདོམ་གང་ཙམ་བྱས་པ་ཉིད་ན་བྱས་པ་ཉིད་དོ་ཞེས་བྱ་བ་ནི། མཆོད་རྟེན་འདི་ལ་གཅལ་དེ་འདོམ་གང་ཙམ་བྱས་པ་ཉིད་ན་བྱས་པ་ཉིད་ཡིན་པའོ། །སེང་གེའི་ཁྲི་གྲུ་བཞི་བྱའོ་ཞེས་བྱ་བ་ནི། ཚེས་སྨྲ་བ་གཞག་པའི་ཕྱིར་རོ། །རྐང་པ་དག་ལ་སེང་གེའི་གདོང་ལྟ་བུ་ཉིད་དོ་ཞེས་བྱ་བ་ནི། རྐང་པ་བཞི་པོ་དག་ལ་སེང་གེའི་གདོང་ལྟ་བུ་བྱ་བྱའོ། །སྤོ་བའི་དོན་དུ་གཟུང་བའི་ཕྱིར་བཞི་པོ་དེ་དག་ལ་ལྕགས་ཀྱི་ཡང་མིག་དག་གདགས་སོ་ཞེས་བྱ་བ་ནི། སེང་གེའི་ཁྲི་དེ་སྤོ་བའི་དོན་དུ་གཟུང་བའི་ཕྱིར་རྐང་པ་བཞི་པོ་དེ་དག་ལ་ལྕགས་ཀྱི་ཡང་མིག་དག་གདགས་པའོ། །ཐག་གུ་དག་གིས་བཏགས་སོ་ཞེས་བྱ་བ་ནི། སེང་གེའི་ཁྲིའི་ཐགས་མའོ། །དེར་སྟན་ནང་ཚངས་ཅན་གཞུག་གོ་ཞེས་བྱ་བ་ནི། སེང་གེའི་ཁྲི་དེར་རོ། །སྟེང་དུ་བླ་རེའོ་ཞེས་བྱ་བ་ནི། སེང་གེའི་ཁྲི་དེའི་སྟེང་དུ་གདགས་པའོ། །དབྱངས་བདག་གོ་ཞེས་བྱ་བ་ནི་བླ་རེ་དང་སེང་གེའི་ཁྲི་དེ་ལས་གདགས་པའོ། བརྟན་པ་ལ་ནི་སོ་ཕག་ལས་བྱས་པའི་ཐེམ་སྐས་བྱའོ་ཞེས་བྱ་བ་ནི། སེང་གེའི་ཁྲི་གཞན་དུ་མི་བསྐྱོད་པའི་ཆོས་ཅན་བརྟན་པ་ལའོ། །སྤོ་བ་ལ་ནི་ཤིང་ལས་བྱས་པའོ་ཞེས་བྱ་བ་ནི། སེང་གེའི་ཁྲི་གཞན་དུ་སྤོ་བ་ལ་ནི་ཤིང་ལས་བྱས་པའི་ཐེམ་སྐས་བྱ་བའོ། །མ་འབྱོར་ན་ཡ་གད་དོ་ཞེས་བྱ་བ་ནི། ཤིང་ལས་བྱས་པའི་ཐེམ་སྐས་མ་འབྱོར་ན་དེ་ལ་ཡ་གད་གཟུགས་པར་བྱའོ། །རྐང་རྟེན་ཡང་ངོ་ཞེས་བྱ་བ་ནི། གང་དུ་རྐང་པ་གཉིས་འཕྱང་བ་
དེར་རྐང་པ་གཉིས་གཞག་པའི་ཚད་ཇི་ཙམ་པ་དེ་ཙམ་གྱི་རྐང་རྟེན་བྱའོ། །མཆོད་པའོ་ཞེས་བྱ་བ་ནི། རྐང་རྟེན་ལ་ཞེས་བྱ་བར་ཤེས་པར་བྱ་སྟེ། གང་གི་ཚེ་དད་པ་ཅན་དག་གིས་རྐང་རྟེན་ལ་དྲིས་བྱུག་པ་དང༌། མེ་ཏོག་གིས་གཡོགས་པ་དང་མཆོད་ཡོན་ལ་སོགས་པ་དག་གིས་མཆོད་པར་བྱེད་པ་དེའི་ཚེའོ། །དེའི་སྟེང་དུ་ལོ་མའི་ཆུན་བུ་འམ་རྩྭའི་ཆུན་བུ་གཞག་པར་བསྟན་པའི་ཕྱིར། སྟེང་དུ་ལོ་མའི་ཆུན་པོ་འམ་རྩྭའི་ཆུན་བུ་གཞག་གོ་ཞེས་བྱ་བ་སྨྲས་ཏེ། ལངས་པའི་གནས་སྐབས་སུ་དོགས་པ་སྤང་བའི་ཕྱིར་རོ། །འདི་ནི་རྐང་པ་གཉིས་མི་འཕྱང་བར་བྱ་བའི་ཕྱིར་རོ་ཞེས་བྱ་བ་ནི། རྐང་རྟེན་བྱ་བ་འདི་ནི་དེའི་ཕྱིར་རོ། །འདི་ནི་རྡོས་འགྲུབ་པོ་ཞེས་བྱ་བ་ནི་རྐང་པ་གཉིས་མི་འཕྱང་བར་བྱ་བ་འདི་ནི་རྡོས་ཀྱང་འགྲུབ་པའོ། །ཟན་ཟ་བ་རྣམས་ལ་ཁྭ་དང་བྱིའུ་དང་ཕུག་རོན་དག་གིས་མི་འཚེ་བར་བྱ་བའི་ཕྱིར་བྱ་རྒྱ་བྱའོ་ཞེས་བྱ་བ་ནི་ཁྱམས་སུའོ། །འདིར་གཞུང་ནི་དགེ་སློང་དག་ཁྱམས་སུ་ཟན་ཟ་བ་ན། དེ་དག་ལ་ཁྭ་དང་བྱེའུ་དང་ཕུག་རོན་དག་གིས་འཚེ་ནས། བཅོམ་ལྡན་འདས་ཀྱིས་བཀའ་སྩལ་པ། བྱ་རྒྱ་བྱའོ་ཞེས་གསུངས་པ་ཡིན་ནོ། །དེ་ནི་རྣམ་པ་བཞིའོ་ཞེས་བྱ་བ་ནི། བྱ་རྒྱ་དེའོ་།མུཉྫ་ལས་བྱས་པ་དང་བལ་བ་ཛ་ལས་བྱས་པ་དང་ཤན་ལས་བྱས་པ་དང་རས་བལ་ལས་བྱས་པའོ་ཞེས་བྱ་བ་ནི་བཞི་པོ་དེ་དག་ནི་ཀ་ཤ་དང་ཀུ་ཤ་ལ་སོགས་པ་གཞན་དག་གི་དཔེ་ཡིན་ནོ། །གྲྭ་བཞི་དག་ཏུ་གཟུངས་གཟེར་གདབ་པོ་ཞེས་བྱ་བ་ནི་ཁྱམས་ཀྱིའོ། །དེ་དག་ལ་གདགས་སོ་ཞེས་བྱ་བ་ནི། གཟུངས་གཟར་དེ་དག་ལ་བྱ་རྒྱ་གདགས་སོ། །ཤིང་གི་ནི་འཆག་པ་དང་འདྲུལ་བས་དེའི་ཕྱིར་ལྕགས་ལས་བྱས་པ་དག་གོ་ཞེས་བྱ་བ་ནི། གཟུངས་གཟེར་དག་གོ །དེའི་ཕྱོགས་གཅིག་ཏུ་མཐོངས་གདོད་དོ་ཞེས་བྱ་བ་ནི། བྱ་རྒྱ་དེའི་ཕྱོགས་གཅིག་ཏུ་མཐོངས་གདོད་པར་བྱའོ། །དེ་རྩིའི་ཕྱིར་ཞེ་ན་དེའི་ཕྱིར། ཟན་ཟོས་ཟིན་ནས་འཇུག་པར་བྱ་བའི་ཕྱིར་རོ་ཞེས་བྱ་བ་སྨྲས་ཏེ། དགེ་སློང་རྣམས་ཟན་ཟོས་ཟིན་ནས་ཁྭ་ལ་སོགས་པ་ནང་དུ་འཇུག་པར་བྱ་བའི་ཕྱིར་རོ། །དེ་དྲོ་ཁར་དགབ་པོ་ཞེས་བྱ་བ་ནི་མཐོངས་དེའོ། །དབྱར་དག་ཁྱམས་སུ་ཆུ་
མི་འབྱུང་བར་བྱ་བའི་ཕྱིར་སྤང་ལེབ་དག་གོ་ཞེས་བྱ་བ་ནི་གཞུག་གོ་ཞེས་བྱ་བར་སྦྱར་རོ། །ཕྱོགས་གང་དུ་ཞེ་ན་དེའི་ཕྱིར་ཀ་བའི་བར་དག་ཏུའོ་ཞེས་བྱ་བ་སྨྲས་སོ། །ཅི་ཐམས་ཅད་དུ་འམ་ཞེ་ན་དེའི་ཕྱིར་སྣང་བར་བྱ་བའི་ཕྱོགས་མ་གཏོགས་པར་རོ་ཞེས་བྱ་བ་སྨྲས་ཏེ། སྣང་བ་འཇུག་པར་བྱ་བའི་ཕྱོགས་མ་གཏོགས་པར་རོ། །མེད་ན་སེག་དག་གམ་རེ་ལྡེ་དག་གོ་ཞེས་བྱ་བ་ནི། སྤང་ལེབ་དག་མེད་ན་དེར་སེག་དག་གམ་རེ་ལྡེ་དག་གཞུག་པར་བྱ་བའོ། །དབྱར་གྱི་ཟླ་བ་བཞི་པོ་དག་གི་མཐར་དབྱུང་ངོ་ཞེས་བྱ་བ་ནི། སྤང་ལེབ་ལ་སོགས་པའོ། །འཁོར་གྱི་ཁྱམས་བྱའོ་ཞེས་བྱ་བ་ནི་ཁྱམས་ཟླུམ་པོ་བྱ་བའོ། །གནས་བསིལ་བར་བྱ་བའི་ཕྱིར་ཕྱི་རོལ་རྩིགས་པས་བསྐོར་རོ་ཞེས་བྱ་བ་ནི། གནས་བསིལ་བར་བྱ་བའི་ཕྱིར་ནང་དུ་ཀ་བའི་ཚར་གཟུགས་ཤིང་ཕྱི་རོལ་རྩིག་པས་བསྐོར་བར་བྱ་བ་དང༌། དབུས་སུ་རྫིང་བུ་གཞག་པར་བྱའོ། །ཀ་བའི་ཚར་དག་གཟུགས་སོ་ཞེས་བྱ་བ་ནི་ནང་དུའོ། །སྐར་ཁུང་གདོད་དོ་ཞེས་བྱ་བ་ནི། དེར་སྐར་ཁུང་མང་པོ་དག་གདོད་པར་བྱ་བའོ། །མ་མཐའ་དག་སྟན་གྱི་ཡ་མཐའ་དང་ཐད་ཀར་བབ་པར་བྱའོ་ཞེས་བྱ་བ་ནི། སྐར་ཁུང་དེ་དག་གི་མ་མཐའ་དག་ཁྲི་ལ་སོགས་པའི་སྟན་ཚད་མ་དག་གི་ཡ་མཐའ་དང་ཐད་ཀར་བབ་པར་འགྱུར་བ་དེ་ལྟར་འཁོར་གྱི་ཁྱམས་དེར་སྐར་ཁུང་མང་པོ་དག་གདོད་པར་བྱ་བའོ། །དྲ་བ་དང་སྤོ་གླགས་དག་གཞུག་པའོ་ཞེས་བྱ་བ་ནི། སྐར་ལུང་དག་ལའོ། །ཟས་དང་མེ་དང་དབོངས་དང་འཆག་སའི་ཁང་པ་དག་བྱའོ་ཞེས་བྱ་བ་ནི། ཟས་ཀྱི་ཁང་པ་དང་མེའི་ཁང་པ་དང་དབོང་སའི་ཁང་པ་དང་འཆག་སའི་ཁང་པ་དག་བྱ་བའོ། །རྩིག་ངོས་ཀྱི་ཕྱོགས་འཁོར་བར་གློ་འབུར་དག་བྱའོ་ཞེས་བྱ་བ་ནི། གཙུག་ལག་ཁང་གི་རྩིག་ངོས་ཀྱི་ཕྱོགས་སུ་རྒྱུན་ལུགས་ཀྱི་ཕན་ཆད་དུ་གཙུག་ལག་ཁང་གི་རྩིག་པ་ལ་བརྟེན་ཏེ་གནས་ཀྱི་ཆེད་དུ་ཁང་བུ་གཡོགས་མ་དང་བཅས་པ་དག་བྱའོ། །བསྟི་གནས་ཞེས་བྱ་བ་ནི་ཁྱམས་ཀྱི་ངོ་བོ་ཉིད་ཡིན་པས་འདི་དང་ཐ་དད་དོ། །ས་ཁྱིམ་རུང་ངོ་ཞེས་བྱ་བ་ནི། དགེ་སློང་དག་གི་གནས་སུས་ཕུག་རུང་བའོ། །དགྲ་གང་ཡང་ངོ་ཞེས་བྱ་བ་ཡང༌། དགེ་སློང་དག་གི་གནས་སུ་རུང་བ་སྟེ། འདིར་དགྲ་གང་ཞེས་བྱ་བ་ནི་གཙུག་ལག་
༄༅། ཁང་གི་གླ་དག་གི་ཡང་ཐོག་ལ་སོགས་པ་སྟེ། ཕ་རོལ་གྱི་མཚོན་རྡུགས་པར་བྱེད་པའི་ཕྱིར་རོ། འདི་ལ་ལན་ཀན་གྱི་སྐབས་ནི་ཁྱམས་དང་འདྲ་འོ་ཞེས་བྱ་བ་ནི། དགྲ་གང་འདི་ལ་མི་ལྷུང་བར་བྱ་བའི་ཕྱིར་ལན་ཀན་བྱ་བ་དང༌། མི་འགུལ་བར་བྱ་བའི་ཕྱིར་ཤར་བ་གཞུག་པ་དང༌། དེ་ལྕགས་ཀྱི་གཟེར་བུ་དག་གིས་སྦྱར་བ་དང༌། འཛེག་པའི་ཕྱིར་ཐེམ་སྐས་བྱ་བ་ལ་སོགས་པའི་སྐབས་ནི་ཁྱམས་དང་འདྲའོ། །རབ་ཏུ་བྱུང་བའི་ཀུན་དགའ་རབ་རྩིག་པས་བསྐོར་བ་ཉིད་ཀྱང་ངོ་ཞེས་བྱ་བ་ཡང་རུང་ངོ་ཞེས་བྱ་བའི་རྗེས་སྙག་པའི་ཕྱིར་ཀྱང་ངོ་ཞེས་བྱ་བའི་སྒྲ་སྨོས་སོ། །རྩིག་པ་ལ་ཆུ་ཁུང་གདོད་པ་ཉིད་ཀྱང་ངོ་ཞེས་བྱ་བ་ནི། རབ་ཏུ་བྱུང་བའི་ཀུན་དགའ་རབ་གང་ཡིན་པ་དེ་ལ་ཆུ་ཁུང་གདོད་པ་ཉིད་ཀྱང་རུང་བའོ། །གཙང་དང་འོབས་དག་ཀྱང་ངོ་ཞེས་བྱ་བ་ཡང༌། རབ་ཏུ་བྱུང་བའི་ཀུན་དགའ་རབ་དེ་དག་གིས་བསྐོར་བ་ཉིད་ཀྱང་རུང་བའོ། །གང་ཟག་གི་གཙུག་ལག་ཁང་ཡོ་བྱད་དང་བཅས་པ་ཡང་ངོ་ཞེས་བྱ་བ་ཡང་རུང་བ་ཉིད་ཡིན་ཏེ། ལན་ཀན་དང༌། དྲ་བ་དང་ཟས་ཀྱི་ཁང་པ་ལ་སོགས་པ་ནི་ཡོ་བྱད་ཡིན་པར་རིག་པར་བྱའོ། །སྔོན་པོ་ལ་སོགས་ཟད་པར་གྱི་མཚན་མ་མངོན་དུ་བྱ་བའི་ཕྱིར་གནས་ཁང་གི་རྩིག་པ་དག་སྔོན་པོ་ལ་སོགས་པ་རྣམ་པ་བཞིར་བྱའོ་ཞེས་བྱ་བ་ནི། ཟད་པར་སྔོན་པོ་དང༌། ཟད་པར་སེར་པོ་དང༌། ཟད་པར་དམར་པོ་དང༌། ཟད་པར་དཀར་པོའི་སྐྱེ་མཆེད་ཀྱི་མཚན་མ་དག་མངོན་དུ་བྱ་བའི་ཕྱིར་གནས་ཁང་གི་རྩིག་པ་དག་སྔོན་པོ་ལ་སོགས་པ་ཁ་དོག་རྣམ་པ་བཞིར་བྱའོ། །འདིར་གཞུང་ནི་དགེ་སློང་ཞིག་ཟད་པར་སྔོན་པོའི་སྐྱེ་མཆེད་ཀྱི་སྙོམ་པར་འཇུག་པ་སྒོམ་པར་བྱེད་པའི་དགེ་སློང་དེ་ལ་རེ་ཞིག་མངོན་དུ་མི་འགྱུར་བ་ན། བཅོམ་ལྡན་འདས་ཀྱིས་བཀའ་སྩལ་པ། གནས་ཁང་གི་རྩིག་པ་སྔོན་པོ་དང་སེར་པོ་དང་དམར་པོ་དང་དཀར་པོ་རྣམ་པ་བཞིར་བྱས་ཏེ་དེ་དག་མཐོང་ནས་མངོན་དུ་བྱས་ཏེ། ཟད་པར་སྔོན་པོའི་སྐྱེ་མཆེད་ཀྱི་སྙོམས་པར་འཇུག་པ་བསྒོམ་པར་བྱའོ་ཞེས་གསུངས་པ་ཡིན་ནོ། །རབ་ཏུ་བྱུང་བའི་ཀུན་དགའ་རབ་ལ་རི་མོ་བྲི་བ་ཉིད་དུ་རུང་ངོ་ཞེས་བྱ་བ་ནི། རབ་ཏུ་བྱུང་བའི་གཙུག་ལག་ཁང་ལ་རི་མོ་བྲི་བ་ཉིད་དུ་དུང་བའོ། །གང་དུ་
ཅི་ཞིག་བྲི་བར་བྱ་ཞེ་ན་དེའི་ཕྱིར་སྒོར་གནོད་སྦྱིན་ལག་ན་རྡོ་རྗེ་འཛིན་པ་ལ་སོགས་པ་བྲིའོ་ཞེས་བྱ་བ་སྨྲས་ཏེ། གཙུག་ལག་ཁང་གི་སྒོར་གནོད་སྦྱིན་ལག་ན་རྡོ་རྗེ་འཛིན་པ་ལ་སོགས་པ་དག་རི་མོར་བྲི་བར་བྱའོ། །སྒོ་གང་དུ་འཁོར་བའི་འཁོར་ལོའི་ཞེས་བྱ་བ་ཡང༌། རི་མོར་བྲི་བར་བྱའོ་ཞེས་བྱ་བར་སྦྱར་རོ། །འཁོར་བའི་འཁོར་ལོ་ཅི་འདྲ་བ་ཞེན་དེའི་ཕྱིར་ཆ་ལྔ་པར་བྱའོ་ཞེས་བྱ་བ་སྨྲས་ཏེ། འདིར་ཆ་ལྔ་པ་ཞེས་བྱ་བའི་སྒྲས་ནི་འགྲོ་བ་ལྔ་པོ་དག་བསྟན་ཏོ། །ལྷ་དང་མིའི་ཆ་དག་ཕྱོགས་གང་དུ་བྲི་བར་བྱ་ཞེ་ན་དེའི་ཕྱིར། སྟེང་དུ་ལྷ་དང་མི་རྣམས་སོ་ཞེས་བྱ་བ་སྨྲས་ཏེ། འཁོར་ལོའི་སྟེང་གི་ཕྱོགས་སུ་ལྷ་དང་མིའི་འགྲོ་བ་དག་བྲི་བར་བྱའོ། །དེ་ནས་འོག་གི་ཕྱོགས་དག་ཏུ་སེམས་ཅན་དམྱལ་བ་དང་དུད་འགྲོ་དང༌། ཡི་དགས་ཀྱི་འགྲོ་བ་དག་བྲི་བར་ཞར་ལ་ཤེས་པར་བྱའོ། །གླིང་བཞི་པོ་དག་གོ་ཞེས་བྱ་བ་ཡང་བྲི་བར་བྱའོ། །རྫུས་ཏེ་སྐྱེ་བའི་སེམས་ཅན་ཟོ་ཆུན་རྒྱུད་མོ་བཞིན་དུ་འཆི་འཕོ་བ་དང་སྐྱེ་བ་དག་ཀྱང་ངོ་ཞེས་བྱ་བ་ཡང་རི་མོ་བྲི་བར་བྱའོ། །དབུས་སུ་འདོད་ཆགས་དང་ཞེ་སྡང་དང་གཏི་མུག་དག་ཕུག་རོན་དང་སྤྲུལ་དང་ཕག་གི་རྣམ་པར་རོ་ཞེས་བྱ་བ་ནི། དེ་དག་གོ་རིམས་བཞིན་དུ་ཡིན་པར་རི་མོ་བྲི་བར་བྱའོ། །སྔ་མ་དེ་གཉིས་གཏི་མུག་གིས་ཟས་བར་རོ་ཞེས་བྱ་བ་ནི། འདོད་ཆགས་དང་ཞེ་སྡང་གི་རྣམ་པ་ཕུག་རོན་དང་སྤྲུལ་གཉིས་གཏི་མུག་གི་རྣམ་པ་པག་གིས་ཟ་བ་དང་འདྲ་བར་བྲི་བར་བྱ་བའོ། །ཁོར་ཁོར་ཡུག་ཏུ་རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་དང་ཐམས་ཅད་མི་རྟག་པ་ཉིད་ཀྱིས་གཟུང་བར་བྱའོ་ཞེས་བྱ་བ་ནི། འཁོར་བའི་འཁོར་ལོའི་ཕྱི་རོལ་གྱི་མཐའ་ཁོར་ཁོར་ཡུག་ཏུ་རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་བྲི་བར་བྱ་ཞིང་དེ་དག་ཐམས་ཅད་ཀྱང་མི་རྟག་པ་ཉིད་ཀྱི་སྲིན་པོས་པང་དུ་བླངས་ཏེ་ཡན་ལག་ལྔ་ཆར་གྱིས་གཟུང་བར་བྲི་བར་བྱ་བའོ། །སྟེང་དུ་སངས་རྒྱས་མྱ་ངན་ལས་འདས་པའི་དཀྱིལ་འཁོར་དཀར་པོ་ཉེ་བར་སྟོན་པའོ་ཞེས་བྱ་བ་ནི། འཁོར་བའི་འཁོར་ལོ་མི་རྟག་པ་ཉིད་ཀྱི་སྲིན་པོས་གཟུང་བར་དེའི་སྟེང་དུ་སངས་རྒྱས་བཅོམ་ལྡན་འདས་ཀྱི་སྐུ་གཟུགས་བྲི་ཞིང༌། དེའི་དྲུང་དུ་མྱ་ངན་ལས་འདས་པའི་
གཟུགས་བརྙན་དཀྱིལ་འཁོར་དཀར་པོ་བྲི་བར་བྱ་སྟེ། སངས་རྒྱས་ཀྱི་སྐུ་གཟུགས་དེ་དཀྱིལ་འཁོར་དེ་བཞིན་ལ་ཉེ་བར་སྟོན་པར་མཛད་པ་འདྲ་བར་འདྲི་བར་བྱ་བའོ། །འོག་ཏུ་བརྩམ་པར་བྱ་ཞིང་ཞེས་བྱ་བའི་ཚིགས་སུ་བཅད་པ་གཉིས་སོ་ཞེས་བྱ་བ་ནི། འཁོར་བའི་འཁོར་ལོ་མི་རྟག་པ་ཉིད་ཀྱི་སྲིན་པོས་གཟུངས་བ་དེའི་འོག་ཏུ་བརྩམ་པར་བྱ་ཞིང་ཞེས་བྱ་བ་ལ་སོགས་པའི་ཚིགས་སུ་བཅད་པ་གཉིས་ཡི་གེར་བྲི་བར་བྱ་བའོ། །ཚིགས་སུ་བཅད་པ་གཉིས་གང་ཞེ་ན། །བརྩམ་པར་བྱ་ཞིང་དབྱུང་བར་བྱ། །སངས་རྒྱས་བསྟན་ལ་འཇུག་བར་བྱ། །འདམ་བུའི་ཁྱིམ་ན་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཞེས་གསུངས་པ་ཡིན་ནོ། དེ་སྟོན་པར་བྱེད་པ་གཞག་པར་བྱའོ་ཞེས་བྱ་བ་ནི། སྐྱེ་བོ་ལྷགས་པ་རྣམས་འཁོར་བའི་འཁོར་ལོ་དེ་སྟོན་ནུས་པའི་དགེ་སློང་གཙུག་ལག་ཁང་དེར་གཞག་པར་བྱ་བའོ། །དེའི་ཁོར་ཁོར་ཡུག་ཏུ་ཆོ་འཕྲུལ་ཆེན་པོ་དང་བདུད་བཅོམ་པ་དག་གོ་ཞེས་བྱ་བ་ནི། སྒོ་ཁང་དེའི་ཁོར་ཁོར་ཡུག་ཏུ་བཅོམ་ལྡན་འདས་རྡོ་རྗེའི་གདན་ལ་གཞུགས་ཏེ་བདུད་འདུལ་བ་དང༌། མངོན་པར་རྫོགས་པར་སངས་རྒྱས་ཏེ་ཆོ་འཕྲུལ་ཆེན་པོ་བསྟན་པའི་རྒྱུད་རི་མོ་བྲི་བར་བྱ་བའོ། །ཁྱམས་སུ་སྐྱེས་པའི་རབས་དག་གོ་ཞེས་བྱ་བ་ནི། གཙུག་ལག་ཁང་གི་ཁྱམས་སུ་སྐྱེས་པའི་རབས་ཀྱི་སྡེ་དག་རི་མོང་བྲི་བར་བྱ་བའོ། །དྲི་གཙང་ཁང་གི་སྐོར་གནོད་སྦྱིན་ཕྲེང་ཐོགས་དག་གོ་ཞེས་བྱ་བ་ནི། དྲི་གཙང་ཁང་གི་སྒོར་གནོད་སྦྱིན་ལག་ན་ཕྲེང་ཐོགས་དག་རི་མོར་བྲི་བར་བྱ་བའོ། །དཔོང་སའི་ཁང་པར་གནས་བརྟན་གྱི་གྲལ་དག་གོ་ཞེས་བྱ་བ་ནི། དཔོང་སའི་རྩིག་ངོས་སུ་གནས་བརྟན་ཆེན་པོ་འཕགས་པ་ཀུན་ཤེས་ཀཽཎྜི་ནྱ་ལ་སོགས་པ་དགྲ་བཅོམ་པའི་དགེ་འདུན་རྣམས་ཀྱི་གཟུགས་རི་མོར་བྲི་བར་བྱའོ། །མཛོད་ཀྱི་སྒོར་གནོད་སྦྱིན་ལག་ན་མྱུ་གུ་ཐོགས་པ་དག་གོ་ཞེས་བྱ་བ་ནི། མཛོད་ཀྱི་སྒོར་གནོད་སྦྱིན་ལག་ན་རིན་པོ་ཆེའི་མྱུ་གུ་དང་སྙེ་མ་དང་
དོག་པ་དང༌། འབྲུ་ཐོགས་པ་དག་རི་མོར་བྲི་བར་བྱའོ། །ཟས་ཀྱི་ཁང་པར་ལག་ན་བཟའ་བ་དང་བཅའ་བ་ཐོགས་པ་དག་གོ་ཞེས་བྱ་བ་ནི། བཀད་སར་གནོད་སྦྱིན་ལག་ན་བཅའ་བ་དང་བཟའ་བ་ཐོགས་པ་དག་རི་མོར་བྲི་བར་བྱ་བའོ། །བ་སྲོ་གང་གི་ཁང་པར་ལག་ན་མྱུ་གུ་དང་བུམ་པ་ཐོགས་པ་དག་གོ་ཞེས་བྱ་བ་ནི། བ་སྲོ་གང་གི་ཁང་པར་གནོད་སྦྱིན་ལག་ན་བུམ་པ་དང་མྱུ་གུ་ཐོགས་པ་དག་རི་མོར་བྲི་བར་བྱ་བ་སྟེ། བུམ་པ་ནི་ཁྲུས་ཀྱི་དོན་ཉིད་དུ་དགོས་ལ་མྱུ་གུ་ནི་གདིང་བའི་དོན་ཉིད་དུ་དགོས་པའི་ཕྱིར་རོ། །མེ་ཁང་དུ་གྲུལ་བུམ་མེ་སྤར་བར་བྱེད་པ་དག་ཀྱང་གྲུལ་བུམ་གྱི་བུ་བྱི་དོར་ལ་སོགས་པ་བྱེད་པ་དང་མེ་སྦར་བར་བྱེད་པ་དག་དང་སྦྱིན་བདག་མར་མོ་ཐོགས་པ་དང་ལྷའི་ཕོ་ཉ་དག་གོ་ཞེས་བྱ་བ་ནི། མེ་བུད་པའི་ཁང་པར་གྲུལ་བུམ་མེ་སྦར་བར་བྱེད་པ་དག་རི་མོར་བྲི་བར་བྱ་སྟེ། དེ་དག་ནི་མེ་ལ་དབང་བར་གྲགས་པའི་ཕྱིར་རོ། །དེར་གྲུལ་བུམ་གྱི་བུ་བྱི་དོར་ལ་སོགས་པ་བྱེད་པ་དང་མེ་སྦར་བར་བྱེད་པ་དག་ཀྱང་རི་མོར་བྲི་བར་བྱའོ། །དེར་སྦྱིན་བདག་གང་ཡིན་པ་འཁོར་དང་བཅས་པ་མར་མེ་ཐོགས་པ་ཡང་རི་མོར་བྲི་བར་བྱ་སྟེ། མེ་བུད་པའི་ཁང་པ་དེ་ནི་མུན་གང་པའི་ཕྱིར་མར་མེ་གཟུགས་པར་གསུངས་པའི་ཕྱིར་རོ། །དེ་ད་ལྷའི་ཕོ་ཉ་དག་ཀྱང་རི་མོར་བྲི་བར་བྱ་སྟེ། ལྷའི་ཕོ་ཉ་ཞེས་བྱ་བ་ནི། སེམས་ཅན་སྐྱེ་བ་དང་རྒ་བ་དང་ན་བ་དང་འཆི་བ་ལ་སོགས་པ་དེ་དག་སྟེ། དེ་དག་ན་སྐྱོ་བ་བསྐྱེད་པར་བྱ་བའི་ཕྱིར་དང༌། དགེ་བའི་ཕྱོགས་ལ་མངོན་པར་བྱ་བའི་ཕྱིར་རོ། །ཆུའི་ཁང་པར་ཀྵུ་ལག་ན་བུམ་པ་ཐོགས་པ་རྒྱན་སྣ་ཚོགས་ཀྱིས་བརྒྱན་པ་དག་དང་ཀླུའི་བུ་མོ་ཆུ་འདྲི་མ་པར་བྱེད་པ་དག་གོ་ཞེས་བྱ་བ་ནི། ཆུའི་ཁང་པར་དེ་དག་རི་མོ་བྲི་བར་བྱ་བ་སྟེ་ཀླུ་རྣམས་ནི་ཆུ་ལ་དབང་བའི་ཕྱིར་རོ། །ནད་པའི་རུང་བའི་ཁང་པར་དེ་བཞིན་གཤེགས་པ་ནད་པའི་རིམ་གྲོ་མཛད་པའི་ཞེས་བྱ་བ་ནི། སྨན་ཁང་དུ་ནི་དེ་བཞིན་གཤེགས་པ་ནད་པའི་རིམ་གྲོ་མཛད་པ་རི་མོར་བྲི་བར་བྱ་བའོ། །བཤང་བ་དང་གཅི་བའི་སྐྱབས་སུ་དུར་ཁྲོད་དག་གམ་མགོའི་ཐོད་པ་དག་གོ་ཞེས་བྱ་བ་ནི། ཆབ་ཁུངས་རྣམ་པ་གཉིས་སུ་ནི་དུར་ཁྲོད་རྒྱས་པ་འམ་མགོའི་ཐོད་པ་ལ་སོགས་པ་རུས་པའི་ཀེང་རུས་དམ་དུམ་
དག་རི་མོར་བྲི་པར་བྱའོ། །གཙུག་ལག་ཁང་བླ་གབ་མེད་པ་མ་ཡིན་པར་མེ་དུ་བ་དང་བཅས་པ་བུད་པར་ཡང་མི་བྱ་བཅང་བར་ཡང་མི་བྱའོ་ཞེས་བྱ་བ་ནི། རི་མོ་མ་རུང་བར་འགྱུར་བ་སྤང་བའི་ཕྱིར་རོ། །བླ་ག་བ་མེད་པར་ནི་ཉེས་པ་མེད་དོ། །སྤྱིལ་བར་ནི་ཐམས་ཅད་མི་བྱའོ་ཞེས་བྱ་བ་ནི། ས་གཞི་སྤྱིལ་བ་འམ་བརྡུངས་པས་འཇམ་པོར་ནི་མེ་དུ་བ་ཅན་དང་དུ་བ་མེད་པར་ཐམས་ཅད་བུད་པར་ཡང་མི་བྱ་བཅང་བར་ཡང་མི་བྱ་བའོ། །དེའི་དོན་དུ་ཞུགས་ལིང་བཅང་བར་བྱའོ་ཞེས་བྱ་བ་ནི་མེ་བུད་པ་དང་དེའི་དོན་དུ་ཞུགས་ལིང་བཅང་བར་བྱ་བའོ། །མེ་ལ་དགོས་པ་གྱོ་མོ་ལ་སོགས་པའི་སྣོད་ནི་ཞུགས་ལིང་ཞེས་བྱའོ། །འདིར་གཞུང་ནི་དགེ་སློང་དག་དགུན་སྨད་ཀྱི་དུས་སུ་ལྷགས་པས་ཉེན་ནས་སྤྱིལ་བར་མེ་འབུད་པར་བྱེད་པ་ནི་སྤྱིལ་བ་མ་རུང་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། སྤྱིལ་བར་མེ་འབུད་པར་མི་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །མཉམ་པར་བཅེར་བའི་ཕྱིར་ལྕགས་ཀྱི་ཕྲ་སྐོམ་མོ་ཞེས་བྱ་བ་ནི། བཅང་བར་བྱའོ་ཞེས་བྱ་བར་སྦྱར་ཏེ། མེའི་ཕྱོགས་ཕན་ཚུན་ནས་བསྐུལ་བ་ནི་མཉམ་པར་བཅེར་བ་ཞེས་བྱའོ། །ལྕགས་ཀྱི་ཕྲ་སྐམ་ཞེས་བྱ་བ་ནི་ལྕགས་ཀྱི་ཐལ་ཕྱགས་སོ། །ཤིང་གི་གཡོག་པས་ཀྱང་ལས་དེ་འགྲུབ་བོ་ཞེས་བྱ་བ་ནི། ཤིང་གི་གཡོག་པ་ཞེས་བྱ་བ་ནི་ཤིང་གི་ཐལ་ཕྱགས་ཀྱིས་ཀྱང་ཕྲ་སྐམ་གྱི་ལས་དེ་འགྲུབ་པོ། །ཁང་སྐྱོང་གིས་གཙུག་ལག་ཁང་ཉི་མ་རེ་རེ་ཞིང་ཕྱག་དར་བྱའོ་ཞེས་བྱ་བ་ནི་གཙུག་ལག་ཁང་གི་ཁང་སྐྱོང་གིས་ཉི་མ་རེ་རེ་ཞིང་གཙུག་ལག་ཁང་ཕྱག་དར་བྱའོ། །ཅི་མཐའི་ཕྱོགས་ཐམས་ཅད་དམ་ཞེ་ན་དེའི་ཕྱིར། མི་ནུས་ན་མཁོ་བའི་ཕྱོགས་སོ་ཞེས་བྱ་བ་སྨྲས་ཏེ། གཙུག་ལག་ཁང་མཐའ་དག་ཕྱག་དར་བྱེད་མི་ནུས་ན་གཙུག་ལག་ཁང་གི་ཕྱོགས་གང་མཁོ་བ་དེ་དག་ཕྱག་དར་བྱའོ། །ལྷག་མ་ནི་ཚེས་བརྒྱད་དམ་ཚེས་བཅུ་བཞི་ལ་གཎྜཱི་བརྡུངས་ཏེ་དགེ་འདུན་ཐམས་ཅད་ཀྱིས་ཆོས་དང་ལྡན་པའི་གཏམ་གྱིས་སམ་འཕགས་པ་མི་སྨྲ་བ་ཉིད་ཀྱིས་སོ་ཞེས་བྱ་བ་ནི། མཁོ་བའི་ཕྱོགས་ཀྱི་ལྷག་མ་ཕྱག་དར་མ་བྱས་པ་གང་ཡིན་པ་དེ་དག་ནི་ཚེས་བརྒྱད་
དམ་བཅུ་བཞིའི་དུས་སུ་དགེ་འདུན་ཐམས་ཅད་ཀྱིས་ཇི་སྐད་སྨོས་པའི་རིམ་པ་དེས་ཕྱག་དར་བྱའོ། །ཆོས་ཀྱི་འདུན་སར་ཆག་ཆག་དང་ལྕི་བ་འཇམ་པོའི་བྱུག་པས་བྱུག་གོ་ཞེས་བྱ་བ་ནི། གསོ་སྦྱོང་དང་དགག་དབྱེ་ལ་སོགས་པ་ཆོས་ཀྱི་འདུན་མའི་གནས་དེར་ཆག་ཆག་གདབ་པར་བྱ། ལྕི་བ་འཇམ་པོའི་བྱུག་པས་བསྐུ་བར་བྱའོ། །མཇུག་ཏུ་ཁྲུས་བྱའོ་ཞེས་བྱ་བ་ནི། ཕྱག་དར་ལ་སོགས་པ་ཟིན་པའི་མཇུག་ཏུ་དེའི་ཚེ་ཁྲུས་བྱ་བའོ། །ཡང་ན་རྐང་ལག་བཀྲུའོ་ཞེས་བྱ་བ་ནི་མཇུག་ཏུའོ། །ཆུས་བརླན་པས་ལུས་ཀྱང་བྱུག་གོ་ཞེས་བྱ་བ་ནི། ལག་པ་ཆུས་བརླན་པས་ལུས་ཀྱི་རྡུལ་ཕྱི་པའི་ཕྱིར་ལུས་ལ་བྱུག་པར་བྱའོ། །སྣུམ་བག་གིས་ཉེད་པ་བྱའོ་ཞེས་བྱ་བ་ནི། ཚེས་བརྒྱད་དང་བཅུ་བཞི་དང་བཅོ་ལྔ་ལའོ། །དཀོན་མཆོག་གི་དོན་དུ་ཕྱག་དར་བྱས་པ་དང༌། ཞལ་ཞལ་བྱས་པ་དང༌། དྲི་གཙང་ཁང་དང་སྐུ་གཟུགས་དང་མཆོད་རྟེན་དང་སྲོག་ཤིང་གི་གྲིབ་མལ་གཙུག་ལག་ཁང་གི་ཚིགས་སུ་བཅད་པ་གདོན་ཅིང་བགོམ་མོ་ཞེས་བྱ་བ་ནི། དེ་དག་ལ་མི་བགོམ་དུ་མི་རུང་ན་དྲང་སྲོང་གས་གསུངས་པའི་ཚིགས་སུ་བཅད་པ་གདོན་ཅིང་བགོམ་པར་བྱའོ། །ཉི་མ་དེ་ཉིད་ལ་གནས་མལ་ལ་སོ་སོར་བརྟག་པ་དང་བཅོས་པར་བྱའོ་ཞེས་བྱ་བ་ནི་ཚེས་བརྒྱད་དང་བཅུ་བཞིའི་ཉི་མ་དེ་ཉིད་ལ་མལ་ཆ་དང་སྟན་དང༌། གདིང་བ་ལ་སོགས་པ་སོ་སོར་བརྟག་པ་དང་བཅོས་པར་བྱ་བའོ། །སུས་དེ་ལ་སོ་སོར་བརྟག་པར་བྱ་ཞེ་ན་དེའི་ཕྱིར། རྡོལ་བ་ལ་སོགས་པ་དང་ལྡན་པ་དག་གིས་སོ་ཞེས་བྱ་བ་སྨྲས་ཏེ་མལ་ཆ་ལ་སོགས་པའོ། །སུས་བཅོས་པར་བྱ་ཞེ་ན་དེའི་ཕྱིར། གནས་པ་དག་གིས་སོ་ཞེས་བྱ་བ་སྨྲས་ཏེ། དེ་དག་ཉིད་ཀྱིས་འདིར་མཁན་པོ་དང་སློབ་དཔོན་དག་གི་མལ་སྟན་ལ་སོགས་པ་བཅོས་པར་བྱའོ། །གནས་མལ་གྱི་གཞི་ཆག་ཆག་དང་ཕྱག་དང་དང་ལྕིབ་འཇམ་པོའི་བྱུག་པས་བསྐུ་པར་བྱའོ་ཞེས་བྱ་བ་ནི། གནས་ཁང་ལ་སོགས་པ་གནས་མལ་གྱི་གཞི་དག་དེ་ན་གནས་པའི་དགེ་སློང་དག་གིས་ཆག་ཆག་ལ་སོགས་པ་བྱ་བའོ། །མལ་ཆ་དྲི་མས་གོས་པ་སྤྲུག་པར་བྱའོ་ཞེས་བྱ་བ་ནི། གལ་ཏེ་སྤྲུགས་པས་དྲི་མ་དང་བྲལ་བར་འགྱུར་ནའོ། །
གལ་ཏེ་ཧ་ཅང་ན་བཀྲུའོ་ཞེས་བྱ་བ་ནི། གལ་ཏེ་ཧ་ཅང་དྲི་མ་ཅན་དུ་གྱུར་ན་འགྱུར་བྱེད་ཀྱི་ཆུ་ལ་སོགས་པས་བཀྲུ་བར་བྱ་བའོ། །ཆག་ཆག་བཏབ་པའི་འོག་ཏུ་ཕྱག་གོ་ཞེས་བྱ་བ་ནི། ཆག་ཆག་བཏབ་པའི་འོག་ཏུ་ཕྱག་དར་བྱ་བའོ། །དེའི་འོག་ཏུ་བ་ཤམ་མོ་ཞེས་བྱ་བ་ནི། ཕྱག་དར་བྱས་པའི་འོག་ཏུ་མལ་སྟན་བཤམ་པར་བྱ་བའོ། །གཞི་རྡུལ་དང་བཅས་པ་མ་སྤྲུགས་པ་ལ་མི་བྱའོ་ཞེས་བྱ་བ་ནི། མལ་ཆ་དང་སྟན་གྱི་གཞིའི་ཁྲི་ལ་སོགས་པ་རྡུལ་དང་བཅས་པ་ཉིད་ཡིན་ན་དེ་མ་སྤྲུགས་པའི་སྟེང་དུ་མལ་དང་སྟན་བཤམ་པར་མི་བྱའོ། །བཤམ་པར་བྱ་བ་དག་ལས་གོས་གཅིག་སྤྲུགས་པར་སྤྱད་དོ་ཞེས་བྱ་བ་ནི་མལ་སྟན་བཤམ་པར་བྱ་བ་དེ་དག་གི་ནང་ནས་གཅིག་ཅིག་ཁྲི་ལ་སོགས་པ་སྤྲུག་ཅིང་ཕྱི་བའི་རྡུལ་ཕྱགས་སུ་སྤྱད་པར་བྱ་བའོ། གོས་ཇི་ལྟ་བུ་ཞིག་ཅེ་ན་དེའི་ཕྱིར་ངན་པའོ་ཞེས་བྱ་བ་སྨྲས་ཏེ་ཐམས་ཅད་ཀྱི་ཐ་མའོ།། དེ་བཅོས་སོ་ཞེས་བྱ་བ་ནི། སྤྲུག་པའི་དོན་དུ་སྤྱད་པའི་གོས་ངན་པ་དེའོ། །མི་ནུས་པ་ཉིད་ན་རས་མར་བྱས་ཏེ་ཤིང་བུའི་རྩེ་མོ་ལ་བཏགས་ནས་སྤྲུག་གོ་ཞེས་བྱ་བ་ནི། དེས་ཁྲི་ལ་སོགས་པ་དག་སྤྲུག་གོ་ཞེས་བྱ་བར་སྦྱར་ཏེ། གོས་ངན་པ་དེ་ཧ་ཅང་ཞིགས་ཆེས་པར་གྱུར་ན་གང་གི་ཚེ་དེས་ཁྲི་ལ་སོགས་པ་དག་སྤྲུག་པར་མི་ནུས་ཤིང་ཕྱིར་བཅོས་སུ་མི་རུང་བ་དེའི་ཚེ་གོས་ཞིགས་པ་དེ་རས་མར་བྱས་ཏ་དམ་དུམ་དུ་གཤེགས་ནས་ཤིང་བུའི་རྩེ་མོ་ལ་བཏགས་ཏེ་སྦྲང་ཡབ་བཞིན་དུ་དེས་ཁྲི་ལ་སོགས་པ་དག་སྤྲུག་པར་བྱའོ། །དེ་ལྟར་ཡང་མི་རུང་བ་ཉིད་ཡིན་ན་སྦྱིན་པ་པོའི་བསོད་ནམས་མངོན་པར་སྤེལ་བ་དང་ཡུན་རིང་བ་ཉིད་དུ་བྱ་བའི་བྱིར་ལྕི་བ་དང་ས་དག་བསྲེས་ཏེ་ཀ་བ་དང་རྩིག་པའི་སེར་ཀ་གླན་པར་བྱའོ་ཞེས་བྱ་བ་ནི། །དེ་ལྟར་རས་མར་བྱས་ཀྱང་ཁྲི་ལ་སོགས་པ་སྤྲུག་པར་མི་ནུས་པ་ཉིད་ཡིན་ན་ཇི་སྐད་སྨོས་པ་དེ་བཞིན་བྱ་བའོ། །སྒོ་གང་དང་ཁྱམས་སུ་མལ་བཅའ་བ་དང་བཅས་ན་ཡང་གཟུང་བར་མི་བྱའོ་ཞེས་བྱ་བ་ནི། དེ་དག་ཏུ་མལ་བཅའ་བར་ཡང་མི་བྱ་ལ་གཞན་གྱིས་བཅས་ན་ཡང་རང་གིས་གཟུང་བར་མི་བྱའོ། །སྦྱིན་པ་པོ་མྱ་ངན་བསང་བའི་ཕྱིར་ཕུལ་བ་དེས་མཐོང་བར་གཞག་པར་མི་བྱའོ་ཞེས་བྱ་བ་ནི།
རྒྱལ་པོ་གསལ་རྒྱལ་གྱིས་རང་གི་མ་ཤི་བའི་མྱ་ངན་བསང་བའི་ཕྱིར་མའི་མལ་ཁྲི་དགེ་འདུན་ལ་ཕུལ་བ་དགེ་སློང་དག་གིས་སྒོ་གང་དང་ཁྱམས་སུ་བཤམས་པ་རྒྱལ་པོས་མཐོང་ནས་ཡང་མྱ་ངན་ལངས་པ་བྱུང་བའི་མཐའ་ལས་བཅས་པ་ཡིན་ཏེ། དེ་ལྟ་བུའི་རྫས་སྦྱིན་བདག་གིས་མཐོང་བར་མི་བྱའོ། །སྒྲ་མི་སྙན་པའི་གཉེན་པོའི་ཕྱིར་ཚེས་བརྒྱད་དང་བཅུ་བཞི་དག་ལ་ཁྱམས་སུ་བཤམ་པར་བྱའོ་ཞེས་བྱ་བ་ནི། སྦྱིན་བདག་གིས་མཐོང་བར་མི་བྱ་བའི་ཕྱིར་རྫས་དེ་སྦས་པ་ན། གལ་ཏེ་གཞན་དག་འདི་སྐད་ཅེས་དགེ་སློང་དེ་དག་གིས་མལ་ཁྲི་དེ་བརྐུས་སོ་ཞེས་བྱ་བ་ལ་སོགས་པའི་སྒྲ་མི་སྙན་པ་སྐུར་པ་དང་ཕྱར་ཀ་དང་དྲི་ངས་སུ་འགྱུར་བ་དེ་བསལ་བའི་ཕྱིར་གཉེན་པོའི་ཕྱིར་ཚེས་བརྒྱད་དང་བཅུ་བཞི་ལ་སོགས་པ་དུས་དུས་སུ་སྦྱིན་བདག་དེ་མེད་པའི་སྐབས་སུ་མལ་ཁྲི་ལ་སོགས་པ་དེ་དག་ཁྱམས་ལ་སོགས་པ་དག་ཏུ་བཤམས་ཤིང་གཞན་གྱིས་མཐོང་བར་བྱའོ། །ཁྲི་དང་ཁྲིའུ་བཅང་བར་བྱ་བའོ་ཞེས་བྱ་བ་ནི། གང་ཟག་གིས་ཀྱང་ངོ༌། །སྤྱིལ་བ་མི་ཉམས་པར་བྱ་བའི་ཕྱིར་ཁྲི་རྐང་གི་མཐིལ་མཉམ་པར་བཅས་པར་བྱའོ་ཞེས་བྱ་བ་ནི། ས་གཞི་སྤྱིལ་བ་འཇམ་པོ་མི་ཉམས་པར་བྱ་བའི་ཕྱིར་རོ། །ཡང་ན་དེའི་འོག་ཏུ་ཕུབ་མའི་ཕུང་པོ་བཞག་པའམ་དེ་རས་མས་དཀྲི་བར་བྱའོ་ཞེས་བྱ་བ་ནི། སྤྱིལ་བ་མི་ཉམས་པར་བྱ་བའི་ཕྱིར་ཡང་ན་ཁྲི་རྐང་དེའི་འོག་ཏུ་ཕུབ་མའི་ཕུང་བུ་བླུགས་པའམ་ཁྲི་རྐང་དེ་རས་མས་དཀྲི་བར་བྱའོ། །དགེ་འདུན་མ་ཡིན་པས་རྐང་པ་བྲིས་པའི་ཁྲིའུ་བདག་གིར་བྱ་བ་བསྟན་པར་མི་བྱའོ་ཞེས་བྱ་བ་ནི། དགེ་འདུན་མ་ཡིན་པ་གང་ཟག་གིས་རྐང་པ་རི་མོ་བྲིས་པའི་ཁྲིའུ་བཅང་བར་མི་བྱའོ། །འདིར་གཞུང་ནི། དགེ་སློང་གཞན་དག་ཁྲིའུ་རྐང་པ་ཁྲ་བོ་རང་གིས་བྱེད་དུ་མི་འཇུད་ལ། གཞན་དག་ལས་ཐོབ་པ་ནི་འཆང་བར་བྱེད་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་འདུན་ལ་ནི་ཁྲིའུ་རྐང་པ་ཁྲ་བོ་ཐོབ་པ་དང་བྱེད་དུ་བཅུག་པ་རྗེས་སུ་གནང་ངོ༌། །གང་ཟག་ལ་ནི་རྣམ་པ་ཐམས་ཅད་རྗེས་སུ་མི་གནང་ངོ་ཞེས་གསུངས་པ་ཡིན་ནོ། །སྟན་བཟང་པོ་དང་རྒྱབ་རྟེན་དང་བཅས་པའི་རྟེན་ཡང་མི་
བྱའོ། །ཞེས་བྱ་བ་ཡང་དགེ་འདུན་མ་ཡིན་པས་བདག་གིར་བྱ་བ་བསྟེན་པར་མི་བྱའོ། །སྟན་བཟང་པོ་ཞེས་བྱ་བ་ནི་སྟན་ཚད་ཆེན་པོའོ། །རྒྱབ་རྟེན་དང་བཅས་པའི་སྟན་ཞེས་བྱ་བ་ནི། ལུས་ཀྱི་རྒྱབ་རྟེན་དང་བཅས་པའི་སྟན་ནོ། །མར་མེའི་སྡང་བུ་ཡང་མི་བྱའོ་ཞེས་བྱ་བ་ནི་ཤིང་ལྗོན་པའི་རྣམ་པ་འདྲ་བའི་མར་མེའི་སྡོང་བུ་ཡང་དགེ་འདུན་མ་ཡིན་པས་བདག་གིར་བྱ་བ་བསྟེན་པར་མི་བྱའོ། །འདིར་གཞུང་ནི་དགེ་འདུན་ལ་ནི་ཡལ་ག་གཅིག་པའི་མར་མེའི་སྡོང་བུ་རྙེད་ན་ཡང་རྗེས་སུ་གནང་ངོ༌། །གང་ཟག་ལ་ནི་རྗེས་སུ་མི་གནང་ངོ༌། །ཡལ་ག་གཉིས་པ་དང་མང་པོ་ཡང་དེ་བཞིན་ནོ་ཞེས་གསུངས་པ་ཡིན་ནོ། །ཁ་ཅིག་ལས་ནི་ཡལ་ག་དུ་མ་པ་ཞེས་སོ་ཞེས་བྱ་བ་ནི། ལུགས་ཁ་ཅིག་ལས་ནི་ཡལ་ག་དུ་མ་དང་ལྡན་པའི་མར་མེའི་སྡོང་བུ་དགེ་འདུན་མ་ཡིན་པས་བདག་གིར་བྱ་བ་བསྟེན་པར་མི་བྱའོ། །ཡལ་ག་ཁ་ཅིག་དང་ལྡན་པ་བདག་གིར་བྱས་པ་ལ་ནི་ཉེས་པ་མེད་དོ་ཞེས་འབྱུང་ངོ༌། །སྟན་ནང་ཚངས་ཅན་གྲུ་བཞི་དང་སྔས་ནང་ཚངས་ཅན་བཅང་བར་བྱའོ་ཞེས་བྱ་བ་ནི། དགེ་འདུན་དང་གང་ཟག་གིས་ཀྱང་ངོ༌། །སྟན་ནང་ཚངས་ཅན་ཞེས་བྱ་བ་ནི་ཤིང་བལ་ཅན་ནོ། །སྔས་ནང་ནང་ཚངས་ཅན་གྱི་རྣམ་པ་བསྟན་པའི་ཕྱིར་ཁྲུ་བཞི་དང་དོ་པ་ཉིས་བལྟབ་ཏུ་བྱས་ཏེ། བཅོམ་མོ་ཞེས་བྱ་བ་སྨྲས་ཏེ། སྲིད་དུ་ནི་ཁྲུ་བཞི་པ་ཉིས་བལྟབ་ཞེང་དུ་ནི་ཁྲུ་དོ་པ་ཉིད་བལྟབ་ཏུ་བྱས་ཏེ་བཙེམ་མོ། །ཤིང་བལ་གྱིས་བརྫང་ངོ་ཞེས་བྱ་བ་ནི། སྟན་ནང་ཚངས་ཅན་དང་སྔས་ནང་ཚངས་ཅན་དག་གོ །སོ་སོར་བརྟག་པར་མ་བྱས་པར་ཉལ་བར་མི་བྱའོ་ཞེས་བྱ་བ་ནི། མལ་དང་སྟན་ལ་སོ་སོར་བརྟག་པར་མ་བྱས་པར་དེར་ཉལ་བར་མི་བྱའོ། །འདིར་གཞུང་ནི། ཉལ་བར་བྱེད་ན་སོ་སོར་བརྟགས་ཏེ་ཉལ་བར་བྱའོ་ཞེས་གསུངས་པ་ཡིན་ནོ། །དྲན་པ་ཉེ་བར་མ་བཞག་པར་མི་བྱའོ་ཞེས་བྱ་བ་ནི་ཉལ་བར་མི་བྱ་བ་སྟེ། འདིར་དྲན་པ་ཞེས་བྱ་བ་ནི། དགེ་བ་བརྩམས་པ་དང༌། འབྲེལ་བ་དང༌། དགེ་བའི་ཕྱོགས་གཞན་དང་འབྲེལ་བ་དག་དུས་ཇི་ལྟ་བ་བཞིན་དུ་ལྡང་བ་དང༌། འབྲེལ་པ་དང༌། ལུས་དང་གོས་མི་འཕྱར་བ་དང་འབྲེལ་བའི་དྲན་པ་
ཡིན་པར་རིག་པར་བྱའོ། །གཞན་དང་ལྷན་གཅིག་ཁྲིའམ་སྟན་ནམ་གཞན་ལ་ཅིག་ཅར་མི་བྱའོ་ཞེས་བྱ་བ་ནི་ཉལ་བར་མི་བྱ་བ་སྟེ། གཞན་ཞེས་སྨོས་པ་ནི་སྟེགས་བུ་ལ་སོགས་པ་དག་བསྡུའོ། །ངོ་ཚ་ཤེས་པས་མེད་ན་སྟན་སོ་སོར་བཏིང་སྟེ་གཏུར་བུའམ་ལྷུང་བཟེད་ཀྱི་སྣོད་ལ་སོགས་པས་བར་དུ་བཅད་ནས་དྲན་པ་ཉེ་བར་གཞག་སྟེ་ཉལ་བར་བྱའོ་ཞེས་བྱ་བ་ནི། དགེ་སློང་ངོ་ཚ་ཤེས་ཤིང་ཁྲེལ་ཡོད་པས་ནི་ཁྲི་ལ་སོགས་པ་མལ་ཐ་དད་པ་མེད་པ་ན། གདིང་བའི་སྟན་སོ་སོར་བཏིང་སྟེ་ཆོས་གོས་ཀྱི་གཏུར་བུའམ་ལྷུང་བཟེད་ཀྱི་སྣོད་ལ་སོགས་པས་བར་དུ་བཅད་ནས་དྲན་པ་ཉེ་བར་གཞག་སྟེ་ཁྲིའམ་སྟན་ནམ་གཞན་དེའི་སྟེང་དུ་གཞན་དང་ལྷན་ཅིག་ཉལ་བར་བྱའོ། །འདི་ནི་ཕན་ཚུལ་ལུས་རེག་པ་སྤང་བའི་ཕྱིར་རོ། །གསུམ་ལས་ལྷག་པ་མང་བ་དང་ལྷན་ཅིག་ཁྲི་ལས་འཛེག་པ་ཉིད་བསྟེན་པར་མི་བྱའོ་ཞེས་བྱ་བ་ནི། གང་ཟག་གསུམ་ལས་ལྷག་པ་མང་པོ་དང་ལྷན་ཅིག་ཏུ་ཁྲི་གཅིག་གི་སྟེང་དུ་འཛེགས་པ་དང་འདུག་པ་དང་ཉལ་བར་མི་བྱའོ། །འདི་སྐད་བསྟན་ཏེ། ཁྲི་གཅིག་གི་སྟེང་དུ་གང་ཟག་གཉིས་སམ་གསུམ་ནི་འཛེག་པ་དང་འདུག་པ་དང་ཉལ་བར་བྱའི། བཞི་ཡན་ཆད་ནི་མི་བྱའོ། །ཁྲི་རིང་པོ་ལ་ནི་གཉིས་ལས་མི་བྱའོ་ཞེས་བྱ་བ་ནི། ལྷག་པར་མང་པོ་དང་ལྷན་ཅིག་འཛེག་པ་ཉིད་བསྟེན་པར་མི་བྱ་བའོ། །ཁྲིའུ་ལ་གཅིག་མ་ཡིན་པས་མི་བྱའོ་ཞེས་བྱ་བ་ནི་གཅིག་པོ་ཁོ་ན་དེ་ལ་འདུག་པར་བྱའོ། །དེ་ནི་ཁྲི་ཐུང་དུའི་དཔེ་ཡིན་པར་བལྟ་བར་བྱའོ། །ཤིང་གི་སྤང་ལེབ་ལ་ནི་སྟོབས་ཅི་ཡོད་པ་དང་གོ་ཅི་ཡོད་པ་ལས་ཤེས་པར་བྱའོ། །ལོ་གསུམ་ལས་ལྷག་པས་བར་དུ་ཆོད་པ་དང་ལྷན་ཅིག་སྟན་ལ་འདུག་པར་མི་བྱའོ་ཞེས་བྱ་བ་ནི། དགེ་སློང་རྫོགས་པར་བསྙེན་པའི་དུས་ལོ་གསུམ་ལས་ལྷག་པས་བར་དུ་ཆོད་ཅིང་ཁྱད་ཞུགས་པ་རྒན་པ་དང་ལྷན་ཅིག་སྟན་གཅིག་ལ་འདུག་པར་མི་བྱ་སྟེ། འདི་ལྟར་གཞོན་པ་ཆེས་རྒན་པ་དང་ལྷན་ཅིག་ཏུ་འདུག་པར་མི་རིགས་པའི་ཕྱིར་རོ། །འདིར་ལོ་གསུམ་ལས་ལྷག་པས་བར་དུ་ཆོད་པ་ཞེས་སྨོས་པ་ནི། བསྙེན་པར་རྫོགས་པའི་ལོ་གྲངས་ཡིན་གྱི་ན་ཚོད་ནི་མ་ཡིན་ཏེ། དེས་ན་ལོ་གསུམ་ལས་ལྷག་ན་མི་རུང་གི །
ལོ་གསུམ་ཡན་ཆད་ནི་རུང་བར་ཤེས་པར་བྱའོ། །ཁྱིམ་གཞན་དུ་སྟན་གཞན་མེད་ན་མཁན་པོ་དང་ཡང་དྲན་པ་ཉེ་བར་གཞག་སྟེ་སྟན་གཅིག་ལ་འདུག་པར་བྱའོ་ཞེས་བྱ་བ་ནི། ཁྱིམ་པའི་ཁྱིམ་གཞན་དུ་གལ་ཏེ་སྟན་གཞན་མེད་ན་མཁན་པོ་དང་ཡང་སྟན་གཅིག་ལ་འདུག་པ་བསྟེན་པར་བྱ་སྟེ། འདི་ནི་མཁན་པོ་ཡིན་ཏེ་གུས་པ་དང་བཅས་པས་འདུག་པར་བྱའོ་སྙམ་དུ་དྲན་པ་ཉེ་བར་གཞག་སྟེ་འདུག་པར་བྱའོ། །ཁྱིམ་པ་དང་གང་དུའང་མི་བྱའོ་ཞེས་བྱ་བ་ནི། ཁྱིམ་པ་དང་ནི་ཁྱིམ་གཞན་ཡང་རུང་གཙུག་ལག་ཁང་ཡང་རུང་སྟེ། །གང་དུ་ཡང་སྟན་གཅིག་ལ་འདུག་པར་མི་བྱའོ། །བསྙེན་པར་མ་རྫོགས་པ་དང་ཡང་མི་བྱའོ་ཞེས་བྱ་བ་ནི། བསྙེན་པར་མ་རྫོགས་པ་དང་གང་དུ་ཡང་སྟན་གཅིག་ལ་འདུག་པར་མི་བྱའོ། །ཟ་མ་དང་མ་ནིང་དང་མ་བསད་པ་ལ་སོགས་པ་དང་མུ་སྟེགས་ཅན་དང་མུ་སྟེགས་ཅན་དུ་ཞུགས་པ་དང་རྐུ་ཐབས་སུ་གནས་པ་དང་ཐ་དད་པར་གནས་པ་དང་གནས་པར་མི་བྱ་བ་དག་དང་མི་བྱའོ་ཞེས་བྱ་བ་ནི། དེ་དག་དང་གང་དུ་ཡང་སྟན་གཅིག་ལ་འདུག་པ་བསྟེན་པར་མི་བྱའོ། །བསླབ་པ་བྱིན་པ་དང་མི་བྱའོ་ཞེས་བྱ་བ་ཡང་གང་དུ་ཡང་སྟན་གཅིག་ལ་འདུག་པ་བསྟེན་པར་མི་བྱའོ། །ཨར་མོ་ནི་ག་ནི་བསྙེན་པར་རྫོགས་པ་དང་བཅས་པའི་དགེ་འདུན་འདུས་པ་ལས་གཞན་པའི་སྟན་ཉིད་ཡིན་ནོ་ཞེས་བྱ་བ་ནི། ཨར་མོ་ནི་ག་ནི་བསྙེན་པར་རྫོགས་པ་དང་བཅས་པའི་དགེ་འདུན་འདུས་པ་ལས་གཞན་པའི་གནས་སུ་སྟན་ཉིད་ཡིན་པའོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་དགེ་འདུན་འདུས་པ་ལས་གཞན་པར་ཡང་ཨར་མོ་ནི་ག་དེ་ལ་ལོ་གསུམ་ལས་ལྷག་པས་བར་དུ་ཆོད་པ་དང་ལྷན་ཅིག་འདུག་པ་བསྟེན་པར་མི་བྱའོ། །འདིར་བསྙེན་པར་རྫོགས་པ་དང་བཅས་པ་ཞེས་སྨོས་པ་ནི། བསྙེན་པར་མ་རྫོགས་པ་དང་ལྷན་ཅིག་དགེ་འདུན་ཚོགས་ན་ཡང་འདུག་པར་མི་བྱའོ་ཞེས་བསྟན་པའི་ཕྱིར་སྨོས་སོ། །སྟེགས་བུ་ནི་མ་ཡིན་ནོ་ཞེས་བྱ་བ་ནི། སྟེགས་པུ་ནི་སར་གྱུར་པ་ཉིད་ཡིན་པས་སྟན་ཉིད་མ་ཡིན་ནོ། །དོག་པའི་གནོད་པར་གྱུར་ན་ལྟུང་བ་མེད་དོ་ཞེས་བྱ་བ་ནི། འདུས་པའི་སྐབས་ཀྱི་བསླབ་པའི་གཞི་དེ་དག་ཐམས་ཅད་ལ་འདི་དམིགས་ཀྱིས་བསལ་བ་ཡིན་
ནོ། །འདིར་གཞུང་ནི་བཙུན་པ་དགེ་སློང་ཁྱིམ་པ་དང་ལྷན་ཅིག་སྟན་ནང་ཚངས་ཅན་གཅིག་ལས་མཆིས་སུ་རུང་ངམ། ཉེ་བ་འཁོར་མི་རུང་སྟེ་རྐྱེན་དེ་ལྟ་བུ་དག་ཡོད་ན་ནི་རུང་ངོ་ཞེས་གསུངས་པ་ཡིན་ནོ། །གནས་མལ་སྤེད་པ་ནི་གལ་ཏེ་གཉིས་ཡོད་ན་གཅིག་གིས་ཁྲིའམ་ཁྲིའུ་བསྐུར་ཞིང་ཅིག་ཤོས་ཀྱིས་སྟན་ནང་ཚངས་ཅན་ལ་སོགས་པའོ་ཞེས་བྱ་བ་ནི། གལ་ཏེ་གང་ཟག་གཉིས་ཡོད་ན་དེ་ལྟར་བསྐུར་བར་བྱ་བའོ། །འདིར་བྱེ་བྲག་ཏུ་མ་སྨོས་པས་དགེ་འདུན་གྱི་འབའ་ཞིག་ཏུ་མ་ཟད་ཀྱི་གང་ཟག་གི་ཡང་རུང་ངོ༌། །དགེ་འདུན་གྱི་དེ་སྙིང་མི་བརྩེ་བར་མདུན་ནས་དྲང་བ་དང་གཡས་གཡོན་ནས་དྲང་བར་མི་བྱའོ་ཞེས་བྱ་བ་ནི། དགེ་འདུན་གྱི་མལ་ཆ་དང་སྟན་ལ་སོགས་པའི་གནས་མལ་དེ་སྙིང་མི་བརྩེ་ཞིང་ལྟོས་པ་མེད་པར་མདུན་ནས་ཚུར་བྲང་ཞིང་བཤལ་བ་དང་ཀློ་གཡས་གཡོན་ནས་དྲང་ཞིང་བཤལ་བར་མི་བྱའོ། །ཅི་ནས་ཀྱང་དེ་དུ་བ་དང་དྲི་མ་དང་རྡུལ་དག་གིས་གོས་པར་འགྱུར་བ་དེ་ལྟར་མི་བྱའོ་ཞེས་བྱ་བ་ནི། དགེ་འདུན་གྱི་གནས་མལ་དེའོ། །དེ་མི་གཙང་བའི་སྐྱབས་དང་ཉེ་བར་བསྟེན་པར་མི་བྱའོ་ཞེས་བྱ་བ་ནི། དགེ་འདུན་གྱི་གནས་མལ་དེ་བཤང་བ་དང་གཅི་བའི་སྐྱབས་དག་དང་ཉེ་བར་བཅང་བ་དང་བཞག་པ་བསྟེན་པར་མི་བྱ་བའོ། །ཉམས་པ་དོར་བར་མི་བྱའོ་ཞེས་བྱ་བ་ནི། དགེ་འདུན་གྱི་གནས་མལ་སྟན་ལ་སོགས་པ་དེ་དག་རླན་པ་དང༌། གཤེར་བ་དང་རྡུལ་ཆགས་པ་དང་རྡོལ་པ་ལ་སོགས་པས་ཉམས་པ་ཕྱི་རོལ་དུ་དོར་བར་མི་བྱ་བའོ། །འོ་ན་ཇི་ལྟར་ཞེ་ན་དེའི་ཕྱིར་བསྲད་པ་དང་བསྐམ་པ་དང་སྤྲུག་པ་དང་བུ་གུ་གླན་པར་བྱའོ་ཞེས་བྱ་བ་སྨྲས་ཏེ། གནས་མལ་དེའོ། །རལ་པ་ལ་ལྷན་རིང་ངོ་ཞེས་བྱ་བ་ནི་གནས་མལ་རལ་བ་དང་གས་པ་དག་ལ་ལྷ་རིང་གིས་གླན་པར་བྱ་བའོ། །དབུས་ཟེགས་ན་མཐའ་གཉིས་དབུས་ཉིད་དུའོ་ཞེས་བྱ་བ་ནི། གལ་ཏེ་གནས་མལ་གྱི་དབུས་ཟགས་ཤིང་མཐའ་གཉིས་སྲན་དེའི་ཚེ་མཐའ་གཉིས་དབུས་ཉིད་དུ་བྱ་བའོ། །དེར་འོས་པ་ཁ་བསྒྱུར་རོ་ཞེས་བྱ་བ་ནི། ཁ་བསྒྱུར་བར་འོས་པའི་གནས་མལ་ཁ་བསྒྱུར་བར་བྱ་བའོ། །ཕྱིར་བཅོས་མི་ནུས་པ་ཉིད་ཡིན་ན་དཀོན་མཆོག་ལ་ཕུལ་བའི་མར་མེ་གང་ཟག་སྦྱིན་
བདག་ཡིན་པ་ཡང་རུང་བ་དག་གིས་སྙིང་པོ་ཉིད་དུ་སྤྱད་དོ་ཞེས་བྱ་བ་ནི། གལ་ཏེ་གནས་མལ་མི་རུང་བ་ཉིད་དུ་གྱུར་པས་ཕྱིར་བཅོས་མི་ནུས་པ་ཉིད་ཡིན་ན་དེའི་ཚེ་དཀོན་མཆོག་གསུམ་ལ་ཕུལ་བའི་མར་མེ་གང་ཟག་སྦྱིན་བདག་ཡིན་པ་རུང་བ་དག་གིས་སྙིང་ཕོ་ཉིད་དུ་སྤྱད་པར་ཡང་རུང་བ་བྱ་སྟེ། དགེ་འདུན་སྦྱིན་བདག་ཡིན་པའི་མར་མེ་དག་འབའ་ཞིག་གི་སྙིང་པོར་སྤྱད་པར་བྱ་བར་མ་ཟད་དོ། །དེར་མི་མཁོ་བ་ཉིད་ཡིན་ན་འཇིམ་པ་དང་བསྲེས་ཏེ་དཀོན་མཆོག་དག་གི་རྩིག་པ་དང་ཀ་བ་དང་སྒོ་གླེགས་ཀྱི་སེར་ཀ་དག་བྱུག་པའི་ཕྱིར་དེ་ལ་ནན་ཏན་བྱའོ་ཞེས་བྱ་བ་ནི་གནས་མལ་དེ་སྔར་བསྟན་པའི་མར་མེའི་སྙིང་པོ་དེར་མི་མཁོ་བ་ཉིད་ཡིན་ན་དེའི་ཚེ་འཇིམ་པ་དང་ལྷན་ཅིག་བསྲེས་ཏེ། དཀོན་མཆོག་དག་གི་རྩིག་པ་དང་ཀ་བ་དང་སྒོ་གླེགས་ཀྱི་སེར་ཀ་དག་བྱུག་པར་བྱ་བའི་ཕྱིར་བསྲད་པ་དང་བསྐམ་པ་དང་སྤྲུག་པ་དེ་ལ་ནན་ཏན་བྱ་བའོ། །གནས་མལ་ཇི་ལྟ་བུར་གྱུར་པ་སུས་བསྲད་པ་ལ་སོགས་པའི་ནན་ཏན་བྱ་ཞེ་ན་དེའི་ཕྱིར། བསྐོས་པ་ནི་མནོས་པས་སོ་ཞེས་བྱ་བ་སྨྲས་ཏེ། གནས་མལ་བསྐོས་པ་ནི་གང་ཟག་གང་གིས་མནོས་པ་དེས་བསྲད་པ་ལ་སོགས་པ་ནན་ཏན་བྱའོ། །ལྷག་མ་ནི་དགེ་འདུན་གཎྜཱི་བརྡུངས་པས་བསྡུས་ཏེའོ་ཞེས་བྱ་བ་ནི། གནས་མལ་བསྐོས་པའི་ལྷག་མ་མ་བསྐོས་པ་ནི་དགེ་འདུན་གཎྜཱི་བརྡུངས་པས་བསྡུས་ཏེ་དགེ་འདུན་དུ་གྱུར་པའི་དགེ་སློང་ཐམས་ཅད་ཀྱིས་བསྲད་པ་ལ་སོགས་པ་ལ་ནན་ཏན་བྱ་བའོ། །དགེ་འདུན་གྱིས་རྐུ་འཕྲོག་བྱེད་པ་མཐོང་ལ་དུས་ན་མི་ཟློགས་པར་མི་བྱའོ་ཞེས་བྱ་བ་ནི། དགེ་འདུན་གྱིས་དངོས་པོ་ལ་ཆོམ་རྐུན་ལས་རྐུ་འཕྲོག་བྱེད་པ་མཐོང་ལ་གལ་ཏེ་ཕྱིར་བཟློག་ནུས་ན་མི་ཟློགས་པར་མི་བྱ་སྟེ་བཟློག་པ་ཁོ་ནར་བྱ་བའོ། །རྐུ་འཕྲོག་ནི་དཔེ་ཙམ་དུ་ཟད་དེ་ཆུད་ཟ་བར་འགྱུར་བ་དག་ལ་ཡང་ཆོ་ག་དེ་བཞིན་དུ་བསྒྲུབ་པར་བྱ་བའོ། །སྐྲག་པ་ན་དགེ་འདུན་གྱིས་ཡལ་བར་མི་དོར་རོ་ཞེས་བྱ་བ་ནི་ཆོམ་རྐུན་ལ་སོགས་པས་སྐྲག་པ་ན་དགེ་འདུན་གྱིས་དངོས་པོ་ཡལ་བར་མི་འདོར་བའོ། །གནས་སུ་མ་སོན་གྱི་བར་དུ་ཁྱེར་བར་བྱེད་པས་ལོངས་སྤྱད་པར་བྱ་བ་ཉིད་ཡིན་ནོ་ཞེས་བྱ་བ་ནི། སྐྲག་པ་ན་དགེ་འདུན་གྱིས་དངོས་པོ་ཡལ་བར་བོར་
ཏེ་བླངས་པ་གང་ཡིན་པ་དེ་ནི་དགེ་སློང་གི་གནས་སུ་མ་སོན་གྱི་བར་དུ་གང་གིས་ཁྱེར་བར་བྱེད་པའི་གང་ཟག་དེ་ཉིད་ཀྱིས་ལོངས་སྤྱད་པར་བྱ་བ་ཉིད་ཡིན་པའོ། །དེ་རང་གི་གནས་སུ་བསྐུར་བར་མི་འགྲུབ་ན་གནས་གཞན་དུ་ལོངས་སྤྱད་བས་ཡོངས་སུ་སྤྱད་པར་བྱའོ་ཞེས་བྱ་བ་ནི། གལ་ཏེ་རྫས་དེ་རང་གི་གནས་སུ་བསྐུར་བར་མི་འགྲུབ་ན་གནས་གཞན་དུ་ཡོངས་སུ་ལོངས་སྤྱད་པས་ཡོངས་སུ་སྤྱད་པའོ། །གནས་གཞན་གྱི་ཟས་དང་ཡོ་བྱད་ཀྱི་རྙེད་པ་གནས་གཞན་དུ་ཡོངས་སུ་སྤྱད་པར་མི་བྱའོ་ཞེས་བྱ་བ་ནི། གནས་གཞན་གྱི་ཟས་ཀྱི་རྙེད་པ་བཟའ་བ་དང་བཅའ་བ་ལ་སོགས་པ་དང་ཡོ་བྱད་ཀྱི་རྙེད་པ་མར་མེ་དང་འབྲུ་མར་དང༌། རྐང་པ་བསྐུ་བ་དང་མཆིལ་ལྷམ་དང་གོས་དང་གདུགས་དང་ཤིང་དང་རྩ་བ་དང་སྡོང་བུ་དང་འདབ་མ་དང་མེ་ཏོག་དང༌། འབྲས་བུ་དང་སྨན་ལ་སོགས་པ་དག་གནས་དེར་གནས་པ་མི་བསྟན་པས་གནས་གཞན་དུ་དྲང་ཞིང་ཡོངས་སུ་སྤྱད་པར་མི་བྱའོ། །དེ་དེ་ལ་སྦྱིན་པར་མི་བྱའོ་ཞེས་བྱ་བ་ནི། གནས་གཞན་གྱི་ཟས་དང་ཡོ་བྱད་ཀྱི་རྙེད་པ་དེ་གནས་གཞན་དུ་ཟ་བར་བྱེད་པ་དེ་ལ་དགེ་འདུན་གྱིས་སྦྱིན་པར་མི་བྱ་བའོ། །ནོད་པ་འབུལ་དུ་གཞུག་པར་བྱ་བ་ཉིད་དོ་ཞེས་བྱ་བ་ནི་གནས་གཞན་དུ་ཟ་བར་བྱེད་པ་དེས་གནས་གཞན་གྱི་ཟས་དང་ཡོ་བྱད་ཀྱི་རྙེད་པ་མནོས་པ་གང་ཡིན་པ་དེ་དགེ་འདུན་གྱིས་ནོད་པར་བྱེད་པའི་གང་ཟག་དེ་ཉིད་ཕྱིར་འབུལ་དུ་གཞུག་པར་བྱའོ། །མི་ཁུགས་ན་འབོག་པའོ་ཞེས་བྱ་བ་ནི། གལ་ཏེ་ནོད་པ་དེ་མ་རྙེད་དམ་མཐུ་དང་ལྡན་པ་ལ་བརྟེན་པའི་ཕྱིར་དེ་ལས་ཟས་དང་ཡོ་བྱད་ཀྱི་རྙེད་པ་དེ་ཕྱིར་མ་ཁུགས་ན་གང་ཟག་གང་གིས་ནོད་པ་དེ་ལ་ཕོག་པའི་གང་ཟག་འབོག་འབོག་པ་དེ་ཉིད་དགེ་འདུན་གྱི་ཕྱིར་དབུལ་དུ་གཞུག་པར་བྱའོ། །འདིར་གཞུང་ནི་དགེ་སློང་གཞན་དུ་གནས་པས་གཞན་དུ་ཁྱེར་ཏེ་ཅུང་ཟད་ཅི་ཙམ་ཟོས་པ་ཐམས་ཅད་རིན་ཚང་བར་བྱས་ཏེ་འབུལ་དུ་གཞུག་པར་བྱའོ་ཞེས་གསུངས་པ་ཡིན་ནོ།། །།བམ་པོ་བདུན་ཅུ་པ་སྟེ་ཐ་མའོ། །ཆ་དབང་བ་དག་གིས་དགེ་འདུན་གྱི་རྩྭ་དང་ཤིང་མི་མཁོ་བ་རང་གི་དང་འདྲ་བར་སྤྱད་པ་ལ་ཁ་ན་མ་ཐོ་བ་མེད་དོ་ཞེས་བྱ་བ་ནི། གང་དག་དེ་ཐོབ་ཅིང་དེའི་ཆ་དབང་བ་དག་གིས་དགེ་འདུན་གྱི་རྩྭ་
དང། ཤིང་དགེ་འདུན་གྱི་འཁོར་ན་སྐྱེ་ཞིང་ཡོངས་སུ་མ་བཟུང་བ་གང་ཡིན་པ་མི་མཁོ་བ་དེ་དག་རང་གི་དང་འདྲ་བ་སྤྱད་པ་ཁ་ན་མ་ཐོ་བ་མེད་པའོ། །མ་བསྐོས་པར་འཁོར་ཞིང་སྤྱད་པ་ལ་ཇི་ལྟར་འོངས་པས་ཡིན་གྱི་རྒན་རིམས་ཀྱིས་མ་ཡིན་ནོ་ཞེས་བྱ་བ་ནི། དགེ་འདུན་གྱི་ཡོ་བྱད་གང་ཟག་སྒོ་གཅིག་ཏུ་མ་བསོས་པས་རེས་ཀྱིས་འཁོར་ཞིང་སྤྱད་པ་ཟངས་ལ་སོགས་པ་མར་མེ་བཞིན་དུ་ཅིག་ཅར་སྤྱད་པར་བྱ་བ་མ་ཡིན་པ་ལ་ནི་ཇི་ལྟར་འོངས་པ་སྤྱད་པར་བྱའི། རྒན་རིམས་ཀྱིས་སྤྱད་པར་བྱ་བ་ནི་མ་ཡིན་ཏེ། དེ་མ་བསྒོས་ན་དང་པོ་སུ་འོངས་པ་དེ་ལ་གཡར་པོར་སྦྱིན་པར་བྱའོ། །བསྒོས་ན་ནི་བསྐོས་པའི་ཚེ་ན་གང་གིས་མནོས་པ་དེ་བདག་པོ་ཉིད་ཡིན་ནོ། །ཅིག་ཅར་བརྙས་ན་ནི་དེའོ་ཞེས་བྱ་བ་ནི། གལ་ཏེ་ཅིག་ཅར་བརྙས་པར་གྱུར་ན་ནི་ཅིག་ཅར་བརྙས་པ་དེ་རྒན་རིམས་ཀྱིས་སྤྱད་པར་བྱ་བའོ། །མ་ཟིན་ན་དེ་ལས་འབྲེལ་བར་མི་བྱའོ་ཞེས་བྱ་བ་ནི། གང་ཟག་གང་གིས་བརྙས་པ་དེའི་གོས་ཁ་བསྒྱུར་པ་ལ་སོགས་པའི་ལས་བརྩམས་པ་མ་ཟིན་ན་མ་བསྐོས་པའི་འཁོར་ཞིང་སྤྱད་པ་ཟངས་ལ་སོགས་པ་དེ་ལས་དབྲལ་བར་མི་བྱ་སྟེ། གཞན་གྱི་མཐུས་དབྲོག་པར་མི་བྱའོ་ཞེས་བྱ་བའི་ཐ་ཚིག་གོ ། དེས་བཀྲུ་བར་ཆུས་བཀང་ལ་འབགས་པ་ཉིད་ན་དེ་ཡིན་ནོ་ཞེས་བྱ་བ་ནི། དེ་བསྐྲུ་བར་ཞེས་བྱ་བ་རྐང་པ་དེ་བཀྲུ་བའི་རྐང་ཁྲུས་སར་གལ་ཏེ་ཆུས་རྐང་པ་འབའ་ཞིག་གོས་པ་ཉིད་ཡིན་ན་བརྩམས་པ་མ་ཟིན་པ་ཉིད་ཡིན་པ་སྟེ། མ་ཟིན་ན་དེ་དང་དཔྲལ་བར་མི་བྱའོ་ཞེས་བྱ་བར་སྦྱར་ཏེ། དེས་རྐང་པ་བཀྲུས་མ་ཟིན་གྱི་བར་དུ་གཞན་གྱི་རྐང་ཁྲུས་སའི་གོ་དབྲོག་པར་མི་བྱའོ་ཞེས་བྱ་བའི་ཐ་ཚིག་གོ །ཆབ་ཁུང་ས་དེར་ཞུགས་པ་ཉིད་ནའོ་ཞེས་བྱ་བ་ནི། བཤང་བ་དང་གཅི་བའི་ཆབ་ཁུང་ས་དེར་ཞུགས་པ་ཉིད་ན་མ་ཟིན་པ་ཉིད་ཡིན་པས། མ་ཟིན་ན་དེ་དང་དབྲལ་བར་མི་བྱའོ་ཞེས་བྱ་བར་སྦྱར་ཏེ་དེས་བཤད་བ་དང་གཅི་བ་མ་ཟིན་གྱི་བར་དུ་གཞན་གྱི་ཆབ་ཁུང་སའི་གོ་དབྲོག་པར་མི་བྱའོ་ཞེས་བྱ་བའི་ཐ་ཚིག་གོ །བསྒོམ་པའི་ཕྱིར་འདུག་པ་ལ་བསླང་བར་མི་བྱའོ་ཞེས་བྱ་བ་ནི། བསམ་གཏན་ལ་སོགས་པ་བསྒོམ་པའི་ཕྱིར་འདུག་པ་གཞན་གྱི་མཐུས་བསླང་བར་མི་བྱའོ། །དེ་ལ་
རྒན་རིམས་སུ་མི་བྱའོ་ཞེས་བྱ་བ་ནི་སྒོམ་པ་དེ་ལ་རྒན་རིམས་སུ་མི་བྱའི་ཇི་ལྟར་འོས་པས་བྱ་བ་སྟེ། སྒོམ་པའི་ཡོ་བྱད་སྟན་ལ་སོགས་པ་དག་ལ་ཇི་ལྟར་འཐོབ་པས་ལོངས་སྤྱད་པར་བྱའི་རྒན་རིམས་སུ་ལོངས་སྤྱད་པར་བྱ་བ་མ་ཡིན་ནོ་ཞེས་བྱ་བའི་ཐ་ཚིག་གོ །འདིར་གཞུང་ནི་དགེ་སློང་དག་སྤོང་བའི་ཁང་པ་ན་འཁོད་ཅིང་དགེ་བའི་ཕྱོགས་ངག་བྱེད་པ་ན། དྲུག་སྡེ་དག་ལྷགས་ཏེ་དེད་ཅག་རྒན་ནོ་ཞེས་སློང་བར་བྱེད་པ་དང༌། བཅོམ་ལྡན་འདས་ཀྱིས་བཀའ་སྩལ་པ། འདི་ལ་རྒན་རིམས་སུ་མི་བྱའོ་ཞེས་གསུངས་པ་ཡིན་ནོ། །དགེ་སློང་ལས་དང་ཟས་ཀྱིས་འབགས་པ་མི་བྱའོ་ཞེས་བྱ་བ་ནི། དགེ་སློང་ལས་དང་ཟས་བརྩམས་བས་འཕགས་པ་བསླང་བར་མི་བྱའོ། །བྱུག་རིས་མ་ཡིན་པར་འདུག་པར་མི་བྱའོ་ཞེས་བྱ་བ་ནི། རང་གི་གོ་མ་ཡིན་པ་ནི་བྱུག་རིས་མ་ཡིན་པ་སྟེ། དེར་འདུག་པར་མི་བྱའོ། །བྱ་བ་བྱས་ན་འཁོར་ཞིང་སྤྱད་པར་འདོད་པ་ཡོད་ན་བཅད་བར་མི་བྱའོ་ཞེས་བྱ་བ་ནི། དགེ་སློང་གིས་རང་གི་གོས་ཁ་བསྒྱུར་བ་ལ་སོགས་པ་དང་རྐང་པ་བཀྲུ་བ་ལ་སོགས་པ་དང༌། བཤད་གཅི་བྱ་བ་ལ་སོགས་པ་བྱ་བ་བྱས་ཟིན་ནས་དགེ་འདུན་གྱི་འཁོར་ཞིང་སྤྱད་པ་ཟངས་ལ་སོགས་པ་དང༌། རྐང་ཁྲུས་ས་ལ་སོགས་པ་དང་ཆབ་ཁུང་ས་ལ་སོགས་པ་གཞན་འདོད་པ་ཡོད་ན་མི་བཅང་མི་བརྣོག་པར་གཏང་བར་བྱ་བའོ། །བར་དུ་དོན་གྱི་ཆེད་ཉིད་དུ་ཁྲིའུ་ལས་ལངས་པ་ནི་བྱ་བ་བྱས་པ་ཉིད་མ་ཡིན་ནོ་ཞེས་བྱ་བ་ནི། གོས་ཁ་བསྒྱུར་བ་དང་གདང་པ་གཟར་བ་དང་དབོག་པ་མི་སླེབས་པ་བསྙགས་པའི་ཆེད་དུ་རྐང་རྟེན་ཁྲིའུ་བཙུགས་པ་ལས་བར་དུ་དོན་གྱི་དབང་ཉིད་དུ་ཁྲིའུ་ལས་བབ་པ་ནི། ང་དུང་ལས་སྔ་མ་བརྩམས་པ་མ་ཟིན་པས་བྱ་བ་བྱས་པ་ཉིད་མ་ཡིན་ཏེ། དེའི་སྐབས་སུ་གཞན་ཁྲིའུ་འདོད་པ་ཡོད་ན་བསྐུར་བར་མི་བྱའོ། །གཞན་ལ་ཡང་དེ་བཞིན་དུ་ཅི་རིགས་པར་སྦྱར་རོ། །དེའི་དུས་ན་དེ་ལ་ཆོས་གོས་སམ་པུས་འཁྱུད་གཞག་པར་བྱའོ་ཞེས་བྱ་བ་ནི། བར་དུ་དོན་གྱི་ཆེད་ཉིད་དུ་ཁྲིའུ་ལས་ལྡང་པ་དེའི་དུས་ན་ཁྲིའུ་དེ་ལ་རང་གི་ཆོས་གོས་སམ་པུས་འཁྱུད་གཞག་པར་བྱའོ། །དེ་ནི་ཁྲིའུ་བྱ་བ་མ་བྱས་པར་ཁ་བརྔམ་དུ་འཕྲོག་པའི་སྐབས་མེད་པར་བྱ་བའི་ཕྱིར་རོ། །འདོད་པ་ཡོད་ལ་གནས་ཡོད་ན་
དགེ་འདུན་གྱིས་སྤགས་པ་ཉིད་བསྟེན་པར་མི་བྱའོ་ཞེས་བྱ་བ་ནི། དགེ་སློང་གི་དགེ་འདུན་གྱི་འཁོར་ཞིང་སྤྱད་པར་ཟངས་ལ་སོགས་པ་བླངས་ཏེ། ཚོན་ལ་སོགས་པས་སྦགས་ཤིང་རང་གི་བྱ་བ་བྱས་པ་མ་ཟིན་པའི་ཚེ་འདོད་པ་གཞན་ཡོད་ལ། བདག་ལ་སྣོད་ལ་སོགས་པ་གནས་གཞན་ཡོད་ན་དགེ་འདུན་གྱི་སྣོད་སྤགས་པ་དེ་རང་གི་བྱ་བ་བྱས་མ་ཟིན་ཀྱང་མི་བསྟེན་པར་བྱ་སྟེ་བསྐུར་བར་བྱ་བའོ། །འདི་སྐད་བསྟན་ཏེ་དགེ་སློང་གང་གིས་དགེ་འདུན་གྱི་ཡོ་བྱད་དེ་བླངས་ཤིང་སྤགས་པ་དེ་མ་ཟིན་པའི་ཚེ་དེ་འདོད་པའི་གང་ཟག་གཞན་ཡོད་ལ་བདག་ལ་ཡང་ཡོ་བྱད་གཞན་ཡོད་ན་དེའི་ཚེ་དགེ་འདུན་གྱི་ཡོ་བྱད་དེ་བྱོ་སྟེ་བསྐུར་བར་བྱའོ། །དོན་ཡོད་ན་རྣམ་པ་དེ་ལྟ་བུ་ལས་བྲལ་པར་བྱས་པ་ལ་ཁ་ན་མ་ཐོབ་མེད་དོ་ཞེས་བྱ་བ་ནི། གང་ཟག་དེ་དགེ་འདུན་གྱི་ཡོ་བྱད་འདོད་པ་ཕྱི་མ་ཤོས་དེ་ལ་དོན་ཡོད་པ་ཉིད་ཡིན་ན། གང་ཟག་སྔ་མ་ཤོས་ལ་རང་གི་སྣོད་གཞན་ཡོད་བཞིན་དུ་དགེ་འདུན་གྱི་ཡོ་བྱད་གང་ཟག་ཕྱི་མ་ལ་མི་སྟེར་ན་གང་ཟག་རྣམ་པ་དེ་ལྟ་བུ་དེ་ལས་གང་ཟག་ཕྱི་མ་ཤོས་ཀྱིས་དགེ་འདུན་གྱི་སྣོད་དེན་དེའི་སྤགས་པ་འདུག་པ་དེ་ད་རང་གི་སྣོད་གཞན་དེར་བྱ་སྟེ། དགེ་འདུན་གྱི་འཁོར་ཞིང་སྤྱད་པའི་ཡོ་བྱད་དེ་དེ་ལས་བྲལ་བར་བྱས་ཏེ་ཁྱེར་བ་ལ་ཁ་ན་མཐོ་བ་མེད་པའོ། །དོན་མེད་ན་ནི་བྲལ་པར་མི་བྱའོ། །དགེ་འདུན་གྱིས་མཆིག་དང་མཆི་གུ་བཅང་བར་བྱའོ་ཞེས་བྱ་བ་ནི། མཆི་གཅེས་བྱ་བ་ནི་ལན་ཚྭ་ལ་སོགས་པ་བཏགས་པའི་ཕྱིར་རོ། །འོག་གཞིར་བཞག་པའི་རྡོ་ལེབ་བོ། །དེའི་མཆི་གུ་ཞེས་བྱ་བ་ནི། མཆིག་དེའི་སྟེང་ནས་ལན་ཚྭ་ལ་སོགས་པ་འཐག་པར་བྱེད་པའི་རྡོ་ལེབ་ཆུང་དུ་འཕྲེད་ཀར་གཞག་པའོ། །འདྲེག་མཁན་གྱི་ལག་ཆ་ཡང་ངོ་ཞེས་བྱ་བ་ཡང༌། བཅང་བར་བྱའོ་ཞེས་བྱ་བའི་རྗེས་སྙེག་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་ཏེ། དགེ་སློང་དག་གིས་དགེ་འདུན་གྱི་ཕྱིར་བཅང་བར་བྱ་བའོ། །སྣོད་དུ་བཅུག་སྟེ་རྩིག་པ་ལ་གཞག་གོ་ཞེས་བྱ་བ་ནི། འདྲེག་མཁན་གྱི་ལག་ཆའོ། །འདིར་གཞུང་ནི་དགེ་སློང་གི་དགེ་འདུན་གྱི་ཕྱིར་འདྲེག་མཁན་གྱི་ལག་ཆ་བཅང་བར་བྱ་ཞིང་སྣོད་དུ་བཅུག་སྟེ་རྩིག་པ་ལ་གཞག་པར་བྱའོ་ཞེས་གསུངས་པ་ཡིན་ནོ། །སྣོད་
ཅེས་བྱ་བ་ནི་འདྲེག་མཁན་གྱི་ལག་ཆའི་སྣོད་ཡིན་པར་ཤེས་པར་བྱའོ། །སྟེའུ་དང་སྟ་རེ་དང་གཟོད་བ་སོགས་པ་དང་དེ་དག་གི་སྣོད་དང་བཅས་པ་ཡང་ངོ་ཞེས་བྱ་བ་ལ་ཡང༌། དགེ་འདུན་གྱིས་བཅད་བར་བྱའོ་ཞེས་བྱ་བའི་རྗེས་སྙེག་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་ཏེ། དགེ་འདུན་གྱིས་སྟེའུ་དང་སྟ་རེ་དང་གཟོང་ལ་སོགས་པ་དང་དེ་དག་གི་སྣོད་དང་བཅས་པ་བཅང་བར་བྱ་བའོ། །སོགས་པ་ཞེས་སྨོས་པའི་སྒྲས་ནི། སྤྱང་ཕྲ་མོ་ལ་སོགས་པ་དག་བསྡུའོ། །དེ་དག་གི་སྣོད་ཅེས་སྨོས་པས་ནི་ཤིང་མཁན་གྱི་ལག་ཆའི་སྣོད་དག་བསྡུའོ། །འདིར་གཞུང་ནི་ཤིང་དག་གཤེགས་པར་མི་ནུས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ཕྱིར་སྟ་རེ་དང་གཟོང་དག་བཅང་བར་བྱའོ། །དགེ་སློང་ཞིག་གི་ཁྲི་ཆག་ནས་དགེ་སློང་དེས་སྨྲས་པ་ཁོ་བོ་ལ་བཟོ་ཡོད་དེ་ཞེས་བྱ་བས་ན། བཅོམ་ལྡན་འདས་ཀྱིས་བཀའ་སྩལ་པ། དབེན་པའི་ཕྱོགས་སུ་བྱའོ། །དགེ་འདུན་གྱིས་སྟེའུ་དང་སྣོད་དག་ཀྱང་བཅང་བར་བྱའོ། །གང་ཟག་གི་འཆང་ན་འགལ་ཚབས་ཅན་དུ་འགྱུར་རོ་ཞེས་བྱ་བ་གསུངས་པ་ཡིན་ནོ། །དེས་དགེ་སློང་ལ་གཡར་པོ་ཉིད་དུས་ལས་བྱས་པ་ཡན་ཆད་སྦྱིན་ནོ་ཞེས་བྱ་བ་ནི། དགེ་འདུན་དེས་དགེ་སློང་ཤིང་བཟོ་བྱེད་པ་དེ་ལ་ལག་ཆའི་སྣོད་ཐན་ས་ལས་བྱས་པ་ཡན་ཆད་ཀྱང་གཡར་པོ་ཉིད་དུ་སྦྱིན་པར་བྱའོ། །དགེ་སློང་མས་འཆིང་བུའི་སྣོད་བཅང་བར་མི་བྱའོ་ཞེས་བྱ་བ་ནི་རྣམ་པ་ཐམས་ཅད་དུའོ། །ཐམས་ཅད་ཀྱིས་འབྲུ་མར་སྣོད་བཅང་བར་བྱའོ་ཞེས་བྱ་བ་ནི་དགེ་སློང་དང་དགེ་སློང་མ་ཐམས་ཅད་ཀྱིས་སོ། །ཕུལ་གང་མན་ཆད་ནས་ཕུལ་བྱེད་ཡན་ཆད་ཤོང་བའོ་ཞེས་བྱ་བ་ནི། འབྲུ་མར་སྣོད་ཀྱི་ཚད་དེ་ཕུལ་གང་ལ་ནི་དབུས་ཀྱི་སྲང་བརྒྱད་ཀྱི་ཚད་དོ། །ཕུལ་ཕྱེད་ལ་ནི་དབུས་ཀྱི་སྲང་བཞིའི་ཚད་དོ། །ལྕགས་ཀྱི་དོག་ལེ་ཡང་ངོ་ཞེས་བྱ་བ་ནི་དགེ་སློང་དང་དགེ་སློང་མ་ཐམས་ཅད་ཀྱིས་བཅང་བར་བྱའོ། །དེའི་ལྕགས་སྒྱེད་ཀྱང་ངོ་ཞེས་བྱ་བ་ནི། ལྕགས་ཀྱི་དོག་ལེའི་ལྕགས་སྒྱེད་རྐང་གསུམ་པའམ་རྐང་བཞི་པ་ཡང་བཅང་བར་བྱ་བའོ། །ས་ལས་བྱས་པའི་ཐབ་ཀྱང་ངོ་ཞེས་བྱ་བ་ནི། རྒྱ་ཐབ་དང་སྒྱེད་པོ་ཡང་བཅད་བར་བྱའོ། །གནང་བ་ཐོབ་པས་འཁར་
བའོ་ཞེས་བྱ་བ་ནི། འཁར་བའི་གནང་བ་ཐོབ་པ་ཐམས་ཅད་ཀྱིས་འཁར་བ་བཅང་བར་བྱ་བའོ། །དྲ་བ་ཁ་དོག་གཅིག་པ་ཡང་ངོ་ཞེས་བྱ་བ་ཡང་གནང་བ་ཐོབ་པ་ཐམས་ཅད་ཀྱིས་བཅང་བར་བྱ་བའོ། །འདིར་དྲ་བ་ཞེས་བྱ་བ་ནི་བྱ་རྒྱའི་རྣམ་པ་ལྟ་བུ་ཡིན་པར་ཤེས་པར་བྱ་སྟེ་དེ་ཁ་དོག་གཅིག་པ་བཅང་བར་བྱའོ། །འདིར་གཞུང་ནི་བཅོམ་ལྡན་འདས་ཀྱིས་དྲ་བ་ཉེ་བར་གཞག་པར་བྱའོ་ཞེས་བཀའ་སྩལ་པ་དང༌། དྲུག་སྡེ་དག་གིས་ཚོན་སྣ་ལྔ་བའི་དྲ་བ་དག་ཉེ་བར་གཞག་པ་ནས། བཅོམ་ལྡན་འདས་ཀྱིས་བཀའ་སྩལ་པ། ཚོན་སྣ་ལྔ་པའི་དྲ་བ་དག་ཉེ་བར་གཞག་པར་མི་བྱའོ་ཞེས་གསུངས་པ་ཡིན་ཏེ། དེའི་ཕྱིར་དྲ་བ་ཁ་དོག་གཅིག་པ་ཡང་ངོ་ཞེས་སྨོས་སོ། །དེ་སྦྱིན་པར་བྱའོ་ཞེས་བྱ་བ་ནི་འཁོར་བ་དང་དྲ་བའི་གནང་བ་དེ་སྦྱིན་པར་བྱ་བའོ། །ཅི་ཐམས་ཅད་ལའམ་ཞེན་དེའི་ཕྱིར་རྒས་པ་དང་ན་བདག་ལའོ་ཞེས་བྱ་བ་སྨྲས་ཏེ། རྒས་པ་དང་ན་བ་དག་གིས་དགེ་འདུན་ལ་གསོལ་ནས། དགེ་འདུན་གྱིས་གསོལ་བ་དང་གཉིས་ཀྱི་ལས་ཀྱིས་གནང་བ་སྦྱིན་པར་བྱའོ། །དེའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །བདག་དགེ་སློང་མིང་འདི་ཞེས་བགྱི་བ་རྒས་འཁོགས་ཤིང་ཉམ་ཆུང་ལ་བྲོ་འཚལ་ཞིང་སྦྱོར་མི་བཟོད་དེ་དགེ་འདུན་ལས་འཁོར་བ་གནང་བ་གསོལ་ན་ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུག་ས་བརྩེ་བའི་སླད་དུ། བདག་དགེ་སློང་མིང་འདི་ཞེས་བགྱི་བ་རྒས་འཁོགས་ཤིང་ཉམ་ཆུང་བ་ལ་བྲོ་འཚལ་ཞིང་སྟོང་མི་བཟོད་པ་ལ། འཁར་བ་གནང་བ་སྩལ་དུ་གསོལ། །ལན་གསུམ་དུ་བཟླས། དགེ་འདུན་བཙུན་པ་རྣམས་གསན་དུ་གསོལ། །དགེ་སློང་མིང་འདི་ཞེས་བ་གྱི་བ་རྒས་འཁོགས་ཤིང་ཉམ་ཆུང་ལ་བྲོ་འཚལ་ཞིང་སྦྱོར་མི་བཟོད་པ་འདི་དག་དགེ་འདུན་ལས་འཁར་བ་གནང་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་མིང་འདི་ཞེས་བགྱི་བ་རྒས་འཁོགས་ཤིང་ཉམ་ཆུང་ལ་བྲོ་འཚལ་ཞིང་སྦྱོར་མི་བཟོད་པ་ལ་འཁར་བ་གནང་བ་གསོལ་ཏོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་
ཡིན་ནོ། །དྲ་བ་གནང་བ་གསོལ་བ་དང་སྦྱིན་པའི་སྔགས་ནི་འཁར་བ་གནང་བ་ཞེས་འབྱུང་བ་མིང་བརྗེས་ལ། སྐབས་དེར་དྲ་བ་གནང་བ་ཞེས་བྱ་བ་སྨོས་ཏེ་དྲ་བ་གནང་བ་ཉིད་བརྗོད་པར་བྱའོ། །དེ་གཉིས་ཚིག་གཅིག་གིས་སྦྱིན་པ་ཡང་སྲིད་དོ་ཞེས་བྱ་བ་ནི། འཁར་བ་དང་དྲ་བ་གན་བ་དེ་ཉིད་སྔགས་ཀྱི་ཚིག་གཅིག་གིས་ཅིག་ཅར་དུ་གསོལ་བ་དང་སྦྱིན་དུ་ཡང་རུང་ངོ༌། །སྡིག་སྦྲུལ་ལ་སོགས་པའི་གཉེན་པོའི་ཕྱིར་འཁར་བ་སྒྲ་དང་བཅས་པ་བཅང་ངོ་ཞེས་བྱ་བ་ནི། སྡིག་སྦྲུལ་མང་པའི་ཡུལ་དུ་དེས་འཚེ་བའི་གཉེན་པོར་དགེ་སློང་གིས་འཁར་བའི་མེ་ཏོག་གསོང་གདངས་སྙིང་པོ་ཅན་སྒྲ་དང་བཅས་པ་བཅང་པར་བྱའོ། །སྔར་རྒན་པོ་དང་ནད་པ་དག་ལ་གནང་བ་སྦྱིན་པའི་འཁར་བ་ནི་གནས་བརྟན་པའི་ཕྱིར་བེ་ཅོན་སྦོམ་པོ་རྗེས་སུ་གནང་བ་ཡིན་ནོ། །འཁར་གསིལ་ནི་དགོས་པ་གཞན་གྱི་དབང་གིས་གསུངས་སོ། །འདི་ནི་སྡིག་སྤྲུལ་ལ་སོགས་པའི་གཉེན་པོའི་ཕྱིར་རྗེས་སུ་གནང་བ་ཡིན་པས་དེའི་ཕྱིར་དེ་གསུམ་ཐ་དད་པར་ཤེས་པར་བྱའོ། །ཡུ་བའི་རྩ་བ་ནས་གས་ན་སྦུ་གུ་བསྐོན་ནོ་ཞེས་བྱ་བ་ལ་ཡུ་བ་ཞེས་བྱ་བའི་སྒྲས་ནི་འཁར་བ་གནང་བ་ཐོབ་པའི་འཁར་བའི་ཡུ་བ་དང་འཁར་གསིལ་གྱི་ཡུ་བ་དང་གོས་ཀྱི་སྲོག་ཤིང་གི་ཡུ་བ་དག་གཟུང་ངོ༌། །དེ་དག་གི་རྩ་བ་མ་ཐོག་ན། ལྕགས་ཀྱི་བུ་གུ་ངོས་གཅིག་ཞབས་བཅུག་པ་བསྐོན་པར་བྱ་བའོ། །ཡ་ཐོག་ནི་དཀྲི་བས་སོ་ཞེས་བྱ་བ་ནི། ཡུ་བ་དེ་དག་གི་ཡ་ཐོག་གས་ན་དཀྲི་བ་བསྐོན་པར་བྱ་སྟེ། ལྕགས་ཀྱི་གླེགས་བུས་ཀུན་ནས་འཁོར་བར་དཀྲི་བར་བྱའོ།། འདིར་གཞུང་ནི་རྒྱལ་པོའི་ཁབ་ཀྱི་གྲོང་ཁྱེར་གྱི་བསིལ་བའི་ཚལ་གྱི་དུར་ཁྲོད་ན་སྡིག་སྦྲུལ་དག་མང་པས། དེ་ན་དགེ་སློང་དུར་ཁྲོད་དུ་འགྲོ་བ་དག་སྡིག་སྤྲུལ་དག་གིས་ཟིན་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་སྡིག་སྤྲུལ་བཟློག་པའི་ཕྱིར་འཁར་བ་སྒྲ་ཅན་རྗེས་སུ་གནང་ངོ་ཞེས་བྱ་བའི་བར་དུ་གསུངས་པ་ཡིན་ནོ། །གོས་ཀྱི་སྲོག་ཤིང་ཞེས་བྱ་བ་ནི་གོས་ཀྱི་གདང་ཡིན་ནོ། །སྨྱིག་མ་མཁན་གྱིས་བྱས་པ་འམ་ལོ་མ་ལས་བྱས་པའི་གདུགས་བཅང་བར་བྱའོ་ཞེས་བྱ་བ་ནི། སྨྱིག་མས་འཚོ་བ་ནི་སྨྱིག་མ་མཁན་ཏེ། དེས་བྱས་པའི་གདུགས་
ནི་སྨྱིག་མ་མཁན་གྱིས་བྱས་བའི་གདུགས་སོ། །དེ་ནི་སྐྱེ་བོ་ཐམས་ཅད་ཀྱི་དོན་དུ་གདུགས་ཁྲ་བོ་བཀྲ་བདག་བྱེད་པས་དེ་འདིར་ཉེས་པ་མེད་པར་བསྟན་པའི་ཕྱིར་སྨྱིག་མ་མཁན་གྱིས་བྱས་པའི་ཞེས་སྨོས་སོ། །ལོ་མ་ལས་བྱས་བའི་གདུགས་ནི་འཕྲལ་གྱི་རང་བཟོར་བྱས་པ་ཡིན་ཏེ། དེ་གཉིས་གང་འབྱོར་བ་བཅང་བར་བྱའོ། །ཡུ་བ་ནི་ལུས་ཀྱི་ཚད་དོ་ཞེས་བྱ་བ་ནི་གདུགས་ཀྱི་ཡུ་བའི་སྲིད་ཀྱི་ཚད་ནི་ལུས་ཀྱི་སྲིད་ཀྱི་ཚད་དང་མཉམ་པར་བྱའོ། །དེས་གྲོང་དབུས་སུ་འགྲོ་བར་མི་བྱའོ་ཞེས་བྱ་བ་ནི། གདུགས་དེས་གྲོང་གི་དབུས་སུ་འགྲོ་བར་མི་བྱའོ། །གལ་ཏེ་ལམ་གྱི་དབང་གིས་ནི་གློར་བསྙལ་ཏེའོ་ཞེས་བྱ་བ་ནི་གལ་ཏེ་ལམ་གྱི་དབང་གིས་གྲོང་དབུས་སུ་མི་འགྲོར་མི་རུང་ན། གདུགས་དེ་གློར་བསྙལ་ཏེ་འགྲོ་བར་བྱའོ། །ཆར་འབབ་པ་ཉིད་ནི་བསོད་སྙོམས་ལ་རྒྱུ་བར་བྱའོ་ཞེས་བྱ་བ་ནི། གདུགས་ཀྱིས་གྲོང་དབུས་སོ། །ཡུ་བ་ལ་གཞར་དུ་མི་རུང་བ་ཉིད་མ་ཡིན་ནོ་ཞེས་བྱ་བ་ནི། གོས་བསྐྱབ་པའི་ཕྱིར་ཡུ་བ་ལ་གཞར་ཞིང་ཡིབ་ཏུ་མི་རུང་བ་མ་ཡིན་ཏེ་རུང་བ་ཁོ་ནའོ། །ཡུ་བ་ནི་བྱི་དོར་བྱའོ། །ཆད་ན་ཁྱིམ་དག་ཏུ་གཞག་གོ་ཞེས་བྱ་བ་ནི། ཆར་པ་ཆད་ན་དེའི་ཚེ་དྲུང་ན་འདུག་པའི་ཁྱིམ་གང་ཡིན་པ་དེར་གདུགས་དེ་བརྟགས་ཏེ་གཞག་པའོ། །འབྱུང་ཀར་བླང་ངོ་ཞེས་བྱ་བ་ནི། གང་དུ་བཞག་པའི་གྲོང་དེ་ནས་ཕྱིར་འབྱུང་ཀར་གདུགས་དེ་བླང་བའོ། །གཙུག་ལག་ཁང་ན་གནས་པའི་སྐབས་བཤད་ཟིན་ཏོ།། །།ད་ནི་གནས་གཞན་ན་གནས་པའི་སྐབས་བརྗོད་པར་བྱ་སྟེ། རོལ་མོ་མཁན་གྱི་གནས་དང༌། སྨད་འཚོང་མའི་གནས་དང༌། ཆང་འཚོང་མའི་གནས་དང༌། རྒྱལ་པོའི་ཕོ་བྲང་དང༌། གདོལ་བའི་ཁྱིམ་གྱི་གནས་དག་བསྟེན་པར་མི་བྱའོ་ཞེས་བྱ་བ་ནི། སྤྱོད་ཡུལ་མ་ཡིན་པའི་གནས་ལྔ་པོ་དེ་དག་ཏུ་འཇུག་པར་མི་བྱའོ། །མི་གཙང་པའི་སྐྱབས་དང་ཉེ་བར་འདུག་པར་མི་བྱའོ་ཞེས་བྱ་བ་ནི། འཇུག་པའི་ཕྱིར་སོང་ན་ཡང་དེའི་ཉེན་ཀོར་དུ་བསྡད་པར་མི་བྱའོ། །འདིར་གཞུང་ནི། གླེང་གཞི་དག་ལས་དེ་ལྟ་བས་ན་དགེ་སློང་གིས་ཆབ་ཁུང་སར་སོང་ན་འདུ་འཛིས་གནས་པར་མི་བྱའོ། །དེའི་ཉེན་ཀོར་དུ་ལུང་དབོག་པར་མི་བྱ། བཀླག་པར་མི་བྱ། ཁ་
ཐོན་མི་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །གོས་རིན་པོ་ཆེར་གྱུར་པས་དགོན་པར་གནས་པར་མི་བྱའོ་ཞེས་བྱ་བ་ནི་ལ་པ་རིན་པོ་ཆེ་ལ་སོགས་པ་རིན་ཆེ་བས་སོ། །ལྡུམ་བུ་ནི་མེ་རུ་ཀའི་ཕྱེ་མས་ལ་བལ་སྲོག་ཆགས་དག་མི་འབྱུང་ངོ་ཞེས་བྱ་བ་ནི། ལྡུམ་བུ་དེའི་ཕྱེ་མས་བཏབ་ནལ་བ་ལ་སྲིལ་ལ་སོགས་པ་སྲོག་ཆགས་དག་མི་འབྱུང་ཞིང་དེ་དག་གིས་ཟོས་པར་མི་འགྱུར་བའོ། །ཤིད་ཀུན་གྱིས་ཀྱང་ངོ་ཞེས་བྱ་བ་ནི། ཤིང་ཀུན་གྱི་ཕྱེ་མས་ཀྱང་ལ་བ་ལ་སྲོག་ཆགས་དག་མི་འབྱུང་བའོ། །ཤིང་ནི་མ་པ་དང་བ་ཤ་ཀའི་ལོ་མ་དག་གིས་ཀྱང་ངོ་ཞེས་བྱ་བ་ནི། ཤིང་དེ་གཉིས་ཀྱི་ལོ་མ་དག་གི་ཕྱེ་མས་ཀྱང་ལ་བ་ལ་སྲོག་ཆགས་དག་མི་འབྱུང་བའོ། །རིམ་པ་དེར་སོང་ན་དེ་ལ་ཤིན་ཏུ་ཕན་པ་ཉིད་དོ་ཞེས་བྱ་བ་ནི། གོས་ཀྱི་རིམ་པ་གཅིག་ཏུ་ཕྱེ་མ་སོང་ཞིང་བཏབ་ན་རིམ་པ་གཞན་ལ་ཤིན་ཏུ་ཕན་པ་ཉིད་ཡིན་ཏེ། དེའི་མཐུས་རིམ་པ་གཞན་ལ་ཡང་ཤིན་ཏུ་ཕན་པ་ཉིད་ཡིན་པའོ། །སྐམ་པ་ཡང་དེའི་དོན་ཉིད་ཡིན་ནོ་ཞེས་བྱ་བ་ནི། གོས་སྐམ་པ་ཡང་སྲོག་ཆགས་མི་སྐྱེ་བ་ཉིད་དེའི་དོན་ཉིད་ཡིན་པའོ། །འདིར་གཞུང་ནི་དུས་དུས་སུ་བསྐམ་པར་བྱའོ་གསུངས་པ་ཡིན་ནོ། །དགོན་པ་པས་ཕྱོགས་དང་ལམ་དང་ཚེས་གྲངས་དང་ཉི་མ་དང་རྒྱུ་སྐར་དག་ལ་མཁས་པར་བྱའོ་ཞེས་བྱ་བ་ནི། དགོན་པ་པས་དེ་དག་ཤེས་པར་བྱ་བའོ། །རྟག་ཏུ་མེ་དང་ཆུ་ཡོད་པར་རོ་ཞེས་བྱ་བ་ནི། དགོན་པ་པས་དེ་གཉིས་རྟག་ཏུ་ཡོད་པར་བྱའོ། །ཕྱེ་དང་རས་མ་དག་དང༌། སྦྲང་རྩི་དང་ཞུན་མར་དག་ཅི་འབྱོར་པ་ཉེ་བར་གཞག་གོ་ཞེས་བྱ་བ་ནི། དགོན་པ་པས་དེ་དག་ཅི་འབྱོར་བ་བཅང་བར་བྱ་བ་སྟེ། དེ་ནི་ཆོམ་རྐུན་པའི་གནོད་པ་ཟློག་པའི་ཕྱིར་རོ། །འདིར་གཞུང་ནི་ཕྱེ་དང་སྦྲང་རྩི་དང་ཞུན་མར་ཅི་འབྱོར་བ་ཉེ་བར་གཞག་པར་བྱའོ་ཞེས་གསུངས་པ་ཡིན་ནོ། །གལ་ཏེ་ཟས་ལས་ལྷག་བྱུང་ན་ཡང་ངོ་ཞེས་བྱ་བ་ནི། གལ་ཏེ་ཟས་ལས་ལྷག་རོལ་ལུས་པར་གྱུར་ན་ཡང་ཉེ་བར་གཞག་པར་བྱའོ། །དགེ་སློང་མས་དགོན་པར་གནས་པར་མི་བྱའོ་ཞེས་བྱ་བ་ནི་རྣམ་པ་ཐམས་ཅད་དུའོ། གྲོང་ཁྱེར་གྱི་ནང་དུ་དབྱར་ཁང་བྱའོ་ཞེས་བྱ་བ་ནི་དགེ་སློང་མས་སོ། །དེས་དེའི་
ཕྱིར་སྒོར་འདུག་པར་མི་བྱའོ་ཞེས་བྱ་བ་ནི། དགེ་སློང་མ་དེས་དབྱར་ཁང་དེའི་ཕྱིར་སྒོར་འདུག་པར་མི་བྱའོ། །སྣང་ཡལ་ཅན་དུ་མི་བྱའོ་ཞེས་བྱ་བ་ནི་འདུག་པར་ཏེ། འདིར་སྣང་ཡལ་ཅན་ཞེས་བྱ་བ་ནི། སྐར་ཁུང་འབའ་ཞིག་ཏུ་མ་ཟད་ཀྱི། གང་དུ་ཕྱི་རོལ་སྣང་བ་ཐམས་ཅད་ཡིན་པར་རིག་པར་བྱའོ། །ལམ་གྱི་གཞི་མདོར་མི་བྱའོ་ཞེས་བྱ་བ་ཡང་འདུག་པར་རོ། །གོས་མེད་པ་ཅན་གྱིས་མི་བྱའོ་ཞེས་བྱ་བ་ནི། དགེ་སློང་མ་གོས་མེད་པ་ཅན་གྱིས་ཐམས་ཅད་དུ་འདུག་པར་མི་བྱའོ། །དེ་ལ་རྡུལ་གཟན་ནི་གོས་ཉིད་ཡིན་ནོ་ཞེས་བྱ་བ་ནི། བསྟན་མ་ཐག་པའི་མོད་དེ་ལའོ། །དཔུང་པ་གཉིས་མ་གཡོགས་པར་ཁྱིམ་པའི་དུང་དུ་མི་བྱའོ་ཞེས་བྱ་བ་ནི། དགེ་སློང་མས་རྡུལ་གཟན་གྱི་གོས་ཉིད་གྱོན་དུ་ཟིན་ཀྱང་དཔུང་པ་གཉིས་མ་གཡོགས་པར་ཁྱིམ་པའི་དྲུང་དུ་འདུག་པར་མི་བྱའོ། །དེའི་སྐྱིལ་མོ་ཀྲུང་གི་གནས་སུ་སྐྱིལ་མོ་ཀྲུང་ཕྱེད་དོ་ཞེས་བྱ་བ་ནི། དགེ་སློང་མས་དེའི་སྐྱིལ་མོ་ཀྲུང་གིས་འདུག་པའི་གནས་སུ་ནི་སྐྱིལ་མོ་ཀྲུང་ཕྱེད་ཀྱིས་འདུག་པར་རིག་པར་བྱ་སྟེ། དེས་སྐྱིལ་མོ་ཀྲུང་ཕྱེད་ཀྱིས་ཏིང་ངེ་འཛིན་ལ་འདུག་པར་བྱའོ་ཞེས་བྱ་བའི་ཐ་ཚིག་གོ །ཟག་བྱེད་ཀྱི་སྒོར་སྲོག་ཆགས་མི་འཇུག་པར་བྱ་བའི་ཕྱིར་གོས་ལ་སོགས་པས་གཡོགས་སོ་ཞེས་བྱ་བ་ནི་དགེ་སློང་མས་མོ་མཚན་གྱི་སྒོར་འབུ་སྦྲང་ལ་སོགས་པ་སྲོག་ཆགས་ཕྲ་མོ་མི་འཇུག་པར་བྱ་བའི་ཕྱིར་གོས་ལ་སོགས་པས་གཡོགས་པར་བྱ་བའོ། །དགེ་སློང་དག་གིས་དགེ་སློང་མ་གཙུག་ལག་ཁང་དུ་འཇུག་པ་དག་བཟློག་པར་མི་བྱའོ་ཞེས་བྱ་བ་ནི། དགེ་སློང་དག་གིས་དགེ་སློང་མ་དགེ་འདུན་གྱི་གཙུག་ལག་ཁང་དུ་འཇུག་པ་དག་ཕྱིར་བཟློག་པར་མི་བྱའོ། །དེ་དག་གཏམ་མི་འདྲི་བ་དང་མི་གདམས་པ་དང༌། གསོ་སྦྱོང་དང་དགག་དབྱེ་གཞག་པ་དག་གིས་ཡོངས་སུ་གདུལ་བར་བྱའོ་ཞེས་བྱ་བ་ནི། དགེ་སློང་དག་གིས་དགེ་སློང་མ་དེ་དག་ཚུལ་བཞེན་མ་ཡིན་པར་བྱེད་ན་གཏམ་འདྲེ་བར་མི་བྱ་བ་ལ་སོགས་པ་དག་གིས་ཡོངས་སུ་གདུལ་བར་བྱ་ཞིང་དུལ་བ་ཐོབ་པར་བྱའོ། །དེས་དགེ་སློང་རྗེས་སུ་གནང་བ་བྱེད་དུ་མ་བཅུག་པར་གཙུག་ལག་ཁང་དུ་འཇུག་པར་མི་བྱའོ་ཞེས་བྱ་བ་ནི། དགེ་སློང་
མ་དེས་དགེ་སློང་རྗེས་སུ་གནང་བར་བྱེད་དུམ་བཅུག་ཅིང་གོ་བར་མ་བྱས་པར་དགེ་སློང་གི་གཙུག་ལག་ཁང་དུ་ཐུག་ཐུབ་ཏུ་འཇུག་པར་མི་བྱའོ། །དགེ་སློང་གིས་དེ་ལ་ཇི་ལྟར་རྗེས་སུ་གནང་བར་བྱ་ཞེ་ན། དེའི་ཕྱིར་ཁྱོད་ནད་དང་བཅས་པ་མ་ཡིན་ན་རྗེས་སུ་གནང་ངོ་ཞེས་བྱ་བ་སྨྲས་ཏེ། གལ་ཏེ་ཁྱོད་དགེ་སློང་རྣམས་དང་ཞེ་འགྲས་པ་མ་ཡིན་ན་རྗེས་སུ་གནང་ངོ་ཞེས་རྗེས་སུ་གནང་བར་བྱའོ། །ཅི་དེ་བཞིན་རྗེས་སུ་གནང་པར་བྱའམ་ཞེ་ན་དེའི་ཕྱིར། དྲི་བས་ཞེ་འགྲས་པ་མེད་པ་ཉིད་ངེས་པར་ཤེས་པར་བྱ་ཏེའོ་ཞེས་བྱ་བ་སྨྲས་ཏེ། དྲི་བ་གང་གི་དགེ་སློང་མ་དེ་ལ་ཞེ་འགྲས་པ་མེད་ཅིང་རྙོག་པ་མེད་པ་ཉིད་དུ་སྟོན་པའི་དྲི་བ་དེས་ཞེས་བྱ་བའི་ཐ་ཚིག་གོ །གནས་ཀྱི་ཡང་དག་པར་སྦྱར་བའི་སྐབས་རྫོགས་སོ།། །།ད་ནི་སྤ་བའི་རྣམ་པར་གཞག་པ་དང་ཡོངས་སུ་བསྐྱང་བའི་སྐབས་བརྗོད་པར་བྱ་སྟེ། ཕྲེད་གཏན་དང་གནམ་གཟེར་དང་འཁོར་གཏན་དང་སྒོ་ལྕགས་དང་ལྡེ་མིག་ཀྱོག་པོ་དག་གཙུག་ལག་ཁང་བསྡམ་པའི་ཕྱིར་ཡང་དག་པར་སྦྱར་རོ་ཞེས་བྱ་བ་ནི། གཙུག་ལག་ཁང་གི་སྒོ་ལ་སོགས་པ་བསྡམ་པའི་ཕྱིར་སྟ་གོན་བྱའོ། །སྒོ་ལྕགས་ཞེས་སྨོས་པས་ནི་སྒོ་གཏན་ཡང་བརྗོད་པ་ཡིན་ནོ། །འདིར་གཞུང་ནི་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ལྔ་པོ་འདི་དག་ནི་སྡོམ་པར་བྱེད་པ་དག་ཡིན་ཏེ། ལྔ་གང་ཞེ་ན། ཕྲེད་གཏན་དང་གནམ་གཟེར་དང༌། འཁོར་གཏན་དང་སྒོ་ལྕགས་དང་སྡེ་མིག་ཀྱོག་པོ་སྟེ། དེ་དག་གཙུག་ལག་ཁང་ན་བདོག་ན་ཐམས་ཅད་དགེ་སྐོས་ཀྱིས་བཅང་བར་བྱའོ་ཞེས་གསུངས་པ་དང༌། རྣམ་པར་འབྱེད་པ་ལས་ཀྱང་དགེ་འདུན་གྱི་གནས་བརྟན་དགེ་སློང་གིས་དགེ་སྐོས་ལ་ཚེ་དང་ལྡན་པ་ཁྱོད་ཀྱིས་སྒོ་བཅད་དམ། གཙུག་ལག་ཁང་སོ་སོར་བརྟགས་སམ་ཞེས་དྲི་བར་བྱའོ་ཞེས་གསུངས་པ་དང༌། མ་མོ་ལས་ཀྱང་བཅོམ་ལྡན་འདས་ཀྱིས་དགེ་སློང་རྣམས་ལ་གནས་མལ་བསྲུང་བའི་ཕྱིར་ལྡེ་མིག་ཀྱོག་པོ་རྗེས་སུ་གནང་ངོ་ཞེས་གསུངས་པ་ཡིན་ནོ། །དགེ་སྐོས་ཀྱིས་དགོངས་ཀར་གཙུག་ལག་ཁང་བསྡམས་ནས་སོ་སོར་བརྟག་པར་བྱའོ་ཞེས་བྱ་བ་ནི། དགེ་སྐོས་ཀྱིས་མཚན་མོའི་ཐུན་དང་པོའི་ཆང་གཙུག་ལག་ཁང་གི་སྒོ་ལ་
སོགས་པ་བསྡམས་ནས་གཙུག་ལག་ཁང་སོ་སོར་བརྟག་པར་བྱའོ། །འཇིགས་པ་དང་བཅས་པ་ཉིད་ཡིན་ན་ཐུན་པ་ཉིད་ཀྱིས་མེལ་ཚེ་བྱའོ་ཞེས་བྱ་བ་ནི། གལ་ཏེ་གཙུག་ལག་ཁང་འཇིགས་པ་དང་བཅས་པ་ཉིད་ཡིན་ན། དེའི་ཚེ་དགེ་སློང་རྣམས་ཀྱིས་ཐུན་ཏུ་ཀླག་པའི་ཐུན་པ་ཉིད་ཀྱིས་མེལ་ཚེ་བྱ་བའོ། །དེར་གྱུར་པས་ཉལ་བ་དང་སྙོམས་པར་འཇུག་པ་དག་སྤང་ངོ་ཞེས་བྱ་བ་ནི། མེལ་ཚེའི་ཐུན་པར་གྱུར་པ་དེས་ཉལ་བ་དང་སྙོམས་པར་འཇུག་པ་དག་ངེས་པར་སྤང་བར་བྱ་སྟེ། གཞན་དུ་ན་ཡིད་རྟོན་པ་ལ་འཁུས་པར་འགྱུར་རོ། །དེར་དགེ་འདུན་གྱི་གནས་བརྟན་གྱིས་དགེ་སྐོས་ལ་དམ་གཞག་བྱས་པ་ཉིད་དྲི་བར་བྱའོ་ཞེས་བྱ་བ་ནི། གཙུག་ལག་ཁང་དེར་དགེ་འདུན་གྱི་གནས་བརྟན་གྱིས་དགེ་སྐོས་ལ་སྒོ་བཅད་པ་ལ་སོགས་པ་དམ་གཞག་བྱས་པ་ཉིད་སྨྲ་བར་བྱའོ། །གལ་ཏེ་ཡང་དག་པར་སྦྱར་བ་དག་གིས་མ་བསྡམས་པ་ཉིད་ན་གཙུག་ལག་ཁང་བརླག་ན་དགེ་སྐོས་འཇལ་དུ་གཞུག་པར་བྱ་བ་ཉིད་ཡིན་ནོ་ཞེས་བྱ་བ་ནི། གལ་ཏེ་ཕྲེད་གཏན་ལ་སོགས་པ་སྡོམ་པར་བྱེད་པ་ལྔ་པོ་ཡང་དག་པར་སྦྱར་བ་དག་གིས་གཙུག་ལག་ཁང་གི་སྒོ་ལ་སོགས་པ་ལ་མ་བསྡམས་པ་ཉིད་ན་ཆོམ་རྐུན་པ་དག་གིས་གཙུག་ལག་ཁང་བོར་རླག་བྱུང་ན། རྫས་ཅི་རླག་པ་དགེ་སྐོས་འཇལ་དུ་གཞུག་པར་བྱ་བ་ཉིད་ཡིན་ཏེ། དགེ་སྐོས་ལ་སྐྱིན་པ་དབབ་པོ་ཞེས་བྱ་བའི་ཐ་ཚིག་གོ །དེ་དག་ཇི་ཙམ་ཉམས་པར་བྱས་པ་དེ་ཙམ་གྱི་ཆ་དག་གོ་ཞེས་བྱ་བ་ནི། བསྡམས་པའི་ཕྱིར་ཡང་དག་པར་སྦྱར་བ་འཕྲེད་གཏན་ལ་སོགས་པ་དག་ལས་གཅིག་གམ་དུ་མའམ། མང་པོས་བསྡམ་པ་མ་བསྒྲུབས་ཤིང་ཉམས་པར་བྱས་ན་ཡང་དག་པར་སྦྱར་བ་དེ་དག་ཇི་ཙམ་མ་བསྒྲུབས་ཤིང་ཉམས་པར་བྱས་པ་དེ་ཙམ་གྱི་ཆ་དག་དགེ་སྐོས་འཇལ་དུ་གཞུག་པར་བྱ་བ་ཉིད་ཡིན་ཏེ། གལ་ཏེ་གཅིག་གིས་མ་བསྡམས་ན་གཅིག་གི་ཆ་འཇལ་དུ་གཞུག་གོ །ཇི་སྟེ་གཉིས་ཀྱིས་མ་བསྡམས་ན་གཉིས་ཀྱི་ཆ་འཇལ་དུ་གཞུག་གོ །དེ་བཞིན་དུ་གསུམ་གྱིས་མ་བསྡམས་ན་གསུམ་གྱི་ཆ་བཞིས་མ་བསྡམས་ན་བཞིའི་ཆ་འཇལ་དུ་གཞུག་གོ །གལ་ཏེ་ལྔ་ཆར་གྱིས་མ་བསྡམས་ན་སྐྱིན་
པ་རིལ་གྱིས་འཇལ་དུ་གཞུག་གོ །ལྡེ་མིག་ཀྱོག་པོ་དང་སྒོ་ལྕགས་བཅང་བར་བྱའོ་ཞེས་བྱ་བ་ནི། དགེ་སློང་དང་དགེ་སློང་མ་ཐམས་ཅད་ཀྱིས་སོ། །སྡོམ་པ་ཇི་སྙེད་ཡོད་པ་དེ་དག་གིས་སྒོ་མ་བསྡམས་པར་འགྲོ་བར་མི་བྱའོ་ཞེས་བྱ་བ་ནི། །ཕྲེང་གཏན་ལ་སོགས་པ་སྡོམ་པར་བྱེད་པ་ཇི་སྙེད་ཡོད་པ་དེ་དག་ཐམས་ཅད་ཀྱིས་སྒོ་མ་བསྡམས་པར་གཞན་དུ་འགྲོ་བར་མི་བྱའོ། །གལ་ཏེ་གནས་སྟོང་པར་ཞུགས་པར་གྱུར་པ་ན་དེར་ཆག་ཆག་ལ་སོགས་པ་བྱའོ་ཞེས་བྱ་བ་ནི་གནས་གང་དུ་ཞུགས་པར་གྱུར་པ་དེ་གལ་ཏེ་སྟོང་པ་ཡིན་ན། །དེར་ཆག་ཆག་ལ་སོགས་པ་བྱ་བའོ། །སྣོད་སྤྱད་བརྩམ་པ་མཁོས་སུ་དབབ་པར་བྱའོ་ཞེས་བྱ་བ་ནི། གནས་གང་དུ་ཞུགས་པར་གྱུར་པ་དེ་ན་གལ་ཏེ་སྣོད་སྤྱད་དག་བསྡུ་བ་སོགས་མ་བྱས་པར་བརྩམ་པར་འཇུག་ན་དེ་དག་གནས་ཇི་ལྟ་བ་བཞིན་དུ་བསྡུ་བ་སོག་བྱ་ཞིང་མཁོས་སྲུང་བབ་པར་བྱའོ། །གལ་ཏེ་བཟོད་ན་བྱི་དོར་བྱའོ་ཞེས་བྱ་བ་ནི། སྣོད་སྤྱད་དེ་དག་གལ་ཏེ་བཀྲུ་བཤལ་ལ་སོགས་པ་བྱི་དོར་བྱ་བ་དེ་བཟོད་ཅིང་འོས་པ་ཡིན་ན་དེ་དག་བཀྲུ་བཤལ་ལ་སོགས་པ་བྱི་དོར་བྱ་སྟེ་མཁོས་སུ་དབབ་པར་བྱའོ། །གལ་ཏེ་རུང་བར་བྱེད་པ་ཡོད་ན་སྔོ་སྲབ་པ་བྱེད་དུ་གཞུག་གོ་ཞེས་བྱ་བ་ནི་གལ་ཏེ་རྩེ་རྒོད་ལ་སོགས་པ་བསྙེན་པར་མ་རྫོགས་པ་དུང་བར་བྱེད་པ་ཡོད་ན། གཙུག་ལག་ཁང་དུ་རྩྭ་སྔོན་པོ་ལ་སོགས་པ་ལྷབ་ལྷུབ་འཐོག་ཏུ་གཞུག་པའོ། །གལ་ཏེ་དེར་ཁྱིམ་དག་ལྷག་ན་དེ་དག་ལ་ཆོས་དང་ལྡན་པའི་གཏམ་དང་ནུས་པའི་ཆོས་གཞན་ཡང་བྱ་བའོ་ཞེས་བྱ་བ་ནི། གལ་ཏེ་གཙུག་ལག་ཁང་དེར་ཁྱིམ་པ་དག་ལྷགས་ན་ཁྱིམ་པ་དེ་དག་ལ་ཆོས་དང་ལྡན་པའི་གཏམ་བྱ་བ་དང་ཟས་སྐོམ་དང་དབྱར་གཟིགས་ལ་སོགས་པ་ནུས་པའི་ཆོས་གཞན་ཡང་བྱ་བའོ། །གནས་ཀྱི་གཞིའི་ནང་གི་སྐབས་བཤད་ཟིན་ཏོ།། །།ད་ནི་ཕྱི་རོལ་གྱི་སྐབས་བརྗོད་པར་བྱ་སྟེ། ཤིང་ལྗོན་པ་བསྐྱེད་པ་མི་རུང་བ་ནི་མ་ཡིན་ནོ་ཞེས་བྱ་བ་ནི། དགེ་སློང་གིས་ཤིང་ལྗོན་པ་བསྐྱེད་དུ་རུང་བ་སྟེ། འདིར་ཤིང་ལྗོན་པ་ཞེས་བྱ་བ་ནི་ན་གས་མ་དང་གེལ་པ་དང་ཁྲི་ཤིང་དང་ཏལ་ལ་སོགས་པ་དག་བསྟན་པར་རིག་པར་བྱའོ། །དེ་བསྐྱེད་ནས་མི་བསྐྱང་བར་མི་
བྱའོ་ཞེས་བྱ་བ་ནི། ཤིང་ལྗོན་པ་ལ་སོགས་པ་དེ་བསྐྱེད་ནས་མི་བསྐྱང་བར་མི་བྱ་སྟེ་བསྐྱང་བ་ཁོ་ནར་བྱ་བའོ། །ཤིང་ལྗོན་པ་དུས་ཇི་སྲིད་དུ་བསྐྱང་བར་བྱ་ཞེ་ན་དེའི་ཕྱིར། དེའི་ཤིང་ལྗོན་པ་ནི་མེ་ཏོག་ཆགས་ཀྱི་བར་དུའོ་ཞེས་བྱ་བ་སྨྲས་ཏེ། མེ་ཏོག་གི་ཤིང་ལྗོན་པ་ནི་མེ་ཏོག་ཆགས་ཀྱི་བར་དུ་བསྐྱང་བར་བྱའོ། །གཞན་ནི་འབྲས་བུའི་བར་དུའོ་ཞེས་བྱ་བ་ནི་འབྲས་བུའི་ཤིང་ལྗོན་པ་ནི་འབྲས་བུ་ཆགས་ཀྱི་བར་དུ་བསྐྱང་བར་བྱའོ། །གང་ལ་མེ་ཏོག་དང་འབྲས་བུ་གཉིས་ཀ་ཡང་འགྲུབ་པའི་ཤིང་ལྗོན་པ་དེ་ལ་ནི་གང་གི་དོན་དང་ལྡན་པ་ཉིད་དུ་ཆེས་གྲགས་པ་དེས་རྣམ་པར་གཞག་གོ ། ཡུན་རིང་བ་ཉིད་ན་ལོ་ལྔར་རོ་ཞེས་བྱ་བ་ནི། མེ་ཏོག་དང་འབྲས་བུ་ཆགས་པ་དེ་ཉིད་ནི་ཡུན་རིང་བ་ཉིད་ནི་ལོ་ལྔར་བསྐྱང་བར་བྱ་བའོ། །འདི་ལ་དགེ་སློང་བསྐོས་པ་ནི་རང་ཉིད་དང་འདྲའོ་ཞེས་བྱ་བ་ནི། ཤིང་ལྗོན་པ་བསྐྱེད་པ་བསྐྱང་བ་འདི་ལ་དགེ་སློང་གཞན་ལ་བཅོལ་ཞིང་བསྐོས་པ་ནི་རང་ཉིད་དང་འདྲ་སྟེ། དགེ་སློང་བསྐོས་པས་བསྐྱང་བ་བྱས་ན་རང་ཉིད་ཀྱིས་བསྐྱང་བ་བྱས་པ་དང་འདྲ་བ་ཉིད་ཡིན་ནོ། །འདིར་གཞུང་ནི་དགེ་སློང་ཀུན་དགའ་རབ་བསྐྱེད་པས་ལོ་ལྔར་གར་ཡང་འགྲོ་བར་མི་བྱའོ། །གལ་ཏེ་འགྲོ་ན་དགེ་སློང་ལ་རྗེས་སུ་གཏད་དེ་འགྲོ་བར་བྱའོ་ཞེས་གསུངས་པ་ཡིན་ནོ། །བཅུ་པའི་བདག་ཉིད་ཀྱིས་བསྐྱང་པ་ཇི་ལྟར་བྱ་ཞེ་ན་དེའི་ཕྱིར་ལག་པ་དག་དང་རྐང་པ་དག་བཀྲུ་བ་དང་སོ་ཤིང་དོར་བ་དང༌། ལྷུང་བཟེད་བཀྲུ་བ་དང༌། ཁྲུས་བྱས་པ་ནི་བཅུ་པ་ཡིན་ནོ་ཞེས་བྱ་བ་སྨྲས་ཏེ། ཕྱོགས་དེར་རྐང་ལག་བཀྲུ་བ་ལ་སོགས་པ་ཁྲུས་ཀྱི་མཐར་ཐུག་པའི་བར་དག་བྱ་བ་ནི། བཅུ་པ་བྱ་བ་ཡིན་པར་རིག་པར་བྱའོ། །གྲང་བ་བསྐྱབ་པའི་ཕྱིར་ཁང་བུའི་སྦུབས་བྱའོ་ཞེས་བྱ་བ་ནི། ལྷགས་པ་བསྐྱབ་པའི་ཕྱིར་དེའི་སྟེང་དུ་ཁུང་བུའི་སྦུབས་དབུབ་པར་བྱ་བའོ། །དབུགས་དབྱུང་བའི་ཕྱིར་དེ་ལ་སྐར་ཁུང་གདོད་དོ་ཞེས་བྱ་བ་ནི། རླངས་པ་ཕྱིར་དབྱུད་པའི་ཕྱིར་ཁང་བའི་སྦུབས་དེ་ལ་སྐར་ཁུང་གདོད་པར་བྱ་བའོ། །གཡོགས་མས་དགབ་པོ་ཞེས་བྱ་བ་ནི། གྲང་བ་བསྐྱབ་པའི་ཕྱིར་ཁོ་ནར་ཁང་བུའི་སྦུབས་དེའི་སྟེང་དུ་གཡོགས་པར་བྱ་བའོ། །སོག་མི་ཚ་བར་བྱ་བའི་ཕྱིར་དེ་བསལ་ལོ་ཞེས་བྱ་བ་ནི། སོ་ག་ཤིང་ལྗོན་པ་མི་ཚ་བར་བྱ་བའི་ཕྱིར་
གཡོག་མ་དེ་བསལ་བར་བྱ་བའོ། །དབྱར་དག་ནི་མི་འདྲུལ་བར་བྱ་བའི་ཕྱིར་སྔ་མ་ཡང་ངོ་ཞེས་བྱ་བ་ནི། དབྱར་དག་ནི་ཤིང་ལྗོན་པ་མི་འདྲུལ་བར་བྱ་བའི་ཕྱིར་སྔ་མ་དག་ཅེས་བྱ་བ་ཁང་བུའི་སྦུབས་དེ་ཡང་བསལ་བར་བྱའོ། །ཆུའི་ཡུར་བ་གདོད་དོ་ཞེས་བྱ་བ་ནི། ཁང་བུའི་སྦུད་བ་དེ་ལས་ཆུའི་ཡུར་བ་གདོད་པར་བྱ་བའོ། །རྩ་བའི་འོངས་ཡལ་བར་མི་འདོར་རོ་ཞེས་བྱ་བ་ལ། རྩ་བ་ཞེས་བྱ་བ་ནི་ཤིང་ལྗོན་པའོ། །དེའི་འོངས་ཞེས་བྱ་བ་ནི། མེ་ཏོག་དང་འབྲས་བུ་ལ་སོགས་པ་ཐོག་སྟེ་དེ་ཡུལ་བར་མི་དོར་བའོ། །འདིར་གཞུང་ནི་དེས་རྩ་བའི་ཐོག་ཡལ་དོར་བར་མི་བྱ་ཞིང་བྱི་དོར་བྱའོ་ཞེས་གསུངས་པ་ཡིན་ནོ། །འཁོར་རྣམ་པར་དབྱེ་བའི་བྱེ་བྲག་གིས་བྱི་དོར་བྱའོ་ཞེས་བྱ་བ་ནི། དགེ་སློང་དག་གིས་འཁོར་མང་ཉུང་རྣམ་པར་དབྱེ་བའི་མི་ཟླས་ཀྱི་བྱེ་བྲག་དེས་བྱི་དོར་གྱི་ལས་བྱ་བའོ། །ཅི་དེ་ལ་འཇུག་པས་སམ་ཞེན་དེའི་ཕྱིར། ཁ་ཅིག་ཏུ་སོ་ཤིང་བཟའ་བ་དང་ཁ་གཅིག་ཏུ་ཁ་བཀྲུ་བ་དང་ཁ་གཅིག་ཏུ་རྐང་པ་དག་བཀྲུ་བ་དེ་ལྟ་བུ་དེ་ལ་འཇུག་པ་ཉིད་མ་ཡིན་པས་སོ་ཞེས་བྱ་བ་སྨྲས་ཏེ། གཅིག་པུ་དེ་ལ་བྱ་བ་དེ་དག་འཇུག་པ་ཉིད་དུ་མི་བྱ་བར་ལྷག་མ་རྣམས་ལ་ཡང་དེ་ལྟར་ཁ་བཀྲམ་སྟེ་བཅུ་བར་བྱའོ། །བྱི་དོར་གྱི་ལས་ལྷག་མ་སྨེད་ལ་སོགས་པ་གདབ་པ་དང༌། ཁང་བུའི་སྦུབས་བྱ་བ་ལ་སོགས་པ་རང་གིས་བསྐྱེད་པ་ལ་བྱ་བ་བསྟན་པ་གང་ཡིན་པ་དེ་དག་ལ་ཡང་ཅི་རིགས་པར་ཁ་བཀྲམ་སྟེ་བྱ་བར་རིགས་པར་བྱའོ། །མེ་ཏོག་དང་འབྲས་བུ་དག་བསྲུང་བའི་ཕྱིར་དགེ་སློང་དག་བསྐོ་བར་བྱའོ་ཞེས་བྱ་བ་ནི། མེ་ཏོག་དང་འབྲས་བུ་ལ་སོགས་བསྲུང་བའི་ཕྱིར་དགེ་སློང་དག་བསྐོ་བར་བྱའོ། །ཟས་ཀྱི་དུས་ཀྱི་ཆེད་དུ་གཞན་དག་གོ་ཞེས་བྱ་བ་ནི། དགེ་སློང་སྔ་མ་དག་ཟན་ཟ་བའི་དུས་ཀྱི་ཆེད་དུ་དགེ་སློང་གཞན་དག་བསྐོ་བར་བྱའོ། །དེ་དག་གིས་ཆེས་དང་པོར་ཟན་ཟོས་ཏེ་འགྲོ་བར་བྱའོ་ཞེས་བྱ་བ་ནི། ཟན་གྱི་དུས་ཀྱི་ཆེད་དུ་བསྐོས་པའི་དགེ་སློང་དེ་དག་གིས་ཟན་སྔར་ཟོས་ཏེ་དེར་འགྲོ་བར་བྱའོ། །གནས་ཀྱི་ཚུལ་བཤད་ཟིན་ཏོ།། །།ད་ནི་བྱ་བའི་སྐབས་བརྗོད་པར་བྱ་སྟེ། ཀློག་ཏུ་འཇུག་པས་བསྙེན་བཀུར་ཆེས་མང་པོ་བྱེད་པ་དང་མི་ནུས་པ་ལ་ལོགས་ཤིག་ཏུ་བྱས་པས་
ཀྱང་རྗེས་སུ་བརྩེ་བར་བྱའོ་ཞེས་བྱ་བ་ལ། ཀློག་ཏུ་འཇུག་པ་ཞེས་བྱ་བ་ནི་ཀློག་པའི་སློབ་དཔོན་གྱིས་བསྙེན་བཀུར་ཆེས་མང་དུ་བྱེད་པ་ཞེས་བྱ་བར་རང་གི་དྲུང་ན་འདུག་པའི་སློབ་མ་དང་ཉེ་གནས་སློབ་དཔོན་རང་གི་བསྙེན་བཀུར་དང་འཕྲལ་གྱི་བྱ་བའི་ལས་ཆེས་མང་པོ་བྱེད་པ་དང༌། ལུང་ཕོག་པ་སྤྱིར་ཅིག་ཅར་དུ་འཛིན་ཅིང་ཀློག་པ་དང༌། ཁ་ཏོན་བྱ་བ་ལ་སོགས་པར་མི་ནུས་པའི་གང་ཟག་ལ་ལོགས་ཤིག་ཏུ་ལུང་འབོགས་པ་དང་རྣམ་པར་བཤད་པ་ལ་སོགས་པ་བྱ་བས་ཀྱང་རྗེས་སུ་སྙིང་བརྩེ་བར་བྱ་བའོ། །དེའི་འདུལ་བ་བཟུང་སྟེ་དེའི་ལུང་འབོགས་པ་དང་ཁ་ཏོན་བྱ་བ་དང༌། དམིགས་ཀྱིས་འདྲི་བ་སྦྱིན་པ་དག་གིས་དགེ་སློང་མ་ལ་རྗེས་སུ་བརྩེ་བར་བྱའོ་ཞེས་བྱ་བ་ནི། དགེ་སློང་གིས་དགེ་སློང་མའི་དེའི་འདུལ་བ་བཟུང་སྟེ། དགེ་སློང་མའི་འདུལ་བ་དེའི་ལུང་འབོགས་པ་དང་ཁ་ཏོན་བྱ་བ་དང་དམིགས་ཀྱིས་འདྲི་བ་སྦྱིན་པ་དག་གིས་དགེ་སློང་མ་ལ་རྗེས་སུ་བརྩེ་བར་བྱའོ། །ཡི་གེ་བྲི་བར་བྱའོ་ཞེས་བྱ་བ་ནི། དགེ་སློང་གིས་སྤྲིང་ཡིག་ལ་སོགས་པ་ཡི་གེ་བྲི་བ་ལ་ཚུལ་དང་མི་མཐུན་པར་མེད་པར་ཤེས་པར་བྱའོ། །འདིར་གཞུང་ནི། རྣམ་པར་འབྱེད་པ་ལས། བཅོམ་ལྡན་འདས་ཀྱིས་རང་ཉིད་ཀྱིས་ཡང་ལ་སྤྲིང་ཡིག་བསྐུར་བ་དང༌། སྐྱེ་དགུའི་བདག་མོ་ཆེན་མོས་ཨུཏྤ་ལའི་མདོག་གི་ཕྱིར་རང་ཉིད་ཀྱིས་ཡི་གེ་སྤྲིང་ངོ་ཞེས་གསུངས་པས་དེའི་ཕྱིར་མདོ་འདིས་བྱས་སོ། །དྲན་པ་དང་འཛིན་པར་མི་ནུས་པས་འདུལ་བའོ་ཞེས་བྱ་བ་ནི། གང་ཟག་གང་གིས་འདུ་པ་པའི་ཚིག་དང་དོན་དྲན་པ་དང་འཛིན་པར་མི་ནུས་པ་དེས་འདུལ་བ་ཡི་གེར་བྲི་བར་བྱའོ། །དེ་མི་བྲི་བར་བྱ་བ་ཉིད་ཡིན་ནོ་ཞེས་བྱ་བ་ནི་འདུལ་བ་དེ་དྲན་པར་བྱའོ། །དོན་ལས་གཞན་དུ་ཡི་གེར་མི་བྲི་བ་ཉིད་ཡིན་པའོ། །འདིར་གཞུང་ནི། བཙུན་པ་བཅོམ་ལྡན་འདས་ཀྱིས་མ་འོངས་པའི་དུས་ན་བརྗེད་དེས་བརྒྱུད་ཉམ་ཆུང་བ་དག་འབྱུང་བར་འགྱུར་ཏེ། དེ་དག་གིས་གླེང་གཞི་ཡང་ཐོན་པར་མི་འགྱུར་རོ་ཞེས་གསུངས་ལ། བཅོམ་ལྡན་འདས་ཀྱིས་ལྔ་པོ་དག་ནི་ཡི་གེར་མི་བྲིས་ཏེ། ལྔ་གང་ཞེ་ན། སོ་སོར་ཐར་པ་ཐམས་ཅད་དང༌། སོ་སོར་ཐར་པ་དང་ལྡན་པ་ཐམས་ཅད་དང༌། འདུལ་
བ་ཐམས་ཅད་དང༌། འདུལ་བ་དང་ལྡན་པ་ཐམས་ཅད་དང༌། གང་ཟག་སོ་སོའིའོ་ཞེས་ཀྱང་བཀའ་སྩལ་ན། དེ་དག་གིས་ཇི་ལྟར་བསྒྲུབ་པར་བགྱི། ཉེ་བ་འཁོར་དེ་དག་གིས་གླེགས་བུ་ལ་ཡི་གེར་བྲིས་ཏེ་བཅང་བར་བྱའོ་ཞེས་གསུངས་པ་ཡིན་ནོ། །འདི་ལ་སོ་སོར་ཐར་པ་ནི་དེ་དང་འདྲའོ་ཞེས་བྱ་བ་ནི། ཡི་གེར་བྲི་བ་དང་ཡི་གེར་མི་བྲི་བ་ཉིད་འདི་ལ་སོ་སོར་ཐར་པ་ནི་འདུལ་བ་དང་འདྲ་བ་སྟེ། དྲན་པ་དང་འཛིན་པར་མི་ནུས་པས་ནི་སོ་སོར་ཐར་པའི་ཡི་གེར་བྲི་བར་བྱའོ། །དེ་དང་ལྡན་པ་ཡང་ངོ་ཞེས་བྱ་བ་ནི། འདུལ་བ་དེ་དང་ལྡན་པ་དང་སོ་སོར་ཐར་པ་དེ་དང་ལྡན་པ་ཡང་ཡི་གེར་བྲི་བ་དང་ཡི་གེར་མི་བྲི་བ་ཉིད་འདི་ལ་འདུལ་བ་དང་འདྲ་བར་ཤེས་པར་བྱའོ། །འདིར་གཞི་དག་ནི་འདུལ་བ་ཉིད་ཀྱིས་བསྟན་ཏོ། །མདོ་ཙམ་ནི་སོ་སོར་ཐར་པ་ཉིད་ཀྱིས་བསྟན་ཏོ། །སོ་སོར་ཐར་པ་རྣམ་པར་འབྱེད་པ་དང་དེར་གཏོགས་པའི་ཕྲན་ཚེགས་དང་གླེང་གཞི་དང་སེལ་བུ་དང་ཞུ་བ་ལ་སོགས་པ་ནི་སོ་སོར་ཐར་པ་དང་ལྡན་པ་ཉིད་ཀྱིས་བསྟན་ཏོ། །གཞིར་གཏོགས་པའི་ཕྲན་ཚེགས་དང་གླེང་བཞི་དང་སིལ་བུ་དང་ཞུ་བ་ལ་སོགས་པ་ནི་འདུལ་བ་དང་ལྡན་པ་ཉིད་ཀྱིས་བསྟན་ཏོ། །གང་ཟག་གིས་ཡང་ངོ་ཞེས་བྱ་བ་ཡང་མི་བྲི་བར་བྱ་བ་ཉིད་ཡིན་ནོ་ཞེས་བྱ་བའི་རྗེས་སུ་བསྙག་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་ཏེ། གང་ཟག་གིས་དངོས་པོ་གང་ཡིན་པ་དེ་ཡང་ཡི་གེར་བྲི་བར་མི་བྱ་བ་སྟེ། དེ་ལ་བདག་པོའི་མིང་ཡི་གེར་བྲི་བར་མི་བྱ་བའོ། །མཚན་མར་བྱ་བ་ལ་ནི་ཉེས་པ་མེད་དོ་ཞེས་བྱ་བ་ནི། འདིར་མཚན་མ་ཞེས་བྱ་བ་ནི་ཡོངས་སུ་ཤེས་པར་བྱ་བའི་ཕྱིར་ལྷུང་བཟེད་ལ་སོགས་པ་ལ་མངོན་མཚན་བྱེད་པ་གང་ཡིན་པ་དེ་ཡིན་པར་རིག་པར་བྱའོ། །འདིར་གཞུང་ནི་མཚན་མ་བྱེད་པ་ལ་ལྷུང་བ་མེད་དོ་ཞེས་གསུངས་པ་ཡིན་ནོ། །དགེ་འདུན་གྱི་གནས་མལ་ལ་མིང་ཡི་གེར་བྲིའོ་ཞེས་བྱ་བ་ནི། དགེ་འདུན་གྱི་གནས་མལ་མིང་ཡི་གེར་བྲི་བར་བྱ་བའོ། །ཇི་ལྟར་ཞེ་ན་དེའི་ཕྱིར། འདི་ནི་ཆེ་གེ་མོའི་གཙུག་ལག་ཁང་མིང་འདི་ཞེས་བྱ་བའི་སྦྱིན་པར་བྱ་བའི་ཆོས་སོ་ཞེས་བྱ་བ་སྨྲས་ཏེ། སྦྱིན་པར་བྱ་བའི་ཆོས་འདི་ནི་སྦྱིན་བདག་ཆེ་གེ་མོའི་གཙུག་ལག་ཁང་མིང་འདི་ཞེས་བྱ་བ་སྦྱིན་པར་བྱ་བའི་ཆོས་སོ་ཞེས་ཡི་གེར་བྲི་བར་བྱའོ། །སྦྱིན་པར་བྱ་བའི་ཆོས་
ཞེས་བྱ་བ་ནི། སྦྱིན་པར་བྱ་བའི་དེའི་ངོ་བོ་ཉིད་ཀྱི་ཆོས་སོ། །འདིར་གཞུང་ནི་བཅོམ་ལྡན་འདས་ཀྱིས་བཀའ་སྩལ་པ། མལ་ཆ་འདི་ནི་རྒྱལ་པོ་གཟུགས་ཅན་སྙིང་པོའི་སྦྱིན་པར་བྱ་བའི་ཆོས་སོ་ཞེས་ཡི་གེར་བྲི་བར་བྱའོ་ཞེས་གསུངས་པ་ཡིན་ནོ། །གོས་དག་ལ་ཡང་ངོ་ཞེས་བྱ་བ་ནི། དགེ་འདུན་གྱིས་གོས་དག་ལ་ཡང་འདི་ནི་ཆེ་གེ་མོའི་གཙུག་ལག་ཁང་མིང་འདི་ཞེས་བྱ་བའི་སྦྱིན་པར་བྱ་བའི་ཆོས་སོ་ཞེས་ཡི་གེར་བྲི་བར་བྱ་བའོ། །རྣམ་པ་དེ་ལྟར་གཞན་དག་ལ་ཡང་ངོ་ཞེས་བྱ་བ་ནི། གནས་མལ་གྱི་རྣམ་པ་དེ་ལྟར་སྣོད་སྤྱད་ལ་སོགས་པའི་དོན་གཞན་ལ་ཡང་བྱ་བའོ། །ཀློག་ཏུ་འཇུད་པའི་སྐབས་ཞར་ལ་བྱུང་བ་དང་བཅས་པ་བཤད་ཟིན་ཏོ།། །།ད་ནི་ཀློག་པར་བྱེད་པའི་སྐབས་བརྗོད་པར་བྱ་སྟེ། སངས་རྒྱས་ཀྱི་བཀའ་སྡེབ་སྦྱོར་དང་ཚིག་དང་རིམ་པ་དེ་ལ་གཞོལ་བ་ཉིད་ཀྱིས་སྐྱར་ཏེ་བཀླག་པར་མི་བྱའོ་ཞེས་བྱ་བ་ནི། སངས་རྒྱས་ཀྱི་བཀའ་ཞལ་ནས་གསུངས་པའི་ལུང་དག་སྡེབ་སྦྱོར་དང་ཚིག་དང་རིམ་པ་དེ་དག་ལ་གཞོལ་བ་ཉིད་ཀྱིས་དེ་དག་དང་སྦྱར་ཏེ་བཀླག་པར་མི་བྱའོ། །སྡེབ་སྦྱོར་ཞེས་བྱ་བ་ནི་ཀླག་པའི་རྣམ་པ་སྟེ་རིང་པོར་དྲང་བ་ལ་སོགས་པའི་རྣམ་པ་དང་ང་རོར་འགྱུར་བ་ལ་སོགས་བའི་མིང་ངོ༌། །ཚིག་ཅེས་བྱ་བའི་ཚིག་རེ་རེར་རྣམ་པར་ཕྱེ་སྟེ་ཀློག་བའོ། །རིམ་པ་ཞེས་བྱ་བ་ནི་ཐམས་ཅད་གཅིག་ཏུ་བྱས་ཏེ་ཀློག་པའོ། །དེ་ལ་གཞོལ་བ་ཉིད་ཀྱིས་ཞེས་བྱ་བ་ནི། དེ་དག་ལ་ཁོ་ན་ལྟ་བུར་བྱས་པར་གྱུར་ཅིག་སྙམ་པ་སྟེ། སྡེབ་སྦྱོར་ལ་སོགས་པའི་རྣམ་པ་ལ་སོགས་པ་བཏོན་པ་དེ་ལྟ་བུར་གྱུར་ཅིག་སྙམ་པ་ཉིད་ཀྱིས་སོ། །གལ་ཏེ་རང་གི་ངང་ཉིད་ཀྱིས་རྣམ་པ་དེ་ལྟ་བུར་ཀློག་པ་ཡིན་ན་དེའི་ཚེ་ནི་ཉེས་པ་མེད་དོ། །གཞན་ལ་ལེགས་པར་གོ་བར་བྱེད་ནུས་ཤིང་སངས་རྒྱས་ཀྱི་བཀའ་ལ་བརྩོན་པ་ཉིད་མི་གཏོང་ན་ཕྱི་རོལ་པའི་བསྟན་བཅོས་དག་གཟུང་བར་བྱའོ་ཞེས་བྱ་བ་ནི། དགེ་སློང་གིས་ཕྱི་རོལ་གྱི་བསྟན་བཅོས་དག་གཟུང་བར་བྱ་བ་སྟེ། འདིར་བྱེ་བྲག་ཏུ་མ་སྨོས་པས་ཚིག་དང་དོན་གཉི་གར་ཤེས་པར་བྱའོ། །འདིར་གཞུང་ནི་དེ་ལྟ་བས་ན་དགེ་སློང་གིས་འཇིག་རྟེན་རྒྱང་འཕེན་པ་གཟུང་བར་རྗེས་སུ་གནང་ངོ་ཞེས་
གསུངས་པ་ཡིན་ནོ། །ཅི་ཐམས་ཅད་ཀྱིས་བྱེ་བྲག་མེད་པར་རམ་ཞེ་ན་དེའི་ཕྱིར། གཞན་ལ་ལེགས་པར་གོ་བར་བྱེད་ནུས་ཤིང་ངོ་ཞེས་བྱ་བ་སྨྲས་ཏེ། གཞན་མགུ་བར་བྱེད་ནུས་པ་གང་ཡིན་པ་དེས་སོ། །ཅི་དེ་ལ་གཞོལ་བ་ཁོ་ནས་དེ་གཟུང་བར་བྱའམ་ཞེ་ན་དེའི་ཕྱིར་སངས་རྒྱས་ཀྱི་བཀའ་ལ་བརྩོན་པ་ཉིད་མི་གཏོང་ན་ཞེས་བྱ་བ་སྨྲས་ཏེ། རྣམ་པ་ཐམས་ཅད་དུ་སངས་རྒྱས་ཀྱི་བཀའ་ལ་བརྩོན་པ་གཏང་བར་མི་བྱའོ། །དེའི་དུས་ནི་ཉི་མའི་སུམ་ཆ་བདེ་བ་མ་ཡིན་པ་ལའོ་ཞེས་བྱ་བ་ནི། ཕྱི་རོལ་པའི་བསྟན་བཅོས་བཟུང་བ་དེའི་དུས་ནི་ཉི་མའི་སུམ་ཆ་སྟེ། དེ་ཡང་བདེ་བ་མ་ཡིན་པ་ཞེས་བྱ་བ་གང་གི་ཚེ་ལུས་དང་སེམས་ལས་སུ་རུང་བ་མ་ཡིན་པར་རིག་པར་བྱའོ། །མཚན་མོ་ཡང་ངོ་ཞེས་བྱ་བ་ནི། དེའི་དུས་སུམ་ཆ་བདེ་བ་མ་ཡིན་པའོ་ཞེས་བྱ་བར་སྦྱར་རོ། །གསང་སྔགས་ཕན་འདོགས་པར་བྱེད་པ་དག་གཟུང་བར་བྱའོ་ཞེས་བྱ་བ་ནི། དུག་གི་གནོད་པ་ལ་སོགས་པ་སེལ་བར་བྱེད་པ་དག་གོ །སྦྱར་བར་བྱའོ་ཞེས་བྱ་བ་ནི་གསང་སྔགས་ཕན་འདོགས་པར་བྱེད་པ་བདག་གིས་གཟུང་བ་དག་གཞན་ཡང་གདབ་པ་ལ་སོགས་པས་ཐམས་ཅད་དུ་སྦྱར་བར་བྱའོ། །གནོད་པ་བྱེད་པ་ནི་མི་བྱའོ་ཞེས་བྱ་བ་ནི། གསང་སྔགས་གནོད་པ་བྱེད་པ་ནི་གཟུང་བར་ཡང་མི་བྱའོ། །སྦྱར་བར་ཡང་མི་བྱ་བའོ། །དེ་དག་གི་ཕྱག་གི་གནས་སུ་དཀོན་མཆོག་གསུམ་བརྗོད་པར་བྱའོ་ཞེས་བྱ་བ་ནི། གསང་སྔགས་དེ་དག་ལ་ཕྱག་འཚལ་བ་འབྱུང་བ་གང་ཡིན་པ་དེའི་གནས་སུ་དཀོན་མཆོག་གསུམ་ལ་ཕྱག་འཚལ་ལོ་ཞེས་བརྗོད་པར་བྱའོ། །ལྷ་གཞན་ལ་ཕྱག་མི་བྱའོ་ཞེས་བྱ་བ་ནི། ཁྱབ་འཇུག་ལ་སོགས་པ་ལའོ། །འདིར་གཞུང་ནི་གསང་སྔགས་ནི་རྣམ་པ་གཉིས་ཏེ། ཕན་འདོགས་པ་དང༌། གནོད་པ་བྱེད་པའོ། །དེ་ལ་གནོད་པར་བྱེད་པ་གང་ཡིན་པ་དེ་དག་ནི་དེ་དགེ་སློང་རྣམས་ཀྱིས་བཀླག་པར་མི་བྱ་སྦྱར་བར་མི་བྱའོ། །ཕན་འདོགས་པ་གང་ཡིན་པ་དེ་དག་ནི་དགེ་སློང་རྣམས་ཀྱིས་བཀླག་པར་བྱ་སྦྱར་བར་བྱའོ་ཞེས་གསུངས་པ་དང༌། གསང་སྔགས་དེ་དག་ལ་ལྷ་གཞན་ལ་ཕྱག་འཚལ་བ་སྔོན་དུ་བཏང་བ་དག་བྱུང་ནས་བཅོམ་ལྡན་འདས་ཀྱིས་
བཀའ་སྩལ་པ། དགེ་སློང་གིས་འདི་ལས་ཕྱི་རོལ་བའི་ལྷ་ལ་ཕྱག་མི་བྱའོ་ཞེས་གསུངས་པ་ཡིན་ནོ། །མཆོད་པ་མི་བྱའོ་བཀུར་སྟི་མི་བྱའོ་ཞེས་བྱ་བ་ནི་འདི་ལས་ཕྱི་རོལ་པའི་ལྷ་ལའོ། །གནས་སུ་ཕྱིན་ན་མངོན་སུམ་དུ་འགྲེང་སྟེ་སེ་གོལ་གྱི་སྤྲས་གོ་བར་བྱས་ནས་གཙུག་ལག་གི་ཚིགས་སུ་བཅད་པ་གདོན་པས་དེ་ལ་ཕན་གདགས་པར་བྱའོ་ཞེས་བྱ་བ་ནི། དགེ་སློང་གིས་འདི་ལས་ཕྱི་རོལ་པའི་ལྷའི་གནས་སུ་ཕྱིན་ན་དེའི་མངོན་སུམ་དུ་འགྲེང་སྟེ། སེ་གོལ་གྱི་སྒྲས་གོ་བར་བྱས་ནས་དྲང་སྲོང་གིས་གསུངས་པའི་ཚིགས་སུ་བཅད་པ་གདོན་པས་དེ་ལ་ཕན་གདགས་པར་བྱའོ། །བཟོ་རྗེས་སུ་བསྒྲུབ་པ་དང་བསླབ་པ་དང་དེའི་སྣོད་ཉེ་བར་གཞག་པར་མི་བྱ་སྟེ་མཚོན་གྱི་ཤུབས་དང་ཁབ་རལ་དང་རམ་ཕྱིས་ནི་མ་གཏོགས་སོ་ཞེས་བྱ་བ་ནི། དགེ་སློང་གིས་རང་གིས་བཟོ་མི་བྱ་བ་དང༌། གཞན་ལ་བཟོ་བསླབ་པར་མི་བྱ་བ་དང༌། བཟོ་སྤྱད་ཀྱི་སྣོད་ཉེ་བར་གཞག་པར་མི་བྱའོ། །གྲི་ཤུབས་ལ་སོགས་པ་དང་ཁབ་རལ་དང་རམ་ཕྱིས་ནི་མ་གཏོགས་སོ། །འདིར་གཞུང་ནི། དགེ་སློང་གིས་དེ་ལྟ་བུའི་སྣོད་ཉེ་བར་གཞག་པར་མི་བྱའོ། །སྔོན་སྨན་པ་ཡིན་ན་མཚོན་གྱི་སྣོད་དོ། །སྔོན་ཡི་གེ་པ་ཡིན་ན་རམ་ཕྱིས་དང༌། སྔོན་བཟོས་མཁན་ལས་རབ་ཏུ་བྱུང་བ་ཡིན་ན་ཁབ་རལ་ནི་མ་གཏོགས་སོ་ཞེས་གསུངས་པ་ཡིན་ནོ། །མུ་གཅིག་པ་ལ་བསོད་ནམས་ཀྱི་བསམ་པས་དགེ་བའི་གསོ་བ་ཉེ་བར་བསྒྲུབ་པར་བྱ་སྟེ་གླ་རྔན་གྱིས་ནི་མ་ཡིན་ནོ་ཞེས་བྱ་བ་ནི། ཚངས་པ་མཚུངས་པར་སྤྱོད་པ་མུ་གཅིག་པ་དག་ལའོ། །བཀྲུ་སྨན་བཏང་ནས་གཞན་དུ་འགྲོ་བར་མི་བྱའོ་ཞེས་བྱ་བ་ནི། །གཞན་ལ་བཀྲུ་སྨན་བཏང་ནས་དེ་ཉིད་དུ་བསྡད་པར་བྱའོ་ཞེས་བྱ་བའི་ཐ་ཚིག་གོ །རྐྱེན་དེ་ལྟ་བུ་དག་བྱུང་ན་ཧ་ཅང་འཁྲུ་བ་ལ་སོགས་པ་གནོད་པའི་གཉེན་པོའི་ཆོ་ག་བསྟེན་ཏེའོ་ཞེས་བྱ་བ་ནི། གདོན་མི་ཟ་བར་འགྲོ་དགོས་པ་དེ་ལྟ་བུའི་རྐྱེན་དག་བྱུང་ན། ཧ་ཅང་འཁྲུ་བ་དང་ཡེ་མི་འཁྲུ་བ་ལ་སོགས་པའི་གནོད་པའི་གཉེན་པོའི་ཆོ་ག་སྨན་དཔྱད་ཀྱི་ཐབས་གཞན་དག་ནད་པ་དང་ནད་གཡོག་ལ་
བསྟན་ཏ་འགྲོ་བར་བྱའོ། །འདིར་གཞུང་ནི་དེ་ལྟ་བས་ན་དགེ་སློང་གིས་གླ་རྔན་གྱིས་བཀྲུ་སྨན་གཏང་བར་མི་བྱའོ། །བཀྲུ་སྨན་བཏང་ནས་གཞན་དུ་འགྲོ་བར་མི་བྱའོ། །རྐྱེན་དེ་ལྟ་བུ་དག་བྱུང་ན་བསྒོས་ཏེ་འགྲོ་བར་བྱའོ་ཞེས་གསུངས་པ་ཡིན་ནོ། །ཚངས་པ་མཚུངས་པར་སྤྱོད་པ་མཚན་མཐུན་པ་དབེན་པའི་ཕྱོགས་སུ་འདྲེག་མཁན་གྱི་བྱ་བ་བྱའོ་ཞེས་བྱ་བ་ནི། རབ་ཏུ་བྱུང་བས་ཚངས་པ་མཚུངས་པར་སྤྱོད་པ་མཚན་མཐུན་པ་ཞེས་བྱ་བ་དགེ་སློང་གིས་དགེ་སློང་ལ་དང༌། དགེ་སློང་མས་དགེ་སློང་མ་ལ་དབེན་པའི་ཕྱོགས་སུ་འདྲེག་མཁན་གྱི་བྱ་བ་སྐྲ་དང་སེན་མོ་བྲེག་པ་ལ་སོགས་པ་དག་བྱའོ། །ཁྲིའི་ཡན་ལག་ཆག་པ་བཅོས་པ་ཡང་ངོ་ཞེས་བྱ་བ་ཡང་དབེན་པའི་ཕྱོགས་སུ་བྱ་བའོ། །འདིར་ཁྲི་ཞེས་སྨོས་པ་ནི་ཁྲིའུ་ལ་སོགས་པ་གཞན་དག་གི་དཔེ་ཡིན་ནོ། །ཕྲེང་བའི་རིམ་པ་དག་བརྒྱུ་བ་ཡང་ངོ་ཞེས་བྱ་བ་ཡང་དབེན་པའི་ཕྱོགས་སུ་བྱ་བའོ། །དཀོན་མཆོག་མཆོད་པར་གྱུར་པ་སེམས་ཅན་གྱི་གཟུགས་མ་ཡིན་པའི་རི་མོ་བྲི་བ་ཡང་ངོ་ཞེས་བྱ་བ་ཡང་དབེན་པའི་ཕྱོགས་སུ་བྱ་བའོ། །སེམས་ཅན་གྱི་གཟུགས་མ་ཡིན་པ་ཞེས་སྨོས་པས་ནི་འདབ་མའི་མྱུ་གུ་ལ་སོགས་པ་དག་གཟུང་ངོ། །དེའི་ཕྱིར་འདྲི་བ་ནི་དེ་ཉིད་ཡིན་ནོ་ཞེས་བྱ་བ་ནི། སེམས་ཅན་དང་སེམས་ཅན་མ་ཡིན་པའི་གཟུགས་བསླབ་པའི་ཕྱིར་དང༌། རྩོམ་ཞིང་བྲི་བ་ནི་ལོབས་པས་བྲིས་ཟིན་པ་ཉིད་དང་འདྲ་བ་སྟེ། སེམས་ཅན་གྱི་གཟུགས་བསླབ་པའི་ཕྱིར་དང༌། འདྲི་བར་རྩོམ་པ་ལ་ནི་ཉེས་པར་འགྱུར་ལ། སེམས་ཅན་གྱི་གཟུགས་མ་ཡིན་པ་ལ་ནི་ཉེས་པར་མི་འགྱུར་རོ། །ཤི་བའི་སྐབས་དང་གཞག་པའི་སྐབས་ལས་གཞན་པའི་རྗེས་སུ་བསྒྲུབ་པའི་སྐབས་བཤད་ཟིན་ཏོ། །ད་ནི་ཤི་བའི་སྐབས་དང་གཞག་པའི་སྐབས་སུ་གང་བྱ་བ་དེ་བརྗོད་པར་བྱ་སྟེ། ཚངས་པ་མཚུངས་པར་སྤྱོད་པའི་ཤི་བའི་ལུས་ལ་མཆོད་པར་བྱའོ་ཞེས་བྱ་བ་ནི། སྤོས་ཆུ་དང་ཁྲུས་དང་བྱུག་པ་དང་མེ་ཏོག་དང་གོས་ཀྱིས་དགབ་པ་དང༌། གདུགས་དང་རྒྱལ་མཚན་བསྒྲེང་བ་དང༌། དུང་དང་རྔ་བོ་ཆེ་དང་རྔ་པ་ཊ་ཧལ་སོགས་པའི་སྒྲ་དབྱུང་བ་དང༌། བདུག་སྤོས་
བསྲེགས་པ་དང༌། མེ་ཏོག་སིལ་མ་ལ་སོགས་པས་གཏོར་བའི་མཆོད་པ་བྱ་བའོ། །དེ་བསྲེག་པར་བྱའོ་ཞེས་བྱ་བ་ནི་རོ་དེའོ། །འདིར་གཞུང་ནི་ལུས་མཆོད་པ་བྱས་ཏེ་བསྲེག་པར་བྱའོ་ཞེས་གསུངས་པ་ཡིན་ནོ། །ཅི་གདོན་མི་ཟ་བར་བསྲེག་པར་བྱ་བ་ཁོ་ན་ཡིན་ནམ་ཞེ་ན་དེའི་ཕྱིར། གལ་ཏེ་སྲོག་ཆགས་དང་བཅས་པའི་རྨ་མེད་པ་ཉིད་ཡིན་ནའོ་ཞེས་བྱ་བ་སྨྲས་སོ། །སོ་སོར་བརྟགས་པས་ངེས་པར་བྱའོ་ཞེས་བྱ་བ་ནི་དེ་ལ་སྲོག་ཆགས་ཡོད་དམ་མེད་པའོ། །བརྐོ་བ་འམ་ཆུ་ཀླུང་དུ་བསྐུར་རོ་ཞེས་བྱ་བ་ནི། ཡང་ན་ས་བརྐོས་པར་གཞུག་པ་འམ། ཆུ་ཀླུང་དུ་བསྒྱུར་བར་བྱའོ། །མི་རུང་ན་ཚང་ཚིང་གི་དབུས་སུ་གཞག་གོ་ཞེས་བྱ་བ་ནི། བརྒྱ་ལ་སྲོག་ཆགས་དང་བཅས་ཤིང་བསྲེགས་ན་སྲོག་ཆགས་མང་པོ་དག་འཆི་བ་ལྟ་ནའོ། །སྤྱོད་ལམ་གང་གིས་གཞག་པར་བྱ་ཞེ་ན་དེའི་ཕྱིར་གློ་གཡས་པ་བསྙལ་ཏེ་མགོ་བྱད་ཕྱོགས་སུ་བསྟན་ཏོ་ཞེས་བྱ་བ་སྨྲས་སོ། །སྔས་སུ་རྩྭའི་ཆུན་པོ་གཞུག་གོ་ཞེས་བྱ་བ་ནི་རོ་དེའི་འོ། །རྩྭ་དག་གམ་ལོ་མ་དག་གིས་གཡོགས་སོ་ཞེས་བྱ་བ་ཡང་རོ་དེའི་འོ། །ཆོས་མཉན་པ་དང་ཡོན་བཤད་པ་དག་བྱའོ་ཞེས་བྱ་བ་ནི་དེའི་ཕྱིར་རོ། །རིག་པ་དག་གིས་གོས་དང་བཅས་ཏེ་ཁྲུས་བྱའོ་ཞེས་བྱ་བ་ནི་རོལ་རེག་པ་དག་གིས་སོ། །གཞན་དག་གིས་ནི་རྐང་ལག་བཀྲུའོ་ཞེས་བྱ་བ་ནི་རོལ་མ་རེག་བདག་གིས་སོ། །མཆོད་རྟེན་ལ་ཕྱག་བྱས་ཏེ་འཇུག་པར་བྱའོ་ཞེས་བྱ་བ་ནི་དགེ་སློང་དེ་དག་གིས་མཆོད་རྟེན་ལ་ཕྱག་བྱས་ཏེ་གཙུག་ལག་ཁང་དུ་འཇུག་པར་བྱའོ། །མཆོད་རྟེན་ནི་རྣམ་པ་གཉིས་ཏེ་གཙང་ཁང་ཅན་ཉིད་དང་ཀ་བ་ལྟ་བུ་ཉིད་དོ་ཞེས་བྱ་བ་ལ་གཙང་ཁང་ཅན་ཉིད་ཅེས་བྱ་བ་ནི། བུམ་པའི་ཕྱོགས་ན་གཙང་ཁང་ཕྱུར་བུ་དང་ལྡན་པ་ཉིད་དོ། །ཀ་བ་ལྟ་བུ་ཉིད་ཅེས་བྱ་བ་ནི། གཙང་ཁང་མེད་པ་ཀ་བའི་རྣམ་པ་ལྟ་བུར་བསྒྲེང་བ་ཉིད་དོ། །དེ་རབ་ཏུ་བྱུང་བ་རྣམས་ལ་འོས་པ་ཉིད་དོ་ཞེས་བྱ་བ་ནི་མཆོད་རྟེན་དེའོ། །ཅི་ཐམས་ཅད་ལ་འམ་ཞེ་ན་དེའི་ཕྱིར། གལ་ཏེ་དགེ་བ་ཡིན་ནའོ་ཞེས་བྱ་བ་སྨྲས་ཏེ། རབ་ཏུ་བྱུང་བར་ཞེས་བྱ་བར་སྦྱར་རོ། །སངས་རྒྱས་ཀྱི་ནི་རྣམ་པ་ཐམས་ཅད་དོ་ཞེས་བྱ་བ་ནི་
སངས་རྒྱས་བཅོམ་ལྡན་འདས་རྣམས་ཀྱི་སྐུ་གདུང་གི་མཆོད་རྟེན་ནི་རྣམ་པ་ཐམས་ཅད་རྫོགས་པར་བྱ་བའོ། །རྣམ་པ་ནི་བང་རིམ་བཞི་དང་འདབ་མ་དྲུག་དང་བུམ་པ་དང་བུ་ཤུ་དང་སྲོག་ཤིང་དང་གདུགས་བཅུ་གསུམ་པ་དང་ཆར་ཁབ་དག་གོ་ཞེས་བྱ་བ་ནི་མཆོད་རྟེན་གྱི་རྣམ་པ་ཐམས་ཅད་རྫོགས་པའོ། །རང་སངས་རྒྱས་རྣམས་ཀྱི་ནི་ཆར་ཁབ་མེད་པའོ་ཞེས་བྱ་བ་ནི། རྣམ་པ་དེ་དག་ལས་ཆར་ཁབ་འབའ་ཞིག་མེད་པ་ཞེས་བྱ་བའི་ཐ་ཚིག་སྟེ། དེ་ཡང་བསེ་རུ་ལྟ་བུའི་ཕྱིར་གསུངས་པ་ཡིན་གྱི། ཆོགས་ན་སྤྱོད་པའི་ནི་དགྲ་བཅོམ་པའི་རྣམ་པ་ལྟ་བུའོ། །འདིར་གཞུང་ནི་རང་སངས་རྒྱས་ཀྱི་ནི་ཆར་ཁབ་མེད་པའོ་ཞེས་གསུངས་པ་ཡིན་ནོ། །ཉན་ཐོས་རྣམས་ཀྱི་ནི་འབྲས་བུའི་ཚང་དག་གིས་དེའི་གདུགས་གཅིག་ལྷག་པའོ་ཞེས་བྱ་བ་ནི། ཉན་ཐོས་རྣམས་ཀྱི་མཆོད་རྟེན་ནི་རྒྱུད་དུ་ཞུགས་པའི་འབྲས་བུ་ལ་སོགས་པའི་ཚད་དག་གིས་ཆར་ཁབ་མེད་པའི་མཆོད་རྟེན་དེའི་གདུགས་གཅིག་གིས་ལྷག་པར་བྱ་སྟེ། འབྲས་བུ་ཇི་སྙེད་ཐོབ་པ་དེ་སྙེད་ལས་གདུགས་རེ་རེས་ལྷག་པར་བྱའོ་ཞེས་བྱ་བའི་ཐ་ཚིག་གོ །འདིར་གཞུང་ནི། དགྲ་བཅོམ་པའི་ནི་གདུགས་ལྔའོ། །ཕྱིར་མི་འོང་བའི་ནི་གདུགས་བཞིའོ། །ལན་ཅིག་ཕྱིར་འོང་བའི་ནི་གདུགས་གསུམ་མོ། །རྒྱུན་དུ་ཞུགས་པའི་ནི་གདུགས་གཉིས་སོ་ཞེས་གསུངས་པ་ཡིན་ནོ། །ཉན་ཐོས་ཀྱི་མཆོད་རྟེན་ནི་ཕྱོགས་གང་དུ་བྱ་ཞེ་ན། དེའི་ཕྱིར་དེ་བཞིན་གཤེགས་པའི་ཕྱོགས་ཀྱི་ཡུལ་ཉིད་དུ་གང་དེ་དག་གནས་པར་གྱུར་པའི་ཕྱོགས་དེར་འཁོར་དུ་བྱའོ་ཞེས་བྱ་བ་སྨྲས་ཏེ། དེ་བཞིན་གཤེགས་པའི་མཆོད་རྟེན་གྱི་ཕྱོགས་བཞི་པོ་གང་ཡིན་པ་དེ་དག་ཉིད་ཉན་ཐོས་ཀྱི་མཆོད་རྟེན་དེ་དག་གི་ཡུལ་ཡིན་ཏེ་དེའི་དངོས་པོ་ནི་དེ་ཉིད་དེ་དེར་རོ། །གང་གི་ཚེ་དེ་བཞིན་གཤེགས་པའི་མཆོད་རྟེན་གྱི་ཕྱོགས་ཀྱི་ཡུལ་ཉིད་དུ་ཉན་ཐོས་ཀྱི་མཆོད་རྟེན་དག་བྱེད་པར་འདོད་པ་དེའི་ཚེ་དེ་བཞིན་གཤེགས་པ་བཞུགས་པའི་དུས་ན་སྔོན་དེ་བཞིན་གཤེགས་པའི་ཕྱོགས་གང་དུ་ཉན་ཐོས་ཆེན་པོ་དེ་དག་གནས་པར་འགྱུར་བའི་ཕྱོགས་དེར་དེ་བཞིན་གཤེགས་པའི་མཆོད་རྟེན་དེའི་འཁོར་དུ་ཉན་
ཐོས་དེ་དག་གི་མཆོད་རྟེན་བརྩིག་པར་བྱ་སྟེ། དཔེར་ན་མཆོག་ཟུང་གཅིག་ནི་བཅོམ་ལྡན་འདས་ཀྱི་མངོན་སུམ་ན་གནས་པར་གྱུར་པས། དེ་ཉིད་ཀྱི་མཆོད་རྟེན་ནི་དེ་བཞིན་གཤེགས་པའི་མཆོད་རྟེན་གྱི་སྤྱན་སྔར་བརྩིག་པར་བྱ་བ་ལ་སོགས་པ་ལྟ་བུའོ། །འདི་ལ་རྒན་རིམས་སུ་མ་བྱ་བར་མ་བྱའི་ཞེས་བྱ་བ་ནི་མཆོད་རྟེན་གྱི་ཡུལ་འདི་ལ་ཉན་ཐོས་ཆེན་པོ་རྣམས་ཀྱི་མཆོད་རྟེན་རྒན་རིམས་སུ་བརྩིག་པར་བྱ་སྟེ། དང་པོར་འོད་སྲུངས་ཆེན་པོའིའོ། །དེའི་འོག་ཏུ་གཞན་དག་གིའོ། །སོ་སོའི་སྐྱེ་བོ་རྣམས་ཀྱི་ནི་བྱི་བོའོ་ཞེས་བྱ་བ་ནི། སོ་སོའི་སྐྱེ་བོ་དགེ་བ་རྣམས་ཀྱི་མཆོད་རྟེན་ནི་སྲོག་ཤིང་མེད་པ་བྱི་བོར་བྱ་བའོ། །དེ་དག་ནི་དགེ་འདུན་གྱི་ཀུན་དགའ་ར་བའི་ཕྱི་རོལ་དུ་བྱའོ་ཞེས་བྱ་བ་ནི་སོ་སོའི་སྐྱེ་བོ་དགེ་བ་རྣམས་ཀྱི་མཆོད་རྟེན་དེ་དག་སྟེ་སོ་སོ་སྐྱེ་བོ་ཡིན་པའི་ཕྱིར་རོ། །འཕགས་པ་ལ་ནི་མཆོད་རྟེན་གྱི་དུས་སྟོན་རིགས་སོ་ཞེས་བྱ་བ་ནི། འཕགས་པའི་གང་ཟག་ལ་མཆོད་རྟེན་གྱི་དུས་སྟོན་བྱ་བར་རིགས་པའོ། །ཉན་ཐོས་ཀྱི་མཆོད་རྟེན་ལ་ཕུལ་བ་ནི་ཚངས་བ་མཚུངས་པར་སྤྱོད་པ་རྣམས་དབང་པ་ཉིད་ཡིན་ནོ་ཞེས་བྱ་བ་ནི། དེ་ལ་རས་དང་སྣམ་བུ་དང་རྫས་ཀྱི་རྣམ་པ་གཞན་གང་དག་ཕུལ་བ་དེ་དག་ནི་དགེ་སློང་རྣམས་ཀྱིས་བགོ་བར་བྱའོ། །འདིར་གཞུང་ནི། ཚངས་པ་མཚུངས་པར་སྤྱོད་པའི་རྫས་ལ་ནི་དགེ་སློང་ཚངས་པ་མཚུངས་པར་སྤྱོད་པ་ངག་དབང་ངོ་ཞེས་བྱ་བ་གསུངས་པ་ཡིན་ནོ། །མུ་ཏིག་དག་ནི་བསྟན་པ་བཞིན་དུའོ་ཞེས་བྱ་བ་ནི། ཉན་ཐོས་ཀྱི་མཆོད་རྟེན་ལ་མུ་ཏིག་ཕུལ་བ་དག་ནི་སྔར་མུ་ཏིག་ནི་སངས་རྒྱས་ལ་དབུལ་ཞིང་དྲི་གཙང་ཁང་གི་ཞལ་ཞལ་དུ་བྱའོ་ཞེས་བསྟན་པ་བཞིན་དུ་བྱའོ། །བུད་དུང་དག་ནི་སངས་རྒྱས་ལ་དབུལ་ལོ་ཞེས་བྱ་བ་ལ། འདིར་གཞུང་ནི་བུད་དུང་གང་དག་ཡིན་པ་དེ་དག་ནི་འཛམ་བུའི་གྲིབ་མ་ལ་སོགས་པ་བྱུང་བའི་སྐུ་གཟུགས་ལ་དབུལ་བར་བྱའོ་ཞེས་གསུངས་པ་ཡིན་ནོ། །དེ་ལས་ཞིག་རལ་བཅོས་པའི་ཕྱིར་གཞག་པར་བྱའོ་ཞེས་བྱ་བ་ནི། མཆོད་རྟེན་ལ་ཕུལ་བའི་རྫས་དེ་ལས་མཆོད་རྟེན་དེ་ཉིད་ཀྱི་ཞིག་རལ་བཅོས་པའི་ཕྱིར་གཞག་པར་ཡང་བྱ་བའོ། །
མཆོད་པ་རུང་བ་ཉིད་ཀྱང་ཞེས་བྱ་བ་ནི། འཕན་གདུགས་ལ་སོགས་པ་མཆོད་པ་རུང་བར་གྱུར་པ་ཉིད་ཀྱང་མཆོད་རྟེན་དེ་ཉིད་ཀྱི་དུས་སྟོན་གྱི་ཆེ་མཆོད་པར་བྱ་བའི་ཕྱིར་གཞག་པར་བྱའོ། །འདིར་གཞུང་ནི་དེ་ལ་དབྱིག་དང་གསེར་གང་ཡིན་པ་དེ་དག་མཆོད་རྟེན་དེ་ཉིད་ཞིག་རལ་དུ་གྱུར་པ་བཅོས་པའི་ཕྱིར་གཞག་པར་བྱའོ། །མཆོད་པར་རུང་བའི་རྫས་གང་ཡིན་པ་དེ་དག་ནི་དུས་སྟོན་གྱི་མཆོད་པ་བྱ་བའི་ཕྱིར་གཞག་པར་བྱའོ་ཞེས་གསུངས་པ་ཡིན་ནོ། །སངས་རྒྱས་ལ་ལྕགས་ལས་བྱས་པའི་མཆོད་རྟེན་བྱ་བ་ནི་ཆོས་དང་མཐུན་ནོ་ཞེས་བྱ་བ་ནི་བྱར་རུང་ངོ་ཞེས་བྱ་བའི་ཐ་ཚིག་གོ །དབུ་སྐྲ་དང་སེན་མོའི་མཆོད་རྟེན་གསེར་དང་དངུལ་དང་བཻཌཱུཪྱ་དང་ཤེལ་ལས་བྱས་པ་ཡང་ངོ་ཞེས་བྱ་བ་ཡང་ཆོས་དང་མཐུན་པའོ། །འདིར་གཞུང་ནི་རྣམ་པར་འབྱེད་པ་ལས་གལ་ཏེ་བཅོམ་ལྡན་འདས་ཀྱིས་རྗེས་སུ་གནང་ན་བདག་གིས་འཛམ་བུའི་གྲིབ་མ་ལས་བྱུང་བའི་སྐུ་གཟུགས་བགྱིད་དུ་སྩལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་རྗེས་སུ་གནང་གིས་བྱེད་དུ་ཆུ་ག་ཤིག་ཅེས་གསུངས་པ་དང༌། སིལ་བུ་དག་ལས་ཀྱང་གལ་ཏེ་བཅོམ་ལྡན་འདས་ཀྱིས་རྗེས་སུ་གནང་བ་ན་བདག་གིས་དབུ་སྐྲ་དང་སེན་མོའི་མཆོད་རྟེན་དག་ལ་མཐུན་པའི་འཁོར་བགྱིད་དུ་སྩལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་རྗེས་སུ་གནང་གིས་བྱེད་དུ་ཆུག་ཤིག་ཅེས་བྱ་བ་ལ་སོགས་པ་གསུངས་པ་དང༌། གླེང་གཞི་དག་ལས་ཀྱང་གལ་ཏེ་བཅོམ་ལྡན་འདས་ཀྱིས་རྗེས་སུ་གནང་ན་བདག་གིས་དབུ་སྐྲ་དང་སེན་མོའི་མཆོད་རྟེན་དག་ལ་ཚོན་དང་དཀར་རྩི་སྐུད་དུ་སྩལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་རྗེས་སུ་གནང་གིས་སྐུད་དུ་ཆུག་ཤིག་ཅེས་བྱ་བ་ལ་སོགས་པ་གསུངས་པ་ཡིན་ནོ། །དེ་ལ་མཐུན་པའི་འཁོར་བྱའོ་ཞེས་བྱ་བ་ནི་སངས་རྒྱས་ཀྱི་མཆོད་རྟེན་དེ་ལ་རི་མོ་དང་བྱུག་པའི་ལས་ལ་སོགས་པས་མཐུན་པའི་འཁོར་བྱ་བའོ། །དགའ་ལྡན་གྱི་གནས་ན་བཞུགས་པ་ལ་སོགས་པ་ནས་ཡོངས་སུ་མྱ་ངན་ལས་འདས་པའི་མཐའི་བར་གྱི་སྤྱོད་པ་ནི་དེ་ཞེས་
བྱའོ་ཞེས་བྱ་བ་ནི། མཐུན་པའི་འཁོར་ཞེས་བྱའོ། །དཀར་རྩིས་དཀར་པོར་བྱའོ་ཞེས་བྱ་བ་ནི་ས་དཀར་པོ་ལ་སོགས་པས་སོ། །མར་མེ་འཛིན་པ་བྱའོ་ཞེས་བྱ་བ་ནི་མར་མེའི་ཕྱིར་ཀོང་བུ་བྱའོ། །ལན་ཀན་གྱིས་བསྐོར་རོ་ཞེས་བྱ་བ་ནི་ཁོར་ཁོར་ཡུག་ཏུ་བསྐོར་བར་བྱ་བའོ། །རྟ་བབས་བསྒྲེང་བར་བྱའོ་ཞེས་བྱ་བ་ནི་སྒོར་རོ། །རྒྱལ་མཚན་གཟུགས་སོ་ཞེས་བྱ་བ་ནི་མཆོད་རྟེན་གྱི་དྲུང་དུའོ། །དེ་ནི་རྣམ་པ་བཞིའོ་ཞེས་བྱ་བ་ནི་རྒྱལ་མཚན་ནོ། །བཞི་གང་ཞེ་ན་དེའི་ཕྱིར། སེང་གེའི་རྒྱལ་མཚན་དང་ཆུ་སྲིན་གྱི་རྒྱལ་མཚན་དང་ཀླུའི་རྒྱལ་མཚན་དང་ཁྱུ་མཆོག་གི་རྒྱལ་མཚན་ནོ་ཞེས་བྱ་བ་སྨྲས་སོ། །གཙང་ཁང་གི་མུ་ཁྱུད་བྱའོ་ཞེས་བྱ་བ་ནི་གཙང་ཁང་ཕྱུར་བུའི་ཚར་གྱིས་བསྐོར་བར་བྱའོ། །དེར་རྟ་བབས་བསྒྲེང་བར་བྱའོ་ཞེས་བྱ་བ་ནི། གཙང་ཁང་གི་མུ་ཁྱུད་དེར་རོ། །སྒོ་ཡབ་བྱའོ་ཞེས་བྱ་བ་ནི། གཙང་ཁང་གི་མུ་ཁྱུད་དེའི་མདུན་དུ་སྒོ་ཡབ་ཀྱི་ཁྱམས་བྱ་བ་སྟེ། སྒོ་དྲུང་དུ་ཁང་པ་བྱའོ་ཞེས་བྱ་བའི་ཐ་ཚིག་གོ །དེ་ལ་ལན་ཀན་གྱིས་བསྐོར་རོ་ཞེས་བྱ་བ་ནི། སྒོ་གཡབ་དེ་ལའོ། །ཀ་བ་རྣམས་བཙག་གིས་བསྐུའོ་ཞེས་བྱ་བ་ནི་གཙང་ཁང་ལ་སོགས་པའི་འོ། །རྩིག་པ་དག་རྒྱ་སྐྱེགས་ཀྱིས་བྲིའོ་ཞེས་བྱ་བ་ནི་ཁྲ་བོ་ལ་སོགས་པར་བྱུག་པའོ། །དྲིས་དབང་བསྐུར་བ་དབུལ་ལོ་ཞེས་བྱ་བ་ལ་ནི། ཆོས་དང་མཐུན་ན་ཞེས་བྱ་བར་སྦྱར་རོ། །འབྲུ་མར་དང་བ་བླ་དང་ཙནྡན་དང་གུར་གུམ་གྱིས་ཆག་ཆག་དག་ཀྱང་ངོ་ཞེས་བྱ་བ་ཡང༌། དབུལ་བ་ཆོས་དང་མཐུན་ནོ་ཞེས་བྱ་བར་སྦྱར་རོ། །གཟེར་བུ་མི་གདང་འོ་ཞེས་བྱ་བ་ནི། མཆོད་རྟེན་ལ་གོས་ལ་སོགས་པ་དཔྱད་བའི་ཕྱིར་གཟེར་བུ་གདབ་པར་མི་བྱ་བའོ། །རྩིག་པའི་ཚེ་ཕྲེང་བ་ལ་སོགས་པ་གདགས་པའི་ཕྱིར་ཟུང་བདག་གཞུག་གོ་ཞེས་བྱ་བ་ནི། མཆོད་རྟེན་རྩིག་པའི་ཚེ་ཕྲེང་བ་དང་དར་ལ་སོགས་པ་གདགས་པའི་ཕྱིར་ཟུང་ང་དག་གཞུག་པར་བྱའོ། །མི་དབུག་གོ་ཞེས་བྱ་བ་ནི། མཆོད་རྟེན་ལ་ཟུང་ང་གཞུག་པའི་ཕྱིར་རོ། །སྟེང་དུ་མར་
མི་མི་གཟུགས་སོ་ཞེས་བྱ་བ་ནི། མཆོད་རྟེན་གྱི་སྟེང་དུ་མར་མེ་གཟུགས་པར་མི་བྱའོ། །མཆོད་པ་བྱ་བའི་ཁྱིམ་པ་དག་འཛེག་ཏུ་གཞུག་གོ་ཞེས་བྱ་བ་ནི་མཆོད་རྟེན་ལའོ། །མེད་ན་དགེ་ཚུལ་དང་དྲི་ཆུས་རྐང་པ་བཀྲུས་ཏེའོ་ཞེས་བྱ་བ་ནི་ཁྱིམ་པ་མེད་ནའོ། གལ་ཏེ་དེ་མ་བྱས་ན་དྲི་དག་གིས་དྲིལ་ཕྱི་བྱས་ཏེ་འམ་གོས་ཀྱིས་དཀྲིས་ཏེ་སྟོན་པའི་འདུ་ཤེས་མངོན་དུ་བྱས་ནས་དོན་གྱི་བརྣབ་སེམས་ཀྱི་དྲན་པ་དག་གིས་སོ་ཞེས་བྱ་བ་ནི། གལ་ཏེ་དྲི་ཆུས་རྐང་པ་བཀྲུ་བ་དག་མ་བྱས་ན་དེའི་ཕྱིར་དྲི་དག་གིས་རྐང་བ་དྲིལ་ཕྱི་བྱས་ཏེའམ། ཡང་ན་འབོབ་ལ་སོགས་པའི་གོས་ཀྱིས་དཀྲིས་ཏེ་སྟོན་པའི་འདུ་ཤེས་མངོན་དུ་བྱས་ནས་དགོས་པའི་དོན་གྱི་བརྣབ་སེམས་ཀྱི་དྲན་པ་དག་གིས་དགེ་ཚུལ་དག་མཆོད་རྟེན་ལ་འཛེག་ཏུ་གཞུག་གོ །དེ་དག་ཀྱང་མེད་ན་དགེ་སློང་དག་གིས་དེ་བཞིན་དུའོ་ཞེས་བྱ་བ་ནི། དགེ་ཚུལ་དེ་དག་ཀྱང་མེད་ན་དགེ་སློང་དེ་དག་གིས་དྲི་ཆུས་རྐང་པ་བཀྲུ་བ་ལ་སོགས་པའི་རྣམ་པ་ཇི་སྐད་བཤད་པ་དེ་བཞིན་དུ་བྱས་ཏེ་འཛེག་པར་བྱ་བའོ། །དེའི་ཆེད་དུ་ཐག་པ་གདགས་སོ་ཞེས་བྱ་བ་ནི། འཛེག་པ་དེའི་ཆེད་དུ་ཐག་པ་གདགས་ཤིང་དཔྱད་པར་བྱའོ། །རིན་པོ་ཆེ་ལས་བྱས་པའི་ཕྲེང་བ་དབུལ་ལོ་ཞེས་བྱ་བ་ནི་མཆོད་རྟེན་ལའོ། །འཇིག་པར་བྱེད་པ་བཟློག་པའི་ཕྱིར་སྦུབས་གཡོགས་ཀྱིས་གཡོགས་སོ་ཞེས་བྱ་བ་ནི། ཆར་པ་ལ་སོགས་པ་མཆོད་རྟེན་འཇིག་པར་བྱེད་པ་བཟློག་པའི་ཕྱིར་ངོས་ནས་སྐྱོར་པའི་སྦུབས་དང་སྟང་ནས་གཡོགས་པའི་གཡོགས་མས་གཡོགས་པར་བྱ་བ་སྟེ། སྟེང་དུ་ཁང་བ་དབུབ་བོ་ཞེས་བྱ་བའི་ཐ་ཚིག་གོ །མུན་པ་མི་ནག་པར་བྱ་བའི་ཕྱིར་དེ་ལ་སྒོ་གདོད་དོ་ཞེས་བྱ་བ་ནི་སྦུབས་གཡོགས་པ་དེ་ལའོ། །སངས་རྒྱས་ཀྱི་སྐུ་གཟུགས་བྱའོ་ཞེས་བྱ་བ་ནི་ཆོས་དང་མཐུན་པ་ཉིད་ཡིན་པའོ། །དེ་ལ་དུས་སྟོན་བྱའོ་ཞེས་བྱ་བ་ནི། སངས་རྒྱས་ཀྱི་སྐུ་གཟུགས་དེ་ལའོ། །བལྟམས་པ་དང་གཙུག་ཕུད་དང་དབུ་སྐྲ་དང་བྱང་ཆུབ་པའི་དུས་སྟོན་དག་ཀྱང་ངོ་ཞེས་བྱ་བ་ནི་བྱའོ་ཞེས་བྱ་བར་སྦྱར་ཏེ། དུས་
སྟོན་ཞེས་བྱ་བའི་སྒྲ་ནི་བལྟམས་པ་ལ་སོགས་པ་དང་སོ་སོར་སྦྱར་རོ། །དེ་གྲོང་ཁྱེར་དུ་གཤེགས་པར་བྱའོ་ཞེས་བྱ་བ་ནི། སངས་རྒྱས་ཀྱི་སྐུ་གཟུགས་དེའོ། །འདི་ལ་དགེ་སློང་གིས་བསྐུར་དུ་རུང་ངོ་ཞེས་བྱ་བ་ནི། སངས་རྒྱས་ཀྱི་སྐུ་གཟུགས་གྲོང་ཁྱེར་དུ་གཤེགས་པ་འདི་ལ་ཁྱོགས་ལ་སོགས་པ་དེ་དག་དགེ་སློང་གིས་བཀུར་དུ་རུང་བའོ། །དེ་ནི་གསར་བུ་དག་ལ་དབབ་བོ་ཞེས་བྱ་བ་ནི་བཀུར་བ་དེ་ལའོ། །སྡེ་བ་ལྔ་པོ་དག་གིས་ཞམ་རིང་བྱའོ་ཞེས་བྱ་བ་ནི། དགེ་སློང་ལ་སོགས་པ་དག་གིས་སོ། །མཆོད་ཡོན་དུ་བྱ་བ་ནི་རྒན་པོ་དག་གིས་གཟུང་ངོ་ཞེས་བྱ་བ་ནི། གོས་དང་རྒྱན་ལ་སོགས་པ་མཆོད་ཡོན་དུ་བྱ་བ་དག་ནི་དགེ་སློང་རྒན་རབས་དག་གིས་གཟུང་བར་བྱའོ། །དེ་ལ་རོལ་མོ་བྱེད་པ་དག་གིས་རོལ་མོ་བྱ་བ་དང་བསྐུ་སྟི་ཆེན་པོ་གཞན་ཡང་བཟང་ངོ་ཞེས་བྱ་བ་ནི། སངས་རྒྱས་ཀྱི་སྐུ་གཟུགས་གྲོང་ཁྱེར་དུ་གཤགས་པར་བྱ་བ་དེ་ལ་རོལ་མོ་མཁན་དག་གིས་གླུ་གླིང་དང་སིལ་སྙན་ལ་སོགས་པ་རོལ་མོ་བྱ་བ་བཟང་ངོ༌། །བཀུར་སྟི་ཆེན་པོ་གཞན་ཡང་བཟང་ངོ་ཞེས་བྱ་བ་ནི། དེ་ལ་ལྷའི་གཟུགས་བྱས་པ་དག་གིས་མེ་ཏོག་དག་འཐོར་བ་དང༌། གོས་དག་འཐོར་བ་དང༌། རྒྱན་དག་འཐོར་བ་དང༌། ལྷའི་བུ་དག་བསིལ་ཡབ་དག་གིས་གཡོ་བ་པ་དང༌། ལྷའི་བུ་མོ་དག་གར་བྱེད་པ་དང༌། དྲི་ཟད་གསིལ་སྙན་བྱེད་པ་དང༌། གྲུལ་བུམ་དག་སྟོད་པར་བྱེད་པ་དག་མིའམ་ཅི་དག་གླུ་ལེན་པ་དང༌། ཀླུ་དག་ཆག་ཆག་འདེབས་པ་དང༌། བར་བར་དུ་མེ་ཏོག་གི་ཁང་པ་དང༌། དྲི་གཙང་ཁང་དག་བྱ་བ་ལ་སོགས་པ་དག་བཟང་བའོ། །རོལ་མོ་བྱེད་དུ་གཞུག་པའི་ཕྱིར་ཀྱེ་མི་དག་སྟོན་པ་ལ་མཆོད་པ་དག་གྱིས་ཤིག་ཅེས་བརྗོད་པ་ལ་མན་མ་ཐོ་བ་མེད་དོ་ཞེས་བྱ་བ་ནི། རྔ་བོ་ཆེ་དང་རྔ་པཊ་ཧ་ལ་སོགས་པ་དག་བརྡུང་ཞིང་རོལ་མོ་བྱེད་དུ་གཞུག་པའི་ཕྱིར་རྔ་མཁན་ལ་སོགས་པ་དག་ལ་ཀྱེ་མི་དག་སྟོན་པ་ལ་མཆོད་པ་དག་གྱིས་ཤིག་ཅེས་བརྗོད་པ་ལ་ཁ་ན་མ་ཐོ་བ་མེད་པའོ། །ལམ་པོ་ཆེ་དང་ལམ་སྲང་དང་བཞི་མདོ་དང་སུམ་མདོ་དག་ཏུ་སོང་ངམ་གནང་འབྱུང་
བར་འགྱུར་པ་ཉིད་ན་ཡི་གེར་བྲིས་པ་བསྒྲག་པར་བྱའོ་ཞེས་བྱ་བ་ནི། སངས་རྒྱས་ཀྱི་སྐུ་གཟུགས་གྲོང་ཁྱེར་དུ་གཤེགས་པའི་ཞིག་གཅིག་གམ་གཉིས་ཀྱིས་མདུན་རོལ་དུའོ། །ཇི་ལྟར་ཡི་གེར་བྲིས་པ་ཞེ་ན་དེའི་ཕྱིར། དེ་ལྟར་ན་སངས་རྒྱས་གཤེགས་པར་འགྱུར་ཞེས་གྲོག་ལ་སོགས་པ་ལ་བྲིས་པ་གླང་པོ་ཆེའི་བཤུལ་སྟེང་དུ་གདུགས་དང་རྒྱལ་མཚན་དང་བ་དན་ལ་སོགས་པས་ཡོངས་སུ་བསྐོར་བར་བྱའོ་ཞེས་བྱ་བ་སྨྲས་ཏེ། དེ་ལྟར་ཡི་གེར་བྲིས་པ་བསྒྲག་པར་བྱའོ། །ཇི་དེ་ལྟར་ཞེས་བྱ་བ་ནི། སང་ངམ་གནང་སངས་རྒྱས་གཤེགས་པར་འགྱུར་རོ་ཞེས་སྨོས་པ་ལ་བསྙེགས་སོ། །བྱང་ཆུབ་སེམས་དཔའི་སྐུ་གཟུགས་བྱ་བ་ཆོས་དང་ལྡན་ནོ་ཞེས་བྱ་བ་ནི་བྱང་ཆུབ་སེམས་དཔའི་སྐུ་གཟུགས་བྱར་རུང་བའོ། །དེ་རྒྱལ་མཚན་དག་གིས་བསྐོར་འོ་ཞེས་བྱ་བ་ནི་བྱང་ཆུབ་སེམས་དཔའི་སྐུ་གཟུགས་དེའོ། །ལན་ཀན་གྱིས་བསྐོར་རོ་ཞེས་བྱ་བ་ཡང་དེའོ། །ལྕགས་ཀྱི་ཀ་བ་དག་གིས་ཀྱང་ངོ་ཞེས་བྱ་བ་ཡང་བསྐོར་རོ་ཞེས་བྱ་བར་སྦྱར་རོ། །དེ་དག་ལ་བ་དན་གདགས་སོ་ཞེས་བྱ་བ་ནི། ལྕགས་ཀྱི་ཀ་བ་དེ་དག་ལའོ། །རྗེས་སུ་འགྲོ་བ་བྱའོ་ཞེས་བྱ་བ་ལ་འདིར་རྗེས་སུ་འགྲོ་བ་ཞེས་བྱ་བ་ནི། སྔར་མཐུན་པའི་འཁོར་ཞེས་སྨོས་པ་ཉིད་ནི་ཡིན་པར་རིག་པར་བྱའོ། །རྐང་རྒྱན་དང་རྣ་རྒྱན་མ་གཏོགས་པའི་རྒྱན་གདགས་སོ་ཞེས་བྱ་བ་ནི། དེ་གཉིས་མ་གཏོགས་པའི་རྒྱན་གདུ་བུ་ཅན་དང་དཔུང་རྒྱན་ལ་སོགས་པ་རྒྱན་ལྷག་མ་དག་གདགས་པར་བྱ་བའོ། །སྤོས་ཀྱི་ལུས་སྦྱིན་བྱའོ་ཞེས་བྱ་བ་ནི་དྲི་ལས་བྱས་པའི་འདབ་མ་དང༌། མྱུ་གུ་དང་འཁྲི་ཤིང་དང་མེ་ཏོག་ལ་སོགས་པ་ལུས་ལ་གཞག་པར་བྱ་བ་ནི་སྤོས་ཀྱི་ལུས་སྦྱིན་ཞེས་བྱའོ། །ཁྱོགས་ཀྱིས་བསྐུར་རོ་ཞེས་བྱ་བ་ནི། སྐུ་གཟུགས་དག་གོ །ཤིང་རྟས་ཀྱང་ངོ་ཞེས་བྱ་བ་ཡང་བསྐུར་རོ་ཞེས་བྱ་བར་སྦྱར་རོ། །དེ་ལ་གདུགས་དང་རྒྱལ་མཚན་དང་བ་དན་དག་བསྒྲེང་ངོ་ཞེས་བྱ་བ་ནི་ཁྱོགས་དང་ཤིང་རྟ་དེ་ལའོ། །དབུ་ལ་མེ་ཏོག་རྣ་རྒྱན་གདགས་སོ་ཞེས་བྱ་བ་ནི། བྱང་ཆུབ་སེམས་དཔའི་སྐུ་གཟུགས་ཀྱི་དབུ་ལ་མེ་ཏོག་གི་ཐོད་བཅིང་བར་བྱའོ། །མཆོད་ཡོན་དང་ཞབས་
ལ་གསོལ་བདག་ཀྱང་རོ་ཞེས་བྱ་བ་ནི། དེ་ལ་དབུལ་བ་ཆོས་དང་མཐུན་པའོ། །དད་རྫས་ནི་གནས་པ་དང་གཞོན་ནུ་དང་རྒན་པོ་དག་གིས་ཀྱང་བླང་ངོ་ཞེས་བྱ་བ་ལ། འདིར་དད་རྫས་ཞེས་བྱ་བ་ནི་ཡོངས་སུ་ཚིམ་པས་ཕུལ་བའི་རྫས་སོ། །གནས་བརྟན་རྣམས་ཀྱིས་བསྲུང་ངོ་ཞེས་བྱ་བ་ནི་དད་རྫས་སོ། །ལམ་པོ་ཆེར་ཕྲེང་བའི་ཟ་མ་ཏོག་ཅེས་བྱའོ་ཞེས་བྱ་བ་ནི་མཆོད་ཡོན་དང༌། ཞབས་ལ་གསོལ་བ་དང༌། མེ་ཏོག་དང༌། གོས་ལ་སོགས་པ་གཏོར་བ་དག་ས་ལ་མི་འབབ་པར་བྱ་བའི་ཕྱིར། དེ་དག་གི་ལམ་སྲོལ་དུ་ཕྲེང་བའི་ཟ་མ་ཏོག་གཞག་པར་བྱའོ། །ཕྲེང་བའི་ཟ་མ་ཏོག་ཏུ་དྲིའི་ཟ་མ་ཏོག་གཞུག་གོ་ཞེས་བྱ་བ་ནི། ཕྲེང་བའི་ཟ་མ་ཏོག་གི་ནང་དུ་དྲིའི་ཟ་མ་ཏོག་གཞག་པར་བྱ་བའོ། །ཕྲེང་བ་གདགས་སོ་ཞེས་བྱ་བ་ནི། བྱང་ཆུབ་སེམས་དཔའི་སྐུ་གཟུགས་ལའོ། །མཆོད་པ་རྫོགས་ཤིང་རོལ་མོ་བརྟུལ་བ་དག་ན་སྐྱེ་བོའི་ཚོགས་ཕྱིར་དོང་བའི་ཚེ་རྒྱན་བརྟུལ་ལོ་ཞེས་བྱ་བ་ནི། དེའི་ཚེ་སྐུ་གཟུགས་ལ་སོགས་པའི་རྒྱན་བརྟུལ་བར་བྱའོ། །གང་གི་ཚེ་ཞེ་ན། དེའི་ཕྱིར་མཚན་མོའོ་ཞེས་བྱ་བ་སྨྲས་ཏེ། ཉིན་མོ་ནི་ཕྱིར་དང་དུ་ཟིན་ཀྱང་ཡང་ཕྱིར་འོང་བ་དང༌། དང་པོ་ནས་མི་འདོད་པ་ཡང་སྲིད་པས་དེའི་ཕྱིར་ཉིན་མོ་རྒྱན་བརྟུལ་བར་མི་བྱ་བའོ། །བྱང་ཆུབ་སེམས་དཔའ་འབའ་ཞིག་ལ་དེ་ལྟར་བྱ་བར་མ་ཟད་ཀྱི། མཆོད་པ་ཐམས་ཅད་ལ་ཆོག་དེ་ལྟར་བྱ་བར་རིག་པར་བྱའོ། །ཤི་བའི་སྐབས་མཆོད་རྟེན་བྱ་བ་ལ་སོགས་པ་འདྲ་བ་དང་བཅས་པ་བཤད་ཟིན་ཏོ།། །།ད་ནི་སྐབས་སྔ་མའི་མཐར་བྱ་བ་བརྗོད་པར་བྱ་སྟེ། རབ་ཏུ་བྱུང་བའི་གནས་སུ་དུས་སྟོན་བྱ་བ་ཆོས་དང་མཐུན་ནོ་ཞེས་བྱ་བ་ནི། གང་ཟག་གི་གཙུག་ལག་ཁང་དུ་དུས་སྟོན་བྱར་རུང་པ་སྟེ། དེ་ནི་ཁང་པའི་དུས་སྟོན་ཞེས་བྱའོ། །འདུལ་བ་རྒྱ་ཆེར་བསྟན་པ་བཤད་ཟིན་ཏོ།། །།ད་ནི་འདུལ་བ་མདོར་བསྡུ་བ་བརྗོད་པར་བྱ་སྟེ། མི་རུང་བ་དང་མཐུན་པ་ལ་རུང་བ་དང་འགལ་བ་ནི་རུང་བ་མ་ཡིན་པར་བསྡུའོ་ཞེས་བྱ་བ་ནི། གང་རུང་བ་མ་ཡིན་པ་བསྟན་ཅིང་
རུང་བ་དང་འགལ་བ་དེ་ན་རུང་བ་མ་ཡིན་པ་སྟེ། དེ་ནི་འདིར་རུང་བ་མ་ཡིན་པར་མདོར་བསྡུའོ། །ཕྱི་མ་དང་མཐུན་ལ་སྔ་མ་དང་འགལ་བ་ནི་རུང་བར་རོ་ཞེས་བྱ་བ་ལ་ཕྱི་མ་ཞེས་བྱ་བ་ནི་རུང་བ་སྟེ་དེ་དང་མཐུན་པ་ལ། སྔ་མ་ཞེས་བྱ་བ་ནི་མི་རུང་བ་སྟེ་དེ་དང་འགལ་བ་ནི་རུང་བ་སྟེ། དེ་ནི་འདིར་རུང་བར་མདོར་བསྡུའོ། །དཔེར་ན་ཁྲིའུ་རྐང་པ་བྲིས་པ་བཅང་བར་མི་བྱ་བ་ཉིད་དང་ཉལ་བ་དང༌། འགྲོ་བས་བཤང་བ་དང་གཅི་བ་དག་མི་བྱ་བ་ཉིད་དང༌། ཉལ་བ་དང་འགྲོ་བས་ཟས་བཟའ་བར་མི་བྱ་བ་ཉིད་ཅེས་བྱ་བ་ལ་སོགས་པ་དག་ནི་དགག་པའི་རྣམ་པ་ཡིན་ལ། ཚྭ་དང་བསྲེས་པའི་རྒུན་ཆུ་བཏུང་བར་བྱ་བ་ཉིད་དང༌། ཁམ་ཕོར་དག་ཏུ་ཟས་བཟའ་བར་བྱ་བ་ཉིད་ཅེས་བྱ་བ་ལ་སོགས་པ་དག་ནི་རྗེས་སུ་གནང་བའི་རྣམ་པ་ཡིན་ཏེ། དེ་དག་ཐམས་ཅད་འདིས་བསྟན་པ་ཉིད་ཡིན་ནོ། །འདི་སྐད་བསྟན་ཏེ། བཅོམ་ལྡན་འདས་ཀྱིས་མ་བཀག་ལ་མི་རུང་བ་ཡང་བསྟེན་པ་གང་ཡིན་པ་དེ་ནི་འདིས་བཀག་པར་རིག་པར་བྱའོ། །རྗེས་སུ་མ་གནང་ལ་རུང་བ་ཡང་བསྟེན་པ་གང་ཡིན་པ་དེ་ནི་འདིས་རྗེས་སུ་གནང་བར་རིག་པར་བྱའོ། །གནས་མལ་གྱི་གཞི་ཕྲན་ཚེགས་ལ་སོགས་པའི་སྐབས་སོ་ཞེས་བྱ་བ་དེ་ཕྲན་ཚེགས་ལ་སོགས་པའི་སྐབས་ནས་འབྱུང་བ་བཤད་ཟིན་ཏོ། །གནས་མལ་གྱི་གཞི་རྫོགས་སོ་ཞེས་བྱ་བ་དེ་བཤད་ཟིན་ཏོ། །འདུལ་བའི་མདོ་རྣམས་རྫོགས་སོ།། །།གང་དག་དུལ་ཞིང་བསླབ་འདོད་པ། །འདུལ་འཛིན་དེ་ལ་གཞོལ་བ་དག །དེ་དག་བདེ་བར་གནས་བྱའི་ཕྱིར། །རུས་ལྤགས་ལྷག་མ་ལུས་གྱུར་ཅིང༌། །མི་བཟད་ནད་ཀྱིས་ཟིན་པའི་ལུས། །སྲོག་ནི་མགྲིན་པར་ཕྱིན་འདྲ་ཞིང༌། །སངས་རྒྱས་ཚུལ་ཁྲིམས་མངོན་འདོད་པ། །སློབ་དཔོན་ཆོས་ཀྱི་བཤེས་གཉེན་གྱིས། །འདུལ་མདོ་རྒྱ་ཆེར་འགྲེལ་པ་འདི། །དེ་ལྟར་བདག་གིས་སྦྱར་བྱས་པས། །ལན་ཅིག་མ་ཡིན་དེ་བཞིན་དུ། །ཚུལ་ཡོན་བཞིན་ལ་བདག་སྤྱོད་ཤོག །དཔལ་ལྡན་ཡུལ་མཆོག་ཏར་མི་ཏ་ཞེས་བྱ། །དམ་པས་བསྔགས་པ་དེ་ན་མཁས་པ་གནས། །པཀྵུ་ཞེས་བྱ་ཆུ་ཀླུང་འགྲམ་དུ་ནི། །འབྱོར་རྒྱས་གྲགས་མཆོག་གྲོང་ཁྱེར་འགྲུབ་པར་
འགྱུར། །དཔལ་ལྡན་གནས་མཆོག་གྲོང་ཁྱེར་དེ་ཉིད་དུ། །ཁ་ན་མ་ཐོ་མེད་པའི་རིགས་མཆོག་སྐྱེས། །དེ་ནི་ལོ་བརྒྱད་བསམ་པ་རྣམ་དག་པས། །ཁྱིམ་གྱི་འབྱོར་པ་དག་ལའང་ཆགས་པ་མེད། །སྐྱེ་བ་གཞན་ནས་གོམས་པས་རྟོག་ལྡན་ཞིང༌། དཀོན་མཆོག་གསུམ་ལ་བརྟེན་སེམས་དབེན་གྱུར། །བསླབ་པའི་རྟེན་ལྡན་ཚུལ་ལ་ཉེར་སྤྱད་ཅིང༌། །དམ་པའི་བསྟན་ལ་བརྟེན་པས་འདི་རྣམས་ཕྱེད། །སངས་རྒྱས་བྱམས་པ་ཉི་མ་ནི། །རྡོ་རྗེ་མཆོག་གི་གདན་སྤོ་ལ། །ཇི་སྲིད་རྫོགས་སངས་མ་ཤར་བ། །དེ་སྲིད་ས་སྟེང་འདི་གནས་ཤོག །།འདུལ་བའི་མདོ་རྒྱ་ཆེར་འགྲེལ་པ་རྫོགས་སོ། །འདུལ་བའི་མདོ་ཞེས་བྱ་བ་ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་པ་འདུལ་བ་རྒྱ་མཚོའི་སྙིང་པོ་མདོར་བསྡུས་པ། ལྷག་པའི་ཚུལ་ཁྲིམས་ཀྱི་བསླབ་པ་མཐའ་དག་གི་མཛོད་དུ་གྱུར་པ། འདུལ་བའི་སྡེ་སྣོད་ཐམས་ཅད་ཀྱི་མ་ལྟ་བུ་འདི་ནི་འཕགས་པ་གཞི་ཐམས་ཅད་ཡོད་པར་སྨྲ་བའི་འདུལ་བ་འཛིན་པ་ཆེན་པོ་བྲམ་ཟེའི་སློབ་དཔོན་བཙུན་པ་ཡོན་ཏན་འོད། བདག་དང་གཞན་གྱི་གྲུབ་པའི་མཐའ་རྒྱ་མཚོའི་ཕ་རོལ་དུ་སོན་པ། བདེ་བར་གཤེགས་པའི་ཆོས་འདུལ་བ་བདུད་རྩིའི་སྙིང་ཁུས་ཤེས་རབ་ཀྱི་དབང་པོ་རྒྱས་པ། དེ་བཞིན་གཤེགས་པའི་བཀའ་དམ་པ་ནན་ཏན་གྱི་སྙིང་པོར་སྒྲུབ་པས། སྡེ་བ་ཐམས་ཅད་ཀྱི་འདུལ་བའི་སྡེ་སྣོད་མཐའ་དག་གི་གཙོ་བོར་གྱུར་པ། འཕགས་པ་གཞི་ཐམས་ཅད་ཡོད་པར་སྨྲ་བའི་འདུལ་བ་ཀུན་ལས་བཏུས་པའི་རྒྱ་ཆེར་འགྲེལ་པ་འདི་ནི་འཕགས་པ་གཞི་ཐམས་ཅད་ཡོད་པར་སྨྲ་བའི་འདུལ་བ་འཛིན་པ་ཆེན་པོ། །ཐོ་གར་གྱི་བྱེ་བྲག་ཏུ་སྨྲ་བའི་སློབ་དཔོན་དྷརྨ་མི་ཏྲས་མཛད་པ་དབང་ཕྱུག་དམ་པའི་མངའ་བདག་དཔལ་ལྷ་བཙན་པོའི་བཀའ་ལུང་གིས། འཕགས་པ་གཞི་ཐམས་ཅད་ཡོད་པར་སྨྲ་བའི་འདུལ་བ་འཛིན་པ་ཆེན་པོ་ཁ་ཆེ་བྱེ་བྲག་ཏུ་སྨྲ་བའི་སློབ་དཔོན་ཛི་ན་མི་ཏྲ་དང༌། ཞུ་ཆེན་གྱི་ལོ་ཙཱ་བ་བནྡེ་ཀླུའི་རྒྱལ་མཚན་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པ། འདི་ལ་ཤློ་ཀ་ནི་ཉི་ཁྲི་ཆིག་སྟོང་ཡོད། བམ་པོ་ནི་བདུན་ཅུར་བྱས་སོ།། །།