འཕགས་པ་གཞི་ཐམས་ཅད་ཡོད་པར་སྨྲ་བའི་དགེ་ཚུལ་གྱི་ཚིག་ལེའུར་བྱས་པའི་འགྲེལ་པ་འོད་ལྡན།
ཤཱཀྱའི་འོད།

---

^{[མ་དཔེ་གཟིགས་ན་འདིར་གནོན།]}

རྒྱ་གར་སྐད་དུ། །ཨཱཪྻ་མཱུ་ལ་སརྦ་ASTI་བདེ་ཤྲ་མ་ཎི་ར་ཀཱ་རི་ཏྟི་པྲ་བྷཱ་བ་ཏི། །བོད་སྐད་དུ། འཕགས་པ་གཞི་ཐམས་ཅད་ཡོད་པར་སྨྲ་བའི་དགེ་ཚུལ་གྱི་ཚིག་ལེའུར་བྱས་པའི་འགྲེལ་པ་འོད་ལྡན། བམ་པོ་དང་པོ། །ཐམས་ཅད་མཁྱེན་པ་ལ་ཕྱག་འཚལ་ལོ། །ཐམས་ཅད་ཡོད་སྨྲ་གང་དག་རྒྱལ་འགྱུར་བ། །སྟོན་པའི་བསླབ་པ་འཛིན་བྱེད་ས་འཛིན་དབང༌། །གཞན་ཞིག་སྐྱེས་འགྱུར་མེ་ཏོག་མངའ་ཅན་དཔུང༌། །རབ་ཏུ་རྒྱུ་བདེ་དག་བཅོམ་ཞིང་རྒྱལ། །འཕགས་པ་ཡོན་ཏན་འོད་དང་ཉེར་སྦས་དང༌། །ཟླ་སྩོགས་རྣམ་བཤད་མཛད་ལ་དད་པ་ཡིས། །ཕྱག་འཚལ་དགེ་ཚུལ་ཚིག་ལེའུར་བྱས་པའི་དོན། །ཚིག་དོན་ལྡན་པ་སྤེལ་བས་ཇི་བཞིན་བཤད། །རྣམ་བཤད་མཐའ་དག་རྣམ་མང་ངེས་བརྟགས་ནས། །འདུལ་བ་རྒྱ་མཚོའི་

---

^{[མ་དཔེ་གཟིགས་ན་འདིར་གནོན།]}

ཕ་རོལ་ཕྱིན་མེད་ཚུལ། །ཆུ་སྲིན་ན་ཀྲའི་འཇིགས་ཅན་དེ་ལས་བདག །གྲོགས་ཀྱིས་ངོ་དགར་འདོད་པའི་དད་པ་སྐྱེས། །བླ་མའི་མན་ངག་ཡང་དག་རྣམ་བཤད་པ། །དེ་དང་དེ་དག་ཐོས་ཏེ་འོན་ཀྱང་ནི། །ཟབ་མོ་རྣམ་པར་གཏན་ལ་དབབ་པ་ལ། །སོ་སོའི་སྐྱེ་བོའི་སེམས་དག་འཁྲུལ་བར་འགྱུར། །ཡོན་ཏན་འོད་བཤད་ལམ་གྱི་རྗེས་འབྲངས་ནས། །མཁས་པས་བདག་སྨད་མི་འགྱུར་དེ་ཡི་ཕྱིར། །ཐམས་ཅད་ཡོད་སྨྲའི་བླ་མ་རྣམས་ཀྱིས་བདག །འདི་ལ་ཡང་དག་ཞུགས་པས་མྱུར་གྲུབ་མཛོད། །ངེས་པར་འབྱུང་བའི་ཚུལ་ཁྲིམས་སྡུག་བསྔལ་སྤོང༌། །འཇིག་ཚོགས་ལྟ་བ་གདོན་གྱི་རྩ་བ་འཇོམས། །དཔལ་འབྱོར་ས་དང་མེ་ཏོག་མདའ་ཅན་འཇོམས། །སངས་རྒྱས་ལ་ནི་མགོས་གཏུགས་བཤད་པར་བྱ། །གཞི་ཐམས་ཅད་ཡོད་པར་སྨ་བའི་དགེ་ཚུལ་རྣམས་ཀྱི་ཆོ་ག་བསྡུ་བར་བཞེད་ནས། སངས་རྒྱས་བཅོམ་ལྡན་འདས་ལ་མགོ་བོས་ཕྱག་འཚལ་ཏེ། །ངེས་པར་འབྱུང་བའི་ཚུལ་ཁྲིམས་བཤད་པར་བྱའོ། །ཞེས་བྱ་བལ་སོགས་པ་སྐབས་འབྱེད་པ་ཡིན་ནོ། །ངེས་པར་འབྱུང་བ་ནི་ངེས་པར་འབྱུང་བ་སྟེ། ཁམས་གསུམ་ལས་ངེས་པར་ཕྱིན་པ་ཡིན་ནོ། །དེའི་རྒྱུར་གྱུར་པའི་ཚུལ་ཁྲིམས་ནི་ངེས་པར་འབྱུང་བའི་ཚུལ་ཁྲིམས་སོ། །འདིས་ནི་ངེས་པར་ལེགས་པའི་རྒྱུ་ཉིད་ཡིན་པར་བསྟན་ཏོ། །ངེས་པར་ལེགས་པ་ཡང་རྣམ་པ་གཉིས་ཏེ། ཕུང་པོ་ལྷག་མ་དང་བཅས་པ་དང༌། ཕུང་པོ་ལྷག་མ་མེད་པ་ཐ་དད་པས་སོ། །དེ་ལ་ཚུལ་ཁྲིམས་གང་གིས་ཕུང་པོ་ལྔའི་བདག་ཉིད་ཀྱི་སྡུག་བསྔལ་སྤོང་བར་བྱེད་པ་ནི་སྡུག་བསྔལ་སྤོང་བྱེད་ཅེས་བྱ་བ་སྟེ། འདིས་ནི་ཕུང་པོ་ལྷག་མ་མེད་པའི་མྱ་ངན་ལས་འདས་པའི་རྒྱུ་ཉིད་ཡིན་པར་བསྟན་ཏོ། །འཇིག་ཚོགས་ལ་ལྟ་བ་ཉིད་གདོན་ཡིན་ཏེ། །གསོ་བར་དཀའ་བ་ཉིད་ཡིན་པའི་ཕྱིར་རོ། །དེའི་རྩ་བ་སྟེ། །ས་བོན་འཇོམས་པར་བྱེད་པ་ཡིན་པས་འཇིག་ཚོགས་ལྟ་བའི་གདོན་གྱི་རྩ་བ་འཇོམས་བྱེད་དེ། འདིས་ནི་ཕུང་པོ་ལྷག་མ་དང་བཅས་པའི་མྱ་ངན་ལས་འདས་པའི་རྒྱུ་ཉིད་ཡིན་པར་སྔོན་ཏེ། དཔལ་འབྱོར་ས་ཞེས་བྱ་བ་ནི་རྟེན་ཡིན་ཏེ། མངོན་པར་མཐོ་བའི་རྒྱུ་ཡིན་པར་ཡང་བསྟན་ཏོ། །མེ་ཏོག་གི་མདའ་ཅན་འདོད་པའི་ལྷ་སྟེ། །དེ་འཇོམས་པའི་རྒྱུར་གྱུར་པ་ཡིན་པའི་ཕྱིར་མེ་ཏོག་མངའ་ཅན་འཇོམས་པ་སྟེ། །ལྷའི་བུའི་བདུད་ལས་རྣམ་པར་རྒྱལ་བར་བྱེད་པའི་རྒྱུ་ཡིན་ནོ། །ཞེས་བྱ་བའི་ཐ་ཚིག་གོ །

---

^{[མ་དཔེ་གཟིགས་ན་འདིར་གནོན།]}

འདིས་ནི་མངོན་པར་མཐོང་བ་ཡང་བསྟན་ཏོ། །ད་ནི། གང་ཞིག་སྲོག་གཅོད་གཞན་གྱི་ནོར་འཕྲོག་དང༌། །མི་ཚངས་སྤྱོད་བརྫུན་བཅོས་པའི་ཆང་ལ་སོགས། །གར་སྩོགས་ཕྲེང་སོགས་མལ་ཆེན་མཐོ་བ་དང༌། ཕྱི་དྲོའི་ཁ་ཟས་དངུལ་ནི་སྤོང་བ་དེ། །ཉོན་མོངས་དགྲ་གཡུལ་རྒྱལ་བྱེད་ཚུལ་ཁྲིམས་དེ། །དགེ་ཚུལ་བརྟུལ་ཞུགས་ཆུ་ལོན་བརྩིགས་པ་དང༌། །འཆི་བའི་མཆེ་བ་འབྱིན་པར་བྱེད་པའི་ཐབས། །རྫོགས་པའི་བྱང་ཆུབ་དཔལ་ནོད་དབང་བསྐུར་ཡིན། །ཞེས་བྱ་བས་ངེས་པར་འབྱུང་བའི་ཚུལ་ཁྲིམས་ཀྱི་རང་བཞིན་སྟོན་ཏེ། །སྲོག་གཅོད་པ་ལ་སོགས་པ་རེ་རེ་ལ་ཡང་སྤོང་བར་སྦྱར་བར་བྱའོ། །སྤོང་བ་ནི་སྤོང་བར་བྱེད་པའོ། །བཅོས་པའི་ཆང་ལ་སོགས་པ་ཞེས་བྱ་བ་ལ་སོགས་པའི་སྒྲས་ནི་སྦྱར་བའི་ཆང་བསྡུའོ། །གར་ལ་སོགས་པ་དང༌། ཕྲེང་བ་ལ་སོགས་པ་དང༌། མལ་མཐོན་པོ་དང༌། །ཆེན་པོ་དང༌། ཕྱི་དྲོའི་ཁ་ཟས་ཞེས་བྱ་བར་ཚིག་དབྱེའོ། །དེ་ལ་གར་སོགས་ཞེས་བྱ་བ་ལ་སོགས་པའི་སྒྲས་ནི་གླུ་དང་རོལ་མོའི་སྒྲ་གཉིས་གཟུང་ངོ༌། །ཕྲེང་བ་ལ་སོགས་པའི་སྒྲས་ནི་སྤོས་ཉུག་པ་དང་ཁ་དོག་འཆང་བ་གཉིས་བསྡུའོ། །མལ་ཆེན་མཐོ་བ་ཞེས་བྱ་བ་ནི་དེ་ཆེན་པོ་ཡང་ཡིན་ལ། མཐོན་པོ་ཡང་ཡིན་པས་སོ། །མལ་གྱི་སྒྲ་སྤྱིར་བསྟན་པས་མལ་ཆེན་པོ་དང་མལ་མཐོན་པོ་སྟོན་ཏོ། །ཆེན་པོ་དང་མཐོན་པོའི་སྒྲའི་ཡན་ལག་གི་སྒོ་ནས་ནི་མལ་ཞེས་སྤྱིར་བསྟན་པའི་ཁྱད་པར་དུ་འབྱེད་པ་ཡིན་ནོ། །དེའི་ཕྱིར་མལ་མཐོན་པོ་དང༌། །མལ་ཆེན་པོ་ཞེས་བྱ་བའི་དོན་དུ་འགྱུར་རོ། །མལ་གྱི་སྒྲ་ནི་མཚོན་པའི་དོན་ཡིན་པའི་ཕྱིར་སྟན་ཡང་བསྡུའོ། །ཕྱི་དྲོའི་ཁ་ཟས་ཞེས་བྱ་བ་ནི་ཕྱི་དྲོའི་ཁ་ཟས་ཞེས་བྱ་བའི་ཐ་ཚིག་གོ ། ཟས་ནི་བཟའ་བ་སྟེ་མ་ནིང་གི་རྟགས་སུ་བསྟན་ཏོ། །དངུལ་རྣམས་སྤོང་བ་ཞེས་བྱ་ནི་དངུལ་དང་གསེར་ལ་སོགས་པ་ལེན་པ་སྤོང་བ་ཞེས་བྱ་བའི་ཐ་ཚིག་གོ །དེ་ལྟར་ན་སྲོག་གཅོད་པ་ལ་སོགས་པ་བཅུ་པོ་སྤོང་བ་གང་ཡིན་པའི་སྤོང་བ་སྟེ་ཚུལ་ཁྲིམས་ཡིན་ནོ་ཞེས་བྱ་བར་སྦྱར་བར་བྱ་སྟེ། དེ་ཡང་དགེ་ཚུལ་གྱི་སྡོམ་བཞེས་བྱ་བ་ཡིན་ནོ། །དེ་ལྟ་བུའི་སྤོང་བ་སྟེ། ཚུལ་ཁྲིམས་དེ་ནི་ཉོན་མོངས་དགྲའི་གཡུལ་ལས་རྒྱལ་བྱེད་དེ། ངེས་པར་འབྱིན་པ་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ །ཉེ་བར་སྟོན་པར་བྱེད་པ་ཡིན་པའི་དོན་གྱིས་ཆུ་ལོན་བརྩིགས་པ་དང་འདྲ་བས་དགེ་ཚུལ་གྱིས་ནི་བརྟུལ་ཞུགས་ཀྱི་ཆུ་ལོན་བརྩིགས་པ་ཡིན་ནོ།

---

^{[མ་དཔེ་གཟིགས་ན་འདིར་གནོན།]}

དགེ་ཚུལ་གྱི་བརྟུལ་ཞུགས་ནི་འདིར་རབ་ཏུ་བྱུང་བ་ལ་བྱ་སྟེ། ཆོས་འདི་པ་རྣམས་ཀྱི་ཆ་བྱད་ཡིན་ནོ། །དགེ་ཚུལ་གྱི་སྡོམ་པ་ནི་སྤོང་བ་ཡིན་ཏེ། ཁྱད་པར་ནི་དེ་ཡིན་ནོ། །འཆི་བའི་མཆེ་བ་འབྱིན་པར་བྱེད་པའི་ཐབས་ཡིན་པ་ནི་འཆི་བའི་མཆེ་བ་འདོན་པའི་རྒྱུ་ཡིན་ཏེ། ཚུལ་ཁྲིམས་ལ་གནས་པ་དང༌། ཐོས་པ་དང༌། བསམས་པ་དང༌། བསྒོམས་པའི་རིགས་ཀྱིས་འཆི་བ་ངེས་པར་འཇོམས་པའི་ཕྱིར་རོ། །རྫོགས་པའི་བྱང་ཆུབ་ཉིད་དཔལ་ཡིན་ཏེ། ཆོས་ཀྱི་རྒྱལ་པོ་མཛད་པའི་རྒྱུ་ཡིན་པའི་ཕྱིར་རོ། །དེ་ཐོབ་པར་བྱ་བའི་ཕྱིར་དབང་བསྐུར་བ་ཡིན་ཏེ། དབང་སྦྱིན་པར་བྱེད་ཅེས་བྱ་བའི་ཐ་ཚིག་གོ །ད་ནི་ངེས་པར་འབྱུང་བའི་ཚུལ་ཁྲིམས་ཀྱི་སོ་སོའི་མཚན་ཉིད་བརྗོད་པར་བྱ་བའི་ཕྱིར་རེ་ཞིག་སྤྱིར་བཏང་བས་ནི། འདུ་ཤེས་གཙོ་ལ་དོན་གཉིས་ཇི་བཞིན་ན། །ལྟུང་རྫོགས་དོན་ཉིད་ཇི་བཞིན་མིན་ན་ཆུང༌། །ཡིད་གཉིས་གྱུར་ན་ངེས་དང་འདྲ་བར་གཞག །བླངས་པའི་ཕྱོགས་མཐུན་རྣམས་ལ་ཡིད་ཀྱིར་འགྱུར། །ཞེས་བྱ་བ་སྨོས་སོ། །བསླབ་པའི་གཞི་ནི་རྣམ་པ་གཉིས་ཏེ། འདུ་ཤེས་གཙོ་བོར་བྱ་བ་དང༌། །དངོས་པོ་གཙོ་བོར་བྱ་བའོ། །དེ་ལ་འདུ་ཤེས་གཙོ་བོར་བྱ་བ་ནི་དཔེར་ན་སྲོ་གཅོད་པ་ལྟ་བུའོ། །དངོས་པོ་གཙོ་བོར་བྱ་བ་ནི་དཔེར་ན་འཁྲིག་པ་ལས་བྱུང་བ་ལྟ་བུའོ། །སྤྱིར་བཏང་བ་འདི་ནི་འདུ་ཤེས་གཙོ་བོར་བྱ་བ་རྣམས་ཀྱི་ཡིན་གྱི། །དངོས་པོ་གཙོ་བོར་བྱ་བ་རྣམས་ཀྱི་ནི་མ་ཡིན་ནོ་ཞེས་བྱ་བའི་ཐ་ཚིག་གོ །དོན་ཉིད་ཇི་བཞིན་ན་ཞེས་བྱ་བ་ནི་དོན་དེ་ཇི་ལྟ་བ་བཞིན་དུ་གལ་ཏེ་འདུ་ཤེས་ཀྱང་དེ་ཁོ་ན་ཉིད་བཞིན་དུ་གྱུར་ན། དེའི་ཚེ་ལྟུང་བ་རྫོགས་པ་ཡིན་ཏེ། དཔེར་ན་སྲོག་ཆགས་དང་བཅས་པའི་ཚུལ་སྲོག་ཆགས་དང་བཅས་པར་འདུ་ཤེས་པ་ལྟ་བུའོ། །དོན་ཉིད་ཇི་བཞིན་མིན་ན་ཆུང་ཞེས་བྱ་བ་ནི། འདུ་ཤེས་བཞིན་དུ་གལ་ཏེ་དོན་དེ་ཁོ་ན་ལྟར་མ་ཡིན་ན་ལྟུང་བ་དེ་མ་རྫོགས་སོ་ཞེས་བྱ་བའི་ཐ་ཚིག་སྟེ། །དཔེར་ན་སྲོག་ཆགས་མེད་པ་ལ་སྲོག་ཆགས་དང་བཅས་པར་འདུ་ཤེས་པ་ལྟ་བུའོ། །ཡིད་གཉིས་གྱུར་ན་ངེས་དང་འདྲ་བར་གཞག །ཅེས་བྱ་བ་ནི་ཐེ་ཚོམ་ཟ་བ་ནི་ངེས་པ་དང་འདྲ་བར་རྣམ་པར་གཞག་གོ་ཞེས་བྱ་བའི་ཐ་ཚིག་གོ །འདི་ལྟར་སྲོག་ཆགས་དང་བཅས་པ་ལ་ཡིད་གཉིས་སུ་གྱུར་པ་ནི་ལྟུང་བ་རྫོགས་པ་ཁོ་ན་ཡིན་ལ་སྲོག་ཆགས་མེད་པ་ལ་ཡིད་གཉིས་སུ་གྱུར་པ་ནི་རྫོགས་པ་མ་ཡིན་པར་རྣམ་པར་གཞག་གོ །བླངས་པའི་ཕྱོགས་མཐུན་རྣམས་ལ་ཡིད་ཀྱིར་འགྱུར། །ཞེས་བྱ་བ་ལ། བླངས་ཞེས་བྱ་

---

^{[མ་དཔེ་གཟིགས་ན་འདིར་གནོན།]}

བ་ནི་སྲོག་གཅོད་པ་སྤོང་བ་ལ་སོགས་པ་དང༌། དེ་བཞིན་དུ་ཁྱིམ་པའི་རྟགས་སྤོང་བ་དང༌། རབ་ཏུ་བྱུང་བའི་རྟགས་ཡང་དག་པར་ལེན་པ་དང༌། མཁན་པོར་ཁས་ལེན་པའོ། །བླངས་པའི་ཕྱོགས་དང་མཐུན་པ་ནི་དཔེར་ན་མི་ཚངས་པར་སྤྱོད་པ་སྤོང་བའི་ནི་ཁུ་བ་འབྱིན་པ་སྤོང་བ་ལ་སོགས་བ་ལྟ་བུ་སྟེ། མ་བླངས་སུ་ཟིན་ཀྱང་བླངས་པ་དང་ཤན་འདྲ་བ་ཡིན་པས་ཕྱོགས་དང་མཐུན་པ་དེ་རྣམས་སུ་གྱུར་པ་ཁུ་བ་འབྱིན་པ་ལ་སོགས་པར་ཐལ་བ་ནི་ཕྱོགས་དང་མཐུན་པ་ཞེས་བྱའོ། །ཕྱོགས་དང་མཐུན་པ་དེ་དག་ཡོད་ན་ཡིད་ཀྱིར་འགྱུར་ཏེ། བསྡམ་པར་བྱས་པའི་ཉེས་བྱས་སུ་འགྱུར་རོ་ཞེས་བྱ་བའི་ཐ་ཚིག་གོ །དེ་ལ་སྲོག་གཅོད་པའི་ཕྱོགས་དང་མཐུན་པ་ནི། དཔེར་ན་ཉེས་རྩོམ་གྱི་གཞི་མི་གཏོང་བ་དང༌། རྣམ་པར་འཚེ་བ་དང༌། དམག་གི་ནང་དུ་ཞུགས་པ་དང༌། རྡེག་པ་དང་འགྱོད་པ་སྐྱེས་པ་དང༌། བཟའ་བ་དང༌། སྡངས་པར་བྱེད་པ་ལ་སོགས་པའོ། །མ་བྱིན་པར་ལེན་པའི་ཕྱོགས་དང་མཐུན་པ་ནི། །དཔེར་ན་མ་བསྟབས་པར་སྟན་ལ་འདུག་པ་དང༌། བྱིན་པ་ཁྲོས་ནས་ཕྲོགས་པ་དང༌། བཞད་གད་ཀྱིས་སྦེད་པ་ལ་སོགས་པའོ། །མི་ཚངས་པར་སྤྱོད་པའི་ཕྱོགས་དང་མཐུན་པ་ནི་དཔེར་ན་ཁུ་བ་འབྱིན་པ་དང༌། འཁྲིག་པ་དང༌། བསྙེན་བཀུར་བསྔགས་པ་དང༌། སྨྱན་ལ་སོགས་པ་སྟེ་དེ་བཞིན་དུ་དེ་རྣམས་ཀྱང་བསླབ་བའི་གཞི་རེ་རེ་ལ་དཔེར་བརྗོད་པར་བལྟ་བར་བྱའོ། །བྱེ་བྲག་ཏུ་བཤད་པ་ལས་ནི་ཕྱོགས་དང་མཐུན་པའི་མཚན་ཉིད་འདི་སྐད་དུ། འཆང་བ་དང་ནི་འབྲལ་བ་དང༌། དེ་བཞིན་ས་ནི་རྐོ་བ་དང༌། རིན་ཆེན་རེག་དང་མེ་ལ་རེག །བཏང་ནས་ཟ་བར་བྱེད་པ་དང༌། །ལྗོན་ཤིང་གཅོད་དང་ཤིང་གཅོད་དང༌། །བྱིན་ལེན་མ་བྱས་ཟ་བ་དང། །རྩྭ་སྔོན་མི་གཙང་འདོར་བ་དང༌། །དེ་བཞིན་སྩོགས་འཇོག་ཟ་བ་དང༌། །ས་བོན་འཇོམས་དང་བསླབ་པའི་གཞི། །བཅུ་པོ་རྣམས་ནི་མ་གཏོགས་པ། །སོ་སོར་ཐར་པར་བསྟན་པ་དག །བླངས་པའི་ཕྱོགས་མཐུན་ཤེས་པར་བྱ། །ལྷན་ཅིག་དབྱར་ནི་གནས་པ་དང༌། །གསོ་སྦྱོང་དགག་དབྱེ་བཅས་ལ་སོགས། །བླངས་པ་ལ་བརྟེན་རྟགས་དང་ནི། །སློང་སྤྱད་ཉེར་སྤྱོད་རྒོད་པ་དང༌། །འདོད་དང་གནོད་དང་འགྲོགས་པ་དང༌། །མ་གུས་མི་སྦྱོང་གཞི་ལས་འབྱུང༌། །ཞེས་བསྟན་ཏོ། །འདིའི་དོན་ནི་འདི་ཡིན་ཏེ། ལྷུང་བཟེད་དང་ཆོས་གོས་དག་ལྷག་པ་འཆང་བ་དང༌། ཆོས་གོས་

---

^{[མ་དཔེ་གཟིགས་ན་འདིར་གནོན།]}

དང་འབྲལ་བ་དང༌། ས་རྐོ་བ་དང༌། རིན་པོ་ཆེ་ལ་རེག་པ་དང༌། མེ་ལ་རེག་པ་དང༌། བཏང་ནས་ཟ་བ་དང༌། ལྗོན་ཤིང་གཅོད་པ་དང༌། ཤིང་ལ་སོགས་པ་གཅོད་པ་དང༌། བྱིན་ལེན་མ་བྱས་པར་ཟ་བ་དང༌། རྩྭ་སྔོན་པོ་དང་བཅས་པའི་ཕྱོགས་སུ་མི་གཙང་བ་འདོར་བ་དང༌། སྩོགས་འཇོག་ཟ་བ་དང༌། ས་བོན་འཇོམས་པ་དང༌། ཞེས་བྱ་བ་བཅུ་གསུམ་དང༌། དགེ་ཚུལ་གྱི་བསླབ་པའི་གཞི་བཅུ་པོ་དག་མ་གཏོག་པ་སོ་སོར་ཐར་པའི་མདོ་ལས་བསྟན་པ་གཞན་རྣམས་ནི་ཇི་ལྟར་འབྱོར་བར་དགེ་ཚུལ་གྱིས་ཡང་དག་པར་བླངས་པའི་ཕྱོགས་དང་མཐུན་པ་ཡིན་ནོ། །དེ་དག་ཀྱང་དབྱར་གནས་པར་ཁས་ལེན་པ་དང༌། གསོ་སྦྱོང་དང་དགག་དབྱེ་དང༌། སྩོགས་པའི་སྒྲས་རྟགས་ཀྱི་གཞི་ལས་བྱུང་བ་ཞེས་བྱ་བ་ལ་སོགས་པ་བསྡུའོ། །གཞིའི་སྒྲ་ཡང་རེ་རེ་ལ་སྦྱར་བའི་ཕྱིར་གཞི་བཅུར་འགྱུར་རོ། །དེ་ལ་རྟགས་ཀྱི་གཞི་ལས་བྱུང་བ་ནི་རབ་ཏུ་བྱུང་བའི་སྔགས་ལས་རབ་ཏུ་བྱུང་བའི་རྟགས་ཡང་དག་པར་ལེན་ཏོ་ཞེས་འབྱུང་བ་གང་ཡིན་པ་དེ་ལས་སུ་སྟེགས་ཅན་གྱི་རྟགས་འཆང་བ་དང༌། ཁྱིམ་པའི་རྟགས་འཆང་བ་དང༌། དེ་བཞིན་དུ་རྫས་རུང་བ་མ་ཡིན་པ་དང༌། ཚད་ལས་ཆུང་བ་དང་ལྷག་པ་དག་བྱེད་པ་དང་བྱེད་དུ་འཇུག་པ་དང༌། སེན་མོའི་བྱི་དོར་མ་གནང་བ་རྣམས་བྱད་པ་དང༌། རྟགས་ཉམས་པར་བྱེད་པའི་སྐྲའི་བྱི་བྱད་དང༌། མ་གནང་བའི་ཕྱོགས་རྣམས་འབྲེག་པར་བེད་པ་ལ་སོགས་པ་ནི་རབ་ཏུ་བྱུང་བའི་རྟགས་ཉམས་པའི་ཕྱོགས་དང་མཐུན་པ་ཡིན་པར་བསྟན་ཏོ། །ལྷུང་བཟེད་འཆང་བ་དང་བསོད་སྙོམས་ལ་རྒྱུ་བ་ན་རྟགས་སུ་གྱུར་པ་ཉིད་ཡིན་ཏེ། དེ་ཡང་རྣམ་པ་གཞན་དང༌། རྫས་གཞན་ལས་བྱས་པ་དང༌། ཚད་ལས་ཆུང་བ་དང༌། ལྷག་པ་དང༌། སྐྱ་བོ་འཆང་བ་ཡང་རྟགས་ཉམས་པའི་ཕྱོགས་དང་མཐུན་པ་ཡིན་པར་རིག་པར་བྱའོ། །སློང་བ་དང་སྤྱད་པའི་གཞི་ལས་བྱུང་བ་རྣམས་ནི་དངུལ་དང་གསེར་ལེན་པ་སྤོང་པ་ཉམས་པའི་ཕྱོགས་དང་མཐུན་པ་ཉིད་ཡིན་ཏེ། སློང་བའི་གཞི་ལས་བྱུང་བ་ནི་གོས་སློང་བ་ལ་སོགས་པའོ། །སྤྱད་ཀྱི་གཞི་ལས་བྱུང་བ་ནི་ཁ་བ་རལ་ལ་སོགས་པ་བྱེད་དུ་འཇུག་པའོ། །ཉེ་བར་སྤྱོད་པའི་གཞི་ལས་བྱུང་བ་ནི་སྒོག་སྐྱ་ཟ་བ་ལ་སོགས་པ་དག་སྟེ། དུས་མ་ཡིན་པར་ཟ་བའི་ཕྱོགས་དང་མཐུན་པ་ཉིད་དོ། །རྒོད་པའི་གཞི་ལས་བྱུང་བ་ནི་རྒྱུག་པ་དང་མཆོང་པ་དང་ཆུ་ལ་རྩེ་བ་ལ་སོགས་པ་དག་སྟེ། གར་དང་གླུ་དང་རོལ་མོའི་སྒྲ་དང༌། ཕྲེང་བ་དང་སྤོས་ཉུག་པ་དང་ཁ་དོག་འཆང་

---

^{[མ་དཔེ་གཟིགས་ན་འདིར་གནོན།]}

པ་དང༌། མལ་མཐོན་པོ་དང་མལ་ཆེན་པོའི་ཕྱོགས་དང་མཐུན་པ་ཉིད་ཡིན་ནོ། །འདོད་པའི་གཞི་ལས་བྱུང་བ་ནི་ཁུ་བ་འབྱིན་པ་ལ་སོགས་པ་དང་ཁང་པ་དང་ལྷ་ཁང་དུ་གཏོགས་པ་སྟེ། དེ་ནི་རབ་ཏུ་བྱུང་བའི་ཕྱོགས་དང་མཐུན་པ་ཉིད་ཀྱང་ཡིན་ནོ། །གནོད་པའི་གཞི་ལས་བྱུང་བ་ནི་དགེ་འདུན་གྱི་དབྱེན་ལ་སོགས་པ་ཡིན་ནོ། །འགྲོགས་པའི་གཞི་ལས་བྱུང་བ་ནི་དགེ་འདུན་གྱིས་བསྐྲད་པ་གང་ཡིན་པ་དང་འགྲོགས་པ་སྟེ། དེ་ནི་འདོད་ཆགས་དང་བྲལ་བར་འགྱུར་བ་ལས་གཡེལ་བར་གྱུར་བ་ཉིད་ཡིན་པས་ཡོངས་སུ་སྤང་བར་བྱ་བ་ཉིད་ཡིན་པའི་ཕྱིར་ན་སྡོམ་པ་མཐའ་དག་ཉམས་པའི་ཕྱོགས་དང་མཐུན་པ་ཉིད་ཡིན་ནོ། །བུད་མེད་དང་ལྷན་ཅིག་ཏུ་ཉལ་བའི་བདག་ཉིད་དུ་འགྲོགས་པ་གང་ཡིན་པ་དེ་ནི་མི་ཚངས་པར་སྤྱོད་པའི་ཕྱོགས་དང་མཐུན་པ་ཉིད་ཡིན་ནོ། །མ་གུས་པའི་གཞི་ལས་བྱུང་བ་ནི་སངས་རྒྱས་དང་ཆོས་དང་དགེ་འདུན་རྣམས་ལ་མ་གུས་པ་ཉིད་ཡིན་ཏེ། དེ་ཡང་རབ་ཏུ་བྱུང་བའི་སྡོམ་པ་ཉམས་པའི་ཕྱོགས་དང་མཐུན་པ་ཉིད་ཡིན་ནོ། །གནས་ལ་མ་གུས་པ་ཉིད་ནི་སྡོམ་པ་མཐའ་དག་འཇིག་པའི་ཕྱོགས་དང་མཐུན་པ་ཉིད་ཡིན་ནོ། །མཁན་པོ་ལ་མ་གུས་པ་ཉིད་ནི་མཁན་པོ་ལ་བདག་གི་མཁན་པོ་མཛད་དུ་གསོལ་ཞེས་གསོལ་བ་འདེབས་པ་སྔོན་དུ་འགྲོ་བའི་ཁས་བླངས་པ་གང་ཡིན་པ་དེ་ཉམས་པའི་ཕྱོགས་དང་མཐུན་པ་ཉིད་ཀྱང་ཡིན་ནོ། །གང་ཟག་གཞན་ལ་མ་གུས་པ་ཉིད་ནི་མཁན་པོ་ལ་མ་གུས་པའི་ཕྱོགས་དང་མཐུན་པ་ཉིད་ཡིན་ནོ། །མི་སྦྱོང་བའི་གཞི་ལས་བྱུང་བ་ནི་བདག་ཉིད་དག་པར་བྱ་བའི་ཕྱིར་གསོ་སྦྱོང་དང་དགག་དབྱེ་གཉིས་བྱ་བར་གསུངས་པ་སྟེ། དེ་མི་བྱེད་པ་ནི་མི་སྦྱོང་པའོ། །དགེ་ཚུལ་གྱི་དགག་དབྱེ་ལས་གསོ་སྦྱོང་དུ་འགྱུར་བ་ཡང་ཡོད་པར་ཕྱིས་བསྟན་པར་བྱའོ། །གནས་མེད་པར་འདུག་པར་ཡང་མི་སྦྱོང་བ་ཡིན་ཏེ། དེ་ལྟར་མ་བྱས་ན་ཚུལ་ཁྲིམས་ཕུན་སུམ་ཚོགས་པར་མི་འགྱུར་བས་དེ་རྣམས་ནི་བྱ་བ་ཁོ་ན་ཡིན་ནོ། །ཇི་སྟེ་དེའི་ཕྱོགས་དང་མཐུན་པ་རྣམས་ཡིད་ཀྱིས་བྱ་བ་ཡིན་ནོ་ཞེས་བྱ་བ་འདི་ག་ལས་འབྱུང་ཞེ་ན། དགེ་ཚུལ་གྱི་སྔགས་ལས་ཡན་ལག་བཅུ་པ་འདིས་བདག་ཅེས་བསླབ་པའི་ཚད་གསུངས་པ་ལས་བསླབ་པ་བཅུ་པོ་དག་ཁོ་ན་ལས་འདས་ན་ལྟུང་བ་ཡིན་པར་གསུངས་པའི་ཕྱིར་དང༌། གཞན་ལ་ནི་མ་གསུངས་པའི་ཕྱིར་ལ་གཞན་ལའང་སྐྱོན་མེད་པ་ཉིད་ནི་མ་ཡིན་ཞིང༌། བླངས་པ་ལས་འདས་པ་དང༌།

---

^{[མ་དཔེ་གཟིགས་ན་འདིར་གནོན།]}

ཤན་འདྲ་བའི་ཕྱིར་དང༌། ཡིད་ཀྱིས་བསྡམ་པར་བྱ་བ་ཡང་སྤྱིར་བསྟན་པའི་ངོ་བོ་ཉིད་ཡིན་པས་ཕྱོགས་དང་མཐུན་པ་རྣམས་ཡིད་ཀྱིས་བསྡམ་པར་བྱ་བ་ཡིན་ནོ་ཞེས་རྣམ་པར་གཞག་གོ །གལ་ཏེ་ཡང་ཅིའི་ཕྱིར་ཆ་མ་ཚང་བའི་ལྟུང་བ་ཡིན་པར་མི་འདོད་ཅེ་ན། མི་འཐད་པའི་ཕྱིར་ཏེ། ཆ་མ་ཚང་བའི་ཡང་དག་པར་བླངས་པ་ལས་འདས་པའི་ཡུལ་ཁོ་ན་ཉིད་ཡིན་ནོ། །དེ་ལ་ཆ་ཇི་སྙེད་ཅིག་གིས་འགྱུར་བར་བསྟན་པ་དེ་རྣམས་ལས་ཆ་གཅིག་མེད་པས་ཀྱང་ཆུང་བར་རྣམ་པར་གཞག་པ་ཡིན་ཏེ། དེས་ན་གཞན་ལ་ནི་ཆ་མ་ཚང་བར་མི་འགྱུར་རོ། །དེའི་ཕྱིར་བསླབ་པའི་གཞི་ལས་གཞན་བླངས་པ་དང་འདྲ་བ་རྣམས་ནི་མ་བླངས་ཀྱིས་ཀྱང་འདས་ན་ཡིད་ཀྱིས་བསྡམ་པར་བྱ་བར་རྣམ་པར་གཞག་པ་ཡིན་གྱི་ལྟུང་བ་ནི་མ་ཡིན་ནོ། །ཁ་ན་མ་ཐོ་བ་ལྕི་བ་དང་ཡང་བ་ཉིད་དུ་འགྱུར་བ་ནི་བསམ་པའི་དབང་ལས་འགྱུར་བ་དང༌། ཡུལ་གྱི་དབང་ལས་འགྱུར་བར་རྣམ་པར་གཞག་གི །ལྟུང་བའི་དབང་ལས་ནི་མ་ཡིན་ཏེ། ལྟུང་བ་ལ་ནི་བཅས་པ་ཙམ་གྱི་རྗེས་སུ་འབྲང་བས་སོ། །དེ་ལྟར་སྤྱིར་བཏང་བ་རྣམས་བཤད་ནས། མཚན་ཉིད་རྣམས་བཤད་པར་བྱ་སྟེ། གང་ཞིག་རང་བཞིན་གནས་ལ་བསླབ་བཅས་པས། །མི་གཞན་ཡིན་ལ་མིར་ནི་འདུ་ཤེས་དང༌། །གསད་པའི་བསམ་པས་འཁྲུལ་མེད་གསོད་བྱེད་ཅིང༌། །མི་ཤི་རྨི་ལམ་མ་གཏོགས་དེ་བརླག་འགྱུར། །ཚིག་གི་དོན་ནི་དགེ་ཚུལ་གང་ཞིག་རང་བཞིན་དུ་གནས་པ་དང་བསླབ་པ་མ་བཏང་བས། མི་ཕ་རོལ་ལ་མིའི་བློ་དང་གསད་པའི་བསམ་པས་འཁྲུལ་པ་མེད་པར་གསོད་ཅིང་ཕ་རོལ་པོ་དེ་ཡང་ཤི་ན་དེ་ཕམ་པར་འགྱུར་བ་ཡིན་ཏེ། རྨི་ལམ་ནི་མ་གཏོགས་སོ་ཞེས་བྱ་བ་ཡིན་ནོ། །རང་བཞིན་གནས་ཞེས་བྱ་བ་ནི་ཐ་མལ་བར་གནས་པའོ། །འདིར་གཞུང་ནི་སྨྱོས་པ་དང༌། སེམས་འཁྲུགས་པ་དང༌། ཚོར་བས་གཟིར་བ་ལ་ནི་ལྟུང་བ་མེད་དོ་ཞེས་འབྱུང་བ་ཡིན་ནོ། །བསླབ་པ་བཅས་པ་ཞེས་བྱ་བ་ནི་བསླབ་པ་མ་བཏང་བ་ཡིན་ནོ། །འདིར་གཞུང་ནི་སོ་སོར་ཐར་པ་ལས་བསླབ་པ་མ་ཕུལ་བསླབ་པ་ཉམས་པར་མ་བྱས་པར་ཞེས་གསུངས་པའི་དབང་དུ་བྱས་པའི་ཕྱིར་རོ། །ཕུལ་བ་ཞེས་བྱ་བ་ཡང་ཕུལ་བ་གསལ་བར་བྱེད་པ་གང་ཡང་རུང་བར་འགྱུར་རོ། །འདི་ལྟར་གཞུང་ནི་ཐ་ན་འདི་སྐད་དུ་བདག་ལ་ཁྱེད་ལྟ་བུའི་ཚངས་པ་མཚུངས་པར་སྤྱོད་པ་རྣམས་ཀྱིས་ཅི་ཞིག་བྱ་ཞེས་ཟེར་ནའོ་ཞེས་འབྱུང་བ་ཡིན་ནོ། །ཡང་

---

^{[མ་དཔེ་གཟིགས་ན་འདིར་གནོན།]}

བཤད་པ། རང་བཞིན་གནས་པའི་སྡོམ་དང་ནི། །བཏང་བའི་བློ་ཡིས་བཏང་པ་ཡི། །གོ་བར་བྱེད་པ་ཐམས་ཅད་ཀྱིས། །བརྡ་ཕྲད་མི་ལ་གོ་བྱེད་ནའོ། །སློབ་དཔོན་གཞན་དག་ནི། ངག་གིས་སྡོམ་པ་ལེན་པ་ཡིན་པས། གཏོང་བ་ཡང་ཚིག་ཁོ་ནས་རིགས་སོ་ཞེས་ཟེར་བ་དེ་ནི་མི་རིགས་ཏེ། ལུས་ཀྱི་རྣམ་པར་རིག་བྱེད་ཀྱིས་ཀྱང་སྡོམ་པ་ལེན་པའི་ཕྱིར་རོ་ཟེར་རོ། །བསླབ་པ་ཉམས་པར་མ་བྱས་ཞེས་སྨོས་པ་ནི་གཏོང་བའི་རྒྱུ་ཡིན་པར་བསྟན་པའི་ཕྱིར་རོ། །ཇི་སྟེ་བསླབ་པ་མ་ཕུལ་བ་ཞེས་བྱ་བ་ལ་སོགས་པ་ནི་དགེ་སློང་ལ་གསུངས་པ་ཡིན་ན་ཅིའི་ཕྱིར་དགེ་ཚུལ་གྱི་ཡང་ཞར་ལ་བཤད་ཅེ་ན། དགེ་སློང་གི་སྐབས་སུ་བབ་པའི་ཕྱིར་དགེ་སློང་ཞེས་གསུངས་པས་འདི་ནི་སྤྱིར་གསུངས་པ་ཡིན་ནོ། །འདི་ལྟར་བྱེ་བྲག་ཏུ་བཤད་པ་ལས། དགེ་སློང་གང་ཞེས་བྱ་བ་འདིར་དགེ་སློང་གི་སྒྲ་ནི་གཞི་གཅིག་ལ་བྱ་བ་ཡིན་པའི་ཕྱིར་རོ། །གང་ཞེས་བྱ་བའི་སྒྲ་འདི་ནི་སྤྱིར་བསྟན་པ་ཡིན་ནོ། །དེའི་ཕྱིར་སྡེ་ལྔ་ཆར་གཟུང་ངོ་ཞེས་བཤད་དོ། །མི་ཞེས་བྱ་བ་ནི་མིའི་འགྲོ་བ་སྟེ། བཤད་པ་ནི་འགྲོ་བའི་གཙོ་བོ་ཡིན་ནོ། །དེས་ན་འདིར་བུད་མེད་དང༌། མ་ནིང་དང་མེར་མེར་པོ་ལ་སོགས་པ་དག་ཀྱང་སྨོས་པར་རིག་པར་བྱའོ། །འདིར་གཞུང་ནི་མིའམ་མིར་ཆགས་པ་ཞེས་བྱ་བར་འབྱུང་བ་ཡིན་ནོ། །མིར་ཆགས་པ་ཞེས་བྱ་བ་ནི་མེར་མེར་པོ་དང་ནུར་ནུར་པོ་དང༌། ལྟར་ལྟར་པོ་དང་མཁྲང་གྱུར་གྱི་གནས་སྐབས་རྣམས་ཡིན་ནོ། །མི་ནི་རྐ་ལག་འགྱུས་པ་དང༌། བྱིས་པ་དང༌། གཞོན་ནུ་དང༌། དར་ལ་བབ་པ་དང༌། བར་མ་དང༌། རྒན་པོའི་གནས་སྐབས་རྣམས་ཡིན་ནོ། །རྣམ་པར་འབྱེད་པ་ལས་མིར་ཆགས་པ་ཞེས་བྱ་བ་ནི་གང་གིས་མའི་མངལ་དུ་དབང་པོ་གསུམ་པོ་ལུས་དང༌། སྲོག་དང༌། ཡིད་ཀྱི་དབང་པོ་རྣམས་རྙེད་པའོ།། །མི་ཞེས་བྱ་བ་ནི་གང་གིས་དབང་པོ་དྲུག་པོ་མིག་དང༌། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ཀྱི་དབང་པོ་རྣམས་རྙེད་པའོ་ཞེས་གསུངས་པའོ། །དེ་ལྟར་ན་བཅས་པའི་གནས་སྐབས་ལྔ་དང༌། མངལ་གྱི་གནས་སྐབས་ལྔ་ནི་རིས་མཐུན་པ་གཅིག་ཡིན་པར་རིག་པར་བྱའོ། །དེ་ཉིད་ཀྱི་ཕྱིར་རྩ་བའི་བྱེ་བྲག་ཏུ་བཤད་པ་ལས། འཕགས་པ་ཉེར་སྦས་ཀྱིས་མེར་མེར་པོ་བསད་ན་མཐར་འགྱུར་རོ་ཞེས་གསུངས་པ་དང༌། མངལ་ཚུན་ཆད་ལོ་ཉི་ཤུ་ལོན་པ་ནི་བསྙེན་པར་རྫོགས་པར་རུང་ངོ་ཞེས་ཁུངས་གསུངས་པ་ཡིན་ཏེ།

---

^{[མ་དཔེ་གཟིགས་ན་འདིར་གནོན།]}

མེར་མེར་པོ་ཚུན་ཆད་མིར་གདགས་སོ་ཞེས་དགོངས་པ་ཡིན་ནོ། །མི་ཞེས་ཅིའི་ཕྱིར་སྨོས་ཤེ་ན། འགྲོ་བ་གཞན་ནམ་སྤྲུལ་པ་ལ་ནི་ལྟུང་བ་ཆུང་བར་འགྱུར་རོ་ཞེས་བསྟན་པའི་ཕྱིར་རོ། །འདིར་གཞུང་ནི་ཚེ་དང་ལྡན་པ་དག་མི་མ་ཡིན་པ་ཤིན་ཏུ་ཆེན་པོ་བསད་ན་ཉེས་པ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ། །སྤྲུལ་པ་ཡང་གཞུང་ནི་གཏམ་གྱི་གཞི་ལས། གང་ཞིག་འགྲོ་བ་ཐམས་ཅད་དང་མ་འབྲེལ་ལ། མྱ་ངན་ལས་འདས་པ་ཡང་མ་ཡིན་ཞིང༌། རྒྱལ་བའི་བསྟན་པ་ལ་ཡང་མི་འཇུག་པ་དེ་གང་ཞེ་ན། བཤད་པ། སྤྲུལ་པའོ། །དེ་སྲོག་དང་བྲལ་ན་ཅིར་འགྱུར་བཤད་པ། དམན་པ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ། །ཇི་སྟེ་ཅིའི་ཕྱིར་མི་བསད་ན་མཐར་འགྱུར་ལ་ལྷ་ལ་སོགས་པ་མི་མ་ཡིན་པ་བསད་ན་ནི་སྡོམ་པོར་འགྱུར། དུད་འགྲོར་གྱུར་པ་བསད་ན་ལྟུང་བྱེད་དུ་འགྱུར་ཞེ་ན། །འདིར་འཕགས་པ་ཉེར་སྦས་ཀྱིས་གསུངས་པ་ལ་འཇིག་རྟེན་ན་མི་བསད་པ་ལ་ཤིན་ཏུ་སྐྱོ་བར་བྱས་པ་ཡིན་པའི་ཕྱིར་རོ་ཞེས་གསུངས་སོ། །གཞན་ཡང་མི་རྣམས་ཁོ་ན་ལ་དཀོན་མཆོག་གསུམ་རྣམ་པར་འཇོག་པ་དང༌། སོ་སོར་ཐར་པ་དང༌། བསམ་གཏན་དང་ཟག་པ་མེད་པའི་སྡོམ་པ་གནས་ལ། མི་མ་ཡིན་པ་རྣམས་ལ་ཡང་བསམ་གཏན་དང༌། ཟག་པ་མེད་པའི་སྡོམ་པ་གཉིས་གནས་ཤིང༌། སོ་སོར་ཐར་པའི་སྡོམ་པ་ནི་མེད་དོ། དུད་འགྲོ་རྣམས་ལ་ནི་སྡོམ་པ་གསུམ་ཆར་མེད་པ་ཡིན་ཞེས་བྱ་བ་ལ་སོགས་པ་གསུངས་པས་མི་རྣམས་ནི་གཙོ་བོ་ཡིན། མི་མ་ཡིན་པ་རྣམས་ནི་འབྲིང་ཡིན། དུད་འགྲོ་རྣམས་ནི་ཐ་ཆད་ཡིན་པས་ལྟུང་བ་ཐ་དད་པར་ཁོང་དུ་ཆུད་པར་བྱའོ། །གཞན་སྨོས་པ་ཅི་དགོས་ཤེ་ན། བདག་གསོད་པ་ལྟུང་བ་ཆུང་ངུ་ཡིན་པར་བསྟན་པ་ཡིན་ནོ། །ཞུས་པ་ལས་ཀྱང་འདི་སྐད་དུ། བཙུན་པ་དགེ་སློང་གིས་མི་ལ་མིར་འདུ་ཤེས་པས་སྲོག་དང་ཕྲལ་ན་མཐར་མི་འགྱུར་བ་ལྟ་མཆིས་སམ། བདག་ཉིད་ལ་གསོད་པར་བྱེད་ན་དམན་པ་སྦོམ་པོར་འགྱུར་བ་ཡོད་དོ་ཞེས་གསུངས་སོ། །དམན་པ་སྦོམ་པོར་ཞེས་བྱ་བ་ནི་ཆུང་བའི་རྣམ་གྲངས་ཡིན་ཏེ། ཨུཏྤ་ལའི་ཕྲེང་བ་ལས་འདི་སྐད་ཅེས་དམན་པ་སྡོམ་ངོ་ཞེས་བྱ་བའི་ཚིག་འདི་ནི་རིལ་གྱིས་མ་ཡིན་པ་དང༌། གླང་པོ་ཆེའི་གཙོ་བོ་དག་མི་བུལ་མི་མགྱོགས་པར་འགྲོ་བ་ལ་སྦྱར་བ་ཡིན་ནོ་ཞེས་གསུངས་པ་ཡིན་ཏེ། རིལ་གྱིས་མ་ཡིན་པ་ནི་ཆུང་བ་ཉིད་ཡིན་ནོ་

---

^{[མ་དཔེ་གཟིགས་ན་འདིར་གནོན།]}

ཞེས་བྱ་བའི་ཐ་ཚིག་གོ །གང་ལ་ཉེས་པ་སྦོམ་པོར་ཞེས་འབྱུང་བ་དེར་དམན་པ་སྦོམ་པོ་ཞེས་བྱ་བའི་སྒྲ་ནི། སྦོམ་པོ་ཞེས་བྱ་བའི་སྒྲར་སྦྱར་བ་ཡིན་ནོ། །འདི་ལྟར་ཚིག་ནི་ཕྱོགས་གཅིག་ལ་ཡང་སྦྱར་བ་ཡིན་ཏེ། དཔེར་ན་འཇིགས་སྡེ་ལ་འཇིགས་པ་ཞེས་བྱ་བ་དང༌། བདེན་སྨྲ་ལ་སྨྲ་བ་ཞེས་བྱ་བ་ལྟ་བུ་ཡིན་པས་དེའི་ཕྱིར་ཉེས་པའི་སྒྲས་བྱེ་བྲག་གི་ཚིག་ཏུ་བསྡུ་ན་ཉེས་པ་སྦོམ་པོར་འགྱུར་ཏེ། འདས་པ་ཆུང་ངུ་ཞེས་བྱ་བར་འགྱུར་རོ། །བུད་མེད་ཀྱི་རྟགས་སུ་བསྟན་པ་ནི་ལྟུང་བ་ཆུང་ངུ་དང་སྦྱར་བའི་ཕྱིར་རོ། །ཅི་སྟེ་དེ་ལྟར་ན་འདས་པ་ཆུང་ངུ་ཞེས་བྱ་བ་འདས་བ་ཞེས་བྱ་བའི་ཚིག་གི་དོན་ཇི་ལྟར་འབྲེལ་བར་འགྱུར་ཞེ་ན། སྤྱི་དང་ཁྱད་པར་གྱི་དངོས་པོ་ཉིད་ཡིན་པའི་ཕྱིར་འདི་ལ་ངེས་པ་མེད་དེ་དཔེར་ན་བ་ལང་གསོ་བར་བྱེད་ཅེས་བྱ་བ་ལྟ་བུའོ། །ལྟུང་བའི་རང་བཞིན་ཅི་ཡིན་ཞེ་ན། ལུས་ཀྱི་དང་ངག་གི་ལས་འདས་པའི་རང་བཞིན་ནོ། །ཅི་སྟེ་ཡིད་ཀྱིས་ཐལ་བའི་རང་བཞིན་ལྟུང་བ་ཅིའི་ཕྱིར་མ་ཡིན་ཞེ་ན། ཡིད་ཀྱི་སྡོམ་པ་ལ་སོ་སོར་ཐར་པའི་སྡོམ་པ་ཉིད་མེད་པའི་ཕྱིར་རོ། །སོ་སོར་ཐར་པའི་སྡོམ་པ་ནི་སྤོང་བ་བདུན་གྱི་མཚན་ཉིད་ཡིན་ཏེ། ལུས་ཀྱི་རྣམ་པ་གསུམ་ངག་གི་རྣམ་པ་བཞི་ཞེས་བྱ་བར་ངེས་པའི་ཕྱིར་རོ། །གཏམ་གྱི་གཞི་ལས་ཀྱང༌། ལྟུང་བ་ནི་རྣམ་པར་རིག་བྱེད་ཡིན་པར་བརྗོད་པར་བྱའོ། །དེ་བཞིན་དུ་ལྟུང་བ་ནི་སེམས་དང་སེམས་ལས་བྱུང་བ་མ་ཡིན་ནོ་ཞེས་བརྗོད་པར་བྱའོ་ཞེས་གསུངས་པས་དེའི་ཕྱིར་རྣམ་པར་རིག་བྱེད་ཉིད་དང༌། གཟུགས་ཅན་ཉིད་དུ་བསྟན་པའི་ཕྱིར་དང༌། སེམས་དང་སེམས་ལས་བྱུང་བ་དག་ནི་བཀག་པའི་ཕྱིར་ཡིད་ཀྱི་བྱ་བ་ལ་ནི་ལྟུང་བ་ཉིད་མེད་དོ། །མིར་ནི་འདུ་ཤེས་ཞེས་བྱ་བ་ནི་འགྲོ་བ་གཞན་དུ་འདུ་ཤེས་པ་ནི་མཐར་འགྱུར་བ་མེད་པར་སྟོན་ཏོ། །གསད་པའི་བསམ་པས་ཞེས་བྱ་བ་ནི་གསད་པར་བྱ་བའི་སེམས་ཀྱིས་སོ། །འདིར་གཞུང་ནི། དགེ་སློང་གིས་སྐྱེས་པ་དང་བུད་མེད་དང་མ་ནིང་དག་གསང་བའི་སེམས་ཀྱིས་ཞེས་བྱ་བ་འབྱུང་བ་ཡིན་ནོ། །འཁྲུལ་མེད་ཅེས་བྱ་བ་ནི་འཁྲུལ་པ་ནི་དེ་མ་ཡིན་བཞིན་དུ་ཡིན་ནོ་ཞེས་ངེས་པར་བརྟགས་ནས་ནོར་བ་སྟེ། མ་འཁྲུལ་པ་ཞེས་བྱ་བའི་ཐ་ཚིག་གོ །འདིར་གཞུང་ནི་ཞུས་པ་ལས། མ་ལམ་མ་ལགས་པའི་འདུ་ཤེས་ཀྱིས་འགུམས་ན་ཅིར་འགྱུར། བཀའ་སྩལ་པ། ཉེས་པ་སྦོམ་པོའོ་ཞེས་བྱ་བ་དང༌། དེ་བཞིན་དུ་མི་

---

^{[མ་དཔེ་གཟིགས་ན་འདིར་གནོན།]}

གཉིས་འཁོད་པ་ན། དེ་ན་དེ་གསད་དོ་སྙམ་ནས་གཅིག་གསད་པའི་སེམས་ཀྱིས་གཉིས་པ་འགུམས་ན་ཅིར་འགྱུར་བཀའ་སྩལ་པ། ཉེས་པ་སྦོམ་པོའོ་ཞེས་འབྱུང་བ་ཡིན་ནོ། །འོ་ན་དགྲ་བཅོམ་པ་ལ་དགྲ་བཅོམ་པ་མ་ཡིན་པའི་འདུ་ཤེས་ཀྱིས་གསོད་ན་ཉེས་པ་སྦོམ་པོར་འགྱུར་རོ་ཞེས་བྱ་བ་དེའི་དོན་གང་ཡིན། ཅི་དགྲ་བཅོམ་པའི་ལུས་ལ་དགྲ་བཅོམ་པ་མ་ཡིན་པའི་ལུས་སུ་ནོར་པས་དགྲ་བཅོམ་པ་མ་ཡིན་པར་འདུ་ཤེས་པ་ཞེས་བྱ་བའམ། འོན་ཏེ་ལུས་གཅིག་ལ་དགྲ་བཅོམ་པ་ཉིད་ཀྱི་ཆོས་མེད་པར་ནོར་བ་ལས་འགྱུར་བ་བརྗོད་པར་བྱ་དགོས་སོ་ཞེ་ན། དེ་ནི་གཞན་གྱི་ལུས་སུ་ནོར་བ་ལས་སྦོམ་པོ་ཡིན་ནོ་ཞེས་བཤད་དོ། །དེ་ལྟ་མ་ཡིན་ན་དགྲ་བཅོམ་པ་ཉིད་ཀྱི་ཆོས་མེད་པ་ལས་ཡིན་ན་ནི་མཚམས་མེད་པར་གྱུར་ན་མི་རུང་གིས་ཀྱང་ལུས་གཅིག་པ་ཉིད་ཡིན་པའི་ཕྱིར། ཕམ་པ་ནི་སུས་ཀྱང་བཟློག་པར་དཀའོ། །དེ་ལྟ་བས་ན་ཇི་ལྟར་མ་ལམ་མ་ཡིན་པའི་འདུ་ཤེས་བཞིན་དུ་དགྲ་བཅོམ་པ་ལ་དགྲ་བཅོམ་པ་མ་ཡིན་པའི་འདུ་ཤེས་ཀྱང་དེ་ལྟ་བུར་རིག་པར་བྱའོ། །གསོད་བྱེད་ཅེས་བྱ་བ་ནི་གསོད་པར་བྱེད་པའོ། །འདིར་གཞུང་ནི། ལུས་ཀྱིས་སམ་ལུས་དང་འབྲེལ་པས་སམ་ཕྱི་རོལ་དུ་ཐལ་བས་སམ་ཞེས་བྱ་བ་ལ་སོགས་པ་འབྱུང་བ་ཡིན་ནོ། །མི་ཤི་ཞེས་བྱ་བ་ནི་མིའི་རིགས་ཤི་བར་གྱུར་ན་ཞེས་བྱ་བའི་ཐ་ཚིག་གོ །དུས་ངེས་པར་མ་བཤད་པའི་ཕྱིར་དེའི་ཚེའམ་གཞན་གྱི་ཚེ་ཡང་རུང་སྟེ། སྦྱོང་བ་དེས་ཤི་ན་མཐར་འགྱུར་བར་རིག་པར་བྱའོ། །འདིར་གཞུང་ནི་དེས་དེའི་ཚེ་ཁོ་ན་ནི་མ་ཡིན་ལ། འོན་ཀྱང་དེས་དེ་ནས་ཕྱིས་གྱུར་ན་དགེ་སློང་ཕམ་པ་བྱུང་བ་ཡིན་ནོ། །དེས་དེའི་ཚེ་ཡང་མ་ཡིན་ལ་དེས་དེ་ནས་ཕྱིས་ཀྱང་མ་ཡིན་ན་དགེ་སློང་ཉེས་པ་སྦོམ་པོ་བྱུང་བ་ཡིན་ནོ་ཞེས་འབྱུང་བ་ཡིན་ནོ། །འོ་ན་རྩ་བའི་བྱེ་བྲག་ཏུ་བཤད་པའི་གཞུང་དང་འགལ་ཏེ། གཅིག་གིས་ནི་ཞག་བཅུ་ཙམ་གྱིས་འཆི་བར་འགྱུར་བར་མཚོན་བསྣུན་ལ། གཉིས་པས་ནི་ཞག་དགུས་འཆི་བར་འགྱུར་བར་མཚོན་བསྣུན་པ་ནས། བཅུ་པས་ནི་དེ་ཉིད་ཀྱི་ཉིན་པར་ཤི་བར་མཚོན་བསྣུན་ན་དེའི་ཕྱིར་དགུ་པོ་རྣམས་ཀྱིས་ནི་ཕམ་པའི་རྣམ་པར་རིག་བྱེད་མ་ཡིན་པ་བཟུང་བ་ཡིན་ལ། བཅུ་པས་ནི་ཕམ་པའི་རྣམ་པར་རིག་བྱེད་དང་རྣམ་པར་རིག་བྱེད་མ་ཡིན་པ་ཡང་བཟུང་བ་ཡིན་ནོ་ཞེས་བྱ་བ་ལ་སོགས་པ་འབྱུང་བ་དང་འགལ་ཏེ། འདིར་སྔ་མ་ཤོས་རྣམས་ལ་ནི་

---

^{[མ་དཔེ་གཟིགས་ན་འདིར་གནོན།]}

སྦྱོར་བ་དེ་ཉིད་ཀྱིས་ཞེས་བྱ་བའི་དོན་དེ་མི་སྲིད་པའི་ཕྱིར་དང༌། བཅུ་པ་ཤོས་ཁོ་ན་ལ་སྲིད་པའི་ཕྱིར་ལ། བཅུ་ཆར་གྱིས་ཕམ་པའི་རྣམ་པར་རིག་བྱེད་མ་ཡིན་པར་བསྡུས་སོ་ཞེས་འབྱུང་བ་དང་འགལ་བ་ཡིན་ནོ་ཞེ་ན། འགལ་བ་མེད་དེ། བཅུ་ཆར་གྱི་ཡང་སྦྱོར་བ་མཐུན་པའི་ཕྱིར་དང་འབྲས་བུ་གཅིག་པའི་ཕྱིར་རོ། །གཞན་དག་ན་རེ་དང་པོ་ཉིད་ཀྱིས་ངེས་པར་བྱས་པའི་ཕྱིར་གཉིས་པ་ལ་སོགས་པ་ལ་ནི་ཕམ་པར་མི་རིགས་ཏེ། དང་པོ་པས་ཚེའི་ཚད་ཅི་ཡོད་པ་མེད་པར་བྱས་པ་དེ་ཁོ་ན་ལ་གཉིས་པ་ལ་སོགས་པས་བྱེད་པར་ཟད་དེ། །འདི་ལྟར་རྩ་བའི་བྱེ་བྲག་ཏུ་བཤད་པ་ཉིད་ལས་གང་གི་ཚེ་དབུགས་རྡུ་བ་པ་དང་འབྱུང་བ་ཐ་མར་གྱུར་ཅིང་གནད་དང་འགལ་བའི་ཚོར་བ་ལ་གནས་པ་ན་མཚོན་བསྣུན་ཏེ་དུས་བྱས་ན་དེས་ཕམ་པའི་ལྟུང་བར་མི་འགྱུར་ཏེ། འདི་ལྟར་དེ་ནི་དེ་ཉིད་ཀྱི་ཚེ་འཆི་བས་སོ་ཞེས་ཟེར་རོ། །དེ་ནི་མ་ཡིན་ཏེ། མི་བཅུ་ཆར་ཡང་སྦྱོར་བ་མཚུངས་པ་དང་འདྲ་བར་ཞུགས་པ་ཡིན་ཏེ། དེས་ན་དེ་རྣམས་ལྟུང་བ་མཚུངས་པ་ཡིན་ནོ། །དབུགས་རྒྱུ་བ་ཐ་མར་གྱུར་པ་ནི་འཇིག་པའི་གནས་སྐབས་ཉིད་ཡིན་པའི་ཕྱིར་བྱེད་པ་དོན་མེད་པ་ཉིད་ཡིན་པས་གལ་མཚུངས། བཙུན་པ་ཆོས་དགའ་ན་རེ་ནི་ཡོད་ཡེ་ཚེའི་སྐད་ཅིག་གཅིག་ལུས་པ་ལ་ཡང་གསོད་པ་གང་ཡིན་པ་དེ་ལ་མཐར་འགྱུར་ལ། གཞན་རྣམས་ལ་ནི་སྦོམ་པོར་འགྱུར་རོ་ཞེས་ཟེར་རོ། །ཡང་གང་ཞིག་གསད་པའི་ཕྱིར་མཚོན་བཏབ་ནས་འགྱོད་པར་བྱེད། ཕྱིར་འཆོས་པར་བྱེད་ན་དེ་ལ་མཐར་མི་འགྱུར་རོ་ཞེས་འཆད་པ་ནི་དངོས་གཞིའི་ལས་ཀྱི་ལམ་འཇུག་པར་བྱེད་པའི་སེམས་པ་རྣམ་པར་སྨད་པས་ལོག་པའི་ཕྱིར་རྣམ་པར་རིག་བྱེད་མ་ཡིན་པ་མི་སྐྱེ་བས་སོ། །དེ་བཞིན་དུ་མདོ་ལས། འདུན་པ་བཟློག་པའི་འོག་ཏུ་ཤི་ན་རྒྱུ་མེད་པ་ཡིན་ནོ་ཞེས་འབྱུང་ངོ༌། །གལ་ཏེ་དེ་ལྟ་མ་ཡིན་ན་མ་སྐྱེས་དགྲ་ལ་མཚམས་མེད་པ་འབྱུང་ངོ་ཞེས་པ་དང་འགལ་ཏེ། མ་སྐྱེས་དགྲས་གསོན་པའི་གཏམ་ཞིག་ཡོད་ན་མགུ་བའི་རྫས་སྦྱིན་པར་དམ་བཅས་པ་དང༌། གཟུགས་ཅན་སྙིང་པོ་ཤིན་དུ་བརྟད་པར་འོས་པ་རྣམས་ཀྱི་སྒྲ་ཐོས་པས་ཤི་བར་གྱུར་པའི་ཕྱིར་རོ་ཞེ་ན། འགལ་བ་མེད་དེ་དེ་དུས་ཕྱི་མར་གནས་སྐབས་མི་འདྲ་བ་ལ་སྦྱོར་བ་ནི་ཆུང་བ་ཉིད་ཡིན་པར་འདོད་པའི་ཕྱིར་རོ། །དེ་བཞིན་དུ་མདོ་ལས། སྔོན་གྱི་ཚིགས་སུ་སྦྱོར་བ་བྱས་པ་ནི་ཆུང་བ་ཉིད་ཡིན་ནོ་ཞེས་འབྱུང་སྟེ། དཔེར་ན་སྔོན་གྱི་

---

^{[མ་དཔེ་གཟིགས་ན་འདིར་གནོན།]}

ཚིགས་ཁྱིམ་པ་ཉིད་ཡིན་ལ་སྦྱོར་བ་དེའི་དབང་གིས་དགེ་ཚུལ་ཉིད་ལ་སོགས་པའི་ཚེ། ལས་ཀྱི་ལམ་གང་ཞིག་གྲུབ་ནའོ། །དགེ་ཚུལ་ཉིད་ཀྱིས་སྦྱོར་བ་བྱས་པ་ཙམ་གྱི་དབང་གིས་བསྙེན་པར་རྫོགས་པ་ཉིད་དུ་གྲུབ་ན་ཆུང་བ་ཉིད་ཡིན་ཏེ། སྔ་མའི་ཚིགས་སུ་སྦྱོར་བ་བྱས་པའི་ལས་ཀྱི་ལམ་ཚིགས་ཕྱི་མ་ལ་རྫོགས་ན་ཆུང་བ་ཉིད་ཡིན་ནོ་ཞེས་བྱ་བའི་ཐ་ཚིག་གོ །དེ་བཞིན་དུ་ཡང་གཙུག་ལག་ལས། བསྙེན་པར་མ་རྫོགས་པས་རྐུ་བ་ལ་སྦྱོར་ཞིང༌། བསྙེན་པར་མ་རྫོགས་པ་ན་རྐུ་བར་བྱེད་ན་ཉེས་བྱས་སོ། །བསྙེན་པར་མ་རྫོགས་པས་རྐུ་བ་ལ་སྦྱོར་ཞིང་བསྙེན་པར་རྫོགས་པ་ན་རྐུ་བར་བྱེད་ན་ཉེས་པ་སྦོམ་པོའོ་ཞེས་བྱ་བ་ལ་སོགས་པ་འབྱུང་བ་ཡིན་ནོ། །དེ་ལྟ་བས་ན་རབ་ཏུ་སྡང་བའི་གནས་སྐབས་ལ་སྦྱོར་བ་བྱས་པ་ནི་སྙིང་བརྩེ་བའི་གནས་སྐབས་སུ་ཡོངས་སུ་རྫོགས་ན་ཆུང་བ་ཉིད་ཡིན་པས་མ་སྐྱེས་དགྲ་ལ་མཚམས་མེད་པ་ཆུང་བ་ཉིད་བྱུང་བའི་ཕྱིར་འགལ་བ་མེད་དེ། དཔེར་ན་ཉེས་བྱས་ཆུང་ངུ་ལ་ཉེས་བྱས་ཞེས་བྱ་བ་དེ་བཞིན་དུ་མཚམས་མེད་པ་ཆུང་ངུ་ལ་མཚམས་མེད་པ་ཉིད་ཅེས་བྱའོ། །འོ་ན་གསད་པར་བྱ་བ་ལ་མཚོན་བཏབ་ནས་དེ་དང་ལྷན་ཅིག་གམ། དེ་བས་སྔར་གསོད་པར་བྱེད་པ་ཤི་ན་དེ་ལ་ཇི་ལྟར་འགྱུར། དེ་ལ་ཡང་མཐར་མི་འགྱུར་ཏེ། གསད་པའི་རྣམ་པར་རིག་བྱེད་མ་ཡིན་པ་སྐྱེ་བའི་གནས་སྐབས་ལ་བབ་པ་ན་རིས་མི་འདྲ་བའི་ལུས་སུ་སྐྱེས་པའི་ཕྱིར་རོ། །དེ་ལྟར་ཡང༌། ལྷན་ཅིག་སྔར་ནི་ཤི་བ་ལ། །ལུས་གཞན་སྐྱེས་པས་དངོས་གཞི་མེད། །ཅེས་བསྟན་པ་ཡིན་ནོ། །དེ་བཞིན་དུ་འདུལ་བ་མདོ་ལས། ཚེ་རབས་གཞན་དུ་ལས་ཀྱི་ལམ་སྐྱོ་བ་མེད་དོ་ཞེས་འབྱུང་ངོ༌། །རྨི་ལམ་མ་གཏོགས་ཞེས་བྱ་བ་ནི་རྨི་ལམ་དུ་རྨིས་པ་བོར་ཏེ། ཞེས་བྱ་བའི་ཐ་ཚིག་གོ །འདིར་གཞུང་ནི་འཁྲིག་པ་ལས་བྱུང་བའི་ཆོས་བསྟེན་ན་ཞེས་འབྱུང་བ་ཡིན་ནོ། །རང་གི་མཚན་ཉིད་འཛིན་པའི་ཕྱིར་ཆོས་སོ་ཞེས་བྱ་བ་ལ་སོགས་པ་ཡིན་པས་འདིར་ཆོས་སྨོས་པ་གང་ཡིན་པ་དེས་ན་བཅོམ་ལྡན་འདས་ཀྱིས་རྨི་ལམ་གྱི་འཁྲིག་པ་ལས་བྱུང་བ་ལ་སོགས་པ་ལ་ནི་རང་གི་ངོ་བོ་ཉིད་མེད་པའི་ཕྱིར་ལྟུང་བ་མེད་དོ་ཞེས་གསུངས་པ་ཁོང་དུ་ཆུད་པར་བྱའོ། །གཞན་ཡང་འདི་ཆོས་མ་ཡིན་ཡང་ཆོས་ཀྱི་སྒྲར་གསུངས་སོ་ཞེས་བསྟན་ཏོ། །འཁྲིག་པ་ནི་ཆོས་མ་ཡིན་ཡང་ཆོས་ཀྱི་སྒྲར་བསྟན་པས་རང་གི་མཚན་ཉིད་དུ་ཡོད་པའི་འཁྲིག་པ་

---

^{[མ་དཔེ་གཟིགས་ན་འདིར་གནོན།]}

དགག་པའི་ཕྱིར་རོ་ཞེས་བྱ་བའི་ཐ་ཚིག་གོ །བྱེ་བྲག་ཏུ་བཤད་པ་ལས་ཀྱང་རང་གི་མཚན་ཉིད་འཛིན་པར་བྱེད་པ་ཉིད་ཡིན་པར་རབ་ཏུ་བསྟན་པའི་ཕྱིར་སོ་སོར་ཐར་པ་རྫོགས་ཀྱི་བར་དུ་ཆོས་སྨོས་པ་ཡང་དེའི་དབང་དུ་མཛད་པ་ཡིན་ནོ་ཞེས་བསྟན་ཏོ། །གཞན་ཡང་འདུལ་བ་ལས་འགྱུར་བའི་དགོངས་པ་འདི་ནི་འདོད་པར་བྱ་བ་ཡིན་ཏེ། རྨི་ལམ་མ་གཏོགས་ཏེ་དགེ་འདུན་གྱི་ལྷག་མའོ་ཞེས་གསུངས་པའི་རྟགས་ཡོད་པའི་ཕྱིར་དང༌། རྨི་ལམ་ནི་ཐ་སྙད་གདགས་སུ་མེད་པའི་ཕྱིར་རོ་ཞེས་བསྟན་ཏོ། །འོ་ན་རྨི་ལམ་ལ་དགག་པར་ཇི་ལྟར་འཐད། དགེ་སློང་དང་དགེ་སློང་མའི་སྡོམ་པ་ནི་སྤོང་བ་བདུན་གྱི་མཚན་ཉིད་ཡིན་ལ། དགེ་ཚུལ་ལ་སོགས་པ་དག་གི་ནི་སྤོང་བ་བཞིའི་མཚན་ཉིད་ཡིན་ཞིང༌། རྨི་ལམ་ན་ནི་ལུས་ཀྱི་རྣམ་པ་གསུམ་དང༌། ངག་གི་རྣམ་པ་བཞི་མེད་པ་ཁོ་ན་ཡིན་ཏེ། རྨི་ལམ་ནི་ཡིད་ཀྱི་རྣམ་པར་རྟོག་པ་ཙམ་ཉིད་ཡིན་པའི་ཕྱིར་ལ། ཡིད་ཀྱི་བྱ་བ་ལ་ནི་ལྟུང་བར་ཡང་མི་འདོད་པས་སོ་ཞེ་ན། འདིར་བཤད་པ། གང་ལ་མི་ཉལ་བའི་གནས་སྐབས་བཞིན་དུ་བྱེད་པ་དག་ལ་འཇུག་པའི་རྨི་ལམ་ཁ་ཅིག་ལ་ལུས་དང་ངག་གི་ལས་དག་ཀྱང་ཡོད་དེ། དེ་ལྟ་བུའི་རྨི་ལམ་དེའི་དབང་དུ་མཛད་ནས་རྨི་ལམ་ནི་མ་གཏོགས་སོ་ཞེས་གསུངས་པས་དེའི་ཕྱིར་ཉེས་པ་མེད་དོ། །དེ་ལྟ་ཡིན་ན་ཡང་བཤད་པར་མི་བྱ་བ་ཡིན་ཏེ། རང་བཞིན་དུ་གནས་པ་ཞེས་བྱ་བ་ཉིད་ཀྱིས་གོ་བའི་ཕྱིར་རོ་ཞེ་ན། དེ་ཡང་བདེན་ན་འཇིག་རྟེན་པའི་ལུགས་ཀྱི་དབང་གིས་དེ་སྐད་གསུངས་པ་ཡིན་ཏེ། འདི་ལྟར་འཇིག་རྟེན་ན་ནི་རྨི་ལམ་ན་བྱེད་པའི་སྲོག་ཆགས་དག་ལ་བརྟགས་ནས་སྨྱོས་པའམ། སེམས་འཁྲུག་པའམ། ཚོར་བས་གཟིར་བ་ཡིན་པར་མི་སེམས་སོ། །དེ་བརླག་འགྱུར་ཞེས་བྱ་བ་ནི་དགེ་ཚུལ་ལས་ཕམ་པ་ཡིན་ཏེ། ཏ་ལའི་མགོ་བཅད་པ་དང་འདྲ་བར་ཕྱིས་སྐྱེ་བའི་སྐལ་པ་མེད་པའི་ཕྱིར་རོ། །དེ་ཡང་ཕམ་པ་རྣམས་ལས་དགེ་སློང་ཇི་ལྟ་བ་བཞིན་དུ་དགེ་སློང་མ་དང༌། དགེ་སློབ་མ་དང༌། དགེ་ཚུལ་མ་ཡང་དེ་བཞིན་ནོ་ཞེས་གསུངས་པ་ལས་ཁོང་དུ་ཆུད་པར་བྱའོ། །འོ་ན་འདུལ་བྱེད་ལས་སྡིག་ཅན་དགོན་པ་བས་དགེ་ཚུལ་ལ་ཁྱོད་ལ་བསྙེན་པར་མ་རྫོགས་པ་དང༌། མི་ཆངས་པར་སྤྱོད་པ་བྱས་དང༌། ཁོ་བོ་ལ་ཡང་ལྟུང་བར་མི་འགྱུར་རོ་ཞེས་བྲིད་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་ཚུལ་ལ་ཉེས་བྱས་

---

^{[མ་དཔེ་གཟིགས་ན་འདིར་གནོན།]}

སུ་འགྱུར་ལ། དགེ་ཚུལ་མ་ལ་ཡང་དེ་བཞིན་དུ་འགྱུར་རོ་ཞེས་བྱ་བའི་བར་དུ་གསུངས་པ་ཇི་ལྟ་བུ་ཡིན་ཞེ་ན། འདི་ནི་ཉེས་པ་མེད་དེ། དགེ་ཚུལ་གྱི་ལྟུང་བ་ནི་ཐམས་ཅད་དུ་ཉེས་བྱས་ཁོ་ན་ཡིན་ནོ། །དེ་ཡང་ཡུལ་གྱི་ཁྱད་པར་ལས་ཁ་ཅིག་ཏུ་ནི་ཕམ་པར་འགྱུར་བ་ཡིན་ཏེ། དཔེར་ན་སྲོག་གཅོད་པ་ལ་སོགས་པ་དག་ཏུའོ། །ཁ་ཅིག་ཏུ་ནི་བཤགས་པར་འགྱུར་བ་ཡིན་ཏེ། དཔེར་ན་ཆང་འཐུང་བ་ལ་སོགས་པ་དག་ཏུའོ། །ཡང་ཅིའི་ཕྱིར་བསྙེན་པར་མ་རྫོགས་པའི་ནི་ཐམས་ཅད་དུ་ཉེས་བྱས་སུ་འགྱུར་བའི་ཆད་པ་རྣམ་པར་གཞག་ཅེ་ན། འཕགས་པ་ཉེར་སྦས་ཀྱི་ཞལ་ནས་བསྙེན་པར་རྫོགས་པ་དང་བསྙེན་པར་མ་རྫོགས་པ་གཉིས་ཀྱི་བྱེ་བྲག་བསྟན་པའི་ཕྱིར་རོ་ཞེས་གསུངས་སོ། །འཕགས་པ་ཟླ་བའི་ནོར་བུའི་ཞལ་ནས་ནི་ཚུལ་ཁྲིམས་ཀྱི་ཐ་མར་གྱུར་པ་ཡིན་པའི་ཕྱིར་རོ་ཞེས་གསུངས་སོ། །འདིར་ཡང་བཤད་པ། མི་གསོད་ལ་སོགས་བཞི་རྣམས་ཀྱིས། །དགེ་ཚུལ་ལས་ནི་ཉམས་གྱུར་དང༌། །དགེ་སློང་བཞིན་དུ་དགེ་ཚུལ་ཡང༌། །ཕྱི་ནས་སྡོམ་སྐྱེའི་སྐལ་བ་མེད། །ཆང་འཐུང་ལ་སོགས་དྲུག་པོ་ཡི། །བཤགས་པའི་ཉེས་བྱས་མཐུན་པ་ཡིན། །ཕྱོགས་དང་མཐུན་ལས་འདས་ན་དེའི། །ཉེས་པ་སྨད་བྱ་ཡིན་པར་བཞེད། །ད་ནི་གསོད་པའི་ཡན་ལག་རྣམས་རྣམ་པར་དབྱེ་བར་བྱའོ། །གང་གིས་གསང་སྔགས་ལ་སོགས་ཐབས་རྣམས་སམ། །གསང་པར་སྦྱོར་ལ་ཡི་རང་བས་གསོད་ན། །དེ་ཡང་མཐར་འགྱུར་གསང་པར་སྦྱོར་བ་ལས། །ཡིད་ཀྱིས་ཡི་རང་ན་ནི་ཡིད་ཀྱིར་འགྱུར། །དགེ་ཚུལ་གང་གིས་གསང་སྔགས་ལ་སོགས་པའི་ཐབས་རྣམས་ཀྱིས་གསོད་པར་བྱེད་ན་དེ་ཡང་མཐར་འགྱུར་བ་ཡིན་ཏེ། ཕམ་པར་འགྱུར་བ་ཡིན་ནོ་ཞེས་བྱ་བའི་ཐ་ཚིག་གོ །ཐབས་རྣམས་ཞེས་བྱ་བ་མང་པོའི་ཚིག་སྨོས་པ་ནི་ཐབས་རྣམས་མང་བ་ཉིད་ཡིན་པའི་ཕྱིར་ཏེ། །དཔེར་ན་འདུལ་བྱེད་ལས་དགེ་སློང་གིས་གསད་པའི་སེམས་ཀྱིས་འཇིགས་པ་དང་བཅས་པའི་ཕྱོགས་སུ་བཏང་ལ་དེ་ཡང་ཤི་ན་ཕམ་པར་འགྱུར་རོ་ཞེས་འབྱུང་བ་དང༌། དེ་བཞིན་དུ་རྣམ་པར་འབྱེད་པ་ལས། གཡངས་ལ་སོགས་པ་གསུངས་པ་ལྟ་བུ་ཡིན་ནོ། །འདིར་ཡང་མིའི་ཆེད་དུ་སྦྱོར་བ་བྱས་ལ། གལ་ཏེ་མི་མ་ཡིན་པའམ། དུད་འགྲོའམ། མི་གཞན་འཆི་བར་བྱེད་ན་ཐམས་ཅད་ལ་ཡང་མི་གསད་

---

^{[མ་དཔེ་གཟིགས་ན་འདིར་གནོན།]}

པའི་སྦྱོར་བ་དེ་ཁོ་ན་ལས་ཉེས་པ་སྦོམ་པོར་འགྱུར་བར་རིག་པར་བྱའོ། །མི་མ་ཡིན་པའམ། དུད་འགྲོའམ། མི་གཞན་འཆི་བར་བྱེད་པ་གང་ཡིན་པ་དེ་ནི་དེ་ཁོ་ན་ལས། ལྟུང་བ་མེད་པ་མ་ཡིན་ཏེ། འདི་ལྟར་འཕགས་པ་ཉེར་སྦས་ཀྱིས་གང་ལ་སྦྱོར་བ་བྱས་པ་དེ་ཁོ་ན་ལས་ལྟུང་བར་འགྱུར་བར་འདོད་ཀྱི་གཞན་ལས་ནི་མ་ཡིན་ནོ་ཞེས་གསུངས་པའོ། །གསོད་པར་སྦྱོར་ལ་ཡི་རང་བས། །ཞེས་བྱ་བ་ཡང་གང་གིས་གསོད་ན་ཞེས་བྱ་བ་དང་སྦྱར་ཏེ། གང་གིས་གསད་པའི་སྦྱོར་བ་ལ་མངོན་དུ་ཡི་རང་བས་གསོད་པར་བྱེད་ན་དེ་ཡང་མཐར་འགྱུར་བ་ཡིན་ནོ། །འདིར་གཞུང་ནི་ཉེ་སྡེ་ཁྱོད་ཀྱིས་མངལ་མེད་པར་བྱས་པ་བདེན་ནམ། བཙུན་པ་མ་ལགས་སོ། །འོན་ཀྱང་བདག་གིས་རྗེས་སུ་ཡི་རང་བ་བགྱིས་སོ། །དགེ་སློང་དག་ཉེ་སྡེ་ལ་ནི་ལྟུང་བ་མེད་དེ། ཡང་དགེ་སློང་གིས་མངལ་མེད་པར་བྱ་བ་ལ་རྗེས་སུ་ཡི་རང་བར་མི་བྱའོ། །རྗེས་སུ་ཡི་རང་བར་བྱེད་ན་འགལ་ཚབས་ཅན་དུ་འགྱུར་རོ་ཞེས་བྱ་བའི་བར་དུ་འབྱུང་བ་ཡིན་ནོ། །འགལ་ཆབས་ཞེས་བྱ་བའི་སྒྲ་ནི་འདས་པའི་ཚིག་ཡིན་ཏེ། འདས་པ་དང་བཅས་པར་འགྱུར་རོ་ཞེས་བྱ་བའི་ཐ་ཚིག་གོ །དེའི་ཕྱིར་འདིར་ལུས་སམ་ངག་གིས་རྗེས་སུ་ཡི་རང་བར་བྱེད་ན་ནི་མཐར་འགྱུར་བ་ཡིན་ལ། ཡིད་ཀྱིས་རྗེས་སུ་ཡི་རང་བར་བྱེད་ན་ནི་ཡིད་ཀྱི་བྱ་བ་ཡིན་པར་ཤེས་པར་བྱའོ། །དེ་ཉིད་ཀྱི་ཕྱིར། གསད་པར་སྦྱོར་ལ། ཡིད་ཀྱིས་ཡི་རང་ན་ནི་ཡིད་ཀྱིར་འགྱུར་ཞེས་བྱ་བ་སྨོས་སོ། །ཡིད་ཀྱིས་རྗེས་སུ་ཡི་རང་བ་བྱས་ན་ཡིད་ཀྱིས་བྱས་པའི་ཉེས་བྱས་སུ་འགྱུར་ཏེ། དེ་བསྡམ་པར་བྱ་བའི་ཉེས་བྱས་ཁོ་ནར་འགྱུར་རོ་ཞེས་བྱ་བའི་ཐ་ཚིག་གོ །དེ་ཉིད་ཀྱི་ཕྱིར་ཉེ་སྡེ་ལ་ནི་ལྟུང་བ་མེད་དོ་ཞེས་གསུངས་པ་ཡིན་ཏེ། ཡིད་ཀྱིས་དང་དུ་ལེན་པའི་བདག་ཉིད་ལ་ནི་ལྟུང་བ་རྣམ་པར་གཞག་པ་མེད་པའི་ཕྱིར་རོ། །དེ་བཞིན་དུ་འདུལ་བ་གཅིག་ལས་འཕྲོས་པ་ལས་ཀྱང་ལྟུང་བ་ནི་གཉིས་ཏེ། ལུས་ཀྱི་དང་ངག་གིའོ་ཞེས་གསུངས་པ་ཡིན་ནོ། །གཏམ་གྱི་གཞི་ལས་ཀྱང༌། སེམས་ལས་བྱུང་བ་འབའ་ཞིག་གིས་ནི་ལྟུང་བ་མེད་དོ་ཞེས་གསུངས་པ་ཡིན་ནོ། །འོ་ན་ནི་དགེ་སློང་མའི་རྣམ་པར་འབྱེད་པ་ལས། ཁྱིམ་ཐབ་མི་གནས་པའི་བུད་མེད་ཅིག་ཉོན་མོངས་པས་གཟིར་བ་ན་སྐྱེས་པ་གཞན་ཞིག་དང་ལྷན་ཅིག་འདུག་པ་ལས་དགེ་སློང་མ་ཁྱོད་ཀྱིས་མངལ་མེད་པར་བྱས་

---

^{[མ་དཔེ་གཟིགས་ན་འདིར་གནོན།]}

པ་བདེན་ནམ། བཙུན་པ་བདག་གིས་མངལ་མ་མཆིས་པར་ནི་མ་བགྱིས་སོ། །འོན་ཀྱང་བདག་གིས་དང་དུ་ནི་བླངས་སོ། །བཅོམ་ལྡན་འདས་ཀྱིས་དགེ་སློང་མ་ལ་བཀའ་སྩལ་པ། དགེ་སློང་མས་གནས་ཀྱི་རྣམ་པ་དེ་ལྟ་བུ་ལ་དང་དུ་བླང་བར་མི་བྱའོ། །དང་དུ་ལེན་པར་བྱེད་ན་ནི་ཉེས་པ་སྦོམ་པོར་འགྱུར་རོ་ཞེས་བྱ་བའི་བར་དུ་འབྱུང་བ་དང་འགལ་ལོ། །དེ་ལྟ་བས་ན་འདིར་གལ་ཏེ། ལུས་དང་ངག་གི་རང་བཞིན་གྱི་རྗེས་སུ་ཡི་རང་བ་ཡིན་ན་དེའི་ཚེ་ཕས་ཕམ་པ་ཡིན་པར་འགྱུར་རོ། །འོན་ཏེ་ཡིད་ཀྱི་རང་བཞིན་ན་ནི་དེའི་ཚེ་ཡིད་ཀྱིས་བྱས་པར་འགྱུར་བས་ཉེས་པ་སྦོམ་པོའོ་ཞེས་གསུངས་པ་དང་འགལ་ཏེ། འདིར་ཡིད་ཀྱི་བྱ་བ་ཡིན་པར་ཡང་མི་འཐད་དེ། ཚིག་གིས་འགྲུབ་པའི་དོན་ལ་ཅང་མི་སྨྲ་བས་དང་དུ་བླངས་པས་འགྲུབ་པའི་ཕྱིར་འདིར་ཕམ་པ་ཁོ་ན་ཡིན་པར་འགྱུར་རོ་ཞེ་ན། དེ་ནི་འགལ་བ་མེད་དེ་དང་དུ་བླངས་པ་ནི་རྣམ་པ་གཉིས་ཏེ། རང་ཉིད་བྱེད་པར་སྨྲ་བ་དང་དུ་ལེན་པ་དང༌། སྣང་བ་གསོལ་བ་དང་དུ་ལེན་པའོ། །དེ་བས་ན་འདིར་དེ་ནི་རང་ཉིད་བྱེད་པར་སྨྲ་བ་ལ་དང་དུ་ལེན་པ་ཡིན་གྱི། གནང་བ་གསོལ་བ་དང་དུ་ལེན་པ་ནི་མ་ཡིན་ནོ། །བསྐོ་བ་པོ་མ་ཡིན་པའི་ཕྱིར་ཅང་མི་སྨྲ་བས་དང་དུ་ལེན་པ་གོ་བར་བྱེད་པ་ཡིན་དུ་ཟིན་ཀྱང་འདིར་ཕམ་པར་རྣམ་པར་མི་གཞག་སྟེ། སེམས་ལ་དེ་བྱེད་པ་ནི་ལེགས་ན་བདག་གིས་ནི་དེ་མི་བྱ་ཞིང་བྱེད་དུ་ཡང་མི་གཞུག་གོ་སྙམ་དུ་སེམས་ཤིང༌། གལ་ཏེ་དེས་བྱེད་དམ་མི་བྱེད་ཀྱང་རུང་བདག་ལ་འདིས་ནི་ཅི་ཞིག་བྱ་སྙམ་དུ་སེམས་པའི་ཕྱིར་ཕམ་པར་འགྱུར་བའི་སྐབས་ནི་མེད། །ཡིད་ཀྱིས་དང་དུ་བླངས་པ་ཡོད་པའི་ཕྱིར་ཡིད་ཀྱིས་རྣམ་པར་གཞག་སྟེ། འགལ་ཚབས་ཅན་གྱི་སྒྲ་དང་ཉེས་པ་སྡོམ་པོའི་ཚིག་ཀྱང་ཉེས་པ་མང་པོ་འཕེལ་བ་ལ་ནི་ཡིད་ཀྱིས་བསྒྲུབ་པར་བྱ་བ་ཡོད་དོ། །དེ་ལྟ་བས་ན་ཉེས་པ་མང་པོའི་ཚིག་ལ་འདིར་ཉེས་པ་སྦོམ་པོ་ཞེས་བསྟན་པ་ཡིན་ཏེ། དེ་བཞིན་དུ་སྦོམ་པོའི་སྒྲ་གཞན་ལ་ཡང་མཚན་ཉིད་ཇི་ལྟ་བ་བཞིན་དུ་བརྟག་པར་བྱའོ། །དཔེར་ན་འདུལ་བྱེད་ལས་དགེ་སློང་ཡོ་བྱད་མང་པོ་ཞིག་ན་བ་དང༌། དེའི་ནད་གཡོག་གིས་ཤིན་དགེ་འདུན་ལ་ནོར་རྫས་བགོར་ཡོད་པས་འདི་ལ་རིམ་གྲོ་མི་བྱ་བའོ་ཞེས་བསམས་བསམས་ནས་དེས་དེའི་རིམ་གྲོ་མ་བྱས་ཏེ་ཤི་ནས་དེ་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ཕམ་པའི་ལྟུང་བ་ནི་མེད་དེ། ཉེས་པ་སྦོམ་པོར་

---

^{[མ་དཔེ་གཟིགས་ན་འདིར་གནོན།]}

འགྱུར་རོ་ཞེས་བྱ་བ་ལ་སོགས་པ་གསུངས་པ་ལྟ་བུ་ཡིན་ནོ། །དེ་ལྟ་བས་ན་ཉེས་པ་སྦོམ་པོ་ཞེས་བྱ་བའི་སྒྲ་ནི་རྣམ་པ་གཉིས་སུ་སྟོན་ཏེ། མིང་དུ་ཆགས་པའི་སྒྲ་དང༌། ཡོན་ཏན་གྱི་སྒྲའོ། །དེ་ལ་མིང་དུ་ཆགས་པའི་སྒྲ་ནི་ཉེས་པ་ཆུང་ངུ་ཞེས་བྱ་བ་ཡིན་ནོ། །ཡོན་ཏན་གྱི་སྒྲ་ནི་ཉེས་པ་མང་པོ་ཞེས་བྱ་བ་ཡིན་ནོ། །འོ་ན་རྣམ་པར་འབྱེད་པ་ལས། ཉེས་པ་སྦོམ་པོ་ནི་གཉིས་ཏེ་ཕམ་པ་ལས་བྱུང་བ་དང༌། དགེ་འདུན་ལྷག་མ་ལས་བྱུང་བའོ་ཞེས་གསུངས་པ་ཇི་ལྟ་བུ་ཡིན་ཞེ་ན། དེ་ནི་ཉེས་པ་མེད་དེ། ཉེས་པ་སྦོམ་པོ་གཉིས་ཆུང་བའི་ཚིག་ཡིན་པར་དགོངས་པའི་ཕྱིར་རོ། །དེ་བཞིན་བདག་ཉིད་དུད་འགྲོར་མཐུན་པ་ཡི། །གཟུགས་སུ་བསྒྱུར་ནས་སེམས་ཅན་གསོད་བྱེད་ལ། །སྡོམ་བརྩོན་སྡོམ་བརྩོན་ཉིད་དུ་འདུ་ཤེས་ན། །དངོས་གཞིའོ་མིན་ན་ལྟུང་བ་ཆུང་དང་ལྡན། །བདག་ཉིད་སྨིན་ལ་སོགས་པས་སྟག་ལ་སོགས་པའི་གཟུགས་གང་ཡིན་པར་བསྒྱུར་ཏེ། མི་གསོད་པར་བྱེད་ལ། གལ་ཏེ་བདག་དགེ་ཚུལ་ཡིན་ན་བྱ་བ་མ་ཡིན་པ་ཞིག་བྱེད་དོ་སྙམ་དུ་དགེ་སློང་གི་འདུ་ཤེས་བྱུང་ན་དེ་མཐར་འགྱུར་རོ། །གལ་ཏེ་མ་ཡིན་ན་ལྟུང་བ་ཆུང་ངུ་ཁོ་ནར་འགྱུར་རོ། །འདིར་གཞུང་ནི་ཞུས་པ་ལས། བཙུན་པ་དགེ་སློང་གིས་བདག་ཉིད་དུད་འགྲོའི་སྐྱེ་གནས་སུ་གྱུར་པར་བསྒྱུར་ཏེ། མིའི་སྲོག་དང་ཕྲལ་ན་ཅིར་འགྱུར་ལགས། བཀའ་སྩལ་པ། གལ་ཏེ་བདག་ནི་དགེ་སློང་ཡིན་ན་བྱ་བ་མ་ཡིན་པ་བྱེད་དོ་སྙམ་དུ་དགེ་སློང་གི་འདུ་ཤེས་བྱུང་ན་མཐར་འགྱུར་རོ། །གལ་ཏེ་དགེ་སློང་གི་འདུ་ཤེས་མ་བྱུང་ན་ཉེས་པ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ། །འདིར་གཞུང་ཡང༌། རྨི་ལམ་བསླབ་པ་མེད་དམ་གསད་པ་ཡི། །བསམ་པ་མེད་དམ་སྨྱོས་པས་གལ་ཏེ་གསོད། །དེ་ནི་ལྟུང་བར་མི་འགྱུར་བསྡམ་བྱ་ཡིན། །གསོད་པའི་ཡན་ལག་ལྷག་མ་མ་ཚང་ན། །ལྟུང་ཆུང༌། རྨི་ལམ་མ་ཡིན་པ་ཉིད་དང༌། བསླབ་པ་མ་བཏང་བ་ཉིད་དང༌། གསད་པའི་བསམ་པ་ཉིད་དང༌། རང་བཞིན་དུ་གནས་པ་ཉིད་ཅེས་བྱ་བ་བཞི་པོ་འདི་རྣམས་ལས་གང་ཡང་རུང་བ་ཞིག་མ་ཚང་ན་ལྟུང་བ་མེད་དེ་བསྡམ་པར་བྱ་བར་ནི་མི་འགྱུར་རོ། །ཡན་ལག་ལྷག་མ་དྲུག་པོ་དག །འདི་ལྟ་སྟེ། མི་ཉིད་དང༌། གཞན་ཉིད་དང༌། དེར་འདུ་ཤེས་པ་ཉིད་དང༌། མ་ནོར་བ་ཉིད་དང༌། སྦྱོར་བ་ཉིད་དང༌། ཤི་བ་ཉིད་དེ་གསོད་པའི་ཡན་ལག་དྲུག་པོ་དེ་རྣམས་ལས་གཅིག་ཅིག་མེད་ན་ཡང་

---

^{[མ་དཔེ་གཟིགས་ན་འདིར་གནོན།]}

ལྟུང་བ་ཆུང་བ་ཁོ་ན་ཡིན་ཏེ། ཡན་ལག་ཐམས་ཅད་འདུས་ན་ནི་རྫོགས་པ་ཡིན་ནོ་ཞེས་བྱ་བར་གྲུབ་པ་ཡིན་ནོ། །ཁ་ཅིག་ན་རེ་གསོད་པའི་ཡན་ལག་རྣམས་སུ་ནི་ཐེ་ཚོམ་མེད་པ་ཉིད་ཅེས་བྱ་བའི་ཚིག་གིས་ཁ་བསྐང་བར་བྱ་བ་ཡིན་ཏེ། འདིར་གཞུང་ནི་ཞུས་པ་ལས། བཙུན་པ་དགེ་སློང་གིས་འདི་བདག་གི་ཡིན་ནམ་མ་ཡིན་སྙམ་དུ་ཐེ་ཚོམ་འཚལ་བ་ལས་དེ་ཡང་མ་ལགས་ལ། དེ་ལ་གསོད་པར་བགྱིད་ན་ཅིར་འགྱུར་ལགས། བཀའ་སྩལ་པ། ལྟུང་བ་སྦོམ་པོར་འགྱུར་ཏེ། མཚམས་མེད་པར་ནི་མི་འགྱུར་རོ་ཞེས་འབྱུང་བ་ཡིན་ནོ་ཞེ་ན། ཚིག་གི་ཁ་བསྐང་བར་མི་བྱ་སྟེ། འདི་ལྟར་གསད་པར་བྱ་བའམ། གསད་པར་མི་བྱ་སྙམ་པའི་བསམ་པ་སྔར་ཡོད་ཀྱང་གསོད་པའི་ཚེ་གདོན་མི་ཟ་བར་སུ་ཡིན་པ་ཞེས་ངེས་པ་སྐྱེའོ། །དེ་ལྟ་མ་ཡིན་ན་བསད་པ་ཉིད་དུ་མི་འགྱུར་རོ། །ལས་ཐམས་ཅད་ལ་གདོན་མི་ཟ་བར་འཇུག་པའི་སེམས་པ་ནི་གསུམ་སྟེ། དཔྱོད་པ་དང༌། ངེས་པ་དང༌། གཡོ་བར་བྱེད་པའོ། །རེ་ཞིག་ཐོག་མར་ནི་ཅི་བྱའམ་འོན་ཏེ་མི་བྱ་སྙམ་དུ་དཔྱོད་པ་སྐྱེའོ། །དེ་ནས་བྱའོ་ཞེས་ངེས་པ་སྐྱེའོ། །དེ་ནས་གཡོ་བར་བྱེད་པ་སྐྱེ་སྟེ། དེས་ནི་ལུས་གཡོ་བར་བྱེད་དོ། །དེ་བས་ན་དོན་དེ་ནི་དྲང་བར་བྱ་བ་ཡིན་ནོ། །འདི་ལྟར་དྲང་བར་བྱ་བ་ཡིན་ཏེ། གསད་པར་བྱའོ་ཞེས་བྱ་བ་འདིས་དངོས་གཞིའི་ལས་ཀྱི་ལམ་དང༌། ལས་ཀྱི་ལམ་གྱི་སྦྱོར་བ་བསྟན་ཏོ། །དེ་ལྟ་བས་ན་འདིར་ལས་ཀྱི་ལམ་གྱི་སྦྱོར་བའི་དབང་དུ་མཛད་ནས་ཞུས་པ་ལས་ལྟུང་བ་སྦོམ་པོར་འགྱུར་ཏེ། མཚམས་མེད་པར་མི་འགྱུར་རོ་ཞེས་གསུངས་པའི་ལན་རིགས་པ་ཡིན་ནོ། །དེ་ལྟར་བྱས་ན་འདུལ་བྱེད་ཀྱི་གཞུང་ལས་བཙུན་པ་དགེ་སློང་གིས་མ་བསད་དམ་མི་གསད་སྙམ་དུ་ཐེ་ཚོམ་འཚལ་བ་ལས་དེ་ལ་འགུམས་པར་བགྱིད་ན་ཅིར་འགྱུར་ལགས། བཀའ་སྩལ་པ། ཕམ་པར་འགྱུར་རོ་ཞེས་འབྱུང་བ་དང་ཡང་མི་འགལ་བར་བྱས་པ་ཡིན་ནོ། །འདིར་གསོད་པའི་སྒྲས་ནི་དངོས་གཞིའི་ལས་ཀྱི་ལམ་བསྟན་ཏོ། །འོ་ན་ཡང་ལས་དང་པོ་པ་མ་ཡིན་པ་ཡང་སྨོས་པར་བྱ་བ་ཡིན་ནོ་ཞེ་ན། སྨོས་པར་མི་བྱ་སྟེ། ད་ལྟར་ལས་དང་པོ་བ་མི་སྲིད་པའི་ཕྱིར་རོ། །འོ་ན་ལྟ་ཞིག་དེའི་ཚེ་ཡང་ལས་དང་པོ་བ་མི་སྲིད་པ་ཉིད་ཡིན་ཏེ། བཅོམ་ལྡན་འདས་ཀྱིས་ནི་བྱང་ཆུབ་ཀྱི་ཤིང་དྲུང་དུ་ཐོ་རངས་ཉོན་མོངས་པའི་བདུད་བཏུལ་ནས་ཚུལ་ཁྲིམས་དང༌། ཏིང་ངེ་འཛིན་

---

^{[མ་དཔེ་གཟིགས་ན་འདིར་གནོན།]}

དང་ཤེས་རབ་ཀྱི་ཕུང་པོ་གསུམ་ཚང་བར་བཅས་པ་དང༌། རྣམ་པར་འབྱེད་པ་ལས་ཀྱང༌། ད་ལྟར་ཡང་བཅོམ་ལྡན་འདས་ཀྱིས་ཚིགས་སུ་བཅད་པ་གཉིས་ཀྱིས་སོ་སོར་ཐར་པ་བསྟན་ཏོ་ཞེས་གསུངས་པས་ཤེ་ན། འཕགས་པ་ཉེར་སྦས་ཀྱི་ཞལ་ནས་ཆད་པ་བཅའ་བ་ལས་དགོངས་ནས་གསུངས་པའི་ཕྱིར་རོ་ཞེས་གསུངས་ཏེ། ཆད་པ་བཅའ་བའི་རིམ་པའི་ངོ་བོ་ཁོ་ན་ཡིན་པའི་ཕྱིར་ཞེ་ན། དགེ་ཚུལ་གྱི་བསླབ་པའི་རིམ་པ་ལས་བཟློག་ནས་འདུལ་བ་ལས་རིམ་པ་གཞན་དུ་བསྟན་ཏོ། །གསོད་པ་ལས་བྱུང་བའི་ལྷག་མ་མེད་པའི་ལྟུང་བ་བཤད་ཟིན་ཏོ། །ལྷག་མ་དང་བཅས་པ་བསྟན་པར་བྱ་སྟེ། དེ་བཤད་པ། འཁྲུལ་མེད་སྲོག་ཆགས་གསད་བསམས་པས། །རིགས་གཞན་གསད་པ་ལས་ནི་ཉེས་བྱས་འགྱུར། །མ་བརྟགས་པ་ཡི་ཆུ་བུམ་བརྙས་པ་ལས། །སྦྱིན་པར་གྱུར་ཀྱང་ཉེས་པ་མེད་པ་ཡིན། །དེ་ཁོ་ན་ཡིན་གྱི་འདྲ་བར་མ་འཁྲུལ་པ་དང༌། གསང་བའི་བསམ་པ་ཁོ་ནས་མིའི་རིགས་ལས་རིགས་གཞན་ཏེ། དུད་འགྲོ་དང་ཡི་དགས་ལ་སོགས་པའོ། །དེ་ལ་སྲོག་ཆགས་ཀྱི་བློས་མི་མ་ཡིན་པ་བསད་ན་ཉེས་བྱས་སུ་འགྱུར་རོ། །དེ་ལྟར་ན་འཁྲུལ་པ་མེད་པ་དང༌། བསད་པའི་བསམ་པ་དང༌། རིགས་གཞན་ཉིད་དང༌། སྲོག་ཆགས་སུ་འདུ་ཤེས་པ་ཉིད་དང༌། གསད་པ་ཉིད་དེ། ཉེས་བྱས་ཀྱི་ཡན་ལག་ནི་ལྔ་པོ་འདི་དག་ཡིན་ནོ། །གང་ན་དེ་དག་མེད་པ་དེ་ན་ནི་ལྟུང་བ་མེད་དོ། །དེ་ཉིད་ཀྱི་ཕྱིར་མ་བརྟགས་པའི་ཆུའི་བུམ་པ་སློང་བ་དག་ལ་བྱིན་ན་ཡང་འགལ་བར་མི་འགྱུར་རོ་ཞེས་སྟོན་པ་ཡིན་ནོ། །ཉེས་བྱས་ཀྱི་ཡན་ལག་རྣམས་ཚང་ན་ཇི་ལྟར་རིགས་པར་ལྟུང་བར་འགྱུར་བར་རིག་པར་བྱའོ། །གང་གིས་སྲོག་ཆགས་བཅས་ཆུ་ལ་སོགས་སྤྱོད། །ཡང་ན་ཆུ་ཚན་ལ་སོགས་ལྡུགས་བྱེད་ལ། །བལྟར་ཡོད་སྐྱེ་བོ་ཤི་ན་དེ་ལ་ནི། །སྲོག་ཆགས་རེ་རེའི་ལྟུང་བ་ལྕི་བ་འབྱུང༌། །གང་གིས་སྲོག་ཆགས་དང་བཅས་པའི་ཆུ་དང་རྩ་བ་མོ་ལ་སོགས་པ་སྤྱོད་དམ། ཁུ་བ་ཚ་བ་ལ་སོགས་པ་དག་ལྡུགས་པར་བྱེད་ན་སྡོམ་བརྩོན་དེ་ལ་ནི་སྲོག་ཆགས་རེ་རེ་སྟེ་སྲོག་ཆགས་མིག་གིས་གཟུང་དུ་ཡོད་པ་དེ་དག་ཇི་སྙེད་ཤི་ན་དེ་སྙེད་ཁོ་ནའི་ཉེས་བྱས་ངག་ཏུ་འགྱུར་རོ། །ཞུས་པ་ལས། བཙུན་པ་དགེ་སློང་གིས་སྲོག་ཆགས་དང་བཅས་པའི་ཆབ་གཞག་སྟེ་སྲོག་ཆགས་དང་བཅས་པ་གཞན་དག་སྤྱོད་

---

^{[མ་དཔེ་གཟིགས་ན་འདིར་གནོན།]}

པར་བགྱིད་ན་ཅིར་འགྱུར་ལགས། བཀའ་སྩལ་པ། སྲོག་ཆགས་ཇི་སྙེད་སྲོག་དང་བྲལ་བ་དེ་སྙེད་ཀྱི་ལྟུང་བྱེད་དུ་འགྱུར་རོ་ཞེས་བྱ་བ་ལ་སོགས་པའི་བར་དུ་འབྱུང་བ་ཡིན་ནོ། །རྣམ་པར་འབྱེད་པ་ལས་ཀྱང༌། སྲོག་ཆགས་དང་བཅས་པའི་ཡུར་བ་ཕོ་ན། སྲོག་ཆགས་ཇི་སྙེད་ཤི་བ་དེ་སྙེད་ཀྱི་ལྟུང་བྱེད་དུ་འགྱུར་ལ། སྲོག་ཆགས་ཇི་སྙེད་པ་དུས་མ་བྱས་པ་དེ་སྙེད་ཀྱི་ནི་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །ལྟུང་བ་དེ་དག་ལྕི་བ་ནི་སྲོག་ཆགས་གསོད་པ་ནི་ཁ་ན་མ་ཐོབ་དང་བཅས་པ་ཆེན་པོ་ཡིན་པའི་ཕྱིར་རོ། །བལྟར་ཡོད་ཅེས་བྱ་བ་འདི་ག་ལས་འབྱུང་ཞེ་ན། ཕྲན་ཚེགས་ལས། བཙུན་པ་ཆབ་བཙགས་པ་མ་བརྟགས་པར་འཚལ་དུ་རུང་ངམ་ཉེ་བ་འཁོར་མི་རུང་ངོ༌། །བཙུན་པ་མ་བཙགས་པ་བརྟགས་ན་འཚལ་དུ་རུང་ངམ། ཉེ་བ་འཁོར་རུང་ངོ་ཞེས་གསུངས་པ་ཡིན་ཏེ། འདི་ལྟར་ཡོད་པ་ཁོ་ན་ལ་བརྟེན་པར་བྱ་བའི་ཕྱིར་རོ། །ཡང་ཅིའི་ཕྱིར་བལྟར་ཡོད་པ་ཁོ་ན་ལ་བརྟེན་པར་བྱའི། ཆུ་ཚགས་ལ་ནི་མ་ཡིན་ཞེ་ན། སྲོག་ཆགས་ཕྲ་མོ་ཁ་ཅིག་བལྟར་ཡོད་དུ་ཟིན་ཀྱང་ཆུ་ཚགས་ཀྱིས་གཟུང་དུ་མེད་པའི་ཕྱིར་རོ། །དེ་བཞིན་དུ་རྣམ་པར་འབྱེད་པ་ལས་ཀྱང༌། སྲོག་ཆགས་དག་ནི་རྣམ་པ་གཉིས་ཏེ། གང་དག་མིག་ལ་སྣང་བར་འགྱུར་བ་དང༌། གང་དག་ཆགས་ཀྱིས་གཟུང་དུ་ཡོད་པའོ་ཞེས་གསུངས་པ་ཡིན་ནོ། །དེ་ལྟ་བས་ན་མཐོང་བ་ཁོ་ན་ལ་བརྟེན་པ་ཡིན་གྱི་ཚགས་ལ་ནི་མ་ཡིན་ནོ། །ཐ་མལ་པ་ཡི་མིག་ནི་ནད་མེད་པས། །ཆུ་མི་གཡོ་ཞིང་རྙོག་པ་མེད་ལ་བརྟག །བུམ་པ་གང་བ་བརྟག་བྱ་ཀ་ཏ་ཀ །རྣམས་ཀྱིས་ཆུ་རྡུལ་ཅན་དག་དང་བར་བྱ། །ཤའི་མིག་ཉིད་རབ་རིབ་ལ་སོགས་པས་ཉམས་པར་མ་གྱུར་པས་ཆུ་མི་གཡོ་ཞིང་རྙོག་པ་མེད་པ་ལ་བརྟག་པར་བྱའི་ལྷའི་མིག་གིས་ནི་མ་ཡིན་ནོ། །འདིར་གཞུང་ནི་ཕྲན་ཚེགས་ལས། ཚེ་དང་ལྡན་པ་མ་འགགས་པས། ལྷའི་མིག་གིས་ཆུ་བརྟགས་ན་དེ་ན་སྲིད་པ་བར་མ་ངོ་བའི་སྲོག་ཆགས་རྣམས་ཀྱིས་གང་བ་དང༌། བཅོམ་ལྡན་འདས་ཀྱིས་བཀའ་སྩལ་པ། ལྷའི་མིག་ནི་ཐ་སྙད་དུ་བརྗོད་དུ་མེད་པས་དེའི་ཕྱིར་ལྷའི་མིག་གིས་ཆུ་བརྟག་པར་མི་བྱའོ། །ཞེས་བྱ་བའི་བར་དུ་འབྱུང་བ་ཡིན་ནོ། །སྣོད་གང་དུ་བརྟག་པར་བྱ་བ་དེ་ནི་དོན་གྱིས་སྨོས་པར་རིག་པར་བྱའོ། །བུམ་པ་དག་ལ་ཁྱད་པར་ཡོད་དེ། དེ་ནི་གང་ལ་ཁོ་ན་ལ་བརྟག་པར་བྱའི་མ་གང་བར་ནི་མ་ཡིན་ནོ། །ཕྲན་ཚིགས་ལས་ཀྱང༌། དེ་དག་བུམ་པ་མ་

---

^{[མ་དཔེ་གཟིགས་ན་འདིར་གནོན།]}

གང་བ་ལ་རྟོག་པར་བྱེད་པ་ན་སྲོག་ཆགས་རྣམས་མི་རྟོགས་སོ། །བཅོམ་ལྡན་འདས་ཀྱིས་བཀའ་སྩལ་པ། བུམ་པ་གང་བ་ལ་བརྟག་པར་བྱའོ་ཞེས་གསུངས་པ་ཡིན་ནོ། །གལ་ཏེ་ཆུ་དེ་རྡུལ་ཅན་ཡིན་ན་ཤིང་ཏོག་ཀ་ཏ་ཀ་ལ་སོགས་པས་དང་བར་བྱའོ། །ཀ་ཏ་ཀ་རྣམས་ཀྱིས་ཞེས་མང་པོའི་ཚིག་ཏུ་སྨོས་པ་ནི་ནས་ཕྱེའི་ཟན་འབྲུ་མར་གྱིས་བསྐུས་པ་ལ་སོགས་པ་བསྡུ་བའི་ཕྱིར་རོ། །ཇི་སྲིད་འདི་ལ་ཡིད་ནི་དག་གྱུར་ན། །དེ་སྲིད་བརྟག་བྱ་རིང་མིན་ཐུང་ངུ་མིན། །སྟེང་དུའང་དེ་བཞིན་ཡང་དང་ཡང་དུ་མིན། །གློ་བུར་པ་ཡིས་སྲོག་ཆགས་བཅས་ཏེ་མིན། །དུས་ཇི་སྲིད་དུ་སེམས་དག་པར་འགྱུར་བའི་དུས་དེ་སྲིད་དུ་བརྟག་པར་བྱའི་ཡུན་རིང་དུ་ཡང་མ་ཡིན་ལ། ཡུན་ཐུང་ངུ་ཡང་མ་ཡིན་ཞིང་ཡང་དང་ཡང་དུ་བརྟག་པར་མི་བྱའོ། །སྟེང་དུ་ཡང་དེ་བཞིན་ནོ། །སྦྲང་བུ་དང་སྦྲང་བུ་མཆུ་རིངས་ལ་སོགས་པ་གང་དག་ཆུའི་སྟེང་ན་འཁྱམ་པ་དེ་དག་ནི་ཆུ་ན་གནས་པ་མ་ཡིན་པས་དེ་དག་བསལ་ཏེ། དེ་དག་དང་མཐུན་པའི་གནས་སུ་གཞག་པར་བྱའོ། །གྲོག་སྦུར་ལ་སོགས་པ་གློ་བུར་བས་ཀྱང་ཆུ་དེ་སྲོག་ཆགས་དང་བཅས་པ་ཡིན་པར་མི་བརྩིའོ། །དེ་བཞིན་ཁྲོན་པ་དག་དང་ཆུ་རའི་ཆུ། །ལན་ཅིག་བརྟགས་ནས་ཉི་མ་ཤར་བར་དུ། །ཐེ་ཚོམ་མེད་པར་སྤྱད་པར་རུང་བ་ཡིན། །དེ་ཡི་ཉེན་འཁོར་འདོམ་གང་འཁོར་ཡུག་གོ །ཁྲོན་པ་དང་བུམ་པ་ལ་སོགས་པའི་ཆུ་ལན་ཅིག་བརྟགས་པ་ནི་ཇི་སྲིད་དུ་ཕྱི་དེ་ཉིན་པར་གྱི་ཉི་མ་ཤར་བའི་བར་དེ་སྲིད་དུ་ཐེ་ཚོམ་མེད་པར་སྤྱད་པར་བྱ་བར་རུང་བ་ཡིན་ནོ། །དེ་ཕྱིན་ཆད་ནི་མི་རུང་ངོ༌། །ཆུའི་ཆ་བརྟག་པའི་ཉེ་འཁོར་ནི་འདོམ་གང་འཁོར་ཡུག་ཡིན་པར་བཤད་དོ། ཁྲོན་པ་སོགས་གཙང་ཆུ་ཚགས་དམ་ལ་སོགས། །དགེ་སློང་དགེ་འདུན་དེ་བཞིན་ཡིད་ཆེས་པས། ལྔ་ཆར་རུང་བའི་ཆུ་ཡིན་བླང་བར་བྱ། །ཆུ་ཚགས་མེད་པ་དག་ཏུ་མི་བྱའོ། །ཆུ་བླང་བར་རུང་བ་ནི་ལྔར་བསྟེན་ཏེ། ཁྲོན་པས་རུང་བ་དང་སྟེ། བརྟགས་པས་གཙང་བའོ། །ཆུ་ཚགས་ཀྱིས་རུང་བ་དང་སྟེ་ཆུ་ཚགས་དམ་པོ་ནི་སྲོག་ཆགས་འཛིན་པའི་ཕྱིར་རོ། །དགེ་སློང་གིས་རུང་བ་དང་སྟེ། འདི་ནི་བསླབ་པ་འདོད་པའོ་ཞེས་དེ་ལ་ཡིད་ཆེས་པའི་ཕྱིར་རོ། །དགེ་འདུན་གྱིས་རུང་བ་དང་སྟེ། དགེ་འདུན་ནི་ཆུ་མ་བཙགས་པར་མི་སྤྱོད་པའི་ཕྱིར་རོ། །ཡིད་ཆེས་པས་རུང་བ་ནི་བཀོད་མའི་རུང་བ་དང་སྟེ། བཀོད་མ་

---

^{[མ་དཔེ་གཟིགས་ན་འདིར་གནོན།]}

ནི་ཆུ་མིག་ཅེས་བྱ་སྟེ། དེ་ལ་སྲོག་ཆགས་མེད་དོ་སྙམ་དུ་ཡིད་ཆེས་པའི་དབང་གིས་སོ། །ཉིན་ཞག་གཅིག་རུང་བ་ཡང་ཡིད་ཆེས་པས་རུང་བ་ཉིད་ཡིན་ཏེ། བརྟགས་པ་ནི་སྲོག་ཆགས་མེད་དོ་སྙམ་དུ་ཡིད་ཆེས་པ་འཇུག་པའི་ཕྱིར་ཏེ། དེ་ནི་སྔར་ཉི་མ་ཤར་གྱི་བར་དུ་ཞེས་བྱ་བ་འདིས་བསྟན་ཏོ། །འདིར་གཞུང་ནི་ཆུ་རུང་བ་ནི་ལྔ་དག་སྟེ། ཁྲོན་པས་རུང་བ་དང༌། ཆུ་ཚགས་ཀྱིས་རུང་བ་དང༌། དགེ་སློང་གིས་རུང་བ་དང་དགེ་འདུན་གྱིས་རུང་བ་དང༌། ཉིན་ཞག་གཅིག་རུང་བ་དང་ཞེས་བྱ་བ་དང༌། འདིར་ཡང་གཞུང་ཕྲན་ཚེགས་ལས། ལྔ་པ་བཀོད་མའི་རུང་བའོ་ཞེས་བསྟན་པ་ཡིན་ནོ། །ཆུ་ཚགས་དང་བྲལ་བ་ཉིད་དུ་ན་མ་ཡང་མི་བྱའོ།། །།བམ་པོ་གཉིས་པ། གང་ཞིག་ཆུ་ཚགས་རིལ་ཚགས་གྲུ་གསུམ་དང༌། །སྦྱངས་ཚགས་རིལ་བ་ཞབས་ཚགས་ཅན་དག་གམ། །བསལ་ཆགས་དག་ཀྱང་བོར་ཏེ་འགྲོ་བྱེད་ན། །དེ་ལ་ཡིད་ཀྱིས་བྱ་བའི་ཉེས་བྱས་འགྱུར། །ཐ་ན་ཆུ་ཚགས་གཅིག་ཙམ་ཡང་ཁྱེར་ཏེ་འགྲོ་བར་བྱའོ། །དགེ་ཚུལ་གང་ཞིག་ཆུ་ཚགས་མཁྱེར་བར་འགྲོ་ན་དེ་ལ་བསྡམ་པར་བྱ་བའི་ཁ་ན་མ་ཐོ་བར་འགྱུར་རོ། །ཆུ་ཚགས་ཀྱང་རྣམ་པ་ལྔ་སྟེ། དེ་ལ་ཆུ་ཚགས་རིལ་ཚགས་ནི་ཟླུམ་པོ་ཁ་གཉིས་པའོ། །གྲུ་གསུམ་ནི་གྲྭ་གྲུ་གསུམ་ཡོད་པའོ། །སྦྱངས་ཚགས་ཞེས་བྱ་བ་ནི་ཆུ་ཚགས་ཡུ་བ་ཡོད་པའོ།། རིལ་བ་ཞབས་ཚགས་ཅན་ནི་རིལ་བའི་ཞབས་སུ་ཚགས་བྱས་པའོ། །བསལ་ཚགས་ནི་གོས་ཀྱི་དུམ་བུའོ། །མིང་གསུམ་པོ་ནི་གོས་ཀྱི་ཐ་མ་ཞེས་བྱ་སྟེ། གོས་ཀྱི་ཐ་མ་ཉིད་ཀྱིས་ནི་བུམ་ཚགས་གཅེ་འུ་ཅན་ཡང་བསྟན་པར་རིག་པར་བྱའོ། །གལ་ཏེ་སོང་ན་བསལ་ཚགས་ལ་སོགས་ཡོད། །དེ་ཚེ་རྒྱང་གྲགས་ལྔར་ནི་ཆུ་ཚགས་དག །མེད་པར་འགྲོ་བྱ་གལ་ཏེ་མེད་ན་ཡང༌། །དེ་སླར་འོང་འདོད་དཔག་ཚད་ཕྱེད་འགྲོ་བྱ། །གལ་ཏེ་དེར་སོང་ན་ཆུ་ཚགས་རྙེད་ན་དེའི་ཚེ་རྒྱང་གྲགས་ལྔ་ཁོ་ནར་འགྲོ་བར་བྱའོ། །དེ་ལས་ཕན་ཆད་དུ་ནི་མ་ཡིན་ནོ། །ཇི་སྟེ་ཇི་སྙེད་ཀྱང་དེའི་ཚེ་བྱ་བ་དེ་ལྟ་བུ་ཞིག་ཡོད་ན་བརྟུལ་ཞུགས་ཅན་དེས་དེ་མ་ཐག་ཏུ་སླར་འོང་བའི་བསམ་པས་དཔག་ཚད་ཕྱེད་ཁོ་ནར་འགྲོ་བར་བྱའི་དེ་ཕན་ཆད་དུ་ནི་མ་ཡིན་ནོ། །གཅུགས་པ་རྣམས་ཀྱི་ཚིག་གིས་ལམ་རིང་དུ། །སོང་དུ་ཟིན་ཡང་ནམ་ཡང་ཉེས་པ་མེད། །ཆུ་པོའི་འགྲམ་ནས་འགྲོ་བར་བྱེད་པ་ན། །མཐོང་བས་དག་པའི་ཆུ་འཐུངས་ཉེས་པ་མེད། །ཇི་སྟེ་འགྲོགས་བཤེས་

---

^{[མ་དཔེ་གཟིགས་ན་འདིར་གནོན།]}

ན་རེ་ཁོ་བོས་ཁྱོད་ལ་ཆུ་ཚགས་སྦྱིན་ནོ་ཞེས་ཟེར་ན་དེའི་ཚིག་གིས་རིང་དུ་སོང་ཡང་ཉེས་པ་མེད་དོ། །གཞན་ཡང་ཆུ་ཀླུང་གི་འགྲམ་ནས་འགྲོ་བ་ན་མཐོང་བས་དག་པར་འགྱུར་བའི་ཆུ་ལ་སྤྱོད་ན་ཆུ་ཚགས་མེད་ན་ཡང་ཉེས་པ་མེད་དོ། །རྒྱུན་གྱིས་འབབ་པའི་ཆུ་རྒྱུན་མ་འདྲེས་པ། །དེར་ནི་རྒྱང་གྲགས་རེ་རེས་ལེགས་པར་བརྟག །གཞན་དུ་འཇུག་དོགས་རེ་རེ་ཁོ་ནར་རོ། །འདི་ནི་ཆུ་ཚགས་མེད་འགྲོའི་ཚུལ་ཡིན་ནོ། །འབབ་པར་བྱེད་པས་འབབ་པའོ། །གལ་ཏེ་ཆུ་ཀླུང་དེ་ཆུའི་རྒྱུན་གཞན་དང་མ་འདྲེས་པ་ཡིན་ན་དེར་རྒྱང་གྲགས་རེ་རེར་ཆུ་བརྟགས་ནས་སྤྱད་པར་བྱའོ། །ཆུ་རྒྱུན་ནི་འདིར་རྒྱུན་ལ་བྱའོ། །འདིར་སློབ་དཔོན་གྱི་ཞལ་ནས་རྒྱང་གྲགས་སུ་རྗེས་སུ་འགྲོ་བ་ཞིག་ཡིན་ན་ཆུའི་ཚོགས་བརྟགས་པ་ལ་རྒྱང་གྲགས་ཞེས་སྨོས་པ་ཡིན་ནོ། །གཞན་དུ་ན་ཇི་ལྟར་ཆུའི་ཚོགས་གཞན་བརྟགས་ན་གཞན་བརྟགས་པར་ཇི་ལྟར་འགྱུར་ཞེས་གསུངས་སོ། །རྗེས་སུ་འགྲོ་བ་ཉིད་མེད་པའི་ཕྱིར་རྒྱུན་གྱི་བཟློག་ཕྱོགས་སུ་ནི་འཇུག་དོགས་རེ་རེར་བརྟགས་ནས་སྤྱད་པར་བྱའོ་ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །གཞན་དུ་ཞེས་བྱ་བ་ནི་ཆུ་ཀླུང་གི་རྒྱུན་འབབ་པའི་བཟློག་ཕྱོགས་དག་ཏུ་ནི་འཇུག་དོགས་རེ་རེར་བརྟགས་ནས་སྤྱད་པར་རུང་བ་ཡིན་ནོ། །ཆོ་ག་འདི་ནི་ཆུ་ཚགས་མེད་པར་འགྲོ་བ་ལ་བསྟན་པ་ཡིན་ནོ། །སྤུ་བཅས་གོས་དང་ཉི་རིམ་དག་གིས་ནི། །སྲོག་ཆགས་བཅས་པའི་ཆུ་ལ་ཁྲུས་བྱ་བཀག །གང་ལ་ཆུ་བས་སྲོག་ཆགས་མང་བ་དེར། །རིམ་པ་གཅིག་པུས་ཁྲུས་ནི་མི་བྱའོ། །གོས་སྤུས་གཡོགས་པ་དང་ཉི་རིམ་གྱིས་སྲོག་ཆགས་དང་བཅས་པའི་ཆུ་ལ་ཁྲུས་བྱ་བ་བཀག་སྟེ། འདི་གཉིས་ལ་སྲོག་ཆགས་འཆགས་པ་སྲིད་པའི་ཕྱིར་རོ། །ཇི་སྐད་དུ་གོས་ལྷན་པས་བཏབ་པ་དང༌། སྤུས་ཁེབས་པ་དག་གིས་ཁྲུས་མི་བྱའོ། །བྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་དེ་ཡང་བསྡུས་པ་ཡིན་ཏེ། ཉི་རིམ་བཀག་པས་གོས་ལྷན་པས་བཏབ་པ་ཡང་འདུས་པའི་ཕྱིར་ལ། སྤུ་དང་བཅས་པ་སྨོས་པས་ཀྱང་སྤུས་ཁེབས་པ་རྣམས་སོ། །གང་ལ་ཆུ་བས་སྲོག་ཆགས་མང་བ་དེར་ནི་གོས་རིམ་པ་གཅིག་གིས་ཀྱང་ཁྲུས་མི་བྱའོ། །འདིར་གཞུང་ནི། གང་ལ་སྲོག་ཆགས་ཀྱི་བྱིངས་ནི་མང་ལ་ཆུ་བྱིངས་ནི་ཆུང་བ་དེར་ནི་ཁྲུས་མི་བྱའོ། །གང་ན་ཆུའི་བྱིངས་ནི་ཆེ་ལ་སྲོག་ཆགས་ཀྱི་བྱིངས་ནི་ཉུང་བ་དེར་ཁྲུས་བྱའོ་

---

^{[མ་དཔེ་གཟིགས་ན་འདིར་གནོན།]}

ཞེས་འབྱུང་བ་ཡིན་ནོ། །དེ་ལ་ཆུ་བརྟགས་པ་ནི་ཁྱོར་བས་སོ་ཞེས་གསུངས་པ་དེ་ནི་ཉ་ཕྱིས་ལ་སོགས་པ་མཚོན་པར་བལྟ་བར་བྱའོ། །ཁྲོན་པའི་ཆུ་དག་འབྲས་ཆན་ལ་སོགས་དང༌། །འདྲེས་པ་བཙགས་ནས་དེ་ནི་ཁ་ཟས་མེད། །གང་ཚེ་ཁྱིམ་པའི་བསྟི་སར་ཡོད་པའི་ཆུ། །གཙང་ན་ཕྱི་དྲོའང་ཐེ་ཚོམ་མེད་པར་བཏུང༌། །ཁྲོན་པ་ལ་སོགས་པའི་ཆུ་འབྲས་ཆན་དང་ཚོད་མ་ལ་སོགས་པ་དང་འདྲེས་པ་གང་ཡིན་པ་དེ་ནི་བཙགས་ནས་བླང་བར་བྱའོ། །སིལ་བུ་ལས། དགེ་སློང་དག་ཁྲོན་པ་ནས་ཆུ་ལེན་པ་དང་དེ་ན་དེ་རྣམས་ཀྱི་ཆུ་ཚགས་སུ་འབྲས་ཆན་གྱི་ཚིགས་མ་དང་ཁུར་བའི་དུམ་བུ་དག་ལྟུང་བ་ནས། བཅོམ་ལྡན་འདས་ཀྱིས་བཀའ་སྩལ་པ། ཁ་ཟས་དེས་ཁ་ཟས་ཀྱི་བྱ་བ་བྱེད་མི་ནུས་ཀྱི་བོར་ལ་བཙག་པར་བྱའོ། །འདི་ལ་འགྱོད་པར་མི་བྱའོ། །མཚན་མོ་ཡང་བཏུང་བར་བྱ་ཞིང༌། བྱ་མ་བུམ་ཡང་དགང་བར་བྱའོ་ཞེས་བྱ་བའི་བར་དུ་འབྱུང་བ་དང༌། དེ་བཞིན་དུ་དགེ་སློང་གིས་དུས་སུ་ལྷུང་བཟེད་ནས་ཁུ་བ་འཐུངས་པ་དང༌། དུས་མ་ཡིན་པར་ལྷུང་བཟེད་ནས་སྐོམ་འཐུངས་པ་ན་ལྷུང་བཟེད་ལས་སྣུམ་ལངས་པ་ནས། བཅོམ་ལྡན་འདས་ཀྱིས་བཀའ་སྩལ་པ། སྟེང་གི་སྣུམ་ཕོར་ལ་སྐོམ་བཏུང་བར་བྱའོ། །འདི་ལ་འགྱོད་པར་མི་བྱའོ་ཞེས་བྱ་བའི་བར་དུ་འབྱུང་བ་ཡིན་ནོ། །གང་གི་ཚེ་ཁྱིམ་པ་རྣམས་ཀྱི་བསྟི་ས་ན་ཡོད་པའི་ཆུ་བརྟགས་པས་གཙང་བ་ཡིན་ན། དེའི་ཚེ་མཚན་མོ་ཡང་བཏུང་དུ་རུང་ངོ༌། །འདིར་གཞུང་ནི་གླེང་གཞི་ལས། དགེ་སློང་དག་ལམ་དུ་འགྲོ་བར་བྱེད་ལ། དེ་ན་ཆུ་མེད་པ་དང༌། འགྲོན་པ་རྣམས་ཀྱིས་ཁྱིམ་པའི་བསྟི་ས་ན་ཡོད་པའི་ཆུ་བྱིན་ན། དགེ་སློང་རྣམས་དུས་མ་ཡིན་པ་ན་འགྱོད་པས་མི་བཏུང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་གཞན་རྙེད་པ་མེད་ན་བརྟགས་ནས་བཏུང་བར་བྱ་ཞིང་བྱ་མ་བུམ་དང་རིལ་བ་དག་ཏུ་ཡང་བླུགས་པར་བྱའོ། །ཟོ་ཆུན་རྒྱུད་མོ་དང་རྒྱལ་བ་དག་ན་ཡོད་པ་ཡང་དེ་དང་འདྲ་སྟེ། དགེ་སློང་དག་ཟོ་ཆུན་རྒྱུད་མོ་ནི་གཙང་བའི་རྒྱུ་ཡིན་གྱི་བརྟགས་ན་དུས་སམ་དུས་མ་ཡིན་པར་ཡང་བཏུང་བར་བྱ་ཞིང་འདི་ལ་འགྱོད་པར་མི་བྱའོ་ཞེས་འབྱུང་བ་ཡིན་ནོ། །འདི་ནི་དུས་མ་ཡིན་པའི་ཁ་ཟས་དང་འབྲེལ་པ་ཡིན་ཡང་ཆུའི་སྐབས་ཡིན་པའི་ཕྱིར་འདིར་བསྟན་ཏོ། །དབྱུག་གུ་གསུམ་པ་གྲུ་གསུམ་གྲྭ་སྲད་བུས། །བཏགས་ནས་ཆུ་ནི་ལེགས་པར་བཙག་པར་བྱ། །ལྕི་བ་སྐམ་པོ་གཙང་མའི་ཕྱེ་

---

^{[མ་དཔེ་གཟིགས་ན་འདིར་གནོན།]}

མ་ཡིས། །ཆུ་ཚགས་ཤིན་ཏུ་སྲབ་ན་གདབ་པར་བྱ། །དབྱུག་གུ་གསུམ་ལས་ཆུ་ཆགས་གྲུ་གསུམ་གྱི་གྲྭའི་སྲད་བུ་བཏགས་ནས་བཙག་པར་བྱའོ། །གལ་ཏེ་སྲབ་པའི་ཕྱིར་སྲོག་ཆགས་དག་མི་འཛིན་ན་དེའི་ཚེ་ལྕི་བ་ཤིན་ཏུ་སྐམ་པོའི་ཕྱེ་མ་ཆུ་ཚགས་གྲུ་གསུམ་པོ་དེར་གདབ་པར་བྱའོ། །ཆུ་ཚགས་འཛག་པར་བྱ་ཕྱིར་ཡང་དང་ཡང༌། །སྨྱིག་མའི་ཚལ་པ་དག་གིས་བརྡབ་པར་བྱ། །སྲོག་ཆགས་སྲུང་ཕྱིར་ལྕགས་ཀྱི་ལུ་གུ་བརྒྱུད། །བཏགས་པའི་སྣོད་ནི་འོག་ཏུ་གཞག་པར་བྱ། །ཆུ་ཚགས་དེར་ལྕི་བའི་ཕྱེ་མ་བཏབ་པས་གལ་ཏེ་ཆུ་མི་འཛག་ན། དེའི་ཚེ་ཆུ་འཛག་པར་བྱ་བའི་ཕྱིར་ཡང་དང་ཡང་དུ་སྨྱིག་མའི་ཚལ་པས་བརྡབ་པར་བྱའོ། །ཆུ་ཚགས་གྲུ་གསུམ་གྱི་འོག་ཏུ་སྲོག་ཆགས་དེ་དག་བསྲུང་བའི་ཕྱིར་སྣོད་ལ་ལྕགས་ཀྱི་ལུ་གུ་རྒྱུད་ལ་སོགས་པས་བཏགས་ནས་གཞག་པར་བྱའོ། །འོ་ན་ཕྲན་ཚེགས་ལས། ཚགས་རྟེན་སྣོད་གཉིས་ཏེ། ཟངས་ལས་བྱས་པ་དང༌། ས་ལས་བྱས་པའོ། །དེ་ལ་ཟངས་ལས་བྱས་པ་ལ་བུ་ག་བཏོད་དེ་ལུ་གུ་རྒྱུད་ཀྱིས་བུ་ག་ལ་གདགས་པར་བྱའོ། །ས་ལས་བྱས་པ་ལ་བུ་ག་བཏོང་དེ་སྲད་བུས་གདགས་པར་བྱའོ་ཞེས་གསུངས་པ་མ་ཡིན་ནམ། ད་ཇི་ལྟར་གཞན་དུ་བསྟན་ཞེ་ན། དེ་ནི་ཉེས་པ་མེད་དེ། ཇི་ཙམ་གྱིས་སྲོག་ཆགས་ཟད་པ་ཙམ་འགྲུབ་པ་དེ་ཙམ་ཞིག་འདིར་བརྗོད་པ་མཚོན་པའི་ཕྱིར་ན། དེ་ནི་ཉེ་བར་མཚོན་པ་ཡིན་ནོ། །ཇི་སྟེ་ལུགས་ཀྱིས་ཡུལ་ན་ཁྲོན་པ་ཡོད་པ་ཞིག་ཡིན་ན། སྲོག་ཆགས་དེ་དག་བཙགས་པའི་ཆུ་ཇི་ལྟར་དབོ་བར་བྱ་ཞེ་ན། བཤད་པ། དེ་ཡི་སྲོག་ཆགས་གནོད་པ་སྤང་བའི་ཕྱིར། །སྲོག་ཆགས་ཡོད་ཆུ་ཐར་པར་བྱེད་པའི་སྣོད། ཁ་དང་ཞབས་སུ་ཐག་པ་གཉིས་བཏགས་པས། །སྙིང་རྗེའི་དོར་ནི་ཁྲོན་པའི་ནང་དུ་དབོ། །སྲོག་ཆགས་དང་བཅས་པའི་ཆུ་དེ་ཐར་བར་བྱེད་པའི་སྣོད་ཀྱིས་དབོའོ། །ཇི་འདྲ་བར་བྱ་ཞེ་ན། སྲོག་ཆགས་རྣམས་ལ། གནོད་པ་མེད་པར་བྱ་བའི་ཕྱིར་བསལ་ཚགས་དེས་སམ། ཐར་པར་བྱེད་པའི་སྣོད་ལ་ཐག་པས་བཏགས་ནས་ཁྲོན་པར་གཞུག་པར་བྱ་ཞིང་གང་བ་ནི་གཞུག་ལ། སྟོང་པ་ནི་སླར་དབྱུང་བ་དེ་ལྟ་བུར་བྱའོ་ཞེས་གསུངས་པ་ཡིན་ཏེ། འདི་ནི་བསྡུས་པ་ཡིན་ནོ། །འཕགས་པས་འཇིག་རྟེན་མདུན་དུ་རིལ་བ་དག །ཁ་ལ་བཟློག་སྟེ་གཏད་ནས་ཆུ་མི་བཏུང༌། །ལོ་མ་ལ་སོགས་མི་རྙེད་དབེན་སོང་སྟེ། །སྐོམ་པའི་ཕྱིར་ནི་

---

^{[མ་དཔེ་གཟིགས་ན་འདིར་གནོན།]}

འཐུངས་ན་ཉེས་པ་མེད། །འཕགས་པའི་ཆོས་ཀྱི་རྗེས་སུ་འབྲང་བས་ནི་ཁར་རིལ་བ་སྤྱི་བླུགས་བཟློག་ནས་ཆུ་བཏུང་བར་མི་བྱའོ། །ལོ་མ་ལ་སོགས་པ་དག་མི་རྙེད་ལ་སྐོམ་པས་གདུངས་ན་སྐྱེ་བོ་མེད་པར་སོང་སྟེ་བཏུང་བར་བྱའོ། །སིལ་བུ་ལས། དགེ་སློང་གིས་བྱ་མ་བུམ་ནས་ཆུ་འཐུངས་པ་ན། སྦྲང་བུ་མཆུ་གསུམ་པས་ཟིན་པ་ནས་བཏུང་དུ་མེད་པ་དང༌། བཅོམ་ལྡན་འདས་ཀྱིས་བཀའ་སྩལ་པ། གང་དུ་གཞན་དག་གིས་མཐོང་ནས་མ་དད་པར་མི་འགྱུར་བའི་ཕྱོགས་དབེན་པར་འདུག་སྟེ། བྱ་མ་བུམ་ནས་བཏུང་བར་བྱའོ་ཞེས་བྱ་བ་ལ་སོགས་པའི་བར་དུ་རྒྱ་ཆེར་གསུངས་པ་ཡིན་ནོ། །དུས་དང་དུས་སུ་བུམ་པ་བསྐམ་པར་བྱ། །ཁྲུད་ཤིང་གིས་རབ་ཏུ་བཀྲུ་བར་བྱ། །རུང་བའི་སྣོད་རྣམས་ཀྱི་ནི་ཁ་དག་ལ། །རྟག་ཏུ་བསྒྲིམས་ནས་ལོ་མ་ལ་སོགས་དགབ། །དུས་སུ་ཞེས་བྱ་བ་ནི་ཕྱིས་སོ་ཞེས་བྱ་བའི་ཐ་ཚིག་གོ །མི་ཟད་པའི་བསྡུ་བ་ཡིན་ལ་དེའི་ཕྱིར་དུས་དང་དུས་སུ་ཞེས་བྱ་བ་ནི་དུས་དང་དུས་སུའོ། །པུ་ཤེལ་ཙིལ་སོགས་པའི་ཁྲུ་ད་ཤིང་གཙང་མས་བཀྲུ་བར་བྱའོ། །རྡུལ་མེད་པར་བྱ་བའི་ཕྱིར་ཆུའི་བུམ་པ་ལ་སོགས་པའི་ཁ་དགབ་པར་བྱའོ། །ཡང་ཆུ་ཤིན་ཏུ་གཙང་མ་དག་སྤྱད་པར་བྱའོ། །སྙིང་ནས་ལན་གཉིས་ལན་གསུམ་བཀྲུས་ནས་ནི། །ལག་པ་སྣུམ་པོར་ཡོད་ཀྱང་དག་པ་ཡིན། །རྙོག་མ་ཅན་གྱི་ཆུ་ནི་ཇི་སྲིད་དུ། །གཞན་གྱི་གཟུགས་སྣང་བར་དུ་བསྒྲིམས་ཏེ་བཙག །གཡོ་བོར་ཏེ་དེ་སྙིང་ནས་ལན་གཉིས་ལན་གསུམ་དུ་བཀྲུས་ན། གལ་ཏེ་ལག་པ་ལ་སྣུམ་སྣང་དུ་ཟིན་ཀྱང་དེ་དག་པ་ཡིན་པར་ཁོང་དུ་ཆུད་པར་བྱའོ། །འདིར་གཞུང་ནི། སྙིང་ནས་ལན་གཉིས་ལན་གསུམ་དྲུང་པར་བྱའོ་ཞེས་འབྱུང་བ་ཡིན་ནོ། །གལ་ཏེ་སྣོད་དང་འབྲེལ་པར་འདི་བསྟན་དུ་ཟིན་ཀྱང་འོན་ཀྱང་འདི་སྤྱིར་བསྟན་པར་ཁོང་དུ་ཆུད་པར་བྱ་སྟེ། ཐམས་ཅད་ལ་དག་པར་བྱ་བར་མཚུངས་པའི་ཕྱིར་རོ། །ཆུ་གང་ཤིན་ཏུ་རྙོག་པ་ཅན་དུ་གྱུར་པ་དེ་ནི་རབ་ཏུ་བསྒྲིམས་ཏེ་བཅག་པར་བྱའོ། །འདིར་གཞུང་ནི། དགེ་སློང་རྣམས་ལམ་དུ་འགྲོ་བ་ན་ཆུ་ཤིན་ཏུ་རྙོག་པ་ཅན་དུ་གྱུར་པས། བཅོམ་ལྡན་འདས་ཀྱིས་བཀའ་སྩལ་པ། གང་ལ་བཞིན་གྱི་གཟུགས་མི་སྣང་བ་དེ་ནི་བྱིན་ལེན་བྱས་ནས་བཏུང་བར་བྱའོ། །གང་ལ་སྣང་བ་དེ་ནི་དེ་ཁོ་ན་བཞིན་དུ་བཏུང་བར་བྱའོ་ཞེས་བྱ་བའི་བར་དུ་འབྱུང་བ་ཡིན་ནོ། །འོ་ན་དགེ་ཚུལ་རྣམས་ལ་བྱིན་ལེན་མ་བྱས་ན་ཉེས་པ་མེད་

---

^{[མ་དཔེ་གཟིགས་ན་འདིར་གནོན།]}

བ་ཉིད་མ་ཡིན་ནམ། འདིར་ཇི་ལྟར་བསྟན་ཞེ་ན། བླ་མའི་ཆེད་དུ་བླངས་ན་ཆུ་ཚགས་ཀྱིས་གཟུང་དུ་མེད་པའི་རྡུལ་དག་ཡོད་ན་ཡང་ཉེས་པ་མེད་དོ་ཞེས་བསྟན་པའི་ཕྱིར་འདི་བསྟན་པ་ཡིན་ནོ། །ཁྲོན་པ་ལ་སོགས་རྣམས་ནས་ཆུ་བླངས་ནས། །ཁྲོན་པ་ལ་སོགས་བྱེད་དེའི་ཆུ་ལྷ་ལ། །སྦྱིན་པའི་རབས་མཐུན་ཚིགས་བཅད་གདོན་པར་བྱ། །འཐུང་དང་ཁྲུས་བྱེད་པ་ནའང་དེ་བཞིན་བརྗོད། །ཁྲོན་པ་ལ་སོགས་པ་རྣམས་ནས་ཆུ་བླངས་ནས། ཁྲོན་པ་ལ་སོགས་པ་བྱེད་པ་དང༌། དེའི་ཆུ་ལྷ་རྣམས་ལ་སྦྱིན་པའི་རབས་དང་མཐུན་པའི་ཚིགས་བཅད་གདོན་པར་བྱའོ། །འཐུང་བ་དང་ཁྲུས་བྱེད་པ་ན་ཡང་དེ་བཞིན་དུ་བྱ་སྟེ། ཁྲོན་པ་ལ་སོགས་པ་རྣམས་ནས་ཆུ་བླངས་ནས་ཁྲོན་པ་ལ་སོགས་པ་བྱེད་པ་དང༌། དེའི་ཆུའི་ལྷ་རྣམས་ཀྱི་ཕྱིར་གཙུག་ལག་གི་ཚིགས་སུ་བཅད་པ་གདོན་པར་བྱའོ། །མུད་ག་ལ་སོགས་འབྲུ་ལ་སྲོག་ཆགས་ཡོད། །དེ་ནི་བདེ་དང་བསིལ་བར་དགྲམ་པར་བྱ། །འོན་ཀྱང་དེ་ནས་སྲོག་ཆགས་མི་འབྲལ་ན། །འོན་ཀྱང་གནས་ཁང་ནང་དུ་བཅུག་སྟེ་གཞག །གལ་ཏེ་སྲན་མུད་ག་ལ་སོགས་པ་ལ་སྲོག་ཆགས་རྣམས་ཡོད་པར་གྱུར་ན། དེའི་ཚེ་བསིལ་བའི་ཕྱོགས་སུ་བཀྲམ་སྟེ་གཞག་པར་བྱའོ། །གལ་ཏེ་འོན་ཀྱང་སྲོག་ཆགས་རྣམས་བྲལ་བའམ་གྱུར་ན་འོན་ཀྱང་གནས་ཁང་དུ་བཅུག་སྟེ་གཞག་པར་བྱའོ། །ཤིག་རྣམས་དལ་གྱིས་རས་མར་བཞག་ནས་ནི། །རྩིག་པ་ལ་སོགས་བུ་ག་རྣམས་སུ་གཞུག །རྩྭ་ཤིག་དག་ཀྱང་དེ་བཞིན་བསིལ་བའི་ས། །རྩྭ་སྔོན་བཅས་པའི་ཕྱོགས་སུ་དོར་བར་བྱ། །ཤིག་རྣམས་ནི་དལ་གྱིས་བླངས་ཏེ་རས་མ་དག་ཏུ་བཞག་ནས་རྩིག་པ་ལ་སོགས་པའི་བུ་ག་དག་ཏུ་གཞུག་པར་བྱའོ། །སྲོག་ཆགས་མ་གུ་ཏ་ག་དག་ནི་བསིལ་བའི་རྩྭ་སྔོན་པོ་དང་བཅས་པའི་ཕྱོགས་སུ་གཏང་བར་བྱའོ། །གདུག་པ་ལ་སོགས་ཉོན་མོངས་བྱེད་པ་གཞན། །རང་གི་སྤྱོད་ཡུལ་དག་ཏུ་གཏང་བར་འོས། །སྦྲུལ་དང་བྱི་བ་ལ་སོགས་པ་ཉོན་མོངས་པ་བསྐྱེད་པ་གཞན་རྣམས་ཀྱང་ཐབས་ཀྱིས་བཟུང་སྟེ། རང་གི་ཡུལ་ཁོ་ནར་གཏང་བར་འོས་པ་ཡིན་ནོ། །མཐར་འགྱུར་དེ་ནི་ཉེས་བྱས་ལྷན་ཅིག་བསྟན། །དེ་ནས་སྲོག་གཅོད་ཕྱོགས་མཐུན་བཤད་པར་བྱ། །མཐར་འགྱུར་བ་དེ་ནི་ཉེས་བྱས་དང་ལྷན་ཅིག་ཏུ་བསྟན་ཟིན་ཏོ། །ཞར་ལ་དེའི་ཕྱོགས་དང་

---

^{[མ་དཔེ་གཟིགས་ན་འདིར་གནོན།]}

མཐུན་པ་དག་ཀྱང་བསྟན་ཟིན་ན། གཙོར་ནི་མ་ཡིན་པས་དེའི་ཕྱིར་ད་ནི་སྲོག་གཅོད་པའི་ཕྱོགས་དང་མཐུན་པ་བཤད་པར་བྱའོ། །ཡང་དེ་དག་གང་ཞེ་ན། བཤད་པ། དཔེར་ན་ནད་པ་དག་ལ་དུག་མཚོན་སྦྱིན། །སྐོམ་ལ་སོགས་པ་མི་འཕྲོད་སྦྱིན་པ་སྟེ། །རྒན་པོ་མཁས་དང་སྨན་པ་དག་ལ་ཡང༌། །དྲིས་ནས་ནད་པ་དག་ལ་སྨན་དག་སྦྱིན། །ནད་པ་ལ་དུག་གམ་མཚོན་དག་གྱ་ཚོམ་དུ་སྦྱིན་པར་མི་བྱའོ། །འདིར་གཞུང་ནི་འདུལ་བྱེད་ལས། དགེ་སློང་ཞིག་ཡུན་རིང་པོར་ནད་ཀྱིས་ཉོན་མོངས་ནས། དེ་བདག་གི་སྲོག་འདི་འདྲ་བས་ཅི་ཞིག་བྱ་སྙམ་དུ་སེམས་ཤིང་དེ་དགེ་སློང་འགྲོགས་བཤེས་ཀྱི་གན་དུ་སོང་སྟེ། འདི་སྐད་ཅེས་བདག་ལ་མཚོན་བྱིན་ཅེས་སྨྲས་པ་ན། དེས་མཚོན་གྱིས་མགུལ་པ་བཅད་དེ་ཤི་ནས་དུས་བྱས་པ་དང༌། བཅོམ་ལྡན་འདས་ཀྱི་བཀའ་སྩལ་པ། ལྟུང་བ་ནི་མེད་དོ། །ཕྱིས་དགེ་སློང་གིས་གྱ་ཚོམ་དུ་མཚོན་སྦྱིན་པར་མི་བྱའོ། །དུག་ཀྱང་དེ་བཞིན་ནོ་ཞེས་བྱ་བའི་བར་དུ་འབྱུང་བ་ཡིན་ནོ། །ལྟུང་བ་མེད་དོ་ཞེས་བྱ་བ་འདི་ཡང་སེམས་དག་པ་ལ་བསྟན་པ་ཡིན་ནོ་གཞན་དུ་ན་ནི་མཐའི་ཡན་ལག་རྣམས་ཚང་བའི་ཕྱིར་ཕམ་པར་འགྱུར་རོ། །མི་འཕྲོད་ཅེས་བྱ་བ་ནི་ལྟུང་བ་ལ་སོགས་པ་མི་ཕན་པ་སྦྱིན་པའོ། །འདིར་གཞུང་ནི། དགེ་སློང་ཞིག་ན་ནས་དེས་ཁ་ཟས་འཕྲོད་པ་དག་མི་རྙེད་པ་དང༌། དེའི་རིམ་གྲོ་བས་མི་འཕྲོད་པ་ཞིག་བྱིན་ཏེ་ཤི་བ་ནས། བཅོམ་ལྡན་འདས་ཀྱིས་བཀའ་སྩལ་པ། ཕམ་པའི་ལྟུང་བ་ནི་མེད་དེ། དམན་པ་སྦོམ་པོར་འགྱུར་རོ་ཞེས་བྱ་བའི་བར་དུ་འབྱུང་བ་ཡིན་ནོ། །རྒན་པོ་མཁས་དང་སྨན་པ་དག་ལ་ཡང༌། །དྲིས་ནས་ཞེས་བྱ་བ་ནི་འདིར་རྣམ་པར་འབྱེད་པ་ལས། ཡང་དགེ་སློང་གིས་རང་གི་བློས་ནད་པ་ལ་སྨན་སྦྱིན་པར་མི་བྱའོ། །སྨན་པ་ལ་དྲི་བར་བྱའོ། །སྨན་པ་མེད་ན་ཡང་སྨན་པ་ལས་རབ་ཏུ་བྱུང་བ་ལ་དྲི་བར་བྱའོ། །སྨན་པ་ལས་རབ་ཏུ་བྱུང་བ་མེད་ན་ཡང་སྨན་པས་བཀོལ་བ་ལ་དྲི་བར་བྱའོ། །སྨན་པས་བཀོལ་བ་མེད་ན་ནད་ཀྱིས་ཉོན་མོངས་པ་དག་ལ་དྲི་བར་བྱའོ། །དེ་དག་ཀྱང་མེད་ན་གནས་བརྟན་གནས་བརྟན་རྣམས་ལ་དྲི་བར་བྱའོ་ཞེས་འབྱུང་བ་ཡིན་ནོ། །དེ་ཡི་རིམ་གྲོ་བ་ནི་གླེན་མི་བསྐོ། །མེད་པར་གྱུར་ན་ལེགས་པར་བསྒོ་སྟེ་བསྐོ། །གང་གིས་དེ་ཡི་སེམས་ནི་འཆིར་གནས་པ། །དེ་འདྲའི་ཆོས་རྣམས་ནད་པ་ལ་མི་བཤད། །རྣམ་པར་འབྱེད་པ་ལས་ཀྱང་དགེ་སློང་གིས་རིམ་གྲོ་པ་མི་མཁས་པ་གཞག་པར་མི་བྱའོ། །གལ་ཏེ་དེ་ལྟ་བུའི་

---

^{[མ་དཔེ་གཟིགས་ན་འདིར་གནོན།]}

རྐྱེན་ཞིག་བྱུང་ན་བསྒོ་སྟེ་གཞག་པར་བྱའོ་ཞེས་བྱ་བ་ལ་སོགས་པ་འབྱུང་བ་ཡིན་ནོ། །བསྒོ་བ་ནི་འདིར་ཁོང་དུ་ཆུད་པར་བྱ་བ་ཡིན་ནོ། །གང་གིས་ནད་པ་འཆི་བར་བྱ་བའི་ཕྱིར་སྤྲོ་བ་དེ་ལྟ་བུའི་ཆོས་ནང་པ་ལ་བཤད་པར་མི་བྱའོ། །རྣམ་པར་འབྱེད་པ་ལས། དགེ་སློང་གིས་གང་མཐོང་ན་ནད་པ་འཆི་བར་སེམས་པ་དེ་ལྟ་བུའི་ཆོས་ནད་པ་ལ་བཤད་པར་མི་བྱའོ་ཞེས་བྱ་བ་ནས་འགལ་ཚབས་ཅན་དུ་འགྱུར་རོ་ཞེས་བྱ་བའི་བར་དུ་གསུངས་པ་ཡིན་ནོ། །འདིར་སྤྱིར་དགག་པར་བཞེད་པའི་ཕྱིར་ནད་པ་སྨོས་པ་ནི་མཚོན་པར་ཟད་དོ། །འོ་ན་རྣམ་པར་འབྱེད་པ་ལས། བཅོམ་ལྡན་འདས་ཀྱིས་ཆོས་བསྟན་པ་ཐོས་ནས། དགེ་སློང་དག་ལུས་རྣག་ཅན་དེས་འཛེམ་ནས་བདག་ཉིད་སྲོག་དང་འབྲལ་བར་བྱེད་ཅེས་བྱ་བ་ལ་སོགས་པ་འདི་ཇི་ལྟར་གྲང་ཞེ་ན། འདི་ལ་འགལ་བ་མེད་དེ། དེ་རྣམས་ནི་ཆོས་བསྟན་པས་ངོམས་པ་མ་ཡིན་གྱི། འོན་ཀྱང་མྱོང་བར་འགྱུར་བས་ངེས་པའི་ལས་ཀྱིས་སོ། །བཅོམ་ལྡན་འདས་ཀྱིས་ལས་བཟློག་དཀའ་བར་གཟིགས་ནས་མི་སྡུག་པ་བསྟན་པས་དེ་རྣམས་ཀྱིས་ཐར་པའི་ས་བོན་བརྟས་པར་མཛད་དོ། །དེ་ལ་ཇི་སྲིད་ཡུན་རིངས་ཆོས་སྤྱོད་འཚོ། །དེ་སྲིད་དུ་ནི་དགེ་བའི་རྒྱུན་འཕེལ་བས། །སོས་པར་ཤོག་ཤིག་ཡུན་རིངས་གསོན་པར་ཤོག །ནད་འཇིགས་ལས་ཐར་བདེ་བར་ཤོག་ཅེས་བརྗོད། །ནད་པ་དེ་ལ་ཚེ་དང་ལྡན་པ་ཆོས་ལ་གནས་པ་ནི་ཇི་སྲིད་དུ་ཡུན་རིང་དུ་འཚོ་བ་དེ་སྲིད་དུ་དགེ་བ་རྒྱུད་ལ་རྒྱས་པར་འགྱུར་གྱི་སོས་པར་ཤོག་ཤིག །ཡུན་རིང་དུ་གསོན་པར་ཤོག་ཤིག །དུས་ཐམས་ཅད་དུ་ནད་ལས་ཐར་ཏེ་བདེ་བར་ཤོག་ཤིག་ཅེས་བརྗོད་པར་བྱའོ། །གལ་ཏེ་ནད་པ་ན་རེ་སྤོ་བྱས་ན། །བདག་ནི་འཆི་འགྱུར་ཟེར་ན་དེ་མི་བྱ། །གདོལ་པ་བཞིན་དུ་ལྷུང་བཟེད་ལ་སོགས་ཕྱིར། །སྙིང་བརྩེ་མེད་པར་ཆགས་པའི་སེམས་མི་བྱ། །གལ་ཏེ་ནད་པ་ན་རེ་སྤོས་ན་བདག་འཆི་བར་འགྱུར་རོ་ཞེས་ཟེར་ན་དེ་སྤོ་བར་མི་བྱའོ། །འདིར་ཁུངས་ནི་འདུལ་བྱེད་ལས། དགེ་སློང་ནད་པ་ཞིག་སྟན་ལ་འདུག་པ་དང༌། དེའི་རིམ་གྲོ་པས་སྨྲས་པ། ཚེ་དང་ལྡན་པ་ལོངས་ཤིག །དེས་སྨྲས་པ། བདག་ཤི་ན་མི་རུང་གི་མ་བསླང་ཤིག །ཚེ་དང་ལྡན་པ་ལོངས་ཤིག །ལངས་པ་དང་ཤི་ནས་དེ་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ཕམ་པའི་ལྟུང་བ་ནི་མེད་དེ། དམན་པ་སྦོམ་པ་

---

^{[མ་དཔེ་གཟིགས་ན་འདིར་གནོན།]}

པོར་འགྱུར་རོ་ཞེས་གསུངས་པའི་བར་དུ་འབྱུང་བ་ཡིན་ནོ། །གདོལ་བ་དང་འདྲ་བར་ལྷུང་བཟེད་ལ་སོགས་པའི་ཆེད་དུ་ཆགས་པའི་སེམས་བསྐྱེད་པར་མི་བྱའོ། །འདིར་གཞུང་ནི་རྣམ་པར་འབྱེད་པ་ལས། དགེ་སློང་གིས་གདོལ་བ་དང་འདྲ་བར་ཆོས་གོས་ཀྱི་ཕྱིར་དེ་ལྟ་བུའི་སེམས་སྐྱེད་པར་བྱེད་ན་འགལ་ཚབས་ཅན་དུ་འགྱུར་རོ་ཞེས་འབྱུང་བ་ཡིན་ནོ། །གཞན་ཡང༌། གང་ཚེ་ཉེས་པའི་གཞི་དག་བྱེད་པ་དང༌། །ནན་གྱིས་གཞན་གྱི་ཁྲི་དང་ཁྲིའུ་ལ་འདུག །རྡེག་པར་བྱེད་དམ་ཡང་ན་གཟས་པ་དང༌། རྣམ་པར་འཚེ་དང་འཇིགས་པ་ལ་སོགས་བྱེད། །ཁྲོས་པས་བརྟུལ་ཞུགས་ཅན་ལ་ཟན་མེད་བྱེད། ངལ་ལ་འབུལ་ལམ་རྒྱལ་ལ་ཆོམ་རྐུན་འབུལ། །བསམས་བཞིན་དུ་ནི་འགྱོད་པའི་ཚུལ་དག་བྱེད། །འཚིར་དང་གཡའ་སྒོག་ལ་སོགས་ནགས་མེས་གཏོང༌། །འབྲས་ནི་མ་སྨིན་པར་ཡང་བརྟོལ་བྱེད་དང༌། །ཡན་ལག་གཅོད་དམ་དེ་བཞིན་འབིགས་ཀྱང་རུང༌། །དེ་ཡི་ཚེ་ཡང་ཕྱོགས་མཐུན་དེ་ལྟར་འདིར། །ཐམས་ཅད་སྲོག་གཅོད་མཐུན་པའི་ཕྱོགས་ཙམ་ཡིན། །ཉེས་པ་འཐབ་མོ་དང་མཚང་འབྲུ་བ་ལ་སོགས་པའི་ཉོན་མོངས་པ་དག་གཞི་གང་དག་ལས་སྐྱེས་པ་དེ་དག་ནི་ཉེས་པའི་གཞི་དག་སྟེ། གང་གི་ཚེ་གཏོང་བར་མི་བྱེད་ན་དེའི་ཚེ་ཡང་ཕྱོགས་མཐུན་ཞེས་བྱ་བ་འདི་དང་སྦྱར་བར་བྱའོ། །དེ་བཞིན་དུ་གལ་ཏེ་གཞན་དག་གི་ཁྲི་དང་ཁྲིའུ་དག་ལ་ནན་གྱིས་འདུག་པ་དང༌། གལ་ཏེ་རྡེག་པར་བྱེད་པ་དང༌། གལ་ཏེ་གཟས་པར་བྱེད་པ་དང༌། གལ་ཏེ་རྣམ་པར་འཚེ་བར་བྱེད་པ་དང༌། གལ་ཏེ་གནོད་སྦྱིན་པ་གུ་ལ་ཡིན་ནོ་ཞེས་བྱ་བས་འཇིགས་པར་བྱེད་པ་དང༌། གལ་ཏེ་ཁྲོས་པས་བརྟུལ་ཞུགས་ཅན་ལ་ཟན་མེད་པར་བྱེད་ན་དེའི་ཚེ་ཡང་ཕྱོགས་དང་མཐུན་པ་ཉིད་དོ་ཞེས་རེ་རེ་ལ་སྦྱར་བར་བྱའོ། །འདི་ལ་ཟན་ཡོད་པ་མ་ཡིན་པས་ཟན་མེད་པ་སྟེ། །ཟན་གཅོད་པར་བྱེད་ན་ཞེས་བྱ་བའི་ཐ་ཚིག་གོ །ཕན་པར་འདོད་པས་ནི་ཉེས་པ་མེད་པ་ཉིད་བསྟན་པའི་ཕྱིར་ཁྲོས་པས་ཞེས་བྱ་བ་སྨོས་པ་ཡིན་ནོ། །གཞན་ཡང་ངལ་བ་ལ་འཕུལ་བ་དང༌། གལ་ཏེ་རྒྱལ་ནི་རྒྱལ་པོ་སྟེ། རྒྱལ་པོ་ལ་ཆོམ་རྐུན་པ་འབུལ་བར་བྱེད་པ་དང༌། བསམས་བཞིན་དུ་ནི་བློ་སྔོན་དུ་བཏང་བའོ། །གལ་ཏེ་ཁྱོད་ནི་བསྙེན་པར་རྫོགས་པ་མ་ཡིན་ནོ། །ཁྱོད་ཀྱི་མཁན་པོ་ཡང་ཚུལ་ཁྲིམས་འཆལ་བ་ཡིན་ནོ་ཞེས་བྱ་བ་ལ་སོགས་པ་འགྱོད་པའི་གནས་དག་བརྗོད་པ་དང༌། གལ་ཏེ་

---

^{[མ་དཔེ་གཟིགས་ན་འདིར་གནོན།]}

འཚིར་བར་བྱེད་པ་དང༌། གལ་ཏེ་གཡའ་སྒོག་པར་བྱེད་པ་དང་ཞེས་འཚིར་བ་དང་གཡའ་སྒོག་པར་ཡང་བྱེད་ཅེས་བྱ་བ་འདི་དང་སྦྱར་བར་བྱའོ། །གལ་ཏེ་ནགས་སུ་མེས་གཏོང་བར་བྱེད་པ་དང༌། གལ་ཏེ་འབྲས་མ་སྨིན་པ་བརྟོལ་བར་བྱེད་པ་དང༌། གལ་ཏེ་ཡན་ལག་གཅོད་པར་བྱེད་པ་དང། གལ་ཏེ་ཡན་ལག་འབིགས་བར་བྱེད་ན་དེའི་ཚེ་ཡང་ཕྱོགས་དང་མཐུན་པ་ཉིད་ཡིན་པར་རིག་པར་བྱའོ། །ནན་འཆིར་བའི་གཞུང་ནི་འདུལ་བྱེད་ལས། དགེ་སློང་རྣམས་ཀྱིས་དགེ་སློང་དགོན་པ་བ་ཞིག་བོས་ཏེ། དགོན་པ་པ་ཁྱིམ་བདག་དེ་དགེ་འདུན་དབྱར་གནས་པ་ལ་གོས་དག་ད་ལྟར་མེ་འབུལ་ལ་ཁྱོད་ཀྱང་ཁྱིམ་དེར་འགྲོ་བས་ཁྱོད་ཀྱིས་བཟློག་པ་ཡིན་སྙམ་ཞེས་དྲིས་པ་དང༌། དེས་སྨྲས་པ། ཤེས་ལྡན་དག་མ་བཟློག་གོ །དེ་དག་ན་རེ་འདི་མི་སྨྲས་དེང་ལ་སྒོ་འཕར་གྱིས་འཚིར་ཤིག་ཅེས་སྨྲས་པ་དང༌། དེ་སྒོ་འཕར་གྱིས་བཙིར་བ་ན་ཤི་ནས་དེ་དག་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ཕམ་པའི་ལྟུང་བ་ནི་མེད་དེ། དམན་པ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ། །གཡའ་སྒོག་པ་ལ་སོགས་པ་གཞུང་ནི། བཅུ་བདུན་སྡེ་རྣམས་ཀྱིས་ག་ག་ཚིལ་བྱས་པ་ནས། བཅོམ་ལྡན་འདས་ཀྱིས་བཀའ་སྩལ་པ། ཡང་དགེ་སློང་གིས་ག་ག་ཚིལ་མི་བྱའོ། །བྱེད་ན་འགལ་ཚབས་ཅན་དུ་འགྱུར་རོ་ཞེས་བྱ་བའི་བར་དུ་འབྱུང་བ་ཡིན་ནོ། །སོགས་པའི་སྒྲས་ནི་རྣམ་པ་དེ་ལྟ་བུ་གཞན་དག་ལ་བལྟ་བར་བྱ་སྟེ། དཔེར་ན་ཕྲན་ཚེགས་ལས་ཉེ་དགས་ཤ་ཟའི་བུ་གཅིག་ཟློས་གར་མཁན་ལ་བཙོངས་པ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་སྐྲ་ཅན་བཙོང་པར་མི་བྱའོ།། ཞེས་བྱ་བ་སོགས་པའི་བར་དུ་འབྱུང་བ་ཡིན་ནོ། །ནགས་མེས་གཏོང་ཞེས་བྱ་བའི་གཞུང་ནི་འདིར་དགེ་སློང་དག་ནགས་ཚལ་གྱི་ནང་དུ་དོང་སྟེ། བསམ་གཏན་བྱེད་པ་དང༌། དྲུག་སྡེ་རྣམས་ཀྱིས་རླུང་ལ་བརྟེན་ནས་ནགས་ཀྱི་ངོས་གསུམ་ནས་ནི་མེས་བཏང༌། ངོས་གཅིག་ཏུ་ནི་རང་དག་དོང་ནས་འཁོད་དོ། །དགེ་སློང་རྣམས་ཀྱི་ས་ནགས་ཀྱི་མེས་ནགས་སྲེག་ཅིང་འབྱུང་བ་མཐོང་ནས་སྟན་དག་ལས་ལངས་ཏེ། རིངས་པ་རིངས་པར་དོང་བན་དྲུག་སྡེ་རྣམས་ཀྱིས་སྨྲས་པ། འཇུངས་པ་དག་ཁྱེར་དེ་ལྟར་བཟློག་པར་བྱའོ་ཞེས་བྱ་བའི་བར་དུ་རྒྱ་ཆེར་འབྱུང་བ་ནས། དེ་ལྟ་བས་ན་དགེ་སློང་

---

^{[མ་དཔེ་གཟིགས་ན་འདིར་གནོན།]}

གིས་ནགས་སུ་མེ་གཏང་བར་མི་བྱའོ། །གཏོང་ན་ཉེས་བ་སྦོམ་པོར་འགྱུར་རོ་ཞེས་བྱ་བའི་བར་དུ་གསུངས་པ་ཡིན་ནོ། །ཉེས་པ་སྦོམ་པོར་ཞེས་བྱ་བ་འདི་གང་ལ་བྱ། རེ་ཞིག་གལ་ཏེ་ཉེས་པ་སྦོམ་པོ་ཞེས་བྱ་བའི་ཚིག་འདི་ཉེས་པ་མང་པོ་ཞེས་བྱ་བ་ཡིན་ན། དེའི་ཚེ་སྲོག་ཆགས་མང་པོ་ཡོད་པའི་བློས་ནགས་བསྲེགས་ན་དགེ་ཚུལ་ལ་ཉེས་བྱས་མང་པོར་འགྱུར་ཏེ། གྲོག་སྤུར་མང་པོ་ཚིག་པའི་ཕྱིར་རོ། །འོན་ཏེ་མིང་དུ་ཆགས་པའི་ཚིག་ཡིན་ན་དེའི་ཚེ་མེ་ཡོད་པའི་བློས་མེ་བཏང་བའི་ཕྱིར་མི་ཤི་ན་མཐར་འགྱུར་རོ། །འོན་ཏེ་མ་ཡིན་ཏེ་སྦྱོར་བ་ཡིན་ན་ཉེས་བྱས་སུ་འགྱུར་བ་ཡིན་ན་ཕྱོགས་དང་མཐུན་པ་རྣམས་སུ་ཇི་ལྟར་བསྡུ་ཞེ་ན། འདིར་བཤད་པ། མི་ལ་གཙེ་བ་ཙམ་གྱི་བསམ་པས་མེ་བཏང་པའི་ཕྱིར་འདི་ནི་མཐར་འགྱུར་བ་ལ་སྦྱོར་བ་དང་འདྲ་བའི་ཉེས་པ་སྦོམ་པོ་གཞན་ཡིན་པས་ཕྱོགས་དང་མཐུན་པར་བསྡུ་བ་ཡིན་ནོ། །འདི་ལྟར་འདིར་ལྷུང་བཟེད་ནག་པོ་བ་རྣམས་བཟློག་པར་བྱའོ་ཞེས་གསུངས་པ་ཡིན་ནོ། །སློབ་དཔོན་གྱིས་ཀྱང་གནོད་པ་དང་འདྲ་བ་ཉིད་ཀྱི་ཕྱིར་དངོས་གཞིའི་སྦྱོར་བ་ལས་བྱེ་བྲག་དུ་མ་ཕྱེའོ། །གལ་ཏེ་ཞེས་བྱ་བ་ལས་ཀྱང་སྲོག་ཆགས་ཤིན་ཏུ་མང་པོ་ཡོད་པའི་བློ་བྱུང་བཞིན་དུ་བསམས་པར་སྲོག་བཅད་ན་ཡང་སྲོག་ཆགས་ལ་ལྟོས་པ་མེད་པར་ཀུན་དུ་སྤྱོད་པའི་ཕྱིར་སྦོམ་པོ་དེ་ཁ་ན་མ་ཐོ་བ་མང་བ་ཡིན་པར་བསྟན་པ་ཡིན་ནོ་ཞེས་གསུངས་སོ། །དེ་ནི་སྦྱོར་བའི་ཁ་ན་མ་ཐོ་བ་དང་འདྲ་བ་ཡིན་ནོ། །དངོས་གཞི་རྣམས་ནི་མཚན་ཉིད་ཇི་ལྟ་བ་ཁོ་ན་བཞིན་དུ་འོང་ངོ༌། །དེ་ཡང་སྲོག་གཅོད་པར་མ་བསམས་པར་ནགས་སུ་མེ་གཏོང་བར་ཞུགས་ན། གལ་ཏེ་སྲོག་ཆགས་མེད་པར་ངེས་ན་ནི་དེའི་ཚེ་ལྟུང་བ་མེད་པ་ཡིན་ནོ། །སྲོག་ཆགས་ཡོད་པའི་བློས་གཙེ་བ་ཙམ་ཞིག་བྱས་པར་གྱུར་དུ་ཟིན་ཀྱང་གལ་ཏེ་གཙོ་བ་དེ་མིའི་ཡུལ་ལ་ཡིན་པར་གྱུར་ན་ནི་དེའི་ཚེ་མི་ཤི་ཡང་རུང་མ་ཤི་ཡང་རུང་སྦོམ་པོར་འགྱུར་རོ། །གལ་ཏེ་དུད་འགྲོའི་ཡུལ་ལ་ཡིན་ན་ནི་ཉེས་བྱས་སུ་འགྱུར་རོ། །འདིར་འདི་ལ་གནོད་པར་འགྱུར་རོ་སྙམ་དུ་ངེས་པར་སེམས་ལ་གནས་ན། འོན་ཀྱང་སྙིང་བརྩེ་བ་མེད་པ་ཉིད་ཀྱིས་དེ་མ་སྤངས་པ་ཡིན་པས་དེ་ཉིད་ཀྱི་ཕྱིར་སྦོམ་པོར་འགྱུར་རོ། །གསོད་པའི་བསམ་པ་མེད་པར་གྱུར་པ་གཞན་རྣམས་ལ་ཡང་དེ་བཞིན་དུ་རིག་པར་བྱའོ། །དཔེར་ན་ལྟོ་མཉེས་པ་ན་མངལ་ན་ཡོད་པ་གསད་པའི་སེམས་ཀྱིས་ལྟོ་ཉེད་པར་བྱེད་ལ། གལ་ཏེ་མ་ཤི་ན་སྦོམ་པོར་འགྱུར་བ་ལྟ་བུ་སྟེ།

---

^{[མ་དཔེ་གཟིགས་ན་འདིར་གནོན།]}

འདིར་ཡང་ངེས་པར་མ་ལ་གནོད་པར་འགྱུར་བ་ཡིན་ལ་གནས་པས་དེ་མ་སྤངས་པ་གང་ཡིན་པ་དེ་ཉིད་ལ་སྦོམ་པོར་འགྱུར་གྱི་འཆི་བ་ལས་ནི་མ་ཡིན་ནོ། །ལག་པ་གཅོད་པ་དང༌། སྣ་འབུགས་པ་དང༌། ཆོམ་རྐུན་པ་འབུལ་བ་དང༌། སྐྲ་ཅན་འཚོང་བ་དང༌། འབྲས་མ་སྨིན་པར་བརྟོལ་བ་ལ་སོགས་པ་དག་ལ་ཡང་ངེས་པར་སེམས་རྩུབ་པ་ཉེ་བར་གནས་པའི་ཕྱིར་སྦོམ་པོར་འགྱུར་བར་ཤེས་པར་བྱའོ། །བསམས་ནས་གསད་པ་ལ་ཞུགས་པ་ན། ངེས་པར་མ་བྱས་པར་འདི་ན་གང་ཅི་ཡོད་པ་དེ་ཐམས་ཅད་བརླག་པར་གྱུར་ཅིག་སྙམ་པ་ལས་དེ་རྣམས་ཤི་ན་སྲོག་ཆགས་ཇི་ལྟ་བུ་དང་སྲོག་ཆགས་ཇི་སྙེད་བ་ལྟུང་བ་རྣམས་ཀྱང་དེ་ལྟ་བུ་དང་དེ་སྙེད་འབྱུང་བར་འགྱུར་རོ། །རི་དགས་ཁོ་ན་དག་ཤི་བར་གྱུར་ཅིག་ཅེས་ངེས་པར་བྱས་ན་དེའི་ཚེ་རི་དགས་ཁོ་ན་ལས་ལྟུང་བར་འགྱུར་ཏེ། གཞན་དག་ལས་ནི་མ་ཡིན་ནོ། །འོན་ཏེ་དེས་འདི་ན་མི་དག་ཀྱང་ཡོད་དུད་འགྲོ་དག་ཀྱང་ཡོད་དོ་སྙམ་དུ་རིག་ན་དེའི་ཚེ་གནོད་པ་མ་སྤངས་པའི་ཕྱིར་མི་དག་ཤི་ན་ནི་སྦོམ་པོར་འགྱུར་རོ། །གཞན་དག་ཤི་ན་ནི་ཉེས་བྱས་སུ་འགྱུར་རོ་ཞེས་བྱ་བ་ལ་སོགས་པ་ཡིན་ནོ། །འདིར་དོན་བསྡུས་པ་ནི་འདི་ཡིན་ཏེ། །དགེ་སློང་མི་ལ་གཙོ་བ་ཙམ་བྱ་བའི་བསམ་པས་ཞུགས་པ་ནི་སྦོམ་པོར་འགྱུར་རོ། །དགེ་ཚུལ་ལ་ནི་ཡིད་ཀྱིས་བྱ་བར་འགྱུར་ཏེ། དེ་ལྟར་ན་ནགས་མེས་གཏོང་བ་ལ་སོགས་པ་རྣམས་ནི་ཕྱོགས་དང་མཐུན་པ་ཉིད་ཡིན་པར་ཐེ་ཚོམ་མེད་དོ། །དེ་ལྟར་ན་འདིར་ཐམས་ཅད་ཀྱང་སྲོག་གཅོད་པའི་ཕྱོགས་དང་མཐུན་པ་རྣམས་ཀྱི་དཔེར་བརྗོད་པ་ཙམ་ཞིག་བསྟན་པ་ཡིན་ནོ། །དགེ་ཚུལ་གྱི་ཚིག་ལེའུར་བྱས་པའི་འགྲེལ་པ་ལས་སྲོག་གཅོད་པ་སྤོང་བ་སྟེ་དང་པོ་རྫོགས་སོ།། །། དགེ་ཚུལ་གང་ཞིག་བརྐུ་བའི་སེམས་ཀྱིས་སུ། །མི་ཡི་རྫས་སུ་འདུ་ཤེས་མི་གཞན་ནོར། །མ་བྱིན་རིན་ཐང་ཚང་མིས་བདག་གིར་བྱས། །དུར་ཁྲོད་མི་དབང་བསོད་སྙོམས་མ་གཏོགས་པ། །བསམས་པ་གང་དེ་ཉིད་སྦྱོར་གཅིག་པུ་ཡིས། །བདག་གི་དོན་དུ་རྐུ་ན་དེའི་གནས་དང༌། །དུས་ཀྱིས་རིན་ཐང་དབང་གིས་དེ་བསྙིལ་བྱ། །དད་པས་རྒྱལ་བའི་རིང་བསྲེལ་རྐུ་དེ་མིན། །དགེ་ཚུལ་གང་ཞིག་བརྐུ་བའི་སེམས་ཀྱིས་མིའི་རྫས་སུ་འདུ་ཤེས་དང་ལྡན་པས་མིའི་རྫས་མ་བྱིན་པ་རིན་ཐང་ཚང་བ། མིས་བདག་གིར་བྱས་པ། དུར་ཁྲོད་པ་མ་ཡིན་པ། མི་དབང་བའི་བསོད་སྙོམས་ཀྱི་ངོ་བོ་མ་ཡིན་པ་བསམས་

---

^{[མ་དཔེ་གཟིགས་ན་འདིར་གནོན།]}

པ་ཁོ་ནའི་རྫས་ལ་སྦྱོར་བ་གཅིག་གིས་བདག་གི་དོན་དུ་རྐུ་བར་བྱེད་ན་རྐུ་བའི་གནས་དང་དུས་ཀྱི་རིན་ཐང་གི་དབང་གིས་དེ་བསྙིལ་བར་བྱ་བ་ཡིན་ནོ། །རྐུ་བ་དེ་ཡང་གལ་ཏེ་སངས་རྒྱས་ཀྱི་རིང་བསྲེལ་ལ་དད་པ་དང་མི་ལྡན་ན་བརྐུས་པ་ཡིན་ནོ། །དད་པས་རྐུ་བ་དང་ལྡན་པས་སངས་རྒྱས་ཀྱི་རིང་བསྲེལ་རྐུན་བསྙིལ་བར་བྱ་བ་ནི་མ་ཡིན་ཏེ། ཉེས་བྱས་ཡིན་པས་བཤགས་པར་བྱ་བ་ཡིན་ནོ། །འདིར་ཡང་བརྐུ་བའི་སེམས་ཀྱིས་སུ་ཞེས་སྨོས་པ་ནི་བསམ་པ་དག་པས་ནི་ལྟུང་བ་མེད་པར་བསྟན་པའི་ཕྱིར་རོ། །འདིར་གཞུང་ནི་རང་གིར་འདུ་ཤེས་པ་དང༌། ཡིད་གཅུགས་པའི་འདུ་ཤེས་ཀྱིས་ལེན་པ་དང་གཞན་གྱི་ཡང་སློང་ཞིང་ལེན་ན་ལྟུང་བ་མེད་པ་ཡིན་ནོ་ཞེས་འབྱུང་བ་ཡིན་ནོ། །མིའི་རྫས་སུ་འདུ་ཤེས་ཞེས་བྱ་བ་ནི་མིས་ཡོངས་སུ་གཟུང་བའི་རྫས་སུ་འདུ་ཤེས་དང་ལྡན་པས་སོ། །འདིར་གཞུང་ནི། འདི་ལྟ་སྟེ་དགེ་སློང་འདི་སྙམ་དུ་སྐྱེས་པ་དང་བུད་མེད་དང་མ་ནིང་གིས་ཡོངས་སུ་བཟུང་བའི་ཡོ་བྱད་ལྕི་བ་འདི་དག་ཅེས་བྱ་བ་ལ་སོགས་པར་འདུ་ཤེས་པ་ཞེས་འབྱུང་བ་ཡིན་ནོ། །མིའི་ཞེས་བྱ་བ་ནི་མིའི་འགྲོ་བ་སྟེ་འགྲོ་བ་གཞན་གྱིས་ཡོངས་སུ་བཟུང་བ་ནི་ཆུང་བ་ཡིན་ནོ་ཞེས་བྱ་བའི་ཐ་ཚིག་གོ །འདི་ག་ལས་བྱུང་ཞེ་ན། གལ་ཏེ་འདི་སྙམ་དུ་བྱའི་ནི་བརྐུའོ། །མིའི་ནི་མ་ཡིན་ནོ་སྙམ་དུ་སེམས་ན་ཉེས་པ་སྦོམ་པོར་འགྱུར་རོ་ཞེས་འབྱུང་བ་དང༌། དེ་བཞིན་དུ་དུད་འགྲོའི་བཏུང་བའི་སྐལ་བ་ལ་རིན་ཐང་ཚང་བ་བརྩི་བར་བྱའོ། །དངོས་པོ་ཚང་ན་ཉེས་པ་སྦོམ་པོར་འགྱུར་རོ་ཞེས་འབྱུང་བའི་ཕྱིར་མངོན་ནོ། །དུད་འགྲོ་དེ་ནི་ལྷ་ལ་སོགས་པ་དག་གིས་ཉེ་བར་མཚོན་པ་ཡིན་ཏེ་འདི་ལྟར་ཞུས་པ་ལས། མི་རྣམས་ཀྱི་ལྷ་ཁང་དང་མཆོད་རྟེན་གྱི་གནས་ཀྱི་ཁང་པ་དག་ན་རྒྱན་མཆིས་པ་དེ་དགེ་སློང་གིས་བརྐུ་བའི་སེམས་ཀྱིས་འཕྲོག་ན་ཅིར་འགྱུར་ལགས། གལ་ཏེ་མི་དག་སྲུང་བའི་ཕྱིར་ཉེ་བར་གནས་པ་ཡིན་ན་རིན་ཐང་བརྩི་བར་བྱའོ། །དངོས་པོ་ཚང་ན་མཐར་འགྱུར་རོ། །དངོས་པོ་མཚང་ན་ཉེས་པ་སྦོམ་པོར་འགྱུར་རོ། །འོན་ཏེ་མི་མ་ཡིན་པ་རྣམས་སྲུང་བའི་ཕྱིར་ཉེ་བར་གནས་པ་ཡིན་ན་དངོས་པོ་ཚང་ན་ཉེས་པ་སྦོམ་པོར་འགྱུར་རོ། །དངོས་པོ་མ་ཚང་ན་ཉེས་བྱས་སུ་འགྱུར་རོ། །འདུལ་བྱེད་ལས་ཀྱང་དགེ་སློང་གིས་གསེར་དངུལ་གྱི་ཕྲེང་བ་རྐུ་བར་བགྱིད་ན་ཐ་མ་ལགས་པར་འགྱུར་ལགས་སམ། བཀའ་སྩལ་པ། གསེར་དངུལ་གྱི་ཕྲེང་བ་གང་ཞིག་མ་ཤ་ཀ་ལྔའི་རིན་

---

^{[མ་དཔེ་གཟིགས་ན་འདིར་གནོན།]}

ཐང་བས་ཆུང་བ་ཞིག་ཡིན་ནམ། །མི་མ་ཡིན་པ་རྣམས་ཀྱི་ཡིན་ན་འགྱུར་རོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །གཞན་ཞེས་བྱ་བ་ནི་བདག་ཉིད་ཀྱི་མ་ཡིན་པའོ། །འདིར་གཞུང་ནི། སྐྱེས་བུ་མ་ཕམ་པ་བླུན་པོ་དེ་རང་གི་གོས་རྙེད་པ་དག་གིས་ཉེས་པ་སྤོམ་པོ་འབྱུང་ངོ་ཞེས་འབྱུང་བ་ཡིན་ནོ། །མ་བྱིན་ཞེས་བྱ་བ་ནི་འདིར་གཞུང་ལས། སྐྱེས་པ་དང་བུད་མེད་དང་མ་ནིང་གཞན་རྣམས་ཀྱིས་འདི་ལ་མ་བྱིན་པ་ཡིན་ཞེས་འབྱུང་བ་ཡིན་ནོ། །འདི་ཡང་མི་གཞན་གྱི་ས་ཞེས་བྱ་བ་ཁོ་ནས་གྲུབ་པ་ཡིན་མོད་ཀྱི། སྔོན་བྱུང་བ་ལ་ལྕི་རྟེན་འདོགས་པ་བཟློག་པའི་ཕྱིར་ཡང་སྨོས་པ་ཡིན་ནོ། །རིན་ཐང་ཚང་བ་ཞེས་བྱ་བ་ནི་གལ་ཏེ་ཀཱར་ཥཱ་པ་ཎ་བཞི་ཆ་ཚང་པའོ། །འདིར་གཞུང་ནི་གཏམ་གྱི་གཞི་ལས། །མ་ཤ་ཀ་གསུམ་བརྐུས་ན་མཐར་འགྱུར་ལགས་སམ། བཀའ་སྩལ་པ། །གང་ན་མ་ཤ་བཅུ་གཉིས་ལ་ཀཱར་ཥཱ་པ་ཎ་ཡིན་ན་འགྱུར་རོ། །མ་ཤ་ཀ་ལྔ་ལས་ལྷག་པར་བརྐུས་ན་ཕམ་པར་འགྱུར་བ་མ་ལགས་པར་འགྱུར་བ་ལགས་སམ། །བཀའ་སྩལ་བ། གང་ན་མ་ཤ་ཀ་བཞི་བཅུ་ལ་ཀཱར་ཥཱ་པ་ཎ་ཡིན་ན་འགྱུར་ཞེས་གསུངས་པ་ཡིན་ནོ། །ཞུས་པ་ལས་ཀྱང༌། དགེ་སློང་གིས་མ་ཤ་ཀ་ལྔ་ལས་ལྷག་པ་བརྐུས་ན་མཐའ་མ་ལགས་པར་འགྱུར་ལགས་སམ། བཀའ་སྩལ་པ། གང་ན་ཀཱར་ཥཱ་པ་ཎ་རིན་ཐང་ཆེ་བ་ཡིན་ན་འགྱུར་རོ་ཞེས་གསུངས་སོ། །དེ་ལྟར་ན་རྣམ་པར་འབྱེད་པ་ལས། མ་ཤ་ཀ་ལྔའམ་མ་ཤ་ཀ་ལྔ་ལས་ལྷག་པ་ཞེས་བྱ་བ་སོགས་པ་འབྱུང་བ་དང་ཡང་མི་འགལ་བ་ཡིན་ཏེ། །དེ་ནི་ཀཱར་ཥཱ་པ་ཎའི་བ་ཞི་ཆའི་མཚོན་པ་ཡིན་ནོ། །དེའི་སེ་ན་ནི་རྨ་བྱའི་བུས་མ་ཤ་ཀ་ཉི་ཤུ་ལ་ཀཱར་ཥཱ་པ་ཎར་བྱས་སོ། །དེང་སང་ནི་མ་ཤ་ཀ་བཅུ་དྲུག་ལ་ཀཱར་ཥཱ་པ་ཎ་ཡིན་པས་མ་ཤ་ཀ་བཞི་ས་མཐར་འགྱུར་བ་ཡིན་ནོ། །མ་ཤ་ཀ་ཞེས་བྱ་བ་ནི་པ་ཎ་ལ་བྱའོ། །ཀཱ་ར་ཤཱ་པ་ཎ་ཞེས་བྱ་བ་ནི་ན་ན་ཀ་ལ་བྱའོ། །ཞུས་པ་ལས་ནི། བཙུན་པ་བཅོམ་ལྡན་འདས་ཀྱིས་མ་ཤ་ཀ་ལྔ་བརྐུས་ན་མཐར་འགྱུར་རོ་ཞེས་གང་གསུངས་པའི་མ་ཤ་ཀ་ཇི་ལྟ་བུ་ལགས། མ་ཤ་ཀ་ཉི་ཤུ་ལན་ན་ཀ་ཡིན་ནོ། །མ་ཤ་ཀ་ཇི་ལྟར་བུ་ལགས། །ཀ་ཀ་ནི་བཞི་ལ་བྱའོ་ཞེས་འབྱུང་བ་ཡིན་ནོ། །མིས་བདག་གིར་བྱས་ཞེས་བྱ་བ་ནི་བདག་གིར་བྱས་པ་ཉིད་བདག་གིར་བྱས་པ་ཡིན་ཏེ། མིས་རྫས་གང་ལ་འདི་ནི་བདག་གི་ཡིན་ནོ་ཞེས་བློས་ཡོངས་སུ་གཟུང་བ་ཞེས་བྱ་བའི་ཐ་

---

^{[མ་དཔེ་གཟིགས་ན་འདིར་གནོན།]}

ཚིག་གོ །དེ་ལྟར་བྱས་ན་བདག་པོས་ནོར་ཡོད་པར་ཤེས་པའི་རྫས་དེ་བདག་པོ་དང་བཅས་པ་ཡིན་ནོ་ཞེས་བྱ་བའི་དོན་དུ་གནས་ལ། ནོར་ཡོད་པར་མ་ཤེས་པ་ནི་མ་ཡིན་ནོ། །འདིར་གཞུང་ནི་རྣམ་པར་འབྱེད་པ་ལས། གཏེར་ནི་གཉིས་ཏེ། བདག་པོ་དང་བཅས་པ་དང་བདག་པོ་མེད་པའོ། །དགེ་སློང་གིས་གསང་སྔགས་བརྗོད་ཅིང་དེ་འདི་སྙམ་དུ་བདག་པོ་མེད་པའི་གཏེར་ནི་བདག་ལ་ཤོག་ཤིག །བདག་པོ་དང་བཅས་པའི་གཏེར་ནི་མ་ཡིན་ནོ་སྙམ་པའི་བར་དུ་སེམས་པ་ལས་བདག་པོ་མེད་པའི་གཏེར་འོང་ལ། ཇི་སྲིད་དུ་མིག་ལམ་དུ་མི་སྣང་བར་འོང་གི་བར་དུ་ནི་ཉེས་བྱས་སུ་འགྱུར་རོ་མིག་ལམ་དུ་སྣང་བར་འོང་བ་ན་ནི་བརྐུས་པ་ཡིན་པར་བརྗོད་པར་བྱ་སྟེ། རིན་ཐང་བརྩི་བར་བྱའོ། །དངོས་པོ་ཚང་ན་ཉེས་བ་སྒོམ་པོར་འགྱུར་རོ། །མ་ཚང་ན་ཉེས་བྱས་སུ་འགྱུར་རོ་ཞེས་འབྱུང་བ་ཡིན་ཏེ། འདིར་ནི་བདག་པོས་ནོར་ཡོད་པར་ཤེས་པ་ནི་བདག་པོ་དང་བཅས་པ་ཞེས་བྱའོ། །ནོར་ཡོད་པར་མ་ཤེས་པ་ནི་བདག་པོ་མེད་པ་སྟེ། དཔེར་ན་ཡུལ་གྱི་བདག་པོ་འམ་གཏེར་སྤེད་པའི་རིགས་བརྒྱུད་ཀྱིས་མ་ཚོར་བའི་ནོར་ལྟ་བུ་ཡིན་ནོ། །གང་གིས་རྫས་སྦས་པ་དེ་རབས་ཆད་ལ་དེ་རྒྱལ་པོས་ཀྱང་མ་ཤེས་པས་བདག་པོ་མེད་པ་ཞེས་བྱའོ། །འོ་ན་ནོར་ཡོད་པར་མ་ཤེས་ཀྱང་བདག་པོ་ལས་ལས་ཀྱི་ལམ་ལྡང་པར་འདོད་པ་ཡིན་ན་ཅིའི་ཕྱིར་ཕམ་པར་མི་འགྱུར་ཞེ་ན། །འདིར་བཤད་པ། དཔེར་ན་མ་ཤ་ཀ་ལྔ་བས་ཆུང་བ་བརྐུས་པ་དང་འདྲ་བར་ལས་ཀྱི་ལམ་ཆུང་བའི་ཕྱིར་རོ། །འདིར་ལས་ཀྱི་ལམ་ཡང་ཅིའི་ཕྱིར་ཆུང་བ་ཡིན་ཞེ་ན། བདག་གིར་བྱ་བ་མ་སྐྱེས་པ་ཉིད་ཀྱིས་བརྐུས་པའི་ཡན་ལག་མ་ཚང་བའི་ཕྱིར་རོ། །ཅིའི་ཕྱིར་བདག་གིར་བྱ་བ་མེད་ན་བརྐུས་པར་འགྱུར་ཞེ་ན། །རྫས་དེ་བདག་པོ་དེ་དང་འབྲེལ་བ་ཉིད་དུ་གནས་པའི་ཕྱིར་རོ། །འདིར་ཤེས་པར་བྱེད་པའི་གཞུང་ནི་འདུལ་བྱེད་ལས། །དགེ་སློང་ནད་པ་ཞིག་ཡོད་པ་དེས་ནད་གཡོག་རྣམས་ལ་ཁུར་བ་སྣ་གསུམ་པ་དང་ནས་ཐུག་དག་སྒྲུབས་ཤིག་དང༌། དགེ་འདུན་ལ་ཡང་འབུལ་བར་བྱ་ཞིང་བདག་གིས་ཀྱང་སྤྱད་པར་བྱའོ་ཞེས་སྨྲས་ན་སྡེས་དེ་རྣམས་འགོད་པའི་རྒྱུ་དག་བྱིན་པ་དང༌། དེ་དག་འདི་སྙམ་དུ་བདག་ཅག་ལ་ཁུར་བ་སྣ་གསུམ་པ་དང་ནས་ཐུག་ཅི་དགོས་ཀྱི། བདག་ཅག་གི་འདི་ལ་ཁུར་བ་སྣ་གསུམ་དང་ནས་ཐུག་དག་བྱིན་ལ་གསེར་གྱི་དོང་ཚེ་དག་བགོ་བར་བྱའོ་སྙམ་དུ་སེམས་པ་

---

^{[མ་དཔེ་གཟིགས་ན་འདིར་གནོན།]}

ལས་རེ་ཞིག་ན་དེ་དག་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ཕམ་པའི་ལྟུང་བ་ནི་མེད་དེ། ཉེས་པ་སྦོམ་པོར་འགྱུར་རོ་ཞེས་བྱ་བའི་བར་དུ་གསུངས་པ་ཡིན་ཏེ། འདིར་དགེ་འདུན་གང་ལ་རྫས་དེ་ཕུལ་བ་དེ་དག་གིས་མ་ཤེས་པའི་ཕྱིར་བདག་གིར་བྱ་བ་མེད་པ་ནི་ཕམ་པ་མི་སྐྱེད་པའི་རྒྱུ་ཡིན་གྱི་གཞན་ནི་མ་ཡིན་ནོ། །འོན་ཀྱང་དགེ་འདུན་ལ་འབུལ་ལོ་ཞེས་སྨྲས་པའི་ཕྱིར་དེ་ནི་སྦྱིན་བདག་ལས་བརྐུས་པ་ཡིན་གྱི། དགེ་འདུན་ལས་མ་ཡིན་ནོ་ཞེ་ན། འདིར་བཤད་པ། གལ་ཏེ་རེ་ཞིག་དགེ་འདུན་ལ་བྱིན་ནོ་ཞེས་བློས་བརྟུལ་ནས་དེ་དག་གིས་བགོས་ནས་དེའི་ཚེ་སྦྱིན་པ་པོ་ལས་བརྐུས་སོ་ཞེས་བྱ་བའི་རྟོག་པའི་སྐབས་མེད་པ་ཡིན་ཏེ། དོན་གྱིས་ན་དེས་རྫས་དེ་ཡོངས་སུ་བཏང་བ་ཡིན་ནོ། །དེ་ལྟ་བས་ན་འདི་དགེ་འདུན་ལ་འབུལ་ལོ་ཞེས་བྱ་བའི་ཚིག་ནི་བྲིམ་པའི་བསམ་པ་ཡིན་པར་རྟོགས་པར་བྱ་སྟེ། དགེ་འདུན་ལ་དབུལ་ལོ་ཞེས་བྱ་བ་ནི་དགེ་འདུན་ལ་བྲིམ་མོ་ཞེས་བྱ་བའི་ཐ་ཚིག་གོ །དེ་ཁོ་ནའི་ཕྱིར་དགེ་འདུན་ལ་ཞེས་སྨྲས་པ་ཡིན་ནོ། །གཞན་དུ་ན་ནི་དགེ་འདུན་གྱི་ཕྱིར་ཞེས་ཡང་དག་པར་སྦྱིན་པའི་གཞི་སྨྲ་བའི་རིགས་སོ། །དེ་ལྟ་བས་ན་དགེ་འདུན་ཁོ་ན་ལས་བརྐུས་པ་ཡིན་གྱི་སྦྱིན་པ་པོ་ལས་ནི་མ་ཡིན་ནོ། །སྦྱིན་པ་པོ་ལས་བརྐུས་པ་ཡིན་ན་ནི་ཕམ་པར་ཐལ་བར་འགྱུར་བ་ཡིན་པས་ཉེས་པ་སྦོམ་པོར་མི་འགྱུར་རོ། །གལ་ཏེ་འདིར་ཉེས་པ་སྦོམ་པོར་ཞེས་གསུངས་པ་ནི་སྦྱོར་བ་ལ་ཡིན་ནོ་ཞེ་ན། དེ་ནི་དེ་གཏམས་པ་བརྐུས་པ་ཡིན་ཏེ་འདིར་ཐག་བཅད་པ་བརྐུས་པ་ཡིན་ནོ། །ཐག་མ་བཅད་པར་ནི་བགོ་བར་ཡང་མི་རུང་ངོ༌། །དེ་ལྟ་བས་ན་དགེ་འདུན་གྱིས་མ་ཤེས་པའི་ཕྱིར་བདག་གིར་བྱ་བ་མེད་པས་ཉེས་པ་སྦོམ་པོ་ཞེས་གསུངས་པ་འདི་ངེས་པ་ཡིན་ནོ། །འོ་ན་ཡང་དགེ་སློང་མ་གང་གིས་སྐྱེ་དགུ་མང་པོའི་རྙེད་པ་བསྡོས་པ་བདག་གིར་བྱེད་ན་ལྟུང་བྱེད་དོ་ཞེས་གསུངས་པ་དེ་ཇི་ལྟ་བུ་ཡིན། འདིར་སྐྱེ་དགུ་མང་པོ་ཞེས་བྱ་བ་ནི་དགེ་སློང་མའི་དགེ་འདུན་ཡིན་པར་དགོངས་སོ།། དེ་ལྟར་ཡང་དགེ་སློང་མའི་རྣམ་པར་འབྱེད་པ་ལས་ཀྱང་དགེ་སློང་མ་སྦོམ་དགའ་མོས་བཙུན་མོ་ཕྲེང་ལྡན་མ་ལ་བཅོམ་ལྡན་འདས་ཀྱིས་ཁོ་མོ་ཅག་ལ་ཟླ་མཚན་གྱི་འཛག་སྣོད་གནང་ན་དེ་ཡང་ཁོ་མོ་ཅག་ལ་མི་བདོག་གི་དེ་སྦྱིན་པའི་རིགས་སོ་ཞེས་སྨྲས་པ་དང༌། དེས་གོས་སྒྲོམ་གང་དགེ་སློང་མ་ཐམས་ཅད་

---

^{[མ་དཔེ་གཟིགས་ན་འདིར་གནོན།]}

ལ་བྱིན་ན་སྦོམ་དགའ་མོས་དེ་བདག་གིར་བྱས་སོ། །དགེ་སློང་མ་རྣམས་ཀྱིས་ཐོས་ནས་བཙུན་མོ་ཕྲེང་ལྡན་མ་ལ་སྨྲས་པ་དང༌། བདག་གིས་ཁྱེད་ལ་གོས་སྒྲོམ་གང་སྦོམ་དགའ་མོའི་ལག་ཏུ་བྱིན་ནོ་ཞེས་བྱ་བའི་བར་དུ་སྨྲས་སོ། །དེ་ནས་དགེ་སློང་མ་རྣམས་ཀྱིས་སྦོམ་དགའ་མོ་ལ་བསླངས་ན་དེ་མ་སྟེར་ནས་ལྟུང་བྱེད་དོ་ཞེས་བྱ་བའི་བར་དུ་གསུངས་པ་ཡིན་པ་ཇི་ལྟ་བུ་ཡིན། དེ་ལྟ་བས་ན་འདིར་དགེ་སློང་མ་གང་དག་ལ་བྱིན་པ་དེ་དག་གིས་མ་ཤེས་ན་ཉེས་པ་སྦོམ་པོར་འགྱུར་ལ། ཤེས་ཤིང་ཐག་བཅད་ན་ཕམ་པར་འགྱུར་བ་ཡིན་ན་ལྟུང་བྱེད་དུ་འགྱུར་རོ་ཞེས་གསུངས་པ་དེ་ཅིའི་ཕྱིར་ཡིན་པ་སྨྲོས་ཤིག །འདིར་བཤད་པ། སྦོམ་དགའ་མོས་བཅོམ་ལྡན་འདས་ཀྱིས་ཁོ་མོ་ཅག་ལ་གནང་ངོ་ཞེས་སྨྲས་པའི་ཤན་གྱིས་བདག་ཉིད་ལ་བསྡོས་པ་ཡིན་ལ། བཙུན་མོ་ཕྲེང་ལྡན་མ་ཡང་དེ་དགེ་འདུན་གྱི་ཆེད་དུ་སློང་བ་མ་ཡིན་པར་ངེས་པ་སྐྱེས་པས་དེས་དགེ་འདུན་གྱི་ཕྱིར་བྱིན་ནོ། །དེའི་ཕྱིར་བདག་གིས་འདི་རྙེད་དོ་སྙམ་དུ་ངེས་པར་རྟོག་པའི་དབང་གིས་བདག་གིར་བྱས་ཀྱང་ཕམ་པར་རྣམ་པར་མི་གཞག་གོ །འོ་ན་ཡང་དགེ་སློང་མ་གང་གིས་དགེ་འདུན་གྱི་རྙེད་པར་བསྡོས་པ་གང་ཟག་བདག་གིར་སྔོ་བར་བྱེད་ན་སྤང་བའི་ལྟུང་བྱེད་དོ་ཞེས་འབྱུང་བ་ཇི་ལྟ་བུ་ཞེ་ན། འདིར་ཡང་མ་བྱིན་པར་ལེན་པའི་སྐྱོན་མེད་དེ། སྦྱིན་པ་པོ་མངོན་པའི་ཕྱིར་དང༌། བརྐུ་སེམས་དང་བྲལ་བའི་ཕྱིར་རོ། །སྔ་མ་ཤོས་ནི་ཤན་གྱིས་ཕྱི་མ་སྦྱིན་པ་པོར་མངོན་པས་བྱེ་བྲག་ཡོད་དོ། །དེ་ཉིད་ཀྱི་ཕྱིར་བཤད་པ་བདག་གིར་བྱ་བ་ནི་བསྡོས་པ་བསྒྱུར་བ་དང་འདྲ་བ་ཡིན་གྱི་བསྡོས་པ་བསྒྱུར་བ་ནི་མ་ཡིན་ནོ། །གཞན་ཡང་བསྡོས་པ་ནི་དགེ་སློང་དང་ཐུན་མོང་བ་ཡིན་ལ་བདག་གིར་བྱེད་པ་ནི་ཐུན་མོང་མ་ཡིན་ཏེ། དགེ་སློང་མ་རྣམས་ཁོ་ནའི་ཡིན་ནོ། །དེ་བཞིན་དུ་བསྔོས་པ་ནི་བདག་གིར་མ་བྱས་པ་བདག་གིར་བྱ་བའི་ཕྱིར་བསྔོ་བ་ཡིན་ལ། བདག་གིར་ བྱེད་པ་ནི་རང་གིར་བྱས་པ་ཉིད་ཡིན་ཏེ། ཁྱད་པར་ནི་དེ་ཡིན་ནོ། །ཧ་ཅང ་རྒྱ་ཆེར་བྱས་པས་ཆོག་གོ །འོ་ན་ཅིའི་ཕྱིར་བདག་པོས་ནོར་ཡོད་པར་མ་ཤེས་པ་བདག་པོ་མེད་པའི་གཏེར་གང་ཡིན་པ་འདི་ལྟ་སྟེ། དགོན་པ་སུས་ཀྱང་མ་བསྣམས་པ་ན་ཡོད་པ་དེ་བརྐུས་ན་འདི་ཉེས་པ་སྦོམ་པོ་ཞེས་གསུངས་པ་མི་མངོན་ཞེ་ན། མི་འཐད་པའི་ཕྱིར་རོ། །དེ་ན་ཡོངས་སུ་འཛིན་པ་མེད་པ་ཉིད་ཀྱིས་མ་བྱིན་པར་ལེན་པ་མེད་པའི་ཕྱིར་ཏེ། དཔེར་ན་བྱང་གི་སྒྲ་མི་སྙན་

---

^{[མ་དཔེ་གཟིགས་ན་འདིར་གནོན།]}

གྱི་བཞིན་ནོ། །གལ་ཏེ་བརྐུ་སེམས་སྐྱེས་ན་ཉེས་པ་སྦོམ་པོར་འགྱུར་ཏེ། དངོས་གཞིའི་རྣམ་པར་རྟོག་པ་རྣམས་ཀྱིས་ཡན་ལག་རྣམས་འདུས་པའི་ཕྱིར་རོ། །དུར་ཁྲོད་མི་དབང་བསོས་སྙོམས་མ་གཏོགས་པ། །ཞེས་བྱ་བ་ནི་རྫས་དེ་ཡང་གལ་ཏེ་དུར་ཁྲོད་པ་དང་མི་དབང་བའི་བསོད་སྙོམས་ལས་གཞན་པ་ཞེས་བྱ་བའི་ཐ་ཚིག་གོ །འདིར་གཞུང་ནི་འདུལ་བྱེད་ལས། དགེ་སློང་རྣམས་ཀྱིས་ཡོངས་སུ་འཛིན་པ་དང་བཅས་པའི་དུར་ཁྲོད་ནས་གོས་མ་བྱིན་པ་དག་ལེན་པ་དང༌། རིགས་ངན་དག་ན་རེ་བཙུན་པ་དག་བདག་ཅག་མཁར་ལན་གྱི་ལས་ཅུང་ཟད་ཅི་བགྱིད་པ་དེ་ཐམས་ཅད་འདིའི་ཕྱིར་བགྱིད་ན། ཁྱེད་ཀྱིས་བདག་གི་གོས་འཕྲོག་གམ་ཞེས་དེ་དག་འཕྱ་བ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་ཡོངས་སུ་འཛིན་པ་དང་བཅས་པའི་དུར་ཁྲོད་ནས་གོས་བླང་བར་མི་བྱའོ། །གང་ཞིག་ལེན་པར་བྱེད་ན་དམན་པ་སྦོམ་པོར་འགྱུར་རོ་ཞེས་བྱ་བའི་བར་དུ་འབྱུང་བ་ཡིན་ནོ། །ཁ་ཅིག་ན་རེ་དེ་ལ་དུར་ཁྲོད་རྣམ་པ་གཉིས་ཏེ། འདི་བདག་ཁོ་ནའི་ཡིན་ནོ་ཞེས་བདག་གིར་བྱས་པ་དང༌། གནས་ཡོངས་སུ་འཛིན་པས་འཐོབ་པར་ངེས་པའོ། །འདིར་བདག་གིར་བྱས་པ་རྐུ་ན་མཐར་འགྱུར་བར་འདོད་ལ། འཐོབ་པར་ངེས་པ་ཞིག་བརྐུས་ན་དམན་པ་སྦོམ་པོར་འདོད་པར་བྱའོ་ཞེས་ཟེར་ཏེ། འཐོབ་པར་ངེས་པ་ནི་མཁར་ལན་བྱེད་པ་ལ་སོགས་པའི་དབང་གིས་སོ། །དེའི་ཕྱིར་རིགས་ངན་གང་དག་གིས་རྫས་དེ་འཐོབ་པར་ངེས་པ་དེ་དག་གིས་དེ་ཡོངས་སུ་འཛིན་པ་དང་བཅས་པ་ཉིད་ཡིན་ནོ། །འོ་ན་འཐོབ་པར་ངེས་པ་ཉིད་ཀྱང་ཤོ་གམ་དང་འདྲ་བར་ཕམ་པར་འགྱུར་མོད་ཅེ་ན། དེ་ནི་མི་རུང་སྟེ། ཤོ་གམ་ནི་བསྐྱིས་པ་དང་འདྲ་བར་གཞལ་བར་བྱ་བ་ཉིད་ཡིན་ནོ། །དུར་ཁྲོད་ཀྱི་རྫས་ནི་ཕོངས་པ་ཉིད་ཡིན་པས་སྦྱིན་པར་བྱ་བ་ཉིད་ཡིན་ཏེ། དེའི་ཆེད་དུ་སྙིང་བརྩེ་བ་མེད་པར་མཁར་ལན་ལ་སོགས་པ་བྱེད་དུ་འཇུག་པའི་ཕྱིར་རོ། །དེ་ལྟ་བས་ན་གནས་ཡོངས་སུ་འཛིན་པའི་ཕྱིར་རོ། །འཐོབ་པར་ངེས་པ་ཉིད་ཡིན་དུ་ཟིན་ཀྱང་འཐོབ་པ་དང་ལྡན་པ་རྣམས་ལ་རྫས་དེ་ལག་ཏུ་མ་ཐོབ་པས་འདི་ནི་བདག་གིའོ་ཞེས་བདག་གིར་བྱེད་པའི་བློ་མེད་པའི་ཕྱིར་ལྟུང་བ་ཆུང་བ་ཡིན་པར་བསྟན་ཏོ། སློབ་དཔོན་གྱི་ཞལ་ནས་གལ་ཏེ་དེ་ལྟ་ཡིན་ན་བདག་གིར་བྱས་པ་ཞེས་བྱ་བ་ཁོ་ནས་གྲུབ་པས་དུར་ཁྲོད་པ་ཞེས་བསྟན་པ་དོན་མེད་པར་འགྱུར་རོ། །

---

^{[མ་དཔེ་གཟིགས་ན་འདིར་གནོན།]}

དེ་ལྟ་བས་ན་འཇིག་རྟེན་ན་ནི་དུར་ཁྲོད་ཀྱི་རྫས་ནི་ཐ་ཆད་ཡིན་པས་མངོན་པར་ཞེ་ན་པ་ཤིན་ཏུ་ཞན་པའི་ཕྱིར་དམན་པ་སྦོམ་པོར་འགྱུར་བར་བཤད་པའི་ཆེད་དུ་དུར་ཁྲོད་པ་ཞེས་གསུངས་སོ་ཞེས་འཆད་དེ། དངོས་པོ་ཚང་ན་དེ་ཆུང་བ་ཡིན་པར་ཁོང་དུ་ཆུད་པར་བྱའོ། །མི་དབང་བའི་བསོད་སྙོམས་ནི་དབང་བ་མ་ཡིན་པ་ཞེས་བྱ་སྟེ། དཔེར་ན་དགེ་ཚུལ་རྣགས་ཀྱིའོ་ཞེས་སྦྱིན་པར་བྱེད་པ་ན་དགེ་སློང་གིས་དེའི་ནང་དུ་གཏོགས་པར་བྱས་ཏེ། ལེན་པར་བྱེད་པ་ལྟ་བུའོ། །འདིར་གཞུང་ནི་འདུལ་བྱེད་ལས། དགེ་སློང་གིས་འབྲས་ཆན་གྱི་བསོད་སྙོམས་མི་དབང་བ་བླངས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དམན་པ་སྦོམ་པོར་འགྱུར་རོ། །དེ་བཞིན་དུ་ཕྱེའི་བསོད་སྙོམས་དང༌། ནས་ཆན་གྱི་བསོད་སྙོམས་དང༌། བཅའ་བའི་བསོད་སྙོམས་ལ་སོགས་པ་ཐམས་ཅད་ལ་ཡང་དམན་པ་སྦོམ་པོར་འགྱུར་རོ་ཞེས་བྱ་བའི་བར་དུ་འབྱུང་བ་ཡིན་ནོ། །ཅིའི་ཕྱིར་མཐར་མི་འགྱུར་ཞེ་ན། འདིར་ལན་བཤད་པ། ན་ན་ཀ་ལྟ་བུའི་ནོར་ལན་པ་ལ་ཞེན་པ་གང་ཡིན་པ་དེ་ལྟ་བུ་ཁ་ཟས་ལ་ནི་དེ་ལྟ་མ་ཡིན་ཏེ། བསམ་པ་ཞན་པའི་ཕྱིར་དེས། འཇིག་རྟེན་གྱི་ཐ་སྙད་ཀྱི་དབང་གི་ཕྱིར་ཉེས་པ་སྦོམ་པོ་ཁོ་ནར་མངོན་གྱི་རིན་ཐང་མ་ཚང་བའི་ཕྱིར་ནི་མ་ཡིན་ཏེ། རིན་ཐང་བརྩི་བར་བྱའོ་ཞེས་བྱ་བ་ལ་སོགས་པ་མ་གསུངས་པའི་ཕྱིར་རོ། །གཞན་གྱི་དོན་མ་ཡིན་པའི་ཕྱིར་དང༌། གཞན་གྱི་དོན་དུ་མ་གསུངས་པའི་ཕྱིར་དང༌། བརྐུས་པར་མི་འགྱུར་བའི་ཕྱིར་ཡང་མ་ཡིན་ཏེ། མི་དབང་བར་ལེན་པའི་ཕྱིར་རོ། །བསམས་པ་ཞེས་བྱ་བ་ནི་མ་བསམས་པ་ལས་ལྟུང་བར་མི་འགྱུར་རོ། །འདིར་གཞུང་ནི་འདུལ་བྱེད་ལས། དགེ་སློང་གིས་གྲོས་རྡོལ་བ་མ་བྱིན་པར་བླངས་ཏེ། དེས་དེ་ཕྱེ་བ་དང་དེའི་ནང་ནས་རིན་ཐང་ཆེན་པོ་རི་བའི་སྣམ་བུ་ཞིག་བྱུང་ནས་དེ་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། གོས་རྡོལ་བའི་རིན་ཐང་བརྩི་བར་བྱའོ་ཞེས་བྱ་བ་ལ་སོགས་པ་འབྱུང་བ་ཡིན་ནོ། །གང་དེ་ཉིད་ཅེས་བྱ་བ་ནི་གང་ཁོ་ན་མངོན་པར་བྱས་པ་དེ་ཉིད་གལ་ཏེ་ཡིན་ནའོ།། འདྲ་བར་འཁྲུལ་བས་མ་བསམས་པ་ནི་མ་ཡིན་ནོ་ཞེས་བྱ་བའི་ཐ་ཚིག་གོ །འདིར་གཞུང་ནི་ཞུས་པ་ལས། བཙུན་པ་དགེ་སློང་གིས་ཤིང་པ་ལ་ལས་བགྱིས་པའི་གོས་རྐུ་བར་འཚལ་ལ། དེས་གསོ་རས་བརྐུས་ན་ཅིར་འགྱུར་ལགས། བཀའ་སྩལ་པ། དམན་པ་སྦོམ་པོར་འགྱུར་རོ། །འོ་ན་དེ་མ་བསམས་

---

^{[མ་དཔེ་གཟིགས་ན་འདིར་གནོན།]}

པ་ཡིན་མོད་ཅེ་ན། གལ་ཏེ་དེ་ལྟ་ཡིན་དུ་ཟིན་ཀྱང་འོན་ཀྱང་འདི་བརྐུའོ་སྙམ་དུའི་བསམ་པ་ཡོད་པའི་ཕྱིར་བསམ་པ་ཉིད་ཡིན་པ་སྙམ་དུ་དོགས་པར་འགྱུར་རོ། །དེ་ལྟ་བས་ན་དེ་བསལ་བའི་ཕྱིར་སྨོས་པ་ཡིན་ནོ། །འདིར་ཡང་ཤིང་བལ་ལས་བྱས་པའི་བརྐུ་བའི་སྦྱོར་བ་ལས་སྦོམ་པོར་གསུངས་ཀྱི་གསོ་རས་ལ་ནི་ལྟུང་བ་མེད་པ་ཁོ་ནའོ། །དེ་ལ་ཡང་གལ་ཏེ་བརྐུ་བའི་སེམས་བསྐྱེད་ན་དངོས་པོ་ཇི་ལྟ་བ་བཞིན་དུ་ལྟུང་བ་མ་བཟློག་པ་ཉིད་ཡིན་ནོ། །སྦྱོར་བ་གཅིག་པུ་ཡིས་ཞེས་བྱ་བ་ལས། འདིར་གཞུང་ནི་འདུལ་བྱེད་ལས། དགེ་སློང་གིས་དགེ་སློང་ལ་སྨྲས་པ། །ཚེ་དང་ལྡན་པ་ཚུར་ཤོག །ཆུང་ངུ་ཆུང་དུ་ནས་མ་བྱིན་པར་བླངས་ན་ལྟུང་བར་མི་འགྱུར་རོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། སྦྱོར་བ་གཅིག་ལ་རིན་ཐང་བརྩི་བར་བྱའོ། །དངོས་པོ་ཚང་ན་མཐར་འགྱུར་རོ། །མ་ཚང་ན་ཉེས་པ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ། །བདག་གི་དོན་དུ་ཞེས་བྱ་བ་ནི་རང་གི་ཆེད་དུའོ། གཞན་གྱི་ཆེད་དུ་ནི་ལྟུང་བ་ཆུང་བ་ཉིད་ཡིན་ནོ། །འདིར་གཞུང་ནི་ཞུས་པ་ལས། བཙུན་པ་དགེ་སློང་གིས་མ་བཅོལ་བར་གཞན་གྱི་ཆེད་དུ་རྐུ་བར་བགྱིད་ན་ཅིར་འགྱུར་ལགས། བཀའ་སྩལ་པ་ཉེས་པ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ། །རྐུ་ན་ཞེས་བྱ་བ་ནི་རྐུ་བ་རྣམ་པ་དུ་མ་ཞིག་ཡོད་དེའོ་གནས་འཆད་དོ། །དེའི་གནས་དང་དུས་ཀྱི་རིན་ཐང་དབང་གིས་ཞེས་བྱ་བ་ནི་རྐུ་བའི་གནས་དང་རྐུ་བའི་དུས་དེའི་རིན་ཐར་དེའི་དབང་གིས་ལྟུང་བ་རྣམ་པར་གཞག་གོ་ཞེས་བྱ་བའི་ཐ་ཚིག་གོ །འདིར་གཞུང་ནི་འདུལ་བྱེད་ལས། དགེ་སློང་གིས་དགེ་སློང་ལ་སྨྲས་པ། ཚེ་དང་ལྡན་པ་ཚུར་ཤོག ། རྐུར་འདོང་ཞིང་གང་གིས་དངོས་པོ་མི་ཚང་བ་དེ་ཙམ་ཞིག་བླང་བར་བྱའོ། །དེ་གཉིས་ཀྱིས་གང་དུ་བླངས་པ་དེ་ཉིད་དུ་དངོས་པོ་ཚང་ནས་དེ་གཉིས་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། གནས་གང་ནས་བསྐྱོད་པ་ཉིད་ཀྱི་རིན་ཐང་བརྩི་བར་བྱའོ་ཞེས་བྱ་བ་ལ་སོགས་པའི་བར་དུ་གསུངས་པ་ཡིན་ནོ། །དད་པས་རྒྱལ་བའི་རིང་བསྲེལ་རྐུ། །དེ་མིན་ཞེས་བྱ་བ་ནི་གལ་ཏེ་དེས་དད་པའི་རྒྱུས་ནི་སངས་རྒྱས་ཀྱི་རིང་བསྲེལ་རྐུ་བ་མ་ཡིན་ན་དེའི་ཚེ་བསྙིལ་བར་བྱ་བ་ཡིན་ནོ། །འདི་སྐད་དུ་རྫས་དེ་གལ་ཏེ་སངས་རྒྱས་ཀྱི་རིང་བསྲེལ་ཡིན་ལ། དེ་ཡང་གལ་ཏེ་མཆོད་པའི་ཕྱིར་རྐུ་ན་དེའི་ཚེ་མཐར་མི་འགྱུར་

---

^{[མ་དཔེ་གཟིགས་ན་འདིར་གནོན།]}

རོ། འཚོ་བའི་ཕྱིར་རྐུ་ན་ནི་མཐར་འགྱུར་རོ་ཞེས་བྱ་བ་ཡིན་ནོ། །འདིར་གཞུང་ནི་ཞུས་པ་ལས། བཙུན་པ་དགེ་སློང་གིས་སྟོན་པའི་རིང་བསྲེལ་བརྐུ་བའི་སེམས་ཀྱིས་རྐུ་བར་བགྱིད་ན་ཅིར་འགྱུར་ལགས། ཉེ་བ་འཁོར་གལ་ཏེ་འཚོ་བའི་བསམ་པས་བརྐུ་ལ་གལ་ཏེ་དངོས་པོ་ཚད་ན་ཕམ་པར་འགྱུར་རོ།། དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ། །ཅི་སྟེ་དེ་ལ་མེད་ཀྱང་རུང་བདག་ལ་མེད་ཀྱང་རུང་ཞེས་ཆུད་གསན་པར་བྱ་བའི་ཕྱིར་རྐུན་ཉེས་པ་སྦོམ་པོར་འགྱུར་རོ། །ཅི་སྟེ་འདི་ནི་བདག་གི་སྟོན་པ་ཡིན་པས་མཆོད་པར་བྱའི་ཞེས་མཆོད་པའི་ཆེད་དུ་རྐུ་ན་ཉེས་བྱས་སུ་འགྱུར་རོ་ཞེས་འབྱུང་བ་ཡིན་ནོ། །དེ་ལྟར་ན་ཡན་ལག་དེ་རྣམས་འདུས་པ་ལས་བསྙིལ་བར་བྱ་བ་ཡིན་གྱི་གཞན་དུ་ནི་མ་ཡིན་ནོ། །འོ་ན་ཞུས་པ་ལས། དགེ་སློང་ཡིད་གཉིས་ཅན་ཞིག་གིས་བརྐུའོ། །མི་བརྐུའོ་སྙམ་པ་ལ་རྐུ་འཕྲོག་བགྱིད་ན་ཅིར་འགྱུར་ལགས། བཀའ་སྩལ་པ། ཉེས་པ་སྦོམ་པོར་འགྱུར་རོ་ཞེས་གང་གསུངས་པ་ཇི་ལྟ་བུ་ཡིན་ཞེ་ན། དོན་དེ་ནི་དྲང་བར་བྱ་བ་ཡིན་ཏེ། ལས་ཀྱི་ལམ་དངོས་ངང་ལས་ཀྱི་ལམ་གྱི་སྦྱོར་བ་ལ་ཡང་རྐུ་བ་ཞེས་བྱ་བ་ཡོད་པས། དེ་ལ་རྐུ་འཕྲོག་བགྱིད་ན་ཞེས་བྱ་བ་འདིས་ནི་ལས་ཀྱི་ལམ་གྱི་སྦྱོར་བ་བསྟན་ཏོ་ཞེས་བྱ་བ་དེ་ལྟར་དྲང་ངོ༌། །རྩ་བའི་བྱེ་བྲག་ཏུ་བཤད་པ་ལས་ཀྱང༌། རྐུ་བར་བྱེད་ཅེས་བྱ་བ་ནི་སྦྱོར་བར་བྱེད་པའོ། །རྐུ་འཕྲོག་བྱེད་ཅེས་བྱ་བ་ནི་ལེན་པ་ཡིན་པར་སྟོན་ཏོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །དེ་བས་ན་རྐུ་བར་བྱེད་ཅེས་བྱ་བ་ནི་སྦྱོར་བ་ལ་ཡང་ཡོད་དོ་ཞེས་བྱ་བ་འདི་གཙུག་ལག་ལས་རྣམ་པར་བཤད་པ་ཡིན་ནོ། །དེའི་ཕྱིར་ཡན་ལག་གཞན་གྱིས་ཁ་བསྐང་བར་མི་བྱའོ།། །།བམ་པོ་གསུམ་པ། རྐུ་བ་ལ་ནི་བརྐུ་སེམས་གཙོ་བོ་སྟེ། །དེ་བས་དེ་དང་བྲལ་ན་ཉེས་པ་མེད། །ཡན་ལག་ལྷག་མ་ཉམས་པས་ཆུང་བར་འགྱུར། །རྨི་ལམ་ལ་སོགས་དག་ལ་ཉེས་པ་མེད། །འདིར་རྐུ་བ་ལ་ནི་བརྐུ་བའི་སེམས་ཉིད་གཙོ་བོའི་ཡན་ལག་ཡིན་ནོ། །དེ་ལྟ་བས་ན་ཡན་ལག་གཅིག་པོ་ཁོ་ན་མེད་པས་ལྟུང་བ་མེད་པ་ཡིན་ཏེ། འདིར་བརྐུ་སེམས་ནི་ལྟུང་བ་བྱེད་པ་ཡིན་པའི་ཕྱིར་རོ། །དེས་ན་སྦྱོར་བའམ་དངོས་གཞིའམ། གཉི་ག་ལ་ཡང་རུང་སྟེ། གང་ལ་བརྐུ་སེམས་ཡོད་པ་དེའི་ལྟུང་བར་འགྱུར་གྱི། གཞན་དུ་ནི་མ་ཡིན་ནོ། །དེ་ལྟར་བྱ་བ་ན་གལ་ཏེ་

---

^{[མ་དཔེ་གཟིགས་ན་འདིར་གནོན།]}

སྦྱོར་བ་ཁོ་ན་ལ་བརྐུ་བའི་སེམས་ཉིད་ན་དེའི་ཚེ་སྦྱོར་བའི་ལྟུང་བ་ཁོ་ནར་འགྱུར་གྱི། །དངོས་གཞི་ལ་ནི་མ་ཡིན་ནོ། །ཇི་སྟེ་དངོས་གཞི་ལ་བརྐུ་སེམས་ཉིད་ཡོད་ན་དེའི་ཚེ་དངོས་གཞི་ཁོ་ན་ཡིན་གྱི། སྦྱོར་བའི་ལྟུང་བ་ནི་མེད་དོ། །གཉི་ག་ལ་བརྐུ་བའི་སེམས་ཉིད་ཡོད་ན་ནི་གཉི་གར་གཏོགས་པའི་ལྟུང་བ་ཡོད་དོ། །འདིར་གཞུང་ནི་ཞུས་པ་ལས། བཙུན་པ་དགེ་སློང་གིས་གོས་ཀྱི་གདང་ལས་གོས་ལེན་ཅིང་སྔར་བརྐུ་བའི་སེམས་བྱུང་ལ་སླད་ཀྱིས་རང་གི་འདུ་ཤེས་དང་ལྡན་པས་རྐུ་བར་བགྱིད་ན་ཅིར་འགྱུར་ལགས། སྔ་མ་ནི་ཉེས་པ་སྦོམ་པོར་འགྱུར་ལ། ཕྱི་མ་ནི་ཉེས་པ་མེད་དོ། །འོན་ཏེ་སྔར་ནི་རང་གི་འདུ་ཤེས་དང་ལྡན་ལ། ཕྱིས་བརྐུ་བའི་སེམས་ཀྱིས་རྐུ་ན་སྔ་མ་ལ་ནི་ལྟུང་བ་མེད་ལ། ཕྱི་མ་ལ་ནི་ཉེས་པ་སྦོམ་པོར་འགྱུར་རོ་ཞེས་འབྱུང་བ་དང༌། གཞན་ཡང་གཞུང་ལས། བཙུན་པ་རེ་ཞིག་དགེ་སློང་གིས་གོས་ཀྱི་གདང་བུའི་ཐོག་མིའི་ཆ་ལ། རང་གི་འདུ་ཤེས་དང་ལྡན་པས་བརྗོད་པར་བགྱིད་ལ། ཐ་མའི་ཆ་ལ་བརྐུ་བའི་སེམས་ཀྱིས་བགྱིད་ན་ཅིར་འགྱུར་ལགས། མཐར་འགྱུར་རོ་ཞེས་འབྱུང་བ་ཡིན་ནོ། །དེ་ལྟ་བས་ན་སློབ་དཔོན་ཡོན་ཏན་འོད་ཀྱི་ཞལ་ནས། འདིར་རང་གིས་ལ་རང་གིར་འདུ་ཤེས་ཡོད་ཀྱང་དགོས་པའི་དབང་གིས་བརྐུ་བའི་སེམས་ཉེ་བར་གནས་པའི་དབང་དུ་མཛད་ནས་ནི་གཞུང་གི་དུམ་བུ་སྔ་མ་ལས་ཉེས་པ་སྦོམ་པོར་གསུངས་པ་ཡིན་ལ། གཞུང་གི་དུམ་བུ་ཕྱི་མ་ལས་ནི་གཞན་གྱི་ལ་གཞན་གྱི་ནོར་ཡིན་པར་འདུ་ཤེས་ཡོད་ན་མཐར་འགྱུར་རོ་ཞེས་གསུངས་པ་ཡིན་ནོ་ཞེས་བཤད་དོ། །དེ་ལྟར་ན་བརྐུ་བའི་སེམས་གཙོ་བོའི་ཡན་ལག་ཡིན་པས། དེ་ཡོད་ན་ཡན་ལག་གཞན་རྣམས་ལས་གཅིག་པུ་ཞིག་མེད་ཀྱང་ལྟུང་བ་ཆུང་ངུ་ཉིད་ཡིན་ནོ། །རྨི་ལམ་ལ་སོགས་དག་ལ་ཞེས་བྱ་བ་ནི་འདིར་རྨི་ལམ་མ་ཡིན་པ་ཉིད་དང་བསླབ་པ་མ་བཏང་བ་ཉིད་དང༌། ཐ་མལ་པར་གནས་པ་ཉིད་ཅེས་བྱ་བ་འདི་དག་གི་དབང་དུ་བྱས་པ་ཉིད་ཡིན་ཏེ། དེ་རྣམས་ལས་གང་ཡང་རུང་བ་ཞིག་མེད་ན་ཡང་ལྟུང་བ་མེད་དོ། །འདིར་ཡང༌། སེམས་བསྐྱེད་པ་ནི་བསྡམ་བྱ་དང་པོ་ཡིན། །སྦྱོར་བ་ལས་ནི་ཉེས་བྱས་རིག་པར་བྱ། །ཕྱི་མའི་སྦྱོར་བ་ལ་ཡང་ཉེས་བྱས་ཡིན། །དངོས་གཞི་ཀུན་ལ་འདི་ནི་དངོས་གཞི་ཡིན། །ཐམས་ཅད་དུ་ཡང་འདའ་བའི་རིམ་པ་

---

^{[མ་དཔེ་གཟིགས་ན་འདིར་གནོན།]}

ནི་སེམས་བསྐྱེད་པ་ནི་བསྡམ་པར་བྱ་བའི་ཉེས་བྱས་སོ། །སྦྱོར་བ་ནི་བཤགས་པར་བྱ་བའི་ཉེས་བྱས་སོ། །ངན་པར་བྱས་པའི་དོན་ལ་ནི་སྦྱོར་བ་དང་རྗེས་སུ་སྦྱོར་བ་ཞེས་བྱའོ། །དེ་ལ་ཡང་ཉེས་བྱས་ཆེས་ཆུང་བ་ལ་ཡང་ཉེས་བྱས་ཞེས་བྱ་བའི་མིང་འཐོབ་པོ་ཞེས་འདོན་པའི་ཕྱིར་རོ། །དེ་ལྟར་ཡང་ཆེས་ཆུང་བ་ཡང་ཆུང་བ་དང་འདྲ་བར་ཉེས་བྱས་ཉིད་ཡིན་ནོ་ཞེས་བཤད་པའི་ཕྱིར་རོ། །ལས་ཀྱི་ལམ་གྱི་དངོས་གཞི་ཡོངས་སུ་རྫོགས་ན་དངོས་གཞི་ཡིན་ཏེ་ཚུལ་ནི་དེ་ཡིན་ནོ། །འདི་མན་ཆད་ནི་མ་བྱིན་པར་ལེན་པའི་ཡན་ལག་དེ་རྣམས་སྤྲོས་ཏེ་བཤད་པར་བྱའོ། །ཆུད་གཟན་ཕྱིར་འཕྲོག་གདོས་དང་བཅས་པ་ཡི། །རྒྱ་སོགས་མ་རུང་བྱེད་དང་མི་དབང་པའི། །བསོད་སྙོམས་ལེན་པར་བྱེད་ནའང་འཇིག་རྟེན་གྱི། །ཐ་སྙད་ཚུལ་གྱིས་ཆུང་བ་ཉིད་དུ་འགྱུར། །རང་གི་དོན་དུ་ཞེས་བྱ་བ་ནི་བཤད་ཟིན་པས་དེའི་ཕྱིར་གཞན་གྱི་དོན་དུ་ནི་ཆུང་བ་ཡིན་ནོ། །དེ་བཞིན་དུ་ཆུད་གཟན་ཕྱིར་ཡང་སྟེ། དེ་ལ་མེད་པར་གྱུར་ཀྱང་རུང༌། བདག་ལ་མེད་པར་གྱུར་ཀྱང་རུང་སྙམ་པའི་བསམ་པ་ནི་ཆུད་གཟན་པ་ཡིན་ཏེ། །འདིར་ཡང་རང་གི་དོན་མེད་པའི་ཕྱིར་རོ། །དེ་བཞིན་དུ་གདོས་དང་བཅས་པའི་རྒྱ་དང་རིབ་མ་ལ་སོགས་པ་མ་རུང་བར་བྱེད་ན་ཡང་ཆུང་བ་ཉིད་ཡིན་ནོ། །མི་དབང་བའི་བསོད་སྙོམས་ཞེས་བྱ་བ་སྨོས་པ་ནི་འཇིག་རྟེན་གྱི་ཐ་སྙད་ཀྱི་ཚུལ་གྱིས་ཞེས་བྱ་བ་རྒྱུ་ཡིན་པར་བསྟན་པའི་ཕྱིར་རོ། །གཞན་གྱི་གོས་ལ་བྱིན་བཞིན་སྤྱོད་པ་དང༌། །སྨན་དང་སྔགས་ཀྱིས་སྦྱིན་དུ་འཇུག་པ་དང༌། །སྡུག་པ་འཕྲོག་ཕྱིར་འདམ་པར་བྱེད་པ་དང༌། །གཞན་ཕྱིར་བླངས་ནས་འགེད་བྱེད་ན་ཡང་འགྱུར། །གཞན་གྱི་གོས་ལ་ཕོངས་པ་མེད་པར་འཐོབ་པ་བཞིན་དུ་ལོངས་སྤྱོད་ན་ཆུང་བ་ཡིན་ཏེ། ལོངས་སྤྱོད་ཀྱི་སྙིང་པོ་སྤྱད་པའི་ཕྱིར་འདི་ནི་རྐུ་བ་དང་འདྲ་བ་ཡིན་ནོ། །མ་གནང་བར་ལོངས་སྤྱད་ན་ཁ་ན་མ་ཐོ་བ་ཤིན་ཏུ་ལྕི་བར་རིག་པར་བྱའོ། །སྔགས་དང་སྨན་གྱི་དབང་དུ་བྱས་ཏེ་སྦྱིན་དུ་འཇུག་ན་ཡང་ཆུང་བ་ཡིན་ནོ། །མགུ་བར་བྱ་བའི་ཕྱིར་མེ་ཏོག་ལ་སོགས་པ་གང་བྱིན་པ་དེའི་རྒྱུས་རྙེད་པའི་ཕྱིར་བསམ་པ་ལོག་པ་བྱུང་ན་འཚོ་བ་ལོག་པར་གཏོགས་པའི་ཉེས་པ་བསླང་བ་ཡིན་ཏེ། རྐུ་བར་གཏོགས་པ་ནི་མ་ཡིན་ནོ། །ཅི་འདོད་པ་དེ་རྐུའོ་སྙམ་པའི་བསམ་པས་འདམ་པར་བྱེད་ན་ཡང་ཆུང་བ་ཁོ་ནར་འགྱུར་རོ། །དགེ་འདུན་

---

^{[མ་དཔེ་གཟིགས་ན་འདིར་གནོན།]}

གྱི་སྟོན་མོའི་ཆེད་དུ་བྱ་བར་དེ་ལྟར་སྦྱིན་བདག་ལས་རྫས་བླངས་ནས་གང་ཟག་རྣམས་ཀྱིས་འགོད་ན་ཆུང་བ་ཉིད་ཡིན་ནོ། །འདིར་གཞུང་ནི་འདུལ་བྱེད་ལས། ནད་པས་ནད་གཡོག་རྣམས་ཀྱི་ལག་ཏུ་དགེ་འདུན་སྟོན་མོ་གསོལ་བའི་ཕྱིར་འགོད་པའི་རྒྱུ་དག་བྱིན་པ་དང་དེ་རྣམས་ཀྱིས་བགོས་པ་ནིས་སྦོམ་པོའོ་ཞེས་བྱ་བའི་བར་དུ་འབྱུང་བ་ཡིན་ནོ། །འདིར་ནི་བདག་པོ་དགེ་འདུན་གྱིས་ནོར་ཡོད་པར་མ་ཤེས་པས་སྦོམ་པོར་གསུངས་ཏེ། ཕམ་པ་ནི་མ་ཡིན་ནོ། །ཕྱོགས་བཞིའི་འཕགས་པའི་ཚོགས་ཀྱི་ནོར་དག་ལས། །ཕྱོགས་བཞི་པོ་ཡི་དོན་དུ་རྐུ་ན་ཉམས། །དུར་ཁྲོད་ས་ནི་ཡོངས་འཛིན་བཅས་པ་ནས། །གོས་ལ་སོགས་པ་རྐུ་ནའང་དེ་བཞིན་ནོ། །དགེ་སློང་གང་དག་གི་ཕྱོགས་བཞི་པོ་དེ་དག་ནི་ཕྱོགས་བཞིའོ། །དེ་དག་གི་ཚོགས་ནི་ཕྱོགས་བཞི་པ་སྟེ། ཕྱོགས་བཞིའི་དགེ་འདུན་གྱི་རྫས་ཕྱོགས་བཞི་པའི་ཆེད་ཁོ་ནར་རྐུ་བར་བྱེད་ན་རྣམ་པར་ཉམས་པ་ཡིན་ཏེ། ཉེས་བྱས་ཆུང་དུ་ཉིད་ཡིན་ནོ་ཞེས་བྱ་བའི་ཐ་ཚིག་གོ །འདིར་གཞུང་ནི་འདུལ་བྱེད་ལས། དགེ་སློང་གཉུག་མར་གནས་པ་ཞིག་གིས་ཕྱོགས་བཞི་པའི་དགེ་འདུན་གྱི་ཡོ་བྱད་རྣམས་བརྐུ་བའི་སེམས་ཀྱིས་གནས་ནས་གནས་སུ་སྤགས་ནས་དེ་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ཕམ་པའི་ལྟུང་བ་ནི་མེད་དེ། ཉེས་བྱས་སུ་འགྱུར་རོ་ཞེས་འབྱུང་བ་ཡིན་ནོ། །གལ་ཏེ་ཞེས་པའི་གཞུང་ལས་ནི་སྦོམ་པོ་ཞེས་བྱ་བ་འབྱུང་སྟེ། དེའི་ཚེ་ནི་ཆུང་བ་ཞེས་བྱ་བ་དང༌། རྣམ་པར་ཉམས་པ་ཞེས་བྱ་བའི་དོན་དུ་བཤད་པ་ཡིན་ནོ། །ཅི་སྟེ་སྡེ་ལ་སོགས་པ་ཐ་དད་པའི་བདག་པོ་ཐ་དད་པའི་གནས་སུ་སྦེད་པར་བྱེད་ཅིང་དེར་ཡང་དེ་བདག་པོ་རྣམས་ཀྱི་ཁོང་དུ་ཆུད་པ་ཡིན་ལ། གལ་ཏེ་དེའི་ཚེ་ན་རིན་ཐང་ཚང་ན་ཕམ་པ་ཁོ་ན་ཡིན་ཏེ། དགེ་འདུན་ནི་སྤུན་དང་འདྲ་བའི་ཕྱིར་རོ། །ཇི་སྟེ་ཁོང་དུ་མ་ཆུད་ན་དེའི་ཚེ་སྦོམ་པོ་ཡིན་ཏེ། གཞན་གྱི་དོན་ཉིད་ཀྱི་ཕྱིར་རོ་ཞེས་བྱ་བར་གནས་པས་སོ། །དེ་བཞིན་དུ་དུར་ཁྲོད་ཡོངས་སུ་འཛིན་པ་དང་བཅས་པ་ནས་རྐུ་ན་ཆུང་བ་ཁོ་ན་ཡིན་ནོ། །དུར་ཁྲོད་སྨོས་པ་ནི་འདིར་ཐ་ཆད་ཡིན་པའི་ཕྱིར། །མངོན་པར་ཞེན་པ་ཆུང་བ་ཉིད་ཀྱིས་རྐུ་བ་མ་རྫོགས་པ་ཉིད་ཡིན་པར་བསྟན་པའི་ཕྱིར་རོ། །ད་ནི་རྐུ་བའི་དབྱེ་བ་བསྟན་པར་བྱ། །ས་ནི་གལ་ཏེ་བརྩད་པས་གྲྭར་

---

^{[མ་དཔེ་གཟིགས་ན་འདིར་གནོན།]}

ཕྲོགས་ན། །གང་ཚེ་ཁྱིམ་པས་དེ་སྦྱོར་བཏང་ཚེ་སྟེ། །གལ་ཏེ་སླར་ནི་རྒྱལ་བ་ཉིད་ན་བརྐུས། །ད་ནི་རྐུ་བའི་དབྱེ་བ་རབ་ཏུ་བསྟན་པར་བྱའོ། །དེ་ལ་གལ་ཏེ་བརྩད་པས་གྲར་ཕྲོགས་ལ། བརྩད་པ་དེ་ཡང་གལ་ཏེ་འོག་ཟུར་འགྱེད་ན་དེར་གང་གི་ཚེ་ཤགས་ཟླས་སྦྱོར་བ་བཏང་བ་དེའི་ཚེ་བརྐུས་པ་ཡིན་པར་ཁོང་དུ་ཆུད་པར་བྱ་སྟེ། དེའི་ཚེ་ཁོ་ན་མཐར་འགྱུར་བར་ཤེས་པར་བྱའོ་ཞེས་བྱ་བའི་ཐ་ཚིག་གོ །ཅི་སྟེ་སླར་བརྩད་པ་དེ་བགྱི་ན་དེའི་ཚེ་ནི་རྒྱལ་བར་གྱུར་པ་ཁོ་ན་ན་བརྐུས་པ་ཡིན་པར་རིག་པར་བྱའོ། །འདིར་གཞུང་ནི། དགེ་སློང་དག་ཞལ་ཅེ་བ་རྣམས་ཀྱི་བདག་པོ་ནི་རྒྱལ་པོ་ཡིན་ནོ་ཞེས་འབྱུང་བ་ཡིན་ནོ། །ཡོངས་སུ་བསྐོར་བའི་དབང་གིས་རྐུ་བྱེད་ན། །གང་ཚེ་མཚམས་ཀྱི་སྒོ་དང་འབྱོར་ན་བརྐུས། །ཡོངས་སུ་བསྐོར་བས་རྐུ་ན་གང་གི་ཚེ་མཚམས་ཀྱི་སྒོ་དང་སྒོ་འབྱོར་བར་གྱུར་པ་དེའི་ཚེ་བརྐུས་པ་ཡིན་པར་ཁོང་དུ་ཆུད་པར་བྱའོ། །བརྡ་ཡི་སྦྱོར་བས་མི་ལ་རྐུ་བྱེད་ན། །བརྡ་གྲུབ་པ་ཡི་དབང་གིས་ལྟུང་བ་ཡིན། །བརྡས་ནི་རྐུ་ན་བརྡ་གྲུབ་པ་ཁོ་ན་བརྐུས་པར་ཁོང་དུ་ཆུད་པར་བྱའོ། །དེ་ལ་རྣམ་པ་མང་པོ་དག་གིས་མི་རྐུ་བ་ཡིན་ཏེ། མི་འདོད་བཞིན་དུ་ཡང་དྲང་བ་དང༌། གདེག་པ་གཉིས་དང༌། འཇིགས་པའི་མཚན་མས་སྤོ་བ་དང༌། སྔགས་དང་སྨན་དག་གིས་རྨོངས་པར་བྱས་པ་དང༌། བཅིངས་པ་ཐར་བར་བྱས་པ་དང། གཉིད་ཀྱིས་ལོག་པ་ན་མ་ཚོར་བར་འདེགས་པ་ལ་སོགས་པ་རྣམ་པར་གཅད་པའི་ཕྱིར་བརྡ་ཞེས་སྨོས་སོ། །མི་རྐུ་བ་ལ་རྣམ་པ་གསུམ་སྟེ། མན་ངག་གིས་དང༌། བརྡས་དང༌། མཚན་མས་སོ། །གསུམ་པོ་འདི་དག་ཏུ་ནི་རང་དག་འདུན་པ་ཁོ་ནས་བརྐུས་པ་ཉིད་ཡིན་པར་དགོངས་སོ། །དེ་ལ་མན་ངག་ནི་འདུས་པ་ལ་སོགས་པའོ། །མཚན་མ་ནི་རྟགས་ཏེ། སྒྲ་དང་ཁ་སྤུ་བྲེགས་ནས་རིང་པོ་མ་ལོན་པ་ལ་སོགས་པའོ། །བརྡ་ནི་སྔ་དྲོ་ལ་སོགས་པའོ། །མན་ངག་ལ་སོགས་པ་གསུམ་པོ་འདི་དག་དོན་ཐ་དད་པ་ཉིད་ཡིན་དུ་ཟིན་ཀྱང༌། དེ་དག་གིས་ཉེ་བར་མཚོན་པར་བྱ་བ་དེ་ཡང་སྔ་དྲོ་ལ་སོགས་པ་ནི་བྱེ་བྲག་ཡིན་པས་བརྡ་ཞེས་བྱ་བའི་སྒྲས་སྤྱིར་བསྟན་པ་ཡིན་ནོ། །གང་གི་ཚེ་ཁྱོད་ཀྱིས་འདི་དང་འདི་ལྟ་བུ་ཞིག་ན་ལྟོས་ཤིག་དང༌། དེའི་ཚེ་ཁྱོད་ངའི་དྲུང་དུ་ཕྲད་དུ་ཤོག་ཤིག་ཅེས་བྱ་བ་གང་ཡིན་པ་དེ་ནི་བརྡ་བྱས་པ་ཡིན་ནོ། །དེ་ནི་གང་གི་ཚེ་གྲུབ་པ་དེའི་ཚེ་མི་བརྐུས་པ་ཡིན་ནོ་ཞེས་བྱ་བའི་ཐ་

---

^{[མ་དཔེ་གཟིགས་ན་འདིར་གནོན།]}

ཚིག་གོ །རྣམ་པ་གཞན་དག་ལ་ཡང་མཚན་ཉིད་ཀྱི་རྗེས་སུ་འབྲངས་ནས་བརྐུས་པར་རིག་པར་བྱ་སྟེ། དཔེར་ན་སྔགས་ཀྱིས་དྲངས་ནས་གཏེར་དང་འདྲ་བར་སྣང་བར་འོང་བ་ན་བརྐུས་པ་ཡིན་ནོ། །ཁྱུ་ལས་བཀར་བ་དང་བཅིངས་པ་ཞིག་ཡིན་ན་མི་སྣང་བར་གྱུར་པ་ན་བརྐུས་པ་ཡིན་ནོ་ཞེས་བྱ་བ་ལ་སོགས་པ་ལྟ་བུའོ། །དུད་འགྲོར་གྱུར་པ་བཅིངས་ལས་རྐུ་པ་ན། །བཅིངས་བཀྲོལ་ཙམ་གྱིས་བརྐུས་པར་ཤེས་པར་བྱ། །ཁྱུ་ལས་བཀར་དང་བཅིངས་པས་རྐུ་བ་ན། །ཁྱུ་ལས་མི་སྣང་གྱུར་ན་བརྐུས་པ་ཡིན། །དུད་འགྲོ་བཅིངས་པ་ལས་རྐུ་ན་བཅིངས་པ་ལས་བཀྲོལ་བ་ཁོ་ནས་བརྐུས་པ་ཡིན་ནོ། །འདིར་གཞུང་ནི། དགེ་སློང་གིས་རྔོན་ཤོར་བའི་རིམ་མར་རི་དགས་བཅིངས་པ་བཀྲོལ་བ་ལས་རི་དགས་ཀྱི་རིན་ཐང་བརྩི་བར་བྱའོ་ཞེས་འབྱུང་བ་ཡིན་ནོ། །བཀྲོལ་པ་ཁོ་ན་ལས་རིན་ཐང་བརྩི་བའི་རིམ་པ་སྨོས་པའི་ཕྱིར་བཀྲོལ་བ་ཉིད་ན་བརྐུས་པ་ཡིན་པར་དགོངས་པ་ཡིན་ནོ་ཞེས་བྱ་བར་མངོན་ནོ། །བཅིངས་པ་ལས་སམ་ཁྱུ་ལས་བཀར་བས་དུད་འགྲོ་རྐུན་ཁྱུ་ལས་མི་སྣང་བར་གྱུར་བ་ཁོ་ན་བརྐུས་པ་ཡིན་ནོ། །གཅིག་པུ་ཞིག་ལས་རྐུ་ན་ནི་གནས་གང་ནས་བསྐྱོད་པ་དེ་ནས་མི་སྣང་བར་གྱུར་བ་ན་བརྐུས་པ་ཡིན་ནོ་ཞེས་བྱ་བ་འདི་ནི་རིགས་པས་རྟོགས་པར་བྱ་བ་ཡིན་ནོ། །གལ་ཏེ་བླ་མའི་གོས་ལ་སོགས་ཁྱེར་ནས། །གོམ་པ་བསྐྱེད་དམ་ཡང་ན་འབྲི་བྱེད་པས། །རེ་ལྡེ་ལ་སོགས་ཕག་ཏུ་མི་སྣང་སོང༌། །དངོས་གཞིའོ་མངོན་སུམ་ཕྲོགས་པའང་དེ་དང་འདྲ། །འདིར་གཞུང་ནི། འདི་ལྟ་སྟེ། མཁན་པོ་དང་སློབ་དཔོན་དག་ལམ་དུ་ཞུགས་པ་ལ་གོས་རྣམས་ནི་དེ་རྣམས་ཀྱིས་སློབ་མའི་ལག་ན་ཡོད་པ་དང༌། དེ་རྣམས་དེ་ལ་བརྐུ་སེམས་ཉེ་བར་གནས་ཤིང་དེ་དག་གོམ་པ་འབྲི་བར་བྱེད་པ་དང༌། གོམ་པ་རེ་རེ་ལ་ཉེས་བྱས་སུ་འགྱུར་ལ། ནམ་མིག་སྔར་སྣང་བར་འོང་གི་བར་དུ་ཉེས་པ་སྦོམ་པོར་འགྱུར་རོ། །མིག་སྔར་སྡང་བར་མི་འོང་བ་ན་ཕྲོགས་པ་ཡིན་ནོ་ཞེས་བརྗོད་པར་བྱའོ་ཞེས་བྱ་བ་ལ་སོགས་པ་འབྱུང་བ་ཡིན་ནོ། །དེ་ལྟར་ན་གོམ་པ་བསྐྱེད་པ་དང་གོམ་པ་འབྲི་བ་དག་གིས་རེ་ལྡེ་དང་ནགས་ཁུང་ལ་སོགས་པ་དག་ཏུ་མི་སྣང་བར་སོང་བ་ལས་དངོས་གཞིར་འགྱུར་ཏེ། རྐུན་མ་ནི་ནམ་སྣང་བ་དེའི་བར་དུ་བརྐུ་བའི་བློ་མི་སྐྱེ་བས་སོ། །མངོན་སུམ་ཕྲོགས་

---

^{[མ་དཔེ་གཟིགས་ན་འདིར་གནོན།]}

པའང་དེ་དང་འདྲ་ཞེས་བྱ་བ་ནི་མི་སྣང་བར་སོང་བ་ལས་དངོས་གཞིར་འགྱུར་རོ་ཞེས་བྱ་བའི་ཐ་ཚིག་གོ །འདུལ་བྱེད་ལས། དགེ་སློང་གིས་ཁྱིམ་པའི་གོས་ཤིག་བླངས་སོ། །དེས་དེ་བླངས་ནས་སོང་བ་དང༌། ཁྱིམ་པ་དེས་མཐོང་ནས་དེས་དེ་ལ་སྨྲས་པ། བཙུན་པ་གོས་མ་བསྣམས་ཤིག་ཅེས་སྨྲས་པ་དང༌། ཡིད་ཀྱིས་བལྟས་ཏེ་ཁྱེར་ཏེ་འོང་ཞེས་སྨྲས་ནས། དེ་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ཕམ་པའི་ལྟུང་བ་ནི་མེད་དེ་དམན་པ་སྦོམ་པོར་འགྱུར་རོ་ཞེས་གསུངས་པ་ཡང་འདིར་ལྟུང་བ་མེད་པར་གསུངས་པའི་རྒྱུ་ནི་སྣང་བ་མེད་པར་མ་སོང་བ་ལས་གཞན་པ་མི་སྣང་ངོ༌། །སྦྱོར་བ་ཡིན་པའི་ཕྱིར་ན་ཉེས་པ་སྦོམ་པོར་གསུངས་སོ་ཞེས་བྱ་བའི་དོན་འདི་རྟོགས་པར་བྱའོ། །གྲུ་ཞིག་ཆུ་འདལ་བ་འམ་ཐང་ལས་སམ། །ཆུ་བོའི་རྒྱུན་ཕྱོགས་རྐུ་ནའང་དེ་བཞིན་ནོ། །ཀླུང་སོགས་འགྲམ་མི་སྣང་ལ་ཞིང་དུ་ན། །དེ་བཞིན་སྣང་ལས་ཕ་རོལ་ཕྱིན་འདིར་བརྐུས། །དེ་བཞིན་ཞེས་བྱ་བ་ནི་མི་སྣང་བར་གྱུར་པ་ན་བརྐུས་པ་ཡིན་ནོ་ཞེས་བྱ་བའི་ཐ་ཚིག་གོ །གང་དུ་ཞེ་ན། བཤད་པ། ཆུ་འདལ་བ་སྟེ། ཆུ་འགྲམ་པ་དང༌། ཐང་དང་ཆུ་བོའི་རྒྱུན་ཕྱོགས་ལ་ཡང་རུང་སྟེ། མི་སྣང་བར་གྱུར་པ་ཉིད་ན་བརྐུས་པ་ཡིན་ནོ། །ཆུ་བོ་འམ་རྒྱ་མཚོ་གང་ལས་ཕ་རོལ་གྱི་འགྲམ་མི་མངོན་པའི་ཐད་ཀ་འདལ་བ་དེ་ལ་ཡང་མི་སྣང་བར་གྱུར་པ་ཁོ་ན་ན་བརྐུས་བ་ཡིན་ནོ་ཞེས་བྱ་བའི་ཐ་ཚིག་གོ །ཆུ་བོ་ལ་སོགས་པ་འགྲམ་སྣང་བ་ལ་ནི་ཕ་རོལ་གྱི་འགྲམ་དུ་ཕྱིན་པ་ཁོ་ན་ན་བརྐུས་པ་ཡིན་ནོ། །རྒྱུན་ལས་བཟློག་པར་གྲུ་ནི་འདྲེན་བྱེད་ན། །གྲུ་ཚུགས་ཐལ་བ་ལས་ནི་བརྐུས་པ་ཡིན། །རྒྱུན་ལས་བཟློག་ཕྱོགས་སུ་གྲུ་འདྲེན་ན་གྲུ་ཚུགས་ལས་འདས་པ་ཁོ་ན་ན་བརྐུས་པ་ཡིན་ནོ། །གྲུ་ཚུགས་ནི་གྲུ་ཕ་རོལ་དུ་བཀྲི་བའི་ཕྱིར་ལམ་ཇི་སྲིད་དུ་རྒྱུན་ལས་བཟློག་ཕྱོགས་སུ་བཀྲི་བར་བྱ་བ་དེ་ཡིན་ཏེ། དེ་ནི་གྲུ་དེའི་རྒྱུ་བའི་ས་ཡིན་པའི་ཕྱིར་གནས་པ་ཡིན་ནོ། གྲུ་ཚུགས་མེད་ན་གདགས་པའི་ཚད་གནས་པ་ཡིན་པར་རྟོགས་པར་བྱའོ། གསང་སྔགས་དག་གིས་བརྐུ་བྱ་རྐུ་བྱེད་ན། །རང་གི་མིག་སྔར་སྣང་ན་དེ་བརྐུས་ཡིན། །གསང་སྔགས་དག་གིས་རྫས་བརྐུ་བར་བྱ་བ་རྐུ་བ་ན་རྫས་དེ་མཐོང་བ་ཁོ་ན་ན་བརྐུས་པ་ཡིན་ནོ། །རྫས་ཀྱི་སྟེང་ཆ་སྦྱིང་བར་བྱེད་ན་ནི། །

---

^{[མ་དཔེ་གཟིགས་ན་འདིར་གནོན།]}

གནས་ཀྱི་སྟེང་ཆ་ལས་འདས་བརྐུས་པ་ཡིན། །ལུས་ཀྱི་རྒྱན་ནི་བཀྲོལ་བ་ཉིད་ན་ཡིན། །ཤོ་གམ་དག་ནི་ས་ཉིད་ས་འདས་ནའོ། །རྫས་ཀྱི་སྟེང་གི་ཆ་སྦྱིང་བས་རྐུ་བ་ན་གནས་ཀྱི་སྟེང་གི་ཆ་ལས་ཐལ་ན་བརྐུས་པ་ཡིན་པར་རིག་པར་བྱའོ། །འདིར་གཞུང་ནི། ཟོང་སྦྱིང་བའི་ཕྱིར་ཁྲི་ལས་ལྡང་བ་ནས་འདམ་རྐོ་ཞིང་ཕྱིས་བརྐུའོ་སྙམ་པ་ལས་དངོས་པོ་ཚང་ན་ཕམ་པར་འགྱུར་རོ། །དངོས་པོ་མ་ཚང་ན་དམན་པ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ། །གལ་ཏེ་ཕྱིས་བརྐུའོ་ཞེས་བྱ་བ་སྨོས་པའི་ཕྱིར་རྫས་ཀྱི་སྟེང་གནས་ཀྱི་སྟེང་ཆུ་འམ་འདམ་ལས་འདས་པ་ན་བརྐུས་པ་ཡིན་པར་མི་རིགས་སོ་ཞེ་ན་དེ་ནི་མི་རུང་སྟེ། རྐུ་བ་ནི་འདིར་བསྐུར་བ་ལ་སྦྱར་གྱི། བརྐུ་བ་དངོས་ལ་མ་ཡིན་ནོ། །དེ་བས་ན་ཕྱིས་བརྐུ་འོ་ཞེས་བྱ་བ་ནི་འདིའི་ཕྱིས་བསྐུར་རོ་ཞེས་བྱ་བའི་དོན་དུ་གནས་པ་ཡིན་ནོ། །དེ་ལྟར་ཡང་འདུལ་བ་མདོ་ལས། ཕྱིས་བརྐུ་བའི་བློ་གང་ཡིན་པ་དེ་ནི་བླང་བ་ཡིན་ནོ་ཞེས་འབྱུང་བ་ཡིན་ནོ། །ལུས་ལ་རྒྱན་བཏགས་པ་རྣམས་ནི་བཀྲོལ་བ་ཁོ་ན་ན་བརྐུས་པ་ཡིན་ནོ། །བཀྲོལ་བ་ཁོ་ན་ན་གནས་གཞན་དུ་སྤོས་པ་ཡིན་པར་རྣམ་པར་གནས་པ་ཡིན་ཏེ། འདི་ལྟར་དེ་ནི་བཏགས་པ་ཡིན་གྱི་བཞག་པ་ནི་མ་ཡིན་པས་དེའི་ཕྱིར་བཏགས་པ་ལས་བཀྲོལ་བ་འདིར་བརྐུས་པ་ཡིན་གྱི། གདགས་པའི་ས་བསྣོར་བས་ནི་མ་ཡིན་ནོ། །གསེར་གྱི་གདུ་བུ་ལ་སོགས་པ་ཐོགས་ཏེ་འདུག་པ་ནི་དཔུང་མགོ་ལ་ཐུག་པར་ཕྱིན་ཀྱང་བཏགས་པ་བཀྲོལ་བ་མ་ཡིན་ནོ། །ཤོ་གམ་དག་ནི་ས་ཉིད་འདས་ན་བརྐུས་པའོ་ཞེས་བྱ་བར་འགྱུར་རོ། །ས་ཉིད་ཅེས་བྱ་བ་ནི་འདིར་ཤོ་གམ་གྱི་སྐབས་ཡིན་པའི་ཕྱིར་ཤོ་གམ་གྱི་གནས་སུ་རིག་པར་བྱའོ། །དེ་ཡང་གང་ཚུན་ཆད་ཕྱིན་ནས་ཤོ་གམ་གཞལ་བར་བྱ་བ་ཉིད་ཡིན་པ་དེ་ཚུན་ཆད་ཡིན་པར་རིག་པར་བྱའོ། །ཤོ་གམ་གྱིས་དེ་ལས་འདས་པ་ནི་ཤོ་གམ་བཅད་པའི་ཤོ་གམ་གྱིས་དེ་ལས་ཐལ་བ་ཡིན་ཏེ། ས་ཕྱོགས་གཞན་ལས་དེ་ཐལ་བས་ནི་ཤོ་གམ་བརྐུས་པ་མ་ཡིན་ནོ་ཞེས་བྱ་བའི་ཐ་ཚིག་གོ །གལ་ཏེ་ཡང་ཇི་ལྟར་ན་ཤོ་གམ་བཅད་པ་འདས་ན་ཤོ་གམ་འདས་པ་ཡིན་ཞེ་ན། ཤོ་གམ་ནི་ཤོ་གམ་བཅད་པའི་ཆ་ཡིན་པའི་ཕྱིར་ཉེས་པ་མེད་དོ། །ས་ཉིད་ཅེས་བྱ་བ་ཅི་དགོས་ཤེ་ན་རྫུ་འཕྲུལ་

---

^{[མ་དཔེ་གཟིགས་ན་འདིར་གནོན།]}

གྱིས་ནམ་མཁའ་ལས་ཐལ་ན་ལྟུང་བ་མེད་པར་བསྟན་པའི་ཕྱིར་ཏེ། རྒྱལ་པོ་ནི་ས་ལ་དབང་བ་ཡིན་གྱི་ནམ་མཁའ་ལ་དབང་བ་མ་ཡིན་པས་སོ། །འདིར་གཞུང་ནི་ཞུས་པ་ལས། བཙུན་པ་དགེ་སློང་གིས་ནམ་མཁའ་ལས་ཤོ་གམ་འདའ་བར་བགྱིད་ན་ཅིར་འགྱུར་ལགས་གལ་ཏེ་རྫུ་འཕྲུལ་གྱིས་འདའ་བར་བྱེད་ན་ལྟུང་བ་མེད་དོ། །འོན་ཏེ་རྣམ་པ་གཞན་དག་གིས་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །འདིར་རྫུ་འཕྲུལ་ཞེས་སྤྱིར་བསྟན་པའི་ཕྱིར་མངོན་པར་ཤེས་པ་ལས་བྱུང་བ་དང༌། ལས་ལས་སྐྱེས་པ་དང༌། གསང་སྔགས་དང་སྨན་གྱིས་བྱས་པའི་རྫུ་འཕྲུལ་གཟུང་ངོ༌། །ཤོ་གམ་གྱི་ས་སྨོས་པ་ནི་ས་གཞན་ནས་ཤོ་གམ་བཅད་པ་འདས་ན་ཉེས་པ་མེད་པར་བསྟན་པའི་ཕྱིར་རོ། །ས་ཉིད་ཅེས་བྱ་བའི་ཉིད་ཅེས་བྱ་བ་ཅི་དགོས་ཤེ་ན། གལ་ཏེ་ཤོ་གམ་གྱི་སའི་གནས་སུ་ལུས་ཀྱི་ལག་པས་དབུལ་བ་ལ་སོགས་པ་ལག་པའི་ཕྱག་རྒྱས་སམ། ངག་གིས་གསང་སྔགས་བརྗོད་པ་ལ་སོགས་པས་སམ། ཡིད་ཀྱིས་རྫུ་འཕྲུལ་མངོན་པར་འདུ་བྱ་བ་ལ་སོགས་པས་ཤོ་གམ་བཅད་པ་ལུས་ལའམ་ལུས་དང་འབྲེལ་པ་ལ་འམ་གང་ལ་ཡང་མ་རེག་པར་ནམ་མཁའ་ལས་ཤོ་གམ་གྱི་ས་ལས་འདའ་བར་བྱེད་ན་དེ་ན་ཤོ་གམ་མ་ཤ་ཀ་ལྔ་ལ་སོགས་པ་ཡོད་དུ་ཟིན་ཀྱང་སྦོམ་པོ་ཡིན་པར་བསྟན་པའི་ཕྱིར་རོ། །གང་ཞིག་ནམ་མཁའ་ལ་འདུག་ནས་འདའ་བར་བྱེད་ན་དེ་ལ་ནི་ལྟུང་བ་མེད་པ་ཉིད་ཡིན་པར་རིག་པར་བྱའོ། །དེ་ལྟ་བས་ན་ས་ཞེས་སྨོས་པའི་ཕྱིར་གང་ཞིག་ཡོད། ཤོ་གམ་གྱི་ས་དང་མ་འབྲེལ་བ་དེ་ལ་ནི་ལྟུང་བ་མེད་པ་ཉིད་ཡིན་པར་རིག་པར་བྱའོ། །གལ་ཏེ་ལུས་ཀྱིས་སམ་ལུས་དང་འབྲེལ་པས་སམ་བཞོན་པས་ཤོ་གམ་གཞལ་བ་འདའ་བར་བྱེད་པ་ལྟུང་བར་མི་འགྱུར་རོ་ཞེ་ན། སྐྱོན་དུ་མི་འགྱུར་ཏེ་ས་ནི་བརྒྱུད་པས་གཞི་ཉིད་དུ་འབྲེལ་བའི་ཕྱིར་རོ། །དུད་འགྲོ་གང་ཞིག་ཤོ་གམ་གྱི་གནས་སུ་ཕྱིན་པ་ལས་ལམ་སྒྱུར་ནས་འདའ་བར་བྱེད་ན་དེ་ནི་རེ་ཞིག་ས་དེ་ལས་འདས་པ་ཡིན་པར་ཐེ་ཚོམ་མེད་པ་ཁོ་ན་ཡིན་ནོ། །སླར་ལོག་སྟེ་ལམ་གཞན་ནས་འགྲོ་ན་ཇི་ལྟར་རྟོགས་པར་བྱ་ཞེ་ན། འཇིག་རྟེན་གྱི་ལུགས་ཀྱི་དབང་གིས་རྟོགས་པར་བྱ་སྟེ། གལ་ཏེ་སར་ཕྱིན་པ་ལས་སླར་ལོག་ཀྱང་ག་ཞལ་བར་བྱ་བ་ཉིད་ཡིན་ན་སླར་ལོག་པའི་རྫས་དེ་འདས་པ་ཡིན་ནོ། །གལ་ཏེ་བསྐུར་

---

^{[མ་དཔེ་གཟིགས་ན་འདིར་གནོན།]}

བར་བྱ་བ་ཉིད་ཡིན་ན་དེའི་ཚེ་འདས་པ་མ་ཡིན་པར་རིག་པར་བྱའོ། །ཤོ་གམ་གྱི་གནས་ཀྱིས་ནི་ས་བྱེ་བྲག་ཏུ་འབྱེད་པ་ཡིན་ཏེ། ས་གཞན་ལས་འདའ་བར་བྱེད་པ་ལ་ནི་ལྟུང་བ་མེད་པར་བསྟན་པའི་ཕྱིར་རོ། །དཔེར་ན་ཡུལ་ཆོས་ཀྱིས་ཤོ་གམ་གཅོད་པ་ཞིག་ཡིན་ལ་ཡུལ་དེར་གཏོགས་པའི་གྲོང་གི་སའི་སྟེང་ལས་འདས་ན་མ་ཡིན་པ་ལྟ་བུའོ། །རྣམ་པར་འབྱེད་པ་ལས་ཤོ་གམ་གཅོད་པའི་རྫས་དང་ལམ་དུ་འཇུག་པར་བྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་དེ་ཡང་ལམ་དུ་འཇུག་པར་བྱེད་པ་ལ་བྱའི་བརྐུ་བ་ལ་ནི་མི་བྱ་བས་ཉེས་པ་མེད་དོ། །འདིར་འཇིག་རྟེན་པའི་ལུགས་ཀྱིས་རྣམ་པར་གཞག་པ་ཡིན་པས་འདུལ་བ་ལས་ཤོ་གམ་གྱི་མཚན་ཉིད་མ་གསུངས་སོ། །འཇིག་རྟེན་ན་ནི་ལུགས་ཀྱིས་ཟོང་ཁོ་ན་ཤོ་གམ་གཅོད་པར་རིགས་སོ་ཞེས་འཇོག་སྟེ། འདི་ལྟར་ཟོང་ལ་ནི་ཉིད་ཤུ་ཆ་ཤོ་གམ་ཡིན་ལ་རྩྭ་དང་ཤིང་ལ་སོགས་པ་དག་ནི་དྲུག་ཅུ་ཆ་ཡིན་ནོ། །ཟོང་ཞེས་བྱ་བ་ནི་རྙེད་པའི་ཆེད་དུ་བཙོང་བར་བྱ་བ་ལ་བྱའོ། །དེ་ལྟ་བས་ན་ཐོང་མ་ཡིན་པ་དེ་ནི་ཤོ་གམ་གཅད་པ་མ་ཡིན་ནོ། །དེའི་ཕྱིར་སྡོམ་བརྩོན་རྣམས་ཀྱི་འཚོ་བའི་ཡོ་བྱད་ནི་ཤོ་གམ་གཅད་པར་འོས་པ་མ་ཡིན་པར་རིག་པར་བྱའོ། །གལ་ཏེ་སྡོམ་བརྩོན་རྣམས་ཀྱི་འཚོ་བའི་ཡོ་བྱད་ཀྱང་ཤོ་དམ་གཅད་པར་འོས་པ་ཡིན་ན་ནི་ལམ་དུ་དེ་འཇུག་པར་བྱེད་པ་ཁོ་ནར་ཡང་མི་འགྱུར་པ་ཞིག་ན། འདིར་གཞུང་ནི་རྣམ་པར་འབྱེད་པ་ལས། ཤོ་གམ་གཅད་པའི་རྫས་ནི་ལམ་དུ་འཇུག་པར་ཡང་མི་བྱའོ་ཞེས་བཀག་པའི་ཕྱིར་ལ། འདིར་གཞུང་ནི་སྨན་གྱི་གཞི་ལས་ཁྱིམ་བདག་ལུག་སྐྱེས་ཀྱིས་གསོལ་པ། བཅོམ་ལྡན་འདས་ཤུལ་གྱི་བསྙུན་རྒྱགས་ཀྱི་ཆེད་དུ་ཀཱར་ཥཱ་པཎ་ད་གཅིག་བཞེས་པར་གསོལ། བཅོམ་ལྡན་འདས་ཀྱིས་བཀའ་སྩལ་པ། བཞེས་པར་བྱའོ་ཞེས་འབྱུང་བ་དང་ཡང་འགལ་ལོ། །དེའི་ཕྱིར་འདིར་ཤོ་གམ་གཅད་པར་བྱ་བ་ཉིད་ཡིན་པའི་ཕྱིར་དེ་ལམ་དུ་ཞུགས་པར་བྱ་བ་མི་སྲིད་ན་ཅིའི་ཕྱིར་བཅོམ་ལྡན་འདས་ཀྱིས་བསྟུན་རྒྱགས་བཞེས་པར་བཀའ་སྩལ་བ་སྨྲ་བར་བྱ་དགོས་སོ། །དེ་ལྟ་བས་ན་འཇིག་རྟེན་ན་ནི་བཙོང་བར་བྱ་བ་ཁོ་ན་ཤོ་གམ་དུ་གཅད་པར་འོས་པར་གྲུབ་ཀྱི་གཞན་ནི་མ་ཡིན་ནོ། །བཅོམ་ལྡན་འདས་

---

^{[མ་དཔེ་གཟིགས་ན་འདིར་གནོན།]}

ཀྱིས་འཇིག་རྟེན་གྱི་ལུགས་ཀྱི་དབང་ཁོ་ནས་སྣམ་བུ་གཅིག་རིན་ཐང་ཆེན་པོ་ཡིན་ཡང་ཡོ་བྱད་ཀྱིས་གོས་ཉིད་དུ་བྱས་ཏེ་བསྐུར་བར་བྱ་ཞེས་གསུངས་པ་ཡིན་ཏེ། སྡོམ་བརྩོན་རྣམས་ཀྱི་འཚོ་བའི་ཡོ་བྱད་ནི་ཤོ་གམ་དུ་གཅད་པ་མ་ཡིན་པའི་ཕྱིར་རོ། །འོ་ན་ཅིའི་ཕྱིར་བཅོམ་ལྡན་འདས་ཀྱིས་ཤོ་གམ་ལས་ཐར་བར་བྱ་བའི་ཕྱིར་ཆུར་སྨྱུགས་ནས་སམ་ཁ་ཚར་བཅད་ནས་བསྐུར་བར་བྱའོ་ཞེས་གསུངས་ཤེ་ན། དེ་ནི་ཉེས་པ་མེད་དེ་ཤོ་གམ་པ་རྣམས་ཀྱིས་ཡོ་བྱད་མང་པོ་དག་མཐོང་ན། ཤོ་གམ་གཅད་པར་འོས་པ་ཉིད་ཡིན་པར་ཐེ་ཚོམ་ཟོས་ནས་ཁམ་ཆུ་དག་བྱེད་ན་མི་རུང་ངོ་སྙམ་དུ་དགོངས་པའི་ཕྱིར་རོ། །གཞན་དག་ན་རེ་འདི་ནི་ཟོང་དུ་གྱུར་པ་དག་ཤོ་གམ་ལས་ཐར་པར་བྱ་བའི་ཕྱིར་གསུངས་པ་ཡིན་ནོ་ཞེས་ཟེར་ཏེ། འདི་ནི་ཡུལ་ཆོས་ཀྱིས་བསྟན་པ་ཡིན་ནོ། །ཡུལ་ཁ་ཅིག་ཏུ་གསེར་ཤོ་གམ་དུ་མི་གཅོད་དེ། །ཁ་ཅིག་ཏུ་ཁ་ཚར་གཅད་པ་མི་གཅོད་དོ། །ཁ་ཅིག་ཏུ་ཆུར་སྨྱུགས་པ་མི་གཅོད་དོ། །ཁ་ཅིག་ཏུ་ནི་ཤོ་གམ་གཅོད་དེ་གང་ན་ཁ་ཚར་གཅད་པ་ཁོ་ན་ཟོང་དུ་བྱེད་པ་དང༌། དེ་བཞིན་དུ་ཆུར་སྨྱུགས་པ་ཉིད་ལ་བྱེད་པ་ལྟ་བུའོ། །རྣམ་པར་འབྱེད་པ་ལས་དཀོན་མཆོག་དག་གམ་ཕ་མའི་ཆེད་དུ་ཁྱེར་བར་བྱེད་ན་དེ་དག་གི་བསྔགས་པ་བརྗོད་པར་བྱ་བ་འམ་བྱིན་ནས་བསྐུར་བར་བྱའོ་ཞེས་གསུངས་པ་གང་ཡིན་པ་དེར་ཡང་ཤོ་གམ་བྱིན་ནས་ཞེས་གསུངས་པའི་ཕྱིར་དེ་ནི་ཟོང་དུ་གྱུར་པ་ཁོ་ན་ལ་གསུངས་པར་ཁོང་དུ་ཆུད་པར་བྱ་སྟེ། བཅོམ་ལྡན་འདས་ཀྱིས་ཀྱང་ཟོང་དུ་བསྐུར་རོ་ཞེས་གནང་བས་སྲིད་པ་ཡིན་ནོ། །ཅི་སྟེ་ཡང་ངེ་ཟོང་ཉིད་ནི་མ་ཡིན་ལ་དེའི་ཚེ་གལ་གྱིས་འཆུ་བ་དག་ཡོད་ན་སྔོམ་བརྩོན་རྣམས་ཀྱིས་རིགས་པ་ནི་འདི་ཁོ་ན་ཡིན་ནོ་ཞེས་བྱ་བ་ཡིན་པས་དེ་ཉེ་བར་མཚོན་པ་ཡིན་ཏེ། དེ་ཉེ་བར་མཚོན་པ་ཤོ་གམ་བྱིན་ནས་ཞེས་གསུངས་པ་ནི་སྦྱིན་པ་དང་འདྲ་བ་ཉིད་ཡིན་པའི་ཕྱིར་བསྟན་པར་རིགས་པར་བྱའོ། །འདིར་གཞུང་ནི་རྩ་བའི་བྱེ་བྲག་ཏུ་བཤད་པ་ལས་ཀྱང༌། འདི་ནི་མཆོད་རྟེན་གྱི་དཀོར་མ་ཡིན། འདི་ནི་དགེ་འདུན་གྱི་དཀོར་མ་ཡིན་ན་དེའི་ཕྱིར་མཆོད་རྟེན་གྱི་ཕྱིར་རམ་དགེ་འདུན་གྱི་ཕྱིར་བསྐུར་བར་བྱ་བ་གང་ཡིན་པ་དེ་ལས་ནི་ཤོ་གམ་སྦྱིན་པར་མི་བྱའོ། །ཅིའི་ཕྱིར་ཞེ་ན། དེ་ནི་ཉོ་ཚོང་བྱ་བའི་རྒྱུར་མི་ཁྱེར་

---

^{[མ་དཔེ་གཟིགས་ན་འདིར་གནོན།]}

པས་སོ། །ཟོང་དེ་ལས་ཟོང་དང་འདྲ་བ་ཡང་མི་བླང་ངོ༌། །འོ་ན་ཇི་ལྟར་ཞེ་ན། མཆོད་པའི་ཕྱིར་བསྐུར་གྱི་རྙེད་པའི་ཕྱིར་ནི་མ་ཡིན་ནོ། །འདི་མཁན་པོའི་ཡིན། འདི་སློབ་དཔོན་གྱི་ཡིན། འདི་མའི་ཡིན། འདི་ཕའི་ཡིན་ན། མཁན་པོ་དང་སློབ་དཔོན་དང་ཕ་མའི་ཕྱིར་ཁྱེར་བ་གང་ཡིན་པ་དེ་ལས་ཀྱང་ཤོ་གམ་སྦྱིན་པར་མི་བྱའོ། །ཅིའི་ཕྱིར་ཞེ་ན། དེ་ནི་ཉོ་ཚོང་བྱ་བའི་རྒྱུར་མི་ཁྱེར་བས་སོ། །ཟོང་དེ་ལས་ཟོང་དང་འདྲ་བ་ཡང་བླང་བར་མི་བྱའོ། །འོ་ན་ཇི་ལྟར་ཞེ་ན། དེ་ནི་མཆོད་པའི་ཕྱིར་ཁྱེར་གྱི་རྙེད་པའི་ཕྱིར་ནི་མ་ཡིན་ནོ། །འདི་སྐྱེས་ཡིན་ཏེ། དཔེར་ན་ཡུལ་གཞན་ནམ། ཡུལ་གཞན་དུ་བསྐུར་བར་བྱ་བ་ཞིག་ཡིན་ན་དེ་ལས་ཤོ་གམ་སྦྱིན་པར་མི་བྱའོ། །དེ་ཅིའི་ཕྱིར་ཞེ་ན། སྔ་མ་བཞིན་དུ་སྐྱེས་ཀྱི་ཕྱིར་བསྐུར་བ་ཡིན་གྱི་རྙེད་པའི་ཕྱིར་མ་ཡིན་ནོ་ཞེས་བྱ་བའི་བར་དང༌། འདི་ལོངས་སྤྱོད་ཀྱི་རྫས་ཡིན་ན་ལོངས་སྤྱོད་ཀྱི་ཕྱིར་བསྐུར་བ་གང་ཡིན་པ་དེ་ལས་ཀྱང་ཤོ་གམ་སྦྱིན་པར་མི་བྱའོ་ཞེས་བྱ་བ་ནས་སྔ་མ་བཞིན་དུ་དེ་ལོངས་སྤྱོད་ཀྱི་ཕྱིར་བསྐུར་བ་ཡིན་གྱི་རྙེད་པའི་ཕྱིར་མ་ཡིན་ནོ་ཞེས་བྱ་བ་ལ་སོགས་པའི་བར་དུ་འབྱུང་བ་ཡིན་ནོ། །རྒྱལ་པོའི་བསྟན་དག་ལས་ཀྱང་བག་མ་བླང་བ་དང༌། གཏང་བ་དང༌། མཆོད་སྦྱིན་བྱ་བ་དང༌། བཙས་པའི་ལྟས་མཁན་དང༌། ལྷ་ལ་མཆོད་པ་དང༌། གཙུག་ཕུད་འདྲེག་པ་དང༌། བ་ལང་སྦྱིན་པ་དང༌། བརྟུལ་ཞུགས་དང༌། རབ་ཏུ་འབྱུང་བ་ལ་སོགས་པ་བྱ་བའི་ཁྱད་པར་རྣམས་ཀྱི་རྫས་ཀྱི་ཤོ་གམ་མི་བྱ་བ་ཡིན་ནོ་ཞེས་བསྟན་ཏོ། །དེའི་ཕྱིར་འཇིག་རྟེན་ན་ཟོང་ལས་གཞན་པ་ལམ་བརྒྱགས་ལ་སོགས་པ་ནི་ཤོ་གམ་གཅད་པར་འོས་པ་མ་ཡིན་ནོ། །འོ་ན་གང་ན་ཤོ་གམ་གཅོད་པ་དག་ཐམས་ཅད་འཕྲོག་པ་ཡིན་ན་དེར་ཇི་ལྟར་བསྒྲུབ་ཅེ་ན། རྩ་བའི་བྱེ་བྲག་ཏུ་བཤད་པ་ལས། དེའི་ཕྱིར་ཤོ་གམ་འདི་ཅི་འདྲ་བ་ཞིག་གིས་དབང་བར་བྱ་བ་ཡིན་ཞེ་ན། གང་ཞིག་ཆོས་བཞིན་དུ་སྲུང་བ་དང༌། སྐྱོབ་པ་དང༌། སྦེད་པ་དང༌། ཀུན་འགེད་པར་བྱེད་པ་དེས་ཤོ་གམ་དབང་བར་བྱ་བ་ཡིན་ནོ། །གང་ཞིག་ཆོས་བཞིན་དུ་སྲུང་བ་དང༌། སྐྱོབ་པ་དང༌། སྦེད་པ་དང༌། ཀུན་འགེད་པར་མི་བྱེད་པ་དེས་ནི་ཤོ་གམ་དབང་བར་མི་བྱའོ། །གང་ཞིག་ལེན་པར་བྱེད་ན་དེ་ཐམས་ཅད་དངོས་གཞིའམ་བྱིན་པར་ལེན་པའི་ཁ་

---

^{[མ་དཔེ་གཟིགས་ན་འདིར་གནོན།]}

ན་མ་ཐོ་བས་རེག་པ་ཡིན་ནོ་ཞེས་གསུངས་པ་དང་འཇིག་རྟེན་པའི་ཚུལ་ལས་ཀྱང་རྒྱལ་པོས་བསྲུངས་པའི་ཕྱིར་སྐལ་བ་ཤོ་གམ་ཡིན་ནོ་ཞེས་འབྱུང་བ་དང༌། དེའི་ཕྱིར། སྐྱེ་དགུ་ཉོན་མོངས་སྲུང་བའི་ཕྱིར། །རྒྱལ་པོ་ལ་ནི་ཤོ་གམ་འཇལ། །གལ་ཏེ་དེ་ཡང་སྲུང་བ་ཡིས། །ཉོན་གླ་ཡིན་བུ་ལོན་མིན། །ཞེས་བསྟན་ཏོ། །དེ་བས་ན་ཆོམ་རྐུན་དག་དང་འདྲ་བར་ཐམས་ཅད་འཕྲོག་པ་དག་ལས་ནི་འདས་ན་ཡང་ཉེས་པ་མེད་དོ། །དེ་བཞིན་དུ་ཡང་དེ་སྲུང་བའི་ཆོས་ཅན་ཡིན་པའི་ཕྱིར་རོ་ཞེས་ཀྱང་འབྱུང་སྟེ་དེའི་ལས་ནི་ཟོང་སྲུང་བ་ཡིན་ཏེ། སྲུང་བའི་སྐལ་བ་ཡིན་པས་དེ་ལ་ཤོ་གམ་གཞལ་ལོ་ཞེས་བྱ་བའི་ཐ་ཚིག་གོ །དེ་བས་ན་འཕྲོག་པ་རྣམས་ནི་སྲུང་བའི་སྐལ་བ་མི་དབང་བར་འོས་པ་ཡིན་ནོ་ཞེས་བྱ་བར་རྟོགས་པར་བྱའོ། །ཤོ་གམ་གྱིས་ནི་གྲུ་བཙས་ཀྱང་རྣམ་པར་བཤད་པ་ཡིན་ཏེ། དེ་ཡང་འཇིག་རྟེན་ཁོ་ན་ལས་ཡིན་པས་སོ། །ཇི་སྐད་དུ། སྦྲུམ་མ་ཟླ་བ་གཉིས་ལ་སོགས། །རབ་ཏུ་བྱུང་དང་ཐུབ་པ་དང༌། །བྲམ་ཟེ་དང་ནི་རྟགས་ཅན་ལས། །གྲུ་བཙས་བླང་བར་མི་བྱའོ། །ཞེས་འབྱུང་བ་ཡིན་ནོ། །དེ་བས་ན་རབ་ཏུ་བྱུང་བ་རྣམས་ལ་ནི་གྲུ་བཙས་མེད་དོ། །སྐལ་བ་ཐོབ་ཕྱིར་སྡོམ་བརྩོན་རྐུན་པོ་ལ། །ལམ་སྩོགས་སྟོན་པས་གལ་ཏེ་གྲོགས་བྱེད་ན། །སྐལ་བ་ཐོབ་ན་བརྟུལ་ཞུགས་ཉམས་པར་འདོང༌། །ཚུལ་མིན་ཆད་པས་གཅོད་པ་ཆོད་ན་ཡིན། །གལ་ཏེ་སྡོམ་བརྩོན་གྱིས་སྐལ་པ་ཐོབ་པར་བྱ་བའི་ཕྱིར་ཆོམ་རྐུན་པ་རྣམས་ལ་ལམ་ལ་སོགས་པ་སྟོན་པ་དག་གིས་གྲོགས་བྱེད་ན་དེའི་ཚེ་སྐལ་བ་ཐོབ་པར་གྱུར་ན་བརྟུལ་ཞུགས་ལས་ཉམས་པ་ཡིན་ནོ། །དེ་བཞིན་དུ་གང་གི་ཚེ་ལས་བྱེད་པ་རྣམས་ལ་ནི་རིགས་པས་ཆད་པས་གཅོད་ན་དེའི་ཚེ་ཡང་ཆད་པས་ཆོད་པར་གྱུར་པ་ཉིད་ན་བརྟུལ་ཞུགས་ལས་ཉམས་པ་ཡིན་ནོ། །ལོ་ཏོག་དག་ལ་ཤོག་ཤིག་གཞན་མིན་ཞེས། །གཞན་གྱི་ཞིང་ལ་ཆུ་འདྲེན་གཅོད་བྱེད་ལ། །རང་གི་ལོ་ཏོག་དག་ནི་ལེགས་གྱུར་ཅིང༌། །གཞན་གྱི་ལོ་ཏོག་འགྲིབས་འདིར་དངོས་གཞིར་འགྱུར། །གལ་ཏེ་བདག་གི་ནི་ལེགས་པར་ཤོག་ཤིག །གཞན་གྱི་ནི་ཉེས་པར་གྱུར་ཅིག་ཅེས་བྱ་བའི་བསམ་པ་འདིས་ཕ་རོལ་གྱི་ཞིང་ལ་ཆུ་འདྲེན་ཏམ་གཅོད་པར་བྱེད་ལ། ཕ་རོལ་གྱི་ཉེས་ཤིང་རང་གི་ལོ་ཏོག་

---

^{[མ་དཔེ་གཟིགས་ན་འདིར་གནོན།]}

ལེགས་ན་དེའི་ཚེ་དངོས་གཞིར་འགྱུར་ཏེ། ཕ་རོལ་གྱི་ཉེས་པའི་ཚད་ལས་ལྷག་པར་གྱུར་ནའོ་ཞེས་བྱ་བའི་ཐ་ཚིག་གོ །དཔེར་ན་ཁལ་བཅུ་གཉིས་བྱུང་བ་ལས་ཁལ་བཞི་འགྲིབས་ལ་དགེ་སློང་ལ་ནི་ཁལ་བཞི་ལྷག་པར་གྱུར་ན་དེ་དག་གི་རིན་ཐང་གིས་ལྟུང་བ་ཡིན་ནོ། །འདིར་ཆུ་འདྲེན་པ་དང་གཅོད་པ་ནི་རྒྱུན་ཕྱོགས་སུ་འབབ་པ་ལས་སམ་ཞིང་འགྲམ་དུ་བབ་པ་ལས་ཡིན་པར་ཤེས་པར་བྱའོ། །དེ་བཞིན་དུ་འདིར་རྐུ་བ་ནི་ལོ་ཏོག་ལེགས་པ་ལ་བརྟེན་པ་ཡིན་གྱི་ཆུ་ལ་ནི་མ་ཡིན་ཏེ། རང་གི་ཞིང་ལ་ཆུ་འདོར་བའམ་གཅོད་པ་ནི་རྐུ་བ་མི་བསྐྱེད་པར་ཐལ་བའི་ཕྱིར་རོ། །གཞན་གྱི་ལོ་ཏོག་དག་ནི་འགྲིབས་ཞེས་བྱ་བ་ཅི་དགོས་ཤེ་ན། གཞན་གྱི་ལོ་ཏོག་འགྲིབས་པར་མ་གྱུར་ན་ཅུང་ཟད་ཀྱང་བརྐུས་པར་མི་འགྱུར་ཞེས་བསྟན་པའི་ཕྱིར་རོ། །ལོ་ཏོག་བདག་ལ་ཤོག་ཤིག་གཞན་མིན་ཞེས་བྱ་བ་ཅི་དགོས་ཤེ་ན། རྐུ་བའི་བསམ་པ་མེད་ན་ཡང་རྐུ་བ་སློང་བ་མ་ཡིན་ལ། འདིར་རྐུ་བ་དེ་ཡང་ལོ་ཏོག་གང་ཞིག་གཞན་གྱི་ལོ་ཏོག་ཉེས་པས་རང་གི་ལོ་ཏོག་ལེགས་པ་གང་ཡིན་པའོ་ཞེས་རབ་ཏུ་བསྟན་པའི་ཕྱིར་རོ། །འདིར་ཡང་སའི་ཡོན་ཏན་ལ་སོགས་པས་གང་དག་ལྷག་པར་གྲུབ་པ་མ་གཏོགས་པར་ཆུ་ལས་གྱུར་པ་ཁོ་ནས་གང་དག་གྲུབ་ཅིང༌། གཞན་གྱི་ལོ་ཏོག་འགྲིབས་ནས་རང་གི་ལོ་ཏོག་ལེགས་པ་ཁོ་ནས་གང་དག་གྲུབ་ཅིང་གཞན་གྱི་ཉེས་པའི་ཚད་པས་རང་གི་ལྷག་པ་དེ་ཁོ་ན་ལ་རིན་ཐང་བརྩི་བར་བྱའོ། །གལ་ཏེ་རྫས་ལ་བཤལ་ཏེ་རྐུ་བྱེད་ན། །ངོས་གཞན་གྱིས་ནི་ངོས་གཞན་ས་མཚམས་ཐལ། །དེ་ཚེ་བརྐུས་ཡིན་བཏེག་བརྐུས་ས་འཕགས་ཡིན། །གལ་ཏེ་རྫས་བཤལ་ཏེ་རྐུ་བར་བྱེད་ན་ངོས་གཞན་གྱིས་ངོས་གཞན་ཕྱི་མའི་ས་ལས་ཐལ་ཏེ་སོང་ན་དེའི་ཚེ་བརྐུས་པ་ཡིན་པར་ཁོང་དུ་ཆུད་པར་བྱའོ། །འདིར་གཞུང་ནི་རྣམ་པར་འབྱེད་པ་ལས། དགེ་སློང་གིས་ཡོ་བྱད་ལྕི་བས་ཤིན་ཏུ་ཐག་རིང་པོར་རྐུ་བར་བགྱིད་ཀྱང་མཐར་མི་འགྱུར་བ་མཆིས་ལགས་སམ། ཡོད་དེ། འདི་ལྟ་སྟེ། དགེ་སློང་གིས་ཡོ་བྱད་ལྕི་བ་ཕྱོགས་གཅིག་ནས་བཟུང་སྟེ་ཤིན་ཏུ་ཐག་རིང་པོར་འདྲེན་པར་བྱེད་ཀྱང་ངོས་ཅིག་ཤོས་གནས་དེ་ནས་མ་ཐལ་ན་ཉེས་པ་སྦོམ་པོར་འགྱུར་རོ་ཞེས་བྱ་བ་ལ་སོགས་པ་འབྱུང་བ་ཡིན་ནོ། །གལ་ཏེ་དེ་ལྟར་

---

^{[མ་དཔེ་གཟིགས་ན་འདིར་གནོན།]}

ཡིན་ན་རྫས་ཀྱིས་ནོན་པའི་རི་མོ་ལ་སོགས་པས་མཚམས་ལ་ཇི་ལྟར་རྟོགས་པར་བྱ་སྟེ། འདི་ལྟར་གལ་ཏེ་ས་དེ་གས་པ་དང་ཞེས་བྱ་བ་ལ་སོགས་པ་བྱེ་བྲག་མ་ཕྱེ་བར་གསུངས་ཀྱི་རྫས་ཀྱིས་ཁྱབ་པའི་ཕྱོགས་ལས་ཕྱི་རོལ་དུ་གྱུར་པའི་ས་དེ་གས་པ་དང་ཞེས་བྱ་བ་ལ་སོགས་པ་མ་གསུངས་སོ་ཞེ་ན། འདིར་བཤད་པ། རྫས་རྐུ་བར་བྱ་བ་དེས་ཁྱབ་པའི་ཕྱོགས་གང་ཡིན་པ་དེར་གཏོགས་པ་དག་གས་པ་རྣམས་ལ་ནི་མཚམས་གཞན་ཉིད་ཡིན་པར་མི་འཐད་དེ། དེ་ལྟར་ན་རིལ་གྱིས་བརྐུས་པར་མི་འགྱུར་གྱི་ཆ་ཕྱི་མ་ལ་བརྐུས་པར་འགྱུར་རོ། །ཆ་ཤས་འདྲེས་ཤིང་འབྱར་བ་དྲང་བར་བྱ་བ་ལ་བརྟེན་པར་བྱེད་པ་དག་ནི་འདུས་པའི་ངོ་བོ་ལས་ལོགས་ཤིག་ཏུ་རྐུ་བར་མི་རུང་སྟེ། འདུས་པའི་ངོ་བོ་ཉིད་དུ་གནས་པའི་ཕྱིར་རོ། །བཏེག་སྟེ་རྐུ་བ་ཐམས་ཅད་ལ་ནི་ས་ལས་འཕགས་པ་ཁོ་ན་བརྐུས་པ་ཡིན་ནོ། །འདིར་ས་ནི་རྫས་ཀྱི་གཞི་ཟུང་ལ་སོགས་པ་མཚོན་པ་ཡིན་པར་རིག་པར་བྱའོ། །དེ་ལྟར་ཡང་ཞུས་པ་ལས། བཙུན་པ་དགེ་སློང་གིས་ཟུང་དང་བཅས་ཏེ་བརྐུས་ན་ཅིར་འགྱུར་ལགས། བཀའ་སྩལ་པ། ཉེས་པ་སྦོམ་པོར་འགྱུར་རོ། །གང་གི་ཚེ་ཟུང་ལས་བྲལ་བ་དེའི་ཚེ་མཐར་འགྱུར་རོ་ཞེས་གསུངས་པ་ཡིན་ནོ། །དབྱུག་པ་ལ་སོགས་བརྒྱབ་པས་ཤིང་ཏོག་རྐུ། །འོག་ཏུ་ལྟུང་ན་བརྐུས་པ་ཡིན་པར་བསྟན། །དབྱུག་པ་ལ་སོགས་པ་དག་གིས་བརྒྱབ་པས་ཤིང་ཏོག་རྣམས་བརྐུ་ན་འོག་ཏུ་ལྟུང་བ་ཁོ་ན་ན་བརྐུས་པ་ཡིན་པར་རིག་པར་བྱའོ། །གྲོགས་མང་དག་དང་འགྲོགས་ཏེ་རྐུ་བྱེད་ན། །སྐལ་བ་ཐོབ་ན་བརྐུས་ཡིན་སྔར་མིན་ནོ། །འདིར་གཞུང་ནི་ཞུས་པ་ལས། མུན་ཁུད་དུ་གོས་གཞག་པ་ལས་དགེ་སློང་བཞིས་རྐུ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །གང་གི་ཚེ་མཐར་འགྱུར་ལགས། གང་གི་ཚེ་བཞི་ཆར་གྱིས་སོ་སོའི་སྐལ་བ་རང་གིར་བྱས་ལ་གཅིག་གི་སྐལ་བ་ལ་དངོས་པོ་ཚང་ན་མཐར་འགྱུར་རོ། །མ་ཚང་ན་ཉེས་པ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ། །སྐྱེ་བོ་མང་པོའི་རྫས་རྐུ་གང་གི་ཚེ། །རེ་རེའི་སྐལ་བས་རིན་ཐང་ཚང་ན་བརླག །སྐྱེ་བོ་མང་པོས་གང་ཚེ་རྐུ་བྱེད་ན། །དེ་ཚེ་རང་སྐལ་རིན་གྱིས་རྣམ་པར་གཞག །སྐྱེ་བོ་མང་པོ་ལ་བདོག་པ་རྐུ་བར་བྱེད་ན་

---

^{[མ་དཔེ་གཟིགས་ན་འདིར་གནོན།]}

བདག་པོ་རེ་རེའི་སྐལ་བའི་རིན་ཐང་ལས་ལྟུང་བར་འགྱུར་རོ། །འདིར་གཞུང་ནི་ཞུས་པ་ལས། དགེ་སློང་གིས་ཤིན་ཏུ་མང་པོ་བརྐུས་ཀྱང་མཐར་མི་འགྱུར་བ་མ་ཆིས་ལགས་སམ། ཡོད་དེ། སྐྱེ་བོ་མང་པོའི་རྐུ་བར་བྱེད་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ཏེ། འདིར་ཡང་སྐྱེ་བོ་མང་པོ་ཇི་སྙེད་པའི་རིན་ཐང་ཚང་བར་མ་གྱུར་བའི་སྐྱེ་བོ་མང་པོ་དེ་སྙེད་ལ་དགོངས་ནས་ཉེས་པ་སྦོམ་པོར་འགྱུར་རོ་ཞེས་བྱ་བ་ནི་རྣམ་པར་གནས་པ་ཡིན་ནོ། །འདིར་འཕགས་པ་ཉེར་སྦས་ཀྱི་ཞལ་ནས་ནི་གལ་ཏེ་དེ་ལ་སྲུང་མ་དག་བཞག་པ་ཡིན་ན་དེ་དག་ཁོ་ན་ལས་མ་བྱིན་པར་ལེན་པ་ཡིན་ཏེ། འདི་ལྟར་མཆོད་རྟེན་ལ་སོགས་པ་དང༌། ཕྱོགས་བཞིའི་དགེ་འདུན་གྱི་རྫས་དག་ལས་གང་གི་ཕྱིར་སྲུང་མ་དག་གིས་གཞལ་དགོས་པའི་ཕྱིར་རོ་ཞེས་གསུངས་སོ། །གཞན་དག་ན་རེ་ནི་རྫས་ཀྱི་བདག་པོ་ཁོ་ན་དག་ལས་མ་བྱིན་པར་ལེན་པ་ཡོངས་སུ་རྫོགས་པ་ཡིན་ནོ་ཞེས་འཆད་དོ། །སྐྱེ་བོ་མང་པོ་དང་ལྷན་ཅིག་པས་གཅིག་གི་རྫས་རྐུ་བར་བྱེད་ན་རང་རང་གི་སྐལ་བའི་རིན་ཐང་ཁོ་ན་ལས་ལྟུང་བར་འགྱུར་རོ། །འདིར་གཞུང་ནི་ཞུས་པ་ལས། དེ་བཞིན་དུ་སྐྱེ་བོ་མང་པོ་དང་ལྷན་ཅིག་ཏུ་རྐུ་བར་བྱེད་ན་ཉེས་པ་སྦོམ་པོར་འགྱུར་རོ། །ཇི་སྟེ་རེ་རེའི་སྐལ་བ་ལས་མ་ཤ་ཀ་ལྔ་བྱུང་ན་མཐར་འགྱུར་རོ་ཞེས་གསུངས་པ་ཡིན་ནོ། །འོ་ན་གང་ན་སྐྱེ་བོ་མང་པོའི་རྫས་ཡོད་པ་ལ་སྐྱེ་བོ་མང་པོས་རྐུ་ན་དེར་ཇི་ལྟར་རྟོགས་པར་བྱ་ཞེ་ན། དབྲོག་པར་བྱ་བ་གཅིག་གི་སྐལ་བ་ཇི་ཙམ་ཡོད་པ་དེ་ལས་འཕྲོག་པ་པོ་གཅིག་གི་སྐལ་བ་ཅི་ཡོད་པ་དེའི་རིན་ཐང་གིས་དེ་ལ་ལྟུང་བར་འགྱུར་བར་རྟོགས་པར་བྱའོ། །དགེ་འདུན་དག་ནི་ནོར་གཅིག་སྤུན་འདྲ་བས། །དགེ་འདུན་ཆེད་བྱས་སྐལ་བ་མི་བརྟག་སྟེ། །ཞིང་བགོ་མིན་ཕྱིར་སྡོམ་བརྩོན་མང་ཕྱིར་རོ། །གཞན་དུ་ལུང་ལས་རིན་ཐང་དཔྱད་མི་འགྱུར། །ཇི་ལྟར་སྤུན་ནོར་གཅིག་པ་རྣམས་ནི་སོ་སོ་ནས་ནོར་ཐམས་ཅད་ལ་སོ་སོ་བ་མ་ཡིན་པ་ཉིད་ཀྱིས་བདག་གིར་བྱ་བའི་བློ་འབྱུང་ངོ༌། །དེ་བཞིན་དུ་དགེ་སློང་རྣམས་ལ་ཡང་དགེ་འདུན་གྱི་རྫས་ལ་སོ་སོ་བ་མ་ཡིན་པ་ཉིད་ཀྱིས་བདག་གིར་བྱ་བ་ཡོད་དོ། །དེ་ལྟ་བས་ན་དགེ་འདུན་གྱི་ཆེད་དུ་བརྐུས་པ་ལ་མ་ཤ་ཀ་ལྔ་ཙམ་ཁོ་ནས་ཕམ་པར་འགྱུར་གྱི་དགེ་སློང་རེ་རེའི་སྐལ་བས་ནི་མ་ཡིན་ནོ་ཞེས་བྱ་བར་རྣམ་པར་

---

^{[མ་དཔེ་གཟིགས་ན་འདིར་གནོན།]}

གནས་སོ། །འདིར་གཞུང་ནི་འདུལ་བྱེད་ལས། དགེ་སློང་གཉུག་མར་གནས་ པ་ཞིག་གིས་དགེ་འདུན་གྱི་ཞིང་རྨེད་པར་བྱེད་ལ་དེ་དང་ཧ་ཅང ་མི་རིང་བ་ཞིག་ན་ཁྱིམ་བདག་གི་ཞིང་ཞིག་ཡོད་པས་ཁྱིམ་བདག་དེ་འོངས་ནས་སྨྲས་པ། བཙུན་པ་ཅི་བདག་གི་ཞིང་རྨེད་དམ། ཞིང་འདི་ནི་ཁྱོད་ཀྱི་མ་ཡིན་གྱི་དགེ་འདུན་གྱི་ཡིན་ནོ། །དེས་སྨྲས་པ། བཙུན་པ་མི་མ་ཡིན་པའི་ཆེ་བཞི་རྣམས་ཀྱིས་བསྟན་པར་བྱའོ། །ཞེས་སྨྲས་ནས། ཁྱིམ་བདག་དེས་སྔོན་གྱི་མུར་ཕུར་པ་བཙུགས་པ་དག་དེས་བརྐོས་ཏེ་བསྟན་པ་དང༌། དགེ་སློང་གིས་རྨེད་པ་བོར་རོ། །དེས་ཁྱིམ་བདག་དེ་སོང་བ་དང་ཕུར་བ་དེ་ནང་དུ་བཙུགས་ནས་ཞིང་རྨེད་དོ། །ཁྱིམ་བདག་དེ་ཡང་འོངས་ནས་སྨྲས་པ། བཙུན་པ་ཁར་རྩང་བདག་གིས་ཁྱོད་ཕམ་པར་བྱས་ན་ཅི་ད་ལྟར་ཡང་ཞིང་རྨེད་དམ། དེ་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་དངོས་པོ་ཚང་ན་མཐར་འགྱུར་རོ། །དངོས་པོ་མ་ཚང་ན་ཉེས་པ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ། །འདི་སྙམ་དུ་གལ་ཏེ་དངོས་པོ་ཚང་ན་ཞེས་གསུངས་པ་ལས་ན། དེ་ལས་དེའི་སྐལ་བ་གང་ཡོད་པ་དེ་ཁོ་ན་ལས་ལྟུང་བ་དེ་འབྱུང་བར་དགོངས་པ་ཡིན་ཏེ། མ་ཤ་ཀ་ལྔ་ལ་སོགས་པ་ལས་ཆུང་བའི་ཞིང་ནི་མི་འཐད་པའི་ཕྱིར་རོ་སྙམ་དུ་སེམས་ན་དེ་ནི་མི་རུང་སྟེ། ཅིའི་ཕྱིར་ཞེ་ན། ཞིང་བགོ་མིན་ཕྱིར། དགེ་འདུན་གྱི་ཞིང་ནི་བགོ་བར་བྱ་བ་མ་ཡིན་པས་སྐལ་བ་རྣམ་པར་གཅད་པ་མི་སྲིད་པའི་ཕྱིར་རོ། །གཞན་ཡང་སྡོམ་བརྩོན་མང་ཕྱིར་རོ། །དགེ་སློང་རྣམས་ནི་དཔག་ཏུ་མེད་པ་ཡིན་པས་ཏིལ་ཙམ་གྱི་སྐལ་བ་ཞིག་སྲིད་པས་རིན་ཐང་ཚང་བ་ཉིད་དུ་མི་འཐད་པའི་ཕྱིར་རོ། །དེ་ལྟ་བས་ན་ལུང་གི་གཞུང་ལས། གལ་ཏེ་དངོས་པོ་ཚང་ན་ཞེ་འམ་འོན་ཏེ་མ་ཚང་ན་ཞེས་རིན་ཐང་དཔྱད་པར་འདི་མི་འབྱུང་གི །འོ་ན་ཅི་ཞེ་ན། ཉེས་པ་སྦོམ་པོ་ཁོ་ནར་འགྱུར་རོ་ཞེས་གསུངས་པར་གྱུར་པ་ཞིག་ན། བཅོམ་ལྡན་འདས་ཀྱིས་རིན་ཐང་དཔྱད་པར་ཡང་མཛད་དོ། །དེ་ལྟ་བས་ན་འདི་སྐད་གསུངས་པ་ནི་ཞིང་མ་བགོས་པ་ལ་བྱ་བར་མངོན་ནོ། །གཞན་དུ་ན་ནི་རིན་ཐང་དཔྱད་པའི་སྐབས་མེད་པར་འགྱུར་རོ། །གང་ཞིག་བཏུས་སམ་བསྡུས་སམ་ནགས་ཚལ་ལ། །རྐུ་ན་སྤགས་པ་ཉིད་ན་བརྐུས་པ་ཡིན། །མེ་ཏོག་དག་ནི་བཏུས་

---

^{[མ་དཔེ་གཟིགས་ན་འདིར་གནོན།]}

ནས་གོས་དག་ནི་བསྡུས་ནས་སྤུངས་ཤིང་ཐུམ་པོར་བཅིངས་ཏེ་རྐུ་ན་ཐུམ་པོ་གནས་ནས་སྤགས་པ་ཁོ་ན་ནས་བརྐུས་པ་ཡིན་ནོ། །དེ་བཞིན་དུ་ནགས་ཚལ་ཡང་གནས་ནས་སྤགས་པ་ཁོ་ན་ནས་བརྐུས་པ་ཡིན་ནོ། །འོ་ན་རྣམ་པར་འབྱེད་པ་ལས་མེ་ཏོག་དང་ལྗོན་ཤིང་བཏོན་ནས་རྐུ་བར་བྱེད་ན་མེ་ཏོག་དང་ལྗོན་ཤིང་གི་རིན་ཐང་བརྩི་བར་བྱའོ་ཞེས་བྱ་བ་ལ་སོགས་པ་གསུངས་པ་ཇི་ལྟ་བུ་ཡིན། འདི་ལྟར་འདི་ལས་བཏོན་ནས་ཞེས་གསུངས་པའི་ཕྱིར་སྔར་འདོན་པར་བྱེད་ན་ཕྱིས་རྐུ་བར་བྱེད་དོ། །བར་མངོན་ན་དེ་ཇི་ལྟར་ན་སྤགས་པ་ཉིད་ན་བརྐུས་པ་ཡིན་ཞེས་བྱ་ཞེ་ན། བཤད་པ་ལས་ནི་ཤིང་བཏོན་ནས་རྐུ་བར་བྱེད་ཅེས་བྱ་བ་ནི་ཁ་གདངས་ནས་ཉལ་ལོ་ཞེས་བྱ་བ་དང་འདྲའོ་ཞེས་འབྱུང་ངོ༌། །བཤད་པ་ཞེས་བྱ་བ་ནི་སོ་སོར་ཐར་པའི་རྣམ་པར་འབྱེད་པ་ཡིན་ནོ། །འདི་ལྟར་འདི་ལས་བཏོན་ནས་རྐུ་བར་བྱེད་ཅེས་བྱ་བའི་དོན་འདི་གནས་པའི་ཕྱིར་ནས་ཞེས་བྱ་བ་ནི་དུས་སྔ་མ་ཉིད་ལ་མི་བྱའི་དུས་མཉམ་པ་ཉིད་ཁོ་ན་ལ་བྱ་བར་མངོན་ཏེ། དཔེར་ན་ཁ་གདངས་ནལ་ཞེས་བྱ་བ་དང༌། མིག་བཙུམས་ནས་དགོད་ཅེས་བྱ་བ་དང༌། བརྟེན་ནས་འབྲེལ་པར་འབྱུང་བ་ཞེས་བྱ་བ་ལ་ནས་ཞེས་བྱ་བ་ཡོད་པ་ཡིན་ནོ། །དེ་བཞིན་དུ་འདིར་ཡང་བཏོན་ནས་ཞེས་བྱ་བ་ནས་ནི་དུས་མཉམ་པ་ཉིད་ལ་བྱ་བར་གསུངས་སོ་ཞེས་བྱ་བར་ཐེ་ཚོམ་མེད་དོ། །ནགས་ཚལ་ཞེས་བྱ་བ་ཡང་འདིར་མཚོན་པ་ཙམ་དུ་ཟད་ཀྱི། འབྲས་བུ་ཅན་ནི་ནགས་ཚལ་ཡིན། །མེ་ཏོག་འབྲས་ལྡན་ལྗོན་ཤིང་ཡིན། །འབྲས་བུ་སྨིན་ཟད་སྨན་ཡིན་ནོ། །འཁྲི་ཤིང་གེལ་བ་ནགས་མ་ཡིན། །ཞེས་འབྱུང་བ་ལྟ་བུར་ལྗོན་ཤིང་དང༌། ནགས་མ་དང་སྨན་རྣམས་ཞེས་བྱ་བའི་རྣམ་པར་དབྱེ་བ་འདི་ལ་བརྟེན་པར་མི་བྱའོ། །རྒྱན་པོ་དོར་བྱས་རྒྱལ་ན་ཉེས་པར་འགྱུར། །རྒྱན་པོ་དོར་བྱས་པས་རྒྱལ་ན་ཉེས་པར་འགྱུར་རོ། །རྒྱན་པོ་ལ་སོགས་གྲངས་ལ་དོར་བྱེད་དང༌། །མཚན་མ་བསྐྱེད་དང་འབྲིད་པར་བྱེད་པ་དང༌། །གནས་གཞན་དུ་ནི་འཇོག་དང་འདོར་བྱེད་དང༌། །ཚོམས་གཞན་དུ་ནི་འགྲང་ངམ་སྙོན་བྱེད་དང༌། །མི་རིགས་པ་ཡིས་ཐོབ་པ་སྒྲུབ་བྱེད་དང༌། །གཞན་ལ་སྙད་བཏགས་ལ་སོགས་ཚུལ་གྱིས་རྐུ། །གྲུབ་པ་ཉིད་ན་ཉེས་པ་ཡིན་པར་དགོངས། །རྒྱན་པོ་ལ་

---

^{[མ་དཔེ་གཟིགས་ན་འདིར་གནོན།]}

སོགས་པ་བགྲང་བ་ལ་དོར་བྱས་པས་རྐུ་ན་གྲུབ་པ་ཉིད་ན་ཉེས་པ་ཡིན་ནོ་ཞེས་བྱ་བར་སྦྱར་རོ། །དེ་བཞིན་དུ་མཚན་མ་བསྐྱེད་པའམ་འབྲི་བའམ་གནས་གཞན་དུ་འཇོག་པའམ་འདོར་བའམ་དེ་བཞིན་དུ་གང་ན་ཚོགས་སུ་བྱས་ཏེ། རྙེད་པ་འབུལ་བར་བྱེད་པའི་ཚོགས་གཞན་དེར་བདག་ཉིད་གྲངས་སུ་ཆུད་པར་བྱེད་དམ། ཁོ་བོ་གཞན་དུ་མ་གྲངས་སོ་ཞེས་ཚོགས་སྔ་མ་ལ་སྙོན་པར་བྱེད་པའམ། དེ་བཞིན་མི་དབང་བཞིན་དུ་ཁོ་བོ་དབང་ངོ་ཞེས་སྒྲུབ་པར་བྱེད་པ་དང༌། དེ་བཞིན་དུ་ཁྱིམ་བདག་གིས་བྱིན་ཅིག་ཅེས་སྨོས་སོ་ཞེས་བྱ་བ་ལ་སོགས་པ་གཞན་ལ་སྙད་བཏགས་པས་རྐུ་ན་ཐམས་ཅད་ལ་ཡང་དོན་གྲུབ་པ་ཁོ་ན་ན་བརྐུས་པ་ཡིན་ནོ། །བསྐྱིས་དང་གཏམས་དང་བརྙས་པ་རྣམས་ལ་ནི། །བསྙོན་པས་ཐག་བཅད་པ་ན་ཉེས་པ་ཡིན། །བསྐྱིས་པ་ཞེས་བྱ་བ་ནི་སྐྱིན་པོ་བྱས་པ་དང་སྐྱིན་པོར་བླངས་པའི་ཐ་ཚིག་གོ །གཏམས་ཞེས་བྱ་བ་ནི་གཞག་པ་སྟེ་བགྲངས་ནས་གཏམས་ཞེས་བྱ་བའི་ཐ་ཚིག་གོ །དེ་ལ་བསྐྱིས་པ་དང་བརྙས་པ་དང་གཏམས་པ་ལ་བསྙོན་པ་དག་གིས་རྐུ་བར་བྱེད་པ་ན་ཐག་བཅད་ན་བརྐུས་པ་ཡིན་པར་རིག་པར་བྱའོ། །ཐག་བཅད་པ་ཞེས་བྱ་བ་ནི་གཅིག་ཁོ་ནར་ཆད་པར་བྱེད་པ་སྟེ། གཞན་གྱི་རེ་ཐག་བཅད་པར་བྱས་པ་ཞེས་བྱ་བའི་ཐ་ཚིག་གོ །འདིར་གཞུང་ནི་ཞུས་པ་ལས། བཙུན་པ་དགེ་སློང་གིས་བསྐྱིས་ནས་བསྙོན་པར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བརྙས་པ་ལས་བསྙོན་ནས་རྐུ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །ནམ་མཐར་འགྱུར་ལགས་གང་གི་ཚེ་ཐག་བཅད་པ་ནའོ། །གཞན་ཞིག་གིས་དགེ་སློང་ལ་བཞག་པ་ཞིག་གཏམས་པ་ལ་བླངས་པ་ན་དེས་བསྙོན་པར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །ནམ་ཞིག་མཐར་འགྱུར་ལགས། གང་གི་ཚེ་ཀུན་དུ་ཐག་བཅད་ནའོ། །གཏམས་པ་ནི་གཉིས་ཏེ། བགྲངས་ནས་གཏམས་པ་དང༌། རྒྱས་བཏབ་སྟེ་གཏམས་པའོ། །དེ་ལ་གང་ཞིག་བགྲངས་ནས་གཏམས་པ་ནི་གཏམས་པ་ཞེས་བྱ་བ་འདིས་བསྟན་ཏོ། །རྒྱས་བཏབ་སྟེ་གཏམས་པ་ནི་བཅོལ་ཏེ་བཞག་པའོ་ཞེས་ཏེ། གཏད་པ་ཞེས་བྱ་བའི་ཐ་ཚིག་གོ །འདིའི་རབ་ཏུ་དབྱེ་བ་ནི། བཅོལ་ཏེ་གཏམས་པ་རྐུ་པར་བྱེད་པ་ལ། །ཐག་བཅད་པ་ཡི་རབ་དབྱེ་རྣམ་གསུམ་སྟེ། །ཞེས་རྣམ་པ་

---

^{[མ་དཔེ་གཟིགས་ན་འདིར་གནོན།]}

གསུམ་དུ་བསྟན་ཏོ། །བཅོལ་བ་རྐུ་བ་ལ་ཐག་བཅད་པའི་རབ་ཏུ་དབྱེ་བ་གསུམ་དུ་འགྱུར་ཏེ། གསུམ་གང་དག་ཅེ་ན། བཤད་པ། ཐག་བཅད་པ་དང་སྤགས་མཉམ་སྤགས་པ་ཡི། །འོག་ཏུ་ཐག་བཅད་པ་ལས་ཉེས་པར་འགྱུར། །སྤགས་པའི་རོལ་ཐག་བཅད་དེ་བཞིན་བསྙོན། །སྦྱོར་བའོ་འདིར་ནི་སྤགས་པ་དངོས་གཞི་ཡིན། །སྤགས་པ་དང་ཐག་བཅད་པ་མགོ་མཉམ་པ་ནི་དབྱེ་བ་གཅིག་གོ །སྤགས་པ་ནི་སྔ་ལ་ཕྱིས་ཐག་བཅད་པ་འདི་ནི་གཉིས་པའོ། །ཐག་བཅད་པ་ནི་སྔ་ལ་ཕྱིས་སྤགས་པ་ནི་གསུམ་པ་ཡིན་ནོ། །དེ་ལ་གལ་ཏེ་གནས་ནས་སྤགས་པ་དང་ལྷན་ཅིག་ཏུ་ཐག་བཅད་པ་དང༌། ཡང་ན་གལ་ཏེ་སྤགས་པའི་འོག་ཏུ་ཐག་བཅད་པ་ཡིན་ཡང་རུང་སྟེ། གཉི་གར་ཡང་ཐག་བཅད་པ་ཉིད་ན་བརྐུས་པ་ཡིན་ནོ། །འོན་ཏེ་ཐག་བཅད་པ་ནི་སྔ་ལ། ཕྱི་ནས་སྤགས་པ་ཡིན་ན་དེའི་ཚེ་ཐག་བཅད་པ་ནི་སྦྱོར་བ་ཡིན་པར་རིག་པར་བྱའོ། །དེ་བཞིན་དུ་བསྙོན་པ་ཡང་སྦྱོར་བ་ཁོ་ན་ཡིན་ནོ་ཞེས་བྱ་བའི་ཐ་ཚིག་གོ །འདིར་དོན་གྱིས་ན་ཐག་བཅད་པས་སྔ་བའི་བསྙོན་པ་ནི་སྦྱོར་བ་ཉིད་ཡིན་པར་ཁོང་དུ་ཆུད་པར་བྱ་ལ། འདིར་སྤགས་པ་ཁོ་ན་ནི་ཕམ་པ་ཡིན་ནོ། །འདིར་གཞུང་ནི་ཞུས་པ་ལས། གཞན་ཞིག་གིས་དགེ་སློང་ལ་གཞག་པ་གཏམས་པ་ལས་བླངས་པ་ན་དེས་བསྙོན་པར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །ནམ་ཞིག་ན་མཐར་འགྱུར་ལགས། གང་གི་ཚེ་སྤགས་ཤིང་ཐག་བཅད་པ་ནའོ་ཞེས་བྱ་བ་དང་འོན་ཏེ་སྔར་གནས་ནས་སྤགས་ལ། ཕྱིས་ཐག་བཅད་ན་དངོས་པོ་ཚང་ན་མཐར་འགྱུར་རོ། །མ་ཚང་ན་ཉེས་པ་སྦོམ་པོར་འགྱུར་རོ་ཞེས་བྱ་བ་དང༌། གལ་ཏེ་དེས་སྔར་ཐག་བཅད་ལ། ཕྱིས་གནས་ནས་སྤོག་པར་བྱེད་ན་ཉེས་པ་སྦོམ་པོར་འགྱུར་རོ་ཞེས་གཞུང་གི་དུམ་བུ་གསུམ་འབྱུང་ངོ༌། །འདིར་སྔར་ཐག་བཅད་ན་ཐག་བཅད་པ་ལས་སྦོམ་པོར་འགྱུར་གྱི། མཐར་ནི་མི་འགྱུར་རོ་ཞེས་བྱ་བའི་དོན་འདིར་ཁོང་དུ་ཆུད་པར་བྱ་སྟེ། གཙོར་ཐག་བཅད་པ་ཉིད་ཀྱི་སྐབས་ཡིན་པའི་ཕྱིར་རོ། །འདིར་སྤགས་པ་ནི་མཐར་འགྱུར་བར་གྲུབ་པ་ཁོ་ན་ཡིན་པར་ཐེ་ཚོམ་མེད་དོ། །གཞན་དུ་ན་ཚིག་འདི་

---

^{[མ་དཔེ་གཟིགས་ན་འདིར་གནོན།]}

མི་རིགས་པར་འགྱུར་རོ། །འོ་ན་འདུལ་བ་གཅིག་ནས་འཕྲོས་པ་ལས། བཙུན་པ་རྐུ་བ་དུ་མཆིས། ཉེ་བ་འཁོར་དྲུག་སྟེ། མཐུས་རྐུ་བ་དང༌། འདྲིད་པས་རྐུ་བ་དང༌། གཏམས་པས་རྐུ་བ་དང༌། སླར་སྦྱིན་པར་བྱ་བ་རྐུ་བ་དང༌། འཇོམས་པས་རྐུ་བ་དང༌། ཆོས་རྐུ་བ་དང་དྲུག་གོ །བཙུན་པ་བཅོམ་ལྡན་འདས་ཀྱིས་རྐུ་བ་རྣམ་པ་དྲུག་པོ་གང་ལགས་པ་འདི་དག་ལས་གསུངས་པ་དེ་དག་ལས་དུ་ཞིག་གིས་མཐར་འགྱུར་ལགས། ཉེ་བ་འཁོར་ཆོས་རྐུ་བ་མ་གཏོགས་པ་ཐམས་ཅད་ཀྱིས་མཐར་འགྱུར་རོ་ཞེས་གང་གསུངས་པའི་གཞུང་གི་དོན་འདི་ཅི་བསྟན་ནམ། སྨྲས་པ་དེ་བཞིན་ནོ། །དེ་ལ་རེ་ཞིག་ཆོས་རྐུ་བའི་དོན་ནི། ཡིད་དགེ་བ་ཡིས་ལེན་ན་ཉེས་པ་མེད། །ཅེས་བྱ་བའི་ཚིག་འདིས་བསྟན་པ་ཡིན་ནོ། །འདྲིད་པས་རྐུ་བ་རྣམ་པ་གཉིས་ཏེ། ཆོམ་པོ་དང༌། དོར་ཐབས་ཀྱིས་སོ། །དེ་ལ་ཆོམ་པོས་ལེན་པ་ནི་རྐུ་བའི་སེམས་ཀྱིས་སུ་ཞེས་བྱ་བ་ལ་སོགས་པས་བསྟན་པ་ཡིན་ནོ། །དོར་ཐབས་ཀྱིས་རྐུ་བ་ནི། རྒྱན་པོ་དོར་བྱས་རྒྱལ་ན་ཉེས་པར་འགྱུར། །ཞེས་བྱ་བ་འདིས་བསྟན་པ་ཡིན་ནོ། །གཏམས་པ་རྐུ་བ་ཡང་རྣམ་པ་གཉིས་ཏེ། བགྲངས་ནས་གཏམས་པ་དང༌། རྒྱས་བཏབ་ནས་གཏམས་པའོ། །དེ་ལ་རྒྱས་བཏབ་ནས་གཏམས་པ་ནི་བཅོལ་ཏེ་གཏམས་པ་ཞེས་བྱ་བ་འདིས་བསྟན་པ་ཡིན་ནོ། །བགྲངས་ནས་གཏམས་པ་རྐུ་བ་དང༌། སླར་སྦྱིན་པར་བྱ་བ་རྐུ་བ་ནི་བརྐུས་པ་དང༌། བསྐྱིས་པ་དང་གཏམས་པ་དང་བརྙས་པ་རྣམས་ལ་ནི་ཞེས་བྱ་བ་འདིས་དོན་བསྟན་པ་ཡིན་ནོ། །མཐུས་རྐུ་བ་ནི་མངོན་སུམ་འཕྲོག་པ་དང་ཞེས་བྱ་བ་འདིས་བསྟན་པ་ཡིན་ནོ། །འཇོམས་པས་རྐུ་བ་ནི་ཤོ་གམ་འཇོམས་པའོ། །དེ་ཡང་རྣམ་པ་གཉིས་ཏེ། མཐུ་དང་འཇབ་བུས་སོ། །དེ་ཡང་རྐུ་བའི་སེམས་ཀྱིས་སུ། །ཞེས་བྱ་བ་ལ་སོགས་པ་འདིས་དོན་བསྟན་པ་ཡིན་ནོ། །དེ་ལྟར་བརྐུ་བྱའི་དབྱེ་བས་རྐུ་དབྱེ་བ། །འདི་ནི་འདུལ་བའི་རྒྱ་མཚོ་ལས་བཏུས་བསྟན། །དེ་ལྟར་ན་ནི་དེ་ལྟར་ཏེ། བརྐུ་བར་བྱ་བའི་དབྱེ་བས་རྐུ་བའི་རབ་ཏུ་དབྱེ་བ་འདི་འདུལ་བའི་རྒྱ་མཚོ་ལས་ཕྱུང་ནས་བཤད་པ་ཡིན་ནོ། །རང་གཞན་བང་ཆེན་བརྒྱུད་ལ་སོགས་པ་ཡིས། །གང་ཞིག་རྐུ་ན་ཐམས་ཅད་རྐུན་མ་ཡིན། །རང་རྐུ་འམ། གཞན་དག་གིས་སམ། བང་ཆེན་བཏང་བས་སམ། བང་ཆེན་བརྒྱུད་པས་རྐུ་

---

^{[མ་དཔེ་གཟིགས་ན་འདིར་གནོན།]}

ཡང་རུང་སྟེ། །དེ་ཐམས་ཅད་རྐུན་མ་ཉིད་ཡིན་པར་རྟོགས་པར་བྱའོ། །འདིར་གཞུང་ནི་བདག་ཉིད་ཀྱིས་རྐུ་བར་བྱེད་པ་དང༌། བདག་ཉིད་ཀྱིས་རྐུར་འཇུག་པ་དང༌། བདག་ཉིད་ཀྱིས་གནས་ནས་གནས་སུ་སྤོག་པར་བྱེད་པ་དང་བྱིན་གྱིས་བརླབས་ནས་རྐུ་བར་བྱེད་པ་དང༌། བྱིན་གྱིས་བརླབས་ནས་རྐུར་འཇུག་པ་དང༌། བྱིན་གྱིས་བརླབས་ནས་གནས་ནས་གནས་སུ་སྤོག་པར་བྱེད་པ་དང༌། བང་ཆེན་གྱིས་རྐུ་བར་བྱེད་པ་དང་བང་ཆེན་གྱིས་རྐུར་འཇུག་པ་དང༌། བང་ཆེན་གྱིས་གནས་ནས་གནས་སུ་སྤོག་པར་བྱེད་ན་ཕམ་པར་འགྱུར་རོ་ཞེས་བྱ་བ་ལ་སོགས་པ་འབྱུང་བ་ཡིན་ནོ། །དེ་ལ་འཕགས་པ་ཉེར་སྦས་ཀྱིས་རྐུ་བར་བྱེད་པ་ནི་སྦྱོར་བར་བྱེད་དོ་ཞེས་བྱ་བར་རྣམ་པར་བཤད་དོ། །དེའི་ཕྱིར་དེའི་རྗེས་སུ་འབྲངས་ནས་རྐུ་བ་འདི་དག་རྣམ་པར་བཤད་པར་བྱའོ། །བདག་ཉིད་ཀྱིས་རྐུ་བར་བྱེད་ཅེས་བྱ་བ་ནི་རང་གིས་སྦྱོར་བར་བྱེད་པའོ། །བདག་ཉིད་ཀྱིས་རྐུར་འཇུག་པ་ཞེས་བྱ་བ་ནི་རང་ཉིད་ཀྱིས་གཞན་ལ་བསྐོར་བར་བྱེད་པའོ། །གནས་ནས་གནས་སུ་སྤོག་པར་བྱེད་ཅེས་བྱ་བ་ནི་གནས་གང་ན་རྫས་གང་ཡོད་པ་དེ་ནས་གཞན་དུ་སྤེད་པར་བྱེད་པ་སྟེ། དཔེར་ན་གལ་ཏེ་བརྩད་པས་རྐུ་བ་ན་འོག་ཟུར་བརྩད་ལ་དེར་ཕ་རོལ་གྱི་རེ་བ་མ་ཆད་པའི་གནས་སུ་ཕྱིན་པར་བྱེད་པ་ནི་གནས་ནས་གནས་གཞན་དུ་སྤོག་པར་བྱེད་པ་དང༌། གལ་ཏེ་བླའི་གྲྭར་རྩོད་ན་དེར་ཕ་རོལ་པོ་མ་ཕམ་པའི་གནས་ནས་ཕམ་པའི་གནས་སུ་ཕྱིན་པར་བྱེད་པ་ནི་གནས་ནས་གཞན་དུ་སྤོག་པར་བྱེད་པ་ཞེས་བྱ་བ་ལ་སོགས་པར་སྦྱར་བ་ལྟ་བུའོ། །བྱིན་གྱིས་བརླབས་ནས་རྐུ་བར་བྱེད་པ་ཞེས་བྱ་བ་ནི་བདག་ཉིད་ཀྱིས་ཏེ། བདག་ཉིད་ཁོ་ནས་རྫས་དེ་བྱིན་གྱིས་བརླབས་ནས་བཟུང་ནས་བདག་གིར་བྱས་ནས་ཞེས་བྱ་བའི་ཐ་ཚིག་གོ །དཔེར་ན་རྫས་བསྐྱིས་པ་དང༌། གཏམས་པ་དང་བརྙས་པ་དེ་དག་ལ་ཐོག་མ་ཉིད་ནས་བྱིན་གྱིས་བརླབས་ཤིང་སྙིང་ལ་བསམས་ནས་དཔྱད་པར་བྱས་ལ། ཕྱིས་རྐུ་བར་བྱེད་པ་སྟེ། སྦྱོར་བ་བྱེད་པ་ལྟ་བུའོ། །སྦྱོར་བ་དེ་ཡང་བསྙོན་ཅིང་ལས་མི་ལེན་ཏོ་ཞེས་བྱ་བའི་ཐ་ཚིག་གོ །།བམ་པོ་བཞི་པ། བྱིན་གྱིས་བརླབས་ནས་རྐུར་འཇུག་པ་ཞེས་བྱ་བ་ཡང་སྔ་མ་བཞིན་ཏེ་བདག་གིར་བྱས་ནས་དེའི་རེ་བ་ཆད་པའི་ཐབས་གཞན་ལ་བྱེད་དུ་འཇུག་ཅིང་སྦྱོར་བར་བྱེད་དོ། །བྱིན་གྱིས་

---

^{[མ་དཔེ་གཟིགས་ན་འདིར་གནོན།]}

བརླབས་ནས་གནས་ནས་གནས་སུ་སྤོག་པར་བྱེད་པ་ཞེས་བྱ་བ་ཡང་སྔ་མ་བཞིན་ཏེ། རྫས་བྱིན་གྱིས་བརླབས་ཤིང་སྙིང་ལ་བསམས་ནས་དེས་ཕ་རོལ་པོའི་རེ་བའི་གནས་ནས་རེ་བ་ཆད་པའི་གནས་སུ་ཕྱིན་པར་བྱེད་པ་སྟེ། རེ་ཐག་ཆད་པར་བྱེད་དོ་ཞེས་བྱ་བའི་ཐ་ཚིག་གོ །བང་ཆེན་གྱིས་རྐུ་བར་བྱེད་ན་ཞེས་བྱ་བ་ནི་ཐག་རིང་པོར་བང་ཆེན་བཏང་ནས་སོ། །བང་ཆེན་གྱིས་རྐུར་འཇུག་པ་ཞེས་པ་ནི་བང་ཆེན་གྱིས་བང་ཆེན་ལ་སོགས་པས་སོ། །བང་ཆེན་གྱིས་གནས་ནས་གནས་སུ་སྤོག་པར་བྱེད་ཅེས་བྱ་བ་ནི་བརྐུ་བར་བྱ་བ་གང་གནས་གང་ན་ཡོད་པ་དེ་ནས་གཞན་དུ་སྤེད་པར་བྱེད་པའོ། །གནས་ཀྱང་སྔ་མ་བཞིན་ཏེ། ཁ་ཅིག་ཏུ་ནི་བསམ་པ་མ་བཏང་བའོ། །ཁ་ཅིག་ཏུ་ནི་ཕམ་པའོ། །ཁ་ཅིག་ཏུ་ནི་མི་སྣང་བའོ། །ཁ་ཅིག་ཏུ་ནི་སྣང་བའོ། །ཁ་ཅིག་ཏུ་ནི་རེ་བ་ཆད་པ་ལ་སོགས་པ་མཚན་ཉིད་ཇི་ལྟ་བ་བཞིན་དུ་དཔྱད་ན་བརྗོད་པར་བྱའོ། །འཕགས་པ་ཟླ་བའི་ནོར་བུའི་ཞལ་ནས་ནི་བདག་ཉིད་ཀྱིས་རྐུ་བར་བྱེད་པ་ཞེས་བྱ་བ་ནི་རང་གིས་འཕྲོག་པར་བྱེད། བྲལ་བར་བྱེད་ཅེས་བྱ་བའི་ཐ་ཚིག་གོ །བདག་ཉིད་ཀྱིས་རྐུར་འཇུག་པ་ཞེས་བྱ་བ་ནི་ཕ་རོལ་པོ་བསྐོས་ནས་འཕྲོག་པར་བྱེད་པའོ། །སྤོག་པར་བྱེད་པ་ཞེས་བྱ་བ་འདི་ནི་རྣམ་གྲངས་ཀྱི་ཚིག་ཡིན་ཏེ། རྫས་གང་ཞིག་གནས་གང་ན་ཡོད་པ་དེ་ནི་སྤོག་པར་བྱེད། འཕྲོག་པར་བྱེད་ཅེས་བྱ་བའི་དོན་འདི་ཁོ་ནར་འགྱུར་རོ་ཞེས་གསུངས་སོ། །གལ་ཏེ་རྣམ་གྲངས་ཀྱི་ཚིག་ཡིན་ན། སངས་རྒྱས་བཅོམ་ལྡན་འདས་རྣམས་ནི་ཟློས་བུ་མངའ་བར་སྟོན་པ་ཡིན་ནོ་ཞེས་འབྱུང་བ་འདི་དང་འགལ་ལོ་ཞེ་ན། བཙུན་པ་བློས་མི་འབེབས་ཀྱི་ཞལ་ནས་གདུལ་བའི་དབང་གི་ཕྱིར་ནི་ཟློས་བུར་མི་འགྱུར་རོ་ཞེས་གསུངས་སོ། །བརྒྱ་ལ་འོན་གལ་ཏེ་རྐུར་འཇུག་པ་ཞེས་བྱ་བ་གཞན་ལ་བསྒོ་བ་ཡིན་ནོ་ཞེས་བྱ་བའི་དོན་ཡིན་ན་དེའི་ཚེ་ལུས་ཀྱི་མ་བྱིན་པར་བླངས་པར་ཇི་ལྟར་འགྱུར་ཞེ་ན། ཚིག་གིས་བསྒོ་ནས་ལུས་ཀྱི་འབྲས་བུ་རྫོགས་པར་བྱེད་པའི་ཕྱིར་ལུས་ཀྱིས་ཞེས་བྱ་བར་འགྱུར་བས་ཉེས་པ་མེད་དོ། །གཞི་ནས་རྒྱུན་གྱིས་རྐུ་བར་བྱེད་པ་ནས། །རྐུན་དུ་འབྲེལ་པར་འབྱུང་ལ་གཅིག་ཉིད་དོ། །ཞེས་བྱ་བ་དེ་ཀུན་དུ་འབྲེལ་བའི་རྒྱུན་ནི་གཅིག་པ་ཉིད་ཡིན་ནོ་ཞེས་བྱ་བའི་ཐ་ཚིག་གོ །འདིར་གཞུང་ནི་ཞུས་པ་ལས། བཙུན་པ་དགེ་སློང་གིས་ཆུ་བོ་བཀུམ་ནས་ཆབ་རྐུ་

---

^{[མ་དཔེ་གཟིགས་ན་འདིར་གནོན།]}

བར་བྱེད་ན་ཅིར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། ཆུའི་ཕུང་པོ་དང་པོ་ནས་ཆུའི་མཇུག་གི་རིན་ཐང་བརྩི་བར་བྱའོ་ཞེས་བྱ་བ་ལ་སོགས་པ་འབྱུང་བ་ཡིན་ནོ། །དེ་བཞིན་འདིར་ནི་ཁ་དོག་གཅིག་གྱུར་གནས། །རི་མོ་ལ་སོགས་མེད་ས་སྟེང་མཉམ་གཅིག །དེ་བཞིན་དུ་ཁ་དོག་གཅིག་པར་གྱུར་པའི་གནས་ཀྱང་གཅིག་པ་ཉིད་ཡིན་ཏེ། གལ་ཏེ་ས་གཞི་ཁ་དོག་གཅིག་པ་ཡིན་ལ། རི་མོ་ལ་སོགས་པ་ཡང་མེད་ཅིང་མཉམ་པ་དང་མཐོ་དམན་མེད་པ་དེ་ཡང་གཅིག་པ་ཉིད་དུ་ཤེས་པར་བྱའོ། །གླང་ཆེན་ལ་སོགས་ཕྱོགས་ནི་མི་མངོན་དང༌། །དོང་ན་ཡོད་པའི་འབྲས་ཆན་ཁ་དོག་མཚུངས། །རྩྭ་རྣམས་བཀྲམ་པའི་འབྱར་བ་མཉམ་པའམ། །གཞན་རྣམས་ལ་ཡང་འོས་པ་ཉིད་ཀྱིས་དཔྱད། །གལ་ཏེ་གླང་པོ་ཆེ་དེ་ཤ་རྒྱས་པ་ཞིག་ཡིན་ན་ཕྱོགས་གཅིག་ཡིན་ནོ། །གང་ཞིག་རྩི་བ་ལོགས་ལ་སོགས་པ་རུས་པ་དག་སྣང་བ་དེ་དག་ནི་ཕྱོགས་ཐ་དད་པ་ཡིན་པར་བལྟ་བར་བྱའོ། །དེ་བཞིན་དུ་དོང་དག་ན་ཡོད་པའི་འབྲས་ཁ་དོག་གཅིག་པ་དང༌། རྩྭ་བཀྲམ་པ་འབྱར་བ་མཉམ་པའི་ངོ་བོར་གྱུར་པ་ལས་ཡང་གཅིག་པ་ཉིད་ཁོ་ན་ཡིན་ནོ། །གཞན་རྣམས་ལ་ཡང་ཇི་ལྟར་འོས་པ་ཉིད་ཀྱིས་དཔྱད་པར་བྱའོ། །གསེར་དངུལ་རྣམ་པ་ཉམས་བྱས་རྐུ་བྱེད་ན། །ཉམས་བྱས་ངོ་བོ་བརྐུ་བར་བྱ་བར་འདོད། །གསེར་རམ་དངུལ་དག་སྨན་གྱིས་ཉམས་པར་བྱས་ནས་རྐུ་བར་བྱེད་པ་ན། ཉམས་པར་བྱས་པའི་ངོ་བོ་ཁོ་ནའི་རིན་ཐང་བརྩི་བར་བྱའི་ཉམས་པར་མ་བྱས་པའི་མ་ཡིན་ནོ། །གསད་པ་ཉིད་ནི་ནམ་ཡང་བརྐུས་མིན་ཏེ། །དེ་ནི་རྐུ་བའི་སྦྱོར་བ་ཡིན་པར་བསྟན། །ལུག་ལ་སོགས་པ་བསད་ནས་རྐུ་བ་ན་དེའི་གནས་སྐབས་ཀྱི་རིན་ཐང་བརྩི་བར་བྱའོ། །བསད་པ་ནི་རྐུ་བའི་སྦྱོར་བ་ཁོ་ན་ཡིན་པར་བསྟན་ཏོ། །དེ་ལྟར་ན། བརྐུ་བྱ་གཅིག་ཉིད་དང་ནི་གཞིར་གྱུར་གཅིག །བརྐུ་བྱའི་ངོ་བོ་ཇི་ལྟར་དེ་ལྟར་བཤད། །བརྐུ་བར་བྱ་བ་གཅིག་པ་ཉིད་ནི་གཞི་ནས་རྒྱུན་གྱིས་ཞེས་བྱ་བ་ལ་སོགས་པས་བཤད་དོ། །གཞིར་གྱུར་པ་གཅིག་པ་ཉིད་ནི། དེ་བཞིན་འདིར་ནི་ཁ་དོག་གཅིག་གྱུར་གནས། །ཞེས་བྱ་བ་ལ་སོགས་པས་བཤད་དོ། །བརྐུ་བར་བྱ་བའི་རང་བཞིན་ཡང༌། །གསེར་དངུལ་རྣམ་པ་ཉམས་བྱས་ཞེས་བྱ་བ་ལ་སོགས་པས་བཤད་དོ། །

---

^{[མ་དཔེ་གཟིགས་ན་འདིར་གནོན།]}

ད་ནི་བདག་པོའི་རབ་ཏུ་དབྱེ་བ་བཤད་པར་བྱའོ། །ནོར་གྱི་བདག་པོ་མི་འམ་རི་དགས་ཞེས། །ངེས་པ་མེད་ན་དངོས་ཀྱི་དབང་གིས་གཞག །བདག་པོ་རྣམས་མི་ཡིན་ན་འོ་ན་ཏེ་མི་མ་ཡིན་ཞེས་ངེས་པ་མེད་ན། །ཡིད་གཉིས་གྱུར་ན་ངེས་དང་འདྲ་བར་གཞག །ཅེས་བྱ་བ་འདིས་དངོས་པོ་ལས་རྣམ་པར་གཞག་གོ །རྐུན་པོས་ཆོས་གོས་རྫས་ལ་སོགས་ཕྲོགས་ན། །དེ་ལ་རེ་བ་མེད་ན་བདག་གི་མིན། །དེ་ཕྱིར་ནན་གྱིས་དེ་ལས་ལེན་ན་མཐའ། །བསམ་པས་མ་བཏང་བ་ལ་ཉེས་པ་མེད། །རྐུན་མ་རྣམས་ཀྱིས་ཆོས་གོས་ལ་སོགས་པ་ཕྲོགས་ན། གང་ཞིག་བསམ་པས་བཏང་བ་དེ་ལ་བདག་ཉིད་ཀྱིར་བྱ་བ་མེད་དོ། །བསམ་པས་མ་བཏང་བ་ལ་ནི་ཡོད་དོ། །དེ་ལྟར་བས་ན་ནན་གྱིས་རྐུན་མ་ལས་ལེན་པར་བྱེད་ན། བསམ་པས་ཡོངས་སུ་བཏང་བ་ལས་མཐར་འགྱུར་རོ། །བསམ་པས་མ་བཏང་བ་ལ་ནི་ཉེས་པ་མེད་པ་ཉིད་ཡིན་ཏེ། འདོད་པ་དང་བཅས་པ་ཉིད་ཀྱིས་བདག་གིར་བྱ་བ་ཉིད་དང་མ་བྲལ་བའི་ཕྱིར་རོ། །འོ་ན་ཕྲན་ཚེགས་ལས། རང་གི་ཆོས་གོས་དང་ལྷུང་བཟེད་ངོ་ཤེས་ནས་དགེ་སློང་རྣམས་ཀྱིས་ཀུ་ཅོ་བཏོན་པ་དང༌། ཆོམ་རྐུན་པ་དེ་རྣམས་སྐྲག་ནས་བོར་ཏེ་བྱེར་རོ། །དགེ་སློང་རྣམས་ཀྱང་རང་རང་གི་ཆོས་གོས་དང་ལྷུང་བཟེད་བྱིན་གྱིས་བརླབས་ནས་འཁོད་ལ། ཅི་འདི་བདག་ཅག་ལ་རུང་ངམ་འོན་ཏེ་མི་རུང་སྙམ་དུ་མི་ཤེས་པ་ལས། བཅོམ་ལྡན་འདས་ཀྱིས་བཀའ་སྩལ་པ། དེ་དག་སྐྲག་པར་མི་བྱ་སྟེ། དེ་ནི་གང་གིས་ཕྲོགས་པ་དེའི་ཡིན་ནོ། །ཞེས་འབྱུང་བ་དང་འགལ་ལོ་ཞེ་ན། འདི་ལ་འགལ་བ་མེད་དེ། གཞུང་གི་དོན་ནི་ནོར་གྱི་བདག་པོ་རྣམས་ཀྱི་བསམ་པས་བཏང་བ་བྱས་ན། དེ་གང་གིས་ཕྲོགས་པ་དེའི་ཡིན་ནོ་ཞེས་བྱ་བ་ཡིན་པའི་ཕྱིར་རོ། །འདི་ག་ལས་ཤེས་ཤེ་ན། དེ་སྲིད་དུ་ལྟོས་པ་མེད་པར་མི་བྱའོ་ཞེས་གསུངས་པའི་ཕྱིར་རོ། །འདི་ནི་ཁུངས་མ་ཡིན་ཏེ། དེ་ལྟར་ཡང་ཆོམས་རྐུན་རྣམས་ཀྱིས་གཞོམ་པར་བརྩམས་པ་དང༌། དགེ་སློང་རྣམས་ཀྱིས་ལྟོས་པ་མེད་པར་ཆོས་གོས་དང་ལྷུང་བཟེད་བོར་བ་དང༌། དེ་རྣམས་ཕོངས་པར་གྱུར་བ་ན། བཅོམ་ལྡན་འདས་ཀྱིས་བཀའ་སྩལ་པ། ཇི་སྲིད་དུ་ཆོམ་རྐུན་རྣམས་ཀྱིས་བཅོམ་པའི་རྫས་ཁྱེར་ནས་སྦྱོར་བའི་རྒྱུན་མ་ཆད་པ་དེ་སྲིད་དུ་ལྟོས་པ་མེད་པར་མི་བྱའོ་ཞེས་གཞུང་ལས་འབྱུང་

---

^{[མ་དཔེ་གཟིགས་ན་འདིར་གནོན།]}

བས་ཆོམ་རྐུན་མཐོང་བ་ཁོ་ན་ལས་འཕྲལ་དུ་མ་བཏང་བ་ཞེས་བྱ་བ་ལ་དགོངས་པའི་ཕྱིར་འདི་ནི་ཁུངས་མ་ཡིན་ནོ་ཞེས་བྱ་བའི་ཐ་ཚིག་གོ་ཞེ་ན། འདིའི་དོན་ནི་འདི་ཡིན་ཏེ། འདི་ནི་བྱུང་བ་ཙམ་ཡིན་གྱི། ཆོམ་རྐུན་དེ་སྲིད་དུ་ལྟོས་པ་མེད་པར་མི་བྱའོ་ཞེས་འབྱུང་བ་འདི་ནི་སྤྱིར་གསུངས་པ་ཡིན་ནོ། །གལ་ཏེ་འདི་སྤྱིར་གསུངས་པར་མི་འགྱུར་ན་དེའི་ཚེ་ཆོམ་རྐུན་དེ་དག་བཅོམ་པའི་རྫས་རྣམས་ཁྱེར་ཏེ་མཉན་ཡོད་དུ་ཚོང་བྱ་བར་བཙམས་པ་དང༌། དགེ་སློང་རྣམས་ཀྱིས་བཅོམ་པའི་རྫས་ངོ་ཤེས་ལ། བཅོམ་ལྡན་འདས་ཀྱིས་ཀྱང་དེ་སྲིད་དུ་ལྟོས་པ་མེད་པར་མི་བྱའོ་ཞེས་གསུངས་པས། དགེ་སློང་དེ་རྣམས་ཀྱིས་བཅོམ་པའི་རྫས་དེ་ངོ་ཤེས་ནས་ཆོམ་རྐུན་དེ་རྣམས་རྒྱལ་པོའི་ཕོ་བྲང་འཁོར་དུ་ཁྲིད་པ་དང༌། བཅོམ་ལྡན་འདས་ཀྱིས་བཀའ་སྩལ་བ། ཆོམ་རྐུན་པ་རྣམས་རྒྱལ་པོའི་ཕོ་བྲང་འཁོར་དུ་དབུལ་བར་མི་བྱའོ། །འོན་ཀྱང་ཆོས་བཤད་པས་བླང་བར་བྱའོ། །གལ་ཏེ་མི་སྟེར་ན་རིན་ཕྱེད་ཀྱིས་ཀྱང་བླང་བར་བྱའོ། །འོན་ཀྱང་མི་སྟེར་ན་རིན་ཐང་ཚང་བར་བྱིན་ཏེ་བླང་བར་བྱའོ་ཞེས་བྱ་བ་ལ་སོགས་པའི་བར་དུ་འབྱུང་བའི་གཞུང་འདི་མི་རུང་སྟེ། འདིར་དེ་སྲིད་དུ་ལྟོས་པ་མེད་པར་མི་བྱའོ་ཞེས་བྱ་བའི་ཚིག་འདི་མངོན་དུ་བྱས་ནས་དགེ་སློང་རྣམས་འཇུག་པ་ནི་འགལ་ལོ། །གལ་ཏེ་དོན་དེ་ལྟར་མི་སེམས་ན་བཅོམ་ལྡན་འདས་ཀྱིས་ཀྱང་མ་བྱིན་པར་ལེན་པ་ལ་བརྟེན་ནས་དགག་པ་བོར་ཏེ་ཆོམ་རྐུན་དབུལ་བ་བཀག་པ་མི་རིགས་པར་འགྱུར་རོ། །དེ་ལྟ་བས་ན་བསམ་པས་བཏང་བ་ལས་བདག་གིར་བྱ་བ་ལོག་པ་ཡིན་ནོ་ཞེས་བྱ་བར་རྟོགས་པར་བྱའོ། །བསམ་པས་མ་བཏང་ན་ནི་གཞན་གྱིས་བདག་གིར་བྱས་ཀྱང་རུང་སྟེ། བདག་ཉིད་ཀྱིར་བྱ་བ་མ་ཉམས་པ་ཡིན་ནོ། །དེ་ལྟར་ཡང་འདུལ་བ་མདོ་ལས། ཕྲོགས་པ་ལ་བསམ་པས་མ་བཏང་བ་ཉིད་ནི་བདག་པོ་ཉིད་དང་མ་བྲལ་བ་ཡིན་པ་ཉིད་དོ་ཞེས་བྱ་བ་འབྱུང་བ་ཡིན་ནོ། །རྩ་བའི་བྱེ་བྲག་ཏུ་བཤད་པ་ལས་ཀྱང་ཕྲོགས་མ་ཐག་ཏུ་དངོས་པོ་དེ་ཆོམ་རྐུན་གྱི་ཡིན་པར་མི་འགྲུབ་སྟེ། དེ་ནི་བདག་པོ་ཁོ་ནའི་ཡིན་ནོ་ཞེས་འབྱུང་ངོ༌། །འོན་ནི་ཆོས་བཤད་པས་བླང་བར་བྱའོ་ཞེས་བྱ་བ་འདི་དང་འགལ་ཏེ། རང་གི་རྫས་བླང་བ་ལ་ཆོས་བཤད་པ་

---

^{[མ་དཔེ་གཟིགས་ན་འདིར་གནོན།]}

དང་འབྲེལ་བ་ཅི་ཡོད་ཅེ་ན། དེ་ནི་བཅོམ་ལྡན་འདས་ཀྱིས་ཐུགས་བརྩེ་བ་ལྷུར་མཛད་ནས་གསུངས་པས་འགལ་བ་མེད་དོ། །གཞུང་གི་དོན་ནི་གལ་ཏེ་ལུས་ལ་གནོད་པ་མེད་པར་བླང་བར་ནུས་ན་དེ་ལྟ་ན་ནི་བླང༌། །འོན་ཏེ་མ་ཡིན་ན་ཆོས་བཤད་པས་བླང་བར་བྱ་བ་འམ་རིན་གྱིས་ཀྱང་བླང་བར་བྱའི། ཆོམ་རྐུན་རྣམས་རྒྱལ་པོའི་ཕོ་བྲང་འཁོར་དུ་དབུལ་བར་མི་བྱ་སྟེ། དེས་ན་དེ་དག་ལ་གནོད་པར་འགྱུར་རོ་ཞེས་བྱ་བར་གནང་སྟེ་འདི་ལྟར་རིན་ཕྱེད་ཀྱིས་ཀྱང་ཞེས་གསུངས་པས། དེ་ནི་དེ་ལྟར་གདོན་མི་ཟ་བ་ཡིན་ནོ། །དེ་ལྟ་མ་ཡིན་ན་རིན་ཕྱེད་ཀྱིས་ཇི་ལྟར་ལྟུང་བར་མི་འགྱུར། གལ་ཏེ་ཞེས་བྱ་བའི་གཞུང་ལས། དེ་དག་བསྒྲག་པར་མི་བྱ་སྟེ་དེ་ནི་གང་གིས་ཕྲོགས་པ་དེའི་ཡིན་ནོ་ཞེས་གསུངས་པ་ཡང་དེའི་དོན་འདི་ཡིན་ཏེ། འདི་ནི་བདག་གི་ཡིན་ནོ་སྙམ་དུ་མངོན་པར་ཞེན་པའི་ཕྱིར་དེ་དེའི་ཡིན་གྱི། རྐུན་པོ་མ་ཡིན་པར་མི་གཞན་གྱི་ནི་མ་ཡིན་ནོ། །མཐུས་དེའི་རེ་བ་བཅད་ན་སྡོམ་བརྩོན་དབྱུག་པ་སྤངས་པ་དགོན་པ་དང་བས་མཐའ་ན་གནས་པ་ལ་སྲོག་གི་བར་ཆད་བྱེད་པར་འགྱུར་རོ་སྙམ་ནས་བཅོམ་ལྡན་འདས་ཀྱིས་བཟློག་པ་མཛད་དེ། རང་གི་འདུ་ཤེས་ཀྱིས་འཇུག་པས་གཞན་གྱིས་ནི་མ་ཡིན་པའི་ཕྱིར་རོ། །གཞན་གྱི་ཡིན་པར་འདུ་ཤེས་ཡོད་ན་ནི་ཁ་ན་མ་ཐོ་བ་ལ་སོགས་པ་བསྐྱེད་པའི་ཕྱིར་རོ། །གཞན་གྱིས་སློབ་མ་དབང་བྱས་དེ་བདག་མིན། །གཞན་གྱིས་སློབ་མ་བསྡུས་པའམ་སྦྱིན་པ་ལ་སོགས་པས་དབང་དུ་བྱས་ན་བདག་ཉིད་ཀྱི་མ་ཡིན་ཏེ། དེ་སླར་ཕྲོགས་ན་མཐར་འགྱུར་བ་ཡིན་ནོ་ཞེས་དགོངས་པའོ། །འདིར་གཞུང་ནི་འདུལ་བྱེད་ལས། དགེ་སློང་གི་སློབ་མ་ཆོམ་རྐུན་རྣམས་ཀྱིས་ཁྲིད་པ་དང༌། དེས་དེ་འབྲོས་སུ་བཅུག་ནས་བཀུག་པ་ལས། དེ་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་བ། གལ་ཏེ་དེ་དག་གི་སློབ་མ་དབང་དུ་བྱས་པ་ལས་འགུགས་པར་བྱེད་པ་ན་དངོས་པོ་ཚང་ན་ཕམ་པར་འགྱུར་རོ་ཞེས་འབྱུང་བ་ཡིན་ནོ། །འོ་ན་ཡང་དགེ་སློང་མ་གང་གིས་ཁྱིམ་ཐབ་ཀྱིས་མ་གནང་བར་རབ་ཏུ་འབྱིན་པར་བྱེད་ན་ལྟུང་བྱེད་དོ་ཞེས་གསུངས་པ་ཇི་ལྟ་བུ་ཡིན། འདི་ནི་སྲོག་ཆགས་ཕལ་བ་འཕྲོག་པའི་རྣམ་པ་ཡིན་ཏེ། མ་གནད་པ་རབ་ཏུ་འབྱིན་པས་བདག་ཉིད་ཀྱིས་སྒྲུབ་པར་བྱེད་པ་དེའི་ཕྱིར་མཐར་འགྱུར་བར་རིགས་སོ་ཞེ་ན། རྐུ་བའི་སེམས་

---

^{[མ་དཔེ་གཟིགས་ན་འདིར་གནོན།]}

མེད་པའི་ཕྱིར་འདི་འཕྲོག་པ་མ་ཡིན་པས་ཉེས་པ་མེད་དོ། །བདག་ཉིད་རྐུ་བས་ནམ་ཡང་ཡོད་མ་ཡིན། །ཞེས་བྱ་བ་འདིར་གཞུང་ནི་འདུལ་བྱེད་ལས། ཆོམ་རྐུན་རྣམས་ཀྱིས་དགེ་སློང་བརྐུས་པ་དང༌། དེ་དེ་རྣམས་ལས་བྲོས་ནས་སླར་འོངས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ལ་བདག་ཉིད་རྐུ་བ་མེད་པས་ལྟུང་བ་མེད་དེ་ཞེས་བྱ་བའི་བར་དུ་འབྱུང་བ་ཡིན་ནོ། །དུད་འགྲོའི་ནོར་ལ་བདག་དང་དུད་འགྲོ་དག །ཟས་བཏང་བ་ལ་བདག་པོ་དུད་འགྲོ་ཡིན། །ཞེས་བྱ་བ་འདི་ནི་བྱའི་བདག་པོ་རྣམས་ཀྱི་བུ་དང་འདྲ་བར་བྱ་རྣམས་ལ་རྒྱན་དེ་བྱིན་ནོ། །དེ་ལྟ་བས་ན་འདིར་བྱ་ཡང་བདག་པོ་ཉིད་ཡིན་པས་གཉི་ག་བདག་པོ་ཉིད་ཡིན་ཡང་འདུ་ཤེས་ཀྱི་དབང་གིས་ལྟུང་བ་རྣམ་པར་གཞག་པར་རིག་པར་བྱའོ། །འདིར་གཞུང་ནི། གལ་ཏེ་འདི་སྙམ་དུ་མིའི་ནི་རྐུའི་བྱའི་ནི་མ་ཡིན་ནོ་སྙམ་དུ་སེམས་ན་མིའི་ལས་རིན་ཐང་བརྩི་བར་བྱའོ། །གལ་ཏེ་དངོས་པོ་ཚང་ན་ཕམ་པར་འགྱུར་རོ། །འོན་ཏེ་མ་ཚང་ན་ཉེས་པ་སྤོམ་པོར་འགྱུར་རོ་ཞེས་བྱ་བ་ལ་སོགས་པ་འབྱུང་བ་ཡིན་ནོ། །མི་བདག་པོ་ཉིད་མ་ཡིན་ན་ནི་དེར་ཕམ་པར་འགྱུར་པར་ཡང་མི་འཐད་པས་འདིར་མི་ཡང་བདག་པོ་ཡིན་པར་རྟོགས་པར་བྱའོ། །ཟས་བཏང་བ་ལ་བདག་པོ་དུད་འགྲོ་ཡིན། །ཞེས་བྱ་བ་ནི་ལོངས་སྤྱོད་པའི་ཕྱིར་དུད་འགྲོ་རྣམས་ལ་བཏུང་བ་ལ་སོགས་པ་གང་སྦྱིན་པར་བྱ་བ་དེ་ལ་འདི་ནི་བདག་གི་ཡིན་ནོ་སྙམ་དུ་སྦྱིན་པ་པོ་ལ་བསམ་པ་མེད་དོ། །དེ་ལྟར་བས་ན་བཏུང་བ་ལ་སོགས་པ་ལ་ནི་དུད་འགྲོ་བདག་པོ་ཉིད་ཡིན་པར་ཁོང་དུ་ཆུད་པར་བྱའོ། །དེ་ཉིད་ཀྱི་ཕྱིར་དགོན་པའི་ལམ་དུ་དུད་འགྲོ་རྣམས་ལ་བཏུང་བའི་སྐལ་བ་བྱིན་པ་ལ་འདུ་ཤེས་ཀྱི་དབང་གིས་ལྟུང་བ་རྣམ་པར་གཞག་པར་མ་མཛད་དོ། །ཐོབ་པར་བྱ་ཕྱིར་མེ་སོགས་དཀྲོགས་པ་ཡིས། །རི་དགས་ལ་སོགས་བདག་པོ་བརྩོན་པོར་བསྟན། །བཤད་པ་ལས་ན་རི་དགས་མཚོན་ཕྱིར་ཡིན། །དེ་ཕྱིར་སྲོག་ཆགས་གཞན་ལའང་འཐད་པ་ཡིན། །རྔོན་པ་ལ་སོགས་བརྩོན་པར་བྱེད་པ་ལས། །ཐོབ་པར་བྱ་ཕྱིར་མེ་ལ་སོགས་པ་དཀྲོགས་པ་ན་རི་དགས་ལ་སོགས་པ་དེའི་བདག་པོ་ནི་བརྩོན་པ་པོ་ཁོ་ན་ཡིན་པར་བསྟན་གྱི་གཞན་ནི་མ་ཡིན་ནོ། །ཐོབ་པར་བྱ་ཕྱིར་ཞེས་སྨོས་པ་ནི་གནོད་པར་བྱ་བའི་

---

^{[མ་དཔེ་གཟིགས་ན་འདིར་གནོན།]}

ཕྱིར་མེ་ལ་སོགས་པས་དཀྲོགས་པ་ལ་ཡང་བདག་པོ་ཉིད་ཡིན་པར་རབ་ཏུ་བསྟན་པའི་ཕྱིར་རོ། །བཤད་པ་ལས་སོ་ཞེས་བྱ་བ་ནི་སོ་སོར་ཐར་པའི་བཤད་པ་སྟེ། རྣམ་པར་འབྱེད་པ་ལས་ཉེ་བར་མཚོན་པ་ཙམ་ཡིན་པར་རྟོགས་ནས་རི་དགས་ལ་སོགས་ཞེས་བྱ་བ་ལ་སོགས་པའི་སྒྲ་སྦྱར་རོ། །དེ་ལྟ་བས་ན་མི་དང་མ་ཧེ་ལ་སོགས་པ་ལ་ཡང་དེ་ཁོ་ན་བཞིན་དུ་རིག་པར་བྱའོ། །རྔོན་པ་རྣམས་ཀྱིས་རི་དགས་གཙེས་པ་ཞིག །གཙུག་ལག་ཁང་དུ་རྒྱུག་ཅིང་ཕྱིན་པ་ན། །སྐྱབས་སུ་འོངས་པ་དེ་ལ་བསྲུང་བར་བྱ། །དེ་ནི་ཤིན་དེ་དག་རྣམས་ལ་གཏད། །རྔོན་པ་རྣམས་ཀྱིས་རི་དགས་རྣམས་གཙེས་པར་གྱུར་པ་ཞིག་གཙུག་ལག་ཁང་དག་ཏུ་རྒྱུག་ཅིང་ཕྱིན་ན་རྒྱུག་པ་ཡང་དེ་ཡིན་ལ། ཕྱིན་པ་ཡང་ཡིན་པས་ན་རི་དགས་གཙུག་ལག་ཁང་དུ་ཕྱིན་པ་དེ་ལ་བསྲུང་བར་བྱའོ། །སྐྱབས་ཞེས་བྱ་བ་ནི་གཙུག་ལག་ཁང་ལ་བྱ་སྟེ། དེ་ལྟར་ཡང་སྐྱབས་ཀྱི་སྟེང་དུ་འཛེགས་ཏེ་ཞེས་འབྱུང་བས་སོ། །དེ་ནི་མགོན་སྐྱབས་བྱེད་པ་ཙམ་ཡིན་ཏེ། ཁྱེད་བ་ཡང་མེད་ཅིང་བཏང་བ་ཡང་མེད་པས་འདིར་ཕྲོགས་པའི་ཉེས་པ་ནི་མེད་དོ། །འདིར་གཞུང་ནི་འདུལ་བྱེད་ལས། རྔོན་པ་རྣམས་ཀྱིས་རི་དགས་རྣམས་ལ་གཙེས་པ་ན་གཙུག་ལག་ཁང་དུ་ཕྱིན་པ་དང༌། རྔོན་པ་དེ་རྣམས་ཀྱིས་སྨྲས་པ། འདི་གཙེས་པ་ལས་གཙུག་ལག་ཁང་དུ་ཕྱིན་པས་འདི་བདག་ཅག་ལ་སྩོལ་ཅིག །དེ་དག་གིས་གང་གི་ཚེ་མ་ཐོབ་པ་དེའི་ཚེ་བོར་ནས་དོང་བ་དང༌། དགེ་སློང་དེ་རྣམས་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ལྟུང་བ་མེད་དོ་ཞེས་འབྱུང་བ་ཡིན་ནོ། །གལ་ཏེ་ཡང་ཤིན་དེའི་ཚེ་དེ་དག་ཉིད་ལ་སྦྱིན་པར་བྱའོ། །འདིར་གཞུང་ནི་འདུལ་བྱེད་ཉིད་ལས། །རྔོན་པ་རྣམས་ཀྱིས་རྙོང་གིས་རི་དགས་སྣད་པར་བྱས་པ་ལ་གཙུག་ལག་ཁང་དུ་ཕྱིན་པ་དང༌། རྔོན་པ་དེ་དག་གིས་སྨྲས་པ། བདག་ཅག་གིས་རི་དགས་འདི་རྙིང་གིས་སྣད་པར་བྱས་པ་ཡིན་ཏེ། འདི་གདོན་མི་ཟ་བར་འཆིས་ཐོང་ཤིག །དགེ་སློང་དེ་དག་གིས་མ་བཏང་ནས། གང་གི་ཚེ་མ་བཏང་བ་དེའི་ཚེ་བོར་ནས་དོང་ངོ༌། །དེ་དག་དོང་བ་དང་ཤི་ནས་དགེ་སློང་དེ་དག་གིས་དེ་ལྟར་བསྒྲུབ་པར་བྱ་བ་མི་ཤེས་པ་ལས། བཅོམ་ལྡན་འདས་ཀྱིས་བཀའ་སྩལ་པ། རྔོན་པ་དེ་དག་ཉིད་ལ་སྦྱིན་པར་བྱའོ་ཞེས་འབྱུང་བ་ཡིན་ནོ། །སྐྱེ་བོ་ཉེ་དུས་བརྟུལ་ཞུགས་ཅན་གང་ཞིག །

---

^{[མ་དཔེ་གཟིགས་ན་འདིར་གནོན།]}

མཐུ་ཡིས་ཁྲིད་ནས་འབད་པས་གཟུང་བར་བྱ། །གལ་ཏེ་རྟགས་ཀྱིས་དེ་བསམ་སྐྱེ་བོ་གཉེན། །མཐུན་པར་ཤེས་ན་གཟུང་བར་མི་བྱའོ། །གལ་ཏེ་ཉེ་དུ་རྣམས་ཀྱིས་བརྟུལ་ཞུགས་ཅན་ཁྲིད་ལ་རྟགས་འགའ་ཞིག་གིས་འདུག་པར་འདོད་པར་ཤེས་ན་བསྒྲིམས་ཏེ་གཟུང་བར་བྱའོ། །འོན་ཏེ་འགྲོ་བར་འདོད་ན་དེའི་ཚེ་གཟུང་བར་མི་བྱའོ། །རྟགས་ཀྱང་ཁྱོད་ཀྱི་ལག་པ་གང་ན་གལ་ཏེ་གང་ཉེ་དུ་རྣམས་ཀྱིས་བཟུང་བའོ་ཞེས་ཟེར་ན་གཟུང་བར་བྱའོ། །འོན་ཏེ་གང་ཁྱེད་ཅག་གིས་གཟུང་བའོ་ཞེས་ཟེར་ན་ཀྱེ་མ་འདི་འགྲོ་བར་འདོད་པ་ཡིན་ནོ་ཞེས་གཟུང་བར་མི་བྱའོ། །དབྱར་གྱི་གནས་སུ་རྙེད་པའི་རྣམ་པ་འོངས། །དེ་བས་མང་དུ་དབྱར་གནས་པ་ཡང་དབང༌། །གང་དག་དམ་ཆོས་ཚིགས་བཅད་འགའ་འདོན་པ། །དེ་ཡང་ཆོས་ཀྱི་རྙེད་པ་དབང་པ་ཡིན། །དབྱར་གྱི་གནས་དང་འབྲེལ་བའི་རྙེད་པ་འོངས་པ་གང་ཡིན་པ་དེ་ནི་དབྱར་གནས་པ་དབང་བས་གང་གིས་ཐ་ན་ཟླ་བ་གཉིས་ཤིག་དབྱར་གནས་པ་ཡིན་ན་དེ་ཡང་དབང་པ་ཡིན་ཏེ། དེ་བས་མང་དུ་དབྱར་གནས་པ་ཡིན་པའི་ཕྱིར་རོ། །ཐ་ན་ཤི་བ་དང་བབས་པ་རྣམས་ཀྱང་དབང་ངོ༌། །ཆོས་ཀྱི་རྙེད་པ་ནི་ཆོས་སྨྲ་བ་རྣམས་ཁོ་ན་དབང་བ་ཡིན་པས། །ཐ་ན་ཚིག་བཞི་པའི་ཚིགས་སུ་བཅད་པ་འགའ་ཙམ་འདོན་པ་གང་ཡིན་པ་དེ་དག་ཀྱང་ཆོས་སྨྲ་བ་དག་ཡིན་ནོ། །དེ་ནི་རྩོད་པའི་གཞི་ལས་འབྱུང་ངོ༌། །འདིར་ཡང་བྱེ་བྲག་ཏུ་སྨྲ་བ་རྣམས་ཀྱིས་གལ་ཏེ་མྱ་ངན་ལས་འདས་པའི་ཆོས་ཀྱི་ཡིན་ན་དེའི་ཚེ་མཆོད་རྟེན་གྱི་དཀོར་དང་འདྲ་བར་སྤྱད་པར་བྱ་བ་མ་ཡིན་ནོ། །འོན་ཏེ་ལུང་གི་ཆོས་ཀྱི་ཡིན་ན་དེའི་ཚེ་སྤྱད་པ་ཡིན་ནོ་ཞེས་རྣམ་པར་བཤད་དོ། །སིང་ག་ལའི་རྒྱལ་པོའི་བུ་མོ་མུ་ཏིག་གིས་ཀྱང་ལུང་གི་ཆོས་ཁོ་ན་ལ་ཕུལ་བ་ཡིན་པར་རྟོགས་པར་བྱའོ། །གལ་ཏེ་དེ་ཅིའི་ཕྱིར་ཞེ་ན། །བཅོམ་ལྡན་འདས་ཀྱིས་གསུངས་པའི་ཕྱིར་རོ། །བཅོམ་ལྡན་འདས་ཀྱིས་ནི་གང་ཞིག་གིས་ཐ་ན་ཚིག་བཞི་བའི་ཚིགས་སུ་བཅད་པ། འགའ་ཞིག་འདོན་པར་བྱེད་ན་དེ་ལ་ཡང་སྦྱིན་པར་བྱའོ་ཞེས་གསུངས་ཀྱི། མྱ་ངན་ལས་འདས་པ་ལའོ་ཞེས་ནི་མ་གསུངས་སོ། །ཅི་སྟེ་འོ་ན་ཆོས་ལ་ནི་མུ་ཏིག་བྲེ་གང་དོ་ཞེས་བུ་མོ་མུ་ཏིག་གིས་སྤྱིར་སྨྲས་ན་ཇི་ལྟ་ཇི་ལྟ་བུར་འགྱུར་ཞེ་ན། ཤེད་མ་བྱེ་བ་ནི་བརྡར་བཏགས་པའི་ཆོས་ལ་འདུ་ཤེས་འབྱུང་བ་ཁོ་ན་ཡིན་པས་ཉེས་པ་མེད་དོ། །གཙུག་

---

^{[མ་དཔེ་གཟིགས་ན་འདིར་གནོན།]}

ལག་ཁང་མང་གནས་པར་ཁས་བླངས་ཀྱང༌། །རྙེད་པ་གཅིག་ན་ལེན་པར་དབང་བ་ཡིན། །གལ་ཏེ་ཐམས་ཅད་དུ་ན་གཙུག་ལག་ཁང༌། །རྙེད་པ་ཀུན་ལས་ཆ་གཅིག་ཙམ་ཞིག་བླང༌། །གཙུག་ལག་ཁང་མང་པོ་དག་ཏུ་དབྱར་གནས་པར་ཁས་བླངས་ཀྱང་གཙུག་ལག་ཁང་གཅིག་ཁོ་ན་ནས་རྙེད་པ་ལེན་པར་དབང་པ་ཡིན་ནོ། །འོན་ཏེ་ཐམས་ཅད་ནས་ལེན་པར་འདོད་ན་དེའི་ཚེ་གཙུག་ལག་ཁང་གི་རྙེད་པ་དེ་དག་ཐམས་ཅད་ལས་ཆ་གཅིག་ཙམ་བྱུང་བ་དེ་ཙམ་བླང་བར་བྱའི་ལྷག་པར་ནི་མ་ཡིན་ནོ། །དགེ་སློང་གཅིག་གི་ངེས་པར་འདྲ་བ་ལས། །དགེ་ཚུལ་སུམ་ཆ་གཅིག་ཅིག་དབང་བར་འགྱུར། །བསྙེན་པར་རྫོགས་པར་འདོད་ན་ཆ་གཉིས་ཏེ། །ཟས་ལ་སོགས་གཏོགས་བགོ་བ་མ་གཏོགས་སོ། །དགེ་ཚུལ་ལ་ནི་དགེ་སློང་གཅིག་གི་སྐལ་བ་ངེས་པ་དེ་དང་མཉམ་པའི་རྫས་ལས་སུམ་ཆ་གཅིག་སྦྱིན་པར་བྱ་སྟེ། དཔེར་ན་གལ་ཏེ་དགེ་སློང་གིས་སྐལ་བ་པ་ན་གསུམ་ཞིག་ཡོད་ན་དེའི་ཚེ་དགེ་ཚུལ་ལ་ནི་པ་ན་གཅིག །བསྙེན་པར་རྫོགས་པར་འདོད་པ་ལ་ནི་པ་ན་གཉིས་སྦྱིན་པར་བྱ་བ་ལྟ་བུ་ཡིན་ནོ། །འདིར་གཞུང་ནི་སིལ་བུ་ལས། མཉན་ཡོད་ན་ཁྱིམ་པ་ཞིག་གིས་གཙུག་ལག་ཁང་བརྩིགས་ནས་དེས་དེ་ཞལ་བསྲོ་བ་ན་གཉི་གའི་དགེ་འདུན་མཆོད་སྟོན་གསོལ་ནས་རྙེད་པ་མང་པོ་ཕུལ་བ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དང་དགེ་སློང་མ་ལ་ནི་སྐལ་བ་མ་ཉམ་པར་སྦྱིན་ནོ། །དགེ་ཚུལ་དང་དགེ་ཚུལ་མ་ལ་ནི་སུམ་ཆའོ། །བསྙེན་པར་རྫོགས་པར་འདོད་པ་དང་དགེ་སློབ་མ་ལ་ནི་སུམ་གཉིས་སྦྱིན་པར་བྱའོ་ཞེས་གསུངས་པ་ཡིན་ཏེ། མཆོད་སྟོན་ལ་དགེ་སློང་གཙོར་བྱ་བ་ཡིན་གྱིས་ཀྱང་དགེ་སློང་མ་རྣམས་ཀྱིས་ཀྱང་ཞོས་པ་ལས་རྙེད་པ་སྦྱིན་སྦྱིན་པའི་ཚུལ་ནི་འདི་ཁོ་ན་ཡིན་ནོ། །ཡང་ཁ་ཅིག་ནི་སུམ་ཆ་སྦྱིན་པར་བྱའོ་ཞེས་བྱ་བ་འདི་ལ་སུམ་ཆ་ཞེས་བྱ་བ་དང༌། སུམ་གཉིས་ཞེས་བྱ་བ་འདི་ལས་ཡང་སྐལ་བ་མཉམ་པར་སྦྱིན་པར་བྱའོ་ཞེས་བྱ་བ་འདོན་ཏེ། གཞུང་འདི་ཉིད་འདུལ་བའི་མདོ་ལས། དགེ་ཚུལ་དང་དགེ་ཚུལ་མ་གཉིས་ཀྱི་རྙེད་པ་ནི་སུམ་ཆ་དང་བྲལ་བ་ཉིད་ཡིན་ནོ།།མིད་པར་བྱ་བ་ནི་མཉམ་པ་ཉིད་ཡིན་ནོ། །བསྙེན་པར་རྫོགས་པར་འདོད་པ་དང༌། དགེ་སློང་མའི་ཡང་ནོག་ཞེས་བསྡུས་སོ། །མདོའི་དོན་ནི་དགྲོལ་ན་སུམ་ཆ་དང་བྲལ་བ་

---

^{[མ་དཔེ་གཟིགས་ན་འདིར་གནོན།]}

ཉིད་ནི་སུམ་ཆ་མ་ཡིན་པའི་ཆ་ཉིད་དོ་ཞེས་བྱ་བའི་ཐ་ཚིག་གོ །མིད་པར་བྱ་བ་ནི་འབྲས་ཆན་ལ་སོགས་པའོ། །མཉམ་པ་ཉིད་ནི་དགེ་ཚུལ་དང་དགེ་ཚུལ་མ་གཉིས་སྐལ་བ་མཚུངས་པ་ཉིད་དོ། །བསྙེན་པར་རྫོགས་པར་འདོད་པ་དང་དགེ་སློབ་མའི་ཡང་མཉམ་པ་ཉིད་དོ་ཞེས་བྱ་བར་སྦྱར་རོ། །མིད་པར་བྱ་བར་མ་ཟད་དོ། །དེའི་ཕྱིར་མདོ་འདི་སྤྱིར་ཁོང་དུ་ཆུད་པར་བྱའོ། །གལ་ཏེ་ཞེས་བྱ་བ་ལས་ཀྱང་གཞུང་དེ་ཉིད་རིགས་པར་བསྟན་ཏེ། ཆོ་ག་དེ་ལ་ནི་ནོར་ཅེས་པའི་ཕྱིར་རོ། །དེ་ལྟར་ཡང་གླེང་གཞི་ལས་དགེ་ཚུལ་རྣམས་ལ་ནི་གཏོད་གཡོགས་དང་སྨད་གཡོགས་སུ་ཟད་པས་བདག་ལ་ནི་ཆོས་གོས་གསུམ་དགོས་སོ་ཞེས་བསྟན་པ་ཡིན་ནོ། །འདིར་ཞུས་པའི་གཞུང་ཡང་ཁུངས་ཡིན་ཏེ། བཅོམ་ལྡན་འདས་ཀྱིས་དགེ་ཚུལ་དང༌། དགེ་ཚུལ་མ་ལ་སོགས་པའི་རྙེད་པ་སུམ་ཆ་མ་ཡིན་པ་སྦྱིན་པར་བྱའོ་ཞེས་བྱ་བ་དང༌། དགེ་སློབ་མ་ལ་ཅི་ཙམ་ཞིག་སྩལ་བར་བགྱི་ལགས། ཉེ་བ་འཁོར་མི་ཆེ་མི་ཆུང་བར་མཉམ་པོར་རོ་ཞེས་འབྱུང་བ་ཡིན་ཏེ། འདི་ཐམས་ཅད་ཀྱང་ཡིན་ན། འོན་ཀྱང་གཞུང་དེ་མི་སྣང་བའི་ཕྱིར་སློབ་དཔོན་དག་ནི་སྔ་མ་བཞེད་དོ། །ཟས་ལ་སོགས་པ་གཏོགས་ཀྱི་བགོ་བ་མ་གཏོགས་སོ་ཞེས་བྱ་བ་ནི། བཟའ་བ་དང་བཅའ་བ་ལ་སོགས་པ་ཁར་མིད་པར་བྱ་བ་གང་ཡིན་པ་དེར་གཏོགས་པ་བགོ་བ་ནི་མ་གཏོགས་སོ་ཞེས་བྱ་བའི་ཐ་ཚིག་གོ །འདིར་གཞུང་ནི་སིལ་བུ་ལས། དགེ་འདུན་ལ་བུ་རམ་ཤིང་གི་བཅའ་བ་དག་ཅིག་གྲུབ་པ་ནས་ཚེ་དང་ལྡན་པ་སྒྲ་གཅན་ཟིན་ལ་སྡོད་བུའི་སུམ་ཆ་ཞིག་བྱིན་པའི་བར་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ངས་གོས་ཀྱི་རྙེད་པ་ལ་དགོངས་ནས་དགེ་ཚུལ་དག་ལ་སུམ་ཆ་བཅས་ཀྱི་ཟས་ཀྱི་རྙེད་པ་ལ་ནི་མ་ཡིན་ནོ། །དེ་ལྟ་བས་ན་ཟས་ཀྱི་རྙེད་པ་ཞིག་བྱུང་ན་སུ་ལ་སའི་འདབ་མ་ཙམ་ཡང་མཉམ་པར་བགོ་བར་བྱའོ། །གཞན་དུ་དགོད་པར་མི་བྱེད་ན་འགལ་ཚབས་ཅན་དུ་འགྱུར་རོ་ཞེས་བྱ་བའི་གཞུང་འབྱུང་བ་ཡིན་ནོ། །ཟས་ལ་སོགས་པ་ཞེས་བྱ་བའི་སྒྲས་ནི་ཤི་བའི་གོས་ཀྱི་སྐལ་བ་བསྡུས་པ་ཡིན་ཏེ། དགེ་ཚུལ་རྣམས་ལ་སྐལ་བ་མཉམ་པར་སྦྱིན་པར་བྱའོ་ཞེས་གསུངས་པ་ཡིན་ནོ། །དེ་ཡང་བསྙེན་པར་རྫོགས་པ་དག་དང་མཉམ་པ་ཡིན་ནོ། །དེ་ཡང་འདུལ་བ་མདོ་འདི་ལ་བསྙེན་པར་མ་རྫོགས་པ་ལ་ནི་

---

^{[མ་དཔེ་གཟིགས་ན་འདིར་གནོན།]}

ཐམས་ཅད་འོས་སོ་ཞེས་བྱ་བ་དང༌། དགེ་འདུན་གྱི་དབང་གིས་སོ་ཞེས་གསུངས་པ་ཡིན་ནོ། །གཙུག་ལག་ཁང་ནི་གང་ན་གཅིག་གནས་ཀྱང༌། །དེ་ཉིད་གཙུག་ལག་ཁང་དེའི་སྐལ་བ་དབང༌། །ཞེས་བྱ་བ་ནི། གཙུག་ལག་ཁང་ན་བརྟུལ་ཞུགས་ཅན་གཅིག་པུ་ཞིག་གནས་ན་ཡང་དེ་ལ་གང་ཞིག་གཙུག་ལག་ཁང་དེའི་རྙེད་པ་ལ་དེ་ཉིད་བདག་པོ་ཡིན་གྱི་ཇི་སྲིད་སྡོམ་བརྩོན་གཞན་དག་ལ་ནི་མ་ཡིན་ནོ། །འདིར་གཞུང་ནི་བྲམ་ཟེའི་བུ་མོ་ལྟ་བུ་ལས། ཉེ་བ་འཁོར་གཙུག་ལག་ཁང་གང་ན་དགེ་སློང་གཅིག་པུ་ཞིག་འདུག་ན་དགེ་སློང་དེས་ཆོས་གོས་ཀྱི་རྙེད་པ་ཞིག་བྱུང་བ་ན་གནས་འདི་ན་བདག་གཅིག་པུ་གནས་ལ། དགེ་འདུན་གྱི་གོས་བགོ་བར་བྱ་བ་དགེ་འདུན་ལ་བརྟེན་དུ་རུང་བ་འདི་བདག་གིས་ཐོབ་པས་བདག་གིས་གོས་འདི་བདག་གིར་བྱའོ་ཞེས་བྱ་བ་ནས་བདག་གིར་བྱས་བྱིན་གྱིས་བརླབས་སོ་ཞེས་བྱ་བའི་བར་དུ་སེམས་བསྐྱེད་པར་བྱ་ཞིང་ཚིག་ཏུ་ཡང་བརྗོད་པར་བྱའོ། །གལ་ཏེ་དེ་ལྟར་བྱེད་ན་བྱིན་གྱིས་བརླབས་པ་ཡིན་པར་བརྗོད་པར་བྱ་བ་ཡིན་པས་གཞན་དག་འོངས་པ་རྣམས་ལ་སྦྱིན་པར་མི་བྱའོ། །འོན་ཏེ་དེ་ལྟར་མི་བྱེད་ན་དགེ་སློང་དེས་གོས་དེ་དག་བདག་གིར་མི་བྱའོ། །བདག་གིར་བྱས་ན་ཉེས་བྱས་སུ་འགྱུར་ཏེ། དགེ་སློང་དེ་དག་དང་ཡང་སྐལ་བ་མཉམ་པ་ཡིན་ནོ། །འདིར་བརྒྱ་ལ་གལ་ཏེ་དེ་དག་དང་སྐལ་བ་མཉམ་ན་གོས་དེ་དག་ལས་བརྐུས་པ་ཡིན་ན་ཇི་ལྟར་ཉེས་བྱས་སུ་འགྱུར་ཞེ་ན། དེའི་དོན་ནི་མི་རིགས་པར་བྱེད་པ་ལས་ཉེས་པར་འགྱུར་བ་ཡིན་པའི་ཕྱིར་རོ། །ལྟུང་བ་ནི་མཚན་ཉིད་ཇི་ལྟ་བུ་བཞིན་དུ་རིག་པར་བྱ་བ་ཡིན་པས་ཉེས་པ་མེད་དོ། །སྡོམ་བརྩོན་ཤི་ན་བཀུར་སྟི་བྱས་ནས་ནི། །དེ་ཤི་བ་ཡི་གོས་ལ་སོགས་པ་བགོ །གདུགས་དང་མེ་ཏོག་དང་བ་དན་ལ་སོགས་པའི་ཡོ་བྱད་ཀྱིས་སྡོམ་བརྩོན་ཤི་བ་དུར་ཁྲོད་ཀྱི་གནས་སུ་བསྐྱལ་ཏེ། བཀུར་སྟི་བྱ་ཞིང་དེ་ཉིད་དུ་རྒྱུད་གསུམ་པའི་ཆོས་བསྒྲགས་པར་བྱའོ། །དེ་ནས་སླར་ཕྱིན་ནས་ཤི་བའི་གོས་ལ་སོགས་པ་བགོ་བར་བྱ་སྟེ། །གོ་རིམས་ནི་འདི་ཡིན་ནོ། །འདིར་གཞུང་ནི་གོས་ཀྱི་གཞི་ལས། དེ་མི་མ་ཡིན་པ་རྣམས་སུ་སྐྱེས་ནས་དབྱུག་པ་ཐོགས་ཏེ་ལངས་ནས་ཇི་སྲིད་དུ་ངའི་ལུས་ལ་མཆོད་པ་མ་བྱས་པ་དེའི་བར་དུ་འགྱེད་དམ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་རྣམས་ཀྱིས་སྔར་དེའི་ལུས་ལ་མཆོད་པ་བྱས་ཤིང༌། ཕྱིས་ལྷུང་བཟེད་དང་

---

^{[མ་དཔེ་གཟིགས་ན་འདིར་གནོན།]}

ཆོས་གོས་བགོ་བར་བྱ་སྟེ། ཉེས་དམིགས་དེ་ཡང་འབྱུང་བར་མི་འགྱུར་རོ་ཞེས་བྱ་བའི་བར་དུ་འགྱུར་བ་དང༌། དགེ་སློང་ནད་པ་ཞིག་གནས་ཁང་དུ་ཤི་བ་དང༌། མི་མ་ཡིན་པ་རྣམས་སུ་སྐྱེས་སོ། །ཁོག་པ་དེ་ནི་དགེ་སློང་རྣམས་ཀྱིས་བསྲེག་པའི་གནས་སུ་ཁྱེར་ཏེ་མཆོད་པ་བྱས་ནས་བསྲེགས་སོ། །དེ་ནས་གཙུག་ལག་ཁང་དུ་ཕྱིན་ནས་གོས་འགྱེད་པ་དང༌། དབྱུག་པ་ཐོགས་ནས་ལངས་ཏེ་ཇི་སྲིད་དུ་ངའི་ཆེད་དུ་ཆོས་བསྒྲགས་པ་མ་བྱས་པ་དེའི་བར་དུ་གོས་འགྱེད་པར་བྱེད་དམ་ཞེས་ཟེར་བ་ལས། བཅོམ་ལྡན་འདས་ཀྱིས་བཀའ་སྩལ་པ། དེའི་ཆེད་དུ་ཆོས་བསྒྲགས་པ་བྱ་ཞིང་ཡོན་བསྔོ་བ་བྱས་ཏེ་ཕྱིས་གོས་བགོ་བར་བྱའོ་ཞེས་འབྱུང་བ་ཡིན་ནོ། །གང་ཞིག་ཤི་བའི་ཡོ་བྱད་གང་དབང་བ་དེ་བཤད་པར་བྱ་སྟེ། ནད་པའི་ནད་གཡོག་འགྱུར་བ་གང་ཡིན་པ། །སྡོམ་བརྩོན་དེ་ནི་ལྷུང་བཟེད་སོགས་དྲུག་དབང༌། །གང་ཚེ་ནད་གཡོག་མང་བ་ཉིད་ཡིན་ན། །དེ་དག་དྲུག་པོ་དེ་ཉིད་སྤྱིར་ཡིན་ནོ། །ལྷུང་བཟེད་དང་ཆོས་གོས་གསུམ་དང༌། གདིང་བ་དང༌། ཆུ་ཚགས་ཞེས་བྱ་བ་དྲུག་པོ་དེ་ནི་ནད་གཡོག་སྡོམ་བརྩོན་དབང་བ་ཡིན་ཏེ། དེ་ནི་དེའི་ཡིན་ནོ་ཞེས་བྱ་བའི་ཐ་ཚིག་གོ །གང་གི་ཚེ་ནད་གཡོག་མང་བར་འགྱུར་བ་དེའི་ཚེ་ཡང་ལྷུང་བཟེད་ལ་སོགས་པ་དྲུག་པོ་དེ་ཉིད་དེ་རྣམས་ཀྱི་སྤྱིར་དབང་བར་ཟད་དེ། གཞན་ནི་སྦྱིན་པར་མི་བྱའོ་ཞེས་བྱ་བའི་ཐ་ཚིག་གོ །འདིར་གཞུང་ནི་བྲམ་ཟེའི་བུ་མོ་ལྟ་བུ་ལས། ཡོ་བྱད་དེ་དག་ལས་ཀྱང་འབྲིང་ལས་སྦྱིན་པར་བྱའོ་ཞེས་གསུངས་པ་དང༌། ནད་པའི་ནད་གཡོག་དགེ་ཚུལ་ལགས་ན་དེ་ལ་ནད་གཡོག་གིས་གོས་སྩལ་ལགས་སམ། བཀའ་སྩལ་པ། སྦྱིན་པར་བྱའོ། །ཇི་ཙམ་ཞིག་སྩལ་ལགས། ཐམས་ཅད་མཉམ་པར་རོ་ཞེས་འབྱུང་བ་ཡིན་ནོ། །ནད་པའི་ཆེད་དུ་གཞན་དུ་སོང་བ་ལས། །སྡོམ་བརྩོན་ནད་པ་ཤི་ཡང་དྲུག་པོ་དབང༌། །སྡོམ་བརྩོན་རྣམས་ཀྱིས་གལ་ཏེ་དེ་བགོས་བསྡུས། །མྱུར་བར་ནད་གཡོག་ལ་ནི་སྦྱིན་པར་བྱ། །གལ་ཏེ་ནད་གཡོག་ནད་པའི་བྱ་བ་ཞིག་ལ་གཞན་དུ་སོང་སྟེ་མེད་པ་ལས་ནད་པ་ཤི་ན་དེའི་ཚེ་ཡང་ཡོ་བྱད་དྲུག་པོ་དེ་དག་དབང་ངོ༌། །འོན་ཏེ་དེ་བགོས་ན་དེའི་ཚེ་བསྡུས་ནས་ཀྱང་ནད་གཡོག་ལ་སྦྱིན་པར་བྱའོ། །འདིར་གཞུང་ནི་བྲམ་ཟེའི་བུ་མོ་ལས། བཙུན་པ་ནད་

---

^{[མ་དཔེ་གཟིགས་ན་འདིར་གནོན།]}

གཡོག་མཚམས་ཀྱི་སླད་རོལ་དུ་མཆིས་པ་ལས་ནད་པ་ཡང་གུམ་ན་དེ་ལ་ནད་གཡོག་གི་གོས་སྩལ་ལགས་སམ། བཀའ་སྩལ་པ། །གང་ཞིག་ནད་པའི་བྱ་བས་སོང་བ་ཡིན་ན་དེ་ལ་སྦྱིན་པར་བྱའོ། །གང་ཞིག་བདག་ཉིད་ཀྱི་བྱ་བས་སོང་ན་དེ་ལ་ནི་སྦྱིན་པར་མི་བྱའོ་ཞེས་འབྱུང་བ་ཡིན་ནོ། །གལ་ཏེ་ནད་གཡོག་བུད་མེད་མཚན་ལྡན་ནམ། །ཁྱིམ་པ་ཡིན་ན་དེ་དྲུག་མི་དབང་ངོ༌། །གལ་ཏེ་སྡོམ་བརྩོན་བུ་ལོན་བླངས་ཤིན། །དེ་ཡི་རྫས་རྣམས་ལས་ནི་འཁོར་བར་བྱ། །བུད་མེད་མཚན་ལྡན་ཞེས་བྱ་བ་ནི་དགེ་སློང་མ་དང་དགེ་སློབ་མ་དང་དགེ་ཚུལ་མ་རྣམས་སོ། །གལ་ཏེ་ནད་གཡོག་ཁྱིམ་པ་ཡིན་ན་ཡང་ཡོ་བྱད་དེ་དྲུག་མི་དབང་ངོ༌། །འདིར་གཞུང་ནི་བྲམ་ཟེའི་བུ་མོ་ལས། བཙུན་པ་ནད་གཡོག་ཁྱིམ་པ་ཞིག་ལགས་ན་དེ་ལ་ནད་པའི་གོས་སྩལ་ལགས་སམ། བཀའ་སྩལ་པ། ཅི་ཡང་མི་སྦྱིན་ནོ། །ནད་གཡོག་དགེ་སློང་མ་དང༌། དགེ་སློབ་མ་དང་དགེ་ཚུལ་མ་རྣམས་ལ་ཡང་དེ་བཞིན་དུ་རྒྱ་ཆེར་འབྱུང་ངོ། །དེ་ལྟར་ཡང་འདུལ་བ་མདོ་ལས། དེ་ནི་ཤི་བའི་རྫས་མི་འོས་པ་ལ་མ་ཡིན་ནོ་ཞེས་འབྱུང་ངོ༌། །འདིར་འོས་པ་ནི་མཚན་འདྲ་བ་ཡིན་ནོ། །གང་ན་མཚན་ཐ་དད་པ་དག་ཁོ་ན་ཡོད་ན་དེ་ནི་དབང་པ་ཁོ་ན་ཡིན་ནོ་ཞེས་བྱ་བར་དོན་གྱིས་ཁོང་དུ་ཆུད་པར་བྱའོ། །ཇི་སྟེ་ངས་བུ་ལོན་བླངས་ཏེ་ཤི་ན་དེའི་ཚེ་དེའི་རྫས་དག་ཁོ་ན་ལས་འཁོར་བར་བྱའི་གཞན་ལས་ནི་མ་ཡིན་ནོ། །ལག་གི་བླ་ཡིས་དགེ་འདུན་ཆེད་བླངས་ནས། །ཡི་གེར་བྲིས་བརྟགས་དགེ་འདུན་དག་ལས་གཞལ། །ཇི་སྟེ་ལག་གི་བླས་དགེ་འདུན་གྱི་ཆེད་དུ་བུ་ལོན་བླངས་ནས་དེ་ཤ་ན་ཡི་གེ་བྲིས་པ་ལ་བརྟགས་ཏེ། དགེ་འདུན་ཁོ་ན་ལས་གཞལ་བར་བྱའོ། །གསོལ་དང་དང་པོ་ཐ་མར་གང་དག་ཡོད། །དེ་དག་དེ་ཤི་བ་ཡི་གོས་རྣམས་དབང༌། །གསོལ་བ་བྱ་བ་དང༌། དང་པོ་དང༌། ཐ་མ་དག་ན་སྡོམ་བརྩོན་གང་དག་ཉེ་བར་འཁོད་པ་དེ་དག་ཁོ་ན་ཤི་བའི་རྫས་དེ་དག་ལ་དབང་བ་ཡིན་གྱི་སྡོམ་བརྩོན་གཞན་དག་ནི་མ་ཡིན་ནོ། །འོ་ན་གོས་ཀྱི་གཞི་ལས་ཆོས་གོས་ཀྱི་རྙེད་པ་བགོ་བ་ལ་རྒྱུ་ལྔ་དག་སྟེ། ལྔ་གང་དག་ཅེ་ན། གཎྜཱི་དང༌། རྒྱུད་ཆགས་གསུམ་པ་དང༌། མཆོད་རྟེན་ལ་ཕྱག་བྱ་བ་དང༌། ཚུལ་ཤིང་འབྲིམ་པ་དང༌། ལྔ་པ་གསོལ་བ་ཡིན་ནོ་ཞེས་གསུངས་པ་ཇི་ལྟ་བུ་ཡིན་ཞེ་ན། མཇུག་ན་ཡོད་པའི་དབང་དུ་མཛད་ནས་བསྟན་པ་ཡིན་པས་ཉེས་

---

^{[མ་དཔེ་གཟིགས་ན་འདིར་གནོན།]}

པ་མེད་དོ། །ཡང་ན་གསོལ་དང་ཞེས་བྱ་བ་དང་ཞེས་བྱ་བས་བསྡུ་བ་བྱས་པའི་ཕྱིར་གཎྜཱི་ལ་སོགས་པ་ཡང་སྨོན་པ་གྲུབ་པོ། །གལ་ཏེ་དེ་ལྟ་ཡིན་ན་གཎྜཱི་ལ་སོགས་པ་ཡིན་ན་ནི་ཉེ་བར་མ་གྱུར་ལ། གསོལ་བ་ན་ནི་ཉེ་བར་མ་གྱུར་ཀྱང་སྐལ་པ་ཐོབ་མོད་ཅེ་ན། འདོད་པ་ཉིད་ཡིན་པའི་ཕྱིར་ཉེས་པ་མེད་དོ་ཞེས་བཤད་དོ། །དང་པོ་དང་ཐ་མའི་གཞུང་ནི་བཙུན་པ་གང་ན་དགེ་འདུན་བྲེལ་བ་འམ་གསོལ་བ་བགྱིད་པ་མ་མཆིས་པ་དེར་ཤི་བའི་ཡོ་བྱད་བགོ་བར་བགྱི་ལགས་སམ། ཉེ་བ་འཁོར་དང་པོ་དང་ཐ་མར་བྱས་ཏེ་བགོ་བར་བྱའོ། །དགེ་སློང་རྣམས་ཀྱིས་དང་པོ་དང་ཐ་མ་ཞེས་བྱ་བ་ཅི་ཡིན་པ་མི་ཤེས་པ་ལས། བཅོམ་ལྡན་འདས་ཀྱིས་བཀའ་སྩལ་པ། ཡོ་བྱད་ཅིག་བཙོངས་ནས་དེ་ལས་ཆུང་ཤས་ཤིག་དགེ་འདུན་གྱི་རྒན་པོ་དང་དགེ་འདུན་གྱི་གཞོན་ནུ་ལ་སྦྱིན་ནས་ཇི་ལྟར་འདོད་པ་བཞིན་དུ་བགོ་བར་བྱ་སྟེ། འདི་ལ་འགྱོད་པར་མི་བྱའོ། །གསོལ་བ་མ་བྱས་སམ་དང་པོ་དང་ཐ་མ་མ་བྱས་ན་ནི་ཤི་བའི་ཡོ་བྱད་ཀྱི་རྙེད་པ་སངས་རྒྱས་ཀྱི་སློབ་མ་ཐམས་ཅད་དབང་བ་ཡིན་ནོ་ཞེས་འབྱུང་བ་ཡིན་ནོ། །འོ་ན་དང་པོ་དང་ཐ་མ་དང་གསོལ་བ་མ་བྱས་པར་རྫས་བགོས་ན་ཇི་ལྟར་བསྒྲུབ་པར་བྱ་ཞེ་ན། དགེ་སློང་གཞན་དག་ལྷགས་ནས་ཕྱིས་ཡང་བགོ་བར་བྱའོ་ཞེས་བཤད་དེ། གོས་ཀྱི་གཞི་ལས་མཉན་ཡོད་དུ་ཉེ་དགའ་ཤི་བའི་ཡོ་བྱད་བགོས་པ་དང༌། ཡུལ་རང་འདུས་ཀྱི་དགེ་སློང་རྣམས་ཀྱིས་ཐོས་ནས་ཇི་ཙམ་ན་བདག་ཅག་ཀྱང་བཙུན་པ་ཉེ་དགའི་ཚངས་པ་མཚུངས་པར་སྤྱོད་པ་ཡིན་པས་བདག་ཅག་ཀྱང་དབང་ངོ་ཞེས་བྱ་བ་ནས། ཅི་ཙམ་ན་དེ་དག་དང་ལྷན་ཅིག་ཏུ་ཕྱིས་བགོས་སོ་ཞེས་བྱ་བ་ལ་སོགས་པ་གསུངས་པའི་ཕྱིར་རོ། །ཡང་གཞན་དག་ན་རེ་ཕྱིས་བགོས་སོ་ཞེས་བྱ་བ་འདི་ནི་འགྱེད་པ་མཇུག་ཏུ་མ་ཕྱིན་པ་ལ་བྱ་བར་གསུངས་པ་ཡིན་གྱི། མཇུག་དུ་ཕྱིན་པ་ལ་ནི་མ་ཡིན་ནོ་ཞེས་ཟེར་ན་དེ་ནི་མི་རིགས་ཏེ། ཁུངས་མེད་པའི་ཕྱིར་དང༌། བགོ་བ་དངོས་སུ་གསུངས་པའི་ཕྱིར་དང༌། གསོལ་བ་དང་དང་པོ་དང་ཐ་མ་མ་བྱས་ནས་སངས་རྒྱས་ཀྱི་སློབ་མ་ཐམས་ཅད་དབང་བར་གསུངས་པའི་ཕྱིར་རོ། །ཁོ་བོ་འདས་ནས་སྦྱིན་ཞེས་སྨྲས་ནས་ནི། །གལ་ཏེ་ཤི་ན་དེ་ནི་བགོ་བྱ་སྟེ། །སྡོམ་བརྩོན་བུ་ལ་སོགས་པ་ལྟོས་བྲལ་ཕྱིར། །ལྟོས་དང་བཅས་པའི་སྦྱིན་པ་སྦྱིན་པ་མིན། །ཁོ་བོ་ཤི་ན་འདི་ལ་སྦྱིན་པར་བྱའོ་ཞེས་སྨྲས་ནས་གལ་ཏེ་སྡོམ་བརྩོན་ཤི་ན་དེ་

---

^{[མ་དཔེ་གཟིགས་ན་འདིར་གནོན།]}

སྦྱིན་པར་མི་བྱའི་བགོ་བར་བྱ་བ་ཁོ་ན་ཡིན་ནོ། །ཇི་སྟེ་ཞེ་ན། ལྟོས་པ་དང་བཅས་པའི་སྦྱིན་པ་ནི་སྦྱིན་པ་མ་ཡིན་ཏེ། སྡོམ་བརྩོན་རྣམས་ལ་ནི་བུ་ལ་སོགས་པ་ལྟོས་པ་མེད་པའི་ཕྱིར་རོ། །འདིར་གཞུང་ནི་གོས་ཀྱི་གཞི་ལས་དགེ་སློང་དག་དེ་གསོན་པ་ན་སྦྱིན་པར་མི་བྱེད་ན་ཤི་ན་སྦྱིན་པར་བྱེད་པ་ལྟ་སྨོས་ཀྱང་ཅི་དགོས་ཏེ། ཁོ་བོ་འདས་ནས་འདི་ལ་སྦྱིན་པར་བྱའོ་ཞེས་བྱ་བའི་སྦྱིན་པ་འདི་ནི་མེད་ཀྱི། བླངས་ནས་བགོ་བར་བྱའོ་ཞེས་འབྱུང་བ་ཡིན་ནོ། །ཕྲན་ཚེགས་ལས་ཀྱང༌། སྐྱེས་བུ་བླུན་པོ་དེ་གསོན་པར་ན་སྦྱིན་པར་མི་བྱེད་ན། ཤི་ན་ལྟ་ཅི་ཞིག་སྦྱིན་པར་བྱེད། འདི་ལྟ་སྟེ། ཁོ་བོ་འདས་ནས་ཞེས་བྱ་བ་དེ་ལྟ་བུའི་སྦྱིན་པ་ནི་མེད་དོ། །སྡོམ་བརྩོན་སྨོས་པ་ཅི་དགོས་ཤེ་ན། ཁྱིམ་པ་རྣམས་ལ་ནི་བུ་ལ་སོགས་པ་ལྟོས་པ་ཡོད་པའི་ཕྱིར་ལྟོས་པ་དང་བཅས་པའི་སྦྱིན་པ་ཡོད་དོ་ཞེས་རབ་ཏུ་བསྟན་པའི་ཕྱིར་རོ། །དེ་ལྟར་ཡང་ཕྲན་ཚེགས་ལས་དགེ་སློང་དག་ཁྱིམ་པ་དག་ནི་ལྟོས་པ་དང་བཅས་པའི་འཆི་བ་ཡིན་གྱི། རབ་ཏུ་བྱུང་བ་རྣམས་ནི་ལྟོས་པ་མེད་པ་ཡིན་པས་ཁྱིམ་པ་ལ་ནི་ཁོ་བོ་འདས་ནས་ཞེས་བྱ་བའི་སྦྱིན་པ་དེ་ལྟ་བུ་ཡོད་དོ། །དེ་ལྟ་བས་ན་བུའི་སྐལ་པ་བླང་བར་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །ནད་པས་སྦྱིན་པར་བྱ་བ་བསྐུལ་བ་ལས་བྱ་བ་ཞིག་གིས་ཤོར་ནས་མ་བྱིན་ན། ཤི་ཡང་དེ་ཡི་ཚིག་དང་མཐུན་པར་ནི། །དེ་ཡི་རྫས་ལས་སྡོམ་བརྩོན་རྣམས་ཀྱིས་སྦྱིན། །འདུལ་བྱེད་ལས། གལ་ཏེ་ནད་པ་ན་རེ་མཆོད་པ་བྱོས་ཤིག་ཅེས་བྱ་བ་ལ་སོགས་པ་ཟེར་ན་དེ་བྱའོ། །འོན་ཏེ་བྱ་བ་ཞིག་གི་ཆེད་ཀྱིས་དེའི་ཚེ་མ་བསྒྲུབས་ན་ནད་པ་དེ་ཤི་ཡང་དེའི་རྫས་ལས་དེས་ཇི་སྐད་སྨྲས་པ་དེ་བཞིན་དུ་བྱའོ། །འདི་ནི་འཆི་བའི་སྔ་རོལ་གྱི་སྦྱིན་པ་ཡིན་གྱི། བདག་འདས་ནས་ཞེས་བྱ་བ་ནི་མ་ཡིན་ནོ་ཞེས་གསུངས་པ་ཡིན་ནོ། །དེ་ལྟ་བས་ན་འདི་ནི་སྦྱིན་པ་ཁོ་ན་ཡིན་ནོ། །ནད་གཡོག་ལས་བསྐུར་ཏེ་ཉམས་པ་ལས་འདི་སྐད་གསུངས་པ་ནི་གཞན་ལས་བསྐུར་ཏེ་ཉམས་པ་ལ་ཡང་བྱེ་བྲག་མེད་པའི་ཕྱིར་སྦྱིན་པ་ཉིད་དུ་རྟོགས་པར་བྱའོ། །རང་གི་སྡེ་ཚན་རྫས་ནི་འགྱེད་པ་ལས། །གལ་ཏེ་སྡོམ་བརྩོན་སྐལ་བ་མ་བླངས་ཤིང༌། །སྐལ་བ་དེ་ནི་སྡེ་ཚན་དེའི་ཡིན་ནོ། །སྐལ་བ་ཐོབ་ན་ཤི་བའི་སྐལ་བ་ཡིན་ནོ། །གང་ན་སྡེ་ཚན་བཅུ་ལ་སོགས་པས་རྫས་བགོས་པ་དེ་ལ་རང་གི་སྡེ་ཚན་དང་རྫས་འགྱེད་པ་ལས་གལ་ཏེ་བརྟུལ་ཞུགས་ཅན་རང་གི་སྐལ་བ་མ་བླངས་པ་

---

^{[མ་དཔེ་གཟིགས་ན་འདིར་གནོན།]}

ཁོ་ནར་ཤི་ན་དེའི་ཚེ་རྙེད་པ་དེ་གཅིག་པུ་དེས་མ་ཚང་བའི་སྡེ་ཚན་དེ་ཁོ་ནའི་ཡིན་པར་རིག་པར་བྱའོ། །འོན་ཏེ་རང་གི་སྐལ་བ་བླངས་ནས་ཤི་ན་དེའི་ཚེ་རྙེད་པ་དེ་མཚམས་སུ་མངོན་དུ་གྱུར་པ་རྣམས་ཁོ་ནའི་ཡིན་ཏེ། ཤི་བའི་རྫས་ཡིན་པའི་ཕྱིར་རོ། འདིར་གཞུང་ནི་གླེང་གཞི་ལས། བཙུན་པ་གལ་ཏེ་བཅུ་རྣམས་ལས་གཅིག་གུམ་ན་ཤི་བའི་ཡོ་བྱད་ཀྱི་རྙེད་པ་སུ་དབང་ལགས། བཅོམ་ལྡན་འདས་ཀྱིས་བཀའ་སྩལ་པ། ཉེ་བ་འཁོར་གལ་ཏེ་བགོས་ནས་ཤི་ན་དགེ་འདུན་མཐུན་པས་བགོ་བར་བྱའོ། །འོན་ཏེ་མ་བགོས་པར་ཤི་ན་དགུ་པོ་རྣམས་དབང་ངོ་ཞེས་གསུངས་པ་ཡིན་ནོ། །ཁུངས་ཀྱི་ཚིག་དེ་ནི་སྤྱི་མཐུན་གྱི་རྫས་ཞེས་བྱ་བ་གཞན་ལ་ཡང་བརྗོད་དོ། །གཞན་དུ་གོས་ལ་སོགས་པ་བསྐུར་གྱུར་ན། །དེ་ནི་གང་ལ་བསྐུར་བ་དེའི་ཡིན་ནོ། །གལ་ཏེ་མི་འདོད་སྐུར་བར་བྱེད་དབང་སྟེ། །མི་འདོད་ཀྱང་དེ་དབང་བ་ཁོ་ན་ཡིན། །གཞན་དུ་གོས་ལ་སོགས་པ་བསྐུར་ལ་སྡོམ་བརྩོན་གང་ཁོ་ན་ལ་བསྐུར་བ་དེས་ཀྱང་མ་སྤངས་ན་གོས་ལ་སོགས་པ་པེ་ཁོ་ནའི་ཡིན་པར་རིག་པར་བྱའོ། །དེ་ཤི་ན་ཡང་དེ་ཁོ་ནའི་ཡིན་ཏེ། དེ་ནི་ཤི་བའི་རྫས་ཡིན་ནོ་ཞེས་བྱ་བའི་ཐ་ཚིག་གོ །འདིར་གཞུང་ནི་གོས་ཀྱི་གཞི་ལས། དགེ་སློང་ལ་གོས་དག་བསྐུར་བ་གང་གིས་བསྐུར་བ་དེ་ལ་ཡིད་གཅུགས་པས་ལོངས་སྤྱོད་ན་ཉེས་པར་ལོངས་སྤྱད་པ་ཡིན་ནོ།། གང་ལ་བསྐུར་བ་དེའི་བསམ་པས་ཤི་བའི་ཡོ་བྱད་དུ་བྱིན་གྱིས་རློབ་པར་བྱེད་ན་ལེགས་པར་བྱིན་གྱིས་བརླབས་པ་ཡིན་ནོ་ཞེས་བྱ་བ་དང༌། དགེ་སློང་གིས་དགེ་སློང་ལ་གོས་དག་བསྐུར་བ་དེ་ཤི་ན་གང་ལ་བསྐུར་བ་དེ་ལ་ཡིད་གཅུགས་པས་ལོངས་སྤྱོད་ན་ལེགས་པར་ལོངས་སྤྱད་པ་ཡིན་ནོ། །གང་གིས་བསྐུར་བ་དེ་ནི་བསམ་པས་ཤི་བའི་ཡོ་བྱད་དུ་བྱིན་གྱིས་རློབ་པར་བྱེད་ན་ཉེས་པར་བྱིན་གྱིས་བརླབས་པ་ཡིན་ནོ་ཞེས་བྱ་བ་དང་དགེ་སློང་གིས་དགེ་སློང་ལ་གོས་དག་བསྐུར་བ། གང་ལ་བསྐུར་བ་དེ་ཡང་ཤི་ལ། གང་གིས་བསྐུར་བ་དེ་ཡང་ཤི་ན། གང་ལ་བསྐུར་བ་དེའི་བསམ་པས་ཤི་བའི་ཡོ་བྱད་དུ་བྱིན་གྱིས་རློབ་པར་བྱེད་ན། ལེགས་པར་བྱིན་གྱིས་བརླབས་པ་ཡིན་ནོ། །གང་གིས་བསྐུར་བ་དེའི་བསམ་པས་ཤི་བའི་ཡོ་བྱད་དུ་བྱིན་གྱིས་རློབ་པར་བྱེད་ན། ཉེས་པར་བྱིན་གྱིས་རློབ་པ་ཡིན་ནོ་ཞེས་འདིར་གཞུང་གི་དུམ་བུ་གསུམ་འབྱུང་བ་ཡིན་ནོ། །གལ་ཏེ་མི་འདོད་སྐུར་བ་བྱེད་དབང་སྟེ། །ཞེས་བྱ་བ་ནི་ཇི་སྟེ་དེས་མི་འདོད་

---

^{[མ་དཔེ་གཟིགས་ན་འདིར་གནོན།]}

ན་དེའི་ཚེ་དེ་སྐུར་པར་བྱེད་པ་ཁོ་ནའི་ཡིན་ནོ། །འདིར་གཞུང་ནི་དགེ་སློང་གིས་དགེ་སློང་ལ་གོས་དག་བསྐུར་བ་ལས་གང་ལ་བསྐུར་བ་དེས་སྤངས་བ་ལ་གང་གིས་བསྐུར་བ་དེ་ལ་ཡིད་གཅུགས་པས་ལོངས་སྤྱོད་པར་བྱེད་ན་ལེགས་པར་ལོངས་སྤྱད་པ་ཡིན་ནོ། །གང་ལ་བསྐུར་བ་དེ་ལ་ཡིད་གཅུགས་པས་ལོངས་སྤྱོད་པར་བྱེད་ན་ཉེས་པར་ལོངས་སྤྱད་པ་ཡིན་ནོ་ཞེས་འབྱུང་བ་ཡིན་ནོ། །མི་འདོད་ཀྱང་དེ་དབང་བ་ཁོ་ན་ཡིན་ཞེས་བྱ་བ་ནི་འོན་ཏེ་སྐུར་པར་བྱེད་ན་ཡང་མི་འདོད་ན། འོན་ཀྱང་དེ་སྐུར་བར་བྱེད་པ་ཁོ་ནའི་ཡིན་པར་རིག་པར་བྱ་སྟེ། དེ་ལྟར་གྱུར་དུ་ཟིན་ཀྱང་ཕྱག་དར་དང་འདྲ་བར་བདག་གིས་པོར་རོ་སྙམ་དུ་དེ་ལྟ་བུའི་བློ་མི་འབྱུང་བར་རིགས་པས་ན་དེའི་ཁོ་ན་ཡིན་པར་རིག་པར་བྱའོ། །འདིར་གཞུང་ནི་དགེ་སློང་གིས་དགེ་སློང་ལ་ཆོས་གོས་དག་བསྐུར་བ་ན་དུས་ཀྱང་སྤངས་པ་མིན་ཞིང༌། གང་ལ་བསྐུར་བ་དེས་ཀྱང་སྤངས་ལ། གང་ལ་བསྐུར་བ་དེའི་ཡིན་པར་བྱིན་གྱིས་རློབ་པར་བྱེད་ན་བྱིན་གྱིས་མ་བརླབས་པ་ཡིན་ནོ། །གང་གིས་བསྐུར་བ་དེའི་ཡིན་པར་བྱིན་གྱིས་རློབ་པར་བྱེད་ན་བྱིན་གྱིས་བརླབས་པ་ཡིན་ནོ་ཞེས་འབྱུང་བ་ཡིན་ནོ། །མཐུན་པ་ཡོད་ན་ཤི་བའི་ནོར་རྣམས་ལ། །མཚན་རྣམས་ཐ་དད་པ་ནི་མི་དབང་ངོ༌། །སྡོམ་བརྩོན་གཞན་གྱི་མངོན་སུམ་བསྐྲད་པ་དག །བསྐྲད་པའི་རྫས་རྣམས་ལ་ཡང་དབང་བ་མིན། །མཚན་རྣམས་ཐ་དད་བཞེས་བྱ་བ་ནི་དགེ་སློང་དང་དགེ་ཚུལ་མཚན་མི་འདྲ་བ་དག་ལ་ནི་དགེ་སློང་མ་ལ་སོགས་པ་དག་མི་དབང་བ་ཉིད་ཡིན་ནོ། དེ་བཞིན་དུ་དགེ་སློང་མ་ལ་སོགས་པ་ལ་ཡང་དགེ་སློང་དང་དགེ་ཚུལ་དག་མི་དབང་བ་ཉིད་ཡིན་ནོ། །དུས་ཐམས་ཅད་དུ་དེ་རྣམ་པར་གཞག་པ་ཡང་མ་ཡིན་པས་མཐུན་པ་དག་ཡོད་ན་ཞེས་བྱ་བ་སྨོས་པ་ཡིན་ཏེ། མཚན་འདྲ་བ་དག་ཡོད་ན་ཞེས་བྱ་བའི་ཐ་ཚིག་གོ །མེད་ན་ནི་དབང་བ་ཁོ་ན་ཡིན་ནོ། །འདིར་གཞུང་ནི་གླེང་གཞི་ལས། གང་ན་དགེ་སློང་མེད་པ་དེ་ན་ནི་དགེ་སློང་མ་རྣམས་ཀྱིས་བླང་བར་བྱ་སྟེ། འདི་ལ་འགྱོད་པར་མི་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །དེ་བཞིན་དུ་བསྐྲད་པ་དག་ལ་ཡང་ཐན་སྡོམ་བཙོན་བསྐྲད་པའི་རྫས་རྣམས་ལ་ཡང་དབང་བ་མེད་ན། སྡོམ་བརྩོན་མ་བ་སྨད་པའི་རྫས་ལ་ལྟ་སྨོས་ཀྱང་ཅི་དགོས། །གང་གི་ཚེ་ཞེ་ན། སྡོམ་བརྩོན་གཞན་གྱི་མངོན་སུམ་ཞེས་བྱ་བ་སྨོས་པ་ཡིན་ཏེ། མ་བསྐྲད་པའི་མདུན་དུ་ཞེས་བྱ་བའི་ཐ་ཚིག་གོ །དེ་དག་མེད་ན་ནི་དབང་བ་ཉིད་

---

^{[མ་དཔེ་གཟིགས་ན་འདིར་གནོན།]}

ཡིན་པ་ལ་མི་དགག་གོ །གཙུག་ལག་ཁང་གི་མཚམས་གཉིས་པར་ཤི་ན། དེའི་ལུས་འབྲེལ་པའི་གོས་ལ་སོགས་པའི་རྫས། །གང་དུ་མགོ་བོ་གཞག་པ་དབང་བ་ཡིན། །གཉི་གར་གཞག་ན་དེ་ཕྱིར་གཉི་གའི་ཡིན། །གཙུག་ལག་ཁང་གི་མཚམས་གཉིས་ཀྱི་པར་དུ་གལ་ཏེ་དགེ་སློང་ཤི་ན་དེའི་ཚེ་དེའི་ལུས་དང་འབྲེལ་པའི་གོས་ལ་སོགས་པ་དག་སུ་དབང་ཞེ་ན། མཚམས་གང་དུ་མགོ་པོ་གཞག་པའོ། །འོན་ཏེ་མཚམས་གཉི་གར་ནོན་པར་མགོ་བོ་བཞག་ན་གཉི་ག་དབང་ངོ༌། །འདིར་གཞུང་ནི་གླེང་གཞི་ལས། བཙུན་པ་རེ་ཞིག་མཚམས་ཀྱི་བར་དུ་དགེ་སློང་གུམ་ན་དེའི་ལྷུང་བཟེད་དང་ཆོས་གོས་སུ་དབང་ལགས། ཉེ་བ་འཁོར་གང་དུ་མགོ་བོ་གཞག་པའོ། །བཙུན་པ་གལ་ཏེ་གཉི་གར་མགོ་བོ་བཞག་ན་སུ་དབང་ལགས། ཉེ་བ་འཁོར་གཉིས་ཀའོ་ཞེས་གསུངས་པ་ཡིན་ནོ། །ལུས་དང་འབྲེལ་པ་སྨོས་ཅི་དགོས་ཤེ་ན། དམིགས་ཀྱིས་དབྱེ་བ་འོག་ནས་འབྱུང་བ་རྣམས་ཀྱི་ཡུལ་རབ་ཏུ་བསྟན་པའི་ཕྱིར་རོ། །ཁྱིམ་གྱི་ནང་ན་ཡོད་པའི་ཤི་བའི་གོས། །ཁྱིམ་པ་དེ་ནི་དད་པས་སྦྱིན་བྱེད་པའོ། །ཁྱིམ་གྱི་ནང་ན་ཡོད་པའི་ཤི་བའི་ཡོ་བྱད་དག་ནི་ཁྱིམ་པ་མངོན་པར་དད་པས་གང་ལ་སྦྱིན་པར་བྱེད་པ་དེ་ཁོ་ན་དབང་བ་ཡིན་ནོ། །གང་གི་མཚམས་ན་ཤི་བའི་གོས་ཡོད་པ། །དེ་རྣམས་དེ་དག་བྱིན་གྱིས་རློབ་པ་དབང༌། །དགེ་སློང་གང་དག་གི་གཙུག་ལག་ཁང་གི་མཚམས་ཀྱི་ནང་ན་ཤི་པའི་ཡོ་བྱད་རྣམས་ཡོད་ན་གོས་ལ་སོགས་པ་དེ་དག་ཁོ་ན་བྱིན་གྱིས་རློབ་པ་དབང་བ་ཡིན་གྱི་གཞན་དག་ནི་མ་ཡིན་ནོ། །གནས་གཞན་དག་ནི་གོས་རྣམས་ཡོད་གྱུར་ཀྱང༌། །རྫས་དང་འདྲ་བ་དེ་བཞིན་བྱིན་གྱིས་བརླབས། །ཤི་བའི་ཡོ་བྱང་གནས་གཞན་ཡོད་དུ་ཟིན་ཀྱང་རྫས་དང་འདྲ་བ་ཉེ་བར་འགྱུར་པ་ལ་བྱིན་གྱིས་བརླབ་པར་ཡའོ། །འདིར་གཞུང་ནི་གོས་ཀྱི་གཞི་ལས། བཙུན་པ་དགེ་སློང་ཡང་གཞན་དུ་བུམ། ལྷུང་བཟེད་དང་ཆོས་གོས་ཀྱང་གཞན་ནམ་མཆིས། རྫས་དང་འདྲ་བ་ཡང་གཞན་ནམ་ཆིས་ན་དེའི་ལྷུང་བཟེད་དང་ཆོས་གོས་སུ་དབང་ལགས། ཉེ་བ་འཁོར་དགེ་སློང་ངམ་ཁྱིམ་པ་གང་ན་འདུག་པའོ་ཞེས་གསུངས་པ་ཡིན་ནོ། །རྫས་དང་འདྲ་བ་ཅི་ཞིག་ཡིན་ཞེ་ན། བཤད་པ། གང་ལ་དེ་ཡི་རྫས་རྣམས་གཏམས་གྱུར་པའི། །མི་དེ་རྫས་དང་འདྲ་ཞེས་བྱ་བ་

---

^{[མ་དཔེ་གཟིགས་ན་འདིར་གནོན།]}

ཡིན། །ཤི་བ་དེའི་རྫས་རྣམས་དེར་སྔར་གང་ལ་གཏམས་པའི་མི་རབ་ཏུ་བྱུང་བའམ་ཁྱིམ་པ་དེ་ནི་དེའི་རྫས་དང་འདྲ་བ་ཞེས་བྱ་སྟེ། དེ་ནི་དེའི་རྫས་འཆང་བ་ཡིན་པའི་ཕྱིར་དེའི་སྦྱིན་པ་དང་འདྲ་བ་ཡིན་ནོ་ཞེས་བྱ་བའི་ཐ་ཚིག་གོ །འདི་ལྟར་རྫས་དང་འདྲ་བ་མཚམས་ཀྱི་ནང་ན་གནས་ན་རྫས་ཀྱང་མཚམས་ཀྱི་ནང་དུ་ཆུད་པར་རྟོགས་པར་བྱའོ་ཞེས་བྱ་བར་དགོངས་པ་ཡིན་ནོ། །གྲུར་ཞུགས་ལྷུང་བཟེད་ལ་སོགས་འདི་གཟུང་ངམ། །བཏང་ཞེས་གོ་པར་བྱས་ནས་སྦྱིན་པར་བྱ། །དེ་ལྟར་དེ་སྐད་སྨྲས་ནས་དེ་བོར་ན། །དེ་ཚེ་རིན་ནི་ཐེ་ཚོམ་མེད་པར་གཞལ། །གྲུ་ལ་སོགས་པར་ཞུགས་པ་ན་ཟླ་བོ་ལ་གོ་བར་བྱས་ནས་ལྷུང་བཟེད་ལ་སོགས་པ་གཏང་པར་བྱའོ། །གོ་བར་བྱ་བ་དེ་ཡང་ཅི་ཁྱོད་ཀྱིས་བཟུང་ངམ། བཏང་ངོ་ཞེས་བྱ་བ་ཡིན་ནོ། །དེ་སྐད་ཅེས་སྨྲས་པ་ལས་གལ་ཏེ་དེ་ལས་ལྷུང་ནས་དེའི་ལྷུང་བཟེད་ལ་སོགས་བ་ཆུ་བོ་ལ་སོགས་པར་ཆུད་ཟོས་པར་གྱུར་ན་དེའི་ཚེ་ལེན་པ་པོ་ལ་ངེས་པར་རིན་དབབ་པར་བྱ་སྟེ། མ་བྱིན་པར་ལེན་པའི་དོགས་པ་མེད་དོ། །དེ་ནི་སིལ་བུ་ལས་འབྱུང་ངོ༌། །འདི་ཁོ་ནས་ནི་རྙེད་པ་བླང་པར་ཁས་བླངས་ནས་མ་བླངས་ན་ཡང་དབབ་པར་བྱའོ་ཞེས་བྱ་བ་ལ་སོགས་པ་དོན་དུ་རྟོགས་སོ། །སྨད་རིམས་དག་ལས་གོས་ལ་སོགས་པ་དེ། །བླང་པར་མི་བྱ་དེ་ནི་སྦྱིན་པོ་མིན། ཕོངས་ན་ནད་པས་བདག་ལས་བླང༌། །དེ་ཡང་སླར་སྦྱིན་འདོད་པ་ཉིད་ཀྱིས་སོ། །གཙོ་བོ་མ་ཡིན་པ་རྣམས་ལས་ནི་གོས་ལ་སོགས་པ་བླང་པར་མི་བྱ་སྟེ། དེ་དག་ནི་སྦྱིན་པ་པོ་མ་ཡིན་པས་སོ། །ཕོངས་ན་ནད་པས་ནི་བདག་གི་སྨད་རིམས་རྣམས་ལས་ཀྱང་བླང་པར་བྱའོ། །དེ་ཡང་སླར་སྦྱིན་པར་འདོད་པ་ཉིད་ཀྱིས་ཡིན་གྱི་གཞན་དུ་ནི་མ་ཡིན་ནོ། །ནོར་གྱིས་ཕོངས་པས་དེ་བཞིན་གཤེགས་པ་ཡི། །དཀོར་གྱིས་ཀྱང་ནི་སྨན་གྱི་བྱ་བ་བྱ། །སོས་པ་ཉིད་དུ་གྱུར་ན་བསབ་པར་བྱ། །དེ་ལ་འབྱོར་བ་མེད་ན་ཉེས་པ་མེད། །ནད་པ་ནོར་གྱིས་ཕོངས་པས་ནི་ཐ་ན་སངས་རྒྱས་ཀྱི་རྒྱན་ལ་སོགས་པའི་རྫས་ཀྱིས་ཀྱང་སྨན་གྱི་ཟོང་བྱའོ། །གང་གི་ཚེ་སོས་པ་ཉིད་དུ་གྱུར་བ་དེའི་ཚེ་རྫས་དེ་བསམ་པར་བྱའོ། །འོན་ཏེ་འབྱོར་བ་མེད་ན་དེའི་ཚེ་ཅི་ཞིག་བྱ་ཞེ་ན། བཤད་པ། དེ་ལ་འབྱོར་པ་མེད་ན་ཉེས་པ་མེད། །འབྱོར་པ་མི་བདོག་ནམ་བསབས་ཀྱང་ལྟུང་བ་མེད་

---

^{[མ་དཔེ་གཟིགས་ན་འདིར་གནོན།]}

པའི་ཕྱིར་རོ། །འདིར་གཞུང་ནི་གོས་ཀྱི་གཞི་ལས། དེ་ལྟ་བས་ན་དགེ་སློང་གིས་ཚངས་པ་མཚུངས་པར་སྤྱོད་པ་ན་བ་ཡལ་བར་དོར་བར་མི་བྱ་སྟེ། ནད་གཡོག་བསྐོ་བར་བྱའོ། །དེས་ཀྱང་གལ་ཏེ་དེ་ལ་སྨན་མེད་ན་དྲིས་ཏེ་སྦྱིན་བདག་རྣམས་ལ་ཡང་དག་པར་ལེན་དུ་གཞུག་པར་བྱའོ། །འོན་ཏེ་མ་གྲུབ་ན་དགེ་འདུན་གྱི་ལས་སྦྱིན་པར་བྱའོ། །འོན་ཀྱང་གལ་ཏེ་མ་གྲུབ་ན་སངས་རྒྱས་ཀྱི་མི་ཟད་པའི་དཀོར་ལས་སྦྱིན་པར་བྱའོ། །གལ་ཏེ་འོན་ཀྱང་མི་འགྲུབ་ན་དེ་བཞིན་གཤེགས་པའི་མཆོད་རྟེན་ནམ་དྲི་གཙང་ཁང་གི་གདུགས་སམ་རྒྱལ་མཚན་ནམ་བ་ངན་ནམ་རྒྱན་ཡང་རུང་སྟེ། དེ་དགེ་འདུན་གྱིས་བླངས་ནས་སྦྱིན་པར་བྱའོ། །ནད་གཡོག་གིས་ཀྱང་བཙོངས་ནས་རིམ་གྲོ་བྱའོ། །སྟོན་པ་ལ་ཡང་མཆོད་པར་བྱའོ། །སོས་པར་གྱུར་པ་དང་སངས་རྒྱས་ཀྱི་འདིས་ཁྱོད་ལ་མཁོ་བ་བྱས་སོ་ཞེས་བརྗོད་པར་བྱའོ། །གལ་ཏེ་དེ་ལ་འབྱོར་པ་ཡོད་ན་དེས་བསྒྲིམས་ནས་བསབ་པར་བྱའོ། །གལ་ཏེ་མེད་ན་མཁོ་བ་བྱས་པ་ལེགས་པར་མཁོ་བ་བྱས་པ་ཡིན་ཏེ་པའི་ནོར་བུ་དབང་བ་ཡིན་པས་འདི་ལ་འགྱོད་པར་མི་བྱའོ་ཞེས་གསུངས་པ་ཡིན་ནོ།། །།བམ་པོ་ལྔ་པ། ཡུལ་ཆོས་ཆད་པ་སོགས་ཆོས་ལྡན་པས་བསྟན། །རྒྱལ་པོའི་སྐལ་ཡིན་རྒྱལ་པོས་གནང་བ་བླང༌། །དེ་ལ་རྩོད་པ་དག་ནི་བྱུང་གྱུར་ན། །སྡོམ་བརྩོན་བསྐོ་བར་སྟོན་པའི་བཀའ་ལས་མིན། །འདིར་གཞུང་ནི་དེ་ལྟ་བས་ན་རྒྱལ་པོའི་སྐལ་བ་ནི་བླང་བར་བྱ་སྟེ། གནང་ངོ་ཞེས་བྱ་བ་ལ་སོགས་པ་འབྱུང་བ་ཡིན་ནོ། །ཡུལ་ཆོས་ཀྱི་ཆད་པ་ལ་སོགས་པ་ལས་བྱུང་བ་ཆོས་དང་ལྡན་པས་བསྟན་པ་ནི་རྒྱལ་པོ་དབང་བ་ཡིན་ཏེ། འབྲས་དང་དབྱིག་ལ་སོགས་པ་ནི་རྒྱལ་པོའི་སྐལ་བ་ཞེས་བྱའོ། །དེའི་ཕྱིར་ཡུལ་ཆོས་ཀྱི་ཆད་པ་ཕ་ཚན་ཆོས་དང་ལྡན་པ་རྣམས་ཀྱིས་བསྟན་པ་གང་ཡིན་པ་དེ་ནི་ཆད་པར་གྱུར་པ་དེའི་ནོར་བླང་བ་ནི་རྒྱལ་པོས་བླང་བར་བྱ་བ་ཡིན་ནོ། །གྲུ་བཙས་དང་ཤོ་གམ་ལ་སོགས་པ་ལས་བྱུང་བ་གང་ཡིན་པ་དེ་དག་ཐམས་ཅད་ཀྱང་རྒྱལ་པོས་བླང་བར་བྱ་བ་ཡིན་ནོ། །དེར་ཤགས་འགྱེད་པ་ལྟ་བུ་བྱུང་ན་ནི་ཁྱིམ་པ་བསྐོ་བར་བྱའོ་ཞེས་བྱ་བར་གནས་ཏེ། སྡོམ་བརྩོན་བསྐོ་བར་བྱའོ་ཞེས་ནི་སྟོན་པའི་བཀའ་ལས་མི་འབྱུང་བས་སོ། །གལ་ཏེ་སྡོམ་བརྩོན་ཤགས་འགྱེད་པར་བསྐོས་ན་ཅིར་འགྱུར་ཞེ་ན། མི་

---

^{[མ་དཔེ་གཟིགས་ན་འདིར་གནོན།]}

འཚམ་པ་སྤྱོད་པའི་ཕྱིར་དོན་གྱིས་ན་སྡོམ་པ་མ་ཡིན་པ་དང་ལྡན་པར་འགྱུར་རོ། །དེ་ལྟར་ཡང་རྒྱལ་པོ་དང་ཤགས་འགྱེད་པ་དང་ཆད་པས་གཅོད་པ་རྣམས་དོན་གྱིས་ན་སྡོམ་པ་མ་ཡིན་པ་དང་ལྡན་པ་ཡིན་ནོ་ཞེས་གསུངས་པ་ཡིན་ནོ། །ཆད་པ་ཞེས་བྱ་བ་ནི་གསོད་པ་དང་ཉོན་མོངས་པར་བྱེད་པ་ཡིན་ནོ། །ཆད་པ་དེས་གཅོད་པར་བྱེད་པ་ནི་གཅོང་པ་ཞེས་བྱའོ། །ཁབ་ལ་སོགས་པའི་རྫས་དག་ལྟུང་མཐོང་ན། །དེ་དག་གཙུག་ལག་ཁང་སྐྱོད་དག་ལ་གཏད། །གྲི་གུ་དང་ཁབ་ལ་སོགས་པ་འཆགས་ལ་སོགས་པར་ལྟུང་བ་མཐོང་ན་གཙུག་ལག་ཁང་སྐྱོང་ལ་གཏད་པར་བྱའོ། །དེས་ཀྱང་ཚོགས་རྣམས་ནང་དུ་བསྟན་པ་ནི། །ཉི་མ་གསུམ་དུ་དེ་འོང་བསྡད་བྱས་ནས། །གལ་ཏེ་ཤེས་པ་མེད་ན་ཚོགས་ལ་དབུལ། །གཙུག་ལག་ཁང་སྐྱོད་དེས་ཀྱང་ཚོགས་ཀྱི་ནང་དུ་བསྟན་ནས་ཉི་མ་གསུམ་གྱི་བར་དུ་ཁབ་ལ་སོགས་པའི་བདག་པོ་འོང་བ་ལ་བསྡད་ནས་གལ་ཏེ་ཤེས་པ་མེད་ན་དེའི་ཚེ་དགེ་འདུན་ལ་ཇི་ལྟར་བདེ་བར་དབུལ་བར་བྱའོ། །དངུལ་ལ་སོགས་པ་ཉི་མ་བརྒྱད་བསྡད་ནས། །ཕྱིས་ནས་ཟླ་བ་དྲུག་ཏུ་མཛོད་དུ་བཞག །ཕྱི་ནས་ཀྱང་ནི་སྣོད་རྣམས་རབ་ཏུ་བྱ། །དངུལ་དང་གསེར་ལ་སོགས་པ་འཆགས་ལ་སོགས་པར་ལྟུང་བ་མཐོང་ན་ཞག་བརྒྱད་དུ་བསྡད་ནས་ཟླ་བ་དྲུག་ཏུ་དགེ་འདུན་གྱི་མཛོད་དུ་གཞག་པར་བྱའོ། །གལ་ཏེ་འོན་ཀྱང་ཤེས་པ་མེད་ན་ཕྱིས་སྣོད་གཤའ་མར་བྱས་ཏེ་སྤྱད་པར་བྱའོ། །དེ་ནས་གལ་ཏེ་དེ་ཡོངས་སློང་བྱེད་ན། །འོན་ཀྱང་སྦྱིན་པར་བྱ་སྟེ་སྐྱེད་ནི་མེད། །དེ་ནས་ཕྱིས་སྣོད་བྱས་པ་ན་གལ་ཏེ་ནོར་གྱི་བདག་པོ་དེ་འོངས་ནས་ཁ་དོག་དང་མཚན་མས་མཚོན་པས་སློང་བར་བྱེད་ན། འོན་ཀྱང་སྦྱིན་པར་བྱ་བ་ཉིད་ཡིན་ནོ། །འོན་ཏེ་སྐྱེད་སློང་ན་སྐྱེད་སྦྱིན་པར་མི་བྱའོ། །ལག་གི་བླ་ལ་མི་མཁོའི་ཤིང་ཡོད་ལ། །འཐོབ་ན་དེ་ཡིས་གནང་བས་རེ་བླང་བྱ། །ལག་གི་བླ་ལ་མི་མཁོ་པའི་ཤིང་གང་ཡོད་པ་དེ་གལ་ཏེ་ལག་གི་བླ་ལས་འཐོབ་ན་དེས་གནང་བས་བླངས་ན་ཉེས་པ་མེད་དོ། །རྙེད་པ་ནི་བརྒྱད་དེ། མཚམས་ཀྱི་བསྒྲུབས་པ་ནི་ཁྲིམས་སུ་བྱས་པས་བསྒྲུབས་པ་དང༌། གནས་ཀྱི་བསྒྲུབས་པ་དང༌། དབྱར་གྱི་དང༌། དགེ་འདུན་ལ་བསྟབས་པ་དང༌། གང་ཟག་ལ་བསྟབས་པ་དང༌། མངོན་དུ་གྱུར་པ་དང༌། བརྒྱད་པ་སོ་སོར་སྨོས་པ་ཞེས་གང་གསུངས་པ་དེ་དག་གི་བདག་པོ་ནི་གསལ་

---

^{[མ་དཔེ་གཟིགས་ན་འདིར་གནོན།]}

བ་ཉིད་ཡིན་པས་མདོར་མ་བྱས་སོ། །དེ་ལ་མཚམས་ཀྱི་བསྒྲུབས་པའི་རྙེད་པ་ནི་དཔེར་ན་མཚམས་གཅིག་ན་གནས་མང་པོ་ཡོད་ལ། དེ་དག་རྣམས་ལས་གནས་གཞན་ཞིག་ཏུ་རྙེད་པ་གང་སྒྲུབ་པ་དེ་ནི་མཚམས་དེའི་ནང་ན་གནས་པའི་དགེ་འདུན་རྣམས་བདག་པོ་ཉིད་ཡིན་པས་དེ་རྣམས་དང་ལྷན་ཅིག་བགོ་བར་བྱ་བ་ལྟ་བུའོ། །ཁྲིམས་སུ་བྱས་པས་བསྒྲུབས་པའི་རྙེད་པ་ནི་དཔེར་ན་ཁས་བླངས་པ་དང་ཁས་མ་བླངས་པ་རྣམས་ཀྱིས་ཁྱིམ་ཆེ་གེ་མོ་ཞིག་ནི་ཁྱེད་ཀྱི་ཡིན་ནོ། །ཁྱིམ་ཆེ་གེ་མོ་ཞིག་ནི་ངེད་ཀྱི་ཡིན་ནོ། །ཁྱིམ་ཆེ་གེ་མོ་ཞིག་ནི་སྤྱིའི་ཡིན་ནོ་ཞེས་དེ་ལྟར་ཁྲིམས་སུ་བྱས་ཏེ་དབྱར་གནས་པར་ཁས་ལེན་ཅིང་དེ་ལ་གལ་ཏེ་ཁས་བླངས་པའི་གནས་སུ་ཁས་བླངས་པ་དང༌། ཁས་མ་བླངས་པ་སྟོན་ཏེ། ཁས་བླངས་པ་རྣམས་ལ་ནི་ཆུ་རྙེད་པ་སྦྱིན་པར་བྱེད་ཁས་མ་བླངས་པ་རྣམས་ལ་ནི་ཆུ་བྲིམས་ན་དེའི་ཚེ་ཁས་བླངས་པ་རྣམས་དབང་ངོ༌། །ཡང་ན་གལ་ཏེ་ཁས་མ་བླངས་པ་རྣམས་ལ་རྙེད་པ་ནི་སྦྱིན་པར་བྱེད་ལ། ཁས་བླངས་པ་རྣམས་ལ་ནི་ཆུ་སྦྱིན་པར་བྱེད་པའམ། ཡང་རྒན་རིམས་ལ་ཆུ་སྦྱིན་པར་བྱེད་ན་རྣམ་པ་ཐམས་ཅད་དུ་ཁས་བླངས་པ་རྣམས་ཁོ་ན་དབང་ངོ༌། །དེ་བཞིན་དུ་ཁས་མ་བླངས་པ་རྣམས་ཀྱི་གནས་སུ་ཁས་མ་བླངས་པ་ཉིད་དང༌། གཉི་ག་དག་གི་གནས་སུ་གཉི་ག་དག་དབང་ངོ་ཞེས་སྦྱར་བ་ལྟ་བུ་ཡིན་ནོ། །ལྷ་སྦྱིན་གྱི་ལྟ་བ་ཁས་བླངས་པ་རྣམས་ཀྱི་ཁས་བླངས་པ་རྣམས་ཡིན་ནོ། །དེ་ལས་གཞན་པ་དག་ནི་ཁས་མ་བླངས་པ་ཞེས་བྱ་བའོ། །གནས་ཀྱི་བསྒྲུབ་པའི་རྙེད་པ་ནི་དཔེར་ན་སྐྱེ་དགུ་གང་ལ་བརྟེན་ནས་དབྱར་གནས་པར་ཁས་ལེན་པར་བྱེད་ལ། དེར་རྙེད་པ་གང་སྒྲུབ་པ་དེ་ནི་དེ་དབང་བ་ཡིན་གྱི་གནས་པ་དང་མི་གནས་པ་གཞན་རྣམས་ནི་མ་ཡིན་པ་ལྟ་བུའོ། །དབྱར་གྱི་རྙེད་པ་ནི་དབྱར་གནས་པ་དབང་བ་ཡིན་གྱི་དབྱར་མི་གནས་པ་ནི་མ་ཡིན་ནོ། །དགེ་འདུན་ལ་བསྟབས་པའི་རྙེད་པ་ནི་གང་ཞིག་ངེས་པ་དང་མ་ཕྱེ་བའོ། །དགེ་འདུན་ལ་བསྡོས་པའི་ཕྱིར་ངེས་པ་ཞེས་བྱའོ། །འདི་ནི་དབྱར་གནས་པ་རྣམས་ལའོ། །འདི་ནི་མངོན་དུ་གྱུར་པ་རྣམས་ལའོ་ཞེས་བྱེ་བྲག་མ་ཕྱེ་བའི་ཕྱིར་མ་ཕྱེ་བ་ཞེས་བྱའོ། །དགེ་སློང་ལ་བསྟབས་པའི་རྙེད་པ་ནི་གང་ཞིག་ངེས་པ་ཕྱེ་བའོ། །མངོན་སུམ་དུ་གྱུར་པའི་རྙེད་པ་ནི་གང་ཞིག་མངོན་སུམ་དུ་གྱུར་པ་རྣམས་ལ་གྲུབ་

---

^{[མ་དཔེ་གཟིགས་ན་འདིར་གནོན།]}

པའོ། །སོ་སོར་སྨོས་པའི་རྙེད་པ་ནི་གཙུག་ལག་ཁང་འདིར་དབུལ་བར་བྱའོ་ཞེས་བྱ་བ་གང་ཡིན་པའོ། །དེ་ལྟར་བདག་པོ་ཐ་དད། དེ་ལྟར་བདག་པོའི་རབ་ཏུ་དབྱེ་བ་བསྟན་པ་ཡིན་ནོ། །དེའི་འོག་ཏུ་ཉེས་བྱས་ཀྱི་རབ་ཏུ་དབྱེ་བ་བཤད་པར་བྱ་སྟེ། དཔེར་ན་མ་པོས་ཟས་ཟ་དང༌། །ཞེས་བྱ་བ་ནི་མགྲོན་དུ་མ་བོས་པར་ཟས་ཟ་བའོ་ཞེས་འདིར་རྙེད་པ་ནི་རྣམ་པ་གཉིས་ཏེ། འདིར་ནི་ཁོ་བོས་མགྲོན་དུ་མ་བོས་སོ་སྙམ་དུ་རིག་པ་དང་མ་རིག་པའོ། །སྔ་མ་ཤེས་ལ་ནི་རྐུ་བ་མེད་དེ་སྦྱོར་བ་ལ་ནི་ཉེས་བྱས་སོ། །ཕྱི་མ་ཤོས་ལ་ནི་ངན་ངོན་ཁ་ཟས་ལེན་པའི་ཕྱིར་མངོན་པར་ཞེན་པ་ཤིན་ཏུ་ཞན་པ་ཡིན་ནོ། །འཇིག་རྟེན་ཡང་འདི་ལ་བརྐུས་པའི་བློ་མི་འབྱུང་བའི་ཕྱིར་ནི་ཉེས་བྱས་ཁོ་ན་ཞེས་གསུངས་སོ། །རྒྱ་སོགས་ཟིན་པའི་སྡུག་བསྔལ་གཟིར་བ་ཡི། །སྲོག་ཆགས་བསོད་ནམས་བསམ་པས་གཏོང་བྱེད་དང༌། །རྒྱ་ལ་སོགས་པས་ཟིན་པའི་སྲོག་ཆགས་རྣམས་བསོད་ནམས་ཀྱི་བསམ་པས་ཐར་པར་བྱས་ན་ཉེས་བྱས་ཀྱི་ཁ་ན་མ་ཐོ་བར་འགྱུར་རོ། །སངས་རྒྱས་རིང་བསྲེལ་རིན་ཐང་མེད་གྱུར་ཀྱང༌། །དེ་ལ་དད་པས་མཆོད་ཕྱིར་རྐུ་བ་དང༌། །དེ་བཞིན་སྙིང་རྗེའི་དབང་གིས་གདོས་བཏགས་པ། །དགྲོལ་བ་ལ་སོགས་བྱས་དང་བཤིག་པ་དང༌། །སངས་རྒྱས་ཀྱི་རིང་བསྲེལ་རིན་པོ་ཆེ་ཉིད་ཡིན་གྱིས་ཀྱང་འདི་ནི་བདག་གི་སྟོན་པའོ་སྙམ་དུ་དེ་ལ་དད་པའི་དབང་གི་ཕྱིར་མཆོད་པའི་བསམ་པས་རྐུ་ན་ཉེས་བྱས་སོ། །སྙིང་རྗེའི་བསམ་པས་རྙི་ལ་སོགས་པ་བཤིག་ཀྱང་ཉེས་བྱས་ཁོ་ན་ཡིན་ནོ། །ཕུག་རོན་ལ་སོགས་ཚང་འཇིག་ལས་ཀྱང་ཡིན། །ཞེས་བྱ་བ་ནི་བྱིའུ་དང་ཕུག་རོན་ལ་སོགས་པའི་ཚང་བཤིག་པ་ལས་ཀྱང་ཉེས་བྱས་སུ་རིག་པར་བྱའོ། །འདིར་གཞུང་ནི་འདུལ་བྱེད་ལས། དགེ་སློང་གི་འཆག་སར་ཤིང་སྐྱེས་པ་དང༌། དེ་ལ་བྱི་ཁྲས་ཚད་བཅས་པ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་བྱི་ཁྲའི་ཚང་བཤིག་པར་མི་བྱའོ། །བཤིག་ན་ཉེས་བྱས་ཀྱི་ལྟུང་བར་འགྱུར་རོ་ཞེས་བྱ་བའི་བར་དུ་འབྱུང་བ་ཡིན་ནོ། །བྱ་ཆུན་ལག་གི་ཚད་ལ་ཡང་དེ་བཞིན་དུ་སྦྱར་བར་བྱའོ། །བྱི་ཁྲ་དང་བྱ་ཆུན་ལག་གཉིས་ནི་ཉེ་བར་མཚོན་པ་ཙམ་ཡིན་པས་ཕུག་རོན་ལ་སོགས་པ་ཡང་གཟུང་ངོ༌། །ཚང་ནི་བྱ་རྣམས་ཀྱི་ཁྱི་མ་ཡིན་ནོ། །བྱི་ཁྲ་ནི་ཁྲ་ཡིན་ནོ། །དེ་ལས་ལྟུང་

---

^{[མ་དཔེ་གཟིགས་ན་འདིར་གནོན།]}

བ་མེད་པའང་བཤད་པར་བྱ། །ཞེས་བྱ་བ་ནི་འདི་མན་ཆད་ལྟུང་བ་མེད་པ་བཤད་པར་བྱ་སྟེ། དེ་ཉོན་ཅི་ག་འདི་ལྟ་སྟེ། ཡིད་གཅུགས་བྱས་ནས་གཞན་ལ་གོ་བྱས་ཏེ། །ཡིད་དགེ་བ་ཡིས་ལེན་ན་ཉེས་པ་མེད། ཡིད་གཅུགས་པའི་འདུ་ཤེས་ཀྱིས་གཞན་ལ་གོ་བར་བྱས་ཏེ་སེམས་དག་པས་ལེན་ན་ཉེས་པ་མེད་པ་ཡིན་ནོ། །ཡིད་གཅུགས་པའི་ཡུལ་བསྟན་པའི་ཕྱིར་བཤད་པ། གྲོགས་པོ་རབ་འབྲིང་ཐ་མར་གྱུར་པ་ལ། །ཡིད་གཅུགས་བྱ་བ་རིམ་པ་བཞིན་དུ་བསྒྲུབ། །ཐ་མ་ལ་ནི་ཐ་མའོ། །འབྲིང་ལ་ནི་འབྲིང་དང་ཐ་མའོ། །དང་པོ་ཤོས་ལ་ནི་མཐའ་དག་ཁོ་ནའོ། །གྲོགས་པོ་ནི་རྣམ་པ་གསུམ་སྟེ། རབ་དང༌། འབྲིང་དང༌། ཐ་མའོ། །ཡིད་གཅུགས་པ་ལ་ཡང་རྣམ་པ་གསུམ་ཁོ་ན་སྟེ། རབ་དང་འབྲིང་དང་ཐ་མ་ཡིན་པས་གོ་རིམས་བཞིན་དུ་བསྒྲུབ་པར་བྱའོ། །དེ་ལ་གོ་རིམས་ནི་འདི་ཡིན་ཏེ། གྲོགས་པོ་ཐ་མ་ལ་ནི་ཡིད་གཅུགས་པར་བྱ་བ་ཐ་མ་བྱའོ། །འབྲིང་ལ་ནི་འབྲིང་དང་ཐ་མ་བྱའོ། །གྲོགས་པོ་རབ་ལ་ནི་ཡིད་གཅུགས་པ་ཆུང་ངུ་དང་འབྲིང་དང་ཆེན་པོ་ཐམས་ཅད་བྱའོ། །སློབ་མ་ལ་སོགས་ར་ལུག་ནོར་གྱི་རྒྱུད། །ཆོམ་རྐུན་གྱིས་ཕྲོགས་སྙིང་རྗེའི་རྗེས་མཐུན་པས། །རྫུ་འཕྲུལ་བསྟན་ནས་ཤོར་བྱེད་ཉེས་མེད་དོ། །པི་ལིན་ད་པད་ས་ལ་སོགས་བཞིན་ནོ། །སློབ་མ་ལ་སོགས་པ་དང༌། ར་ལུག་ལ་སོགས་པ་ཆོམ་རྐུན་རྣམས་ཀྱིས་ཕྲོགས་པར་སྙིང་རྗེས་རྫུ་འཕྲུལ་བསྟན་པས་ཤོར་བར་བྱེད་ན་ལྟུང་བ་མེད་དེ། དཔེར་ན་དགྲ་བཅོམ་པ་པི་ལིན་ད་བད་སས་རྩེ་རྒོད་རྣམས་ཀྱི་རྫས་ཤོར་བར་བྱས་པ་དང༌། མཽད་གལ་གྱི་བུ་ཆེན་པོས་མགོན་མེད་ཟས་སྦྱིན་གྱི་བུ་ཤོར་བར་བྱས་པ་ན་ལྟུང་བ་མེད་པ་ཡིན་ཏེ། གཞན་དག་ལའང་དེ་དང་འདྲའོ་ཞེས་བྱ་བའི་ཐ་ཚིག་གོ །འདུལ་བྱེད་ལས་སྔགས་ཀྱིས་བྱས་པའི་རྫུ་འཕྲུལ་སད་པར་འདོད་པའི་བསམ་པས་བྱས་ན་ཡང་མཚུངས་སོ་ཞེས་གསུངས་ཏེ། དེ་ལྟ་བུའི་རྫུ་འཕྲུལ་ལ་ལྟུང་བ་མེད་པ་ནི་འདི་ལྟར་སེམས་ཀྱིས་རིགས་ཉིད་དེ་དག་ཡིན་པར་རིག་པར་བྱའོ། །གལ་ཏེ་གཙུག་ལག་ཁང་གི་ཁྱམས་ན་ཚད། །སྒོ་ང་མེད་ན་སྡོམ་བརྩོན་བསལ་བར་བྱ། །དཔེ་ཙམ་ཡིན་པས་སྡོམ་གྱི་ཚད་ཡང་ཡིན། །ད་ནི་མ་བྱིན་ཕྱོགས་མཐུན་བཤད་པར་བྱ། །གཙུག་

---

^{[མ་དཔེ་གཟིགས་ན་འདིར་གནོན།]}

ལག་ཁང་གི་ཁྱམས་ན་བྱིའུ་ལ་སོགས་པའི་གནས་ཆང་གང་དག་ཡོད་པ་དེ་དག་སྒོ་ང་མེད་པ་ཡིན་ན་བརྟུལ་ཞུགས་ཅན་གྱིས་བསལ་བར་བྱ་སྟེ། །གཞན་དག་ནི་མ་ཡིན་ནོ། །དེ་ནི་དཔེར་བརྗོད་པ་ཙམ་ཡིན་པས་དེ་བཞིན་དུ་རྒྱལ་སོགས་པ་ལ་ཡང་ལྟུང་བ་མེད་པ་ཡིན་ནོ། །ད་ནི་མ་བྱིན་ལེན་པའི་ཕྱོགས་དང་མཐུན་པ་བརྗོད་པར་བྱ་བ་ཡིན་པས་དེ་བཤད་དོ། །གང་གིས་བ་དན་མལ་སྟན་སོགས་བྱིན་ནས། །ཡིད་ལ་གཅགས་པའི་མེ་ནི་འབར་བྱེད་ན། །བསྡམ་བྱ་ལས་ཐར་བྱ་ཕྱིར་དེ་ལ་ནི། །སླར་སྦྱིན་བུམ་ཆུས་མ་ལུས་ཞི་བར་བྱ། །གང་ཞིག་གིས་བ་དན་ལ་སོགས་པ་བྱིན་ནས་ཡིད་ལ་གཅགས་པའི་མེ་འབར་བར་བྱེད་ན་དེའི་ཡིད་ལ་གཅགས་པའི་མེ་མ་ལུས་པར་ཞི་བར་བྱ་སྟེ། བསྡམ་པར་བྱ་བའི་ཁ་ན་མ་ཐོ་བ་སྤང་བའི་ཕྱིར་རོ། །སླར་སྦྱིན་པ་ཉིད་བུམ་པའི་ཆུ་སྟེ་དེ་རྣམས་ཀྱིས་ཞི་བར་བྱའོ། །གཞན་དུ་ན་ནི་བསྡམ་པར་བྱ་བའི་ཉེས་བྱས་སུ་འགྱུར་རོ། །གཞན་ཡང༌། གནང་བ་མེད་པར་གཞན་གྱིས་གོས་སྤྱོད་དང༌། །ཁྱིམ་དུ་སྟན་ལ་མ་བསྟབས་འདུག་པ་དང༌། །བརྟུལ་ཞུགས་ཅན་ལ་གོས་སོགས་བྱིན་ནས་ཁྲོས། །སྡང་དང་ལྡན་པའི་བསམ་པས་འཕྲོག་པ་དང༌། །ལྷུང་བཟེད་ལ་སོགས་བརྐམ་པས་ནན་གྱིས་སློང༌། །བཞད་གད་ཀྱིས་ནི་ལྷུང་བཟེད་ལ་སོགས་སྦེད། །ཁྲོས་པས་སྡོམ་བརྩོན་གཙུག་ལག་ཁང་འབྱིན་སོགས། །རྐུན་པོས་སྐྱེ་བོ་མེད་པར་བོར་ལེན་དང༌། །སྡོམ་བརྩོན་སྔ་ནས་འཁོད་ལ་ཕྱིས་མནན་ནས། །མལ་དང་སྟན་ལ་སྤྱོད་པར་བྱེད་པ་དང༌། །རྙེད་པ་དག་ཀྱང་གཞན་དུ་སྡོ་བྱེད་པ། །གཞན་གྱི་རྫས་ཀྱི་ཕྱོགས་མཐུན་དཔེ་ཡིན་ནོ། །གནང་བ་མེད་པར་ཕ་རོལ་གྱི་གོས་ལ་སྤྱོད་པ་དང༌། ཁྱིམ་དག་ཏུ་སྟན་ལ་མ་བསྟབས་པར་འདུག་པ་དང༌། གོས་ལ་སོགས་པ་བྱིན་པ་ལས་ཞེ་སྡང་གི་སེམས་ཀྱིས་འཕྲོག་པ་དང༌། ཆགས་པས་ནན་གྱིས་སློང་བར་བྱེད་པ་དང༌། བཞད་གད་ཀྱི་ཕྱིར་ལྷུང་བཟེད་ལ་སོགས་པ་སྦེད་པ་དང༌། ཁྲོས་པས་སྡོམ་བརྩོན་གཙུག་ལག་ཁང་ནས་འབྱིན་པ་དང༌། ཆོམ་རྐུན་རྣམས་ཀྱིས་ཤིང་ཏ་ལ་དང་བུ་རམ་ཤིང་གི་སྡོང་བུ་ལ་སོགས་པ་སྐྱེ་བོ་མེད་པའི་སར་བོར་བ་དག་ལེན་པ་དང༌། སྡོམ་བརྩོན་སྔ་ན་གནས་པ་རྣམས་ལ་ཞེ་སྡང་གིས་མལ་ལ་སོགས་པ་སྤྱོད་པ་དང༌། གཞན་དུ་རྙེད་པ་བསྡོས་པ་

---

^{[མ་དཔེ་གཟིགས་ན་འདིར་གནོན།]}

ལས་སྡོ་བར་བྱེད་པ་དང༌། འདི་དག་ནི་མ་བྱིན་པར་ལེན་པའི་ཕྱོགས་དང་མཐུན་པའི་དཔེར་བརྗོད་པ་ཡིན་ནོ། །འདི་སྙམ་དུ་ཞེ་སྡང་གིས་འཕྲོག་པ་ཇི་ལྟར་ཕྱོགས་དང་མཐུན་པ་ཡིན་སྙམ་དུ་སེམས་ན། བཤད་པ། རང་གི་ཡིན་པར་འདུ་ཤེས་པ་དང་ལྡན་པའི་ཕྱིར་རོ། །དེ་ལྟར་ཡང་འདིར་རྣམ་པར་བྱེད་པ་ལས་དགའ་བོ་ཁྲོས་ནས་སྨྲས་པ་དང༌། གླེན་པ་ཅི་དས་ཁྱོད་ལ་ཆོས་རྣམས་ལ་ཆོས་དང་ལྡན་པས་སྣམ་སྦྱར་བྱིན་ནམ། འོན་ཀྱང་ངས་ནི་ལྷན་ཅིག་འགྲོ་བར་བྱའོ་སྙམ་ནས་ཡིན་གྱི་གལ་ཏེ་མི་འགྲོ་ན་སྣམ་སྦྱར་འོན་ཅིག་འབྱུང་བ་ལྟ་བུ་སྟེ། དེ་ལྟ་བས་ན་རྐུ་སེམས་མེད་ན་རང་གིས་བྱིན་པ་འཕྲོག་པ་ལ་ཁ་ན་མ་ཐོ་བ་འདི་ཡིན་ནོ། །རྐུ་སེམས་ཡོད་ན་ནི་མ་བྱིན་པར་ལེན་པར་འགྱུར་བར་རིག་པར་བྱའོ། །དེ་ལྟར་ཡིན་ན་ཡང་དེ་ནི་ཕྱོགས་དང་མཐུན་པ་ཉིད་ཡིན་པར་མི་རིགས་ཏེ། འདི་ལྟར་འཕྲོག་པའི་སྤང་བའི་ལྟུང་བྱེད་ཀྱི་གཞུང་ལས། དགེ་སློང་མ་དང་དགེ་ཚུལ་དང་དགེ་ཚུལ་མ་ལས་ཉེས་བྱས་སུ་འགྱུར་རོ་ཞེས་འབྱུང་བ་ཡིན་ནོ་ཞེ་ན། དེ་ནི་ཉེས་པ་མེད་དེ། ཡིད་ཀྱིས་བྱས་པའི་ཉེས་བྱས་ཁོ་ན་ལ་ཉེས་བྱས་ཞེས་གསུངས་པ་ཡིན་པས་སོ། །སྡང་བ་དང་ལྡན་པའི་བསམ་པས་ཞེས་བྱ་བ་ནི་ཕན་པར་འདོད་པས་ནི་ཉེས་པ་མེད་པར་བསྟན་པའི་ཕྱིར་རོ། །དེ་ལྟར་ཡང་འདིར་གཞུང་ནི་དོན་གཞན་ཉིད་དང་འདུལ་བའི་རྒྱུ་ཉིད་ཀྱིས་ན་ལྟུང་བ་མེད་པ་ཡིན་ནོ་ཞེས་འབྱུང་བ་ཡིན་ནོ། །དེ་ལ་དོན་གཞན་ཉིད་ཀྱིས་ནི་དུས་མ་ཡིན་པར་འགྲོ་བས་མ་བྱིན་པར་ལེན་པར་བྱེད་པས་ཁྱེར་ན་མི་རུང་ངོ་སྙམ་པས་སོ། །འདུལ་བའི་རྒྱུ་ཉིད་ཀྱིས་ནི་སྡིག་པའི་གྲོགས་པོ་རྣམས་དང་ལྷན་ཅིག་འགྲོ་བས་ཞེས་བྱ་བ་ལ་སོགས་པ་ཡིན་ནོ། །རྙེད་པ་དག་ཀྱང་གཞན་དུ་སྡོ་བྱེད་པ། །ཞེས་བྱ་བ་འདི་ནི་གནས་སྐབས་རུང་བར་བྱེད་པ་ལ་གསུངས་པ་ཡིན་གྱི། དེ་ལྟ་བུའི་རྐྱེན་ཞིག་ཡོད་ནས་ངེས་པ་བཞི་མ་གཏོགས་པ་གཞན་དུ་སྒྲུབ་པར་བྱེད་པ་ལ་ཉེས་པ་མེད་དོ། །འདིར་གཞུང་ནི་སིལ་བུ་ལས། དགེ་སློང་དག་བཞི་པོ་འདི་དག་ནི་ངེས་པའི་རྙེད་པ་ཡིན་ཏེ། བྱང་ཆུབ་ཆེན་པོ་ལ་བསྔོས་པ་དང༌། ཆོས་ཀྱི་འཁོར་ལོ་ལ་བསྔོས་པ་དང༌། ཆོ་འཕྲུལ་ཆེན་པོ་ལ་བསྔོས་པ་དང༌། ལྷ་ཡུལ་ནས་གཤེགས་པ་ལ་བསྡོས་པ་སྟེ། དེ་དག་ལ་བརྣག་པ་བྱས་

---

^{[མ་དཔེ་གཟིགས་ན་འདིར་གནོན།]}

པ་རྣམས་ནི་གཞན་དུ་བསྔོ་བར་མི་བྱའོ། །གཞན་དག་ལ་བརྣག་པ་བྱས་པ་ནི་དེ་ལྟ་བུའི་རྐྱེན་ཞིག་བྱུང་ན་གཞན་དུ་བསྔོ་བར་བྱ་སྟེ་འདི་ལ་འགྱོད་པར་མི་བྱའོ་ཞེས་འབྱུང་བ་ཡིན་ནོ། །དགེ་ཚུལ་གྱི་ཚིག་ལེའུར་བྱས་པའི་འགྲེལ་པ་ལས་བསླབ་པའི་གཞི་གཉིས་པའི་འགྲེལ་པ་རྫོགས་སོ།། །གང་ཞིག་འཇིགས་མེད་ངོ་ཚ་མེད་ཆགས་ཕྱིར། །ཡན་ལག་ཆ་ཀུན་གཟུང་བར་བཟོད་པ་ཡིས། །ལམ་གྱི་གཞུག་ཏུ་རུང་དང་མ་ཉམས་པའི། །པགས་པ་སྤུ་གུའི་ཁ་དང་སོ་ལས་མཐར། །ནོར་བུ་ནད་མེད་ལས་རུང་དྲུད་ནས་ནི། །ཆགས་པས་རེག་པའི་བདེ་རྣམས་མྱོང་སྟེ་ཉམས། །འདིར་ཡང་ཐ་མལ་རྨི་ལམ་མིན་བསླབ་བཅས། །ཞེས་སྦྱར་ཕྱི་མ་ལ་ཡང་དེ་བཞིན་ནོ། །དགེ་ཚུལ་འདོད་ཆགས་ཀྱི་མེ་རབ་ཏུ་འབར་བ་འཇིགས་པ་མེད་པ་དང༌། ངོ་ཚ་མི་ཤེས་པ་གང་ཞིག་གིས་བུད་མེད་ཡན་ལག་ཐམས་ཅད་ལ་བཟུང་དུ་རུང་བའི་བུག་དང་པགས་པའི་རིམ་པ་ལ་སོགས་པ་གཞུག་ཏུ་རུང་བ་མ་ཉམས་པར་ནོར་བུས་པགས་པའི་རིམ་པ་ལ་སོགས་པ་ཕན་ཆད་དུ་དྲུད་ནས་རེག་པའི་བདེ་བ་ཉམས་སུ་མྱོང་བར་བྱེད་ན་དེ་ནི་མཐར་འགྱུར་བའི་སྤྲུལ་གདུག་པས་དབང་མེད་པར་བྱས་པས་ངེས་པར་ཉམས་པ་ཡིན་ནོ། །འདིར་ཡང་ཐ་མལ་པ་ཉིད་དང༌། རྨི་ལམ་མ་ཡིན་པ་ཉིད་དང༌། བསླབ་པ་མ་བཏང་བ་ཉིད་ཅེས་བྱ་བའི་ཡན་ལག་རྣམས་རྗེས་སུ་སྦྱར་བར་བྱ་བ་ཁོ་ན་ཡིན་ཏེ། བསླབ་པའི་གཞི་འོག་ནས་འབྱུང་བ་ཕྱི་མ་རྣམས་ལ་ཡང་དེ་བཞིན་ནོ། །གཞན་དུ་ན་བསླབ་པ་བཅས་པ་མི་འཐད་པའི་ཕྱིར་རོ། །འཇིགས་མེད་ཅེས་བྱ་བ་ནི་འདུལ་བྱེད་ལས། ཀླུའི་བུ་མོ་ཞིག་དགེ་སློང་གི་དྲུང་དུ་འོངས་ནས་འདི་སྐད་ཅེས་བཙུན་པ་ཚུར་སྤྱོན་མི་ཚངས་པར་སྤྱོད་པ་བགྱིའོ་ཞེས་སྨྲས་པ་དང༌། དེས་དེ་ལ་ཁས་བླངས་ནས་དེས་གཞུག་པར་བྱའོ་སྙམ་སྟེ་རྨར་གནོད་པར་བྱས་སོ། །དེ་ཡང་རིང་པོར་གྱུར་པ་དང་དགེ་སློང་དེ་འཇིགས་པ་སྐྱེས་པ་ནས། བཅོམ་ལྡན་འདས་ཀྱིས་བཀའ་སྩལ་པ། འཇིགས་པ་ལ་འདོད་ཆགས་མེད་པས་ཕམ་པའི་ལྟུང་བ་ནི་མེད་དེ། དམན་པ་སྦོམ་པོར་འགྱུར་རོ་ཞེས་བྱ་བའི་བར་དུ་འབྱུང་བ་ཡིན་ནོ། །སློབ་དཔོན་རྣམས་ན་དེ་རྨར་གནོད་པ་བྱས་ཞེས་བྱ་བ་ལ་གནོད་པ་ནི་སྤྱིང་བ་ལ་བྱ་སྟེ། རྨར་སྤྱིང་ཞེས་

---

^{[མ་དཔེ་གཟིགས་ན་འདིར་གནོན།]}

བྱ་བའི་ཐ་ཚིག་གོ །འདི་ག་ལས་ཤེས་ཤེ་ན། རེ་ལྡེས་ཆོད་པ་ན་ཟོ་ཆུན་འདྲེན་པར་བྱེད་པ་ལ་ཀུན་ཏུ་ཆགས་པས་ཡན་ལག་གི་རྣམ་པས་ཡན་ལག་གི་རྣམ་པ་ལ་རེག་ཅེས་གསུངས་པའི་ཕྱིར་རོ། །དེར་ནི་མ་བཅུག་པར་གྱུར་པའི་རེག་པ་ལས་དགོངས་པ་ཡིན་ལ། འདིར་ནི་འཇིགས་པ་ལ་ཀུན་དུ་ཆགས་པ་མེད་པས་ཞེས་རྒྱུ་གསུངས་པའི་ཕྱིར་བཅུག་པར་གྱུར་པའི་གནོད་པར་ནི་རོ་མྱང་བ་མེད་པར་བཅུག་པར་གྱུར་པའི་ཕྱིར་སྦོམ་པོ་ཡིན་ནོ་ཞེས་འཆད་དོ། །རིང་པོར་གྱུར་པ་ཞེས་བྱ་བ་ནི་འདིར་ལྔ་ཚན་ལས། ཀླུ་སྦྲུལ་གྱི་རང་གི་ལུས་སུ་མངོན་པར་འགྲུབ་པ་ལ་རྒྱུ་ལྔ་དག་དང༌། རྐྱེན་ལྔ་དག་ཡོད་དེ། ལྔ་པོ་གང་དག་ཅེ་ན། གང་གི་ཚེ་སྐྱེ་བ་དང་གང་གི་ཚེ་འཆི་བ་དང༌། གང་གི་ཚེ་གཉིད་ཀྱིས་ལོག་པ་དང༌། གང་གི་ཚེ་ཁྲོས་པ་དང༌། གང་གི་ཚེ་མི་ཚངས་པར་སྤྱོད་པ་འཁྲིག་པའི་ཆོས་སྟེན་པར་བྱེད་པའོ། །དེའི་ཕྱིར་འཁྲིག་པའི་གནས་སྐབས་ན་དེ་རིང་པོར་གྱུར་པ་ཡིན་ནོ། །ངོ་ཚ་མེད་ཅེས་བྱ་བའི་གཞུང་ནི་འདིར་འདུལ་བྱེད་ལས། དགེ་སློང་འདོད་ཆགས་ཀྱིས་ཀུན་ནས་དཀྲིས་པས་གནོད་པར་གྱུར་པ་ན་དེ་མའི་དྲུང་དུ་སོང་སྟེ། མལ་འདོད་ཆགས་ཀྱིས་རྐུན་ནས་དཀྲིས་པས་གནོད་པར་གྱུར་ཏོ་ཞེས་སྨྲས་པ་དང༌། བུ་གང་ཁོ་ན་ནས་བྱུང་བ་དེ་ཉིད་དུ་སྒྲུབས་ཤིག །རེ་ཞིག་ན་དེ་ཁོ་ན་བཞིན་དུ་དེས་གཞུག་པར་བྱའོ་སྙམ་ནས་རྨར་གནོད་པ་བྱས་པ་ལས་དེ་ངོ་ཚ་བའི་ཆོས་ཀྱིས་ནོན་པ་དང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ངོ་ཚ་ཤེས་པ་ལས་ཀུན་དུ་ཆགས་པ་མེད་པས་ཕམ་པའི་ལྟུང་བ་ནི་མེད་དེ། དམན་པ་སྦོམ་པོར་འགྱུར་རོ་ཞེས་བྱ་བའི་བར་དུ་འབྱུང་བ་ཡིན་ནོ། །འདིར་ཡང་བཅུག་པར་གྱུར་པའི་གནོད་པ་བྱས་པ་ནི་ཀུན་ཏུ་ཆགས་པ་མེད་པའི་ཕྱིར་སྦོམ་པོར་འགྱུར་བར་རྟོགས་པར་བྱའོ། །ཡན་ལག་ཆ་ཀུན་གཟུང་བར་བཟོད་པ་ཡི། །ཞེས་བྱ་བ་ནི་ཞུས་པ་ལས། བཙུན་པ་སྐྱེས་པས་བུད་མེད་ཅི་འདྲ་བ་དང་ལྷན་ཅིག་མི་ཚངས་པར་སྤྱད་ན་མཐར་འགྱུར་ལགས། གང་ཞིག་གིས་ཡན་ལག་ཐམས་ཅད་གཟུང་བར་རུང་བའོ། །དུད་འགྲོའི་སྐྱེ་གནས་སུ་གྱུར་པ་ལ་ཡང་དེ་བཞིན་དུ་བརྗོད་པར་བྱའོ། གལ་ཏེ་ཡན་ལག་ཐམས་ཅད་གཟུང་བར་མི་རུང་ན་ཉེས་པ་

---

^{[མ་དཔེ་གཟིགས་ན་འདིར་གནོན།]}

སྦོམ་པོར་འགྱུར་རོ་ཞེས་གསུངས་པ་ཡིན་ནོ། །གལ་ཏེ་དེ་ལྟར་ཡིན་ན་རྐེད་པར་ཆད་པ་ལ་མཐར་མི་འགྱུར་ཏེ། དེ་ནི་ཡན་ལག་ཐམས་ཅད་ལ་གཟུང་དུ་མི་རུང་བས་སོ། །དེ་བཞིན་དུ་རང་གི་རྨལ་མཚན་རིངས་དང་རྒྱབ་མཉེན་གཉིས་ཀྱང་ལོགས་ཤིག་ན་མེད་པས་ཡན་ལག་ཐམས་ཅད་གཟུང་བར་མི་སྲིད་པའི་ཕྱིར་རོ་ཞེ་ན། དེ་ནི་མ་ཡིན་ཏེ། གང་གི་ཕྱིར་ཡན་ལག་ཇི་སྙེད་ཀྱི་འཁྲིག་པའི་རོའི་ལྟུང་བ་འབྱུང་བ་དེ་སྙེད་ལ་ཐམས་ཅད་ཀྱི་སྒྲས་བསྡུས་པ་ཡིན་ཏེ། དཔེར་ན་མཚན་དང་རྐེད་པར་དང་སེམས་ཅན་དུ་བགྲང་བའི་འཇམ་པ་དང་ཇི་ལྟར་འཁྱུད་ཀྱང་རུང་སྟེ། རོ་སྨད་ཀྱི་བུ་ག་གསོག་མ་ཡིན་པའི་ངོ་བོར་སྣང་བ་ལ་སོགས་པ་ལྟ་བུ་མིན་པར་རིག་པར་བྱའི། ཕྱི་རོལ་གྱི་ཡན་ལག་ལག་པ་ལ་སོགས་པ་ནི་མ་ཡིན་ཏེ། འདི་ལྟར་མཚན་མེད་ན་ཆུང་བར་གསུངས་ཏེ། མཚན་པོར་ནས་བྱེད་ན་སྦོམ་པོའོ་ཞེས་གསུངས་པ་ཡིན་ནོ། །རྐེད་པ་ལ་རེག་པར་བྱེད་ན་ཡང་དེ་དང་འདྲ་སྟེ། བུད་མེད་ཀྱི་མཚན་བཅད་ནས་འཇུག་པར་བྱེད་པ་སྦོམ་པོ་ཞེས་འབྱུང་བ་ཡིན་ནོ། །སེམས་ཅན་དུ་བགྲང་བའི་འཇམ་པ་མེད་ན་ཡང་ཆུང་བ་ཡིན་ཏེ། འདུལ་བྱེད་ལས་དགེ་སློང་གིས་ཤིང་ལས་བྱས་པའི་གཟུགས་བརྙན་བྱད་བཟང་བ། བལྟ་ན་སྡུག་པ། མཛེས་པ་ཞིག་མཐོང་ངོ༌། །དེ་མཐོང་བ་དང་ཆགས་པའི་ཆོས་སྐྱེས་ནས། དེས་དེ་ལ་གཞུག་གོ་སྙམ་ནས་རྨར་གནོད་པ་བྱས་པ་དང༌། དེས་ཀྱང་མདོམས་ཕྱེ་བ་དང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་ཡན་ལག་ཐམས་ཅད་ཀྱིས་རེག་པར་བྱེད་ན་ཕམ་པར་འགྱུར་རོ། འོན་ཏེ་དེས་དབང་པོ་འབྱེད་པར་བྱེད་ན་དམན་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །དབང་པོ་ཙམ་ཁོ་ན་ཞིག་འབྱེད་པར་བྱེད་ཀྱི། ལྷག་མ་ནི་སེམས་ཅན་དུ་བགྲང་བའི་འཇམ་པ་དང་བྲལ་བ་ཁོ་ན་ཡིན་ནོ་ཞེས་བྱ་བའི་ཐ་ཚིག་གོ །རོ་སྨད་ཀྱི་བུ་ག་གསོག་གི་རང་བཞིན་ལ་བསྟེན་ན་ཡང་ཆུང་བ་ཡིན་ཏེ། དཔེར་ན་མགོ་བོ་བཅད་པའི་ཁར་ཡིན་ན་སྦོམ་པོ་ཞེས་འབྱུང་བ་ལྟ་བུའོ། །འདིར་གལ་ཏེ་ཁ་ལ་སེམས་ཅན་དུ་འགྲང་བའི་འཇམ་པ་ཡོད་ཀྱང་འོན་ཀྱང་ལུས་ལས་ལོགས་ཤིག་ཏུ་བྱས་པའི་ཕྱིར་ལོགས་ཤིག་ཏུ་བྱས་པའི་མོ་མཚན་དང་འདྲ་བ་གསོག་ཉིད་དུ་

---

^{[མ་དཔེ་གཟིགས་ན་འདིར་གནོན།]}

ཡིད་ལ་གནས་པའི་ཕྱིར་སྦོམ་པོར་རྣམ་པར་གཞག་གོ །དེ་ལྟ་བས་ན་རྐེད་པར་ཆད་པ་ལ་སོགས་པའམ། རང་གི་རྨལ་ཡང་མཐར་མི་འགྱུར་བ་ཐལ་བ་མེད་དོ། །གཞན་དག་ན་རེ་ནི་ཡན་ལག་ཐམས་ཅད་ཀྱིས་ཞེས་བྱ་བ་ནི་ལུས་ཀྱི་ཆ་ཐམས་ཅད་ཀྱི་ཡིན་ནོ། །འདིར་ཁུངས་ནི་འདུལ་བྱེད་ལས། བུད་མེད་གཅར་བུ་ཞིག་རེ་ལྡེས་ཆོད་པ་ན་ཟོ་ཆུན་འདྲེན་པར་བྱེད་པ་ལས། དགེ་སློང་གིས་དེའི་རེ་ལྡེས་ཆོད་པའི་ཡན་ལག་གི་རྣམ་པ་མཐོང་ངོ༌། །དེས་མཐོང་ནས་ཀུན་ཏུ་ཆགས་པར་གྱུར་ཏེ། དེས་ཡན་ལག་གི་རྣམ་པས་དེའི་ཡན་ལག་གི་རྣམ་པ་ལ་རེག་པར་བྱས་པས་དེ་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ཕམ་པའི་ལྟུང་བ་ནི་མེད་དེ། དམན་པ་སྦོམ་པོར་འགྱུར་རོ་ཞེས་གསུངས་པ་ཡིན་ཏེ། འདི་ལྟར་འདིར་ནི་ཡན་ལག་ཐམས་ཅད་ལ་བཟུང་བ་མེད་པས་དམན་པ་སྦོམ་པོ་ཞེས་བྱ་བར་དགོངས་པ་ཡིན་ནོ། །རྐེད་པར་ཆད་པ་ལ་སོགས་པ་ནི་རོའི་ཁྱད་པར་ཡང་ཡོད་ལ་བསྟེན་པར་བྱ་བ་ཡང་མ་ཚང་བ་མེད་པ་ཡིན་པས་དེ་ཉིད་དེའི་ཞེས་པའི་ངོ་བོ་ཡིན་ནོ། །མཚན་རིངས་དང་རྒྱབ་མཉེན་གཉིས་ལ་ཡང་བརྟེན་པར་བྱ་བ་དང༌། རྟེན་པར་བྱེད་པ་གཉིས་སུ་ཐ་དད་པ་ཉིད་ཡིན་ཏེ། འདི་ལྟར་རྟེན་པར་བྱེད་པའི་ཆ་ཡང་གཞན་ཡིན་ལ། བརྟེན་པར་བྱ་བའི་ཆ་ཡང་གཞན་ཡིན་པས་སོ་ཞེས་འཆད་དོ། །ཡང་གཞན་དག་ན་རེ་ཡན་ལག་གི་རྣམ་པས་ཡན་ལག་གི་རྣམ་པ་ལ་རེག་པར་བྱས་ཞེས་བྱ་བ་འདི་ནི་བཅུག་པའི་རེག་པ་ཁོ་ན་ལ་གསུངས་པར་ནི་མི་སྣང་ངོ༌། །འོ་ན་ཅི་ཞེ་ན། ཕྱི་རོལ་དུ་རེག་པ་ཙམ་ཉིད་ཡིན་ནོ། །གཞན་དུ་ན་ཡན་ལག་གི་སྦུ་གུ་ལ་དེ་ཙམ་ལས་ཕར་འདས་པ་ཞིག་ལྷུར་བྱ་བ་ཡིན་པར་ག་ལ་རྟོགས་ཏེ། རེ་ལྡེས་ཆོད་པ་ལ་དེ་ལྟ་བུའི་ཕྲད་པ་མི་སྲིད་པའི་ཕྱིར་རོ། །དེའི་ཕྱིར་ཁུངས་མ་ཡིན་ནོ། །རྐེད་པར་ཆད་པ་ལ་སོགས་པ་ལ་རོའི་ཁྱད་པར་ཉིད་འབྱུང་ངོ་ཞེས་བྱ་བ་ཉིད་ཀྱང་བསྒྲུབ་པར་བྱ་བ་ཉིད་ཡིན་ནོ་ཞེས་འཆད་དོ། །ཡིན་ནི་འདི་ལྟར་ཡིན་ཏེ། སེམས་ཅན་དུ་བགྲང་བའི་འཇམ་པ་ཡང་ཡོད་དོ། །རོ་སྨད་ཀྱི་བུ་ག་གསོག་མ་ཡིན་པར་སྣང་བ་ཡང་ཡོད་ན། བརྟེན་པར་བྱ་བ་གང་དུ་ཡན་ལག་གི་སྦུ་བུ་བཅུག་པ་ན་སྟེང་དང་འོག་ལ་

---

^{[མ་དཔེ་གཟིགས་ན་འདིར་གནོན།]}

ཐུག་པར་གྱུར་པའི་རྨའི་ཆ་ཇ་སྙེད་པ་དག་དང་ཕྲད་པ་ལས་བདེ་བ་འབྱུང་བར་འགྱུར་བའི་རྨའི་ཆ་དེ་དག་ཉིད་འདིར་ཡན་ལག་དག་ཏུ་རིག་པར་བྱའི། ཕྱི་རོལ་གྱི་ཡན་ལག་ལག་པ་ལ་སོགས་པ་ཉིད་མ་ཡིན་ནོ་ཞེས་བྱ་བར་བསྟན་པར་བྱ་བ་ཡིན་ནོ། །ཞལ་ལ་འོངས་པ་རྫོགས་སྷོ།། །།གཞུག་ཏུ་རུང་ཞེས་བྱ་བ་ནི་ལམ་སྐབས་དབྱེ་བར་བཟོད་པ་ཞེས་བྱ་བའི་ཐ་ཚིག་གོ །འདིར་གཞུང་ནི་འདུལ་བྱེད་ལས། དགེ་སློང་གཅིག་པུ་ཞིག་དགོན་པ་ན་འདུག་པ་ལས། དེ་དང་ཧ་ཅང་ཐག་མི་རིང་བ་ཞིག་ཏུ་གླང་པོ་ཆེ་མོ་ཞིག་བཙས་ཏེ། དེ་ལས་གླང་པོ་ཆེ་ཕྲུ་གུ་མོ་ཞིག་བྱུང་ངོ༌། །དེའི་མ་སྤྱོད་ཡུལ་ལ་སོང་བ་དང༌། དགེ་སློང་དེའི་གན་དུ་འོངས་སོ། །དེས་ཀྱང་དེ་ལ་རྩྭ་དག་བྱིན། ཆུ་དག་བླུད་དོ། །དེས་དེ་ཉལ་བ་དང་ཡན་ལག་གི་རྣམ་པ་ཁ་བྱེ་བ་མཐོང་ངོ༌། །དེས་དེ་མཐོང་ནས་ཆགས་པར་གྱུར་ཏེ། དེ་དེར་བཅུག་པ་ལས་གཞུག་ཏུ་མ་རུང་བ་དང༌། དེ་འགྱོད་པ་སྐྱེས་པ་ནས། བཅོམ་ལྡན་འདས་ཀྱིས་བཀའ་སྩལ་པ། གང་དུ་གཞུག་ཏུ་མི་རུང་ན་དམན་པ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ། །གཞུག་པ་དེ་སྤྱད་དུ་མི་རུང་བ་ནི་ལམ་ཆུང་བ་ཉིད་ཀྱི་ཕྱིར་རོ་ཞེས་བྱ་བའི་ཐ་ཚིག་གོ །དོན་འདི་ཉིད་ཞུས་པ་ལས་ཀྱང༌། མ་ནིང་ལ་འཇུག་པར་བྱེད་པ་ལས་གང་ལ་སྐབས་མེད་པ་དང༌། ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ཏེ། ཡན་ལག་གི་སྤུ་གུ་ཆུད་པར་མི་བྱེད་པ་ནི་བུ་ག་ཆུང་བའི་ཕྱིར་རོ་ཞེས་བྱ་བའི་ཐ་ཚིག་གོ །མ་ཉམས་པའི་ཞེས་བྱ་བ་ནི་ལམ་ཞེས་བྱ་བ་དང་སྦྱར་རོ། །འོ་ན་རྣམ་པར་འབྱེད་པ་ལས། བུད་མེད་མ་ཉམས་པ་ཞེས་འབྱུང་བ་མ་ཡིན་ནམ། །གཞུང་འདིས་ནི་མ་ཉམས་པ་ཞེས་བྱ་བ་བུད་མེད་ཀྱི་ཁྱད་པར་ཡིན་པར་སྦྱར་བ་ཡིན་ནོ་ཞེ་ན། བདེན་ཏེ་འོན་ཀྱང་དོན་འདི་ལ་རྨའི་སྒོར་གཏོགས་པའི་མ་ཉམས་པ་ལས་གཞན་པའི་མ་ཉམས་པ་ཉིད་ན་དགོས་པ་མེད་པ་སྟེ། འདི་ནི་ཆ་ཤེས་ཀྱི་སྒོ་ནས་སྤྱི་ལ་གདགས་པ་ཡིན་ཏེ། ཞར་བ་དང་ལག་རྡུམ་ཞེས་གདགས་པ་དང་འདྲ་བ་ཡིན་ནོ་ཞེས་ཁོང་དུ་ཆུད་པར་བྱ་སྟེ། ལམ་གྱི་ཁྱད་པར་ཡིན་པར་བཤད་པ་ཡིན། འདིར་ཁུངས་ཀྱང་ཞུས་པ་ལས། གང་གི་རྨའི་སྒོ་ཟོས་པ་དང་རུལ་བ་ཞེས་བྱ་བ་ལ་སོགས་པ་འབྱུང་བ་ཡིན་ནོ། །

---

^{[མ་དཔེ་གཟིགས་ན་འདིར་གནོན།]}

ཅི་སྟེ་ཅིའི་ཕྱིར་རྣམ་པར་འབྱེད་པ་ལས། ཆ་ཤས་ཀྱི་སྒོ་ནས་སྤྱི་ལ་གདགས་པར་མཛད་ཅེ་ན། ལུས་ལས་ཐ་དད་པར་མ་གྱུར་པའི་རྨ་ལ་ཡིན་ན་མཐར་འགྱུར་རོ་ཞེས་བསྟན་པའི་ཕྱིར་རོ། །དེ་ལྟར་ཡང་ཞུས་པ་ལས། མོ་མཚན་ཆད་པར་འཇུག་པར་བགྱིད་ན་ཅིར་འགྱུར་ལགས། བཀའ་སྩལ་པ། ཉེས་པ་སྦོམ་པོར་འགྱུར་རོ། །དེ་བཞིན་དུ་མགོ་བོ་ཆད་པའི་བུད་མེད་དང་ལྷན་ཅིག་ཏུ་རྣམ་པར་ཉམས་པར་བགྱིད་ན་ཅིར་འགྱུར་ལགས་ཞེས་བྱ་བ་ནས་ཁའི་སྒོ་རྣམ་པར་ཉམས་པར་བྱེད་ན་ཉེས་པ་སྦོམ་པོར་འགྱུར་རོ་ཞེས་བྱ་བའི་བར་དུ་རྒྱ་ཆེར་གསུངས་པ་ཡིན་ནོ། །འོ་ན་དེ་ལུས་ལས་ཐ་དད་པར་མ་གྱུར་པ་ཞེས་སྨོས་པར་བྱ་མོད་ཅེ་ན་མི་བྱ་སྟེ། ཡན་ལག་ཆ་ཀུན་གཟུང་བར་བཟོད་པ་ཡི། །ཞེས་བྱ་བ་འདི་ཁོ་ནས་འགྲུབ་པའི་ཕྱིར་རོ། །འོ་ན་ལུས་སུ་གཏོགས་པའི་ཉམས་པ་ཡང་ཅིའི་ཕྱིར་མི་གཟུང་ཁུངས་ཀྱང་ཡོད་དེ། འདུལ་བྱེད་ལས་བསྲེགས་པ་སྤུ་མེད་པ་དང་ལྷན་ཅིག་རྣམ་པར་ཉམས་པར་བྱེད་ན་དམན་པ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ་ཞེ་ན། དེ་ནི་ཁུངས་མ་ཡིན་ཏེ། དེ་ལས་ནི་ལུས་ཀྱི་སྒོ་ནས་ཆ་ཤས་ཉམས་པ་བསྟན་པ་ཡིན་ནོ། །ཇི་སྟེ་འདི་ག་ལས་ཤེས་ཤེ་ན། བུད་མེད་ཕྱེད་ཤགས་སུ་གཤགས་པ་ནི་གང་གི་ཕྱིར་དེའི་རྨར་གཏོགས་པའི་རྣམ་པར་ཉམས་པ་ཁོ་ན་ཡིན་པར་གསུངས་པས་སོ། །གཞན་ཡང་གལ་ཏེ་འདིར་ལུས་ལ་རེག་པར་འདོད་ན་ནི་དེའི་ཚེ་འདུལ་བྱེད་ཀྱི་གཞུང་ལས། དགེ་སློང་མ་ཅི་ཁྱོད་ཀྱིས་རེག་པ་བདག་གིར་བྱས་སམ། གསོལ་པ། བཙུན་པ་བདག་གིས་རེག་པ་ཅིའི་སླད་དུ་བདག་གིར་བགྱིས་ཏེ། དཔེར་ན་ཐོང་ལྕགས་བསྲེགས་པ་དང་འདྲ་ལགས་སོ་ཞེས་འབྱུང་བ་ཡང་མི་རུང་བར་འགྱུར་རོ། །འདིར་ཐོང་ལྕགས་ནི་ཕོ་མཚན་གྱི་དཔེར་བྱ་བ་ཡིན་ནོ། །དེ་ནི་རྨ་ལ་རེག་པའི་དཔེ་ཡིན་ནོ། །དེ་ལྟ་བས་ན་རྨས་པ་ཡང་རྨར་གཏོགས་པ་ཉིད་ཡིན་པར་མངོན་ཏེ། ལུས་སུ་གཏོགས་པ་ནི་མ་ཡིན་ནོ། །པགས་པ་སྤུ་བུའི་ཁ་དང་སོ་ལས་ཕར། །ཞེས་བྱ་བ་ནི། འདུལ་བྱེད་ལས་དགེ་སློང་གིས་བཤང་བའི་ལམ་དུ་སྤུ་བུའི་ཁ་ལ་ནོར་བུ་འདའ་བར་བྱེད་ན་ཕམ་པར་

---

^{[མ་དཔེ་གཟིགས་ན་འདིར་གནོན།]}

འགྱུར་རོ། །ཁའི་ལམ་དུ་སོ་ལས་ནོར་བུ་འདའ་བར་བྱེད་ན་ཕམ་པར་འགྱུར་རོ། །གཅི་བའི་ལམ་དུ་པགས་པ་ལས་ནོར་བུ་འདའ་བར་བྱེད་ན་ཕམ་པར་འགྱུར་རོ་ཞེས་འབྱུང་བ་ཡིན་ཏེ། ཐམས་ཅད་ལ་ཡང་མཐར་འགྱུར་བའི་ཡན་ལག་རྣམས་ཚང་བའོ་ཞེས་བྱ་བར་ཁོང་དུ་ཆུད་པར་བྱའོ། །པར་འཇུག་པར་བྱེད་ན་མཐར་འགྱུར་རོ་ཞེས་གསུངས་པའི་ཕྱིར་ཚུན་ཆད་དུ་འཇུག་པར་བྱེད་ན་ཆུང་བ་ཡིན་པར་རྟོགས་པར་བྱའོ། །རྣམ་པར་འབྱེད་པ་ལས་ཀྱང༌། དགེ་སློང་གིས་གཅི་བའམ། ཁར་རམ། བཤང་བའི་ལམ་དུ་གཅི་བར་བྱེད་པ་འཇུག་པར་བྱེད་ན་བཅུག་མ་ཐག་ཏུ་ཕམ་པར་འགྱུར་རོ་ཞེས་གསུངས་པ་ཡིན་ནོ། །འདིར་ཡང་པགས་པ་དང་སྦུ་བུའི་ཁ་དང་སོ་ལས་ཕར་ནོར་བུ་འཇུག་པར་རིག་པར་བྱའོ། །པགས་པ་དང་སྦུ་བུའི་ཁ་དང་སོ་ལས་ཞེས་བྱ་བ་ཅི་དགོས་ཤེ་ན་གཞན་ཡང་ལྟུང་བ་ཆུང་བར་རབ་ཏུ་བསྟན་པའི་ཕྱིར་རོ། །དེ་ལྟར་ཡང་ཞུས་པ་ལས། ལུས་ལ་བུ་ག་བཏོད་དེ་རང་གི་ཡན་ལག་གི་རྣམ་པ་འཇུག་པར་བྱེད་ན་ཉེས་པ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ། །ནོར་བུ་ཞེས་བྱ་བ་ནི་བཀུག་སྟེ་འཇུག་པར་བྱེད་ན་ཆུང་བ་ཡིན་པར་བསྟན་ཏོ། །འདིར་གཞུང་ནི་ཞུས་པ་ལས། བཀུག་སྟེ་འཇུག་པར་བྱེད་ན་ཉེས་པ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ། །ནད་མེད་ལས་རུང་ཞེས་བྱ་བ་ལ། ནད་མེད་པ་སྨོས་པ་ནི་ཉམས་ན་ལྟུང་བ་ཆུང་བར་རབ་ཏུ་བསྟན་པའི་ཕྱིར་རོ། །འདིར་འདུལ་བྱེད་ཀྱི་གླེགས་བམ་ཁ་ཅིག་ལས། བཙུན་པ་དགེ་སློང་གིས་ཡན་ལག་གི་རྣམ་པ་གས་པ་འཇུག་པར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ་ཞེས་བྱ་བ་འབྱུང་ངོ༌། །གང་དག་མི་འདོད་པ་དེ་དག་གིས་ཀྱང་དོན་གྱིས་ཁོང་དུ་ཆུད་པར་བྱ་སྟེ། ཕོའི་དབང་པོ་ཉམས་པ་དང་མོའི་དབང་པོ་ཉམས་པར་རོ། །ཉམས་སུ་མྱོང་བ་མེད་པར་མཚུངས་པའི་ཕྱིར་རོ། །ཁྱད་པར་ཡོད་པ་མ་ཡིན་ནོ། །གང་དག་མི་འདོད་པ་དེ་དག་གིས་ཀྱང་དོན་གྱིས་ཁོང་དུ་ཆུད་པར་བྱ་སྟེ། རོ་མི་མྱང་བར་མཚུངས་པ་ཡིན་ཏེ། འཇུག་པ་ཉམས་པའི་ཕྱིར་དང༌། །མོ་མཚན་ཉམས་པའི་ཕྱིར་ཁྱད་པར་མེད་དོ། །གལ་ཏེ་དེ་ལྟ་ཡིན་ན་འདུལ་བྱེད་ལས་དགེ་སློང་ཞིག་པོའི་ནད་ཀྱིས་སྡུག་བསྔལ་བ་ལས་དེས་འཚོ་བྱེད་ལས། ཕོའི་ནད་བྱུང་བར་

---

^{[མ་དཔེ་གཟིགས་ན་འདིར་གནོན།]}

གྱུར་པ་ལས་དེས་བུད་མེད་ཀྱི་ཁར་བཅུག་པ་དང༌། དེ་ནད་དེ་ལས་ཐར་རོ་ཞེས་ཐོས་ནས་དེ་འདི་སྙམ་དུ་བདག་ལ་ལྟུང་བར་ཡང་མི་འགྱུར་བས་བུད་མེད་ཀྱི་ཁར་གཞུག་པར་བྱའོ་སྙམ་དུ་སེམས་པ་ན། བཅོམ་ལྡན་འདས་ཀྱིས་བཀའ་སྩལ་པ། བཅུག་མ་ཐག་ཏུ་ཕམ་པར་འགྱུར་རོ་ཞེས་བྱ་བའི་བར་ཇི་ལྟར་དྲང་ཞེ་ན། འདིར་བཤད་པ། ཉམས་པ་ཞེས་བྱ་བ་ནི་འཁྲིག་པའི་རོ་མྱང་དུ་མི་རུང་བ་གང་ཡིན་པའོ། །འདིར་ནི་དེ་ལྟ་བུར་ཉམས་པ་མ་ཡིན་པ་ལས་ཞེས་དེ་ལྟར་དྲང་ངོ༌། །འདིར་ཞུས་པ་ལས། གང་གིས་རྨའི་སྒོ་རུལ་བ་དང་ཞིགས་པ་དང་ཞེས་འབྱུང་བ་ལ་སོགས་པའི་རྣམ་གྲངས་དག་གིས་རོ་མྱང་དུ་མི་རུང་བ་ཉིད་ཡིན་པར་སྟོན་ཏོ། །ལས་རུང་ཞེས་བྱ་བ་ནི་ལས་སུ་མི་རུང་བ་ཞིག་ཡིན་ན་རུང་བ་ཡིན་ནོ་ཞེས་རབ་ཏུ་བསྟན་པའི་ཕྱིར་རོ། །འདིར་གཞུང་ནི་འདུལ་བྱེད་ལས། དགེ་སློང་གི་ཡན་ལག་གི་རྣམ་པ་རང་བཞིན་གྱིས་ལས་སུ་མི་རུང་བ་ཡིན་པས་དེ་འདི་སྙམ་དུ་གང་ཞིག་ལས་སུ་རུང་བ་འཇུག་པར་བྱེད་ན་དེ་ལ་ནི་ཕམ་པར་འགྱུར་གྱི། བདག་གི་ནི་ལས་སུ་མི་རུང་བ་བཅུག་ཀྱང་ལྟུང་བ་མེད་དོ་སྙམ་དུ་སེམས་ནས་དེས་ལས་སུ་མི་རུང་བ་བཅུག་པ་ལས། བཅོམ་ལྡན་འདས་ཀྱིས་བཀའ་སྩལ་པ། ཕམ་པའི་ལྟུང་བ་ནི་མེད་དེ། དམན་པ་སྦོམ་པར་འགྱུར་རོ་ཞེས་འབྱུང་བ་ཡིན་ནོ། །དྲུད་ནས་ཞེས་བྱ་བ་ཅི་དགོས་ཤེ་ན། བསྐྱོད་ནམ་ཐར་འགྱུར་བ་ཉིད་ཡིན་པར་བསྟན་པའི་ཕྱིར་རོ། །འདིར་གཞུང་ནི་འདུལ་བྱེད་ལས། དགེ་སློང་གིས་བུད་མེད་ཉལ་བ་མནན་པ་ལས་དེ་འགྱོད་པ་སྐྱེས་པ་དང། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་ལག་པས་ལག་པ་ལ་དང༌། རྐང་པས་རྐང་པ་ལ་དང༌། ཚིགས་ཀྱིས་ཚིགས་སུ་དང༌། མདོམས་ཀྱིས་མདོམས་སུ་རྩོལ་བར་བྱེད་ན་ཕམ་པར་འགྱུར་རོ། །འོན་ཏེ་རྩོལ་བར་མི་བྱེད་ན་དམན་པ་སྦོམ་པོར་འགྱུར་རོ། །གཉིད་ཀྱིས་ལོག་པ་ལ་ཇི་ལྟ་བ་བཞིན་དུ་ར་རོ་བ་དང་ཚོར་བས་གཟིར་བ་ལ་ཡང་དེ་བཞིན་ནོ་ཞེས་འབྱུང་བ་ཡིན་ནོ། །ཇི་སྟེ་ཚིགས་ལས་ཕར་ནོར་བུ་འདས་བཞིན་དུ་ཚིགས་ལས་རྩོལ་བར་མི་བྱེད་པ་ཇི་ལྟ་བུ་ཞེ་ན། སྲིད་པའི་ཕྱིར་བསྟན་པ་ཡིན་པས་ཉེས་པ་མེད་དོ། །འདི་ལྟར་དཔེར་ན་ཁ་ཅིག་གིས་

---

^{[མ་དཔེ་གཟིགས་ན་འདིར་གནོན།]}

བུག་ཕྱེ་ནས་མ་རེག་པར་ནོར་བུ་བཅུག་སྟེ། མ་དྲུད་པ་ཁོ་ནར་བུ་གའི་ཚིགས་ཀྱིས་རེག་པ་ཉམས་སུ་མྱོང་བར་བྱེད་ཅིང་འབྱིན་པ་ཡང་ཕྱེ་ནས་བུ་ག་ལས་མ་རེག་པ་ཁོ་ནར་འབྱིན་པར་བྱེད་པས་དེ་སྲིད་པ་ཡིན་ནོ། །ཅི་སྟེ་འོ་ན་བཅུག་མ་ཐག་ཏུ་མཐར་འགྱུར་རོ་ཞེས་གསུངས་པ་ཇི་ལྟ་བུ་ཡིན་ཞེ་ན། མཐར་འགྱུར་བའི་ཡན་ལག་རྣམས་ཆང་བར་ཡོད་ན་འདྲུད་པ་དང་ལྡན་པའི་འཇུག་པ་ཡིན་ནོ་ཞེས་དགོངས་པས་ཉེས་པ་མེད་དོ། །འབྱིན་པའི་དགེ་འདུན་ལྷག་མ་ལས་གང་ཞིག་རྩོལ་བར་བྱེད་ན་ཞེས་གསུངས་པའི་བཀའ་དེ་ནི་སྤྱིར་ཡིན་པར་རྗེས་སུ་དཔག་པས་མཐོང་སྟེ། དེ་ལྟ་བུ་ཐམས་ཅད་ལ་ནི་རེག་པ་ཉམས་སུ་མྱོང་བ་ཡིན་པས་སོ་ཞེས་བསྟན་ཏོ། །རྩོལ་བ་ནི་བསྐྱོད་པ་ལ་བྱ་སྟེ། བསྐྱོད་པ་མེད་ན་སྦོམ་པོར་གསུངས་པའི་ཕྱིར་རོ། །འོ་ན་རེ་ཞིག་ཚིགས་ཀྱིས་ཚིགས་སུ་ཞེས་བྱ་བ་ནི་རྨའི་ཚིགས་དེ་ཉིད་དུ་བྱ་བ་ཡིན་པའི་ཕྱིར་རིགས་ན་ལག་པ་ལ་སོགས་པས་རྩོལ་བ་ཅི་དགོས་ཤེ་ན། འདི་ནི་ཚིགས་སུ་རྩོལ་བའི་རིམ་པ་ཡིན་པར་བསྟན་པའི་ཕྱིར་རོ། །སློབ་དཔོན་ཡོན་ཏན་འོད་ཀྱི་ཞལ་ནས་ནི་ཡན་ལག་གི་ཆ་ཐམས་ཅད་གཟུང་དུ་མེད་པར་རབ་ཏུ་བསྟན་པ་ཁོ་ནའི་ཕྱིར་ལག་པ་ལ་སོགས་པ་མི་རྩོལ་བ་གསུངས་པ་ཡིན་ནོ་ཞེས་འཆད་དེ། ཀུན་ནས་བསྐྱོད་པ་མེད་པར་ཡང་བཅུག་པའི་རེག་པ་བདག་གིར་བྱེད་པ་ལས། མཐར་འགྱུར་བར་དགོངས་ཤིང་རྐེད་པར་ཆད་པ་ལ་སོགས་པ་ཡང་རོའི་ཁྱད་པར་གྱིས་མཐར་འགྱུར་བའི་རྒྱུ་ཡིན་ནོ་ཞེས་ངེས་གལ་ཏེ་ཞེས་པའི་གཞུང་དུ་བྲིས་སོ། །འདི་ལ་ཡང་བརྗོད་པར་བྱ་བ་མངས་པར་འགྱུར་བས་དེ་ནི་གཞག་གོ ། ཆགས་པས་རེག་པའི་བདེ་རྣམས་མྱོང༌། །ཞེས་བྱ་བ་ནི་རེག་པའི་བདེ་བ་བདག་གིར་བྱེད་ཅེས་བྱ་བའི་ཐ་ཚིག་སྟེ། ཆགས་པས་ཞེས་བྱ་བ་ནི་བདག་གིར་བྱེད་པ་བསྟན་པ་ཡིན་ནོ། །འདིར་གཞུང་ནི་འདུལ་བྱེད་ལས། དགེ་སློང་བསམ་གཏན་པ་མཛེས་པ་ཞེས་བྱ་བ་གཅིག་པུ་དགོན་པ་ན་གནས་པ་བྲམ་ཟེ་ཞིག་གིས་མགྲོན་དུ་བོས་ཏེ། དེས་ནང་པར་ཟན་གྱི་ཞལ་ཏ་བྱས་ནས། བུ་མོ་ཆུང་ངུ་གཅེར་བུར་བང་ཆེན་དུ་མངགས་སོ། །དེས་དེའི་ཡན་ལག་གི་རྣམ་པ་མཐོང་ངོ༌། །དེས་མཐོང་ནས་ཆགས་པར་གྱུར་ཏེ། དེས་དེ་མནན་པ་ལས་དེའི་ཡན་ལག་གི་རྣམ་པ་གས་སོ། །དེའི་

---

^{[མ་དཔེ་གཟིགས་ན་འདིར་གནོན།]}

ཡན་ལག་གི་རྣམ་པ་གས་པ་ན། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་མི་ཚངས་པར་སྤྱོད་པའི་རོ་ཉམས་སུ་མྱོང་ན་ཕམ་པའི་མཐར་འགྱུར་རོ། །འོན་ཏེ་མ་མྱོང་ན་ཉེས་པ་སྦོམ་པོར་འགྱུར་རོ་ཞེས་བྱ་བའི་བར་དུ་འབྱུང་བ་ཡིན་ནོ། །རེག་པའི་བདེ་རྣམས་ཞེས་མང་བ་སྐད་དུ་སྨོས་པ་ནི་རྐེད་བར་ཆད་པ་ལ་སོགས་པ་དག་ལ་ཡང་མཐར་འགྱུར་བར་མཚུངས་པར་བསྟན་པའི་ཕྱིར་རོ། །ཆགས་པ་ཁོ་ནས་རེག་པའི་བདེ་བ་ཉམས་སུ་མྱོང་ན་མཐར་འགྱུར་རོ་ཞེས་བསྟན་པའི་ཕྱིར་ཆགས་པ་སྟེ། དགའ་བ་དང༌། འདོད་པ་དང༌། བདག་གིར་བྱེད་འདོད་པ་ཞེས་བྱ་བ་ནི་དོན་གཞན་མ་ཡིན་ནོ། །ཉམས་སུ་མྱོང་བ་ནི་རེག་བྱའི་རྣམ་པར་ཤེས་པས་མྱོང་བ་ཙམ་ལ་བྱ་བ་ཡིན་པས་ཁྱད་པར་ཡོད་དོ། །འདིར་གཞུང་ནི་རྣམ་པར་འབྱེད་པ་ལས། ཐོག་མ་དང༌། བར་དང༌། ཐ་མར་ནི་ཀུན་དུ་ཤེས་སོ། །ཤེས་ནས་ཀྱང་ཀུན་དུ་བདག་གིར་བྱེད་དོ་ཞེས་བྱ་བ་དང། དེ་བཞིན་དུ་བསྟེན་པར་གཞོལ་བའི་སེམས་ཀྱིས་ཞེས་བྱ་བ་ལ་སོགས་པ་འབྱུང་བ་ཡིན་ནོ། །དེ་ལྟར་བྱས་ན་རྣམ་པར་འབྱེད་པ་ལས་ཀྱང༌། འདོད་པའི་འདོད་ཆགས་དང་བྲལ་བ་ཞིག་ལ་ཐུན་མ་ཞིག་གིས་མནན་ཏེ་རེག་པ་ཉམས་སུ་མྱོང་བ་ཡང་ཆགས་པ་སྤངས་པའི་ཕྱིར་བདག་གིར་བྱ་བ་མ་བྱུང་ན་ལྟུང་བ་མེད་པར་གསུངས་པ་ཡིན་ནོ། །འདུལ་བྱེད་ལས་ཀྱང༌། དགེ་སློང་གཉིད་ཀྱིས་ལོག་པ་ལས་བུད་མེད་ཀྱིས་མནན་པ་ལས་དེ་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཁྱེད་ཀྱིས་ཅི་རོ་ཀུན་དུ་ཤེས་སམ། ཀུན་དུ་མ་འཚལ་ལོ། །འོན་ཀྱང་བདག་གིས་འགུལ་བར་ནི་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། འགུལ་བ་ཡོད་ཀྱང་ཕམ་པའི་ལྟུང་བ་ནི་མེད་དེ། དམན་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །རོ་དང་རྗེས་སུ་ཆགས་པ་དང༌། འདོད་པ་ཞེས་བྱ་བ་ནི་དོན་གཅིག་པ་ཡིན་ནོ། །དེའི་ཕྱིར་རོ་ཀུན་དུ་ཤེས་སམ་ཞེས་བྱ་བ་ནི་ཅི་འདོད་པ་ཉམས་སུ་མྱོང་བ་དྲན་ནམ་ཞེས་བྱ་བའི་དོན་དུ་གནས་སོ། །འགུལ་བ་ནི་ཅུང་ཟད་འགྱུར་བའི་བདག་ཉིད་བདེ་བ་མྱོང་བའི་ངོ་བོ་ཡིན་པར་རིག་པར་བྱའོ། །ཅུང་ཟད་འགྱུར་བ་ཡང་ལུས་ཀྱི་འགྱུར་བ་ཤིན་ཏུ་གསལ་བ་མི་བྱེད་པའི་ཕྱིར་ཏེ། བདག་ཉིད་མི་

---

^{[མ་དཔེ་གཟིགས་ན་འདིར་གནོན།]}

འགུལ་བར་གནས་པའི་ཕྱིར་རོ། །ཡིད་ཀྱིས་ཀྱང་འགྱུར་བ་གསལ་བ་མི་སྤྱོད་པའི་ཕྱིར་ཏེ། བསྟེན་པར་གཞོལ་བའི་སེམས་མ་སྐྱེས་པའི་ཕྱིར་ཞེས་བྱ་བར་རིག་པར་བྱའོ། །ཞུས་པ་ལས་ཀྱང༌། ཇི་ཙམ་གྱིས་ན་རོ་མྱང་བ་ཞེས་བརྗོད་པར་བགྱི། བདག་གིར་བགྱིད་པ་དེ་ནི་ཅི་ཞིག་ལགས། བཀའ་སྩལ་པ། འདིར་བདག་གིར་བྱེད་པ་ཞེས་བསྟན་པ་ནི་གལ་ཏེ་ལུས་ཀྱིས་སམ་སེམས་ཀྱིས་འགྱུར་བར་བྱེད་པ་ཡིན་ཏེ། དེ་ལྟར་ན་དེ་ལ་ལྟུང་བར་འགྱུར་རོ་ཞེས་འབྱུང་བ་ཡིན་ནོ། །འདིར་རོ་མྱང་བ་ཡང་ལུས་ཀྱི་འགྱུར་བ་སྤྱོད་པའོ། །བདག་གིར་བྱེད་པ་ནི་བསྟེན་པར་གཞོལ་བའི་སེམས་བསྐྱེད་པའི་ཕྱིར་རོ་ཞེས་བྱ་བར་རིག་པར་བྱའོ། །དེའི་ཕྱིར་བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་ལུས་ཀྱིས་སམ་སེམས་ཀྱིས་གཡོ་བར་བྱེད་ན་དེ་ལྟར་ན་དེ་ལ་ལྟུང་བར་འགྱུར་རོ་ཞེས་འགྱུར་བ་ཡིན་ནོ། །ནི་ཞེས་བྱ་བ་ནི་དེ་མ་ཐག་པ་ལ་བྱ་བ་སྟེ། དེ་ལྟ་བུའི་རེག་པའི་བདེ་བ་ཉམས་སུ་མྱོང་མ་ཐག་ཏུ་དེ་ཉམས་པར་འགྱུར་རོ་ཞེས་བྱ་བའི་ཐ་ཚིག་གོ །ཁ་ཅིག་ན་རེ་འདིར་ཡང་འཆབ་པའི་སེམས་ཉིད་ཀྱང་ཡིན་ནོ་ཞེས་བྱ་བར་ཡན་ལག་གཞན་ཁ་བསྐང་བར་བྱའོ། །འདིར་གཞུང་ནི་འདུལ་བྱེད་ལས་ཀྱང༌། དགེ་སློང་དག་ཁྱེད་ཀྱིས་དགེ་སློང་གང་བྱེད་གང་འཆབ་པའི་སེམས་སྐད་ཅིག་ཀྱང་མ་སྐྱེས་པ་ལ་ཇི་སྲིད་འཚོའི་བར་དུ་བསླབ་པ་བྱིན་ཅིག་ཅེས་བྱ་བ་ནས། གང་གི་ཚེ་ངེས་ཟག་པ་ཟད་པར་བྱ་བ་དེའི་ཚེ་གྲལ་རིམས་ཇི་ལྟ་བ་བཞིན་དུ་འདུག་པར་བྱ་ཞིང་བསླབ་པ་བྱིན་པའི་ཚུལ་ཁྲིམས་ཐམས་ཅད་ཀྱང་རྒྱུན་གཅད་པར་བྱའོ། །དེ་ལྟ་བས་ན་རང་བཞིན་བཟང་པོ་གཞན་གང་ཡོད་པ་དེ་ལ་ཡང་བསླབ་པ་སྦྱིན་པར་བྱའོ་ཞེས་བྱ་བར་གནང་ངོ་ཞེས་བྱ་བའི་བར་དུ་རྒྱ་ཆེར་འབྱུང་བ་ཡིན་ནོ། །འདི་ལྟར་གལ་ཏེ་འཆབ་པའི་སེམས་མེད་ཀྱང་མཐར་འགྱུར་བ་ཡིན་ན་ནི་མཐར་འགྱུར་བ་དེས་ཀྱང་དགེ་སློང་གི་དངོས་པོ་ལས་ཉམས་པར་འགྱུར་རོ། །དེ་ལྟ་ན་ནི་གང་གི་ཚེ་ཟག་པ་ཟད་པར་བྱས་པ་དེའི་ཚེ་གྲལ་རིམས་བཞིན་དུ་འདུག་པར་བྱའོ་ཞེས་གསུངས་པ་དང་འགལ་ཏེ། དགེ་སློང་གི་དངོས་པོ་ཉམས་ན་དེ་ལ་གྲལ་ག་ལ་ཡོད། ཇི་སྟེ་འོ་ན་བསླབ་པ་ཇི་ལྟར་སྦྱིན་ཞེ་ན། བསླབ་པ་དེ་ནི་ཆད་པའི་ལས་ཡིན་གྱི། སྡོམ་པའི་བསླབ་པ་ནི་མ་ཡིན་པས་

---

^{[མ་དཔེ་གཟིགས་ན་འདིར་གནོན།]}

ཉེས་པ་མེད་དོ། །ཆད་པའི་ལས་ལས་སློང་བ་ཡང་ཟག་པ་ཟད་པ་ལ་ཐུག་པ་ཡིན་པས་སྔོན་གྱི་གྲལ་དུ་འདུག་པ་དང༌། ཆད་པའི་ལས་རྒྱུན་གཅད་པར་གནང་བ་ཡིན་ནོ། །དེ་ལྟ་བས་ན་འཆབ་པའི་སེམས་ཉིད་ནི་གདོན་མི་ཟ་བར་བརྗོད་པར་བྱའོ། །གཞིའི་བྱེ་བྲག་ཏུ་སྨྲ་བ་རྣམས་ན་རེ་ནི་དེ་ལྟ་མ་ཡིན་ཏེ། འདི་ལྟར་ཡན་ལག་ཅེས་བྱ་བ་ནི་གཅིག་ཏུ་ཅིག་ཅར་ཕྲད་པ་ལ་བྱ་བ་ཡིན་ན། །འདོད་ཆགས་ཀྱིས་གཟིར་བས་དབང་མེད་པར་གྱུར་པའི་རོ་མྱང་བའི་སེམས་ལ་ནི་འཆབ་པ་དང་མི་འཆབ་པ་གཉིས་ཀྱི་སྐབས་མེད་དེ། དེ་བས་དུས་ཕྱི་མ་ཉིད་ཡིན་པའི་ཕྱིར་རོ། །དེ་བས་ན་ཡན་ལག་མ་ཡིན་ནོ། །དེ་ལྟར་ཡང་བསམ་གཏན་པ་དགའ་བྱེད་དགའ་བའི་ཡོངས་སུ་གདུང་བ་དང་བྲལ་བར་གྱུར་ནས། །ཕྱིས་ཡིད་ལ་གཅགས་པ་སྐྱེས་ཏེ་བདག་ནི་ཉམས་པ་ཡིན་ནོ་ཞེས་སྒྲོགས་ཤིང་བཅོམ་ལྡན་འདས་ཀྱི་སྤྱན་སྔར་འོངས་ཀྱི་གཞན་ནི་མ་ཡིན་ནོ། །དེ་ལྟ་བས་ན་དེ་ནི་མཐར་འགྱུར་བ་ཡིན་ནོ། །ཆད་པའི་ལས་དང་ཀུན་ཤེས་པ་ཐོབ་པས་ནི་མཐར་འགྱུར་བ་བཅོམ་པ་ཡིན་ཏེ། དགེ་འདུན་གྱི་ལྷག་མ་དང་འདྲའོ། །དེ་ལྟ་བས་ན་དེས་སྔོན་གྱི་གྲལ་འཐོབ་པོ། །སྔ་རབས་པ་དག་ན་དེ་དེ་ནི་སྡོམ་པ་ཞིག་པས་མཐར་འགྱུར་བ་ཡིན་པས་ད་ལྟ་བས་ན་ཁ་བསྐང་བར་མི་བྱའོ་ཞེས་འཆད་དེ། དེ་ལྟ་བས་ན་ཞུས་པ་ལས། བཙུན་པ་བསྙེན་པར་མ་རྫོགས་པ་ལ་དགེ་འདུན་གྱི་ལྷག་མ་འབྱུང་བར་འགྱུར་ལགས་སམ། བཀའ་སྩལ་པ། དེ་བཞིན་ཏེ། བསླབ་པ་བྱིན་པ་ལ་འགྱུར་རོ་ཞེས་གསུངས་པ་ཡིན་ནོ། །དེ་བཞིན་དུ་ཕྲན་ཚེགས་ལས་ཀྱང་། བསླབ་པ་བྱིན་པའི་བསླབ་པ་ནི་དགེ་སློང་དང་འདྲ་བ་ཡིན་ནོ་ཞེས་གསུངས་སོ། །གལ་ཏེ་སྡོམ་པ་མ་ཞིག་པ་ཡིན་ན་ཇི་ལྟར་ན་བསྙེན་པར་མ་རྫོགས་པ་ཡིན། ཇི་ལྟར་ན་བསླབ་པ་དགེ་སློང་དང་འདྲ་བ་ཡིན་ནོ་ཞེས་རྩིས་མགོ་བསྒྲེ་བར་འགྱུར། ཇི་སྟེ་མཐར་འགྱུར་བས་སྡོམ་པ་ཞིག་པ་ཡིན་ན་ཇི་ལྟར་ན་བསླབ་པ་དགེ་སློང་དང་འདྲ་བ་ཡིན་ཞེ་ན། བསམ་པ་ཕུན་སུམ་ཚོགས་པས་ཡང་བསླབ་པ་མནོད་པའི་ཕྱིར་རོ། །འདྲ་བ་སྨོས་པ་ནི་དགེ་སློང་རྣམས་དང་བསླབས་པ་མཐུན་པར་གྱུར་པ་དང་འདྲ་བས་སོ། །ཇི་སྟེ་འོ་ན་བསྙེན་པར་རྫོགས་པ་ཐམས་ཅད་ཀྱི་འོག་ཏུ་འདུག་ཏུ་གཞུག་པ་དང༌། དེ་དག་

---

^{[མ་དཔེ་གཟིགས་ན་འདིར་གནོན།]}

རྣམས་ལ་འདྲིམ་པར་བྱེད་པ་ཇི་ལྟ་བུ་ཞེ་ན། དེ་ནི་ཆད་པའི་ལས་སུ་བསྐོས་པའི་ཕྱིར་རོ། །ཇི་སྟེ་ཟག་པ་ཟད་པ་ཐོབ་པར་གྱུར་ན་སྔོན་གྱི་གྲལ་དུ་འདུག་པར་བྱ་བ་ནི་ཇི་ལྟ་བུ་ཞེ་ན། དེ་ནི་བཅོམ་ལྡན་འདས་ཀྱིས་ཡང་དག་པར་གཟེངས་བསྟོད་པའི་གོ་འཕང་ཡིན་པས་ཉེས་པ་མེད་དོ། །གཞན་ཡང་མ་མོ་ལས། ཕམ་པ་བྱུང་བ་བསླབ་པ་བྱིན་པ་གང་ཞེ་ན། གལ་ཏེ་མི་ཚངས་པར་སྤྱོད་པ་བྱས་ནས་ཐ་ན་སེ་གོལ་གཏོགས་པ་ཙམ་ཡང་འཆད་པའི་སེམས་མི་བསྐྱེད་པ་ཡིན་ཏེ། དགེ་སློང་དག་གིས་དེ་ལ་ཚེ་དང་ལྡན་པ་དགའ་བྱེད་དང་འདྲ་བར་གསོལ་བ་དང་བཞིའི་ལས་ཀྱིས་བསླབ་པ་བྱིན་ཅིག་ཅེས་བྱ་བ་ནས། དགེ་སློང་ཕམ་པ་བྱུང་བ་བསླབ་པ་བྱིན་པས་བསླབ་པ་ལ་བསླབ་པར་བྱའོ་ཞེས་བྱ་བའི་བར་དུ་གསུངས་པ་ཡིན་ནོ། གལ་ཏེ་ཕམ་པ་བྱུང་ནས་བསླབ་པའི་གཞི་བྱིན་པར་མི་འགྱུར་བ་ནི་འདིར་ཕམ་པ་བྱུང་བ་བསླབ་པའི་གཞི་བྱིན་པར་ཐ་སྙད་གདགས་པར་ཡང་ཇི་ལྟར་རུང༌། འདིར་གལ་ཏེ་མི་ཚངས་པར་སྤྱོད་པ་བྱས་ནས་ཞེས་བྱ་བ་དུས་སྔ་མ་ཉིད་ཀྱང་ཇི་ལྟར་རུང༌། ཆད་པའི་ལས་ཆེན་པོས་ཕམ་པ་ལས་ལྡང་བར་འབྱུང་བ་ཡང་ཇི་ལྟར་རུང་སྟེ། དེའི་ཕྱིར་མཐར་གྱུར་པ་ཁོ་ན་བསླབ་པ་བྱིན་པ་ཞེས་བྱ་བར་ངེས་སོ། །གལ་ཏེ་མཐར་གྱུར་པ་ཉིད་ལས་ལྡང་བ་ཡོད་ན་དེའི་ཚེ་དེའི་དགེ་སྦྱོང་གི་ཚུལ་ཉམས་པ་དང༌། བཅོམ་པ་དང༌། ལྟུང་བ་དང༌། དྲང་དུ་མེད་པ་ཡིན་ནོ་ཞེས་བྱ་བའི་གཞུང་འདི་འགལ་ལོ་ཞེ་ན། གལ་ཏེ་མཐར་འགྱུར་བ་བྱུང་ལ་འཆབ་པའི་སེམས་སྐྱེས་ན་དེའི་ཚེ་དགེ་སློང་གི་ཚུལ་ཉམས་པ་དང༌། དྲང་དུ་མེད་པ་ཉིད་ཡིན་ནོ་ཞེས་བྱ་བར་དགོངས་པའི་ཕྱིར་འགལ་བ་མེད་དོ། །སློབ་དཔོན་རྣམས་ཀྱི་ཞལ་ནས། དགེ་སློང་གི་ཚུལ་དྲི་མ་མེད་པའི་ལམ་དང་སྡོམ་པ་ནི་ཉམས་པ་མེད་པ་ཡིན་ནོ་ཞེས་འཆད་དོ། །བྱེ་བྲག་ཏུ་སྨྲ་བ་རྣམས་ན་རེ་འདི་ལྟར་ཕྱོགས་གཅིག་འཁྲུགས་པས་སྡོམ་པ་མཐའ་དག་གཏོང་བར་རིགས་པ་མ་ཡིན་ཏེ། དེ་བས་ན་མཐར་འགྱུར་བས་སྡོམ་པ་ཞིག་པ་མེད་དོ་ཞེས་འཆད་དོ། །ཇི་སྟེ་འོ་ན་དགེ་སློང་མ་ཡིན་ཞེས་བྱ་བ་ཇི་ལྟ་བུ་ཞེ་ན། མ་ཡིན་ཞེས་བྱ་བའི་དགག་པ་འདི་ནི་སྨད་པ་ལ་བྱ་བར་བསྟན་པ་ཡིན་ཏེ། སྨད་པ་ཡིན་ནོ་ཞེས་བྱ་བའི་ཐ་ཚིག་གོ །ཡང་ན་དོན་དམ་པའི་དགེ་སློང་གི་དངོས་པོ་ལས་ཉམས་པ་ཡིན་ཏེ། མ་

---

^{[མ་དཔེ་གཟིགས་ན་འདིར་གནོན།]}

ཐོབ་པ་ལས་ཡོངས་སུ་ཉམས་པ་ཡིན་ནོ་ཞེས་བྱ་བའི་ཐ་ཚིག་གོ །གཞན་ཡང་གལ་ཏེ་མཐར་འགྱུར་བས་སྡོམ་པ་ཞིག་པར་གྱུར་ན་རྣམ་པར་འབྱེད་པ་ལས། གང་ཟག་མ་དག་པ་ལ་སྐུར་བ་འདེབས་པར་བྱེད་ན་ཉེས་པའི་གཞི་བཅུ་གཅིག་ཏུ་འགྱུར་རོ་ཞེས་འབྱུང་བ་ཇི་ལྟར་དྲང༌། ཇི་སྟེ་འདིར་མ་དག་པ་ནི་མཐའ་འགྱུར་བ་ཁོ་ནས་ཡིན་པར་འདོད་དེ། །དེ་བས་ན་མཐར་འགྱུར་བས་སྡོམ་པ་ཞིག་པར་འགྱུར་རོ་ཞེ་ན། དེ་ལ་སྐུར་བ་བཏབ་ན་དགེ་འདུན་གྱི་ལྷག་མར་གསུངས་པ་དང་འགལ་ཏེ། འདི་ལྟར་ཁྱིམ་པ་ལ་སྐུར་བ་བཏབ་ན་དགེ་འདུན་གྱི་ལྷག་མར་མི་འགྱུར་བས་སོ། །དགེ་སློང་གི་ཆ་བྱད་ཡོད་པའི་ཕྱིར་རོ་ཞེས་ཀྱང་བྱ་བ་མ་ཡིན་ཏེ། སྔར་ལྟུང་བ་བྱུང་བ་ལ་ཉེས་བྱས་སུ་གསུངས་པའི་ཕྱིར་རོ།། །།བམ་པོ་དྲུག་པ། ཇི་སྟེ་འདིར་གལ་ཏེ་མཐར་འགྱུར་བས་མ་དག་པ་ཡིན་པར་དགོངས་ན་ནི་དེའི་ཚེ་སོ་སོར་ཐར་པའི་མདོ་ལས་དགེ་སློང་དག་པ་ལྟུང་བ་མེད་པ་ལ་ཞེས་འབྱུང་བ་དང་འགལ་ལོ་ཞེ་ན། དེ་ནི་མ་ཡིན་ཏེ། རྣམ་པར་འབྱེད་པ་ལས་ལྟུང་བ་མ་བྱུང་བ་ཞེས་བྱ་བ་ནི་དེའི་གཞི་ཉིད་དོ་ཞེས་གསུངས་པའི་ཕྱིར་རོ། །དེ་ལྟར་བྱས་ན་མི་ཚངས་པར་སྤྱོད་པ་ལ་སོགས་པ་གང་གིས་གླེང་བར་བྱ་བ་དེས་ནི་དག་པ་ཡིན་ལ་གཞན་གྱིས་ནི་མ་དག་པ་ཡིན་པར་འགལ་བ་མེད་དོ། །དེ་ལྟར་ཡང་ཞུས་པ་ལས། དགེ་སློང་གིས་རང་ཉིད་ན་རེ་བདག་གིས་མི་ཚངས་པར་སྤྱོད་པ་བྱས་སོ་ཞེས་ཟེར་ལ་དེ་ལ་དགེ་སློང་ཞིག་གིས་གསུམ་པོ་གཞན་དག་གིས་སྐུར་བ་འདེབས་པར་བྱེད་ན་དགེ་འདུན་གྱི་ལྷག་མའོ་ཞེས་གསུངས་པ་ཡིན་ནོ། །དགེ་སློང་མ་ལ་གདམས་པ་ལས་ཀྱང་ཚུལ་ཁྲིམས་འཆལ་བ་ཞིག་དགེ་སློང་མ་ལ་འདོམས་པར་བྱེད་ན་ལྟུང་བྱེད་དོ་ཞེས་གསུངས་པ་ཡིན་ཏེ། སྡོམ་པ་དང་བྲལ་བ་ལ་ནི་ལྟུང་བར་ཡང་ཇི་ལྟར་འགྱུར་བས་ཕམ་པ་ཁོ་ནས་ཚུལ་ཁྲིམས་འཆལ་པར་འགྱུར་བར་ངེས་ཏེ། དེ་ལ་ཚུལ་ཁྲིམས་དང་ལྡན་པ་ཞེས་བྱ་བ་ནི་ལྟུང་བ་བཞི་པོ་རྣམས་ལས་ལྟུང་བ་གང་ཡང་རུང་བ་མ་བྱུང་བ་ཡིན་ནོ་ཞེས་གསུངས་པའི་ཕྱིར་རོ། །དེ་ལྟ་བས་ན་མཐར་འགྱུར་བར་བྱུང་བ་ལ་ཡང་སྐུར་བ་འདེབས་ན་དགེ་འདུན་གྱི་ལྷག་མར་གསུངས་པའི་ཕྱིར་དང༌། དགེ་སློང་མ་ལ་འདོམས་

---

^{[མ་དཔེ་གཟིགས་ན་འདིར་གནོན།]}

པར་བྱེད་ན་ཚུལ་ཁྲིམས་འཆལ་པ་ལ་ལྟུང་བྱེད་དོ་ཞེས་གསུངས་པའི་ཕྱིར་མཐར་འགྱུར་བས་སྡོམ་པ་ཞིག་པ་མེད་དོ། །སྔ་རབས་རྣམས་ནི་དེ་མི་འདོད་དེ། དག་པ་ཞེས་བྱ་བ་དེ་ནི་སྤྱི་ལ་བྱ་བར་གསུངས་པ་ཡིན་ཏེ། འདིར་ཕམ་པ་ཐམས་ཅད་ཀྱིས་དག་པ་ཡིན་པར་རྟོགས་པས་སོ། །གལ་ཏེ་རྣམ་པར་འབྱེད་པ་ལས། དེའི་གཞི་ཉིད་དོ་ཞེས་གསུངས་ན་ཡང་ཕམ་པའི་གཞི་ཉིད་དོ་ཞེས་བྱ་བར་བཤད་པར་བྱའོ། །ཞུས་པའི་གཞུང་དང་ཡང་མི་འགལ་ཏེ། འདི་ལྟར་གཞུང་གི་དོན་ནི་དེ་མཚན་ཉིད་མི་ཤེས་པས་ཉམས་པ་ལ་སོགས་པ་དག་ཏུ་ལོག་པར་ཞུགས་ནས་བདག་གིས་མི་ཚངས་པར་སྤྱོད་པ་བྱས་སོ་ཞེས་སྨྲས་ལ། གང་ལ་སྨྲས་པ་དེ་ནི་མཚན་ཉིད་ཤེས་པ་ཞིག་ཡིན་ནས་ཞེ་སྡང་གིས་གསུམ་པོ་གཞན་དག་གིས་སྐུར་བ་འདེབས་པར་བྱེད་ན་དེ་ལ་དགེ་འདུན་གྱི་ལྷག་མའོ་ཞེས་བྱ་བ་ཡིན་པའི་ཕྱིར་རོ། །གང་ཟག་མ་དག་པ་ལ་སྐུར་བ་འདེབས་པར་བྱེད་ན་ལྟུང་བའི་གཞི་བཅུ་གཅིག་ཏུ་འགྱུར་རོ་ཞེས་གང་གསུངས་པ་དེ་ཡང་ཕྱོགས་འདི་ཉིད་ཀྱིས་ན་དམན་པ་སྦོམ་པོ་ལ་སོགས་པས་ནི་མ་དག་པ་ཡིན་ལ་ཕམ་པ་རྣམས་ཀྱིས་ནི་དག་པ་ཡིན་ནོ་ཞེས་བྱ་བར་ཁོང་དུ་ཆུད་པར་བྱའོ། །ཚུལ་ཁྲིམས་འཆལ་པ་ལ་ལྟུང་བྱེད་དོ་ཞེས་གསུངས་པ་དེ་ནི་ཉེས་བྱས་སུ་བཤད་པ་ཡིན་ཏེ། འདི་ལྟར་འདི་ནི་ལྟུང་བར་བྱེད་པས་ན་ལྟུང་བྱེད་དོ་ཞེས་བྱ་བའི་སྒྲ་ཡིན་གྱི་མིང་དུ་ཆགས་པའི་སྒྲ་མ་ཡིན་པས་ཁོ་ན་ལ་ལྟུང་བྱེད་དོ་ཞེས་གསུངས་པ་ཡིན་ནོ། །མཐར་འགྱུར་བ་བྱུང་བ་ལ་ནི་ཐམས་ཅད་ལས་འདས་ན་ཡང་ཉེས་བྱས་སུ་བསྟན་ཏོ། །དེ་ལྟར་ཡང་འདུལ་བ་མདོ་ལས། ཉམས་པ་དང་མ་སྐྱེས་པ་དག་ན་ལྟུང་བ་ལ་སྦྱོར་བ་ནི་ཉེས་བྱས་སོ་ཞེས་འབྱུང་ངོ༌། །ཇི་སྟ་འོ་ན་ཞུས་པ་ལས། གཅིག་ལ་མཐར་འགྱུར་བ་བཞི་ཡང་འབྱུང་ངོ་ཞེས་གསུངས་པ་ཇི་ལྟ་བུ་ཡིན་ཞེ་ན། དེ་ནི་ལས་ཀྱི་ལམ་རྣམས་ཅིག་ཅར་རྫོགས་པ་ལ་དགོངས་ནས་ཡིན་ཏེ། རིམ་གྱིས་ན་ནི་ཉེས་བྱས་ཁོ་ན་ཡིན་པས་ངེས་པ་མེད་དོ། །དེ་ལྟར་ན་འདུལ་བ་ནི་རྟོགས་པར་དཀའ་བ་ཡིན་ནོ། །དེ་ཉིད་ཀྱི་ཕྱིར་གནས་མལ་གྱི་གཞི་ལས་འདུལ་བ་ནི་ཟབ་མོ། །ཟབ་པར་སྣང་བ། མཐོང་བར་དཀའ་བ། ཁོང་དུ་ཆུད་པར་དཀའ་བ། །དགོངས་པ་མང་བ། འཇིག་རྟེན་

---

^{[མ་དཔེ་གཟིགས་ན་འདིར་གནོན།]}

གྱི་ཚིག་འབྲུ་དང་ལྡན་པ་ཡིན་ནོ་ཞེས་གསུངས་སོ། །འོ་ན་ཅི་དགེ་ཚུལ་ལ་བསླབ་པ་བྱིན་པ་ཡོད་དམ་ཞེ་ན་ཡོད་དོ་ཞེས་བཤད་དོ། །ཕྲན་ཚེགས་ལས། དགེ་སློང་དག་དེ་ལྟ་བུ་གཞན་ལ་ཡང་བསླབ་པ་བྱིན་ཅིག་ཅེས་གསུངས་པའི་ཕྱིར་རོ། །ཞུས་པ་ལས། དགེ་སློང་ལ་བསླབ་པ་བྱིན་པ་ཞེས་གསུངས་པའི་ཕྱིར་བསམ་གཏན་པ་དགའ་བྱེད་ནི་མཚོན་པ་ཡིན་པར་རྟོགས་སོ། །བཙུན་པ་ཕྱིར་མི་འོང་བ་གློས་མི་འབེབས་པ་ནི་འདི་ལྟར་དེས་འདུལ་བ་ལས་དགེ་ཚུལ་འཁྲུལ་པ་ནི་བསྙིལ་བར་བྱའོ་ཞེས་འབྱུང་བའི་ཚིག་དེ་ལན་ཅིག་མ་ཡིན་པར་འཁྲུལ་པ་བསྙིལ་བར་བྱ་བ་ཡིན་གྱི་ལན་ཅིག་འཁྲུལ་པར་ནི་མ་ཡིན་ནོ་ཞེས་སྒྲོ་བཏགས་ནས་འཆད་དེ། འཕགས་པའི་ཆོས་འདུལ་བ་ལ་ནི་ཚིག་དོར་གྱི་ཐ་སྙད་གདགས་པ་མེད་དེ། འཕགས་པའི་གང་ཟག་རྣམས་ཀྱང་འཁྲིག་པའི་འདོད་ཆགས་ཀྱིས་གཡོ་ན་སོ་སོའི་སྐྱེ་བོའི་བྱིས་པ་ལྟ་སྨོས་ཀྱང་ཅི་དགོས། དེ་ཉིད་ཀྱི་ཕྱིར་འཁྲིག་པ་ཁོ་ན་ལས་བསླབ་པ་བྱིན་པ་རྣམ་པར་གཞག་པ་ཡིན་ནོ་ཞེས་བྱ་བ་ལ་སོགས་པས་དགེ་ཚུལ་ལན་ཅིག་འཁྲུལ་པ་བསྙེན་པར་མ་རྫོགས་པ་དག་བསྙེན་པར་རྫོགས་པར་བྱ་བར་ཡང་བཞེད་དོ། །དེ་ནི་མི་འདོད་དེ། སྒྲོ་བཏགས་པ་བྱས་ནས་གང་ལ་ཡང་མི་འཇུག་པ་མེད་དེ། འདོད་པ་ཙམ་གྱིས་འཇུག་པའི་ཕྱིར་རོ། །ཞར་ལ་འོངས་པ་རྫོགས་སྷོ།། །།འོ་ན་སྤྱད་དུ་བཟོད་པ་ཞེས་བྱ་བ་འདི་བརྗོད་པར་བྱ་སྟེ། རྣམ་པར་འབྱེད་པ་ལས། སྤྱད་མི་བཟོད་པ་ཞིག་ཡིན་ན་སྦོམ་པོ་ཞེས་གསུངས་པའི་ཕྱིར་རོ་ཞེ་ན། བརྗོད་པར་མི་བྱ་སྟེ། ཡན་ལག་ཆ་ཀུན་གཟུང་བར་བཟོད་པ་ཡི། །ཞེས་བྱ་བ་འདི་ཁོ་ནས་དོན་རྟོགས་པའི་ཕྱིར་རོ། །ང་ནི་མཚན་ཉིད་ལྷག་མ་རྣམས་བཤད་པར་བྱ་སྟེ། རང་གི་རྨར་ཡང་གཞན་གྱི་འམ་རང་ཉིད་ཀྱི། །སྦུ་བུར་ནན་ལ་སོགས་པའི་སྦྱོར་བ་ཡིས། །དྲུད་པ་བདག་གིར་བྱེད་ནའང་རྣམ་ཀུན་དུ། །དངོས་གཞི་རྡོ་རྗེས་མངོན་པར་བཅོམ་པ་འཐོབ། །བདག་ཉིད་ཀྱི་རྨ་དག་ཏུ་ཡང་བདག་གི་བསམ་པས་སམ། གཞན་གྱི་བསམ་པས་སམ། ནན་ལ་སོགས་པའི་ཐབས་ཀྱིས་རང་གི་ཡན་ལག་གི་སྦུ་བུ་འམ། གཞན་གྱི་ཡན་ལག་གི་སྦུ་བུས་དྲུད་པའི་

---

^{[མ་དཔེ་གཟིགས་ན་འདིར་གནོན།]}

རེག་པ་གལ་ཏེ་བརྟུལ་ཞུགས་ཅན་གྱིས་བདག་གིར་བྱེད་ན་དེའི་ཚེ་ཡང་རྣམ་པ་ཐམས་ཅད་དུ་མཐར་འགྱུར་བའི་རྡོ་རྗེས་བཅོམ་པ་འཐོབ་བོ། །དེ་ལ་རང་གི་རྨར་རང་གི་ཡན་ལག་གི་སྦུ་བུ་འདྲུད་པའི་དཔེར་བརྗོད་པ་ནི་རྒྱབ་མཉེན་དང་མཚན་རིངས་གཉིས་ལྟ་བུའོ། །གཞན་གྱི་ཡན་ལག་གི་སྦུ་བུས་དྲུད་པའི་དཔེར་བརྗོད་པ་ནི་དགོན་པ་སྡིག་པ་ཅན་གྱིས་དགེ་ཚུལ་མནན་པ་ལྟ་བུའོ། །ད་ནི་དངོས་གཞིའི་ཡན་ལག་རྣམས་ཀྱི་སྤྲོས་པ་བཤད་པར་བྱའོ། །བུད་མེད་ལ་སོགས་རྨ་རྣམས་འགྲོ་རིགས་དབྱེ། །ཤི་དང་གཡོགས་དང་རྐེད་ཕྱེད་ཆད་ན་ཡང༌། །ཁྱད་པར་མེད་དེ་དུམ་བུར་སྦྱར་བ་ལས། །མཚམས་མངོན་མིན་པའི་བུ་གའང་དངོས་གཞིར་འགྱུར། །བུད་མེད་དང་སྐྱེས་པ་དང་མ་ནིང་རྣམས་ཀྱི་རྨའི་སྒོ་གང་དག་ཡིན་པ་ནི། ཁ་དང་བཤད་དང་གཅི་བའི་བུ་ག་རྣམས་སོ། །དེ་རྣམས་ནི་མི་དང་དུད་འགྲོའི་འགྲོ་བའི་དབྱེ་བ་འམ། བྲམ་ཟེ་དང་གདོལ་པ་ལ་སོགས་པའི་རིགས་ཀྱི་དབྱེ་བའི་ཁྱད་པར་མེད་དོ། །དེ་བཞིན་དུ་གསོན་པ་དང་ཤི་བར་གྱུར་པ་དང༌། གོས་ཀྱིས་གཡོགས་པ་དང༌། མ་གཡོགས་པར་གྱུར་ཀྱང་ཁྱད་པར་མེད་པ་ཁོ་ན་ཡིན་ཏེ། ཐམས་ཅད་ལ་མཐར་འགྱུར་པ་མཚུངས་པ་ཡིན་ནོ་ཞེས་བྱ་བའི་ཐ་ཚིག་གོ །ཅིའི་ཕྱིར་འདི་སྨོས་ཤེ་ན། བུད་མེད་ཀྱི་རོ་གང་ཡིན་པ་དེ་ཉིད་ལས་སྐྱེས་པ་ལས་ཕམ་པར་འགྱུར་བ་རིགས་པ་ཡིན་གྱི། དུད་འགྲོ་རྣམས་ཀྱི་ནི་མ་ཡིན་ནོ། །དེ་བཞིན་དུ་བྲམ་ཟེ་མོ་རྣམས་ཁོ་ནའི་བྲམ་ཟེ་ལ་འགྱུར་གྱི་གདོལ་པ་མོ་རྣམས་ཀྱི་ནི་མ་ཡིན་ནོ། །གསོན་པ་རྣམས་ཁོ་ནའི་ཡིན་གྱི་ཤི་བ་རྣམས་ཀྱི་ནི་མ་ཡིན་ནོ་ཞེས་བྱ་བ་ལ་སོགས་པ་གང་ཞིག་སེམས་པ་དེའི་དོགས་པ་བཟློག་པའི་ཕྱིར་རོ། །གཞན་ཡང་རྐེད་པའི་ཕྱེད་དུ་ཆད་པ་ལ་ཡང་ཁྱད་པར་མེད་པ་ཁོ་ན་ཡིན་ནོ་ཞེས་བྱ་བར་སྦྱར་ཏེ། ལུས་ཀྱི་རྐེད་དུ་ཆད་པར་གྱུར་ཀྱང་མཐར་འགྱུར་བ་ཁོ་ན་ཡིན་ནོ་ཞེས་བྱ་བའི་ཐ་ཚིག་གོ །དེ་བཞིན་དུ་བུད་མེད་ཆུ་ཤགས་སུ་གཤགས་པའི་དུམ་བུ་སྦྱར་བ་ལས་བུ་ག་དེ་ལ་མཚམས་མི་མངོན་ན་དེའི་ཚེ་ཡང་དངོས་གཞིར་འགྱུར་རོ། །འོན་བུ་གར་སྦྱར་བའི་མཚམས་མངོན་པ་དེ་ལ་ཇི་ལྟར་འགྱུར་ཞེ་ན། བཤད་པ། སྦྱར་བའི་མཚམས་ནི་མངོན་པར་གྱུར་པ་དང༌། །ཕག་ལ་སོགས་པ་བསྲེགས་པ་སྦུ་མེད་རྨ། །དེ་

---

^{[མ་དཔེ་གཟིགས་ན་འདིར་གནོན།]}

བཞིན་མགོ་བོ་བཅད་པའི་ལ་ལ་ཡང༌། །ཀུན་དུ་བཤགས་པར་བྱ་བའི་ཆུད་པར་འགྱུར། །གང་ལ་སྦྱར་བའི་མཚམས་མངོན་པའི་བུ་ག་དེ་ལ་ནི་བཤགས་པར་བྱ་བའི་ལྟུང་བ་ཆུད་པར་འགྱུར་རོ། །དེ་བཞིན་དུ་ཕག་ལ་སོགས་པ་བསྲེགས་པ་སྦུ་མེད་པ་དག་གི་ལམ་དང༌། མགོ་བོ་བཅད་པའི་ཁ་དང༌། ཡང་ཞེས་བྱ་བས་ལུས་ཀྱི་བུ་ག་གནས་མ་དང་བཅོས་མ་གཞན་ལ་ལོག་པར་ཞུགས་ན་ཡང་ལྟུང་བ་ཆུང་དུ་ཁོ་ནར་འགྱུར་རོ་ཞེས་སྟོན་ཏོ། །གོས་ཀྱིས་དཀྲིས་དང་དགུག་པ་བྱས་པ་དང༌། །ལམ་ལམ་རེག་པར་ཡང་ཆུད་པར་འགྱུར། །ཡན་ལག་གི་སྦུ་གུ་གོས་ཀྱིས་དཀྲིས་པ་དང༌། དེ་བཞིན་དུ་བཀུག་པ་དང༌། ལམ་ལ་མ་རེག་པར་ཡང་རུང་སྟེ། འཇུག་པས་ལྟུང་བ་ཆུད་པར་འགྱུར་རོ། །འདིར་གཞུང་ནི། གོས་སམ་གྲོ་ག་འམ་པགས་པའི་རིམ་པས་སམ། འོད་མའི་སྦུ་བུར་བཅུག་ནས་སམ་ཡན་ལག་གི་རྣམ་པ་བཀུག་ནས་སམ་ལམ་ལ་མ་རེག་པར་འཇུག་ན་ཐམས་ཅད་ལ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ། །འོ་ན་རྣམ་པར་འབྱེད་པ་ལས། བར་ཆད་དང་བཅས་པས་བར་ཆད་དང་བཅས་པ་ལ་ཞེས་བྱ་བ་དང༌། ཕམ་པར་འགྱུར་རོ་ཞེས་གསུངས་པ་ཇི་ལྟ་བུ་ཡིན་ཞེ་ན། བཤད་པ། གོས་སྟུག་དག་གིས་ཡིན་ན་ཆུང་བར་འདོད། །སྲབ་མོ་དངོས་གཞི་ཡིན་པས་དེ་འགལ་མེད། །འདིར་གཞུང་ནི་ཞུས་པ་ལས། ཆུད་པར་གསུངས་པ་ཡིན་ཏེ། གོས་ལ་སོགས་པ་སྟུག་པོས་བར་དུ་ཆོད་ན་རྣམ་པ་ཐམས་ཅད་དུ་རེག་པའི་བདེ་བ་མེད་པའི་ཕྱིར་རོ། །རྣམ་པར་འབྱེད་པ་ལས་ནི་སྲབ་མོས་བར་དུ་ཆོད་ན་རེག་པའི་བདེ་བ་འབྱུང་བའི་ཕྱིར་མཐར་འགྱུར་བར་གསུངས་པས་གཞུང་འགལ་བ་མེད་དོ། །ད་ནི་ལྟུང་བའི་རྣམ་པར་དབྱེ་བ་བཤད་པར་བྱ་སྟེ། སེམས་བྱུང་ཡིད་ཀྱིས་བྱ་ཡིན་སོ་ལ་སོགས། །རེག་པའི་གཞི་ཡི་བར་དུ་སྦྱོར་བ་ཡིན། །སོ་སོགས་མཚམས་ལས་ཕར་ནི་དངོས་གཞི་ཡིན། །འཁྲིག་པ་ལ་ནི་འདུ་ཤེས་གཙོར་བྱ་མེད། །བསྟེན་པའི་ཕྱིར་སེམས་སྐྱེས་ནས་བསྡམ་པར་བྱ་བའི་ཁ་ན་མ་ཐོ་བར་འགྱུར་རོ། །སོ་དང་པགས་པ་དང་སྦུ་བུའི་ཁ་ལ་རེག་པའི་བར་གྱི་བར་མདོ་དེར་ནི་སྦྱོར་བའི་ལྟུང་བའི་ཉེས་བྱས་ཁོ་ནར་འགྱུར་རོ། །སོ་ལ་སོགས་

---

^{[མ་དཔེ་གཟིགས་ན་འདིར་གནོན།]}

པའི་མཚམས་ལས་ཕར་འདའ་བར་བྱེད་ལ། དངོས་གཞིའི་ཡན་ལག་རྣམས་ཀྱང་ཕྲད་ན་དངོས་གཞིའི་ལས་ཀྱི་ལམ་སྐྱེས་པ་ཡིན་ཏེ། དངོས་གཞིའི་ལྟུང་བར་རིག་པར་བྱའོ། །སོ་དང་པགས་པ་དང་སྦུ་བུའི་བར་ཡིན་པར་ངེས་པའི་ཕྱིར་འདིར་འཁྲིག་པ་ལ་ནི་མེད་པར་རིག་པར་བྱའོ། །དེ་ལྟར་ཡང་གཞུང་ནི་འདུལ་བྱེད་ལས། དགེ་སློང་གིས་ལམ་དུ་ལམ་མ་ཡིན་པའི་འདུ་ཤེས་ཀྱིས་མི་ཚངས་པར་སྤྱོད་པ་འཁྲིག་པའི་ཆོས་བསྟེན་པ་ན། བཅོམ་ལྡན་འདས་ཀྱིས་བཀའ་སྩལ་པ། ལམ་དུ་ལམ་མ་ཡིན་པའི་འདུ་ཤེས་དང་ལྡན་པ་ལ་ཕམ་པ་ལ་སོགས་པའི་བར་དུ་འབྱུང་བ་ཡིན་ནོ། །འདུ་ཤེས་གཙོ་བོར་བྱ་བ་རྣམས་ལ་ནི་དེ་ལྟ་བུ་མེད་དེ། འདི་ལྟར་སྲོག་ཆགས་དང་བཅས་པའི་ཆུ་ལ་སྲོག་ཆགས་མེད་པར་འདུ་ཤེས་དང་ལྡན་པ་ལ་ལྟུང་བ་ཡོད་པར་མི་འདོད་པས་སོ། །ད་ནི་ཕྱོགས་དང་མཐུན་པ་བརྗོད་པ་ཡིན་པས། བཤད་པ། མི་ཚངས་སྤྱོད་ཕྱོགས་ངོ་བོ་བསྟན་པ་ནི། །དཔེར་ན་བསམས་བཞིན་ཁུ་བ་འབྱིན་བྱེད་དང༌། །འདོད་ཆགས་ཀྱིས་ནི་འཁྱུད་དང་ཟུར་སྟེག་དང༌། །འཁྲིག་པའི་ཚིག་རྣམས་སྒྲོགས་པར་བྱེད་པ་དང༌། །མི་ཚངས་པར་སྤྱོད་པ་དང་འདྲ་བ་དག་གི་རང་བཞིན་བསྟན་པ་ནི། འདི་ལྟ་སྟེ། བསམས་བཞིན་དུ་ཁུ་བ་འབྱིན་པ་དང༌། འདོད་ཆགས་ཀྱིས་འཁྱུད་པ་དང༌། ཟུར་སྟེག་བྱེད་པ་དང་སྟེ། འཁྲིག་པའི་འདོད་ཆགས་ཀྱིས་བསྐྱོད་པ་དང༌། འཁྲིག་པའི་ཚིག་སྟེ་སྒྲ་རྣམས་སྒྲོགས་པ་དང༌། །ཉལ་ཤོམ་ཁྱིམ་དུ་ལྟད་མོ་བལྟ་ཕྱིར་དང༌། །རྒོད་པས་གནས་པ་ཉིད་དང་སྨྱན་བྱེད་དང༌། །ཁྱིམ་དག་ཏུ་ནི་མཚན་མོ་འཕྱན་ཅིང་རྒྱུ། །མིག་ཟུར་གཡོ་བ་དང་སྟེག་པར་བྱེད་པ་ཡིན། །ཞེས་བྱ་བ་ནི་རྒོད་པས་སྐྱེས་པ་དང༌། བུད་མེད་དག་གི་སྤྱོད་པ་ལྟ་བའི་ཕྱིར་གནས་པའོ། །ཁྱིམ་གང་དུ་བུད་མེད་ལ་ཉལ་པོ་བྱས་པ་དེ་ནི་ཉལ་པོ་ཤོམ་པའི་ཁྱིམ་ཞེས་བྱ་སྟེ། དཔེར་ན་བུད་མེད་ནི་སྐྱེས་པས་ཉལ་བར་བྱ་བ་ཡིན་ནོ་ཞེས་བསྟན་པ་ལྟ་བུ་ཡིན་ནོ། །སྨྱན་བྱེད་ཅེས་བྱ་བ་ནི་སྐྱེས་པ་དང་བུད་མེད་སྤྲོད་པར་བྱེད་པའོ། །ཁྱིམ་དག་ཏུ་མཚན་མོ་འགྲོ་བ་དང༌། དེ་བཞིན་དུ་མིག་ཟུར་དང་གཡོབ་པ་དང༌། སྟེག་པ་ཡང་ཡིན་ཏེ། དེ་ལ་མིག་ཟུར་ནི་བཟུར་ཏེ་བལྟ་བའོ། གཡོབ་པ་ནི་

---

^{[མ་དཔེ་གཟིགས་ན་འདིར་གནོན།]}

ཡན་ལག་གིས་གཡོབ་པའོ། །འདོད་ཆགས་ཀྱི་གདོན་གྱིས་གཟིར་བར་བྱས་པའི་དག་གི་འགྱུར་བ་ན་སྟེག་པ་ཡིན་ཏེ། སྟེག་པར་བྱེད་པའོ་ཞེས་བྱ་བའི་ཐ་ཚིག་གོ །ཡང་དང་ཡང་དུ་བུད་མེད་གདོད་མི་བལྟ། །རེག་པའི་དུག་ལ་ནམ་ཡང་རེག་མི་བྱ། །གལ་ཏེ་ཆུ་དང་མེས་འཆི་དེ་ཡི་ཚེ། །དེས་པའི་འདུ་ཤེས་བྱས་ཏེ་རེག་པར་བྱ། །ཡང་དང་ཡང་དུ་བུད་མེད་རྣམས་ཀྱི་གདོང་དུ་བལྟ་བར་མི་བྱའོ། །དེ་ལྟར་ཡང་གཞུང་ནི། བཅོམ་ལྡན་འདས་བུད་མེད་དག་ལ་ཇི་ལྟར་བསྒྲུབ་པར་བགྱི། ཀུན་དགའ་བོ་མི་ལྟ་བར་རོ་ཞེས་གསུངས་པ་ཡིན་ནོ། །དེ་ལྟ་བུའི་དགོས་པ་ཞིག་བྱུང་ན་ཡང་ལན་ཅིག་བལྟ་བར་བྱའོ། །ཡང་དང་ཡང་དུ་བུད་མེད་ཀྱི་གདོང་དུ་བལྟས་ནས་མཚན་མར་འཛིན་པར་འགྱུར་ཞིང་དེ་ལས་ཀྱང་འདོད་ཆགས་ཀྱི་མེ་འབར་བར་འགྱུར་རོ་སྙམ་དུ་དགོངས་པ་ཡིན་ནོ། །ཀུན་དུ་ཆགས་པས་ལྟ་བ་ནི་རྣམ་པ་ཐམས་ཅད་དུ་བཀག་པ་ཁོ་ནའོ། །ཇི་སྐད་དུ། རབ་ཏུ་བྱུང་བའི་གཞི་ལས། བུད་མེད་ཀྱི་ཡུལ་ལ་མིག་གཏད་དེ་བལྟ་བར་མི་བྱའོ་ཞེས་གསུངས་པ་ཡིན་ནོ། །འཁྲིག་པའི་ཀུན་དུ་སྦྱོར་བ་བདུན་གྱི་མདོ་ལས་ཀྱང༌། །བྲམ་ཟེ་འདི་ན་ཁ་ཅིག་བདག་ཉིད་ཚངས་པར་སྤྱོད་པ་ཡིན་པར་ཁས་འཆེ་ཞིང་དེ་བུད་མེད་དང་ལྷན་ཅིག་གཉིས་ཀྱིས་གཉིས་སྤྲོད་པར་ནི་མི་བྱེད་དོ། །འོན་ཀྱང་བུད་མེད་ལ་མིག་གཏད་ནས་ལྟ་བར་བྱེད་ཅིང་དེས་དེའི་རོ་མྱོང་བར་བྱེད་དོ་ཞེས་བྱ་བ་ལས། ཚངས་པར་སྤྱོད་པ་མ་ཆུབ་པར་སྤྱོད་ཅིང་རལ་བ་དང༌། སྐྱོན་ཅན་དང༌། འདྲེན་མ་དང༌། ཐུན་ཚགས་ཅན་ཡིན་ཏེ། སྐྱེ་བ་དང༌། རྒ་བ་དང༌། ན་བ་དང༌། འཆི་བ་དང༌། མྱ་ངན་དང༌། སྨྲེ་སྔགས་འདོན་པ་དད། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུགས་པ་དག་ལས་ཡོངས་སུ་མི་འགྲོལ་ཞིང་སྡུག་བསྔལ་ལས་ཡོངས་སུ་མི་གྲོལ་བ་ཡིན་ནོ་ཞེས་སྨྲའོ། །འདི་ནི་འཁྲིག་པའི་ཆོས་ཀུན་དུ་སྦྱོར་བ་དང་པོ་ཡིན་ནོ་ཞེས་བྱ་བའི་བར་དང༌། དེ་བཞིན་དུ་བུད་མེད་དང་ལྷན་ཅིག་སྟེག་པར་བྱེད། རྩེ་བར་བྱེད། ག་ཞ་འདོན་པར་བྱེད་ཅེས་བྱ་བ་ནི་གཉིས་པ་ཡིན་ནོ། །བུད་མེད་ཀྱིས་བསྐུ་བ་དང༌། ཁྲུས་བྱ་བ་དང༌། མཉེ་བ་བདག་གིར་བྱེད་པ་ཞེས་བྱ་བ་ནི་གསུམ་པ་ཡིན་ནོ། །བུད་མེད་

---

^{[མ་དཔེ་གཟིགས་ན་འདིར་གནོན།]}

རྩིག་པའི་ཕག་ན་འདུག་པའམ། རས་བཅོས་བུའི་ཕག་ན་འདུག་པའི་གོས་དག་གམ་རྒྱན་དག་གི་སྒྲ་ཉན་ཅིང་དེས་དེའི་རོ་མྱོང་བར་བྱེད་པ་ཞེས་བྱ་བ་ནི་བཞི་པ་ཡིན་ནོ། །གཞན་དག་ལ་འདོད་པའི་ཡོན་ཏན་ལྔ་དག་དང་ལྡན་ཞིང་རྩེ་བར་བྱེད་པ་ལ་ལྟ་བར་བྱེད་པ་ནས། དེས་དེའི་རོ་མྱོང་བར་བྱེད་པ་ཞེས་བྱ་བའི་བར་ནི་ལྔ་པ་ཡིན་ནོ། །བདག་ཚུལ་ཁྲིམས་སམ་བརྟུལ་ཞུགས་སམ་ཚངས་པར་སྤྱོད་པ་འདིས་ལྷའམ་མིའི་གཙོ་བོར་ཤོག་ཤིག་ཅེས་སྨོན་ལམ་བཏབ་ནས་ཚངས་པར་སྤྱད་པ་སྤྱོད་པར་བྱེད་པ་ཞེས་བྱ་བ་ནི་དྲུག་པ་ཡིན་ནོ། །སྔོན་བགད་པ་དང་དགའ་བ་དང་རྩེ་བ་དང་ཀུན་དུ་སྤྱད་པ་དྲན་པར་བྱེད་ཅིང་དྲན་པར་བྱེད་དུ་འཇུག་པ་ཞེས་བྱ་བ་འདི་ནི་འཁྲིག་པའི་ཀུན་དུ་སྦྱོར་བ་བདུན་པ་ཡིན་ནོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །རེག་པར་མི་བྱའོ་ཞེས་བྱ་བའི་གཞུང་ནི་འདིར་བུད་མེད་ནི་རེག་པའི་དུག་ཡིན་ནོ་ཞེས་འབྱུང་བ་ཡིན་ནོ། །གལ་ཏེ་བུད་མེད་ཆུའམ་མེ་དག་གིས་འཆི་ན་དེའི་ཚེ་དེ་བསྐྱབ་པའི་ཕྱིར་སའི་འདུ་ཤེས་བསྐྱེད་ནས་རེག་པར་བྱའོ། །མོ་ཡིས་བརྟུལ་ཞུགས་ཅན་ལའམ་སྡོམ་བརྩོན་གྱིས། །དེ་མཐོང་ཆགས་ན་དེར་ནི་གནས་མི་བྱ། །རྡོ་སོགས་ཡན་ལག་འཁྲི་ཤིང་མི་བརྡུང་སྟེ། །འདོད་ཆགས་མ་ནི་མི་སྡུག་ཆུས་ཞི་འགྱུར། །གང་ན་བུད་མེད་ཀྱི་བརྟུལ་ཞུགས་ཅན་ལ་མཐོང་ནས་ཆགས་པར་བྱེད་དམ། གང་ན་བརྟུལ་ཞུགས་ཅན་གྱིས་བུད་མེད་ལ་མཐོང་ནས་ཆགས་པར་བྱེད་ན་དེར་ཡང་ཡུན་རིང་དུ་གནས་པར་མི་བྱ་སྟེ། །མྱུར་བ་ཁོ་ནར་དེ་ནས་འགྲོ་བར་བྱའོ། །དེ་བཞིན་དུ་རྡོ་བ་ལ་སོགས་པས་ཡན་ལག་གི་འཁྲི་ཤིང་བརྡུང་པར་མི་བྱ་སྟེ། །འདིར་གཞུང་ནི་དགེ་སློང་འདོད་ཆགས་ཀྱིས་གཟིར་བ་ཞིག་གིས་རྡོ་བས་ཡན་ལག་གི་རྣམ་པ་བཅོམ་པ་དང༌། དེ་ནས་བཅོམ་ལྡན་འདས་ཀྱིས་ཇི་ལྟར་ན་བརྡུང་པར་བྱ་བ་གཞན་ཡིན་ན། གཞན་རུང་བར་བྱེད་དེ། འོན་ཀྱང་འདོད་ཆགས་ལ་ནི་མི་སྡུག་པའོ་རྟ། ཞེ་སྡང་ལ་ནི་བྱམས་པའོ། །གཏི་མུག་ལ་ནི་རྟེན་ཅིང་འབྲེལ་པར་འབྱུང་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །བུད་མེད་གནམ་བལྟས་འཐུད་ལ་རང་གིས་ནི། །ཆུ་ནི་རྒྱུན་མི་འཆད་པར་སྦྱིན་མི་བྱ། །རང་ལག་གཅེར་བུ་མོ་ལ་བྲས་ལ་སོགས། །མི་སྦྱིན་ཁུར་བ་སྦྱིན་

---

^{[མ་དཔེ་གཟིགས་ན་འདིར་གནོན།]}

བཞིན་གྱུར་མི་རུང༌། །བུད་མེད་ཁ་གྱེན་དུ་བལྟས་ཏེ་ཆུ་འཐུང་བ་དག་ལ་རྒྱུན་མི་འཆད་པར་སྦྱིན་པར་མི་བྱའོ། །དེ་བཞིན་དུ་རང་གི་ལག་ནས་གཅེར་བུ་མོ་དག་ལ་ཟས་ལ་སོགས་པ་སྦྱིན་པར་མི་བྱ་སྟེ། འདི་ལྟར་འཕགས་པ་ཀུན་དགའ་བོས་ལྷུང་བཟེད་གྱི་ལྷག་མ་སྦྱིན་པར་མཛད་པ་ན་མ་བརྟགས་པར་གཅེར་བུ་མོ་གཞོན་ནུ་མལ་ཁུར་བ་གཉིས་བྱིན། རྒན་མོ་ལ་ནི་ཁུར་བ་གཅིག་བྱིན་པ་དང༌། རྒན་མོས་སྨྲས་བ། ཕུ་ནུ་མོ་ཤཱ་ཀྱའི་བུ་ཀུན་དགའ་བོས་འདོད་པར་འགྱུར་རོ་ཞེས་དེ་ལྟ་བུའི་སྐུར་བ་འདེབས་པར་གྱུར་ན་མི་རུང་བས་སོ། །བུད་མེད་རྣམས་དང་ལྷན་ཅིག་ཏུ་འགྲོགས་པ་དང་སྨྲ་བ་དང༌། ལྟ་བ་བཀག་ནས་དམིགས་ཀྱིས་དབྱེ་བ་བཤད་པར་བྱ་སྟེ། མ་ཆགས་མིག་གིས་བུད་མེད་ཆོས་བསྟན་བྱའི། །མིག་ཚུགས་སུ་ནི་བཞིན་ལ་བལྟ་མི་བྱ། །བུད་མེད་རྣམས་དང་ཉལ་འདུག་འགྲོ་ལ་སོགས། །སྤང་བྱ་སྐྱེས་པ་ཡོད་ན་ཉེས་པ་མེད། །འོན་ཏེ་བུད་མེད་རྣམས་ལ་ཆོས་སྟོན་པ་ཞིག་བྱུང་ན། དེའི་ཚེ་མ་ཆགས་པའི་མིག་གིས་སྐབས་སྐབས་སུ་ལྟ་བའམ། མིག་གི་རྒྱུ་བ་འཛུམས་པས་ཆོས་བཤད་པར་བྱའི། །མིག་ཚུགས་སུ་བཞིན་ལ་བལྟ་བས་ནི་མ་ཡིན་ནོ། །བུད་མེད་ཀྱི་བཞིན་ལ་ཡང་དང་ཡང་དུ་བལྟས་ནས་བྱིས་པ་ལ་མཚན་མར་འཛིན་པའི་རྩ་བ་ཟུག་པར་འགྱུར་བས་བཟློག་པ་ཡིན་ནོ། །དེ་བཞིན་དུ་བུད་མེད་རྣམས་དང་ལྷན་ཅིག་ཏུ་ཁྱིམ་ན་ཉལ་བ་དང༌། ལྷན་ཅིག་ཏུ་འདུག་པ་དང༌། ལྷན་ཅིག་ཏུ་ལམ་དུ་འགྲོ་བ་དང༌། འབེལ་བའི་གཏམ་བྱ་བ་ལ་སོགས་པ་ཞི་ཐག་རིང་ཞིང་ཤིན་ཏུ་རིང་བར་སྤང་བར་བྱའོ། །དེ་ལྟ་བུའི་རྐྱེན་ཞིག་བྱུང་ལ་གལ་ཏེ་དེ་ན་སྐྱེས་པ་ཡོད་ན་དེའི་ཚེ་ཉེས་པ་མེད་དོ། །དགེ་ཚུལ་གྱི་ཚིག་ལེའུར་བྱས་པའི་འགྲེལ་པ་ལས། བསླབ་པའི་གཞི་གསུམ་པ་རྫོགས་སྷོ།། །།གང་ཞིག་བླ་མ་བརྗོད་བློས་མི་ཆོས་ལས། །བླ་མ་ཞེས་བྱ་དེ་བདག་ལ་ཡོད་ཅེས། །མི་ལ་བརྫུན་ཟེར་གཞན་གྱིས་གོ་ན་ནི། །མངོན་པའི་ང་རྒྱལ་མ་གཏོགས་དེ་བསྙིལ་བྱ། །ཞེས་བྱ་བ་ལ། གང་ཞིག་ཅེས་བྱ་བ་ནི་དགེ་ཚུལ་ལོ། །བླ་མ་བརྗོད་བློས་ཞེས་བྱ་བ་ནི་མིའི་ཆོས་ལས་བླ་མ་བསྙད་པར་བྱའོ་སྙམ་པའི་བསམ་པས་སོ། །མིའི་ཆོས་ལས་བླ་མ་ཞེས་བྱ་ནི་མིའི་ཆོས་ལས་བླ་མ་ཞེས་བྱའོ། །དེ་ཞེས་

---

^{[མ་དཔེ་གཟིགས་ན་འདིར་གནོན།]}

བྱ་བ་ནི་མིའི་ཆོས་ལས་བླ་མ་དེ་ཉིད་ཅེས་ངེས་པར་གཟུང་བས་འཁྲུལ་པས་ནི་མ་ཡིན་ནོ་ཞེས་བསྟན་ཏོ། །འདི་ལྟར་གལ་ཏེ་རྒྱུན་དུ་ཞུགས་པའི་འབྲས་བུ་ལ་སོགས་པའི་ལུང་བསྟན་པར་བྱའོ་སྙམ་དུ་ཞུགས་པ་ཡིན་པར་དེ་ཁོ་ན་ལུང་སྟོན་པར་བྱེད་ན་དེའི་ཚེ་མཐར་འགྱུར་རོ། །འོན་ཏེ་འཁྲུལ་པས་གཞན་ལུང་བསྟན་པར་བྱའོ་སྙམ་པ་ལས་གཞན་ཞིག་ལུང་སྟོན་པར་བྱེད་ན་དེའི་ཚེ་ཆུང་བ་ཡིན་ནོ་ཞེས་བྱ་བའི་ཐ་ཚིག་གོ །འདིར་གཞུང་ནི་ཞུས་པ་ལས། བཙུན་པ་དགེ་སློང་གིས་རྒྱུན་དུ་ཞུགས་པའི་འབྲས་བུར་ལུང་བསྟན་པར་བྱའོ་སྙམ་པ་ལས། ལན་ཅིག་ཕྱིར་འོང་བའི་འབྲས་བུར་ལུང་བསྟན་པར་བགྱིད། ཕྱིར་མི་འོང་བའི་འབྲས་བུར་ལུང་བསྟན་པར་བྱའོ་སྙམ་པ་ལས། དགྲ་བཅོམ་པའི་འབྲས་བུར་ལུང་སྟོན་པར་བགྱིད་ན་ཅིར་འགྱུར་ལགས། བཀའ་སྩལ་པ། ཉེས་པ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ། །ཟེར་ཞེས་བྱ་བའི་སྨྲ་བ་ལའོ། །འདི་སྐད་ཟེར་ཞེ་ན། བདག་ལ་ཡོད་ཅེས་བྱ་བ་སྨོས་ཏེ། འདིར་གཞུང་ནི་བསམ་གཏན་དང་པོ་ལ་སོགས་པ་མ་ཐོབ་པར་བདག་གིས་ཐོབ་བོ་ཞེས་བྱ་བ་ལ་སོགས་པ་འབྱུང་བ་ཡིན་ནོ། །མི་ལ་ཞེས་བྱ་བ་ནི་མིའི་འགྲོ་བ་ལ་མངོན་སུམ་དུའོ། །འདིར་གཞུང་ནི་འདུལ་བྱེད་ལས། དགེ་སློང་གིས་མིའི་འགྲོ་བ་ལ་མིར་འདུ་ཤེས་དང་ལྡན་པས་མེད་ཅིང་མི་བདོག་པའི་མིའི་ཆོས་བླ་མ་སྨྲས་ནས་དེ་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། མི་ལ་མིའི་འདུ་ཤེས་དང་ལྡན་ན་ཕམ་པར་འགྱུར་རོ། །མི་ལ་ཡིད་གཉིས་དང་ལྡན་ན་ཕམ་པར་འགྱུར་རོ། །མི་མ་ཡིན་པ་ལ་མིར་འདུ་ཤེས་དང་ལྡན་པ་དང་མི་མ་ཡིན་པ་ལ་ཡིད་གཉིས་དང་ལྡན་ན་དམན་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །བརྫུན་ཞེས་བྱ་བ་ནི་དོན་གྱིས་སྟོང་པ་ཡིན་ནོ་ཞེས་བྱ་བའི་ཐ་ཚིག་གོ །གཞན་གྱིས་གོ་ན་ནི་ཞེས་བྱ་བ་ནི་གལ་ཏེ་མི་གཞན་དེས་ཚིག་གི་དོན་ཁོང་དུ་ཆུད་པ་ཡིན་ཏེ། གཞན་དེས་གོ་བར་གྱུར་ན་ཞེས་བྱ་བའི་ཐ་ཚིག་གོ །འདིར་གཞུང་ནི་འདུལ་བྱེད་ལས། དགེ་སློང་གིས་ཁྱིམ་པ་ལ་མེད་ཅིང་མི་བདོག་པའི་མིའི་ཆོས་བླ་མ་སྨྲས་པ་ལས། དེས་དེ་མ་བསམས་པས་དེ་ཅི་ཟེར་

---

^{[མ་དཔེ་གཟིགས་ན་འདིར་གནོན།]}

ཞེས་སྨྲས་པ་དང༌། དེ་ཙམ་དུ་ཟད་ཅེས་སྨྲས་ནས་དེ་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ཕམ་པའི་ལྟུང་བ་ནི་མེད་དེ། དམན་པ་སྦོམ་པོར་འགྱུར་རོ་ཞེས་བྱ་བའི་བར་དུ་འབྱུང་བ་ཡིན་ནོ། །མངོན་པའི་ང་རྒྱལ་མ་གཏོགས་ཞེས་བྱ་བ་ནི་མ་ཐོབ་པ་ཐོབ་པའི་འདུ་ཤེས་དང་ལྡན་པ་ཉིད་ནི་མངོན་པའི་ང་རྒྱལ་ཡིན་ཏེ། ཐོབ་པའི་འདུ་ཤེས་དང་ལྡན་པ་མ་གཏོགས་པ་ཞེས་བྱ་བའི་ཐ་ཚིག་གོ །འདིར་གཞུང་ནི་འདུ་ཤེས་སྦས་ནས་ཞེས་འབྱུང་བ་ཡིན་ནོ། །དེ་ཞེས་བྱ་བ་ནི་དགེ་ཚུལ་ལོ། །བསྙིལ་ཞེས་བྱ་བ་ནི་དགར་བར་བྱ་བ་ཡིན་ནོ་ཞེས་བྱ་བའི་ཐ་ཚིག་གོ །མིའི་ཆོས་བླ་མ་དེ་ཡང་གང་ཞེ་ན། བཤད་པ། བསམ་གཏན་ལ་སོགས་མངོན་ཤེས་འབྲས་བཅས་པའི། །ཡོན་ཏན་རྣམས་འདིར་མི་ཆོས་བླ་མར་བསྟན། །དེ་ཡི་རྗོད་པར་བྱེད་པ་རྣམ་མང་དག །ད་ནི་བཤད་པར་བྱ་ཡིས་མཉན་པར་གྱིས། །བསམ་གཏན་རྣམས་དང༌། གཟུགས་མེད་པ་རྣམས་དང༌། མངོན་པར་ཤེས་པ་ལྷའི་རྣ་བ་ལ་སོགས་པ་རྣམས་དང༌། ཡོན་ཏན་འབྲས་བུ་དང་བཅས་པ་རྣམས་ཡིན་ནོ། །དེ་ལ་འབྲས་བུ་ཞེས་བྱ་བ་ནི་དགེ་སྦྱོང་གི་ཚུལ་གྱི་འབྲས་བུ་བཞི་པོ་དག་ཡིན་ནོ། །ཡོན་ཏན་རྣམས་ནི་སོ་སོ་ཡང་དག་པར་རིག་པ་དང༌། ཟིལ་གྱིས་ནོན་པའི་སྐྱེ་མཆེད་དང༌། ཟད་པར་གྱི་སྐྱེ་མཆེད་ལ་སོགས་པ་རྣམས་སོ། །མིའི་ཆོས་ལས་བླ་མར་གྱུར་པ་དེ་ཁོ་ན་ཡིན་པར་ཁོང་དུ་ཆུད་པར་བྱའོ། །མིའི་ཆོས་ཀྱང་ཆོས་འདུལ་བ་འདི་ལས་སྒྲིབ་པ་ལྔ་གསུངས་པ་དག་ཡིན་ནོ། །བསམ་གཏན་ལ་སོགས་པ་དག་ནི་དེ་དག་ལས་བླ་མར་གྱུར་པ་ཡིན་ཏེ་སྒྲིབ་པ་ལྔ་སྤངས་པས་ཐོབ་པའི་ཕྱིར་རོ། །མིའི་ཆོས་བླ་མ་འདི་རྗོད་པར་བྱེད་པ་དུ་མ་སྟེ། འདི་ལྟར་ཁ་ཅིག་ནི་འབྲས་བུ་ལས་སྟོན་པར་བྱེད་དོ། །ཁ་ཅིག་ནི་དངོས་སུའོ། །ཁ་ཅིག་ནི་དེའི་ཆོས་ཀྱིས་སོ། །ཁ་ཅིག་ནི་ཡོངས་སུ་ཉམས་པ་བརྗོད་པས་སོ། །ཁ་ཅིག་ནི་གཞན་ལ་སྙད་བཏགས་པས་སོ། །ཁ་ཅིག་ནི་དོན་མཐུན་པ་སྟོན་པས་སོ། །ཁ་ཅིག་ནི་ཟུར་གྱིས་གླེང་བས་སོ། །ཁ་ཅིག་ནི་ཕྱི་མ་ཡང་དག་པས་སོ། །ཁ་ཅིག་ནི་ཅད་མི་སྨྲ་བར་དང་དུ་ལེན་པར་བྱེད་

---

^{[མ་དཔེ་གཟིགས་ན་འདིར་གནོན།]}

པས་སོ་ཞེས་བྱ་བ་ལ་སོགས་པ་ཡིན་ནོ། །དེ་དག་གི་དཔེར་བརྗོད་པ་ཙམ་ཞིག་རབ་ཏུ་བསྟན་གྱི་ཉོན་ཅིག །དེ་ལ་རེ་ཞིག་འབྲས་བུ་ལས་ནི། ལྷ་ལ་སོགས་མཐོང་བ་དག་ལ་སོགས་ལྟ་བྱེད། །ཅེས་བྱ་བ་ནི་ལྷ་ལ་སོགས་བ་མཐོང་ངོ༌། །ལྷ་ལ་སོགས་པ་ཡང་བདག་ལ་ལྟ་བར་བྱེད་དོ་ཞེས་བྱ་བ་ཡིན་ཏེ། འདིག་ནི་འབྲས་བུ་ལས་བདག་བསམ་གཏན་ལ་སོགས་པ་ཐོབ་པ་ཉིད་དུ་བརྗོད་པ་ཡིན་ཏེ། བསམ་གཏན་ལ་སོགས་པ་མི་སྲིད་པ་ནི་ལྷ་ལ་སོགས་པ་ལྟ་བ་དང༌། བསྙེན་བཀུར་བྱེད་པ་མི་སྲིད་པའི་ཕྱིར་རོ། །སྡུག་བསྔལ་ཉིད་ལ་སོགས་ཤེས་སོ། །ཞེས་བྱ་བ་འདིས་ནི་དངོས་སུ་རྗོད་པར་བྱེད་པ་བསྟན་ཏོ། །འདིར་གཞུང་ནི། སྡུག་བསྔལ་དང་ཀུན་འབྱུང་དང་འགོག་པ་དང་ལམ་ཤེས་སོ་ཞེས་བྱ་བ་ལ་སོགས་པ་འབྱུང་བ་ཡིན་ཏེ། ཚིག་འདི་ནི་རྟོགས་པའི་རང་བཞིན་ཡིན་གྱི། ལུང་ནི་མ་ཡིན་ནོ། །དེའི་ཆོས་ཉིད་ཀྱང༌། ཟག་པ་ཟད་པའི་ཁྱད་པར་ངེས་རྣམས་དང༌། །བདག་ཉིད་ལྡན་པར་རྗོད་པར་བྱེད་པ་ཡིན། །ཞེས་བྱ་བས་བསྟན་ཏེ། ཟག་པ་ཟད་པ་རྣམས་ཀྱི་ཁྱད་པར་དེས་པ་དེ་དག་དང་བདག་ཉིད་ལྡན་པ་ཉིད་དུ་རྗོད་པར་བྱེད་པ་ཡིན་ནོ། །དེ་ཡང་དཔེར་བརྗོད་ན། དེར་དགྲ་བཅོམ་གང་ཡིན་སྟན་བཀྲ་ལ་སོགས་དབང༌། །དེར་ནི་ཁོ་བོ་འང་དབང་ངོ་གཞན་མ་ཡིན། །ཞེས་བྱ་བ་ཡིན་ཏེ། འདིར་གཞུང་ནི་དགེ་སློང་རབ་ཏུ་མང་པོ་དག་ཁྱིམ་དག་ཏུ་མགྲོན་དུ་བོས་ནས་ཟས་ཟ་བར་བྱེད་ཅིང༌། དེར་སྟན་ཁྲ་བོ་དང་ཆུང་ཟད་བཀྲ་བ་དག་ཀྱང་བཏིང་སྟེ། དེ་ན་དགེ་སློང་གང་ཞེས་བྱ་བ་ནས། དགྲ་བཅོམ་པ་མ་ཡིན་པ་དེ་སྟན་ཁྲ་བོ་དང་ཅུང་ཟད་བཀྲ་བ་དབང་ངོ༌། །ཁོ་བོ་ཡང་དེར་མགྲོན་དུ་བོས་ཏེ་ཟས་ཟའོ། །ཁོ་བོ་ཡང་དེར་སྟན་ཁྲ་བོ་དང་ཅུང་ཟད་བཀྲ་བ་དབང་ངོ་ཞེ་ན། ཕམ་པར་འགྱུར་རོ་ཞེས་བྱ་བའི་བར་དུ་འབྱུང་བ་ཡིན་ནོ། །ཡོངས་སུ་ཉམས་པའི་དབང་དུ་བྱས་ནས། ཁྱད་པར་ཐོབ་ལས་ཡོངས་སུ་ཉམས་སྨྲ་ཡིན། །ཞེས་བྱ་བས་བསྟན་པ་ཡིན་ནོ། །ཡོངས་སུ་ཉམས་པ་ནི་རྣམ་པ་གཉིས་ཏེ། ཐོབ་པ་ལས་ཡོངས་སུ་ཉམས་པ་དང༌། མ་ཐོབ་པ་ལས་ཡོངས་སུ་ཉམས་པའོ། །དེ་ལ་མ་ཐོབ་པ་ལས་ཡོངས་སུ་ཉམས་པ་ལས་ནི་ཆུང་བ་ཉིད་དུ་འོག་ནས་འབྱུང་ངོ༌། །དེའི་ཕྱིར་

---

^{[མ་དཔེ་གཟིགས་ན་འདིར་གནོན།]}

ཁྱད་པར་ཐོབ་པ་ལས་ཞེས་ཁྱད་པར་དུ་དབྱེའོ། །དེའི་དཔེར་བརྗོད་པ་ནི། བདག་ནི་དགེ་སྦྱོང་ཚུལ་གྱི་ལམ་ཉམས་ཡིན། །ཞེས་བྱ་བ་ཡིན་ཏེ། བདག་ནི་ཟག་པ་མེད་པའི་ལམ་ལས་ཡོངས་སུ་ཉམས་པ་ཡིན་ནོ་ཞེས་བྱ་བ་ལ་སོགས་པ་ཡིན་ནོ། །དེ་ལྟར་བླ་མ་བརྗོད་ཚིག་སྦྱོར་བ་ལས། །དངོས་གཞིས་བཅོམ་ཞིང་སེམས་ཅན་དམྱལ་མྱོང་འགྱུར། །དེ་ལྟར་ན་མིའི་ཆོས་བླ་མ་སྟོན་པའི་ཚིག་གི་སྦྱོར་བ་ལས་མཐར་འགྱུར་བའི་ལྟུང་བས་ངེས་པར་བཅོམ་ཞིང་སེམས་ཅན་དམྱལ་བ་ཉམས་སུ་མྱོང་བར་འགྱུར་རོ། །ཕྱག་དར་ཁྲོད་ཀྱི་འདྲེ་དང་རྒྱུ་མཚན་ནི། །རང་གི་མཚན་ཉིད་འཛིན་ལ་ལྟུང་བ་ཆུང༌། །འདྲེ་ཕལ་བ་དག་ནི་ལྟུང་བ་ཆུང་བ་ཡིན་ནོ། །ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ལ་ཡང་འདིར་སེམས་རྩེ་གཅིག་པ་ལ་ཕྱོགས་པ་ཙམ་ཡིན་གྱི་ཡོངས་སུ་རྫོགས་པ་ནི་མ་ཡིན་ནོ། །གཞན་ལ་སྙད་བཏགས་ནས་བརྗོད་པའི་དབང་དུ་བྱས་ནས། དཔེར་ན་བརྟུལ་ཞུགས་ཅན་གང་ལྷ་སྒྲ་ཐོས། །ཡོད་ཅེས་གཞན་ལ་སྙད་བཏགས་ཟེར་བའང་ཡིན། །ང་ཡིན་ཚིག་མ་ཚང་བས་དེ་ཆུང་ལ། །ང་ཡིན་ཚིག་འབྱུང་བས་ནི་དངོས་གཞིར་འགྱུར། །རང་ལ་བསམས་ནས་དཔེར་ན་དགེ་སློང་གང་ཞིག་ལྷ་རྣམས་ཀྱི་སྒྲ་ཐོས་པ་དེ་ཡོད་དོ་ཞེས་བྱ་བ་ལ་སོགས་པ་ལྟ་བུར་གཞན་ལ་སྙད་བཏགས་ནས་ཟེར་བ། དེ་ན་ང་ཡིན་ནོ་ཞེས་དེ་སྐད་མི་ཟེར་ན་དེའི་ཚེ་ཆུང་བ་ཡིན་ནོ། །ང་ཡིན་ནོ་ཞེས་ཟེར་ན་ནི་ཕམ་པ་ཁོ་ན་ཡིན་ནོ། །གལ་ཏེ་འདིར་གང་ལ་བསམས་པ་ཡོད་དུ་ཟིན་ཀྱང་འོན་ཀྱང་གཞན་ལ་སྙད་བཏགས་པའི་ཕྱིར་ཆུང་བ་ཡིན་ནོ། །ཚིག་གི་རང་བཞིན་གྱིས་རང་དང་གཞན་ལ་སྙད་བཏགས་པ་ལས་ནི་རྣམ་པར་གཞག་པ་ཡིན་གྱི། བསམས་པ་ལས་ནི་མ་ཡིན་ནོ། །དེ་ལྟར་ཡང་འདིར་གཞུང་ནི་ང་ཡིན་ནོ་ཞེས་དེ་སྐད་མི་ཟེར་ན་ཉེས་པ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ། །གཞན་ལ་སྙད་བཏགས་པའི་རྣམ་པ་གཞན་དག་ལ་ཡང་དེ་བཞིན་དུ་ཁོང་དུ་ཆུད་པར་བྱ་སྟེ། དཔེར་ན་ཞུས་པ་ལས་བཙུན་པ་དགེ་སློང་གིས་རང་ཉིད་ཀྱི་ཡི་གེར་བྲིས་ནས། འདི་སྐད་ཅེས་ཡི་གེར་བྲིས་པ་འདི་ལས་ནི་ཁྱོད་ནི་རྒྱུན་དུ་ཞུགས་པ་ཡིན་ནོ་ཞེས་ཟེར་རོ་ཞེས་མཆི་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ་ཞེས་བྱ་བ་ལ་སོགས་པ་འབྱུང་བ་ལྟ་བུའོ། །དོན་མཐུན་པ་སྟོན་པའི་དབང་དུ་མཛད་ནས། སྒྲ་མཐུན་བརྗོད་པ་ལས་ཀྱང་ཡིན་ཏེ་དཔེར། །ཀུན་དུ་

---

^{[མ་དཔེ་གཟིགས་ན་འདིར་གནོན།]}

སྤྱོད་པས་བསམས་ནས་བདག་སློབ་པ་འམ། །ལམ་དུ་འདུག་ནས་བདག་ནི་ལམ་གནས་ཞེས། །ཟེར་བ་ལ་སོགས་པ་དག་ལ་འང་དེ་དང་འདྲའོ། །ཞེས་བྱ་བས་བསྟན་ཏོ། །དོན་གང་དག་ལ་སྒྲ་མཐུན་པ་ཡོད་པའི་དོན་དེ་དག་ནི་སྒྲ་མཐུན་པ་དག་ཡིན་ནོ། །དོན་གྱི་སྒྲ་མཐུན་པ་དེ་དག་གིས་རང་ལས་བསམས་ནས་ཟེར་ན་སྔ་མ་བཞིན་དུ་ལྟུང་བ་ཆུང་བར་རིག་པར་བྱའོ། །འདིར་དཔེར་བརྗོད་པ་ནི་བདག་ནི་སློབ་པ་ཡིན་ཞེས་བྱ་བ་ལ་སོགས་པ་ཡིན་ཏེ། སོ་སོར་ཐར་པའི་སྡོམ་པ་ལ་སོགས་པ་ལ་སློབ་པར་བྱེད་པའི་བསམ་པས་བདག་ནི་སློབ་པ་ཡིན་ནོ་ཞེས་ཟེར་ན་ལྟུང་བ་ཆུང་བ་ཡིན་ནོ། །ཀུན་དུ་སྤྱོད་པ་ནི་སློབ་པར་བྱེད་པ་ཡིན་ནོ། །བསམ་པ་ནི་མནོས་པ་ཡིན་ནོ། །དེ་བཞིན་དུ་ལམ་དུ་འདུག་ནས་བདག་ནི་ལམ་ལ་གནས་པ་ཡིན་ནོ་ཞེས་ཟེར་བ་དང༌། རྒྱུན་ལ་འདུག་ནས་བདག་ནི་རྒྱུན་དུ་ཞུགས་པ་ཡིན་ནོ་ཞེས་བྱ་བ་ལ་སོགས་ཟེར་ན་དེ་དང་འདྲ་བ་ཡིན་ནོ། །འདིར་གཞུང་ནི་ཞུས་པ་ལས། བདག་ནི་སློབ་པ་ཡིན་ནོ་ཞེས་མཆི་ན་ཅིར་འགྱུར་ལགས། གལ་ཏེ་སོ་སོར་ཐར་པའི་སྡོམ་པ་ལས་བསམས་ནས་ཟེར་ན་ཉེས་པ་སྦོམ་པོར་འགྱུར་རོ། །འོན་ཏེ་མེད་བཞིན་དུ་སློབ་པའི་ཆོས་ལུང་སྟོན་པར་བྱེད་ན་མཐར་འགྱུར་རོ་ཞེས་བྱ་བ་ལ་སོགས་པ་དང་དེ་བཞིན་དུ་བཙུན་པ་དགེ་སློང་གིས་འདི་སྐད་ཅེས་བདག་ནི་ཀུན་ཏུ་སྦྱོར་བ་དང༌། འཆིང་བ་དང༌། ཕྲ་རྒྱས་དང༌། ཉེ་བའི་ཉོན་མོངས་པ་རྣམས་ལས་གྲོལ་བ་ཡིན་ནོ་ཞེས་མཆི་ན་ཅིར་འགྱུར་ལགས། །གལ་ཏེ་ཀུན་དུ་སྦྱོར་བ་དང༌། འཆིང་བ་དང༌། ཕྲ་རྒྱས་དང༌། ཉེ་བའི་ཉོན་མོངས་པ་དང༌། ཀུན་ནས་དཀྲིས་པ། འདས་པ། ཟད་པ། འགགས་པ། བྲལ་བ་རྣམ་པར་གྱུར་པ་གང་དག་ཡིན་པ་དེ་ལས་བསམས་ནས་བདག་ནི་དེ་དག་ལས་གྲོལ་བ་ཡིན་ནོ་ཞེས་དེ་སྐད་ཅེས་ཟེར་ན་དམན་པ་སྦོམ་པོར་འགྱུར་རོ། །འོན་ཏེ་ཀུན་དུ་སྦྱོར་བ་ལ་སོགས་པ་མེད་པ་ལས་བསམས་ནས་ལུང་སྟོན་པར་བྱེད་ན་མཐར་འགྱུར་རོ། །ཞེས་གསུངས་པ་ཡིན་ནོ། །ཟུར་གྱིས་གླེང་པའི་དབང་དུ་བྱས་ནས། མ་ལ་ཀྱེ་མ་ཁྱོད་ཀྱང་ང་འདྲ་ན། །འོ་ན་ཕྱིར་མི་འོང་བའི་འབྲས་ལྡན་ཡིན། །ད་ལྟར་ང་ནི་དེ་ལྟར་འཕགས་མིན་ཞེས། །ཟུར་གྱིས་གླེང་བས་བརྗོད་པ་ལས་ནི་ཆུང༌། །ཟུར་གྱིས་གླེང་བ་བརྗོད་པ་ལས་ཀྱང་ཆུང་བ་ཡིན་ནོ། །འདིར་གཞུང་ནི། མ་ལ་ཀྱེ་མ་ཁྱོད་ཀྱང་ཅི་འདྲ་བ་དེ་འདྲ་བར་གྱུར་ན་ང་དང་ཁྱོད་ཀྱང་འདྲ་

---

^{[མ་དཔེ་གཟིགས་ན་འདིར་གནོན།]}

བ་ཡིན་པས་དེ་ལྟར་ན་བདག་ཅག་རྒྱུན་དུ་ཞུགས་པ་དང༌། ལན་ཅིག་ཕྱིར་འོང་བ་དང༌། ཕྱིར་མི་འོང་བ་དང༌། དགྲ་བཅོམ་པ་ཡིན་པ་ཞིག་ན་ང་ནི་རྒྱུན་དུ་ཞུགས་པ་ནས་དགྲ་བཅོམ་པའི་བར་དུ་ཡང་མ་ཡིན་ན་རྒྱུན་དུ་ཞུགས་པ་དང༌། ལན་ཅིག་ཕྱིར་འོང་བ་དང༌། ཕྱིར་མི་འོང་བ་དང༌། དགྲ་བཅོམ་པ་ཡིན་ནོ་ཞེས་དེ་སྐད་ཟེར་བ་སུ་ཡིན་ཞེས་འབྱུང་བ་ཡིན་ནོ། །གཞན་ཡང༌། ཁོ་བོས་དེང་འདིར་བསམ་གཏན་སྙོམས་མ་ཞུགས། །དེ་བཞིན་ཁར་སང་མིན་དེ་ལས་ཕར་མིན། །ཞེས་བྱ་བ་ཡང་ཡིན་ཏེ། འདིར་གཞུང་ནི། བཙུན་པ་དགེ་སློང་གིས་འདི་སྐད་ཅེས་བདག་གིས་དེ་རིང་འཇིག་རྟེན་པའི་བསམ་གཏན་ལ་སྙོམས་པར་མ་ཞུགས་ཤིང་ཁར་སང་ཡང་མ་ཡིན། དེ་ཕན་ཆད་ཀྱང་ནམ་ཡང་མ་ཡིན་ནོ་ཞེས་མཆི་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ། །ཕྱི་མ་ཡང་དག་པ་ལ་དཔེར་བརྗོད་པ་ནི། ཁྱིམ་འདི་གང་གི་ཡིན་པ་དེ་ཆགས་བྲལ། །དེ་ཉིད་ངའི་ཡིན་ང་ནི་ཆགས་བྲལ་མིན། །ཞེས་བྱ་བས་བསྟན་ཏེ། འདིར་གཞུང་ནི་ཞུས་པ་ལས། བཙུན་པ་དགེ་སློང་གིས་འདི་སྐད་ཅེས་ཁྱིམ་ག་གེ་མོ་ཞིག་དགེ་སློང་གང་གི་ཡིན་པ་དེ་ནི་རྒྱུན་དུ་ཞུགས་པ་དང༌། ལན་ཅིག་ཕྱིར་འོང་བ་དང༌། ཕྱིར་མི་འོང་བ་དང༌། དགྲ་བཅོམ་པ་ཡིན་ནོ། །ཁྱིམ་དེ་ནི་ངའི་ཡང་ཡིན་ཏེ། ད་ནི་རྒྱུན་དུ་ཞུགས་པ་དང༌། ལན་ཅིག་ཕྱིར་འོང་བ་དང༌། ཕྱིར་མི་འོང་བ་དང༌། དགྲ་བཅོམ་པ་ཡང་མ་ཡིན་ནོ་ཞེས་མཆི་ན་ཅིར་འགྱུར་ལགས། བཀའ་སྩལ་པ། ཉེས་པ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ། །འདིར་ནི་ཁྱིམ་འདི་གང་གི་ཡིན་པ་དེ་ནི་རྒྱུན་དུ་ཞུགས་པ་ཡིན་ཞེས་བྱ་བ་ལ་སོགས་པ་ཚིག་སྔར་སྨོས་པ་ལས། ང་ནི་འདོད་ཆགས་དང་བྲལ་བ་ཡང་མ་ཡིན་ནོ་ཞེས་བྱ་བ་ལ་སོགས་པ་ཚིག་ཕྱི་མ་ཡང་དག་པ་བདེན་པ་ཡིན་ན་དེའི་སྔ་མ་སྦྱོར་བ་ལས་ཀྱང་ཆུང་བ་ཁོ་ན་ཡིན་ནོ་ཞེས་བྱ་བའི་ཐ་ཚིག་གོ །འདི་ལྟར་ཚིག་སྐྱོན་ཅན་དང་སྐྱོན་མེད་པ་འབྲེལ་བ་ལས་ནི་སྐྱོན་ཅན་མ་ཡིན་པར་མི་འགྱུར་ཏེ། དུག་དང་འདྲེས་པའི་ཆུ་བཞིན་ནོ། །ཅང་མི་སྨྲ་བས་དང་དུ་ལེན་པའི་དབང་དུ་བྱས་ནས། བཙུན་པ་གལ་ཏེ་དགྲ་བཅོམ་བདག་གི་ཟས། །བཞེས་ཤིག་ཟེར་དེས་དེ་བཞིན་མི་སྨྲ་ལེན། །གཞན་གྱི་ཟག་པ་ཟད་དམ་ཞེས་དྲིས་ན། །མི་སྨྲའི་རྣམ་པས་དང་དུ་ལེན་བྱེད་ཡིན། །ཞེས་

---

^{[མ་དཔེ་གཟིགས་ན་འདིར་གནོན།]}

བྱ་བས་བསྟན་ཏོ། །འདུལ་བྱེད་ལས། བཙུན་པ་གལ་ཏེ་དགྲ་བཅོམ་པ་ཞིག་ན་བདག་གི་བསོད་སྙོམས་བཞེས་ཤིག་ཅེས་ཟེར་བ་ལས་ཅང་མི་སྨྲ་བས་དང་དུ་ལེན་པར་བྱེད་ན་དམན་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །ཤེས་ལྡན་ཟག་པ་ཟད་དམ་ཞེས་དྲིས་པ་ལས་ཅང་མི་སྨྲ་བས་དང་དུ་ལེན་པར་བྱེད་པ་ཡང་ཡིན་ནོ། །དང་དུ་ལེན་པ་ཡང་འདིར་ཡིད་ལ་འཇོག་པ་ཡིན་ནོ། །འདིར་གཞུང་ནི། བཙུན་པ་དགྲ་བཅོམ་པ་ནི་གོས་དང་བསོད་སྙོམས་དང་མལ་སྟན་དང་ནད་ཀྱི་གསོས་སྨན་དང་ཡོ་བྱད་ཀྱི་ཕུད་དབང་ངོ་ཞེས་ཟེར་བ་ལ་ཅང་མི་སྨྲ་བས་དང་དུ་ལེན་པར་བྱེད་ན་ཉེས་པ་སྦོམ་པོར་འགྱུར་རོ་ཞེས་བྱ་བ་ལ་སོགས་པ་འབྱུང་བ་ཡིན་ནོ། །ཅང་མི་སྨྲ་བ་ཞེས་བྱ་བ་ནི་འདིར་རྣམ་པར་རིག་བྱེད་ཀྱི་རྣམ་པ་ཉིད་དུ་གྲུབ་པ་ཡིན་ནོ། །དེ་ལྟ་བས་ན་ལྟུང་བ་ཆུང་ཞེས་བྱའོ། །འདིར་ཐམས་ཅད་དུ་ཡང་ཕ་རོལ་ལ་གོ་ན་ཆུང་བར་བལྟ་བར་བྱའོ། །གཞན་དུ་ན་ཆུང་བ་པས་ཀྱང་ཆུང་བར་འགྱུར་རོ། །དེ་ལྟར་བླ་མ་བརྗོད་བློས་བརྫུན་པ་བསྟན། །ད་ནི་བརྫུན་དུ་སྨྲ་བ་གཞན་ཉོན་ཅིག །དེ་ལྟར་མིའི་ཆོས་བླ་མ་བརྗོད་པའི་འདུན་པས་བརྫུན་དུ་སྨྲ་བ་སྡོམ་པ་གཅོད་པར་བྱེད་པ་བསྟན་ཏོ། །འདིར་ནི་བཤགས་པར་འགྱུར་བའི་བརྫུན་དུ་སྨྲ་བ་གཞན་ཉོན་ཅིག་དང་བཤད་པར་བྱའོ། །གང་ལས་གཞན་པའི་འདུ་ཤེས་ཉིད་སྒྲའི་དོན། །གོ་བའི་མི་ལ་སྨྲས་པ་དེ་བརྫུན་ཡིན། །ཞེས་བྱ་བ་ནི་གལ་ཏེ་དོན་གང་ཞིག་སྨྲ་བར་བྱ་བ་དེ་ལས་གཞན་པའི་འདུ་ཤེས་དང་ལྡན་པ་ཡིན་ཞིང་སྐྱེས་བུ་གང་གི་ཆེད་དུ་བྱས་ནས་སྨྲ་བར་བྱ་བ་དེ་ཡང་གལ་ཏེ་དོན་དེ་གོ་བར་ནུས་པ་ཞིག་ཡིན་ལ་དེ་ལ་དེ་སྨྲས་ན་བརྫུན་དུ་སྨྲ་བ་ཡིན་ནོ། །གོ་བར་མི་ནུས་ན་ཅིར་འགྱུར་ཞེ་ན། ལྟུང་བ་ཆུང་ངུར་འགྱུར་རོ། །ཉིད་ཅེས་བྱ་བ་ངེས་པར་གཟུང་བ་ནི་གལ་ཏེ་དོན་གང་སྨྲ་བར་བྱ་བ་དེ་ལས་གཞན་དུ་འདུ་ཤེས་དང་ལྡན་པས་སྨྲས་པ་ཡིན་ན་དེ་བརྫུན་དུ་སྨྲ་བ་ཡིན་གྱི། འཁྲུལ་པས་གཞན་སྨྲ་བར་བྱའོ་སྙམ་པ་ལས་གཞན་སྨྲས་ན་ནི་མ་ཡིན་ནོ་ཞེས་ཉེ་བར་བསྟན་པའི་ཕྱིར་རོ། །ཇི་སྟེ་འོ་ན་བརྫུན་ཞེས་བྱ་བར་རྣམ་པར་གཞག་པ་དེ་ཚིག་ཡིན་ན་དེའི་ཕྱིར་ལུས་ཀྱིས་གཞན་དུ་དོན་གོ་བར་བྱེད་ན་ལྟུང་བ་མེད་པར་འགྱུར་རོ་ཞེ་ན་མི་འགྱུར་ཏེ། འདི་ལྟར། བརྫུན་ཞེས་བྱ་བའི་ཚུལ་དེ་ཚིག་ཡིན་ཡང༌། །ངག་གི་གོ་འགྱུར་གལ་ཏེ་ལུས་ཀྱིས་ཀྱང༌། །གོ་བྱེད་ཉེས་བྱས་ཉིད་དེ་འོན་ཀྱང་ཆུང༌། །འདི་ལྟར་འདིར་ནི་ཚིག་འཇུག་མེད་པས་སོ། །གལ་ཏེ་བརྫུན་ཞེས་བྱ་བར་

---

^{[མ་དཔེ་གཟིགས་ན་འདིར་གནོན།]}

རྣམ་པར་གཞག་པ་དེ་ཚིག་ཡིན་ཡང་འོན་ཀྱང་ཚིག་གིས་གོ་བར་འགྱུར་བའི་དོན་ལུས་ཀྱིས་གོ་བར་བྱེད་པའི་ཕྱིར་ཉེས་བྱས་ཀྱི་ལྟུང་བ་ཉིད་ཡིན་ནོ། །འོན་ཀྱང་དེ་ནི་ཆུང་བ་ཡིན་ཏེ། འདི་ལྟར་འདིར་ནི་ངག་འཇུག་པ་མེད་པས་སོ། །བརྫུན་གྱི་ལྟུང་བའི་རྟེན་ནི་ཚིག་ཡིན་པར་རྣམ་པར་གཞག་པ་ཡིན་ནོ། །འདིར་གཞུང་ནི་ཞུས་པ་ལས། དགེ་སློང་གིས་མཐོང་བ་ལས་ཐོས་སོ་ཞེས་ཟེར་ན་ལྟུང་བྱེད་དུ་འགྱུར་རོ། །ལུས་ཀྱིས་དོན་དེ་གོ་བར་བྱེད་ཅིང་ངག་གིས་མི་སྨྲ་ན་ཉེས་བྱས་སོ་ཞེས་འབྱུང་བ་ཡིན་ནོ། །དེ་ལྟ་བས་ན་མཐོང་བ་དང༌། ཐོས་པ་དང༌། དོགས་པ་དག་ལ་ཡང་དེ་བཞིན་དུ་སྨྲ་བར་བྱའོ། །དེ་དག་གི་མཚན་ཉིད་ཀྱང་ཅི་ཞིག་ཡིན་ཞེ་ན། །རང་གིས་རིག་པ་གང་ཡིན་མཐོང་བ་ཡིན། །ཡིད་ཆེས་ལས་ཐོས་གང་ཡིན་ཐོས་པ་ཡིན། །རྟགས་མ་ངེས་པར་འཛིན་པ་དོགས་པ་ཡིན། །གཞི་འདི་དག་གིས་སྨྲ་ན་ཉེས་པ་མེད། །དེ་ལ་རང་གི་གཞི་གང་ཞིག་མངོན་སུམ་མམ་རྗེས་སུ་དཔག་པས་ཡོངས་སུ་ཤེས་པ་དེ་ནི་མཐོང་བ་ཞེས་བྱའོ། །ཡིད་ཆེད་པ་སྟེ་མི་སླུ་བ་ལས་རྟོགས་པ་གང་ཡིན་པ་དེ་ནི་ཐོས་པ་ཡིན་ནོ། །རྟགས་མ་ངེས་པ་མཐོང་བ་ནི་དོགས་པ་ཡིན་ཏེ། །འདི་ལྟར་ནགས་ཐིབས་པོ་དེར་བུད་མེད་ཞུགས་པ་ཡིན་པ་འམ་ཆང་ཡང་འགྲིབ་པ་ནས་དགེ་སློང་ཡང་དེ་ལས་བྱུང་བ་ལ་སོགས་པའི་བར་ནི་དོགས་པ་ཡིན་པར་བསྟན་ཏོ། །དེ་ལྟ་བས་ན་གསུམ་པོ་འདི་དག་ནི་འདུལ་བ་ལས་ཐ་སྙད་གདགས་པའི་གཞི་ཡིན་ནོ། །གཞི་མེད་པར་དངོས་པོ་སྨྲ་བར་བྱེད་ན་བརྫུན་གྱི་ལྟུང་བར་འགྱུར་རོ། །དེ་ལས་ཡང་སྐུར་པ་འདེབས་པའི་ངོ་བོ་ནི་ཁ་ན་མ་ཐོ་བ་ཆེན་པོར་འགྱུར་རོ། །དེ་ལྟར་ཡང་འདུལ་བ་གཅིག་ནས་འཕྲོས་པ་ལས་གང་ཟག་ལས་ཀུན་དུ་འབྱུང་བའི་ལྟུང་བ་གཅིག་ནི་ཐམས་ཅད་ལས་ཁ་ན་མ་ཐོ་བ་ཆེན་པོ་ཡིན་ཏེ། ཡང་དག་པ་མ་ཡིན་པས་སྐུར་པ་འདེབས་པ་ཞེས་འབྱུང་བ་ཡིན་ནོ། །གཞན་ཡང༌། གཞན་གྱིས་གང་དྲིས་དེ་ཉིད་བརྗོད་པར་བྱའི། །གཙེ་བར་འདོད་པས་གཞན་དང་གཞན་མ་ཡིན། །གལ་ཏེ་གཤེད་མས་གསད་བྱ་བྲོས་པ་ན། །འདྲི་ན་དེ་ཚེ་དེ་ལ་འདི་སྐད་བརྗོད། །གཞན་གྱིས་གང་ཁོ་ན་དྲིས་པ་དེ་ཁོ་ན་བརྗོད་པར་བྱའི། མཐོ་བཙམས་པའི་བསམས་པས་གཞན་དང་གཞན་དུ་འཕྲོས་པར་མི་བྱའོ། །འོན་ཏེ་གཤེད་མ་དག་གིས་གསད་པར་བྱ་བ་བྲོས་པ་ན་མི་ཞིག་ལམ་འདི་ནས་སོང་ངམ་

---

^{[མ་དཔེ་གཟིགས་ན་འདིར་གནོན།]}

མ་སོང་ཞེས་འདྲི་ན་དེ་ལ་འདི་སྐད་ཅེས་བརྗོད་བར་བྱའོ། །ཚུར་ཤོག་སེན་མོ་འམ་གནམ་མཐོང་ཡང་དག་ཏུ། །ཁྱོད་ཀྱི་ལུས་ཅན་དག་ནི་མ་མཐོང་ངོ༌། །གནོད་པར་གྱུར་པ་རྣམས་ལ་ཡོངས་སྲུང་ཕྱིར། །དེ་སོགས་བརྣག་པས་སྨྲ་ན་ཉེས་པ་མེད། །དེ་ལྟ་བུ་ལ་སོགས་པའི་ཤན་བསྟན་པ་དག་གིས་གནོད་པར་འགྱུར་བ་རྣམས་ལས་ཡོངས་སུ་བསྐྱབ་པའི་ཕྱིར་གཞན་དང་གཞན་དུ་འཕྲོས་པར་བྱེད་ན་ཉེས་པ་མེད་དོ། །བརྫུན་སྨྲར་གཏོགས་པའི་རབ་ཏུ་དབྱེ་བ་བསྟེན། །ད་ནི་བརྫུན་སྨྲའི་ཕྱོགས་དང་མཐུན་པ་བརྗོད། །དེ་ལྟར་བརྫུན་དུ་སྨྲ་བར་གཏོགས་པའི་དབྱེ་བ་བསྟན་ཏོ། །ད་ནི་བརྫུན་དུ་སྨྲ་བའི་ཕྱོགས་དང་མཐུན་པ་བརྗོད་པར་བྱ་སྟེ། དེ་དག་ཀྱང་ལན་མི་འདེབས་པ་ལ་སོགས་པ་ཡིན་པར་བལྟ་བར་བྱའོ། །དེའི་ཕྱིར། དྲིས་ན་ཆོས་དང་ལྡན་པས་ལན་གདབ་བྱའི། །གཙེ་ཕྱིར་མི་སྨྲ་བར་ནི་འདུག་མི་བྱ། །དྲིས་ན་ཆོས་བཞིན་ལན་གདབ་པར་བྱའི། ཐོ་འཚམས་པའི་ཕྱིར་མི་སྨྲ་བར་འདུག་པར་མི་བྱའོ། །བླ་མ་མཁན་པོ་མི་ཡི་དབང་ཕྱུག་དང༌། །སངས་རྒྱས་དགེ་འདུན་གནས་བརྟན་དག་གི་བཀའ། །བརྟགས་ནས་རིག་པ་ཉིད་དོན་ཚིག་བཞིན་བྱ། །གལ་ཏེ་ཆོས་བཞིན་མིན་ན་བརྡ་སྤྲད་བྱ། །བླ་མ་ནི་སློབ་དཔོན་ཡིན་ནོ། །མཁན་པོ་ནི་རང་གི་སྒྲས་བསྟན་པའི་ཕྱིར་ཏེ། རྒྱལ་པོ་དང༌། སྟོན་པ་དང༌། དགེ་འདུན་གྱི་གནས་བརྟན་དང༌། ལྔ་པོ་དེ་དག་གི་བཀའ་ཆོས་དང་ལྡན་པ་ལ་མི་མཐུན་པར་མི་བྱའོ། །གལ་ཏེ་ཆོས་དང་ལྡན་པ་མ་ཡིན་ན་དེའི་ཚེ་བདག་ལ་མི་རུང་ངོ་ཞེས་བྱ་བ་ལ་སོགས་པ་ཆོས་དང་ལྡན་པའི་བརྡ་སྤྲད་པར་བྱའོ། །རིགས་པ་ཉིད་ན་བྱ་བའི་ཉིད་ཅེས་བྱ་བ་ཅིར་དགོས་ཤེ་ན། གལ་ཏེ་མཁན་བོ་དང་སློབ་དཔོན་གྱི་བཀའ་བསྒོ་བ་ཆོས་དང་ལྡན་པ་མ་ཡིན་པ་ནོད་པར་མི་བྱེད་ན་དེའི་ཚེ་བཀའ་ལས་འདས་ན་ཡང་ཉེས་པ་མེད་དོ་ཞེས་བསྟན་པའི་ཕྱིར་རོ། །ཇི་སྐད་དུ་འདུལ་བ་གཅིག་ནས་འཕྲོས་པ་ལས་གང་ཞིག་མཁན་པོ་དང་སློབ་དཔོན་གྱིས་ཆོས་ཀྱིས་སྡུད་པར་བྱེད་པ་ལ་ཟང་ཟིང་གིས་མ་ཡིན་ན་དེ་ལྟ་བུ་དག་ལ་སོ་སོར་བརྟགས་ནས་གནས་པར་བྱའོ། །གང་ཞིག་ཟང་ཟིང་གིས་ནི་སྡུད་པར་བྱེད་ལ་ཆོས་ཀྱིས་ནི་མ་ཡིན་ན་དེ་ལྟ་བུ་ལ་སོ་སོར་བརྟགས་ནས་འགྲོ་བར་བྱའོ། །གང་ཞིག་མཁན་པོ་དང་སློབ་དཔོན་གྱིས་ཆོས་དང་ཟང་ཟིང་གིས་སྡུད་པར་བྱེད་ན་དེ་ལ་ཇི་སྲིད་འཚོའི་བར་དུ་བསྐྲད་ཀྱང་འདུག་པར་

---

^{[མ་དཔེ་གཟིགས་ན་འདིར་གནོན།]}

བྱའོ། །གང་ཞིག་ཆོས་ཀྱིས་ཀྱང་མ་ཡིན་ལ་ཟང་ཟིང་གིས་ཀྱང་སྡུད་པར་མི་བྱེད་ན་དེ་ལྟ་བུ་ལ་བཟློག་ཏུ་ཟིན་ཀྱང་ལྟ་ཡང་མི་ལྟ་བར་འགྲོ་བར་བྱའོ་ཞེས་གསུངས་པ་ལྟ་བུ་ཡིན་ནོ། །རང་ངམ་གཞན་ནམ་གཉིས་ཀས་སྐྱེ་བོ་ལ། །འདྲེ་སྐད་མི་སྙན་པ་དག་མི་བྱའོ། །མི་སྡུག་མ་ཆེ་པ་གཙིགས་པའི་སྐད་དག་གིས། །གལ་ཏེ་ཕན་ཕྱིར་བྱེད་ན་ཉེས་པ་མེད། །བདག་ཉིད་མ་གཞན་གྱིས་སྲོག་ཆགས་རྣམས་ལ་འདྲེ་ལ་སོགས་པའི་སྐད་མི་སྙན་པ་དག་གིས་འཇིགས་པ་དག་བསྐྱེད་པར་མི་བྱའོ། །གལ་ཏེ་ཕན་པའི་ཕྱིར་བཞིན་མི་སྡུག་པ་མཆེ་བ་གཙིགས་པ་བསྡིགས་པར་བྱེད་པ་ལ་ཟ་བར་བྱེད་དོ་ཞེས་བྱ་བ་ལ་སོགས་པས་བསྡིགས་པ་དེའི་ཚེ་ཉེས་པ་མེད་དོ། །འདི་བསད་པའི་ཕྱོགས་དང་མཐུན་པ་ཡིན་ཡང་ཚིག་དང་འབྲེལ་བའི་ཕྱིར་འདིར་བཀོད་དོ། །ཡལ་གཟུགས་འཆའ་དང་མནའ་དང་མི་སྨྲར་བཅས། །དེ་བཀག་ཡིན་པས་ལམ་དུ་འགྲོ་བ་ན། །མི་སྨྲ་ཉིད་དམ་ཆོས་ཀྱི་གཏམ་བྱ་ཡི། །བུད་མེད་སོགས་གཏམ་ཚུལ་མི་མཐུན་མི་བྱ། །ཡལ་གཟུགས་འཆའ་བ་དང་མནའ་དང་ཅང་མི་སྨྲ་བ་མི་བྱའོ། །ལམ་དུ་འགྲོ་བ་ན་ཅང་མི་སྨྲ་བས་ལམ་དུ་འཇུག་པར་བྱ་བ་འམ། འཁོར་བ་ལས་སྐྱོ་བ་དང་མཐུན་པའི་གཏམ་དག་བྱའི། བུད་མེད་ཀྱི་གཏམ་དང་དམག་གི་གཏམ་ལ་སོགས་པ་ནི་མི་བྱའོ། །བུད་མེད་ཀྱི་གཏམ་འདོད་ཆགས་དང་བྲལ་བ་དང་མཐུན་པའི་ཆོས་ཀྱི་གཏམ་དུ་གཏོགས་པ་ཉིད་ཡིན་པས་དེའི་ཕྱིར་ཚུལ་དང་མི་མཐུན་ཞེས་བྱེ་བྲག་ཏུ་ཕྱེ་བ་ཡིན་ཏེ། འདིར་བྱུང་བ་ནི་གནོད་སྦྱིན་འཕྱ་བ་ཡིན་ནོ། །ངལ་སོས་གུས་པས་སངས་རྒྱས་ཚིགས་བཅད་གདོན། །མཚན་མོ་འདུག་ན་རྒྱུད་གསུམ་པ་ཡིན་ནོ། །འོན་ཏེ་གཞན་གྱི་ལྷ་ཡི་གནས་དག་མཐོང༌། །དེར་ནི་སེ་གོལ་གཏོགས་ཏེ་ཚིགས་བཅད་གདོན། །སྡོམ་བརྩོན་འགྲོན་ལམ་གྱི་ནང་དུ་ངལ་བསོས་ནས་གུས་པས་སངས་རྒྱས་ཀྱི་ཚིགས་བཅད་གདོན་ཏོ། །གང་དུ་མཚན་མོ་གནས་འཆའ་བར་བྱེད་ན་དེར་རྒྱུད་གསུམ་པ་གདོན་ཏོ། །ཕྲན་ཚེགས་ལས་གང་ལ་རྒྱུད་གསུམ་པ་མེད་པ་དེས་ནི་གཙུག་ལག་ཁང་གི་ཚིགས་སུ་བཅད་པ་བཏོན་ནས་འགྲོ་བར་བྱའོ་ཞེས་འབྱུང་བ་ཡིན་ནོ། །དེ་ནི་ཕོངས་ན་བྱ་བ་ཡིན་པས་མདོར་མ་བྱས་སོ། །འོན་ཏེ་ཡང་ལམ་གྱི་བར་དུ་མི་སྟེགས་ཅན་གྱི་ལྷའི་གནས་དག་མཐོང་ན་དེར་སེ་གོལ་གཏོགས་ཏེ། བདེ་བར་གཤེགས་པའི་ཚིགས་སུ་

---

^{[མ་དཔེ་གཟིགས་ན་འདིར་གནོན།]}

བཅད་པ་གདོན་ཏོ། །གཞན་ཡང༌། མཛའ་བོ་དབྱེ་དང་རྩུབ་པའི་ཚིག་དང་ནི། །སྐྱོན་ནས་སྨྲ་བ་ལ་སོགས་སྤང་བར་བྱ། །ཕྲ་མ་དང་ཚིག་རྩུབ་མོ་དང༌། མིའི་སྐྱོན་ནས་སྨྲ་བ་ལ་སོགས་པ་ཐམས་ཅད་ཡོངས་སུ་སྤང་བར་བྱའོ། །གལ་ཏེ་མཛའ་བོ་དབྱེ་བར་འགྱུར་པ་ཕྱོགས་དང་མཐུན་པ་ཡིན་ན་འོ་ན་ཇི་ལྟར་དགེ་ཚུལ་ལ་ཕྲ་མ་བྱེད་ན་ཉེས་བྱས་ཀྱི་ལྟུང་བར་འགྱུར་རོ་ཞེས་གསུངས་ཤེ་ན། །བཤད་པ། འདུལ་བར་དབེན་འདི་ཉེས་བྱས་གང་གསུངས་པ། །དེ་ནི་ཡིད་ཀྱིས་ཉེས་བྱས་ཡིན་གཞན་མིན། །ཉེས་བྱས་དེ་ནི་ཡིད་ཀྱི་བྱ་བ་ཉིད་ལས་དགོངས་པའི་ཕྱིར་ཉེས་པ་མེད་དོ་ཞེས་བྱ་བའི་ཐ་ཚིག་གོ །ཇི་སྟེ་འདི་ག་ལས་ཤེ་ན། དགེ་ཚུལ་གྱི་སྡོམ་པ་ནི་སྤོང་བ་བཞིའི་མཚན་ཉིད་ཡིན་པའི་ཕྱིར་རོ། །དེ་ཉིད་དུ་ཕྲ་མ་དང་ཚིག་རྩུབ་པོ་དང་ཚིག་འཁྱལ་པ་གསུམ་བཅུག་ནས་དགེ་སློང་གི་སྡོམ་པ་སྤོང་བ་བདུན་གྱི་མཚན་ཉིད་ཡིན་པས་སོ། །དགེ་ཚུལ་ཀྱི་ཚིག་ལེའུར་བྱས་པའི་འགྲེལ་པ་ལས་བསླབ་པའི་གཞི་བཞི་བ་རྫོགས་སྷོ།། །། འབྲས་བུ་ལ་སོགས་ཁུ་བཅོས་པ་ནི། །བཅོས་ཆད་རྒུན་ཆང་བུ་རམ་ཤིང་འདྲར་བསྟན། །ཆན་བཏགས་མནན་པ་བྱས་པ་སྦྱར་བའི་ཆང༌། །མྱོས་འགྱུར་རྩྭ་མཆོག་གིས་ཀྱང་མི་བཏུང་ངོ༌། །དེ་ལ་བཅོས་ཆང་ཞེས་བྱ་བ་འདི་ལྟ་སྟེ། རྒུན་འབྲུའི་ཁུ་བ་ལས་བྱས་པའི་རྒུན་ཆང་དང༌། །བུ་རམ་ཤིང་གི་ཁུ་བ་ལས་བྱས་པ་བུ་རམ་ཆང་ངོ༌། །འདྲ་བ་སྨོས་པ་ནི་ན་ལི་ཀེ་ར་དང་མེ་ཏོག་ལ་སོགས་པའི་ཆད་བསྡུ་བའི་ཕྱིར་རོ། །སྦྱར་བའི་ཆང་ནི་འབྲུ་བཏགས་པ་མནན་པ་བྱས་པ་ཡིན་པར་རྟོགས་པར་བྱའོ། །དེ་བས་ན་མྱོས་པར་གྱུར་པ་འདི་གཉིས་ནི་རྩྭ་མཆོག་གིས་ཀྱང་བཏུང་བར་མི་བྱའོ་ཞེས་བཀའ་སྩལ་ཏོ། །འོ་ན་སྦྱར་བའི་ཆང་དང་བཅོས་པའི་ཆང་མྱོས་པར་འགྱུར་བའི་ཁུ་བ་བག་མེད་པའི་གནས་སྤོང་ངོ་ཞེས་བྱ་བ་འདི་ལ་སྦྱར་བའི་ཆང་དང་བཅོས་པའི་ཆང་སྨོས་པ་ཅི་དགོས་ཤེ་ན། སྦྱར་བའི་ཆད་དང་བཅོས་ཆང་གཉིས་འདིར་བསྟན། །དེ་གོ་ཏྲ་བ་ལ་སོགས་བཟློག་ཕྱིར་རོ། །མྱོས་འགྱུར་སྨོས་པ་མ་རེད་ཉམས་པ་ཡིན། །བག་མེད་མྱོས་བ་སྤོང་བའི་རྒྱུ་ཡིན་ནོ། །ཞེས་བྱ་བ་ལ་ངང་ནི་བསྡུ་བ་ཡིན་ཏེ། །སྦྱར་བའི་ཆང་དང་བཅོས་པའི་ཆང་ཞེས་བྱ་བའི་ཐ་ཚིག་གོ །ཀོ་ཏྲ་བ་ལ་སོགས་པ་བཟློག་ཕྱིར་རོ། །ཞེས་བྱ་བ་ནི་ཇི་སྐད་དུ་ཆོས་མངོན་པ་མཛོད་ལས་གླ་གོར་ཞོ་ཤ་དང་

---

^{[མ་དཔེ་གཟིགས་ན་འདིར་གནོན།]}

ཀོ་ཏྲ་བ་ལ་སོགས་པ་ཡང་མྱོས་བར་བྱེད་པ་ཡིན་པས་བཅོས་པའི་ཆད་དང་སྦྱར་བའི་ཆང་ཞེས་བྱ་བ་སྨོས་པ་ཡིན་ནོ་ཞེས་བསྟན་པ་ལྟ་བུའོ། །གལ་ཏེ་དེ་ལྟ་ཡིན་ན་མྱོས་པར་འགྱུར་བ་གླ་གོར་ཞོ་ཤ་དང་ཀོ་ཏྲ་བ་ལ་སོགས་པ་སྤྱད་པར་རུང་མོད་ཅེ་ན། མི་དུང་སྟེ། དེ་དག་ནི་ཁ་ཟས་མི་འཕྲོད་པ་ཉིད་ཡིན་པས་བླངས་པའི་ཕྱོགས་དང་མཐུན་པ་ཉིད་ཡིན་ནོ་ཞེས་བཀག་པའི་ཕྱིར་རོ། །འདིར་མྱོས་པར་འགྱུར་བ་ལས་ལྡོག་པ་ནི་སེམས་འཁྲུལ་བའི་རྒྱུ་དག་ཁོ་ན་དགག་པར་བྱ་བ་ཡིན་པའི་ཕྱིར་རོ། །འདིས་ནི་མི་འཕྲོད་པ་ཁོ་ན་ནི་མ་བཀག་གོ །དེ་ལྟར་ཡང་མྱོས་པར་འགྱུར་པ་ཞེས་བྱ་བ་ནི་གང་ཞིག་སྤྱད་ན་བྱ་བ་དང༌། མི་བྱ་བ་མི་ཤེས་པའོ་ཞེས་གསུངས་པ་ཡིན་ནོ། །གླ་གོར་ཞོ་ཤ་དང་གོ་ཏྲ་བ་ནི་དེ་ལྟ་ཡང་མ་ཡིན་ཏེ། སེམས་འཁྲུལ་པར་བྱེད་པ་དང་བྲལ་བའི་ཕྱིར་རོ། །གལ་ཏེ་དེ་ལྟ་ན་མྱོས་པར་འགྱུར་བ་ཚོད་ཟིན་པར་འཐུང་བ་ཡང་སེམས་འཁྲུལ་པ་དང་བྲལ་བའི་ཕྱིར་ཉེས་པ་མེད་པར་འགྱུར་མོད་ཅེ་ན། དེ་ནི་མ་ཡིན་ཏེ། མྱོས་པར་འགྱུར་བའི་ཚོད་ཡོངས་སུ་མི་ཤེས་པའི་ཕྱིར་དང༌། ཧ་ཅང་ཐལ་བར་འགྱུར་པའི་ཕྱིར་དང༌། དེའི་རིགས་དང་ལྡན་པ་ཉིད་ཡིན་པས་ཡོངས་སུ་སྤང་བར་བྱ་བ་ཡིན་པའི་ཕྱིར་རོ། །དེའི་ཕྱིར་རྣམ་པ་ཐམས་ཅད་དུ་བཀག་པ་ཡིན་ཏེ། བཅོམ་ལྡན་འདས་ཀྱིས་དགེ་སློང་དག་སྟོན་པ་ང་ལ་ལུང་ནོད་པ་རྣམས་ཀྱིས་མྱོས་པར་འགྱུར་པའི་ཁུ་བ་ཐ་ན་རྩྭ་མཆོག་གིས་ཀྱང་མི་སྦྱིན་ཞིང་མི་བཏུང་ངོ་ཞེས་གསུངས་པ་ཡིན་ནོ། །མྱོས་པར་འགྱུར་པའི་ཁུ་བ་སྨོས་པ་ཅི་དགོས་ཤེ་ན་མྱོས་འགྱུར་སྨོས་པ་མ་རེད་ཉམས་པ་བཟློག་པའི་ཕྱིར་ཡིན་ནོ་ཞེས་བྱ་བར་སྦྱར་རོ། །དེ་བས་ན་སྦྱར་བའི་ཆད་དང་བཅོས་པའི་ཆད་ཇི་སྲིད་དུ་མྱོས་པར་འགྱུར་པའི་དངོས་པོར་མ་རེད་པ་འམ་རེད་ནས་ཀྱང་གང་གི་ཚེ་སྐྱུར་པོར་རེད་པ་དེའི་ཚེ་བཏུང་བར་བྱ་བ་ཉིད་ཡིན་ཏེ། དེ་ཡང་བཏུང་བའི་ཚིག་ལེའུར་བྱས་པ་གཞན་ལས་སྟོན་པར་འགྱུར་རོ། །བག་མེད་པའི་གནས་སྤོང་བ་ཅི་དགོས་ཤེ་ན། བཤད་པ་བག་མེད་སྨོས་པ་སྤོང་བའི་རྒྱུ་ཡིན་ནོ་ཞེས་བྱ་བ་ནི་གང་གི་ཕྱིར་བག་མེད་པའི་གནས་མྱོས་པར་འགྱུར་པའི་ཁུ་བ་འཐུང་བ་དེའི་ཕྱིར་སྤང་བར་བྱས་ཡིན་ནོ་ཞེས་བསྟན་པའི་ཕྱིར་རོ་ཞེས་བྱ་བའི་ཐ་ཚིག་གོ། །།བམ་པོ་བདུན་པ། ད་ནི་

---

^{[མ་དཔེ་གཟིགས་ན་འདིར་གནོན།]}

ལྟུང་བའི་རྣམ་པར་དབྱེ་བ་བཤད་པར་བྱ་སྟེ། གང་ཞིག་མྱོས་འདུ་ཤེས་པར་མྱོས་འཐུང་བ། །འཐུངས་ལ་མྱོས་ན་ཉེས་བྱས་ཉིད་ཡིན་ནོ། །ནུར་རྩི་དང་ནི་སྤང་མ་ཟ་བ་ལས། །དེ་དང་འདྲ་བར་ཉེས་བྱས་རྡོ་རྗེས་འཇོམས། །དགེ་ཚུལ་གང་ཞིག་མྱོས་པར་འགྱུར་པའི་འདུ་ཤེས་དང་ལྡན་པས་མྱོས་པར་འགྱུར་བའི་ཁུ་བ་འཐུངས་ལ་དེ་མྱོས་པར་གྱུར་ན་ཉེས་བྱས་ཀྱི་ཁ་ན་མ་ཐོ་བར་འགྱུར་བ་ཡིན་ནོ་ཞེས་བྱ་བའི་ཚིག་གོ །དེ་བཞིན་དུ་ནུར་རྩི་ཟ་བ་དང་སྤང་མ་ཟ་བ་ལས་ཀྱང་ཉེས་བྱས་ཀྱི་རྡོ་རྗེས་འཇོམས་པ་ཁོ་ནར་འགྱུར་རོ། །བཅོས་པའི་ཆང་གི་སྙིགས་མ་ནི་ནུར་རྩི་ཡིན་ལ་སྦྱར་བའི་ཆང་གི་སྙིགས་མ་ནི་སྤང་མ་ཡིན་ནོ། །གཞན་དག་ན་རེ་སྙིགས་མ་ནི་ནུར་རྩི་ཡིན་ལ་དེའི་ཁུ་བ་ཕྱུང་བ་ནི་སྤང་མ་ཡིན་ནོ་ཞེས་འཆད་དོ། །དེ་ལྟར་ཡང༌། སྦང་མ་ཁུ་བ་ཕྱུང་བའི་ཕྱིར། །རྟུག་སྐམ་འདེབས་དང་སྐྱོན་འཁྲུག་བྱེད། །ཅེས་བསྟན་པ་ཡིན་ནོ། །ཕབས་ཀྱི་རྡོ་གུ་འམ་རྩ་སོགས་མྱོས་བྱེད་གང༌། །གལ་ཏེ་ཟ་ན་ཆུང་བ་ཉིད་དུ་འགྱུར། །གང་ལ་མྱོས་འགྱུར་ཁུ་བའི་རོ་དྲི་ཡོད། །མྱོས་འགྱུར་ཁུ་བ་མིན་ཡང་བཏུང་བྱ་མིན། །ཞེས་བྱ་བ་ལ། ཕབས་ཞེས་བྱ་བ་ནི་མྱོས་པར་འགྱུར་བའི་ཁུ་བའི་དོན་དུ་ས་བོན་གང་ཞིག་སྦྱར་བ་སྟེ། ཕབས་ཀྱི་རྡོ་གུ་འམ་རྩ་བ་ལ་སོགས་པ་མྱོས་པར་འགྱུར་བ་ཟ་ན་ཉེས་བྱས་ཆུད་ངུར་འགྱུར་རོ། །མྱོས་པར་འགྱུར་བ་མ་ཡིན་དུ་ཟིན་གྱིས་ཀྱང་གང་ཞིག་མྱོས་པར་འགྱུར་པའི་ཁུ་བའི་རོ་དང༌། མྱོས་པར་འགྱུར་བའི་དྲི་ཡོད་ན་དེ་བཏུང་བར་མི་བྱ་སྟེ། དེ་ལ་ཡང་ཉེས་བྱས་ཁོ་ནར་འགྱུར་བས་སོ། །ལུས་ལ་སྐུད་དང་མཁུར་བར་བླུགས་པ་ནི། །ན་བ་མ་གཏོགས་མྱོས་ཁུས་མི་བྱའོ། །ན་བ་མ་གཏོགས་པ་གཞན་གྱི་ཚེ་ལུས་ལ་བསྐུ་བའམ་མཁུར་བར་བླུགས་པ་མྱོས་པར་འགྱུར་པའི་ཁུ་བས་མི་བྱའོ། །ལུས་ལ་བྱུགས་ན་བ་སྤུའི་ཁུང་བུ་ནས་དེར་འཇུག་པའི་ཕྱིར་ཉེས་པ་ཡིན་ནོ། །མཁུར་བར་བླུགས་པ་ནི་མིད་པར་མི་འདོད་པའི་ཕྱིར་ཉེས་པ་མེད་དོ་སྙམ་དུ་དེ་ལྟར་སེམས་པ་བཟློག་པའི་ཕྱིར་རོ། །གལ་ཏེ་བསྐོལ་དང་དེ་ཡི་ཁ་དོག་ཙམ། །མཐུན་པ་འམ་མྱོས་པར་འགྱུར་པའི་ཁུ་བ་ཡི། །དངོས་པོར་མ་རེད་ཉམས་འཐུང་ཉེས་མེད་དེ། །འདི་ལྟར་འདིར་ནི་མྱོས་རྒྱུ་སྤང་བྱ་ཡིན། །གལ་ཏེ་མྱོས་པར་འགྱུར་བའི་ཁུ་བ་བསྐོལ་

---

^{[མ་དཔེ་གཟིགས་ན་འདིར་གནོན།]}

བ་འཐུངས་ན་ལྟུང་བ་མེད་པ་ཡིན་ནོ། །གལ་ཏེ་མྱོས་པར་འགྱུར་བའི་ཁུ་བ་དང་ཁ་དོག་མཐུན་པ་འམ། ཡང་ན་མྱོས་པར་འགྱུར་པའི་ཁུ་བའི་དངོས་པོར་མ་རེད་པ་འམ། ཉམས་པ་འཐུང་ན་དེའི་ཚེ་ཡང་ཉེས་པ་མེད་པ་ཡིན་ཏེ། གང་གི་ཕྱིར་འདིར་མྱོས་པའི་རྒྱུ་ཁོ་ན་སྤད་པར་བྱ་བ་ཡིན་གྱི་གཞན་ནི་མ་ཡིན་པས་སོ། །མྱོས་པར་འགྱུར་བའི་ཕྱོགས་མཐུན་དཔེར་བྱ་ན། །བྲེག་བཙོང་ཀེའུ་དང་སྒོག་སྐྱ་ཡིན་པར་བཤད། །སྒོག་སྐྱ་ལ་སོགས་པ་ནི་བྱེ་བྲག་ཏུ་བཤད་པ་ལས་དུས་མ་ཡིན་པའི་ཟས་ཀྱི་ཕྱོགས་དང་མཐུན་པར་བསྟན་པ་ཡིན་ཏེ། དེ་ལྟར་ཡང་འཐུང་ན་ལྟུང་བ་དང་ཆོས་མཐུན་པས་འདིར་བཤད་དོ། །གཞན་ཡང་ཇི་ལྟར་ཆང་འཐུང་བ་བཅས་པའི་ཁ་ན་མ་ཐོ་བ་དང་བཅས་པ་ཡིན་ཡང་ཤིན་ཏུ་སྨད་པར་བྱ་བ་དེ་བཞིན་དུ་སྒོག་སྐྱ་ལ་སོགས་པ་ཡང་ཤིན་ཏུ་སྨད་པར་བྱ་བ་དང་ཆོས་མཐུན་པའི་ཕྱིར་དེ་མྱོས་པར་འགྱུར་བའི་ཕྱོགས་དང་མཐུན་པ་ཉིད་ཡིན་ནོ། །མྱོས་པར་འགྱུར་བའི་ཁུ་བ་དང་བཅས་པའི་ཁ་ན་མ་ཐོ་བ་དང་བཅས་པ་ཡིན་ཞེས་བྱ་བ་འདིའི་ཁུངས་ནི་ནད་པ་རྣམས་ཀྱི་ལུས་བསྐུ་བ་དང་མཁུར་བར་རྔུབ་པར་གནང་བའི་ཕྱིར་ལ། རང་བཞིན་གྱིས་ཁ་ན་མ་ཐོབ་དང་བཅས་པ་ནི་སྲོག་ལ་བབ་ཀྱང་རུང་མ་གནང་བའི་ཕྱིར་རོ། །འཕགས་པ་ཉེར་སྦས་ཀྱིས་ནི་མྱོས་པར་འགྱུར་བའི་ཁུ་བ་བཅས་པའི་ཁ་ན་མ་ཐོ་བ་དང་བཅས་པ་ཡིན་ཡང་ཤིན་ཏུ་སྨད་པ་ཡིན་ཏེ། རང་བཞིན་གྱིས་ཁ་ན་མ་ཐོ་བ་དང་བཅས་པའི་རྒྱུ་ཡིན་པའི་ཕྱིར་དང༌། མཚམས་མེད་པ་བཞི་པོ་དག་དང་ལྟུང་བ་རིས་ལྔ་དག་ལ་རབ་ཏུ་འཇུག་པར་བྱེད་པ་ཡིན་པའི་ཕྱིར་དང༌། ཉེས་པ་ཐམས་ཅད་ཀྱི་འབྱུང་གནས་ཡིན་པའི་ཕྱིར་རོ་ཞེས་གསུངས་སོ། །དེ་ཡང་ནད་ལ་མཁས་པས་ལུང་ཕོག་པས། །གནང་ངོ་དང་མེད་མི་ཡི་མངོན་སུ་མ་མིན། །ཞེས་བྱ་བ་ལ། དེ་ཡང་ཞེས་བྱ་བ་ནི་བྲེག་བཙོང་དང༌། ཀེའུ་དང་སྒོག་སྐྱ་སྟེ་སྨན་པས་ལུང་ཕོག་པའི་ཕྱིར་བཅོམ་ལྡན་འདས་ཀྱིས་གནང་བས། གཙུག་ལག་ཁང་གི་ཕྱི་རོལ་དབེན་ཕྱོགས་སུ། །ཁང་པ་བྱས་ནས་བྱ་བའི་ཆེད་དུ་འཇུག །གཙུག་ལག་ཁང་གི་ཕྱི་རོལ་ཕྱོགས་ཤིན་ཏུ་དབེན་པར་ཁང་པ་བྱས་ཏེ་དེར་བྱ་བའི་ཕྱིར་འཇུག་པར་བྱའོ། །དེར་མ་དད་པ་རྣམས་འཇུག་ཏུ་མི་གཞུག་གོ །གཞན་ཡང༌།

---

^{[མ་དཔེ་གཟིགས་ན་འདིར་གནོན།]}

དེ་དག་དགེ་འདུན་མལ་སྟན་རྣམས་ལ་ནི། །ནམ་ཡང་ལོངས་མི་སྤྱད་པར་བཀའ་སྩལ་ཏོ། །ལུས་ལ་དྲི་ང་ཉིད་དང་བྲལ་འོག་ཏུ། །རང་བཞིན་གནས་ཕྱིར་གཙུག་ལག་ཁང་འཇུག་བྱ། །བཅོམ་ལྡན་འདས་ཀྱིས་དེ་ནི་དགེ་འདུན་གྱི་མལ་སྟན་དག་གི་སྟེང་དུ་ལོངས་སྤྱད་པར་མི་བྱའོ་ཞེས་བཀག་སྟེ། བྱ་བ་ཟིན་དུ་ཟིན་ཀྱང་དེ་ལྟར་ཐ་མལ་པར་མ་གྱུར་པར་གཙུག་ལག་ཁང་དུ་འཇུག་པར་མི་བྱའོ། །དྲི་ང་བ་ཉིད་དང་བྲལ་བར་གྱུར་ནས་ཕྱིས་རང་བཞིན་དུ་གནས་ནས་གཙུག་ལག་ཁང་དུ་འཇུག་པར་བྱའི་གཞན་དུ་ནི་མ་ཡིན་ནོ། །དགེ་ཚུལ་གྱི་ཚིག་ལེའུར་བྱས་པའི་འགྲེལ་པ་ལས་མྱོས་པར་འགྱུར་བ་སྤོང་བ་སྟེ་ལྔ་པ་རྫོགས་སྷོ།། །།བྲོ་གར་གླུ་དང་རོལ་མོའི་སྒྲ་ཡང་རུང༌། །བརྟུལ་ཞུགས་ཅན་གྱིས་རང་ངམ་གཞན་བྱ་མིན། །འདི་འདིར་འཁོར་བ་ལ་ཆགས་རྒྱུ་ཡིན་ནོ། །འོན་ཀྱང་གལ་ཏེ་བྱེད་ན་ཉེས་བྱས་འགྱུར། །དགེ་ཚུལ་གྱིས་བྲོ་གར་དང༌། གླུ་དང་རོལ་མོའི་སྒྲ་གང་རང་ངམ་གཞན་གྱིས་ཀྱང་མི་བྱ་སྟེ། གང་གི་ཕྱིར་འདིར་ནི་འཁོར་བ་ལ་ཆགས་པའི་རྒྱུ་ཡིན་པས་སོ། །འོན་ཀྱང་གལ་ཏེ་བྱེད་ན་ཉེས་བྱས་སུ་འགྱུར་རོ། །མཆོད་པའི་ཆེད་དུ་འང་རོལ་མོའི་སྒྲ་དང་ནི། །གླུ་བྱོས་ཞེས་ནི་མི་བརྗོད་འོན་ཀྱང་ནི། །ལྷ་དང་ལྷ་མིན་དབང་པོས་ཞབས་རྡུལ་གཏུགས། །སངས་རྒྱས་ལ་ནི་མཆོད་པ་བྱོས་ཞེས་བརྗོད། །ཆེར་ན་སྟོན་པ་ལ་མཆོད་པའི་ཕྱིར་ཡང་བརྟུལ་ཞུགས་ཅན་གྱིས་བྲོ་གར་དང༌། གླུ་དང༌། རོལ་མོའི་སྒྲ་བྱོས་ཤིག་ཅེས་བརྗོད་པར་མི་བྱའོ། །འོ་ན་ཅི་ལྟ་ཞེ་ན། ལྷ་དང་ལྷ་མ་ཡིན་རྣམས་ཀྱིས་ཞབས་ཀྱི་རྡུལ་ལ་གཏུགས་པའི་བཅོམ་ལྡན་འདས་ལ་མཆོད་པ་བྱོས་ཤིག་ཅེས་བརྗོད་པར་བྱའོ། །འདིར་གཞུང་ནི། བཞིན་བཟངས་དག་བཅོམ་ལྡན་འདས་ལ་རང་གི་བཟོས་མཆོད་པ་བྱོས་ཤིག་ཅེས་འབྱུང་བ་ཡིན་ནོ། །དམིགས་ཀྱིས་བསལ་བ་ནི། ཆོས་སྒྲོགས་བྱེད་པའི་གླུ་ནི་ཉེས་པ་མེད། །སྟོན་པའི་ཡོན་ཏན་སྒྲོགས་པའང་དེ་བཞིན་ནོ། །དམ་ཆོས་ཆེད་དུ་གླུ་ནི་མི་ཤེས་ན། །དབེན་པར་སོང་སྟེ་རབ་ཏུ་བསླབ་པར་བྱ། །ཞེས་བསྟན་པ་ཡིན་ཏེ། ཆོས་སྒྲོགས་པ་དང་སྟོན་པ་ལ་སྟོད་པར་བྱེད་པ་ན་གླུ་བྱའོ། །གང་ཞིག་གླུ་མི་ཤེས་ན་བརྟུལ་ཞུགས་ཅན་དེས་དབེན་པར་སོང་

---

^{[མ་དཔེ་གཟིགས་ན་འདིར་གནོན།]}

སྟེ། དམ་པའི་ཆོས་བརྗོད་པའི་ཆེད་ཁོ་ནར་གླུ་བསླབ་པར་བྱའོ། །ཆུ་འབུད་ལ་སོགས་གར་སོགས་ཕྱོགས་དང་མཐུན། །བྱིའུ་ཟུལ་དང་ནི་རིང་དུ་འགྲོ་བྱེད་དང༌། །སྟེང་དུ་འབྱུང་དང་མཆོང་དང་རྒྱུག་ལ་སོགས། །རྩེད་མོའི་རྒྱུ་ཡིན་པས་ན་དེ་བཀག་གོ །ཆུ་ལ་འབུད་པ་དང་ཆུ་ལ་རྡོབ་པ་དང་ཆུ་ལ་འཇོལ་བ་ལ་སོགས་པ་ནི་ཆུ་ལ་རྩེ་བའི་རྣམ་པ་དག་ཡིན་ནོ། །དེ་བཞིན་དུ་བྱིའུ་ཟུལ་ཏེ་ཆུའི་གཏིང་དུ་འཇུག་པ་དང་ཐག་རིང་དུ་འགྲོ་བ་དང་དེ་བཞིན་དུ་སྟེང་དུ་འབྱུང་བ་དང་མཆོང་བ་དང་རྒྱུག་པ་ལ་སོགས་པ་ཡང་རྩེད་མོའི་རྒྱུ་ཡིན་པས་མི་བྱའོ། །གཞན་ཡང༌། འཕགས་པ་རྣམས་ཀྱིས་དགོད་ན་སོ་ཕྱུང་སྟེ་འམ། །དེ་བཞིན་སྒྲ་དག་ཆེན་པོར་མི་བྱའོ། །ལག་པ་འམ་ཆོས་གོས་ཀྱི་ནི་ཐ་མ་ཡིས། །ཁ་དག་རབ་ཏུ་བཀབ་སྟེ་གླལ་བར་བྱ། །མཆུ་བགྲད་དེ་སོ་ཕྱུང་ནས་ཧ་ཧ་ཞེས་སྐད་ཆེན་པོ་དང་འབྲེལ་བའི་བགད་པ་མི་བྱའོ། །ཅུང་ཟད་དགོད་པ་ལ་ནི་ཉེས་པ་མེད་དེ། བཞིན་གྱི་མདོག་གསལ་བ་དང་བཞིན་འཛུམ་པར་བྱའོ་ཞེས་གསུངས་པའི་ཕྱིར་རོ། །ཁ་གདངས་པར་ཡང་མི་བྱའོ། །འོན་ཏེ་གླ་ལ་བྱུང་ན་དེའི་ཚེ་ལག་པའམ་གོས་ཀྱི་ཐ་མས་ཁ་བཀབ་སྟེ་གླལ་བར་བྱའོ། །ཆུ་ལ་འཕྱོ་བའི་དམིགས་ཀྱིས་དབྱེ་བ་བཤད་པར་བྱ་སྟེ། །སྨན་པས་ལུང་ཕོག་པས་སམ་བསླབ་པའི་ཕྱིར། །དབེན་པའི་ཕྱོགས་སུ་རྐྱལ་ན་ཉེས་མེད་དོ། །གལ་ཏེ་སྨན་པས་ལུང་ཕོག་པས་སམ་ཡང་ན་བསླབ་པའི་ཕྱིར་དབེན་པར་འཕྱོ་བར་བྱེད་ན་དེའི་ཚེ་ཉེས་པ་མེད་དོ། །འདིར་ནི་ངེས་པ་ཡིན་ཏེ། གང་ན་བུད་མེད་དམག་མི་ཁྲུས་བྱེད་པའི། །འཇུག་ངོགས་དེ་ནི་རིང་པོར་སྤང་བར་བྱ། །ཞེས་བྱ་བ་འདི་ནི་ངེས་པ་ཡིན་ནོ། །འཇུག་དོགས་གང་དུ་བུད་མེད་དང་དམག་མི་དག་ཁྲུས་བྱེད་པའི་འཇུག་དོགས་དེ་ནི་ཐག་རིང་དུ་སྤང་བར་བྱའོ། །དེང་ནི་སྨན་པས་ལུང་ཕོག་ཀྱང་རུང༌། བསླབ་པའི་ཕྱིར་ཡང་རུང་སྟེ། འཇུག་པར་མི་བྱའོ། །དགེ་ཚུལ་གྱི་ཚིག་ལེའུར་བྱས་པའི་འགྲེལ་པ་ལས་གར་ལ་སོགས་པ་སྤོང་བ་སྟེ་དྲུག་པ་རྫོགས་སོ།། །།གང་ཞིག་སྤོས་བྱུག་མེ་ཏོག་ཕྲེང་བ་འམ། །དེ་བཞིན་ལུས་མདོག་ཁ་དོག་བྱ་བ་དག །མི་གཙང་སྣོད་ཀྱི་ལུས་ལ་འཆང་བྱེད་ན། །རྨོངས་པ་དེ་ནི་ཉེས་བྱས་

---

^{[མ་དཔེ་གཟིགས་ན་འདིར་གནོན།]}

ཉིད་ཀྱིས་གཟིར། །བརྟུལ་ཞུགས་ཅན་གང་ཞིག་སྤོས་ཀྱིས་བྱུགས་པ་དང་མེ་ཏོག་གི་ཕྲེང་བ་དང་ལུས་ཀྱི་མདོག་གི་ཁ་དོག་བྱ་བ་དག་མི་གཙང་བའི་འབྱུང་ཁུངས་ལུས་ལ་འཆང་བར་བྱེད་ན་རྨོངས་པ་དེ་ཉེས་བྱས་ཀྱི་ལྟུང་བས་གཟིར་བར་འགྱུར་རོ། །གཞན་ཡང༌། འདག་ཆལ་བསུང་དང་གོས་ལ་འདུག་བྱེད་དང༌། སེན་མོ་བྱི་དོར་མིག་སྨན་མཆུ་སྒྱུར་དང༌། །གཡན་པ་མ་གཏོགས་སོ་ཕག་ལོང་བུ་ལས། །ཡང་ཆད་འདྲུད་ལ་སོགས་པ་ཉེས་བྱས་ཡིན། །འདག་པའི་ཆལ་དྲི་ཞིམ་པོ་དང༌། །གོས་ལ་འདུག་པར་བྱེད་པ་དང༌། སེན་མོ་བྱི་དོར་བྱེད་པ་དང༌། མིག་སྨན་དང༌། མཆུ་ཁ་དོག་བསྒྱུར་བ་དང༌། གཡན་པ་ལ་སོགས་པའི་ནད་མེད་པར་ལོང་བུ་ཡན་ཆད་དུ་སོ་ཕག་གིས་ལུས་ལ་འདྲུད་པ་ལ་སོགས་པ་ནི་ཉེས་བྱས་ཁོ་ནར་འགྱུར་རོ། །དམིགས་ཀྱིས་བསལ་བ་བཤད་པར་བྱ་སྟེ། ནད་པས་དབེན་པར་འདུག་ནས་བསྐུ་བྱ་སྟེ། འཇིག་རྟེན་མ་དད་འགྱུར་བ་བཟློག་ཕྱིར་རོ། །དང་ལྡན་དག་གིས་རྐང་པ་སྤོས་བྱུགས་ན། །སྦྱིན་བདག་གི་ནི་ལྐོག་ཏུ་བཀྲུ་བར་བྱ། །ནད་པ་དག་གིས་ནི་སྨན་པས་ལུང་ཕོག་པས་རིམས་ལ་སོགས་པ་ཞི་བར་བྱ་བའི་ཕྱིར་དབེན་པར་འདུག་ནས་སྤོས་བྱུག་པར་བྱ་སྟེ། འཇིག་རྟེན་མ་དད་པར་གྱུར་ན་མི་རུང་བས་སོ། །དེ་བཞིན་དུ་དད་པ་ཅན་དག་གིས་རྐང་པ་ལ་སྤོས་ཀྱི་རི་མོ་དག་བྱུགས་ན་བདག་གིར་བྱས་ནས་ཕྱིས་སྦྱིན་བདག་གི་ལྐོག་ཏུ་བཀྲུ་བར་བྱའོ། །གཞན་ཡང༌། །འཕགས་པས་མེ་ཏོག་དྲི་ནི་ཞིམ་པོ་དག །མིག་ཕན་སྙམ་བསྣམ་འདོད་ཆགས་བློས་མ་ཡིན། །མེ་ཏོག་དག་རྙེད་ན་དྲི་ཞིམ་པོ་ཐམས་ཅད་མིག་ལ་ཕན་ནོ་སྙམ་དུ་རྣམ་པར་བྱའི་འདོད་ཆགས་ཀྱི་བསམ་པས་ནི་མ་ཡིན་ནོ། །ད་ནི་སྤོས་སོགས་ཕྱོགས་མཐུན་སྐབས་ཡིན་པས། །ཆུ་ལ་སོགས་པར་བཞིན་ལ་བལྟ་མི་བྱ། །ད་ནི་སྤོས་ལ་སོགས་པའི་ཕྱོགས་དང་མཐུན་པའི་སྐབས་ཡིན་པས་དེ་བཤད་པར་བྱ་སྟེ། མེ་ལོང་ངམ་ཆུ་ལ་སོགས་པར་བཞིན་ལ་བལྟ་བར་མི་བྱའོ། །དམིགས་ཀྱིས་བསལ་བ་བཤད་པར་བྱ་སྟེ། དེ་ནི་ལུས་ཀྱི་སྔ་ཕྱིའི་གནས་སྐབས་དང༌། །རྨལ་བལྟ་ན་ལྟུང་བ་མེད་པར་འགྱུར། །གལ་ཏེ་ལུས་ཀྱི་སྔ་ཕྱིའི་གནས་སྐབས་སམ་རྨལ་ལྟ་བར་བྱེད་ན། །

---

^{[མ་དཔེ་གཟིགས་ན་འདིར་གནོན།]}

དེའི་ཚེ་ལྟུང་བ་མེད་དོ། །མཆོད་ཕྱིར་ཐོགས་བྱུགས་རིས་ཤིས་སྐུད་ལ་སོགས། །ལྷབ་ལྷུབ་དག་ནི་ཐམས་ཅད་སྤང་བར་བྱ། །མཆོད་ཕྱིར་ཐོགས་པ་ནི་སྐུད་པ་སེ་རལ་ཁའོ། །བྱུགས་རིས་ནི་རི་མོར་བྲིས་པའོ། །ཤིས་སྐུད་ནི་མཁྲིག་མ་ལ་གདགས་པའི་བཀྲ་ཤིས་ཀྱི་ཚོན་སྐུད་སྣ་ལྔའོ། །དེ་ལྟ་བུ་ལ་སོགས་པའི་ལྷབ་ལྷུབ་རྣམས་ནི་བཅང་བར་མི་བྱའོ། །འདིའི་དམིགས་ཀྱིས་བསལ་བ་ནི། རིམས་སོགས་ཞི་བར་བྱ་ཕྱིར་དཔུང་གཡོན་ལ། །སྔགས་ལ་སོགས་པའི་སྐུད་པ་ལ་སོགས་བཅད། །རིམས་དང་བྲལ་ནས་སྐུད་པ་བཀྲོལ་ནས་ནི། །བུ་ག་གཙང་མའི་ཕྱོགས་སུ་གཞག་པར་བྱ། །རིམས་ལ་སོགས་པ་ཞི་བར་བྱ་བའི་ཕྱིར་ནི་གསང་སྔགས་ཀྱི་སྐུད་པ་འམ། རིག་སྔགས་ཀྱི་སྐུད་པ་ལ་སོགས་པ་བཅང་བར་བྱའོ། །གང་གི་ཚེ་རིམས་དང་བྲལ་བར་གྱུར་པ་དེའི་ཚེ་གསང་སྔགས་ལ་སོགས་པའི་སྐུད་པ་དེ་ཀ་བའི་བུ་ག་འམ། །རྩིག་པའི་བུ་ག་གཙང་མའི་ཕྱོགས་སུ་གཞག་པར་བྱའོ། །སྡོམ་བརྩོན་དག་གིས་གདུགས་བཀྲ་བཅང་མི་བྱ། །གྲོང་དུ་དེ་བསྒྲེང་བ་ཡང་བཀག་པ་ཡིན། །ལོ་ཁྲུ་གང་ལས་ལྷག་པའི་ཚད་ནི་མལ་མཐོན་པོ་གདུགས་ཀྱི་ཚད་དུ་བཤད་པ་ཡིན། །བརྟུལ་ཞུགས་ཅན་གྱིས་གདུགས་ཁྲ་བོ་བཅང་བ་མི་བྱའོ། །ཁྲ་བོ་མ་ཡིན་ན་ཡང་གྲོང་གི་ནང་དུ་བསྒྲེང་བ་ནི་བཀག་པ་ཡིན་ནོ། །གདུགས་ནི་རྣམ་པ་གཉིས་སྣང་སྟེ། ལོ་མ་ལས་བྱས་པ་དང༌། སྨྱིག་མ་ལས་བྱས་པའོ། །ལོ་མ་ཞེས་བྱ་བ་ནི་འདབ་མ་སྟེ། དེ་ལས་བྱས་པ་ནི་ལོ་མ་ལས་བྱས་པའོ། །སྨྱིག་མ་ལས་བྱས་པ་ནི་སྨྱིག་མ་ལས་བྱས་པའོ། །གདུགས་ཀྱི་ཡུ་བ་ཡང་གདུགས་ཀྱི་ཁོག་པའི་ཚད་དམ་ཁྲུ་དོ་བར་གནང་ངོ༌། །དགེ་ཚུལ་གྱི་ཚིག་ལེའུར་བྱས་པའི་འགྲེལ་པ་ལས་སྤོས་ལ་སོགས་པ་སྤོང་བ་སྟེ་བདུན་པ་རྫོགས་སྷོ།། །།མལ་ཆེན་མཐོན་པོ་དག་ཡ་ཉལ་བྱེད་པ། །ཉེས་བྱས་བཀྲ་མི་ཤིས་པས་ངེས་པར་གཟིར། །ཁྲུ་གང་ལས་ལྷག་ཚད་ནི་མཐོན་པོ་ཡིན། །རིན་ཆེན་ལ་སོགས་རྐང་པ་སྤྲས་ཆེན་ཡིན། །དགེ་ཚུལ་མལ་ཆེན་པོ་དང་མལ་མཐོན་པོ་ལ་ཉལ་ན་ཉེས་བྱས་བཀྲ་མི་ཤིས་པས་ངེས་པར་བརླག་པར་འགྱུར་རོ། །ཉེས་བྱས་ཉིད་བཀྲ་མི་ཤིས་པ་ཡིན་ཏེ། ཤིས་པ་མ་ཡིན་པས་ཉེས་བྱས་

---

^{[མ་དཔེ་གཟིགས་ན་འདིར་གནོན།]}

བཀྲ་མི་ཤིས་པ་དེས་ངེས་པར་བཅོམ་པར་འགྱུར་རོ། །དེ་ལྟ་བས་ན་མལ་དེ་ལྟ་བུ་ལ་ཉལ་བར་མ་གནང་ངོ༌། །དེ་གཉིས་ཀྱི་མཚན་ཉིད་ཀྱང་ཅི་ཞིག་ཅེ་ན། བཤད་པ། ཁྲུ་གང་ལས་ལྷག་ཚད་ནི་མཐོན་པོ་ཡིན། །རིན་ཆེན་ལ་སོགས་རྐང་པ་སྤྲས་ཆེན་ཡིན། །ཁྲུ་གང་ལས་ལྷག་པའི་ཚད་ནི་མལ་མཐོན་པོ་ཡིན་ལ། གསེར་དང་བ་སོ་ལ་སོགས་པའི་རྐང་པ་དང་རིན་པོ་ཆེས་སྤྲས་པ་ནི་མལ་ཆེན་པོ་ཡིན་པར་ཤེས་པར་བྱའོ། །དམིགས་ཀྱིས་བསལ་བ་བཤད་པར་བྱ་སྟེ། །སྟན་མཐོ་རིན་ཆེན་འོད་ཀྱིས་མཛེས་པ་ལ། །འདུ་བྱེད་འཇིག་པའི་ངང་ཅན་འདིར་བསམས་ཏེ། །འཛེགས་ནས་ཆོས་བསྒྲགས་པ་ནི་སྦྱིན་བྱ་སྟེ། །བདེ་གཤེགས་ཆོས་ནི་མཆོད་བྱ་ཡིན་པས་སོ། །འདུ་བྱེད་རྣམས་འཇིག་པའི་ངང་ཅན་ཡིན་པར་རྗེས་སུ་བསམས་ཏེ། སེང་གེའི་ཁྲི་ནི་ནོར་བུ་སྣ་ཚོགས་ཀྱི་འོད་ཟེར་གྱིས་སྤྲས་པ། ཤིན་ཏུ་མཐོ་བ། བླ་རེ་དང་བཅས་པ། འཕྱང་འཕྲུལ་དང་བཅས་པ། རྐང་རྟེན་དང་བཅས་པ་ལ་འཛེགས་ནས་ཆོས་བསྒྲགས་པ་སྦྱིན་པར་བྱ་སྟེ། འདི་ལྟར་བཅོམ་ལྡན་འདས་ཀྱི་ཆོས་ནི་མཆོད་པར་བྱ་བ་ཡིན་པས་སོ། །གཞན་ཡང༌། ཁྱིམ་པས་རིན་ཆེན་འོད་འབར་བྱས་བྱིན་ནའང༌། །མི་རྟག་ཉིད་དུ་བསྒོམ་པས་འདུག་པར་བྱ། །གནོད་སྦྱིན་གནས་དང་ལྷ་ཁྱིམ་ཀླུ་གནས་སུ། །སྡོམ་བརྩོན་འདུག་ནའང་ཉེས་པ་མེད་པ་ཡིན། །ཁྱིམ་པ་དག་གིས་རིན་པོ་ཆེའི་འོད་ཟེར་དག་གིས་སྤ་བར་བྱས་པའི་སྟན་དག་བྱིན་ན། མི་རྟག་པ་ཉིད་ཀྱི་ཡིད་ལ་བྱེད་པས་ཟིལ་གྱིས་མནན་ནས་འདུག་པར་བྱའོ། །དེ་བཞིན་དུ་ལྷ་དང་ཀླུ་དང་གནོད་སྦྱིན་དག་གི་གནས་སུ་འདུག་ན་ཡང་སྡོམ་བརྩོན་ལ་ཉེས་པ་མེད་དེ། དེ་ནི་དེ་དག་གི་བསོད་ནམས་ལས་སྐྱེས་པ་ཡིན་པས་སོ། །བསླབ་པའི་གཞི་འདི་ནི་དངོས་པོ་གཙོ་བོར་བྱ་བ་ཡིན་ཏེ། གང་གི་ཕྱིར་གཏམ་གྱི་གཞི་ལས་ལུས་ཀྱི་ལྟུང་བ་འབའ་ཞིག་གོ་ཞེས་གསུངས་པས་དེའི་ཕྱིར་འདིར་འདུ་ཤེས་གཙོ་བོར་བྱ་བ་སྤྱིར་བཏང་བའི་སྐབས་མེད་དོ། །མཐོན་པོ་ལ་སོགས་ཕྱོགས་མཐུན་ཉིད་ཉལ་ཡིན། །གཉིད་ཀྱི་ནང་དུ་གྱུར་ན་ཡུད་ཙམ་གནང༌། །ན་དང་དེ་ཡི་ནད་གཡོག་མ་གཏོགས་པ། །བརྟུལ་ཞུགས་ཅན་ནི་མར་མེ་ཉལ་བ་བཀག །མལ་སྟན་མཐོན་པོའི་ཕྱོགས་དང་མཐུན་པ་ནི་ཉིན་པར་ཉལ་བ་ཡིན་པར་རྟོགས་པར་བྱའོ། །གང་ཞིག་གཉིད་ཀྱི་ནད་

---

^{[མ་དཔེ་གཟིགས་ན་འདིར་གནོན།]}

དུ་གྱུར་པ་དེ་དག་ནི་གཉིད་སངས་ནས་དགེ་བའི་ཕྱོགས་ལ་མི་ཉལ་བར་བྱའོ་སྙམ་པའི་བསམ་པས་ཡུད་ཙམ་གྱི་ཚད་ཙམ་ཅིག་ཉིན་པར་ཉལ་བར་གནང་ངོ༌། །དེ་བཞིན་དུ་མར་མེ་ལ་ཉལ་བ་ཡང་བཀག་གོ །འདིར་ཉལ་བ་ནི་གཉིད་ཀྱིས་ནོན་པ་ལ་བྱའི། སྤྱོད་ལམ་བཞི་པ་བཀག་པ་ནི་མ་ཡིན་ནོ། །དམིགས་ཀྱིས་བསམ་པ་ནི་ནད་པ་གཡོག་ནི་མ་ཡིན་ནོ། །འདིར་མར་མེ་སྨོས་པ་ནི་ལོངས་འཆོས་པའི་སྣང་བའི་མཚོན་པ་ཡིན་ནོ། །དེའི་ཕྱིར་ཟླ་བ་དང་ཉི་མའི་སྣང་བདག་ལ་ཉལ་བ་ནི་ལྟུང་བ་མེད་པར་ཤེས་པར་བྱ་སྟེ། །དེ་ཉིད་ཀྱི་སྤང་བར་བྱ་བ་མ་ཡིན་པའི་ཕྱིར་རོ། །འདིར་ནི་གླེང་གཞི་གཙོ་བོར་བྱ་བ་མ་ཡིན་ཏེ། བསླབ་པ་དེ་ནི་དབང་དུ་བྱ་བ་མ་ཚང་བའི་ཕྱིར་རོ། །གདིང་བ་མེད་པར་ཉལ་བའི་རིགས་མ་ཡིན། །ཡུལ་གྱི་དབུས་སུ་མལ་སྟན་ཀོ་ལྤགས་མིན། །ཁྱིམ་དག་ཏུ་ནི་སྟན་ཙམ་ཁོ་ན་དབང༌། །ཡུལ་གྱི་མཐའ་འཁོབ་དག་ཏུ་གཉིད་ཀའང་གནང༌། །གདིང་བ་མེད་པར་མལ་སྟན་ལ་འདུག་པ་ནི་རིགས་པ་མ་ཡིན་ནོ། །དེ་བཞིན་དུ་ཡུལ་གྱི་དབུས་སུ་མལ་སྟན་ཀོ་ལྤགས་མི་གནང་ངོ༌། །ཁྱིམ་གྱི་ནང་དུ་ནི་སྟན་ཙམ་ཁོ་ན་ཞིག་དབང་གི་མལ་ནི་མ་ཡིན་ནོ། །ཡུལ་མཐའ་འཁོབ་དག་ཏུ་ནི་མལ་དང་སྟན་གཉི་ག་ཡང་ཀོ་ལྤགས་དག་ལས་གནང་ངོ༌། །ཡུལ་གྱི་དབུས་སམ་མཐའ་འཁོབ་ཅེས་བྱ་བ་ཡང་གང་ཞེ་ན། །ཀོ་ལྤགས་ཀྱི་གཞི་ལས། ཉེ་བ་འཁོར་ཤར་དུ་ན་ལི་ཁ་ར་ཤིང་འཕེལ་ཞེས་བྱ་བའི་གྲོང་ཡོད་དོ། །དེའི་ཕ་རོལ་ན་ལི་ཁ་རའི་ཤིང་ཐིབས་པོ་ཞེས་བྱ་བའི་ཚལ་ཡོད་དེ་དེ་ནི་མཐའ་ཡིན་ནོ། །དེའི་ཕ་རོལ་ནི་མཐའ་འཁོབ་ཡིན་ནོ། །ལྷོར་ནི་འདམ་བུ་མངའ་རྒྱུ་ཞེས་བྱ་བའི་ཆུ་ཀླུང་ཡོད་དེ་དེ་ནི་མཐའ་ཡིན་ནོ། །དེའི་ཕ་རོལ་ནི་མཐའ་འཁོབ་ཡིན་ནོ། །ནུབ་ཏུ་ནི་བྲམ་ཟེའི་གྲོང་ཁྱེར་ཀ་བ་དང་ཉེ་བའི་ཀ་བ་གཉིས་ཡོད་དེ། །དེ་ནི་མཐའ་ཡིན་ནོ། །དེའི་ཕ་རོལ་ནི་མཐའ་འཁོབ་ཡིན་ནོ། །བྱང་དུ་ནི་ཨུ་ཤི་རའི་རི་ཡོད་དེ། །དེ་ནི་མཐའ་ཡིན་ནོ། །དེའི་ཕ་རོལ་ནི་མཐའ་འཁོབ་ཡིན་ནོ་ཞེས་གསུངས་པ་ཡིན་ནོ། །གླང་ཆེན་རྟ་དང་ལྟག་དང་སེང་གེ་དང༌། །སྤྲེའུ་དང་བྱི་ལའི་པགས་པ་རུང་མ་ཡིན། །མཆི་ལ་ལྷམ་བལ་བ་ཛ་དང་མུན་ཛའི་འཇག །རྩྭ་ལ་སོགས་ལས་བྱ་སྤ་འང་བཅང་མི་

---

^{[མ་དཔེ་གཟིགས་ན་འདིར་གནོན།]}

བྱ། །གླང་པོ་ཆེ་དང༌། རྟ་དང༌། སྟག་དང༌། སེང་གེ་དང༌། སྤྲེའུ་དང༌། བྱི་ལ་དག་གི་པགས་པ་ནི་རྣམ་པ་ཐམས་ཅད་དུ་རུང་བ་མ་ཡིན་ནོ། །ནད་པ་རྣམས་ལ་ནི་དོམ་གྱི་པགས་པ་གནང་ངོ༌། །གཞན་དག་ལ་ནི་དེ་ལྟ་བུའི་མཆེ་བ་ཅན་དང་སེན་མོ་ཅན་དག་གི་པགས་པ་རུང་བ་མ་ཡིན་པར་རིག་པར་བྱའོ། །གཞན་ཡང་མཆིལ་ལྷམ་རྩྭ་བལ་བ་ཛ་དང་མུན་ཛའི་དང་འཛག་མ་ལས་བྱས་པ་དང༌། རྩ་དང་སྟེ་སྨྱིག་མ་དང་བ་ལ་ཤ་དག་དང་སོག་མ་དག་ལས་བྱས་པ་བཅང་བར་མི་བྱའོ། །གཙུག་ལག་ཁང་སྟེ་གནས་ཁང་ཁྱམས་རྣམས་སུ། །ཤིང་ལས་བྱས་ལྷམ་རྟག་ཏུ་མི་གནང་ངོ༌། །བཤད་དང་གཅི་བའི་ཁང་པའི་ཕྱོགས་དང་ནི། །ཁྱིམ་ནང་བཅས་མ་བསྟར་བར་ཉེས་པ་མེད། །ཤིང་ལས་བྱས་པའི་མཆིལ་ལྷམ་ནི། བླ་གབ་མེད་པ་དང༌། གནས་ཁང་དང་ཁྱམས་དག་ཏུ་རྣམ་པ་ཐམས་ཅད་དུ་མི་གནང་ངོ༌། །བླ་གབ་མེད་པ་ནི་གཙུག་ལག་ཁང་གི་སྟེང་ལ་བྱའོ། །བཤད་བ་དང་གཅི་བའི་ཀང་པའི་ཕྱོགས་དང༌། །ཁྱིམ་གྱི་ནང་དང་བཅས་པར་ནི་ཉེས་པ་མེད་དེ། །དེར་ཡང་མ་བསྟར་ནའོ། །བསྟར་བདག་ཏུ་ནི་ཉེས་པར་འགྱུར་རོ། །ཁ་ཅིག་ན་རེ་ནི། གཙག་ལག་ཁང་དུ་ཡང་མ་བསྟར་བ་ན་ཉེས་པ་མེད་དོ་ཞེས་འཆད་དོ། །མཛེ་ཅན་གྱིས་ནི་དགེ་འདུན་ཁྲི་སོགས་སྤང༌། །དགེ་འདུན་རྣམས་དང་འདུ་སོགས་དེ་བཞིན་ནོ། །དགེ་འདུན་སྐྱེ་བོ་མེད་པར་དེ་བཞག་སྟེ། །སྨན་གྱི་སྦྱོར་བ་དག་གིས་བསྐྱད་པར་བྱ། །མཛེ་ཅན་གྱིས་ནི་དགེ་འདུན་གྱི་ཁྲི་དང་ཁྲིའུ་ལ་སོགས་པ་ཐམས་ཅད་ཡོངས་སུ་སྤང་བར་བྱའོ། །དགེ་འདུན་དང་འདུ་བ་ལ་སོགས་པ་ཡང་དེ་བཞིན་ནོ། །དགེ་འདུན་གྱིས་ཀྱང་མཛེ་ཅན་དེ་ཕྱོགས་དབེན་པར་གཞག་སྟེ། སྨན་དང་ནད་གཡོག་ཉེ་བར་བསྒྲུབས་པས་ཡོངས་སུ་བསྐྱང་བར་བྱའོ། །ནད་གཡོག་གྱིས་ཀྱང་ནད་པ་ཐམས་ཅད་ལ། །གསོན་པ་རྙེད་པར་དཀའ་བར་རྟོགས་བྱས་ཏེ། །རང་བཞིན་ཁ་ན་མ་ཐོ་མ་གཏོགས་བསྒྲིམ། །བཅས་པའི་ཁ་ན་མ་ཐོ་བས་ཀྱང་བསྐྱང༌། །ནད་གཡོག་གིས་ནད་པ་ཐམས་ཅད་ལ་སངས་རྒྱས་ཀྱི་བསྟན་པ་ལ་གནས་པའི་གང་ཟག་ནི། །ཉི་མ་གཅིག་ཙམ་གསོན་པ་ཡང་རྙེད་པར་དཀའ་བ་ཡིན་ནོ་སྙམ་དུ་རྟོགས་པར་བྱ་སྟེ། རང་བཞིན་གྱི་ཁ་ན་མ་ཐོ་བ་དང་བཅས་པ་མ་གཏོགས་

---

^{[མ་དཔེ་གཟིགས་ན་འདིར་གནོན།]}

པ། བཅས་པའི་ཁ་ན་མ་ཐོ་བ་དང་བཅས་པས་ཀྱང་རིམ་གྲོ་བྱའོ། །འདིར་གཞུང་ནི་ཕྲན་ཚེགས་ལས། བཙུན་པ་བཅོམ་ལྡན་འདས་ཀྱིས་ནད་པ་ལ་རིམ་གྲོ་བྱའོ་ཞེས་གསུངས་པ་དེ་ཡོ་བྱད་ཅི་འདྲ་བ་ཞིག་གིས་བགྱི། ཉེ་བ་འཁོར་རང་བཞིན་གྱི་ཁ་ན་མ་ཐོ་བ་དང་བཅས་པ་མ་གཏོགས་པའི་ཡོ་བྱད་གཞན་རྣམས་ཀྱིས་བྱའོ་ཞེས་གསུངས་པ་ཡིན་ནོ། །དགེ་ཚུལ་གྱི་ཚིག་ལེའུར་བྱས་པའི་འགྲེལ་པ་ལས། མལ་མཐོན་པོ་ལ་སོགས་པ་སྤོང་བ་སྟེ་བསླབ་པའི་གཞི་བརྒྱད་པ་རྫོགས་སོ།། །།རང་གླིང་སྐྱ་རེངས་དང་པོ་སོགས་བཟུང་ནས། །ཉི་མ་ཕྱེད་བར་འདི་ནི་དུས་ཡིན་ཏེ། །དེ་ཡོལ་གང་ཞིག་དུས་རུང་ཟ་བྱེད་དེ། །ཉེས་བྱས་ལྕགས་ཀྱི་གོང་བུའི་ཟས་རྣམས་ཟ། །རང་གི་གླིང་གི་སྐྱ་རེངས་དང་པོ་ལ་སོགས་པ་ནས་བཟུང་ནས་ཉི་མ་ཕྱེད་ཀྱི་བར་འདི་ནི་དུས་ཡིན་ནོ། །རང་གི་གླིང་གི་སྒྲས་སྐྱ་རེངས་ལ་ཡང་སྦྱར་བར་བྱ་སྟེ། རང་གི་གླིང་གི་སྐྱ་རངས་ནས་བཟུང་ནས། རང་གི་གླིང་གི་ཉི་མ་ཕྱེད་ཀྱི་བར་ཞེས་བྱ་བའི་དུས་དེ་ཡོལ་ནས། དགེ་ཚུལ་གང་ཞིག་བཟའ་བ་དུས་སུ་རུང་བ་ཟ་བ་སྟེ། མིད་པ་དེ་ཉེས་བྱས་ཀྱི་ལྕགས་ཀྱི་གོང་བུ་རྣམས་ཟ་བ་ཡིན་ནོ། །ཉེས་བྱས་ཉིད་ལྕགས་ཀྱི་གོང་བུའི་ཟས་རྣམས་ཡིན་ནོ་ཞེས་ཚིག་སྦྱར་རོ། །རྣམས་ཞེས་མང་པོར་སྨོས་པ་ནི་ཁམ་རེ་རེ་ལ་ཉེས་བྱས་ཡིན་ནོ་ཞེས་བསྟན་པའི་ཕྱིར་རོ། །རྣམ་པར་འབྱེད་པ་ལས། དུས་མ་ཡིན་པ་རྣམ་པ་གཉིས་ཏེ། །སྐྱ་རེངས་མ་ཤར་བ་ནས་ཉི་མ་ཕྱེད་ཡོལ་བའི་ཞེས་གསུངས་པ་ནི་བྱེ་བྲག་མ་ཕྱེད་པར་གསུངས་པའི་ཕྱིར་འདིར་སྐྱ་རེངས་སྤྱིར་སྨོས་པ་ཡིན་ནོ། །སྒོ་གཏན་གྱི་བསླབ་པའི་གཞི་ལས་ནི། སྐྱ་རེངས་བྱེ་བྲག་ཏུ་དགོངས་པ་ཡིན་པས་དབྱེ་བ་རྣམ་པ་གསུམ་དུ་མཛད་པ་ཡིན་ཏེ། སྐྱ་རེངས་ནི་གསུམ་སྟེ། སྐྱ་རེངས་དང་པོ་ནི་སྔོན་པོར་སྣང་བའོ། །སྐྱ་རེངས་པར་པ་ནི་སེར་པོར་སྣང་བའོ། །སྐྱ་རེངས་ཐ་མ་ནི་དམར་པོར་སྣང་བའོ་ཞེས་རྒྱ་ཆེར་གསུངས་ནས། དོན་འདི་ལ་ནི་སྐྱ་རེངས་ཐ་མ་ཡིན་པར་དགོངས་སོ་ཞེས་དེ་སྐད་གསུངས་པས་དེའི་ཕྱིར་འདིས་ནི་སྒོ་གཏན་ལས་གཞན་དུ་ནི་སྐྱ་རེངས་དང་པོ་ཁོ་ནར་བཞེད་པ་ཡིན་པས་སྐྱ་རེངས་དང་པོ་སྨོས་པ་ཡིན་ནོ། །འོ་ན་སྐྱ་རེངས་འཆར་བའི་དུས་གང་ཡིན་ཞེ་ན། རེ་ཞིག་

---

^{[མ་དཔེ་གཟིགས་ན་འདིར་གནོན།]}

གསོ་སྦྱོང་བཞག་པའི་གཞི་ལས། བཙུན་པ་མཚན་མོའི་ཐུན་ཐ་མ་ལ་བབ་སྟེ། རྔ་བརྡུང་དུ་ཉེ་བའི་མཚན་མོ་སྐྱ་རེངས་འཆར་བའི་དུས་ཀྱི་ཚོད་ལ་བབ་པས་ད་ནི་རིང་པོར་མི་ཐོགས་པར་སྐྱ་རེངས་འཆར་ལགས་ན། བཅོམ་ལྡན་འདས་སོ་སོར་ཐར་པའི་མདོ་གདོན་དུ་གསོལ་ཞེས་གསུངས་པ་ཡིན་ནོ། །ཐུན་ཐ་མ་ནི་ནམ་གྱི་ཆ་གསུམ་པ་ཡིན་ནོ། །བབ་སྟེ་ནི་ཐུག་སྟེའོ། །ཐ་མ་དེ་ལ་སྐྱ་རེངས་འཆར་བའི་དུས་ཡིན་པར་ཁོང་དུ་ཆུད་པར་བྱའོ། །དུས་དེ་ནི་བཅོམ་ལྡན་འདས་ཀྱིས་མཚན་མོ་དཔེར་བསྟན་པས་ངེས་པར་གསུངས་པ་ཡིན་ཏེ། རྣམ་པར་འབྱེད་པ་ལས། སྐྱ་རེངས་དང་པོ་ཤར་ན་ནམ་མཁའ་སྔོན་པོར་སྣང་ངོ༌། །སྐྱ་རེངས་བར་མ་ཤར་ན་སེར་པོར་སྣང་ངོ༌། །སྐྱ་རེངས་ཐ་མ་ཤར་ན་དམར་པོར་སྣང་ངོ་ཞེས་གསུངས་པའི་ཕྱིར་རོ། །ཆུ་ཚོད་ལ་སོགས་པས་མཚོན་པར་མ་མཛད་པ་ནི་ཐམས་ཅད་དུ་ཆུ་ཚོད་ལ་སོགས་པ་རྙེད་པར་དཀའ་བའི་ཕྱིར་རོ། །ཇི་སྟེ་འོ་ན་ཉི་མ་མ་ཤར་ཀྱང་སྐྱ་རེངས་འཆར་ན། ཉིན་མོར་ཐ་སྙད་གདགས་སམ་ཞེ་ན། བཤད་པ། སྣང་བ་ཡོད་པའི་ཕྱིར་རོ། །འདི་ལྟར་མཚན་མོ་ཟད་པར་གྱུར་པའི་ངོ་བོ་ནི་ཉིན་མོ་ཡིན་ལ། ཉིན་མོའི་ངོ་བོ་ནི་སྣང་བ་ཡིན་ཞིང་སྣང་བ་ཡང་སྐྱ་རེངས་དང་པོ་ལ་སོགས་པ་ཡིན་ནོ། །དེ་ཉིད་ཀྱི་ཕྱིར་ཞག་བཅུ་གཅིག་པའི་སྐྱ་རེངས་འཆར་བ་ན་ཞེས་གསུངས་པ་ཡིན་ནོ། །གཞན་དུ་ན་ཞག་བཅུ་གཅིག་པའི་སྐྱ་རེངས་ཤར་བའི་དུས་ཞེས་བྱ་བར་ཇི་ལྟར་འགྱུར། དེ་ལྟར་ཡང་བསྟན་བཅོས་ལས་སྣང་བའི་གནས་སྐབས་ནི་ཉིན་མོ་ཡིན་ལ། མུན་པའི་གནས་སྐབས་ནི་མཚན་མོ་ཡིན་ནོ་ཞེས་འབྱུང་བ་དང་ཡང་མི་འགལ་ཏེ་སྐྱ་རེངས་ཤར་བ་དང་པོ་ལ་སོགས་པ་ནི་སྣང་བ་བརྩོན་པའི་ཕྱིར་རོ། །གཞུང་ལུགས་དང་སྐར་མའི་བསྟན་བཅོས་ལས་མཚན་མོའི་བརྒྱད་ཆ་ལུས་པའི་ཐུན་ལ་རྡ་བརྡུང་བར་བྱའོ་ཞེས་རྣམ་པར་གཞག་པས། དེའི་ཕྱིར་རྔ་བརྡུང་དུ་ཉེ་བའི་མཚན་མོ་ཞེས་བྱ་བ་ནི་ཐུན་ཚོད་ཕྱེད་ལུས་པའི་མཚན་མོ་ཡིན་ཏེ། འདི་ཁོ་ན་ལ་སྐྱ་རེངས་འཆར་བ་ཡིན་ནོ་ཞེས་བྱ་བའི་དོན་དུ་གནས་སོ། །ཐུན་ཚོད་ཕྱེད་པས་ལྷག་པ་དང་བཅས་པ་ལ་སྐྱ་རེངས་འཆར་རོ་ཞེས་བྱ་བར་ཁོང་དུ་ཆུད་པར་བྱ་སྟེ། འདིར་གཞུང་ནི། དགེ་སློང་མའི་རྣམ་པར་འབྱེད་པ་

---

^{[མ་དཔེ་གཟིགས་ན་འདིར་གནོན།]}

ལས། ཐུན་ཐ་མའི་ཐུན་དང་པོའི་ཕྱེད་ན་རྔ་བརྡུང་དུ་ཉེ་བའི་མཚན་མོ་སྐྱ་རེངས་འཆར་བའི་དུས་ཡིན་ནོ་ཞེས་གསུངས་པའི་ཕྱིར་རོ། །གལ་ཏེ་སྐྱ་རེངས་དང་པོ་ལ་སོགས་པ་ལས་ཉིན་ཞག་དུ་རྣམ་པར་གཞག་པ་ཡིན་ན། དེའི་ཚེ་ཆུའི་བསླབ་པའི་གཞི་ལས། ཉིན་ཞག་གི་རུང་བ་གསུངས་པ་ཇི་ལྟར་རྟོགས་པར་བྱ་སྟེ། དེང་བརྟགས་པའི་ཆུ་ནི་སྐྱ་རེངས་ཤར་གྱི་བར་དུ་རུང་གི་དེ་ཕན་ཆད་མི་མཐོང་བའི་ལམ་ལས་འདས་པའི་ཕྱིར་བརྟག་པ་མི་སྲིད་ན། ཆུ་སྤྱད་པ་ཡང་མི་སྲིད་པས་ཉམས་པ་ཆེར་འགྱུར་རོ་ཞེ་ན། དེ་ནི་ཉེས་པ་མེད་དེ། ཕྲན་ཚེགས་ལས། ཉིན་མོ་བརྟག་པར་བྱ་ཞིང་ཇི་སྲིད་དུ་སྐྱ་རེངས་ཀྱི་དུས་ཀྱི་ཚད་དེ་སྲིད་དུ་ཡོངས་སུ་སྤྱད་པར་བྱའོ་ཞེས་གསུངས་པའི་ཕྱིར་རོ། །སྐྱ་རེངས་ཀྱི་དུས་ཀྱི་ཚོད་ཅེས་བྱ་བ་ནི་སྐྱ་རེངས་སུམ་ཆར་སྤྱིར་གཟུང་བ་ཡིན་ནོ། །དེ་ལྟར་ཡང་འདུལ་བ་མདོ་ལས་ནམ་ཉི་མ་ཤར་ཀ་ཚུན་ཆད་བརྟགས་པ་ཉིད་ཀྱི་རྗེས་སུ་འཇུག་པར་བྱ་ཞེས་འབྱུང་བ་ཡིན་ཏེ། ནམ་ཞེས་བྱ་བ་འདི་ནི་ཁྱབ་པ་ལ་བྱ་བ་ཡིན་པས། ཉིན་མོ་སྐྱ་རེངས་རྣམས་དང་བཅས་པ་བཟུང་བ་ཡིན་པར་རིག་པར་བྱའོ། །སྡེ་བ་གཞན་དག་ན་རེ་ནི། ཐུན་ཚོད་བཞི་ཆའི་ལྷག་དང་བཅས་པ་ནི་མཚན་མོའི་ཐུན་ཐ་མ་མ་ཡིན་ཞིང༌། ཐུན་ཚོད་ཐུན་ཚོད་ལ་རྔ་བརྡུང་བར་བྱའོ་ཞེས་འཆད་དེ། དེ་དག་ལ་ཡང་རྣམ་པར་གཞག་པ་ཡོད་དོ། །དེ་བས་ན་བཙུན་པ་མཚན་མོ་ཐུན་ཐ་མ་ལ་བབ་སྟེ། རྔ་བརྡུང་དུ་ཉེ་བའི་མཚན་མོ་སྐྱ་རེངས་འཆར་བའི་དུས་ཀྱི་ཚོད་ལ་བབ་པས། ད་ནི་རིང་པོར་མི་ཐོགས་པར་སྐྱ་རེངས་འཆར་ལགས་ན་ཞེས་གསུངས་པའི་ཕྱིར། མཚན་མོའི་ལྔ་ཆ་ལུས་པ་ན་སྐྱ་རེངས་འཆར་རོ་ཞེ་ན། དེ་སྐད་སྨྲས་པ་ནི་ངེས་པ་མེད་པའི་ཕྱིར་རོ། །ཇི་སྟེ་ངེས་པར་བྱེད་པ་ནི་བྱེ་བྲག་ཏུ་བཤད་པའི་ཚིག་ཡིན་ནོ་ཞེ་ན། དེ་ཡིན་ཟིན་ཀྱང་བཅོམ་ལྡན་འདས་ཀྱི་གསུང་རྣམ་པར་བཤད་པ་ནི། བྱེ་བྲག་ཏུ་བཤད་པའོ་ཞེས་བྱའོ་ཞེས་དེ་སྐད་གསུངས་ལ། འདི་གང་གིས་རྣམ་པར་བཤད་པ་ཡིན་པ་ལས་ནི་མཚན་མོའི་ལྔ་ཆ་ལུས་པ་ན་སྐྱ་རེངས་དང་པོ་ཡིན་ནོ་ཞེས་དེ་སྐད་ཀྱང་མི་འབྱུང་ངོ༌། །ཡང་ན་དེ་ཡིན་ཡང་རུང་སྟེ། གལ་ཏེ་སྐྱ་རེངས་འཆར་བའི་མཚན་ཉིད་ནམ་མཁའ་ལ་སྣང་བ་

---

^{[མ་དཔེ་གཟིགས་ན་འདིར་གནོན།]}

དེའི་ཚེ་བརྩད་དུ་མེད་པ་ཁོ་ན་ཡིན་ཏེ། ཇི་སྐད་དུ་སྐར་མའི་བསྟན་བཅོས་ནས། སྐྱ་རེངས་དང་པོ་ཤར་ན་ནི། །ཤར་ཕྱོགས་སུ་ནི་སྔོར་སྣང་ཞིང༌། སྐར་མའི་གདོང་གི་འོད་ཉམས་ལ། །ནམ་མཁའ་སྔོ་སྐྱར་འགྱུར་བ་ཡིན། །སྐྱ་རེངས་བར་མ་ཤར་ན་ནི། །དེས་ན་ཤར་ཕྱོགས་སྐྱ་ཞིང་དམར། །རྒྱུ་སྐར་འོད་ནི་ཆུང་བ་དང༌། །ནམ་མཁའ་སེར་སྐྱར་འགྱུར་བ་ཡིན། །སྐྱ་རེངས་ཐ་མ་ཤར་བ་ནི། །རྒྱུ་སྐར་འོད་ནི་མེད་པ་དང༌། །སྐྱ་རེངས་ཐ་མའོ་ཟིར་བཤད། །འོ་ཟི་འང་ཉི་མ་ཤར་བར་དུའོ། །ཞེས་བསྟན་པ་ལྟ་བུ་ཡིན་ནོ། །ཞར་ལ་འོངས་པས་ཆོག་གོ །འོ་ན་རང་གི་གླིང་སྨོས་པ་ཅི་དགོས་ཤེ་ན། འཛམ་བུའི་གླིང་ལ་སོགས་པ་གནས་གང་ན་འདུག་པ་དེ་ནི་རང་གི་གླིང་ཞེས་བྱ་ལ། དེ་ལས་གཞན་པ་ནི་རྣམ་པ་གཞན་དུ་ཡིན་ནོ་ཞེས་རབ་ཏུ་བསྟན་པའི་ཕྱིར་རོ། །འདིར་གཞུང་ནི་ཞུས་པ་ལས། །བཙུན་པ་དགེ་སློང་གིས་དུས་མ་ལགས་པར་བཟའ་བ་དང་བཅའ་བ་འཚལ་ལམ། འཆའ་ན་ལྟུང་བར་མི་འགྱུར་བ་མཆིས་སམ། བཤད་པ་དེ་བཞིན་ཏེ། འཛམ་བུའི་གླིང་པའི་དུས་ཀྱིས་གླིང་གསུམ་པོ་དག་ཏུ་ཟོས་ན་ལྟུང་བ་མེད་དོ་ཞེས་འབྱུང་བ་ཡིན་ཏེ། དེ་སྐད་གསུངས་པ་ཡང་འཛམ་བུའི་གླིང་ན་གནས་པ་ལ་མཚོན་པ་ཡིན་ནོ། །གཏམ་གྱི་གཞི་ལས། བཙུན་པ་རེ་ཞིག་དགེ་སློང་གིས་ཤར་གྱི་ལུས་འཕགས་གླིང་དུ་འཚལ་ན་དེས་དུས་གང་གིས་འཚལ་བར་བགྱི། དེ་རྣམས་ཀྱི་དུས་གང་ཡིན་པས་སོ་ཞེས་བྱ་བ་ལ་སོགས་པ་གསུངས་པ་དེ་ནི། ཤར་གྱི་ལུས་འཕགས་གླིང་ལ་སོགས་པར་གནས་པ་ལ་གསུངས་པ་ཡིན་ནོ། །གནས་པའི་དུས་ཀྱིས་ནི་འདིར་དུས་དང་དུས་མ་ཡིན་པར་རྒྱུ་བ་དག་དང༌། བསོད་སྙོམས་ལ་འགྲོ་བ་ལ་སོགས་པའི་རྣམ་པར་གཞག་པ་ཡིན་གྱི། གང་དུ་འགྲོ་བར་བྱེད་པ་དེ་ནི་དེའི་དུས་ཀྱིས་མ་ཡིན་པར་ཤེས་པར་བྱའོ། །སྒྲིགས་པ་ཟས་ཅན་བྱུང་ན་དོར་བྱས་ནས། །འབད་པ་དག་གིས་ཁ་ནི་བཀྲུ་བར་བྱ། །ལས་ཀྱི་དབང་གིས་མིད་པ་གཉིས་ཡོད་ན། །བ་ལང་བདག་བཞིན་ཅི་དགར་མིད་པར་བྱ། །གལ་ཏེ་སྒྲེགས་པ་ཟས་ཅན་བྱུང་ན་དེ་བོར་ཏེ་ལེགས་པར་ཁ་བཀྲུ་བར་བྱའོ། །གང་ཞིག་སྔོན་གྱི་ལས་ཀྱི་དབང་གིས་བ་ལང་བདག་དང་འདྲ་བར་མེད་པ་གཉིས་ཡོད་ན། དེས་བ་

---

^{[མ་དཔེ་གཟིགས་ན་འདིར་གནོན།]}

ལང་བདག་བཞིན་དུ་ཅི་དགར་མིད་པར་བྱའོ། །འདིར་གཞུང་ནི་ཕྲན་ཚེགས་ལས། ཚེ་དང་ལྡན་པ་བ་ལང་བདག་མིད་པ་གཅིག་ནས་ནི་སྒྲེགས་པ་ཟས་ཅན་འབྱུང་ལ། གཅིག་ནས་ནི་མིད་པར་བྱེད་པ་ལས། གང་གི་ཚེ་བཅོམ་ལྡན་འདས་ཀྱིས་དུས་མ་ཡིན་པའི་ཟས་བཀག་པ་དེའི་ཚེ། ཚེ་དང་ལྡན་པ་བ་ལང་བདག་གིས་སྒྲེགས་པ་བྱུང་ཞིང༌། བྱུང་བ་བོར་བ་དང་དེ་རིང་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་གང་ལ་སྔོན་གྱི་ལས་ཀྱིས་མིད་པ་གཉིས་སྐྱེས་པ་དེས་ལན་གཉིས་སམ། ལན་གསུམ་བོར་ཏེ་ཁ་བཀྲུས་ནས། ལྷག་མ་མིད་པར་བྱ་བར་གནང་གི་དེ་ལ་འགྱོད་པར་མི་བྱའོ་ཞེས་བྱ་བའི་བར་དུ་འབྱུང་བ་ཡིན་ནོ། །གཞན་ཡང༌། གལ་ཏེ་འདི་ལ་བརྟུལ་ཞུགས་གནས་པའི་ཚེ། །ཉི་མ་གཅིག་ཀྱང་འདོད་ཡིན་དེ་ཡི་ཕྱིར། །ནད་པ་ལ་ནི་མཁས་པའི་ལུང་ཉིད་དུས། །ཕོངས་པ་ལ་ནི་དུས་མིན་མེད་པ་ཡིན། །གང་གི་ཕྱིར་བདེ་བར་གཤེགས་པའི་བསྟན་པ་ལ་ནི་སྡོམ་པ་ལ་གནས་པའི་ཚེ་ཉིན་གཅིག་ཀྱང་གསོན་པ་ཤིན་ཏུ་རྙེད་པར་དཀའ་བ་ཡིན་པ་དེའི་ཕྱིར་ནད་པ་ལ་ནི་སྨན་པའི་ལུང་ཉིད་དུས་ཡིན་ནོ། །འདིར་གཞུང་ནི་གླེང་གཞི་ལས། འཕགས་པ་དུས་མ་ཡིན་པར་བཤོས་གསོལ་བ་དང་སོས་པར་འགྱུར་རོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་སྨན་པ་ཟེར་ན་ལྡེ་གུའི་ཟན་དག་སྦྱིན་པར་བྱ་ཞིང་དེ་བཞིན་དུ་གོང་བུའི་ཟན་དང་བྲ་བྲུའི་ཟན་དང་ཐམས་ཅད་སྦྱིན་པར་བྱ་སྟེ། འདི་ལ་འགྱོད་པར་མི་བྱའོ་ཞེས་བྱ་བའི་བར་དང༌། དེ་བཞིན་དུ་དུས་མ་ཡིན་པར་ཤ་ཁུ་ངག་འཐུངས་ཤིག་དང་སོས་པར་འོང་ངོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་སྨན་པ་ཟེར་ན་སྦྱིན་པར་བྱའོ་ཞེས་བྱ་བའི་བར་དང༌། །དེ་བཞིན་དུ་རྡོ་ཤའི་ཤ་དང་ཚོད་མ་མངར་བག་ཏུ་བྱས་པ་སྐམ་པོ་ཡང་སྦྱིན་པར་བྱ་སྟེ། འདི་ལ་འགྱོད་པར་མི་བྱའོ་ཞེས་གསུངས་པ་ཡིན་ནོ། །ཕོངས་པ་སྟེ་ལོ་ཉེས་སམ་དགོན་པ་དག་ཏུ་བབ་ན་དེ་ལྟ་བུའི་གནས་སྐབས་ཤེས་པར་བྱའི། ཟོས་པ་ལ་ཉེས་པ་མེད་དེ་གང་གི་ཚེ་རྙེད་པ་དེའི་ཚེ་དེ་ཉིད་དུས་ཡིན་ནོ་ཞེས་བྱ་བའི་ཐ་ཚིག་གོ །འདིར་གཞུང་ནི་སེལ་བུ་ལས། ཕོངས་པ་

---

^{[མ་དཔེ་གཟིགས་ན་འདིར་གནོན།]}

ལོ་ཉེས་བྱུང་བ་དང་དགོན་པར་བབ་པས་རང་གིས་ཀྱང་གཡོས་ནས་སམ། ལྗོན་ཤིང་ལ་འཛེགས་ཏེ་འབྲས་བུ་བཏོགས་ནས་སམ། བསྒུལ་ནས་སམ་བྱང་གི་སྒྲ་མི་སྙན་པའི་ལུགས་ལ་བརྟེན་ནས་སྤྱད་པར་བྱའོ། །དེ་བཞིན་དུ་རྩ་བ་ལ་སོགས་པ་ཡང་རང་གིས་ས་ལས་བཏོན་ནས། དུས་དང་དུས་མ་ཡིན་པར་ཡང་རུང་སྤྱད་པར་བྱ་སྟེ། འདི་ལ་འགྱོད་པར་མི་བྱའོ་ཞེས་འབྱུང་བ་ཡིན་ནོ། །གླེགས་བམ་ཁ་ཅིག་ལས་དུས་མ་ཡིན་པར་ཡང་རུང་ཞེས་བྱ་བ་མི་འབྱུང་སྟེ། །འོན་ཀྱང་དགོན་པ་ལ་སོགས་པར་བབ་པ་ན་ནི་ནད་པ་དང་འདྲ་བར་མཚུངས་པ་ཡིན་པས་དོན་གྱིས་རྟོགས་པར་བྱའོ། །ཡ་རབས་རྣམས་ཀྱིས་ཤ་དང་ཉ་གནང་གང༌། །གནོད་དང་བརྩེ་མེད་རོ་སོགས་ལ་ཆགས་དང༌། །ཡོངས་སུ་བཙལ་བའི་སེམས་དག་སྤངས་ནས་ནི། །ལྷུང་བཟེད་འོངས་པ་དེ་ལ་བརྟགས་ཏེ་བཟའ། །འཇིག་རྟེན་ན་ཡ་རབས་ཏེ་རིགས་ཀྱི་ཆོས་དང་ལྡན་པར་བྱེད་པ་རྣམས་ཀྱིས། ཤའམ་ཉ་ཤ་བཟའ་བར་གྲགས་ཤིང་གནང་བ་གང་ཡིན་པ་ལྷུང་བཟེད་དུ་འོངས་པ་དེ་ལ་བརྟགས་ཏེ་བཟའ་བར་བྱའོ། །བརྟགས་ནས་ཞེས་བྱ་བ་ཅི་དགོས་ཤེ་ན། མི་དང་སྦྲུལ་དང་གླང་པོ་ཆེ་དང༌། སྤྲེའུ་ལ་སོགས་པའི་ཤ་བཀག་པ་རྣམས་ཡོངས་སུ་སྤང་བའི་ཕྱིར་རོ། །ཡ་རབས་རྣམས་ཀྱིས་གནང་ཞེས་བྱ་བ་འདི་ཅིའི་ཕྱིར་ཞེ་ན། སྐྱེ་བོ་ཡ་རབས་ཀྱིས་སྨད་པ་ཁོ་ན་དག་ལ་བཅོམ་ལྡན་འདས་ཀྱིས་ཀྱང་བཀག་པའི་ཕྱིར་ཏེ། དེ་ལྟར་མདོར་བྱས་པ་ཡིན་ནོ། །གནོད་ཅེས་བྱ་བ་ལ་སོགས་པ་ནི་ཇི་ལྟར་བཟའ་བར་བྱ་བ་དེ་སྟོན་ཏོ། །གནོད་པ་དང༌། བརྩེ་བ་མེད་པ་དང་རོ་ལ་སོགས་པ་ལ་ཆགས་པ་དང༌། ཡོངས་སུ་བཙལ་བའི་ཞེས་བྱ་བ་དང་ཡོད་པར་བྱས་ནས། གནོད་པ་དང་བརྩེ་བ་མེད་པ་དང་རོ་ལ་སོགས་པ་ལ་ཆགས་པ་དང༌། ཡོངས་སུ་བཙལ་བའི་རྣམ་པའི་སེམས་དག་ཅེས་བྱ་སྟེ། བར་གྱི་ཚིག་མི་མངོན་པར་བྱས་པ་ཡིན་ནོ། །དེ་ལ་གནོད་པ་ནི་གཞན་ལ་འཁུ་བའོ། །བརྩེ་མེད་ནི་སྙིང་མི་བརྩེ་བའོ། །རོ་སོགས་ལ་ཆགས་པ་ནི་དྲི་དང་རོ་དང་རེག་བྱ་དག་ལ་ཞེན་པ་ཡིན་ནོ། །ཡོངས་སུ་བཙལ་བ་ནི་རང་གིས་བྱེད་པའོ། །དེའི་ཕྱིར་དེ་དག་ལ་མ་ཞེན་པར་བྱ་སྟེ། ལུས་གཟུང་བའི་ཕྱིར་སྨན་དང་འདྲ་བར་བཟའ་བར་བྱའོ། །

---

^{[མ་དཔེ་གཟིགས་ན་འདིར་གནོན།]}

སྨན་གྱི་གཞི་ལས་ཀུན་དགའ་བོ་དེ་བས་ན་དེའི་ཕྱིར་དགེ་སློང་རྣམས་ཀྱིས་སྨན་རྣམ་པ་བཞི་པོ་དུས་སུ་རུང་བ་དང༌། ཐུན་ཚོད་དུ་རུང་བ་དང༌། ཞག་བདུན་པ་དང༌། འཚོ་བའི་བར་དུ་བཅང་བ་རྣམས་བསྟེན་པར་བྱ་བར་གནང་ངོ་ཞེས་གསུངས་པ་དེ་ལ་དུས་སུ་རུང་བའི་དབང་དུ་བྱས་ནས། བཤད་པ། ནས་ཆན་སྣུམ་ཁུར་འབྲས་ཆན་ཉ་དང་ཤ་།འདི་དག་སྲོག་གནས་བྱ་ཕྱིར་བཟའ་བར་གསུངས། །སྡོང་བུ་འབྲས་བུ་ཨུཏྤལ་ལ་སོགས་རྩ། །དེ་དག་བཅའ་བ་དུས་སུ་རུང་བ་ཡིན། །བཅོམ་ལྡན་འདས་ཀྱིས་ནས་ཆན་དང༌། །འབྲས་ཆན་དང༌། ཤ་དང་ཉ་ཤ་དང་སྣུམ་ཁུར་ནི་བཟའ་བ་ཡིན་པར་གསུངས་ལ། བཅའ་བ་ཡང་སྡོང་བུའི་བཅའ་བ་ནི་བུ་རམ་ཤིང་ལ་སོགས་པའོ། །འབྲས་བུའི་བཅའ་བ་ནི་ཆུ་ཤིང་གི་འབྲས་བུ་ལ་སོགས་པའོ། །རྩ་བའི་བཅའ་བ་ནི་ཨུཏྤལ་ལ་སོགས་པའི་རྩ་བ་དག་དང༌། དོ་བ་ལ་སོགས་པ་སྟེ། འདི་ནི་དུས་སུ་རུང་བ་ཡིན་པར་ཁོང་དུ་ཆུད་པར་བྱའོ། །དུས་མིན་རུང་བ་ཆུ་ཤིང་འབྲས་བུ་ལ། །སོགས་པའི་ལྟུང་བ་ཚགས་བཙགས་རུང་ཆུས་བསླད། །དར་བ་དང་རྩ་བས་ཆུར་ཁུ་སྦྱར་བའི་ཚ། །བུ་རམ་ཤིང་ཁུ་དང་བ་འབྲུ་ཚ་ཡིན། །དུས་མ་ཡིན་པར་རུང་བ་ནི་དུས་མིན་རུང་བ་ཡིན་ཏེ། ཐུན་ཚོད་དུ་རུང་བ་དང༌། ཞག་བདུན་དང༌། ཇི་སྲིད་དུ་འཚོ་བའོ། །དེ་ལ་ཐུན་ཚོད་དུ་རུང་བ་ནི་ཆུ་ཤིང་གི་འབྲས་བུ་ལ་སོགས་པ་བཏུང་བ་ཡིན་ཏེ། དེ་ཡང་རུང་ཆུས་བཏབ་པ་དང་ཚགས་ཀྱིས་བཙགས་པ་ཉིད་ཡིན་ནོ། །ཕྲན་ཚེགས་ལས། བཙུན་པ་དུས་སུ་རུང་བའི་བཏུང་བ་ནི་གང་ལགས། དུས་མ་ལགས་པར་རུང་བ་ནི་གང་ལགས། བཀའ་སྩལ་པ། ཉེ་བ་འཁོར་མ་བཙགས་པ་ནི་དུས་སུ་རུང་བའོ། །ཚགས་ཀྱིས་ཡོངས་སུ་བཙགས་ཤིང༌། ཆུས་གཏོར་བ་ནི་དུས་མ་ཡིན་པར་རུང་བའོ་ཞེས་གསུངས་པ་ཡིན་ནོ། །དེའི་ཕྱིར་བཏུང་བ་ཚགས་ཀྱིས་བཙགས་པ་རུང་བའི་ཆུས་བསླད་པ་ཞེས་བྱ་བས་བྱེ་བྲག་ཏུ་འབྱེད་དོ། །སྨན་གྱི་གཞི་ལས། ཆུ་ཤིང་འབྲས་བུ་ཀུ་ཤུ་གོ་ལ་དང༌། །ཨ་ཤྭད་ཐ་དད་ཨུ་དུམ་བཱ་ར་དང༌། །པ་རུ་ཤ་ཀ་དང་ནི་རྒུན་འབྲུམ་དང༌། །བརྒྱད་པ་འབྲ་གོ་དག་ནི་ཡིན་པར་བཤད། །ཅེས་སྡོམ་གྱི་

---

^{[མ་དཔེ་གཟིགས་ན་འདིར་གནོན།]}

ཚིགས་སུ་བཅད་པ་གསུངས་པ་དེ་ནི་ཉེ་བར་མཚོན་པ་ཡིན་པས། ཨ་མྲ་ལ་སོགས་པའི་བཏུང་བ་རྣམས་འདིར་ཁོང་དུ་ཆུད་པར་བྱའོ། །དར་བ་དང་ཞེས་བྱ་བ་ནི་ཤིན་ཏུ་དང་བའོ། །ཆུར་ཁུ་དང་སྦྱར་བའི་ཚ་ནི་སྦྱར་བའི་ཚ་ཡིན་ཏེ། རྩ་བ་མོ་དང་ཆུར་ཁུ་དང་སྦྱར་བའི་ཚ་ཞེས་རེ་རེ་ལ་ཡང་དང་བ་ཡོད་པར་སྦྱར་རོ། །གླེང་གཞི་ལས། དགེ་སློང་དག་ལྔ་པོ་འདི་དག་ནི་རྩ་བ་མོ་སྐྱུར་པོ་དག་ཡིན་ཏེ། ལྔ་པོ་གང་དག་ཅེ་ན། འདི་ལྟ་སྟེ། སྦྱར་བའི་ཚ་དང༌། འབྲུའི་ཆང་དང༌། ཕྲུམ་ཁུ་དང༌། ཞོ་ག་ཆུ་དང༌། ལྔ་པ་རྩ་བ་མོ་ཞེས་གསུང་པ་ཡིན་ནོ། །དེ་ལ་སྦྱར་བའི་ཚ་ནི། གང་ཞིག་རྫས་སྦྱར་བ་ལས་སྐྱུར་པོར་གྱུར་ཅིང་ཉམས་པའོ། །ཞོ་ག་ཆུ་ནི་ཆུར་ཁུའོ། །ཕྲུམ་ཁུ་ནི་ཆུར་ཁུ་དང་འདྲའོ། །རྩབས་ནི་རྩ་བ་མོ་ཉིད་དོ། །འདི་དག་ཚགས་ཀྱིས་བཙགས་ཏེ། ཆུས་བསླད་པ་ཤིན་ཏུ་དང་བ་འདམ་བུ་མདའ་རྒྱུའི་ཁ་དོག་འདྲ་བར་གྱུར་པ་དག་ནི། དགེ་སློང་གིས་དུས་ཀྱང་རུང་དུས་མ་ཡིན་པ་ཡང་རུང༌། ན་ཡང་རུང་མི་ན་ཡང་རུང༌། ཡོངས་སུ་སྤྱད་པར་བྱ་སྟེ་འདི་ལ་འགྱོད་པར་མི་བྱའོ་ཞེས་འབྱུང་བ་ཡིན་ནོ། །བུ་རམ་ཤིང་གི་ཁུ་བ་ནི་ཐུན་ཚོད་དུ་རུང་བ་ཡིན་ནོ། །དང་བ་ཞེས་བྱ་བ་འདིས་ནི་ཕྱེ་མ་དང་འདྲེས་པར་དང་བ་རྣམས་ནི་དུས་སུ་རུང་བ་ཉིད་ཡིན་པར་སྟོན་བ་ཡིན་ནོ། །འདིར་གཞུང་ནི་ཞུས་པ་ལས། ཉེ་བ་འཁོར་བུ་རམ་ཤིང་ནི་དུས་སུ་རུང་བ་ཡིན། ཁུ་བ་ནི་ཐུན་ཚོད་དུ་རུང་བ་ཡིན་ཞེས་བྱ་བ་ལ་སོགས་པ་གསུངས་པ་ཡིན་ནོ། །ཐུན་ཚོད་དུ་རུང་བ་བཤད་ཟིན་ཏོ། །ཞག་པ་དུན་པ་བཤད་པ། བུ་རམ་དང་ནི་བྲུ་མར་སྦྲང་རྩི་མར། །ཧྭགས་དང་ཞག་དང་ཁ་རར་བཅས་ཉིད་ཡིན། །སྨན་གྱི་གཞི་ལས། ཞག་བདུན་པ་ནི་མར་དང་དེ་བཞིན་དུ་འབྲུ་མར་དང་བུ་རམ་དང་སྦྲང་རྩི་དང་ཁ་རའོ་ཞེས་གསུངས་པ་ལ། བུ་རམ་ནི་བུ་རམ་ཁོ་ན་ཡིན་ཏེ། བུ་རམ་སྨོས་པ་ཁོ་ནའི་ཕྱིར་བུ་རམ་གྱི་རྣམ་པ་དག་ཀྱང་སྨོས་པ་ཡིན་པས་ཧྭགས་ཞེས་སྨོས་སོ། །འདིར་གཞུང་ནི། ཉེ་བ་འཁོར་གང་ཟག་ལྔ་པོ་དག་གིས་བུ་རམ་སྤྱད་པར་བྱ་སྟེ། ལམ་དུ་ཞུགས་པ་དང༌། ཟན་ཆད་པ་དང༌། ནད་པ་དང༌། དགེ་སྐོས་དང༌། ལག་གི་བླས་ཞེས་འབྱུང་བ་ཡིན་ནོ། །སྦྲང་རྩི་ཞེས་བྱ་བ་ནི་སྦྲང་མ་དང་བུང་བའི་འོ། །ཁར་ཞེས་བྱ་བ་ནི་

---

^{[མ་དཔེ་གཟིགས་ན་འདིར་གནོན།]}

སྦྲང་རྩིའི་ཁ་ར་དང་ཧྭགས་ཀྱི་ཁ་རའོ། །ཞག་ཅེས་བྱ་བ་ལ། འདིར་གཞུང་ནི་ཞག་ལྔ་དག་སྟེ། ཉའི་ཞག་དང༌། ཤུ་ཤུ་ཀའི་ཞག་དང༌། ཆུ་སྲིན་བྱིས་པ་གསོད་པའི་ཞག་དང༌། དྲེད་མོའི་ཞག་དང༌། ཕག་གི་ཞག་གོ །དེ་ལྟར་ཞག་ལྔ་པོ་འདི་དག་ནི་ཞག་བདུན་གྱི་བར་དུ་བཞུས་པའི་ཁུ་བ་ཡོངས་སུ་སྤྱད་པས། ཡོངས་སུ་སྤྱད་པར་བྱའོ་ཞེས་འབྱུང་བ་ཡིན་ནོ། །ཇི་སྲིད་འཚོའི་བར་དུ་བཅང་བའི་དབང་དུ་བྱས་ནས་བཤད་པ། ཡུང་དང་སྒེའུ་གཤེར་གླ་སྒང་ལ་སོགས་རྩྭ། །སླེ་ཏེ་ས་ཙན་དན་དམར་པོ་སོགས་སྡོང་བུ། །ནིམ་པ་པ་ཏོ་ལ་སོགས་ལོ་མར་བཤད། །མེ་ཏོག་ད་ཏ་ཀི་དང་བ་ཤ་ཀ །འབྲས་བུ་སྐྱུ་རུ་ན་ལེ་ཤམ་པ་རུ། ཨ་རུ་ཀ་ཀོལ་སུག་སྨེལ་པི་པི་ལིང༌། །དེ་ལ་རྩ་བའི་སྨན་ནི་ཡུང་དང་སྒེའུ་གཤེར་དང་གླ་སྒང་ལ་སོགས་པ་ཡིན་ནོ། །སྡོང་བུའི་སྨན་ནི་སླེ་ཏྲེས་དང༌། ཙན་དན་དམར་པོ་ལ་སོགས་པ་ཡིན་ནོ། །ལོ་མའི་སྨན་ནི་ནིམ་པའི་ལོ་མ་དང༌། པ་ཏོ་ལའི་ལོ་མ་ལ་སོགས་པ་ཡིན་པར་བཤད་དོ། །མེ་ཏོག་གི་སྨན་ནི་དཔེར་ན་བ་ཤ་ཀའི་མེ་ཏོག་དང༌། ད་ཏ་ཀའི་མེ་ཏོག་ལ་སོགས་པ་ཡིན་ནོ། །འབྲས་བུའི་སྨན་ནི་སྐྱུ་རུ་ཞེས་བྱ་བ། སྐྱུ་རུ་ར་དང་བ་རུ་ར་དང༌། ཨ་རུ་ར་ཞེས་དང་ཡོད་པར་བྱས་ནས། ན་ལེ་ཤམ་དང༌། བ་རུ་ར་དང༌། ཨ་རུ་ར་ཞེས་རེ་རེ་ལ་ཡང་ཡོད་པར་སྦྱར་རོ། །བ་རུ་ར་ཞེས་བྱ་བ་ནི་བ་རུ་རའི་འབྲས་བུ་ཡིན་ནོ། །ཨ་རུ་ར་ཞེས་བྱ་བ་ནི། ཨ་རུ་རའི་འབྲས་བུ་ཡིན་ནོ། །ཀ་ཀོ་ལ་ནི་ཀ་ཀོ་ལའི་འབྲས་བུ་ཞེས་བྱ་བ་དང༌། སུག་སྨེལ་གྱི་འབྲས་བུ་དང༌། པི་པི་ལིང་ཡིན་ནོ། སྨན་གྱི་གཞི་ལས། ཇི་སྲིད་འཚོའི་བར་དུ་བཅང་བ་ནི། རྩ་བའི་སྨན་དང༌། སྡོང་བུའི་སྨན་དང༌། ལོ་མའི་སྨན་དང༌། མེ་ཏོག་གི་སྨན་དང༌། འབྲས་བུའི་སྨན་ཞེས་རྒྱ་ཆེར་འབྱུང་ཞིང༌། དེ་ལ་རྩ་བའི་སྨན་ནི་གླ་སྒང་དང༌། ཤུ་དག་དང༌། ཡུང་བ་དང༌། སྒེའུ་གཤེར་དང༌། བོང་ང་ཞེས་བྱ་བ་དང༌། གཞན་ཡང་གང་ཞིག་རྩ་བའི་སྨན་གྱི་དོན་དུ་གསལ་ཞིང༌། ཁ་ཟས་ཀྱི་དོན་དུ་མ་ཡིན་པའོ། །སྡོང་བུའི་སྨན་ནི་ཙན་དན་དང༌། སྤྱི་མོ་དང༌། ཤུག་པ་དང༌། སྒྲོན་ཤིང་དང༌། སླེ་ཏྲེས་དང༌། སྐྱེར་བའོ། །ལོ་མའི་སྨན་ནི། པ་ཏོ་ལའི་ལོ་མ་དང༌། བ་ཤ་

---

^{[མ་དཔེ་གཟིགས་ན་འདིར་གནོན།]}

ཀའི་ལོ་མ་དང༌། ནིམ་པའི་ལོ་མ་དང༌། ཀོ་ཤ་ཏ་ཀིའི་ལོ་མ་དང༌། སབྟ་པྲྞའི་ལོ་མ་ལ་སོགས་པ་ཡིན་ནོ། །མེ་ཏོག་གི་སྨན་ནི། བ་ཤ་ཀའི་མེ་ཏོག་དང༌། ནིམ་པའི་མེ་ཏོག་དང༌། ད་ཏ་ཀའི་མེ་ཏོག་དང༌། ཀླུ་ཤིང་གི་མེ་ཏོག་དང༌། པད་མའི་ཟེ་བ་ཡིན་ནོ། །འབྲས་བུའི་སྨན་ནི། ཨ་རུ་ར་དང༌། སྐྱུ་རུ་ར་དང༌། བ་རུ་ར་དང༌། ན་ལེ་ཤམ་དང༌། པི་པི་ལིང་དང༌། གཞན་ཡང་འབྲས་བུའི་སྨན་གྱི་དོན་དུ་གསལ་ཞིང༌། ཁ་ཟས་ཀྱི་དོན་དུ་མ་ཡིན་ནོ་ཞེས་རྒྱ་ཆེར་འབྱུང་བ་ཡིན་ནོ། །གཞན་ཡང་ཞེས་བྱ་བའི་ཚིག་གིས་འཕངས་པའི་ཕྱིར་སུག་སྨེལ་དང༌། ཀ་ཀོ་ལ་དག་སྨོས་པ་བྱས་པས་སོ། །ཏིལ་སོགས་འགྱུར་བྱེད་དང་ནི་ཚ་ལྔ་དང༌། །ཐང་ཆུ་རྒྱ་སྐྱེགས་སྲ་རྩི་ཤིང་ཀུན་དང༌། །སྦྲ་ཚིལ་བཀྲེས་པ་བསལ་ཕྱིར་བཟའ་མིན་གང༌། །དེ་དག་མ་ཤི་བར་བཅང་སྨན་དུ་གསུངས། །འགྱུར་བྱེད་ལྔ་ནི་ཏིལ་ཚིག་འཁུས་པའི་ཐལ་བ་དང༌། ནས་ཚིག་འཁུས་པའི་ཐལ་བ་དང༌། ནས་ཀྱི་གྲ་མ་འཁུས་པའི་ཐལ་བ་དང༌། དར་ཚུར་དང༌། བ་ཤ་ཀའི་འགྱུར་བྱེད་དོ། །ཚ་ལྔ་ཞེས་བྱ་བ་ནི་རྒྱ་མ་ཚ་དང༌། རྩབ་རུ་ཚ་དང༌། ཁ་རུ་ཚ་དང༌། ལན་ཚྭ་དང༌། རྒྱ་མཚོའི་ཚ་ཞེས་བྱ་བ་དང་ལྔ་ཡིན་ནོ། །སྲ་རྩི་དང་སྤྲ་ཚིལ་དང༌། རྒྱུ་སྐྱེགས་དང༌། ཐང་ཆུ་དང་ཞེས་རེ་རེ་ལ་ཡང་དང་ཡོད་པར་སྦྱར་རོ། །སྲ་རྩི་ཞེས་བྱ་བ་ནི་ཤིང་ས་རྫའི་ཞོ་ཡིན་ནོ། །སྤྲ་ཚིལ་ནི་སྤྲ་ཚིལ་ཉིད་ཡིན་ནོ། །འདིར་གཞུང་ནི། སྤྱི་བྱེད་ནི་ལྔ་སྟེ། ཤིང་ཀུན་དང༌། སྲ་རྩི་དང༌། རྒྱ་སྐྱེགས་དང༌། སྤྲ་ཚིལ་དང༌། ཐང་ཆུའོ་ཞེས་འབྱུང་ངོ༌། །དེ་ལ་ཤིང་ཀུན་ནི་ཤིང་ཀུན་གྱི་ཤིང་གི་ཞོའོ། །རྒྱ་སྐྱེགས་ནི་རྒྱ་སྐྱེགས་སོ། །སྤྲ་ཚིལ་ནི་སྒྲ་ཚིལ་ལོ། །ཐང་ཆུ་ནི་དེ་ལས་གཞན་པའི་ཐང་ཆུའོ། །དེ་ལྟར་ན་དུས་མ་ཡིན་པར་རུང་བ་སྨོས་པ་ནི་དགེ་ཚུལ་རྣམས་ཀྱི་ཐུན་ཚོད་དུ་རུང་བ་ལ་སོགས་པ་དང༌། འཚོ་བའི་བར་དུ་བཅད་བ་དེ་དག་ཉིད་བསྟན་པ་ཡིན་ནོ། །མདོར་ན་བཀྲེས་པ་ཞི་བར་བྱ་བའི་ཕྱིར། བཟའ་བར་བྱ་བ་མ་ཡིན་པ་གང་ཡིན་པ་དེ་ནི་འཚོ་བའི་བར་དུ་བཅད་བའི་སྨན་ཡིན་པར་བསྟན་ཏོ། །དུས་མིན་རུང་དང་དུས་སུ་རུང་བསྲེས་གང༌། །དེ་ནི་དུས་སུ་རུང་བའི་དབང་གིས་སྤྱད། །གང་གི་ཚེ་དུས་མ་ཡིན་པར་རུང་བ་

---

^{[མ་དཔེ་གཟིགས་ན་འདིར་གནོན།]}

དང། དུས་སུ་རུང་བ་བསྲེས་པ་ནི། དུས་སུ་རུང་བའི་དབང་ཉིད་ཀྱིས་སྤྱད་པར་བྱའོ། །འདིར་གཞུང་ནི་སྨན་གྱི་གཞི་ལས། མཽད་གལ་གྱི་བུ་དེ་ལ་ཐུན་ཚོད་དུ་རུང་བ་གང་ཡིན་པ་དང༌། ཞག་བདུན་པ་གང་ཡིན་པ་དང༌། འཚོ་བའི་བར་དུ་བཅང་བ་གང་ཡིན་པ་དེ་གལ་ཏེ་དུས་སུ་རུང་བ་དང་བསྲེས་ན། དུས་སུ་རུང་བར་སྤྱད་པར་བྱའོ། །དུས་ལས་འདས་ན་སྤྱད་པར་མི་བྱའོ་ཞེས་རྒྱ་ཆེར་འབྱུང་བ་དང༌། གཞན་ཡང༌། དགེ་སློང་དག་ཁ་ཟས་དེས་ཁ་ཟས་ཀྱི་བྱ་བ་བྱར་མི་རུང་སྟེ། བུ་རམ་གང་འབྲས་ཀྱི་ནང་དུ་བཅུག་པ་དེ་ནི་བསལ་ནས་སྤྱད་པར་བྱའོ། །གང་ཞིག་ཕྱེའི་ནང་དུ་བཅུག་པ་ནི་ཆུས་བཤལ་ནས་སྤྱད་པར་བྱའོ། གཞན་ཡང་ཞུ་ན་དེའི་སྨྱིག་མའི་ཚལ་པས་བཞར་ནས་ཆུས་བཤལ་བར་བྱའོ། །འོན་ཀྱང་གལ་ཏེ་ཁ་ཟས་མེད་པར་བྱ་བར་མ་ནུས་ན་ལེགས་པར་དག་པར་བྱས་ཏེ། ཁུ་བར་བྱས་ནས་སྐོམ་དུ་བྱ་ཞིང༌། །ཚགས་ཀྱིས་བཙགས་ནས་སྤྱད་པར་བྱའོ། །འདི་ལ་འགྱོད་པར་མི་བྱའོ་ཞེས་འབྱུང་བ་ཡིན་ནོ། །འདི་ནི་སྨན་གྱི་དམིགས་ཀྱིས་དབྱེ་བ་ཡིན་ནོ། །དུས་མིན་ཕྱོགས་མཐུན་སྣོད་གཞན་ཡོད་པ་དང༌། །འཇིགས་མེད་ཕྱོགས་སུ་སྣོད་གཅིག་ནས་ཟ་ཡིན། །དུས་མ་ཡིན་པར་ཟ་བའི་ཕྱོགས་དང་མཐུན་པ་བཤད་པར་བྱ་སྟེ། འདི་ལྟ་སྟེ། །སྣོད་གཅིག་ནས་ཟ་ཞེས་བྱ་བ་ནི། སྣོད་ཐ་མི་དང་པ་ནས་ཟ་བ་ཡིན་ཏེ། སྣོད་ཐ་མི་དད་པ་ནས་ཟ་བ་དེ་ཡང༌། སྣོད་གཞན་དག་ཡོད་ན་ཉེས་པར་འགྱུར་གྱི། མེད་ན་ནི་མ་ཡིན་ལ། འཇིགས་པ་དང་བཅས་པར་ཡང་ཉེས་པ་མེད་པ་ཉིད་ཡིན་ནོ། །དམིགས་ཀྱིས་དབྱེ་བ་ནི། ཕ་མ་དང་ནི་གཅིག་ཏུ་བཟའ་བ་ལ། །དེ་ཕྱིར་སྐྱེ་བོ་མེད་པར་ཉེས་པ་མེད། །ཅེས་སྨོས་པ་ཡིན་ཏེ། གལ་ཏེ་ཕ་དང་མ་གཉིས་ན་རེ། བུ་ཡུན་རིང་མོ་ཞིག་ནས་བསམས་པ་ཡིན་གྱི། ལྷན་ཅིག་བཟའ་བར་བྱའོ་ཞེས་ཟེར་ན། དེའི་ཚེ་དེ་དག་གི་ངོར་སྐྱེ་བོ་མེད་པར་ཞུགས་ཏེ། ལྷན་ཅིག་ཟོས་ན་ཉེས་པ་མེད་དོ། །གཙུག་ལག་ཁ་ཅིག་ལས་ནི་ཉེ་དུ་རྣམས་ཀྱིས་ཞེས་འབྱུང་སྟེ། དེའི་ཚེ་ཕ་མ་གཉིས་ཀྱིས་ཞེས་བྱ་བ་ནི་ཉེ་བར་མཚོན་པ་ཡིན་པར་ཤེས་པར་བྱའོ། །དགའ་བོ་ལ་སོགས་མདོ་ལས་གསུངས་ཚུལ་དང༌། །ལེགས་དང་ཚོད་དང་ལྡན་པས་ཟས་བཟའ་བྱ། །དགའ་བོ་དང་མིག་སྨན་བསྐུ་

---

^{[མ་དཔེ་གཟིགས་ན་འདིར་གནོན།]}

བའི་ཐུར་མ་ལ་སོགས་པའི་མདོ་ལས། ཚུལ་གང་གསུངས་པའི་ཚུལ་དེས་སོ་སོར་བརྟགས་ནས་ཁ་ཟས་བཟའ་བར་བྱའོ། །གཞན་ཡང་ལེགས་པ་སྟེ་སྤྱོད་ལམ་མཛེས་པ་དང༌། ཚོད་དང་ལྡན་པ་སྟེ་ཧ་ཅང་ཉུང་བ་ཡང་མ་ཡིན་ཏེ། ཧ་ཅང་མང་བ་ཡང་མ་ཡིན་པར་སྨན་སྙམ་དུ་བཟའ་བར་བྱའོ། །ཁམ་ཆུང་བའམ་ཆེ་བ་རིགས་མིན་ལ། །ཁ་ཁམ་བཅས་པས་ནམ་ཡང་སྨྲ་མི་བྱ། །མི་སྙན་མི་བྱ་གཏོར་བར་བྱ་མ་ཡིན། །མཆོད་རྟེན་འདྲ་བ་བཅོམ་སྟེ་བཟའ་མི་བྱ། །ཡི་ག་འཆུས་པ་བཞིན་དུ་ཁམ་ཆུང་ངུར་བཟའ་བར་མི་བྱའོ། །སྤྲང་པོ་བཞིན་དུ་ཁམ་ཆེན་པོར་འགྲམ་པ་གཉིས་བཀང་ནས་བཟའ་བར་མི་བྱའོ། །དྭ་ཕྲུག་ལ་སོགས་པ་བཞིན་དུ་ཁ་ཁམ་དང་བཅས་པས་ཚིག་སྨྲ་བར་མི་བྱའོ། །སྨོད་པ་དང་བཅས་པ་བཞིན་དུ་མི་སྙན་པར་ཟེར་ཞིང་བཟའ་བར་མི་བྱའོ། །དྲིས་ནས་ནི་སྦྱིན་བདག་གིས་སྦྱིན་ནོ། །ལེན་པ་པོས་སྤྱད་དོ། །འབྱུང་བ་ཆེན་པོ་རྣམས་ཆི་མ་པར་བྱས་སོ། །ཉིན་ཞག་གཅིག་གི་ལམ་བརྒྱགས་བླངས་སོ་ཞེས་སྨྲ་བར་བྱའོ། །འོན་ཏེ་ཁ་ཟས་དེ་བསོད་པ་ཉིད་ཡིན་ན་དེའི་ཚེ་གྱ་ནོམ་པ་ཟོས་སོ། །ཟས་དང་སྐོམ་ཞིམ་མོ། །དགེ་སློང་དག་ལེགས་པར་ཚིམ་པར་བྱས་སོ་ཞེས་བྱ་བ་ལ་སོགས་པ་སྨྲ་བར་མི་བྱའོ། །གཞན་ཡང་བྱ་གག་བཞིན་དུ་གཏོར་ནས་བཟའ་བར་མི་བྱའོ། །མཆོད་རྟེན་དང་འདྲ་བར་བྱས་ཏེ་བཤིག་ནས་བཅའ་བར་མི་བྱའོ། །སྟག་གིས་ཟོས་པའི་གོད་ཀྱི་ཤ་རྣམས་དང༌། །ཆེད་དུ་བྱས་པ་དག་ནི་བཟའ་མི་བྱ། །ཁྭ་རྣམས་ཀྱིས་ནི་ལྷག་མར་བྱས་པའི་ཟས། །གང་ཡིན་དེ་མཆུའི་ཐན་འཁོར་བོར་ཏེ་བཟའ། །སྟག་གིས་ཟོས་པའི་གོད་ཀྱི་ཤ་དག་བཟའ་བར་མི་བྱའོ། །འདིར་གཞུང་ནི་ཕྲན་ཚེགས་ལས། །དྲུག་སྡེ་རྣམས་ཀྱིས་ཐིབས་པོའི་ཚལ་ནས་སྟག་གིས་སྦས་པའི་གོད་ཀྱི་ཤ་བླངས་ཏེ། རྒྱལ་བུ་རྒྱལ་བྱེད་ཀྱི་ཚལ་དུ་དོང་བ་དང༌། སྟག་དེ་ཡང་ཕྱི་བཞིན་དུ་རིངས་པར་འོང་ངོ༌། །དེ་དག་རྒྱལ་བུ་རྒྱལ་བྱེད་ཀྱི་ཚལ་དུ་ཕྱིན་པ་དང༌། སྟག་རྒྱལ་བུ་རྒྱལ་བྱེད་ཀྱི་ཚལ་གྱི་སྒོ་ནས་ཟུགས་ཤིང་འདུག་པ་ནས། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དག་འབོ་ལ་བཀའ་སྩལ་པ་ཀུན་དགའ་བོ་ཅིའི་ཕྱིར་ན། རྒྱལ་བུ་རྒྱལ་བྱེད་ཀྱི་སྒོ་ན་སྟག་ཟུགས། བཙུན་པ་དེས་གོང་སྦས་པ་

---

^{[མ་དཔེ་གཟིགས་ན་འདིར་གནོན།]}

དྲུག་སྡེ་རྣམས་ཀྱིས་བླངས་སོ། །ཀུན་དགའ་བོ་སྟག་གི་གོད་ཟའམ། འཚལ་ལགས་སོ། །ཀུན་དགའ་བོས་རི་དགས་ཀྱི་རྒྱལ་པོ་སེང་གེ་ནི་རི་དགས་བཟང་པོ་དག་བསད་ནས་ཤ་བཟང་པོ་དག་ཟོས། ཁྲག་བཟང་པོ་དག་འཐུངས་ནས་ལྟོས་པ་མེད་པར་སོང་བ་དང༌། དེ་ལས་གཞན་པའི་རི་དགས་ཕྲ་མོ་རྣམས་གོད་ཟ་བར་བྱེད་དོ། །དེ་ལྟ་བས་ན་དགེ་སློང་གིས་སྟག་གི་གོད་སྤྱད་པར་མི་བྱའོ། །སྤྱོད་ན་ཉེས་པ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ། །འདིར་ཡང་སྒྲ་བཞིན་དུ་བྱས་ན་རེ་ཞིག་འདི་ནི་མ་བྱིན་པར་ལེན་པ་བཀག་པ་ཡིན་པར་སྣང་ངོ་ཞེ་ན། བཙུན་པ་ཆོས་དགའི་ཞལ་ནས། གལ་ཏེ་དགག་པ་འདི་མ་བྱིན་པར་ལེན་པར་གཏོགས་པ་ཡིན་ན། ཅིའི་ཕྱིར་བཅོམ་ལྡན་འདས་ཀྱིས་སྟག་གི་གོད་སྤྱད་པར་མི་བྱའོ་ཞེས་བཀའ་སྩལ་གྱི། མ་བྱིན་པར་ལེན་པ་དགག་པ་མ་མཛད། ཅིའི་ཕྱིར་ན་གལ་ཏེ་དངོས་པོ་ཚང་ན་ཞེས་མ་གསུངས་པར་ཉེས་པ་སྦོམ་པོར་འགྱུར་རོ་ཞེས་བཀའ་སྩལ། དེ་ལྟ་བས་ན་འདི་མ་བྱིན་པར་ལེན་པ་ཡིན་དུ་ཟིན་གྱིས་ཀྱང་སྔར་བཀག་པའི་ཕྱིར་འགོག་པར་མི་མཛད་དོ། །བྱུང་བ་འདིས་སྟག་གི་གོད་ཟ་བ་བཀག་གོ །དེའི་ཕྱིར་སྦོམ་པོ་འདི་ནི་མིའི་ཤ་ཟ་བ་སྦོམ་པོ་ཡིན་པ་དང་འདྲ་བར་གཞན་ཁོ་ན་ཡིན་པར་རིག་པར་བྱའོ་ཞེས་འཆད་པས་དེའི་དགོངས་པས་དུས་མ་ཡིན་པར་ཟ་བའི་ཕྱོགས་དང་མཐུན་པ་ཡིན་པར་བསྟན་པས་ཉེས་པ་མེད་དོ། །ཆེད་དུ་བྱས་པ་དག་ནི་ཞེས་བྱ་བ་ནི་ཆེད་དུ་བྱས་པའི་ཤ་དང་ཉ་ཤ་དག་བཟའ་བར་མི་བྱའོ། །གལ་ཏེ་དེ་བྱས་པ་དང་བྱེད་དུ་བཅུག་པ་དང༌། རྗེས་སུ་ཡི་རང་བའི་འཁོར་གསུམ་ཡོངས་སུ་དག་པ་ཡིན་དུ་ཟིན་ཀྱང༌། འོན་ཀྱང་ཆེད་དུ་བྱས་པ་རྣམས་ལས་སྙིང་བརྩེ་བ་མེད་པའི་སེམས་སྐྱེ་བའི་ཕྱིར་དང༌། ཆ་མ་ཡིན་པའི་ཕྱིར་བཀག་གོ །དེ་ལས་གཞན་པ་ནི་མ་བཀག་གོ །འདི་ལྟར་གཞུང་ནི་གླེང་གཞི་ལས། བཙུན་པ་བཅོམ་ལྡན་འདས་ཀྱིས་དགེ་སློང་བྱེ་མ་སྐྱེས་བྲོ་འཚལ་བ་ལ་ཤ་རྗེན་པ་སྦྱིན་པར་བྱའོ་ཞེས་གང་བཀའ་སྩལ་པ། བཙུན་པ་དེ་གང་ནས་བླང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཉེ་བ་འཁོར་ཤ་འཚོང་གི་གནས་ཆེན་པོ་ལྔ་དག་ནས་སོ། །ལྔ་པོ་གང་དག་ནས་ཤེ་ན། ཤན་པ་དང༌། བྱ་གག་འཚོང་བ་

---

^{[མ་དཔེ་གཟིགས་ན་འདིར་གནོན།]}

དང༌། བྱ་བ་དང༌། ཕག་འཚོང་དང༌། རི་དགས་ཀྱི་རྔོན་པའི་ཤ་འཚོང་བའི་གནས་དག་ནས་སོ། །བཙུན་པ་སུས་བླང་བར་བགྱི་ཞིང་སྟོབས་སུ་སྩལ་བར་བགྱི། ཉེ་འཁོར་དགེ་བསྙེན་དད་པ་ཅན་གྱིས་སོ་ཞེས་གསུངས་པ་ཡིན་ཏེ། དགེ་བསྙེན་དད་པ་ཅན་སྨོས་པ་ནི་ཆེད་དུ་གསོན་པའི་དོགས་པ་མེད་པར་སྟོན་པ་ཡིན་ནོ། །འདིར་ཡང་སྲོག་གཅོད་པའི་ཕྱོགས་དང་མཐུན་པ་ཡིན་ཡང༌། ཁ་ཟས་ཀྱི་སྐབས་ཡིན་པའི་ཕྱིར་འདིར་བསྟན་ཏོ། །བྱ་རོག་རྣམས་ཀྱིས་ལྷག་མར་བྱས་པའི་ཟས་ནི་མཆུའི་ཐན་ཀོར་བོར་ཏེ་སྤྱད་པར་བྱའོ། །འདི་ནི་སིལ་བུ་ལས་འབྱུང་ངོ༌། །ལྷུང་བཟེད་གཞི་ལས་རྐང་ཕྱོགས་མནན་ནས་མིན། །མཆིལ་ལྷམ་གྱོན་བཞིན་མིན་གོས་གཅིག་པུས་མིན། །སྨན་པས་བསྒོ་ན་ནད་པས་མཆིལ་ལྷམ་སྟེ། །རྐང་པ་གཞག་སྟེ་ཇི་ལྟར་འདོད་པར་བཟའ། །ལྷུང་བཟེད་ཀྱི་རྟེན་ནི་ལྷུང་བཟེད་ཀྱི་གཞི་ཡིན་ནོ། །རྐང་ཕྱོགས་ཞེས་བྱ་བ་རྡོག་པའི་ཕྱོགས་ཀྱིས་མནན་ནས་བཟའ་བར་མི་བྱའོ། །མཆིལ་ལྷམ་གྱོན་པས་ཀྱང་མ་ཡིན་ལ། གོས་གཅིག་གོན་པས་ཀྱང་བཟའ་བར་མི་བྱའོ། །ནད་པས་ནི་སྨན་པས་ལུང་རོག་པ་བཞིན་དུ་མཆིལ་ལྷམ་གྱི་སྟེང་དུ་རྐང་པ་བཞག་ནས། ཇི་ལྟར་འདོད་པར་བཟའ་བར་བྱའོ། །དེའི་བདག་པོ་འམ་འདྲིམ་པར་བྱེད་པ་ལ། །འདི་འམ་འདི་ལས་བྱིན་ཞེས་བརྗོད་མི་བྱ། །འཕགས་པ་རྣམས་ཀྱིས་རིམ་གྱིས་འཐོབ་པ་བཟའ། །འདིར་ནི་ནད་པ་རྣམས་ལ་བཀག་པ་མིན། །བཟའ་བ་འམ་བཅའ་བ་འདྲིམ་པར་བྱེད་པ་ནི། །སྦྱིན་བདག་གམ་འདྲིམ་པར་བྱེད་པ་དག་ལ་འདི་བྱིན་ཅིག་གམ་འདི་ལས་བྱིན་ཅིག་ཅེས་བརྗོད་པར་མི་བྱའོ། །འོན་ཀྱང་འཕགས་པ་ཆོས་ཀྱི་རྗེས་སུ་འབྲང་བ་རྣམས་ཀྱིས་ནི་རིམ་གྱིས་འཐོབ་པ་ཁོ་ན་བཟའ་བར་བྱའོ། །འདིར་ནད་པ་རྣམས་ལ་ནི་བཀག་པ་མེད་དོ། །ཟོས་པའི་ལྷག་མ་ལས་ནི་ཆང་གཅིག་བཞག །ཆེད་དུ་མི་བྱ་བཀག་པའི་རྒྱུ་འདིར་ཁྭ། །འདག་པའི་རྫས་རུང་བ་ཡི་ཆུ་རྣམས་ཀྱིས། །ཟོས་ན་ཁ་ཡང་ཁ་ཟས་མེད་པར་བྱའོ། །ཁ་ཟས་ཟོས་པའི་ལྷག་མ་ལས་ཆང་བུ་གཅིག་གཞག་པར་བྱའོ། །འདིར་གཞུང་ནི་ཕྲན་ཚེགས་ལས། དགེ་སློང་ཞིག་ཟས་ཀྱི་བྱ་བ་བྱེད་པ་ན་དེ་ལ་ཁྱི་ཞིག་འཕགས་པས། བདག་ལ་ཅུང་ཟད་ཅིག་འདོར་བར་བྱེད་དོ་སྙམ་དུ་སྐྲུ་ཞིང་འདུག་

---

^{[མ་དཔེ་གཟིགས་ན་འདིར་གནོན།]}

པ་ལས་ཇི་ཙམ་ན་ངེས་མ་ལུས་པར་ཟོས་པ་དང༌། དེ་རེ་ཐག་ཆད་ནས་ཤི་ཞིང་དུས་ལས་འདས་པ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དུད་འགྲོ་ལ་ཆང་བུ་གཅིག་གཞག་པར་གནང་ངོ་ཞེས་བྱ་བའི་བར་དུ་འབྱུང་བ་ཡིན་ནོ། །དེ་ལ་ཡང་ཁྭ་འམ་ཁྱིའི་ཆེད་དུ་ནི་མི་བྱའོ། །འདིར་ཆེད་དུ་གཞག་པར་དགག་པའི་རྒྱུ་ནི་ཁྲ་ཡིན་ནོ། །འདིར་གཞུང་ནི། ཕྲན་ཚེགས་ཉིད་ལས། དགེ་སློང་དགོན་པ་པ་ཞིག་གིས་དུད་འགྲོའི་ཆང་བུ་ཝ་ལ་བྱིན་ཞིང་ཁྭ་རྣམས་བཟློག་པ་དང༌། ཁྭ་རྣམས་ཁྲོས་པ་ནས་དེ་དག་གིས་ཆོམ་རྐུན་གྱི་སྡེ་དཔོན་ལ། སྡེ་དཔོན་དགེ་སློང་འདི་ལ་དོང་ཙེ་རབ་ཏུ་མང་པོ་དག་ཡོད་དོ་ཞེས་སྨྲས་པ་དང༌། ཆོམ་རྐུན་གྱི་སྡེ་དཔོན་དེ་ཁྭ་སྐད་མཁས་པས་དེར་སོང་སྟེ། དགེ་སློང་དེ་བཟུང་ནས་དེས་དེ་བརྡེག་པར་བརྩམས་པ་ལ་སོགས་པའི་བར་དུ་འབྱུང་བ་ཡིན་ནོ། །དེ་ལྟ་བས་ན་ཅི་བདེར་ཞེས་བྱ་སྟེ། དུད་འགྲོ་ལ་ཆང་བུ་གཅིག་སྦྱིན་པར་བྱའོ། །ཟས་ཟོས་ནས་ཀྱང་འདག་པའི་རྫས་སམ། བ་ལང་གི་ལྕི་བ་གཙང་མ་དང༌། ཆུ་རུང་བས་ཁ་ཁ་ཟས་མེད་པར་བྱའོ། །འདིར་གཞུང་ནི་སིལ་བུ་ལས། བཙུན་པ་ཅི་ཙམ་གྱིས་དབྱར་ཁ་བྱི་དོར་བགྱིས་པར་བརྗོད་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཉེ་བ་འཁོར་རྨའི་སྒོ་ཁ་ནི་རྟག་ཏུ་འཛག་པ་ཡིན་པས་ཁ་ཟས་མེད་པར་བྱ་བར་མི་ནུས་ཏེ། འོན་ཀྱང་འཁུར་བར་ཆུ་བཏུང་བས་ལན་གཉིས་ལན་གསུམ་དུ་བཀྲུས་ཤིང་བཤལ་ནས་བོར་ན། བྱི་དོར་བྱས་པར་བརྗོད་པར་བྱའོ་ཞེས་འབྱུང་བ་ཡིན་ནོ། །ཟས་ཟོས་ནས་སྦྱིན་པའི་ཚིགས་སུ་བཅད་པ་གདོན་པར་བྱའོ་ཞེས་མདོར་མ་བྱས་པ་ནི་ཆུ་བླངས་ནས་ཚིགས་སུ་བཅད་པ་གདོན་པར་བྱའོ་ཞེས་བྱ་བ་དེ་ཁོ་ནར་འགྲུབ་པའི་ཕྱིར་རོ། །དགེ་ཚུལ་གྱི་ཚིག་ལེའུར་བྱས་པའི་འགྲེལ་པ་ལས། དུས་མ་ཡིན་པའི་ཟས་སྤོང་བ་སྟེ་དགུ་པ་རྫོགས་སོ།། །།དངུལ་དང་གསེར་གྱི་རྣམ་པ་ལེན་བྱེད་ན། །ཉེས་བྱས་འགྱུར་རོ་གོས་དང་རྒྱགས་ཕྱིར་དང༌། །ལུས་ཀྱི་ཕྱིར་རམ་དེ་བཞིན་སྨན་ཕྱིར་རམ། ཆོས་དང་ལྡན་པའི་ཕྱིར་ནི་ལྟུང་བ་མེད། །དངུལ་དང་གསེར་ལེན་ན་དགེ་ཚུལ་ལ་ཉེས་བྱས་སུ་འགྱུར་རོ། །འདིར་ནི་བདག་གིར་བྱེད་པ་ལ་ལེན་པ་ཞེས་བྱ་བར་དགོངས་པ་

---

^{[མ་དཔེ་གཟིགས་ན་འདིར་གནོན།]}

ཡིན་གྱི། རེག་པ་ནི་མ་ཡིན་ནོ། །འདི་ག་ལས་ཤེ་ན། སྨན་གྱི་གཞི་ལས། དགེ་སློང་རྣམས་ཀྱི་ལམ་བརྒྱགས་ཀྱི་རྒྱུ་ཀཱཪྵཱ་པ་ཎ་རྣམས་ནི། དགེ་ཚུལ་རྣམས་ཀྱིས་བསྐུར་བར་བྱའོ་ཞེས་གསུངས་པའི་ཕྱིར་རོ། །ཇི་སྟེ་འདི་ནི་དམིགས་ཀྱིས་བསལ་བ་ཡིན་ནོ་ཞེ་ན། དེ་ནི་མ་ཡིན་ཏེ་གང་གི་ཕྱིར་སྨན་གྱི་གཞི་ཉིད་ལས། བཙུན་པ་བཅོམ་ལྡན་འདས་ཀྱིས་དངུལ་དང་གསེར་ལེན་པར་བྱེད་པ། དགེ་ཚུལ་གྱི་བསླབ་པའི་གཞི་བཅུ་པ་ཡིན་ནོ་ཞེས་གང་གསུངས་པ་དང༌། བཅོམ་ལྡན་འདས་ཀྱིས་དགེ་ཚུལ་རྣམས་ཀྱིས་བསྐུར་བར་བྱའོ་ཞེས་གསུངས་པ་དེ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ཉེ་བ་འཁོར་ལེན་པ་ནི་ངས་དགོངས་ནས་གསུངས་པ་ཡིན་གྱི། བསྐུར་བ་ནི་མ་ཡིན་ནོ། །དེ་ལྟ་བས་ན་དགེ་ཚུལ་གྱིས་བསྐུར་བར་བྱའི། ལེན་པ་སྟེ་བདག་གིར་ནི་མི་བྱའོ་ཞེས་གསུངས་པ་ཡིན་ནོ། །དེ་ལྟ་བས་ན་དེ་ནི་ཐེ་ཚོམ་མེད་པར་ལེན་པ་བཀག་པ་ཡིན་ནོ། །དམིགས་ཀྱིས་བསལ་བ་ནི། གོས་དང་རྒྱགས་ཕྱིར་དང་ཞེས་བྱ་བ་ལ་སོགས་པ་སྨོས་པ་ཡིན་ཏེ། གོས་ཀྱི་ཕྱིར་གལ་ཏེ་ལེན་པར་བྱེད་ན་ཉེས་པ་མེད་དོ། །དེ་བཞིན་དུ་རྒྱགས་ཕྱིར་ནི་ལམ་བརྒྱགས་ཀྱི་ཕྱིར་རོ་ཞེས་བྱ་བའི་ཐ་ཚིག་གོ །ལུས་ཀྱི་ཕྱིར་ཞེས་བྱ་བ་ནི་ཁར་བཟའ་བའི་ཆེད་དུའོ། །སྨན་ཕྱིར་ཞེས་བྱ་བ་ནི་ནད་ཞི་བར་བྱ་བའི་ཕྱིར་རོ། །ཆོས་དང་ལྡན་པའི་ཕྱིར་ཞེས་བྱ་བ་ལ་ཆོས་དང་མ་བྲལ་བ་ནི་ཆོས་དང་ལྡན་པ་སྟེ། བཅོམ་ལྡན་འདས་ལ་མཆོད་པ་འམ། སྡོམ་བརྩོན་རྣམས་ལ་ཕན་གདགས་པའི་ཕྱིར་རོ་ཞེས་བྱ་བའི་ཐ་ཚིག་གོ ། ལེན་པའི་རྗེས་སུ་མཐུན་པ་དཔེར་བྱ་ན། ཆོས་གོས་ལ་སོགས་ཡོད་བཞིན་གོས་སོགས་སློང༌། །ཁབ་རལ་བ་སོ་རུས་པ་ལས་བྱས་པའམ། །གསེར་གྱིས་སྤྲས་པ་བྱ་བ་མ་ཡིན་ནོ། །ལེན་པའི་ཕྱོགས་དང་མཐུན་པ་བཤད་པར་བྱ་སྟེ། འདི་ལྟ་སྟེ། ཆོས་གོས་དག་ཡོད་བཞིན་དུ་གོས་ལ་སོགས་པ་སློང་བ་དང༌། དེ་བཞིན་དུ་ཁབ་རལ་གྱི་རྒྱུ་རྭ་ལ་སོགས་པ་ལས་བྱས་པ་ཡང་དེ་བཞིན་ཏེ། དེ་ལྟ་བས་ན་ཁབ་རལ་རྭ་ལས་བྱས་པ་དང༌། བ་སོ་ལས་བྱས་པ་དང༌། རུས་པ་ལས་བྱས་པའམ། ཡང་ན་གསེར་གྱིས་སྤྲས་པ་དག་མི་བྱའོ། །རྙེད་འདོད་ཉོ་དང་བཙོང་ལ་

---

^{[མ་དཔེ་གཟིགས་ན་འདིར་གནོན།]}

སོགས་མི་བྱ། །དགོས་པའི་འབྲེལ་པ་ཡོད་ན་ཉེས་པ་མེད། །གལ་ཏེ་གོས་དག་ཉོ་བར་འདོད་ན་ནི། །ཁྱིམ་པ་ལ་བཅོལ་ཉོ་བྱ་རང་གིས་མིན། །གལ་ཏེ་ཉོ་བྱེད་སྒྲིན་པོ་འགའ་མེད་ན། །ཚིག་ནི་གསུམ་གྱི་བར་དུ་བརྗོད་པར་བྱ། །རྙེད་པའི་བསམ་པས་ཉོ་བའམ་བཙོང་བར་མི་བྱའོ། །དགོས་པ་དེ་ལྟ་བུ་ཞིག་ཡོད་ན་བྱ་སྟེ། དེ་ལ་ཉེས་པ་མེད་དོ། །གལ་ཏེ་གོས་ལ་སོགས་པ་ཉོ་བར་འདོད་ན་དེའི་ཚེ་ཁྱིམ་པ་ལ་བཅོལ་ནས་ཉོ་བར་བྱའི། རང་གིས་ནི་མི་བྱའོ། །འོན་ཏེ་ཉོ་བར་བྱེད་པའི་ཁྱིམ་པ་སྒྲིན་པོ་མེད་ན་དེའི་ཚེ་རང་གིས་ཉོ་བར་བྱའོ། །དེར་ཡང་ཚིག་གཉིས་སམ་གསུམ་ངེས་པར་བརྗོད་པར་བྱའི། །ཀ་ཀ་ནི་དང་འགྲོན་བུ་ལ་སོགས་པས་ཚོང་ལ་བརྩེག་པར་མི་བྱའོ། །རྒས་པས་འཁོགས་དང་ནད་པ་མ་གཏོགས་པར། །སྡོམ་བརྩོན་གཞན་གྱིས་པུས་འཁྱུད་བཅང་མི་བྱ། །ནད་པ་དང་རྒས་པས་ཉམ་ཆུང་བ་མ་གཏོགས་པ། སྡོམ་བརྩོན་གཞན་གྱིས་པུས་འཁྱུད་བཅང་བར་མི་བྱའོ། །གཞན་ཡང་ཚུལ་འཆོས་པ་དང༌། ཁ་གསག་དང༌། གཞོགས་སློང་དང༌། ཐོབ་ཀྱིས་འཇལ་བ་དང༌། རྙེད་པས་རྙེད་པར་བྱེད་འདོད་པར་མི་བྱའོ། །དེ་དག་གི་མཚན་ཉིད་ཀྱང་ཅི་ཡིན་ཞེ་ན། བཤད་པ། རྙེད་ཕྱིར་སྤྱོད་ལམ་ཚུལ་འཆོས་ཡིན་པར་བསྟན། །ཆགས་པས་གཞན་ལ་སྨོད་པས་ཐོབ་ཀྱིས་འཇལ། །ཆུང་ངུ་བྱིན་ནས་མང་པོ་ཚོལ་བྱེད་དང༌། །གཞན་གྱི་བསྔགས་པ་བྱེད་པ་གཞོགས་སློང་ཡིན། །རྙེད་པའི་ཕྱིར་ནི་གཅམ་དང་སྙན་པར་སྨྲ། །ཐམས་ཅད་ཁ་གསག་ཡིན་པར་འཕགས་པས་བཤད། །དེ་དག་དཔེ་ཙམ་གཞན་ཡང་ལོག་སྒྲུབ་པས། །འཚོ་བར་བྱེད་པ་ཉིད་ནི་རྟག་ཏུ་སྤང༌། །རྙེད་པའི་ཕྱིར་སྤྱོད་ལམ་འཆོས་པ་གང་ཡིན་པ་དེ་ནི་ཚུལ་འཆོས་པ་ཡིན་ནོ། །ཆགས་པས་གཞན་ལ་སྨོད་པ་ནི་ཐོབ་ཀྱིས་འཇལ་བ་ཞེས་བྱ་སྟེ། གཞན་ལ་མཚང་ནས་འདྲུབ་ལ་སོགས་པས་ཕྱིར་བཏགས་པ་དང་འདྲ་བར་བྱས་ནས་རྙེད་པ་སྒྲུབ་པའི་ཕྱིར་རོ། །ཆུང་ངུ་བྱིན་ནས་ཟས་མང་པོ་སྒྲུབ་པར་བྱེད་པ་ནི་རྙེད་པས་རྙེད་པར་བྱེད་འདོད་པ་ཡིན་ནོ། །ཆགས་པས་གཞན་གྱི་བསྔགས་པ་བྱེད་པ་གང་ཡིན་པ་དེ་ནི་གཞོགས་སློང་བྱེད་པ་ཡིན་ཏེ། རྙེད་པའི་ཕྱིར་བསྔགས་པ་བྱེད་པའི་ཕྱིར་

---

^{[མ་དཔེ་གཟིགས་ན་འདིར་གནོན།]}

རོ། །རྙེད་པའི་ཕྱིར་ནི་གཅམ་དང་སྙན་པར་སྨྲ་བ་ནི་ཁ་གསག་ཡིན་ནོ། །དེ་ལྟར་ན་དེ་ཐམས་ཅད་དང་གཞན་ཡང་ལོག་པའི་སྒྲུབ་པས་འཚོ་བར་བྱེད་པ་ཉིད་རྟག་ཏུ་སྤང་བར་བྱ་སྟེ། དེ་དག་ནི་འཕགས་པ་རྣམས་ཀྱིས་དཔེ་ཙམ་དུ་གསུངས་པ་ཡིན་ནོ། །དགེ་ཚུལ་གྱི་ཚིག་ལེའུར་བྱས་པའི་འགྲེལ་པ་ལས། གསེར་དངུལ་ལེན་པ་སྤོང་བ་སྟེ་བཅུ་པ་རྫོགས་སོ།། །།བམ་པོ་བརྒྱད་པ་སྟེ་ཐ་མ། ཁྱིམ་པའི་རྟགས་ནི་སྤང་བར་སྨྲས་པས་ན། དེ་ཉམས་ཕྱོགས་མཐུན་ཡོངས་སུ་སྤང་བྱ་སྟེ། །ཁྱིམ་པ་འདྲ་བར་ཤམ་ཐབས་མི་བགོ་ཞིང༌། ཁ་དོག་གཅིག་པ་འམ་ཁ་ཆར་ཅན་དཀར་མིན། །རབ་ཏུ་འབྱུང་བའི་སྔགས་ལས་ཁྱིམ་པའི་རྟགས་ཡོངས་སུ་སྤང་བར་བགྱིའོ་ཞེས་བྱ་བ་འདིས། ཁྱིམ་ན་གནས་པའི་རྟགས་རྣམ་པར་སྤང་བའི་ཕྱིར་དེ་ཉམས་པའི་ཕྱོགས་དང་མཐུན་པ་ཡོངས་སུ་སྤང་བར་བྱ་བ་ཡིན་ནོ། །དེ་ཡང་ཁྱིམ་པ་འདྲ་བར་ཤམ་ཐབས་མི་བགོ་ཞིང་ཞེས་བྱ་བ་ལ་སོགས་པ་ནི་དཔེར་བརྗོད་པ་ཡིན་ནོ། །ཇི་ལྟར་ཁྱིམ་པ་ཤམ་ཐབས་ཀྱི་གློར་ལྕམ་གྱིས་བྱས་ཤིང་མདོམས་དཀྲིས་ཏེ་གྱོན་པ་དེ་ལྟར་མི་བྱའོ། །ཁ་དོག་གཅིག་པ་ཡང་མིན་ཞེས་བྱ་བ་ནི་ཤམ་ཐབས་སྟོད་གཡོགས་དང༌། ཁ་དོག་མཐུན་པ་བགོ་བར་མི་བྱའོ་ཞེས་བྱ་བའི་ཐ་ཚིག་གོ །འདིར་གཞུང་ནི་གོས་ཀྱི་གཞི་ལས། བཙུན་པ་བདག་ཆོས་གོས་ཐམས་ཅད་སྔོ་བ་བཅང་བར་འཚལ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་པ་དག་ནི་དེ་ལྟར་འཆང་བར་བྱེད་བས། དེ་ལྟ་བས་ན་དགེ་སློང་གིས་ཆོས་གོས་ཐམས་ཅད་སྔོ་བ་བཅང་བར་མི་བྱའོ་ཞེས་བྱ་བ་ནས་འགལ་ཚབས་ཅན་དུ་འགྱུར་རོ། །ཐམས་ཅད་དམར་བ་དང་སེར་བ་ཡང་དེ་བཞིན་ཏེ། དཀར་པོ་ནི་མི་རུང་བ་ཁོ་ན་ཡིན་ནོ་ཞེས་བྱ་བའི་བར་དུ་འབྱུང་བ་ཡིན་ནོ། །དེ་ལྟ་བས་ན་འདིར་ནི་ཤམ་ཐབས་དང་སྟོད་གཡོགས་གཉི་ག་ཁ་དོག་གཅིག་པ་བཀག་པ་ཡིན་ནོ་སྙམ་དུ་ཤེས་པར་བྱས་ནས། ཁ་དོག་གཅིག་པ་ཡང་མིན་ཞེས་མདོར་བྱས་སོ། །ཁ་ཚར་ཅན་དང་ཤམ་ཐབས་དཀར་པོ་མི་བགོའོ་ཞེས་བྱ་བར་སྦྱར་རོ། །ཕྱི་རོལ་དག་ཏུ་ཚོན་ཅན་གོས་གཡོགས་ན། །དཀར་

---

^{[མ་དཔེ་གཟིགས་ན་འདིར་གནོན།]}

པོ་འང་ཉིན་པར་བགོ་བར་གནང་བ་ཡིན། །དགེ་འདུན་ཁྲི་དང་ཁྲིའུ་དང་བེའུ་རས་ལ། །གདིང་བ་བཏིང་ནས་སྤྱོད་ནའང་དེ་བཞིན་ནོ། །གལ་ཏེ་གོས་དཀར་པོ་བགོ་བར་འདོད་ན། དེའི་ཚེ་ཕྱི་རོལ་ནས་གོས་ཚོན་ཅན་གྱིས་གཡོགས་ནས་བགོ་བར་བྱའོ། །དགེ་འདུན་གྱི་ཁྲི་འམ། ཁྲིའུ་འམ། བེའུ་རས་ལ་སོགས་པ་ལ་ཡང་གདིང་བ་བཏིང་ནས་སྤྱོད་པར་བྱེད་ནའང་དེ་བཞིན་ནོ་ཞེས་བྱ་བ་ནི་དབང་ངོ་ཞེས་བྱ་བའི་ཐ་ཚིག་གོ །གོས་རྣམས་ཁ་དོག་བསྒྱུར་ཕྱིར་ཚོན་རྩི་གསུམ། །ངུར་སྨྲིག་རྩི་དང་སྔོན་པོའི་མདོག་དང་བཙག །ཚོན་རྩི་གསུམ་པོ་འདི་དག་ནི་བཅོམ་ལྡན་འདས་ཀྱིས་གོས་ཁ་དོག་བསྒྱུར་བའི་ཕྱིར་གསུངས་པ་ཡིན་ནོ། །ངུར་སྨྲིག་རྩི་ཞེས་བྱ་བ་ནི་ཤུན་པ་དང༌། ལོ་མ་དང༌། མེ་ཏོག་དང་འབྲས་བུ་ངུར་སྨྲིག་གི་རྩི་རྣམས་གཞུང་ངོ༌། །སྔོན་པོ་ཞེས་བྱ་བ་ནི་སྔོན་པོ་ཐམས་ཅད་གཟུང་ངོ༌། །དེ་ཉིད་ཀྱི་ཕྱིར་མདོག་ཅེས་སྣོས་པ་ཡིན་ནོ། །རམས་འབའ་ཞིག་སྨོས་པར་གྱུར་ན་མི་རུང་བས་སོ། །ཞུས་པ་ཁ་ཅིག་ལས། ཆུ་ཚགས་ཁ་དོག་བསྒྱུར་བར་བྱའོ་ཞེས་འབྱུང་ངོ༌། །སློབ་དཔོན་དག་གི་ཞལ་ནས་དེ་ནི་མི་རུང་སྟེ། ཁ་དོག་བསྒྱུར་བས་ཆུ་ཡང་ཁ་དོག་ཅན་དུ་འགྱུར་རོ། །དེ་ལྟ་བས་ན་དེ་ནི་ཡོ་བྱད་ཀྱི་གོས་བཞིན་དུ་ཁ་དོག་བསྒྱུར་བར་མི་བྱའོ་ཞེས་འཆད་དོ། །མཚལ་དང་དེ་བཞིན་རྒྱ་སྐྱེགས་བཙོད་རྣམས་དང༌། །གུར་གུམ་དག་དང་ཐིང་ཤིང་ལི་ཁྲི་དང༌། །རྨ་ཤིང་ལེ་བརྒན་རྩི་རྣམས་མི་རུང་སྟེ། །བརྒྱད་པོ་ཚོན་ཆེན་ཡིན་པས་བཀག་ཕྱིར་རོ། །མཚལ་དང༌། རྒྱ་སྐྱེགས་དང༌། བཙོད་དང༌། གུར་གུམ་དང། ཐིང་ཤིང་དང༌། ལི་ཁྲི་དང༌། རྨ་ཤིང་དང༌། ལེ་བརྒན་རྩི་མི་རུང་སྟེ། གང་གི་ཕྱིར་བརྒྱད་པོ་དེ་དག་ནི་ཚོན་ཆེན་པོ་ཡིན་པས་བཀག་པའི་ཕྱིར་རོ། །འོ་ན་ཅིའི་ཕྱིར་ཚོན་ཆེན་པོ་རྣམས་བཀག་ཅེ་ན། སྡོམ་བརྩོན་རྣམས་ལ་ནི་ཁ་དོག་གསལ་པ་ཉིད་ཆ་མ་ཡིན་པའི་ཕྱིར་རོ། །དེ་ཉིད་ཀྱི་ཕྱིར་རྒྱ་སྐྱེགས་ལ་སོགས་པ་དང་ཁ་དོག་མཐུན་པར་སྦྱར་བ་ལས་བྱུང་བ་ཡང་དགག་པར་བསྟན་ཏོ། །འོ་ན་གུར་གུམ་གྱི་མདོག་དང་མཐུན་པ་མེ་ཏོག་ཤེ་བ་ལི་ཀ་ཇི་ལྟར་གནང༌། ཁ་ཅིག་ན་རེ་མི་གནང་བ་ཁོ་ན་ཡིན་ནོ་ཞེས་ཟེར་རོ། །དེ་ནི་རིགས་པ་མ་ཡིན་ཏེ། བཅོམ་ལྡན་འདས་ཀྱིས་སེར་

---

^{[མ་དཔེ་གཟིགས་ན་འདིར་གནོན།]}

པོ་ཁ་དོག་བཟང་པོ་ལོངས་སྤྱོད་པའི་ཕྱིར་དང༌། ངུར་སྨྲིག་རྩི་ཞེས་སྤྱིར་བསྟན་པའི་ཕྱིར་དང༌། །ཚོན་ཆེན་པོ་བརྒྱད་པོ་དེ་ཉེ་བར་དམིགས་ཀྱིས་བསལ་བའི་ཕྱིར་རོ། །འོ་ན་ཚོན་ཆེན་པོ་བརྒྱད་པོ་ཉེ་བར་མཚོན་པར་མི་འགྱུར་རོ་ཞེ་ན་འོ་ན་དེ་ལྟར་ཡིན་ན་ནི་བཅོམ་ལྡན་འདས་ཀྱིས་ལོངས་སྤྱོད་པའི་ཕྱིར་མེ་ཏོག་ཤེ་བ་ལི་ཀ་ནི་གུར་གུམ་གྱི་ཁ་དོག་མ་ཡིན་པས་ཉེས་པ་མེད་པ་ཡིན་ནོ་ཞེ་ན། བཅོམ་ལྡན་འདས་ཀྱིས་ལོངས་སྤྱད་པ་ནི་གཏན་ཚིགས་སུ་མི་རུང་སྟེ། དེ་ནི་འདུལ་བའི་དབང་གིས་ཞུགས་པའི་ཕྱིར་རོ། །སེན་མོ་སྟེའུ་དང་སྤུ་གྲི་སོ་འདྲ་བ། །བྲེག་བྱ་དེ་ལས་གཞན་གྱི་རྣམ་པར་མིན། སེན་མོ་ནི་སྟེའུ་འི་སོ་འདྲ་བ་དང༌། །སྤུ་གྲིའི་སོ་འདྲ་བར་བྲེག་པར་བྱའི། དེ་ལས་གཞན་པའི་རྣམ་པ་ཁབ་ལ་སོགས་པའི་རྣམ་པ་ནི་མ་ཡིན་ནོ་ཞེས་བྱ་བའི་ཐ་ཚིག་གོ །དགོན་པར་གནས་པའི་སྐྲ་དང་ཁ་སྤུ་དག །སོར་གཉིས་ལས་ནི་ལྷག་པར་གཞག་མི་བྱ། །གྲོང་མཐའ་དེ་བས་ཆུང་ལྷག་དེ་བཞིན་ནོ། །སྐྲ་ནི་བ་ལང་སྤུ་འདྲའི་བྱི་བྱད་སྤང༌། །བརྟུལ་ཞུགས་ཅན་དགོན་པ་པས་སྐྲ་དང་ཁ་སྤུ་སོར་ཕྱེད་དང་གཉིས་ལས་ལྷག་པར་གཞག་པར་མི་བྱའོ། །དེ་བཞིན་དུ་གྲོང་མཐའ་བས་སྐྲ་དང་ཁ་སྤུ་སོར་ཕྱེད་དང་གཉིས་ལས་ལྷག་པར་གཞག་པར་མི་བྱའོ། །འདིར་གཞུང་ནི་ཕྲན་ཚོགས་ལས། དགེ་སློང་དགོན་པ་བས་སྐྲའི་སྲིད་སོར་གཉིས་ལས་ལྷག་པར་གཞག་པར་མི་བྱའོ། །གྲོང་མཐའ་བས་ནི་སོར་གཉིས་པས་ཆུང་བ་ལས་ལྷག་པར་གཞག་པར་མི་བྱའོ་ཞེས་འབྱུང་བ་ཡིན་ནོ། །དེ་ནི་འདིར་སྲིད་ཁོ་ན་ཡིན་ནོ། །དེའི་ཕྱིར་ཚད་ཉིད་ལས་སྲིད་དང་རིང་ཐུང་ཞེས་བྱ་ཐར་བསྒྲེའོ། །སོར་གཉིས་ཀྱི་ཚད་ཀྱི་སྲིད་ཅེས་བྱ་བའི་བར་གྱི་ཚིག་མི་མངོན་པར་བསྡུས་པ་ཡིན་ཏེ། སྲིད་ཀྱི་ཚང་སོར་གཉིས་ཞེས་བྱ་བར་བར་གྱི་ཚིག་ཕྱི་མ་ཅན་གྱིས་བསྡུ་བ་ཡིན་ཏེ། ལྡམ་ལྡུམ་གྱི་རྒྱལ་པོ་ལ་སོགས་པ་དང་འདྲ་བར་གྲངས་མ་ཚང་པའི་ཕྱིར་རོ། །གང་དག་སྲིད་ཅེས་བྱ་བ་འཁྱིལ་པའི་དོན་དུ་འཆད་པ་དེ་དག་གིས་ཀྱང༌། སོར་གཉིས་ཀྱི་ཚད་ཀྱི་སྲིད་ཅེས་བྱ་བར་ཁོང་དུ་ཆུད་པར་བྱའི། སྐྲ་འཁྱིལ་པར་གྱུར་བ་ཉིད་ལས་སོར་གཉིས་སུ་བྱས་པ་མ་ཡིན་ནོ། །འོ་ན་སོར་གཉིས་འཁྱིལ་པ་ཞེས་བྱ་བ་དེ་ལྟར་ཅིའི་ཕྱིར་མི་འདོད་ཅེ་ན། དེ་ལྟར་གྱུར་ན་ཚད་སོར་ལྔར་འགྱུར་

---

^{[མ་དཔེ་གཟིགས་ན་འདིར་གནོན།]}

བས་སོ། །དེའི་ཕྱིར་གླེང་གཞི་དེ་ཉིད་ཀྱི་ཉེས་པར་འགྱུར་བས་མི་འདོད་དོ། །སྐྲ་ནི་བ་ལང་སྤུ་འདྲའི་བྱི་བྱད་སྤོང་སྟེ། སྐྲ་བཤད་པ་དེ་སྤང་བར་བྱའོ། །གཞན་ཡང༌། བྱིན་པ་མིག་དང་མཆན་ཁུང་རྐེད་སྨིན་མ། །བྲེག་པར་བྱ་བ་ཤིན་ཏུ་ཐག་རིང་སྤང༌། །སྐྲ་རྣམས་བྲེགས་པ་བྱས་ནས་ཁྲུས་དག་བྱ། །ཡང་ན་ཡན་ལག་ལྔ་པོ་བཀྲུ་བར་བྱ། །བྱིན་པའི་སྤུ་བྲེག་པ་དང༌། མིག་གི་རྫི་མ་དང༌། མཆན་ཁུང་གི་སྤུ་དང༌། རྐེད་པའི་སྤུ་དང༌། སྨིན་མ་བྲེག་པ་ནི་ཤིན་ཏུ་ཐག་རིང་པོ་ཁོ་ནར་སྤང་བར་བྱའོ། །སྐྲ་དག་བྲེགས་ནས་ཁྲུས་བྱའོ། །དེ་ལྟ་བུའི་རྐྱེན་ཞིག་བྱུང་ན་ཡན་ལག་ལྔ་ཁྲུས་བྱའོ། །ཡན་ལག་ལྔ་ནི་མགོ་དང༌། ལག་པ་གཉིས་དང༌། རྐང་པ་གཉིས་སོ། །དང་པོར་ཁ་འམ་མགོ་ནི་ཅི་འདོད་བྱ། །དེ་ཡི་འོག་ཏུ་སྣ་ཡི་ནང་བྱ་ཞིང༌། །ལག་པ་རྐང་པའི་སེན་མོ་རིམ་པས་བྱ། །དེ་ལྟར་འདི་ནི་འབྲེག་མཁན་ལས་ཡིན་ནོ། །འབྲེག་མཁན་གྱི་ལས་ཀྱི་གོ་རིམས་ནི་འདི་ཡིན་ཏེ། ཐོག་མང་མགོ་འབྲེག་པར་བྱ། ཡང་ན་ཁ་སྟེ་འདིར་ཅི་དགར་ཞུགས་ནས་བྱའོ། །ལྷག་མ་ལྔ་ནི་ངེས་ཏེ། དེའི་འོག་ཏུ་སྣའི་ནང་ངོ༌། །དེའི་འོག་ཏུ་ལག་པའི་སེན་མོའོ། །དེའི་འོག་ཏུ་རྐང་པའི་སེན་མོ་སྟེ། གོ་རིམས་འདིས་འབྲག་མཁན་གྱི་ལས་དེ་བྱའོ། །སྐས་ལ་འཛེག་དང་དེ་བཞིན་ཉིན་ཉལ་དང༌། །ཤམ་ཐབས་ཐ་མ་མདུད་པ་དོར་བར་བྱ། །སྡོམ་བརྩོན་གྱིས་ནི་ཁུར་ལྕི་བསྐུར་མི་བྱ། །ཡང་ཡང་ཕྲག་པ་མགོ་བོ་རྐེད་པས་མིན། །སྐས་ལ་འཇོག་པར་འདོད་པས་ཤམ་ཐབས་ཀྱི་ཐ་མ་མདུད་པ་དོར་བར་བྱའོ། །ཉིན་པར་ཉལ་བ་ན་ཡང་དེ་བཞིན་དུ་བྱ་སྟེ། འདིར་དོན་ནི་གསང་བ་བསྡམས་པ་ཡིན་ནོ། །སྡོམ་བརྩོན་གྱིས་ཁུར་ལྕི་བ་བསྐུར་བར་མི་བྱའོ། །ཁུར་ཡང་དུ་ཟིན་ཀྱང་ཕྲག་པ་འམ་མགོ་བོ་དང་རྐེད་པས་བསྐུར་བར་མི་བྱའོ། །རྐུབ་ཚོས་དང་འབྲེལ་བའི་ཕྱིར་རྐེད་པ་ཁོ་ན་ལ་རྐེད་པ་ཞེས་བྱའོ། །དགུག་དང་ཕྲལ་དང་མདོམས་སྣང་བྱས་པ་དང༌། །དེ་བཞིན་ཙོག་ཙོག་པོར་ནི་འདུག་མི་བྱ། །བསྟན་བཅོས་ལས་གསུངས་སྤྱོད་ལམ་ལྟ་བུར་ནི། །བྱ་ཡིན་འདིར་ནི་འདི་དག་དཔེ་ཙམ་ཡིན། །རྐང་པ་མི་དགུག་པ་དང༌། རྐང་པ་མི་གདངས་པ་དང༌། མདོམས་མི་སྣང་བར་འདུག་པར་བྱའོ། །མདོམས་

---

^{[མ་དཔེ་གཟིགས་ན་འདིར་གནོན།]}

སྣང་བ་ཞེས་བྱ་བ་མིང་དུ་ཆགས་པའི་ཚིག་འདི་ནི་འཚིག་པ་དང་ཡན་ལག་གི་སྦུ་གུ་འདྲ་བར་འདུག་པ་སྟེ། ཅི་ནས་ཀྱང་འཚིག་པ་དང༌། ཡན་ལག་གི་སྤུ་གུ་གཉིས་རིལ་རིལ་པོ་གོས་ཀྱིས་དཀྲིས་པ་ཐུམ་པོ་ལྟར་མི་མངོན་པ་དེ་ལྟར་འདུག་པར་བྱའོ་ཞེས་བྱ་བའི་ཐ་ཚིག་གོ །གཞན་དག་ན་རེ་གཅེར་བའི་དོན་ལ་བྱ་སྟེ། ཅི་ནས་ཀྱང་གཅེར་བ་མི་མངོན་པ་དེ་ལྟ་བུར་འདུག་པར་བྱའོ་ཞེས་བྱ་བའི་ཐ་ཚིག་གོ་ཞེས་འཆད་དོ། །སློབ་དཔོན་གྱི་ཞལ་ནས་ནི། བཤད་པ་གཉིས་ཀ་ལྟར་ཡང་ཤམ་ཐབས་ཀྱི་ཐ་མ་གཉིས་བསྡུས་ནས་འདུག་པར་བྱའོ་ཞེས་བྱ་བའི་དོན་དུ་གནས་སོ་ཞེས་གསུངས་སོ། །དེ་བཞིན་དུ་ཙོག་ཙོག་པོར་འདུག་པར་མི་བྱའོ། །མང་དུ་སྨོས་ཀྱང་ཅི་དགོས་པས་འདུལ་བའི་བསྟན་བཅོས་ལས་གསུངས་པ་ཁོ་ནའི་སྤྱོད་ལམ་ལྟ་བུར་བྱ་བ་ཡིན་ཏེ། འདི་དག་ནི་དཔེར་བརྗོད་པ་བསྟན་པ་ཡིན་ནོ། །དགེ་ཚུལ་གྱི་ཚིག་ལེའུར་བྱས་པའི་འགྲེལ་པ་ལས། ཁྱིམ་པའི་རྟགས་སྤོང་པའི་ཕྱོགས་དང་མཐུན་པ་སྟེ་བཅུ་གཅིག་པ་རྫོགས་སོ།། །།སྡོམ་བརྩོན་རྟགས་ནི་ཁས་བླངས་བརྗོད་པས་ན། །དེར་རྟོགས་ཉམས་པའི་ཕྱོགས་མཐུན་སྤང་བྱ་སྟེ། །དཔེར་ན་མུ་སྟེགས་རྟགས་ནི་ཐོགས་པ་དང༌། །གཅེར་བུ་སྐྲ་འབལ་ལག་པར་ཟ་བ་དང༌། །རབ་ཏུ་བྱུང་བའི་སྔགས་ལས་རབ་ཏུ་འབྱུང་བའི་རྟགས་ཡང་དག་པར་ལེན་ཏོ་ཞེས་འབྱུང་བའི་ཕྱིར་རབ་ཏུ་བྱུང་བ་ཉམས་པའི་ཕྱོགས་དང་མཐུན་པ་སྤང་བར་བྱ་བ་ཡིན་ཏེ། དཔེར་ན་མུ་སྟེགས་ཅན་གྱི་རྟགས་ཀེང་རུས་ལ་སོགས་པ་ཐོགས་པ་དང༌། གཅེར་བུ་ཉིད་དང་སྐྲ་འབལ་བ་དང་ལག་པར་ཟན་ཟ་བ་ལ་སོགས་པའོ། །གཞན་ཡང༌། རི་ལ་མཆོང་དང་ཉི་མ་ལྟ་བྱེད་དང༌། །མེ་ལྔ་བསྟེན་པ་ལ་སོགས་སྤང་བར་བྱ། །རི་ཀ་ནས་མཆོང་བ་དང་ཉི་མ་ལ་ལྟ་བ་དང་མེ་ལྔ་བསྟེན་པ་ལ་སོགས་པ་རྣམ་པ་ཐམས་ཅད་དུ་སྤང་བར་བྱའོ། །མཆིལ་མ་ལ་སོགས་སེ་གོལ་གཏོགས་བྱས་ཏེ། །དེ་ནས་གནང་བའི་ས་ཕྱོགས་དག་ཏུ་དོར། །མཆིལ་མ་ལ་སོགས་དོར་བ་ན་སེ་གོལ་བརྡབས་ཏེ་དེ་ནས་གནང་བའི་ས་ཕྱོགས་སུ་དོར་བར་བྱའོ། །བཤད་པའི་ས་དང་གཅི་བའི་ཉེ་འཁོར་དུ། །སྣ་ཚོགས་གཏམ་གྱིས་ཡུན་རིངས་གནས་མི་བྱ། །ཁ་དོག་བཅོ་བླག་ལ་སོགས་དེར་མི་བྱ། །སྐད་དག་ཕྱུང་སྟེ་བརྟགས་ནས་འཇུག་

---

^{[མ་དཔེ་གཟིགས་ན་འདིར་གནོན།]}

པར་བྱ། །བཤང་བའི་སའི་ཉེ་འཁོར་རམ་གཅི་བའི་སའི་ཉེ་འཁོར་དུ་གཏམ་སྣ་ཚོགས་སྨྲ་བ་ལ་སོགས་དག་གིས་ཤིན་ཏུ་ཡུན་རིང་བར་གནས་པར་མི་བྱའོ། །ཁ་དོན་ནམ་བཙོ་བླག་ལ་སོགས་པ་དེར་མི་བྱའོ། །སྣམ་ཕྱི་སར་འཇུག་པ་ན་སྐད་དག་ཕྱུང་སྟེ་འཇུག་པར་བྱའོ། །བཤང་བའི་ས་དང་གཅི་བའི་ས་དག་ཀྱང༌། །སོ་སོར་ཐ་དད་ཡིན་ཏེ་དེར་མི་བརྗོད། །གཅི་དང་བཤང་བ་དེ་བཞིན་རླུང་དག་ནི། །འབྱུང་བར་གྱུར་ན་དལ་བུས་གཏང་བར་བྱ། །བཤང་བའི་ས་ཡང་ལོགས་ཤིག་གཅི་བའི་ས་ཡང་ལོགས་ཤིག་ཏུ་བྱའོ། །དེར་ཞུགས་ན་བརྗོད་པར་མི་བྱའོ། །བཤང་བ་ལ་སོགས་པ་གང་འབྱུང་བར་གྱུར་པ་དེ་ནི་བཤད་པ་འམ་གཅི་བ་འམ་རླུང་འབྱུང་བར་འགྱུར་བ་སྟེ། དལ་གྱིས་དལ་གྱིས་གཏང་བར་བྱའོ། །འབྱུང་བ་དགག་པར་ནམ་ཡང་འདོད་མ་ཡིན། །གཅི་བ་ལ་སོགས་པ་དེ་དག་འབྱུང་བ་དགག་པར་མི་བྱའོ། །གཙང་སྦྲའི་རིམ་པ་ཡང་བཤད་པར་བྱ་སྟེ། རྨ་ལ་སྔར་ནི་འཇམ་པོས་ཕྱིས་ནས་ཀྱང༌། །ཆུ་ནང་དག་དང་ས་ཡིས་བཀྲུས་བྱས་ཏེ། །ལག་པ་གཡོན་པར་ས་ནི་ལན་བདུན་བླུགས། །དེ་ཡི་འོག་ཏུ་ལག་པ་གཉིས་ཀར་བདུན། །ས་དེ་དག་ཀྱང་སོ་སོར་རིམ་བཞིན་གཞག །དེ་བཞིན་ཆུ་མང་ལག་པ་གཉིས་བཀྲུས་ནས། །དེས་འབད་ལག་ངར་བྱིན་པ་ལེགས་ཕྱིས་ཏེ། །ཕྱིས་ཀྱང་ལག་པ་གཉིས་ཀ་བཀྲུ་བྱ་ཞིང༌། །ཕྱིས་ནས་རིལ་བས་རྐང་པ་གཉིས་ཀ་ཡིན། །སེམས་ནི་དག་ན་གཙང་བ་ཡིན་པར་བཤད། །དྲི་དང་གོས་པ་དག་དང་བྲལ་ཙམ་ཡིན། །རྨ་ཉིད་ལ་ནི་རེ་ཞིག་སྔར་བོང་པ་ལ་སོགས་པ་འགའ་ཞིག་གིས་ཕྱི་བར་བྱའོ། །དེའི་འོག་ཏུ་ཆུ་མང་པོ་དང་སས་བཀྲུ་བར་བྱ་སྟེ། ཇི་ཙམ་གྱིས་དྲི་དང༌། གོས་པ་མེད་པར་འགྱུར་བ་དེ་ཙམ་གྱིས་བླང་བར་བྱའོ། །དེ་ལྟར་བཀྲུས་ནས་ཕྱིས་ལག་པ་གཡོན་པར་ས་ལན་བདུན་བླང་བར་བྱའོ། །དེ་ནས་ལག་པ་གཉི་གས་ཀྱང་བདུན་ཁོ་ན་སྟེ། ས་དེ་དག་ཀྱང་སོ་སོར་རིམ་པར་གཞག་པར་བྱའོ། །དེ་ལྟར་ཆུ་མང་པོས་ལག་པ་གཉིས་བཀྲུས་ཏེ་བརྟུལ་ཞུགས་ཅན་དེས་ལག་ངར་དང་བྱིན་པ་ལེགས་པར་ཕྱི་བར་བྱ་སྟེ། བྱེད་པར་བྱའོ་ཞེས་བྱ་བའི་ཐ་ཚིག་གོ །ལག་ངར་དང་བྱིན་པ་ཕྱིས་ནས་ཕྱིས་ཡང་ལག་པ་གཉིས་ཀ་བཀྲུ་བར་བྱའོ། །དེ་ནས་རིལ་བའོ། །

---

^{[མ་དཔེ་གཟིགས་ན་འདིར་གནོན།]}

དེ་ནས་རྐང་པ་གཉིག་བཀྲུ་བར་བྱ་སྟེ། རིམ་པ་ནི་འདི་ཡིན་ནོ། །སེམས་དག་པར་གྱུར་པ་ཙམ་ལ་གཙང་བ་ཡིན་པར་བཤད་པར་བྱ་སྟེ། དེ་ཡང་དྲི་དང་གོས་པ་བསལ་བ་ཙམ་ཡིན་ནོ། །ཐ་སྙད་པའི་གཅང་བར་སྟོན་པ་དེ་ལྟ་བུ་ཡིན་ནོ། །བཅོམ་ལྡན་ནང་གི་གཙང་སྦྲ་གསུངས་པ་ནི། །ལུས་ལ་སོགས་པའི་སྡིག་སྤང་གང་ཡིན་པའོ། །བརྟུལ་ཞུགས་ཅན་གྱིས་བཤང་དང་གཅི་བ་དང༌། །སོ་ཡི་དི་བསལ་ཕྱོགས་ནི་དབེན་པར་བྱ། །གཞན་ཡང་བཅོམ་ལྡན་འདས་ཀྱིས་དོན་དམ་པར་ནང་གི་གཙང་སྦྲ་དག་གསུངས་ཏེ། དེ་ཡང་ལུས་དང་ངག་དང་ཡིད་རྣམས་ཀྱིས་རྣམ་པ་ཐམས་ཅད་དུ་སྡིག་པ་མི་བྱ་བ་ཡིན་པར་རིག་པར་བྱའོ། །བརྟུལ་ཞུགས་ཅན་གྱིས་བཤང་བ་དང་གཅི་བ་དང༌། སོ་ཤིང་དོར་བ་དག་ནི་ཕྱོགས་དབེན་པ་དག་ཏུ་བྱའོ། །སོ་ཤིང་དག་ནི་ཆུ་ཡིས་བཀྲུས་བྱས་ནས། །དོར་བར་བྱའོ་ཆུ་དག་མེད་ན་ཡང༌། །ལྕེ་ཡི་དྲི་མས་ཤི་བཞིན་འདིར་གྱུར་ན། །མི་རུང་བསྒྲིམས་ཏེ་ས་ལ་ཕྱིས་ནས་སོ། །སོ་ཤིང་ཟོས་ནས་ཆུས་བཀྲུས་ཏེ་དོར་བར་བྱའོ། །འོན་ཏེ་ཆུ་མེད་ན་དེའི་ཚེ་རྣམ་པ་ཐམས་ཅད་དུས་ལ་ཕྱིས་ནས་ཀྱང་དོར་བར་བྱའོ། །ཅིའི་ཕྱིར་ཞེ་ན། བཤད་པ། ལྕེའི་དྲི་མས་ཤི་བཞིན་འདིར་གྱུར་ན་མི་རུང་ངོ༌། །འདིར་གཞུང་ནི་ཕྲན་ཚེགས་ལས། དགེ་སློང་གིས་སོ་ཤིང་ཟོས་ཏེ་ལྕེ་བཞར་ནས་མ་བཀྲུས་ཏེ་བོང་བ་དང༌། དེ་ལས་སྦྲང་བུས་གཞི་བས་པས་དུས་ལས་འདས་སོ། །སྦྲང་བུའི་རོའི་རྒྱུས་སྲོག་ཆགས་ཧ་རོ་ལི་ཀ་འོངས་ཏེ་དེས་སྦྲང་བུ་བཟུང་ངོ༌། །སྲོག་ཆགས་ཅིན་ཏི་ཀས་ཧ་རོ་ལི་ཀ་བཟུང་ནས་དེ་ཡང་དུས་བྱས་སོ། །བྱི་ལས་ཅིན་ཏི་ཀ་བཟུང་བ་དང་དེ་ཡང་ཤི་ནས་སྲོག་ཆགས་རྣམས་ཚང་དུ་དུས་བྱས་པ་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སྐྱེས་བུ་སོ་གདུག་པ་དག་ཡོད་པས། དེའི་ཕྱིར་སོ་ཤིང་ཆུས་བཀྲུ་བར་བྱའོ། །ཆུ་མ་རྙེད་ནས་ས་ཕྱིས་ནས་དོར་བར་བྱའོ་ཞེས་བྱ་བའི་བར་དུ་འབྱུང་བ་ཡིན་ནོ། །ལྷུང་བཟེད་གཉིས་ཏེ་སས་བྱས་ལྕགས་ལས་བྱས། །ལྷུང་བཟེད་གཞན་མིན་ཆུང་ཆེ་སྐྱ་བོ་མིན། །ཁང་གསིལ་སྒྲ་དང་ལྡན་པ་བཅང་བྱ་སྟེ། །དེ་ནི་གོ་བྱེད་ཁྱི་སྐྲོད་ཡིན་པས་སོ། །ལྷུང་བཟེད་ས་ལས་བྱས་པ་དང༌། ལྕགས་ལས་བྱས་པ་དག་གནང་བ་ཡིན་གྱི། ལྷུང་བཟེད་ཟངས་ལ་སོགས་པ་གཞན་ལས་

---

^{[མ་དཔེ་གཟིགས་ན་འདིར་གནོན།]}

བྱས་པ་ཡང་མ་ཡིན་ནོ། །ལྷུང་བཟེད་ཆུང་བ་ཡང་མ་ཡིན་ནོ། །ལྷུང་བཟེད་སྐྱ་བོ་ཡང་མ་ཡིན་ནོ། །ལྷུང་བཟེད་ཆེན་པོ་ལ་སོགས་པ་ཡང་མ་ཡིན་ནོ། །ཁར་གསིལ་སྒྲ་དང་ལྡན་པ་བཅང་བར་བྱ་སྟེ། གང་གི་ཕྱིར་ཁར་གསིལ་དེ་ནི་སྐྱེ་བོ་དག་ལ་གོ་བར་བྱེད་པ་དང༌། བསོད་སྙོམས་ལ་ཞུགས་པ་ལ་སོགས་པའི་ཚེ་ཁྱི་དག་སྐྲོད་པར་བྱེད་པ་དེའི་ཕྱིར་བཅང་བར་བྱའོ། །དགེ་ཚུལ་གྱི་ཚིག་ལེའུར་བྱས་པའི་འགྲེལ་པ་ལས། རབ་ཏུ་བྱུང་བ་ཉམས་པའི་ཕྱོགས་དང་མཐུན་པ་སྟེ། བཅུ་གཉིས་པ་རྫོགས་སོ།། །།བླ་མར་གསོལ་བཏབ་བླ་མ་ཉམས་ཕྱོགས་མཐུན། །རང་གི་བླ་མ་མ་གུས་དེ་ཡིན་པས། །བདག་ཉིད་འདོད་པས་པ་ལྟར་རབ་སྡུག་དང༌། །གུས་པར་བྱས་ནས་བླ་མའི་རིམ་གྲོ་བྱ། །མཁན་པོར་གསོལ་བ་གདབ་པའི་སྔགས་ལས་བཙུན་པ་བདག་གི་མཁན་པོ་མཛད་དུ་གསོལ་ཞེས་གང་ཞིག་གསོལ་བ་གདབ་པ་སྔོན་དུ་བཏང་ནས་ཁས་ལེན་པ་སྟེ། དེ་ཡོངས་སུ་གཏོང་བ་ནི་ཉམས་པ་ཞེས་བྱའོ། །དེ་ཉམས་པའི་ཕྱོགས་དང་མཐུན་པ་ཡང་རང་གི་བླ་མ་ལ་མ་གུས་པ་ལ་སོགས་པ་གང་ཡིན་པ་དེ་ཡིན་ནོ། །དེ་ལྟ་བས་ན་བདག་ཉིད་ཤེས་པས་ནི། །མཁན་པོ་ལ་པ་ལྟར་ཤིན་ཏུ་སྡུག་པས་བསྙེན་བཀུར་བྱས་ནས་རིམ་གྲོ་བྱའོ། །བཤད་དང་གཅི་དང་སོ་ནི་དག་བྱ་དང༌། །མཚམས་ཀྱི་ནང་དུ་རྒྱལ་ལ་ཕྱག་བྱ་དང༌། །ཆུ་དག་བཏུང་བར་བྱ་བ་མ་གཏོགས་པ། །ཐམས་ཅད་དྲིས་ནས་བྱ་བ་ཡིན་པར་གསུངས། བླ་མ་ལ་ཐམས་ཅད་དྲིས་ན་བྱ་བ་ཡིན་པར་བསྟན་ཅེས་བྱ་བར་སྦྱར་ཏེ། བླ་མ་ལ་མ་དྲིས་པར་ཅི་ཡང་མི་བྱའོ་ཞེས་བྱ་བའི་ཐ་ཚིག་གོ །སྤྱིར་བཏང་བ་དམིགས་ཀྱིས་བསལ་པ་ནི་བཤང་བ་དང་གཅི་བ་དང་སོ་བཀྲུ་བ་དང་མཚམས་ཀྱི་ནང་དུ་མཆོད་རྟེན་ལ་ཕྱག་བྱ་བ་དང་ཆུ་བཏུང་བ་དང་ལྔ་མ་གཏོགས་པ་ཡིན་ནོ། །བླ་མ་བས་སྔར་ནང་པར་ལངས་ནས་ནི། གདོང་དག་བཀྲུས་ནས་བདེ་གཤེགས་ཕྱག་འཚལ་ཏེ། །དེ་ནས་བླ་མ་གུས་བཅས་ཕྱག་བྱས་ནས། །བཏུད་དེ་སྐུ་ལ་མཉམ་མམ་ཞེས་ནི་དྲི། །བྱ་བ་ཉིད་ཀྱི་ལུང་མནོས་དེའི་འོག་ཏུ། །དེ་ཡི་གནས་ཁང་ཉེ་འཁོར་ཕྱག་དར་བྱ། །དེ་ནས་རྒྱལ་ལ་དཀྱིལ་འཁོར་བྱས་ནས་ནི། །དད་པས་བཏུད་བཞིན་དུ་ནི་བསྐོར་བྱ་ཞིང༌། །བླ་མ་བས་ཆེས་ནང་པར་སྔར་

---

^{[མ་དཔེ་གཟིགས་ན་འདིར་གནོན།]}

ལངས་ནས་གདོང་བཀྲུ་བར་བྱའོ། །དེ་ནས་བཅོམ་ལྡན་འདས་ལ་ཕྱག་བྱའོ། །དེ་ནས་བླ་མ་ལ་གུས་པ་དང་བཅས་པས་ཕྱག་བྱ་ཞིང་དེའི་འོག་ཏུ་དེའི་ཁམས་མཉམ་མམ་ཞེས་དྲིས་ནས། ཀུན་དུ་སྦྱར་བ་རུང་བ་དག་བགྱི་འོ་ཞེས་བྱ་བ་འདི་ཉིད་ཀྱི་ལུང་མནོད་པར་བྱའོ། །ལུང་ཐོབ་པས་ཐོག་མར་བླ་མ་དེའི་གནས་ཁང་གི་ཉེ་འཁོར་གྱི་ཕྱག་དར་བྱའོ། །དེ་ནས་སངས་རྒྱས་བཅོམ་ལྡན་འདས་ལ་དཀྱིལ་འཁོར་བྱས་ཏེ། དད་པས་བཏུད་བཞིན་དུ་བསྐོར་བར་བྱའོ། །དེའི་འོག་ཏུ། ཉེ་བའི་སྡོམ་བརྩོན་རྒན་ལ་ཕྱག་བྱས་ནས། །དགེ་བས་ལུས་ལ་སྙིང་པོ་བླང་བར་བྱ། །ཉེ་འཁོར་ན་ཉེ་བར་གནས་པའི་བརྟུལ་ཞུགས་ཅན་རྒན་པོ་དག་ལ་ཕྱག་བྱས་ནས། དེའི་འོག་ཏུ་བསམ་གཏན་ནམ་ཀློག་པས་རང་གི་ལུས་ལས་སྙིང་པོ་བླང་བར་བྱའོ། །བླ་མ་དག་ལ་བསྙེན་བཀུར་བྱེད་པས་ནི། །ཟས་སྐོམ་ལ་སོགས་ཞིམ་པོ་ཀུན་ཀྱང་དབུལ། །བླ་མ་ལ་བསྙེན་བཀུར་བྱེད་པར་འདོད་པས་མཁན་པོ་འདི་ལས་གང་བཞེད་པ་དེ་བཞེས་སུ་གསོལ་ཞེས་ཟས་སམ་སྐོམ་ཞིམ་པོ་གང་ཅི་ཡང་རུང་བ་དེ་ཐམས་ཅད་བླ་མ་ལ་དབུལ་བར་བྱའོ། །ཕྱག་བྱའི་ལམ་དུ་ཕྱིན་ནའང་ཕྱག་བྱ་སྟེ། །བརྟུལ་ཞུགས་ཅན་དང་མི་མཐུན་བཀོལ་མི་བྱ། །འཇིག་རྟེན་གསུམ་གྱི་སྟོན་པའི་གསུང་དབང་གིས། །དེས་ཀྱང་ཨ་རོག་གྱ་ཞེས་བརྗོད་པར་བྱ། །ཉེ་འཁོར་དུ་ཕྱིན་པ་ན་ཕྱག་བྱ་བར་བྱའོ་ཞེས་བསྟན་ཏོ། །དེ་ལ་གལ་ཏེ་ཕྱག་བྱ་བའི་ཉེ་འཁོར་དུ་ཕྱིན་པ་དང་མི་མཐུན་པ་ཞིག་ཡིན་ན་དེའི་ཚེ་དེས་ཕྱག་བྱ་བ་ཁོ་ན་ཡིན་གྱི་དེ་བཀོལ་ཏེ། གཞན་ལ་ནི་ཕྱག་མི་བྱའོ་ཞེས་བཀའ་སྩལ་པ་ཡིན་ནོ། །བརྟུལ་ཞུགས་ཅན་མི་མཐུན་པ་དེས་ཀྱང་ཁམས་གསུམ་གྱི་མགོན་པོའི་བཀའ་མདུན་དུ་བྱས་ཏེ། ཨ་རོག་གྱ་ཞེས་བརྗོད་པར་བྱའོ། །གཞན་དུན་གཉི་ག་ལ་ཡང་བཀའ་ལས་འདས་པར་འགྱུར་རོ། །རྒན་ཞུགས་ཤིན་ཏུ་རྒན་པོ་སྦྲིད་བྱུང་དང༌། །ཁྱིམ་པ་སྦྲིད་པ་བྱུང་ནའང་སོས་ཞེས་བརྗོད། །གཞོན་ནུ་སྦྲིད་བྱུང་ཨ་རོག་གྱ་ཞེས་བྱ། །རྒན་ལ་བྱུང་ལ་ཚིག་གིས་ཕྱག་བྱའོ། །རྒན་ཞུགས་ཤིན་ཏུ་རྒན་པོ་དག་གི་སྦྲིད་པ་བྱུང་ན་སོས་ཤིག་ཅེས་བརྗོད་པར་བྱའོ། །ཁྱིམ་པ་ལ་བྱུང་ན་ཡང་སོས་ཞེས་བརྗོད་པར་བྱའོ། །དེ་ཡང་དགེ་སློང་དག་དེ་རྣམས་ནི་གསོན་པར་དགའ་བ་ཡིན་ནོ་ཞེས་

---

^{[མ་དཔེ་གཟིགས་ན་འདིར་གནོན།]}

གསུངས་པས་སོ། །གཞོན་ནུ་དག་གི་སྦྲིད་པ་བྱུང་ན་ཨ་རོག་གྱ་ཞེས་བརྗོད་པར་བྱའོ། །ཤིན་ཏུ་རྒན་པ་ལས་གཞན་པའི་རྒན་རབས་སྦྲིད་པ་བྱུང་ན་ཚིག་གིས་ཕྱག་བྱ་བར་བྱའོ། །འདི་ལ་བཀྲུ་སྟིས་ཕྱག་བྱས་རྣམ་གཉིས་ཏེ། །ཡན་ལག་ལྔ་དང་སྦྱིད་བཟུང་རང་བཞིན་ནོ། །མུན་ཁུང་བླ་མ་སྤྱི་བོས་སར་གཏུགས་པའི། །ཕྱག་དག་མི་བྱ་ཚིག་གིས་ཕྱག་བྱའོ། །བསྟན་པ་འདི་ལ་བཀུར་སྟིས་ཕྱག་བྱ་བ་ནི་གཉིས་སུ་གསུངས་ཏེ། །གཅིག་ནི་ཡན་ལག་ལྔས་ཕྱག་བྱ་བ་ཡིན་ནོ། །གཉིས་པ་ནི་སྒྱིད་པ་ནས་འཁྱུད་པའི་རང་བཞིན་ནོ། །མུན་ཁུང་དུ་བླ་མ་ལ་སྤྱི་བོ་ས་ལ་གཏུགས་ཏེ་ཕྱག་མི་བྱའོ། །བླ་མ་སྨོས་པ་ནི་མཚོན་པ་ཙམ་དུ་ཟད་དེ། །གཞན་ལ་ཡང་ཕྱག་མི་བྱ་བ་ཁོ་ན་ཡིན་ནོ། །ཚིག་གིས་ནི་ཕྱག་བྱ་སྟེ་འདིར་གཞུང་ནི་ཚངས་པའི་གདུང་བ་བྱའོ་ཞེས་འབྱུང་བ་ཡིན་ནོ། །སྡོམ་བརྩོན་བཅའ་བ་འགའ་ཞིག་འཆའ་བྱེད་ན། །ཕྱག་དག་མི་བྱ་དེས་ཀྱང་ཕྱག་མི་བྱ། །མི་གཙང་ལམ་གྱི་ཕྱོགས་མ་བཀྲུས་པ་འང་མིན། གོས་གཅིག་མ་ཡིན་ཟས་བཅས་ཁ་མ་ཡིན། །མདུན་དུ་ཟས་དྲངས་སྤོ་བ་སྤྱོད་པ་དང༌། །ཁྱིམ་གནས་ཚུལ་ཁྲིམས་འཆལ་དང་གཅེར་བུ་དང༌། །གཞན་ཡང་ཕྱག་བྱ་མིན་ཡང་རྟག་པར་ནི། །ཕྱག་བྱ་གཉིས་ཏེ་བདེ་གཤེགས་རྒན་པོ་ཡིན། །གཞན་དག་ཇི་དག་མུར་པ་ལ་ཕྱག་དག་མི་བྱའོ། །གཞན་གྱིས་ཀྱང་དེ་དག་ལ་ཕྱག་དག་མི་བྱའོ། །མི་གཙང་བའི་ལམ་ལ་བཀྲུས་པ་ལ་ཡང་མི་བྱའོ། །གོས་གཅིག་ལ་ཡང་མི་བྱའོ། །ཁ་ཟས་དང་བཅས་པ་ལ་ཡང་མི་བྱའོ། །དེ་བཞིན་དུ་མདུན་དུ་ཟས་དྲུངས་པ་དང༌། །སྤོ་བ་སྤྱོད་པ་དང་ཁྱིམ་པ་དང་ཚུལ་ཁྲིམས་འཆལ་བ་དང་གཅེར་བུ་དང༌། གཞན་ཡང་དེ་ལྟ་བུའི་ཕྱག་བྱ་བ་མ་ཡིན་པ་དག་མང་པས། །མདོར་ན་ཕྱག་བྱ་བ་ནི་གཉིས་ཁོ་ན་སྟེ། བཅོམ་ལྡན་འདས་བདེ་བར་གཤེགས་པ་དང༌། སྔོམ་པ་རྒན་པའི་སྡོམ་བརྩོན་ཅན་ནོ། །གང་ཕྱི་དེ་དག་སྔོམ་པས་རྒན་མིན་པས། །གསང་སྔགས་ལ་ཡང་ལྷ་གཞན་ཕྱག་མི་བྱ། །དཀོན་མཆོག་གསུམ་ལ་བཏུང་པས་ཕྱག་བྱས་ནས། །གཞན་གྱིས་བྱས་པའི་གསང་སྔགས་བརྗོད་པར་བྱ། །གསང་སྔགས་དག་བ་རྗོད་པ་ན་ཡང་ལྷ་གཞན་དག་ལ་

---

^{[མ་དཔེ་གཟིགས་ན་འདིར་གནོན།]}

ཕྱག་མི་བྱ་ཞིང༌། གང་གི་ཕྱིར་དེ་དག་ནི་སྡོམ་པས་རྒན་པ་མ་ཡིན་པས་སོ། །འོ་ན་དེས་བྱས་པའི་གསང་སྔགས་དག་ཇི་ལྟར་བརྗོད་པར་བྱ་ཞེ་ན། །བཤད་པ། །དཔེར་ན། ན་མོར་དད་ཏྲ་ཡཱ་ཡ་ཀུ་རུ་ཀུལླེ་ཞེས་བྱ་བ་ལྟ་བུར་དཀོན་མཆོག་གསུམ་ལ་འདུད་པས་མཆོད་ནས། ལྷ་གཞན་དག་གིས་བྱས་པའི་གསང་སྔགས་བརྗོད་པར་བྱའོ། །གང་ཞིག་སངས་རྒྱས་སྐྱབས་འོས་དག་ལ་སྐྱབས། །སོང་ནས་གཞན་ལ་གུས་པས་ཕྱག་བྱེད་པ། དེ་ནི་ཤཱཀྱའི་རིགས་ཀྱི་རྟགས་དག་ལ། །ཅོ་འདྲི་ཡུལ་འཁོར་ཟས་ནི་འབར་བར་ཟ། །གང་ཞིག་སངས་རྒྱས་ལ་སྐྱབས་སུ་སོང་ནས། ལྷ་གཞན་དག་ལ་སྙིང་ནས་ཕྱག་འཚལ་བའི་བརྟུལ་ཞུགས་ཅན་དེ་ལྟ་བུ་དེ་ནི། ཤཱཀྱའི་རིགས་འཕགས་པ་རྣམས་ཀྱི་ཆ་བྱད་ལ་ཅོ་འདྲི་ཞིང༌། ཡུལ་འཁོར་གྱི་ཟས་མདག་མ་འབར་བ་དང་འདྲ་བ་ཟ་བ་ཡིན་ཏེ། སྤྱོད་པ་ནི་གཞན་དུ་ཡིན་ལ། བསམ་པ་ནི་གཞན་དུ་སེམས་པའི་ཕྱིར་རོ། །དགེ་ཚུལ་གྱི་ཚིག་ལེའུར་བྱས་པའི་འགྲེལ་པ་ལས། བླ་མར་གསོལ་བ་བཏབ་པ་ལས་ཉམས་པའི་ཕྱོགས་དང་མཐུན་པ་སྟེ་བཅུ་གསུམ་པ་རྫོགས་སོ།། །།དེ་ནས་སྡོམ་པ་ཉམས་ཕྱོགས་མཐུན་འབྱུང་སྟེ། །དཀོན་མཆོག་གསུམ་ལ་མ་གུས་དེ་བཞིན་དུ། །ཉི་མ་ལྔ་ལས་ལྷག་པར་མི་གནས་པའམ། །དགག་དབྱེ་དང་ནི་ག་སོ་སྤྱོར་ཉམས་པ་སྟེ། འདི་མན་ཆད་ནི། སྡོམ་པ་མཐའ་དག་ཉམས་པའི་ཕྱོགས་དང་མཐུན་པ་འབྱུང་བ་སྟེ། འདི་ལྟ་སྟེ། །དཀོན་མཆོག་གསུམ་ལ་མ་གུས་པ་ཉིད་དང༌། དེ་བཞིན་དུ་ཉི་མ་ལྔ་ལས་ལྷག་པར་མི་གནས་པ་ཉིད་དེ། །འདིར་ཡང་གལ་ཏེ་གནས་ཚོལ་བ་ལ་ཞུགས་ན། །དེའི་ཚེ་མི་གནས་པ་ལ་ཉི་མ་ལྔའི་རྙེད་པ་དག་དབང་ངོ༌། །འོན་ཏེ་མི་ཚོལ་ན་དེའི་ཚེ་ཉི་མ་ཐོག་མ་ཉིད་ལས་མི་དབང་ངོ༌། །འམ་ཞེས་བྱ་བའི་སྒྲའི་དོན་ནི་ཐ་དད་པའི་དོན་ལ་བྱའོ། །འདིར་གཞུང་ནི་གླེང་གཞི་ལས། ཡུན་ཇི་སྲིད་ཅིག་ཏུ་མི་གནས་པ་ལ་རྙེད་པ་བརྩམ་པར་བགྱི། ཉེ་བ་འཁོར་ཞག་ལྔ་ཁོ་ན་སྟེ། དེ་ཡང་གནས་ཚོལ་བའི་སྦྱོར་བ་མ་བཏང་ནའོ་ཞེས་འབྱུང་བ་ཡིན་ནོ། །གཞན་ཡང་དགག་དབྱེའི་ལས་ཉམས་པ་ཡང༌། སྡོམ་པ་ཉམས་པའི་ཕྱོགས་དང་མཐུན་པ་ཡིན་ནོ། །དེ་བཞིན་དུ་གསོ་སྦྱོང་གི་ལས་

---

^{[མ་དཔེ་གཟིགས་ན་འདིར་གནོན།]}

ཉམས་པ་ཡང་ཡིན་ནོ། །ཇི་སྟེ་དེ་ནི་བཅོམ་ལྡན་འདས་ཀྱིས་མ་གསུངས་པའི་ཕྱིར་ཉེས་པ་མེད་དོ་ཞེ་ན། བཤད་པ། གལ་ཏེ་མངོན་སུམ་གསུངས་པ་མེད་གྱུར་ཀྱང༌། །དགག་དབྱེ་གསུངས་ཕྱིར་འདིར་ནི་གསོ་སྦྱོང་ཡོད། །དགག་དབྱེ་དག་པར་གོ་བར་བྱ་ཕྱིར་ཏེ། །དེ་ལས་གསོ་སྦྱོང་དོན་ནི་ཐ་དད་མིན། །འཕགས་པ་ཟླ་བའི་ནོར་བུ་ལ་སོགས་པའི་ཞལ་ནས་དགེ་ཚུལ་དག་གིས་གསོ་སྦྱོང་བྱའོ་ཞེས་དངོས་སུམ་གསུངས་ཀྱང་འོན་ཀྱང་དགག་དབྱེ་གསུངས་པ་ཁོ་ནའི་ཕྱིར་གསོ་སྤྱོད་གསུངས་པར་རྗེས་སུ་དཔག་པར་བྱ་སྟེ། དགག་དབྱེ་ནི་དག་པར་གོ་བར་བྱེད་པ་ཡིན་ལ། གསོ་སྦྱོང་གིས་ཀྱང་དེ་ཉིད་ཡིན་པས་སོ། །གཞན་ཡང་ཚུལ་ཁྲིམས་ཕུན་སུམ་མ་ཚོགས་པ་ཉིད་དུ་སྒྲུབ་པའི་ཕྱིར་དགག་དབྱེ་སྒྲུབ་པ་དང་གསོ་སྦྱོང་སྒྲུབ་པ་ཡིན་པས་གསོ་སྦྱོང་དང་དགག་དབྱེ་གཉིས་ཀྱི་དོན་ནི་གཅིག་པ་ཉིད་ཡིན་ནོ། །དེ་ལྟར་བས་ན་དགག་དབྱེ་ལས་གསོ་སྤྱོང་ཐ་དད་པ་མ་ཡིན་ཏེ། དགག་དབྱེ་གནང་བ་ཁོ་ན་གསོ་སྦྱོང་ཡང་གནང་བ་ཁོང་དུ་ཆུད་པར་བྱའོ་ཞེས་འཆད་དོ། །ཡང་སྨྲས་པ་དགག་དབྱེ་བྱས་པས་གོས་སྦྱོང་བྱས་པ་ཡིན་ནོ་ཞེས་བྱ་བ་དང༌། སྡིག་པའི་སྨན་གྱི་གསོ་སྦྱོང་ནི། །དགག་དབྱེ་བྱས་ནས་ཡང་མི་བྱ། །གསོ་སྦྱོང་གསུངས་པ་དག་ཕྱིར་ཏེ། །དགག་དབྱེ་བྱས་དེ་ཡང་དག །ཕན་ཚུན་གདམས་པའི་དོན་དུ་ནི། །དགག་དབྱེ་རྗེས་སུ་གནང་བ་ཡིན། །སྡིག་པ་ཡོངས་སུ་དག་བྱའི་ཕྱིར། །གསོ་སྦྱོང་གཉེན་པའི་ཕྱོགས་ཡིན་ནོ། །འདིར་དགྲ་བཅོམ་པ་དེ་དག་གིས་སྔགས་ཀྱི་ཆོ་ག་མཛད་པ་ཡང་འདི་ཡིན་ཏེ། བཙུན་པ་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅོམ་ལྔ་པ་ལགས་ལ། བདག་དགེ་ཚུལ་མིང་འདི་ཞེས་བགྱི་བའི་གསོ་སྦྱོང་ཡང་བཅོ་ལྔ་པ་ལགས་ཏེ། བདག་དགེ་ཚུལ་མིང་འདི་ཞེས་བགྱི་བ་བདག་གི་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་བདག་ཉིད་མཆིའོ་ཞེས་འབྱུང་བ་ཡིན་ནོ། །འདི་ཉིད། ཀྱེ་ཚིག་བདག་ལ་བཙུན་པ་དགོངས་སུ་གསོལ། །དེང་འདིར་འཕགས་པའི་དགེ་འདུན་གསོ་སྦྱོང་ལགས། །དེ་ནི་དགེ་ཚུལ་བདག་གི་འང་ལགས་ཏེ་བདག །ཡང་དག་པར་མཆི་ཞེས་བྱ་སྔགས་ཡིན་ནོ། །ཞེས་བྱ་བའི་ཚིགས་སུ་བཅད་པས་བསྡུས་སོ། །གསོ་སྦྱོང་ཡང་

---

^{[མ་དཔེ་གཟིགས་ན་འདིར་གནོན།]}

དགེ་སློང་ཁོ་ན་ལ་བྱ་བར་འཆད་དོ། །མཆོད་རྟེན་ཁྱམས་རྣམས་ཅི་ནུས་བྱི་དོར་བྱ། །བདུག་པ་མེ་ཏོག་བཀྲམ་པ་དགྲ་མ་བྱས་ཏེ། །རང་གི་རྒྱུད་བརྟགས་ཐོག་མར་སྡོམ་བརྩོན་གྱི། །མདུན་དུ་ལྟུང་བདག་ནི་བཤགས་པར་བྱ། །གསོ་སྦྱོང་བྱ་བའི་གོ་རིམས་ནི་འདི་ཡིན་ཏེ། རེ་ཞིག་ཐོག་མར་མཆོད་རྟེན་གྱི་ཁྱམས་དག་ནི་ཅི་ནུས་ཀྱིས་བྱི་དོར་བྱ་ཞིང༌། བདུག་པས་བདུགས་པ་དང༌། མེ་ཐོག་བཀྲམ་པའི་དགྲམ་པ་དག་བྱའོ། །དེའི་འོག་ཏུ་ཅི་བདག་གིས་ཐལ་ལམ། འོན་ཏེ་མ་ཡིན་ཞེས་རང་གི་རྒྱུད་ལ་སོ་སོར་བརྟག་པར་བྱའོ། །དེ་ནས་སྡོམ་བརྩོན་ཡོངས་སུ་དག་པ་ལྟ་བ་མཐུན་པ་ལ་ལྟུང་བ་བཤམས་བར་བྱའོ། །དེ་ནས་གསོ་སྦྱོང་བྱའོ། །འདིར་གཞུང་ནི་ཞུས་པ་ལས། བཙུན་པ་ཇི་ཙམ་གྱིས་ན་དགེ་སློང་ཡོངས་སུ་དག་པ་དང་ལྟ་བ་མཐུན་པ་ལགས། ཉེ་བ་འཁོར་འདི་ལྟར་གཞི་དེ་ལ་ལྟ་བ་མཐུན་པ་ཡིན་ནོ་ཞེས་འབྱུང་བ་ཡིན་ནོ། །ཕམ་པའི་གཞི་དེ་ལ་ཕམ་པའི་གཞི་ཡིན་ནོ་ཞེས་དེ་ལྟར་བསམ་པ་མཐུན་པ་གང་ལ་ཡོད་པ་དེ་ལྟ་བ་མཐུན་པ་ཡིན་ནོ། །གང་དག་མེར་མེར་པོ་བླུགས་པར་བྱས་པ་ལ་སོགས་པ་ཕམ་པའི་གཞི་ལ་ཉེས་བྱས་ཀྱི་གཞིར་ལྟ་བ་དེ་དག་ནི། ལྟ་བ་ཐ་དད་པ་ཡིན་ནོ་ཞེས་བྱ་བའི་ཐ་ཚིག་གོ །གཞན་དག་ན་རེ་ནི་གཞི་དེ་ལས་ཞེས་བྱ་བ་བསླབ་པའི་བར་དུ་གཅོད་པ་ལ་སོགས་པ་གཞི་ལས་ལྟ་བ་མཐུན་པ་གང་དག་ལ་ཡོད་པ་དེ་ནི་ལྟ་བ་མཐུན་པ་ཡིན་ནོ། །དེའི་ཕྱིར་འཆི་ལྟས་ལ་སོགས་པ་དག་ནི་ལྟ་བ་མཐུན་པ་མ་ཡིན་པར་རིག་པར་བྱ་སྟེ། དེ་དག་ནི་བཅོམ་ལྡན་འདས་ཀྱི་འདོད་པ་གང་དག་བར་དུ་གཅོད་པར་གསུངས་པ་དེ་དག་བསྟེན་ཀྱང༌། བར་དུ་གཅོད་པར་མི་འགྱུར་རོ་ཞེས་བྱ་བ་དེ་ཡིན་ནོ་ཞེས་འཆད་དོ། །ཡོངས་སུ་དག་པ་ནི་མཐོང་བ་དང་ཐོས་པ་དང་དགོས་པས་སོ་ཞེས་འོག་ནས་བཤད་པར་བྱའོ། །གནས་ཞེས་གང་དག་བསྟན་པ་དེའི་རང་བཞིན་བཤད་པ། ཚུལ་ཁྲིམས་ལྡན་དང་འདུལ་བའི་ཆོག་ཤེས། །ནང་པ་སྙིང་བརྩེ་འཁོར་ནི་དག་པ་དང༌། །ཆོས་དང་ཟང་ཟིང་ཕམ་འདོགས་བརྩོན་པ་དང༌། །དུས་སུ་འདོམས་པ་དེ་ལྟར་བླ་མར་བསྔགས། །ཚུལ་ཁྲིམས་འཆལ་པ་ནི་རོ་ལངས་དང་འདྲ་བར་གནོད་པར་འགྱུར་པས། གལ་ཏེ་གནས་ཀྱི་སློབ་དཔོན་དེ་ཚུལ་ཁྲིམས་དང་ལྡན་

---

^{[མ་དཔེ་གཟིགས་ན་འདིར་གནོན།]}

པ་ཡིན་པ་དང༌། ཆོ་ག་མི་ཤེས་པས་ཉོན་མོངས་ཀྱི་ཅི་ཞིག་ལུང་བསྟན་དུ་ཡོད་པས་འདུལ་བའི་ཆོ་ག་ཤེས་པ་དང༌། ནད་པ་སྙིང་བརྩེ་བ་ཞེས་བྱ་བ་ནི་ན་བ་ལ་ཕན་འདོགས་པ་ཞེས་བྱ་བའི་ཐ་ཚིག་གོ །གཞན་དུ་ན་སེང་གེ་སྙིང་རྗེ་མེད་པས་ལྟ་ཅི་ཞིག་བྱེད་པར་འགྱུར་བས་སོ། །འཁོར་ནི་དག་པ་ཞེས་བྱ་བ་ནི་འཁོར་ལྷན་ཅིག་གནས་པ་ལ་སོགས་པ་གལ་ཏེ་རིགས་པར་བྱེད་པ་ཡིན་ནོ། །བདེ་བར་མི་བྱེད་པས་ནི་ཅི་ཞིག་བྱེད་པར་འགྱུར་ཏེ། ཙན་དན་གྱི་ཤིང་སྦྲུལ་གདུག་པས་དཀྲིས་པ་དང་འདྲ་བར་འཇིགས་པ་མང་དུ་འགྱུར་བས་སོ། །ཆོས་དང་ཟང་ཟིང་གིས་གལ་ཏེ་ཕན་འདོགས་པ་ལ་བརྩོན་པ་ཡིན་ཏེ། གཞན་དུ་ན་ཤིང་སྐོམ་པོ་འབྲས་བུ་མེད་པ་དང་འདྲ་བས་ཅི་ཞིག་བྱེད་པར་འགྱུར་པས་སོ། །དུས་དང་འཚམ་པར་རྗེས་སུ་སྟོན་པ་ཡིན་གྱི། གཞན་དུ་ན་སྐྱོ་བར་བྱེད་པས་ཅི་ཞིག་བྱེད་པར་འགྱུར་པས་སོ། །ཚུལ་དེ་ལྟ་བུའི་ཆོ་ག་བསྔགས་པའི་བླ་མ་ལ་བརྟེན་ན། མཚོ་ཆེན་པོའི་ཆུའི་པད་མ་བཞིན་དུ་ཆོས་དགེ་བ་རྣམས་འཕེལ་བར་འགྱུར་རོ། །མཚན་ཉིད་དེ་དག་མ་ཚང་བ་ལ་གནས་པ་ནི་ཞིང་ཚ་སྒོ་ཅན་ལ་ས་བོན་བཏབ་པ་དང་འདྲ་བར་གནོད་པ་ལ་བརྟེན་པར་འགྱུར་རོ། །གནས་པའི་རང་བཞིན་བཤད་པ། །སློབ་དཔོན་ལ་གུས་ཚུལ་ཁྲིམས་ཡོངས་དག་དང༌། །བསམ་གཏན་དང་ནི་འདོན་ལ་རྟག་བརྩོན་དང༌། །གྲིམས་ཤིང་དུས་ལ་བཟོད་དང་ལྡན་པ་ནི། །སྡོམ་བརྩོན་གནས་པའི་ཆོས་ལྡན་ཤེས་པར་བྱ། །གནས་པ་ཡང་བླ་མ་ལ་གུས་པ་དང༌། ཚུལ་ཁྲིམས་ཕུན་སུམ་ཚོགས་པ་དང༌། བསམ་གཏན་ནམ་འདོན་པ་ལ་འགྲུས་པ་དང༌། གྲིམས་པ་ནི་ལེ་ལོ་མེད་པ་སྟེ། སློབ་དཔོན་གྱི་བྱ་བ་ཐམས་ཅད་ལ་ཐོག་འདྲེན་པ་དང༌། དུལ་བ་སྟེ་རྒོད་པ་མེད་པ་དང༌། བཟོད་པ་ཕུན་སུམ་ཚོགས་པ་ནི་གནས་པའི་ཆོས་དང་ལྡན་པར་རིག་པར་བྱའོ། །དེ་ལྟ་བུའི་གནས་པ་དང་ཕྲད་ན་ཀླུའི་གནས་མཚོ་ཆེན་པོ་དང་འདྲ་བར་གནས་པ་སྤ་འགོང་བར་མི་འགྱུར་རོ། །ཡོན་ཏན་དང་བྲལ་བའི་གནས་ནི་ཚ་སྣོད་བཞིན་དུ་རྨས་པ་ཁོ་ནར་འགྱུར་རོ། །ཆོ་ག་ཡང་མ་མོ་ལས་གནས་སུ་གཟུང་བར་འདོད་པས་ཆོས་གོས་ཕྲག་པ་གཅིག་ཏུ་གཟར་ཏེ། ལག་པ་གཉིས་ཀྱིས་རྐང་པ་གཉིས་བཟུང་བཞིན་དུ་འདི་སྐད་ཅེས་

---

^{[མ་དཔེ་གཟིགས་ན་འདིར་གནོན།]}

བརྗོད་པར་བྱའོ། །བཙུན་པ་བདག་མིང་འདི་ཞེས་བགྱི་བའི་གནས་སུ་གསོལ་ན། བཙུན་པ་བདག་གི་གནས་མཛད་དུ་གསོལ། བཙུན་པ་ལ་གནས་ནས་མཆིས་པར་བགྱིའོ་ཞེས་ལན་གསུམ་དུ་བརྗོད་པར་བྱའོ། །དེས་ལེགས་སོ་ཞེས་བརྗོད་པར་བྱའོ། །གནས་ཀྱིས་ཐབས་ཡིན་ནོ་ཞེས་བརྗོད་པར་བྱའོ་ཞེས་གསུངས་པ་ཡིན་ནོ། །གྲོང་ལ་སོགས་པའི་མིང་སྨོས་རིམ་པ་ཡིས། །དབྱར་དུས་དབྱར་གནས་དམ་ནི་བཅའ་བར་བྱ། །གལ་ཏེ་དེ་ནི་གཞན་དུ་འགྲོ་འགྱུར་ན། ཞག་བདུན་བྱིན་གྱིས་བརླབས་ནས་འགྲོ་བར་བྱའོ། །སྦྱིན་བདག་དང་སྤྱོད་ཡུལ་དང་གྲོང་དང་ཞལ་ཏ་བ་དང་ནད་གཡོག་རྣམས་ཀྱི་མིང་སྨོས་པའི་རིམ་པས་དབྱར་དག་ཏུ་དབྱར་གནས་པར་དམ་བཅའ་བར་བྱའོ། །འདིར་གཞུང་ནི་གླེང་གཞི་ལས། བཙུན་པ་བཅོམ་ལྡན་འདས་ཀྱིས་དབྱར་གནས་པར་དམ་བཅའ་བར་བྱའོ་ཞེས་གང་གསུངས་པ་སུས་གནས་པར་དམ་བཅའ་བར་བགྱི་ལགས། ཉེ་བ་འཁོར་རིགས་ལྔ་དག་གིས་ཏེ། དགེ་སློང་རྣམས་དང༌། དགེ་སློང་མ་རྣམས་དང༌། དགེ་སློང་མ་རྣམས་དང༌། དགེ་ཚུལ་རྣམས་དང༌། དགེ་ཚུལ་མ་རྣམས་ཀྱིས་སོ་ཞེས་བྱ་བ་ལ་སོགས་པ་འབྱུང་བ་ཡིན་ནོ། །གལ་ཏེ་དེ་ནི་གཞན་དུ་འགྲོ་བར་གྱུར་ན་དེའི་ཚེ་ཞག་བདུན་བྱིན་གྱིས་བརླབས་ནས་འགྲོ་བར་བྱའོ། །ཚུལ་ཁྲིམས་ཉམས་ལ་བཀུར་སྟི་མི་བྱ་ཞིང༌། །དེ་དང་འགྲོགས་དང་ལོངས་སྤྱོད་མི་བྱའོ། །ཕ་མ་བླ་མ་དག་དང་ནད་པ་དག །ཚུལ་ཁྲིམས་ཉམས་སུ་ཟིན་ཀྱང་བསྙེན་བཀུར་བྱ། །ཚུལ་ཁྲིམས་འཆལ་པ་ལ་བསྙེན་བཀུར་མི་བྱ་སྟེ། འདིར་གཞུང་ནི་གླེང་གཞི་ལས། དགེ་སློང་དག་དེ་ལྟ་བས་ན་ཝ་དང་འདྲ་བ་ལ་སེང་གེ་དང་འདྲ་བས་བསྙེན་བཀུར་མི་བྱའོ། །བྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །ཚུལ་ཁྲིམས་འཆལ་བ་དང་ལྷན་ཅིག་འགྲོགས་པར་མི་བྱ། ཆོས་ཀྱི་ལོངས་སྤྱོད་མི་བྱ། །ཟང་ཟིང་གི་ལོངས་སྤྱོད་མི་བྱའོ། །འདིར་གཞུང་ནི་ཞུས་པ་བྲམ་ཟེའི་བུ་མོ་ལྟ་བུ་ལས། དགེ་སློང་ཚུལ་ཁྲིམས་དང་ལྡན་པས་ཤེས་བཞིན་དུ་ཚུལ་ཁྲིམས་འཆལ་པ་ལ་སོ་ཤིང་སྟོབས་པར་བྱེད་ན། དེའི་ལས་ཀྱི་རྣམ་པར་སྨིན་པས་དགེ་སློང་ཚུལ་ཁྲིམས་དང་ལྡན་པ་ལོ་སྟོང་ཕྲག་དུ་མར་སེམས་

---

^{[མ་དཔེ་གཟིགས་ན་འདིར་གནོན།]}

ཅན་དམྱལ་བར་འགྱུར་བའི་ལས་བསགས་པ་ཡིན་ནོ། །དེ་བཞིན་དུ་འདག་རྫས་སྟོབས་པ་དང༌། ཁ་ཏོན་བྱེད་པ་དང༌། གནས་བྱེད་པ་དང༌། ཚུལ་ཁྲིམས་འཆལ་པ་ལ་གནས་སུ་འཛིན་པ་དང༌། ཚུལ་ཁྲིམས་འཆལ་བ་དང་ལྷན་ཅིག་ཉལ་བར་བྱེད་ན། ཇི་སྲིད་དུ་སྐྱ་རེངས་མ་ཤར་བ་དེའི་བར་དུ་ལོ་སྟོང་ཕྲག་དགུ་བཅུར་སེམས་ཅན་དམྱལ་བར་འགྱུར་པའི་ལས་བསྒྲུབས་པ་ཡིན་ནོ། །སྐྱ་རེངས་ཤར་ན་ལོ་བྱེ་བ་ཕྲག་བཅུ་བཞི་དང༌། ལོ་སྟོང་ཕྲག་བཞི་བཅུར་སེམས་ཅན་དམྱལ་བར་འགྱུར་པའི་ལས་བསྒྲུབས་པ་ཡིན་ནོ་ཞེས་འབྱུང་བ་ཡིན་ནོ། །དམིགས་ཀྱིས་བསལ་བ་ནི། ཕ་མ་ཞེས་བྱ་བ། ཕ་དང་མ་དང༌། བླ་མ་དག་ཅེས་བྱ་བ་མཁན་པོ་དང༌། སློབ་དཔོན་དང༌། ནད་པ་ནི་ཤིན་ཏུ་ཚུལ་ཁྲིམས་འཆལ་བ་ཡིན་དུ་ཟིན་གྱིས་ཀྱང་བསྙེན་བཀུར་བྱའོ་ཞེས་བཤད་པ་ཡིན་ནོ། །འདིར་གཞུང་ནི་གླེང་གཞི་ལས། དགེ་སློང་དག་འོ་ན་དེའི་ཕྱིར་ལྔ་པོ་འདི་དག་ནི་ཤིན་ཏུ་ཚུལ་ཁྲིམས་འཆལ་བ་ཡིན་དུ་ཟིན་གྱིས་ཀྱང་བསྙེན་བཀུར་བྱའོ། །ལྔ་པོ་གང་དག་ཅེ་ན། ཕ་དང༌། མ་དང༌། མཁན་པོ་དང༌། སློབ་དཔོན་དང༌། ནད་པའི་ཞེས་འབྱུང་བ་ཡིན་ནོ། །ཚུལ་ཁྲིམས་འཆལ་བ་དེ་ཡང་ཇི་ལྟར་ཤེས་པར་བྱ་ཞེ་ན། མཐོང་བ་དང་ཐོས་པ་དང༌། དོགས་པ་རྣམས་ཀྱིས་སོ་ཞེས་བཤད་དོ། །གསུམ་པོ་འདི་དག་ནི་འདུལ་བ་ལས་འབྱུང་བའི་ཐ་སྙད་ཀྱི་རྒྱུ་ཡིན་ནོ། །དེ་ལྟར་ཡང་གཞུང་ནི་གསོ་སྦྱོང་གཞག་པའི་གཞི་ལས། ལྷའི་མིག་དང་ལྷའི་རྣ་བ་དག་གིས་ཐ་སྙད་དུ་བྱ་བ་བཀག་པ་ཡིན་ཏེ། དགེ་སློང་དག་ལྷའི་མིག་ནི་ཐ་སྙད་དུ་བྱ་བ་མ་ཡིན་པས་ལྷའི་མིག་གིས་བལྟས་ཆས་དགེ་སློང་ལ་གླེང་ཞིང་བསྐུལ་བར་མི་བྱའོ། །ལྷའི་མིག་གིས་བལྟས་ནས་དགེ་སློང་ལ་གླེང་ཞིང་སྐུལ་བར་བྱེད་ན་འགལ་ཚབས་ཅན་དུ་འགྱུར་རོ། །ལྷའི་མིག་གིས་ཇི་ལྟ་བ་བཞིན་དུ་ལྷའི་རྣ་བས་ཀྱང་དེ་བཞིན་ནོ་ཞེས་འབྱུང་བ་ཡིན་ནོ། །གལ་ཏེ་དཔྱད་པ་དོན་དམ་པར་དགོངས་པ་ཡིན་ན་ནི་ལྷའི་མིག་དང་ལྷའི་རྣ་བ་གཉིས་འདིར་བཀག་པར་མི་འགྱུར་ཏེ། གཞན་གྱིས་གཏན་ལ་དབབ་པར་ཡང་མི་ནུས་པའི་ཕྱིར་རོ། །གང་གི་ཕྱིར་རང་བཞིན་གྱིས་ཁ་ན་མ་ཐོ་བ་དང་བཅས་པ་དག་ལ་ཡང་ཐ་མལ་བའི་མིག་གིས་འཇུག་པར་བྱ་བར་གསུངས་པས་དེ་ནི་དེ་ལྟར་གདོན་

---

^{[མ་དཔེ་གཟིགས་ན་འདིར་གནོན།]}

མི་ཟ་བ་ཡིན་ཏེ། འདི་ལྟར་ཕྲན་ཚོགས་ལས། འཕགས་པ་མ་འགགས་པའི་དབང་དུ་མཛད་ནས་ལྷའི་མིག་གིས་ཆུ་ལ་བརྟག་པར་མི་བྱའོ། །འོན་ཀྱང་ཐ་མལ་པའི་མིག་གིས་སོ་ཞེས་འབྱུང་བ་ཡིན་ནོ། །ཁ་ཅིག་ན་རེ་འོ་ན་གལ་ཏེ་འདུལ་བ་ཐམས་ཅད་ལས་འབྱུང་བའི་དཔྱད་པ་ཐ་སྙད་པ་ཡིན་ན་ནི་ཞུས་པའི་གཞུང་ལས་འབྱུང་བ་དང་འགལ་བར་འགྱུར་ཏེ། གཞུང་ནི། ཉེ་བ་འཁོར་མཁན་པོ་ཚུལ་ཁྲིམས་འཆལ་བས་བསྙེན་པར་རྫོགས་པར་བྱེད་ན་གལ་ཏེ་གང་ཟག་གིས་མི་ཤེས་ན་བསྙེན་པར་རྫོགས་པ་ཡིན་ནོ་ཞེས་རྒྱ་ཆེར་གསུངས་ནས། འདི་སྐད་དུ། ཉེ་བ་འཁོར་ལས་བྱེད་པ་ཚུལ་ཁྲིམས་འཆལ་བས་བསྙེན་པར་རྫོགས་པར་བྱེད་ན། བསྙེན་པར་མ་རྫོགས་པ་ཡིན་ནོ་ཞེས་གསུངས་པ་ཡིན་པས། གལ་ཏེ་འདིར་ལས་བྱེད་པའི་དཔྱད་པ་ཐ་སྙད་པ་ཡིན་པར་བཞེད་ན་ནི་དེའི་ཚེ་གལ་ཏེ་གང་ཟག་གིས་མི་ཤེས་ནའོ་ཞེས་མཛད་པར་འགྱུར་བ་ཞིག་ན་མཛད་པ་ཡང་མེད་པས། དེ་ལྟ་བས་ན་དངོས་ཉིད་དུ་བཞེད་པ་ཡིན་ནོ་ཞེ་ན། དེ་ནི་མ་ཡིན་ཏེ། མཁན་པོ་དང་འབྲེལ་བའི་ཚིག་ལས་ནི་གལ་ཏེ་གང་ཟག་གིས་མི་ཤེས་ན་ཞེས་བྱ་བའི་ཁྱད་པར་འདི་ཙམ་ཞིག་ལས་བྱེད་པའི་ཚིག་ལ་རྗེས་སུ་སྦྱར་བར་བྱའོ། །དབང་དུ་བྱ་བའི་རྗེས་སུ་འཇུག་པ་ནི་བཞེད་པ་ཉིད་ཡིན་ཏེ། དགེ་སློང་རྣམས་དང་བསླབ་པ་མཐུན་པར་འགྱུར་བ་ཞེས་བྱ་བ་ལ་སོགས་པ་ནི་ཕྱི་མ་དག་གི་རྗེས་སུ་འཇུག་པར་མཐོང་བའི་ཕྱིར་རོ། །ཡང་གལ་ཏེ་དཔྱད་པ་དངོས་སུ་བ་ཡིན་པར་གྱུར་ན་ཅིར་འགྱུར་ཞེ་ན། བསྒྲུབ་པར་མི་ནུས་པ་ཉིད་ཀྱི་ཕྱིར་བཅོམ་ལྡན་འདས་ཀྱིས་བསྟན་པ་དོན་མེད་པར་འགྱུར་ཏེ། འདི་ལྟར་ལྷའི་མིག་དང་རྣ་བས་དཔྱད་པ་ནི་མ་ཡིན་ཏེ་བཀག་པའི་ཕྱིར་རོ། །ཐ་སྙད་པས་ནི་གཞན་གྱི་སེམས་ཀྱིས་འཇུག་པ་སྤྱོད་ཡུལ་མ་ཡིན་པའི་ཕྱིར་རོ། །མདོ་ལས་ཚེ་ལ་དབང་བ་བཅོམ་ལྡན་འདས་ཀྱིས་ཆོས་བསྟན་པ་ནི་ངེས་པར་འབྱུང་བ་དང་བཅས་པ་དང་བསྒྲུབ་པར་ནུས་པ་ཡིན་ནོ་ཞེས་བྱ་བ་ལ་སོགས་པ་དང་ཡང་འགལ་བར་འགྱུར་ཏེ། གལ་ཏེ་དཔྱད་པ་ཐ་སྙད་པ་མ་ཡིན་ན་བསྟན་པ་བསྒྲུབ་པར་ནུས་པར་མི་འགྱུར་རོ། །དེ་ལྟ་བས་ན་མཐོང་བ་དང་དོགས་པ་དག་ཁོ་ན་འདིར་ཐ་སྙད་ཀྱི་རྒྱུ་ཡིན་ནོ་ཞར་ལ་འོངས་པ་རྫོགས་སོ།། །།ཉེས་རྩོམ་བྱེད་དང་ཁྱིམ་སུན་འབྱིན་པ་

---

^{[མ་དཔེ་གཟིགས་ན་འདིར་གནོན།]}

དང༌། །འདིར་ནི་གསུམ་པ་ཚུལ་ཁྲིམས་ཉམས་པ་དག །ཐབ་མོས་སྤངས་ཏེ་གཎྜཱི་བརྡུང་བྱས་ནས། །ཤི་ཞིང་རུལ་པ་བཞིན་དུ་ངེས་བསྐྲད་བྱ། །འཐབ་ཀྲོལ་བྱེད་པ་ནི་ཉེས་རྩོམ་བྱེད་པ་ཡིན་ནོ། །ཁྱིམ་སུན་འབྱིན་པ་ནི་གང་ཞིག་བསླབ་པ་ལས་འདས་ནས་ཁྱིམ་པ་མ་དད་པར་བྱེད་པའོ། །གསུམ་པ་ཚུལ་ཁྲིམས་འཆལ་བ་གང་ཡིན་པ་དེ་ནི་ཕམ་པ་བྱུང་བ་ཡིན་ནོ། །འདི་གསུམ་ཆར་ཡང་གཎྜཱི་བརྡུངས་ནས་བསྐྲད་པར་བྱ་སྟེ་འདི་དག་ནི་ཤི་ཞིང་རུལ་པ་དང་འདྲ་བར་འགྲོགས་པར་བྱ་བ་མ་ཡིན་པས་སོ། །ཐབ་མོ་སྤངས་ཏེ་ཞེས་བྱ་བ་ནི་གལ་ཏེ་དེ་དག་བསྐྲད་པ་ན་དགེ་འདུན་དག་ལ་ཀུ་ཅོ་དག་བྱེད་ན། དེའི་ཚེ་རེ་ཞིག་མི་དབྱུང་བར་བྱའོ་ཞེས་བྱ་བའི་ཐ་ཚིག་གོ །སྐྲོད་པ་ན་ལས་ཀྱི་གཎྜཱི་བརྡུང་བར་བྱའོ་ཞེས་འཆད་དོ། །གསོ་སྦྱོང་གི་གཞི་ལས་གཎྜཱི་དེ་ནི་ལྔ་དག་སྟེ། དགེ་འདུན་ཐམས་ཅད་ཀྱི་གཎྜཱི་དང༌། ལས་ཀྱི་གཎྜཱི་དང༌། ཤི་བའི་གཎྜཱི་དང༌། སྤོང་བའི་གཎྜཱི་དང༌། གནོད་པ་འབྱུང་བའི་གཎྜཱིའོ་ཞེས་གསུངས་པ་དེ་ལ། དགེ་འདུན་ཐམས་ཅད་ཀྱི་གཎྜཱི་ཞེས་བྱ་བ་ནི་རྒྱུད་གསུམ་དང་ཏོག་གསུམ་མོ། །ལས་ཀྱི་གཎྜཱི་ཞེས་བྱ་བ་ནི་རྒྱུད་གསུམ་དང་ཏོག་གཉིས་སོ། །ཤི་བའི་གཎྜཱི་ཞེས་བྱ་བ་ནི་གཎྜཱི་ཡུ་བོ་ཡིན་ནོ། །སྤོང་བའི་གཎྜཱི་ཞེས་བྱ་བ་ནི་ཁར་གསིལ་དཀྲོལ་བར་བྱ་བ་ཡིན་ནོ། །གནོད་པ་བྱུང་བའི་གཎྜཱི་ཞེས་བྱ་བ་ནི་ཡིད་ཆེས་པར་གྱུར་གྱི་བར་དུའོ། །འདིར་ཡང་དགེ་འདུན་ཐམས་ཅད་ཅེས་བྱ་བ་ནི་འདུ་བ་ཞེས་བྱའོ། །ཤི་བའི་གཎྜཱི་ཞེས་བྱ་བ་ནི་རོ་དབྱུང་བའི་གཎྜཱིའོ། །ཡུ་བོ་ཞེས་བྱ་བ་ནི་གང་ལ་རྒྱུད་གཅིག་དང་ཏོག་གཅིག་ཡོད་པ་དེ་ལྟ་བུ་དེ་ལ་བྱའོ། །ཀ་བར་གྱུར་པ་མདོ་སྡེ་འཛིན་གང་དང༌། །དེ་བཞིན་གཞན་ཡང་ཆོ་ག་བཞིན་དཔྱད་བསྐྲད། །དཔུང་བྱེད་བཏང་ན་སླར་ཡང་གཞུག་བྱ་སྟེ། །གལ་ཏེ་མིན་ན་དེ་སྐལ་རིན་གྱིས་ལྟུང༌། །འཕགས་པའི་ཆོས་འདུལ་བ་འདི་ལ་མདོ་སྡེ་དང་འདུལ་བ་དང་མ་མོ་འཛིན་པ་དག་ནི་ཀ་བ་དང་འདྲ་བའི་ཕྱིར། ཀ་བར་གྱུར་བ་ཞེས་བྱ་སྟེ། གལ་ཏེ་དེ་དག་འཐབ་ཀྲོལ་བྱེད་པ་ལ་སོགས་པ་བསྐྲད་པར་བྱ་བ་རྣམས་ཀྱི་དཔུང་བྱེད་ན། དེ་དག་ཀྱང་ཆོ་ག་ཇི་ལྟ་བ་བཞིན་དུ་ཡང་དག་པར་དཔྱད་ནས་བསྐྲད་པར་བྱའོ། །གང་གི་ཚེ་ཀ་བ་དང་འདྲ་

---

^{[མ་དཔེ་གཟིགས་ན་འདིར་གནོན།]}

བ་དེ་དག་གིས་འཐབ་ཀྲོལ་བྱེད་པ་ལ་སོགས་པ་དེ་དག་བཏང་ན་དེའི་ཚེ་སླར་གཞུག་པར་བྱའོ། །འོན་ཏེ་དགེ་འདུན་གྱིས་འཇུག་པར་མི་བྱེད་ན། དེའི་ཚེ་དེའི་གཙུག་ལག་ཁང་གི་རྙེད་པའི་སྐལ་བའི་རིན་ཐང་གིས་དགེ་འདུན་ལ་ལྟུང་བར་འགྱུར་རོ། །འདིར་གཞུང་ནི་ཞུས་པ་བྲམ་ཟེའི་བུ་མོ་ལྟ་བུ་ལས། བཅོམ་ལྡན་འདས་གལ་ཏེ་དགེ་འདུན་གྱིས་ཀ་བ་དང་འདྲ་བ་འམ་སྒོ་སྐྱེས་དང་འདྲ་བ་སྐྲོད་པར་བགྱིད་ལ་དེ་ཡང་སླར་འཆོས་པར་བགྱིད་ན། དགེ་འདུན་ལ་བསོད་ནམས་མ་ལགས་པ་ཇི་སྙེད་ཅིག་སྐྱེ་བར་འགྱུར་ལགས། གང་ནས་བཟུང་སྟེ་གང་ཟག་དེ་སླར་བཅོས་པར་འོས་པ་དེ་ནས་བཟུང་སྟེ། གཙུག་ལག་ཁང་གི་རྙེད་པའི་རིན་ཐང་བརྩི་བར་བྱའོ། །གལ་ཏེ་དངོས་པོ་མ་ཚང་ན་དགེ་འདུན་ལ་སྦོམ་པོར་འགྱུར་རོ། །དངོས་པོ་ཚང་ན་དགེ་འདུན་ལ་ཕམ་པར་འགྱུར་རོ་ཞེས་འབྱུང་བ་ཡིན་ནོ། །གང་དག་གྲངས་ཅན་ལ་སོགས་བདེན་བློས་འདོན། །དེ་དག་ལ་ནི་ཁ་ཟས་དུག་ཏུ་འགྱུར། སངས་རྒྱས་གསུང་ནི་ཇི་སྐད་བསྟན་བཏོན་ནས། །ངེས་པ་དཔྱད་པར་བྱ་ཕྱིར་གཞན་དག་ཀླག །དགེ་ཚུལ་གང་དག་གྲངས་ཅན་དང་སེར་སྐྱ་ལ་སོགས་པའི་བསྟན་བཅོས་ལ། དེ་ཁོ་ན་ཉིད་ཡིན་པའི་བློས་འདོན་པར་བྱེད་པ་དེ་དག་ལ་ནི་ཡུལ་འཁོར་གྱི་བསོད་སྙོམས་དུག་ཉིད་དུ་འགྱུར་པས། སངས་རྒྱས་ཀྱི་གསུངས་རབ་ཇི་སྐད་བསྟན་པ་བཏོན་ནས། ཕྱིས་རིགས་པ་དང་རིགས་པ་མ་ཡིན་པར་དཔྱད་པའི་ཕྱིར་མུ་སྟེགས་ཅན་གྱི་བསྟན་བཅོས་དག་ཀླག་པར་བྱའོ། །སངས་རྒྱས་དེ་ཡི་ཡོན་ཏན་སྨོས་པས་བརྗོད། །སློབ་དཔོན་སློབ་དཔོན་ཚིག་དང་ལྡན་པས་སོ། །དོན་སོགས་སྨོས་པས་ཉེ་བའི་ཚིག་བྱས་ཏེ། །བདུད་བཅས་མཁན་པོར་གྱུར་པའི་མིང་དག་བརྗོད། །སངས་རྒྱས་བཅོམ་ལྡན་འདས་དག་ནི་ཡོན་ཏན་སྨོས་པ་དག་གིས་བརྗོད་པར་བྱ་སྟེ། དཔེར་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ཞེས་བྱ་བ་ལ་སོགས་པ་ལྟ་བུ་དག་གིས་སོ། །སློབ་དཔོན་ནི་སློབ་དཔོན་གྱི་ཉེ་བའི་ཚིག་དང་ལྡན་པ་དག་གིས་བརྗོད་པར་བྱ་སྟེ། དཔེར་ན་སློབ་དཔོན་སངས་རྒྱས་འཚོ་ཞེས་བྱ་བ་ལ་སོགས་པ་ལྟ་བུ་དག་གིས་སོ། །དོན་སོགས་སྨོས་པས་ཉེ་བའི་ཚིག་བྱས་ཏེ། །ཞེས་བྱ་བ་ནི་དོན་གྱི་སླད་དུ་མཁན་

---

^{[མ་དཔེ་གཟིགས་ན་འདིར་གནོན།]}

པོའི་མཚན་ནས་སྨོས་ཏེ་ཞེས་བྱ་བ་དེ་དག་སྨོས་པའི་ཉེ་བའི་ཚིག་བྱས་ཏེ། །འདུད་པ་དང་བཅས་བཞིན་དུ་མཁན་པོའི་མིང་བརྗོད་པར་བྱའི། གཞན་དུ་ནི་མ་ཡིན་ནོ། །རྒན་ལ་བཙུན་པའི་ཉེ་བའི་ཚིག་གིས་བརྗོད། །གཞོན་ལའང་ཚེ་དང་ལྡན་པའི་ཉེ་ཚིག་གིས། །དེ་བཞིན་གནས་བརྟན་ཞེས་བྱའི་ཉེ་ཚིག་བརྗོད། །དེ་ལྟར་འདི་ནི་མིང་སྨོས་རིམ་པ་ཡིན། །རྒན་པ་ལ་ནི་བཙུན་པའི་ཉེ་བའི་ཚིག་གིས་བརྗོད་པར་བྱའོ། །གཞོན་པ་ལ་ཡང་ཚེ་དང་ལྡན་པ་ཞེས་ཉེ་བའི་ཚིག་གིས་བརྗོད་པར་བྱའོ། །ཡང་གི་སྒྲས་ནི་རྒན་པ་ལ་ཡང་བྱའོ། །དེ་བཞིན་དུ་རྒན་པ་ལ་ཡང་རུང་གཞོན་པ་ལ་ཡང་རུང་སྟེ། གནས་བརྟན་ཞེས་བྱ་བའི་ཉེ་བའི་ཚིག་གིས་བརྗོད་པར་བྱའོ། །འདི་སྐད་དུ་རྒན་པ་ལ་ནི་བཙུན་པ་ཞེས་ཉེ་བའི་ཚིག་གིས་བརྗོད་པར་བྱའོ། །རྒན་པ་ལ་ཡང་རུང་བ་གཞོན་པ་ལ་ཡང་རུང་བ་ནི་གནས་བརྟན་དང་ཚེ་དང་ལྡན་པ་ཞེས་ཉེ་བའི་ཚིག་གཉིས་ཀྱིས་བརྗོད་པར་བྱའོ་ཞེས་བསྟན་པ་ཡིན་ནོ། །དེ་ལྟར་ན་བཅོམ་ལྡན་འདས་ཀྱིས་མིང་སྨོས་པའི་རིམ་པ་བཀའ་སྩལ་པ་ཡིན་ནོ། །དགེ་ཚུལ་གྱི་ཚིག་ལེའུར་བྱས་པའི་འགྲེལ་པ་ལས་སྡོམ་པ་མཐའ་དག་ཉམས་པའི་ཕྱོགས་དང་མཐུན་པ་སྟེ་བཅུ་བཞི་པ་རྫོགས་སོ།། །།དེ་ལྟར་ཡོངས་སུ་རྫོགས་པར་བྱས་ནས་འདུལ་བ་མདོར་བསྡུས་པ་བཤད་པ། །གང་ཞིག་གནང་མེད་དེ་བཞིན་བཀག་མེད་པ། །དེ་ནི་གསུངས་པའི་རྗེས་མཐུན་བརྟགས་ཏེ་གཟུང༌། །འདུལ་བ་མདོར་བསྡུས་ཞེས་བྱ་སྒྲོན་མ་དང༌། །འདྲ་བ་གཞན་འདི་བདེ་བར་གཤེགས་པས་གསུངས། །གང་ཞིག་གནང་བ་ཡང་མེད་ལ་བཀག་པ་ཡང་མེད་པ་དེ་ནི་གཞུང་བླ་མའི་རྗེས་སུ་འབྲངས་ནས། གལ་ཏེ་རུང་བ་དང་ཉེ་བ་ཡིན་ན་ནི་དེའི་ཚེ་གཟུང་བར་བྱ། །འོན་ཏེ་མི་རུང་བ་དང་ཉེ་བ་ཡིན་ན་ནི་དེའི་ཚེ་གཟུང་བར་མི་བྱ་སྟེ། དཔེར་ན་ཏམ་བུ་ལ་བཟའ་བ་གལ་ཏེ་སྨན་ནམ་ཁ་བཤལ་བར་བྱ་བའི་ཕྱིར་ཡིན་ན་ནི་རུང་བ་ཡིན་ནོ། །གལ་ཏེ་སྒེག་པའི་ཕྱིར་ཡིན་ན་ནི་མི་རུང་བ་ཡིན་ནོ། །འདུལ་བ་མདོར་བསྡུས་པ་ཞེས་བྱ་བ་སྒྲོན་མ་དང་འདྲ་བ་འདུལ་བ་གཞན་གཉིས་པ་འདི་ཡང་བཅོམ་ལྡན་འདས་ཀྱིས་གསུངས་པ་ཡིན་ནོ། །འདིར་གཞུང་ནི་ཕྲན་ཚེགས་ལས། དེ་ནས་བཅོམ་ལྡན་འདས་

---

^{[མ་དཔེ་གཟིགས་ན་འདིར་གནོན།]}

ཀྱིས་ཡོངས་སུ་མྱ་ངན་ལས་འདའ་བའི་དུས་དེའི་ཚེ་ཉིད་ན། དགེ་སློང་རྣམས་ལ་བཀའ་སྩལ་པ། དགེ་སློང་དག་ངས་ཁྱེད་ལ་འདུལ་བ་རྒྱ་ཆེར་ནི་བསྟན་ན་མདོར་བསྡུས་ཏེ་མ་ཡིན་ནོ། །འོན་ཏེ་མདོར་བསྡུས་པ་ཡང་ཉོན་ཅིག །དགེ་སློང་དག་ངས་ཁྱེད་ལ་གང་ཞིག་ཐོག་མ་ཉིད་ནས་གནང་བ་ཡང་མེད་བཀག་པ་ཡང་མེད་ལ། གལ་ཏེ་རུང་བ་དང་ཉེ་བ་ཡིན་ཞིང་མི་རུང་བ་ཟློག་པར་བྱེད་པ་ཡིན་ན་ནི་རུང་བ་ཡིན་པས་གཟུང་བར་བྱའོ། །གལ་ཏེ་མི་རུང་བ་དང་ཉེ་བ་ཡིན་ཞིང་རུང་བ་ཟློག་པར་བྱེད་པ་ཡིན་ན་མི་རུང་བ་ཡིན་པས་ཀུན་དུ་སྦྱར་བར་མི་བྱའོ་ཞེས་འབྱུང་བ་ཡིན་ནོ། །དགེ་ཚུལ་རྣམས་ཀྱི་ཆོས་ལུགས་བསྡུས་བྱུང་བའི། །བསོད་ནམས་བདག་ལས་སྐྱེས་དེས་འཇིག་རྟེན་འདི། །ཤཱཀྱའི་འོད་བསྟན་ལམ་ནས་རྫོགས་པ་ཡིས། །བྱང་ཆུབ་དཔལ་ལྡན་གནས་སུ་འགྲོ་བར་ཤོག །དགེ་ཚུལ་རྣམས་ཀྱི་ཆོས་ལུགས་ཞེས་བྱ་བའི་ཆོ་ག་དེ་བསྡུས་ཞེས་བྱ་བ་ཀུན་ནས་བཏུས་པ་འདི་ལས་སྐྱེས་པས་ན་བྱུང་བ་སྟེ་རྒྱུ་ཞེས་བྱའོ། །དགེ་ཚུལ་གྱི་ཆོ་ག་བསྡུས་པ་ལས་བྱུང་བ་སྟེ། དེའི་རྒྱུས་བསོད་ནམས་སྐྱེས་པ་གང་ལ་ཡོད་པ་དེ་ནི། དགེ་ཚུལ་རྣམས་ཀྱི་ཆོས་ལུགས་བསྡུས་བྱུང་བའི། །བསོད་ནམས་སྐྱེས་པ་ཞེས་བྱ་སྟེ། དེ་ལྟ་བུའི་བསོད་ནམས་བདག་ལ་སྐྱེས་པ་གང་ཡིན་པ་དེས། འཇིག་རྟེན་འདི་རྫོགས་པའི་བྱང་ཆུབ་དཔལ་དང་ལྡན་པའི་གནས་སངས་རྒྱས་ཀྱིས་སར་འགྲོ་བར་ཤོག་ཤིག །ཤཱཀྱའི་འོད་བསྟན་ལམ་ནས་ཞེས་བྱ་བ་ནི་ཤཱཀྱའི་རིགས་སུ་འཁྲུངས་པའི་ཕྱིར་ཤཱཀྱ་ནི་སངས་རྒྱས་བཅོམ་ལྡན་འདས་སོ། །དེའི་གསུང་རབ་ནི་འོད་དང་འདྲ་བས་འོད་ཡིན་ཏེ། མཉམ་པ་དང་མི་མཉམ་པ་གསལ་བར་སྟོན་པའི་ཕྱིར་རོ། །གསུང་རབ་དེས་བསྟན་པའི་ལམ་གང་ཡིན་པའི་ལམ་དེ་ནས་སོ། །ཡང་ན་དག་སློང་ཤཱཀྱའི་འོད་ཀྱིས་བསྟན་པའི་ལམ་ནས་འཇིག་རྟེན་འདི་སངས་རྒྱས་ཀྱི་སར་འགྲོ་བར་ཤོག་ཤིག་ཅེས་སྡུད་པ་པོས་བསོད་ནམས་ཡོངས་སུ་སྔོ་བར་བྱེད་པ་ཡིན་ནོ། །ཤཱཀྱའི་བཤེས་གཉེན་དོར་ནི་བདེ་བར་གཤེགས་པས་གསུངས་པའི་བསླབ་པ་ཡི། །རིན་ཆེན་འབར་བ་དག་ནི་འདུལ་བའི་རྒྱ་མཚོའི་ནང་ནས་རབ་བཏུས་ཏེ། །དབང་པོའི་རྡོ་རྗེས་ཕུག་ནས་དེ་གཞི་ཐམས་ཅད་ཡོད་པར་སྨྲ་བ་ཡི། །སོ་

---

^{[མ་དཔེ་གཟིགས་ན་འདིར་གནོན།]}

སོར་ངེས་པའི་དབྱེ་བ་དག་གིས་ཕྲེང་བ་མཐུན་པར་བསྡེབས་པ་ཡིན། །ཞེས་བྱ་བ་ལ། ཤཱཀྱའི་བཤེས་གཉེན་ངོར་ནི་ཞེས་བྱ་བའི་ཤཱཀྱ་ནི་སངས་རྒྱས་བཅོམ་ལྡན་འདས་སོ། །དེའི་བཤེས་གཉེན་ནི་གྲོགས་ཡིན་ཏེ། དེ་ཟག་པ་མེད་པའི་ལམ་ཡིན་ཏེ། དེའི་སྟོབས་ཀྱིས་སངས་རྒྱས་ཉིད་དུ་འགྲུབ་པའི་ཕྱིར་རོ། །དེའི་ངོར་ནི་ཞེས་བྱ་བ་ནི་དེ་ལ་ལྟོས་ནས་ཞེས་བྱ་བའི་ཐ་ཚིག་གོ །ཡང་ན་གནས་བརྟན་ཤཱཀྱའི་བཤེས་གཉེན་གྱིས་བཅོལ་བས་ཞེས་བྱ་བའི་ཐ་ཚིག་གོ །བདེ་བར་གཤེགས་པས་གསུངས་པའི་བསླབ་པ་དེ་ཉིད་རིན་པོ་ཆེ་ཡིན་པས་བདེ་བར་གཤེགས་པས་གསུངས་པའི་བསླབ་པའི་རིན་ཆེན་ཡིན་ནོ། །འབར་བ་ཞེས་བྱ་བ་ནི་འོད་གསལ་བ་ཡིན་ཏེ། བསླབ་པ་རིན་པོ་ཆེ་གཅེས་གང་ཡིན་པ། །ཞེས་བྱ་བའི་ཐ་ཚིག་གོ །འདུལ་བ་ཉིད་རྒྱ་མཚོ་ཡིན་ཏེ་གཞུང་ལུགས་ཀྱི་རྒྱ་མཚོ་འཛིན་ཁྲི་དུ་མའི་གནས་སུ་གྱུར་པ་ཉིད་ཀྱིས་རྟོགས་པར་དཀའ་བའི་ཕྱིར་རོ། །དེ་ནས་ཡང་དག་པར་རབ་ཏུ་བསྡུས་ཏེ་དབང་པོའི་རྡོ་རྗེས་ཕུག་ནས་ཞེས་བྱ་བ་ནི་ཇི་ལྟར་དབང་པོའི་རྡོ་རྗེ་འོད་ཅེས་བྱ་བས་རིན་པོ་ཆེ་ཕུག་ནས་ཕྲེང་བར་བྱེད་པ་དེ་བཞིན་དུ། འདུལ་བ་ལས་བསླབ་པའི་གཞི་བཏུས་ནས་ཚིགས་བཅད་སྡེ་བ་སྦྱོར་དབང་པོའི་རྡོ་རྗེ་ཞེས་བྱ་བས་ངེས་པར་ཕྱེ་ཞིང་ཕུག་ནས་བསླབ་པའི་གཞི་རིན་པོ་ཆེའི་ཕྲེང་བར་བསྡེབས་སོ་ཞེས་བྱ་བའི་ཐ་ཚིག་གོ །ཇི་ལྟར་བསྡེབས་ཤེ་ན། བཤད་པ་གཞི་ཐམས་ཅད་ཡོད་པར་སྨྲ་བའི་སོ་སོར་ངེས་པའི་དབྱེ་བ་དག་གིས་སོ། །བཅོམ་ལྡན་འདས་ཀྱིས་ཉན་ཐོས་གང་དག་ལས་དང་འབྲས་བུ་ལ་སོགས་པ་ཐམས་ཅད་ཡོད་པར་སྨྲ་བ་དེ་དག་ནི། ཐམས་ཅད་ཡོད་པར་སྨྲ་བ་དག་ཡིན་ཏེ། དེ་དག་གི་བསླབ་པ་སོ་སོར་ངེས་པ་གང་ཡིན་པ་དག་དབྱེ་བ་སྟེ། དགོད་པ་དེ་དག་གི་ཕྲེང་བར་བསྡེབས་པ་ཡིན་ནོ་ཞེས་བྱ་བར་སྦྱར་རོ། །ཐམས་ཅད་ཡོད་པར་སྨྲ་བ་དེ་དག་ནི་གཞི་དང་འདྲ་བ་ཡིན་ཏེ། ལེགས་པར་སྦྱར་བའི་སྐད་དུ་ཐ་སྙད་བརྗོད་པའི་ཕྱིར་རོ། །འདི་ལྟར་ཡ་རབས་དག་ནི་ལེགས་པར་སྦྱར་བའི་སྐད་དུ་ཐ་སྙད་བརྗོད་པ་ཡིན་ནོ་ཞེས་ཟེར་བར་སྒྲའི་མཚན་ཉིད་ལ་བརྩོན་པར་བྱེད་པ་འདི་ཡང་ཡ་རབས་སུ་ཤེས་པར་བྱ་བའི་ཕྱིར་རོ། །ཡ་རབས་ནི་

---

^{[མ་དཔེ་གཟིགས་ན་འདིར་གནོན།]}

འཇིག་རྟེན་ན་གཞི་དང་འདྲ་བ་ཡིན་ཏེ། དེ་ལས་འཇིག་རྟེན་གྱི་ཆོས་ལུགས་འབྱུང་བའི་ཕྱིར་རོ། །དེ་ལྟ་བས་ན་ཐམས་ཅད་ཡོད་པར་སྨྲ་བ་ནི་གཞི་ཞེས་བྱའི། སྡེ་པ་གཞན་དག་ནི་མ་ཡིན་ཏེ། ཐ་མལ་པ་དང༌། ཟུར་ཆག་པ་དང༌། འབྲིང་དུ་འདོན་པའི་ཚིག་གི་ཐ་སྙད་བརྗོད་པའི་ཕྱིར་རོ། །འདི་སྐད་དུ་སྔོན་ནི་ཐམས་ཅད་ཡོད་པར་སྨྲ་བ་འདི་གཅིག་པུ་ཡོད་པ་ལས། བཅོམ་ལྡན་འདས་ཡོངས་སུ་མྱ་ངན་ལས་འདས་པ་དང་ད་ལ་བརྟེན་ནས་སྡེ་པ་གཞན་དག་བྱུང་བས་དེ་དག་གི་གཞིར་གྱུར་པའི་ཕྱིར་གཞི་ཐམས་ཅད་ཡོད་པར་སྨྲ་བ་ཞེས་བྱའོ་ཞེས་བྱ་བར་བསྟན་པ་ཡིན་ནོ། །བཅོམ་ལྡན་འདས་ཡོངས་སུ་མྱ་ངན་ལས་འདས་ནས་རིང་པོ་མ་ལོན་པར། དགྲ་བཅོམ་པ་ལྔ་བརྒྱ་རྒྱལ་པོའི་ཁབ་ཏུ་འདུས་ནས་སྡེ་སྣོད་གསུམ་བསྡུས་སོ། །དེ་ནས་ཡོངས་སུ་མྱ་ངན་ལས་འདས་ནས་ལོ་བརྒྱ་རྩ་བཅུ་ལོན་པ་དང༌། འཕགས་པ་ཐམས་ཅད་འདོད་ལ་སོགས་པ་ནས་སྒུར་པོ་དང་ཞི་ལྡན་ལ་ཐུག་པ་དགྲ་བཅོམ་པ་བདུན་བརྒྱས་ཡངས་པ་ཅན་དུ་འདུས་ནས་བསྡུ་པ་གཉིས་པ་མཛད་དེ། ཧུ་ལུ་ཧུ་ལུ་ཀའི་ཆོ་ག་ལ་སོགས་པ་བཅུ་བསལ་ཏེ། རྒྱ་ཆེར་ནི་ཕྲན་ཚེགས་ལས་འབྱུང་ངོ༌། །དེ་ནས་རྒྱལ་པོ་དྷ་རྨ་ཨ་ཤོ་ཀ་ཤི་བ་དང༌། དགྲ་བཅོམ་པ་རྣམས་ཀྱིས་ཐ་མལ་པ་དང༌། ཟུར་ཆག་པ་དང༌། བར་མར་འདོན་པའི་ཚིག་ལ་མངོན་པར་ཞེན་པའི་འདུལ་བའི་དབང་གི་ཕྱིར་རིམ་གྱིས་གཞུང་གཞན་དང་གཞན་དུ་སྦྱར་ཏེ། རྒྱ་ཆེན་པོའི་སྐད་དུ་སྦྱར་བའི་མདོ་སྡེ་ལ་སོགས་པ་ལྟ་བུ་སྟེ། བསྟན་པ་རྣམ་པ་བཅོ་བརྒྱད་ཀྱི་བར་དུ་གྱུར་པ་ཡིན་ནོ། །དེའི་ཕྱིར་གཞི་ཞེས་བྱའོ་ཞེས་འཆད་དོ། །གཞན་དག་ན་རེ་བསྟན་པ་ནི་ཡན་ལག་བརྒྱད་དང་ལྡན་པ་ལེགས་པར་སྦྱར་བ་གཅིག་ཁོ་ན་ཡིན་ལ། དེ་ཉིད་བཅོམ་ལྡན་འདས་ཀྱི་བྱིན་གྱི་རླབས་ལས་གདུལ་བའི་དབང་གིས་ཐ་དད་དུ་སྣང་བར་གྱུར་པ་ཡིན་ཏེ། ཅིག་ཅར་དུ་རྒྱལ་པོ་ཆེན་པོ་བཞི་ལ་བདེན་པ་བསྟན་པ་དང་འདྲའོ། །དེ་ལྟར་ཡང༌། གསུང་ནི་གཅིག་ཅིག་གསུང་མཛད་ལ། །དུ་མ་ཉིད་དུ་རིག་འགྱུར་ཏེ། །དེ་ནི་བདག་གི་ཆེད་དུའོ་ཞེས། །ཐམས་ཅད་ཀྱིས་ནི་རྟོགས་ཕྱིར་རོ། །ཞེས་བསྟན་པ་ལྟ་བུའོ་ཞེས་འཆད་དོ། །འོ་ན་ནག་པོ་

---

^{[མ་དཔེ་གཟིགས་ན་འདིར་གནོན།]}

བསྟན་པ་དང༌། ཆེན་པོ་བསྟན་པ་ཇི་ལྟར་དྲང༌། དེ་ལས་ནི་འདི་ན་དགེ་སློང་ཁ་ཅིག་འོད་ས་ནས་ཆོས་འདི་ནི་བདག་གིས་བཅོམ་ལྡན་འདས་ལས་ཡང་དག་པར་གཟུང་བ་ཡིན་ནོ་ཞེས་བྱ་བ་ནས། རྒྱ་ཆེར་མདོ་སྡེ་ལ་ནི་མི་འཇུག །འདུལ་བ་ལ་མི་སྣང༌། ཆོས་ཉིད་དང་མི་མཐུན་པ་དེ་ནི་སངས་རྒྱས་ཀྱི་གསུང་མ་ཡིན་པའི་ཕྱིར་ཐག་རིང་དུ་དོར་བར་བྱའོ་ཞེས་བྱ་བ་འདི་ནི་ནག་པོ་བསྟན་པ་ཡིན་ནོ། །མདོ་སྡེ་ལ་འཇུག །འདུལ་བ་ལ་སྣང༌། ཆོས་ཉིད་དང་མི་མཐུན་པ་མེད་པ་དེ་ནི་སངས་རྒྱས་ཀྱི་གསུང་ཡིན་པའི་ཕྱིར་བླང་བར་བྱའོ་ཞེས་བྱ་བ་འདི་ནི་ཆེན་པོ་བསྟན་པ་ཡིན་ནོ་ཞེས་བྱ་བའི་བར་དུ་གསུངས་པ་ཡིན་ནོ། །ནག་པོ་བསྟན་པ་དང་ཆེན་པོ་བསྟན་པའི་དོན་ཡང་ཇི་ལྟ་བུ་ཞིག་ཡིན་ཞེ་ན། འདུལ་བ་མ་མོ་ལས་ཆེན་པོ་བསྟན་པ་བཤད་པ། འདི་དག་ནི་ཆོས་མ་ཡིན་པ་ཚར་གཅོད་པའི་ཕྱིར་དང༌། ཆོས་ལྟར་བཅོས་པ་ལ་གནོད་པ་བྱེད་པའི་ཕྱིར་དང༌། ངའི་ཉན་ཐོས་རྣམས་ཆོས་མ་ཡིན་པ་ཚར་བཅད་པ་ལ་མི་འཇུག་པར་འགྱུར་བས། དེའི་ཕྱིར་ཆེན་པོ་བསྟན་པ་ཞེས་བྱའོ། །ནག་པོ་ཉིད་དུ་བསྟན་པ་དག་ནི་ནག་པོ་བསྟན་པ་སྟེ། དམ་པའི་ཆོས་ལྟར་བཅོས་པ་ལ་གནོད་པ་བྱེད་པའི་ཕྱིར་དང༌། ངའི་ཉན་ཐོས་རྣམས་བཤད་པ་ལ་འདི་ནི་སངས་རྒྱས་ཀྱི་གསུང་ཡིན། འདི་ནི་སངས་རྒྱས་ཀྱི་གསུང་མ་ཡིན་ནོ་ཞེས་མི་འཇིགས་པར་འགྱུར་བས། དེས་ན་ནག་པོ་བསྟན་པ་ཞེས་བྱའོ་ཞེས་གསུངས་པ་ཡིན་ནོ། །གྱིས་པ་རྣམ་པ་བཅུ་བདུན་ནི་སྡེ་སྣོད་གསུམ་པོ་དེ་ལ་མི་སྣང་བ་ཡིན་ཏེ། སྡོམ་གྱིས་མ་བསྡུས་པའི་ཕྱིར་རོ། །མི་འཇུག་པ་ཡིན་ཏེ། དོན་ཕན་ཚུན་འགལ་བར་བཤད་པའི་ཕྱིར་རོ། །ཚིག་གི་དོན་གཞན་དུ་བསྟན་པའི་ཕྱིར་ཆོས་ཉིད་དང་ཡང་མི་མཐུན་པ་ཡིན་ན་དེ་དག་ཀྱང་སངས་རྒྱས་ཀྱི་གསུང་དུ་ཇི་ལྟར་བརྗོད་པར་བྱ་ཞེ་ན། དེའི་ཕྱིར་བཤད་པ། བསླབ་པ་ནི་གསུམ་དག་སྟེ། ལྷག་པའི་ཚུལ་ཁྲིམས་དང༌། ལྷག་པའི་སེམས་དང༌། ལྷག་པའི་ཤེས་རབ་བོ། །དེ་ལ་ལྷག་པའི་ཚུལ་ཁྲིམས་ནི་འདུལ་བ་ཡིན་ནོ། །ལྷག་པའི་ཤེས་རབ་ནི་ཟག་པ་མེད་པའི་ཤེས་རབ་ཀྱི་རང་བཞིན་ཆོས་མངོན་པ་ཡིན་ནོ། །ལྷག་པའི་སེམས་ནི་བསམ་གཏན་དང་གཟུགས་མེད་པ་ཡིན་ནོ། །དེ་སྟོན་

---

^{[མ་དཔེ་གཟིགས་ན་འདིར་གནོན།]}

པར་བྱེད་པའི་གཞུང་ལ་ཡང་བཏགས་ནས་དེ་སྐད་ཅེ་ས་བྱའོ། །གྱེས་པ་རྣམ་པ་བཅུ་བདུན་པོ་དེ་དག་ཀྱང་བསླབ་པ་གསུམ་པོ་དེ་དག་ཉིད་སྟོན་པར་བྱེད་པ་ཡིན་པས། མདོ་སྡེ་ལ་འཇུག་པ་ཡང་ཡིན། འདུལ་བ་ལ་སྣང་བ་ཡང་ཡིན། ཆོས་ཉིད་དང་མཐུན་པ་ཡང་ཡིན་ཏེ། མྱ་ངན་ལས་འདས་པ་དང་མཐུན་པའི་ཕྱིར་རོ། །ཚེས་ཉིད་ཅེས་བྱ་བ་འདི་ཅི་ཡིན་ཞེ་ན། ཆོས་རྣམས་ཀྱི་ངང་ཚུལ་ཅན་ཡིན་ཏེ། དཔེར་ན་གཟུགས་སུ་རུང་བའི་མཚན་ཉིད་ནི་གཟུགས་ཡིན་ནོ་ཞེས་བྱ་བ་ལ་སོགས་པ་ལྟ་བུ་ཡིན་ནོ། །དེ་བཞིན་དུ་ཆོས་ཀྱི་ཕྱག་རྒྱ་ཡང་ཡིན་ཏེ། དེ་ཡང་ཆོས་ཐམས་ཅད་ནི་བདག་མེད་པ་ཡིན། འདུས་བྱས་ཐམས་ཅད་ནི་སྐད་ཅིག་མ་ཡིན། མྱ་ངན་ལས་འདས་པ་ནི་ཞི་བ་ཡིན་པས། ཆོས་རྣམས་ཐམས་ཅད་བདག་མེད་དེ། །འདུས་བྱས་ཐམས་ཅད་སྐད་ཅིག་མ། །མྱ་ངན་འདས་ཞི་དེ་དག་ནི། །ཆོས་ཀྱི་ཕྱག་རྒྱ་མཚན་ཉིད་གསུམ། །ཞེས་གསུངས་པ་ཡིན་ཏེ། དེ་ནི་ཆོས་ཀྱི་ཕྱག་རྒྱའི་མཚན་ཉིད་གསུམ་ཡིན་ནོ། །མང་དུ་སྨོས་ཀྱང་ཅི་དགོས་པས། མདོ་སྡེ་ལ་སོགས་པ་གང་ཞིག་ཕྱག་རྒྱ་གསུམ་གྱི་ཕྱག་རྒྱས་བཏབ་པ་ཡིན་ལ། བསླབ་པ་གསུམ་སྟོན་པར་བྱེད་པ་དེ་ནི་སངས་རྒྱས་ཀྱི་གསུང་ཡིན་པར་ཤེས་པར་བྱའོ། །ཡང་བཤད་པ། ཕྱག་རྒྱ་གསུམ་དང་ཡང་དག་ལྡན། །བསླབ་པ་གསུམ་ནི་རབ་སྟོན་ཅིང༌། །ཐོག་མ་བར་དང་མཐར་དགེ་བ། །སངས་རྒྱས་གསུང་དུ་མཁས་པས་རྟོགས། །དེ་ལས་གཞན་པ་ནི་སངས་རྒྱས་ཀྱི་གསུང་མ་ཡིན་པར་ཤེས་པར་བྱ་སྟེ། །དཔེར་ན་བཅོམ་ལྡན་འདས་ཡོངས་སུ་མྱ་ངན་ལས་འདས་ནས་ལོ་བརྒྱ་རྩ་བཅུ་ལོན་པ་ན་རུང་བ་མ་ཡིན་པའི་གཞི་བཅུ་བྱུང་བ་ལྟ་བུ་སྟེ། དེ་དག་ནི་ལྷག་པའི་ཚུལ་ཁྲིམས་སྟོན་པར་བྱེད་པ་མ་ཡིན་པས་འདུལ་བ་ལ་མི་འཇུག་པ་ཡིན། ལྷག་པའི་སེམས་སྟོན་པར་བྱེད་པ་མ་ཡིན་པས་མདོ་སྡེ་ལ་མི་སྣང་བ་ཡིན། ལྷག་པའི་ཤེས་རབ་སྟོན་པར་བྱེད་པ་མ་ཡིན་ལ། དེ་དང་རྗེས་སུ་མཐུན་པ་ཡང་མ་ཡིན་པས་ཆོས་ཉིད་དང་མི་མཐུན་པ་ཡིན་ནོ། །དེའི་ཕྱིར་སྡུད་པ་པོ་གཉིས་པས་བོར་བ་ཡིན་ནོ། །དེ་ལྟ་བས་ན་སྡེ་པ་གཞན་འདོན་པ་དག་ཀྱང་སངས་རྒྱས་ཉིད་ཀྱི་གསུང་ཉིད་ཡིན་པར་ཐེ་ཚོམ་མེད་པ་ཡིན་ནོ། །

---

^{[མ་དཔེ་གཟིགས་ན་འདིར་གནོན།]}

གཞན་ཡང་གཙོར་ན་དོན་ཁོ་ན་སངས་རྒྱས་ཀྱི་གསུང་ཉིད་དུ་བཞེད་པའི་ཕྱིར་དང༌། དགྲ་བཅོམ་པ་རྣམས་ཀྱིས་རྣམ་པར་དབྱེ་བར་མཛད་པའི་ཕྱིར་དང༌། སངས་རྒྱས་ཀྱི་བྱིན་གྱི་རླབས་ལས་བྱུང་བའི་ཕྱིར་དང༌། རྒྱལ་པོ་ཀྲི་ཀཱིའི་རྨི་ལམ་སད་པའི་མདོ་ལས། ཡང་དག་པར་རྫོགས་པའི་སངས་རྒྱས་འོད་སྲུངས་ཀྱིས་རྒྱལ་པོ་ཀྲི་ཀཱི་ལ་བཀའ་སྩལ་པ། རྒྱལ་པོ་ཆེན་པོ་ཁྱོད་ཀྱི་རྨི་ལམ་དུ་མི་བཅོ་བརྒྱད་ཀྱིས་རས་ཡུག་གཅིག་འདྲེན་པར་མཐོང་བ་དེ་ནི་ཤཱཀྱ་ཐུབ་པའི་བསྟན་པ་རྣམ་པ་བཅོ་བརྒྱད་དུ་གྱེས་པར་འགྱུར་ལ། དེའི་རྣམ་པར་གྲོལ་བའི་རས་ནི་གྱེས་པར་མི་འགྱུར་རོ། །ཞེས་འབྱུང་བ་ཡིན་པའི་ཕྱིར་དེ་དག་ཀྱང་སངས་རྒྱས་ཉིད་ཀྱི་གསུང་ཉིད་དུ་མི་འགལ་ལོ། །ཞར་ལ་འོངས་པ་རྫོགས་སོ།། །།གང་གི་མན་ངག་དབང་གིས་འདི་ལྟར་ཕྱེ། །བསོད་ནམས་བདག་ལས་སྐྱེས་དེས་འགྲོ་བ་རྣམས། །མྱུར་དུ་བལྟ་བའི་རྣམ་བསལ་ཤཱཀྱ་ཡི།། འོད་བསྟན་དངོས་པོའི་དེ་ཉིད་མཐོང་གྱུར་ཅིག །གཞན་ཡང༌། འདིར་བཤད་པ་ནི། སྔོན་ཆད་མ་བྱུང་བ་དག་འགའ་ཡང་མ་བྲིས་འོན་ཀྱང་ནི། །བདག་གི་མཁན་པོ་ས་མ་ཏ་ཏར་གནས་པའི་རྒྱན་དུ་གྱུར་པ་གྲགས་པ་ཐོབ། །བསོད་ནམས་གྲགས་པ་ལས་ནི་བདག་གིས་མཉན་ནས་རང་གི་འདུལ་པའི་ཆོ་ག་ཡི། །རྣམ་པར་བཤད་པ་འདི་ནི་གསུམ་རིག་རྣམས་ཀྱི་བཞེད་པའི་ཕྱོགས་ཀྱི་གཞི་ཙམ་བསྟན་པ་ཡིན། །དེ་ཉིད་མ་མཐོང་རང་གི་བློ་ཡིས་དགོངས་པ་དག །ཐ་དད་པ་ཡི་འདུལ་བ་རྣམ་པར་དབྱེ་མི་རུང༌། །སུ་ཞིག་བདག་ཉིད་སྡིག་པའི་སྔགས་ཀྱིས་དྲེགས་པ་ཡིན། །ལག་པ་འཇིགས་པའི་སྦྲུལ་གྱི་བུ་གར་འཇུག་པར་བྱེད། །དེ་ཕྱིར་ཆོས་འདུལ་ཟབ་མོ་གཏན་ལ་དབབ་པ་འདི། །བྱེ་བྲག་བཤད་པ་དག་ལ་བརྟེན་ནས་བྱས་ཡིན་ཏེ། །མིག་དང་ལྡན་པ་ཟེར་བའི་གོམ་རྗེས་འབྲངས་ན་ནི། །བགྲོད་དཀའ་དག་ཏུ་འང་ལོང་བ་བདེ་བར་འགྲོ་བར་བྱེད། །གཞན་ཡང་བླ་མ་དག་ནི་རིང་ན་བཞུགས་པ་གྲགས་པས་རྣམ་པར་ཁྱབ་པ་ཞི་བའི་འོད་ཀྱིས་བདག །དྲན་པས་དགོངས་པ་མཛད་པར་གྱུར་ཅིག་སྙམ་ནས་བདག་གིས་འགྲེལ་པ་དོན་གསལ་བྱས་པ་ཡིན། །བསྟན་བཅོས་སྣ་ཚོགས་མཁས་པའི་བློ་འབྱོར་གྱུར་པ་གྲགས་པ་དག་གི་རྒྱལ་མཚན་མཐོ་ལྡན་པ། །དེ་ཉིད་དོན་ནི་གཏན་

---

^{[མ་དཔེ་གཟིགས་ན་འདིར་གནོན།]}

ལ་འབེབས་པ་རྣམས་ཀྱིས་ན་ལེན་དྲ་ཡི་བདར་ལ་བདར་བ་ཡིན། །དགེ་ཚུལ་གང་དག་འདུལ་བ་དག་ལ་མངོན་བརྩོན་ཞིང༌། །བསླབ་པ་དག་ལ་ལྷོད་པ་མེད་པའི་བློ་རྒྱུ་བ། །དེ་དག་རྟག་ཏུ་ནད་མེད་པ་ཡི་འོད་ལྡན་འདི། །སྟོན་པར་བྱེད་པས་གཞན་དག་ལ་ནི་གྲགས་གྱུར་ཅིག །འཕགས་པ་གཞི་ཐམས་ཅད་ཡོད་པར་སྨྲ་བའི་དགེ་ཚུལ་གྱི་ཚིག་ལེའུར་བྱས་པའི་འགྲེལ་བ་འོད་ལྡན་ཞེས་བྱ་བ་མང་དུ་ཐོས་པའི་སློབ་དཔོན་ཆེན་པོ་ཤཱཀྱ་འོད་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་སརྭ་ཛྙཱ་དེ་བ་དང༌། ཞུ་ཆེན་གྱི་ལོ་ཙཱ་བ་བནྡེ་གཙང་དེ་བེནྡྲ་རཀྵི་ཏས་བསྒྱུར་ཅིང་ཞུས་ཏེ་གཏན་ལ་ཕབ་པ། །