དགེ་སྦྱོང་གི་ཀཱ་རི་ཀཱ་ལྔ་བཅུ་པའི་ཚིག་གི་བརྗེད་བྱང་དུ་བྱས་པ།
ཀ་མ་ལ་ཤཱི་ལ།
ཐམས་ཅད་མཁྱེན་པ་ལ་ཕྱག་འཚལ་ལོ། །དགེ་སྦྱོང་གི་ཀཱ་རི་ཀཱ་ལྔ་བཅུ་པའི་ཚིག་གི་བརྗེད་བྱང་དུ་བྱས་པ། དཔེར་ན་ས་གཞི་ལ་ས་བོན་བཏབ་ནས་ས་བོན་ལ་བརྟེན་ནས་མྱུ་གུ། མྱུ་གུ་ལ་བརྟེན་ནས་འདབ་མ། འདབ་མ་ལ་བརྟེན་ནས་སྡོང་བུ། སྡོད་བུ་ལ་བརྟེན་ནས་མེ་ཏོག །མེ་ཏོག་ལ་བརྟེན་ནས་འབྲས་བུ་འབྱུང་བ་དེ་བཞིན་དུ། ཚུལ་ཁྲིམས་ས་གཞི་དང་འདྲ་བ་ལ་བརྟེན་ནས་མྱུ་གུ་ལ་སོགས་པ་ལྟ་བུའི་ཏིང་ངེ་འཛིན་གྱི་ཕུང་པོ་འབྱུང་ངོ༌། །ཏིང་ངེ་འཛིན་གྱི་ཕུང་པོ་བྱུང་ནས་དེའི་འོག་ཏུ་མེ་ཏོག་ལྟ་བུའི་ཤེས་རབ་ཀྱི་ཕུང་པོ་འབྱུང་ངོ༌། །ཤེས་རབ་ཀྱི་ཕུང་པོ་བྱུང་ནས་དེའི་འོག་ཏུ་རྣམ་པར་གྲོལ་བའི་ཕུང་པོ་དང༌། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་འབྲས་བུ་ལྟ་བུ་འབྱུང་ངོ༌། །དེ་བས་ན་དགེ་བ་ཐམས་ཅད་འབྱུང་བའི་གཞི་ཚུལ་ཁྲིམས་ཡིན་པའི་ཕྱིར་ཚུལ་ཁྲིམས་བསྲུང་བ་ལ་ནན་ཏན་བྱའོ། །དགེ་སྦྱོང་གི་བསླབ་ཚིག་ལྔ་བཅུ་པ་འདི་མགོ་མཇུག་ཏུ་བསྡུ་ན་དོན་རྣམ་པ་བརྒྱད་ཀྱིས་འཆད་དེ། གང་ཞེ་ན། བསྟོད་ཅིང་ཕྱག་འཚལ་བ་བསྟན་པ་དང༌། བསླབ་པ་ཉམས་སུ་བླང་བ་དང༌། སྔ་དྲོའི་དུས་ན་ལས་གང་བྱ་བ་དང༌། ཟས་ཀྱི་བྱ་བ་བྱས་པའི་འོག་ཏུ་ལས་གང་བྱ་བ་དང༌། ཕས་ཕམ་པའི་གནས་དང༌། བསླབ་པ་ཕྲ་མོའི་གནས་དང༌། ཕྱི་དྲོ་ཕན་ཆད་ཇི་ལྟར་བྱ་བ་དང༌། བརྒྱད་པ་འབྲས་བུ་ཇི་ལྟར་བྱ་བ་བཞིན་དུ་བསྟན་པའོ། །དེ་ལ་མགོན་པོ་ཞེས་བྱ་བ་ནས་བརྩམས་ཏེ། མདོ་ཙམ་ངེས་པར་བཤད་པར་བྱ། །ཞེས་བྱ་བ་ཡན་ཆད་ཀྱིས་རང་གི་ལྷ་ལ་བསྟོད་ཅིང་ཕྱག་འཚལ་བ་བསྟན་ཏོ། །ཤཱཀྱ་སེང་གེ་ཞེས་བྱ་བ་ནས་བརྩམས་ཏེ། བདག་གི་ལུས་བཞིན་བསླབ་པ་བསྲུང༌། །ཞེས་བྱ་བ་ཡན་ཆད་ཀྱིས་བསླབ་པ་ཉམས་སུ་བླང་བ་བསྟན་ཏོ། །ནམ་གྱི་ཆ་སྨད་ཅེས་བྱ་བ་ནས་བརྩམས་ཏེ། སྦྱིན་པའི་ཚིགས་བཅད་གཉིས་ཤིག་བརྗོད། །ཅེས་བྱ་བ་ཡན་ཆད་ཀྱིས་སྔ་དྲོའི་དུས་
ན་ལས་གང་བྱ་བ་བསྟན་ཏོ། །མན་ངག་ཡོད་ན་བསམ་གཏན་བྱ། །ཞེས་བྱ་བ་ནས་བརྩམས་ཏེ། བསྒྲུབ་པ་ལ་ནི་བརྩོན་པར་བྱ། །ཞེས་བྱ་བ་ཡན་ཆད་ཀྱིས་དགེ་བ་བྱ་བ་བསྟན་ཏོ། །བརྟུལ་ཞུགས་གནས་སེམས་ཞེས་བྱ་བ་ནས་བརྩམས་ཏེ། ངག་རྣམས་ཤིན་ཏུ་བསྡམ་པར་བྱ། །ཞེས་པ་ཡན་ཆད་ཀྱིས་ཕས་ཕམ་པའི་གནས་བསྟན་ཏོ། །འབྲུ་བཏགས་ཕབས་དང་སྦྱར་བ་ཡི། །ཞེས་བྱ་བ་ནས་བཟུང་ནས། གུས་བཅས་ཞེས་བཅས་པར་བྱ། །ཞེས་བྱ་བ་ཡན་ཆད་ཀྱིས་བསླབ་པ་ཕྲ་མོ་རྣམས་བསྟན་ཏོ། །ལག་པ་དག་པར་བསྙལ་ནས་ནི། །ཞེས་བྱ་བ་ནས་བརྩམས་ཏེ། ཇི་སྐད་བསྟན་པ་བཞིན་དུ་བྱ། །ཞེས་པ་ཡན་ཆད་ཀྱིས་ཕྱི་དྲོ་ཕན་ཆད་ཀྱི་བྱ་བ་བསྟན་ཏོ། །ཇི་ལྟར་ཉོན་མོངས་མྱུར་ཟད་ནས། །བྱང་ཆུབ་དམ་པ་ཐོབ་པར་འགྱུར། །དེ་ལྟར་བསྒྲིམས་དང་ལྡན་པར་བྱ། །ཞེས་བྱ་བས་ནི་འབྲས་བུ་བསྟན་ཏོ། །དེ་ལ་སངས་རྒྱས་ཀྱི་སློབ་མ་རྣམས་ཀྱི་ལྷ་ནི་དཀོན་མཆོག་གསུམ་སྟེ། སངས་རྒྱས་དང༌། ཆོས་དང༌། དགེ་འདུན་དང༌། མགོན་པོ་ཐམས་ཅད་མཁྱེན་ཞེས་བྱ་བ་ནི་སངས་རྒྱས་ལ་བསྟོད་ཅིང་ཕྱག་འཚལ་བ་བསྟན་ཏེ། སངས་རྒྱས་ལ་བསྟོད་པ་ཡང་གཞན་གྱི་དོན་མཛད་པ་དང༌། རང་གི་དོན་ཕུན་སུམ་ཚོགས་པ་བརྙེས་པའི་སྒོ་ནས་བསྟོད་དེ། དེ་ལ་མགོན་པོ་ཞེས་བྱ་བས་གཞན་གྱི་དོན་ཕུན་སུམ་ཚོགས་པར་མཛད་པ་སྟོན་ཏེ། སེམས་ཅན་ངན་སོང་གསུམ་དུ་སྐྱེས་པ་རྣམས་དེ་ལས་ཐར་པའི་སྐྱབས་མཛད་པ་དང༌། ལྷ་དང་མིར་སྐྱེས་པ་སྐྱེ་རྒ་ན་འཆིས་གཙེས་པ་ཐམས་ཅད་ཀྱི་སྐྱབས་མཛད་པས་ན་སངས་རྒྱས་ལ་མགོན་པོ་ཞེས་བྱ་སྟེ། སེམས་ཅན་ཐམས་ཅད་ཀྱི་སྐྱབས་དང་དཔུང་གཉེན་དུ་གྱུར་པ་ཡིན་ནོ་ཞེས་བྱ་བའི་དོན་ཏོ། །དེ་ལ་སེམས་ཅན་ངན་སོང་གསུམ་དུ་སྐྱེས་པ་རྣམས་ལ་ནི་འོད་ཟེར་བཀྱེ་བ་དང་སྤྲུལ་པའི་སྐུ་བསྟན་པའི་སྒོ་ནས་ངན་སོང་ལས་ཐར་པར་མཛད་དོ། །ལྷ་དང་མིར་སྐྱེས་པ་སྐྱེ་རྒ་ན་འཆིས་གཙེས་པ་རྣམས་ལ་ནི་འཕགས་པའི་བདེན་པ་བཞི་བཤད་ཅིང་དེ་ལ་བཀོད་ནས་སྐྱེ་རྒ་ན་འཆི་ལས་ཐར་པའི་སྒོ་ནས་སྐྱབས་མཛད་དོ། །ཐམས་ཅད་མཁྱེན་ཞེས་བྱ་བས་བདག་གི་དོན་ཕུན་སུམ་ཚོགས་པ་བརྙེས་པ་བསྟན་ཏེ། ཕུང་པོ་དང་ཁམས་དང་སྐྱེ་མཆེད་དང་རྟེན་ཅིང་འབྲེལ་པར་འབྱུང་བ་
ལ་སོགས་པ་ཇི་སྙེད་དུ་ཤེས་པར་བྱ་བའི་ཆོས་ཐམས་ཅད་མ་ལུས་པར་ཤེས་ཤིང༌། དེ་དག་ཀྱང་མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པའི་མཚན་ཉིད་དུ་ཕྱིན་ཅི་མ་ལོག་པར་ཤེས་པས་ན་སངས་རྒྱས་བཅོམ་ལྡན་འདས་ལ་ཐམས་ཅད་མཁྱེན་པ་ཞེས་བྱ་སྟེ། འདི་དག་བདག་དང་གཞན་གྱི་དོན་ཕུན་སུམ་ཚོགས་པའི་སངས་རྒྱས་ལ་ཕྱག་འཚལ་ཏེ་ཞེས་བྱ་བར་སྦྱར་རོ། །ཆོས་ཞེས་བྱ་བས་ནི་ཆོས་ལ་བསྟོད་ཅིང་ཕྱག་འཚལ་བར་བསྟན་ཏེ། དེ་ལ་ཆོས་ལ་ཡང་རྣམ་པ་གསུམ་མོ། །གང་ཞེ་ན། བཤད་པའི་ཆོས་དང༌། སྒྲུབ་པའི་ཆོས་དང༌། འབྲས་བུའི་ཆོས་སོ། །དེ་ལ་གསུང་རབ་ཡན་ལག་བཅུ་གཉིས་ནི་བཤད་པའི་ཆོས་སོ། །རང་གི་ལ་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ནི་སྒྲུབ་པའི་ཆོས་སོ། །མྱ་ངན་ལས་འདས་པ་ནི་འབྲས་བུའི་ཆོས་སོ། །ཆོས་དེ་གསུམ་ལ་ཕྱག་འཚལ་ཏེ་ཞེས་བྱ་བར་སྦྱར་རོ། །འཕགས་པའི་ཚོགས་ལ་ཞེས་བྱ་བས་དགེ་འདུན་ལ་བསྟོད་པ་བསྟན་ཏེ། ཉོན་མོངས་པ་དང་སྡིག་པའི་ཆོས་ལས་རིང་དུ་སྤངས་པ་ལ་ནི་འཕགས་པ་ཞེས་བྱ་ལ། འཕགས་པའི་གང་ཟག་དེ་ལྟ་བུ་མང་པོ་ལ་ནི་འཕགས་པའི་ཚོགས་ཞེས་བྱ་སྟེ། དེ་ཡང་མདོར་ན་སློབ་པའི་གང་ཟག་དང༌། མི་སློབ་པའི་གང་ཟག་འཕགས་པ་གཉིས་ཡོད་དོ། །དེ་ལ་སློབ་པའི་གང་ཟག་ནི་བདུན་ཡོད་དེ། རྒྱུན་དུ་ཞུགས་པ་དང༌། རྒྱུན་དུ་ཞུགས་པའི་འབྲས་བུ་ཐོབ་པ་དང༌། ལན་ཅིག་ཕྱིར་འོང་བ་དང༌། ལན་ཅིག་ཕྱིར་འོང་བའི་འབྲས་བུ་ཐོབ་པ་དང༌། ཕྱིར་མི་འོང་བ་དང༌། ཕྱིར་མི་འོང་བའི་འབྲས་བུ་ཐོབ་པ་དང༌། དགྲ་བཅོམ་པ་ལ་འཇུག་པ་དང་བདུན་ནོ། །མི་སློབ་པའི་གང་ཟག་ནི་དགྲ་བཅོམ་པའི་འབྲས་བུ་ཐོབ་པ་སྟེ། དེ་དག་ལ་ཡང་ཕྱག་འཚལ་ཏེ་ཞེས་བྱ་བ་སྦྱར་རོ། །དེ་ལ་ཕྱག་འཚལ་བ་ཡང་རྣམ་པ་གསུམ་སྟེ། ལུས་ཀྱིས་ཕྱག་འཚལ་བ་དང༌། དག་གིས་ཕྱག་འཚལ་བ་དང༌། ཡིད་ཀྱིས་ཕྱག་འཚལ་བའོ། །དེ་ལ་ལུས་ཀྱིས་ཕྱག་འཚལ་བ་ནི། དཔྲལ་བ་གཏུགས་པ་ཐལ་མོ་སྦྱར་བ་ལ་སོགས་པ་བྱེད་པའོ། །ངག་གིས་ཕྱག་འཚལ་བ་ནི་དེ་དག་གི་ཡོན་ཏན་ཚིག་ཏུ་རྗོད་པར་བྱེད་པའོ། །ཡིད་ཀྱིས་ཕྱག་འཚལ་བ་ནི་དེ་དག་ལ་དད་པ་དང་དགའ་བ་དང་མོས་བའི་སེམས་ཀྱིས་ཕྱག་འཚལ་
བའོ། །ཕྱག་འཚལ་ཏེ་ཞེས་བྱ་བ་ནི་ཕྱག་འཚལ་ནས་ཞེས་བྱ་བའི་དོན་ཏོ། །ཕྱག་འཚལ་ནས་ཅི་བྱ་ཞེ་ན། དགེ་ཚུལ་གྱི་ནི་ཆོ་ག་རྣམས། །མདོ་ཙམ་ངེས་པར་བཤད་པར་བྱ། །ཞེས་བྱ་བ་སྨོས་ཏེ། དགེ་ཚུལ་དགེ་སྦྱོང་རྣམས་ཀྱི་བསླབ་ཚིག་དང་ལས་སུ་བྱ་བ་རྣམས་ལ་བྱའོ། །མདོ་ཙམ་ངེས་པར་བཤད་པར་བྱ་བ་ནི་དགེ་སྦྱོང་གི་བསླབ་ཚིག་དང་ལས་སུ་བྱ་བ་རྣམས་ནི་ཀཱ་རི་ཀཱ་སུམ་བརྒྱ་པ་དང༌། འདུལ་བ་འབུམ་གྱི་ནང་ནས་འབྱུང་བས་དེར་བརྟག་པར་བྱའོ། །འདིར་མདོ་ཙམ་སྟེ། མི་བྱར་མི་གནང་བའི་དམིགས་པ་ཉི་ཚེ་ཙམ་ཞེས་བྱ་བའི་དོན་ཏོ། །རང་གི་ལྷ་ལ་ཕྱག་འཚལ་བ་དང་བསྟོད་པའི་བཤད་པ་རྫོགས་སོ།། །།བསླབ་པ་ཉམས་སུ་བླང་བ་ཡང་ཚིག་རྣམ་པ་བཞི་ཞིག་གིས་སྟོན་ཏེ། གང་ཞེ་ན། ཆོས་ཕུན་སུམ་ཚོགས་པ་དང༌། གང་ཟག་ཕུན་སུམ་ཚོགས་པ་དང༌། སྒྲུབ་པ་ཕུན་སུམ་ཚོགས་པ་དང༌། ཇི་ལྟར་བསྒྲུབ་པར་བྱ་བའོ། །ཤཱཀྱ་སེང་གེའི་བསྟན་པ་ལ། །ཞེས་བྱ་བས་ཆོས་ཕུན་སུམ་ཚོགས་པ་བསྟན་ཏེ། དེ་ལ་ཆོས་ཕུན་སུམ་ཚོགས་པ་ཡང་ཚིག་རྣམ་པ་གཉིས་སོ། །སྟོན་པ་ཕུན་སུམ་ཚོགས་པ་དང༌། བསྟན་པ་ཕུན་སུམ་ཚོགས་པའོ། །ཤཱཀྱ་སེང་གེ་ཞེས་བྱ་བས་སྟོན་པ་ཕུན་སུམ་ཚོགས་པ་བསྟན་ཏེ། སྟོན་པ་ནི་སངས་རྒྱས་བཅོམ་ལྡན་འདས་སོ། །སངས་རྒྱས་བཅོམ་ལྡན་འདས་གསུང་དབྱངས་རྣམ་པར་དག་པ་དང་ཐུགས་རྣམ་པར་དག་པས་ན་སྟོན་པ་ཕུན་སུམ་ཚོགས་པ་ཞེས་བྱ་སྟེ། ཤཱཀྱ་ཞེས་བྱ་བས་གདུང་རུས་རྣམ་པར་དག་པ་སྟོན་ཏེ། སྤྱིར་མི་རྣམས་ཀྱི་ནང་དུ་སྐྱེས་པ་ལ་རིགས་རྣམ་པ་བཞི་ཡོད་དེ། དམངས་རིགས་དང༌། རྗེའུ་རིགས་དང༌། བྲམ་རྗེའི་རིགས་དང༌། རྒྱལ་རིགས་སོ། །སངས་རྒྱས་བཅོམ་ལྡན་འདས་ནི་ཤཱཀྱ་རྣམས་ཀྱི་ནང་དུ་གཽ་ཏ་མའི་རིགས་ཀྱི་གདུང་རུས་དང་ལྡན་པས་ན་ཤཱཀྱ་ཞེས་བྱའོ། །ཤཱཀྱ་ཞེས་བྱ་བས་ནི་གདུང་རུས་རྣམ་པར་དག་པ་སྟོན་ཏོ། །སེང་གེ་ཞེས་བྱ་བས་ཐུགས་རྣམ་པར་དག་པ་སྟོན་ཏོ། །དཔེར་ན་སེང་གེ་ནི་དཔའ་བོའི་སེམས་དང་ལྡན་པས་རི་དགས་རྣམས་ཀྱིས་མི་སྐྲག་ཅིང་རི་དགས་རྣམས་སེང་གེས་ཟིལ་གྱིས་གནོན་པ་དང་འདྲ་བར་སངས་རྒྱས་བཅོམ་ལྡན་འདས་ཀྱང་མི་འཇིགས་པ་བཞི་བརྙེས་པའི་ཐུགས་
དང་ལྡན་པས་བདུད་དང་མུ་སྟེགས་པ་རི་དགས་དང་འདྲ་བས་སངས་རྒྱས་ཟིལ་གྱིས་མི་ནོན་ཅིང་སྐྲག་པར་བྱེད་མི་ནུས་ལ། སངས་རྒྱས་ནི་བདུད་དང་མུ་སྟེགས་རི་དགས་དང་འདྲ་བ་རྣམས་ཟིལ་གྱིས་གནོན་ཅིང་སྐྲག་པར་བྱེད་པས་ན་སངས་རྒྱས་ལ་སེང་གེ་ཞེས་བྱ་སྟེ། དེ་བས་ན་སེང་གེའི་སྒྲས་ཐུགས་དག་པ་སྟོན་ཏོ། བསྟན་པ་ཞེས་བྱ་བས་བསྟན་པ་ཕུན་སུམ་ཚོགས་པ་སྟོན་ཏོ། །སློབ་མ་རྣམས་ལ་འདི་དག་ནི་བསྒྲུབ་པར་བྱ་བ་ཡིན། འདི་དག་ནི་སྤང་བར་བྱ་བ་ཡིན་ནོ་ཞེས་སྟོན་པའི་ཆོས་ལ་བསྟན་པ་ཞེས་བྱ་སྟེ། འདུལ་བའི་སྡེ་སྣོད་དང༌། མདོ་སྡེའི་སྡེ་སྣོད་དང༌། མངོན་པའི་ཆོས་ཀྱི་སྡེ་སྣོད་དོ། །དེ་ལས་རབ་ཏུ་བྱུང་བ་རྣམས་ཀྱིས་བསླབ་ཚིག་རྣམ་པ་གསུམ་སྟེ། ལྷག་པ་ཚུལ་ཁྲིམས་ཀྱི་བསླབ་པ་དང༌། སེམས་ཀྱི་བསླབ་པ་དང༌། ཤེས་རབ་ཀྱི་བསླབ་པའོ། །དེ་འདུལ་བའི་སྡེ་སྣོད་ཀྱི་ནང་ནས་ནི་ལྷག་པ་ཚུལ་ཁྲིམས་ཀྱི་བསླབ་པ་འབྱུང་ངོ༌། །མདོ་སྡེའི་སྡེ་སྣོད་ལས་ནི་ལྷག་པ་སེམས་ཀྱི་བསླབ་པ་འབྱུང་ངོ༌། །མངོན་པའི་ཆོས་ཀྱི་སྡེ་སྣོད་ནས་ནི་ལྷག་པ་ཤེས་རབ་ཀྱི་བསླབ་པ་འབྱུང་སྟེ། དེ་ལྟར་སྡེ་སྣོད་གསུམ་ལ་བསྟན་པ་ཞེས་བྱའོ། །དད་པས་རབ་ཏུ་བྱུང་ནས་ནི། །ཞེས་བྱ་བས་གང་ཟག་ཕུན་སུམ་ཚོགས་པ་སྟོན་ཏེ། གང་ཟག་ཕུན་སུམ་ཚོགས་པ་ཡང་རྣམ་པ་གཉིས་ཀྱིས་ཕུན་སུམ་ཚོགས་སོ། །གང་ཞེ་ན། བསམ་པ་ཕུན་སུམ་ཚོགས་པ་དང༌། སྦྱོར་བ་ཕུན་སུམ་ཚོགས་པའོ། །དད་པ་ཞེས་བྱ་བས་བསམ་པ་ཕུན་སུམ་ཚོགས་པ་བསྟན་ཏེ། ལས་དང་འབྲས་བུ་ལ་སོགས་པ་ནི་ཡོད་པར་ཡིད་ཆེས་པ་དང༌། དཀོན་མཆོག་གསུམ་ལ་ནི་ཡོན་ཏན་ཕུན་སུམ་ཚོགས་པ་དང་ལྡན་པར་སེམས་པ་དང༌། འཕགས་པའི་ལམ་ནི་བསྒྲུབ་པར་འདོད་པ་དང༌། མྱ་ངན་ལས་འདས་པ་ཐོབ་པར་འདོད་པའི་སེམས་ལ་ནི་དང་བ་ཞེས་བྱའོ། །དད་པས་ཞེས་བྱ་བ་ནི། དད་པའི་སེམས་ཀྱིས་རྒྱུར་བྱས་ནས། །ཞེས་བྱ་བའི་དོན་ཏོ། །རབ་ཏུ་བྱུང་ནས་ནི་ཞེས་བྱ་བས་ནི་སྦྱོར་བ་ཕུན་སུམ་ཚོགས་པ་བསྟན་ཏེ། དཀོན་མཆོག་གསུམ་ལ་སྐྱབས་སུ་སོང་ཞིང་བསླབ་ཚིག་བཅུ་མནོས་པ་ལས་རབ་ཏུ་བྱུང་བ་ཞེས་བྱའོ། །ཡང་ན། དད་པས་རབ་ཏུ་བྱུང་ནས་ནི། །ཞེས་བྱ་བའི་ཚིག་འདིས་བཅོམ་ལྡན་འདས་ཀྱིས་འདུལ་བ་ལས་སྐྲ་
དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པས་ཡང་དག་པ་ཁོ་ནར་ཁྱིམ་ནས་ཁྱིམ་མེད་པར་རབ་ཏུ་འབྱུང་ངོ་ཞེས་རབ་ཏུ་བྱུང་བའི་མཚན་ཉིད་གསུངས་པའི་དོན་བསྟན་པ་ཡིན་ཏེ། ཚིག་འདིས་ནི་རབ་ཏུ་བྱུང་བ་རྣམས་ཀྱི་ཕུན་སུམ་ཚོགས་པ་རྣམ་པ་བཞི་བསྟན་པ་ཡིན་ནོ། །རྣམ་པ་བཞི་གང་ཞེ་ན། ཚུལ་ཁྲིམས་ཕུན་སུམ་ཚོགས་པ་དང༌། །ལས་ཕུན་སུམ་ཚོགས་པ་དང༌། གནས་ཕུན་སུམ་ཚོགས་པ་དག །བསམ་པ་ཕུན་སུམ་ཚོགས་པའོ། །དེ་ལ་སྐྲ་དང་ཁ་སྤུ་བྲེགས་ནས་གོས་དུར་སྨྲིག་བགོས་ཏེ་ཞེས་བྱ་བས་ཚུལ་ཁྲིམས་ཕུན་སུམ་ཚོགས་པ་བསྟན་ཏེ། དེ་ཚུལ་དེ་ལས་ཉོན་མོངས་པ་སྤོང་བ་དང་མཐུན་པའི་ཚུལ་ཡིན་པས་ཁྱིམ་ན་གནས་པའི་ཚུལ་ལས་འཕགས་པ་ཡིན་ནོ། །དད་པས་ཡང་དག་བ་ཁོ་ནར་ཞེས་བྱ་བས་བསམ་པ་ཕུན་སུམ་ཚོགས་པ་བསྟན་ཏེ། བུ་ལོན་མ་འཁོར་བ་དང་རྒྱལ་པོ་ལ་སོགས་པའི་འཇིགས་པས་རབ་ཏུ་བྱུང་བ་མ་ཡིན་གྱི་དད་པའི་སེམས་ཀྱིས་རབ་ཏུ་བྱུང་བ་ཡིན་ནོ། །རབ་ཏུ་བྱུང་ཞེས་བྱ་བས་ནི་ལས་ཕུན་སུམ་ཚོགས་པ་བསྟན་ཏེ། བྱ་བ་མཆོག་ཏུ་གྱུར་པ་ལ་ཞུགས་པའི་ཕྱིར་རོ། །ཁྱིམ་ནས་ཁྱིམ་མེད་པར་རབ་ཏུ་བྱུང་ཞེས་བྱ་བས་ནི་གནས་ཕུན་སུམ་ཚོགས་པ་བསྟན་ཏེ། བུ་སྨད་དང་ཉེ་དུ་ལ་སོགས་པའི་འཇིགས་པ་མི་བཟད་པའི་གནས་སྤངས་ནས་ཁྱིམ་མེད་པར་ཤིང་དྲུང་དང་བྲག་ཕུག་ན་གནས་པས་ན། གནས་ཕུན་སུམ་ཚོགས་པའོ། །རབ་ཏུ་བྱུང་ནས་ནི་ཞེས་བྱ་བས་ནི་རབ་ཏུ་བྱུང་བའི་འོག་ཏུ་ཞེས་བྱ་བའི་དོན་ཏོ། །བརྟུལ་ཞུགས་བརྟན་པས་རབ་བསྒྲིམས་ཏེ། །ཞེས་བྱ་བས་སྒྲུབ་བ་ཕུན་སུམ་ཚོགས་པ་སྟོན་ཏེ། བརྟུལ་ཞུགས་ཞེས་བྱ་བས་ནི་རང་བཞིན་གྱི་ཁ་ན་མ་ཐོ་བ་དང༌། བཅས་པའི་ཁ་ན་མ་ཐོ་བའི་བསླབ་པ་ལ་བྱའོ། །དེ་ལ་རང་བཞིན་གྱི་ཁ་ན་མ་ཐོ་བའི་བསླབ་ཚིག་ནི་ཕས་ཕམ་པ་བཞིའོ། །བཅས་པའི་ཁ་ན་མ་ཐོ་བའི་བསླབ་ཚིག་ནི་ཆང་མི་བཏུང་བ་ལ་སོགས་པ་རྣམ་པ་དྲུག་གོ །བརྟན་པས་རབ་བསྒྲིམས་ཏེ་ཞེས་བྱ་བས་ནི་ལུས་ངག་ཡིད་གསུམ་གྱིས་རབ་ཏུ་བསྒྲིམས་ལ་ཕས་ཕམ་པ་མི་འབྱུང་བར་བྱ་བའི་ཕྱིར་བསྟན་པ་སྟེ། ཉེས་པ་ཕྲན་ཚེགས་ཀྱང་མི་འབྱུང་བར་བསྲུང་བའོ། །དེ་ཡང་ཤིང་ཆེན་པོ་བསྲུང་ན་དེ་ལ་བསྐོར་བའི་ར་བ་དང་ཤིང་ཐགས་
རྣམས་ཅི་ནས་ཀྱང་མི་གཞིག་པར་བྱའོ། །དེ་དང་འདྲ་བར་ཕས་ཕམ་པ་མི་འབྱུང་བར་བྱ་ན་ར་བ་དང་ཤིང་ཐགས་ལྟ་བུའི་བསླབ་པ་ཕྲན་ཚེགས་རྣམས་མ་ཞིག་པར་བསྲུང་ན་ཚུལ་ཁྲིམས་བརྟན་པར་བསྲུང་བ་ཡིན་ནོ། །བདག་གི་ལུས་བཞིན་བསླབ་པ་བསྲུང༌། །ཞེས་བྱ་བས་ཇི་ལྟར་བསྒྲུབ་པར་བསྟན་ཏེ། དཔེར་ན་བདག་གི་ལུས་འདི་ལ་དུག་དང་ཚེར་མ་དང་ངམ་གྲོག་ལ་སོགས་པས་འཆི་བར་མི་འགྱུར་བར་བསྲུང་བ་དང༌། བཟའ་བ་དང་བགོ་བ་དང་སྨན་ལ་སོགས་པས་ཅི་ནས་ཀྱང་མི་བརྙས་པར་བྱ་བའི་ཚུལ་དུ་བསྲུང་བ་དང་འདྲ་བར་ཚུལ་ཁྲིམས་ཀྱང་ཅི་ནས་ཀྱང་མི་ཞིག་པར་བསྲུང་བ་དང། རྣམ་པར་དག་པའི་ཚུལ་དུ་བསྲུང་བའོ། །བསླབ་པ་ཉམས་སུ་བླང་བའི་བཤད་པ་རྫོགས་སོ།། །།སྔ་དྲོའི་དུས་ན་ལས་གང་བྱ་བ་བསྟན་པ་ལ་རྣམ་པ་བརྒྱད་བྱ་བར་བསྟན་ཏེ། ཁ་ཏོན་བྱ་བ་དང༌། དེ་བཞིན་གཤེགས་པ་ལ་ཕྱག་འཚལ་བ་དང༌། མཁན་པོ་དང་སློབ་དཔོན་ལ་སྙུན་གསོལ་ནས་ལས་སུ་བྱ་བ་ཞུ་བ་དང༌། ཆུ་བརྟག་པ་དང༌། མཁན་པོ་དང་སློབ་དཔོན་གྱི་ལས་སུ་བྱ་བ་བསྒྲུབ་པ་དང༌། ཞུ་བ་དང༌། ཟས་བཟའ་བ་དང༌། བསོད་ནམས་བསྔོ་བ་དང་བརྒྱད་བྱའོ། །ནམ་གྱི་ཆ་སྨད་མལ་ནས་ལངས། །ནམ་ལངས་བར་དུ་ཁ་ཏོན་བྱ། །ཞེས་བྱ་བས་ཁ་ཏོན་བྱ་བ་བསྟན་ཏོ། །དེ་ནམ་གྱི་ཆ་སྨད་ནི་མཚན་གཅིག་ལ་ཐུན་ལྔར་བགོས་པ་ལས་ཐོ་རངས་ལ་བྱ་སྟེ། ཐོ་རངས་མལ་ནས་ལངས་ནས་ནི་ཙོག་ཙོག་པོར་འདུག་ལ་ལྷ་མ་སྲིན་ལ་ཆོས་ཀྱི་སྦྱིན་པ་བྱའོ་སྙམ་དུ་བསམས་ནས་ལྷ་མ་སྲིན་རྣམས་ལ་ཚིགས་སུ་བཅད་པ་སྟེར་བ་ལ་བོས་ཏེ་ནམ་ལངས་ཀྱི་བར་དུ་ཁ་ཏོན་ཅི་ནུས་སུ་བྱའོ། །ཁ་ཏོན་བྱས་པའི་བསོད་ནམས་སེམས་ཅན་ཀུན་གྱི་དོན་དུ་བསྔོ་བའོ། །གདོང་དང་སོ་ཡི་དྲི་བཀྲུས་ནས། །རྫོགས་སངས་རྒྱས་ལ་གུས་ཕྱག་བྱ། །ཞེས་བྱ་བས་དེ་བཞིན་གཤེགས་པ་ལ་ཕྱག་བྱ་བ་བསྟན་ཏེ། ལངས་ནས་ཆུ་དང་སོ་ཤིང་ལ་སོགས་པས་སོ་དང་གདོང་གི་དྲི་མ་བཀྲུས་ནས་རྫོགས་སངས་རྒྱས་ཏེ་སངས་རྒྱས་བཅོམ་ལྡན་འདས་རྣམས་ལ་གུས་པས་ཕྱག་བྱའོ། །དེ་ལ་ཆོས་ཐམས་ཅད་ཐུགས་སུ་ཆུད་ཅིང་ཡོན་ཏན་ཕུན་སུམ་ཚོགས་པ་མ་ལུས་པར་བརྙེས་པས་ན་རྫོགས་པ་ཞེས་བྱའོ། །སྐྱེས་བུ་གཉིད་ལས་སངས་
པ་བཞིན་དུ་མ་རིག་པ་སྤངས་ནས། མ་རིག་པའི་གཉིད་ལས་སངས་པས་ན་སངས་རྒྱས་ཞེས་བྱའོ། །གུས་ཕྱག་བྱ་ཞེས་བྱ་བས་གུས་པར་ཕྱག་བྱ་བ་ལ་ཡང་རྣམ་པ་གསུམ་སྟེ། ལུས་ཀྱིས་གུས་པར་ཕྱག་བྱ་བ་དང༌། ངག་གིས་གུས་པར་ཕྱག་བྱ་བ་དང༌། ཡིད་ཀྱིས་གུས་པར་ཕྱག་བྱ་བའོ། །དེ་ལ་ལུས་སྨད་ལྔ་ས་ལ་གཏུགས་ཏེ་ཞི་བའི་ཚུལ་གྱིས་ཕྱག་བྱ་བ་ནི་ལུས་ཀྱིས་གུས་པར་ཕྱག་བྱ་བའོ། །མི་དྲག་མི་ངལ་བའི་དབྱངས་གྱིས་དེ་བཞིན་གཤེགས་པ་ལ་བསྟོད་པ་ནི་ངག་གིས་གུས་པར་ཕྱག་བྱ་བའོ། །ལུས་ཀྱིས་གུས་པར་ཕྱག་བྱ་བའི་སྔོན་རོལ་དུ་སངས་རྒྱས་བཅོམ་ལྡན་འདས་ནི་ཉེས་པ་ཐམས་ཅད་སྤངས་པས་ཡོན་ཏན་ཕུན་སུམ་ཚོགས་པ་དང་ལྡན་པ་ཐུགས་རྗེ་ཆེན་པོ་ཅན་ཞེས་སེམས་ཅན་ཐམས་ཅད་ཀྱི་མགོན་དང་སྐྱབས་སུ་གྱུར་པ། འགྲོ་བ་ཐམས་ཅད་ཀྱི་བསོད་ནམས་ཀྱི་གཞི་ཡིན་པས་ཕྱག་བྱ་བའི་གནས་ཡིན་ནོ་སྙམ་དུ་སེམས་པ་ནི་ཡིད་ཀྱིས་གུས་པར་ཕྱག་བྱ་བ་སྟེ། དེ་ལྟ་བུའི་སེམས་སྔར་བསྐྱེད་ལ་དེ་ནས་གདོད་ལུས་ངག་གིས་ཕྱག་བྱ་བས་ཕྱག་བྱའོ། །བླ་མ་གནས་པའི་སྒོ་གླེགས་ལ། །ལག་པས་དལ་གྱིས་བརྡུང་བར་བྱ། །ནང་ཞུགས་གུས་པར་བླ་མ་ལ། །ཁམས་བདེ་མི་བདེ་ལ་སོགས་དྲི། །འདི་ངག་བྱ་ཞེས་དྲིས་ནས་ནི། །དཀྱིལ་འཁོར་ལ་སོགས་རྣམ་བྱའི་ཕྱིར། །ཞེས་བྱ་བས་མཁན་པོ་དང་སློབ་དཔོན་ལ་སྙུན་གསོལ་ནས་ལས་སུ་བྱ་བ་ཞུ་བ་བསྟན་ཏེ། བླ་མ་གནས་པའི་སྒོ་གླེགས་ལ། །ལག་པས་དལ་གྱིས་བརྡུང་བར་བྱ། །ཞེས་བྱ་བ་ལ་དེ་ལྟར་སངས་རྒྱས་ལ་ཕྱག་བྱས་པའི་འོག་ཏུ་བླ་མ་སྟེ་མཁན་པོ་དང་སློབ་དཔོན་གྱི་གནས་སུ་སོང་ལ་སྒོ་འཕར་ལ་ལག་པས་དལ་གྱིས་བརྡུང་བའམ། སེ་གོལ་གཏོགས་ཏེ་ནང་དུ་ཤོག་ཅིག་ཅེས་ཟེར་ན་ནང་དུ་འགྲོ་བར་བྱའོ། །དེ་ལྟར་སྒྲ་མ་བྱུང་ན་ཡང་ལན་གཉིས་ཀྱི་བར་དུ་དེ་བཞིན་དུ་བྱའོ། །དེ་སྟེ་སྒྲ་མ་བྱུང་ན་ཡང་ལན་གཉིས་ལན་གསུམ་གྱི་བར་དུ་དེ་བཞིན་དུ་བྱའོ། །དེ་ནས་ནང་དུ་ཤོག་ཅིག་ན་གདོད་ནང་དུ་འགྲོ་བར་བྱའོ། །ཐུག་ཐུབ་ཏུ་མི་བྱ་བར་ཚུལ་འདི་ལྟར་བྱ་བ་ནི་དགེ་སྦྱོང་གི་ཚུལ་ཞི་བ་དང་དུལ་བའི་རང་བཞིན་ཡིན་པའི་ཚུལ་བསྟན་པར་བྱ་བ་དང༌། ཐུག་ཐུབ་ཏུ་ཞུགས་ན་བླ་མ་རྣམས་ཀྱིས་དགེ་བའི་བར་ཆད་དུ་གྱུར་
ཞིང་སེམས་འཁྲུག་པར་འགྱུར་བས་བླ་མའི་སེམས་མི་འཁྲུག་པར་བྱ་བའི་ཕྱིར་ཚུལ་དེ་ལྟར་བྱའོ། །དེ་ནས་བླ་མས་ནང་དུ་ཤོག་ཅིག་ཅེས་སྨྲས་ཏེ་ནང་དུ་ཞུགས་ནས་ཅི་བྱ་ཞེ་ན། དེའི་ཕྱིར། ནང་ཞུགས་གུས་པས་བླ་མ་ལ། །ཁམས་བདེ་མི་བདེ་ལ་སོགས་དྲི། །ཞེས་བྱ་བ་སྨོས་ཏེ། ཁམས་ཀྱི་སྒྲས་ནི་ས་དང་ཆུ་དང་མེ་དང་རླུང་དང་འབྱུང་བ་ཆེན་པོ་བཞི་ལ་བྱ་སྟེ། འབྱུང་བ་ཆེན་པོ་བཞི་ཤས་ཆེ་ཆུང་དུ་གྱུར་པ་ལས་ནད་དུ་འགྱུར་རོ། །དེ་ལ་སའི་ཁམས་ཤས་ཆེན་ནི་ཁ་ཟས་མི་འཇུ་ཞིང་ལུས་ལྕིའོ། །ཆུའི་ཁམས་ཤས་ཆེ་ན་ནི་བད་ཀན་ཤས་ཆེའོ། །མེའི་ཁམས་ཤས་ཆེ་ན་ནི་མཁྲིས་པ་ཅན་དུ་འགྱུར་རོ། །རླུང་གི་ཁམས་ཤས་ཆེ་ན་ནི་རླུང་ནད་ཅན་དུ་འགྱུར་རོ། །དེ་ལྟར་ནང་དུ་ཞུགས་ནས་ཞི་བ་དང་དུ་ལ་བ་དང་སྲིད་ཞུའི་ཚུལ་གྱིས་ཕྱག་བྱ་སྟེ། ཁམས་བཞི་མ་སྙོམས་པ་ལས་སྙུན་དུ་གྱུར་པ་མཆིས་སམ་མ་མཆིས་སྙུན་གསོལ་ལོ། །སོགས་པའི་སྒྲས་ནི་མཚན་མོ་བདེ་བར་མནལ་ལམ་མ་མནལ། དགོངས་པ་ལ་བར་ཆད་དུ་གྱུར་ཏམ་མ་གྱུར་ཞེས་བྱའོ། །དེ་ལྟར་སྙུན་གསོལ་ནས་ཅི་ཞིག་བྱ་ཞེ་ན། དེའི་ཕྱིར་ན། འདི་དག་བྱ་ཞེས་དྲིས་ནས་ནི། །དཀྱིལ་འཁོར་ལ་སོགས་རྣམ་བྱའི་ཕྱིར། །ཞེས་བྱ་བ་སྨོས་ཏེ། སྙུན་གསོལ་བའི་འོག་ཏུ་མཆོད་རྟེན་ལ་ཕྱག་བྱ་ཞིང་བསྐོར་བ་དང་བཤང་གཅི་ཆེ་ཆུང་དུ་འགྲོ་བ་མ་གཏོགས་པར་ནང་པར་སྔ་དྲོའི་བར་དུ་ཅི་དང་ཅི་བྱ་བ་ཐམས་ཅད་ཞུའོ། །དེ་ལྟར་ཞུས་པའི་འོག་ཏུ་དཀྱིལ་འཁོར་བྱས་ལ་དེ་ནས་གདོད་གཡར་ཚུས་བཟའོ། །སོགས་པའི་སྒྲས་ནི་མེ་ཏོག་དང་བདུག་པ་ལ་སོགས་པ་མཆོད་པ་ཡང་བསྡུའོ། །ཉ་ཕྱིས་ལ་སོགས་ཆུ་བརྟགས་ཏེ། །སྟེང་དང་བར་གཏིང་རིམ་བཞིན་ནོ། །ཉ་ཕྱིས་ལ་སོགས་མེད་ན་ཡང༌། །ཁྱོར་བའམ་འདབ་མས་བུམ་པ་དགང༌། །ཆུ་ཡི་སྐྱེ་བོ་ཆེ་ཆུང་རྣམས། །ཡུན་མི་རིང་བར་ནན་ཏན་བརྟག །སྙིང་རྗེ་ཅན་གྱིས་ཁུ་བ་རྣམས། །རབ་ཏུ་བརྟགས་ཏེ་སྤྱད་པར་བྱ། །སྲོག་ཆགས་ཡོད་ན་ལེགས་པར་བཙག །སྲོག་ཆགས་རྣམས་ལ་གནོད་མི་བྱ། །རྩྭ་དང་ལྕི་བ་ཤིང་ལ་སོགས། །དགོས་པ་གང་དང་གང་ཡང་རུང༌། །དེ་དག་སྲོག་ཆགས་མེད་པར་བྱ། །སྡོམ་པས་སྲོག་ཆགས་གསད་པ་སྲུང༌། །ཞེས་བྱ་བས་ཆུ་ལ་སོགས་པ་བརྟག་པར་བསྟན་ཏེ། དེ་དག་
དཀྱིལ་འཁོར་བྱས་ནས་གཡར་ཚུས་ཐོབ་པའི་འོག་ཏུ་ཅི་བྱ་ཞེ་ན། དེའི་ཕྱིར། ཉ་ཕྱིས་ལ་སོགས་ཆུ་བརྟགས་ཏེ། །ཞེས་བྱ་བ་ལ་སོགས་པ་སྨོས་ཏེ། དེའི་འོག་ཏུ་ཆུ་ཚགས་ལྔ་འདུལ་བ་ལས་གསུངས་པའི་ཆུ་ཚགས་གང་ཡང་རུང་བ་ཅིག་གིས་ཆུ་བཙག་གོ །དེ་ལ་ཆུ་ཚགས་ལྔ་ནི་རིལ་བ་དང༌། གྲུ་གསུམ་པ་དང༌། ཡུ་བ་ཅན་དང༌། ཆོས་ཅན་ཞེས་བྱ་བ་དང༌། གྲོལ་བར་བྱེད་པའི་རས་སོ། །དེ་ལྟར་ཆུ་བཙགས་ནས་བཙགས་པ་ཙམ་གྱིས་ཀྱང་མི་ཆོག་སྟེ། ཉ་ཕྱིས་ལ་སོགས་པ་ཆུས་གང་བར་བཀང་ལ་སྲོག་ཆགས་ཡོད་དམ་མེད་བརྟག་གོ །སོགས་པའི་སྒྲས་ནི་དུང་ཕོར་རྣམས་ཀྱང་བསྡུས་སོ། །ཇི་ལྟར་བརྟག་ཅེ་ན། དེའི་ཕྱིར། སྟེང་དང་བར་གཏིང་རིམ་བཞིན་ནོ། །ཞེས་བྱ་བ་སྨོས་ཏེ། བརྟག་པའི་རིམ་པ་ནི་ཐོག་མར་ཆུའི་སྟེང་ན་སྲོག་ཆགས་ཡོད་དམ་མེད་བརྟག་གོ །དེ་ནས་བར་དུ། དེ་ནས་གཏིང་སྟེ་ཞབས་སུ་བརྟགས་ལ། སྲོག་ཆགས་མེད་ན་ནི་ཆུ་དེ་སྤྱད་དུ་རུང་ངོ༌། །སྲོག་ཆགས་ཡོད་ན་ནི་ཆུ་དེ་སྤྱད་དུ་མི་རུང་བས་སླར་སྔ་མའི་གནས་སུ་དབོའོ། །གལ་ཏེ་ཉ་ཕྱིས་དང་དུང་ཕོར་མ་འབྱོར་ན་ཇི་ལྟར་བྱ་སྙམ་པ་ལ། དེའི་ཕྱིར། ཉ་ཕྱིས་ལ་སོགས་མེད་ན་ཡང༌། །ཁྱོར་བ་འམ་འདབ་མས་བུམ་པ་དགང༌། །ཞེས་བྱ་བ་སྨོས་ཏེ། ཉ་ཕྱིས་དང་དུང་ཕོར་མ་འབྱོར་ན་ཡང་ཁྱོར་བ་བཀང་སྟེ་བརྟག་གོ །འདིར་ཡང་སྟེང་དང་བར་གཏིང་རིམ་བཞིན་དུ་བརྟག་པ་ནི་སྔ་མ་བཞིན་ནོ། །འདིའི་སྐབས་སུ་ཇི་ལྟར་བརྟག་ཅེ་ན། དེའི་ཕྱིར། ཆུ་ཡི་སྐྱེ་བོ་ཆེ་ཆུང་རྣམས། །ཡུན་མི་རིང་བར་ནན་ཏན་བརྟག ། ཅེས་བྱ་བ་སྨོས་ཏེ། ཆུ་བརྟག་པ་ཡང་མིག་ནད་ཀྱིས་ཕོག་པའམ། མིག་ལིང་ཏོག་གིས་ཁེབས་པས་ནི་མི་བརྟག་གི་མིག་གསལ་བས་ཆུ་ན་གནས་པའི་སྲོག་ཆགས་ཕྲ་མོ་དང་སྦོམ་པོ་རྣམས་ཡོད་དམ་མེད་བརྟག་གོ །མིག་གསལ་བས་བརྟགས་ན་ཡང་ཡུན་རིང་དུ་མིག་བགྲད་དེ་བལྟས་ན་མིག་ཟི་ཟི་པོར་འགྱུར་བས་སྲོག་ཆགས་མི་མཐོང་པའི་ཕྱིར་ཡུན་མི་རིང་བར་ཡང་ནས་ཡང་དུ་མིག་གསལ་བ་ས་བརྟག་སྟེ། སྲོག་ཆགས་མེད་པར་ཡིད་ཆེས་ཀྱི་བར་དུ་བརྟག་གོ །དེ་བས་ན་ནན་ཏན་བརྟག་ཅེས་སྨོས་ཏེ། སྲོག་ཆགས་མེད་པར་ཡིད་ཆེས་ཤིང་ཐེ་ཚོམ་མེད་
ཀྱི་བར་དུ་བལྟའོ་ཞེས་བྱ་བའི་དོན་ཏོ། །ཅིའི་ཕྱིར་དེ་ལྟར་བརྟག་ཅེ་ན། དེའི་ཕྱིར་སྙིང་རྗེ་ཅན་གྱིས་ཞེས་བྱ་བ་སྨོས་ཏེ། རབ་ཏུ་བྱུང་བ་རྣམས་ནི་སེམས་ཅན་གྱི་སྡུག་བསྔལ་སེལ་བར་བྱེད་པའི་སྙིང་རྗེ་དང་ལྡན་པ་ཡིན་པས། དེའི་ཕྱིར་སེམས་ཅན་གྱི་གནོད་པ་བསལ་བའི་དོན་དུ་སྲོག་ཆགས་ཡོད་དམ་མེད་བརྟག་གོ །གལ་ཏེ་ཆུ་ལས་སྐྱེས་པའི་སྲོག་ཆགས་ནི་མེད་ཀྱི་སྦྲང་བུ་ལ་སོགས་པ་གློ་བུར་དུ་འོངས་པས་ཆུ་དེ་སྲོག་ཆགས་དང་ལྡན་པར་གྱུར་པ་དང༌། ཁ་ཟས་ཀྱི་ཁུ་བ་ལ་སོགས་པ་ལ་གློ་བུར་གྱི་སྲོག་ཆགས་ཡོད་པར་གྱུར་ན་དེ་དག་དོར་བར་ཇི་ལྟར་བྱ་སྙམ་པ་ལ་ཁུ་བ་རྣམས་རབ་ཏུ་བརྟགས་ཏེ་སྤྱད་པར་བྱ་ཞེས་བྱ་བ་སྨོས་ཏེ། ཆུ་བཙགས་པ་དང་ཁ་ཟས་ཀྱི་ཁུ་བ་ལ་གློ་བུར་དུ་འོངས་པའི་སྲོག་ཆགས་ཡོད་པར་གྱུར་ན་ཡང་ཡོད་དམ་མེད་ལེགས་པར་བརྟགས་ཏེ་སྤྱད་པར་བྱའོ། །དོར་བར་ནི་མི་བྱའོ། །ཐབས་ཇི་ལྟར་བྱ་ཞེ་ན། དེའི་ཕྱིར། སྲོག་ཆགས་ཡོད་ན་ལེགས་པར་བཙག །སྲོག་ཆགས་རྣམས་ལ་གནོད་མི་བྱ། །ཞེས་བྱ་བ་སྨོས་ཏེ། བཙགས་པ་དང་ཁ་ཟས་ཀྱི་ཁུ་བ་ལ་གློ་བུར་དུ་འོངས་པའི་སྲོག་ཆགས་ཡོད་ན་ལེགས་པར་མ་སྣད་པར་བཙགས་པར་རིག་པ་ནི་བཙག །ལག་པས་བསལ་བར་རིག་པ་ནི་ལེགས་པར་བསལ་ལ་སོ་སོའི་གནས་སུ་མ་སྣད་མ་ཤི་བར་བསྐྱལ་བར་བྱའོ། །དེ་ལ་ཆུ་གྲང་མོ་ལ་གནས་པའི་སྲོག་ཆགས་རྣམས་ཆུ་དྲོན་མོ་ལ་བསྐྱལ་ན་གནོད་པར་འགྱུར་བས་ཆུ་གྲང་མོ་ཉིད་དུ་བསྐྱལ་ལོ། །ཆུ་དྲོན་མོ་ལ་གནས་པའི་སྲོག་ཆགས་རྣམས་ཆུ་གྲང་མོ་ལ་བསྐྱལ་ན་གནོད་པར་འགྱུར་བས་ཆུ་དྲོན་མོ་ཉིད་དུ་བསྐྱལ་ལོ། །གལ་ཏེ་མ་བྱས་པར་སྲོག་ཆགས་དང་བཅས་པའི་ཆུ་འཐུངས་སམ། སྲོག་ཆགས་རྣམས་རང་རང་གི་གནས་མ་ཡིན་པར་བསྐྱལ་ཏེ། ཤི་བར་གྱུར་ན་སྲོག་ཆགས་ཀྱི་གྲངས་དུ་ཡོད་པའི་ཉེས་བྱས་ཀྱི་གྲངས་ཀྱང་དེ་སྙེད་ཅིག་འཐོབ་བོ། །ཆུ་བཙགས་ཏེ་བརྟགས་པ་དེ་ཡང་དེ་རིང་ལྟ་བུའི་ནང་པར་བརྟགས་ན། དེའི་ཕྱི་དེ་ཉིད་ཀྱི་ནང་པར་གྱི་བར་དུ་སྤྱད་པར་བྱར་རུང་ངོ༌། །ཆུ་རྣམ་པ་ལྔ་ནི་བདག་གིས་མ་བཙགས་མ་བརྟགས་ཀྱང་སྤྱད་དུ་རུང་བའི་ཆུ་སྟེ། ལྔ་གང་ཞེ་ན། ཁོ་ར་ཁོར་ཡུག་འདོམ་གང་དུ་བརྟགས་པའི་ཆུ་དང༌། ཁྲོན་པ་ལ་སོགས་པ་དང༌། དགེ་སློང་ཡོན་ཏན་ཅན་གྱི་ཆུ་དང༌། དགེ་
འདུན་གྱི་ཆུ་དང༌། ཡིད་ཆེས་པའི་ཆུའོ། །དེ་ལ་ཁོར་ཁོར་ཡུག་འདོམ་གང་དུ་བརྟགས་པའི་ཆུ་ནི་ལྟེང་ཀ་འམ་མཚེའུ་ལ་སོགས་པའི་དབུས་སུ་བུས་མོ་ནུབ་ཙམ་དུ་སོང་ལ་སྲོག་ཆགས་ཡོད་དམ་མེད་བརྟགས་ཏེ་མེད་པར་གྱུར་ན་འདོམ་གང་ཁོར་ཁོར་ཡུག་ཏུ་བརྟགས་པ་ཡིན་པར་སྤྱད་དུ་རུང་ངོ༌། །ཁྲོན་པ་ལ་སོགས་པའི་ཆུ་ནི་ཁྲོན་པ་དང་ལྟེང་ཀ་དང་རྫིང་ལ་སོགས་པར་ཉ་ཕྱིས་གང་གི་ཆུ་བླངས་ཏེ། སྲོག་ཆགས་ཡོད་དམ་མེད་བརྟགས་ཏེ་མེད་ན་ཉིན་ཞག་གཅིག་གི་བར་དུ་སྤྱད་དུ་རུང་ངོ༌། །དགེ་སློང་ཡོན་ཏན་ཅན་གྱི་ཆུ་ནི་དགེ་སློང་ཚུལ་ཁྲིམས་ལ་གནས་པ་སྡིག་པ་ལ་འཛེམ་པས་ཆུ་བཙགས་ཏ་བཙགས་པ་ལ་བདག་གིས་མ་བརྟགས་མ་བཙགས་པར་སྤྱད་དུ་རུང་ངོ༌། །དགེ་འདུན་གྱི་ཆུ་ནི་དགེ་འདུན་སྤྱིའི་ཆུ་ལྟ་བུ་བརྟགས་ནས་བཙགས་ཏེ་བཞག་པ་ལ་ནི་བདག་གིས་མ་བརྟགས་མ་བཙགས་ཀྱང་སྤྱད་དུ་རུང་ངོ༌། །ཡིད་ཆེས་པའི་ཆུ་ནི་བྲག་ཁ་འམ། རི་ཁ་གཟར་པོ་ནས་འབབ་པའི་ཆུ་འམ། སའི་འོག་ནས་གྱེན་དུ་རྡོལ་པའི་ཆུ་མིག་ལྟ་བུ་ལ་སྲོག་ཆགས་ཡོད་མི་སྲིད་པས་ཡིད་ཆེས་པའི་ཆུ་ཞེས་བྱ་སྟེ་སྤྱད་དུ་རུང་ངོ༌། །ཆུ་བཙགས་པའི་བསླབ་ཚིག་ནི་དགེ་སློང་མོས་པ་ཅན་གྱི་སྲོག་ཆགས་དང་བཅས་པའི་ཆུས་ཆག་ཆག་དང་དཀྱིལ་འཁོར་ལ་སོགས་བྱས་པ་ལས་བཅས་སོ། །དེའི་ཕྱིས་དགེ་སྦྱོང་གིས་ཆུ་ཚགས་ལྔ་ལས་གང་ཡང་རུང་བ་ཅིག་མེད་པར་གནས་སུ་མི་རུང་ངོ༌། །མེད་པར་གནས་ན་ཉེས་བྱས་སུ་འགྱུར་རོ། །ཆུ་ལ་དེ་ལྟར་བརྟགས་ཤིང་བཙགས་ནས་སྲོག་ཆགས་མེད་པར་བྱས་ཏེ་སྤྱད་ན། འོ་ན་རྩྭ་དང་ཤིང་ལ་སོགས་པ་ལ་སྲོག་ཆགས་ཡོད་ན་ཇི་ལྟར་སྤྱད་སྙམ་པ་ལ། དེའི་ཕྱིར། རྩ་དང་ལྕི་བ་ཤིང་ལ་སོགས། །དགོས་པ་གང་དང་གང་ཡང་རུང༌། །དེ་དག་སྲོག་ཆགས་མེད་པར་བྱ། །ཞེས་བྱ་བ་སྨོས་ཏེ། མལ་གྱི་འོག་ཏུ་གདིང་བའི་རྩ་ལ་སོགས་པ་དང༌། དཀྱིལ་འཁོར་དང་ཁང་པ་བཀྲུ་བའི་ལྕི་བ་དང༌། མ་བུད་པའི་ཤིང་དང༌། སོགས་པའི་སྒྲས་ནི་ས་ལ་སོགས་པའི་ཡང་བསྡུས་ཏེ། དགེ་སྦྱོང་གིས་སྤྱད་པར་བྱ་བའི་རྫས་གང་ཅི་ཡང་རུང་སྟེ་ཀུན་ལ་སྲོག་ཆགས་ཡོད་དམ་མེད་བརྟགས་ནས་སྲོག་ཆགས་ཡོད་ན་བཙགས་ལ་སྲོག་ཆགས་རྣམས་ཀྱང་རང་རང་གི་གནས་སུ་བདེ་བར་བསྐྱལ་ཏེ།
སྲོག་ཆགས་མེད་པར་བྱས་ནས་སྤྱད་པར་བྱའོ། །ཆུའི་སྐབས་སུ་བཤད་པ་རྣམས་ཀྱི་དོན་མདོར་བསྡུས་ཏེ་བསྟན་པའི་ཕྱིར། སྡོམ་པས་སྲོག་ཆགས་བསད་པ་བསྲུང༌། །ཞེས་བྱ་བ་སྨོས་ཏེ། དགེ་སྦྱོང་རྣམས་ནི་སྙིང་རྗེ་ཅན་ལ་ཁྲིམས་དང་ལྡན་པ་ཡིན་པས་ཅི་ནས་ཀྱང་སེམས་ཅན་ཆེ་ཕྲ་ཀུན་གྱི་བསད་པ་བསྲུང་སྟེ། སེམས་ཅན་གང་ཡང་མི་བསད་དོ། །ཞེས་བྱ་བའི་དོན་ཏོ། །སྟན་ཆུ་ས་དང་སོ་ཤིང་དང༌། །འདག་པའི་ཆལ་ཡང་སྟ་གོན་བྱ། །ལྷུང་བཟེད་བཀྲུ་ལ་སོགས་པ་དང༌། །བླ་མའི་དགོས་པ་ཐམས་ཅད་བྱ། །ཞེས་བྱ་བས་མཁན་པོ་དང་སློབ་དཔོན་གྱི་ལས་སུ་བསྒྲུབ་པ་བསྟན་ཏེ། དེ་ལྟར་བརྟགས་པ་དང་བཙགས་པའི་འོག་ཏུ། བླ་མའི་དགོས་པ་ཐམས་ཅད་བྱ། །ཞེས་སྦྱར་ཏེ། བླ་མ་ནི་མཁན་པོ་དང་སློབ་དཔོན་ལ་བྱ་སྟེ། དེའི་དགོས་པ་ནི་མཁན་པོ་དང་སློབ་དཔོན་གྱི་ལས་སུ་བྱ་བ་རྣམས་ཉམས་སུ་བླང་སྟེ་བསྒྲུབ་བོ་ཞེས་བྱ་བའི་དོན་ཏོ། །ཉམས་སུ་བླང་བ་དེ་དག་ཀྱང་གང་ཞེ་ན། དེ་བསྟན་པའི་ཕྱིར། སྟན་ཆུ་ས་དང་སོ་ཤིང་དང༌། །འདག་པའི་ཆལ་ཡང་སྟ་གོན་བྱ། །ཞེས་བྱ་བ་སྨོས་ཏེ། མཁན་པོ་དང་སློབ་དཔོན་གྱི་ལས་སུ་བྱ་བ་ནི་ནང་བར་མཁན་པོ་དང་སློབ་དཔོན་གང་དུ་ཁ་གདོང་བཀྲུ་བའི་གནས་སུ་གདན་གདིང་བ་དང༌། བཀྲུ་བའི་ཆུ་དང་སོ་ཤིང་དང༌། འདག་པ་ལི་ཆལ་ལ་སོགས་པ་སྟ་གོན་བྱ་སྟེ། གཤེགས་པ་དང༌། བཤང་གཅི་བྱེད་པའི་གནས་སུ་ས་དང་འདབ་མ་དག་ཀྱང་སྟ་གོན་བྱས་ཏེ་བཞག་གོ །དེ་ཙམ་ཞིག་བྱས་པས་ཆོག་གམ་ཞེ་ན། མི་ཆོག་པར་བསྟན་པའི་ཕྱིར། ལྷུང་བཟེད་བཀྲུ་ལ་སོགས་པ་དང༌། །ཞེས་བྱ་བ་སྨོས་ཏེ། འདིར་མཁན་པོ་དང་སློབ་དཔོན་གྱི་ལྷུང་བཟེད་བཀྲུའོ། །སོགས་པའི་སྒྲས་ནི་ཆོས་གོས་བཀྲུ་ཞིང་བཙེམ་པ་དང་གནས་བྱི་དོར་བྱ་བ་ལ་སོགས་པ་ལས་སུ་བྱ་བ་ཐམས་ཅད་བྱའོ། །དེ་ནས་དུས་རིག་ཕྱག་བྱ་སྟེ། །དེ་བཞིན་གུས་པར་ཐལ་སྦྱར་ནས། །ཟས་བཟའ་བྱ་ཞེས་བླ་མ་ལ། །བརྟུལ་ཞུགས་ཅན་གྱིས་དེ་ལྟར་ཞུ། །ཞེས་བྱ་བས་ཞུས་ནས་ཟས་བཟའ་བ་བསྟན་ཏེ། དེ་ནས་ཞེས་བྱ་བས་ནི་བླ་མའི་དགོས་པ་ཐམས་ཅད་བྱས་པའི་འོག་ཏུ་ཞེས་བྱ་བའི་དོན་ཏོ། །དུས་རིག་ཕྱག་བྱས་ལ་དགེ་སློང་རྣམས་ཀྱི་ཟས་བཟའ་བའོ། །དུས་ནི་སྐྱ་རེངས་ཤར་བ་ནས་བརྩམས་ཏེ། འཛམ་བུའི་གླིང་གི་ཉི་མ་དྲོས་མན་ཆད་དེ། དེའི་བར་དུ་ཟས་
བཟའ་བར་གནང་བའི་དུས་རིག་ནས་ཞེས་བྱའོ། །ཕྱག་བྱས་ཏེ། དེ་བཞིན་གུས་པས་ཐལ་སྦྱར་ནས། །ཞེས་བྱ་བ་ལ་མཁན་པོ་འམ་སློབ་དཔོན་ལ་ཕྱག་བྱས་ཏེ། དེ་བཞིན་ནང་པར་སྔར་ཞུས་པ་བཞིན་དུ་ལུས་ཀྱིས་མ་གུས་པ་རྐང་པ་བརྐྱང་བ་དང༌། ལག་པ་བརྐྱང་བ་ལ་སོགས་པ་བྱེད་པ་དང༌། ངག་གིས་མ་གུས་པ་རྟ་གད་བྱེད་པ་ལ་སོགས་པ་བཏང་ལ། ལུས་དང་ངག་ཞི་བ་དང་དུལ་བར་བྱ་སྟེ། ཐལ་མོ་སྦྱར་ལ་འཚལ་མ་འཚལ། །ཞེས་བླ་མ་མཁན་པོ་དང་སློབ་དཔོན་ལ་བརྟུལ་ཞུགས་ཅན་དེ་དགེ་སློང་གིས་དེ་ལྟར་ཞུའོ། །ལག་པ་བཀྲུས་ནས་ཚུལ་བཞིན་དུ།། དེ་ནི་མི་སྨྲ་ཚོད་རིག་བྱ། །ཞེས་བྱ་བས་སྦྱོར་བ་ཕུན་སུམ་ཚོགས་པ་བསྟན་ཏེ། ལག་པ་བཀྲུས་ནས་ཞེས་བྱ་བ་ནི་ལག་པ་དང་ལྷུང་བཟེད་གཉིས་ཀ་བཀྲུས་ཞེས་བྱ་བའི་དོན་ཏོ། །ཚུལ་བཞིན་དུ་ཞེས་བྱ་བས་ནི་ཟས་བཟའ་བའི་ཚེ་གཡས་གཡོན་དུ་མི་བལྟའོ། །ཁ་ཟས་འབྲིམ་པ་ལ་མི་བལྟའོ། །ཧ་ཅང་ཁམ་ཆེར་མི་ཟའོ། །དེ་ནི་མི་སྣ་ཚོད་རིག་བྱ། །ཞེས་བྱ་བ་ནི་ཟས་ཟ་བའི་ཚེ་གད་མོ་མི་བགད་དོ། །གཏམ་མི་བྱའོ། །རྐན་སྒྲ་མི་གཏོག་གོ །ཅག་ཅག་མི་བྱའོ། །ཚོད་རིག་ཅེས་བྱ་བ་ནི་ཧ་ཅང་མང་དུ་མི་བཟའ་ལ། ཧ་ཅང་ཉུང་དུ་ཟོས་ན་ཡང་དགེ་བ་བྱེད་མི་ནུས་པས་ཅི་ཙམ་གྱི་དགེ་བ་བྱེད་པ་དེ་ཙམ་གྱི་ཚོད་དེ་ཙམ་ཞིག་བཟའོ། །བྲུ་བའི་ནད་ལས་བཟློག་པའི་ཕྱིར། །བཟའོ་སྙམ་པའི་སེམས་ཀྱིས་བཟའ། །ཞེས་བྱ་བས་བསམ་པ་ཕུན་སུམ་ཚོགས་པས་བཟའ་བར་བྱ་བ་བསྟན་ཏེ། འདི་ལྟར་ཟས་ཟ་བའི་ཚེ་སྟོབས་ཆེ་བ་དང་གཟུགས་མཛེས་པར་འདོད་པའི་བསམ་པས་ཟོས་ན་ནི་ཟས་ཟོས་པ་དེ་ཉིད་མི་དགེ་བར་འགྱུར་རོ། །ཟས་མ་ཟོས་ན་ལུས་ཉམ་ཆུང་བས་དགེ་བ་བྱེད་མི་ནུས་པའི་ཕྱིར་དགེ་བ་བྱེད་པའི་དོན་དུ་ཟས་བཟའོ་སྙམ་པའི་སེམས་ཀྱིས་ཟས་ཟོས་ན་ཟས་ཟོས་པ་དེ་ཉིད་དགེ་བར་འགྱུར་རོ། །དེ་གཉིས་གང་དུ་ཡང་མ་གཏོགས་པར་ཁ་ཟས་བཟའོ་སྙམ་སྟེ་ཟས་ཟོས་པ་དེ་ཉིད་ལུང་མ་བསྟན་དུ་འགྱུར་རོ། །དེ་བས་ན་ཟས་ཟ་བའི་ཚེ་ཡང་ཟས་མ་ཟོས་ན་བཀྲེས་པའི་ནད་ཀྱིས་འདེབས་སོ། །བཀྲེས་པའི་ནད་ཀྱིས་བཏབ་ན་དགེ་བ་བྱེད་མི་ནུས་པས། ཁ་ཟས་ཟོས་ལ་བཀྲེས་པའི་ནད་བཟློག་ལ་དགེ་བ་བྱའོ་སྙམ་པའི་བསམ་བས་ཟས་བཟའ་བར་བྱ་སྟེ། དེ་ལྟ་བུའི་
བསམ་པ་བཟང་པོས་ཟོས་ན་ཁ་ཟས་ཟོས་པ་དེ་དགེ་བར་འགྱུར་རོ། །ཟོས་ཤིང་དེ་བཞིན་འཐུངས་པ་དང༌། །རུང་བའི་ཆུ་ཡིས་དེ་འོག་ཏུ། །སྦྱིན་པ་ཡང་དག་འཕེལ་བྱའི་ཕྱིར། །སྦྱིན་པའི་ཚིགས་བཅད་གཉིས་ཤིག་བརྗོད། །ཅེས་བྱ་བས་བསོད་ནམས་བསྔོ་བ་བསྟན་ཏེ། ཟོས་ཤིང་ཞེས་བྱ་བས་ནི་བཟའ་བ་ལྔ་ཟོས་ཤིང་བཅའ་བ་ལྔ་འཆོས་སོ། །དེ་ལ་བཟའ་བ་ནི་ཁ་ཟས་ལ་བྱའོ། །བཅའ་བ་ནི་སྤྱན་གཟིགས་ལ་བྱའོ། །དེ་བཞིན་འཐུངས་པ་དང་ཞེས་བྱ་བས་ནི་བཏུང་བར་བྱ་བ་འཐུངས་པའོ། །རུང་བའི་ཆུ་ཡིས་ཞེས་བྱ་བ་ནི་བཙགས་ཤིང་བརྟགས་པའི་ཆུས་ལག་པ་དང་ཁ་བཀྲུས་ལ། དེའི་འོག་ཏུ་ལྷུང་བཟེད་ཀྱང་དག་པར་བཀྲུ་བར་བྱའོ། །དེའི་འོག་ཏུ། སྦྱིན་པ་ཡང་དག་འཕེལ་བྱའི་ཕྱིར། །སྦྱིན་པའི་ཚིགས་བཅད་གཉིས་ཤིག་བརྗོད། །ཅེས་བྱ་བ་ལ། ལག་པ་དང་ལྷུང་བཟེད་བཀྲུས་པའི་འོག་ཏུ་སྦྱིན་པའི་ཡོན་བདག་གི་སྨོན་ལམ་བདག་དང་གཞན་ལ་གནོད་པར་འགྱུར་བ་བཟློག་སྟེ། སྦྱིན་པའི་འབྲས་བུ་ལྷ་དང་མིའི་ལུས་ཐོབ་པའི་ལོངས་སྤྱོད་ཆེན་པོ་ཐོབ་པར་བྱ་བའི་ཕྱིར་སྦྱིན་པའི་ཡོན་བདག་གི་དོན་དུ་ཚིགས་སུ་བཅད་པ་གཅིག་བཀླགས་པ་དང༌། ཀླུའི་རྒྱལ་པོ་དགའ་བོ་དང༌། ཉེ་དགའ་བོའི་དོན་དུ་ཚིགས་སུ་བཅད་པ་གཅིག་བཀླགས་ཏེ་དེ་ལྟར་ཚིགས་སུ་བཅད་པ་གཉིས་ཤིག་གདོན་ཏོ། །མན་ངག་ཡོད་ན་བསམ་གཏན་བྱ། །རབ་ཏུ་འབད་དེ་བཀླག་པར་བྱ། །སྡོམ་དང་ཆོ་ག་མཁས་པ་དང༌། །བསྒྲུབ་པ་ལ་ནི་བརྩོན་པར་བྱ། །ཞེས་བྱ་བས་དགེ་བ་བྱ་བ་བསྟན་ཏེ། དེ་རྣམ་པ་བཞི་ཡོད་དེ་བསམ་གཏན་བྱ་བ་དང༌། བཀླག་པ་དང༌། ལྟུང་བ་དང༌། མི་ལྟུང་བ་ལ་མཁས་པ་དང༌། ཚུལ་ཁྲིམས་མ་ཉམས་པར་བསྲུང་བར་བྱའོ། །མན་ངག་ཡོད་ན་བསམ་གཏན་བྱ། །ཞེས་བྱ་བས་བསམ་གཏན་བྱ་བར་བསྟན་ཏེ། དེ་ལ་ཡང་གང་ཟག་རྣམ་པ་བཞི་ཡོད་དེ། འདོད་ཆགས་ལ་སྤྱོད་པའི་གང་ཟག་དང༌། ཞེ་སྡང་ལ་སྤྱོད་པའི་གང་ཟག་དང༌། གཏི་མུག་ལ་སྤྱོད་པའི་གང་ཟག་དང༌། རྣམ་པར་རྟོག་པ་ལ་སྤྱོད་པའི་གང་ཟག་གོ །དེ་ལ་འདོད་ཆགས་ལ་སྤྱོད་པའི་གང་ཟག་གིས་ནི་མི་ གཙང 
་བ་བསྒོམ་མོ། །ཞེ་སྡང་ལ་སྤྱོད་པའི་གང་ཟག་གིས་ནི་སེམས་ཅན་ཐམས་ཅད་གཉེན་བཤེས་དང་ཉེ་དུ་བཞིན་དུ་སྡུག་པ་དང་ཕངས་པར་བསྒོམ་མོ། །གཏི་མུག་ལ་
སྤྱོད་པའི་གང་ཟག་གིས་ནི་རྟེན་ཅིང་འབྲེལ་པར་འབྱུང་བ་ལུགས་བཞིན་འབྱུང་བ་དང་ལུགས་ལས་བཟློག་པའི་མཚན་ཉིད་བསྒོམ་མོ། །རྣམ་པར་རྟོག་པ་ལ་སྤྱོད་པའི་གང་ཟག་གིས་ནི་དབུགས་ཕྱི་ནང་དུ་རྒྱུ་བ་བསྒོམ་མོ། །སྒོམ་པ་འདི་དག་ནི་བདུད་རྩིའི་སྒོ་ཞེས་བྱ་སྟེ། མྱ་ངན་ལས་འདས་པ་ཐོབ་པའི་རྒྱུ་ཡིན་ནོ། །གལ་ཏེ་བསམ་གཏན་འདི་དག་ལ་སོགས་པ་མན་ངག་གང་མཁན་པོ་དང་སློབ་དཔོན་ལ་ཐོས་ནས་ཟས་ཟོས་པའི་འོག་ཏུ་བསམ་གཏན་བྱའོ། །རབ་ཏུ་འབད་དེ་ཀླག་པར་བྱེད། །ཅེས་བྱ་བས་བཀླག་པར་བྱ་བ་བསྟེན་ཏེ། གལ་ཏེ་བསམ་གཏན་བསྒོམ་པའི་མན་ངག་མེད་ན་བཀླག་པར་བྱ་སྟེ་ཁ་ཏོན་བྱ་བའམ། དྷརྨ་གླེགས་བམ་ལ་བཀླག་པར་བྱ་བའོ། །དེ་ལྟར་ཀློག་པའི་དུས་ན་ཡང་རབ་ཏུ་འབད་དེ་བཀླག་པར་བྱའོ། །དཀྱིལ་འཁོར་དང་མཆོད་པ་ལ་སོགས་པ་བྱས་ལ་སེམས་མ་ཡེངས་པར་རྩེ་གཅིག་ཏུ་བསྡུས་ནས་ལྷ་ཀླུ་ལ་སོགས་པ་ལ་ཆོས་ཀྱི་སྦྱིན་པ་བྱའོ། །ཧ་ཅང་ཡང་མི་དྲག་ཧ་ཅང་ཡང་མི་དལ་བར་རེན་པར་བྱ་སྟེ། ཟུར་ཕྱིན་པར་བཀླག་གོ །བཀླགས་པའི་རྗེས་ལ་ཡང་བསོད་ནམས་བདག་དང་སེམས་ཅན་གྱི་དོན་དུ་བསྔོའོ། །སྡོམ་དང་ཆོ་ག་མཁས་པ་དང༌། །ཞེས་བྱ་བས་ལྟུང་བ་དང་མི་ལྟུང་བར་བྱ་བ་ལ་མཁས་པར་བྱ་བ་བསྟན་ཏེ། སྡོམ་པའི་སྒྲ་ནི་ཕས་ཕམ་པ་བཞི་ལ་བྱ་ལ། ཆོ་གའི་སྒྲ་ནི་སྦོམ་པོ་དང་ཉེས་བྱས་ལ་སོགས་པ་བསླབ་ཚིག་ཕྲ་མོ་དང་དགེ་སྦྱོང་གི་བྱ་བ་རྣམས་ལ་བྱ་སྟེ། མཁས་པ་ཞེས་བྱ་བས་ནི་འདི་ཙམ་གྱི་ཕས་ཕམ་པར་འགྱུར་ལ། འདི་ཙམ་གྱིས་ཕས་ཕམ་པར་མི་འགྱུར་ཞེས་ཤེས་པར་བྱ་བ་དང། འདི་དག་ནི་ཉེས་བྱས་ཡིན། འདི་དག་ནི་བདག་གི་ལས་སུ་བྱ་བ་ཡིན། འདི་དག་ནི་བདག་གི་ལས་སུ་བྱ་བ་མ་ཡིན་ནོ་ཞེས་ཤེས་པར་བྱའོ། །བསྒྲུབ་པ་ལ་ནི་བརྩོན་པར་བྱ། །ཞེས་བྱ་བས་ཚུལ་ཁྲིམས་ལྷུར་ལེན་པ་བསྟན་ཏེ། ཕས་ཕམ་པ་དང་སྦོམ་པོ་དང་ཉེས་བྱས་ལ་སོགས་པ་མི་འབྱུང་བར་བསྲུང་བ་ཉིད་བསྒྲུབ་པར་བྱ་བ་ལ་བརྩོན་པ་ཡིན་ནོ། །ད་ནི་ཕས་ཕམ་པའི་གནས་འཆད་དེ། དེ་ལ་ཕས་ཕམ་པའི་དོན་ཅི་ཞེ་ན། སངས་རྒྱས་བཅོམ་ལྡན་འདས་ནི་ཆོས་ཀྱི་རྒྱལ་པོ། །བདག་ནི་ཆོས་ཀྱི་རྒྱལ་པོའི་རྒྱལ་ཚབ་བོ། །ཚུལ་ཁྲིམས་དང་ཏིང་ངེ་འཛིན་དང་ཤེས་རབ་ལ་སོགས་པ་བྱང་
ཆུབ་ཀྱི་ཕྱོགས་ཀྱི་ཆོས་རྣམས་ནི་བདག་གི་ཉོན་མོངས་པ་ཐམས་ཅད་ཞི་བར་བྱ་བའི་གྲོགས་སམ་མིག་ལྟ་བུ་ཡིན་ཏེ། བྱང་ཆུབ་ཀྱི་ཕྱོགས་ཀྱིས་ཉོན་མོངས་པ་བཅོམ་ནས་ཆོས་ཀྱི་རྒྱལ་པོའི་གནས་ཐོབ་པར་བྱ་བ་ཡིན་པ་ལས། འདོད་ཆགས་ལ་སོགས་པ་ཉོན་མོངས་པའི་དབང་དུ་གྱུར་པ་རྣམས་ཀྱིས་ཚུལ་ཁྲིམས་ལ་སོགས་པ་བྱང་ཆུབ་ཀྱི་ཕྱོགས་ཀྱི་ཆོས་རྣམས་མེད་པར་བྱས་པས་བདག་གིས་ཆོས་ཀྱི་རྒྱལ་པོའི་གནས་མྱ་ངན་ལས་འདས་པ་ཐོབ་པར་བྱ་བའི་སྐལ་བ་མེད་པ་ལ་ཕས་ཕམ་པ་ཞེས་པ་བྱ་སྟེ། ཉོན་མོངས་པའི་གནས་སུ་གྱུར་ཞེས་བྱ་བའི་དོན་ཏོ། །དེ་ལ་ཕས་ཕམ་པ་རྣམ་པ་བཞི་སྟེ། སྲོག་གཅོད་པ་དང༌། མ་བྱིན་པར་ལེན་པ་དང༌། མི་ཚངས་པར་སྤྱོད་པ་དང༌། བརྫུན་དུ་སྨྲ་བའོ། །ཕས་ཕམ་པ་འབྱུང་བའི་རྒྱུ་ནི་རྣམ་པ་གསུམ་སྟེ། ཞེ་སྡང་དང༌། འདོད་ཆགས་དང༌། གཏི་མུག་གོ །དེ་ལ་ཞེ་སྡང་ལས་ནི་སྲོག་གཅོད་པའི་ཕས་ཕམ་པ་འབྱུང་ངོ༌། །འདོད་ཆགས་ལས་ནི་མ་བྱིན་པར་ལེན་པ་དང་མི་ཚངས་པར་སྤྱོད་པའི་ཕས་ཕམ་པ་འབྱུང་ངོ༌། །གཏི་མུག་ལས་ནི་བརྫུན་དུ་སྨྲ་བའི་ཕས་ཕམ་པ་འབྱུང་ངོ༌། །བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ལ་ལོ་བཅུ་གཉིས་ཀྱི་བར་དུ་ལྟ་བ་མཉམས་སྐྱོན་མེད་པས། དེས་ན་བཅོམ་ལྡན་འདས་ཀྱིས་འདིར་མདོར་བསྡུས་ཏེ། ཉན་ཐོས་རྣམས་ལ་སོ་སོར་ཐར་པའི་མདོ་བཤད་དེ་བསྟན་པ། སྡིག་པ་ཐམས་ཅད་མི་བྱ་སྟེ། །དགེ་བ་ཕུན་སུམ་ཚོགས་པར་བྱ། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པའོ། །ལུས་ཀྱི་སྡོམ་པ་ལེགས་པ་སྟེ། །ངག་གི་སྡོམ་པ་ལེགས་པ་ཡིན། །ཡིད་ཀྱི་སྡོམ་པ་ལེགས་པ་སྟེ། །ཐམས་ཅད་དུ་ནི་སྡོམ་པ་ལེགས། །ཀུན་དུ་བསྡམས་པའི་དགེ་སློང་ནི། །སྡུག་བསྔལ་ཀུན་ལས་རབ་ཏུ་གོལ། །ངག་རྣམས་བསྲུངས་ཤིང་ཡིད་ཀྱང་རབ་བསྡམས་ཏེ། །ལུས་ཀྱིས་མི་དགེ་བ་དག་མི་སྤྱོད་ཅིང༌། །ལས་རྣམས་གསུམ་པོ་འདི་དག་རབ་སྦྱངས་ནས། །དྲང་སྲོང་གསུང་བའི་ལམ་ནི་ཐོབ་པར་འགྱུར། །ཞེས་གསུངས་པས་སློབ་པར་ཟད་དོ། །ལོ་བཅུ་གཉིས་འདས་ནས་བཅོམ་ལྡན་འདས་ཀྱི་བསྟན་པ་ལ་སྐྱོན་དང་ཕན་འབྱུང་ངོ༌། །དེ་ལ་དང་པོ་སྲོག་གཅོད་པའི་ཕས་ཕམ་པ་བཤད་དེ། དེ་ཡང་སངས་རྒྱས་བཅོམ་ལྡན་འདས་ཡུལ་བྲི་ཛིའི་ལྗོངས་ཆུ་བོ་དགའ་སྐྱེད་ཀྱི་འགྲམ་ཐང་ཤིང་གི་ནགས་སྟུག་བོ་ན་
བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་གི་དགེ་འདུན་ལ་མི་
གཙང ་བ་བསྒོམ་དུ་བཅུག་ནས་དགེ་སློང་དག་མི་ གཙང ་བ་ལ་བརྟེན་ནས་བསྒོམ་པ་ལན་མང་དུ་བྱས་ནས་འབྲས་བུ་ཆེ་ཞིང་ལེགས་པ་ཆེན་པོར་འགྱུར་རོ་ཞེས་བསྔགས་པ་བརྗོད་པས། དགེ་སློང་རྣམས་ཀྱིས་མི་ གཙང ་བ་བསྒོམས་པས་ལུས་རྣག་ཅན་འདིས་ཡིད་བྱུང་སྒྱིད་ལུག་སྟེ། རྣམ་པར་སྨོད་ཅིང་མཚོན་གྱིས་ཀྱང་འདེབས། དུག་ཀྱང་ཟ། འགེགས་ཀྱང་འགེག །གཡང་དུ་ཡང་མཆོང༌། དགེ་སློང་གིས་ཀྱང་དགེ་སློང་ཡང་གསོད། དེ་ནས་དགེ་སློང་ཞིག་ལུས་ལ་རྣམ་པར་སྨོད་ཅིང་རི་དགས་དབྱིག་པ་ཅན་དགེ་སྦྱོང་སྲུང་བ་ལ་འདི་སྐད་ཅེས་སྨྲའོ། །བཞིན་བཟངས་ང་སོད་ཅིག་དང་ཆོས་གོས་ཀྱང་ཁྱོད་ཀྱིར་འགྱུར་རོ། །དེ་ནས་དབྱིག་པ་ཅན་གྱིས་དེའི་སྲོག་བཅད་ནས་རལ་གྲི་ཁྲག་ཅན་ཆུ་བོ་དགའ་སྐྱེད་ལ་འཁྲུའོ། །དེ་ནས་ལྷའི་བུའི་བདུད་ཅིག་ཆུ་བོའི་རྒྱུན་ལ་མ་རེག་ཙམ་དུ་འདུག་ནས་དབྱུག་པ་ཅན་ལ་ལེགས་པའི་བསོད་ནམས་མང་དུ་སྤེལ་ལོ། །སེམས་ཅན་ནོ་ཞེས་བསྟོད་པས་དབྱིག་པ་ཅན་ཡང་ཆོས་གོས་དང་ལྷུང་བཟེད་འདོད་པས་བསོད་ནམས་བྱའོ་སྙམ་ནས་རལ་གྲི་རྣོན་པོ་མཆན་དུ་བཅུག་སྟེ། གཙུག་ལག་ཁང་ནས་འཆག་སའི་བར་དུ་གཅིག་ནས་གཅིག་ཏུ་དགེ་སློང་དྲུག་ཅུའི་བར་དུ་སྲོག་བཅད་ནས་དགེ་སློང་རྣམས་ཉུང་ཞིང་འགྲིབས་པར་གྱུར་ཏོ། །དེ་ནས་བཅོམ་ལྡན་འདས་གསོ་སྦྱོང་བཅོ་ལྔ་པའི་ཚེ་དགེ་སློང་གི་དགེ་འདུན་ཐམས་ཅད་ལ་གཟིགས་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། རྒྱུ་རྐྱེན་གང་གིས་ད་ལྟ་ངའི་དགེ་སློང་ཉུང་ཞིང་འགྲིབས་པར་གྱུར་ཞེས་སྨྲས་པ་དང་ཇི་ལྟ་བུར་གྱུར་པ་རྒྱས་པར་གསོལ་ཏོ། །བཀའ་སྩལ་པ། ཀུན་དགའ་བོ་དགེ་སློང་གསོད་དམ། བཙུན་པ་འགུམས་ལགས་སོ། །བཅོམ་ལྡན་འདས་ཀྱིས་དགེ་སློང་མ་ཡིན་ཞེས་རྣམ་གྲངས་དུ་མས་སྨད་ནས། ལེགས་པ་བཅུ་གཟིགས་པའི་ཕྱིར་བསླབ་པའི་གནས་བཅས་སོ། །གླེང་གཞི་ནི་ཡུལ་བྲི་ཛི། གང་ཟག་ནི་དབྱིག་པ་ཅན་དགེ་སྦྱོང་སྲུང༌། ཉོན་མོངས་པ་ནི་མི་བཟོད་པ། ཉེས་པ་ནི་གསོད་པ་དང༌། དངོས་པོ་ནི་མིར་ཆགས་པའོ། །སྲོག་གཅོད་པའི་ཕས་ཕམ་པ་འདི་རྣམ་པ་གསུམ་གྱིས་བསྟན་ཏེ། ཕས་ཕམ་པའི་གནས་བསྟན་པ་དང༌། སྦོམ་པོའི་གནས་བསྟན་པ་
དང། ཉེས་བྱས་ཀྱི་གནས་བསྟན་པའོ། །ཕས་ཕམ་པའི་གནས་བསྟན་པ་ལ་གསུམ་སྟེ། བདག་གིས་བསད་པ་དང༌། གཞན་གསོད་དུ་བཅུག་པ་དང༌། ཐབས་ཀྱིས་བསད་པའོ། །བརྟུལ་ཞུགས་གནས་སེམས་མ་ཉམས་པས། །ཆེད་དུ་བསམས་ཏེ་མ་ནོར་བར། །མི་གཞན་བདག་གམ་གཞན་རྣམས་ཀྱིས། །བསད་ན་བརྟུལ་ཞུགས་ཉམས་པར་འགྱུར། །ཞེས་བྱ་བ་བདག་གིས་བསད་པ་དང༌། གཞན་གྱིས་བསད་པ་བསྟན་ཏེ། བརྟུལ་ཞུགས་གནས་ཞེས་བྱ་བས་བསླབ་པ་ཉམས་པར་ཡང་མ་བྱས། བསླབ་པ་ཕུལ་ཡང་མ་ཕུལ་བ་ལ་བརྟུལ་ཞུགས་གནས་ཞེས་བྱའོ། །འདིར་རྣམ་པ་བཞི་བཞག་གོ །བསླབ་པ་ཕུལ་ལ་ཉམས་པར་མ་བྱས་པ་དང༌། བསླབ་པ་ཉམས་པར་བྱས་ལམ་ཕུལ་བ་དང༌། བསླབ་པ་ཉམས་པར་ཡང་བྱས་ལ་ཕུལ་བ་དང༌། བསླབ་པ་ཉམས་པར་ཡང་མ་བྱས་ཕུལ་ཡང་མ་ཕུལ་ལོ། །དེ་ལ་བསླབ་པ་ཕུལ་ལ་ཉམས་པར་མ་བྱས་པ་ནི་འདི་ལྟར་དགེ་སྦྱོང་ཆགས་པར་གྱུར་ཏམ་མི་དགའ་འམ། སླར་འབབ་འདོད་དམ། དགེ་སྦྱོང་དོན་དུ་མི་གཉེར་བས་དགེ་སྦྱོང་གི་གན་དུ་སོང་ནས། ཚེ་དང་ལྡན་པ་དགོངས་ཤིག་བདག་མིང་འདི་ཞེས་བགྱི་བ་བསླབ་པར་འབུལ་ལོ་ཞེས་ཟེར་བ་དང༌། སངས་རྒྱས་དང་ཆོས་དང་དགེ་འདུན་འབུལ་བའམ། མཁན་པོ་དང་སློབ་དཔོན་འབུལ་ལོ་ཞེས་ཟེར་ན་བསླབ་པ་ཕུལ་ལོ་ཞེས་བྱའོ། །བདག་ཁྱིམ་པ་ཡིན་ནོ་ཞེ་འམ། དགེ་བསྙེན་ཡིན་ནོ་ཞེ་འམ། མཚམས་མེད་པ་ལྔ་བྱས་པའམ། མུ་སྟེགས་ཅན་ནམ། ཚངས་པ་མཚུངས་པར་སྤྱོད་པ་ཁྱེད་དང་ལྷན་ཅིག་འགྲོགས་སུ་མ་དགོངས་སོ་ཞེས་ཟེར་ན་བསླབ་པ་ཕུལ་བ་ཡིན་ཏེ། བསླབ་བ་ཉམས་པར་བྱས་པ་མ་ཡིན་ནོ། །ཇི་ལྟར་བསླབ་པ་ཉམས་པར་ནི་བྱས་ལ་བསླབ་པ་ཕུལ་བ་མ་ཡིན་ཞེ་ན། འདི་ལྟར་དགེ་སྦྱོང་ཆགས་ཤིང་མི་དགའ་སྟེ་འབབ་བར་འདོད་ནས་མཁྱེན་པར་མཛོད་ཅིག་ཚངས་པར་སྤྱད་པས་རབ་ཏུ་དབེན་པ་དང༌། དགོན་པ་ནི་སྤྱད་དཀའོ། །ཕམ་བུ་སྲིང་བུ་ནུ་མཁན་པོ་དྲན་ནོ། །བདག་བཟོ་སློབ་བོ། །བདག་དགའ་བའི་རིགས་རྣམས་ལ་གཏོད་ཅིག །བབས་པའི་རྟགས་སྨྲས་ཀྱང་བསླབ་པ་འབུལ་ཞེས་མ་སྨྲས་ན་བསླབ་པ་ཉམས་པར་བྱས་ཀྱི་ཕུལ་བ་མ་ཡིན་ནོ། །ཇི་ལྟར་བསླབ་པ་ཉམས་པར་ཡང་བྱས་ཕུལ་བ་ཡང་ཡིན་ཞེ་ན། དགེ་སྦྱོང་
ཆགས་ཤིང་འབབ་པར་འདོད་པས་ཚངས་པར་སྤྱོད་པ་དང་དགོན་པ་ནི་དཀའོ། །ཕ་དང་མ་དང་མཁན་པོ་ལ་སོགས་པ་དྲན་ན་བདག་དགའ་བའི་རིགས་ལ་གཏོད་ཅིག་ཅེས་སྨྲ་ཞིང་ཚིག་གིས་གོ་བར་བསླབ་པ་འབུལ་ཞེས་ཟེར་ན་བསླབ་པ་ཉམས་པར་ཡང་བྱས་པ་བསླབ་པ་ཕུལ་བ་ཡང་ཡིན་ནོ། །ཇི་ལྟར་བསླབ་པ་ཉམས་པར་ཡང་མ་བྱས་ལ་ཕུལ་བ་ཡང་མ་ཡིན་ཞེ་ན། ཉམས་པའི་ཚིག་ཀྱང་མ་སྨྲས་འབུལ་བའི་ཚིག་ཀྱང་མ་སྨྲས་པའོ། །དེ་ལ་བསླབ་པ་མ་ཕུལ་ཡང་ཉམས་པར་བྱས་པས་ཀྱང་བསླབ་པ་ཉམས་པ་དང་ཕུལ་བར་འགྱུར་རོ། །བསླབ་པ་མ་ཕུལ་བ་ལས་ཉམས་པར་བྱས་པ་དང༌། བསླབ་པ་ཕུལ་ཡང་མ་ཕུལ་ལ་ཉམས་པར་ཡང་མ་བྱས་པས་ནི་ཕུལ་བར་མི་འགྱུར་རོ། །སེམས་ཉམས་པས་ཞེས་བྱ་བ་ལ་སེམས་ཉམས་པ་ནི་སྨྱོས་ཏེ་མི་དྲན་པ་ལ་བྱ་སྟེ། བདག་སྨྱོས་ཀྱང་མ་སྨྱོས་ཏེ་དྲན་བཞིན་དུ་བསད་ན་ཕས་ཕམ་པར་འགྱུར་རོ། །སྨྱོས་ཏེ་མི་དྲན་པར་འགྱུར་ནས་བསད་ན་ནི་ཕས་ཕམ་པར་མི་འགྱུར་རོ། །ཆེད་དུ་བསམས་ཏེ་ཞེས་བྱ་བ་ལ་བསད་པར་ནི་མ་བསམས་ཀྱི་རྩེད་མོ་ལ་སོགས་པ་བྱེད་བྱེད་དེ་ཤི་ནས་ཕས་ཕམ་པར་མི་འགྱུར་གྱི། ཆེད་དུ་གསད་པར་བསམས་ཏེ་ཤི་ནས་ཕམ་པར་འགྱུར་རོ། །མ་ནོར་བ་ཞེས་བྱ་བ་ལ་ཡང་མི་རྣམ་པ་གསུམ་བསད་ན་ཕས་ཕམ་པར་འགྱུར་བ་ལས། བདག་ཀྱང་མིའི་རྒྱུད་དུ་གཏོགས་པ་ཡིན་ཏེ། བདག་གིས་བདག་བསད་པ་ན་ཕས་ཕམ་པར་མི་འགྱུར་གྱི་བདག་གིས་གཞན་བསད་ན་ཕས་ཕམ་པར་འགྱུར་རོ། །བདག་གིས་གཞན་བསད་ན་བརྟུལ་ཞུགས་ཉམས་པར་འགྱུར་ཞེས་བྱ་བར་སྦྱར་ཏེ། བདག་ཉིད་ཀྱིས་ལག་དར་ཏེ་མི་རྣམ་པ་གསུམ་བསད་ན་བརྟུལ་ཞུགས་ཉམས་པར་འགྱུར་ཏེ་ཕས་ཕམ་པ་འབྱུང་བས་དགེ་སྦྱོང་དུ་མི་རུང་ཞིང་འཕགས་པའི་བདེན་པ་མཐོང་བ་དང་མྱ་ངན་ལས་འདས་པ་ཐོབ་པའི་སྐལ་བ་མེད་པར་འགྱུར་རོ་ཞེས་བྱ་བའི་ཐ་ཚིག་གོ །དེ་ལ་བདག་གིས་བསད་པ་ལ་ཡང་རྣམ་པ་གསུམ་སྟེ། ཟིན་པའི་ལུས་སུ་གཏོགས་པ་དང༌། ཕྱི་རོལ་གྱིས་འཕངས་པ་དང༌། གཉིས་ཀ་དང་ཡང་ལྡན་པའོ། །ཇི་ལྟར་ཟིན་པའི་ལུས་སུ་གཏོགས་པས་ཤེ་ན། དགེ་སྦྱོང་གིས་གསད་སེམས་ཀྱིས་སྐྱེས་པ་དང༌། བུད་མེད་དམ་མ་ནིང་ཁུ་ཚུར་རམ་རྡོའམ་ཐ་ན་སོར་མོ་གཅིག་བསྣུན་ཏེ། ཤི་བར་གྱུར་ཅིག་སྙམ་པ་ལས་དེ་ཉིད་ཀྱི་
ཚེའམ་ཕྱིས་ཤི་བར་འགྱུར་ན་ནི་ཕས་ཕམ་པར་འགྱུར་རོ། །མ་ཤི་ན་ཉེས་པ་སྦོམ་པོའོ། །ཕྱི་རོལ་གྱིས་འཕངས་པ་གང་ཞེ་ན། དགེ་སྦྱོང་གིས་བསད་སེམས་ཀྱིས་མི་ལ་མདའ་འཕངས་པའམ། མདུང་དང༌། བེ་ཅོན་དང༌། ཐ་ན་རྒྱ་ཤུག་གིས་བསྣུན་ཏེ་དེས་ཤི་བར་གྱུར་ཅིག་སྙམ་པ་ལས་དེ་ཉིད་ཀྱི་ཚེའམ་དུས་ཕྱིས་ཤི་ན་ཡང་པས་ཕམ་པའོ། །མ་ཤིན་སྦོམ་པོའོ། །གཉིས་ཀ་དང་ལྡན་པ་གང་ཞེ་ན། དགེ་སྦྱོང་གིས་མི་ལ་བསད་སེམས་ཀྱིས་རལ་གྲི་དང་དབྱིག་པ་དང་མདུང་ཐུང་གིས་བསྣུན་ཏེ་འདིས་ཤི་བར་གྱུར་ཅིག་སྙམ་པ་ལས་དེ་ཉིད་ཀྱི་ཚེའམ་ཕྱིས་ཤིན་ཡང་ཕས་ཕམ་པར་འགྱུར་རོ། །མ་ཤི་ན་སྦོམ་པོའོ། །གཞན་རྣམས་ཀྱིས་བསད་ན་བརྟུལ་ཞུགས་ཉམས་པར་འགྱུར་ཞེས་བྱ་བ་ལ། མི་རྣམ་པ་གསུམ་བསད་པའི་ཕྱིར་བདག་གིས་གཞན་ལ་གསོད་དུ་བཅོལ་བ་ལས་དེས་མི་རྣམ་པ་གསུམ་གང་ཡང་རུང་བས་བསད་ན་ཕས་ཕམ་པར་འགྱུར་རོ། །འདིར་རྣམ་པ་གསུམ་བཞག་སྟེ། ཟིན་པའི་ལུས་སུ་གཏོགས་པ་དང༌། ཕྱི་རོལ་གྱིས་འཕངས་པ་དང༌། གཉིས་ཀ་དང་ལྡན་པ་བཤད་པ་ནི་སྔ་མ་བཞིན་ནོ། །ཚིག་དེ་དག་གིས་ནི་བདག་གིས་བསད་པ་དང༌། གཞན་གྱིས་བསད་པ་སྟོན་ཏོ། །ཚུལ་ཁྲིམས་ལྡན་ནམ་ཚུལ་ཁྲིམས་འཆལ། །དེ་བཞིན་ནད་ཀྱིས་བཏབ་པ་ལ། །གང་ཐོས་སྡུག་བསྔལ་ཉམ་ཐག་སྟེ། །ངེས་འཆིའི་ཆོས་གཏམ་དེ་མི་བྱ། །སྨན་དང་སྔགས་དང་རིག་པ་དང༌། །འཆི་བའི་ཕྱོགས་སུ་བཏང་བའམ། །མི་གཞན་ཐབས་རྣམས་སྣ་ཚོགས་ཀྱིས། །བསད་ན་བརྟུལ་ཞུགས་ཉམས་པར་འགྱུར། །ཞེས་བྱ་བ་ཡན་ཆད་ཀྱིས་ཐབས་ཀྱིས་གསོད་པ་བསྟན་ཏེ། ཐབས་ཀྱིས། ཚུལ་ཁྲིམས་ལྡན་ནམ་ཚུལ་ཁྲིམས་འཆལ། །དེ་བཞིན་ནད་ཀྱིས་བཏབ་པ་ལ། །གང་ཐོས་སྡུག་བསྔལ་ཉམ་ཐག་སྟེ། །ངེས་འཆིའི་ཆོས་གཏམ་དེ་མི་བྱ། །ཞེས་བྱ་བས་ཚིག་གི་སྒོ་ནས་ཐ་བས་ཀྱིས་གསོད་པ་རྣམས་ཤིག་བསྟན་ཏེ། དེ་ཡང་རྣམ་པ་གསུམ་ཡོད་དེ། གང་ཞེ་ན། ཚུལ་ཁྲིམས་དང་ལྡན་པ་དང༌། ཚུལ་ཁྲིམས་འཆལ་བ་དང༌། ནད་ཀྱིས་བཏབ་པ་ལ་ཚུལ་ཁྲིམས་དང་ལྡན་ནམ་ཞེས་བྱ་བ་དང༌། གང་ཐོས་ཞེས་བྱ་བ་དང༌། ངེས་འཆིའི་ཆོས་གཏམ་དེ་མི་བྱ། །ཞེས་བྱ་བར་སྦྱར་ཏེ། ཚུལ་ཁྲིམས་དང་ལྡན་པ་ལ་འཚོ་བའི་ཡོ་བྱད་འདོད་པའི་ཕྱིར་ཚེ་དང་
ལྡན་པ་ཁྱོད་ཚུལ་ཁྲིམས་དང་ལྡན་པ་དགེ་པའི་ཆོས་ཅན་ཡིན་པས་འདི་ནས་ཤི་འཕོས་ནས་ཚེ་རབས་གཞན་དུ་སྐྱེས་ན་ལོ་ལེགས་པ་དང་འདྲ། མཐོ་རིས་ནི་དར་ལས་ཆོད། ཐར་པ་ནི་ཡོལ་བ་ལྟ་བུས་ཆོད་དེ་ལུས་དང་བྲལ་ནས་ལྷར་སྐྱེས་པར་འགྱུར་གྱིས་རང་གིས་རང་སོད་ཅིག་ཅེས་བསྒོ་བ་ལས་དེ་ཤི་ན་ནི་ཕས་ཕམ་པའོ། །མ་ཤི་ན་སྦོམ་པོའོ། །ཚུལ་ཁྲིམས་འཆལ་ཅེས་བྱ་བ་དང༌། གང་ཐོས་ཞེས་བྱ་བ་དང༌། ངེས་འཆིའི་ཆོས་གཏམ་དེ་མི་བྱ། །ཞེས་བྱ་བར་སྦྱར་ཏེ། ཚུལ་ཁྲིམས་འཆལ་བ་ཅན་ལ་ཡོ་བྱད་འདོད་པའི་ཕྱིར། འཆིར་གཞུག་གོ་སྙམ་དུ་བསམས་ནས་ཚེ་དང་ལྡན་པ་སྡིག་པའི་ཆོས་ཅན་ལུས་དང་ངག་གིས་ངན་པར་སྤྱོད་པ་ཁྱོད་ཇི་ཙམ་དུ་ཡུན་རིང་དུ་གསོན་པ་དེ་ཙམ་ངན་སོང་དུ་སྐྱེ་བར་འགྱུར་བའི་སྡིག་འཕེལ་བས་རང་གིས་རང་སོད་ཅིག་ཅེས་བསྒོ་བ་ལས་ཤི་ན་ཕས་ཕམ་པར་འགྱུར་རོ། །མ་ཤི་ན་སྦོམ་པོའོ། །དེ་བཞིན་ནད་ཀྱིས་བཏབ་པ་ལ། །གང་ཐོས་སྡུག་བསྔལ་ཉམ་ཐག་སྟེ། །ངེས་འཆིའི་ཆོས་གཏམ་དེ་མི་བྱ། །ཞེས་བྱ་བས་ནད་པ་སྦྱར་ཏེ། ནད་ཀྱིས་བཏབ་པའི་ནད་པ་ལ་ནད་པའི་ཡོ་བྱད་འདོད་པའི་ཕྱིར། ཚེ་དང་ལྡན་པ་ནད་བུ་ཅན་སྡུག་བསྔལ་གྱིས་རྙོངས་པ་ཇི་སྲད་དུ་ཡུན་རིང་དུ་འཚོ་བ་དེ་སྲིད་དུ་སྡུག་བསྔལ་དུ་འགྱུར་གྱིས་རང་གིས་རང་སོད་ཅིག་ཅེས་གདོན་མི་ཟ་བར་འཆི་བའི་གཏམ་མི་བྱའོ། །གལ་ཏེ་གདོན་མི་ཟ་བར་འཆི་བར་འགྱུར་པའི་གཏམ་བྱས་པ་ལས་ཤི་ན་ཕས་ཕམ་པའོ། །མ་ཤི་ན་སྦོམ་པོའོ། །གོང་དུ་སྨོས་པ་ལྟར་བསྟན་པ་ལ་དགེ་སྦྱོང་གིས་འགྱོད་དེ་ད་ནི་བྱིས་པ་དང་འདྲ་བས་གྱི་ན་ཞིག་སྨྲས་ཀྱི་རང་མ་གསོད་ཅིག་ཅེས་བསྒོ་བ་ལས་ཤི་ཡང་རུང་མ་ཤི་ཡང་རུང་ཕྱིས་འགྱོད་དེ་བསྒོ་ན་སྦོམ་པོར་ཟད་དོ། །སྨན་དང་ཞེས་བྱ་བ་ལ། སྨན་དེ་དུག་གིས་བསད་པའི་གླེང་གཞི་ནི། བཅོམ་ལྡན་འདས་ཛེ་ཏའི་ཚལ་ན་བཞུགས་སོ། །དེ་ན་ཁྱིམ་བདག་སྟོབས་སྡེ་ཞེས་བྱ་བ་ལོངས་སྤྱོད་ཆེ་བ་ཞིག་འདུག་པ་ཆུང་མ་དང་ཡོངས་སུ་སྤྱོད་པ་ལས་ཁྱེའུ་གཉིས་བདོག་སྟེ། ཕུ་བོ་ནི་སྡེ་པ། ནུ་བོ་ནི་ཉེ་སྡེ་ཞེས་མིང་དུ་བཏགས་སོ། །དེ་ནས་དུས་གཞན་ཞིག་ན་སྡེ་པ་གཞན་དུ་ཚོང་ལ་ཆས་པས་ནོར་མང་དུ་རྙེད་པས་དེ་ཆགས་ཏེ། ཡུན་རིང་དུ་མ་ལོག་གོ །དེ་ནས་སྡེ་བའི་ཆུང་མ་འདོད་ཆགས་ཀྱིས་ཁོལ་བར་གྱུར་ནས་ཉེ་སྡེ་ལ་ལན་དུ་མ་ཞིག་བསྒུགས་པ་ལས། ཉེ་སྡེས་ཀྱང་
ཕྱི་ཞིག་ན་སྤྱད་དེ་བུ་ཆགས་སོ། །དེ་ནས་སྡེ་པ་འོང་བ་ཐོས་ནས་ཉེ་སྡེས་འཇིགས་ནས་ཛེ་ཏའི་ཚལ་དུ་རབ་ཏུ་བྱུང་ངོ༌། །དེས་ཕྱིས་བདག་གི་ཁྱིམ་དུ་ཕྱིན་པ་དང༌། སྡེ་པའི་ཆུང་མས་ཁྱོ་ནི་འོང་ཁྱོད་ནི་ཐར་ན་བདག་ཇི་ལྟར་བྱ་ཞེས་དྲིས་པ་དང༌། ཉེ་སྡེས་གྲོགས་པོ་སྨན་པ་གཅིག་ལ་ཇི་ལྟར་གྱུར་པ་རྒྱས་པར་སྨྲས་ནས། སྨན་པས་བདག་གིས་མངལ་འཇིག་པར་འགྱུར་བའི་སྨན་གྱིས་མངལ་ན་ཡོད་པ་དེ་དུམ་བུར་ཞིག་པར་འགྱུར་བ་དེ་སྦྱིན་ནོ་ཞེས་བྱས་ཏེ། སྡེ་པའི་ཆུང་མ་ལ་སྨན་ཕྱེ་མ་བླུད་པས་རུམ་ན་ཡོད་པ་ཡང་མེད་པར་གྱུར་ཏོ། །ཉེ་སྡེ་ཡང་སྨན་བྱས་པ་ལ་ཡི་རང་ནས་ཅང་མ་སྨྲས་སོ། །དུས་ཕྱི་ཞིག་ན་དེ་ལྟར་གྱུར་བ་སྐྱེ་བོ་ཀུན་གྱིས་ཐོས་ནས་དགེ་སློང་ཞེས་འཛེར་ཏོ། །དེ་ལྟར་གྱུར་པ་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏེ། བཅོམ་ལྡན་འདས་ཀྱིས་ཉེ་སྡེ་ལ་ཁྱོད་ཀྱིས་དེ་ལྟར་བྱས་པ་བདེན་ནམ་ཞེས་སྨྲས་ནས། བཙུན་པ་དེ་ལྟར་ནི་མ་བགྱིས་ཀྱི་རྗེས་སུ་ཡི་རང་བ་ནི་བགྱིས་སོ་ཞེས་གསོལ་པས། བཅོམ་ལྡན་འདས་ཀྱིས་བཀའ་སྩལ་པ། ཉེ་སྡེ་ལ་ནི་ལྟུང་བ་མེད་ཀྱིས་ཕྱིན་ཆད་དེ་ལྟ་བུ་ལ་ཡི་རང་ན་ཉེས་པ་དང་བཅས་པར་འགྱུར་རོ། །དགེ་སྦྱོང་གིས་སྐྱེས་པའམ་བུད་མེད་དམ་མ་ནིང་ལ་གསད་སེམས་ཀྱིས་ཁ་ཟས་ཀྱི་ནང་དུ་དུག་སྦྱར་མ་བླུགས་པ་དང༌། ཁྲུས་ཆུ་དང༌། སྐོམ་དང། བདུག་སྤོས་ཀྱི་ནང་དུ་དུག་གི་ཕྱེ་མ་བླུགས་ཏེ་འདིས་འཆི་བར་འགྱུར་རོ་སྙམ་ན་ཡང་དེ་ཉིད་ཀྱི་ཚེ་ཤི་འམ་དུས་ཕྱིས་ཤི་ན་ཕས་ཕམ་པའོ། །མ་ཤི་ན་སྦོམ་པོའོ། །དགེ་སྦྱོང་གིས་ཆང་ངམ་སྨྱོ་བའི་སྨན་བྱིན་ཏེ་ཤི་བར་གྱུར་ཅིག་སྙམ་པ་ལས་དེ་ཉིད་ཀྱི་ཚེ་འམ་ཕྱིས་ཤི་ན་ཕས་ཕམ་པའོ། །མ་ཤི་ན་སྦོམ་པོའོ། །འཆི་བའི་ཕྱོགས་སུ་བཏང་ངམ་ཞེས་བྱ་བ་ལ་དགེ་སྦྱོང་གིས་གསད་སེམས་ཀྱིས་གཡང་དུ་ཕུལ་བ་དང༌། མེར་ཕུལ་བ་དང༌། འཆི་བའི་ཕྱོགས་སུ་བཏང་བ་དང༌། སྟག་གཟིག་ལ་སོགས་པ་གཅན་གཟན་གདུག་པའི་གནས་སུ་བཏང་བ་དང༌། སྦྲུལ་དང་སྡིག་པ་ལ་སོགས་པ་སྲོག་ཆགས་གདུག་པའི་གནས་སུ་བཏང་བ་འམ། གསད་པར་འདོད་པས་གྲང་བའི་ཚེ་གྲིབ་མ་ལ་བཞག་ནས་ལྷགས་པ་ལ་བོར་བ་དང༌། དྲོ་བའི་ཚེ་ཉི་མ་ལ་བཞག་ནས་དྲོ་ཁུང་དུ་བཞག་སྟེ་ཐབས་འདིས་ཤི་བར་གྱུར་ཅིག་སྙམ་པ་ལས་དེའི་ཚེ་ཤི་འམ་ཕྱིས་ཤི་ན་ཡང་ཕས་ཕམ་པའོ། །མི་གཞན་ཐབས་རྣམས་སྣ་ཚོགས་
ཀྱིས། །བསད་ན་བརྟུལ་ཞུགས་ཉམས་པར་འགྱུར། །ཞེས་བྱ་བ་ལ་གཞན་གསད་པའི་བསམ་པས་ཐབས་ཀྱིས་འཆི་བས་བསད་པ་འམ་ཤིང་ལ་འཆིང་བས་བསད་པ་དང༌། དེ་ལ་དགེ་སྦྱོང་གིས་གསད་སེམས་ཀྱིས་སྤྱུགས་ནས་སྟག་གཟིག་གམ་འཕར་སྤྱང་ལ་སོགས་པས་ཟོས་སམ། ཐབས་ཅི་ཡང་རུང་བས་ཤི་ན་ཕས་ཕམ་པའོ། །དགེ་སྦྱོང་གིས་གསད་སེམས་ཀྱིས་མི་ཤིང་ལ་འབྲེང་རློན་གྱིས་བཅིངས་ཏེ་བཞག་པ་ལ་སྟག་གཟིག་གམ་འཕར་སྤྱང་ལ་སོགས་པས་ཟོས་སམ་ཅིའི་ཐབས་ཀྱིས་ཤི་ཡང་ཕམ་པའོ། །དགེ་སྦྱོང་གིས་བུད་མེད་སྦྲུམ་མ་གསད་པར་བསམས་ཏེ་དཀུ་མཉེས་པ་ལས་མ་ཤི་ན་ཕས་ཕམ་པའོ། །བུ་ཤི་ལ་མ་མ་ཤི་ན་སྦོམ་པོའོ། །གཉིས་ཀ་མ་ཤི་ན་སྦོམ་པོའོ། །བུ་བསད་པར་འདོད་དེ། དཀུ་མཉེས་པ་ལས་བུ་ཤི་ལ་མ་མ་ཤི་ན་ཕས་ཕམ་པའོ། །བུ་མ་ཤི་ལ་མ་ཤི་ན་ཡང་སྦོམ་པོའོ། །གཉིས་ཀ་མ་ཤི་ན་ཡང་སྦོམ་པོའོ། །དེ་བཞིན་དུ་དགེ་སྤྱོང་གིས་གསད་སེམས་ཀྱིས་སྙིང་ཁར་འདེབས་པའི་རལ་གྲི་དང་ཆུ་གྲི་བཞག་པ་དང༌། གཏོར་མ་བཞག་པ་དང༌། ས་མདའ་དང༌། རྩང་བཙུགས་པ་ལ་སོགས་པ་བཞག་པ་ལ་ཤི་ན་ཕས་ཕམ་པའོ། །མ་ཤི་ན་སྦོམ་པོའོ། །འདི་ཡན་ཆད་ཀྱིས་ཕས་ཕམ་པའི་ཟླ་ལ་སྦོམ་པོ་ཡང་བཅད་དེ་བཤད་དོ། །ཡན་ལག་བདུན་དང་ལྡན་ན་སྲོག་གཅོད་པའི་མཚན་ཉིད་ཕས་ཕམ་པར་འགྱུར་རོ། །བདུན་གང་ཞེ་ན། མིའི་རྒྱུད་ཡིན། མི་ཡིན། གཞན་མ་ཡིན། མིར་འདུ་ཤེས། སྦྱོར་བ་བྱས། འཚོ་བ་ཉམས། བདག་མ་སྨྱོས་པའོ། །བྱོལ་སོང་དང་ནི་སེམས་དམྱལ་དང༌། །ཡི་དགས་འོན་ཏེ་ལྷ་ཡང་རུང༌། །བསད་ན་ངན་འགྲོར་ལྷུང་བ་ཡིས། །སྡིག་པ་སྦོམ་པོ་ཐོབ་པར་འགྱུར། །བརྟུལ་ཞུགས་ཅན་གྱིས་བསད་སྙམ་སྟེ། །ལུས་དང་ངག་གི་སྦྱོར་བ་ལས། །སྐྱེ་བོ་གསོན་ཡང་དེ་ལ་ནི། །ཁ་ན་མ་ཐོ་རྣམ་གསུམ་འགྱུར། །ཞེས་བྱ་བས་ཉེས་པ་སྦོམ་པོའི་གནས་བསྟན་ཏེ། བྱོལ་སོང་ནི་རྟ་དང་བ་ལང་དང་ལུག་ལ་སོགས་པ་ལ་བྱ་སྟེ། དགེ་སྦྱོང་གིས་གསད་སེམས་ཀྱིས་བྱོལ་སོང་བསད་ན་སྡིག་པ་སྦོམ་པོ་ཐོབ་པར་འགྱུར་ཞེས་བྱ་བར་སྦྱར་ཏེ། སེམས་ཅན་དམྱལ་བ་དང་ཞེས་བྱ་བ་སེམས་ཅན་དམྱལ་བ་ལ་རྣམ་པ་གཉིས་ཏེ། སེམས་ཅན་དམྱལ་བ་ཆེན་པོ་
དང། ཕྱོགས་གཅིག་པའི་སེམས་ཅན་དམྱལ་བའོ། །སེམས་ཅན་དམྱལ་བ་ཆེན་པོ་ལ་ཡང་རྣམ་པ་གཉིས་ཏེ། ཚ་བའི་སེམས་ཅན་དམྱལ་བ་དང༌། གྲང་བའི་སེམས་ཅན་དམྱལ་བའོ། །དེ་ལ་ཚ་བའི་སེམས་ཅན་དམྱལ་བ་ནི་མནར་མེད་པ་དང༌། རབ་ཏུ་ཚ་བ་དང༌། ཚ་བ་དང༌། ངུ་འབོད་ཆེན་པོ་དང༌། ངུ་འབོད་དང༌། བསྡུས་འཇོམས་དང༌། ཐིག་ནག་དང༌། ཡང་སོས་སོ། །གྲང་བའི་སེམས་ཅན་དམྱལ་བ་ཆེན་པོ་ལ་ཡང་བརྒྱད་དེ། ཆུ་བུར་དང༌། ཆུ་བུར་ཆེན་པོ་དང༌། པདྨ་དང༌། པདྨ་ཆེན་པོ་དང༌། ཨུཏྤ་ལ་དང༌། ཨུཏྤ་ལ་ཆེན་པོ་དང༌། ཧ་ཧ་ཞེས་ཟེར་བ་དང། ཧུ་ཧུ་ཞེས་ཟེར་རོ། །ཕྱོགས་གཅིག་པའི་སེམས་ཅན་དམྱལ་བ་ཞེས་བྱ་བ་ནི་ལྷའི་ལོངས་སྤྱོད་ཀྱང་ཡོད་ལ་བར་འགའ་ནི་སེམས་ཅན་དམྱལ་བའི་སྡུག་བསྔལ་ཡང་མྱོང་བའོ། །དགེ་སྦྱོང་གིས་གསད་སེམས་ཀྱིས་སེམས་ཅན་དམྱལ་བ་བསད་ན་སྡིག་པ་སྦོམ་པོ་ཐོབ་པར་འགྱུར་ཞེས་བྱ་བར་སྦྱར་རོ། །ཡི་དགས་ཞེས་བྱ་བ་ལ། ཡི་དགས་ཞེས་བྱ་བ་ནི་ཕལ་ཆེར་གཅོང་རོང་དང་མྱ་ངན་དག་ན་གནས་སོ། །དགེ་སྦྱོང་གིས་གསད་སེམས་ཀྱིས་ཡི་དགས་བསད་ན་སྡིག་པ་སྦོམ་པོ་ཐོབ་པར་འགྱུར་ཞེས་བྱ་བར་སྦྱར་རོ། །ལྷ་ཡང་རུང་ཞེས་བྱ་བས་འདོད་ཁམས་ཀྱི་ལྷ་དང༌། གཟུགས་ཁམས་ཀྱི་ལྷ་དང༌། གནས་རིས་བཅུ་བདུན་ཞེས་བྱ་བ་ན་གནས་པའི་ལྷ་རྣམས་དགེ་སྦྱོང་གིས་བསད་ན་སྡིག་པ་སྦོམ་པོ་ཐོབ་པར་འགྱུར་ཞེས་བྱ་བར་སྦྱར་རོ། །སྡིག་པ་སྦོམ་པོ་ཐོབ་པར་འགྱུར་ཞེས་བྱ་བ་གང་ཞེ་ན། སྡིག་པ་སྦོམ་པོའི་འབྲས་བུ་བསྟན་པའི་ཕྱིར། བསད་ན་ངན་སོང་ལྟུང་བའི་ཞེས་བྱ་བ་སྨོས་ཏེ། དཔེར་ན་དུག་ཆེན་པོས་ཀྱང་སྐྱེས་བུ་ཆེན་པོ་གསོད་ལ། དུག་ཆུང་དུས་ཀྱང་སྐྱེས་བུ་ཆེན་པོ་གསོད་པ་དང༌། དེ་བཞིན་དུ་མེ་སྟག་ཆེན་པོས་ཀྱང་ཡུལ་ཆེན་པོ་ཚིག་ལ་མེ་སྟག་ཆུང་དུས་ཀྱང་ཡུལ་ཆེན་པོ་སྲེག་པ་དང༌། ཕས་ཕམ་པ་བྱུང་ན་ངན་སོང་གསུམ་དུ་སྐྱེ་བར་འགྱུར་བ་དེ་བཞིན་དུ་ཉེས་པ་སྦོམ་པོ་བྱུང་བ་ལ་ཚུལ་བཞིན་དུ་མ་བཤགས་ན་ངན་སོང་གསུམ་དུ་ལྟུང་བར་འགྱུར་རོ་ཞེས་བྱ་བའི་དོན་ཏོ། །བརྟུལ་ཞུགས་ཅན་གྱིས་བསད་སྙམ་སྟེ། །ཞེས་བྱ་བ་ལ། དགེ་སྦྱོང་གིས་སྐྱེས་པ་དང་བུད་མེད་དང༌། མ་ནིང་སྟེ་མི་རྣམ་པ་གསུམ་ལས་གང་ཡང་རུང་བ་ཅིག་བསད་དོ་སྙམ་དུ་བསམས་ཏེ་ལུས་དང་ངག་གི་
སྦྱོར་བ་བཤམས་པ་ལས་ཞེས་བྱ་བ་ལ། ལུས་ཀྱིས་བཤམས་ཏེ་ཁུ་ཚུར་དང་ཐལ་མོ་དང་རྡོ་དབྱིག་དང་མཚོན་ཆས་ཀྱང་བཏབ། ངག་གིས་བཤམས་ཏེ་གོང་དུ་བཤད་པ་བཞིན་དུ་ཚུལ་ཁྲིམས་དང་ལྡན་པ་དང༌། ཚུལ་ཁྲིམས་འཆལ་བ་དང༌། ནད་པ་རྣམས་འཆི་བའི་རིགས་སོ་ཞེས་བསྔགས་པ་བརྗོད་པ་ལས་ཞེས་བྱ་བའི་ཐ་ཚིག་གོ །སྐྱེ་བོ་གསོན་ཡང་དེ་ལ་ནི། །ཁ་ན་མ་ཐོ་རྣམ་གསུམ་འགྱུར། །ཞེས་བྱ་བ་ལ། གསད་པར་ཡང་བསམས་ལུས་དང་ངག་གིས་ཀྱང་བཤམས་པ་ལས་མི་གསུམ་པོ་གསོན་ཏེ་མ་ཤི་ཡང་དགེ་སྦྱོང་དེ་ལ་ཁ་ན་མ་ཐོ་བ་རྣམ་པ་གསུམ་ཐོབ་པར་འགྱུར་ཏེ། ཡིད་ཀྱི་ཉེས་པ་སྦོམ་པོ་དང༌། ལུས་ཀྱི་ཉེས་པ་སྦོམ་པོ་དང༌། ངག་གི་ཉེས་པ་སྦོམ་པོ་ཐོབ་པར་འགྱུར་རོ། །དེ་ལ་གསད་པར་བསམས་པས་ན་ཡིད་ཀྱི་ཉེས་པ་སྦོམ་པོ་ཐོབ་པར་འགྱུར་རོ། །ལུས་ཀྱིས་བཤམས་པས་ན་ལུས་ཀྱི་ཉེས་པ་སྦོམ་པོ་ཐོབ་པར་འགྱུར་རོ། །ངག་གིས་བཤམས་པས་ན་ངག་གི་ཉེས་པ་སྦོམ་པོ་ཐོབ་པར་འགྱུར་རོ། །དེ་དག་ཚུལ་བཞིན་དུ་མ་བཤགས་ན་ངན་སོང་གསུམ་དུ་ལྟུང་ངོ་ཞེས་སྔར་བཤད་པ་བཞིན་དུ་སྦྱར་རོ། །རྡོ་དབྱུག་ཁུ་ཚུར་འཚོག་པ་དང༌། །དེ་ལས་གཞན་པའི་གནོད་པ་དང༌། །བ་ལང་ལ་སོགས་གནོད་མི་བྱ། །རྟ་ལ་སོགས་པ་མི་བཞོན་ནོ། །ཞེས་བྱ་བས་ཉེས་བྱས་ཀྱི་གནས་བསྟན་ཏེ། དེ་ཞེས་བྱ་བ་ལ་གསད་སེམས་ནི་མེད་ཀྱི་དགེ་སྦྱོང་གིས་ཁྲོ་སེམས་ཀྱིས་མི་རྣམ་པ་གསུམ་ལ་བཙོགས་ན་ཉེས་བྱས་སུ་འགྱུར་རོ། །ཁུ་ཚུར་འཚོག་པ་དང་ཞེས་བྱ་བ་ལ་གསད་སེམས་ནི་མེད་ཀྱིས། ཁྲོ་སེམས་ཀྱིས་མི་རྣམ་པ་གསུམ་བཙོགས་ན་ཉེས་བྱས་སུ་འགྱུར་རོ། །དེ་ལས་གཞན་པའི་གནོད་པ་དང་ཞེས་བྱ་བ་ནི་གསད་སེམས་མེད་པར་ཁྲོ་སེམས་ཀྱིས་མི་རྣམས་ལ་ཐལ་མོ་བསྣུན་ནམ། ལྕག་གིས་གཞུས་སམ། ལྷགས་པའི་ཚེ་གྲང་བ་ལ་བོར་ཏམ། ཚ་བའི་ཚེ་དྲོ་བ་ལ་བོར་ན་ཉེས་བྱས་སུ་འགྱུར་ཏེ་དབྱུག་པ་ལ་སོགས་པའི་གྲངས་སུ་ཕག་པ་ཉེས་བྱས་ཀྱི་གྲངས་ཀྱང་དེ་སྙེད་ཅིག་འཐོབ་བོ། །བ་ལང་ལ་སོགས་གནོད་མི་བྱ། །ཞེས་བྱ་བ་ནི་གཞན་ཡང་བ་ལང་དང་གླང་པོ་ཆེ་དང་རྟ་དང་ལུག་ལ་སོགས་པ་ལ་ཁལ་དགལ་བ་དང་བརྡེག་པ་ལ་སོགས་པའི་གནོད་པ་མི་བྱ་སྟེ། དེ་ལྟ་བུའི་གནོད་པ་བྱས་ན་ཉེས་བྱས་སུ་འགྱུར་རོ། །རྟ་ལ་སོགས་པ་མི་བཞོན་
ནོ། །ཞེས་བྱ་བ་ནི་དགེ་སྦྱོང་གིས་རྟ་དང་གླང་པོ་ཆེ་ལ་སོགས་པ་བཞོན་པར་མི་བྱ་སྟེ། ཞོན་ན་ཉེས་བྱས་སུ་འགྱུར་རོ། །དེ་ལ་གནོད་སེམས་མེད་ལ་ཡན་ལག་གཞན་ཡོད་ན་ནི་ཉེས་བྱས་སུ་བཞག་གོ །གནོད་སེམས་ཡོད་ལ་ཡན་ལག་གཞན་མི་ལྡན་ན་སྦོམ་པོའོ། །ཡན་ལག་ཐམས་ཅད་དང་ལྡན་ན་མི་དེ་ནོར་ཏེ་གཞན་བསད་ན་ཡང་སྦོམ་པོའོ། །གསད་པར་བསམས་ཏེ་སྦྱོར་བ་བྱས་པ་ལས་མ་ཤི་ན་ཡང་སྦོམ་པོའོ། །ཡན་ལག་ཐམས་ཅད་དང་ལྡན་ན་ཕས་ཕམ་པའོ། །ཕས་ཕམ་པ་བཞི་ལས་སྲོག་གཅོད་པའི་ཕས་ཕམ་པ་རྫོགས་སོ།། །།མ་བྱིན་པར་ལེན་པའི་གླེང་གཞི་ནི་བཅོམ་ལྡན་འདས་ཡུལ་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །དེའི་ཚེ་སྔོན་རྫ་མཁན་ལས་རབ་ཏུ་བྱུང་བའི་དགེ་སློང་ནོར་ཅན་ཞེས་བྱ་བ་ཞིག་རྒྱལ་པོའི་ཁབ་ཀྱི་དགོན་པ་ན་སྤྱིལ་པོ་བྱས་ནས་གནས་སོ། །དེ་ནས་ནོར་ཅན་གང་གི་ཚེ་རྒྱལ་པོའི་ཁབ་ཏུ་བསོད་སྙོམས་ལ་ཞུགས་པ་དེའི་ཚེ་རྒྱལ་པོའི་ཁབ་ཀྱི་ཕྱུགས་རྫི་དང་ཤིང་ཐུན་རྣམས་ཀྱིས་སྤྱིལ་པོ་བཤིག་དྲལ་ཅིང་རྩྭ་དང་ཤིང་རྣམས་སོ་སོར་ཁྱེར་རོ། །དེ་ལྟ་བུ་ལན་དུ་མ་ཞིག་བྱས་པ་དང་རྫ་མཁན་ནོར་ཅན་གྱིས་བསམས་པ་འདི་ལྟ་བུ་ཐམས་ཅད་དུ་གཙེས་ཤིང་སྤྱིལ་པོ་བྱེད་པ་ཡང་ཤིན་ཏུ་ཉོན་མོངས་ལ་དག་བའི་བར་ཆད་དུ་ཡང་འགྱུར་བས་འོ་ན་བདག་གིས་སྔོན་གྱི་གནས་རྗེས་སུ་བསྒྲུབ་པས་སའི་སྤྱིལ་པོ་ཞིག་བྱས་ལ་སོ་བཏང་སྟེ་གནས་སོ་སྙམ་དུ་བསམས་ནས་ཁང་བུའི་རྨང་བཏིང་ཞིང་བརྩིགས་ནས་སོ་བཏང་ནས་ཤིན་ཏུ་མཛེས་པ་མེ་ཏོག་ཛི་བ་ཀ་བཞིན་དུ་དམར་ཞིང་འཚེར་བ་ཞིག་བྱས་ཏེ་གནས་སོ། །དུས་གཞན་ཞིག་ན་བཅོམ་ལྡན་འདས་འཁོར་དགེ་སློང་རྣམས་དང་གནས་རྒྱུ་ཞིང་གཤེགས་པས་ཁང་བུ་གཟིགས་ནས་སུའི་ཡིན། དེ་ནི་དགེ་སློང་ནོར་ཅན་གྱི་ལགས་སོ་ཞེས་སྨྲས་སོ། །འདི་ལྟ་བུའི་ཕྱིར་མུ་སྟེགས་པ་རྣམས་ངལ་འཕྱ་བར་འགྱུར་གྱིས་ཁང་བུ་ཆོམས་ཤིག་ཅེས་བཀའ་སྩལ་ནས། དགེ་སློང་རྣམས་ཀྱིས་ཁང་བུ་བཅོམ་སྟེ་གནས་སོ། །དེ་ནས་ཡང་ནོར་ཅན་གྱིས་བསམ་པ་རྒྱལ་པོའི་ཁབ་གྱི་ཤིང་སྲུངས་ཀྱི་དཔོན་དང་བདག་མཛའ་བས་ཤིང་གི་ཁང་པ་ཞིག་བྱའོ་སྙམ་དུ་བསམས་ནས། ཤིང་སྲུངས་པ་ལ་ལྷས་ཤིང་བྱིན་པ་འོན་ཅིག་ཅེས་སྨྲས་པ་དང༌། ཤིང་
སྲུངས་ཀྱི་དཔོན་པོས་ཀྱང་ལྷས་ཕུལ་ན་བཙུན་པ་ཅི་བདེར་སྣོམས་ཤིག་ཅེས་སྨྲས་ནས། རྒྱལ་པོའི་ཁབ་ཀྱི་ཞིག་རལ་བཅོས་པའི་རྒྱུ་ཤིང་བཅད་པ་དུ་མ་ཞིག་གཤགས་གཏུབས་ཏེ་ཁྱེར་བ་གྲོང་ཁྱེར་སྲུངས་པའི་དཔོན་པོས་མཐོང་ནས་རྒྱལ་པོ་མ་སྐྱེས་དགྲ་ལ་སྨྲས་སོ། །རྒྱུ་མཚན་ཅན་བཀུག་སྟེ། དགེ་སློང་ཁྱོད་ནི་ཤིང་མ་བྱིན་པར་ལེན་པ་དབང་བྱས་པ་དང༌། མི་དབང་གིས་བདག་ལ་སྩལ་ཏོ། །སྔོན་ཡབ་ཀྱིས་ལྷ་ཁྱོད་རྒྱལ་པོར་དབང་བསྐུར་བའི་ཚེ་ངའི་ཡུལ་དགེ་བར་གྲགས་པས་དགེ་སློང་དང་བྲམ་ཟེ་རྣམས་རྩྭ་དང་ཤིང་དང་ཆུ་མ་བྱིན་པར་མི་སྤྱོད་པ་དེ་ཐམས་ཅད་ཅི་བདེར་སྤྱོད་ཅིག་ཅེས་ཁྱུ་མཆོག་གི་སྒྲ་ཆེན་པོ་བསྒྲགས་པ་ནི་མི་དགོངས་སམ། རྒྱལ་པོས་སྨྲས་པ། དེ་ནི་ཡོངས་སུ་བཟུང་བ་མེད་པ་ལ་བྱའི་ཡོངས་སུ་བཟུང་བ་ལ་ནི་མ་ཡིན་ནོ་ཞེས་སྨྲས་པ་དང༌། ཡོངས་སུ་མ་བཟུང་བ་ལ་ནི་རྒྱལ་པོས་མངའ་བགྱིར་ཅི་མཆིས་ཞེས་གསོལ་པ་དང༌། རྒྱལ་པོ་ཤིན་ཏུ་ཁྲོས་ནས་མ་བྱིན་པར་ལེན་པའི་དགེ་སློང་བསད་པར་རིགས་ན་ཁྱོད་ད་སླན་ཆད་དེ་ལྟར་མ་བྱེད་ཅིག་ཅེས་སྤྱོས་ནས་སླར་བཏང་ངོ༌། །དེ་ནས་དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་སོང་ལ་རྒྱལ་པོའི་གྲོང་དཔོན་དང་དེད་དཔོན་ལམ་བྱིན་པར་ལེན་པ་ཇི་ཙམ་ཞིག་བླངས་པས་སྲོག་ལ་འབབ་པ་དང་ཡུལ་ནས་དབྱུང་བའི་ཆད་པ་གཅོད་པར་བྱེད་སྨོས་ཤིག་ཅེས་བཀའ་སྩལ་པ་དང༌། ཀུན་དགའ་བོས་དེ་བཞིན་དུ་སྨྲས་པ་དང༌། མ་ཤ་ཀ་ལྔའམ་ལྔ་ལས་ལྷག་པ་བླངས་པས་སྲོག་ལ་འབབ་པ་དང་ཡུལ་ནས་འབྱིན་པའི་ཆད་པ་གཅོད་དོ་ཞེས་མཆི་བ་བཅོམ་ལྡན་འདས་ལ་དེ་བཞིན་གསོལ་པས། དགེ་སློང་ནོར་ཅན་བཀུག་ནས་རྣམ་གྲངས་དུ་མར་སྨད་ནས་འདུལ་བལ་བསླབ་པའི་གནས་བཅས་སོ། །དགེ་ཚུལ་བདག་གམ་གཞན་རྣམས་ཀྱིས། །རྐུ་སེམས་མཐུ་དང་འཇབ་བུ་ཡིས། །འཁྲུལ་པ་མེད་པར་མི་གཞན་གྱི། །གནས་ནས་མ་ཤ་ལྔ་ཙམ་མམ། །རང་གི་ཡུལ་ནས་བྱུང་བ་ཡང༌། །ཀཱར་ཥཱ་པ་ཎའི་བཞི་ཆ་བརྐུས། །དེ་བརྐུས་ཚུལ་ཁྲིམས་ཞིག་པར་འགྱུར། །ཞེས་བྱ་བ་ལ་དགེ་ཚུལ་ནི་རབ་ཏུ་བྱུང་བའི་སྡོམ་པ་ལ་གནས་པའོ། །བདག་གིས་ཀྱང་རྐུ་སེམས་དང་ལྡན་པས་མཐུ་དང་འཇབ་བུ་
ཡིས་བརྐུས་ན་ཚུལ་ཁྲིམས་ཞིག་པར་འགྱུར་ཞེས་བྱ་བར་སྦྱར་ཏེ། འདི་ལྟར་རྐུ་སེམས་དང་ལྡན་པས་མཐུ་དང་འཇབ་བུས་ཀཱར་ཥཱ་པཎའི་བཞི་ཆ་བརྐུས་ཏེ་རིན་ཐང་ཚང་ན་ཕས་ཕམ་པའོ། །རྐུ་སེམས་མེད་ན་བསྡམ་པར་བྱ་བའི་ཉེས་བྱས་གཅིག །གཞན་གྱིས་མཐུ་དང་འཇབ་བུས་བརྐུས་ན་ཚུལ་ཁྲིམས་ཞིག་པར་འགྱུར་ཏེ། བདག་ཉིད་ཀྱིས་ནི་མ་ཡིན་གྱིས་དགེ་སློང་གྲོགས་པོ་ཞིག་ལ་རྐུར་བཅུག་པ་ལས་དེས་མཐུ་དང་འཇབ་བུས་བརྐུས་ཏེ། ནོར་བདག་ཅག་སོ་སོར་བགོས་རིན་ཐང་ཚང་ན་ཕས་ཕམ་པར་འགྱུར་རོ། །རིན་ཐང་མ་ཚང་ན་ཉེས་བྱས་སྦོམ་པོ་རེ་རེ་བརྐུས་ན་བརྐུས་ཤས་ཀྱི་སྐལ་བ་བླངས་ན་ཉེས་པ་སྦོམ་པོ་གཅིག །འཁྲུལ་པ་མེད་པར་མི་གཞན་གྱི་ཞེས་བྱ་བ་ལ་འཁྲུལ་པ་ནི་རྨོངས་པ་དང་མི་དྲན་པ་ཡིན་ལ་དེ་མེད་པ་ནི་སེམས་རང་བཞིན་དུ་གནས་པའོ། །ཡང་བརྐུ་བར་བྱ་བའི་རྫས་གང་ཡིན་པ་དེ་ཉིད་མངོན་པར་ཐོབ་པ་ལ་བྱ་སྟེ། བརྐུ་བར་བྱ་བའི་རྫས་ཉིད་ནི་མ་ཐོབ་ཀྱི་བར་དུ་རྫས་གཞན་གྱིས་ཐོབ་པ་ལས་འཁྲུལ་ཞེས་བྱ་སྟེ་དེ་ནི་རིན་ཐང་ཚང་ཡང་ཕས་ཕམ་པར་མི་བྱ་སྟེ་སྤོམ་པོར་འགྱུར་རོ། །མི་གཞན་ཞེས་བྱ་བ་ནི་བདག་གི་ནོར་དགར་བའི་ཚིག་སྟེ། མི་གཞན་གྱི་ནོར་བརྐུས་ན་ཕས་ཕམ་པར་འགྱུར་རོ། །བདག་གི་ནོར་བརྐུས་ན་རིན་ཐང་ཚང་ཡང་སྤོམ་པོར་མི་འགྱུར་རོ། །གནས་ནས་མ་ཤ་ལྔ་ཙམ་ཞེས་བྱ་བ་ལ་གནས་ནི་ནོར་རྫས་གནས་ནས་སྤགས་ཏེ་བར་དུ་ཆོད་རིན་ཐང་ཚང་བ་ལས་ཕམ་པའོ། །དེ་ཡང་གནས་གཅིག་སྟེ་གཞི་མ་ཉམས་པ་ལ་ཚོན་ལ་སོགས་པ་མ་གྲོགས་པ་དང༌། ས་སྒར་སྒུར་མེད་ན་གཞི་གཅིག་པ་ཞེས་བྱ་བ་སྟེ་ནམ་ཐ་དད་པ་གཅིག་གིས་མ་ཆོད་ཀྱི་བར་དུ་ཕམ་པར་མི་གཞག་གོ །མ་ཤ་ལྔ་ཙམ་ཞེས་བྱ་བ་ནི་རྒྱ་གར་གྱི་རིན་ཐང་གཞལ་ན་དངུལ་ཞོ་གཅིག་ཙམ་བརྐུས་ན་ཕམ་བར་བརྩིའོ། །ཡང་ཁ་ཅིག་གིས་ནི་ཞོའི་བརྒྱད་ཆ་གཅིག་ལ་བྱས་ཏེ་དེ་ཙམ་གྱིས་ནི་རིན་ཐང་ཚང་བར་བརྩིའོ། །རང་གི་ཡུལ་ནས་བྱུང་བ་གང་ཞེས་བྱ་བ་ནི་རིན་ཐང་ཚང་བ་ཡང་བརྐུས་བའི་དུས་དེ་ཉིད་ན་རིན་ཐང་ཚང་མ་ཚང་བརྩིའོ། །ཁ་ཅིག་བརྐུས་པའི་དུས་དེ་ཉིད་ན་རིན་ཐང་མ་ཚང་ལ་དཀོན་མོད་དང་སྦྱར་ཏེ། དུས་ཕྱི་ཞིག་ན་རིན་ཐང་ཚང་བ་ལྟ་བུ་ནི་ཕམ་པར་མི་གཞག་སྦོམ་པོའོ། །ཀཱཪྵཱ་པ་ཎའི་བཞི་ཆ་བརྐུས། །ཞེས་བྱ་བ་ནི་གོང་དུ་མ་ཤ་ལྔ་བཤད་པ་དང་འདྲའོ། །
སྦྱོར་བའི་ཚེ་ན་ཉེས་བྱས་སོ་ཞེས་བྱ་བ་ནི་དང་པོ་བརྐུ་བར་བསམས་ཏེ་སྟན་དང་ཁྲི་ལས་ལངས་པའི་དུས་ཉིད་ན་ཉེས་བྱས་སུ་འགྱུར་རོ། །རྡོ་ཁུ་རྩ་བ་འབྲས་བུ་ཤིང༌། །ཞེས་བྱ་བ་ལ་རྩ་བ་ནི་གླ་སྒང་དང་བོད་ང་ཞེས་བྱ་བ་ལ་སོགས་པའོ། །འབྲས་བུ་ནི་ཤིང་ཐོག་ལ་སོགས་པའོ། །ཤིང་ནི་སྐྱེད་ཤིང་རྣམ་པ་སྣ་ཚོགས་ཏེ། དེ་དག་བརྐུས་ཏེ་རིན་ཐང་ཚང་ན་ཕམ་པ་མ་ཚང་ན་སྦོམ་པོའོ། །སྡོང་བུ་ལོ་མ་ཤུན་པ་ཆུ། །ཞེས་བྱ་བ་ལ། སྡོང་བུ་ནི་མར་དང་སྨན་ཁྲིལ་བུའི་རིགས་སུ་གཏོགས་པའོ། །ལོ་མ་ནི་ཤིང་ལོ་ལྡུམ་ལོངས་སྤྱད་པར་འོས་པར་རུང་བའོ། །ཤུན་པ་ནི་གྲོ་ག་ལ་སོགས་པའོ། །ཆུ་ནི་ཁྲུས་ཆུ་དང་བཏུང་ཆུ་ལྟ་བུ་སྟེ་རྒྱ་མཚོར་ཞུགས་པ་དང་མྱ་ངམ་ལྟ་བུར་འགྲོ་བ་སྟེ་ཆུ་ཤིན་དུ་དཀོན་པའི་དུས་ན་བརྐུ་བའོ། །མེ་ཏོག་ཆུ་སྐྱེས་ཐང་སྐྱེས་དང༌། །ཞེས་བྱ་བ་ནི་མེ་ཏོག་ཆུ་ནས་སྐྱེས་པ་པདྨ་དང་ཨུཏྤལ་ལ་སོགས་པའོ། །ཐང་ལས་སྐྱེས་པ་སྟེ་ནཱ་ག་གེ་སར་ལ་སོགས་པའོ། །ཞིང་དང་ལོ་ཐོག་ས་གཞི་དང༌། །ཞེས་བྱ་བ་ལ་ཞིང་གི་མུ་རྐུ་བ་སྟེ། ཡུལ་གྱི་རྒྱལ་པོའི་བཀའ་ཁྲིམས་ལས་བྱུང་བ་བཞིན་རིན་ཐང་བརྩིའོ། །ལོ་ཏོག་ནི་ཐན་པ་ཆེན་པོའི་ཚེ་གཞན་གྱི་ཞིང་ལ་ཆུ་གཏོང་བ་གཅོད་ཅིང་བདག་གི་ཞིང་ལ་ཆུ་གཏོང་བ་དང༌། ཆར་པ་ཆེ་བའི་དུས་ན་བདག་གི་ཞིང་ལ་ཆུ་བཅད་ནས་གཞན་གྱི་ཞིང་ལ་བཏང་སྟེ་བདག་གི་ལོ་ལེགས་ལ་གཞན་གྱི་ལོ་ཉེས་ན་རིན་ཐང་ཚང་ན་ཕམ་པ། མ་ཚང་ན་སྦོམ་པོའོ། །ལོ་ཏོག་གཉིས་ཀ་ལ་མ་ཕན་ཡང་བླ་སྙམ་པས་ཞིང་རྐུ་སེམས་དེ་ལྟར་བཏང་སྟེ་ཕ་རོལ་པོ་ལ་ཉེས་པ་སྦོམ་པོར་འགྱུར་རོ། །ཞིང་རྐུ་བ་ལ་རྣམ་པ་གཉིས་ཏེ། ཤགས་བཀར་གཏོང་བ་དང་ར་བས་བསྐོར་བའོ། །དགེ་སྦྱོང་གིས་ཞལ་ཆེ་བ་འམ་ཡུལ་དཔོན་གྱི་མདུན་དུ་ཤགས་བཀྱེ་ལ་དགེ་སྦྱོང་རྒྱལ་བར་བཅད་ལ་ཁྱིམ་པས་ཀྱང་སྦྱོར་བའི་བསམ་པ་བཏང་ན་ཕམ་པ། སྦྱོར་བའི་བསམ་པ་མ་བཏང་ན་སྦོམ་པོའོ། །རྒྱལ་པོས་རྒྱལ་བར་བཅད་ན་ཡུལ་གྱི་གཙོ་བོས་རྒྱལ་བར་གྱུར་པར་གཅད་མ་ཐག་ཏུ་ཕམ་པའོ། །བསྐོར་བས་བརྐུ་བ་ནི་ཞིང་ལ་ར་བ་དང་འོབས་ལྟ་བུས་སྐོར་བར་བྱེད་པ་ན་ནམ་ལངས་ཀྱི་སྣ་མ་ཕྲད་ཀྱི་བར་དུ་སྦོམ་པོའོ། །ཕྲད་ན་ཕམ་པར་གཞག་གོ །ས་གཞི་ནི་ཁངས་དང་ཚོང་དུས་ལྟ་བུ་སྟེ། དགེ་སྦྱོང་གིས་མི་དབང་བཞིན་བརྐུས་ན་རིན་ཐང་ཚང་ན་ཕམ་
པའོ། །མ་ཚང་ན་སྦོམ་པོར་བཞག་གོ །གྲུ་དང་ཤིང་དང་ཤོ་གམ་དང༌། །ཞེས་བྱ་བ་ལ་དགེ་སློང་གིས་གྲུ་རྐུ་བར་བསམས་ཏེ་ཆུ་རྒྱུན་ལས་གྱེན་དུ་བཟློག་དེ་གྲུ་ཚུགས་ལས་གྲུ་འཇུག་ཐལ་ན་ཕམ་པ། ཆུ་རྒྱུན་ཐོག་ཐག་ཁྱེར་ཏེ་སྒུར་དང་གད་པ་དང་སྣེའུ་ཆོད་ན་སྦོམ་པོའོ། །དེ་མི་སྣང་ན་ཕམ་པ། ཐད་ཀར་རྐུ་ན་ཕ་རོལ་གྱི་འགྲམ་སྐམ་ས་ལ་ཕྱིན་ན་ཕམ་པ། དེ་ཉིད་རྫབ་དང་སའི་འོག་ཏུ་སྦས་ན་གྲུ་མི་སྣང་བར་གྱུར་ཙམ་ན་ཕམ་པའོ། །ཤིང་ནི་བཟའ་ཤིང་དང་མེ་ཏོག་གི་ཤིང་དང་གྲིབ་ཤིང་ལྟ་བུ་སྟེ་རིན་ཐང་ཚང་ན་ཕམ་པའོ། །གསེབ་ལམ་དང་ལམ་གྱི་ཤོ་གམ་ལྟ་བུ་བཀའ་ཁྲིམས་གྱིས་མི་སྦྱིན་དུ་མེ་རུང་བ་ལས་གཞན་གྱི་དགེ་སྦྱོང་གིས་བཟླས་སམ་གང་གིས་གང་ཟག་གཞན་ལ་གསངས་ཏེ་ཤོ་གམ་མ་བྱིན་ཏེ་རིན་ཐང་བརྩིས་ཏེ་ཚང་ན་ཕམ་པ། དེ་བཞིན་གྲུ་ཡི་བཙས་རྣམས་དང༌། །ཞེས་པ་དང་ཡང་སྦྱར་བར་བྱའོ། །སྲོག་ཆགས་རྐང་པ་མེད་པ་དང༌། །རྐང་མངས་རྐང་གཉིས་རྐུ་བ་དང༌། །བརྟུལ་ཞུགས་ཅན་གྱིས་མི་ཡི་ནོར། །དབྱིག་ལ་སོགས་པ་གང་ཡང་རུང༌། །རྐུ་བའི་སེམས་ཀྱིས་གང་བརྐུས་ཀྱང༌། །རིན་ཐང་ཚང་ན་སྡོམ་པ་ཞིག །ཅེས་བྱ་བ་ལ། མིའི་ལོངས་སྤྱོད་དགོས་པར་བྱ་བའི་ཕྱིར་གསོས་ཤིང་བཙལ་བ་སྲོག་ཆགས་རྐང་པ་མེད་པ་སྦྲུལ་དང་འབུ་ལྟ་བུ་དང༌། རྐང་པ་གཉིས་པ་མི་ལྟ་བུ་དང༌། ཕ་རོལ་ལ་གནོད་པར་བྱ་བའི་ཕྱིར་རྐང་མངས་སྡིག་པ་ལ་སོགས་པ་ལྟ་བུ། རང་ཉིད་ཀྱིས་བརྐུས་པ་དང༌། རྐུར་བཅུག་པ་དང༌། ཡང་གཞན་གྱི་ནོར་གསེར་དངུལ་ལྟ་བུ་རྣམས་རྐུ་བའི་སེམས་ཀྱིས་བརྐུས་ཏེ་རིན་ཐང་ཚང་ན་ཕམ་པའོ། །སྩོགས་པའི་སྒྲས་ནི་མིའི་ནོར་རྙི་དང་སྤྲེའུ་དང་བྱ་རྒྱ་དང་བོད་རྒྱ་དང་ཉ་རྒྱ་ལ་སོགས་པ་རྐུ་བ་ཡང་བསྡུ་སྟེ། འདིར་དགེ་སྦྱོང་གིས་བདག་གི་ནོར་དུ་རྐུ་སེམས་ཀྱིས་མིང་དུ་སྨོས་པ་འདི་དག་བརྐུས་ཏེ་རིན་ཐང་ཚང་ན་ཕམ་པའོ། །བདག་གི་དོན་དུ་མ་ཡིན་གྱི་ཕ་རོལ་ལ་གནོད་པ་བྱ་བའི་བསམ་པས་རྐུ་ན་ཕམ་པའོ། །གཉིས་ཀ་ལ་ཕན་གནོད་མེད་པའི་བསམ་བས་དེ་དག་དྲལ་ཞིང་བསྲེགས་ན་ཡང་སྦོམ་པོའོ། །སྙིང་རྗེའི་བསམ་པས་དལ་ཞིང་བསྲེགས་ན་ཉེས་བྱས་སོ། །དེ་དག་གིས་ཟིན་པའི་སྲོག་ཆགས་བརྐུས་ཏེ་རིན་ཐང་ཚང་ན་ཕམ་པའོ། །གཉིས་ཀ་ལ་མི་ཕན་པའི་བསམ་པས་བཏང་ན་སྦོམ་པོའོ། །སྙིང་རྗེའི་བསམ་
པས་བཏང་ན་ཉེས་བྱས་སོ། །སྔགས་ཀྱི་བདག་པོ་ཡོད་པའི་གཏེར་བདག་གིར་བྱ་ས་པ་སྒྲུབ་པ་ལས་གཏེར་ཕས་འོང་ན་ཇི་ཙམ་མིག་གིས་མ་མཐོང་གི་བར་དུ་སྦོམ་པོའོ། །མཐོང་སྟེ་རིན་ཐང་ཚང་ན་ལག་ཏུ་མ་ཐོབ་ཀྱང་ཕམ་པའོ། །བདག་པོ་མེད་པའི་གཏེར་བསྒྲུབས་པ་ལས་ཕས་འོང་བ་མ་མཐོང་གི་བར་དུ་ཉེས་བྱས། མཐོང་སྟེ་རིན་ཐང་ཚང་ན་སྦོམ་པོའོ། །ལྷུང་བཟེད་ལ་སོགས་རྐུན་ཁྱེར་ན། །ཆོས་བཤད་ནས་ནི་བསྒྲུབ་པར་བྱ། །ཡང་ན་རི་བའི་རིན་གྱིས་བླུ། །དེ་ལྟར་མ་བྱས་ཉེས་བྱས་སོ། །ཞེས་བྱ་བས་ནི་མ་བྱིན་པར་ལེན་པའི་དངོས་པོ་ཐམས་ཅད་ནས་ཐམས་ཅད་དུ་མི་བྱ་བར་དགག་པ་སྟེ། འདི་ལྟར་བདག་གི་འཚོ་བའི་ཡོ་བྱད་མེད་དུ་མི་རུང་བ་ལྷུང་བཟེད་དང་ཁར་གསིལ་དང༌། ཆོས་གོས་ལ་སོགས་པ་རྐུན་པོས་ཁྱེར་ཞིང་ཕྲོགས་ན་རྐུ་བའི་རྣམ་པར་སྨིན་པ་ཡིད་དུ་མི་འོང་བ་ལ་སོགས་པ་རྣམ་པར་སྨིན་པ་ཐོབ་པར་འགྱུར་བའི་ཆོས་བཤད་ནས་སླར་བླང་བར་བྱའོ། །དེ་ལྟར་ཆོས་བཤད་པ་ལས་སླར་མ་སྟེར་ན་ཡོ་བྱད་དེ་དག་དགེ་སྦྱོང་བདག་ལ་མེད་དུ་མི་རུང་བས་ཅི་རི་བའི་རིན་གྱིས་བླུས་ཏེ་བླང་པར་བྱའོ། །དེ་ལྟར་མ་བྱས་པར་ནན་གྱིས་བླངས་སམ་ཕྲོགས་ན་ཉེས་བྱས་སུ་འགྱུར་རོ། །ཕས་ཕམ་པ་གཉིས་པ་བཤད་ཟིན་ཏོ།། །།ཕས་ཕམ་པ་གསུམ་པ་མི་ཚངས་པར་སྤྱོད་པའི་གླེང་གཞི་ནི། བཅོམ་ལྡན་འདས་ཡུལ་ཀ་ལན་ད་ཀ་གནས་པའི་གྲོང་ན་བཞུགས་སོ། །དེའི་ཚེ་ཁྱིམ་བདག་ཀ་ལན་ད་ཀའི་བུ་བཟང་བྱིན་ཞེས་བྱ་བ་ཞིག་རབ་ཏུ་བྱུང་ནས་གནས་པ་ལས། དེའི་མས་བུ་ཁྱོད་ཕ་དང་མའི་ནོར་ནི་སྦྱིན་དུ་ཡོད་པ་ལ་བདག་ཅག་བཟའ་བྲན་རྒས་ཏེ་ཤི་བར་གྱུར་ན་ཀུན་ཀྱང་རྒྱལ་པོའི་ནོར་དུ་གྱུར་ན་ཁྱོད་སླར་འབབས་སུ་མི་རུང་ན་ཡང་ས་བོན་ཅུང་ཟད་ཅིག་ཞོག་ཅིག་ཅེས་བྱས་ནས། བཟང་བྱིན་གྱི་ཆུང་མ་ཟླ་མཚན་དང་ལྡན་ཞིང་དུས་ལ་བབ་པ་རྒྱན་གྱིས་ཀླུབས་ཏེ་ཁྲིད་དེ་འོངས་པ་དང༌། ཚེ་དང་ལྡན་པ་བཟང་བྱིན་ཡང་འདོད་ཆགས་བདོ་བ་དང་ཉེས་དམིགས་མ་མཐོང་བས་མི་ཚངས་པར་སྤྱོད་དོ། །དེ་ནས་དུས་མི་རིང་བ་བཅོམ་ལྡན་འདས་ཀྱིས་དགེ་སློང་རྣམས་ལ་འདོད་ཆགས་དང་ཞེ་སྡང་དང་གཏི་མུག་གི་ཉེས་པ་ལས་དཔྲལ་བའི་ཕྱིར། སེམས་རྣམ་པར་གྲོལ་བ་དང་ཤེས་རབ་རྣམ་པར་གྲོལ་བར་འགྱུར་བའི་ཆོས་བཤད་པ་དང༌། ཚེ་དང་ལྡན་པ་བཟང་བྱིན་ཉེས་པ་དྲན་ནས་ཤིན་ཏུ་འགྱོད་ཅིང་མི་
དགའ་ནས། དེ་དགེ་སློང་རྣམས་ཀྱིས་མཐོང་ནས་ཅི་ཉེས་སྨྲས་པ་དང༌། ཚེ་དང་ལྡན་པ་བཟང་བྱིན་གྱིས་དྲང་པོར་སྨྲས་སོ། །དེ་ལྟ་བུ་བཅོམ་ལྡན་འདས་ལ་གསོལ་ནས་བཅོམ་ལྡན་འདས་ཀྱིས་བཟང་བྱིན་ལ་རྣམ་པ་དུ་མས་སྨད་ནས་ལེགས་པ་བཅུ་གཟིགས་ཏེ་འདུལ་བ་ལ་བསླབ་པའི་གནས་བཅས་སོ། །སྡོམ་ཅན་ཉམས་པ་མེད་སེམས་ཀྱིས། །ཉམས་པ་མེད་པའི་སྒོ་གསུམ་དུ། །ཆགས་པས་ནང་དུ་ནོར་བུ་འདས། །དགའ་བ་ཚོར་ན་བརྟུལ་ཞུགས་ཉམས། །ཞེས་བྱ་བས་མི་ཚངས་པར་སྤྱོད་པ་དང༌། རང་བཞིན་བསྟན་ཏེ། སྡོམ་པ་ཅན་དགེ་སྦྱོང་བསླབ་པ་མ་ཕུལ་ཞིང་ཉམས་པ་མེད་པའི་སེམས་རང་བཞིན་དུ་གནས་པས་ཁ་དང༌། རྐུབ་དང༌། མོ་མཚན་ཏེ་སྒོ་གསུམ་པོ་འདི་དག་མ་རུལ་བ་དང༌། རྨ་མ་བྱུང་བ་དང༌། འབུ་ཞུགས་པ་ལྟ་བུ་ཉམས་པ་མེད་པ་སྤྱད་དུ་བཟོད་པར་བདག་ཉིད་ཆགས་པའི་སེམས་ཀྱིས་ནང་དུ་བཅུག་སྟེ་མཚམས་འདས་ལ། དགའ་བ་ཚོང་ན་བརྟུལ་ཞུགས་ཉམས་ཏེ་ཕམ་པར་འགྱུར་རོ་ཞེས་བྱ་བའི་དོན་ཏོ། །དེ་ལ་ཡན་ལག་ནི་རྣམ་པ་ལྔ་སྟེ། སེམས་མ་ཉམས། སྒོ་གསུམ་སྤྱད་བཟོད། ཆགས་སེམས་ཡོད། མཚམས་ལས་འདས། དགའ་བ་ཚོར། དེ་རྣམས་གཅིག་དང་མི་ལྡན་ན་སྦོམ་པོར་གཞག་གོ །སྐྱེས་པ་བུད་མེད་མ་ནིང་གིས། །ཚན་ཀར་བོར་ཏེ་མནན་པ་ལས། །གང་གིས་བདེ་བའི་རོ་མྱོང་བ། །དེ་ཡང་སྡོམ་པ་ཞིག་པར་འགྱུར། །ཞེས་བྱ་བ་ནི་བདག་དགེ་སྦྱོང་མཐུ་ཆུང་ཞིང་ཞན་པ་ལ། སྐྱེས་པ་དང་བུད་མེད་དང་མ་ནིང་སྟེ། མི་རྣམ་པ་གསུམ་གྱིས་ཚན་ཀར་བོར་ཏེ་མནན་ནས་བདག་དང་དེ་དག་གི་སྒོ་གསུམ་གང་ཡང་རུང་བར་བཅུག་པའི་ཚེ། བདག་ཉིད་ཀྱིས་ཉམས་སུ་བླངས་ཏེ་དགའ་བ་ཚོར་ན་དེ་ཡང་སྡོམ་པ་ཞིག་སྟེ་ཕས་ཕམ་པར་འགྱུར་རོ་ཞེས་བྱ་བའི་དོན་ཏོ། །འདིས་ནི་ཇི་ལྟར་གྱུར་ཡང་ཉམས་སུ་མི་བླང་བ་སྟོན་ཏོ། །ཡན་ལག་སྐྱེས་ནས་བདེ་འདོད་པས། །གདུག་པ་སྦྲུལ་གྱི་ཁར་བཅུག་བླ། །ལུས་ལ་དཀའ་ཐུབ་མི་གཞིག་ཅེས། །རྫོགས་སངས་རྒྱས་ཀྱིས་བཀའ་སྩལ་ཏོ། །ཞེས་བྱ་བ་ལ། གལ་ཏེ་འདོད་ཆགས་ཀྱི་དབང་གིས་བདག་གི་ཡན་ལག་སྐྱེས་བསྒྲེངས་ཏེ་ཤིན་ཏུ་བདོ་བར་གྱུར་པ་འདོད་ཆགས་དེ་དང་བྲལ་ཞིང་བདེ་བར་འདོད་པར་བྱ་བའི་ཕྱིར། སྦྲུལ་གདུག་པའི་ཁར་བཅུག་སྟེ། འདོད་ཆགས་དང་བྲལ་
བར་གྱུར་པ་ནི་བདག་ལ་ཕན་པ་ཡིན་པས་བླའི། ལུས་ལ་བདག་གི་སྡོམ་པ་ནི་མི་གཞིག་པར་བྱའོ་ཞེས་རྫོགས་པའི་སངས་རྒྱས་བཅོམ་ལྡན་འདས་ཀྱིས་བཀའ་སྩལ་ཏོ། །ཇི་ལྟར་ཞེ་ན། གལ་ཏེ་སྦྲུལ་གྱིས་གསད་གྱུར་ཀྱང༌། །ཚུལ་ཁྲིམས་གནས་ལ་དེ་ཕན་ཏེ། །ཞེས་བྱ་བ་སྨོས་ཏེ། གལ་ཏེ་ཆགས་པའི་དབང་གིས་ཡན་ལག་སྐྱེས་བསྒྲེངས་ནས་སྦྲུལ་གདུག་པའི་ཁར་བཅུག་སྟེ་ཤི་བར་གྱུར་པ་ནི་སྒོ་གསུམ་སྣང་བའི་གནས་སུ་མ་བཅུག་བ་ཚུལ་ཁྲིམས་ཅན་དེ་ལ་ཕན་ཏེ་མཐོ་རིས་སུ་སྐྱེས་པའི་ཕྱིར་རོ། །ཚུལ་ཁྲིམས་དེ་ཞིག་པར་གྱུར་པས་སྡུག་བསྔལ་ཡིན་ཏེ་ངན་སོང་གསུམ་དུ་སྐྱེའོ། །དེར་ཡང་མ་ཟད་ཀྱི་མྱ་ངན་ལས་འདས་པ་ལའང་སྒྲིབ་པར་འགྱུར་ཏེ། ཚུལ་ཁྲིམས་ཉམས་ན་ཐར་པ་མྱ་ངན་ལས་འདས་པའི་སྐལ་བ་ཡང་མེད་པར་འགྱུར་རོ་ཞེས་བྱ་བའི་དོན་ཏོ། །ཕས་ཕམ་པ་གསུམ་པ་བཤད་ཟིན་ཏོ།། །།ཕས་ཕམ་པ་བཞི་པ་བརྫུན་གྱི་གླེང་གཞི་ནི། བཅོམ་ལྡན་འདས་ཡུལ་ཡངས་པ་ཅན་གྱི་སྤྲེའུ་རྫིང་གི་འགྲམ་ན་བཞུགས་སོ། །དེའི་ཚེ་མུ་གེ་ཆེན་པོ་བྱུང་ནས་ཁ་ཟས་ཀྱིས་ཤིན་ཏུ་བྲེལ་ཏེ་ཕ་མ་ཡང་བུ་ལ་ཁ་ཟས་མི་སྟེར་བ་ཙམ་དུ་དཀོན་པའི་ཚེ། དགེ་སློང་རྫུ་འཕྲུལ་ཅན་དང་གནས་བརྟན་རྣམས་ནི་བྱང་གི་སྒྲ་མི་སྙན་ལ་སོགས་པ་ཡུལ་གཞན་འབྱོར་ཅིང་རྒྱས་པ་དག་ཏུ་དོང་ཞིང་བདག་ཉིད་ཀྱང་ཟ། གང་ཟག་གཞན་ལ་ཡང་སྟོབས་སོ། །དེ་ལ་ཉ་པ་ལས་རབ་ཏུ་བྱུང་བའི་དགེ་སློང་ལྔ་བརྒྱ་ལ་སོགས་པ་དག་གིས་ཀྱང་དགེ་སློང་དེ་དག་ལྟར་བྱ་ཞིང་དབྱར་ཚུལ་དུ་འཇུག་ཏུ་ནི་རྫུ་འཕྲུལ་ཡང་མ་ཐོབ་ཅིང་ཐོས་པ་དག་ཀྱང་ཉུང་ཞིང་དེ་ལྟར་མི་ནུས་ཀྱིས་བདག་ཅག་གིས་ཡུལ་ཉིད་དུ་དབྱར་ཚུལ་དུ་ཞུགས་ལ་བདག་ཅག་སོ་སོའི་ཡོན་ཏན་བསྒྲགས་ཏེ་རྙེད་པ་བསྒྲུབ་པོ་སྙམ་ནས་ཚུལ་དུ་ཞུགས་སོ། །དེ་ནས་ལྔ་བརྒྱ་པོ་དེ་དག་གིས་གཅིག་གིས་གཅིག་གི་ཡོན་ཏན་བརྗོད་པ་ལ་ཞུགས་སོ། །འདིས་རྒྱུན་དུ་ཞུགས་པའི་འབྲས་བུ་ཐོབ་བོ། །འདིས་ལན་ཅིག་ཕྱིར་འོང་བའི་འབྲས་བུ་ཐོབ་བོ། །འདིས་ཕྱིར་མི་འོང་བའི་འབྲས་བུ་ཐོབ་བོ། །འདིས་ནི་དགྲ་བཅོམ་པའི་འབྲས་བུ་ཐོབ་བོ། འདིས་ནི་འཇིག་རྟེན་པའི་ལམ་གྱིས་གྲུབ་བོ། །འདི་ནི་སྡེ་སྣོད་གསུམ་སྨྲ་བའོ་ཞེས་སོ་སོའི་ཡོན་ཏན་བརྗོད་པས་ཁ་ཟས་ལ་སོགས་པ་མང་པོ་དུ་མ་རྙེད་དེ་ཤ་ཁྲག་གི་ལུས་ཤིན་ཏུ་རྟས་པས་གནས་སོ། །དེ་ནས་དབྱར་
འདས་ནས་ཚུལ་ནས་བྱུང་སྟེ། བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་ཕྱིན་ཏོ། །དང་པོར་ཀུན་དགའ་བོ་དང་ཕྲད་པ་དང་སྨྲས་པ། མུ་གེ་ཆེན་པོ་བྱུང་བའི་དུས་ན་དགེ་སློང་གཞན་རྣམས་ནི་རྨྱ་སྟེ་ལྷགས་ན། ཁྱོད་ནི་ཤིན་ཏུ་ཚོ་སྟེ་བྱུང་ན་དེ་ཅིའི་རྒྱུ་ཞེས་སྨྲས་པ་དང༌། བདག་ཅག་སོ་སོའི་ཡོན་ཏན་བརྗོད་པས་རྙེད་པ་མང་པོ་བྱུང་སྟེ་ལུས་རྟས་སོ་ཞེས་སྨྲས་སོ། །ཁྱེད་ལ་ཡོན་ཏན་ཡོད་དེ་བརྗོད་དམ་མེད་དེ་བརྗོད། བདག་ཅག་ལ་ཡོན་ཏན་མེད་པར་བརྗོད་དོ་ཞེས་སྨྲས་པ་དང༌། ཟང་ཟིང་ཅུང་ཟད་ཙམ་གྱི་ཕྱིར་མིའི་ཆོས་ལས་བླ་མར་གྱུར་པ་མེད་པ་ལ་ཡོད་པ་གཞན་བཞིན་དུ་སྨ་བ་ཤིན་ཏུ་མི་རིགས་སོ་ཞེས་ཀུན་དགའ་བོ་ལ་སོགས་པ་རྣམས་ཀྱིས་སྨྲས་སོ། །དེ་ལྟར་གྱུར་པ་བཅོམ་ལྡན་འདས་ཀྱིས་གསན་ཏོ། །དེ་ནས་བཅོམ་ལྡན་འདས་གྱིས་རྣམ་པ་དུ་མས་སྨད་ནས་འདུལ་བ་ལ་བསླབ་པའི་གནས་བཅས་སོ། །ལྷ་དག་མཐོང་ཞེས་དེ་ཡི་སྒྲ། །ཐོས་པར་གྱུར་དང་ཀུན་སྨྲ་དང༌། །ཞེས་བྱ་བ་ལ། དགེ་སྦྱོང་གིས་བདག་གིས་ལྷ་མཐོང་ངོ༌། །ལྷའི་སྒྲ་ཐོས་སོ། །ལྷ་རྣམས་དང་བདག་ཏུ་སྨྲ་ཞིང་ཀུན་དུ་སྨྲ་བར་བྱེད་དོ་ཞེས་ཟེར་ན་གསུམ་ཆར་ལ་ཡང་ཕམ་པ་རེ་རེར་འགྱུར་རོ། །གང་ན་བདག་འདུག་ལྷ་འོང་ཞིང༌། །བདག་ཀྱང་དེ་ཡི་གནས་འགྲོ་དང༌། །ཞེས་བྱ་བ་ལ། དགེ་སྦྱོང་གིས་བདག་གང་ན་འདུག་པའི་གནས་སུ་ལྷ་དག་འོང་ངོ༌། །བདག་ལྷ་གང་ན་གནས་པའི་གནས་དེ་དག་ཏུ་འགྲོའོ་ཞེ་ན་ཡང་ཕམ་པ། ཇི་ལྟར་ལྷ་མཐོང་ཞིང་སྒྲ་ཐོས་ཟེར་བ་དང༌། ལྷ་དང་སྨྲ་ཞིང་ཀུན་དུ་སྨྲའོ། །བདག་འདུག་པའི་གནས་སུ་འོང་ངོ་ཞེས་སྨྲའོ། །དེ་བཞིན་དྲི་ཟ་གྲུལ་བུམ་ཀླུ། །གནོད་སྦྱིན་ལྟོ་འཕྱེ་ཆེན་པོ་དང༌། །ཤ་ཟ་ཡི་དགས་མིའམ་ཅི། །མཐོང་ངོ་ཞེས་ལ་སོགས་སྨྲའམ། །ཞེས་བྱ་བ་རྣམས་ལ་ཡང་སྦྱར་བར་བྱའོ། །བསམ་གཏན་མངོན་ཤེས་ཚད་མེད་དང༌། །རྒྱུན་ཞུགས་ལ་སོགས་འབྲས་བུ་དང༌། །ལམ་ལ་རབ་ཏུ་ཞུགས་པ་འང་རུང༌། །བདག་གིས་ཐོབ་ཅེས་སྨྲས་ན་ནི། །དོན་རིག་པ་ལས་བརྫུན་པའི་ཚིག །ཅེས་བྱ་བ་ལ། དགེ་སྦྱོང་གི་འདུ་ཤེས་སྦས་ནས། གཟུགས་ཀྱི་ཁམས་ཀྱི་བསམ་གཏན་དང་པོ་ཐོབ་བོ་ཞེའམ། གཉིས་པ་ཐོབ་པོ་ཞེའམ། གསུམ་པ་དང་བཞི་པ་ཐོབ་བོ་ཞེས་སྨྲ་ན་ཡང་ཕམ་པ། དེ་བཞིན་དུ་མངོན་པར་ཤེས་པ་ལྔ་ལས་གང་ཡང་རུང་བ་ཞིག་ཐོབ་པོ་ཞེས་སྨྲ་ན་ཡང་ཕམ་པའོ། །ཡང་འདུ་ཤེས་སྦས་ནས་
ཚད་མེད་པ་བཞི་གང་ཡང་རུང་བ་ཞིག་གྲུབ་པོ་ཞེས་ཟེར་བ་དང༌། དགེ་སྦྱོང་གི་འདུ་ཤེས་སྦས་ནས་འབྲས་བུ་བཞི་ལས་བདག་གིས་རྒྱུན་དུ་ཞུགས་པའི་འབྲས་བུ་ཐོབ་བོ་ཞེའམ། ལན་ཅིག་ཕྱིར་འོང་བ་དང༌། ཕྱིར་མི་འོང་བ་དང༌། དགྲ་བཅོམ་པའི་འབྲས་བུ་ཐོབ་པོ་ཞེས་སྨྲས་ཏེ། གཞན་གྱིས་དོན་གོ་བས་དོན་རིག་སྟེ་གོ་ན་བརྫུན་གྱི་ཚིག་སྟེ་ཕམ་པར་འགྱུར་རོ། །ལམ་ལ་རབ་ཏུ་ཞུགས་པ་ནི་དགེ་སྦྱོང་གིས་འདུ་ཤེས་སྦས་ཏེ་འཇིག་རྟེན་ལས་འདས་པའི་ལམ་བདག་གིས་ཐོབ་པོ་ཞེས་སྨྲས་ན་ཕམ་པའོ། །འཇིག་རྟེན་པའི་ལམ་གྱི་ཞི་གནས་ཀྱི་མཚན་མ་འགའ་ཞིག་ལ་བརྟེན་ཏེ་འདོད་ཆགས་དང་གནོད་སེམས་ལ་མི་སྤྱོད་དོ་ཞེས་ཟེར་ན་སྦོམ་པོར་འགྱུར་རོ། །ཁྱད་པར་ཐོབ་པའི་བདག་ཉིད་ཅན། །མ་ཉམས་ཞེས་བྱ་བ་ལ། དགེ་སྦྱོང་བདག་གིས་སེམས་མ་སྨྱོས་པ་ནད་ཀྱིས་གཟིར་བར་མ་གྱུར་ཏེ་རང་བཞིན་དུ་གནས། གོང་དུ་བསྟན་པའི་ཡོན་ཏན་ཁྱད་པར་ཅན་ཐོབ་ཅིང་མཐོང་ཞེས་སྨྲས་ན་ཕས་ཕམ་པར་འགྱུར་གྱི། སེམས་སྨྱོས་པ་དང་ནད་ཀྱིས་གཟིར་བ་རྣམས་ནི་ཕམ་པར་མི་འགྱུར་གྱི་སྦོམ་པོར་གཞག་གོ་ཞེས་བྱ་བའི་དོན་ཏོ། །ང་རྒྱལ་མེད་བཞིན་དུ། སྨྲས་ན་བརྟུལ་ཞུགས་ཉམས་པར་འགྱུར། །ཞེས་བྱ་བ་ལ། སྔོན་དགེ་སྦྱོང་ཞིག་དགོན་པ་ན་གནས་པས་འཇིག་རྟེན་པའི་ལམ་གྱིས་ཉོན་མོངས་པ་བཅོམ་སྟེ། མི་འབྱུང་བར་བྱས་ནས་ཡུན་རིང་མོ་ཞིག་ལོན་པ་ན། ཉོན་མོངས་པ་མི་འབྱུང་བའི་གནས་རྣམས་ལ་བརྟགས་ན་ཉོན་མོངས་པ་མི་སྐྱེ་བས་བདག་ཅག་གིས་ཉོན་མོངས་པ་སྤངས་སོ་ཞེས་བསམས་ཤིང་བརྗོད་ནས་སླར་གྲོང་དུ་ལྷགས་པ་ལས་འཇིག་རྟེན་པའི་ལམ་གྱིས་ཉོན་མོངས་པ་རྩད་ནས་མ་ཕྱིན་པའི་ཕྱིར་ཉོན་མོངས་པ་སྐྱེ་བའི་ཡུལ་བུད་མེད་དང་དགྲ་ལ་སོགས་པ་མངོན་དུ་གྱུར་པ་དང་ཉོན་མོངས་པ་སླར་སྐྱེས་ནས་དགེ་སློང་དེ་དག་བདག་ཅག་གིས་ཉོན་མོངས་པ་མ་སྤངས་པར་སྤངས་སོ་ཞེས་སྤྲས་ཏེ་མིའི་ཆོས་ལས་བླ་མར་གྱུར་པའི་ཕམ་པར་མ་གྱུར་གྲང་ཞེས་བཅོམ་ལྡན་འདས་ལ་ཞུས་པ་དང༌། མངོན་པའི་ང་རྒྱལ་ཅན་དེ་ལྟ་བུ་མ་གཏོགས་ཏེ་སླན་ཆད་དེ་ལྟ་བུའི་ཁྱད་པར་ཞིག་ཐོབ་ན་ཡང་སྨྲ་བར་མི་བྱའོ་ཞེས་གསུངས་པ་ལྟ་བུ་སྟེ། དེ་ལྟ་བུ་ནི་ཕམ་པར་མི་གཞག་གོ །དགེ་སྦྱོང་གིས་འདུ་ཤེས་སྦས་ཏ། ལྷ་དང་ཀླུ་དང་གནོད་སྦྱིན་མཐོང་བ་དག་ཡོད་
དོ་ཞེས་ནི་སྨྲ་ལ། བདག་ཉིད་ཡིན་ནོ་ཞེས་ནི་མི་སྨྲ་ན་སྦོམ་པོར་འགྱུར་རོ། །ཤ་ཟ་རྣམས་མཐོང་བ་ཡོད་དོ་ཞེས་སྨྲ་ལ། བདག་ཉིད་ཡིན་པར་མི་སྨྲ་ན་ནི་ཉེས་བྱས་སུ་འགྱུར་རོ། །དགོན་པ་ན་དགེ་སློང་དུ་གནས་པ་དེ་ལ་མི་མ་ཡིན་པ་རྣམས་ཀྱིས་གཙེས་པ་ལས་འཕགས་པ་རྣམས་ལ་མི་གཙེ་སྟེ་བདག་ལ་ཡང་མི་གཙེ་ཟེར་ན་ཕམ་པ། འཕགས་པ་རྣམས་ཀྱི་ཕྱིར་ཁྱིམ་བདག་རྣམས་སྟན་ཁྲ་བོ་འདིངས་ཏེ་བདག་གི་ཕྱིར་ཡང་ཁྱིམ་བདག་སྟན་ཁྲ་བོ་འདིངས་སོ་ཞེས་ཟེར་བ་ཡང་དོན་རིག་ན་ཕམ་པའོ། །ཁྱད་པར་ཐོབ་པ་མ་གཏོགས་པར་ཞེས་བྱ་བ་ལ་སོགས་པས་ཉེས་བྱས་སུ་འགྱུར་བ་བསྟན་ཏོ། །དེ་ལས་གཞན་པའི་བརྫུན་ཚིག་རྣམས། །དེ་དག་ཐམས་ཅད་སྡིག་མང་འགྱུར། །ཞེས་བྱ་བ་ནི་གོང་དུ་ཡོན་ཏན་ཁྱད་པར་ཅན་ཐོབ་བོ་ཞེས་བྱ་བ་ལས་མ་གཏོགས་པར་ཀུ་རེ་དང་ཀྱལ་ཀ་ལ་སོགས་པའི་ཕྱིར། བརྫུན་པའི་ཚིག་སྨྲས་ན་སྡིག་པ་མང་དུ་འགྱུར་ཏེ་ཉེས་བྱས་ལྕི་བར་འགྱུར་རོ། །ཇི་ལྟར་མཛའ་བོ་འབྱེད་འགྱུར་བ། །ཕྲ་མའི་ཚིག་རྣམས་སྨྲ་མི་བྱ། །ཞེས་བྱ་བས་ནི་ངག་གི་ཉེས་པ་གཉིས་པ་བསྟན་ཏེ་འདུམ་ཞིང་མཛའ་བར་འགྱུར་བས་འཐབ་ཅིང་དབྱེ་བར་འགྱུར་བའི་ཕྲ་མའི་ཚིག་གིས་དབྱེ་བ་རྣམས་སླར་མི་སྡུམ་ཞིང་དབྱེས་སུ་འགྱུར་བ་ཕྲ་མའི་ཚིག་རྣམས་མི་བྱའོ། །ངན་དུ་ཟེར་ལ་ངན་མི་སྨྲ། །གཤེ་བ་ལ་ཡང་སླར་མི་གཤེ། །མཚང་འབྲུ་བ་ལ་སླར་མི་འབྲུ། །རྡེག་པ་ལ་ཡང་སླར་མི་རྡེག །ཅེས་བྱ་བས་ནི་ངག་གི་ཉེས་པ་སྤོང་བ་དགེ་སྦྱོང་གི་ཚུལ་བཞི་སྟེ། བདག་ཉིད་ལ་ཉེས་པ་རྣམས་ལའང་མི་རིགས་པར་མི་བྱ་ན། སེམས་ཅན་ཉེས་པ་མེད་པ་རྣམས་ལ་བདག་ཉིད་ཀྱིས་མི་རིགས་པར་བྱ་བ་ལྟ་ཅི་སྨོས། གཞན་གྱིས་ངན་དུ་སྨྲ་བལ་སོགས་པ་བྱས་པ་སླར་ལན་མི་གླན་ནོ་ཞེས་བྱ་བའི་དོན་ཏོ། །བློ་ལྡན་བསླབ་པ་འདོད་བ་ཡིན། །བསྒྲིམས་ཏེ་ངག་གི་སྐྱོན་རྣམས་སྤང༌། །ཞེས་བྱ་བ་ནི་ངག་གི་ཉེས་པ་བཞི་པ་སྟེ། རྒྱལ་པོའི་གཏམ་དང༌། ཆོམ་པོའི་གཏམ་དང༌། ཚོང་པའི་གཏམ་ལ་སོགས་པ་ནི་ཚིག་ཀྱལ་པ་སྟེ་ངག་གི་སྐྱོན་རྣམས་ཏེ་གང་བསླབ་པར་འདོད་པའི་དགེ་སློང་བློ་དང་ལྡན་པས་སྤང་བར་བྱའོ། །དེ་ལྟར་འགྱུར་བར་རིག་ནས་ནི། །ངག་རྣམས་ཤིན་ཏུ་བསྡམ་པར་བྱ། །ཞེས་བྱ་བ་ནི་གོང་དུ་བཤད་པ་ལྟར་ངག་གིས་ཉེས་པ་བཞི་སྤྱད་ན་བརྫུན་དང་སྦོམ་པོ་དང་ཉེས་བྱས་སུ་རིག་
ནས་དེ་དག་བསྡམ་ཞིང་སྤང་ངོ་ཞེས་བྱ་བའི་དོན་ཏོ། །ཕམ་པ་བཞི་པ་བཤད་པ་སྟེ་ཕས་ཕམ་པ་བཞིའི་བཤད་པ་རྫོགས་སོ།། །།དེ་ལྟར་ཕས་ཕམ་པའི་གནས་བསྟན་ནས། ད་ནི་བསླབ་པ་ཕྲ་མོའི་གནས་བསྟན་པའི་ཕྱིར། འབྲུ་བཏགས་ཕབས་དང་སྦྱར་བ་ཡི། །ཞེས་བྱ་བ་ལ་སོགས་པ་སྨོས་སོ། །དེ་ཡང་རྣམ་པ་དྲུག་སྟེ། འབྲུ་བཏགས་ཕབས་དང་སྦྱར་བ་ཡི། །བཏུང་བའི་བྱེ་བྲག་འབྲུ་ཡི་ཆང༌། །ཞེས་བྱ་བ་ནི་ནས་འབྲས་བཏགས་ཏེ་ཆང་དུ་བྱ་བའམ། མ་བཏགས་པ་ཆང་དུ་བྱས་པ་རྣམས་ཏེ། དེ་ནི་མྱོས་པར་འགྱུར་རིག་ནས། །རྩྭ་མཆོག་གིས་ཀྱང་མི་བཏུང་ངོ༌། །ཞེས་བྱ་བར་འགྱུར་རོ། །སྡོང་བུ་མེ་ཏོག་འབྲས་བུ་ལས། །སྦྱར་བའི་ཁུ་བ་བཅོས་པའི་ཆང༌། །དེ་ནི་མྱོས་པར་འགྱུར་རིག་ནས། །ཞེས་བྱ་བ་དང༌། རྩྭ་མཆོག་གིས་ཀྱང་མི་བཏུང་ངོ༌། །ཞེས་བྱ་བར་སྦྱར་ཏེ། འདི་ལྟར་སྡོང་བུ་སྟེ་བུར་མ་ཤིང་བཅིར་བ་ལས་བྱས་པ་དང༌། མེ་ཏོག་འབྲས་བུ་སྟེ་རྒུན་འབྲུམ་ལ་སོགས་པ་སྦྱར་བའི་ཁུ་བས་མྱོས་ཤིང་དྲན་པ་ཉམས་པར་འགྱུར་བར་རིག་ནས་བདག་ཉིད་ཀྱང་རྩྭ་མཆོག་གིས་མི་བཏུང་ལ་གཞན་ལ་ཡང་སྦྱིན་པར་མི་བྱ་ཞེས་སྟོན་ཏོ། །ཅིའི་ཕྱིར་ཞེ་ན། སྡོམ་ཅན་ཕན་འདོད་མི་བཏུང་ངོ༌། །ཞེས་བྱ་བ་སྟེ། འདི་ལྟར་དགེ་སྦྱོང་སྡོམ་པ་ཅན་བསླབ་པ་ལ་གནས་པས་བདག་ལ་ཕན་པ་དང་བདེ་བར་བྱ་བའི་ཕྱིར་རོ། །འཐུངས་ན་ཉེས་པ་ཅི་ཡོད་ཅེ་ན། དེ་འཐུངས་ན་ནི་དྲན་ཉམས་ཤིང༌། །བརྟུལ་ཞུགས་ལྡན་པ་བག་མེད་འགྱུར། །བག་མེད་པ་ལས་བརྟུལ་ཞུགས་ཉམས། །ཞེས་བྱ་བ་སྟེ། གོང་དུ་སྨོས་པའི་ཆང་གི་རྣམ་པ་དེ་དག་འཐུངས་ཤིང་གཞན་ལ་བླུད་ན་བདག་དང་གཞན་གྱི་སེམས་རང་བཞིན་དུ་གནས་ཤིང་གསལ་བ་ཉམས་སུ་མྱོང་བའི་དྲན་པ་ཉམས་པས་ལུས་ཀྱིས་རྗེས་སུ་རྡེག་བཙོག་དང༌། ངག་གི་སྒོ་ནས་ཚིག་ངན་པ་ལ་སོགས་པ་བག་མེད་པ་འབྱུང་ངོ༌། །དེ་ལྟར་བག་མེད་པའི་སྒོ་ནས་སྲོག་གཅོད་པ་དང༌། མ་བྱིན་པར་ལེན་པ་ལ་སོགས་པ་བརྟུལ་ཞུགས་ཏེ་ཚུལ་ཁྲིམས་ཉམས་པར་འགྱུར་རོ། །དེ་བས་ན། དེ་བས་སྟོན་པའི་བཀའ་དྲན་བྱ། །མྱོས་འགྱུར་ཉེས་པ་འཕེལ་འགྱུར་བ། །རྩྭ་མཆོག་གིས་ཀྱང་མི་བཏུང་ངོ༌། །ཞེས་སྨོས་ཏེ། དེ་བས་ན་སྟོན་པ་
སངས་རྒྱས་ཀྱི་བཀའ་ཚད་མ་དྲན་པར་བྱས་ལ་དྲན་པ་ཉམས་ཤིང་མྱོས་པར་འགྱུར་བའི་གནས་ཉེས་པ་རྣམ་པ་དུ་མ་འཕེལ་བར་བྱེད་པའི་རྒྱུ་རྩྭ་མཆོག་གིས་ཀྱང་རེག་པར་མི་བྱ་ན་གཞན་ལྟ་སྨོས་ཀྱང་ཅི་དགོས་ཞེས་བྱ་བའི་དོན་ཏོ། །ཇི་ལྟར་ཆང་འཐུངས་ན་ཉེས་བྱས་སུ་འགྱུར་བ་བཞིན་དུ་གླུམ་དང་སྦང་མ་ཟོས་ན་ཉེས་བྱས་སུ་འགྱུར་རོ། །འདི་ལྟར་ཆང་ལ་ཆང་གི་ཁ་དོག་དང་དྲི་དང་རོ་དང་མྱོས་པར་འགྱུར་བའི་མཐུ་དང་བཞི་ཆར་ལྡན་པ་འཐུངས་ན་ཉེས་པར་གཞག་གོ །སྦྲང་རྩི་དང་བྲོ་བ་ལ་སོགས་པ་མྱོས་པའི་མཐུ་ཡོད་དུ་ཟིན་ཀྱང་ཁ་དོག་དང་དྲི་དང་རོ་ལ་སོགས་པ་དང༌། འཇིག་རྟེན་ལ་སོགས་པ་སྨད་པ་མ་ཡིན་པས་དེ་དག་གིས་མྱོས་པ་ནི་མ་ཡིན་ནོ། །གལ་ཏེ་དགེ་སྦྱོང་ནད་ཀྱིས་ཐེབས་ཏེ་ཆང་གི་ཆོ་ག་བྱ་དགོས་ན་ཆང་གིས་ལུས་ལ་བསྐུ་བར་བྱའོ། །ཡི་ག་འཆུས་པ་ཕན་པར་བྱ་ན་ཡང་ཁར་བླུགས་པ་ལས་བཏུང་བར་མི་བྱའོ། །ཆང་མ་འཐུངས་ན་ཡང་མི་འཚོ་བ་ཙམ་དུ་ཐུག་ན་བསྐོལ་བ་ཆང་གི་རོ་དང་མྱོས་པའི་མཐུ་མེད་པར་བྱས་ཏེ། ཆང་དང་རོ་ཉམས་པ་དང་ཁ་དོག་དང་འདྲ་བ་ཙམ་བྱའོ། །གླུ་གར་རོལ་མོའི་གླེང་གཞི་ནི་བཅོམ་ལྡན་འདས་རྒྱལ་པོའི་ཁབ་ན་བཞུགས་སོ། །རྒྱལ་པོ་གཟུགས་ཅན་སྙིང་པོས་ཀླུའི་རྒྱལ་པོ་རི་བོ་དང་ཡིད་འོང་གི་ཕྱིར་གཙུག་ལག་ཁང་བརྩིགས་ནས་དུས་སྟོན་ཆེན་པོ་བྱས་པའི་ཚེ། ལྷོ་ཕྱོགས་ནས་གར་མཁན་འོངས་ཏེ་དྲུག་སྡེ་ཅི་བྱེད་པའི་ལད་མོ་བཟླས་པ་དང༌། དྲུག་སྡེ་ཁྲོས་ནས་དུས་གཞན་ཞིག་ན་དུས་སྟོན་བྱེད་པའི་གར་མཁན་ལ་གནོད་པའི་ཕྱིར་དྲུག་སྡེས་བྲོ་གར་བྱས་པ་དང༌། སྐྱེ་བོ་ཀུན་གར་མཁན་ལ་མི་ལྟ་བར་དྲུག་སྡེས་བྲོ་གར་བྱེད་པ་ལ་བལྟས་ནས་རོལ་མོ་མཁན་གྱིས་རྙེད་པ་མ་གྲུབ་སྟེ། འཚོ་བ་ཆད་ནས་རོལ་མོ་མཁན་ཁ་ཟེར་བ་ལ་བཅས། ཡུལ་ནི་རྒྱལ་པོའི་ཁབ། གང་ཟག་ནི་དྲུག་སྡེ། ཉོན་མོངས་པ་ནི་ཞེ་སྡང༌། ཉེས་པ་ནི་གླུ་གར་རོལ་མོའི་སྒྲ་བྱེད་པའོ། །གླུ་གར་དེ་བཞིན་སིལ་སྙན་རྣམས། །སྡོམ་ལ་གནས་པས་མི་བྱའོ། །ཞེས་བྱ་བས་དྲེགས་པའི་ཉེས་པ་སྤང་བ་སྟོན་ཏེ། དེ་ལ་གླུ་ནི་ཤར་དང་གནད་ར་ལ་སོགས་པའོ། །གར་ནི་རྐང་ལག་གཡོབ་ཅིང་ལུས་སྒྱུར་བར་བྱེད་པའོ། །དེ་གཉིས་སྡོམ་པ་ལ་གནས་པས་བྱས་ན་ཉེས་བྱས་སུ་འགྱུར་རོ། །གཞན་བྱེད་དུ་མི་གཞུག་སྟེ་བྱེད་དུ་བཅུག་
ན་ཉེས་བྱས་སོ། །སིལ་སྙན་ནི་མཆོད་པའི་ཡོ་བྱད་དང་རོལ་མོའི་ཆ་བྱད་དོ། །དེ་གསིལ་ཞིང་དཀྲོལ་བ་རྣམ་པ་སྣ་ཚོགས་ཏེ། དེ་དག་སྡོམ་པ་ལ་གནས་པས་མི་བྱའོ། །ཅིའི་ཕྱིར་ཞེ་ན། དེ་དག་ནི་རྒྱ་གས་ཤིང་དྲེགས་པར་འགྱུར་བའམ། ཡན་ལག་འཁོར་བར་བྱེད་པའི་རྒྱུ་ཡིན་པའི་ཕྱིར་རོ། །མཆོད་པ་བྱ་བའི་ཕྱིར་གླུ་གར་བྱེད་དུ་བཅུག་ན་ཡང་གླུ་གར་བྱེད་དུ་མི་གཞུག །ལྷ་དང་ལྷ་མ་ཡིན་གྱི་དབང་པོས་མཆོད་པ་ལྟར་སངས་རྒྱས་ཀྱི་ཞབས་ཀྱི་རྡུལ་ལ་མཆོད་པ་གྱིས་ཤིག་ཅེས་བྱས་ལ་བྱེད་དུ་གཞུག་གོ །ཡང་ན་གནང་བ་ནི་སེམས་ཅན་གཞན་རྣམས་དད་པ་བསྐྱེད་པའི་ཕྱིར། དཀོན་མཆོག་གསུམ་གྱི་ཆེ་བའི་ཡོན་ཏན་བསྟོད་ར་རྣམས་དབྱངས་དང་གླུ་བསྲེས་ཏེ་བྱས་ན་ཉེས་པ་མེད་དོ། །གླུ་དབྱངས་དག་མི་ཤེས་ཏེ་སློབ་འདོད་ན་ཡང་ཤེས་པ་ཁྲིད་དེ་གནས་དབེན་པར་སློབ་ཏུ་གཞུག་གོ །འདིར་བླུ་གར་ལ་སོགས་པ་དངོས་སུ་མ་བྱས་ཀྱང་ཆུ་ལ་སོགས་པ་ལ་བརྡ་ཐབས་དང་ལག་ཐབས་སུ་བྱད་ན་ཡང་ཉེས་བྱས་སོ། །ཕྲེང་བ་དང་སྤོས་དང་བྱུག་པ་དང༌། རྒྱན་འདོགས་པའི་གླེང་གཞི་ནི་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །དེའི་ཚེ་གཙུག་ལག་ཁང་གི་དུས་སྟོན་བྱེད་པ་ན་དྲུག་སྡེ་ཁ་དོག་གིས་བརྒྱན་ནས་གར་བྱས་པ་ལ་བཅས་སོ། །ཡུལ་ནི་རྒྱལ་པོའི་ཁབ། གང་ཟག་ནི་དྲུག་སྡེ། ཉོན་མོངས་པ་ནི་ཞེ་སྡང༌། ཉེས་པ་ནི་རྒྱན་ཕྲེང་དང་ཁ་དོག་འཆང་བའོ། །ལུས་ལ་སྦོས་ཀྱིས་མི་བྱུག་སྟེ། །ཞེས་བྱ་བ་ལ་སོགས་པ་ཤློ་ཀ་ཕྱེད་དང་གསུམ་གྱིས་ཁ་དོག་གི་ཉེས་པ་སྟོན་ཏོ། །དེ་ལ་ལུས་ལ་སྤོས་ཀྱིས་བྱུག་པ་ནི་ལུས་ཀྱི་མདོག་མཛེས་པ་དང་དྲི་ཞིམ་པར་བྱ་བའི་ཆེད་དུ་ཨ་ཀ་རུ་དང་འབུ་སུག་ལ་སོགས་པ་དྲི་ཞིམ་པོའི་རྣམ་པ་ལྡེ་གུ་དང་ཕྱེ་མར་བྱས་ཏེ་ལུས་ལ་བསྐུ་ཞིང་གདགས་པར་མི་བྱའོ། །དེ་བཞིན་དུ་ཙནྡན་ལ་སོགས་པ་མི་བསྐུའོ། །ཡུང་དང་གུར་གུམ་ལ་སོགས་པས། ཁ་དོག་རྣམས་སུ་མ་བྲིའོ་སྟེ། མིང་གིས་སྨོས་པ་འདི་རྣམས་ཀྱིས་ཀྱང་ལུས་ཀྱི་མཛེས་ཤིང་སྤ་བ་དང་དྲི་ཞིམ་པར་བྱ་བའི་ཆེད་དུ་ལུས་ལ་གདགས་ཤིང་བསྐུ་བ་དཔྲལ་བ་ལ་རེས་སུ་མི་བྱའོ། །སྩོགས་པའི་སྒྲས་ནི་མཚལ་དང་ལི་ཁྲི་དང༌། ཁ་དོག་མཛེས་པར་འགྱུར་བའི་རྒྱུ་གཞན་དག་ཀྱང་བསྡུའོ། །མེ་
ཏོག་མགོ་རྒྱན་ཕྲེང་བ་དག །བརྟུལ་ཞུགས་ཅན་གྱིས་གདགས་མི་བྱ། །ཞེས་བྱ་བ་ནི་མེ་ཏོག་བརྒྱུས་པའི་ཆུན་པོས་མགོ་དང་མགུལ་དུ་མི་གདགས་ཤིང་སྤང་ངོ་ཞེས་བྱ་བའི་དོན་ཏོ། །གསེར་ལ་སོགས་པའི་རྒྱན་རྣམས་ཀྱིས། །བདག་ལ་བརྒྱན་པར་མི་བྱའོ། །ཞེས་བྱ་བ་ལ། དགེ་སྦྱོང་བདག་ཉིད་གསེར་དང་དངུལ་དང་མུ་ཏིག་ལ་སོགས་པ་ནོར་བུ་རིན་པོ་ཆེའི་རྒྱན་རྣམས་ཀྱིས་བདག་གི་མགུལ་དང་རྐང་ལག་ལ་སོགས་པ་བརྒྱན་ཅིང་གདགས་པར་མི་བྱའོ། །དུད་པ་ལ་སོགས་མིག་སྨན་རྣམས། །མིག་མི་ན་བར་མི་བྱུག་གོ །ཞེས་བྱ་བ་ནི་དགེ་སློང་བདག་ཉིད་མིག་མི་ན་བར་མཚལ་དང་གུར་གུམ་དང་ག་བུར་དང་དུད་པ་སྦྱར་བ་ལ་སོགས་པས་མིག་ལ་བསྐུ་བར་མི་བྱའོ། །ལུས་ཀྱི་མདོག་མཛེས་པ་དང་ཆགས་པ་སྐྱེ་བར་བྱ་བའི་ཕྱིར་མེ་ལོང་དང་ཆུ་དང་བ་ལ་བལྟ་བར་མི་བྱ། སེན་མོ་མི་བཅོས། ཆགས་པའི་བསམ་པས་སོ་རྩིལ་སོགས་པ་བཟའ་ཞིང་མཆུ་དམར་པོར་མི་བྱའོ། །གཡན་པ་དང་འབྲུམ་བུའི་ནད་མེད་པར་ལུས་འཇམ་པ་དང༌། མཛེས་པར་བྱ་བའི་ཕྱིར་རྡོ་དང་སོ་ཕག་གིས་མི་བྲུད། ཁྲུས་ཆུ་ལ་སོགས་པའི་ནང་དུ་དྲི་ཞིམ་པོ་སྣ་ཚོགས་སྦྱར་ལ་མི་བླུགས། ཡོན་བདག་དང་པ་ཅན་འགའ་ཞིག་དྲི་འབུལ་ཏེ་ལུས་ལ་མི་བསྐུར་མི་རུང་ན་ཡང་ཡིད་བསྲུང་བའི་ཕྱིར་སྐད་ཅིག་ཙམ་བསྐུས་ལ་ཡོན་བདག་སོང་མ་ཁད་དུ་མ་ཚོར་བར་དབྱིའོ། །རིམས་ནད་དང་གཡན་པའི་ནད་ལ་ཕན་པའི་ཕྱིར་ཙནྡན་དང་གུར་ཀུམ་གྱིས་ལུས་ལ་བསྐུ་དགོས་ན་འཇིག་རྟེན་པས་མི་འཕྱ་བར་བསྐུའོ། །ཤིང་ཁྲི་ཁྲུ་གང་མཐོ་བ་དང༌། །ཞེས་བྱ་བ་ལ་སོགས་པ་ཤློ་ཀ་གཅིག་གིས་མཐོན་པོ་ན་འདུག་པའི་ཉེས་པ་བསྟན་ཏེ། ཤིང་ཁྲི་ཁྲུ་གང་ལས་མཐོ་བ་ཞེས་བྱ་བ་སྟེ་དེ་ལ་ཉལ་བར་མི་བྱའོ། །བ་སོ་ལ་སོགས་བརྒྱན་པའི་ཁྲི། །དམའ་ཡང་ཉལ་ཁྲི་བཟང་པོ་ལ། །ཉལ་ལ་སོགས་པ་མི་བྱའོ། །ཞེས་བྱ་བ་ནི་ཁྲུ་གང་སྙེད་དུ་མི་མཐོ་ཟིན་ཀྱང་བ་སོ་དང་དུང་དང་རྭ་ལས་བྱས་པའི་ཁྲི་འམ། དེ་དག་གིས་བརྒྱན་པའི་ཁྲི་བཟང་པོ་དམའ་ཡང་ཉལ་བར་མི་བྱའོ། །ཅིའི་ཕྱིར་ཞེ་ན། མལ་སྟན་མཐོན་པོ་དང་བཟང་པོ་དང་ཆེན་པོ་ལ་ཉལ་ན་མལ་གྱི་བདེ་བ་ལ་ཆགས་ཤིང་རློམ་སེམས་འབྱུང་བའི་ཕྱིར་དང༌། གཞན་དུ་ན་བཀྲ་མི་ཤིས་པར་ཡང་འཆད་པས་ཉལ་བར་མི་བྱའོ། །གནང་བ་ནི་དེ་བཞིན་གཤེགས་པའི་གསུང་རབ་ཁ་དོན་དུ་འདོན་
ཅིང་འཆད་པའི་ཚེ་ནི་རིན་པོ་ཆེ་སྣ་ཚོགས་ཀྱིས་བརྒྱན་པའི་ཁྲི་ལ་འདུག་ཏུ་གནང་ངོ༌། །དེ་ལ་འདུག་པའི་ཚེ་ཡང་ཆགས་ཤིང་བདེ་བའི་བསམ་པས་ནི་འདུག་པར་མི་བྱའོ། །འདུ་བྱེད་ཐམས་ཅད་སྐད་ཅིག་མི་རྟག་པའི་རང་བཞིན་ཡིན་པར་བསམས་ཏེ་འདུག་པར་བྱའོ། །གདིང་བ་ཀོ་ལྤགས་འཆང་བ་གནང་བ་ནི་ཡུལ་མཐའ་འཁོབ་དང་ལྷགས་པ་ཆེ་བ་དག་ཏུ་ནི་མལ་གོས་དང་སྟན་གཉིས་ཀ་ཀོ་ལྤགས་ལས་བྱེད་དུ་གནང་གི་ཡུལ་དབུས་མ་ག་དྷཱའི་ཕྱོགས་སུ་ནི་མི་གནང་ངོ༌། །ཀོ་ལྤགས་བཅང་དུ་གནང་བ་ཡང་གཞན་གྱི་གནང་གི་པ་གླང་དང་སྟག་དང་སེང་གེ་དང་དོ་མ་དང་དྲེད་དང་རྟ་དང་བྱི་ལའི་པགས་པ་འདི་བདུན་བཀྲ་མི་ཤིས་ཤིང༌། འཇིག་རྟེན་པ་རྣམས་ཀྱིས་སྨད་ཅིང་དཀོན་པ་ཡིན་པ་སྤྱོད་ཅིང་འདུག་ཏུ་མི་གནང་ངོ༌། །ནད་ཀྱི་གཞི་ལ་ཕན་ན་ནི་སྨན་པས་བསྒོ་བ་ལ་ཉེས་པ་མེད་དོ། །གླུ་གར་ལ་སོགས་བསྟེན་པ་དང༌། །གང་ལ་དྲེགས་པ་སྐྱེ་མི་འགྱུར། །དྲེགས་པའི་ཡན་ལག་སྤངས་ནས་ནི། །བརྟུལ་ཞུགས་གནས་ཞེས་བརྗོད་པ་ཡིན། །ཞེས་བྱ་བ་ནི་དྲེགས་པའི་ཉེས་པ་སྤངས་པའི་ཕན་ཡོན་ཡིན་ཏེ། འདི་ལྟར་གླུ་དང་གར་ལ་སོགས་པ་དངོས་པོ་གནག་བསྟེན་ཅིང་གནས་ན་དྲེགས་པ་དང་རྒྱགས་པ་སྐྱེ་བར་འགྱུར་བའི་དྲེགས་པའི་ཡན་ལག་གམ་དངོས་པོ་དེ་ཡང་སྤང་སྣ་བརྟུལ་ཞུགས་གནས་པ་སྟེ། སྡོམ་པ་ལ་གནས་པ་ཚུལ་ཁྲིམས་དང་ལྡན་པ་ཡིན་ནོ་ཞེས་བྱ་བའི་དོན་ཏོ། །ཉི་མ་ཕྱེད་མཚམས་ཕན་ཆད་ནས་།ཞེས་བྱ་བ་ལ་སོགས་པ་ཤློ་ཀ་གསུམ་གྱིས་ནི་དུས་མ་ཡིན་པས་ཟས་ཟ་བའི་ཉེས་པ་བསྟན་ཏོ། །དེ་ལ་དགེ་སྦྱོང་གིས་ཟས་ཟ་བའི་དུས་མ་ཡིན་པ་ནི་རང་གི་གནས་འཛམ་བུའི་གླིང་དུ་ཉི་མ་ཕྱེད་མཚམས་ཚུན་ཆད་ནས་བཟུང་སྟེ་སྐྱ་རེངས་མ་ཤར་བར་དུ་ཟ་བའི་དུས་མ་ཡིན་པར་སངས་རྒྱས་བཅོམ་ལྡན་འདས་ཀྱིས་བཀའ་སྩལ་ཏེ། དགེ་སྦྱོང་སྡོམ་པ་ལ་གནས་པས་དུས་དེར་ཟས་མི་བཟའ་བར་བྱ་སྟེ། དེ་བས་ན། ཉི་མ་ཕྱེད་མཚམས་ཕན་ཆད་ནས། །སྐྱ་རེངས་མ་ཤར་དུས་མིན་ཏེ། །དེ་ནི་རྒྱལ་བས་དུས་མིན་གསུངས། །སྡོམ་ཅན་རྣམས་ཀྱིས་དེར་མི་བཟའ། །ཞེས་བྱ་བ་བསྟན་པ་ཡིན་ནོ། །འོ་ན་དགེ་སྦྱོང་གི་ཟས་བཟའ་བའི་དུས་གང་ཞེ་ན། སྐྱ་རེངས་ཤར་ནས་ཕྱེད་ཀྱི་བར། །དེ་ཡི་སྐབས་སུ་ཟོས་ན་ནི། །དེ་ནི་བདག་
ཤེས་སྡོམ་པ་སྟེ། །བཟའ་བ་དུས་སུ་ཟོས་པ་ཡིན། །ཞེས་བྱ་བས་བསྟན་ཏེ། འདི་ལྟར་རང་གི་གནས་ནི་འཛམ་བུའི་གླིང་དུ་སྐྱ་རེངས་ཤར་པ་ཉི་མ་ཕྱེད་མ་ཡོལ་གྱི་བར་སྐབས་དེར་བཟའ་བ་ཟོས་པ་ནི་བདག་ཤེས་བཞིན་དང་ལྡན་པ་སྡོམ་པ་ལ་གནས་པ་སྟེ་དགེ་སྦྱོང་གིས་གནས་བཟའ་བའི་དུས་སུ་ཟོས་པ་ཡིན་ཏེ་དེ་ནི་དུས་ཡིན་ནོ། །དུས་མིན་དུས་སུ་འདུ་ཤེས་ནས། །ནམ་ཡང་བཟའ་བར་མི་བྱའོ། །ཞེས་བྱ་བ་ནི་ཕྱེད་མཚམས་ཕན་ཆད་དུ་ས་མ་ཡིན་པ་ལས་དུས་ཡིན་ནོ་སྙམ་པའི་འདུ་ཤེས་བཞག་ནས་བཟའ་བ་རྣམས་བཟའ་བར་བྱ་བ་ནི་ནམ་ཡང་མི་བྱའོ་ཞེས་བྱ་བའི་དོན་ཏོ། །དུས་མ་ཡིན་པར་བཟར་གནང་བ་ནི། སྨན་པས་ཉོན་མོངས་བསྒོ་ན་ནི། །ནད་པས་ཉེས་པར་མི་འགྱུར་རོ། །ཞེས་བྱ་བ་ལ་སོགས་པ་སྟེ། སྔ་དྲོ་ཟོས་པས་འཚོ་བར་མི་ནུས་ན་ཕྱི་དྲོ་ཡང་ཟོ་ཅིག་ཅེས་སྨན་པས་བསྒོ་ན་ཉེས་པར་མི་འགྱུར་བ་དང༌། ལམ་དུ་ཞུགས་ཏེ་དཔག་ཚད་གཅིག་ཙམ་དུ་འགྲོ་བ་དང༌། མུ་གེ་ཆེན་པོ་བྱུང་སྟེ་ཉམ་ཐག་པའི་དུས་སུ་ནི་དུས་དང་སྦྱར་བའི་གཏོལ་མེད་པས་ནམ་ཟས་རྙེད་པའི་ཚེ་དུས་མ་ཡིན་པར་བཟར་གནང་ངོ༌། །དགེ་སློང་བ་ལང་བདག་བཞིན་དུ་ལས་ཀྱི་རྣམ་པར་སྨིན་པས་མིད་པ་གཉིས་ཡོད་པར་གྱུར་ན་སྔ་དྲོ་ནི་མིད་པ་གཅིག་ནས་ནང་དུ་རྒྱུ། ཕྱི་དྲོ་ནི་གཅིག་ནས་ཕྱིར་རྒྱུ་ཞིང་ཟ་བའི་དུས་ཡིན་པས་དེ་ལྟ་བུ་ནི་དང་པོ་ཁམ་གཅིག་གཉིས་ཙམ་གྱིས་ཕྱིར་བོར་ཏེ་སླར་ཁ་བཀྲུ་བར་བྱ། དེའི་ཕྱི་མ་ཕན་ཆད་བཟའ་བར་བྱའོ། །དེ་ལྟ་བུ་མ་གཏོགས་པ་རྣམས་ནི་སྒྲེགས་པའི་ཁྲོད་ན་ཁ་ཟས་ཀྱི་ཚལ་མ་ཞིག་བྱུང་ན་ཁ་ཟས་དང་བཅས་པར་མི་བྱའི་བརྟགས་པའི་ཆུས་ཁ་དག་པར་བཀྲུ་བར་བྱའོ། །ས་ལེ་སྦྲམ་ནི་གསེར་ཡིན་ཏེ། །ཞེས་བྱ་བ་ལ་སོགས་པ་ཤློ་ཀ་གསུམ་གྱིས་དབྱིག་འཆང་བའི་ཉེས་པ་སྤང་བ་སྟོན་ཏེ། དགེ་སྦྱོང་གིས་བདག་གི་ཆེད་དུ་གསེར་ས་ལེ་སྦྲམ་དང༌། བདོག་པ་ལ་སོགས་པ་དང༌། དངུལ་ལ་སོགས་པ་སྟེ་རིན་པོ་ཆེ་རྣམས་སྦྱིན་བདག་རྣམས་ཀྱིས་དེ་བྱིན་ན། བདག་ཉིད་ཀྱིས་ཀྱང་མི་བླང་ལ། །གཞན་ཡང་ལེན་དུ་མི་གཞུག་གོ །གལ་ཏེ་དེ་ལྟར་མ་བྱས་པར་བླངས་ན་ཉེས་བྱས་ཏེ་ལྕི་བར་འགྱུར་རོ། །དགེ་སྤྱོང་གིས་ཁབ་རལ་དང་གིར་ཤུབས་ལ་སོགས་པ་རྭ་དང་བ་སོ་དང་རུས་པ་ལས་བྱས་པ་དང༌། གསེར་དངུལ་ལ་སོགས་པ་ལས་
བྱས་པའམ། གསེར་དངུལ་དང་རིན་པོ་ཆེས་སྤྲས་པ་ལ་སོགས་པ་གདགས་ཤིང་བཅང་བར་མི་བྱ་སྟེ་བྱས་ན་ཉེས་བྱས་སོ། །ཚོན་མོ་སྟེང་དང་ཞ་ཉེ་དང་ཁར་བ་ལ་སོགས་པ་ལ་རེག་ན་ཉེས་བྱས་སོ། །འོ་ན་དགེ་སྦྱོང་གསེར་དངུལ་ལ་སོགས་པ་ལ་ཅི་ནས་ཀྱང་རེག་ཏུ་མི་རུང་ངམ་ཞེ་ན། བདག་གིས་རུང་བ་མ་ཡིན་འདིས། །རུང་བའི་དངོས་པོ་བཙལ་སྙམ་དུ། །དེ་ལྟར་མངོན་པར་བསམས་ནས་ནི། །དེ་ནས་གཞན་ཞིག་ལེན་དུ་གཞུག །ཅེས་སྨོས་ཏེ། དགེ་སྦྱོང་གིས་བསམས་པ་འདི་གཞན་ཏེ། བདག་གིས་གསེར་དངུལ་ལ་སོགས་པ་རུང་བའི་དངོས་པོ་མ་ཡིན་པ་འདིས། རུང་བའི་དངོས་པོ་ཆོས་གོས་གསུམ་བཙལ་བའི་ཟོང་དང༌། གསེར་དངུལ་ཅུང་ཟད་མ་བཅངས་ན་འཚོ་བ་འཆད་པར་འགྱུར་བས་འཚོ་བའི་ཕྱིར་དང༌། སྨན་མེད་ནད་ཀྱིས་གཙེས་པར་འགྱུར་བས་སྨན་བཙལ་བའི་ཟོང་གི་ཕྱིར་བཅང་ཞིང་བླང་ངོ་སྙམ་དུ་བསམས་ཏེ་དགེ་བསྙེན་ནམ་ཁྱིམ་བདག་གཞན་ལེན་དུ་གཞུག་གོ །ཡང་ཉེས་པར་མི་འགྱུར་བ་ནི། དཀོན་མཆོག་གསུམ་གྱི་ཆེད་ཀ་དང༌། །ཚངས་པ་མཚུངས་པར་སྤྱོད་རྣམས་ཀྱི། །གསེར་དང་དངུལ་ལ་རེག་གྱུར་ཀྱང༌། །ཉེས་པར་གྱུར་པ་མ་ཡིན་ནོ། །ཞེས་པ་སྟེ། འདི་ལྟར་དཀོན་མཆོག་གསུམ་གྱི་ཆེད་དུ་སྟེ་དེའི་དཀོར་དུ་གཏོགས་པ་དང༌། ཚངས་པ་མཚུངས་པར་སྤྱོད་པ་མཁན་པོ་དང་སློབ་དཔོན་གཅིག་པའི་དགེ་སྦྱོང་གི་ཡོ་བྱད་ལྟ་བུ་དང༌། མཁན་པོ་དང་སློབ་དཔོན་གྱི་ཡོ་བྱད་དུ་གཏོགས་པའི་གསེར་དངུལ་ལ་དགེ་སྦྱོང་བདག་གིས་རེག་ཀྱང་ཉེས་པར་མི་འགྱུར་རོ། །ཡང༌། བདག་གིས་རུང་བ་མ་ཡིན་འདིས། །རུང་བའི་དངོས་པོ་བཙལ་སྙམ་དུ། །ཞེས་བྱ་བ་ནི་གསེར་དངུལ་འདིས་དེ་བཞིན་གཤེགས་པའི་སྐུ་གཟུགས་ལུགས་སུ་བླུགས་ཤིང་རིས་སུ་བྲིས་པ་དང༌། དྷརྨ་བྲིས་ཤིང་གླེགས་བམ་དུ་བྱས་པ་དང༌། དགེ་འདུན་སྤྱི་ལ་འབུལ་བའི་བསམས་པས་བླངས་ན་ཉེས་པར་མི་འགྱུར་རོ་ཞེས་བྱ་བའི་དོན་ཏོ། །དགེ་སྦྱོང་གིས་ཁེ་སྦོགས་འདོད་པའི་ཕྱིར་བདག་གི་ནོར་གཞན་ལ་འཚོད་དུ་བཅོལ་ཏམ། གཞན་གྱི་ནོར་བདག་གིས་བླངས་ཏེ་ཚོང་བྱས་ན་ཉེས་བྱས་སོ། །དཀོན་མཆོག་གསུམ་གྱི་ཕྱིར་རམ། དེ་ལྟར་མ་བྱས་ན་སྨན་ཟོང་ཙམ་ཡང་མེད་ལ་འཚོ་བ་ཡང་འཆད་པར་འགྱུར་བ་ཞིག་གམ། བསོད་ནམས་བྱ་བ་ཞིག་ཏུ་བསམས་
ཏེ་ཚོང་གི་ཁེ་སྤོགས་བྱ་དགོས་ན་ཡང་བདག་ཉིད་ཀྱིས་མི་བྱའི། ཁྱིམ་པ་གཞན་ལ་བཅོལ་བར་བྱའོ། །དེ་ལྟར་བཅོལ་བའི་འོས་མེད་ན་ཡང་བདག་ཉིད་ཚོར་བྱེད་པའི་ཚེ་བདག་གིས་ནན་དང་མཐུས་མི་བྱའོ། །རུང་གནམ་མི་རུང་དགའ་མི་དགའ། །ཞེས་ལན་གསུམ་གྱི་བར་དུ་དྲིས་ལ། མི་དགའ་བ་མེད་དེ་རུང་ངོ་ཞེས་ཟེར་ན་ཚོང་བྱའོ། །ཕ་རོལ་པོ་མ་དད་བཞིན་དུ་ནན་གྱིས་ཚོང་བྱས་ཏེ་རིན་བརྩིས་ལ་ཐོབ་ན་ཕམ་པར་འགྱུར་རོ། །དེ་ལྟར་འདི་ཡན་ཆད་དུ་དགེ་སྦྱོང་གི་བསླབ་ཚིག་བཅུ་པོ་མདོ་ཙམ་དུ་བཤད་ཟིན་ཏོ།། །།འདོད་པས་བར་དུ་གཅོད་བྱེད་ཅིང༌། །རྫོགས་སངས་རྒྱས་ཀྱིས་བཀའ་སྩལ་པ་ནི་བཅོམ་ལྡན་འདས་ཀྱིས་རབ་ཏུ་བྱུང་བ་རྣམས་འདོད་པའི་ཡོན་ཏན་ལྔ་ལ་བརྟེན་པ་རྣམས་ནི་མོ་ཐ་རིས་དང་ཐར་པ་ལ་བར་དུ་གཅོད་པའོ་ཞེས་བཀའ་སྩལ་པ་ལས། ཉེ་དགའི་སློབ་མ་དགེ་སྦྱོང་ཚེར་མ་ཅན་དང་མཆོད་སྦྱིན་གཉིས་ན་རེ་འདོད་པས་པར་དུ་གཅོད་པའོ་ཞེས་བཅོམ་ལྡན་འདས་ཀྱིས་བཀའ་སྩལ་པ་ནི་དེ་ལྟར་མ་ཡིན་ཏེ། འདོད་པ་ལ་བརྟེན་ཀྱང་བར་དུ་གཅོད་པར་མི་འགྱུར་ཏེ་དེའི་དོན་བདག་གིས་ཤེས་སོ་ཞེས་སྨྲས་པ་ལས། བཅོམ་ལྡན་འདས་ལ་གསོལ་ཏེ་བཀའ་སྩལ་པ། དེ་སྐད་དུ་སྨྲ་བ་ལ་དང་པོར་ཚིག་འཇམ་པོས་སྨྲོས་ཤིག །དེས་མ་བཏུབ་ན་གསོལ་བ་དང༌། བཞིའི་ལས་ཀྱིས་དགེ་ཚུལ་གཏི་མུག་མ་སྨྲ་ཤིག་ཅེས་བསྒོ་ཞིག །དེ་སྐད་དུ་བསྒོ་བ་ལས་ཀྱང་མ་བཏུབ་སྟེ་དེ་སྐད་སྨྲ་ན་དགེ་འདུན་གྱིས་འཚོ་བའི་ཡོ་བྱད་དུ་གཏོགས་པ་ལོངས་སྤྱོད་རྣམས་དང་ཕྲལ་ནས། གཙུག་ལག་ཁང་ནས་བསྐྲད་པར་བྱའོ། །དེ་ལྟར་བསྐྲད་པའི་དགེ་སྦྱོང་དེ་ནི་དགེ་སྦྱོང་དང་གཉིས་གནས་ཁང་གཅིག་ཏུ་ཉལ་བ་གནང་བ་དེ་ལ་མེད་ན། ཚངས་པ་མཚུངས་པར་སྤྱོད་པ་རྣམས་དང་སྤྱོད་པ་གཅིག་ཅིང་ཡོ་བྱད་གཅིག་པ་དང༌། ལྟ་བ་གཅིག་པ་རྣམས་ཀྱང་དེ་ལ་མེད་པས་ན། དེ་ནས་རོ་དང་འདྲ་བར་འགྱུར་རོ། །འཕྱར་དང་རྟ་གད་བྱེད་ལ་སོགས། །འཆི་བར་བསམས་ཏེ་མི་བྱའོ། །ཞེས་བྱ་བ་ལ། རབ་ཏུ་བྱུང་བ་རྣམས་ནི་དུལ་ཞིང་ཞི་བའི་རང་བཞིན་པས། གདོལ་པ་དང་མ་རབས་ཀྱི་ཆོས་ལུས་ཀྱི་སྒོ་ནས་མཆོང་ཞིང་བརྒལ་བ་ལ་སོགས་པ་དག་དང༌། ངག་གི་སྒོ་ནས་རྟ་གད་དྲག་པོ་ལ་སོགས་པ་མི་བྱའོ། །ཅིའི་ཕྱིར་ཞེ་ན། འཕྱར་བ་ནི་མ་བརྟགས་པའི་ཆོས་ཡིན་
བ་དང༌། རྟ་གད་དང་གག་ཚིལ་བྱེད་པ་ནི་རླུང་འཚུབ་ཅིང་སྔོན་ཤི་བདག་བྱུང་བས། དེའི་ཕྱིར་འཆི་བར་བསམས་ཤིང་མི་བྱའོ། །གླལ་ཚེ་ལག་ལ་སོགས་པ་ཡིས། །ཁ་དགབ་པར་ཡང་ནན་ཏན་བྱ། །ཅིའི་ཕྱིར་ཞེ་ན། སོ་སྣང་བ་དང་གཅན་གཟན་ཆད་པ་ལྟར་ཤིན་ཏུ་མི་མཛེས་པའི་ཕྱིར་རོ། །རྒན་ལ་སྦྲིད་བྱུང་ཕྱག་བྱ་སྟེ། །གཞོན་ལ་ནད་མེད་གྱུར་ཞེས་བྱ། །ཁྱིམ་པ་སྦྲིད་པ་བྱུང་བ་དང༌། །ཡུན་རིང་སོས་ཞེས་བརྗོད་པར་བྱ། །ཞེས་བྱ་བ་ལས། རྒན་པ་ནི་བདག་པས་ཚུལ་ཁྲིམས་དང་ཤེས་པ་རྒན་པའམ་མཁན་པོ་དང་སློབ་དཔོན་ནོ། །གཞོན་པ་ནི་བདག་པས་དེ་དག་གིས་དམའ་བ་ཆུང་བའོ། །ཡུན་རིངས་པོས་ཞེས་བྱ་བ་ནི་ཁྱིམ་པ་རྣམས་ནི་ཚེ་རིང་བ་ལ་དགའ་བའི་ཕྱིར་རོ། །བླ་མ་དག་གི་མདུན་དག་ཏུ། །སྣབས་དང་མཆིལ་མ་མི་དོར་ཞིང༌། །སོ་ཤིང་བཅའ་བར་མི་བྱའོ། །དེ་བཞིན་སྟན་ལ་མི་འདུག་ཅིང༌། །མདུན་དུ་བཅག་པར་མི་བྱའོ། །གོས་གཅིག་དག་ཀྱང་བགོ་མི་བྱ། །ཁྱེད་རེངས་སུ་ཡང་མི་དབྱུང་ངོ༌། །ཞེས་བྱ་བ་ལ། མཁན་པོ་དང་སློབ་དཔོན་དང་ཤེས་པ་དང་ཚུལ་ཁྲིམས་ཀྱི་ཡོན་ཏན་གྱིས་འཕགས་པ་རྣམས་ནི་བླ་མ་སྟེ། དེ་དག་གི་མདུན་དུ་མིང་གིས་འབྱུང་བ་དེ་དག་མི་དོར་མི་བྱའོ། །ཅིའི་ཕྱིར་ཞེ་ན། མ་རབས་སྨད་པའི་ཆོས་ཡིན་པ་དང། མ་གུས་ཤིང་བསྙེམས་པའི་ཚུལ་ཡིན་པས་སྤང་བར་བྱའོ། །སོ་ཤིང་ཟ་ན་ཡང་ཕུ་རུང་གིས་ཁ་བཀབ་སྟེ་བཟའ་བར་བྱའོ། །བླ་མ་རྣམས་ལ་ཇི་ལྟར་བྱ་ཞེ་ན། རྒན་པོ་རྣམས་ལ་སྡོམ་ཅན་གྱིས། །གུས་བཅས་ཞེ་སར་བཅས་པར་བྱ་བ་སྟེ། རྒན་པ་གོང་དུ་སྨོས་པ་རྣམས་ལ་ལུས་ཀྱི་སྒོ་ནས་ཀྱང་གུས་ཤིང་ཞི་བར་བྱ་བ་དང༌། ངག་གི་སྒོ་ནས་ཀྱང་ཚིག་འཇམ་ཞིང་གསོང་པོར་སྨྲ་བ་དང་ཞེ་ས་དང་བཅས་པར་བྱའོ། །བསླབ་པ་ཕྲ་མོའི་གནས་བསྟན་ཟིན་ཏོ།། །།ལག་པ་དག་པར་བསྙལ་ནས་ནི། །བུམ་པ་ལ་སོགས་རྡུལ་མེད་བྱ། །ཞེས་བྱ་བ་ནི་ཟས་ཟོས་པའི་འོག་ཏུ། ཁ་ལག་ལེགས་པར་བཀྲུས་ནས་ནང་པར་སྤྱད་པར་བྱ་བའི་ཆུ་བཙག་ཅིང་བླང་བར་བྱའོ། །ཆུའི་སྣོད་བུམ་པ་ལ་སོགས་པ་རྡུལ་དང་དྲི་མ་མེད་པར་སྲོག་ཆགས་མད་པར་བརྟགས་ནས་ཆུ་ཡང་བཙག་ཅིང་བླང་བར་བྱ་སྟེ། ཆུ་བཙག་པའི་ཐབས་ནི། སྲོག་ཆགས་ཡོད་ན་ལེགས་པར་བཙག །ཅེས་པའི་སྐབས་སུ་
བསྟན་པ་བཞིན་ནོ། །གནས་མེད་པར་ནི་གནས་མི་བྱ། །ཞེས་བྱ་བ་ནི་བསྙེན་པར་རྫོགས་ནས་ལོ་བཅུའམ། ལྔ་མ་ལོན་གྱི་བར་དུ་གནས་མ་བཅས་པར་གནས་སུ་མི་དབང་བས་དགེ་སྦྱོང་རྣམས་ཀྱིས་གནས་མེད་པར་ཞག་གཅིག་ཀྱང་གནས་སུ་མི་གནང་ངོ་ཞེས་བཀའ་སྩལ་ཏོ། །དགེ་འདུན་མལ་སྟན་ལ་སོགས་པ། །དྲན་པ་མེད་པར་འདུག་མི་བྱ། །ཞེས་བྱ་བ་ནི། དགེ་འདུན་སྤྱིའི་མལ་ཆ་དང་སྟན་ཁྲི་དང་ཁྲིའུ་ལ་སོགས་པ་ནི་ཤིན་ཏུ་སྤྱད་པར་བྱ་བ་མ་ཡིན་པས་མི་རྟག་པ་ལ་སོགས་པའི་ཆོས་དྲན་པར་བྱས་ཏེ་འདུག་པར་མི་བྱའོ། །དེ་ལྟ་བུའི་དྲན་པ་མེད་པར་ནི་འདུག་པར་མི་བྱའོ། །དེ་ལྟ་བུའི་ཆོས་ཡིད་ལ་བྱེད་པ་དང་ལྡན་པས་འདུག་ཏུ་གནང་སྟེ། དེ་བས་ན་དྲན་དང་ལྡན་ན་ཉེས་མེད་དོ། །སོ་བཀྲུ་བ་དང་ཆུ་བཏུང་དང༌། །བཤང་གཅི་བྱེད་དུ་འགྲོ་བ་དང༌། །མཚམས་ནང་སྟོན་ལ་ཕྱག་བྱ་བ། །དེ་དག་མ་ཞུས་ཉེས་མེད་དོ། །ཞེས་བྱ་བའི་མིང་གིས་འབྱུང་བ་འདི་དག་ནི་མཁན་པོ་དང་སློབ་དཔོན་ལ་མ་ཞུས་ཀྱང་ཉེས་པར་མི་འགྱུར་རོ་ཞེས་བསྟན་ཏོ། །བརྟུལ་ཞུགས་ཅན་གྱིས་བྱ་བ་གཞན། །དེ་དག་ཐམས་ཅད་མ་ལུས་པར། །གལ་ཏེ་བླ་མ་མ་ཞུས་པར། །བྱས་ན་དེ་ནི་ཉེས་བྱས་འགྱུར། །ཞེས་བྱ་བ་ལ། དགེ་སྦྱོང་གིས་བསྒོམ་ཞིང་བཀླག་པར་བྱ་བ་དང༌། གོས་དྲ་བ་དང་འདྲུབ་པ་ལ་སོགས་པ་ལས་སུ་ཅི་བྱ་བ་ཀུན་ཀྱང་མཁན་པོ་ལ་ཞུ་བར་བྱ་སྟེ། གལ་ཏེ་མ་ཞུས་པར་སྣ་འགའ་བྱས་ན་ཉེས་བྱས་སུ་འགྱུར་རོ་ཞེས་གསུངས་སོ། །མཆོད་རྟེན་ལ་སོགས་ཕྱག་བྱས་ཏེ། །མི་ཉལ་བྱས་ནས་དེ་འོག་ཏུ། །བླ་མའི་རྐང་བཀྲུ། །ཞེས་བྱ་བ་ལ། ནུབ་མོ་དགེ་སྦྱོང་གིས་མཆོད་རྟེན་དང་སྐུ་གཟུགས་ལ་སོགས་པ་ལ་ཕྱག་བྱས་ཏེ། ཞུ་བའི་གནས་གང་ཡིན་པའི་གང་ཟག་ལ་སང་ནང་པར་གྱི་བར་དུ་མི་ཉལ་བར་དགེ་བ་རྔོ་ཐོགས་ཚད་དུ་བགྱི་ཞེས་ཞུ་ཞིང་དེ་ལྟར་བྱས་པའི་འོག་ཏུ་མཁན་པོ་དང་སློབ་དཔོན་གཉིས་ཀ་དང་བླ་མ་རྣམས་ཀྱི་རྐང་པ་ཆུ་ གཙང ་མས་བཀྲུ་བར་བྱའོ། །བླ་མ་ལ། །བརྟུལ་ཞུགས་ཅན་གྱིས་ཀུན་ཞུས་ཏེ། །ཞེས་བྱ་བ་ནི་དེ་ལྟར་བླ་མའི་རྐང་ལག་བཀྲུ་བར་བྱས་ནས་དགེ་བ་ལ་སོགས་པ་ཅི་བྱ་བརྟུལ་ཞུགས་ཅན་དགེ་སྦྱོང་བདག་གིས་ཞུས་ནས་ཞེས་བྱ་བའི་ཐ་ཚིག་གོ །ཅི་བྱ་ཞེ་ན། རྐང་པ་གཉིས་ཀ་བཀྲུས་ནས་ནི། །ནམ་གྱི་ཆ་སྟོད་ཆ་སྨད་ལ། །བསྒྲིམས་ཏེ་མི་
ཉལ་བྱ་བ་སྟེ། །ཞེས་བྱ་བ་སྟེ། སླར་བདག་གི་གནས་ཁང་དུ་ཕྱིན་ནས། རྐང་པ་གཉིས་དག་ཏུ་བཀྲུས་ཏེ་ཞུས་པ་བཞིན་ནམ་གྱི་ཆ་སྟོད་སྲོད་དང་ནམ་གྱི་ཆ་སྨད་ཐོ་རངས་ལ་བསྒྲིམས་པ་བརྩོན་འགྲུས་ཆེན་པོས་མི་ཉལ་བར་དགེ་སྦྱོར་བྱའོ། །དེ་ལྟར་བྱས་ན་ཞུས་པ་བཞིན་དགེ་སྦྱོང་དེས་ནི་བདེན་པར་སྨྲ་བར་འགྱུར་ཏེ། ཞུས་པ་བཞིན་དུ་བྱས་པ་ཡིན་ནོ། །ལྡང་དང་སྣང་བའི་འདུ་ཤེས་ཀྱིས། །སེང་གེའི་ཉལ་ཐབས་བཞིན་དུ་བྱ། །ཞེས་བྱ་བ་ལ། གཉིད་འོང་སྟེ་མལ་དུ་ལུས་ཕབ་པའི་ཚེ་ན་ཡང་བསམ་པ་མེད་པར་ཉལ་བར་མི་བྱའི། མྱུར་དུ་ལྡང་བའི་བསམ་པ་དང་མྱུར་དུ་སང་ཅིང་སྣང་བའི་འདུ་ཤེས་ཡིད་ལ་བྱས་ནས་སེང་གེ་བཞིན་དུ་གློ་གཡས་པ་ཕབ་སྟེ་ཉལ་བར་བྱའོ། །དྲན་དང་བསམ་པའི་རྒྱུད་དག་དང༌། །དེ་བཞིན་མྱུར་དུ་སད་ནས་ནི། །ཇི་སྐད་བསྟན་པ་བཞིན་དུ་བྱ། །ཞེས་བྱ་བ་ལ། དེ་ལྟར་སྣང་བ་དང་ལྡང་བའི་འདུ་ཤེས་ཀྱིས་ཉལ་བ་ནི་དྲན་པའི་བསམ་པ་དང་ལྡན་པ་ཞེས་བྱ་བ་སྟེ། དེས་ནི་མྱུར་དུ་སད་ཅིང་ལྡང་བར་འགྱུར་རོ། །དེ་ལྟར་སད་ནས། ནམ་གྱི་ཆ་སྨད་མལ་ནས་ལངས། །ནམ་ལངས་བར་དུ་ཁ་ཏོན་བྱ། །ཞེས་ཇི་སྐད་བསྟན་པ་བཞིན་དུ་བསྒྲུབ་ཅིང་བསྒོམ་པར་བྱའོ་ཞེས་བྱ་བའི་དོན་ཏོ། །ཕྱི་དྲོ་ཕན་ཆད་ཀྱི་བྱ་བ་བསྟན་ཟིན་ཏེ། །ད་ནི་ཚིག་རྐང་གསུམ་གྱིས་དགེ་སྦྱོང་གི་བསླབ་ཚིག་བསྲུང་བ་དང༌། སྔ་དྲོ་དང་ཕྱི་དྲོའི་དུས་སུ་ཁ་ཟས་བཟའ་ཞིང་ཆུ་ གཙང ་བ་དང༌། མཁན་པོ་དང་སློབ་དཔོན་དང་བླ་མ་རྣམས་ལ་ལུས་ངག་གི་སྒོ་ནས་བཀུར་སྟི་ལ་སོགས་པའི་ལས་སུ་བྱ་བ་ཇི་ལྟར་བསྟན་པ་བཞིན་དུ་ཉམས་སུ་བླངས་ཏེ་བསྒྲུབས་ན་ཡོན་ཏན་དང་འབྲས་བུ་གསུམ་འཐོབ་བོ་ཞེས་བསྟན་པའི་ཕྱིར། ཇི་ལྟར་ཉོན་མོངས་མྱུར་ཟད་ནས། །བྱང་ཆུབ་དམ་པ་འཐོབ་འགྱུར་བ། །དེ་ལྟར་བསྒྲིམས་དང་ལྡན་པར་བྱ། །ཞེས་བྱ་བ་སྨོས་ཏེ། དེ་ལྟར་བསྒྲིམས་དང་ལྡན་པར་བྱ། །ཞེས་བྱ་བ་ནི་གོང་དུ་བསྟན་པ་བཞིན་ནན་ཏན་བྱས་ན་ཚེ་འདིར་ཡང་ཉོན་མོངས་པ་མྱུར་དུ་ཟད་པར་འགྱུར་ལ། མ་འོངས་པ་ན་ཡང་བྱང་ཆུབ་རྣམ་པ་གསུམ་ལས་དམ་པ་བླ་ན་མེད་པའི་བྱང་ཆུབ་ཐོབ་པར་འགྱུར་རོ། །དགེ་སྤྱོང་གི་ཀཱ་རི་ཀཱ་ལྔ་བཅུ་པ་མདོ་ཙམ་དུ་བཤད་པ། སློབ་དཔོན་ཀ་མ་ལ་ཤཱི་ལས་མཛད་པ་རྫོགས་སོ།། །།