ཡན་ལག་བརྒྱད་པའི་སྙིང་པོ་བསྡུས་པ་ཞེས་བྱ་བ།
ཕ་གོལ།
རྒྱ་གར་སྐད་དུ། ཨཥྚ་ཨཾ་ག་ཧྲྀ་ད་ཡ། སཾ་ཧི་ཏྟ་ནཱ་མ། བོད་སྐད་དུ། ཡན་ལག་བརྒྱད་པའི་སྙིང་པོ་བསྡུས་པ་ཞེས་བྱ་བ། བཅོམ་ལྡན་འདས་དེ་བཞིན་གཤེགས་པ་སྨན་གྱི་བླ་བཻཌཱུཪྻ་འོད་ཀྱི་རྒྱལ་པོ་ལ་ཕྱག་འཚལ་ལོ། །འདོད་ཆགས་ལ་སོགས་མ་ལུས་པ་ཡིན་ད། །རྒྱུན་དུ་འབྲེལ་པས་ལུས་ཀུན་མ་ལུས་ཁྱབ། །འདོད་དང་གཏི་མུག་ཁྲོ་བ་སེལ་བ་ཡི། །སྨན་པ་སྔོན་མེད་དེ་ལ་ཕྱག་འཚལ་ལོ། །དེ་ནས་ཚེ་རིང་པར་འདོད་པའི་ལེའུ་བཤད་པར་བྱའོ། །རྒྱུན་ཤེས་ཀྱི་བུ་ལ་སོགས་པ་དྲང་སྲོང་ཆེན་པོ་རྣམས་ཀྱིས་འདི་ལྟར་བཤད་དོ། །ཚེ་ནི་རིང་པར་འདོད་པ་ཡིས། ཆོས་དང་ནོར་དང་བདེ་བ་བསྒྲུབ། །ཚེ་ཡི་རིག་བྱེད་ལུང་བཤད་པ། །རབ་ཏུ་གུས་པར་བྱ་བར་གྱིས། །ཚངས་པས་ཚེ་ཡི་རིག་བྱེད་དྲན། །སྐྱེ་དགུའི་བདག་ལ་བཤད་པ་ཡིན། །དེ་ཡིས་ཐ་སྐར་དེས་བརྒྱ་བྱིན། །དེས་རྒྱུན་ཤེས་སྩོགས་དྲང་སྲོང་ལའོ། །དེ་ཡིས་མེ་བཞིན་འཇུག་ལ་སྩོགས། །དེ་རྣམས་ཀྱིས་རྒྱུད་སོ་སོར་བྱས། །ཤིན་ཏུ་འཐོབ་པ་དེ་རྣམས་ལས། །རབ་ཅེས་ཕལ་ཆེར་བཏུས་པ་ནི། །ཤིན་ཏུ་བསྡུས་མིན་རྒྱས་མིན་པར། །ཡན་ལག་བརྒྱད་པའི་སྙིང་པོ་བྱས། །ལུས་དང་བྱིས་པ་གདོན་ལུས་སྟོད། །མཚོན་དང་མཆེ་བ་རྒས་རོ་ཙ། །གསོ་དཔྱད་གང་ལ་གནས་པ་ཡི། །ཡན་ལག་བརྒྱད་དུ་དེ་བཤད་དོ། །རླུང་དང་མཁྲིས་པ་བད་ཀན་ཡང༌། །ཉེས་པ་རྣམ་གསུམ་མདོར་བསྡུས་ཡིན། །དེ་ནི་རྣམ་གྱུར་མ་གྱུར་པས། །ལུས་ནི་འཇོམས་དང་གནས་པ་ཡིན། །དེས་ཁྱབ་གྱུར་ཀྱང་སྙིང་ག་དང༌། །ལྟེ་བའི་འོག་བར་སྟེང་ན་གནས། །ན་ཚོད་ཉིན་ཞག་ཟས་ཟོས་ལ། །དེ་ནི་མཐའ་དབུས་སྩོགས་རྟོགས་རིམ། །དེས་ནི་འཇུ་བ་མི་སྙོམས་རྣོ། །ཆུང་དང་མཉམ་པས་མཉམ་པར་འགྱུར། །དེ་ནི་ལྟོ་བ་སྲ་སྙི་རན། །མཉམ་པས་ཀྱང་ནི་བར་མར་འགྱུར། །སྐྱེ་བའི་དང་པོར་ཁུ་ཁྲག་གནས། །དུག་ཅན་སྲིན་བུའི་དུག་དང་མཚུངས། །དེ་ནི་རང་བཞིན་རྣམ་གསུམ་སྟེ། །ཆུང་འབྲིང་ཆེན་པོ་སོ་སོར་ལྟ། །མ་ལུས་པ་ལ་ཁམས་མཉམ་པ། །
མཆོག་ཡིན་ཉེས་པ་གཉིས་འབྱུང་སྨད། །དེ་ལ་རླུང་ནི་རྩུབ་ཅིང་ཡང༌། །གྲང་ཞིང་སྲ་ལ་ཕྲ་ཞིང་གཡོ། །མཁྲིས་པ་སྨུམ་བཅས་རྣོ་ཞིང་དྲོ། །ཡང་ཞིང་དྲི་མནམ་འཁྲུ་ཞིང་ག་ཤེར། །བད་ཀན་སྣུམ་བསིལ་ལྕི་བ་དང༌། །རྟུལ་ཞིང་འཇམ་བརྟན་འབྱར་བ་གཅན། །དེ་གཉིས་གསུམ་ཟད་འཁྲུགས་པ་ལས། །ལྡན་པ་དང་ནི་འདུས་པ་ཡིན། །ལུས་ཟུངས་དངས་མ་ཁྲག་དང་ཤ་།ཚིལ་དང་རུས་རྐང་ཁུ་ཆུ་སྟེ། །གནོད་བྱ་བདུན་ཡིན་དྲི་མ་གཅིན། །བཤང་བརྡུལ་ལ་སྩོགས་པ་ཡིན། །ཐམས་ཅད་མཉམ་པས་འཕེལ་འགྱུར་ཞིང༌། །དེ་ལས་བཟློག་པས་གནོད་པར་འགྱུར། །རོ་ནི་མངར་སྐྱུར་ལན་ཚྭ་དང༌། ཚ་དང་ཁ་དང་བསྐ་བ་སྟེ། །རྫས་དྲུག་ལ་གནས་དེ་དག་ཀྱང༌། །གོ་རིམས་བཞིན་དུ་སྟོབས་ཆེན་ཡིན། །དེ་ལས་དང་པོའི་གསུམ་པོ་ནི། །རླུང་འཇོམས་ཚྭ་སྩོགས་བད་ཀན་སེལ། །བསྐ་དང་ཁ་དང་མངར་བ་ནི། །མཁྲིས་སེལ་གཞན་དག་སྐྱེད་པ་ཡིན། །ད་ལྟར་རྫས་ནི་རྣམ་པ་གསུམ། །ཞི་འཁྲུགས་ཐ་མལ་གནས་ལ་ཕན། །དེ་ལ་ཚ་བསིལ་ཕུལ་བྱུང་བས། །ནུས་པ་རྣམ་པ་གཉིས་སུ་བཤད། །རྫས་ནི་ཁུ་བ་རྣམ་གསུམ་སྟེ། །མངར་སྒྱུར་ཚ་བའི་བདག་ཉིད་ཅན་ཡོན་ཏན་ལྕི་རྟུལ་བསིལ་དང་སྣུམ། །འཇམ་དང་བསྐ་བ་མཉེན་དང་བརྟན། །ཕྲ་དང་བཅས་ཤིང་བསྐ་བག་ཅན། །དེ་བཟློག་པ་དང་ཉི་ཤུ་ཡིན། །དུས་དོན་ལས་ཀྱི་སྦྱོར་བ་རྣམས། །དམན་དང་ལོག་པར་ལྷག་པ་དང༌། །ཡང་དག་སྦྱོར་བས་ནད་དང་ནི། །ནད་མེད་རྒྱུ་གཅིག་ཡིན་ཞེས་བྱ། །ནད་ནི་ཉེས་པ་མ་སྙོམས་ཡིན། །ཉེས་པ་སྙོམས་པ་ནད་མེད་ཉིད། །དེ་ལ་ནད་ནི་རང་བཞིན་གནས། །གློ་བུར་ཆ་ཡིས་གཉིས་སུ་བཤད། །དེ་རྣམས་ལུས་སེམས་དབྱེ་བ་ཡིས། །གནས་ཀྱང་རྣམ་པ་གཉིས་ཡིན་ནོ། །འདོད་ཆགས་གཏི་མུག་ཀྱང་ཡིད་ཀྱི། །ཉེས་པ་གཉིས་སུ་བསྟན་པ་ཡིན། །ནད་པ་བལྟ་དང་རེག་པ་དང༌། །དྲིས་པ་ཡས་ནི་ཡོངས་སུ་བརྟག །ནད་ཀྱི་གཞི་ཡི་དང་པོའི་ཚུལ། །མཚན་ཉིད་ཉེར་བསྟེན་འཐོབ་པ་ཡིན། །ས་དང་ལུས་ཀྱི་བྱེ་བྲག་གིས། །འདི་ལ་ཡུལ་ས་རྣམ་གཉིས་བཤད། །
སྐམས་ཕལ་ཆེར་རླུང་སྐྱེད་ཅིང༌། །རླན་ཅན་བད་ཀན་འཕེལ་བ་ཡིན། །ཆ་མཉམ་ཉེས་པ་མཉམ་པ་སྟེ། །ས་ཡི་ཕྱོགས་ནི་གསུམ་དུ་བཤད། །སྐད་ཅིག་ལ་སོགས་ནད་ཀྱི་སྐབས། །དུས་སུ་སྨན་ནི་སྦྱོར་བར་བྱེད། །མདོར་ན་སྨན་ནི་རྣམ་གཉིས་ཏེ། །སྦྱང་བ་དང་ནི་ཞི་བའོ། །ལུས་ལས་བྱུང་བའི་ནད་རྣམས་ཀྱི། །རིམ་གྱིས་སྨན་གྱི་དམ་པ་ནི། །མས་གཏོང་བཀྲུ་སྨན་སློན་སྨན་དང༌། །དེ་བཞིན་ཏིལ་མར་མར་སྦྲང་རྩི། །བློ་དང་བརྟན་བདག་སྩོགས་ཤེས་པ། །སེམས་ཀྱི་ཉེས་པའི་སྨན་མཆོག་ཡིན། །གསོ་བ་དག་ཏུ་བསྟན་པ་ནི། །སྨན་པ་སྨན་དང་ནད་གཡོག་དང༌། །ནད་པ་ཡན་ལག་རྣམ་བཞི་སྟེ། །རེ་རེའང་རྣམ་པ་བཞི་བཞི་ཡིན། །སྨན་པ་མཁས་སྟེགས་གཞུང་དོན་ཤེས། །ལས་རྣམས་མཐོང་བཞིན་གཙང་བ་ཡིན། །སྨན་ནི་ཆོ་ག་མང་པོ་དང༌། །ཡོན་ཏན་མང་ལྡན་ཕུན་ཚོགས་འཕྲོད། །ནད་གཡོག་རྗེས་བརྩེ་གཙང་སྒྲ་ཅན། །སྒྲིམ་ཞིང་བློ་དང་ལྡན་པ་ཡིན། །ནད་པ་ཕྱུག་ཅིང་བསྒོ་བ་ཉན། །ཤེས་པར་ནུས་ཤིང་སྙིང་སྟོབས་ལྡན། །སྨན་ཀུན་བཟོད་པར་ནུས་པའི་ལུས། །སྐྱེས་བུ་གཞོན་ཞིང་བདག་ཉིད་ཐུལ། །གནད་དུ་མ་སོང་རྒྱུ་སྔར་ཚུལ། །མཚན་ཉིད་ཆུང་དང་གནོད་པ་མེད། །གནོད་བྱ་ཡུལ་དུས་རང་བཞིན་རྣམས། །མཚུངས་མིན་ཡན་ལག་ཕུན་སུམ་ཚོགས། །བཟའ་ནི་རྗེས་སུ་མཐུན་པ་ལ། །ཉེས་པ་ལམ་གཅིག་གསར་གསོ་སླ། །ནད་ནི་མཚན་སྩོགས་ཀྱིས་བཏབ་ཅིང༌། །གསོ་བ་དཀའ་ཞིང་དེ་ལས་འདྲེས། །ཚེ་ཡི་ལྷག་མ་ལུས་ཕྱིར་འཚོ། །གོ་བཟློག་པ་ལ་གོམས་ཕན་ཉིད། །བཅོས་པའི་ཐབས་མེད་ཉིད་དུ་འགྱུར། །ཤིན་ཏུ་ཕྱིན་ཅི་ལོག་པར་གནས། །འདོད་དང་རྨོངས་དང་ཁྲོ་བར་བྱེད། །འཆི་ལྟས་སྣང་ཞིང་དབང་པོ་ཉམས། །སྨན་པ་རྒྱལ་པོ་ལ་སྡང་དང༌། །དེ་དང་མི་མཛའ་སྡང་བ་དང༌། །ཡོ་བྱད་མི་འབྱོར་བྲེལ་བ་དང༌། །ཉན་དུ་མི་བཏུབ་ཚེ་ཟད་དང༌། །གཏུམ་ཞིང་མྱ་ངན་ལ་མནན་འཇིགས། །ཡས་པ་མི་གཟོ་སྨན་བརྙས་སྤངས། །དེ་ནས་གཞན་ཡང་རྒྱུད་འདི་ཡི། །ལེའུ་བསྡུས་བཤད་བྱ་སྟེ། །ཚེ་རིང་ཉིན་རེ་
དུས་སྤྱོད་དང༌། །ནད་མེད་བྱ་དང་བཏུང་བ་དང༌། །ཟས་ཤེས་བྱ་དང་ཟས་བསྡམ་དང༌། །ཟས་ཚོད་སྨན་དང་རོ་ལ་གནས། །ནད་ཤེས་བྱ་དང་དེའི་དབྱེ་བ། །དེ་གསོ་བ་དང་གསོ་ཐབས་གཉིས། །སྦྱང་སྩོགས་སྣུམ་ཆོས་ཁྲུས་བརྟ་བྱ། །སྨན་དུང་ཁར་དོར་མིག་བཀྲུ་དང༌། །གསོད་དང་དབྱུང་ཐབས་ཟུག་རྔུ་མཚོན། །གཏར་དཔྱད་ཟུག་རྔུ་དབྱུང་བའི་དཔྱད། །མཚོན་དང་ཐལ་སྨན་མེ་བཙའི་ལས། །མདོག་ནས་ལེའུ་སུམ་ཅུ་ནི། །འདི་ཡིན་ལུས་ཀྱི་བརྗོད་བྱ་སྟེ། །མངལ་དུ་འཇུག་དང་དེའི་ནད་དང༌། །ཡན་ལག་གནང་ཀྱི་བྱེ་བྲག་དང༌། །རྣམ་འགྱུར་བང་ཆེན་ལས་བྱུང་དྲུག །ནད་ཀུན་འབྱུང་བའི་ནད་གཞི་དང༌། །རིམས་ཁྲག་དབུགས་མི་བདེ་གཅོང་སྩོགས། །ཆང་དང་གཞང་འབྲུམ་ཚད་པའི་ནང༌། །ཆུ་འགགས་གཅིན་ནི་སྙི་བ་དང༌། །ཁོང་འབྲས་དམུ་རྫིང་དག་དང་ནི། །སྐྱ་རྦབ་མཛེས་རླུང་གིས་གཟིར། །དྲེག་ནག་དག་དང་བཅུ་དྲུག་ཡིན། །རིམས་ནད་གསོ་དང་ཁྲག་དང་ནི། །ལུད་པ་དབུགས་མི་བདེ་དང་གཅོང༌། །སློན་དང་ཆང་ནད་གཞན་འབྲུམ་དང༌། །ཚད་ནད་ཕོ་བ་གཅིན་ནད་གཉིས། །ཁོང་འབྲས་སྐྲན་དང་དམུ་རྫིང་དང༌། །སྤྱ་རྦབ་འོར་ནད་མེ་དཔལ་དང༌། །མཛེ་དང་ཤ་བཀྲ་རླུང་ནད་དང༌། །དྲག་ནད་གསོ་བའི་དཔྱད་རྣམས་ཏེ། །ལེའུ་ཉི་ཤུ་གཉིས་འདི་ཡིན།། །།དེ་ལས་གཞན་པ་ཆོ་ག་གྲུབ། །སྐྱུག་སྨན་བཀྲུ་སྨན་ཆོ་ག་དང༌། །དེ་གྲུབ་མས་གཏོང་ཆོ་ག་དང༌། །མས་གཏོང་ཉེས་གྲུབ་དྲུག་པ་ནི། །སྨན་ཡིན་དེ་ནས་ཕྱི་མ་ནི། །བྱིས་པ་ཉེར་སྤྱོད་དེའི་ནད་དང༌། །དེ་གདོན་འབྱུང་པོར་གཏོགས་པ་གཉིས། །སྨྱོ་དང་བརྗེད་བྱེད་སྩོགས་གཉིས་གཉིས། །མིག་ཆུ་རྫི་མའི་གྲྭ་མཚམས་དང༌། །མིག་འབྲས་རབ་རིབ་མཐོང་ཉམས་གསུམ། །གཉིས་གཉིས་ཀུན་ལ་འགྲོ་བ་ཡིན། །རྣ་ནད་སྣ་དང་ཁ་ནད་མགོའི། །རྨ་དང་ཆག་གྲུགས་མཚན་བར་རྡོལ། །འབྲས་སྩོགས་ཕྲ་མོའི་ནད་རྣམས་དང༌། །གསང་བའི་ནད་ནི་ཐ་དད་གཉིས། །དུག་དང་སྤྲུལ་དང་སྲིན་བུའི་དུག །བྱི་བ་དང་ནི་བཅུད་ཀྱིས་ལེན། །བུ་མེད་ས་བོན་གསོ་བ་སྟེ། །
ལེའུ་བཞི་བཅུ་ཉིད་ཡིན་ནོ། །དེ་ལྟར་ལེའུ་ནི་བརྒྱ་ཉི་ཤུ། །གནས་ནི་དྲུག་ཏུ་བཤད་པ་ཡིན། །ཡན་ལག་བརྒྱད་པའི་སྙིང་པོ་བསྡུས་པ་ལས། མདོའི་གནས་ཀྱི་ལེའུ་དང་པོའོ།། །།དེ་ནས་ཉིན་རེ་ཞིང་དཔྱད་པའི་ལེའུ་བཤད་པར་བྱའོ། །བདེ་གནས་ཚེ་ནི་བསྲུང་བའི་ཕྱིར། །ཡུད་ཙམ་ཚངས་ཕྱིར་གནས་ཏེ་ལངས། །ལུས་ཀྱི་བྱ་བ་རྫོགས་བྱས་ནས། །དེ་ནས་གཙང་སྦྲའི་ཆོ་ག་བྱ། །ཨརྐ་ནྱ་གྲོ་དྷ་སེང་ལྡེང༌། །ཀ་རཉྫ་ཀ་ཀུ་ལ་སྩོགས། །བསྐ་དང་ཚ་དང་ཁ་བ་དག །རྩེ་འཇམ་ནང་པར་ཟས་སྤྱད་ནས། །སོ་དང་རྙིལ་མ་གནོད་པར། སོ་ཡི་དག་བྱེད་བཅའ་བར་བྱ། །མ་ཞུ་སློན་བྲོ་དབུགས་མི་བདེ། །ལུང་པ་ལུ་རིམས་ཁ་ཡོན་ཅན། །སྐོམ་ཞིང་ཁ་སྐམས་སྙིང་མིག་རྣ། །མགོ་བོ་ན་བས་འདི་མི་བཅའ། །རྟག་ཏུ་མིག་སྨན་སྐྱེར་ཁཎ། །མིག་ལ་ཕན་པས་དེ་ཕྱིར་བསྟེན། །དེ་ནི་མེ་ཡི་རང་བཞིན་ཏེ། །ལྷག་པར་བད་ཀན་ལ་འཇིགས་པས། །མཆི་མ་འཛག་ཕྱིར་སྐྱེར་ཁཎྡ། །ཞག་བདུན་ཞིང་ནི་བླུགས་པར་བྱ། །དེ་ནས་སྣ་སྨན་མ་ཁུར་བཀང་དོར། །དུད་པ་སོ་རྩི་བསྟེན་པར་བྱ། །སོ་རྩི་གློ་འགྲམས་མཁྲིས་པ་ཁྲག །རྩུག་པས་མིག་ནི་ན་བ་དང༌། །དུག་གིས་བརྒྱལ་ཞིང་ཆང་ནད་གཟིར། །ལུས་སྐེམ་གྱུར་ལ་གནོད་པ་ཡིན། །རྟག་ཏུ་བསྐྲུ་བྱུག་སྤྱོད་བྱེད་ན། །དེ་ནི་རྒས་ངལ་རླུང་འཇོམས་ཡིན། །མིག་གསལ་ལུས་རྒྱས་ཚེ་འཕེལ་ཞིང༌། །གཉིད་འོད་པགས་འཇམ་རྟས་བྱེད་ཡིན། དེས་ནི་མགོ་དང་རྣ་བ་དང༌། །རྐང་པ་ཁྱད་པར་རྟག་ཏུ་བརྟན། །བད་ཀན་སྐྱེས་དང་མ་ཞུ་དང༌། །བཀྲུ་སྨན་སྩོགས་བཏང་བསྐུ་བྱུག་སྤང༌། །ཡང་ཞིང་ལས་ནི་ནུས་པ་དང༌། །མེ་ཡི་དྲོད་སྐྱེད་ཚུལ་འབྲི་ལ། །ལུས་ཀྱི་སྐབས་ཕྱེད་མཁྲེགས་པ་ཉིད། །རྩོལ་བ་ལས་ནི་འབྱུང་བར་འགྱུར། །རླུང་མཁྲིས་ནད་ཅན་བྱིས་པ་དང༌། །རྒས་ཤིང་འཁོགས་པས་དེ་སྤང་བྱ། །སྟོབས་ལྡན་སྣུམ་བག་ཟ་བ་དང༌། །གྲང་བའི་དུས་དང་དཔྱིད་དུས་དང༌། །ནུས་ལྡན་དག་གིས་དེ་བསྟན་བྱ། །དེ་ལས་གཞན་ཚེ་དལ་བ་ཉིད། །དེ་བྱས་ཅི་བདེར་ལུས་དག་ནི། །ཀུན་
ནས་ཡོངས་སུ་མཉེ་བར་བྱ། །རྩོལ་བ་དེ་བྱས་ཟིན་ནས་ནི། །བདེ་བར་ལུས་ཀུན་ནས་པར་བྱ། །ཤིན་ཏུ་རྩོལ་བས་ལུད་པ་དང༌། །སྐོམ་དང་གཅོང་ཅན་མི་དྲན་མུན། །ཁྲག་དང་མཁྲིས་རྒྱས་ངལ་དང་དུབ། །རིམས་དང་སློན་པ་འབྱུང་བར་འགྱུར། །རྩོལ་བ་མི་ཉལ་ལམ་བུད་མེད། །དགོད་དང་སྨྲ་སོགས་ཤུགས་འབྱིན་དང༌། །སེང་གེས་གླང་པོ་དྲངས་པ་བཞིན། །ཤིན་ཏུ་དྲགས་བསམ་རུང་འགྱུར། །དྲིལ་ཕྱིས་བད་ཀན་སེལ་བ་དང༌། །ཚིལ་ནི་རབ་ཏུ་ཞུ་བྱེད་ཅིང༌། །ཡན་ལག་བརྟན་པར་བྱེད་པ་དང༌། །པགས་པ་གསལ་བར་བྱེད་པའི་མཆོག །ཁྲུས་ནི་དྲོད་སྐྱེད་རོ་ཙ་དང༌། །ཚེ་དང་མདངས་དང་སྟོབས་རབ་སྐྱེད། །གཡའ་དང་དྲི་མ་ངལ་དང་རྡུལ། །སྙོམ་སྐོམ་ལུས་ཚ་མི་ཤིས་སེལ། །ཆུ་དྲོན་གྱིས་ནི་ལུས་ཀྱི་སྨད། །བླུགས་ཤིང་བཀྲུས་པ་སྟོབས་སྐྱེད་ཡིན། །དེ་ཉིད་མགོར་བླུགས་ཁྲུས་བྱས་ན། །སྐྲ་དང་མིག་གི་སྟོབས་འཕྲོག་ཡིན། །ཁྲུས་ནི་འགྲམ་ཆགས་མིག་ནད་དང༌། །རྣ་བའི་ནད་དང་ཚད་པས་འཁྲུ། །ལྟོ་སྦོས་ཆམ་པ་མ་ཞུ་དང༌། །ཟོས་མ་ཐག་པ་རྣམས་ལ་སྨད། །ཞུ་ནས་ཕན་ཞིང་རན་པར་ཟ། །བཤང་སྩོགས་ནན་གྱིས་བརྣག་མི་བྱ། །ཤུགས་མ་ཕྱུང་བར་གཞན་མི་བྱ། །གནོད་ལས་མི་བདེ་བར་མ་ཡིན། །སེམས་ཅན་ཐམས་ཅད་བདེ་འདོད་ཕྱིར། །རྩོམ་པ་ཀུན་ལ་འཇུག་པར་འདོད། །བདེ་བར་ཆོས་མེད་པར་མ་ཡིན། །དེ་བས་ཆོས་ལ་བརྩོན་པར་བྱ། །མོས་པས་དགེ་བའི་བཤེས་གཉེན་བསྟེན། །ཅིག་ཤོས་རིང་དུ་སྤང་བར་བྱ། །འཚེ་དང་བརྐུ་དང་འདོད་ལོག་སྤྱོད། །ཕྲ་མ་ངག་རྩུབ་བརྫུན་ཚིག་དང༌། །མི་འབྲེལ་སྨ་དང་གནོད་སེམས་དང༌། །བརྣབ་སེམས་ལྟ་བ་ཕྱིན་ཅི་ལོག །དེ་ལྟར་སྡིག་པའི་ལས་རྣམས་བཅུ། །ལུས་ངག་ཡིད་ཀྱིས་སྤང་བར་བྱ། །ཕོངས་པ་ནད་པ་མྱ་ངན་གཟིར། །ཅི་ནུས་པར་ནི་ཕན་གདགས་བྱ། །འབུ་སྲིན་གྲོག་སྦུར་དག་ལ་ཡང༌། །རང་དང་འདྲ་བར་རྟག་ཏུ་བལྟ། །ལྷ་དང་དགེ་སློང་བྲམ་ཟེ་དང༌། །སྨན་པ་རྒན་རྒྱལ་མགྲོན་པོས་མཆོད། །སློང་ལ་རྒྱབ་ཀྱིས་ཕྱོགས་མི་བྱ། །བརྙས་པར་མི་བྱ་ཚར་མི་གཅད། །
གནོད་པར་བྱེད་བརྩོན་དགྲ་གཞན་ལའང༌། །ཕན་གདགས་པ་ནི་གཙོ་ཆེར་བྱ། །འབྱོར་དང་རྒུད་ལའང་ཡིད་གཅིག་བྱ། །རྒྱུ་ལ་ཕྲག་དོག་འབྲས་བུ་མིན། །དུས་སུ་ཕན་དང་ངན་པར་སྨྲ། །སླུ་བ་མེད་ཅིང་ངེས་པར་བྱ། །བཞིན་འཛུམ་གསོད་པོར་སྨྲ་བ་དང༌། །སྤྱོད་པ་བཟང་ཞིང་སྙིང་རྗེ་འཇམ། །གཅིག་པུ་བདེ་མིན་ཐམས་ཅད་ལ། ཡིད་མི་བརྟན་ཞིང་དོགས་མི་བྱ། །སུ་ཡང་བདག་གི་དགྲ་ཡིན་དང༌། །བདག་ནི་སུ་ཡི་དགྲར་གྱུར་དང༌། །བརྙས་དང་བདག་ལ་གཙོ་བོ་ནི། །མི་བྱམས་ཞེས་ནི་སྨྲ་མི་བྱ། །འགྲོ་བའི་བསམ་པ་ཤེས་ནས་ནི། །གང་ཞིག་ཇི་ལྟར་ཡོངས་མགུ་བ། །དེ་ལ་དེ་བཞིན་རྗེས་འཇུག་ཅིང༌། །གཞན་དག་དགའ་བྱེད་མཛངས་པ་ཡིན། །དབང་པོ་གཟིར་བར་མི་བྱ་ཞིང༌། །འདི་རབ་ཉམས་བདེར་བྱ་བའང་མིན། །ཚོམས་གསུམ་མེད་པའི་རྩོམ་པ་ལ། །མི་བསྟེན་དེ་དང་འགལ་མི་བྱ། །ཆོས་རྣམས་ཀུན་གྱི་ལམ་ལ་ནི། །དབུ་མའི་ལམ་གྱི་རྗེས་འཇུག་བྱ། །སྐྲ་སེན་ཁས་པུ་རིང་མི་གཞག །སྒོ་དགུ་རྐང་པ་དྲི་མེད་བྱ། །ཁྲུས་ལ་དགའ་ཞིང་དྲི་ཞིམ་བསྒོ། །ཆ་ལུགས་བཟང་ཞིང་མི་འཕྱར་སྤ། །རིན་ཆེན་གྲུབ་པའི་གསང་སྔགས་དང༌། །སྨན་ཆེན་རྟག་ཏུ་བཅང་བར་བྱ། །གདུགས་དཀར་ལྷམ་དང་ལྡན་པ་ནི། །གཉའ་ཤིང་གང་ཙམ་བལྟ་ཞིང་འགྲོ། །མཚན་མོ་དོན་ཆེན་དག་ལ་ནི། །དབྱིག་ཐོགས་མགོ་དཀྲི་གྲོགས་ལྡན་བྱ། །མཆོད་རྟེན་མཆོད་བྱ་རྒྱལ་མཚན་དང༌། །མི་ཤེས་གྲིབ་མ་ཐལ་ཕུབ་དང༌། །མི་གཙང་གསེག་བོད་གཏོར་མ་དང༌། །ཁྲུས་བྱས་ས་ནི་འགོམ་མི་བྱ། །ཆུ་བོར་རྒྱལ་ཏེ་འགྲོ་མི་བྱ། །མེ་ཆེན་ཕུང་པོར་འགྲོ་མི་བྱ། །ཐེ་ཚོམ་བཅས་པའི་གྲུ་ཤིང་ལ། །བཞོན་པ་མི་བསྲུན་བཞིན་མི་འཛེག །སྦྲིད་པ་གད་མོ་གླལ་བ་ལ། །ཁ་ནི་གདངས་པར་མི་བྱའོ། །སྣ་ནི་བྲུད་པར་མི་བྱ་ཞིང༌། །དོན་མེད་ས་རིས་མི་བྱའོ། །ལུས་ཀྱི་ཡན་ལག་མི་གཅུ་ཞིང༌། །ཙོག་ཙོག་པོར་ཡང་འདུག་མི་བྱ། །ལུས་ངག་ཡིད་ཀྱི་སྤྱོད་པ་ནི། །སྔ་ནས་ངལ་ལས་བཟློག་པར་བྱ། །བུས་འགྲེང་ཡུན་རིངས་གནས་མི་བྱ། །མཚན་མོ་ཤིང་དྲུང་བསྟེན་མི་བྱ། །
སུམ་མདོ་མཆོད་རྟེན་དྲུང་བཞི་མདོ། །ལྷའི་ཁང་པ་ཡང་དེ་བཞིན་ནོ། །གསོད་ས་འབྲོག་སྟོང་ཁང་སྟོང་དང༌། དུར་ཁྲོད་དུ་ནི་ཉིན་མོའང་མིན། །རྣམ་ཀུན་ཉི་མ་ལ་མི་བལྟ། །མགོ་ཡིས་ཁུར་ནི་བསྐུར་མི་བྱ། །ཤིན་ཏུ་ཕྲ་དང་འཚེར་བ་དང༌། །མི་གཙང་མི་སྡུག་རྒྱུན་མི་བལྟ། །ཆང་འཚོང་བ་དང་སྦྱོར་བ་དག །སྦྱིན་དང་ལེན་ལ་སྤྱད་མི་བྱ། །མདུན་གྱི་སེར་བུ་ཉི་ཚན་རྡུལ། །བ་མོ་དང་ནི་རླུང་རྩུབ་དང༌། །སྦྲིད་བསྒྲེགས་པ་ལུད་པ་ཟས། །གཉིད་ལོག་ཉལ་པོ་གཅུ་མི་བྱ། །གད་ཁའི་གྲིབ་མ་རྒྱལ་པོ་སྡང༌། །སྤྲུལ་གདུག་གཅན་གཟན་རྭ་ཅན་དང༌། །དུས་མཚམས་དག་ཏུ་ཟས་བཟའ་དང༌། །བུད་མེད་ཉལ་ཀློག་སེམས་ལས་དང༌། །དགྲ་བོའི་ནར་མར་ཟན་ཚོགས་འདུས། །སྨད་འཚོང་ཚོང་པའི་ཟས་ངག་དང༌། །ལུས་དང་མཆུ་དང་སེན་སྒྲ་འབྱིན། །ལག་པ་སྒྲ་ནི་སྤྲུགས་པ་དང༌། །ཆུ་མེ་མཆོད་བྱའི་བར་དུ་འགྲོ་།རོ་བསྲེགས་ལ་བརྟེན་དུད་པ་དང༌། །ཆང་སྩོགས་ཆགས་དང་བུད་མེད་ལ། །ཡིད་རྟོན་རང་དབང་གྱུར་པ་སྤང༌། །བློ་ལྡན་སྤྱོད་པ་ཐམས་ཅད་ལ། །འཇིག་རྟེན་ཉིད་ནི་སློབ་དཔོན་ཡིན། །དེ་བས་འཇིག་རྟེན་པ་ཡིད་དོན། །རྟོགས་པར་བྱེད་པས་དེ་ཉིད་བྱ། །སྙིང་རྗེས་བརླན་ཞིང་གཏོང་དང་ལྡན། །ལུས་དང་ངག་ཡིད་དུལ་བ་དང༌། །གཞན་གྱི་དོན་ལ་རང་དོན་སེམས། །དེ་དག་དམ་པའི་སྤྱོད་མཐར་ཐུག །ད་ལྟར་བདག་ནི་ཉིན་མཚན་དུ། །ཇི་ལྟ་བུར་ནི་གནས་འགྲོ་ཞེས། །རྟག་ཏུ་དྲན་པ་ཉེར་འཇོག་པ། །སྡུག་བསྔལ་སྣོད་དུ་མི་འགྱུར་རོ། །དེ་ལྟར་སྤྱོད་པ་མདོར་བསྡུས་པས། །གང་ཞིག་ཀུན་ཏུ་སྤྱོད་བྱེད་པ། །ཚེ་དང་ནད་མེད་དབང་ཕྱུག་དང༌། །གྲགས་པ་འཇིག་རྟེན་རྟག་འཐོབ་འགྱུར། །ཡན་ལག་བརྒྱད་པའི་སྙིང་པོ་བསྡུས་པ་ལས། །མདོའི་གནས་ཀྱི་ལེའུ་གཉིས་པའོ།། །།དེ་ནས་དུས་སུ་སྤྱོད་པའི་ལེའུ་བཤད་པར་བྱའོ། །དགུན་ཟླ་ར་བ་སྩོགས་གཉིས་གཉིས། །རིམ་བཞིན་དུས་ནི་དྲུག་ཏུ་བཤད། །དེ་ལས་དགུན་ཟླ་ཐ་ཆུངས་སྩོགས། །གསུམ་ནི་བྱང་དུ་འགྲོ་ཞེས་བྱ། །དེ་ཚེ་མི་རྣམས་ཉིན་རེ་བཞིན། །མཐུ་འཕྲོགས་པ་ཞེས་བྱ་བ་ཡིན། །དེ་ཚེ་ཤིན་ཏུ་རྣོ་
ཞིང་ཚ། །རྩུབ་པའི་ལས་ཀྱི་ངོ་བོ་ཉིད། །ཉི་མ་རླུང་གི་ཟླ་བ་ཡི། །ས་ཡི་ཡོན་ཏན་ཟད་པར་བྱེད། །འདིར་ནི་ཚབ་སྐ་ཁབ་ཡི། །རོ་རྣམས་སྟོབས་ནི་ཆེ་བ་ཡིན། །དེ་བས་མེ་ནི་མཐུ་སྟོབས་འཕྲོག །ལྷོ་ཕྱོགས་སུ་ནི་འགྲོ་བའི་དུས། །དབྱར་ལ་སོགས་པའི་སླར་སྟོབས་སྐྱེད། །འདི་སྟོབས་སླར་ནི་སྐྱེད་པས་ན། །འདིར་ནི་བསིལ་བས་ཟླ་བ་ནི། །སྟོབས་དང་ལྡན་པས་ཉི་མ་འབྲི། །ཆར་འབབ་པ་དང་རླུང་བསིལ་བས། །ས་སྟེངས་ཚ་བ་ཞི་བ་ན། །འདིར་ནི་སྣུམ་དང་སྐྱུར་ལན་ཚྭ། །མངར་བའི་རོ་རྣམས་མཐུ་སྐྱེད་དོ། །དགུན་ཚེ་ཆར་དང་ཚ་དུས་སུ། །སྟོབས་ཆུང་ལྷག་མ་དག་ལ་འབྲིང༌། །སྟོབས་ལྡན་གྲང་བས་བཀག་པས་ན། །དགུན་གྱི་དུས་སུ་མེ་སྟོབས་ལྡན། །དེ་ནི་རླུང་གིས་སྦར་བས་ན། །ཟས་ཉུང་གྱུར་ན་ལུས་ཟུངས་སྐེམས། །དེ་བས་དགུན་ནི་མངར་སྐྱུར་དང༌། །ལན་ཚྭའི་རོ་ནི་བསྟེན་པར་བྱ། །དེ་ཚེ་མཚན་མོ་རིང་བས་ན། །ནང་པར་ཉིད་ནི་བཀྲེས་པར་འགྱུར། །ངེས་པར་བྱ་བ་བྱས་ནས་ནི། །ཇི་སྐད་བཤད་རྫོགས་དེ་རྗེས་ལ། །རླུང་འཇོམས་ཏིལ་མར་གྱིས་བྱུག་ཅིང༌། །སྤྱི་བོ་འང་ཏིལ་མར་གྱིས་བྱུག་མ་ཉེ། །བག་ཡོད་པ་དང་སྟོབས་འགྱེད་ཅིང༌། །རྐང་པས་རན་པར་མཉེ་བར་བྱ། །དེ་ནས་བསྐ་བས་སྣུམ་བསལ་ལ། །ཆོ་ག་བཞིན་དུ་ཁྲུས་དག་བྱ། །གུར་གུམ་གླ་རྩི་དང་བཅས་པས། །ལུས་བསྐུ་ཨ་ཀ་རུ་ཡིས་བདུག །ཤ་ཚོན་ཁུ་བ་སྣུམ་པ་དང༌། །བུ་རམ་ཆང་དང་ཆང་དང་ས་ཆང༌། །གྲོ་དང་འབྲས་ཁུར་མ་ཤ་དང༌། །འོ་མ་བུ་རམ་ཤིང་བྱས་བཟའ། ཁ་ཟས་གསར་དང་ཞག་ཏིལ་མར། །དྲོ་འཇམ་ཆུ་ཡིས་གཙང་སྤྲ་བྱ། །བེའུ་རས་སླག་པ་དར་སྩོགས་གོ །དྲེའུ་རྡོག་རེའུ་བལ་ཆེན་གདིང༌། །རང་བཞིན་དོ་ཞིང་ཡང་བ་ཡི། །གོས་བགོ་མལ་ལ་བརྟེན་པར་བྱ། །ཉི་མའི་འོད་ལ་རན་པར་འདེ། །དུགས་བྱ་ལྷ་མ་ནི་རྟག་ཏུ་བགོ །ཆུང་མ་གཞོན་ཞིང་འོང་རྒྱགས། །ནུ་མ་བརླ་དང་རོ་སྨད་རྒྱས། །གུར་གུམ་གྱིས་བྱུགས་སྤོས་ཀྱིས་བདུག །ལུས་ཀྱི་དྲོད་ཀྱིས་གྲང་སེལ་བའོ། །ས་ཁང་ཁང་པ་ཉིས་རིམ་བྱས། །མདག་མེའི་དྲོད་ཀྱིས་བསྲོས་པ་ནི། །གྲང་དང་རྩུབ་པ་ལས་བྱུང་བའི། །ཉེས་པ་ནམ་ཡང་མི་
འབྱུང་ངོ༌། །དགུན་སྨད་དུས་སུ་ལྷག་པར་ཡང༌། །ཆོ་ག་འདི་ཉིད་བྱ་བ་ཡིན། །དེ་ཚེ་ལྷག་པར་གྲང་བ་དང༌། །སྟོབས་འཕྲོགས་ལས་བྱུང་རྩུབ་པ་ཡིན། །དགུན་ནི་བད་ཀན་ཁོང་ན་སྩོགས། །དཔྱིད་དུས་ཉི་མའི་འོད་དྲོས་པ། །མེ་ཡི་དྲོད་ཉམས་ནས་སྐྱེད་དེ། །དེ་བས་དེ་ནི་མྱུར་དུ་བསལ། །རྣོ་དང་སྐྱུག་སྨན་སྣ་སྨན་སོགས། །ཡང་དང་རྩུབ་པའི་ཁ་ཟས་དང༌། །བཅག་དང་ལུས་ཕྱི་མཉེས་པ་ཡིས། །བད་ཀན་བདོ་བའི་ནད་བསལ་བྱ། །ཁྲུས་བྱས་ག་པུར་ཙནྡན་དང༌། །གུར་གུམ་སྩོགས་པས་བསྐུ་བར་བྱ། །ནས་དང་གྲོ་ནི་རྙིང་པ་དང༌། །སྦྲང་རྩི་སྐམ་སའི་བསྲེགས་ཤ་བཟའ། །ཨ་མྲའི་ཁུ་བ་དང་སྦྱར་བའི། །ཁུ་བ་སྐོམ་དུ་སྦྱར་བ་བཏུང༌། །ཆུང་མ་དྲི་ཞིམ་ཨུཏྤལ་གྱི། །མིག་དང་ལྡན་དང་ལྷན་ཅིག་ཅིང༌། །ཡིད་ནི་དགའ་ཞིང་བདེར་བྱས་པས། །གྲོགས་དང་ལྷན་ཅིག་བཏུང་བར་བྱ། །སྐྱོན་མེད་ཆང་རྒན་དྲོ་འཇམ་དང༌། །བུ་རམ་རྒུན་ཆང་སྦྲང་ཆང་དང༌། །སྒ་ཆུ་བསྐོལ་དང་སེའུའི་ཆུ། །སྦྲང་ཆུའམ་གླ་སྒང་ཆུ་བཏུང་བྱ། །ལྷོ་ཕྱོགས་སེར་བུས་བསིལ་བ་དང༌། །མཐའ་མ་ཀུན་ཏུ་ཆུ་འབབ་ལ། །ཉི་མའི་འོད་ནི་མི་སྣང་དང༌། །ནོར་བུ་བཅག་འདྲའི་མདངས་ལྡན་པ། །ཁུ་བྱུག་སྙན་པ་སྒྲ་སྒྲོགས་ཤིང༌། །འདོད་པའི་ལོངས་སྤྱོད་ལྡན་པའི་ས། །སྣ་ཚོགས་མེ་ཏོག་ལྡན་པའི་ཤིང༌། །དྲི་ཞིམ་སྐྱེད་མོས་ཚལ་དུ་ནི། །དགའ་འདུན་གཏམ་ནི་སྣ་ཚོགས་པས། །ཕྱེད་དུ་བདེ་བས་བདེ་བར་བྱ། །ལྕི་བསིལ་ཉིན་མོ་ཉལ་བ་དང༌། །སྣུམ་བག་མངར་སྐྱུར་སྤང་བར་བྱ། །ཉི་མའི་འོད་ཟེར་རབ་ཚ་བས། །སོ་ག་འཕྲོག་པ་འདྲ་བ་ཡིན། །དེ་བས་དེ་ཚེ་ལན་ཚྭ་ཚ། །སྐྱུར་རྩོལ་ཉི་མའི་འོད་ཟེར་སྤང༌། །ཟས་ནི་མངར་དང་ཡང་བ་དང༌། །སྣུམ་བསིལ་སླ་བ་ཉིད་བསྟེན་བྱ། །རབ་བསིལ་ཆུ་ཡིས་ལུས་བཀྲུ་ཞིང༌། །ཕྱེ་ཟན་ཁ་རར་བཅས་པ་བཟའ། །ཆང་མི་བཏུང་སྟེ་འཐུང་ན་ཡང༌། །ཉུང་བའམ་ཆུ་མང་བསྲེས་ལ་བཏུང༌། །གཞན་དུ་དེ་ནི་ཁ་སྐོམ་ལྷོད། །ཚ་དང་རྨོངས་པར་བྱེད་པ་ཡིན། །འབྲས་ཆན་ཀུནད་ལྟར་དཀར་དང༌། །སྐམ་སའི་སྲོག་ཆགས་ཤ་དག་བཟའ། །
ཁུ་བ་མི་སྐ་ཞོ་དང་ནི། །བུ་རམ་སྦྱར་སྩོགས་གཡོས་བྱས་བཏུང༌། །ཕལ་ཆེར་སྐྱུར་བ་བཏུང་བར་བྱའོ། །སྙིང་པོ་ལྔ་ཡི་བཏུང་བ་ནི། །ཁམ་ཕོར་སར་པ་ལ་གནས་པ། །ཆུ་ཤིང་རྒྱ་སྟར་དུམ་བུ་བསྲེས། །སྒྱུར་བཅས་ཁམ་ཕོར་སྣོད་ཀྱིས་བཏུང༌། །ཆུ་ནི་པ་ཏ་ལས་བསྒོས་ཤིང༌། །ག་བུར་བཅས་ཤིང་ཤིན་ཏུ་བསིལ། །ཟླ་ཟེར་ལྟ་བུའི་བཟའ་བ་ནི། །མཚན་མོའི་དུས་སུ་བཟའ་བ་དང༌། །ཟླ་བ་སྐར་མ་ལྟར་དཀར་བའི། །མ་ཧེའི་འོ་མ་བསིལ་མོ་བཏུང༌། །སཱ་ལ་ཏ་ལ་ཆེན་མོ་ནི། །སྤྲིན་རེག་ཚ་བའི་འོད་ཟེར་སྒྲིབ། །རྒུན་འབྲུའི་སྙེ་མ་གཡུར་ཟ་ཞིང༌། །འཁྲི་ཤིང་ལྡན་དང་ནགས་ཚལ་བཟང༌། །དྲི་བཟང་ཁང་པ་ཆུ་ཡིས་ནི། །བསིལ་ཁང་ལུས་དང་འཚམ་བྱས་ལ། །ཆག་ཆག་བཏབ་དང་ཨ་མྲ་ཡི། །ལྡུམ་བུ་འབྲས་བུ་འཕྱང་བ་དང༌། །ཆུ་ཤིང་འདབ་དང་ཀལ་ལྟར། །པད་རྩ་པདྨ་ཨུཏྤལ། །མེ་ཏོག་རྒྱས་པ་དང་ལྡན་པར། །འཇམ་པའི་གནས་མལ་བཅས་ནས་ནི། །ཕྱེད་དུས་ཉི་མས་གདུངས་པ་ན། །ཉལ་བའམ་ཆུ་ཡི་ཁང་པ་ནི། །བུད་མེད་བཅོས་གཟུགས་ནུ་མ་ལག །ཁ་ལས་ཨུ་ཤིར་ཆུ་འབབ་བྱ། །མཚན་མོ་ཡང་ཐོག་རྡོ་ཐལ་བྱུགས། །ཟླ་བའི་འོད་ཀྱིས་བསིལ་བར་ཉལ། །མལ་སྟན་བདེ་བར་སེམས་བདེ་ཞིང༌། །ཙནྡན་ལྡེ་གུ་ཕྲེང་བ་ཐོགས། །རབ་ཏུ་ཕྲ་བའི་གོས་བགོས་ཏེ། །འདོད་པའི་རྒྱུན་ལས་བཟློག་པར་བྱ། །ཏ་ལའི་བསིལ་ཡབ་སྦོས་ཆུས་བཏབ། །པདྨའི་འདབ་རྒྱས་རླུང་ཡབ་དང༌། །དལ་གྱིས་ལེགས་པར་གཡོབ་པ་དང༌། །རྫི་ཆར་སེར་བུ་དང་ལྡན་བྱ། །ག་བུར་མ་ལི་ཀའི་ཕྲེང་བ། །མུ་ཏིག་དོ་ཤལ་ཙནྡན་དཀར། །ནེ་ཙོ་ཤ་རི་ཀ་ལ་སྩོགས། །སྒྲ་སྙན་ཡིད་འོང་སྒྲོགས་པ་དང༌། །ཆུང་མ་གདུ་བུ་པད་རྩ་འདྲ། །པདྨ་རྒྱས་པ་ལྟ་བུར་མཛེས། །པདྨ་ཅན་ནི་འགྲོ་འདྲལ། །སྙོམ་པ་སེལ་བར་བྱེད་པ་ཡིན། །མཐུ་འཕྲོགས་པ་ནི་ན་བའི་ལུས། །དམན་པ་ལས་ཀྱང་དམན་གྱུར་ཏེ། །དབྱར་ནི་གནོད་པས་གནོད་གྱུར་ཏེ། །མཁའ་ལ་སྤྲིན་འདུས་ཆུ་ཡིས་བརླན། །ཆུ་ཐིགས་བཅས་པའི་རླུང་དང་ནི། །གྲང་བ་དྲག་པོར་ལྡང་བ་དང༌། །ས་ཡི་རླངས་པ་སྐྱུར་མིན་དང༌། །ཆུ་ནི་རྙོག་མ་
ཅན་དག་གིས། །མེ་དྲོད་ཆུང་བས་གནོད་པར་བྱེད། །ཕན་ཚུན་གནོད་པ་དེ་ལ་ནི། །དྲོ་ཞིང་མེ་ཡི་སྟོབས་སྐྱེད་པ། །ཐུན་མོང་གང་ཡིན་བསྟེན་པར་བྱ། །སྦྱང་བས་ལུས་ནི་དག་བྱས་ལ། །ཟས་ནི་ཡང་བག་ཁུ་བ་བཟའ། །སྐམ་སའི་སྲོག་ཆགས་ཤ་ཁུ་དང༌། སྦྲང་རྩི་ཅན་ནི་རྙིང་པ་བཏུང༌། །དར་བ་ཁ་རུ་ཚར་སྦྱར་བའམ། །ཚ་བ་ལྔ་ནི་ཕྱེ་མ་ཅན། །ཁྲོན་པའི་ཆུ་ནི་བསྐོལ་བའང་རུང༌། །ཆར་ཆེའི་དུས་སུ་ཁ་ཟས་ནི། །རབ་སྒྱུར་ལན་ཚྭ་སྣུམ་པ་དང་བཅས། །སྐམ་ཞིང་སྦྲང་རྩིར་ལྡན་ལ་ཡང༌། །རྐང་གིས་མི་འགྲོ་དྲི་ཞིམ་བྱུགས། །རྟག་ཏུ་གོས་ནི་སྦོས་ཀྱིས་བདུག །ཁང་བཟངས་སྟེང་དུ་བ་མོ་བསིལ། །ཆར་གྱི་ཟེར་སྤངས་གནས་པར་བྱས། །རླུང་ཆུ་དང་སྦྱར་སྐྱོམ་དང༌། །ཉིན་གཉིད་རྩོལ་དང་ཉི་ཚན་སྤང༌། །དབྱར་ལུས་བསིལ་བར་གྱུར་པ་ལ། །འཕྲལ་དུ་ཉི་ཟེར་གྱིས་གདུངས་པས། །ཆར་འབབ་ཚེ་ནའང་བསགས་པ་ཡི། །མཁྲིས་པ་སྟོན་ནི་ལྡང་བར་འགྱུར། །དེ་བསལ་ཕྱིར་ནི་སྨན་མར་ཁ། །བཀྲུ་སྨན་གཏང་དང་གཏར་ག་བྱ། །ཁ་དང་མངར་དང་བསྐ་བ་དང༌། །བཀྲེས་ཚེ་ཟས་ནི་ཡང་བ་བཟའ། །འབྲས་ཆན་མུངྒ་སྐྱུ་རུར། །སྦྲང་རྩི་སྐམ་སའི་པ་ཏོ་ལ། །ཉི་མའི་ཟེར་གྱིས་གདུངས་པ་དང༌། །ཟླ་བའི་འོད་ཀྱིས་བསིལ་བྱས་ལ། །རྀ་ཥི་ཤར་བས་དུག་མེད་པ། །ཉིན་མཚན་གཉིས་ཀར་སྦྱངས་ཆུ་བཏུང༌། །དངས་པའི་དྲི་མེད་ཆུ་ཞེས་པ། །དྲི་མེད་དྲི་མ་སེལ་འགྱུར་བ། །མི་འབྲུག་རྩུབ་པ་མ་ཡིན་པ། །བཏུང་བ་ལ་སོགས་བདུད་རྩིར་མཚུངས། །ཙནྡན་ཨུར་ཤིང་ག་པུར་དང༌། །མུ་ཏིག་ཆུན་འཕྱངས་ཕྲེང་གོས་མཛེས། །ཁང་བཟངས་རྡོ་ཐལ་གྱིས་དཀར་ཞིང༌། །ཟླ་ཟེར་ཅན་དུ་མཚན་གནས་བྱ། །ཟིལ་པ་ཐལ་སྨན་ཧ་ཅང་འགྲངས། །ཞོ་དང་ཏིལ་མར་ཞག་ཉི་ཚན། །མི་བཟད་ཆང་དང་ཉིན་པར་ཉལ། །མདུན་གྱི་སེར་བུ་ཡོངས་སུ་སྤང༌། །དགུན་དང་དབྱར་ནི་དང་པོའི་གསུམ། །དཔྱིད་ནི་ཐ་མའི་རོ་གསུམ་བསྟེན། །སོས་ཀ་མངར་ཏེ་སྟོན་ཀ་ནི། །མངར་དང་ཁ་དང་བསྐ་བ་བསྟེན། །མདོར་ན་ཟས་དང་སྐོམ་དག་ནི། །སྟོན་དང་དཔྱིད་ནི་རྩུབ་པ་སྟེ། །སོ་ག་དབྱར་མཐའ་བསིལ་
བར་བྱ། །གཞན་དག་ཏུ་ནི་དེ་ལས་བཟློག །རྟག་ཏུ་རོ་ཀུན་བསྟེན་པ་ལས། །རང་རང་དུས་སུ་ལྷག་པར་བསྟེན། །དུས་གཉིས་ཐོག་མའི་ཞག་བདུན་ནི། །དུས་མཚམས་ཡིན་པར་ཤེས་པར་བྱ། །དེ་ནི་སྔ་མའི་ཆོ་ག་སྤང༌། །འོག་མ་རིམ་བཞིན་བསྟེན་པར་བྱ། །མ་སྤངས་ན་ནི་ནད་འགྱུར་ཏེ། །འཕྲལ་དུ་ནང་ནི་འོང་བར་འགྱུར། །ཡན་ལག་བརྒྱད་པའི་སྙིང་པོ་བསྡུས་པ་ལས། མདོའི་གནས་ཀྱི་ལེའུ་གསུམ་པའོ།། །།དེ་ནས་ནད་མི་འབྱུང་བར་བྱ་བའི་དཔྱད་ཀྱི་ལེའུ་བཤད་པར་བྱའོ། །ཕྱི་དབུགས་བཤད་གཅི་སྦྲིད་པ་དང༌། །བཀྲེས་སྐོམ་གཉིད་དང་ལུད་པ་དབུགས། །གླལ་དང་མཆིལ་མ་སྐྱུགས་པ་དང༌། །ཁུ་བའི་ཤུགས་ནི་དགག་མི་བྱ། །འཕྱེན་ནི་བཀག་པར་གྱུར་པ་ཡིས། །སྐྲན་དང་རྟུག་སྐམ་གཟེར་སྙོམ་ལྕི། །འཕྱེན་དང་བཤད་གཅི་ཁོང་དུ་འགགས། །མིག་རྟུལ་དྲོད་ཆུང་སྙིང་ནད་འགྱུར། །བཤང་འགགས་བྱིན་པའི་ཉ་འགྱུར་ཞིང༌། །ཆམ་པས་འདེབས་ཤིང་ཀླད་པ་ན། །ཁར་ནི་མི་གཙང་འབྱུང་བ་དང༌། །སྔར་བཤད་ནད་དུའང་འགྱུར་བ་ཡིན། །གཅིན་འགགས་པ་ཡིས་ཡན་ལག་ན། །རྡེའུ་ཆུ་སོ་ཕོ་མཚན་དང༌། །དཀུ་ཡི་ནང་ན་སྔར་གྱི་ནད། །ཕལ་ཆེར་འབྱུང་ངོ་དེ་ཡི་སྨན། །རེང་བུ་བསྐུ་བྱུག་ལུས་བཅིང་དང༌། །དུགས་དང་སྨན་མར་མས་གཏོང་བའོ། །ཟས་སྐོམ་བཤད་བ་འགགས་པ་དང༌། །བཤང་འགགས་ལས་བྱུང་གློ་གཅོད་མཚུངས། །ཆུ་བཀག་པ་ལས་མར་གསར་ནི། །ཆེ་ཚད་ཙམ་ནི་རབ་ཏུ་སྦྱང༌། །སྒྲེགས་པ་བགག་ན་ཡི་ག་འཆུས། །ལུས་འདར་སྙིང་དང་བྲང་འགགས་ན། །སྦོ་ཞིང་ལུད་པ་སྐྱིགས་བུས་འདེབས། །དེའི་སྨན་སྐྱིགས་བུ་དག་དང་འདྲ། །སྦྲིད་བཀག་མགོན་དབང་མི་རྣོ། །གཉའ་རེངས་ཁ་ཡོ་འགྲམ་ཆགས་འགྱུར། །དུད་རྣོན་གྱིས་བདུག་མིག་སྨན་དང༌། །སྣ་སྨན་ཉི་མ་ལྟ་བ་ཡིས། །སྦྲིད་པ་འགགས་པ་བསལ་བྱ་ཞིང༌། །སྣུམ་དང་དུགས་ཀྱང་བསྟེན་པར་བྱ། །སྐོམ་པ་འགགས་པས་ཁ་སྐམས་ཤིང༌། །ཡན་ལག་མི་བདེ་རྣ་མི་གསང༌། །མགོ་འཁོར་མྱོས་ཤིང་སྙིང་ནད་འབྱུང༌། །དེར་བསིལ་ཆོ་ག་ཐམས་ཅད་ཕན། །བཀྲེས་པས་ལུས་
ཞིག་ཡི་ག་འཆུས། །ལུས་སྙོམ་ཉམ་ཆུང་གཟེར་མགོ་འཁོར། །དེ་ལ་ཟས་ཡང་སྣུམ་དྲོ་དང༌། །ཆུང་བ་དག་ནི་སྦྱར་བར་བྱ། །གཉིད་བཀག་ཁོང་མྱོས་སྤྱི་བོ་མིག །ལྕི་ཞིང་སྙོམ་ལ་གླལ་འོང་ཞིང༌། །ལུས་ཞིག་སྙམ་སེམས་དེ་ལ་ནི། །གཉིད་ལོག་ལུས་མཉེ་ཕན་པ་ཡིན། །ལུད་པ་བཀག་པས་དེ་འཕེལ་ཞིང༌། །དབུགས་མི་བདེ་ཞིང་ཡི་ག་འཆུས། །སྙིང་ནད་སྐེམས་བྱེད་སྐྱིགས་བུས་འདེབས། །དེར་ནི་ལུད་པས་ལ་ཆོ་ག་བྱ། །ངལ་དུབ་དབུགས་ནི་བཀག་པ་ལས། །སྐྲན་དང་སྙིང་ནད་མྱོས་པར་འགྱུར། །དེ་ལ་ངལ་གསོ་བྱ་བ་དང༌། །རླུང་སེལ་བྱ་བའི་ཆོ་ག་ཕན། །གླ་ལ་བཀག་ན་ནི་སྦྲིད་བཀག་མཚུངས། །ཆོ་ག་ཐམས་ཅད་རླུང་འཇོམས་བྱ། །མཆིལ་མ་བཀག་པས་མགོ་སྙིང་ན། །གཉའ་རེངས་ཡི་ག་འཆུས་མགོ་འཁོར། །སྐྲན་བཅས་སྣ་ཆུ་འཛག་འགྱུར་དེར། །གཉིད་ངོམས་ཆང་བཏུང་གཏམ་སྙན་ཕན། །སྐྱུག་བྲོ་བ་རྣགས་པས་མི་དཔལ་མཛེ། །འབྲས་དང་མིག་ནད་གཡན་པ་རིམས། །སྐྱ་རྦབ་ལུད་པ་དབུགས་མི་བདེ། །དང་ག་རོ་སྟོད་མི་བདེ་སྐྲང༌། །དེར་ཁ་བཀང་དབོ་དུད་སྨྱུང་གནས། །རྩུབ་བྲོས་དེ་ཉིད་སྐྱུགས་པ་དང༌། །རྩོལ་དང་མྱུར་བར་གཏར་ག་གདབ། །བཀྲུ་སྨན་གཏང་བའང་བསྔགས་པ་ཡིན། །ཁུ་བ་བཀག་པས་དེ་འཛག་དང༌། །ཕོ་མཚན་ན་དང་འོར་ནད་རིམས། །སྙིང་ནད་ཆུ་འགགས་ལུས་ཞིག་དང༌། །རྡེའུ་འཕེལ་དང་མ་ནིང་འགྱུར། །དེ་ལ་ཁྱིམ་བྱའི་ཤ་དང་ཆང༌། །འབྲས་ཆན་མས་གཏོང་ལུས་བཅིང་དང༌། །ཆུ་སོའི་ནད་བསལ་ཏིལ་མར་བཙོས། །འོ་མ་བུད་མེད་གཞོན་བསྟེན་ཕན། །ཤུགས་ནི་བཀག་དང་བཙིར་བ་ཡིས། །ནད་ནི་ཀུན་ཀྱང་འབྱུང་བར་འགྱུར། །ཤིན་ཏུ་མང་པོ་དེ་ཡི་ཕྱིར། །གསོ་དཔྱད་མང་པོ་འདིར་བཤད་དོ། །དེ་ལས་ཕལ་ཆེར་རླུང་དུ་མ། །གང་ཕྱིར་འཁྲུགས་པར་འགྱུར་བས་ན། །དེ་ཕྱིར་དེའི་ཟས་སྐོམ་དང་སྨན། །མཉམ་པར་འགྱུར་བར་སྦྱར་བར་བྱ། །འདི་དང་གཞན་དུ་ཕན་འདོད་པས། །འདོད་ཆེན་ཕྲག་དོག་ཞེ་སྡང་དང༌། །སེར་སྣ་འདོད་ཆགས་ལ་སོགས་ཤུགས། །རྟག་བཀག་དབང་པོ་ཐུལ་བར་བྱ། །
དྲི་མ་རྣམས་ནི་སྦྱང་བའི་ཕྱིར། །ཇི་བཞིན་དུས་སུ་ནན་ཏན་བྱ། །དེ་ནི་ཤིན་ཏུ་སོགས་འགྱུར་ན། །ཤས་ཆེར་འཁྲུགས་པས་སྲོག་རྒྱུན་གཅོད། །གནོད་པ་སྨྱུང་དང་གཞུ་བྱས་པས། །བསལ་ཀྱང་སླར་ནི་ལྡང་སྲིད་ཀྱི། །གང་ཞིག་ལེགས་པར་སྦྱངས་པ་དག །དེ་ནི་སླར་ཡང་འབྱུང་མི་འགྱུར། །དུས་ཤེས་པ་ཡིས་དེ་ཕན་ཆད། །རིམ་པ་བཞིན་དུ་ཅི་རིགས་པར། །བཅུད་ཀྱིས་ལེན་རྣམས་གྲུབ་པ་དང༌། །རོ་ཙའི་སྦྱོར་བ་སྦྱར་བར་བྱ། །སྨན་རྣམས་ཀྱིས་ནི་ལུས་སྦྱངས་ཕན། །སཱ་ལུ་དྲུག་ཅུ་པ་དང་དྲོ། །མུངྒ་ཤ་དང་མར་ལ་སོགས། །ཕན་པའི་ཟས་ཀྱིས་རིམ་ལུས་བརྟས། །ཡིད་འོད་དྲོད་སྐྱེད་སྨན་སྦྱར་བ། །ཡི་ག་འབྱེད་ཅིང་འཇུ་བྱེད་དང༌། །བསྐུ་ཞང་དྲིལ་ཕྱིས་ཁྲུས་བྱས་དང༌། །དྲག་པོ་འཇམ་རྩི་མས་གཏོང་བརྟས། །དེས་ནི་མེ་ཀུན་སྟོབས་ལྡན་ཞིང༌། །བློ་མདོག་དབང་པོ་དྲི་མ་མེད། །དེ་བཞིན་ཚེ་རིང་རོ་ཙ་དང༌། །དཔལ་དང་གཟི་མདངས་ཐོབ་པར་འགྱུར། །འབྱུང་པོ་དུགས་དང་རླུང་དང་མེ། །མཚོན་སྨས་ཆག་གྲུགས་སྩོགས་འབྱུང་དང༌། །འདོད་ཆགས་ཞེ་སྡང་འཇིག་ཚོགས་གང༌། །དེ་ནི་གློ་བུར་ནད་ཅེས་བྱ། །ཤེས་རབ་ཉེས་པ་སྤང་བ་དང༌། །དབང་པོ་ཉེར་ཞི་དྲན་པ་དང༌། །ཡུལ་དུས་བདག་ཉིད་ཤེས་པ་དང༌། །དམ་པའི་སྤྱོད་པའི་རྗེས་འཇུག་པ། །ལྷན་ཅིག་སྐྱེས་དང་གློ་བུར་ནད། །མདོར་ན་མ་སྐྱེས་མི་འབྱུང་དང༌། །སྐྱེས་པ་ཞི་བར་བྱ་བའི་ཕྱིར། །ཆོ་ག་འདི་ནི་བསྟེན་པ་ཡིན། །གྲང་བ་ལས་བྱུང་ཉེས་ཚོགས་དཔྱིད་ཀྱི་ཚེ། །རྣམ་བསལ་སོག་ལས་བྱུང་དབྱར་དུས་ན། །དབྱར་བསགས་སྤྲིན་བྲལ་དུས་སུ་ལེགས་སྦྱངས་ན། །དུས་བྱུང་ནད་ནི་ནམ་ཡང་འབྱུང་མི་འགྱུར། །རྟག་ཏུ་ཕན་པའི་ཟས་དང་སྤྱོད་ལམ་བསྟེན། །བརྟགས་ཏེ་བྱེད་ཅིང་ཡུལ་རྣམས་ལ་མི་ཆགས། །གཏོང་ལྡན་སེམས་སྙོམས་བདེན་བརྩོན་བཟོད་དང་ལྡན། །ཉམས་ལྡན་སྟེན་པར་བྱེད་ན་ནད་མེད་འགྱུར། །ཡན་ལག་བརྒྱད་པའི་སྙིང་པོ་བསྡུས་པ་ལས། །མདོའི་གནས་ཀྱི་ལེའུ་བཞི་པའོ།། །།དེ་ནས་ཆུ་སྣ་ཚོགས་པ་ལ་སོགས་པའི་བྱེ་བྲག་ཤེས་པར་བྱ་བའི་ལེའུ་བཤད་པར་བྱའོ། །མཁའ་ལས་འབབ་
པའི་གང་གཱའི་ཆུ། །འཚོ་བྱེད་ངོམས་བྱེད་ཡི་གར་འོང༌། །ཚིམ་བྱེད་སེམས་ནི་གསལ་བྱེད་ལ། །སླ་ཞིང་རོ་མི་གསལ་ལ་ཞིམ། །བསིལ་ཞིང་ཡང་བ་བདུད་རྩིར་མཚུངས། །ཉི་ཟླ་རླུང་གིས་རེག་འགྱུར་བ། །དེ་ནི་ཡུལ་དུས་ལ་ལྟོས་ནས། །ཕལ། ཆེར་ཕན་དང་གནོད་པ་ཡིན། །གང་ཞིང་ཆར་འབབ་དྲི་མ་མེད། །འབྲས་ཆན་དངུལ་ཕོར་ནང་གནས་པ། །མ་རུལ་མདོག་ཀྱང་མ་གྱུར་པ། །གང་གཱའི་ཆུ་དེ་བཏུང་བར་བྱ། །གཞན་དུ་མཚོ་ཆུ་སྟོན་ཟླ་ནི། །འབྲིང་པོ་མིན་པར་བཏུང་མི་བྱ། །ཆར་པའི་ཆུ་ནི་སྣོད་བཟང་བཞག །འགྱུར་བ་མེད་པར་རྟག་ཏུ་བཏུང༌། །དེ་མེད་ན་ནི་ཐང་ལ་གནས། །བར་སྣང་བ་དང་རྗེས་མཐུན་ཡིན། །ས་ཕྱོགས་དཀར་ནག་གཙང་ཞིང་ཡངས། །ཉི་འོད་རླུང་གིས་ཕོག་པ་བསྔགས། །ལྟེང་ཀ་འདམ་རྫབ་ཉ་ལྕིབས་དང༌། །རྩ་དང་ལོ་མ་རྙོག་མ་ཅན། །ཉི་ཟླ་རླུང་གིས་མ་ཕོག་པ། །མངོན་དུ་འབབ་དང་ཆུ་གར་ལྕི། །དབུ་བ་སྲོག་ཆགས་ཅན་དང་དྲོ། །གྲང་ཆེས་སོ་ཡིས་མི་བཟོད་པ། །ཆར་གང་དུས་སུ་མ་བབ་དང༌། །དུས་ཀྱི་དང་པོར་བབ་པ་གང༌། །སྲོག་ཆགས་གདུག་དང་བ་སྩོགས་འདྲེས། །བཤད་གཅི་དྲུག་འདྲེས་གནོད་མི་བཏུང༌། །ནུབ་ཕྱོགས་ནས་ནི་རྒྱ་མཚོར་བབ། །གང་ཡང་མྱུར་འབབ་རྡུལ་མེད་ཆུ། །དེ་དག་མདོར་ན་དགེ་བ་ཡིན། །དེ་ལས་ཟློག་ན་བཟང་མ་ཡིན། །རྡོ་ལ་ཤུགས་དྲག་རྡེབས་པ་ཡིས། །རྒྱུན་ཆད་གཡེངས་པའི་ཆུ་དག་དང༌། །གངས་ཅན་མ་ལ་ཡ་ལས་བྱུང༌། དགེའོ་དེ་ནི་བརྟན་གཡུང་ན། །སྲིན་བུ་རྐང་བ་མ་སྙིང་དང་ནི། །ལྐོག་མ་ཀླད་པའི་ནད་སྐྱེད་འགྱུར། །ཤར་དང་ནུབ་ཀྱི་མཐའ་ལས་བྱུང༌། །གཞང་འབྲུམ་སྐྱེད་དོ་དབང་ཆེན་འབབ། །དམུ་རྫིང་རྐང་བམ་ནད་སྐྱེད་འགྱུར། །ས་ཧྱ་བིན་དེའི་རི་ལས་འབབ། །མཛེ་དང་སྐྱ་རྦ་བ་ཀླད་ནད་འགྱུར། །པ་རི་ཡ་ཏྲའི་ནད་ཀུན་སེལ། །ཁྲོན་པ་རྫིང་ལ་སྩོགས་པའི་ཆུ། །སྐམ་ས་རླན་ཅན་བྲག་ལས་ཤེས། །དྲོད་ཆུང་སྐྲན་ཡོད་སྐྱ་རྦབ་བ་དང༌། །དམུ་རྫིང་ཚད་འཁྲུ་གཞང་འབྲུམ་མམ། །ཕོ་བའི་དྲོད་ཆུང་འོར་ནད་ཅན། །མི་བཏུང་བ་རང་དཀའ་ཉུང་ཟད་བཏུང༌། །
སྟོན་ཀ་སོ་ག་མ་གཏོགས་པར། །ནད་མེད་མིས་ཀྱང་ཅུང་ཟད་བཏུ་ང༌། །ཟན་ཟོས་བར་མཐའ་ཐོག་མར་ནི། །ཆུ་འཐུངས་རན་དང་སྦོམ་སྐེམས་འགྱུར། །ཆུ་བསིལ་ཆང་ནད་བརྒྱལ་བ་དང༌། །སྐྱུགས་དང་ངལ་དང་མགོ་འཁོར་དང༌། །སྐོམ་དང་ལུས་ཚ་མཁྲིས་པ་དང༌། །ཁྲག་རྒྱས་དུག་ནཾ་སེལ་བྱེད་ཡིན། །ཆུ་ཚན་དྲོད་སྐྱེད་ཟས་འཇུ་ཞིང༌། །མགུལ་བདེ་ལུས་ཡང་གཅིན་ནད་སེལ། །སྐྱིགས་བུ་ལྟོ་སྦོས་རླུང་བད་ཀན། །རིམས་སར་འཕྲལ་དུ་ཟློག་བྱེད་ཅིང༌། །ལུད་པ་ཆམ་སར་དབུགས་མི་བདེ། །རྩིབ་ལོགས་ཟུག་ལ་བསྔགས་པ་ཡིན། །ཆུ་ནི་བསྐོལ་བགྲང་བདག །བད་ཀན་མི་སྐྱེད་ལུས་ཡང་ཞིང༌། །མཁྲིས་པ་ཅན་ལའང་ཕན་པ་ཡིན། །དེ་ནི་ཞག་ལོན་ཉེས་གསུམ་སྐྱེད། །རྒྱ་སྟར་ཆུ་ནི་སྣུམ་པ་དང༌། །རོ་མངར་རོ་ཙ་བསིལ་ཞིང་ཡང༌། །སྐོམ་དང་མཁྲིས་པ་རླུང་ནད་སེལ། །དྲོད་སྐྱེད་ལྒང་པའི་ནད་སྦྱོང་བྱེད། །དབྱར་གྱི་ཆར་ཆུ་ཆུ་བོའི་ཆུ། །མཆོག་ཏུ་བཟང་དང་ངན་པར་བཤད། །ཆུའི་སྡེ་ཚན་ནོ།། །།འོ་མ་ཕལ་ཆེར་རོ་ཞུ་མངར། །སྣུམ་ཞིང་མདངས་སྐྱེད་ལུས་ཟུངས་འཕེལ། །རླུང་དང་མཁྲིས་སེལ་རོ་ཙ་བྱེད། །བད་ཀན་སྐྱེད་ལྕི་བསིལ་བ་ཡིན། །བ་ཡི་འོ་མ་འཚོ་བྱེད་ཅིང༌། །བཅུད་ཀྱིས་ལེན་ཡིན་གློ་རྡོལ་དང༌། །གློ་གཅོང་ལ་ཕན་ཡིད་གཞུངས་བྱེད། །སྟོབས་སྐྱེད་ནུ་ཞོ་སྐྱེད་དང་འཁྲུ། །ངལ་དང་མགོ་འཁོར་མྱོས་དཔལ་ཉམས། །ལུད་པ་དབུགས་མི་བདེ་བཀྲེས་སྐོམ། །རིམས་རྙིང་གཅིན་ནི་སྲིབ་དང༌། །ཁྲག་དང་མཁྲིས་བ་སེལ་བ་ཡིན། །མ་ཧེའི་འོམ་འཇུ་དྲགས་དང༌། །གཉིད་མེད་ལ་ཕན་རབ་ལྕི་བསིལ། །ར་ནི་ཆུ་ཉུང་འཐུང་ཟས་རྒོད། །ཁ་ཞིང་ཚ་བ་ཟ་བས་ཡང༌། །སྐེམས་དང་རིམས་དང་དབུགས་མི་བདེ། །ཁྲག་དང་མཁྲིས་པ་ཚད་ནད་སེལ། །རྔ་མོའི་འོ་མ་ཅུང་རྩུབ་དྲོ། །ལན་ཚྭ་བྲོ་ཞིང་དྲོད་ཆེ་ཡང༌། །རླུང་དང་བད་ཀན་ལྟོ་སྤོས་སྲིན། །འོར་ནད་དམུ་རྫིང་གཞང་ནད་སེལ། །བུད་མེད་ནུ་ཞོ་རླུང་མཁྲིས་ཁྲག །སྣད་པའི་མིག་ནད་སེལ་བྱེད་དེ། །ཚིམ་བྱེད་མིག་དང་སྣར་བླུགས་ཕན། །ལུག་གི་འོ་མ་སྙིང་གནོད་ཚ། །རླུང་འཇོམས་སྐྱིགས་བུ་དབུགས་མི་བདེ། །མཁྲིས་
པ་བད་ཀན་སྐྱེས་པ་ཡིན། །བན་གླང་མོ་ཡིས་རབ་བརྟན་བྱེད། །རྨིག་པ་གཅིག་པའི་འོ་མ་ཚ། །ཡན་ལག་རླུང་གསལ་སྐྱུར་བཅས་ཤིང༌། །ལན་ཚྭ་བོ་ཞིང་རྨོངས་པར་བྱེད། །འོ་རློན་བད་ཀན་སྐྱེད་ཅིང་ལྕི། །རིགས་པར་བསྐོལ་བས་དེ་ལས་གཞན། །ཤིན་ཏུ་བསྐོལ་ན་འཇུ་དཀའ་ལྕི། །བཞོས་མ་ཐོག་དྲོ་བདུད་རྩིར་མཚུངས། །ཞོ་ནི་རོ་དང་ཞུ་རྗེས་སྐྱུར། །རྟུག་སྐམ་ལྕི་ལ་རླུང་ནད་སེལ། །ཚིལ་དང་ཁུ་ཆུ་སྟོབས་བད་ཀན། །ཁྲག་མཁྲིས་དྲོད་སྐྱེད་འོར་ནད་སྐྱེད། །ཡི་ག་འབྱེ་ཞིང་ཁ་ཟས་ལེན། །གྲང་བའི་རིམས་དང་མི་སྙོམས་རིམས། །ཆམ་པ་གཅིན་འགགས་གྱུར་པ་དང༌། །འཁྲུ་བའི་ནད་ལ་རྩུབ་མོ་ཕན། །ཞོ་དྲོན་དཔྱིད་དང་སོག་དང༌། །སྟོན་དུས་མཚན་མོ་བཏུང་མི་བྱ། །དེ་ནི་མུངྒའི་སྲན་ཚོད་དང༌། །སྦྲང་རྩི་མར་དང་ཤ་ཁར། །སྐྱུ་རུ་ར་ནི་མེད་མི་བཏུང༌། །རྟག་ཏུ་མ་ཡིན་མ་ལངས་མིན། །གཞན་དུ་མེ་དཔལ་རིམས་ཁྲག་དང༌། །མཛེ་དང་སྐྱ་རྦབ་མགོ་འཁོར་སྐྱེད། །དར་སར་ཡང་ལ་བསྐ་ཞིང་སྐྱུར། །དྲོད་སྐྱེད་བང་ཀན་རླུང་དག་སེལ། །སྐྲན་ནད་དམུ་རྫིང་གཞང་འབྲུམ་དང༌། །ཕོ་ནད་ཆུ་སྲི་ཡི་ག་འཆུས། །མཆེར་པ་སྐྲན་དང་མར་མ་ཞུ། །སྦྱར་དུག་སྐྱ་རྦབ་ནད། །རྣམས་སེལ། །དེ་འདྲ་ཞོག་ཆུ་འཁྲུ་ཡང༌། །རྩ་སྦུབས་སྦྱོང་ལ་རྟུག་སྐམ་སེལ། །འཕྲལ་གྱི་མར་སར་རོ་ཅི་ཞིང༌། །བསིལ་ཞིང་མདོག་སྟོབས་དྲོད་སྐྱེད་བྱེད། །འཁྲུ་གཅོད་རླུང་མཁྲིས་ཁྲག་གཞང་འབྲུམ། །གློ་གཅོད་ཁ་ཡོན་ལུང་པ་སེལ། །ཞུན་མར་བློ་རྣོ་དྲན་གསལ་ཞིང༌། །ཡིད་གཞུང་ས་དྲོད་སྐྱེད་སྟོབས་ཚེ་འཕེལ། །མིག་དང་བྱིས་རྒན་བུ་འདོད་དང༌། །མདངས་བཟང་རབ་གཞོན་སྐད་སྙན་ཕན། །གློ་རྡོལ་སྐེམ་དང་གཅོད་དང་འབྲས། །མཚོན་སྨད་མེས་ཚིག་རྨ་ལའང་བསྔགས། །རླུང་དང་མཁྲིས་པ་དུག་དང་སྨྱོ། །ལུས་སྐེམས་མདངས་ཉམས་རིམས་ནད་སེལ། །སྣུམ་གྱི་ནང་ན་སྣུམ་མཆོག་སྟེ། །བསིལ་ཞིང་ན་ཚོད་འཇོག་པའི་མཆོག །ཞུན་མར་སྟོབས་ནི་སྟོང་དང་ལྡན། །སྦྱོར་བས་ལས་ནི་སྟོང་བྱེད་འགྱུར། །མར་རྙིང་སྨྱོ་དང་བརྗེད་བྱེད་བརྒྱལ། །གླད་ནད་རྣ་མིག་མངལ་ནད་དང༌། །རྨ་རྣམས་སྦྱང་ཞིང་འཚོ་བྱེད་པས། །
ནད་ལས་རྒྱལ་བྱེད་དམ་པ་ཡིན། །ཕྲུམ་སར་སྦྲི་དང་རྒྱ་ཕྲུམ་དང༌། །ཆུར་བ་ལ་སོགས་སྟོབས་སྐྱེད་ཅིང༌། །ཁུ་བ་གཉིད་དང་བད་ཀན་འཕེལ། །རྟུག་སྐམ་བྱེད་ལྕི་ཉེས་བ་དང༌། །བ་མར་འོ་མ་མཆོག་ཡིན་ཏེ། །ལུག་ལས་བྱུང་བ་སྨད་པ་ཡིན། །འོ་མའི་སྡེ་ཚན་ནོ།། །།བུ་རམ་ཤིང་ཁུ་འཁྲུ་ལྕི་སྣུམ། །ཤ་སྐྱེ་རོ་ཙ་བད་གཅིན་འཕེལ། །བསིལ་ཞིང་ཁྲག་མཁྲིས་སེལ་བ་དང༌། །རོ་དང་ཞུ་རྗེས་མངར་བ་ཡིན། །དེ་ཚེ་ལན་ཚྭ་བྲོ་ཞིང་སོས། །བཅས་ན་ཁར་དག་དང་འདྲ། །རྩབ་རྩེ་མོ་དབུས་ཟོས་སྩོགས། །བཙིར་དང་དྲི་མས་སྦགས་པ་དང༌། །དུས་ནི་ཅུང་ཟད་ལོན་པ་ལས། །འཁྲུལ་འཁོར་ཅན་ནི་རྣམ་འགྱུར་ཏེ། །ཚ་ཞིང་ལྕི་ལ་མ་ཁྲིགས་པར་འགྱུར། །དེ་ལ་ཁར་དཀར་པོའི་ཤིང༌། །བསིལ་དང་མངར་བས་མཆོག་ཡིན་ལ། །དེ་ཡི་འོག་མ་སྦུབས་ཅན་ཡིན། །ཚིགས་བརྒྱ་པ་དང་ཀནྟ་ར། །བལ་ཡུལ་སྐྱེས་སྩོགས་དེ་ལས་རིམ། །ཅུང་ཟད་ཚ་བྲོ་བསྐ་བ་དང༌། །དྲོད་བཅས་ཅུང་ཟད་ཚ་བ་སྐྱེད། །དབུ་བ་ཅན་ལྕི་བད་ཀན་སྐྱེད། །སོགས་བྱེད་གཅིན་ནི་སྦྱོང་བྱེད་ཡིན། །དཀར་པོར་ད་ཀན་ཆེར་མི་སྐྱེང༌། །བཤད་དང་གཅི་བ་བདེ་བར་འབྱིན། །དམར་ནག་ཕལ་ཆེར་སྲིན་བུ་ཁྲག །རྐང་ཚིལ་ཤ་དང་བད་ཀན་སྐྱེད། །རྙིང་པ་ཡིད་འོང་ཕན་པ་ཡིན། །སར་པ་དྲོད་འབྲི་བད་ཀན་སྐྱེད། །ཧྭགས་དང་ཁཎྚ་ཀར་དཀར། །རིམ་གྱིས་ཡོན་ཏན་ཆེ་བ་སྟེ། །རོ་ཙ་གློ་གཅོད་གློ་རྡོལ་དང༌། །ཁྲག་དང་མཁྲིས་པ་རླུང་སེལ་ཡིན། །ཡ་བ་ཁ་ར་ཚ་ཞིང་མངར། །བསྐ་སྟེ་ཡོན་ཏན་དེ་དང་འདྲ། །ཁ་ར་ཀར་ཀུན་ཚ་དང་སྐོམ། །སྐྱུག་བྲོ་བརྒྱལ་དང་ཁྲག་མཁྲིས་སེལ། །བུ་རམ་ཤིང་གདུས་ཁང་དང༌། །དབུ་བ་ཅན་མཆོག་ཐ་མ་ཡིན། །སྦྲང་རྩི་མིག་ཕན་གཅོད་སྐོམ་དང༌། །བད་ཀན་སྐྱིགས་བུ་ཁྲག་མཁྲིས་འཇོམས། །ཚིལ་ཆེན་མཛེ་ནད་གཅིན་ནད་སྐྱུག །ལུད་པ་དབུགས་མི་བདེ་ཚད་སེལ། །རྨ་སྦྱོང་རྨ་འཚོ་ཆག་གྲུགས་སྦྱོར། །རླུང་ནི་སྐྱེད་པར་བྱེད་པ་ཡིན། །རྩུབ་ཅིང་བསྐ་ལ་མངར་བ་སྟེ། །སྦྲང་རྩིའི་ཁཎྜ་དེ་དང་འདྲའོ། །ཚ་ཞིང་ཚས་གདུངས་ཚ་བར་ལྡན། །ཚབ་དེས་ནི་གསོད་པར་འགྱུར། །སྐྱུག་སྨན་སྨན་མར་མས་གཏོང་ལ། །སྦྲང་རྩི་
དྲོ་བའམ་བཀག་པ་མེད། །བུ་རམ་ཤིང་གི་སྡེ་ཚན་ནོ།། །།འབྲུ་མར་རང་གནས་ལྟ་བུ་ཡིན། །དེ་ལ་ཏིལ་མར་ཏིལ་དང་མཚུངས། །གཙོ་བོ་རྣོ་ཞིང་ཁྱབ་པ་ཡིན། །པགས་པའི་ཉེས་སེལ་མིག་ལ་གནོད། །ཚ་ཞིང་རྣོལ་བད་ཀན་སེལ། །སྐེམ་པོ་དག་ནི་ཤ་སྐྱེད་ཅིང༌། །སྦོམ་པོའི་ཤ་འབྲི་མཁྲེགས་པར་འོང༌། །རྟུག་སྐམ་སྲིན་བུ་འཇོམས་པ་དང༌། །སྦྱར་བས་ནད་རྣམས་ཐམས་ཅད་སེལ། །ཨེརྞྜ་མར་ཚ་ཞིང་ཁ། །ཞུ་རྗེས་མངར་ལྕི་འཁྲུ་བ་ཡིན། །རླིག་རླུགས་སྐྲང་རླུང་བད་ཀན་དང༌། །ལྟོ་ནད་ལྡང་དུབ་རིམས་ནས་སེལ། །འོར་ནད་རྐེད་པ་གསང་བའི་ནད། །ལྟོ་བ་རོ་རྒྱབ་ནད་ལ་ཕན། །ཨེ་རཎྜ་ནི་དམར་པོའི་མར། །རྣོ་ཚ་དྲིང་རབ་འབྱིལ་འདྲེད། །ཡུངས་མར་ཚར་དྲོ་རྣོ་བ་དང༌། །བད་ཀན་རླུང་སེལ་ཀུ་བ་འབྲི། །ཡང་ཞིང་ཁྲག་མཁྲིས་སྐྱེད་བྱེད་ལ། །ཤ་བཀྲ་མཛེ་འབྲུམ་རྨིན་བུ་སེལ། །བ་རུ་རའི་མར་མངར་བསིལ་ལྕི། །སྐྲན་སྐྱེ་རླུང་དང་མཁྲིས་པ་སེལ། །ནིམ་དམར་རབ་ཏུ་ཚ་མིན་ཁ། །ལྟོ་སྲིན་མཁྲིས་པ་བག་ཀན་སེལ། །ཟར་མ་ལེ་བརྒན་རྩི་ཡི་མྲ། །དྲོ་ཞིང་པགས་ནད་བད་མཁྲིས་སྐྱེད། །ཞག་དང་རྐང་ནི་རླུང་འཇོམས་ཤིང༌། །སྟོབས་དང་ཁུ་ཆུ་བདག་ཀན་སྐྱེད། །ཤ་ནི་རང་དངོས་རྗེས་མཐུན་ལ། །ཚིལ་ཡང་དེ་དང་འདྲར་ཤེས་བྱ། །ཏིལ་མར་ལ་སྩོགས་པའི་སྡེ་ཚན་ནོ།། །།ཆང་ནི་དྲོད་འབར་ཡི་ག་འབྱེད། །རྣོ་ཞིང་དྲོད་སྐྱེད་ཁོར་བརྟ་དགའ། །མངར་བཅས་ཁ་ཞིང་ཚབ་དང༌། །ཞུ་རྗེས་སྐྱུར་ཞིང་ཅུང་ཟད་འཁྲུ། །བསྐ་བཅས་གདངས་སྙན་ནད་མེད་དང༌། །སྤོབས་བསྐྱེད་མདོག་འགྱུར་ཁོང་ཡངས་ཤིང༌། །གཉིད་མེད་པ་དང་གཉིད་ཆེ་ལ། །ཕན་ཞིང་ཁྲག་དང་མཁྲིས་པ་སྐྱེད། །རིགས་འཐུངས་སྐེམ་དང་སྦོམ་ཕན་ཞིང༌། །རྩུབ་རྣོ་ལས་སྒོ་ཁྱབ་ཅིང་སྦྱོང༌། །རླུང་དང་བད་ཀན་སེལ་བ་ཡིན། །གཞན་དུ་བསྟེན་ན་དུག་དང་མཚུངས། །ཆང་སར་ལྕི་ཞིང་ཉེས་སྐྱེད་ཡིན། །ཆང་རྙིང་དེ་ལས་གཞན་དུ་བྱེད། །ཚ་བའི་སྤྱོད་པར་ལྡན་མི་ཏུང༌། །སུན་ཅིང་བཀྲེས་ཉེན་ནད་བས་མིན། །ཤིན་ཏུ་རྣོ་མིན་སར་པ་དང༌། །ལེགས་པར་མ་བསླངས་རྙོགས་ཅན་ཡིན། །འབྲུ་ཆང་སྐྲན་དང་དམུ་
རྫིང་དང༌། །རྟུག་སྐེམ་གློ་གཅོང་སེལ་བ་དང༌། །རླུང་འཇོམས་ཚིལ་དང་ཁྲག་སྐྱེད་ཅིང༌། །གཅིན་བདེར་འབྱིན་ཞིང་བད་ཀན་སྐྱེད། །ཆང་དངས་ཡོན་ཏན་དེ་འདྲ་ལས། །ཡིད་འོང་ཡང་ཞིང་རྣོ་བ་དང༌། །གཟེར་དང་ལུད་པ་དབུགས་མི་བདེ། །སྐྱུག་བྲོ་བཤང་འགགས་སྦོས་ཆམ་འཇོམས། །བ་རུར་ཆང་ཡང་ཞིང་ཕན། །ཤིན་ཏུ་ར་རོར་མི་འགྱུར་ཞིང༌། །རྨ་དང་སྐྱ་རྦབ་མཛེ་ནད་ལ། །ཧ་ཅང་གནོད་པར་མི་འགྱུར་ཞིང༌། །རྫས་བཞིན་ཡོན་ཏན་རྗེས་མཐུན་ཆང༌། །ཆང་གི་ཡོན་ཏན་ཀུན་ལས་ལྷག །ཕོ་ནད་སྐྱ་རྔབ་མཛེ་གཞང་འབྲུམ། །ལུས་སྐེམ་སྐྲང་འོར་དམུ་རྫིང་རིམས། །སྐྲན་དང་སྲིན་བུ་མཆེར་ནད་སེལ། །རོ་ནི་བསྐ་ཞིང་ཚ་རླུང་སྐྱེད། །རྒུན་ཆང་ནད་སྦྱོང་སྙིང་ལ་ཕན། །ཤིན་ཏུ་དྲོ་མིན་མངར་ཞིང་འཁྲུ། །མཁྲིས་རླུང་ཅུང་ཟད་སྐྱེད་སྐྱ་རྦབ། །གཅིན་ནད་གཞང་འབྲུམ་སྲིན་ནད་སེལ། །བུ་རམ་ཆད་ནི་གཅིན་རྟུག་འགགས། །འབྱིན་ཞིང་ངོམས་ལ་དྲོད་སྐྱེད་ཡིན། །བུ་རམ་ཤིང་ཆང་རླུང་མཁྲིས་སྐྱེད། །སྣུམ་དང་བད་ཀན་ལས་བྱུང་འཇོམས། །ཚིལ་འོར་དུམ་རྫིང་གཞང་འབྲུམ་སེལ། །དེ་བས་ཁུ་བ་བསྐོལ་མཆོག་ཡིན། །སྦྲང་ཆང་འགྲིབ་བྱེད་རྣོ་བ་སྟེ། །གཅིན་ནད་ཆམ་པ་ལུད་པ་སེལ། །ཚ་ནི་ཁྲག་མཁྲིས་བད་ཀན་དག །འཇུ་ཞིང་རླུང་ནི་སྙོམས་བྱེད་ལ། །རབ་ཏུ་ཚ་ཞིང་རྣོ་རྩུབ་སྐྱུར། །ཡིད་འོང་ཡིག་འབྱེད་ཞིང་འཁྲུ། །དྲོད་སྐྱེད་རེག་ན་བསིལ་བ་དང༌། །སྐྱ་རྦབ་སྲིན་སེལ་མིག་ལ་གནོད། །བུར་མ་བུར་ཤིང་རྒུན་ཆང་དང༌། །ཚ་ནི་ཕྱི་མ་ཕྱི་མ་ཡང༌། །སྔོན་བུ་རྩ་བ་འབྲས་སྩོགས་ལས། །མནན་བྱས་དེ་དང་འདྲར་ཤེས་བྱ། །རྡ་གུ་ལ་སོགས་བཞུར་བ་གཞན། །དུས་ཀྱི་སྐྱུར་པོ་ཡང་ཟས་ལེན། །འབྲས་ཁུའི་རང་སྐྱུར་འཁྲུ་རྣོ་ཚ། །མཁྲིས་པ་སྐྱེད་བྱེད་བསྐུས་ན་བསིལ། །ངལ་དང་རྨྱ་སེལ་ཡིག་འབྱེད། །དྲོད་སྐྱེད་ཆུ་སེའི་ནད་སེལ་ཡིན། །མས་གཏོང་ལ་ཕན་ཡིད་དུ་འོང༌། །ཡང་ཞིང་རླུང་དང་བད་ཀན་འཇོམས། །བ་གཅིན་ར་ལུག་མ་ཧེ་དང༌། །གླང་པོ་རྟ་བོང་རྔ་མོའི་གཅིན། །མཁྲིས་སྐྱེད་རྩུབ་ཅིང་རྣོ་ལ་ཚ། །འཐུངས་རྗེས་ཚ་བྲོ་རོ་ཚ་སྟེ། །སྲིན་ནད་འོར་ནད་དམུ་རྫིང་སྦོས། །གཟེར་དང་སྐྱ་རྦབ་བད་ཀན་རླུང༌། །དུག་སྐྲན་ཤ་བཀྲ་
ཡི་ག་འཆུས། །མཛེ་དང་གཞང་འབྲུམ་མྱུར་དུ་འཇོམས། །དེ་ལྟར་ཆུ་བོ་བུར་རམ་ཤིང༌། །ཏིལ་མར་ཆང་གི་སྡེ་ཚོགས་རིམ། །གཤེར་བའི་རྫས་ཕྱོགས་གཅིག་པ་འདི། །རགས་རིམ་ཇི་བཞིན་བསྟན་པ་ཡིན། །ཡན་ལག་བརྒྱད་པའི་སྙིང་པོ་བསྡུས་པ་ལས། །མདོའི་གནས་ཀྱི་ལེའུ་ལྔ་པའོ།། །།དེ་ནས་ཁ་ཟས་ཀྱི་ཚུལ་བརྟག་ཅིང་ཤེས་པར་བྱ་བའི་ལེའུ་བཤད་པར་བྱའོ། །རྩ་སྣར་འབྲས་ཆན་ཀ་མ་ལ། །དྲུག་ཅུ་པ་དང་བྱ་ཡིས་བླངས། །སྒྲོན་བུའི་མཆུ་དང་རྩེ་རྣོན་དང༌། །རོ་འདྲའི་འབྲས་འདྲ་དྲི་བཟང་དང༌། །པ་ཏང་ཀ་དང་གསེར་མདོག་ཅན། །གང་གཞན་འབྲས་ནི་བཟང་པོ་རྣམས། །རོ་མངར་ཞུ་རྗེས་མངར་ཞིང་སྣུམ། །རོ་ཙ་བ་ཤང་གཅི་སྐ་ཞིང་ཆུང༌། །རོ་རྗེས་བསྐ་ཞིང་ཕན་པ་དང༌། །ཡང་ཞིང་གཅིན་མང་བསིལ་བ་ཡིན། །དེ་ལ་རྩེ་རྣོ་ནང་རྩ་སྣར། །མཆོག་ཡིན་སྐོམ་དང་ཉེས་གསུམ་སེལ། །དེ་ཡི་འོག་ཏུ་འབྲས་ཆན་སྨད། །དེའི་འགོ་ཀ་མ་ལ་དེའི་འོག །ནས་འདྲ་ཧ་ཡན་ཆར་མ། །ནེ་ཤ་ད་ཀ་ལ་སོགས་ནི། །རོ་མངར་དྲི་ཞིམ་ལྕི་ལ་སྣུམ། །ཞུ་བའི་རྗེས་སྒྱུར་བད་མཁྲིས་སྐྱེད། །བཤད་དང་གཅི་བ་ཐུར་དུ་འབྱིན། །སྔ་མ་སྔ་མ་སྨད་པ་ཡིན། །འབྲས་ནང་དྲུག་ཅུ་བ་མཆོག་སྟེ། །རྩ་སེར་ཤུན་པ་ནག་པ་དག །སྣུམ་ཞིང་འཇུ་སལ་བརྟེན་ཞིང་མངར། །ཉེས་པ་གསུམ་སེལ་བསིལ་རྟུག་འདྲིལ། །དེ་ལས་རིམ་བཞིན་ཐུག་ཆེན་དང༌། །ཤུན་ནག་རྒྱ་སྐྱེགས་ཚིགས་མ་འདྲ། །ཁྱིམ་བྱའི་སྒང་འདྲ་འུར་བའི་མིག །ཕུག་རོན་འབྲས་དང་སུ་ཁར། །འབའ་ར་ཁ་དང་ཨུཏྤལ་དམར། །ཙི་ཏ་སྟོན་སྐྱེས་ད་དུར། །གན་དྷན་དང་ཀུ་རུ་བིན། །ཡོན་ཏན་རིམ་བཞིན་ཆུང་ཤེས་བྱ། །འབྲས་གཞན་མངར་ཞིང་ཞུ་རྗེས་སྐྱུར། །མཁྲིས་པ་སྐྱེད་ཅིང་ལྕི་བ་དང༌། གཅིན་རྟུག་མང་ཞིང་ཚབ་ཡིན། །པ་ཏ་ལ་ཉིད་ཉེས་གསུམ་སྐྱེད། །ཅི་ཚེ་ཁྲེ་དང་ནི་བ་ར། །ཁྲེ་རྒོད་སྣེ་འབྲས་སྩོགས་བསིལ་ཡང༌། །རྩའི་འབྲུ་དེ་དག་རླུང་སྐྱེད་ཅིང༌། །ཁོང་རྩུབ་བད་ཀན་མཁྲིས་པ་སེལ། །དེ་ལ་ཁྲེ་ནི་རྟས་བྱེད་ལྕི། །ལུས་ཀྱི་ཆག་གྲུགས་འབྱོར་བར་བྱེད། །ཁྲེ་རྒོད་མཆོག་ཏུ་འཁྲུ་གཅོད་ཅིང༌། །རེག་ན་བསིལ་ལ་དུག་སེལ་ཡིན། །ནས་
ནི་རྩུབ་བསིལ་ལྕི་ལ་མངར། །ཅུང་ཟད་ཁོང་འཁྲུ་བཤང་རླུང་འཕེལ། །རོ་ཙ་བརྟན་བྱེད་གཅིན་དང་ནི། །ཚིལ་དང་མཁྲིས་པ་བད་ཀན་སེལ། །ཆམ་པ་ལུད་པ་དབུགས་མི་བདེ། །ད་རྒན་ལྐོག་ནད་པགས་ནད་སེལ། །ནས་རྒོད་ཅུང་ཟད་དམན་པ་ཡིན། །སྨྱིག་སྐྱེས་འབྲས་ནས་རྩུབ་ཅིང་ཚ། །གྲོ་ནི་རོ་ཙ་སྣུམ་བསིལ་ལྕི། །འཚོ་བྱེད་རླུང་དང་མཁྲིས་པ་སེལ། །ཆག་གྲུགས་འབྱོར་བྱེད་མངར་བ་དང༌། །ཤ་མཁྲེགས་བྱེད་ཅིང་ཅུང་ཟད་འཁྲུ། །ནནྟི་མུ་ཀ་རོ་བསྐ་ཞིང༌། །བསིལ་ཞིང་མངར་ཡང་ཕན་པ་ཡིན། །གྲ་མ་ཅན་གྱི་འབྲུ་སྣ་ཚོགས་ཀྱི་སྡེ་ཚན་ནོ།། །།མོན་སྲན་སྡེའུ་དཀར་སྲན་ཆུང་སྩོགས། །གང་བུ་ཅན་འབྲུ་རྩ་སྒོ་བཀག །རོ་བསྐ་མངར་ཞིང་འཁྲུ་བ་གཅོད། །ཞུ་རྗེས་ཚ་ལ་བསིལ་ཞིང་ཡང༌། །ཚིལ་དང་ཁྲག་དང་མཁྲིས་པ་ལ། །བསྐུས་ཤིང་བླུགས་ན་ཕན་པ་ཡིན། །འདི་ལས་མུངྒ་མཆོག་རླུང་ཆུང༌། །སྲན་མ་ཤིན་ཏུ་རླུང་སྐྱེད་ཡིན། །མོན་སྲན་དཀར་པོ་རླུང་སྐྱེད་ཅིང༌། །རྩུབ་ཅིང་ལྕི་ལ་བཤད་པ་འཕེལ། །རྒྱ་སྲན་ནག་ཚ་ཞུ་རྗེས་སྐྱུར། །ཁུ་ཆུའི་རྡེའུ་ཆམ་ལུད་པ། །དབུགས་མི་བདེ་རླུང་བད་གཞང་འབྲུམ། །འཇོམས་ཤིང་ཁྲག་མཁྲིས་མཆོག་ཏུ་སྐྱེད། །ནིས་པ་བ་ནི་རླུང་ཁྲག་མཁྲིས། །ནུ་ཞོ་གཅིན་འཕེལ་ལྕི་ཞིང་འཁྲུ། །ཚ་བྱེད་མིག་གནོད་ཁུ་བ་འབྲི། །བད་ཀན་འོར་ནང་དུག་རྣམས་སེལ། །མ་ཤ་སྣུམ་སྟོབས་བད་ཀན་སྐྱེད། །བཤད་གཅི་མཁྲིས་པ་འཕེལ་བྱེད་འཁྲུ། །ལྕི་ཞིང་ཚ་ལ་རླུང་འཇོམས་དང༌། །ཁུ་བ་འཕེལ་ཞིང་འབྱིན་པར་བྱེད། །ཀ་ཀན་དུ་ལ་ཁ་སྲལ་ཕྲེའུ། །ཡོན་ཏན་མོན་སྲན་གྲེའུ་དང་འདྲ། །ཏིལ་འབྲུ་དྲོ་ཞིང་པགས་པ་འཇམ། །བསིལ་ཞིང་སྐྲ་དང་སྟོབས་སྐྱེད་པ། །ལྕི་ཞིང་གཅིན་ཉུང་ཞུ་རྗེས་ཚ། །ཡིད་གཞུངས་དྲོད་སྐྱེད་པད་མཁྲིས་སྐྱེད། །ཟར་མ་སྣུན་མངར་ཁ་ཞིང་དྲོ། །ལྕི་ཞིང་བད་ཀན་མཁྲིས་པ་སྐྱེད། །མིག་གནོད་ཁུ་སྐེམས་ཞུ་རྗེས་ཚ། །ལེ་བརྒན་རྩི་འབྲས་དེ་དང་འདྲ། །གྲ་མ་ཅན་ལས་ནས་རྒོད་དང༌། །མ་ཤ་གང་བུ་ཅན་ཐ་ཆད། །འབྲུ་ཡི་གསར་ཐོག་བད་ཀན་སྐྱེད། །ལོར་ལོན་འབྲུ་ནི་ཡང་བ་ཡིན། །མྱུར་སྐྱེ་དེ་བཞིན་སྲན་མ་ནི། །
སྤུན་མེད་ལེགས་བརྔོས་ཚོད་མ་ཡང༌། །གང་བུ་ཆགས་པའི་འབྲུ་སྣ་ཚོགས་ཀྱི་སྡེ་ཚན་ནོ།། །།འབྲས་ཐུག་སླ་སྐ་གར་བ་དང༌། །འབྲས་ཆན་རྣམས་ནི་སྔ་མ་བཞིན། །ཡང་ངོ་དེ་ལས་སླ་བ་ནི། །དགེ་འོ་རླུང་ནི་ལུགས་མཐུན་བྱེད། །སྐོམ་རྨྱ་ཉེས་པ་ལྷག་མ་འཇོམས། །འཇུག་ཞིང་ལུས་ཟུངས་མཉམ་པར་བྱེད། །རྩ་སྦུབས་མཉེན་བྱེད་རྡུལ་བ་དང༌། །མེ་ཡི་དྲོད་ནི་སྐྱེད་པར་བྱེད། །ཐུག་སྐ་བཀྲེས་སྐོམ་ཉམ་ཆུང་རྨྱ། །ལྟོ་ནད་རིམས་ནད་སེལ་བ་ཡིན། །དྲི་མ་འགགས་ལ་ཕན་པ་དང༌། །དྲོད་སྐྱེད་ནད་ནི་འཇུ་བར་བྱེད། །ཐུག་གར་འཁྲུ་གཅོད་ཡི་གར་འོང༌། །སྐོམ་སེལ་དྲོད་སྐྱེད་རྨ་དང་མིག །བཀྲུ་སྨན་རྗེས་དང་ཉམ་ཆུང་དང༌། །སྣུམ་འཐུངས་རྗེས་ལ་ཕན་པ་ཡིན། །འབྲས་ཆན་ལེགས་བཀྲུས་ཁུ་བཙགས་ཚོས། །རླངས་པ་དང་ནི་བྲལ་བ་དང༌། །གང་ཡང་ཚ་བའི་སྨན་རྣམས་ཀྱིས། །བསྐོལ་བའི་འབྲས་ཚོས་ཡང་བ་ཡིན། །དེ་ལས་བཟློག་པ་གང་ཞིག་ནི། །ཤ་ཁུ་འོ་མ་བསྐོལ་སྩོགས་ལྕི། །དེ་ལྟར་རྫས་དང་བྱ་སྦྱོར་དང༌། །ཚད་ལ་སོགས་པས་ཀུན་ཤེས་བྱ། །ཁུ་བ་ཉམས་རྟས་ཚིམ་བྱེད་ཅིང༌། །རོ་ཙ་མིག་ཕན་རྨ་ལ་གནོད། །མོན་སན་སྡེའུ་སྦྱོང་དང་རྨ། །ལྐོག་མ་མིག་ནད་དག་ལ་ཕན། །ཀུ་ལང་ཐ་ཁུ་རླུང་དང་སྐྲན། །རོ་སྨད་སླར་གཟེར་གནོད་པ་སེལ། །ཏིལ་ཚིགས་གཡོས་སུ་སྦྱར་བྱས་ནས། །ཚོད་མ་སྐམ་དང་མྱུ་གུ་དང༌། །སྐྱུར་པོར་ཆང་བུ་བཅུག་པ་ནི། །མིག་གནོད་ཉེས་སྐྱེད་རྨྱ་བྱེད་ལྕི། །དྲི་འཛིན་ལུས་བརྟ་རོ་ཙ་ཞིང༌། །སྣུམ་ཞིང་སྟོབས་སྐྱེད་ཡི་ག་འབྱེ། །རྒུན་ཆུའི་བཏུང་བ་ངལ་དུབ་དང༌། །བཀྲེས་སེལ་ཚིམ་པར་བྱེད་ཅིང་ལྕི། །རྟུག་སྐམ་གཅིན་མང་ཡི་གར་འོང༌། །དེ་ཡི་ཡོན་ཏན་སྨན་བཞིན་བལྟ། །འབྲས་ཡོས་སྐོམ་དང་སྐྱུག་ཚད་འཁྲུ། །གཅིན་མང་ཚིལ་དང་བད་ཀན་སེལ། །ལུད་པ་མཁྲིས་པ་ཉེར་ཞི་བྱེད། །དྲོད་སྐྱེད་ཡང་ཞིང་བསིལ་བ་ཡིན། །སྲུས་ལེབ་ལྕི་ཞིང་སྟོབས་སྐྱེད་ལ། །བད་ཀན་བཤང་བ་སྲ་བྱེད་ཅིང༌། །ནས་ཡོས་རྟུག་མཁྲེགས་རྩུབ་པ་དང༌། །སྐོམ་ཞིང་ཁོང་འཁྲུགས་ལྕི་བ་ཡིན། །ནས་ཕྱེ་ཁོང་ཡང་བཀྲེས་སྐོམ་དང༌། །ངལ་དུ་བ་མིག་
ནད་རྨ་ལ་ཕན། །སྐྱོ་མར་བྱས་པ་འཐུངས་པ་ཡིས། །འཕྲལ་དུ་སྟོབས་ནི་སྐྱེད་བྱེད་ཡིན། །ཆུ་དང་ཕྱེ་སྤེལ་མི་བཟའ་ཞིང༌། །དུས་གཉིས་མཚན་མོ་འཕྲད་མེད་མིན། །འགྲངས་རྗེས་མི་བཟའ་སོས་བཅད་མིན། །ཧ་ཅང་འགྲངས་ཆེས་བཟའ་མི་བྱ། །འབའ་ཆ་ཉམ་འབྲི་རྩུབ་པ་དང༌། །བཤང་མཁྲེགས་མིག་ལ་གནོད་པ་ཡིན། །ཤ་གཡོས་སྤོད་སྦྱར་སྣུམ་ཞིང་ལྕི། །སྟོབས་སྐྱེད་ཤ་འཕེལ་རྟས་བྱེད་ཡིན། །མུངྒ་གཡོས་སྦྱར་ལྕི་བ་དང༌། །སྨན་གྱི་ཆ་དང་ཡོན་ཏན་འདྲ། །ཁུར་བ་མདག་བཙོས་དོག་ལེ་དང༌། །ས་སླང་ད་ནུར་རྒྱ་སོལ་བསྲེགས། །ཁུར་བ་འདི་རྣམས་རིགས་གཅིག་ཀྱང༌། །ཕྱི་མ་ཕྱི་མ་ཡང་བ་ཡིན། །གཡོས་སུ་བྱས་པའི་ཟས་ཀྱི་སྡེ་ཚན་ནོ།། །།ཤ་བགོ་བ་ཀུ་རང་ག །རྐྱང་དང་རི་ཤ་རི་དྭགས་མ། །རི་བོང་དང་སྒོ་ཙ་རུ་ཀ །ལྡང་སྒོ་ལ་སོགས་རི་དྭགས་ཡིན། །ལ་བ་བར་ཏི་བར་ཏི་ཀ །གོ་ཙ་དམར་དང་གོང་མོ་དང༌། །སྲེག་པ་ཨུ་པ་ཙ་ཀྲ་དང༌། །ཀ་ཕིན་ཙ་ར་ཀུ་རུ་བ། །བར་ད་ཀ་དང་བར་ཏི་ཀ །གོང་མ་སྲེག་དང་རྨ་བྱ་དང༌། །ཁྱིམ་བྱ་དང་ནི་ཙ་ཀོར། །གོན་ནད་དང་རི་ལ་གནས། །ཤ་ར་བ་དང་ཨིནྡྲ་བ། །རི་བྱ་འདི་དག་ཟས་ཁྲོན་རྐོ། །ཤང་ཤང་ཏེའུད་དུ་ཧ། །བུང་འདྲ་ནེ་ཙོ་ཤ་རི་ཀ །ཏ་ལ་ཁུ་བྱུག་ཧ་རི་ཏ། །བྱེའུ་ལ་སོགས་མཆུས་རྐོ་ཡིན། །སྦལ་པ་སྦྲུལ་དང་སྦྱིན་གོར་དང༌། །བི་དུར་ལ་སོགས་ཁུང་ནག་ནས། །བ་ལང་རྟ་བོད་དྲེའུ་དང༌། །སྟག་གཟིགས་སེང་གེ་དོམ་སྤྲེའུ། །བྱི་ལ་བྱི་བ་སྦྱང་ཀི་དང༌། །སྲེ་མོ་དང་ནི་དྲེད་དག་དང༌། །ཝ་དང་འཕར་བ་ཁྲ་དང་ནི། །ཆུན་ལག་ཁྲ་སྤྱང་བྱ་རོག་གི །བྱ་རིགས་ཁྲ་སྔོན་བྱ་ཀུ་རུ། །བྱ་རྒོད་འུག་པ་ཀ་ལིང་ཀ །དུང་ཅན་མ་དུ་ཧ་ལ་སོགས། །བྱ་དང་གཅན་གཟན་རྩལ་མཐུས་ཟ། །ཕག་རྒོད་རུ་རུ་མ་ཧེ་སྐྱིན། །རོ་ཧི་ཏ་དང་གླང་པོ་ཆེ། །མཛོ་རྒོད་གཡག་རྒོད་བསེ་དང་ནི། །སྨྱིག་གླང་ཞེས་གྲགས་རི་དྭགས་ཆེ། །ཆུར་གནས་ངང་པ་ས་ར་ས། །ཆུ་སྐྱར་ཀ་རན་ད་བྱ་བླ། །རྒྱ་དང་ཁྲུང་ཁྲུང་དུར་པ་དང༌། །སོ་བྱ་ཀ་ཏམྦ་སོགས་ཡིན། །ཉ་རོ་ཧ་ཏི་བ་ཏི་ན། །ཉ་ཕྱིས་རུས་སྦལ་ཀུམ་བིར། །ཀར་ཏ་
དུང་སྲམ་ཤམྦུ་ཀ །ཉེ་ལྡང་བར་མི་ཙན་ཏི་ཀ །བུ་ལུ་ཆུ་སྲིན་ནག་ཁྲ་དང༌། །ཉ་བོ་ཆེ་ནི་བྱིས་པ་གསོད། །ཇ་རི་ཅི་ལི་ཙི་མ་སྩོགས། །དེ་ལྟར་ཤ་ནི་བརྒྱད་དུ་བཤད། །ར་ལུག་གཟས་ཀྱི་སྤྱོད་ཡུལ་ནི། །འདྲེས་པས་རིགས་གཅིག་ངེས་མ་ཡིན། །ཐོག་མ་ཐ་མ་སྐམ་གཤེར་གནས། །བར་མ་གཉིས་པོ་ཐུན་མོང་བཤད། །དེ་ལས་སྐམ་སའི་ཤ་རྟུག་འགགས། །བསིལ་བ་དང་ནི་ཡང་པ་ཡིན། །འདུས་པ་མཁྲིས་པ་ཤས་ཆེ་ཞིང༌། །རླུང་འབྲིང་བད་ཀན་ཆུང་ལ་ཕན། །རི་བོང་ཤ་ནི་དྲོད་སྐྱེད་རྩུབ། །ཞུ་རྗེས་ཚ་ཞིང་འཁྲུ་གཅོད་བསིལ། །བར་ཏ་ཀི་ལ་སོགས་པའི་ཤ །ཅུང་ཟད་སྣུམ་དྲོ་ལྕི་རྟས་བྱེད། །དེ་རྣམས་ལས་ཀྱང་རྒྱ་བྱའི་ཤ།། །།ཡིད་གཞུངས་དྲོད་སྟོབས་ཁུ་བ་འཕེལ། །བཤང་སྐེམས་མདོག་བཟང་རླུང་ཤས་ཆེ། །འདུས་པ་སེལ་བའི་དམ་པ་ཡིན། །རྨ་བྱའི་ཤ་ནི་བཟང་མིན་ཡང༌། །རྣ་མིག་སྐད་འགགས་རྒས་སྲར་ཕན། །ཁྱིམ་བྱེད་འདྲའི་རོ་ཙ་ལ། །གྲང་གནས་ལྕི་ཞིང་བད་ཀན་སྐྱེད། །གོང་མོ་ཨུ་པ་ཙ་ཀྲར་བཅས། །ཡིད་གཞུངས་དྲོད་སྐྱེས་ཡི་གར་འོང༌། །ཐི་བ་ཞར་བའི་ཤ་ལྕི་ཞིང༌། །ཚ་བྲོ་ཉེས་པ་ཐམས་ཅད་སྐྱེད། །བྱེའུ་ཤ་བད་ཀན་སྐྱེད་ཅིང་སྣུམ། །རླུང་འཇོམས་ཁུ་བ་རབ་ཏུ་འཕེལ། །སྡེ་ཚན་དེ་ལས་ཕྱི་མ་རྣམས། །རིམ་བཞིན་ལྕི་དྲོ་སྣུམ་ཞིང་མངར། །གཅིན་མང་རོ་ཙ་སྟོབས་སྐྱེད་ཅིང༌། །རླུང་འཇོམས་བད་ཀན་མཁྲིས་པ་སྐྱེད། །དེ་ལས་རི་དགས་ཆེན་པོ་གསིལ། །རྩ་མཐུས་ཤ་རློན་ཟ་བའི་ཡང༌། །རོ་རྗེས་ལན་ཚྭ་བྲོ་ཞུ་རྗེས། །ཚ་ཞིང་ཤ་ནི་འཕེལ་བར་བྱེད། །གཞང་འབྲུམ་རྙིང་པ་ཕོ་བ་གྲང༌། །སྐེམ་ནད་ཉེན་ལ་མཆོག་ཏུ་ཕན། །ར་ཤ་ཤིན་ཏུ་བསིལ་མིན་ཞིང༌། །ལྕི་སྣུམ་མ་ཡིན་ཉེས་མེད་ཡིན། །ལུས་དང་ཁམས་ནི་མཉམ་པས་ན། །བད་ཀན་མི་སྐྱེད་ལུས་རྟས་བྱེད། །ལུག་ཤ་དེ་ལས་བཟློག་པ་སྟེ། །ལུས་རྟས་ཡིན་པར་ཤེས་པར་བྱ། །བ་ལང་ཤ་ནི་ལུད་སྐམ་དང༌། །ངལ་དང་ཚོ་ཆེས་མ་སྙོམས་རིམས། །ཆམ་པ་དང་ནི་སྐེམ་པ་དང༌། །རླུང་ནད་གཅིག་པུ་ན་བ་སེལ། །མ་ཧེའི་ཤ་ནི་ལྕི་ཞིང་ཚ། །གཉིད་ཆེ་བརྟན་བྱེད་ཤས་ཆེར་སྐྱེད། །ཕག་རྒོད་ཤ་ནི་དེ་འདྲ་ཞིང༌། །
ངལ་སེལ་ཟས་ལེན་ཁུ་སྟོབས་སྐྱེད། །ཉ་ནི་མཆོག་ཏུ་བད་ཀན་སྐྱེད། །ཙི་ལི་ཙི་མ་ཉེས་གསུམ་སྐྱེད། །ལ་བ་རོ་ཧ་ཏི་སྐྱིན་གོར། །ཤ་བ་རང་རང་སྡེ་ཚན་མཆོག །ཤ་ནི་འཕྲལ་བསད་པ་དག་དང༌། །དར་ལ་བབ་པ་བསྟེན་པར་བྱ། །རང་ཤི་རིད་དང་ཤིན་ཏུ་ཚོ། །ནད་ཆུ་དྲུག་གིས་ཤི་བ་སྤང༌། །ཕོ་དང་མོ་ཡི་སྟོད་སྨད་ཕྱེད། །ལྕི་སྟེ་སྦྲུམ་མ་ཐམས་ཅད་ལྕི། །རྐང་བཞི་མོ་ཡི་ཡང་བ་ཡིན། །བྱ་རྣམས་ཀྱི་ནི་ཕོ་ཡི་ཡང༌། །མགོ་བོ་རོ་སྟོང་བྲང་དང་རྒྱབ། །རྐེད་པ་དཔྱི་ཡི་ལྕི་བ་ཡིན། །དེ་བཞིན་ཕོ་བ་རྒྱུ་མ་སོགས། །གོ་རིམས་བཞིན་དུ་ལྕི་བ་ཡིན། །ཁྲག་ལ་སོགས་པའི་ལུས་ཟུངས་རྣམས། །ཕྱི་མ་ཕྱི་མ་ལྕི་བ་ཡིན། །ཤ་ལས་རླིག་པ་ཕོ་མཚན་དང༌། །མཁལ་མ་མཆེར་པ་གཞང་དག་ལྕི། །ཤའི་སྡེ་ཚན་ནོ།། །།ཚོད་མ་པ་ཐ་ཤ་ཏི་དང༌། །སུ་ཤ་སུ་ནི་ཤ་ན་དང༌། །ས་ཏིན་ཛ་རྒྱ་སྣེའུ་སྩོགས། །ཉེས་པ་གསུམ་འཇོམས་རྟག་སྲི་ཡང༌། །དེ་ལས་སུ་ནི་ཤན་དྲོ། །རོ་ཙ་ར་ཛཀྵ་པ་ཏི། །ཕོ་བ་གཞང་འབྲུམ་ནད་སེལ་མཆོག །རྒྱ་སྣེའུ་རྟུག་སྐམ་འཇོམས་པ་ཡིན། །མོན་སྣེའུ་དམེ་རུ་ཉེས་གསུམ་འཇོམས། །མཛེ་སེལ་རོ་ཙ་བཅུད་ལེན་དྲོ། །འཁྲུ་ཞིང་མགུལ་པ་སྙན་པར་བྱེད། །ཙང་གི་རི་སྐྱུར་མེ་དྲོད་སྐྱེད། །ཕོ་བ་གཞང་འབྲུམ་བད་ཀན་རླུང༌། །དྲོད་ཆེ་འཁྲུ་གཅོད་ཡང་བ་ཡིན། །པ་ཏོ་ལ་དང་སབ་ཏ་ལ། །ནིམ་པ་ཤང་གསྠ་སླེ་ཏྲེས། །ཨ་པ་ལ་གུ་ཟ་རྩའི་མྱུ་གུ། །བྲི་ཧ་ཏི་དང་བཱ་ཤ་དང༌། །ཏི་ལ་པར་ནི་ཀུ་ཏ་ལ། །མན་དུ་ཀ་འདབ་ཀར་ཀོ་ཏ། །ཀ་ར་བེ་ལ་པར་བ་ཏ། །ཎ་ཏི་དང་ནི་ཀ་ཏ་ཡ། །གོ་ཛི་ཧ་དང་བར་ད་ཀ །པ་ནི་ཏིག་ཏ་ཀ་རི་རམ། །ཀུ་ལི་ཀ་དང་ནན་ཏི་དང༌། །ཀུ་ཙེལ་ཤག་ཀུན་ད་ནི། །ཀ་ཏིལ་དང་ཀེའུ་ཀམ། །ཤོ་ཏ་མ་ཀོ་ཤ་ཏ་ཀ་དང༌། །ཀར་ཤ་འཇམ་བསིལ་ཁ་ཞིང་ཚ། །བཤང་སྲི་རླུང་སྐྱེད་བད་མཁྲིས་སེལ། །པ་ཏོ་ལ་ཞི་མ་སྲིན་ནད་སེལ། །ཞུ་རྗེས་མངར་ཞིང་ཡི་ག་འབྱེད། །བྲི་ཧ་ཏི་གཉིས་མཁྲིས་སྐྱེད་འཁྲུ། །དྲོད་སྐྱེད་རླུང་ནི་འཇོམས་པ་ཡིན། །བྲི་ཤན་རླུང་དང་ལུད་པ་འཇོམས། །ཁྲག་མཁྲིས་སེལ་བའི་དམ་པ་
ཡིན། །ཀར་བེལ་ལ་ཁ་བ་དང༌། །དྲོད་སྐྱེད་བད་ཀན་སེལ་མཆོག་ཡིན། །བར་ཏ་ཀ་རོ་ཁ་ཞིང་ཚ། །མངར་དྲོ་བད་ཀན་རླུང་དག་སེལ། །ལན་ཚྭར་བཅས་པ་མེ་དྲོད་སྐྱེད། །ཡིད་འོང་ཟས་ལེན་མཁྲིས་མི་སྐྱེད། །ཀ་རི་ར་ནི་སྦོས་བྱེད་ཅིང༌། རོ་བསྐ་མངར་ཞིང་ཁ་བ་ཡིན། །ཀོ་ཤ་ཏ་ཀ་བལ་གུ་ཟ། །འཁྲུ་ཞིང་དྲོད་ནི་སྐྱེད་བྱེད་ཡིན། །ཏན་དུ་ལི་བསིལ་རྩུབ་པ་དང༌། །རོ་མངར་ཞུ་རྗེས་མངར་ཞིང་ཡང༌། །ཆང་ནད་མཁྲིས་ནད་དུག་ཁྲག་སལ། །མུན་ཛ་ལས་བྱུང་རླུང་མཁྲིས་སེལ། །སྣུམ་བསིལ་ལྕི་ཞིང་མངར་བ་དང༌། །ལུས་རྟས་ཁུ་བ་འཕེལ་བའི་མཆོག །བ་ལག་ཀྱ་ལྕི་འཁྲུ་བར་བྱེད། །ཨུ་པོ་ད་ཀ་ཆང་ནད་འཇོམས། །ཙུ་ཙུ་པ་ལག་ཀྱ་འདྲ་ལས། །དེ་ནི་འཁྲུ་གཅོད་བདག་ཉིད་ཅན། །བི་ད་རི་ནི་རླུང་མཁྲིས་སེལ། །གཅིན་མང་མངར་ཞིང་བསིལ་བ་ཡིན། །འཚོ་བར་བྱེད་ཅིང་ལྐོག་ནད་སེལ། །ལུས་བརྟ་རོ་ཙ་ལྕི་བཅུད་ལེན། །ཛི་བན་ཏི་མངར་བསིལ་བ་དང༌། །མིག་ལ་ཕན་ཞིང་ཉེས་གསུམ་སེལ། །ཀུ་སྨན་ད་བུམ་ཤ་ཀ་ལིང༌། །ཀར་ཀ་དང་ནི་ཨེར་བ་རུ། །ད་ན་དིས་ཞེས་བྱ་བ་དང༌། །ད་ནི་དིས་དང་ག་གོན་དང༌། །ཙིན་ཏ་ཀ་དང་ཙིར་བི་ཏ། །བད་རླུང་སྐྱེད་ཅིང་འཁྲུག་ཅིན་མང༌། །བཤང་སྲེ་ལྕི་ཞིང་ཞུ་རྗེས་མངར། །འཁྲི་ཤིང་འབྲས་བུའི་ནང་ན་མཆོག །ཀུ་སྨན་ད་སྟེ་རླུང་མཁྲིས་སེལ། །གཅིན་ནད་སེལ་ཞིང་རོ་ཙར་བྱེད། །ག་གོན་ཤིན་ཏུ་གཅིན་མང་ཞིང༌། །ཀུ་བ་ཤིན་ཏུ་རྩུབ་པ་ཡིན། །ཀ་ལིང་ཀ་དང་ཨེར་བ་རུ། །ཙིར་བི་མཁྲེགས་གཞོན་མཁྲིས་སེལ་བསིལ། །སྨིན་པ་དེ་ལས་གཞན་དུ་བྱེད། །འབྲས་བུ་རྙིང་ལུང་ལན་ཚྭར་བཅས། །མཁྲིས་སྐྱེད་བད་ཀན་རླུང་ནད་སེལ། །ཡི་ག་འབྱེ་ཞིང་དྲོ་ཡིད་འོང༌། །ཧེན་ལངས་ལྟོ་སྦོས་སེལ་ཞིང་ཡང༌། །པད་རྩ་རྩ་བ་ཨུཏྤལ་རྩ། །ཀུ་མུ་ཨུཏྤལ་ཆུ་བ་དང༌། །ཆུས་པ་ཤ་ལུ་ཀ་ཏ་དང༌། །སྲིང་གདང་ག་ཤ་རུ་ཀ །ཀྲོན་ཛ་ད་ན་ཀ་ལོད། །རྩུབ་ཅིང་བཤད་སྲི་བསིལ་ཞིང་ལྕི། །ཀ་ལམ་པ་དང་ན་ལི་ཀ །མར་ཤེ་ཞེས་ནི་བྱ་བ་དང༌། །ཀུ་ཏི་ན་ཛ་ར་ཀུ་ཁ། །སེང་ཕྲོམ་ཡུངས་མ་ལོན་ཀ །ཀ་རུ་དགག་པེ་དུ། །
འཚོ་བྱེད་དང་ནི་ཛུན་ཛུ་དང༌། །ཨེ་དག་ཛ་དག་དང་ནི། །ཡ་བ་ཤ་ཀ་ལྕམ་པ་དང༌། །ཨ་ལུ་ཀ་སྩོགས་ཐམས་ཅད་དང༌། །སྲན་ལོ་ཤིང་མངར་ལོ་མ་དང༌། །མངར་ཞིང་རྩུབ་ལ་ལན་ཚྭ་བྲོ། །བད་ཀན་རླུང་སྐྱེད་ལྕི་བ་དང༌། །བསིལ་ཞིང་བཤད་ལྕི་འབྱུང་སླ་བྱེད། །ཕལ་ཆེར་ཞུས་བཤད་གཅི་མཁྲེགས། །ཚོས་ཤིང་ཁུ་བ་ལེགས་བཙིར་ལ། །མར་ཆེར་བཏབ་པ་ཉེས་མི་སྐྱེད། །སེང་ཕྲོམ་འདབ་མ་ཞེས་བྱ་གང༌། །དེ་ནི་རྒྱ་སྣེའུ་དང་འདྲར་འདོད། །ཏར་ཀ་རི་བར་ན་མངར། །ཁ་བཅས་རླུང་དང་བད་ཀན་སེལ། །པུ་རྞ་རྣམ་གཉིས་ཀ་ལ་ཤ །ཅུང་ཟད་ཚ་བྲོ་ཁ་ཞིང་ཚ། །དྲོད་སྐྱེད་ཁོང་འཁྲུ་སྦྱར་དུག་དང༌། །འོར་ནད་བད་ཀན་རླུང་ནད་འཇོམས། །ཙི་བི་ར་ཡི་མྱུ་གུ་ནི། །དྲོད་སྐྱེད་རླུང་དང་བད་སེལ་འཁྲུ། །ཉེའུ་ཤིང་མྱུ་གུ་ཁ་བ་སྟེ། །རོ་ཙ་ཉེས་གསུམ་སེལ་བ་ཡིན། །སྨྱིག་མའི་མྱུ་གུ་རྩུབ་པ་དང༌། །ཁོང་ཚ་རླུང་དང་མཁྲིས་པ་སྐྱེད། །བ་རུ་ར་ནི་དྲོད་སྐྱེད་ཁ། །མཆེར་པ་གཞང་འབྲུམ་བད་རླུང་སེལ། །ཀ་ས་མར་ད་སྲིན་ལུང་པ། །བད་ཀན་སེལ་ཞིང་ཞུ་བྱེད་འཁྲུ། །ལེ་བརྒན་རྩི་ཚོད་རྩུབ་སྐྱུར་ཚ། །ལྕི་ཞིང་མཁྲིས་པ་སྐྱེད་ལ་འཁྲུ། །ཡུངས་ཀར་ཚོད་མ་ལྕི་ཞིང་ཚ། བཤང་དང་ལྕི་འགགས་ཉེས་ཀུན་སྐྱེད། །ལ་ཕུག་གཞོན་ནུ་རོ་མི་གསལ། །ཅུང་ཟད་ཚ་བྲོ་ཁ་དང་བཅས། །གང་ཡིན་དེ་ནི་ཉེས་ཀུན་སེལ། །ཡང་ཞིང་ཅུང་ཟད་ཚ་བ་དང༌། །སྐྲན་དང་ལུད་གཅོང་དབུགས་མི་བདེ། །རྨ་དང་མིག་ནད་ལྐོག་ནད་སེལ། །སྐད་འགགས་དྲོད་ཆུང་རྟག་སྐམ་དང༌། །ཆམ་པའི་ནད་ནི་འཇོམས་པ་ཡིན། །ནར་སོན་རོ་དང་ཞུ་རྗེས་ཚ། །དྲོད་སྐྱེད་བྱེད་ཅིང་ཉེས་གསུམ་སྐྱེད། །བད་ཀན་སྐྱེད་ལྕི་བཙོས་པ་ནི། །སྣུམ་ཞིང་དེ་ཡང་རླུང་སེལ་ཡིན། །སྐམ་པོ་རླུང་དང་བད་ཀན་སེལ། །རྗེན་པ་ཐམས་ཅད་ཉེས་སྐྱེད་ཡིན། །ཡུངས་མ་ཚ་ཞིང་དྲོ་བ་དང༌། །བད་ཀན་རླུང་སེལ་མཁྲིས་པ་སྐྱེད། །ཤན་ཏ་མཱུ་ལ་མཁྲིས་སེལ་ཞིང༌། །བསིལ་ཞིང་ཞུ་རྗེས་མངར་བ་དང༌། །རོ་མངར་ཁ་ཞིང་བསྐ་བ་སྟེ། །བད་ཀན་དུག་ཀྱང་སེལ་བར་བཤད། །ཀུ་ཐེར་བྱེའུ་རུག་ཤི་ཀྲུ། །སུ་མུ་ཁ་དང་སྐེ་
ཚེ་དང། །བུ་སྲིན་དང་ཕ་ནི་ཛ། །ཟིན་ཐིག་ལེ་དང་ཛམ་བིར། །དེ་ལ་སྩོགས་པའི་ལྡུམ་རྣམས་ནི། །བཤང་གཅི་སྲ་ཞིང་མེ་དྲོད་སྐྱེད། །ཁོང་པ་ཚ་བྱེད་ཁ་རྩུབ་ཚ། །ཡིད་འོང་ལུས་དྲོ་ཡི་ག་འབྱེ། །མིག་གནོད་ཁུ་བ་སྲིན་འཇོམས་རྣོ། །སྐྲང་པར་བྱེད་དང་ཡང་བ་ཡིན། །བྱེ་རུག་སྐྱིགས་ལུད་དབུགས་མི་བདེ། །རྩིབ་ལོགས་ཟུག་དུག་ཁ་མནམ་སེལ། །སུ་མུ་ཁ་ནི་རབ་ཚ་མིན། །སྦྱར་དུག་འོར་ནད་སེལ་བ་ཡིན། །འུ་སུའི་ལོ་མ་ཁ་ཞིང་མངར། །གཅིན་མང་མཁྲིས་པ་སྐྱེད་མ་ཡིན། །སྒོག་སྐྱ་རབ་ཏུ་ཚ་ཞིང་རྣོ། །ཞུ་རྗེས་ཚ་ཞིང་འཁྲུ་བ་དང༌། །ཞིམ་ཞིང་སྐྲ་སྐྱེད་ལྕི་རོ་ཚ། །སྣམ་ཞིང་དྲོད་སྐྱེད་ཡིག་འབྱེ། །ཤ་བཀྲ་མཛེ་སྐྲན་གཞང་འབྲུམ་དང༌། །གཅིན་ནད་སྲིན་དང་བད་ཀན་རླུང༌། །སྐྱིགས་བུ་ཆམ་པ་དབུགས་མི་བདེ། །ལུད་པ་སེལ་ཏེ་ཁྲག་མཁྲིས་སྐྱེད། །ཀུན་དོང་དེ་ལས་ཡོན་ཏན་དམན། །བད་ཀན་སྐྱེད་མཁྲིས་རབ་མི་སྐྱེད། །ཀེའུ་བཙོས་དུག་སྦྱར་ཟོས་པ་ཡིས། །བད་ཀན་རླུང་དང་གཞང་འབྲུམ་སེལ། །རྣོ་ཞིང་རྟུག་པ་སྲི་བ་དང༌། །དེ་ནི་མཁྲིས་ཅན་ལ་ཕན་མིན། །སུར་དྲོད་སྐྱེད་ཁ་ཟས་ལེན། །བད་སེལ་དྲི་མ་སྦྱོང་ཞིང་ཡང༌། །མཆོག་ཏུ་གཞང་འབྲུམ་དག་ལ་ཕན། །སྦང་ཕྲུམ་ཤིན་ཏུ་ཉེས་སྐྱེད་ཡིན། །མེ་ཏོག་འདབ་མ་འབྲས་ཡལ་ག །སྡོང་བུ་རིམ་བཞིན་ལྕི་བ་ཡིན། །ཚོད་མའི་རབ་མཆོག་འཚོ་བྱེད་ཡིན། །ཡུངས་ཀར་ཚོད་མ་ཐ་ཆད་ཡིན། །ཚོད་རྔད་རྣམས་ཀྱི་སྡེ་ཚན་ནོ།། །།རྒུན་འབྲུམ་འབྲས་བུའི་མཆོག་ཡིན་ཏེ། །རོ་ཙ་མིག་སྨན་བཤད་གཅི་སླ། །མངར་ཞིང་ཞུ་རྗེས་སྣུམ་པ་དང༌། །ཅུང་ཟད་བསྐ་ཞིང་བསིལ་ལ་ལྕི། །རླུང་དང་ཁྲག་མཁྲིས་སེལ་བྱེད་ཅིང༌། །ཁ་ནང་ཁ་བྲོ་ཆང་ནད་དང༌། །སྐོམ་ལུད་ཚད་རིམས་དབུགས་མི་བདེ། །སྐད་འཛེར་གློ་རྡོལ་གློ་གཅོང་པོ་ལ། །བལ་པོ་སེའུ་མངར་མཁྲིས་རྒྱས་དང༌། །ཉེས་པ་གསུམ་པོ་སེལ་བ་ཡིན། །སྒྱུར་བ་མཁྲིས་སྐྱེད་མིན་ཅུང་དྲོ། །རླུང་དང་བད་ཀན་འཇོམས་པར་བྱེད། །སེའུ་ཀུན་ཀྱང་ཡིད་འོང་སྣུམ། །ཡང་ཞིང་བཤད་སྲ་དྲོད་ཟས་ལེན། །མོ་ཚ་འབྲ་གོ་པ་ནས། །རྒྱ་
སྟར་པ་རུ་ཤ་ཀ་དང༌། །ཨ་མ་ཏ་ལ་ཀསྨ་འབྲས། །ར་ཇ་ད་ན་མ་དུའི་འབྲས། །རྒྱ་ཤུག་སོ་བི་ར་ཨང་ཀོ་ལ། །ཕལ་ཀུ་སླེས་མ་ཏའི་འབྲས་བུ། །ཏ་མལ་བི་ཤུ་སྟར་གའི་འབྲས། །མྱུ་གུ་ལ་དང་རྒྱ་ཁམ་དང༌། །ཨ་རུ་མ་ན་པི་ཡལ་འབྲས། །རྟས་བྱེད་ལྕི་ཞིང་བསིལ་བ་ཡིན། །ལུས་ཚ་གློ་རྡོལ་གློ་གཅོང་སེལ། །ཁྲག་དང་མཁྲིས་པ་སྙོམས་པར་བྱེད། །ཞུ་རྗེས་མངར་ཞིང་སྣུམ་པ་དང༌། །བཤང་ལྕི་བད་ཀན་ཁུ་བ་འཕེལ། །ཏ་ལའི་འབྲས་བུ་མ་ཁྲིས་སྐྱེད་འཁྲུ། །ཀསྨ་རྒྱ་འབྲས་བསིལ་བ་དང༌། །བཤང་ལྕི་འགགས་པ་སེལ་བྱེད་ཅིང། །སྐྲ་བྱེད་ཡིད་གཞུངས་བཅུད་ལེན་འགྱུར། །པ་ཏ་མ་སྩོགས་དྲོ་བ་དང༌། །བད་ཀན་མཁྲིས་པ་སྐྱེད་བྱེད་འཁྲུ། །སྣུམ་ཞིང་མཆོག་ཏུ་རླུང་སྐྱེད་བྱེད། །པི་ལ་ཡའི་འབྲས་ཚབ་མིན། །པི་ལ་ཡ་ཡི་ཚི་གུ་མངར། །རོ་ཙ་མཁྲིས་པ་རླུང་ནད་སེལ། །རྒྱ་ཤུག་ཚི་གུའི་ཡོན་ཏན་ནི། །དེ་འདྲ་སྐམ་སློན་ལུད་པ་སེལ། །བིལ་འབྲས་སྨིན་པ་འཇུ་དཀའ་ཞིང༌། །ཉེས་སྐྱེད་འཕྱེན་ནི་དྲི་བ་བྱེད། །མ་སྨིན་དྲོད་སྐྱེད་བད་རླུང་སེལ། །དེ་དག་གཉིས་ཀ་འཁྲུ་བ་གཅོད། །མ་སྨིན་ཀ་པིད་མགུལ་ནད་དབ། །ཉེས་པ་ཀུན་སྐྱེད་སྨིན་པ་ནི། །ཉེས་འཇོམས་སྐྱིགས་བུ་སློན་བྲོ་སེལ་ཀུན་ཀྱང་འཁྲུ་གཅོད་དུག་འཇོམས་ཡིན། །འཛམ་བུའི་ཤང་ཏོག་བཤད་གཅི་སྲི། །བསིལ་ཞིང་ཤིན་ཏུ་རླུང་སྐྱེད་ཡིན། །བཤང་དང་ལྕི་བ་གཅོད་བྱེད་ཅིང༌། །ལྐོག་མ་ལ་གནོད་བད་མཁྲིས་སེལ། །ཨ་མྲའི་འབྲས་བུ་མ་སྨིན་རླུང༌། །ཁྲག་མཁྲིས་སྐྱེད་བྱེད་རུས་ཆགས་པ། །བད་ཀན་མཁྲིས་སྐྱེད་མིན་རླུང་སྐྱེད། །ལྕི་མངར་བད་ཀན་ཁྲུ་བ་འཕེལ། །བྲྀཀྵ་ཨམླ་རྩུབ་བཤད་སྲི། །ལྕི་ཚ་བད་ཀན་རླུང་དག་འཇོམས། །ཤ་མྱ་ཚ་ལྕི་སྐྲ་གནོད་རྩུབ། །པི་ལུའི་འབྲས་བུ་མཁྲིས་པ་སྐྱེད། །བད་ཀན་རླུང་ནད་སེལ་ཞིང་འཁྲུ། །མཆེར་པ་གཞང་འབྲུམ་སྐྲན་སྲིན་སེལ། །པི་ལུ་མངར་ཞིང་ཁ་བ་གང༌། །ཤིན་ཏུ་ཚ་མིན་ཉེས་གསུམ་འཇོམས། །བ་ལུ་ཤུན་ཁ་ཚ་ཞིང་སྣུམ། །རླུང་ནད་སེལ་བར་བྱེད་པ་ཡིན། །བ་ལུང་འབྲས་ཤས་རྟས་བྱེད་མངར། །རླུང་དང་མཁྲིས་པ་སེལ་ཞིང་ལྕི། །དེ་ཡིས་རྐང་ཡང་
སྐྱིགས་ལུད་པ། །དབུགས་མི་བདེ་དང་ཆང་ནད་སེལ། །ཁ་སྐམ་རླུང་དང་བད་ཀན་དང༌། །རྟུག་སྲ་སྐྱུགས་བྲོ་ཡི་ག་འཆུས། །སྐྲན་དང་གཞང་འབྲུམ་གཟེར་ནད་དང༌། །མེ་དྲོད་ཆུང་བ་ཉིད་སེལ་ཏོ། །ན་རང་ག་འབྲས་མངར་ཅུང་སྐྱུར། །ཡི་གར་འོང་ཞིང་ཁ་ཟས་ལེན། །ལྕི་ཞིང་རླུང་ནི་རབ་སྐྱེད་པའི། །ཡོན་ཏན་ལྡན་པར་ཤེས་པར་བྱ། །བསེ་ཤིང་འབྲས་བུའི་ཤུན་པ་ཤ །ཁོང་རྟས་བྱེད་ཅིང་མངར་ལ་བསིལ། །དེའི་རུས་མེ་མཉམ་ཡིད་གཞུངས་བྱེད། །བད་ཀན་རླུང་ནི་སེལ་བའི་མཆོག །ཀུ་ཤུ་རྣམ་གཉིས་ལྕི་བ་སྟེ། །མངར་སྐྱུར་བསིལ་དང་ཚ་བ་ཡིན། །ཡི་ག་འབྱེད་ཞིང་མེ་རབ་འབྲི། །ཁམ་ཤ་ཡི་ག་འབྱེད་ཅིང་མངར། །སྨིན་པ་མྱུར་དུ་འཇུ་བར་འགྱུར། །ཤིན་ཏུ་ཚ་མིན་ལྕི་ཉེས་སྐྱེད། །རྒུན་འབྲུམ་པ་རུ་ཤ་ཀ་དང༌། །ཀར་མར་དང་བཙོས་རློན་སྐྱུར། །མཁྲིས་པ་བད་ཀན་སྐྱེད་ཅིང་འཁྲུ། །ལྕི་ཞིང་ནུས་ཚ་རླུང་འཇོམས་སོ། །རྒྱ་ཤུག་སྐྱུར་ཐུང་ལི་གུ་ཚེ། །ཨ་མྲ་ཀ་ཏ་དེ་བཞིན་ནོ། །ཨེར་བ་ཏི་ཏུ་ད་དང༌། །མྲི་ཀ་ལིན་ད་ཛམ་བིར་བཅས། །སྨིན་དང་ཀ་ར་ཡར་ཏ་སྐམ། །མཁྲིས་པ་ཤིན་ཏུ་སྐྱེད་བྱེད་མིན། །ཨམླི་ཀ་དང་རྒྱ་ཤུག་སྐྱུར། །སྐམ་པོ་དྲོད་སྐྱེད་འཁྲུ་བ་དང༌། །སྐོམ་དང་དལ་དང་རྨྱ་བ་སེལ། །ཡང་ཞིང་རླུང་དང་བད་ཀན་འཇོམས། །དེ་ལས་འབྲས་བུ་ཀུན་ཐ་ཆད། །ལི་གུ་ཙི་སྟེ་ནད་ཀུན་སློང༌། །ཁ་བ་མེ་དང་རླུང་གནོད་ཉེན། །སྦྲུལ་གྱི་ཁ་ཆུ་སྩོགས་པས་ཕོག །སྲིན་བུས་ཟོས་དང་ཆུ་ནང་ལྟུང༌། །ས་ངན་དུས་མིན་སྐྱེས་པ་དང༌། །འབྲུ་གཞན་འདྲེས་ཞིང་མཐུ་ཉམས་དང༌། །ཤིན་ཏུ་རྙིང་འགྱུར་འབྲུ་སྤང་བྱ། །ཚོད་མའང་དེ་བཞིན་རྩུབ་པར་ནི། །གཡོས་པ་དག་དང་མི་སྙི་དང༌། །རོ་ནི་སྨིན་པར་མ་གྱུར་དང༌། །ལ་ཕུག་མ་གཏོགས་སྐམ་པོ་དང༌། །འབྲས་བུའང་ཕལ་ཆེར་དེ་བཞིན་ཏེ། །བིལ་བ་མ་གཏོགས་རློན་པ་སྤང༌། །འབྲས་བུའི་སྡེ་ཚན་ནོ།། །།ལན་ཚྭ་ཀུན་ཀྱང་བད་ཀན་སྐྱེད། །ཕྲ་ཞིང་བཤད་གཅི་འབྱིན་ལ་འཇམ། །རླུང་འཇོམས་འཇུ་བྱེད་ཚ་ཞིང་རྣོ། །ཡི་ག་འབྱེད་ཞིང་བད་མཁྲིས་སྐྱེད། །
དེ་ལ་ལྕེ་མྱང་ཚ་མངར་བཅས། །རོ་ཙ་ཡིད་འོང་ཉེས་གསུམ་སེལ། །ཡང་ཞིང་ཚ་ལ་མིག་ལ་ཕན། །ཚ་བ་མི་སྐྱེད་མེ་དྲོད་སྐྱེད། །རྩལ་རུ་ཚ་ཡང་ཡིད་འོང་ཞིང༌། །སྒྲེགས་པ་སྦྱོང་ཞིང་དྲི་ཞིམ་ལ། །ཞུ་རྗེས་ཚ་ཞིང་བཤད་སྲི་སེལ། །དྲོད་སྐྱེད་ཡི་ག་འབྱེད་བྱེད་ཡིན། །ཁ་རུ་ཚ་ནི་སྟོད་བད་ཀན། །སྨད་ཀྱི་རླུང་འབྱིན་དྲོད་སྐྱེད་ལ། །བཤང་འགགས་ལྟོ་སྦོས་རྟུག་སྐམ་དང༌། །གཟེར་ཟུག་ལུས་ལྕི་སེལ་བ་ཡིན། །རྒྱ་མཚོའི་ལན་ཚྭ་ཞུ་རྗེས་མངར། །ལྕི་ཞིང་བད་ཀན་རྣམ་འཕེལ་བྱེད། །བཀོད་མའི་ཚ་ནི་ཅུང་ཟད་ཁ། །ཚ་དང་བ་ཚ་རྣོ་བྱེད་གཤེར། །ཁ་རུ་ཚ་ནག་ཡོན་ཏན་དྲི། །མ་གཏོགས་ཡོན་ཏན་བི་དར་མཚུངས། །མཚོ་ཚ་ཡང་སྟེས་སྐམ་ཚ། །བད་ཀན་སྐྱེད་ཅིང་འཇུ་དཀའ་ལྕི། །ལན་ཚྭ་རྣམས་ཀྱི་སྦྱོར་བ་ལ། །རྒྱ་མཚོ་ལ་སོགས་རབ་ཏུ་སྦྱར། །ནས་ཚིག་འཁུས་པའི་ལན་ཚྭ་ནི། །སྐྲན་དང་སྙིང་ནད་སྐྱ་རྦབ་དང༌། །པོ་བམ་ཆེར་པ་ལྐོག་ནད་དང༌། །ལུད་པ་གཞང་འབྲུམ་དབུགས་མི་བདེ། །ལྟོ་སྦོས་བད་ཀན་སེལ་བ་ཡིན། །སྭ་རྫི་ཀ་སོགས་ཐལ་ཚ་ཀུན། །རབ་རྣོ་ཚ་ཞིང་སྲིན་སེལ་ཡང༌། །ཁྲག་མཁྲིས་སྐྱེད་བྱེད་སྨིན་བྱེད་ལ། །གཅོད་ཅིང་མི་ཞིམ་རྣམ་པར་འབྱེད། །ནས་ཚིག་འཁུས་ཚ་ཁ་བས་ན། །མདོག་མདངས་ཁུ་བ་ཀྲ་མིག་གནོད། །ཤིང་ཀུན་རླུང་དང་བད་ཀན་སེལ། །གཟེར་འཇོམས་མཁྲིས་པ་སྐྱེད་བྱེད་དེ། །ཞུ་རྗེས་རོ་ཚ་ཡི་ག་འབྱེད། །དྲོད་སྐྱེད་ཟས་འཇུ་ཡང་བ་ཡིན། །ཨ་རུ་ར་བསྐ་ཞུ་རྗེས་མངར། །རྩུབ་ཅིང་ལན་ཚྭའི་རོ་མེད་ཡང༌། །དྲོད་ཆེ་ཟས་འཇུ་ཡིད་གཞུངས་བྱེད། །ན་ཚོད་ལ་འཇོག་དམ་པ་ཡིན། །དྲོ་ཞིང་འཁྲུལ་ཚེ་ལ་ཕན། །བློ་དང་དབང་གསལ་སྟོབས་རབ་སྐྱེད། །མཛེ་དང་བཞིན་ལུས་མདོག་མི་སྡུག །སྐད་འགགས་རིམས་རྙིང་མི་བཟད་རིམས། །གླད་པ་མིག་ནད་སྐྱ་རྦབ་དང༌། །མིག་སེར་ཕོ་བའི་ནད་རྣམས་དང༌། །སྐེམ་བཅས་འོར་དང་གཅིན་ནད་སེལ། །ཚད་འཁྲུ་རྨོངས་བག་མྱོས་སློན་སྲིན། །མཆིལ་མང་ལུད་པ་དབུགས་མི་བདེ། །གཞང་འབྲུམ་མཆེར་པ་ལྟོ་སྦོས་དུག །
གསུམ་འཕེལ་རྒྱུན་འགགས་སྐྲན་དང་ནི། །ད་རྒན་ན་དང་ཡི་ག་འཆུས། །རླུང་དང་བད་ཀན་ལས་གྱུར་ནད། །དེ་དང་དེ་ནི་སེལ་བྱེད་ཡིན། །སྐྱུ་རུ་ར་ཡང་དེ་འདྲ་བསིལ། །རོ་སྐྱུར་བད་མཁྲིས་སེལ་དེ་ལས། །ཡོན་ཏན་ཅུང་དམན་བ་རུ་ར། །ཞུ་རྗེས་ཚ་མངར་སྐྲ་མིག་ཕན། །འབྲས་བུ་གསུམ་པོ་འདི་དག་ནི། །བཅུད་ཀྱིས་ལེན་མཆོག་མིག་ནད་སེལ། །རྨ་འཚོ་པགས་ནད་རྨ་རེད་དང༌། །ཚིལ་ཆེས་གཅིན་སྙི་བད་ཁྲག་སེལ། །ཤིང་ཚ་སུག་སྨེལ་བྷ་དྲ་གསུམ། །གེ་སར་བཅས་པ་དྲི་བཟང་བཞི། །ན་ལེ་ཤམ་ནི་མཁྲིས་སྐྱེད་རྣོ། །རྩུབ་ཅིང་དྲོད་སྐྱེད་ཡི་ག་འབྱེད། །རོ་དང་ཞུ་རྗེས་དག་ཀྱང་ཚ། བད་ཀན་འཇོམས་ཤིང་ཡང་བ་ཡིན། །པི་པི་ལིང་རློན་བང་སྐྱེད་མངར། །བསིལ་ཞིང་ལྕི་ལ་སྣུམ་པ་ཡིན། །སྐམ་པོ་དེ་ལས་བཟློག་པ་ཡིན། །སྣུམ་ཞིང་རོ་ཙ་རོ་ཚ་ལ། །ཞུ་རྗེས་མངར་ཞིང་བད་རླུང་དང༌། །ལུད་པ་དབུགས་མི་བདེ་སེལ་འཁྲུ། །དེ་གཉིས་བཅུད་ལེན་མ་གཏོགས་པ། །གཞན་ལས་ཤས་ཆེར་སྦྱར་མི་བྱ། །དོང་གྲ་དྲོང་སྐྱེད་རོ་ཙ་དང༌། །འཁྲུ་གཅོད་ཡིད་འོང་མཁྲེགས་པ་སེལ། །ཡི་ག་འབྱེ་ཡང་ཞུ་རྗེས་མངར། །ཁོང་སྣུམ་དྲོད་ཆེ་བད་རླུང་སེལ། །སྒེའུ་གཤེར་དེ་འདྲ་དེ་དག་ནི། །ཚ་བ་གསུམ་སྟེ་ཤ་སྦོམ་དང༌། །མེ་དྲོད་ཉམས་དང་དབུགས་མི་བདེ། །ལུད་པ་རྐང་བམ་ཆམ་པ་འཇོམས། །དབྱི་མོ་པི་པི་ལིང་རྩ་བ། །ནལ་ཤམ་ཡོན་ཏན་ཅུང་ཟད་ཆུང༌། །ཙི་ཏྲ་ཀ་སྟོབས་མེ་དང་མཉམ། །འོར་ནད་གཞང་འབྲུམ་སྲིན་མཛེ་སེལ། །འདི་རྣམས་ལས་ནི་ན་ལེ་ཤམ། །མ་གཏོགས་ཚ་བ་ལྔ་ཞེས་བཤད། །སྐྲན་ཆེན་དམུ་རྫིང་ལྟོ་སྦོས་དང༌། །གཟེར་འཇོམས་དྲོད་ནི་སྐྱེད་པའི་མཆོག །བིལ་བ་ཀཤྨ་ཏར་ཀ་རི། །བ་ཏ་ལ་དང་དུན་དུ་ཀ །རྩ་ཆེན་ལྔ་པོ་བསྐ་ཁ་དྲོ། །རླུང་དང་བད་ཀན་སེལ་བྱེད་ཡིན། །ཨང་ཤུ་མ་ཏི་པྲི་ཧ་ཏི། །གཉིས་གཉིས་གཟེ་རྩ་ཆུང་ལྔར་བཤད། །ཞུ་རྗེས་རོ་མངར་ཧ་ཅང་ནི། །བསིལ་དང་ཚ་མིན་ཉེས་ཀུན་སེལ། །བ་ལ་པུརྞ་ཨེ་རཎྜ། །སུ་པྱ་པརྞི་རྣམ་གཉིས་རྩ། །འབྲིང་ཡིན་བད་
ཀན་རླུང་འཇོམས་ཡིན། །ཤིན་ཏུ་མཁྲིས་པ་མི་སྐྱེད་འཁྲུ། །ཉེའུ་ཤིང་ཀ་ཀོ་ལ་འཚོ་བྱེད། །ཛི་བ་ཀ་དང་རི་ཤར་བཤད། །འཚོ་བྱེད་ཅེས་བྱ་མིག་ལ་ཕན། །རོ་ཙ་རླུང་དང་མཁྲིས་པ་སེལ། །འཇག་མ་ཀུ་ཤ་འབྲས་བུར་ཤིང༌། །འདམ་རྩ་རྩར་བཤད་ལྔ་མཁྲིས་སེལ། །གྲ་མ་གང་བུ་གཡོས་སྦྱར་ཟས། །ཤ་དང་ཚོད་མ་ཤིང་ཏོག་སྨན། །ཟས་ཆ་ཅུང་ཟད་ཚན་གདུས་འདི། །རྟག་ཏུ་དགོས་པ་ཡོད་པ་སྨྲ། །ཡན་ལག་བརྒྱད་པའི་སྙིང་པོ་བསྡུས་པ་ལས། །མདོའི་གནས་ཀྱི་ལེའུ་དྲུག་པའོ།། །།དེ་ནས་ཁ་ཟས་བསྲུང་བའི་ལེའུ་བཤད་པར་བྱའོ། །རྒྱལ་པོའི་ཕོ་བྲང་ཉེ་འཁོར་དུ། །སྲོག་འཚོའི་སློབ་དཔོན་གཞག་པར་བྱ། །དེ་ལྟར་བྱས་པས་ཐམས་ཅད་དུ། །ཐམས་ཅད་ལས་ནི་བསྲུང་བར་འགྱུར། །ཁྱད་པར་དུ་ནི་ས་བདག་གི །ཟས་སྐོམ་དུག་ལས་བསྲུང་བར་བྱ། །ཆོས་ལ་སྩོགས་དང་གང་འབྲེལ་པའི། །འབྱོར་བ་དེ་དེ་ལ་རག་ལས་སོ། །འབྲས་ཆན་དུག་བཅས་གཤེར་བག་ཀྱང༌། །སྐམ་བག་ཅན་ནི་འདྲ་བར་འགྱུར། །ཡུན་རིང་ཚོས་པར་གྱུར་པ་དང༌། །ཚོས་པའང་ཞག་ལོན་ལྟ་བུར་འགྱུར། །རླངས་པ་རྨ་བྱའི་མགྲིན་འདྲ་ཞིང༌། །ཁོང་མྱོས་བརྒྱལ་དང་ལུས་རྡུལ་སྐྱེད། །དྲི་དང་མདོག་སྩོགས་ཉམས་པར་འགྱུར། །རུལ་ཞིང་རྨ་བྱའི་སྒྲོ་ལྟར་འཚེར། །ཚོད་མ་མྱུར་དུ་སྐམས་པ་དང༌། །བསྐོལ་བའི་མདོག་ནི་གནག་འགྱུར་ཞིང༌། །དེར་གཟུགས་ཆུང་བའམ་ཆེ་བའམ། །མི་སྡུག་པའམ་མི་སྣང་འགྱུར། །དབུ་བ་སྟེང་འབྱུང་རི་མོ་མཚམས། །ཁ་ཆུ་འདྲ་དང་ཆུ་བུར་འབྱུང༌། །བཏུང་བ་མངར་སྐྱུར་ཚོད་མ་དང༌། །ཤ་དག་མཚམས་བྱེ་རོ་དང་བྲལ། །ཤ་ཁུའི་རི་མོ་སྔོར་སྣང་ཞིང༌། །འོ་མ་ཟངས་མདོག་ཞོ་དྲི་མ། །དར་བ་ལ་ནི་སེར་དང་གནག །མར་ཁུ་ཆུ་དང་འདྲ་བར་སྣང༌། །ཆང་དང་ཆུ་རང་སྦྲང་རྩི་ལ། །ལྗང་སྣང་ཏིལ་མར་དག་ལ་དམར། །ཤིང་ཏོག་མ་སྨིན་སྨིན་པར་སྣང༌། །སྨིན་པ་དག་ནི་ཡོངས་སུ་འདྲུལ། །ཁ་ཟས་རློན་དང་སྐམ་པ་དག །རྙིངས་ཤིང་མདོག་
ནི་ཉམས་པར་འགྱུར། །སྙི་བ་དང་ནི་སྲ་བ་དག །རེག་པ་གོ་ནི་བཟློག་པར་འགྱུར། །མེ་ཏོག་ཕྲེང་རྩེ་ལོ་མ་གས། །རྙིང་ཅིང་དྲི་ནི་མི་ཞིམ་འགྱུར། །གོས་ལ་ནག་པོ་ཏལ་ཏིལ་དང༌། །སྤུ་རྣམས་འཐུལ་ཞིང་ཁ་ཚར་འཆད། །གསེར་དངུལ་མུ་ཏིག་ཤིང་དང་རྡོ། །རིན་ཆེན་སྩོགས་ལ་དྲི་མ་ཆགས། །གཟི་མདངས་རེག་པ་འོད་ཉམས་འགྱུར། །ས་ཡི་སྣོད་ནི་མདོག་བཅས་བྱེད། །དུག་སྟེར་ཁ་ནི་སྔོ་བསྐམས་ལ། །གནོད་བག་གིས་ནི་ཕྱོགས་སུ་བལྟ། །རྡུལ་ཞིང་འདར་ལ་སྐྲག་པ་དང༌། །འཇིགས་ཤིང་འགྲོས་འཁྱོར་གླལ་བར་འགྱུར། །དུག་ལྡན་ཟས་ནི་མེས་བསྲེགས་ན། །མེ་ལྕེ་གཅིག་འཁྱིལ་མེ་སྟག་རྒལ། །དུ་བ་རྨ་བྱའི་མགྲིན་འདྲར་འགྱུར། །མེ་ལྕེ་མི་འབར་འབར་ཡང་མནན། །སྦྲང་མས་ཟོས་ན་འཆི་བར་འགྱུར། །བྱ་རོག་གིས་ཟོས་སྐད་ཞན་འགྱུར། །འདི་ནི་ནེ་ཙོ་ད་རུ་ཧ། །རི་སྐེགས་ཀྱིས་མཐོང་ཅ་ཅོ་འབྱིན། །ངང་པས་ཟོས་ན་རྡེག་འཆོས་ལ། །ཤང་ཤང་ཏེའུ་ན་བར་འགྱུར། །སྲེག་པ་མིག་ནི་མི་ཆགས་བྱེད། །ཁྲུང་ཁྲུང་དག་ནི་འཛུར་བར་འགྱུར། །ཕུག་རོན་ཁུ་བྱུག་བྱ་གག་དང༌། །ངུར་བས་ཟོས་ན་འཆི་བར་འགྱུར། །བྱི་ལ་སྐྱོ་ཞིང་འདོར་བར་འགྱུར། །སྦྲེའུ་མི་གཙང་འདོར་བར་བྱེད། །རྨ་བྱས་དེ་མཐོང་དགའ་བར་བྱེད། །དུག་གི་དཔལ་ནི་ཉམས་པར་འགྱུར། །དེ་ལྟར་ཟས་ནི་དུག་ལྡན་པར། །ཤེས་ཤིང་ཅི་ནས་དེ་ཡི་ནི། །སྲོག་ཆགས་ཕྲ་མོ་ཡན་ཆད་ལ། །གནོད་པར་འགྱུར་བས་འབད་དེ་དོར། །རེག་ན་ཚ་ཞིང་གཡའ་ལན། །རིམས་འདེབས་འབྲུམ་འབྱུང་ཚོར་བ་ཆུང༌། །སེན་མོ་སྤུ་འབྱུང་ལུས་སྐྲངས་ཏེ། །དེ་ལ་དུག་ནི་རྣམ་འཇིག་པའི། །ཙནྡན་ཤུག་པ་པུ་ཤེལ་ཙི། །སོ་མའི་ཤུན་བཅས་བལ་བུའི་འདབ། །རུ་རྟ་སླེ་ཏྲེས་ཨ་ཀ་རུའི། །ཆུས་བཀྲུས་བླུགས་ཤིང་བསྐུ་བར་བྱ། །ཁར་ཆུད་ན་ནི་མཆིལ་སྣབས་མང༌། །ལྕེ་མ་ཆུ་སྦྲིད་ཅིང་བེམ་པོར་བྱེད། །ལུས་ཚན་ཞིང་སོ་བརྩེ་ལ། །རོ་མི་ཚོར་ཞིང་འགྲམ་སོ་འཐམས། །དེ་ལ་དུག་ཀུན་འཇོམས་སྨན་དང༌། །ཨུར་ཤི་སྩོགས་ཁུས་མཁུར་བཀང་
དབོ། །མ་ཞུའི་གནས་འབབ་རྡུལ་བ་དང༌། །བརྒྱལ་ཞིང་ལྟོ་སྦོས་མྱོས་མགོ་འཁོར། །བ་སྤུ་ལྡང་ཞིང་སྐྱུག་ལུས་ཚ། །མིག་མི་གསལ་ཞིང་སྙིང་མི་དྲན། །ཡན་ལག་ཐིག་ལེས་ཁྱབ་བར་འགྱུར། །ཞུ་བའི་གནས་སུ་ཕྱིན་ན་ཡང༌། །ཁ་དོག་སྣ་ཚོགས་སྐྱུག་པ་དང། །གཅིན་མངར་རབ་ཏུ་འཁྲུ་བར་འགྱུར། །རྨྱ་སྙོམ་སྐེམ་ཞིང་མདོག་སྐྱ་ལ། །གསུས་པ་ཆེ་ཞིང་ཉམས་སྟོབས་ཟད། །དེ་གཉིས་སློན་དང་ཁྲུས་བྱས་ནས། །སེར་གཉིས་བུ་རམ་གིར་ཀར་ནི། །སནྡུ་བ་རི་ནིས་པ་བ། །བ་ཤི་ཀ་དང་ཚིགས་བརྒྱ་བ། །ཏན་དུ་ལི་ཡའི་རྩ་བ་དང༌། །བྱ་གག་སྒོ་ང་བ་ལ་ཀུ་ཟ། །སྣར་གཏང་མིག་སྨན་བླུད་བྱ་བ། །དུ་གཞིའི་ཕྱིར་ནི་སྦྱར་བར་བྱ། །དུག་འཐུངས་པ་དག་སྟེང་དང་ནི། །དེ་བཞིན་འོག་ནི་སྦྱངས་གྱུར་ནས། །དུས་སུ་ཟངས་བཟང་བདར་ཕྱེ་མ། །སྦྲང་རྩེར་བཅས་པ་སྙིང་སྦྱོང་སྦྱིན། །སྙིང་ནད་སྦྱངས་ནས་གསེར་ཕྱེ་ནི། །ཞིབ་མོ་ཞོ་ཕྱེད་སྦྱིན་བྱས་ན། །པདྨའི་འདབ་མར་ཆུ་བཞིན་དུ། །གསེར་གྱིས་ཡན་ལག་ལ་མི་ཆགས། །ཚེ་ཡང་རིང་དུ་འཕེལ་བར་འགྱུར། །སྦྱར་དུག་ལ་ཡང་ཆོ་ག་འདིའོ། །ཁ་ཟས་དག་ཀྱང་མི་མཐུན་ཟོས། །སྦྱར་དུག་འདྲ་བར་ཤེས་པར་བྱ། །རླན་ཅན་ཤ་དང་མོན་སྲན་གྲེའུ། །སྦྲང་རྩི་འོ་མ་མྱུ་གུ་ཅན། །པདྨའི་རྩ་བ་ལ་ཕུག་གམ། །བུ་རམ་དང་བཅས་མི་འཕྲོད་ཡིན། །ཁྱད་པར་དུ་ནི་འོ་མ་ཉ། །ཉ་རྣམས་ལས་ཀྱང་ཙི་ལི་ཙི་མ། །འོ་མ་ལྷན་ཅིག་སྐྱུར་ཀུན་ནི། །མི་འཕྲོད་ཤིང་ཏོག་དེ་བཞིན་ནོ། །དེ་བཞིན་རྒྱ་སྲན་ཁྲེ་དག་དང༌། །བ་ལ་ཀུ་མུ་ཏི་འཕྲོད། །ལ་ཕུག་ལ་སྩོགས་སྔོ་རྔད་ནི། །ཟོས་ནས་འོ་མ་སྤང་བར་བྱ། །ཕག་རྒོད་བྱི་དུར་ཤ་མི་བཟའ། །ཁྱིམ་བྱ་བྲི་ཤ་ཏ་ཞོར་མིན། །ཤ་རློན་མཁྲིས་པ་དག་དང་ནི། །ལ་ཕུག་མ་ཤའི་ཚོད་མར་མིན། །ལེ་བརྒན་ཙི་ཚོད་ལུག་ཤར་མིན། །མྱུ་གུའི་ཚོད་མ་པད་རྩར་མིན། །མ་ཤའི་སྲན་ཚོད་བུ་རམ་ཞོ། །མར་འོ་ལི་གུ་རྩེའི་འབྲས་མིན། །ཆུ་ཤིང་འབྲས་བུ་དར་བར་མིན། །ཏ་ལའི་འབྲས་བུ་ཞོར་མི་འཕྲོད། །ཚབ་གཉིས་
པོ་བུ་རམ་དང༌། །སྦྲང་རྩི་ཀ་ཀམ་ཙིར་མིན། །དེ་ནི་ཉ་བཙོས་པའི་སྣོད་དང༌། །དོང་གྲ་བཙོས་བར་གཡོས་པ་མིན། །ཀ་མ་ཏ་ནི་སྣོད་གཞན་དུ། །བཙོས་ནས་ཉིན་མཚན་ལོན་མི་བཟའ། །ཉ་བརྡོས་པ་ཡི་སྣུམ་ལ་ནི། །པི་པི་ལིང་བརྔོས་སྤང་བར་བྱ། །མར་སར་ཁར་སྣོད་ཞག་བཅུ་ལོན། །གོ་བྱེའི་འབྲས་བུ་དྲོར་མི་བཟའ། །བ་ས་བསྲེགས་ཤར་མི་འཕྲོད་ཅིང༌། །དར་བར་ཀམ་པི་ལ་བཙོས་མིན། །འོ་ཐུག་དང་ནི་ཀྲི་སར། །ཆང་དང་ལྷན་ཅིག་མི་འཕྲོད་སྤང༌། །སྦྲང་རྩིར་མར་སར་ཞག་ཏིལ་མར། །ཆུ་རྣམས་གཉིས་གཉིས་གསུམ་གསུམ་མམ། །ཆ་མཉམ་ལྷན་ཅིག་ཟོས་པ་དག །ཕན་ཚུན་དག་ནི་མི་མཐུན་ནོ། །མར་སྦྲང་ཆ་ནི་མི་མཉམ་ཡང༌། །ཆར་པའི་ཆུ་ནི་འཐུངས་ན་གནོད། །སྦྲང་རྩི་པདྨའི་ས་བོན་དང༌། །སྦྲང་རྩི་འབྲུ་ཆང་ཁ་རར་མིན། །འོ་ཐུག་རྗེས་ལ་སྐྱོན་མར་མིན། །ཤ་མོ་ཡུངས་མར་བརྔོས་མི་འཕྲོད། །ཨུ་པོ་ཏ་ཀ་ཏི་ལ་ཚིགས་ལ། །བཙོས་པ་འཁྲུ་བར་བྱེད་པ་ཡིན། །བྱ་གག་ཤ་ནི་ཆང་དངས་དང༌། །ཀུལ་མ་ཤ་ཡི་ཐུག་མི་འཕྲོད། །དེ་ཉིད་ཕ་རྒོད་ཚི་ལ་བརྔོས། །སྲོག་ནི་འཕྲལ་དུ་འཇོམས་པར་བྱེད། །དེ་བཞིན་སྲེག་པ་རྨ་བྱ་དང། །ལ་བ་ཀ་པི་ན་ཛ་ལ་སྲམ། །ཨེ་རཎྜ་ཡི་མེ་ལ་ནི། །ཨེ་རཎྜ་མར་བརྡོས་མི་འཕྲོད། །ཧ་རིད་ཏྲ་ཤ་སྐྱེར་བ་ཡི། །ཐུར་མ་དག་ལ་བསྐྱོན་ནས་ནི། །སྐྱེར་བའི་མེ་ལ་བསྲེགས་གྱུར་པ། །འཕྲལ་དུ་སྲོག་ནི་འཇོམས་པར་བྱེད། །དེ་ཉིད་ཐལ་བརྡུལ་གྱིས་གོས། །སྦྲང་རྩིར་བཅས་པ་འཕྲོད་མ་ཡིན། །གང་ཡང་ཉེས་པ་མ་སྦྱངས་པ། །མདོར་ན་དེ་ནི་མི་འཕྲོད་ཡིན། །ཉེས་འདི་སྦྱང་བར་འདོད་པའམ། །ཡང་ན་དེ་དང་མི་མཐུན་པའི། །རྫས་དེ་ཉིད་ཀྱིས་དང་པོ་ནི། །ལུས་ནི་མངོན་པར་སྦྱང་བར་བྱ། །རྩོལ་ཅན་སྣུམ་བསྟེན་དྲོད་ཆེ་དང༌། །དར་ལ་བབ་ཅིང་ཉམས་སྟོབས་ལྡན། །གོམས་པར་ཟོས་དང་ཅུང་ཟད་ཟོས། །མི་འཕྲོད་གྱུར་ཀྱང་གནོད་མི་འགྱུར། །མི་འཕྲོད་ཆ་ཡིས་གོམས་བྱའམ། །ཆ་ཡིས་ཆ་ཡིས་ཡོངས་སུ་སྤང༌། །ཕན་པའང་དེ་བཞིན་བསྟེན་བྱ་སྟེ། །འདི་དག་གཉིས་གསུམ་གྱིས་
ཆོད་བྱ། །སྐྱོན་ནི་རིམ་གྱིས་འགྲིབ་པ་དང༌། །ཡོན་ཏན་རིམ་གྱིས་འཕེལ་འགྱུར་ན། །སླར་སྐྱེ་བར་ནི་མི་འགྱུར་ཞིང༌། །གཡོ་སྟན་འདོད་ལ་སྤྱོད། །རན་ཞིང་རིགས་པར་སྦྱར་བ་ཡིས། །ཁང༌། འཕྲོད་པ་གོམས་པར་གྱུར་པ་ཉིད། །འཕྲལ་དུ་སྤངས་དང་མ་བསྟེན་ལས། ཉེས་པ་རྣམས་ནི་འབྱུང་བར་འགྱུར། །གནོད་པ་གནོད་བྱའི་བདག་ཉིད་ཅན། །ཤིན་ཏུ་ཉེས་པར་གྱུར་པ་ལ། །ཕན་མེད་གནོད་པར་བྱེད་པ་ནི། །མཁས་པས་ཕྱིར་ཞིང་བྱ་མི་རིགས། །ཟས་དང་མལ་སྟན་འདོད་ལ་སྤྱོད། །རན་ཞིང་རིགས་པར་སྦྱར་བ་ཡིས། །ཁང་ཁྱིམ་འཆོས་པ་ལྟ་བུར་ནི། །རྟག་ཏུ་ལུས་ནི་གཟུང་བར་བྱ། །དེ་ལ་ཟས་ནི་བཤད་ཟིན་ཞིང༌། །དེ་དང་དེར་ནི་བཤད་པར་བྱ། །བདེ་སྡུག་སྦོམ་སྐེམ་སྟོབས་ཆེ་ཆུང༌། །བུད་མེད་ལ་ཕོད་མི་ཕོད་དང༌། །ཤེས་དང་མི་ཤེས་འཚོ་དང་འཆི། །གཉིད་ལ་རག་ནི་ལུས་པ་ཡིན། །དུས་མིན་ཧ་ཅང་ཐལ་ཆེས་དང༌། །གཉིད་ནི་ཀུན་ཏུ་འགེགས་པ་དག །བདེ་དང་ཚེ་ནི་ཉམས་བྱེད་དེ། །དུས་མཚན་གཉིས་པ་ལྟ་བུ་ཡིན། །མཚན་མོ་གཉིད་ནི་མ་ལོག་རྩུབ། །ཉིན་མོ་གཉིད་ལོག་སྣུམ་ལྕིར་འགྱུར། །ཙོག་པུར་འདུག་སྟེ་ཡུར་བདག །མིག་རྩུབ་བད་ཀན་མེད་པར་འགྱུར། །སོ་ག་རླུང་འཕེལ་སྟོབས་འཕྲོག་དུས། །རྩུབ་ཅིང་མཚན་མོ་ཐུང་བས་ན། །ཉིན་པར་གཉིད་ཕན་གཞན་དག་ཏུ། །དེ་ནི་བད་ཀན་མཁྲིས་པ་སྐྱེད། །སྨྲ་མང་བཞིན་དང་ལམ་གྱིས་དུབ། །ར་རོ་བུད་མེད་བསྟེན་ཁུར་ལས། །ཁྲོས་དང་མྱ་ངན་འཇིགས་པས་དུབ། །སྐྱིགས་བུ་དབུགས་མི་བདེ་ཚད་འཁྲུ། །རྒན་དང་བྱིས་པ་ཉམས་སྟོབས་ཟད། །གློ་རྡོལ་སྐེམ་དང་གཟེར་གྱིས་གནོད། །ཟས་མ་ཞུ་དང་བཅོམ་དང་སྨྱོ། །ཉིན་པར་གཉིད་ལོག་རིགས་མ་གཏོགས། །འདི་དག་དེ་བཞིན་ལུས་ཟུངས་སྙོམས། །བད་ཀན་སྐྱེས་ཤིང་ལུས་བརྟས་གྱུར། །ཚིལ་ཆེ་བད་ཀན་མང་དང་སྣུམ། །རྟག་ཟ་ཉིན་པར་གཉིད་མ་ལོག །དུག་གིས་ཕོག་དང་ལྐོག་ནད་ཅན། །མཚན་མོ་ནམ་ཡང་གཉིད་མ་ལོག །དུས་མིན་གཉིད་ལོག་རྨོངས་བག་དང༌། །རིམས་
སྐྱེད་རྨུགས་ཤིང་ཆམ་པས་འདེབས། །མགོན་སྐྲང་ཞིང་སློན་སྒྱིད་སྒྱུར། །རྩ་ཡི་རྒྱུན་འགགས་མེ་དྲོད་ཉམས། །དེ་ལ་བསྙུང་དང་སློན་སྨན་དང༌། །རྡུལ་འབྱུང་སྣ་སྨན་བཏང་བ་དང༌། །གཉིད་ཆེས་གྱུར་ལ་སྐྱུག་སྨན་རྣོ། །མིག་སྨན་རྣོ་དང་སྣ་སྨན་དང། །སྨྱུང་བ་སེལ་ལས་བུད་མེད་བསྟེན། །མྱ་ངན་འཇིགས་དང་ཁྲོས་བ་སྦྱར། །འདི་དག་ཉིད་ཀྱིས་གཉིད་དྲགས་པ། །འཇིག་ཅིང་བད་ཀན་རབ་ཟད་བྱེད། །གཉིད་ཡར་བ་ཡིས་ཡན་ལག་སྙོམས། །ཀླད་པ་ལྕི་ཞིང་གླལ་འོང་ལ། །མི་གསལ་ན་ཞིང་མགོ་འཁོར་ལ། །ཟས་མི་འཇུ་རྨྱ་རླུང་སྐྱེད་ནད། །དེ་བས་མཚན་མོ་དུས་བཞིན་དུ། །ཅི་བདེར་གཉིད་ནི་ལོག་པར་བྱ། །མ་གོམས་གཉིད་ཀྱིས་མ་ལོག་ན། །ནང་པར་མ་ཟོས་ཕྱེད་གཉིད་ལོག །གཉིད་ཡར་གྱུར་ན་འོ་མ་དང༌། །ཆང་དང་ཤ་ཁུ་ཞོ་རྣམས་བཏུང༌། །ལུས་བསྐུ་དྲིལ་དང་ཁྲུས་བྱ་ཞིང༌། །མགོ་བསྐུ་རྣ་བ་མིག་དག་བྱ། །ན་ཆུང་ལག་ངར་གྱིས་འཁྱུད་དང༌། །སེམས་བདེ་བྱ་བ་ཟིན་པ་དང༌། །ཡིད་དང་རྗེས་མཐུན་ཡུལ་ལྡན་པ། །ཅི་འདོད་གཉིད་འོང་བདེ་བར་སྐྱེད། །ཉལ་པོའི་བདེ་ལ་སེམས་མ་ཆགས། །ཚངས་པར་སྤྱོད་པ་ལ་དགའ་བ། །ཆོག་ཤེས་པ་ཡིས་མགུ་བའི་གཉིད། །རང་གི་དུས་ལས་འདའ་མི་བྱེད། །ཉལ་བོའི་ཆོས་ནི་སྤང་བྱ་བ། །བཀན་མིན་ཟླ་མཚན་ལྡན་པ་དང༌། །ཡིད་དུ་མི་འོང་མི་སྡུག་སྤྱོད། །མངལ་ནི་སྐྱོན་གྱིས་ཁྱབ་པ་དང༌། །རབ་སྦོམ་སྐེམ་དང་བཙས་པ་དང༌། སྦྲུམ་མ་གཞན་གྱི་བུད་མེད་དང༌། །རིགས་གཞན་སྐྱེ་གནས་མི་མཐུན་དང༌། །བླ་མ་ལྷ་དང་རྒྱལ་པོའི་གནས། །མཆོད་རྟེན་དུར་ཁྲོད་གསོད་གནས་དང༌། །བསྟི་ས་ལམ་གྱི་བཞི་མདོ་ཆུ། །དུས་ཚིགས་ཉིན་མོ་ཡན་ལག་མིན། །སྙིང་ག་མགོ་བོར་བརྡེག་སྤང་བྱ། །འགྲངས་ཆེས་ལྟོགས་དང་སྟན་བྲལ་དང༌། །ཡན་ལག་མི་བདེར་གནས་དང་སྐོམ། །བྱིས་པ་རྒན་དང་ཤུགས་གཞན་ཉེན། །ནད་པ་ཡིས་ཀྱང་འཁྲིག་པ་སྤང༌། །དགུན་དུས་རོ་ཙ་བྱས་དྲགས་ཚེ། །འདོད་པས་འདོད་པ་བསྟེན་བར་བྱ། །དཔྱིད་སྟོན་ཞག་ནི་གཉིས་
གཉིས་ནས། །སོག་དབྱར་ཚེ་ཟླ་ཕྱེད་ཅིང༌། །གཞན་དུ་བུད་མེད་ལ་ཞུགས་ན། །མགོ་འཁོར་ངལ་དང་བླ་མཐུ་ཉམས། །སྟོབས་དང་ལུས་ཟུངས་དབང་པོ་ཉམས། །དུས་མིན་འཆི་བར་བྱེད་པ་ཡིན། །བུད་མེད་དག་ལ་ལེགས་གདམས་ན། །དྲན་དང་ཡིད་གཞུངས་ནད་མེད་ཚེ། །དབང་པོ་རྟས་ཤིང་གྲགས་སྟོབས་རྣམས། །ལྷག་པར་འཕེལ་ཞིང་རྒས་སྲར་འགྱུར། །ཁྲུས་དང་བྱུག་པ་རླུང་བསིལ་ཁར་ལ་སོགས་བཟའ། །ཆུ་བསིལ་འོ་མ་ཤ་ཁུ་སྲན་ཚོད་ཆང་དངས་འཐུངས། །ཉལ་པོ་དགའ་བྱས་འོད་ད་དང་བྲལ་གྱུར་རྗེས་ལ་བསྟེན། །དེ་འདྲས་དེ་ཡི་ལུས་མདངས་སྟོབས་སླར་སྐྱེ་བར་འགྱུར། །སྨན་པ་ཐོས་སྤྱོད་ཕུན་ཚོགས་ལྡན་ཞིང་ལས་མཁས་སྙིང་རྗེ་ཅན། །གགས་དང་གནོད་མེད་ལུས་སྲུང་བྱེད་པ་ཉེ་བར་བཞག་བྱས་ནས། །རྒྱལ་པོ་རང་གི་དགེ་བའི་འབྲས་བུའི་ལོངས་སྤྱོད་བདེར་སྤྱོད་ཅིང༌། །ནད་མེད་མཐུ་དང་གཟི་བརྗིད་གྲགས་པ་ཡུན་རིང་འཕེལ་བར་འགྱུར། །ཡན་ལག་བརྒྱད་པའི་སྙིང་པོ་བསྡུས་པ་ལས། །མདོའི་གནས་ཀྱི་ལེའུ་བདུན་པའོ།། །།དེ་ནས་ཁ་ཟས་ཀྱི་ཚོད་རན་པར་བཟའ་བའི་ལེའུ་བཤད་པར་བྱའོ། །དུས་ཀུན་དུ་ནི་ཚོད་ཟིན་བཟའ། །དེ་ནི་མེ་དྲོད་སྐྱེད་བྱེད་ཡིན། །རྫས་ནི་ལྕི་བའམ་ཡང་བའང་རུང༌། །ཆད་ལ་ལྟོས་པར་བྱ་བ་ཡིན། །ལྕི་བ་ལས་ནི་ཕྱེད་འགྲངས་བྱ། །ཡང་བ་ལས་ནི་རབ་འགྲངས་མིན། །བདེ་བླག་འཇུ་བ་དེ་ཙམ་ལ། །ཚོད་ཟིན་ཞེས་ནི་བཤད་པ་ཡིན། །ཟས་ཚོད་མ་ཟིན་ཆུང་གྱུར་ན། །སྟོབས་དང་གཟི་མདངས་འཕེལ་མི་འགྱུར། །རླུང་གི་ནད་ནི་ཐམས་ཅད་ཀྱི། །རྒྱུ་ཉིད་དུ་ནི་འགྱུར་བ་ཡིན། །ཚད་ལས་ཤིན་ཏུ་ཆེས་བ་ཡང༌། །ཉེས་པ་ཐམས་ཅད་མྱུར་དུ་སྐྱེད། །མ་ཞུའི་ཟས་ནི་མི་བཟད་པ། །དེ་ཡིས་རླུང་སྩོགས་གཟིར་གྱུར་པས། །ཅིག་ཅར་རྣམ་པར་འཁྲུགས་འགྱུར་ཞིང༌། །དེ་ཉིད་དུ་ནི་ཞུགས་གྱུར་ནས། །རྩ་སྒོ་འགགས་ཤིང་བེ་སྣབས་སྐྱེད། །སྟེང་དང་འོག་གི་ལམ་དག་ཏུ། །བསྐྱོད་པས་གསུང་ཅིང་ཟུག་བྱེད་པ། །བརྐམ་ཆགས་ཅན་ལ་འཕྲལ་སྐྱེད་བྱེད། །དེ་ལས་རླུང་ལས་གཟེར་མགོ་
འཁོར། །ཁོང་སྦོས་འདར་ཞིང་རེངས་སྩོགས་འགྱུར། །མཁྲིས་པ་ལས་ནི་འཁྲུ་རིམས་འདེབས། །ཁོང་ཚ་སྐོམ་ཞིང་ཁ་སྩོགས་འགྱུར། །བད་ཀན་སློན་ཞིང་ཡན་ལག་ལྕི། །ཚིགས་ཐོག་མཆིལ་ལ་མང་བར་འགྱུར། །ཁྱད་པར་དུ་ནི་ཉམ་ཆུང་ཞིང༌། །མེ་དྲོད་ཞན་དང་ཤུགས་བཀག་པའི། །ཟས་ནི་རླུང་གིས་བཀག་པ་དང༌། །བད་ཀན་གྱིས་ནི་བར་བཀག་པའི། །ཉེས་པ་བེའུ་སྣབས་དཀྲུགས་པས་ན། །ཟུག་རྔུ་ཟུག་པ་ལྟ་བུར་གནས། །འཁྲུ་དང་རློན་པར་མི་བྱེད་པར། །གཟེར་ལ་སོགས་པ་མི་བཟད་པ། །བེའུ་སྣབས་དེ་ཡིན་ཉེས་རབ་གདུག །བེ་སྣབས་མི་བཟད་ཀྱིས་སྦུབས་བཀག །རྩིབ་ལོགས་ཀུན་ཏུ་དྲང་པོར་འགྲོ། །ཤིང་བཞིན་རེངས་པར་འགྱུར་ན་ནི། །མ་ཞུ་ཤིང་འདྲ་ཞེས་བྱ་སྟེ། །མྱུར་དུ་གསོད་བྱེད་དེ་སྤང་བྱ། །མི་འཕྲོད་ལྷག་ཟ་མ་ཞུ་བར། །ཟད་བྱེད་མ་ཞུ་དུག་གི་ནི། །མཚན་ཉིད་ཅན་དེ་མི་བཟད་པ། །དུག་གི་མིང་ཅན་གང་ཡིན་ཏེ། །དུག་གི་ཚུལ་ཅན་མྱུར་གསོད་བྱེད། །གསོ་དཔྱད་བྱ་བར་དཀའ་བས་སྤང༌། །དེ་ནས་མ་ཞུའི་བེའུ་སྣབས་འགྱུར། །གསོར་རུང་ཤུ་དག་རྒྱམ་ཚ་དང༌། །པོ་སོན་ཆ་བཅུག་ཆུ་དྲོན་ནི། །འཐུང་བས་སྐྱུགས་བཅུག་དེ་ནས་ན། །དུག་དང་མས་གཏོང་རིང་བུ་དག །དྲི་མ་རླུང་དག་ལེགས་རྒྱུ་སྦྱར། །ཡན་ལག་འཁུམས་པར་གྱུར་པ་ལ། །ཤིན་ཏུ་དུགས་བྱ་དཀྲི་བར་བྱ། །གསུད་ནད་ཤིན་ཏུ་འཕེལ་བ་དང༌། །རྟིང་པར་མེ་བཙའ་གདབ་པ་བསྔགས། །དེ་ནི་དེའི་ཉིན་ནི་སྨྱུང་པར་གཞག །ཁྲུས་བཏང་ལྟ་བུར་ཉེ་བར་སྤྱད། །མ་ཞུ་མི་བཟད་ཉེན་གྱུར་ཀྱང༌། །གཟེར་འཇོམས་སྨན་ནི་བཏུང་མི་བྱ། །བེའུ་སྣབས་མ་ཞུ་མེ་དྲོད་ཉམས། །ནད་ཀྱི་སྨན་ནི་འཇུ་མི་ནུས། །དེ་ཡིས་ནད་པ་འཕྲལ་དུ་ནི། །ཐུང་ཞིང་འཆི་བ་དག་ཏུ་འང་འགྱུར། །ཁ་ཟས་ཞུ་ནས་ལྟོ་བ་ནི། །རྩུབ་སྲར་གྱུར་ལ་སྨན་དག་ཀྱང༌། །ཉེས་པའི་ལྟག་མ་སྦྱང་ཕྱིར་དང༌། །ཕོ་བའི་མེ་ནི་བསྐྱེད་ཕྱིར་གཏང༌། །མ་ཞུའི་འགྱུར་བ་ཞི་བ་དག །ཉམས་སྨད་པར་ནི་བྱས་ལས་གྱུར། །དེ་གསུམ་ཉེས་པ་
རྣམ་གསུམ་ནི། །བརྟགས་ནས་རབ་ཏུ་སྦྱར་བར་ཡ། །དེ་ལ་ཆུང་ལ་སྨྱུང་བ་ཕན། །འབྲིང་ལ་སྨྱུང་དང་བཞུ་བྱ་བ། །ཆེན་པོ་ལ་ནི་སྦྱང་བ་སྟེ། །དེ་ཡིས་དྲི་མ་རྩ་ནས་འབྱིན། །དེ་བཞིན་ནད་གཞན་དག་ལ་ཡང༌། །རང་ནད་གཞི་ལས་གོ་བཟློག་པས། །གསོ་བ་དེ་ལས་རྗེས་འབྲེལ་ཡོད། །རྒྱུ་ལས་གོ་བཟློག་རྣམ་སྤང་བ། །སྨན་པས་ཇི་ལྟ་ཇི་ལྟ་བར། །ནད་ལས་གོ་བཟློག་སྦྱར་བའམ། །དེའི་དོན་བྱེད་པ་སྦྱོར་བར་བྱ། །ཉེས་སྨིན་མེ་དྲོད་སྐྱེད་འགྱུར་ནས། །ཉམས་རྟས་སྣུམ་གྱིས་བྱུག་པ་དང༌། །བཏུང་དང་འཇམ་རྩི་སྩོགས་རིགས་སྦྱར། །བད་ཀན་མ་ཞུའི་བེ་སྣབས་ཏེ། །དེ་ནི་མིག་དང་མཁུར་བ་སྐྲང༌། །སྒྲེགས་པ་ཟོས་མ་ཐག་འདྲ་འབྱུང༌། །མཆིལ་མ་མང་ཞིང་ཉེས་གཡོ་ལྕི། །རླུང་ལས་རེངས་བག་གཟེར་བ་དང༌། །བཤང་གཅི་འགགས་ཤིང་སྦོས་དྲོད་ཉམས། །མཁྲིས་ལས་ཁོང་ཚ་སྐོམ་མགོ་འཁོར། །རྨོངས་བག་སྒྲེགས་བ་སྐྱུར་ཞིང་ཚ། །མ་ཞུ་བེ་སྣབས་སྨྱུང་བར་བྱ། །རེངས་བག་ལས་ནི་དུགས་རབ་བྱ། །ཚ་བའི་མ་ཞུ་སྐྱུག་སྨན་དག །བཏང་བའམ་གནས་སྐབས་གང་ཕན་བྱ། །མ་ཞུའི་བེ་སྣབས་ལྕི་བ་ན། །རྩ་སྦུབས་ཐིམ་ལས་ཡུན་རིངས་ཅན། །བད་ཀན་རླུང་ནི་འདྲེས་མཚན་མ། །དེ་དང་མཉམ་པར་བསྒྲུབ་པར་བྱ། །དངས་མ་ལུས་ལས་ཟས་དད་ཆུང༌། །སྙིང་ན་སྒྲེགས་པ་མནམ་པར་འགྱུར། །འདི་ལ་ཅུང་ཟད་གཉིད་ལོག་བྱ། །མ་ཞུ་ཀུན་གྱིས་ཉིན་པར་ནི། །ཟས་མ་ཟོས་པར་གཉིད་ལོག་ལ། །བཀྲེས་གྱུར་ཡང་ལས་རན་པར་བཟའ། །མ་ཞུ་སྤྱི་ཡི་མཚན་མ་ནི། །རྣམ་པར་འགགས་སམ་ཤས་ཆེར་འབྱུང༌། །ན་ཞིང་རླུང་ནི་མི་གསལ་རྒྱུ། །མཁྲེགས་ཤིང་ལུས་ལྕི་མགོ་བོ་འཁོར། །ཟས་ཚོད་ལྷག་པར་གྱུར་པ་ཉིད། །གཅིག་བུམ་ཞུམ་ཟད་ཀྱི། །མི་འདོད་གགས་བྱེད་ཚིག་མ་ཚོས། །ལྕི་དང་རྩུབ་དང་མི་གཙང་དྲང༌། །ཁོང་ཚ་སྐོམ་དད་ཆུ་མང་དང༌། །བསྲེས་པའི་ཟས་ནི་འཇུ་མི་འགྱུར། །མྱ་ངན་ཁྲོ་དང་བཀྲེས་པ་ཡིས། །ཉེ་བར་གདུངས་ཤིང་ཟས་མི་འཇུ། །ཕན་དང་མི་ཕན་བསྲེས་པ་དག །ཟོས་པ་མཉམ་ཟ་
ཡིན་པར་འདོད། །འགྲངས་རྗེས་སླར་ཡང་ཟ་གྱུར་པ། །ལྷག་པར་ཟ་བ་ཡིན་ཞེས་བྱ། །དུས་མིན་ཆེ་བའམ་ཆུང་ཟོས་པ། །མི་མཉམ་པར་ནི་ཟབ་ཡིན། །གསུམ་པོ་འདིས་ཀྱང་གསོད་པའམ། །མི་བཟད་ནད་ཀྱིས་འདེབས་པར་བྱེད། །དུས་སུ་གོམས་ཤིང་གཙང་ལ་ཕན། །སྣུམ་དྲོ་ཡང་དང་མ་ཡངས་དང༌། །རོ་དྲུག་ལྡན་ཞིང་མངར་བག་ཆེ། །ཤིན་ཏུ་མྱུར་མིན་དལ་བར་མིན། །ཁྲུས་བྱས་བཀྲེས་ཤིང་དབེན་བར་གནས། །ཁ་གདོང་ལག་པ་རྐང་པ་བཀྲུས། །ལྷ་དང་ཡི་དྭགས་རྗེད་ཅིང་སྦྱིན། །བླ་མ་བྱིས་པ་མགྲོན་མཆོད་བྱས། །དུད་འགྲོ་རྣམས་ཀྱང་རབ་བརྟགས་ཤིང༌། །བདག་ཉིད་ལེགས་པར་བརྟགས་ནས་ནི། །མ་སྨད་སྨྲའམ་ཡིད་འོང་སྨྲ། །སྐྱེ་བོ་གཙང་ཞིང་གུས་པས་སྟོབས། །ཡིད་འོང་གཉེན་དང་ལྷན་ཅིག་བཟའ། །ཟས་ནི་རྩྭ་དང་སྐྲ་སྦུ་སྩོགས། །འདྲེས་ཤིང་ཁོང་དུ་སླར་སྲོས་དང༌། །ཚོད་མ་ཟས་ངན་མང་བ་དང༌། །ཚ་ཆེས་ལན་ཚྭ་མང་བ་སྤང༌། །ཕྲུམ་དང་ཞོ་དང་ཕྲུམ་སྐམ་དང༌། །བ་ཚ་ཚ་དང་ལ་ཕུག་རྗེན། །ཕག་རྒོད་ལུག་དང་བ་གླང་ཉ། །མ་ཧེའི་ཤ་དང་རིད་དང་སྐམ། །མ་ཤ་ཆུ་ལྡུམ་ནི་ས་ཤ་བ། །པད་རྩ་འབྲས་འཁུར་མྱུ་གུར་གྱུར། །ཚོད་མ་སྐམ་དང་ནས་འདྲ་དང༌། །བུ་རམ་ཕྲ་མོ་བཟའ་མི་བྱ། །སཱ་ལུའི་འབྲས་དང་འགྲོ་དང་ནས། །དྲུག་ཅུ་པ་དང་སྐམ་སའི་ཤ །ཨ་རུ་སྐྱུ་རུ་རྒུན་འབྲུམ་དང༌། །མུངྒ་ཁ་ར་པ་ཏོ་ལ། །ཞུན་མར་ཆར་ཆུ་འོམ་དང༌། །སྦྲང་རྩི་སེའུ་འབྲུམ་རྒྱམ་ཚ་བཟའ། །མིག་དང་སྟོབས་ཕྱིར་མཚན་མོ་ནི། །འབྲས་གསུམ་སྦྲང་རྩི་མར་སར་བཟའ། །མི་ནར་འཇོག་པར་བྱེད་གང་དང༌། །ནད་སེལ་བྱེད་པ་གང་ཡིན་བསྟེན། །པད་རྩ་བུར་ཤིང་ཙོ་ཙ་དང༌། །མོ་ཙ་ཨ་མྲའི་འབྲས་བུ་དང༌། །ལ་དུ་འཁུར་བ་བུ་རམ་ཅན། །ཟས་ནི་ལྕི་ཞིང་སྣུམ་པ་དང༌། །མངར་ཞིང་འཇུ་དཀའ་བསྟེན་པ་རྣམས། །དང་པོ་ཉིད་དུ་བཟའ་བར་བྱ། །དེ་ལས་བཟློག་པ་ཐ་མར་བཟའ། །བར་དུ་སྐྱུར་ཚ་ལན་ཚྭ་ཅན། །ལྟོ་ཡི་ཆ་གཉིས་ཟས་ཀྱིས་ཏེ། །ཆ་གཅིག་སྐོམ་གྱིས་དགང་བར་བྱ། །
རླུང་ལ་སོགས་པའི་གནས་སུ་ནི། །ཆ་བཞི་པ་ནི་ལྷག་མར་གཞག །ཟོས་རྗེས་སྐོམ་ནི་བསིལ་བའི་ཆུ། །ནས་དང་བག་ཕྱེའི་གཡོས་བྱས་ཟོས། །ཞོ་ཆང་དུག་འབགས་སྦྲང་རྩི་ལ། །ཆུ་བསིལ་རྗེས་སུ་འཐུངས་ན་པན། །མི་འཇུ་འགགས་ལ་ཆུ་དྲོན་གཏང༌། །ཆད་མ་མུངྒའི་གནོད་པ་ལ། །ཞོག་ཆུ་དང་དར་བ་དང༌། །རང་སྒྱུར་རྩབ་མོ་བཏུང་བར་བྱ། །སྐེམ་པོ་རྒྱས་ཕྱིར་ཆང་བཏུང་སྟེ། །སྦོམ་པོས་སྦྲང་རྩིའི་ཆུ་བཏུང་ངོ༌། །གཅོང་ཆེན་ནད་ལ་ཤ་ཁུ་བཏུང༌། །དྲོད་ཆུང་ཤ་ཟོས་ཆང་བཏུང་བྱ། །ནད་དང་སྨན་སྩོགས་སྦྲུམ་བུད་མེད། །ཟན་བཅད་དཀའ་ཐུབ་ལས་རྣམས་ཀྱིས། །སྐེམ་དང་བྱིས་པ་རྒན་པོ་ལ། །འོ་མ་བདུད་རྩི་ལྟ་བུར་ཕན། །མདོར་ན་ཟོས་རྗེས་བཏུང་བ་ནི། །གང་ཞིག་ཟས་དང་ཡོན་ཏན་གྱིས། །མི་མཐུན་མི་འཕྲོད་མེད་གྱུར་པ། །དེ་ནི་རྣམ་པ་ཀུན་ཏུ་བསྔགས། །ཟས་རྗེས་སྐོན་འཐུངས་ངོམས་དང་ཁྱབ། །སྟོབས་འཕེལ་ལུས་ནི་བརྟན་བྱེད་ལ། །ཟས་སྡུད་སྙི་བར་འགྱུར་བ་དང༌། །འདུལ་ཞིང་རྣམ་པར་འཇུ་བར་འགྱུར། །དེ་ནི་ནམ་ཚང་ཡན་ཆད་ནད། །དབུགས་ལུད་གློ་རྡོལ་ཆམ་པ་དང༌། །གླུ་ལེན་སྨྲ་མང་ལ་ཆགས་དང༌། སྐད་འགགས་པ་ལ་གནོད་པ་ཡིན། །ལུས་ལས་རྣག་འཛག་གཅིན་ནད་མིག །ལྐོག་ནད་རྨ་ཡི་ནད་ཀྱིས་ཉེན། །སྐོམ་སྤང་ཀུན་གྱིས་སྐོམ་འཐུངས་ནས། །མང་སྨྲ་ལམ་ཞུགས་ཉལ་བ་སྤང༌། །ཟས་ཟོས་ནས་ནི་ཉི་ཚན་མེ། །རྟ་ཞོན་རྐྱལ་དང་འདེགས་པ་སྤང༌། །བཤད་དང་གཅི་གསལ་སྙིང་ལ་དྲི་མེད་ཉེས་པ་ལམ་མིན་པར་མི་འགྲོ། །སྒྲེགས་པ་དག་ཅིང་བྲུ་བ་ཚ་གྱུར་ཐུར་གྱི་རླུང་ནི་ཐ་མལ་རྒྱུ། །དེ་བཞིན་མེ་ཡི་དྲོད་བདོ་དབང་པོ་གསལ་ཞིང་ལུས་ཀྱང་རབ་ཏུ་ཡང༌། །ཟས་ཀྱི་ཚོད་རན་ཆོ་གར་སྦྱར་བཞིན་ཟ་བ་དེ་ནི་དུས་སུ་འདོད། །ཡན་ལག་བརྒྱད་པའི་སྙིང་པོ་བསྡུས་པ་ལས། །མདོའི་གནས་ཀྱི་ལེའུ་བརྒྱད་པའོ།། །།དེ་ནས་སྨན་ལ་སྩོགས་པའི་བྱེ་བྲག་ཤེས་པར་བྱ་བའི་ལེའུ་བཤད་པར་བྱའོ། །སྨན་རྣམས་ཉིད་ཀྱི་རོལ་སྩོགས། །དེ་ནི་དེ་ལ་བསྟེན་པས་མཆོག །དེ་ཡང་འབྱུང་
ལྔའི་བདག་ཉིད་ཅན། །སལ་བརྟེན་ཏེ་སྐྱེ་བ་ཡིན། །ཆུ་ནི་སྐྱེ་གནས་མེ་དང་རླུང༌། །ནམ་མཁའ་རྣམས་ནི་ཚོགས་པ་ལས། །དེ་སྐྱེས་གྱུར་དང་ཁྱད་པར་ཕྱུང༌། །མིང་ནི་ཤས་ཆེ་ལས་གྱུར་ཡིན། །དེ་བས་འབྱུང་བ་འདུས་པ་ལས། །བྱུང་བས་སྨན་ནི་རོ་གཅིག་མིན། །དེ་ཕྱིར་ནད་ཀྱང་ཉེས་གཅིག་མིན། །དེ་ལ་གསལ་བ་རོ་ཞེས་བཤད། །མི་གསལ་རོ་རྗེས་མཐའ་མར་ནི། །ཅུང་ཟད་གསལ་བདག་ཏུ་འང་འདོད། །སྨན་གྱི་ཡོན་ཏན་ལྕི་སོགས་དང༌། །རོ་ནི་ས་ལ་སྩོགས་བསྟེན་པས། །མཚུངས་པར་སྤྱོད་པ་ཉེར་གདགས་པས། །རོ་ལས་མིང་དུ་བཏགས་པ་ཡིན། །དེ་ལ་སའི་སྨན་ལྕི་དང་སྤོམ། །སྲ་ཞིང་དྲི་ཡི་ཤེས་རབ་ཆེ། །ལྕི་ཞིང་བརྟན་དང་འདུས་པ་དང༌། །ཉེ་བར་འཕེལ་བར་བྱེད་པ་ཡིན། །ཆུ་ཡི་གཤེར་དང་ལྕི་བསིལ་སྣུམ། །རྟུལ་ཞིང་བསྐལ་རོ་ཤས་ཆེ། །འཇམ་ཞིང་བད་ཀན་འདྲ་བ་ལ། །འདྲུལ་ཞིང་ཚིམ་བྱེད་སྡུད་པར་བྱེད། །མེ་ཡི་རྩུབ་རྣོ་ཚ་ཞིང་སྐམ། །ཕྲ་ཞིང་གཟུགས་ཀྱི་ཡོན་ཏན་ཆེ། །ཚ་ཞིང་འབར་ལ་མདོག་སྐྱེད་ཅིང༌། །གསལ་ཞིང་སྨིན་པའི་བདག་ཉིད་ཅན། །རླུང་གི་རྩུབ་ཅིང་ཁྱབ་ལ་ཡང༌། །རེག་པའི་ཡོན་ཏན་ཤས་ཆེ་ཡིན། །རྩུབ་ཅིང་ཡང་ལ་དྲི་མ་སེལ། །རྣམ་དཔྱོད་ན་བར་བྱེད་པ་ཡིན། །ནམ་མཁའི་ཕྲ་ཞིང་དངས་ལ་ཡང༌། །སྒྲ་ཡི་ཡོན་ཏན་ཤས་ཆེ་སྟེ། །ཁོང་སྟོང་ཡང་བར་བྱེད་པ་ཡིན། །དེ་ལྟར་འགྲོ་ན་དོན་དང་ནི། །སྦྱོར་བ་སྣ་ཚོགས་དབང་གིས་ནི། །སྨན་མིན་ཅི་ཡང་ཡོད་མ་ཡིན། །དེ་ལ་སྨན་ནི་གྱེན་དུ་འགྲོ། །ཕལ་ཆེར་མེ་དང་རླུང་ཤས་ཆེ། །ཐུར་དུ་འགྲོ་བ་ཕལ་ཆེར་ནི། །ས་ཆུའི་ཡོན་ཏན་ཤས་ཆེར་ཡིན། །དེ་ལྟར་སྨན་ནོ་རོའི་བྱེ་བྲག །འདི་ཡི་འོག་ནས་སྟོན་པ་ཡིན། །སྨན་མཐུ་ལ་ལས་བཤད་པ་ནི། །ལྕི་སྣུམ་བསིལ་དང་འཇམ་པ་དང༌། །ཡང་རྩུབ་ཚ་དང་རྣོ་བ་སྟེ། །དེ་ལྟར་རྣམ་པ་བརྒྱད་དུ་འདོད། །སྨན་མཐུ་ཙར་ཀས་བཤད་པ། །གང་གིས་བྱ་བ་གང་བྱེད་པ། །མཐུ་མིན་ཅིར་ཡང་མི་བྱེད་ཀྱི། །དེ་དག་ཐམས་ཅད་མཐུ་ཡིས་བྱེད། །དེས་ན་ལྕི་ལ་སྩོགས་པ་ཉིད། །ནུས་པའི་ཁྱད་པར་ལྡན་པ་དང༌། །ཡོན་ཏན་མ་
ལུས་སྙིང་པོར་ནི། །གྱུར་པས་མཐུ་ཞེས་བཤད་པ་དག །དོན་དང་མཐུན་པར་བཏགས་པ་ཡིན། །གཅིས་པ་མང་དུ་ཡོད་ན་ཡང༌། །ཐ་སྙད་གཙོ་བོ་ཉིད་ཀྱིས་ཡིན། །དེ་བས་གོ་ནི་བཟློག་པའི་ཕྱིར། །དེ་ནི་རོ་ལ་སྩོགས་པ་ལ། །སྲིད་དུ་ཟིན་ཀྱང་མ་བཤད་དེ། །དེ་བས་ལྕི་བ་ལ་སོགས་ཡིན། །གཞན་དག་ཚ་དང་བསིལ་ཉིད་གཉིས། །སྟོབས་ཡིན་ཞེས་ཀྱང་སྟོན་པར་བྱེད། །སྨན་ནི་སྣ་ཚོགས་བདག་ཉིད་ཅན། །ཉི་མ་ཟླ་བའི་སྟོབས་ཅན་ཡིན། །འགྲོ་འདི་གསལ་དང་མི་གསལ་ལས། །ནམ་ཡང་འདའ་བར་མི་འགྱུར་རོ། །དེ་ལ་ཚ་བ་མགོ་འཁོར་སྐོམ། །རྨྱ་རྡུལ་ཚ་ཞིང་མྱུར་འཇུ་བྱེད། །རླུང་དང་བད་ཀན་ཞི་བར་བྱེད། །བསིལ་བ་དག་ནི་ཚིམ་བྱེད་ཅིང༌། །འཚོ་དང་རེངས་པར་བྱེད་པ་དང༌། །ཁྲག་དང་མཁྲིས་པ་རབ་དང་བྱེད། །ཕོ་བའི་མེ་དང་ཕྲད་པ་ལས། །གང་ཞིག་རོ་གཞན་བྱུང་གྱུར་པའི། །རོ་རྣམས་ཀྱི་ནི་མཐར་ཞུ་བ། །དེ་ནི་ཞུ་བ་ཞེས་བཤད་དོ། །མངར་དང་ལན་ཚྭ་ཞུ་རྗེས་མངར། །སྐྱུར་བའི་ཞུ་རྗེས་སྐྱུར་བ་ཡིན། །ཁ་དང་བསྐ་དང་ཚབ་རྣམས། །ཞུ་རྗེས་ཕལ་ཆེར་ཁ་བ་ཡིན། །རོ་དང་ཞུ་རྗེས་འབྲས་བུ་མཉམ། །དེ་ལ་སྨན་ནི་བཟང་དང་ངན། །ལ་ལ་རོ་ཡིས་ལས་བྱེད་ལ། །གཞན་དག་འཇུ་བར་བྱེད་པ་ཡིན། །ཡོན་ཏན་གཞན་དང་ནུས་པ་དང༌། །མཐུ་ཡིས་ལ་ལ་བྱེད་པ་ཡིན། །སྨན་གྱི་རོ་སྩོགས་གང་དང་གང༌། །སྟོབས་ལྡན་ཉིད་ཀྱིས་གནས་བྱེད་དེ། ཤིན་ཏུ་ཟིལ་མནན་དེ་དང་དེ། །སྒྲུབ་བྱེད་རྒྱུ་ནི་ཉིད་དུ་གནས། །ཡོན་ཏན་མི་འཕྲོད་སྦྱར་བ་ནི། །མང་པོས་ཉུང་ངུ་ཟིལ་གྱིས་གནོན། །རོ་དང་འཇུ་བའི་མཐུ་དག་ནི། །དེ་ཡི་སྟོབས་ཀྱི་ཟིལ་གྱིས་གནོན། །རོ་སྩོགས་དེ་ལྟར་སྟོབས་ནི་མཉམ། །མ་བཅོས་པ་ཡི་སྟོབས་དང་ལྡན། །རོ་སྩོགས་མཉམ་པའི་ལས་གང་ནི། །ཁྱད་འཕགས་དེ་ནི་མཐུ་ལས་སྐྱེས། །དན་ཏི་དང་ནི་ཙི་ཏྲ་ཀ །རོ་སྩོགས་མཚུངས་ཀྱང་དན་ཏི་འཁྲུ། །ཤིང་མངར་རྒུན་འབྲུམ་འདྲ་ཡང་འཁྲུ། །འོ་མ་མར་འདྲ་མར་དྲོད་སྐྱེད། །དེ་ལྟར་སྨན་ལ་སོགས་པ་ཡི། །སྤྱི་ཡི་ལས་ཏེ་དེ་ཡང་ནི། །སྣ་ཚོགས་རྐྱེན་གྱི་དབྱེ་བ་ཡིས། །
སྨན་དབྱེ་ཐ་དད་གྱུར་པ་ཡིན། །གྲོ་དང་ནས་ནི་མངར་བ་དང༌། །ལྕི་ལས་རླུང་འཇོམས་སྐྱེད་པ་ཡིན། །ཉ་གྲོ་འོ་མ་བསིལ་བ་དང༌། །སེང་གེ་ཁ་ཡིས་ཕག་མ་ཡིན། །ཡན་ལག་བརྒྱད་པའི་སྙིང་པོ་བསྡུས་པ་ལས། །མདོའི་གནས་ཀྱི་ལེའུ་དུག་པའོ།། །།དེ་ནས་རོ་ཐ་དད་པ་ཤེས་པར་བྱ་བའི་ལེའུ་བཤད་པར་བྱའོ། །མངར་བ་ལ་སོགས་རོ་སྐྱེ་བ། །ས་ཆུ་མེས་ཆུ་དང་མེ། །མཁའ་རླུང་མེ་རླུང་ས་དང་རླུང༌། །གཉིས་གཉིས་ཤས་ཆེ་ལས་རིམ་འབྱུང༌། །དེ་ལས་རོ་ནི་མངར་བ་དག །གང་ཞིག་མྱངས་པའི་ཚེ་ན་ནི། །ཁ་ལ་ཆགས་ཤིང་ལུས་ཀྱང་ནི། །ཚིམ་བྱེད་དབང་པོ་རབ་དབང་བྱེད། །གྲོག་མ་ལ་སོགས་དགའ་བ་ཡིན། །སྐྱུར་བ་ཁ་ནས་ཆུ་འཛག་ཅིང༌། །སོ་བརྩེ་སྦུ་ནི་ལྡང་བ་དང༌། །མིག་དང་སྨིན་མ་འཛུམ་པར་བྱེད། །ལན་ཚྭ་ཁར་ནི་མཆིལ་མ་འདུ། །མཁུར་བ་གྲེ་བ་ཚ་བར་བྱེད། །ཁ་བ་ཁ་ཡི་དྲི་མ་སྦྱང༌། །ལྕེ་ནི་འཇོམས་པར་བྱེད་པ་ཡིན། །ཚབ་ལྕེ་རྩེ་སྐྱོ་བྱེད་ཅིང༌། །ཙག་ཙག་བྱེད་པར་འགྱུར་བ་དང༌། །ཁ་མིག་སྣ་ལས་འཛག་བྱེད་ཅིང༌། །མཁུར་བསྲེག་པར་བྱེད་པ་ཡིན། །བསྐ་བས་ལྕེ་ནི་བེམ་པོར་བྱེད། །གྲེ་བ་རྩ་སྦུབས་འགགས་པར་བྱེད། །རོ་ཡི་ཚུལ་ནི་དེ་དག་སྟེ། །ལས་ནི་རོ་མངར་བ་དག་གིས། །སྐྱེས་ནས་འཕྲོད་པར་བྱེད་པ་དང༌། །ལུས་ཟུངས་མཐུ་སྟོབས་རབ་སྐྱེད་ཅིང༌། །བྱིས་པ་རྒན་པོ་གློ་རྡོལ་སྐེམ། །མདོག་མདངས་སྐྲ་དང་དབང་པོ་བཟང༌། །ལུས་རྟས་སྐད་འགགས་ཕན་ཞིང་ལྕི། །ནུ་ཞོ་སྐྱེད་ཅིང་རྨ་འབྱོར་བྱེད། །ཚེ་རིང་འཚོ་བྱེད་སྣུམ་པ་དང༌། །རླུང་དང་མཁྲིས་པ་དུག་རྣམས་སེལ། །ཧ་ཅང་དྲགས་ན་ཚིལ་བཅས་དང༌། །བད་ཀན་ལས་བྱུང་ནད་སྐྱེད་ཅིང༌། །ལུས་སྦོམ་དྲོད་བྲི་ཆང་ནད་དང༌། །གཅིན་ནད་ལྦ་བ་རྨེན་སྩོགས་སྐྱེད། །སྐྱུར་བ་མེ་དྲོད་སྐྱེད་བྱེད་སྣུམ། །ཞིམ་ཞིང་འཇུ་བྱེད་ཡི་ག་འབྱེ། །དྲོ་བའི་ནུས་སྐྱེད་རེག་བ་བསིལ། །ཚིམ་བྱེད་འདྲུལ་བྱེད་ཡང་བ་སྟེ། །བད་ཀན་ཁྲག་མཁྲིས་རྒྱས་པར་བྱེད། །རླུང་འགགས་རྒྱུ་བར་བྱེད་པ་ཡིན། །དེ་ནི་ཤིན་ཏུ་བསྟེན་དྲགས་ན། །ལུས་ལྷོད་རབ་རིབ་མགོ་འཁོར་དང༌། །གཡན་པ་སྐྱ་རྦབ་མེ་དཔལ་དང༌། །འོར་ནད་ཐོར་བུ་སྐོམ་རིམས་སྐྱེད། །
ལན་ཚྭ་སྲ་དང་འཁྱིལ་པ་དང༌། །འགགས་པ་འབྱིན་ཞིང་དྲོད་སྐྱེད་བྱེད། །སྣུམ་དང་དུགས་ཀྱིས་རྡུལ་ཞིང་རྣོ། །ཡི་ག་འབྱེད་ཅིང་གཅོད་འབྱེད་བྱེད། །དེ་ནི་དྲགས་པས་རླུང་ཁྲག་དང༌། །སྐྲ་འབྱི་སྐྲ་དཀར་གཉེར་མ་དང༌། །སྐོམ་མཛེ་དུག་དང་མེ་དཔལ་རྣམས། །སྐྱེད་ཅིང་སྟོབས་ནི་བྲི་བར་བྱེད། །ཁ་བ་རང་ཉིད་ཞི་མ་མིན་ཞིང༌། །ཡི་ག་འཆུས་དང་སྲིན་སྐོམ་དུག །མཛེ་དང་རྒྱལ་དང་རིམས་སློན་བྲོ། །ཚ་དང་མཁྲིས་པ་བད་ཀན་འཇོམས། །འདྲུལ་དང་ཚིལ་དང་ཞག་དང་རྐང༌། །བཤང་དང་གཅི་བ་སྐེམས་པ་དང༌། །ཡང་ཞིང་ཡིད་གཞུངས་བསིལ་ཞིང་རྩུབ། །ནུ་མའི་ནད་དང་སྐད་འགགས་སེལ། །དེ་ནི་ཤིན་ཏུ་དྲགས་གྱུར་ན། །ལུས་ཟུངས་ཟད་ཅིང་རླུང་ནད་སྐྱེད། །ཚ་བས་ལྐོག་ནད་འགགས་པ་དང༌། །མཛེ་དང་མ་ཞུ་འོར་ནད་སེལ། །རྨ་འཇིག་བྱེད་ཅིང་སྣུམ་པ་དང༌། །ཚིལ་དང་འདྲུལ་བག་སྐེམས་པར་བྱེད། །དྲོད་སྐྱེད་འཇུ་བྱེད་ཡི་ག་འབྱེད། །སྦྱོང་ཞིང་ཟས་ནི་འཇིག་པར་བྱེད། །འཆིང་བ་གཅོད་ཅིང་རྩ་སྦུབས་དག །རྣམ་པར་འབྱེད་ཅིང་བད་ཀན་སེལ། །དེ་ནི་ཤིན་ཏུ་དྲག་འགྱུར་བས། །སྐོམ་སྐྱེད་ཁུ་བ་སྟོབས་ཟད་ཅིང༌། །བརྒྱལ་ཞིང་ལུས་འཁུམས་འདར་བ་དང༌། །རྐེད་པ་རྒྱབ་སྩོགས་ན་བར་བྱེད། །བསྐ་བས་མཁྲིས་པ་བད་ཀན་སེལ། །ལྕི་ཞིང་ཁྲག་ནད་རྣམ་པར་སྦྱོང༌། །སྐེམ་ཞིང་རྨ་འཚོ་བསིལ་བ་དང༌། །འདྲུལ་དང་ཚིལ་ནི་རྣམ་པར་སྐེམས། །བེའུ་སྣབས་འཁྱིལ་ཞིང་སྲི་བར་བྱེད། །རྩུབ་ཅིང་ལྤགས་མདོག་རབ་དང་བྱེད། །དེ་ནི་ཤིན་ཏུ་བསྟེན་དྲགས་ན། །བཤད་འགགས་ལྟོ་སྦོ་སྙིང་ནད་དང༌། །སྐོམ་དང་སྐེམ་ཞིང་སྐྱེས་མཐུ་ཉམས། །རྩ་སྒོ་འགགས་ཤིང་དྲི་མ་སྲི། །ཞུན་མར་བུ་རམ་སྟར་ག་གསེར། །མོ་ཙ་ཙོ་ཙ་པ་རུ་ཤ །ཉེའུ་ཤིང་ར་མ་ཉེ་པ་ནས། །ར་ཛ་དན་པ་ལ་གསུམ། །མེད་གཉིས་དང་པརྞི་བཞི། །འཚོ་བྱེད་ཛི་བ་རི་ཤོ་བ། །ཤིང་མངར་མ་དུ་ཀ་བིམྦི། །ཤྲ་བ་ནི་གཉིས་བི་ད་རི། །ཅུ་གང་ཀྵི་ར་ཤུ་ཀུ་ལ། །ས་ཧའོ་ཅན་ཀཤྨ་རི། །འོ་མ་བུ་རམ་ཤིང་གཟེ་མ། །རྒུན་འབྲུམ་སྦྲང་སྩོགས་མངར་བའི་སྡེ། །སྒྱུར་བ་སྐྱུ་རུ་ཨམླི་ཀ །བ་ལུང་དང་ནི་
སྟར་བུ་དང༌། །སེའུ་འབྲུ་རྡུལ་དང་དར་བ་དང༌། །ཚྭ་དང་ཀུ་ཤུ་ཨ་མྲ་དང༌། །ཨམླ་ཏ་ཀ་བྷ་བྱ་དང༌། །ཀ་རམ་རྡ་ཀ་པིད་ཏའོ། །ཚ་མཆོག་རྩལ་རུ་ཁ་རུ་ཚ། །བདེ་རྒྱ་མཚོ་བཀོད་མའི་ཚ། །མཚོ་ཚ་སྐམ་ཚ་རོ་ཉེ་དང༌། ཀྵ་ར་ལན་ཚྭའི་སྡེ་ཚན་ཡིན། །ཁ་བ་ཀྱི་ལྕེ་བ་ཏོ་ལ། །ཙནྡན་ཨུར་ཤི་བ་ལེ་ཀ །ཅི་སྐྲིགས་ནིམ་པ་པུ་ཙེ་ཤེལ། །རྒྱ་སྤོས་ཨ་ཀར་བ་ཚ་ཀ །ནག་ཏ་མ་ལ་སེར་པོ་གཉིས། །གླ་སྒང་མུར་བ་བ་ཤ་ཀ །ཨ་པ་མརྒ་པོ་སོན་ཆ། །འཁར་ལྕགས་སླེ་ཏྲེས་བྱི་ཚེར་བ། །རྩ་བ་ཆེ་ལྔ་བྱ་གྲི་གཉིས། །བོང་ང་ཤུ་དག་བི་ཤ་ལ། །ཚ་བ་ཤིང་ཀུན་ན་ལེ་ཤམ། །བྱི་དང་ག་དང་ཚ་བ་ལྔ། །ཀུ་ཐེ་ར་སྩོགས་ལྡུམ་རྔད་སྔོ། །མཁྲིས་པ་གཅིན་དང་གོ་བྱེད་ཡིན། །བསྐ་ཚན་ཨ་རུ་བ་རུ་ར། །སྦྲང་རྩི་སེང་ལྡེང་ཤི་རི་ཤ །ཀ་དམ་ཨུ་དུམྦྷཱར་དང༌། །མུ་ཏིག་བྱུ་རུ་ཨན་ཙན་བཅག །ཀ་པི་ད་ཐ་གཞོན་ཁ་རྫུར། །པད་རྩ་པདྨ་ཨུཏྤ་ལའོ། །འབྲས་རྙིང་ནས་རྙིང་གྲོ་རྙིང་དང༌། །མུངྒ་སྦྲང་རྩི་ཤ་ཀ་ར། །སྐམ་སའི་ཤ་རྣམས་མ་གཏོགས་པའི། །མངར་བ་ཕལ་ཆེར་བད་ཀན་སྐྱེད། །སྐྱུ་རུ་སེ་འབྲུམ་གཏོགས་པའི། །སྐྱུར་བ་ཕལ་ཆེར་མཁྲིས་པ་སྐྱེད། །རྒྱམ་ཚ་ལྕེ་མྱང་ཚ་མ་གཏོགས། །ལན་ཚྭ་ཕལ་ཆེར་མིག་ལ་གནོད། །སླེ་ཏྲེས་པ་ཏོ་ལ་བཅའ་སྒ། །སྒོག་སྐྱ་པི་པི་ལིང་མ་གཏོགས། །ཁ་དང་ཚབ་ཕལ་ཆེར་ནི། །རོ་ཙ་འབྲི་ཞིང་རླུང་སྐྱེད་ཡིན། །བསྐ་ལས་ཨ་རུ་ར་མ་གཏོགས། །ཕལ་ཆེར་བསིལ་ཞིང་སྲི་བར་བྱེད། །རོ་ཚ་སྐྱུར་དང་ལན་ཚྭ་རྣམས། །གོ་རིམས་བཞིན་དུ་དྲོ་ནུས་ལྡན། །ཁ་དང་བསྐ་དང་མངར་བ་རྣམས། །དེ་བཞིན་དུ་ནི་བསིལ་བ་ཉིད། །ཁ་དང་ཚ་དང་བསྐ་བ་རྣམས། །དེ་བཞིན་རྩུབ་ཅིང་དྲི་མ་སྲི། །ལན་ཚྭ་སྐྱུར་མངར་སྣུམ་པ་དང༌། །བཤང་གཅི་ཐུར་གྱི་དབུགས་འབྱིན་བྱེད། །ལན་ཚྭ་ལས་བསྐ་དེ་བས་ཀྱང༌། །མངར་བ་མཆོག་ཏུ་ལྕི་བ་ཡིན། །སྐྱུར་ལས་ཚ་དང་དེ་བས་ཀྱང༌། །ཁ་བདག་ནི་ཡང་བ་ཡིན། །རོ་རྣམས་ཀྱིས་ནི་དབྱེ་བ་ལས། །སྦྱོར་བ་ལྔ་བཅུ་རྩ་བདུན་དང༌། །བརྟགས་པ་དྲུག་ཅུ་རྩ་གསུམ་དུ། །རགས་རིམ་
ཇི་བཞིན་ཕྱེ་བ་ཡིན། །དེ་ལྔ་རེ་རེ་ཕྲི་བ་ལས། །ལྔར་གྱུར་པ་ནི་རོ་གཉིས་པ། །གསུམ་པ་མངར་བཅུ་སྐྱུར་དྲུག་སྟེ། །ལན་ཚྭ་གསུམ་སྟེ་ཁ་བ་གཅིག །བཞི་པ་ལ་ནི་མངར་པོ་བཅུ། །སྐྱུར་བ་བཞི་པོ་ལན་ཚྭ་གཅིག །ལྔ་པ་ལ་ནི་སྐྱུར་གཅིག་པུ། །མངར་བ་ལྔ་ལ་བརྟེན་པ་ཡིན། །སྨན་ནི་རོ་དྲུག་གཅིག་པུ་ཡིན། །མ་འདྲེས་པ་ནི་རོ་དྲུག་འགྱུར། །ལྔ་པ་དྲུག་དང་རོ་ནི་ཐ་དད་དྲུག །བཞི་པ་གཉིས་པ་རྣམ་པ་བཅྭ་ལྔ་ཡིན། །དབྱེ་བ་གསུམ་པ་ཉི་ཤུ་གཅིག་ཉིད་དེ། །སྨན་ནི་རོ་དྲུག་དེ་ལྟར་དྲུག་ཅུ་གསུམ། །དེ་རྣམས་རོ་དང་རྡོ་རྗེས་རོའི་དབྱེ་བ། །རབ་དང་རབ་མཆོག་དག་ཏུ་བརྟགས་པ་ལས། །རྩིས་ལས་འདས་པར་བྱུང་བར་གྱུར་པ་ནི། །ནད་དང་སྨན་གྱི་དབང་ལས་ཉེ་བར་སྦྱར། །ཡན་ལག་བརྒྱད་པའི་སྙིང་པོ་བསྡུས་པ་ལས། །མདོའི་གནས་ཀྱི་ལེའུ་བཅུ་པའོ།། །།དེ་ནས་ནད་ལ་སྩོགས་པའི་ཚུལ་ཤེས་པར་བྱ་བའི་ལེའུ་བཤད་པར་བྱའོ། །ནང་དང་ལུས་ཟུངས་དྲི་མ་རྣམས། །རྟག་ཏུ་ལུས་ཀྱི་རྩ་བ་ཡིན། །དེ་རླུང་དབུགས་འབྱུང་དབུགས་རྔུབ་དང༌། །བསྐྱོད་དང་ལས་སྤྱོད་ཤུགས་འབྱིན་དང༌། །ལུས་ཟུངས་ལེགས་པར་རྒྱུ་བ་དང༌། །དབང་པོ་རྣམས་ནི་གསལ་བ་དག །མི་གནོད་པ་ནི་རྗེས་འཛིན་ཡིན། །མཁྲིས་པ་འཇུ་དྲོད་མཐོང་བྱེད་དང༌། །བཀྲེས་སྐོམ་ཟས་ལེན་མདངས་ཡིད་གཞུངས། །བློ་ལྡན་དཔའ་སྙིང་ལུས་འཇམ་པས། །བད་ཀན་བརྟན་ཞིང་སྣུམ་ཉིད་དང༌། །ཚིགས་འབྲེལ་བཟོད་ལ་སྩོགས་པས་སོ། །ལུས་ཟུངས་ལས་གཙོ་གོ་རིམས་བཞིན། །ཚིམ་བྱེད་འཚོ་བྱེད་གཡོགས་པ་དང། །སྣུམ་དང་བརྟན་དང་འགེངས་པ་དང༌། །མངལ་ནི་སྐྱེད་བྱེད་ཡིན་པར་བཤད། །བརྟན་པར་བྱེད་པ་བཤད་པ་ཡིན། །འདྲུལ་དང་འབྱིན་པ་གཅིན་གྱི་ཡིན། །བ་སྤུ་བརྟན་པ་རྡུལ་གྱི་ཡིན། །རླུང་ནི་འཕེལ་བར་གྱུར་པ་ཡིས། །སྐེམ་དང་མདོག་གནག་དྲོད་བག་དགའ། །འདར་དང་ལྟོ་སྤོས་བཤད་བ་སྲེ། །སྟོབས་དང་གཉིད་དང་དབང་པོ་ཉམས། །སྨྲ་མང་མགོ་འཁོར་ཞུམ་པར་བྱེད། །མཁྲིས་པ་བཤད་གཅི་པགས་མིག་སེར། །བཀྲེས་སྐོམ་ལུས་ཚ་གཉིད་ཆུང་བྱེད། །བད་ཀན་དྲོད་ཉམས་མཆིལ་མ་མང༌། །ཁོང་སྙོམ་ལྕི་
དང་ཤ་མདོག་དཀར། །ལུས་གྲང་ཡན་ལག་ལྷོད་པ་དང༌། །ལུད་པ་དབུགས་མི་བདེ་གཉིད་ཆེ། །དངས་མའང་བད་ཀན་དང་འདྲ་ལ། །ཁྲག་འཕེལ་མེ་དབལ་ཁོང་འབྲས་མཆེར། །མཛེ་དང་རླུང་ཁྲག་མཁྲིས་པ་ཁྲག །སྐྲན་དང་རྙིལ་ནད་མིག་སེར་དང། །བསྐྱོད་དཀའ་དྲོད་ཉམས་རྨོངས་བག་ཅན། །མིག་དང་གཅིན་པགས་དམར་བར་འགྱུར། །ཤ་འཕེལ་ཝ་བ་རྨེན་བུ་མདུད། །མཁུར་ཚོས་བྲང་ལྟོ་བརླ་སྦོམ་ཞིང༌། །མགུལ་སྩོགས་ལྷག་པར་ཤ་ཡང་ཆེ། །ཚིལ་འཕེལ་དེ་འདྲ་དེ་བཞིན་ངལ། །ཅུང་ཟད་བསྐྱོད་ཀྱང་དབུགས་རྒོད་ཅིང༌། །རྐུབ་ཚོས་ནུ་མ་གསུས་འཕྱང་འགྱུར། །རུས་འཕེལ་རུས་ལྷག་སོ་ལྷག་འགྱུར། །རྐང་འཕེལ་ལུས་ལྕི་མིག་རྩ་གཡུང༌། །ཚིགས་ཀྱི་མགོ་བོ་སྦོམ་པ་དང༌། །ཚིགས་ལ་ཐོར་བུ་གསོ་དཀའ་འབྱུང༌། །ཁུ་འཕེལ་བུད་མེད་ལ་རབ་གདུང༌། །ཁུ་བའི་རྡེའུ་དག་ཏུ་འང་འགྱུར། །བཤད་འཕེལ་ལྟོ་སྤོས་རྒྱུ་འཁྲུག་ཅིང༌། །ལུས་ལྕི་ལྟོ་བ་ན་བར་བྱེད། །གཅིན་འཕེལ་ཆུ་སོར་ཟུག་ཅིང་ན། །གཅིས་ཀྱང་མ་གཅིས་སྙམ་སེམས་འགྱུར། །རྡུལ་འཕེལ་རྡུལ་ཆེ་དྲི་མི་ཞིམ། །གཡན་པ་ཉིད་ཀྱང་སྐྱེད་ཅེས་བྱ། །མིག་རྡུལ་ལ་སྩོགས་དྲི་མ་རྣམས། །མང་བས་ལྕི་ལ་སྩོགས་པར་བྱེད། །རླུང་ཟད་མཚན་མ་ལུས་མི་བདེ། །སྨྲ་ཉུང་རྩོལ་བ་ཆུང་བར་འགྱུར། །དྲན་པ་མི་གསལ་བད་ཀན་འཕེལ། །སྔར་བཤད་པ་ཡི་ནད་རྣམས་འབྱུང༌། །མཁྲིས་ཟད་དྲོད་ཉམས་གྲང་བ་དང༌། །མདོག་ཉམས་བྱེད་དེ་བད་ཀན་ཟད། མགོ་འཁོར་བད་ཀན་གནས་སྟོངས་ཤིང༌། །སྙིང་འདར་ཚིགས་ནི་ལྷོད་པར་འགྱུར། །ཅུང་ཟད་རྩུབ་ངལ་སྐམ་པ་དང༌། །ན་ཞིང་སྒྲ་ཆེར་མི་བཟོད་འགྱུར། །ཁྲག་ཟད་སྐྱུར་དང་བསིལ་ལ་དགའ། །རྩ་ལྷོད་པགས་པ་རྩུབ་པར་འགྱུར། །ཤ་ཟད་དབང་ཉམས་མིག་མཁུར་བའི། རུས་སྐམ་ལྷུ་ཚིགས་ན་བར་འགྱུར། །ཚིལ་ཟད་གཉིད་ཆེད་བྱི་རྐེད་མངོན། །མཆེར་བ་ཆེ་དང་ལུས་སྐེམ་འགྱུར། །རུས་ཟད་རུས་ཟུག་སོ་དང་ནི། །སེན་མོ་སྐྲ་ལ་སོགས་པ་འབྱུང༌། །རྐང་ཟད་རྐང་སྦུབས་སྟོང་པ་དང༌། །མགོ་འཁོར་རབ་རིབ་ཅན་དུ་འགྱུར། །ཁུ་བ་
ཟད་པས་རིང་ནས་འབྱུང༌། །ཡང་ན་ཁུ་བ་ཁྲག་ཉིད་འབྱུང༌། །རླིག་པ་ཤིན་ཏུ་ན་བ་དང༌། །ཕོ་མཚན་ཚིག་པ་སྙམ་དུ་སེམས། །བཤད་ཟད་རླུང་ནི་རྒྱུ་མའི་ནང༌། །སྒྲ་བཅས་འཁྱིལ་བ་ལྟ་བུར་བྱེད། །ལྟོ་བར་རྒྱུ་ཞིང་གྱེན་དུ་འགྲོ། །སྙིང་ག་རྩིབ་ལོགས་མི་བཟད་ན། །གཅིན་ཟད་གཅིན་ནི་ཉུང་སྲི་དང༌། །མདོག་འགྱུར་བ་འམ་ཁྲག་བཅས་ཉིད། །རྡུལ་ཟད་སྦུ་འབྱི་སྦུ་འགྲེངས་ལ། །པགས་པ་རྣམས་ནི་འགགས་པར་འགྱུར། །དྲི་མ་ཤིན་ཏུ་ཕྲ་བ་རྣམས། །ཟད་པས་བརྟག་དཀའ་དྲི་མ་ཡི། །རང་གནས་བསྐམས་དང་ན་བ་དང༌། །སྟོང་དང་ཡང་བ་ལས་ཤེས་བྱ། །ནད་སྩོགས་རང་ཉིད་ཇི་ལྟ་བའི། །ཡོན་ཏན་འདི་ནི་བཟློག་པ་དང༌། ཟད་པ་དང་ནི་འཕེལ་གྱུར་ལས། །འཕེལ་འབྲི་སྨན་པས་ཤེས་པར་བྱ། །དྲི་མ་ཐོགས་ལས་འཕེལ་བ་སྟེ། །ཤིན་ཏུ་འབྱུང་ལས་ཟད་ཤེས་བྱ། །ལུས་ནི་དྲི་མས་བརྟེན་པས་ན། །འཕེལ་བས་ཟད་པ་གནོད་པ་ཡིན། །དེ་ལ་རླུང་ནི་རུས་པར་གནས། །མཁྲིས་པ་རྡུལ་དང་ཁྲག་ལ་གནས། །བད་ཀན་ལྷག་མ་གནས་དེས་འདི། །ཕན་ཚུན་རྟེན་དང་བརྟེན་པ་ཡིན། །འཕེལ་དང་ཟད་པར་བྱེད་པའི་སྨན། །གཅིག་གི་གང་ཡིན་གཞན་གྱི་འང་དེ། །རུས་པ་རླུང་གཉིས་ལ་འདི་མིན། །ཕལ་ཆེར་རྟས་པས་འཕེལ་བར་འགྱུར། །བད་ཀན་རྗེས་མཐུན་དེ་ཡི་ཕྱིར། །དེ་ལས་བཟློག་པས་ཟད་པ་ཡིན། །རླུང་དང་རྗེས་མཐུན་དེ་ལྟར་ན། །འཕེལ་དང་ཟད་པ་འབྱུང་འགྱུར་བའི། །སྨྱུང་དང་བརྟ་བར་བྱ་བ་ཡིས། །ནད་ནི་རིམ་གྱིས་གསོ་བར་བྱ། །རླུང་མ་གཏོགས་ཏེ་དེ་སྐྱེས་ལ། །དེ་ཉིད་བཟློག་ཐབས་སྦྱར་བར་བྱ། །ཁྱད་པར་དུ་ནི་ཁྲག་སྐྱེས་ནད། གཏར་ག་བཀྲུ་སྨན་དག་གིས་གསོ། །ཤ་ཆེར་སྐྱེས་ལས་བྱུང་བའི་ནད། །གཏར་ག་མེ་བཙའ་ཐལ་སྨན་སྦྱར། །ཚིལ་ཆེས་སྦོམ་སྐེམ་གསོ་བར་བྱ། །རུས་པ་ཟད་པ་ལས་བྱུང་ལ། །མར་དང་འོ་མ་ཁ་རང་སྦྱར། །དེ་བཞིན་འཇམ་རྩི་གཏང་བས་གསོ། །བཤང་བ་འཕེལ་ལ་འཁྲུ་བས་གསོ། །བཤད་བཟས་ལས་བྱུང་བའི་ནད། །ར་ལུག་ནང་གྲོལ་ཟན་དྲོན་དང༌། །སྦྱར་ཐུག་མ་ཤ་གཉིས་སོགས་སྦྱིན། །གཅིན་འཕེལ་གྱུར་ལ་གཅིན་འབྲི་བ། །གཅིན་ཟད་ལས་བྱུང་
གཅིན་སྙི་གསོ། །རྡུལ་མི་འབྱུང་ལ་རྩོལ་དང་བསྐུ། །རྡུལ་འབྱུང་ཆོ་གས་གསོ་བར་བྱ། །ལུས་ཀྱི་མེ་དྲོད་རང་གནས་འདུག །ཆ་ཤས་ལུས་ཟུངས་རྣམས་ལ་བརྟེན། །དེ་རྣམས་འབྲི་ཞིང་རབ་འབར་བ། །ལུས་ཟུངས་འཕེལ་དང་ཟད་པར་འགྱུར། །ལུས་ཟུངས་དང་པོ་ཕྱི་མ་ནི། །རྒྱས་བྱེད་ཟད་པའང་དེ་བཞིན་ནོ། །ཉེས་འཁྲུགས་པས་ནི་ལུས་ཟུངས་ཉེན། །གཉི་གས་དྲི་མ་ལ་གནོད་བྱེད། །འོག་ན་གཉིས་ཏེ་མགོ་བོར་བདུན། །བུ་ག་དང་ནི་རྡུལ་འབྱུང་བའི། །དྲི་མའི་གནས་ནི་དྲི་མ་སྟེ། །རང་རང་གནས་སུ་ནད་སྐྱེད་འགྱུར། །ལུས་ཟུངས་ཁུ་བའི་མཐར་ཐུག་པའི། །ནང་ནས་གཟི་ཅན་མདངས་མཆོག་ཡིན། །སྙིང་ལ་གནས་ཀྱང་ཁྱབ་པ་དང༌། །ལུས་ནི་བརྟན་པར་གནས་པ་ཡིན། །གང་ཞིག་འཇིག་ན་ངེས་འཇིག་ལ། །གང་ཞིག་གནས་ན་གནས་གྱུར་པ། །གང་ལ་དངོས་རྣམས་སྣ་ཚོགས་པ། །ལུས་ལ་བརྟེན་པ་འབྱུང་བ་ཡིན། །མདངས་ནི་སེམས་འཁྲུགས་བཀྲེས་སེམས་ལས། །མྱ་ངན་ངལ་ལ་སྩོགས་པས་ཟད། །དེ་ཟད་སྡང་ཞིང་ལུས་རིད་ལ། །ཡང་ཡང་སེམས་ཤིང་དབང་པོ་ཉམས། །གཟི་ཉམས་རྩུབ་དང་ཡིད་མི་དགའ། །ཉམ་ཆུང་བར་ནི་འགྱུར་བ་ཡིན། །འཚོ་བྱེད་སྨན་དང་འོ་མ་དང༌། །ཤ་ཁུ་ལ་སོགས་དེའི་སྨན་ཡིན། ཟས་གང་མི་འདོད་གང་ཞིག་སློང༌། །དེ་ལ་མི་འཕྲོད་འཕྲོད་པ་ནི། །སྤང་དང་སྦྱིན་པར་བྱ་བ་དང༌། །དེ་དང་དེས་འཕེལ་ཟད་པར་འགྱུར། །ཉེས་པ་ཕྱིན་ཅི་ལོག་པ་དང༌། །མཐུན་པས་སྲེད་པ་སྐྱེད་བྱེད་དེ། །ཕལ་ཆེར་འཕེལ་དང་ཟད་པ་དག །མི་མཁས་པ་ཡིས་མི་ཤེས་སོ། །ཇི་བཞིན་སྟོབས་དང་རང་ཇི་བཞིན། །འཕེལ་ན་ཉེས་པ་རྒྱས་པར་འགྱུར། །ཟད་པས་རང་བཞིན་འདོར་བར་འགྱུར། །མཉམ་ན་རང་གི་ལས་རྣམས་བྱེད། །གང་ཞིག་མཉམ་པས་ལས་ནི་འཕེལ་བར་བྱེད། །ཉེས་པ་དེ་ཉིད་མི་མཉམ་གསོད་པར་བྱེད། །དེ་བས་ཟད་བའང་འཕེལ་བ་ལྟ་བུ་ནི། །ཕན་པའི་སྤྱོད་པ་ཉིད་ཀྱིས་བསྲུང་བར་བྱ། །ཡན་ལག་བརྒྱད་པའི་སྙིང་པོ་བསྡུས་པ་ལས། །མདོའི་གནས་ཀྱི་ལེའུ་བཅུ་གཅིག་པའོ།། །།དེ་ནས་ནད་ཀྱི་བྱེ་བྲག་
ཤེས་པར་བྱ་བའི་ལེའུ་བཤད་པར་བྱའོ། །ཞུ་བའི་གནས་དང་རྐེད་པ་དཔྱི། །རྣ་བ་རུས་པ་རེག་དབང་པོ། །རླུང་གནས་ཡིན་ཏེ་དེ་ལས་ཀྱང༌། །ཞུ་བའི་གནས་སུ་ཁྱད་པར་གནས། །མཁྲིས་གནས་ལྟེ་བ་ཕོ་བ་རྡུལ། །ཆུ་སེར་དངས་མ་ཁྲག་དང་ནི། །མིག་དང་པགས་པ་དག་ཡིན་ཏེ། །དེ་ལས་ལྟེ་བ་ཁྱད་པར་གནས། །བད་ཀན་བྲང་དང་མགུལ་བ་མགོ །གློ་བ་རུས་ཚིགས་མ་ཞུའི་གནས། །དངས་མ་ཚིལ་དང་སྣ་ལྕེར་གནས། །བྲང་ནི་ཁྱད་པར་དག་གི་གནས། །རླུང་ནི་སྲོག་སྩོགས་དབྱེ་བ་ཡིན། །ལྔ་ཡི་བདག་ཉིད་འདིར་སྲོག་ནི། །སྤྱིར་གནས་བྲང་དང་གྲེ་བར་རྒྱུ། །བློ་དང་དབང་པོ་སེམས་འཛིན་བྱེད། །མཆིལ་འདོར་སྦྲིད་འབྱུང་སྒྲེགས་པ་འདོན། །དབུགས་རྔུབ་ཟས་ནི་མིད་པར་བྱེད། །གྱེན་རྒྱུའི་གནས་ནི་བྲང་ཡིན་ཏེ། །སྣ་དང་ལྕེ་དང་ལྐོག་མར་རྒྱུ། །ཚིགས་འབྱིན་འབད་རྩོལ་དངས་དང་ནི། །སྟོབས་དང་ཁ་དོག་དྲན་ལས་བྱེད། །ཁྱབ་བྱེད་སྙིང་གནས་ལུས་ཀུན་ལ། །མ་ལུས་ཁྱབ་ཅིང་རབ་ཏུ་མགྱོགས། །འགྲོ་དང་འདེགས་དང་འཇོག་པ་དང༌། །མིག་འབྱེད་འཛུམས་པ་ལ་སོགས་པ། །ལུས་ཅན་བྱ་བ་ཕལ་ཆེར་ནི། །དེ་ལ་རག་ནི་ལུས་པ་ཡིན། །མཉམ་གནས་མེ་དྲོད་ཉེ་བར་གནས། །ནད་གྲོལ་ཀུན་ཏུ་རྒྱུ་བ་ཡིན། །བྱ་བ་ཟས་ལེན་འཇུ་བ་དང༌། །དངས་སྙིགས་འབྱེད་ཅིང་འདོར་བར་བྱེད། །ཐུར་སེལ་གཞང་གནས་འདོང་མོ་དང༌། །ལྒང་པ་ཕ་མཚན་བྲལ་ནང་རྒྱུ། །བྱ་བ་ཁུ་བ་ཟླ་མཚན་དང༌། །བཤང་གཅི་མངལ་གནས་འབྱིན་པར་བྱེད། །མཁྲིས་པའི་རང་བཞིན་ལྔ་དེ་ལ། །ཞུ་དང་མ་ཞུའི་གནས་པར་གནས། །འབྱུང་ལྔའི་བདག་ཉིད་ཅན་གྱིས་ནི། །གང་མེའི་ཡོན་ཏན་ཤས་ཆེ་བས། །གཤེར་ཉིད་སྐེམས་བྱེད་འཇུ་ལ་སྩོགས། །ལས་ཀྱི་མེ་ཡི་སྒྲར་བཤད་དོ། །ཟས་ནི་འཇུ་དང་དེ་བཞིན་དུ། །དངས་མ་ཚིགས་མ་འབྱེད་པར་བྱེད། །དེར་གནས་བཞིན་དུ་མཁྲིས་པ་ནི། །ལྷག་མ་རྣམས་ཀྱི་གྲོགས་བྱེད་པས། །སྟོབས་བསྐྱེད་པ་ཡིས་བྱེད་འགྱུར་པས། །དེ་ནི་འཇུ་བྱེད་ཅེས་བཤད་དོ། །མཁྲིས་པ་མ་ཞུའི་གནས་ལ་བརྟེན། །དངས་མདོག་བསྒྱུར་བས་དམར་སྒྱུར་ཡིན། །མཁྲིས་པ་སྒྲུབ་བྱེད་སྙིང་ལ་གནས། །བློ་དང་
ཡིད་གཞུངས་ང་རྒྱལ་སྩོགས། །མངོན་འདོད་དོན་ནི་སྒྲུབ་བྱེད་པས། །མིག་ལ་གནས་ཏེ་གཟུགས་མཐོང་བྱེད། །མཐོང་བྱེད་ཅེས་བཤད་མདོག་གསལ་ནི། །བགས་མདོག་གསལ་བྱེད་པགས་པར་གནས། །བད་ཀན་རྣམ་ལྔ་བྲང་གནས་པ། །རང་གི་སྟོབས་ཀྱིས་སུམ་མདོ་དང༌། །སྙིང་དང་ཟས་ཀྱི་མཐུ་དང་ནི། །དེ་ཉིད་ལ་གནས་ཆུ་ལས་བྱེད། །བད་ཀན་ལྷག་མའི་གནས་གྱུར་པའི། །རྟེན་ནི་གང་ཕྱིར་བྱེད་གྱུར་པས། །དེ་ཕྱིར་རྟེན་བྱེད་ཅེས་བཤད་དོ། །གང་ཞིག་མ་ཞུའི་གནས་ལ་གནས། །དེ་ནི་ཟས་སྩོགས་འདྲུལ་བྱེད་པས། །མྱགས་བྱེད་ཅེས་ནི་བྱ་བ་ཡིན། །མྱོང་བྱེད་ལྕེར་གནས་རོ་ཚོར་བྱེད། །རྟས་བྱེད་མགོར་གནས་དབང་པོ་ནི། །ཚིམ་པར་བྱེད་དེ་འབྱོར་བྱེད་ནི། །ཚིགས་ལ་གནས་ནས་འབྱོར་བར་བྱེད། །དེ་ལྟར་ནད་ནི་ཕལ་མོ་ཆེ། །མི་འགྱུར་བདག་ཉིད་ཅན་ཁྱབ་ཀྱང༌། །གནས་ཡིན་པར་ནི་ཤེས་བྱ་སྟེ། །ལས་རྣམས་ཀྱང་ནི་ཐ་དད་ཡིན། །རྩུབ་སོགས་དྲོ་བར་ལྡན་པས་ནི། །རླུང་ནི་སྩོགས་པར་འགྱུར་བ་ཡིན། །གྲང་བས་ལྡང་བྱེད་སྣུམ་ལ་སོགས། །ཡོན་ཏན་དྲོ་ལྡན་ཞི་བྱེད་འགྱུར། །རྣོ་སྩོགས་བསིལ་བ་དང་ལྡན་པས། །མཁྲིས་པ་སྩོགས་པར་བྱེད་འགྱུར་ལ། །དྲོ་བས་ལྡང་ཞིང་རོ་རྟུལ་སྩོགས། །བསིལ་བར་ལྡན་པས་ཞི་བར་འགྱུར། །སྣུམ་སྩོགས་གྲང་དང་ལྡན་པ་ཡིས། །བད་ཀན་སྩོགས་པར་བྱེད་འགྱུར་ལ། །གྲོ་བས་ལྡང་འགྱུར་དེ་ཉིད་ནི། །རྩུབ་སོགས་ཡོན་ཏན་གྱིས་ཞིར་འགྱུར། །རང་གནས་ཉིད་དུ་འཕེལ་སྩོགས་ཡིན། །དཀྱིལ་འགྱུར་རྒྱུ་ལས་འཁྲུགས་པ་དང༌། །མི་མཐུན་པ་ཡི་ཡོན་ཏན་འདོད། །ལྡང་བ་ལོག་པའི་ལམ་ཞུགས་ཉིད། །རང་གི་རྟགས་ནི་སྟོན་པ་དང༌། །བདེ་མེད་ནད་ནི་འབྱུང་འགྱུར་བའོ། །རང་གནས་གནས་པ་མཉམ་ཉིད་དང༌། །ནད་རྣམས་མ་བྱུང་ཞི་བ་ཡིན། །སོགས་དང་ལྡང་དང་རབ་ཞི་བ། །རླུང་ནི་སོ་ག་སྩོགས་གསུམ་ཚེ། །མཁྲིས་པ་དབྱར་ལ་སོགས་པར་ཏེ། །བད་ཀན་དགུན་སྨད་སྩོགས་པར་རོ། །ཡང་དང་རྩུབ་པ་ལ་སོགས་པའོ། །སྨན་དང་ལུས་ཀྱང་དེ་མཚུངས་པས། །སོ་ག་རླུང་ནི་སོགས་འགྱུར་གྱི། །
དྲོ་བའི་དུས་ཀྱིས་ལྡང་མི་འགྱུར། །ཆུ་རྣམས་འཇུ་བ་སྐྱུར་བ་དང༌། །སྨན་ཡང་དེ་དག་འདྲ་བ་ཡིས། །མཁྲིས་པ་སྩོགས་ཀྱི་དུས་ཀྱིས་ནི། །གྲང་བ་ཉིད་ཀྱིས་ལྡང་མི་འགྱུར། །ཆུ་དང་སྨན་ནི་བསིལ་བ་དང༌། །སྣུམ་པས་དུས་ནི་མཚུངས་འགྱུར་ཡང༌། །དགུན་སྨད་བད་ཀན་སྩོགས་འགྱུར་གྱི། །བསྒོངས་པས་ལྡང་བར་མི་འགྱུར་རོ། །དེ་ལྟར་དུས་ཀྱི་རང་བཞིན་འདི། །ཟས་ལ་སྩོགས་པའི་དབང་གིས་ནི། །དུས་ལ་བབ་པར་མ་གྱུར་ཀྱང༌། །འཕྲལ་དུ་སྩོགས་པ་ལ་སོགས་འགྱུར། །ནང་ནི་ལྡང་གྱུར་འཕྲལ་དུ་ལུས། །མགོ་ནས་རྐང་གི་བར་དུ་ཁྱག །ལྡོག་འགྱུར་ཆུ་ཡི་རྒྱུན་བཞིན་དུ། །ཅུང་ཞིག་ཅུང་ཞིག་དག་གིས་ཞི། །ནད་འཁྲུགས་སྣ་ཚོགས་ཚུལ་ཅན་ནི། །གྲངས་མེད་པར་ནི་གྱུར་པའི་ལུས། །ཐམས་ཅད་ཉེ་བར་གཟིར་གྱུར་པ། །དེ་རྒྱུ་ཚུལ་དང་སྒྲུབ་པ་དག །རེ་རེ་ནས་ནི་བསྟན་མི་ནུས། །དེ་བས་སྤྱི་ཡི་བརྗོད་པ་ཡིན། །ནད་རྣམས་དག་ནི་ཐམས་ཅད་ཀྱི། །ཉེས་པའི་རྒྱུ་ནི་གཅིག་པུ་ཉིད། །དཔེར་ན་བྱ་ནི་ལྡིང་འགྱུར་པ། །ཉིན་རངས་ཀུན་ཏུ་སེང་གྱུར་ཀྱང༌། །རང་གི་གྲིབ་མ་དང་མི་འབྲལ། །འགྲོ་ཀུན་དེ་དང་འདྲ་བ་ཡིན། །ཡང་ན་ཇི་ལྟར་མ་ལུས་པའི། །འགྲོ་བ་མི་འདྲ་སྣ་ཚོགས་འདི། །ཡོན་ཏན་གསུམ་དང་མི་འབྲལ་ལོ། །དེ་བཞིན་རང་ཁམས་མ་སྙོམས་པའི། །རྒྱུ་ཡང་གནས་སྐབས་ཐམས་ཅད་དུ། །ནད་རིགས་ཉེས་པ་གསུམ་མི་འབྲལ། །དེ་རྣམས་ཀྱིས་ནི་ལྡང་བའི་རྒྱུ། །དབང་དོན་མི་འཚམ་ཕྲད་པ་དང༌། །དུས་དང་ཉེས་པའི་ལས་རྣམས་སོ། །དེ་ཡང་དམན་ལྟག་ལོག་སྦྱོར་བས། །དབྱེ་བ་རྣམ་པ་གསུམ་དུ་འགྱུར། །དབང་དོན་རང་ཡུལ་ཆུང་དུའམ། །མི་སྦྱོར་བ་ནི་དམན་པ་སྟེ། །ཤས་ཆེར་གཏང་བ་ལྷག་སྦྱོར་བ། །རབ་ཕྲའི་འོད་དང་འཇིགས་པ་དང༌། །ཤིན་ཏུ་ཉེ་དང་ཤིན་ཏུ་རིང༌། །ཡིད་དུ་མི་འོང་མི་སྡུག་པའི། །གཟུགས་ལ་མིག་ནི་ལྟ་བྱེད་པ། །ལག་སྦྱོར་དེ་ནི་མི་ཟད་ཡིན། །དེ་བཞིན་རབ་དྲགས་རྡུལ་ལ་སོགས། །དབང་དོན་ཇི་བཞིན་ཤེས་པར་བྱ། །དུས་ཀྱང་གྲང་དང་ཚ་བ་དང༌། །ཆར་དུས་དབྱེ་བས་གསུམ་དུ་འདོད། །དེ་དམན་གྲང་སྩོགས་ཆུང་བ་དང༌། །ལྷག་སྦྱོར་ཤིན་ཏུ་ཆེ་
མཚན་ཉིད། །རང་གི་མཚན་ཉིད་ཕྱིན་ཅི་ལོག །ལོག་པའི་སྦྱོར་བ་ཡིན་པར་བཤད། །ལུས་ངག་ཡིད་ཀྱི་དབྱེ་བ་ཡིས། །ལས་ཀྱང་རྣམ་པ་གསུམ་དུ་བཤད། །ལུས་ལ་སོགས་པའི་ལས་དམན་ལ། །འཇུག་པ་དམན་པའི་མིང་ཅན་ཡིན། །བརྟུན་ངས་འཇུག་པ་ལྷག་སྦྱོར་བའོ། །ཤུགས་བཀག་པ་དང་བཙིར་བ་དང༌། །མི་བཟད་ལུས་ཀྱི་ལས་རྣམས་དང༌། །གཅུས་དང་རྡེག་འཆོས་གོམ་འཁྱོར་སྩོགས། །ལྡང་བཞིན་སྨྲ་བར་བྱེད་པ་དང༌། །འདོད་ཆགས་ཞེ་སྡང་འཇིག་སྩོགས་དང༌། །སྲོག་གཅོད་ལ་སོགས་ལས་རྣམས་དང༌། །རྣམ་བཅུ་དེ་ཡང་སྨད་པ་ཡིན། །འདི་དང་གཞན་དུ་བྱས་པ་རྣམས། །དེ་དག་མ་ལུས་ལོག་སྦྱོར་ཡིན། །འདི་དག་ནད་ཀྱི་རྒྱུ་ཡིན་ནོ། །ལྡང་འགྱུར་དེ་ནི་མཐའ་ཡས་ཏེ། །སྣ་ཚོགས་ནད་ནི་བྱེད་པར་འགྱུར། །ཡན་ལག་ནང་ཁྲོལ་ལྷུ་ཚིགས་བརྟེན། །ཡན་ལག་ཁྲག་སྩོགས་པགས་པ་ཡིན། །དེ་ནི་ཕྱི་རོལ་ནད་གནས་ཏེ། །དེ་བརྟེན་མ་ཞུ་ཡན་ལག་ན། །ལྦ་བ་བེའུ་སྣབས་འབྲུམ་པ་སྩོགས། །གཞང་འབྲུམ་སྐྲན་དང་འོར་ནད་སོགས། །དེ་དག་ཕྱི་རོལ་ནད་ཅེས་བྱ། །ནང་ནད་རྩ་སྦུབས་ཆེན་པོ་དང༌། །མ་ཞུ་ཞུ་བའི་གནས་ལ་བརྟེན་གནས་དེ་ལས་ནི་སྐྱུགས་ཚད་འཁྲུ། །དམུ་རྫིང་ལུད་བ་དབུགས་མི་བདེ། །ནང་གི་ཆ་ཡི་གཞང་འབྲུམ་སྐྲང༌། །སྐྲན་དང་མེ་དཔལ་ཁོང་འབྲུམ་པ། །མགོ་བོ་སྙིང་དང་ཆུ་སོ་སྩོགས། །རུས་པའི་ཚིགས་ནད་གནད་ཡིན་ནོ། །དེ་འབྲེལ་རྩ་དང་ཆུ་བ་དང༌། །ཆུ་བ་ཆེན་སྩོགས་པར་མ་ཡིན། །དེ་ལ་ནད་ལམ་དེར་གནས་པ། །གཅོང་ཆེན་གཞོགས་ཕྱེད་མཇིང་ཁ་ཡོ། །གླད་ནད་སྩོགས་དང་ཚིགས་རུས་དང༌། །དཔྱི་ཡི་གཟེར་དང་གནོད་ནད་སྩོགས། །འབྱིན་ཁྱབ་ཟུག་དང་སྙོམ་པ་དང༌། །ལུས་ཚ་ནད་གཟེར་བྱེ་བ་དང༌། །འཇའ་ཞིང་ཆག་སྙམ་རྐང་ལག་འཁུམས། །བསྒོངས་དང་རྩེ་དང་སྐོམ་བྱེད་དང༌། །འདར་དང་རྩུབ་དང་ཁོང་སྟོང་དང༌། །སྐེམ་དང་མགུལ་དང་དཀྲིས་སྙམ་དང༌། །རེངས་དང་རོ་བསྐ་བྲོ་བའོ། །མདོག་ནི་གནག་གམ་དམར་བ་དག །རླུང་གི་ལས་ཡིན་མཁྲིས་པའི་ལས། །ལུས་ཚ་མདོག་དམར་དྲོ་
སྨིན་བྱེད། །རྡུལ་དང་གནག་དང་འཛག་རྨ་རེད། །འདྲུལ་དང་བརྒྱལ་ཞིང་མྱོས་པ་དང༌། །ཁའི་རོ་ཁ་དང་སྒྱུར་བ་དང༌། །མདོག་སྐྱ་དམར་རྩ་མ་ཡིན་པའོ། །བད་ཀན་ལས་ནི་མཁྲང་ཞིང་སྣུམ། །གཡའ་ཞིང་ཁྲོང་གྲང་ལྕི་བ་དང༌། །ཚིགས་དམ་ཤ་རྒྱས་རྨོངས་བག་དང༌། །སྐྲང་ཞིང་གཉིད་ཆེ་ཟས་མི་འཇུ། །མདོག་དཀར་ཁ་རོ་ལན་ཚྭ་མངར། །ལས་ཀྱི་མཐའ་ལས་འདམ་རིང་ངོ༌། །དེ་ལྟར་ཇི་སྐད་བཤད་པ་ཡི། །མཚན་ཉིད་ཀྱིས་ནི་ནད་ཀུན་ཁྱབ། །དེ་ནི་མ་ཡེངས་ལྟ་སྩོགས་པས། །ཡང་དག་པར་ནི་ཤེས་པར་བྱ། །ནད་ཀྱི་གནས་སྐབས་དབྱེ་ཤེས་པས། །ནད་པ་སྐད་ཅིག་རེ་རེར་བལྟ། །གོམས་པས་ངེས་པར་ཐོབ་འགྱུར་ཏེ། །ལས་རྣམས་གྲུབ་པ་གསལ་བྱེད་ཡིན། །རིན་ཆེན་ལ་སོགས་བཟང་ངན་ཤེས། །བསྟན་བཅོས་འབའ་ཞིག་ལས་མི་འབྱུང༌། །ནད་ནི་འདི་ལྟར་རྣམ་གསུམ་སྟེ། །ལ་ལ་ཚེ་འདིའི་ཉེས་ལས་བྱུང༌། །ལ་ལ་སྔོན་གྱི་ཉེས་ལས་བྱུང༌། །གཞན་དག་དེ་གཉིས་འདྲེས་ལས་བྱུང༌། །ཉེས་འབྱུང་ནད་གཞི་ཇི་བཞིན་པར། །ལས་སྐྱེས་རྒྱུ་ནི་མེད་པ་ཡིན། །རྒྱུ་ཆུང་བ་ལ་དཀྱེལ་ཆེའི་ནང༌། །ཉེས་དང་ལས་ལས་བྱུང་བ་ཡིན། །དང་པོ་མི་མཐུན་བཟའ་བ་ཡིན། །ལས་སྐྱེས་ལས་ནི་ཟད་པ་སྟེ། །གཉི་ག་ལས་བྱུང་ཉེས་དང་ལས། །ཟད་པས་ཟད་པར་འགྱུར་བ་ཡིན། །ནད་ནི་རང་རྒྱུད་གཞན་རྒྱུད་ལས། །གཉིས་འགྱུར་མཐའ་འང་གཉིས་ཡིན་ཏེ། །སྔར་སྐྱེས་སྔ་མའི་ཚུལ་དུ་བཤད། །ཕྱི་སྐྱེས་པ་ནི་བླ་བརྣན་ཡིན། །རང་གནས་ཇི་བཞིན་གནས་པ་ནི། །རང་རྒྱུད་ཅན་དེ་མཚན་ཉིད་གསལ། །གཞན་དག་དེ་ལས་གོ་བཟློག་པ། །དྲི་མའང་དེ་བཞིན་ཤེས་པར་གྱིས། །དེ་ནི་ནད་རེ་ལྡང་བ་ན། །མ་ཡེངས་པས་ནི་ཤེས་བྱ་སྟེ། །དེ་རྣམས་གཙོ་བོ་ཞི་བྱས་པས། །ཞི་འགྱུར་ཞི་བར་མ་གྱུར་ན། །དེ་བཞིན་ཕྱི་ནས་གསོ་བར་བྱ། །འོན་ཏེ་བླ་བརྣན་སྟོབས་ཆེ་ན། །མྱུར་གསོ་དེ་ནད་ཀྱིས་གཟིར་བ། །ལུས་ལ་ཤས་ཆེར་གནོད་བྱེད་ཡིན། །ནད་ལ་རྣམ་པར་མི་མཁས་ཤེས། །ངོ་ཚ་ནམ་ཡང་མ་བྱེད་ཅིག །ནད་ཀྱི་འགྱུར་བ་ཐམས་ཅད་ཀྱི། །མིང་གི་ངེས་བསྟན་ཡོད་པ་མིན། །ཉེས་པ་དེ་ཉིད་འཁྲུགས་ནས་ནི། །ཁྱད་
བར་དུ་ནི་ལྡང་གྱུར་ནས། །གནས་གཞན་དག་ཏུ་སོང་ནས་ནི། །ནད་ནི་མང་པོར་བྱེད་པར་འགྱུར། །དེ་བས་ནད་ཀྱི་རང་བཞིན་ནི། །རང་གནས་གཞན་དུ་འཕོས་པ་དང༌། །རྒྱུ་ཡི་ཁྱད་པར་ཤེས་བྱས་ལ། །སྨན་དཔྱད་ཀྱིས་གསོ་མྱུར་དུ་བྱ། །གནོད་བྱ་ཡུལ་དང་ཉམས་སྟོབས་དུས། །མེ་དྲོད་རང་བཞིན་ན་ཚོད་དང༌། །སྙིང་སྟོབས་གོམས་དང་ཟས་རྣམས་ཀྱིས། །གནས་སྐབས་རྣམ་པ་ཐ་དད་པ། །འདི་དག་ཕྲ་མོ་ཡན་ཆད་བརྟག །ནད་དང་སྨན་གྱི་ཚུལ་བརྟགས་པས། །གང་ཞིག་གསོ་བ་ལ་འཇུག་པ། །དེ་ནི་ནམ་ཡང་འཁྲུལ་མི་འགྱུར། །ནད་དཀྱེལ་ཆེ་བའམ་ཆུང་བ་དག །ཕོག་སྙ་ལུས་ཉམས་ཆེ་ཆུང་ལས། །གནོད་པར་བྱེད་པ་སྣང་འགྱུར་བས། །དེ་ལའང་མ་ཡེངས་ཉིད་དུ་བྱ། །སྨན་པ་ངན་པས་ནད་རྣམས་ནི། །ལྕི་བ་ཡང་བར་ཡོངས་རྟོག་ཅིང༌། །ནད་ཉུང་དག་ཏུ་བརྟགས་པ་ཡིས། །གསོ་བ་ལོག་པ་དག་ཏུ་འགྱུར། །དེ་བས་ཆུང་བའང་སྟོབས་ཆུང་བ། །དཀྱེལ་ཆེན་ནད་ལ་རབ་ཏུ་སྦྱོར། །སྦྱོར་བ་ཆུང་ངུར་སྦྱར་བ་ཡིས། །ནད་ནི་ཤིན་ཏུ་སློང་བ་ཡིན། །སྦྱོར་བའང་ལྷག་པར་སྦྱོར་བ་དང༌། །ལོག་པར་སྦྱོར་བས་ཕྱིན་ཅི་ལོག །དྲི་མ་འབྱུང་བར་མི་ཟད་ཀྱི། །ལུས་ཀྱང་ཤིན་ཏུ་མ་རུང་འགྱུར། །དེ་བས་རྟག་ཏུ་བརྩོན་པ་དང༌། །ཐམས་ཅད་ཀུན་ཏུ་ལེགས་བརྟགས་ནས། །ཅི་ནས་ནད་མེད་བརྟན་གྱུར་པ། །དེ་ལྟར་སྨན་དཔྱད་སྦྱར་བར་གྱིས། །དེ་ནས་གཞན་ཡང་ནད་རྣམས་ནི། །འཕེལ་ཟད་དབྱེ་བས་བཤད་བྱ་སྟེ། །ཐ་དད་པ་ལས་གསུམ་ཤེས་བྱ། །ལྡན་གསུམ་དེ་ཡང་དེ་དགུ་ཡིན། །མཉམ་པར་འཕེལ་བས་གསུམ་ཉིད་དེ། །གཅིག་རབ་ལྷག་པས་དྲུག་ཏུ་འགྱུར། །མ་ལུས་པ་ལས་བཅུ་གསུམ་ཡིན། །གཉིས་གཅིག་ལྷག་པ་ལས་དྲུག་སྟེ། །མཚུངས་ལས་གཅིག་ཡིན་རབ་དང་ནི། །རབ་མཆོག་བརྟགས་པ་ལས་དྲུག་ཡིན། །དེ་ལྟར་ཉི་ཤུ་རྩ་ལྔ་ནི། །འཕེལ་བའོ་ཟད་པའང་དེ་སྙེད་ཡིན། །དེ་དག་རེ་རེ་འཕེལ་མཉམ་ཟད། །དྲུག་སྟེ་སླར་ཡང་དེ་དག་ནི། །གཅིག་ཟད་གཉིས་གཉིས་འཕེལ་བ་ནི། །གོ་བཟློག་བཅས་ལས་དྲུག་ཏུ་འགྱུར། །དབྱེ་བ་དྲུག་ཅུ་གཉིས་སུ་
བསྟན། །དྲུག་ཅུ་གསུམ་པ་བདེར་གནས་རྒྱུ། །དེ་བཞིན་འདི་དག་དངས་མ་ཁྲག་སྩོགས་འདྲེས་པ་ལས། །ནད་ནི་ཟད་དང་མཉམ་དང་འཕེལ་བའི་དབྱེ་བ་ཡིས། །རབ་དང་རབ་མཆོག་དག་ལས་མཐའ་ཡས་ཉིད་འགྱུར་བར། །རང་བཞིན་ཅི་འདྲ་མ་ཡེངས་ཡིད་ཀྱིས་ཤེས་པར་གྱིས། །ཡན་ལག་བརྒྱད་པའི་སྙིང་པོ་བསྡུས་པ་ལས། །མདོའི་གནས་ཀྱི་ལེའུ་བཅུ་གཉིས་པའོ།། །།དེ་ནས་ནད་གསོ་བའི་ཐབས་ཀྱི་ལེའུ་བཤད་པར་བྱའོ། །རླུང་ནད་གསོ་བ་སྣུམ་དང་ནི། །དུགས་དང་སྦྱང་བ་འཇམ་རྩི་དང༌། །མངར་སྐྱུར་ལན་ཚྭ་བྲོ་བ་ཡི། །ཟས་དང་བསྐུ་ཞིང་མཉེ་བ་དང༌། །དཀྲི་སྣུན་སྨན་ཆུ་བླུགས་པ་དང༌། །གྲོ་ཆང་འབྲས་ཆང་བུ་རམ་ཆང༌། །སྣུམ་དྲོ་འཇམ་རྩི་གཏང་བ་ནི། །འཇམ་རྩི་ངེས་པ་བདེ་དགའ་དང༌། །སྐྱེ་གནས་དུ་མའི་སྣུམ་དག་ནི། །དྲོད་ཆེ་འཇུ་བར་བྱེད་གཡོས་སྦྱར། །ཁྱད་པར་དུ་ནི་ཤ་ཚོན་དང༌། །ཏིལ་མར་དང་སྦྱར་འཇམ་རྩི་བྱ། །མཁྲིས་པ་མར་སར་བླུད་པ་དང༌། །མངར་ཞིང་བསིལ་བའི་བཀྲུ་སྨན་དང༌། །མངར་དང་ཁ་དང་བསྐ་བ་ཡི། །ཟས་དང་སྨན་ནི་སྦྱིན་པ་དང༌། །དྲི་བཟང་བསིལ་ཞིང་ཡིད་འོང་བའི། །དྲི་ནི་ཉེ་བར་བསྟེན་པ་དང༌། །མགུལ་དུ་དོ་ཤལ་སེ་མོ་དོ། །ནོར་བུ་བྲང་དུ་གདགས་པར་བྱ། །ག་བུར་ཙནྡན་ཨུར་ཤི་རའི། །བྱུག་པས་སྐད་ཅིག་རེ་རེ་བསྐུ། །སྲོད་ལ་རྡོ་ཐལ་ཅན་ཟླ་ཟེར། །ཡིད་འོང་གླུ་དང་སེར་བསིལ་བསྟེན། །བག་ཕེབས་མཛའ་བོ་བདེ་བ་དང༌། །བུ་ལ་གཞོན་སྐད་ཉམས་རངས་སྨྲ། །ཆུང་མ་ཡིད་མཐུན་ལས་བྱེད་ཅིང༌། །སྡུག་ཅིག་ཡོན་ཏན་རྣམས་ཀྱིས་བརྒྱན། །ཁང་པ་ཉི་རིམ་ཆུ་བསིལ་བླུགས། །སྐྱེད་མོས་ཚལ་རྫིང་བཟང་པོ་ནི། །རྒྱ་ཚ་དང་ནི་སྟེགས་བཅས་པ། །ཆུས་བརླན་བྱེ་མ་བསིལ་བ་དང༌། །སྦྱིལ་བུ་ལུས་ཚད་ཤིང་ཁེབས་དང༌། །ཆུ་འགྲམ་པདྨར་བཅས་པར་ནི། །བདེ་གནས་ཁྱད་པར་འོ་མ་དང༌། །མར་སར་བཟའ་དང་བཀྲུ་སྨན་བྱ། །བད་ཀན་ཆོ་གར་ལྡན་པར་ནི། །སྐྱུག་སྨན་བཀྲུ་སྨན་རྣོན་པོ་བཏང༌། །ཟས་ནི་རྩུབ་ཆུང་རྣོ་ཞིང་དྲོ། །ཚ་ཞིང་ཁ་དང་བསྐ་བ་བཟའ། །ཆང་ནི་ཡུན་རིངས་ལོན་པ་བཏུང༌། །རྩེ་དགའ་དང་ནི་གཉིད་མི་ལོག །རྩོལ་
བའི་ཚུལ་ནི་སྣ་ཚོགས་དང༌། །སེམས་ལས་རྩུབ་པས་མཉེ་བ་དང༌། །ཁྱད་པར་སྨན་ཁུ་སྐྱུག་སྨན་བཏང༌། །སྦྲང་རྩི་ཚིལ་འཇོམས་སྨན་བསྟེན་བྱ། །སྨྱུང་བདུད་བདུག་མཁུར་བཀང་ད་བོ། །བདེ་བ་མེད་ཉིད་བདེ་ཕྱིར་བྱ། །ནད་རྣམས་སོ་སོར་གསོ་བ་དང༌། །ནད་ལས་དཔགས་ཏེ་བཤད་པ་ཡིན། །ལྡན་པ་དང་ནི་འདུས་པ་དག །དེ་ནི་སོ་སོའི་ཚུལ་བཞིན་བརྟག །རླུང་ནི་ཟུང་དུ་འཇུག་པས་ན། །རླུང་མཁྲིས་ཕལ་ཆེར་སོ་གའི་བྱ། །བད་ཀན་རླུང་ལ་དཔྱིད་ཀྱི་བྱ། །བད་ཀན་མཁྲིས་པ་སྟོན་གྱི་བྱ། །ཟུང་དུ་འཇུག་པ་རླུང་གི་མཆོག །ཡང་དག་འདྲེས་པས་གཉིས་བདག་ཅན། །མེ་དང་ལྡན་པས་སྲེག་པར་བྱེད། །ཟླ་བ་ལྡན་པས་བསིལ་བར་བྱེད། །ནད་ནི་དཀྱེལ་སོགས་དུས་སུ་བསལ། །ལྡང་ན་གཞན་དོན་མེད་པར་གསོ། །ཐམས་ཅད་ལྡན་ན་ཚབས་ཆེ་བ། །ནད་གཞན་གནོད་པ་མེད་པར་གསོ། །ནད་ནི་སྦྱོར་བས་ཞི་བྱ་བ། །གང་གཞན་ལྡང་བར་བྱེད་པ་དག །དེ་ནི་དག་མིན་གཞན་དག་ནི། །ལྡང་བར་མི་འགྱུར་རྣམ་དག་ཡིན། །རྩོལ་དྲག་ཚ་བ་རྣོ་བ་དང༌། །གནོད་པར་འགྱུར་བ་སྤྱད་པས་ཀྱང༌། །ཁོང་པ་ཡན་ལག་རུས་པ་དང༌། །གནད་དུ་རླུང་ནི་འཇུག་པར་འགྱུར། །དེ་བཞིན་དེ་ལ་རྩ་སྒོ་ནི། །རྣམ་པར་སྦྱངས་བས་འབྱུང་བར་འགྱར། །སྨིན་བྱས་རླུང་ནི་ཚར་བཅད་པས། །ཁོང་པའི་ནང་དུ་འདུ་བར་འགྱུར། །དེར་གནས་ནས་ཀྱང་རྒྱུ་དག་ལ། །སྡོད་ཅིང་རིང་དུ་ཐོགས་པ་ཡིན། །དེ་ནི་དུས་སོགས་སྟོབས་ཐོབ་ནས། །གཞན་ལ་བརྟེན་ཡང་ལྡང་བར་བྱེད། །དེ་ལ་གནས་གཞན་གནས་བ་ནི། །དེ་ཉིད་སྟོབས་ནི་མེད་ཉིད་ལ། །གསོ་བར་བྱ་བ་རང་གི་ནི། །སྟོབས་ཀྱིས་གཞན་ཟིལ་གནོན་བྱེད་ནའོ། །བླ་བརྣན་ནད་ནི་ཞི་བྱས་ན། །རང་གནས་གནས་པ་གསོ་མི་དགོས། །ཕལ་ཆེར་རྩིབ་ལོགས་འགྲོ་བའི་ནད། །ནད་པ་ཡུན་རིངས་ཉོན་མོངས་བྱེད། །ལུས་མེའི་སྟོབས་ནི་ཤེས་པ་ཡིས། །དེ་ལ་རིངས་ཐབས་དག་མི་བྱ། །དེ་ནི་སྦྱོར་བས་ཞི་བྱའམ། །ཁོང་དུ་བདེ་བར་བསྡུ་བར་བྱ། །ཁོང་དུ་འདུས་པར་ཤེས་ནས་ནི། །ཇི་ལྟར་ཉེ་བ་བཞིན་དུ་བསལ། །བུ་ག་འབྱུང་འགགས་སྟོབས་ཉམས་ཤིང༌། །ལྕི་ཞིང་རླུང་ནི་ཁུང་དུ་འཁྲུལ། །ཁོང་སྙོམ་མི་འཇུ་མཆིལ་མ་མང༌། །བཤང་གཅི་སྲི་དུབ་ཟས་མི་ལེན། །ནད་རྩེ་མ་ཞི་ལ་སྤྱི་ཡི་རྟགས། །རྩེ་
ཞི་ལ་དེ་ལས་བཟློག་པ་ཡིན། །ཁོང་བའི་དྲོད་སྟོབས་ཆུང་ཉིད་ཀྱིས། །ལུས་ཟུངས་དང་པོ་མི་འཇུག །ནད་ནི་ཕོ་བར་ཞུགས་པ་དག །དངས་མ་མ་ཞུ་ཡིན་པར་བཤད། །གཞན་དག་ནད་ཉིད་རབ་འཁྲུགས་པ། །རབ་སྡུག་ཕན་ཚུན་འདོམས་ལས་བྱུང༌། །ཀོ་དྲ་བ་ཡི་དུག་བཞིན་དུ། །ནད་ཚབས་ཆེན་པོ་འབྱུང་བར་བཤད། །ནད་ཚབས་དེ་དང་འདྲེས་པ་དང༌། །གནོད་པ་གནོད་བྱ་གནོད་འགྱུར་དང༌། །ནད་གཞན་གང་དག་དེ་ལས་བྱུང༌། །མ་ཞུ་བ་དང་བཅས་པར་བཤད། །དེ་ནི་ལུས་ཀུན་ཞུགས་གྱུར་པ། །ནད་ནང་ཞུགས་ཏེ་རྩེ་མ་བཅི་ལ། །མ་སྨིན་དབྱུང་བར་མི་བྱ་སྟེ། །མ་སྨིན་ཤིང་ཐོག་ཁུ་བར་མཚུངས། །དེ་ནི་དབྱུང་བར་དཀའ་བས་ན། །རྟེན་ནི་འཇིག་པར་བྱེད་པར་འགྱུར། །དེ་ནི་སྨིན་དང་དྲོད་སྐྱེད་སྣུམ། །དུགས་བྱ་རྩེ་བཅིལ་དེ་བསིལ་བ། །ཇི་ལྟར་ཉེ་དང་སྟོབས་ཇི་བཞིན། །སྦྱངས་པའི་དུས་སུ་བསལ་བར་བྱ། །ཁ་ནས་རིགས་པར་སྨན་བཏང་བས། །མ་ཞུའི་གནས་ལས་ནད་མྱུར་བསལ། །ནམ་ཚོད་ཡན་ཆད་སྣ་སྨན་གྱིས། །ཞུ་བའི་གནས་ཡོང་མས་གཏོང་བསལ། །སྟེང་ངམ་འོག་ཏུ་འབྱུང་བར་རྩོམ། །ནད་ནི་རང་ཉིད་འབྱུང་བས་ན། །སྨན་གྱིས་ནད་ནི་མི་དགག་སྟེ། །བཀག་ན་དེ་ཉིད་ནད་སྐྱེད་འགྱུར། །དེ་བས་དང་པོར་ནད་འབྱུང་ལ། །བསྡད་དེ་ཕན་པར་བཟའ་བར་བྱ། །འཁྱིལ་ལ་སྨིན་པ་དེ་དང་དེས། །སྨིན་བྱས་དེ་བཞིན་བསལ་བར་བྱ། །དབྱར་སྟོན་ཐ་ཆུངས་དཔྱིད་ཟླ་འབྲིང༌། །ཐུན་མོང་དུས་སུ་རིམ་བཞིན་དུ། །སོ་ག་དབྱར་དང་དགུན་བསགས་པའི། །རླུང་སོགས་ནད་ནི་མྱུར་དུ་བསལ། །སོ་ག་དབྱར་དང་དགུན་གྱི་ཚེ། །རབ་ཚ་ཆར་དང་གྲང་བའི་དུས། །དེ་རྣམས་དུས་མཚམས་ཐུན་མོང་སྟེ། །དེ་ཚེ་ནད་ནི་མི་བཟང་བསལ། །ཐ་མལ་བདེ་གནས་དབང་བྱས་ཀྱི། །ནད་པ་ནད་ཀྱི་དབང་དུ་ནི། །གྲང་ཚ་ཆར་གྱི་དུས་དག་གི །གཉེན་པོ་ཇི་བཞིན་བྱས་ནས་ནི། །སྦྱོར་བའི་དུས་སུ་བབ་པ་ན། །བྱ་བ་དུས་ལ་མི་སྡོད་དོ། །སྨན་ནི་ཟས་མ་ཟོས་སྔོན་དང༌། །དབུས་དང་མཐའ་དང་ཁམ་གྱི་བར། །ཟས་བར་ཙེག་བུ་ཟས་བཅས་དང༌། །ཟས་མནན་མཚན་མོ་བཏུང་བའོ། །བད་ཀན་བདོ་འདས་ནད་པ་ནི། །ཉམས་སྟོབས་ལྡན་ལམ་ཟོས་བཏང༌། །ཐུར་སེལ་རླུང་ལ་ཟས་སྔར་བཏང༌། །མཉམ་གནས་ལྡང་ལ་བར་དུ་ཡིན། །
ཁྱབ་བྱེད་ནང་པར་ཟས་ཟའི་མཐར། །གྱེན་རྒྱུའི་རླུང་ལ་དགོངས་ཀའོ། །སྲོག་ཅེས་བྱ་བའི་རླུང་ལྡང་ལ། །ཁམ་གྱི་བར་དང་ཟས་བར་བཟའ། །དུགས་དང་སྐྱུགས་ལུད་དབུགས་མི་བདེ། །སྐོམ་དད་སྐྱེ་ལ་ཙེག་བུའོ། །ཡི་ག་འཆུས་ལ་སྣ་ཚོགས་ཟས། །སྨན་དང་ཟས་བཅས་སྦྱར་བར་བྱ། །སྐྱིགས་བུ་ལུས་འདར་ལག་འདར་དང༌། །ཟས་ཉུང་ཟ་ལ་མནན་བ་གཏང༌། །ནམ་ཚོང་ཡན་ཆད་ནད་ལ་ནི། །མཚན་མོའི་དུས་སུ་བཏང་བ་བསྔགས། །ཡན་ལག་བརྒྱད་པའི་སྙིང་པོ་བསྡུས་པ་ལས། །མདོའི་གནས་ཀྱི་ལེའུ་བཅུ་གསུམ་པའོ།། །།དེ་ནས་གསོ་བའི་ཐབས་རྣམ་པ་གཉིས་བསྟན་པའི་ལེའུ་བཤད་པར་བྱའོ། །གསོ་བ་རྣམ་པ་གཉིས་ཡིན་ཕྱིར། །གསོ་ཐབས་རྣམ་པ་གཉིས་སུ་འདོད། །དེ་གཅིག་བརྟ་བར་བྱ་བ་ཡིན། །གཉིས་པ་ཉམས་ནི་སྨད་པའོ། །དེ་དག་རྒྱས་བྱ་སྨྱུང་བ་ཞེས། །རྣམ་གྲངས་དག་ཏུ་བཤད་པ་ཡིན། །ལུས་ཤ་རྒྱས་ཕྱིར་རྒྱས་བྱ་སྟེ། །ཡང་བ་ཉིད་ཕྱིར་སྨྱུང་བར་བྱ། །དེ་ནི་ཕལ་ཆེར་ས་ཆུ་དང༌། །ཅིག་ཤོས་ལས་ནི་གྱུར་པ་ཡིན། །ལས་གང་སྣུམ་དང་དགག་པ་དང༌། །དུགས་དང་ཁོང་རྩུབ་བྱ་བ་སྟེ། །འབྱུང་བ་དེ་ཡང་གཉིས་ཡིན་ཕྱིར། །གཉིས་ལས་འདའ་བར་མི་བྱེད་དོ། །དེ་ལའང་སྦྱོང་དང་ཞི་བྱ་བ། །རྣམ་པ་གཉིས་པོ་སྨྱུང་བ་ཡིན། །གང་ཞིག་ནད་ནི་ཕྱིར་འབྱིན་པ། །སྦྱོང་ཡིན་དེ་ནི་རྣམ་ལྔ་སྟེ། །མས་གཏོང་སྐྱུགས་སྨན་ལུས་ནད་བཀྲུ། །མགོ་བོའི་ནད་བཀྲུ་གཏར་གསད་བྱུང༌། །གང་ཞིག་ནད་ནི་མི་སྦྱོང་དང༌། །སྙོམས་གནས་གློངས་པ་མ་ཡོན་དང༌། །མ་སྙོམས་སྙོམས་པར་བྱེད་པ་དག །ཞི་བ་ཡིན་ཏེ་དེ་རྣམས་བདུན། །སྨིན་དང་དྲོད་སྐྱེད་བཀྲས་སྐོམ་དང༌། །རྩོལ་བཅག་ཉི་ཚན་སེར་བུ་བསིལ། །བརྟ་བ་དག་ནི་རླུང་དང་ནི། །རླུང་བཅས་མཁྲིས་པ་ཞི་བྱེད་ཡིན། །བརྟ་བྱ་ནད་དང་སྨན་དང་ཆང༌། །བུད་མེད་མྱ་ངན་གྱིས་ཉམ་ཆུང༌། །ཁུར་དང་ལམ་གྱིས་གློ་རྡོལ་དང༌། །ལུས་རྩུབ་ཉམས་དམའ་རླུང་ཤས་ཆེ། །སྦྲུམ་མ་བུ་བཙས་བྱིས་པ་རྒན། །སོ་གའི་དུས་དང་གཞན་ཡང་བརྟ། །ཤ་དང་འོ་མ་ཀ་ར་དཀར། །མར་སར་མངར་བག་མས་གཏོང་དང༌། །གཉིད་ལོག་ཉལ་བདེ་བ་སྐུ་བྱུག་དང༌། །ཁྲུས་དང་བདེར་གནས་ཉམས་དགའ་བརྟ། །
གཅིན་སྙི་མ་ཞུ་སྣུམ་རབ་ཟོས། །རིམས་བཏབ་བརླ་རེངས་མཛེ་ནད་ཅན། །ཤུབ་ཁོང་འབྲས་མཆེར་པ་ན། །གླད་ནད་ལྐོག་ནད་མི་གནད་དང༌། །སྦོམ་པོ་དགུན་དང་གཞན་དག་ཀྱང༌། །རྟག་ཏུ་སྨྱུང་བར་བྱ་བ་ཡིན། །དེ་ལ་སྦྱང་བྱ་ཤས་ཆེ་སྦོམ། །སྟོབས་ལྡན་མཁྲིས་པ་བད་ཀན་རྒྱས། །མ་ཞུའི་ནད་དང་རིམས་དང་སྐྱུག །ཚད་པས་འཁྲུ་དང་སྙིང་ནད་ཅན། །ལུས་ལྕི་སྒྲེགས་མང་བཤང་གཅི་འགགས། །ཡི་ག་འཆུས་སོགས་ཀྱིས་ན་བ། །འབྲིང་ཙམ་སྤོམ་སོགས་ཕལ་ཆེར་ནི། །དང་པོར་སྨིན་དང་དྲོད་བསྐྱེད་བྱ། །ནད་ནི་འདི་དག་གིས་མཉམ་ཐག །སྦོམ་དང་སྟོབས་སོགས་ཆུང་བ་ལས། བཀྲེས་དང་སྐོམ་པས་ཚར་བཅད་དོ། །ནད་ཀྱིས་ཉམ་ཐག་སྟོབས་འབྲིང་བརྟན། །སེར་བུ་ཚ་རྩོལ་གྱིས་སྨད་ན། །ཉམ་ཆུང་མི་བརྟ་སྨོས་ཅི་དགོས། །ཉམས་སྨད་བྱ་བ་བརྟ་མི་བྱ། །བརྟ་བྱ་ཉམས་སྨད་འཇམ་པོས་བྱ། །ཡང་ན་ཡུལ་དང་སྟོབས་སོགས་ལས། །རིགས་པས་དེ་ནི་ཉེ་བར་སྤྱད། །བརྟ་བས་སྟོབས་ནི་འཕེལ་བ་དང༌། །དེ་ཡིས་བསྒྲུབ་བྱའི་ནད་ཟད་འགྱུར། །སྨྱུང་བས་དབང་གསལ་དྲི་མ་རྣམས། །མི་སྲི་ཁོང་ཡང་ཡིག་འབྱེ། །བཀྲེས་དང་སྐོམ་པ་ལྷན་ཅིག་འབྱུང༌། །དང་ག་སྙིང་དང་སྒྲེགས་པ་དག །ནད་ཀྱི་རྩེ་ཞི་ལ་སྤྲོ་བ་ཆེ། །སྙོམ་བག་མེད་པ་དག་ཏུ་འགྱུར། །དེ་དག་ཚད་ལ་སོགས་པ་དང༌། །མི་ལྡན་སྟེན་པར་བྱེད་པ་དག །རབ་སྦོམ་རབ་ཏུ་སྐེམ་སོགས་འགྱུར། །དེ་ཡང་སྨན་བཅས་བཤད་པ་ཡིན། །ཚུལ་ནི་ཤིན་ཏུ་བརྟ་བ་དང༌། །ཉམས་སྨད་དེ་ཉིད་ལས་ཤེས་བྱ། །ཤིན་ཏུ་ཚོ་ཆེས་འབྲུམ་གཅིན་སྙི། །རིམས་དང་དམུ་རྫིང་མཚན་བར་རྡོལ། །ལུས་རྨོངས་གཅིན་སྲེ་བེའུ་སྣབས་ཆགས། །མཛེ་ལ་སོགས་པ་མི་བཟད་འབྱུང༌། །དེ་ལ་ཚིལ་དང་རླུང་བད་ཀན། །སེལ་བར་བྱེད་པ་ཐམས་ཅད་ཕན། །ཛུར་ན་ཁྲེ་རྒོད་ཀུ་ལངྠ། །ནས་དང་སྲན་ཆུང་མོན་སྲན་སྡེའུ། །དར་བ་དར་རྙིང་ཞོ་ག་ཆུ། །སེམས་ལས་བྱ་དང་མི་ཉལ་བྱ། །སྦྲང་རྩི་འབྲས་བུ་གསུམ་པའམ། །སླེ་ཏྲེས་གླ་སྒང་ཨ་རུ་ར། །སྐྱེར་ཁཎྜ་དང་རྩ་བ་ནི། །ཆེན་པོ་ལྔ་དང་གུ་གུལ་དང༌། །བྲག་ཞུན་གྱི་ནི་སྦྱོར་བ་དང༌། །ཨ་ག་ནི་མན་ཐའི་ཁུ་བཅས་ཕན། །ནས་ཚིག་ར་ཁྲུས་ཐལ་བྱི་དང་ག །
བཅའ་སྒ་ལྕགས་ཕྱེ་སྦྲང་རྩི་དང༌། །ནས་དང་སྐྱུ་རུའི་ཕྱེ་མ་ཡིས། །སྦྱོར་བས་ཤིན་ཏུ་ཚོ་ནད་སེལ། །ཚ་གསུམ་འབྲས་གསུམ་བུ་ཙེ་ཤེ་ལ། །ཤི་ཀྲུ་བྱི་དང་པོ་སྛིར། །ཤིང་ཀུན་གོ་སྙོད་ཁ་རུ་ཚ། །ལ་ལ་ཕུད་དང་འུ་སུ་དང༌། །ཀྲུ་དྲུག་ཏྲེས་དང་སེར་པོ་གཉིས། བྲི་ཧ་གཉིས་དང་ཆུ་རྩི་མོ། །ཧ་པུ་ཤ་དང་པ་ཏ་དང༌། །ཀེ་པུ་ཀ་ཡི་རྩ་བ་སྟེ། །འདི་རྣམས་ཕྱེ་མ་མར་སྦྲང་རྩི། །ཏིལ་མར་དག་ནི་ཆ་སྙོམས་པ། །ནས་ཕྱེའི་ཆ་ནི་བཅུ་དྲུག་བསྐྱེད། །སྦྱར་བ་འཐུངས་ན་དེ་འཇོམས་སོ། །ཤིན་ཏུ་ཤས་ཆེའི་བདག་ཉིད་ཀུན། །གཞན་ཡང་དེ་འདྲའི་ནད་རྣམས་དང༌། །སྙིང་ནད་མིག་སེར་ཤ་བཀྲ་དང༌། །ལུས་དབུགས་མི་བདེ་ལྐོག་ནད་སེལ། །བློ་དང་ཡིད་གཞུངས་སེམས་དྲན་བྱེད། །ཟས་འཇུ་ཕོ་བའི་དྲོད་ཀྱང་སྐྱེད། །སྨྱུང་དྲགས་རབ་སྐམ་མགོ་འཁོར་ལུང༌། །སྐོམ་དང་ཆེ་ཞིང་ཡི་ག་འཆུས། །སྣུམ་དྲོད་གཉིད་མིག་རྣ་བ་ཉམས། །ཁུ་བ་གཟི་མདངས་སྐད་གསང་ཟད། །རྒུ་སོ་སྙིང་ཀླད་བྱིན་པ་བརླ། །དཀུ་དོ་རྩིབ་ལོགས་ན་རིམས་འདེབས། །ཚིག་མང་སྟོང་དུ་རླུང་ནད་འཇུག །རྨྱ་ཞིང་སྐྱུག་བྲོ་རུས་ཚིགས་ན། །བཤང་གཅི་སྲི་བ་ལ་སོགས་པ། །སྨྱུང་བ་དྲགས་པས་འབྱུང་བར་འགྱུར། །རབ་ཏུ་ཚོ་བས་སྐེམ་ཉིད་མཆོག །ཤིན་ཏུ་ཚོ་དྲགས་པ་ཡི་སྨན། །ཤིན་ཏུ་ཚིལ་ཆེས་མེ་རླུང་སེལ། །བརྟ་དང་ཉམས་སྨད་ཡོད་མ་ཡིན། །གང་ཞིག་མངར་དང་སྣུམ་བག་བཟའ། །བསོད་བདེ་དག་གིས་སྐེམ་པ་སེལ། །དེ་ལས་ཤིན་ཏུ་བཟློག་པ་དག །ངེས་པར་བསྟེན་པས་སྦོམ་ཉིད་སེལ། །དེ་ལ་བཟའ་བཏུང་སྨན་རྣམས་ནི། །བརྟ་བར་བྱེད་པ་ཐམས་ཅད་སྦྱར། །སེམས་ལས་མེད་དང་དགའ་བ་དང༌། །ངེས་པར་བརྟ་བར་བྱ་བ་དང༌། གཉིད་ཆེར་ལོག་པས་སྐམ་པ་ཡང༌། །ཕག་དང་འདྲ་བར་ལུས་རྒྱས་གྱུར། །ལུས་ནི་བརྟས་ཤིང་ཚོ་བྱེད་པ། །ཤ་དང་འདྲ་བ་གང་ཡང་མེད། །ཤ་མི་ཟ་ལ་ཤ་ཟའི་ཤས། །ལུས་ནི་ཤིན་ཏུ་བརྟས་བྱེད་ཡིན། །སྦོམ་ལ་ཉམས་སྨད་ལྕི་བས་བྱ། །དེ་ལས་བཟློག་པ་སྐེམ་ལ་ཕན། །ནས་དང་གྲོ་ནི་གཉིས་ཀ་ལ། །དེ་ལ་འོས་པར་བྱེད་པས་བརྟག །ནད་ཀྱི་དབྱེ་བ་ཐ་དད་ཀྱི། །གཅོད་འཁྲུལ་
སོགས་དབྱེ་བ་ཡིས། །ནད་ལྟར་ཐ་དད་གྱུར་ཀྱང་ནི། །གསོ་བ་གཉིས་ལས་ཡོད་མ་ཡིན། །ཡན་ལག་བརྒྱད་པའི་སྙིང་པོ་བསྡུས་པ་ལས། མདོའི་གནས་ཀྱི་ལེའུ་བཅུ་བཞི་པའོ།། །།དེ་ནས་སྦྱང་བ་ལ་སྩོགས་པ་སྨན་གྱི་སྡེ་ཚན་འདུས་པའི་ལེའུ་བཤད་པར་བྱའོ། །པོ་སོན་ཆ་དང་ཤིང་མངར་དང༌། །ཀུ་བ་ཁ་བོ་ནིམ་པ་དང༌། །བིམ་པ་ག་གོན་བི་ཤ་ལ། །དུག་མོ་ཉུང་དང་མུར་བ་དང༌། །དེ་བ་དེ་ལ་བྱི་དང་ག །ལྕང་མ་ཙི་ཏྲ་ཀྲུ་ཏྲུག་ཏྲེས། །ཀོ་ཤ་བ་ཏི་ཀ་རཉྫ། །པི་པི་ལིང་དང་རྒྱམ་ཚ་དང༌། །ཤུ་དག་སུག་སྨེལ་ཡུངས་ཀར་ཏེ། །འདི་དག་སྐྱུགས་བའི་སྨན་གྱི་སྡེ། །དན་ཏི་དང་ནི་ཏྲི་བིད་ཏ། །འབྲས་བུ་གསུམ་དང་བི་ཤ་ལ། །ཤང་ཀི་ནི་དང་སྣུ་ཧ་དང༌། །སེང་ཕྲོམ་དོང་ག་ནི་ལི་ནི། །ཁྲོན་བུ་དང་ནི་ཀམ་པི་ལྱ། །འོ་མ་གཅིན་འཁྲུ་བར་བྱེད། །པོ་སོན་ཆ་དང་དུག་མོ་ཉུང༌། །རུ་རྟ་དེ་བ་ད་ལི་དང༌། །ཤིང་མངར་ཤུ་དག་རྩ་བ་བཅུ། །ཐང་ཤིང་ར་སྣལ་ལ་ཕུད། །ཤ་ཏ་པུས་པ་པ་ཏ་ལ། །རྒྱ་སྲན་ནག་པོ་སྦྲང་རྩི་དང༌། །རྒྱམ་ཚ་ལྕེ་ཚ་ཤིང་ཉེ་རོ། །འདི་དག་མས་གཏོང་བཀྲུ་སྨན་ཏེ། །ཨ་བ་མརྒ་བྱི་དང་ག །ཚ་བ་གསུམ་དང་སྐྱེར་བའི་རྩ། །སུ་ར་ལ་དང་ཤི་རི་ཥ། །བྲི་ཉད་ཤི་ཀྲུའི་ས་བོན་དང༌། །སེང་ལྡེང་མ་དུ་ཀའི་སྙིང་པོ། །རྒྱམ་ཚ་དངུལ་རྡོ་ཕ་བོང་དྲེག །སུག་སྨེལ་གཉིས་དང་གོ་སྙོད་སྤོམ། །མགོ་བོའི་ནད་སྦྱོང་བྱེད་པ་ཡིན། །ཐང་ཤིང་རྒྱ་སྤོས་རུ་རྟ་དང༌། །རྩ་བ་བཅུ་དང་བལ་གཉིས། །བི་ར་ཏ་རིའི་སྨན་སྡེར་གཏོགས། །བི་ད་རི་སོགས་རླུང་ནད་སེལ། །དཱུར་བ་དང་ནི་བྱི་ཚེར་བ། །ནི་མ་བ་ཤ་ཀའི་ལོ་མ། །ཁ་སྲལ་ཕྲེའུ་འོལ་མས། །ཉེའུ་ཤིང་པ་ཞེས་བྱ་དང༌། །ཤི་ཏ་པ་ཀི་པྲ་ཡང་ཀུ། །ནྱ་གྲོ་དྷ་སོགས་ཤུག་པ་སོགས། །སྠི་ར་རྣམ་གཉིས་པདྨའི་ཟེ། །བན་ནྱ་ཐལ་ཏྲེས་སོགས་མཁྲིས་སེལ། །དོང་ག་སོགས་དང་ཨརྐ་སོགས། །མུངྒ་སོགས་དང་པོ་སོན་སོགས། །བྱེའུ་རུག་པ་སོགས་གླ་སྒང་སོགས། །དུག་མོ་ཉུང་སོགས་བད་ཀན་སེལ། །ཛི་བནྟི་དང་ར་མཉེ་བ། །མེ་ད་མ་ཧཱ་མེ་ད་དང༌། །མུངྒ་མ་ཤ་པརྞི་དང༌། །ལྡུམ་བུ་ཟངས་རྩི་བ་དང་ནི། །ཛི་བ་ཀ་དང་ཤིང་མངར་ཏེ། །སྡེ་འདི་འཚོ་བྱེད་ཅེས་བྱ་
ཡིན། །བིད་རི་དང་ཨེ་རཎྜ། །པྲིཥྩི་ཁ་ལི་པུརྞ་རྣ། །དེ་བ་ཧ་ས་དེ་བ་དང༌། །པརྞི་གཉིས་དང་ཁ་སྲལ་དང༌། །འཚོ་བྱེད་ལྔ་དང་རྩ་ཆུང་ལྔ། །ཐལ་ཏྲེས་དང་ནི་ལྕང་མ་དང༌། །ཧཾ་ས་པ་ཏི་ཞེས་བྱ་རྣམས། །བི་ད་རི་སོགས་འདི་སྙིང་ཕན། །ཉམ་ཆུང་རླུང་དང་མཁྲིས་པ་སེལ། །ལུས་སྐེམ་སྐྲན་ཚིགས་ཡན་ལག་ན། །དབུགས་མི་བདེ་དང་ལུད་པ་ལུ། །སེལ་བར་བྱེད་པའི་སྡེ་ཚན་ཡིན། །ཐལ་ཏྲེས་དང་ནི་པུ་ཤེལ་ཙེ། །ཏང་པ་ལ་དང་ནི་མ་དུ་ཀ །ཙནྡན་དཀར་དང་དམར་བ་དང༌། །ཤིང་མངར་བ་རུ་ཤ་ཀ་རྣམས། །ཚད་བ་མཁྲིས་པ་ཁྲག་རྒྱས་དང༌། །སྐོམ་དང་རིམས་ཀྱིས་བཏབ་པ་སེལ། །ཤུག་པ་པུཎྜ་རཱི་ཀ་དང༌། །བྲྀཏྟི་རྀཏྟི་ཅུ་གང་དང༌། །སྲིང་གི་སླེ་ཏྲེས་འཚོ་བྱེད་བཅུ། །ནུ་ཞོ་སྐྱེད་བྱེད་རླུང་མཁྲིས་སེལ། །ཉམ་ཆུང་ཚིམ་བྱེད་བརྟས་བྱེད་ལ། །འཚོ་བྱེད་རོ་ཙ་ཉིད་དུ་བྱེད། །པ་རུ་ཤ་དང་འབྲས་བུ་གསུམ། །རྒུན་འབྲུམ་དང་ནི་ཀད་པ་ལ། །ཀ་ཏ་ཀའི་འབྲས་ར་ཛ་དན། །སེའུ་འབྲུ་བ་ར་ད་དུ་རྣམས། །སྐོམ་དང་ཆེ་དང་གཅིན་སྲི་དང༌། །རླུང་གི་ནད་རྣམས་སེལ་བྱེད་ཡིན། །ཨཉྫ་ན་དང་ཕ་ལི་ནི། །སྤང་སྤོས་པདྨ་ཨུཏྤ་ལ། །སྐྱེར་ཁཎྜ་དང་སུག་སྨེལ་དང༌། །ཤིང་མངར་ནཱ་གེ་སར་བཅས། །དུག་དང་ནང་གི་ཚ་བ་དང༌། །མཁྲིས་པ་རྒྱས་པ་སེལ་བར་བྱེད། །པ་ཏོལ་དང་པུ་ཙེ་ཤེལ་།ཙནྡན་དཀར་པོ་མུར་བ་དང༌། །སླེ་ཏྲེས་སྐྲ་ལོར་བཅས་པ་དག །བད་ཀན་མཁྲིས་པ་མཛེ་དང་རིམས། །དུག་དང་སྐྱུག་བྲོ་ཡིག་འཆུས། །མིག་སེར་གྱི་ནི་ནད་རྣམས་འཇོམས། །སླེ་ཏྲེས་དང་ནི་ཤུག་པ་དང༌། །ནིམ་པའུ་སུའི་འབྲས་བུ་དང༌། །ཙནྡན་དམར་པོ་ཞེས་བྱ་རྣམས། །མཁྲིས་པ་དང་ནི་བད་ཀན་དང༌། །རིམས་དང་སྐྱུག་བྲོ་ལུས་ཚ་དང༌། །སྐོམ་དད་ཆེ་སེལ་མེ་དྲོད་སྐྱེད། །དོང་ག་དང་ནི་དུག་མོ་ཉུང༌། །ཀ་ཀ་ཏིག་ཏ་བ་ཏ་ལི། །ནིམ་པ་སླེ་ཏྲེས་དཱུར་བ་དང༌། །མུར་བ་བི་དང་ཀ་ཏ་དང༌། །པ་ཐ་ཅི་སྐྲིགས་ཤེ་རྒྱ་ཀ །ཀ་རཉྫ་གཉིས་པ་ཏོ་ལ། །ལོ་མ་བདུན་པ་ཀྲུ་ཏྲུག་ཏྲེས། །སུ་ཥ་བྱི་ཏ་པོ་སོན་ཆ། །ས་ཧ་ར་ཙ་ཞེས་བྱ་དང༌། །རྒྱ་ཤུགས་གི་ནི་འབྲས་བུ་རྣམས། །དེ་ནི་སློན་བྲོ་མཛེ་ནད་དང༌། །དུག་དང་
རིམས་དང་བད་ཀན་དང༌། །གཡས་པ་དང་ནི་གཅིན་སྙི་དང༌། །རྨ་རེད་པ་རྣམས་སྦྱོང་བར་བྱེད། །ཨ་ས་ན་དང་ཏི་ནི་ཤ །སྟག་པ་ཤྭེ་ཏ་བ་ཧ་དང༌། །ཀ་ཏ་ར་སེང་ལྡེང་དང༌། །བན་དང་ནི་ཤིང་ཤ་བ། །ཨ་ཛ་སྲིང་ག་ཙནྡན་གསུམ་།ཏ་ལ་ཨ་ཀར་པ་ལ་ཤ །ས་ལ་ཁ་ར་བ་ཏྲ་དང༌། །དྷ་བ་ཀ་ལིང་ཀ་སྤྲོ་ཏོག །ཚ་ག་ཀ་རྣ་བད་ཚ་ཀ །ཐ་རམ་ཞེས་ནི་བྱ་བ་སྟེ། །ཨ་སན་སོགས་དེ་རྣམས་ཀྱིས། །ཤ་བཀྲ་མཛེ་ནད་བད་ཀན་དང༌། །སྲིན་ནད་སྐྱ་རྦབ་གཅིན་སྙི་དང༌། །ཚོ་ཆེས་ནད་ནི་སེལ་བར་བྱེད། །བར་ན་ཤེ་རྒྱ་ཀ་གཉིས། །ཉེ་ཤིང་ཙི་ཏྲ་མོ་ར་ཏ། །བིལ་བ་ཨཉྫ་སྲིང་གི་དང༌། །བྲི་ཧ་ཏི་ནི་རྣམ་གཉིས་དང༌། །ཀ་རྙྫ་གཉིས་ཛ་ཡ་གཉིས། །ཤི་ཀྲུ་ཀུ་ཤ་རུ་རྟའོ། །བ་ར་ནི་སོགས་བད་ཀན་ཚིལ། །མེ་དྲོད་ཆུང་དང་རླུང་ནད་འཁྱིམས། །ཀླད་པ་ལ་བརྟེན་ནད་སེལ་ཞིང༌། །སྐྲན་དང་ཁོང་འབྲས་འཇོམས་པ་ཡིན། །རུ་ཤ་ཀ་ཤིང་ཀུན་སྤངས་མ། །རྒྱམ་ཚ་བྲག་ཞུན་ནག་ཚུར་གཉིས། །གཅིན་སྲི་རྡེའུ་འགགས་པ་དང༌། །སྐྲན་དང་ཚིལ་ཆེས་བད་ཀན་སེལ། །བེ་ལན་ཏ་ར་ཨར་ནི། །སྦྲ་ཏོག་བྲི་ཤ་སྲུ་སྲུའི་རྩ། །ཨི་ཀ་ཏ་དང་གཟེམ་དང༌། །ས་ཧ་ར་ཛ་བ་ན་དང༌། །ཀ་ཤ་བྲྀཀྵ་ད་ནི་དང༌། །འདམ་བུ་ཀུ་ཤ་རྣམ་གཉིས་དང༌། །ཀུན་ཐ་དང་ནི་ཁ་སྲལ་དང༌། །བ་ལུ་ཀ་དང་མོར་ཏེ། །ཀུ་རྟ་དང་ཀ་རམ་པ། །ལྕམ་པ་ཞེས་བྱའི་སྨན་སྡེ་འདི། །བེ་ལེན་ཏ་ར་ལ་སོགས་པ། རླུང་ལས་གྱུར་པའི་ནད་འཇོམས་ཤིང༌། །རྡེའུའི་ཕྲེའུ་ཡོད་པ་དང༌། །གཅིན་སྲི་བ་ཡི་ནད་རྣམས་སེལ། །སེང་ཕྲོམ་ཤ་བར་རོ་ཏྲ། །པ་ལ་ཤ་དང་ཛྷིན་ཛི་ནི། །ཐང་ཤིང་ཀད་པ་ལ་ར་སྣ། །ཀ་ཏམ་པ་དང་ཆུ་ཤིང་དང༌། །ཨེ་ལ་བ་ལུ་ཨ་ཤྭ་ཀ །པ་རི་པེ་ལ་མོ་ཙ་ཀ །འདི་ནི་སེང་ཕྲོམ་སོགས་ཞེས་བྱ། །ཚིལ་ཆེས་བད་ཀན་སེལ་བའི་སྡེ། །མངལ་ནད་འཇོམས་ཤིང་འཁྲུ་བ་གཅོད། །མདོག་བཟང་དུག་ནད་སེལ་བྱེད་ཡིན། །ཨརྐ་དང་ནི་ཨ་རལ་ཀ །ནཱ་ག་དནྟི་བི་ཤ་ལྱེ། །ག་བྲ་ར་སྣ་བྲི་ཤལ། །ཨ་བ་མརྒ་ཀ་རཉྫ། །ཀ་ཀད་རི་ཀ་རཉྫ། །གི་རི་ཀར་གཉིས་ཨིཾ་གུ་དང༌། །ཨརྐ་ལ་སོགས་སྡེ་ཚན་འདི། །བད་ཀན་ཚིག་ཆེས་དུ་
རྣམས་སེལ། །སྲིན་ནང་དང་ནི་མཛེ་ནད་འཇོམས། །ཁྱད་པར་དུ་ནི་རྨ་ལ་ཕན། །བྱེའུ་རུག་རྣམས་གཉིས་ཀུ་ཐེར། །ཀ་ལ་མལ་བྱི་དང་ག །ཁ་ར་པ་ཏྲ་ཀད་པ་ལ། །བྲི་ཤ་ཀརྞི་ཤ་ཀུན་ཏི། །སྐེ་ཚེ་ཀ་བིད་ཐའི་ལོ་མ། །ག་བྲ་མོན་སྣེའུ་ཀ་མུ་ཀ་རྐང་མར་བི་ཤ་མུཥྚྷི་དང༌། །བུ་སྲིན་དང་འབམ་པོའོ། །བྱེའུ་རུག་པ་ལ་སོགས་པའི་སྡེ། །བད་ཀན་ཚིལ་ཆེས་སྲིན་ནད་སེལ། །ཆམ་པ་ཡི་ག་འཆུས་ལུད་པ། །དབུགས་མི་བདེ་འཇོམས་རྨེ་རེད་སྦྱོང༌། །མུསྐ་ཀ་དང་སྣུ་ཧ་དང༌། །འབྲས་བུ་གསུམ་དང་ཙི་ཏྲ་ཀ །པ་ལ་ཤ་དང་དྷ་བ་དང༌། །ཤིང་ཤ་བ་ཞེས་བྱ་བ་རྣམས། །སྐྲན་དང་གཅིན་ནད་རྡེའུ་ཆགས། །སྐྱ་རྦབ་དང་ནི་ཚིལ་ཆེས་ནད། །བད་ཀན་རྒྱས་དང་ཁུ་བ་ཡི། །ནད་རྣམས་སེལ་བར་བྱེད་པ་ཡིན། །དུག་མོ་ཉུང་དང་མུར་བ་དང༌། །བར་གྱི་དང་ནི་བུ་ཙེ་ཤེལ། །ན་ལེ་ཤམ་དང་བོང་བ་དཀར། །ཆུ་སྒོག་སུག་སྨེལ་བ་ཏ་དང༌། ཉུངས་ཀར་ཟིར་ཨུར་ལུ། །ཨ་ཟ་མོ་དང་པོ་སོན་ཆ། །ཤུད་གཟིར་ནག་པོ་དང༌། །ཤིང་ཀུན་དང་ནི་བྱི་དང་ག །པ་ཤུ་གནྡྷ་ཚ་བ་ལྔ། །རླུང་དང་བད་ཀན་ཚིལ་ཆེས་དང༌། །ཆམ་པ་སྐྲན་དང་རིམས་དང་གཟེར། །གཞང་འབྲུམ་གྱི་ནི་ནད་རྣམས་སེལ། །ཤུ་དག་གླ་སྒང་ཐང་ཤིང་དང༌། །དོང་གྲ་བོང་ང་ཨ་རུར། །སེར་པོ་གཉིས་དང་ཤིང་མངར་དང༌། །ཀྲྀཥྞ་པརྞི་དུག་མོ་ཉུང༌། །ཤུ་དག་ཡུང་བ་ལ་སོགས་སྡེ། །བེའུ་སྣབས་ཚད་པས་འཁྲུ་སྨིན་གཅོད། །ཚིལ་ཆེས་བད་ཀན་རྒྱས་རླུང་འཁྱིལ། །ནུ་མའི་ནད་རྣམས་སེལ་བར་བྱེད། བྲི་ཡངྐུ་དང་ར་གན་དུད། །ལིག་བུ་མིག་དང་སྟང་ཟིལ་དང༌། །ལྕིམ་རྩ་པདྨ་གེ་སར་དང༌། །བཙོད་དང་ཡ་བ་ཤ་ཀ་དང༌། །ཤལ་མ་ལི་དང་དེའི་ཁུ་བ། །ས་མང་ག་དང་བུན་མ། །ཙནྡན་ད་ཏ་ཀའི་མེ་ཏོག །ཨཾ་པ་ཤ་དང་ཤིང་མངར་དང༌། །ན་མ་ཀ་ར་ཏུ་ནི་ཤིང༌། །རྒྱ་སྐྱེགས་ཤིང་དང་ཀང་ཚུ་ར། །སེང་ཕྲོམ་བིལ་རྐང་ད་ཏ་ཀི། །པདྨའི་གེ་སར་ཀ་ཏང་ཀ །པྲི་ཡང་ཨཾ་པསྠ་སྡེ་གཉིས། །ཞུ་བའི་ཚད་པའི་འཁྲུ་བ་སེལ། །འབྱོར་བྱེད་མཁྲིས་པ་དག་ལ་ཕན། །རྨ་ཡང་འཚོ་བ་པར་བྱེད་པ་ཡིན། །ཀླ་སྒང་ཤུ་དག་ཀྲུ་ཏྲུག་ཏྲེས། །སེར་པོ་གཉིས་དང་ཁ་བ་
གཉིས། །གོ་བྱེ་པ་ཐ་འབྲས་བུ་གསུམ། །བོང་ང་དཀར་ནག་རུ་རྟ་དང༌། །སུག་སྨེལ་དང་ནི་ཤུ་དག་རྣམས། །ནུ་ཞོ་མངལ་ནད་དྲི་མ་སེལ། །ནྱ་གྲོ་དྷ་དང་ཨ་ཤྭདྠ། །ཨུ་དུམྦཱ་ར་སེང་ཕྲོམ་གཉིས། །འཛམ་བུ་གཉིས་དང་ཨ་རྫུན། །ཀ་བི་ཏ་དང་ཀད་པ་ལ། །བླག་ཤ་ཨ་མྲ་ལྕང་མ་དང༌། །བི་ཡ་ལ་དང་པ་ལ་ཤ །ནནྟི་རྒྱ་ཤུག་ཀ་དམ་པ། །བིར་ཤིང་མངར་མ་དུ་ཀ །ནྱ་གྲོ་དྷ་སོགས་སྡེ་ཚན་འདི། །རྨ་འཚོ་འཁྲུ་གཅོད་ཆག་གྲུགས་སྦྱོར། །ཚིལ་ཆེས་ཁྲག་མཁྲིས་སྐོམ་དད་ཆེ། །མངལ་གྱི་ནད་རྣམས་སེལ་བར་བྱེད། །ཨེ་ལ་གཉིས་དང་དུ་རུ་ཀ །རུ་རྟ་གནྡྷ་བྲི་ཡང་ཀུ། །སྤང་སྤོས་པ་ལ་བྱ་མ་ཀ །སྤྲི་ཀ་ཙོར་ཙོ་ཙ་དང༌། །ཤིང་ཚ་གནྡྷ་བྷ་དྲ་དང༌། །རྒྱ་སྤོས་བོ་ལ་སྠེ་ནེ་ཡ། །རྒྱ་མཚོའི་ལྦུ་བ་ཆུ་སྲིན་སེན། །ཐང་ཤིང་དང་ནི་ཨ་ཀ་རུ། །གུར་གུམ་ཤི་རི་བས་ཀ །ཙནྡན་གུ་གུལ་ལྕེ་པོག་དཀར། །བུར་ནམ་དང་ཀུན་དུ་རུ། །ནཱ་ག་གསེར་ཞེས་བྱའོ། །ཨེ་ལ་སོགས་སྟེ་རླུང་བད་ཀན། །དུག་རྣམས་སེལ་ཞིང་མདོག་གསལ་བྱེད། །གཡོན་པ་ཐོར་བུའི་ནད་རྣམས་དང༌། །ཤ་བཀྲ་བས་ལྡག་སེལ་བར་བྱེད། །ཤ་མ་དན་ཏི་དྲ་བནྟི། །ཀུ་ཏ་ར་ན་ཀྲ་མུ་ཀ །ཤཾ་གི་ནི་དང་ས་ཏ་ལ། །ཁྲོན་བུ་དང་ནི་ག་བཀྵི། །སུ་དྷ་ཀྵི་ར་ཀམྦི་ལྱེ། །སླེ་ཏྲེས་དོང་ག་ཀ་རཉྫ། །བཥྚ་ཨནྟྲ་ཤི་ཀྲུ་དང༌། ཨ་མྲ་ཤི་རོ་ཚའི་འབྲས་བུ། །དུར་བྱིད་ལ་སོགས་སྡེ་ཚན་འདི། །སྐྲན་དང་དུག་དང་ཡི་ག་འཆུས། །བད་ཀན་དང་ནི་སྙིང་ནད་དང༌། །གཅིན་སྲི་བ་ཡི་ནད་རྣམས་འཇོམས། དེ་ལྟར་སུམ་ཅུ་རྩ་གསུམ་བཤད། །སྡེ་ཚན་དེ་ལས་མ་རྙེད་ན། །དེ་དང་མཚུངས་པ་གཞན་དང་སྦྱར། །མི་འདྲའི་སྦྱོར་བ་སྤང་བར་བྱ། །སྡེ་ཚན་དེ་དག་གནོད་དང་གནོད་བྱ་སོགས་ལྟོས་ཏེ། །ཆོ་ག་བསྐོལ་དང་སྣུམ་དང་བསྡམས་པ་ལ་སོགས་ལྡན། །བཏུང་དང་སྣར་གཏང་མས་གཏོང་དང་ནི་ཕྱི་རོལ་དུ། །བསྐུ་ཞིང་བྱུགས་པས་ཤིན་ཏུ་གསོ་དཀའི་ནད་ཀུན་འཇོམས། །ཡན་ལག་བརྒྱད་པའི་སྙིང་པོ་བསྡུས་པ་ལས། །མདོའི་གནས་ཀྱི་ལེའུ་བཅྭ་ལྔ་པའོ།། །།དེ་ནས་སྣུམ་གྱི་ཆོ་ག་བྱ་བའི་ལེའུ་བཤད་པར་བྱའོ། །སྣུམ་བྱེད་སྨན་རྣམས་ཕལ་ཆེར་ནི། །
ལྕི་ཞིང་བསིལ་ལ་ཁོང་འཁྲུ་སྣུམ། །རྡུལ་དང་བྲལ་ལ་མཉེན་ཞིང་བརླན། །དེ་ལས་བཟློག་པ་རྩུབ་བྱེད་ཡིན། །ཞུན་མར་རྐང་དང་ཚིལ་ཏིལ་མར། །སྣུམ་རྣམས་ཀྱི་ནི་མཆོག་རབ་འདོད། །དེ་དག་ལས་ཀྱང་ཞུན་མར་ནི། །སྦྱོར་རྗེས་སུ་འཇུག་པས་མཆོག་ཡིན་ནོ། །དེ་དག་སྔོན་བཞིན་མཁྲིས་པ་སེལ། །ཕྱི་མ་བཞིན་དུ་ཅིག་ཤོས་སེལ། །མར་བས་ཏིལ་མར་ལྕི་དེ་བས། །ཚིལ་དེ་ཚིལ་བས་རྐང་ལྕིའོ། །དེ་ལས་གཉིས་དང་གསུམ་དང་བཞི། །ཟུང་དང་གསུམ་པ་ཆ་ཞེས་བྱ། །དུགས་བྱ་སྦྱང་བྱ་ཆང་བུད་མེད། །རྩོལ་ཆགས་སེམས་ལས་ཆེ་བ་དང༌། །རྒན་པོ་བྱིས་པ་སྟོབས་ཆུང་སྤེགས། །རྩུབ་དང་ཁྲག་དང་ཁུ་བ་ཟད། །རླུང་ནད་ཀྱིས་ཉེན་རབ་རིབ་དང༌། །ཤིན་ཏུ་དབྱེ་དཀའ་ལ་སྣུམ་བྱ། །ཤིན་ཏུ་དྲོད་ཆུང་རབ་དྲོད་ཆེ། །ཤིན་ཏུ་སྦོམ་དང་རིད་པ་དང༌། །བརླ་རེངས་ཚད་འཁྲུ་མ་ཞུ་དང༌། །ལྐོག་ནད་དབྱིག་དུག་དམུ་རྫིང་དང༌། །བརྒྱལ་སྐྱུགས་བད་ཀན་ཡི་ག་འཆུས། །སྐོམ་དང་ཆང་ནད་ཀྱིས་ཉེན་དང༌། །དུས་མིན་བུ་སྐྱེས་སྣ་སྨན་དང༌། །མས་གཏོང་བཀྲུ་སྨན་བྱས་ལ་མིན། །དེ་ལ་བློ་དྲན་ཡིད་གཞུངས་སོགས། །འདོད་པ་རྣམས་ལ་ཞུན་མར་བསྔགས། །རྨེན་བུ་བད་ཀན་སྲིན་བུ་དང༌། །ཚིལ་ཆེས་རླུང་ནད་ཡོད་པ་དང༌། །ལུས་ཡང་མཁྲང་འདོད་ལྟོ་སྲབ་པའི། །ལུས་ཅན་རྣམས་ལ་ཏིལ་མར་ཕན། །རླུང་དང་ཉི་ཚན་ལམ་བུད་མེད། །ཁུར་དང་རྩོལ་བས་ལུས་ཟུངས་ཟད། །རྩུབ་ཉོན་མོངས་བཟོད་མེ་དྲོད་རྣོ། །རྩ་སྒོ་རླུང་འགགས་ལྷག་མ་ཕན། །ཚིགས་དང་རུས་པ་གནད་རྣམས་དང༌། །ལྟོ་ན་མེས་ཚིག་རྨ་བྱུང་ལྟུང༌། །མངལ་དང་རྣ་བ་གླད་ནད་ལ། །ཚིལ་ཡང་མཆོག་ཏུ་ཕན་པ་ཡིན། །ཏིལ་མར་དབྱར་ཕན་ཞུན་པར་ནི། །དབྱར་མཐའ་དེ་བཞིན་དཔྱིད་ཀྱང་བསྔགས། །ཐུན་མོང་དུས་ལ་སྣུམ་རྣམས་ནི། །ཉིན་མོར་ཉི་མ་གསལ་ཚེ་བསྔགས། །རིངས་ལ་དགུན་ཡང་ཏིལ་མར་གཏང༌། །ཚ་བའི་དུས་སུའང་མར་ཚན་གཏང༌། །མཁྲིས་པ་རླུང་དང་མཁྲིས་པར་བཅས། །ལྡན་པ་ལ་ཡང་མཚན་མོ་ཉིད། །མཚན་མོ་ལས་གཞན་རླུང་བད་ཀན། །ཉིན་པར་སྦྱར་བསམ་མཁྲིས་ནད་འགྱུར། །བཟའ་སོགས་ཟས་
དང་མས་གཏོང་དང༌། །སྣ་ནས་གཏང་བསྐུ་མཁུར་བཀང་དགོ །མགོ་བསྐུ་རྣ་མིག་དགང་བ་ཡི། །སྣུམ་ནི་རིགས་པར་དཔྱད་པར་བྱ། །རོ་ཡི་དབྱེ་བ་རེ་རེ་ཡིས། །དྲུག་ཅུ་རྩ་བཞིར་རྣམ་པར་བརྟགས། །སྣུམ་ནི་གཞན་གྱིས་ཟིལ་གནོན་ཞིང༌། །ཆུང་དུ་དགོས་པས་རིམ་པར་བཤད། །ཇི་སྐད་བཤད་པའི་རྒྱུ་མེད་པས། །དངས་མ་བཏུང་ལ་དཔྱད་མི་དགོས། །སྣུམ་གྱི་ལས་ནི་མྱུར་བསྒྲུབས་པས། །སྣུམ་དེའི་ཆོ་ག་མཆོག་ཡིན་ནོ། །གང་ཞིག་ཐུན་ནི་གཉིས་དང་བཞི། །བརྒྱད་ཀྱིས་རིམ་བཞིན་འཇུ་འགྱུར་བ། །ཚད་ཆུང་འབྲིང་དང་ཆེ་བ་སྟེ། །དེ་ལས་ཆུང་ངུ་བཟའ་བ་མཆོག །ནད་ལ་སོགས་པ་བརྟགས་ནས་ནི། །ཐོག་མར་ཤིན་ཏུ་ཆུང་ངུ་བཟའ། །སྔ་དེའི་ཟས་དེ་ཞུ་ཉིད་ན། །སྦྱང་ཕྱིར་དངས་མ་མང་དུ་བཏུང༌། །ཞི་བྱ་ལྟོགས་བྱས་ཟས་མེད་པར། །འབྲིང་ཚད་ཙམ་ནི་བསྔགས་པ་ཡིན། །བརྟ་བ་ཤ་དང་ཤ་ཁུ་སོགས། །དེ་ཡང་འབྲས་ཆན་ཉུང་བཅས་པ། །བྱིས་པ་རྒན་པོ་སྐོམ་གྱིས་གདུངས། །སྣུམ་འགྲས་ཆད་དང་ཆེ་བ་དང༌། །བུད་མེད་སྣུམ་ནི་རྟག་བསྟེན་དང༌། །དྲོད་ཆུང་བདེ་དང་དཀའ་མི་བཟོད། །ལྟོ་སྙི་ནད་དཀྱིལ་ཆུང་ཚ་དུས། །ཉམ་ཆུང་པ་ལ་བསྔགས་པ་ཡིན། །དང་པོ་བར་དང་ཟས་རྗེས་ཟོས། །ལུས་ཀྱི་སྨད་བར་སྟོད་ལས་བྱུང༌། །ནད་རྣམས་སེལ་ཞིང་ལུས་ཀྱི་སྟོབས། །བསྐྱེད་པའི་རིམ་བཞིན་བྱེད་པ་ཡིན། །དེ་ནི་ལེགས་པར་སྨིན་ཕྱིར་དང༌། །ཁར་ཆགས་པ་ནི་ཕྱི་བའི་ཕྱིར། །སྣུམ་དག་འཐུངས་རྗེས་ཆུ་ཚན་བཏུང༌། །ཨེ་རཎ་པ་ལ་ཏ་ཀར་མིན། །ཞུའམ་མ་ཞུའི་དོགས་སྐྱེས་ན། །སླར་ཡང་ཆུ་ཚན་བཏུང་བར་བྱ། །དེས་ནི་སྒྲེགས་པ་དག་འགྱུར་ཞིང༌། །དེ་ལས་ཁོང་ཡང་ཡི་གར་འོང༌། །ནང་པར་འཐུང་ངམ་འཐུངས་པ་དང༌། །འཐུངས་པར་གྱུར་ཚེ་ཁ་ཟས་རན། །གཤེར་དྲོ་བད་ཀན་མི་སྐྱེད་དང༌། །ཤིན་ཏུ་སྣུམ་མིན་འདྲེས་མིན་བཟའ། །ཁ་ལག་ཆུ་དྲོན་གྱིས་བཀྲུ་ཞིང༌། །བུད་མེད་མི་བསྟེན་མཚན་མོ་ཉལ། །ཤུགས་དགག་དྲག་ཤུལ་ལས་རྣམས་དང༌། །ཁྲོ་དང་མྱ་ངན་ཉི་ཚན་གྲང༌། །སེར་བུའི་ཁར་འདུག་རྟ་ཞོན་འགྲོ། །མང་སྨྲ་རབ་མཐོའི་སྟན་ལ་འདུག །སྔས་ནི་རབ་མཐོ་རབ་དམའ་དང༌། །ཉིན་ཉལ་དུད་རྡུལ་གནས་
པ་སྤང༌། །གང་གིས་ཉིན་མོ་འཐུངས་གྱུར་པ། །དེ་ལྟར་གཞན་ལ་ལང་སྤང་བར་བྱ། །རིམ་འདི་ལས་རྣམས་ཐམས་ཅད་དང༌། །ནད་ཟད་པ་ལ་སྤྱད་པར་བྱ། །ཞི་བའི་སྣུམ་གྱི་ཉེར་སྤྱད་ནི། །བརྐུ་སྨན་བཏང་བ་ལྟ་བུར་བྱ། །ལྟོ་སྙི་ཞུན་མར་ཞག་གསུམ་བཏུང༌། །ལྟོ་སྲབ་ཡིས་ཞག་བདུན་བཏུང༌། །ཡང་ན་ཇི་སྲིད་སྣུམ་པར་བཏུང༌། །དེ་ཕན་ཆད་ནི་གོམས་པར་འགྱུར། །རླུང་ནི་བདེར་རྒྱུ་མེ་དྲོད་འབར། །བཤང་བ་སྣུམ་ཞིང་མི་སྲི་ལ། །སྣུམ་མི་འདོད་ཅིང་སྙོམས་འགྱུར་པ། །སྣུམ་ལེགས་ཡིན་ཏེ་རྩུབ་གོ་བཟློག །སྣུམ་དྲགས་པ་ཡིས་སྐྱ་བ་དང༌། །སྣ་དང་ཁ་རྐུབ་ལས་འཛག་འགྱུར། །ཚད་དང་མི་ལྡན་དུས་མིན་གནོད། །ཟས་དང་སྤྱོད་ལམ་ལོག་པ་ཡིས། །སྣུམ་ཆོས་བྱེད་སྐྲང་གཞང་འབྲུམ་དང༌། །ཁོང་རྨྱ་རེངས་ཤིང་སེམས་མྱོས་དང༌། །གཡན་པ་མཛེ་དང་རིམས་སྐྱུག་གཟེར། །ལྟ་སྡོས་མགོ་འཁོར་ལ་སོགས་འགྱུར། །དེ་ལ་བཀྲེས་སྐོམ་སྐྱུག་སྨན་དུགས། །ཟས་སྐོམ་སྨན་ནི་རྩུབ་པ་དང༌། དར་བ་ཆང་རྙིང་ཚོད་མ་དང༌། །འབྲུ་རྒོད་ཙི་ཙི་ཁྲེ་རྒོད་དང༌། །སྦྲང་རྩི་འབྲས་གསུམ་པི་པི་ལིང༌། །བ་གཅིན་གུ་གུལ་ཨ་རུ་ར། །ནད་དམིགས་སོ་སོ་ཇི་བཞིན་དུ། །སྣུམ་ལས་ནད་གྱུར་བཅོས་ཐབས་ཡིན། །རྩུབ་པ་དག་ནི་སྨྱུང་བྱས་དང༌། །ཤིན་ཏུ་བྱས་དང་འདྲ་བ་ཡིན། །སློབ་དྲོ་རྣམས་ས་ལས་བྱུང་སྣུམ། །ཤ་ཁུ་བཏུང་ཞིང་དུགས་དཔྱད་བྱ། །ཁྲུས་བྱེད་པའམ་སྐྱུག་སྨན་གཏོང༌། །སྣུམ་བྱས་ཞག་གསུམ་གནས་པར་བྱ། །ཉིན་ཞག་གཞན་པ་གཅིག་ཅིག་ནི། །དེ་བསྐྱེད་པ་ཡིས་བད་ཀན་སྐྱོད། །ཤ་ཆེ་ཚིལ་ཆེ་བད་ཀན་མང༌། །མེ་ཡི་འཇུ་དྲང་མ་སྙོམས་དང༌། །སྣུམ་ལ་གོམས་པའི་སྣུམ་བྱ་རྣམས། །དེ་ནི་སྔོན་དུ་རྩུབ་ཆོས་བྱ། །དེ་ནས་སྣུམ་བྱས་སྦྱངས་གྱུར་ན། །དེ་ལ་སྣུམ་ནད་མི་འབྱུང་ངོ༌། །སྣུམ་ལ་གོམས་པར་གྱུར་པས་ན། །དྲི་མ་འཐོན་པར་ནུས་པ་ཡིན། །བྱིས་པ་རྒན་ཕོལ་སོགས་པ། །སུམ་སྤང་བར་ནི་མི་ནུས་ལ། །སྐྱེ་བར་མི་བྱེད་སྦྱོར་བ་འདིས། །འཕྲལ་དུ་སྣུམ་ནི་སྦྱར་བར་བྱ། །དེ་ལ་མར་བརྔོས་ཤ་ཁུ་དང༌། །མར་དང་བརྔོས་པའི་ཐུག་བའམ། །ཏིལ་ཆེ་སྣུམ་
བཅས་བུ་རམ་ཆུང༌། །བཅས་དང་ཀྲི་སར་དང་ནི། །འོ་ཐུག་མར་མང་དྲོ་བའམ། །བུ་རམ་ཞོ་དང་བཅས་པའམ། །ཐུག་པ་སྣུམ་ནི་བཞི་པ་ལ། །ལྔ་པ་འབྲས་དང་ལྡན་པར་བྱ། །བདུན་པ་དེ་དག་འཕྲལ་སྣུམ་བྱ། །སྣུམ་རྣམས་ལན་ཚྭ་ཆེར་བཏབ་པ། །དེ་ནི་བད་ཀན་སྐྱེད་རྩུབ་མིན། །ཕྲ་ཞིང་དྲོལ་ལུས་ཁྱབ་བྱེད། །མཛེ་དང་སྐྲན་ནད་གཅིན་སྙི་ལ། །བུ་རམ་བཅས་བཟའ་འོ་མ་ཤ །ཏིལ་དང་མ་ཤ་ཆང་དང་ཞོ། །སྣུམ་བྱའི་དོན་དུ་མི་བྱའོ། །འབྲས་གསུམ་པི་པི་ལིང་གུ་གུལ། །ཨ་རུ་ར་ལ་སོགས་བསྐོལ་བས། །དེ་དག་སྣུམ་ལ་ཇི་བཞིན་དུ། །གནོད་པ་མེད་པར་སྦྱར་པར་བྱ། །ནད་ཀྱིས་ཉམ་ཆུང་གྱུར་པ་ལས། །ལུས་དྲོད་སྟོབས་བསྐྱེད་ནུས་པ་བཏང༌། །སྐྱེས་བུ་སྣུམ་ལ་བརྟེན་པར་བྱེད་པ་རྣམས། །ནང་གི་དྲོད་འབར་ཁོང་པ་དག་པ་དང༌། །ལུས་ཟུངས་འཕྲལ་བརྟ་སྟོབས་དང་མདོག་བཟང་ལྡན། །དབང་བརྟན་རྒས་སྲ་ལོ་བརྒྱ་ཐུབ་པར་བཤད། །ཡན་ལག་བརྒྱད་པའི་སྙིང་པོ་བསྡུས་པ་ལས། །མདོའི་གནས་ཀྱི་ལེའུ་བཅུ་དྲུག་པའོ།། །།དེ་ནས་དུགས་ཀྱི་ཆོ་གའི་ལེའུ་བཤད་པར་བྱའོ། །དུགས་བསྲོ་བཅིང་དང་ཐ་མལ་པ། །ཆུ་དུགས་དབྱེ་བས་རྣམས་པ་བཞི། །བསྲོ་བ་གོས་དང་ལྕགས་དང་ནི། །ལག་མཐིལ་ལ་སོགས་མེར་བསྲོས་བསྲོ། །བཅིང་བ་ཤུ་དང་སྤང་མ་དང༌། །ཐང་ཤིང་ཤ་ཏ་པུཥྤ་དང༌། །འབྲུ་ཀུན་དྲི་རྣམས་ར་སྣ་དང༌། །ཨེ་རཎྜའི་རྩ་ཤུ་དག་དང༌། །སྣུམ་བག་ཚ་དང་དར་བ་དང༌། །འོ་མས་སྦྲུས་ཤིང་ཚ་ཆེར་བཏབ། །རླུང་ལུས་བྱུང་བ་འབའ་ཞིག་སེལ། །བད་ཀན་འདྲེས་ལ་བྱེའུ་རུག་སོགས། །མཁྲིས་པ་འདྲེས་ལ་ཤུག་སོགས་ཀྱིས། །གླན་པ་ཞེས་བྱ་ཡང་དང་ཡང༌། །དཀྲིས་བ་སྣུམ་ཞིང་ནུས་པ་དྲོ། །སྤུ་འཇམ་ལྤགས་རུལ་མིན་པས་དཀྲི། །མ་རྙེད་རླུང་འཇོམས་ལོ་མ་དང༌། །དར་དང་སྣམ་བུ་རས་ཀྱིས་དཀྲི། །མཚན་མོ་དཀྲིས་པ་ཉིན་པར་དགྲོལ། །ཉིན་པར་དཀྲིས་པ་མཚན་མོ་དགྲོལ། །ཐ་མལ་པ་ནི་ཁུར་བ་དང༌། །བོང་བ་གྱོ་མོ་རྡོ་ས་ཕྱེ། །གསོ་མའི་ལོ་མ་འབྲུ་རྣམས་དང༌། །ལྕི་རིལ་ཕྱེ་མ་ཕུབ་མ་རྣམས། །ཐབས་རྣམས་དུ་མས་ལེགས་བསྲོས་པ། །ཡུལ་དང་དུས་ལས་དཔགས་
ཏེ་སྦྱར། །ཆུ་དུགས་ཤི་ཀྲུ་བ་ར་ན། །ཨེ་རཎྜ་དང་ཀ་རཉྫ། །བྱིའུ་རུག་པ་དང་ཨརྫ་ཀ །ཤི་རི་ཤ་དང་བ་ཤ་ཀ །འོད་མ་ཨརྐ་མ་ལ་ཏི། །ཡ་བ་ཤ་ཀའི་ལོ་མ་བ་ཀྲུ། །ཤུ་དག་ལ་སོགས་སྨན་རྣམས་དང༌། །གཤེར་ས་ཆུར་གནས་ཤ་རྣམས་དང༌། རྩ་བཅུ་ནད་དམིགས་ཇི་བཞིན་དུ། །སོ་སོའམ་ལྷན་ཅིག་སྦྱར་ནས་ནི། །སྣུམ་ལྡན་ཆང་དང་ཚ་དང་ནི། །འོ་མ་ཆུ་སོགས་ཀྱིས་བཙོས་ལ། །བུམ་པའམ་སྤུ་གུ་རིང་པོ་ནི། །བཀང་ལ་ནད་ཀྱིས་ཉམ་ཐག་པའི། །ལུས་ནི་གོས་ཀྱིས་དཀྲིས་ནས་སུ། །ཅི་བདེ་བར་ནི་སྣུམ་ཆུ་བླུགས་ལུས་ལ་རླུང་ནད་ཞུགས་གྱུར་པ། །དེ་ཉིད་ཀྱིས་འདིར་བཀང་སྣོད་དུ། །ནད་པ་ཞུགས་ཏེ་གནས་ན་ནི། །གཅིན་སྲི་གཞང་འབྲུམ་སོགས་ནད་སེལ། །རླུང་མེད་ཕྱི་ནང་སྣུམ་བཅས་ཤིང༌། །ཟས་འཇུའི་དུས་སུ་དགུས་དཔྱད་བྱ། །ནད་དང་ནད་པ་ཡུལ་དུས་ཀྱི། །དབང་ལས་ཆུང་འབྲིང་ཆེན་པོ་བྱ། །བད་ཀན་གྱིས་ཉིན་རྩུབ་དུགས་བྱ། །བད་ཀན་རླུང་ལ་རྩུབ་སྣུམ་བྱ། །རླུང་ནི་མ་ཞུའི་གནས་ཞུགས་དང༌། །བད་ཀན་ཞུ་བའི་གནས་བརྟེན་ལ། །གནས་ཀྱི་དབང་གིས་རྩུབ་དུགས་དང༌། །དེ་བཞིན་སྣུམ་སྔར་འགྲོ་དུགས་བྱ། །སྟ་ཟུར་དག་དང་མིག་དང་སྙིང༌། །རླིག་པར་ཉུང་ངུའམ་བྱ་བ་མིན། །དུགས་ཀྱིས་གྲང་དང་ཟུག་གཟེར་བྲལ། །ཡན་ལག་མཉེན་པར་གྱུར་པ་དང༌། །དལ་གྱིས་མཉེས་ལ་ཁྲུས་བྱས་ལ། །དེ་ནས་སྣུམ་གྱི་ཆོ་ག་བསྟེན། །དུགས་དྲགས་པ་ཡིས་ཁྲག་མཁྲིས་འཁྲུགས། །སྐོམ་བརྒྱལ་སྐད་འགགས་ཡན་ལག་འཇུམས། །མགོ་འཁོར་ཚིགས་ན་རིམས་འདེབས་ཤིང༌། །ཚི་གུ་དམར་པོ་ཏལ་ཏིལ་སྣང༌། །ལུམས་ཀྱིས་སྐྱུགས་བྲོ་བར་འགྱུར་ཏེ། །དེར་ནི་ཞི་བྱའི་སྨན་གྱིས་གསོ། །དུགས་དང་ཐལ་སྨན་མེ་བཙའ་དང༌། །ཚད་འཁྲུ་སྐྱུགས་བྲོ་བརྒྱལ་ནད་གསོ། །དུགས་ནི་ཕལ་ཆེར་ལྕི་དྲོ་རྣོ། །དེ་ལས་གཞན་པ་ཞི་བྱེད་ཡིན། །གཤེར་ཞིང་བརྟན་འཁྲུ་སྣུམ་པ་དང༌། །རྩུབ་བཅིང་སྲ་བ་དུགས་སྨན་ཡིན། །འཇམ་དང་རྩུབ་དང་ཞི་འབྱར་བག །གཤེར་བག་དེ་ནི་སེལ་བྱེད་ཡིན། །མདོར་ན་ཕལ་ཆེར་ཁ་བ་དང༌། བསྐ་དང་མངར་བ་དེ་སྨན་ཡིན། །
ཞི་ཞིང་རྩེ་བཅིལ་སྟོབས་ཐོབ་འགྱུར། །ཇི་སྐད་བཤད་པའི་ནད་རྣམས་ཟད། །བཅིལ་དྲགས་པགས་པ་རྩ་འཁུམས་ཤིང༌། །འདར་སྙིང་ཁ་འགྲམ་ནད་དུ་འགྱུར། །རྐང་མཆུ་ལག་པ་པགས་ནག་འགྱུར། །བཅིལ་དྲགས་པ་ཡི་ནད་དུ་བཤད། །ཤིན་ཏུ་སྤོམ་དང་རྩུབ་པ་དང༌། །ཉམ་ཆུང་བརྒྱལ་བར་གྱུར་པ་དང༌། །དུགས་དྲགས་བཅོས་དགོས་གློས་རྡོལ་དང༌། །སྐེམ་དང་ཆང་ནད་ཀྱིས་བཏབ་དང༌། །རབ་རིབ་དམུ་རྫིང་ཤུ་བ་མཆེད། །མཛེ་ནད་འོར་ནད་རླུང་མཁྲིས་དང༌། །འོ་མ་ཞོ་དང་མར་སྦྲང་རྩི། །འཐུངས་དང་བཀྲུ་སྣམ་བཏང་བ་དང༌། །ལུས་ནད་ཚིགས་དང་གཞང་ནད་ཡོད། །ཁྲོ་དང་མྱ་ངན་འཇིགས་པས་ཉེན། །བཀྲེས་སྐོམ་མིག་སེར་སྐྱ་རྦབ་དང༌། །གཅིན་ནད་མཁྲིས་ནད་ཟླ་མཚན་འཛག །སྦྲུམ་དང་བུ་སྐྱེས་དུགས་མི་བྱ། །ནད་ཚབས་ཆེན་འཇམ་པོར་བྱ། །ལུད་པ་ཆམ་པ་དབུགས་མི་བདེ། །སྐྱིགས་བུ་ལྟོ་སྤོས་བཤང་འགགས་དང༌། །སྐད་འགགས་རླུང་གི་ནད་རྣམས་དང༌། །བད་ཀན་བེ་སྣབས་འཁྱིལ་ཞིང་ལྕི། །ལུས་རེངས་རྐེད་པ་རྩིབ་ལོགས་དང༌། །སྒུར་དང་ལྷོ་ནད་འགྲམ་ནད་དང༌། །རླིག་ནད་སྐྲངས་དང་ད་རྒན་དང༌། །རྩོལ་དང་རླུང་ནད་ཀྱིས་ཟུག་དང༌། །གཅིན་འགགས་ཐོར་བུ་རྨེན་བུ་དང༌། །ཁུ་བ་བཀག་དང་རླུང་འཁྱིམས་ལ། །དེ་ཡི་སྨན་གྱི་དབྱེ་བ་ཡིས། །དུགས་ནི་སོ་སོ་ཇི་བཞིན་བྱ། །དུགས་ཕན་མེ་ཡིས་བསྲོ་མིན་པ། །རླུང་ནད་ཚིལ་དང་བད་ཀན་ཅན། །རླུང་མེད་ཁང་པར་རྩོལ་བ་དང༌། །གོས་ལྕི་བ་དང་འཇིགས་པ་དང༌། །དཀྲི་དང་སྟོབས་འགྱེད་ཁྲོ་བ་དང༌། །ཆང་མང་བཀྲེས་དང་ཉི་ཚན་བཞག །ནད་གང་ནད་ཁྲོལ་གནས་པའི་ལུས་ཟུངས་གནས། །རྩར་སོང་རྐང་ལག་རུས་པའི་ནང་སོང་བའི། །ནད་དེ་དུགས་ཀྱིས་བསྲུང་བར་བྱས་ནས་ནི། །ཀོང་དུ་བསྡུས་ལ་སྦྱང་བས་དབྱིས་དབྱུང་བྱ། །ཡན་ལག་བརྒྱད་པའི་སྙིང་པོ་བསྡུས་པ་ལས། མདོའི་གནས་ཀྱི་ལེའུ་བཅུ་བདུན་པའོ།། །།དེ་ནས་སྐྱུགས་སྨན་དང་བཀྲུ་སྨན་གཏང་བའི་ཆོ་གའི་ལེའུ་བཤད་པར་བྱའོ། །བད་ཀན་ནད་དམ་འདྲེས་པ་ཡི། །བད་ཀན་རྒྱས་ལ་སྐྱུག་སྨན་གཏང༌། །དེ་བཞིན་མཁྲིས་པ་བཀྲུས་སྨན་བྱ། །རིམས་
སར་ཚད་འཁྲུ་ཐུར་དུ་ནི། །མཁྲིས་པ་ཁྲག་འཁྲུ་གློ་གཅོང་དང༌། །མཛེ་དང་གཅིན་ནད་འབྲུམ་ཐོར་བུ། །རྐང་བམ་མི་དྲན་ལུད་པ་ཅན། །དབུགས་མི་བདེ་སྙིང་འཕར་འབྲས་མཆེད། །ནུ་མའི་ནད་དང་རོ་སྟོད་ནད། །ཁྱད་པར་དུ་ནི་སྐྱུག་སྨན་བྱ། །སྐྱུག་སྨན་མི་གཏོང་སྦྲུམ་ཁོང་རྩུབ། །བཀྲེས་དང་རྟག་ཏུ་སྡུག་བསྔལ་བ། །བྱིས་པ་རྒན་སྐེམ་སྦོམ་སྙིང་ན། །གློ་སྣམ་སྨྲས་དང་ཉམ་ཆུང་དང༌། །རྟག་ཏུ་སློན་དང་མཆེར་པ་ན། །རབ་རིབ་ལྟོ་ན་སྲིན་བུ་ཡོད། །རླུང་ཁྲག་འདྲེན་མར་གྱེན་དུ་འབྱུང༌། །སོ་ནམས་གཏོང་སྐད་འཛེར་དང༌། །གཅིན་སྲི་དམུ་རྫིང་སྐྲན་ཅན་དང༌། །སློན་དཀའ་དྲོད་ཆེ་གཞང་འབྲུམ་ཅན། །རྟུག་སྐམ་མགོ་འཁོར་རྩིབ་ལོགས་སྲ། །རྩིབ་ལོགས་ཟུག་དང་རླུང་ཅན་ནོ། །དེ་དག་དུག་འཐུངས་མ་ཞུ་དང༌། །མི་འཕྲོད་ཟས་ཟོས་མ་གཏོགས་སོ། །རྟག་ཏུ་སློན་པ་ཡན་ཆད་དང༌། །ཕལ་ཆེར་མ་ཞུའི་རིམས་དག་དང༌། །མ་ཞུ་བ་ནི་ཐམས་ཅད་ལའང༌། །དུད་པས་བདུག་པའི་ལས་ཀུན་སྤངས། །བརྐུ་སྨན་གྱིས་གསོ་སྐྲན་གཞང་འབྲུམ། །འབྲུམ་བུ་མི་གསེར་གཞོགས་ཕྱེད་ལྕི། །རིམས་རྙིང་དམུ་རྫིང་དབྱིག་དུག་དང༌། །སྐྱུགས་དང་མཆེར་ནད་སྐྱ་རྦབ་དང༌། །ལོང་ནད་རབ་རིབ་སྔོན་པོར་གྱུར། །མཆི་འཛག་ཞུ་བའི་གནས་ན་ཟུག །མངལ་དང་ཁུ་བའི་གནས་ཀྱི་ནད། །ཁོང་ནད་གཏོགས་དང་སྲིན་ནད་རྨ། །དྲེག་ནད་ནམ་ཚོང་ཡན་ཆད་མན། །གཅིན་སྲི་བཤད་པ་འགགས་པ་དང༌། །སློན་བྱ་མཛེ་གཅིན་ནད་སོགས་ཡིན། །ཁྲུས་མི་བྱ་བར་རིམས་གསར་དང༌། །དྲོད་ཆུང་ཁྲག་མཁྲིས་ཐུར་དུ་འབྱུང༌། །རྨས་དང་གཞུང་ནད་ཚད་པས་འཁྲུ། །ཁོང་དུ་མཚོན་ལུས་ལྟོ་སྲ་དང༌། སྣུམ་ཆེས་པ་དང་སྐེམ་ཆེས་པའོ། །དེས་ནས་ཐུན་མོང་དུས་སུ་ནི། །ཆོ་ག་བཞིན་དུ་སྣུམ་གྱིས་ཉེན། །ཉ་དང་མ་ཤ་རིལ་སོགས་ཀྱིས། །ནང་པར་སློབ་བྱའི་བད་ཀན་སྐྱེད། །མཚན་མོ་གཉིས་ལོག་ཟས་ལེགས་ཞུ། །སྔ་དྲོའི་དང་པོར་བཀྲ་ཤིས་བྱས། །ཟས་མ་ཟོས་པའམ་ཅུང་ཟད་སྣུམ། །ཐུག་པ་ཞུན་མར་ལྡན་པར་བཏུང༌། །བྱིས་པ་རྒན་པོ་ཉམས་སྟོབས་ཆུང༌། །སྣམ་སྟོབས་ཆུང་བ་ནད་དབང་ལས། །ཆང་འོ་བུ་རམ་
ཤིང་ཤ་ཁུ། །ནད་དམིགས་ཇི་སྐད་བཤད་པ་བཞིན། །སྦྲང་རྩི་རྒྱམ་ཚ་དང་ལྡན་པ། །སྨན་ཚད་ལྟོ་བ་ལས་དཔགས་ཏེ། །སྨན་ལ་སྔགས་ནི་མངོན་བཟླས་ལ། །ལྐོག་མར་ཕྱིན་བའི་བར་དུ་བླུད། །ཚངས་པ་སྐྱེ་དགུའི་བདག་དང་ཐ་སྐར་བུ། །དྲག་པོ་དབང་པོ་ཉི་ཟླ་ས་མེ་རླུང༌། །དྲང་སྲོང་རྣམས་ཀྱི་ཚོགས་དང་བཅས་པ་དང༌། །འབྱུང་པོའི་ཚོགས་ཀྱིས་ཁྱེད་ནི་བསྲུང་བར་ཤོག །དྲང་སྲོང་རྣམས་ཀྱི་བཅུད་ཀྱིས་ལེན་པ་དང༌། །ལྷ་རྣམས་ཀྱི་ནི་བདུད་རྩི་ལྟ་བུ་དང༌། །ཀླུ་མཆོག་རྣམས་ཀྱི་བདུད་རྩི་ལྟ་བུར་ནི། །ཁྱོད་ལ་སྨན་འདི་ཉེ་བར་གནས་གྱུར་ཅིག །ཨོཾ་ན་མོ་བྷ་ག་བ་ཏེ། བྷཻ་ཥ་ཛྱ་གུ་རུ་བཻ་ཌཱུཪྻ་པྲ་བྷ་རཱ་ཛཱ་ཡ། །ཏ་ཐཱ་ག་ཏཱ་ཡ། ཨརྷ་ཏེ། སཾ་མྱག་སཾ་བུདྡྷཱ་ཡ། །ཏདྱཐཱ། །ཨོཾ་བྷྸེ་ཥ་ཛྱེ་བྷཻ་ཥ་ཛྱེ་མ་ཧཱ་བྷཻ་ཥ་ཛྱེ། རཱ་ཛཱ་ས་མུདྒ་ཏེ་སྭཱཧཱ། །ཤར་དུ་ཁ་བསྟན་འཐུང་དུ་བཞུག །འཐུངས་ནས་དེ་ལ་སེམས་དམིགས་ཏེ། །ཡུད་ཙམ་བསྡད་ལ་དང་གར་འཁྱིལ། །མཆིལ་མ་དེ་ནས་སློན་དུ་གཞུག །མག་ནོད་པར་ནི་སོར་མོས་སམ། །ཡང་ན་ཆུ་བ་འཇམ་པོ་ཡིས། །ལྐོག་མ་ལྕེའུ་ཆུང་མ་སྣང་བྱ། །སྐྱུག་མི་བྲོ་བར་མི་དྲང་ངོ༌། །འབྱུང་བར་བཟློག་པ་སློན་པར་བྱ། །པུས་མོ་དང་མཉམ་སྟན་ལ་གནས། །དེ་ནི་སློན་ན་ཚེ་གློ་གཉིས་དང། །འཕྲལ་བ་དག་ནས་བརྟེན་པར་བྱ། །དེ་བཞིན་ལྟེ་བ་བཅིར་བ་དང༌། །རྒྱབ་ནས་གྱེན་དུ་མཉེ་བར་བྱ། །དེ་ལྟར་བད་ཀན་རྣོ་དྲོད་ཁ། །ཁྲིས་པ་མངར་དང་བསིལ་བས་སློན། །རླུང་འདྲིས་བད་ཀན་སྣུམ་པ་དང༌། །སྐྱུར་དང་ལན་ཚྭ་དང་གིས་སློན། །ཇི་སྲིད་བད་ཀན་རྒྱུན་ཆད་པའམ། །མཁྲིས་པ་སྣང་གི་བར་དུ་སྐྱུགས། །ཤུགས་དཔལ་པི་པི་ལིང་སྒྱུ་རུ། །ཡུངས་ཀར་རྒྱམ་ཚ་ཆུ་དག་གིས། །ཡང་དང་ཡང་ནི་སློན་དུ་གཞུག །དེ་ནི་སློན་པར་མ་གྱུར་པའམ། །སྡོད་པ་དང་བཅས་སློན་པའམ། །སྨན་ནི་འབའ་ཞིག་བྱུང་གྱུར་ན། །སྦྱོར་ཉེས་དེ་ནི་མཆིལ་མ་མང༌། །གཡོན་པ་ཐོར་པུ་རིམས་སོགས་འབྱུང༌། །བདེར་སྐྱུགས་བད་ཀན་མཁྲིས་པ་དང༌། །རླུང་ནི་རིམ་གྱིས་འབྱུང་བར་འགྱུར། །སྦྱོར་བ་ལེགས་ཡིན་སྦྱོར་དྲགས་པས། །དབུ་བ་ཚོན་ཅན་ཁྲག་འདྲར་སྣང༌། །སློན་ནས་ཁོང་རྨྱ་ལུས་ཚ་དང༌། །ལྐོག་
སྐམ་མགོ་འཁོར་མིག་མི་མཐོང༌། །རླུང་ནད་མི་བཟད་ལྡན་གྱུར་ཞིང༌། །སྲོག་གི་ཁྲག་འབྱུང་འཆི་བར་འགྱུར། །སྦྱོར་བ་ལེགས་པས་སློན་ན་ནི། །ཡུད་ཙམ་ངལ་གསོ་དུད་པ་གསུམ། །གང་ཡང་རུང་བས་བདུགས་པ་དང༌། དེའི་འོག་སྣུམ་གྱི་སྤྱོད་པ་བསྟན། །དེ་ནས་དགོངས་ཀའམ་ནང་པར་ནི། །བཀྲེས་ཚེ་ཆུ་དྲོན་གྱིས་བཀྲུ་ལ། །སཱ་ལུ་རྩ་སྣར་འབྲས་ཀྱི་ནི། །ཐུག་པ་ལ་སོགས་རིམ་བཞིན་བསྟེན། །ཐུག་པར་གཡས་མ་བྱས་པའི། །ཁུ་བ་ཤ་ཁུ་གསུམ་དང་གཉིས་དང་གཅིག །མཆོག་དང་བར་མཐའ་མའི་སྦྱོང་བས་སྦྱང༌། །མི་ཡིས་ཟས་ཀྱི་དུས་སུ་རིམ་བཞིན་སྤྱད། །དཔེར་ན་མེ་ཆུ་རྩྭ་དང་ལྕི་སོགས་ཀྱིས། རྣམ་པར་སྦྱར་ན་རིམ་གྱིས་མཆེད་པ་ན། །ཆེ་ཤིང་བརྟན་ལ་ཐམས་ཅད་མཆེད་པར་ནུས། །སྦྱངས་པའི་ནང་མེ་ཐུག་སོགས་ཀྱིས་དེ་བཞིན། །སློན་ཚད་ཆུ་དང་འབྲིང་དང་ཆེན་པོ་ནི། །བཞི་དང་དྲུག་དང་ལན་བརྒྱད་སློབ་པར་འདོད། །དེ་ཉིད་བཅུ་དང་ཉིས་ལྡབ་སུམ་ལྡབ་འཁྲུ། །བྲེ་གང་དེ་བཞིན་ཉི་ལྡབ་བཞི་ལྡབ་འགྱུར། །སྐྱུག་སྨན་མཐར་མཁྲིས་བཀྲུ་སྣམ་ལས་བྱེད་དང༌། །བད་ཀན་མཐར་དབྱུང་ཁྲུ་བ་མཆོག་ཏུ་བཤད། །འཁྲུ་བ་གཉིས་གསུམ་བཤད་དང་བཅས་མ་གཏོགས། །འཁྲུ་བ་གཞལ་ཏེ་སློན་ལ་འཐུངས་མ་གཏོགས། །དེ་ནས་སློན་པ་དེ་ལ་ནི། །སླར་ཡང་སྣུམ་དང་དུགས་བྱས་ཏེ། །བད་ཀན་དུས་འདས་ལྟོ་ཤེས་ནས། །ལེགས་པར་བཀྲུ་སྨན་གཏང་བར་བྱ། །མཁྲིས་པ་མང་ཞིང་ལྟོ་སྙི་ལ། །འོ་མས་བྱང་ནི་བཀྲུ་བར་བྱེད། །རླུང་ཤས་ཆེ་ཤིང་ལྟོ་སྲ་ན། །དུར་བྱིད་སོགས་ཀྱིས་ཀྱང་བཀྲུ་དཀའ། །བཀྲུ་སྨན་མ་ཁྲིས་ལ་མངར་དང་བསྐལ། །བད་ཀན་ལ་ནི་ཁ་བས་བྱ། །རླུང་ལ་སྣུམ་བྲོ་ལན་ཚྭ་ཅན། །མི་འཁྲུན་ནི་ཆུ་ཚན་བླུད། །ལག་པ་བསྲོས་པས་དེ་ཡི་ནི། །ལྟོ་བ་ལེགས་པར་དུགས་བྱའོ། །མ་འཁྲུས་དེ་ཞག་ལྡང་ཟས་ཟོས། །ཉི་མ་གཉིས་པར་སླར་ཡང་བཏུང༌། །ལྟོ་བ་རབ་སྲ་སྣམ་དག་ནི། །ཞག་བཅུའི་བར་དུ་ཡང་བཏུང་བས། །སླར་ཡང་སྣུམ་དང་དུགས་ཀྱིས་ནི། །ལུས་སྦྱངས་ནས་ནི་བཀྲུ་སྨན་གྱིས། །སྦྱོར་བ་ལེགས་པར་བརྟགས་པ་དང༌། །སྔར་
གྱི་ཉེས་པ་དྲན་པར་བྱ། །སྙིང་དང་ལྟོ་ན་ཡི་ག་འཆུས། །བད་ཀན་མཁྲིས་པ་གློངས་པ་དང༌། །གཡོན་པ་ལུས་ཙ་ཐོར་བུ་དང༌། །ཆམ་པས་འདེབས་ཤིང་བཤད་རླུང་འགགས། །སྦྱོར་བ་ཉེས་པའི་མཚན་ཉིད་ཡིན། །སྦྱོར་ལེགས་ཇི་སྐད་བཤད་གོ་བཟློག །བཤང་བ་མཁྲིས་པ་བད་ཀན་རླུང༌། །རིམ་གྱིས་འཁྲུ་ཞིང་འབྱུང་བ་ན། །བད་ཀན་མཁྲིས་པ་མེད་ཆུ་འཁྲུ། །སྐྱ་ཞིང་རང་དང་ཁྲག་དང་བཅས། །ཡན་ན་ཤ་བཀྲུས་ལྟ་བུའམ། །ཚིལ་གྱི་དུམ་བུ་འདྲ་ཉིད་དམ། །གཞང་འབྱུང་སྐོམ་དད་ཆེ་བ་དང༌། །མགོ་འཁོར་མིག་ནི་ཕུགས་སུ་བྲོས། །བཀྲུ་སྨན་དྲགས་པས་འབྱུང་བ་ཡིན། །དེ་བཞིན་སྐྱུག་སྨན་དྲགས་ནད་འབྱུང༌། །ལེགས་པར་འཁྲུས་པ་དེ་ལ་ནི། །དུད་པས་བདུག་པ་མ་གཏོགས་པའི། །ཆོ་ག་སྐྱུག་སྨན་དང་མཚུངས་པས། །དེ་ནས་སློན་དང་འདྲ་བར་བྱ། །ཟས་ལ་རིམ་གྱིས་སྤྱད་ནས་ནི། །དེ་འོག་ནར་མའི་ཁ་ཟས་བསྟེན། །སྨན་འཐུངས་མེད་དྲོ་ཆུང་བ་དང༌། །མ་དག་ནད་ཀྱིས་རྨྱ་བ་དང༌། །ཞུ་བའི་མཚན་མ་མ་མཐོང་ན། །དེ་ནི་ཉིན་པར་སྨྱུང་བྱས་ལ། །སྣུམ་དང་དུགས་དང་སྨན་རྣམས་ཀྱིས། །གློངས་པའི་ནད་ཀྱིས་ཉེན་མི་འགྱུར། །སྦྱངས་དང་ཁྲག་ནི་འབྱུང་བ་དང༌། །སྣུམ་མཆོག་ལ་སྦྱར་སྨྱུང་བ་ཡིས། །མེ་དྲོད་ཞན་པ་ཉིད་འགྱུར་ཏེ། དེ་བས་ཐུག་སོགས་རིམ་གྱིས་སྤྱད། །བད་ཀན་མཁྲིས་པ་བྲི་ཞིང་ཆུང༌། །ཆང་འཐུངས་རླུང་དང་མཁྲིས་པ་ཆེ། །དེ་ལ་ཐུག་པ་མི་བླུད་ཀྱི། །བརྟ་བ་ལ་སོགས་རིམ་པ་ཕན། །སྐྱུག་སྨན་མ་ཞུ་བར་ནད་འབྱིན། །བཀྲུ་སྨན་ཞུ་ནས་འབྱིན་པ་ཡིན། །དེ་ཡི་ཕྱིར་ན་སྐྱུག་སྨན་ངག །ཞུ་བ་ལ་ནི་བསྡད་མི་དགོས། །སྟེང་དང་འོག་ཏུ་འབྱུང་རིགས་པས། །གང་ཚེ་ཕྱིན་ཅི་ལོག་གྱུར་ན། །དེ་ཚེ་སྐྱུགས་ལ་རྐང་པར་ནི། །ཆུ་དྲོན་དག་གིས་བླུགས་པར་བྱ། །ལུས་ཀྱི་སྟོད་ནི་ཆུ་གྲངས་བླུགས། །འཁྲུ་བ་ལ་ནི་དེ་ལས་བཟློག །གང་ཞིག་ཉམས་ཆུང་ནད་མང་དང༌། །ནད་སྨིན་པ་ཡིས་རང་ཉིད་ནི། །འཁྲུ་བར་བྱེད་པ་འཁྲུ་བ་ནི། །ཁ་ཟས་བྱིན་ལ་དེར་འཁྲུར་གཞུག །སྔར་སྦྱངས་པས་ནི་ཉམ་ཆང་དང༌། །ནད་ཀྱི་དཀྱིལ་ཆུང་ལུས་ཟད་མི། །ལྟོ་བ་སྲ་
སྙི་མི་ཤེས་ལ། །སྨན་ནི་འཇམ་ཞིང་ཆུང་དུ་བླུད། །དེ་མང་འཐུངས་པ་མཆོག་ཡིན་གྱི། །གཞན་དུ་དགོས་པ་བཅས་མི་རུང༌། །ཉམ་ཆུང་པ་ཡི་ནད་མང་པོ། །གཡོས་གྱུར་ཅུང་ཟད་ཅུང་ཟད་ཅིག །སྨན་ནི་འཇམ་པོས་ལན་མང་ཞིག །དེ་ནི་ཉུང་འགྱུར་ཞི་པར་བྱ། །མ་བཙལ་དེ་ནི་ཡུན་རིང་དུ། །ཉོན་མོངས་པའམ་གསོད་པར་འགྱུར། །མེ་དྲོད་ཆུང་དང་ལྷོ་སྲ་ལ། །ཐལ་སྨན་རྒྱམ་ཚ་མར་བཅས་པས། །མེ་ཡི་དྲོད་ནི་བསྐྱེད་ནས་སུ། །རླུང་དང་བད་ཀན་བསལ་བར་བྱ། །རྩུབ་ཅིང་རླུང་མང་ལྟོ་སྲ་དང༌། །རྟག་ཏུ་རྩོལ་བའི་ཚུལ་ཅན་དང༌། །མེ་དྲོད་རབ་ཏུ་ཆེ་ལ་སྨན། །མི་འཁྲུ་བར་ནི་ཞུ་བར་འགྱུར། །དེ་ལ་སྔར་ནི་འཇམ་རྩི་བཏང༌། །དེ་ནས་སྣུམ་པའི་བཀྲུ་སྨན་བྱ། །སྨན་ནི་རྣོན་པོའི་རིང་བུ་ཡིས། །བཤང་བ་ཅུང་ཟད་དབྱུང་བར་བྱ། །དྲི་མ་ལེགས་པར་འཁྲུས་ནས་ནི། །སྣུམ་འཁྲུ་བདེ་བར་འབྱུང་བར་འགྱུར། །དུག་གིས་ཕོག་ན་ཐོར་བུ་འབྱུང༌། །མཛེ་དང་འོར་ནད་མེ་དཔལ་དང༌། །མིག་སེར་སྐྱ་རྦབ་ཟ་ཁུས་ཉེན། །ཧ་ཅང་སྣུམ་ཆེས་སྦྱང་མི་བྱ། །ཀུན་ལ་བཀྲུ་སྨན་སྣུམ་བག་གཏང༌། །སྣུམ་གྱིས་ཞེན་ལ་རྩུབ་བ་གཏང༌། །སྐྱུག་སྨན་ལ་སོགས་ལས་རྣམས་ལ། །སླར་ཡང་བར་སྐབས་བར་སྐབས་སུ། །སྣུམ་དང་དུགས་ཀྱི་ཆོ་ག་བྱ། །སྣུམ་རྗེས་ལ་ནི་སྟོབས་བསྐྱེད་བྱ། །ལུས་ལས་ནད་རྣམས་བསལ་བ་ན། །གོས་ཀྱི་དྲི་མ་འཁྲུ་དང་མཚུངས། །སྣུམ་དང་དུགས་དག་མ་བྱས་པར། །གང་ཞིག་སྦྱང་བའི་ལས་བྱེད་པ། །ཤིང་སྐམ་འགུགས་པར་བྱེད་པ་ལྟར་དེ་ཡི་ལུས་ནི་མ་རུངས་འགྱུར། །སྦྱང་བ་ལེགས་པར་ཉེ་བར་བསྟན་པས་ནི། །བློ་གྲོས་གསལ་ཞིང་དབང་པོ་སྟོབས་དང་ལྡན། །ལུས་ཟུངས་བརྟན་ཞིང་ཁོང་པའི་མེ་དྲོད་འབར། །ན་ཚོད་དག་ཀྱང་རིང་དུ་འཇོག་པར་བྱེད། །ཡན་ལག་བརྒྱད་པའི་སྙིང་པོ་བསྡུས་པ་ལས། །མདོའི་གནས་ཀྱི་ལེའུ་བཅྭ་བརྒྱད་པའོ།། །།དེ་ནས་མས་གཏོང་བའི་ཆོ་གའི་ལེའུ་བཤད་པར་བྱའོ། །རླུང་ཤས་ཆེ་བའི་ནད་རྣམས་སམ། །རླུང་ལ་མས་གཏོང་བ་སྔགས་པ་སྟེ། །དེ་ནི་གསོ་བ་ཐམས་ཅད་ཀྱི། །མཆོག་སྟེ་དེ་ཡང་རྣམ་པ་གསུམ། །བཀྲུ་དྲགས་འཇམ་རྩི་མས་གཏོང་གོང༌། །དེ་ཡིས་
གསོ་བྱ་སྐྲན་དང་ནི། །ལྟོ་སྦོས་དྲེག་ནད་མཆེར་པ་དང༌། །འཁྲུ་བ་འབའ་ཞིག་གཟེར་ནད་དང༌། །རིམས་རྙིང་བྱིང་དང་ཆམ་པ་དང༌། །ཁུ་བ་རླུང་དང་དྲི་མ་འགགས། །རླིག་རླུགས་རྡེའུ་ནད་ཟླ་མཚན་འཇིག །རླུང་གི་ནད་ནི་མི་བཟད་གསོ། །བཀྲུ་དྲགས་མི་བྱ་སྣུམ་དྲགས་དང༌། །གློ་རྡོལ་ཤིན་ཏུ་སྐེམས་པ་དང༌། །བེ་སྣབས་འཁྲུ་དང་སློན་བྲོ་དང༌། །སྦྱང་བྱས་སྣ་སྨན་བཏང་བ་དང༌། །དབུགས་མི་བདེ་ལུད་ཆམ་གཞང་འབྲུམ། །སྐྱིགས་བུ་ལྟོ་སྦོས་མེ་དྲོད་ཆུང༌། །གཞན་སྐྲངས་ཁ་ཟས་ཟོས་ཟིན་དང༌། །ལྟོ་འགགས་བུ་ག་ཆུ་ཡོད་དང༌། །མཛེ་ཅན་གཅིན་ནད་སྦྲང་མདོག་དང༌། །སྦྲུམ་མ་ཟླ་བདུན་ཡན་ཆད་དོ། །བཀྲུ་དྲགས་བྱ་ཉིད་འཇམ་རྩི་བྱ། །ཁྱད་པར་དུ་ནི་མེ་དྲོད་ཆེ། །རྩུབ་དང་རླུང་ནད་གཅིག་པུས་ཉེན། །འཇམ་རྩི་མི་བྱའང་དེ་ཉིད་དོ། །དེ་བཞིན་སྐྱ་རྦབ་མིག་སེར་དང༌། །ཚིལ་ཆེ་ཆམ་བཏབ་ཟས་མ་ཟས། །བཤད་བར་འཁྲུ་བར་བྱེད་པ་དང༌། །ལྟོ་ལྕི་ལྟོ་ནད་བད་ཀན་ཅན། །མཆིལ་མ་མང་དང་ཤིན་ཏུ་སྦོམ། །ལྟོ་ན་སྲིན་ཡོད་རླུང་འཁྱིམས་དང༌། །དུག་དག་འཐུངས་དང་འབྲུམ་བུས་བཏབ། །རྐང་བ་མ་ལྐོག་མའི་ཝ་བ་ཅན། །དེ་གཉིས་སྦུ་གུ་གསེར་སོགས་དང༌། །ཤིང་རུས་འོད་མ་ལས་བྱས་པ། །བ་ལང་མཇུག་འདྲ་བུག་རྡོལ་མེད། །འཇམ་ཞིང་དྲང་ལ་ཁ་ཟླུམ་པའོ། །ལོ་གཅིག་མ་ལོན་སོར་ལྔ་པ། །ལོ་ཚད་ལོ་བདུན་པ་ཡི་བར། །ཚད་ནི་སོར་དྲུག་ཡིན་པར་བཤད། །ལོ་བདུན་པ་ཡི་བདུན་ཉིད་དེ། །བཅུ་གཉིས་པ་ལ་སོར་བརྒྱད་བྱ། །བཅུ་དྲུག་ཡན་ཆད་སོར་དགུ་སྟེ། །ཉི་ཤུ་ཡན་ཆད་སོར་བཅུ་གཉིས། །ལོ་གཞན་དག་ལ་ན་ཚོད་དང༌། །སྟོབས་དང་ལུས་ཚད་བརྟགས་ནས་ནི། །ཚད་ནི་མངོན་པ་བསྐྱེད་པར་བྱ། །རྩ་བར་རང་གི་མཐེ་བོང་མཉམ། །རྩེ་མོ་མཐེའུ་ཆུང་ཚད་དུ་བྱ། །ལོ་གཅིག་ལོན་སོར་ནས་བཟུང་སྟེ། །དེ་ཡིས་ཕྱེད་ཕྱེད་ཀྱིས་བསྐྱེད་བྱ། །གང་ཞིག་རྩ་བའི་བུ་གའི་ཚད། །སོར་མོ་གསུམ་རྩེ་ཤོང་བ་མཆོག །མུངྒ་མ་ཤ་སྲན་མ་བཙོས། །རྒྱ་ཤུགས་འབྲས་ཤོང་རིམ་བཞིན་བྱ། །རྩ་བའི་བུ་གའི་ཚད་ཀྱིས་ནི། །མཐར་ནི་བུག་པ་འགེགས་པར་བྱ། །ལྕེ་རྩེ་རང་གི་སོར་གཉིས་ཀྱིས། །ཆོད་པར་འགག་པ་གཉིས་པ་བྱ། །དེར་ནི་རྐྱལ་བུ་གདགས་བྱ་བ། །ར་ལུག་མ་ཧེ་ལ་སོགས་པའི། །ལྒང་པ་ལེགས་མཉེས་སྲ་
བ་དང༌། །དམར་བཙོས་བུ་ག་ཐག་ཐུག་མེད། །དྲི་ང་རྩ་རིས་མེད་སྲབ་པར། །སྨན་ནི་ལེགས་པར་བླུགས་བྱས་ལ། །སྲད་བུས་དམ་པར་བཅིང་བར་བྱ། །ལྒང་མེད་རྐྱལ་པའི་དཔུང་པའམ། །བྱིན་པའི་པགས་པའམ་རས་སྟུག་བཟང༌། །ནི་རུ་ཧ་ཚད་དང་པོ་ནི། །ལོ་གཅིག་པ་ལ་སྲང་གཅིག་མཆོག །ཇི་སྲིད་སྲང་ནི་བཅུ་གཉིས་པར། །ལོ་རེ་སྲང་རེས་བསྐྱེད་པར་བྱ། །བཅུ་གཉིས་པ་ནས་བཅྭ་བརྒྱད་པར། །དེ་ཡང་བདུན་ཅུའི་བར་ཆད་འདི། །དེ་ཕན་ཆད་སྲང་ཉི་ཤུ་ཉིད། །བཀྲུ་སྨན་དྲག་ཚད་ཇི་ལྟ་བ། །དེ་ཡི་བཞི་ཆ་འཇམ་རྩི་ཚད། །བཀྲུ་སྨན་དྲག་བྱ་སྣུམ་དུགས་བྱ། །སྦྱང་བྱས་ནས་ཀྱང་སྟོབས་ཐོབ་པ། །འཇམ་རྩི་གཏང་འོས་པར་ཤེས་ནས། །ཐོག་མ་ཉིད་དུ་འཇམ་རྩི་གཏང༌། །དགུན་དཔྱིད་ཉིན་པར་གཏང་དེ་ལས། །གཞན་དུ་མཚན་གཏང་ལ་ལ་འདོད། །བསྐུ་བྱུག་ཁྲུས་བྱ་སྔོན་ཐང་ལས། །བཞི་གསུམ་ཕན་ཞིང་ཡང་བ་དང༌། །སྣུམ་དང་ཙུབ་ཆེས་མ་ཡིན་བཟའ། །ཁུ་བ་ལ་སོགས་ཟོས་རྗེས་བཏུང༌། །བཅགས་ལ་བཤང་གཅི་བསལ་ནས་ནི། །མལ་དུ་བདེ་བར་གནས་བྱས་ལ། །མཐོ་དམན་མེད་པར་མགོ་སྨད་དེ། །གློ་གཡོན་གྱིས་ནི་ཕབ་ནས་སུ། །རྐང་པ་གཡས་པ་བཀུག་ནས་ནི། །རྐང་པ་གཡོན་པ་བརྐྱང་པར་བྱ། །དེ་ནས་དེ་ལ་གཅེའུ་ཁ་དང༌། །གཞང་སྒོ་སྣུམ་གྱིས་བསྐུས་ནས་ནི། །གཅེའུ་ལྒང་པའི་དབུགས་བཏོན་ལ། །ཁ་བཅིངས་ལག་པ་མི་འདར་བར། །རྒྱབ་ཀྱི་ལོགས་སུ་འདུག་ནས་ནི། །ཤིན་ཏུ་མྱུར་དང་བུལ་ཡིན་དང༌། །ཧ་ཅང་ཤུགས་དྲག་དལ་མིན་པར། །རན་པར་ལན་ཅིག་ཁོང་ན་བཙིར། །རླུང་ནི་ལྷག་པར་གནས་པས་ན། །ལྷག་མ་ཅུང་ཟད་ལུས་པར་བྱ། །བཏང་ནས་ལུས་ནི་གན་རྐྱང་བཞག །རྐུབ་ཚོས་ལག་པས་བརྡབ་པར་བྱ། །རྟིང་པས་མཇུག་ཙོས་བརྡུང་བྱ་ཞིང༌། །རྟིང་བ་བཏེག་ལ་ལན་གསུམ་གསིག །དེ་ནས་ལུས་ནི་བརྐྱངས་ནས་སུ། །སྔས་དང་བཅས་པའི་རྟིང་པར་ནི། །ཁུ་ཚུར་གྱིས་བརྡུང་ལུས་ཀྱང་ནི། །སྣུམ་གྱིས་བསྐུས་ལ་མཉེ་བར་བྱ། །ཚོར་བས་ཉེན་པས་སྣུམ་དག་ནི། །མྱུར་དུ་ཕྱིར་འབྱུང་མི་བྱེད་དོ། །གལ་ཏེ་མྱུར་དུ་ཕྱིར་བྱུང་ན། །ཕན་མི་བྱེད་པས་གཞན་དག་གཏང༌། །མེ་དྲོད་ཆེ་ཞིང་སྣུམ་བྱུང་ན། །དགོངས་ཀ་ཁ་ཟས་ཡང་བ་སྦྱིན། །དབྱུང་བའི་དུས་ཀྱི་དམ་བ་ནི། །ཐུན་གསུམ་
ཡིན་ཏེ་དེ་ཕན་ཆད། །ཉིན་མཚན་གཅིག་ནི་བསྡད་ནས་སུ། །དེ་ཡི་འོག་ཏུ་རེང་བུ་ཡིས། །སྣུམ་དབྱུང་ཕྱིར་ནི་འབད་བྱ་བའམ། །མས་གཏོང་བ་ནི་རྣོན་པོ་བྱ། །ཤིན་ཏུ་རྩུབ་པས་མ་བྱུང་ཞིང༌། །སྙོམ་བག་ལ་སོགས་ནད་མེད་ན། །བཏང་སྙོམས་སུ་ནི་གཞག་པར་བྱ། །དེ་ནས་མཚན་འདས་ནང་པར་ནི། །བཅའ་སྒ་འུ་སུ་བསྐོལ་ཆུ་འམ། །ཡང་ན་ཆུ་ཚན་འབའ་ཞིག་བཏུང༌། །འཇམ་རྩི་བཏང་ནས་ཉིན་གསུམ་མམ། །ཉིན་ལྔ་ལོན་ནས་སླར་གཏང་བའམ། །ཇི་སྲིད་སྣུམ་ནི་འཇུག་གྱུར་པའམ། །ཡང་ན་རླུང་ནི་ཤས་ཆེ་དང༌། །རྟག་ཏུ་རྩོལ་བྱེད་མེ་དྲོད་ཆེ། །ཁོང་རྩུབ་པ་ལ་ཉིན་རེ་གཏང༌། །དེ་ལྟར་སྣུམ་ནི་གསུམ་མམ་བཞི། །སྣུམ་གྱུར་རྩ་སྒོ་སྦྱང་བའི་ཕྱིར། །མས་གཏོང་ཁྲུས་ཀྱིས་སྦྱང་བ་དང༌། །སྣུམ་མེད་ལུས་ནི་སྣུམ་གྱུར་གཏང༌། །ཉི་མ་གསུམ་མམ་ཉིན་ལྔ་ན། །ཚེས་གྲངས་བཟང་ཞིང་དགེ་བ་ལ། །ཉིན་ཕྱེད་ཅུང་ཟད་ཡོལ་བའི་ཚེ། །གཏོར་མ་བཀྲ་ཤིས་ཆོ་ག་བྱ། །སྣུམ་བསྐུས་དུགས་བྱ་བཤད་གཅི་ནི། །བསལ་ཞིང་ཤིང་ཏུ་བཀྲེས་མིན་ལ། །སྐྱེས་བུའི་ནད་དམིགས་སྨན་ལ་སོགས། །འབད་དེ་ཤེས་པར་བྱས་ནས་ནི། །སྨན་པ་དེ་ལ་མཁས་པ་ནི། །མར་དང་ལྷན་ཅིག་མས་གཏོང་སྦྱར། །སྨན་གྱི་སྲང་ནི་ཉི་ཤུ་དང༌། །བོ་སོན་ཆ་བརྒྱད་ལྷན་ཅིག་བསྐོལ། །བསྐོལ་བ་དེ་ཡི་བཞི་ཆ་ཡིས། །སྨན་མར་རླུང་ལ་རྗེས་སུ་སྦྱར། །མཁྲིས་པ་བདེ་བར་གནས་དྲུག་ཆ། །བད་ཀན་ཤས་ཆེ་བརྒྱད་ཆ་གཅིག །ཡང་ན་ཀུན་ལ་སྨན་གྱི་ནི། །བརྒྱད་ཆ་གཅིག་གམ་ཅི་ནས་ཀྱང༌། །མས་གཏོང་སྐ་སླར་མི་འགྱུར་བྱ། །བུ་རམ་དག་ནི་སྲང་གཅིག་ཙམ། །རིགས་པས་སྦྲང་རྩི་རྒྱམ་ཚ་སོགས། །ལྷག་མ་དེ་ཀུན་སྣོད་ཅིག་བླུགས། །བུམ་པར་ཆུ་བསྐོལ་རླངས་པ་ཡིས། །བསྲོ་ཞིང་གཟར་བུས་དཀྲུགས་ནས་ནི། །རྐྱལ་པའི་ནང་བླུགས་མཇུག་མར་ནི། །གཏོང་ཚེ་ཤིན་ཏུ་ཚ་གྲང་མིན། །ཤིན་ཏུ་སྣུམ་མིན་རྩུབ་པའང་མིན། །ཤིན་ཏུ་རྣོ་མིན་འཇམ་པའང་མིན། །ཤིན་ཏུ་སྐ་མིན་སླ་བའང་མིན། །ཤིན་ཏུ་མང་ཉུང་ཚད་མེད་པའང༌། །ཚ་ཆེ་སྐྱུར་བའང་དེ་དང་འདྲ། །དེ་ལ་མཁས་པ་གཞན་སྨྲ་བ། །སྣུམ་པ་དང་སྦྲང་རྩི་གཉིས་སོ་སོར། །སྲང་ནི་གསུམ་གསུམ་བྱས་ནས་སུ། །རྒྱམ་ཚ་དག་ནི་ཞོ་གཉིས་དང༌། །ནད་མེད་ལ་བཏང་སྨན་སྲང་གཉིས། །ཁུ་བའི་
སྨན་ནི་ལྷག་མ་ཀུན། །སྲང་བཅུ་ཡོངས་སུ་སྦྱར་བར་བྱ། །སྦྲང་རྩི་རྒྱམ་ཚ་སྣུམ་རྣམས་དང༌། །སྨན་ཕྱེ་ཁུ་བའི་རིམ་པ་ནི། །མས་གཏོང་རྐྱལ་བར་བཅུག་བྱས་ཏེ། །འདི་ནི་སྦྱོར་བའི་ཆོ་གར་བཤད། །གན་རྐྱལ་བཞག་ནས་བཏང་མ་ཐག །སྔས་ཀྱིས་བརྟེན་ཏེ་མས་གཏོང་ལ། །ཡིད་ནི་གཞན་དུ་མ་ཡེངས་པས། །འཁྲུ་བ་ཙོག་པུས་གཏང་བར་བྱ། །འོང་དུས་དམ་པ་ཡུད་ཙམ་སྟེ། །དེ་ལས་གཞན་དུ་འཆི་བྱེད་ཡིན། །དེ་ལ་བཅོས་པའི་ཐབས་གྱུར་སྣུམ། །ཐལ་སྨན་བ་གཅིན་ཁུ་སྐྱུར་སྦྱར། །མྱུར་བས་སྣུམ་ལ་རྣོ་དྲོ་བའི། །མང་གཏོང་གཞན་དག་གཏང་བར་བྱ། །ཡང་ན་སྨན་གྱི་རེང་བུ་དག །གཏོང་ཞིང་དུགས་ལ་སོགས་པ་བྱ། །རང་ཉིད་འོངས་པར་གྱུར་ན་ནི། །མས་གཏོང་གཉིས་པ་གཏང་བའམ། །ལན་གསུམ་ལན་བཞིའི་བར་དུ་ནི། །ཇི་སྲིད་ལེགས་པར་གྱུར་པར་གཏང༌། །དེ་ཡིས་སྦྱོར་སོགས་བཀྲུ་སྨན་དང༌། །འདྲ་བར་ཤེས་བྱ་སྦྱོར་ལེགས་ན། །ཆུ་དྲོན་འཇམ་པོས་བཀྲུས་ནས་ནི། །ཤ་ཁུ་འབྲས་ཆན་ཉུང་ཟད་སྦྱིན། །མས་གཏོང་དྲག་པོས་ནད་རྣམས་ཀྱི། །དྲི་མ་བསྐྱོད་པས་བྱུང་གྱུར་པ། །དེ་ནི་ཆུ་དྲོན་གྱིས་བཀྲུ་དང༌། །ཁ་ཟས་ཚུལ་བཞིན་ཐོས་བས་འབྱུང༌། །གལ་ཏེ་རླུང་གིས་ཉམ་ཐག་ན། །སླར་ཡང་འཕྲལ་དུ་འཇམ་རྩི་གཏང༌། །དེ་ནི་ལེགས་དང་མ་ལེགས་དང༌། །གྲགས་པ་སྣུམ་འཐུངས་འདྲར་ཤེས་བྱ། །གང་ཞིག་དུས་ནི་ཅུང་ཟད་གནས། །བཤང་དང་བཅས་པར་འབྱུང་འགྱུར་ཞིང༌། །ཐུར་དུ་དབུགས་དང་སྣུམ་ལྷན་ཅིག །འབྱུང་འགྱུར་འཇམ་རྩི་ལེགས་པ་ཡིན། །བད་ཀན་ལ་ནི་མས་གཏོང་བའི། །འཇམ་རྩི་གཅིག་གམ་གསུམ་གཏང་བྱ། །མཁྲིས་པ་ལ་ནི་ལྔའམ་བདུན། །རླུང་ལ་དགུའམ་བཅུ་གཅིག་གཏང༌། །སླར་ཡང་དེ་ལ་ཟུང་མིན་པ། །མས་གཏོང་རྗེས་ལ་བྱ་བ་ཡིན། །བད་མཁྲིས་རླུང་ལ་རིམ་བཞིན་ཟས། །ཡུ་ཤ་འོ་མ་ཤ་ཁུ་གཏང༌། །རླུང་འཇོམས་སྨན་ནི་ལེགས་བསྐོལ་བ། །དུར་བྱིད་རྒྱ་མཚར་བཅས་པར་བྱ། །སྣུམ་མངར་སྐྱུར་ཤ་ཁུ་དྲོན་སྦྱར། །མས་གཏོང་གཅིག་ནི་རླུང་ལ་ཕན། །ནྱ་གྲོ་དྷ་སོགས་སྡེ་ཚན་བསྐོལ། །ཤུག་སོགས་ཀར་དཀར་དང་བཅས། །མངར་བསིལ་བུ་རམ་ཤིང་ཁུ་མར། །འོ་མ་སྦྲང་རྩིར་བཅས་མཁྲིས་སེལ། །དོང་ག་ལ་སོགས་བསྐོལ་བ་དང༌། །དུག་མོ་ཉུང་སོགས་བཅས་པ་
གསུམ། །རྩུབ་དང་སྦྲང་རྩི་བ་གཅིན་བཅས། །རྣོ་ཞིང་དྲོ་ཁ་བད་ཀན་སེལ། །གསུམ་པོ་འདུས་པའི་ནད་ལ་ཡང༌། །གང་ཕྱིར་རིམ་བཞིན་སེལ་བ་ཡིན། །གསུམ་པོ་དེ་ལས་གཞན་པ་ཡིན། །མས་གཏོང་གསོ་ཞེས་གཞན་མི་འདོད། །གང་ཕྱིར་སླར་ཡང་སྦྱིན་བྱ་བའི། །ཉེས་བ་བཞི་པོ་ཡོད་མ་ཡིན། །ནད་བསྐྱོད་དག་པར་བྱེད་པ་དང༌། །ཞི་བར་བྱ་བའི་རིམ་པ་ཡིས། །མས་གཏོང་གསུམ་པོ་ཉིད་བརྟག་ཅེས། །དེ་སྐད་གཞན་དག་སྨྲ་བ་ཡིན། །ནད་དང་སྨན་སོགས་སྟོབས་ལས་ནི། །འདི་དག་ཐམས་ཅད་ཚད་མས་གཞལ། །བསྐྲུ་སྨན་དྲག་བཏང་ལེགས་མཚན་མ། །མ་མཐོང་བར་དུ་འཕྲོ་མི་བཅད། །དང་པོར་སྣུམ་གཅིག་ཐ་མར་ལྔ། །བཀྲུ་སྨན་དྲག་པོ་བཅུ་གཉིས་ཏེ། །འཇམ་རྩིར་བཅས་བ་མས་གཏོང་བའི། །ལས་ནི་སུམ་ཅུར་བཤད་པ་ཡིན། །དུས་ནི་བཅོ་ལྔ་འདིར་གཅིག་ནི། །ཐོག་མའི་སྣུམ་སྟེ་ཐ་མར་གསུམ། །དུགས་དང་མས་གཏོང་ལྔ་པར་བཤད། །མས་གཏོང་སྦྱོར་འདིར་བརྒྱད་ཡིན་ཏེ། །ནི་རུ་ཧ་དང་སྣུམ་གསུམ་དང༌། །ཐོག་མ་ཐ་མ་གཉིས་ཀའོ། །འཇམ་རྩིའམ་བཀྲུ་སྨན་མས་གཏོང་དྲག །གཅིག་བུ་ལྷག་པར་བསྟེན་མི་བྱ། །འཇམ་རྩིས་ནད་སློངས་མེ་དྲོད་འཇོམས། །ནི་རུ་ཧས་རླུང་སྐྱེད་འཇིགས་ཡོད། །དེ་བས་སྣུམ་རྗེས་བཀྲུས་དྲགས་གཏང༌། །ཁྲུས་དྲག་བཏང་ནས་འཇམ་རྩི་བྱ། །དེ་ལྟར་རིམ་པས་སྣུམ་སྦྱང་བྱ། །མས་གཏོང་ལས་ནི་ཉེས་གསུམ་སེལ། །སྣུམ་གྱི་ཚད་ནི་ཆུང་ངུ་ཡི། །ཚད་དང་དེ་ནི་མཉམ་བྱས་པའི། །སྣུམ་ཚད་འཇམ་རྩིའི་ཚད་དུ་བཤད། །དེ་ནི་བྱིས་རྒན་ལམ་དང་ཁུར། །བུད་མེད་རྩོལ་ཞེན་པས་དུ་བ་དང༌། །རླུང་ནད་ཀྱིས་གཞོམ་མེ་དྲོད་ཆུང༌། །རྒྱལ་པོ་ཕྱུག་པོ་ལ་བདེ་བ། །ཡིན་པས་རྟག་ཏུ་བསྟེན་པར་བྱ། །ནད་འཇོམས་ཡང་བ་མེད་པ་དང༌། །སྟོབས་སྐྱེད་བཤང་བ་བདེ་བར་འབྱུང༌། །མས་གཏོང་བུད་མེད་རོ་སྨད་ཀྱི། །མངལ་དང་མོ་མཚན་ནད་རྣམས་ལ། །བཀྲུས་དྲགས་གཉིས་གསུམ་གྱིས་དག་པར། །མས་གཏོང་གོང་མས་གཏང་བར་བྱ། །དེ་ཡི་གཅེའུ་ནད་པ་ཡི། །སོར་ཚད་བཅུ་གཉིས་ཚད་དུ་བྱ། །ཟླུམ་ཞིང་བ་ལང་མཇུག་མ་འདྲ། །རྩ་བ་དབུས་སུ་གག་པ་གདགས། །རྩེ་མོ་ཡུངས་ཀར་ཤོང་བ་ཙམ། །འཇམ་པ་གསེར་ལ་སོགས་ལས་བྱས། །ཀུནད་སྲི་ཞིང་སོ་མན། །མེ་ཏོག་རྩེ་མོ་ལྟར་ཟླུམ་ཕྲ། །དེ་ཡི་རྐྱལ་བུ་འཇམ་
ཞིང་ཡང༌། །ཚད་སྲང་ཕྱེད་དམ་གང་རིགས་བྱ། །དེ་ནས་ཁྲུས་བྱས་ཟས་ཟོས་ལ། །འཇམ་རྩི་གཏོར་བའི་ཆོ་ག་བྱ། །ཁྲི་སྟེགས་བུས་མཉམ་འཇམ་པ་ལ། །དྲང་ཞིང་བདེ་བར་འདུག་ནས་ནི། །ཕོ་མཚན་བཏེག་ཅིང་དྲང་པར་བྱ། །སྦུབས་སྦྱང་ཕྱིར་ནི་ཐུར་མ་ནི། །འཇམ་པ་རིམ་གྱིས་གཞུག་པར་བྱ། །དེ་དག་ཕོ་མཚན་དང་འཚམ་པ། །འབྲས་བུའི་མཐར་ཐུག་པར་གཏང་བ། །མི་འདར་འཇམ་རྩི་བཏང་ལྟར་བྱ། །བཙིར་ཏེ་བཏང་ལ་སྣུམ་རྗེས་བྱ། །འཇམ་རྩིའི་རིམ་པ་བཞིན་དུ་བྱ། །མས་གཏོང་ཆོ་ག་འདི་ཡིས་ནི། །གསུམ་མམ་བཞི་ཡི་བར་དུ་གཏང༌། །ལྷག་མ་འཇམ་རྩི་ཇི་ལྟ་བར། །འདི་ལ་ཐམས་ཅད་སྦྱར་བར་བྱ། །བུད་མེད་ཟླ་མཚན་དུས་སུ་ནི། །མངལ་བྱེ་བ་ལས་ཆགས་པར་འགྱུར། །དེ་ཕྱིར་དེ་ཚེ་གཏང་བྱ་ལ། །རབ་ན་དུས་མིན་པར་ཡང་གཏང༌། །མོ་མཚན་ཉམས་དང་གཟེར་བ་དང༌། །མངལ་ཁྲག་རྟག་ཏུ་འབྱུང་གཏོང་བ། །གཅེ་བུ་སོར་བཅུ་རྩེ་མོ་ཡི། །བུ་ག་མུངྒ་ཤོང་སོར་བཞི། །མངལ་གྱི་གནས་སུ་གཏང་བར་བྱ། །སོར་གཉིས་གཅིན་འབབ་ལམ་དུ་བཏང༌། །གཅིན་འགགས་པ་ཡིན་ད་རྣམས་ལ། །བུ་མོ་རྣམས་ལ་སོར་གཅིག་གཏང༌། །འབྲིང་ཚད་སྲང་ནི་གཅིག་པ་སྟེ། །བུ་མོ་རྣམས་ལ་སྲང་ཕྱེད་ཉིད། །མལ་དུ་གན་རྐྱང་འདུག་ནས་ནི། །བརླ་ནི་ལེགས་པར་བསྐུམས་ནས་སུ། །པུས་མོ་བསྟོད་དེ་ཉིན་ཞག་ནི། །གཅིག་ལ་ལན་གསུམ་ལན་བཞི་གཏང༌། །དེ་ལྟར་མས་གཏོང་ཞག་གསུམ་ལ། །སྣུམ་གྱི་ཚད་ནི་བསྐྱེད་པར་བྱ། །དེ་ནས་ཞག་གསུམ་ངལ་བོས་ནས། །སླར་ཡང་ཞག་གསུམ་གཏང་བར་བྱ། །སྐྱུག་སྨན་བྱས་ཟླ་ཕྱེད་བཀྲུ་སྨན། །དེ་ནས་ཟླ་ཕྱེད་ནས་བཀྲུས་དྲགས། །བཀྲུས་དྲགས་འཕྲལ་ལ་འཇམ་རྩི་གཏང༌། །ཁྲུས་བཏང་ཞག་བདུན་ནས་འཇམ་རྩི། །དཔེར་ན་ལེ་བ་རྒན་སོགས་བཙོས་པའོ། །གོས་ནི་ཆུ་ལས་ཚོས་ལེན་ལྟར། །དེ་བཞིན་བངས་པར་བྱས་ལུས་སེལ། །མས་གཏོང་བས་ནི་ནང་རྣམས་འབྱིན། །ལུས་ཀྱི་ཡན་ལག་ནང་ཁྲོལ་དག་ཏུ་སོང་ནད་དང༌། །གནད་དང་ལུས་སྟོད་ཡན་ལག་ཀུན་ཁྱབ་ནད། །གང་ཞིག་ཡོད་པ་དེ་ལས་སྐྱེ་བའི་རྒྱུ། །རླུང་མ་གཏོགས་པ་གཞན་དག་ཡོད་མ་ཡིན། །བཤང་དང་བད་ཀན་མཁྲིས་སོགས་ནད་སོགས་པ། །གང་ཕྱིར་འཐོར་ཞིང་སྡུད་པར་བྱེད་པ་ཡིན། །དེ་ནི་རབ་འཕེལ་གྱུར་ལ་ཞི་བའི་ཕྱིར། །འཇམ་
རྩི་མ་གཏོགས་སྨན་གཞན་གང་ཡང་མེད། །དེ་བས་གསོ་བ་མ་ལུས་ལས་མ་བཏང༌། །གསོ་བའི་ཕྱེད་ཡིན་ཞེས་ནི་ལ་ལ་འདོད། །དེ་བཞིན་ནད་རྙིང་གློ་བུར་སྐྱེད་བྱེད་ལ། །གཏར་ག་ཁྲག་དབྱུང་སྨན་ཉིད་འགྱུར་བ་ཡིན། །ཡན་ལག་བརྒྱད་པའི་སྙིང་པོ་བསྡུས་པ་ལས། མདོའི་གནས་ཀྱི་ལེའུ་བཅུ་དགུ་པའོ།། །།དེ་ནས་སྨན་སྣ་ནས་གཏོང་བའི་ཆོ་གའི་ལེའུ་བཤད་པར་བྱའོ། །ནམ་ཚོང་ཡན་ཆད་ནད་རྣམས་ལ། །ལྟག་པར་སྨན་ས་བཏང་བ་ཕན། །སྣ་ནི་ཀླད་པའི་སྒོ་ཡིན་ཏེ། །དེས་ན་དེ་ནས་ནད་དེ་འཇོམས། །བཀྲུ་སྨན་ཀླད་པའི་ནད་རྣམས་དང༌། །གློང་བག་ལྐོག་ནད་མཆི་མ་འཛག །སྐྲང་དང་ཐོར་བུ་སྲིན་རྨེན་བུ། །མཛེ་སྙོམས་ཆམ་པས་བཏབ་ལ་གཏང༌། །བརྟ་བ་རླུང་ལས་བྱུང་གཟེར་དང༌། །གླད་པ་ཕྱེད་ནས་སྐད་འགགས་དང༌། །སྣ་དང་ཁ་སྐོམ་ཚིག་མི་ཐོན། །མིག་དབྱེ་དཀའ་དཔུང་བསྐྱོད་དཀའ་གཏང༌། །ཞི་བ་མིག་སྔོན་གདོང་པགས་ནད། །སྐྲ་ཡི་སྐྱོན་མིག་དམར་ལ་གཏང༌། །དང་པོ་རང་སྦྱོར་ཇི་ལྟའི་སྣུམ། །སྨན་གྱི་ལྡེ་གུ་སོགས་བསྐོལ་དང༌། །ཤིང་མངར་རྒྱམ་ཚ་ཆང་རྙིང་སོགས། །ཅི་རིགས་པ་ནི་བསྐོལ་བ་གཏང༌། །བརྟ་བ་འུ་སུའི་ཁུ་བ་དང༌། །ཤ་ཁུ་ཁྲག་དང་ཐང་ཆུའང་སྦྱར། །ཞི་བ་སྔ་མའོ་མ་དང༌། །ཆུ་དང་བཅས་པར་སྦྱར་བར་བྱ། །ཚད་ཆེན་དང་ནི་ཚང་ཕྲན་ཏེ། །འདི་ཡི་སྣུམ་ཚད་རྣམ་པ་གཉིས། །ལྡེ་གུ་ལ་སོགས་བཙིར་བ་ཡི། །རྣོ་དེ་སྤྱི་བོའི་བཀུར་སྨན་ཡིན། །ཕྱེ་མ་བུད་པའི་བཀྲུ་སྨན་ཏེ། །སྦུ་གུ་སོར་དྲུག་ཁ་གཉིས་པ། །ནང་ན་སྨད་དང་བཅས་པ་དག །ཁ་ཡི་དབུགས་ཀྱིས་བུས་ཏེ་གཏང༌། །དེས་ནི་མགོ་ནད་མང་པོ་ཡང༌། ཕྱེ་མ་ཡིན་པས་འབྱིན་པར་བྱེད། །མཛུབ་མོའི་ཚིགས་ནི་གཉིས་བའི་བར། །སྨྱུགས་པའི་ཕྱིར་བྱུང་གྱུར་པ་ལས། །ཐིགས་པ་བཅུའམ་བརྒྱད་དམ་དྲུག །ཇི་སྲིད་འཛགས་པར་གྱུར་པ་དག །སྣ་ནས་གཏོང་ཚད་ཆེ་འབྲིང་ཆུང༌། །རིམ་པ་དེ་ཉིད་ཀྱིས་ཤེས་བྱ། །ལྡེ་གུ་ལ་སོགས་ཐིགས་པ་ནི། །གཉིས་ཀྱིས་ཕྱིར་སྟེ་གཏང་བར་བྱ། །ཆུ་དང་ཆང་དང་སྦྱར་དུག་མར། །འཐུངས་པའམ་འཐུང་བར་འདོད་པ་དག །ཁ་ཟས་ཟོས་དང་མགོ་བཀྲུས་དང༌། །འཁྲུ་བར་འདོད་དང་གཏར་ག་བྱས། །ཆམ་པ་ཤུགས་འོངས་ཀྱིས་གཟིར་དང༌། །བུ་བཙས་ལུད་པ་དབུགས་མི་བདེ། །སྦྱང་བྱས་མས་གཏོང་ཆོ་ག་བྱས། །དེ་བཞིན་
དུས་མིན་ཡུལ་རྨུགས་ལ། །སྣ་སྨན་གཏང་བར་མི་བྱ་སྟེ། །ཚབས་ཆེན་ནད་དང་སོགས་མ་གཏོགས་སོ། །དེ་ནས་སྣ་ནས་སྨན་གཏང་བ། །བད་ཀན་ནང་པར་མཁྲིས་ཉིན་ཕྱེད། །རླུང་ཅན་ཕྱི་འབྲེད་མཚན་མོ་གཏང༌། །ནད་མེད་པ་ལ་སྟོན་ཀ་དང༌། །དཔྱིད་ཀྱི་ཚེ་ན་སྔ་དྲོ་གཏན། །དགུན་ནི་ཕྱེད་དུས་སོ་གའི་ཚེ། །ཕྱི་འབྲེད་དབྱར་ནི་ཉི་དྲོན་བཅས། །གླད་པ་རླུང་ནད་ཀྱིས་ཐེབས་དང༌། །སྐྱིགས་བུས་བཏབ་དང་མགོ་འདར་དང༌། །གཉེའུ་རེངས་སྐད་ནི་འགགས་པ་ལ། །ཉིན་རེ་ནང་པར་དགོངས་ཀ་གཏང༌། །གཞན་ལ་ཉིན་རེས་བར་བཅད་ལ། །ཉི་མ་བདུན་དུ་དེ་སྤྱད་བྱ། །རྟག་ཏུ་བྱ་བའི་ལས་བྱས་ནས། །དང་པོར་མགོ་སྣུམ་བསྐུ་དུགས་བྱས། །རླུང་མེད་མལ་དུ་གནས་ནས་ནི། །ནམ་ཚོང་ཡན་ཆད་དུགས་ཀྱང་བྱ། །དེ་ནས་གན་རྐྱལ་ལུས་དྲང་བརྐྱང༌། །རྐང་པ་ལག་པ་ལེགས་བརྐྱངས་ལ། །རྐང་པ་ཅུང་ཟད་བསྟོད་ནས་སུ། །མགོ་བོ་ཡིད་ཙམ་སྨད་པར་བྱ། །སྣ་ཁུང་གཅིག་ནི་རབ་བཀག་ལ། །རིམ་གྱིས་ཡོངས་སུ་བླུགས་བྱ་བ། །སྨན་ནི་ཆུ་དྲོན་གྱིས་བསྲོས་ལ། །སྦུ་གུའམ་རས་བལ་གྱིས་བླུགས་བྱ། །བླུགས་ནས་རྐང་མཐིལ་ཕྲག་པ་དང༌། །ལག་པ་རྣ་བ་ལ་སོགས་མ་ཉེ། །རིམ་གྱིས་བརྔུབས་ལ་གློ་གཉིས་སུ། །མཆིལ་མདོར་བ་དེ་ནས་ནི། །སྨན་ནི་ཟད་པར་འགྱུར་གྱི་བར། །ལན་གཉིས་ལན་གསུམ་སྣང་བཏང་སྤྱད། །གལ་ཏེ་བརྒྱལ་གྱུར་བསིལ་བའི་ཆུས། །མགོ་མ་གཏོགས་པར་གཏོར་བར་བྱ། །བཀྲུ་སྨན་འོག་ཏུ་སྣུམ་དག་ནི། །ནད་སོགས་ཚུལ་ལས་དཔགས་ཏེ་གཏང༌། །སྣ་སྨན་བཏང་མཐར་གན་རྐྱལ་དུ། །གྲངས་བརྒྱར་དེ་ལས་བསྡད་པར་བྱ། །དུད་པ་བརྔུབས་ལ་ཆུ་དྲོན་འཇམ། །གྲེ་བ་མཚུལ་པ་དག་ཕྱིར་བྱ། །སྣུམ་བཏང་ལེགས་གྱུར་དབུགས་བདེར་རྒྱུ། །གཉིད་ལོག་སད་བདེ་དང་པོ་གསལ། །ཉེས་པས་མགོ་རྩུབ་མི་འགྱུར་སྐམ། །སྣ་དང་ཁ་སྐམས་ཀླད་སྟོང་སྙམ། །སྣུམ་དྲགས་གཡན་དང་ལྕི་བ་ཉིད། །མཆིལ་མང་ཆམ་འདེབས་ཡི་ག་འཆུས། །ལེགས་བཀྲུས་མིག་གསལ་ཡང་བ་དང༌། །ཁ་དང་སྐད་ནི་དག་པར་འགྱུར། །བཀྲུས་ཉེན་ནད་ནི་འཕེལ་བར་འགྱུར། །བཀྲུས་དྲགས་ཁོང་ནི་རྨྱ་བར་འགྱུར། །ཚད་ཕྲན་གློ་རྡོལ་རིད་པ་དང༌། །བྱིས་པ་རྒན་པོ་སྐྱིད་པར་གནས། །དུས་མིན་ཆར་འབབ་པར་ཡང་གཏང༌། །དེ་ནི་ཆམ་པས་དྲག་བཏབ་དང༌། །ཆང་འཐུངས་རྣ་བ་འོན་པ་དང༌། །ཀླད་རྒྱས་སྲིན་བུ་ཞུགས་པ་དང༌། །ནད་བསྡུས་ཕྱིར་ནི་མ་ཕྱུང་
ལ། །ཚད་ཕྲ་བ་ནི་གཏང་མི་བྱ། །ཉིན་མཚན་ཟས་ཟོས་སློན་གཉིད་ཉལ། །མཐའ་དང་བུད་མེད་ལམ་ངལ་དུབ། །མགོ་བསྐུས་མ་ཁུར་བཀང་དབོ་བའི་རྗེས། །བཤང་གཅི་མིག་སྨན་བཏང་རྗེས་དང༌། །སོ་ཤིང་གི་རྗེས་དགོད་པ་ཡིན། །རྗེས་ལ་ཐིགས་པ་གཉིས་པ་གཏང༌། །ལྔ་ཡིས་དབང་པོའི་བུ་ག་དག །གསུམ་གྱིས་རིམ་བཞིན་ངལ་བ་སེལ། །ལྔ་ཡིས་མིག་ནི་གསལ་བར་བྱེད། །སོ་བརྟན་རླུང་ནད་ཞི་བར་འགྱུར། །སྣ་སྨན་ལོ་བདུན་མ་ལོན་དང༌། །བརྒྱད་ཅུ་འདས་ལ་གཏང་མི་བྱ། །བཅྭ་བརྒྱད་མ་ལོན་དུད་མི་བདུག །མཁུར་བཀང་ལྔ་མ་ལོན་ལ་མིན། །ལོ་བཅུ་མ་ལོན་སྤྱད་མི་གཏང༌། །བདུན་ཅུ་འདས་ལའང་མི་བྱའོ། །སྐྱེས་ནས་རྒས་པའི་བར་དུ་ནི། །ཚད་ཕྲན་མས་གཏོང་ལྟ་བུར་བསྔགས། །དེ་ནི་རྟག་ཏུ་བསྟེན་གྱུར། །ཚད་ཆེ་བ་ལྟར་ཡོན་ཏན་སྐྱེད། །འདི་ལ་བདམ་པ་གང་ཡང་མེད། །གནོད་ལས་ཚད་ཆེན་ལྟར་འཇིགས་མེད། །སྣ་སྨན་དོན་དུ་ཏིལ་མར་ཉིད། །རྟག་ཏུ་བསྟེན་པ་བསྔགས་པ་ཡིན། །མགོ་ནི་བད་ཀན་གནས་ཡིན་ཕྱིར། །སྣུམ་གཞན་བདེ་གནས་ལ་མི་བསྔགས། །མྱུར་བྱེད་རིང་ཞིག་བྱེད་པ་དང༌། ཡོན་ཏན་ཆེ་དང་ཆུང་བྱེད་པའི། །ཁྱད་པར་ཚད་ཆེན་ཚད་ཕྲན་ལ། །གལ་ཏེ་མེད་པར་གྱུར་ན་ནི། །གང་ཞིག་སྤང་བྱས་གནོད་བྱས་པའི། །ཚད་ཆེན་ངག་ནི་སུ་ཞིག་སྟོན། །སྣུམ་དངས་བཏུང་བ་རྟག་བཤད་དུ། །སྤྱིལ་བུ་རླུང་དང་ཚད་པར་གནས། །འཇམ་རྩི་ཚད་ཆེན་པས་གཏོང་ཚད། །དེ་དང་འདྲ་བར་རྣམ་པར་བསྟན། །ཛ་ལ་སྒོར་ཤིང་ཛི་བནྟི། །གླ་སྒང་ཤིང་ཚ་བུ་ཤེལ་ཙེ། །གོ་བི་ཙནྡན་སྐྱེར་པའི་རྩ། །ཤིང་མངར་གླ་བ་ཨ་ཀ་རུ། །ཉེའུ་ཤིང་བིལ་བ་པུཎྜ་རཱི། །ཨུཏྤལ་མུར་བ་པརྞི་གཉིས་།བྲི་ཧ་ཏི་གཉིས་བྱི་དང་ག །གནྡྷ་བྷ་དྲ་སུག་སྨེལ་དང༌། །ཧ་རེ་ཎུ་ཀ་པདྨ་ཡི། །གསེར་དང་ནི་བ་ལ་སྟེ། །སྨན་ནི་འདི་རྣམས་ཆ་མཉམ་ལ། །ཆར་པའི་ཆུས་ནི་བསྐོལ་པར་བྱ། །ཏིལ་མར་ལས་ནི་སྨན་གྱི་ཁུ། །བཅུ་འགྱུར་ལྷག་བྱས་དེ་ལ་ནི། །ཏིལ་མར་ཆུ་དང་བསྐོལ་བ་བྱ། །ལན་བཅུ་ཉིད་ནི་བསྐོལ་ནས་ནི། །ཆོས་པ་ཡིན་བཅུ་ཆ་ལ། །དེ་མཉམ་ར་ཡི་འོམ་བླུགས། །སྣར་བཏང་ཏིལ་མར་ཡོན་ཏན་ཆེ། །ཐིགས་ཕྲན་ཞེས་བྱ་འདི་བསྟེན་བྱ། །སྣ་ནས་བཏང་བའི་སྨན་བསྟེན་པས། །ཕྲག་པ་མགྲིན་པ་དབུང་མགོ་ནི། །མཁྲེགས་ཤིང་མཐོལ་པ་གས་མདོག་གསལ། །དབང་བརྟན་སྐྲ་དཀར་མེད་པར་འགྱུར། །ཡན་ལག་བརྒྱད་པའི་སྙིང་པོ་
བསྡུས་པ་ལས། །མདོའི་གནས་ཀྱི་ལེའུ་ཉི་ཤུ་པའོ།། །།དེ་ནས་རྣམ་སྨན་གྱི་དུད་པ་གཏང་པའི་ཆོ་གའི་ལེའུ་བཤད་པར་བྱའོ། །ནམ་ཚོང་ཡན་ཆད་བང་རླུང་ལས། །བྱུང་བའི་ནད་རྣམས་མི་སྐྱེ་དང༌། །སྐྱེས་པ་རྣམས་ནི་བསལ་པའི་ཕྱིར། །མཁས་པས་རྟག་ཏུ་དུད་པ་བ་རྔུབ། །དེ་ནི་འཇམ་དང་བར་མ་རྣོ། །རླུང་དང་བད་རླུང་བད་ཀན་ལ། །གཏང་ངོ་མཁྲིས་ཁྲག་གིས་ཉེན་དང༌། །བཀྲུས་དང་དམུ་རྫིང་ཟ་ཁུ་དང༌། །རབ་རིབ་སྦོས་དང་སྟོད་རླུང་ནད། །ལྐོག་ནད་མས་གཏོང་བྱས་པ་དང༌། །ཉ་དང་ཆང་དང་འོ་མ་ཞོ། །སྦྲང་རྩི་མར་དང་དུག་འཐུངས་སོགས། །མགོ་ནད་སྐྱ་རྦབ་ནད་ཅན་ནི། །མཚན་གཉིད་མ་ལོག་ལ་མི་གཏང༌། །གལ་ཏེ་དུད་པ་ཆེར་བརྔུབས་ན། །ཁྲག་དང་མཁྲིས་འཕེལ་འོན་དང་ལོང༌། །སྐོམ་དང་བརྒྱལ་དང་རྨོངས་པར་བྱེད། །དེར་ནི་བསིལ་བའི་ཆོ་ག་ཕན། །བཀྲེས་སྦྲིད་གླལ་དང་བཤད་གཅི་བསལ། །བུད་མེད་བསྟེན་དང་གཏར་ག་བཏབ། །དགོད་དང་སོ་ཤིང་བཅས་པ་ཡི། །མཐར་ནི་དུད་པ་འཇམ་པོ་གཏང༌། །དུས་འདི་དག་ནས་མཚན་ཟས་ཟོས། །སྣ་སྨན་རྗེས་ལ་བར་མ་བརྔུབ། །གཉིད་ལོག་སྣ་སྨན་མིག་སྨན་ཁྲུས། །སློབ་པའི་རྗེས་ལ་རྣོན་པོས་བཀྲུ། །མས་གཏོང་གཅེའུ་འདྲར་བྱས་པ་ཡི། །དུད་གཅེའུ་སྦུབས་གསུམ་དྲང་པོར་བྱ། །རྩ་བ་མཐེབ་ཤོང་རྩེ་མོ་ནི། །རྒྱ་ཤུག་ཤོང་བའི་ཚད་དུ་བྱ། །དེ་ཡི་ཚད་ནི་རྔུབ་བྱེད་པའི། །སོ་ནི་ཉི་ཤུ་སུམ་ཅུ་གཉིས། །བཞི་བཅུ་རྣོ་དང་བར་མ་དང༌། །འཇམ་པོ་ལ་ནི་རིམ་བཞིན་བྱ། །དྲང་པོར་འདུག་ཅིང་དེ་ལ་སེམས། །ཁ་གདངས་ནས་ནི་ལན་གསུམ་བརྔུབ། །སྣ་ཁུང་རེ་རེ་བཀག་ནས་ནི། །སྣར་ནི་དུད་པ་བྲུབ་པར་བྱ། །མགོ་དང་སྣར་གཏོགས་ནད་བསྐྱོད་པ། །དང་པོར་སྣ་ནས་བརྔུབ་པར་བྱ། །བསྐྱོད་པའི་དོན་དུ་ཁོ་ནས་བརྔུབ། །གྲེ་བར་གཏོགས་པ་དེ་ལས་བཟློག །དུ་བ་ཁ་གཉིས་ནད་སློན་གྱི། །སྣར་སློན་མིག་ལ་གནོད་པར་བྱེད། །དུ་བ་རྔུབ་དང་འབྱིན་པ་ཡིས། །ལན་ནི་གསུམ་གསུམ་བརྔུབ་པར་བྱ། །འཇམ་པ་ཉིན་གཅིག་ལན་གཅིག་གཏང༌། །བར་མ་ལན་གཉིས་སྦྱོར་བ་ནི། །ལན་གསུམ་ལན་བཞི་གཏང་བར་བྱ། །དེར་སྨན་གུ་གུལ་ཨ་ཀ་རུ། །གླ་སྒང་རྡོ་དྲེག་སྠོ་ནི་ཡ། །སྤང་སྤོས་ཨུར་ཤི་བ་ལ་ཀ །ཤིང་ཚ་ཀོན་ཏི་ཤིང་མངར་དང༌། །བིལ་རྐང་ཨེ་ལ་བ་ལུ་ཀ །པོག་དཀར་ཤྲི་བེ་ཏ་ཀ་དང༌། །གླ་བ་སྦྲ་ཚིལ་བྱ་མ་ཀ །པོག་ནག་གུར་གུམ་མ་ཤ་དང༌། །ཀུན་ཏུ་རུ་དང་ནས་དང་ཏིལ། །སྣུམ་བཅས་
འབྲས་བུ་སྙིང་པོ་དང༌། །ཚིལ་དང་རྐང་དང་གཞག་དང་མར། །ཞི་བ་པོག་ནག་རྒྱ་སྐྱེགས་དང༌། །རྒུན་འབྲུམ་པདྨ་ཨུཏྤལ། །ནྱ་གྲོ་དྷ་དང་ཨ་ཤྭད་ཐ། །ཨུ་དུམྦཱ་ར་བླག་ཤ་དང༌། །སེང་ཕྲོམ་ཤུན་པ་ཁ་ར་དང༌། །ཤིང་མངར་ཀླུ་ཤིང་ཤུག་པ་བཙོད། །དྲི་ལས་རྒྱ་སྤོས་རུ་རྟ་བསྐོལ། །རྣོན་པོ་ཛོ་ཏི་སྨ་ཏི་དང༌། །སྐྱེར་པ་དང་ནི་རྩ་བ་བཅུ། །ལྡོང་རོས་བ་བླ་རྒྱ་སྐྱེགས་དང༌། །གི་རི་གར་ཀར་འབྲས་བུ་གསུམ། །དྲི་ཡི་སྨན་ལ་རོ་རྣོ་བའི། །མགོ་བོའི་བཀྲུ་སྨན་སྡེ་ཚན་ནོ། །དེ་དག་ཞག་གཅིག་ནུར་སྤངས་ལ། །དུད་པའི་སྨན་རྣམས་བཏགས་ནས་ནི། །ཐུར་མ་སོར་ནི་བཅུ་གཉིས་ལ། །ལན་ལྔའི་བར་དུ་བྱུགས་པར་བྱ། །གདར་བུ་མཐེ་བོང་ཙམ་སྦོམ་ལ། །ནས་ཀྱི་དབྱིབས་དང་འདྲ་བར་བྱ། །གྲིབ་མར་སྐམ་ཞིང་ཁོང་སྟོང་མེད། །སྣུམ་གྱིས་ཇི་བཞིན་བསྐུས་བྱས་ལ། །བརྔུབ་ཕྱིར་མི་ཡིས་བསྲེགས་ནས་ནི། །དུད་པའི་གཅེའུ་སྦྱར་བར་བྱ། །ཁམ་ཕོར་ཁ་སྦྱར་བུ་གར་ནི། །གཅེའུ་སོར་བཅུའམ་སོར་བརྒྱད་པ། །བཅུག་པ་ཁ་ནས་དུད་པ་ནི། །ལུད་པ་ཅན་གྱིས་བརྔུབ་པར་བྱ། །དུད་པ་བརྔུབས་ལ་ལུད་པ་དབུགས་མི་བདེ། །སྐད་འགགས་རྣག་དང་དྲི་མི་ཞིག་གདོང་སྐྱ། །སྐྲ་སྐྱོན་རྣ་མིག་འཛག་གཡའ་རྨོངས་བག་དང༌། །སྙོམ་དང་སྐྱིགས་ཐུ་ཆམ་པའི་ནད་མི་འབྱུང༌། །ཡན་ལག་བརྒྱད་པའི་སྙིང་པོ་བསྡུས་པ་ལས། །མདོའི་གནས་ཀྱི་ལེའུ་ཉི་ཤུ་རྩ་གཅིག་པའོ།། །།དེ་ནས་སྨན་གྱི་ཁུ་བས་མཁུར་བ་དགང་བ་ལ་སོགས་པའི་ཆོ་གའི་ལེའུ་བཤད་པར་བྱའོ། །མཁུར་བཀང་རྣམ་པ་བཞི་ཡིན་ཏེ། །སྣུམ་དང་ཞི་བྱེད་སྤྱོད་རྨ་འཚོབ། །དེ་ལས་གསུམ་ནི་རླུང་ལ་སོགས། །གསུམ་གཏང་ཐ་མ་རྨ་ལ་ཕན། །འདིར་སྨན་མངར་སྐྱུར་ལན་ཚྭ་དང༌། །ཚ་དང་སྣུམ་ནི་བསྐོལ་བ་ཡིན། །ཞི་བྱེད་ཁ་བསྐ་མངར་སྨན་བསྐོལ། །སྦྱོར་བ་ཁ་དང་ཚ་དང་སྐྱུར། །རྨ་ཚོ་བ་བྱེད་པ་ཁ་བ་དང༌། །བསྐ་བའི་སྨན་ནི་བསྐོལ་བར་བྱ། །དེ་ལ་སྣུམ་དང་འོ་མ་དང༌། །སྦྲང་རྩི་ཆུ་དང་ཚ་དང་ཆང༌། །བ་གཅིན་འབྲུ་ཡི་ཁུ་བ་རྣམས། །སྨན་ནི་ཇི་ལྟ་ཇི་ལྟ་དང༌། །ལྡེ་གུར་བཅས་པ་བསྐོལ་བ་ནི། །ཇི་ཙམ་བཟོད་པ་རྣམ་པར་སྦྱར། །སོ་བརྩེ་སོ་ནི་འགུལ་བ་དང༌། རླུང་ལས་གྱུར་པའི་ཁ་ནད་ལ། །དྲོ་འཇམ་ཙམ་མམ་བསིལ་བ་ཡི། །ཏི་ལ་ཆུས་མཁུར་བ་བཀང་པ་ཕན། རྟག་ཏུ་མཁུར་བ་བཀང་སྟེ་གཞག །ཏིལ་མར་དག་གམ་ཤ་ཁུ་བསྔགས། །ཁ་དྲོད་ཆེ་ཚ་ཆོས་པ་དང༌། །འཕྲལ་དུ་རྨ་ནི་བྱུང་བ་དང༌། །དུག་
དང་ཐལ་སྨན་མེས་ཚིག་ལ། །ཞུན་མར་དག་གོམ་འོ་མས་དགང༌། །སྦྲང་རྩི་མཁུར་བཀང་བྱས་པས་ནི། །ཁ་ཡི་དྲི་མ་སྦྱོང་བྱེད་ཅིང༌། །ཁ་ཡི་རྨ་ནི་འཚོབ་བྱེད་ཡིན། །ཁ་ཚ་སྐོམ་དད་རབ་ཞི་བྱེད། །རོ་མི་ཚོར་དང་དྲི་མ་ཆེ། །ཁ་མནམ་འབྲས་རྩ་བས་བཀང་བས་སེལ། དེ་ཉིད་ཅུང་ཟད་ཚ་བཅས་བསིལ། །ཁ་སྐམས་སེལ་བའི་དམ་པ་ཡིན། །ཐལ་སྨན་རྣོན་ཁུས་མཁུར་བཀང་བས། །བད་ཀན་སོགས་པ་མྱུར་དུ་སེལ། །ཆུ་ཚན་དྲོ་འཇམ་མཁུར་བཀང་བས། །ཁ་ནི་ཡང་ཞིང་བདེ་བར་བྱེད། །རླུང་མེད་ཉི་ཚན་བཅས་པར་ནི། །ཕྲག་པ་མ་ཇིང་བར་དུགས་བྱ་མཉེ། །མཁུར་བ་བཀང་ནས་གདོང་བ་ནི། །ཅུང་ཟད་བཏེག་སྟེ་ཇི་སྲིད་ན། །བད་ཀན་གྱིས་ནི་ཁ་གང་བའང༌། །སྣ་མིག་འཛག་པའི་བར་དུ་གཞག །ཁ་བཀང་མི་སྤོ་བཞག་མཁུར་བཀང༌། །གཞན་དུ་ཁར་བརྔུབ་པར་འགྱུར་རོ། །ཁར་བརྔུབས་པ་ཡིས་ཁྱད་པར་གསོ་བ་ནི། །གཉེའུ་རེངས་མགོ་མིག་རྣ་ནད་ཁ་ནག་དང༌། །མཆིལ་མང་གྲེ་ནད་སྙིང་ག་སྲ་བ་དང༌། །སྙིང་འཕར་སྙམ་དང་ཆམ་པ་ཡི་ག་འཆུས། །མཁུར་བཀང་བཤད་པའི་སྨན་རྣམས་ཀྱི། །ལྡེ་གུ་སྨན་ཁུ་ཕྱེ་མ་སྟེ། །ཁ་མུར་བྱ་བ་རྣམ་གསུམ་ཡིན། །དེ་ནི་བད་ཀན་ནད་ལ་གཏང༌། །གདོང་བསྐུས་གསུམ་སྟེ་ནད་སེལ་དང༌། །དུག་སེལ་ཁ་དོག་བཟང་བྱེད་པའོ། །དེ་དྲོད་བད་ཀན་རླུང་ལ་བསྔགས། །ལྷག་མ་ལ་ནི་རབ་བསིལ་བ། །དེ་ཡི་ཚད་དཔངས་སོར་བཞི་ཆ། །སུམ་ཆ་ཕྱེད་དེ་རྣམ་པ་གསུམ། །མ་བསྐམས་པར་དུ་དེ་བཞག་གི །བསྐམས་ན་པགས་པ་ལ་གནོད་འགྱུར། །དེ་ནས་སྤངས་ནས་བཀྲུ་བར་བྱ། །དེ་ཡི་རྗེས་ལ་བསྐུ་བྱུག་བྱ། །ཉིན་པར་གཉིད་ལོག་མང་སྨྲ་ཁྲོ། །མེ་ཚན་ཉི་ཚན་མྱ་ངན་སྤང༌། །དེ་ནི་ཆམ་པ་སྣ་སྨན་གཏང༌། །མ་ཞུ་འགྲམ་འཐམས་ཡི་ག་འཆུས། །མཚན་གཉིད་མ་ལོག་ལ་མི་གཏང༌། །དེ་ནི་ལེགས་པར་སྤྱོད་པ་ཡིས། །དུས་མིན་སྐྲ་དཀར་ངོ་ཁབས་དང༌། །གཉེར་མ་རབ་རིབ་མིག་སྔོ་སེལ། །རྒྱ་ཤུག་སྙིང་པོ་བ་ཤའི་རྩ། །སེང་ཕྲོམ་ཡུངས་ཀར་དཀར་པོ་རྣམས། །སིང་ཧིའི་རྩ་བ་ཏིལ་ནག་དང༌། །སྐྱེར་བའི་ཤུན་པ་རྨེའུ་རྣམས། །འཇག་རྩ་ཙནྡན་ཨུར་ཤིར། །ཤིཪྴ་ཤ་ཏ་པུས་པ་འབྲས། །ཀུ་མུད་ཨུཏྤལ་
ཀ་ལ་ཧ། །དཱུར་བ་ཤིང་མངར་ཙནྡན་རྣམས། །ཀ་ལི་ཡ་ཀ་ཨུར་ཤི་ཏི། །སྤང་སྤོས་རྒྱ་སྤོས་ཤུག་བ་རྣམས། །ད་ལིས་ཀུན་དྲ་པུཎྜ་རཱི། །ཤིང་མངར་རྒྱ་སྤོས་ཨ་རུ་ར། །དེ་ལྟར་ཚིགས་བཅད་ཕྱེད་ཀྱིས་བཤད། །བསྐུ་བ་དགུན་སྟོད་སོགས་དྲུག་སྦྱར། །གདོང་བསྐུ་བ་ལ་གོམས་པ་རྣམས། །མཐོང་བ་བརྟན་པར་འགྱུར་བ་དང༌། །གདོང་ནི་ཡོངས་སུ་མི་རྙིང་ལ། །འཇམ་ཞིང་པདྨ་འདྲ་བར་འགྱུར། །བསྐུ་དང་བླུགས་དང་རས་བལ་ཅན། །པགས་པས་གཡོགས་དང་རྣམ་པ་བཞི། །དེ་ནི་སྤྱི་བོའི་ཏིལ་མར་ཏེ། །ཕྱི་བཞིན་དུ་ནི་ཡོན་ཏན་ཆེ། །དེ་ལ་བྱུགས་པ་རྩུབ་པ་དང༌། །གཡའ་དང་དྲི་མ་ཅན་ལ་སྦྱར། །རླུགས་པ་གློག་པ་གླད་གཟེར་དང༌། །ཆ་དང་རྨ་སྨིན་རྣགས་ལ་གཏང༌། །རས་བལ་སྣུམ་ཅན་སྐྲ་འབྱི་དང༌། །གཟའ་ཞུགས་མིག་ནི་རེངས་ལ་གཏང༌། །བགས་བཅིབས་མགོ་བོ་ཚོར་བ་མེད། །ཁ་ཡོ་གཉིད་ནི་ཡར་བ་དང༌། །ཁ་དང་སྣ་སྐམ་རབ་རིབ་དང༌། །མི་བཟད་མགོ་ནད་དག་ལ་སྦྱར། །དེ་ཡི་ཆོ་ག་འདུག་པ་ལ། །ཁྲིའུ་པུས་མཉམ་འཇམ་པ་ལ། །ལུས་བཀྲུས་བསྐུལ་ཞིང་དུགས་བྱས་ལ། །དགོངས་ཀ་བའམ། མ་ཧེ་ཡི། །པགས་པ་མགོ་བོ་དང་མཉམ་ལ། །རྒྱར་ནི་སོར་ནི་བཅུ་གཉིས་པ། །རྣ་བའི་མཐར་ཐུག་པར་བཅིངས་པ། །འཕྲལ་བ་གོས་ཀྱིས་དཀྲིས་པ་ནི། །གོས་སམ་ལན་བུས་བཅིངས་བྱས་ལ། །མ་ཤའི་ལྡེ་གུས་བསྐུ་བར་བྱ། །དེ་ན་ས་ནད་དམིགས་ཅི་འདྲ་ལ། །སྣུམ་བསྐོལ་པ་ནི་དྲོ་འཇམ་ཙམ། །དེ་ནི་སྤྱི་བོ་མན་ཆད་ནས། །སྐྲ་དྲུང་སོར་གཅིག་ནུབ་ཙམ་བླུགས། །ཁ་དང་སྣམ་ཚུལ་ཕྱིན་པར་གཞག །དེ་ནི་རླུང་སོགས་ནད་རྣམས་ལ། །སྟོང་ཕྲག་བཅུ་དང་བརྒྱད་དྲུག་གཞག །ནད་མད་ས་ལ་སྟོང་ཕྲག་གཅིག །མར་གསར་ཕྲག་པ་ལ་སོགས་མཉེ། །དེ་ལྟར་ཞག་བདུན་བླུགས་པར་བྱ། །རྣ་བ་གང་བར་བླུགས་ཏེ་གཞག །རྣ་བའི་རྩ་ལ་མཉེ་བར་བྱ། །ནད་རྩེ་ཞིལ་གྱི་བར་བྱ་ཞིང༌། །རྣ་བ་སེ་གོལ་བརྒྱ་པར་གཞག །བུས་མོ་གཡས་པའི་ལྷང་ནི། །ལག་རྩེས་བསྐོར་བའི་བར་དང་ནི། །མིག་འབྱེད་འཇུམས་དང་མཉམ་པ་ཡི། །ཡུན་ནི་གྲངས་ཀྱི་ཚད་དུ་བཤད། །སྤྱི་བོའི་ཏིལ་མར་སྦྱར་བ་བསྐུས་པས་ནི། །སྐྲ་དཀར་དམར་སེར་སྐྲ་འབྱི་གཟའ་ཞུགས་དང༌། །མགོ་བོའི་རླུང་ནད་སེལ་ཞིང་དཔང་པོ་གསལ། །སྐད་གདངས་འགྲམ་པ་མགོ་ཡི་སྟོབས་སྐྱེད་བྱེད། །ཡན་ལག་བརྒྱད་པའི་སྙིང་པོ་བསྡུས་པ་ལས། །མདོའི་གནས་ཀྱི་ལེའུ་ཉི་ཤུ་རྩ་གཉིས་པའོ།། །།
དེ་ནས་སྨན་གྱི་ཐིགས་པ་མིག་ཏུ་བླུགས་པ་དང་སྨན་གྱིས་མིག་བསྐུ་བའི་ཆོ་གའི་ལེའུ་བཤད་པར་བྱའོ། །མིག་ནད་དག་ནི་ཐམས་ཅད་ལ། །དང་པོར་སྨན་ཐིགས་བླུགས་པས་ནི། །ཟུག་ན་གཡའ་དྲུད་མཆི་མ་འཛག །མིག་ཚ་མིག་དམར་རྣམས་ལ་ཕན། །རླུང་ལ་དྲོན་པོ་བད་དྲོ་འཇམ། །ཁྲག་མཁྲིས་ལ་ནི་དེ་བསིལ་བསྔགས། །རླུང་མེད་གནས་སུ་འདུག་ནས་ནི། །ལག་པ་གཡོན་པས་མིག་ཕྱེ་ལ། །ཉ་ཕྱིས་ནང་སྦྱར་རས་བལ་ནི། །བསྙད་པའི་ཐིགས་བ་བླུགས་བྱ་བ། །སོར་གཉིས་ཙམ་སྤངས་ལས་མིག་གྲྭ། །ཐིགས་པ་བཅུའམ་བཅུ་གཉིས་བླུགས། །དེ་ནས་གོས་འཇམ་དག་གིས་ཕྱི། །རླུང་དང་བད་ཀན་ཅན་དག་ལ། །གོས་འཇམ་གཞན་ནི་ཆུ་དྲོན་ལ། སྤངས་པས་དུགས་ནི་འཇམ་པོ་བྱ། །མིག་སྨན་བླུགས་པ་རབ་ཚ་རྣོས། །ན་ཞིང་མིག་དམར་རྟུལ་བར་འགྱུར། །ཤིན་ཏུ་གྲང་བས་ཟུག་པ་དང༌། །འཛུམས་མི་ཤེས་དང་ན་བར་འགྱུར། །དྲགས་པས་མིག་མཆུ་དམར་དང་དྲུད། །རྩུབ་ཅིང་མིག་ནི་འབྱེད་དཀར་འགྱུར། །ཤིན་ཏུ་ཆུང་བས་ནད་དཀྱེལ་སྒྱེད། །མ་ཕོ་བས་ནི་ཐུ་བར་བྱེད། །བསྐུས་ལེགས་ནད་རྩ་སྣ་སུལ་དང༌། །ཁ་ཡི་སྦུབས་སུ་སྨན་གྱིས་ཁྱབ། །སྤྱི་བོར་གཏོགས་པའི་ནད་ཀྱི་ནི། །དྲི་མ་དཔྱིས་ནི་འབྱིན་པར་བྱེད། །དེ་ནས་ལུས་སྦྱངས་མིག་སྨན་བསྐུ། །མིག་ཙམ་ལ་ནི་གནས་གྱུར་པ། །ཅུང་ཟད་སྐྲངས་དང་ཤིན་ཏུ་གཡའ། །རྡུ་མ་ཆགས་པས་སྨིན་ཤེས་ཤིང༌། །ཅུང་ཟད་དྲུད་དམར་མཆི་མ་འཛག །མིག་རྡུ་སྟུག་ལ་གཏང་བར་བྱ། །བད་ཀན་དང་ནི་ཁྲག་མཁྲིས་དང༌། །མཆོག་ཏུ་རླུང་གིས་གཟིར་ལ་བསྐུ། །མིག་སྨན་ཕྱི་དང་རྨག་སོ་དང༌། །གསལ་བར་མཐོང་སྟེ་རྣམ་པ་གསུམ། །དེ་ལ་ཕྱི་བའི་མིག་སྨན་ནི། །བསྐ་དང་སྐྱུར་དང་ཚ་དང་ཁ། །རྨ་གསོ་སྨན་ནི་ཁ་བ་སྟེ། །གསལ་སྨན་མངར་དང་བསིལ་བ་ཡིན། །བྲུར་མ་སོར་བཅུ་དབུས་ཕྲ་ལ། །རྩེ་མོ་སྲི་ཞིང་ཁ་འབུས་འདྲ། །ཕྱི་བའི་ཐུར་མ་ཟངས་ཀྱི་བསྔགས། །རྨ་གསོ་ལྕགས་ནག་བྱས་སོར་ཙམ། །བཟང་པོ་གསལ་བར་བྱེད་པ་ནི། །གསེར་དང་དངུལ་ལས་བྱས་པ་བསྔགས། །གདར་བུ་ཁུ་བ་ཕྱེ་མས་ཏེ། །མིག་སྨན་རྣམ་གསུམ་ཉིད་དུ་
བརྟག །དེ་ནི་མིག་ནད་ལྕི་འབྲིང་དང༌། །ཡང་བ་ལ་ནི་རིམ་བཞིན་སྦྱར། །མཚན་མོ་ཉལ་དང་ཉི་མའི་གུང༌། །ཟོས་འཐུངས་ཉི་མ་ཚ་བ་ཡིས། །མིག་གི་ནད་ནི་འཕེལ་བ་དང༌། །དཀྱིལ་ནི་སྐྱེ་དང་འཁྲུགས་པར་འགྱུར། །དེ་བས་དེ་ཞི་ཕྱིར་ན་དགོངས། །ཉི་མ་སྤྲིན་བྲལ་དུས་སུ་བསླུ། །གཞན་དག་སྨྲ་བ་ཉིན་བར་ནི། །མིག་སྨན་རྣོན་པོ་གཏང་མི་བྱ། །བཀྲུས་པས་ཉམ་ཆུང་གྱུར་པའི་མིག །ཉི་མ་བལྟས་ན་གནོད་པར་འགྱུར། །མཚན་མོ་གཉིད་ནི་ལོག་པ་དང༌། །ཟླ་དུས་ཡིན་པས་རྟས་འགྱུར་ཏེ། །མིག་ནི་མེ་ཡི་རང་བཞིན་པས། །བསིལ་བས་གནད་མེད་བསྟེན་པར་འགྱུར། །མིག་ནད་བད་ཀན་ཤས་ཆེ་བའམ། །ཕྱི་ཞིང་གསལ་བར་བྱ་བ་ལས། །རབ་ཆ་མིན་པའི་ཉིན་པར་ཡང༌། །མིག་སྨན་རྣོན་པོ་བླུགས་པར་འདོད། །ལྕགས་ནི་རྡོ་ལས་འབྱུང་བ་ཡིན། །རྣོ་བ་དེ་ཉིད་ལས་བྱུང་ཡང༌། །དེ་ཉིད་ཀྱིས་ནི་གནོད་བྱེད་ནུས། །མིག་གི་རང་བཞིན་དེ་དང་འདྲ། །དགུན་ཚེ་མཚན་མོ་མིག་སྨན་ནི། །རྣོན་པོ་ཕན་པ་མ་ཡིན་ཏེ། །འཛག་མི་འགྱུར་བས་མིག་རེངས་དང༌། །གཡའ་དང་མི་གསལ་ལ་སོགས་སྐྱེད། །མིག་སྨན་མི་གཏང་འཇིགས་དང་སློན། །ཁྲུས་བཏང་ཟན་ཟོས་ཤུགས་ཀྱིས་ཉེན། །ཁྲོས་དང་རིམས་བཏབ་མིག་ཕྱིར་བྱུང༌། །བླང་ནད་མྱ་ངན་གཉིད་མ་ལོག །ཉི་མ་མ་མཐོང་མགོ་བཀྲུས་དང༌། །ཆང་འཐུངས་དུད་པ་བརྔུབས་པ་དང༌། །ཁ་ཟས་མ་ཞུ་ཉི་ཚན་གདུངས། །ཉིན་ཉལ་སྐོམ་པ་ལ་མི་གཏང༌། །མིག་སྨན་རབ་རྣོ་འཇམ་དང་ཉུང༌། །མང་སླ་སྐ་དང་རྩུབ་པ་དང༌། །ཤིན་ཏུ་བསིལ་དང་ཚ་བ་ཡི། །མིག་སྨན་བསྐུ་བར་མི་བྱའོ། །དེས་ན་མིག་ནི་མ་ཕྱེ་བར། །དལ་གྱིས་ནང་དུ་ཁྱབ་པར་བྱ། །མིག་སྨན་བསྐུས་ནས་མིག་མཆུ་ནི། །ཅུང་ཟད་བསྐྱོད་ལ་མིག་སྨན་ནི། །རྣོན་པོས་མྱུར་དུ་ཁྱབ་པར་འགྱུར། །དབྱེ་དང་འཛུམས་པར་མི་བྱའོ། །མིག་མཆུ་གཉིས་ན་བསྡམ་པ་དང༌། །བཀྲུ་བ་དག་ནི་མི་བྱའོ། །གང་ཚེ་མིག་སྨན་གྱིས་བསྐུས་པའི། །སྨན་གྱི་རྩོམ་པ་ཞི་གྱུར་ན། །ནད་ཀྱི་དམིགས་དང་མཐུན་པ་ཡི། །ཆུ་ཡིས་དེ་ཚེ་བཀྲུ་བར་བྱ། །དེ་ནས་གོས་འཇམ་བཅས་པ་ཡི། །མཐེ་བོང་དང་ནི་མཛུབ་མོ་གཉིས། །མིག་ནི་ཅི་རན་ཕྱེ་སྟེ་ཕྱི། །གཡོན་པས་གཡས་པ་ཕྱི་བར་བྱ། །
གཞན་དུ་མིག་སྨན་བླུགས་པ་ཡིས། །མིག་མཆུ་ཁྱབ་པས་ནད་སྐྱེད་འགྱུར། །སྨན་གྱིས་གཡའ་བའམ་རྟུལ་གྱུར་ན། །རྣོན་པོའི་དུད་བརྔུབ་པར་བྱ། །མིག་སྨན་རྣོན་པོས་ཚ་གྱུར་ན། །སླར་འཆོས་མིག་སྨན་བསིལ་བྱེད་གཞུག །ཡན་ལག་བརྒྱད་པའི་སྙིང་པོ་བསྡུས་པ་ལས། མདོའི་གནས་ཀྱི་ལེའུ་ཉི་ཤུ་རྩ་གསུམ་པའོ།། །།དེ་ནས་མིག་བརྟ་བའི་ཆོ་ག་དང༌། མིག་སྨན་གྱི་ཕུར་མ་བསྲེགས་ཤིང་བཙོས་པའི་ཁུ་བ་མིག་ཏུ་བླུགས་པའི་ཆོ་གའི་ལེའུ་བཤད་པར་བྱའོ། །མིག་འཛུམས་མི་ཤེས་རེངས་བག་དང༌། །སྐམ་དང་རྩུབ་དང་སྣང་པ་དང། །རླུང་མཁྲིས་ནད་གྱུར་ཞུམ་བག་དང༌། །རྫི་མ་བྱི་ཞིང་གཡོགས་པར་མཐོང༌། །དབྱེ་དཀའ་རྩ་ནི་བརྩེ་བ་དང༌། མིག་ནི་རྩ་འགྱུར་མི་མཐོང་དང༌། དམར་ཞིང་མཆི་འཛག་ཀླད་ཕྱེད་ན། །རླུང་ནད་ཀུན་འགྲོ་ལིང་ཏོག་ཅན། །མིག་ནད་བརྩེ་ཞིང་མཆི་མ་འཛག །ན་ཞིང་དམར་ལ་མིག་རྡུ་ཆགས། །ཐུན་མོང་དུས་སུ་ནང་བར་རམ། །དགོངས་ཀ་གན་རྐྱལ་ཉལ་ནས་ནི། །ལུས་དང་མགོ་སྦྱང་རླུང་མེད་པའི། །གནས་སུ་བརྟ་བའི་སྨན་གཏང་ངོ༌། །ནས་སམ་མ་ཤའི་རྗེན་ཟན་གྱིས། །མིག་སྦུབས་མཐའ་བསྐོར་མཉམ་པ་ནི། །དཔངས་སུ་སོར་གཉིས་རྟེན་བྱས་ལ། །ནད་དམིགས་ཇི་བཞིན་སྨན་བསྐོལ་ལ། །ཞུན་མར་ཆུ་ཚན་ལ་བསྲོས་ཏེ། །མིག་ནི་བཙུམས་པར་བླུགས་པར་བྱ། །མཚན་མོ་མི་མཐོང་རླུང་རབ་རིག །དབྱེ་དཀའ་སྩོགས་ལ་ཚིལ་ཞུན་བླུགས། །རྫི་མའི་རྩེ་ནུབ་བར་བཀང་ལ། །དེ་ནས་བསྐྱོད་ཅིང་དབྱེ་བ་ནི། །དེ་ནི་དལ་གྱིས་བྱེད་དུ་གཞུག །ཚད་བགྲང་བྱ་བ་དེ་ལ་ནི། མིག་མཆུ་མིག་འགྲམ་དཀར་ནག་ནད། །གྲངས་བརྒྱ་སུམ་བརྒྱ་ལྔ་བརྒྱ་དང༌། །བརྒྱ་ཕྲག་བདུན་དང་བརྒྱད་རིམ་བཞིན། །དཀྲུགས་དང་རླུང་ལ་གྲངས་སྟོང་སྟེ། །མཁྲིས་པ་ནད་མེད་ལ་དྲུག་བརྒྱ། །བད་ཀན་ལ་ནི་ལྔ་བརྒྱ་གཞག །དེ་ནས་མིག་འགྲམ་འཛག་སྒོ་བྱ། །སྨན་མར་སྣོད་དུ་གཟགས་བྱས་ལ། །དུད་པ་བརྔུབས་ནས་ནམ་མཁའ་དང༌། །གཟུགས་འཆོར་བ་ནི་བལྟ་མི་བྱ། །དེ་ལྟར་རླུང་ལ་ཉིན་རེ་བྱ། །མཁྲིས་པ་ཉིན་རེའི་བར་དུ་གཅོད། །བད་ཀན་བདེར་གནས་གཉིས་པར་བཅད། །ཚིམ་
པར་འགྱུར་གྱི་བར་དུ་གཏང༌། །ཚིམ་པས་གསལ་བར་མཐོང་ནུས་ཤིང༌། །བདེ་ཞིང་མིག་ཡང་དྲི་མ་མེད། །མ་ཚིམ་པ་ལས་གོ་བཟློག་ཡིན། །ཚིམ་དྲགས་བད་ཀན་ནད་སྐྱེད་འགྱུར། །དེ་ནི་ལུས་ཀྱིས་སྣུམ་འཐུངས་ལྟར། །མི་གསལ་མཐོང་བ་ཉམ་ཆུང་འགྱུར། །དེ་བས་ལྟ་བའི་རྗེས་ལ་ནི། །མཐོང་བའི་སྟོབས་ནི་སྐྱེད་བྱེད་ལ། །སྔར་བཤད་པ་ཡི་མིག་ནད་ལ། །ཕུར་མ་བཙོས་པ་སྦྱར་བར་བྱ། །དེ་ནི་རླུང་ལས་སྣུམ་ཅན་ཏེ། །བད་ཀན་བཅས་ཏེ་ཕྱི་བ་བན། །མཐོང་ཉམས་རླུང་དང་མཁྲིས་བཅས་དང༌། །ཁྲག་མཁྲིས་བདེ་གནས་ལ་གསལ་བྱེད། ཁུང་ནས་མཐུས་ཚོལ་རླན་ཅན་གྱི། །ཚིལ་དང་རྐང་དང་ཞག་ཤ་རློན། །འོ་མ་དག་དང་བཏགས་པ་དང༌། །འཚོ་བྱེད་དག་དང་སྦྱར་བའི་སྣུམ། །རི་དྭགས་བྱ་ཡི་མཆེར་པ་ཤ་།མུ་ཏིག་ལྕགས་ཟངས་རྒྱམ་ཚ་དུང༌། །རྒྱ་མཚོའི་ལྦུ་བ་ལིག་བུ་མིག །བ་བླ་ཞོག་ཆུར་སྦྱར་བྱ། །རི་དྭགས་བྱ་ཡི་མཆེར་པ་རྐང༌། །ལྟོ་ཚིལ་རྒྱུ་མ་སྙིང་དང་ཤ །མངར་བག་མར་བཅས་ནུ་ཞོར་བཅས། །བཏགས་པ་གསལ་བར་བྱེད་པ་ཡིན། །ཤ་དང་སྨན་གྱི་ལྡེ་གུ་ནི། །གོང་བུ་སྲང་གཅིག་སོ་སོར་བྱས། །ཨེ་རཎ་ནྱ་གྲོ་པདྨ་ཡི། །ལོ་མ་སྣུམ་པོས་རིམ་བཞིན་དུ། །དཀྲིས་ལ་འབྱིན་པས་བྱུགས་ནས་ནི། །ད་བ་དགོན་པའི་ལྕི་བའི་མེ། །འབར་བར་ཡོངས་སུ་བསྲེག་པར་བྱ། །ཚོས་ནས་དེ་ཡི་ཁུ་བ་བཙིར། །མིག་ཏུ་བརྟ་བའི་སྨན་ལྟར་བླུགས། །ཕྱི་དང་སྣུམ་དང་བསལ་བ་ལ། །བརྒྱ་ཕྲག་གཅིག་གཉིས་གསུམ་ཅར་བཞག །དང་པོར་དྲོ་འཇམ་ཕྱི་བསིལ་བླུགས། །དེ་ཉིད་རྗེས་ལ་དུད་པ་བརྔུབ། །དེས་ནི་སྦྱོར་བ་བརྟ་དང་མཚུངས། །བརྟ་དང་ཕུར་བཙོས་ཐིགས་པ་བླུགས། །སྣ་སྨན་མི་བྱ་ལ་མི་གཏང༌། །ཇི་སྲིད་དུས་ནི་སྨན་གཏོང་བ། །དེ་ཡི་ཉིས་འགྱུར་འཕྲོད་པ་བཟའ། །མེ་ཏོག་ཛཱ་ཏི་མ་ལི་ཀས། །མིག་བཅིངས་མཚན་མོ་གནས་པར་བྱ། །སྣ་སྨན་མིག་སྨན་བརྟ་བ་ལ་སོགས་པས། །མིག་མཐུ་བསྐྱེད་ཕྱིར་ཀུན་ཏུ་འབད་པར་བྱ། །མཐོང་བ་ཉམས་ན་འགྲོ་བ་སྣ་ཚོགས་པའང༌། །མུན་པའི་རང་བཞིན་ཚུལ་གཅིག་ཉིད་དུ་འགྱུར། །ཡན་ལག་བརྒྱད་པའི་སྙིང་པོ་བསྡུས་པ་ལས། མདོའི་གནས་ཀྱི་ལེའུ་ཉི་ཤུ་རྩ་བཞི་པའོ།། །།དེ་ནས་ཆ་སྤྱད་ཀྱི་ཆོ་གའི་ལེའུ་
བཤད་པར་བྱའོ། །ཟུག་རྔུ་རྣམ་པ་སྣ་ཚོགས་དང༌། །ལུས་ནི་སྣ་ཚོགས་གནོད་བྱེད་པ། །འབྱིན་བའི་ཐབས་སུ་གང་གྱུར་པ། །སྤྱད་ཡིན་དེ་བཞིན་གཞང་འབྲུམ་དང༌། །མཚན་པར་རྡོ་ལ་སོགས་བརྟ་བ་དང༌། །གཙགས་བུ་ཐལ་སྨན་མེ་བཏབ་པའི། །ཡན་ལག་ལྷག་མ་བསྲུང་ཕྱིར་དང༌། །མས་གཏོང་ལས་སོགས་སྤྱད་མ་གཏོགས། །བུམ་པ་ཀུ་བ་རཱ་དང་ནི། །འཛམ་བུའི་མཆུ་ལ་སོགས་སྤྱད་ཡིན། །གང་ཕྱིར་ཆ་སྤྱད་ཆོ་ག་བཞིན། །སྣ་ཚོགས་ཚུལ་དུ་བརྡུང་བྱ་བ། །བློ་ཡིས་རྣམ་དཔྱད་བྱ་བ་ནི། །རགས་རིམ་ཙམ་ཞིག་བསྟན་པ་ཡིན། །སེང་གེ་ཀངྐ་དོམ་བྱ་རོག །རི་དགས་བྱ་སོགས་ཁ་འདྲ་བའི། །མཆུ་ཅན་ཆ་སྤྱད་བྱས་ནས་ནི། །དེ་ཡི་མིང་ཡང་གདགས་པར་བྱ། །ཕལ་ཆེར་ལྕགས་ཀྱི་རྒྱུ་ལས་ནི། །སྲིད་དུ་སོར་ནི་བཅོ་བརྒྱད་པ། །སྐམ་པ་འབྲེལ་པའི་མཚམས་སུ་ནི། །སྲན་ཆུང་ལྟ་བུའི་གཟེར་གདབ་པ། །རྩ་བ་ལྕགས་ཀྱུ་ལྟར་གུག་པའི། །ཆ་སྤྱད་བདེ་ལེགས་ཡིན་ཞེས་བྱ། །རྩེ་མོ་གཡུང་དྲུང་ལྟ་བུའོ། །དེ་ནི་བརྟན་པར་རུས་ཟུག་པའི། །ཟུག་རྔུ་འབྱིན་ལ་སྦྱར་བར་བྱ། །གཟེར་བཏབ་རྩེ་མོ་གྱེས་པ་དང༌། །སྐམ་པ་ཡིན་ཏེ་སོར་བཅུ་དྲུག །དེ་ནི་པགས་བ་རྩ་རྒྱུས་ཤར། །ཞེན་པའི་ཟུག་རྔུ་འབྱིན་ལ་སྦྱར། །སྐམ་པ་སོར་དྲུག་ཟུག་རྡུ་ཕྲ། །རྫི་མ་མ་རུངས་འབྱིན་ལ་སྦྱར། །སོ་ཕྲ་དྲང་ཞིང་རྩ་བ་ནི། །གདུ་བུས་བརྒྱན་པ་མུ་ཙ་ཏི། །དེས་རྨ་གཏིང་དུ་ཟུག་པ་དང༌། །མིག་མཛེར་གཏིང་དུ་ལུས་ལ་སྦྱར། །ཉ་མགོ་འདྲ་བར་སོར་བཅུ་གཉིས། །ཆ་སྤྱད་གཉིས་པ་གཅིག་པ་བྱ། །ཉ་མགོ་ལྟ་བུ་ཞེས་བཤད་དེ། །རྣ་ཁུང་ཟུག་རྔུ་འབྱིན་ལ་སྦྱར། །ཆ་སྤྱད་སྤུ་གུ་ཅན་ཁོང་སྟོང༌། །རྩེ་མོ་གཅིག་གམ་མང་པོ་བྱ། །དེས་ནི་བུ་གའི་ཟུག་རྡུ་དང༌། །ནད་ཡོད་བལྟ་དང་དབྱུང་བ་དང༌། །བྱ་བ་སླ་བར་བྱ་ཕྱིར་དང༌། །དགང་བར་བྱ་བའི་དོན་དུ་བྱ། །དེ་ཡི་ཞེང་དང་སྦོམ་སྲིད་ཚད། བུ་གའི་ཚད་ལས་དཔག་པར་བྱ། །སྲིད་དུ་སོར་བཅུ་སྦོམ་སོར་ལྔ། །གྲེ་བའི་དྲུག་རྡུ་རྟོག་བྱེད་ཡིན། །རྩེ་མོ་ལྔ་བ་བུག་ཅན། །རྩེ་མོ་བཞི་ལ་སྤྱི་མདུད་བྱ། །ཆ་སྤྱད་ཐུར་མ་གཉིས་པ་ནི། །བུ་ག་གསུམ་པ་དེའི་ཚད་བྱ། །ཆ་སྤྱད་བྱ་བ་རང་གི་དབྱིབས། །སྦོམ་དང་ཆུ་ཡི་ཚད་
མཉམ་པའི། །སྦུ་གུ་དེ་འདྲ་གཞན་དག་ཀྱང༌། །ཆ་སྤྱད་ཤེས་པར་བྱེད་དུ་གཞུག །རྩེ་མོ་པདྨའི་སྙིང་པོ་འདྲ། །སྲིད་དུ་སོར་ནི་བཅུ་གཉིས་པ། །བཞི་ཆ་ཁོང་སྟོང་བྱས་སྦུ་གུ། །ཟུག་རྔུ་འབྱིན་པ་ཡིན་པར་བཤད། །གཞང་འབྲུམ་ཆ་སྤྱད་པ་ཡི་ནི། །ནུ་སོར་འདྲ་བ་སོར་བཞི་པ། །སྐྱེས་པའི་སོར་ལྔས་འཁྱུད་པ་སྟེ། །བུད་མེད་སོར་དྲུག་གིས་འཁྱུད་བྱ། །ནད་ལྟ་བ་ལ་བུ་ག་གཉིས། །ལས་ལ་བུ་ག་གཅིག་པ་བྱ། །དབུས་ཀྱི་བུ་ག་སོར་གསུམ་པ། །མཐེ་བོང་ཤོང་བ་ཙམ་དུ་བྱ། །དེ་སྟེང་རྩེ་མོ་ཟླུམ་པོ་ནི། །དཔངས་སུ་སོར་ནི་ཕྱེད་པར་བྱ། །ཁར་དཀྲོལ་དེ་འདྲ་བུག་མེད། །ཆ་སྤྱད་གཞང་འབྲུམ་བཙིར་ལ་སྦྱར། །མཚན་པར་རྡོལ་ལ་རྣམ་ཀུན་ཏུ། །བུ་ག་ཡན་ཆད་བསལ་བར་བྱ། །སྣ་ཡི་ཤུ་བའི་འབྲུམ་པ་ལ། །བུ་ག་གཅིག་པ་སོར་གཉིས་བྱ། །ཞེང་དུ་མཛུབ་མོའི་ཚད་ཙམ་ལས། །མཚན་པར་རྡོལ་གྱི་སྤྱད་འདྲར་བྱ། །སོར་མོ་བསྲུང་ཕྱིར་བ་སོའམ། །ཤིང་གིས་ཤུབས་ནི་སོར་བཞི་བྱ། །བ་ཡི་ནུ་འདྲ་བུ་ག་གཉིས། །དེ་ཡིས་ཁ་ནི་དབྱེ་བར་བྱ། །མོ་མཚན་རྨ་བརྟག་དབུས་སུ་ནི། །ཁོང་སྟོང་སོར་ནི་བཅུ་དྲུག་པ། །ཕྱོགས་བཞིར་གདུ་བུས་བཅིང་བར་བྱ། །རྩེ་མོ་པདྨ་ཁ་ཟླུམ་འདྲ། །ཐུར་མ་བཞི་ནི་མནན་པ་ཡིས། །རྩ་བ་བསྡམས་ན་ཁ་དབྱེ་བྱ། །ཆ་སྤྱད་འཇམ་རྩིའི་སྦུབས་འདྲ་ལ། །རྩ་བ་མཐེབ་ཤོང་རྩེ་སྲན་ཤོང༌། །རྩེ་མོ་གག་པ་མེད་པ་ལ། །རྩ་བར་ལྤགས་འཇམ་རྐྱལ་བུ་བཅིང༌། །རྨ་ཡི་ཕུག་ནི་འཆས་པ་དང༌། །རྨ་བཀྲུ་བ་ལ་སྦྱར་བར་བྱ། །འོད་མའི་སྤུ་གུའམ་སྒྲོ་རྩ་ནི། །འདྲ་བ་ཁ་གཉིས་དམུ་རྫིང་སྤྱད། །དུད་པ་མས་གཏོང་ལ་སོགས་སྤྱད། །རང་རང་གི་ནི་སྐབས་སུ་སྨྲས། །རྡབས་རྭ་ཁ་ཞེང་སོར་གསུམ་པ། །དཔངས་སུ་སོར་བརྒྱད་པའམ་བཅུ། །རྩེ་མོའི་བུ་ག་གཡུངས་ཀར་ཤོང༌། །ལེགས་བཀག་ནུ་སོར་དབྱིབས་འདྲ་བྱ། །ཀུ་བ་སྲིད་དུ་སོར་བཅུ་གཉིས། ཁྱུད་སྐོར་སོར་ནི་བཅོ་བརྒྱད་པ། །ཁ་ཟླུམ་སོར་ནི་གསུམ་མམ་བཞི། །ནང་འབར་བད་ཀན་ཁྲག་འདྲེན་བྱེད། །དེ་བཞིན་བུམ་པ་དེ་འདྲ་བ། །གླན་པས་སྐྲན་ཡང་འཇུ་པར་བྱེད། །ཐུར་མ་ཞེས་བྱའི་ཆ་སྤྱད་ནི། །ལས་དང་དབྱིབས་ནི་སྣ་ཚོགས་པ། །ཅི་རིགས་པ་ཡི་ཚད་ལྡན་བྱ། །
དེ་ལ་རྨ་ཚོལ་ལས་ལ་གཉིས། །སྲིན་བུ་གན་དུ་པ་ཏའི་དབྱིབས། །བུ་གའི་ནང་གི་ཟུག་རྡུ་འབྱིན། །ཁ་ནི་སྲན་ཆུད་ཕྱེ་འདྲ་གཉིས། །སོར་བརྒྱད་པ་དང་དགུ་པའི་ཚད། །ཐུར་མ་དྲུག་སྟེ་དེ་ལས་གཉིས། །སོར་ནི་བཅུ་དྲུག་བཅུ་གཉིས་པ། །ཐལ་སྨན་བཏང་བ་སྤྲུལ་ཁ་འདྲ། །གཉིས་པོ་བཅུ་གཉིས་སོར་བཅུ་པ། །བསྐུལ་སྤྱད་ཁ་ནི་མདའ་ལྟོང་འདྲ། །འབྱིན་པའི་ཆ་སྤྱད་ལྕགས་ཀྱུའི་དབྱིབས། །ཐུར་མ་རྩེ་མོ་གུག་པ་ནི། །མངལ་གྱི་ཕུར་པ་ཞེས་བྱ་སྟེ། སྲང་དུ་སོར་བརྒྱད་བྱས་པ་དེས། །བུད་མེད་མངལ་དུ་བུ་ཤི་དབྱུང༌། །རྡེའུ་འབྱིན་ཆ་སྤྱད་སྤྲུལ་མགོ་ཡི། །གདེངས་ཀ་འདྲ་ལ་རྩེ་གུག་པའོ། །མདའ་ལྟོང་འདྲ་བར་སོར་བཞི་པ། །སོ་དབྱུང་བ་ལ་སྦྱར་བར་བྱ། །རྩེ་མོར་རས་བལ་གྱིས་དཀྲིས་པའི། །ཕྱི་བསལ་ཐུར་མ་དྲུག་བྱའོ། །གཞན་གི་ནེ་རིང་ནང་ལ་གཉིས། །སོར་བཅུ་བ་དང་བཅུ་གཉིས་པ། །སྣ་ཡི་སོར་དྲུག་བདུན་པ་གཉིས། །རྣ་བའི་སོར་བརྒྱད་དགུ་པ་གཉིས། །རྣ་བ་བསལ་ལ་ཨ་ཤྭདྠའི། །རྩེའམ་བླུགས་གཟར་ཁ་འདྲ་བྱ། །ཐུར་མ་འཛམ་བུའི་ཐོར་ཏོ་འདྲ། །ཐལ་སྨན་མེ་བཙའ་སོ་སོར་གསུམ། །ཕྲ་སྦོམ་རིམ་བཞིན་སྦྱར་བར་བྱ། །རྒྱུ་མའི་ལས་ལ་ཐུར་མ་ནི། །ཁར་བ་འདྲ་ཞིང་དབུས་ཟླུམ་ལ། །རྩ་བ་ཟླ་བ་ཕྱེད་འདྲ་བྱ། །རྒྱ་ཤུག་ཚི་གུ་བཀས་འདྲ་བ། །སྣ་ཡི་ཐོར་ཏོ་འབྲུམ་སྲེག་བྱེད། །སོར་བརྒྱད་པ་ལ་རྩེ་མོ་ལྗོན། །གསུམ་པ་ཐལ་སྨན་སྨན་རིམ་ལ། །མཐེའུ་ཆུང་གུང་མོ་སྲིན་ལག་གི །སེན་མོ་ལྟ་བུའི་སོ་བྱས་པའོ། །ཕོ་མཚན་སྤྱད་དང་མིག་སྨན་སྩོགས། །ཆ་སྤྱད་རང་རང་ལེའུར་བཤད། །ཉེ་བའི་ཆ་སྤྱད་ཁབ་ལོང་དང༌། །ཐག་པ་རས་དང་ཐོ་བ་དང༌། །འབྲིང་བུ་རྒྱུ་མ་ལྕེ་རྟ་རྡ། །ཡལ་ག་སྲེན་མོ་ཁ་སོ་དང༌། །དུས་དང་སྨིན་དང་ལག་རྐང་དང༌། །འཇིགས་དང་དགའ་བ་དེའི་བྱ་བའི། །བྱེ་བྲག་ཐབས་ནི་ཤེས་པའོ། །མཁས་པས་བློ་ཡིས་དཔྱད་པར་བྱ། །ཆ་སྤྱད་གདུང་སྲུབ་དགང་དང་རྒྱུན་སྲང་དག་བྱ་དང༌། །ཐལ་སྨན་གདབ་དང་མཚོན་དབྱུང་བཅིང་དང་བཅེར་བ་དང༌། །གཞིབ་དང་སྨད་དང་སྟོད་དང་བསྐྱོད་དང་བཅག་པ་དང༌། །བཟློག་དང་དྲང་པོར་བྱ་བ་ཚ་སྤྱད་ལས་རྣམས་ཡིན། །ལེགས་པར་ཟུག་ཅིང་འབྱིན་པར་བྱེད་པ་དང༌། །གཟུང་བྱ་བླངས་ནས་འབྱིན་པར་བྱེད་ཕྱིར། །ཡན་
ལག་ཀུན་ལ་གནོད་པ་མེད་པས་ན། །ཆ་སྤྱད་ཀུན་གྱི་མཆོག་ནི་ཀངྐའི་མཆུ། །ཡན་ལག་བརྒྱད་པའི་སྙིང་པོ་བསྡུས་པ་ལས། །མདོའི་གནས་ཀྱི་ལེའུ་ཉི་ཤུ་རྩ་ལྔ་པའོ།། །།དེ་ནས་གཏར་སྤྱད་ཀྱི་ཆོ་གའི་ལེའུ་བཤད་པར་བྱ། །མགར་བ་མཁས་པས་ཆོ་ག་བཞིན། །བརྡུངས་པའི་གཏར་སྤྱད་ཉི་ཤུ་དྲུག །སྤུ་ནི་ཆོད་པར་ནུས་པ་དག །ཕལ་ཆེར་སོར་ནི་དྲུག་པར་བྱ། །གཟུགས་ལེགས་སོ་ནི་ལེགས་པ་དང༌། །གཟུང་བར་བདེ་བ་ཉིད་དུ་བྱ། །ཡ་ཡོ་མེད་ཅིང་འཐར་ལེགས་པའི། །ཤིན་ཏུ་རྣོ་བའི་ལྕགས་ལས་བྱ། །རྩེ་མོ་ཤིན་ཏུ་ལེགས་བརྡུངས་ལ། །ཨུཏྤལ་སྔོན་པོའི་མདོག་འདྲ་བའི། །རང་མིང་རྗེས་མཐུན་གཟུགས་ཅན་ནི། །རྟག་ཏུ་ཉེ་བར་གཞག་པར་བྱ། །རྩེ་མོ་རེ་རེ་དག་ལ་ཡང༌། །རང་ཚོད་སོར་ཕྱེད་གཉིས་དང་བཞི། །ཕལ་ཆེར་གཉིས་དང་གསུམ་དུ་བྱ། །དེ་གནས་ཁྱད་པར་དག་ལ་སྦྱར། །དེ་ལས་དཀྱིལ་འཁོར་འདྲ་བའི་རྩེ། །མཛུབ་སེན་ནང་གི་དབྱིབས་འདྲར་བྱ། །དེ་ནི་རྙིལ་སྐྱེས་ལྐོག་མ་ཡི། །ཤ་ལྷག་ལ་སོགས་གཞར་བཅད་སྦྱར། །འཕེལ་གཙགས་སྤུ་གྲིའི་དབྱིབས་ལྟ་བུ། །གཅོད་དང་དྲལ་དང་འབྱིན་ལ་སྦྱར། །རྩེ་དྲང་སྐྲངས་ནད་མཐོ་བ་དང༌། །ཟབ་པ་ལ་སྦྱར་དེ་ལས་གཞན། །ལྟག་པ་རིང་ཞིང་རྩེ་གུག་པ། །སོ་ཐུང་ནད་ཚུལ་ཇི་བཞིན་སྦྱར། །ཨུཏྤ་ལ་དང་སོ་ཕྱེད་ཀྱིས། །དྲལ་དང་དེ་བཞིན་གཅད་པར་བྱ། །སྦྲུལ་ཁ་རྩེ་སོར་ཕྱེད་རྣ་བ། །སྣ་ཡི་ཐོར་བུ་དཔྱད་ལ་སྦྱར། །རྨ་ཚོལ་འཇམ་པོ་རྟ་བླ་བའི། །མགོ་བོ་འདྲ་གཞལ་བརྟག་པར་བྱ། །དེ་ལས་གཞན་པ་ཁབ་རྩེ་འདྲ། །རྩེ་བུ་ག་ཅན་ནི་དབུག་ལ་སྦྱར། །ལྗང་བའི་ལོ་འདྲ་འབིགས་པ་ལ། །ཤ་རིའི་མཆུ་འདྲ་མདའ་བུག་ནི། །ཁ་འདྲ་རྩེ་གསུམ་ཁྲག་གཟགས་ལ། །འཇག་རྩེ་ཨ་ཏའི་མཆུ་འདྲ་བ། །འབྲས་བུ་སོར་གཉིས་ཁྲག་འབྱིན་ལ། །དེ་འདྲའི་སོ་ནི་ནང་དུ་ལྟ། །གཙགས་འབྲས་ཟླ་བ་ཁམ་པ་འདྲ། །སོར་ནི་ཕྱེད་དང་གཉིས་ཡོད་བྱ། །རྩེ་མོ་འབྲས་དང་འདྲ་པ་ལ། །སོར་ནི་ཕྱེད་དང་གཉིས་ཡོད་དག །དེ་ནི་རྩ་ལྟོའི་ནད་ལ་སྦྱར། །སྟ་རེའི་སྤངས་འདྲ་བ་ལང་སོ། །འདྲ་བའི་གཙགས་འབྲས་སོར་ཕྱེད་པ། །དེ་ཡི་ཡུ་བ་གྱེན་བསྟན་ལ། །རུས་པའི་སྟེང་གནས་རྩ་ལ་གདབ། །ཟངས་མའི་ཐུར་མ་རྩེ་གཉིས་པ། །རྩེ་མོ་མེ་
ཏོག་ཁ་འབུས་འདྲ། །དེ་ཡིས་མཐོང་ཉམས་མིག་སྦྲིས་དབུག །རྒྱ་འདྲའི་གཅགས་བུ་བྱ་བ་ནི། །སོར་གདུབ་འདྲ་ལས་ཁ་འབྱུང་བ། གཙགས་འབྲས་རྒྱར་ནི་སོར་ཕྱེད་པ། །རིག་པས་འཕེལ་གཙགས་ལྟ་བུའམ། །དཀྱིལ་འཁོར་ལྟ་བུའི་རྩེ་འདྲ་བྱ། །དེ་ནི་མཛུབ་མོའི་ཐོར་ཏོལ། །གདགས་སུ་རུང་བའི་རྒྱ་འདྲ་བྱ། །སྲད་བུས་བརྟོད་ལ་གྲེ་བའི་ནང༌། །ནད་རྣམས་གཅད་དང་དྲལ་ལ་སྦྱར། །གྲེ་བའི་ཤ་ལྷག་ཐོར་གཙུག་འཛིན། །ལྕགས་ཀྱུའི་རྩེ་མོ་ལེགས་གུག་བྱ། །རུས་པ་གཅོད་པའི་སོག་ལེ་ནི། །སྲིད་དུ་སོར་བཅུ་ཞིང་སོར་གཉིས། །སོ་རྣམས་ཕྲ་ཞིང་རབ་ཏུ་རྣོ། །ཡུ་བ་ཆང་གཟུང་ལེགས་པར་བྱ། །རྨ་ཡི་ཆུ་རྒྱུས་སྐྲ་བཅད་པའི། །ཆན་པ་ཆན་པ་འདྲ་བར་བྱ། །སོ་ཡོ་སོ་དྲང་ཁ་གཉིས་པའི། །སེན་མོ་འདྲེག་སྤྱད་སོར་དགུ་པ། །ཟུག་རྔུ་ཕྲ་འབྱུང་གཅད་པ་དང༌། །དྲལ་དང་དབུག་དང་ཕྱི་བར་བྱ། །ཟུར་བཞི་པ་ལ་སོར་གཅིག་པ། །དབྱིབས་ནི་ཀུན་ཏུ་གཅིག་འདྲ་བ། །སོ་ཕྱི་བ་ཡི་གཅགས་སྤྱད་དེ། །སོ་ཡི་དྲེག་པ་ཕྱི་བར་བྱ། །ཁ་བ་ནི་མགོ་ཟླུམ་མིག་ཟབ་ཆེ། །མཁྲང་པ་གསུམ་བྱ་དེ་ལས་ནི། །ཤ་ཆེ་བ་ཡི་ཕྱོགས་སུ་ནི། །ཟུར་གསུམ་སྲིད་དུ་སོར་གསུམ་པས། །ཤ་ཆུང་པ་དང་རུས་ཚིགས་ན། །རྨ་ཡོད་པ་ལ་སྲིད་སོར་གཉིས། །ཞུ་དང་མ་ཞུའི་གནས་ནད་རྨའི། །ཁབ་རྩེ་འབྲས་དབྱིབས་གཞུ་ལྟར་སྒུ། །སྲིད་དུ་སོར་ནི་ཕྱེད་དང་གསུམ། །ཁབ་ནི་བདུན་དང་བརྒྱད་ཀུན་ཡང༌། །ཟླུམ་པོ་སོར་ནི་ལེགས་སྦོམ་པ། །ཁྲི་གཅིག་ལ་བཙུགས་པིར་འདྲ་བ། །བརྩན་སྔོ་གདོང་ནད་ཐིག་ལེ་གནག །སྐྲ་འབྱི་བ་ལ་གཙགས་པར་བྱ། །ཁབ་བརྒྱད་ཟླུམ་པོ་སོར་ཕྱེད་པ། །གཅིག་ཏུ་སྦོམ་ལ་གཟར་བུ་འདྲ། །ལག་པ་གཉིས་ཀྱིས་བཙུགས་ནས་ནི། །དེ་ཡིས་སྣ་ཡི་ཁྲག་དབྱུང་ངོ༌། །རྣ་ཤལ་དབུག་པའི་སྙུང་བུ་ནི། །ཡུ་ཏི་ཀ་ནི་ཁ་འབུས་འདྲ། །སྙུང་བུ་སོར་ནི་ཕྱེད་པར་བྱ། །དེ་ཡི་ཚད་དབུག་དེ་ཡན་ཆད། །ཟུར་བཞི་པར་བྱས་དེ་ཡིས་ནི། །སྐྲངས་སྨིན་མ་སྨིན་དོགས་ལ་དབུག །རྣ་དྲུང་ཤ་ནི་སྟུག་པོ་དབུག །སྙུང་བུ་ཁ་ནི་སྦོམ་པོ་ལ། །སུམ་ཆ་སྦུ་གུ་ཡོད་བྱས་ལ། །སོར་གསུམ་པ་ཡིས་རྣ་བ་དབུག །པདྨ་ཐལ་སྨན་མེ་བཙའ་དང༌། །མཆིང་བུ་རྡོ་དུམ་སེན་མོ་སྩོགས། །
ལྕགས་མིན་གཏར་སྤྱད་ཕྲ་མོ་སྟེ། །དེ་ཡང་དེ་བཞིན་སྦྱར་བར་བྱ། །ཆ་སྤྱད་འཁྲུལ་འཁོར་སྩོགས་པར་ཀྱང༌། །མཁོ་བ་ནད་ཀྱི་དམིགས་དང་སྦྱར། །འདྲེན་དང་འབྱིན་དང་འབྲལ་དང་འདྲུབ། །དམིགས་ཚོལ་ཕྱ་བསལ་ཞལ་ཞལ་གདག །གཙགས་བཅད་གཤེགས་དབུག་བཙུགས་པ་དང༌། །གཟུང་སྲེག་དེ་ཡིས་བྱ་བ་ཡིན། །གཅད་དང་དྲལ་དང་ཕྱི་བའི་ཕྱིར། །སྤྱད་ཀྱི་གཙགས་འབྲས་རྩ་བའི་བར། །མཛུབ་མོ་གུང་མོ་མཐེབ་མོ་ཡིས། །མ་ཡེངས་པ་དང་ལེགས་པར་གཟུང༌། །གཏར་ག་གདབ་ཕྱིར་རྩེ་མོའི་དྲུང༌། །མཛུབ་མོ་དང་ནི་མཐེ་བོས་གཟུང༌། འབྲས་འདྲ་བ་ཡི་ཡུ་བ་ནི། །ཆང་བར་བཅུག་སྟེ་རྩེ་མས་གདབ། །དབྱུང་དོན་ཡུ་བ་ནས་གཟུང་བྱ། །གཞན་དག་བྱ་བ་གང་བདེར་བྱ། །གཏར་སྤྱད་སྣ་ཚོགས་དག་གི་སྣོད། །གསོ་རས་བལ་སྣམ་མེན་དྲིའམ། །པགས་འཇམ་དུ་གུ་ལ་ལས་བྱས། །རབ་ཏུ་སྟུག་པ་ཞེང་སོར་དགུ། །སྲིད་དུ་སར་ནི་བཅུ་གཉིས་པ། བལ་གྱིས་བར་བཅད་སྤྱད་བཅུག་ལ། །ལེགས་པར་གཞག་སྟེ་དྲུབ་པ་དང༌། །ཐུར་མས་ཁ་ནི་བརྒྱུ་བར་བྱ། །སྲིན་བུ་པད་པ་བདེར་གནས་པ། །ཁྲག་དབྱུང་ཕྱིར་ན་སྦྱར་བར་བྱ། །ཆུ་ནང་ཉ་དང་སྦལ་སྩོགས་དང༌། །མི་རོའི་དྲི་མ་མནམ་ལས་བྱུང༌། །དམར་དང་དཀར་དང་ཤིན་ཏུ་གནག །མི་སྲུན་སྦོམ་དང་འབྱིལ་བ་དང༌། །འཇའ་ཚོན་དང་འདྲ་རོ་སྟོད་བཀྲ། །སྤུ་ཡོད་དེ་རྣམས་དུག་ཅན་ཡིན། །སྤང་བྱ་དེས་ནི་ཁྲག་གཞིབས་ན། །གཡའ་རྣགས་འཛག་རིམས་མགོ་འཁོར་སྐྱེད། །དེ་ལ་དུགས་ཁྲག་མཁྲིས་གསོ་བྱ། །ཆུ་མདོག་རྣམ་པར་གསལ་བ་དང༌། །དུག་མེད་ཉ་ལྕིབས་མེད་ལས་བྱུང༌། །རྩ་སྣར་རོ་སྟོང་སྔོ་ཁྲ་ཟླུམ། །རྒྱབ་ནི་དུར་སྨྲིག་འདྲ་ལུས་ཕྲ། །ལྟོ་ནི་ཅུང་ཟད་སེར་བ་བཟང༌། །དེ་ཡང་ལེགས་པར་མ་སྐྱུགས་དང༌། །རྟག་ཏུ་འཐུང་དུ་བཅུག་པ་དག །ཆུ་ནང་ཞུགས་ཏེ་ནུབ་པ་ནི། །ཁྲག་གིས་མྱོས་པ་ཡིན་པས་སྤངས། །དེ་ནས་ཅིག་ཤོས་སྐྱེ་རབ་བརྟགས་།ཆུ་སྦྱར་བ་ཡི་ནང་དུ་གཞུག །ཀན་ཛིའམ་དར་བའི་ནང་དུ་གཞུག །སླར་ཡང་ཆུར་ནི་དབུགས་ཕྱུང་ནས། །མར་རམས་ས་ཞག་ནུ་ཞོམ། །ཁྲག་གི་ཐིག་པ་བསྐུས་འཐུང་གཞུག །འཐུངས་ཚེ་རོ་སྟོད་མཐོར་གྱུར་ན། །རས་མ་སྲབ་མོས་གཡོགས་པར་བྱ། ཁྲག་
ནི་བཟང་ངན་འདྲེས་པ་ལས། །པད་པ་དང་པོར་ནད་ཁྲག་ནི། །འཐུངས་ཏེ་ངང་པས་འོ་མ་དང༌། །འདྲེས་ཆུའི་འོ་མ་ལེན་དང་མཚུངས། །སོ་ཡིས་འདེབས་པའམ་གཡའ་གྱུར་ན། །དེ་ནི་སླར་དབྱུང་སྐྱུག་ཏུ་གཞུག །རྒྱམ་ཚ་ཏིལ་མར་གྱིས་ཁ་བསྐུ། །ཕྱེ་མ་འཇམ་པོས་རྒྱབ་ཏུ་གཏོར། །སླར་ཡང་ཞག་བདུན་བར་དུ་ནི། །ཁྲག་མྱོས་བསྲུངས་ལ་འཐུང་མི་གཞུག །སྲིན་བུ་པད་པ་ལེགས་སྐྱུགས་ན། །སྔོན་བཞིན་ཁོང་གྲིམས་བརྟན་པར་འགྱུར། །དྲགས་ན་དལ་ཞིང་སྙོམ་འཆི་འགྱུར། །སྐྱུགས་མ་ལེགས་ན་རེངས་མྱོས་འགྱུར། །བུམ་པ་ཆུ་དང་ས་བླུགས་པ། །གཞན་དང་གཞན་དུ་གཞག་པར་བྱ། །ཁ་ཆུ་རུལ་བག་སྦྱང་ཕྱིར་བྱ། །གཞན་དུ་དུག་དང་བཅས་པར་འགྱུར། །མ་དག་པའམ་ཁྲག་མང་བྱུང༌། །སྐྱེར་པ་བུ་རམ་སྦྲང་རྩིས་བསྐུ། །ལན་བརྒྱར་དཀྲུགས་མར་རས་བལ་གྱི། །ཡེའུས་བྱུགས་ལ་སྨན་བསིལ་བསྐུ། །ནད་ཀྱི་ཁྲག་དང་བྲལ་གྱུར་ན། །འཕྲལ་དུ་རྩ་དམར་ནད་མེད་འགྱུར། །མ་དག་གནས་ནས་བསྐྱོད་གྱུར་པ། །རྨ་ཡི་གནས་སུ་འདུག་པའི་ཁྲག །ཞག་ལོན་ན་ནི་གནག་པར་འགྱུར། །དེ་བས་དེ་ནི་སླར་དབྱུང་ངོ༌། །མཁྲིས་རྒྱས་ཁྲག་གི་ནད་ལ་ནི། །ཀུ་བ་བུམ་པ་སྦྱར་མི་བྱ། །དེ་གཉིས་མེ་དང་བཅས་པ་ཡིན། །རླུང་དང་བད་ཀན་ལ་སྦྱར་བྱ། །བད་ཀན་ལས་གྱུར་ནད་ཁྲག་ནི། །སྐ་བས་རྔབས་རུས་གཞིབ་མི་བྱ། །རླུང་དང་མཁྲིས་པ་ལས་གྱུར་ཁྲག །རྔབས་རྭས་གཞིབས་ཏེ་དབྱུང་བར་བྱ། །ལུས་ཀྱི་གོང་དུ་སྲད་བུའམ། །རས་ཀྱི་དམ་དུ་བཅིངས་ནས་ནི། །ཆུ་བ་ཚིས་རུས་གནད་རྣམས་ནི། །དོར་ཏེ་ཞལ་ཞལ་གདབ་བར་བྱ། །གྱེན་དུ་དབྱུང་བའི་ཐབས་ཀྱིས་ནི། །ཐུར་དུ་བབས་པ་གདབ་བར་བྱ། །ཟབ་དང་ཉེ་དང་འཕྲེད་མི་གདབ། །བཏབ་བའི་གནས་སུའང་གདབ་མི་བྱ། །ཞལ་ཞལ་བྱ་བ་ཕྱོགས་གཅིག་འདུས། །རྩ་མདུད་སྲིན་བུས་ཁྲག་འབྱུང་ཞིང༌། །བེམ་བེམ་པོར་གྱུར་རྭ་སྩོགས་གདབ། །ནད་ཁྲག་ལུས་ཁྱབ་གཏར་ག་གདབ། །ཁྲག་ནད་འདུས་པ་ཞལ་ཞལ་བྱ། །གཏིང་ན་ཡོད་པ་པད་པས་དབྱུང༌། །པགས་གནས་ཀུ་བུམ་རྡབས་རས་དབྱུང༌། །ལུས་ཁྱབ་ཁྲག་ལ་གཏར་གཉིད། །རླུང་སྩོགས་གནས་ལ་རྔབས་རྭ་དང༌། །པད་པ་ཀུ་བས་རིམ་བཞིན་དབྱུང༌། །ཁྲག་ཕྱུང་
བསིལ་བསྐུས་ལ་སྩོགས་པས། །རླུང་ནི་རྣམ་པར་འཁྲུགས་གྱུར་ཏེ། །རྨ་ན་གཡའ་ཞིང་སྐྲངས་གྱུར་ནའང༌། །དེ་ལ་ཞུན་མར་དྲོན་པོས་བསྐུ། །ཡན་ལག་བརྒྱད་པའི་སྙིང་པོ་བསྡུས་པ་ལས། མདོའི་གནས་ཀྱི་ལེའུ་ཉི་ཤུ་རྩ་དྲུག་པའོ།། །།དེ་ནས་གཏར་ག་གདབ་པའི་ཆོ་གའི་ལེའུ་བཤད་པར་བྱའོ། །ཅུང་ཟད་མངར་ཞིང་ཚ་བྲོ་ལ། །གྲང་དང་ཚ་མིན་སྐ་བ་མིན། །པདྨ་ལམ་བུ་ཆུ་གཤེར་དང༌། །བཙོད་དང་རི་བོང་ཁྲག་ལྟར་དམར། །དག་ཅིང་དམར་བ་འབྱུང་བ་ནི། །དེ་ཉིད་ཀྱིས་ནི་ལུས་གནས་བྱེད། །དེ་ནི་ཕལ་ཆེར་བད་མཁྲིས་ཀྱི། །ནད་ཀྱིས་འཁྲུགས་པས་གནོད་བསྐྱད་པས། །མེ་དཔལ་འབྲས་དང་མཆེར་ནད་དང༌། །སྐྲན་དང་མེ་དྲོད་བྲི་དང་རིམས། །ཁ་དང་མིག་དང་མགོ་ནད་དང༌། །མྱོས་དང་སྐོམ་དང་ཚ་བྲོ་དང༌། །མཛེ་དང་དྲེག་ནད་མཁྲིས་ཁྲག་དང༌། །སྒྲེགས་པ་སྐྱུར་ཞིང་མགོ་འཁོར་བྱེད། །བསིལ་དྲོ་སྣུམ་དང་རྩུབ་སྩོགས་ཀྱིས། །ནད་གང་གསོས་པར་གྱུར་པ་དག །ལེགས་པར་འཆོས་པར་མ་གྱུར་པ། །དེ་ནི་ཁྲག་འཁྲུགས་ལས་གྱུར་ཡིན། །ཁྲག་བདོ་གྱུར་པ་དེ་ལས་ནི། །གཏར་ག་གདབ་པས་དབྱུང་བར་བྱ། །དེ་ཡང་བཅུ་དྲུག་མ་ལོན་དང༌། །བདུན་ཅུ་འདས་ལ་ཁྲག་མི་དབྱུང༌། །ཉམ་ཆུང་དུགས་དྲགས་དུགས་མ་བྱས། །རླུང་གི་ནད་ཀྱིས་ཉེན་པ་དང༌། སྦྲུམ་མ་བུ་བཙས་ཟས་མ་ཞུ། །ཁྲག་མཁྲིས་ལུད་པ་དབུགས་མི་བདེ། །ཚད་འཁྲུ་རིམས་དང་སྐྱུགས་པ་དང༌། །སྐྱ་རྦབ་ཡན་ལག་ཀུན་སྐྲངས་དང༌། །སྣུམ་འཐུངས་པ་ལ་སྦྱོར་བ་དང༌། །དེ་བཞིན་ལས་ལྔ་བྱས་ལ་མིན། །མ་བསྡམས་གཏར་ག་མི་གདབ་ཅིང༌། །ཡོན་པོའམ་མི་སྣང་ལ་མི་གདབ། །ཚབས་ཆེན་ནད་ནི་མ་གཏོགས་པ། །གྲང་ལ་ཚ་ཆར་རླུང་དུས་མིན། །མགོ་དང་མིག་གི་ནད་རྣམས་ལ། །འཕྲལ་བའི་རྩ་ལ་གཏར་བའམ། །མིག་འགྲམ་སྣ་དྲུང་རྩ་ལ་གདབ། །རྣ་བའི་ནད་ལ་རྣ་བའི་རྩ། །སྣ་ཡི་ནད་ལ་སྣ་རྩེར་རོ། །ཆམ་པ་སྣ་དང་དཔྲལ་རྩར་གདབ། །ཁ་ནང་རྣམས་ལ་ལྕེ་དང་ནི། །མཆུ་དང་རྐན་གྱི་རྩར་གདབ་བོ། །ནམ་ཚོང་ཡན་ཆད་རྩ་མདུད་མགུལ། །རྣ་བ་མུར་འགྲམ་སྤྱིར་གནས་གདབ། །སྨྱོ་བྱེད་མིག་འགྲམ་བྲང་དཔྲལ་རྩ། །བརྗེད་བྱེད་འགྲམ་པའི་
མཚམས་སུ་གདབ། །ཡང་ན་ཀུན་ལ་སྨིན་མཚམས་གདབ། །འབྲས་དང་རྩིབ་ལོགས་ཟུག་པ་ལ། །རྩིབ་ལོགས་ནུ་མའི་བར་རྩ་གདབ། །ཉིན་གསུམ་པ་ལ་ཕྲག་མཚམས་གདབ། །ཉིན་བཞི་པ་ལ་ལྟག་པའི་འོག །འཁྲུ་བ་གཟེར་དང་ལྡན་པ་ལ། །མཇུག་ཏོའི་གོང་མ་སོར་གཉིས་པར། །ཁུ་བའི་མཚན་ནད་ཕོ་མཚན་རྩ། །ལྐོག་མའི་ཝ་བར་བརླ་རྩ་གདབ། །གཟུགས་འཁུམས་པུས་མཐིལ་འོག་གམ་ནི། །གོང་གི་སོར་བཞི་པ་ལ་གདབ། །འབྲས་ཀྱི་ཕྲེང་བར་བྱིན་པའི་ཉྭ། །འོག་ཏུ་སོར་བ་གཉིས་གདབ་བོ། །རྐུབ་ཚོས་བུས་མོའི་ལྷ་པའི་སྟེང། །ནད་ལ་ལོང་མོའི་ལྟག་སོར་བཞིར། །རྐང་ཚ་འཐེང་དང་སྦྲིད་པ་དང༌། །རྟིང་རྡོལ་རླུང་ནད་མཛེར་བ་དང༌། །རྐང་སོར་སྣགས་སུ་ཆད་པ་ལ། །རྒྱ་ཚིགས་ལས་གོང་སོར་གཉིས་གདབ། །འཁུམས་ལ་རྐང་འཁུམས་ལྟ་བུར་གདབ། །ཇི་སྐད་བཤད་པ་མ་མངོན་ན། །གནད་མ་གཏོགས་པ་གར་ཉེ་བའི། །ཕྱོགས་གཞན་དག་ཏུ་གཏར་ག་གདབ། །དེ་ནས་ལུས་སྣུམ་གཏར་ག་ཡི། །ཡོ་བྱད་ཀུན་བསགས་སྟོབས་དང་ལྡན། །བཀྲ་ཤིས་བྱས་ཤིང་ཁ་ཟས་ནི། །སྣུམ་ཟོས་ཁུ་བ་འཐུངས་བ་དང༌། །མེ་དང་ཉི་མཚན་གྱིས་དུགས་བྱས། །བུས་མཉམ་མཐོ་བའི་སྟན་ལ་འདུག །སྐྲ་རྩ་རས་ནི་འཇམ་པོས་བཅིངས། །པུས་མོའི་ལྷ་ངར་གྲུ་མོ་བཙུགས། །ཁུ་ཚུར་ནང་དུ་གློད་བཅུག་པས། །མགུལ་པ་དམ་དུ་བཙིར་བར་བྱ། །སོ་བསྡམ་ལུད་པ་ལུ་བ་དང༌། །མཁུར་བ་གཉིས་ནི་བུད་པར་བྱ། །དེ་ལ་རྒྱབ་ནས་བཙིར་བ་དང༌། །གོས་ཀྱིས་དཀྲི་ཞིང་མཛུབ་མོ་ནི། །གཡོན་པ་ལྐོག་མར་བཅུག་ནས་སུ། །ནང་དུ་ལེགས་པར་གཞུག་པར་བྱ། །འདི་ནི་ནང་དུ་ཁ་བལྟས་རྩ། །མ་གཏོགས་བསྡམ་པའི་ཆོ་ག་ཡིན། །དེ་འོག་སྨན་པའི་མཐེ་བོ་ལས། །གུང་མོ་བཏང་བར་གྱུར་བ་ཡིས། །རྩ་བྱུང་མངོན་ལ་གདབ་བྱས་ནས། །རེག་པའམ་མཐེ་བོས་མནན་བྱས་ལ། །ལག་པ་གཡོན་པས་བཟུང་བ་ཡི། །གཙགས་པུ་སྟ་རེས་དབུས་སུ་གདབ། །གཙགས་བུའི་ཁ་ཕྱོགས་མི་གཡོ་གཏད། །དེ་བཞིན་གདབ་པའམ་བཙིར་བ་ཡིས། །བེམ་རྟོལ་གདབ་ལས་ཁྲག་དབྱུང་ངོ༌། །སྣ་དྲུང་གི་ནི་རྩར་
གདབ་པ། །རྩེ་མོ་མཐེ་བོས་བཏེག་ནས་ནི། །གཙགས་རྩེ་འབྲས་འདྲ་གདབ་བར་བྱ། །ལྕེ་བཏེག་བཟློག་སྟེ་སོས་མནན་ལ། །ལྕེ་འོག་རྩར་ནི་གདབ་བར་བྱ། །ནུ་མ་ཡན་ཆད་བསྡམས་ནས་ནི། །མགུལ་པར་གནས་པའི་རྩར་གདབ་བོ། །ལག་པ་གཉིས་སུ་རྡོ་བཅངས་ཏེ། །ལག་པ་པུས་མོར་བརྟེན་ཏེ་བརྐྱང༌། །མཆན་ཁུང་མན་ཆད་མཉེས་ནས་ན། །གོང་དུ་བཅིངས་ལ་མདོ་རྩར་གདབ། །ལག་ངར་རྩ་ནི་བདེར་འདུག་སྟེ། །གདབ་པའི་སོར་བཞི་གོང་གི་ནི། །ཕྱོགས་སུ་རས་ཀྱིས་དམ་བཅིངས་ལ། །མཐེ་བོ་ཆང་པར་བཅུག་ནས་ནི། །ལག་ངར་བརྐྱང་ལ་གདབ་པར་བྱ། །རྩིབ་ལོགས་རྩ་ནི་དཔུང་པ་གཉིས། །ཐུར་དུ་དཔྱངས་ཏེ་གདབ་བར་བྱ། །ཕོ་མཚན་རྩ་ནི་བཏེག་གདབ། །བྱིན་རྩ་པུས་མོ་མ་བཀུག་པར། །རྐང་པ་ལེགས་གཞག་པུས་མོ་ལ། །འོག་ཏུ་ལག་པ་གཉིས་ཀྱིས་ནི། །ལོང་མོའི་བར་དུ་དམ་བཙིར་ལ། །རྐང་པ་དེ་སྟེང་གཉིས་པ་ནི། །ཅུང་ཟད་བཀུག་སྟེ་བཞག་པ་ཡིས། །མནན་ལ་དེ་ནས་ལག་པ་ལྟར། །རྩར་གདབ་དེ་ལྟར་མ་སྨོས་པའི། །གཞན་དག་ལ་ཡང་གདབ་བྱས་ལ། །ཐབས་ཤེས་གཙགས་སྤྱད་དེ་དང་དེས། །ཕྱོགས་ནི་དེ་དང་དེ་རུ་གདབ། །ཤ་ཆེ་བ་ཡི་ཕྱོགས་སུ་འདེབས། འབྲས་འདྲ་འབྲས་ཀྱི་སྲིད་ཙམ་གདབ། །རུས་པའི་སྟེང་རྩ་རྩ་སྟ་རེ་འདྲས། །ནས་ཀྱི་ཕྱེད་ཙམ་གདབ་བར་བྱ། །ལེགས་པར་བཏབ་ནས་ཁྲག་གཟགས་ཏེ། །ཆིངས་མ་བཀྲོལ་ནས་གཟག་མི་བྱ། །གདབ་མ་ལེགས་པ་དུས་ཅུང་ཟད། །ཉུང་ཟད་འབྱུང་བ་ཏིལ་ཕྱེ་གདབ། །གདབ་དྲགས་སྒྲ་དང་བཅས་པར་ནི། །འབྱུང་ཞིང་བཅད་ཀྱང་དཀའ་བར་འགྱུར། །དབང་དང་འབོག་པར་འགྱུར་བ་དང༌། །ཆིངས་ལྷོད་མཚོན་རྟུལ་འགྲངས་དྲགས་དང༌། །ཉམ་ཆུང་ཤུགས་ཉེན་དུགས་མ་བྱས། །ཁྲག་མི་འབྱུང་བའི་རྒྱུ་ཡིན་ནོ། །ཁྲག་ནི་ལེགས་པར་མ་བྱུང་ན། །བྱི་དང་ཚ་གསུམ་སྐྱེར་པ་དང༌། །རྒྱ་སྤོས་རྒྱམ་ཚ་ཁྱིམ་དུད་བཅས། །ཏིལ་མར་བཏགས་ལ་རྨ་ལ་བསྐུ། །ཁྲག་ནི་ལེགས་བྱུང་ཏིལ་མར་དང༌། །རྒྱམ་ཚར་བཅས་པ་དྲོ་འཇམ་བསྐུ། །ལེ་བརྒན་རྩི་ལས་ཚོན་སེར་ལྟར། །དང་པོ་ནད་ཁྲག་འབྱུང་པར་འགྱུར། །ལེགས་པར་བྱུང་ན་རང་ཉིད་འཆད། །ཁྲག་བཟང་
བྱུང་ནའང་དབྱུང་མི་བྱ། །བརྒྱལ་འགྱུར་ན་ནི་ཆིངས་མ་དགྲོལ། །རླུང་གཡབ་ཀྱིས་གཡབ་སླར་ཁྲག་དབྱུང༌། །སླར་འབོག་གྱུར་ན་ཉི་མ་ནི། །གཉིས་པའང་གསུམ་པ་དག་ལ་གདབ། །རླུང་ཁྲག་གནག་ཅིང་དམར་ལ་རྩུབ། །ཤུགས་དྲག་གསལ་ཞིང་ལྦུ་བ་ཅན། །མཁྲིས་ཁྲག་སེར་ལ་རྩ་གནག་མནམ། །སྦྱིན་བག་དྲོ་ཞིང་ཚོན་ཅན་ཡིན། །བད་ཀན་ཁྲག་ནི་འཇམ་ལ་སྐྱ། །རྒྱུན་ཅན་འབྱར་ཞིང་སྐ་བ་ཡིན། །འདྲེས་པའི་མཚན་མ་འདྲེས་མ་ཡིན། །ཉེས་གསུམ་དྲི་མ་རྙོག་མ་ཅན། །ཁྲག་ངན་པ་ནི་ཉམས་ཆེ་ལའང༌། །ཚད་ལས་ལྷག་པར་དབྱུང་མི་བྱ། །ཁྲག་དབྱུང་དྲགས་ནའང་འཆི་བའམ། །རླུང་ནད་མི་བཟད་འབྱུང་བར་འགྱུར། །དེ་ལ་བསྐུ་བྱུག་འོ་མ་ཁུ། །ཁྲག་བཅུད་བླུད་པ་སྨན་ཡིན་ནོ། །ཁྲག་ཕྱུང་ནས་ནི་ཆིངས་མ་དག །དལ་གྱིས་བཀྲོལ་ལ་ཆུ་བསིལ་གྱིས། །བཀྲུས་ལ་ཏིལ་མར་གྱིས་བྱུགས་པའི། གོས་འཇམ་གྱིས་ནི་རྨ་ཁ་དཀྲི། །ཁྲག་ནད་ཡོད་ན་ཕྱི་འབྲེད་དམ། །ཕྱི་དེ་ཉིན་པར་སླར་ཡང་དབྱུང༌། །ཤིན་ཏུ་གནོད་པའི་ཁྲག་ཟླ་ཕྱེད། །སྣུམ་གྱིས་བརྟས་པའི་ལུས་ལས་དབྱུང༌། །ཁྲག་ངན་ཅུང་ཟད་ལུས་ཀྱང་ནི། །ནད་ནི་ལྷག་པར་མི་སྐྱེད་པས། །དེ་ཕྱིར་ལྷག་མ་ཡོད་གྱུར་ཡང༌། །གཞག་གི་ཤས་ཆེར་མི་དབྱུང་ངོ༌། །ལྷག་མ་རྔབས་རྭ་སྩོགས་གདབ་པའང༌། །ཡང་ན་སྤྱོད་བསིལ་ཁྲག་མཁྲིས་བསལ། །སྦྱང་དང་སྐམ་པའི་བྱེ་བྲག་ནི། །གསོ་བས་དེ་ནི་དང་བར་བྱ། །ནད་ཁྲག་རབ་རྒྱས་མ་གྱུར་བའམ། །དེ་འདྲའི་ཐབས་ཀྱིས་གསོ་བར་བྱ། །ཁྲག་གི་རྒྱུན་ནི་མཆོད་ན། །གཅད་པའི་སྦྱོར་བ་མྱུར་དུ་བྱ། །སེང་ཕྲོམ་རྨ་ཤིང་པྲི་ཡང་ཀུ། །མ་ཤ་ཤིང་མངར་ཡུག་སྣམ་བཙག །གྱོ་དུམ་ཟར་མ་སྣག་ཚ་དང༌། །འོ་མ་ཅན་ཤིང་ཤུན་ལོ་མ། །བཏགས་པའི་ཕྱེ་མ་རྨ་ཁར་གདབ། །ཤུག་སྩོགས་ཆུ་གྲང་སྦྱར་བ་བླུད། །ཡང་ན་རྩ་བཏབ་དེ་གོང་གི །རྩ་དེ་ཉིད་ལ་གཏར་ག་གདབ། །ཡང་ན་ཐུར་མ་བསྲེགས་པ་ཡིས། །རྨ་ཁ་མྱུར་དུ་བསྲེག་པར་བྱ། །བཅིབས་པ་ཉེས་པས་ལམ་ལོག་ལ་གནས་ཏེ། །ནད་ནི་རྒྱས་པས་ཁྲག་ནི་འཁྲུགས་འགྱུར་བ། །རང་གི་གནས་སུ་སླར་ཕྱིན་མ་གྱུར་བ། །དེ་སྲིད་
ཟས་དང་སྤྱོད་ལམ་ཕན་པ་བསྟེན། །ཤིན་ཏུ་ཚ་གྲང་མ་ཡིན་ཡང་དྲོད་སྐྱེད། །ཁྲག་སེལ་བྱེད་པའི་བཟའ་དང་བཏུང་བ་ཕན། །དེ་ཚེ་ལུས་དང་ཁྲག་བདེར་མི་གནས་པས། །ཁྱད་པར་དུ་ནི་མེ་ལས་བསྲུང་བར་བྱ། །མདོག་དང་དབང་པོ་གསལ་ཞིང་དབང་པོ་ཡུལ། །འདོད་ཅིང་ཟས་འཇུ་ཤུགས་ཀྱང་བདེ་བར་འཇུ། །བདེ་དང་ལྡན་ཞིང་སྟོབས་རྒྱས་ཕུན་སུམ་ཚོགས། །མི་ཡི་ནད་ཁྲག་དག་པ་ཡིན་པར་བཤད། །ཡན་ལག་བརྒྱད་པའི་སྙིང་པོ་བསྡུས་པ་ལས། །མདོའི་གནས་ཀྱི་ལེའུ་ཉི་ཤུ་རྩ་བདུན་པའོ།། །།དེ་ནས་ཟུག་རྔུ་དབྱུང་བའི་ཆོ་གའི་ལེའུ་བཤད་པར་བྱའོ། །ཟུག་རྔུའི་བགྲོད་པ་རྣམ་ལྔ་སྟེ། །ཡོ་དྲང་ཐད་ཀ་སྟེང་དང་འོག །ཁ་གནག་སྐྲངས་དང་ནད་དང་བཅས། །ཡང་དང་ཡང་དུ་ཁྲག་འཛག་ལ། །རྨ་ཡི་ཉེ་འཁོར་མཐོ་ཞིང་གློ། །ཆུ་བུར་ལྟ་བུའི་ཐོར་བུ་འབྱུང༌། །ཤ་ནི་འཇམ་འགྱུར་ལུས་མདོར་ན། །ཁོང་དུ་ཟུག་རྔུ་ཡོད་ཤེས་བྱ། །ཁྱད་པར་དུ་ནི་པགས་པ་ན། །མཚོན་ལུས་མདོག་ཉམས་སྲ་བ་དང༌། །སྐྲངས་པར་འགྱུར་རོ་ཤར་གནས་པ། །ནད་དང་སྐྲང་པ་ལྷག་པར་འཕེལ། །བཙིར་བར་མི་བཟོད་སྨིན་པ་དང༌། །རྨ་ཡི་སྒོ་ནི་འདྲུབ་མི་ཤེས། །ཉེ་ཡི་ནང་ཟུག་ཤར་ཟུག་དང༌། །འདྲ་ལས་སྐྲང་བག་མེད་པ་ཡིན། །ཆུ་པའི་དྲ་བའི་ནང་ལུས་པའི། །ཆུ་བ་ལས་ནི་འབྱུང་དཀའ་ཞིང༌། །བསྒུལ་དཀའ་བསྐྱོད་ཚེ་རེངས་ཤིང་ན། །རྩ་ལ་བརྟེན་པ་རྩ་སྐྲང་འགྱུར། །བུ་གའི་སྦུབས་གནས་སྦུབས་ཀྱིས་ནི། །རང་གི་ལས་དང་ཡོན་ཏན་ཉམས། །རྩ་ཆེན་གནས་པའང་དབུགས་དང་ཁྲག །ལྦུ་བ་ཅན་དུ་འབྱུང་འགྱུར་ཞིང༌། །སྒྲ་དང་བཅས་པར་འབྱུང་བ་དང༌། །སྙིང་དང་ཡན་ལག་ན་བཅས་འགྱུར། །རུས་ཚིགས་བོག་རེར་མཚོན་ལུས་པ། །རུས་བརྩེ་ཚབས་ཆེར་ན་བར་འགྱུར། །རུས་གནས་ནད་མང་སྐྲང་བར་བྱེད། །ཚིགས་ལ་གནས་པ་དེ་དང་འདྲ། །བསྐྱོད་པར་དཀའ་བ་དག་ཏུའང་འགྱུར། །ནང་གྲོལ་ནང་ཡོད་འཁྲུགས་པ་དང༌། །ཝོ་ཞིང་ཁ་ཟས་ངན་སྐྱུགས་གཅིན། །རྨ་ཡི་ཁར་ནི་འབྱུང་བར་འགྱུར། །གནད་ཀྱི་ནང་དུ་མཚོན་ལུས་པ། །གནད་ཟུག་མཚན་ཉིད་ལས་
ཤེས་བྱ། །པགས་པ་ལ་སོགས་རང་རང་གི །ཇི་ལྟར་འཛག་ལས་ཤེས་པར་བྱ། །སྐྱོན་མེད་ལུས་ཀྱི་རྨ་འཚོ་བ་སྟེ། །དེ་ནི་གནོད་པ་མེད་པར་གནས། །ནད་འཁྲུགས་སྣད་པ་ལ་སོགས་ཀྱིས། །བསླངས་ནས་སླར་ཡང་གནོད་པ་སྐྱེད། །གང་ཡང་རུང་བར་པགས་པ་ཉམས། །བསྐུ་དང་མཉེ་དང་དུགས་བྱས་ནས། །མདོག་དམར་ན་ཞིང་ཚ་ལ་འཁྲུགས། །ཡང་ན་གང་དུ་མར་གཞག་འཇུ། །ལྡེ་གུས་བྱུགས་པ་མྱུར་དུ་བསྐམས། །གནས་དེར་ཟུག་རྔུ་བཅས་ཤེས་བྱ། །ཤར་ལུས་སྦྱང་བར་བྱས་པ་ཡིས། །སྐེམ་བྱས་ལྷོངས་འགྱུར་བསྐུལ་བ་དང༌། །བཙན་དམར་སོགས་ཀྱིས་ཤེས་པར་བྱ། །ཉ་དང་རུས་ཚིགས་ནང་གྲོལ་གྱི། །ཟུག་རྔུའང་དེ་བཞིན་ཤེས་པར་བྱ། །རུས་པ་ཟུག་རྡུས་མ་རུངས་འགྱུར། །རུས་པ་བསྐུ་དང་དུགས་བྱ་ཞིང༌། །མཉེ་དང་བཙིར་ལས་ཤེས་པར་བྱ། །རུས་ཚིགས་གནས་པ་རུས་འདྲ་དང༌། །བརྐྱང་དང་བསྐུམ་ལས་ཤེས་པར་བྱ། །ཆུ་བ་རྩ་དང་རྩ་ཆེན་སྦུབས། །ཟུག་རྔུ་མི་མཉམ་ལམ་འགྲོ་དང༌། །ཤིང་རྩ་ཆག་པའི་རྟ་དང་ནི། །ལྡན་པར་ནད་པ་བསྐྱོན་ནས་སུ། །མྱུར་དུ་དྲངས་ནས་དེ་ནས་ནི། །བསྐྱོད་པས་ཟུག་རྔུ་ཤེས་པར་བྱ། །གནད་ཟུག་ལོགས་ཤིག་མ་བཤད་དེ། །དེ་རྣམས་ཤ་སྩོགས་ལ་གནས་ཡིན། །སྤྱིར་ནི་ཟུག་རྡུ་བཅས་བསྐྱོད་པའི། །བྱ་བས་ནད་བཅས་ལས་ཤེས་བྱ། །མདོར་ན་ཟླུམ་དང་གྱེས་པ་དང༌། །ཟུར་བཞི་བ་དང་ཟུར་གསུམ་པའི། །རྨ་ཡི་དབྱིབས་ལས་ཟུག་རྔུ་ནི། །མི་མངོན་རྣམ་པར་ཤེས་པར་བྱ། །དེ་རྣམས་དབྱུང་བའི་ཐབས་གྱུར་གཉིས། །ཕྱིར་དྲང་བ་དང་མདུན་ནས་དྲང༌། །རྩེ་ནས་དྲང་དང་རྩ་ནས་དྲང༌། །དེ་ལས་བཟློག་པས་དབྱུང་བར་བྱ། །དབྱུང་སླ་གང་ན་ཡོད་དྲལ་ཏེ། །དེ་ནས་ཐད་ཀར་དྲང་བར་བྱ། །མཚོན་ནི་བྲང་དང་མཚན་ཁུང་དང༌། །བརླ་དྲུང་རྩིབ་ལོགས་ཟུག་པ་དང༌། །མདུན་དྲང་རྩེ་མོ་མངོན་གཅད་བྱ། །ཁ་ཞེང་ཆེ་དྲང་མི་བྱ་དང༌། །ཟུག་རྔུར་མ་གྱུར་མདེའུ་དང༌། །མི་མངོན་གནོད་མེད་པ་མི་དབྱུང༌། །དེ་ནས་ལག་པས་ཟིན་གྱུར་ན། །ལག་པ་གཉིས་ཀྱིས་དྲང་བར་བྱ། །སྣང་གཞན་སེང་གེ་ཆུ་སྲིན་
དང། །བར་གྱི་ཀརྟ་ཏི་མཆུས་དྲང༌། །མི་མངོན་རྨ་ཡི་དབྱིབས་ལས་ནི། །གལ་ཏེ་དབྱུང་བར་ནུས་གྱུར་པ། །ཀང་ཀ་བྲིང་ཀ་ཁྲུང་ཁྲུང་དང༌། །བྱ་རོག་ཤ་ར་བྱེའི་མཆུས་དྲང༌། །པགས་སྩོགས་ལ་གནས་སྐམ་པས་དྲང༌། །ཁོང་སྟོང་ནང་ནས་ཉ་མགོས་དབྱུང༌། །སྦུ་གུར་གནས་པ་འདམ་བུ་འདྲས། །ལྷག་མ་གཞན་གྱིས་ཅི་རིགས་དྲང༌། །ཡང་ན་དང་པོ་མཚོན་གྱིས་དྲལ། །དེ་ནས་རྨ་ཡི་ཁྲག་བསལ་བ། །བྱས་ལ་མར་གྱིས་དུགས་བྱ་ཞིང༌། །བཅིངས་ཏེ་སྤྱོད་པ་བསྟེན་པར་བྱ། །རྩ་དང་ཆུ་བར་མཚོན་ལུས་པ། །ཐུར་མས་བསྐྱོད་དེ་དབྱུང་བར་བྱ། །སྙིང་གར་གནས་པའི་ཟུག་རྔུ་ནི། །ཆུ་གྲང་གཏོར་བས་སྡངས་བྱས་ལ། །གནས་གཞན་ཕྱིན་ཅིང་འཕགས་གྱུར་ན། །ཅི་རིགས་པར་ནི་དབྱུང་བར་བྱ། །རྨ་ཡི་སྒོ་ནས་དབྱུང་དཀའ་བ། །གཞན་དག་ལ་ཡང་དེ་བཞིན་སྦྱར། །རུས་པར་ཟུག་པ་རྐང་པ་ནི། །གཉིས་ཀྱིས་མནན་ལ་དྲང་བར་བྱ། །དེ་ལྟར་མ་ནུས་སྟོབས་ཆེ་བའི། །གཡོག་གིས་དམ་དུ་བཟུང་སྟེ་དབྱུང༌། །འོན་ཀྱང་མ་ནུས་མདེའུའི་རྩ། །བཀུག་ལ་གཞུ་རྒྱུད་དམ་བཏགས་ལ། །རྟ་སྲབ་ཀྱི་ནི་ཁ་ལྕགས་མཐར། །མ་ཡེངས་པ་ཡིས་དམ་བཏགས་ཏེ། །ཡན་ལག་ལྔ་པ་ལེགས་བསྡམས་ནས། །རྟ་ནི་ལྕག་གིས་གཞུས་ནས་སུ། །བརྡེག་ཅིང་མགོ་བོ་བཏེག་ནས་ནི། །ཤུགས་ཀྱིས་ཇི་བཞིན་བརྟོད་ནས་ནི། །དེ་ལྟར་ཟུག་རྔུ་དབྱུང་བའམ། །ཡང་ན་ཤིང་གི་ཡལ་གར་གདགས། །མདེའུ་རྩ་ཕྲ་བར་སྲད་བུ་དག །བཏགས་ཏེ་ཟུག་རྔུ་དབྱུང་བར་བྱ། །རྨ་སྐྲངས་མདེའུ་རྩ་མི་མངོན་ན། །སྐྲངས་པ་ལགས་པར་བཙིར་ནས་དབྱུང༌། །དོང་བུ་ཐོ་བས་བརྡུངས་པ་ཡིས། །མཐོ་ཞིང་སྣང་བར་གྱུར་ན་དབྱུང༌། །ལམ་མ་ཡིན་པར་འབྱུང་བ་གང༌། །དེ་ཉིད་ཀྱིས་ནི་རྨར་དབྱུང་བྱ། །མདེའུ་ཟུར་བཅུམ་སྟེ་དབྱུང་བའམ། །དོང་བུ་ཁ་ཡེས་དབྱུང་བར་བྱ། །རྣ་བ་མེད་ཅིང་རྨ་ཁ་དབྱེ། །དྲང་འདུག་ཁ་དབྱེ། རང་འདུག་ཁབ་ལོང་བསྟན་པས་དབྱུང༌། །ཞུ་བའི་གནས་སུ་ཟུག་རྡུ་ནི། །བཀྲུ་སྨན་ཉིད་ཀྱིས་དབྱུང་བར་བྱ། །རླུང་གནོད་དུགས་དང་ནུ་ཞོ་དང༌། །ཁྲག་དང་ཆུས་གནོད་གཞིབས་པས་བསལ། །གྲེ་བའི་ནང་ཞུགས་
ཟུག་རྔུ་ལ། །སྐུད་པ་གྲེ་བར་གཞུག་བྱ་སྟེ། །པདྨའི་རྩ་བར་སྐུད་པས་གདགས། །པད་རྩ་ཟུག་རྡུ་ལྷན་ཅིག་དྲང༌། །ལྕགས་སྲེག་མིག་ཆུར་བཅུག་པ་ཡི། །ལྕགས་ཐུར་བརྟན་པོར་བྱས་ནས་ནི། །རྒྱ་སྐྱེགས་ཅན་ནམ་རྒྱ་སྐྱེགས་མེད། །རྒྱ་སྐྱེགས་ཀྱིས་བསྒོས་ཟུག་རྔུ་དབྱུང༌། །སྐྲ་ཤད་འཛིངས་པ་འཐུངས་པ་དང༌། །གཤེར་བས་ཚེར་མ་ཟུག་པ་གདོན། །འཕྲལ་དུ་སྲད་བུ་ཐོགས་པ་ཡིས། །སློན་པར་བྱའོ་དེས་ཅིག་ཤོས། །ཁ་སྣར་དྲང་བར་མ་ནུས་ན། །གཞན་དུ་ཐུར་དུ་མེད་པར་བྱ། །ཟས་ཀྱིས་བརྣངས་པའི་ཟུག་རྔུ་ནི། ཆུ་བཏུང་ཕྲག་པར་བརྡེགས་པས་གཞུག །མིག་གི་རྨ་ཡི་ཟུག་རྡུ་ཕྲ། །དར་རམ་བལ་ལམ་ཆུ་ཡིས་བསལ། །མི་ནི་ཆུས་གང་ཁ་སྦུབས་ཏེ། །སྤུགས་པའམ་བརྐྱང་ལ་བཙིར་སློན་པའམ། །ཐལ་ཁུང་བརྐོས་ཏེ་མི་ཡི་ནི། །སྐེ་ཡི་བར་དུ་ནུབ་པར་གཞུག །རྣ་བ་ཆུས་གང་ལག་པ་ཡིས། །མཉེས་ལ་ཏིལ་མར་རྒྱུན་བླུགས་ལ། །རྣ་བ་ཐུར་དུ་བསྟན་ནས་ནི། །གདབ་པའམ་ཡང་ན་བརྔུབ་བར་བྱ། །རྣ་བའི་ནང་དུ་འབུ་ཞུགས་ན། །རྣ་བ་ཚ་ཆུས་བཀང་བའམ། །ཚ་ཆུ་དྲོ་འཇམ་ཉིད་ཀྱིས་དགང༌། །ཤི་ནས་འབུ་རོ་དབྱུང་ཐབས་བྱ། །རྒྱ་སྐྱེགས་ཅན་དང་གསེར་དངུལ་སྩོགས། །འབྱུང་ཁུངས་ལས་བྱུང་ཡུན་རིངས་གནས། །མཚོན་ནི་ཕལ་ཆེར་ལུས་ཀྱི་མེ། །དྲོད་ཀྱིས་འཇུ་བར་བྱེད་པ་ཡིན། །ས་དང་འོད་མ་ཤིང་རྭ་རུས། །སོ་དང་སྐྲ་དང་རྡོ་བའང་འཇུ། །རྭ་དང་འོད་ཚལ་ལྕགས་ཏ་ལ། །ཤིང་ཚལ་ཟུག་རྔུ་རིང་པོས་ཀྱང༌། །ཕལ་ཆེར་དེ་དག་ཚོས་འགྱུར་ལ། །ཁྲག་དང་ཤ་ཡིས་ཚོས་པར་བྱེད། །ཟུག་རྔུ་ཤ་ཡི་གཏིང་དུ་ཟུག །ཕྱོགས་དེ་ཚ་བའམ་མེད་གྱུར་ན། །དེ་ནས་དེ་ནི་སྣང་བྱའི་ཕྱིར། །མཉེ་དུགས་སྦྱངས་དང་ཤ་དབྲི་བལྟ། །སྨན་རྣོན་བཅིངས་དང་ཟས་སྐོམ་སྦྱིན། །མཚོན་གྱིས་བཏབ་ཅིང་གཙགས་པ་ཡིས། །སྨིན་པར་བྱས་ནས་རྨ་དབྲལ་དང༌། །བཙལ་དང་བྱེ་བས་ཟུག་རྡུ་དབྱུང༌། །ཟུག་རྔུའི་གནས་དང་ཆ་སྤྱད་ཀྱི། །ཚུལ་ནི་མང་པོས་ལེགས་བརྟགས་ཏེ། །བློ་ལྡན་ཐབས་ནི་དེ་དང་དེས། །ཤེས་པར་བྱས་ལ་ཟུག་རྔུ་དབྱུང༌། །ཡན་ལག་བརྒྱད་པའི་སྙིང་
པོ་བསྡུས་པ་ལས། །མདོའི་གནས་ཀྱི་ལེའུ་ཉི་ཤུ་བརྒྱད་པའོ།། །།དེ་ནས་གཏར་ག་གདབ་པའི་ལས་ཀྱི་ཆོ་གའི་ལེའུ་བཤད་པར་བྱའོ། །རྨ་ནི་ཕལ་ཆེར་དང་པོར་ནི། །སྐྲངས་དང་སྨིན་ལས་འབྱུང་བར་འགྱུར། །དེ་བས་དེ་ཉིད་གསོ་བྱ་སྟེ། །དེ་བསིལ་བྱུགས་བླུགས་ཁྲག་དབྱུང་དང༌། །ལེགས་པར་སྦྱངས་པ་ལ་སོགས་པས། །སྨིན་པར་གྱུར་ལས་འབད་དེ་བསྲུང༌། །ཐོར་བུ་མ་སྨིན་སྐྲངས་དྲོད་ཆུང༌། །མདོག་འདྲ་སྲ་ཞིང་བརྟན་པར་གནས། །སྨིན་ཚེ་མདོག་ནི་འགྱུར་བ་དང༌། །དམར་ཞིང་རྐྱལ་བུའི་དབྱིབས་ལྟར་འདུག །གས་པ་ལྟ་བུའི་ནད་བཅས་དང༌། །ཡན་ལག་སྙོམ་ཞིང་གླལ་བཅས་དང༌། །ལུས་གྲུགས་འཁྲུགས་ཚ་ཡིག་འཆུས། །རིམས་འདེབས་སྐོམ་དད་གཉིད་མེད་དང༌། །མར་འཁྱགས་བཞག་ན་འཇུ་བ་དང༌། །རྨ་གཏར་རེག་ན་མི་བཟོད་དོ། །སྨིན་གྱུར་ན་བའི་ཤུགས་ཆུང་ཞིང༌། །རྙིད་ཅིང་སྐྱ་ལ་གཉེར་མ་འདུ། །མཐའ་མ་འཇུམ་ཞིང་དབུས་སུ་མཐོ། །གཡའ་དང་སྐྲང་བ་ལ་སོགས་ཆུང༌། །རྒྱལ་པ་ཡི་ནི་ཆུ་ལྟ་བུར། །རེག་ན་རྣག་ནི་ཕན་ཚུན་རྒྱུ། །རླུང་མིན་མིན་མཁྲིས་མིན་ཚ། །མེད་དེ་བད་ཀན་མེད་མི་སྐྲང༌། །ཁྲག་མེད་དམར་བར་མི་འགྱུར་ཏེ། །དེ་བས་ནད་ཁྲག་དང་བཅས་སྨིན། །སྨིན་པ་ཐལ་དྲགས་ཁོང་སྟོང་དང༌། །ནད་ཀྱིས་ཟོས་པས་པགས་པ་སྲབ། །གཉེར་མ་འཇུམ་ཞིང་མདོག་གནག་ལ། །བ་སྤུ་རྣམས་ནི་འབྱི་བར་འགྱུར། །བད་ཀན་ཤས་ཆེའི་སྐྲང་པ་ནི། །སྨིན་པ་གཏིང་རིང་ཁྲག་གིས་གང༌། །དེ་བས་སྨིན་རྟགས་གསལ་མ་ཡིན། །སྐྲང་པ་གང་དུ་བསིལ་འགྱུར་ཞིང༌། །པགས་མདོག་མི་འགྱུར་ནད་ཚབས་ཆུང༌། །རྡོ་ལྟར་རེག་ན་སྲ་བ་ནི། །མཁས་པས་ཐེ་ཚོམ་མེད་པར་དེ། །ཁྲག་གི་སྨིན་པ་ཞེས་བཤད་བྱ། །སྙིང་སྟོབས་ཉམ་ཆུང་བྱིས་པ་དང༌། །ཐོར་བུ་སྨིན་པའི་ཚབས་ཆེའམ། །གནད་དང་རུས་ཚིགས་ལ་སོགས་པར། །འབྱུང་བ་མ་གཏོགས་གཞན་དག་འདྲལ། །མ་སྨིན་བརྟོལ་ན་རྩ་རྒྱུས་ལ། །གནོད་ཅིང་ཁྲག་ནི་མང་དུ་འབྱུང༌། །ནད་ཚབས་རབ་འཕེལ་རྨ་གྱེས་པའམ། །རྨ་འབྱུང་ཐོར་བུ་འབྱུང་བར་འགྱུར། །རྣག་ནི་ནང་དུ་གནས་གྱུར་པ། །འཕེལ་
བས་རྩ་རྒྱུས་ཤ་དང་ནི། །ཁྲག་རྣམས་མྱུར་དུ་སྲེག་བྱེད་དེ། །རྩྭ་སྐམ་ལ་ནི་མེ་དང་མཚུངས། །གང་ཞིག་མ་སྨིན་བརྟོལ་བ་དང༌། །གང་ཞིག་སྨིན་ཀྱང་བཏང་སྙོམས་འཇོག །ཁྱད་པར་མི་ཤེས་དེ་དག་ནི། །སྨེ་ཤ་ཅན་འདྲར་ཤེས་པར་བྱ། །མ་བརྟོལ་བ་ཡི་དང་པོ་ནི། །ཁ་ཟས་ཕན་པ་སྦྱིན་པར་བྱ། །ཚོར་བ་མི་བཟད་བཟོད་འགྱུར་བས། །ཆང་འཐུང་བ་ལ་ཆང་བླུད་བྱ། །ཟས་ཟོས་པས་ནི་མི་བརྒྱལ་ཞིང༌། །ནང་དུ་མཚོན་བཏབ་ཚོར་མི་འགྱུར། །རུམ་དུ་པུ་ཤི་རྡེའུ་ཆགས་པ་དང༌། །ཁ་ནད་དམུ་རྫིང་ཅན་མ་གཏོགས། །དེ་ནས་ཡོ་བྱད་ཀུན་བསགས་ཏེ། །ནད་པ་ཤར་དུ་ཁ་བསྟན་ལ། །སྨན་པ་མངོན་ཕྱོགས་བསྡམས་ནས་ནི། །གནད་སྩོགས་མ་གཏོགས་གཙགས་བུས་གདབ། །ཤ་ཤུགས་རྗེས་མཐུན་ཤིན་ཏུ་རྣོ། །གཙགས་བུ་རྣག་ཕྱིན་བར་དུ་གདབ། །དེ་ནི་ཅིག་ཅར་གདབ་བར་བྱ། །སྨིན་པ་ཆེན་པོ་ཡོད་ཀྱང་ནི། །རྨ་ཞེང་སོར་གཉིས་དྲལ་བྱའམ། །སོར་གཉིས་པ་ཡི་ཟབ་སོར་གསུམ། །མཛུབ་མོ་ཆུ་བ་སྤུ་དག་གིས། །གནས་ཕྱོགས་ཇི་བཞིན་བརྟག་པའམ། །རྨ་འཚོལ་གྱིས་ནི་ལེགས་བཙལ་ཞིང༌། །ཀུན་ཏུ་ལེགས་པར་བརྟག་པར་བྱ། །གང་ནས་གང་དུ་འགྲོ་བར་འགྱུར། །གང་དུ་མཐོ་བ་ཤེས་བྱས་ལ། །དེ་དང་དེར་ནི་རྨ་བཏོད་དེ། །ལེགས་ཕྱེ་ཕུག་ནི་མེད་པར་བྱ། །ཆུ་དང་ཞེང་དུ་ཅི་ནས་ཀྱང༌། །ནད་ནི་གནས་པར་མི་འགྱུར་བྱ། །སྨན་པ་དཔའ་བརྟན་ལས་ལ་མྱུར། །མཚོན་རྣོ་མི་རྟུལ་མི་འདར་ལ། །ཀུན་ཏུ་རྨོངས་པར་མ་གྱུར་པ། །གཙགས་བུས་འདེབས་པའི་ལས་ལ་བསྔགས། །གྱེན་དུ་བཅད་རྩ་འཕྲལ་སྨིན་རྩ། །རྙིལ་དང་སྐེ་རྩ་ལྟོ་སྦོས་དང༌། །མཆན་ཁུང་དང་ནི་མིག་སྦུབས་མཆུ། །མཁུར་ཚོས་བརླ་དྲུང་ཆུ་སོ་རྩའོ། །གཞན་དག་གྱེན་དུ་བཅད་ན་ནི། །རྩ་དང་ཆུ་བའང་མ་རུངས་འགྱུར། །གཙགས་པུས་བཏབ་ནས་ནད་པ་ནི། །ཚིག་སྙན་ཆུ་ནི་བསིལ་བ་ཡིས། །དབུགས་ཕྱུང་ནས་ནི་དེ་འོག་རྨ། །སོར་མོས་ཀུན་ནས་བཙིར་བ་དང༌། །བསྐ་བའི་ཆུ་ཡིས་ལེགས་བཀྲུས་ཤིང༌། །སྨན་ཆུར་བཅུག་པའི་གོས་ཀྱིས་ཕྱི། །གུ་གུལ་ཡུངས་ཀར་ཨ་
རུ་ར། །ཤིང་ཀུན་ཀ་ར་རྒྱམ་ཚ་དང༌། །ཤུ་དག་ནིམ་པའི་ལོ་མ་ནི། །མར་དང་སྦྱར་བས་བདུག་པར་བྱ། །ཏིལ་གྱི་ལྡེ་གུ་མར་སྦྲང་རྩི། །རང་གི་སྨན་ནི་ཇི་ལྟ་བས། །བྱུགས་ཤིང་དེ་ནས་རྨ་ཚངས་གཞུག །དེ་ཉིད་ཀྱིས་ནི་དེ་གཡོགས་ལ། །མར་དང་ཕྱེ་སྤྲུས་བསྐུས་པ་དང༌། །དེའི་འོག་ཀོག་ཙེ་སྟུག་པོ་ནི། །གཞག་སྟེ་ཤིན་ཏུ་མ་ཡེངས་པས། །གོས་ཀྱིས་ལེགས་པར་བཅིང་བྱས་ཏེ། །གློ་དང་གཡས་དང་གཡོན་དག་གམ། །སྟེང་དང་འོག་ཏུ་མ་སོང་བྱ། །རྨ་ཚངས་ཀོག་ཙེ་དཀྲིས་མར་བཅས། །ཕྲ་ཞིང་སྲ་ལ་གཙང་པ་ལ། །སྤོས་ཀྱིས་བདུགས་ཤིང་འཇམ་ལ་མཉེན། །ཁམ་ཁུམ་མེད་ཅིང་རྨ་ལ་ཕན། །བཅིངས་ནས་དེའི་འོག་ཏུ་དེ། །གནོད་པ་བཟློག་ཕྱིར་བསྲུང་བར་བྱ། །དེ་རྣམས་ལ་ནི་གཏོར་མ་སྦྱིན། །ལཀྵྨི་གུ་ཧ་ཨ་ཏི་གུ་ཧ། །སྤང་སྤོས་པྲ་མ་ཙ་རི་ནི། །ཚ་ཏྲ་ཨ་ཏི་ཚ་ཏྲ་དང༌། །དུར་བ་ཤུ་དག་ཉུངས་ཀར་དག །རྟག་ཏུ་དེ་ཡི་སྤྱི་བོར་བཏགས། །དེ་ནས་སྣུམ་གྱི་ཆོ་གར་བཤད། །ཉིན་རེའི་ཀུན་སྤྱོད་བཤད་པ་བསྟན། །ཉིན་པར་གཉིད་ལོག་རྨ་གཡའ་ཞིང༌། །ཁ་དམར་ན་སྐྲངས་རྣག་འཁྱིམས་འགྱུར། །བུད་མེད་དྲན་ནམ་རེག་པའམ། །མཐོང་བས་ཁུ་བ་བྱུང་འགྱུར་ན། །མ་ཕྲད་ནའང་འཁྲིག་པ་ལས། །བྱུང་བའི་སྐྱོན་ནི་ཐོབ་བར་འགྱུར། །ཁ་ཟས་དག་ནི་གང་གོམས་ལས། །ནས་དང་གྲོ་དང་དྲུག་ཅུ་པ། །སྲན་ཆུང་མུངྒ་དུ་བ་རི། །ནི་ཤན་ནཱ་ག་ཛི་བནྟི། །ལ་ཕུག་གཞོན་ནུ་བརྟ་ཀ །རྒྱ་སྣེའུ་དནྡུ་ལི་ཡ་ཀ །ཀ་ར་བེ་ལ་ཀརྐོ་ཏ། །ག་དུ་ག་པལ་པ་ཏོ་ལ། །རྒྱམ་ཚ་སེ་འབྲུ་སྐྱུ་རུ་ར། །ཆུ་བསྐོལ་བ་ནི་བསྒྲངས་པ་དང༌། །འབྲས་རྙིང་ཆང་དང་སྣུམ་ཉུང་ཟད། །ཟོས་རྗེས་སུ་ཆུ་ཚན་བཏུང་བ་དང༌། །སྐམ་སའི་ཤ་ནི་ཟོས་གྱུར་ན། །རྨ་ནི་མྱུར་དུ་འཚོ་བར་འགྱུར། །དུས་སུ་རན་པར་བཟའ་བ་དང༌། །ཕན་པ་ཟོས་ན་བདེ་འཇུ་འགྱུར། །མ་ཞུ་བ་ཡི་རླུང་ལ་སྩོགས། །ལྡང་ཞིང་ནད་ནི་སྟོབས་ཅན་འགྱུར། །དེ་ལས་སྐྲངས་དང་རྣགས་པ་དང༌། །ཚ་དང་སྦོས་པར་འགྱུར་བ་ཡིན། །འབྲུ་གསར་ཏིལ་དང་མ་ཤ་དང༌། །ཆང་དང་རླན་ཅན་ལས་བྱུང་ཤ་།འོ་མ་བུ་རམ་ཤིང་
ལས་གྱུར། །སྐྱུར་དང་ལན་ཚྭ་ཚ་བ་དང༌། །གཞན་གང་འཁྲུ་བ་གཅོད་བྱེད་དང༌། །ཚ་དང་བསིལ་དང་ལྕི་བ་ཡང༌། །འབྲུ་ས་ར་ལ་སོགས་སྡེ་ཚན་འདི། །རྨ་དང་ལན་པའི་ནད་ཀུན་སྐྱེད། །ཆང་ནི་རྣོ་བ་ཚ་རྩུབ་འགྱུར། །རྨ་ལ་མྱུར་དུ་གནོད་པར་བྱེད། །བ་ལ་ཨུཪྴི་རས་གཡབ་ཅིང༌། །འདི་ནི་བསྐྱོད་པར་མི་བྱ་ལ། །དྲག་ཤུལ་མི་གཟུག་འཕྲུག་མི་བྱ། །བསྐྱོད་པའི་ཆོ་ན་བག་བྱའོ། །མཛའ་དང་བྲམ་ཟེ་རྒན་སྩོགས་ཀྱི། །གཏམ་ནི་ཡིད་ལ་དགའ་བ་ཉན། །ནད་ལས་ཐར་བའི་རེ་བཅས་པས། །རྨ་ནི་མྱུར་དུ་འཚོ་བར་འགྱུར། །ཉིན་གསུམ་ལོན་ཚེ་རྨ་ཡི་ཚས། །སླར་ཡང་བཀྲུས་སོགས་ལས་རྣམས་ནི། །སྔ་མ་བཞིན་བྱ་དེ་བཞིན་དུ། །ཉིན་ཞག་གཉིས་པར་མི་བྱའོ། །ཚབས་ཆེར་ན་ཞིང་མི་འབྱར་ལ། །རྨ་ནི་ཡུན་རིང་ཞིག་ན་འཚོ། །རྨ་ཚངས་སམ་ནི་ལྡེ་གུས་གླན། །སྣུམ་ཆེས་རྩུབ་ཆེས་དམ་པ་དང༌། །ལྷོད་དྲགས་གཞག་ཉེས་མི་བྱ་སྟེ། །སྣུམ་ཆེས་རྨ་ནི་རིད་པར་འགྱུར། །རྩུབ་ཆེས་ཤ་འཆད་ཤིན་ཏུ་ན། །གས་ཤིང་ཁྲག་ནི་འབྱུང་བར་འགྱུར། །དམ་དང་ཀློད་དྲགས་གཞག་ཉེས་པས། །རྨ་ཡི་ཁ་ནི་འདྲུད་པར་འགྱུར། །རྨ་ནི་རྣག་བཅས་སྐྲངས་ཤིང་མཐོ། །རྒྱུ་བཅས་རྣག་ཕུགས་འཆས་པ་དག །རྨ་ཚངས་འཇམ་པོ་ནང་གནས་པས། །རྨ་ཡི་སྐྱོན་ནི་དག་པར་བྱེད། །སྐྲངས་པ་ཧ་ཅང་མ་སྨིན་བརྟོལ། །སྨིན་ཞིང་རྣགས་པར་འགྱུར་བ་སྤྱད། །ཕན་པའི་སྨན་དང་ཟས་སྦྱིན་དཀྲི། །ཤིན་ཏུ་རྨར་མི་གནོད་པས་གསོ། །སྣད་པའི་རྨ་ནི་གསར་དུ་བྱུང༌། །རལ་ཞིང་ཁ་བྱེ་འཕྲལ་དུ་བཙེམ། །རྨེན་བུ་ཆེན་པོ་བཀས་པ་དང༌། །རྣ་ཤལ་བུ་ག་ཆད་པའང་བཙེམ། །མགོ་དང་མིག་ཕུགས་སྣ་དང་མཆུ། །མཁུར་ཚོས་རྣ་པ་དཔུང་པ་བརླ། །མགུལ་པ་ཕྲག་པ་རླིག་པ་དཔྱི། །ཕོ་མཚན་གཞང་དང་ལྟོ་བ་སྩོགས། །ཕུགས་རིང་བ་ཡི་གནས་རྣམས་དང༌། །ཤ་ཆེ་མི་འགུལ་མ་ཡིན་དང༌། །ཆུ་སོ་མཆན་ཁུང་ལ་སྩོགས་དང༌། །ཤ་ཆུང་མགུལ་པའི་རྨ་དག་དང༌། །དབུགས་དབྱུང་ཟུག་རྔུ་ཡོད་པ་དང༌། །ཐལ་སྨན་དུག་མེས་ཚིག་མི་བཙེམ། །བཙེམ་པ་རུས་དུ་མ་ཁྲག་སྐམ་
དང། །རྩ་དང་སྤུ་རྣམས་བསལ་ནས་ནི། །ཤ་ཆད་དུམ་བུ་འཕྱང་བ་དང༌། །རང་གི་གནས་སུ་གླན་པ་དང༌། །རུས་ཚིགས་བཅུག་ཅིང་ཁྲག་གཟགས་ལ། །སྐུང་པ་ཤིང་ཤུན་རྒྱུས་པས་བཙེམ། །སྲུབས་ནི་ཉེ་བའམ་རིང་མི་བྱ། །བླང་བ་ཆེ་བའམ་ཆུང་མི་བྱ། །དེ་ནས་སྤྲོ་བསྲིང་བྱས་ནས་མཐར། །རྨ་ནི་སྦྲང་རྩི་མར་སྦྱར་དང༌། །སྐྱེར་པ་ཟར་མའི་དུད་པ་དང༌། །འབྲས་བུ་གསུམ་དང་ས་ལ་ཀི། །སེང་ཕྲོམ་མངར་དང་སྣུམ་བཅས་པས། །བསྐུས་ལ་བཅིང་སྩོགས་སྔོན་བཞིན་བྱ། །རྨ་ཁ་ཁྲག་ནི་མེད་འགྱུར་གང༌། །དེ་ནི་ཅུང་ཟད་འབྲུད་བྱ་སྟེ། །རྨ་འབྱོར་བྱེད་པ་ཁྲག་ཡིན་པས། །ཕྱུང་སྟེ་ལེགས་པར་དྲུབ་པར་བྱ། །དེ་ལ་བཅིངས་པ་ཡུལ་ལ་སྩོགས། །བརྟགས་ནས་ངེས་པར་སྦྱར་བར་བྱ། །བལ་གོས་པགས་པ་དར་གསུམ་དྲོ། །ཟར་མའི་རས་ནི་བསིལ་བ་ཡིན། །དྲོ་གྲང་རྣ་པ་ཤིང་བལ་འདབ། །རས་བལ་རྒྱུས་པ་ཤིང་ཤུན་ཡིན། །ཟངས་ལྕགས་ཞ་ཉེ་རོ་ཉེ་ཡིས། །བད་ཀན་ཚིལ་ཆེས་རྨ་ལ་གླན། །ཆག་ཐུར་ཤིང་བྱང་པགས་པ་དང༌། །ཤིང་ཤུན་སྨྱིག་ཚལ་སྩོགས་པས་བཅིངས། །དབྱིབས་ནི་རང་མིན་རྗེས་མཐུན་པའི། །བཅིང་བ་བཅོ་ལྔ་རྣམ་བྱ་སྟེ། །ཤུབས་དང་བཀྲ་ཤིས་ལྷོད་པར་བཅིང༌། །མཐར་ཆགས་བཅིང་དང་ཟླུམ་པོར་བཅིང༌། །མདའ་ལྕགས་ཁྲི་དང་དམ་བཅིང་དང༌། །སྒྱེའུ་བླ་རེ་ལྐོག་ཤལ་དང༌། །འུར་མཐིལ་ཟུང་གླན་ཟླུམ་པ་དང༌། །ཡན་ལག་ལྔ་པ་ཞེས་བྱ་སྦྱར། །དེ་ལས་གང་ཞིག་གང་ལེགས་སྦྱོར། །དེ་ནི་དེ་རུ་ལེགས་པར་སྦྱར། །བརླ་དང་མཇུག་ཙོས་མཆན་ཁུང་དང༌། །ཆུ་སོ་སྤྱི་བོར་དམ་དུ་བཅིང༌། །ལག་ངར་གདོང་དང་རྣ་བ་དང༌། །རྒྱབ་དང་རྩི་བ་ལོགས་མགུལ་པ་ལྟོ། །ཕོ་མཚན་རླིག་པ་རན་པར་བཅིང༌། །མིག་དང་ཚིགས་སུ་ལྷོད་པར་བཅིང༌། །ལྷོད་བཅིངས་རྨ་ནི་བད་ཀན་དང༌། །རླུང་ཤས་ཆེ་ལན་རན་པར་བཅིང༌། །རན་ཞིང་གནས་སུ་དམ་དུ་བཅིང༌། །དམ་ཞིང་ཤིན་ཏུ་དམ་དུ་བཅིང༌། །དགུན་དང་དེ་བཞིན་དཔྱིད་ཀྱི་ཚེ། །ཞག་ནི་གསུམ་གསུམ་དག་ནས་དགྲོལ། །ཁྲག་མཁྲིས་ཤས་ཆེའི་རྨ་དག་ནི། །དམ་བཅིང་གནས་སུ་རན་པར་བཅིང༌། །རན་བཅིང་
གནས་སུ་ལྷོད་པར་བཅིང༌། །ལྷོད་བཅིང་གནས་སུ་བཅིང་མི་བྱ། །དེ་གཉིས་སོ་ག་སྟོན་གྱི་ཚེ། །སྔ་དྲོ་ཕྱི་དྲོ་དགྲོལ་བར་བྱ། །མ་བཅིངས་ཤ་སྤང་སྦྲང་བུ་དང༌། །ལྷགས་པ་སེར་བུ་སྩོགས་པས་གནོད། །རྨ་རེད་འགྱུར་ཞེས་དེར་སྣུམ་དང༌། །སྨན་ནི་ཡུན་རིང་གནས་མི་འགྱུར། །སྦྱང་བའམ་འཚོ་བར་དཀའ་བ་དང༌། །འཚོབ་ཀྱང་མདོག་ནི་མི་སྡུག་འགྱུར། །བཅིངས་ན་ཆག་བཅིང་ཕྱི་མར་འགྱུར། །འཕྲེས་སམ་འབུར་གྱུར་དྲལ་གྱུར་ཏམ། །རྩ་དང་རྒྱུས་པ་ཆད་གྱུར་ཀྱང༌། །རྨ་ནི་མྱུར་དུ་བདེ་བར་འཚོ། །ལྡང་དང་ཉལ་བ་ལ་སོགས་པའི། །སྤྱོད་ལམ་ཀུན་ལ་གནོད་པ་མེད། །རྨ་ཁ་སྐྱེས་མཐོ་མི་མཉམ་དང༌། སྲ་ཞིང་རབ་ན་འཚོ་བ་དཀའ། །འཇམ་ཞིང་མཉམ་ལ་ན་བ་མེད། །རྨ་ནི་མྱུར་དུ་དག་ཅིང་འཚོ་བ། །རྨ་ནི་ཡུན་རིང་ཤ་ཆུང་དང༌། རྩུབ་པས་འབྱོར་པར་མ་གྱུར་ན། །ནད་གཞི་དུས་ཚིགས་ཇི་བཞིན་དུ། །སྨན་དང་ལོ་མས་དགབ་པར་བྱ། །མ་རྙིང་གཞོན་ཞིང་བུ་ག་མེད། །ཀུན་ནས་ལེགས་པར་ཁེབས་པ་དང༌། ཕྱིས་ཤིང་མི་རྩུབ་ལོ་མ་ནི། །འོ་མ་ཅན་ཤིང་སྟག་པ་དང༌། ཨ་རྫུ་ན་དང་ཀ་དམྦའི། །ལོ་མ་ཡིས་ནི་གཡོགས་པར་བྱ། །མཛེ་དང་མེ་ཡིས་ཚིག་པ་དང༌། །འབུས་ཟོས་གཅིན་ནད་སྦྲང་རྩི་འདྲ། །བྱི་བ་སྦྲུལ་གྱི་དུག་དང་ནི། །ཐལ་སྨན་རྣོ་དང་དུག་གིས་ཕོ། །རྨ་ནི་བཅིང་བར་མི་བྱ་ཞིང༌། །ཤ་འདྲུལ་གཞང་ཁར་མི་བཟད་རྣགས། །འདྲུལ་ཞིང་ཚ་དང་ན་བཅས་པར། །སྐྲངས་སྐམས་མེད་བལ་མི་བཅིང་ངོ། །རྨ་གང་ལེགས་པར་མ་བསྲུངས་པར། །སྦྲང་མ་སྲིན་བུ་འཇུག་བྱེད་དེ། །དེ་ཡིས་ཟོས་པས་ན་བ་དང༌། སྐྲང་དང་རང་ཁྲག་འཛག་པར་བྱེད། །དེར་ནི་བཀྲུ་དང་དག་པར་ནི། །བྱེའུ་རུག་ལ་སོགས་སྡེ་ཚན་སྦྱར། །སཔྟ་པ་པརྞི་ཀ་རཉྫ། །ཨ་རྐ་དང་ནི་ནིམ་པ་དང༌། །ར་ཚ་དང་ནི་ཤིང་ཚ་རྣམས། །བ་གཅིན་དང་ནི་བཏགས་པ་ཡི། །ལྡེ་གུ་དེ་ལ་བསྐུ་བ་དང༌། །ཐལ་སྨན་ཆུ་ནི་བླུགས་པས་ཕན། །ཡང་ན་ཤ་རློན་གྱིས་གཡོགས་ལ། །དེ་ནི་མྱུར་དུ་དབྱུང་བར་བྱ། །འདི་ནི་ནང་ན་སྐྱོན་བཅས་པས། །མྱུར་དུ་
འཚོབ་བར་མི་བྱ་སྟེ། །དེ་ནི་གནོད་པའང་ཆུང་དུས་ཀྱང༌། །སླར་ཞིང་འགྲམས་པར་འགྱུར་བ་ཡིན། །འཚོ་བ་པར་གྱུར་ཀྱང་མ་ཞུ་དང༌། །དྲག་ཤུལ་བུད་མེད་བསྟེན་སྩོགས་སྤང༌། །ཟླ་བ་དྲུག་གམ་བདུན་གྱི་བར། །ཆོ་ག་འབད་པས་བསྲུང་བར་བྱ། །གནས་སྐབས་དེ་དང་དེར་ནི་བྱུང་གྱུར་ཚེ། །ནད་གཞི་ལ་སྩོགས་སྟོབས་ཀྱིས་རྗེས་འབྲངས་ཏེ། །ཕྱི་མ་ནས་བཤད་རྒྱ་ཆེར་ལེགས་བརྟགས་ལ། །ཐབས་ནི་དེ་དང་དེ་ཡིས་འབད་དེ་གསོ། །ཡན་ལག་བརྒྱད་པའི་སྙིང་པོ་བསྡུས་པ་ལས། །མདོའི་གནས་ཀྱི་ལེའུ་ཉི་ཤུ་རྩ་དགུ་པའོ།། །།དེ་ནས་ཐལ་སྨན་རྣོན་པོ་དང་མེ་བཙའ་གདབ་པའི་ཆོ་གའི་ལེའུ་བཤད་པར་བྱའོ། །གཙགས་སྤྱད་ལྕགས་སྤྱད་རྗེས་འདྲ་བ། །མང་པོ་ཀུན་ལས་ཐལ་སྨན་མཆོག །དཀའ་བ་རྣམས་སུའང་བཅད་པའམ། །དབུག་པ་ལ་སྩོགས་བྱེད་པར་འགྱུར། །གཙགས་བུས་གདབ་པར་དཀའ་བ་ལའང༌། །དེ་ཡིས་བསྒྲུབ་པར་རུང་བ་དང༌། །ཤིན་ཏུ་གསོ་དཀའི་ནད་རྣམས་ལ། །གང་ཞིག་བཏུང་དུའང་རུང་བ་ཡིན། །དེ་ནི་གཞང་འབྲུམ་མེ་དྲོད་ཉམས། །རྡེའུ་འགགས་སྦྱར་དུག་སྐྲན་སྩོགས་བཏུང༌། །སྨེ་བ་ཤ་བཀྲ་སྣ་འཐོར་དང༌། །ཕྱི་རོལ་གཞང་འབྲུམ་ཚོར་མེད་མཛེ། །ཐོར་བུ་འབྲུམ་ཕྲན་མཚན་བར་རྔོལ། །རྨ་ལོག་སྩོགས་ལ་བྱུག་པར་བྱ། །ཁྲག་མཁྲིས་རླུང་ཅན་ནད་སྟོབས་ཆུང༌། །རིམས་དང་ཚད་འཁྲུ་སྙིང་ཀླད་ནད། །སྐྱ་རྦབ་ཡི་ག་འཆུས་པ་དང༌། །རབ་རིབ་ཅན་ལ་སློན་ཁྲུས་བཏང༌། །ལུས་ཀུན་ཁྱབ་པའི་འོར་ནད་དང༌། །འཇིགས་དང་སྦྲུམ་མ་ཟླ་མཚན་འཛག །ཕོ་མཚན་མོ་མཚན་སྐྲངས་པ་དང༌། །བྱིས་པ་རྒན་པོ་ཟས་མ་ཞུ། །རྩ་བོ་ཆེ་དང་རུས་ཚིགས་གནད། །རུས་པ་གཞོན་ནུ་ཆུ་བ་རྩ། །ལྟོ་བསྲུབས་མགུལ་པ་ལྟེ་བ་དང༌། །ཤ་སྲ་བ་ཕྱོགས་དང་རླིག་པ་དང༌། །ཕོ་མཚན་བུ་ག་སེན་མོ་ཕྲག །མིག་མཆུ་མ་གཏོགས་མིག་ནད་རྣམས། །ཚ་གྲང་ཆར་དང་ཡུལ་རྨུས་ཚེ། །གཉི་གའང་གཏང་བར་མི་བྱའོ། །མུ་ཀ་ཀ་ནག་ཤ་མྱ་ཀ །ཆུ་ཤིང་པ་རི་བ་ཏྲ་ཀ །ཨ་ཤྭ་ཀ་རྞ་འཛམ་བུའི་ཤིང༌། །པལ་ཤ་དང་ཨ་པོ་ཏ། །ཨེནྡྲ་བྲྀཀྵ་ཨ་རྒ་དང༌། །ན་གཏ་མ་ལ་
མུཀྟི་ཀ །སྲིང་ཤིང་ཨ་པ་མརྒ་དང༌། །ཀ་ཀ་ཛ་ཀ་ཙི་ཏྲ་ཀ །ཨགྣི་མནྟ་ཏིལ་བཅའ་སྒ། །རློན་ཤིང་རྩ་བ་ལ་སྩོགས་བཅས། །དུམ་བུར་ཡོངས་སུ་གཏུབས་པ་དང༌། །ཀོ་ཤ་ཏ་ཀ་རྣམ་བཞི་དང༌། །ནས་ཀྱི་སོག་མ་གྲམ་རྣམས། །རླུང་མེད་གནས་སུ་བསགས་ནས་དེ། །རྡོ་ལེབ་སྟེང་དུ་སོ་སོར་གཞག །མུ་ཀ་ཀ་ཡི་ཕུང་པོ་དང༌། རྡོ་ཐལ་རྡོ་ནི་བཅུག་པར་བྱ། །དེ་ནས་ཏིལ་གྱི་སྡོང་བུས་བསྲེག །ཚིག་ནས་མེ་ནི་ཤི་བ་དང༌། །རྡོ་ཐལ་ཐལ་བ་ལོགས་ཤིག་དབྱེ། །ཐལ་བ་གཞན་དག་བྲེ་གང་སྟེ། །མུ་ཀའི་ཐལ་ལྷག་བླངས་ནས་ནི། །སོ་སོར་ཕྱེ་སྟེ་ཆུ་དང་གཅིན། །སྲང་སྟོང་དག་དང་བསྲེས་ནས་བཞུ། །ཚགས་ནི་བཟང་པོས་དེ་བཙགས། །ཇི་སྲིད་འབྱར་བག་དམར་ཞིང་དངས། །རྣོ་བར་གྱུར་པའི་བར་དུ་ནི། །ཐལ་བའི་དངས་མ་དེ་བླངས་ལ། །ལྕགས་སྣོད་བཟང་པོར་བསྐོལ་ཞིང་དཀྲུགས། །དེ་ནས་འཚོད་པར་བྱེད་པ་དེར། །རྡོ་ཐལ་བསྲེགས་རྡོའི་དུམ་བུ་དང༌། །ཉ་ཕྱིས་ཀྵི་ར་པ་ཀ་དང༌། དུང་གི་ལྟེ་བ་ལྕགས་སྣོད་གཞུག །མེ་མདོག་ཅན་དུ་ལན་མང་བྱ། །ཐལ་སྨན་ཆ་ནི་ཕུལ་གང་དང༌། །མེ་བསད་དེ་ཉིད་དང་བཏགས་ལ། །ལྡེ་གུ་དེར་ནི་གཞུག་པར་བྱ། །ཁྱིམ་བྱ་རྨ་བྱ་བྱ་རྒོད་དང༌། །ཀངྐ་ཕུག་རོན་རྟུག་པ་དང༌། །བྱ་དང་རྐང་བཞིའི་མཁྲིས་པ་དང༌། བ་བླ་སྡོང་རོས་ལན་ཚྭ་རྣམས། །ཞིབ་བཏགས་བཅུག་བྱ་དེ་ནས་ནི། །གཟར་བུས་དེ་ཡང་ཀུན་ཏུ་དཀྲུགས། །གང་ཚེ་ལྦུ་བར་བཅས་བར་ཁོལ། །ཆུ་བུར་སྦོམ་སྐ་ལྡེ་གུ་འདྲ། །དེ་ཚེ་ཕབ་ལ་གྲངས་པ་དང༌། ལྕགས་སྣོད་བཅུག་སྟེ་ནས་ནང་གཞུག །འདི་ནི་ཐལ་སྨན་འབྲིང་པོ་ཡིན། །འཇམ་པོ་མ་བཏགས་ཕར་བཅུག་ལ། །གསུར་ལ་སླར་ནི་གདོན་པར་བྱ། །རྣོན་པོར་སྔ་མ་བཞིན་བཅུག་ལ། །ལངྐ་ལིངྐ་དནྟི་དང༌། །ཤུ་དག་པོང་ང་ཙི་ཏྲ་ཀ །སྭ་རྩི་ཀ་དང་ཁྲོན་བུ་དང༌། །ཤིང་ཀུན་ཀ་རྙྫའི་ལོ་མ། །ཏ་ལའི་ལོ་མ་ཁ་རུ་ཚའི། །ཕྱེ་བཅུག་ཞག་བདུན་དེ་གཞག་བྱ། །རྣོན་པོ་དེ་ནི་རླུང་བད་ཀན། །ཚིལ་སྐྱེས་ཐོར་བུ་ཚོགས་ལ་བཏང༌། །འདི་ཉིད་ནད་ཚབས་འབྲིང་ལ་འབྲིང༌། །འཇམ་པོ་ཁྲག་
མཁྲིས་གཞང་འབྲུམ་ལའོ། །མཐུ་བསྐྱེད་ཕྱིར་ནི་འོ་མ་ཆུ། །ཐལ་སྨན་ཆུ་ནི་སླར་ཡང་གཞུག །ཤིན་ཏུ་རྣོ་མིན་འཇམ་དང་མཉེན། །འབྱོར་བག་སྣ་རྣོ་དཀར་བ་དང༌། །རྩེ་ཅན་བདེ་བར་འཇིལ་བ་དང༌། །མི་འཛག་བྱུགས་ན་ནང་མི་ཆེ། །ཐལ་སྨན་ཡོན་ཏན་བཅུ་དང་ལྡན། །གཙགས་བུ་མེ་བཙའི་ལས་ཀྱང་བྱེད། །དཀྲུགས་པས་གཞིབས་བ་ལྟ་བུ་དང༌། །ལུས་ནི་བཙིར་བ་ལྟ་བུ་དང༌། །ནད་ཀྱི་རྗེས་འགྲོ་སྙེགས་པས་ན། །རྩ་བ་ནས་ནི་འབྱིན་པར་བྱེད། །ལས་བྱས་ནད་དང་བྲལ་ནས་ཀྱང༌། །རང་ཉིད་བར་ཞི་བར་འགྱུར། །ཐལ་སྨན་གྱིས་ནི་གསོ་བའི་ནད། །མཚོན་བཅད་བྲུད་པའམ་གཏར་ག་བྱ། །ཐལ་སྨན་ཐུར་མ་གོས་ཀྱིས་ནི། །དཀྲིས་པ་བསྒོས་ཏེ་གླན་ནས་སུ། །གྲངས་བརྒྱའི་བར་དུ་བསྡད་ནས་ཕྱི། །དེ་ལ་གཞང་འབྲུམ་བསྐུས་གོས་ཀྱིས། །གཡོགས་ཏེ་ལག་པ་གདབ་པར་བྱ། །མིག་མཆུའི་ནད་ལ་མིག་མཆུ་བཟློག །མིག་འབྲས་ནག་པོ་རས་བལ་གྱིས། །བཀབ་སེ་ལེགས་པར་བྱུག་པར་བྱ། །ཐལ་སྨན་པད་ལོ་ཙམ་སྲབ་བསྐུ། །སྣ་ཡི་བུ་གའི་ཐོར་བུ་ནི། །ཉི་མ་ལ་བལྟས་འདུག་པ་ལ། །སྣ་རྩེ་ལེགས་པར་བཏག་ནས་ནི། །གྲངས་ནི་ལྔ་བཅུའི་བར་དུ་གཞག །རྣ་བའི་ཐོར་བུ་ལ་དེ་བཞིན། །ཐལ་སྨན་བསྐུས་པའི་འོག་ཏུ་ནི། །ཕྱིར་ལ་ལེགས་ཉེས་རྟོགས་བྱ་སྟེ། །ལེགས་ཚིག་མར་དང་སྦྲང་རྩི་བསྐུ། །འོ་མ་རང་སྐྱུར་ཞོ་ག་ཆོས། །དབལ་བསད་དེ་ནས་མར་བཅས་པའི། །མངར་དང་བསིལ་བས་བྱུག་པར་བྱ། །བཟའ་བཏུང་བད་ཀན་བསྐྱེད་པ་དང༌། །བསྲུལ་པའི་ཕྱིར་ནི་སྦྱིན་པར་བྱ། །གལ་ཏེ་རྩ་བ་བརྟན་གྱུར་པས། །ཐལ་སྨན་གྱིས་བསྲེགས་མི་འདྲུལ་ན། །འུ་སུ་སྐྱུར་སྙིགས་ཤིང་མངར་དང༌། ཏིལ་གྱི་ལྡེ་གུས་དེ་ཚེ་བསྐུ། །ཏིལ་གྱི་ལྡེ་གུ་ཤིང་མངར་བཅས། །མར་གྱིས་བསྐུས་ན་རྨ་འཚོབ་བྱེད། །སྨིན་པ་འཛམ་བུ་ལྟར་ཀུན་གནག །ལེགས་ཚོས་དེ་ལས་གོ་བཟློག་པ། །དམར་ཞིང་ན་ལ་གཡའ་སྩོགས་བྱེད། །བསྲེགས་ཉེས་ཡིན་ཏེ་དེ་སླར་བསྲེག །བསྲེགས་དྲགས་ཁྲག་ནི་འཛག་པ་དང༌། །བརྒྱལ་ཞིང་ཚ་དག་རིམས་སྩོགས་འགྱུར་
གཞང་ཁར་བསྲེགས་དྲགས་ཁྱད་པར་དུ། །འགགས་པའམ་ཤས་ཆེར་འབྱུང་བར་འགྱུར། །ཁུ་བ་ཟད་པར་འགྱུར་བའམ། །གཞང་ཁ་འབྱུང་བས་འཆི་བར་འགྱུར། །སྣར་དྲགས་སྣ་ཡི་མཚུལ་བར་ནི། །ཉམས་པའམ་ཡང་ན་ཡོ་བའམ། །ཡུལ་ནི་འཛིན་མི་ནུས་པར་འགྱུར། །རྣ་བ་སྩོགས་པའང་དེ་དང་འདྲ། །འདིར་ནི་མཆོག་ཏུ་སྐྱུར་བ་བླུགས། །ཤིང་མངར་མར་དང་ཏིལ་བཏགས་བྱུག་རླུང་དང་མཁྲིས་པ་སེལ་བ་དང༌། བསིལ་པའི་སྤྱོད་པ་ཐམས་ཅད་ཕན། །སྐུར་བའི་རེག་པ་བསིལ་བས་ན། །ཐལ་སྨན་དེ་དང་འདྲེས་གྱུར་ན། །དེ་ཡིས་མྱུར་དུ་མངར་གྱུར་བས། །སྐྱུར་བས་ཚ་བ་ཤིན་ཏུ་འཇིལ། །མེ་བཙའ་ཐལ་སྨན་ལས་མཆོག་སྟེ། །དེས་བསྲེགས་པས་ནི་སླར་མི་འབྱུང༌། །སྨན་དང་ཐལ་སྨན་མཚོན་སྤྱད་ཀྱིས། །མ་གྲུབ་པར་ཡང་གྲུབ་བྱེད་ཡིན། །པགས་པ་ཤ་དང་རྩ་རྒྱུས་དང༌། །ཚིགས་དང་རུས་སྩོགས་དེ་ལ་གདབ། །སྨེ་བ་མཛེ་ནད་གླད་ནད་དང༌། མགོ་བོའི་གཞོགས་ཕྱེད་ན་སྩོགས་ལ། །པགས་བསྲེགས་རས་བལ་བ་ལང་སོ། །མེ་ཤེལ་མདའ་སྨྱུག་སྩོགས་མེ་གདབ། །གཞང་འབྲུམ་རྨེན་བུ་མཚན་བར་རྡོལ། །བུ་ག་རྨ་ལོངས་ལ་སྩོགས་ལ། །ཤ་བསྲེག་སྤྲ་ཚིལ་མར་བསྲེགས་དང༌། །བུ་རམ་འཛམ་བུའི་ཆུ་ཡིས་བསྲེག །པགས་པ་འཇར་དང་ཁྲག་མ་ཆོད། །ཐིག་ལེ་གནག་སྩོགས་པགས་ནད་ན། །དེ་དག་ཉིད་ཀྱི་རྩ་བསྲེག་གོ །བསྲེག་མིན་ཐལ་སྨན་བཀག་པ་དང༌། །ནང་ན་མཚོན་ལུས་རྨ་ཆེན་འབྱུང༌། །ཁྲག་ཟགས་པ་དང་ལྟོ་དྲལ་བའོ། །ལེགས་བསྲེག་མར་དག་སྦྲང་རྩིས་བསྐུ། །སྣུམ་དང་བསིལ་བས་བྱུག་པར་བྱ། །ལེགས་པའི་མཚན་མ་ཁྲག་མི་དབྱུང༌། །སྒྲ་ཅན་ཆུ་བུར་ཕྲེའུ་འབྱུང༌། །ཏ་ལའི་འབྲས་སྨིན་ཐི་བ་འདྲ། །ན་བ་ཆུང་ཞིང་འཚོབ་པ་སླ། །བག་མེད་པས་བསྲེགས་ཐམས་ཅད་དང༌། བསྲེགས་ཉེས་བསྲེགས་ནི་དྲགས་པ་དང༌། །མ་ཚོས་མཚན་ཉིད་དང་བཅས་བཞི། །མ་ཚོས་པགས་མདོག་མི་སྡུག་ཚ། །ཆུ་བུར་འབྱུང་བར་མི་འགྱུར་རོ། །བསྲེགས་ཉེས་ཆུ་བུར་ཆེ་རབ་ཚ། །བསྲེགས་དྲགས་པས་ནི་ཤ་
འཕྱང་དང༌། །པགས་པ་འཁུམས་ཤིང་རབ་ཏུ་ཚ། །དུད་པ་འཁྱིམས་པ་ལྟ་བུ་དང༌། །རྩ་སྩོགས་འཁུམས་ཤིང་སྐོམ་དང་བརྒྱལ། །རྨ་ཡི་གཏིང་ཟབ་འཆི་བར་འགྱུར། །མཚོས་པ་ནི་མེ་ཕྲད་ཅིང༌། །ཚ་བའི་སྨན་ནི་གཏང་བར་བྱ། །ཁྲག་སྐ་ཤིན་ཏུ་ན་བར་འགྱུར། ཟགས་པར་གྱུར་ན་ནད་ཚབས་ཆུང༌། །བསྲེགས་ཉེས་བསིལ་དང་དྲོ་བའི་སྨན། །དང་པོར་བཏང་ན་དེ་འོག་བསིལ། །བསྲེགས་ལེགས་ན་ནི་ཅུ་གང་དང༌། །པླག་ཤ་ཙནྡན་བཙག་ཡུག་སྣམ། །སླེ་ཏྲེས་བཅས་པ་མངར་བཅས་བསྐུ། །དེ་འོག་མཁྲིས་མེ་དབལ་ལྟར་སྤྱད། །བསྲེགས་དྲག་མཁྲིས་པ་མེ་དབལ་གྱི། །ཆོ་ག་ཐམས་ཅད་མྱུར་དུ་སྤྱད། །སྣུམ་གྱིས་ཤིན་ཏུ་བསྲེགས་དྲགས་པ། །དེར་ནི་རྩུབ་པའི་ཆོ་གའང་བྱ། །སྙིང་པོ་གསང་བ་ལྟ་བུ་ནི། །གནས་འདིར་རྫོགས་པར་བྱ་པ་ཡིན། །འདིར་དོན་ཕྲ་བ་མདོར་བཤད་ཀྱི། །རྒྱ་ཆེར་ཀུན་ཏུ་བསྟན་པ་ཡིན། །ཡན་ལག་བརྒྱད་པའི་སྙིང་པོ་བསྡུས་པ་ལས། །མདོའི་གནས་ཀྱི་ལེའུ་སུམ་ཅུ་ཐམ་པའོ།། །།ཡན་ལག་བརྒྱད་པའི་སྙིང་པོ་བསྡུས་པ་ལས། །མདོའི་གནས་ཏེ་གནས་དང་པོ་རྫོགས་སོ།། །།དེ་ནས་ལུས་ཀྱི་རུམ་དུ་ཞུགས་པའི་གནས་དང་པོ་བཤད་པར་བྱའོ། །དེ་ཡང་སྔོན་གྱི་དྲང་སྲོང་ཆེན་པོ་རྒྱུན་ཤེས་ཀྱི་བུ་ལ་སྩོགས་པས་འདི་སྐད་བཤད་དོ། །ཁུ་ཁྲག་སྐྱོན་མེད་པར་སེམས་ཅན། །རང་ལས་ཉོན་མོངས་ཀྱིས་བསྐུལ་ནས། །ཚོགས་པས་མངལ་ཆགས་འགྱུར་ཏེ། །གཙུབ་ཤིང་ལས་ནི་མེ་འབྱུང་མཚུངས། །ས་བོ་བདག་ཉིད་འབྱུང་བ་ཆེ། །ཕྲ་མོ་སེམས་ཀྱི་རྗེས་འགྲོ་དང༌། མ་ཡི་ཁ་ཟས་དངས་མ་ལས། །རིམ་གྱིས་མངལ་དུ་རྣམ་པར་འཕེལ། །ཇི་ལྟར་ཉིད་མའི་ཟེར་གྱི་མེ། །མེ་ཤེལ་དང་ནི་ཕྲད་གྱུར་པའི། །ཤིང་ལ་འགྲོ་བར་མི་སྣང་སྟེ། །སེམས་ཅན་མངལ་གནས་དེ་དང་འདྲ། །རྒྱུ་ཡི་རྗེས་སུ་འགྲོ་བས་ན། །འབྲས་བུ་དེ་དག་སྐལ་མཉམ་ཉིད། །སེམས་ཅན་སྐྱེ་གནས་སྣ་ཚོགས་འཛིན། །ཟངས་མ་ལ་སྩོགས་བཞུ་དང་མཚུངས། །དེ་བས་ཁུ་བ་མང་བ་ལས། །ཕལ་ཆེར་སྐྱེས་པར་སྐྱེ་འགྱུར་ལ། །ཟླ་མཚན་མངལ་བས་
བུད་མེད་དེ། །དེ་གཉིས་མཉམ་ལས་མ་ནིང་འགྱུར། །ཁུ་ཁྲག་རླུང་གིས་མང་དུ་ཕྱེ། །ཇི་ལྟར་བ་ལས་མཚེ་མར་འགྱུར། །སྐྱེ་གནས་མཐུན་གཟུགས་མི་སྡུག །གནོད་པའི་དྲི་མས་སྐྱེ་བར་འགྱུར། །བུད་མེད་ཟླ་བ་རེ་རེའི་ཁྲག །དངས་མ་ལས་བྱུང་ཞག་གསུམ་འཛག །ལོ་ནི་བཅུ་གཉིས་ཡན་ཆད་ནས། །ལྔ་བཅུའི་བར་འཛག་དེ་ནས་ཟད། །བུད་མེད་ལོ་ནི་བཅས་དྲུག་ལོན། །སྐྱེས་པ་ཉི་ཤུ་ལོན་དང་འདུས། །མངལ་གནས་ལམ་དང་ཁུ་བ་ཁྲག །རླུང་དང་སེམས་ནི་དག་གྱུར་པའི། །པུ་ནི་སྟོབས་དང་ལྡན་པ་སྐྱེ། །དེ་ལས་ལོ་ནི་མ་ཚང་བའི། །ནད་ཅན་ཆོ་ཐུང་སྐལ་ངན་པའི། །བུ་ཆགས་པའམ་ཆགས་མི་འགྱུར། །རླུང་སྩོགས་རུལ་དང་མདུད་པ་ཅན། །དྲི་མ་སྐྱོན་དང་ལྡན་བཤད་པའི། །ཁུ་ཁྲག་ས་བོན་བྱེད་མི་ནུས། །རང་གི་མཚན་མས་སྐྱོན་བྱུང་བཤད། །ཁྲག་གིས་རུལ་ཞིང་བད་ཀན་དང༌། །རླུང་གིས་མདུད་པ་ཅན་འདྲར་འགྱུར། །ཁྲག་དང་མཁྲིས་པས་རང་འདྲ་ལ། །རླུང་དང་མཁྲིས་པས་ཟད་པར་འགྱུར། །འདི་དག་གསོ་དཀའ་ཉེས་གསུམ་ལྡན། །བཤང་གཅི་འདྲ་བ་གསོར་མི་རུང༌། །རླུང་ལ་སོགས་བས་གནོད་གྱུར་པ། །རང་གི་སྨན་གྱིས་གསོ་བར་བྱ། །རུལ་ལ་ད་ཏ་ཀའི་མེ་ཏོག །སེང་ལྡེང་སེ་འབྲུ་ཨརྫུ་ན། །མར་དང་བསྐོལ་བ་བླུད་པའམ། །ཨ་ས་ན་སྩོགས་བསྐོལ་བ་བླུད། །ཁུ་ཁྲག་མདུད་འདྲ་པ་ལ་ཤའི། །ཐལ་བ་སྲུ་སྲུའི་རྩ་བས་ཕན། །རང་འདྲ་པ་རུ་ཤ་ཀ་དང༌། ནྱ་གྲོ་དྷ་སྩོགས་བསྐོལ་བ་བླུད། །ཁུ་བ་ཟད་ལ་རོ་ཙའི་དཔྱད། །བཤང་འདྲ་སློན་ཁྲུས་ཤིང་ཀུན་དང༌། །པུ་ཤེལ་རྩི་ཏྲ་ཀ་བསྐོལ་བླུད། །ཟླ་མཚན་མདུད་འདྲ་པ་ཐ་དང༌། །ཚ་གསུམ་དུག་མོ་ཉུང་བསྐོལ་བླུད། །ཟླ་མཚན་རུལ་དང་རང་འདྲ་ལ། །ཙནྡན་བླུད་བྱ་ཕྱིས་བཤད་པའི། །གསང་བའི་ནད་གསོར་བཤད་ཀུན་དང༌། །འཇམ་རྩིར་བཅས་པ་གང་ཡིན་བྱ། །ཁུ་བ་དཀར་ཞིང་ལྕི་བ་དང༌། །དམར་དང་བསྐ་དང་མང་བ་དང༌། །མར་དང་སྦྲང་རྩི་ཏིལ་མར་འདྲ། །མངལ་དུ་ལེགས་ཆགས་ཟླ་མཚན་ཡང༌། །རྒྱ་སྐྱེགས་ཁུ་བ་རི་བོང་ཁྲག །འདྲ་ཞིང་བསྐྲུས་ན་དག་འགྱུར་
བཟང༌། །ཁུ་ཁྲག་སྐྱོན་མེད་ནད་མེད་ཅིང༌། །ཕན་ཚུན་དུ་ནི་ཆགས་པ་དང༌། །རོ་ཙའི་སྣུམ་གྱིས་བརྟས་པ་དང༌། སྦྱང་བ་བྱས་ཤིང་འཇམ་རྩི་བཏང༌། །མཆོག་ཏུ་སྐྱེས་པ་འོ་མ་མར། །མངར་བའི་སྨན་གྱིས་བརྟ་བར་བྱ། །བུད་མེད་ཏིལ་མར་ཤ་དག་ནི། །མཁྲིས་པ་སྐྱེད་པ་ཉེ་བར་སྤྱད། །བུད་མེད་ཉམ་ཆུང་བཞིན་རས་དང༌། ནུ་མ་རྐེད་པ་འགུལ་བ་དང༌། །མིག་དང་དཀུ་གཡོ་སྐྱེས་པ་འདོད། །ཟླ་མཚན་ལྡན་པར་ཤེས་པར་བྱ། །དཔེར་ན་ཉི་མ་ནུབ་པ་ན། །པདྨའི་ཁ་ནི་ཟུམ་པར་འགྱུར། །དེ་བཞིན་ཟླ་མཚན་དུས་འདས་པའི། །མངལ་ནི་ཁུ་བ་ལེན་མི་འགྱུར། །ཟླ་བ་གཅིག་ཏུ་བསགས་པའི་ཁྲག །རྩ་ཆེན་གཉིས་ལས་དུས་སུ་ནི། །ཅུང་ཟད་གནག་ཅིང་དྲི་བྲལ་བ། །རླུང་གིས་མངལ་གྱི་སྒོ་རུ་འབྱིན། །དེ་ནས་ཟླ་མཚན་མཐོང་ཉིད་ནས། །ཞག་གསུམ་པར་དུ་སེམས་དགེ་བསམ། །རྒྱན་དང་ཁྲུས་ནི་སྤང་བ་དང༌། །ཀུ་ཤའི་སྟན་ལ་ཉལ་བར་བྱ། །ནས་ཐུག་འོ་མར་བཙོས་ཉུང་ཟད། །བླུད་ཅིང་ལྟོ་སྦྱང་ཉམས་སྨད་བྱ། །ལོ་མའམ་རྫ་སྐྱོགས་ལེགས་པར་ནི། །བཟའ་ཞིང་འཁྲིག་པ་སྤང་བར་བྱ། །དེ་ནས་ཞག་ནི་བཞི་པ་ལ། །ཁྲུས་བྱས་གོས་ཕྲེང་དཀར་ཞིང་གཙང། །ཕ་དང་འདྲ་བའི་བུ་འདོད་ཅིང༌། །མདུན་དུ་ཁྱོ་ནི་བལྟ་བར་བྱ། །ཟླ་མཚན་ཞག་ནི་བཅུ་གཉིས་དུས། །དེ་ལས་དང་པོའི་ཞག་གསུམ་དང༌། །བཅུ་གཅིག་པ་སྨད་ཚེས་ཟུང་ལ། །བུར་འགྱུར་གཞན་དུ་བུ་མོར་འགྱུར། །དེ་ནས་བུ་ཕྱིར་སློབ་དཔོན་གྱིས། །ཆོ་ག་ཆོ་ག་བཞིན་བྱས་ལ། །དམངས་རིགས་ཕྱག་འཚལ་ལ་བརྩོན་པས། །སྔགས་ཀྱིས་བྱ་བ་མེད་པར་བྱ། །དེ་ལྟར་འདོད་སྤྱོད་དོན་ལྡན་ཞིང༌། །ཡིད་ལ་འདོད་པའི་བུ་སྐྱེད་འགྱུར། །བུ་འདོད་བཟའ་བྲན་དབེན་པར་ནི། །འདོད་སྤྱད་བྱ་ཞེས་དམ་པ་སྨྲ། །གཞན་དུ་རིགས་བཟང་ལས་ཀྱང་ནི། །བུ་ངན་རིགས་སྲེག་མེ་འདྲར་འགྱུར། །ཇི་ལྟ་བ་ཡི་བུ་འདོད་པ། །དེ་ཡི་ཚལ་དུ་དེ་ཡིས་སྤྱད། །ཡུལ་དེའི་སྐྱེ་བོའི་སྤྱོད་པ་དང༌། །དེ་ཡི་ཡོ་བྱད་ལ་བསམ་བྱ། །ལས་མཐར་སྐྱེས་པས་ཞུན་མར་དང༌། །འོ་མ་འབྲས་ཆན་བཅས་པ་བཟའ། །སྐར་
མཁན་ལུང་གིས་མལ་ཁྲིར་ནི། །སྐྱེས་པ་དང་པོ་རྐང་གཡས་ཀྱིས། །འཛེག་བྱ་བུད་མེད་གཡོན་གྱིས་འཛེག །དེ་ཡི་གཡས་ལོགས་ངག་ཏུ་ཉལ། །ཏིལ་མར་མོན་སྲན་གྲེའུ་སྦྱར་བཟའ། །དེར་ནི་སྔགས་ཀྱི་ཚིག་བརྗོད་བྱ། །ཨ་ཧི་ར་སི། །ཨ་ཡུ་ར་སི། སརྦ་ཏཿཔྲ་ཏིཥྛ་སི་དྷ་ཏྭ་དྷ་ཏུ། །བི་དྷ་བ་ཏྭ། བ་དྷ་དུ། བྲཧྨ་བརྩ་ས་བྷ་བ་ཞེས་བྱའོ། །ཚངས་པ་ཕུར་བུ་ཁྱབ་འཇུག་དང༌། །ཉི་ཟླ་ཐ་སྐར་བུ་གཉིས་དང༌། ལེགས་ལྡན་མཛའ་བོ་ཆུ་ལྷ་རྣམས། །བདག་ལ་དཔའ་བའི་བུ་སྩོལ་ཅིག །དེ་ནས་ཕན་ཚུན་སྤྲོ་བསྐྱེད་དེ། །དགའ་དང་བཅས་པས་གནས་པར་བྱ། །བུད་མེད་དེར་སེམས་གན་རྐྱལ་གནས། །ཡན་ལག་ལེགས་པར་གནས་འདུག་བྱ། །དེ་ལྟར་ཉེས་པ་རང་གནས་འདུག །ས་བོན་ལེགས་པར་འཛིན་པར་འགྱུར། །འཕྲལ་དུ་མངལ་ཆགས་མཚན་མ་ནི། །མངལ་དུ་ས་བོན་འཛིན་པ་དང༌། །འདོད་ངོམས་ལྕི་དང་གཡོ་བ་དང༌། ཁྲག་དང་ཁུ་བ་རྗེས་འདྲེས་དང༌། སྙིང་འཕར་བ་དང་སྙོམ་པ་དང༌། །སྐོམ་དང་རྨྱ་དང་བ་སྤུ་ལྡང༌། །ཟླ་བ་དང་པོ་མིག་གསལ་ཞལ་།བདུན་ནས་ནུར་ནུར་པོ་རུ་འགྱུར། །འདི་ནི་མངལ་གྱི་བུ་སྐྱེས་པ། །གསལ་བར་མ་གྱུར་གོང་དུ་བྱ། །སྐྱེས་བུ་བྱེད་པ་འདི་སྟོབས་ལྡན། །ལས་ཀྱང་ཟིལ་གྱིས་གནོན་པར་ནུས། །སྐར་མ་རྒྱལ་སྐྱེས་བུ་ཡི་གཟུགས། །གསེར་རམ་དངུལ་ལམ་ལྕགས་ལས་བྱས། །མེ་མདོག་འགྱུར་བསྲེགས་འོ་མར་བཅུག །དེ་ནི་སྙིམ་གང་བླུད་པར་བྱ་།ཡང་ན་གོ་ར་དནད་དང༌། །ཨ་པ་མརྒ་ཛི་བ་ཀ །ཟངས་རྩི་བ་དང་ཤེཪྻ་ཀ །གཅིག་གམ་གཉིས་སམ་གསུམ་ཞིག་གམ། །ཐམས་ཅད་ཆུ་ལ་བཏབ་པ་ནི། །སྐར་རྒྱལ་ལ་བབ་ཚེ་བླུད། །བྲི་ཧ་ཏི་ནི་དཀར་པོའི་རྩ། །འོ་མར་བཏབ་པ་རང་ཉིད་ཀྱིས། །བུ་འདོད་སྣ་ཁུང་གཡས་པར་བླུགས། །བུ་མོ་འདོད་ན་གཡོན་པར་བླུགས། །ལག་སྨ་ནའི་རྩ་འོ་མར་སྦྱར། །བུ་སྐྱེད་གནས་པ་རབ་སྟེར་བྱེད། །དེ་བཞིན་ནྱ་གྲོའི་མྱུར་གུ་བརྒྱད། །སྦྱར་བ་སྣ་འམ་ཁ་ནས་བཏུང༌། །འཚོར་བྱེད་ཀྱི་ནི་སྨན་སྡེ་རྣམས། །ཕྱི་དང་ནང་ནས་ཉེ་བར་
སྦྱར། །མངལ་འཛིན་ཡོད་འོང་ཕན་པ་ཡི། །ཁྱོ་དང་འཁོར་གྱིས་བསྙེན་བཀུར་བྱ། །མར་གསར་ཞུན་མར་འོ་མ་རྣམས། །རྟག་ཏུ་དེ་ལ་བླུད་པར་བྱ། །ཉལ་པོ་དྲགས་དང་རྩོལ་དྲགས་དང༌། །ཁུར་དང་གོས་ནི་ལྕི་བ་དང༌། །ཉིན་ཉལ་ནུབ་མོ་གཉིད་མི་ལོག །སྟན་སྲབ་ཙོག་པུར་འདུག་པ་དང༌། །མྱ་ངན་ཁྲོ་དང་འཇིགས་དང་སྐྱོ། །ཤུགས་དང་སྲེད་པ་དགག་པ་དང༌། སྨྱུང་བ་ལམ་འགྲོ་རྣོ་དང་ཚ། །ལྕི་དང་བཤང་འགགས་ཟན་ཟ་དང༌། །གོས་དམར་གྱོན་དང་གཡང་ས་དང༌། །ཁྲོན་ལྟ་ཤ་ཟ་ཆང་འཐུངས་དང༌། །གན་རྐྱལ་ཉལ་དང་བུད་མེད་དང༌། མི་འདོད་གང་ཡིན་དེ་ཀུན་སྤང༌། །དེ་བཞིན་གཏར་ག་གདབ་སློན་ཁྲུས། །མས་གཏོར་ཟླ་བརྒྱད་བར་མི་བྱ། །འདི་དག་གིས་ནི་མངལ་འཇིག་པའམ། །དཀུ་སྐམས་པའམ་འཆི་བར་འགྱུར། །རླུང་ནི་སྐྱེད་པར་བྱེད་པས་མངལ། །སྒུར་པོ་འོན་ལོང་མི་ཐུང་འགྱུར། །མཁྲིས་པ་ཅན་གྱིས་སྤྱི་ཐེར་སེར། །བད་ཀན་ཤ་བཀྲ་སྐྱ་རྦབ་འགྱུར། ནད་གཞན་འཇམ་ཞིང་བདེ་བ་དང༌། །རྣོན་པོ་མ་ཡིན་སྨན་གྱིས་གསོ། །ནུར་ནུར་པོ་ལས་ཟླ་གཉིས་བར། །གོར་གོར་མེར་མེར་ནར་ནར་པོ། །དེ་ལས་ཕོ་མོ་མ་ནིང་རིམ། །དེ་ནས་གསལ་འགྱུར་མཚན་མ་ནི། །རིད་ཅིང་དཀུ་ནི་ལྕི་བ་དང་རྒྱལ་སྐྱུགས་ཡིག་འཆུས་པ་དང༌། །གླལ་དང་མཆིལ་མང་སྙོམ་བག་དང༌། །སྤུ་ཡི་ཕྲེང་བ་གསལ་བ་དང༌། །སྐྱུར་ལ་དགའ་ཞིང་ནུ་མ་རྒྱས། །ནུ་ཞོར་བཅས་ཤིང་རྩེ་མོ་གནག །རྐང་པ་སྐྲངས་ཤིང་ཁ་ཟས་ཚ། །སྲེད་པ་སྣ་ཚོགས་ཉིད་དུ་འགྱུར། །འདི་ཡི་སྙིང་ནི་མ་ལས་སྐྱེས། །མ་ཡི་སྙིང་ཡང་དེ་ཡང་ནི། །འབྲེལ་པས་དེ་ཕྱིར་སྦྲུམ་མ་ནི། །སྲེད་པ་དགག་པར་མི་བྱའོ། །དེ་ལ་གནོད་པར་འགྱུར་པའང༌། །ཕན་དང་བསྲེས་ཏེ་ཅུང་ཟད་སྦྱིན། །སྲེད་པ་བཀག་ན་མངལ་གྱི་བུ། །མི་སྡུག་པའམ་འཇིག་པར་འགྱུར། །ཟླ་བ་གསུམ་པར་དེ་ཡི་ལུས། །མགོ་བོ་དཔྱི་གཉིས་དཔུང་པ་གཉིས། ཡན་ལག་ལྔ་ནི་གསལ་དོད་འགྱུར། །ཡན་ལག་ཕྲ་མོ་རྣམས་ཀྱང་འབྱུང༌། །མགོ་བོ་སོགས་དང་ཆ་མཉམ་དུ། །བདེ་དང་
སྡུག་བསྔལ་ཤེས་པ་འབྱུང༌། །མངལ་གནས་ལྟེ་བ་མ་ཡི་ནི། །སྙིང་གི་རྩ་དང་འབྲེལ་བའི་ཕྱིར། །དེ་ཡིས་དེ་ནི་འཕེལ་འགྱུར་ཏེ། །ཞིང་གི་གྱུར་བ་དག་དང་མཚུངས། །བཞི་པར་ཡན་ལག་གསལ་དོད་འགྱུར། །ལྡ་པར་སེམས་ནི་གསལ་བར་འགྱུར། །དྲུག་པར་ཆུ་བ་རྩ་དང་སྤུ། །སེན་མོ་པགས་པ་མདོག་སྟོབས་འགྱུར། །བདུན་པར་དངོས་པོ་ཐམས་ཅད་ཀྱིས། །ཡན་ལག་ཀུན་ནི་རྫོགས་པར་འགྱུར། །མངལ་གནས་ནད་ཀྱིས་ཉེར་གཟིར་ན། །དེ་ཚེ་སྙིང་དང་འབྲེལ་པའི་ཕྱིར། །གཡའ་དང་ཚ་བར་བྱེད་པ་དང༌། །པགས་གས་རྨ་ཕྲན་འབྱུང་བར་འགྱུར། །དེར་ནི་མར་སར་རྒྱ་ཤུག་ཆུ། །མངར་བའི་སྨན་སྡེ་བསྐོལ་བ་ཕན། །ལན་ཚྭ་ཉུང་ཞིང་སྣུམ་བག་ཅན། །ཡང་ཞིང་མངར་བའི་ཁ་ཟས་བཟའ། །ཙནྡན་པུ་ཤེལ་རྩིའི་ལྡེ་གུས། །བྲང་དང་ནུ་མ་ལྟོ་ལ་བསྐུ། །འབྲས་བུ་གསུམ་པའམ་ཨེ་ནེ་ཡ། །ཤ་བཀྲ་རི་བོང་ཁྲག་སྦྱར་བསྐུ། །ཀ་ར་བཱི་རའི་ལོ་མ་དང༌། །ཏིལ་མར་བསྐོལ་བས་བསྐུས་ཏེ་མཉེ། །པ་ཏོ་ལ་དང་ནིམ་པ་བཙོད། །བྱེའུ་རུག་གིས་ཀྱང་བསྐུ་བར་བྱ། །སྐྱེར་པ་ཤིང་མངར་ཆུ་ཡིས་ནི། །བཀྲུ་དང་བསྐུ་བ་བསྟེན་པར་བྱ། །ཟླ་བ་བརྒྱད་པར་མ་དང་བུ། །ཐང་རེ་རིམ་གྱིས་གཟི་མདངས་འཕོ། །དེ་ཡིས་དེ་གཉིས་ཞུམ་དགར་འགྱུར། །བྱིས་མདངས་མ་ལ་མི་གནས་པས། །དེ་ཚེ་བཙས་ན་མི་འཚོ་ལ། །བུད་མེད་ཐེ་ཚོམ་བཅས་སྐབས་འགྱུར། །འདིར་ནིའོ་མ་ཅན་བླུད་ཅིང༌། །མངར་བའི་སྨན་དང་བསྐོལ་བ་ཡི། །མར་གྱི་འཇམ་རྩི་གཏང་བྱ་ཞིང༌། །ཕྱིས་རྙིང་པ་དག་བྱ་བའི་ཕྱིར། །ལ་ཕུག་སྐམ་དང་རྒྱ་ཤུག་སྐྱུར། །བསྐ་བ་དང་ནི་བསྐོལ་བ་བསྔགས། །ཤ་ཏ་པུཥྤའི་ལྡེ་གུ་ནི། །རྒྱམ་ཚ་ཏིལ་མར་འཇམ་རྩི་གཏང༌། །དེ་ཚེ་ཞག་གཅིག་འདས་པ་ནའང༌། །དུས་སུ་བཙས་ཡིན་དེ་ཕན་ཆད། །རླུང་གིས་དཀུར་ནི་བཀག་གྱུར་ན། །ལོ་ཡི་བར་དུ་གནོད་པ་སྐྱེད། །ཟླ་དགུ་ལོན་ན་སྣུམ་བཅས་པའི། །འབྲས་ཆན་ཤ་ཁུ་བླུད་པ་བསྔགས། སྣུམ་མང་ནས་ཐུག་སྦྱིན་པའམ། །སྔར་བཤད་པ་ཡི་འཇམ་རྩི་གཏང༌། །དེ་
ཉིད་ལ་བཅུག་རས་བལ་ནི། །མཚན་མར་རྟག་ཏུ་གཞུག་པར་བྱ། །རླུང་འཇོམས་ལོ་མ་བསྐོལ་བའི་ཆུ། །བསྒྲངས་པས་ཉིན་རེ་བཀྲུས་པ་ཕན། །ཟླ་དགུ་ཕན་ཆད་ལུས་ལ་ནི། །སྣུམ་མེད་པར་ནི་མི་གཞག་གོ །ནུ་ཞོ་གཡས་པ་སྔར་བྱུང་ཞིང༌། །གཡས་ལོགས་ལ་ནི་བརྟེན་པ་དང༌། །འདྲི་ཚིག་སྐྱེས་པའི་མིང་ཅན་སྨྲ། །དགའ་ཞིང་རྨི་ལམ་སྐྱེས་པ་མཐོང༌། །དཀུ་ནི་གཡས་པ་མཐོ་བ་དང༌། །མངལ་ཡང་ཀུན་ནས་ཟླུམ་པ་དག །བུ་སྐྱེ་གཞན་དུ་བུ་མོར་འགྱུར། །གང་ཡང་སྐྱེས་པ་ཕྲད་འདོད་དང༌། །གླུ་གར་རོལ་མོ་ལ་དགའ་དང༌། དྲི་དང་ཕྲེང་ཆགས་བུ་མོར་སྐྱེ་།དེ་འདྲེས་པས་ནི་མ་ནིང་འགྱུར། །དཀུ་ཡི་དབུས་ནི་མཐོ་བ་ཡིན། །མཚེ་མ་ལོགས་གཉིས་མཐོ་བས་ན། །ལྟེ་བ་དམའ་བར་འདུག་པ་ཡིན། །དགུ་བའི་དང་པོ་ནས་བརྩམས་ཏེ། །ས་ཕྱོགས་ཤིས་ཤིང་ཡོ་བྱད་ནི། །ཕུན་ཚོགས་ལྡན་པར་དགེ་བའི་ཞག །དེ་ནི་བཙས་ཁྱིམ་ཞུགས་པར་བྱའོ། །དེར་ནི་བུད་མེད་བཙའ་མྱོང་བས། །བསྐོར་ཏེ་བཙའ་བའི་དུས་བར་བསྡད། །དེང་དམ་སང་ནི་བུ་བཙས་རྟགས། །སྙོམ་ཞིང་དཀུ་དང་མིག་ལྷོད་དུབ། །སྨད་དུ་ལྕི་ཞིང་ཡི་ག་འཆུས། །མཆིལ་མ་མང་ཞིང་གཅིན་མང་འབྱུང༌། །བརླ་དང་རྐེད་པ་ལྟོ་དང་རྒྱབ། །སྙིང་དང་ཆུ་སོ་བརླ་རྩ་ན། །མཚན་བྱེ་ན་ཞིང་ཟུག་པ་དང༌། །འགུལ་ཞིང་འཛག་པར་འགྱུར་བ་ཡིན། །རང་དབང་མེད་གྱུར་རྗེས་སུ་ནི། །དེ་འོག་མངལ་གྱི་ཆུ་འཛག་འགྱུར། །དེ་ནས་མངལ་ནས་ལས་བྱུང་རྩོམ། །བཀྲ་ཤིས་བསྲུང་བའི་ཆོ་ག་བྱས། །ལག་པར་འབྲས་བུ་སྐྱེས་མིང་གཞག །ལེགས་བསྐུས་ཆུ་ནི་དྲོན་མོ་བླུགས། །མར་དང་བཅས་པའི་ཐུག་པ་བླུད། །དེ་འོག་ས་ལ་མལ་བཅས་འདུག །བརླ་གཉིས་བཀུག་སྟེ་གན་རྐྱལ་གནས། །ཡན་ལག་ཡང་ནས་ཡང་དུ་བསྐུ། །ལྟེ་བ་མན་ཆད་མཉེ་བྱ་ཞིང༌། །གླལ་དང་འཆག་པ་བྱེད་དུ་གཞུག །དེ་ལྟས་མངལ་གནས་ཐུར་དུ་འབྱུང༌། །དེ་རྟགས་སྙིང་ག་ལས་འཕོས་ནས། །མངལ་གནས་ལྟོ་བར་ཞུགས་ནས་ནི། །ཆུ་སོའི་སྟེང་ན་གནས་པར་འགྱུར། །དེ་ནས་དབང་མེད་ནད་ལྡང་སྟེ། །མྱུར་དུ་ཁྲི་ལ་
གཞག་པར་བྱ། །དེ་འོག་མངལ་གནས་ལེགས་བཙིར་ནས། །དེ་ཡི་མཚན་ནི་དབྱེ་བར་བྱ། །དང་པོར་དལ་གྱིས་བཙིར་བྱ་ཞིང༌། །བཙའ་ཁར་དྲག་ཏུ་བཙིར་བར་བྱ། །དེ་ནས་བུ་སྐྱེའི་སྒྲ་དང་ནི། །ཆུ་དང་རླུང་གིས་དགའ་བ་སྐྱེད། །བཙའ་བའི་ནད་ཀྱིས་གཟིར་བ་ཡི། །སྲེག་བྲལ་འདྲ་བ་སླར་གསོ་བྱ། །མངལ་དུ་ཐོགས་ན་སྤྲུལ་ནག་པོའི། །པགས་པས་མོ་མཚན་བདུག་པར་བྱ། །བྱ་རྞུའི་མེ་ཏོག་རྩ་བའམ། །ལྕམ་པའམ་ཡང་ན་བྱི་ཤ་ལྱ། །རྐང་བའམ་ལག་པར་གདགས་པར་བྱ། །ཤ་མ་དབྱུང་བའི་ཕྱིར་ཡང་ནི། །དེ་དག་ཉིད་བྱ་དེ་ནས་བཏེག །དཔུང་པ་གཉིས་ནས་བཟུང་སྟེ་སྦྲུག །རྟིང་པས་མཇུག་ཏོ་རྡེག་པ་དང༌། །རྐུབ་ཚོས་དམ་དུ་བཙིར་པར་བྱ། །སྐྲ་ཡིས་ལྐོག་མ་རྐན་རེག་བྱ། །སྣུ་ཧའི་འོ་མ་སྤྱི་པོར་བླུགས། །སྟག་པ་ཀུ་བ་ལངྐ་ལི། །སྦྲུལ་ལྤགས་རུ་རྟ་ཡུངས་ཀར་རྣམས། །རེ་རེ་འམ་གཉིས་སམ་མ་ལུས་པས། །མོ་མཚན་བྱུག་པའམ་བདག་པར་བྱ། །རུ་རྟའམ་བལ་བུའི་ལྡེ་གུ་ནི། །ཆང་དངས་དང་ནི་བླུག་པར་བྱ། །ཀུ་ལངྠ་འམ་བལ་བ་ཛ། །ཆང་རྙིངས་དག་ལ་བཏབ་སྟེ་བླུད། །ཤུ་ཏི་ཉུངས་ཀར་ཟི་ར་དང༌། །ཤི་ཀྲུ་ཏིག་སྣ་ཀྲུ་དྲུག་ཏྲེས། །ཤིང་ཀུན་རུ་རྟ་པོ་སོན་ཆ། །འོ་མ་བ་གཅིན་ཡུངས་མར་དང༌། །བསྐོལ་བ་བཤང་བའི་སྒོའམ་ནི། །མོ་མཚན་ནས་ནི་འཇམ་རྩི་བཏང༌། །ཤུ་ཏི་ཤུ་དག་རུ་རྟ་དང༌། །ཡུངས་ཀར་པི་པི་ལིང་ལྡེ་གུ། །སྣུམ་དང་ལན་ཚྭར་བཅས་པ་ཡི། །མས་གཏོང་ཤ་མ་མྱུར་དུ་འབྱིན། །དེར་ཐོགས་རྒྱུ་ནི་རླུང་ཡིན་ཏེ། །དེ་བཅོམ་ཤ་མ་མྱུར་དུ་འབྱུང༌། །ཡང་ན་ལག་བཀྲུས་སོར་མོ་བྲེགས། །མཁས་པ་ཡིས་ནི་དྲངས་ཏེ་དབྱུང༌། །ཤ་མ་བྱུང་ན་མོ་མཚན་དང༌། །ཡན་ལག་ཏིལ་མར་གྱིས་བྱུགས་མཉེ། །མངལ་ནད་གཟེར་ནི་ཆུ་སོ་མགོ །ལྟོ་བ་གཟེར་ལ་ཐལ་སྨན་ནི། །རྣོན་པོ་ཞིབ་ཏུ་བཏགས་པ་དག །མར་རམ་ཆུ་ཚན་སྦྱར་བ་བླུད། །འུ་སུ་བསྐོལ་ཆུ་བུ་རམ་དང༌། །ཚ་གསུམ་དྲི་བཟངས་གསུམ་བཏབ་བླུད། །དེ་ནས་བྱིས་པའི་ཉེར་སྤྱོད་ཀྱིས། །བྱིས་པ་མ་མས་སྐྱོང་དུ་གཞུག །བུ་བརྩས་བཀྲེས་ཡོད་ཏིལ་མར་དང༌། །མར་ལས་ཚད་
ཆེན་བླུད་བྱ་བ། །ཚ་བ་ལྔ་ཕྱེ་རན་བཏབ་སྦྱིན། །དེ་འོག་བུ་རམ་ཆུ་དྲོན་ནམ། །རླུང་འཇོམས་སྨན་བསྐོལ་ཆུ་བླུད་དེ། །དེས་ནི་རླུང་ནད་ལྡང་མི་འགྱུར། །ཁྲག་ངན་དག་ཀྱང་དག་པར་བྱེད། །རིམ་འདི་ཞག་ནི་གཉིས་གསུམ་བྱ། །སྣུམ་མི་འཕྲོད་ལ་ཆོ་ག་འདི། །སྣུམ་མེད་པར་ནི་བསྟེན་པར་བྱ། །འཐུངས་ནས་ལྟོ་བ་ཏིལ་མར་དང༌། །མར་བསྐུས་ནས་ནི་གོས་ཀྱིས་དཀྲི། །ཞུ་ནས་ཁྲུས་བྱས་ཐུག་པ་ནི། །སྔར་བཤད་སྨན་དང་བསྐོལ་བ་བླུད། །ཞག་གསུམ་ཕན་ཆད་བི་ད་རི། །ལ་སྩོགས་སྨན་སྡེའི་ཁུ་བར་བསྐོལ། །ནས་ཐུག་ཕན་ཞིང་སྣུམ་མང་བའམ། །གོམས་པའི་དབང་ལས་འོ་ཐུག་བླུད། །ཞག་བདུན་ཕན་ཆད་དེ་ལ་ནི། །རིམ་གྱིས་བརྟ་བའི་ཆོ་ག་ཕན། །ཞག་ནི་བཅུ་གཉིས་མ་ལོན་པར། །ཤ་ནི་སྦྱིན་པར་མི་བྱའོ། །མངལ་དུ་འཕེལ་དང་བཙས་པའི་ནད། །གཤེར་དང་ཁྲག་འཛག་བཙིར་བ་ཡིས། །ནད་དེ་གསོ་དཀའ་ཡིན་པའི་ཕྱིར། །བཙས་ཚེ་འབད་དེ་རིམ་གྲོ་བྱ། །དེ་ལྟར་ཟླ་བ་ཕྱེད་དང་གཉིས། །ཁ་ཟས་བསྡམས་སྩོགས་དང་བྲལ་ནས། །བཙས་པའི་མིང་དང་བྲལ་བའམ། །ཟླ་མཚན་བྱུང་བར་གྱུར་བར་དུའོ། །ཡན་ལག་བརྒྱད་པའི་སྙིང་པོ་བསྡུས་པ་ལས། །ལུས་ཀྱི་གནས་ཀྱི་ལེའུ་དང་པོའོ།། །།དེ་ནས་ལུས་ཀྱི་རུམ་དུ་ཞུགས་པའི་ནད་ཀྱི་བྱེ་བྲག་བཤད་པར་བྱའོ། །སྦྲུམ་མས་སྤང་བར་བྱ་བ་དག །བསྟེན་པའམ་ནད་ཀྱི་དབང་ལས་ནི། །ཟླ་མཚན་བྱུང་བའམ་གཟེར་ཞིང་ན། །ཕྱི་ནང་སྣུམ་དང་བསིལ་ཐབས་བྱ། ཨུཪྴི་པདྨ་ཙནྡན་དང༌། །འོ་མ་ཅན་ཤིང་ཤུན་པ་ཡི། །ལྡེ་གུར་མར་ནི་བསྐུ་བ་དང༌། །རས་བལ་སྦངས་པ་བཤང་སྒོ་དང༌། །མོ་མཚན་གཉིས་སུ་ཐེམ་བུར་གཞུག །ལན་བརྒྱར་བཀྲུས་པའི་མར་གྱིས་ནི། །བསྐུ་བའམ་བུད་མེད་དེ་ཡི་ལུས། །ཨུཪྴི་ར་སྩོགས་ཆུ་ནང་གཞུག །ཁ་ར་སྦྲང་རྩི་ཀུ་མུ་ཏ། །པདྨ་ཨུཏྲལ་གེ་སར་ནི། །འོ་མའི་མར་སྦྱར་ཀ་ཤེ་རུ། །ཤྀངྒ་ཏ་ཀ་སྦྱིན་བར་བྱ། །གནྡྷ་པྲི་ཡང་ཀུ་དང་ནི། །ཆུ་སྐྱེས་རྣམས་ཀྱི་རྩ་བ་དང༌། །ཨུ་དུ་མྦའ་ར་གཞོན་ནུ་དང༌། །ལྡན་པའི་འོ་མ་སྐོམ་དུ་བླུད། །སཱ་ལུའི་རྩ་བ་ཀ་ཀོ་ལ། །བ་ལ་གཉིས་
དང་ཤིང་མངར་དང༌། །བུ་རམ་ཤིང་དང་བསྐོལ་བ་ཡི། །འོ་མ་སཱ་ལུ་རྩ་སྣར་ཆན། །སྦྲང་རྩི་ཁ་རར་བཅས་པ་ནི། །སྐམ་སའི་ཤ་ཁུ་ལྡན་པར་བཟའ། །བཀྲུ་སྨན་མ་གཏོགས་ཁྲག་མཁྲིས་ཀྱི། །གསོ་དཔྱད་བཤད་པ་ཐམས་ཅད་བྱ། །ཟླ་གསུམ་མ་ཚང་བར་དུ་ནི། །ཁྲག་དགག་ཕྱིར་ནི་འབད་པར་བྱ། །བེའུ་སྣབས་ལྡན་པའང་དགག་པར་བྱ། །དེར་ནི་བསིལ་པན་རྩུབ་པ་དང༌། །སྨྱུང་དང་གླ་སྒང་ཨུཪྴིར། །སླེ་ཏྲེས་འུ་སུ་ཨ་རལ། །བྱི་ཚེར་དང་ནི་པ་རྦ་ཏ། །ཙནྡན་བ་ལ་བོང་ང་དཀར། །བསྐོལ་བའི་ཆུ་ནི་བླུད་པར་བྱ། །རྩ་འབྲུ་ལས་གཡོས་ཟས་སྦྱིན་དང༌། །མུངྒ་སོགས་ཁུས་བེའུ་སྣབས་ནི། །བསལ་ལ་སྣུམ་སྩོགས་སྔོན་བཞིན་གཏང༌། །མངལ་ནི་རྣམ་པར་འཇིག་གྱུར་ན། །མངལ་ནང་དག་པར་བྱ་ཕྱིར་དང༌། །ནད་ཀྱིས་གཟིར་བ་མི་དྲན་ཕྱིར། །ཆང་རྣོ་ཅི་ནུས་བཏུང་བར་བྱ། །དེ་ནས་རྩ་བ་ལྔ་པོ་ནི། །ཆུང་ངུའི་ཐུག་པ་རྩུབ་དེ་བླུད། །ཆང་མི་འཐུངས་ལ་ཐུག་པ་ནི། །ཚ་བ་ལྡ་དང་བསྐོལ་བ་དང༌། །བིལ་བ་ལ་སོགས་ལྡ་དད་བསྐོལ། །ཏིལ་དང་རྩ་འབྲུ་ཆན་སྦྱིན་བྱ། །ཟླ་བ་དང་མཉམ་ཉིན་ཞག་རིམ། །མངལ་འཇིག་པ་ལ་ཐུག་སྩོགས་སྦྱིན། །ཡང་ཞིང་སྣུམ་དང་ལན་ཚྭ་མེད། །དྲོད་བསྐྱེད་ལྡན་ལ་ཕན་པ་ཡིན། །ནད་དང་ལུས་ཟུངས་ལྗན་ལྗིན་ནི། །སྐམ་ཕྱིར་ཆོ་ག་འདི་བྱའོ། །དེ་ཕན་ཆད་ཟས་སྣུམ་འཇམ་རྩི། །སྟོབས་སྐྱེད་འཚོ་བྱེད་སྦྱིན། །སྙིང་པོར་ལྡན་པས་ཆེར་སྐྱེས་ལ། །མོ་མཚན་ནས་ནི་ཁྲག་འཛག་པས། །མངལ་དུ་སྐྱེ་བར་མི་ནུས་ལ། །ལྟོ་ན་འགུལ་དང་བཅས་པར་གནས། །དེ་ནི་སོ་ན་གནས་ཤེས་བྱ། །དེས་ནི་ལྟོ་བ་རྒྱས་མི་འགྱུར། །མྱ་ངན་སྨྱུང་དང་རྩུབ་སོགས་སམ། །ཡང་ན་མངལ་ནས་ཁྲག་འཛག་པས། །མངལ་དུ་སྐྱེ་བར་མི་ནུས་ལ། །རླུང་འཁྲུག་སྐམ་ཞིང་བསྐམས་གྱུར་པའི། །མངལ་དེ་ཀླུ་ཡི་ལྟོ་ཞེས་བྱ། །འདིར་ནི་ལྟོ་བ་རྒྱས་གྱུར་ཡང༌། །འགྲིབ་ཅིང་ཡུན་རིངས་ལོན་ན་འཕར། །དེ་གཉིས་བརྟ་དང་རླུང་འཇོམས་སྨན། །མངར་བ་དག་དང་བསྐོལ་བ་ཡི། །མར་
དང་འོ་མ་ཚིམ་སྦྱིན་ཞིང༌། །སྐྱེས་མ་ཐག་པའི་ཤ་སྦྱིན་བྱ། །དེ་གཉིས་ཀྱིས་ནི་ཚིམ་བྱའི་ཕྱིར། །ཁྱོགས་དང་བཞོན་པར་བསྐྱོན་ཏེ་བསྐུལ། །སྔན་པོ་ཞེས་བྱ་མི་འགུལ་ལ། །ཁྲ་དང་བ་ལང་ཉ་ཤ་དང༌། །སྒྲ་སྒྲོགས་བྱ་དང་རྨ་བྱ་ཡི། །ཤ་ཁུ་མར་ནི་མང་པོ་དང༌། །མོན་སྲན་གྲེའུ་དག་དང་ནི། །ལ་ཕུག་དག་གི་ཁུ་བ་བླུད། །བིལ་བ་གཞོན་ནུ་མ་ཤ་ཏིལ། །ཕྱེ་དང་འོ་མ་སྦྱར་བ་བླུད། །ཚིལ་བཅས་ཤ་དང་སྦྲང་ཆང་སྦྱིན། །རྐེད་པ་བསྐུ་བ་བསྟེན་པར་བྱ། །དེ་ནི་རྟག་ཏུ་དགའ་བ་སྐྱེད། །དེ་འདྲས་མངལ་ནི་འཕེལ་བར་འགྱུར། །རྒྱས་པ་གཞན་དུ་ལོ་ཚང་ནས། །དཀའ་བས་བཙས་པའམ་སྐྱེ་མི་འགྱུར། །སྦྲུམ་མ་རྟུག་པ་འགགས་གྱུར་ན། །སྣུམ་མམ་མཐུན་པའི་འཇམ་རྩི་ཡིས། །མྱུར་བ་ཁོ་ནར་གསོ་བར་བྱ། །གཞན་དུ་སྦྲུམ་མ་བུ་བཙས་འཆི། །མངལ་དུ་ནང་རབ་བསགས་པས་སམ། །མི་མཐུན་པའམ་གནོད་གཞན་གྱིས། །ནང་དུ་ཤི་ན་ལྟོ་གྲང་ཞིང༌། །རེངས་དང་སྦོ་དང་ནད་ཚབས་ཆེ། །མངལ་མི་འགུལ་དང་མགོ་འཁོར་སྐོམ། །དབུགས་འབྱིན་དཀའ་ཞིང་དུབ་པ་དང༌། །དགའ་བ་མེད་ཅིང་མི་འགྱུར་དང༌། །དབང་མེད་ནད་ནི་མང་པོ་འབྱུང༌། །དེ་ལ་ཆུ་དྲོན་བླུགས་པ་དང༌། །བུ་རམ་སྤང་མ་ལན་ཚྭར་བཅས། །བཏགས་པས་མོ་མཚན་བསྐུ་བ་དང༌། །ཤལ་མ་ལི་དང་ཟར་མ་ཡ། །ཁུ་བ་མར་དང་ལྡེ་གུར་བྱས། །ནང་དུ་ཡང་དང་ཡང་དུ་གཞུག །སྔགས་དང་ཤ་མ་འབྱིན་སྦྱོར་བྱ། །གལ་ཏེ་བུ་ཤི་མ་བྱུང་ན། །དེ་ནས་སྨན་པས་རྒྱལ་པོ་ལ། །ཞུ་ལ་དེ་འབད་མྱུར་དུ་དབྱུང༌། །ཤལ་མ་ལི་ཡི་ཐང་ཆུ་མར། །ཁ་ཅས་པས་ལག་པ་མོ་མཚན་བསྐུ། །ལག་པས་དབྱུང་ནུས་དེ་ཉིད་ཀྱི། །ལུས་ནི་ལེགས་པར་མི་གནས་ན། །གཅུས་ཤིང་བསྒྱུར་དང་བཟློག་པ་དང༌། །བརྩིར་དང་འདེགས་གཞག་ལ་སྩོགས་ཀྱིས། །ལུགས་དང་མཐུན་པར་དྲངས་ནས་ནི། །མངལ་གྱི་སྒོར་ནི་དྲང་པོར་དྲང༌། །གང་ཞིག་རྐང་ལག་མགོ་བོ་ནི། །ཡོན་པོར་མངལ་དུ་གནས་གྱུར་དང༌། །རྐང་པ་གཅིག་ནི་མཚན་དུ་འབྱུང༌། །གཉིས་པ་བཤང་སྒོར་ཆུད་ཡོན་པོ། །དེ་ནི་འགགས་པ་
ཞེས་བྱ་སྟེ། །མཚོན་གྱིས་བཅད་པར་འོས་པ་ཡིན། །ལས་དེར་དཀྱིལ་འཁོར་སོར་གདུབ་ཅན། །གཙགས་བུ་གཉིས་ནི་བསྔགས་པ་ཡིན། །འཕེལ་གཙགས་རྩེ་མོ་རྣོ་བས་ནི། །མངལ་དུ་གཏང་བར་མི་བྱའོ། །དང་པོར་མགོ་བོའི་ཐོད་པ་ནི། །ཕྱེ་ལ་རྣམ་པར་དབྱུང་བར་བྱ། །དེ་ནས་མཆན་ཁུང་བྲང་ཀོས་ཀོ། །རྐན་གྱི་ཕྱོགས་ནི་གང་རུང་བར། །གཏང་དེ་མངལ་གྱི་ལྕགས་ཀྱུ་ནི། །བརྟན་པོ་དག་གིས་མཁས་བས་དྲང༌། །མགོ་བོ་མ་ཕྱེ་མིག་སྦུབས་དང༌། །མཁུར་ཚོས་ནས་ཀྱང་དྲང་བྱ་ཞིང༌། །ཕྲག་པ་ཐོགས་ན་དཔུང་བར་བཅད། །ལྟོ་བ་རླུང་གིས་སྦོས་གྱུར་པ། །ནང་གྲོལ་དབྲལ་ཏམ་རྒྱུ་མ་ནི། །ཕྱི་རོལ་དུ་ནི་བཏོན་ཏེ་དབྱུང༌། །རྐེད་པར་ཐོགས་ན་དེ་བཞིན་དུ། །དེ་ཡི་རུས་ཚིགས་དབྱེ་བར་བྱ། །རླུང་གི་དབང་གིས་ཡན་ལག་གང༌། །མངལ་དུ་ཐོགས་པ་དེ་དང་དེ། །དུམ་བུར་གཏུབས་ལ་ལེགས་ཕྱུང་སྟེ། །འབད་དེ་བུད་མེད་བསྲུང་བར་བྱ། །རླུང་ནི་རྣམ་པར་འཁྲུགས་གྱུར་པས། །མངལ་གྱི་གནས་སྐབས་སྣ་ཚོགས་བྱེད། །དེ་ཕྱིར་དེ་ནི་མཁས་པ་ཡིས། །གནས་སྐབས་དག་ནི་བལྟས་ཏེ་སྤྱད། །མ་དང་ལྷན་ཅིག་འཆི་འགྱུར་བས། །གསོན་པོ་མངལ་དུ་གཅད་མི་བྱ། །འཆི་བར་འགྱུར་བ་དག་ལ་ནི། །ཡུད་ཙམ་བཏང་སྙོམས་གཞག་མི་བྱ། །མོ་མཚན་འགགས་དང་ཉམས་པ་དང༌། །གཟེར་ནད་དབུགས་ཀྱིས་ཉམ་ཐག་དང༌། །སྒྲེགས་པ་མནམ་དང་ལུས་གྲང་བའི། །མངལ་དུ་བུ་ཤི་བུད་མེད་སྤང༌། །དེ་ནས་ཤ་མ་ཐོན་ན། །སྨན་པས་སྔོན་བཞིན་དབྱུང་བར་བྱ། །དེ་ལྟར་ཟུག་རྔུ་ཕྱུང་ནས་ནི། །ཆུ་དྲོན་གྱིས་ནི་བཀྲུ་བར་བྱ། །ལུས་ལ་སྣུམ་གྱིས་བྱུགས་པ་དང༌། །མཚན་དུ་རས་བལ་སྣུམ་ཅན་གཞུག །དེས་ནི་མོ་མཚན་འཇམ་འགྱུར་ཞིང༌། །དེ་ཡིས་གཟེར་བ་ཞི་བར་འགྱུར། །ལ་ལ་ཕུད་དང་བོང་བ་དཀར། །ར་སྣ་ཤིང་ཀུན་སུག་སྨེལ་དང༌། །ཚ་བ་ལྔ་ཡི་ཕྱེ་མ་སྣུམ། །སྦྱར་བའམ་ལྡེ་གུ་ཆུ་བསྐོལ་བླུད། །དེ་བཞིན་ནད་རྣམས་འཛག་པ་དང༌། །ཚོར་བ་ཞི་ཕྱིར་ཞག་གསུམ་ནི། །པུ་ཙེ་ཤེལ་དང་བོང་ང་དཀར། །བ་ཤ་ཀ་ཡི་ཤུན་པ་དང༌། །ཤིང་ཀུན་ཏེ་ཛོ་བ་ཏི་རྣམས། །བཏགས་པའི་ཕྱེ་མའམ་བསྐོལ་བ་བླུད། །དེ་ནས་ཞག་བདུན་བར་དུ་ནི། །
སྣུམ་ཉིད་ཉེ་བར་བཏུང་བར་བྱ། །དགོངས་ཀ་ཆང་ནི་རྙེད་པ་དང༌། །དེ་བཞིན་ལེགས་སྦྱར་ཆང་བཏུང་བྱ། །ཤིཪྴ་ཀ་ཀུ་བར་བསྐོལ་སྤངས། །རས་བལ་མོ་མཚན་ནང་དུ་གཞུག །བླ་བརྣན་གཞན་དག་གང་བྱུང་བ། །དེ་ལ་རང་གིས་གསོ་བས་གསོ། །རླུང་འཇོམས་སྨན་ནི་འོ་མར་བསྐོལ། །ཞག་བཅུའི་བར་དུ་བཟའ་བ་ཕན། ཞག་བཅུའི་བར་དུ་ཤ་ཁུ་བཏུང༌། །དེ་ཕན་ཆད་ནི་ཡང་ཞིང་ཕན། །ཉུང་དུ་བཟའ་ཞིང་སྣུམ་བསྐུ་དུགས། །བ་ལའི་ཏིལ་མར་ལ་སོགས་བསྟེན། །ཟླ་བ་བཞི་ལོན་ཕན་ཆད་དེ། །དེ་ནི་རིམ་གྱིས་ཅི་བདེར་སྤྱད། །བ་ལོའི་རྩ་བའི་ཁུ་བ་ནི། ཆ་དྲུག་འོ་མ་དེ་མཉམ་དང༌། །ནས་དང་རྒྱ་ཤུག་ཀུ་ལངྠ། །རྩ་བ་བཅུ་པའི་ཆ་གཅིག་དང༌། །བསྐོལ་བའི་ཆ་ནི་ཆར་བྱས་པའི། །ཏིལ་མར་ཆ་ནི་བཅུ་བཞི་དང༌། །མེད་གཉིས་དང་ཐང་ཤིང་བཅོད། །ར་མཉེ་བ་གཉིས་ཙནྡན་དང༌། །ཏལ་ཏྲེ་ས་རུ་རྟ་ཛོ་བ་ལ། །རྒྱ་སྤོས་རྒྱམ་ཚ་ཐངས་རྩི་བ། །གླ་སྒང་རྡོ་དྲེག་ཤུ་དག་དང༌། །བུ་རྞ་རྣ་བ་ཨ་ཀ་རུ། །ཨ་ཤྭ་གནྡྷ་ཉེ་ཤིང་དང༌། །ཀྵི་ར་ཀུ་ཤུ་ཤེན་མངར་དང༌། །བ་ལ་རས་ཤུ་ཏི་དང༌། །པ་རྞི་གཉིས་དང་སུག་སྨེལ་དང༌། །ཤིང་ཚ་གནྡྷ་བྷར་དྲ་རྣམས། །ཞིབ་ཏུ་བཏགས་པའི་ལྡེ་གུ་དང༌། །ཏིལ་མར་མེ་ཆུང་ལ་བསྐོལ་བ། །རླུང་ནད་ཐམས་ཅད་སེལ་བའི་མཆོག །བུ་བཙས་བྱིས་པ་རུས་པ་གནད། །སྣང་དང་སྐེམ་ལ་བསྔགས་པ་ཡིན། །རིམས་སྐྲན་གདོན་དང་སྐྱོ་བྱེད་དང༌། །གཅིན་ནད་རྒྱུ་མ་སྐྱེས་བསེལ། །ཐང་ཕ་འབར་གྱི་མངལ་གྱི་ནི། །ནད་རྣམས་སེལ་བའི་མཆོག་ཏུ་བཤད། །མ་ནི་གི་ཚེ་ཆུ་སོར་ནི། །རང་ལ་གནས་གལ་ཏེ་དཀུར་འཕར་ན། །དེ་ནི་སྐྱེ་བའི་དུས་ཡིན་པས། །དཔྲལ་ཏེ་བྱིས་པ་མྱུར་དུ་དབྱུང༌། །ཤ་རི་ཀ་ཡི་ས་བོན་དང༌། །པ་ཡ་སྱ་དང་ཐང་ཤིང་བཞི། །ཏིལ་ནག་སྲུ་སྲུའི་རྩ་བ་དང༌། །བཙོ་ར་དང་ཉེའུ་ཤིང་ཞེས་བྱ་བཞི། །བྲི་ཤ་དང་ནི་པ་ཡ་སྱ། ཨུཏྤལ་ཟལ་ཏྲེས་བྲི་ཡང་ཀུ། །བྱི་ཚང་ཐལ་ཏྲེས་ར་སྣ་དང༌། །པདྨ་ཙ་རི་ཤིང་མངར་དང༌། །བྲི་ཧ་ཏི་གཉིས་དང་པལ་དང༌། །འོ་ཤིང་མྱུ་གུ་ཤུན་པ་དམར། ཀྲྀཥྞ་པ་རྞི་བ་ལ་དང༌། །ཤི་ཀྲུ་གཟེ་མ་སླེ་ཏྲེས་དང༌། །ཤྲིང་ག་སྟ་རྒ་རྒུན་པད་རྩ། །ཤིང་མངར་ཁ་ར་ཀ་ཤེ་རུ། །ཚིགས་
བཅད་ཕྱེད་ཀྱིས་རྫོགས་བཤད་པའི། །བདུན་པ་འདི་དག་འོ་མར་སྦྱར། །ཟླ་བ་བདུན་ལ་རིམ་བཞིན་དུ། །མངལ་འཛག་པ་ལ་གཏང་བར་བྱ། །ཀ་པི་ཏ་དང་བིལ་བ་དང༌། །བྲི་ཧ་ཏི་དང་བུ་རམ་དང༌། །ཀཎྜ་ཀ་རི་པ་ཏོ་ལཱི། །རྩ་བ་བསྐོལ་བར་བྱས་པ་དང༌། །དེ་བཞིན་འོ་མ་ཤ་རྣམས་ནི། །ཟླ་བ་བརྒྱད་པའི་ཚེ་ན་འང་བཏང༌། །དགུ་པར་ཐལ་ཏྲེས་ཨེ་རྞ་དང༌། །པ་ཡ་སྱ་མངར་གཏང༌། །ཟླ་བ་བཅུ་པར་པ་ཡ་སྱ། །འོ་མ་དང་ནི་བསྐོལ་བ་བླུད། །ཡང་ན་ཤིང་མངར་དོང་གྲ་དང༌། །ཐང་ཤིང་འོ་མར་སྦྱར་བ་སྦྱིན། །བུད་མེད་མངལ་དུ་རླུང་གིས་ཁྲག་བསྒོངས་ཏེ། །གནས་པ་དེ་ནི་མངལ་ཆགས་ཆ་འདྲ་བས། །བུ་ཆགས་ཡིན་ཞེས་མི་མཁས་པ་དག་སྨྲ། །སྨན་ཁ་རྣོ་དྲོས་ཁྲག་ནི་འབའ་ཞིག་ཟགས། །བླུན་པོས་མངལ་གནས་འབྱུང་པོས་ཟོས་ཞེས་ཟེར། །མདངས་འཕྲོག་ཡིན་ཕྱིར་དེ་ལུས་མངོན་སུམ་དུ། །འཕྲོག་པར་མི་སྣང་བ་འམ་འབྱུང་པོ་ནི། །གཞུང་འདོར་མ་ནི་བཏང་སྙོམས་འཇོག་མི་བྱེད། །ཡན་ལག་བརྒྱད་པའི་སྙིང་པོ་བསྡུས་པ་ལས། ལུས་ཀྱི་གནས་ཀྱི་ལེའུ་གཉིས་པའོ།། །།དེ་ནས་ལུས་ཀྱི་ཡན་ལག་གི་བྱེ་བྲག་བསྟན་པ་བཤད་པར་བྱའོ། །མདོར་ན་ཡན་ལག་རྣམ་དྲུག་སྟེ། །མགོ་དང་ཁོག་པ་དཔུང་པ་གཉིས། །བརླ་གཉིས་ཡིན་ཏེ་དེའི་ཉིང་ལག །མིག་སྙིང་ལག་པ་རྐང་བ་སྩོགས། །སྒྲ་དང་རེག་བྱ་གཟུགས་རོ་དྲི། །གོ་རིམས་བཞིན་དུ་ནམ་མཁའ་རླུང༌། །མེ་ཆུ་ས་ཡི་ཡོན་ཏན་ཡིན། །ཡོན་ཏན་རེ་རེས་ཕྱི་མ་སྐྱེད། །དེ་ལ་མཁའ་ལས་ལུས་བུ་ག །རྣ་བ་སྒྲ་དང་ཁོང་སྟོང་ཉིད། །རླུང་ལས་རེག་པ་ལྤགས་དབུགས་འབྱིན། །མེ་ལས་མིག་དང་གཟུགས་འཇུ་ཉིད། །ཆུ་ལས་ལྕེ་དང་རོ་དང་གཤེར། །ས་ལས་སྣ་དྲི་རུས་པ་ཡིན། །འདིར་ནི་མ་ལས་སྐྱེས་འཇམ་ཁྲག །ཤ་དང་རྐང་དང་གཞང་ཁ་སྩོགས། །ཕ་སྐྱེས་བརྟན་དང་ཁུ་ཆུ་དང། །རྩ་བོ་ཆེ་རུས་སྐྲ་སྩོགས་ཡིན། །སེམས་ལས་སེམས་བྱུང་དབང་པོ་རྣམས། །སྐྱེ་གནས་སྣ་ཚོགས་རྣམས་ཀྱང་འབྱུང༌། །གོམས་པ་ལས་བྱུང་ནད་མེད་ཚེ། །ལེ་ལོ་མེད་སྟོབས་གཟི་མདངས་ཡིན། །དངས་མ་ལས་བྱུང་ལུས་ཀྱེད་དང༌། །གནས་དང་འཕེལ་དང་མི་བརྐམ་ཉིད། །
སྙིང་སྟོབས་ཅན་ཙང་ཡོད་པར་ལྟ། །ཆོས་དཀར་ལ་དགའ་བློ་གྲོས་ལྡན། །རྡུལ་ཅན་མང་དུ་སྐྲ་བ་དང༌། །ང་རྒྱལ་ཚུལ་འཆོས་ཁྲོ་ཕྲག་དོག །མུན་པ་འཇིགས་དང་མི་ཤེས་དང༌། །གཉིད་དང་ལེ་ལོ་སྐྱོ་བོའོ། །དེ་ལྟར་འབྱུང་བའི་རང་བཞིན་ལུས། །དེ་ལ་ཁྲག་སྐྱེས་ལྤགས་རིམ་བདུན་འོ་མ་ལས་ནི་སྤྲིས་མ་བཞིན། །སྨིན་པའི་ཚེ་ན་འབྱུང་བར་འགྱུར། །ལུས་ཟུངས་གནས་ནི་ནད་གཤེར་གྱི། །རང་གི་དྲོད་ཀྱིས་སྨིན་པས་ན། །བད་ཀན་རྒྱུས་པ་ཤམས་གཡོགས། །ཆར་བཤད་ཤིང་གི་སྙིང་པོ་འདྲ། །བདུན་པ་དེ་དག་གནས་བདུན་ཏེ། །དང་པོར་ཁྲག་ཡིན་བ་དན་རིམ་བཞིན། །བད་ཀན་མ་ཞུ་མཁྲིས་ཞུ་བ། །རླུང་དང་གཅིན་གྱི་གནས་སུ་བཤད། །བུད་མེད་མངལ་གནས་བརྒྱད་པ་སྟེ། །མཁྲིས་པ་ཞུ་བའི་གནས་པར་གནས། །འདི་ལ་ནང་འགྲོལ་ཡན་ལག་གནས། །སྙིང་གློ་མཆིན་མཁྲིས་མཆེར་མཁལ་མ། །ཕོ་བགྲོད་པ་རྒྱུ་མ་དང༌། །གཉེ་མ་ལོང་ཀ་ལྒང་པའོ། །སྲོག་གི་གནས་ནི་རྣམ་བཅུ་སྟེ། །མགོ་དང་ལྕེ་ཡི་རྩ་བ་དང༌། །ལྐོག་མ་ཁྲག་དང་སྙིང་ལྟེང༌། །ཆུ་སོ་ཁུ་ཆུ་དངས་དང་གཞང༌། །ལུས་ལ་རྩ་དྲ་ཆུ་བ་ཆེ། །རེ་རེ་བཅུ་དྲུག་ཡོད་པར་བཤད། །པིར་འདྲ་དྲུག་དང་སྲུབས་འདྲ་བདུན། །ཕོ་མཚན་ལྕེ་དང་མགོ་ལ་བརྟེན། །དེ་དག་གཙགས་བུས་གདབ་མི་རུང༌། །ཤ་ཡི་ཐག་པ་རྣམ་པ་བཞི། །རུས་པའི་ཚོགས་འདུས་བཅུ་བཞི་ཡོད། །མཚམས་ན་དགུ་ཕྲག་གཉིས་ཡོད་ལ། །སོ་དང་སེན་མོར་བཅས་པ་ཡི། །རུས་པ་སུམ་བརྒྱ་དྲུག་ཅུ་ཡིན། །ཐང་ལ་འབར་ནི་སུམ་བརྒྱར་འདོད། །ཚིགས་ནི་ཉིས་བརྒྱ་རྩ་བཅུར་འདོད། །རྒྱུན་ཤེས་བུས་ནི་ཚིགས་ཀྱི་གྲངས། །ཉི་མ་སྟོང་དག་ནི་ཡོད་པར་འདོད། །རྒྱུས་པ་དགུ་བརྒྱ་སྐྱེས་པ་ལ། །ཤ་ནི་སྤར་ཚད་ལྔ་བརྒྱ་ཡོད། །བུད་མེད་ཀྱི་ནི་ནུ་མ་དང༌། མོ་མཚན་ལ་གནས་ཉི་ཤུ་ལྷག །རྩ་ཆེན་རྩ་བ་སྙིང་ལ་གནས། །དེ་དག་ཀུན་གྱིས་ལུས་ཀུན་ཁྱབ། །དངས་མའི་བདག་ཉིད་མ་རངས་སུ་འགྱུར། །དེ་ནི་ཕྲ་བ་ཀུན་དང་འབྲེལ། །རྩ་བ་སྦོམ་ཞིང་རྩ་ར་བ་ཕྲ། །ལོ་མའི་རྩ་ལྟར་གྱེས་པ་ཡིན། །གྱེས་པ་དེ་ལས་རྩ་ཕྲན་ནི། །བདུན་བརྒྱ་དག་ཏུ་གྱུར་པ་ཡིན། །དེ་ལ་ཡན་ལག་རེ་རེ་ཞིང༌། །བརྒྱད་བརྒྱད་དེར་ནི་གནས་
པ་ཡིན། །དེ་ལ་དབུག་པར་མི་བྱ་བ། །རྩ་ཡི་དྲ་བ་འཛིན་ཞེས་བྱ། །ནང་ན་གནས་པ་གསུམ་པོ་ཡིན། །རྐེད་པར་བཅུ་དྲུག་ཕྲག་གཉིས་ཏེ། །དེ་ལས་བརླ་རྩར་གཉིས་གཉིས་དང༌། །རྐེད་པའི་གནད་རྣམས་གཉིས་གཉིས་ཏེ། །དེ་བརྒྱད་གཙགས་བུས་གདབ་མི་བྱ། །རྩིབ་ལོགས་གཉིས་ལ་རྩ་བཅུ་དྲུག །དེ་ལས་གྱེན་འགྲོ་ཞེས་བྱ་སྤང༌། །རྒྱབ་ཏུ་རྩ་ནི་ཉི་ཤུ་བཞི། །སྒལ་ཚིགས་ཀྱི་ནི་ངོས་གཉིས་ན། །དེ་ལས་གཉིས་གཉིས་གྱེན་འགྲོ་བ། །མཚོན་གྱིས་གདབ་པར་མི་བྱའོ། །རྒྱབ་བཞིན་ལྟོ་ན་གནས་རྩ་དེ། །ཕོ་མཚན་སྟེང་ན་གནས་པ་དང༌། །སྦུ་ཡི་ཕྲེང་བའི་ངོས་གཉིས་རྩ། །གཉིས་གཉིས་མཚོན་གྱིས་མི་གདབ་བོ། །བྲང་ལ་གནས་པ་བཞི་བཅུ་ལས། །བཅུ་བཞི་དབུག་པར་མི་བྱ་སྟེ། །ནུ་མ་ཇིང་དེ་ཡི་རྩ་བ་དང༌། །སྙིང་ག་དག་ནི་སོ་སོར་གཉིས། །གནོད་བྲལ་གནད་ནི་གཉིས་པོ་དང༌། །མི་གསལ་ཞེས་བྱ་གཉིས་ཀྱི་གཉིས། །མགྲིན་པ་ལྟག་པ་འདྲ་བ་ལས། །སྔོན་པོ་མཇིང་པ་ལྟག་པ་དང༌། །འགལ་པ་དང་ནི་མ་མོ་བརྒྱད། །བཅུ་དྲུག་ཡོངས་སུ་སྤང་བར་བྱ། །འགྲམ་པ་བཅུ་དྲུག་དེ་ལས་གཉིས། །མཚམས་ནི་འབྲེལ་བར་བྱེད་པ་སྤང༌། །ལྕེ་ཡང་འགྲམ་ཕ་དང་འདྲ་སྟེ། །འོག་གི་རོ་ཚོར་བྱེད་གཉིས་དང༌། །ཚིག་འབྱིན་བྱེད་པ་གཉིས་པོ་སྤང༌། །སྣ་ཡི་རྩ་ནི་ཉི་ཤུ་བཞི། །དེ་ལས་དྲི་ཚོར་བྱེད་གཉིས་དང༌། །རྐན་དུ་འགྲོ་བའི་རྩ་གཉིས་སྤང༌། །མིག་གཉིས་ཀྱི་ནི་ལྔ་བཅུ་དྲུག །འབྱེད་དང་འཛུམས་པའི་ལས་བྱེད་པ། །གཉིས་གཉིས་དང་ནི་མིག་འགྲམ་གཉིས། །དྲུག་པོ་དེ་དག་སྤང་བར་བྱ། །མིག་དང་སྣར་གནས་འཕྲལ་བ་ལ། །བརྟེན་པའི་རྩ་ནི་དྲུག་ཅུ་ལས། །གཞག་པ་གཅིག་དང་གཙུག་གི་གཉིས། །སྐྲ་མཚམས་གནས་པའི་རྩ་བཞི་སྟེ། །བདུན་པོ་དེ་དག་མཚོན་གདབ་སྤང༌། །རྣ་བར་བཅུ་དྲུག་དེ་ལས་འདིར། །སྒྲ་ཐོས་བྱེད་པའི་རྩ་གཉིས་སྤང༌། །དེ་ཉིད་ལས་ནི་མུར་འགྲམ་གྱི། །མཚམས་སུ་འགྲོ་བ་གཉིས་པོ་སྤང༌། །སྤྱི་བོར་བཅུ་གཉིས་དེ་ལས་ནི། །གྱེན་འགྲོ་སྐྲ་མཚམས་བདག་པོ་ལས། །སོ་སོའི་རེ་རེ་སྤང་བར་བྱ། །དེ་ལྟར་ཡན་ལག་རེ་རེའི་རྩའི། །དབྱེ་བ་
དབུག་མིན་ཤེས་ཕྱིར་བཤད། །དེ་ལས་ལུས་ལ་དབུག་མི་རུང༌། །མ་ལུས་དགུ་བཅུ་རྩ་བརྒྱད་ཡོད། །དོག་དང་རྩ་མདུད་ཤིང་ཏུ་ཕྲ། །ཡོ་དང་ཚིགས་ལ་གནས་མི་དབུག །རྩ་ནི་བདུན་བརྒྱ་དེ་རྣམས་ལས། །བཞི་ཆར་ཁྲག་ནི་སོ་སོར་རྒྱུ། །རླུང་དང་མཁྲིས་པ་བད་ཀན་ཁྲག །ནད་མེད་ཁྲག་ནི་དེ་ལྟར་གནས། །དེ་ནི་ལུས་ལ་ཕན་འདོགས་ཏེ། །གཞན་དུ་གནོད་པ་སྐྱེད་པར་འགྱུར། །དེ་ལ་གནག་དང་དམར་དང་ཕྲ། །སྐད་ཅིག་རེ་རེ་གང་ཞིང་སྟོངས། །མགུལ་པ་རླུང་གི་ཁྲག་རྩ་ཡིན། །རེག་ན་ཚ་ཞིང་མྱུར་དུ་རྒྱུ། །མདོག་སྔོ་སེར་པོར་འདུག་པ་ནི། །མཁྲིས་པའི་ཁྲག་རྩང་མཚན་ཉིད་ཡིན། །དཀར་སྣུམ་བརྟན་གྲང་བད་ཀན་རྩ། །འདྲེས་པའི་མཚན་ཉིད་འདྲེན་མ་ཡིན། །མི་མངོན་མཉམ་གནས་སྣུམ་པ་དང༌། །མདོག་དམར་ཁྲག་རྩ་ནད་མེད་ཡིན། །རྩ་བ་ཆེ་ནི་ཉི་ཤུ་བའི། །ལྟེ་བ་ལ་ནི་བརྟེན་པ་ཡིན། །དེ་རྣམས་ཀྱིས་བསྐོར་ལྟེ་བ་ནི། །འཁོར་ལོའི་ལྟེ་བ་རྩི་བས་བསྐོར་མཚུངས། །དེས་ནི་སྟེར་འོག་ཐད་ཀ་རུ། །ལུས་འདི་རྗེས་སུ་འཛིན་པ་ཡིན། །བུ་ག་སྣ་དང་རྣ་བ་གཉིས། །མིག་གཉིས་ཁ་རྐུབ་ཕོ་མཚན་གྱིའོ། །བུད་མེད་ནུ་མ་གཉིས་ཁྲག་སྒོ། །གསུམ་གྱིས་ལྷག་པར་གྱུར་པ་ཡིན། །ནང་གི་སྲོག་གི་གནས་གྱུར་བའི། །བུ་ག་བཅུ་གསུམ་ཡོད་པར་བཤད། །སྲོག་དང་ལུས་ཟུངས་བྲི་མ་ཆུ། །ཟས་རྒྱུ་མི་མཐུན་བསྟེན་པ་ཡིན། །དེ་ལ་གནོད་པས་ནད་སྐྱེད་ལ། །སྐྱོན་མེད་དག་པས་བདེ་བར་བྱེད། །རང་གི་ལུས་ཟུངས་མདོག་ཉམ་ཞིང། །ཟླུམ་དང་སྤོ་མ་ཕྲ་བ་ཡིན། །བུ་གའི་དབྱིབས་ནི་རིང་པོ་སྟེ། །ལོ་མའི་རྩ་འཕྲོས་ལྟ་བུ་ཡིན། །ཟས་དང་སྤྱོད་ལམ་དག་གིས་གང༌། །ནད་ཀྱི་མཐུ་དང་མཉམ་གྱུར་དང༌། །གང་ཡང་ལུས་ཟུངས་མི་མཉམ་སྟེ། །བུ་གའི་རྒྱུན་ལ་གནོད་བྱེད་ཡིན། མང་དུ་འབྱུང་ངམ་འགགས་པའམ། །རྩ་ནི་མདུད་པ་ཆགས་པའམ། །ལམ་གཟན་དག་ཏུ་འགྲོ་བ་ན། །བུ་གའི་རྒྱུ་འཁྲུགས་མཚན་ཉིད་ཡིན། །པདྨའི་རྩ་བ་ཕྲ་མོ་ལས། །རིང་དུ་རྒྱུ་བར་བྱེད་པ་ལྟར། །གང་གིས་དངས་མ་ཉེར་འཕེལ་བའི། །ལུས་ཀྱི་སྒོ་ནི་
བུ་ག་ཡིན། །བུ་ག་རྣམས་ནི་བརྟོལ་འགྱུར་ན། །འདར་མྱོས་ལྟོ་སྦོས་ལྐུགས་དང་རིམས། །སླ་དང་གཟེར་དང་བཤང་ཅི་འགགས། །ཡང་ན་འཆི་བ་ཉིད་དུ་འགྱུར། །དེ་བས་སྨན་པས་བུག་བརྟོལ། །རེ་ཐག་བཅད་དེ་གསོ་བར་བྱ། །འཕྲལ་དུ་རྨ་བྱུང་ཆོ་ག་ཡིས། །འབད་དེ་ཟུག་རྡུ་དབྱུང་བར་བྱ། །ཟས་འཇུ་བྱེད་པ་མཁྲིས་པ་ནི། །འཇུ་བྱེད་ཡིན་ཞེས་སྔར་བཤད་དོ། །ནད་དང་ལུས་ཟུངས་དྲི་མ་ཡི། །དྲོད་ཡིན་ཞེས་ནི་རྒྱུན་ཤེས་ཟེར། །དེ་ནི་ཟས་ཀྱི་གནས་ཡིན་ཞིང༌། །འཛིན་ཅིང་འཛིན་བྱེད་ཅེས་བཤད་དོ། །དེ་ཉིད་ཐང་ལ་འབར་གཞུང་གིས། །མཁྲིས་པ་འཛིན་པའི་ཆ་རུ་བཤད། །ཚེ་དང་ནད་མེད་བརྩོན་གཟི་མདངས། །ལུས་ཟུངས་མེ་དྲོད་སྟོབས་འཕེལ་བྱེད། །ཞུ་བའི་གནས་ཀྱི་སྒོར་འཇུག་གང༌། །ཟས་ཀྱི་ལམ་གྱི་སྒོ་གཏན་ཡིན། །དེ་ནི་སྟོབས་ལྡན་ཟོས་པ་རྣམས། །ཞུ་ནས་ཟུར་དུ་འདྲེན་པར་བྱེད། །སྟོབས་ཞན་གྱུར་ན་ཁ་ཟས་ནི། །མ་སྨིན་ཉིད་དུ་འབྱུང་བར་བྱེད། །འཛིན་བྱེད་སྟོབས་ནི་མེ་དྲོད་དེ། །དེ་ཡང་འཛིན་བྱེད་སྟོབས་ཅན་ཡིན། །དེ་བས་མེ་དྲོད་ཉམས་གྱུར་ན། །འཛིན་བྱེད་ནད་ནི་སྐྱེད་པར་བྱེད། །ཟས་གང་ལུས་ཀྱི་ལུས་ཟུངས་མདངས། །སྟོབས་དང་ཁ་དོག་སྩོགས་རྒྱས་བྱེད། །དེ་རྒྱུ་ཁ་ཟས་མེ་དྲོད་ནི། །མི་འཇུ་དངས་མ་སྩོགས་མི་འགྱུར། །ཟས་ནི་དུས་སུ་ཟོས་གྱུར་པ། །ལྟོ་བར་སྲོག་གི་རླུང་གིས་དྲངས། །སྐོམ་གྱིས་གོང་པོར་རྣམ་པར་བྱེད། །སྣུམ་གྱིས་མཉེན་པར་བྱས་པ་ཡིན། །མེ་མཉམ་གནས་ཀྱིས་བུས་ནས་ནི། །མ་ཞུའི་གནས་ན་གནས་སྨིན་བྱེད། །ཕྱི་ཡི་སྣོད་གནས་འབྲས་ཆུ་ལྟར། །ལྟོ་བའི་མེ་ཡིས་འཇུ་བར་བྱེད། །དང་པོར་རོ་དྲུག་ཟས་ཀྱང་ནི། །མངར་བ་ཉིད་དུ་གྱུར་ནས་ནི། །སྦུ་བ་ཅན་གྱུར་བདེ་ཀན་འགྱུར། །ཞུ་བའི་གནས་ནས་འཕོ་བ་ན། །རྣམ་པར་ཚ་བས་སྐྱུར་ཉིད་འགྱུར། །མཁྲིས་གྱུར་འཕོས་པའི་རྗེས་ལ་ནི། །མེ་དྲོད་ཀྱིས་སྐམས་ཞུ་བ་དང༌། །ཁ་ཞིང་གོང་བུར་གྱུར་རླུང་སྐྱེད། །ས་དང་ཆུ་དང་མེ་དང་རླུང༌། །ནམ་མཁའ་བཅས་པའི་དྲོད་ལྔ་པོས། །རང་རང་ཡོན་ཏན་ཟས་ལྔ་པོ། །ས་སྩོགས་ཀྱིས་སྨིན་དེ་འོག་ཏུ། །
དེ་དག་རང་རང་ཇི་བཞིན་རྒྱས། །སྨིན་འབྱུང་ཡོན་ཏན་ཐ་དད་ཡིན། །ས་རུ་གཏོགས་པས་ས་ཉིད་དང༌། །ལྷག་མས་ལུས་གཏོགས་ལྷག་མ་རྒྱས། །ཟས་དེ་ཞུ་བའི་ཚིགས་མ་དང༌། །དངས་མ་ཞེས་བྱ་གཉིས་སུ་འགྱུར། །དེ་ལས་ཟས་ཀྱི་ཚིགས་མ་སླ། །གཅིན་འགྱུར་སྐ་བ་བཤད་བར་འགྱུར། །དངས་མས་ལུས་ཟུངས་རང་རང་གི །མེ་དྲོད་ཀྱིས་སྨིན་རྣམ་བདུན་འགྱུར། །དངས་མ་ལས་ཁྲག་དེ་ལས་ཤ །ཤ་ལས་ཚིལ་ཏ་དེ་ལས་རུས། །རུས་རྐང་དེ་ལས་ཁུ་བ་ཡིན། །ཁུ་བ་ལས་ན་མིང་ལ་གནས་འགྱུར། །ལུས་ཟུངས་ཚིགས་མ་རིམ་བཞིན་དུ། །བད་མཁྲིས་བུ་གའི་དྲི་མ་དང༌། །རྡུལ་དང་སེན་མོ་བ་སྤུ་དང༌། །མི་ལྤགས་བཤང་སྣུམ་དངས་མ་ཡིན། །དེ་ལྟར་ལུས་ཟུངས་སྨིན་པ་ལས། །དངས་མ་ཚིགས་མ་གཉིས་སུ་འགྱུར། །ལུས་ཟུངས་སྣུམ་ནི་གཅིག་ལ་གཅིག །ཕན་ཚུན་ཉེ་བར་བསྟེན་པ་ཡིན། །ཟས་འཇུ་དངས་མ་སྩོགས་རིམ་གྱིས། །ཁུ་ཆུར་གྱུར་པ་ལ་ལ་ནི། །ཉིན་ཞིག་གཅིག་འདོད་གཞན་དག་ནི། །ཞག་དྲུག་ཁ་ཅིག་ཟླ་གཅིག་འདོད། །ལུས་ཀྱི་ཟུངས་ནི་ཟས་ཀྱི་རྒྱུན། །འཁོར་ལོ་ལྟ་བུར་ཡོངས་སུ་འཁོར། །རོ་ཙ་སྩོགས་པའི་མཐུ་ཡིས་ནི། །འཕྲལ་དུ་ཁུ་བ་ལ་སྩོགས་སྐྱེད། །ཕལ་ཆེར་སྨན་གཞན་ཉིན་ཞག་ནི། །གཅིག་གིས་ལས་རྣམས་བྱེད་པ་ཡིན། །ཁྱབ་བྱེད་ཀྱིས་དངས་ལུས་ཟུངས་རྣམས། །འཐོར་བར་བྱེད་པའི་ལས་ཀྱིས་ནི། །ཅིག་ཅར་རྒྱུན་མི་འཆད་ཀུན་ཏུ། །ལུས་ལ་རྟག་ཏུ་རྣམ་པར་འཐོར། །གཏོར་ཚེ་བུ་གའི་སྐྱོན་གྱིས་ནི། །དངས་མ་གང་དུ་ཆགས་འགྱུར་ཏེ། །དེར་ནི་གནོད་པ་སྐྱེད་བྱེད་དེ། །མཁའ་ལ་སྤྲིན་ཆགས་ཆར་འབབ་མཚུངས། །ནད་ཀྱང་མ་སྙོམས་གྱུར་པ་ལས། །ཕྱོགས་གཅིག་འདུས་ན་ལྡང་བར་འགྱུར། །དེ་ལྟར་འབྱུང་བ་ལུས་ཟུངས་མེའི། །ལས་ནི་ཡོངས་སུ་བཤད་པ་ཡིན། །ཟས་ནི་དུས་སུ་ཟོས་གྱུར་པ། །ས་དང་ཆུ་དང་མེ་དང་རླུང༌། །དངས་མ་ལུས་ཟུངས་རང་རང་གིས། །སྨིན་བྱེད་ཀུན་ལ་ཟས་འཇུ་བའི། །མེ་ནི་ལྷག་པ་ཡིན་པར་འདོད། །དེ་ནི་རྩ་བ་དེ་འཕེལ་འཕེལ། །ཟད་གྱུར་ཟད་པའི་བདག་ཉིད་འགྱུར། །དེ་བས་རིགས་པས་ཆོ་ག་བཞིན། །ཟས་སྐོམ་རིགས་
ཤིང་ཕན་པ་ཡིན། །དེ་འབད་པས་བསྲུངས་གནས་གྱུར་ན། །ཚེ་དང་སྟོབས་ནི་གནས་པར་འགྱུར། །མཉམ་གནས་རང་གནས་འདུག་ན་མཉམ། །མཉམ་ལམ་གཞན་འགྲོ་དྲོད་མི་སྙོམས། །མཁྲིས་པ་ཤས་ཆེ་པོར་འགྱུར། །བད་ཀན་གྱིས་གནོད་མེ་དྲོད་ཆུང༌། །མེ་དྲོད་མཉམ་དང་མི་མཉམ་རྣོ། །ཆུང་དང་དེ་ལྟར་རྣམ་བཞི་ཡིན། །གང་ཞིག་ཟས་ནི་ལེགས་ཟོས་པ། །ལེགས་པར་འཇུ་འདི་མཉམ་པ་ཡིན། །ལེགས་པར་མ་ཟོས་མྱུར་འཇུ་བའམ། །ལེགས་ཟོས་རིང་ཞིང་འཇུ་མི་མཉམ། །ཟས་ནི་ལེགས་པར་མ་ཟོས་ཀྱང༌། །མྱུར་འཇུ་མེ་དྲོད་རྣོན་པོ་ཡིན། །ཟས་ནི་ལེགས་པར་ཟོས་གྱུར་ཀྱང༌། །རིང་ནས་འཇུ་ཞིང་ཁ་སྐམ་དང༌། །སྦོ་དང་རྒྱུ་མ་འཁྲུགས་པ་དང༌། །ལྕི་བ་མེ་དྲོད་ཆུང་བ་ཡིན། །མ་དྲོད་ཉམས་སྣ་འཆི་འགྱུར་ཞིང༌། །སྐྱོན་མེད་ན་ནི་ཡུན་རིང་འཚོ། །མ་སྙོམས་ནད་ནི་སྐྱེ་འགྱུར་བས། །དེ་ཕྱིར་མེ་དྲོད་གཙོ་བོ་ཡིན། །ལུས་སྟོབས་ལྷན་ཅིག་སྐྱེས་པ་དང༌། །དུས་སྐྱེས་རིགས་པ་ལས་བྱུང་གསུམ། །དེ་ལ་ལུས་སེམས་ལས་བྱུང་བ། །རང་བཞིན་ལྷན་ཅིག་སྐྱེས་པའི་སྟོབས། །ན་ཚོང་དུས་ཚིགས་ལས་བྱུང་བ། །དུས་སྐྱེས་ཡིན་ཏེ་རིགས་པ་ལས། །བྱུང་བ་སྤྱོད་ལམ་ཟས་ཀྱིས་བསྐྱེད། །དེ་བཞིན་གཟི་བསྐྱེད་སྦྱོར་ལས་འབྱུང༌། །ཡུལ་ཕྱོགས་ཤིང་རིང་ཆུ་ཉུང་ལ། །སྐམས་ནད་ཉུང་སྐྱེད་བྱེད་ཡིན། །རླན་ཅན་དེ་ལས་བཟློག་པ་ཡིན། །ཆ་སྙོམས་ཐུན་མོང་ཡིན་པར་བཤད། །རྐང་དང་ཚིལ་དང་ཞག་དང་གཅིན། །མཁྲིས་པ་བད་ཀན་ཕྱིས་ཁྲག །དངས་མཆུ་རྣམས་ལུས་གནས་པའི། །སྙིམ་པ་རེ་རེས་སྐྱེད་པར་བྱེད། །མདངས་དང་ཀླད་རྒྱས་ཁུ་ཆུ་ནི། །རེ་རེའང་རང་གི་ཁྱོར་གང་ཡིན། །བུད་མེད་ནུ་ཞོ་སྙི་མ་དོ་དང༌། །ཟླ་མཚན་སྙིམ་པ་བཞི་ཡོད་དོ། །ལུས་ཟུངས་མཉམ་གནས་ཚད་འདི་ཡིན། །དེ་ལས་འཕེལ་དང་ཟད་ཤེས་བྱ། །ཁུ་ཆུ་ཁྲག་དང་སྦྲུམ་མའི་ཟས། །སྤྱོད་ལམ་མངལ་གནས་དུས་ཚིགས་ལས། །གང་ཞིག་ཉེས་པ་ལྷག་གྱུར་དེས། །རང་བཞིན་རྣམ་པ་བདུན་དུ་བཤད། །ཁྱབ་དང་མྱུར་བར་བྱེད་ཕྱིར་དང༌། །སྟོབས་ལྡན་བ་དང་གཞན་ལྡང་བྱད། །རང་དབང་
ཅན་དང་ནད་མང་ཕྱིར། །ནད་ལས་ཕལ་ཆེར་རླུང་སྟོབས་ཅན། །དེ་ཉིད་ཀྱིས་ན་རླུང་གིས་བསྐྱོད་པའི་མི་རྣམས་ནི། །ནད་ཀྱི་བདག་ཉིད་རྡུལ་ཅན་སྐྲ་བཤོར་པགས་པགས། །གྲང་ལྷགས་མི་བཟོད་བརྟན་དྲན་བློ་གྲོས་སྤྱོད་མཛའ་སྲེད། །བལྟ་དང་འགྲོ་བ་གཡོ་ཞིང་སྨ་བ་ཤིན་ཏུ་མང༌། །བད་ཀན་ནོར་ཉུང་ཚེ་ཐུང་གཉིད་སྲ་བ་དང༌། །གཅོམ་ཆུང་ཚིག་ཐོགས་གཡོ་ཞིང་སྐད་འཛེར་དང༌། །ཆད་ལྟ་མང་དུ་ཟ་ཞིང་སྒེག་དང་བཅས། །གླུ་དང་དགོད་དང་རྔོན་ལས་འཐབ་ལ་དགའ། །མངར་སྐྱུར་ཁ་དང་ཚ་བའི་རོ་གོམས་སྲེད། །ལུས་སྐེམ་དབྱིབས་རིང་འགྲོ་ཚེ་སྦྲ་དང་བཅས། །མི་བརྟན་དབང་པོ་མི་ཐུལ་དམ་པ་མིན། །བུད་མེད་མི་ཆགས་བུ་མང་སྐྱེ་མི་འགྱུར། །དེ་ཡི་མིག་ནི་རྩུབ་ཅིང་རྡུལ་གྱིས་གང༌། །ཟླུམ་ཞིང་མི་མཛེས་འཆི་བ་ལྟ་བུ་དང༌། །ཕྱེ་གདངས་གཉིད་ལོག་ལྟ་བུར་སྣང་བ་ཡིན། །དེ་ནི་ཤིང་དང་རི་འཛེག་མཁའ་འཕུར་རྨི། །སྐལ་ངན་སེར་ན་ཆེ་ཞིང་ཁེངས་པ་དང༌། །རྐུ་ཞིང་བྱིན་སྙིང་རྩ་རིངས་བཅས་པ་དང༌། །ཁྱི་དང་ཝ་དང་རྡ་མོ་བྱ་རྒོད་ཁྲ། །བྱི་བའི་མཚན་ཉིད་ལྡན་མི་རླུང་ཅན་ཡིན། །མཁྲིས་པ་མེ་འདྲ་མེ་ལས་བྱུང་ཡིན་ཕྱིར། །མཁྲིས་པ་རྒྱས་པ་སྐོམ་དང་བཀྲེས་ཤས་ཆེ། །མདོག་སེར་ལུས་ཚ་རྐང་ལག་གདོང་ཡང་དམར། །སྐྲ་སེར་སྦུ་ཉུང་དཔའ་ཞིང་ང་རྒྱལ་ཆེ། །ཕྲེང་བ་བྱུག་པ་རྒྱན་ལ་ལྷག་པར་དགའ། །སྤྱོད་བཟང་གཙང་སྦྲ་ཆེ་ཞིང་མཉེས་གཤིན་ལ། །འབྱོར་དང་རྟུལ་ཕོད་བློ་གྲོས་སྟོབས་དང་ལྡན། །འཇིག་རྟེན་དགྲ་བོའང་སྐྱབས་འོངས་སྐྱོབ་པར་བྱེད། །ཡིད་གཞུངས་ཚིགས་ཀྱི་མཚམས་དང་ཤ་ནི་རབ་ཏུ་ལྷོང༌། །བུད་མེད་མི་དགའ་ཁུ་བ་དང་ནི་འདོད་པ་ཆུང༌། །གཉེར་མའི་ཚོགས་དང་སྐྲ་དཀར་མིག་སྔོའི་གནས་གྱུར་ལ། །ཟས་ནི་མངར་དང་བསྐ་དང་ཁ་བསིལ་ཟ་བར་དགའ། །ཐན་པ་མི་བཟོད་རྡུལ་ཞིང་དྲིང་ལ། །བཤང་གཅི་བཟའ་བཏུང་ཁྲ་དང་ཕྲག་དོག་མང༌། །རྨི་ལམ་དོད་ཀ་བ་ལ་ཤའི་མེ་ཏོག །གློག་འགྱུར་ཕྱོགས་ཚིག་སྐར་མདའ་ཉི་མེ་མཐོང༌། །འདི་ཡིས་ལུས་ཕྲ་མིག་སེར་གཡོ་བ་དང༌། །རྫི་མ་སྲབ་ཅིང་ཉུང་ཞིང་གྲང་ལ་དགའ་།ཁྲོ་དང་ཆང་དང་ཉི་མའི་འོད་ཟེར་གྱིས། །མིག་ནི་མྱུར་བར་དམར་པོར་
འགྱུར་བ་ཡིན། །ཚེ་ན་རན་ཅིང་སྟོབས་ནི་འབྲིང་བ་དང༌། །མཁས་ཤིང་སྡུག་བསྔལ་དག་ལ་སྲན་ཆུང་འགྱུར། །སྟག་དང་སྦྲེའུ་བྱིལ་དང༌། །གནོད་སྦྱིན་རང་བཞིན་ལྡན་བ་མཁྲིས་ཅན་ཡིན། །བད་ཀན་བསིལ་བས་བད་ཀན་ཅན་བསིལ་ཞིང༌། །རུས་ཚིགས་མི་མངོན་སྣུམ་ཞིང་ཤ་རུས་འབྲེལ། །བཀྲེས་སྐོམ་ཉོན་མོངས་སྡུག་བསྔལ་ཐན་པ་བཟོད། །བློ་ལྡན་སྙིང་སྟོབས་ཆེ་ཞིང་དམ་བཅའ་བརྟན། །ཕྲི་ཡང་ཀུ་དང་དཱུར་བ་འདམ་བུའི་མདོག །ཚོན་དང་གིའུ་དང་པདྨ་གསེར་མདོག་ཅན། །ལག་ངར་རིང་ཞིང་དྲང་ནི་ཡང་ས་ལ་རྒྱས། །འཕྲལ་བའི་དབྱེས་ཆེ་སྐྲ་ནི་མཐུག་ཆིང་གནག །ལུས་འཇམ་སྙོམས་ཤིང་ཡན་ལག་མཛེས་པ་དང༌། །མདངས་ཆེ་ཁུ་བཅུད་བུ་ཚ་གཡོག་འཁོར་མང༌། །ཆོས་ལྡན་ཚིག་རྩུབ་ནམ་ཡང་སྨྲ་མི་བྱེད། །དགྲ་ལ་ཞེ་སྡང་འདམ་རིངས་ཁོན་འཛིན་བྱེད། །གླང་པོའི་མཆོག་དྲེགས་བཅས་པ་ལྟ་བུར་འགྲོ། །རྒྱ་མཚོ་འབྲུག་དང་རྫ་རྔ་སེང་གེ་ཡི། །སྒྲ་ལྡན་དྲན་དང་བརྩོན་འགྲུས་དུལ་བར་ལྡན། །བྱིས་པའི་ཚེ་ནའང་དུ་དང་སྐོམ་ཤས་ཆུང༌། །ཟས་ནི་ཁ་བསྐ་ཆ་དང་དྲོ་ཞིང་རྩུབ། །ཉུང་ངུ་ཟོས་ཀྱང་དེ་ནི་སྟོབས་དང་ལྡན། །མིག་གི་མཐའ་དམར་སྣུམ་ཞིང་དཀྱུས་རིང་ཡངས། །དཀར་ནག་རབ་གསལ་རྫི་མ་སྙོམས་དང་ལྡན། །སྨྲ་དང་ཁྲོ་དང་བཟའ་བཏུང་སྤྱོད་པ་ཉུང༌། །ཚེ་རིང་ནོར་མང་རིང་ལྟ་ཚིག་འཇམ་སྨྲ། །དད་ཅིང་བློ་ཟབ་ལྟ་ཆེ་བཟོད་དང་ལྡན། །རང་བཞིན་བཟང་ཞིང་གཉིད་ཆེ་ལས་མཐའ་རིང༌། །བྱས་གཟོ་དྲང་མཁས་སྐལ་བཟང་ངོ་ཚར་ལྡན། །བླ་མ་ལ་གུས་མཛའ་བཤེས་དག་ལ་བརྟེན། །རྨི་ལམ་པདྨ་བྱ་ཡི་ཕྲེང་བར་བཅས། །ཆུ་ཡི་གནས་དང་སྤྱིན་ཡང་མཐོང་བ་ཡིན། །ཚངས་པ་དྲག་པོ་དབང་པོ་ཆུ་ལྷ་དང༌། །ནམ་མཁའ་ལྡིང་དང་ངང་བ་གླང་པོ་མཆོག །དེ་བཞིན་སེང་གེ་དང་ནི་ཁྱུ་མཆོག་དང༌། །བད་ཀན་ཅན་ནི་རང་བཞིན་འདྲར་ཤེས་བྱ། །རང་བཞིན་གཉིས་དང་ཀུན་ལས་བྱུང༌། །གཉིས་གཉིས་ཀུན་གྱི་ཡོན་ཏན་བསྐྱེད། །གཙང་སྦྲ་ཡོད་པར་སྨྲ་སྩོགས་ཀྱི། །ཡོན་ཏན་གྱིས་ནི་དེ་ལྡན་བཤད། །ན་ཚོད་བཅུ་དྲུག་པར་བྱིས་པ། །དེ་ལས་ལུས་ཟུངས་དབང་པོ་གཟི། །འཕེལ་
འགྱུར་བདུན་ཅུའི་བར་བར་མ། །ཟད་པ་ཕན་ཆད་རྒན་པོ་ཡིན། །རང་རང་ཁྲུ་ནི་ཕྱེད་དང་བཞི། །ལུས་ནི་ཚེ་རིང་བདེ་བའི་སྣོད། །སྤུ་མེད་གནག་དང་ཤིན་ཏུ་སྦོམ། །རིང་པོ་ཉིད་ནི་མི་མཐུན་བཅས། །སྨད་པ་བརྒྱད་དང་རང་ཉིད་ལྡན། །གང་ཡིན་དེ་ནི་དེ་སྣོད་མིན། །སྐྲ་ནི་རབ་ཏུ་འཇམ་པ་དང༌། །ཕྲ་ཞིང་རྩ་བ་མ་འདྲེས་བརྟན། །དཔྲལ་བ་མཐོ་ཞིང་མུར་འགྲམ་འཕྱར། །ཟླ་བ་ཁམ་པ་འང་བ་བཟང༌། །རྣ་བརྒྱབ་ཕྱོགས་རྒྱ་ཆེ་མཛེས། །རྣ་ཤལ་ཆེ་ཞིང་ཤ་ཡིས་རྒྱས། །མིག་ནི་དཀར་ནག་འབྱེས་པ་དང༌། །རྫི་མ་སྟུག་ཅིང་སྙོམས་པ་བཟང༌། །སྣ་ཡི་རྩེ་མོ་དབུགས་ཆེར་འབྱུང༌། །ཤ་རྒྱས་དྲང་ཞིང་སྙོམས་པ་བཟང༌། །མཆུ་ནི་དམར་ཞིང་མ་འཕྱངས་པ། །འགྲམ་པ་ཡང་ཤིང་མི་འབུར་བཟང༌། །ཁ་ཆེ་སོ་ཡི་ཚིགས་དམ་ལ། །སྣུམ་ཞིང་དཀར་ལ་འཇམ་ཞིང་སྙོམས། །ལྕེ་ནི་དམར་ཞིང་ཡངས་ལ་སྲབ། །ཀོ་སྐོ་ཆེ་ཞིང་ཤ་ཡིས་རྒྱས། །མགྲིན་པ་ཟུང་ཞིང་ཤ་རྒྱས་ཟླུམ། །ཕྲག་པ་མཐོང་ཞིང་ཤ་ཡིས་རྒྱས། །ལྟོ་བ་ཟླུམ་ཞིང་ལྟེ་བ་ནི། །ཟབ་ཅིང་མཐོ་ལ་གཡས་སུ་འཁྱིལ། །རྐང་པ་ལག་པ་ལེགས་གནས་ཤིང༌། །སེན་མོ་འཇམ་ཞིང་མཐོ་ལ་དམར། །སྣུམ་ཞིང་ཀུན་དམར་ཤ་རྒྱས་པ། །སོར་མོ་རིང་ཟླུམ་བུག་མེད། །རྒྱབ་ཞིང་ཆེ་ཞིང་སྒལ་ཚིགས་ནུབ། །ཚིགས་མཚམས་མི་མངོན་དམ་པ་དང༌། །ཚིགས་གསང་མཐོ་ཞིང་བརྟན་པ་དང༌། །མདོག་སྣུམ་ཁ་དོག་བརྟན་པར་གནས། །རང་བཞིན་གྱིས་འབྱུང་སྙིང་སྟོབས་བརྟན། །ཕོངས་པའི་ཚེ་ནཱང་ཞུམ་པ་མེད། །མངལ་ནས་བརྩམས་ཏེ་ནད་མེད་པ། །གོང་ནས་གོང་དུ་ཞིང་བཟང་ལ། །ཤེས་དང་ཡེ་ཤེས་རྒྱ་ཆེར་ནི། །འཕེལ་ཞིང་རིམ་གྱིས་དགེ་བར་འགྱུར། །དེ་ལྟར་ཡོན་ཏན་ཀུན་ལྡན་པའི། །ལུས་ནི་སྟོན་བརྒྱའི་བར་དག་ཏུ། །ཚེ་དང་དབང་ཕྱུག་འདོད་པ་ཡི། །དངོས་པོ་ཐམས་ཅད་རབ་ཏུ་གནས། །བགས་པ་ཁྲག་སྩོགས་སྙིང་སྟོབས་པར། །བརྒྱད་པོ་ཕྱི་མ་བཞིན་དུ་མཆོག །སྟོབས་དང་ཚད་དང་ཤེས་པའི་ཕྱིར། །ལུས་ཅན་རྣམས་ཀྱི་སྙིང་པོར་བཤད། །སྙིང་པོ་ཀུན་དང་ལྡན་པ་ཡི། །མཆོག་ཏུ་བཀུར་བར་
བྱ་བར་འགྱུར། །རྩོམ་པ་ཀུན་ལའང་རེ་བཅས་དང༌། །བཟོད་ལྡན་བློ་བཟང་བརྟན་པར་འགྱུར། །དྲེགས་དང་ཞུམ་པ་མེད་པར་ནི། །བདེ་དང་སྦུག་བསྔལ་བསྟེན་གྱུར་བ། །སྙིང་སྟོབས་ཅན་ཡིན་རྡུལ་ཅན་ཁེངས། །མུན་པ་ཅན་ནི་དེ་ལྟར་མིན། །སྦྱིན་དང་ཚུལ་ཁྲིམས་སྙིང་བརྩེ་བདེ་ནི། །ཚངས་པར་སྤྱོད་དང་བྱས་པ་གཟོ། །བྱམས་ལྡན་བཅུད་ཀྱིས་ལེན་བ་སྟེན་པ། །ཚེ་དང་བསོད་ནམས་འཕེལ་བའི་སྡེའོ། །ཡན་ལག་བརྒྱད་པའི་སྙིང་པོ་བསྡུས་པ་ལས། །ལུས་ཀྱི་གནས་ཀྱི་ལེའུ་གསུམ་པོའོ།། །།དེ་ནས་ལུས་ཀྱི་གནད་ཀྱི་བྱེ་བྲག་བཤད་པར་བྱའོ། །གནད་ནི་བརྒྱ་ལས་བདུན་ལྷག་པ། །དེ་ལས་བཅུ་གཅིག་བརླ་དང་ནི། །དེ་བཞིན་ལག་ངར་གཉིས་སོ་སོར། །ལྟོ་བ་ལ་གསུམ་བྲང་ལ་དགུ། །རྒྱབ་ལ་བཅུ་བཞི་ནམ་ཚོང་ནི། །ཡན་ཆད་སུམ་ཅུ་རྩ་བདུན་ཡོད། །རྐང་པའི་མཐིལ་ནས་གུང་མོ་ཡི། །ཐད་ཀ་ན་ནི་མཐིལ་འཕྲོག་པའི། །གནད་ཡོད་ཅེས་ནི་རྣམ་བཤད་དེ། །དེ་ཕུག་གནད་ཀྱིས་འཆི་བར་འགྱུར། །མཐེབ་སོར་དབུས་ན་རྒྱ་ཚིགས་ཏེ། །དེ་ཕུག་བསྐྱོད་པའི་གནད་ཀྱིས་འཆི། །དེ་གོང་སོར་གཉིས་ཤེས་པར་བྱ། །རྐང་པ་ལ་འཁར་ཞིང་འདར་བར་བྱེད། །ལོང་མོའི་ཚིགས་འོག་པིར་མགོ་སྟེ། །དེ་བཅད་སྐྲང་དང་ནད་སྐྱེད་བྱེད། །བྱིན་པ་རྐང་བ་གཉིས་ཀྱི་བར། །ལོང་མོ་གནད་རེངས་བེམ་པོར་བྱེད། །བྱིན་པའི་ནང་ན་ཉ་ཞེས་པ། །ཁྲག་ཟད་པ་ཡིས་འཆི་བར་བྱེད། །བྱིན་པ་བརླ་མཚམས་བུས་མོ་སྟེ། །དེ་ཕུག་གསོན་ཡང་འཐེང་པོར་འགྱུར། །པུས་གོང་སོར་གསུམ་པར་གཉན་གོང༌། །དེ་ཕུག་བརླ་རེངས་སྐྲང་བར་བྱེད། །བརླ་ནང་བརླ་དབང་ཞེས་བྱ་བ། །དེ་ཕུག་ཁྲག་ཟགས་བརླ་བསྐམ་འགྱུར། །བརླ་རྩ་མིག་དམར་ཞེས་བྱ་བ། །ཁྲག་ཟད་པས་ནི་གཞོགས་ཕྱེད་འཇོམས། །བརླ་རྩ་རླིག་པའི་བར་གྱི་གནད། །ལྗོན་ཤིང་ཞེས་བྱ་མ་ནིང་བྱེད། །དེ་དག་བརླིའོ་དཔུང་དེ་བཞིན། །མཁྲིག་མ་འདི་ནི་ལོང་མོར་མཚུངས། །གྲུ་མོ་བྱིན་འདྲ་དེ་གཉིས་ཕུག །ཞ་བོ་ལྗོན་ཤིང་འདྲ་བ་ནི། །མཆན་ཁུང་ནང་ན་མཆན་ཁུང་འཛིན། །
དེ་ཕུག་ཞ་པོ་ཉིད་དུ་འགྱུར། །ལོང་ཀའི་གནད་ནི་གཟང་ཞེས་བྱ། །དེ་ཕུག་གཟང་རླུང་གིས་འཕྲལ་གསོད། །ལྡང་བ་གཞུ་ལྟར་ཡོ་བ་ཡི། །ཆུ་སོའི་གནད་ནི་ཤ་ཁྲག་ཉུང༌། །དབུས་ན་ཁ་ཅིག་ཐུར་དུ་ལྟ། །རྐེད་པའི་དབུས་གནས་སྲོག་འཕྲལ་འཇོམས། །རྡེའུ་འབྱིན་རྨ་བུག་གནས་མ་གཏོགས། །དེ་ཡང་ངོས་གཉིས་ཕུག་སྟེ་འདྲ། །གཅིན་འཛག་གནས་དང་གཅིག་ཏུ་ཕུག །རྨ་ནི་འཚོ་བར་ཤིན་ཏུ་དཀའ། །ལུས་ཀྱི་ཞུ་དང་མ་ཞུའི་གནས། །དབུས་ན་ལྟེ་བ་རྩ་ཀུན་གྱི། །རྟེན་ཡིན་དེ་ཡང་འཕྲལ་གསོད་བྱེད། །མ་ཞུ་བ་ཡི་གནས་སྒོར་གྱུར། འདོད་ཆགས་སྩོགས་གནས་སྙིང་ཞེས་བྱ། །བྲང་དང་ནུ་མ་ལྟོ་དབུས་གནས། །ནུ་མཇིང་ནུ་མའི་རྩ་ཞེས་བྱ། །སྟེང་འོག་སོར་གཉིས་ནུ་མའི་གནད། །དེ་ཕྲུག་བད་ཀན་ཁྲག་གིས་ནི། །རིམ་བཞིན་ལྟོ་འགེངས་འཇིག་པར་བྱེད། །རེངས་བྲལ་བྲང་གི་ངོས་གཉིས་ནི། །རྩ་སྦུབས་གཉིས་པོ་རླུང་རྒྱུ་བ། །དེ་ཕུང་ཁོང་པ་ཁྲག་གིས་གང༌། །ལུད་པ་དབུགས་མི་བདེ་བས་འཆི། །རྒྱབ་ཀྱི་སྒལ་ཚིགས་བྲང་གི་བར། །དེ་གཉིས་ཀྱི་ནི་ངོས་གཉིས་ན། །ཕྲག་པ་གཉིས་ཀྱི་འོག་ན་ནི། །མི་གསལ་ཞེས་བྱའི་གནད་གཉིས་ཡོད། །དེ་གཉིས་ཕུག་པས་ཁོང་པ་ནི། །ཁྲག་ཁངས་རྣག་སྟེ་འཆི་བར་འགྱུར། །སྒལ་ཚིགས་ཀྱི་ནི་ངོས་གཉིས་ན། །རྐེད་པའི་ཆ་གཉིས་གནས་པ་དང༌། །རྐུབ་ཚོས་ལྟག་གནས་སྒལ་ཚིགས་བརྟེན། །རྐེད་པ་ཅན་དང་གཞོན་ནུར་བཤད། །དེ་སྣད་ཁྲག་ཟད་སྐྱ་རྦབ་དང༌། །གཟུགས་ཉམས་པས་ནི་འཆི་བར་འགྱུར། །རྒྱབ་ཀྱི་སྒལ་ཚིགས་ངོས་གཉིས་ཀྱི། །རྐེད་པའི་མཚམས་ནི་གང་ཡིན་པ། །རོ་སྨད་ཀྱི་ནི་རྒྱབ་ཕྱོགས་ན། །ཁུང་བུ་ཞེས་བྱའི་གནད་གཉིས་ཡོད། །དེ་སྣད་སྐྱོད་པ་ཉམས་པ་དང༌། །རོ་སྨད་ཚོར་བ་མེད་པར་འགྱུར། །གང་ཞིག་རྩིབ་ལོགས་གཉིས་དང་འབྲེལ། །སྟ་ཟུར་རྩེ་མོ་གཉིས་སྟེང་གི །གནས་ནི་གཡོགས་པར་གྱུར་པ་དང༌། །རོ་སྨད་གཞོན་ནུའི་རུས་པར་གནས། །དེ་སྣད་རོ་སྨད་སྐྲང་པ་དང༌། །ཉམ་ཆུང་འཆི་བ་ཉིད་དུ་འགྱུར། །རྩིབ་ལོགས་གཉིས་ཀྱི་ནང་དང་འབྲེལ། །རྐེད་པའི་ངོས་གཉིས་དབུས་ན་གནས།
ཐད་ཀ་དང་ནི་གྱེན་གནས་པ། །རྩིབ་ལོགས་མཚམས་ཏེ་དེ་ཕུག་ན། །ཁོང་པ་ཁྲག་གིས་གང་བ་དང༌། །ལུས་དང་བྲལ་བ་ཉིད་དུ་འགྱུར། །ནུ་མ་གཉིས་ཀྱི་ཐད་ཀའི་ཆ། །རྒྱབ་ཀྱི་སྒྲ་ལ་ཚིག་སླ་བརྟེན་པ། །རྩ་ཆེན་ཞེས་བྱ་དེ་ཕུག་ན། །ཁྲག་ཟད་ནས་ནི་འཆི་བར་འགྱུར། །དཔུང་མགོ་གཉིས་དང་འབྲེལ་བ་ཡི། །སྒལ་ཚིགས་ཀྱི་ནི་ངོས་གཉིས། །ཕྲག་པ་གཉིས་ཀྱི་སོག་པ་སྟེ། །དེ་སྣད་བསྐམས་ཤིང་ཚོར་བྲལ་འགྱུར། །མགྲིན་པ་གཉིས་ཀྱི་ངོས་གཉིས་རྩ། །དཔུང་མགོ་དང་ནི་མགྲིན་པའི་བར། །བྲག་པ་བྲག་པ་ལ་བརྟེན་གནད། །དེ་ཕུག་ལག་ངར་བྱ་བ་ཉམས། །སྲོལ་གོང་གི་ནི་ངོས་གཉིས་ན། །འགྲམ་པ་ལ་ནི་བརྟེན་པའི་རྩ། །བཞི་སྟེ་དེ་ལ་སྔོན་པོ་གཉིས། །གཉིས་པའང་མཇིང་པའི་གནད་དུ་བཤད། །དེ་ཕུག་སྐད་འགགས་མི་སྡུག་དང༌། །ལྕེ་ཡིས་རོ་ནི་མི་ཚོར་འགྱུར། །ལྐོག་མའི་སྦྲུབས་ཀྱི་ངོས་གཉིས་ནས། །ལྕེ་དང་སྣར་ནི་འགྲོ་བའི་རྩ། །སོ་སོར་བཞི་བཞི་ཡོད་མ་མོ། །དེ་བཅད་འཕྲལ་དུ་སྲོག་འཇོམས་སོ། །མགོ་བོ་སྐེ་མཚམས་ལྟག་པ་སྟེ། །དེ་ཕུག་མགོ་བོ་ལྡེམ་པོར་འགྱུར། །རྣ་བ་གཉིས་འོག་ལྕོང་བ་ན། །རྣ་རྩ་ཞེས་བྱའོ་བར་འགྱུར། །སྣ་ཡི་བུ་ག་གཉིས་དང་ནི། །སྣ་ཡི་ལམ་འགྲོ་མགྲིན་ནང་གནས། །སྦྲུལ་མགོ་ཞེས་བྱ་དེ་བཅད་ན། །དྲི་མི་ཚོར་བར་བྱེད་པར་འགྱུར། །མིག་གཉིས་ཀྱི་ནི་ཕྱི་རོལ་མཚམས། །སྨིན་མ་སྐྱེས་པའི་མཐའ་ཡི་འོག །མིག་ཟུར་སྨིན་སྟེང་དམའ་བར་གནས། །འཁྱིལ་པ་ཕུག་པས་ལོང་བར་འགྱུར། །རྣ་མཆན་འཕྲལ་བའི་མཐའ་ན་ནི། །མུར་འགྲམ་ཞེས་བྱ་དབྲལ་འཆི་བྱེད། །མུར་འགྲམ་གཉིས་སྟེང་སྐྲ་མཚམས་ན། །གདེག་པ་ཞེས་བྱ་བཞག་བྱ་ཡང༌། །སྨིན་མཚམས་བར་གནས་གསུམ་ཚར་ལའང༌། །ཟུག་རྔུ་དག་ནི་མ་ཕུང་ཞིང༌། །སྨིན་ནས་རང་ཉིད་བྱུང་ན་འཚོ། །ཕུང་ན་འཕྲལ་དུ་འཆི་བར་འགྱུར། །ལྕེ་མིག་སྣ་དང་རྣ་བ་ཡི། །བུ་ག་བཞིན་འདུས་པ་དག །རྐན་དང་སྒོ་རུ་ཁ་བཞི་སྟེ། །བུ་གའི་གནད་ནི་དེ་རྣམས་ཀྱི། །གནད་ནི་སུམ་
མདོ་རིས་ཞེས་བྱ། །དེ་བཅད་སྲོག་ནི་འཕྲལ་དུ་འདོར། །ཐོད་པ་ཡི་ནི་མཚམས་ལྔ་པོ། །ཐད་ཀ་གྱེན་འགྲོ་མཚམས་ཀྱི་མཐའ། །དེ་སྣད་པས་ནི་མགོ་འཁོར་དང༌། །སྨྱོ་ཞིང་དྲན་པ་ཉམས་ཏེ་འཆི། །སྤྱི་བོའི་སྟེང་ན་གཙུག་འཁྱིལ་པའི། །རྩ་དང་ལྡན་སྦུབས་འདུས་པ་ན། །སྤུ་འཁྱིལ་བདག་པོ་ཞེས་བྱ་བའི། །གནད་ཀྱིས་སྲོག་ནི་འཇིག་པར་བྱེད། །གང་དུ་མནན་ན་ཤིན་ཏུ་འགུལ། །རབ་ན་དེ་གནད་ཡིན་ཞེས་བྱ། །ཤ་རྒྱུས་རུས་བ་རྩ་ཆེན་དང༌། །རྩ་དང་ཚིགས་ནི་འདུས་པ་རུ། །གནད་ཅེས་བྱ་སྟེ་དེས་ན་དེར། །སྲོག་ནི་ལྷག་པར་གནས་པ་ཡིན། མང་དུ་རྣམ་པར་བསྟན་མོད་ཀྱི། །གནད་ནི་རྣམ་པ་དྲུག་ཏུ་བསྟན། །སྲོག་གི་གནས་སུ་ཐུན་མོང་བས། །གནད་ནི་གཅིག་ཏུ་འང་གནས་པ་ཡིན། །ཤར་གཏོགས་བཅུ་སྟེ་བྱིན་ལག་ཉྭ། །མཐིལ་འཕྲོག་ནུ་མཇིང་ནུ་རྩའོ། །རུས་པའི་གནད་བརྒྱང་མུར་འགྲམ་དང༌། །རྐེད་པ་ཅན་དང་གཞོན་ནུ་དང༌། །རོ་སྨད་དང་ནི་སོག་པའོ། །རྒྱུས་པའི་གནད་ནི་ཉི་ཤུ་གསུམ། །གཉན་གོང་ཞེས་བྱ་པིར་དང་ནི། །པིར་མགོ་མིག་ཟུར་རྒྱ་ཚིགས་དང༌། །ཕྲག་པ་གཞག་དང་ཆུ་སོ་ཡི། །རྩ་ཆེན་གནད་ནི་རྣམ་དགུ་སྟེ། །གཞང་དང་རེངས་བྲལ་རྣ་རྩ་དང༌། །སུམ་མདོ་རིས་ཞེས་བཤད་པའོ། །རྩ་ལ་གནས་གནད་སུམ་ཅུ་བདུན། །རྩ་ཆེན་གཉིས་དང་མ་མོ་སྔོ། །འགྲམ་པ་མཆན་ཁུང་འཛིན་སྤྲུལ་མགོ །ལྗོན་ཤིང་སྙིང་དང་ལྟེ་བ་དང༌། །རྩིབ་ལོགས་མཚམས་དང་ནུ་མའི་འོག །མི་གསལ་གཞག་དང་བརླ་དབང་དང༌། །དམར་པོ་ཞེས་བྱ་བཞི་པོའོ། །ཚིགས་ལ་ཉི་ཤུ་འཁྱིལ་པ་དང༌། །མཁྲིག་མ་གཉིས་དང་ཁུང་བུ་དང༌། །མཚམས་མཐའ་གྲུ་མོ་ལོང་མོ་དང༌། །ལྟག་པ་པུས་མོ་བདག་པོའོ། །གཞན་དག་གཞང་ཤའི་གནད་ཅེས་ཟེར། །མཆན་ཁུང་འཛིན་དང་ལྗོན་ཤིང་ནི། །རྒྱུས་པ་ལ་བརྟེན་རྣ་རྩ་དབ་སུམ་མདོར་སི་དང་རེངས་བྲལ་དང༌། །མིག་འགྲམ་རྩ་ཡི་གནད་ཡིན་གྱི། །རྩ་ཆེན་གནས་པར་དེ་མ་བཤད། །ཤ་ཡི་གནད་བཅད་ཁྲག་རྒྱུན་འཛག །ཤ་བཀྲུས་འདྲར་འགྱུར་སླ་བ་དང༌། །སྐྱ་ཞིང་དབང་པོ་ཉམས་པ་དང༌། །མྱུར་དུ་འཆི་བ་ཉིད་དུ་འགྱུར། །རུས་
གནས་གནད་བཅད་རྐང་བཅས་ན། །སླ་དང་བར་བར་ཆད་ཅིང་འཛག །རྒྱུས་པའི་གནད་བཅད་ན་ཞིང་འཁྲུག །བརྐྱང་བསྐུམ་མི་ཤེས་གནོད་པར་འགྱུར། །འགྲོ་དང་སྟན་གནས་ནུས་པ་ཆུང༌། །དབང་པོ་ཉམས་པའམ་འཆི་བར་འགྱུར། །རྩ་ཆེན་གནད་བཅད་སྦུ་བ་དང༌། །སྒྲ་བཅས་འབྱུང་ཞིང་དྲན་ཉམས་འགྱུར། །རྩ་ཡི་གནད་བཅད་ཁྲག་སྐ་ཞིང༌། །རྒྱུན་མི་འཆད་པར་མང་དུ་འབྱུང༌། །དེ་ཟད་མགོ་འཁོར་དབུགས་མི་བདེ། །སྐོམ་རྨོངས་སྐྱིགས་བུས་འདེབས་བས་འཆི། །ལུས་ནི་གྲ་མ་ལྟ་བུས་ཁྱབ། །འཚོ་བ་ཀྱང་སྒུར་པོའམ་འཐེང་པོར་འགྱུར། །ཚིགས་གནད་སྟོབས་དང་སྤྱོད་པ་ཉམས། །ལུས་སྐེམ་ཚིགས་ནི་སྐྲང་བར་འགྱུར། །ལྟེ་བ་མུར་འགྲམ་བདག་པོ་གཟང༌། །སྙིང་དང་ཆུ་སོ་སུམ་མདོ་རིས། །མ་མོ་བརྒྱད་དང་བཅུ་དགུ་པོ། །འཕྲལ་དུ་སྲོག་ནི་གཅོད་པར་བྱེད། །དེ་རྣམས་འཕྲལ་དུ་མི་འཆི་ཡང༌། །ཞག་བདུན་གྱིས་ནི་ངེས་པར་འཆི། །རེངས་བྲལ་མཐིལ་འཕྲོག་རྩིབ་ལོགས་མཚམས། །རྐེད་པ་ཅན་གཞོན་མཚམས་ཀྱི་མཐའ། །ནུ་རྩ་དབང་པོ་ཆུ་སོའི་གནད། །རྒྱབ་ཚིགས་མི་གསལ་རྩ་ཆེན་དང༌། །རོ་སྨད་ནུ་མཇིང་སུམ་ཅུ་གསུམ། །ཟླ་བའམ་ཟླ་ཕྱེད་སོན་ནས་ནི། །དུས་གཞན་དུ་ནི་འཆི་བར་བྱེད། །བརྡེག་དང་གཞག་བཞེས་བྱ་གསུམ། །དེར་ནི་ཟུག་རྔུ་བྱུང་གྱུར་ན། །རླུང་གིས་ཤ་དང་ཚིལ་དང་རྐང༌། །གླད་རྒྱས་རྣམས་ནི་སྐེམས་པར་བྱེད། །མཚོན་ཕྱུང་ལུད་པ་དབུགས་མི་བདེ། །འབྱུང་ཞིང་སྲོག་ནི་འཇོམས་པར་འགྱུར། །སྦྲུལ་མགོ་མིག་ཟུར་རྣ་རྩ་དང༌། །སྔོན་པོ་འགྲམ་གནས་ལྟག་པའི་གནད། །ཕྲག་པའམ་ཕྲག་སྩོགས་འཁྱིལ་པ་དང༌། །ལྗོན་ཤིང་བརླ་དབང་ཁུང་བུ་དང༌། །མིག་དམར་པུས་མོའི་གནད་དང་བཅས། །མཚན་འཛིན་པིར་དྲ་གྲུ་མོའི་གནད། །དེ་ལྟར་གནད་ནི་བཞི་བཅུ་བཞིས། །རྐང་ལག་འཇས་པར་བྱེད་འགྱུར་བའམ། །གལ་ཏེ་ཚབས་ཆེར་སྣད་གྱུར་ན། །དེས་ནི་སྲོག་ཀྱང་འཇོམས་པར་པེད། །ཕིར་མགོ་འདྲ་དང་ལོང་མོ་དང༌། །མཁྲིག་མའི་གནད་བརྒྱད་ནད་ཚབས་སྐྱེད། །དེ་ལས་ལྗོན་ཤིང་མཆན་ཁུང་འཛིན། །
བརླ་དང་པིར་མགོ་ལྟ་བུ་སྟེ། །བཅུ་གཉིས་སོར་གཅིག་ཚད་ཡིན་ནོ། །མཁྲིག་མ་དང་ནི་ལོང་མོ་དང༌། །ནུ་མའི་རྩ་བ་སོར་གཉིས་ཚད། །པུས་མོ་གྲུ་མོ་སོར་གསུམ་ཚད། །གཞང་དང་ཆུ་སོ་ལྟེ་བ་སྙིང༌། །སྔོན་པོ་མཚམས་མཐའ་མ་མོ་དང༌། པིར་འདྲ་སུམ་མདོ་རིས་འགྲམ་པ་གནད་ནི་ཉི་ཤུ་དགུ་ཡི་ཚད། །རང་གི་ལག་མཐིལ་ཚད་ཡིན་ནོ། །ལྷག་མ་གནད་ནི་ལྔ་བཅུ་དྲུག །སོར་ཕྱེད་ཀྱི་ནི་ཚད་དུ་འདོད། །གཞན་དག་གནད་དེ་ཏིལ་འབྲུ་སྟེ། འབྲས་ཙམ་གྱི་ནི་ཚད་དུ་འདོད། །རྩ་བཞིར་བཤད་པ་གང་ཡིན་པ། །ལུས་ཀུན་བརྟས་པར་བྱེད་པ་རྣམས། །དེ་ནི་གནད་ལ་གནས་པ་ཡིན། །དེས་ནི་དེ་ཕུག་ཁྲག་དྲག་འབྱུང༌། །ལུས་ཟུངས་རྣམས་ནི་ཟད་པའི་ཕྱིར། །རླུང་འཕེལ་ནད་ནི་མི་བཟང་འདེབས། །རླུང་གིས་མཁྲིས་པ་རྒྱས་པར་བྱེད། །མཁྲིས་པ་རྒྱས་པར་གྱུར་པས་ན། །སྐོམ་དང་མགོ་འཁོར་སྐམ་དང་མྱོས། །ལུས་རྡུལ་ཚིགས་དབྱེ་ལུས་ལྷོད་དང༌། །དེ་ནི་གཤིན་རྗེའི་དབང་དུ་འགྲོ། །གནད་གཅོད་ན་ནི་མྱུར་བ་རུ། །ལུས་ཀྱི་ཚིགས་ནི་ཆོས་འགྱུར་ཏེ། །ཚིགས་ཀྱི་ཕྱོགས་སུ་བཅད་པས་ན། །རྩ་ནི་འཁུམས་པར་བྱེད་པ་ཡིན། །དེ་ལ་སྲོག་ཆགས་རྣམས་ཀྱི་སྲོག །ཁྲག་གནས་ན་ནི་གནས་པ། །ཡིན། །དེ་བས་གནད་མིན་ལེགས་ཕོག་ན། །ངེས་པར་འཆི་བར་མི་འགྱུར་རོ། །འགའ་ཞིག་སྨིན་པའི་ཡོན་ཏན་དང༌། །ཕྱོགས་གཅིག་ཏུ་ནི་ཕོག་པ་ཡིས། །འཆོ་བར་གྱུར་ཀྱང་དེ་ཡི་ནི། །དབང་བོ་མཚང་ཉིད་དུ་འགྱུར། །དེ་བས་འབད་དེ་གནད་དུ་ནི། །ཐལ་སྨན་མེ་བཙའ་ལ་སོགས་སྤང༌། །གནད་དུ་ཕོག་ན་ཆུང་དུས་ཀྱང༌། །ཕལ་ཆེར་ཤིན་ཏུ་གནོད་པ་ཡིན། །དེ་བཞིན་གནད་ལ་བརྟེན་པའི་ནད། །རབ་ཏུ་འབད་པས་གསོ་བར་བྱ། །ཡན་ལག་བརྒྱད་པའི་སྙིང་པོ་བསྡུས་པ་ལས། །ལུས་ཀྱི་གནས་ཀྱི་ལེའུ་བཞི་པའོ།། །།དེ་ནས་ལུས་ཀྱི་འགྱུར་བའི་བྱེ་བྲག་ཤེས་པར་བྱ་བའི་ལེའུ་བཤད་པར་བྱའོ། །ཇི་ལྟར་འབྲས་བུ་མེ་ཏོག་དང༌། །མེ་ཡི་དུ་བ་ཆར་གྱི་སྦྲིན། །ཕྱིས་འབྱུང་མཚན་མ་ཡིན་པ་ལྟར། །དེ་བཞིན་འཆི་ལྟས་ལས་ངེས་འཆི། །འཆི་ལྟས་མེད་ན་མི་འཆིལ། །འཆི་ལྟས་སྣང་ན་
འཚོ་མི་འགྱུར། །འཆི་ལྟས་འཆི་ལྟས་མི་ཤེས་པ། །མི་མཁས་འཆི་ལྟས་མེད་མིན་ཤེས། །ལ་ལ་རྟེན་དང་བརྟེན་པ་པོའི། །ཁྱད་པར་གྱིས་དེ་གཉིས་སུ་འདོད། །ནད་ཀྱི་ཚུལ་ནི་མང་པོ་ལས། །འཆི་ལྟ་ཚུལ་དུ་འབྱུང་བར་འགྱུར། །ནད་ཞིན་ནི་ཞི་འགྱུར་ལ་།བརྟན་པར་གནས་ན་འཆི་བར་འགྱུར། །གཟུགས་དང་དབང་པོ་སྐད་དང་མདོག །གཟུགས་བརྙན་བྱ་བ་སོགས་པ་དང༌། །དངོས་པོ་དག་ནི་གཞན་ལ་ཡང༌། །ཐ་མལ་པ་ལས་རྒྱུ་མེད་པར། །གཞན་དུ་གྱུར་གནག་མདོར་གང་ནི། །འཆི་ལྟས་ཡིན་པར་དེ་ཤེས་བྱ། །སྐྲ་དང་བ་སྤུ་མ་བསྐུས་པར། །སྣུམ་གྱིས་བསྐུས་ལྟར་གང་སྣང་དང༌། །གང་ཞིག་མིག་ནི་རབ་གཡོ་དང༌། །མི་འགྱུར་ཕྱིར་འབྱུང་ཁུང་བུར་ཞུགས། །ཡོ་དང་བགྲད་དང་འཇུམས་བ་དང༌། །བཅུ་མ་ཞིང་སྨིན་མ་སྨད་པ་དང༌། །འཁྲུལ་དང་མཐོང་བ་ཉམས་པ་དང༌། །སེ་མོའི་མིག་ལྟར་ལྟ་བ་དང༌། །ཐི་བ་འདྲ་དང་མགལ་མེ་འདྲ། །མཆི་མ་འཛག་ཅིང་རྫིམ་འཁྲུགས་།སྣ་ནི་ཤིན་ཏུ་གདངས་པ་དང༌། །ཞོམ་དང་འབྲུམ་ཕན་གྱིས་ཁྱབ་དང༌། སྐྱང་དང་གོས་དང་སྙིད་པ་དང༌། གང་གི་མ་མཆུ་འཕྱངས་པ་དང༌། །ཡམ་ཆུ་གྱེན་ལ་བརྗེས་པ་དང༌། །གཉི་ག་འཛམ་བུ་སྨིན་འདྲར་སྣང༌། །སོ་གནག་གསེག་མར་བཅས་པ་དང༌། །དམར་ཞིང་སོ་ཞོ་ནག་ནོག་ཅན། །གློ་བུར་དུ་ནི་འབྱུང་བ་དང༌། །ལོ་ནི་ཡོ་དང་རྟག་ཏུ་འབྱིན། །སྐྲང་དང་སྐམ་དང་ལྕི་དང་གནག །གོས་དང་རྩུབ་དང་ཚོར་བ་མེད། །མཇིང་པས་མགོ་ནི་མི་ཐིག་དང། །རང་གི་ལྷག་རྒྱབ་ཁུར་ལྟར་ལྕི། །འགྲམ་པས་ཁན་གནས་པ་ཡི། །ཁ་ཟས་བླད་པར་མི་ནུབ་པ། །གང་ཞིག་རྒྱུ་མེད་པར་ཡན་ལག །ཤིན་ཏུ་ལྕི་བའམ་ཤིན་ཏུ་ཡང༌། དགུ་དང་སྣད་པ་མེད་པར་ནི། །བུ་ག་རྣམས་ལས་ཁྲག་འབྱུང་དང༌། །གང་ཞིག་ཕོ་མཚན་ནུབ་པ་དང༌། །རླིག་པ་རབ་ཏུ་འཕྱངས་བའམ་།དེ་ལས་གོ་ལོག་གྱུར་བ་རྣམས། །ཐམས་ཅད་འཆི་བདག་དབང་གྱུར་ཡིན། །གང་གི་རྩ་རིས་སྔོན་མེ་དཔར། །ཟླ་བ་ཚེས་པ་ལྟར་བུ་ནི། །འཕྲལ་བའམ་ཆུ་སོའི་སྟེང་ན་གནས། །དེ་ནི་ཟླ་དྲུག་ལས་མི་འཚོ། །ལུས་ཅན་
།གང་གི་ལུས་ལ་ཆུ། །པདྨའི་འདབ་མ་ལྟ་བུར་ནི། །རྒྱལ་ཚེ་ཆུ་ནི་མི་ཆགས་པ། །དེ་ནི་ཟླ་བ་དྲུག་ན་འཆི་།སྤྱི་བོ་དུའམ་སྣུམ་བཅས་སྣང༌། །དེ་ནི་ཟླ་བ་གཅིག་ན་འཆི། །སྤྱི་བོའམ་སྨིན་མཚམས་གསར་དུ་ནི། །མཚམས་བྱེ་བའམ་གཙུག་འཁྱིལ་སྣང༌། །ནད་མེད་ཞག་ནི་དྲུག་གིས་འཆི་།ནད་པ་ཞག་གསུམ་ན་འཆི་འགྱུར། །ལྕེ་གནག་ཁ་ནི་མནམ་པ་དང༌། །མིག་གཡས་ཕུགས་སུ་བྲོས་བའམ་།བྱ་ནི་མགོལ་བས་པ་དག །གང་ཡིན་དེ་ནི་ཡོངས་སུ་སྤངས། །གང་ཞིག་ཁྲུས་བྱས་བྱུགས་པ་དང༌། །ལོས་ཀུན་གཤེར་བར་གནས་བཞིན་དུ། །སྙིང་ག་ཤིན་ཏུ་མྱུར་བར་བསྐམས། །དེ་ནི་ཟླ་ཕྱེད་ལས་མི་འཆོ། །གློ་བུར་དུ་ནི་ལུས་ཀུན་མདོག །ཅིག་ཅར་ཐ་མ་ལ་པ་ལས་ཉམས། །དེ་བཞིན་ནད་ནི་སོགས་པ་དང༌། །རྩུབ་དང་སྣུམ་འགྱུར་འཆི་བ་ཡིན། །གོང་གི་སོར་མོ་དྲངས་པ་དང༌། །སྒྲ་མི་འབྱུང་བ་དེ་མི་འཚོ། །དེ་བཞིན་ལུད་པ་སྦྲིད་སྩོགས་ལ། །གང་ཞིག་སྔོན་མེད་སྒྲ་བྱུང་བའམ། །དབུགས་འབྱིན་ཐུང་བའམ་རིང་བའམ། །དྲི་མནམ་པའམ་དྲི་ཞིམ་འགྱུར། ལུས་ནི་ཁྲུས་བྱས་མ་བྱས་རུང༌། །མི་མ་ཡིན་པའི་དྲི་འབྱུང་བའམ། །གོས་རྨ་དྲི་མ་བྱུང་ན་ཡང༌། །དེ་ནི་ལོ་གཅིག་ནས་འཆི་འགྱུར། གང་ཞིག་ཤིག་དང་སྦྲང་མ་སྩོགས། །དྲི་ཞིམ་པས་ནི་འདུ་བའམ། །དྲི་ང་བས་ནི་སྤོང་འགྱུར་ན། །དེ་ནི་ལོ་གཅིག་ལས་མི་འཚོ། །གང་ཞིག་རྟག་ཏུ་ལུས་ཚལ། །གྲང་བ་ཉིད་དུ་སྣང་བ་དང༌། །བསིལ་བ་ཤིན་ཏུ་ཚ་བར་སྣང༌། རྒྱུ་མེད་པར་ནི་རྡུལ་དང་རེངས། །གང་ཞིག་གྲང་བའི་ཆུ་བུར་འབྱུང༌། །ལུས་གྲང་བ་ལས་ཚ་བ་སྐྱེས། །གྲང་གདུངས་ཐན་པ་ལ་མི་དགའ། །དེ་ནི་གཤིན་རྗེས་དབང་འགྱུར་ཡིན། གང་གི་སྙིང་ག་དྲོ་གྱུར་ལ་།ལྟོ་བ་ཤིན་ཏུ་གྲང་གྱུར་ཅིང༌། བཤད་བ་འཁྲུ་ཞིང་སྐོམ་དང་ཆེ། །དེ་ནི་རོ་དང་འདྲ་བ་ཡིན། བཤད་དང་གཅིག་བ་མཆིལ་སྣབས་སམ། །ཁ་ཆུ་ཆུ་ན་ནུབ་གྱུར་པའམ། །མཆི་ལ་མ་ཁ་དོག་སྣ་ཚོགས་པ། །གང་ཡིན་པ་དེ་ཟླ་གཅིག་འཆི་།ས་ནི་ནམ་མཁར་མཐོང་བ་དང༌། ནམ་མཁའ་སར་ནི་མཐོང་གྱུར་དང༌། །གཟུགས་མེད་གཟུགས་ཅན་ལྟ་བུ་དང༌།
གཟུགས་ཅན་གཟུགས་མེད་ལྟར་གནས་མཐོང༌། །དེ་བཞིན་འདོད་ཅན་འདོད་ཅན་འདོད་མེད་མཐོང༌། །དཀར་པོ་གནག་དང་པ་མེད། །མིག་ནད་མེད་པར་ཟླ་བ་ནི། །གཟུགས་མངར་རི་མེད་མཐོང་དང༌། །གཉིད་མ་ལོག་པར་དྲི་ཟ་སྲིན། །ཡི་དྭགས་གཞན་ཡང་དེ་འདྲ་བའི། །གཟུགས་མི་སྡུག་པ་མཐོང་འགྱུར་བ། གང་ཡིན་དེ་ནི་འཆི་བར་འགྱུར། །སྨེ་བདུན་དང་ནི་ཉེར་གནས་པའི། །སྐར་མ་སྒྲིབ་མེད་མ་མཐོང་དང༌། །གདུ་ཚིགས་གུང་ཚུགས་མ་མཐོང་བ། །དེ་ནི་ལོ་གཅིག་མི་འཚོའོ། །འབྲུག་སྒྲ་ཆུ་བོའི་སྒྲ་དང་ནི། །གླིང་བུ་བི་ཝང་རྔ་ཡི་སྒྲ། །སྒྲ་གཞན་མེད་ཀྱང་ཐོས་པའམ། །ཡོད་པ་ཐོས་པར་མ་གྱུར་དང༌། །རྣ་བའི་བུ་ག་བཀབ་པ་ཡིས། །འུར་འུར་པོ་ཡི་སྒྲ་མི་ཐོས། །དེ་བཞིན་དྲི་དང་རོ་དང་རེག །གང་ཞིག་ལོག་པར་ཤེས་པ་དང༌། ཡང་ན་ཡོང་ཡེ་མི་ཚོར་དང༌། །མེ་མར་ཤི་བའ་I་དྲི་མ་ཚོར། །ཆོག་བཞིན་བྱས་ནད་སྐྱེད་ལ། །ཆོ་ག་ལོག་པས་བདེ་གནས་དང༌། །གང་གི་ལུས་ནི་རྡུལ་གཡོགས་འདྲ། །ལུས་ལ་སྣད་བ་མི་ཆོར་དང༌། །དཀའ་འཐུབ་དྲག་དང་ཆོ་ག་ནི་།སྔོན་འགྲོའི་རྣལ་འབྱོར་མེད་པ་རུ། །དབང་པོ་ལས་འདས་ཤེས་པ་སྐྱེད། །དེ་རྣམས་འཆི་བར་ཤེས་པར་བྱ་སྐད་འགགས་དམན་ཞིང་མི་གསལ་དང༌། །གང་ཞིག་སྐད་ནི་འཛེར་གྱུར་དང༌། །སྨྲ་འདོད་པ་ནི་འཕྲལ་དུ་ནི་།བརྗེད་འགྱུར་དེ་ནི་མི་འཚོའོ། །སྐད་གསང་ཤིན་ཏུ་ཉམ་ཆུང་འགྱུར་།མདོག་དང་སྟོབས་ནི་ཉམས་པ་དང༌། །རྒྱུ་མེད་པར་ན་ཉིད་འཕེལ་བར། །སྣང་བདག་ཀྱང་འཆི་བར་བཤད། །སྐད་གདངས་ཉམས་པར་གྱུར་པ་དང༌། །བདག་ཉིད་འཆི་བར་སྨྲ་བ་དང༌། །ཏེ་འདྲའི་སྒྲ་ནི་ཐོས་པ་དག །རིང་དུ་ཡོངས་སུ་སྤངས་བར་བྱ། །ལུས་དབྱིབས་དང་ནི་ཚད་དང་ནི། །མདོག་གམ་གཟི་མདངས་གང་དག་གིས། །གཟུགས་བརྙན་འགྱུར་བ་རྨི་ལམ་དུ། །མཐོང་ནའང་དེ་ནི་འཆི་བར་འགྱུར། །ཉི་མ་མེ་ལོང་ཆུ་སྩོགས་ལ། །གང་ཞིག་དབྱིབས་དང་ཚ་དང་ནི། །ལུས་ཀྱི་རྣམས་པ་སྣང་གྱུར་པ། །གཟུགས་བརྙན་ཞེས་ནི་དེ་ལ་བཤད། །མདོག་དང་གཟི་མདངས་ལ་བརྟེན་གང༌། །ལུས་གཏོགས་གཟུགས་བརྙན་ལྟ་བུ་ཡིན། །གང་
གི་གཟུགས་བརྙན་བཅས་པ་དང༌། །གྱེས་དང་ལྷག་དང་འཁྲུགས་པ་དང༌། །མོག་མེད་མགོ་གཉིས་ཡོན་པོ་དང༌། །མི་སྡུག་གཞན་དུ་གྱུར་པར་སྣང༌། །མཚན་ཉིད་ལས་བྱུང་མ་ཡིན་ན། །དེ་ནི་ཚེ་ཟད་ཡིན་ཞེ་བྱ། །གང་གི་མིག་གི་རྒྱལ་མོར་ནོ། །གཟུགས་བརྙན་སྣང་བར་མ་གྱུར་དང༌། །ནམ་མཁའ་ལ་སྩོགས་ལྔ་པོ་ཡི། གཟུགས་བརྙན་རྣམ་པ་སྣ་ཚོགས་ལྔ། །ནམ་མཁའ་དངས་ཤིང་སྔོ་བ་དང༌། །སྣུམ་བཅས་མདོག་དང་བཅས་པ་ཡིན། །རླུང་ལས་རྡུལ་ཅན་དམར་དང་གནག །ཐལ་མདོག་རྩུབ་ཅིང་མདོག་ཉམས་ཡིན། །མོ་ཡི་དམར་ཞིང་དང་བར་སྣང༌། །མདངས་ལྡན་བལྟ་ན་སྡུག་པ་ཡིན། །ཆུ་སྐྱེས་བཻཌཱུཪྻ་འདྲ་སྣང༌། །དག་ཅིང་རབ་སྣུབ་བདེ་བ་ཡིན། ས་ཡི་བརྟན་སྣུམ་དག་པ་དང༌། །མཐུག་ཅིང་དཀར་དང་སྡོད་བསངས་ཡིན། །རླུང་ནི་འཆི་སྡུག་བསྔལ་སྐྱེད། །གཞན་དག་བདེ་བ་སྐྱེད་པ་ཡིན། །མེ་ཡིས་ཐམས་ཅད་མདོག་ཅན་ཏེ། །དེ་ནི་རྣམ་པ་བདུན་དུ་བཤད། དམར་དང་སེར་དང་ཀར་ནག་པོ། །ལྗང་དང་སྐྱ་དང་ནག་པོའོ། །དེ་རྣམས་ལ་ནི་གང་གསལ་འགྱུར་།སྣུམ་པ་དྲི་མ་མེད་དེ་དག །དྲི་མ་ཅན་དང་རྩུབ་པ་དང༌། །ཞུམ་པ་སྡུག་བསྔལ་སྐྱེད་པ་ཡིན། །མདངས་ཀྱི་མདོག་ནི་ཟིལ་གྱིས་གནོན། །འོད་ནི་ཁ་དོག་གསལ་བྱེད་ཡིན། །མདངས་ཀྱིས་ཉེ་བར་སྣང་བ་ཡིན། །འདི་ནི་རིང་ནས་སྣང་བ་ཡིན། །འགའ་ཞིག་མདངས་དང་ཁ་དོག་གི །མཚན་མའི་ཁྱད་པར་མེད་མིན་ཏེ། །མི་རྣམས་མཚན་མ་བཟང་ངན་འབྱུང༌། །དུས་སུ་མདངས་ལ་བརྟན་པ་ཡིན། །གང་ཞིག་རྐང་པ་འདྲུད་པ་དང༌། །ཕྲག་པ་ཡོ་བས་འགྲོ་བ་དང༌། །གང་ཞིག་ཕན་ཟས་མང་ཟོས་ཀྱང༌། །རྟག་ཏུ་སྟོབས་ནི་ཉམས་འགྱུར་ན། །གང་ཞིག་ཉུང་ཟོས་བཤང་གཅི་མང༌། །མང་ཟོས་བཤང་གཅི་ཉུང་བ་དང༌། །ཉུང་ཟོས་བད་ཀུན་གྱི་ཉེན་ཞིང༌། །དབྱུགས་རིངས་འབྱིང་ཞིན་ས་ལ་འགོལ་།གང་ཞིག་དབུགས་རིངས་ཕྱུང་ནས་ནི། །ཐུང་དུ་རྔུབས་ཏེ་ཤུགས་འབྱིན་དང༌། །ཐུང་དུ་དབུགས་འབྱིན་བསྣུན་པ་ལྟར། ཤིན་ཏུ་འདར་བར་བྱེད་པ་ཡང༌། །གང་ཞིག་ལག་ངར་བསྐུམས་ནས་ནི་
མགོ་བོ་དཀའ་བས་འདེབས་པ་དང༌། །གང་ཞིག་འཕྲལ་བ་ལས་རྡུལ་འཛག །ཚིགས་མཚམས་ལྷོད་པར་གྱུར་པ་དང༌། །ཉམས་ཆེ་བ་འམ་ཉམ་ཆུང་གྱུར་པ་གང༌། །ལྡང་བའི་ཆེ་ན་འགྱུར། །གང་ཞིག་གན་རྐྱལ་ཉལ་ནས་ནི། རྐང་པ་རྣམ་པར་བསྐྱོད་པ་དང༌། །རྩིག་པ་མ་ལ་སྟན་ལ་སོགས་པ། །གང་ཞིག་རྟག་ཏུ་སྙེས་པ་དང༌། །རྒྱུ་མེད་པར་དགོད་མྱོངས་ཚུལ་གྱིས། །མཆུ་ལ་ལྡགས་པར་བྱེད་པ་དང༌། །ཡ་མཆུ་ལྡགས་པར་བྱེད་པ་དང༌། །སྒྲ་བཅས་པར་ཡང་གང་བྱེད་དང༌། །ལུས་མདོག་ནག་པོ་སེར་པོ་དང༌། །དམར་པོའི་གཟུགས་བརྙན་སྣང་བ་དང༌། །སྨན་པ་སྨན་དང་ཁ་ཟས་དང༌། །བླ་མ་མཛའ་བཤེས་ལ་སྡང་གང༌། །འདི་དག་ཐམས་ཅད་གཤིན་རྗེ་ཡི། །དབང་གྱུར་ཡིན་པར་ཤེས་པར་བྱ། །གང་ཞིག་དྲོད་ཆུང་སེམས་གཡེངས་དང༌། །རྟག་ཏུ་མདངས་ངན་ཡིད་མི་བདེ། །གང་ཞིག་གཏོར་མ་བྱ་རོག་ལ། །བྱིན་ཡང་ཟ་བར་མི་བྱེད་དང༌། །གང་ཞིག་རྒྱུ་མེད་ཡིད་གཞུངས་དང༌། །མཛེས་ཤིང་ལུས་རྒྱས་དཔལ་ཐོབ་པའམ། །དེ་ལས་ཉམས་པར་གྱུར་པ་དག །དེ་ནི་གཤིན་རྗེའི་ཁྱིམ་དུ་འཇུག །ཐ་མལ་པར་རམ་ནད་པ་ཡིས། །གང་ཞིག་ཡོན་ཏན་སྐྱོན་རང་བཞིན། །སྔ་ལས་གཞན་དུ་འགྱུར་པར་སྣང༌། །དེ་ནི་ཟླ་དྲུག་ལས་མི་འཚོ། །དད་དང་ཚུལ་ཁྲིམས་དྲན་དང་སྦྱིན། །བློ་གྲོས་སྟོབས་ནི་རྒྱུ་མེད་པར། །འདི་དྲུག་ལས་ནི་ལྡོག་གྱུར་པ་།ཟླ་བ་དྲུག་ནས་འཆི་བར་འགྱུར། །འགྲོ་དང་ཚིག་ནི་སྨྱོ་བ་འདྲ། །འདར་རྨོངས་ཟླ་བ་གཅིག་ནས་འཆི། །སྐྲ་ཕྱི་བ་ན་ཚོར་བ་མེད་།ཞག་དྲུག་ནས་ནི་འཆི་བར་འགྱུར་།གང་ཞག་ལྐོག་ནད་མེད་པ་རུ། །མིད་པར་ཁ་ཟས་མི་ཆུད་དང༌། །བྲན་གཡོག་ལོག་པར་བྱེད་གྱུར་པ་།དེ་ནི་འཆི་བ་དང་འདྲར་བཤད། །གང་ཞིག་རྟག་ཏུ་གཉིད་ལོག་པའམ། །གཉིད་མེད་དེ་ཡང་མི་འཚོའོ། །མཆིམས་གདོང་ནི་ཁེབས་པ་དང༌། །རྐང་པ་ཤིན་ཏུ་རྡུལ་བ་དང༌། །མིག་ནི་མི་སྡུག་པར་སྣང་བ། །གཤིན་རྗེའི་གནས་སུ་འགྲོ་བར་འགྱུར། །སྔོན་ཆད་དགའ་བའི་དངོས་ལ་གང༌། །
དགའ་མི་འགྱུར་བ་དེ་མི་འཚོ། །གང་ཞིག་འཕྲལ་དུ་གྱུར་པ་ཡིན། །མཚན་ཉིད་ཐམས་ཅད་སྣང་བ་དང༌། །འཕྲལ་དུ་ལྡོག་པར་འ།གྱུར་བ་དག །དེ་ནི་མོད་ལ་འཆི་བར་འགྱུར། །རིམས་ནི་སྟོབས་དང་ལྡན་པ་དང༌། །གཏིང་དུ་ཞེན་ཞིང་ཡུན་རིང་དང༌། བླ་བཅས་མགོ་འཁོར་དབུགས་མི་བདེ། །རིད་ཅིང་སྐྲངས་དང་མེ་དྲོད་ཉམས། །ཚིག་མི་གསལ་ཞིང་ཐོགས་པ་དང༌། །མིག་དམར་སྙིང་ནི་ག་ཟེར་བ་དང༌། །སྔ་དྲོ་ལུད་པ་སྐམ་པོ་འབྱུང༌། །ཕྱིར་དྲོ་དེ་ལས་གཞན་དུ་འགྱུར་།བད་ཀན་ལུད་པར་བཅས་པ་དང༌། །སྟོབས་དང་ཤ་ནི་འཆི། །ཁྲག་དང་མཁྲིས་པ་ཤིན་ཏུ་དམར། །ཡང་ན་གང་པའམ་ཚོན་ཅན་ནམ། །དམར་དང་སེར་དང་ལྗང་མདོག་ཏུ། །ཁྲག་གི་གཟུགས་ནི་རབ་ཏུ་སྣང༌། །བ་སྤུའི་བུ་གནས་འཛག་དང༌། །ལྐོག་མ་སྙིང་གར་གོས་པ་དང༌། གོས་ལ་མ་ཆགས་དྲི་ངལ། །ཤུགས་བྱུང་ཤིན་ཏུ་མང་དུ་འབྱུང༌། །རྒད་པོ་སྐྱ་རབ་པ་སྐྱ་རྣ་བ་རིམས་ཐབས་སྐྱུགས། །ལུད་པ་སྐྲང་དང་ཚད་འཁྲུ་གསོད། །ལུད་པ་དབུགས་མི་བདེ་རིམས་སྐྱུགས་།།སྐོམ་དང་ཚད་འཁྲུ་འོར་ནད་དང༌། །གཅོང་ཅན་སྤོས་དང་རྩིབ་ལོགས་གཟེར། །ཁྲག་སྐྱུག་ཕྲག་པ་ཚན་འཆི། །སྐྱུག་པ་ཤུགས་དང་ལྡན་པ་དང༌། །བཤང་གཅི་དྲི་ཡོད་ཚོན་ཅན་དང༌། །ལུད་པ་བཤང་ནག་ཁྲག་དང་བཅས། །དབུགས་མི་བདེ་ཡུན་རིང་ན་འཆི། །སྐོམ་དད་ནད་གཞན་གྱིས་ཉམ་སྨད། །ལྕེ་འབྱུང་དྲན་པོ་སྟོར་འཆི། །ཆང་ནད་ཤིན་ཏུ་གྲང་བས་ཉེན། །ཤ་ཟད་ཏིལ་མར་གདོང་བསྐུས་འདྲ། །གཞང་འབྲུམ་རྐང་ལག་ལྟེ་བ་དང༌། །བཤང་སྒོ་རླིག་པའི་ཁ་སྐྲངས་དང༌། སྙིང་རྩི་བ་ལོགས་ཡན་ལག་ན། །སློན་བྲོ་གཞང་རྣམས་རིམས་ཀྱིས་ཉེན། །ཆད་འཁུར་མཆེར་བའི་དུམ་བུ་དང༌། །ཤ་བ་ཀྲུས་པའམ་སྣུམ་ནག་དང༌། །ཏིལ་མར་འོ་མ་མར་འདྲ་ཡང༌། །ཞོ་དང་རྐང་ཞག་ཆང་སྙིང་དང༌། །གླད་པ་གནག་ཚ་འདྲ་བ་དང༌། །ཤ་བརྡུངས་ཆུ་དང་སྦང་རྩི་དང༌། །རབ་དམར་གནག་དང་སྣམ་པ་དང༌། །རྣག་འདྲ་སླ་སྐ་རྣག་དང་བཅས། །ལུ་ཟུངས་སྣ་ཚོགས་འབྱུང་བ་དང༌། །བཤང་བ་
མེད་པའམ། །འབྱར་བག་སྦྲང་མ་ལྟ་བུའམ། །རི་མོ་ཅན་དང་ཚོན་ཅན་དང༌། །གཞང་གི་གཉེར་མ་ཕྱིར་འབྱུང་དང༌། །སྐྲ་ཅན་རུས་ཚིགས་གཟེར་བ་དང༌། བཤང་སྒོ་བྱེ་ཞིང་སྟོབས་ཟད་དང༌། །ཟས་ནི་ཉམས་འབྱུང་བ་དང༌། །སྐོམ་བཅས་རིམས་དང་སྐྱུག་པ་དང༌། །ལུས་ཚ་ལྟོ་སྦོས་རྒྱུན་འཁྲུས་འཆི། །རྡེའུ་འགགས་རླིག་པ་སྐྲངས་པ་དང༌། །གཅིན་འགགས་ནད་ཀྱིས་ཉམ་ཐག་གསོད། གཅིན་སྙི་སྐོམ་དང་ཚ་འབྲུམ་བཅས། །ཤ་རུལ་ཚད་པས་འཁྲུ་བ་འཆི། །ཐོར་ནད་དང་ནི་སྙིང་ག་རྒྱབ། །ནུ་མ་ཕྲག་པ་སྤྱི་བོར་བྱུང། །ཚིགས་དང་རྐང་ལག་པར་ནས། །གཅིན་སྲི་ནད་ཅན་སྟོབས་ཆུང་དང༌། །ཤ་རྣམས་ཐམས་ཅད་འདྲུལ་བ་དང༌། །སྐོམ་དང་ཚ་མྱོངས་རིམས་བཏབ་འཆི། །མེ་དབལ་གནད་ནི་འགགས་པ་དང༌། །སྐྱིགས་བུ་འགོ་འཁོར་དབུགས་མི་བདེ། །སྐྲན་ནི་རྒྱ་ཆེར་ཀུན་ནས་ཟླུམ། སྲ་ཞིང་རུས་སྦལ་ལྟར་མཐོ་དང༌། །རྩ་མངོན་རིམས་བཏབ་སྐྱུགས་པ་དང༌། །སྐྱིགས་བུ་སྦོས་ཤིང་ཟུག་གཟེར་བཅས། །ལུད་པ་ཆེ་མ་པ་སྙིང་འཕར་དང༌། །ཚང་འཁྲུ་སྐྲང་དང་དབུགས་མི་བདེ། །དམུ་རྫིང་བཤང་གཅི་འགགས་པ་དང༌། །དབུགས་མི་བདེ་སྐྲང་སྐྱིགས་བུ་དང༌། །རིམས་དང་མགོ་འཁོར་བརྒྱལ་སློན་འཁྲུ། །ཉམ་ཆུང་མི་ནི་གསོད་འགྱུར་ཞིང༌། །མིག་སྐྲང་བ་དང་མཆན་ཁུང་དང༌། །པགས་པ་རུལ་ཞིང་སྲབ་པ་དང༌། །བཀྲུ་སྨན་གྱིས་བཀྲུས་ལྟོ་སྦོས་ཞིང༌། །ཡང་དང་ཡང་དུ་འཕེལ་བ་འཆི། །སྐྱ་རྦབ་སྐྲང་དང་བཅས་པ་དང༌། །མིག་དང་སེན་མོ་སེར་པོར་སྣང༌། །སྙོམས་ཚ་ཡི་ག་འཆུས་དང་སློན། །བརྒྱལ་དང་ལྟོ་སྦོས་ཚད་འཁྲུ་འཆི། །སྐྲངས་ནད་བླ་བརྣན་སྣ་ཚོགས་ལྡན། །སྐྱེས་པ་རྐང་གཉིས་དང་པོར་སྐྲངས། །བུད་མེད་མགོ་ནས་སྐྲངས་ན་འཆི། །གཉི་གའང་མཚན་དང་མཆན་ཁུང་སྐྲངས། །རི་མོར་བཅས་འཛག་སྐྱུགས་པ་དང༌། །རིམས་དང་ཚད་འཁྲུ་དབུགས་མི་བདེ་།སྐྲངས་པའི་ཐ་མར་རིམས་ཚེད་འཁྲུ། །དེ་གཉིས་གཉིས་ཟད་མཐར་སྐྲངས་དང༌། །ལུས་ཅན་ཉམ་ཆུང་གྱུར་པ་དག །སྐྲངས་པར་གྱུར་ན་འཆི་བར་འགྱུར། །གང་ཞིག་སྐྲངས་པ་རྐང་པར་
གནས། །བྱིན་པའི་ཉར་ནི་ཕྱིན་པ་དང༌། །དཔྱི་ཡི་བར་དུ་གནོད་གྱུར་པ། །དེ་ནི་སྨན་པས་སྤང་བར་བྱ། །གང་གི་གདོང་ལག་རྐང་དང་ནི། །ལྷག་པར་སྐམས་པར་གྱུར་པའམ། །ལུས་མ་གཏོགས་འདི་ཤས་ཆེར་སྐྲངས། །དེ་ནི་ཟླ་བ་གཅིག་ན་འཆི། །མེ་དབལ་ལུད་པ་ཁ་དོག་ཉམས། །རིམས་བརྒྱལ་ཡན་ལག་བཅག་སྙམ་སེམས། །མགོ་འཁོར་ཁ་སྐམས་སྙིང་ག་ན། །ལུས་སྙོམ་ཚད་པས་འཁྲུ་ལྡན་སྙང༌། །མཛེ་ནི་ཡན་ལག་འདྲུལ་བ་དང༌། །མིག་དམར་སྐད་ནི་འགགས་པ་དང༌། །དྲོད་ཉམས་སྲིན་བུ་རྣམས་ཀྱིས་གཙེས། །སྐོམ་དང་ཚད་པས་འཁྲུ་ལྡན་འཆི། །རླུང་ནད་པགས་པས་ཚོར་མེད་བྱེད། །ལུས་འདར་སྐྲང་དང་ནད་ཀྱིས་གཟིར། །དྲེག་ནད་རྨོངས་ཤིང་བརྒྱལ་བ་དང༌། །མྱོས་དང་གཉིད་ཆེ་རིམས་མགོ་རེངས། །ཡི་ག་འཆུས་དང་དབུགས་མི་བདེ། །འཁུམས་ཤིང་ཆུ་བུར་རུལ་པ་འདྲ། མགོ་ནད་ཡིད་འཆུས་དབུགས་མི་བདེ། །རྨོངས་བག་ལ་འཁྲུ་ཞིང་སྐོམ་མགོ་འཁོར། །སྐད་འགགས་ལུས་ཟུངས་མེ་དྲོད་ཟད། །ལུས་ཉམས་ཆུང་ནད་ཀུན་གསོད་བྱེད། །རླུང་གི་ནད་དང་བརྗེད་བྱེད་དང༌། །མཛེ་ནད་ཁྲག་དང་དམུ་རྫིང་གཅོང༌། །སྐྲན་ཅན་གཅིན་ནད་ལྡན་པ་ཡིས། །ཤ་ཟད་ནད་ཚབས་ཆུང་ཡང་སྡང༌། །ཤ་དང་སྟོབས་ནི་ཤིན་ཏུ་ཟད། །ནང་འཕེལ་ཡི་ག་འཆུས་པ་དག །ནད་པ་གང་ལ་སྣང་འགྱུར་ཏེ། །ཟླ་བ་ཕྱེད་དང་གཉིས་ན་འཆི། །རླུང་ནད་གཏུན་འདྲ་ལ་འཕེལ་འགྱུར་ཞིང༌། །མི་ཟད་སྙིང་ག་གནས་པ་དག །སྐོམ་དད་ཀྱིས་ནི་ཡོངས་གདུངས་པ། །འཕྲལ་དུ་སྲོག་ནི་འཕྲོག་པར་བྱེད། །རླུང་ནད་ཉྭ་ནི་ལྷོད་བྱེད་ཅིང༌། །སྣ་ནི་ཡོན་པོར་འཆུས་བྱེད་པ། །གང་གི་འབྲམ་པ་ཟད་པར་སྣང༌། །འཕྲལ་དུ་སྲོག་ནི་འཕྲོག་པ་ཡིན། །རླུང་ནད་ལྟེ་བ་གཞང་བར་སོང༌། །ཡང་ན་བརླ་དབྲག་གཉིས་ན་གནས། །སྟོབས་ལྡན་རླུང་ནི་ཉམ་ཆུང་བའི། །གཞང་དང་སྙིང་གར་གནས་བྱེད་པའམ། །དྲི་མ་ཆུ་སོའི་ལྟག་ལྟེ་བ། །བཀག་ཏེ་ནད་ནི་སྐྱེད་པ་དང༌། །ཆུ་སོར་གཟེར་བར་བྱེད་འགྱུར་ལ། །སྐོམ་དད་ལ་འཁུར་བར་བྱེད་པ་དང༌། །ཆུ་སོ་བཤང་སྒོར་གནས་ནས་ནི། །རླུང་ནི་
དབུགས་མི་བདེ་སྐྱེད་དང༌། །རྩིབ་མའི་རྩེ་མོ་འདེགས་བྱེད་ཅིང༌། །སྙིང་གར་རླུང་ནི་བརྟེན་པ་དང༌། །མིག་བགྲད་འགྱུར་བ་མེད་བྱེད་པ། །འཕྲལ་དུ་སྲོག་ནི་འཕྲོག་པར་བྱེད་།འཕྲལ་དུ་རིམས་དང་ཚ་བས་བཏབ། །སྐོམ་དད་བརྒྱལ་དང་སྟོབས་ཟད་དང༌། །ཚིག་མཚམས་བྲལ་བར་གྱུར་པ་རྣམས། །ཉེ་བར་འཆི་བར་འགྱུར་བ་ཡིན། །ནང་པར་གནག་གི་གདོང་ལས་ནི། །རྡུལ་ནས་ཤས་ཆེར་འཛག་འགྱུར་ཞིང༌། །ཁར་ཆགས་རིམས་ཀྱིས་གདུངས་པ་རྣམས། །དེ་ཡང་འཚོ་བར་དཀའ་བ་ཡིན། །གང་གི་ལུས་ལ་འབྲུམ་ཕྲན་ནི། །བྱི་རུའི་མདོག་འདྲ་སྣང་གྱུར་པ། །བྱུང་ནས་མྱུར་དུ་མི་སྣང་གྱུར། །དེ་ནི་རིང་པོར་མི་ཐོགས་འཆི། །འབྲུམ་པ་སྲན་ཆུང་བཤུས་འདྲ་ཞིང༌། །དེ་བཞིན་བྱི་རུའི་མདོག་འདྲ་བ། །ནང་དུ་ཁ་བལྟ་ཚད་འབྲུམ་འདྲ། །འབྲུམ་བུས་ལུས་ནི་འཇིག་བྱེད་ཡིན། །མིག་སེར་གདོང་སེར་རྒྱས་པ་དང༌། །མུར་འགྲམ་གཉིས་ཀྱི་ཤ་ཟད་པ། །སྐྲག་ཅིང་ལུས་ནི་ཚ་བདག །གང་ཡིན་དེ་ནི་སྤངས་བར་བྱ། །རྒྱུ་མེད་ཕྲུགས་པ་དག་ལས་རྨ། །འཕེལ་ཞིང་མཆེད་པར་བྱེད་པ་དང༌། །རླུང་སྐྱེད་གང་ཡིན་ན་བ་མེད། །མཁྲིས་པ་ལས་གྱུར་ཚ་བ་མེད། །བད་ཀན་ལས་གྱུར་རྣག་མེད་དང༌། །གང་ཞིག་ནད་སྐྱེད་ཟུག་གཟེར་མེད། །ཕྱེ་མས་ཁྱབ་དང་རྙིང་པར་སྣང༌། །གང་དུ་གློ་བར་དག་ཏུ་ནི། །རྒྱལ་མཚན་མ་དུང་ལ་སོགས་གཟུགས་སྣང༌། །རྨ་དེ་ཐམས་ཅད་སྤངས་བར་བྱ། །མཚན་པར་རྡོལ་ན་བཤང་གཅིག་རླུང༌། །འབྱུང་ཞིང་སྲིན་བུས་གཅེས་པ་དང༌། །པུས་མོ་ཕན་ཚུལ་འབྱེར་བ་དང༌། །རྐང་བ་བཏེག་ནས་ལྟུང་གྱུར་དང༌། །ཡང་དང་ཡང་དུ་ཁ་བསྒྱུར་བའི། །ནད་པ་དེ་ནི་འཚོ་མི་འགྱུར། །སོ་ཡིས་སེན་མོའི་རྩེ་གཅོད་ཅིང༌། །སེན་མོས་སྐྲའམ་རྩ་གཅོད་དང༌། །ས་ལ་ཤིང་བུས་འདྲི་བ་དང། །བོང་པས་བ་རྡེག་པ་དང༌། །སྤུ་ལྡང་ཅིན་ནི་བསྐ་བ་དང༌། །ལུད་པ་བསྐམས་ཤིང་རིམས་ཀྱིས་འདེབས། །སྐད་ཅིག་དགོད་ཅིང་སྤྱུགས་གླུ་ལེན། །མ་ལ་ལ་རྐང་བས་རྡེག་པ་དང༌། །སྐད་ཅིག་རེ་རེས་བུ་གསོལ། །ནད་པ་གང་ཡིན་དེ་མི་འཚོ། །
གདོང་ལ་སྨེ་བ་ངོ་ཁབས་དང༌། །མཛེར་སྐྱེས་སོ་སེན་ཐིག་ལེ་ཆགས། །ལྟོ་ལ་སྣ་ཚོགས་རྩ་སྣང་བ། །གློ་བུར་བྱུང་བ་དེ་མི་འཚོ་།གྱེན་དུ་དབུགས་རྩེག་དྲོད་ཡལ་ཞིང༌། །བརླང་བྲག་གཉིས་སུ་གཟེར་གྱིས་ཉེན། །དཔལ་དང་རྣམ་པར་བྲལ་གྱུར་པ། །བློ་དང་ལྡན་པས་ཡོངས་སུ་སྦང༌། །གང་གི་ནད་ནི་འཕེལ་འགྱུར་དང༌། །རང་བཞིན་ཡོངས་སུ་ཉམས་པ་ནི། །གང་ལ་འཕྲལ་དུ་འབྱུང་གྱུར་པ། །དེ་ནི་མོད་ལ་འཆི་བར་འགྱུར། །སྨན་བས་ནད་པ་གནག་ཞིག་ལ་།སྨན་གྱི་བྱ་བ་བྱས་གྱུར་པ། །འབད་ཀྱང་སོས་པར་མ་གྱུར་ན། །དེ་ཡིད་སྲོག་ནི་རྙེད་པར་དགའ་མཁས་ཤིང་མང་དུ་གྲུབ་པ་དང༌། །ཆོ་ག་བཞིན་དུ་བྱིན་གྱུར་ཡང༌། །སྨན་གྱི་བྱ་བ་མ་གྲུབ་གང༌། དེ་ལ་གསོ་བའི་ཐབས་མེད་དོད། །གང་གིས་སྨན་ནི་སྦྱོར་བའི་ཚེ། །རྒྱུ་མེད་པར་ནི་ཕྱིན་ཅི་ལོག །མདོག་དང་རོ་སྩོགས་ལོགས་གྱུར་ན། །ནད་མེད་ཡིན་ཡང་དེ་མི་འཚོ། །གང་གི་གནས་སུ་ཤིང་བཅས་མེད། རླུང་མེད་ཀྱང་ནི་ཤིན་འགྱུར་དང༌། ནད་པ་གང་གི་ཁྱིམ་དུ་ནི། །སྣོད་ནི་ཤིན་ཏུ་མང་པོ་དག །ཆག་གམ་ལྷང་བར་གྱུར་པ་ན། །དེ་ཡི་སྲོག་ནི་སྙེ་པར་དགའ། །མི་གང་ཉམ་ཆུང་གྱུར་བ་ཡང༌། །གློ་བུར་སོས་པར་སྣང་འགྱུར་བ། །དེ་ཡི་སྲོག་ཀྱང་མ་ངེས་པ་།ཡིན་པར་རྒྱན་ཤེས་བུས་བཤད་དོ། །ཉེ་དུ་མཛའ་བོ་རྣམས་ཀྱིས་ནི། །དྲིས་ཀྱང་མཉན་པར་མི་བྱ་ལ། །སྨན་པས་སྨྲ་བར་མི་བྱ་ཞིང༌། དེ་ཡི་གསོ་བའང་ཁས་མི་བླང༌། །གཤིན་རྗེའི་ཕོ་ཉ་ཤ་ཟ་སྩོགས། །གཞན་གྱིས་ཉེ་བར་བསྟེན་པ་གང༌། །སྨན་གྱིས་སྟོབས་ནི་འཇོམས་པས་ན། དེ་ཕྱིར་དེ་ནི་ཡོངས་སུ་སྤངས། །ཚེ་ཡི་རིག་བྱེད་འབྲས་བུ་ཀུན། །ཚེ་ཤེས་པ་ལ་གནས་པ་ཡིན། །དེ་བས་འཆི་ལྟས་གནས་པ་ཀུན། སྨན་པས་འབད་དེ་ཤེས་པར་བྱ། །ཚེ་དང་བསོད་ན་མས་གཉི་ག་ཟད། །དེ་གཉིས་ཟད་པར་མ་གྱུར་ཡང༌། །ཡང་བ་ནི་མ་སྤངས་པས་།སྲོག་ཆགས་རྣམས་ན་འཆེ་བར་བཤད། །ཡན་ལག་བརྒྱད་པའི་སྙིང་པོ་བསྡུས་པ་ལས། ལུས་ཀྱི་གནས་ཀྱི་ལིའུ་ལྡ་པའོ།། །།དེ་ནས་ལུས་ཀྱི་གནས་ཀྱི་ཕྱོ་ཉ་ལ་སྩོགས་པ་བཤད་པར་བྱའོ། ཡ་མཚན་ཅན་དང་དགེ་སྦྱོར་དང༌། རིགས་མཐུན་
ལས་ནི་འགྲུབ་པར་བཤད་།དེ་ལས་གོ་བཟློག་ཕོ་ཉ་ནི། །ལས་ནི་འགྲུབ་མིན་རྟགས་སུ་བཤད། །དམན་དང་འཇིགས་རེངས་སྔངས་པ་དང༌། །མཚོན་ཆད་དབྱུག་ཐོགས་མགོ་རེག་དང༌། །མ་ནིང་སྨར་རལ་པ་ཅན། །བཀྲ་མི་ཤིས་པའི་མིང་དང་ལྡན། །སྡིག་ལས་བུད་མེད་དྲི་མ་ཅན། །མང་པོ་ནད་པ་མི་སྡུག་དང༌། །ཕྲེང་བ་བྱུག་པ་དམར་པོས་བརྒྱན། །ཏིལ་མར་འདམ་བསྐུས་གོས་སྙིང་དང༌། །མདོག་ངན་རླན་ཅན་གོས་གཅིག་གོན། །བོང་བུ་རྔ་མོ་མ་ཧེ་ཞོན། །ཤིང་དང་བོང་བ་ཉེད་པ་དང༌། །རིང་ནས་འབོད་པའི་ཕོ་ཉ་འོངས། །སྨན་པས་ཡོངས་སུ་སྤངས་བར་བྱ། །བཀྲ་མི་ཤིས་པ་སེམས་དང་སྨྲ། །གཅེར་བུ་གཅོད་དང་འཇིག་པ་དང༌། མཚུན་གཏོར་མེ་ལ་བསྲེག་པ་དང༌། །འཆི་བ་རྣམས་ལ་སྟེར་བ་དང༌། །སར་ཉལ་སྐྲ་བ་ཤིག་སྐུད་པ་དང༌། དུ་དང་མ་བསྡམས་གནས་སྐབས་སུ་།སྨན་པ་གནས་ཚེ་ཕོ་ཉ་འོངས། །མི་ནི་འཆི་བར་སྟོན་པ་ཡིན། །ནད་དང་མཚན་ཉིད་མཚུངས་བ་ཡི། །ཡུལ་ལམ་དུས་སུ་སྨན་པ་གནས། །བང་ཆེན་འབོད་དུ་འོངས་མཐོང་ན། །ནད་པ་དེ་ནི་གསོ་མི་བྱ། །ལྟེ་བ་ཁ་དང་སྣ་རེག་དང༌། །སྐྲ་དང་སྤུ་དང་སེན་མོ་སོ། མཚན་རྒྱབ་ནུ་མ་མགྲིན་པ་དང༌། །ལྟོ་དང་སྲིན་ལག་དག་དང་ནི། །རས་བསལ། ཕུབ་མ་ཞ་ཉེ་རྩ། །རུས་པ་གཏུན་བརྡུང་ཕྱགས་མ་རྡོ། །ཞབས་མ་གོས་ཀྱིས་མཐའ་མ་དང༌། །ཐལ་བ་སོལ་བ་ཁ་ཚར་སོགས། །གཞན་ཡང་ཐོག་གི་ཞགས་པ་ཐོགས། །ཕོ་ཉིད་འདྲ་སྔོན་དུ་མཐོང༌། །འཆི་བ་དག་ཏུ་སྟོན་པ་ཡིན། །དེ་བཞི་མཚན་ཕྱེད་ཉི་མའི་གུང༌། །ཐུན་མཚམས་དང་ནི་དུས་ཚིགས་དང༌། །ཚེས་དྲུག་ཚེས་དྲུག་ཚེས་བཞི་ཚེས་དགུ་དང༌། །སྒྲ་གཅན་མུག་རིངས་འཆར་དུས་སྩོགས། །བྲ་ཉེ་སྨིན་དྲུག་སྐག་ཆུ་སྟོད། །གྲེ་དང་ཁྲུམས་སྟོད་སྦུབས་དང་ནི། །གོང་དུ་ཉན་པ་ཡི། །མཚན་ཉིད་ལ་ནི་བརྟེན་པའི་ཚིག །མི་དགེ་སྨྲ་དང་མི་ཤེས་མཐོང༌། །དེར་ནི་སྨན་པ་འགྲོ་མ་བྱི། །དབང་བོ་མ་ཚན་མི་རོའམ། །མི་རུས་ཀྱིས་ནི་བརྒྱན་པའམ། །ཆད་དང་ཚིག་དང་ཉམས་ཆག་དང༌། །དེ་ཡི་ཚིག་ཏུ་
སྨྲ་བའམ། །རོ་ནི་ཚ་དང་དྲག་པའམ། །དྲི་ནི་ཤས་ཆེར་རུལ་པའམ། །རེག་བྱ་རྒྱ་ཆེར་མི་བཟད་དང༌། །གང་ཡང་དེ་འདྲ་གཞན་དག་ནི། །དེ་ཀུན་མདུན་དུ་སྨྲ་བའམ། །ཡང་ན་དེ་སྐད་ད་སྨྲ་བའི་ཚེ། །ཕོ་ཉ་ལོངས་པར་མཐོང་ན་ནི། །ནད་པ་དེ་ནི་གསོ་མི་བྱ། །ཀྱི་ཧུད་ཀྱི་ཧུད་ཚོ་ངེས་འདེབས། །འདོད་དོད་མོད་མོ་འགྱེལ་སྦྲིད་སྒྲ། །གོས་དང་གདུགས་དང་ལྷམ་འཇིག་དང༌། །སྡུག་བསྔལ་བ་དག་མཐོང་བ་དང༌། །ཤིང་ཆེན་རྒྱལ་མཚན་གང་བའི་སྣོད། །ཆུ་ནང་ནུབ་པར་མཐོང་བ་དག །གསོད་སྩོགས་ཡིད་དུ་མི་འོང་སྨྲ། །ཐལ་བ་ཕྱག་དར་གྱིས་གཏོར་དང༌། ཕྱི་ལ་སྲམ་དང་སྦྲུལ་དང་ནི། །སྤྲེའུས་ལམ་ནི་བཅས་པ་དང༌། འབར་བའི་ཕྱོགས་སུ་རི་དགས་བྱ། །གདུག་པ་སྒྲ་ནི་སྒྲོགས་པ་དང༌། །འབྲུག་ནག་བུར་མདར་བ་དང༌། །ལན་ཚྭ་ཆང་རྙིང་པགས་པ་དང༌། །ཡུངས་ཀར་ཞག་དང་འབྲུ་མར་དང༌། །རྩྭ་དང་འདམ་བུ་བུད་ཤིང་དང༌། །མ་ནིང་མི་སྲུན་སྨེ་ཤ་ཅན། །རྒྱ་དག་དང་ནི་རྙི་རྣམས་དང༌། །སློན་དང་བཤང་བ་གཏོང་བ་དང༌། །རྣག་དང་མཚན་མ་ངན་པ་མཐོང༌། །སྙིང་པོ་མེད་དང་འཁྲིག་པ་སྤྱོད། །རས་བལ་སྩོགས་དང་དགྲ་བོ་མཐོང༌། །མལ་སྟན་དང་ནི་ཁྱོགས་ལ་སྩོགས། །ཁ་སྦུབ་ཏུ་ནི་གནས་པར་མཐོང༌། །ནད་པ་དག་དང་གཞན་དག་དང༌། །སྣོད་སྩོགས་ངན་མཐོང་མི་ཤེས་སོ། །སྐྱེས་པའི་མིང་ཅན་བྱ་གཡོན་ན། །བུད་མེད་མིང་ཅན་གཡས་འདུག་བཟང༌། །བྱད་རི་དྭགས་གཡས་སྐོར་བཟང༌། །ཁྱི་དང་ཝ་ནི་དེ་ལྟ་མིན། །རི་དྭགས་རྣམས་ནི་ཟུང་མིན་ཤིས། །ཙ་ཤ་བྱ་རྒོད་ཁྙྫ་རི། །ནེའུ་ལེ་དང་རྨ་བྱ་རྣམས། །མཐོང་བ་རྟག་ཏུ་ཤེས་པ་ཡིན། །འུག་པ་བྱི་ལ་སྦྲུལ་མཐོང་བ། །རྣམ་པ་ཀུན་ཏུ་ཤི་མ་ཡིན། །གོ་ད་དང་ནི་གྲི་བོང་སྦྲུལ། །རྫ་བ་ཀ་ནི་མིང་ཏོས་དགེ། །མཐོང་དང་སྒྲ་སྒྲོགས་དེ་ལྟ་མིན། །དྲེད་དང་སྤྲེའུ་དེ་ལས་བཟློག །འཕྲལ་བའི་ཕྱོགས་སུ་འཇའ་ཚོན་མཐོང༌། །མི་ཤིས་རྒྱབ་ཏུ་མཐོང་ན་ཤིས། །མེ་ཡིས་གང་བའི་སྔ་དོད་དག་ནི། ཆག་དང་ཁོང་སྟོང་གནས་པ་དང༌། །ནད་པ་འཆི་འགྱུར་ཁྱིམ་དུ་ནི་།སྣམ་པ་འཇུག་པར་བྱེད་པའི་ཚེ། །ཞོ་སྩོགས་བཀྲ་ཤ་འོག་ནས་བཤད། །གང་བའི་སྣོད་ཕྱིར་བྱང་མཐོང་བྱུང་མཐོང་དང༌། །ཕོ་ཉ་ལ་
སྩོགས་མི་ཤིས་མཐོང༌། །དེ་ལྟའི་ནད་པ་སྤང་བར་བྱ། །དེ་ལས་གཞན་པར་སྙིང་རྗེའི་རྒྱུད། །དག་པས་འབད་དེ་གསོ་བར་བྱ། །ཞོ་འབྲུ་བུ་རམ་ཤིང་དང་ཁྲེ། །སྦྲང་རྩི་ཞུན་མར་དྲི་ཡང་ཀུ། །ནས་ཐུག་དང་དུལ་རྡོ་བུམ་པ་དང༌། ། དྲིལ་བུ 
་མར་མེ་ཆུ་སྐྱེས་དང། །དཱུར་པ་ཉ་དང་ཤ་རློན་དང༌། །འབྲས་ཡོས་འབྲས་བུ་ཁ་ཟས་དང༌། །བུམ་པ་རིན་པོ་ཆེ་ཡིས་གང༌། །བུ་མོ་གཞོན་དང་ཤིང་རྟ་དང༌། །མི་ནི་མགོ་འཕང་མཐོ་བ་དང༌། །ལྷ་རྣམས་དང་ནི་རྒྱལ་པོ་དང༌། །གོས་དཀར་གོན་དང་མེ་ཏོག་དཀར། །ཁྱིམ་དང་རྔ་ཡབ་རྟ་དཀར་མཐོང༌། །དམ་པ་བྲམ་ཟེ་གཙུག་ཏོར་དུང༌། །རྟ་པས་དང་ནི་གཡུང་དྲུང་དང༌། །ས་ནི་བརྐོས་པར་གྱུར་པ་དང༌། །མེ་ནི་རབ་ཏུ་འབར་བ་དང༌། །བཟའ་བཏུང་ཡིད་དུ་འོང་བ་དང༌། །མི་ཡིས་ཤིང་རྟ་ལེགས་གང་དང༌། །བ་ནི་བེའུ་དང་བཅས་པ་དང༌། །རྒོད་མ་བུད་མེད་བཙས་དང༌། །ཤང་ཤང་ཏེའུ་ཤ་བཀྲ་དང༌། །ངང་པ་ཁུ་བྱུག་རྨ་བྱ་དང༌། །སར་ས་ནི་སྒྲ་སྙན་སྒྲོགས། །དེ་བཞིན་ཕྱུགས་གཅིག་བཏགས་པ་དང༌། །གདུ་བུ་མེ་ལོང་ཡུངས་ཀར་དང༌། །གི་ཝང་རྣམས་ནི་མཐོང་བ་དང༌། །བྱུག་པ་དྲི་ཞིམ་གྱིས་བྱུགས་དང༌། །ཁུ་བ་དཀར་ཞིང་མངར་བ་དང༌། །ཁྱུ་མཆོག་དེ་བཞིན་བ་ལང་རྣམས། །རྗེས་སུ་མཐུན་པའི་སྒྲ་སྒྲོགས་དང༌། །རི་དྭགས་བྱ་དང་མེ་རྣམས་ནི། །ཡིད་འོང་སྒྲ་སྙན་སྨྲ་བ་ཡི། །གདུགས་དང་རྒྱལ་མཚན་པ་དན་བསྒྲེང༌། །མངོན་པར་སྟོད་པར་བྱེད་པ་དང༌། །རྫ་རྔ་དུང་དང་རྔ་བོ་ཆེ། །སྒྲ་དང་བཀྲ་ཤིས་སྒྲ་སྒྲོགས་པ། །བྲམ་ཟེ་རིག་བྱེད་འདོན་པ་དང༌། །བདེ་བའི་རླུང་ནི་རྗེས་མཐུན་རྒྱུ། །ལམ་དང་ཁྱིམ་དུ་འཇུག་ཚེ་ཡོད། །ནད་སོས་མཚན་ཉིད་ཡིན་ཤེས་བྱ། །དེ་ལྟར་ཕོ་ཉ་དགེ་བཤད་ནས། །དེ་འོག་རྨ་ལིམ་བཤད་བྱ་སྟེ། །རྨི་ལམ་ཤི་བའི་མི་རྣམས་དང༌། །ལྷན་ཅིག་ཆང་འཐུངས་ཁྱིས་དྲངས་གང༌། །མི་དེ་རིམ་གྱིས་གཟུགས་ཅན་གྱི་འཆི་བདག་གིས་ནི་མྱུར་ཁྱེར་འགྱུར། །ལུས་དང་གོས་དང་ཕྲེང་བ་དམར། །བུད་མེད་རྒོད་པས་དྲངས་རྨིས་གང༌། །དེ་ནི་ཁྲག་མཁྲིས་དག་གིས་འཆི། །མ་ཧེ་རྟ་ཕག་བོང་བུ་དང༌། །རྔ་མོ་ཞོན་ཏེ་ལྷོ་ཕྱོགས་འགྲོ། །དེ་ནི་གཅོང་ཆེན་ནད་ཀྱིས་འཆི། །ལྕུག་མ་ཚེར་ཅན་འོད་མའམ། །ཏ་ལ་
སྙིང་གར་སྐྱེས་པ་རྨི། །གང་ཡིན་དེ་ནི་སྐྲན་གྱིས་འཆི། །གང་ཞིག་མེ་ནི་མི་འབར་ལ། །སྦྱིན་སྲེག་བྱེད་ཅིང་མར་གྱིས་བསྐུས། །གཅེར་བུར་འདུག་དང་པདྨ་ནི། །སྙིང་གར་བྱུང་རྨིས་མཛེ་ཡིས་འཆི། །གང་ཞིག་སྨེ་ཤ་ཅན་ལྷན་ཅིག །སྣུམ་མང་འཐུངས་པར་རྨི་བདེ། །གཅིན་ནད་ཀྱིས་ནི་འཆི་བར་འགྱུར། །སྲིན་པོ་ལྷན་ཅིག་གར་བྱེད་ཅིང༌། །ཆུ་ལ་བྱིང་རྨི་སྨྱོ་བྱེད་འཛིན། །ར་རོ་གར་བྱེད་ཤི་བ་ཡི། །མིས་ཁྱེར་རྨི་བ་བརྗེད་བྱེད་འཛིན། །བོང་བུ་རྔ་མོ་བྱི་ལ་སྤྲེའུ། །སེང་གེ་སྟག་དང་ཁྭ་དག་དང༌། །ཝ་འམ་མི་རོ་ལ་ཞོན་རྨིས། །དེ་ནི་འཆི་བདག་ཁར་སོང་ཡིན། །སྣུམ་ཁུར་ཤ་ཁུ་ལི་ཟོས་རྨིས། །སད་ནས་དེ་འདྲ་སློན་འགྱུར་བ། །གང་ཡིན་དེ་ནི་འཚོ་མི་འགྱུར། །ཉི་ཟླ་གཟས་ཟིན་རྨིས་མིག་ན། །ཉི་མ་ཟླ་བ་ལྷུང་བ་ཡི། །རྨི་ལམ་མཐོང་ན་ལོང་བར་འགྱུར། །སྤྱི་བོར་འོད་མའི་ལྕུག་སྩོགས་སྐྱེས། །དེ་བཞིན་བྱ་རོག་ཚང་འཆའ་དང༌། །མགོ་བོ་ཆད་པར་རྨིས་པ་དང༌། །ཁྭ་དང་བྱ་རོག་སོགས་ཀྱིས་བསྐོར། །དེ་བཞིན་ཡི་དྭགས་ཤ་ཟ་མོ། །བྱད་མ་སྨེ་ཤ་ཅན་གྱིས་བསྐོར། །འོད་མའི་ཚལ་དང་ཚེར་མ་དང༌། །རྩྭ་ཡི་ཚང་ཚིང་ནང་དུ་ཚུད། །གཡང་སར་ལྷུང་དང་དུར་ཁྲོད་ཉལ། །ཕྱག་དར་ཐལ་བའི་ནང་དུ་ལྷུང༌། །ཆུ་དང་འདམ་ལ་སྩོགས་པར་ནུབ། །ཆུ་རྒྱུན་གྱིས་ནི་མྱུར་དུ་ཁྱེར། །གླུ་གར་དང་ནི་རོལ་མོ་དང༌། །གོས་དང་ཕྲེང་བ་དམར་པོ་འཆང༌། །ལུས་འཕེལ་ན་ཚོད་རྒས་པ་དང༌། །བག་མ་ལེན་ཞིང་ཁ་སྤུ་འདྲེག །ཟས་བཙོས་སྣུམ་ཟ་ཆང་འཐུང་དང༌། །སྐྱུགས་དང་འཁྲུ་བ་རྨི་བ་དང༌། །ལྕགས་དང་གསེར་དག་རྙེད་པ་དང༌། །བཙོང་དང་རྩོད་ལས་ཕམ་པ་དང༌། །མཆིལ་ལྷམ་གཉིས་ནི་སྟོར་བ་དང༌། །རྐང་པགས་ལྷུང་བ་རྨི་བ་དང༌། །ཤིན་ཏུ་དགའ་དང་རབ་ཁྲོས་བའི། །ཤི་བའི་གཉེན་གྱིས་སྤྱོས་པ་དང༌། །མར་མེ་གཟའ་དང་སྐར་མ་དང༌། །སོ་མིག་ལྷའི་གཟུགས་རྣམས་ནི། །ལྷུང་བའམ་འཇིག་པ་རྨིས་པའམ། །རི་བོ་རལ་པར་འགྱུར་པ་དང༌། །ནགས་ཚལ་འབར་བའི་ནང་དང་ནི། །སྡིག་ཅན་ཁྱིམ་དུ་འཇུག་པ་དང༌། །རོ་བསྲེགས་པ་དང་མུན་པར་ཞུགས། །མ་ཡི་མངལ་དུ་ཞུགས་པ་དང༌། །ཁྲག་དང་ཁང་བ་སར་ལྷུང་དང༌། །དེ་བཞིན་ཉ་
ཡིས་མིད་པ་དང༌། །ཆོས་གོས་གོན་པའི་མི་སྲུན་དང༌། །གཅེར་བུ་དབྱུག་པ་ཐོགས་པ་དང༌། །མིག་དམར་ཁ་དོག་གནག་པ་ནི། །མཐོང་ན་ནམ་ཡང་ཤིས་ཡིན། །བུད་མེད་སྡིག་ཅན་གདོང་གནག་དང༌། །སྐྲ་དང་སེན་མོ་ནུ་མ་རིང༌། །གོས་དང་ཕྲེང་བ་དམར་པོ་ཐོགས། །རྨིས་པ་དུས་མཚན་ཡིན་པར་འདོད། །ནད་ནི་སྟོབས་དང་ལྡན་པ་ཡིས། །ཡིད་འཇུག་བུ་ག་བཀག་པའི་ཕྱིར། །མི་བཟད་རྨི་ལམ་མཐོང་འགྱུར་ཏེ། །ནད་པ་འཆི་བར་འགྱུར་པ་ཡིན། །ནད་མེད་ཐེ་ཚོམ་བཅས་ཞིང༌། །འགའ་ཞིག་ཐར་བར་འགྱུར་པ་ཡིན། །མཐོང་དང་ཐོས་དང་ཉམས་མྱོང་དང༌། །གསོལ་བ་བཏབ་དང་བརྟགས་པ་དང༌། །འབྱུང་བར་འགྱུར་དང་ནད་ལས་བྱུང༌། །རྨི་ལམ་རྣམ་པ་བདུན་དུ་བཤད། །དེ་ལས་དང་པོའི་ལྔ་པོ་དང༌། །རང་གི་རང་བཞིན་ཉིན་མོ་བརྗེད། །ཤིན་ཏུ་རིང་ཐུང་འབྲས་བུ་མེད། །ཆ་འདྲེས་པ་ཡི་རང་བཞིན་ཅན། །མཚན་སྟོང་རྨི་ལམ་འབྲས་བུ་རིང༌། །མཐོང་བ་ཆུང་དུ་བྱེད་པ་ཡིན། །ནང་པར་མཐོང་དང་གཉིད་མ་ལོག །མི་མཐུན་གཏམ་གྱིས་བར་མཆོད། །དེ་ཡི་ཉིན་པར་འབྲས་ཆེན་འགྱུར། །སྦྱིན་དང་སྦྱིན་སྲེག་ལ་སྩོགས་ཀྱིས། །རྨི་ལམ་འབྲས་བུ་ཆུང་བར་འགྱུར། །གང་ཞིག་རྨི་ལམ་ངན་མཐོང་ནས། །སླར་ཡང་གནས་སྐབས་དེ་ཉིད་དུ། །རྨི་ལམ་བཟང་པོ་མཐོང་གྱུར་ན། །འབྲས་བུ་བཟང་པོ་ཉིད་ཐོབ་འགྱུར། །ལྷ་དང་བྲམ་ཟེ་ཁྱུ་མཆོག་དང༌། །བ་ལང་རྒྱལ་པོ་མཛའ་བཤེས་གསོན། །སྐྱེས་བུ་དམ་པ་གྲགས་ལྡན་དང༌། མེ་འབར་བ་དང་དངས་པའི་མཚོ། །བུ་མོ་ཁྱེའུ་སེར་བ་དང༌། །གོས་དཀར་གོན་ཞིང་མདང་ས་དང་ལྡན། །སྐྱེས་བུ་ཟ་དང་ལུས་འབར་དང༌། །ཁྲག་གིས་ལུས་ཀུན་བྱུགས་པ་དག །གང་གིས་མཐོང་བར་གྱུར་བ་དང༌། །གདུགས་དང་ཤ་རློན་མེ་ལོང་དུག །སྣ་མ་དཀར་པོས་གོས་པ་དང༌། །མི་གཙང་གིས་བྱུགས་འབྲས་བུ་རྙེད། །རི་བོ་ཁང་བཟངས་འབྲས་བཅས་ཤིང༌། །འཛེག་དང་སེང་གེ་གླང་ཆེན་མི། །རྟ་དང་བ་ལང་དག་ལ་ཞོན། །ཆུ་བོ་མཚོ་བྲན་རྒྱ་མཚོ་རྒྱལ། །ཤར་དང་བྱང་དུ་འགྲོ་བ་དང༌། །བགྲོད་མ་ནི་འགྲོ་དང་ཤི་བ་དང༌། །ཉམ་ང་
ལས་ཐར་ལྷ་རྣམས་དང༌། །ཕ་མས་མངོན་པར་བསྟོད་པ་དང༌། །ངུ་དང་ལྟུང་ལས་ལྡང་བ་དང༌། །དགྲ་བོ་ཕམ་པར་བྱས་པ་དག །གང་རྨིས་ཚེ་རིང་ནད་མེད་དང༌། །ནོར་མང་པོ་ནི་རྙེད་པར་འགྱུར། །དེ་བཞིན་ནད་པའི་གཡོག་འཁོར་ནི། །བཀྲ་ཤིས་ཆོ་ག་ཕུན་སུམ་ཚོགས། །དད་ལྡན་རྗེས་སུ་མཐུན་པ་དང༌། །ནོར་མང་བསྡུས་པར་གྱུར་པ་དང༌། །སྙིང་སྟོབས་མཚན་ཉིད་དང་ལྡན་ཞིང༌། །སྨན་པ་བྲམ་ཟེ་སྩོགས་ལ་གུས། །གསོ་དཔྱད་རྣམས་ལ་སྐྱོ་བ་མེད། །དེ་ནི་ནད་མེད་འགྱུར་མཚན་ཉིད། །རྟག་ཏུ་ཤིས་པ་སྡུད་པ་དང༌། །བཀྲ་མི་ཤིས་པ་རྣམ་པར་སྤང༌། །འདི་དག་དེ་ཉིད་མཐོང་བ་ཡི། །དྲང་སྲོང་རྣམས་ཀྱིས་ཤིས་པར་བཤད། །དེ་ལྟར་འདི་ནི་སྐྱེ་དང་འཆི། །མཚན་ཉིད་གང་ཕྱིར་བཤད་པས་ན། །དེ་ཕྱིར་ལུས་ཀྱི་གནས་ཡིན་པས། །འདི་ནི་ལུས་ཀྱི་གནས་སུ་བཤད། །ཡན་ལག་བརྒྱད་པའི་སྙིང་པོ་བསྡུས་པ་ལས། །ལུས་ཀྱི་གནས་ཀྱི་ལེའུ་དྲུག་པའོ།། །།ཡན་ལག་བརྒྱད་པའི་སྙིང་པོ་བསྡུས་པ་ལས། །ལུས་ཀྱི་གནས་ཏེ་གནས་གཉིས་པ་རྫོགས་སོ།། །།དེ་ནས་ནད་ཐམས་ཅད་ཀྱི་ནད་གཞི་བཤད་པར་བྱའོ། །དེ་ཡང་རྒྱུན་ཤེས་ཀྱི་བུ་ལ་སྩོགས་པ་དྲང་སྲོང་ཆེན་པོ་རྣམས་ཀྱིས་འདི་སྐད་ཅེས་བཤད་དོ། །ནད་དང་སྡིག་པ་རིམས་གནོད་བྱེད། །འགྱུར་བྱེད་སྡུག་བསྔལ་མ་ཞུའི་སྐྱོན། །ཟད་བྱེད་འཚོ་དཀའ་མཁུན་གནོད་སྐྱེད། །མིང་གི་རྣམ་གྲངས་སྒྲས་བཤད་དོ། །ནད་གཞི་སྔར་བྱུང་ཚུལ་དང་ནི། །དེ་བཞིན་ཚུལ་ཕྱེད་གོམས་བྱེད་དང༌། །དཀྱེལ་གྱུར་ཤེས་པར་བྱེད་པ་སྟེ། །ནད་ནི་རྣམ་པ་ལྔར་ཤེས་བྱ། །གཞི་དང་རྒྱུ་དང་སྐྱེ་མཆེད་དང༌། །རྐྱེན་དང་སློང་བར་བྱེད་པའི་རྒྱུ། །རྣམ་གྲངས་ཀྱིས་ནི་ནད་གཞི་བཤད། །གང་གིས་སྔར་བྱུང་ཚུལ་ཤེས་པས། །ནད་ནི་འབྱུང་བར་འདོད་གྱུར་ལ། །བྱེ་བྲག་ཕྱེད་པར་མ་གྱུར་བ། །ནད་ཀྱི་ཚུལ་ནི་ཇི་བཞིན་པར། །ཆུང་ཕྱིར་མཚན་ཉིད་མི་གསལ་བའོ། །དེ་ཉིད་གསལ་བ་ཉིད་གྱུར་པ། །ཚུལ་ཕྱེད་པ་ཞེས་བྱ་བར་བཤད། །དབྱིབས་དང་གསལ་མངོན་རྟགས་དང་ནི། །མཚན་ཉིད་མཚན་མ་རྣམས་ཡིན་ནོ། །རྒྱུ་དང་ནད་དང་མི་མཐུན་ཞིང༌། །མི་མཐུན་པ་ཡི་དོན་བྱེད་པའི། །སྨན་དང་ཟས་
དང་སྤྱོད་ལམ་རྣམས། །ཉེར་བར་བསྒྱུར་པས་བདེ་འགྱུར་བ། །ཉམས་བརྟས་བྱེད་པར་ཤེས་བྱ་སྟེ། །དེ་ནི་གོམས་པ་ཞེས་བྱར་བཤད། །དེ་ལས་བཟློག་པའི་མ་གོམས་ནད། །མི་འཕྲོད་ནད་ཅེས་བྱ་བའོ། །གང་གིས་ནད་ནི་དཀྱིལ་གྱུར་པས། །ཇི་བཞིན་རྗེས་སུ་འཕེལ་འགྱུར་ཞིང༌། །ནད་རྣམས་རྫོགས་ཤིང་མངོན་གྱུར་པ། །སྐྱེས་ཤིང་འོངས་པ་དཀྱེལ་གྱུར་ཡིན། །དེ་ནི་གྲངས་བརྟག་གཙོ་བོ་དང༌། །སྟོབས་དང་དུས་ཀྱིས་ཕྱེ་བ་ཡིན། །གྲངས་ནི་ཇི་ལྟར་འདི་ཉིད་ལས། །རིམ་ནི་བརྒྱད་དུ་བཤད་པ་ཡིན། །ནད་རྣམས་སྤྱིར་ནི་བསྡུས་པ་ལས། །ཆ་ཤས་དབྱེ་བ་བརྟག་པ་ཡིན། །རང་དབང་གཞན་དབང་གཉིས་ལས་ནི། །ནད་རྣམས་གཙོ་བོར་བཤད་པ་ཡིན། །རྒྱུ་སྩོགས་མ་ལས་ཕྱོགས་གཅིག་ལས། །སྟོབས་ནི་ཆེ་ཆུང་ཤེས་པར་བྱ། །ཉིན་མཚན་དུས་དང་ཟས་ཟོས་ཆས། །ཉེས་པ་ཇི་བཞིན་ནད་ཀྱི་དུས། །དེ་ལྟར་ནད་གཞིའི་དོན་བཤད་ནས། །དེ་ནི་རྒྱས་པར་བཤད་པར་བྱ། །ནད་རྣམས་ཀུན་གྱི་ནད་གཞི་ནི། །ནད་ནི་འཁྲུགས་པར་གྱུར་པ་ཡིན། །དེ་ནི་གནོད་འགྱུར་སྣ་ཚོགས་པ། །བསྟེན་པས་ལྡང་བར་འགྱུར་བར་བཤད། །གསུམ་པོའི་སྦྱོར་བ་རྣམ་པ་གསུམ། །གནོད་འགྱུར་སྔར་ནི་བཤད་པ་ཡིན། །ཁ་དང་ཚ་དང་བསྐ་ཆུང་ཟད། །རྩུབ་དང་བཅུད་མེད་སྲ་བ་དང༌། །བཀག་དང་ནན་གྱིས་བཙིར་བ་དང༌། །མཚན་མོ་མི་ཉལ་སྐད་ཆེར་སྨྲ། །སྦྱངས་པའི་སྦྱོར་དྲགས་མྱ་ངན་འཇིགས། །སེམས་ལས་དྲག་ཤུལ་བུད་མེད་དྲགས། །སོ་གཉིན་མཚན་ཟས་ཞུའི་རྗེས། །རླུང་གི་ནད་ནི་ལྡང་བར་འགྱུར། མཁྲིས་པ་ཚ་དང་སྒྱུར་དང་རྣ། །ལན་ཚྭ་བྲོ་དང་ལུས་ཚ་དང༌། །སྟོན་ཀ་ཉིན་ཕྱེད་མཚན་ཕྱེད་དང༌། །ཚ་བའི་དུས་སུ་ལྡང་བར་འགྱུར། །མངར་སྐྱུར་ལན་ཚྭ་སྣུམ་པ་དང༌། །ལྕི་དང་བད་ཀན་སྐྱེད་བསིལ་དང༌། །འདུག་དང་བདེ་དང་གཉིད་མ་ཞུ། །ཉིན་པར་གཉིད་ལོག་བརྟས་དྲགས་དང༌། །སློན་སྩོགས་སྦྱོར་བ་ཉེས་པ་དང༌། །ཟོས་མ་ཐག་དང་དཔྱིད་ཀྱི་དུས། །སྔ་དྲོ་མཚན་སྟོད་བད་ཀན་ལྡང༌། །འདྲེས་པ་ལས་ནི་ལྡན་པ་ཡིན། །ཐམས་ཅད་བསྟེན་པས་འདུས་པར་འགྱུར། །དེ་བཞིན་གཞན་ཡང་འདྲེན་མར་ཟོས། །མ་ཞུ་མ་སྙོམས་མི་འཕྲོད་དང༌། །ལྷག་པར་ཟོས་པ་ལ་སྩོགས་
དང༌། །ཆང་དང་བཏུང་བ་ཉེས་པ་དང༌། །ཚོད་མ་སྐམ་དང་ལ་ཕུག་རྗེན། །ཏི་ལ་ཚིགས་ས་ཞག་སོ་བའི་ཆང༌། །ཤ་རུལ་ཤ་སྐམ་ཤ་རིད་རྣམས། །དེ་དང་དེ་ཡིས་ཉེས་གསུམ་སྐྱེད། །དེ་བཞིན་ཁ་ཟས་སྦོས་པ་དང༌། །དུས་ཚིགས་ལོག་པ་བདུན་གྱི་རླུང༌། །གདོན་ཞུགས་དུག་དང་དབྱིག་དུག་ཟོས། །བེའུ་སྣབས་ནད་འཁྲུགས་རི་རྩར་གནས། །བཙས་སྐར་ལ་ནི་གཟའ་ཞུགས་དང༌། །ལོག་པར་སྤྱོར་བ་སྣ་ཚོགས་དང༌། །སྡིག་པའི་ལས་ལ་བརྟེན་པ་དང༌། །བུད་མེད་བུ་བཙས་ལོག་པར་བྱུང༌། །གསོ་བ་ལོག་པར་བྱས་ལས་ལྡང༌། །དེ་ལྟར་སོ་སོའི་ནད་ལྡང་བས། ནད་ཀྱི་གནས་སུ་འགྲོ་བྱེད་པ། །རྩ་སྦུབས་རྣམས་སུ་ཕྱིན་པ་དང༌། །ནད་རྣམས་ལུས་ལ་མྱུར་དུ་སྐྱེད། །ཡན་ལག་བརྒྱད་པའི་སྙིང་པོ་བསྡུས་པ་ལས། །ནད་གཞིའི་གནས་ཀྱི་ལེའུ་དང་པོའོ།། །།དེ་ནས་རིམས་ནད་ཀྱི་ནད་གཞི་བཤད་པར་བྱའོ། །རིམས་ནི་ནད་བདག་སྡིག་ཅན་དང། །འཆི་བདག་མདངས་ཟ་འཆི་བྱེད་ཡི། །ཁྲོས་པས་མྱུར་བའི་མཆོད་སྦྱིན་བརླག །དྲག་པོ་དཔྲལ་བའི་མིག་ལས་བྱུང༌། །སྐྱེ་དང་འཆི་ཚེ་རྨོངས་བྱེད་པ། །མི་འཕྲོད་སྣ་ཚོགས་བསྟེན་ལས་བྱུང༌། །མི་བཟད་མིང་ནི་སྣ་ཚོགས་པས། །སྐྱེ་གནས་དུ་མ་རྣམས་ལ་གནས། །དེ་ནི་ནད་རྣམས་སོ་སོར་འདྲེས། །འདུས་དང་གློ་བུར་ལས་བརྒྱད་འགྱུར། །དེ་ལ་ནད་རྣམས་རང་རང་ནི། །རྒྱུ་ལས་འཁྲུགས་ཏེ་ལྡང་བ་ཡིས། །མ་ཞུའི་གནས་སུ་ཞུགས་གྱུར་པ། །ལྷན་ཅིག་གནས་ནས་རྩ་སྒོ་བཀག །ཞུ་བའི་གནས་ནས་མེ་དྲོད་ནི། །ཕྱི་རོལ་དུ་ནི་འབྱིན་པར་བྱེད། །དེ་དང་ལྷན་ཅིག་མངོན་ཁྱབ་ནས། །ལུས་ཀུན་ཚ་བར་བྱེད་པ་ཡིན། །ཡན་ལག་ཤིན་ཏུ་ཚ་བྱེད་པས། །རིམས་ནི་དེ་ཡིས་སྐྱེད་པར་བྱེད། །རྩ་སྒོ་བཀག་པས་དེ་འོག་ཏུ། །རྡུལ་ནི་མང་དུ་མི་འབྱུང་ངོ༌། །དེ་ཡི་སྔོན་ཚུལ་སྒྱིད་ཞན་དང༌། །ཉམས་མི་དགའ་ཞིང་ལུས་ལྕི་ལ། །རོ་མི་ཚོར་ཞིང་ཡི་ག་འཆུས། །གླལ་འབྱུང་མིག་འཁྲུགས་མཆི་མར་བཅས། །ཡན་ལག་ན་ཞིང་འདུ་སྟོབས་ཆུང༌། །ཉམ་ཆུང་གཉིད་ནི་ཆེ་བ་དང༌། །སྦུ་ལྡང་བྱ་རྨྱང་བྱེད་འདོད་དང༌། །བྱིན་པའི་ཉྭ་ན་ལུས་སྙོམ་དང༌། །ཕན་པར་བསྟན་པ་མི་བཟོད་ཁྲོ། །སྐྱུར་དང་ཚ་དང་དྲོད་
ལ་སྲེད། །ཁ་ཟས་མངར་བ་ལ་མི་དགའ། །བྱིས་པ་ལ་སྡང་སྐོམ་དད་ཆེ། །སྒྲ་མེ་གྲང་ལྷགས་རླུང་དང་ཆུ། །གྲིབ་མ་ཉིན་མཚན་རྒྱུ་མེད་པར། །དགའ་དང་མི་དགའ་དག་ཏུ་བྱེད། །དེ་རྗེས་རིམས་ནི་གསལ་བར་འགྱུར། །རིམས་ཐེབས་འབྱང་ཉེའི་ཚེ་ནད་ཚབས་ཆུང་ཞིང་ཚབ་མི་སྙོམས་ལ། །ཡན་ལག་དེ་དང་དེར་འཕོ་ཞིང༌། །ན་བདེ་དང་དེར་གཡོ་འགྱུར། །རྐང་པ་བེམས་པོ་རེངས་པ་དང༌། །བྱིན་སྙིང་ན་ཞིང་ངལ་བ་དང༌། །ཚིགས་རྣམས་བྱེ་བ་ལྟ་བུར་སེམས། །བརླ་དང་རྐེད་པ་ན་བ་དང༌། །རྒྱབ་ནི་བརྡུངས་པ་ལྟར་སེམས་དང༌། །ལྟོ་བ་བཙིར་བ་སྙམ་སེམས་དང༌། །རུས་པ་བཅད་པ་སྙམ་པ་དང༌། །རྩིབ་མ་ལྷག་པར་ན་བ་དང༌། །སྙིང་ནི་བཙིར་སྙམ་སེམས་ཤིང་ཟུག །བྲང་དུ་བཙུགས་པ་ལྟ་བུར་གཟེར། །ཕྲག་པ་བརྡུངས་སྙམ་དཔུང་པ་ནི། །བཅོམ་སྙམ་སེམས་ཤིང་སྒྲོག་དུས་ན། །འགྲམ་པས་ཁ་ཟས་བལྡད་མི་ནུས། །གླལ་འབྱུང་རྣ་བ་སྒྲ་དང་བཅས། །མུར་འགྲམ་ཟུག་ཅིང་མགོ་བོ་ན། །ལྕེ་ཡིས་རོ་ནི་མི་ཚོར་རམ། །ཡང་ན་ཁ་བསྐ་བྲོ་བར་འགྱུར། །དྲི་མ་རྣམས་ནི་སྲི་བ་དང༌། །ལྤགས་མིག་ཁ་དང་སེན་མོ་དང༌། བཤང་སོགས་རྩུབ་ཅིང་དམར་བ་དང༌། །མཆིལ་མང་ཡི་ག་འཆུས་སྲེད་ཆུང༌། །ཟས་མི་འཇུ་ཞིང་རྡུལ་མི་འབྱུང། །གཉིད་ཡར་མཆུ་དང་གྲེ་བསྐམ། །སྐོམ་དད་ཆེ་ཞིང་ལུད་པ་སྐམ། །ལུད་པ་ལུ་ཞིང་སྐྱུགས་པ་སྐམ། །སེམས་ཞུམ་ལུས་ཀྱི་བ་སྤུ་ལྡང༌། །པགས་པ་སོ་དག་བརྩེ་བ་དང༌། །རྐང་ལག་འདར་ཞིང་སྦྲིད་པ་ཐོགས། །མགོ་འཁོར་ཚིག་ནི་བླ་བ་དང༌། །དྲོད་བག་ལ་དགའ་བྱ་རྨྱང་བྱེད། རླུང་གི་རིམས་སུ་ཤེས་པར་བྱ། །ལུས་ཀུན་ཅིག་ཅར་ཁྱབ་པ་དང༌། །བླ་ཞིང་ཁའི་རོ་ཁ་བ་དང༌། །བསིལ་འདོད་ཁ་སྣར་ཐོར་བུ་འབྱུང༌། །མགོ་འཁོར་བརྒྱལ་མྱོས་སྙིང་མི་དགའ། །བཤང་སླ་མཁྲིས་བ་སྨོན་པ་དང༌། མཆིལ་མ་ཁྲག་བཅས་སྒྲེགས་པ་སྐྱུར། །ཐོར་བུ་དམར་པོ་འབྱུང་བ་དང༌། །པགས་པ་ལ་སྩོགས་སེར་རྩ་སྔོ། །རྡུལ་འབྱུང་དབུགས་ནི་མནམ་པ་དང༌། །སྐོམ་དད་རབ་ཆེ་མཁྲིས་པའི་རིམས། །ལྷག་པར་ཡི་ག་འཆུས་ཤིང་རྨོངས། །བུ་ག་འགགས་ཤིང་རིམས་ཤུགས་དལ། །མཆིལ་མང་ཁ་ནང་མངར་བ་བྲོ། །དང་ག་ལྕི་ཞིང་
དབུགས་མི་བདེ། །ཆམ་བཏབ་སྙིང་ན་སྐྱུག་པ་འབྱུང༌། །ལུད་པ་ལུས་རེངས་ལྤགས་སྩོགས་སྐྱ། །ཡན་ལག་ཐོར་བུ་གྲང་མོ་འབྱུང༌། །སྙོམ་ཞིང་ལུས་འདར་བད་ཀན་རིམས། །རང་གི་དུས་སུ་ཐམས་ཅད་ནི། །འབྱུང་ཞིང་འཕེལ་པ་ཉིད་འགྱུར་བ། །ནད་གཞིར་བཤད་པའི་མི་མཐུན་བསྟེན། །བསྒྱུར་བས་བདེ་བར་བྱེད་པ་ཡིན། །རང་རང་མཚན་མ་འདྲེས་པ་ནི། །ལྡན་པའི་རིམས་ཡིན་གཞན་ཡང་ནི། །མགོན་བརྒྱལ་སློན་ལུས་ཚ་རྨོངས་བག་འགྱུར། །གྲེ་བ་ཁ་སྐམ་མི་དགའ་རུས་ཚིགས་ན། །གཉིད་མིད་མགོ་འཁོར་སྦུ་ལྡང་སྐོམ་དད་ཆེ། །ཁ་གླལ་ཚིག་མང་རླུང་མཁྲིས་འདྲེས་པའི་རིམས། །ཚ་མེད་ཡི་ག་འཆུས་ཤིང་ཀླད་ཚིགས་ན། །ཆམ་པ་ལུད་པ་དབུགས་མི་བདེ་བཤང་སྲི། །ཁོང་བསིལ་རྨོངས་བག་རབ་རིབ་མགོ་འཁོར་རྨྱ། །བད་ཀན་རླུང་འདྲེས་རིམས་ཀྱི་མཚན་མ་ཡིན། །ལུས་རྡུལ་རེངས་དང་ཚ་བསིལ་སོར་མི་གནས། །སྐོམ་དད་ལུད་པ་བད་ཀན་མཁྲིས་བག་འབྱུང༌། །རྨོངས་བག་རྨྱ་དང་ཁ་བྲོ་ཁར་དྲི་ཆགས། །བད་ཀན་མཁྲིས་པ་འདྲེས་པའི་རིམས་ཀྱི་རྟགས། །ཀུན་ནས་འབྱུང་བ་རྟགས་ཀུན་ལྡན། །འདིར་ཡང་ཐང་རི་ཚ་བ་ལྡང༌། །དེ་བཞིན་གྲང་དང་ཉིན་མོ་ནི། །གཉིད་ཆེ་མཚན་མོ་གཉིད་མེད་བྱུང་བའམ། །རྟག་པར་གཉིད་འོང་པའམ་ཡང་ན་ཡར། །རྡུལ་ཆེར་འབྱུང་བའམ་རྡུལ་མི་འབྱུང༌། །གླུ་དང་གར་དང་དགོད་སྩོགས་པ། །སྤྱོད་པ་ངན་པ་ལ་འཇུག་ཅིང༌། །མིག་དམར་མཆི་མ་འཛག་དང་བཅས། །ཞུམ་ཞིང་རྫི་མ་འཁྲུགས་པར་སྣང༌། །བྱིན་སྙིང་རྩིབ་ལོགས་ན་བ་དང༌། །མགོ་བོ་རུས་ཚིགས་ན་མགོ་འཁོར། །རྣ་བ་སྒྲ་དང་ནད་དང་བཅས། །མགུལ་བ་གྲ་མས་གང་སྙམ་སེམས། །ལྕེ་རྩུབ་ཀུན་ནས་བསྲེགས་ལྟར་སྣང༌། །ལུས་ལྕི་ཚིགས་ནི་འབྱེ་སྙམ་སེམས། །མཆིལ་མར་ཁྲག་མཁྲིས་བད་ཀན་འབྱུང༌། །མགོ་བོ་གཡོ་ཞིང་སྐོམ་དད་ཆེ། ཐོར་བུ་འབྲུམ་ཕྲན་མཐའ་འཁོར་ལ། །དམར་ཞིང་གནག་པ་འབྱུང་བར་འགྱུར། །སྙིང་ན་བཤང་གཅི་སྲི་བའམ། །ཡང་ན་ཉུང་བའམ་རབ་མང་འབྱུང༌། །ཁ་ནང་སྣུམ་ཞིང་ཉམས་སྟོབས་ཆུང༌། །གཅོམ་ཆུང་འགྱུར་ཞིང་བླ་བ་དང༌། །ནད་སྨིན་དཀའ་ཞིང་རྨུགས་པ་དང༌། །རྒྱུན་དུ་
གྲེ་བ་འཛེར་བ་ནི། །འདུས་པའི་རིམས་ཏེ་མངོན་རྨུགས་བྱེད། །དེ་ནི་མདངས་འཕྲོག་ཅེས་ཀྱང་བཤད། །ནད་ཀྱིས་བཀག་ཅིང་མེ་དྲོད་ཉམས། །མཚན་མ་ཐམས་ཅད་རྫོགས་གྱུར་པ། །གསོར་མི་རུང་ཏེ་དེ་ལས་གཞན། །གསོ་དཀའ་འམ་དབང་བོ་མ་ཚང་འགྱུར། གཞན་ཡང་འདུས་པ་ལས་བྱུང་བ། །གང་དུ་མཁྲིས་པ་ལོགས་ཤིག་གནས། །པགས་པའམ་ནང་གྲོལ་ཚ་བ་དག །འདེབས་པའམ་ཚ་བ་སྔ་ཕྱིས་འབྱུང༌། །དེ་བཞིན་པད་ཀན་རླུང་གྲང་བ། །དེ་གཉིད་ཚ་སྔ་གསོ་དཀའ་ཡིན། །གྲང་སྔ་དེར་ནི་མཁྲིས་པ་ཡིས། །བད་ཀན་གཤེར་བ་སྐམ་པ་དང༌། །གྲང་བཞི་བྱེས་ཁ་སྒྱུར་བརྒྱལ། །མྱོས་དང་སྐོམ་དད་སྐྱེས་བར་འགྱུར། །ཚ་བ་སྔ་དེ་རྗེས་ལ། །རྨུགས་སློན་མཆིལ་མང་ཁོད་སྙོམ་འགྱུར། །གློ་བུར་དྲག་ཤུལ་ལས་བྱུང་དང༌། །མངོན་ཟིན་བྱད་བྱས་དམོད་བྱུང་བཞི། །དེ་ལ་སྨས་བཅད་མེས་ཚིག་སྩོགས། །ངལ་བ་དྲག་ཤུལ་ལས་བྱུང་ཡིན། །དེ་ནི་ཕལ་ཆེར་རླུང་ནད་ཀྱིས། །ཁྲག་ནི་གནོད་ཅིང་འཁྲུགས་བྱས་པས། །ན་བཅས་མདོག་ཉམས་སྐྲང་དང་བཅས། །ཟུག་གཟེར་བཅས་པའི་རིམས་སྐྱེད་འགྱུར། །གདོན་ཞུགས་སྨན་གྱི་དྲི་དང་དུག །ཁྲོས་འཇིགས་མྱ་ངན་གདོན་ལས་འབྱུང༌། །མངོན་པར་ཟིན་ལས་བྱུང་རིམས་ཡིན། །འདིར་གདོན་རྒྱུ་མེད་དགོད་ཅིང་དུ། །སྨན་གྱི་དྲི་བསྐྱེད་བརྒྱལ་བ་དང༌། །སྦིད་པ་གླད་ནད་སྐྲངས་པར་འགྱུར། །དུག་ལས་བརྒྱལ་དང་ཚད་པར་འཁྲུ། །མདོག་ནག་ལུས་ཚ་སྙིང་ནད་འབྱུང༌། །ཁྲོས་པས་ལུས་འདར་གླད་ནད་འགྱུར། །མྱ་ངན་འཇིགས་ལས་བླ་བར་འགྱུར། །འདོད་ལས་མགོ་འཁོར་ཡིད་འཚུས་ཚ། །ངོ་ཚ་གཉིད་བློ་བརྟན་ཉམས་འགྱུར། །གདོན་ལ་སོགས་པ་འདུས་པའི་རིམས། །འཇིག་ཚོགས་གསུམ་ནི་རླུང་གི་རིམས། །ཁྲོ་ལས་མཁྲིས་པ་ལྡང་བར་འགྱུར། །དམོད་པ་བྱད་བྱས་ལས་བྱུང་གང༌། །འདུས་པའི་རིམས་ནི་མི་བཟད་པ། །དེ་ནི་ཤིན་ཏུ་བཟོད་དཀར་བཤད། །དེ་ལ་བྱད་བྱས་སྔགས་ཀྱིས་ནི། །སྦྱིན་སྲེག་བྱས་པ་བཞིན་དུ་བྱས། །ཐོག་མར་སེམས་འབབ་དེ་འོག་ལུས། །དེ་ནས་ཐོར་བུ་མགོ་འཁོར་སྐོམ། །ཚ་བཅས་བརྒྱལ་བས་ཟིན་གྱུར་བའི། །རིམས་ནི་ཉིན་རེ་བཞིན་དུ་འཕེལ། །དེ་ལྟར་རིམས་ནི་བརྒྱད་དུ་བཅས། །
དེ་དག་མདོར་ན་རྣམ་གཉིས་ཏེ། །ལུས་དང་སེམས་ཀྱི་རིམས་དང་ནི། །གྲང་དང་ཚ་དང་ཕྱི་ནང་གནས། །རང་བཞིན་དང་ནི་གྱུར་བ་དང༌། །གསོར་རུང་གསོར་མི་རུང་བ་དང༌། །སྨིན་དང་མ་སྨིན་ཞེས་བྱའོ། །ལུས་རིམས་ཐོག་མར་ལུས་ཚ་བྱེད། །སེམས་ཀྱི་དང་པོར་སྙིང་ཚ་འགྱུར། །རླུང་དང་བད་ཀན་ཅིག་ཅར་ནི། །འབྱུང་ཚེ་གྲང་བའི་རིམས་སུ་འགྱུར། །མཁྲིས་པ་དང་ལྡན་ཚ་བ་སྟེ། །འདྲེས་པས་འདྲེས་པའོ་ནང་གནས་པ། །རིམས་ནད་དཀྱེལ་ནི་བསྐྱེད་འགྱུར་ནས། །ནང་ན་ན་ཞིང་བཤང་གཅི་སྲི། །ཕྱི་རོལ་རིམས་ནི་ཚ་བ་དང༌། །ཕྱི་རོལ་གནས་པ་གསོ་བར་སླ། །དབྱེར་དང་སྟོན་དང་དཔྱིད་དུས་སུ། །རླུང་སྩོགས་རིམ་འབྱུང་རང་བཞིན་རིམས། །གཞན་དུ་གྱུར་པ་དེ་གསོ་དཀའ། །ཕལ་ཆེར་རླུང་ནི་རང་བཞིན་རིམས། །ཡིན་ཡང་གསོ་བར་དཀའ་བ་ཡིན། །དབྱར་དུས་རླུང་ནད་ལྡང་འགྱུར་ན། །མཁྲིས་པ་བད་ཀན་ལྡན་རིམས་འགྱུར། །སྟོན་ཀ་མཁྲིས་བས་ནད་སློང་སྟེ། །བད་ཀན་དེ་ཡི་གྲོགས་བྱེད་འགྱུར། །དེར་ནི་སྨྱུང་བ་བྱས་གྱུར་ཀྱང༌། །གནོད་པར་འགྱུར་བ་མ་ཡིན་ནོ། །བད་ཀན་བྱེད་ལྡན་དེ་ཡང་ནི། །དེ་རྗེས་རླུང་དང་མཁྲིས་པ་འབྱུང༌། །ཉམས་སྟོབས་ཆེ་ཞིང་ནད་ཚབས་ཆུང༌། །བླ་བརྣན་མེད་རིམས་གསོ་བར་སླ། །རྣམ་ཀུན་འགྱུར་བཞེས་བྱ་བར། །གསོར་མི་རུང་བ་སྔར་བཤད་དོ། །རིམས་ཀྱི་ནད་ཚབས་ཚེ་ཞིང་ཚ། །ཁོང་རྨྱ་ཉམ་ཆུང་གཅིན་མང་དང༌། །བཤང་སྲི་ཁ་ཟས་མི་འཇུ་ལ། །བཀྲེས་ཆུང་མ་སྨིན་རིམས་མཚན་ཉིད། །རིམས་ཤུགས་སྟོབས་ཆེ་སྐོམ་དད་ཆེ། །བླ་ཞིང་མགོ་འཁོར་དབུགས་མི་བདེ། །བཤང་གཅི་བདེར་འབྱུང་ནད་བསྐྱོད་པ། །སྨིན་པར་འགྱུར་པའི་མཚན་མ་ཡིན། །མ་སྨིན་གོ་བཟློག་མཚན་ཉིད་དང༌། །ཞག་བདུན་སྨྱུང་བྱས་ལས་སྨིན་བཤད། །རིམས་ནི་ནད་ཀྱི་དུས་དང་ནི། །སྟོབས་ཆུང་ཆེ་ལས་རྣམ་ལྔར་བཤད། །ཕལ་ཆེར་འདུས་པར་གྱུར་བ་ཡི། །རིམས་སུ་མང་དུ་འགྱུར་བར་བཤད། །རྒྱུན་དང་རྟག་པ་ཉིན་གཅིག་པ། །ཉིན་གསུམ་པ་དང་ཉིན་བཞི་བའོ། །ལུས་ཟུངས་བཤང་གཅི་རྒྱུ་བ་ཡི། །བུ་གནད་ཀྱིས་ཁྱབ་བྱས་པས། །ལུས་ཀུན་ཚ་བར་གྱུར་ནས་ནི། །གནོད་བྱ་སྩོགས་དང་མཉམ་པར་འཕེལ། །སྟོབས་ཆེ་ལུས་ལྕི་རྐང་ལག་རེངས། །ཁྱད་པར་དུ་ནི་
དངས་མར་གནས། །གཉེན་པོས་བཅོས་དཀའ་བཟོད་པར་དཀའ། །རྒྱུན་གྱི་རིམས་སུ་འགྱུར་བ་ཡིན། །དེ་ཡི་དྲོད་ཀྱིས་དྲི་མ་དང༌། །ལུས་ཟུངས་མྱུར་དུ་ཟད་པར་བྱེད། །དེ་འོག་རྣམ་ཀུན་ལུས་ཟུངས་སྩོགས། །དག་པའམ་མ་དག་རིམས་ཀྱིས་ནི། །རླུང་དང་མཁྲིས་པ་བད་ཀན་ཞག །བདུན་ནམ་བཅུའམ་བཅུ་གཉིས་གནས། །ཕལ་ཆེར་མཚམས་ལས་མི་འདའ་བར། །འཚོ་བའམ་འཆི་བ་དག་ཏུ་བྱེད། །དེ་སྐད་མེ་བཞིན་འཇུག་གིས་བཤད། །ལྗང་སྔོན་གྱིས་ནི་བཤད་པའི་གཞུང༌། །བདུན་པ་ཉིས་བལྡབ་གྱུར་བ་ཡིན། །དེ་བཞིན་དགུ་དང་བཅུ་གཅིག་བལྡབ། །འདི་ནི་ནད་གཞི་གསུམ་གྱིས་ཚིགས། །འཚོ་དང་འཆི་འབར་བྱེད་པ་ཡིན། །རིམས་དུས་དག་དང་མ་དག་ལས། །ཡུན་རིངས་དུས་སུ་གནས་པ་ཡིན། །ནད་རྩེ་ཞིལ་བ་ཉམ་ཆུང་དང༌། །ཁ་ཟས་མི་འཕྲོད་སྩོགས་བསྟེན་པས། །ནད་དཀྱེལ་ཆུང་ཡང་གནོད་བྱ་སྩོགས། །བརྟེན་ཏེ་སྟོབས་ཆེ་ཉིད་གྱུར་ལས། །གཉེན་པོར་བཅས་ཤིང་འཕེལ་འབྲི་གནས། །མི་བཟད་པ་ནི་ཉིད་དུ་འགྱུར། །དེ་རྣམས་ཀྱིས་ནི་ནད་ཀྱི་སྟོབས། །རང་གི་དུས་སུ་རིམས་སྟོབས་སྐྱེད། །སླར་ཡང་དེ་དག་བཅོས་ཐབས་ཀྱིས། །སྟོབས་ཆེ་ཆུང་ལས་ལྡོག་བར་བྱེད། །ནད་ཟད་རིམས་ནི་ཕྲར་གྱུར་པ། །བཅུད་ལ་སོགས་པ་ཉིད་ལ་ཐིམ། །ཐིམ་པས་ལུས་རིང་ཤ་མདོག་ཉམས་ཉམས། །རྨོངས་བག་ལ་སོགས་དེ་ཡིས་སྐྱེད། །ཉེ་ནི་བ་ནི་བྱེ་བའི་ཕྱིར། །དངས་མ་རྒྱུ་བའི་རྩ་སྒོ་ལས། །ལས་ཀུན་མྱུར་དུ་ཁྱབ་པ་ནི། །ནད་ཀྱིས་སྐྱེ་བར་བྱེད་པ་ཡིན། །དེས་ན་རྒྱུན་དུ་རྟག་རིམས་འགྱུར། དེ་ལས་བཟློག་པ་ཚུལ་མི་འདྲ། །མི་སྙོམས་རྩོལ་བ་མི་མཉམ་པ། །བྱ་བའི་དུས་མིན་མཉམ་ཡུན་རིང༌། །དེ་ནི་ཉིན་མཚན་ལན་གཉིས་ལྡང༌། །གཞན་དག་ཉིན་རེ་ལན་རེ་ཡིན། །ཕལ་ཆེར་ནད་ནི་ཁྲག་ལ་བརྟེན། །རྟག་པའི་རིམས་ནི་བྱེད་པར་འགྱུར། །དེ་ཡང་ཉིད་མཚན་ལན་གཉིས་ལྡང༌། །ཉིན་གཅིག་ཉིན་རེ་ལན་རེ་ལྡང༌། །དེ་ནི་ཤ་ཡི་རྩ་ལ་བརྟེན། །གསུམ་པ་ཚིལ་གྱི་རྩ་ལ་གནས། །མཁྲིས་པ་རླུང་གཉིས་སྤྱི་ནས་འཛིན། །བད་ཀན་མཁྲིས་གྱུར་སུམ་མདོ་ན། །རླུང་དང་བད་ཀན་རྒྱབ་ནས་འཛིན། །དེ་ནི་ཞག་གཅིག་གིས་ཆོད་ཡིན། །ཉིན་བཞི་པའི་རིམས་
ནད་ཚིལ་དང༌། །རྐང་དང་རུས་པའི་ནང་ན་གནས། །གཞན་དག་ཚིལ་ཉིད་ལ་གནས་ཟེར། །དེ་ཡི་ནུས་པ་བསྟན་པ་ནི། །བད་ཀན་གྱིས་ནི་བྱིན་གཉིས་ན། །རླུང་གིས་ཀླད་པ་ན་བར་བྱེད། །རུས་རྐང་གཉིས་ཀར་ཞུགས་པ་ཡིན། །ཉིན་བཞི་པ་ནི་གོ་བཟློག་པའོ། །ཉིན་གསུམ་པས་ནི་ཉིན་གཉིས་ན། །ཉིན་ཅིག་ན་བར་མི་བྱེད་དོ། །ནད་རྣམས་ཀྱི་ནི་སྟོབས་ཆེ་ཆུང། །ཟས་དང་སྤྱོད་པ་ལས་འབྱུང་ཞིང༌། །དེ་བཞིན་རིམས་རྣམས་འབྱུང་བ་ནི། །ཡིད་དང་ལས་ལས་སྐྱེ་བར་འགྱུར། །ནད་ཀྱིས་ལུས་ཟུངས་དཀྲུགས་གྱུར་པ། །ནད་སོས་ཉི་ཚེ་ཞུ་བར་འགྱུར། །དེ་ཚེ་ནད་བ་དབུགས་དྲག་རྡུལ། །མཁུན་ཞིང་སློན་བྱེད་འགྲེ་བ་དང༌། །ལུས་འདར་ཚིག་མང་ཚབ་དང༌། །ལུས་གྲང་བཞིན་མདོག་ཉམས་པ་དང། །དྲན་སྟོར་རིམས་ཀྱི་ཤུགས་ཀྱིས་གཟིར། །ཁྲོས་པའི་ཚུལ་གྱིས་ལྟ་བ་དང༌། །བཤང་བ་ནད་དང་སྒྲར་བཅས་པ། །སླ་བ་ཤུགས་དྲག་འབྱུང་བ་ཡིན། །ལུས་ནི་ཡང་ཞིང་རྨྱ་དང་རྨོངས་བག་ཚ་བ་མེད། །ཁ་ན་ཐོར་བུ་འབྱུང་དང་དབང་པོ་བརྟས་ཤིང་བ་དེ། །ཡིད་ནི་སོར་གནས་རྡུལ་སྦྲིད་བདེར་འབྱུང་ཡིག་འབྱེད། །མགོ་བོ་གཡའ་བ་རིམས་ནད་འབྱང་བའི་མཚན་མ་ཡིན། །ཡན་ལག་བརྒྱད་པའི་སྙིང་པོ་བསྡུས་པ་ལས། །ནད་གཞིའི་གནས་ཀྱི་ལེའུ་གཉིས་པའོ།། །།དེ་ནས་ཁྲག་དང་མཁྲིས་པ་དང་ལུད་པའི་ནད་གཞི་བཤད་པར་བྱའོ། །རབ་དྲོ་རབ་རྣོ་ཚ་དང་སྐྱུར། །ལན་ཚྭ་ལ་སོགས་ཚ་བ་དང༌། །ཁྲེ་རྒོད་ཨུཏྤ་ལ་ཡི་ཟས། །དེ་བཅས་ཤིན་ཏུ་བསྟེན་དྲགས་དང། །མཁྲིས་པ་ཅན་གྱི་མཁྲིས་ནད་ནི། །གཤེར་དང་ཁྲག་རྒྱས་ནད་དུ་འགྱུར། །དེ་ནི་ཕན་ཚུན་འདྲེས་གྱུར་བས། །ལུས་ཀུན་ཁྱབ་པར་བྱེད་པར་འགྱུར། །མཁྲིས་པ་ཁྲག་ལས་གྱུར་པ་དང༌། །འདྲེས་དང་གནོད་བྱ་ལས་དང་གཅིག །མདོག་དང་དྲི་ནི་རྗེས་མཐུན་པས། །ཁྲག་གི་མིང་དུ་བསྟན་པ་ཡིན། །དེ་ནི་ཁྲག་གནས་མཆིན་པ་དང༌། །མཆེར་པ་ལས་ནི་འབྱུང་བར་འགྱུར། །མགོ་བོ་ལྕི་ཞིང་ཡི་ག་འཆུས། །བསིལ་འདོད་སྒྲེགས་པ་དུད་ཅན་སྐྱུར། །སྐྱུག་ཅིང་སྐྱུགས་མདོག་བཙོག་པར་སྣང༌། །ལུད་པ་དབུགས་མེ་བདེ་མགོ་འཁོར། །ཁོང་སྙོམ་ཁྲག་དམར་ཉ་དྲི་བྲོ། །ཁ་དྲི་མི་ཞིམ་སྐད་འགགས་ལ། །མིག་ལ་སྩོགས་པའི་ཁ་དོག་ནི། །དམར་དང་ལྗང་དང་སེར་པོར་སྣང༌། །རྨི་ལམ་དུ་ཡང་ཁ་དོག་དེ། །འདིར་ནི་མཐོང་བར་འགྱུར་བ་ཡིན། །སྟོད་དུ་སྣ་མིག་རྣ་བ་ཁ། །སྨད་དུ་བཤང་སྒོ་ཕོ་མོའི་མཚན། །བ་སྤུའི་བུ་ག་ཀུན་ལས་ཀྱང༌། །ཁྲག་རབ་རྒྱས་པ་འབྱུང་བར་འགྱུར། །སྟོད་ཀྱི་བད་ཀན་ཡིན་གསོ་སླ། །དེ་ནི་བཀྲུ་སྨན་བྲང་བས་གསོ། །སྨན་མང་ཡོད་ཅིང་
མཁྲིས་པ་ཡི། །སྨན་གྱི་མཆོག་ནི་བཀྲུ་སྨན་ཡིན། །ཟླ་ལ་ཡོད་པའི་བད་ཀན་ཡང༌། །དེར་ནི་དེ་ཡིས་སྦྱངས་བྱས་འགྱུར། །དེ་ལ་སྨན་ནི་མངར་དང་བསྐ། །བད་ཀན་དག་ལ་ཕན་པ་ལ། །གང་གཏོགས་ངང་གིས་བད་ཀན་སེལ། །ཁ་དང་བསྐ་བ་སྨོས་ཅི་དགོས། །ཐུར་དུ་འབྱུང་བའི་རླུང་ཡིན་ཕྱིར། །དེ་ནི་སྐྱུག་སྨན་བཏང་བས་གསོ། །མཁྲིས་པའི་སྨན་ནི་ཉུང་བ་ཡིན། །སྐྱུག་སྨན་མཁྲིས་པའི་སྨན་མཆོག་ཡིན། །ཟླ་ལ་ཡོད་པའི་རླུང་ནད་ཀྱང༌། །དེ་ནི་དེ་ཡིས་ཞི་མི་འགྱུར། །དེ་ལ་རོ་ནི་མངར་བསྐོལ་བ། །འབའ་ཞིག་ཕན་པར་འགྱུར་བ་ཡིན། །བད་ཀན་རླུང་ནི་འདྲེས་པའི་ནད། །གཉི་གར་འབྱུང་བ་གསོ་དཀའ་སྟེ། །བཟློག་པའི་ཐབས་ནི་མེད་ཕྱིར་དང༌། སྨན་ཡང་ཡོད་པ་མ་ཡིན་ནོ། །འདི་ལས་བཟློག་པར་བྱ་བའི་ཐབས། །སྦྱང་བའང་ཡོད་པ་མ་ཡིན་ཏེ། །སྦྱངས་པས་བཟློག་པར་བྱ་བ་དང༌། །སྨན་པས་ཁྲག་མཁྲིས་གསོ་བ་ཡིན། །མཁྲིས་པ་ཉེ་བར་ཞི་བ་ཡང༌། །འདི་ལས་ཡོང་ཡེ་ཡོད་མ་ཡིན། །འདྲེས་པར་གྱུར་བའི་ནད་ལ་ནི། །ཐམས་ཅད་སེལ་བའི་ཞི་བྱ་ཕན། །དེ་ལ་ནད་དང་རྗེས་མཐུན་པའི། །གཏར་ག་བཏབ་སྟེ་བརྟག་པར་བྱ། །བླ་བརྣན་བྱུང་བར་གྱུར་པ་དག །འགྱུར་བར་ཤེས་ལས་རྟོགས་པར་བྱ། །དེ་ལ་ལུད་བ་མྱུར་གནོད་བྱེད། །དེ་ཕྱིར་དེ་ཉིད་བཤད་པར་བྱ། །ལུད་པ་རླུང་མཁྲིས་བད་ཀན་དང༌། །གློ་རྡོལ་གློ་གཅོད་ལ་ལྔར་བཤད། །ཐམས་ཅད་མ་གསོས་ཟད་བྱེད་འགྱུར། །ཕྱི་མ་བཞིན་དུ་སྟོབས་ཆེན་ཡིན། །དེ་རྣམས་འབྱུང་བར་འགྱུར་བའི་རྟགས། །གྲེ་བ་གཡའ་ཞིང་ཡིག་འཆུས། །གྲེ་ནང་གྲ་མས་གང་སྙམ་སེམས། །དེ་ལ་ཐུར་རྒྱུའི་རླུང་གནོད་འགྱུར། །སྟོད་དུ་སོང་སྟེ་བྲང་དུ་ཕྱིན། །དེ་ཚེ་མགུལ་བའི་ནད་དུ་ཞེན། །མགོ་བའི་རྩ་རྣམས་བཀང་ནས་ནི། །དེ་ནས་ཡན་ལག་འདེགས་པ་ལྟར། །གཡེངས་བྱེད་མིག་རྡོལ་ཙམ་དུན། །རྒྱབ་བྲང་རྩིབ་ལོགས་ན་ཞིང་ཟུག །ཁ་རུ་འབྱུང་ཞིང་རྒྱུ་བ་ནི། །ལུད་པ་སྣོད་ཆག་འདྲའི་སྒྲ་འབྱུང༌། །ནད་གཞིའི་དི་བྱེ་བས་ནད་ཀྱང་ནི། །ཐ་དང་ཤུགས་དང་བཅས་པ་ཡིན། །ནད་གང་སྒྲ་ནི་མི་སྙོམས་པའི། །དེ་ལས་ལུད་བ་འབྱུང་བ་ཡིན། །རླུང་ནད་སྐྱེས་པ་རླུང་འཁྲུགས་པ། །བྲང་དང་གྲེ་བ་སྐམ་ཞིང༌། །སྙིང་བྲང་རྩི་བ་ལོགས་ཀླད་པ་གཟེར། །རྨོངས་བག་ཁོང་འཁྲུགས་སྐད་འགགས་ཤིང༌། །ལུད་པ་སྐམ་པོ་འབྱུང་བྱེད་ཅིང༌། །ན་བའི་ཤུགས་དྲག་སྒྲ་ཆེར་འབྱུང༌། །ལུས་ཀུན་བརྩེ་བཅས་བད་ཀན་སྐམ། །འཐོན་པར་དཀའ་ཞིང་ཉུང་དུ་འབྱུང༌། །མཁྲིས་པས་མིག་དང་བད་ཀན་སེར། །ཁ་ནང་ཁ་ཞིང་རིམས་མགོ་འཁོར། །ཁྲག་མཁྲིས་སློན་ཞིང་སྐོམ་
དད་ཆེ། །སྐད་འགགས་དུད་འདྲ་སྐྱུར་བ་དང༌། །ལུད་པའི་ཤུགས་ཀྱི་རྒྱུན་འབྱུང་བ། །སྐར་མདའ་འཕྲོ་བ་ལྟ་བུར་སྣང༌། །བད་ཀན་ལས་བྲང་ནད་ཚབས་ཆུང༌། །མགོ་ལྕི་སྙིང་ག་གང་སྙམ་སེམས། །གྲེ་བར་བསྐུས་འདྲ་སྙོམ་པར་བྱེད། །ཆམ་འདེབས་ཟས་སྐྱུག་ཡི་ག་འཆུས། །སྤུ་རྩེ་ལུད་པ་སྐམ་པ་དང༌། །སྣུམ་ཞིང་དཀར་བ་འབྱུང་བར་འགྱུར། །སྟོབས་འགྱེད་ལ་སོགས་དྲག་ཤུལ་རྣམས། །མི་ནུས་བཞིན་བྱས་དེ་དང་དེས། །རླུང་གིས་བྲང་ནང་གློ་དྲལ་ལ། །མཁྲིས་པ་རྗེས་འབྲངས་དཀྱེལ་གྱུར་པ། །འཁྲུགས་ཏེ་ལུད་པ་ལུ་བར་བྱེད། །དེ་ནི་བད་ཀན་ཁྲག་བཅས་དང༌། །སེར་ཞིང་གནག་ལ་སྐམ་བ་དང༌། རིལ་རིལ་པོར་མནམ་མང་དུ་འབྱུང༌། །འབྱུང་ཚེ་གྲེ་བ་ན་བ་དང༌། །བྲང་ནི་དྲལ་བསྙམ་དུ་སེམས། །ཁབ་ནི་རྣོན་པོས་ཕུག་སྙམ་སེམས། །གཟེར་གྱིས་འདེབས་པར་བྱེད་པ་དང༌། །ཚིགས་འབྱེ་རིམས་དང་དབུགས་མི་བདེ། །སྐད་འགགས་ལུས་འདར་སྐོམ་དད་ཆེ། །ཕུག་རོན་ལྟ་བུར་མཁུན་འབྱིན་ཏོ། །རྩིབ་ལོགས་གཟེར་འགྱུར་དེ་ནས་ནི། །རིམ་གྱིས་སྟོབས་དང་མེ་དྲོད་དང༌། །ནུས་པ་ཉམས་ནི་འབྲི་བར་འགྱུར། །ཟད་བྱེད་ཀྱིས་གཅིན་ཁྲག་དང་བཅས། །རྒྱབ་དང་རྐང་པ་ན་བར་འགྱུར། །གཙོ་བོ་རླུང་ནི་འཁྲུགས་པ་ཡིས། །ལུས་ཟུངས་ཟད་བྱེད་ནད་རྒྱལ་བོ། །གློ་གཅོང་གི་ནི་གནས་བྱེད་ཅིང༌། །ལུད་པ་ལུ་ཞིང་བད་ཀན་འབྱུང༌། །རྣག་འདྲ་མནམ་ཞིང་སེར་བ་དང༌། རུལ་ཞིང་རྩ་སྔོ་དམར་བ་དང༌། རྩིབ་ལོགས་བཏོན་བ་ལྟར་སེམས་ཤིང༌། །སྙིང་ནི་ལྟུང་བསྙམ་དུ་བྱེད། །རྒྱུ་མེད་དྲོ་དང་གྲང་བ་འདོད། །ཟས་མང་ཟ་ཞིང་ཉམས་སྟོབས་ཟད། །བཞིན་ནི་སྣུམ་ཞིང་དང་བར་སྣང༌། །མིག་ནི་མ་དང་ལྡན་པ་ལྟ་སྡུག་འགྱུར། །དེ་ནས་དེ་ལས་ཟད་བྱེད་འགྱུར། །ཐམས་ཅད་འབྱུང་བར་འགྱུར་བ་ཡིན། །དེ་ལྟར་གློ་རྡོ་ལ་ལས་བྱུང་ལུད། །ཉམ་ཆུང་ལུས་ནི་འཇིག་བྱེད་དེ། །སྟོབས་ལྡན་གསོ་བ་བརྩམ་དུ་རུང༌། །གློ་གཅོང་ལས་བྱུང་དེ་དང་འདྲ། །དེ་གཉིས་གསར་བྱུང་མགོན་ལྡན་འགྲུབ། །ནད་གཞི་ཐ་དད་གསུམ་གསོར་རུང༌། །གཉིས་འདྲེས་ཀུན་ཀྱང་རྒན་པོ་ནི། །ན་ཚོད་ཟད་བཏབ་འཚོ་བཙམ། །ལུད་པ་ཡལ་བར་བོར་བ་ལས། །དབུགས་མི་བདེ་དང་ཟད་བྱེད་སློན། །སྐད་གསལ་སོགས་ནད་འབྱུང་འགྱུར། །དེ་ཕྱིར་དེ་ནི་མྱུར་དུ་གསོ། །ཡན་ལག་བརྒྱད་པའི་སྙིང་པོ་བསྡུས་པ་ལས། །ནད་གཞིའི་གནས་ཀྱི་ལེའུ་གསུམ་པའོ།། །།དེ་ནས་དབུགས་མི་བདེ་དབང་སྐྱིགས་བུས་བཏབ་པའི་ནད་གཞི་བཤད་པར་བྱའོ། །ལུད་པ་འཕེལ་བའམ་སྔར་ནད་གཞི། །འཁྲུགས་ལས་དབུགས་མི་བདེ་འབྱུང་འགྱུར། །མ་ཞུ་ཚད་འཁྲུ་སློན་དུག་འཐུངས། །སྐྱ་རྦབ་རིམས་བཏབ་ལས་ཀྱང་འབྱུང༌། །
ཕྲན་ཚེགས་མུན་ཅན་ཆད་པ་དང༌། །ཆེན་པོ་གྱེན་འབྱུང་རྣམ་པ་ལྔ། །བད་ཀན་གྱིས་ནི་རྒྱུ་ལམ་བཀག །རླུང་ནི་སྣ་ཚོགས་ཁྱབ་པར་གནས། །སྲོག་དང་ཟས་སྐོམ་རྒྱུ་བའི་ལམ། །སྦུ་གུ་ནད་ཀྱིས་བཀག་པས་ན། །མ་ཞུའི་གནས་ནས་འབྱུང་བའི་དབུགས། །བྲང་གནས་དབུགས་མི་བདེ་བར་བྱེད། །དེ་ཡི་སྔོན་ཚུལ་སྙིང་རྩི་བ་ལོགས། །གཟེར་ཞིང་སྲོག་རླུང་མི་མཐུན་རྒྱུ། །སྤོས་དང་མུར་འགྲམ་ན་བ་ཡིན། །དེས་ནི་དྲག་ཤུལ་འགྲངས་དྲགས་པས། །བསྐྱོད་པའི་རྔམ་པ་ཕྲན་ཚེགས་འགྱུར། །དེ་ནི་རང་ཉིད་ཞི་བར་འགྱུར། །རླུང་གིས་རྩ་སྦུབས་ལོགས་རྒྱུ་བྱེད། །བད་ཀན་སློངས་པར་གྱུར་ནས་ནི། །ཀླད་པ་མགུལ་བའི་ནང་སོང་སྟེ། །བྲང་དང་རྩིབ་ལོགས་ན་པར་བྱེད། །ལུད་པ་ངར་སྒྲ་འཛེར་མི་དྲན། །ཆམ་པ་མི་བཟད་ཡི་ག་འཆུས། །མི་བཟད་ཤུགས་ནི་སྐྱེད་བྱེད་ཅིང༌། །དབུགས་མི་བདེ་བདེའི་ཤུགས་ཀྱིས། །སྲོག་ལ་གནོད་འགྱུར་ལུད་པའི་མཐར། །སྐད་ཅིག་བདེ་བར་བྱེད་པ་ཡིན། །ཉལ་ཚེ་ཤིན་ཏུ་མི་བདེ་ལ། །འདུག་ན་ཅུང་ཟད་བདེ་བར་འགྱུར། །མིག་གདངས་འཕྲལ་བའི་ཕྱོགས་ནས་ནི། །རྡུལ་འཛག་ཤིན་ཏུ་ན་བས་ཉེན། །ཁ་སྐམ་དབུགས་ནི་བསྟུད་མར་འབྱུང༌། །དྲོ་བ་འདོད་ཅིང་འདར་དང་བཅས། །ཆར་འབབ་གྲང་དང་སེར་བུས་ཕོག །བད་ཀན་བསྐྱེད་པས་རྣམ་པར་འཕེལ། །མུན་ཅན་དེ་ནི་འཚོ་བྱ་ཙམ། །ཉམས་ལྡན་གསར་དུ་བཏབ་གསོ་སླ། །རིམས་དང་བརྒྱལ་ལས་བྱུང་གང་བའི། །སྨན་གྱིས་ཞི་སྟེ་རབ་མུན་ཅན། །དབུགས་འཆད་དབུགས་འབྱིན་རྒྱུན་ཆད་པའི། །གནད་གཅོད་ནད་ཀྱིས་གཟིར་བར་བྱེད། །རྡུལ་བཅས་རྒྱལ་དང་སྤོས་དང་བཅས། ལྒང་པ་ཚ་ཞིང་གཅིན་འགགས་བྱེད། །མིག་མི་སྡུག་ཅིང་ཐུར་དུ་ལྟ། །མིག་གཅིག་དམར་ཞིང་དྲན་པ་སྟོར། །ཁ་སྐམ་སྨྲེ་ཞིང་སྐད་གདངས་དམའ་།གཟི་མདངས་ཉམས་ཤིང་སེམས་བྲལ་བའོ། །ཆེན་པོར་རོ་ཆེར་འབྱུང་ཞིང༌། །སྒྲ་ཆེ་སྡུར་པ་དྲག་པ་དང༌། བསྐྱང་པ་བཞིན་དུ་འབྱུང་འགྱུར་ཞིང༌། །ཁུ་མཆོག་རྒྱགས་པའི་ང་རོ་འདྲ། །ཤེས་དང་རྣམ་ཤེས་རབ་ཉམས་ཤིང༌། །མིག་འཁྲུལ་བཞིན་ནི་འགྱུར་བ་དང༌། །རོ་སྟོད་ཞུམ་པར་འགྱུར་བ་དང༌། །བཤང་གཅི་འགགས་ཤིང་སྐད་གསང་ཉམས། །མགུལ་སྐམ་ཡང་དང་ཡང་མི་དྲན། རྣ་བ་མུར་འགྲམ་ཀླད་པ་ན། །གྱེན་འབྱུང་དབུགས་ནི་རིང་དུ་འབྱིན། །སླར་ནི་ཐུར་དུ་རྔུབ་མི་ནུས། །བད་ཀན་གྱིས་ཁ་རྩ་སྒོ་འགགས། །རླུང་ནི་འཁྲུགས་པས་གཟིར་འགྱུར་བ། །གྱེན་དུ་བལྟ་ཞིང་འཁྲུལ་བྱེད་པས། །མིག་ནི་ཀུན་ཏུ་ལྟ་བྱེད་པ། །གནད་རྣམས་
འཆད་པར་བྱེད་བཞིན་དུ། །སྐད་འགགས་སྨྲེ་སྔགས་འདོན་པར་བྱེད། །འདི་དག་མ་ཚང་གསོར་རུང་ལ། །ཚང་ན་ངེས་པར་སྲོག་འཕྲོག་བྱེད། །དབུགས་མི་བདེ་རྒྱུ་སྔོན་ཚུལ་དང༌། །གྲངས་དང་རང་བཞིན་རྟེན་གཅིག་ཡིན། །སྐྱིགས་བུ་ཐས་བྱུང་ཕྲན་ཚེགས་དང༌། །ཟུང་དང་ཆེན་པོར་འབྱུང་བ་དང༌། །ཟ་བདག་དང་རྣམ་པ་ལྔ། །དེ་ལ་རླུང་གིས་རིང་ཟོས་དང༌། །རྩུབ་ཚ་སྲ་དང་མ་གོམས་པའི། །ཟས་དང་སྐོམ་གྱིས་བཙིར་གྱུར་པའི། །རླུང་གིས་སྐྱིགས་བུ་ནད་མེད་དང༌། །སྒྲ་མི་གྲགས་ཅིང་སྦྲིད་འབྱུང་སྟེ། །གང་ཞིག་གོམས་པའི་ཟས་སྐོམ་གྱིས། །ཞི་འགྱུར་སྐྱིགས་བུ་ཟས་བྱུང་ཡིན། །དྲག་ཤུལ་གྱིས་རླུང་ཅུང་ཟད་བེ་སྐྱོད། །སྐྱིགས་བུ་ཕྲ་མོ་འབྱུང་བར་འགྱུར། །ནམ་ཚོང་རྩ་བ་ནས་འབྱུང་བྱེད། །དེ་ནི་ཤུལ་ངལ་འཇམ་པ་ཡིན། །རྩོལ་བ་དྲག་པོ་འཕེལ་འགྱུར་ལ། །ཟས་ཟོས་ཙམ་གྱིས་དལ་བར་འགྱུར། །ཟུང་འབྱུང་ཚིགས་ནི་རིང་བལ། །གང་ཞིག་ཟས་ལས་འབྱུང་འགྱུར་བ། །འཇུག་བར་ཉེ་བའི་ཚེ་ན་འདབས། །ཟས་ཞུ་ཟིན་ནས་འཕེལ་འགྱུར་བའོ། །མགོ་དང་མགུལ་པ་འདར་བྱེད་ཅིང༌། །སྦོ་དང་ཤིན་ཏུ་སྐོམ་དད་སྐྱེད། །བླ་དང་སློན་དང་ཚད་པར་འཁྲུ། །མིག་གདངས་གླལ་ནི་འབྱུང་བར་འགྱུར། །སྐྱིགས་བུ་ཟུང་འབྱུང་ཤུགས་དྲག་ལ། །ཞུ་དང་བཅས་པར་དེ་ཤེས་བྱ། །སྐྱིགས་བུ་ཆེན་པོ་འབྱུང་བའི་ཚུལ། །སྨིན་མ་མུར་འགྲམ་གཉིས་རེངས་ཤིང༌། །མི་གནས་མ་ཆི་འཛག་ཧར་བར་ལྟ། །ལུས་རེངས་ཚིག་ནི་ཐོགས་བྱེད་ཅིང༌། །དྲན་དང་འདུ་ཤེས་འཁྲུལ་པར་བྱེད། །མིད་པའམ་སྦུབས་ནི་འགགས་བྱེད་ཅིང༌། །གནད་ཀྱི་ཚོགས་ནི་སྐྱོད་པར་བྱེད། །རྒྱབ་སྒུ་ལུས་ནི་ཁོང་སྐེམ་བྱེད། །རྩ་བ་ཆེ་ཞིང་སྒྲ་ཆེ་ལ། །ནད་ཚབས་ཆེ་ཞིང་སྟོབས་ཆེར་འབྱུང༌། །ཞུ་བའི་གནས་སམ་ལྟེ་འོག་ནས། །སྔ་མ་འདྲ་བར་གང་ཞིག་འབྱུང༌། །དེ་འདྲའི་ཚུལ་ནི་བསྟུད་མར་འབྱུང༌། །གླལ་དང་རྐང་ལག་བྱ་རྨྱང་བྱེད། །བྲག་ཅ་ཟབ་འབྱུང་ཟབ་མོའོ། །དེ་རྣམས་ལས་ནི་དང་པོ་ཡི། །གཉིས་པོ་གསོ་བར་བྱ་བ་ཡིན། །ཐ་མ་གཉིས་དང་ཟུང་འབྱུང་བ། །མཚན་ཉིད་
ཀུན་རྫོགས་ཤུགས་དྲག་སྤང༌། །འདི་དག་ཐམས་ཅད་ཡུན་རིངས་བསགས། །རྒད་པོ་བུད་མེད་ཀྱིས་དུབ་དང༌། །ནད་ཀྱིས་ཉམ་ཆུང་ཟས་བཅད་པ། །གློ་རྡོལ་ནད་ཅན་སྤང་བར་བྱ། །ནང་ཀུན་གྱིས་འཆི་བྱེད་མོད་ཀྱི། །སྐྱིགས་བུ་དབུགས་མི་བདེ་བལྟར། ནད་གཞན་མྱུར་དུ་གསོད་མི་བྱེད། །འདི་དག་འཆི་ཚེ་ངེས་འབྱུང་འགྱུར། །ཡན་ལག་བརྒྱད་པའི་སྙིང་པོ་བསྡུས་པ་ལས་ནད་གཞིའི་གནས་ཀྱི་ལེའུ་བཞི་པའོ།། །།དེ་ནས་གློ་གཅོང་ཆེན་པོ་ཟད་བྱེད་ཀྱི་ལེའུ་བཤད་པར་བྱའོ། །ནད་ནི་དུ་མ་རྗེས་འབྲང་ཞིང༌། །ནད་མང་སྔོན་དུ་འགྲོ་འགྱུར་ལ། །རྒྱལ་པོ་ཟད་བྱེད་སྐེམ་བྱེད་དང༌། །ནད་ཀྱི་རྒྱལ་པོ་ཞེས་ཀྱང་བཤད། །རྒྱུ་སྐར་རྣམས་དང་བྲམ་ཟེ་ཡི། །རྒྱལ་པོའི་གཅོང་དུ་སྔོན་གྱུར་ཅིང༌། །གང་ཡང་ནད་ཀྱི་རྒྱལ་པོར་འགྱུར། །དེ་ཕྱིར་གནོད་པའི་རྒྱལ་པོར་བཤད། །ལུས་དང་སྨན་ནི་ཟད་བྱེད་ཅིང༌། ཟད་ལས་འབྱུང་བས་ཟད་བྱེད་ཡིན། །དྲངས་སྩོགས་སྐེམས་པས་སྐེམ་བྱེད་ཡིན། །དེ་རྣམས་དེ་ལས་གསལ་པས་རྒྱལ། །དྲག་ཤུལ་བསྟེན་དང་ཤུགས་བཀག་དང༌། །ཁུ་ཆུ་དྲངས་མ་སྣུམ་ཟད་དང༌། །ཟས་སྐོམ་ཆོ་ག་དང་བྲལ་བསྟེན། །བཞི་པོ་འདི་དག་དེ་ཡི་རྒྱུ། དེ་ཡིས་རླུང་དང་མཁྲིས་པ་དང༌། །བད་ཀན་བསླངས་ནས་ཐམས་ཅད་དུ། །ལུས་ཀྱི་ཚིགས་ཀུན་ལ་ཞུགས་ཏེ། །དེ་ཡིས་རྩ་སྒོ་ལ་གནོད་ཅིང༌། །བུ་གའི་སྒོ་ནི་བཀག་པའམ། །ཡང་ན་ཤིན་ཏུ་ཁ་བྱེ་འགྱུར། །སྟོང་སྨད་ཐད་ཀར་གནས་ནས་ནི། །རང་གི་ནད་ནི་ཇི་བཞིན་སྐྱེད། །དེ་འབྱུང་འགྱུར་བའི་སྔོན་ཚུལ་ནི། །ཆམ་འདེབས་སྦྲིད་པ་ཤིན་ཏུ་མང༌། །མཆིལ་མ་ཁ་ནས་རོ་མངར་བྲོ། །ལུས་དང་མེ་དྲོད་ཉམ་ཆུང་བྱེད། །གཞོང་སྣོད་ཟས་སྐོམ་ལས་སོགས་ནི། །གཙང་ཡང་མི་གཙང་ཉིད་དུ་མཐོང༌། །ཕལ་ཆེར་ཟས་དང་སྐོམ་སྩོགས་ལ། སྦྲང་མ་སྐུ་དང་རྩ་སྩོགས་འབབ། །སྙིང་འཕར་སློན་བྲོ་ཡི་གེ་འཆུས། །ཁ་ཟས་ཟོས་ཀྱང་ཉམས་སྟོབས་ཟད། །ལག་པར་ལྟ་ཞིང་རྐང་གདོང་སྐྲང༌། །མིག་ནི་ཤིན་ཏུ་དཀར་པོར་སྣང༌། །ལག་ངར་དག་ནི་འཇལ་བར་འདོད། །ལུས་ལ་འཇིགས་སུ་རུང་བར་མཐོང༌། །བུད་མེད་
ཆང་དང་ཤ་ལ་དགའ། །སྨོད་དང་ཀླད་པ་འགེབས་པར་བྱེད། །སྐྲ་དང་སེན་མོ་ཤིན་ཏུ་འཕེལ། །རྨི་ལམ་དུ་ནི་ཕྱེ་མ་ལེ་བ། །རྩངས་པ་སྡིག་སྦྲུལ་གཅན་གཟན་སྤྲེའུ། །བྱ་རྣམས་ཀྱིས་ནི་གཙེས་པར་མཐོང༌། །སྐྲ་རུས་ཕུབ་མ་ཐལ་སྩོགས་ཀྱི། །ཕུང་པོ་ལ་ནི་འཛེགས་པ་དང༌། །ཡུལ་དང་གྲོང་ནི་སྟོང་པ་དང༌། །ཆུ་ཀླུང་སྐམས་པར་རྨི་ལམ་མཐོང༌། །སྐར་མངའ་རི་བོ་ལྟུང་བ་དང༌། །ལྗོན་ཤིང་རྣམས་ནི་འབར་བ་རྨི། །སྟོད་དུ་གནས་ན་ཆམ་པས་འདེབས། །ལུད་པ་ལུ་ཞིང་དབུགས་མི་བདེ། །ཕྲག་པ་སྤྱི་བོ་ན་པ་དང༌། །སྐད་འགགས་ཡི་ག་འཆུས་པར་འགྱུར། །སྨད་གནས་བཤང་སླ་རྟུག་སྐེམ་བྱེད། །ནང་གྲོལ་ནང་གནས་སློན་པར་བྱེད། །ཐད་ཀར་གནས་པས་རྩིབ་ལོགས་ཟུག །ཚིགས་ལ་གནས་ན་རིམས་སུ་འགྱུར། །དེ་ལྟར་ནད་ཚུལ་བཅུ་གཅིག་ནི། །གཅོང་ཆེན་ལྡན་ལས་འབྱུང་བར་འགྱུར། །དེ་རྣམས་ཀྱི་ནི་བླ་བརྣན་དག །སྐད་འགགས་བྲང་དུ་ན་བ་དང༌། །ཁ་གླལ་ལུས་གྲུགས་མཆིལ་སྣབས་མང༌། །དྲོད་ཉམས་ཁ་མནམ་ཡིན་ཤེས་བྱ། །དེ་ལ་རླུང་གྱུར་ཀླད་པ་དང༌། །རྩིབ་ལོགས་ཟུག་ཤ་ཡན་ལག་ན། །སྐད་འགགས་མགུལ་པ་སུབས་པར་འགྱུར། །མཁྲིས་རྒྱས་རྐང་ལག་ཕྲག་པ་ཚ། །ཚད་འཁྲུ་ཁྲག་ཏུ་སློན་པ་དང༌། ཁ་མནམ་རིམས་འདེབས་མྱོས་པར་འགྱུར། །བད་ཀན་ལས་གུར་ཡི་ག་འཆུས། །སློན་ལུད་ལུས་དང་ཡན་ལག་ལྕི། །མཆིལ་སྣབས་མང་ཞིང་ཆམ་པས་འདེབས། །དབུགས་མི་བདེ་སྐད་འགགས་དྲོད་ཉམས། །ནད་ཀྱི་མེ་དྲོད་ཉམ་ཆུང་པས། །འབྱར་བཅས་བད་ཀན་རྒྱས་གྱུར་ནས། །རྩ་སྦུབས་སྒོ་ནི་འགགས་པ་དང༌། །ལུས་ཟུངས་དྲོད་ནི་ཆུང་འགྱུར་བས། །དྲངས་མ་རང་གི་གནས་སུ་ནི། །མ་ཞུ་བླ་བརྣན་དེ་དང་དེ། །སྐྱེད་ཅིང་ཤ་སྩོགས་མི་འགྱུར་ལ། །ཁྲག་ནི་གྱེན་དུ་འབྱུང་བར་བྱེད། །ཁོང་པ་ཉིད་དུ་ཟས་འདུ་བས། །དྲངས་མར་འགྱུར་པར་མི་བྱེད་ཅིང༌། །ཕལ་ཆེར་དྲི་མ་ཉིད་འགྱུར་གྱི། །ལུས་ཟུངས་འཕེལ་བར་མི་བྱེད་དོ། །དྲངས་མ་ཁྲག་ཏུ་མི་འགྱུར་ན། །ཤར་འགྱུར་བ་ལྟ་སྨོས་ཅི་དགོས། །ཟད་བྱེད་ཅན་ནི་བཤང་འཕེལ་བ། །འབའ་ཞིག་གིས་ནི་གནས་པར་བྱེད། །མཚན་
མ་ཆུང་ཡང་ཉམ་ཆུང་ཞིང༌། །ནད་ཀྱིས་སྨན་གྱི་སྟོབས་མི་བཟོད། །སྤང་བྱ་དེ་ལས་གཞན་པ་ནི། །ཐམས་ཅད་ལྡན་ཡང་གསོ་བར་བྱ། །ནད་ནི་སྣ་རེ་འདུས་པ་དང༌། །ཟད་བྱེད་ཚིལ་ལས་གྱུར་པ་དྲུག །སྐད་འགགས་ཀྱི་ནི་དབྱེ་བ་ཡིན། །དེ་ལས་རླུང་གཡོ་ཉམ་ཆུང་རྩུབ། །གྲེ་བ་གྲ་མས་གང་སྙམ་བྱེད། །དེ་ལ་སྣུམ་དྲོ་འོ་མ་ཕན། །མཁྲིས་པ་ལས་གྱུར་རྐན་ལྐོག་ཚ། །སྐམ་ཞིང་སྨྲ་བར་མི་ནུས་འགྱུར། །བད་ཀན་མགུལ་བ་བྱུགས་སྙམ་བྱེད། །སྐད་ཀྱི་གསང་དམའ་ངར་ངར་འཛེར། །ཐོགས་བཅས་འགྱུར་རོ་ཐམས་ཅད་ཀྱི། །མཚན་མ་ཐམས་ཅད་ལྡན་པ་ཡིན། །ཟད་བྱེད་ལས་ནི་དྲུད་སྙམ་བྱེད། །དུ་བས་བདུགས་ལྟར་ཤིན་ཏུ་ན། །ཚིལ་གྱུར་བད་ཀན་བདག་གཉིད་ཅན། །ཚིག་གི་བརྡ་སྤྲོད་མི་ནུས་འགྱུར། །འདིར་ནི་འདུས་དང་ཐ་མར་སྤང༌། །ཡི་ག་འཆུས་པའི་ནང་རྣམས་ནི། །ལྕེ་སྙིང་གནས་པ་སོ་སོ་དང༌། །འདུས་པ་དང་ནི་ཡིད་ཀྱི་ནི། །གདུང་བ་ལས་གྱུར་ལྔ་པ་ཡིན། །ཁ་ནི་བསྐ་དང་ཁ་མངར་ཕྲོ། །རླུང་སྩོགས་གསུམ་དང་རིམ་བཞིན་སྦྱར། །ཀུན་ལས་གྱུར་པ་རོ་བྲོ་མེད། །མྱ་ངན་ཁྲོ་སྩོགས་ནད་ཇི་བཞིན། །སློན་བྲོ་ནད་གཞི་སྣ་རེ་ཀུན། །མི་སྡུག་ཡུལ་ལས་བྱུང་ལྔ་པ། །འདི་དག་སྟོང་དུ་རྒྱུ་བའི་རླུང༌། །འཁྲུགས་པས་ནད་ནི་ཐམས་ཅད་ཕུལ། །དེ་རྣམས་བསླངས་ན་ཁ་ཚ་བྲོ། །མཆིལ་མང་ཡི་ག་འཆུས་སྔོན་བྱུང༌། །རླུང་གྱུར་ལྟེ་བ་རྒྱབ་ཏུ་ཟུག །རྩིབ་ལོགས་ན་ཞིང་ཟས་སློན་ནས། །ཅུང་ཟད་འབྱུང་ཞིང་ཆད་པ་དང༌། །རོ་བསྐ་ལྦུ་བ་ཅན་དུ་སྐྱུགས། །སྒྲེགས་པའི་སྒྲ་བཅས་མདོག་གནག་ལ། །སླ་ཞིང་འབྱུང་དཀའ་སྒྲ་དང་བཅས། །ལུད་པ་ཁ་སྐམ་གླད་སྙིང་ན། །སྐད་འགགས་པ་དང་ཁོང་སྙོམ་བཅས། །མཁྲིས་གྱུར་ཐལ་ཆུ་འདྲ་བ་ལ། །དུང་ཁ་ལྗང་སྔོན་མདོག་སེར་སྐྱུག །ཁྲག་བཅས་རོ་སྐྱུར་ཚ་ཞིང་བྲོ། །སྐོམ་དད་བརྒྱལ་ཚ་བརྡུངས་བཅས་ཡིན། །བད་ཀན་ལས་བྱུང་སྣུམ་བསྐ་བསིལ། །ནལ་ནལ་བོར་འདུག་དྲ་བ་རིས། །རོ་མངར་ལན་ཚྭ་བྲོ་ཚབས་ཆེ། །ཆགས་ཤིང་བ་སྤུ་བརྩེ་བར་བྱེད། །གདོང་
སྐྲང་ཁ་ནང་མངར་བ་བྲོ། །སྙོམ་ཞིང་སྙིང་ན་ལུད་པ་ཅན། །གསུམ་ཆར་ལས་བྱུང་རྟགས་ཀུན་ལྡན། །འཆི་ལྟས་ལས་བཤད་གང་དེ་སྤང༌། །རུལ་དང་མི་གཙང་བ་ཙོག་པ་དང༌། །སྐྱུགས་བྲོ་མཐོང་དང་ཐོས་སྩོགས་ཀྱིས། །ཡིད་གདུང་སྙིང་ལ་ཕོག་གྱུར་སློན། །མི་སྡུག་ཡུལ་ལས་བྱུང་བ་ཡིན། །ཡིད་མི་བདེ་སྐོམ་སྲིན་བེའུ་སྣབས། །རླུང་སྩོགས་ཉིད་ལ་གནས་པར་བརྟག །གཟེར་དང་འཕར་དང་སྙིང་ན་བ། །བྱེ་བྲག་ཏུ་ནི་སྲིན་བུའི་ནད། །སྲིན་བུའི་སྙིང་ནད་མཚན་མ་ལས། །དེ་ནི་ཤེས་པར་བྱ་བ་ཡིན། །སྙིང་ནད་ནད་ནི་རེ་རེ་འདུས། །སྲིན་བུ་ལས་གྱུར་རྣམ་ལྔར་བཤད། །རླུང་གིས་ཤིན་ཏུ་ཟུག་ཅིང་ན། །གས་དང་བཤགས་པ་སྙམ་དུ་སེམས། །བཅོམ་སྙམ་སེམས་ཤིང་སྐམ་ལ་རེངས། །སྙིང་ག་སྟོང་སྙམ་ཟག་པར་བྱེད། །རྒྱུ་མེད་ཞུམ་ཞིང་མི་དགའ་ལ། །འཇིགས་ཤིང་དགྲ་ནི་མི་བཟོད་ཅིང༌། །འཕར་ཞིང་འགྲེ་ལ་གཅུས་སྙམ་བྱེད། །རྨོངས་བག་དབུགས་ཐུང་གཉིད་ཆུང་འགྱུར། །མཁྲིས་གྱུར་སྙོམ་དང་མགོ་འཁོར་བརྒྱལ། །ཚ་རྡུལ་སྙིང་ག་སྐྱུར་ལུས་སྙོམ། །མཁྲིས་པ་སྐྱུར་བ་སློན་པར་བྱེད། །དུད་པ་ཁར་སོང་སེར་རིམས་འདེབས། །བད་ཀན་ལས་བྱུང་སྙིང་ག་རེངས། །ཁོང་ན་རྡོ་བཅུག་ལྟ་བུར་ལྕི། །དྲོད་ཉམས་མཆིལ་མང་ལུད་པ་ལུ། །གཉིད་ཆེ་སྙོམ་རིམས་ཡི་ག་འཆུས། །ཉེས་གསུམ་མཚན་ཉིད་ཐམས་ཅད་ལྡན། །སྲིན་བུས་མིག་ནི་གནག་པ་དང༌། །མུན་པར་ཞུགས་སྙོམ་བྱེད་སྙིང་འཕར། །ལུས་སྐམ་གཡའ་ཞིང་བད་ཀན་འཛག །འདི་ནི་རྟག་ཏུ་སོག་ལེ་ཡིས། །སྙིང་ལ་འདྲུད་པ་ལྟ་བུར་སེམས། །མི་བཟད་ནད་དེས་མྱུར་གསོད་པས། །དེ་ནི་རིངས་པར་གསོ་བར་བྱ། །སྐོམ་དང་རླུང་མཁྲིས་བད་ཀན་དང༌། །འདུས་པ་དངས་མ་ཟད་པ་དང༌། །ནད་འདྲེས་པ་ལས་དྲུག་ཏུ་འགྱུར། །དེ་ལྟར་གྱུར་པ་ཐམས་ཅད་ལ། །རླུང་མཁྲིས་གཉིས་ནི་རྒྱུ་ཡིན་ཏེ། །དེ་འཁྲུགས་ལུས་ཟུངས་བསིལ་བ་ནི། །སྐམས་ནས་ལྡང་བར་འགྱུར་བ་ཡིན། །ལུས་ཀུན་འདར་ཞིང་མགོ་འཁོར་ཚ། །སྐོམ་དང་ཁོང་ཚ་རྨོངས་པར་བྱེད། །
ལྕེ་དྲུང་མགུལ་པ་གློ་བ་དང༌། །སྐོམ་དད་སྐོམ་འཐུངས་རྒྱུ་བའི་རྩ། །སྐོམ་པས་སྐོམ་དང་སྐྱེ་བར་འགྱུར། །དེ་རྣམས་ཀྱི་ནི་སྤྱིའི་མཚན་ཉིད། །ཁ་སྐམ་སྐོམ་གྱིས་མི་ངོམས་དང༌། ཟས་ལ་མི་དགའ་སྐད་འགགས་དང༌། གྲེ་བ་ལྕེ་མཆུ་རྩུབ་མོར་འགྱུར། །ལྕེ་འབྱིན་བྱེད་ཅིང་ཁོང་ལ། །བླ་ཞིང་སེམས་ནི་མྱོས་པ་དང༌། །དེ་བཞིན་སྐོམ་གདུང་ནད་དུ་འགྱུར། །ལུས་སྐམས་རྨྱ་ཞིང་འོན་བ་དང༌། །རྨོངས་བག་མགོ་འཁོར་སྙིང་ནད་དེ། །འདི་ལྟ་བུ་ཡི་ནད་རྣམས་ནི། །སྐོམ་པས་གདུངས་ལས་སྐྱེ་བར་འགྱུར། །རླུང་འགྱུར་ཁོང་རྨྱ་ཉམ་ཆུང་ལ། མུར་འགྲམ་ཟུག་ཅིང་ཀླད་པ་འཁོར། །སྣ་ལྕེས་དྲི་དང་རོ་མི་ཚོར། །འོན་ཞིང་གཉིད་མེད་ཉམ་སྟོབས་ཟད། །ཆུ་གྲང་འཐུངས་ན་སྐོམ་འཕེལ་འགྱུར། །མཁྲིས་པ་ཁ་ནང་རོ་ཁྱབ་རྒྱལ། །མངར་པོར་མཐོང་ཞིང་རྟག་པར་ནི། །ཁ་སྐམ་ཁོང་ཚ་དབུགས་མ་ནམ་པའོ། །བད་ཀན་ལྡང་བས་སྐོམ་རྒྱུའི་རྩ། །བཀག་པས་རླུང་ནི་འཁྲུགས་གྱུར་ནས། །དེ་ཚེ་དེ་ཡིས་བད་ཀན་ནི། །འདམ་བཞིན་དེ་ཡིས་སྐེམ་པར་བྱེད། །མགུལ་པ་གྲམས་གང་སྙམ་སེམས། །གཉིད་ཆེ་ཁ་ནང་མངར་བར་བྲོ། །ལྟོ་བ་མགོ་བོ་ཚོར་བ་ཆུང༌། །རྨོངས་བག་སློན་གྱུར་ཡིག་འཆུས། །ལུས་སྐམ་ཁ་ཟས་མི་འཇུའོ། །ཀུན་ལས་གྱུར་པ་རྟགས་ཀུན་ལྡན། །བེའུ་སྣབས་ལས་གྱུར་ཁ་ཟས་ནི། །མིད་དཀའ་རླུང་མཁྲིས་ལ་གྱུར་ཡིན། །ཚ་བས་ངལ་བས་འཕྲལ་དུ་ན། །ཆུ་གྲང་བསྟེན་གྱུར་སྐོམ་དང་ཆེ། །ཁོང་པར་ཚ་བ་བསྡུས་པ་ཡིས། །སྐོམ་དད་དེ་ནི་མཁྲིས་སྐྱེས་ཡིན། །གང་ཡང་ཆང་དྲགས་མེ་དྲོད་རྣོ། །སྣུམ་ཟོས་སྐྱེས་པའང་མཁྲིས་འབྱུང་ཡིན། །སྣུམ་ཞིང་སྐྱུར་དང་ལན་ཚྭའི་བག །ཟོས་པས་བད་ཀན་ལས་སྐྱེས་འགྱུར། །ཟད་བྱེད་ལས་ནི་སྐོམ་དད་འགྱུར། །དངས་མ་ཟད་དང་མཚན་ཉིད་འདྲ། །ཁོང་སྐམ་གཅིན་ནད་རིམས་ནང་སྩོགས། །ཡུན་རིངས་ནད་ནི་རིམས་སྐོམ་ནད། །གང་ཞིག་སྐོམ་དང་མི་བཟང་སྐྱེས། །དེ་ནི་འདྲེས་ལས་འབྱུང་བར་བཤད། །ཡན་ལག་བརྒྱད་པའི་སྙིང་པོ་བསྡུས་པ་ལས། །ནད་གཞིའི་གནས་ཀྱི་ལེའུ་ལྔ་པའོ། །དེ་ནས་ཆང་ནད་ཀྱི་ནད་གཞི་བཤད་པར་བྱའོ། །རྣོ་དང་དྲོད་ཆེ་རྩུབ་ཕྲ་སྐྱུར། །ཉལ་པོ་འདོད་མྱུར་བྱེད་དང་ཡང༌། །གསལ་དང་དང་བར་བྱེད་པར་བཤད། །མདངས་ནི་འདི་ལས་གོ་བཟློག་ཡིན། །དུག་ཀྱང་རྣོ་སྩོགས་ཡིན་མོད་ཀྱིས། །སེམས་ལ་གནོད་པར་བྱེད་པ་ཡིན། །ནུས་པས་འཆི་བར་བྱེད་པས་ན། །དུག་
ནི་ལྷག་པར་མཐུ་ཆེའོ། །ཆང་ནི་རྣོ་སྩོགས་ཡོན་ཏན་གྱི། །མདངས་ཀྱི་ཡོན་ཏན་རྟུལ་ལ་སྩོགས། །བཅུ་པོ་བཅུ་ཡིས་འཁྲུགས་བྱས་ནས། །སེམས་ནི་སྒྱུར་བར་བྱེད་པ་ཡིན། །ར་རོ་དང་པོ་གཉིས་པ་ཡིས། །བག་མེད་བ་ཡི་གནས་ལ་གནས། །རྣམ་རྟོག་ངན་བཅོམ་རྨོངས་པ་རྣམས། བདེ་བ་ཡིན་སྙམ་སེམས་པར་འགྱུར། །འབྲིང་དང་ཆེན་པོ་བར་གྱི་ཚེ། །རྡུལ་དང་མུན་པའི་རང་བཞིན་ཅན། །གླང་ཆེན་ལྕགས་ཀྱུ་མེད་པ་ལྟར། །རྨོངས་པས་མི་བྱ་ཅི་ཡང་མེད། །འདི་ནི་ཁ་ནམ་ཐོའི་གནས། །འདི་ནི་ཚུལ་ཁྲིམས་འཆལ་པའི་གཞི། །འདི་གཅིག་ངན་འགྲོར་འགྲོ་བའི་ལམ། །མང་པོ་སྟོན་པར་བྱེད་པ་ཡིན། །ར་རོ་གསུམ་པའི་ཚེ་ན་ནི། །སེམས་མེད་པར་ནི་རོ་ལྟར་ཉལ། །ཉེས་པའི་བདག་ཉིད་ཤི་བ་ལས། །ཤིན་ཏུ་མ་རུངས་གནས་སྐབས་འཐོབ། །ཆོས་དང་ཆོས་མིན་བདེ་དང་སྡུག །དོན་དང་དོན་མིན་ཕན་དང་གནོད། །གང་ལ་ཆགས་པ་མི་ཤེས་པ། །དེ་ལ་མཁས་པས་ཇི་ལྟར་བསྟེན། །ཆང་ལས་མྱོས་འཇིགས་མྱ་ངན་དང༌། ཁྲོ་དང་སྲོག་དང་བྲལ་བ་ནས། །སྨྱོ་བྱེད་མྱོས་དང་བརྒྱལ་བར་བཅས། །བརྗེད་བྱེད་བཅས་པ་ཀུན་སོང་ནད། །གང་དུ་དྲན་པ་ཉམས་གཅིག་ཡོད། །དེར་ནི་མི་དགེ་ཐམས་ཅད་འབྱུང༌། །མི་འཕྲོད་ཟས་ནི་ཟོས་པས་ཀྱང༌། །ནད་དམ་ཡང་ན་འཆི་བར་འགྱུར། །ཆད་ནི་སྡེ་ཚན་གསུམ་བློ་ལྡན། །ངོ་ཚ་སྩོགས་ཀྱང་འཇིག་པར་བྱེད། །ཉམས་སྟོབས་ལྡན་དང་ཟས་ཟོས་དང༌། །ཟས་ཆེར་ཟ་དང་སྣུམ་བག་ཟ། །སྙིང་སྟོབས་ལང་ཚོར་ལྗན་པ་དང༌། །རྟག་ཏུ་ཆང་འཐུངས་དེའི་རིགས་སྐྱེས་ཚིལ་དང་བད་ཀན་ཤས་ཆེ་ལ། །རླུང་དང་མཁྲིས་པ་ཤས་ཆུང་དང༌། །མེ་དྲོད་ཆེ་ཞིང་བརྟན་པ་རྣམས། །ཤས་ཆེར་ར་རོར་མི་འགྱུར་རོ། །དེ་ལས་བཟློག་པ་ཆང་དད་ཅན། །ཁྲོས་དང་ཆང་རྩུབ་སྐྱུར་ཤས་ཆ། །མ་ཞུར་བཅས་དང་མངའ་འཐུང་པ། །གང་ཡིན་ཤས་ཆེར་ར་རོར་འགྱུར། །རླུང་མཁྲིས་བད་ཀན་ཀུན་ལས་བྱུང༌། །ཆང་ནད་རྣམ་པར་བཞིན་འགྱུར་རོ། །ཀུན་ཀྱང་ཀུན་ལས་སྐྱེས་མོད་ཀྱི། །ཤས་ཆེ་བ་ལས་མིང་དུ་བཏགས། །དེ་རྣམས་ཀྱི་ནི་སྤྱི་མཚན་ཉིད། །རྨོངས་དང་སྙིང་ནི་ན་བ་དང༌། །འཁྲུ་ཞིང་རྟག་ཏུ་སྐོམ་དང་ཆེ། །ཚ་གྲང་རིམས་འདེབས་ཡི་ག་འཆུས། །
མགོ་བོ་རྩིབ་རུས་ན་དང་འདར། །གནད་འཇིག་ལྟག་པ་ན་བ་དང༌། །བླ་རེངས་རབ་རིབ་ཁྱེར་བ་དང༌། །ལུད་པ་དབུགས་མི་བདེ་གཉིད་མེད། །རྡུལ་ཆེར་འབྱུང་ཞིང་བཤད་བ་འགགས། །སྐང་ཞིང་སེམས་ནི་འཁྲུལ་པ་དང༌། བླ་ཞིང་སློན་པར་བྱེད་པ་དང༌། མགོ་འཁོར་རྨི་ལམ་ངན་མཐོང་བའོ། །རླུང་གྱུར་ཁྱད་པར་གཉིད་མི་འོང༌། །དབུགས་མི་བདེ་ཞིང་ཀླད་ན་འདར། །རྨི་ལམ་དུ་ནི་འཕྱན་ཞིང་འཕྲུ། །གཤིན་པོ་རྣམས་དང་གཏམ་སྨྲ་རྨི། །མཁྲིས་པས་ལུས་ཚ་སྐད་འགགས་དང༌། རྨོངས་བག་ཚད་འཁྲུས་སྐོམ་མགོ་འཁོར། ལུས་མདོག་ལྗང་དང་སེར་བ་དང༌། །མིག་དང་མཁུར་ཚོས་དམར་བར་འགྱུར། །བད་ཀན་གྱིས་སློན་སྙིང་ན་དང༌། གཉིད་ཆེ་གྲང་འདར་ཡན་ལག་ལྕི། །ཀུན་སྐྱེས་མཚན་ཉིད་ཀུན་དང་ལྡན། །ཆང་སྤངས་པ་ལས་འཕྲལ་དུ་ནི། །མང་དུ་འཐུངས་སམ་མ་གོམས་འཐུངས། །དེ་ལས་འཇོམས་དང་ལུས་སྐམ་ནད། །རླུང་ལས་སྡུག་བསྔལ་ལྡན་པ་འབྱུང༌། །ཉམ་ཆུང་བ་ལ་མཆོག་ཏུ་འབྱུང༌། །འཇོམས་པས་བད་ཀན་མཆིལ་མ་མང༌། །ཀློག་མ་སྐམས་ཤིང་གཉིད་རབ་ཆེ། །སྒྲ་དྲག་མི་བཟོད་གློང་བག་འགྱུར། །ལུད་སྐམ་ཡན་ལག་མགོ་རབ་ན། །སྙིང་ནད་མགུལ་ནད་རྨོངས་བག་དང༌། །ལུད་པ་སྐོམ་དང་སློན་རིམས་འདེབས། །གང་ཞིག་ཆང་རྣམས་སྤངས་པས་ནི། །དབང་པོ་ཐུལ་ཞིང་བརྟགས་ཏེ་བྱེད། །ནམ་ཡང་དེ་ལ་ལུས་སེམས་ཀྱི། །སྐྱོན་རྣམས་འབྱུང་བར་མི་འགྱུར་རོ། །རྡུལ་དང་མུན་པ་མི་འཕྲོད་ཟས། །མཆོག་ཏུ་བསྟེན་ལས་ནད་གསུམ་འབྱུང༌། །དྲངས་མ་ཁྲག་དང་སེམས་རྒྱུ་བའི། །རྩ་སྦུབས་བཀག་པ་ལས་བྱུང་བ། །མྱོས་དང་བརྒྱལ་དང་ཀུན་སོང་ནད། །ཕྱི་མ་བཞིན་དུ་སྟོབས་རབ་ཆེ། །འདིར་མྱོས་ནད་སྣ་རེ་རེ་ཀུན། །ཁྲག་ཆང་དུག་རྣམས་ལས་ཀྱང་འབྱུང༌། རླུང་ལས་གཏམ་ལ་ཆགས་པ་དང༌། །མང་སྨྲ་ཉུང་སྨྲ་སྤྱོད་པ་འཁྲུལ། །ལུས་ནི་རྩུབ་གནག་དམར་བ་ཡི། །མྱོས་པ་རླུང་ལས་སྐྱེས་པ་ཡིན། །མཁྲིས་པ་ལས་ཁྲོ་དམར་བ་དང༌། །སེར་པོར་སྣ་བཞིན་རྩོད་ལ་དགའ། །བད་ཀན་ཚིག་ཉུང་འབྲེལ་སྨྲ་སྐྱ། །སེམས་
ལས་ཆེ་ཞིང་ལེ་ལོ་ཆེ། །འདུས་པ་མཚན་ཉིད་ཀུན་དང་ལྡན། །ཁྲག་ལས་མིག་དང་ཡན་ལག་རེངས། །མཁྲིས་པའི་མཚན་ཉིད་ལྡན་པ་ཡིན། །ཆང་གིས་ཡན་ལག་སྐད་བསྐྱོད་འགྱུར། །དུག་གིས་འདར་ཞིང་གཉིད་རབ་ཆེ། །དེ་ནི་ཀུན་ལས་མྱོས་ཚབས་ཆེ། །ཁྲག་སྩོགས་པ་ཡིས་རླུང་སྩོགས་པའི། །མཚན་ཉིད་ལྷག་པར་ཤེས་པར་བྱ། །བརྒྱལ་བ་རླུང་གི་བདག་ཉིད་ཅན། །ནམ་མཁའ་དམར་སྔོ་གནག་པར་ནི། །མཐོང་ཞིང་མུན་པར་ཞུགས་སྙམ་སེམས། །མྱུར་དུ་སངས་པར་བྱེད་པ་དང༌། །སྙིང་ན་འདར་ཞིང་མགོ་འཁོར་ལ། །སྐེམ་ཞིང་བཞིན་མདོག་དམར་ནག་འགྱུར། །མཁྲིས་པས་དམར་བའམ་སེར་པོར་ནི། །ནམ་མཁའ་མཐོང་ཞིང་མུན་འཐིབས་བྱེད། །སངས་ནས་རྡུལ་དང་བཅས་པ་དང༌། །ཚ་སྐོམ་གདུངས་པས་ཉེན་པ་དང༌། འཁྲུ་ཞིང་ཁ་དོག་སེར་དང་དམར། །མིག་དམར་སེར་བར་སྣང་བར་འགྱུར། །བད་ཀན་གྱིས་ནི་སྤྲིན་ལྟ་བུར། །ནམ་མཁའ་མཐོང་ཞིང་མུན་འཐིབས་བྱེད། །རིངས་ནས་སངས་པར་འགྱུར་བ་དང༌། སྙིང་ན་བཅས་པས་མཆིལ་མ་མང༌། །པགས་པ་རློན་པས་གཡོགས་པ་བཞིན། །ཡན་ལག་ལྕི་ཞིང་ཚོར་བ་ཆུང༌། །ཉེས་པ་གསུམ་གྱི་མཚན་ཀུན་ལྡན། །བརྗེད་བྱེད་གཉིས་པ་ལྟ་བུ་སྟེ། །མྱུར་དུ་འགྱེལ་ཞིང་བརྒྱལ་འགྱུར་ལ། །འཇིགས་པ་རུང་སྤྱོད་པ་མེད་པ་ཡིན། །ལུས་ཅན་མྱོས་དང་བརྒྱལ་བ་ཡིས། །ནད་ལ་ཤུགས་ཡོད་གྱུར་ཀྱང་ནི། །རང་ཉིད་ཞི་བར་འགྱུར་བ་ཡིན། །ཀུན་ཞུགས་སྨན་མེད་པར་མི་ཞི། །ནད་ནི་ཤིན་ཏུ་སྟོབས་ཆེ་ལ། །འདུས་པ་ལས་གྱུར་ཀུན་ཞུགས་པ། །སྲོག་གི་གནས་ལ་བརྟེན་པ་ཡིས། །ལུས་དང་ངག་ཡིད་སྤྱོད་པ་འཕྲོག །དེ་ཡིས་སྐྱེས་བུ་རོ་དང་ནི། །ཤིང་དང་རྩིག་པ་འདྲ་བར་བྱེད། །རིངས་པར་གསོ་བར་མ་བྱས་ན། །མྱུར་དུ་འཆི་བར་བྱེད་པ་ཡིན། །མཚོ་ཟབ་ཆུ་སྲིན་མང་བོ་ཅན། །ཆུ་འཇིང་འཇུག་ངོགས་མེད་པར་ནི། །ཀུན་ཞུགས་པ་ནི་ནུབ་བྱེད་ལ། །མི་ནི་མྱུར་དུ་གདོན་པར་བྱ། །རིགས་པས་བརྟེན་དང་བྲལ་
བའི་ཆང་འཐུངས་པས། །མྱོས་དྲེགས་ཁྲོ་དང་བྲལ་བའི་རང་བཞིན་ཅན། །རང་གི་དགྲ་བོས་ཡོངས་སུ་འཁྱུད་འགྱུར་ཞིང༌། །རིགས་དང་མི་རིགས་མཉམ་པར་བྱེད་པར་འགྱུར། །སྟོབས་དང་དུས་དང་ཡུལ་དང་གོམས་པ་དང༌། །རང་བཞིན་གྲོགས་དང་ན་ཚོད་ནད་རྣམས་ནི། །ལེགས་བརྟགས་དེ་དང་རྗེས་མཐུན་གང་ཞིག་འཐུང༌། །དེ་ནི་བདུད་རྩི་འཐུངས་དང་མཚུངས་པ་ཡིན། །ཡན་ལག་བརྒྱད་པའི་སྙིང་པོ་བསྡུས་པ་ལས། །ནད་གཞིའི་གནས་ཀྱི་ལེའུ་དྲུག་པའོ།། །།དེ་ནས་གཞང་འབྲུམ་གྱི་ནད་གཞི་བཤད་པར་བྱའོ། །དགྲ་ལྟར་སྲོག་ཆགས་རྣམས་ཀྱི་ཚེ། །གཞང་འབྲུམ་འབྱུང་བས་གསོད་བྱེད་པས། །དེ་ཕྱིར་བཤང་བའི་ལམ་འགེགས་པས། །གཞང་འབྲུམ་ཞེས་ནི་བཤད་པ་ཡིན། །ནད་ཀྱིས་ལྤགས་ཚིལ་ཤ་རྣམས་ནི། །གནོད་བྱས་དབྱིབས་ནི་སྣ་ཚོགས་པའི། ཤ་ཡི་མྱུ་གུ་གཞང་སྩོགས་སུ། །སྐྱེས་དེ་གཞང་འབྲུམ་ཡིན་པར་བཤད། །ལྷན་ཅིག་སྐྱེས་དང་ཕྱིས་འབྱུང་དང༌། །སྐམ་དང་ཁྲག་ཏུ་འཛག་པ་ཡི། །དབྱེ་བས་མདོར་ན་རྣམ་གཉིས་ཡིན། །གཞང་ནི་རྒྱུ་མ་སྦོམ་པོར་བརྟེན། །སོར་ནི་ཕྱེད་དང་ལྔ་ཡོད་དོ། །གཉེར་གསུམ་སོར་ནི་ཕྱེད་དང་གཉིས། །རིམ་པ་དེ་ཡི་ནང་མ་ནི། །ཕྱིར་འཕུལ་བར་མ་སེལ་བ་ཡིན། །དེ་ཡི་ཕྱི་རོལ་འཛུམ་པ་ཡིན། །དེ་ཡི་ཕྱི་རོལ་སོར་གཅིག་ཁ། །ནས་ནི་ཕྱེད་དང་གཉིས་ཀྱི་ཚད། །དེ་ཕན་ཆད་ནི་སྤུ་སྐྱེ་འགྱུར། །དེ་ལ་ལྷན་ཅིག་སྐྱེས་པའི་རྒྱུ། །གཉེར་མའི་ས་བོན་གནོད་འགྱུར་ཉིད། །གཞང་འབྲུམ་ས་བོན་གནོད་པ་ཡང༌། །ཕ་མས་མི་འཕྲོད་ཟོས་པ་དང༌། །སྔོན་ལས་དེ་གཉིས་དང་འདུས་པ། །འཁྲུགས་པ་ལས་གྱུར་དེ་དག་ནི། །གསོར་མི་རུང་བ་ཉིད་དུ་བཤད། །རིགས་འབྱུང་ནད་ཀུན་དེ་དང་འདྲ། །ལྷན་ཅིག་སྐྱེས་པ་ཁྱད་པར་དུ། །རྩུབ་ཅིང་བརྟ་བར་དཀའ་བ་དང༌། །ནང་དུ་ཁ་བལྟས་དཀར་བ་དང༌། །བླ་བརྣན་མི་བཟོད་ཅན་གསོ་དཀའ། །ཅིག་ཤོས་དྲུག་སྟེ་ནད་ཐ་དད། །འདྲེས་དང་འདུས་པ་ཁྲག་ལས་འབྱུང༌། །རླུང་དང་བད་ཀན་གཉིས་ལས་
སྐམ། །ཁྲག་དང་མཁྲིས་པ་ལས་རླན་ཅན། །ནད་རྣམས་ལྡང་རྒྱུ་སྔར་བཤད་པ། །འཁྲུགས་པ་དེ་ཡིས་ཁོང་པ་ཡི། །མེ་དྲོད་ཉམས་ཤིང་བཤད་བ་འཕེལ། །གཞན་ཡང་ཉལ་བོ་རབ་དྲགས་དང༌། །གཞོན་པས་ཁོང་དཀྲུགས་སྟན་དག་ནི། །མ་སྙོམས་སྲ་དང་ཙོག་པུར་འདུག །འཇམ་རྩིའི་གཅེའུ་ས་དང་ནི། །རྡོ་དང་གོས་ཀྱིས་དྲུད་པ་དང༌། །ཤིན་ཏུ་གྲང་བའི་ཆུས་བཀྲུས་དང༌། །རྟག་ཏུ་འཁྲུ་བར་བྱེད་པ་དང༌། །བཤང་དང་གཅི་དང་འཕེན་གྱི་ཤུགས། །བཀག་དང་ནན་གྱིས་བཙིར་བ་དང༌། །རིམས་དང་སྐྲན་དང་ཚད་པར་འཁྲུ། །འོར་ནད་སྐྱ་རྦབ་བེ་སྣབས་ཀྱིས། །སྐེམས་བྱས་གནོད་པར་འགྱུར་བ་ཡི། །སྤྱོད་པ་བསྟེན་ལས་འབྱུང་བར་འགྱུར། །བུད་མེད་ཟླ་གྲངས་མ་ཚང་འཕྱི་ལ། །ཟླ་བ་རྫོགས་པས་གཟིར་ལས་འབྱུང༌། །དེ་འདྲ་དག་དང་གཞན་ཡང་རླུང༌། །ཐུར་སེལ་འཁྲུགས་པས་དྲི་མ་ནི། །གཞང་གི་གཉེར་མར་དེ་གཞག་པས། །དེ་ནི་མི་མངོན་གྱུར་པས་གནས། །གཞང་འབྲུམ་འབྱུང་བར་འགྱུར་བ་ཡིན། །དེ་ཡི་སྔོན་ཚུལ་མེ་དྲོད་ཉམས། །བརླ་ནི་རེངས་ཤིང་ན་བ་དང༌། །བྱིན་པའི་ཉྭ་ན་མགོ་འཁོར་ཞིང༌། །ཡན་ལག་ན་ཞིང་མིག་གཉིས་སྐྲང༌། བཤང་བ་འཁྲུ་བའམ་ཡང་ནི་སྲི། །རླུང་ཆེན་ནང་ནས་འཁྱིལ་བ་དང༌། །ཕལ་ཆེར་ལྟེ་བའི་འོག་ནས་རྒྱུ། །ནད་བཅས་བཅད་པ་ལྟ་བུར་སེམས། །དཀའ་བར་འབྱུང་ཞིང་སྒྲ་ཅན་འབྱུང༌། །རྒྱུ་མ་ཀྲུལ་ཀྲུལ་ཟེར་ཞིང་སྤོས། །སྐེམ་ཞིང་སྒྲེགས་པ་མང་དུ་འབྱུང༌། །གཅིན་མང་བཤང་ཉུང་ཡི་ག་འཆུས། །སྒྲེགས་པ་དུད་འདྲར་སྒྱུར་བ་འབྱུང༌། །མགོ་དང་བྲང་དང་རྒྱབ་ཏུ་གཟེར། །སྙོམ་ཞིང་ཁ་དོག་ཉམས་པ་དང༌། །གློང་བག་དབང་པོ་ཉམ་ཆུང་ལ། །ཁྲོ་ཞིང་བསྙེན་བཀུར་དཀའ་བ་དང༌། །མ་ཞུ་སྐེམ་ནད་སྐྱ་རྦབ་དང༌། །དམུ་རྫིང་རྣམས་ལ་སོམ་ཉི་སྐྱེས། །གཞང་འབྲུམ་སྐྱེ་བར་གྱུར་བ་ལ། །འདི་དག་ཉིད་ནི་འཕེལ་བར་འགྱུར། །དེ་ཡིས་འོག་གི་ལམ་བཀག་པས། །ཐུར་དུ་སེལ་བའི་རླང་ལོག་སྟེ། །ལུས་དང་དབང་པོ་ཀུན་གནས་པའི། །རླུང་གཞན་
ཐམས་ཅད་འཁྲུག་པར་བྱེད། །དེ་བཞིན་བཤང་གཅི་མཁྲིས་པ་དང༌། །བད་ཀན་ལུས་ཟུངས་རྟེན་བཅས་པ། འཁྲུགས་ཤིང་མེ་དྲོད་ཉམས་པར་བྱེད། །དེ་ནས་གཞང་འབྲུམ་ནད་ཅན་ལ། །ཕལ་ཆེར་ཐམས་ཅད་ཉེ་ར་འབྱུང་བ། །སྐེམ་ཞིང་མཆོག་ཏུ་བསྐྱོད་མི་ནུས། །སྟོབས་ཟད་ཁོང་རྨྱ་བཞིན་མདངས་ཉམས། །ལུས་ལྷོད་སྙིང་པོ་མེད་འགྱུར་ཞིང༌། །འབུས་ཟོས་པ་ཡི་ཤིང་འདྲ་ལ། །བླ་བརྣན་མ་ལུས་དག་གིས་འདེབས། །ཇི་སྐད་བཤད་པའི་གནད་གཟིར་ཞིང༌། །ལུད་པ་སྐམ་དང་སྐད་འགགས་དང༌། །ཁ་རོ་མི་ཚོར་ཆམ་འདེབས་སྦོ། །སྒྱིད་སྒྱུར་རྐ་ལག་ན་ཞིང་སློན། །སྦྲིད་པ་སྐྲང་དང་རིམས་ནད་དང༌། །ཁུ་བཟད་ཅིང་རབ་རིབ་སློན། །རྡེའུ་ཆགས་ནད་ཀྱིས་གཟིར་བ་དང༌། །སྐད་འགགས་ཞུམ་ལ་སེམས་ཁོང་ཆུད། །མཆིལ་མ་མང་འདོར་ཡི་ག་འཆུས། །རུས་ཚིགས་ཀུན་དང་སྙིང་ལྟེ་བ། །གཞང་དང་སྣ་རྩ་གཟིར་དང་བཅས། །གཞང་ནད་འབྲུ་ནི་མ་སྨིན་བཅོས། །ཁུ་བ་ལྟ་བུའི་སྦྱིན་བག་འཛག །རྟུག་སྐམ་སྦྱིན་པའམ་སླ་བར་འགྱུར། །སྨིན་དང་མ་སྨིན་པར་བར་འཁྲུ། །སྐྱ་ཞིང་སེར་དང༌། སྔོན་པོ་ཡི། །ཁྲག་ནི་སྦྱིན་བག་འཁྲུ་བར་འགྱུར། །གཞང་འབྲུམ་རླུང་ཤས་ཆེ་ལས་གྱུར། །སྐམ་ཞིང་ཙེག་ཙེག་ཚ་བ་དང༌། །རྙིད་ཅིང་དམར་ནག་རེངས་པ་དང༌། །མི་སྙོམས་རྩུབ་ཅིང་སྲ་བ་དང༌། །ཕན་ཚུན་མི་འདྲ་ཡོ་བ་དང༌། །རྩེ་མོ་རྣོ་ཞིང་གས་པ་དང༌། བིམ་པ་རྒྱ་ཤུག་ཁ་རྫུ་ར། །རས་བལ་ས་བོན་དང་འདྲ་ཞིང༌། །ལ་ལ་ཀ་ཏམ་མེ་ཏོག་འདྲ། །ལ་ལ་ཡུངས་ཀར་ལྟ་བུར་སྐྱེས། །མགོ་དང་ཕྲག་པ་རྩིབ་ལོགས་བརླ། །ཆུ་སོ་དག་ཏུ་ལྷག་པར་ན། །སྦྲིད་པ་སྒྲེགས་པ་བཤང་བ་སྲི། །སྙིང་འཕར་ཡི་ག་འཆུས་པ་སྐྱེད། ལུད་དབུགས་མི་བདེ་མེ་དྲོད་ཉམས། །རྣ་བ་སྒྲ་བཅས་མགོ་འཁོར་བྱེད། །དེས་ཉེས་རྟུག་སྐམ་ཉུང་དུ་ནི། །སྒྲ་བཅས་སྐ་སླ་འདྲེན་མ་དང༌། །ན་ཞིང་ལྦུ་བ་འབྱར་བག་ཅན། །རྟུག་སྐམ་ཚུལ་གྱིས་འབྱུང་བར་འགྱུར། །པགས་པ་སེན་མོ་བཤང་གཅི་དང༌། །མིག་དང་
གདོང་ནི་གནག་པར་འགྱུར། །སྐྲན་དང་མཆེར་པ་དམུ་རྫིང་དང༌། །གཏུན་འདྲ་དེ་ཉིད་ལས་འབྱུང་འགྱུར། །མཁྲིས་ཤས་ཆེ་ལས་རྩེ་མོ་ནི། །སྔོ་ཞིང་དམར་སེར་དཀར་བར་སྣང༌། །ཕྲ་ཞིང་དྲི་མ་ནམ་ཁྲག་སླ་འཛག །སྲ་བ་ཅིང་འཇམ་ལ་ལྷོད་པ་ཡིན། །མཆེར་པའི་དུམ་བུ་ནེ་ཙོའི་ལྕེ། །སྲིན་བུ་པད་པའི་མཆུ་འདྲར་སྣང༌། །ཚ་ཞིང་གནག་ལ་རིམས་དང་རྡུལ། །སྐོམ་དད་ཡི་ག་འཆུས་རྨོངས་སྐྱེད། །བཤང་དྲོ་སླ་ཞིང་སྔོ་ལ་ཚ། །སེར་ཞིང་དམར་བར་འཁྲུ་བར་འགྱུར། །ནས་རུལ་ནང་འདྲ་པགས་པ་དང༌། །སེན་སྩོགས་སྔོ་སེར་ལྗང་བར་འགྱུར། །བད་ཀན་ཤས་ཆེ་རྩ་བ་སྦོམ། །མཐུག་ཅིང་ནད་ཀྱི་ཤུགས་དལ་དཀར། །སྐྲང་ཞིང་རྒྱས་ལ་སྣུམ་པ་དང༌། །འགྲེང་ཞིང་སྣུམ་ལ་ལྕི་ཞིང་བརྟན། །འབྱར་བག་ཚོར་བ་ཆུང་ཞིང་འཇམ། །གཡའ་ཞིང་རེག་ན་དགའ་བར་བྱེད། །ཀ་རི་ར་བ་ན་ས་ཡི། །རུས་པ་བ་ཡི་ནུ་སོར་འདྲ། །ཆུ་སོར་ཟུག་ཅིང་སྦོ་གཞང་ན། །ལྟེ་བ་ལྒང་པ་བཅད་སྙམ་སེམས། །ལུད་པ་དབུགས་མི་བདེ་སྙིང་ན། །མཆིལ་མང་ཆམ་འདེབས་ཡི་ག་འཆུས། །གཅིན་སྲི་མགོ་བོ་ཚོར་བ་མེད། །གྲང་བའི་རིམས་ནི་སྐྱེད་པར་བྱེད། །ཁ་ཆུ་འཛག་ཅིང་མེ་དྲོད་ཉམས། །སློན་ཞིང་མ་ཞུའི་ནད་ཀུན་སྐྱེད། །བཤང་བ་ཚིལ་འདྲ་བད་ཀན་མང༌། །འཁྲུ་དང་བཅས་པར་འབྱུང་བར་འགྱུར། །འཛག་པར་མི་བྱེད་རྡོལ་མི་བྱེད། །པགས་པ་ལ་སོགས་སྣུམ་ཞིང་དཀར། །འདྲེས་ལས་མཚན་ཉིད་འདྲེས་པ་ཡིན། །འདུས་པ་མཚན་ཉིད་ཀུན་དང་ལྡན། །ཁྲག་ཤས་ཆེ་ལས་གཞང་འབྲུམ་ནི། །མཁྲིས་པའི་མཚན་ཉིད་འདྲ་བ་ལ། །ནྱ་གྲོ་དྷ་ཡི་མྱུར་གུ་འདྲ། །བྱི་རུ་འོལ་མ་སེ་མདོག་འདྲ། །ཤིན་ཏུ་ཚ་བྲོ་ན་བ་དང༌། །བཤང་བ་ཤུགས་ཀྱིས་རབ་བཙིར་ལས། །འཕྲལ་དུ་ཁྲག་ནི་འབྱུང་བ་དང༌། དེ་ཉིད་ཤིན་ཏུ་འཛག་པར་འགྱུར། །སྦ་ལ་པ་འདྲ་ཞིང་ཁྲག་ཟད་ལས། །བྱུང་བའི་སྡུག་བསྔལ་གྱིས་ཉེན་འགྱུར། །མདོག་སྟོབས་སྤྲོ་བ་ཉམས་པ་དང༌། །མདངས་འཕྲོག་དབང་པོ་ཞ་ན་པར་འགྱུར། །མུངྒ་ཀོ་དྲ་བའི་ཕྱེ་མ། །ཙ་ན་ཀ་རི་ར་སྩོགས་པ། །རྩུབ་དང་བཤང་བ་སྲི་བས་རླུང༌། །རང་གནས་འཁྲུགས་པ་སྟོབས་
ལྡན་པས། །ཐུར་དུ་རྒྱུ་བའི་བུ་ག་ནི། །བཀག་སྟེ་སྨད་དུ་རབ་སྐམས་ནས། །བཤང་བ་གཅི་བ་འཕྱེན་རྣམས་ནི། །འགགས་པས་ནད་ནི་མི་བཟད་སྐྱེད། །དེ་ཡིས་ཁོང་པ་རྒྱབ་རྩིབ་ལོགས། །སྙིང་གར་ནད་ནི་ཤིན་ཏུ་སྐྱེད། །ལྟོ་སྤོས་གསུས་པ་ན་བ་དང༌། །སྙིང་གཅུས་རྒྱུ་མ་བཅད་སྙམ་སེམས། །ཆུ་སོར་ཤིན་ཏུ་ཟུག་པ་དང༌། །མཁུར་བར་སྐྲང་པ་འབྱུང་བར་འགྱུར། །རླུང་ནི་གྱེན་དུ་སོང་གྱུར་ན། །དེ་ལས་སློན་རིམས་ཡི་ག་འཆུས། །སྙིང་ནད་བེའུ་སྣབས་མ་ཞུ་དང༌། །གཅིན་སྲི་བཤང་བ་འཁྲུ་བ་དང༌། །འོན་དང་རབ་རིབ་དབུགས་མི་བདེ་མགོ་ན་ལུད་པ་ཆམ་པས་འདེབས། །ཡིད་ཀྱིས་འགྱུར་བ་སྐོམ་དང་ཁྲག །མཁྲིས་པ་སྐྲན་དང་དམུ་རྫིང་སྩོགས། །རླུང་གི་ནད་གཏོགས་དེ་དང་དེ། །ཤིན་ཏུ་མི་བཟད་འབྱུང་བར་འགྱུར། །གཞང་འབྲུམ་གྱེན་དུ་འཁྱིལ་འགྱུར་བ། །འདི་ནི་མཆོག་ཏུ་གནོད་བྱེད་ཡིན། །རླུང་ཤས་ཆེ་བ་ཁོང་བར་ནི། །དེ་མེད་པར་ཡང་འབྱུང་བར་འགྱུར། །ལྷན་ཅིག་སྐྱེས་དང་ནད་གསུམ་ལྡན། །ཕུགས་མའི་གཉེར་མར་གང་གནས་པ་།དེ་དག་གསོར་མི་རུང་བ་ཡིན། །མེ་དྲོད་སྟོབས་ཆེ་སྩོགས་ཀྱིས་འཚོ། །འདྲེས་ལས་གྱུར་དང་གཉེར་མ་ནི། །བར་མར་གནས་པ་གང་ཡིན་པ། །ལོ་གཅིག་ཡན་ཆད་ལོན་གྱུར་པ། །དེ་དག་གསོ་དཀའ་ཡིན་པར་བཤད། །ཕྱི་རོལ་གཉེར་མར་བྱུང་བ་དང༌། །ནད་གཅིག་ཤས་ཆེ་ལས་འབྱུང་བ་དང༌། །སྐྱེས་ནས་རིང་པོ་མ་ལོན་གང༌། །གཞང་འབྲུམ་དེ་ནི་གསོ་བ་སླ། །ཕོ་མཚན་སྩོགས་ཀྱི་འོག་ནས་ནི། །རང་རང་སྐབས་བཤད་ལྟེ་བར་སྐྱེས། །རྟ་བླ་བ་ཡི་ཁ་འདྲ་ཞིང༌། །འབྱུང་བག་ཅན་ལ་འཇམ་པ་ཡིན། །ཁྱབ་བྱེད་ཀྱིས་ནི་བད་ཀན་བསྡུས། །པགས་པའི་ཕྱི་རོལ་ཐོར་བུར་བྱེད། །མཛེར་པ་འདྲ་ཞིང་རྩུབ་པར་གནས། །པགས་པའི་མཛེར་པ་ཡིན་པར་ཤེས། །རླུང་གིས་ཟུག་ཅིང་རྩུབ་པར་འགྱུར་མཁྲིས་པས་གནག་ལ་དམར་རྩར་འགྱུར། །བད་ཀན་གྱིས་དེ་སྣུམ་ཉིད་དང༌། །རྨེན་བུའི་མདོག་དང་འདྲ་བར་འགྱུར། །བློ་དང་ལྡན་པས་མྱུར་བར་ནི། །འབད་དེ་གཞང་འབྲུམ་གསོ་བར་བྱེད། །དེ་ཡིས་གཞང་ནི་མྱུར་འགགས་ནས། །དམུ་རྫིང་ནད་ནི་སྐྱེ་བར་འགྱུར། །ཡན་ལག་བརྒྱད་
པའི་སྙིང་པོ་བསྡུས་པ་ལས། །ནད་གཞིའི་གནས་ཀྱི་ལེའུ་བདུན་པའོ།། །།དེ་ནས་ཚད་པས་འཁྲུ་བ་དང་ཕོ་བའི་ནད་གཞི་བཤད་པར་བྱའོ། །ནད་གཞི་སྣ་རེ་ཀུན་དང་ནི། །འཇིགས་དང་མྱ་ངན་ལས་འགྱུར་བའི། །ཚད་པས་འཁྲུ་བ་རྣམ་དྲུག་ཡིན། །དེ་ནི་ཆུ་འཐུངས་དྲགས་པ་དང་ཤ་རིང་ཤ་སྐམ་མ་གོམས་པའི། །ཏིལ་གྱི་ཁུ་བ་མ་སྨིན་འབྲུ། །ཆང་རྩུབ་ཁ་ཟས་ཚོད་མ་ཟིན། །གཞང་འབྲུམ་སྣུམ་བག་དྲགས་པ་དང༌། །འབུ་དང་ཤུགས་ནི་བཀག་ལས་འབྱུང༌། །དེ་འདྲས་རླུང་ནི་འཁྲུགས་པ་ཡིས། །ཆུ་ཁམས་ཐུར་དུ་བསྐྱོད་གྱུར་ལ། །དེ་ཉིད་ཀྱིས་ནི་མེ་དྲོད་ཉམས། །དེ་འོག་ཁོང་པ་ཁྱབ་ནས་ནི། །བཤང་བ་སླ་བ་ཉིད་དུ་བྱེད། །དེ་ལྟར་ཚད་འཁྲུ་འབྱུང་བར་བཤད། །དེ་ཡི་འབྱུང་འགྱུར་མཚན་མ་ནི། །བཤང་ལམ་སྙིང་ག་ལྟོ་བར་ཟུག །ལུས་སྙོམ་བཤང་བ་སྲི་བ་དང༌། །སྦོ་ཞིང་ཁ་ཟས་མི་འཇུ་བའོ། །དེ་ལས་རླུང་གྱུར་བཤང་ཆུར་བཅས། །ཉུང་ཞིག་འབྱུང་ཞིང་གཟེར་སྒྲ་བཅས། །འགག་ཅིང་འབྱུང་བར་འགྱུར་བ་དང༌། །རྩུབ་སླ་དབུ་བར་བཅས་པ་འམ། །གོང་བུ་ཡང་དང་ཡང་དུ་འབྱུང༌། །དེ་བཞིན་བུ་རམ་ཚིག་པ་འདྲ། །སྦྱིན་བག་བཅས་ཤིང་བཅད་སྙམ་སེམས། །ཁ་སྐམ་གཞང་ནི་སྣད་པ་དང༌། །སྤུ་ལངས་པ་དང་འཁྲུ་བ་ཡིན། །མཁྲིས་པས་སེར་ཞིང་གནག་པ་དང༌། །སྔོ་ཞིང་དུ་བའི་མདོག་འདྲ་ལ། །ཁྲག་ཅས་ཤིན་ཏུ་དྲི་མནམ་པ། །སྐོམ་དད་བརྒྱལ་ཚ་རྡུལ་དང་བཅས། །གཟེར་བཅས་གཞང་ཁ་ཚ་དང་བཅས། །གཞང་ཁར་ཐོར་བུ་འབྱུང་བ་ཡིན། །བད་ཀན་ལས་གྱུར་སྐ་བ་དང༌། །འབྱར་བག་དཀར་ཞིང་ནལ་ནལ་པོ། །སྣུམ་ཞིང་བེའུ་སྣབས་བད་ཀན་བཅས། །རྒྱུན་དུ་འཁྲུ་ཞིང་ལྕི་ལ་མནམ། །སྐ་ཞིང་ནད་རྗེས་འབྲང་བ་དང༌། །གཉིད་ཆེ་ཁོང་སྙོམ་ཡི་ག་འཆུས། །ཉུང་ཟད་ཉུང་ཟད་འཁྲུ་དང་བཅས། །བ་སྤུ་བརྩེ་ཞིང་གློང་བཅས་དང༌། །ཆུ་སོ་ལྟོ་བ་གཞང་ཁ་ལྕི། །བཤང་ཡང་བཤང་བ་མ་བཏང་བསྙམ། །ཀུན་སྐྱེས་མཚན་ཉིད་ཀུན་དང་ལྡན། །འཇིགས་པས་སེམས་ནི་འཁྲུགས་གྱུར་པ། །རླུང་གིས་མཁྲིས་བཅས་བཤང་བ་ནི། །སླ་བྱེད་དེ་ནས་འཁྲུ་བ་ནི། །ཚ་ཞིང་སླ་ལ་འཕྱོ་བ་དང༌། །མཚན་མ་རླུང་མཁྲིས་
ལས་བྱུང་འདྲ། །མྱ་ངན་ལས་བྱུང་དེ་དང་འདྲ། །མདོར་ན་ཚད་འཁྲུ་རྣམ་གཉིས་ཏེ། །མ་ཞུར་བཅས་དང་མ་ཞུ་མེད། །ཁྲག་བཅས་ཁྲག་མེད་དེ་ལས་ནི། །དང་པོ་བཤང་གཅི་ཆུར་འབྱིང་འགྱུར། །དྲི་མནམ་ལྟོ་ནི་སྦོ་བ་དང༌། །མཁྲེགས་ཤིང་མཆིལ་སྣབས་ཤིན་ཏུ་མང༌། །སྨིན་པ་དེ་ལས་བཟློག་པ་ཡིན། །བད་ཀན་སྨིན་པའང་ཆུ་ནང་འབྱིང༌། །གང་ཞིག་ཚད་འཁྲུ་འབད་པ་ནི། །མེད་དེས་ཕོ་བའི་ནད་དུ་འགྱུར། །མེ་དྲོད་ཉམས་པར་བྱེད་པ་ཡི། །ཟས་ཟོས་ནས་ནི་བདེ་བར་འགྱུར། །གང་ཞིག་ཞུ་ནས་བཤང་བ་ནི། །བེའུ་སྣབས་བཅས་དང་བེའུ་སྣབས་མེད། །འཁྲུ་བ་དེ་ནི་ཚད་འཁྲུ་སྟེ། །རང་བཞིན་གྱིས་ནི་མྱུར་གསོད་བྱེད། །མ་ཞུ་ཁ་ཟས་མ་ཞུ་དང༌། །ཞུ་བ་སྨིན་པའང་མི་འཁྲུ་འགྱུར། །རྒྱུ་མེད་ཡང་དང་ཡང་སྲི་བ་འམ། །རྒྱུ་མེད་ཡང་ཡང་སླ་བར་འབྱུང༌། །ཕོ་བར་མ་ཞུ་སྩོགས་ཤིང་འཁྲུ། །ཡུན་རིང་ན་བར་བྱེད་པ་ཡིན། །དེ་ནི་ནད་སྣ་རེ་རེ་འདུས། །ལས་བྱུང་རྣམ་པ་བཞི་ཡིན་ནོ། །དེ་ཡི་སྔོན་ཚུལ་སྙོམ་པ་དང༌། །རིང་ནས་འཇུ་ཞིང་སྐྱུར་བག་འབྱུང༌། །མཆིལ་མང་ཁ་ཡིས་རོ་མི་ཚོར། །རྨྱ་སྙོམ་སྐོམ་ཞིང་ཡི་ག་འཆུས། །ལྟོ་སྦོ་སློན་ནི་བྲོ་བ་དང༌། །རྣ་བ་རྒྱུ་མ་སྒྲ་དང་བཅས། །སྤྱི་ཡི་མཚན་ཉིད་སྐེ་མ་པ་དང༌། །དུ་བ་མུན་དང་རིམས་ཀྱིས་འདེབས། །བརྒྱལ་ཞིང་མགོ་ན་བཤང་བ་འགགས། །རྐང་བ་ལག་པ་སྐྲངས་པར་འགྱུར། །དེ་ལ་རླུང་ལ་རྐན་བསྐམས་ཞིང༌། །རབ་རིབ་རྣ་བར་སྒྲ་འབྱུང་དང༌། །རྩིབ་ལོགས་བརླ་དང་ཆུ་སོར་ན། །བཤང་བ་ཡང་དང་ཡང་དུ་འབྱུང༌། །ཡང་ཡང་སྦོ་ཞིང་གསུད་པ་དང༌། །རོ་རྣམས་ཀུན་ལ་བརྐམ་པ་དང༌། །བཀྲེས་སྐོམ་རྒྱུ་མ་བཅད་སྙམ་སེམས། །ཟས་ཞུ་ནས་ནི་སྦོ་བ་དང༌། །ཟས་ཟོས་ནས་ནི་བདེ་བར་འགྱུར། །རླུང་གི་སྙིང་ནད་སྐྲན་གཞང་འབྲུམ། །མཆེར་བ་སྐྱ་རྦབ་འབྱུང་བར་དོགས། །བཤང་བ་འབྱུང་དཀའ་སྐ་སླར་འབྱུང༌། །དེ་ཡང་བེ་སྣབས་སྒྲ་ཅན་འབྱུང༌། །གཞང་ན་ལུད་པ་དབུགས་མི་བདེ། །མཁྲིས་པ་སྔོ་ཞིང་སེར་པ་དང༌། །སེར་པོ་སླ་བག་འཁྲུ་བར་འགྱུར། །མནམ་ཞིང་སྒྲེགས་སྒྱུར་སྙིང་ལྐོག་ཚ། །
ཡི་ག་འཆུས་ཤིང་སྐོམ་དད་ཆེ། །བད་ཀན་ལས་གྱུར་འཇུ་དཀའ་ཞིང༌། །ཟས་སློན་ཡིག་འཆུས་པ་དང༌། །ཁར་ཆགས་མཆིལ་མ་མང་བ་དང༌། །ལུད་པ་སྙིང་ནད་ཆམ་པས་འདེབས། །སྙིང་ག་མེར་མེར་པོར་སེམས་ཤིང༌། །ལྟོ་བ་ཚོར་བ་ཆུང་ཞིང་ལྕི། །སྒྲེགས་པ་དྲི་མནམ་མངར་འབྱུང་སྙོམ། །བུད་མེད་མི་དགའ་མེ་དྲོད་ཆུང༌། །བེའུ་སྣབས་བད་ཀན་འདྲེས་པར་འཁྲུ། །བཤང་བ་ལྕི་བར་འབྱུང་བར་འགྱུར། །རིད་པ་མིན་ཡང་ཉམས་སྟོབས་ཆུང༌། །ཀུན་སྐྱེས་མཚན་ཉིད་འདྲེན་མར་ལྡན། །མ་སྙོམས་ལ་སོགས་མེ་དྲོད་གསུམ། །ཡན་ལག་ཆར་ཕྱེ་གང་བཤད་པ། །དེ་ཡང་ཕོ་བའི་ནད་དུ་འགྱུར། །སྙོམས་པ་བདེ་གནས་རྒྱུ་ཡིན་ནོ། །རླུང་ནད་རྡེའུ་ནད་མཛེ་ནད་དང༌། །གཅིན་སྙི་དམུ་རྫིང་མཚན་བར་རྡོལ། །གཞང་འབྲུམ་ཕོ་ནད་ཅེས་བྱ་བརྒྱད། །ནད་ཆེན་གསོ་བར་དཀའ་བ་ཡིན། །ཡན་ལག་བརྒྱད་བའི་སྙིང་པོ་བསྡུས་པ་ལས། །ནད་གཞིའི་གནས་ཀྱི་ལེའུ་བརྒྱད་པའོ།། །།དེ་ནས་གཅིན་འགགས་པའི་ནད་གཞི་བཤད་པར་བྱའོ། །ལྒང་པ་ལྒང་པའི་མགོ་ཕོ་མཚན། །རྐེད་པ་རླིག་པ་གཞང་ཁ་ནི། །གཞང་ཁའི་རུས་པར་བརྟེན་གྱུར་ཞིང༌། །གཅིག་ཏུ་འབྲེལ་བ་ཡིན་པར་བཤད། །ལྒང་བ་ཁ་ནི་ཐུར་བལྟས་ཀྱང༌། །གཅིན་འཛག་པ་ཡི་རྩ་སྒོ་ནས། །རྒྱུན་མི་འཆད་པར་འཛག་པ་ཡིས། །ངོས་གཉིས་ནས་ནི་ཕྲེའུས་འགེངས། །ཞུགས་པ་གང་ཡིན་དེ་ཡིས་ནི། །གཅིན་འགགས་པ་དང་གཅིན་སྙི་བའི། །གསོ་དཀའ་གནད་ལ་བརྟེན་པའི་ནད། །ཉི་ཤུ་སྐྱེད་པར་བྱེད་པ་ཡིན། །ལྒང་པ་ཆུ་སོ་ཕོ་མཚན་ན། །ཅུང་ཟད་ཡང་དང་ཡང་དུ་འབྱུང༌། །སྲི་བ་རླུང་ལས་གྱུར་བ་ཡིན། །མཁྲིས་པ་ལས་གྱུར་སེར་ཚ་ན། །མདོག་དམར་བད་ཀན་ལས་གྱུར་པ། །ལྒང་བ་ཕོ་མཚན་ལྕི་ཞིང་སྐྲངས། །འབྱར་བག་ངལ་གྱིས་འབྱུང་ཞིང་ཐོགས། །ནད་ཀུན་ལས་བྱུང་མཚན་ཀུན་ལྡན། །གང་ཚེ་རླུང་གིས་ལྒང་པའི་ཁ། །བཀག་པ་དེ་ཚེ་གཅིན་མཁྲིས་པ། །བད་ཀན་ཁུ་ཆུར་བཅས་པ་ནི། །རིམ་གྱིས་བསྐམས་པར་བྱས་པ་ལས། །མི་བཟད་རྡེའུ་ཆགས་འགྱུར་ཏེ། །བ་ལང་མཁྲིས་པར་གི་
ཝང་ལྟར། །ཐམས་ཅད་བད་ཀན་ལ་བརྟེན་འགྱུར། །འདི་ཡི་སྔོན་ཚུལ་མཚན་ཉིད་ནི། །ལྒང་པ་སྦོ་ཞིང་དེ་ཡི་ནི། །ཉེ་འཁོར་ཀུན་དུ་རབ་ཏུ་ན། །གཅིན་ཡང་ལྷག་པར་དབྲེ་བྲོ་ཞིང༌། །གཅིན་འགགས་རིམས་འདེབས་ཡིག་འཆུས། །སྤྱི་ཡི་མཚན་ཉིད་ལྟེ་བ་དང༌། །ལྒང་མགོ་ལྒང་པའི་སྲུབས་ན་ཞིང༌། །དེ་ཡིས་གཅིན་འབྱུང་སྒོ་བཀག་པས། །གཅིན་གྱི་རྒྱུན་ནི་འཆད་ཅིང་འབྱུང༌། །དེ་བྱུང་ཟིན་ནས་བདེ་བར་བྱེད། །སླ་ཞིང་བ་ལང་ཚིལ་འདྲ་ལ། །དེ་བསྐྱོད་པ་ཡིས་ཁྲག་ཏུ་འགྱུར། །དྲག་ཤུལ་སྤྱོད་པས་རབ་ཏུ་ན། །དེ་ལ་རླུང་གྱུར་ཤིན་ཏུ་ན། །སོ་འཐམས་སྡོམ་ཞིང་ལུས་འདར་ལ། །ཕོ་མཚན་ཉེད་ཅིང་ལྟེ་བ་འཚིར། །རྒྱུན་དུ་ན་ཞིང་འཁུན་པར་བྱེད། །བཤང་བ་འཕྱེན་དང་བཅས་པར་འབྱུང༌། །གཅིན་གྱི་ཐིགས་པ་ཡང་ཡང་འོང༌། །རྡེའུ་གནག་ཅིང་རྩུབ་པ་དང༌། །ཆུ་སོར་ཚེར་མས་གང་སྙམ་བྱེད། །མཁྲིས་པས་ལྒང་པ་ཚ་བ་དང༌། །བཙོས་པ་སྙམ་བྱེད་རབ་ཏུ་དྲོ། །གོ་བྱེའི་འབྲས་བུའི་དབྱིབས་འདྲ་ལ། །རྡེའུ་མདོག་དམར་ཞིང་སེར་ལ་གནག །བད་ཀན་གྱིས་བསིལ་ལྕི་བ་དང༌། །ལྒང་པའི་ནང་དུ་ཟུག་ཅིང་ན། །རྡེའུ་ཆེ་ཞིང་འཇམ་པ་ལ། །སྦྲང་རྩིའི་མདོག་གམ་ཡང་ན་དཀར། །འདི་དག་བྱིས་པ་རྣམས་ལ་ནི། །ཕལ་ཆེར་འབྱུང་བར་འགྱུར་བ་ཡིན། །གནས་དང་ཤ་ནི་ཆུང་བའི་ཕྱིར། །བཟུང་དང་དབྱུང་བ་བདེ་བ་ཡིན། །མི་ཆེན་ཁུ་བ་ལས་བྱུང་རྡེའུ། །ཁུ་བ་བཀག་ལས་འབྱུང་བར་འགྱུར། །གནས་ལས་འཕྱོས་པ་ཕྱིར་མ་བྱུང༌། །རླིག་བར་གནས་པ་རླུང་གིས་ནི། །བསྐམས་ནས་ཉེ་བར་བསྡུས་གྱུར་པ། །དེ་ནི་ཁུ་བ་རྡེའུ་ཆགས་ཡིན། །ལྒང་པར་གཅིན་ནི་སྲི་བྱེད་ཅིང༌། །ཚ་ཞིང་སྐྲང་བར་བྱེད་པ་ཡིན། །དེ་ནི་སྐྱེས་མ་ཐག་ཏུ་ནི། །ཁུ་བ་ཞུ་སྟེ་སླ་བར་འགྱུར། །ཕྱོགས་དེར་མནན་ན་ཞུ་བར་བྱེད། །རྡེའུ་གསེག་མ་ལྟ་བུར་གནས། །རླུང་གིས་ཕྱེ་མར་བཤིག་གྱུར་པ། །དེ་འདིར་ཚུལ་བཞིན་འབྱུང་ཞེས་བྱ། །གཅིན་དང་ལྷན་ཅིག་ཕྱིར་འབྱུང་འགྱུར། །ལུགས་བཞིན་མི་འབྱུང་རྡེའུར་ཆགས། །གཅིན་ནི་བཀག་པར་
བྱས་གྱུར་པས། །རླུང་གིས་ལྒང་བའི་ཁ་བཀག་ནས། །གཅིན་འགགས་ན་ཞིང་གཡའ་བར་འགྱུར། །ལན་འགའ་རང་གནས་ལས་སྤངས་ནས། །ལྒང་བ་རྒྱས་ཏེ་ཁ་ཆེ་ཞིང༌། །མངལ་འདྲ་སྦོམ་ཞིང་ལོག་པར་འདུག །དེར་ནི་ན་ཞིང་ཚ་བར་བྱེད། །འཕར་ཞིང་གཅུས་པ་སྙམ་དུ་སེམས། །ཐིགས་པ་ཙམ་དུ་འཛག་པ་དང༌། །ལྒང་བཙིར་རྒྱུན་ནི་འབྱུང་བར་འགྱུར། །རྣམ་པ་གཉིས་བོ་འདི་དག་ནི། །རླུང་གི་ལྒང་བའི་ནད་ཅེས་བྱ། །གསོ་དཀའ་གཉིས་པ་རླུང་གི་ཡིན། །མཐུ་ཆེན་ཤིན་ཏུ་གསོ་དཀའ་ཡིན། །བཤང་ལམ་དེ་ནི་ལྡང་པ་ཡི། །བར་ན་རླུང་ནི་བརྟེན་གྱུར་པ། །གཏུན་འདྲ་སྲ་ཞིང་མཐོ་བ་དང༌། །མི་འགྱུར་གནས་བྱེད་མདུད་པ་ཅན། །རླུང་ནད་གཏུན་འདྲ་དེ་སྦོས་བཅས། །བཤང་གཅི་འཕེན་ནི་འགགས་བྱེད་ཡིན། །ལོག་རྒྱུ་འཁྱིལ་བར་བྱེད་པ་ཡི། །རླུང་གིས་ཆུ་སོར་མི་བཟད་གཟེར། །གཅིན་ལས་ཞུགས་ཏེ་འཁྱིལ་བྱེད་ཅིང༌། །རེངས་བྱེད་ལྕི་ཞིང་གཅུས་སྙམ་བྱེད། །གཅིན་ནི་ཉུང་ཤས་ཉུང་ཤས་འབྱུང༌། །ཡང་ན་བཤང་གཅི་གཏོང་ཚེ་འབྱུང༌། །འདི་ནི་རླུང་ནད་འཁྱིལ་བ་ཡིན། །ག་ཅིན་ནི་ཡུན་རིངས་བཀག་གྱུར་པ། །སྲི་ཞིང་འབྱུང་བར་མི་འགྱུར་ལ། །གཅིན་ཐོན་ནས་ནི་ནད་ཚབས་འབྲི། །གཅིན་བཀག་པ་ཡིས་གནོད་གྱུར་པ། །གང་ཚེ་རླུང་གིས་བཟློག་གྱུར་པ། །ལྟེ་བའི་འོག་ནས་ལྟེ་བའི་བར། །གཅིན་གྱིས་གང་འགྱུར་དེ་ཡི་ཚེ། །རབ་ཏུ་ན་ཞིང་སྦོས་པ་དང༌། །ཟས་མི་འཇུ་ཞིང་དྲི་མ་འགགས། །དེ་ནི་ལྟོ་ར་གཅིན་འགགས་ཞེས་བྱ། །གཅིན་འབྱུང་བུ་ག་འཆུས་པའམ། །རླུང་གིས་བཀག་ནས་གཅིན་ཉུང་འབྱུང༌། །ལྒང་པ་མཚན་སྦུབས་ནོར་བུ་ནི། །གནས་ནས་དེ་འོག་རིམ་གྱིས་འཛག །ནད་བཅས་པའམ་ནད་མེད་པ། །གཅིན་ནི་ཆད་དང༌། བཅས་པར་འབྱུང༌། །ལྷག་མ་ལུས་ཏེ་མཚན་ལྕི་ཡིན། །ལྒང་བའི་ཁ་ནང་ཟླུམ་ཞིང་སྲ། །ཅུང་ཞིག་འཕྲལ་དུ་འབྱུང་འགྱུར་ན། །གཅིན་སྩོགས་རྡེའུ་ལྟ་བུ་ནི། །གཅིན་གྱི་མདུད་པར་དེ་བ་ཤད་དོ། །གཅིན་སྙོམས་པ་ལས་ཉལ་པོ་བྱས། །རླུང་གིས་ཁུ་བ་བསྐྱོད་གྱུར་པ།
གནས་ལས་བསྐྱོད་ཅིང་གཅིན་བཏང་ཚེ། །སྔོན་ནམ་ཕྱི་ནས་ཐལ་ཆུ་དང༌། །མདོག་འདྲ་བྱུང་བར་འགྱུར་བ་ཡིན། །ཁུ་བ་འདྲེས་པར་དེ་བཤད་དོ། །རྩུབ་ཅིང་སྐེམ་ལ་རླུང་གིས་ནི། །གང་ཚེ་རྟུག་སྐམ་ནད་གྱུར་པ། །གཅིན་འབྱུང་བུ་གར་སོང་ནས། །ནི། །བཤང་བ་དང་འདྲེས་དེ་ཡི་ཚེ། །གཅིན་ནི་བཤང་བའི་དྲི་ཅན་འབྱུང༌། །བཤང་བ་འགགས་པར་དེ་བཤད་དོ། །མཁྲིས་པ་དྲག་ཤུལ་ཁ་ཟས་ནི། །རྣོ་ཚ་ཉི་ཚན་ལ་སོགས་ཀྱིས། །འཕེལ་ཞིང་རླུང་ནི་ཞུགས་གྱུར་པ། །ལྒང་བའི་ཉེ་འཁོར་ཚ་ཞིང་ན། །གཅིན་ནི་སེར་པོར་འགྱུར་བ་འམ། །ཡང་ན་ཁྲག་བཅས་ཁྲག་ཉིད་འབྱུང༌། །ཚ་ཞིང་སྲིལ་ཡང་ཡང་འབྱུང༌། །དེ་ནི་ཚ་རླུང་ཞེས་བྱར་བཤད། །རྩུབ་ཅིང་ལུས་ནི་རྨྱ་བ་ཡི། །ལྒང་བར་གནས་པའི་མཁྲིས་པ་རླུང༌། །གཅིན་ཟད་ཚ་དང་ན་བར་བཅས། །བསྐྱེད་པ་དེ་ཡང་དེ་སྐད་བཤད། །བད་ཀན་མཁྲིས་པ་གཉི་ག་ལ། །རླུང་གིས་བསྐྱོད་པར་གྱུར་ན་ནི། །དེ་ཚེ་གཅིན་སྲི་སེར་བ་དང༌། །དམར་ཞིང་དཀར་ལ་སྐ་བ་འབྱུང༌། །དེ་ནི་ཚ་བཅས་གི་ཝང་ངམ། །དུང་གི་ཕྱེ་མའི་མདོག་འདྲ་འམ། །ཡང་ན་སྐམ་ཞིང་མདོག་ཀུན་ལྡན། །དེ་ནི་གཅིན་ཉམས་ནད་དུ་བཤད། །དེ་ལྟར་གཅིན་འགགས་ལས་བྱུང་བའི། །མཚན་ཉིད་རྒྱ་ཆེར་བཤད་ནས་ནི། །དེ་འོག་གཅིན་སྙི་ལས་བྱུང་བའི། །ནད་གཞིའི་མཚན་ཉིད་བཤད་པ་ཡིན། །ཡན་ལག་བརྒྱད་པའི་སྙིང་པོ་བསྡུས་པ་ལས། །ནད་གཞིའི་གནས་ཀྱི་ལེའུ་དགུ་པའོ།། །།དེ་ནས་གཅིན་སྙི་བ་ཟ་ཁུའི་ནད་དམིགས་བཤད་པར་བྱའོ། །གཅིན་སྙིའི་ནད་ནི་ཉི་ཤུ་སྟེ། །དེ་ལས་བད་ཀན་ལས་གྱུར་བཅུ། །མཁྲིས་པ་ལས་དྲུག་རླུང་གྱུར་བཞི། །དེ་རྣམས་ཚིལ་གཅིན་བད་ཀན་སྐྱེད། །ཟས་དང་སྐོམ་གྱི་ཚུལ་ལས་ནི། །ཕལ་ཆེར་དེ་དག་འབྱུང་བར་བྱེད། །མངར་དང་སྐྱུར་དང་ལན་ཚ་དང༌། །ལྕི་ཞིང་འབྱིལ་ལ་བསིལ་བ་དང༌། །འབྲུ་མར་ཆང་དང་གཤེར་བའི་ཤ་།དར་བ་བུ་རམ་བུ་རམ་ཤིང༌། །གནས་གཅིག་སྟན་གཅིག་ལ་རྟག་གནས། །མལ་སྟན་ཆོ་གར་མི་ལྡན་ལ། །བརྟེན་ནས་གཅིན་སྙིའི་ནད་སྐྱེད་བྱེད། །བད་ཀན་འཁྲུགས་
ལས་ལྒང་བའི་གཅིན། །སྙི་འགྱུར་ལུས་གཤེར་རྡུལ་ཚིལ་དང༌། །ཤ་གློངས་ལྒང་བར་བརྟེན་ཅིང་སྙི། །མཁྲིས་པས་ཁྲག་ཀྱང་ཟད་བྱས་ནས། །བད་ཀན་སྩོགས་ཟད་གཅིན་གནས་བསྐྱེད། །རླུང་འཁྲུགས་པ་དང་དེ་ཟད་ལས། །ལུས་ཟུངས་ལྒང་བར་འཁུས་ཏེ་བསྐྱེད། །དེ་བྱུང་གསོ་བྱ་འཚོ་ཙམ་དང༌། །སྤང་བྱ་གཅིན་ནད་རྣམ་གསུམ་འགྱུར། །མདོར་ན་མི་མཐུན་བྱ་བ་དང༌། །ནད་དམིགས་ཆེན་པོ་ཉིད་ཀྱིས་འབྱུང༌། །དེ་རྣམས་ཀྱི་ནི་སྤྱིའི་མཚན་ཉིད། །གཅིན་ནི་རྙོག་མ་ཅན་དུ་འབྱུང༌། །གནོད་དང་གནོད་བྱ་ཁྱད་མེད་ཀྱང༌། །དེ་དུས་ཁྱད་པར་ཉིད་དང་ནི། །གཅིན་གྱི་མདོག་སྩོགས་དབྱེ་བ་ཡིས། །གཅིན་སྙིའི་དབྱེ་བ་བརྟག་པར་བྱ། །དང་ཞིང་མང་ལ་དཀར་ཞིང་བསིལ། །དྲི་ང་མེད་ཅིང་ཆུ་འདྲ་བ། །གཅིན་སྙི་ཆུ་ཡི་ཟ་ཁུ་ཡིན། །ཅུང་ཟད་རྙོག་ཅན་སྦྱིན་བག་ཅན། །བུ་རམ་ཤིང་ཁུ་ལྟ་བུར་མངར། །ཟ་ཁུ་བུ་རམ་ཤིང་ཁུ་ཡིན། །ཞག་ལོན་ན་ནི་སྐ་བར་འགྱུར། །ཟ་ཁུ་གར་པོ་ཞེས་བྱའོ། །སྟེང་ན་དངས་མ་འོག་ན་སྐ། །ཆང་འདྲ་ཆང་གི་ཟ་ཁུ་ཡིན། །བ་སྦུ་ལྡང་ཞིང་འབྲས་བཏགས་འདྲ། །དཀར་ཞིང་མང་འབྱུང་འབྲས་ཕྱེ་འདྲ། །ཁུ་ཆུ་འདྲ་བའམ་ཁུ་བ་འདྲེས། །ཁུ་བ་འདྲ་བའི་ཟ་ཁུ་ཡིན། །གཅིན་ནི་བྱེ་ཚིགས་དྲི་མ་ཅན། །བྱེ་མའི་ཟ་ཁུ་ཞེས་བྱའོ། །གཅིན་སྙི་མང་དུ་འབྱུང་ཞིང་བསིལ། །མངར་བ་དེ་བསིལ་ཟ་ཁུ་ཡིན། །དལ་གྱིས་ཉུང་ཟད་ཉུང་ཟད་འབྱུང༌། །བགས་ཀྱིས་འབྱུང་བའི་ཟ་ཁུ་ཡིན། །ཁ་ཆུ་འདྲ་བའི་ནལ་ནལ་པོ། །འབྱིལ་བག་ཁ་ཆུའི་ཟ་ཁུ་ཡིན། །དྲི་རོ་ཁ་དོག་རེག་བྱ་ནི། །ནས་ཚིག་འཁུས་འདྲ་ནས་ཚིག་ཅན། །ཟ་ཁུ་སྔོན་པོ་ཁ་དོག་སྔོ། །ཟ་ཁུ་ནག་པོ་སྣག་ཚ་འདྲ། །གཅིན་སྙི་ཚ་ཞིང་མདོག་སེར་བ། །དེ་ནི་སྐྱེར་བ་འདྲ་བ་ཡིན། །མནམ་ཞིང་བཙོད་ཀྱི་ཁུ་བ་འདྲ། །བཙོད་ཀྱི་ཟ་ཁུ་ཞེས་བྱའོ། །དྲི་ང་ཚ་ཞིང་ལན་ཚྭར་བཅས། །ཁྲག་འདྲ་ཁྲག་གི་ཟ་ཁུ་ཡིན། །ཞག་གི་ཟ་ཁུ་ཞག་དང་འདྲེས། །ཞག་ཉིད་གཅིན་དུ་འབྱུང་བ་ཡིན། །རྐང་འདྲེས་པའམ་རྐང་ཉིད་ནི། །ཡང་དང་ཡང་འབྱུང་རྐང་ཟ་ཁུ། །
གླང་ཆེན་མྱོས་ལྟར་རྒྱུན་དུ་ནི། །གཅིན་ཤུགས་དལ་བར་འབྱུང་འགྱུར་ལ། །ཆུ་སེར་བཅས་ཤིང་རྙོག་བཅས་འབྱུང༌། །གླང་ཆེན་ཟ་ཁུ་ཞེས་བྱའོ། །སྦྲང་རྩིའི་ཟ་ཁུ་སྦྲང་རྩི་འདྲ། །དེ་ནི་རྣམ་པ་གཉིས་སུ་འགྱུར། །ལུས་ཟུངས་ཟད་པས་རླུང་འཁྲུགས་བའམ། །ནད་ཀྱིས་རྩ་སྦུབས་བཀག་སྟེ་འབྱུང༌། །ནད་ཀྱིས་བདག་པའི་མཚན་མ་དག །དེ་ནི་རྒྱུ་མེད་པར་འབྱུང་ཞིང༌། །སྐད་ཅིག་ཟད་སྟོང་གང་འགྱུར་བ། །གསོ་བར་དཀའ་བ་ཉིད་དུ་འགྱུར། །ཐམས་ཅད་དུས་སུ་མ་བཅོས་ན། །སྦྲང་རྩི་འདྲ་བའི་ཟ་ཁུར་འགྱུར། །གང་ཞིག་ཐམས་ཅད་མངར་འགྱུར་བས། །ཕལ་ཆེར་སྦྲང་རྩིའི་ཟ་ཁུ་ཡིན། །སྲྦང་རྩིའི་ཟ་ཁུ་ཞེས་བྱ་ཀུན། །མངར་བ་ལས་ནི་བཤད་པ་ཡིན། །ཟས་མི་འཇུ་ཞིང་ཡི་ག་འཆུས། །སློན་ལུད་གཉིད་ཆེན་ཆམ་པས་འདེབས། །བད་ཀན་ལས་བྱུང་ཟ་ཁུ་ལ། །བླ་བརྣན་དེ་དག་འབྱུང་བར་འགྱུར། །ཕོ་མཚན་ལྒང་བར་ཟུག་པ་དང༌། །རླིག་འབྲས་བྱེ་ཞིང་རིམས་ཀྱིས་འདེབས། །ཚ་སྐྱུར་སྐོམ་དད་བརྒྱལ་དང་འཁྲུ། །མཁྲིས་པ་ལས་གྱུར་བླ་བརྣན་ཡིན། །རླུང་ལས་སྐྱེས་པའི་སྙིང་འཕར་ཞིང༌། །ལུས་འདར་སྙིང་ན་ཟས་ལ་བརྐམ། །གཟེར་ཞིང་གཉིད་མེད་སྐེམ་པ་དང༌། །ལུད་པ་དབུགས་མི་བདེ་བ་འབྱུང༌། །ཁམ་ཕོར་རུས་སྦལ་འདྲ་བ་ཅན། །སྒུ་བོ་མེ་དབལ་ཕྲ་མོ་དང༌། །སྲན་ཆུང་འདྲ་དང་དང་ཉུངས་ཀར་འདྲ། །བུ་བཅས་འབྱུང་དང་པི་ད་རི། །ཁོང་འབྲས་ཞེས་བྱའི་འབྲས་འབྲུམ་བཅུ། །གཅིན་ནད་མ་བཅོས་པ་ལས་འབྱུང༌། །ཚིགས་དང་གནད་དང་ཤ་ཆེ་བའི། །སྲོག་གི་གནས་སུ་འབྱུང་བར་འགྱུར། མཐའ་མ་མཐོ་ཞིང་དབུས་མ་དམའ། །གནག་ཅིང་རྣག་དང་ནད་བཙས་ལ། །དབྱིབས་དང་ཚད་ནི་ཁམ་ཕོར་འདྲ། །ཐོར་བུ་ཁམ་ཕོར་ཞེས་བྱའོ། །ནང་དུ་ཟུག་ཅིང་ན་བྱེད་ལ། །ཉེ་འཁོར་དག་ཏུ་ཆེར་མཆེད་ཅིང༌། །འཇམ་ཞིང་རུས་སྦལ་རྒྱབ་འདྲ་བའི། །འབྲས་ནད་རུས་སྦལ་ཅན་ཞེས་བྱ། །སྲ་ཞིང་རྩ་ཡི་དྲ་བ་ཅན། །སྣུམ་ཞིང་འཛག་ལ་ཁྱོན་ཆེ་བ། །ན་ཞིང་ནང་ཟུག་བུ་ག་
ནི། །ཕྲ་མོ་ལྡན་པ་དྲ་བ་ཅན། །ནང་དུ་ཟུག་ཅིང་ན་ལ་རྣགས། །རྒྱབ་བམ་ལྟོ་བ་དག་ཏུ་ནི། ཐོར་བུ་ཆེན་པོ་ཁ་དོག་གནག །སྐུ་བོར་འདུག་པས་སྒུ་བོར་བཤད། །སྐྱེས་མ་ཐག་ཏུ་པ་གས་པ་ཚ། །ཤིན་ཏུ་ན་བྱེད་མེ་དབལ་ཏེ། །དམར་ཞིང་གནག་ལ་གས་པ་དང༌། །ཚ་ཞིང་རྨུགས་བྱེད་མེ་དཔལ་ཕྲ། །སྲན་ཆུང་འདྲ་བའི་ཚད་དང་དབྱིབས། །མཉམ་པས་སྲན་ཆུང་ཅན་ཡིན་ནོ། །ཚད་དང་དབྱིབས་ནི་ཉུངས་ཀར་འདྲ། །མྱུར་དུ་སྨིན་ཞིང་ནད་ཚབས་ཆེ། །ཡུངས་ཀར་འདྲ་བའི་འབྲུམ་ཕྲན་གྱིས། །ཡོངས་སུ་བསྐོར་བས་ཆུ་བུར་ཅན། །བུ་བཅས་ཆེ་ཞིང་མང་བ་ལ། །རབ་ཕྲའི་འབྲུམ་བུས་ཁྱབ་གྱུར་པའོ། །ལྡུམ་བུ་བི་ད་རི་ལྟར་ལྡུམ། །སྲ་བ་བི་ད་རི་ཞེས་བྱ། །ཁོང་འབྲས་གཞན་དུ་བཤད་པ་ཡིན། །དེ་ལ་དང་བོའི་འབྲས་ནད་གསུམ། །བུ་བཅས་དང་ནི་བི་ད་རི། །ཚིལ་ཆེན་ལས་བྱུང་བརྣག་དཀའ་ཡིན། །གཞན་དག་མཁྲིས་པ་ཤས་ཆེ་ཞིང༌། །ཚིལ་ཆུང་ལས་བྱུང་བརྣག་ནུས་འགྱུར། །དེ་རྣམས་ནད་ཤས་ཇི་ལྟར་ཆེའི། །གཅིན་སྙི་བ་ཡི་དབང་ལས་འབྱུང༌། །འདི་དག་ཟ་ཁུ་མེད་པར་ནི། །གནོད་གྱུར་ཚིལ་ལས་འབྱུང་འགྱུར་ཏེ། །ཇི་སྲིད་དངོས་པོ་མི་སྣང་བ། །དེ་སྲིད་ཤེས་པར་མི་འགྱུར་རོ། །ཁ་དོག་ལྗང་བའམ་དམར་བའི་གཅིན། །ཟ་ཁུའི་སྔོན་ཚུལ་མེད་པ་ཡིས། །གཅིན་འབྱུང་གང་དེ་ཟ་ཁུ་མིན། །དེ་ནི་ཁྲག་མཁྲིས་ཡིན་ཞེས་བྱ། །ལུས་རྡུལ་ཡན་ལག་མནན་ཞིང་ལྷོད་པ་དང༌། །སྟན་དང་མལ་དང་གཉིད་ཀྱི་བདེ་ལ་ཆགས། །སྙིང་མིག་རྣ་བ་ཁ་ལྕེ་བྱུགས་སྙ་མ་བྱེད། །ལུས་སྦོམ་སྐྲ་དང་དང་སེན་མི་རིང་བ་དང༌། བསིལ་བག་ལ་དགའ་འགྲེ་བ་རྐན་བསྐམས་ཤིང༌། །ཁ་ནང་རོ་མངར་རྐང་མཐིལ་ལག་མཐིལ་ཚ། །གང་དུ་གཅིས་པར་གྲོག་མ་འདུ་འགྱུར་བ། །གཅིན་ནད་ཟ་ཁུའི་ཚོགས་ནི་ཕྱིས་འབྱུང་ཚུལ། །ཟ་ཁུ་སྦྲང་རྩིའི་མདོག་འདྲ་འབྱིལ་བ་དང༌། །སྦྲང་རྩིའི་རོ་འདྲ་བ་ལ་གཉིས་སུ་རྟོག །ལུས་བརྟས་བད་ཀན་ཅན་གྱི་ཟ་ཁུའམ། །ཉེས་པ་ཟད་པས་
རླུང་གི་བདག་ཅན་ཡིན། །སྔོན་ཚུལ་བཅས་པའི་བད་མཁྲིས་ཟ་ཁུ་དང༌། །གང་ཡང་རིམ་གྱིས་རླུང་ནད་ཟ་ཁུར་འགྱུར། །མཁྲིས་པ་ལས་གྱུར་གང་ཡིན་གསོ་བར་དཀའ། །གལ་ཏེ་ཚིལ་ནད་ཆུང་གྱུར་གསོ་སླ། །ཡན་ལག་བརྒྱད་པའི་སྙིང་པོ་བསྡུས་པ་ལས། ནད་གཞིའི་གནས་ཀྱི་ལེའུ་བཅུ་པའོ།། །།དེ་ནས་ཁོང་འབྲས་དང་རྒྱུ་རླུགས་དང་སྐྲན་གྱི་ནད་གཞི་བཤད་པར་བྱའོ། །ཁ་ཟས་ཁེངས་བུ་རབ་ཚ་དང༌། །རྩུབ་དང་སྐམ་དང་ཚ་འགྱུར་ཟོས། །ཉལ་བའི་སྤྱོད་པ་མི་བདེ་བས། །ཁྲག་ནད་སྐྱེད་འགྱུར་དེ་དང་དེས། །པགས་པ་ཤ་ཚིལ་རུས་པ་དང༌། །ཁྲག་དང་ཆུ་ཆུ་བ་ཆེ། །ཕྱི་དང་ནང་ནང་དུ་སྐྲངས་གྱུར་པ། །རྩ་བ་ཆེ་ཞིང་ནད་ཚབས་ཆེ། །ཟླུམ་པོ་འམ་འཇོང་བར་གནས་པ་གང༌། །ཁོང་འབྲས་དེ་ནི་རྣམ་པ་དྲུག །ནད་དམིགས་སྣ་རེ་འདུས་པ་དང༌། །ཁྲག་དང་སྨས་པ་ལས་བྱུང་བའོ། །འདིར་ཕྱིའི་ཡན་ལག་དེ་དང་དེར། །རབ་ན་མདུད་པ་འདྲ་ལ་མཐོ། །ནང་གི་ཤིན་ཏུ་མི་བཟད་ཅིང༌། །གཏིང་རིང་སྐྲན་ལྟར་སྲ་བ་ཡིན། །གྲོག་མཁར་ལྟ་བུར་མཐོ་བ་དང༌། །མེ་དང་མཚོན་ལྟར་མྱུར་གསོད་བྱེད། །ལྟེ་བ་ཆུ་སོ་མཆིན་མཆེར་པ། །གློ་དང་སྙིང་ལྟོ་བརླ་རྩ་དང༌། །མཁལ་མ་གཉིས་སམ་གཞང་དུའང་འབྱུང༌། །དེ་ལ་རླུང་གྱུར་ནད་ཚབས་དྲག །དམར་ནག་རིང་ཞིག་ལོན་ནས་ནི། །འབྱུང་ཞིང་སྨིན་པ་དབྱིབས་མི་སྙོམས། །རན་ཞིང་མགོ་འཁོར་སྤོས་བ་དང༌། །གཡོ་ཞིང་འཕོ་ལ་སྒྲ་དང་བཅས། །མཁྲིས་གྱུར་ཟངས་ལྟར་དམར་རྩ་གནག །སྐོམ་དང་ཚ་རིམས་རྨོངས་བག་སྐྱེད། །ལྡང་ཞིང་སྨིན་པ་མྱུར་བ་ཡིན། །བད་ཀན་ལས་སྐྱ་གཡའ་དང་བཅས། །སློན་ཞིང་བསིལ་སླ་བ་དང༌། །གླ་ཞིང་ལྕི་ལ་ཡིག་འཆུས། །འབྱུང་ཞིང་སྨིན་པ་ཡུན་རིང་ཐོགས། །འདུས་པ་ལས་གྱུར་འདྲེན་མ་ཡིན། །འདིར་ནི་ཕྱི་ནང་གཉིས་མཚན་ཉིད། །དོན་གྱི་དབང་ལས་ཤེས་པར་བྱ། །འབྲུམ་ནག་པོས་ཁེབས་ཤིང་གནག །རབ་ཚ་ན་ཞིང་རིམས་ཀྱིས་འདེབས། །མཁྲིས་པའི་རྟགས་ལྡན་ཕྱི་འམ་
ནང༌། །ཁྲག་གྱུར་བུད་མེད་ཉིད་ལ་འབྱུང༌། །མཚོན་ལ་སྩོགས་པས་སྨས་པ་ཡིས། །རྨ་བྱུང་མི་འཕྲོད་བསྟེན་པ་ལས། །རྨ་ཁའི་ཚ་བ་རླུང་གིས་ཕུལ། །ཁྲག་བཅས་མཁྲིས་པ་འབྱུང་བར་བྱེད། །ཁོང་འབྲས་བླ་བརྣན་ནད་མང་ཞིང༌། །ཁྲག་མཁྲིས་མཚན་ཉིད་ཅན་དག་བྱེད། །བླ་བརྣན་དེ་ཡི་དབྱེ་བ་ཡང༌། །གནས་ཀྱི་དབྱེ་བ་ལས་བཤད་དོ། །ལྟེ་བར་བྱུང་ན་སྐྱིགས་བུ་སྟེ། །ཆུ་སོར་གཅིན་འགགས་རྣག་ཏུ་འགྱུར། །མཆེར་པ་དབུགས་མི་བདེ་མཆིན་པར། །དབུགས་འབྱུང་འགག་སྐོམ་མགོ་འཁོར་འགྱུར། །གློ་བར་བྱུང་ན་ལྐོག་ནད་འགྱུར། །སྙིང་བྱུང་ཡན་ལག་ཀུན་གཟིར་སྙམ། །རབ་རྨོངས་མུན་སྲོས་སྙམ་དུ་བྱེད། །སྙིང་འཕར་ན་བར་འགྱུར་བ་ཡིན། །ལྟོ་བ་རྩིབ་ལོགས་ཕྲག་པའི་བར། །ན་ཞིང་ལྟོ་སྦོས་འབྱུང་བར་འགྱུར། །ཆུ་སོ་མདོམས་པར་བྱུང་བརླ་ན། །མཁལ་མར་བྱུང་ན་རྐེད་པ་རྒྱབ། །རྩིབ་ལོགས་སུ་ནི་ན་བར་འགྱུར། །གཞང་དུ་རླུང་ནི་ཐུར་འབྱུང་འགགས། །ཞུ་དང་མ་ཞུ་ཕྱེད་ཉིད་ཞུ། །དེ་དག་འོར་ནད་ལྟ་བུར་བཤད། །ལྟེ་བ་ཡན་ཆད་སྨིན་ཁར་འཛག །ལྟེ་བ་མན་ཆད་གཞང་དུ་འཛག །ལྟེ་བར་གནས་པ་གཉི་གར་འཛག །ཁོང་འབྲས་ཀྱི་ནི་ནད་དམིགས་རྣམས། །འཛག་ལས་རྨ་ལྟར་ཤེས་པར་བྱ། །དེ་ལས་འདུས་པ་ལས་གྱུར་དང༌། །སྙིང་དང་ལྟེ་བ་ཆུ་སོར་གནས། །ཕྱི་འམ་ནང་དུ་བྱེ་བ་འམ། །སྨིན་ཏེ་ཁ་ནས་འཛག་པ་ནི། །ཉམ་ཆུང་བླ་བརྣན་ལྡན་པ་སྤང༌། །དེ་བཞིན་བུད་མེད་བུ་བཙས་པའམ། །སྦྲུམ་མ་ནུ་ཞོ་ཡོད་པ་དང༌། །ནུ་ཞོ་མེད་པའི་ནུ་མ་ཡི། །རྩ་སྒོ་ཁ་བྱེར་ཕྱིན་གྱུར་ནས། །ཕྱི་ཡི་ཁོང་འབྲས་མཚན་ཉིད་ཅན། །སྐྲང་ཞིང་སྲབ་འབྱུང་བར་འགྱུར། །བུ་མོ་རྣམས་ཀྱི་ནུ་རྩའི་སྒོ། །ཕྲ་བས་འབྱུང་བར་མི་འགྱུར་རོ། །རླུང་ནི་རྒྱུ་ལམ་འགགས་པས་འཁྲུགས། །སྐྲང་དང་གཟེར་ནི་སྐྱེད་ཅིང་རྒྱུ། །ཆུ་སོ་རླིག་པར་ཕྱིན་པ་དང༌། །རླིག་པར་རྒྱུ་བའི་རྩ་དག་ནི། །བཙིར་ནས་རླིག་པ་པགས་པ་དག །འཕེལ་ཞིང་རླིག་རླུགས་ཉིད་དུ་ཕྱེད། །ནང་
ཁྲག་གཅིན་ཚིལ་རྒྱུ་མ་ལས། །རླིག་རླུགས་དེ་ནི་རྣམ་བདུན་འགྱུར། །རྒྱུ་མ་གཅིན་སྐྱེས་པའམ་རླུང༌། །རྒྱུ་མའི་དབྱེ་བ་འབའ་ཞིག་གཞན། །རླུང་གྱུར་རྐྱལ་པ་གང་འདྲ་ཞིང༌། །རེག་ན་རྩུབ་ཅིང་རྒྱུ་མེད་ན། །མཁྲིས་གྱུར་ཨུ་དུམྦཱ་ར་ཡི། །འབྲས་བུ་སྨིན་འདྲ་ཚ་དྲོ་འདྲུལ། །བད་ཀན་ལས་བསིལ་ལྕི་ཞིང་སྣུམ། །གཡའ་ཞིང་སྲ་ལ་ནད་ཚབས་ཆུང༌། །ཁྲག་གྱུར་གནག་ཅིང་འབྲུམ་བུས་ཁྱབ། །མཁྲིས་པའི་རླིག་རླུགས་མཚན་ཉིད་ལྡན། །ཚིལ་གྱུར་རླིག་རླུགས་བད་ཀན་འདྲ། །འཇམ་ཞིང་ཏ་ལའི་འབྲས་བུར་མཚུངས། །གཅིན་གནག་པ་ལ་བརྟེན་པ་རྣམས། །གཅིན་ལས་འབང་བར་དེ་འགྱུར་ཏེ། །རྐྱལ་པ་ཆུ་ཡིས་གང་བལྟར། །གཡོ་འགྱུར་ནད་དང་བཅས་ཤིང་འཇམ། །གཅིན་འགགས་པ་དང་རླིག་པ་ཡི། །འོག་ཏུ་སྐྲང་པར་བྱེད་པར་འགྱུར། །རླུང་འཁྲུགས་པ་ཡི་ཟས་དང་ནི། །ཆུ་གྲུབ་ལ་ནི་རྐྱལ་བ་དང༌། །ཤུགས་བཀག་བཅིར་དང་ཁུར་དང་ལམ། །ཡན་ལག་ལོག་པར་འཆུས་པ་དང༌། །རླུང་འཁྲུགས་པ་ནི་གཞན་གྱིས་ཀྱང༌། །གང་ཚོ་རྒྱུ་མ་ཕྲ་མོའི་ཆ། །རླུང་གིས་ལོག་པར་ཕུལ་འགྱུར་ཏེ། །རང་གི་གནས་ནས་ཐུར་དུ་བསྐྱོད། །ཆུ་སོའི་ཚིགས་སུ་ཕྱིན་པ་དང༌། །དེ་ཆ་མདུད་པ་ལྟར་གློ་འགྱུར། །ཡལ་བར་བོར་ན་རླིག་པ་ཆེར་སྐྱེ་ཞིང༌། །སྤོ་ཤིང་ན་ལ་རེངས་པར་རླུང་གིས་བྱེད། །རབ་ཏུ་གཟིར་ཞིང་ནང་ན་སྒྲ་དང་བཅས། །གང་བར་བྱེད་ཅིང་བཅུག་ཀྱང་སླར་འབྱུང་བྱེད། །རྒྱུ་རླུགས་འདི་ནི་གསོ་དཀའ་སྟེ། །རླུང་གི་རླིག་རླུགས་འདྲ་བ་ཡིན། །རྩུབ་ཅིང་གནག་ལ་དམར་པའི་རྩ། །ཕྲ་མོའི་འབྲ་བས་ཁེབས་པ་ཡིན། །སྐྲན་བརྒྱད་ནད་ནི་སོ་སོ་དང༌། །འདྲེས་དང་འདུས་པ་ལས་གྱུར་དང༌། །ཟླ་མཚན་གྱི་ནི་ཉེས་པ་ཡིས། །བརྒྱད་པ་བུད་མེད་རྣམས་ལ་འབྱུང༌། །རིམས་དང་སློན་དང་ཚད་འཁྲུ་སྩོགས། །སྐྱུག་སྨན་སྩོགས་དང་ལས་རྣམས་ཀྱིས། །སྐེམ་གྱུར་རླུང་སྐྱེས་ཟས་ཟ་དང༌། །བཀྲེས་ཏེ་ཏུ་གྲང་འཐུངས་གྱུར་པའམ། །སྐེམ་འཐུངས་རྗེས་ལ་གང་ཞིག་ནི། །རྐྱལ་དང་མཆོང་བ་ལ་སོགས་པ། །
བསྟེན་པས་ལུས་ནི་དཀྲུགས་བྱས་དང༌། །སློན་མི་བྲོ་ཡང་སྐྱུགས་པ་དང༌། །རླུང་ལ་སོགས་པ་འབྱུང་བ་ཡི། །ཤུགས་བཀག་པ་འམ་བཙིར་པའམ། །སྣུམ་མ་དང་དུགས་ནི་མ་བསྟེན་པར། །སྦྱང་བའི་ལས་ནི་བྱས་པ་དང༌། །སྦྱངས་ཟིན་མྱུར་དུ་ཚ་བ་དང༌། །བད་ཀན་སྐྱེད་པའི་ཟས་སྐོམ་སྤྱད། །རླུང་རྒྱས་པ་ཡིན་ནད་རྣམས་ནི། །སོ་སོ་འམ་འདྲེས་པའམ་འཁྲུགས་གྱུར་པའམ། །ཀུན་ནས་ཁྲག་དང་བཅས་འཁྲུགས་པས། །སྦུབས་ཅན་ལ་ནི་བརྟེན་གྱུར་ནས། །སྟེང་འོག་ལམ་ནི་བཀག་ནས་སུ། །གཟེར་སྔོན་འགྲོ་ཞིང་རེག་ཏུ་རུང༌། །ཤིན་ཏུ་མཐོ་ཞིང་མདུད་པའི་གཟུགས། །སྐྲན་ནི་སྐྱེད་པར་འགྱུར་བ་ཡིན། །སྐེམ་པས་བད་ཀན་མཁྲིས་བཤང་པའི། །རྒྱུན་སྲང་འགགས་པར་གྱུར་པ་ཡིས། །རླུང་ནི་ཁོང་པར་གནས་བཅས་པ། །རྩུབ་པས་སྲ་བར་གྱུར་པ་ཡིན། །རང་གནས་ལྡང་འགྱུར་རང་དབང་ཅན། །གཞན་གནས་ལ་བརྟེན་གཞན་དབང་ཅན། །གོང་པོར་གྱུར་པས་གཟུགས་མེད་ཀྱང༌། །གཟུགས་ཅན་ལྟར་གནས་སྐྲན་ཞེས་བྱ། །ཆུ་སོ་ལྟེ་བ་སྙིང་ག་དང༌། །རྩིབ་ལོགས་ལ་ནི་གནས་པ་ཡིན། །རླུང་ལས་མཇིང་པ་ཀླད་པ་གཟེར། །རིམས་འདེབས་མཆེར་ན་རྒྱུ་མ་ཁྲུག །བཤང་སྲི་ཁབ་ཀྱིས་གཙགས་སྙམ་ན། །དབུགས་འབྱིན་ཡང་དང་ཡང་མི་ཕྱིན། །ལུས་རེངས་ཁ་ནི་སྐམ་པ་དང༌། །སྐེམ་ཞིང་མེ་དྲོད་མི་སྙོམས་ལ། །པགས་སྩོགས་གནག་ཅིང་རྩུབ་པ་དང༌། །རླུང་སྐྲན་གཡོ་བ་ཡིན་པའི་ཕྱིར། །དབྱིབས་ནི་བརྟག་པར་མི་མངོན་ཞིང༌། །གནས་འཕེལ་འབྲི་དང་ན་བ་དང༌། །གྲོགས་ཁྱབ་པ་ལྟ་བུར་ནི། །སྐྲན་ནི་འགུལ་ཞིང་ཟུག་པ་ཡིན། །མཁྲིས་ལས་ཚ་ཞིང་སྒྲེགས་སྐྱུར་བརྒྱལ། །འཁྲུ་ཞིང་ལུས་རྡུལ་སྐོམ་རིམས་འདེབས། །པགས་པ་ལ་སོགས་སེར་པོར་སྣང༌། །སྐྲན་ནི་རེག་པར་མི་བཟོད་དང༌། །ཚ་ཞིང་འབར་ལ་དྲོ་བ་དང༌། །རང་གི་གནས་ནི་སྲེག་སྙམ་བྱེད། །བད་ཀན་སློན་བག་ཡི་ག་འཆུས། །མེ་དྲོད་ཉམས་ཤིང་གྲང་རིམས་འདེབས། །ཆོམ་པ་ཁོང་སྙོམ་དང་ག་ལྕི་
ལུད་པ་ལུ་ཞིང་པགས་སྩོགས་དཀར། །སྐྲན་ཕུགས་རིང་ཞིང་སྲ་བ་དང༌། །ལྕི་ཞིང་རང་གནས་བརྟེན་ནད་ཆུང༌། །ཕལ་ཆེར་རང་གནས་འདུག་པ་དང༌། །རང་གི་དུས་སུ་ནད་སྐྱེད་བྱེད། །གཉིས་ལས་བྱུང་བའི་སྐྲན་གསུམ་པོ། །མཚན་ཉིད་འདྲེན་མར་ལྡན་པ་ཡིན། །ཀུན་སྐྱེས་མི་བཞད་ན་ཞིང་ཚ། །མྱུར་སྨིན་སྲ་མཐོ་དེ་གསོ་དཀའ། །ཁྲག་གི་སྐྲན་ནི་གང་ཡིན་པ། །དེ་ནི་བུད་མེད་ཉིད་ལ་འབྱུང༌། །ཟླ་མཚན་དུས་སམ་བུ་གསར་བཙས། །ཡང་ན་མངལ་གྱི་ནད་ཅན་གྱིས། །བུམ་མེད་རླུང་སྐྱེད་བསྟེན་གྱུར་པས། །རླུང་ནི་འཁྲུགས་པར་གྱུར་པ་ལས། །ཟླ་རེ་འབྱུང་བར་བྱེད་པ་ཡིས། །ཟླ་མཚན་མངལ་དུ་བཀག་པས་ནི། །དེ་ནི་མངལ་ལ་ཆགས་འདྲར་སྣང་ཞིང༌། །མཚན་མ་གསལ་བར་སྟོན་བྱེད་དེ། །སྙིང་འཕར་འཛགས་ཡིད་མེ་བདེ། །སྐེམ་པ་ལ་སྩོགས་ཚུལ་དུ་སྣང༌། །དེ་ནས་རིམ་གྱིས་རླུང་འདྲེས་དང༌། །མཁྲིས་པ་ཡི་ནི་རྒྱུ་ཡིས་ན། །རླུང་ནི་དང་མཁྲིས་པ་ལས་བྱུང་བའི། །སྐྲན་ནི་ཁྲག་དེ་སྐྱེད་བྱེད་ཡིན། །ན་ཞིང་སྲ་ལ་ཚ་ཞིང་འཁྲུ། །སྐོམ་དད་རིམས་སྩོགས་བླ་བརྣན་འབྱུང༌། །ནད་ཀྱི་ཁྲག་ལ་བརྟེན་པས་ན། །མངལ་གནས་དག་ཏུ་ལྷག་པར་གཟེར། །མངལ་ནས་དྲི་ང་འཛག་པ་དང༌། །ན་ཞིང་འཕར་ལ་ཟུག་པར་བྱེད། །མངལ་ཆགས་འདྲ་ཡང་ཡན་ལག་མེད། །འོན་ཀྱང་སྐྲན་ནི་འགུལ་གཟེར་ལྡན། །དེ་ཉིད་དེ་ནི་གོང་པོར་གནས། །ལན་འགའ་འགུལ་བར་བྱེད་པ་ཡིན། །འདི་ནི་ལྟོར་འཕེལ་མི་བྱེད་ཀྱི། །སྐྲན་ཉིད་འཕེལ་བར་བྱེད་པ་ཡིན། །རང་གི་ནད་གཞི་ལ་བརྟེན་པས། །དེས་དེར་སྐྲན་ནད་ཐམས་ཅད་སྐྱེད། །ཡུན་རིངས་ནས་ནི་སྨིན་འགྱུར་བ་འམ། །ཡང་ན་མ་སྨིན་ཁོང་འབྲས་ཀྱང༌། །ནད་ཁྲག་ནི་བརྟེན་པའི་ཕྱིར། །ཤིན་ཏུ་མྱུར་བར་སྨིན་པར་འགྱུར། །དེ་ཕྱིར་མྱུར་དུ་ཚ་འགྱུར་བས། །ཁོང་འབྲས་ཞེས་ནི་དེ་ལ་བཤད། །ནད་གནས་སྐྲན་ནི་ཆུ་སོ་དང༌། །ལྟོ་བ་མཆིན་པ་སྙིང་ན་ཞིང༌། །མེ་དྲོད་མདོག་ཉམས་སྟོབས་འབྲི། །ཤུགས་ནི་འགག་པར་འགྱུར་བ་ཡིན། །ཕྱི་རོལ་དེ་ལས་
བཟློག་པ་སྟེ། །ཁོང་པའི་ཡན་ལག་ནད་ཚབས་ཆུང༌། །ཕྱོགས་དེའི་མདོག་ནི་ཉམས་པ་དང༌། །ཕྱི་རོལ་དུ་ནི་མཐོང་ཞིང་འཕགས། །ལྟོ་སྦོ་ལྷག་པར་མི་བཟད་ན། །རྒྱུ་མའི་སྒྲ་བཅས་མི་བཟད་ན། །སྦོ་བཅས་ལྟོ་བ་ན་དང༌། །རླུང་གི་ནད་ཀྱིས་འོག་བཀབ། །དེ་ནི་ཧེན་གྱི་ཞེས་བྱར་བཤད། །སྲ་ཞིང་གཏུན་འདྲ་མདུད་པ་ཅན། །གཏུན་འདྲ་གྱེན་དུ་མཐོ་བར་གནས། །ཧེན་གྱི་མཚན་ལྡན་གཏུན་བུ་ནི། །འཕྲེད་གནས་དེ་དང་ཚུལ་འདྲ་ཡིན། །ཞུ་བའི་གནས་ནས་གཞང་ཕོ་མཚན། །རླུང་ནི་མི་བཟད་ན་ཞིང་རྒྱུ། །ཐུར་དུ་ཟུག་པ་ཡིན་པར་བཤད། །དེ་ལས་བཟློག་པ་གྱེན་དུ་ཟུག་པའོ། །སྒྲེགས་པ་མང་ཞིང་བཤང་པ་འགགས་པ་དང༌། །འགྲངས་ཟ་མི་ནུས་རྒུམ་སྒྲ་དང་བཅས། །སྦོ་ཞིང་ཧེན་ལངས་ཁ་ཟས་འཇུ་མི་ནུས། །སྐྲན་ནི་ཉེར་འབྱུང་མཚན་མ་ཡིན་པར་བཤད། །ཡན་ལག་བརྒྱད་པའི་སྙིང་པོ་བསྡུས་པ་ལས། །ནད་གཞིའི་གནས་ཀྱི་ལེའུ་བཅུ་གཅིག་པའོ།། །།དེ་ནས་དམུ་རྫིང་གི་ནད་གཞི་བཤད་པར་བྱའོ། །ནད་ཀུན་མེ་དྲོད་ཉམས་ལས་སྐྱེ། །ལྷག་པར་དམུ་རྫིང་ནས་སྐྱེ་ཞིང༌། །མ་ཞུ་དྲི་མ་ཅན་གྱི་ཟས། །དྲི་མ་སྩོགས་ལས་སྐྱེ་བར་འགྱུར། །ནད་ཀྱིས་ཆུ་ནི་རྒྱུ་བའི་རྩ། །སྟེང་དང་འོག་ཏུ་བཀག་ནས་ནི། །སྲོག་དང་ཐུར་སེལ་ལ་གནོད་དེ། །པགས་པ་ཤ་ཡི་བར་གནས་ནད། །ལྟོ་བ་བཀང་སྟེ་དམུ་རྫིང་སྐྱེད། །དེ་ཡང་རྣམ་པ་བརྒྱད་འགྱུར་ཏེ། །ནད་གཞི་ཐ་དང་འདུས་མཆེར་པ། །དྲི་མ་འགགས་དང་རྒྱུ་རྡོལ་དང༌། །དེས་གཟིར་རྐན་དང་མཆུ་བསྐམས་ཤིང༌། །རྐང་པ་ལག་པ་གསུས་པ་སྐྲང༌། །སྤྱོད་པ་ཁ་ཞས་ཉམས་སྟོབས་འབྲི། །སྐེམ་ཞིང་གསུས་པ་ཆེར་སྐྱེས་ལ། །མི་ནི་ཡི་དྭགས་གཟུགས་ཅན་འགྱུར། །དེ་ནི་འབྱུང་འགྱུར་མཚན་མ་དག །བཀྲེས་པ་མེད་ཅིང་ཟས་ཀུན་ནི། །རིང་ནས་ཚ་ཞིང་སྐྱུར་བཅས་འཇུ། །འཇུ་དང་མི་འཇུ་མི་ཤེས་ལ། །འགྲངས་པར་ཞ་ཡང་མི་ནུས་ཤིང༌། །སྟོབས་ནི་རྟག་ཏུ་ཟད་པར་འགྱུར། །ཅུང་ཟད་བསྐྱོད་ཀྱང་དབུགས་མི་བདེ། །བཤང་བ་འཕེལ་ཞིང་འགགས་པར་བྱེད། །
རྐང་པ་གཉིས་སུ་ཅུང་ཟད་སྐྲང༌། །ཆུ་སོར་ན་ཞིང་ཟས་ཡང་བ། །ཅུང་ཟས་ཟོས་ཀྱང་གསུས་པ་རྒྱས། །རྩ་རྒྱས་ལྟོ་བའི་གཉེར་མ་འཇིག །དམུ་རྫིང་ནད་ནི་ཐམས་ཅད་ལ། །སྙོམ་ཞིང་ཉམ་ཆུང་འགྱུར་བ་དང༌། །དྲི་མ་སྲི་ཞིང་མེ་དྲོད་ཆུང༌། །ཚ་ཞིང་སྐྲང་ལ་ལ་གསུས་པ་སྦོ། །མཇུག་ཏུ་ཆུ་ནི་འབྱུང་བར་འགྱུར། །ཐམས་ཅད་ཆུ་མེད་པར་དུ་སྨུག །སྐྲང་མེད་བུར་ལྟར་ལྕི་མ་ཡིན། །རྩ་དྲའི་སྐར་ཁུང་རིས་ཀྱིས་ཁེབས། །རྟག་ཏུ་སྒྲ་ནི་འུར་འུར་ཟེར། །རླུང་གིས་ལྟེ་རྒྱུ་མར་ཞུགས། །ཤུགས་སྐྱེད་ན་ནི་འཇིག་པར་འགྱུར། །སྙིང་ག་ལྟེ་བ་རྐེད་པ་དང༌། །གཞང་དང་ཆུ་སོན་བར་བྱེད། །རླུང་ནི་སྒྲ་དང་བཅས་པར་རྒྱུ། །བཤང་བ་འགག་ཅིང་གཅི་བ་ཉུང༌། །མེ་དྲོད་ཆུང་མིན་སྐམ་པ་མིན། །ཁར་ནི་རོ་བྲོ་མེད་པ་ཡིན། །དེ་ལ་རླུང་གི་དམུ་རྫིང་ནི། །རྐང་ལག་རླིག་པ་ལྟོ་བ་སྐྲང༌། །ལྟོ་བ་རྩིབ་ལོགས་རྐད་རྒྱ་བ་ན། །ཚིགས་རྣམས་བྱེ་བ་སྙམ་དུ་སེམས། །ལུད་པ་སྐམས་ཤིང་ཡན་ལག་སྙོམ། །རོ་སྨད་ལྕི་ཞིང་བཤད་གཅི་འགག །པགས་པ་ལ་སྩོགས་གནག་ལ་སྨུག །གློ་བུར་དུ་ནི་འཕེལ་ཞིང་འབྲི། །གསུས་པར་ཟུག་ཅིང་ན་བ་དང༌། །རྩ་བྲན་ནག་པོས་ཁྱབ་ཅིང་རྒྱས། །བརྡབས་ན་རྐྱལ་པ་དབུགས་ཀྱིས་ནི། །གང་བ་ལྟ་བུའི་སྒྲ་དང་ལྡན། །འདིར་རླུང་ནད་དང་སྒྲར་བཅས་པས། །ཐམས་ཅད་དུ་ནི་རྒྱུ་བར་བྱེད། །མཁྲིས་པའི་དམུ་རྫིང་རིམས་འདེབས་རྒྱས། །ལུས་ཚ་སྐོམ་དང་ཁ་རོ་ཁ། །མགོ་འཁོར་ཚད་འཁྲུ་པགས་པ་སྩོགས། །སེར་ཞིང་གསུས་པའི་མདོག་རྩ་སྡོ། །རྩ་ནི་དམར་སེར་དག་གིས་ཁྱབ། །རྡུལ་དང་ཚ་བར་བཅས་པས་སྲེག །དད་འབྱུང་རེག་ན་འཇམ་པ་དང༌། །མྱུར་དུ་སྨིན་ཞིང་ཉེར་གདུང་འགྱུར། །བད་ཀན་དམུ་རྫིང་ལྷུ་ཚིགས་ན། །ཚོར་བ་མེད་ཅིང་སྐྲངས་ལྕི། །གཉིད་ཆེ་སློན་ཞིང་ལི་ག་འཆུས། །ལུད་པ་དབུགས་མི་བདེ་ཕགས་སྩོགས། །སྲ་ཞིང་ལྟོ་བ་མཁྲང་ལ་སྣུམ། །རྩ་ཡི་རི་མོས་ཁྱབ་ཅིང་ཆེ། །རིང་ནས་འཕེལ་ཞིང་སྲ་བ་དང་
རེག་ན་གྲང་ཞིང་གསུས་པ་ལྕི། །ནད་གསུམ་འཁྲུགས་པ་དེ་དང་དེ། །བུད་མེད་ཀྱིས་བྱིན་དྲི་མ་རྡུལ། །དབྱིག་དུག་དུག་སྩོགས་ཀྱིས་གནོད་འགྱུར། །ཁྲག་བཅས་དྲི་མ་བསགས་པ་ནི། །ལྟོར་སོང་གནོད་པ་སྐྱེད་བྱེད་དེ། །ཁ་སྐོམ་མགོ་འཁོར་བརྒྱལ་བ་ཅས་པའི། །རྟགས་གསུམ་ལྡན་པའི་དམུ་རྫིང་སྐྱེད། །མྱུར་དུ་སྨིན་ཞིང་མི་བཟད་ན། །དེ་ནི་གྲང་དང་རླུང་དང་ཆར། །ཕྲད་པས་ཤིན་ཏུ་གནོད་པར་འགྱུར། །མང་དུ་ཟོས་པས་བསྐྱོད་པ་དང༌། །བཞོན་པ་དྲག་ཏུ་འགྲོ་བ་དང༌། །ལས་ལམ་ཉལ་པོ་དྲགས་པས་དུབ། །སྐྱུག་སྨན་དྲགས་དང་ནད་ཀྱིས་སྐེམ། །གྱོན་ལོགས་གནས་པའི་མཆེར་པ་ནི། །གནས་ལས་འཕེལ་ཏེ་འཕེལ་བ་དང༌། །ཡང་ན་དངས་མ་སྩོགས་པས་ཁྲག །ཆུས་བྱ་ལ་དེ་ནི་འཕེལ་གྱུར་དང༌། །དེ་ནས་གཏུན་བུ་བཞིན་རབ་སྲ། །དེ་ནས་རུས་སྦལ་རྒྱབ་འདྲ་བར། །རིམ་གྱིས་འཕེལ་བར་འགྱུར་ནས་ནི། །ལྟོ་བར་དམུ་རྫིང་ཆགས་པར་བྱེད། །ལུད་པ་དབུགས་མི་བདེ་སྐོམ་དད། །ཁ་ཡིས་རོ་ནི་མི་ཚོར་ཞིང༌། །ལྕི་ཞིང་ན་ལ་རིམས་ཀྱིས་འདེབས། །ཤ་མདོག་སྐྱ་ཞིང་མི་སྡུག་ལ། །བརྒྱལ་ཞིང་སློན་པར་བྱེད་པ་དང༌། །ཚ་ཞིང་མྱོས་དང་ལྡན་པར་འགྱུར། །རྩ་མདོག་དམར་བའམ་མི་སྡུག་པའམ། །སྡོ་ཞིང་སེར་རི་མོར་བཅས། །དེ་ལ་རིམ་གྱིས་ནད་རྣམས་ནི། །བཤང་འགགས་ནད་དང་ལྟོ་སྦོས་དང༌། །རྨོངས་བག་སྐོམ་ཚ་རིམས་ཀྱིས་འདེབས། །ལུས་ལྕི་ལྟོ་སྲ་ཡི་ག་འཆུས། །མཆེར་པ་ལྟ་བུར་མཆིན་གཡས་ལོགས། །གནས་འཕོས་དམུ་རྫིང་སྐྱེད་ཅེས་བྱ། །བྱ་སྒྲོ་སྤུ་དང་བཅས་པའི་ཟས། །ཟོས་པས་བཤང་ལམ་གནས་འགགས་ཏེ། །གཞང་འབྲུམ་དང་ནི་རྟུག་སྐམ་དང༌། །རྒྱུ་མར་ཆགས་པའི་ཟས་ཀྱིས་ཀྱང༌། །ཐུར་དུ་སེལ་བའི་རླུང་འཁྲུགས་ཏེ། །བཤང་བས་བད་མཁྲིས་བཀག་ནས་ནི། །ལྟོ་བར་དམུ་རྫིང་ཆགས་པར་བྱེད། །དེས་ནི་ཚ་སྐོམ་རིམས་སྦྲིད་འབྱུང༌། །ལུད་པ་དབུགས་མི་བདེ་བརླ་ན། །ཀླད་སྙིང་ལྟེ་བ་གཞང་ཁ་ན། །དྲི་མ་འགགས་སློན་ཡི་ག་འཆུས། །ལྟོ་བར་རླུང་ནི་འཁྱིམས་པར་བྱེད། །
བརྟན་ཞིང་རྩ་ནི་སྔོ་ལ་སྨུག །རྩ་རིས་སྣང་བའམ་མི་སྣང་འགྱུར། །ཕལ་ཆེར་ལྟེ་བའི་འོག་ཏུ་ནི། །བ་ལང་མཇུག་འདྲ་འབྱུང་བར་འགྱུར། །རུས་སྩོགས་ཟུག་རྔུར་བཅས་པའི་ཟས། །ཟོས་སམ་ཤིན་ཏུ་དྲག་ཟོས་པ། །རྒྱུ་མ་རྡོལ་ལམ་གས་གྱུར་ནས། །བུ་ག་དེ་ནས་མ་ཞུ་བར། །ཕྱིར་འཛག་བཤང་ལམ་ལས་འབྱུང་ཞིང༌། །བཤང་བཅས་ཉུང་ཤས་ནི། །ཤ་རུལ་ལྟ་བུར་མནམ་པ་ནི། །སྤྱིན་བག་དམར་སེར་འབྱུང་བར་འགྱུར། །ལྷག་མ་ཡིས་ནི་ལྟོ་བ་འགེགས། །དམུ་རྫིང་མི་བཟད་སྐྱེ་བར་འགྱུར། །དེན་ནི་ལྟེ་བ་མན་ཆད་རྒྱས། །ཆུས་གང་ལྟ་བུར་མྱུར་འགྱུར། །ནད་ཀྱིས་ཚུལ་ནི་ཤས་ཆེ་ལྡན། །དབུགས་མི་བདེ་སྐོམ་མགོ་འཁོར་ཁྱབ། །རྒྱུ་རྡེལ་དམུ་རྫི་ཞེས་བཤད་དོ། །གཞན་དག་རྒྱུ་མ་འཛག་ཅེས་ཟེར། །སྣུམ་འཐུངས་ལ་སོགས་བྱས་ནས་ནི། །འཕྲལ་དུ་ཆུ་གྲང་འཐུངས་པའམ། །མེ་དྲོད་བྲི་བའམ་ཧ་ཅང་ནི། །སྐོམ་པས་ཆུ་འཐུང་དྲགས་པའམ། །རླུང་དང་བད་ཀན་འཁྲུགས་ཆུར་འདྲེས། །ཆུ་ཡི་ལམ་ནི་བདག་གྱུར་པས། །དེ་ཉིད་གནས་དེར་འཕེལ་བར་འགྱུར། །དེ་འོག་དམུ་རྫིང་གྱུར་པ་ཡིན། །དེ་ནས་དམུ་རྫིང་དེ་ལས་ནི། །སྐོམ་དད་རྐུབ་ཏུ་ཆུ་འཛག་བཅས། །དབུགས་མི་བདེ་ལུད་ཡི་ག་འཆུས། །སྣ་ཚོགས་མདོག་ལྡན་རྩ་ཡིས་ཁྱབ། །རྐྱལ་པ་ཆུས་གང་རེག་པ་འདྲ། །བསྐྱོད་ན་སྒྲ་གྲག་ལུས་འདར་ལ། །དམ་རྫིང་ཆེན་པོས་ཆ་ཞིང་སྣུམ། །བརྟན་ཞིང་དེ་ནི་ལྟེ་བ་ཟླུམ། །ཐམས་ཅད་ཡལ་བར་བོར་ན་ནི། །ནད་ནི་རང་གནས་ལས་འཕོས་ཏེ། །སྨིན་པས་སླ་ཞིང་ཟག་འགྱུར་བ། །ཚིགས་དང་རྩ་སྒོ་ལས་ཀྱང་འཛག །ཕྱི་ཡི་རྩ་སྒོ་ནས་རྡུལ་འབྱུང༌། འགགས་ནས་ཐད་ཀར་འཁྱིལ་ཞིང་གནས། །ཆུ་དེ་ཉིད་ནི་འཕེལ་འགྱུར་ཞིང༌། །སྦྱིན་བག་གྱུར་ན་དེ་ཚེ་ནི། ལྟོ་བ་ལྕི་ཞིང་སྲ་ལ་ཟླུམ། །བརྡབས་ན་སྒྲ་ནི་མི་འབྱུང་ཞིང༌། །མདོག་འཇམ་རྩ་རིས་མི་སྣང་ལ། །ལྟོ་བ་དང་ནི་རྒྱབ་ཏུ་འགྲོ། །དེ་རྗེས་ཆུ་ཡི་དམུ་རྫིང་སྐྱེ། །ལྟོ་བ་འཕེལ་ཞིང་
དེ་ལས་ལྷག །རྩ་ནུས་གྱུར་པའི་དམུ་ཆུ་ནི། །དམུ་རྫིང་བཤང་པའི་མཚན་ཉིད་ལྡན། །རླུང་དང་མཁྲིས་པ་བད་ཀན་མཆེར། །འདུས་པའི་ཆུ་ཡི་དམུ་རྫིང་རྣམས། །ཕྱི་མ་བཞིན་དུ་གསོ་བ་དཀའ། །གཞན་དག་ཕལ་ཆེར་ཟླ་བྱེད་གསོད། །ཐམས་ཅད་ཆུར་གྱུར་འཆི་ལྟས་ལེའུ། །ལས་བཤད་བླ་བརྣན་ལྡན་པའང་གསོད། །སྐྱེས་ན་དམུ་རྫིང་གྱུར་པ་དག །ཕལ་ཆེར་གསོ་བར་དཀའ་བར་བཤད། །སྟོབས་ལྡན་ཆུར་ནི་མ་གྱུར་ཞིང༌། །གསར་དུ་བྱུང་བ་འབད་པས་གསོ། །ཡན་ལག་བརྒྱད་པའི་སྙིང་པོ་བསྡུས་པ་ལས། ནད་གཞིའི་གནས་ཀྱི་ལེའུ་བཅུ་གཉིས་པའོ།། །།དེ་ནས་སྐྱ་རྦབ་དང་འོར་ནད་དང་མེད་དབལ་གྱི་ནད་གཞི་བཤད་པར་བྱའོ། །ཇི་སྐད་བཤད་པའི་ནད་འཁྲུགས་པས། །མཁྲིས་པ་ལྷ་པར་ལྡང་འགྱུར་ལ། །དེ་ལ་རླུང་ནི་སྟོབས་ཆེ་བས། །སྙིང་ལ་གནས་པའི་མཁྲིས་པ་ནི། །གཏོར་ཏེ་རྩ་ཆེན་བཅུའི་ནང་བཀྲམ། །ལུས་ཀུན་ལ་ནི་ཁྱབ་གྱུར་པས། །བད་ཀན་པགས་པ་ཤ་ཁྲག་ལ། །གནོད་བྱས་བར་དུ་གནས་ནས་ནི། །ཤ་དང་པགས་པ་དེ་དག་ལས། །པགས་མདོག་ཐ་དད་དཀར་བ་དང༌། །སེར་ཞིང་ལྗང་སྔོན་བྱེད་པར་འགྱུར། །དེ་ལས་སྐྱ་བའི་ཤས་ཆེ་བས། །དེ་ཕྱིར་སྐྱ་རྦབ་བ་ནད་ཅེས་བཤད། །ནད་དེས་ལུས་ནི་ལྕི་བ་དང༌། །ལུས་ཟུངས་རྣམས་ནི་ལྷོད་པ་དང༌། །མདངས་ཀྱི་ཡོན་ཏན་ཟད་གྱུར་ཞིང༌། །དེ་ལས་ཁྲག་དང་ཚིལ་ལ་ཆུང་སྟེ། །སྙིང་པོ་མེད་ཅིང་དབང་པོ་ལྷོང༌། །ཡན་ལག་བརྡུངས་པ་སྙམ་བྱེད་ཅིང༌། །སྙིང་ནི་ཟག་པ་སྙམ་དུ་སེམས། །མིག་ཕུགས་སྐྲང་ཞིང་ཉམས་ལ་ན། །མཆིལ་མང་སྐད་གསང་དམའ་བ་དང༌། །ཟས་མི་འདོད་ཅིང་གྲང་མི་བཟོད། །སྤུ་འབྱི་མེ་དྲོད་ཉམས་པ་དང༌། །རོ་སྨད་འབྱིང་ཞིང་རིམས་ཀྱིས་འདེབས། །དབུགས་མི་བདེ་ཞིང་རྣ་སྒྲ་འབོད་།མགོ་འཁོར་དལ་བར་བྱེད་པ་ཡིན། །དེ་ནི་ནད་གཞི་ཐད་ད་འདུས། །ས་ཞག་ཟོས་ལས་རྣམ་ལྔ་འགྱུར། །འདི་ཡི་སྔོན་ཚུལ་སྙིང་འཕར་ཞིང༌། །པགས་པ་རྩུབ་པར་གྱུར་པ་དང༌། །ཡི་
ག་འཆུས་ཤིང་གཅིན་མདོག་སེར། །རྡུལ་མེད་ཁོང་པའི་མེ་དྲོད་ཆུང༌། །ལུས་རྨྱ་ངལ་བར་བྱེད་པ་ཡིན། །དེ་ལ་རླུང་གྱུར་ལུས་ན་ཟུག །རྩ་སེན་མིག་དང་བཤང་གཅི་རྣམས། །མདོག་ནག་རྩུབ་ལ་འདར་བ་དང༌། །སྐྲང་སྦོ་ཁ་ཡིས་རོ་མི་ཚོར། །རྟུག་སྐམ་རྩིབ་ལོགས་ཀླད་པ་ན། །མཁྲིས་ལས་རྩ་དང་སེན་མོ་སྩོགས། །ལྗང་སྔོན་རིམས་འདེབས་མུན་འཐིབས་བྱེད། །སྐོམ་དང་རྡུལ་བརྒྱལ་བསིལ་བ་འདོད། །ལུས་མནམ་ཁ་ནང་ཁ་བ་དང༌། །འཁྲུ་ཞིང་སྒྲེགས་པ་སྐྱུར་ལ་ཚ། །བད་ཀན་རྩ་སྩོགས་དཀར་བ་དང༌། །གློངས་ཤིང་ཁ་ནང་ལན་ཚྭ་བྲོ། །བ་སྤུ་ལྡང་ཞིང་སྐད་འགགས་ལ། །ལུད་པ་ལུ་ཞིང་སློན་པར་བྱེད། །འདུས་གྱུར་མཚན་མ་འདྲེས་བྲང་དཀའ། །ས་ཞག་བསྐ་བས་རླུང་སྐྱེད་ལ། །ཚ་བྲོ་མཁྲིས་པ་མངར་བད་ཀན། །དངས་མ་ལ་སོགས་གནོད་འགྱུར་ཞིང༌། །རྩུབ་པས་ཟས་ཟོས་རྩུབ་གྱུར་ནས། །ཞུ་བས་རྩ་སྦུབས་འགགས་བྱས་ཏེ། །སྔ་མ་བཞིན་དུ་སྐྱ་རྦ་བསྐྱེད། །དེ་ནས་ལྟེ་བ་རྐང་པ་དང༌། །ཁ་དང་ཕོ་མཚན་སྐྲང་པར་བྱེད། །བཤང་བ་སྲིན་བུ་དང་བཅས་འཁྲུ། །བད་ཀན་ཁྲག་དང་བཅས་པ་འབྱུང༌། །གང་ཞིག་སྐྱ་རྦབ་ནད་ཀྱིས་བཏབ། །དེ་ཡིས་མཁྲིས་སྐྱེད་ཟས་ཟོས་པས། །ཁོང་པ་ཡན་ལག་གནས་མཁྲིས་གནས། །བཤང་ཁྲག་བསྲེགས་ཏེ་མིག་སེར་སྐྱེད། །དེས་ནི་མིག་དང་པགས་པ་གདོང༌། །བཤང་གཅི་སེན་མོ་ཁ་དོག་སེར། །ལུས་ཚ་སྐོམ་དང་ཟས་མི་འཇུ། །སྦལ་འདྲ་དབང་པོ་ཉམ་ཆུང་འགྱུར། །དེ་ནི་མཁྲིས་པའི་ཤས་ཆེན། །སྐྱ་རྦབ་ནད་མེད་པར་དེ་འབྱུང༌། །ཡལ་བར་བོར་ན་ཆེར་སྐྲངས་ཏེ། །གསོ་དཀའ་མིག་སེར་འོར་ཐབས་ཡིན། །ཧ་ལི་ས་ནི་ལྗང་ནག་སེར། །རླུང་མཁྲིས་མགོ་འཁོར་སྐོམ་དད་ཆེ། །བུད་མེད་ལ་དགའ་རིམས་ཆུང་འདེབས། །ཁོང་རྨྱ་མེ་དྲོད་ཉམས་སྟོབས་འབྲི། །ཧ་ལི་ས་ཀ་ཁྲག་ངན་འགྱུར། །ཆུ་སེར་ཅན་ཞེས་བྱ་བ་ཡིན། །དེ་རྣམས་ཀྱི་ནི་བླ་བརྣན་སྔར། །འོར་ནད་གཅོ་བོ་ཡིན་པར་བཤད། །དེ་ཕྱིར་དེ་ཉིད་བཤད་པར་བྱའོ། །
རླུང་འཁྲུགས་གྱུར་པས་བད་ཀན་དང༌། །ཁྲག་དང་མཁྲིས་པ་ཕྱི་རོལ་རྩར། །འཕྲོས་བྱས་དེ་ཡང་རྒྱུན་སྲང་འགགས། །པགས་པ་ཤ་ལ་གནས་གྱུར་ཏེ། །འོར་ནད་མཐོང་ཞིང་སྐྲང་པར་བྱེད། །དེ་བས་ཐམས་ཅད་འདུས་གྱུར་བཤད། །རྒྱུ་རྣམས་ཀྱི་ནི་བྱེ་བྲག་ལས། །གཟུགས་དབྱེ་དགུ་ཡི་བདག་ཉིད་ཅན། །ནད་གཞི་ཐ་དད་གཉིས་དང་ཀུན། །སྣད་དང་དུག་གིས་ཕོག་ལས་འབྱུང༌། །ཡང་ན་རང་དང་གློ་བུར་གཉིས། །ཡན་ལག་ཀུན་སྐྲང་ཕྱོགས་གཅིག་གཉིས། །ཁྱབ་དང་མཐོ་དང་མདུད་པ་ཡི། །དབྱིབས་ཀྱི་དབྱེ་བས་གསུམ་དུ་འདོད། །འོར་ནད་ཀྱི་ནི་སྤྱི་ཡི་རྒྱུ། །ནད་ལས་སྐྱེས་པ་ཁྱད་པར་ཉིད། །ནད་ལས་སྨྱུང་སྩོགས་ཀྱིས་ཉམ་ཆུང༌། །མྱུར་དུ་ལྷག་པར་ཟོས་ལས་འབྱུང༌། །དེ་ནས་གཞན་ཡང་ལྕི་བ་དང༌། །སྐྱུར་དང་སྣུམ་བསིལ་ལན་ཚྭ་དང། །ཐལ་སྨན་རྣོན་པོ་ཚ་བ་དང༌། །མྱ་ངན་ཆུ་གཉིད་དྲགས་དང་ཡར། །ས་ཟོས་ཤ་ལྕི་ཤ་སྐམ་དང༌། །མ་ཞུ་ངལ་དང་བུད་མེད་དྲགས། །རྐང་གིས་ལམ་དུ་འགྲོ་བ་འམ། །བཞོན་པས་དྲག་ཏུ་བསྐྱོད་འགྱུར་ཡིན། །ལུད་པ་དབུགས་མི་བདེ་ཚད་འཁྲུ། །གཞང་འབྲུམ་ལྟོ་བའི་ནད་དང་ནི། །མངལ་ནས་ཁྲག་ཟག་རིམས་ཀྱིས་བཏབ། །གསུད་དང་ཆུ་སེར་སློན་ཉེས་དང༌། །སྦྲུམ་མ་དང་ནི་མེ་དབལ་གྱི། །ནད་དང་སྐྱ་རྦབ་དག་གིས་བཏབ། །གཞན་ཡང་ལོག་པར་གསོས་གྱུར་པའི། །ནད་དེ་བྲང་དུ་གནས་ན་ནི། །སྟོད་སྐྲང་ཆུ་སོར་གནས་སྨད་སྐྲང༌། །དབུས་ན་གནས་པ་རབ་ཏུ་སྐྲང༌། །ཡན་ལག་ཀུན་ཁྱབ་ཐམས་ཅད་སྐྱང༌། །ཉིད་ལག་ལ་བརྟན་དེ་སྐྲང་བྱེད། །དེ་ཡི་སྔོན་ཚུལ་རྩ་རྣམས་ཚ། །ཡན་ལག་སྙོམ་པར་བྱེད་པ་ཡིན། །རླུང་ལས་སྐྲང་པ་འཕོ་ཞང་རྩུབ། །སྤུ་རྩུབ་སྨུག་ཅིང་གནག་པ་དང༌། །པགས་འཁུམས་འདར་བརྩེ་རིག་ན་ན། །ན་ཞིང་ཟུག་པ་བེམ་བེམ་པོ། །མྱུར་བར་ལྡང་ཞིང་མྱུར་དུ་ཞི། །སྐྲངས་པ་མནན་ན་དམའ་བར་འགྱུར། །སྣུམ་དང་དྲོ་པས་མཉེས་ན་ཞི། །
མཚན་མོ་ཆུང་ཞིང་ཉིན་མོ་ཆེ། །པགས་པ་ཡུངས་ཀར་ལྡེ་གུ་ཡིས། །བསྐུས་ལྟར་ཚ་བ་ཙག་ཙག་བྱེད། །མཁྲིས་པ་རྩ་སེར་དམར་ལ་གནག །སྤུ་ནི་དམར་སེར་གྱུར་པ་དང༌། །མྱུར་དུ་ལྡང་དང་ཞི་མི་འགྱུར། །དང་པོར་དབུས་སུ་བྱུང་དང་སྲབ། །སྐོམ་བཅས་ཚ་ཞིང་རིམས་འདེབས་རྡུལ། །མནམ་ཞིང་འདྲུལ་ལ་སྣུམ་མགོ་འཁོར། །བསིལ་བར་འདོད་ཅིང་ཐུར་དུ་འཁྲུ། །དྲི་མནམ་རེག་ན་མི་བཟོད་འཇམ། །བད་ཀན་གཡའ་སྤུ་པགས་པ་དཀར། །མཁྲང་ཞིང་བསིལ་ལ་ལྕི་བ་དང༌། །སྣུམ་ཞིང་འཇམ་ལ་བརྟེན་ཞིང་འཐས། །གཉིད་ཆེ་སློན་ཞིང་མེ་དྲོད་ཉམས། །མནན་ན་མི་འབྱིང་ལྡང་དཀའ་ཞིང༌། །ཞི་དཀའ་མཚན་མོ་སྐྲངས་ཚབས་ཆེ། །འོད་མ་གཙགས་བུ་སྩོགས་དྲ་ལ་ཡང༌། །ཁྲག་མི་འབྱུང་བར་སྤྱིན་བག་འཛག །དྲོ་དང་རེག་པ་ལ་མངོན་དགའ། །གཉིས་འབྱུང་གསུམ་པོ་རང་ཇི་བཞིན། །རྒྱུ་དང་མཚན་མ་འདྲེན་མ་ཡིན། །འདུས་པ་ཀུན་གྱི་བདག་ཉིད་ཅན། །མཚོན་ལས་སྩོགས་པས་ནད་གྱུར་ཞིང༌། །བཅད་དམ་དབྲལ་ལམ་སྨས་ལ་སྩོགས། །ཁ་བ་མེ་དང་རྒྱ་མཚོའི་རླུང༌། །བསེ་རྩི་ཀ་པི་ཀ་ཆུ་ཡི། །ཁུ་བ་གྲ་མ་སྩོགས་རེག་པས། །སྐྲང་པ་མཆེད་པར་འགྱུར་བ་ཡིན། །ཤིན་ཏུ་ཚ་ཞིང་དམར་བར་སྣང༌། །ཕལ་ཆེར་མཁྲིས་པའི་མཚན་ཉིད་ཅན། །དུག་སྐྱེས་སྲོག་ཆགས་དུག་ཅན་ནི། །ལུས་ལ་སོད་དང་གཅིན་གྱིས་ཕོག །སྲོག་ཆགས་དུག་མེད་པ་ཡི་ཡང༌། །སོ་དང་མཆེ་བ་སེན་མོས་ཟུག །གཅིན་རྟུག་ཁུ་བས་སྨོས་པ་དང༌། དྲི་མ་ཅན་གྱི་གོས་ཀྱིས་རེག །དུག་ཤིང་རླུང་ལ་རག་པ་དང༌། དབྱིག་དུག་ཕྱེ་མས་རེག་ལས་བྱུང༌། མཉེན་ཞིང་གཡོ་ལ་འཕྱང་བ་དང༌། །མྱུར་གསོད་ཚ་ཞིང་ན་བར་བྱེད། །འོར་ནད་གསར་བྱུང་བླ་བླ་བརྣན་མེད། །གསོ་སླ་གསོ་དཀའ་སྔར་བཤད་ཟིན། །མེ་དཔལ་ནད་དང་སྣད་པའི་བར། །གནོད་པ་འོར་ནད་མཚུངས་པ་ཡིན། །དེ་ནི་ཕྱི་ནང་གཉི་ག་སྟེ། །
གསུམ་ན་གནས་པ་ཡིན་པར་བཤད། ཕྱི་མ་བཞིན་དུ་གསོ་བར་དཀའ། །དེ་ལ་ནད་ནི་ཇི་བཞིན་དུ། །འཁྲུགས་པའི་རྒྱུ་ཡིས་ལྡང་གྱུར་ལ། །ཁྱད་པར་དུ་ནི་ཚ་བ་ཡིས། །ལུས་ལ་མྱུར་དུ་མཆེད་པར་བྱེད། །དེ་ཡང་ནང་གནས་ནང་དུ་མཆེད། །ཕྱིར་གནས་ཕྱིར་མཆེད་གཉི་གར་གནས། །གཉི་གར་མཆེད་པར་བྱེད་པ་ཡིན། །དེ་ལ་ནང་ན་གནས་པ་ནི། །གནད་རྣམས་ཚ་གདུང་མྱོས་པར་བྱེད། །བུ་ག་རྣམས་ལ་གནོད་པ་དང༌། སྐོམ་དང་རབ་ཆེ་གཅིན་ནད་སྩོགས། །མི་སྙོམས་པར་ནི་འབྱུང་བ་དང། །མེ་དྲོད་མྱུར་ཉམས་ལས་ཤེས་བྱ། །ཕྱི་རོལ་དེ་ལས་བཟློག་པ་ཡིན། །དེ་ལ་རླུང་གྱུར་མེ་དབལ་ནི། །རླུང་གི་རིམས་དང་ནང་ཐབས་འདྲ། །སྐྲང་ཞིང་འགུལ་ལ་ཟུག་པ་དང༌། །ཡན་ལག་སྙོམ་ཞིང་བ་སྤུ་བརྩེ། །མཁྲིས་གྱུར་མྱུར་དུ་མཆེད་ཅིང་འགྲོ། །མཁྲིས་རིམས་རྟགས་ལྡན་ཤིན་ཏུ་དམར། །བད་ཀན་ལས་གཡའ་རིག་ན་འཇམ། །བད་ཀན་ལས་བྱུང་རིམས་འདར་ན། །མེ་དབལ་སྩོགས་ཀུན་ཡལ་པར་བོར། །རང་གི་ནད་ཚུལ་བསགས་གྱུར་ན། །དེ་ནི་སྨིན་རྡོལ་རང་རང་གི །མེ་དབལ་རྨ་ཡི་མཚན་ཉིད་འཛིན། །རླུང་མཁྲིས་ལ་ནི་རིམས་འདེབས་སློན། །བརྒྱལ་ཞིང་ཚད་འཁྲུ་སྐོམ་མགོ་འཁོར། །རུས་ཚིགས་ཆག་སྙམ་མེ་དྲོད་ཉམས། །མུན་ཞུགས་སྙམ་སེམས་ཡི་ག་འཆུས། །ཡན་ལག་ཐམས་ཅད་མེ་མདག་ནི། །འབར་པས་ཁྱབ་པ་ལྟ་བུར་ཚ། །ཕྱོགས་ནི་གང་དང་གང་དུ་མཆེད། །ཁྱབ་པས་ཡན་ལག་དེ་དང་དེ། །མེ་མདག་ཞི་བ་ལྟར་གནག་པའམ། །སྔོན་བའམ་དམར་བས་ཁྱབ་བྱེད་ལ། །མེས་བསྲེགས་ལྟ་བུར་ཆུ་བུར་འབྱུང༌། །མྱུར་དུ་མཆེད་ཅིང་ཁྱབ་པར་བྱེད། །གནད་ཀྱི་རྗེས་འཇུག་མེད་དབལ་ནི། །དེ་ནས་སྟོབས་རབ་སྐྱེས་པའི་རླུང༌། །ཡན་ལག་ན་ཞིང་དྲན་པ་སྟོར། །གཉིད་ཡར་དབུགས་ཀྱི་རྔམ་པ་དྲག །སྐྱིགས་བུས་འདེབས་ཤིང་འདི་ལྟ་བུའོ། །གནས་སྐབས་དེས་ནི་ཐོབ་པར་འགྱུར། །
ས་དང་མལ་ཁྲི་སྟན་སྩོགས་ལ། །གང་དུ་འང་བདེ་བ་མི་འཐོབ་ཅིང༌། །འགྲེ་ཞིང་སྡུག་བསྔལ་མྱོང་བ་དང༌། །ལུས་སེམས་ངལ་ལས་བྱུང་བ་ཡིས། །གཉིད་ཀྱི་རྨོངས་བག་སད་དགའ་བ། །དེ་ནི་མེ་འདྲའི་མེ་དཔལ་ཡིན། །བད་ཀན་གྱིས་ནི་བཀག་པའི་རླུང༌། །བད་ཀན་དེ་རྡོལ་མང་དུ་ཕྱེ། །ཁྲག་འཕེལ་བ་ཡིས་ཁྲག་བརྟོལ་ཏེ། །པགས་པ་ཆུ་བཤལ་གནས། །གནོད་བྱས་ཐོར་བུ་ཕྲ་ཞིང་རིམ། །ཟླུམ་ཞིང་སྦོམ་ལ་སྲ་བ་ཡི། །མཛེར་པའི་ཕྲེང་བ་ཆགས་བྱེད་ཅིང༌། །མདོག་དམར་རབ་ན་རིམས་ཀྱིས་འདེབས་ལུད་པ་དབུགས་མི་བདེ་ཚད་འཁྲུ། །ཁ་སྐམ་སྐྱིགས་བུ་སློན་མགོ་འཁོར། །རྨོངས་བག་མདོག་ཉམས་བརྒྱལ་དང་ལུས། །ཡན་ལག་ན་ཞིང་མེ་དྲོད་ཉམས། །དེ་ལྟར་མཛེར་པའི་མེ་དབལ་ནི། །བད་ཀན་རླུང་འཁྲུགས་ལས་གྱུར་ཡིན། །བད་ཀན་མཁྲིས་ལས་རིམས་འདེབས་རེངས། །གཉིད་ཆེ་སློན་བག་ཀླད་པ་ན། །ཡན་ལག་ན་ཞིང་བྱ་རྨྱང་འདོད། །བླ་ཞིང་མགོ་འཁོར་ཡི་ག་འཆུས། །རྩུབ་ཅིང་དྲོད་ཉམས་རུས་ཆག་སྙམ། །སྐོམ་ཞིང་དབང་པོ་མི་གསལ་ལྕི། །བེ་སྣབས་འཁྲུ་ཞིང་དང་ག་འཁྱིལ། །དེ་ནི་རྩ་སྦུབས་རྣམས་སུ་འགྲོ། །ཕལ་ཆེར་མ་ཞུ་གནས་ན་ཞུགས། །ཕྱོགས་གཅིག་ཏུ་ནི་རབ་མིན། །ཐོར་བུ་སེར་པོ་དམར་པོ་དང༌། །དཀར་པོས་ཕྱོགས་ཀུན་གང་བར་བྱེད། །ནོར་བུ་ལྟར་སྣང་གནག་ཅིང་སྣུམ། །དྲི་མ་ཅན་ལ་སྐྲང་ཞིང་ལྕི། །རྣག་པའི་ཟབས་ཆེ་རབ་ཏུ་ཚ། །རེག་ན་འཇིག་ཅིང་རྣག་པ་དང༌། །འདམ་ལྟར་ཤིན་ཞིག་གྱུར་ཅིང༌། །རྩ་རྒྱུས་གསལ་བར་སྣང་བ་ཡིན། །མི་ཡི་རོ་ལྟར་མནམ་མེ་དཔལ། །དེ་ནི་འདམ་འདྲ་ཞེས་བྱ་བཤད། །ཀུན་སྐྱེས་མཚན་ཉིད་ཀུན་དང་ལྡན། །ལུས་ཟུངས་ཀུན་ལ་རབ་ཁྱབ་བྱེད། །ཕྱི་ཡི་རྒྱུ་ཡི་སྨས་ལས་འཁྲུགས། །ཁྲག་བཅས་མཁྲིས་པ་སྐྱེད་བྱེད་དེ། །མེ་དཔལ་དུ་ནི་རླུང་གིས་བྱེད། །རྒྱ་སྲན་ཀུ་ལངྠ་འདྲ་བའི། །འབྲུམ་བུས་ཁྱབ་སྐྲང་རིམས་འདེབས་ན། །ཤིན་ཏུ་ཚ་ལ་དམར་ཞིང་སྡོ། །ནད་དམིགས་ཐ་དད་ལས་གྱུར་གསུམ། །གཉིས་གྱུར་བླ་བརྣན་མེད་གསོ་སླ། །རྨ་དང་འདུས་པ་ལས་
འབྱུང་དང༌། །ཐམས་ཅད་གནད་ནི་ཁྱབ་པ་དང༌། །རྩ་དང་ཆུ་བ་ཤ་འདྲུལ་དང༌། །མི་རོའི་དྲི་འདྲ་རུལ་གསོ་དཀའ། །ཡན་ལག་བརྒྱད་པའི་སྙིང་པོ་བསྡུས་པ་ལས། ནད་གཞིའི་གནས་ཀྱི་ལེའུ་བཅུ་གསུམ་པའོ།། །།དེ་ནས་མཛེ་ནང་དང་ཤ་བཀྲ་དང་གཟི་གུ་དང་སྲིན་བུའི་ནད་གཞི་བཤད་པར་བྱའོ། །ཁ་ཟས་སྤྱོད་ལམ་ལོག་པ་དང༌། ཁྱད་པར་དུ་ནི་མི་འཕྲོད་བསྟེན། །དམ་པ་སྨོད་དང་སྲོག་གཅོད་དང༌། གཞན་གྱི་ནོར་འཕྲོག་སྩོགས་བསྟེན་དང༌། སྡིག་པའི་ལས་བི་འཕྲལ་བྱས་དང༌། །སྔོན་ཆད་བྱས་པས་ནད་བསླངས་ནས། །རྩ་ལ་ཐད་ཀར་གྲམ་ནས་ནི། །ཤ་དང་པགས་པ་ཆུ་སེར་ཁྲག །གནོད་བྱས་སླ་བར་གྱུར་ནས་ནི། །དེ་ནས་ཕྱིར་ནི་འབྱུང་འགྱུར་ཏེ། །པགས་པའི་མདོག་ནི་མི་སྡུག་བྱེད། །མི་བཟད་དེ་ནི་མཛེ་རུ་བཤད། །གང་ཕྱིར་དུས་ལས་ཡལ་བར་བོར། །དེ་ནི་ལུས་ཀུན་མ་རུངས་འགྱུར། །ལུས་ཟུངས་ལ་ཞུགས་ནང་དུ་ཁྱབ། །ཐམས་ཅད་འདྲུལ་བར་བྱེད་པར་འགྱུར། །རྡུལ་བཅས་རུལ་ཞིང་མནམ་པ་དང༌། །སྲིན་བུ་ཕྲ་མོ་མི་བཟད་སྐྱེད། །སྤུ་ལྤགས་ཆུ་བ་རྩ་ཆེན་དང༌། །རུས་པ་སྙི་བ་རིམ་བཞིན་ཟ། །དེ་བས་ཤ་བཀྲ་ཕྱི་རོལ་ཏེ། །མཛེ་ལས་གཞན་ནི་ཡིན་པར་བཤད། །ནད་གཞི་ཐ་དད་འདྲེས་པ་དང༌། །འདུས་གྱུར་མཛེ་ནད་རྣམ་པ་བདུན། །ཀུན་ཀྱང་ཉེས་གསུམ་ལས་བྱུང་ཡང༌། །དེ་ལས་ལྷག་པ་ལས་མིང་འདོགས། །རླུང་གི་མཛེ་ནི་ཐོད་པ་འདྲ། །མཁྲིས་གྱུར་ཨུ་དུམ་བཱ་ར་སྟེ། །བད་ཀན་ལས་གྱུར་ཟླུམ་གླང་ཤུ། །རླུང་མཁྲིས་ལས་སྐྱེས་རི་ཤྱའི་ལྕེ། །བད་རླུང་ལས་བྱུང་པགས་པ་གཅིག །འབྲུམ་ཕྲན་དང་ནི་ཤ་བ་ཀྲ་དང༌། །འབྲས་བྱེར་ཆུ་སེར་ཞིག་པོའོ། །བད་ཀན་མཁྲིས་པ་ལས་བྱུང་བ། །ཤུ་བ་རྨ་ཁ་བརྒྱ་པ་དང༌། །པདྨ་དཀར་པོ་འབྲུམ་བུར་བཅས། །གཡན་པ་པགས་པ་མྱགས་པའོ། །འདུས་པ་ལས་གྱུར་འོལ་མ་སེ། །དང་པོའི་གསུམ་དང་ཤུ་བ་དང༌། །འོལ་མ་སེ་དང་པདྨ་དཀར། །རི་ཤྱའི་ལྕེ་ཞེས་བྱ་བ་སྟེ། །འདི་བདུན་མཛེ་ནད་ཆེན་པོ་ཡིན། །མཛེ་ནད་སྔར་བྱུང་མཚན་མ་ནི། །ཤིན་ཏུ་འཇམ་པའམ་རེག་ན་
རྩུབ། །རྡུལ་འབྱུང་མི་འབྱུང་མདོག་མི་སྡུག །ལུས་ཚ་གཡའ་ཞིང་པགས་ཚོར་མེད། །ཐོར་བུ་ཕྲའུ་མཐོ་བ་དང༌། །རྨ་ནི་ལྷག་པར་གཟེར་བ་དང༌། །མྱུར་དུ་འབྱུང་ཞིང་རིང་དུ་གནས། །འཚོ་བས་པ་དག་ཀྱང་རྩུབ་པར་འགྱུར། རྒྱུ་ཆུང་གིས་ཀྱང་ནད་ཆེར་ལྡང༌། །བ་སྦུ་བརྩེ་ཞིང་ཁྲག་མདོག་གནག །ཐོད་པ་ལྟ་བུ་གནག་ཅིང་སྨུག །རྩུབ་སྲ་ཚོར་བ་ཆུང་ལ་སྲབ། །ཁྱབ་ཅིང་མཐའ་མ་མི་མཉམ་ལ། །བ་སྤུ་ལངས་པས་ཁྱབ་པར་བྱེད། །ཤིན་ཏུ་ཟུག་ཅིང་གཡའ་བ་ཆུང༌། མྱུར་དུ་ཁྱབ་བྱེད་ཐོད་པ་འདྲ། །ཨུ་དུམ་བཱ་ར་སྨིན་པ་ལྟར། །པགས་སྤུ་སྨུག་རྩ་དཀར་བས་ཁྱབ། །ཤས་ཆེར་མཐུག་དང་ཤས་ཆེར་འདྲུལ། །ཚ་བའི་ནད་དང་ཁྲག་ཤས་ཆེར། །མྱུར་དུ་སྨིན་ཅིང་འདྲུལ་བར་བྱེད། །འབུ་ཅན་ཨུ་དུམ་བཱ་ར་ཡིན། །བརྟན་ཞིང་འཐས་ལ་ལྕི་ཞིང་འཇམ། །དཀར་དམར་མྱུར་དུ་མི་མཆེད་ལ། །ཕན་ཚུན་འདབ་འབྲེལ་ཤུ་བ་སློན། །གཡའ་ཞིང་རྣག་ཆེ་འབུས་གང་ལ། །མཐའ་མ་འཇམ་ཞིང་སེར་པོར་སྣང༌། །གོར་གོར་པོར་གནས་ཟླུམ་པོ་ཡིན། །གཡའ་ཞིང་ཕྲ་ཙག་གནག་པ་དང༌། །ཆུ་སེར་མང་བ་གླང་ཤུ་ཡིན། །རྩུབ་ཅིང་སྲབ་ལ་མཐའ་མ་དམར། །ནང་ན་གནག་ཅིང་མཐོ་བ་དང༌། །ཟུག་ཅིང་ཚ་ལ་ན་ཞིང་རྣགས། །འབྲུམ་བུ་རྩུབ་པོས་ཁྱབ་པ་དང༌། །རི་ཤྱའི་ལྕེ་ནི་དབྱིབས་འདྲ་པ། །འབུ་མང་རི་ཤྱའི་ལྕེ་འདྲར་བཤད། །གླང་པོའི་ལྤགས་འདྲ་རེག་རྩུབ་ལྤགས། །གཅིག་པུར་བཤད་ལ་གཞི་ཆེ་བ། །རྡུལ་མི་འབྱུང་ཞིང་ཉ་ལྤགས་འདྲ། །འབྲུམ་བུ་ཕྲ་མོ་ཐུག་ཐུག་པོ། །རེག་ན་རྩུབ་དང་ལྡན་པ་དང༌། །གཡའ་ཞིང་སྲ་ལ་གནག་པ་ཡིན། །ཤ་བཀྲ་ནང་རྩུབ་ཕྱི་རོལ་འཇམ། །ཕྲུགས་ན་གློག་པ་འབྱུང་བ་དང༌། །རེག་ན་འཇམ་ཞིང་སྲབ་པ་ལ། ཀུ་བའི་མེ་ཏོག་ལྟར་དམར་དཀར། །ཕལ་ཆེར་རོ་སྟོད་དག་ཏུ་འབྱུང༌། །རྨེན་བུ་དམར་པོ་གཡའ་དང་ལྡན། །ཁྱབ་པར་བྱེད་པའི་འབྲས་ཞེས་བྱ། །
རྐང་པ་ལག་པ་གས་པ་དང༌། །མི་བཟད་ན་ཞིང་གཡའ་ཚབས་ཆུང༌། །རྐང་ལག་ཞིག་པ་ཞེས་བྱའོ། །ཐོར་བུ་དམར་པོས་ཁྱབ་པ་དང༌། རིང་དུ་མཆེད་ཅིང་དཱུར་བ་འདྲ། །པགས་པ་ཟར་མའི་མེ་ཏོག་འདྲ། །གཡའ་ཞིང་བརྟན་པར་གནས་པ་དང༌། །ཟླུམ་པོར་བྱུང་བ་ཤུ་བ་ཡིན། །རྩ་བ་སྦོམ་ཞིང་ཚ་བཅས་ན། །དམར་ཞིང་སྨུག་ལ་རྨ་ཁ་མང༌། །རྣག་ཅིང་འབུ་མང་ཁ་བརྒྱ་པ། །ཕལ་ཆེར་ཀུན་ཏུ་སྐྱེ་བ་ཡིན། །མཐའ་མ་དམར་ཞིང་དབུས་ན་དཀར། །གཡའ་ཚ་ན་དང་བཅས་པ་དང༌། །མཐོ་ཞིང་རི་མོ་བརྟན་པས་ཁྱབ། །པདྨའི་འདབ་མ་ལྟར་རྒྱས་ཤིང༌། །སྟུག་ཅིང་ཆུ་སེར་ཁྲག་མང་ལ། །ཕལ་ཆེར་མྱུར་རྡོལ་པད་དཀར་ཡིན། །པགས་པ་སྲབ་པའི་འབྲུམ་བུ་དཀར། །དམར་བས་གང་བ་འབྲུམ་བུ་ཡིན། གཡའ་བའི་ནད་ནི་གཡའ་བ་དང༌། །འདྲུལ་ཞིང་ལྷག་པར་ན་བ་དང༌། །འབྲུམ་པ་ཕྲ་ནག་མང་པོ་ནི། །ཕལ་ཆེར་རྐུབ་ལག་གྲུ་མོར་འབྱུང༌། །ཐོར་བུ་བཅས་ཤིང་རེག་མི་བཟོད། །གཡའ་ཞིང་དྲོ་ཚ་ན་དང་བཅས། །དམར་ལ་པགས་བ་མྱགས་པ་ཡིན། །འོལ་མ་སེ་ནི་རབ་ཚ་ན། །སྟོད་ནི་དམར་ཞིང་གནག་བ་སྟེ། །འོལ་མ་སེ་ཡི་འབྲས་བུ་འདྲ། །མཛེ་ཡི་མཚན་མ་ཀུན་དང་ལྡན། །དེ་བས་ཁ་དོག་དུ་མར་འགྱུར། །མཛེ་ནད་ནད་གཞི་ཤས་ཆེ་བ། །ནད་དབྱེ་ཤེས་ལས་བཤད་པ་ཡི། །མཚན་མ་ལས་ཀྱིས་བསྟན་པ་ཡི། །ནད་ཀུན་རྒྱས་པ་ལས་བྱུང་དང༌། །གང་ཡང་འཆི་ལྟས་ལས་བཤད་དང༌། །རུས་རྐང་ཁུ་ཆུ་ལ་གནས་སྤང༌། །ཚིལ་ལ་གནས་པ་འཚོར་བཙམ། །མཁྲིས་འདྲེས་ཤ་ཁྲག་གནས་གསོ་དཀའ། །རླུང་དང་བད་ཀན་ལས་གྱུར་དང༌། །པགས་གནས་ནད་གཅིག་གྱུར་གསོ་སླ། །དེ་ལ་པགས་པར་གནས་པའི་མཛེ། །ཟུག་ཅིང་རྩུབ་ལ་མདོག་མི་སྡུག །ཁྲག་གནས་རྡུལ་འབྱུང་གཉིད་ཆེ་སྐྲང༌། །ཤ་ལ་གནས་པ་རྐང་བ་དང༌། །ལག་པར་འབྲུམ་བུ་འབྱུང་བ་དང༌། །ཚིགས་གནས་ལྷག་པར་ཚིགས་འདྲུལ་སྐེམ། །རྐང་བ་འཇས་
འགྱུར་ཚིལ་གནས་པ། །ཡན་ལག་ཞིག་པར་བྱེད་པར་འགྱུར། །རུས་བ་རྐང་གནས་སྣ་ཞོམ་ཞིང༌། །མིག་དམར་སྐད་ནི་འགགས་པ་དང༌། །རྨ་ལ་འབུ་ཞུགས་ཁུ་བར་གནས། །བུ་དང་ཆུང་མར་བཅས་ལ་འབྱུང༌། །ཁྲག་སྩོགས་ལ་ནི་རིམ་བཞིན་དུ། །མཚན་མ་ཐམས་ཅད་འབྱུང་བར་འགྱུར། །གཟི་གུ་མཛེ་དང་གཅིག་ལས་འབྱུང༌། །དེ་ནི་ཤ་བཀྲ་ཆུ་དང་ནི། །ཡོངས་སུ་འཛག་པ་ཞེས་བྱར་བཤད། །ནད་གཞི་གསུམ་ལ་བརྟེན་ཞིང་འབྱུང༌། །རླུང་ལས་རྩུབ་ཅིང་སྨུག་པ་ཡིན། །མཁྲིས་གྱུར་པདྨའི་འདབ་ལྟར་དམར། །ཚ་ཞིང་བ་སྤུ་འབྱི་བར་བྱེད། །བད་ཀན་ལས་སྐྱ་སྟུག་ཅིང་ལྕི། །གཡའ་བཅས་རིམ་བཞིན་ཁྲག་ཆུ་དང་ནི། །ཤ་དང་ཚིལ་ལ་བརྟེན་པར་བཤད། །འདི་དག་མདོག་ནི་གཉི་ག་ཡིན། །དེ་ནི་ཕྱི་མ་བཞིན་གསོ་དཀའ། །སྤུ་དཀར་མ་ཡིན་སྲབ་པ་དང༌། །ཕན་ཚུན་མ་འདྲེས་གསར་དུ་བྱུང༌། །མེས་མ་བསྲེགས་པ་གསོ་བར་སླ། །དེ་ལས་གཞན་པ་གསོ་དཀའ་ཡིན། །མདོམས་དང་ལག་མཐིལ་མཆུར་བྱུང་བ། །གསར་དུ་བྱུང་ཡང་གསོ་བར་དཀའ། །ནད་རྣམས་ཕལ་ཆེར་ཟས་དང་ནི། །མལ་གཅིག་རེག་སྩོགས་ལ་བརྟེན་ལས། །ཐམས་ཅད་འགོ་སྟེ་མིག་ནད་དང༌། །མཛེ་ནད་ལྷག་པར་འགོས་པ་ཡིན། །ཤ་བཀྲ་གཟི་གུའི་ནད་བཤད་ནས། །ད་ནི་སྲིན་བུའི་ནད་བཤད་བྱ། །ཕྱི་དང་ནང་གི་དབྱེ་བ་ཡིས། །སྲིན་བུ་རྣམ་པ་གཉིས་སུ་བཤད། །ཕྱི་ཡི་དྲི་མས་བད་ཀན་ཁྲག །བཤང་སྐྱེས་དབྱེ་བས་རྣམ་བཞི་ཡིན། །མིང་ལས་རྣམ་པ་ཉི་ཤུར་འགྱུར། །དེ་ལ་ཕྱི་ཡི་ཁྲག་ལས་བྱུང༌། །ཚད་དབྱིབས་མདོག་ནི་ཏིལ་འབྲུ་འདྲ། །སྐྲ་དང་གོས་ལ་བརྟེན་པ་ཡིན། །ཕྲ་ཞིང་རྐང་པ་མང་ལ་མིང༌། །ཤིག་དང་སྲོ་མ་ཞེས་བྱའོ། གཉི་གས་ཐོར་བུ་འབྲུམ་བུ་དང༌། །གཡན་པ་དག་ནི་སྐྱེད་པར་འགྱུར། །ནང་གི་མཛེ་དང་རྒྱུ་གཅིག་སྟེ། །དེ་ལས་བད་ཀན་ལས་མང་སྐྱེ། །ཟས་མངར་བུ་རམ་འོ་མ་དང༌། །ཚ་དང་འབྲས་སར་ཆན་ལ་དགའ། །མི་གཙང་བྱུང་བཅས་བཤང་
ལམ་ནས། །ལོག་འདབ་མལ་སྩོགས་དགའ། །བད་ཀན་མ་ཞུའི་གནས་སུ་འབྱུང༌། །སྐྱེས་ནས་ཀུན་དུ་འགྲོ་བ་ཡིན། །ལ་ལ་འབྲེང་བ་འདྲ་བ་ཡི་ན། །ལ་ལ་སྲིན་བུ་ཁོ་ལ་མ་འདྲ། །ཁ་ཅིག་མྱུ་གུ་འབུས་པ་འདྲ། །ཕྲ་ཞིང་རིང་ལ་ཆུང་བ་དང། །དཀར་ཞིང་དམར་བར་སྣང་བ་ཡིན། །དེ་ཡི་མིང་ནི་རྣམ་བདུན་ཏེ། །རྒྱུ་མ་ཟད་དང་ལྟོ་ནང་འཁྱིལ། །སྙིང་ཟ་ཡ་མཚན་ཆེན་པོ་དང༌། །མི་མངོན་རྒྱུ་དང་འཇག་མ་འདྲ། །དྲི་ཞི་མ་ཞེས་བྱ་དེ་རྣམས་ནི། །སྙིང་འཕར་ཁ་ཆུ་འཛག་པ་དང༌། །ཟས་མི་འཇུ་ཞིང་ཡི་ག་འཆས། །བརྒྱལ་ཞིང་མི་དྲན་རིམས་འདེབས་སློན། །སྐོམ་ཞིང་སྦྲིད་པ་ཆམ་པས་འདེ་པས། །ཁྲག་རྒྱུ་བ་ཡི་རྩ་ནད་ནས། །ཁྲག་ལས་བྱུང་བའི་སྲིན་བུ་ཕྲ། །ཟླུམ་ཞིང་རྐང་མེད་ཟངས་ལྟར་དམར། །ཕྲ་ཞིང་ལ་ལར་བལྟར་མི་སྣང། །སྐྲ་རྩ་ཟ་ཞིང་སྦུ་འབྱི་བྱེད། །སྦུ་གླིང་ཨུ་དུམ་བཱ་ར་འདྲ། །ཞགས་པ་བཅས་དང་ཐོང་ཀ་སྟེ། །དྲུག་པོ་དེ་དག་མཛེ་ལས་གཅིག །ཞུ་བའི་གནས་སུ་མི་གཙང་སྐྱེས། །འཕེལ་ནས་ཐུར་དུ་རྒྱུ་བར་བྱེད། །དེ་ནི་ཆེར་འཕེལ་གྱུར་པ་ན། །གང་ཚེ་མ་ཞུའི་གནས་སུ་ཞུགས། །དེ་ཚེ་སྒྲེགས་པ་དབུགས་འབྱུང་བ། །ཕྱི་ས་ལྟ་བུར་མནམ་པར་འགྱུར། །ཟླུམ་ཞིང་ལུས་ཕྲ་སྦོམ་པོ་དང༌། །སྨུག་དང་སེར་དང་དཀར་དང་གནག །སྲིན་བུ་དེ་མིང་རྣམ་ལྔ་སྟེ། །ཁམ་གྱི་ཟས་དང་དལ་གྱིས་འགྲོ། །མྱོང་བར་བྱེད་དང་བརྐམ་པ་དང༌། །ལུས་ལ་གནོད་བྱེད་ཅེས་བྱའོ། །དེས་འཁྲུ་གཟེར་དང་རྟུག་སྐམ་བྱེད། །སྐེམ་ཞིང་མདོག་ནི་སྐྱ་བ་དང༌། །བ་སྤུ་ལྡང་ཞིང་མེ་དྲོད་ཉམས། །ལྕི་གཡའ་གཞང་ནི་ཕྱིར་འབྱུང་བྱེད། །ཡན་ལག་བརྒྱད་པའི་སྙིང་པོ་བསྡུས་པ་ལས། །ནད་གཞིའི་གནས་ཀྱི་ལེའུ་བཅུ་བཞི་པའོ།། །།དེ་ནས་རླུང་ནད་ཀྱི་ནད་གཞི་བཤད་པར་བྱའོ། །རླུང་ནི་ཕན་དང་གནོད་བྱེད་ལ། །འདི་ནི་སྣ་ཚོགས་རྒྱུ་གཅིག་པུ། །ཁྱད་པར་དུ་ནི་ལུས་ཀྱི་ནི། །
ནད་དང་ནད་མེད་རྒྱུ་གཅིག་པུ། །དེ་ནི་ཀུན་བྱེད་ཀུན་བདག་ཉིད། །སྣ་ཚོགས་གཟུགས་ཅན་སྐྱེ་དགུའི་བདག །འབྱིན་བྱེད་འཛིན་བྱེད་ཁྱབ་འཇུག་གཙོ། །སྡུད་བྱེད་འཆི་བདག་གཤིན་རྗེར་འགྱུར། །དེ་བས་དེ་ལྡང་མི་འདྲ་བར། །རྟག་ཏུ་འབད་པ་ཉིད་དུ་གྱིས། །དེ་ཡིས་ཐ་མལ་གཞན་གྱུར་ལས། །ནད་ཀྱི་བྱེ་བྲག་ཤེས་པར་བཤད། །བསྡུས་དང་རྒྱས་པ་དེའི་མིང་གནས། །རྒྱུ་བའི་ལམ་ནི་རེ་རེ་ལྔ། །ནད་ཚུལ་ཤེས་པར་བཤད་པ་ཡིན། །འདིར་ནི་ནད་ཀྱི་རྣམ་གྱུར་བ། །དེ་ཡི་དབྱེ་བ་ནད་གཞི་དང༌། །མཚན་ཉིད་བཅས་པ་ཉིད་དུ་བཤད། །གྲངས་མེད་ཀྱང་ནི་བརྒྱད་ཅུ་ཡི། །གྲངས་སུ་སྔར་ནི་བཤད་པ་ཡིན། །ལུས་ཟུང་ཟད་བྱེད་བསྟེན་དྲགས་པས། །རླུང་ནི་འཁྲུགས་པར་བྱེད་འགྱུར་ཏེ། །སྦུ་གུ་སྟོང་པར་རྒྱུ་གྱུར་པ། །དེ་ཉིད་ཤིན་ཏུ་འགེངས་བར་བྱེད། །ནད་གཞན་གྱིས་ནི་གང་བ་དེར། །ཁེབས་པས་མཐུ་ཅན་ཉིད་དུ་འགྱུར། །དེ་ལ་ཞུ་བའི་གནས་སུ་ཞུགས། །གཟེར་དང་རྒྱུ་མ་སྒྲ་བཅས་སྦོ། །བཤང་འགགས་རྗེའུ་ནང་གཞང་འབྲུམ་སྐྱེ། །རྒྱབ་དང་རྐེད་པ་མཇུག་མདོར་ན། །རོ་སྨད་ཀྱི་ནི་ཕྱོགས་དེ་རུ། །མི་བཟད་གནོད་པ་དེ་དེ་སྐྱེད། །མ་ཞུའི་གནས་ཞུགས་སྐོམ་དང་སློན། །ལུད་པ་དབུགས་མི་བདེ་གསུད་ནད། །ལྐོག་མ་འགགས་ཤིང་སྒྲེགས་མང་ན། ལྟེ་བ་ཡན་ཆད་སྐྱེད་པར་བྱེད། །རྣ་བ་སྩོགས་ཞུགས་དབང་པོར་གནོད། །པགས་ཞུགས་གས་ཤིང་རྩུབ་པར་བྱེད། །ཁྲག་ཞུགས་གཉིད་སྟུག་མི་བཟད་ན། །ཚ་ཞིང་དམར་ལ་མདོག་མི་སྡུག །ཐོར་འབྱུང་ཁ་ཟས་སྲ་བར་གནས། །ཡི་ག་འཆུས་སྐོམ་མགོ་འཁོར་ན། །ཤ་ཚིལ་ལ་གནས་རྨེན་བུ་དང༌། །རབ་ཏུ་ཟུག་ཅིང་ལུས་རྩུབ་ལ། །ལུས་ལྕི་རབ་ན་རེངས་པ་དང༌། །ཁུ་ཚུར་དབྱིག་པས་ཕོག་སྙམ་བྱེད། །རུས་གནས་བརླ་དང་རུས་ཚིགས་ན། །མི་བཟད་གཟེར་ཞིང་ཉམས་སྟོབས་ཟད། །རྐང་
གནས་རུས་པ་ཁོང་སྟོང་ཞིང༌། །གཉིད་མེད་རྟག་ཏུ་ན་བ་ཡིན། །ཁུ་བར་གནས་པ་མྱུར་འབྱུང་ལ། །འགགས་པའམ་མདོག་འགྱུར་ཉིད་དུ་འགྱུར། །མངལ་གྱི་ཁུ་བར་གནས་དེ་བཞིན། །རྩ་རྣམས་སྟོང་ཞིང་སྦོ་བར་འགྱུར། །ཆུ་བར་གནས་བ་གཟུགས་འཇས་དང༌། །སྒུར་དང་ད་རྒན་ནད་དུ་འགྱུར། །ཚིགས་ལ་ནས་བའི་རླུང་སྐྱུང་པ། །རྐྱལ་བ་རླུང་གིས་གང་རེག་འདྲ། །བརྐྱང་དང་བསྐུམ་པར་བྱེད་པ་ཡིས། །བསྐྱོད་པ་ན་དང་བཅས་པར་འགྱུར། །ཡན་ལག་ཀུན་ལ་བརྟེན་པ་ནི། །ཟུག་ཆག་སྙམ་སེམས་འགུལ་བ་དང༌། །རེངས་དང་ཚོར་བ་མེད་པ་དང༌། །ཚིགས་འཁུམས་འདར་བར་བྱེད་པར་འགྱུར། །གང་ཚེ་རྩ་ཆེན་ཀུན་ལ་གནས། །ཡང་དང་ཡང་དུ་འཁྲུགས་གྱུར་པ། །དེ་ཚེ་ཡན་ལག་ལ་འཇུག་པས། །ནད་ནི་ལུས་ལ་འཇུག་ཅེས་བྱ། །རོ་སྨད་དུ་ནི་འགག་པའི་རླུང༌། །གྱེན་དུ་སོང་སྟེ་སྙིང་གར་གནས། །སྙིང་གའི་སྦུ་གུར་ཞུགས་ནས་ནི། །མགོ་བོ་ཡན་ལག་བཅས་བར་ཟུག །ལུས་ནི་ཀུན་དུ་ཞུགས་གྱུར་ན། །དེ་ནི་གཞུ་ལྟར་སྒུ་བོར་བྱེད། །དབུགས་འབྱིན་དཀའ་ཞིང་མིག་རེངས་ཧར། །ལྷོད་ཅིང་འཛུམས་པར་བྱེད་འགྱུར་ལ། །དེ་ནས་ཕུག་རོན་ལྟ་བུར་འཁུན། །དྲན་པ་མེད་དེ་གཞན་དབང་ཅན། །དེ་ཉིད་ཨ་བ་ཏ་ནར་བཤད། །རླུང་གིས་སྙིང་ནི་བཏང་གྱུར་ན། །སྐད་ཅིག་ཙམ་དུ་བདེ་ལ་རེག །སླར་ཞུགས་ན་ནི་ན་བར་བྱེད། །དེ་ནི་མངལ་འཇིག་ལས་བྱུང་དང༌། །ཁྲག་ནི་ལྷག་བར་འཛག་གྱུར་དང༌། །སྣད་པ་དག་ལས་བྱུང་གྱུར་པ། །ཤིན་ཏུ་གསོ་བར་དཀའ་བར་འགྱུར། །མཇིང་པ་རེངས་པའི་རླུང་ཞུགས་ཤིང༌། །གང་ཚེ་རྩ་ཆེན་ལ་གནས་པ། །ལུས་ཀུན་ཁྱབ་པར་གྱུར་པ་ན། །དེ་ཚེ་ནམ་ཚོང་འགུགས་པར་བྱེད། །ལུས་ནི་གཞུ་ལྟར་ནང་དུ་གུག །མིག་རེངས་ཤུགས་ནི་འབྱིན་པར་བྱེད། །གླལ་འབྱུང་སོ་ནི་འཆའ་བ་དང༌། །བད་ཀན་སྐྱུགས་པར་བྱེད་པར་འགྱུར། །
རྩིབ་ལོགས་ཟུག་ཅིང་ཚིག་མི་འཐོན། །འགྲམ་པ་རྒྱབ་དང་མགོ་བོ་ན། །འདི་ནི་ནང་དུ་གུག་ཅེས་བྱ། །ཕྱི་ཡི་དེ་དང་འདྲ་བ་ལ། །ལུས་ནི་ཕྱིར་དགྱེད་བྱེད་པ་དང༌། །མགོ་བོ་རྒྱབ་ཏུ་འདྲེན་བྱེད་ཅིང༌། །དེ་ལ་བྲང་ནི་ཤིན་ཏུ་འབུར། །གཉའ་བ་བཅོམ་པ་ལྟར་ན་ཞིང༌། །སོ་དང་ཁ་ནི་མདོག་མི་སྡུག །རྡུལ་ཞིང་ལུས་ནི་ལྷོད་པར་བྱེད། །ཕྱིར་དགྱེད་གཞུ་རེངས་ཞེས་བྱ་ཞིང༌། །དེ་ལ་ཤུགས་དྲག་ཅེས་ཀྱང་བཤད། །གནད་ལ་གནས་པའི་རྨར་ཞུགས་ཏེ། །རླུང་གིས་བསྐྱོད་པར་གྱུར་བ་དང༌། །རྐང་པ་ནས་ནི་མགོ་བོའི་བར། །ལུས་ལ་ནད་ཀྱིས་ཁྱབ་བྱེད་པ། །སྐམ་ཞིང་ལུས་ནི་སྐྱ་གྱུར་པ། །རྨ་ཡི་ད་རྒན་དེ་སྤང་བྱ། །ལུས་ལ་འཇུག་པའི་རླུང་ཀུན་ནི། །ཤུགས་དང་བྲལ་ནས་བདེ་བར་འགྱུར། །ལྕེ་ནི་ཐུད་དྲགས་སྐམ་ཟོས་གནོད། །འགྲམ་པའི་རྩ་བར་གནས་རླུང་འཁྲུགས། །འགྲམ་པ་གཉིས་ནི་བསྐྱོད་བྱ་ནས། །ཁ་ནི་གདངས་པར་བྱེད་པའམ། །ཡང་ན་འཛུམས་པར་བྱེད་པར་འགྱུར། །འགྲམ་པ་ཉམས་པར་བྱེད་པ་དེས། །ཟ་དང་སྨྲ་བ་དཀའ་བར་འགྱུར། །སྨྲ་བར་བྱེད་པའི་རྩ་གནས་རླུང༌། །ལྕེ་ནི་ལྡི་བས་པར་བྱེད་འགྱུར་ཞིང༌། །ལྕེ་ལྡིབས་དེས་ནི་བཟའ་བཏུང་དང༌། །སྨྲ་བ་ལ་སོགས་མི་ནུས་འགྱུར། །མགོ་བོས་ཁུར་ནི་ཁྱེར་པ་དང། །དགོད་དྲགས་མང་དུ་སྨྲ་བ་དང༌། །སྔངས་དང་གཅུས་ཏེ་སྦྲིད་པ་གཏོང༌། །གཞུ་སྲ་འདྲེན་པར་བྱེད་པ་དང༌། །སྡས་ནི་མི་མཉམ་ལ་ཉལ་དང༌། །སྲ་བ་འཆའ་བར་བྱེད་པ་དང༌། །རླུང་སྐྱེད་པ་ནི་དེ་དང་དེས། །རླུང་འཕེལ་རོ་སྟོད་ལ་ཞུགས་ནས། །གདོང་གི་གཞོགས་ཕྱེད་ཡོན་པོར་བྱེད། །སྨ་བ་དགོད་དང་ལྟ་བའང་ཡོ། །དེ་ནས་དེ་ཡི་མགོ་འགུལ་ཞིང༌། །ཚིག་མི་ཕྱིན་ལ་མིག་རེངས་ཤིང༌། །སོ་འགུལ་སྐད་ནི་འགགས་པ་དང༌། །སྒྲ་མི་ཐོས་ཤིང་སྦྲིད་པ་ཐོགས། །དྲི་མི་ཚོར་ཞིང་དྲན་ཉམས་རྨོངས། །གཉིད་ལོག་བ་ནང་དང་བར་འགྱུར། །མཆིལ་མ་གཡོན་དུ་འདོར་བ་དང༌། །མིག་གཅིག་འཛུམས་པར་འགྱུར་པ་དང༌། །ནམ་ཚོང་ཡན་ཆད་མི་བཟད་ན། །གཞོགས་ཕྱེད་དག་གམ་རོ་སྨད་ན། །ལ་ལས་དེ་གཞོགས་ཕྱེད་ནད་བཤད། །གཞན་དག་ཕྱོགས་གཅིག་གུག་ཅེས་ཟེར། །རླུང་ནི་ཁྲག་ལ་
བརྟེན་གྱུར་ཏེ། །སྤྱི་བོ་འཛིན་པའི་རྟར་ཞུགས་པ། །རྩུབ་ཅིང་ནད་བཅས་མདོག་གནག་བྱེད། །རྩ་འཛིན་དེ་ནི་གསོར་མི་རུང༌། །རླུང་གིས་དེ་ལ་གཞོགས་ཕྱེད་བཟུང༌། །རྩ་དང་རྒྱུས་པ་བསྐམས་བྱས་ནས། །གཞོགས་ཕྱེད་གང་ཡང་རུང་ལ་གནོད། །ཚིགས་ཀྱི་སྦྲེལ་མཚམས་ལྷོད་པར་བྱེད། །དེ་ཡིས་ལུས་ཕྱེད་ཐམས་ཅད་ནི། །ལས་སྦྱོར་མི་ནུས་ཚོར་བ་མེད། །དེ་ནི་ཕྱོགས་གཅིག་ནད་ཅེས་ཟེར། །གཞན་དག་ཕྱོགས་གཅིག་བསྐམས་པར་འཆད། །ལུས་ཀུན་རླུང་ནད་དེ་དང་འདྲ། །ཡན་ལག་ཀུན་ལ་བརྟེན་པ་ཡིན། །རླུང་ནད་ཉི་ཚེས་གཞོགས་བྱེད་བསྐམས། །ཤིན་ཏུ་གསེ་དཀའ་ཡིན་པར་བཤད། །གཞན་དང་འདྲེས་པ་འང་གསོ་དཀའ་ཡིན། །ཟད་བྱེད་རྒྱུ་ཅན་སྤང་བར་བྱ། །མ་ཞུ་བད་ཀན་ལྡན་པ་ཡིས། །རྒྱུན་སྲང་བཀག་སྟེ་ལུས་རེངས་པས། །བརྐྱང་བསྐུམ་ཀུན་ལས་ཉམས་འགྱུར་བ། །ཤིང་འདྲ་ཤིང་ལྟར་རེངས་པ་ཡིན། །ཕྲག་པའི་རྩ་བར་ཞུགས་པའི་རླུང༌། །དེར་གནས་རྩ་ནི་འཁུམས་བྱས་ཏེ། །དཔུང་པ་བསྐྱོད་པར་མི་ནུས་བྱེད། །དཔུང་པ་འཇས་པའི་རླུང་ནད་ཡིན། །གང་ཞིག་ལག་མཐིལ་སོར་མོར་འབྲེལ། །ཆུ་བ་རྒྱབ་ཏུ་འཁུམས་བྱེད་ཅིང༌། །ལག་དར་བྱ་བ་ཉམས་བྱེད་པ། །རླུང་དེ་བི་ཤ་ཙེ་རུ་བཤད། །གང་ཚེ་རླུང་ནི་རྐེད་པར་གནས། །བརླ་ཡི་ཆུ་བའི་ནང་དུ་ཞུགས། །དེ་ཚེ་མི་དེ་འཐེང་པོར་འགྱུར། །བརླ་གཉིས་ལ་ཞུགས་འཕྱེ་བོར་འགྱུར། །གང་ཞིག་འགྲོ་བར་རྩོམ་པ་ན། །ལུས་འདར་འཐེང་པོ་ལྟར་འགྲོ་བ། །ཚིགས་ཀྱི་སྦྲེལ་མཚམས་ལྷོད་གྱུར་པ། །དེ་ནི་སྲན་མའི་འཐེང་པོར་བཤད། །ཁ་ཟས་དྲོ་གྲང་སྐམ་རློན་འདྲེས། །ལྕི་དང་སྣམ་ཆེས་བསྟེན་པ་དང༌། །ཞུ་དང་མ་ཞུ་མི་བདེས་བསྐྱོད། །ཉིན་ཉལ་མཚན་གཉིས་མ་ལོག་པས། །མ་ཞུ་ཤིན་ཏུ་སྩོགས་འགྱུར་ཏེ། །གལ་ཏེ་བརླ་ནང་ཞུགས་འགྱུར་ན། །བད་ཀན་ཚིལ་དང་རླུང་བཅས་བ། །ནད་གཞན་ཟིལ་གྱིས་མནན་ནས་ནི། །བརླ་རུས་ནང་དུ་གང་བྱས་ཏེ། །བད་ཀན་གྱིས་ཏེ་རེངས་གྱུར་ལ། །དེ་ཚེ་དེ་ཡིས་བྲལ་རེངས་བྱེད། །འདེགས་མི་ནུས་གྲང་ཚོར་བ་མེད། །གཞན་གྱི་ཡིན་སྙམ་སེམས་ཤིང་ལྕི། །མི་བཟད་པར་ནི་འགྲོ་བ་ཉམས། །སེམས་ཁོང་ཆུད་ཅིང་ཡན་ལག་ན། །སྙོམ་སློན་རིམས་འདེབས་ཡི་ག་འཆུས། །རྐང་པ་སྒྱིད་ཞན་འདེགས་པ་དཀའ། །བེམ་བེམ་པོར་འདུག་ལྡན་པ་
ཡིན། །དེ་ནི་བླ་རེངས་ནད་ཅེས་བཤད། །གཞན་དག་ཕྱུག་པོའི་རླུང་ཞེས་ཟེར། །རླུང་དང་ཁྲག་ལས་སྐྱེས་པའི་སྐྲང༌། །པུས་མོའི་སྟེང་བྱུང་ནད་ཚབས་ཆེ། །ཅེ་སྤྱང་མགོ་ལྟར་སྦོམ་གྱུར་པ། །ཅེ་སྤྱང་མགོ་འདྲ་ཡིན་ཞེས་བྱ། །རྐང་པ་ན་ཞིང་མི་མཉམ་འདོར། །ངལ་བ་ལས་ནི་གང་ཆེ་རླུང༌། །ལོང་མོར་གནས་ཏེ་ནད་སྐྱེད་པ། །དེ་ནི་རླུང་ནད་ཚེར་མར་བཤད། །རྟིང་བ་སོར་མོར་འབྲེལ་པ་ཡི། །ཆུ་བར་རླུང་གིས་གནོད་གྱུར་གང༌། །བརླ་ནས་འཇུག་པར་བྱེད་པ་དེ། །གཟུགས་འཁུམས་ཞེས་ནི་བྱ་བར་བཤད། །བི་ཤ་ཙི་དང་གཟུགས་འཁུམས་བཤད། །མི་བཟད་ན་བ་ཁ་ལིར་བཤད། །གང་གི་རྐང་པ་བརྩི་འགྱུར་ཞིང༌། །བེམ་བེམ་པོར་ནི་གྱུར་པ་དག །བད་ཀན་རླུང་འཁྲུགས་ལས་གྱུར་པ། །རྐང་པ་བརྩེ་བར་དེ་བཤད་དོ། །མཁྲིས་པ་ཁྲག་དང་བཅས་པའི་རླུང༌། །རྐང་པ་གཉིས་སུ་ཚ་བྱེད་ཅིང༌། །ཁྱད་པར་དུ་ནི་འགྲོ་ཚེ་ཚ། །དེ་ནི་རྐང་ཚ་ཞེས་བྱར་བཤད། །ཡན་ལག་བརྒྱད་པའི་སྙིང་པོ་བསྡུས་པ་ལས། ནད་གཞིའི་གནས་ཀྱི་ལེའུ་བཅྭ་ལྔ་པའོ།། །།དེ་ནས་དྲེག་ནད་ཀྱི་ནད་གཞི་བཤད་པར་བྱའོ། །ཁྲག་ནི་འཁྲུགས་པར་བྱེད་པའི་ཟས། །ཚ་བ་དང་ནི་མི་འཕྲོད་པ། །བསྟེན་དང་སྦྱོར་བ་ལོག་པ་དང༌། །ཉིན་ཉལ་མཚན་གཉིད་མ་ལོག་དང༌། །ཉལ་པོ་དྲགས་དང་སྐྱིད་པར་གནས། །འཆགས་པའི་སྤྱོད་པ་མ་སྟེན་དང༌། །སྣད་དང་སྦྱང་བ་མ་བྱས་བས། །མི་ཡི་ཁྲག་ནི་འཁྲུགས་འགྱུར་ཞིང༌། །རླུང་སྐྱེད་ཟོས་པས་རླུང་ནད་ནི། །འཕེལ་བས་འཁྲུགས་ཏེ་ལམ་གཞན་ཞུགས། །དེ་བཞིན་ཁྲག་ཀྱང་ལམ་འགགས་ལ། །དང་པོར་གནོད་པར་འགྱུར་བ་ཡིན། །དེ་ནི་ཕྱུག་པོའི་རླུང་ནད་དང༌། །འཐེང་ནད་སྟོབས་འཇིག་རླུང་ཁྲག་འདྲེས། །མིང་དུ་དེ་ནི་རྣམ་པར་བཤད། །དེ་ཡང་དང་པོར་རྐང་པར་རྒྱུ། །མཆོག་ཏུ་བཞོན་སོགས་མཆོངས་ལས་བྱུང༌། །དེ་ཡི་འབྱུང་འགྱུར་མཚན་ཉིད་ནི། །མཛེ་ནི་འབྱུང་འགྱུར་མཚན་མར་མཚུངས། །དེ་བཞིན་ལུས་ཉམས་ཡན་ལག་ལྷོད། །བུས་མོ་བྱིན་པ་བརླ་རྐེད་པ། །ལག་པ་རྐང་པའི་ཚིགས་རྣམས་སུ། །གཡའ་ཞིང་འགུལ་དང་ན་བ་དང༌། །ཆག་སྙམ་
སེམས་ཤིང་ཚོར་མེད་ལྕི། །ཡང་དང་ཡང་དུ་ལྡང་བ་དང༌། །སླར་ཡང་ཞི་བར་འགྱུར་བ་ཡིན། །རྐང་པ་གཉིས་ཀྱི་རྩ་བར་གནས། །ལན་འགའ་ལག་པ་དག་ཏུ་གནས། །བྱི་བའི་དུག་ནི་ལྡང་བ་ལྟར། །ལུས་ཀུན་ལ་ནི་ཁྱབ་པར་འགྱུར། །ཐོག་མར་པགས་པ་ཁྲག་ལ་གནས། །བྱུང་བ་རྟོགས་པར་བླ་ཞེས་བྱ། །དེ་ནས་རིམ་གྱིས་ལུས་ཟུངས་ཀུན། །ཁྱབ་སྟེ་རྟོགས་པར་དཀའ་ཞེས་བྱ། །རྟོགས་སླ་པགས་གཡའ་ལ་སོགས་ལྡན། །ཟངས་ལྟར་དམར་དང་སྡོ་བ་དང༌། བྱ་རྨྱང་བཅས་ཤིང་རབ་དྲོ་ཚ། །རྟོགས་དཀའ་སྔར་བས་ལྷག་པར་ན། །སྐྲང་ཞིང་མཁྲང་ལ་ཚོས་པར་བྱེད། །གཞང་དང་ཚིགས་དང་རུས་པ་རྐང༌། །བཅད་སྙམ་སེམས་ཤིང་ནང་དུ་རྒྱུ། །ཤུགས་དང་ལྡན་ཚེ་སྒུར་པོ་དང༌། ཞ་བོ་འཐེང་པོར་བྱེད་འགྱུར་ལ། །ལུས་ནི་ཀུན་དུ་རྒྱུ་བ་ཡིན། །དེ་ལ་རླུང་ཤས་ཚེ་གྱུར་ན། གཟེར་འགུལ་ཟུག་པའི་ཤས་ཆེ་ཞིང༌། །སྐྲང་པ་རྩུབ་ཅིང་གནག་པ་དང༌། །སྡོ་ཞིང་འཕེལ་ཞིང་འབྲི་བར་འགྱུར། །རྩ་ཆེན་སོར་མོའི་ཚིགས་རྣམས་ནི། །འཁུམས་ཤིང་ལུས་བཅུམ་བཞིན་དུ་ན། །གྲང་ལ་མི་དགའ་རེག་ན་བདེ། །རེངས་ཤིང་འདར་ལ་ཚོར་བ་མེད། །ཁྲག་ཤས་ཆེ་སྐྲང་རབ་ཏུ་ཟུག །དམར་ཞིང་ཚ་བ་ཙེག་ཙེག་བྱེད། །སྣུམ་དང་རྩུབ་བས་ཞི་མི་འགྱུར། །གཡའ་དང་འདྲུལ་བར་ལྡན་པ་ཡིན། །མཁྲིས་གྱུར་ཚ་ཞིང་རྨོངས་བག་དང༌། །རྡུལ་ཞིང་བརྒྱལ་མྱོས་སྐོམ་དད་ཆེ། །རེག་མི་བཟོད་ཅིང་ན་ལ་དམར། །སྐྲང་ཞིང་སྨིན་ལ་ཤིན་ཏུ་བྲོ། །བད་ཀན་གྱིས་འགུལ་མི་ཤེས་ལྕི། །ཚོར་མེད་སྣུམ་ཞིང་གྲང་བ་དང༌། །གཡའ་ཞིང་ཅུང་ཟད་ན་བ་ཡིན། །འདྲེས་པའི་མཚན་ཉིད་འདྲེན་མ་ཡིན། །ནད་གཅིག་ལས་བྱུང་གསར་གསོ་སླ། །ནད་གཉིས་ལས་བྱུང་འཚོ་བཙམ། །འདུས་པ་ལས་བྱུང་ཆུ་སེར་འཛག །རེངས་དང་ཐོར་བུ་འབྱང་བ་སྤང༌། །རླུང་ནི་ཡན་ལག་ཚིགས་གནས་པ། །ཁྲག་གི་ལམ་ལ་མྱུར་གནོད་བྱེད། །དེ་གཉིས་ཕན་ཚུན་འདྲེས་གྱུར་པའི། །ནད་ཀྱིས་སྲོག་ནི་འཕྲོག་པར་བྱེད། །ལྔ་ཡི་བདག་ཉིད་ཅན་རླུང་ལས། །སྲོག་རྩུབ་དྲག་ཤུལ་སྨྱུང་བ་དང༌། །འགྲངས་དྲགས་
སྣད་དང་ལམ་གྱིས་དུབ། །ཤུགས་བཀག་ནན་གྱིས་བརྩིར་རབ་ཡིས། །འཁྲུགས་ནས་མིག་ལ་སོགས་པ་ལ། །ཉེ་བར་གནོད་བསྐྱེད་བྱེད་ཅིང༌། །ཆམ་པ་ཉམ་ཐག་སྐོམ་ལུད་པ། །དབུགས་མི་བདེ་སོགས་ནད་མ་བསྐྱེད། །སྟོད་རྒྱུ་སྦྲིད་པ་སྒྲེགས་པ་དང༌། །སྦྱུགས་པ་གཉིད་ནི་བཀག་པ་དང༌། །ཁུར་ལྕི་འདེགས་དང་དྲག་ཏུ་ངུ༌། །དགོད་དྲགས་སོགས་ཀྱིས་ནད་འཁྲུགས་ཏེ། །མགུལ་པ་འགགས་ཤིང་སེམས་ཉམས་ལ། །ཆམ་འདེབས་སློང་ཞིན་གྱི་ག་འཆུས། །མགུལ་པར་ལྦ་བ་སོགས་སྐྱེད་ཅིང༌། །ནམ་འཚོང་ཡན་ཆད་བརྟེན་ནད་སྐྱེད། །ཁྱབ་བྱེད་འགྲོ་དང་འདུ་དྲགས་དང༌། རྩེད་མོ་དྲགས་དང་མི་བཟོད་སྤྱོད། །ཁ་ཟས་མི་མཐུན་རྩུབ་འཇིགས་དགའ། །ཡི་མུ་ག་སོགས་ཀྱིས་འཁྲུགས་པར་འགྱུར། །ཁུ་བ་སྟོབས་དང་སྤྲོ་བ་ཉམས། །སྐྲ་དང་སེམས་གཡེངས་རིམས་ཀྱི་འདེབས། །ཡན་ལག་ཀུན་ལ་ཟུག་པ་དང༌། སྤུ་བརྩེ་ཡན་ལག་ཚོར་བ་མེད། །མཛེ་དང་མེད་དབལ་གཞན་ཡང་ནི། །ལུས་ཀུན་ཁྱབ་པའི་ནད་སྐྱེད་འགྱུར། །མཉམ་གནས་འདུ་བ་མ་སྙོམས་དང༌། གྲང་དང་འདྲེན་མའི་ཟས་ཟོས་དང༌། དུས་མིན་གཉིད་ལོག་མཚན་མོ་ནི། །གཉིད་མ་ལོག་ལ་སོགས་ཀྱིས་འཁུགས། །གཟེར་དང་སྐྲན་དང་ཕོ་ནད་སོགས། །ཞུ་དང་མ་ཞུར་གནས་ནད་སྐྱེད། །ཐུར་སེལ་ཟས་ནི་རྩུབ་དང་ལྕི། །ཤུགས་བཀག་པ་དང་མི་སྲུན་བཞོན། །ཁྱོགས་དང་བཞོན་དང་སྟན་གནས་དང༌། འགྲོ་བ་བསྟེན་ནི་དྲགས་པ་ཡིས། །འཁྲུགས་ནས་གསོ་བར་དཀའ་བའི་ནད། །ཞུ་བའི་གནས་ལ་བརྟེན་པ་སྐྱེད། །གཅིན་དང་ཁུ་ཆུའི་ནད་གཟང་འབྲུམ། །གཞང་འབྱུང་ལ་སོགས་མང་པོ་སྐྱེད། །རླུང་ཀུན་མ་ཞུར་ལྡན་པ་ནི། །སྙོམ་དང་འགུལ་མི་ཤེས་ཁོང་ལྕི། །སྣུམ་དང་སྒྱིད་ཞན་ཡི་ག་འཆུས། །གྲང་སྐྲན་མེ་དྲོད་ཉ་མས་བྱེད་ཅིང༌། །ཚ་དང་རྩུབ་པ་མངོན་འདོད་ཅིང༌། །དེ་ཟོས་བདེ་འགྱུར་ལས་ཤེས་བྱ། །མ་ཞུ་བ་དང་མི་ལྡན་པ། །སྙོམ་སོགས་གོ་ནི་བཟློག་པ་ཡིན། །དེ་ནས་རླུང་གིས་འདྲེས་པ་ཡི། །དབྱེ་བ་མང་པོར་ཤེས་པར་བྱ། །མཁྲིས་པས་འདྲེས་རྟགས་ཚ་བ་དང༌། །སྐོམ་གཟེར་མགོ་འཁོར་མུན་འཐིབས་བྱེད། །ཚ་དྲོ་སྐྱུར་དང་
ལན་ཚ་བྲོ། །ཚ་ཞིང་གྲང་བ་འདོད་པ་ཡིན། །བསིལ་ཞིང་ཁོང་ལྕི་གཟེར་བ་དང༌། །ཚ་བ་སོགས་ཟོས་སྨྱུང་བ་དང༌། །རྩོལ་དང་རྩུབ་པས་ལྷག་པར་བདེ། །དྲོད་འདོད་བད་ཀན་ལྡན་པ་ཡིན། །ཁྲག་བཅས་ཚ་ཞིང་ན་དང་བཅས། །པགས་པའི་ཤ་ནད་ཤིན་ཏུ་ཟུག །སྐྲང་པ་མདོག་དམར་འགྱུར་པ་དང༌། །ཐིག་ལེ་དམར་པོ་འབྱུང་བ་ཡིན། །ཤ་དང་འདྲེས་པ་མཁྲང་བ་དང༌། །མདོག་འགྱུར་འབྲུམ་བུ་ཕྲ་མོ་འབྱུང༌། །སྤུ་བརྩེ་ལུས་ལ་གྲོག་མ་ནི། །རྒྱུ་བ་ཉམ་དུ་སེམས་པར་འགྱུར། །ཚིལ་དང་འདྲེས་པ་གསོ་དཀའ་དང༌། །གཡོ་ཞིང་སྣུམ་ལ་འཇམ་གྲང་བར། །ལུས་ལ་སྐྲང་ཞིང་ཡིག་འཆུས། །དེ་ནི་ཕྱུག་པོའི་རླུང་ནད་ཡིན། །རུས་པ་དང་ལྡན་རེག་ན་ཚ། །བཅིར་ན་མངོན་པར་དགའ་བ་དང༌། །ཁབ་ཀྱིས་རབ་ཏུ་གཙགས་སྙམ་བྱེད། །ཡན་ལག་ན་ཞིང་ཟུག་བ་ཡིན། །རྐང་དང་ལྡན་ལ་ལུས་སྒུ་ཞིང༌།།གླལ་མང་དཀྲིས་པ་སྙམ་དུ་སེམས། །རབ་ཏུ་ན་ལ་ལག་གཉིས་ཀྱིས། །བཙིར་ན་བདེ་བར་འགྱུར་བ་ཡིན། །ཁུ་བ་དང་འདྲིས་དྲག་ཏུ་འབྱུང༌། །ཡང་ན་མི་འབྱུང་འབྲས་བུ་མེད། །ཟས་འདྲེས་ཁོང་པར་མ་ཞུ་ན། །ཞུ་ནས་ནད་དེ་བདེ་བར་འགྱུར། །གཅིན་དང་རླུང་འདྲེས་ལྒང་པ་སྤོ། །གཅིན་ནི་འགགས་པར་བྱེད་པར་འགྱུར། །བཤང་འདྲེས་ཐུར་དུ་འབྱུང་བ་འགག །རང་གི་གནས་སུ་ཡོངས་སུ་གཅོད། །སྣུམ་ཟོས་མྱུར་དུ་འཇུ་བར་འགྱུར། །ཟས་ཟོས་ལྟོ་ནི་སྦོས་པ་དང༌། །ཟས་ཀྱིས་བཤང་བ་ཕུལ་ཞས་ནི། །ན་ཞིང་སྐོམ་པོ་རྙོག་གཅན་འབྱུང༌། །རླུང་ནི་ལུས་ཟུངས་ཀུན་དང་འདེས། །བརླ་དང་ཆུ་སོ་རྒྱབ་ཏུ་ན། །རླུང་ནི་ལོག་སོང་མི་བདེ་ཞིང༌། །སྙིང་ནི་རབ་ཏུ་ན་བར་བྱེད། །སྲོག་དང་མཁྲིས་པ་འདྲེས་གྱུར་འཁྲུགས། །མགོ་འཁོར་རྒྱལ་དང་ལུས་ཚ་འགྱུར། །ལེགས་པར་མ་ཞུ་སློན་པར་བྱེད། །སྟོད་རྒྱུད་མགོ་འཁོར་སོགས་པ་དང༌། །ནང་དུ་ཚ་ཞིང་སྟོབས་ཟད་འགྱུར། །ཁྱབ་བྱེད་རྨོངས་བག་ལུས་ཀུན་ནི། །ཚ་ཞིང་ངལ་ལ་ལུས་སྤྱོད་འགགས། །ལུས་ཚ་ནད་དང་བཅས་པ་ཡིན། །མཉམ་གནས་དྲོད་ཀྱིས་གནོད་རྡུལ་ཆེ། །མི་དགའ་སྐོམ་དང་ཚ་བཅས་འགྱུར། །ཐུར་དུ་སེལ་བས་དྲི་མ་ནི། །ཁ་
དོག་སེར་པོར་འབྱུང་བ་དང༌། །ཟླ་མཚན་ཆེར་འཕེལ་མོ་མཚན་དང༌། །ཕོ་མཚན་རྐུབ་ཏུ་ཚ་བར་འགྱུར། །སྲོག་ནི་བད་ཀན་འདྲེས་གྱུར་པ། །ལུས་ལྷོད་སྐོམ་དང་ཡི་ག་ཆུས། །མཆིལ་མང་སྒྲེགས་པ་སྦྲིད་མང་སློན། །དབུགས་འབྱུང་དབུགས་རྔུབ་ཐོགས་པ་ཡིན། །སྟོད་རྒྱུ་ལུས་ནི་ལྕི་བ་དང༌། །ཚིག་ཐོགས་སྐད་འགགས་ཡིག་འཆུས། །སྟོབས་དང་ཁ་དོག་ཉམས་པར་བྱེད། །ཁྱབ་བྱེད་རུས་ཚིགས་རེངས་པ་དང༌། །ཡན་ལག་ཐམས་ཅད་ལྕི་བ་དང༌། །འགྲོས་ནི་ཤིན་ཏུ་འཁྱོར་བ་ཡིན། །མཉམ་གནས་ཡན་ལག་གྲང་བྱེད་ཅིང༌། །རྡུལ་མི་འབྱུང་ཞིང་དྲོད་ཆུང་འགྱུར། །ཐུར་སེལ་བཤང་དང་གཅི་བ་ནི། །བད་ཀན་བཅས་པར་འབྱུང་བར་འགྱུར། །དེ་ལྟར་རླུང་ནི་གཞན་འབྲེལ་བ། །ཉི་ཤུ་རྩ་གཉིས་ཡིན་ཞེས་བྱ། །དེ་བཞིན་སྲོག་ལ་སོགས་པའི་རླུང༌། །ཕན་ཚུན་རིམ་བཞིན་འདྲེས་གྱུར་པ། །ཀུན་ཀྱང་འཁྲུགས་པར་གྱུར་པ་དེ། །ཉི་ཤུར་འགྱུར་བ་ཡིན་ཞེས་བྱ། །སྲོག་དང་སྟོད་རྒྱུ་ལྷན་ཅིག་འཁྲུགས། །དབུགས་འབྱུང་དབུགས་རྔུབ་དཀའ་བ་དང༌། ཆམ་འདེབས་མགོ་བོ་ན་བར་བྱེད། །སྙིང་ན་ཁ་ནི་སྐམ་པར་འགྱུར། །སྟོད་རྒྱུའི་རླུང་ནི་སྲོག་དང་འདྲེས། །མདོག་དང་གཟི་མདངས་སྟོབས་ཟད་བྱེད། །ཕྱོགས་འདིས་འགྲེས་པ་ལྷ་མ་རྣམས། །སྨན་པས་ཉེ་བར་སྦྱར་པར་བྱ། །རླུང་ནི་གནས་དང་འཕེལ་དང་འབྲི། །ལས་རྣམས་ལེགས་པར་བརྟག་པར་བྱའོ། །སྲོག་ལ་སོགས་པ་ལྔ་པོ་ནི། །འཁྲུགས་པས་ཕན་ཚུན་འདྲེས་པ་ཡིན། །མཁྲིས་པ་ལ་སོགས་བཅུ་གཉིས་དང༌། །འདྲེས་པར་འགྱུར་ཏེ་འདྲེན་མ་ཡིན། །མཁྲིས་པ་སོགས་ལས་འདྲེས་དེ་བཞིན། །འདྲེན་མ་རྣམ་པ་དུམ་ཡིན། །རབ་དང་རབ་མཆོག་བརྟགས་པ་ཡིས། །འདྲེས་པ་གྲངས་མེད་འགྱུར་པ་ཡིན། །དེ་ནི་རང་གི་མཚན་ཉིད་དང༌། །རིམ་གྱིས་བདེ་བར་འགྱུར་པ་ལས། །རྟོགས་དཀའ་ཡིན་ཏེ་ཡང་ཡང་བརྟག །མ་ཡེངས་པས་ནི་ཤེས་པར་བྱ། །ཁྱད་པར་སྲོག་ནི་འཚོ་པ་ཡིན། །སྟོད་དུ་རྒྱུ་བ་སྟོབས་ཞེས་བརྗོད། །དེ་གཉིས་གནོད་པར་གྱུར་པ་ལས། །ཚེ་དང་སྟོབས་ནི་ཟད་པར་འགྱུར། །རླུང་ནི་འདྲེས་པ་
མ་ཤེས་པའམ། །ཤེས་ཀྱང་ལོ་གཅིག་ལོན་པ་ནི། །འབད་ཀྱང་གསོ་དཀའ་ཡིན་པའམ། །གསོ་བའི་ཐབས་ནི་མེད་པ་ཡིན། །འདྲེས་ནང་ཡལ་བར་བོར་ན་ནི། །ཁོང་འབྲས་མཆེར་པ་སྙིང་ནང་དང༌། །སྐྲན་དང་མེ་དྲོད་ཉམས་ལ་སོགས། །བླ་བརྣན་དེ་ལས་འབྱུང་བར་འགྱུར། །ཡན་ལག་བརྒྱད་པའི་སྙིང་པོ་བསྡུས་པ་ལས། །ནད་གཞིའི་གནས་ཀྱི་ལེའུ་བཅུ་དྲུག་པའོ།། །།ཡན་ལག་བརྒྱད་པའི་སྙིང་པོ་བསྡུས་པ་ལས། །ནང་བཞིའི་གནས་ཏེ་གནས་གསུམ་པ་རྫོགས་སོ།། །།དེ་ནས་རིམས་ནད་གསོ་བ་བཤད་པར་བྱའོ། རྒྱུན་ཤེས་ཀྱི་བུ་ལ་སོགས་པ་དྲང་སྲོང་ཆེན་པོ་རྣམས་ཀྱིས་འདི་སྐད་ཅེས་བཤད་དོ། །གང་ཕྱིར་མ་ཞུ་གནས་མ་ཞུ། །རྒྱུན་སྲང་བཀག་སྟེ་མེ་དྲོད་ཉམས། །རིམ་གྱིས་ཉེས་པ་སྐྱེད་བྱེད་པས། །སྔོན་ཚུལ་བྱུང་དང་རིམས་སོགས་ལའང༌། །དེ་ཕྱིར་སྨྱུང་བ་བྱ་དགོས་ལ། །སྟོབས་ནི་འབད་པས་བསྲུང་བར་བྱ། །སྟོབས་ནི་ནད་མེད་པ་ཡི་གནས། བྱ་བའི་རིམས་ནི་ནད་མེད་དོན། །སྨྱུང་བྱས་ནད་ནི་ཉམ་སྨད་ཅིང༌། མེ་དྲོད་སྐྱེད་དང་ཁོང་ཡང་འགྱུར། །བདེ་ཞིང་བཀྲེས་སྐོམ་ཡི་ག་འབྱེ། །ཟས་འཇུ་སྟོབས་དང་མ་དངས་སྐྱེད་འགྱུར། །དེ་ལ་ཕལ་ཆེར་བད་ཀན་ནད། །བསླངས་དང་གཡོས་པར་གྱུར་པ་དང༌། །དང་གར་འཁྱིལ་བཅས་མཆིལ་མ་མང༌། །ཟས་ལ་མི་དགའ་ལུད་པ་གསུང༌། །ཟོས་མ་ཐག་ཏུ་རིམས་འདེབས་པ། །ཁྱད་པར་དུ་ནི་མ་ཞུར་འགྱུར། །སྐྱུག་སྨན་བཏང་འོས་སྐྱུག་སྨན་བསྔགས། །དེ་ལས་གཞན་དུ་བྱས་ན་ནི། །དབུགས་མི་བདེ་དང་ཚད་འཁྲུ་རྨོངས། །སྙིང་ནད་མི་བཟང་རིམས་ཀྱིས་འདེབས། །པོ་སོན་པི་ལིང་བཅས་པ། །དུག་མོ་ཉུང་ངམ་ཤིང་མངར་ནི། །ཆུ་དྲོན་སྦྲང་རྩིར་བཅས་པའམ། །ཡང་ན་རྒྱ་མཚར་ལྡན་པ་བླུད། །ཀར་ཀ་ཏ་འམ་པ་ཏོ་ལ། ནི་མ་བ་སྤའི་ལོ་མའི་ཆུའམ། །འབྲས་ཡོས་ཀྱི་ནི་སྐྱོ་མའམ། །བུ་རམ་རིང་ཁུ་འམ་ཆང་སྦྱར་བཏུང༌། །ཉམས་སྟོབས་དུས་ཀྱི་དབྱེ་ཤེས་པས། །ཆོ་གའི་གནས་ལས་བཤད་པ་ཡི། །སྐྱུག་སྨན་ད་རི་རབ་ཏུ་བཏང༌། །སྐྱུག་སྨན་གྱི་ནི་སྦྱོར་བ་དག །བྱས་པར་གྱུར་ཏམ་མ་བྱས་ཀྱང༌། རིམས་
ནད་ཅན་ལ་རྣམ་སྦྱང་བྱ། །ནད་ནི་བསྐྱོད་པར་གྱུར་པ་དང༌། །སྨིན་དང་ཞི་བར་བྱ་ཕྱིར་བྱ། །ཐལ་དང་གཡོགས་པའི་མེ་བཞིན་དུ། །མ་ཞུས་ཁེབས་ཟས་འཇུ་མི་འགྱུར། །དེ་བས་ཉེས་པ་སྨིན་བྱའི་ཕྱིར། །རིམས་དང་ལྡན་ལ་སྨྱུང་བ་བྱ། །རླུང་དང་བན་ཀན་རིམས་སྐོམ་དང༌། །ཆུ་ཚན་ཉུང་ཤས་ཉུང་ཤས་བཏུང༌། །དེས་ནི་བད་ཀན་ཞུ་གྱུར་ནས། །སྐོམ་དང་མྱུར་དུ་སེལ་བར་བྱེད། །མེ་དྲོད་སྐྱེད་ཅིང་བུ་གའི་རྒྱུན། །འཇམ་པར་བྱས་ནས་སྦྱོང་བར་བྱེད། །ཞེན་པའི་རླུང་མཁྲིས་རྡུལ་དང་ནི། །བཤང་གཅི་བདེ་བར་འབྱིན་པར་བྱེད། །གཉིད་རྨོངས་ཡི་ག་འཆུས་པ་སེལ། །སྲོག་ནི་འཛིན་པར་བྱེད་པ་ཡིན། །ཆུ་གྲང་དེ་ལས་བཟློག་བ་སྙེ། །ནད་ཀྱི་ཚོགས་ནི་འཕལ་བྱེད་ཡིན། །ཆུ་ཚན་ཡོན་ཏན་དེ་འདྲ་ཡང༌། །གཅིག་ཏུ་མཁྲིས་པས་ལྡན་རིམས་དང༌། །མཁྲིས་ཤས་ཆེ་དང་ཕྱོགས་གཅིག་མཁྲིས་ཤས་ཆེ་དང་ཕྱོགས་གཅིག་ཚ། །ཀུན་ཚ་རྨོངས་བག་ཆོད་པར་འཁྲུ། །ཆང་དུ་བ་ལས་བྱུང་སོ་ག་དང༌། གཅོང་སྐེམས་ཁྲག་མཁྲིས་ཅན་མི་གླུད། །དེ་ལ་གླ་སྒང་ཙནྡན་དང༌། །བཅའ་སྒ་བར་པ་ཏ་དང་ནི། །པུ་ཤེལ་ཙི་དང་བ་ལེ་ཀ །བསྐོལ་ཆུ་བསྒྲངས་བླུད་རིམས་སྐོམ་སེལ། །མཁྲིས་པ་མེད་པར་ཚ་མི་འབྱུང༌། །ཚ་བ་མེད་པར་རིམས་ཡོད་མིན། །དེ་བསམ་མཁྲིས་པ་ལ་གནོད་སྤང༌། །མཁྲིས་ཤས་ཆེ་བས་ལྷག་པར་སྤང༌། །ཁྲུས་དང་བསྐུར་དང་བྱུག་པ་དང༌། སྨྱུང་བ་ལྷག་མའང་སྤང་བར་བྱ། །མ་ཞུ་གཟེར་འཇོམས་སྨན་ལྟ་བུར། །མ་ཞུ་རིམས་ནི་མི་བཟད་ལ། སྨན་བཏུང་མི་བྱ་དེ་ཡིས་ནི། །ལྷག་པར་མ་ཞུ་འཕེལ་བར་གྱུར། །ལྟོ་བ་མ་ཞུས་ཁྱབ་པ་ལ། །འོ་མ་སྒྲུལ་ལ་བླུད་དང་མཚུངས། །རླུང་དང་བད་ཀན་བདག་ཉིད་དེར། །ལྐོག་ནད་ཆམ་པ་དབུགས་མི་བདེ། །བྱིན་པ་ཚིགས་རུས་གཟེར་གྱུར་ལ། །རྡུལ་འབྱུང་བ་ནི་རབ་བསྔགས་ཏེ། །རྡུལ་དང་བཤང་གཅི་འཕྱེན་བདེར་འབྱུང༌། །མེ་དྲོད་སྐྱེད་ཅིང་ཟས་འཇུ་བྱེད། །སྣུམ་འཐུང་ཆོ་ག་ར་བཤད་པ་ནི། །རྣམ་པ་ཀུན་དུ་སྤྱད་པར་བྱ། །སྨྱང་དང་དུགས་བྱ་དུས་དང་ནི། །ནས་ཐུག་ཏིག་ཏའི་ཁུ་བ་རྣམས། །དྲི་མ་རྣམས་ནི་སྨིན་བྱེད་པ། །རིམ་མམ་གནས་སྐབས་ཇི་བཞིན་སྦྱིན། །
རླུང་ནད་ཉིད་ཚེ་ཟད་བྱེད་དང༌། །གློ་བུར་བ་དང་རིམས་རྙིང་ལ། །སྨྱུང་བ་མི་བྱ་དེ་ལ་ནི། །ཉམས་མི་སྨད་པའི་ཞི་བྱ་ཕན། །དེ་ལ་མ་ཞུའི་རིམས་ལྡན་ཚུལ། །ཉམས་སྨད་མི་བྱར་ཤེས་པར་བྱ། །གསོ་བའི་ཐབས་ནི་གཉིས་ཤེས་ལས། །བརྟགས་ཏེ་སྨྱུང་བ་བྱ་བ་ཡིན། །སྨྱུང་བྱས་མཚན་མར་ལྡན་པ་ནི། །དེ་ལ་ཐུག་སླ་ལ་སོགས་བླུད། །རང་གིས་སྨན་དང་ཇི་བཞིན་བསྐོལ། །དང་པོར་ཐུག་སླ་ལ་སོགས་སྦྱིན། །ཞག་དྲུག་བར་དུ་འམ་གང་ཚེ་རིམས། །རྩེ་ཞིལ་གྱུར་པའི་བར་དུ་སྦྱིན། །དེ་ཡིས་ཤིང་གིས་མེ་བཞིན་དུ། །དེ་ཡི་མེ་དྲོད་འཕེལ་བར་བྱེད། །དང་པོ་འབྲས་ཡོངས་ཐུག་འཇུ་སླ། །བཅའ་སྒ་པི་པི་ལིང་དང་བཅས། །འུ་སུ་རྒྱ་མཚར་བཅས་པ་སྦྱིན། །སྐྱུར་འདོད་སེའུ་འབྲུ་བཅས་བ་བཏུང༌། །འཁྲུ་བའམ་མཁྲིས་པ་མང་བ་ལ། །སྦྲང་རྩི་བཅའ་སྒ་བཏབ་བསྒྲངས་བླུད། །ཆུ་སོ་རྩིབ་ལོགས་གླད་པ་གཟེར། །གཟེ་མ་བྱ་ཀྲི་བསྐོལ་བ་བླུད། །རིམས་འཁྲུར་ཀྲྀཥྞ་པ་རྞི་དང༌། བལ་བིལ་བ་བཅའ་སྒ་དང༌། ཨུཏྤལ་འུ་སུ་བསྐོལ་རིམས་འཁྲུར། །ཐུག་སྐྱུར་སྨིན་དང་དྲོད་བསྐྱེད་ཡིན། །སྐྱིགས་བུ་ལུད་པ་དབུགས་མི་བདེ། །གཟེར་ཅན་རྩ་བ་ཆུང་དུ་ལྔ། །བད་ཀན་གྱིས་ཉེན་ནས་ཐུག་ནི། །རྩ་བ་ཆེན་པོ་ལྔ་པ་སྦྱིན། །རྟུག་པ་འགགས་ལ་ནད་བཅས་པ། །པི་པི་ལིང་དང་སྐྱུ་རུ་ར། །བཏབ་པའི་ནས་ཐུག་མར་དང་བརྗོད། །དྲི་མ་ནད་ནི་བདེ་འབྱུང་བྱེད། །ལྟོ་བར་རྟུག་འགགས་ནད་བཅས་ལ། །དབྱི་མོ་པི་ལིང་རྩ་བ། །རྒུན་འབྲུམ་དོང་ག་སྐྱུ་རུ་ར། །ཁོང་པ་བཅད་པ་སྙམ་བྱེད་ལ། །རྒྱ་ཤུག་ད་ཏྲིགས་ལ་བར། །ཀྲྀཥྞ་པཎི་པིལ་པ་བླུད། །རྡུལ་མེད་གཉིད་མེད་སྐོམ་པས་ཉེན། །ཁར་དོང་གྲ་སྐྱུ་རུ་རའོ། །རྒྱ་ཤུག་ཁར་རྔུ་འགྲུབ་དང༌། །ཐལ་ཏྲེས་གླ་སྒང་ཙནྡན་ནི། །སྐོམ་དང་སློན་དང་བཅས་པ་བླུད། །སྦྲང་རྩིར་བཅས་པ་རིམས་འཇོམས་ཡིན། དེ་དག་ཐུག་པའི་སྨན་ཡིན་ཏེ། །ཤ་ཁུ་ཡུ་ཤ་སོགས་པའང་སྦྱར། །ཆང་ལས་བྱུང་དང་ཆང་རྒྱུན་བསྟེན། །བད་ཀན་མཁྲིས་པའི་གནས་ཞུགས་ནས། །དེ་གཉིས་ཤས་ཆེ་འམ་སོགས་གའམ། །སྐོམ་དང་སློན་དང་ཚད་པས་ཉེན། །ཁྲག་ནི་སྟོད་དུ་འབྱུང་བ་སྟེ། །དེ་ལ་ཐུག་པ་མི་བླུད་ཀྱི།
འབྲས་ཕྱེའི་སྐྱོ་མ་རིམས་འཇོམས་པའི། །འབྲས་བུའི་ཁུ་བ་སྤྲང་རྩི་དང༌། །ཁར་དཀར་བཅས་བླུད་པར་བྱ། །དེ་ནས་སྐྱོ་མ་ཞུ་ནས་ནི། །བཀྲེས་ན་ནས་ཐུག་འབྲས་བརྔོས་པའི། །འབྲས་ཆན་དག་ནི་བཟའ་བྱ་ཞིང༌། །ཤ་ཁུ་སླ་བའི་ཁུ་བ་འམ། །མུད་འུར་པའི་ཁུ་བཅས་བཟའ། །དེ་ལྟར་ཞག་དྲུག་འདི་བཟླས་ཏེ། །ཉམས་སྟོབས་ནད་ནི་བསྲུང་བར་བྱ། །དེ་ནས་སྨྱུང་བ་ལ་སོགས་པས། །སྨིན་པའི་ནད་ནི་ལྷག་མ་རྣམས། །སྨིན་པའམ་ཡང་ན་ཞི་བྱའི་ཕྱིར། །སྨན་ཁུའི་སྦྱོར་བའི་བྱ་བ་བསྔགས། །མཁྲིས་ལ་མཆོག་ཏུ་ཁ་བ་སྟེ། །བད་ཀན་ལ་ནི་ཚ་བ་བླུད། བད་ཀན་མཁྲིས་པ་སེལ་བྱེད་ཀྱང༌། །བསྐ་བ་བསྔགས་པ་མ་ཡིན་ཏེ། །རིམས་གསར་དྲི་མ་འགགས་བྱེད་པས། །བསྐ་བས་མི་བཟད་རིམས་སྐྱེད་ཅིང༌། །དང་ག་འཁྱིལ་དང་ཡིག་འཆུས། །སྐྱིགས་བུ་དབུགས་མི་བདེ་ཡང་སྐྱེད། །ལ་ལ་ཞག་བདུན་ནས་སྨན་གཏོང༌། །གཞན་དག་ཞག་ནི་བཅུ་ལོན་ནས། །ཁ་ཅིག་ཟས་ཡང་ཟོས་ནས་གཏོར། །མ་ཞུ་ཤས་ཆེ་ལ་མི་གཏང༌། །གང་ཕྱིར་མི་བཟད་རིམས་ཉེན་ལ། །ནད་ཀྱི་ཤུགས་ནི་འབྱུང་འགྱུར་བ། །མ་སྨིན་པ་ལ་སྨན་གྱིས་ནི། །རིམས་ནི་སླར་འཕེལ་བྱེད་པ་འམ། །ནད་ནི་ཤིན་ཏུ་སོགས་པ་ཡིས། །སྙོམ་དང་རྨོངས་བག་སྐྱེད་པར་བྱེད། །གང་ཚེ་རིམས་རྩེ་ཞིལ་ལུས་ཡང༌། །དྲི་མ་ལ་སོགས་གཡོས་གྱུར་བ། །རིམས་བཏབ་ཡུན་རིང་མ་ལོན་ཡང༌། །དེ་ཚེ་སྨན་ནི་སྦྱིན་པར་བྱ། །གླ་སྒང་པར་པ་ཏར་བཅས་པ་འམ། །བཅའ་སྒའམ་ཡང་ན་བྱི་ཚེར་བ། །བསྐོལ་བ་བསྒྲུང་པའི་ཁུ་བ་བླུད། །པ་ཏ་པུ་ཤེལ་པ་ལ་ཀ །བླུད་པའམ་དེ་བཞིན་དུ་ནི་མ་པ། །སླེ་ཏྲེས་གླ་སྒང་དོ་གྲ་རྣམས། །འདི་ནི་ཅི་རིགས་པར་བླུད་བྱ་།ནན་སྨིན་བྱེད་པའི་སྨན་ཁུ་བ། །རིམས་དང་སྐོམ་དང་ཡི་ག་འཆུས། །ཁས་རོ་མི་ཚོར་མ་ཞུ་འཇོམས། །དུག་མོ་ཉུང་དང་པ་ཏོ་ལའི། །ལོ་མ་དང་ནི་མུ་ཙེ་ཤེལ། །པ་ཏོལ་གླ་སྒང་ཐལ་ཏྲེས་དང༌། །པ་ཏ་དང་ནི་པུ་ཙེ་ཤེལ། །པ་ཏོ་ནི་མ་པ་འབྲས་བུ་གསུམ། །རྒུན་འབྲུམ་གླ་སྒང་དུག་མོ་ཉུང༌། །ཀིར་ཏིག་ཏ་སླེ་ཏྲེས་དང༌། །བཅའ་སྒ་དང་ནི་ཙནྡན་དཀར། །སླེ་ཏྲེས་གླ་སྒང་སྐྱུ་རུ་
སྦྲང༌། །ཚིགས་བཅད་ཕྱེད་ཀྱི་རྫོགས་བྱས་པ། །ལྔ་པོ་འདི་དག་རྟག་རིམས་སོགས། །ལྡ་པོ་ཞི་བར་བྱེད་པར་འདོད། །རླུང་གི་རིམས་ལ་བྱི་ཚེར་བ། །བཅའ་སྒ་སླེ་ཏྲེས་གླ་སྒང་ཕན། །ཡང་ན་པི་པི་ལིང་རྩ་བ། །སླེ་ཏྲེས་དང་ནི་བཅའ་སྒའམ། །རྩ་བ་ལྔ་བ་ཆུང་དུ་ཕན། །མཁྲིས་རིམས་གླ་སྒང་དུག་མོ་ཉུང༌། །པུ་ཙེ་ཤེལ་ནི་སྤྲང་རྩིར་བཅས། །དེ་བཞིན་གླ་སྒང་པར་པ་ཏ། །བྱི་ཚེར་རྩ་མཁྲིས་བཅས་པ་ཕན། །བད་ཀན་དུག་མོ་ཉུང་སོགས་སྡེ། །ཡང་ན་བ་ཤ་ཀ་ཀླ་སྒང༌། །བཅའ་སྒ་བྱི་ཚེར་བསྐོལ་བ་ཕན། །པི་པི་ལིང་རྩ་ཨ་རུ་ར། །དོང་ག་གླ་སྒང་བུ་ཙེ་ཤེལ། །བད་ཀན་རླུང་འདྲེས་བཤང་འགགས་པས། །ན་བ་སྨིན་ཞིང་དྲོད་སྐྱེད་བྱེད། །རླུང་མཁྲིས་ལས་གྱུར་རིམས་ལ་ནི། རྒུན་འབྲུམ་ཤིང་མངར་མ་དུ་ཀ །སེང་ཕྲོམ་དང་པ་ལ་ཐལ་ཏྲེས་དང༌། །གླ་སྒང་སྐྱུ་རུ་བ་ལ་ཀེ །པདྨ་གེ་སར་ཤུག་པ་དང༌། །པད་རྩ་ཙནྡན་དང་ཨུཪྴིར། །བ་རུ་ཤ་ཀ་ཨུཏ་པལ་སྔོ། །རྒུན་སོགས་སྐྱོ་མའམ་བསྐོལ་བསྒྲངས་པ། །མེ་ཏོག་ཛའ་ཏིའི་དྲེས་བསྒོས་ཏེ། །ཁ་ར་འབྲས་ཡོས་སྤྲང་རྩིར་སྤྱར། །རླུང་མཁྲིས་རིམས་ནི་འཇོམས་བྱེད་ཅིང༌། །ཆང་ནད་སློན་བརྒྱལ་ཚ་མགོ་འཁོར། །ངལ་དང་སྟོད་ཀྱི་ཁྲག་མཁྲིས་ནད། །སྐོམ་དང་མིག་སེར་དག་ཀྱང་སེལ། །པུ་ཙེ་ཤེལ་བཏགས་སྣོད་སར་པ། །གཙང་མདག་ཏུ་བསྐོལ་ནས་ནི། །བཙིར་བའི་ཁུ་བ་མར་དང་སྦྱར། །ཁུ་བ་དེས་ནི་རིམས་ཚད་སེལ། །བད་ཀན་རླུང་འདྲེས་ཤུ་དག་དང༌། པུ་ཙེ་ཤེལ་དང་པ་ཏ་དང༌། དོང་ག་དུག་མོ་ཉུང་བསྐོལ་ཕན། །ཡང་ན་སླེ་ཏྲེས་བསྐོལ་བ་ཡི། །ཁུ་བར་པི་པི་ལིང་གི་ནི། །ཕྱེ་མ་བཏབ་སྟེ་འཐུངས་ན་ཕན། །བྱ་ཁྲི་བཅའ་སྒ་སླེ་ཏྲེས་བསྐོལ། །པི་པི་ལིང་གི་ཕྱེ་མར་བཅས། །བད་ཀན་རླུང་རིམས་དབུགས་མི་བདེ། །ལུད་པ་ཆམ་པ་གཟེར་འཇོམས་བྱེད། །གླ་སྒང་འུ་སུ་ཨ་རུ་ར། །བཅའ་སྒ་སྐྲ་ལོ་པུ་ཏི་ཀ །ཤུ་དགག་བྲ་ཀླད་ཕལ། །ཐང་ཤིང་ཀུན་སྦྲང་རྩིར་བཅས། །རླུང་དང་བད་རིམས་མཆི་ལམ་མང༌། །ལྟོ་དང་སྙིང་ག་རྩིབ་ལོགས་ན། །ལྐོག་ནད་ཁ་ནི་སྐྲངས་པ་དང༌། །ལུད་པ་དབུགས་མི་བདེ་རྣམས་སེལ། །དོང་ག་སོགས་ཏེ་སྤྲང་རྩིར་བཅས། །བད་ཀན་མཁྲིས་
འགྱུར་རིམས་འཇོམས་སོ། །དེ་བཞིན་དུ་ཙེ་ཤེལ་དང་ནི། །བ་ཤ་ཀ་དང་པུ་ཤེལ་ཙེ། །ཀྱི་ལྕེ་བ་དང་འབྲས་བུ་གསུམ། །སླེ་ཏྲེས་དང་ནི་པ་ཏོ་ལ། །བོང་ང་དཀར་པོ་ནིམ་པ་དང༌། །མུར་བ་བྱི་ཚེར་བ་ཡང་ཕན། །འདུས་པའི་རིམས་ལ་བྱ་ཀྲི་དང༌། །ཐང་ཤིང་སྐྱེར་པ་གླ་སྐང་དང༌། །པ་ཏོ་ལོ་མ་ནིམ་པའི་ཤུན། །འབྲས་གསུམ་པུ་ཙེ་ཤེལ་ཡང་ཕན། །རླུང་དང་བད་ཀན་ཤས་ཆེའི་རིམས། །ལུད་དབུགས་མི་བདེ་རྩིབ་ལོགས་ཟུག །དོང་གྲ་པུཥྐར་མཱུ་ལ་དང༌། །སླེ་ཏྲེས་ཀཎྚ་ཀ་རི་ཕན། །རྒུན་འབྲུམ་མ་དུ་ཀའི་མེ་ཏོག །བ་རུ་ཤ་ཀ་ཀྱི་ལྕེ་བ། །པུ་ཤེལ་ཙེ་དང་པུ་ཙེ་ཤེལ། །འབྲས་བུ་གསུམ་དང་ཏང་པ་ལ་བཅས། །བསྐོལ་ཏེ་བསྒྲངས་པར་གྱུར་པ་ཡི། །ཁུ་བ་དེ་ནི་དེས་འཐུང་ན། །རིམས་ནི་ཐམས་ཅད་སེལ་བར་བྱེད། །ཛའ་ཏི་གླ་སྒང་སྐྱུ་རུ་ར། །བྱི་ཚེར་བ་བསྐོལ་དེ་འདྲར་ཕན། །བཤང་འགགས་རྒུན་འབྲུམ་པུ་ཙེ་ཤེལ། །ཀྱི་ལྕེ་བུ་རམ་འབྲས་བུ་གསུམ། །སྨན་ཞུ་ནས་ནི་ཐུག་པ་སོགས། །སྤྱད་བྱ་བད་ཀན་ཅན་གྱིས་མིན། །བད་ཀན་གྱིས་བརླན་ལུས་ལ་ནི། །རྡུལ་ལ་ཆར་བབ་འཕེལ་བ་ལྟར། །ཐུག་པ་ཡིས་ནི་བད་ཀན་སྐྱེད། །དེ་ཕྱིར་ཐོག་མ་ཉིད་དུ་ཡང༌། །ཡུ་ཤ་རྒྱ་སྲན་ཙ་ན་ཀ །སྲན་མ་སོགས་བྱས་ཡང་བ་དང༌། །རྩུབ་ཅིང་རོ་ཁ་ལྡན་ཡིད་འོང༌། །ཡི་ག་འབྱེད་བྱེད་གཡོས་ལེགས་སྦི། །སྰ་ལུ་རྩ་སྣར་སོགས་འབྲུ་རྙིང༌། །དྲུག་ཅུ་པ་ཡང་རིམས་ལ་ཕན། །བད་ཀན་ཤས་ཆེར་དེ་བཞིན་ནས། །ཕུབ་མ་མེད་བྱས་ཆག་ཚེའི་ཆན། །ནད་དང་ལུས་ཟུངས་སོགས་སྟོབས་ལས། །རིམས་སེལ་སྨན་ཁུར་བཙོས་འབྲས་ཅན། །ལན་གཉིས་ལན་གསུམ་བཙགས་ནས་ནི། །ཅི་རིགས་པར་ནི་སྦྱིན་པར་བྱ། །མུངྒ་སོགས་དང་ཀུལངྠའི། །ཡུ་ཤ་ཡང་བས་རིམས་ནད་འཇོམས། །ཚོད་མ་ཀ་ར་བེ་ལ་དང༌། ཀར་ཀོ་ཏ་དང་ལ་ཕུག་གཞོན། །པར་བ་ཏ་དང་བ་ཤ་ཀ །ནིམ་པའི་མེ་ཏོག་བ་ཏོ་ལའི། །འབྲས་བུ་དང་ནི་ལོ་མ་ལས། །ལེགས་པར་གཡོས་པའི་ཚོད་མ་བསྔགས། །ཤིན་ཏུ་ཡང་བའི་ཤ་དང་ནི། །སྐམས་སའི་སྲོག་ཆགས་ཤ་ཁུ་ནི། །ཀཎྚ་ཀ་རི་པ་རུ་ཤ །ཨགྣི་མནྠ་རྒུན་འབྲུམ་
དང༌། །སྐྱུ་རུ་ར་དང་སེ་འབྲུ་དང༌། །པི་པི་ལིང་དང་བཅའ་སྒ་དང༌། འུ་སུ་ཟིར་རྒྱ་མཚར་བཅས། །ཕལ་ཆེར་ཁར་སྦྲང་རྩི་ཆེར། །ལྡན་བའི་གཡོས་བྱས་མ་བྱས་པ། །མི་སྐྱུར་དར་བ་བསྐོལ་བ་དང༌། །ཡི་གར་འོང་ཞིང་སླ་བ་དང༌། །ལེགས་པར་བསྐོལ་བའི་ཚོད་མ་ཕན། དེ་ནི་བཏུང་བའི་ཕྱིར་ཡང་སྦྱིན། །ཆུ་བསྐོལ་བསྒྲངས་པར་གྱུར་པ་དང༌། །གོམས་པར་གྱུར་པའི་དབང་ལས་ནི། །ཆང་ཡང་བླུད་པར་བྱ་བ་ཡིན། །རིམས་དང་བཅས་པའམ་རིམས་བྲལ་ལ། །དགོངས་ཀ་ཁ་ཟས་ཡང་བ་སྦྱིན། །དེ་ཚེ་བད་ཀན་མེ་དྲོད་འཕེལ། །ཁོང་པའི་མེ་དྲོད་སྟོབས་དང་ལྡན། །ཡང་ན་ཡུལ་གོམས་དབང་ལས་ནི། །ཅི་རིགས་སུ་ཡང་སྦྱིན་པར་བྱ། །མེ་དྲོད་ཆུང་ལས་སྔར་ཟོས་ན། །ཟས་མ་ཞུ་བར་གཟིར་བར་འགྱུར། །སྨན་བསྐོལ་ཁུ་བ་ཕན་ཟས་ཀྱིས། །ཞག་བཅུའི་བར་དུ་སྨྱུང་བ་བྱ། །བད་ཀན་བྲི་ནས་རླུང་མཁྲིས་ནི། །ཤས་ཆེའི་རིམས་ལ་ཞུན་མར་སྤྱིན། །ནད་སྨིན་པ་ལ་བདུད་རྩི་ཡིན། །གཞན་དུ་དེ་ནི་དུག་དང་མཚུངས། །ཞག་བཅུ་འདས་པར་གྱུར་ཀྱང་ནི། །རིམས་གྱིས་བླ་བརྣན་འཕེལ་བར་བྱེད། །དེ་ལ་སྨྱུང་བ་ལ་སོགས་རིམས། །བད་ཀན་ཟད་ཀྱི་བར་དུ་བྱ། །ལུས་དང་ལུས་ཟུངས་སྟོབས་ཞན་པས། །རིམས་རྙིང་དུ་ཡང་འགྱུར་བ་ཡིན་།མེ་དྲོད་རྩུབ་པས་རིམས་ཀྱེད་བྱེད། །མེ་དྲོད་རྩུབ་པར་གྱུར་པ་ལ། །སྐྱུགས་སྨན་དུགས་དང་དུས་དང་ཆུ། །བསྐོལ་དང་ཁ་ཟས་སྤངས་པ་ཡིས། །རླུང་གི་ཁམས་ནི་གྲོགས་གྱུར་པས། །གང་ཞིག་སྟོབས་ཆེན་གྱུར་པ་ལ། །དེ་ཡི་ཞི་བྱེད་ཞུན་མར་ཏེ། །ཁང་བ་འབར་ལ་ཆུ་བླུགས་མཚུངས། །རླུང་མཁྲིས་སེལ་བའི་མཆོག་ཏུ་ནི། །སྦྱོར་བའི་དབང་ལས་གྱུར་པས་ན། །དེ་ཕྱིར་རང་གི་སྨན་དང་ནི། །ཇི་བཞིན་བསྐོལ་བ་དེ་ལ་སྦྱིན། །རིམས་དྲོ་མི་མཐུན་པས་སེལ་ལ། །བསིལ་བས་མཁྲིས་པ་རང་སེལ་བར་བྱེ། །སྣུམ་པས་རླུང་སེལ་བད་ཀན་མར། །མཚུངས་ཀྱང་སྦྱོར་དང་གཡོས་པས་སེལ། །སྔར་གྱི་སྨན་ཁུ་མར་བཅས་པ། །ཐམས་ཅད་ནད་དམིགས་ཇི་བཞིན་གཏང༌། །འབྲས་བུ་གསུམ་དང་ནིམ་པའི་ཤུན། །ཤིང་མངར་བྲི་ཧ་ཏི་
གཉིས་དང༌། སྲན་ཆུང་འོ་མར་བཅས་བསྐོལ་ལ། །མར་ལྡན་རིམས་དང་ལུད་པ་འཇོམས། །པི་པི་ལིང་དང་ཏིག་ཏ་དུག་མོ་ཉུང༌། །ཀཎྚ་ཀ་རི་པུ་ཙེ་ཤེལ་ཐལ་ཏྲེས། །ཏ་མ་ལ་ཀ་སྒྱུ་རུ་ར་བིལ་བ། །གླ་སྒང་ཙནྡན་ཀྱི་ལྕེ་པུ་ཤེལ་ཙེ། །རྒུན་འབྲུམ་བོང་ང་ས་ལ་པརྞི་དང༌། །བསྐོལ་བའི་མར་གྱིས་རིམས་ཀྱི་ནད་དང་ནི། །མེ་དྲོད་མི་སྙོམས་ཧ་ལི་ས་ཀ་དང༌། །ཡི་ག་འཆུས་དང་མི་བཟད་ཚ་བ་དང༌། །སྙོམ་པའི་ནད་དང་རྩིབ་ལོགས་ན་བ་དང༌། མོག་ནད་སློན་ནི་མྱུར་དུ་འཇོམས་པར་བྱེད། །དུར་བྱིད་མ་གཏོགས་སེང་ཕྲོམ་སོགས་བསྐོལ་མར། །རླུང་ལས་གྱུར་པའི་རིམས་ལ་བསྔགས་པ་ཡིན། །མཁྲིས་པའི་རིམས་ལ་པུ་ཙེ་ཤེལ་དུག་མར། །ཀྱི་ལྕེ་བར་བསྐོལ་སྨན་མར་གང་ཡིན་ཕ། །བྱི་དང་ག་དང་དབྱི་མོང་ཁ་རུ་ཚ། །པ་ཏ་ཚ་བ་གསུམ་དང་ཙི་ཏྲ་ཀ །ལྕེ་མྱང་ཆོ་དང་ནས་ཚིག་འཁུས་ཐལ་བ། །འདི་རྣམས་ཆ་ནི་སྲང་རེར་བྱས་པ་དང༌། །མར་དང་འོ་མ་ཆ་ནི་མཉམ་བྱས་པ། །བྲེ་གང་བསྐོལ་བས་བད་ཀན་རིམས་རྙིང་འཇོམས། །སླེ་ཏྲེས་ཁུ་བ་ལྡེ་གུ་དང༌། །བ་ཤ་ཀ་དང་འབྲས་བུ་གསུམ། །རྒུན་འབྲུམ་དང་དང་ནི་བ་ལ་དང༌། །བསྐོལ་བའི་སྨན་མར་རིམས་ནད་འཇོམས། །མར་ཞུ་ནས་ནི་ཤ་འཇམ་ཁུ། །ཁ་ཟས་བཅས་པ་བཟའ་བར་བྱ། །དེས་ནི་སྟོབས་རབ་སྐྱེད་བྱེད་ཅིང༌། །ནད་ནི་ཤིན་ཏུ་ཟད་བྱེད་ཡིན། །ཀ་ར་དེ་ལ་སོགས་ཁུ་དང༌། །མུངྒ་བད་ཀན་མཁྲིས་འཇོམས་པས། །ཕལ་ཆེར་རླུང་ཤས་ཆེ་རིམས་ལ། །གཟེར་དང་བཤད་པ་འགགས་པ་ནི། །སྐྱེད་ཅིང་རིམས་ནི་འཕེལ་བར་བྱེད། །དེ་ཕྱིར་དེ་ནི་བསྔགས་མ་ཡིན། །གལ་ཏེ་དེ་ལྟར་བྱས་ཀྱང་ནི། །རིམས་ནི་ཞི་བར་མ་གྱུར་ན། །སྤྱང་འོས་ལ་ནི་སྤྱང་བར་བྱ། །དེ་ལ་སྐྱུགས་སྨན་སྔར་བཤད་པ། །མ་ཞུ་བར་ནི་གནས་ནད་ལ། །སྟོབས་ཅན་སྟོབས་ནི་བསྲུངས་ཏེ་བཏང༌། །སྨིན་ཞིང་ནད་ནི་ལྷོད་གྱུར་པའམ། །ཆང་དང་དུག་ལས་བྱུང་རིམས་ལ། །ཤ་མ་དུར་བྱེད་འབྲས་བུ་གསུམ། །པི་པི་ལིང་དང་གེ་སར་དང༌། ཡང་ན་ཚ་བ་གསུམ་སོགས་སྨན། །ཁར་སྦྲང་རྩིར་བཅས་པ་སྦྱིན། །རྒུན་འབྲུམ་སྐྱུ་
རུ་རའི་ཁུ་བ། །ཨ་རུ་ར་ནི་རྒུན་ཆུར་བཅས། །དོང་གའོ་མར་བཅས་པའམ། །རྒུན་ཆུ་དང་ནི་བཅས་པ་བླུད། །འབྲས་བུ་གསུམ་མམ་ཀྱི་ལྕེ་བ་།འོ་མ་རིམས་དང་ལྡན་པས་བཏུང༌། །བཀྲུ་སྨན་བཏང་བའི་སྐབས་སུ་ཡང༌། །ཐུག་སླ་ལ་སོགས་རིམ་བཞིན་བླུད། །རིམ་གྱིས་དི་མ་གློངས་གཡོས་ཚེ། །དེ་ལ་རྟག་ཏུ་དགག་མི་བྱ། །ནད་ནི་ཁོང་པར་གནས་སྙེག་ནས། །སྨིན་ཀྱང་གནོད་པ་སྐྱེད་པར་བྱེད་།ཤིན་ཏུ་ཚབས་ཆེར་བྱུང་གྱུར་ན། །སྨིན་ནས་གཅད་པར་བྱ་བ་ཡིན། །མ་སྨིན་བཀག་པའི་ཉེས་པ་ནི། །ནད་བཅོས་ཐབས་སུ་བཤད་པ་ཡིན། །གང་ཞིག་རྨོངས་པས་མ་སྨིན་པའི། །རིམས་ལ་ནད་འབྱིན་སྨན་གཏོང་བ། །དེ་ནི་སྦྲུལ་ནག་གཉིད་ལོག་ལ། །ལག་པའི་རྩེ་མོས་རེག་དང་མཚུངས། །རིམས་ཟད་པ་ལ་སློན་སྨན་དང༌། །བཀྲུ་སྨན་ཕན་པ་མ་ཡིན་ཏེ། །དེ་ལ་འོ་མ་དག་གི་ནི། །མས་གཏོང་བས་ནི་ནད་བསལ་བྱ། །འོ་མ་ལ་གོམས་བ་ཀན་ཟད། །ལུས་ཚ་སྒོམ་དད་གཉིས་ཡོད་ན། རླུང་དང་མཁྲིས་པས་ཉེན་པ་ནི། །ཚད་པར་འཁྲུ་ཡང་འོ་མ་པ་ན། །དེ་ལུས་སྨྱུང་བས་གདུངས་པ་དག །མེས་ཚིག་པ་ཡིན་གསལ་ནི། །ཆར་ཆུ་འབབ་པས་ཀྱེད་པ་ལྟར། །རིམས་ནི་མྱུར་དུ་སེལ་བར་བྱེད། །དེ་བས་འོ་མ་སྦྱར་ཏེ་བསྐོལ། །དྲོ་བའམ་བསྒྲངས་པ་བཞོས་མ་ཐག །དུས་ཀྱི་དབྱེ་བ་ཤེས་ཏེ་སྦྱིན། །དེ་ལས་གཞན་དུ་རིམས་ཅན་གསོད། །འོ་མ་བཅའ་སྒ་འབྲས་གོར་བཅས། །རྒུན་འབྲུམ་ཁ་ར་མར་ལྡན་པར། །བསྐོལ་ཏེ་བསྒྲངས་པར་སྦྲང་རྩི་བཏབ། །སྒོམ་དང་ལུས་ཚ་རིམས་འཇོམས་བྱེད། །དེ་བཞིན་བ་ལ་རྒྱུན་ཞིང་མངར། །ཙནྡན་ཐལ་ཏྲེས་པི་པི་ལིང༌། །འོ་མའི་བཞི་འགྱུར་ཆུ་བསྐོལ་བའམ། །པི་པི་ལིང་དང་བསྐོལ་བ་ནི། །རིམས་ཀྱིས་བཏབ་པས་འཐུངས་ན་ནི། །ཀླད་གཟེར་ལུད་པ་དབུགས་མི་བདེ། །རྩིབ་ལོགས་གཟེར་རིམས་རྙིང་ལས་ཐར། །རྩ་བ་ལྔ་བསྐོལ་དེ་དང་འདྲ། །ཨེ་རཎྚ་རྩ་བསྐོལ་བའམ། །བིལ་བ་གཞོན་ནུ་དང་བསྐོལ་བའམ། །ཞོས་མ་ཧག་གི་འོ་མ་འཐུངས། །རླུང་གི་རིམས་ཀྱིས་ཕྱི་ས་
འགགས། །ཁྲག་བཅས་སྤྱིན་བག་ཚད་འཁྲུ་དང༌། །སྐོམ་དད་གཟེར་བཅས་འཁྲུ་ལས་ཐར། །བཅའ་སྒ་བ་བྱ་ལ་ཀྲི་དང༌། །གཟེ་མ་བུ་རམ་འོ་མར་བཙོས། །བསྐོལ་འཐུངས་སྐྲངས་བཤང་གཅིན་དང་འཕེན། །འགགས་དང་རིམས་དང་ལུད་པ་འཇོམས། །བྲི་ཥྩི་བལ་བིལ་བ་དང༌། །བར་ཤ་བྷུ་དང་བསྐོལ་བ་ཡིས། །རིམས་ཀྱི་སྐྲངས་ནད་སེལ་བ་ཡིན། །ཤིང་ཤ་པ་ཡི་སྙིང་པོ་དང༌། །འོ་མ་དག་ཏུ་བསྐོལ་བ་ནི། །རིམས་ནི་མྱུར་དུ་འཇོམས་བྱེད་ཡིན། །ནད་སྨིན་ཞུ་བའི་གནད་སོང་ལ། །མས་གཏོང་དྲག་པོས་མེ་སྟོབས་སྐྱེད། །རིམས་བྲལ་སེམས་དགའ་ཡིག་འབྱེད། །མྱུར་དུ་སྐྱེད་པར་བྱེད་པ་ཡིན། །བཀྲུ་སྨན་མཁྲིས་པའམ་བད་མཁྲིས་འདྲེས། །མཁྲིས་པའི་གནས་སུ་ཞུགས་པ་སེལ། །འཇམ་རྩིས་ནད་ནི་སུམ་ཆར་དག །ཞུ་བའི་ནད་ལ་བརྟེན་པ་སེལ། །འོ་མས་བད་ཀན་མཁྲིས་པ་དག །མཇུག་ཏོ་རྒྱབ་དང་རྐེད་པ་ན། མེ་དྲོད་ཆེ་ལ་རྟུག་འགགས་པ། །འཇམ་རྩི་མས་གཏོང་སྤྱར་བར་བྱ། །ནི་མ་པ་པ་ཏོ་ལའི་ལོ་མ། །པུ་ཙེ་ཤེལ་དང་དོང་གང་དང༌། །སྠི་ར་བ་ལ་པོ་སོན་ཆ། །གཟེ་མ་པུ་ཤེལ་བ་ལ་ཀ །འོ་མའམ་ཆུར་ནི་བསྐོལ་བ་དག །འོ་མ་ལྷག་མ་ལུས་པ་ལ། །གླ་སྒང་ཤིང་མངར་པོ་སོན་ཆ། །པི་པི་ལིང་དང་དུག་མོ་ཉུང༌། །མར་དང་སྦྲང་རྩི་བསྲེས་པ་ཡི། །འཇམ་རྩི་བཏང་ནི་རིམས་འཇོམས་སོ། །པརྞི་བཞི་དང་ཤིང་མངར་དང༌། །པོ་སོན་ཆ་དང་པུ་ཤེལ་ཙེ། །དོང་ག་རྣམས་ནི་བསྐོལ་བ་རུ། །ཤིང་མངར་ཤ་ཏ་པུཥྤ་དང༌། །པྲི་ཡང་ཀུ་དང་པོ་སོན་ཆ། །གླ་སྒང་ལྡེ་གུར་བྱས་པ་ལ། །བུ་རམ་མར་དང་སྦྲང་རྩིར་བཅས། །འཇམ་རྩིས་རིམས་ནི་སེལ་བྱེད་ཡིན། །ཛི་བནྟི་དང་པོ་སོན་ཆ། །མེ་ད་ཤིང་མངར་པི་པི་ལིང༌། །ཤུ་དག་རིདྡྷི་ར་སྣ་དང༌། བལ་དང་ནི་བིལ་བ་དང༌། །ཤུ་ཏི་དང་ནི་ཉ་ཤིང་རྣམས། །མར་དང་ཏིལ་མར་འོ་མ་དང༌། །ཆུ་དང་བཏགས་ཏེ་ལྷན་ཅིག་བསྐོལ། །སྣུམ་མི་ནད་དང་རྗེས་མཐུན་པའི། །འཇམ་རྩི་རིམས་ལ་གཏང་བར་བྱ། །གང་ཡང་ཆོ་ག་གྲུབ་པ་ལས། །རིམས་སེལ་བར་ནི་བཤད་པ་ཡི། །འཇམ་
རྩི་དག་ཀྱང་གཏང་བར་བྱ། །སྣ་ཡི་བཀྲུ་སྨན་རིམས་རྙིང་ལ། །བཏང་ན་ཡི་ག་འབྱེད་བྱེད་ཅིང༌། །མགོ་ནི་ལྕི་ཞིང་བད་ཀན་ཆེ། །སེལ་ཞིང་དབང་པོ་གསལ་བྱེད་ལ། །སྣུམ་གྱི་སྣ་སྨན་མགོ་སྟོང་སྙམ། །ལུས་ཚ་མཁྲིས་པ་སེལ་བྱེད་ཡིན། །དུད་བརྔུབ་།མཁུར་བཀང་མཁུར་བ་སྦོ། །ནད་དམིགས་ཇི་བཞིན་སྦྱར་བར་བྱ། །ཆམ་པ་ཁས་རོ་མི་ཚོར་དང༌། །མགོ་ནད་ལྐོག་ནད་སེལ་བྱེད་ཡིན། །ཡི་ག་འཆུས་ལ་ཁ་ལུང་གི །གེ་སར་མར་དང་རྒྱ་མ་ཚེར་བཅས། །ཡང་ན་རྒུན་འབྲུམ་སྒྱུ་རུ་ར་།ཁ་རའི་སྡེ་གུ་མཁུར་བར་བཅད། །རིམས་རྙིང་པགས་པ་ལ་བརྟེན་ལ། །རེག་ན་ཇི་ལྟར་བོད་འགྱུར་བའི། །སྨན་བསིལ་དྲོ་བ་ལ་སྦྱར་བའི་།བསྐུ་བྱུག་ཆུ་བླུགས་ལ་སོགས་བྱ། །མིག་སྨན་དུད་པའི་སྦྱོར་བའང་བྱ། །གློ་བུར་བྱུང་ལ་དེ་དེ་བཞིན། །ཚལ་ལན་སྟོང་བཀྲུས་པ་ཡི། །མར་གྱིས་བསྐུ་བ་སྤྱད་པར་བྱ། མདོ་གནས་ལས་བཤད་སྨན་གྱི་སྡེ། །མངར་དང་སྐྱུར་དང་བསྐ་བ་དང༌། །དཱུ་རང་ལ་སོགས་རླུང་མཁྲིས་འཇོམས། །སྐྱུག་སྨན་ལ་སོགས་སྡེ་ཚན་བཤད། །ནུས་པ་བསིལ་ཞིང་རེག་ན་གྲང༌། །བསྐོལ་དང་ལྡེ་གུར་བྱས་པ་དང༌། །ཏིལ་མར་འོ་མར་བཅས་བསྐོལ་བ། །བསྐུས་ན་འཕྲལ་དུ་ཚ་རིམས་སེལ། །མགོ་དང་ལུས་ཀྱང་དེ་ཉིད་ནི། །ཅུང་ཟད་རྩིང་བར་བཏགས་པས་བསྐུ། །དེ་བསྐོལ་ཆུ་ནི་བླུགས་པ་དང༌། །ལུས་འབྱི་བ་ལ་ཡང་སྦྱར་བར་བྱ། །སྐྱུར་རྩབས་ཆུ་དང་འོ་མ་ཚ། །མར་ལ་སོགས་པའང་དེ་བཞིན་སྦྱར། །བིལ་རྐང་ཁ་ལུང་ཨ་མྲ་དང༌། །སེའུ་འབྲུ་སེང་ཕྲོམ་བིད་རི། །རྒྱ་ཤུག་ལོ་མ་ལས་བྱུང་བའམ། །ལུང་ཏང་གི་ནི་དབུ་བ་ཡིས། །ལུས་བསྐུས་ཚ་ན་རྨོངས་བག་དང༌། །སློན་དང་སྐོམ་དད་ཞི་བར་བྱེད། །གང་ཞིག་ནད་གསོའི་ཐབས་སུ་བཤད། །མཁྲིས་པ་སེལ་བའི་རིམ་པ་སྟེ། །བསྟེན་པར་བྱས་ན་མྱུར་དུ་ནི། །ཚ་དང་བཅས་པའི་རིམས་སེལ་འགྱུར། །ནུས་པ་དྲོ་ཞིང་རེག་ན་དྲོ། །རྒྱ་སྤོས་གྲུ་གུམ་ཨ་ཀ་རུ། །རུ་རྟ་རྡོ་དྲེག་སྟོ་ནེ་ཡ། །ས་ར་ལ་དང་ཐང་ཤིང་དང༌། ཆུ་སྲིན་སེན་མོ་ར་སྣ་དང༌། །གུ་གུལ་ཤུ་དག་ལྕ་བ་དང༌། །སུག་སྨེལ་གཉིས་དང་ཙ་རོང་དང༌། །
ཙནྡན་སིབ་དང་བྱིའུ་རུག་པ། །ཤི་ཀྲུ་སྤང་སྤོས་བྱ་མ་ཀ །ཡུངས་ཀར་རྩ་བ་བཅུ་པ་དང༌། །སླེ་ཏྲེས་ཨེར་ཎྜ་གཉིས་དང༌། །བ་རུ་ར་དང་རོ་ཧི་ཤ །ཏ་མ་ལ་ཡི་ལོ་མ་དང༌། པུ་ཏི་ཀ་དང་ས་ལ་ཀི། །འུ་སུ་ཨ་ཟ་མོ་ཏ་དང༌། །ཤུ་ཏི་མ་ཤ་ཀུ་ལངྠ། །ཙི་ཏྲ་ཀ་དང་པྲ་ཀི་དྱ། །ན་ཀུ་ལ་ནི་རྣམ་གཉིས་དང༌། །གཞན་ཡང་དེ་འདྲའི་བསིལ་བའི་སྨན། །བསྐོལ་དང་ལྡེ་གུར་བྱས་ནས་ནི། །ཆང་དང་སྐྱུར་རྩབས་ལ་སོགས་སྦྱར། །ཏིལ་མར་བསྐོལ་བ་གྲང་རིམས་སྦྱར། །དེ་དྲོ་འཇམ་གྱིས་བསྐུ་བ་དང༌། ཞིབ་ཏུ་བཏགས་པས་བྱུག་པར་བྱ། །ཅུང་ཟད་དྲོ་བས་བླུགས་པ་དང༌། །ལུས་འབྱིང་བར་ཡང་བྱ་བ་ཡིན། །ཚྭ་དང་བ་གཅི་ན་ཞོ་ག་ཆུ། །འབའ་ཞིག་གིས་ཀྱང་དེ་བཞིན་བྱ། །དོང་ག་ལ་སོགས་སྡེ་ཡིས་ཡང༌། །བཏུང་དང་བསྐུ་དང་བྱུག་པར་བྱ། །བདུག་པ་ཨ་ཀ་རུ་ལས་བྱུང༌། །འོག་ནས་བཤད་པའི་རིམས་ལ་སྦྱར། །དུགས་ནི་མེས་བྱས་མེས་མ་བྱས། །དུགས་ཀྱི་སྨན་དང་ཁ་ཟས་བསྟེན། །ཁང་སྤྲུམས་ཕུག་ཏུ་ཉལ་ཞིང༌། །ལ་བ་དྲེའུ་རྔོག་རེའུ་སྣམ་འགོ །དུ་བ་མེད་པའི་མདག་མས་གང༌། །ཞུགས་ཤིང་དག་ནི་བསྟེན་པ་དང༌། །ཆང་ནི་ཚ་བ་གསུམ་བཅས། །དང༌། །དར་བ་རྒྱ་སྲན་ཀུ་ལངྠ། །འབྲུ་དང་ཀོ་ཏར་བ་དག་ཀྱང༌། །འདར་བའི་རིམས་ཅན་དེ་ལ་སྦྱིན། །གྲང་བའི་རིམས་ནད་ཅན་དེ་ལ། །ཆུང་མ་ནུ་མ་རྒྱས་པ་དང༌། །རྒྱན་གྱིས་བརྒྱན་ཏེ་བཞག་པ་དང༌། ལང་ཚོས་རྒྱགས་ཤིང་ཚང་གིས་མྱོས། །བུད་མེད་ཀྱིས་དེ་འཁྱུད་པར་བྱ། །གྲང་དང་བྲལ་བར་ཤེས་ནས་ནི། །དེ་ནས་དེ་སླར་བསལ་བར་བྱ། །ནད་གཅིག་འཕེལ་བར་འགྱུར་བ་དང༌། །འགྲིབ་པའམ་ལྡང་བར་གྱུར་པའམ། །མཉམ་གནས་ནད་ནི་བད་ཀན་གྱི། །གནས་ཀྱི་རིམ་པས་བསལ་བར་བྱ། །འདུས་པའི་རིམས་ཀྱི་མཐའ་མར་ནི། །གང་གི་རྣ་པའི་རྩ་བ་རུ། །མི་བཟད་སྐྲང་པ་བྱུང་གྱུར་ན། །འགའ་ཞིག་ཐར་པར་འགྱུར་བ་ཡིན། །དེ་ནི་གཏར་གས་དབྱུང་བ་དང༌། །ཞུན་མར་བླུད་པས་མྱུར་བསལ་ཏེ། །བད་མཁྲིས་སེལ་བའི་སྨན་བསྐུ་དང༌། །སྣ་སྨན་མཁུར་བ་བཀང་བས་གསོ། །གང་གི་རིམས་ནི་བསིལ་དྲོད་
དང༌། སྣུམ་རྩུབ་སོགས་ཀྱིས་ཞི་མི་འགྱུར། །ཡན་ལག་ཞེན་པ་དེ་རིམས་བཞིན། །ལག་ངར་ལས་ཁྲག་མྱུར་དུ་དབྱུང༌། །ཆོ་ག་འདི་ནི་མི་བཟད་པའི། །རིམས་ལའང་ནད་དམིགས་ཇི་བཞིན་བྱ། །རླུང་སོགས་རིམ་གྱིས་ཆ་ཕེ་ལ། །ཕྱིས་བཤད་གང་ཡིན་དག་ཀྱང་བྱ། །པ་ཏོ་ལ་དང་པུ་ཙེ་ཤེལ། །གླ་སྒང་ཤིང་མངར་ཨ་རུར། །གཉིས་སམ་གསུམ་མམ་ལྔ་བསྐོལ་བ། །མི་བཟད་རིམས་ནི་འཇོམས་བྱེད་ཡིན། །འབྲས་བུ་གསུམ་དང་ཨ་རུར། །སླེ་ཏྲེས་པི་པི་ལི་ལིང་སོ་སོར། །ཆོ་ག་དེ་དང་སྦྱར་བའམ། །གོ་བྱེ་བུ་རམ་བཅས་པ་སྦྱིན། །རིམས་ཀྱིས་ཐེབས་པའི་ཉིན་ཞག་ལ། །ཉམས་སྨད་པའམ་ཉམས་བརྟ་བྱ། །ནང་པར་ཏིལ་མར་སྒོ་ག་སྐྱ་བཅས། །བཟའ་འམ་ཡང་ན་མར་རྙིང་ངམ། །དེ་བཞིན་ཞོ་དང་འོ་མ་སྦྱིན། ཞུན་མར་སྲང་དྲུག་པ་དང་ནི། །དགེ་བ་ཆེན་པོའམ་བའི་རྣམ་ལྔ། །ཏིག་ཏའང་དུགས་དང་བསྐོལ་ཏེ་སྦྱིན། །འབྲས་བུ་གསུམ་དང་རྒྱ་ཤུག་དང༌། །ཨགྣི་མནྠ་བསྐོལ་བ་རུ། །ཞོ་དང་བསྐོལ་བའི་མར་དག་ཏུ། །སེང་ཕྲོམ་ཤུན་ལྤགས་སྡེ་གུ་བཏབ། །མི་བཟད་རིམས་ནི་འཇོམས་པའི་མཆོག །འབྲུ་ཆང་དང་ནི་ཆང་རྙིང་རྣོ། །རྨ་བྱ་གོང་མོ་སྲེག་ཁྱིམ་བྱ། །རླན་ཅན་ཤ་ནི་དྲོད་སྐྱེད་པ། །ཟས་བཅས་དག་ནི་ཅི་འདོད་པར། །བསྟེན་ལ་དེ་བཞིན་གཉིད་ལོག་པའམ། །ཡང་ན་སླར་ནི་སྐྱུག་ཏུ་གཞུག །ཡང་ན་ཞུན་མར་ཚད་ཆེན་པོ། །བླུད་དེ་སླར་ཡང་སྐྱུག་ཏུ་གཞུག །ཨ་ཛ་གནྡྷ་ནི་ལི་ནི། །དུར་བྱིད་དང་ནི་པུ་ཙེ་ཤེལ། །རིམས་ཀྱིས་འདེབས་ཚེ་སྣུམ་དང་དུགས། །ལེགས་པར་བྱས་ཏེ་བླུད་པར་བྱ། །ལྡོང་རོས་རྒྱམ་ཚ་པི་པི་ལིང༌། །ཏིལ་མར་དང་སྦྱར་མིག་སྨན་གཞུག །ཤིང་ཀུན་སྟག་ཚིལ་ཆ་མཉམ་བྱ། །རྒྱ་མཚར་བཅས་པའི་སྣ་སྨན་བྱ། །དེ་བཞིན་མར་རྙིང་སེང་གེའི་ཚིལ། །རྒྱམ་ཚ་དག་དང་སྦྱར་ཏེ་གཏང༌། །པ་ལ་ཀ་ས་ནིམ་བའི་ལོ། །ཤུ་དག་རུ་རྟ་ཨ་རུ་ར། །ཡུངས་ཀར་ནས་བཅས་མར་སྦྱར་བའི། །བདུག་པའམ་བྱི་ལའི་རྟུག་པས་བདུག །གུ་གུལ་ཤུ་དག་བྱ་མ་ཀ །ས་རྫ་ར་ས་ནིམ་པ་དང༌། །ཨ་རྐ་དང་ནི་ཨ་རུ་ར། །ཐང་
ཤིང་བཅས་པའི་སྤོས་སྦྱར་བ། །འདི་ནི་གཞན་གྱིས་མི་ཐུབ་པའི། །བདུག་པ་ཡིན་ཏེ་རིམས་ཀུན་སེལ། །སྤོས་བདུག་སྣ་སྨན་གཏང་བྱ་བ། །སེམས་ཀྱིས་བསྒྱུར་བར་གང་བཤད་དང༌། །འཕགས་པ་ལ་བརྟེན་སྨན་གྱིས་ནི། །རིམས་ནད་ཐམས་ཅད་སེལ་བར་བྱེད། །མཆོག་ཏུ་ཕལ་ཆེར་མི་བཟང་རིམས། །དེ་ནི་གློ་བུར་འོང་རྗེས་འབྲེལ། །མི་བཟད་རིམས་ཞིར་མ་གྱུར་ན། །རང་གི་གཏར་ག་ཇི་བཞིན་གདབ། །དངས་མ་ལ་གནས་ཐམས་ཅད་ལ། །སྐྱུག་སྨན་གཏང་དང་སྨྱུང་བ་བྱ། །ཁྲག་ལ་གནས་པ་སྨན་ཆུ་བླུགས། །བསྐུ་དང་བྱུག་དང་གཏར་ག་བྱ། །ཤར་གནས་བཀྲུ་སྨན་རྣོན་པོ་བྱ། །ཚིལ་གནས་ཚིལ་ནི་དབྲི་བར་བྱ། །རུས་པར་གནས་ལ་རླུང་ཞི་བའི། །བསྐུ་དང་དུགས་དང་མཉེ་བ་བྱ། །རིམས་དེར་རླུང་ནད་ཞི་བྱ་དང༌། །ཁྱད་པར་དུ་ནི་འཇམ་རྩི་བྱ། མ་འདྲེས་རླུང་དང་མེ་དབལ་དང༌། འབྲུམ་བུས་གནོད་འགྱུར་རིམས་ལ་ནི། །ཞུན་མར་བླུད་ཅིང་ཙནྡན་བྱུག །སྨན་ཆུ་བླུགས་ཤིང་ཤ་ཁུ་སྦྱིན། །རང་གི་དཔྱད་ནི་ཇི་སྐད་བཤད། །གཏར་ག་ལ་སོགས་དག་གིས་གསོ། །གདོན་བྱུང་འབྱུང་པོའི་རིག་པ་བཤད། །གཏོར་མ་སྔགས་ལ་སོགས་པས་གསོ། །སྨན་དྲི་ལས་བྱུང་མཁྲིས་པ་ནི། །ཞི་བྱ་དུག་སྐྱེས་དུག་གིས་གསོ། །འདོད་དོན་ཇི་ལྟར་ཡིད་འཐད་དང༌། །ནད་ནི་ཇི་ལྟར་ཞི་འགྱུར་བ། །ཕན་དང་མི་ཕན་ལ་མཁས་པས། །ཁྲོས་སོགས་ལས་བྱུང་རིམས་བསལ་བྱ། །ཁྲོས་བྱུང་འདོད་པས་ཞི་བར་འགྱུར། འདོད་བྱུང་ཁྲོས་པས་ཞི་བར་འགྱུར། །མྱ་ངན་འཇིགས་བྱུང་དེ་གཉིས་ཀྱིས། །འཇིགས་དང་མྱ་ངན་བྱུང་ཅིག་ཤོས། །དམོད་པ་མངོན་སྤྱོད་སྔགས་ལས་བྱུང༌། །འཕགས་པའི་དོན་ལ་བརྟེན་པས་ཞི། །རིམས་དེ་ཐོག་མར་མ་འདྲེས་ལ། །དེ་འོག་དྲི་མས་ཁྱབ་པར་བྱེད། །དེ་བས་ནད་དང་རྗེས་མཐུན་པར། །དེ་ལ་ཁ་ཟས་ལ་སོགས་སྦྱར། །རླུང་སྩོགས་རྒྱུ་ལ་མ་བརྟེན་པར། །རིམས་ནི་རྗེས་འབྲེལ་གནས་མི་བྱེད། །རིམས་ཀྱི་དུས་དྲན་བྱུང་དེ་ལ། །ཡིད་འཕྲོག་ཡུལ་གྱིས་བརྗེད་པར་བྱ་།སྙིང་རྗེས་བརླན་ཞིང་སེམས་དག་པ། །རིམས་ཀུན་འཇོམས་པར་བྱེད་པ་ཡིན། །
ཉམས་སྟོབས་རྫོགས་པར་འགྱུར་གྱི་བར། །རྩོལ་དང་ཁྲུས་དང་ཉལ་པོ་དང༌། །ཟས་ལྕི་མ་གོམས་ཚ་བྱེད་དང༌། །གང་གཞན་རིམས་སྐྱེད་བྱེད་པ་སྤངས། །རིམས་བྲལ་གྱུར་ཀྱང་འཕྲལ་དུ་ནི། །ཟས་ཀུན་བསྟེན་པར་མི་བྱ་སྟེ། །རིམས་ནི་མྱུར་དུ་ལྡོག་བྱེད་ནས་། ཉམ་ཆུང་མི་ནི་མྱུར་གསོད་བྱེད། །གང་ཕྱིར་མྱུར་དུ་གསོད་འགྱུར་བས། །དེ་ཕྱིར་དེ་ནི་ཁྱད་པར་དུ། །གནས་སྐབས་དེ་དང་དེ་ངང་ཏུ། །སྨན་དཔྱད་དེ་དང་དེ་དག་བྱ། །སྨན་དང་ནོར་བུ་སྔགས་དང་བཅས་པ་དང༌། །དམ་པ་བླ་མ་བྲམ་ཟེ་དཀོན་མཆོག་མཆོད། །ཡིད་ནི་དགའ་བར་བྱེད་པའི་ཡུལ་བསྟེན་པས། །ཁྱབ་འཇུག་གིས་བྱས་མ་རུངས་རིམས་ཀྱང་འཇོམས། །ཡན་ལག་བརྒྱད་པའི་སྙིང་པོ་བསྡུས་པ་ལས། །གསོ་པའི་གནས་ཀྱི་ལེའུ་དང་པོའོ།། །།དེ་ནས་ཁྲག་མཁྲིས་གསོ་བའི་ལེའུ་བཤད་པར་བྱའོ། ཁྲག་མཁྲིས་བདེ་བའི་དུས་སུ་འབྱུང༌། །སྟོབས་ལྡན་སྟོད་འབྱུང་ཤུགས་དལ་ལ། །ཉེས་གཅིག་ལས་བྱུང་གསར་དུ་བཏབ། །བླ་བརྣན་མེད་པ་གསོ་བར་བྱ། །ཁྲག་གང་ནད་གཞི་གཉིས་ལ་སྐྱེས། །ཞི་ཞིང་ཞི་ཞིང་སླར་ལྡང་དང༌། །ལམ་ནས་ལམ་གཞན་འགྲོ་བ་གང༌། །ཐུར་དུ་འབྱུང་བ་གསོ་བ་ཙམ། །ཤས་ཆེར་འབྱུང་ཞིང་མེ་དྲོ་ད་ཉམས། །ཉེས་གསུམ་ལམ་གཉིས་ལས་བྱུང་སྤངས། །ནད་གཞི་ཟས་དང་གནས་དང་ནི། །ནད་ཀྱི་གྲོགས་དང་སྟོབས་དག་དང༌། །ཡུལ་དང་དུས་ཀྱི་གནས་སྐབས་སོགས། །ཤེས་བྱ་དང་པོར་སྨྱུང་བའམ་བརྟ། །དེ་བཞིན་སྦྱང་དང་ཞི་བྱ་བས། །ཁྲག་དང་མཁྲིས་པ་གསོ་བར་བྱ། །བརྟ་བ་ལས་བྱུང་སྟོབས་ལྡན་པ། །ནད་གཞི་མང་པོ་ལས་བྱུང་བ། །གྱེན་འབྱུང་བཀྲུ་སྨན་གཏོང་བས་གསོ། །ཐུར་འབྱུང་སྐྱུག་སྨན་གྱིས་གསོ་བྱ། །སྨྱུང་བ་བརྟ་བྱ་ལ་ལྟོས་བྱ། །སྟོད་དུ་འབྱུང་བ་ཁ་བ་དང༌། །བསྐ་བའི་སྨན་ཁུ་སྨྱུང་བ་དང༌། །ཡན་ལག་དྲུག་སྨན་བཅའ་སྒ་མེད། །འཐུངས་ན་ཞི་བར་འགྱུར་བ་ཡིན། །ཐུར་དུ་འབྱུང་བའི་ཁྲག་མཁྲིས་ལ། །སྨན་ཁུ་མངར་བས་བརྟ་བར་བྱ། །སྟོང་འབྱུང་དང་པོར་སྐྱོ་མ་བླུད། །སྨད་འབྱུང་དང་
པོར་ཐུག་པ་བླུད། །སྟོབས་ལྡན་ཟ་ནུས་མ་དག་ཁྲག །བྱུང་ཡང་མི་དགག་ག་དེས་ནད་སྐྱེད། །དེ་ནི་གཞན་དུ་མེ་ལྟ་བུར། །མྱུར་གསོད་བྱེད་པས་གཅད་པར་བྱ། །དུར་བྱིད་པྲི་ཡང་ཆུ་བསྐོལ་དང༌། །ལྡེ་གུ་ཁ་རར་བཅས་པ་དག །ཆོ་ག་བཞིན་དུ་དེ་ལ་ནི། །ཞོ་གཉིས་ཙམ་དྲི་ང་ལྡག་པར་བྱ། །དུར་བྱིད་པྲི་ཡང་འབྲས་བུ་གསུམ། །ཁ་ར་སྦྲང་རྩི་པི་པི་ལིང༌། །སྦྲུས་པ་འདུས་བྱུང་སྟོད་དུ་བྱུང༌། །ཁྲག་རིམས་འོར་ནད་སེལ་བྱེད་ཡིན། །དེ་བཞིན་དུར་བྱིད་ཁ་རར་མཉམ། །པི་པི་ལིང་ནི་བཞི་ཆར་བཅས། །སྐྱུག་སྨན་ཕྱིར་ནི་པོ་སོན་ཆ། ཁ་ར་སྦྲང་རྩིར་བཅས་སྐྱོ་མའམ། ཁ་ར་སྦྲང་རྩི་པོ་སོན་ཆ། །ཆུར་བཅས་པའམ་ཤིང་མངར་ཆུ། །འོ་མའམ་བུ་རམ་ཤིང་ཁུ་བླུད། །སྦྱངས་པའི་རྗེས་ལ་ཆོ་ག་ནི། །ཐུག་སླ་ལ་སོགས་ཇི་བཞིན་དུ། །བླུད་ཅིང་སྟོབས་ནི་བསྲུང་བར་བྱ། །སྐྱོ་མ་རིམས་སྐབས་བཤད་རྒུན་སོགས། །ཡང་ན་མཁྲིས་འཇོམས་འབྲས་བུར་སྦྱར། །སྦྲང་རྩི་འབྲ་གོ་རྒུན་འབྲུམ་དང༌། །པ་རུ་ཤ་ཀ་ཀ་རའི་ཆུ། །སྙིང་པོ་ལྔ་ཡི་སྐྱོམ་ནི། །འབྲས་ཡོས་ཕྱེ་ནི་མར་བཅས་སྦྱིན། །མེ་དྲོད་ཆུང་ཞིང་སྐྱུར་ལ་དགའ། །སེ་འབྲུ་སྐྱུ་རུ་ར་སྐྱུར་བ། །པདྨ་ཨུཏྤལ་གེ་སར་དང༌། །ཀྲིཥཎ་པ་རྞི་པྲི་ཡང་ཀུ། །པུ་ཤེལ་ཙེ་དང་སེང་ཕྲོམ་དཀར། །བཅའ་སྒ་དང་ནི་ཙནྡན་དམར། །བྱི་ཚེར་ད་ཏ་ཀའི་མེ་ཏོག །བ་ལ་ཀ་དང་བིལ་བའི་རྐང༌། །ཚིགས་བཅད་ཕྱེད་བཤད་ཐུག་པ་བླུད། །རྩ་མཁྲིས་གླ་སྒང་པུ་ཤེལ་ཙ། །སྲན་ཆུང་ཀྲྀཥྞ་པ་རྞིར་སྦྱར། །མུངྒ་གནྡྷ་བི་ད་རི། །ཧ་རེ་ཎུ་ཀ་བལ་མར། །ཚིག་རྐང་གཅིག་གིས་བཤད་པ་བླུད། །ནུས་པ་བསིལ་བ་དེ་རྣམས་ནི། །སྐམས་སའི་སྲོག་ཆགས་ཤ་དག་དང༌། །ཆུར་ནི་སོ་སོར་བསྐོལ་བ་ཡི། །ཁུ་བར་ནས་ཐུག་སྦྱར་བ་བསྒྲངས། །ཁར་སྦྲང་རྩིར་སྦྱར་བ་བླུད། །དེ་བཞིན་དུ་ནི་ཤ་ཁུ་དང༌། །ཅུང་ཟད་སྐྱུར་དང་སྐྱུར་མིན་པ། །མར་བརྔོས་ཁར་བཅས་པ་སྦྱིན། །ཟས་ཀྱི་ཚུལ་ནི་ཤེས་བ་རུ། །ཡང་དང་བསིལ་བར་གང་བཤད་པའི། །གྲ་མ་གང་བུ་ཅན་འབྲུ་དང༌། །ཚོད་མ་ཁྲག་ལ་བསྔགས་པ་ཡིན། །སྔར་བཤད་
པ་ཡི་ཆུ་དག་གམ། །རྩ་བ་ཆུང་ངུ་ལྔ་བསྐོལ་ཏེ། །བསྒྲངས་པའམ་སྦྲང་རྩིའི་ཆུའམ་ནི། །འབྲས་བུ་མཉེས་པའི་ཆུ་བླུད་བྱ། །བཤང་འགགས་རྒྱ་སྟེའུ་རི་འོང་ཤ །རླུང་ཤས་ཆེ་ལ་སྲེག་པའི་ཤ །ཨུ་དུམ་བ་རའི་ཁུ་བ་ནི། །བསྐོལ་བ་བླུད་ན་བསྔགས་པ་ཡིན། །དེ་བཞིན་བླག་ཤ་རྨ་བྱའི་ཤ །ནྱ་གྲོ་དྷ་དང་ཁྱིམ་བྱའི་ཤ །ཁྲག་མཁྲིས་ཀྱི་ནི་ནད་གཞི་ནི། །གང་ཅིའང་རུང་བ་དེ་སྤང་བྱ། །བ་ཤ་ཀའི་ཁུ་པྲི་ཡང་ཀུ། །ས་ནག་དང་ནི་སྐྱེར་ཁཎྚ། །སེང་ཕྲོམ་དང་ནི་སྦྲང་རྩིར་སྦྱར། །འཐུངས་ན་ཁྲག་དང་མཁྲིས་པ་འཇོམས། །ཡང་ན་བ་ཤ་ཀ་ཡི་ནི། །ཁུ་བ་ཁ་ར་སྦྲང་རྩི་དང༌། །བཅས་པར་འཐུངས་པ་དེ་བཞིན་ཏེ། །བ་ཤ་ཀ་ནི་འབའ་ཞིག་དང༌། །བསྐོལ་བས་ཁྲག་ནི་མྱུར་སེལ་ཏེ། དེ་ནི་འདི་ཡི་སྨན་མཆོག་ཡིན། །པ་ཏོ་ལ་དང་མ་ལ་ཏི། །ནིམ་པ་ཤུག་པ་ཙནྡན་གཉིས། །སེང་ཕྲོམ་བ་ཤ་ཏམ་ཏུ་ལི། །ས་ནག་མ་ད་ཡང་ཏི་ཀ །ཉེ་ཤིང་དང་ནི་ཐལ་ཏྲེས་དང༌། །ར་མཉེ་བ་གཉིས་ཤིང་མངར་རྣམས། །བསྐོལ་བ་གསུམ་པོ་ཁ་ར་དང༌། །སྦྲང་རྩིར་བཅས་པས་ཁྲག་མཁྲིས་འཇོམས། །རྒྱ་སྐྱེགས་ཤིང་ཀུན་བསྐོལ་བ་ནི། །ལེགས་བསྒྲངས་ཀ་ར་བཏབ་པ་ཕན། །ཡང་ན་སྤྲང་རྩི་མར་བཅས་པའམ། །ལྕི་བ་རྟ་སྦངས་བཙིར་ཁུ་འཐུང༌། །ཁྲག་ནད་མདུད་པ་ཅན་འདྲར་འབྱུང༌། །ཕུག་རོན་རྟུག་པ་སྦྲང་རྩི་ཕན། །ཁྲག་ནི་ཤས་ཆེར་བྱུང་གྱུར་ན། །སྐོམ་སའི་སྲོག་ཆགས་ཁྲག་དང་ནི། །སྦྲར་རྩིར་བཅས་པའམ་ར་ཡི་ནི། །མཆིན་པ་མཁྲིས་བཅས་རློན་པ་བཟའ། །ཙནྡན་གླ་སྒང་པུ་ཤེལ་ཙེ། །འབྲས་ཡོས་མུངྒ་པི་པི་ལིང༌། །ནས་ནི་བ་ལའི་ཆུར་སྦངས་པ། །ཁུ་བ་ཁྲག་མཁྲིས་སེལ་བྱེད་ཡིན། །ཙནྡན་པདྨ་པུ་ཤེལ་ཅེ། །ཁུ་བར་བོང་པ་བསྲེགས་བཅུག་ལ། །རབ་བསྒྲངས་ཁ་ར་སྦྲང་རྩིར་བཅས། །ཁྲག་ནི་ཤས་ཆེར་འབྱུང་བ་སེལ། །བུ་རམ་ཤིང་ནི་ཆུ་མང་སྤངས། །རྫ་བུམ་གསར་པར་དེ་བཞག་ནས། །མཚན་མོ་ཕྱི་རོལ་དབེན་པར་གཞག །ནང་པར་ཆུ་ནི་བཙགས་ནས་སུ། །སྦྲང་རྩི་བཏབ་ནས་པདྨ་ནི། །ཁ་ཕྱེའི་ཕྲེང་རྒྱན་ཆུ་དེ་འདྲ། །གང་ཡང་
མཁྲིས་པའི་རིམས་སྐབས་བཤད། །སྨན་ཁུ་དེ་ཡང་བླུད་པར་བྱ། །སྨན་ཁུ་སྣ་ཚོགས་འདི་ཡིས་ནི། །མེ་དྲོད་སྐྱེད་པས་བད་ཀན་ཟད། །གལ་ཏེ་ཁྲག་མཁྲིས་མ་ཞི་ན། །དེ་ལ་རླུང་ཤས་ཆེར་ཕན་པའི། །ར་ཡི་འོ་མ་བསྐོལ་བ་བླུད། །དེ་བཞིན་པ་ཡི་འོ་མ་ནི། །ལྔ་འགྱུར་ཆུ་བསྐོལ་གདུས་པ་བླུད། །རྩ་བ་ལྔ་པ་ཆུང་ངུ་དང༌། །སྦྲང་རྩི་ཁ་ར་བསྐོལ་བའང་རུང༌། །རྒུན་འབྲུམ་བཅའ་སྒ་ཛི་བ་ཀ །བ་ལ་གཟེ་མ་ཟང་ས་རྩི་བ། །རེ་རེ་འོ་མར་བསྐོལ་བའམ། །འོ་མ་ཁར་མར་བསྐོལ་ཕན། །གཟེ་མ་ཉེའུ་ཤིང་བསྐོལ་བའམ། །དེ་བཞིན་འདབ་བཞི་འོ་མར་བསྐོལ། །ཁྲག་ནི་ནད་བཅས་མྱུར་དུ་སེལ། །མཆོག་ཏུ་མཚན་ནས་འབྱུང་ལ་ཕན། །རྐུབ་ལས་བྱུང་ལ་ཁྱད་པར་དུ། །མོ་ཙ་ར་ས་བླུད་ན་ཕན། །ནྱ་གྲོ་དྷ་ཡི་མྱུ་གུའམ། །འདབ་མ་གཞོན་པའམ་བཅའ་སྒ་དང༌། །ཨུཪྴི་ར་དང་ཨུཏྤལ་ཕན། །ཁྲག་གི་ཚད་འཁྲུ་གཞང་འབྲུམ་གྱི། །གསོ་བ་དག་ཀྱང་འདིར་སྦྱར་བྱ། །སྨན་ཁུ་འོ་མ་འཐུངས་ནས་ནི། །བཟའ་བའང་འོ་མ་ཉིད་དང་བཟའ། །སྨན་ཁུའི་སྦྱོར་བ་འདི་དག་ཉིད། །བསྐོལ་བའི་མར་ནི་བླུད་བར་བྱ། །བ་ཤ་ཀ་རྩ་རྩེར་བཅས་བརྡུངས། །ཆུ་ནི་བརྒྱད་འགྱུར་ནང་དུ་ནི། །བསྐོལ་ཏེ་བརྒྱད་ཆ་ལུས་གྱུར་པ། །དེ་དང་མར་ནི་བཙོ་བར་བྱ། །དེ་ཡི་མེ་ཏོག་བཅུག་བསྒྲངས། །སྦྲང་རྩིར་བཅས་པས་ཁྲག་མཁྲིས་དང༌། །མཁྲིས་སྐྲན་རིམས་དང་དབུགས་མི་བདེ། །ལུད་པ་སྙིང་ནད་མིག་སེར་དང༌། །རབ་རིབ་མགོ་འཁོར་མེད་དཔལ་དང༌། །སྐད་འགགས་པ་ནི་འཇོམས་པར་བྱེད། །པ་ལ་ཤ་ཡི་མྱུ་གུའི་ཁུར། །དེ་བཅུག་མར་ནི་བསྐོལ་བ་དག །སྦྲང་རྩིར་བཅས་པས་ཁྲག་ནད་སེལ། །ཀྱི་ལྕེ་བ་ཡང་དེ་བཞིན་ནོ། །ཁྲག་ནི་སྤྱི་བག་ཀན་བཅས། །མདུད་པར་ཆགས་ནད་མགུལ་པར་བྱུང༌། །ཨུཏྤལ་སྡོང་བུ་བསྲེགས་ཐལ་བ། །ཞུན་མར་སྤྲད་རྩིར་བཅས་པ་བལྡག །པདྨ་ཨུཏྤལ་གེ་སར་དང༌། །བྲི་ཡང་ཀུ་དང་མ་དུ་ཀ །རེ་རེའི་སྦྱོར་བ་དེ་བཞིན་བྱ། །ཁྲག་ནི་བཤད་
བའི་ལམ་ལས་ནི། །འབྱུང་བར་བྱེད་ལ་ཁྱད་པར་དུ། །འཇམ་རྩི་བཏང་བ་བསྔགས་པ་ཡིན། །སྣ་ནས་ནད་ཅན་ཁྲག་བྱུང་ན། །སྣ་སྨན་བཏང་ཞིང་བླུགས་པར་བྱ། །སྔར་བཤད་སྨན་ཁུའི་སྦྱོར་བ་དང༌། འོ་མ་བུར་མ་ཤིང་ཁུ་བླུགས། །འོ་མ་སོགས་ཆུ་ཁ་རར་བཅས། །ཡང་ན་ཆུ་ནི་འབའ་ཞིག་ཕན། །སེ་འབྲུའི་མེ་ཏོག་ཁུ་བ་འམ། །ཨ་མྲའི་རུས་པ་དཱུར་བ་ཕན། །བསིལ་སྨན་སྡེ་ཚན་གཏོགས་པ་དག །བསྐུ་དང་བྱུགས་ལ་སོགས་ལས་སྦྱར། །མཁྲིས་པའི་རིམས་སེལ་བཤད་པ་གང༌། །ཕྱི་ནང་ལས་བཏུང་སྨན་དེ་དང༌། །གླུ་རྡོལ་བར་ནི་གང་ཕན་པ། །དེ་ཡང་ཁྲག་དང་མཁྲིས་པར་ཕན། །ཡན་ལག་བརྒྱད་པའི་སྙིང་པོ་བསྡུས་པ་ལས། །གསོ་བའི་གནས་ཀྱི་ལེའུ་གཉིས་པའོ། །དེ་ནས་ལུད་པ་གསོ་བའི་ལེའུ་བཤད་པར་བྱའོ། །ལུད་པ་མ་འདྲེས་རླུང་ལས་བྱུང༌། །དང་པོར་སྣུམ་གྱིས་གསོ་བྱ་ཞིང༌། །ཤ་ཁུ་ཐུག་པ་ཡུ་ཤ་སོགས། །རླུང་འཇོམས་སྨན་བསྐོལ་སྣུམ་པ་དང༌། །དུད་བདུགས་ལྡེ་གུ་བསྐུ་དང་དུགས། །ཆུ་བླུགས་ལུས་བཅིང་དག་གིས་གསོ། །བཤང་རླུང་འགགས་ལ་འཇམ་རྩིས་གསོ། །མཁྲིས་བཅས་ཞུན་མར་འོ་མ་ནི། །ཟས་ཀྱི་སྔོན་བཏང་བད་ཀན་བཅས། །སྣུམ་བཅས་བཀྲུས་སྨན་བཏང་བས་གསོ། །སླེ་ཏྲེས་ཀ་ཎྚ་ཀ་རི་གཉིས། །རེ་རེ་སྲང་སུམ་ཅུའི་ཁུ་བར། །མར་སྲང་སུམ་ཅུ་རྩ་གཉིས་བསྐོལ། །རླུང་གི་ལུད་སེལ་མེ་དྲོད་སྐྱེད། །ཀྵ་ར་ར་སྣ་ཤུ་དག་དང༌། །ཤིང་ཀུན་པ་ཏ་ཤིང་མངར་དང༌། །འུ་སུ་ཞོ་གཉིས་མར་བྲེ་གང༌། །ཚ་བ་ལྔ་དང་བཅས་པ་དང༌། །རྩ་བ་བཅུ་བའི་ཁུ་བར་བསྐོལ། །འཐུངས་རྗེས་ཐུག་པ་བླུད་གྱུར་ན། །ལུད་པ་དབུགས་མི་བདེ་བཅས་སྙིང༌། །རྩིབ་ལོགས་ཕོ་བའི་སྐྲན་ནད་སེལ། །ར་སྣ་ཉེའུ་ཤིང་རྩ་བ་བཅུ། །སྲང་ནི་བཅུ་གཉིས་ཚད་དུ་བྱ། །རྒྱ་སྲན་རྒྱ་ཤུག་ནས་དག་ནི། །ར་ཤ་སྲང་ནི་ལྔ་བཅུ་དང༌། །ཆུ་སྲང་ལྔ་བརྒྱ་བཅུ་གཉིས་བསྐོལ། །དེ་དང་མར་ནི་བྲེ་བཞི་བསྐོལ། །འོ་མ་མར་མཉམ་ཛི་བནྟི། །ལ་སོགས་སྲང་ཆེར་བྱས་ཏེ་བརྟག །རླུང་གི་ནད་ལ་བླུད་
པ་དང༌། །སྣར་བཏང་འཇམ་རྩིའི་མས་གཏོང་སྦྱར། །ལུད་པ་རྣམ་ལྔ་མགོ་འདར་དང༌། །མོ་མཚན་ཆུ་སོན་བ་དང༌། །ལུད་ཀུན་ལུས་ནི་ཕྱོགས་གཅིག་ནད། །མཆིན་བཅས་སྟོད་ཀྱི་རླུང་ནད་སེལ། །བི་ད་རི་སོགས་སྡེ་ཚན་བསྐོལ། །ལྡེ་གུ་མར་བསྐོལ་ལུད་པ་འཇོམས། །ཤིང་མངར་ཨ་ཤྭ་ཀའི་ས་བོན། །བྱི་དང་ག་དང་སྐྱེར་ཁཎྜ། །ཤུག་པར་ཁ་རུ་ཚ་མར་བསྐོལ། །ཡང་ན་དེ་ཕྱི་མར་དང་སྦྲུས། །ལྡེ་གུ་བྱིན་ལ་ར་ཡི་ནི། །འོ་མ་བླུད་ན་ལུད་པ་སེལ། །དོང་གར་སྣ་བྱི་དང་ག །ཤིང་ཀུན་རྒྱམ་ཚ་པི་པི་ལིང༌། །བར་གྱི་ཀྵ་ར་དེའི་ཕྱེ་མའམ། །མར་དང་རན་ཙམ་བླུད་གྱུར་ན། །རླུང་གྱུར་བད་ཀན་བཅས་ལུད་པ། །དབུགས་མི་བདེ་དང་སྐྱིགས་བུ་དང༌། །མེ་དྲོད་ཆུང་བ་སེལ་བར་བྱེད། །བྱི་ཚེར་བ་དང་བཅའ་སྒ་དང༌། །ཟུར་པ་རྒུན་འབྲུམ་ཁ་ར་དཀར། །ཀ་ར་ཀ་ཏ་ཡི་སྲིང་གི་ནི། །ཏིལ་མར་དང་ནི་ལྡེ་གུར་སྦྱར། །རླུང་ལས་གྱུར་པའི་ལུད་པ་སེལ། །བྱི་ཚར་གླ་སྒང་པི་པི་ལིང༌། །བར་གྱི་ཟུར་བ་ཀར་ཀ་ཏི། །བུ་རམ་སྙིང་དང་ཏིལ་མར་དང༌། །ལྡེ་གུར་བྱས་པ་བལྡག་པར་བྱ། །བཅའ་སྒ་པི་པི་ལིང་དེ་བཞིན། །ཀར་ཀ་ཏ་དེ་བཞིན་ནོ། །ཆུ་དྲོན་དག་དང་པི་པི་ལིང༌། ལྕེ་མྱང་ཚ་དང་བཅས་པ་བླུད། བཅའ་སྒ་ཀ་ར་ཞོ་ག་ཆུའམ། །པི་པི་ལིང་ཕྱེ་ཞོར་བཏབ་བླུད། །རྒྱ་ཤུག་ཚི་གུ་ཆང་ངམ་ཞོ། །ཞོ་ག་ཆུ་དང་སྦྱར་བ་བླུད། །ཡང་ན་པི་པི་ལིང་ལྡེ་གུ། །མར་བརྔོས་རྒྱམ་ཚར་བཅས་པའམ་ཕན། །ལུད་པ་ཆམ་བཅས་དུད་པ་ནི། །སྣུམ་བཅས་ཚོགས་བདུག་པ་དང༌། །སྐྱིགས་བུ་དབུགས་མི་བདེ་བདུད་བརྔུབ། །འོ་མ་ཤ་ཁུ་བཅས་པ་བཟའ། །གྲོང་ཆུ་རླུང་ཅན་སྲོག་ཆགས་ཤ །སཱ་ལུ་ནས་གྲོ་དྲུག་ཅུ་པའམ། །མ་ཤ་ཨང་མ་ཀུབ་ཏ་ཡི། །ཡུ་ཤ་དག་དང་ཟོས་ན་ཕན། །ལ་ལ་ཕུད་དང་པི་པི་ལིང༌། །བྱིལ་རྐང་དོང་གཙི་ཏྲ་ཀ །ར་སྣ་ཟིར་པ་ལ་ཤ །ཀྲྀཥྞ་པརྞི་ཟུར་པ་དང༌། །མ་ནུ་བསྐོལ་བར་སྣུམ་སྐྱུར་དང༌། །ལན་ཚྭར་བཅས་ཐུག་རླུང་གྱུར་བླུད། །རྐེད་པ་ལྟོ་སྙིང་རྩིབ་ལོགས་ན། །དབུགས་མི་བདེ་དང་སྐྱིགས་བུ་སེལ། །རྩ་བ་བཅུ་པའི་ཁུ་བར་ནི། །ཚ་བ་ལྔ་དང་བུར་མ་བཅས། །ཏིལ་དང་བཅས་པའི་ཐུག་པ་བླུད། །ཡང་ན་འཐུག་རྒྱམ་ཚར་བཅས། །ཉ་དང་ཁྱིམ་
བྱ་ཕག་རྒོད་ཤ །མར་དང་རྒྱམ་ཚར་བཅས་པའང་ཕན། །ཚོད་མ་རྒྱ་སྣེའུ་པ་ཡ་སི། །ནི་ཤན་ན་ག་ལུད་པ་འཇོམས། །ཀ་ཎྜ་ཀ་རིའི་ལོ་འབྲས་དང༌། །ལ་ཕུག་གཞོན་ནུ་སྐམ་པོའང་ཕན། ཏིལ་མར་སོགས་སྣུམ་འོ་མ་དང༌། །བུ་རམ་བུ་རམ་ཤིང་ཁུའི་ཟས། །ཞོ་ག་ཆུ་ཞོ་རང་སྐྱུར་ཆང༌། །འབྲས་བུ་སྐྱུར་ཆུ་བླུད་པ་ཕན། །མཁྲིས་པའི་ལུད་པ་བད་ཀན་བཅས། །ཞུན་མར་གྱིས་ནི་སྐྱུག་སྨན་ཕན། །དེ་བཞིན་པོ་སོན་ཆ་ཏང་པ་ལ། །མ་དུ་ཀ་ནི་བསྐོལ་ཆུས་སམ། །ཤིང་མངར་པོ་སོན་ཆའི་ལྡེ་གུ། །བི་དེ་བུ་རམ་ཤིང་ཁུར་སྦྱར། །མཁྲིས་ལུད་བད་ཀན་ཤས་ཆུང་ལ། །དུར་བྱིད་མངར་བའི་སྨན་སྦྱར་གཏང༌། །བད་ཀན་ཤས་ཆེར་ཁ་བའི་སྨན། །སྐྱུག་སྨན་ཕྱིར་ནི་གཏང་བར་བྱ། །ནང་སྦྱངས་ནས་ནི་ཐུག་པ་སོགས། །བསིལ་དང་མངར་དང་སྣུམ་པ་སྤྱད། །བད་ཀན་ཤས་ཆེར་ཁ་བ་དང༌། །རྩུབ་པ་དང་སྦྱར་གྲང་ཐུག་བླུད། །མཁྲིས་གྱུར་ཁ་ར་སྐྱུ་རུ་ར། །རྒུན་འབྲུམ་ཨུཏྤལ་ཙནྡན་དཀར། །སྦྲང་རྩིར་སྦྱར་བའི་ལྡེ་གུ་སྦྱིན། །བད་ཀན་བཅས་ལན་ལེ་ཤ་མ། །གླ་སྒང་དང་ནི་བཅས་པ་སྦྱིན། །རླུང་ཅན་ལ་ནི་མར་བཅས་ཕན། །རྒུན་འབྲུམ་ལྔ་བཅུ་པི་པི་ལིང༌། །སུམ་ཅུ་ཁ་ར་སྲང་གཅིག་སྦྱར། །སྦྲང་རྩིའམ་བ་ཡི་ལྕི་བའམ། ཁེའུ་གཞོན་ལྕི་ཁུར་ལྡེ་གུར་སྦྱར། །ཤིང་ཚ་སུག་སྨེལ་ཚ་བ་གསུམ། །རྒུན་འབྲུམ་པི་པི་ལིང་རྩ་བ། །མ་ནུ་འབྲས་ཡོས་གླ་སྒང་དང༌། །ཟུར་པ་དཀར་དང་ར་སྣ་དང༌། །སྐྱུ་རུ་ར་དང་བ་རུ་ར། །ཁ་ར་སྦྲང་རྩི་ཞུན་མར་སྦྱར། །ལྡེ་གུས་སྙིང་ནད་ལུས་པ་སེལ། །མངར་བའི་སྨན་དང་སྲོག་ཆགས་ནི། །སྐམ་སའི་ཤ་དང་ནས་དང་ནི། །ཁྲེ་དང་ཁྲེ་རྒོད་མུངྒ་སོགས། །ཡུ་ཤ་དང་ནི་ཚོད་མ་དང༌། །ཁ་བ་ཚང་ལྡན་སྦྱར་ལྡེ་གུ། །ཁ་བ་དང་ནི་སྦྲང་རྩིར་བཅས། །བད་ཀན་ཤས་ཆེའི་ནད་ལ་ཕན། །བད་ཀན་ཤས་ཆུང་སྰ་ལུ་དང༌། །དྲུག་ཅུ་པའི་ཆན་ཤ་ཁུ་ཕན། །བཏུང་བར་ཁ་རའམ་རྒུན་ཆུའམ། །བུ་རམ་ཤིང་ཁུའམ་འོ་མ་བླུད། །མཁྲིས་པའི་ལུད་པར་ར་མཉེ་བ། །བྲི་ཧ་ཏི་གཉིས་མེད་གཉིས། །བ་ཙ་ཀ་དང་ལི་དོང་གྲ། །ཤ་ཁུ་དང་ནི་འོ་མའམ། །ཐུག་པའམ་ཡུ་ཤར་སྦྱར་ཏེ་བླུད། །རྒུན་འབྲུམ་དང་ནི་པི་པི་ལིང༌། །རྩ་ཡི་རྩ་བ་ལྔར་བཤད་དང༌། །ཆུར་
བསྐོལ་བ་ཡི་ཁུ་བ་དང༌། །དེ་དང་འོ་མ་བསྐོལ་ཏེ་བསྒྲངས། །སྦྲང་རྩི་ཁར་ར་བཅས་པ་བླུད། །ཡང་ན་དེ་ཡིས་ཐུག་པ་བསྐོལ། །ལེགས་བསྐོལ་སྦྲང་རྩིར་བཅས་པ་སྦྱིན། །ཟུར་པ་དང་ནི་བ་ལེ་ཀ །ཁ་ར་བཅའ་སྒ་བྲི་ཧ་ཏི།།བཏགས་བིལ་ཁུ་བ་རས་ཀྱིས་བཙགས་མར་དང་བསྲེས་ཏེ་བླུད་པར་བྱ། །ཁ་ར་དང་ནི་ཛི་བ་ཀ །མུངྒ་ཤ་པརྞི་དང༌། །བྱི་ཚེར་བ་ནི་ལྡེ་གུར་སྦྱར། །མར་དང་འོ་མ་བརྒྱད་བསྐོལ། །དེ་བཏུང་བཟའ་དང་བལྡག་པ་དང༌། །སྦྱར་བས་མཁྲིས་པའི་ལུད་པ་སེལ། །འདི་དགེ་ཕྱེ་མའི་ལྡེ་གུ་འམ། །བསྐོལ་བའི་ཁུ་བ་བླུད་བར་བྱ། །བད་ཀན་ལུད་ཅན་གྱིས་དང་པོར། །ཐང་ཤིང་བསྲེགས་ནས་གཟགས་པའི་སྣུམ། །བ་ཤ་ཀ་དང་ནས་ཚིག་འཁུས། །ཐལ་བའི་ཕྱེ་མ་བཏབ་པ་བཏང༌། །སྣུམ་བཅས་བཀྲུས་སྨན་གྱིས་སྟེང་དང༌། །འོག་དང་སྤྱི་བོར་ཅི་རིགས་པར། །ཉམས་སྟོབས་ལྡན་བཀྲུ་སྨན་རྣོ་གཏང༌། །ཐུག་པ་སོགས་ཀྱང་འདི་ལ་བླུད། །ནས་དང་མུངྒ་རྒྱ་སྲན་ཟས། །རྩུབ་པ་དྲོན་ལེ་ཤམ་གྱིས་ཚ། །ཀ་ས་མརད་བརྡ་ཀ །བྱ་ཀྲི་ཡ་བཀྵ་ར་དང༌། །པི་པི་ལིང་དང་བཅས་པ་སྦྱིན། །སྐམས་ཁུང་ནས་ཁུ་སྣུམ། །ཏིལ་དང་ཡུངས་ཀར་བིལ་བའི་སྣུམ། །སྦྱར་བའི་ཐུག་པ་སྦྱིན་པར་བྱ། །སྐོམ་ན་རྩ་བ་བཅུ་བསོལ་ཆུ། །ཆུ་ཚན་ཆང་མང་སྦྲང་ཆུ་བླུད། །དོང་ག་མ་ནུའི་རྩ་བ་དང༌། །པ་ཏོལ་ཡི་རྩ་བར་བཅས། །ནུབ་གཅིག་ཆུར་སྤངས་སྦྲང་རྩི་བཏབ། །ཟས་དུས་གསུམ་མམ་ནང་པར་བླུད། །པི་པི་ལིང་དང་དེ་རྩ་བ། །བཅའ་སྒ་དང་ནི་བ་རུང༌། །རྨ་བྱ་ཁྱིམ་བྱའི་མཇུག་སྒྲོ་ནི། །སྣག་ཚར་བྱས་དང་ནས་ཚིག་ཐལ། །བི་ཤ་གླ་སྒང་པི་པི་ལིང༌། །དུར་བྱིད་སྦྲང་རྩིར་སྦྱར་བ་སྟེ། །ཚིགས་བཅད་ཕྱེད་ཀྱིས་རྫོགས་ལྡེ་གུ། །གསུམ་པོ་བད་ཀན་ལུད་པ་སེལ། །སྦྲང་རྩི་ན་ལེ་ཤམ་སྦྱར་བལྡག །ཨ་ཀ་རུ་སྦྲང་རྩི་ཉིད་ཀྱིས། །ཀྲྞྜ་ཀ་རི་བརྟ་ཀ །བྲིང་ག་ར་ཛའི་ཁུ་བ་དང༌། །ཀ་ས་མརད་རྟ་སྤངས་བཙིར། །ཁུ་བ་བྱེ་རུ་གནས་པོའི་ཁུ། །སྦྲང་རྩི་སོ་སོར་སྦྱར་བ་ལྡག །ཐང་ཤིང་ཟུར་པར་སྣ་དང༌། །བྱི་ཚེར་ཀར་ཀ་ཏ་སྲིང་གི །གླ་སྒང་བཅའ་སྒ་པི་པི་ལིང༌། །འབྲས་ཡོས་ཁ་ར་དཀར་པོ་དང༌། །སྐྱུ་རུ་ར་ཡི་པགས་པ་རྣམས། །སྦྲང་རྩི་ཏིལ་མར་སྦྱར་ལྡེ་གུ། །གསུམ་པོར་རླུང་འདྲེས་བད་ཀན་སེལ། །སེའུ་འབྲུ་སྲང་གཉིས་
བུ་རམ་ནི། །སྲང་བརྒྱད་ཚ་བ་གསུམ་སྲང་རེས། །སྐད་སྙན་དྲོད་སྐྱེད་ཡི་ག་འབྱེད། །ལུད་པ་དབུགས་མི་བདེ་ཆམ་སེལ། །བུ་རམ་ཡ་བཀྵ་ར་དང༌། །ན་ལེ་ཤམ་དང་པི་པི་ལིང༌། །སེའུ་འབྲུ་རིམ་གྱིས་སྲང་གཉིས་དང༌། །ཞེ་རོ་སྲང་ཕྱེད་དུ་སྦྱར། །ལུད་པ་དབུགས་མི་བདེ་བ་སེལ་རིམས་ཀྱི་སྐབས་བཤད་ཨ་རུ་ར། །སོགས་དང་ཀར་ཀ་ཏ་སྲིང་གི །བསྐོལ་བའི་ཁུ་བ་བླུད་པར་བྱ། །ཡང་ན་དུར་བྱིད་ལ་ལ་ཕུད། །གླ་སྒང་མ་ནུ་བི་ཤལ། །པི་པི་ལིང་བཅས་པ་གཅིན་ནམ། །ཆུར་བསྐོལ་བ་གཅིན་ལུད་པ་སེལ། །པི་པི་ལིང་ནི་ཏིལ་མར་བརྔོས། །ལྡེ་གུ་ཞོ་གཉིས་ཁ་རར་བཅས། །རྒྱ་སྲན་བསྐོལ་བའི་ཁུ་བར་སྦྱར། །བླུད་ན་བད་ཀན་ལུད་པ་འཇོམས། །རྩ་བ་བཅུ་ཁུ་བྲི་བཞི་དང༌། །མར་བྲ་གང་དང་མ་ནུ་དང༌། །ཟུར་པ་བིལ་བ་བྱེའུ་རུག་པ། །ཤིང་ཀུན་ཚ་གསུམ་ཞོ་གཉིས་བསྐོལ། །བླུད་པའི་རྗེས་ལ་ཐུབ་པ་བཏུང༌། །དེ་ཀུན་བད་ཀན་རླུང་ནད་འཇོམས། །ནིར་གུན་ཐི་ལོ་བསྐོལ་བའི་ཁུ། །མར་བསྐོལ་ལུད་པ་འཇོམས་བྱེད་ཡིན། །བྱི་དང་ག་ཡི་ཁུ་བའི་ནང༌། །ཚ་བ་གསུམ་བཅུག་མར་བསྐོལ་ཕན། །བ་སྤྲུ་བ་གཉིས་བྱིའུ་རུག་པ། །ཀ་ས་མར་ད་སླེ་ཏྲེས་དང༌། །པ་ཏོ་ལ་དང་བྲི་ཧ་ཏི། །ཕ་ནི་ད་ཛ་གའི་ཁུ་བ་ནི། །འོ་མ་མར་དང་བཅས་པ་ལ། །ཚ་བ་གསུམ་དང་ལེགས་བསྐོལ་འཐུངས། །ལུད་པའི་རིམས་དྲག་ཟད་བྱེད་དང༌། །གཞང་འབྲུམ་ནད་ཀྱི་འཇིགས་པ་མེད། །ཀཎྜ་ཀ་རིའི་རྩ་བ་དང༌། །འབྲས་བུ་ལོ་མར་བཅས་པ་ཡིན། །ཁུ་བ་བྲེ་བཞིའི་ཚང་ལ་ནི། །མར་བྲེ་གང་དང་བ་ལ་དང༌། །ཚ་བ་གསུམ་དང་བྱི་དང་ག །ཤུ་དག་དང་ནི་སེའུ་འབྲུ་དང༌། །ཁ་རུ་ཚ་དང་ནས་ཚིག་ཐལ། །པི་པི་ལིང་གི་རྩ་བ་དང༌། །སྐྱུ་རུ་ར་དང་མ་ནུ་དང༌། །བྲི་ཤི་བ་དང་བྲི་ཧ་ཏི། །ཨ་རུ་ར་དང་ཡབ་ཏི། །ཀྲུ་ཏྲུག་ཏྲེས་དང་རྒུན་འབྲུམ་དང༌། །དབྱི་མོང་བྱི་ཚེར་བར་ཤ་བུ། །སྟར་བུ་ཀ་རྐ་སྲིང་ཏི། །ཏ་མ་ལ་གི་ག་བྲའི་རྩ། །ར་སྣ་གཟེ་མའི་ལྡེ་གུ་དང༌། །བསྐོལ་བའི་མར་དེས་ལུད་ཀུན་དང༌། །སྐྱིགས་བུ་དབུགས་མི་བདེ་བའང་ཕན། །ཀཎྜ་ཀ་རིའི་སྨན་མ་ར་འདི། །བད་ཀན་ནད་ནི་སེལ་བྱེད་ཡིན། །བྱ་ཀྲི་སྲང་བརྒྱད་བརྡུངས་ཆུ་སྲང༌། །ཉིས་
སྟོང་བཞི་བཅུ་བརྒྱད་ནང་བསྐོལ། །བཙགས་པར་ཚ་བ་གསུམ་ར་སྣ། །སླེ་ཏྲེས་ཀྲུ་ཏྲུག་ཕྱེ་མ་དང༌། །ཀརྐྟ་སྲིང་ག་བྲའི་རྩ། །གླ་སྒང་པི་པི་ལིང་རྩ་བ། །བྱི་ཚེར་བ་རྣམས་སྲང་ཕྱེད་ཕྱེད། །ཞུན་མར་སྲང་ནི་བཅུ་དྲུག་དང༌། །ཀར་དཀར་པོ་སྲང་བཞི་བཅུ། །སླར་ཡང་དེ་ནི་བསྐོལ་བྱ་བ། །གཟར་བུ་ལ་ཆགས་བསྒྲངས་ནས་ནི། །པི་པི་ལིང་དང་སྨིག་རྐང་དང༌། །སྦྲང་རྩི་རྙིང་པ་དག་ལས་ནི། །སྲང་ནི་བརྒྱད་བརྒྱད་གཞུག་པར་བྱ། །ལྡེ་གུ་འདིས་ནི་སྙིང་ནད་སྐྲན། །གཞང་འབྲུམ་ལུད་དབུགས་མི་བདེ་སེལ། །བད་ཀན་ཞི་བདུད་པ་བརྔུབ། །ཤས་ཆེར་སྦྱངས་པའི་དུད་པ་བརྔུབ། །ལྡོང་རོས་བ་བླ་ཤིང་མངར་དང༌། །སྤང་སྤོས་གླ་སྒང་ཨི་གུ་དའི། །ཤུན་སྤགས་དུ་བ་ལུད་འཇོམས་པའི། །ཆོགས་དུད་པ་བརྔུབས་ནས་ནི། །མཆིལ་མང་མཐར་ནི་བུ་རམ་བཅས། །འོ་མ་འཐུངས་པའི་དུད་རྔུབས་དེས། །རླུང་དང་བད་ཀན་ཤས་ཆེ་བའི། །ལུད་པ་རྙིང་པའང་མྱུར་སེལ། །བད་ཀན་ལུང་པ་མུན་ཞུགས་སྙམ། །གལ་ཏེ་མཁྲིས་པ་རྗེས་འབྲེལ་ལ། །དེར་ནི་གནས་སྐབས་ཇི་བཞིན་དུ། །མཁྲིས་པའི་ལུད་གསོའི་སྦྱོར་བ་བྱ། །རླུང་ནི་བད་ཀན་འབྲེལ་པ་ལ། །བད་ཀན་བསལ་བའི་བྱ་བ་བྱ། །མཁྲིས་པ་དང་འབྲེལ་རླུང་བད་ཀན། །ལུད་པར་མཁྲིས་པ་བསལ་བར་བྱ། །རླུང་དང་བད་ཀན་བདག་ཉིད་སྐམ་།གཤེར་ལ་སྣུམ་དང་རྩུབ་ཆོས་བྱ། །ལུད་པ་བད་ཀན་ལས་གྱུར་བ། །མཁྲིས་པར་བཅས་པ་ཁ་བས་གསོ། །གློ་ནད་འགྲམས་ལ་འཕྲལ་དུ་ནི། །རྒྱ་སྐྱེགས་སྦྲང་རྩིའི་འོ་མ་བླུད། །ཞུ་ནས་སྰ་ལུའི་འབྲས་ཆན་ནི། །འོ་མ་ཁ་རར་བཅས་པ་བཟའ། །རྩིབ་ལོགས་ཆུ་སོན་བཅས་ཏེ། །མཁྲིས་དྲོད་ཤས་ཆུང་ཆང་སྦྱར་བ་ཏུང༌། །བཤང་འཁྲུ་གླ་སྒང་བོང་ང་དཀར། །བ་ཏ་དུག་མོ་ཉུང་བཅས་བཏུང༌། །རྒྱ་སྐྱེགས་ཞུན་མར་སྦྲང་རྩི་དང༌། །འཚོ་བྱེད་སྡེ་ཚན་ཀ་ར་དཀར། །སྨིག་རྐང་ཁ་ར་མཉམ་འོ་མར། །བསྐོལ་བ་མེད་དྲོད་ཆེ་ལ་བླུད། །བུ་རམ་ཤིང་དང་པདྨའི་ཚིགས། །པདྨ་གེ་སར་ཙནྡན་དམར། །འོ་མར་བསྐོལ་བ་སྦྲང་རྩིར་བཅས། །
གློ་འགྲམས་འབྱོར་བར་བྱ་ཕྱིར་བླུད། །ནས་རྗེན་ཕྱེ་ནི་འོ་མ་རུ། །བཙོས་ཏེ་མར་དང་སྦྱར་བའམ། །ཁ་ར་སྦྲང་རྩི་འོ་མ་ཕྱེའི། །སྐྱོམ་རིམས་ཆད་ལྡན་ལ་བླུད། །ལུད་པ་ཅན་ལ་སྨན་མངར་དང༌། །བསྐོལ་བའི་ཞུན་མར་བླུད་པར་བྱ། །ཡང་ན་བུ་རམ་ཆུ་བསྐོལ་བསྒྲངས། །སྦྲང་རྩི་ན་ལེ་ཤམ་བཏབ་བླུད། །ཡང་ན་སྐྱུ་རུ་རའི་ཕྱེ་མ། །འོ་མར་བསྐོལ་བ་མར་བཏབ་བླུད། །ཡང་ན་བཅུད་ཀྱིས་ལེན་ཆོ་གས། །པི་པི་ལིང་ཡང་སྦྱིན་པར་བྱ། །ལུད་པ་རུས་ཚིགས་གཟེར་བ་ལ། །རྒུན་འབྲུམ་ཤིང་མངར་མ་དུ་ཀ །སྨིག་རྐང་བ་ལ་པི་པི་ལིང༌། །ཞུན་མར་སྦྲང་རྩིར་བཅས་པ་སྦྱིན། །དྲི་སྣ་གསུམ་ནི་ཞོ་རེ་དང༌། །པི་པི་ལིང་སྲང་ཕྱེད་ཁ་ར། །རྒུན་འབྲུམ་འབྲ་གོ་མ་དུ་ཀ །སྲང་རེ་ཞིབ་ཏུ་བཏགས་ནས་ནི། །སྦྲང་རྩིས་རི་ལུར་བྱས་པ་ཡིས། །རོ་ཙ་བྱེད་ཅིང་ཁྲག་མཁྲིས་དང༌། །ལུད་པ་དབུགས་མི་བདེ་སློན་བྲོ། །བརྒྱལ་མྱོས་སྐྱིགས་བུ་མགོ་འཁོར་དང༌། །གློ་རྡོལ་སྐད་ནི་འགགས་པ་དང༌། །མཆིལ་མ་ལུས་སྐེམ་རླུང་འཁྱིལ་དང༌། །མཆི་ལམ་ཁྲག་འབྱུང་རྩི་བ་ལོགས་ན། །སྙིང་ནད་སྐོམ་དང་རིམས་ནད་འཇོམས། །བར་ཤ་བུ་དང་ཁ་ར་དཀར། །སྰ་ལུ་རྩ་སྣང་བཏགས་པའི་ཕྱེ། །རྒུན་ཆུའོ་མ་མར་དུ་བསྐོལ། །མཆིལ་མ་ཁྲག་ཏུ་འབྱུང་ལ་བླུད། །ཤིང་མངར་དང་ནི་མ་དུ་ཀ །ཏན་དུ་ལི་ཡ་འོར་བཙོས་ཕན། །ཁྲག་ནི་གང་ཚེ་དྲག་ཏུ་འབྱུང༌། །དེ་བཅོས་པ་ཡི་སྨན་བསྟེན་བྱ། །རླུང་འཁྱིལ་པ་ལ་ར་ཚིལ་ནི། །ཆང་བརྔོས་རྒྱམ་ཚར་བཅས་པ་སྦྱིན། །སྐེམས་ཤིང་ཉམ་ཆུང་གླའི་འགྲམས་དང༌། །གཉིད་ཆུང་མེ་དྲོད་ཆེ་བ་ལ། །འོ་མ་བསྐོལ་བའི་སྦྲིས་མར་ཆགས། །ཁ་ར་སྦྲང་རྩི་མར་བཅས་སྦྱིན། །ཀ་ར་དཀར་དང་ནས་དང་གྲོ། །ཚོ་བྱེད་ཟངས་རྩི་སྦྲང་རྩིར་བཅས། །ཡང་ན་འོ་མར་ཏེ་བླུད། །གློ་འགྲམས་ཉམ་ཆུང་རིད་ལ་སྦྱིན། །ཤ་ཟའི་ཤ་ཡི་ཁུ་བ་ནི། །མར་དང་བརྔོས་པའི་པི་པི་ལིང༌། །སྦྲང་རྩིར་བཅས་པ་དེ་ལ་བླུད། །ཤ་དང་ཁྲག་ནི་འཕེལ་བྱེད་ཡིན། །ཨུ་དུམ་བྰ་ར་ནྱ་གྲོ་དྷ། །ཨ་ཤྭཏྥ་དང་བླག་ཤ་དང༌། །སྰ་ལའི་ཤིང་དང་པྲི་ཡང་ཀུ། །ཏ་ལའི་རྩེ་མོ་འཛམ་བུའི་ཤུན། །པི་པི་ལིང་དང་ཤུག་པར་བཅས། །ཨ་ཤྭ་ཀ་ནར་བཅས་པ་ཡིན། །འོ་མར་བསྐོལ་བ་ལས་བྱུང་བའི། །མར་དང་འབྲས་ཆན་བཟའ་བ་ནི། །གློ་
འགྲམས་ཁུ་བ་ཉམས་སྟོབས་དང༌། །དབང་པོའི་ནུས་པ་ཟད་ལ་སྦྱིན། །རླུང་མཁྲིས་ཀྱིས་ཉོན་ཡན་ལག་གཞིག །ན་ལ་མར་དེས་བསྐུས་པ་བསྔགས། །རླུང་ནད་ཀྱིས་ནི་ཉེན་པ་ལ། །རླུང་འཇོམས་སྨན་བསྐོལ་ཏིལ་མར་བསྐུ། །འཚོ་བྱེད་སྡེ་ཚན་ཞུན་མར་ནི། །སྙིང་དང་རྩིབ་ལོགས་ན་ལ་བླུད། །ཡང་ན་རླུང་ནད་འཇོམས་པ་དང༌། །ཁྲག་མཁྲིས་སེལ་བ་གང་ཡིན་བྱ། །ཤིན་མངར་ནག་པ་ལ་གཉིས། །འོ་མ་དང་མཉམ་མར་བསྐོལ་བར། །པ་ཡ་སྱེ་དང་པི་པི་ལིང༌། །སྨིག་རྐང་ལྔ་གུ་བསྐོལ་བས་ནི། །གློ་གྲམས་པ་ཡི་ནད་ལ་ཕན། །འཚོ་བྱེད་སྡེ་ཚན་བཅའ་སྒ་དང༌། །ཉེའུ་ཤིང་བ་དང་ར་མཉེ་བ། །བ་སྤུ་བ་གཉིས་བ་ལ་དང༌། །ག་བྲའི་རྩ་བ་ཁ་སྲལ་ཕྲེའུ། །རི་དི་ཟུར་པ་ཀ་མ་ལ། །ཤྲིང་གང་ཀ་ཀ་ཡ་སྱ། །རྩ་བ་ལྔ་ནི་ཆུང་ངུ་དང༌། །རྒུན་འབྲུམ་སྟར་གའི་འབྲས་བུ་སོགས། །མངར་ཤིང་སྣུམ་ལ་སྟོབས་སྐྱེད་པ། །ཞོ་ནི་གཉིས་གཉིས་བཏགས་ལྡེ་གུ། །དེ་ནང་ཞུང་མར་བྲེ་གང་བསྐོལ། །འོ་མ་ར་ཤ་སྐྱུ་རུ་ར། །བི་ད་རི་དང་བུ་ར་མ་ཤིང༌། །ཁུ་བར་ཤའི་ཁུ་བར་བཅས། །བསྐོལ་ཏེ་བསྒྲངས་པར་སྦྲང་རྩི་ནི། པར་གྱུར་པ་དང༌། །སྦྲང་རྩི་ནི། །བྲེ་ཕྱེད་ཁར་སྲང་ལྔ་བཅུ། །ན་ལེ་ཤམ་དང་སུག་སྨེལ་དང༌། །ཤིང་ཚ་གནྡྷ་བྷ་དྲ་དང༌། །ན་ག་གེ་སར་སྲང་ཕྱེད་ཕྱེད། །ཕྱེ་མར་བཏགས་ཏེ་བཅུག་ནས་ནི། །འཇུ་སྟོབས་རྗེས་མཐུན་ཚད་དུ་བླུད། །འདི་ནི་བདུད་རྩིའི་སྨན་མར་ཏེ། །མི་རྣམས་ཀྱི་ནི་བདུད་རྩི་ཡིན། །བདུད་རྩི་འདི་ནི་ཟོས་ནས་སུ། །འོ་མ་ཤ་ཁུ་ལྡན་ཟོས་ན། །ཁུ་ཆུ་ཉམས་དང་གློའི་འགྲམས་དང༌། །ཉམས་སྟོབས་ཟད་པའི་གསོ་བ་ཡིན། བུད་མེད་ལ་གདུ་ལུས་སྐེམ་དང༌། །མདོག་སྐད་ཉམས་ལ་གཏང་བར་བྱ། །ལུད་པ་དང་ནི་སྐྱིགས་བུ་རིམས། དབུགས་མི་བདེ་དང་ལུས་ཆ་དང༌། །སྐོམ་དང་ཁྲག་མཁྲིས་སེལ་བྱེད་ཅིང༌། །བུ་སྐྱེད་བྱེད་ཅིང་སློན་དང་བརྒྱལ། །མངལ་ནད་གཅིན་ནད་འཇོམས་བྱེད་ཡིན། །གཟེ་མ་བཙོད་དང་པུ་ཤེལ་ཙེ། །བ་ལ་ཏང་པ་ལ་བུ་ཏི་ཀ །ཀྲྀཥྚ་བྲྞི་བའི་རྩ། །ཐལ་ཏྲེས་སྟིར་པ་ལ་ཤ །དེ་རྣམས་སྲང་ར་བསྐོལ་བ་ཡི། །འོ་མ་སྨན་ཁུའི་བཞི་འགྱུར་ལ། །ཁ་སྲལ་ཕྲེའུ་ཛི་བཎྚི། །མེ་ད་གཉིས་དང་ཟངས་རྩི་བ། །ཛི་བ་ཀ་དང་ཉེའུ་ཤིང་དང༌། །རི་དེ་
རྒུན་འབྲུམ་ཤ་ཁ་ར། །སྲ་བ་དང་ནི་པདྨའི་རྩ། །མར་ནི་བྲེ་གང་བསྐོལ་བ་ཡིས། །རླུང་མཁྲིས་སྙིང་འཛག་གཟེར་ནད་སེལ། །གཅིན་སྲི་བ་དང་གཅིན་སྙི་བ། །གཞང་འབྲུམ་ལུད་པ་ལུས་སྐེམ་དང༌། །ཟད་བྱེད་རིམས་ནི་སེལ་བྱེད་ཅིང༌། །གཞུ་འདྲེན་བུད་མེད་ཆང་དང་ལམ། །ཁུར་དུབ་སྟོབས་དང་ཤ་ཟད་སྐྱེད། །ཤིང་མངར་སྲང་བརྒྱད་རྒུན་འབྲུམ་ནི། །བྲེ་གར་བསྐོལ་བར་མར་བཙོས་ལ། །པི་པི་ལིང་སྲང་བརྒྱད་ལྡེ་གུ། །བྲེ་གང་བསྐོལ་བ་བསྒྲངས་ནས་ནི། ཁ་ར་སྦྲང་རྩི་རེ་རེ་ཞིང༌། །སྲང་བརྒྱད་དང་ནི་བསྲེས་པ་ལ། །ནས་ཕྱེ་མཉམ་སྦྱོར་ཟོས་པ་ཡིས། །དེ་ནི་གློ་འགྲམས་ཟད་བྱེད་དང༌། །ཁྲག་གི་སྐྲན་ལ་ཕན་པ་ཡིན། །སྐྱུ་རུ་ར་དང་བི་ད་རི། །བུ་རམ་ཤིང་ཁུ་འཚོ་བྱེད་ཀྱི། །སྡེ་ཚན་བསྐོལ་བའི་ཁུ་བ་མར། །བ་དང་ར་ཡོའི་མ་ལས། །བྲེ་ནི་རེ་རེ་བཙོ་བར་བྱ། །བསྐོལ་བཙགས་ཁར་སྦྲང་རྩི་ནི། བྲེ་རེ་དེར་ནི་གཞུག་པར་བྱ། །དེ་ནི་ཟད་བྱེད་བརྗེད་བྱེད་དང༌། །ཁྲག་དང་མཁྲིས་པ་ལུད་པ་དང༌། །ལུད་སྐེམ་པ་ནི་སེལ་བྱེད་ཅིང༌། །རྒས་སྲ་ཚེ་ནི་རིང་བ་དང༌། །ཤ་དང་ཁུ་ཆུ་སྟོབས་སྐྱེད་བྱེད། །མཁྲིས་པ་ཤས་ཆེས་མར་བལྡག་བྱ། །རླུང་ཤེས་ཆེ་བས་བཏུང་བར་བྱ། །བལྡགས་པས་མཁྲིས་པ་ཞི་བྱེད་ཀྱིས། །ཉུང་བས་རླུང་ནི་འཇོམས་མི་ནུས། །འཐུངས་ན་རླུང་ནི་གནོན་བྱེད་ཅིང༌། །མེ་དྲོད་ནང་དུ་སྡུད་པར་བྱེད། །སྐེམས་ཤིང་ལུས་ཀྱི་ཤ་ཟད་པས། །སྨན་མར་བཤད་པ་འདི་དག་ཉིད། །སྨིག་རྐང་འབྲས་ཡོས་པི་པི་ལིང༌། །ཕྱེ་མ་ལྡེ་གུར་བྱས་ལ་སྦྱིན། །ཞུན་མར་བུ་རམ་སྦྲང་རྩིའི་ཆ། །བཅུག་སྟེ་བྱིན་ལ་འོ་མ་བླུད། །རོ་ཙ་བརྩོན་དང་ལུས་རྒྱས་སྟོབས། །འདི་ཡིས་མྱུར་དུ་སྐྱེད་པར་འགྱུར། །བུམ་ཤ་ཤུན་ལྤགས་ས་བོན་བསལ། །སྲང་བརྒྱད་རླངས་པར་བཙོས་ནས་ནི། །ཞུན་མར་བྲེ་གང་ནང་གཞུག་དཀྲུགས། སྦྲང་རྩིའི་མདོག་འདྲར་གྱུར་པ་དང༌། །ཧྭགས་ནི་སྲང་བརྒྱད་པི་པི་ལིང༌། །བཅའ་སྒ་ཟིར་སྲང་གཉིས་དང༌། །དྲི་སྣ་གསུམ་དང་འུ་སུ་དང༌། །ན་ལེ་ཤམ་ནི་རེ་རེ་ཞིང༌། །སྲང་ནི་ཕྱེད་ཕྱེད་ཚད་བཅུག་ལ། །ཕབ་སྟེ་བསྒྲངས་པར་གྱུར་པ་དང༌། །སྦྲང་རྩི་མར་གྱི་ཕྱེད་བཅུག་ལ། །
གཟར་བུས་དཀྲུགས་ཏེ་བཞག་གྱུར་པ། །ལུད་པ་སྐྱིགས་བུ་ཡི་ག་འཆུས། །དབུགས་མི་བདེ་དང་ཁྲག་མཁྲིས་དང༌། །གློ་འགྲམས་ཟད་བྱེད་འཇོམས་པར་བྱེད། །གློ་འགྲམས་པ་ནི་འབྱོར་བྱེད་ཅིང༌། །བློ་དང་དྲན་པ་སྟོབས་རབ་སྐྱེད། །ཀུ་སྨན་ད་ཡི་བཅུད་ཀྱིས་ལེན། ཡིད་དུ་འོང་བ་དམ་པ་འདི། །ཐ་སྐར་བུ་གཉིས་ཀྱིས་བཤད་ཡིན། །ནཱ་ག་པ་ལའི་རྩ་བ་ནི། །ཞོ་གཅིག་སོགས་ཀྱིས་བསྐྱེད་སྲང་གཅིག །འོ་མར་བཅས་པ་ཟླ་གཅིག་བཏུང༌། །འོ་མ་སྤྱད་ཅིང་ཟས་མི་བཟའ། །སྦྱོར་འདིས་ཏེ་ནི་འཕེལ་བྱེད་ཅིང༌། །སྟོབས་སྐྱེད་ཁ་དོག་བཟང་བྱེད་མཆོག །མན་དུ་ཀ་པརྞི་ཤིང་མངར། །བཅའ་སྒའི་སྦྱོར་བའང་འདི་ཡིན་ནོ། །ནྰ་ག་པ་ལ་སྲང་བརྒྱ་ནི། །ཆུ་སྲང་ལྔ་བརྒྱ་རྩ་བཅུ་གཉིས། །ནང་དུ་བསྐོལ་ཏེ་བཞི་ཆ་ལུས། །སྨན་ཁུ་དེ་དང་ཆ་མཉམ་པའི། །འོ་མ་མར་དང་བསྐོལ་བར་བྱ། །བ་ལ་མ་ཏི་བ་ལ་དང༌། །ཤིང་མངར་པུརྞ་རྣ་བ་དང༌། །སྟག་ཏེར་བ་དང་ཏང་པ་ལ་དང༌། །པི་ལ་ཡ་དང་ཁ་སྲལ་ཕྲེའུ། །ཨ་ཤྭ་གནྡྷ་ཁ་ར་དཀར། །ཉེ་ཤིང་མེད་རྣམ་གཉིས་དང༌། །གཟེ་མར་མཉེ་བ་གཉིས་དང༌། །པ་ཡ་སྱ་དང་ཟི་ར་གཉིས། །པདྨའི་རྩ་བསྡོང་བུ་དང༌། །འབྲ་གོ་སྲིང་ག་ཏ་ཀ་དང༌། །ཀེ་ཤེས་རུ་ཀ་སྲང་ཕྱེད་ཕྱེད། །ནྰ་ག་པ་ལའི་སྨན་མར་འདིས། །ཁྲག་མཁྲིས་གློ་རྡོལ་ཟད་བྱེད་དང༌། །སྐོམ་དད་མགོ་འཁོར་སེལ་བྱེད་ཅིང༌། །སྟོབས་ནི་སྐྱེད་པར་བྱེད་པའི་མཆོག །མདོག་སྡུག་མདངས་བཟང་ཚེ་འཕེལ་ཞིང༌། །སྐྲ་དཀར་གཉེར་མ་འཇིག་པར་བྱེད། །ཟླ་བ་དྲུག་གི་བར་བསྟེན་ན། །རྒན་པའང་གཞོན་ནུ་ཉིད་དུ་འགྱུར། ཆོ་ག་འདིས་ནི་དྲོད་སྐྱེད་ཅིང༌། །མེ་དྲོད་བྲི་བ་སྐྱེད་འཇུ་བྱེད། །གཅོང་ཆེན་བཤད་པའང་གློ་རྡོལ་བསྔགས། འཁྲུ་ན་གཅོད་པར་བྱེད་པར་ཕན། །རྩ་བ་བཅུ་པ་ཁ་སྲལ་ཕྲེའུ། །པ་ལ་ཧ་སྟི་པི་པི་ལིང༌། །ཨ་པ་མརྒ་ཀྲུ་ཏྲུག་ཏྲེས། །ག་བྲ་པི་པི་ལིང་རྩ་བ། །མ་ནུ་སྲང་ནི་གཉིས་གཉིས་དང༌། །ནས་སྲང་དྲུག་ཅུ་རྩ་བཞི་དག །ཨ་རུ་ར་ནི་སྲང་བརྒྱ་དག །ཆུ་སྲང་དྲུག་བརྒྱ་བཞི་བཅུས་བསྐོལ། །ནས་ཆོས་པ་དང་སྨན་ཁུ་དེ། །བཙགས་ལ་ཨ་རུ་ར་བརྒྱ་དེར། །བུ་རམ་སྲང་བརྒྱ་བཅུག་ལ་བསྐོལ། །མར་དང་ཏིལ་
མར་པི་པི་ལིང༌། །ཕྱེ་མ་སྲང་ནི་བརྒྱད་པོ་དག །བསྐོལ་ཏེ་བསྒྲངས་ནས་སྦྲང་རྩིར་གཞུག །རྟག་ཏུ་ཨ་རུ་ར་གཉིས་བཅས། །ལྡེ་གུ་བཅུད་ལེན་འདི་ཟོས་ན། །འདིས་ནི་སྐྲ་དཀར་གཉེར་མ་མེད། །ཚེ་རིང་མདོག་སྟོབས་འཕེལ་བར་བྱེད། །ལུད་ལྔ་ཟད་བྱེད་དབུགས་མི་བདེ། །སྐྱིགས་བུར་བཅས་པའི་མི་བཟད་རིམས། །གཅིན་སྙི་བ་ཡིན་དང་ནི། །གཞང་འབྲུམ་སྐྲན་དང་སྙིང་ནད་དང༌། །ཆམ་པ་ཡི་ག་འཆུས་པ་སེལ་།བཅུད་ཀྱིས་ལེན་མཆོད་དཔལ་ཡོན་ཅན། །འདི་ནི་སྲོང་རྀ་ཥིས་བཤད། །རྩ་བ་བཅུ་པ་བ་ལ་དང༌། །མུར་བསེར་པོ་རྣམ་གཉིས་དང༌། །པི་པི་ལིང་ནི་རྣམ་གཉིས་དང༌། །པ་ཐ་ཨ་ཤྭ་གནྡྷ་དང༌། །ཨ་པ་མརྒ་ཁ་སྲལ་ཕྲེའུ། །སླེ་ཏྲེས་དན་ཏི་བོང་ང་དཀར། །བིལ་བ་གཞོན་ནུ་དུར་བྱིད་དང༌། །ཙི་ཏྲ་ཀ་རྩ་ལོ་མར་བཅས། །པ་ཡ་སྱ་དང་དུག་མོ་ཉུང༌། །སྤང་སྤོས་བི་ཟ་ཀའི་སྙིང་པོ། །མེ་ཏོག་བཅས་དང་རྐང་མར་དང༌། །གོ་བྱེ་བྱི་དང་ག་ཏ་དང༌། །ཉེའུ་ཤིང་བུ་ཏི་ཀ་ར་ཉྫ། །དོང་ག་སོ་མ་ར་ཛ་དང༌། །ས་ཧ་ར་ཛ་ཤི་ཀྲུ་དང༌། །ནིམ་པའི་ཤུན་ལྤགས་བུ་རམ་ཤིང༌། །ཕྲ་མོའི་ཁུ་བ་སྲང་རེ་དང༌། །ཨ་རུ་ར་སྟོང་ཆིག་བརྒྱ་དང༌། །ནས་སྲང་ཉིས་བརྒྱ་ལྔ་བཅུ་དྲུག །ཆུ་ནི་བརྒྱད་འགྱུར་ནང་དུ་བསྐོལ། །ནས་ཚོས་པ་དང་ཕོག་ནས་ནི། །བཙགས་ནས་ཨ་རུ་ར་བཅས་དེར། །བུ་རམ་རྙིང་པ་སྲང་བརྒྱད་གཞུག །ཏིལ་མར་ཞུན་མར་སྐྱུ་རུའི་ཁུར། །བྲེ་རེ་བཅུ་གནས་སྡེ་རྗེས་ཡང༌། །མེ་ཆུང་ལ་ནི་བཙོས་ནས་སུ། །གཟར་བུར་ཆགས་ན་ཐབ་ལས་དབབ། །བགྲངས་ནས་སྦྲང་རྩི་བྲི་དོ་དང༌། །པི་པི་ལིང་ནི་ཕུལ་གང་གཞུག །དྲི་སྣ་གསུམ་ནི་ཕྱིར་བཏགས་པ། །སྲང་གསུམ་བཅུག་ནས་དེ་འོག་ཏུ། །རྫ་སྣོད་རྙིང་བཅུག་འབྲུ་ནང་དུ། །བཅུག་སྟེ་ཟླ་བ་གཅིག་གཞག་བྱ། །དེ་ནས་སྔ་མ་བཞིན་དུ་བཟའ། །གནས་འཇོག་གིས་བཤད་བཅུད་ལེན་འདི། །སྔོན་ལས་ཡོན་ཏན་ལྷག་པར་ཆེ། ནད་མེད་ཀྱིས་བཟའ་དགག་པ་མེད། །དུས་ཀུན་དུ་ཡང་བསྔགས་པ་ཡིན། །རྒྱམ་ཚ་བཅའ་སྒ་སྲང་རེ་དང༌། །ཁ་རུ་ཚ་ནི་སྲང་གཉིས་དང༌། །ད་ཏྲིག་སེའུ་འབྲུ་ཨ་རྫ་ཀ །དེ་དག་སྲང་ནི་བཞི་དང༌། །ན་ལེ་ཤམ་གཅིག་གོ་སྙོད་གཉིས། །འུ་སུའི་འབྲས་བུ་སྲང་བཞི་དང༌། །ཚད་འདི་ལས་ནི་
ཕྱེ་མར་བྱས། །ཟས་དང་སྐོམ་ལ་བཏབ་སྟེ་སྦྱིན། །དེས་ནི་ཡི་ག་འབྱེད་པ་དང༌། །མེ་དྲོད་སྐྱེད་ཅིང་ཉམས་སྟོབས་སྐྱེད། །རྩིབ་ལོགས་ན་དང་དབུགས་མི་བདེ། །ལུད་པ་ལུ་བའི་ནད་སེལ་བྱེད། །ལུ་སུ་ཞོ་གཉིས་སེལ་བྱེད། །འུ་སུ་ཞོ་གཉིས་གོ་སྙོད་དང༌། །ལ་ལ་ཕུད་ལ་ཞོ་བཞི་བཞི། །སེ་འབྲུ་དང་ནི་ད་ཏྲིག་དག །དེ་ཡི་ཉིས་འགྱུར་ཉིས་འགྱུར་བྱ། ཁ་རུ་ཚ་ནི་སྲང་གཅིག་དང༌། །བཅའ་སྒ་ཞོ་གཉིས་བིལ་བའི་རྐང༌། །སྲང་ལྔ་དང་ནི་སྦྱར་བ་ལ། །ཁ་ར་སྲང་ནི་བཅུ་དྲུག་གཞུ་།རོ་དྲུག་པ་འདི་བཟའ་བ་དང༌། །བཏུང་བ་སྔ་མ་བཞིན་དུ་སྦྱིན་གཅོང་ཆེན་ལས་བཤད་ཆོག་གང༌། །གནས་སྐབས་ཇི་བཞིན་གློ་རྡོལ་ཕན། །གློ་རྡོལ་ནད་ནི་བྱུང་གྱུར་ནས། །བད་ཀན་སྐྱེས་ནས་མགོ་བོ་བྲང༌། །ན་བའི་ལུད་པ་ཅན་གང་ཡིན། །དེ་ལ་དུད་པའི་འདི་བརྔུབ་བྱ། །མེ་ད་གཉིས་དང་བ་ལ་གཉིས། །ཤིང་མངར་གསོ་མའི་ཤུན་ལྤགས་ནི། །ལྡེ་གུར་བྱས་ལ་རེང་བུར་ནི། །བྱས་ཏེ་དུད་པ་བརྔུབ་པར་བྱ། །དེ་རྗེས་འཚོ་བྱེད་སྨན་མར་བཏུང༌། །ལྡོང་རོས་དང་ནི་བ་ལ་ཤ །ཨ་ཟ་གནྡྷ་ཅུ་གང་དང༌། །དོང་གྲ་ལས་ཀྱང་དེ་བཞིན་བྱ། །དེ་རྗེས་ཁ་ར་བུ་རམ་དང༌། །བུ་རམ་ཤང་ཁུ་ཏུང་བར་བླུད། །ལྡོང་རོས་དང་ནི་ནྱ་གྲོ་དྷའི། །མྱུ་གུ་རློན་པ་ཆ་སྙོམས་བཏགས། །ཞུན་མར་དང་སྦྱར་དུད་པ་བརྔུབ། །དེ་འོག་སྲེག་པའི་ཤ་ཁུ་བཏུང༌། གློ་རྡོལ་ལས་བྱུང་བླུད་པ་ལ། །ཐོག་མར་སྟོབས་དང་མེ་དྲོད་སྐྱེད། ནད་གཞི་མངལ་སྣུམ་བཅས་པའི། །བཀྲུ་སྨན་འཇམ་པོ་གཏང་བར་བླུད། །ལྡོང་རོས་དང༌། བྱེད་གཉིས། །རྒུན་འབྲུའི་ཆུ་དང་སྦྱར་བ་དང༌། །སེང་ཕྲོམ་བསྐོལ་བའི་ཁུ་བ་དང༌། །བི་ད་རི་ཡི་ཁུ་བར་སྦྱར། །ཞུན་མར་ལ་བཙོས་ཅི་རིགས་སྦྱིན། །ལུས་ཟད་པ་ལ་སྦྱར་པར་བྱ། །མཁྲིས་པ་བད་ཀན་ལུས་ཟུངས་རྣམས། །ཟད་པའི་ཟད་བྱད་ལུང་པ་ཅན། །མར་དང་ཀརྐ་ཏ་སྲིང་གི ། འོ་མ་བ་ལ་གཉིས་བསྐོལ་བླུད། བི་ད་རི་འམ་ཀ་ཏམ་པ། །ཏ་ལའི་འབྲས་བུ་བསྐོལ་བ་ཡི། །མར་དང་འོ་མ་གཅིན་ནང་ནི། །མདོག་འགྱུར་བྲེ་བར་བྱེད་ལ་བླུད། །ཕོ་མཚན་རྐུབ་དང་ཆུ་སོ་དང༌། །བརླ་དབྲག་མཇུག་ཏོ་སྐྲང་ཞིང་ན། །མར་གྱི་ཉིང་ཁུ་ཡང་བ་འམ། །
ཏིལ་མར་བསྲེས་པའི་འཇམ་རྩི་གཏང༌། །སྐམ་སའི་སྲོག་ཆགས་ཤ་དང་ནི། །བྱིའུ་སོགས་དང་ནི་ཁུང་ན་གནས། །དེ་བཞིན་མཐུ་རྩལ་གྱིས་ཟས་ཚོལ། །ཤ་ཟའི་ཤ་ཡང་རིམ་བཞིན་སྦྱིན། །དྲོ་བས་བད་ཀན་འཇིག་བྱེད་ལ། །རྩ་སྦུབས་རྣམས་ནི་དག་བྱེད་ཅིང༌། །དངས་མ་ལེགས་པར་རྒྱུ་བྱེད་བས། །ལུས་ནི་རྒྱས་པར་བྱེད་པར་འགྱུར། །དབྱི་མོ་བར་གྱི་འབྲས་བུ་གསུམ། །རྩ་བ་བཅུ་དང་རྩི་ཏྲ་ཀ །རྒྱ་སྲན་པི་པི་ལིང་རྩ་བ། །པ་ཏ་རྒྱ་ཤུག་ནས་ཚུར་བསྐོལ། །ལི་དོང་གྲ་དང་བྱི་ཚེར་བ། །ཟུར་བ་མ་ནུ་པི་པི་ལིང༌། །ཀརྐ་ཏ་ཡི་སྲིང་གི་བཏགས། །མཉམ་པའི་ཞུན་མར་དག་དང་བསྐོལ། །བསྐོལ་བའི་མར་འདི་ཀྵར་གཉིས། །ལན་ཚྭ་ལྔ་ནི་བཏགས་ཏེ་གཞུག །དེ་ལས་རན་པར་འཐུངས་ན་ནི། །ཟད་བྱེད་ལུད་པས་ཉེད་པ་སེལ། །ཀ་ས་མར་ད་ཨ་རུ་ར། །གླ་སྒང་པ་ཏ་ཀད་པ་ལ། །དོང་གྲ་པི་པི་ལིང་ཏང་པ་ལ། །པུ་ཙེ་ཤེལ་ཚད་ཞོ་གཉིས་གཉིས། །མར་ནི་བྲེ་གང་འོ་མ་དང༌། །རྒུན་ཆུ་བྲི་བཞིའི་ནང་དུ་བསྐོལ། །ཟད་བྱེད་རིམས་དང་མཆིན་པའི་ནད། །ལུད་པ་ཀུན་སེལ་དགེ་བ་ཡིན། །ཀཎྜ་ཀ་རི་བ་ཤ་ཀ །སླེ་ཏྲེས་རྩ་བ་འབྲས་བུ་དང༌། །མྱུ་གུ་ལོ་མར་བཅས་པ་རྣམས། །བསྐོལ་བའི་ཁུ་བ་མར་དུ་བཙོས། །ལུད་པའི་རིམས་ཀྱིས་བཏབ་པ་དང༌། །ཡི་ག་འཆུས་པའི་ནད་རྣམས་སེལ། །སེ་འབྲུའི་ཁུ་བ་ཉིས་འགྱུར་རམ། །ཚ་གསུམ་ལྡན་པར་བསྐོལ་བའང་ཕན། །ཡ་བཀྵར་མར་དང་སྦྱར། །ཟས་ཟོས་པ་ཡི་འོག་ཏུ་བླུད། །པི་པི་ལིང་དང་བུ་རམ་བསྐོལ། །ར་ཡི་འོ་མ་མར་བཅས་ཕན། །འདི་ནི་མེ་དྲོད་སྦྱར་ཕྱིར་ཏེ། །ཟད་བྱེད་ལུས་ཅན་གྱིས་མར་བཏུང༌། །ནད་ཀྱིས་འགགས་པའི་མིད་པ་བྲང༌། །རྩ་སྦུབས་རྣམས་ནི་དག་པར་བྱེད། །ནས་ནི་བྲེ་གང་བཙོས་པ་རུ། །རྣམ་པར་རྒྱལ་བ་ཉི་ཤུ་བཙོ། །ཚོས་ནས་དེ་ཕྱུང་མཉེས་ནས་དེར། །བུ་རམ་རྙིང་པ་སྲང་དྲུག་དང༌། །པི་པི་ལིང་ནི་སྲང་གཉིས་དང༌། །ལྡོང་རོས་ཞོ་གཉིས་སྐྱེར་ཁཎྜ། །ཞོ་གཅིག་ཚད་ནི་བཅུ་ནས་ནི། །སླར་ཡང་བསྐོལ་བའི་ལྡེ་གུ་དེས། །ལུད་པ་དབུགས་མི་བདེ་སེལ་བྱེད། །
རེག་འཇམ་སྒྲོ་རྩ་བསྲེགས་ནས་ནི། །མར་དང་སྦྲང་རྩི་ཁ་རར་སྦྱར། །ཡང་ན་རྨ་བྱའི་རྐང་པ་བསྲེགས། །མར་དང་སྦྲང་རྩིར་སྦྱར་བ་ཡི། །ལྡེ་གུ་ཟོས་ན་ལུད་པ་དང༌། །དབུགས་མི་བདེ་བ་སེལ་བར་བྱེད། །ཨེ་རཎྜ་ཡི་ཐལ་བ་ནི། །ཏིལ་མར་ཚ་གསུམ་བུ་རམ་བཅས། །ལྡེ་གུའམ་བྱེའུ་རུག་ཨེར་རཎྜའི། །ལོ་མའི་ཐལ་བ་དེ་བཞིན་བྱ། །ཚ་བ་གསུམ་གྱི་ཕྱེ་མ་ནི། །བུ་རམ་རྙིང་པ་མར་སྦྱར་ཕན། །ཤུག་པ་ཚ་གསུམ་འབྲས་བུ་གསུམ། །བྱི་དང་ག་དང་ཐང་ཤིང་དང༌། །བ་ལ་ར་སྣའི་ཕྱེ་མ་ཀུན། །དེ་དང་མཉམ་པའི་ཁ་རར་སྦྱར། །ཡང་ན་སྦྲང་རྩི་མར་དང་སྦྱར། །ལྡེ་གུ་ལུད་པ་སེལ་བྱེད་མཆོག །དེ་བཞིན་ན་ལེ་ཤམ་གྱི་ཕྱེ། །མར་དང་སྦྲང་རྩི་ཁར་རར་བཅས། །ཨ་རུ་ར་དང་བཅའ་སྒ་ནི། །བུ་རམ་དང་ནི་བཅས་པ་ཡི། །རི་ལུ་ཁར་ནི་བཞག་གྱུར་ན། །ལུད་པ་དབུགས་མི་བདེ་ཀུན་སེལ། །ཡང་ན་བ་རུ་ར་འབའ་ཞིག །ལུད་པ་སེལ་བར་བྱེད་པ་ཡིན། །སེང་ཕྲོམ་ཨམྲ་ཁ་ར་དང༌། །བཅས་པའི་ལྡེ་གུམར་དང་བརྔོས། །ཐུག་པ་ཟན་དྲོན་ནང་དུ་བཏབ། །སློན་བྲོ་སྐོམ་དང་ལུད་པ་དང༌། །མ་ཞུ་ཚད་འཁྲུ་སེལ་བར་བྱེད། །ཀཎྜ་ཀ་རིའི་ཁུ་བར་བསྐོལ། །མུངྒའི་ཁུ་བར་ལེགས་གཡོས་པ། །སྐྱུ་རུ་ར་སེར་སེའུ་འབྲུར་བཅས། །ལུད་པ་ཀུན་གྱི་སྨན་གྱུར་ཡིན། །རླུང་འཇོམས་སྨན་བསྐོལ་འོ་མའམ། །མཆུ་ཡིས་ཟས་ཚོལ་ཁྲོན་རྐོ་དང༌། །ཁུང་ན་གནས་པའི་ཤ་ཁུ་ནི། །ཟད་བྱེད་ལུད་པ་ཅན་ལ་སྦྱིན། །གློ་རྡོལ་གྱིས་དུད་བརྔུབས་ལ་གང༌། །བཏུང་བར་བཅས་པ་བསྟེན་པ་ཡང༌། །ཟད་བྱེད་ལུད་པར་དེ་གཏང་བྱ། །གང་ཡང་གཅོང་ཆེན་སྐབས་སུ་བཤད། །སྟོབས་སྐྱེས་མེ་དྲོད་སྐྱེད་པ་དང༌། །རྩ་རྒྱུན་བར་བྱེད་པའི་སྨན། །རྣམ་གྲངས་ཟད་བྱེད་ལུད་ཅན་ལ། །སྟོབས་སྐྱེད་ཐམས་ཅད་བསྔགས་པ་ཡིན། །གང་ཕྱིར་འདུས་པ་ལས་བྱུང་བའི། །ཟད་བྱེད་ལུད་པ་མི་བཟད་པས། །དེ་ཕྱིར་ནད་སྟོབས་ཇི་བཞིན་དུ། །འདུས་པའི་ནད་ལ་ཕན་པས་གསོ། །ཡན་ལག་བརྒྱད་པའི་སྙིང་པོ་བསྡུས་པ་ལས། །གསོ་བའི་གནས་ཀྱི་ལེའུ་གསུམ་པའོ།། །།
དེ་ནས་སྐྱིགས་བུ་དང་དབུགས་མི་བདེ་བ་གསོ་བའི་ལེའུ་བཤད་པར་བྱའོ། །གང་ཕྱིར་སྐྱིགས་བུ་དབུགས་མི་བདེ། །རྒྱུ་སོགས་མཚུངས་པས་དེ་ཡི་ཕྱིར། །གསོ་བའང་གཅིག་སྟེ་དེས་ཉེན་ལ། །ཐོག་མར་དུགས་ཀྱི་ཉེར་དཔྱད་བྱ། །སྣུམ་དང་ལན་ཚྭ་ཏིལ་མར་བྱུག །དེ་ཡིས་བད་ཀན་བུ་གར་འགགས། །ཤིན་ཏུ་ཞེན་པ་ཞུ་ནས་ནི། །ཁོང་པར་གནས་པ་ལེགས་པར་འབྱིན། །བུ་གའི་རྒྱུན་སྲང་མཉེན་གྱུར་ཅིང༌། །རླུང་ནི་ལུགས་དང་མཐུན་པར་རྒྱུ། །འཇམ་ཞིང་རླན་གྱུར་ཟས་སྣུམ་དང༌། །ཡང་ན་ཞོ་ཡི་སྤྲིས་མ་སྦྱིན། །དེ་ནས་དེ་ལ་རློན་འཇམ་བཏང༌། །མཆོག་ཏུ་ལུད་པ་རྙིང་ནད་དང༌། །སྐད་འགགས་པ་ལ་སྐྱུག་སྨན་སྦྱིན། །རྒྱམ་ཚ་སྦྲང་རྩི་པི་པི་ལིང༌། །སྦྱར་བའམ་རླུང་ལ་ཕན་པ་གཏང༌། །བད་ཀན་གྱིས་ནི་གནོང་བྱས་པ། །གསལ་ན་བདེ་བ་ཐོབ་འགྱུར་ལ། །བུ་ག་རྣམ་པར་དག་གྱུར་ནས། །རླུང་ནི་གནོད་པ་མེད་པར་རྒྱུ། །ལྟོ་སྤོས་རྟུག་འགགས་མུན་འཐིབས་བྱེད། །མ་དུ་ལུང་ག་སྟེར་བུ་དང༌། །ཤིང་ན་པོ་ལུ་ཁ་རུ་ཚ། །ལྡན་ཟས་བྱིན་ན་བདེ་བར་འབྱུང༌། །རྒྱམ་ཚར་བཅས་པའི་འབྲས་བུ་སྒྱུར། །ཅུང་ཟད་དྲོ་བའི་བཀྲུ་སྨན་གཏན། །འདི་དག་བད་ཀན་གྱིས་ལམ་བཀག །སྲོག་གི་རླུང་ནི་འཁྲུགས་ལས་བྱུང༌། །དེ་བས་དེ་ལམ་བསལ་བྱའི་ཕྱིར། །སྟེང་དང་འོག་ཏུ་སྦྱང་བྱས་ཕན། །ཇི་ལྟར་འབག་པར་གྱུར་པའི་ཆུ། །ཤིན་ཏུ་འཁྱིལ་ཞིང་འཕེལ་བ་ལྟར། །དེ་བཞིན་རླུང་ནི་འཁྱིལ་གྱུར་པའི། །དེ་ལམ་ལེགས་པར་སྦྱང་བར་བྱ། །སྦྱང་བ་བྱས་ཀྱང་མ་དག་པའོ། །ཞེན་པའི་དྲི་མ་དུ་བས་བསལ། །ཡུང་བའི་ལོ་མ་ཨེ་རཎྜའི། །རྩ་བ་རྒྱ་སྐྱེགས་ལྡོང་རོས་དང༌། །ཐང་ཤིང་བ་ལ་སྤང་སྤོས་བཅས། །བཏགས་ཏེ་རེང་བུ་ཉིད་དུ་བྱ། །དེ་ནི་མར་བསྐུས་དུང་བ་རྔུབ། །ཡང་ན་མར་སྦྲུས་ནས་བསྲེགས་རྔུབ། །སྒྲ་ཆིལ་སྲ་རྩི་པོག་དག་གམ། །ཨ་ཀ་རུ་བཟང་མར་སྦྱར་རྔུབ། །དེ་བཞིན་ཙནྡན་གླང་རྭ་འམ། །སྤུ་འམ་རྒྱུས་པའི་དུད་པ་རྔུབ། །བཙོད་དང་གོང་དཀུ་རང་ག །དགེ་བ་ལྤགས་མག་ར་ཡིའམ། །ཡང་ན་གུ་གུལ་ལྡོང་རོས་སྨ། །ཡང་ན་སྰ་ལའི་ཐང་
ཆུ་ཉིད། །མོ་རྩ་གུ་གུ་ལ་ཨ་ག་རུ། །ཤུག་པ་མར་དང་བཅས་དུད་རྔུབ། །དུགས་བྱར་མི་རུང་བཏང་སྙོམས་གཞག །བྲང་དང་མེད་པ་ཞོམ་པ་ལ། །བཤོལ་དུ་མེད་ན་འཇམ་དུགས་བྱ། །ཁ་ར་དཀར་པོའི་འོ་མས་སམ། །དྲོ་འཇམ་ཙམ་ཀྱིས་དུགས་བྱ་ཞིང༌། །དཀྲི་དང་ལྡན་པར་བྱ་བའི་དུགས། །དུགས་ཀྱི་ལེའུར་བཤད་དུགས་བྱ། །མ་ཞུར་དེ་གསོའི་ཆོ་ག་སྤྱད། །སྦྱོར་དྲགས་རླུང་ཤས་ཆེར་གྱུར་ན། །རླུང་ནད་བསལ་བའི་སྦྱོར་བ་བྱ། །ཤ་ཁུ་སྣུམ་སོགས་པར་ར་ཚ་སྦྱིན། །བསྐུ་བ་དག་གིས་ཞི་བར་བྱ། །བད་ཀན་མ་སློང་དུགས་མི་བྱ། །ཉམ་ཆུང་བ་ལ་སྦང་བྱས་པས། །རླུང་གི་གནས་རྙེད་གནས་རྣམས་ནི། །སྐམ་པར་བྱས་ནས་སྲོག་འཕྲོག་བྱེད། །དེ་བས་སྨན་ཁུ་སྣུམ་དང་ནི། །ལྡེ་གུ་ལྕོགས་ཀྱིས་དེ་ཞིར་བྱ། །སྐེམ་ཞིང་གློ་རྡོལ་ཚད་འཁྲུ་དང༌། །ཁྲག་མཁྲིས་ཚ་བ་ལས་བྱུང་བའི། །སྐྱིགས་བུ་དབུགས་མི་བདེ་བ་ལ། །མངར་སྣུམ་བསིལ་སྩོགས་དག་གིས་གསོ། །ཀུ་ལངྠ་དང་རྩ་བ་བཅུ། །བསྐོལ་བའི་སྐམ་སའི་ཤ་ཁུ་ཕན། །ཤི་ཀྲུ་པར་ཏ་ཀ་དང་ནི། །ཀ་ས་མར་ད་བ་ཤ་ཀ །ལ་ཕུག་ལོ་མའི་ཁུ་བ་དང༌། །ནིམ་པའི་མྱུ་གུ་ལས་བྱུང་དང༌། །ཁ་ལུང་བྲི་ཧ་ཏི་ཁུ་ཕན། །ཀཎྜ་ཀ་རི་བྱི་ཏེར་བ། །བིལ་བའི་རྐང་དང་གཟེ་མ་དང༌། །སླེ་ཏྲེས་ཀར་ཀ་ཏ་སྲིང་གི །ཙོ་ཏྲ་ཀ་དང་ཀུ་ལངྠ། །ཆུར་བསྐོལ་བ་ཡི་ཡུ་ཤ་བྱ། །ཡང་ན་ར་སྣ་རྩ་ཆུང་ལྔ། །མུངྒ་ཅི་ཏྲ་ཀར་བཅས་བླུད། །ཙི་ཏྲ་གོ་སྙོད་ཁ་རུ་ཚ། །ཀར་ཀཏ་སྲིང་ཐུག་པ་ཕན། །ཡང་ན་རྩ་བ་བཅུ་སྦྱར་བའི། །ཐུག་པ་བླུད་ན་ལུད་པ་དང༌། །སྐྱིགས་བུ་དབུགས་མི་བདེ་ནད་སེལ། །རྩ་བ་བཅུ་པར་སྣ་དང༌། །ཟུར་པ་ག་བྲའི་རྩ་བ་དང༌། །བིལ་བ་གཉིས་དང་མ་ནུ་དང༌། །ཀར་ཀ་ཏ་སྲིང་པི་པི་ལིང༌། །ལྕ་བ་སླེ་ཏྲེས་བཅའ་སྒ་ནི། །བསྐོལ་བའི་ཁུ་བ་བླུད་ཞུ་ནས། །དེ་ཉིད་དང་བཙོས་ཐུག་པ་བླུད། །སཱ་ལུ་དྲུག་ཅུ་པ་དང་གྲོ། །ནས་དང་མུངྒ་རྒྱ་སྨན་ཟོས། །ལུད་པ་སྙིང་ནད་རྩིབ་ལོགས་ཟུག །སྐྱིགས་བུ་དབུགས་མི་བདེ་བ་སེལ། །ཡང་ན་ཨརྒའི་མྱུ་གུ་ཡི། །འོ་མ་དང་སྒྲུས་ནས་ཀྱི་ཟན། །སྦྲང་རྩི་དང་བཅས་རྩ་བཅུ་སོགས། །
བསྐོལ་བའི་ཁུ་བར་སྦྱར་བ་བླུད། །ཟས་ནི་ཀྵ་ར་ཤིང་ཀུན་མར། །ཁ་རུ་ཚ་དང་སེའུ་སྦྱར་ཟ། །མ་ནུ་ཟུར་པ་ཚ་བ་གསུམ། །ལྟར་བུ་བ་ལུང་སྦྱར་བ་སྦྱིན། །སྐྱིགས་བུ་དབུགས་མི་བདེ་སྐོམ་དང༌། །རྩ་བ་བཅུ་བ་བསྐོལ་ཁུ་བའམ། །ཡང་ན་ཐང་ཤིང་བསྐོལ་ཁུའམ། །ཆང་གི་དངས་མ་བླུད་པར་བྱ། །པི་པི་ལིང་དང་དེའི་རྩ་བ། །མ་རུ་ར་དང་བྱི་དང་ག །ཙིཏྲ་ཀ་རྣམས་ལྡེ་གུར་སྦྱར། །མར་སྣོད་བསྐུས་ཏེ་བསྐམས་པ་རུ། །སྣོད་དུ་དར་བ་ཟླ་གཅིག་གཞག །དེ་འབུངས་མེ་ཡི་དྲོད་སྐྱེད་ཅིང༌། །ལུད་པ་དབུགས་མི་བདེ་བ་སེལ། །བ་ཏ་མུར་པ་ཐང་ཤིང་དང༌། །ས་ར་ལ་དང་ཆང་དངས་མ། །ནུབ་གཅིག་བཞག་སྟེ་ལན་ཚྭ་བཏབ། །དེ་ལས་ཁྱེར་གང་བླུད་པར་བྱ། །ག་བྲའི་རྩ་བ་བཅའ་སྒའི་ཕྱེ་འམ། །ཡ་བཀྵ་ར་ན་ལེ་ཤམ། །བཅས་ཕྱེ་ཆུ་ཚན་བླུགས་པ་བན། །བ་སྤྲི་ཀ་ནི་བསྐོལ་བའི་ཆུ། །བཏགས་པ་ལྡེ་གུར་བྱས་བསྲེས་བླུད། །སབ་ཏ་པརྞཱིའི་ཁུ་བའམ། །ཤྲི་ཤ་ཡི་ནི་མེ་ཏོག་ནི། །པི་པི་ལིང་དང་སྦྲང་རྩིར་སྦྱར། །བད་ཀན་མཁྲིས་པ་འདྲེས་གྱུར་པའི། །སྐྱིགས་བུ་དབུགས་མི་བདེ་བ་སེལ། །ཅུ་གང་པི་པི་ལིང་དང་ནི། །འབྲས་དང་བཅའ་སྒ་མར་དག་ལས། །ཁུ་བ་མཁྲིས་པ་ལས་གྱུར་སལ། །རླུང་དང་ལྡན་ལ་རེག་འཇམ་ཤ་།རི་བོང་ཤ་དང་པི་པི་ལིང༌། །མར་དང་ཤ་སྤྱ་ཀ་ཡི་ཁྲག །ལྕམ་པའི་ཁུ་བ་ཚ་བ་གསུམ། །མར་དང་འོ་མར་སྦྱར་བ་དང༌། །འབྲས་ཆན་ཟོས་ལ་འོ་མ་བླུད། །རླུང་མཁྲིས་འདྲེས་པ་ལས་གྱུར་སེལ། །ར་ཡི་འོ་མ་བཞི་འགྱུར་གྱིས། །ཆུ་བསྐོལ་བུ་རམ་དོང་གྲ་བཏབ། །བི་བི་ལིང་རྩ་ཤིང་མངར་དང༌། །བུ་རམ་ལྕ་བརྟ་སྤངས་ཁུ། །སྦྲང་རྩི་མར་སྦྱར་ཟོས་གྱུར་ན། །སྐྱིགས་བུ་དབུགས་མི་བདེ་བ་སེལ། །རྟ་དང་གླང་པོ་བ་ལང་ཕག །རྔ་མོང་བོང་བུ་ལུག་དང་ར། །གང་ཡང་རུང་བའི་རྟུག་བ་ཙིར་ཁུ། །སྦྲང་རྩིར་སྦྱར་བ་བལྡགས་ན་ཕན། །བད་ཀན་ཤས་ཆེར་བཏུང་བ་བླུད། །རྐང་བཞི་པ་ཡི་ལྤགས་རུས་སྤུ། །རྨིག་པ་བསྲེགས་ལ་སྣག་ཚར་བྱས། །ཡ་ཤྭ་གནྡྷའི་ལྡེ་གུ་ནི། །སྦྲང་རྩིར་སྦྱར་བས་བད་ཀན་ཤད། །ཆེ་བའི་དབུགས་མི་བདེ་བ་སེལ། །ཟུར་པ་མ་
ནུ་སྐྱུ་རུ་ར་འ་མ། །མ་ནུ་པི་པི་ལིང་བཅས་ཕན། །ཡུག་སྣམ་པི་པི་ལིང་བཅས་པའམ། །ཀ་པིད་ཏ་ཡི་ཁུ་བའམ། །བིལ་བའི་རྐང་ཁུ་སྐྱུ་རུ་ར། །པི་པི་ལིང་དང་རྒྱམ་ཚར་བཅས། །མར་དང་སྦྲང་རྩི་ཨ་རུ་རའམ། །ཚ་བ་གཉིས་དང་ཁ་རུ་ཚ། །རྒྱ་ཤུགས་འབྲས་ཡོས་སྦྲང་རྩི་དང༌། །རྒུན་འབྲུ་པི་པི་ལིང་དོང་གྲ། །བུ་རམ་རྒུན་འབྲུ་ཡུང་ར་སྣ། །པི་པི་ལིང་དང་ན་ལེ་ཤམ། །ཏིལ་མར་དང་ནི་སྦྱར་བ་ཕན། །ལྡེ་གུ་སྨན་གྱི་ཕྱེ་མ་ཡང༌། །ཤ་ཁུ་ཆུ་དྲོན་ཚ་སྩོགས་བཏུང༌། །ཇི་བན་ཏི་དང་གླ་སྒང་དང༌། །བྱེའུ་རུག་པ་དང་ཤིང་ཚ་དང༌། །སུག་སྨེལ་གཉིས་དང་མ་ནུ་དང༌། །ལྕ་བ་ཏ་མ་མ་ལི་ཀ །ཨ་རུ་ར་དང་ག་བྲའི་རྩ། །དོང་ག་དང་ནི་བ་ལ་ཀ །ཟུར་པ་ཀ་ར་ཀ་ཏ་སྲིང་གི །ནྰ་ག་སར་པི་པི་ལིང༌། །ཙ་རོང་ཅི་རིགས་སྦྱར་ནས་ནི། །ཕྱེ་མ་གཉིས་འགྱུར་ཁ་རར་བཅས། །རྩིབ་ལོགས་ནད་རིམས་ལུད་པ་སེལ། །སྐྱིགས་བུ་དབུགས་མི་བདེ་འཇོམས་མཆོག །དོང་ག་བུ་རམ་ཆ་མཉམ་པ། །བཟའ་བའམ་སྣ་ནས་བཏང་སྨན་བྱ། །ཡང་ན་སྒག་སྐྱ་འམ་ཀུན་དོང་ངམ། །གྲི་ཛ་ན་ཡི་རྩ་བས་བྱ། །ཙནྡན་གྱི་ནི་ཁུ་བ་དང༌། །བུད་མེད་ནུ་ཞོ་སྣར་བླུགས་བྱ། །སྦྲང་མའི་རྟུག་པ་ནུ་ཞོར་སྦྱར། །རྒྱ་སྐྱེགས་ཁུ་བ་དང་སྦྱར་བླུགས། །རྒྱམ་ཚ་ཞུན་མར་དང་བཅས་པ། །ནུ་ཞོ་མར་དང་བསྐོལ་བའམ། །མངར་བའི་སྨན་དང་ལྡེ་གུར་བྱས། །དེ་བཏུང་བའམ་ན་ནས་གཏད། །ཁ་ར་སྦྲང་རྩིར་བཅས་པ་ནི། །གྲང་དྲོ་རེས་ཀྱིས་བླུགས་པའམ། །དེ་བཞིན་འོ་མ་བསྐོལ་བ་ནི། །སྨན་གྱི་ཕྱེ་མ་མར་སྦྱར་བླུགས། །པི་པི་ལིང་དང་ཁ་རུ་ཚ། །ཡ་བཀྵ་ར་སླེ་ཏྲེས་དང༌། །ཤིང་ཀུན་ཙོ་ར་བྱེའུ་རུག་པ། །མར་དང་ཞོག་ཆུར་སྦྱར་ཞིང༌། །རྩ་བཅུའི་ཁུ་བར་བསྐོལ་བ་བླུད། །ཡང་ན་འཚོ་བྱེད་བསྐོལ་བའི་ཁུ། །སྦྲང་རྩིར་བཅས་པ་བླུད་པར་བྱ། །ཏེ་ཛོ་བ་ཏི་ཨ་རུ་ར། །པི་པི་ལིང་དང་པུ་ཙེ་ཤེལ། །རུ་རྟ་མ་ནུ་བུ་ཏི། །ཙིཏྲ་ཀ་དང་པ་ལ་ཤ་།ཟུར་པ་ལན་ཚྭ་རྣམ་གཉིས་དང༌། །རྫི་བན་ཏི་དང་བིལ་བའི་རྐང༌། །ཤུ་དག་བལ་བའི་ལོ་མ་རྣམས། །དེ་དག་ཞོ་ནི་གཉིས་གཉིས་བསྐོལ། །ཤིང་ཀུན་ཞོ་ཕྱེད་མར་བྲེ་གང༌། །བསྐོལ་བ་དེ་ནི་འཐུངས་གྱུར་ན། །
རྐང་ལག་ལ་ནི་ཞེན་པའི་རླུང༌། །གཞང་འབྲུམ་དང་ནི་ཕོ་བའི་ནད། །སྐྱིགས་བུ་སྙིང་ནད་རྩིབ་ལོགས་ཟུག །མྱུར་དུ་སེལ་བར་བྱེད་པ་ཡིན། །ཞུན་མར་ཆ་ཕྱེད་བཅས་པ་ཡི། །ཡ་བཀྵ་རྒྱམ་ཚ་སྦྱིན། །ཐང་ལ་འབར་གྱི་འམ་དུག་གི་མར། །ཞོ་ཅན་ཧ་པུ་ཤའི་མར་བླུད། །ཆུ་གྲང་གློ་བུར་བླུགས་པ་དང༌། །སྔངས་དང་སྤྲུགས་དང་འཇིགས་པ་དང༌། །དགའ་དང་ཕྲག་དོག་དབུགས་བསྡམས་དང༌། །གནོད་པའི་འབུ་ཡི་སོས་བཏབ་དང༌། །གང་ཡང་བད་ཀན་རླུང་འཇོམས་སྨན། །དྲོ་ཞིང་རླུང་ནི་བདེ་རྒྱུན་བསྟེན། །གང་ཡང་ཕལ་ཆེར་རླུང་གི་ནད། །ལྷག་པར་འཇོམས་པར་བྱེད་པས་སྤྱད། །ཐམས་ཅད་ལ་ནི་བརྟ་བྱས་པ། །ཚབས་ཆུང་གསོ་བར་སླ་བ་ཡིན། །ལྷག་པར་ཉམས་སྨད་པ་ཡིས་ནི། །ཞི་བའི་ཐབས་སུ་འགྱུར་མ་ཡིན། །དེ་བས་ཞི་བ་བརྟ་བའི་ཐབས། །མང་པོ་དེ་ལ་སྤྱོད་པར་བྱ། །ལུད་པ་དབུགས་མི་བདེ་གཅོང་སློན། །སྐྱིགས་བུའི་སྨན་ནི་ཕན་ཚུན་འདྲེ། །ཡན་ལག་བརྒྱད་པའི་སྙིང་པོ་བསྡུས་པ་ལས། །གསོ་བའི་གནས་ཀྱི་ལེའུ་བཞི་པའོ།། །།དེ་ནས་གཅོང་ཆེན་པོ་གསོ་བའི་ཐབས་ཀྱི་ལེའུ་བཤད་པར་བྱའོ། །སྟོབས་ལྡན་ནད་ནི་མང་གྱུར་ལ། །སྣུམ་ཆོས་དུགས་བྱས་སྦྱང་བ་ནི། །སྣུམ་མེད་མ་ཡིན་ཉམ་སྨོད་མིན། །སྟེང་འོག་གི་ནི་སྦྱང་བར་བྱ། །འོ་མ་པོ་སོན་ཆང་བཅས་པའམ་།།ཤ་ཁུ་མངར་དང་ལྡན་པའམ། །ཞུན་མར་བཏབ་པའི་ནས་ཐུབ་ནི། །སྐྱུག་སྨན་བསྐོལ་བས་སློན་དུ་གཞུག །ཤམ་དུར་བྱིད་དོང་གྲར་བཅས། །ཁ་ར་སྦྲང་རྩི་མར་དང་ནི། །བཅས་པའི་འོ་མ་འམ་སྐྱོ་མའམ། །རྒུན་འབྲུ་ཏང་པ་ལ་བི་ད་རི། །ཡང་ན་ཤ་ཁུར་ལྡན་པ་ཡི། །བཀྲུ་སྨན་འཇམ་པོ་གཏང་བར་བྱ། །ལྟོ་སྦྱང་པ་ལ་བརྟ་བ་དང༌། །དྲོད་སྐྱེད་ཆོ་ག་སྤྱད་པར་བྱ། །ཟས་སྐོམ་ཡི་གར་འོང་བ་དང༌། །རླུང་འཇོམས་བྱེད་ཅིང་ཡང་བ་སྦྱིན། །སྰ་ལུ་དྲུག་ཅུ་པ་དང་གྲོ། །ནས་དང་མུངྒ་ལོ་གཅིག་ལོན། །ར་ཡི་འོ་མ་མར་དང་ཤ །ཤ་ཟའི་ཤ་ནི་ཟང་བྱེད་འཇོམས། །བྱ་རོག་འུག་པ་སྦྱང་ཀི་གཟིག །བ་ལང་རྟ་དང་ནེ་ལེ་སྦྲུལ། །བྱ་རྒོད་རྔ་མོ་བོང་བུ་ཁྲའི། །ཤ་ནི་རྒྱུ་ཡིས་བྱིན་ན་ཕན།
།ཤེས་ན་དེ་ལས་སྨོད་པས་ན། །སློན་ཞིང་མདངས་དང་སྟོབས་མི་འགྱུར། །བད་མཁྲིས་རི་དྭགས་ལ་སོགས་ཤ །རླུང་ལ་མཐུ་རྩལ་གཟན་ཚོལ་ཤ་།ཚོ་ཁུར་སྦྱར་ཞིང་ཕན་པ་དང༌། །ཤ་ཁུ་སོགས་ལ་འང་སྦྱར་བར་བྱ། །ཡུངས་མར་དག་དང་བརྔོས་པའམ། །ཡང་ན་ཅི་རིགས་མར་དང་བརྔོས། །ཁུ་བར་ལྡན་ཞིང་མཉེན་ལ་སྣུམ། །སྤོད་ལ་སོགས་དང་ལེགས་གཡོས་སྦྱིན། །དེ་བཞིན་ལ་ཕུག་རྒྱ་སྲན་ལས། །གཡོས་པའི་ཡུ་ཤར་སྦྱར་བར་བྱ། །པི་པི་ལིང་བཅས་ནས་དང་བཅས། །རྒྱ་སྲན་བཅས་ཤིང་དོང་གྲར་བཅས། །སེའུ་འབྲུ་སྐྱུ་རུ་ར་དང་བཅས། །ར་ཤའི་ཁུ་བ་སྣུམ་བཅས་བླུད། །དེས་ནི་ཆམ་པ་ལ་སོགས་པ། །གནོད་པ་དྲུག་ནི་སེལ་བར་འགྱུར། །མཁྲིས་པ་སོགས་ལས་ཁྱད་པར་དུ། །ཆང་རྙིང་རྩ་སྦུབས་སྦྱོང་བྱེད་པ། །ངོམས་པ་ཉིད་དུ་བླུད་པར་བྱ། །རྒུན་ཆང་ཆང་རྙིང་ཆང་དངས་བླུད། །རྩ་བ་ཆུང་ངུ་ལྔར་བསྐོལ་བའམ། །ཏམ་ལ་ཀ་ཆུར་བསྐོལ་བའམ། །པརྞི་བཞི་དང་བསྐོལ་བའམ། །འུ་སུ་བཅའ་སྒ་བསྐོལ་བ་བླུད། །དེ་དང་ཁ་ཟས་གཙང་བ་དག །འབད་པས་བཅོས་པ་རྗེས་མཐུན་ཡིན། །རྩ་བ་བཅུ་དང་འོ་མ་འམ། །ཤ་ཁའི་ནང་དུ་བཙོ་བར་བྱ། །བ་ལ་བཏབ་པའི་མར་སྦྱར་བའམ། །ཤ་ཟའི་ཤ་ཁུར་བཅོས་པ་སྦྱིན། །འོ་མ་བཅུ་འགྱུར་དག་དང་ནི། །མར་བསྐོལ་སྦྲང་རྩིར་བཅས་པའང་ཕན། །ཛི་བན་ཏི་དང་ཤིང་མངར་དང༌། །རྒུན་འབྲུ་དུག་མོ་ཉུང་འབྲས་བུ། །མ་ནུ་ཟུར་པ་པི་པི་ལིང༌། །བྱ་ཀྲི་གཟེ་མ་བ་ལ་དང༌། །ཏ་མ་ལ་ཀི་ཨུཏྤལ་སྔོ། །ཀྱི་ལྕེ་བ་དང་བྱི་ཚེར་བ། །ལྡེ་གུར་བྱས་དང་མར་བསྐོལ་བ། །གཅོང་ཆེན་སེལ་བའི་དམ་པ་ཡིན། །འབྲ་གོ་རྒུན་འབྲུམ་མ་དུ་ཀ །པ་རུ་ཤ་དང་པི་པི་ལིང༌། །མར་དང་བསྐོལ་བས་སྐད་འགགས་དང༌། །ལུད་པ་དབུགས་མི་བདེ་རིམས་འཇོམས། །རྩ་བཅུ་འོ་མར་བསྐོལ་བ་ལས། །བྱུང་བའི་མར་གསར་གང་ཡིན་དེ། པི་པི་ལིང་དང་སྦྲང་རྩིར་བཅས། །སྐད་འགགས་སེལ་བའི་དམ་པ་ཡིན། །མགོ་བྲང་རྩིབ་ལོགས་གཟེར་འཇོམས་ཤིང༌། །ལུད་པ་དབུགས་མི་བདེ་རིམས་སེལ། །རྩ་བ་ལྔ་བ་ལྔར་བསྐོལ་བའི། །འོ་མ་ལས་
བྱུང་མར་གང་ཡིན། །རྩ་བ་ལྔ་པ་ལྔ་ཡི་ནི། །ཁུ་བའོ་མའི་བཞི་འགྱུར་ལ། །བསྐོལ་བ་ཡི་ནི་མར་འདི་ཡིས། །ཟང་བྱེད་ཀྱི་ནི་སྟོབས་བདུན་འཇོམས། །ཡ་བཀྵ་ར་ཚ་བ་ལྔ། །སྲང་དྲུག་དང་ནི་བཙོས་པའི་མར། །བྲེ་གང་འོ་མ་ཆ་མཉམ་བྱས། །དེ་ཡིས་བུ་ག་དག་བྱེད་ཅིང༌། །སྐྲན་དང་དམུ་རྫི་མཆེར་པ་དང༌། །ཕོ་ནད་སྐྱ་རྦབ་ཆམ་པ་དང༌། །ལུད་པ་དབུགས་མི་བདེ་དྲོད་ཉམས། །སྐྲང་དང་སྟོད་ཀྱི་རླུང་ནད་འཇོམས། །ར་སྣ་བ་ལ་གཟེ་མ་དང༌། །ཏི་ར་བ་ར་ཤ་ཁུའི་ཆུར། །ཛི་བ་ནི་ཏི་དང་པི་པི་ལིང༌། །འོ་བཅས་གཅོང་ཆེན་འཇོམས་པའི་མཆོག །ཨ་ཤྭ་གནྡྷ་འོ་མར་བསྐོལ། །ལས་བྱུང་མར་འོ་ཁ་རར་བཅས། །སྤྱི་ཡི་ཤ་ནི་སྲང་བརྒྱ་དག །ཆུ་བྲེ་སུམ་ཅུ་གཉིས་ན་བསྐོལ། །དེ་ཡི་བརྒྱད་ཆ་ལུས་པ་རུ། །འཚོ་བྱེད་བཅུ་ནི་སྲང་རེ་གཞུག །ཞུན་མར་བྲེ་གང་བཅས་བསྐོལ་བ། །ཤ་ཡི་སྨན་མར་འདི་བླུད་པའམ། །ཤ་ཁུ་དང་སྦྱར་ཅི་རིགས་སྦྱིན། །རླུང་དང་མཁྲིས་པ་ལས་གྱུར་ནད། །ལུད་པ་དབུགས་མི་བདེ་སྐད་འགགས། །སྐེམ་ཞིང་རྩིབ་ལོགས་ཟུག་པ་འཇོམས། །སུག་སྨེལ་ཏི་མུས་འབྲས་གསུམ། །ས་ནག་ཚ་བ་གསུམ་ཙི་ཏྲ། །ས་ར་ནི་མ་སེང་ལྡེང་དང༌། །ས་ལའི་འབྲས་བུ་ལས་བྱུང་དང༌། །གོ་བྱེད་དང་ནི་བྱི་དང་ག །སྲང་ནི་བརྒྱད་བརྒྱད་ཚད་དུ་བྱས། །ཆུ་ནི་བཅུ་དྲུག་འགྱུར་བྱས་པར། །བཅུ་དྲུག་ཆར་གནས་བར་དུ་བསྐོལ། །སླར་ཡང་དེ་དང་མར་བྲེ་གང༌། །བསྐོལ་བ་འདིར་ནི་ཅུ་གང་ནི། །སྲང་དྲུག་ཁ་ར་སྲང་སུམ་ཅུ་བཅུག །སྦྲང་རྩི་སྲང་ནི་དྲུག་ཅུག་གཞུག །དྲི་སྣ་གསུམ་ནི་སྲང་རེ་གཞུག །གཟར་བུས་དཀྲུགས་ཏེ་ལྡེ་གུར་བྱས། །སྔ་དྲོ་ཟོས་ལའོ་མ་བཏུང༌། །བཅུད་ལེན་བསྡམས་པ་མེད་པ་ཡིན། །ཡིད་གཞུངས་མིག་རྣོ་ཚེ་རིང་ལ། །དྲོད་སྐྱེད་སྐྲན་དང་གཅོང་ཆེན་ནད། །སྐྱ་རྦབ་དང་ནི་མཚན་བར་རྡོལ་། མྱུར་དུ་འཇོམས་པར་བྱེད་པ་ཡིན། །གང་ཡང་ཞུན་མར་བུ་རམ་བཅས། །གློ་རྡོལ་ལ་བཤད་ཟང་བྱེད་སྦྱར། །ཤིང་ཚ་སྒུག་སྨེལ་པི་པི་ལིང༌། །བུ་གང་ཁ་ར་རིམ་ཉིས་འགྱུར། །ཕྱེ་མར་བྱས་བཟའ་འམ་སྦྲང་རྩི་དང༌། །མར་དང་སྦྱར་ཏེ་ལྡེ་གུར་ཟོས། །སྐད་འགགས་ལུང་པ་
དབུགས་མི་བདེ། །ཟད་བྱེད་རྩིབ་ལོགས་བད་ཀན་འཇོམས། །འདི་ཡི་སྐད་འགགས་ལ་ཁྱད་པར། །སྣ་སྨན་དུད་པ་རྔུབ་སྩོགས་བྱ། །དེ་ལའང་རླུང་ལས་གྱུར་པ་ལ། །ཀས་མར་ད་བརྡ་ཀ །བྲིངྒ་ར་ཛའི་ཁུ་བ་མར། །བསྐོལ་བའམ་ཨ་རྡ་ག་ལ་བསྐོལ། །དྲོ་འཇམ་ཟོས་རྗེས་ལ་བླུད་ན། །ཡུད་པ་ལུ་དང་སྐད་འགགས་སེལ། །རྒྱ་ཤུག་ལོ་མའི་ལྡེ་གུ་ནི། །མར་བརྔོས་རྒྱ་མཚར་བཅས་པའམ། །ཤིང་མངར་དང་ནི་པི་པི་ལིང༌། །བྱི་དང་གདང་རྒུན་འབྲུམ་དང༌། །ཧ་ནས་པརྞཱིའི་རྩ་བ་རྣམས། །ཏིལ་མར་བསྐོལ་བ་སྣར་བླུགས་བྱ། །འབྲས་ཆན་མར་དང་བུ་རམ་བཅས། །ཟོས་ན་དེ་རྗེས་ཆུ་ཚན་བཏུང༌། །འོ་ཐུག་སྣུམ་ཅན་བླུད་པ་དང༌། །སྣུམ་གྱི་དུགས་ཀྱི་ཆོ་ག་བྱ། །མཁྲིས་པ་ལས་གྱུར་འོ་མའི་ཤིང༌། །ལྡེ་གུ་བསྐོལ་བའི་ཞུན་མར་ནི། །སྦྲང་རྩིར་བཅས་ཏེ་དེ་རྗེས་ནི། །འོ་མ་བསྐོལ་ཏེ་བསྒྲངས་པ་བླུད། །ཤིང་མངར་མ་དུ་ཀ་འོ་ཐུག །ཞུན་མར་བཅས་པ་བླུད་པའམ། །བ་ལ་དྲི་བཟང་བི་ད་རི། །ཤིང་མངར་ཀྵི་ཏ་བི་ད་རི། །རྒྱམ་ཚར་བཅས་པ་བསྐོལ་བའི་མར། །སྐད་འགགས་སྣ་སྨན་བླ་མེད་ཡིན། །པྲ་པུཎྚ་ཀ་ཤིང་མངར། །པི་པི་ལིང་དང་བྲི་ཧ་ཏི། །པ་ལ་འོ་མ་མར་བསྐོལ། །སྐད་འགགས་པ་ཡི་སྣ་སྨན་མཆོག །མངར་བའི་སྡེ་ཚན་ཕྱེ་མ་ནི། །སྦྲང་རྩི་མར་སྦྱར་ལྡེ་གུ་སྦྱིན། །བད་ཀན་ལས་འགྱུར་ཚ་བ་དང༌། ཟས་རྩུབ་བ་གཅིན་བླུད་པར་བྱ། །ཀད་ཕ་ལ་དང་སྐྱུ་རུ་ར། །ཚ་གསུམ་ཏིལ་མར་སྦྲང་རྩིར་སྦྱར། །ཡ་བཀྵ་ཚ་བ་གསུམ། །ཀྲུ་ཏྲུག་ཏྲེས་དང་དབྱི་མོང་དང༌། །ཨ་རུ་ར་དང་སྦྲང་རྩིར་སྦྱར། །ནས་ཐུག་ཏིལ་མར་ཞུན་མར་དང༌། །པི་པི་ལིང་དང་སྐྱུར་རུང་སྦྱར། །བཅའ་སྒ་དང་ནི་པི་པི་ལིང༌། །བཟའ་བའམ་སྐྱུག་སྨན་རྣོན་པོ་བསྟེན། །ཤ་ཁ་ར་དང་སྦྲང་རྩིར་བསྲེས། །མངར་བའི་སྨན་དང་ལྷན་ཅིག་བསྐོལ། །འོ་མ་འཐུང་བས་སྐང་གསང་ནི། །ཆེན་པོར་སྨྲས་པའི་འགགས་ནད་སེལ། །ཡི་ག་འཆུས་ལ་སྣ་ཚོགས་ཟས། །ཕན་པའི་སྨན་དང་སྦྱར་བ་སྦྱིན། །ཕྱི་དང་ནང་ནི་སྦྱང་བ་དང༌། །སེམས་དགའ་ཡིད་དང་མཐུན་སྨན་སྦྱིན། །དུས་གཉིས་སུ་ནི་སོ་ཤིང་དག །བཅའ་ཞིང་ཁ་ནི་སྦྱང་བྱ་ཞིང༌། །བསྐ་བས་ཁ་ནི་བཀྲུ་བ་དང༌། །
རྗེས་སུ་མཐུན་པའི་དུད་པ་རྔུབ། །ད་ལིས་ཀྱི་ནི་རུ་ལུ་དང༌། །ཁ་ར་ག་བུར་བཅས་པ་སྦྱིན། །འབྲས་ཁུ་ཟླ་བའི་ཟེར་ལྟར་དཀར། །བཟའ་བ་ཡི་ག་འབྱེད་པའི་མཆོག །དེ་ལས་རླུང་འགྱུར་ཡི་ག་འཆུས། །ཧ་རེ་ཎུ་དང་པི་པི་ལིང༌། །བྱི་དང་ག་དང་ར་སྣ་དང༌། །རྒྱམ་ཚ་དང་ནི་དོང་གྲ་དང༌། །སུག་སྨེལ་ག་བྲའི་རྩ་བ་དང༌། །ནས་ཚིག་མཁུས་པའི་ཐལ་བ་དང༌། །ཤིང་ཀུན་བཅས་པ་མར་རམ་ནི། །ཆང་གི་དངས་མར་སྦྱར་ཏེ་བཏུང༌། །ཤུ་ངག་ཆུས་ནི་སློན་དུ་གཞུག །མཁྲིས་གྱུར་བུ་རམ་ཆུས་སློན་གཞུག །ཁ་ར་དང་ནི་ཞུན་མར་རམ། །རྒྱམ་ཚ་སྦྲང་རྩིར་བཅས་པ་སྦྱིན། །བད་ཀན་ནིམ་པའི་ཆུས་སློན་གཞུག །ལ་ལ་ཕུད་དང་དོང་གྲའི་ཆུ། །སྦྲང་རྩི་འམ་ཆང་རྙིང་རྣོ་སྦྱར་བ། །བུ་རམ་སྦྲང་རྩི་ཆང་བཅས་བླུད། །ཧ་རེཎུ་སོགས་ཕྱེ་མ་ནི། །སྔར་བཤད་ཆུ་ཚན་སྦྱར་བ་བླུད། །སུག་སྨེལ་དང་ནི་ཤིང་ཚ་དང༌། །ནཱ་ག་བུས་པ་ན་ལ་ལེ་ཤམ། པི་པི་ལིང་དང་བཅས་སྒ་རྣམས། །རིམ་བཞིན་ཆ་རེས་བསྐྱེད་ཕྱེ་མ། །ཁ་ར་དག་དང་མཉམ་སྦྱར་བས། །མཆིལ་མང་ཡི་ག་མཆུས་པ་དང༌། །སྙིང་དང་རྩིབ་ལོགས་ན་ལུད་པ། །དབུགས་མི་བདེ་དང་མགུལ་ནད་འཇོམས། །ལ་ལ་ཕུད་དང་ད་ཏྲིག་དང༌། །སྟར་བུ་བཅའ་སྒ་སེའུ་འབྲུ་དང། །རྒྱ་ཤུག་ཞོ་ནི་གཉིས་གཉིས་བྱས། །ཁ་ར་སྲང་བཞི་འུ་སུ་དང༌། །གོ་སྙོད་ཤིང་ཚ་ཁ་རུ་ཚ། །ཞོ་རེ་པི་པི་ལིང་འབྲུ་བརྒྱ། །ན་ལེ་ཤམ་ནི་ཉིས་བརྒྱ་དག །ཕྱེར་བཏགས་ཡི་ག་འབྱེད་པའི་མཆོག །ཡིད་འོང་ཕྱིས་འགགས་པ་དང༌། །ལུད་པ་སྙིང་ག་རྩིབ་ལོགས་ན། །མཆེར་པ་གཞང་འབྲུམ་ཕོ་ནད་སེལ། །བལ་བུའི་ལོ་མན་ལེ་ཤམ། །དོང་གྲ་དང་ནི་པི་པི་ལིང༌། །གོ་རིམས་བཞིན་དུ་ཆ་རེས་བསྐྱེད། །ཤིང་ཚ་སུག་སྨེལ་དང་པོའི་ཕྱེད། །པི་པི་ལིང་གི་བརྒྱད་འགྱུར་གྱི། །ཁ་རར་སྦྱར་བའི་ཕྱེ་མ་དེ། །དྲོད་སྐྱེད་ཡི་ག་འབྱེད་པ་དང༌། །ལུད་པ་ལུ་དང་དབུགས་མི་བདེ། །ཡི་ག་འཆུས་དང་སློན་བྲོ་དང༌། །མཆེར་པ་སྙིང་ནད་རྩིབ་ལོགས་ཟུག །སྐྱ་རྦབ་ཚད་འཁྲུ་རིམས་ནད་འཇོམས། །རླུང་འཁྱིལ་བ་ནི་བདེ་རྒྱུ་བྱེད། །སུག་སྨེལ་ཤིང་ཚ་པུ་ཤེལ་ཙེ། །ཞོ་ནི་གཉིས་གཉིས་བྱས་པ་དང༌། །ནྰ་ག་གེ་སར་སྲང་ཕྱེད་དང༌། །གནྡྷ་
བྷ་དྲ་སྲང་ཕྱེད་གཞུག །ཕྱེ་བཏགས་བུ་རམ་རྙིང་པ་ནི། །སྲང་ནི་ཉི་ཤུ་ལྔ་ནི་བསྐོལ། །སྤྲུས་ཏེ་ཞོ་གཉིས་ཚད་རི་ལུ། །བྱས་པའི་ཡོན་ཏན་དེ་དང་མཉམ། །ཨ་རྒ་སེལ་ཏྲེ་ས་ཀྵ་རའི་ཆུར། །ནས་དང་ནུབ་གཅིག་སྤངས་ནས་ནི། །ཆུ་དང་ཟན་ནི་སྤྲུས་ནས་སུ། །བྱིན་ཏེ་ཉམས་སྟོབས་ལྡན་སློན་གཞུག །དེ་བཞིན་སྐམས་སའི་སྲོག་ཆགས་ཤ་།བསྲེགས་པ་ཁ་དང་ཚ་སྦྱར་སྦྱིན། ཟས་ནི་སྐམ་ཞིང་རབ་ཡང་དང༌། །ཙ་ན་ཀ་སོགས་ཁུ་བ་བླུད། །བད་ཀན་གྱིས་རབ་མཆིལ་མ་མང༌། །རླུང་གིས་མཆིལ་མང་སྐྱེད་པར་བྱེད། །དེ་ནི་བད་ཀན་མཆིལ་མར་བཤད། །སྣུམ་དང་དྲོ་བས་དེ་བསལ་བྱ། །རིམས་འདི་ཆམ་པ་དག་དང་ནི། །སློན་པའི་ནད་ལའང་སྦྱར་བར་བྱ། །མཆོག་ཏུ་ཆམ་པར་བསྐུ་བ་དང༌། །སྣུམ་དང་དུགས་ཀྱི་ཆོ་ག་བསྟན། །མགོ་དང་ལྐོག་མ་རྩིབ་ལོགས་སུ། །འབྲས་ཁུར་སྣུམ་བཅས་དུགས་བྱ་ཞིང༌། །ལན་ཚྭ་སྐྲུར་དང་ཁ་དང་ཚ། །ཤ་ཁུ་སྣུམ་དང་བཅས་པ་སྦྱིན། །མགོ་བོ་སྙིང་ག་རྩིབ་ལོགས་གཟེར། ནད་གཞི་ཇི་བཞིན་གསོ་བར་བྱ། །ཆུ་དང་རླན་ཅན་གནས་པའི་ཤ་།ལེགས་སྦྱར་དཀྲི་བའི་དུགས་བྱ་ཞིང༌། །དེ་ནས་སྣུམ་བཞིའི་སྦྱོར་བ་སྔགས། །ནད་གཞི་འདྲེས་བར་གྱུར་པ་ལ། །རྒྱ་སྤོས་ཤིང་མངར་ཤུ་ཏི་དང༌། །ཙནྡན་མར་གྱི་ལྡེ་གུས་བྱུག །པ་ལ་ར་སྣ་ཏིལ་མར་དང༌། །ཤིང་མངར་ཨུཏྤལ་མར་དེ་བཞིན། །བ་སྦྲུ་བ་དང་ཤི་ཀྲུ་དང༌། །བ་ལ་ར་མ་ཉེ་བིད་རི། །སྣ་སྨན་དུད་བ་རྔུབ་པ་དང༌། །ཟས་ཟོས་འོག་ཏུ་སྣུམ་བསྟེན་ཞིང་ཏིལ་མར་གྱིས་ནི་བསྐུ་བ་དང༌། །དེ་བཞིན་འཇམ་རྩིའི་ལས་རབ་བསྔགས། །ཡང་ན་རྔབས་རྭ་ལ་སོགས་པས། །ནད་དམིགས་ནི་བཞིན་ནད་ཁྲག་དབྱུང༌། །ཤུག་པ་ཙནྡན་པུ་ཤེ་ལ་ཙེ། །མར་བཅས་ལྡེ་གུས་བསྐུ་བའམ། །དཱུར་བ་ཤིང་མངར་བཙོད་དང་ནི། །ནཱ་ག་གེས་སར་མར་སྦྱར་བསྐུ། །ནྱ་གྲོ་དྷ་སོགས་བསྐོལ་ཏིལ་མར། །ལན་བརྒྱ་བསྐྲུས་པའི་མར་གྱིས་ནི། །བསྐུ་བའམ་མ་ཤིང་མངར་ཆུས། །བླུགས་པར་གྱུར་པའང་བསྔགས་པ་ཡིན། །ཕལ་ཆེར་མེ་དྲོད་ཉམས་པའི་ཕྱིར། །མ་ཞུ་བེ་སྣ་བཅས་འཁྲུན། །དེ་ལ་ཕོ་བའི་ཚད་འཁྲུ་བའི། །སྐབས་སུ་
བཤད་པའི་སྨན་བསྟེན་ཕན། །ཟད་བྱེད་ལྡན་པའི་བཤང་བ་ནི། རྣམ་པ་ཀུན་ཏུ་བསྲུང་བྱ་སྟེ། །དེ་ཡི་ལུ་ཟུངས་ཀུན་ཟད་པས། །དེ་སྟོབས་བཤད་པའི་སྟོབས་ཀྱིས་གནས། །རིག་པས་ཤ་རྣམས་ཁོ་ན་སྦྱིན། །སྐོམ་དུ་རྒྱུན་ཆང་བླུད་པར་བྱ། །ཤུགས་ནི་བཀག་པར་གྱུར་པ་ཡིས། །གཅོང་ཆེན་གྱིས་ནི་གླགས་མི་རྙེད། །ཆང་དང་ཆང་དངས་རྒུན་ཆང་དང༌། །ཆང་རྙིང་བུ་རམ་སྦྲང་ཆང་དང༌། ཅི་རིགས་པར་ནི་བླུད་པ་དང༌། །ཤ་ནི་སྦྱིན་པ་ཉིད་དུ་བྱ། །བུ་གའི་རྒྱུན་འགགས་དག་ཕྱིར་དང༌། །སྟོབས་དང་མདངས་ནི་རྒྱས་བྱའི་ཕྱིར། །སྣུམ་དང་འོ་མ་ཆུས་གང་བའི། །སྣོད་དུ་ལུས་ནི་འབྱིང་བར་བྱ། །ཕྱུང་ནས་བསྲེགས་པའི་སྣུམ་གྱིས་ནི། །བསྐུ་ཞིང་ལག་པས་བདེ་བར་མཉེ། །བདེ་བར་འདུག་པར་གྱུར་པ་ལ། །དལ་གྱིས་ལྡེ་གུས་དྲིལ་བར་བྱ། །ཛི་བ་ནི་ཏི་དང་དཱུར་བ་དང༌། །བཙོད་དང་ཨ་ཤྭ་གནྡྷ་དང༌། །ཨ་པ་མརྒ་བ་སྤྲུ་བ། །ཨག་ནི་མན་ཏི་ཤིང་མངར་དང༌། །བ་ལ་ཡུངས་ཀར་བིད་རི། །རུ་རྟ་འབྲས་དང་ཟར་མ་དང༌། །མོན་སྲན་གྲེའུ་གཉིས་ཏིལ་དང་ཕབས། །ཐམས་ཅད་གཅིག་ཏུ་བཏགས་ནས་ནི། །ནས་ཀྱི་ཕྱེ་ནི་སུམ་འགྱུར་དང༌། །ཞོ་དང་སྦྲང་རྩི་ལྷན་ཅིག་སྦྱར། །འདི་དག་གིས་ནི་དྲིལ་ཕྱིས་བྱ། །ཤ་རྒྱས་མདོག་བཟང་སྟོབས་སྐྱེད་བྱེད། །ཡུངས་ཀར་སེར་པོའི་ལྡེ་གུ་དང༌། །འཚོ་བྱེད་སྡེ་ཚན་དང་སྦྱར་བ། །ཁྲུས་ཀྱི་སྨན་གྱིས་ཁྲུས་བྱ་ཞིང༌། །དུས་ཚིགས་བདེ་བའི་ཆུས་ཁྲུས་བྱ་།དྲི་དང་ཕྲང་བ་སོགས་པས་བརྒྱན། །བཀྲ་མི་ཤིས་པ་འཇིགས་པ་བསྟན། །མཛའ་བཤེས་བལྟ་ཞིང་གླུ་དང་ནི། །རོལ་མོ་མཉན་ཆིང་དགའ་སྟོན་བྱ། །འཇམ་རྩི་འོ་མ་ཞུན་མར་དང༌། །ཤ་དང་ཆང་བསྟེན་ཚུལ་ལ་གནས། །ལྷ་ལ་བརྟེན་པའི་ཆོ་ག་དང༌། །མཆོད་པའི་ལས་ལ་བརྩོན་པར་བྱ། །ཡན་ལག་བརྒྱད་པའི་སྙིང་པོ་བསྡུས་པ་ལས། གསོ་བའི་གནས་ཀྱི་ལེའུ་ལྔ་པའོ།། །།དེ་ནས་སློན་པའི་ནད་དང་སྙིང་ནད་དང་སྐོམ་དང་གསོ་བའི་ལེའུ་བཤད་པར་བྱའོ་།སློན་ནད་ཕལ་ཆེར་མ་ཞུ་བའི། །གནས་འཁྲུགས་ལས་བྱུང་དེ་ཡི་ཕྱིར། །རླུང་མ་གཏོགས་ལ་དང་པོར་ནི། །སྨྱུང་བྱས་སྐྱུག་སྨན་གཏང་བ་ཕན། །
སྟོབས་ལྡན་རྒྱུན་ཏུ་སློན་གྱུར་ཅིང༌། །ནད་མང་འགྱུར་ལ་གཏང་བར་བྱ། །དེ་འོག་རིམ་གྱིས་བཀྲུས་སྨན་ནི། །ཡིད་འོང་ཆང་རྒུན་ཆུ་སོགས་སམ། །འོ་མས་བཏང་གྱུརྡ་མོད་ལ། །གྱེན་འབྱུང་ནད་ནེ་ཐུར་དུ་འབྱུང༌། །ཞི་བའི་སྨན་ནི་རྩུབ་པ་སྟེ། །ཉམ་ཆུང་བ་ཡང་དེ་ཉིད་བྱ། །ཟས་ནི་སྐམ་ཞིང་ཡི་གར་འོང༌། །གོམས་ཤིང་ཡང་བ་བསྔགས་པ་ཡིན། །དེ་བཞིན་སྨྱུང་བ་ཡུ་ཤ་དང༌། །ཤ་ཁུ་འབའ་ཆ་སྐམ་པ་ལ། །ཚོད་མ་ལྡེ་གུ་བཟའ་བ་དང༌། །བཏུང་བ་དྲི་བཟངས་པ་ན་ཀ །རོ་དྲུག་ཟས་སྐོམ་སྣ་ཚོགས་དང༌། །འབྲས་བུ་འཁྲུས་དང་མཉེ་བ་དང། །དྲི་ཞིམ་འབྲས་བུ་མེ་ཏོག་སྐྱེས། །ཟས་དང་སྐོམ་ལ་སྤྱོད་པ་དང༌། །ཟོས་མ་ཐག་དུ་འཕྲལ་དུ་ནི། །ཆུ་གྲང་གིས་ནི་གདོང་བཀྲུ་བྱ། །རླུང་ལས་གྱུར་པའི་སློན་པའི་ནད། །རྒྱམ་ཚ་མར་བཅས་དྲོ་བའམ། །ཚ་གསུམ་ལན་ཚྭ་གསུམ་སྦྱར་བས། །ལུད་པ་དང་ནི་སྙིང་འཛག་དང། བཅས་པ་སེལ་བར་བྱེད་པ་ཡིན། །སེ་འབྲུའི་ཁུ་བ་བཅའ་སྒ་དང༌། །འུ་སུ་ཞོ་དང་མར་བསྐོལ་བའམ། །ཆུ་དང་འོ་མ་ཆ་མཉམ་པ། །ཁྲོན་གྱི་ཟས་ཚོལ་ཤ་ཁུ་ནི། །འབྲས་སྐྱུར་རྒྱམ་ཚ་མར་ཤེས་ཆེ། །ཁ་ཟས་སྣུམ་པོ་བཅའ་སྒ་དང༌། །ཞོ་དང་སེ་འབྲུར་སྦྱར་བའམ། །རྒྱམ་ཚར་བཅས་པ་དྲོ་འཇམ་ཕན། །འདིར་ནི་བཀྲུ་སྨན་ལན་ཚྭ་དང༌། །སྣུམ་དང་དྲོ་བར་བཅས་པ་ཕན། །མཁྲིས་པ་ལས་བྱུང་བཀྲུ་སྨན་ཕྱིར། རྒུན་འབྲུམ་བུ་རམ་ཤིང་ཁུ་དང༌། །དུར་བྱིང་སྦྱར་བའི་བཀྲུ་སྨན་བཏབ། །ཞུན་མར་སེང་ཕྲོམ་སྦྱར་བ་གཏང༌། །འཕེལ་ཏེ་བད་ཀན་གནས་ཁྱབ་པའི། །མཁྲིས་པར་མངར་དང་ཁབ་ཡིས། །གྱེན་དུ་དྲངས་ལ་དག་གྱུར་ནས། །འབྲས་ཡོས་ཁར་བཅས་པ་ལས། །སྐྱོ་མའམ་ནས་ཐུག་བླུད་པར་བྱ། །སཱ་ལུ་དྲུག་ཅུག་བ་ཡི་ཆན། །སྐམ་པའི་ཤ་ཁུ་མུ་དྷའི་ཧུ། །སོ་ཕག་བསྲེགས་ཏེ་ཆུ་ནང་གསུར། །ཤིན་ཏུ་བསྒྲངས་པའི་ཆུ་བླུད་པའམ། །མུངྒ་འུ་སུ་པུ་ཤེལ་ཙེ། །པི་པི་ལིང་དང་ནུབ་གཅིག་སྤངས། །ཡང་ན་རྒུན་ཆུ་བུ་རམ་ཤིང༌། །སླེ་ཏྲེས་ཆུ་མང་འོ་མ་བླུད། །འཛམ་བུ་ཨ་མྲའི་ལོ་མ་དང༌། ཨུ་ཤིར་ནྱ་གྲོ་དྷའི་མྱུ་གུ། །བསྐོལ་ཏེ་བསྒྲངས་པར་སྦྲང་རྩི་ནི། །བཏབ་སྟེ་བླུགས་ན་
སློན་པ་དང༌། །རིམས་དང་ཚད་འཁྲུ་བརྒྱལ་བ་དང༌། །སྐོམ་དང་ཆེ་བ་མི་བཟད་སེལ། །སྐྱུ་རུ་རའི་ཁུ་ཙནྡན་བཅས། །མུངྒ་བ་ལའི་ཆུ་བླུད་ཕན། །རྒྱ་ཤུག་ཚིག་གུ་ཁར་དཀར། །འབྲས་ཡོས་སྤྲ་ཡིས་ཚིལ་པི་པི་ལིང༌། །དངུལ་རྡོ་སྦྲང་རྩིའམ་ཨ་རུ་ར། །རྒྱུན་འབྲུ་འམ་རྒྱ་ཤུག་དང་སྦྱར་ཕན། །བད་ཀན་ལས་གྱུར་ནིམ་པ་དང༌། །པི་པི་ལིང་དང་པོ་སོ་ན་ཆ། །ཡུངས་ཀར་ཆུ་དྲོན་གྱིས་སློན་བྱ། །ཉམ་ཆུང་བ་ལ་སྨྱུང་བ་བྱ། །དོང་གལ་སྩོགས་ཁུ་བ་བསྐོལ། །བསྒྲངས་པ་སྦྲང་རྩིར་བཅས་པ་བླུད། །ནས་ཀྱིས་སློན་འཇོམས་པའི། །སྨན་མང་དང་ནི་སྦྱར་བ་བླུད། །བད་ཀན་འཇོམས་ཟས་ཡི་གར་འོང༌། །བཏུང་བ་ཟིན་ཐིག་བུ་སྲིན། །ལྡོང་རོས་དང་ནི་པི་པི་ལིང༌། །ན་ལེ་ཤ་མ་ནི་སྐྱུར་རྩེ་ཆེ། །ཀ་པི་ད་ཏ་ཡི་ཁུ་བ་དང༌། །སྦྲང་རྩིར་བཅས་པས་སློན་ནད་སེལ། །ཀ་པིད་ཏ་དང་ཏ་བ་གསུམ། །ཕྱི་ཚོར་སྦྲང་རྩིར་སྦྱར་བ་སྦྱིན། །མཐུན་པའི་སྤྱོད་པ་བྱས་པ་ཡིས། །མི་སྡུག་ཡུལ་མཐོང་ལས་བྱུང་སེལ། །སྲིན་བུ་ལས་བྱུང་སྲིན་བུ་ཡི། །སྨན་དུ་བཤད་པ་རྣམས་ཀྱིས་གསོ། །ལྷག་མ་ནད་དམིགས་ཇི་བཞིན་དུ། །དེ་ཞི་འགྱུར་པའི་དཔྱད་ཀྱིས་གསོ། །སློན་པའི་སྐབས་སུ་རླུང་གི་ནད་རྣམས་ནི། །ལུས་ཟུངས་ཟད་པས་ངེས་པར་ལྡང་གྱུར་ཏེ། །དེ་བས་འདིར་ནི་སྐྱུག་སྨན་སྦྱོར་དྲངས་པའི། །སྐབས་བཤད་བཅད་དང་བརྟ་བའི་ཆོ་ག་བྱ། །བུ་རམ་ཞུན་མར་ཤ་ཁུ་དགེ་བ་ཆེ། །ཚ་བ་གསུམ་དང་འཚོ་བྱེད་སྨན་མར་དང༌། འོ་ཐུག་དང་ནི་ཕན་པའི་ལྡེ་གུ་ཡིས། །རྒྱུན་དུ་སློན་པ་ཞི་བ་ཉིད་དུ་བྱ། །སྙིང་ནད་རླུང་གྱུར་ཏིལ་མར་ནི། །སྐྱུར་རྩབ་དང་བ་ཞོ་ག་ཆུ། །སྔན་པ་ཚ་ཅ་ན་དྲོ་འཇམ་བླུད། །དེས་ནི་ལྟོ་སྦོས་སྐྲན་ཡང་འཇོམས། །ཏིལ་མར་ལན་ཚྭར་བཅས་དང་སྒྱུར། །བ་གཅིན་བསྐོལ་བའང་དེ་དང་མཚུངས། །བིལ་བ་ར་སྣ་རྒྱ་ཤུག་ནས། །ཐང་ཤིང་དང་ནི་བ་སྤུ་བ། །རྒྱ་སྲན་རྩ་བ་ལྔ་པ་རྣམས། །བསྐོལ་བའི་ཆུ་དེར་ཏིལ་མར་ནི། །བསྐོལ་བ་དེ་ནི་སྣར་བཏང་དང༌། །བཏུང་དང་འཇམ་རྩིར་གཏང་བར་བྱ། །བཅའ་སྤ་རྒྱམ་ཚ་བྱའུ་རུག་པ། །སླེ་ཏྲེས་ཤིང་ཀུན་མ་ནུ་དང༌། ཨ་རུ་ར་དང་མར་བསྐོལ་བ། །སྙིང་ནད་རྩིབ་ལོགས་གཟེར་སྐྲན་འཇོམས། །ཁ་རུ་ཚ་ནི་སྲང་
གཉིས་དང༌། །ཨ་རུ་ར་ནི་ལྔ་བཅུ་དང༌། །ཞུན་མར་བྲེ་གང་བསྐོལ་རྩིབ་ལོགས། །སྙིང་ནད་སྐྲན་དབུགས་མི་བདེ་སེལ། །སེ་འབྲུ་བཅའ་སྒེ་ཁ་རུ་ཚ། །ཤིང་ཀུན་སྟར་བུ་ཕྱེ་མར་སྦྱར། །རླུང་ན་དག་གཞན་དབང་ཅན་སྙིང་ནད། །དབུགས་མི་བདེ་བསེལ་མཆོག་ཡིན། །མ་ནུ་ཟུར་པ་བཅའ་སྒ་དང༌། །སྐྱུར་རྩི་ཆེ་རྩ་ཨ་རུ་རའི་།ལྡེ་གུ་ཡ་བཀྵ་ར་དང༌། །མངར་སྐྱུར་ལན་ཚྭ་ལྡན་པ་འཐུངས། །བཅས་སྙམ་སེམས་པའི་གཟེར་འཇོམས་བྱེད། །རྒྱམ་ཚལ་ལ་ཕུད་ཀཥ་ར། །ཤུ་དག་གོ་སྙོད་བཅའ་སྒ་དང༌། །ཐང་ཤིང་སྒྱུར་རྩི་ཆེན་པོ་དང། །ཟུར་པ་མ་ནུ་པ་ལ་ཤ་།བསྐོལ་ཁུ་འཇམ་འཐུངས་ཡོན་ཏན་མཚུངས། །ཚ་ལྔ་ཟུར་པ་ཨ་རུ་ར། །བུ་རམ་མ་ནུ་སྐྱུར་རྩི་ཆེ། །ཆང་བཏགས་ལྡེ་གུ་མར་ཏིལ་མར། །བརྡོས་ཏེ་རྒྱམ་ཚར་ལྡན་འཐུངས་ན། །སྙིང་ནད་རྩིབ་ལོགས་མོ་མཚན་ཟུག །སྐྲན་དང་དམུ་རྫིང་ནད་རྣམ་སེལ། །འདི་ལ་སྣུམ་གྱི་དུགས་ཕན་ཞིང༌། །སྨན་མར་གྱི་ནི་སྦྱོར་བ་ཕན། །སྐོམ་ལ་རྩ་བ་ཆུང་དུ་ལྔའམ་།བཅའ་སྒ་དང་ནི་བསྐོལ་བའི་ཆུའམ། །ཆང་གི་དང་མ་ཞོ་ག་ཆུ། །འབྲས་བུའི་རང་སྐྱུར་བླུད་པར་བྱ། །བྱ་རྨྱང་རིངས་གཟེར་མ་ཞུར་བཅས། །སྙིང་ལ་རླུང་གིས་གནོད་གྱུར་ལ། །བྱ་བ་འདི་བྱ་སྙིང་འཛག་ཅིང༌། །འཕར་དང་ཅིང་སྙིང་བཅས་པ་ལ། །སྲེག་པ་ཁྲུང་ཁྲུད་རྨ་བྱ་དང༌། །དགོ་བ་ཁྱིམ་བྱ་བ་སྣུམ་མང་ཕན། །སྙིང་ནད་ཅན་ལ་བ་ལའི་མར། །ཡང་ན་སྐྱིད་དེ་པའི་མར་བླུད། །ཤིང་མངར་ལན་བརྒྱར་བཙོས་པའམ། །དེ་བཞིན་སྣུམ་ཆེན་མཆོག་ཏུ་ཕན། །ར་སྣ་འཚོ་བྱེད་ཛི་བ་ནི་ཏི། །བ་ལ་བྱ་ཀྲི་བ་སྤྲུ་བ། །ག་བྲའི་རྩ་བ་ཏིར་དང༌། །ཤུ་དག་ཚ་བ་གསུམ་དང་ནི། །སྣུམ་ཆེན་ཞེས་བྱ་བ་བསྐོལ་བར་བྱ། །ཞོ་ནི་བཞི་ཆ་དེ་བཞིན་སྐྱུར། །ཇི་སྙེད་པ་ལས་སྦྱར་བ་བསྟེན། །ཚིམ་བྱེད་བརྟས་བྱེད་སྟོབས་སྐྱེད་ཅིང༌། །རླུང་གི་སྙིང་ནད་འཇོམས་པ་ཡིན། །སྙིང་ནད་དྲོད་ཆེ་འཕར་བ་དང༌། །རླུང་ལས་གྱུར་བའི་སྙིང་ནད་ལ། །འོ་མ་ཞོ་དང་བུ་རམ་མར། །ཆུ་དང་རླན་ཅན་ཤ་ངག་ཕན། །འདི་མ་གཏོགས་པའི་སྙིང་གི་ནད། །བཞི་པོ་དག་ལ་སྤང་བར་བྱ། །རླུང་ཅན་
རེངས་དང་བེའུ་སྣབས་ཅན། །ཚོར་མེད་ལྷག་མ་རྣམས་ལའང་སྤང༌། །བད་ཀན་འདྲེས་གྱུར་དེ་ལ་ནི། །རྩུབ་དྲོད་ཤད་པའི་བྱ་བ་བྱ། །མཁྲིས་གུར་རྒྱུན་ཆུ་བུ་རམ་ཆུ། །ཁ་རུ་སྦྲང་རྩི་པ་རུ་ཤར། །ལྡན་པའི་བཀྲུ་སྨན་ཡིད་འོང་བས། །སྦྱངས་ལ་མཁྲིས་སེལ་རིམ་པ་བྱ། །གློ་རྡོལ་རིམས་ཀྱི་མཁྲིས་སྐབས་བཤད། །ཕྱི་ནང་གི་ནི་སྦྱང་བ་བྱ། །པུ་ཤེལ་ཙེ་དང་ཤིང་མངར་བཏགས། །ཁ་རར་བཅས་པའི་ཆུ་བླུད་བྱ། །ར་སྣ་ཁར་རྒྱུན་འབྲུམ་དང༌། །འཚོ་བྱེད་ཨུཏྤལ་ཟངས་རྩི་བ། །བ་ལ་འབྲ་གོ་ར་མཉེ་བ། །མེ་ད་གཉིས་དང་མ་ཧེའུ་མར། །འོ་མར་བཅས་པ་བསྐོལ་བ་ནི། །མཁྲིས་གྱུར་སྙིང་ནད་སེལ་བྱེད་ཡིན། །ཤིང་མངར་བ་སྤྲུ་པུ་ཎྜ་རཱི། །པདྨའི་རྩ་བ་ཀ་ཤེ་རུ། །བཅའ་སྒ་བ་ལར་བཅས་དེ་དང༌། འོ་མར་བཅས་དང་བཅའ་སྒར་བསྐོལ། །བསྒྲངས་པར་སྦྲང་རྩི་བཏབ་པ་དང༌། །མངར་བའི་སྡེ་ཚན་བསྡུས་པའང་བསྔགས། །ཏིལ་མར་ཤིང་མངར་བཅས་བསྐོལ་ཞིང༌། །སྦྲང་རྩི་བཏབ་བའི་འཇམ་རྩིའང་ཕན། །བད་ཀན་ལས་གྱུར་དུགས་བྱས་ལ། ནིམ་པ་ཤུ་དག་ཆུ་ཡིས་སློན། །རྒྱ་སྲན་ཁུ་བ་རྒྱམ་ཚོའི་ཆུ། །ཆང་རྣོ་བླུད་ཅིང་ནས་ཟན་སྦྱིན། །ཤུ་དག་ཤིང་ཀུན་ལན་ཚྭ་གཉིས། །དོང་གྲ་སུག་སྨེལ་ལ་ལ་ཕུད། །ནས་ཚིག་འཁུས་ཐལ་པི་པི་ལིང༌། །ཕྱེ་མ་དྲོ་འཇམ་ཆུ་བླུད་པའམ། །འབྲས་བུའི་ཆུའམ་རང་སྐྱུར་རམ། །རྒྱ་སྲན་བ་གཅིན་ཆང་རྙིང་བླུད། །མ་ནུ་བཅའ་སྒ་ཨ་རུ་ར། །ཟུར་པ་ར་སྣ་པི་པི་ལིང༌། །ཤུ་དག་བསྐོལ་ཏེ་བླུད་པའམ། །དེ་བཞིན་བཅའ་སྒ་ཨ་རུ་ར། །བོང་ང་དཀར་པོ་ཡུང་བ་དང༌། །ཀད་པ་ལ་ནི་བསྐོལ་བའམ། །རོ་ཧི་ཏ་ཀ་ཨ་ཤྭ་ཐ། །སེང་ལྡེང་ཨུ་དུམ་བཱ་ར་དང༌། །ཨ་རྫུན་དང་པ་ལ་ཤ་།ནྱ་གྲོ་དྷ་བསྐོལ་ཚ་བ་གསུམ། །དུར་བྱིད་ཕྱེ་མར་བཅས་ལྡེ་གུ། །ཟོས་ཏེ་ཆུ་ཚན་རྗེས་འཐུངས་ན།།བད་ཀན་སྙིང་ནད་སེལ་བྱེད་ཡིན། །བད་ཀན་སྐྲན་སྐབས་བཤད་མར་དང༌། །ཀཥ་ར་སྣ་ཚོགས་བླུད་པར་བྱ། །ཡང་ན་བྲག་ཞུན་བཅུད་ལེན་དང༌། །ཚངས་པའི་བཅུད་ལེན་སྐྱུ་རུ་རའི། །ལྡེ་གུའམ་རི་བྱིས་བཤད་པའམ། །བདུད་རྩིའི་མར་ནི་འདི་སྦྱར་བྱ། །གང་ཞིག་ཟན་ཟོས་གཟེར་གྱིས་
འདེབས། །ཟས་ཞུ་གྱུར་ནས་ཞི་གྱུར་པ། །དེ་ལ་རུ་རྟ་བྱི་དང་ག །ལན་ཚྭ་གཉིས་དང་སེང་ཕྲོམ་དང༌། །ཐང་ཤིང་བོང་དཀར་པོར་བཅས། །ཕྱེ་མ་ཆུ་བསྐོལ་དྲོ་སྦྱར་བླུད། །གང་ཞིག་ཞུ་ནས་ཆེར་གཟེར་བ། །དེ་ལ་སྣུམ་གྱི་བཀྲུ་སྨན་ནི། །འབྲས་བུ་དང་ནི་དེ་བཞིན་དུ། །རྩ་བའི་བཀྲུ་སྨན་སྦྱིན་པར་བྱ། །ཕལ་ཆེར་རླུང་ནི་ལམ་འགགས་པ། །མ་ཞུའི་གནས་སུ་འཁྲུ་བར་འགྱུར། །དེ་ལ་སྨྱུང་དང་སྨིན་པ་དང༌། །སྦྱང་བས་བདེ་བར་རྒྱུ་བར་བྱ། །འབུ་འཇོམས་པ་ཡི་སྨན་ཀུན་གྱིས། །འབུ་ཡི་སྙིང་ནད་གསོ་བར་བྱ། །སྐོམ་དང་རླུང་དང་མཁྲིས་པ་འཇོམས། །ཆོ་ག་ཕལ་ཆེར་བསྔགས་པ་ཡིན། །ཀུན་ལ་ཕྱི་ནང་བསིལ་བ་དང༌། །དེ་བཞིན་ཞི་དང་སྦྱང་བར་བྱ། །ཆར་ཆུ་གྲང་མོ་སྦྲང་རྩིར་བཅས། །ས་ཆུའི་ཡོན་ཏན་དེ་ལྡན་བསྔགས། །བོང་བ་རྫ་སྐྱོངས་བྱེ་མའམ། །གཤག་མ་བསྲེག་བཅུག་དངས་མར་བཅས། །བསྐོལ་ཏེ་ཁ་རར་བཅས་པའམ། །དཱུར་བ་ལ་སྩོགས་རྩ་བ་ལྔ། །བསྐོལ་ཏེ་ཁ་ར་བཏབ་པའམ། །འབྲས་ཡོས་ཕྱེར་སྦྱར་སྐྱོ་མའང་བསྔགས། །ནས་རྗེན་ཆག་ཚེ་སྦྲང་རྩི་དང༌། །ཁ་ར་བཏབ་པ་གྲང་མོའང་ཕན། །དེ་བཞིན་ནས་ཐུགས་སཱ་ལུ་དང༌། །ཀོ་ཏྲ་པ་ནི་རྙིང་པ་ནི། །འོ་མ་བསིལ་ཞིང་ནུས་བསིལ་བའི། །སྨན་དང་བསྐོལ་བའི་ཁ་ཟས་ནི། །ནང་ཆུ་གྲང་གིས་བཀྲུས་ནས། །ཁ་ར་སྦྲང་རྩི་སྦྱིན་པ་བསྔགས། །སྐམ་སའི་ཤ་ཁུ་ལ་ན་ཚྭ་སྐྱུར། མེད་ཅིང་མར་དང་བརྡོས་པ་ཡང༌། །དེ་བཞིན་མུངྒ་སྩོགས་ཁུ་བ། །འཚོ་བྱེད་སྡེ་ཚན་ཁུ་བར་བཅས། །སྣ་སྨན་འོ་མ་མར་བསིལ་སྨན། །བསྐོལ་བའམ་བུ་རམ་ཤིང་ཁུ་ཕན། །སྐོམ་ས་ལ་མཁུར་བ་བཀང་ནས་ནི། །མདོག་ནས་ལས་བཤད་བྱས་པའང་ཕན། །ཚ་རིམས་བཤད་པའི་ལྡེ་གུ་སོགས། །རྩོལ་བ་ཆུང་ཞིང་སེམས་དགའ་དང༌། །ཆུ་བོ་མཚོ་ནི་ཆེན་པོ་སྩོགས། །དྲན་པ་དང་ནི་མཐོང་བ་ཕན། །སྐོམ་དང་རླུང་ལས་གྱུར་པ་ལས། །ཞོ་ནི་བུ་རམ་བཅས་པ་བསྔགས། །ཤ་ཁུས་ཉམས་བརྟས་བིད་རི། །སྩོགས་ཏེ་བསྐོལ་ནས་བསྒྲངས་པ་ཕན། །མཁྲིས་གྱུར་ཨུ་དུམ་བཱ་ར་སྨིན། །ཁུ་བར་ཁ་བཏབ་པ་ཕན། །ཡང་ན་དེ་བསྐོལ་བསྒྲངས་
པའམ། །ཤ་རི་བསྩོགས་སྡེ་ཚན་ཆུ། །སྡེ་ཚན་དེ་འདྲ་བསྐོལ་ཁུ་བ། །བསྒྲངས་བ་ཁ་ར་སྦྲང་རྩིར་བཅས། །མངར་བའི་སྨན་གྱི་སྡེ་ཚན་དང༌། འོ་མ་ཅན་ཤིང་བསྐོལ་དེ་བཞིན། །བི་ཛ་བུར་རྒུན་འབྲུམ་དང༌། །ལྕང་མ་ནྱ་གྲོ་དྷའི་ལོ་མ། །ཀུ་ཤ་འཇག་མའི་རྩ་བ་དང༌། །ཤིང་མངར་ཆུ་ནི་བསྐོལ་བའང་ཕན། །རིམས་ལ་ཕན་སྨན་རྒུན་འབྲུམ་སྩོགས། །སྙིང་པོ་ལྔ་ཡི་ཆུ་བླུད་ཕན། །བད་ཀན་ལས་གྱུར་ནིམ་པ་ནི། །ཆུ་མཆོག་བསྐོལ་བས་སློན་དུ་གཞུག །བིལ་བ་སུ་ཚ་བ་ལྔ། །འཇག་མ་ཀྲུ་རྟུག་ཏྲེས་བསྐོལ་བླུད། །ཡང་ན་སྐྱེར་པ་ཆུ་བསྐོལ་ལ། །ཁ་ར་སྦྲང་རྩི་བཏབ་པ་བླུད། །མུངྒའི་ཁུ་བ་པ་ཏོ་ལ། །ནིམ་པའི་ལོ་མ་ཚ་གསུམ་བཅས། །ནས་ཟན་མ་ཁུར་བཀང་རྣོན་པོ་དང༌། །སྣ་སྨན་ལྡེ་གུ་རྣོན་པོའང་བསྟེན། །ཉེས་ཀུན་མ་ཞུ་ངེས་འཇོམས་པས། །དེ་བཞིན་སྨོན་གྱི་བྱ་བའང་བསྔགས། །གོ་བྱེ་ཤུ་དག་ཆ་བ་གསུམ། །འབྲས་བུ་སྐྱུར་པའམ་ཆུ་ཚན་ནམ། །ཞོ་ག་ཆུ་དང་བཏུང་བ་བསྔགས། །ཟས་ཀྱི་ཉེས་འབྱུང་དུས་ཤེས་པས། །ཐུག་སླའམ་སྐྱོ་མ་བསིལ་བ་བླུད། །ངལ་བས་སྐོམ་ལ་ཤ་ཁུའམ། །སྐྱོ་མ་ཁ་རར་བཅས་པ་བླུད། །ཚ་བས་བསྐོལ་ལ་ཁ་རར་བཅས། །ནས་དང་རྒྱ་ཤུག་ཕྱེ་སྐྱོ་བླུད། །ལུས་ཀུན་ཏིལ་གྱི་ལྡེ་གུ་དང༌། །རང་སྐྱུར་བཅས་པས་བསྐུ་བར་བྱ། །ཆུ་བསིལ་ཁྲུས་ལས་སྐོམ་གྱུར་ཆང༌། །ཆུར་བསྲེས་པའམ་བུར་ཆུ་བླུད། །ཆང་ནི་ཕྱེད་བཅས་པ་བླུད། །ལན་ཚྭ་སྐྱུར་དང་བཅས་འཁྲུས་བྱ། །སྣུམ་བཅས་མེ་དྲོད་རབ་རྣོ་ལ། །རང་བཞིན་བསིལ་བའི་ཆུ་བླུད་བྱ། །སྣུམ་མ་ཞུ་ལ་ཆུ་ཚན་བླུད། །ཞུ་ལས་སྐོམ་ལ་ཐུག་པ་བླུད། །ཟས་སྣུམ་ཟོས་པས་སྐོམ་དང་འགྱུར། །ཁ་བ་དང་མཉམ་བུ་རམ་ཆུ། །བུ་རམ་སོགས་ཟས་ཟོས་ལ་སྐོམ། །ཆུ་དྲོན་བླུད་ལ་དེ་སློན་བྱ། །གཅོང་ཆེན་ལས་བྱུང་གཅོང་ལ་ཕན། །ཐམས་ཅད་ཉམས་ནི་བརྟ་བ་ཕན། །སྐེམ་ཞིང་ཉམ་ཆུང་ཁོང་རྩུབ་ལ། །ཤ་ཁུའམ་ར་ཡི་འོ་མ་བླུད། །སྟོད་རྒྱུའི་རླུང་ལའོ་མ་དང༌། །ཟད་བྱེད་ལུད་པའི་སྨན་བསིལ་བླུད། །ནད་རྐྱེན་ལས་གྱུར་འུ་སུ་ནི། །འབྲས་བསྐོལ་ཁ་ར་སྦྲང་རྩིར་བཅས། །ནད་དམིགས་ལ་ནི་
བལྟས་ནས་ནི། །བཏུང་བའི་བྱ་བ་ཀུན་ཀྱང་བསྔགས། །སྐོམ་ཞིང་སྔར་གྱི་ནད་ཀྱིས་གཟིར། །ཆུ་དང་འཕྲད་བར་མ་གྱུར་ན། །འཆི་བའམ་ཡུན་རིང་བ་ཡི་ནད། །རྙེད་པར་འགྱུར་བས་དེ་ཡི་ཕྱིར། །གོམས་པའི་ཟས་སྒོམ་སྨན་གྱིས་ནི། །དེ་ཡི་སྐོམ་དད་མྱུར་བསལ་བྱ། །དེ་བསལ་ནད་ནི་གཞན་དག་ཀྱང༌། །གསོ་བ་ཉིད་དུ་ནུས་པ་ཡིན། །ཡན་ལག་བརྒྱད་པའི་སྙིང་པོ་བསྡུས་པ་ལས། །གསོ་བའི་གནས་ཀྱི་ལེའུ་དྲུག་པའོ།། །།དེ་ནས་ཆང་ནད་གསོ་བའི་ལེའུ་བཤད་པར་བྱའོ། །ཉེས་པ་གང་ཞིག་ཤས་ཆེར་མཐོང༌། །དེ་ནི་དང་པོར་གསོ་བར་བྱ། །ཡང་ན་ཆང་ནད་ནད་གཞི་མཚུངས། །བད་ཀན་གནས་ཀྱི་རིམ་པས་གསོ། །མཁྲིས་པ་རླུང་གི་མཐར་ཐུག་པར། །ཆང་ནད་ཕལ་ཆེར་འབྱུང་བ་ཡིན། །དམན་དང་ལོག་པ་དྲག་འཐུངས་ལས། །ནད་ནི་གང་ཞིག་སྐྱེས་གྱུར་པ། །དེ་ཉིད་ཆ་མཉམ་འཐུངས་པ་ཡིས། །ཆད་ཉིད་ཀྱིས་ནི་ཞི་བར་འགྱུར་རོ། །ཆང་དང་དུག་ནི་མཚུངས་པ་ལས། །དུག་ནི་རྣོ་སྩོགས་ཡོན་ཏན་གྱི། །ནུས་པ་ཤིན་ཏུ་ཆེ་བས་ན། །དུག་གཞན་ལ་ནི་ལྟོས་པ་ནི། །རྣ་ཚེ་ལྷག་པར་འཐུངས་པ་དང༌། །ཚ་ཞིང་སྐྱུར་བ་དག་གིས་ནི། །ཆང་གིས་ཟས་ཀྱི་རོ་བསྲུལ་ཞིང༌། འཇུ་ཉེར་བ་ཚ་བྲོ་གང་ཡིན། །མྱོས་དང་སྐོམ་རྨོངས་ནང་དུ་ཚ། །རིམས་དང་མགོ་འཁོར་སྐྱེད་པར་བྱེད། །ཆང་གིས་བསླངས་པའི་ནད་ཀྱིས་ནི། །རླུང་རྒྱུའི་བུ་ག་བཀག་གྱུར་པས། །མགོ་དང་རུས་པ་ཆིངས་རྣམས་སུ། །མི་བཟད་པར་ནི་སྐྱེད་པར་བྱེད། །སྦྱོར་བརྗེས་མཐུན་གྱུར་པ་ཡི། །ཆང་ཉིད་ཀྱིས་ནི་དེ་སེལ་འགྱུར། །ཆང་ནད་མ་ཞུ་ཞུ་གྱུར་ན། །ཟས་འདོད་ལུས་ནི་ཡང་བར་འགྱུར། །བ་ཚ་རོ་ནི་སྐྱུར་དང་ཕྲད། །མངར་བ་ཉིད་དུ་མྱུར་དུ་འགྱུར། །ནད་ནི་འཇུ་བར་བྱེད་ནུས་པས། །སྐྱུར་བ་ཀུན་ལས་ཆང་མཆོག་ཡིན། །སྔར་བཤད་རྣོ་དང་དྲོ་སྩོགས་དང༌། །དེ་བཞིན་དྲོད་སྐྱེད་སྩོགས་ཡོན་ཏན། དེ་ཉིད་གོམས་པའི་དབང་གིས་ནི། །འདི་ཡིས་ལུས་ཟུངས་མཉམ་བྱེད་མཆོག །ཞག་བདུན་ནམ་ཞིག་ཞག་བརྒྱད་པར། །ཆང་ན་སྨན་གྱི་སྦྱོར་བ་བྱ། །དུས་འདི་ཙམ་གྱིས་ལམ་ལོག་པར། །གནས་པའི་
ཆང་ནད་ཞི་བར་འགྱུར། །སྨན་ནི་བྱས་གྱུར་ནས་ཆད་ནད། །དེ་ཕན་ཆང་ནི་རྗེས་འབྲེལ་པའི། །ནད་གང་ཡིན་པ་དེ་ལ་སྨན། །ནད་དམིགས་ཇི་བཞིན་སྦྱིན་པར་བྱ། །དེ་ལ་རླུང་ཆེ་བ་ལ། །སྐྱུར་རྩེ་ཆེན་པོད་ཏྲིག་དང༌། །རྒྱ་ཤུག་སེ་འབྲུག་གོ་སྙོད་དང༌། །ལ་ལ་ཕུ་དང་ཧ་པུ་ཤ་།ཟི་ར་ཚ་གསུམ་ལན་ཚྭ་གསུམ། །སྒེའུ་གཤེར་ཕྱེ་ཆང་སྦྱར་བ་བླུད། །སྲེག་ཤ་ལྡུམ་རྔད་བཅས་པ་དང༌། །སྣུམ་དང་ལྡན་པའི་ཟས་སྦྱིན་ནོ། །སྣུམ་ཞིང་དྲོ་སྐྱུར་ལན་ཚྭར་བཅས། །ཤ་ཚོན་ཁུ་བ་བླུད་པའམ། །ཨ་མྲ་ཨ་མྲ་ཏ་ཀ་གཏུབས། །གཡོས་སྦྱར་བ་ཡི་དྲུག་པའམ། །གྲོ་དང་མ་ཤལ་ལས་བྱས་པ། །རྙིང་ཞིང་ཡི་གར་འོང་བ་དང༌། །སྒེ་ཤེར་བཅས་བའི་ཁུ་བ་ནི། །ཚ་དང་ཤ་སོགས་ནང་བཅུག་པའམ། །ཆང་ནི་དྲི་ཞིམ་བསིལ་བ་དང༌། །ལེགས་ལངས་དངས་ཤིང་ཚར་བཅས་ཕན། །སེ་འབྲུའམ་རྩ་བ་ཆུང་ལྔ་བསྐོལ། །བཅའ་སྒའུ་སུ་བསྐོལ་བའམ། །ཞོག་ཆུའམ་ཚ་ཆུའམ། །རང་སྐྱུར་དངས་མ་བླུད་པར་བྱ། །ལུས་བསྐུ་དྲིལ་དང་བཀྲུ་བ་དང༌། །གོས་ནི་དྲོ་ཞིང་མཐུག་པ་དང༌། །ཨ་ཀ་རུ་ཡི་དུད་པས་བ་དུག །གུར་གུམ་ཨ་ཀ་རུ་ཡིས་བྱུག །ཆུང་མ་ནུ་མ་རོ་སྨད་མཛེས། །ལང་ཚོར་ལྡན་ཞིང་ཡན་ལག་དྲོ། །དགའ་བས་འཁྱུད་པར་བྱེད་པ་དང༌། །བསྙེན་བཀུར་བྱས་པར་གྱུར་པའང་ཕན། །མཁྲིས་བ་ཤས་ཆེར་ཆུ་མང་བའི། །སྦྲང་རྩི་ཁར་དང་ལྡན་པའི། །སེ་འབྲུ་འབྲ་གོའི་ཁུ་བ་དང༌། །བྷ་བྱ་རྒྱུན་འབྲུམ་བ་རུ་ཤའི། །བུ་བསྒྲངས་ཕྱེ་དང་ཁར་རར་བཅས། །ཏུང་བའང་དེ་འདྲ་བླུད་པར་བྱ། །ཡང་ན་མངར་བའི་སྡེ་ཚན་གར་བའི་སྡེ་ཚན་བསྐོལ། །ཁུ་བ་ཆང་བསྲེས་སྦྲང་རྩི་བཏབ། །སཱ་ལུ་དྲུག་ཅུ་པའི་ཚན་དང༌། །རི་བོང་གོང་སྲོག་གཙོད་ཀྱི་ཤ །ཙ་ན་མུངྒ་སྒྱུ་རུ་ར། །སེ་འབྲུ་བ་ཏོལ་གཡོས་སྦྱིན། །བད་ཀན་མཁྲིས་འདྲེས་ལས་གྱུར་པ། །ཚ་དང༌། སྐོམ་དང་ལྡན་པ་ཡི། །ཆང་ངམ་ཆུ་གྲང་བུ་རམ་ཤིང༌། །ཁུ་བའམ་རྒུན་ཆུ་མང་བླུད་ལ། །སློན་གཞུག་འདྲེས་བའི་ནད་ལ་ནི། །སྐྱོ་མ་ལ་སོགས་རིམས་པས་ཕན། །དེ་ཡིས་མེ་དྲོད་འབར་གྱུར་པས། །ཟས་དང་ཉེས་ལྷག་སྨིན་པར་བྱེད། །ལུད་པ་མཆིལ་མ་ཁྲག་བཅས་འབྱུང༌། །
རྩིབ་ལོགས་ནུ་མར་གཟེར་བ་དང༌། །ཚ་དང་བཅས་པའི་སྐོམ་དད་དང༌། །སྙིང་དང་བྲང་ནི་ན་བ་ལ། །སླེ་ཏྲེས་ག་དུར་བསྐོལ་བའམ། །ཡང་ན་པ་ཏོ་ལ་བསྐོལ་བུ། །བཅའ་སྐར་བཅས་པ་བླུད་བྱ་ཞིང༌། །གོང་མ་སྲེག་གི་ཤ་སྦྱིན་བྱ། །མཁྲིས་པ་རླུང་ནི་རྒྱས་གྱུར་པས་ཤིན་ཏུ་ཤས་ཆེར་སྐོམ་གྱུར་ན། །རླུང་ནི་བདེ་བར་རྒྱུ་བྱེད་པའི། །རྒུན་ཆུ་བསྒྲངས་པ་བླུད་པར་བྱ། །ཞུ་ནས་ར་ཤའི་ཁུ་བ་ནི། །མངར་དང་སྒྱུར་བའི་སྨན་སྦྱར་སྦྱིན། །སྐོམ་ན་ཆུ་མང་བསྲེས་པ་ཡི། །ཆང་བླུད་ར་རོར་མི་འགྱུར་བསྲུང༌། །གླ་སྒང་སེ་འབྲུ་འབྲས་ཡོས་ཆུའམ། །ཡང་ན་འདབ་མ་བཞི་བསྐོལ་བའམ། །ཨུཏྤལ་པ་ཏོ་ལ་སོགས་སམ། །རང་བཞིན་གྱིས་ནི་བསིལ་བ་བླུད། །ཆང་མང་འཐུངས་པས་ཆུ་ཡི་ཁམས། །འབྲིང་ཞིང་མེ་ཤས་རྒྱས་པར་འགྱུར། །གྲེ་བ་རྐན་མཆུ་སྐམ་འགྱུར་ཞིང༌། །ལྕེ་ནི་འབྱིན་ཅིང་གཅོད་བྱེད་ལ། །མཚན་མོ་རླུང་གིས་བསིལ་བར་བྱས་པའི། །ཆུ་ནི་ཡོག་ཚད་བླུད་པར་བྱ། །རྒྱ་ཤུགས་སེ་འབྲུ་ད་ཏྲིག་དང༌། །ཙུག་ཏྲལ་ཆུ་བའི་ཁུ་བ། །སྐྱུར་བ་ལྔ་ཡིས་ཁར་བསྐུས་ན། །འཕྲལ་དུ་སྐོམ་དང་སེལ་བར་བྱེད། །ཆང་འཐུངས་དྲོད་ནི་ཁྲག་མཁྲིས་དང༌། །འདྲེས་པས་པགས་པ་ཁྱབ་གྱུར་པས། །མི་བཟད་ཚ་བ་སྐྱེད་བྱེད་དེ། །དེར་ནི་རབ་བསིལ་ཆོ་ག་བྱ། །མ་ཞུ་ཤ་ཁུས་ཚིམ་བྱས་ལ། །རོ་ཧི་ནི་ལས་གཏར་ག་གདབ། །སློན་དང་སྨྱུང་བ་དག་གིས་ཀྱང༌། །བད་ཀན་ཤས་ཆེར་སྐུག་སྨན་དང༌། །སྨྱུང་བ་བཅའ་སྒ་སྟི་ར་དང༌། །ཀཎྜ་ཀ་རི་བ་ལ་ཀ །གང་ཡང་རུང་བའི་ཆུ་བླུད་བསལ། །མ་ཞུ་མེད་ཅིང་བཀྲེས་དུས་སུ། །སྦྲང་རྩི་མང་པོ་བླུད་པར་བྱ། །ཤ་ཁ་ར་དང་སྦྲང་རྩི་དང༌། ཆང་རྙིང་དག་གམ་རྒུན་ཆང་ངམ། །རྩུབ་པའི་སྐྱོ་མར་སྦྱར་བ་ནི། །དོང་གྲལ་ལ་ཕུད་བཅས་བླུད། །ནས་དང་གྲོ་ཟན་ཉུང་ཤས་ལ། །རྒྱ་སྲན་ཡུ་ཤ་ཉུང་ཟད་བཅས། །ཆུ་ཚན་ཁ་དང་ཚ་བར་བཅས། །མར་ནི་ཉུང་ཟད་བཅས་པ་སྦྱིན། །ལ་ཕུག་སྐམ་པོར་ཤའི་ཁུ། །སྐམ་སའི་སྲོག་ཆགས་ཤ་ཁུ་ནི། །སྟར་བུད་ཏྲིག་པ་ཏོ་ལ། །ཚ་བ་གསུམ་དང་སེ་འབྲུར་སྦྱར། །བཅའ་སྒ་ན་ལེ་ཤམ་མང་བཏབ། །རྗེན་རྔད་
གཏུབས་པ་དང་ལྡན་ཞིང༌། །སྒྱུར་རྩེ་ཆེན་པོའི་ཁུ་བས་སྐྱུར། །བརྔོས་ཤིང་ཁུ་བ་མེད་པ་དང༌། །ཀ་ར་མར་དང་ཀ་རི་ར། །ལ་སོགས་ཡིག་འབྱེད་པ་དང༌། །ལན་ཚྭ་བརྒྱད་པོ་ལེགས་བོར་དང༌། །གཏུབས་ཤིང་བེ་རེག་ལྟར་བཅོས་པ། །མེ་དྲོད་ཚོད་ལས་ཤ་སྤྱིན་ཞིང༌། །སྦྲང་ཆང་ནད་མེད་གྱུར་པ་བླུད། །ཁར་དང་ནི་ཁ་རུ་ཚ། །གོ་སྣོད་ད་ཏྲིག་སྟར་བུ་དང༌། །ཤིང་ཚ་སུག་སྨེལ་ན་ལེ་ཤམ། །ཆ་ཕྱེད་ཡན་ལག་བརྒྱད་པར་བཤད། །ཕལ་ཆེར་བད་ཀན་ཆང་ན་སེལ། །
བུ་གའི་རྒྱུན་སྦྱོང་དྲོད་སྐྱེད་བྱེད། །རྩུབ་དང་དྲོ་བས་མ་ཉེ་ཞིང་དྲིལ ། །ཁྲུས་དང་ཁ་ཟས་སྨྱུང་བྱས་དང༌། །འདོད་བཅས་བུད་མེད་ལྷན་ཅིག་གནས། །མཚན་ཉིད་མ་ལོག་རིག་པས་བསྟེན། །ཕལ་ཆེར་བད་ཀན་ལས་བྱུང་བའི། །ཆང་ནད་མྱུར་དུ་ཞི་བར་བྱེད། །ནད་གཞི་སོ་སོའི་ཤེས་ཆེ་ལས། །ལས་རྣམས་གང་དག་བསྟན་པ་འདི། །འདི་ནི་འདུས་པ་ལས་གྱུར་པ། །ལྷག་མ་བཅུ་ལའང་སྦྱར་བར་བྱ། །ཤིང་ཚ་ནཱ་ག་པུ་ཥ་པ་དང༌། །པི་པི་ལིང་དང་ན་ལེ་ཤམ། གོ་སྙོད་པ་རུ་ཤ་ཀ་དང༌། །འུ་སུ་སུག་སྨེལ་མ་དུ་ཀ །ཐང་ཤིང་ཀར་དཀར་དང་བཅས། །ཀ་པིད་ཏ་ཡི་ཁུ་བ་བཏབ། །ག་པུར་དྲི་ཡིས་བསྒོས་གྱུར་པ། །བཏུང་བ་ཤིན་ཏུ་ཡིད་འོང་བ། །ཆང་ནང་ཀུན་ལ་བླུད་གྱུར་ན། །ཡི་ག་འབྱེད་ཅིང་མེ་དྲོད་སྐྱེད། །ཆང་གིས་ཡིད་ནི་མ་དཀྲུགས་ཤིང༌། །ལུས་ལ་གནོད་པ་མི་བྱེད་པར། །ཆང་ནད་མི་སྐྱེད་དེ་ཡི་ཕྱིར། །སེམས་དགར་འགྱུར་བའི་ཆོ་ག་བྱ། །ཆང་ནད་ལ་ནི་སྦྱང་བ་དང༌། །ཞི་བའི་ལས་ནི་བྱས་གྱུར་ཀྱང༌། །གལ་ཏེ་མ་ཞི་བད་ཀན་ཟད། །ཉམ་ཆུང་ཡང་བ་ཉིད་གྱུར་ན། །རླུང་དང་མཁྲིས་བ་ཤས་ཆེ་ཞིང༌། །ཆང་ནད་ཀྱིས་ཟད་འོ་མ་བླུད། །སོ་གའི་ཚ་བས་གདུངས་པ་ཡི། །ཤིང་ལས་ཆར་པ་བབ་དང་མཚུངས། །ཆང་གིས་ཟད་པར་བྱ་པའི་མདངས། །འོ་མས་མྱུར་དུ་བརྟས་བྱེད་དེ། །མདངས་དང་ཡོན་ཏན་ཀུན་མཚུངས་ལ། །ཆང་ལས་གོ་ནི་བཟློག་པ་ཡིན། །འོ་མས་ནད་ནི་བཅོམ་གྱུར་ཅིང༌། །སྟོབས་སྐྱེས་ནས་ནི་འོ་མ་ཡི། །ཆོག་ཆང་ཡང་བཟློག་བྱས་ཏེ། །རིམ་གྱིས་ཉུང་ཟད་ཉུང་སྤྱད། །ཅི་ནས་འཇོམས་དང་སྐམས་
གྱུར་པའི། །བླ་བརྣན་འགྱུར་བར་མི་འགྱུར་བྱ། །དེ་གཉིས་ལ་ནི་འོ་མ་མར། །འཇམ་རྩི་བཏང་བས་བརྟ་བ་བསྔགས། །བསྐུ་དང་དྲིལ་ཕྱིས་ཁྲུས་དང་ནི། །བཟའ་བཏུང་རླུང་ནི་སེལ་བ་ཕན། །རིག་པར་ཆང་འཐུང་གང་གིས་ནི། །ནད་ནི་འབྱུར་བར་འགྱུར་མ་ཡིན། །དེ་ལ་རླུང་ནད་ལ་ཕན་ཆང༌། །ཕལ་ཆེར་ཟན་ཆང་བུ་རམ་ཆང༌། །མཁྲིས་པ་རྒུན་ཆད་ཆུ་དང་བཅས། །བད་ཀན་ཆང་རྙིང་སྦྲང་རྒུན་ཆང༌། །བད་ཀན་ཅན་གྱིས་དང་པོར་བཏུང༌། །མཁྲིས་པ་ཅན་གྱིས་ཟོས་རྗེས་བཏུང༌། །རླུང་ཅན་གྱིས་ནི་བར་དུ་བཏུང༌། །ནད་གཞི་མཉམ་པས་ཅི་དགར་བཏུང༌། །མྱོས་དང་བརྒྱལ་ལ་ཕལ་ཆེར་ནི། །རླུང་དང་མཁྲིས་པ་སེལ་ལས་བསྔགས། །ཐམས་ཅད་ལ་ཡང་ཁྱད་པར་དུ། །མཁྲིས་པ་ཤས་ཆེར་ཤེས་པར་བྱ། །བསྐུ་བྱུག་བསིལ་དང་ནོར་བུ་དང༌། །ཆུས་གཏོར་རླུང་ཡབ་ཀྱིས་གཡོ་བྱེད། །ཁ་ར་རྒྱུན་འབྲུམ་བུ་རམ་ཤིང༌། །འབྲ་གོ་ཏང་པ་ལ་ཁུ་བ་དང༌། །མངར་བའི་སྡེ་བསྐོལ་འོ་མ་ཁུ། །ཡུ་ཤེ་སེ་འབྲུར་བཅས་པ་བླུད། །སཱ་ལུ་རྩ་སྣར་དྲུག་ཅུ་པ། །ནས་དང་འཚོ་བྱེད་སྨན་མར་དང༌། །དགེ་བ་ཆེན་པོ་ཏིག་ཏ་ཆེ། །སྲང་དྲུག་འོ་མ་ཅི་ཏྲར་བཅས། །པི་པི་ལིང་དང་བྲ་གཞུན་ནི། །བཅུད་ཀྱིས་ལེན་གྱི་ཆོ་ག་སྦྱིན། །ཡང་ན་འབྲས་བུ་གསུམ་མར་དང༌། །སྦྲང་རྩི་ཁ་རར་བཅས་པ་སྦྱིན། །ཤུགས་དྲག་པ་ལ་ཁ་དང་སྣ། །བཀག་པར་གྱུར་པ་ཕན་པ་ཡིན། །ཡང་ན་བུད་མེད་ནུ་ཞོ་ནི། །བླུད་པའམ་སྣ་ནས་གཏང་བར་བྱ། །པདྨའི་རྩ་སྡོང་པི་པི་ལིང༌། །ཨ་རུ་ར་འམ་གླ་སྒང་ངམ། །བྱི་ཚེར་སྦྲང་རྩིར་སྦྱར་བ་སྤྲིན། །རྒྱ་ཤུག་ཚི་གུ་ན་ལེ་ཤམ། །ན་ག་གེ་སར་པུ་ཤེལ་ཙེ། །ཆུ་གྲང་དང་ནི་སྦྱར་བ་བླུད། །སྐྱུ་རུ་ར་ཡི་ཁུ་བའམ། །ཨ་རུ་ར་མར་བསྐོལ་བའང་པ་ན། །ཇི་སྐད་བཤད་པའི་བྱ་བདག །ནད་གཞིའི་ཤས་ནི་ཇི་བཞིན་སྦྱར། །ལས་ནི་རྣམ་ལྔ་བྱབ་དང༌། །གཏར་གས་ཁྲག་ནི་དབྱུང་བ་དང༌། །སྙིང་སྟོབས་ཆེ་ཞིང་ཤེས་དང་ལྡན། །ཡུལ་ལ་ཆགས་པ་མེད་པ་ཕན། །མྱོས་པ་ཤིན་ཏུ་འཕེལ་གྱུར་དང༌། །བརྒྱལ་བར་གྱུར་བ་དག་ལ་ནི། །ཀུན་ཏུ་ཞུགས་པའི་སྨན་རྣོན་
དང༌། །དུག་ལས་བྱུང་བ་དུག་སྨན་གཏང༌། །ཀུན་ཏུ་ཞུགས་ལ་རབ་རྣོ་བའི། །སྣ་སྨན་དང་ནི་མིག་སྨན་དང༌། །དུད་པས་བུད་དང་ཁབ་ཀྱིས་ནི། །སེན་མོའི་བར་དུ་གཟུགས་པར་བྱ། །སྐྲ་འབལ་བསྲེགས་དང་སོས་བཏབ་དང༌། །སྡིག་པ་ཤ་སྦྲང་གཙེས་པ་དང༌། །མཁུར་བར་ཚ་དང་སྐྱུར་བ་གཞུག །ཁ་སྲལ་ཕྲེའུ་བདར་བར་བྱ། །འདུ་ཤེས་རྙེད་ཅིང་ལྡང་གྱུར་ནས། །སྒོག་སྐྱའི་ཁུ་བ་བླུད་པར་བྱ། །ཚ་བ་གསུམ་ནི་ལན་ཚྭར་བཅས། །པི་ཛ་པུ་རཱི་གེ་སར་སྦྱིན། །བུ་གའི་རྒྱུན་སྲང་དག་བྱའི་ཕྱིར། །ཟས་ཡང་ཚ་དྲོ་རྣོ་བ་སྦྱིན། །བརྗེད་པ་དྲན་ཕྱིར་ངོ་མཚར་དང༌། །ཡིད་འོང་ལྟ་དང་ཐོས་པ་དང༌། །གླུ་དང་རོལ་མོ་སྙན་པ་ཡི། །སྒྲ་སྙན་རྩོལ་བ་བྱེད་དུ་གཞུག །སློན་སྨན་བཀྲུ་སྨན་བཏང་དུས་རྔུབ། །ཁྲག་ནི་དབྱུང་བར་བྱ་བ་དག །རྒྱུན་མི་ཆད་པ་སྤྱད་པར་བྱ། །སེམས་སྟོར་བ་ཡི་རྒྱུ་ལས་ནི། །སླར་ལྡང་འབྲེལ་པའི་འཇིགས་པ་ཡིས། །དེ་ནི་ལེགས་པར་བསྲུང་བར་བྱ། །ཡན་ལག་བརྒྱད་པའི་སྙིང་པོ་བསྡུས་པ་ལས། །གསོ་པའི་གནས་ཀྱི་ལེའུ་བདུན་པའོ།། །།དེ་ནས་གཞང་འབྲུམ་གསོ་བའི་ལེའུ་བཤད་པར་བྱའོ། །ཐུན་མོང་དུས་སུ་སྤྲིན་མེད་པར། །གཞང་འབྲུམ་ཅན་རབ་ཉམ་ཆུང་མིན། །ལྟོ་སྦྱངས་ཁ་ཟས་ཡང་ལ་ཉུང༌། །རྗེས་སུ་མཐུན་པ་ཟོས་པ་ལ། །གཙང་བྱས་བདེ་ལེགས་འགྱུར་བར་བྱས། །བ་ཤང་དང་གཅི་བསལ་གནོད་པ་མེད། །ཁྲིའམ་སྤང་ལེབ་མི་གཞན་གྱི། །བང་པར་ལེགས་བརྟེན་གནས་ནས་ནི། །གན་རྒྱལ་འདུག་ཅིང་རོ་སྟོད་སྨད། །དྲང་འདུག་ཉི་མར་རྐུབ་བསྟན་ལ། །རྐེད་པའི་ཕྱོགས་ནི་བསྟོད་པར་བྱ། །དེ་ནས་བརླ་དང་གཉའ་བར་ནི། །བཅིངས་པའི་གོས་ཀྱིས་བསྡམས་ནས་སུ། །གཟུང་སྟེ་དྲང་པོར་འདུག་པ་ལ། །ནད་གཡོག་གིས་ནི་བཟུང་ནས་སུ། །རྐུ་བ་ནི་ཞུན་མར་དག་གིས་བསྐུ། །དེ་ནས་མར་གྱིས་བསྐུས་པ་ཡི། །ཆ་སྤྱད་དྲང་པོར་དེ་གཞུག་བྱ། །རྐུབ་ནས་ཕྱོགས་པར་རིམ་གྱིས་གཞུག །དེ་ནས་འབྱུང་འགྱུར་མཐོང་བ་དང༌། །ཆ་སྤྱད་ཆུད་པར་ཤེས་གྱུར་ནས། །གཞང་འབྲུམ་ཐུར་མ་གོས་གཤེར་བས། །སྨན་པས་ལེགས་
པར་བཙིར་ནས་ནི། །ཇི་སྐད་བཤད་པའི་ཆོ་ག་ཡིས། །རླན་ཅན་ཐལ་སྨན་བསྲེག་ཅིག་ཤོས། །ཐལ་སྨན་རྣོན་པོའི་མེ་ཡིས་བསྲེག །སྟོབས་ལྡན་མཆེ་བ་བཅད་དེ་བསྲེག །དེ་ནས་ཆ་སྤྱད་ཕྱུང་ནས་ནི། །ནད་པའི་རྐུབ་དང་རོ་སྨད་བསྐུ། །སྣུམ་གྱི་ནང་དུ་འབྱིང་བར་བྱ། །དེ་ལྟར་ཞག་ནི་བདུན་བདུན་ཞིང༌། །རེ་རེ་ཉེ་བར་བཅོས་པར་བྱ། །དེ་ནས་རླུང་མེད་ཁང་པར་ནི། །བཞག་ལ་སྤྱོད་པ་བསྟེན་པར་བྱ། །གཞང་འབྲུམ་མང་ལ་དང་པོར་གཡས། །དེ་ནས་གཡོན་བསལ་དེ་འོག་རྒྱབ། །གཞང་འབྲུམ་མང་པོ་བསྲེགས་ལེགས་ན། །རླུང་ནི་བདེ་བར་རྒྱུ་བྱེད་ཅིང༌། །ཁ་ཟས་འདོད་ཅིང་མེ་དྲོད་སྐྱེད། །བདེར་གནས་སྟོབས་དང་ཁ་དོག་སྐྱེད། །ཆུ་གཟེར་གྱིས་བཏབ་པ་ལ། །བ་སྤྲུ་བ་དང་རུ་རྟ་དང༌། །གནྡྷ་མུངྒ་ཨ་ཀ་རུ། །ཤ་ཏཔུཥྤ་ཐང་ཤིང་རྣམས་།ཞིབ་ཏུ་བཏགས་ལ་ལྡེ་གུ་ཡིས། །ལྟེ་བ་མན་ཆད་བསྐུ་བར་བྱ། །བཤང་དང་གཅི་འགག་ས་གྱུར་པ་ལ། །ཨ་ལམ་བུ་ས་བ་རུ་ན། །བ་སྤུ་གཟེམ་ཨེ་རཎྚ། །ཨ་ཟ་གནྡྷ་མུ་ར་རྣམས། །བསྐོལ་བ་དྲོ་འཇམ་བྱས་པ་ཡིས། །བླུགས་དང་འབྱིང་བའི་སྦྱོར་བ་བྱ། །ཡང་ན་འོ་མ་སྣུམ་བཅས་པ། །རླུང་སེལ་སྨན་བསྐོལ་ཏིལ་མར་སྦྱར། །ཟས་ནི་བཤང་བ་སླ་བྱེད་ཅིང༌། །སྣུམ་དང་རླུང་འཇོམས་དྲོད་སྐྱེད་སྦྱིན། །དེ་ནས་བསྲེག་པ་མི་བྱ་ཞིང༌། །བད་ཀན་རླུང་སྐྱེས་ཕྱིར་བྱུང་བ། །འགགས་ཤིང་གཡའ་ལ་ན་ཞིང་སྐྲང༌། །གཞན་འབྲུམ་བསྐུ་བ་བྱས་ནས་ནི་།བིལ་བའི་རྩ་བ་ཙི་ཏྲ་ཀ །ཐལ་སྨན་རུ་རྟ་བསྐོལ་བ་ཡི། །ཏིལ་མར་བླུགས་པའམ་སྦྲུལ་བྱིལ། །རྔ་མོ་ཕག་རྒོད་ཞག་གིས་བྱུག །དེ་རྗེས་རླན་དུགས་ཀྱིས་དུགས་བྱ། །ཡང་ན་གཤེར་དུགས་སྤྱད་པར་བྱ། །ཡང་ན་ཟན་ནི་ཏི་ལ་མར་དེ་དང༌། །ཞུན་མར་སྣུམ་ཅན་གྱིས་དུགས་བྱ། །ར་སྣ་ཧ་གུ་ཤ་དག་དང༌། ཤི་ཀྲུའི་ལོ་མའི་གོང་པོས་བྱ། །ཨརྒའི་རྩ་བ་ཤལ་མ་ལིའི། །ལོ་མ་མི་སྐྲ་སྦྲུལ་ལྤགས་དང༌། །བྱི་ལའི་པགས་པ་མར་སྦྱར་བའི། །དུད་བདུགས་གཞང་འབྲུམ་དག་ལ་ཕན། །ཨ་ཤྭ་གནྡྷ་བྲི་ཧ་ཏི། །བྱིའུ་རུག་པི་པི་ལིང་མར་སྦྱར། །ཀུ་བ་ཁ་བོའི་ས་བོན་དང་
ཡལ་ག་འཇམ་པོར་རང་སྐྱུར་དང༌། །ལྡེ་གུ་གྲིབ་མར་སྐབས་པ་ཡི། །རེང་བུ་རྐུབ་བཅུག་གཞང་འབྲུམ་འཇིག །ཀུ་བ་ཁ་བོའི་ཡལ་ག་རྩ། །ཐལ་སྨན་བཅས་པའི་ལྡེ་གུ་ནི། །འོལ་མ་སེ་དང་སུ་ར་ན། །བུམ་ཤ་ཡི་ནིས་བོན་ལས། །རེང་བུར་བྱས་པ་དེ་དང་འདྲ། །སུ་དྷཱ་ཀྵི་ར་ཡུང་ལྡེ་གུ། །ཁྱིམ་བྱའི་རྟུག་པ་པི་པི་ལིང༌། །ཡུང་དང་འོལ་མ་སེ་དག་ནི། །བ་གཅིན་བཏགས་པ་དེ་དང་འདྲ། །སྣུ་ཧའི་འོ་མར་བཏགས་ཤུ་དག །ཏ་མ་ལ་རུས་པྲི་ཡང་ཀུ། །རྣམ་རྒྱལ་ཀར་ཀ་ཏ་སྲིང་གི །རུ་རྟ་སྤངས་མ་གོ་བྱེ་དང༌། །ཤི་ཀྲུ་ལ་ཕུགས་བོན་དང༌། །ནིམ་པ་ཀ་ར་བའི་རའི་ལོ། །པི་པི་ལིང་གི་རྩབ་དང༌། །བིལ་རྩ་ཤིང་ཀུན་བཅས་པའམ། །རུ་རྟ་ཤྲི་ཤའི་ས་བོན་དང༌། །རྒྱམ་ཚ་བུ་རམ་པི་པི་ལིང༌། །ཨརྒ་སྣུ་ཧའི་འོ་མ་དང༌། །འབྲས་བུ་གསུམ་གྱི་ལྡེ་གུ་བསྐུ། །ཨརྒའི་འོ་མ་སྣུ་ཧའི་སྔོན། །ཀུ་བ་ཁ་བོའི་འདབ་མ་དང༌། །ཀ་རྙཛ་དང་ར་ཐུག་གཅིན། །ལྡེ་གུས་གཞང་འབྲུམ་སེལ་མཆོག་ཡིན། །འཇམ་རྩིའི་སྨན་ནི་པི་པི་ལིང༌། །ལ་སོགས་ལྡེ་གུའང་བསྔགས་པ་ཡིན། །སྨན་འདི་ཉིད་ཀྱིས་ཏིལ་མར་ནི། །བསྐུ་བའི་དོན་དུ་བསྐོལ་བར་བྱ། །དུད་པས་བདུག་དང་ལྡེ་གུ་ནི། །བསྐུས་པས་གཞང་འབྲུམ་དག་གི་ཁྲག །སོགས་པ་འཛག་པར་བྱེད་འགྱུར་ཏེ། །དེ་ནས་བདེ་བ་ཉིད་དུ་འགྱུར། །སྐྲང་ཞིང་འཛག་པར་མ་གྱུར་དང༌། སྲ་བ་ལས་ནི་ཁྲག་དབྱུང་སྟེ། །བད་པ་གཙགས་བུ་ཁབ་ཀྱི་ནི། །པིར་གྱིས་ཡང་དང་ཡང་ཁྲག་དབྱུང༌། །བསིལ་དྲོད་སྣུམ་དང་རྩུབ་པ་ཡིས། །ནད་ནི་ཞི་བར་མ་གྱུར་ན། །དེ་ཕྱིར་སྨན་པས་ནད་ཁྲག་ཉིད། །དབྱུང་བ་ལ་ནི་འབད་པར་བྱ། །འོ་མ་རྩི་ཏྲ་ཀའི་རྩ་ཕྱེ། །བཏབ་པ་ལས་བྱུང་དར་བ་དང༌། །བླུད་ཅིང་དེ་ཉིད་ཀྱི་ཟས་ནི། །བྱིན་ན་གཞང་འབྲུམ་སེལ་བར་འགྱུར། །ཀ་པི་ད་རིའི་རྩ་བའི་ཕྱེ། །དར་བ་གསར་པ་བཏག་པ་བླུད། །ཞུ་ནས་ཕན་པའི་ཟས་བྱིན་ན། །གཞང་འབྲུམ་ནད་ལས་ཐར་བར་འགྱུར། །གཞང་སྐྲང་གཟེར་བཅས་མེ་དྲོད་འབྲི། །སྐྲན་ནད་ལ་ནི་ཕན་པའི་སྨ། །ཤིང་ཀུན་ལ་སོགས་བླུད་པའམ། །བུ་རམ་ཨ་རུང་སྦྱར་བ། །བྱིན་ལ་དེ་རྗེས་དར་བ་བླུད། །
ཡང་ན་ཨ་རུ་བྱི་དང་ག །དུག་མོ་ཉུང་ཤུན་ཙི་ཏྲ་ཀ །དར་བ་དང་སྦྱར་བླུད་པའམ། །དུག་མོ་ཉུང་དང་པི་པི་ལིང༌། །ཅི་ཏྲ་ཀ་དང་སུ་ར་ན། །ཆ་རེས་བསྐྱེད་པ་ཆུ་དྲོན་བླུད། །ཡང་ན་ཚ་གསུམ་ལན་ཚྭ་གསུམ། །ཤིང་ཀུན་སྟར་བུ་བཅས་ཆུ་བླུད། །བིལ་བ་ཀ་པིད་ཐར་བཅས་པའམ། །བཅའ་སྒ་ཁ་རུ་ཚ་བ་བཅས་པའམ། །གོ་བྱེ་ལ་ལ་ཕུད་བཅས་པའི། །སྐྱོ་མ་དེ་ལ་བླུད་པར་བྱ། །ཡང་ན་ཤིང་ཀུན་སྤ་མའི་འབྲས། །ཙི་ཏྲ་ཀ་དང་དར་བ་སྦྱར། །པི་ལུའི་འབྲས་བུ་དར་བར་བཅས། །ཟླ་བ་གཅིག་གི་བར་དུ་སྦྱིན། །ཟས་ཀྱི་སྔོན་ཉིད་རེ་རེ་ཞིང། །ཅི་འདོད་པར་ནི་བླུད་པར་བྱ། །ཤིན་ཏུ་མེ་དྲོད་ཆུང་བ་ལ། །དར་བ་ཁོ་ན་བླུད་པར་བྱ། །ཉམས་སྟོབས་དུས་དང་གནས་ཤེས་པའི། །སྨན་པ་ཡིས་ནི་དར་བ་དག །ཞག་བདུན་ནམ་ནི་ཞག་བཅུ་འམ། །ཟླ་བ་ཟླ་གཅིག་བར་དུ་བླུད། །ཡང་ན་ཕྱི་དྲོ་འབྲས་ཡོས་ཀྱི། །ཕྱེ་དང་དར་བའི་ལྡེ་གུ་སྦྱིན། །དར་བ་ཞུ་ནས་དར་བ་ནི། །ཐུག་པ་རྒྱམ་ཚར་བཅས་པ་བླུད། །དེ་རྗེས་དར་བར་གཡོས་པའི་ཟན། །སྣུམ་ཅན་བྱིན་ལ་དར་བ་བླུད། །ཡུ་ཤའམ་ཤ་ཁུ་དར་བ་ཅན། །སཱ་ལུའི་འབྲས་ཆེན་རན་པར་བཟའ། །རྩུབ་དང་མར་ཕྱེད་ཕུང་བ་དང༌། །གང་ལས་མར་ནི་མ་ཕྱུང་བ། །དར་བ་ནད་དང་མེ་དྲོད་ཀྱི། །སྟོབས་ལས་དེ་ནི་རྣམ་གསུམ་སྦྱར། །དར་བས་ལེགས་བཅོམ་གྱུར་པ་ཡིས། །གཞན་འབྲུམ་སླར་ནི་འབྱུང་མི་འགྱུར། །དེ་བླུགས་གྱུར་ན་རྩ་ཡིན། །ཚོགས་ཀྱང་སྐྱེ་བར་མི་འགྱུར་རོ། །རྩ་སྦུབས་དར་བས་དག་བྱས་པས། །ལུས་ཟུངས་དངས་མར་གྱུར་པ་གང༌། །དེ་ནི་ཉམས་དགའ་མདོག་དང་སྟོབས། །མཆོག་ཏུ་རྒྱས་པར་བྱེད་པར་འགྱུར། །རླུང་དང་བད་ཀན་དག་གི་ནད། །བརྒྱ་ཕྲག་དར་བ་རྙིང་པས་འཇོམས། །གཞང་འབྲུམ་གཞིག་པར་འདོད་པ་ཡིས། །ཀཎྚ་ཀ་རིའི་ལྡེ་གུས་བསྐུ། །སྣོད་དུ་དར་བ་གསར་པ་ནི། །ནུབ་གཅིག་གཞག་སྟེ་བླུད་པར་བྱ། །འུ་སུ་ཟི་ར་གོ་སྙོད་དང༌། །པི་པི་ལིང་གཉིས་ཧ་པུ་ཤ་།ཤུ་ཏི་པི་པི་ལིང་རྩ་བ། །ལ་ལ་ཕུད་དང་ཅི་ཏྲ་ཀ །ཡ་བ་ན་གིའི་ཕྱེ་མ་དང༌། །དར་བ་སྦྱར་བ་མར་གྱི་སྣོད། །བཞག་པར་གྱུར་པ་དེ་ལས་སྐྱུར། །ཁ་བ་
དང་ནི་རབ་སྐྱུར་མིན། །སྐུར་དང་ཁ་བ་བྲོ་བར་ནི། །ལྡང་བའི་དང་རྙིང་ཅི་འདོད་བླུད། །དྲོད་སྐྱེད་མདོག་བཟང་ཡི་ག་འབྱེད། །རླུང་དང་བད་ཀན་སེལ་བྱེད་ཅིང༌། །གཞང་སྐྲང་ན་བས་ཉམ་ཐག་པ། །འཇོམས་ཤིང་སྟོབས་ནི་འཕེལ་བྱེད་ཡིན། །ཀྲུ་ཏྲུག་ཏྲེས་ཀྱི་རྩ་བའི་ཤུ། །བཏགས་པའི་ལྡེ་གུས་བུམ་པ་བསྐུ། །དེར་ནི་འོ་མ་དང་བ་གཞག །སྨིན་པའི་གཞང་འབྲུམ་སེལ་བྱེད་བླུད། །ག་བྲའི་རྩབ་ཨ་རུ་ར། །སླེ་ཏྲེས་ཚ་བ་ལྔ་དག་ལའང༌། །ཆོ་ག་འདི་ཉིད་སྦྱར་བར་བྱ། །པ་ཏ་ཧ་ཏི་པི་པི་ལིང༌། །ཤུ་ཏི་ཚ་བ་ལྔ་གཡར་མ། །ཟི་ར་འུ་སུ་བིལ་བའི་རྐང༌། །ཕྱེ་མར་བཏགས་ཏེ་སྦྱར་བར་བྱ། །འབྲས་བུ་སྐྱུར་པོ་མར་ཏིལ་མར། །ཡུ་ཤ་ཤ་ཁུ་ཐུག་སྩོགས་བྱ། །སྨན་འདི་ཉིད་དང་ཆུ་དང་མར། །བསྐོལ་བའང་དྲོད་སྐྱེད་བྱེད་པ་ཡིན། །རིམ་འདི་བཤང་བསླབ་ཡིན། །རྟུག་པ་འགགས་པ་བཤང་བྱ་སྟེ། །སྣུམ་སྩོགས་ཟན་དང་ལྡན་པ་ཡི། །ཆང་དངས་ལན་ཚྭ་བཏབ་པ་བླུད། །ཡང་ན་དར་བ་བུ་རམ་ཆང༌། །ཆང་སྐྱུར་ཆང་དངས་ལན་ཚར་སྦྱར། །ཟས་མངར་མར་དང་ཏིལ་མར་གྱིས། །བརྔོས་པའི་ཀ་རཉྫའི་ལོ་མ། །སྟེང་དུ་ཕྱེ་བཏབ་བྱིན་གྱུར་ན། །རླུང་གིས་རྟུག་པ་འགགས་པ་སེལ། །བཅའ་སྒ་བུ་རམ་བཅས་པའམ། །བ་ཏ་བུ་རམ་མར་ལན་ཚྭ། །བ་གཅིན་ལ་སྤངས་ཨ་རུ་ར། །བུ་རམ་བཅས་པ་སྦྱིན་པའང་རུང༌། །ཨ་རུ་ར་ནི་ཉིས་བརྒྱ་གཅིན། །བྲེ་བཅུ་དྲུག་ཏུ་གཅིན་དུའི་བར། །བསྐོལ་བ་སྦྲང་རྩིར་བཅས་པ་དག །གཉིས་གཉིས་ཟོས་ནས་བད་ཀན་གྱིས། །གཞང་འབྲུམ་མཛེ་དང་འོར་ནད་དང༌། །སྐྲན་དང་དམུ་རྩིད་གཅིན་སྙི་འབུ། །རྨེན་བུ་ཤུ་བས་ཁྱབ་ཚོ་ཆེས། །སྐྱ་རྦབ་རླུང་འཁྱིལ་འཇོམས་པར་བྱེད། །ཨ་ཟ་སྲིང་གི་རྩ་བ་ཡི། །ལྡེ་གུ་ར་གཅིན་སྦྱར་འཐུང་ཞིང༌། །བུ་རམ་བར་ཏ་ཀ་ཟོས་ན། །གཞང་འབྲུམ་མྱུར་དུ་འཇིག་པར་འགྱུར། །དུར་བྱིད་འབྲས་བུ་གསུམ་ཁུར་སྦྱར། །ཡང་ན་དར་བ་ཨ་རུ་རའམ། །པི་པི་ལིང་བཅས་ཨ་རུ་ར། །མར་དང་བརྔོས་པའི་བུ་རམ་བཅས། །ཡང་ན་དུར་བྱིད་དན་དར་བཅས། །ཟོས་ན་བདེ་བར་འབྱུང་བར་བྱེད་།གཞང་ན་གནས་པའི་ནད་བསལ་ན། །
གཞང་འབྲུམ་ཟད་པར་བྱེད་པར་འགྱུར། །སེ་འབྲུའི་ཁུ་བ་ཟིར་དང༌། །བཅའ་སྒ་བུ་རམ་ལ་ལ་ཕུད། །པ་ཏ་དང་སྦྱར་དར་བ་ནི། །རླུང་གིས་རྟུག་འགགས་སེལ་བྱེད་ཡིན། །རྒྱུན་ཆང་ཡང་ན་བུ་ར་མ་ཆང༌། །བཅའ་སྒ་ཀྲུ་ཏྲུག་ཏྲེས་དང་བཅས། །ཡང་ན་ཆང་ནི་པ་ཏ་དང༌། །སྤ་འབྲས་ཁ་རུ་ཚ་བཅས་བླུད། །པི་པི་ལིང་ནི་བཅུ་བཅུས་བསྐྱེད། །ཏིལ་ནི་སྲང་ཕྱེད་བཏབ་གྱུར་ན། །འོ་མ་བཅས་འཐུངས་ལུས་སྟོབས་དང༌། །མེ་དྲོད་སྐྱེད་པར་བྱེད་པ་ཡིན། །བྱི་ཚེར་བ་དང་བིལ་བ་དང༌། །ལ་ལ་ཕུད་དང་དོང་གྲ་རྣམས། །རེ་རེ་དང་སྦྱར་པ་ཏས་ཀྱང༌། །གཞང་འབྲུམ་ནད་ནི་སེལ་བར་བྱད། །ཆུ་བྲེ་དྲུག་ཅུ་རྩ་བཞིའི་ནང༌། །ཨ་རུ་ར་ཤུན་བྲེ་ཕྱེད་དང༌། །སྐྱུ་རུ་ར་ནི་བྲེ་གང་དང༌། ཀ་པིད་ཏ་ནི་སྲང་བཅུ་དང༌། པི་ཤ་ལ་ནི་སྲང་ལྔ་དང༌། །སེང་ཕྲོམ་ཤིང་ཚ་ན་ལེ་ཤམ། །པི་པི་ལིང་དང་བྱི་དང་ག་སྲང་ནི་གཉིས་གཉིས་ཚད་བྱས་བསྐོལ། །བཞི་ཆ་ལུས་བཙགས་བུ་རམ་ནི། །སྲང་ནི་ཉིས་བརྒྱ་བཅུག་ནས་ནི། །ད་ཏ་ཀི་ནི་བྲེ་གང་གཞུག །མར་གྱི་སྣོད་དུ་བཅུག་ནས་ནི། །ཟླ་ཕྱེད་ནས་ནི་ཆང་རྙིང་འཐུངས། །མེ་དྲོད་སྐྱེད་ཅིང་གཞང་འབྲུམ་དང༌། །ཕོ་ནད་སྐྱ་རྦབ་མཛོད་མུ་རྫིང༌། །དབྱིག་དུ་རིམས་སྐྲན་མཆིན་ནང་དང༌། །སྙིང་ནད་སྐྲན་དང་གཅོང་ཆེན་དང༌། །སློན་དང་སྲིན་བུའི་ནད་རྣམས་འཇོམས། །ཆུ་བུ་བཅུ་དྲུག་ནང་དན་ཏི། །རྩ་བཅུ་འབྲས་གསུམ་ཅི་ཏྲ་ཀ །སྲང་རེ་བསྐོལ་བ་བཞི་ཆ་ལུས། །བུ་རམ་སྲང་བརྒྱད་གཞུག་པར་བྱ། །ཐམས་ཅད་ལྔ་མ་དང་འདྲ་ལས་།རྗེས་མཐུན་ཅིག་ཤོས་སེལ་བར་བྱེད། །ཆུ་བྲ་བཅུ་དྲུག་ནང་དག་ཏུ། །བྱི་ཚོར་བ་ནི་བྲེ་གང་དང༌། །དན་ཏི་པ་ཏ་རྩི་ཏྲ་ཀ །རྣམ་རྒྱལ་དོང་གྲ་བ་ཤ་ཀ །སྐྱུ་རུ་ར་ནི་ཁྱོར་རེ་བསྐོལ། །བཞི་ཆ་ལུས་པ་དེའི་ནང་དུ། །ཀ་ར་དཀར་པོ་སྲང་བརྒྱད་གཞུག་གཞན་དག་སྔ་མ་བཞིན་དུ་སྦྱར། །རྫ་མའི་སྣོད་ཀྱང་པྲི་ཡང་ཀུ། །པི་པི་ལིང་དང་དབྱི་མོ་དང༌། །མར་དང་སྦྲང་རྩིའི་ལྡེ་གུས་བསྐུ། །བདེ་བར་འབྱུང་ཕྱིར་ཟས་ཀྱི་སྔར། །འབྲས་བུ་སྐྱུར་བཅས་མར་བླུད་པའམ། །དབྱི་མོ་ཀྲུ་ཏྲུག་ཏྲས་བསྐོལ་མར། །ནས་ཚིག་
འཁུས་ཐལ་བུ་རམ་བཅས། །པི་པི་ལིང་གི་རྩ་བར་བསྐོལ། །བུར་མ་དོང་གྲ་ནས་ཚག་འཁུས། །པི་པི་ལིང་རྩ་པི་པི་ལིང༌། །སེ་འབྲུ་འུ་སུ་དག་དང་མར། །བཞི་འགྱུར་ཞོ་དང་བསྐོལ་བས་ནི། །འཕྱེན་དང་བཤང་གཅི་འགགས་པ་སེལ། །བ་ལ་ཤ་ཡི་ཐལ་བའི་ཆུ། །སུམ་འགྱུར་དང་ནི་མར་དུ་བསྐོལ། །དུག་མོ་ཉུང་སོགས་ཕྱེ་མ་བཏབ། །དྲོད་སྐྱེད་གཞང་འབྲུམ་འཇོམས་པའི་མཆོག །ཚ་བ་ལྔ་དང་ཡ་རུ་ར། །ཡ་བཀྵ་ལ་ལ་ཕུད། །ལྕེ་མྱང་ཚ་དང་ཁ་རུ་ཚ། །པ་ཏ་འུ་སུ་ན་ལེ་ཤམ། །བིལ་བཞོ་དང་བཅས་པའི་མར། །བསྐོལ་བ་དེས་ནི་ཆུ་སོ་གཞང༌། །འཁྲུ་ཞིང་གཞང་ནི་ཉམས་པ་དང༌། །གཅིན་སྲི་འཛག་པ་སེལ་བར་བྱེད། །པ་ཏ་འུ་སུ་ལ་ལ་ཕུད། །ཚ་བ་ལྔ་དང་གཟེ་མ་དང༌། །བིལ་བཞོ་དང་ཙང་གི་རི། །ཁུ་བ་མར་གྱི་འགྱུར་བསྐོལ། །ལྟོ་སྤོས་གཅིན་ནི་སྲི་བ་དང༌། །རྟག་ཏུ་འཁྲུ་དང་གཞང་འབྲུམ་དང༌། །གཞང་འབྲུམ་ཕོ་བའི་ནད་རྣམས་དང༌། །བད་ཀན་རླུང་ནི་འཇོམས་པར་བྱེད། །རྨ་བྱ་སྲེག་པ་འུར་བྱ་ཡི། །ཤ་ཁུ་སྐྱུར་པོ་ལེགས་སྦྱར་བ། །ཁྱིམ་བྱ་འམ་བྱེའུའི་ཤ་ཁུ། །འཕྱེན་དང་ཕྱི་ས་འགགས་ལ་བླུད། །རྒྱ་སྣེའུ་དུར་བྱིད་ཙི་ཏྲ་ཀ །དན་ཏི་པ་ཏི་ཨམླི་ཀ །ལ་སོགས་ལོ་མ་གཞན་ཡང་ནི། །བད་ཀན་རླུང་འཇོམས་ཚོད་མ་ནི། །ཡང་ཞིང་བཤང་བསླ་བར་བྱེད། །ཤིང་ཀུན་མར་དང་ཏིལ་མར་བརྔོས། །ཞོ་ཡི་སྤྲིས་མར་བསྐོལ་བ་དང༌། །འུ་སུ་དང་ནི་ཚ་བ་ལྔ། །བཏགས་པའི་ཕྱེ་དང་སེ་འབྲུའི་བཅུད། །འུ་སུའི་འདབ་མ་གཞོན་ནུ་དང༌། །སྒེའུ་གཤེར་གཤགས་པར་གྱུར་པ་དང༌། །སྤོས་ཞིམ་ལེགས་བདུག་དྲི་ཞིམ་བྱས། །ཟིར་ན་ལེ་ཤམ་དང་བཅས། །ཁ་རུ་ཚ་ནི་ཤས་ཆེར་བྲོ། །རླུང་ཤས་ཆེར་རྩུབ་དྲོད་ཆུང་ལ། །སཱ་ལུ་ཙ་སྣར་འབྲས་ཆན་ནི། །བ་ལང་གོ་ཏ་རྔ་མོ་རའི། །ཤ་ཁུ་ཚོད་ལྟར་གཡོས་བ་དང༌། །མཆོག་ཏུ་ཤ་ཟ་རྣམས་ཀྱི་ཤ་།རྟུག་སྐམ་ཅན་ལ་སྦྱིན་པར་བྱ། །ཆང་དང་བུར་ཆང་ཀ་རའི་ཆུ། །རྒུན་ཆང་དར་བ་རྩབ་མོ་དང༌། །ཆང་རྙིང་དང་ནི་ཞོག་ཆུ། །ཡང་ན་ཆུ་ཉུང་བསྐོལ་བའམ། །འུ་སུ་བཅའ་སྒ་བསྐོལ་བའམ། །ཀཎྚ་ཀ་རི་བསྐོལ་བ་བླུད། །
ཟས་ཀྱི་ཐོག་མའམ་བར་དག་ཏུ། །རླུང་གི་རྟུག་སྐམ་སེལ་བ་སྦྱིན། །རླུང་མཁྲིས་བད་ཀན་རྟུག་སྐམ་རྣམས། །བདེ་བར་འབྱུང་ཞིང་དྲི་མ་སྦྱང༌། །གཞང་ཁར་འབྲུམ་ཞི་འགྱུར་ཞིང༌། །མེ་དྲོད་སྐྱེད་པར་བྱེད་པ་ཡིན། །རྟུག་སྐམ་གྱིས་ནི་གཟིར་བ་དང༌། །གང་ཡང་ཤིན་ཏུ་ཁོང་རྩུབ་དང༌། རླུང་འཁྱིལ་གྱིས་ཉེན་པ་གང༌། །དེ་ལ་འཇམ་རྩི་བྱ་བ་བསྔགས། །པི་པི་ལིང་དང་པོ་སོན་ཆ། །བིལ་བ་ཤུ་ཏི་ཤིང་མངར་དང༌། །ཤུ་དག་རུ་རྟ་ཀྲུ་ཏྲུག་ཏྲེས། །ཐུར་པ་མ་ནུ་ཤིང་རྣམས། །བཏགས་དེ་ཏིལ་མར་ལ་བཙོ་ཞིང། །འོ་མ་ཏིལ་མར་ཉིས་འགྱུར་གཞུག །གཞང་འབྲུམ་རླུང་གིས་འཁྱིལ་བ་ལ། །འཇམ་རྩི་དེ་ནི་མཆོག་ཏུ་བསྔགས། །གཞང་འབྱུང་བ་དང་གཟེར་བ་དང༌། །གཅིན་སྲི་འཁྲོག་ཅིང་འཁྲུ་བ་དང༌། །བརླ་རྐེད་རྒྱབ་ན་ཉམ་ཆུང་དང༌། །སྟོ་སྦོས་ཆུ་སོར་བརྟེན་པ་དང། །བེ་སྣབས་འཁྲུ་དང་གཞང་སྐྲ་དང༌། །རླུང་གིས་རྟུག་བ་འགགས་པ་དང༌། གང་ཞིག་མང་དུ་འབྱུང་འདོད་པ། །དེ་དག་འཇམ་རྩིས་སེལ་བར་བྱེད། །ཡང་ན་མས་གཏོང་བཀྲུ་སྨན་དྲག །རྩ་བ་ལྔ་པའོ་མར་བཅས། །བ་གཅིན་ཏིལ་མར་ལན་ཚྭ་དང༌། །སོན་ཆ་ལ་སོགས་ལྡེ་གུ་གཏང༌། །དེ་ནས་གཞང་འབྲུམ་ཁྲག་འཛག་པ། །རླུང་ངམ་བད་ཀན་དང་འབྲེལ་བ། །བཏགས་ནས་དེ་ལ་སྣུམ་པ་དང༌། །རྩུབ་དང་བསིལ་བ་སྦྱར་བར་བྱ། །དེ་ལ་ལུང་དང་རྗེས་འབྲེལ་བ། །བཤང་བ་གནག་ཅིང་སྲ་ལ་རྩུབ། །རླུང་ནི་ཐུར་དུ་འབྱུང་མི་བྱེད། །རྐེད་པ་བརླ་དང་གཞང་ཁ་གཟེར། །རྩུབ་པའི་རྒྱུར་ནི་གྱུར་པ་ཡིན། །བད་ཀན་རྗེས་འབྲེལ་བཤང་བསླ། །སྐྱ་ཞིང་སེར་ལ་ལྕི་ཞིང་སྣུམ། །སྤྱི་བག་གཞང་ཁ་ཚོར་བ་ཆུང༌། །རྒྱུ་ནི་སྣུམ་ལྕི་ཡིན་ཞེས་བྱ། །རང་ཁྲག་མཚན་ཉིད་ལས་ཀྱང་བརྟགས། །ནད་ཁྲག་བསལ་བར་བྱ་བ་དང༌། །ཉམས་སྟོབས་ཇི་བཞིན་སྨྱུང་བ་བྱ། །ཇི་སྲིད་ནད་ཁྲག་ནག་པོ་བྱུང༌། །དེ་སྲིད་ཁྲག་འཛག་གཅད་མི་བྱ། །ནད་ནི་སྨིན་པར་བྱ་ཕྱིར་དང༌། །མེ་དྲོད་བསྐྱེད་པར་བྱ་ཕྱིར་དང༌། །ཁྲག་ནི་གཅད་པར་བྱ་བའི་ཕྱིར། །དེ་ཕན་ཆད་ནི་ཁ་བ་བླུད། །གང་ཞིག་ནད་
ཀྱིས་སྟོབས་ཟ་དང༌། །ཁྲག་ནི་རླུང་གི་ཤེས་ཆེ་ལ། །བཏུང་དང་བསྐུ་དང་འཇམ་རྩི་རུ། །རིག་པས་སྣུམ་ནི་སྦྱར་བར་བྱ། །གང་ཞིག་མཁྲིས་པ་རྒྱས་པའི་ཁྲག །ཚ་བའི་དུས་སུ་འབྱུང་གྱུར་པ། །དེ་ནི་གཅིག་ཏུ་གཅད་བྱ་ཡི། །རླུང་དང་བད་ཀན་ལས་གྱུར་མིན། །བད་ཀན་བཅས་ཁྲག་བཅའ་སྒ་དང༌། །དུག་མོ་ཉུང་ཤུན་བསྐོལ་བ་བླུད། །ཡང་ན་རྩ་མཁྲིས་བཅའ་སྒ་དང༌། །བྱི་ཚེར་ཙནྡན་དམར་པོའམ། །སྐྱེར་པའི་ཤུན་པ་པུ་ཤེལ་ཙོ། །ནིམ་པའམ་སེ་འབྲུའི་ཤུན་བསྐོལ་བླུད། །དུག་མོ་ཉུང་ཤུན་འབྲས་བུ་དང༌། །བོང་དང་སྦྲང་རྩི་སྐྱེར་ཁཎྚ་འམ། །ཡང་ན་ཨ་པ་མརྒ་ཡི། །ལྡེ་གུ་འབྲས་ཀྱི་ཆུ་སྦྱར་བླུད། །དུག་མོ་ཉུང་གི་ཤུན་པ་རློན། །སྲང་བརྒྱད་ཆར་ཆུ་ནང་དུ་བསྐོལ། །ཤུན་ལྤགས་ཁུ་བ་བཙགས་པ་རུ། །བཙོད་དང་མོ་ཙ་པྲི་ཡངྐུའི། །ཁུ་བ་སྲང་རེ་དག་དང་ནི། །དུག་མོ་ཉུང་གི་ཕྱེ་མ་བཅུག །དེ་ནས་གཟར་བུར་ཆགས་པ་ཡི། །ལྡེ་གུ་བསྐོལ་བ་སྦྱིན་བྱ་ཞིང༌། །ཐུག་པ་ཐུག་སླའིའོ་ཐུག་གམ། །ར་འམ་བ་ཡིའོ། །མའམ། །མེ་སྟོབས་ཇི་བཞིན་བླུད་པར་བྱ། །ལྡེ་གུ་འདིས་ནི་ཁྲག་གི་ནི། །ཚད་འཁྲུ་གཞང་འབྲུམ་སེལ་བྱེད་ཅིང༌། །ཁྲག་མཁྲིས་ནད་ནི་སྟོབས་ལྡན་པ། །སྟེང་ངམ་འོག་ནས་འབྱུང་བ་སེལ། །དུག་མོ་ཉུང་ཤུན་སྲང་བརྒྱད་ཅུ། །བྲེ་བཅུ་དྲུག་བསྐོལ་བརྒྱད་ཆ་བླུད། །དེ་ནི་ཆ་གསུམ་སྐྱེར་ཁཎྚ། སེང་ཕྲོམ་གཉིས་དང་མོན་ཆ་ར། །སེ་འབྲུ་གཞོན་ནུའི་ཤུན་ལྤགས་དང༌། །བིལ་བ་གཞོན་ནུ་གླ་སྒང་དང༌། །བཙོད་དང་ད་ཏ་ཀའི་འབྲས་བུ། །སྲང་ནི་རེ་རེ་བཏགས་པ་ཡི། །ལྡེ་གུར་བྱས་པ་གཞུག་པར་བྱ། །དུག་མོ་ཉུང་ཤུན་སྲང་བཅུ་དང༌། ཞུན་མར་སྲང་ནི་ཉི་ཤུ་དང༌། །བུ་རམ་སྲང་ནི་སུམ་ཅུ་གཞུག །བསྐོལ་ལ་གཟར་བུར་ཆགས་པ་དང༌། །འབྲུ་ནང་ཟླ་ཕྱེད་བཅུག་སྟེ་བལྡག །གཞང་འབྲུམ་ཀུན་དང་ཕོ་བའི་ནད། །ལུད་པ་དབུགས་མི་བདེ་བ་སེལ། །སེང་ཕྲོམ་མོ་ཙ་ར་ས་ཏིལ་།བཙོད་དང་ཙནྡན་ཨུཏྤལ། །ར་ཡི་འོ་མ་སྦྱར་བ་བླུད། །དེ་ཉིད་དང་ནི་འབས་ཆེན་སྦྱིན། །ཤིང་མངར་ཤུན་པ་བྱི་ཚེར་བ། །འོ་མ་དཱུར་བ་པ་ཡ་སྱ། །ཁར་སྦྲང་རྩིར་
བཅས་ཆུའམ། །ར་ཡི་འོ་མ་སྦྱར་བ་བཏུང༌། །སེང་ཕྲོམ་བཙོད་དང་པུ་ཤེལ་ཙེ། །ཤ་མ་ལི་ཤུན་དུག་མོ་ཉུང༌། །ཙནྡན་ཤིང་མངར་པུ་ཤེལ་ཙེ། །ནཱ་ག་གསེར་འབྲས་ཆུར་བླུད། །ལ་ལ་ཕུད་དང་དུག་མོ་ཉུང༌། །པ་ཏ་བཅའ་སྒ་སྐྱེར་ཁཎྜའི། །ཕྱེ་མ་གཟེར་དང་བཅས་ལ་ཕན། །ཁྲག་ནི་དྲག་ཏུ་འབྱུང་བ་ལ། །ཀཎྚ་ཀ་རི་པ་ཡ་སྱ། །གཉིས་དང་བསྐོལ་བའི་ཞུན་མར་བསྔགས། །ཡང་ན་སེང་ཕྲོམ་ད་ཏ་ཀི། །དུག་མོ་ཉུང་ཤུན་འབྲས་བུ་དང༌། །ཨུཏྤལ་པདྨ་གེ་སར་མར། །ཡ་བཀྵར་སེ་འབྲུའི་བཅུད། །ཁ་ར་པདྨ་གསེར་དང༌། །མར་སར་བཅས་པ་ཏིལ་སྦྱར་བའམ། །མར་སར་སྦྱར་བས་ཁྲག་ལས་ནི། །གྱུར་པའི་གཞང་འབྲུམ་སེལ་བར་བྱེད། །ར་ཡི་མར་སར་འོ་མ་དང༌། །སྐམ་སའི་སྲོག་ཆགས་ཤ་ཁྲག་དང༌། །རྒྱ་སྣེའི་ཁུ་བར་བཅས་ཤ་ཁུ། །ཅུང་ཟད་སྐྱུར་དང་སྐྱུར་མེད་པ། །སཱ་ལུ་ཙ་སྣར་ཞོ་ཡི་སྤྲི། །དྲུག་ཅུ་པ་དང་ཆང་སར་དང༌། །ཆང་གི་དངས་མ་སར་པ་ནི། །ཁྲག་ལས་གྱུར་པའི་སྨན་མཆོག་ཡིན། །ཐུག་པ་ཡུ་ཤ་ཤ་ཁུ་སོགས། །ཡང་ན་ཀུན་དོང་འབའ་ཞིག་གིས། །ཁྲག་རྒྱས་གྱུར་པ་སེལ་བྱེད་དེ་།རླུང་ལས་གྱུར་པའང་སྦྱར་བར་བྱ། །ཕལ་ཆེར་རླུང་ཤས་ཆེ་གཞང་འབྲུམ། །ཁྲག་འཛག་དྲགས་ལས་འབྱུང་འགྱུར་བས། །དེ་བས་ལྷག་པར་དེ་ལ་ནི། །དེ་བསལ་བལ་འབད་པར་བྱ། །ཁྲག་མཁྲིས་ཤས་ཆེ་བད་ཀན་དང༌། །རླུང་ཤས་ཆེ་བར་མཐོང་གྱུར་ན། །དེ་ཞི་བྱ་ཕྱིར་རྣམ་ཀུན་དུ། །བསིལ་བའི་ཆོ་ག་སྤྱད་པར་བྱ། །གལ་ཏེ་དེས་ཀྱང་མ་ཞི་ན། །དེ་ཚེ་སྣུམ་དང་དྲོ་བས་བརྟ། །ཤ་ཁུ་དྲོ་འཇམ་ཞུན་མར་ནི། །ཐོག་མ་ཉིད་དུ་སྦྱར་བར་བྱ། །དེ་ལ་ཏིལ་མར་མར་དང་ནི། །འོ་མ་དྲོ་འཇམ་བླུད་པའང་བསྔགས། །བྱི་ཚེར་ཀུ་ཤ་འཇག་མའི་རྩྭ། །ཤལ་མ་ལི་ཡི་མེ་ཏོག་དང༌། །ཨུ་དུམ་བཱ་ར་ནྱ་གྲོ་དྷ། །ཨ་ཤྭདྠ་ཡི་མྱུ་གུ་སྲང༌། །གཉིས་གཉིས་ཆུ་བྲེ་གསུམ་དང་ནི། །འོ་མ་བྲེ་གང་ནང་དུ་བསྐོལ། །འོ་མ་ལུས་ནས་ཚིགས་མ་བཙགས། །ཁུ་བ་དེར་ན་མོན་ཆ་ར། །བཙོད་དང་ཙནྡན་ཨུཏྤལ། །ཨུཏྤལ་པདྨའི་གེ་སེར་དང༌། །དུག་མོ་ཉུང་གིས་བོན་
ཏེ། །འདི་རྣམས་བཏགས་པའི་ལྡེ་གུ་བསྲེས། །འདི་ནི་སྤྱི་བག་འཇམ་རྩིར་གྲགས། །མར་དང་སྦྲང་རྩི་ཁ་རར་བཅས། །མཁྲེགས་དང་གཞང་ནི་འབྱུང་བ་དང༌། །ཁྲག་འཛག་རིམས་ནི་འཇོམས་པར་བྱེད། །ཤིང་མངར་པྲ་པུཎྚ་རཱི་ཀ །དེ་བཞིན་མོན་ཆར་ལ་སོགས། །ཉིས་འགྱུར་གྱི་ནི་འོ་མ་བསོལ། །སྣུམ་གྱི་འཇམ་རྩི་གཏང་བར་བྱ། །ཤིང་མངར་ཨུཏྤལ་སེང་ཕྲོམ་བཙོད། །བིལ་བ་ཙནྡན་བ་ལ་ཀ །དབྱི་མོ་གླ་སྒང་བོང་དཀར། །བ་ཏ་ཡ་བཀྵར་མཆོག །སྐྱེར་པ་ཤིང་ཚ་ཅི་ཏྲ་ཀ །དོང་ག་སྤང་སྤོས་ཐང་ཤིང་དང། །ཙང་གི་རི་ཡི་ཁུ་བ་མར། །བསྐོལ་བ་དེས་ནི་ཉེས་གསུམ་འཇོམས། །གཞང་འབྲུམ་ཚད་འཁུ་ཕོ་བའི་ནད། །སྐྱ་རྦབ་རིམས་དང་ཡིག་འཆུས། །གཅིན་སྲི་གཞང་ནི་ཉམས་པ་དང༌། ཆུ་སོ་སྦོ་དང་མཁྲེགས་པ་དང༌། །བསྣབས་འཁྲུ་དང་གཞང་འབྲུམ་སེལ། །དེ་བླུད་སྨན་གྱི་དམ་པ་ཡིན། །རིམ་གྱིས་མངར་ཞིང་སྐྱུར་བ་དང༌། །གྲང་དྲོ་ལ་སོགས་རྟག་ཏུ་ནི། །མེ་དྲོད་སྟོབས་ལས་ལྟོས་ཏེག་ཏང༌། །གཞང་འབྲུམ་ནད་ལས་རྒྱལ་བར་འགྱུར། །རྟུག་སྐམ་གྱིས་ཉེན་ཏིལ་མར་ནི། །གྲང་བའི་རིམས་ལ་ཕན་པས་བསྐུ། །རླན་དུགས་སྣུམ་ཅན་གྱིས་དུགས་བྱ། །དེ་ནས་རེང་བུ་གཞུག་བྱ་སྟེ། །ཤ་མ་དུར་བྱིད་དན་དང༌། ནི་ལི་ནི་འབྲས་པི་པི་ལིང༌། །པོ་སོན་ཆ་ལན་ཚྭ་ཉེས་འགྱུར། །ཕྱེར་བཏགས་བུ་རམ་བ་གཅིན་སྦྱར། །མར་བསྐུས་རིང་བུ་མཐེ་བོང་ཙམ། །བཅུག་ན་རྟུག་སྐམ་བདེ་འབྱུང་བྱེད། །པི་པི་ལིང་དང་པོ་སོན་ཆ། །ཁྱིམ་གྱི་དུང་པ་ཉུངས་ཀར་བཅས། །འདི་དག་ཉིད་ཀྱི་ཕྱེ་མ་ནི། །རྐུབ་ནས་གཅེ་འུས་འབུད་བར་བྱ། །དེ་དོན་མེད་ན་རབ་རྣོ་སྣུམ། །མས་གཏོང་བས་ནི་བཙིར་ཏེ་གཏང༌། །དེས་ནི་གཞང་རྩ་དྲང་པོར་བྱེད། །བཤང་གཅི་འཕྱེན་ནི་བདེ་བར་འབྱུང། །སླར་ཡང་འགགས་ན་རླུང་འཇོམས་པའི། །བཀྲུ་སྨན་སྣུམ་ཅན་གཏང་བྱ་ཞིང༌། །འཇམ་རྩི་དག་ནི་གཏང་བར་བྱ། །རྩུབ་པས་རླུང་ནི་རྟུག་སྐམ་འགྱུར། །ལན་ཚྭ་གསུམ་དང་ཚ་བ་གསུམ། །འབྲས་བུ་གསུམ་དང་དན་ཏི་དང༌། །བསེ་ཤིང་འབྲས་བུ་ཅི་
ཏྲ་ཀ །ཕྱེ་མ་མར་དང་སྦྲང་རྩིས་སྦྲུས། །རྫ་སྐྱོགས་ཁ་སྦྱར་འཇིམ་པས་བྱུགས། །དུ་བ་ནང་འཁྱིམས་བསྲེག་པར་བྱ། །ཐལ་བ་དགེ་བ་ཅན་ཞེས་བྱ། །མར་དང་ལྷན་ཅིག་བླུད་པའམ། །འབྲས་ཆན་སྣུམ་ཅན་དང་སྦྱར་ཟོས། །རྟུག་སྐམ་འགགས་དང་གཞང་འབྲུམ་སྐྲན། །སྐྱ་རྦབ་དམུ་རྫིང་བདེ་གཅིན་སྲི། །སྙིང་ནད་འོར་ནད་ཕོ་བའི་ནད། །གཅིན་སྙི་མཆིན་པ་གཟེར་དང་སྨྲོ། །ལུད་པ་དབུགས་མི་བདེ་བ་འཇོམས། །གཞང་འབྲུམ་ལ་ནི་གང་ཞིག་བཤད། །དེ་བཞིན་རྟུག་སྐམ་དག་ལ་སྦྱར། །ཀ་རཉྫ་ཤུན་སྲང་ནི་ཉིས་བརྒྱ་བཅུ། །བྲེ་བཅུ་དྲུག་བསྐོལ་བཞི་ཆ་ལུས་པ་དེར། །བུ་རམ་སྲང་ནི་བརྒྱད་ཅུ་ཙ་བ་གསུམ། །སྲང་བརྒྱད་ཞིབ་ཏུ་བཏགས་པའི་ཕྱེ་མ་གཞུག །འདི་དག་ཟླ་གཅིག་བཞག་སྟེ་ལངས་གྱུར་ནས། །ཚ་བྱས་མཆོག་ཏུ་དྲོད་སྐྱེད་ཟས་འཇུ་བའི། །ནུས་སྐྱེད་རླུང་བདེར་རྒྱུ་བྱས་གཞང་འབྲུམ་དང༌། །མཆེར་ནད་སྐྲན་དང་དམུ་རྫིང་སེལ་བར་བྱེད། །པུ་ཏི་ཀ་རཉྫ་ནི་སྲང་བརྒྱད་དང༌། །ཙི་ཏྲ་ཀཎྚ་ཀ་རི་སྲང་ཉིས་བརྒྱ། །ཆུ་བྲེ་བཞི་བཅུ་བརྒྱད་བསྐོལ་བཞི་ཆ་ལུས། །བཙགས་ཏེ་བསྒྲངས་པར་བུ་རམ་སྲང་བརྒྱད་གཞུག །དྲི་སྣ་གསུམ་དང་ཚ་གསུམ་སེ་འབྲུ་དང༌། །པི་པི་ལིང་གི་རྩ་བ་སྲུ་སྲུའི་རྩ། །གུ་གུལ་མ་ནུ་འུ་སུ་དབྱི་མོང་དང༌། སྤ་མའི་འབྲས་བུ་སྒེ་གཤེར་སྟར་བུ་ནི། །སྲང་རེ་ཞིབ་ཏུ་བརྟགས་པའི་ཕྱེ་མ་བསྐོལ། །བསྒྲངས་ནས་སྦྲང་རྩི་སྲང་ནི་ཉི་ཤུ་གཞུག །སྒེ་གཤེར་སྐྱུར་རྩི་ཆེན་པོ་རྒྱུན་འབྲུམ་རློན། །བུ་རམ་ཤིང་གི་ཁུ་བ་བཙིར་བ་བཅས། །མར་གྱི་སྣོད་བཅུག་ཟླ་གཅིག་བཞག་སྟེ་ལངས། །སྐྱུར་གྱུར་འདི་ནི་གཞང་འབྲུམ་སོགས་ལ་སྟེ། །མེ་དྲོད་སྐྱེད་པར་བྱེད་པའི་མཆོག་ཡིན་ལ། །སྐྱ་རྦབ་དབྱིག་དྲུག་དམུ་རྫིང་སྐྲན་མཆེར་པ། །ལྟོ་སྦོས་རྡེའུ་ཆགས་གཅིན་སྲི་འཇོམས་པར་བྱེད། །པི་ལུའི་ཁུ་བ་རས་བཙགས་བྲེ་བཅུ་དྲུག །མར་གྱི་སྣོད་ཀྱི་ནང་དུ་བཅུག་ནས་ནི། །ད་ཏ་ཀི་དང་རྒུན་འབྲུ་འབྲ་གོ་དང༌། །སྐྱུ་རུ་ར་ཡི་འབྲས་བུ་སྲང་གཉིས་གཉིས། །བ་ཏ་བོང་ང་དཀར་པོ་བྱི་ཚར་བ། །སྟར་བུ་ཚ་བ་གསུམ་དང་ཤིང་ཚ་དང༌། །སུག་སྨེལ་འུ་སུ་སྤྲ་ཀི་ཀ་ཀོ་ལ། །ལི་ཤི་པི་པི་ལིང་རྩ་བྱི་
དང་ག །ཀྲུ་ཏྲུག་ཏྲེས་སྲང་རེ་རེ་བུ་རམ་ནི། །སྲང་བརྒྱད་རླུང་མེད་གནས་སུ་ཟླ་ཕྱེད་གཞག །དེས་ནི་གཞང་འབྲུམ་སྐྲན་བཅས་ཞི་བྱེད་ཅིང༌། །མེ་ཡི་སྟོབས་ནི་མྱུར་དུ་སྐྱེད་པར་བྱེད། །ཡང་ན་རྩབ་བཅུ་པ་དུར་བྱིད་དང༌། །པ་ཏ་ཨ་ཀ་གཉིས་དང་བོང་ང་དཀར། །ཀད་པ་ལ་རྣམས་རེ་རེ་སྲང་བཅུ་བཅུ། །སྔ་མ་བཞིན་དུ་བསྲེགས་པའི་ཐལ་བ་ནི། །ཆུ་བྲེ་བཅུ་དྲུག་ནང་དུ་བསྐོལ་ནས་ནི། །བཞི་ཆ་ལུས་པར་བུ་རམ་སྲང་བརྒྱ་དང༌། །ཚ་བ་གསུམ་དང་དབྱི་མོང་ཨ་རུ་ར། །སྲང་ལྔ་ཙི་ཏྲ་ཀ་ནི་སྲང་གཉིས་དང༌། ཡ་བཀྵར་སྲང་གཉིས་བཅུག་སྟེ་བསྐོལ། །གཟར་བུར་ཆགས་པའི་བུ་རམ་ལྡེ་གུ་ཡིས། །སྐྲན་དང་མཆེར་ནང་གཞང་འབྲུམ་མཛེ་ནད་དང༌། །གཅིན་ནད་མེ་དྲོད་ཉམས་པ་འཇོམས་པར་བྱེད། །ཙི་ཏྲ་ཀ་ཡི་རྩ་བ་སྲང་ལྔ་བཅུ། །ཆུ་སྲང་བཅུ་དྲུག་བསྐོལ་ལ་བརྒྱད་ཆ་ལུས། །དེར་ནི་བུ་རམ་རྙིང་པ་སྲང་བརྒྱ་གཞུག །སླར་བསྐོལ་སྐ་བར་གྱུར་པ་དེ་ནང་དུ། །ཚ་བ་གསུམ་དང་ཤུ་ཏི་ཨ་རུ་ར། །རུ་རྟ་གླ་སྒང་ཤིང་ཚ་བྱི་དང་ག །ཅི་ཏྲ་ཀ་དང་སུག་སྨེལ་ཕྱེར་བཏགས་བསྲེས། །དེས་ནི་གཞང་འབྲུམ་མཛེ་དང་སྐྲན་དང་ནི། །མཆེར་པ་དམུ་རྫིང་ནད་ནི་འཇོམས་བྱེད་ཅིང༌། །རྟག་ཏུ་བསྟེན་ན་མེ་དྲོད་སྐྱེད་པར་བྱེད། །ཚ་བ་གསུམ་དང་ཏིལ་དར་འབྲས་བུ་གསུམ། །བྱི་དང་ག་དང་གོ་བྱེ་ཙི་ཏྲ་ཀ །བུ་རམ་རི་ལུར་བྱས་བསྟེན་གཞང་འབྲུམ་དང༌། །པགས་པའི་ནད་ནི་སེལ་བར་བྱེད་པ་ཡིན། །སོར་ན་ཡི་རྩབ་ཁ་སྦྱར་བཅུག །འཇིམ་པས་བསྐུས་ཏེ་ཆོ་ག་བཞིན་བསྲེགས་པ། །ལན་ཚྭ་ཏིལ་མར་བཅས་པ་ཟོས་གྱུར་ན། །གཞང་འབྲུམ་སེལ་བར་བྱེད་པའི་དམ་པ་ཡིན། །ན་ལེ་ཤམ་དང་པི་པི་ལིང་དོང་གྲ། །ཀྲུ་ཏྲུག་ཏེས་ནི་ཆ་རེ་བསྐྱེད་པ་དང༌། །ཙི་ཏྲ་བཞི་འགྱུར་སུ་ར་ན་དང་སྦྱར། །བུ་རམ་རི་ལུས་གཞང་འབྲུམ་གཅོད་པར་བྱེད། །སོ་ར་ན་ཡི་བཅུ་དྲུག་ཕྱེར་བཏགས་ཤིང༌། །ཙི་ཏྲ་ཀ་ནི་དེ་ཡི་ཆ་ཕྱེད་བྱ། །བཅའ་སྒ་ཆ་གཉིས་ན་ལེ་ཤམ་ཆ་གཅིག །བུ་རམ་རི་ལུར་བྱས་པས་གཞང་འབྲུམ་སེལ། །ཨ་རུ་ར་དང་དོང་གྲ་པི་པི་ལིང༌། །ཀ་ར་ཉྫ་དང་ཙི་ཏྲ་བྱི་དང་ག །ཀ་ར་མཉམ་ཕྱེ་རྒོད་མའི་ཁ་ལྟ་བུ། །ཟས་ལྕི་མང་དུ་
ཟོས་ཀྱང་འཇུ་བར་བྱེད། །དུག་མོ་ཉུང་ལམ་ག་ལི་པི་ལིང༌། །ཅི་ཏྲ་ཀ་དང་ཨ་བ་མརྒ་ཡི། །ས་བོན་རྩ་མཁྲིས་རྒྱམ་ཚ་བུ་རམ་རྣམས། །རི་ལུར་བྱས་པས་གཞང་འབྲུམ་སེལ་བར་བྱེད། །གལ་ཏེ་གཞང་འབྲུམ་གཞིག་པར་འདོད་ན་ནི། །རྒྱམ་ཚ་ཙི་ཏྲ་ཀ་དང་དུག་མོ་ཉུང༌། །ཙི་ལི་བིལ་བ་ནིམ་པར་བཅས་པ་དག །བཏགས་པའི་ཕྱེ་མངར་བར་བཅས་པ་བཏུང༌། །གཞང་འབྲུམ་སྐམ་ལ་བ་ལ་ཏ་ཀ་སྟེ། །གཤེར་ལ་དུག་མོ་ཉུང་ཤུན་སྨན་མཆོག་ཡིན། །ཀུན་ལ་དུས་ཀུན་དུ་ནི་དར་རྙིང་མཆོག །སྟོབས་ཀྱེད་བྱེད་ཅིང་ནད་རྣམས་འཇོམས་པ་ཡིན། །རྟུག་པ་འགགས་པ་བསལ་བར་བྱ་བའི་ཕྱིར། །རླུང་སེལ་མེ་དྲོད་སྐྱེད་པར་བྱེད་པ་ཡི། །བཟའ་དང་བཏུང་བ་གང་ཡིན་དེ་བསྟེན་བྱ། །དེ་ལས་གོ་ཟློག་པ་ནི་སྤང་བར་བྱ། །གཞང་འབྲུམ་ཚད་འཁྲུ་ཕོ་བའི་ནད་རྣམས་ནི། །ཕལ་ཆེར་ཕན་ཚུན་རྒྱུར་གྱུར་ཡིན་པས་ན། །མེ་དྲོད་ཆུང་ན་སྐྱེའི་ཆེ་ན་མིན། །དེ་བས་དེ་ལ་མཆོག་ཏུ་མེ་དྲོད་བསྲུང༌། །ཡན་ལག་བརྒྱད་པའི་སྙིང་པོ་བསྡུས་པ་ལས། །གསོ་བའི་གནས་ཀྱི་ལེའུ་བརྒྱད་པའོ།། །།དེ་ནས་འཁྲུ་བ་གསོ་བའི་ལེའུ་བཤད་པར་བྱའོ། །འཁྲུ་བ་ཕལ་ཆེར་མ་ཞུ་བའི། །གནས་རྟེན་མེ་དྲོད་ཉམས་པ་ལ། །འབྱུང་བས་དེའི་ཕྱིར་རླུང་གྱུར་ལའང༌། །དང་པོ་སྨྱུང་བ་བྱས་པ་ཕན། །གཟེར་དབོ་བད་ཀན་གྱིས་ཉམ་ཐག །འཁྲུ་བ་ཅན་ནི་སློན་དུ་གཞུག །ནད་ནི་གང་ཞིག་སོགས་པ་དག །མ་སྨིན་ཟས་དང་འདྲེས་གྱུར་ན། །འཁྲུ་བ་དག་ནི་འབྱུང་གྱུར་ཏེ། །ཤིན་ཏུ་སློངས་ཏེ་འབྱུང་གྱུར་དང༌། །རང་ཉིད་འཁྲུ་བྱེད་དེ་ལ་ནི། །བཏང་སྙོམས་གཞག་པ་དེ་ཉིད་སྨན། །མ་ཞུ་འཁྲུལ་དང་པོར་ནི། །གཅོད་པའི་སྨན་ནི་གཏང་མི་བྱ། །གལ་ཏེ་འགགས་བྱེད་ལྟོ་སྦོ་ལྕི། །གཟེར་དང་ཚོར་བ་ཅུང་གྱུར་ལ། །ཨ་རུ་བཏང་ན་ནད་འཁྱིལ་བ། །འབྱིན་པས་སྲོག་ནི་སྟེར་བྱེད་ཡིན། །ནད་ཚབས་འབྲིང་ལ་ཁྱད་པར་དུ། །བུ་ཏི་ཀ་དང་པི་པི་ལིང༌། །བཅའ་སྒ་ཤུ་དག་ཨ་རུ་ར། །འུ་སུ་ལེགས་པར་བསྐོལ་བ་བླུད། །ཡང་ན་པིལ་བ་འུ་སུ་དང༌། །གླ་སྒང་དོང་གྲ་བ་ལེཀ །པ་ཐ་ཤུ་དག་ཁ་རུ་ཚ། །
དོང་ག་བྱི་དང་ཨ་རུ་ར། །བཅའ་སྒ་གླ་སྒང་བོང་ང་དཀར། །བིལ་བ་ཤིང་ཀུན་དུག་མོ་ཉུང༌། །ནད་གཞི་ཆུང་བའི་ཚད་འཁྲུལ། །སྨྱུང་བ་བྱས་པ་བསྔགས་པ་ཡིན། །ཡང་ན་ཤུ་དག་བོང་ང་དཀར། །གླ་སྐང་པར་པ་ཏ་བསྐོལ་པ་འམ། །བ་ལེ་ཀ་དང་དོང་གྲ་ནི། །བསྐོལ་བའི་ཆུ་དག་བླུད་པར་བྱ། །བཀྲེས་ཤིང་ཉམ་ཆུང་ཟས་དུས་སུ། །ཁ་ཟས་ཡང་བ་རིག་པས་སྦྱིན། །དེས་དེའི་ཁ་ཟས་ཡི་གར་འོང༌། །མེ་དྲོད་ལུས་སྟོབས་སྐྱེད་པར་བྱེད། །དར་བའམ་རང་སྐྱུར་དག་གམ་ནི། །ནས་ཐུག་དག་གི་སྐྱོ་མའམ། །ཆང་ངམ་རྒྱུན་ཆང་དག་གི་ནི། བཏུང་བ་གང་འོས་ཉེར་སྤྱད་བྱ། །ཁ་ཟས་བྱིན་པའི་འོག་ཏུ་ནི། །བིལ་བ་གཞོན་ནུ་ཟུར་བ་དཀར། །འུ་སུ་ཤིང་ཀུན་ང་ཏྲིག་སེའུ། །ཟི་ར་པ་འབྲས་པ་ལ་ཤ །ལ་ལ་ཕུད་དང་ཁ་རུ་ཚ། །རྒྱམ་ཚ་རྩ་བ་ཆུང་ངུ་ལྔ། །ཚ་བ་ལྔ་དང་པ་ཐ་སྟེ། །སྨིན་གཅོད་དྲོད་ནི་སྐྱེད་པར་བྱེད། །བད་ཀན་མཁྲིས་པའི་ཤས་ཆེ་ལ། །ས་ལ་པརྞི་བ་ལ་དང༌། །བིལ་བ་ཀྲྀཥྞ་པརྞི་དང༌། །སེ་འབྲུ་བསྐོལ་བའི་ཐུག་པ་ཕན། །པི་པི་ལིང་རྩ་ཨ་རུ་ར། །ཐུག་པས་རླུང་ནི་བདེར་རྒྱུ་བྱེད། །ནད་གཞི་མང་ལ་འགགས་པ་དང༌། །མེ་དྲོད་ཆེ་བར་གང་ཞིག་འཁྲུ། །པི་པི་ལིང་དང་འབྲས་བུ་གསུམ། །བྱི་དང་ག་བསྐོལ་བཀྲུ་སྨན་གཏང༌། །སྦྱངས་བྱས་ནས་ནི་ཐུག་པ་དག །རླུང་འཇོམས་མེ་དྲོད་སྐྱེད་པ་བླུད། །གང་ཞིག་མ་ཞུ་སྨིན་གྱུར་དང༌། མེ་དྲོད་སྐྱེས་ནས་འཁྲུ་འགྱུར་ཞིང༌། །འབྱར་བག་ལྦུམ་ཅན་ནད་བཅས་པ། །སྲི་ཤིང་ཡང་དང་ཡང་དུ་ནི། །ཡང་ཡང་འཁྲུ་ཞིང་བཤང་ཆུང་བའམ། །བཤང་བ་མ་འདྲེས་མཁྲེགས་བཅས་ལ། །ཞོ་དང་འོ་མ་མར་ཏིལ་མར། །བཅའ་སྒ་བུ་རམ་བཅས་པ་བླུད། །ཡང་ན་རྒྱ་ཤུག་འབྲས་བུ་སྤངས། །བུ་རམ་ཏིལ་མར་ལྡན་པ་སྦྱིན། །བཤང་བསྲིལ་ཕན་ཚོད་མ། །སྡུམ་མང་དེ་བཞིན་ཤ་ཁུ་དང། །ཞོ་དང་སེ་འབྲུ་གཡོས་པ་དང༌། །སཱ་ལུའི་འབྲས་ཆེན་མ་ཤ་ཏིལ། །མུངྒ་ལེགས་པར་གཡོས་པའི་ཟས། །དེ་ནི་བཀྲེས་པར་གྱུར་ཚེ་སྦྱིན། །ཟུར་བའི་རྩ་བ་ཀ་པི་ཏ། །པ་ཏ་སྭ་ཏི་ཀའི་ཚོད་མ། །ཤུ་ཤ་ལ་ལ་ཕུད་དང་ནི། །ཀར་ཀ་རུ་དང་སྲིང་གི་ནི། །ཡང་ན་
ཙིར་བི་ཏ་ཡང་རུང༌། །ཨུ་པོ་ཏ་ཀ་ཛི་བན་ཏི། །བ་གུ་རྩེ་དང་རྒྱ་སྣེའུ་དང༌། །ལྕམ་པའམ་ཡང་ན་ཨེ་རཎ་དང༌། །ལོ་ནི་ཀ་ཡི་ཁུ་བ་དང༌། །རུས་སྦལ་བྱེའུ་ལོ་བ་ཀ །རྨ་བྱ་སྲེག་པ་ཁྱིམ་བྱ་ཡི། །ཤ་ཁུ་དང་ཡང་སྦྱིན་པར་བྱ། །བིལ་བ་གླ་སྒང་བ་རུ་ར། །བཅའ་སྒ་ད་ཏ་ཀའི་མེ་ཏོག །དར་བ་བསྐོལ་བའི་ནས་ཐུག་གམ། །ཞོ་དང་སྦྱར་བས་འཁྲུ་བ་སེལ། །ཀ་པིད་ཏ་དང་ཀ་ཙུར། །ག་བྲའི་རྩ་བ་ཡུ་ཏི་དང༌། །ནྱ་གྲོ་དྷ་དང་རྡོ་དྲེག་དང༌། །སེ་འབྲུ་སོ་མར་བལ་དང༌། །ཤལ་མ་ལི་ཡི་ལོ་མ་ཕན། །བིལ་བ་གཞོན་ནུའི་ལྡེ་གུ་དང༌། །ཏིལ་བཏགས་ལྡེ་གུ་འང་དེ་དང་མཉམ། །ཞོ་ཡི་སྤྲིས་སྐྱུར་སྣུམ་བཅས་དང༌། །སྦྱར་དུག་མཁྲེགས་པ་འཇོམས་པར་བྱེད། །འུ་སུ་ཟི་ར་ན་ལེ་ཤམ། །ད་ཏྲིག་ཟུར་པ་ཁ་རུ་ཚ། །སེ་འབྲུ་པ་ཏ་ད་ཏ་ཀི། །འབྲས་གསུམ་ཆ་ལྔ་ཀ་པི། །ནས་ཚིག་འཁུས་ཐལ་ལ་ལ་ཕུད། །ཨ་མྲ་འཛམ་བུའི་འབྲས་བུའི་རྐང༌། །བིལ་བ་དྲུག་འགྱུར་ལྡ་གར་བཏགས། །ཞོ་དང་བུ་རམ་མུངྒའི་ཁུ། །ཏིལ་མར་མར་དང་གཡོས་པ་དག །གཞན་གྱིས་མི་ཐུབ་སྦྱར་ཐུག་འདི། །དྲོད་སྐྱེད་སྨིན་བྱེད་འཁྲུ་བ་གཅོད། །ཡི་ག་འབྱེད་ཅིང་མཁྲེགས་པ་སེལ། །རྒྱ་ཤུག་བིལ་བ་གཞོན་ནུ་ཡི། །ལྡེ་གུ་འབྲས་དང་ནས་དང་ནི། །མུད་ག་མ་ཤ་ཏིལ་རྣམས་དང༌། །འབྲུ་ཡི་ཡུ་ཤར་རྣམ་པར་བཏགས། །བཤང་བ་ཟད་ཅིང་ཁ་སྐམ་ལ། །ཞོ་དང་སེ་འབྲུའི་ཁུ་བ་དང༌། །མར་དང་ཏིལ་མར་ལྷན་ཅིག་བརྔོས། །འབྲས་ཆན་དེ་དང་སྦྱར་བ་ནི། །བཤང་ཟད་ཁ་ནི་སྐམ་ལ་སྦྱིན། །ཡང་ན་ཞོ་སྦྲིས་སྣུམ་གཉིས་བརྔོས། །བྲུར་མ་བཅའ་སྒར་བཅས་པ་སྦྱིན། །ཡང་ན་ཆང་ནི་སྣུམ་གཉིས་བརྔོས། །ཚོད་མའི་དོན་དུ་སྦྱིན་པའམ། །འབྲས་བུ་སྐྱུར་པོ་སྣུམ་གཉིས་བརྔོས། །སྦོག་པ་ལས་བྱུང་ཡུ་ཤའམ། །སྣུམ་གཉིས་དང་བརྔོས་ཕྱེ་ཟན་ནི། །ཚ་བ་གསུམ་གྱི་ཕྱེ་བཏབ་སྦྱིན། །དེ་བཞིན་མ་ཤ་ལེགས་བཅོས་པ། །མར་གྱི་སྙིང་པོ་བླུད་པའམ། །ར་ཐུག་ལུག་ཐུག་དག་གི་ཤ་།བཙོས་ཏེ་བཙགས་པའི་ཁུ་བ་དང༌། །སེ་འབྲུའི་ཁུ་བའི་ཆུ་དང་ནི། །འུ་སུ་དོང་གྲ་སྣུམ་བཅས་བསྐོལ། །སཱ་ལུ་རྩ་སྣར་བཅས་པ་ནི། །ཟ་ཞིང་དེ་ཉིད་འཐུངས་པ།
ཡིས། །རྟུག་པ་ཟད་པ་ལས་བྱུང་བའི། །ནད་ལས་མྱུར་དུ་ཐར་བར་འགྱུར། །བུ་རམ་ཏིལ་མར་བིལ་བ་གཞོན། །པི་པི་ལིང་དང་བཅའ་སྒ་ཡི། །ལྡེ་གུས་རླུང་གིས་གནོད་གྱུར་པའི། །གཟེར་ཐབས་མཁྲེགས་དང་བཅས་པ་སེལ། །སེང་ཕྲོམ་ཤུན་ལྤགས་ད་ཏ་ཀའི། །མེ་ཏོག་རྒྱ་ཤུག་འདབ་མ་རྣམས། །ཞོ་སྤྲིས་སྦྲང་རྩི་ཀ་པི་ཏའི། །ཁུ་བར་སྦྱར་བ་བླུད་ན་ཕན། །རླུང་གིས་རྟུག་འགགས་ཤས་ཆེར་ནི། །ན་ཞིང་མཁྲེགས་པར་བྱེད་པ་དང༌། །བེ་སྣབས་ཁྲག་བཅས་སྐོམ་གདུངས་ལ། །འོ་མ་ཚིམ་པར་བླུད་ན་ཕན། །ཏིལ་མར་མར་གྱི་སྟེང་དུ་ནི། །བཞོས་མ་ཐག་པའི་འོ་མ་བླུད། །ཡང་ན་ཨ་རཎྚ་ཡི་རྩའམ། །བིལ་བ་གཞོན་ནུ་བསྐོལ་བ་བླུད། །གླ་སྒང་ཉི་ཤུ་འོ་མ་ཡི། །སུམ་འགྱུར་གྱི་ནི་ཆུ་བསྐོལ་བ། །འཁྲུ་བ་གཟེར་བཅས་སེལ་བར་བྱེད་།པི་པི་ལིང་དང་ན་ལེ་ཤམ། །ཞི་བ་དུ་བཏགས་པའི་ཕྱེ་དང་སྦྱིན། །དེས་ནི་ཡུན་ཏིང་གནས་པ་ཡི། །མཁྲེགས་པ་སེལ་བར་བྱེད་པར་འགྱུར། །མ་ཞུ་མེད་ཅིང་གཟེར་གྱིས་ཉེན། །སྨྱུང་བ་ལ་སོགས་པས་ཉམས་སྨད། །ཁོང་རྩུབ་མེ་དྲོད་བརྟགས་ནས་ནི། །མར་ནི་ཐལ་སྨན་རྣོ་བཅས་སྦྱིན། །ཡང་ན་རྩབ་བཅུ་བསྐོལ་ཆུ། །ཞོ་དང་ཆང་གི་དངས་མར་བསྐོལ། །ལྕེ་མྱང་ཚ་དང་ཚ་ལྔ། །ཏིལ་མར་འཕྲལ་དུ་ནད་འཇོམས་བྱེད། །བཅའ་སྒ་སྲང་དྲུག་པི་པི་ལིང༌། །མཱུ་ལ་ཀྲུ་ཏྲུག་ཏྲེས་རྒྱམ་ཚ། །སྲང་གཉིས་ཏིལ་མར་བྲེ་གང་དང༌། །ཞོ་དང་བསྐོལ་བའི་ཏིལ་མར་ནི། །འཁྲུ་བའི་ནད་ནི་སེལ་བྱེད་ཡིན། །ཤ་དང་འོ་མ་མར་ཕྱོགས་གཅིག །བཏུང་དང་འཇམ་རྩི་བསྐུར་བ་རུ། །ཏིལ་མར་འབའ་ཞིག་ཕྱོགས་གཅིག་སྦྱར། །བཤང་མཁྲེགས་གཟེར་ནི་འཇོམས་བྱེད་ཡིན། །དེ་ནི་རླུང་སེལ་མཆོག་ཡིན་ལ། །རླུང་འཁྲུགས་མ་གཏོགས་གཟེར་མི་འབྱུང༌། །ཁམས་གཞན་འཇོམས་པས་འབར་གྱུར་པ། །རླུང་ནི་རང་གནས་བརྟེན་ཁྱབ་བྱེད། །མེ་དྲོད་ཆུང་ལ་ཏིལ་མར་ནི། །སྦྱར་བས་བདེ་བར་བྱེད་པའི་མཆོག །ཏིལ་མར་བཅས་པ་རླུང་གནས་སུ། །མཁྲེགས་པ་གནས་པར་མི་འགྱུར་རོ། །དྲི་མ་ཟད་ཅིང་ན་དག་གཞན་རང་གི་ནི། །གནས་ལས་འཕོས་པས་རླུང་ནི་སྟོབས་
ཆེ་བ། །ཁོང་པ་གཟེར་ཞིང་མཁྲེགས་པར་བྱེད་པ་ལ། །ཕྱི་ནང་ཏིལ་མར་མ་བཏང་སུ་ཞིག་འཚོ། །གཞང་ན་འབྱུང་བར་གྱུར་པ་ལ། །འོ་མར་བསྐོལ་བའི་མར་རྒྱ་ཤུག །སྐྱུར་པོ་ཙང་གི་རིའི་ཁུ་བ། །ཞོ་དང་དོང་གྲར་བཏགས་པ་བླུད། །སྒྱུར་བ་དེ་ཉིད་བཅུག་པ་དང༌། །འུ་སུ་ན་ལེ་ཤམ་ཟིར། །ཁ་རུ་ཚ་དང་ཚ་བ་ལྔ། །སེ་འབྱུང་དག་དང་སྦྱར་བ་ནི། །ཞིབ་ཏུ་བཏགས་པའི་ལྡེ་གུ་ཕན། །རྩ་བ་བཅུ་པ་བསྐོལ་བ་ཡི། །ཟུར་བ་ཤུ་ཏི་རུ་རྟའམ། །ཤུ་དག་ཅི་ཏྲ་ཀ་བསྐོལ་བའི། །སྣུམ་གྱི་འཇམ་རྩི་གཏང་བར་བྱ། །མཁྲེགས་དང་གཞང་ནི་འབྱུང་བ་དང༌། །གཅིན་སྲི་རྐེད་པ་ན་བ་དང༌། །མངར་དང་སྐྱུར་བར་བསྐོལ་བ་ཡི། །མར་རམ་ཏིལ་མར་འཇམ་རྩི་གཏང༌། །གཞན་འབྱུང་གཞུག་པ་དཀའ་བ་ལ། །བསྐུ་ཞིང་དུགས་ནི་འཇམ་བྱས་གཞུག །དབུས་སུ་ཕུག་པའི་པགས་པ་ནི། །འུར་མཐིལ་འཆིང་བདག་ཀྱང་བྱ། །རྩ་བ་ལྔ་ནི་ཆེན་པོ་ཡི། །ཁུ་བ་དང་ནི་འོ་མར་བསྐོལ། །བྱི་བ་རྒྱུ་མ་བཏོན་པས་ཀྱང༌། །རླུང་འཇོམས་ལྡེ་གུ་ལྟ་བུར་བྱ། །ཏིལ་མར་བསྐོལ་གཞང་འབྱུང་བ་ལ། །བཏུང་དང་བསྐུ་བས་དེ་གསོ་བྱ། །མཁྲིས་པ་མ་ཞུ་རྣོ་དང་དྲོ། །སྤངས་ལ་སྔོམ་བཞིན་སྨྱུང་བ་བྱ། །སྐོམ་བཅས་ཡན་ལག་དྲུག་པའི་ཆུ། །རྩྭ་མཁྲིས་ཐལ་ཏྲེས་བཅས་པ་བླུད། །བཀྲེས་ན་ཁ་ཟས་ཐུག་པ་སོགས། །བྲི་ཧ་ཏི་སོགས་ཉེའུ་ཤིང་པ། །བ་ལ་རྣམ་གཉིས་པ་རིན་གཉིས། །བསྐོལ་བ་དྲོད་སྐྱེད་བྱེད་པ་ཕན། །བླུད་ཀྱང་རྗེས་སུ་འབྲེལ་གྱུར་ན། །དུག་མོ་ཉུང་ཤུན་འབྲས་བུ་དང༌། །བོང་ང་དཀར་པོ་བཅས་བཏགས་ཕྱེ། །སྦྲང་རྩི་བསྲེས་པ་འབྲས་པ་འབྲས་ཆུ་བླུད། །བ་ཐ་དུག་མོ་ཉུང་ཤུན་འབྲས། །སྐྱེར་པ་པི་པི་ལིང་རྩའམ། །བོང་ང་བིལ་བདུག་མོ་ཉུང༌། །གླ་སྒང་བ་ལེ་ཀ་བསྐོལ་བའམ། །ཡང་ན་བོང་ང་དཀར་མུར་བ། །སྐྱེར་པ་དབུལ་རྡོ་དུག་མོ་ཉུང༌། །བོང་ང་བཅའ་སྒྲ་དུག་མོ་ཉུང༌། །གླ་སྒང་ཀད་པལ་སྦྲང་རྩིར་བཅས། །དུག་མོ་ཉུང་གིས་བོན་ནི། །སྲང་གཅིག་བསྐོལ་བའི་ཁུ་བ་བླུད། །གང་ཞིག་ཤ་ཁུ་བཅས་སྦྱར་ཟ། །མཁྲིས་བཅས་ལྟོ་བའི་ནད་སེལ་འགྱུར། །དེ་བཞིན་གླ་སྒང་བསྐོལ་བའི་ཁུ། །སྦྲང་རྩིར་སྦྱར་བླུད་པས་ཕན། །ཤལ་མ་ལི་ཡི་འདབ་མའི་རྩ། །བསྐོལ་བའི་
ཁུ་བ་བསྒྲངས་པའམ། །རྩ་མཁྲིས་གླ་སྒང་དུག་མོ་ཉུང༌། །སྐྱེར་ཁཎྚ་དང་བཅས་པའམ། །ཡང་ན་སྐྱེར་པ་བ་ལེ་ཀ །བི་ལ་བའི་རྐང་དང་བྱི་ཚོར་བ། །ཏིལ་དང་སེང་ཕྲོམ་མོན་ཆ་ར། །བཙོད་དད་པདྨ་ཨུཏྤལ། །དོང་གྲ་ད་ཏ་ཀའི་མེ་ཏོག །སེ་འབྲུའི་ཤུན་པ་ཨུཏྤལ་བཅས། །ཚིགས་བཅད་ཕྱེད་ཀྱིས་བཤད་སྦྱོར་བ། །སྦྲང་རྩིར་བཅས་པ་འབྲས་ཆུ་བླུད། །སྐྱེར་པ་སེང་ཕྲོམ་དུག་མོ་ཉུང༌། །སུག་སྨེལ་བསྐོལ་བས་སྨིན་འཁྲུ་སེལ། །སེང་ཕྲོམ་དང་ནི་ཨ་བརྟ། །པྲི་ཡང་ཀུ་སོགས་སྡེ་ཚན་དང༌། །བསྐོལ་བ་སོ་སོར་བླུད་དེ་བཞིན། །པུ་ཙེ་ཤེལ་དང་ཤིང་མངར་དང༌། །སེ་འབྲུའི་མྱུ་གུ་པྲི་ཡང་ཀུ། །ཞོ་དང་འུ་སུའི་འབྲས་བུར་བཅས། །ཐུག་པ་སྡེ་གསུ་སྦྱར་དུགས་བྱ། །དེ་བཞིན་བིལ་བ་ཀ་པིད་ཐ། །ཨ་མྲ་འདམ་བུའི་རྐང་ལས་སྦྱར། །སྨིན་པའི་ཁུ་བར་རའི་འོ་མ། །མཆོག་ཏུ་ཕན་ཏེ་དེས་ཀྱང་ནི། །སྟོབས་ལྡན་ནད་གཞི་ཆེ་བའི་ཕྱིར། །མ་ཞིན་ནི་བཀྲུ་སྨན་གཏང༌། །རིམ་གྱིས་བཤད་པ་ཁྲག་དག་ཏུ། །གང་ཞིག་འཁྲུ་བར་གྱུར་པ་ལའང༌། །པ་ལ་ཤ་ཡི་འབྲས་བུ་ཡི། །ཁུ་བ་དང་སྦྱར་འོ་མ་བླུད། །དེ་ནས་འོ་མ་དྲོ་འཇམ་ཙམ། །ཉམས་སྟོབས་ཇི་བཞིན་བླུད་པར་བྱ། །དེས་ནི་དྲི་མ་བསལ་བས་ན། །ལྟོ་ཡི་ནད་ནི་ཞི་བར་འགྱུར། །ཀྱི་ལྕེ་བ་ཡི་སྦྱང་བ་ཡང༌། །པ་ལ་ཤ་ལྟར་སྦྱོར་བ་བྱ། །ཐུག་སོགས་རིམ་པ་བྱས་ཀྱང་ནི། །གལ་ཏེ་གཟེར་ནི་མ་ཞི་ན། །ཉེས་བསལ་དེ་ལ་མེ་དྲོད་སྟོབས། །ལས་དཔགས་འཇམ་རྩི་མྱུར་དུ་གཏང༌། །ཤ་ཏ་པུཥྤ་ཉེ་ཤིང་དང༌། །བིལ་བ་དང་ནི་ཤིང་མངར་དག །མར་འོ་ཏིལ་མར་བཞི་ཆར་བཅས། །བསྐོལ་བ་འཇམ་རྩིའི་སྨན་མར་ཡིན། །དེས་ནི་ཚ་འཁྲུ་མ་ཞི་ན། །སྤྱི་བག་འཇམ་རྩི་མཆོག་ཏུ་ཕན། །ཤལ་མ་ལི་ཡི་ལོ་མ་རློན། །ཀུ་ཤ་རློན་པས་དཀྲིས་ནས་ནི། །ས་ནག་ལྡེ་གུ་བསྐུས་ནས་སུ། །ལྕི་བ་སྐམ་པོའི་མེ་ནང་བསྲེགས། །འཇིམ་པ་ལུས་པ་དེ་བཀོག་སྟེ། །གོང་པོ་དེ་ལས་སྲང་གཅིག་ཙམ། །འོ་མ་བྲེ་གང་ནང་དུ་མཉེ། །བཙགས་ལ་དངགས་མར་རྒྱ་སྤོས་དང༌། །ཤིང་མངར་སྦྲང་རྩི་ལྡེ་གུ་མར། །ཏིལ་མར་ལྡན་པས་འཇམ་རྩི་བྱ། །ཁྲུས་བྱས་འོ་མ་འབྲས་ཆན་སྦྱིན། །ཡང་ན་སྐམ་སའི་ཤ་ཁུ་སྦྱིན། །
མཁྲིས་པའི་ཚད་འཁྲུ་རིམས་དང་འོར་ནད་སྐྲན། །རླུང་ནད་ཁྲག་དང་ཕོ་བའི་ནད་སེལ་ཞིང༌། །འདི་དག་བཀྲུ་སྨན་མས་གཏོང་དྲག་པོ་ཡི། །སྦྱོར་བྱས་དྲག་ཏུ་འབྱུང་བའང་མྱུར་ཞི་བྱེད། །དུག་མོ་ཉུང་ནི་བུ་རམ་ཕྲན། །ལྟར་བསྐོལ་དུག་མོ་ཉུང་སོགས་སྡེ། །ཨ་བརྟ་སོགས་སྦྲང་རྩིར་བཅས། །ལྡེ་གུས་འཁྲུ་བ་ཐམས་ཅད་སེལ། །སྨིན་ཅིང་ནད་མེད་མེ་དྲོད་ཆེ། །ཁྲག་དང་བཅས་པ་རིང་ནས་འཁྲུ། །སྣ་ཚོགས་མདོག་ཏུ་འཁྲུ་འགྱུར་བ། །སྨན་ཐུམ་བཙོས་པ་སྦྱར་བར་བྱ། །ཀད་ཕ་ལ་ཡི་ཤུན་ལྡེ་གུ། །བིལ་བའི་ལོ་མས་དཀྲིས་ནས་ནི། །འཇིམ་པས་བསྐུས་ཏེ་མེ་ནང་བསྲེགས། །ཁུ་བ་བཙིར་ལ་བསྒྲངས་པ་ནི། །སྦྲང་རྩིའམ་ཁར་ར་བཅས་པ་རུ། །འཁྲུ་བ་ཅན་ལ་ཅི་རིགས་བླུད། །དེ་བཞིན་འོ་མ་ཅན་ཤིང་ཀུན། །དེ་ཡི་མྱུ་གུ་ལས་ཀྱང་བྱ། །འཁྲི་ཤིང་ཤུན་པ་མར་དང་བཅས། །བསྐོལ་བའི་རླངས་པས་བཙོས་པ་ནི། །སྦྲང་རྩི་བཅས་པ་ཚལ་འཁྲུ་བ། །སྟོབས་ཅན་དྲག་ཏུ་འབྱུང་བའང་སེལ། །མཁྲིས་པའི་འཁྲུ་བ་ཅན་གྱིས་ནི། །མཁྲིས་པ་སྐྱེད་བྱེད་གང་བསྟེན་པ། །དེ་ཡིས་མཁྲིས་པ་འཁྲུགས་གྱུར་ནས། །ཁྲག་གི་ཚད་འཁྲུ་སྐོམ་དད་རིམས། །འདེབས་ཤིང་གཞང་ཁ་མི་བཟད་འདྲུལ། །པདྨ་ཨུཏྤལ་ས་མང་ག །མོན་ཆ་རས་བསྐོལ་བ་ཡི། །ར་ཡིའོ་མ་དེ་ལ་ཕན། །ཐལ་ཏྲེས་ཤིང་མངར་སེང་ཕྲོམ་མམ། །ནྱ་གྲོ་དྷ་སོགས་མྱུ་གུ་དང༌། །སྦྲང་རྩི་ཁ་རར་བཅས་པ་ནི། །བཏུང་བའམ་གཞང་ཁང་བླུགས་པས་ཕན། །དེ་བཞིན་ཤ་ཁུ་སོགས་སྐྱོན་མེད། །མར་བཅས་བསྒྲངས་པའི་ཟས་སྒོམ་ཕན། །ཏང་པ་ལ་འབྲས་བུའི་ཁུ་བ་ནི། །ཅུང་ཟད་སྐྱུར་ཞིང་ཀ་རར་བཅས། །ར་ཡི་འོ་མ་ཆུ་ཕྱེད་དང༌། །ཨུཏྤལ་དོང་གྲ་བ་ལེ་ཀ །ཀྲྀཥྞ་པརྞི་ཁུ་བར་བཅས། །ཐུག་པས་ཁྲག་གི་ཚད་འཁྲུ་སེལ། །ཟས་ཀྱི་སྔོན་དུ་མར་སར་ནི། །སྦྲང་རྩི་ཁ་རར་སྦྱར་བ་བལྡག །ཁྲག་འཁྲུ་ཚ་བས་ཆེ་ལ་རའམ། །རི་དགས་ཁྲག་གི་མར་བརྡོས་སྤྱིན། །འོ་མ་དང་བཅའ་འོ་མ་བཏུང༌། །འོ་མ་བསྲུབས་མར་ཞག་གསུམ་བསྟེན། །ཡང་ན་གོང་མ་སྲེག་གི་ནི། །ཤ་ཁུ་དང་ཟོས་ནད་མེད་འགྱུར། །ཉེ་ཤིང་བཏགས་པ་
འོ་མ་དང༌། །ལྷན་ཅིག་བླུད་ཅིང་འོ་མར་བཟའ། །ཡང་ན་དེ་དང་བསྐོལ་བ་ཡི། །མར་གྱིས་ཚད་འཁྲུ་མྱུར་དུ་སེལ། །རྒྱ་སྐྱེགས་བཅའ་སྒ་པི་པི་ལིང༌། །སྐྱེར་པའི་ཤུན་པ་པུ་ཙེ་ཤེལ། །དུག་མོ་ཉུང་དང་བཅས་བསྐོལ་མར། །ཐུག་སླ་ཐུག་པ་དང་སྦྱར་བས། །ནད་གཞི་གསུམ་ལས་བྱུང་བ་ཡི། །མི་ཟད་འཁྲུ་བའང་མྱུར་དུ་སེལ། །ས་ནག་དུང་དང་ཤིང་མངར་དང༌། །སྦྲང་རྩིར་ཁྲག་འབྲས་ཆུ་བླུད། །ཁྲག་གིས་འཁྲུ་བ་སེལ་བར་བྱེད། །པྲི་ཡང་ཀུ་དང་སྦྲང་རྩི་འང་ཕན། །ཏིལ་ནག་བཏགས་པའི་ལྡེ་གུ་དང༌། །ཤ་ཁར་ནི་ཆ་ལྔ་ནི། །ར་ཡི་འོ་མ་སྦྱར་བ་བླུད། །འཕྲལ་དུ་ཁྲག་ཏུ་འཁུ་བ་སེལ། །ཁ་ར་སྦྲང་རྩི་ཙནྡན་བཅས། །འབྲས་ཀྱི་ཆུ་དང་བླུད་ན་ནི། །ཁོང་ཚ་སྐོམ་དང་གཅིན་ནད་དང༌། །ཁྲག་ཏུ་འཁྲུ་ལས་ཐར་བར་འགྱུར། །གཞང་ཁ་ཚ་ཞིང་འདྲུལ་བ་ལ། །བསིལ་བའི་སྨན་གྱིས་བླུགས་ཤིང་བསྐུ། །གང་ཚེ་ཡང་དང་ཡང་དུ་འཁྲུ། །ཁྲག་ཉུང་གཟེར་དང་བཅས་པར་འཁྲུ། །རླུང་གིས་གགས་ནི་བྱས་གྱུར་པས། །སྐབས་འབྱུང་བའམ་མི་འབྱུང་བྱེད། །དེ་ཚེ་དེ་ལ་སྤྱི་བག་ནི། །འཇམ་རྩི་སྔར་བཤད་གཏང་བར་བྱ་།ཀར་བུ་དར་ཤིང་ཤ་པ། །ལ་སོགས་ལོ་མ་ཆམ་ཆོམ་བརྡུངས། །ནས་དང་བསྐོལ་བའི་ཁུ་བ་དེ། །མར་དང་འོ་མ་བཅས་པར་བསྐོལ། །སྤྱི་བག་འཇམ་རྩི་བཏང་ན་ནི། །བེ་སྣབས་འཁྲུ་དང་གཞང་འབྱུང་དང༌། །མཁྲེགས་པའི་ནད་རྣམས་སེལ་བྱེད་ཅིང༌། །སྐེམ་པོ་སྟོབས་ནི་སྐྱེད་པར་བྱེད་།སྟག་ཚེར་བ་དང་བསྐོལ་བ་ཡི། །མར་གྱི་འཇམ་རྩི་གཏང་བར་བྱ། །དང་པོར་བཤང་བ་ཁྲག་འདྲེས་འབྱུང༌། །ཡང་ན་ཕྱིས་ནི་འཁྲུ་གྱུར་པ། །དེ་ལ་ཉེ་ཤིང་བསྐོལ་བའི་མར། །ལྡེ་གུའི་དོན་དུ་སྦྱར་བར་བྱ། །ཁ་ར་ཆ་ཕྱེད་དང་སྦྱར་ལ། །སྦྲང་རྩི་བཞི་ཆ་བཅུག་པ་ཡི། །མར་སར་ཕན་པའི་ཟས་ཟོས་ན། །ནད་དེ་མྱུར་དུ་སེལ་བར་འགྱུར། ཨུ་དུམ་ཝཱ་ར་ནྱ་གྲོ་དྷ། །ཨ་ཤྭདྠ་ཡི་མྱུ་གུ་ནི། །བརྡུངས་ཏེ་ཞག་གཅིག་ཆུ་ནང་སྤངས། །མཉེས་ཏེ་བཙགས་པར་མར་བསྐོལ་ལ། །ཁ་ར་དེ་ཡི་ཕྱེད་བཏབ་ཅིང༌། །སྦྲང་རྩི་བཞི་ཆ་བཏབ་སྟེ་བླུད། །གང་ཞིག་ཁྲག་ནི་ཐུར་དུའམ། །གྱེན་དུ་འབྱུང་བར་བྱེད་ལ་སྦྱིན། །བད་ཀན་
འཁྲུ་བ་རླུང་བཤད་པའི། །མ་ཞུ་སྨིན་བྱ་མཆོག་ཏུ་བྱ། །རྗེས་སུ་འབྲེལ་པ་དེ་ལ་ནི། །བིལ་བ་གཞོན་ནུ་གླ་སྒང་དང༌། །ཨ་རུ་ར་དང་བཅའ་སྒ་བསྐོལ། །སྨིན་ཅིང་མེ་དྲོད་སྐྱེད་པ་བླུད། །ཤུ་དག་དོང་གྲ་བྱི་དང་ག །བུ་ཏི་ཀ་དང་ཐང་ཤིང་དང༌། །པི་པི་ལིང་གཉིས་ཀྲུ་ཏྲུག་ཏྲེས། །པི་པི་ལིང་གི་རྩ་བའམ། །པ་ཏ་ཅི་ཏྲ་དུག་མོ་ཉུང༌། །ཤུ་དག་པི་པི་ལིང་རྩ་བ། །པུ་ཙེ་ཤེལ་དང་ཨ་རུ་ར། །བསྐོལ་བའམ་ཡང་ན་བཏགས་པ་སྦྱིན། །བད་ཀན་ཚད་པར་འཁྲུ་སྨན་བླུད། །ཁ་རུ་ཚ་དང་ཚ་བ་གསུམ། །ཤུ་དག་ཤིང་ཀུན་བོང་ང་དཀར། །ཨ་རུ་ར་ཡི་ཆུ་ཚན་བཅས། །བད་ཀན་འཁྲུ་བས་ཉེན་ལ་བླུད། །ཀ་པིད་ཏ་ཡི་རྐང་དང་ནི། །ཚ་གསུམ་སྦྲང་རྩི་ཤ་ཁ་རའམ། །ཀད་ཕ་ལ་དང་སྦྲང་རྩིར་བཅས། །ལྟོ་ཡིན་ནད་ནི་སེལ་བྱེད་ཡིན། །པི་པི་ལིང་དང་སྦྲང་རྩིར་བཅས། །ཙི་ཏྲ་ཀ་དང་དར་བར་བཅས། །བིལ་བ་གཞོན་ནུ་བྱིན་ན་ཡང༌། །འཁྲུ་བའི་ནད་ནི་སེལ་བྱར་བྱེད། །པ་ཏ་གླ་སྒང་མོན་ཆ་ར། །བིལ་བ་དོང་གྲ་ད་ཏ་ཀའམ། །བུ་རམ་དར་བར་བཅས་པ་ཡིས། །འཁྲུ་བ་ཤིན་ཏུ་གསོ་དཀའ་འང་སེལ། །པི་པི་ལིང་རྩལ་ལ་ཕུད། །དྲི་བཟང་བཞི་དང་དོང་གྲ་དང༌། །ན་ལེ་ཤམ་དང་ཀྲུ་ཏྲུག་ཏྲེས། །འུ་སུ་ཟི་ར་ལེ་ཀ །ཁ་རུ་ཚ་རྣམས་ཆ་མཉམ་དང༌། །ད་ཏྲིག་དང་ནི་ད་ཏ་ཀི། །བིལ་བ་དང་ནི་པི་པི་ལིང༌། །སེ་འབྲུ་དང་ནི་ལ་ལ་ཕུད། །སུམ་འགྱུར་ཀ་ར་དྲུག་འགྱུར་དང༌། །ཀ་པིད་ཏ་ནི་བརྒྱད་འགྱུར་བྱས། །ཕྱེ་མས་ཚད་འཁྲུ་ཕོ་བའི་ནད། །ཟད་བྱེད་སྐྲན་དང་ལྐོག་མའི་ནད། །ལུད་པ་དབུགས་མི་བདེ་དྲོད་ཉམས། །གཞང་འབྲུམ་ཆམ་པ་ཡི་ག་འཆུས་སེལ། །སྨིག་རྐང་དང་ནི་དྲི་སྣ་བཞི། །ཞོ་ནི་གཉིས་གཉིས་ལ་ལ་ཕུད། །འུ་སུ་ཟིར་ཞོ་བཞི་བཞི། །པི་པི་ལིང་རྩ་ཚ་བ་གསུམ། །སྲང་ནི་རེ་རེ་སེ་འབྲུ་དང༌། །ཁ་ར་སྲང་བརྒྱད་གཅིག་སྦྱར་འདི།།ཕྱེ་མ་སེ་འབྲུ་བརྒྱད་པ་ཡིན། །ཡོན་ཏན་གོང་མ་དག་དང་འདྲ། །ཁ་ཟས་རླུང་གིས་འཁྲུ་བར་བཤད། །སྦྱར་ཐུག་ལ་སོགས་ཅི་རིགས་སྤྱིན། །ན་ལེ་ཤམ་དང་བྱི་དང་ག །ཀ་པིད་ཏ་དང་དོང་གྲར་བཅས། །ཙང་གི་རི་དང་རྒྱ་ཤུག་སྐྱུར། །སྦྱར་ཐུག་བད་ཀན་འཁྲུ་
བ་སེལ། །བད་ཀན་ཟད་ལ་སྔར་བཤད་པའི། །རྒྱ་སྐྱེགས་ལ་སོགས་སྲང་དྲུག་པ། །ནས་ཐུག་དང་ནི་བསྲེས་པ་ཡི། །མར་ནི་རྙིང་པ་སྦྱིན་པར་བྱ། །རླུང་དང་བད་ཀན་གྱིས་བཀག་པ། །བད་ཀན་ཤས་ཆེར་འཁྲུ་བའམ། །གཟེར་ཞིང་མཁྲེགས་པར་བྱེད་པ་ལ། །སྤྱི་བག་འཇམ་རྩི་བསྔགས་པ་ཡིན། །ཤུ་དག་བིལ་བ་པི་པི་ལིང༌། །རུ་རྟ་ཤུ་ཏི་རྒྱམ་ཚར་བཅས། །བིལ་བའི་མར་རམ་ཏི་ལམ་ནི། །ཤུ་དག་སོགས་དང་བསྐོལ་བ་གཏང༌། །བད་ཀན་རླུང་གིས་ཤས་ཆེར་གཟེར་།ཅུང་ཟད་དྲོ་བའི་འཇམ་རྩི་གཏང༌། །བད་ཀན་ཟད་ཅིང་ཡུན་རིང་དུ། །འཁྲུ་ཞིང་ཉམ་ཆུང་གྱུར་པ་ན། །རླུང་ནི་ངེས་པར་སྟོབས་ཆེ་བ། །རང་གི་གནས་ན་བརྟེན་དེ་སྐྱེ། །དེ་སྟོབས་ཆེ་བས་འཕྲལ་གསོད་བྱེད། །དེ་ཕྱིར་དེ་ནི་མྱུར་དུ་གསོ། །རླུང་གི་རྗེས་ལ་མཁྲིས་པ་སྟེ། །མཁྲིས་པའི་རྗེས་ལ་བད་ཀན་ནི། །གསོ་བའམ་གསུམ་ལས་དང་པོ་ནི། །གང་ཞིག་ཤས་ཆེར་གྱུར་པ་གསོ། །འཇིགས་དང་མྱ་ངན་དག་ལས་ཀྱང༌། །མྱུར་དུ་འཁྲུགས་པས་དེ་ཕྱིར་དེར། །རླུང་བསལ་བ་ཡི་གསོ་བ་དང༌། །དབུགས་དབྱུང་བ་དང་དགའ་བར་བྱ། །གང་ཞིག་གཅིན་མེད་ཕྱི་ས་དང༌། །འཕྱེན་ནི་འབྱུང་བར་འགྱུར་བ་དང༌། །མེ་དྲོད་ཆེ་ཞིང་ལྟོ་བ་ཡང༌། །དེ་ཡི་ཁོང་ནད་ཞི་བ་ཡིན། །ཡན་ལག་བརྒྱད་པའི་སྙིང་པོ་བསྡུས་པ་ལས། །གསོ་བའི་གནས་ལས་ལེའུ་དགུ་པའོ།། །།དེ་ནས་ཕོ་བའི་ནང་གསོ་བའི་ལེའུ་བཤད་པར་བྱའོ། །ཕོ་བ་ལ་ནི་བརྟེན་པའི་ནད། །མ་ཞུ་བ་ལྟར་གསོ་བར་བྱ། །འཁྲུ་བར་བཤད་པའི་ཆོ་ག་ཡིས། །དེ་ཡི་མ་ཞུ་སྨིན་པར་བྱ། །ཟས་ཀྱི་དུས་སུ་ནད་དུག་སོགས། །ཚ་བ་ལྔ་སོགས་ལྡན་པ་དང༌། །ཚ་བྲོ་ཡང་བའི་ཁ་ཟས་དང༌། །གཞན་ཡང་དྲོད་སྐྱེད་སྦྱོར་བ་སྦྱིན། །མ་ཞུར་ཐུག་པ་བོང་ང་དཀར། །བཅའ་སྒ་སྐྱུར་དང་བཅས་པ་སྦྱིན། །བཏུང་བར་འཁྲུ་བ་ལས་བཤད་བའི། །ཆུ་དང་དར་བ་ཆང་སོགས་བླུད། །ཕོ་བའི་ནད་ལ་དར་བ་ནི། །དྲོད་སྐྱེད་འཁྲུ་གཅོད་ཡང་བས་ན། །ཕན་ཏེ་ཞུ་རྗེས་མངར་བའི་ཕྱིར། །མཁྲིས་པ་སྐྱེད་པར་མེ་བྱེད་དོ། །བསྐ་ཞིང་དྲོ་ལ་སྦྱོང་བྱེད་དང༌། །རྩུབ་ཅིང་བད་ཀན་ལ་ཡང་ཕན།
མངར་སྐྱུར་ཁ་བས་རླུང་ལ་ཕན། །བསྲུབས་མ་ཐག་ཏུ་ཚ་མི་སྐྱེད། །སྐྱུར་བ་བཞི་པོ་བྲེ་གང་དང༌། །ཚ་བ་གསུམ་ནི་སྲང་གསུམ་དང༌། །རྒྱ་ཚ་སྲང་བཞི་ཁ་ར་ནི། །སྲང་བརྒྱད་ཕྱེ་མར་བྱས་པ་ནི། །ཚོད་མ་སྲན་ཚོད་བཏུང་བ་སོགས། །བཏུང་ངོ་དྲུག་སོགས་ལ་ཡང་གདབ། །མ་ཞུ་ལུད་པ་དབུགས་མི་བདེ། །ཡི་ག་འཆུས་དང་སྐྲན་མཆིན་པ། །ཕོ་བ་སྙིང་ནད་སྐྱ་རྦབ་འཇོམས། །དོང་གྲ་གླ་སྒང་བོང་ང་དཀར། །བསྐོལ་བ་མ་ཞུ་སེལ་བྱེད་བླུད། །དེ་ཡི་ལྡེ་གུ་ཆུ་ཚན་ནམ། །བཅའ་སྒ་འམ་ཨ་རུ་ར་བཅས་བླུད། །ཤུ་དག་ལ་སོགས་རྒྱམ་ཚར་བཅས། །ཡང་ན་ཆང་དང་སྦྱར་བ་བླུད། །བཤང་བ་མ་སྨིན་འཁྲུ་བཅས་ལ། །སེ་འབྲུའི་ཆུ་དང་བཅས་པ་ཡི། །བིལ་བ་དོང་གྲ་ཙི་ཏྲ་ཀ །ཁ་རུ་ཚ་ནི་བཏབ་པ་སྦྱིན། །བང་ཀན་རླུང་གྱུར་བེ་སྣབས་ཅན། །ཁོང་པ་གཟེར་ལ་དུག་མོ་ཉུང༌། །ཤིང་ཀུན་བོང་ང་ཁ་རུ་ཚ། །ཤུ་དག་ཨ་རུ་ར་ཆུ་དྲོན། །སྐྱུགས་པའི་རྗེས་ལ་གཟེར་ཞིང་བསྒོངས། །ཨ་རུ་ར་དང་ཁ་རུ་ཚ། །ཟི་ར་ན་ལེ་ཤམ་བཅས་ཕྱེ། །ཆུ་དྲོན་དང་ནི་བཅས་པ་བླུད། །དོང་གྲ་པ་ཏ་པི་པི་ལིང༌། །ཐལ་ཏྲེས་བྲི་ཧ་ཏི་གཉིས་དང༌། །དུག་མོ་ཉུང་དང་ཙི་ཏྲ་ཀ །ཚ་བ་རྣམ་ལྔ་ཐལ་སྨན་གཉིས། །ཕྱེར་བཏགས་ཆང་ཞོ་དེའི་དངས་མ། །ཆུ་དྲོན་རང་སྐྱུར་དག་ལ་བླུད། །དེས་ནི་མེ་དྲོད་འཕེལ་བྱེད་ཅིང༌། །ཁོང་པའི་རླུང་ནི་སེལ་མཆོག་ཡིན། །ལན་ཚྭ་ལྔ་དང་ཐལ་སྨན་གཉིས། །ཚ་བ་ལྔ་དང་ན་ལེ་ཤམ། །ལ་ལ་ཕུད་དང་ཤིང་ཀུན་ལས། །སྐྱུར་རྩི་ཆེན་པོ་འམ་སེ་འབྲུ་འམ། །རྒྱ་ཤུག་ཁུ་པས་རི་ལུ་བྱས། །སྨིན་དང་དྲོད་སྐྱེད་བྱེད་མཆོག་ཡིན། །བལ་བུའི་ལོ་མ་དབྱི་མོ་དང༌། །པི་པི་ལིང་ནི་སྲང་རེ་དང༌། །པི་པི་ལིང་དང་དེ་རྩ་སྲང༌། །གཉིས་གཉིས་བཅའ་སྒ་སྲང་གསུམ་དང༌། །དྲི་སྣ་གསུམ་དང་པུ་ཤེལ་ཙེ། །ཞོ་ནི་གཉིས་གཉིས་ཕྱིར་ཞིབ་བཏགས། །བུ་རམ་སུམ་འགྱུར་དག་གིས་ནི། །རི་ལུ་བྱས་པ་རྟག་ཏུ་བཟའ། །དེ་རྗེས་ཡུ་ཤ་ཤ་ཁུ་དང༌། །ཆང་རྙིང་འོ་མ་ཞོ་ག་ཆུ། །ཐུག་པ་བླུད་ན་རླུང་དང་ནི། །བད་ཀན་ལས་གྱུར་སློན་བྲོ་དང༌། །ཕོ་བ་རྩིབ་ལོགས་སྙིང་ག་ན། །རིམས་དང་འོང་ནང་སྐྱ་རྦབ་དང༌། །སྐྲན་
དང་ཆང་ནད་གཞང་འབྲུམ་དང༌། །ཆམ་པ་མཆིལ་མ་དབུགས་མི་བདེ། །ལུད་པ་རྣམས་ནི་འཇོམས་པར་བྱེད། །བཤང་བ་འགགས་དེ་ཉིད་ནི། །བཅའ་སྒའི་གོང་དུ་ཨ་རུ་ར། །བཅུག་སྟེ་དེ་ལ་སྦྱིན་པར། །མཁྲིས་གྱུར་སློན་བྲོ་ལ་སོགས་ལ། །ཁ་ར་བཞི་འགྱུར་བཅས་པ་ནི། །བསྐོལ་བ་ལས་ནི་རི་ལུར་བྱས། །ཡང་ན་བུ་རམ་ཁ་རར་བཅས། །མེ་དང་འཕྲད་པར་གྱུར་པ་ལས། །དེ་ནི་མཆོག་ཏུ་ཡང་བར་འགྱུར། །དེ་ནས་འདི་ནི་མ་ཞུ་སྨིན། །རླུང་ལས་གྱུར་པའི་ཕོ་ནད་ལ། །དྲོད་སྐྱེད་སྨན་དང་བཅས་པ་དང༌། །མར་ནི་ཉུང་ཟང་ཉུང་ཟད་བླུད། །མེ་དྲོད་ཆུང་ཞིང་སྐྱེས་གྱུར་ནས། །བཤང་གཅི་རླུང་ནི་འགགས་གྱུར་ན། །ཞག་ནི་གཉིས་གསུམ་སྣུམ་བཏང་དུགས། །བསྐུ་བྱས་མས་གཏོང་དྲག་པོ་བྱ། །དེ་ནས་ཨེ་རྞྜ་ཡི་མར། །སེང་ཕྲོམ་གྱི་ནི་མར་དང་ནི། །ཐལ་སྨན་ངག་གིས་རླུང་ཞི་ནས། །གཡོས་པའི་ནད་ལ་བཀྲུ་སྨན་གཏང༌། །སྦྱངས་ནས་ཁོང་པ་རྩུབ་གྱུར་ཏེ། །བཤང་བ་འགགས་ལ་འཇམ་རྩི་ནི། །དྲོད་སྐྱེད་སྐྱུར་ཞིང་རླུང་འཇོམས་པའི། །སྨན་བཙོས་ཏིལ་མར་དེ་ལ་གཏང༌། །དེ་ལྟར་བཀྲུ་སྨན་དྲག་བཀྲུ་སྨན། །འཇམ་རྩི་ཆོག་བཞིན་བྱས་ལ། །ཁ་ཟས་ཡང་བ་དང་ལྡན་པའི། །ཞུན་མར་སླར་ཡང་བསྟེན་པར་བྱ། །རྩ་བ་ལྔ་དང་ཚ་བ་གསུམ། །ཨ་རུ་ར་དང་ལྕེ་མྱང་ཚ། །ར་སྣ་པི་པི་ལིང་རྩ་བ། །ཐལ་སྨན་རྣམ་གཉིས་ཟི་ར་དང༌། །བྱི་དང་ག་དང་ཟུར་པ་མར། །ཚ་དང་སྐྱུར་རྩི་ཆེན་པོ་ཡི། །ཁུ་བ་དང་ནི་སྒེའུ་གཤེར་དང༌། །ལ་ཕུག་སྐམ་པོ་རྒྱ་ཤུག་སྐྱུར། །སེ་འབྲུ་ཙུག་ཀྲི་ཀའི་ཁུ་བ། །དར་བཞོ་དང་ཆང་དངས་དང༌། །རྩ་བ་མོ་དངས་མ་རྩ་བ་མོ་དང༌། །སྐྱུར་རྩ་བས་དང་ནི་དེ་བསྐོལ་བ། །མེ་དྲོད་སྐྱེད་པའི་དམ་པ་ཡིན། །གཟེར་དང་སྐྲན་དང་དམུ་རྫིང་དང༌། །ལུད་པ་དབུགས་མི་བདེ་བ་དང༌། །རླུང་དང་བད་ཀན་འཇོམས་པར་བྱེད། །ཡང་ན་སྐྱུར་རྫི་ཆེན་པོ་ཡི། །ཁུ་བར་བསྐོལ་བའི་མར་བླུད་བྱ། །འདི་ཡི་ཏིལ་མར་བསྐོལ་བ་ཡིས། །བསྐུ་བྱུག་བྱས་ན་རླུང་སེལ་ཏོ། །རླུང་དང་བད་ཀན་མ་འདྲེས་ཞུའམ། །བད་ཀན་རླུང་ཤས་ཆེ་བ་ལ། །སྨན་ནི་འདི་དག་ཉིད་ཀྱི་ཕེ། །ཆུ་དྲོན་སྦྱར་བ་བླུད་པར་བྱ། །མཁྲིས་པས་མེ་དྲོད་ཉམས་གྱུར་པ། །བཀྲུ་
སྨན་དག་གམ་སློན་སྨན་གཏང༌། །ཁ་དང་ཡང་དང་འཁྲུ་གཅོད་དང༌། །ཚ་མི་སྐྱེད་པས་དྲོད་བསྐྱེད་བྱ། །ཕྱེ་མ་སྣུམ་དང་ཁ་བ་ཡིས། །མེ་དྲོད་ཉེ་བར་བསྐྱེད་པར་བྱ། །པ་ཏོ་ལ་དང་ཀྱི་ལྕེ་བ། །ནིམ་པ་པུ་ཙེ་ཤེལ་རྩ་མཁྲིས། །པར་པ་ཏ་དང་དུག་མོ་ཉུང༌། །ཤུན་ལྤགས་འབྲས་བུ་མུ་རབ་དང༌། །ཤི་ཀྲུ་མངར་པོའི་འབྲས་བུ་དང༌། །ཤུ་དག་སྐྱེར་པའི་ཤུན་ལྤགས་དང༌། །ཤུག་པ་དང་ནི་པུ་ཤེལ་ཙེ། །ཙནྡན་གླ་སྒང་ལས་ཕུད། །ས་ནག་བོང་ང་ཚ་བ་གསུམ། །ཤིང་ཚ་སུག་སྨེལ་ཐང་ཤིང་དང༌། །གནྡྷ་བྷ་དྲའི་ཕྱེ་མ་ནི། །སྦྲང་རྩིའི་ལྡེ་གུར་བྱས་བཟའ་བའམ། །ཆང་ངམ་ཆུ་དང་སྦྱར་འཐུངས་ན། །སྙིང་ནད་སྐྱ་རྦབ་ཕོ་བའི་ནད། །སྐྲན་གཟེར་རིམས་ནད་ཡིག་འཆུས། །མིག་སེར་འདུས་པའི་ནང་དང་ནི། །ཁ་ཡི་ནད་རྣམས་འཇོམས་པར་བྱེད། །རྩ་མཁྲིས་གླ་སྒང་པུ་ཙེ་ཤེལ། །ཚ་བ་གསུམ་དང་དུག་མོ་ཉུང༌། །ཙི་ཏྲ་ཀ་ནི་ཆ་གཉིས་དང༌། །དུག་མོ་ཉུང་གི་ཤུན་སྤགས་ནི། །བཅུ་དྲུག་ཆ་སྦྱར་ཞིབ་ཏུ་བཏགས། །དེ་ནི་བུ་རམ་ཆུ་གྲང་བླུད། །ཕོ་བའི་ནད་དང་སྐྲན་སེལ་ཞིང༌། །མིག་སེར་སྐྱ་རྦབ་རིམས་ཀྱི་ནད། །ཡི་ག་མཆུས་དང་མཁྲུ་བ་འཇོམས་།དོང་གྲ་བོང་ང་གླ་སྒང་དང༌། །པ་ཏ་བི་ལ་བ་སྐྱེར་ཁཎྜ། །དུག་མོ་ཉུང་གིས་པོ་ན་དང༌། །ཏིག་ཏ་ད་ཏ་ཀའི་མེ་ཏོག །ཕྱེ་མར་བཏགས་ལ་སྦྲང་རྩིར་སྦྱར། །འབྲས་བུ་བཀྲུས་ཆུ་དང་བླུད་ན་ནི། །མཁྲིས་པ་ལས་གྱུར་ཕོ་བའི་ནད། །མཁྲེགས་འཁྲུགས་གཞང་འབྲུམ་གཞང་ཁ་ན། །ཁྲག་ཏུ་འཁྲུ་བ་དག་ལའང་ཕན། །ཙནྡན་ཤུག་པ་པུ་ཤེལ་ཙོ། །པ་ཏ་མུར་བ་བླ་བ་དང༌། །ཤུ་དག་ཐལ་ཏྲེས་དབྱི་མོ་དང༌། །ལོ་མ་བདུན་པ་བ་ཤ་ཀ །པ་ཏོ་ལ་དང་ནྱ་གྲོ་དྷ། །ཨུ་དུམ་ཝའ་ར་ཨ་ཤྭ་དྠ། །པླག་ཤ་ཀ་པི་ཏ་ན་དང༌། །ཕུ་ཙེ་ཤེལ་དང་ལི་ག་དུར། །ནིམ་པ་སྲང་ནི་གཉིས་གཉིས་ལ། །ཆུ་བྲེ་བཅུ་དྲུག་བསྐོལ་བ་དེར། །ཀི་ར་ཏིག་ཏ་དུག་མོ་ཉུང༌། །ར་མཉེ་ཨུཏྤལ་པི་པི་ལིང༌། །བསྐོལ་བ་དེ་འཐུངས་མཁྲིས་པ་ཡི། །ཕོ་བའི་ནད་ལ་བླུད་པར་བྱ། །མཛེར་བཤད་ཏིག་ཏའི་མར་ཡང་བླུད། །བད་ཀན་ལས་གྱུར་ཕོ་བའི་ནང༌། །སློན་སྨན་རྣོན་པོས་སློན་བྱས་ན། །ཚ་སྐྱུར་ལན་ཚྭ་ཐལ་སྨན་གྱིས། །རིམ་
གྱིས་མེ་དྲོད་སྐྱེད་པར་བྱེད། །ཚ་བ་ལྔ་དང་ཨ་རུ་ར། །འུ་སུ་པ་ཏ་པ་ལ་ཤ་།སྐྱུར་རྩེ་ཆེན་པོའི་མྱུ་གུ་དང༌། །བསྐོལ་བའི་ཐུག་པ་ལ་སོགས་བླུད། །མ་དུ་ཀ་ཡི་མེ་ཏོག་བྲེ། །བཅུ་དྲུག་བྱི་དང་ག་དེའི་ཕྱེད། །ཅི་ཏྲ་ཀ་ནི་དེ་ཕྱེད་དང༌། །བསེ་ཤིང་འབྲས་བུ་བྲེ་བཞི་དང༌། །བཙོད་སྲང་བརྒྱད་དེ་འདི་དག་ནི། །ཆུ་བྲེ་སུམ་ཅུ་རྩ་གཉིས་བསྐོལ། །ཆུ་བྲེ་བཅུ་དྲུག་ལུས་བསྒྲངས་པར། །སྦྲང་རྩི་བྲེ་དོ་གཞུག་པ་དང༌། །སུག་སྨེལ་པདྨའི་རྩ་བ་དང༌། །ཨ་ཀར་ཙནྡན་ལྡེ་གུ་བྱུག །བུམ་པར་ཟླ་བ་གཅིག་གཞག་སྟེ། །ལངས་ནས་མནན་ཆང་བླུད་གྱུར་ན། །འདི་ཡིས་ཕོ་བའི་དྲོད་སྐྱེད་ཅིང༌། །ཉམས་བརྟས་ཁྲག་མཁྲིས་སེལ་བར་བྱེད། །སྐེམས་དང་མཛེ་དང་ཤ་བཀྲ་དང༌། །གཅི་སྙི་བ་ཡི་ནད་རྣམས་འཇོམས། །མ་དུ་ཀ་ཡི་མེ་ཏོག་ནི། །ཁུ་བ་བསྐོལ་བ་ཕྱེད་དུ་བ། །བསྒྲངས་པར་སྦྲང་རྩི་བཞི་ཆ་བཏབ། །སྔ་མ་བཞིན་དུ་བྱས་པའི་འཆང༌། །ཕན་པའི་ཟས་དང་བཅས་བསྟེན་ན། །ཕོ་པའི་ནད་ནི་ཐམས་ཅད་སེལ། །དེ་བཞིན་རྒུན་འབྲུ་བུ་རམ་ཤིང༌། །འབྲ་གོའི་ཁུ་བ་མནན་པ་བླུད། །ཤིང་ཀུན་ཤུ་དག་པུ་ཙོ་ཤེལ། །བོད་ད་པ་ཏུ་དུག་མོ་ཉུང༌། །གཟེ་མ་ཚ་བ་ལྔ་པོ་ཞོ། །གཉིས་གཉིས་ལན་ཚྭ་ལྔ་སྲང་རེ། །མར་དང་ཏིལ་མར་ཕུལ་དོ་དོ། །ཞོ་བྲེ་གཉིས་དང་བསྲེས་ནས་ནི། མེ་ནི་ཆུང་ངུ་ལ་བཙོས་སྟེ། །རྙིང་ཞིང་ཁུ་བ་ཐིམ་པ་དང༌། །དེ་ནས་དུ་བ་འཁྱིམས་པར་བསྲེག །བཏགས་ཏེ་མར་དང་བསྲེས་བ་དག །དེ་ལས་ཞོ་གཉིས་འཐུངས་ནས་ནི། །ཞུ་ནས་ཁ་ཟས་མངར་ཟོས་ནས། །དེས་ནི་བད་ཀན་རླུང་ནང་ནི། །ཀུན་དང་དུག་དང་དབྱིག་དུག་འཇོམས། །རྩྭ་མཁྲིས་དང་ནི་བུ་རྩེ་ཤེལ་།པ་ཏོ་ནིམ་པ་པར་པ་ཏ། །བསྲེགས་ལ་མ་ཧེའི་གཅིན་དང་ནི། །འཐུངས་ན་མེ་དྲོད་སྐྱེད་བྱེད་པ་ཡིན། །ཤུ་དག་རུ་རྟ་སེར་པོ་གཉིས། །རྩི་ཏྲ་ཀ་དང་པུ་ཙེ་ཤེལ། །གླ་སྒང་ར་ཡི་གཅིན་དང་ནི། །བསྐོལ་བ་མེ་དྲོད་སྐྱེད་བྱེད་ཡིན། །སུ་ཏའི་སྡོང་བུ་སྲང་བཞི་དང༌། །ལན་ཚྭ་གསུམ་ལས་སྲང་རེ་དང༌། །པར་ཏ་ཀ་ནི་ཕུལ་གང་དང༌། །ཨརྐ་སྲང་བརྒྱད་ཙི་ཏྲ་ཀ །སྲང་གཉིས་བསྲེགས་ལ་པར་ཏ་ཀའི། །ཁུ་བས་རི་ལ་བྱས་ནས་ནི། །ཟས་རྗེས་ཟོན་ན་ཟོས་པའི་ཟས། །མྱུར་དུ་ལུད་པད་དབུགས་མི་བདེ། །
གཞང་འབྲུམ་གསུང་དང་ཆམ་པ་དང༌། །སྙིང་ནད་དེས་ནི་ཞི་བར་བྱེད། །ཁ་ལུད་ཟུར་བ་ར་སྣ་དང༌། །ཚ་བ་གསུམ་དང་ཨ་རུ་ར། །ནས་ཚིག་མཁུས་ཐལ་སྭ་རྫི་ཀའི། །ཐལ་སྨན་ལན་ཚྭ་ལྔ་པོ་རྣམས། །ཕྱེར་བཏགས་དྭོ་འཇམ་ཆུ་དང་བླུད། །མདོག་སྟོབས་མེ་དྲོད་འཕེལ་བྱེད་ཡིན། །བད་ཀན་ལས་གྱུར་ཕོ་བའི་ནད། །རླུང་བཅས་དེ་ལ་མ་ར་དང་བསྐོལ། །ཐང་ལ་འབར་དང་སྲང་དྲུག་པ། །དེ་བཞིན་གོ་བྱེའི་སྨན་མར་བླུད། །ཁ་རུ་ཚ་དང་ཚ་ང་དང༌། །བུལ་ཏོག་དང་ནི་སྭ་རྫི་ཀ །ནས་ཚིག་འཁུས་པའི་ཐལ་བ་དང༌། །ཀཎྜ་ཀ་རི་སབ་ཏ་ལ། །ཙི་ཏྲ་ཀ་ནི་གཅིག་ཏུ་བསྲེག །ལན་བདུན་པར་དུ་གཟགས་པ་ཡི། །ཐལ་ཁུ་བྲེ་དོ་མར་བྲེ་བཞི། །བསྐོལ་ལ་མེད་དྲོད་བསྐྱེད་ཕྱིར་བླུད། །འདུས་པ་ལས་ནི་ལྔ་པོ་དང༌། །འདི་དག་ཉམས་སྟོབས་ཇི་བཞིན་བྱ། །བད་ཀན་མཆིལ་མང་དྲོད་ཆུང་ལ། །ཁ་རྩུབ་མེ་དྲོད་སྐྱེད་པར་སྦྱར། །བད་ཀན་ལས་བྱུང་སྐོམས་པ་ལ། །སྣུམ་དང་རྩུབ་པ་རེས་ཀྱིས་བསྟེན། །ཉམ་ཆུང་རིད་པའི་ལུས་ལ་ནི། །མེ་དྲོད་སྐྱེད་པ་སྣུམ་ལྡན་སྦྱིན། །མཁྲིས་པ་ཤས་ཆེའི་དྲོད་ཉམས་ལ། །ཁ་དང་མངར་བ་ལྡན་པ་སྦྱིན། །རླུང་ཤས་ཆེ་ལ་སྣུམ་སྐྱུར་དང༌། །ལན་ཚྭར་ལྡན་པ་སྔགས་པ་ཡིན། །རིང་པ་མེ་དྲོད་སྐྱེད་པ་ལ། །སྣུམ་ཉིད་མཆོག་ཏུ་ཤེས་པར་བྱ། །སྣུམ་ཤས་ཆེ་བར་གྱུར་པ་ལ། །རབ་ལྕེའི་ཟས་ཀྱང་སྦྱིན་མི་བྱ། །གང་ཞིག་དྲོད་ཆུང་བད་ཀན་ཟད། །བཤང་བ་སྨིན་ཀྱང་སླ་བ་ལ། །དེ་ལ་སྨན་རྣོར་བཅས་པ་ཡི། །མར་ནི་ཉུང་ཟད་བླུད་པར་བྱ། །དེ་ཡིས་མེ་དང་མཉམ་གནས་རླུང༌། །རང་གནས་བཀུག་སྟེ་རང་གི་ནི། །ལས་ལ་སྦྱོར་བས་དྲོད་སྐྱེད་བྱེད། །དེ་ནི་མེ་དྲོད་སྐྱེད་བྱེད་པ་ཡིན། །གང་ཞིག་བཤང་བ་སྲ་བ་ཡིས། །དཀའ་བས་འབྱིན་པར་བྱེད་པ་དག །དེ་ལ་ལན་ཚྭ་བཅས་པའི་མར། །ཟས་ནི་སླ་བར་བྱད་པ་སྦྱིན། །རྩུབ་པས་མེ་དྲོད་ཆུང་ལ་མར། །ཡང་ན་ཏིལ་མར་དྲོད་སྐྱེད་བླུད། །སྣུམ་མང་འཐུངས་པས་དྲོད་ཉམས་ལ། །ཐལ་སྨན་ཕྱེ་མ་ཆང་རྙིང་སྦྱར། །རྟུག་འགགས་པ་ལ་མས་གཏོང་བའི། །དྲག་པོ་དང་ནི་འཇམ་རྩི་བྱ། །ནད་ཚབ་ཆེ་བས་མེ་དྲོད་ཉམས། །སྦྱང་བྱས་ཟས་ཀྱི་ཆོ་ག་སྤྱད། །ནད་བྱང་མེ་དྲོད་ཆུང་བ་ལ། །
ཞུན་མར་འབའ་ཞིག་དྲོད་སྐྱེད་བྱེད། །ལམ་དང་སྨྱུང་བས་ཉམ་ཆུང་ལ། །ནས་ཐུག་མར་དང་སྦྱར་བའམ། །ཟས་བཅས་བླུད་ན་སྟབས་སྐྱེད་ཅིང༌། །དྲོད་སྐྱེད་བརྟ་བར་བྱེད་པ་ཡིན། །ཡུན་རིངས་ཉལ་པོ་སྤྱད་པ་དང༌། །མི་ནི་ཉམ་ཆུང་སྐམ་གྱུར་ལ། །མཐུ་རྩལ་ཅན་གྱིས་ཟས་ཚོལ་བ། །ཤ་ཟའི་ཤ་ཁུ་སྐྱུར་སྦྱར་སྦྱིན། །ཡང་ཞིང་དྲི་ཚ་སྦྱོང་བྱེད་པ། །དེ་ཡིས་མེ་དྲོད་མྱུར་དུ་སྐྱེད། །ཤ་ཡིས་སྐྱེད་པའི་ཤ་ཡིན་ཕྱིར། །སྟོབས་ནི་མཆོག་ཏུ་སྐྱེད་པར་བྱེད། །སྣུམ་དང་མནན་ཆང་ཆང་རྙིང་དང༌། །སྨན་ཁུ་ཕྱེ་མ་འཕྲོད་པ་ཟོས་།ལུས་ལ་ལེགས་པར་སྦྱར་བ་ཡིས། སྟོབས་དང་མེ་དྲོད་འཕེལ་བར་བྱེད། །དཔེར་ན་མེ་ནི་ཤིང་སྲ་བས། །སྦར་བ་ཡུན་རིང་གནས་པར་བྱེད། །དེ་བཞིན་ཁོང་པར་གནས་པའི་མེ། །སྣུམ་དང་བཅས་པས་བརྟན་པར་གནས། །ཇི་ལྟར་མེ་ནི་ཤིང་མེད་པའམ། །མེ་ཆུང་ཤིང་ནི་དྲགས་པ་ལྟར། །ལུས་མེ་ཟས་ནི་མ་ཟོས་པ། །ཟས་དྲགས་གྱུར་པས་འབར་མི་བྱེད། །གང་ཚེ་བད་ཀན་ཟད་མཁྲིས་པ། །རང་གི་གནས་སུ་རླུང་ཞུགས་ན། །མེ་དྲོད་འཕེལ་ཞིང་རབ་རྒྱས་འགྱུར། །དེ་ཚེ་མེ་ནི་རླུང་བཅས་པས། །ཟས་སྨིན་བྱས་ནས་ལུས་ཟུངས་ཀྱང༌། །ཟད་ཅིང་མདངས་འཐོར་བྱེད་པས་གསོད་ཟས་ཟོས་ནས་ནི་བདེ་འགྱུར་ལ། །ཞུ་ནས་མུན་ཞུགས་སྙམ་སེམས་འགྱུར། །སྐོམ་དང་ཚ་བ་རྒྱལ་དབུགས་མི་བདེ། །ལ་སོགས་མེ་དྲོད་དྲགས་ལས་འབྱུང༌། །ཟས་ལྕི་སྣུམ་སླ་རྟུལ་བ་དང༌། །གྲང་དང་འཇུ་དཀའ་མེ་དྲོད་འབྲི། །འབར་བའི་མེ་ལ་ཆུ་བླུགས་ལྟར། །མེ་དྲོད་ཤས་ཆད་དེ་ཞི་བྱ། །དེ་ནས་ཁ་ཟས་མ་ཞུལ་འང༌། །ཡང་དང་ཡང་དུ་ཟས་སྦྱིན་བྱ། །བུད་ཤིང་མེད་པའི་སྐབས་རྙེད་ལྟར། །ཇི་གནས་འདིར་གནས་མི་འགྱུར་བྱ། །ཀྲི་ས་ར་དང་འོ་ཐུག་སྣུམ། །སྣུམ་ཁུར་བུ་རམ་གཡོས་པ་དང༌། །རླན་ཅན་ཆུ་ཡི་སྲོག་ཆགས་ནི། །ཚོ་བ་ཡི་ནི་ཤ་སྦྱིན་ནོ། །མཆོག་ཏུ་ཉ་ནི་འཇམ་པོ་དང༌། །མེ་འགུལ་ཆུ་ལ་གནས་པ་སྦྱིན། །ལུག་ཤ་ཚོན་པོ་དག་ཀྱང་ནི། །ཟོས་ན་མེ་དྲོད་དྲགས་པ་སལ། །འོ་མ་སྦྲང་རྩི་བཅས་བའམ། །མར་དང་སྦྱར་བ་སྐོམ་ཆོ་བླུད། །གྲོ་ཡི་ཕྱེ་ནི་འོ་མ་དང༌། །མར་ནི་མང་པོར་བཅས་པ་བླུད། རླན་ཅན་
སྲོག་ཆགས་ཤ་ཁུ་དང༌། །ཏིལ་མར་མ་གཏོགས་སྣུམ་ཅན་བླུད། །ཤ་མ་དུར་བྱིད་དང་བསྐོལ་བའི། །འོ་མའི་བཀྲུ་སྨན་བླུད་པར་བྱ། །མཁྲིས་པ་སལ་བའི་ཁ་ཟས་དང༌། །འོ་ཐུག་ལན་མང་སྦྱིན་པར་བྱ། །འོ་ཐུག་ལན་མང་སྦྱིན་པར་བྱ། །གང་ཞིག་ལྕེ་ཞིང་ཆིལ་སྐྱེད་དང༌། །བད་ཀན་སྐྱེད་པའི་ཁ་ཟས་རྣམས། །ཐམས་ཅད་མེ་དྲོད་དྲགས་ལ་ཕན། །ཟོས་ནས་ཉིན་པར་ཉལ་བར་བྱ། །ཟས་ནི་མེ་དྲོད་ཀྱིས་འཇུ་བྱེད། །ཟས་མེད་ནས་ནི་ནད་ཟད་བྱེད་པར་འགྱུར། །ལུས་ཟུངས་པར་བྱེད་པར་འགྱུར། །ལུས་ཟུངས་ཟད་ནད་འཆི་བར་འགྱུར། །ཟས་འདི་དག་ནི་རང་བཞིན་གྱིས་མི་མཐུན། །འདི་ནི་སྦྱོར་དང་གཡོས་ཀྱིས་མི་འཕྲོད་པ། །དེ་ལ་སོགས་པ་མེ་ཤེས་ཅི་དགའ་བར། །སྤྱོད་དེ་མེ་དྲོད་ལས་གྱུར་པ་ཡིན། །དེ་བས་འབད་པ་ཀུན་གྱིས་མེ་དྲོད་བསྲུང༌། །དེ་ཉམས་ན་ནི་མི་ཡི་སྲོ་ཉེས་ཉམས། །ཉེས་པས་ཁྱབ་ན་ནད་ཀྱི་ཚོགས་ཀྱིས་འདེབས། །མེ་དྲོད་མཉམ་ན་ནད་མེད་ཚེ་རིང་འགྱུར། །ཡན་ལག་བརྒྱད་པའི་སྙིང་པོ་བསྡུས་པ་ལས། །གསོ་བའི་གནས་ཀྱི་ལེའུ་བཅུའོ།། །།དེ་ནས་གཅིན་འགགས་པའི་ལེའུ་བཤད་པར་བྱའོ། །རླུང་ལས་གྱུར་པའི་གཅིན་སྲི་ལ། །རླུང་འཇོམས་ཏིལ་མར་གྱིས་ལུས་བསྐུ། །ལྟེ་བ་མན་ཆད་དུགས་བྱ་ཞིང༌། །རླན་དུགས་ལུས་ནི་སྦྱིང་བའང་བྱ། །རྩ་བ་བཅུ་པ་ཨེ་རཎྚ། །བ་ལ་ནས་དང་ཉེ་ཤིང་པ། །བ་སྤྲུ་བ་དང་ཀུ་ལངྠ། །རྒྱ་ཤུགས་དང་ནི་བ་རུ་ར། །སྲུ་སྲུའི་རྩ་བ་བྲི་ཤི་བ། །ཏིལ་མར་ཞུན་མར་ཕག་དང་དྲེད། །ཞག་བསྐོལ་ལན་ཚྭ་བཅས་པ་ནི། །འཐུངས་ན་གཟེར་འཇོམས་མཆོག་ཡིན་ནོ། །སྨན་འདི་དག་ནི་སྣུམ་པ་ཡི། །འབྲས་བུར་བཅས་ཤིང་སྐྱུར་བ་དང༌། །སྣུམ་དང་ལྡན་པར་ཟས་སྐོམ་དང༌། །གོང་པོ་དཀྲི་བའི་དུགས་དཔྱད་བྱ། །ཁ་རུ་ཚ་མང་བཏབ་པའི་ཆང༌། །འཐུངས་ན་གཅིན་གྱི་ནད་སེལ་བྱེད། །མཁྲིས་གྱུར་བསྐུ་དང་བླུགས་པ་དང༌། །ལུས་བཅིང་བས་ནི་བསིལ་བར་བྱ། །ཉེ་ཤིང་གཟེ་མ་བི་ད་རི། །རྒུན་འབྲུ་རྩ་ཡི་རྩ་བ་ལྔ། །བསྐོལ་བའི་ནང་དུ་སྦྲང་རྩི་དང༌། །ཁ་རབ་བཏབ་པ་བླུད་པར་བྱ། །བ་ཤ་ཀ་དང་ག་གོ་ན་དང༌། །རྒྱལ་མོ་ག་གོན་ལ་བརྒན་རྩིའི། །ས་བོན་གུར་གུམ་རྒུན་ཆུ་དང༌། །འཐུངས་
ན་གཅིན་འགགས་ནད་སེལ་བྱེད། །ཤིང་མངར་ཨེར་བ་རུའི་ས་བོན། །སྐྱེར་པ་འབྲས་ཀྱི་ཆུ་དང་བླུད། །རྒུན་འབྲུའི་ལྡེ་གུ་ཆུར་སྦྱར་བའམ། །རྒུན་འབྲུ་ཆུར་ནི་སྤངས་པ་བླུད། །བད་ཀན་ལས་གྱུར་དུགས་བྱས་ལ། །སྐྱུག་སྨན་བཟའ་བ་རྣོ་དྲོ་སྦྱིན། །ནས་ཡོས་ཐལ་སྨན་རྣོ་བ་དང༌། །དར་བ་བཅས་པ་སྦྱིན་པར་བྱ། །སུག་སྨེལ་ཆང་དང་སྦྱར་བའམ། །སྐྱུ་རུ་ར་ཡི་ཁུ་བ་བླུད། །བཞད་རུས་གཟེ་མ་སུག་སྨེལ་དང༌། །ཚ་གསུམ་སྦྲང་རྩི་གཅིན་བཅས་བླུད། །ཡང་ན་ཀཎྜ་ཀ་རིའི་ཁུ། །སྦྲང་རྩིར་སྦྱར་བ་བླུད་པར་བྱ། །ཤི་ཏི་བ་རའི་ས་བོན་ནི། །ཞིབ་བཏགས་དར་བས་སྦྱར་བ་བླུད། །བ་ད་སཔྟ་པརྞི་དང༌། །སླེ་ཏྲེས་དོང་གྲ་དུག་མོ་ཉུང༌། །ཀེའུ་ཀ་དང་སུག་སྨེལ་དང༌། །ཀ་ར་ཉྫ་བསྐོལ་སྦྲང་རྩིར་བཅས། །དེས་སྦྱར་ཐུག་པའམ་བྱི་རུ་ཡི། །ཕྱེ་མ་འབྲས་ཀྱི་ཆུ་དང་བླུད། །པ་ཏ་ལི་ཡི་ཐལ་བའི་ཆུ། །ལན་བདུན་བཙགས་པ་ཏལ་མར་བཅས། །ནས་ཚིག་འཁུས་ཐལ་པ་ཏ་ལི་།པ་རི་པ་ཏྲ་ཏིལ་ཐལ་ཆུ། །ཤིང་ཚ་སུག་སྨེལ་ན་ལེ་ཤམ། །ཆང་དང་སྦྱར་བ་བླུད་པར་བྱ། །འདི་དག་རེ་རེའི་ལྡེ་གུར་སྦྱར། །བུ་རམ་སོ་ཡིས་བཅས་ཅིང་བཟའ། །འདུས་པའི་བདག་ཉིད་ཅན་ཀུན་ལ། །འདི་དག་གནས་སྐབས་ཇི་བཞིན་ཕན། །རྡེའུ་ཆགས་རིང་པོ་མ་ལོན་དང༌། །རླུང་གི་ལྒང་ནད་སོགས་ལའང་སྦྱར། །རྡེའུ་ཆགས་ནད་ནི་མི་བཟད་དེ། །འཆི་བདག་དང་ནི་འདྲ་བར་འདོད། །གཞོན་པའི་ཚེ་ན་སྨན་གྱིས་གསོ། །འཕེལ་ནས་འདྲལ་བར་འོས་པ་ཡིན། དེ་ཡི་སྔོན་འབྱུང་ཚུལ་ལ་ནི། །སྣུམ་འཆོས་ལ་སོགས་རིམ་པས་བསྔགས། །སྲུ་སྲུའི་རྩ་བ་སྤྲ་ཏོག་དང༌། །ཨ་སྨན་ད་ཀ་བ་སི་ར། །ཉེ་ཤིང་ལྕམ་པ་པུ་ཙེ་ཤེལ། །ཨ་ཏི་པ་ལ་བ་ལུ་ཀ །སྤངས་མ་བྲྀཀྵ་ད་ནི་དང༌། །ཤ་ཀའི་འབྲས་བུ་བྱ་ཀྲི་གཉིས། །གུད་ཐ་གཟེ་མ་ཀུ་ལངྠ། །ནས་དང་རྒྱ་ཤུག་པ་ར་ཎ། །ཀ་ཏ་ཀ་ཡི་འབྲས་བུ་དང། །ཨུ་ཤ་ཀ་སྩོགས་ཕྱེ་མ་བཏབ། །འདི་དག་ཁུ་བ་མར་བསྐོལ་བླུད། །རླུང་གྱུར་རྡེའུ་འཇིག་པར་བྱེད། །ཨེ་རཎྜ་རི་གཟེ་མ་དང༌། །བུ་རམ་ཤིང་ཕྲན་རྩ་བ་ཡིས། །ལྡེ་གུ་ཞོ་དང་སྦྱར་ཏེ་བླུད། །རྡེའུ་ཆགས་པ་སེལ་བྱེད་ཡིན། །ཀུ་
ཤ་འཇག་མ་འདམ་བུ་དང༌། །ཀུ་ཏ་ཉེའུ་ཤིང་ཨིག་ག་ཐ། །སྲུ་སྲུའི་རྩ་བ་འཇག་ཟླུམ་དང༌། །བི་ད་རི་དང་བ་ར་ཧི། །འབྲས་ཀྱི་རྩ་བ་གཟེ་མ་དང༌། །བ་ལུ་ཀ་དང་པ་ཏ་ལི། །བཏུལ་དང་བླ་བར་བཅས། །བ་སྤུབ་བ་དང་སྲི་ཤ་ཀ །དེ་རྣམས་བསྐོལ་ཁུ་མར་དང་བསྐོལ། །ག་གོན་ས་བོན་ལ་སོགས་དང༌། །ཨུཏྤལ་ཡིས་བོན་དང༌། །ཤིང་མངར་དང་ནི་བྲག་ཞུན་ཕྱེ། །དེ་དག་མཁྲིས་གྱུར་རྗེ་ཆགས་སེལ། །བ་ར་ཎ་སོགས་རླུང་འཇོམས་ཏེ། །སུག་སྨེལ་ཧ་རོ་ནུ་ཀའི་སྡེ། །གུ་གུལ་ཏུ་རྟ་ན་ལེ་ཤམ། །ཙི་ཏྲ་ཀ་དང་བྱེའུ་རུག་པ། །དེ་དག་ལྡེ་གུས་བྱས་པ་གཞུག །ཨུ་ཤ་ཀ་ཡི་སྡེ་ཚན་བཅུག །མར་བསྐོལ་བ་ཡིས་བད་ཀན་ལས། །གྱུར་པའི་རྡེའུ་མྱུར་དུ་འཇོམས། །རང་རང་སྨན་ནི་འདི་ཉིད་ཀྱིས། །ཐལ་སྨན་འོ་མ་ཐུག་སྩོགས་སྦྱར། །པི་ཙུ་ཀ་དང་ཨང་གོ་ལ། །ཀ་ཏ་ཀ་ལ་ཤ་ཀ་དང༌། །ཨུཏྤ་ལ་ཡི་འབྲས་བུ་རྣམས། །བུ་རམ་བཅས་པའི་ཆུ་དྲོན་བླུད། །རྡེ་ཕྲན་འཇིག་པར་བྱེད་པའི་མཆོག །ཁྲུང་ཁྲུང་རྔ་མོ་བོང་བུའི་རུས། །གཟེ་མ་ཏ་ལ་པ་ཏྲི་ཀ །ཨ་ཟ་མོ་དང་ཀ་དམ་པའི། །རྩ་བ་དང་ནི་བཅའ་སྒ་ནི། །ཆང་ངམ་ཆུ་དྲོན་བཅས་པ་བླུད། །རྡེ་ཕྲན་ཆགས་པ་འཇིག་པར་བྱེད། །མ་རི་ཙི་ཀའི་ས་བོན་གྱི། །ཕྱེ་མ་སྦྲང་རྩིར་སྦྱར་བ་དང། །ལུག་གི་འོ་མ་ཞག་བདུན་ནི། །བླུད་ན་རྡེའུ་ནི་འཇིག་པར་བྱེད། །ཤི་ཀྲུའི་རྩ་བ་བསྐོལ་བ་ནི། །དྲོ་འཇམ་འཐུངས་པས་རྡེ་ནད་འཇོམས། །ཏིལ་དང་ཨ་པ་མརྒ་དང༌། །ཆུ་ཤིང་དང་ནི་པ་ལ་ཤ །ནས་ཚིག་མཁུས་ཐལ་ལུག་གཅིན་བླུད། །ཕྱེ་མ་རྡེ་འུ་ཆགས་པ་སེལ། །ཡང་ན་ལྕམ་པའི་རྩ་བ་ནི། །གཅིག་ཏུ་ཆང་ལ་སོགས་པ་བླུད། །ཡང་ན་དེ་བསྐོལ་འོ་མ་བླུད། །ནད་ཀྱིས་ཉེན་པ་སེལ་བ་བྱེད། །ཨ་རུ་ར་ཡི་རུས་པ་བཙོས། །ཡང་ནབ་སྤུ་བ་བཅོས་བླུད། །ཡང་ན་འོ་མ་ཅན་ཟས་བཟའ། །ཡང་ན་བར་ཧི་ཤི་ཀ་ཡི། །རྩ་བ་འབྲས་བུར་བཅས་པ་བླུད། །གཅིན་འགགས་ལྷག་མ་རྣམས་ལ་ནི། །འདི་ཡི་གསོ་བ་ལྷག་མངའ་སྦྱར། །བྲི་ཧ་ཏི་སོགས་སྡེ་ཚན་བསྐོལ། །གཟེ་མ་ཉིས་འགྱུར་གཞུག་པར་བྱ། །ཆུ་འམ་འོ་མ་ཞུན་མར་དང༌། །བླུད་ན་གཅིན་གྱིས་ནད་ཀུན་སེལ། །ཐང་ཤིང་གླ་སྒང་མུད་པར་དང༌། །ཤིང་མངར་དང་ནི་ཨ་རུ་ར། །ཆང་ངམ་
འོ་མ་ཆུར་སྦྱར་བ། །གཅིན་གྱིས་ནད་ནི་ཀུན་ལ་བླུད། །བྱི་ཚེར་བ་བསྐོལ་ཁུ་བའམ། །ཨརྫུ་ན་བསྐོལ་ཁུ་བ་ནི། །རྒྱམ་ཚ་འབྲས་བུ་གསུམ་བཏབ་ལ། །ཆུ་ཚན་དྲོ་འཇམ་སྦྱར་བླུད། ཀཎྜ་ཀ་རི་གཟེམ་བསྐོལ། །ཡང་ན་ནས་ཐུག་བུར་ཕྲན་བཅས། །བི་ད་ར་སོགས་བསྐོལ་བའམ། །ཁྱིམ་བྱའི་ཤ་ཡི་ཁུ་བ་བླུད། །བི་དན་རི་ལ་སོགས་པ་དང༌། །བསྐོལ་བའི་བྲག་ཞུན་སྦྱིན་པའམ། །ཡང་ན་ཆང་ནི་ནང་མེད་བླུད། །རྟའམ་ཤིང་རྟར་བསྐྱོད་ནས་ནི། །མགྱོགས་པར་འགྲོ་བས་བསྐྱོད་གྱུར་ན། །རྡེའུ་དེ་ནི་གཡོ་བར་འགྱུར། །རྡེའུ་དེ་ནི་གཡོ་བར་འགྱུར། །བི་ད་རི་ལ་སོགས་པ་ཡི། །སྡེ་ཚན་རྣམ་པ་ཀུན་ཏུ་སྦྱར། །བཀྲུ་སྨན་དོན་དུ་སེང་ཕྲམ་མར། །འཇམ་རྩིའི་ལས་ཀྱང་བསྟེན་པར་བྱ། །མཆོག་ཏུ་འཇམ་རྩི་གོང་མ་བྱ། །ཁུ་ཆུའི་རྡེའུ་ཆགས་དེ་ཡི་ནི། །གཅིན་ལམ་སྦྱངས་ལ་སྟོབས་ཆེ་བའི། །ཁུ་ཆུའི་གནས་ནི་སྦྱང་བའི་ཕྱིར། །སྐྱེས་པ་ཁུ་བ་འཕེལ་བྱེད་པའི། །ཤ་དང་ཁྱིམ་བྱའི་ཤ་ཡིས་འགྲངས། །འདོད་པ་བདོ་བས་བུད་མེད་ནི། །དགའ་བ་སྐྱེད་ལ་ཉལ་པོ་བྱ། །གསོ་བ་འདི་ཡིས་བཅོས་ཀྱང་ནི། །མ་བཞི་ན་ནི་སྨན་པ་ཡིས། །མཚོན་ན་ལེགས་པར་བརྟག་བྱས་ཏེ། །གསོ་བ་མ་བགྱི་ངེས་པར་འཆེ། །བགྱིས་ན་འང་དོགས་པར་བཅས་པ་ལས། །དེ་ལྟར་རྒྱལ་པོ་ལ་ཞུས་ནས། །ལས་ལ་བྱང་བའི་སྨན་པ་ནི། །མང་པོ་དང་ནི་དཔྱད་པར་བྱ། །དེ་ནས་ནད་པར་སྣུམ་བསྐུས་ཤིང༌། །སྦྱངས་ཤིང་ཅུང་ཟད་ཉམས་སྨད་པའི། །ལུས་ནི་སྣུམ་བསྐུ་དུགས་བྱ་ཞིང༌། །ཟན་མ་ཟོས་ཤིང་བཀྲ་ཤིས་བྱས། །པུས་མོར་སླེབ་པའི་སྤང་ལེ་བ་ལ། །འདུག་པ་མི་ཡི་པད་པར་བརྟན། །རོ་སྟོད་གན་རྐྱལ་བཞག་ནས་ནི། །གོས་ཀྱིས་དཀྲིས་པའི་སྟེང་དུ་གཞག །དེ་ནས་དེ་ཡི་སྒྱིད་ཁུང་དག །བཀུག་ནས་རས་ཀྱིས་དམ་པ་རུ། །རྟེན་གྱི་མི་དང་བཅས་པར་ནི། །བཅིངས་ཏེ་དབུགས་ནི་ཕྱུང་ནས་སུ། །ལྟེ་བ་མན་ཆད་བསྐུས་ནས་ནི། །དེ་ཡི་གཡོན་རོལ་ཕྱོགས་སུ་ནི། །མཉེས་ལ་ཁུ་ཚུར་གྱིས་མནན་ཅིང༌། འོག་ཏུ་འབྱིན་པའི་བར་དུ་བཙིར། །དེ་ནས་གཡོན་པའི་མཛུབ་མོ་དང༌། །གུང་མོའི་སེན་མི་བྲགས་ནས་ནི། །ཏིལ་མར་བསྐུས་ཏེ་རྐུབ་ཏུ་ནི། །སྲུབས་མཚམས་བར་དུ་གཞུག་
པར་བྱ། །རྡེའུ་ལྟེ་བའི་གཉེར་མ་ནས། །ཕོ་མཚན་གཞང་བར་ཕྱིན་པར་བྱ། །དེ་ནས་ཆུ་སོའི་གནས་སུ་ནི། །གཉེར་མ་མེད་ཅིང་དབྱུང་སླ་བ། །སོར་མོ་གཉིས་ཀྱིས་བཙིར་ནས་ནི། །མདུད་པ་ལྟ་བུར་མཐོ་བར་བྱ། །སྲུབས་མཚམས་ནས་གང་མ་གཏོགས་པར། །གཙགས་བུས་ལེགས་པར་དྲལ་ནས་ནི། །རྡེའུའི་ཚད་དུ་དབྲལ་བྱས་ལ། །ཅི་ནས་ཆག་གྲུགས་མེད་པར་ནི། །ཆ་སྤྱད་རྩེ་མོ་གུག་པ་ཡིས། །མ་ལུས་པར་ནི་དབྱུང་བར་བྱ། །བུད་མེད་ཆུ་རོ་ངོས་སུ་གནས། །དེ་ནི་མངལ་གནས་པ་ལ་བརྟེན། །མཐོ་བར་གྱུར་ནས་སྤྱད་ཀྱིས། །ལེགས་པ་ཁོ་ནར་དབྲལ་བར་བྱ། །གཞན་དུ་བྱས་ན་དེ་ཡིས་ན། །རྨ་ནས་གཅིན་ནི་འཛག་པར་འགྱུར། །སྐྱེས་པའི་རྨ་ནི་དབྲལ་ཉེས་ན། །གཅིན་འཛག་པ་དང་གཅིག་ཏུ་འགྱུར། །ཆུ་སོ་དབྲལ་བའི་རྡེའུ་རྒྱུ། །གཅིག་ལས་གྲུབ་ཀྱི་གཉིས་ལས་མིན། །ཟུག་རྔུ་ཆུང་ལས་ཆུ་དྲོན་གྱི། །ནང་དུ་དེ་ནི་སྤྱིང་བར་བྱ། །དེ་ལྟར་ཁྲག་གིས་གང་མི་འགྱུར། །གང་ལ་མཚན་ལས་འོ་མ་ཅན། །ཤིང་གི་ཁུ་བ་བཙིར་བར་བྱ། །དེ་ནས་གཅིན་ནི་དག་བྱའི་ཕྱིར། །བུ་རམ་གྲངས་པ་སྦྱིན་པ་དང༌། །རྨ་ལ་མར་དང་སྦྲང་བརྩི་བསྐུ། །དུས་གཉིས་ནས་ཐུག་མར་བཅས་པའི། །དྲོ་འཇམ་གཅིན་སྐྱེད་ཞག་གསུམ་བླུད། །བུ་རམ་མང་པོ་འོ་མ་དང༌། །འབྲས་ཆན་ཉུང་བཞག་བཅུ་སྦྱིན། །དེ་ནས་འབྲས་བུ་སྐྱུར་བ་དང༌། །སྐམ་སའི་སྲོག་ཆགས་ཤ་ཁུ་སྦྱིན། །འོ་མ་ཅན་ཤིང་ཁུ་བ་ཡིས། །རྨ་ནི་ནས་གཙོད་དང་ནི། །ཤིང་མངར་པྲ་པུཎྜ་རའི་ཀ །སེང་ཕྲོམ་དཀར་པོས་བསྐུ་བར་བྱ། །རྨ་བསྐུས་སྨན་ནི་འདི་ངག་ཉིད། །སྐྱེར་བཅས་ཏིལ་མར་བསྐོལ་ཏེ་བསྐུས། །འདི་ཡིས་རྨ་ཞག་བཅུ་དུགས་བྱ། །གཅིན་གྱི་ལམ་ནི་ཞག་བདུན་ན། །རང་གི་ལམ་ནས་མ་བྱུང་ན། །རྡེའུའི་རྨ་ནི་མེ་ཡིས་བསྲེགས། །རང་གི་ལམ་ནས་བྱུང་གྱུར་ནས། །ཕལ་ཆེར་མས་གཏོང་མངར་བས་གསོ། །རྨ་དེ་འཚོབས་ཀྱང་ལོ་གཅིག་བར། །རི་བོ་གླང་པོ་རྟ་དང་ནི། །ཤིང་ལ་འཛེག་པར་མི་བྱ་སྟེ། །ཤིང་རྟར་ཞོན་ཉལ་པོ་སྤང༌། །ཆུ་ལ་རྐྱལ་བར་མི་བྱའོ། །ཁུ་ཆུ་ག་གཅིན་ལྒང་པ་དང༌། །རླིག་སྦུབས་མཚམས་
སྲུབས་གཞང་རྩ་དང༌། །ཕོ་མཚན་མོ་མཚན་རྩེ་མོ་ནི། །བརྒྱད་པོར་མཚོན་ནི་གདབ་མི་བྱ། །ཡན་ལག་བརྒྱད་པའི་སྙིང་པོ་བསྡུས་པ་ལས། །གསོ་བའི་གནས་ཀྱི་ལེའུ་བཅུ་གཅིག་པའོ།། །།དེ་ནས་གཅིག་སྙེ་བ་ཟ་ཁུའི་ལེའུ་བཤད་པར་བྱའོ། །ཟ་ཁུ་ཅན་ནི་སྟོབས་ལྡན་ལ། །དང་པོ་སྐྱུག་སྨན་བཀྲུ་སྨན་ནི། །སྣུམ་ཅན་ཉུངས་ཀར་ཨ་རི་ཧ། །བ་རུ་ར་དང་ཀ་རཉྫའི། །སྣུམ་དང་གཟེ་མ་ཏིལ་མར་བསྐོལ། །རང་སྨན་ཇི་བཞིན་བསྐོལ་བ་ཡི། །སྣུམ་བཅས་སྐྱུགས་སྨན་བཀྲུ་སྨན་གཏང༌། །གླ་སྒང་ཐང་ཤིང་དོང་གྲ་བཅུག །བྱེའུ་རུག་པ་སོགས་ཁུ་བ་ཡི། །འཇམ་རྩི་དེ་ནས་གཏང་བར་བྱ། །མཁྲིས་པ་ནྱ་གྲོ་དྷ་སོགས་པས། །སྦྱངས་ནས་ཤ་ཁུས་བརྟ་བར་བྱ། །གཅིན་ནད་དང་ནི་སྐྲན་དང་ནི། །སྐེམ་ཞིང་ཉམས་ནི་སྨན་པ་འབྱུང༌། །དེ་བས་རྗེས་འབྲེལ་བསྲུང་བའི་ཕྱིར། །ཞི་བར་བྱ་བ་གཏང་བར་བྱ། །སྦྱང་བ་མ་བྱས་ལ་དེ་ཉིད། །གཅིན་ནད་ཅན་ནི་ཀུན་ལ་བླུད། །སྐྱེར་པ་སྐྱུ་རུ་ར་བསྐོལ་ཁུ། །སྦྲང་རྩིར་བཅས་པ་ནད་པར་བླུད། །སྐྱེར་པ་ཐང་ཤིང་འབྲས་བུ་གསུམ། །གླ་སྒང་ཆུ་བསྐོལ་བླུད་པའང་ཕན། །ཙི་ཏྲ་སྐྱེར་པ་འབྲས་བུ་གསུམ། །དུག་མོ་ཉུང་ནི་སྦྲང་རྩི་བཅས། །ཡང་ན་སླེ་ཏྲེས་སྐྱུ་རུ་ར། །སྦྲང་རྩིར་བཅས་པའི་ཁུ་བའང་བླུད། །སེང་ཕྲོམ་གླ་སྒང་ཀད་པ་ལ་དང་ཨ་རུ་ར། །པ་ཐ་བྱི་ཚེར་བྱི་དང་ག་དང་ཨརྫུན། །སེང་ལྡེང་སྐྱེར་པ་བྱི་དང་ག་དང་དར་བ་བསྐོལ། །ཁུ་བ་གསུམ་པོ་སྦྲང་རྩིར་བཅས་པས་བད་ཀན་སེལ། །མཁྲིས་གྱུར་པ་ཤེལ་སེང་ཕྲོམ་ཙནྡན་ཨརྫུ་ན། །ནིམ་པ་པ་ཏོ་ལ་དང་སླེ་ཏྲེས་སྐྱུ་རུ་ར། །སེང་ཕྲོམ་བ་ལེ་ཀ་དང་སྐྱེར་པ་ད་ཏ་ཀའི། །གསུམ་པོ་དེ་དག་བསྐོལ་བ་སྦྲང་རྩིར་བཅས་པ་བླུད། །འདི་དག་ཇི་བཞིན་ཟས་སྐོམ་དང༌། །ནས་དང་གྲོ་དང་སྦྱར་བ་དང༌། །རླུང་ཤས་ཆེ་བའི་གཅིན་སྙིལ། །སྣུམ་དང་སྦྱར་ཏེ་སྦྱིན་པར་བྱ། །ལྕི་བ་རྟ་རྟུག་ལས་བྱུང་བའམ། །འོད་མ་ལས་ནི་སྐྱེས་པ་དག །ཁུར་བ་ཟན་དྲོན་ཆག་ཚེ་སྩོགས། །ནས་ལས་བྱས་པའི་ཟན་ཀྱང་ཕན། །རྩ་འབྲུ་མུངྒ་ལ་སོགས་དང༌། །འབྲས་རྙིང་དྲུག་ཅུ་པ་རྙིང་ཕན། །ཉུངས་ཀར་ཏིལ་བཙིར་ལས་བྱུང་བའམ། །སྦྱར་ཐུག་
སྐྱུར་དང་བཅས་པའམ། །ཀ་པིད་ཏ་དང་ཏི་ན་ཏུ་ཀ །འཛམ་བུ་དེ་སྦྱར་བཏུང་བ་དང༌། །ཚོད་མ་ཁ་བོ་སྦྲང་རྩི་དང༌། །འབྲས་བུ་གསུམ་ཟན་བཟའ་བ་སྐམ། །སྐམ་སའི་ཤ་ནི་བསྲེགས་པ་དང༌། །སྐམ་པའམ་ལྕགས་དང་གཡོས་པ་དང༌། །རྒུན་ཆང་ཆང་རྙིང་མནན་ཆང་རྙིང༌། །རྒུན་ཆུ་བསྐོལ་བ་ལས་བྱུང་བླུད། །ཨ་ས་ན་སོགས་བསྐོལ་བའི་ཆུ། །འཇག་མ་བསྐོལ་ཆུ་སྦྲང་རྩིའི་ཆུ། །འབྲས་བུ་གསུམ་ལ་མཚན་མོ་སྤངས། །ཉིན་པར་སྐམས་ལ་དེ་ནས་ནི། །ལེགས་པར་བཏགས་པའི་ཕྱེ་དག་དང༌། །བུ་རམ་སྦྲང་རྩིར་བཅས་པ་བླུད། །ས་ལ་ལོ་མ་བདུན་པ་དང༌། །ཀམ་བི་ལྱ་དང་བ་རུ་ར། །བྲི་ཤ་ཀ་དང་ཀ་པིད་ཏ། །རོ་ཧི་ནི་ཡི་མེ་ཏོག་ནི། །ཕྱེར་བཏགས་སྦྲང་རྩིར་བཅས་སྦྱིན་ནམ། །སྐྱུ་རུ་ར་ཡི་ཁུ་བ་བླུད། །བད་ཀན་མཁྲིས་པའི་གཅིན་ནད་སེལ། །གཟེམ་སྐྱེར་པ་སེང་ཕྲོམ་དང༌། །ཤུ་དག་ཀད་ཕལ་ཨ་རྫུན། །ཤུག་པ་ལུང་ཐང་ཨ་སྨན་ཏ། །ཙནྡན་དང་ནི་ཨ་ཀ་རུ། །ལ་ལ་ཕུད་དང་པ་ཏོ་ལ། །ག་དུར་བོང་ང་གོ་བྱེ་བཙོད། །བད་ཀན་རླུང་ལ་ཏིལ་མར་བཅས། །མཁྲིས་པར་མར་དེ་འདྲེན་མར་བཙོས། །རྩ་བ་བཅུ་པ་ཟི་ར་དཀར། །དན་ཏི་ཐང་ཤིང་བ་སྤྲུ་གཉིས། །སྣུ་ཧ་ཨ་རྒའི་རྩ་བ་དང༌། །བུ་ག་དམ་པ་ཨ་རུ་ར། །གོ་བྱེད་ཀ་རཉྫའི་རྩ་བ། །བ་ར་ཎ་ཡི་རྩ་བ་དང༌། །པི་པི་ལིང་རྩ་མ་ནུའི་རྩ། །རེ་རེ་སྲང་ནི་བཅུ་བཅུ་དང༌། །ནས་དང་རྒྱ་ཤུག་རྒྱ་སྲན་ལས། །བྲེ་གསུམ་ཆུ་ནི་བརྒྱད་འགྱུར་དང༌། །བསྐོལ་ལ་བཞི་ཆ་ལུས་པ་དང༌། །དེ་དང་པི་པི་ལིང་གཉིས་དང༌། །དབྱི་མོ་ལྕང་མ་རོ་ཧི་ཤ །དུར་བྱིད་བྱི་དང་ཀམྦི་ལྱ། །ག་བྲའི་རྩ་བ་བཅའ་སྒ་དང༌། །མར་བྲེ་གང་དང་བསྐོལ་བ་ཡིས། །གཅིན་སྙིའི་ནད་ནི་དེ་ཉིད་དང༌། །འབྲུམ་ཕྲན་དུག་དང་སྐྱ་རྦབ་དང༌། །ཁོང་འབྲས་སྐྲན་དང་གཞང་འབྲུམ་དང། །འོར་ནད་སྐེམ་དང་དབྱིག་དུག་དང༌། །དམུ་རྫིང་ལུད་པ་དབུགས་མི་བདེ། །སློན་དང་ཚིལ་ཆེས་མཆེར་པའི་ནད། །དྲེག་མཛེ་སྨྱོ་བྱེད་བརྗོད་བྱེད་འཇོམས། །མར་འདི་ཐང་ལ་འབར་གྱི་ཡིན། །སེང་ཕྲོམ་མུར་བ་བྱི་དང་ག །ཟུར་པ་རྒྱ་སྤོས་ག་བྲའི་རྩ། །ཆུ་སྲིན་སེན་མོ་
དུག་མོ་ཉུང༌། །གླ་བ་རུ་རྟ་པྲི་ཡང་ཀུ། །གླ་གོར་ཞོ་ཤ་ཙི་ཏྲ་ཀ །བོང་ང་བི་ལ་ཤ་ལ་གཉིས་དང༌། །དྲི་བཟང་བཞི་དང་རྩ་མཁྲིས་དང༌། །པུ་ཙེ་ཤེལ་དང་ལ་ལ་ཕུད། །པ་ཏ་པུ་ཥྐ་ར་མའུ་ལ་དང༌། །པི་པི་ལིང་གི་རྩ་བ་དང༌། །དབྱི་མོ་དང་ནི་འབྲས་བུ་གསུམ། །ཞོ་ནི་གཉིས་གཉིས་ཆུ་བྲེ་ནི། །བཅུ་དྲུག་ལ་བསྐོལ་བཞི་ཆ་ལུས། །བཙགས་ཏེ་བསྒྲངས་པའི་ནང་དུ་ནི། །སྦྲང་རྩི་བྲེ་དོ་བཅུག་ནས་ནི། །ཟླ་ཕྱེད་ལེགས་པར་གཞག་པ་ཡི། །སེང་ཕྲོམ་མནན་ཆང་གཅིན་སྙི་དང༌། །གཞང་འབྲུམ་མཛེ་དང་ཡི་ག་འཆུས། །སྲིན་བུ་སྐྱ་རྦབ་ཕོ་བའི་ནང༌། །ཆིལ་བྱེད་པ་ཡི་ནད་སེལ་བྱེད། །ཨ་ས་ན་ལ་སོགས་པའི་སྡེ། །སྣ་རེ་སྲང་ནི་ཉི་ཤུ་དག །ཆུ་བྲེ་ཉིས་བརྒྱ་ལྔ་བཅུ་དྲུག །བསྐོལ་ལ་བཞི་ཆ་ལུས་པ་དང༌། །བུ་རམ་སྲང་ནི་ཉིས་བརྒྱ་དང༌། །སྦྲང་རྩི་བྲེ་དོ་གཞུག་པ་དང༌། །དུག་མོ་ཉུང་སོགས་ལྡེ་གུ་ནི། །སྲང་རོའི་ཚ་ད་ནི་བཅུག་པ་སྟེ། སྦྲང་རྩི་པི་པི་ལིང་གི་ཕྱ། །མར་གྱིས་བསྐུས་པའི་སྣོད་དག་ནི། །རྒྱ་སྐྱེགས་བསྐུས་པར་བཅུག་ནས་ནི། །ནས་ཀྱི་ནང་དུ་བཅུག་ནས་སུ། །ལྕགས་ནི་རྣོ་ལ་སྲབ་པ་དག །སེང་ལྡེང་གི་ནི་མེ་མདག་བསྲེགས། །ཇི་སྲིད་ལྕགས་ནི་ཟད་པའི་བར། །མང་དུ་དེར་ནི་གཞག་པར་བྱ། །ལྕགས་ལས་བྱས་པའི་ཆང་མནན་བླུད། །སྔོན་པས་ཡོན་ཏན་ལྷག་པ་ཡིན། །རྩུབ་པ་དྲིལ་ཕྱིས་དམ་དུ་བསྡམས། །དྲག་ཤུལ་མཚན་མོ་གཉིད་མི་ལོག །ཚིལ་དང་བད་ཀན་འཇོམས་བྱེད་གང༌། །དེ་ནི་ཕྱི་ནང་ལས་བཏང་ཕན། །བྲག་ཞུན་སྲང་བརྒྱ་སྙིང་པོའི་ཆུ། །སྤངས་པའི་སྙིང་པོ་ཆུ་དང་ནི། །ལེགས་པར་བླུད་ཅིང་སྰ་ལུ་དང༌། །སྐམ་སའི་ཤ་ཁུ་བཅས་པ་བཟའ། །བླ་བརྣན་ཤིན་ཏུ་མང་བ་ཡི། །གཅིན་སྙིའི་ནད་ནི་ཀུན་ཀྱང་འཇོམས། །འབྲས་ཕྲེང་ཐོར་བུ་རྨེན་བུ་དང༌། །ཚིལ་ཆེས་མཛེ་དང་མཚན་བར་རྡོལ། །སྲིན་ནད་རྐང་བམ་འོར་ནད་སེལ། །འདི་ནི་བཅུད་ཀྱིས་ལེན་མཆོག་ཡིན། །ལམ་དུ་དུགས་དང་ལྷ་མ་དག་ནི། །མེད་པར་དྲང་སྲོང་ཚུལ་དུ་ནི། །དཔག་ཚད་བརྒྱ་ཡི་བར་དུ་འགྲོ། །ཆུ་ཡི་གནས་ནི་བརྐོ་བའམ། །བ་གཅིན་ལྕེ་བ་བསྟེན་པའམ། བ་ལང་དང་ནི་ལྷན་ཅིག་འཁྱམས། །སྐེམ་པའི་གཅིན་ནད་ཅན་དག་
གི །ཟས་དང་སྨན་ཚིལ་མི་བསྐྱེད་པས། །ཁམ་ཕོར་ལ་སོགས་འབྲས་ནད་ན། །མ་སྨིན་སྐྲང་པའི་ན་ད་ལྟར་གསོ། །སྨན་པ་ལ་ནི་རྨ་ལྟར་གསོ། །དེ་ཡི་སྔོན་བྱུང་ཚུལ་ཉིད་ལ། །འོ་མ་ཅན་ཤིང་བསྐོལ་ཆུ་དང༌། །ར་ཐུག་གཅིན་ནི་བླུད་པ་བསྔགས། །གཅིན་སྙིའི་ནད་ཅན་ལྟོ་སྲ་བས། །ཕལ་ཆེར་བཀྲུ་སྨན་རྣོན་པོ་གཏང༌། །སུག་སྨེལ་སོགས་ཀྱི་ཏིལ་མར་སྦྱར། །རྨ་འཚོ་བ་པ་ཡི་ཆོ་ག་བྱ། །དོང་གྲ་ལ་སོགས་དེ་ཚན་ནི། །བཏགས་པའི་ལྡེ་གུས་དྲིལ་བར་བྱ། །ཨ་ས་ན་སོགས་བསྐོལ་ཆུ་བླུད། །དུག་མོ་ཉུང་སོགས་ཟས་སྐོམ་སྦྱར། །པ་ཏ་ཐལ་ཏྲེས་རྩིར་ར་ཀ །ཤ་རང་ག་པའ་ཀན་ཏ་རི། །སཔྟ་པརྞི་དུག་མོ་ཉུང༌། ཀད་ཕ་ལ་དང་དོང་གའི་ཕྱེ། །སྦྲང་རྩིས་ལྡེ་གུ་བྱས་པའམ། །ལྕགས་དགུ་པ་ཡང་ད་བཞིན་སྦྱིན། །ཡན་ལག་བརྒྱད་པའི་བསྡུས་པ་ལས། །གསོ་བའི་གནས་ཀྱི་ལེའུ་བཅུ་གཉིས་པའོ།། །།དེ་ནས་ཁོང་འབྲས་དང་རྒྱུ་རླུགས་ཀྱི་ལེའུ་བཤད་པར་བྱའོ། །ཁོང་འབྲས་མ་སྨིན་ཐམས་ཅད་ལ། །འོར་ནང་ལྟ་བུར་གོས་བ་དང༌། །རྒྱུན་དུ་ཁྲག་ནི་བྱུང་བར་བྱ། །སྨིན་པ་ལ་ནི་རྨ་ལྟར་གསོ། །རླུང་ཤས་ཆེ་ལ་རྩ་བ་ལྔ། །བསྐོལ་བས་རྨི་ནི་བཀྲུ་བ་དང༌། །ཐང་ཤིང་སོགས་སྡེ་ཤིང་མངར་དང༌། །ཏིལ་སྦྱར་རྒྱམ་ཚས་རྨ་བསྐུ་བྱ། །བཀྲུ་སྨན་དང་ནི་ལྡན་པ་ཡི། །དུར་བྱིད་ཀྱིས་ནི་རྣམ་སྦྱངས་ཤིང༌། །བི་ད་རི་ཡི་སྡེ་བསྐོལ་བའི། །དུར་བྱིད་ཀྱིས་ནི་རྨ་འབྱོར་བྱ། །མཁྲིས་གྱུར་འོ་མ་ཅན་ཆུས་བཀྲུ། །སླེ་ཏྲེས་ཤིང་མངར་ཏིལ་གྱིས་བསྐུ། །བཙོད་དང་རྒྱ་ཤུག་པུ་ཤེལ་ཙེ། །པ་ཡ་སྱ་དང་སེར་པོ་གཉིས། །འབྲས་བུ་གསུམ་དང་ཤིང་མངར་དང༌། །འོ་མར་བཅས་པས་རྨ་འབྱོར་བྱ། །ཡང་ན་ནྱ་གྲོ་དྷ་སོགས་པའི། །མྱུ་གུ་ཤུན་པ་འབྲས་བུ་བསྐུ། །བད་ཀན་ལས་གྱུར་དོང་གའི་ཆུས། བཀྲུ་ཞིང་ཕྱེ་དང་སེར་པོ་གཉིས། །དུར་ཕྱིད་དང་ནི་ཏིལ་གྱིས་བསྐུ། །ཡང་ན་རྒྱ་སྲན་དན་ཏི་ཡི། ཤམ་དུར་བྱིད་རྩི་ཏྲ་ཀ །སེང་ཕྲོམ་རྒྱམ་ཚབ་གཅིན་བཅས། །ཏིལ་མར་གྱིས་ནི་རྨ་འཚོ་བ་བྱ། །ཁྲག་དང་གློ་བུར་ལས་གྱུར་པ། །མཁྲིས་པའི་ཁོང་འབྲས་ལྟ་བུར་གསོ། །མ་སྨིན་ནད་དུ་བྱུང་བ་ལ། །བ་ར་ན་སོགས་སྡེ་བསྐོལ་བར། །ཨུ་ཤ་ཀ་ཡི་སྔ་ཚན་བཏབ། །སྔ་དྲོ་ཁོང་འབྲས་ཅན་
ལ་བླུད། །བཀྲུ་སྨན་བཅས་པར་བསྐོལ་བའི་མར། །དེ་གཉིས་དང་ནི་ལྡན་པར་བླུད། །ནི་རུ་ཧ་དང་སྣུམ་འཇམ་རྩི། །དེ་དག་གཉིས་ལ་སྦྱར་བར་བྱ། །བཟའ་དང་བཏུང་དང་བསྐུ་བ་ལ། །སྦྲང་རྩི་ན་ལེ་ཤམ་དཀར་སྦྱར། །ནད་དམིགས་ཇི་བཞིན་བླུད་ན་ནི། །ཁོང་འབྲས་མ་སྨིན་འཇོམས་པར་བྱེད། །ཀྱི་ལྕེ་ནིམ་པ་འབྲས་བུ་གསུམ། །ཤིང་མངར་པུ་ཙེ་ཤེལ་ཆ་མཉམ། །དུར་བྱིད་པ་ཏོ་ལའི་རྩ་བ། །རེ་རེ་ཆ་ནི་བཞི་པར་བྱ། །སྲན་ཆུང་སྤུན་པ་མེད་སྲང་བརྒྱད། །དེ་བསྐོལ་མར་དང་བཅས་པ་བླུད། །ཁོང་འབྲས་སྐྲན་དང་མེ་དཔལ་དང༌། །ལུས་ཚ་རྨོངས་བག་མྱོས་རིམས་འདེབས། །སྐོམ་དང་བརྒྱལ་སློན་སྙིང་ནད་དང༌། །ཁྲག་མཁྲིས་མིག་སེར་མཛེ་ནད་འཇོམས། །ཀྱི་ལྕེ་བ་ནི་ཕུལ་གང་དག །བརྒྱད་འགྱུར་ཆུ་རུ་བསྐོལ་ནས་ནི། །དེ་ཡི་ཁུ་བ་ཕུལ་གང་དང༌། །སྐྱུ་རུ་ར་ཡི་ཁུ་བ་དང༌། །འོ་མ་མར་ནི་ཕུལ་རེ་དང། །ཏིག་ཏ་བྱི་ཚེར་ཀྲ་ཡིན་ཏི། །གླ་སྒང་རམ་ཉེ་ཏ་མ་ལ། །ཙནྡན་ཨུཏྤལ་ཛི་བན་ཏི། །གཅིག་ཏུ་བསྡུས་ཏེ་བསྐོལ་བ་ཡི། །མར་དེ་ཡོན་ཏན་སྔ་མར་མཚུངས། །རྒུན་འབྲུ་འབྲ་གོ་མ་དུ་ཀ །བི་ད་རི་དང་ཉེ་ཤིང་བཅས། །པ་རུ་ཤ་ཀ་འབྲས་བུ་གསུམ། །དེ་བཙོས་ཁུ་བ་མར་བསྐོལ་ལ། །འོ་མ་བུ་རམ་ཤིང་ཀུ་དང༌། །སྐྱུ་རུ་ར་ཡི་ཁུ་བ་དང༌། །ཨ་རུ་ར་ཡི་ལྡེ་གུར་བཅས། །བསྐོལ་ཏེ་བསྒྲངས་པ་དེ་ནང་དུ། །ཁ་ར་སྦྲང་རྩི་བཞི་ཆར་བཏབ་།ཡོན་ཏན་སྔ་མ་འདྲར་ཤེས་བྱ། །ནད་དམིགས་ཇི་བཞིན་རྔབས་རྭ་སོགས། །ཡང་ན་གཏར་གས་ཁྲག་དབྱུང་བྱ། །ཁོང་འབྲས་སྨིན་པར་གྱུར་པ་ལ། །ཁོང་པར་གནས་པ་ཕྱིར་འབུར་བར། ཤེས་ནས་དེ་ནི་བཅིང་བར་བྱ། །གཟེར་བ་དེར་གནས་གོང་བུར་འདུག །དེ་ངོས་བཙིར་བས་ཚོར་བ་ཆུང༌། །ཚ་བ་ལ་སོགས་ཆུང་གྱུར་ན། །སྨིན་པ་ཡིན་པས་ཁོང་འབྲས་ནི། །བརྟོལ་ཏེ་རྨ་ལྟར་གསོ་བར་བྱ། །ནང་གི་ཆར་གནས་ཁོང་འབྲས་ནི། །སྨིན་པའི་མཚན་མའང་འདི་ཉིད་ཡིན། །སྨིན་ནས་བུ་ག་རངས་གྱུར་ཏེ། །དེ་ནི་སྟེང་མ་འོག་ཏུ་དབྱུང༌། །རང་ཉིད་རྡོལ་བའི་ནད་དེ་ནི། །ཟས་ཕན་བྱིན་ཞིང་སྙོམས་གཞག །ཞག་བཅུ་འམ་བཅུ་
གཉིས་བར་དུ་ནི། །སྨན་པས་བླ་བརྣན་ལས་བསྲུང་བྱ། །རང་ནི་ལེགས་པར་མི་འཛག་ན། །པར་ན་ན་སོགས་ཆུ་དྲོན་ནམ། །ཤི་ཀྲུ་སྦྲང་རྩི་བླུད་པའམ། །དེ་དང་སྦྱར་བའི་ནས་ཐུག་བླུད། །རྒྱ་ཤུག་རྒྱ་སྲན་ནས་ཀྱི་ནི། །ཡུ་ཤ་དང་ནི་བཟའ་བ་བསྔགས། །ཞག་བཅུ་ཕན་ཆད་ཀྱི་ལྕེ་བ། །མར་རམ་སེང་ཕྲོམ་དག་གིས་ནི། །ཉམས་སྟོབས་ཇི་བཞིན་སྦྱང་བར་བྱ། །སྦྱངས་ནས་ཏེག་ཏ་སྦྲང་རྩི་བླུད། །འདི་ལ་ཀུན་ཀྱང་སྐྲན་ལ་བུར། །ནད་ཐབས་ཇི་བཞིན་གསོ་བར་བྱ། །ཁོང་འབྲས་ཀུན་དང་གནས་སྐབས་དང༌། །ཐམས་ཅད་དུ་ནི་གུ་གུལ་གཏང༌། །དེ་བཞིན་བྲག་ཞུན་རང་རང་གི །སྦྱོར་བར་བཅས་ཏེ་ཁུ་བ་བླུད། །འབད་དེ་སྨིན་པ་ལས་བསྲུང་བྱ། །སྨིན་ན་ཤིན་ཏུ་གསོ་དཀའ་ཡིན། གཞན་ཡང་མྱུར་དུ་ཚ་བྱེད་པས། །ཁོང་འབྲས་ཞེས་ནི་དེ་ལ་བཤད། །གལ་ཏེ་གཅིན་སྙི་ལས་གྱུར་ན། །གཅིན་སྙི་བ་ཡི་གསོ་བ་བྱ། །ནུ་མར་བྱུང་ལ་འདི་ལྟར་ནི། །མི་བཅིང་ཐམས་ཅད་རྨ་ལྟར་གསོ། །དབྲལ་ཚེ་ནུ་ཞོ་འཛག་པ་དང༌། །ནུ་སོར་ནག་པོར་མི་གནོད་བསྲུང༌། །མ་སྨིན་གནས་སྐབས་ཐམས་ཅད་དུ། །དེ་ཡི་ནུ་ཞོ་བཅིར་ཞིང་བཞོ། །རྒྱུ་རླུགས་རླུང་ཤས་ཆེ་བ་ལ། །དུར་བྱིད་སྣུམ་ཅན་གྱིས་སྦྱངས་ཤིང༌། །ཨ་མྲའི་འབྲས་བུ་སེང་ཕྲོམ་མར། །ཨེ་རཎྜ་དང་སྐྱིད་དེ་བའི། །མར་དང་སྨན་མར་འདྲེན་མར་སྦྱིན། །དེ་ནས་རླུང་འཇོམས་སྨན་ཁུ་སྣུམ། །ལྡེ་གུ་མས་གཏོང་དྲག་པོ་བྱ། །ཤ་ཁུ་བཅས་པའི་ཟས་སྦྱིན་ཞིང༌། །ཤིང་མངར་སྣུམ་བསྐོལ་འཇམ་རྩི་གཏང༌། །རླུང་འཇོམས་དུགས་དང་བསྐུ་མཉེ་བྱ། །སྨིན་ནས་དྲལ་ལ་རྨ་ལྟར་གསོ། །རྒྱུ་རླུགས་ཁྲག་མཁྲིས་ལས་གྱུར་པ། །སྨིན་དང་མ་སྨིན་ཇི་བཞིན་དུ། །རྨ་དང་སྐྲངས་པའི་གསོབ་བྱ། །རྒྱུན་ཏུ་ཁྲག་ཀྱང་དབྱུང་བར་བྱ། །བད་ཀན་ལས་གྱུར་སྐྱེར་པ་ཡི། །ཕྱེ་མ་གཅིན་སྦྱར་བ་བླུད། །འདི་ལམ་ཉེད་བྱ་མ་གཏོགས་པར། །བད་ཀན་རྨེན་བུའི་གསོ་བ་བྱ། །སྨིན་ནས་དབྲལ་ཏེ་ཛའ་ཏི་ཡི། །མེ་ཏོག་གོ་བྱེ་ཨང་ཀོ་ལ། ལོ་མ་དུན་པ་ཏ་ལ། ནིམ་པ་ཡུང་བ་བྱི་དང་ག །དུག་མོ་ཉུང་དང་ཏིལ་མར་བསྐོལ། །རྨ་སྦྱང་ཕྱིར་ནི་བླུད་པ་ལ་བསྔགས། །ཚིལ་ལས་གྱུར་ལ་བྱེའུ་རུག་སོགས། །
བ་གཅིན་སྦྱར་ཏེ་བཏགས་པའམ། མགོ་བོའི་བཀྲུ་སྨན་དག་གིས་བྱ། །རླིག་པའི་སྲུབས་མཚམས་མ་གཏོགས་པར། །འཕེལ་གཙགས་ཀྱིས་ནི་དབྲལ་ནས་ནི། །ཚིལ་ནི་ལེགས་པར་དབྱུང་བར་བྱ། །རྨ་ནི་སྦྲང་རྩི་ནག་ཚུར་དང༌། །རྒྱམ་ཚ་ངེས་པར་བསྐུས་ནས་བཙེམས། །དེ་ལ་ཚིལ་ནི་སྦྱང་བའི་ཕྱིར། །སྡོང་རོས་སུག་སྨེལ་སུ་མ་ན། །གོ་བྱེ་པི་པི་ལིང་མཱུ་ལ། །ཏིལ་མར་ངག་ནི་བསྐུ་བར་བྱ། །རྨ་ནི་འབྱོར་བར་གྱུར་གྱི་བར། །སྣུམ་དང་དུགས་ཀྱང་བསྟེན་པར་བྱ། །གཅིན་བྱུང་སྣུམ་གྱིས་དུགས་བྱ་ཞིང༌། །རས་མ་ཕྲ་མོས་དཀྲི་བར་བྱ། །སྲུབས་མཚམས་འོག་ཏུ་དམུ་རྫིང་བཞིན། །ལེགས་པར་དབྲལ་ཏེ་གཟག་པར་བྱ། །རྨ་བཀབ་བཅིང་དང་འབྱོར་པར་བྱར། །རྒྱུ་མ་བྱུང་བར་གྱུར་བ་དག །རླིག་པར་ཕྱིན་པར་མ་གྱུར་ལ། །རླུང་གི་རྒྱུ་རླུགས་བཞིན་དུ་གསོ། །བ་སྦུ་བ་ནི་སྲང་བརྒྱ་དང༌། །རྩ་བ་བཅུ་པ་ཨེརཎྜ། །ཨ་ཤྭ་གནྡྷྱ་ཉེ་ཤིང་དང༌། །པ་ཡ་སྱ་དང་དཱུར་བ་གཉིས། །འདམ་བུ་ཀུ་ཤ་བུ་རམ་གཉིས། །ཨ་ཧ་གལ་ལར་བཅས་པ་ནི། །རེ་རེ་སྲང་ནི་བཅུ་བཅུར་བྱས། །ཆུ་བྲེ་བརྒྱ་རྩ་ཉི་ཤུ་བརྒྱད། །བསྐོལ་བ་བརྒྱད་ཆ་ལུས་པ་རུ། །དེར་ནི་བུ་རམ་སྲང་སུམ་ཅུ། །ཨེ་རཎྜ་ཡི་མར་བྲེ་དོ། །འོ་མ་མར་ནི་བྲེ་དོ་དོ། །པི་པི་ལིང་དང་དེ་རྩ་བ། །ཤིང་མངར་རྒུན་འབྲུ་ལྕེ་མྱང་ཚ། །ལ་ལ་ཕུད་དད་དོང་གྲ་གཞུག །དེ་བཙོས་སྐྱིད་དེ་བ་ཞེས་བྱ། །གཞོན་ཤ་ཅན་གྱི་བཅུད་ལེན་ཡིན། །རླུང་དང་ཐན་པ་ལམ་དུ་འགྲོ། །བཞོན་སྩོགས་བསྲུང་བ་བསྡམས་མི་དགོས། །སྒྱིད་དེ་བ་དང་ཕྱུག་པོ་དང༌། བདེ་བ་བསྟེན་དང་བུད་མེད་དང༌། །བུད་མེད་རྒན་མོའི་ཁྱོ་དང་ནི། དཔལ་སྐྱེད་རྩོད་པ་ཟློག་བྱེད་ཅིང༌། །དུས་ཀུན་དུ་ནི་བརྟེན་གྱུར་ན། །མདོག་མདངས་ཤ་ནི་རྒྱས་བྱེད་ཅིང༌། །རྒྱུ་རླུགས་ཁོང་འབྲས་སྐྲན་གཞང་འབྲུམ། །ཕོ་མཚན་མོ་མཚན་རླུང་གིས་ཉེ་ན། །འོར་ནད་མུ་རྫིང་མཆིན་བ་དང༌། །རྟུག་སྐམ་ནད་ནི་སེལ་བྱེད་མཆོག །སྣུམ་གྱི་བཀྲུ་སྨན་འཇམ་རྩི་ཡིས། གལ་ཏེ་རྒྱུ་རླུགས་མ་ཞི་ན། །དང་པོ་འཇམ་ཙི་བཏང་ནས་ནི། །དེ་ནས་ཆུ་སོར་གནས་པ་ནི། །ཟླ་བ་ཁམ་པའི་ཁ་འདྲ་པས། །རླུང་ལམ་དགག་ཕྱིར་
བསྲེག་པར་བྱ། །མཐེ་བོང་སྟེང་གི་རྒྱུས་པ་ནི། །སེར་ཞིང་སྣལ་མ་འདྲ་བ་གང༌། །ཁབ་ཀྱིས་བཏེག་སྟེ་ཐད་ཀ་རུ། །གང་ན་ནད་ཡོད་བཅད་དེ་བསྲེག །གཞན་དག་དེ་ལས་ལོགས་གཞན་ནམ། །སྲིན་ལག་སོར་མོ་བསྲེག་ཅེས་ཟེར། །ཁ་ཅིག་འདི་ནི་བད་ཀན་རླུང༌། །ལས་གྱུར་སྐྲན་མཆེར་ལ་བྱ་ཟེར། །བི་ཤ་ཅོ་ནད་གང་ན་ཡོད། །མཐེའུ་ཆུང་སྲིན་ལག་དག་ལ་བྱ། །ཡན་ལག་བརྒྱད་པའི་སྙིང་པོ་བསྡུས་པ་ལས། །གསོ་བའི་གནས་ཀྱི་ལེའུ་བཅུ་གསུམ་པའོ།། །།དེ་ནས་སྐྲན་གསོ་བའི་ལེའུ་བཤད་པར་བྱའོ། །རླུང་གྱུར་སྐྲན་ནི་མི་བཟད་ན། །ཕྱིས་འཕྱེན་ནི་འགགས་གྱུར་ན། །རྩུབ་དང་གྲང་བྱུང་རླུང་ནད་ལ། །ཕན་པའི་ཏིལ་མར་དག་གིས་གསོ། །ཟས་སྐོམ་འཇམ་རྩི་སྦྱར་བ་དང༌། །བསྐུ་བྱུག་སྣུམ་འཚོས་དུགས་དཔྱང་བྱ། །སྦོ་དང་ཟུག་དང་རེངས་པ་དང༌། །འགགས་པ་ལ་ནི་མཆོག་ཏུ་བྱ། །སྣུམ་འཆོས་དུགས་ནི་བྱས་པ་ཡིས། །བུ་གའི་རྒྱུན་སྲང་མ་ཉེན་བྱེད་ལ། །རླུང་ཤས་ཆེ་བ་གཞོམ་བྱ་ཞིང༌། །ཕྱིས་སྲི་བ་སེལ་སྐྲན་འཇོམས། །ལྟེ་བ་ཡན་ཆད་སྐྱེས་པ་ཡི། །སྐྲན་ལ་མཆོག་ཏུ་སྣམ་བླུད་ཕན། །ཞུ་བའི་གནས་བརྟན་འཇམ་རྩི་བྱ། །ལྟོ་བར་གནས་ལ་གཉི་ག་བྱ། །རླུང་ཅན་སྐྲན་ནི་དྲོད་ཆེ་ལ། །ཕྱིས་རླུང་ནི་འགགས་གྱུར་ལ། །བཟའ་བཏུང་ཉམས་བརྟས་བྱེད་པ་དང༌། །སྣུམ་དང་དྲོ་བ་སྦྱིན་པར་བྱ། །རླུང་གྱུར་སྐྲན་ལ་བད་ཀན་དང༌། །མཁྲིས་པ་སྲུང་ཞིང་ནི་རུ་ཧ། །འཇམ་རྩི་བཅས་པའི་སྦྱོར་བ་ནི། །ཡང་དང་ཡང་དུ་བྱ་བ་ཡིན། །འཇམ་རྩི་མཆོག་ཏུ་སྐྲན་འཇོམས་པར། །ཤེས་བྱ་དེ་ནི་རླུང་གི་ནང༌། །དང་པོར་རང་གི་གནས་སུ་བཅོམ། །འཕྲལ་དུ་སྐྲན་ནི་སེལ་བར་བྱེད། །དེ་བས་སྐྲན་ལ་རྒྱུན་དུ་ནི། །མས་གཏོང་དྲག་པོ་འཇམ་རྩི་བཅས། །བཏང་བར་གྱུར་པས་རླུང་བད་ཀན། །མཁྲིས་པའི་བདག་ཉིད་ཅན་རྣམས་སེལ། ཤིང་ཀུན་དང་ནི་ཚ་བ་གསུམ། །རྩབས་རུ་ཚ་དང་ཁ་རུ་ཚ། །སེ་འབྲུ་མ་ནུ་གོ་སྙོད་དང༌། །ཟིར་འུ་སུ་ལ་ལ་ཕུད། །སྟར་བུ་ཡ་བཀྵ་ར་དང༌། །ཟུར་པ་ཤུ་དག་ཙི་ཏྲ་ཀ །ཨ་ཟ་གནྡྷ་སུག་སྨེལ་དང༌། བྱེ་རུག་པ་ནི་ཞོ་དང་བཅས། །མར་བསྐོལ་རླུང་གི་སྐྲན་སེལ་ཞིང༌། གཟེར་དང་
ལྟོ་སྦོས་འཇོམས་པར་བྱེད། །སྤ་མའི་འབྲས་བུ་ཚ་བ་གསུམ། །ཟིར་གོ་སྙོད་ཚ་བ་ལྔ། །ཨ་ཟ་མོ་དང་ལྕེ་མྱང་ཚ། །ཞོ་དང་འོ་མ་མར་དང་ནི། །སེ་འབྲུལ་ཕུག །རྒྱ་ཤུག་གི །ཁུ་བ་བསྐོལ་བས་རླུང་གི་ནི། །སྐྲན་དང་དམུ་རྫིང་ལྟོ་སྦོས་དང༌། །རྩིབ་ལོགས་སྙིང་དང་ལྟོ་བ་གཟེར། །མངལ་ནད་གཞང་འབྲུམ་ཕོ་བའི་ནད། །ལུད་པ་དབུགས་མི་བདེ་བ་དང༌། །རིམས་ནད་ཡི་ག་མཆུས་པ་འཇོམས། །རྩ་བ་བཅུ་པ་སུ་ཤ་བི། །པ་ལ་ཤ་ཀ་མ་ནུ་དང༌། བ་སྦུ་བ་གཉིས་ཨེ་རཎྜ། །ར་སྣ་ཨ་ཤྭ་གནྡྷ་དང༌། །ག་ཟའི་རྩ་བ་ཟུར་པ་དཀར། །སླེ་ཏྲེས་གནྡྷ་པ་ལག་སྲང་ནི་གཉིས་གཉིས་ཚད་བྱས་དང༌། །ཉི་ཤུ་རྩ་བརྒྱད་ནང་དུ་བསྐོལ། །ནས་དང་རྒྱ་ཤུག་རྒྱ་སྲན་དང༌། །མ་ཤ་བྲེ་རེ་ལྷན་གཅིག་ཏུ། །ཆུ་བྲེ་བཅུ་དྲུག་ནང་དུ་བསྐོལ། །ཁུ་བ་དེར་ཞོ་བྲེ་བཞི་དང༌། །མར་བྲེ་གང་དང་སླར་བསྐོལ་ལ། །སེ་འབྲུ་ཨམྲ་ཏ་ཀ་དང༌། །ཁ་ལུང་ཁུ་བ་བྲེ་རེ་རེ་བཅས། །དེ་བཞིན་རྩ་བ་མོ་སྐྱུར་རྩབས་ཚ། །གཡེར་མ་ཤུ་ངག་གྲ་བྲའི་རྩ། །ར་སྣ་པི་པི་ལིང་རྩ་བ། །ཙི་ཏྲཀ་དང་འུ་སུ་དང༌། །ཡ་བ་ན་ག་ལ་ལ་ཕུད། །སྟར་བུ་ཟིར་ནག་པོ་དང༌། །གོ་སྙོད་ཟིར་སྤ་མའི་འབྲས། །ཀ་ར་པི་བ་ཟངས་རྩི་བ། །ཨུ་ཤ་ཀ་དང་དུར་བྱེད་དང༌། །དན་ང་མུ་ར་བ་བྱི་དག་ག །སེ་འབྲུ་ཧསྟི་པི་པི་ལིང༌། །གཟེ་མ་སྤང་སྤོས་སྲུ་སྲུའི་རྩ། །ག་གོན་རྒྱལ་མོ་ག་གོན་གྱི། །ས་བོན་ཤུཏི་ཐལ་སྨན་གཉིས། །བྱེ་འུ་རུག་པ་ཐལ་ཏྲེས་དང༌། །ནི་ལི་ན་ལའི་འབྲས་བུ་དང༌། །ལན་ཚྭ་གསུམ་དང་ཚ་བ་གསུམ། །བཅས་པའི་ཞོ་ཡི་སྨན་མར་དེས། །སྔར་བཤད་ནང་ནི་གསོ་དཀའ་དང༌། །བརྗེད་བྱེད་སྨྱོ་བྱེད་གཅིན་སྲི་དང༌། །རླུང་ནད་གཞང་འབྲུམ་མྱུར་དུ་འཇོམས། །ཚ་བ་གསུམ་དང་འབྲས་བུ་གསུམ། །འུ་སུ་དབྱི་མོང་བྱི་དང་ག །ཙི་ཏྲ་ཀྣི་ལྡེ་གུར་བྱས། །འོ་མ་མར་བསྐོལ་རླུང་སྐྲན་འཇོམས། །སྒོག་སྐྱའི་རྩ་བ་སྲང་བརྒྱ་དང༌། །རྩ་བ་ཆེན་པོ་སྲང་ལྔ་ལྔ། །ཆུ་སྲང་དང་དེ་བསྐོལ་ལ། །བཞི་ཆ་ལུས་པར་ཕྱེད་སེ་འབྲུའི། །ཁུ་བ་ཆང་དང་འབྲས་ཁུ་སྐྱུར། །ཞོ་རྣམས་དེ་ཡུ་ཕྱེད་ཕྱེད་དང༌། །ཚབ་གསུམ་དང་འབྲས་བུ་གསུམ། །ཤིང་ཀུན་དབྱུ་མོ་ལ་ལ་ཕུད། །དབྱི་མོང་སྟར་བུ་ལྕེ་མྱང་ཚ། །
ཐང་ཤིང་སྲང་ནི་ཕྱེད་ཕྱེད་དང༌། །མར་ནི་བྲེ་གང་བཅས་པར་བསྐོལ། །རླུང་ལས་གྱུར་པའི་སྐྲན་ཀུན་འཇོམས། །གཅོང་ཆེན་སྐབས་སུ་བཤད་པ་ཡི། །སྲང་དྲུག་པ་ཡི་མར་ཡང་བླུད། །འོ་མའི་སྐྱིན་པ་ཆང་དངས་སམ། །སེ་འབྲུ་ཞོ་སྤྲིས་སྦྱར་བའི་མར། རླུང་ལས་གྱུར་པའི་སྐྲན་སེལ་ཏོ། །རླུང་གི་སྐྲན་ལ་བད་ཀན་འཕེལ། །དྲོ་འཇམ་ཡི་ག་འཆུས་པ་དང༌། སྙིང་རྒལ་ཁོང་ལྕེ་གྱུར་པ། །དེ་ལ་སྐྱུག་སྨན་གཏང་བར་བྱ། །གཟེར་དང་ལྟོ་སྤོས་བཤང་སྲི་ལ། །གནས་ཤེས་བྱས་ནས་སྣུམ་བཅས་པའི། །སྨན་མར་སྨན་གྱི་ཕྱེ་མ་དང། །ཁུ་བ་རི་ལུང་བྱས་པ་ཡི། །རྒྱ་ཤུགས་སེ་འབྲུ་ཆུ་དྲོན་དང༌། །དར་བ་དད་ཆད་དང་སྐྱུར་རྩབས་དང༌། །ཆང་དངས་བཅས་པ་ནང་པར་བླུད། །ཡང་ན་ཕྱེ་མ་ལ་སོགས་པ། །ཐུག་པ་སླ་བོར་བྱས་པ་ནི། །ནང་པར་ཡང་ན་ཟས་སྔོན་བླུད། །ཕྱེ་མ་ཁ་ལུང་ཁུ་བ་དང༌། །ལན་མང་བགྲུངས་པར་གྱུར་པ་ཡི། །ལས་ནི་བྱེད་པར་ནུས་གྱུར་པའི། །རི་ལུས་རླུང་དང་བད་ཀན་འཇོམས། །ཤིང་ཀུན་ཤུ་དག་ཨ་རུ་ར། །ཨ་ཟག་གནྡྷ་སེ་འབྲུ་དང༌། །ཨུ་སུ་པ་ཏ་ཏི་མུ་ས། །མ་ནུ་ཟུར་པ་དཀར་པོ་དང༌། །སྤ་མའི་འབྲས་བུ་ཅི་ཏ་ཀ །ཐལ་སྨན་གཉིས་དང་ལན་ཚྭ་གཉིས། །ཚ་བ་གསུམ་དང་ཟིར་དང༌། །དབྱི་མོ་ད་ཏྲིག་སྟར་བུའི་ཕྱེས། །རླུང་དང་བད་ཀན་ལས་གྱུར་པའི། །སྙིང་ག་རྩིབ་ལོགས་ཆུ་སོ་དང༌། །མཇུག་ཏོ་མངལ་དང་ཆུ་སོར་གཟེར། །བད་ཀན་རླུང་ལས་གྱུར་པའི་ནང༌། །གསོ་དཀའ་སྐྲན་དང་འཕྱེན་དང་ནི། །གཅིན་དང་ཕྱི་ས་འགགས་པ་དང༌། །ལྐོག་མ་འགགས་ཤིང་སྙིང་ནད་དང༌། །སྐྱ་རྦབ་ཡི་ག་འཆུས་པ་དང༌། །མཆེར་པ་གཞང་འབྲུམ་སྐྱིགས་བུ་དང༌། །རྒྱུ་རླུགས་ལྟོ་སྦོས་མེ་དྲོད་ཉམས། །ལུད་པ་དབུགས་མི་བདེ་བ་སེལ། །རྒྱམ་ཚ་དང་ནི་ལ་ལ་ཕུད། །ཨ་ཟ་མོ་དང་པི་པི་ལིང༌། །དོང་གྲར་མི་བཞིན་ཆ་རེས་བསྐྱེད། །ཐམས་ཅད་དང་ནི་ཆ་མཉམ་པའི། །ཨ་རུ་ར་བསྲེས་ཕྱེ་མ་འདི། །མ་ནི་མངོན་སུམ་ཉིད་ཡིན་ནོ། །ཚ་བ་གསུམ་དང་ཏི་མུ་ས། །རྒྱམ་ཚ་དང་ནི་ཟིར་གཉིས། །ཆ་མཉམ་ཤིང་ཀུན་བརྒྱད་ཆའི་ཕྱིར། །མར་བསྲེས་ཁམ་གྱི་དང་པོར་ཟོས། །མེ་དྲོད་དྲག་པོ་སྐྱེད་
བྱེད་ཅིང༌། །རླུང་གི་སྐྲན་ནི་འཇོམས་པར་བྱེད། །ཤིང་ཀུན་ཤུ་དག་ཁ་རུ་ཚ། །དོང་གྲ་དང་ནི་ལ་ལ་ཕུད། །རྣམ་རྒྱལ་མ་ནུ་རུ་རྟ་དང༌། །དུར་བྱིད་དན་དའི་རྩ་བར་བཅས། །ཆ་རེས་བསྐྱེད་པའི་ཕྱེ་མ་འདི། །ཆུ་དྲོན་སྦྱར་འཐུངས་ལྟོ་བའི་ནད། །སྐྲན་དང་དམུ་རྫིང་ལ་སོགས་པ། །སེང་གེས་རི་དྭགས་ཚོགས་རྣམས་ནི། །མཐུ་རྩལ་གྱིས་ནི་ཟིལ་ནོན་ལྟར། །ནད་རྣམས་འཇོམས་པར་བྱེད་པ་ཡིན། །ལྕེ་མྱང་ཚ་དང་པི་པི་ལིང༌། །ཨ་ཟ་མོ་དང་ཨ་རུ་རའི། །ཕྱེ་མ་ཆུ་དྲོན་སྦྱར་བླུད་ན། །སྐྲན་ཅན་བད་རླུང་ལས་གྱུར་ཚོགས། །ལྕགས་མདས་ལུས་ཕུག་བཞིན་དུ་འཇོམས། །ཀ་ར་ཉྫ་ཡི་ལོ་མ་དང༌། །ཨིན་ཏྲ་བ་རུ་ཎ་སྤྱི་མོ། །ཀླུ་ཏྲུག་ཏྲེས་དང་བཅའ་སྒ་དང༌། །པི་པི་ལིང་དང་ན་ལེ་ཤམ། །མ་ལུས་རིམ་བཀོད་རྒྱམ་ཚས་བཀབ། །བསྲེགས་ལ་བཏགས་ཏེ་ཞོ་དང་ནི། །ཞོ་ག་ཆུ་སྦྱར་བླུད་པ་དག །སྐྲན་དང་དམུ་རྫིང་འོར་ནད་དང༌། །སྐྱ་རྦབ་གཞང་འབྲུམ་ནད་རྣམས་སེལ། །ཤིང་ཀུན་སུམ་འགྱུར་རྒྱམ་ཚ་དང༌། །དེ་ལས་ཨེ་རཎྜ་ཡི་མར། །སུམ་འགྱུར་དེ་ལས་སྒོག་སྐྱ་ཡི། །ཁུ་བ་སུམ་འགྱུར་སྦྱར་བ་དག །བླུད་ན་སྐྲན་དང་དམུ་རྫིང་དང༌། །རྒྱུ་རླུགས་གཟེར་གྱི་ནད་རྣམས་འཇོམས། །ཁ་ལུང་ཁུ་བ་ཤིང་ཀུན་དང༌། །སེ་འབྲུ་རྒྱམ་ཚ་ཁ་རུ་ཚ། །ཆང་གི་དངས་མར་སྦྱར་བླུད་ན། །རླུང་ལས་གྱུར་པའི་སྐྲན་ནད་སེལ། །བཅའ་སྒ་ཞོ་གཉིས་བུ་རམ་ཞོ། །བཞི་དང་ཏིལ་ནག་བཀྲུས་སྲང་གཅིག །གཅིག་ཏུ་ཕྱེ་མར་བཏགས་བྱིན་ཞིང༌། །འོ་མ་དྲོ་འཇམ་རྗེས་བླུད་ན། །རླུང་གི་སྙིང་ནད་སྐྲན་གཞང་འབྲུམ། །མངལ་གཟེར་རྟུག་པ་འགགས་པ་སེལ། །རླུང་གྱུར་སྐྲན་ལ་ཨེ་རཎྜའི། །མར་ནི་ཆང་དང་སྦྱར་བ་བླུད། །བད་རླུང་འདྲེས་ལའང་དེ་ཉིད་བླུད། །མཁྲིས་པ་འདྲེས་ལ་འོ་མ་བཅས། །གལ་ཏེ་མཁྲིས་པ་འཕེལ་འགྱུར་ཏེ། །ཚ་གྱུར་རླུང་གི་སྐྲན་ཅན་ལ། །མཐུན་པ་རྗེས་སུ་འབྱིན་བྱེད་པ། །སྣུམ་བཅས་པ་བཀྲུ་སྨན་གཏང་བར་བྱ། །དེས་ཀྱང་ཚ་བ་མ་བྲི་ན། །དེ་ལ་གཏར་ག་གདབ་པར་བྱ། །སྒོག་སྐྱ་བཤུས་པ་སྐམ་པོ་ནི། །སྲང་བཞི་ཆུ་དང་འོ་མ་ནི། །བརྒྱད་འགྱུར་གྱི་ནི་ནང་དུ་བསྐོལ། །འོ་མ་མ་ལུས་པར་བླུད་ན། །རླུང་གྱུར་སྐྲན་དང་རྟུག་འགགས་
དང། རླུང་ནད་གཟུགས་འཁུམས་མི་བཟད་རིམས། །སྙིང་ནད་ཁོང་འབྲས་ཟད་བྱེད་རྣམས། །འོ་མ་དེ་ཡིས་མྱུར་དུ་འཇོམས། །ཏིལ་མར་ཆང་དང་བ་གཅིན་དང༌། །རང་སྐྱུར་ཡ་བཀྵ་རར་བཅས། །བླུད་ན་སྐྲན་དང་དམུ་རྫིང་དང༌། །ལྟོ་སྦོས་ཅིག་ཅར་འཇོམས་པར་བྱེད། །ཙིཏྲ་པི་པི་ལིང་མའུ་ལ། །བཅའ་སྒ་ཤིང་ཀུན་ཀུན་ཨེརཎྜ། །རྒྱམ་ཚ་ཁ་རུ་ཚ་བཅས་པ། །བསྐོལ་བ་བླུད་ན་གཟེར་བ་དང༌། །ལྟོ་སྤོས་རྟུག་འགགས་སེལ་མཆོག་ཡིན། །མ་ནི་ཨེ་རཎྜའི་རྩ་བ། །ནས་དང་བྱི་ཚེར་བ་ཤཀ །ཆུ་དང་བསྐོལ་ཏེ་བླུད་ན་ནི། །ལྟོ་ནད་སྤོས་དང་ག་ཟེར་འཇོམས་བྱེད། །མ་ནུ་ཨེ་རཎྜ་འཇག་མའི། །རྩ་བ་ཐང་ཤིང་བཅའ་སྒ་རྣམས། །ཆུ་དང་བསྐོལ་བའི་ཁུ་པ་བླུད། །ཁོང་པ་ཕྲག་པ་རྒྱབ་གཟེར་འཇོམས། །བྲག་ཞུན་དང་ནི་པ་ཡ་སྱ། །རྩ་བ་ཆེན་པོ་ལྔ་བསྐོལ་བ། །རླུང་གྱུར་སྐྲན་ནད་ཅན་ལ་བླུད། །རྟུག་སྐམ་ནད་ལ་ནས་ཀྱི་ནི། །ཆག་ཚེ་སྣུམ་དང་ལྡན་པ་སྦྱིན། །པི་པི་ལིང་ངམ་ལ་ཕུག་གི །ཁུ་བ་དང་ནི་སྦྱར་བ་སྦྱིན། །ནས་ཀྱི་ཟན་དྲོན་འོ་མར་བཅས། །རླུང་གི་རྟུག་འགགས་ནད་ལ་སྦྱིན། །ཡང་ན་མོན་སྲན་གྲེའུའི་ཆན། །སྣུམ་མང་ལན་ཚྭ་ར་ལྡན་པ་སྦྱིན། །དུར་བྱིད་དན་ཏི་ནི་ལི་ནི། །ཨ་རུ་ར་དང་ཀམ་པི་ལྱ། །ནས་ཚིག་འཁུས་ཐལ་ཁ་རུ་ཚ། །དོང་གྲ་མར་དང་བཅས་པ་ནི། །དྲི་མར་བཅས་ལ་བཀྲུ་སྨན་གཏང༌། །ནི་ལི་ནི་དང་འབྲས་བུ་གསུམ། །ར་སྣ་པ་ལ་པུ་ཙེ་ཤེལ། །ཀཎྜ་ཀ་རི་བྱི་དང་ག །སྲང་རེ་ཆུ་བྲེ་བཞི་ནང་བསྐོལ། །ཁུ་ལ་བརྒྱད་ཆ་ལུས་པ་རུ། །མར་བྲེ་གང་ཞོ་བྲེ་གང་དང་ཞོ་བྲེ་གང༌། །སུ་དྷ་ཀྵི་ར་སྲང་གཅིག་བསྐོལ། །དེ་ལས་མར་བྲེ་རེ་རེ་ན། །ནས་ཐུག་ཐུག་སླ་སྦྱར་ཏེ་བླུད། །ཞུ་ཞིང་ལེགས་པར་འཁྲུས་ནས་ནི། །ཤ་ཁུ་བཟའ་བ་སྦྱིན་པར་བྱ། །ནི་ལི་ནི་ཡི་སྨན་མར་འདིས། །སྐྲན་མཛེས་མུ་རྫིང་ངོ་ཁབས་དང༌། འོར་ནད་སྐྱ་རྦབ་པ་རིམས་ནད་དང༌། །ཤ་བཀྲ་མཛེར་པ་སྨྱོ་བྱེད་འཇོམས། །ཁྱིམ་བྱ་རྨ་བྱ་གོང་མ་སྲེག །ཁྲུང་ཁྲུང་བྱའུའི་ཤ་ཁུ་དང༌། །སཱ་ལུའི་འབྲས་ཆན་ཆང་དང་མར། །རླུང་གི་སྐྲན་ནི་སེལ་བ་ཡིན། །ཉུང་ཞིང་སྣུམ་ལ་སླ་ཞིང་དྲོ། །ཁ་ཟས་རླུང་སྐྲན་ཅན་གྱིས་
བཟའ། །བཏུང་བར་ཆང་གི་དངས་མའམ། །འུ་སུ་བསྐོལ་བའི་ཆུ་ཚན་བླུད། །མཁྲིས་གྱུར་སྐྲན་ནི་སྣུམ་དྲོ་ལས། །བྱུང་བ་དེ་ལ་རྒུན་འབྲུ་དང༌། །ཨ་རུར་བསྐོལ་བུར་རམ་བཅས། །ཀམ་པི་ལྱ་དང་སྦྲང་རྩི་དང༌། །ཆོ་ག་འམ་ཁྲག་མཁྲིས་གསོར་བཤད་པའི། །བཀྲུ་སྨན་བླུད་དེ་འཁྲུས་པ་ཕན། །རྩུབ་དྲོ་ལས་བྱུང་སྐྲན་ལ་ནི། །ཏིག་ཏ་འམ་བ་ཤ་ཀ་བསྐོལ་བའི། །མར་ནི་བླུད་པར་བྱས་པའམ། །རྩྭ་ཡི་རྩ་བ་ལྔ་པ་འམ། །འཚོ་བྱེད་སྡེ་ཚན་བཤད་པ་དང༌། །མར་བསྐོལ་བླུད་ན་མཆོག་ཏུ་ཕན། །ནྱ་གྲོ་དྷ་སོགས་སྡེ་ཚན་རྣམས། །འཚོ་བྱེད་སྡེ་ཚན་འོ་མ་ཕན། །དེ་ཡང་བཤོལ་དུ་མེད་གྱུར་པར། །སྨན་པས་བཀྲུ་སྨན་དང་བསྐོལ་བའི། །མར་རམ་འོ་མ་དག་གི་ནི། །བཀྲུས་སྨན་ཉེ་བར་གཏང་བར་བྱ། །སྐྱུ་རུ་ར་དང་བུ་རམ་ཤིང༌། །ཁུ་བ་མར་ནི་བྲེ་གང་དང༌། །ཨ་རུ་ར་ནི་ཞི་ཆ་བཅུག །བསྐོལ་བའི་མར་བླུད་མཁྲིས་སྐྲན་སེལ། །ཡང་ན་མཁྲིས་པའི་ཁོང་འབྲས་གསོར། །བཤད་པའི་སེང་ཕྲོམ་སྨན་མར་བླུད། །རྒུན་འབྲུ་ཤིང་མངར་པ་ཡ་སྱ། །ཤུག་པ་ཙནྡན་སྦྲང་རྩི་རྣམས། །འབྲས་བཀྲུས་ཆུ་དང་བླུད་ན་ནི། །མཁྲིས་པའི་སྐྲན་ནི་སེལ་བར་འགྱུར། །ཀྱི་ལྕེ་བ་ནི་སྲང་གཉིས་དང༌། །ཆུ་བྲེ་དོ་ནི་བསྐོལ་ནས་སུ། །བརྒྱད་ཆ་ལུས་པ་བཙགས་པ་ནི། །དྲོ་འཇམ་འོ་མ་ཆ་མཉམ་བླུད། །ཡང་ན་དེ་སྟེང་འོ་ཆན་ནི། །མེ་དྲོད་ཇི་བཞིན་བླུད་པར་བྱ། །དེ་ཡིས་ནད་ནི་བསལ་བས་ན། །མཁྲིས་པ་ཅན་གྱི་སྐྲན་ཞིར་འགྱུར། །ཚ་ལ་མར་གྲང་བསྐུ་བའམ། །བསིལ་བའི་སྨན་མར་བཅས་པ་བསྐུ། །ཆུ་སྐྱེས་ལོ་མས་རེག་བྱ་ཞིང༌། །སྣོད་ཆུས་གང་ལ་རེག་པ་ཕན། །གཟེར་དང་མེ་དྲོད་བྲི་འགྱུར་ཞིང༌། །ཚ་བའི་དང་པོ་ཚུལ་ཅན་གྱིས། །མཁྲིས་པའི་སྐྲན་ལ་ཁྱད་པར་དུ། །ཁྲག་ནི་ལན་མང་དབྱུང་བ་ཕན། །རྩ་བ་ཆད་སྐྲན་མི་ཚ་ཞིང། །ཉེ་བར་ཟད་པར་འགྱུར་བ་དང༌། །ཁྲག་ནི་སྐྱུར་བར་མི་འགྱུར་ལ། །ཁྲག་ལས་གྱུར་པའི་ནད་ཀྱང་མང༌། །གཉིད་ཅིང་ནད་ནི་བསལ་བལ། །སྐམ་སར་སྐྱེས་པའི་ཤ་ཁུས་བརྟ། །བརྟས་ན་ཉེས་པ་ལྷག་ལུས་ལ། །སླར་ཡང་མར་ནི་བསྟེན་པར་བྱ། །ཁྲག་དང་
མཁྲིས་པ་འཕལ་གྱུར་པས། །སྐྲན་ནི་སྨིན་པར་ཕྱོགས་པ་ལ། །གསོ་བའི་བྱ་བ་མ་རྙེད་ཅིང༌། །མཁྲིས་པའི་ཁོང་འབྲས་ལྟར་གསོ་བྱ། །སཱ་ལུ་བ་དང་རའི་འོ་མ། །པ་ཏོལ་སྐམ་སའི་ཤ་མར་དང༌། །པ་རུ་ཤ་ཀ་སྐྱུ་རུ་ར། །རྒྱུན་འབྲུ་འབྲ་གོ་སེ་འབྲུ་དང༌། །ཁ་རར་བཅས་པའི་ཁ་ཟས་བཟའ། །བཏུང་བ་བ་ལ་བྲི་ཧ་ཏི། །ལ་སོགས་བསྐོལ་བ་བླུད་པར་བྱ། །བད་ཀན་ལས་གྱུར་དང་པོ་ནི། །སློན་བྱེ་དེ་མི་བཟོད་སྨྱུང་བྱ། །ཁ་དྲོ་ཚ་བའི་ཐུག་སྩོགས་ཀྱི། །རིམ་པར་དེ་འོག་མེ་དྲོད་སྐྱེད། །ཤིང་ཀུན་ལ་སོགས་ཐལ་སྨན་དང༌། །ཤིང་ཀུན་སྟར་བུ་ཉིས་འགྱུར་གཏང༌། །གལ་ཏེ་འབུར་རམ་གཏིང་རིང་གྱུར། །ཚོར་བ་ཆུང་ཞིང་སྲ་ལ་བརྟན། །ལྟོ་སྤོས་ལ་སོགས་ལྡན་པའི་སྐྲན། །དུགས་བྱས་ནས་ནི་སྙི་བར་བྱ། །བད་ཀན་ལས་གྱུར་སྐན་ཅན་གྱིས། །མར་ཚ་ཐལ་སྨན་བཅས་ཆུ་བླུད། །ནས་ཚིག་འཁུས་ཐལ་ཚ་བ་གསུམ། །རྒྱམ་ཚ་ཤིང་ཀུན་ཁ་རུ་ཚ། །སེ་འབྲུ་རྩ་བ་བཅུ་བསྐོལ་མར། །བད་ཀན་ལས་གྱུར་སྐྲན་མྱུར་འཇོམས། །བསེ་ཤིང་འབྲས་བུ་སྲང་གཉིས་དང༌། །རྟ་བ་ཆུང་དུ་ལྔ་སྲང་རེ། །ཆུ་བྲེ་བཞི་ཡི་ནང་དུ་བསྐོལ། །བཞི་ཆ་ལུས་པ་དེ་དང་ནི། །མཉམ་པའི་འོ་མ་མཉམ་པའི་མར། །བྱི་དང་ག་དང་ཤིང་ཀུན་དང༌། །ནས་ཚིག་འཁུས་ཐལ་ལྕེ་མྱང་ཚ། །ཀཎྜ་ཀ་རི་རྩ་བས་རུ་ཚ། །ཟུར་པ་ར་སྣ་ཤིང་མངར་དང༌། །པི་པི་ལིང་དང་དོང་གྲ་རྣམས། །ཞོ་ནི་གཉིས་གཉིས་བཅས་པར་བསྐོལ། །གོ་བྱེ་ཡི་ནི་སྨན་མར་ནི། །བད་ཀན་སྦན་ནི་སེལ་བའི་མཆོག །མཆིན་པ་མཆེར་པའི་ནད་དང་ནི། །སྐྱ་རྦབ་དང་ནི་ཕོ་བའི་ནད། །ལུད་པ་དབུགས་མི་བདེ་བ་འཇོམས། །དེ་ནས་སྐྲན་ཅན་དེ་ཡི་ལུས། །མ་ལུས་པར་ནི་དུགས་བྱས་ལ། །སྐྲན་ཀུན་ལ་ནི་ཐོག་མ་ཉིད། །སྣུམ་ཆོས་དུགས་ནི་བྱས་གྱུར་ན། །གསོ་བ་གང་ཞིག་བྱས་པ་དེས། །གྲུབ་ཀྱི་རྩུབ་ཆོས་ཀྱིས་མི་འགྲུབ། །སྣུམ་ཞིང་དུགས་ཀྱིས་བརླན་ལུས་ཀྱི། །སྐྲན་ནི་སྙི་བར་འགྱུར་བ་དང༌། །ཇི་ལྟར་བཤད་པའི་བུམ་པ་ནི། །བཞག་པས་བཀང་ནས་དེ་བསལ་བྱ། །དེ་ནས་རས་ནང་ཆུད་བྱས་ཏེ། །ཚད་ཤེས་པ་ཡི་
སྐྲན་དབྲལ་བྱ། །ཤིང་གཅད་ར་རྨིག་མེ་ལོང་རྣམས། །ཇི་སྙེད་པ་ཡིས་ལེགས་པར་བཅིང༌། །དེས་སྐྲན་གཅིག་པུ་དབྱི་བྱ་ཞིང༌། །སྙིང་དང་རྒྱུ་མར་རེག་མི་བྱ། །ཏིལ་དང་ཟར་མའི་ས་བོན་དང༌། །ཉུངས་ཀར་ཨེ་རཎྜ་ཡིས་བྱུག །བད་ཀན་སྐྲན་ནི་ལྕགས་ཀྱི་སྣོད། །དྲོ་འཇམ་ཙམ་གྱིས་དུགས་བྱའོ། །དེ་ལྟར་གནས་ལས་བསྐྱོད་ནས་ནི། །བད་ཀན་སྐྲན་ལ་སྣུམ་བཅས་པའི། །བཀྲུས་སྨན་དང་ནི་འཇམ་རྩི་དག །རྩ་བ་བཅུ་པ་ལྡན་པར་སྦྱང༌། །པི་པི་ལིང་དང་སྐྱུ་རུ་ར། །རྒྱུན་འབྲུ་ཤ་མ་དུར་བྱིད་སོགས། །སྲང་རེ་དང་ནི་བསྐོལ་བ་ལ། །ཨེ་རཎྜ་ཡི་ཞུན་མར་ནི། །བྲེ་རེའོ་མ་དྲུག་འགྱུར་དང༌། །ལྷན་ཅིག་བསྐོལ་བར་གྱུར་བ་འདི། །འདྲེས་པའི་སྨན་མར་ཞེས་བྱ་སྟེ། །སྐྲན་ཅན་འཁྲུ་བར་བྱེད་པའི་མཆོག །རྒྱུ་རླུགས་ཁོང་འབྲས་གཟེར་བ་ནི། །རླུང་གི་ནད་ལ་བདུད་རྩི་ཡིན། །ཡང་ན་ནི་ལི་ནི་སྨན་མར། །སྲང་གཉིས་ཚད་དུ་བླུད་པའམ། །དེ་བཞིན་སྐྱིད་ད་བའི་སྨན་མར། །དམུ་རྫིང་སྐབས་བཤད་མར་ཡང་ཕན། །དན་ད་ཙི་ཏྲ་ཨ་རུ་ར། །སྲང་ནི་ཉི་ཤུ་རྩ་ལྔ་ལྔ། །ཆུ་བྲེ་བཅུ་དྲུག་ནང་དུ་བསྐོལ། །བརྒྱད་ཆ་ལུས་བཙགས་ཨ་རུ་ར། །བཅས་པ་བུ་རམ་དན་དར་མཉམ། །བཅུག་ལ་ཏིལ་མར་དུར་བྱིད་ཕྱེ། །སྲང་བཞི་བཅའ་སྒ་པི་པི་ལིང༌། །ཞོ་གཉིས་བསྐོལ་བསྒྲངས་ལྡེ་གུ་དེ། །སྦྲང་རྩི་ཏིལ་མར་ཆ་མཉམ་པ། །དྲི་སྣ་བཞི་བཞི་སྲང་རེ་གཞུག །དེ་ལས་ཨ་རུ་གཅིག་དང༌། །ལྡེ་གུ་སྲང་གཅིག་བཅས་ཟོས་ན། །བདེ་བར་ནད་ནི་བྲེ་གང་འཁྲུ། །སྐྲན་དང་སྙིང་ནད་གཞང་འབྲུམ་དང༌། གློ་ནང་ལྟོ་སྤོས་སྦྱར་བའི་དུག །མཛེ་དང་དམུ་རྫིང་ནད་སློང་དང༌། །ཡི་ག་འཆུས་དང་མཆེར་པའི་ནད། །སྐྱ་རྦབ་མིག་སེར་འཇོམས་པར་བྱེད། །འདི་ནི་དན་ཙི་ཏྲ་ཀ །ཨ་རུ་ར་ཡི་ལྡེ་གུ་ཡིན། །སུ་དྷ་ཀྵི་རའི་རླན་དང་ནི། །དུར་བྱིད་དང་ནི་ལེགས་བསྲེགས་ཏེ། །མར་དང་སྦྲང་རྩི་ཞོ་གཉིས་བཅས། །ལྡེ་གུས་ལེགས་པར་འཁྲུ་བར་འགྱུར། །རུ་རྟ་དུར་བྱིད་ཨ་རུ་ར། །དན་ད་གུ་གུལ་ནས་ཚིག་འཁྲུས། །བ་གཅིན་བཅས་བླུད་ཡང་ན་ནི། །གུ་གུལ་ཉི་ཚེ་བ་གཅིན་བླུད། །ཆོ་ག་གྲུབ་པ་ལས་བཤད་པའི། །
བཀྲུ་སྨན་དྲང་པོ་སྐྲན་འཇོམས་གཏང༌། །རྩ་བ་ཟུག་ཅིང་ལྷུན་ཆེ་ལ། །སྲ་ཞིང་ལྕི་ལ་ཚོར་བ་མེད། །གཏིར་རིང་མ་སྨིན་པ་ཡི་སྐྲན། །ཐལ་སྨན་དང་ནི་ཆང་རྙིད་དང༌། །མེ་ཡི་ལས་ཀྱིས་བསལ་བར་བྱ། །བད་ཀན་ཤས་ཆེ་ཐལ་སྨན་ནི། །གཞང་འབྲུམ་རྡེའུ་ཕོ་བའི་ནད། །གསོ་བའི་སྐབས་བཤད་གཏང་བྱ་ཞིང༌། །ཞག་གཅིག་ཞག་གཉིས་ཀྱིས་ཆོད་པ། །ཡང་ན་ཞག་གསུམ་ངལ་སོས་ལ། །ལུས་ཀྱི་ཉམས་སྟོབས་ནད་དག་ནི། །འཕེལ་འབྲིའི་ལས་ལ་བརྩོན་པར་བྱ། །ཐང་ཤིང་དུར་བྱིད་དན་དང༌། །པུ་ཙེ་ཤེལ་དང་ཚ་བ་ལྔ། །སྭ་རྫི་ཀ་ཐལ་ནས་ཚིག་འཁུས། །པ་ཏ་དང་ནི་འབྲས་བུ་གསུམ། །རུ་རྟ་བ་སར་སུ་གནྡྷ། །ཟི་ར་ནག་པོ་སྲང་ཕྱེད་ཕྱེད། །ལན་ཚྭ་ལྔ་ནི་སྲང་རེ་དག །བཏགས་པའི་ཕྱེ་མ་ཏིལ་མར་དང༌། །ཞག་དང་ཞོ་དང་མར་དང་སྦྲུས། །རྫ་མར་དུབ་མ་ཤོར་བསྲེགས། །རྫ་མ་ཡི་མདོག་འགྱུར་དེའི། །ཐལ་བ་བླངས་པའོ་མ་མར། །དར་བ་ཆང་སོགས་སྦྱར་ཏེ་བླུད། །སྐྲན་དང་རྟུག་འགགས་རྒྱུད་རླུགས་དང༌། །གཞང་འབྲུམ་དམུ་རྫིང་ཕོ་བའི་ནད། །སྲིན་ནད་བརྗེད་བྱེད་སྨྱོ་བྱེད་གདོན། །མང་ལ་ནད་ཁུ་ཆུ་ལས་གྱུར་རྡེའུ། །བྱི་ལ་སྦྲུལ་གྱི་དུག་རྣམས་ཀྱང༌། །ཐལ་བའི་སྨན་འདིས་སེལ་བར་བྱེད། །བད་ཀན་ལས་གྱུར་སྐྲན་ལ་སྣུམ། །ཤ་ཁུ་འོ་མ་མར་བསྟེན་ལ། །ཐལ་སྨན་བཏང་ན་སྐྲན་དག་ནི། །གནས་ནས་དུམ་བུ་དུམ་བུ་རུ། །བཅད་ནས་ཐུར་དུ་འབྱིན་པར་བྱེད། །མེ་དྲོད་ཆུང་ཞིང་ཡི་ག་འཆུས། །ཆང་གོམས་སྣུམ་ཅན་ཟ་བ་ལ། །རྒྱུན་སྲང་དག་ཕྱིར་མནན་ཆད་དང༌། །ཆང་རྙིང་སྐྱོན་མེད་བླུད་པར་བྱ། །སཱ་ལུ་དྲུག་ཅུ་པ་རྙིང་པ། །རྒྱ་སྲན་སྐམ་པའི་སྲོག་ཆགས་ཤ་།ཙི་ཏྲ་པུ་རི་ཀ་ར་ཉྫ། །ཨ་ཏི་མན་དལ་ལ་ཕུད། །བ་རི་ན་ཡི་མྱུ་གུ་དང༌། །ཤི་ཀྲུ་བིལ་བ་གཞོན་ནུ་དང༌། །ལ་ཕུག་གཞོན་ནུ་སྐམ་པོ་དང༌། །ཁ་ལུང་ཤིང་ཀུན་སྟར་བུ་དང༌། །སེ་འབྲུ་ནས་ཚིག་འཁུས་ཐལ་བ། །ཚ་བ་གསུམ་དང་ངར་བ་དང༌། །མར་དང་ཏིལ་མར་ཁ་ཟས་སྦྱིན། །བཏུང་བར་ཆང་གི་དངས་མ་དང༌། །སྐྱུར་རྩབས་དར་བཞོག་ཆུ། །བིད་ལ་ལ་ཕུད་ཕྱེ་མ། །
རྩ་བ་ལ་བསྐོལ་ཁུ་བའམ། །རྒུན་ཆང་རྙིང་པ་བླུད་པར་བྱ། །པི་པི་ལིང་དང་དེའི་རྩ་བ་དང༌། །གོ་སྙོད་རྒྱམ་ཚ་ཀྲུ་ཏྲུག་ཏྲེས། །ཆང་གི་སྙིགས་མར་བསྲེས་པ་ཡིས། །སྐྲན་ནི་མྱུར་དུ་སེལ་བར་བྱེད། །སློན་དང་སྨྱང་བ་དུགས་དང་ནི། །སྨན་མར་བླུད་དང་བཀྲུས་སྨན་དང༌། །འཇམ་རྩི་ཐལ་སྨན་མནན་ཆང་དང༌། །ཆང་རྙིང་རི་ལུ་ཕན་ཟས་ཀྱིས། །བད་ཀན་སྐྲན་ཅན་གཏིང་ཟུག་པས། །གལ་ཏེ་ཞི་བར་མ་གྱུར་ན། །དེ་ལ་ཁྲག་དབྱུང་ཐ་མར་ནི། །མདེའུ་ལྕགས་སོགས་ཀྱིས་བསྲེགས་པར་བྱ། །དེ་ནས་སྐྲན་ནི་མཐར་ཐུག་པར། །སྨན་པས་གོས་ཀྱིས་དཀྲིས་ནས་ནི། །ལྟེ་བ་ཆུ་སོ་རྒྱུ་མ་སྙིང༌། །སྤུ་ཡི་ཕྲེང་ནི་མ་གཏོགས་པར། །ཤིན་ཏུ་གཏིང་ཐུག་མ་ཡིན་པར། །མདེའུ་བསྲེགས་པའམ་ཡང་ན་ནི། །གཟོང་བུའི་ལྕགས་ནི་བསྲེགས་པའམ། །ཏིན་དུ་ཀ་ཡི་ཤིང་གིས་བསྲེག །དེ་ནས་བསིལ་བས་མེ་དབལ་ནི། །ཞེ་ནས་རྨ་ལྟར་གསོ་བར་བྱ། །མ་ཞུ་རྗེས་འབྲེལ་སྨྱུང་བྱས་ནས། །ཐུག་པ་སོགས་ཀྱིས་མེ་དྲོད་བསྐྱེད། །རང་རང་རིམ་དང་འབྲེལ་པ་ལས། །འདྲེན་མའི་གསོ་བས་གསོ་བར་བྱ། །བཙས་པའི་དུས་ནི་འདས་གྱུར་པའི། །བུད་མེད་ལ་སྐྲན་ཁྲག་སྐྱེས་འབྱུང༌། །དེ་ལ་ལུས་སྣུམ་དུགས་བྱས་པར། །སྣུམ་གྱི་བཀྲུ་སྨན་གཏང་བར་བྱ། །ཏིལ་བསྐོལ་མར་དང་བུ་རམ་དང༌། །ཚ་གསུམ་ག་བྲའི་རྩ་བའི་ཕྱེ། །ཁྲག་ལས་གྱུར་པའི་སྐྲན་དང་ནི། བུད་མེད་ཟླ་མཚན་མེད་ལ་བླུད། །ག་བྲའི་རྩ་བ་པི་པི་ལིང༌། །ཐང་ཤིང་ཀ་རཉཛཱི་ཤུན་པ། །པི་པི་ལིང་གི་རྩ་བ་ཡི། །ཕྱེ་མ་ཏིལ་བསྐོལ་ཆུར་སྦྱར་བ། །བླུད་ན་ཁྲག་སྐྲན་ནད་སེལ་བྱེད། །པ་ལ་ཤ་ཡི་ཐལ་བ་ནི། །བྲེ་བརྒྱད་ཏིལ་མར་མར་བྲེ་བརྒྱད། །བསྐོལ་ཏེ་ཚད་བཞིན་བླུད་ན་ནི། །སྐྲན་ནི་སྙི་བར་བྱེད་པ་ཡིན། །གལ་ཏེ་སྙི་བར་མ་གྱུར་ན། །མངལ་གྱི་བཀྲུ་སྨན་གཏང་བར་བྱ། །ཏིལ་གྱི་ལྡེ་གུ་ཐལ་སྨན་བཅས། །ཡང་ན་སུ་དྷ་ཀྴི་རར་སྦྱར། །ཡང་ན་དེ་གཉིས་དང་བསྲེས་པའི། །ཉ་ནི་ཁ་བོ་གཏང་བར་བྱ། །ཕག་རྒོད་ཉ་ཡི་མཁྲིས་པ་ཡིས། །བསྒོས་པའི་རས་མ་གཞུག་པར་བྱ། །ཡང་ན་བུ་རམ་ཐལ་སྨན་གཉིས། །ཕབས་སྦྱར་མངལ་ནི་སྦྱང་ཕྱིར་
གཏང། །ཁྲག་མཁྲིས་སེལ་བའི་ཐལ་སྨན་ནི། །སྦྲང་རྩི་མར་བཅས་ལྡེ་གུ་སྦྱིན། །སྒོག་སྐྱའི་ཆང་ནི་རྣོན་པོ་དང༌། །ཉ་ཡང་དེ་ལ་སྦྱིན་པར་བྱ། །རྩ་བ་བཅུ་པ་ཐལ་སྨན་དང༌། །འོ་མ་བ་གཅིན་མས་གཏད་བྱ། །དེས་ཀྱང་ཁྲག་འཛག་མ་གྱུར་ན། །སྐྲན་འཇིག་བྱེད་པའི་སྦྱོར་བ་ཕན། །བྱུང་ནས་མར་དང་ཏིལ་མར་བསྐུ། །བཅད་པ་དག་ནི་མི་བྱ་ཞིང༌། །ཤ་ཁུ་འབྲས་ཆན་བཟའ་བ་དང༌། །བཏུང་བ་ཆང་ནི་སར་པ་བླུད། །ཁྲག་ནི་ཤས་ཆེར་བྱུང་གྱུར་ན། །ཁྲག་མཁྲིས་སེལ་བའི་གསོ་བ་བྱ། །རླུང་གི་ནད་ཀྱིས་ཉེན་གྱུར་ན། །རླུང་གི་གསོ་བ་ཀུན་ཀྱང་བྱ། །ལྟོར་སྤོས་སོགས་དང་རྟུག་སྐམ་ལ། །རླུང་བསལ་གསོལ་བ་ཇི་བཞིན་བྱ། །ཡན་ལག་བརྒྱད་པའི་སྙིང་པོ་བསྡུས་པ་ལས། །གསོ་བའི་གནས་ཀྱི་ལེའུ་བཅུ་བཞི་པའོ།། །།དེ་ནས་དམུ་རྫིང་གསོ་བའི་ལེའུ་བཤད་པར་བྱའོ། །ནད་ནི་ཤས་ཆེར་སྩོགས་པ་དང༌། །བུ་གའི་རྒྱུན་སྲང་འགགས་པ་ལ། །དམུ་རྫིང་འབྱུང་བས་དེ་ཡི་ཕྱིར། །རྟག་ཏུ་བཀྲུས་སྨན་གཏང་བར་བྱ། །ཡང་ན་ཟླ་བ་གཅིག་གམ་གཉིས། །ཨེ་རཎྜའི་མར་བ་གཅིན་བཅས། །འོ་མར་བཅས་པའམ་བ་གཅིན་ནམ། །མ་ཧེའི་གཅིན་ནི་བླུད་བྱ་ཞིང༌། །བ་ཡི་འོ་མ་བླུད་པར་བྱ། །ལྟོ་སྤོས་ཚ་པས་ཉམ་ཐག་ཅིང༌། །སྐོམ་དང་བརྒྱལ་བས་ནོན་པ་ལ། །རྔ་མོའི་འོ་མ་བླུད་པར་བྱ། །རྩུབ་ཅིང་རླུང་ཤས་ཆེ་བ་ཡི། །ནད་ནི་སྦྱོང་བར་འདོད་པར་ཡིས། །སྣུམ་ཆོས་དང་ནི་སྨན་མར་དག །དམུ་རྫིང་འཇོམས་པ་སྦྱར་བར་བྱ། །སྲང་དྲུག་རྩ་བ་བཅུ་པའི་ཆུ། །ཞོ་ག་ཆུ་ནི་བྲེ་བརྒྱད་བསྐོལ། །དོང་གྲ་སྲང་གསུམ་མ་རང་ནི། །ཏིལ་མར་བྲེ་ནི་རེ་རེ་དང༌།།ཞོ་ག་ཆུ་ནི་བྲེ་བཞི་དག །བསྐོལ་བ་འདི་ནི་བླུད་གྱུར་ན། །དམུ་རྫིང་ཐམས་ཅད་འཇོམས་པར་བྱེད། །རླུང་དང་བད་ཀན་ལས་བྱུང་བའི། །སྐྲན་ལའང་མཆོག་ཏུ་ཕན་པ་ཡིན། །བཞི་འགྱུར་ཆུ་དང་ཉིས་འགྱུར་གཅིན། །ཀྲུ་ཏྲུག་ཏྲེས་སྲང་གཅིག་ལྡེ་གུ། །བྲེ་གང་མར་བསྐོལ་ཐལ་སྨན་བཅས། །དམུ་རྫིང་ཅན་ལ་བླུད་པར་བྱ། །ནས་དང་རྒྱ་ཤུག་རྒྱ་སྲན་དང༌། །རྩ་བ་ལྔ་ནི་བསྐོལ་བའི་ཆུ། །ཆང་དང་རང་སྐྱར་བཅས་པ་དང༌། །མར་བསྐོལ་བ་ཡང་བླུད་པར་བྱ། །སྣུམ་འདི་སྣུམ་
བཅས་ཉམས་སྟོབས་ནི། །སྐྱེ་ཞིང་རླུང་ནད་ཞི་གྱུར་ནས། །ནད་ནི་གནས་ནས་བསྐྱོད་པ་དང༌། །ཆོ་ག་གྲུབ་བཤད་བཀྲུ་སྨན་གཏང༌། །པ་ཏོ་ལའི་རྩ་འབྲས་བུ་གསུམ། །སྐྱེར་པ་བྱི་དང་ག་ཞོ་རེ། །ཀམ་པི་ལ་དང་ནི་ལི་ནི། །ཙི་ཏྲ་ཀ་ཞོ་གཉིས་གསུམ་བཞི། །ཕྱེར་བཏགས་བ་གཅིན་སྦྱར་བ་བླུད། །འཁྲུས་ནས་ཐུག་པ་ཤ་ཁུ་ནི་།སྐམ་སར་གནས་པའི་ཤ་ཁུ་སྦྱིན། །དེ་ནས་ཞག་དྲུག་འོ་མ་དང༌། །ཚ་བ་གསུམ་དང་བསྐོལ་བ་ནི། །ཡང་དང་ཡང་དུ་བླུད་བྱས་ན། །འདི་ཡིས་དམུ་རྫིང་ཐམས་ཅད་ནི། །དམུ་ཆུར་གྱུར་ཀྱང་འཇོམས་པར་བྱེད། །བི་ཤ་ལ་དང་ཤང་ཁི་ནི། །དན་ད་སེང་ཕྲོམ་ཤུན་ཤུ་དག །རྒྱ་ཤུག་ཕྲེའུ་རྒུན་འབྲུ་དང༌། །རྒྱ་ཤུག་སྤོམ་ཆུ་བུ་རམ་ཚང༌། །བ་གཅིན་དང་ནི་སྦྱར་ཏེ་བླུད། །ལ་ལ་ཕུད་དང་སྤ་མའི་འབྲས། །འུ་སུ་ཤུ་ཏི་ཟིར་ནག །པི་པི་ལིང་རྩ་ཀ་ར་བཱི། །ཨ་ཟ་མོ་དང་ཟུར་བ་དཀར། །ཤུ་དག་ཟི་ར་ཙི་ཏྲ་ཀ །ཚ་བ་གསུམ་དང་ཁྲོན་བུ་དང༌། །འབྲས་བུ་གསུམ་དང་ཐལ་སྨན་གཉིས། །མ་ནུ་རུ་རྟ་ལ་ཚྭ་ལྔ། །བྱི་དང་ག་རྣམས་ཆ་མཉམ་དང༌། །དན་ད་ཆ་གསུམ་དེ་བཞིན་དུ། །དུར་བྱིད་བི་ཤལ་ཉིས་འགྱུར། །ས་དལ་ནི་བཞི་འགྱུར་ཏེ། །ཕྱེ་མ་འདི་ནི་སྲེད་མེད་དུ། །ཞེས་བྱ་ནད་ཀྱི་ཚིགས་འཇོམས་བྱེད། །འདི་བསྟེན་ནད་ནི་མི་གནས་ཏེ། །ཁྱབ་འཇུག་གིས་བཅོམ་ལྷའི་མིན་མཚུངས། །དམུ་རྫིང་ནད་ལ་དར་བ་བླུད། །སྐྲན་ཅན་རྒྱ་ཤུག་ཆུ་སྦྱར་བླུད། །རླུང་གིས་ལྟོ་སྦོས་ཆང་སྦྱར་གཏང༌། །རླུང་ནད་ཉིད་ལ་ཆང་དངས་སྦྱར། །ཕྱིས་འགགས་ལ་ཞོག་ཆུ། །གཞང་འབྲུམ་ཅན་ལའང་ཞོག་ཆུས། །བཅད་སྙམ་སེམས་ལ་ད་ཏྲིག་ཆུས། །མ་ཞུ་བ་ལ་ཆུ་དྲོན་ལས། །མཚན་བར་རྡོལ་དང་སྐྱ་རྦ་བ་དང༌། །ལུད་པ་དབུགས་བདེ་སྐད་འགགས། །སྙིང་དང་ཕོ་བའི་ནད་དང་ནི། །མཛེ་དང་མེ་དྲོད་ཉམས་དང་རིམས། །མཆེ་བའི་དུག་དང་རྩ་བའི་དུག །དབྱིག་དུག་སྦྱར་བའི་དུག་བཅས་ལ། ཅི་རིགས་པར་ནི་ཕྱེ་མ་འདི། །ཁོང་པ་སྣུམ་དང་ལྡན་པ་ལ། །བླུད་ནས་འཁྲུ་རུ་གཞུག་པར་བྱ། །སྤ་མའི་འབྲས་བུ་བྱ་སྣུ་དང༌། །འབྲས་བུ་གསུམ་དང་ནི་ལི་ནི། །པུ་ཙེ་ཤེལ་དང་ཀྱི་ལྕེ་བ། །དུར་བྱེད་ཤུ་དགས་ཏེ་
ལ། །རྒྱམ་ཚ་དང་ནི་ཁ་རུ་ཚ། །པི་པི་ལིང་ནི་ཕྱེ་མར་བཏགས། །སེ་འབྲུའི་ཁུ་བའམ་འབྲས་བུ་ནི། །གསུམ་གྱི་ཁུ་བའམ་ཤ་ཁུའམ། །བ་གཅིན་དྲོ་འཇམ་ཆུ་ལས་བླུད། །འདིས་ནི་སྐྲན་ནད་ཐམས་ཅད་དང༌། །མཆེར་པ་དམུ་རྫིང་ཐམས་ཅད་དང༌། །ཤ་བཀྲ་མཛེ་ནད་མ་ཞུ་དང༌། །དྲོད་ཉམས་མེ་དྲོད་མ་སྙོམས་དང༌། །གཞང་འབྲུམ་སྐྱ་རྦབ་མིག་སེར་དང༌། །རྐང་ལག་ཞ་བའི་ནད་དང་ནི། །རླུང་དང་མཁྲིས་པ་བད་ཀན་རྣམས། །བཀྲུ་སྨན་བཏང་བས་མྱུར་དུ་སེལ། །ནི་ལི་ནི་དང་ཚ་བ་གསུམ། །ལྕང་མ་ཡ་བཀྵ་དང༌། །ལན་ཚྭ་དང་ཀྲུ་ཏྲུག་ཏྲེས། །ཕྱེ་མ་ཞུན་མར་བླུད་ན་ནི། །དམུ་རྫིང་སྐྲན་གྱི་ནད་རྣམས་སེལ། །སྦྱང་བྱས་ཉམ་ཆུང་བར་བར་དུ། །རྡོ་མོ་བའམ་ར་ཡི་ནི། །འོ་མ་སྔོན་བཞིན་བླུད་པར་བྱ། །བཤོལ་དུ་མེད་པའི་ནད་ལ་ནི། །བཀྲུ་སྨན་ཕྱིར་ནི་སྣུན་བཅས་གཏང༌། །མཆོག་ཏུ་ཉམ་ཆུང་གྱུར་ལ་སྦྱིན། །ཨ་རུ་ར་ཡི་ཕྱེ་མ་ནི། །བྲེ་གང་མར་ནི་བྲེ་བཞི་དང༌། །མེ་ལ་ཞུས་ནས་གཟར་བུ་ཡིས། །དཀྲུགས་ནས་ནས་ཀྱི་སྦུན་པའི་ནང༌། །ཟླ་གཅིག་བཞག་ནས་དེ་རྗེས་ལ། །ཕྱུང་སྟེ་ལེགས་པར་བཞུས་ནས་ནི། །ཨ་རུ་ར་བསྐོལ་ཁུ་བ་དང༌། །ཞོ་ནི་སྐྱུར་པོ་བཅས་པ་བསྐོལ། །དེ་འཐུངས་དམུ་རྫིང་སྐྲན་ལྟོ་སྤོས། །གཏུམ་འདྲའི་རླུང་ནད་ཁོང་འབྲས་དང༌། །མཛེ་དང་སྨྱོ་བྱེད་བརྗེད་བྱེད་རྣམས། །ཉེ་བར་འཇོམས་པར་བྱེད་པར་ཡིན། །ཤྲཱི་ཁཎྜ་བའི་འོ་མ། །བསྐོལ་ཏེ་བསྒྲངས་ནས་གཟར་བུས་དཀྲུགས། །ལས་བྱུང་མར་ནི་སྣུ་ཧ་ཡི། །འོ་མར་བཅས་བསྐོལ་སྔར་མར་མཚུངས། །འོ་མ་བྲེ་ནི་བཅུ་དྲུག་དང༌། །སུ་དྷ་ཀྵི་ར་བྲེ་ཕྱེད་བཅས། །ཞོར་གྱུར་བསྲུབས་པ་ལས་གྱུར་མར། །དུར་བྱིད་བསྐོལ་བའང་ཡོན་ཏན་དེའོ། །མར་ནི་བྲེ་གང་དག་དང་ནི། །འོ་མ་བརྒྱད་འགྱུར་ནང་དུ་ནི། །སྣུ་ཧའི་འོ་མ་སྲང་གཅིག་དང༌། །དུར་བྱིད་སྲང་དྲུག་བསྐོལ་དེ་བཞིན། །འདི་བླུད་འོག་ཏུ་ཐུག་པ་དང༌། །ཤ་ཁུ་མངར་པོའམ་འོ་མ་བླུད། །མ་ཞུ་འཁྲུས་པར་གྱུར་པ་དང༌། །བཅའ་སྒ་བསྐོལ་བའི་ཆུ་དོན་བླུད། །དེ་ནས་ཐུག་པ་དེ་འོག་ནི། །
ཀུ་ལངྠ་ཡི་ཡུ་ཤ་བླུད། །དེ་ལྟར་ཁོང་རྩུབ་ཞག་གསུམ་བླུད། །སླར་ཡང་ཐུག་སོགས་རིམ་པར་བླུད། །རིམ་པ་འདི་དག་ཉིད་ཀྱིས་ནི། །ཞུན་མར་ཡང་དང་ཡང་དུ་བླུད། །མར་ནི་བསྐོལ་བར་གྱུར་པ་འདི། །སྨན་པ་ལ་སླ་བྱ་བ་ཡིས། །སྐྲན་རྣམས་དང་ནི་དབྱིག་དུག་དང༌། །དམུ་རྫིང་བསལ་ཕྱིར་བླུད་པར་བྱ། །ཡང་ན་པི་ལུང་ལྡེ་གུར་བསྐོལ། །ལྟོ་སྤོས་སེལ་བར་བླུད་པར་བྱ། །སེང་ཕྲོམ་ནི་ལི་ནི་མར་རམ། །འདྲེས་པའི་སྨན་མར་བླུད་པར་བྱ། །ནད་བསལ་ནས་ནི་རིམ་གྱིས་ཟས། །སཱ་ལུའི་འབྲས་ཆན་ཡང་ཞིང་ཉུང༌། །བྱིན་ལ་དམུ་རྫིང་ཅན་གྱི་ནི། །ནད་ཀྱི་ལྷག་མ་དག་བྱའི་ཕྱིར། །ཨ་རུ་ར་ནི་རྡོག་མ་སྟོང༌། །བ་གཅིན་དང་སྦྱར་འོ་མ་བླུད། །ཡང་ན་པི་པི་ལིང་རྡོག་སྟོང༌། །སུ་དྷ་ཀྵི་རར་ལེགས་བསྲེགས་པའམ། །པི་པི་ལིང་ནི་བསྐྱེད་སྤྱིན་པའམ། །འོ་མར་འཐུང་ཞིང་བྲག་ཞུན་བཟའ། །དེ་བཞིན་གུ་གུལ་འོ་མ་དང༌། །ཆ་མཉམ་སྒེའུ་གཤེར་ཁུ་བ་སྦྱིན། །ཡང་ན་ཐང་ཤིང་རྩི་ཏྲ་ཀའི། །ལྡེ་གུ་འོ་མར་སྦྱར་བ་བླུད། །ཟླ་གཅིག་ཧ་རི་པི་པི་ལིང༌། །བཅའ་སྒ་འོ་མར་བཅས་པ་བླུད། །ད་ན་ད་ཙི་ཏྲ་བྱི་དང་ག །དབྱི་མོ་ཚ་བ་གསུམ་ལྡེ་གུ། །ཞོ་གཉིས་འོ་མ་སྦྱར་བླུད་ན། །དམུ་རྫིང་འཕེལ་བ་སེལ་བར་བྱེད། །ཡང་ན་སུ་དྷ་ཀྵིར་མར་།བཅས་པའི་ཁ་ཟས་ཟླ་གཅིག་སྦྱིན། །སུ་དྷཱ་ཀྵི་ར་ལ་སྦངས་བའི། །པི་པི་ལིང་དང་ཁུར་བ་སྦྱིན། །གལ་ཏེ་རྩིབ་ལོགས་གཟེར་ཞིང་རེངས། །སྙིང་བརྒལ་རླུང་གི་ནད་ལྡན་ན། །དེ་ལ་ཏིལ་མར་བིལ་བ་དང། །ཐལ་སྨན་དང་ནི་ལྡན་པར་སྦྱིན། །ཏུན་ཏུ་ཀ་དང་བ་ལ་དང༌། །བ་ལ་ཤ་འམ་ཏིལ་སྡོང་དང༌། །ཨ་པ་མརྒ་ཀ་ཏ་ལི། །ཨགྣི་མནྠཱི་ཐལ་བ་རྣམས། །སོ་སོར་གཟགས་པ་བསྐོལ་བ་བླུད། །བད་ཀན་རླུང་ངམ་མཁྲིས་པའམ། །དེ་གཉིས་རླུང་དང་འདྲེས་གྱུར་པ། །སྟོབས་ལྡན་རང་གི་སྨན་བཅས་པ། །ཨེ་རཎྜ་ཡི་ཏིལ་མར་ཕན། །ཐང་ཤིང་ཨ་རྒ་པ་ཤ་།ཧ་ཏི་པི་པི་ལིང་ཤི་ཀྲ། །ཨ་ཤྭ་ཀ་རྞ་བ་གཅིན་བཅས། །ལྡེ་གུ་ལྟོ་བའི་ཕྱི་རིམ་བྱུག །བྲི་ཤི་ཀལི་ཤུ་དག་དང༌། བཅའ་སྒ་རྩ་བ་ལྔ་པ་དང༌། །འུ་སུ་སུ་རྟ་བ་སྦྲུ་གཉིས། །བསྐོལ་
བ་བ་གཅིན་བཅས་པ་བླུགས། །འཁྲུས་ཤིང་ལྟོ་བ་ཞུམ་འགྱུར་བའི། །ས་ར་ན་ལ་སོགས་དུགས་བྱ། །གོས་ཀྱིས་ལེགས་པར་དཀྲི་བར་བྱ། །དེ་ལྟར་རླུང་གིས་སྤོས་མི་འགྱུར། །གང་ཞིག་ལེགས་པར་འཁྲུས་གྱུར་པ། །སླར་ཡང་སྤོས་གྱུར་དེ་ལ་ནི། །སྣུམ་བཅས་སྐྱུར་དང་ལན་ཚྭ་གཉིས། །བཀྲུ་སྨན་མས་གཏོང་དྲག་པོར་བྱ། །རླུང་གིས་རེངས་དང་བཅས་གྱུར་པས། །གང་ཞིག་ལྟོ་སྤོས་གྱུར་པའི་མི། །དེ་ལ་ཐལ་སྨན་རྣོན་པོ་ནི། །བ་གཅིན་བཅས་པ་མས་གཏོང་བྱ། །དེ་ལྟར་དམུ་རྫིང་སྤྱི་ཡི་ནི། །གསོ་བ་གྲགས་པར་བཤད་པ་ཡིན། །དེ་ནས་རླུང་གྱུར་དམུ་རྫིང་ཅན། །བི་ད་རི་སོགས་མར་བསྐོལ་བླུད། །དེ་ནས་སྣུམ་གྱིས་ཞེ་ན་བྱས་ཤིང༌། །ཡན་ལག་དུགས་བྱ་བཀྲུ་སྨན་གཏང༌། །འདི་ལ་སེང་ཕྲོམ་མར་རམ་ནི། །འདྲེས་པའི་སྨན་མར་ལན་མང་བླུད། །ཐུག་སྩོགས་རིམ་པ་བྱས་ནས་ནི། །སྟོབས་བསྐྱེད་ཕྱིར་ནི་འོ་མ་བླུད། །ཉམས་སྟོབས་རྙེད་ནས་རིམ་གྱིས་ནི། །འོ་མ་དེ་ནི་སྤང་བར་བྱ། །ཡུ་ཤ་ཤ་ཁུ་སྐྱུར་དང་ནི། །ལན་ཚྭར་བཅས་པས་མེ་དྲོད་བསྐྱེད། །རྟུག་འགགས་གྱུར་ནས་སླར་སྣུམ་དང༌། །དུགས་བྱ་དེ་འོག་མས་གཏོང་བྱ། །རྩུབ་ཅིང་མས་གཏོང་སྨན་བཅས་པའི། །རྩབ་བཅུ་པའི་མས་གཏོང་སྦྱར། །གཡོ་ཞིང་ཚིག་རུས་ལ་འཇུག་པ། །རྩུབ་ཅིང་འཕྱེན་དང་ཕྱིས་འགགས། །མེ་དྲོད་ཆེ་ལ་ཏིལ་མར་དང༌། །ཨེ་ར་ཎྜཱི་མར་རླུང་འཇོམས་པའི། །སྨན་དང་བསྐོལ་བའི་འཇམ་རྩི་གཏང༌། །ཁྲུས་མི་བྱ་ལ་འོ་མ་མར། །ཤ་ཁུ་ལ་སོགས་ཞི་བྱེད་གཏང༌། །མཁྲིས་པ་ལས་གྱུར་སྟོབས་ཆེ་ལ། །མངར་དང་སྦྱར་བའི་སྣུན་ཆོས་བྱ། །ཤ་མ་དུར་བྱིད་འབྲས་བུ་གསུམ། །བསྐོལ་བའི་ཁུ་བའི་བཀྲུ་སྨན་གཏང༌། །དེ་འོག་ནྱ་གྲོ་དྷ་སོགས་བསྐོལ། །ཁུ་བར་ཁ་ར་སྦྲང་རྩི་མར། །ལྡན་པ་ནི་རུ་ཡང་ཕན། །དེ་བསྐོལ་སྣུམ་གྱི་འཇམ་རྩི་གཏང༌། །ཉམ་ཆུང་དང་པོ་འཇམ་རྩི་གཏང༌། །འོ་མ་མས་གཏོང་གེས་སྦྱང་བྱ། །མེ་སྟོབས་བསྐྱེད་ཅིང་སྣུ་ཆོས་བྱ། །འོ་མ་དུར་བྱེད་ལྡེ་གུའམ། །ཨེ་ར་ནཱ་དང་བསྐོལ་བའམ། །སད་ལ་དང་ཀྱི་
ལྕེ་བའམ། །དོད་བསྐོལ་བ་དག་གིས་བྱ། །བད་ཀན་བཅས་ལ་བ་གཅིན་བཅས། །རླུང་ཅན་ཏིག་ཏ་མར་བཅས་པའི། །ཡང་དང་ཡང་དུ་བཀྲུ་སྨན་གཏང༌། །འདི་དག་འོ་མར་བཅས་བཟའ་བའམ། །བི་ད་རི་སོགས་སྡེ་བསྐོལ་བླུད། །དམུ་རྫིང་ཅན་ལ་འོ་ཐུག་ནི། །སྦྱིན་ཞིང་ཉེ་བར་བསྐུ་བར་བྱ། །སླར་ཡང་འོ་མ་འཇམ་རྩི་དང༌། །བཀྲུ་སྨན་ཡང་དང་ཡང་དུ་གཏང༌། །རིམ་པས་ངེས་ངར་གནས་བྱས་ཏེ། །མ་ཡེངས་མཁྲིས་གྱུར་དམུ་རྫིང་བསལ། །བད་ཀན་ལས་གྱུར་སྣུམ་ཆོས་བྱ། །དུག་མོ་ཉུང་སོགས་མར་བསྐོལ་གཏང༌། །ཉམས་སྟོབས་ལྡན་པས་དུགས་བྱས་ཏེ། །སུ་དྷ་ཀྵི་རའི་བཀྲུ་སྨན་གཏང༌། །ཐུག་སོགས་རིམ་དང་ཐལ་སྨན་ཚ། །ལྡན་པས་བན་ཀན་སེལ་བ་སྦྱིན། །བ་གཅིན་ཚ་གསུམ་ཏིལ་མར་བཅས། །མས་གཏོང་དྲག་པོ་བྱ་བའང་ཕན། །མུངྒ་ཀ་སོགས་སྡེ་གུ་དང༌། །སྣུམ་གྱི་འཇམ་རྩི་དེ་ནས་གཏང༌། །ཁ་ཟས་འོ་མ་ཚ་བ་གསུ། །ཡང་ན་རྒྱ་སྲན་ཁུ་བ་སྦྱིན། །བད་ཀན་འཐམས་ཤིང་ལོ་བ་སྐྲང༌། །རྨོངས་བག་སྙིང་འཕར་ཡིག་འཆུས། །མེ་དྲོད་ཆུང་བ་ཆང་གོམས་ན། །ཆང་སྙིང་ནས་ཚིག་འཁུས་ཐལ་བླུད། །ཤིང་ཀུན་དང་ནི་པི་པི་ལིང༌། །འབྲས་བུ་གསུམ་དང་ཐང་ཤིང་དང༌། །སེར་པོ་རྣམ་གཉིས་གོ་བྱེད་དང༌། །ན་ལེ་ཤམ་དཀར་བུ་ཙེ་ཤེལ། །སེང་ཕྲོམ་ཤུ་དག་བཅའ་སྒ་དང༌། བོང་ང་གླ་སྒང་རུ་རྟ་དང༌། །ས་ར་ན་དང་ལན་ཚྭ་དང༌། །བཏགས་པ་ཞོ་དང་སྣུམ་བཞི་སྦྱར། །དུ་བ་མ་ཤོར་བར་བསྲེགས་ལ། །ཐལ་བ་དེ་ལས་ཞོ་གཉིས་དང། །ཆང་དང་ཆུ་དྲོན་ཞོག་ཆུ། །ཆང་རྙིང་མནན་ཆང་སྦྱར་བ་བླུད། སྐྲན་དང་དམུ་འཛིང་གཏུན་འདྲའི་ནད། །རྩིག་པ་འདྲ་དང་གསུད་དང་སྐྲན་།སྙིང་ནད་མཆེར་པ་གཞང་འབྲུམ་དང༌། རྟག་འགགས་ནད་རྣམས་འཇོམས་པར་བྱེད། །བད་ཀན་དམུ་རྫིང་ཉམས་ཆུང་ལ། །ཆང་རྙིང་དང་ནི་བག་ཅིན་དང༌། །ལྕགས་ཕྱེ་དང་སྦྱར་བཏུང་བ་དང༌། ཐལ་སྨན་ཏིལ་མར་བཅས་པ་བླུད། །ཉུངས་ཀར་ཕབས་དང་ལ་ཕུག་གིས། །ས་བོན་བཏབ་པའི་ལྡེ་གུ་ཡིས། བསྐུ་ཞིང་དམུ་རྫིང་དུགས་བྱ་བ། །འདི་ལ་རྒྱུན་དུ་སྦྱང་བར་བྱ། །འདུས་པ་ལས་གྱུར་དམུ་
རྫིང་ནི། །མེ་དྲོད་ཉམས་སྟོབས་མ་ཟད་ལ། །ནད་ཤས་ཆེ་ལྟར་རེ་ཐག་ཆད། །གསོ་བའི་སྦྱོར་བ་འདི་བྱའོ། །དན་ད་ཏྲ་པ་ན་ཏིའི་འབྲས་བུ། །བཙིར་བའི་མར་ནི་བླུད་པ་བསྔགས། །དམུ་རྫིང་གསོས་ཀྱང་མ་འཆོས་དང༌། །མཆོག་ཏུ་ཉེས་གསུམ་ལས་གྱུར་ལ། །དེ་ཡི་ཉེ་དུ་དྲིས་ནས་ནི། །ཀ་ཀ་ད་ནི་འོལ་མ་སེ། །ཀ་ར་བའི་རའི་རྩ་བ་དག །བཏགས་པའི་ལྡེ་གུ་ཆང་སྦྱར་བླུད། །ཡང་ན་བཟའ་བཏུང་ནང་དུ་ནི། །དུག་ཀྱང་རིམ་པས་སྦྱིན་པར་བྱ། །གང་དུ་སྤྲུལ་ནི་ཁྲོས་གྱུར་ནས། །ཤིང་ཏོག་ལ་ནི་དུག་བསྒོས་པ། །དེ་ཡིས་འདི་ཡི་ནད་ཚོགས་ནི། །བརྟན་ཞིང་ཞེན་པ་ལམ་ལོག་ཞུགས། །བཤིག་སྟེ་ཕྱིར་ནི་འབྱིན་པར་བྱེད། །དུག་གིས་མྱུར་དུ་འཇིག་པར་བྱེད། །དེ་བཞིན་ནད་མེད་འགྱུར་བའམ། །འཆི་བ་ཉིད་དུ་འགྱུར་བ་ཡིན། །ནད་བསལ་ནད་དེ་ཆུ་གྲང་གིས། །ཁྲུས་བྱས་འོ་མའམ་ཐུག་པ་བླུད། །དུར་བྱིད་ཀྱི་ནི་ཚོད་མའམ། །རྒྱ་སྣེའུ་མར་ཏི་ཀ་པརྞི། །ཀ་ལ་ཤ་ཀ་སྣེའུ་ཡི། །ཁུ་བ་དང་ནི་བསྐོལ་བ་ལ། །སྐྱུར་དང་ལན་ཚྭ་སྣུམ་མེད་ཅིང༌། །ཤིན་ཏུ་ཚོས་པ་འམ་མ་ཚོས་མིན། །ཟས་མེད་ཟླ་བ་གཅིག་སྦྱིན་ལ། །དེ་ནས་སྐོམ་ན་ཁུ་བ་བླུད། །དེ་ལྟར་ཟླ་བ་གཅིག་གི་བར། །ཚོད་མས་ནད་ནི་བསལ་གྱུར་ནས། །ཉམ་ཆུང་བ་ལ་བརྟས་བྱེད་པ། །རྔ་མོའི་འོ་མ་བླུད་པར་བྱ། །མཆེར་པའི་དམུ་རྫིང་ནད་གཞི་ནི། །ཇི་བཞིན་སྣུམ་ཆོས་དུགས་བྱ་སྟེ། །ཞོ་དང་འབྲས་ཆན་བཅས་བྱིན་ལ། །ལག་པ་གཡོན་ནས་གཏར་ག་གདབ། །ཉམས་སྟོབས་རྙེད་ནས་སླར་ཡང་ནི། །སྣུམ་བླུད་ནས་ནི་སྦྱང་བར་བྱ། །རྒྱ་མཚོའི་ཉ་ཕྱིས་ཐལ་སྨན་དང༌། །འོ་མ་སྦྱར་བ་བླུད་པར་བྱ། །པུ་ཏི་ཀ་ར་ཉྫའི་ཐལ་བ། །སྐྱུར་ཁུ་ཁ་རུ་ཚོ་དང་ནི། །པི་པི་ལིང་གི་ཕྱེ་བཏབ་བ་བླུད། །ཤི་ཀྲུ་བསྐོལ་བ་པི་པི་ལིང༌། །རྒྱམ་ཚ་ཙི་ཏྲ་ཀ་བཏབ་བླུད། །ཤིང་ཀུན་སྩོགས་ཕྱེ་ཐལ་སྨན་དང༌། །མར་སྦྱར་མེ་དྲོད་ཇི་བཞིན་སྦྱིན། །དོང་གྲ་ངན་པ་པི་པི་ལང༌། །ཆ་མཉམ་ཨ་རུ་ར་ཉིས་འགྱུར། །ཁ་རུ་ཚ་ནི་ཆ་ཕྱེད་བཅས། །ཕྱེ་མ་ཆུ་དྲོན་སྦྱར་བ་བླུད། །བྱི་དང་ག་དང་ཀྲུ་ཏྲུག་ཏྲེས། །ཕྱེ་དང་རྒྱམ་ཚ་ཤུ་དག་རྣམས། །ཁ་མ་སྐྱོགས་
ནང་བསྲེགས་འོ་མར་བཅས། །བླུད་ན་སྐྲན་དང་མཆེར་ནང་འཇོམས། །རྒྱ་ཤུག་ལོ་མ་ཏིལ་མར་བསྲེས་པ་དག །ལེགས་པར་མཉེས་ཤིང་བསྲེགས་ཏེ་དེ་འོག་ཏུ། །གཏུན་བུས་བཙིར་ལ་དེ་འོག་འོ་མ་བླུད། །མཆེར་པ་དམུ་རྫིང་ཚོགས་ནི་འཇིག་པར་འགྱུར། །རོ་ཧིཏ་ཡི་ལྕུག་མ་གཏུབས། །དུམ་བུ་ཨ་རུ་ར་བཅས་ཆུའམ། བ་གཅིན་ནང་དུ་ཞག་བདུན་ནི། །སྤངས་ལ་དེ་ནི་བླུད་གྱུར་ན། །མིག་སེར་མཆེར་པ་སྐྲན་གཞང་འབྲུམ། །སྲིན་ནང་གཅིན་སྙིད་མུ་རྫིང་འཇོམས། །རོ་ཧི་ཏ་ཀའི་ཤུན་ལྤགས་ནི། །སྲང་ནི་ཉི་ཤུ་རྩ་ལྔའི་ཚད། །རྒྱ་ཤུག་བྲེ་དོར་བཅས་པ་ནི། །བསྐོལ་བའི་ཁུ་བ་བྱས་ནས་ནི། །ཚ་བ་ལྔ་ནི་སྲིང་རེ་དང༌། །དེ་དག་ཀུན་དང་མཉམ་པ་ཡི། །རོ་ཧི་ཏ་ཀའི་ཤུན་ལྤགས་ཕྱེ། །མར་བྲེ་གང་དང་བཙོས་ནས་ནི། །འདི་བླུད་པ་ཡིས་མྱུར་དུ་ནི། །མཆེར་པ་རབ་ཏུ་འཕེལ་བ་སེལ། །ཆུ་ཤིང་ཏིལ་གྱི་སྡོང་པོ་དང༌། བུ་རམ་ཤིང་བསྲེགས་ཐལ་བ་ནི། །ཏིལ་མར་བསྐོལ་བ་བླུད་གྱུར་ན། །བར་རླུང་ལས་གྱུར་མཆེར་ནད་འཇོམས། །མ་ཞི་སྐྲན་གྱི་ཆོག་ལྟར། །རླུང་དང་བད་ཀན་ཤས་ཆེ་ལ། །མཆེར་ནང་སྤྱི་བག་མ་གྱུར་ལ། །མེ་ཡི་ལས་ནི་སྤྱད་པར་བྱ། མཁྲིས་གྱུར་འཚོ་བྱེད་སྣ་བཅུ་དང༌། །མར་དང་འོ་མ་འཇམ་རྩི་གཏང༌། །ཁྲག་དབྱུང་སྦྱང་བ་བྱ་བ་དང༌། །འོ་མ་བླུད་པར་གྱུར་པའང་བསྔགས། །མཆིན་པ་མཆེར་པ་ལ་ལྟར་གསོ། གཏར་ག་ལག་པ་གཡས་ནས་བྱ། །རྒྱུ་མ་འགགས་གྱུར་དུགས་བྱས་ལ། །བ་གཅིན་སྨན་ནི་རྣོ་བཅས་པའི། །ཏིལ་མར་ལན་ཚྭ་བཅས་པ་ཡི། །ནི་རུ་ཧ་ནི་འཇམ་རྩིར་བྱ། ཕྱིས་སླ་འགྱུར་ཁ་ཟས་དང༌། །བཀྲུ་སྨན་རྣོན་པོ་འདི་ལ་གཏང༌། །རྟུག་འགགས་བསལ་བའི་གསོ་བ་ནི། །རླུང་འཇོམས་བྱེད་པ་གང་ཡིན་བྱ། །རྒྱུ་མ་རྡོལ་བའི་དམུ་རྫིང་ལ། །དུགས་མ་གཏོགས་པའི་གསོ་བ་ཀུན། །བད་ཀན་དམུ་རྫིང་ལྟ་བུར་བྱ། །སོགས་པ་བཞིན་དུ་ཆུ་གཟུགས་ཤིང༌། །སྨན་པས་དེ་ལྟར་འཚོ་ཙམ་བྱ། །དམུ་ཆུ་ལ་ནི་ཆུ་ཡི་ནི། །ཉེས་སེལ་སྨན་ནི་དང་པོ་ནི། །སྨན་རྣོ་བ་གཅིན་ལྡན་པ་དང༌། །སྣ་ཚོགས་ཐལ་སྨན་ལྡན་པར་སྦྱིན། །དྲོད་
སྐྱེད་བད་ཀན་འཇོམས་པ་ཡི། །ཟས་ཀྱིས་དེ་ནི་གསོ་བར་བྱ། །ར་ཡི་རིལ་མའི་ཐལ་བའི་ཆུ། །བ་གཅིན་བཅས་གཟགས་མེ་བསྐོལ་བ། །སྐ་བར་གྱུར་པ་དེ་ནང་དུ། །པི་པི་ལིང་དང་དེའི་རྩ་བ། །བཅའ་སྒ་དུར་བྱིད་ལན་ཚྭ་ལྔ། །དན་ད་ཁྲོན་བུ་འབྲས་བུ་གསུམ། །ཤུ་དག་ཀརྐ་ཏ་སྲིང་གི །ཡ་བཀྵ་ར་པ་ཏ་ལ། །སྭ་རྫི་ཀཥ་ཞེས་བྱ་བ། །ཞོ་ནི་གཉིས་གཉིས་བཏགས་ཕྱེ་གཞུག །རྒྱ་ཤུག་ཙམ་གྱི་རི་ལུ་བྱ། །དེ་ནས་སྐྱུར་རྩ་བས་དང་སྦྱར་ལ། །བླུད་ན་མ་ཞུ་འོར་ནད་དང༌། །དམུ་ཆུའི་ནད་ནི་འཕེལ་བ་སེལ། །དེ་ལྟར་སྨན་གྱིས་མ་ཐུབ་ན། །རྒྱུ་འགགས་ལ་སོགས་དམུ་རྫིང་གསུམ། །གཉེན་གྱི་རྒྱལ་པོ་ལ་ཞུས་ཏེ། །མཚོན་གྱི་ལས་ནི་སྤྱད་པར་བྱ། །རྒྱུ་འགགས་རྡོལ་བའི་དམུ་རྫིང་ལ། །སྣུམ་ཞེན་དུགས་བྱས་ལྟེ་བའི་འོག །གཡོན་ལོགས་སུ་ནི་སོར་བཞི་ཡི། །ལྟོ་བའི་ཕྱོགས་སུ་བཞག་ནས་ནི། །སོར་བཞི་ཙམ་གྱི་ཚད་དབྲལ་ལ། །དེ་ནས་རྒྱུ་མ་ཕྱུང་ནས་ནི། །བཏགས་ཏེ་སྤུ་དང་དྲི་མ་དང༌། །འབྱར་བག་རྡོ་བ་ལ་སོགས་བསལ། །བརྟོལ་བ་ཟུག་རྔུ་ཕྱུང་ནས་ནི། །རྣམ་པར་བསལ་ལ་གཟགས་པར་བྱ། །བུ་ག་དབྲལ་ལ་འཆར་གཞུག་ཅིང༌། །ཟིན་ནས་དེ་ཡི་ལུས་ཀྱི་ནི། །མགོ་བོ་རྣམ་པར་གཅད་པར་བྱ། །དེ་རྗེས་མར་དང་སྦྲང་རྩི་ཡིས། །བསྐུས་ནས་རྒྱུ་མ་ལེགས་པར་གཞུག །དེ་འོག་ཕྱིའི་ངོས་ནས་རྨ་བཙེམ། །དེ་ནས་ས་ནག་ཤིང་མངར་གྱི། །ལྡེ་གུས་ལེགས་པར་བསྐུ་བར་བྱ། །དེ་འོག་རླུང་མེད་གནས་སུ་ནི། །བཞག་ལ་འོ་མས་གསོས་པ་དང༌། །སྣུམ་གྱི་སྣོད་ནས་བཅིང་བར་བྱ། །ཆུ་བཅས་དམུ་རྫིང་ཏིལ་མར་ནི། །རླུང་འཇོམས་བསྐོལ་བས་བསྐུས་ནས་ནི། །ཆུ་དྲོན་བླུགས་པས་དུགས་བྱ་ཞིང༌། །ལྟོ་བ་རས་ཀྱིས་དཀྲིས་ནས་ནི། །རྒྱུ་འགགས་རྡོལ་པར་བཤང་ནས་སུ། །སོར་གཅིག་ཙམ་ནི་དབུག་པར་བྱ། །དེར་ནི་གཅེའུ་བཅུག་ནས་ནི། །དེ་ལ་ཆུ་ཕྱེད་གཟགས་པར་བྱ། །དེ་ནས་གཅེའུ་ཕྱུང་ནས་ནི། །ཏིལ་དང་རྒྱམ་ཚའི་ལྡེ་གུ་ཡིས། །རྨ་བསྐུས་ནས་ནི་བཀག་ནས་སུ། །རས་ཀྱིས་ལྟོ་བ་དཀྲི་བར་བྱ། །ཞག་གསུམ་ཡང་ན་
ཞག་བཞི་ཞིང༌། །ཞག་ནི་བཅུ་དྲུག་བར་གྱིས་བྱ། །དེ་ནི་བར་བར་དུབ་བསྟི་ཞིང༌། །ཆུ་ནི་ཉུང་ཟད་ཉུང་ཟད་དབྱུང༌། ལྟོ་ནི་ལྷོད་པར་གྱུར་པ་ན། །ཤིན་ཏུ་དམ་དུ་དཀྲི་བར་བྱ། །ཆུ་ནི་གཟགས་པ་སྨྱུང་བྱས་ལ། །ཐུག་པ་ལན་ཚྭ་སྣུམ་མེད་བླུད། །ཟླ་དྲུག་བར་དུ་འོ་མས་གསོ། །ཟླ་གསུམ་ཐུག་པ་འོ་ཐུག་བླུད། །ཟ་གསུམ་བར་དུའོ་ཐུག་གམ། །འབྲས་བུ་སྐྱུར་བཅས་ཤ་ཁུ་ནི། །ལན་ཚྭ་སྣུམ་ནི་ཉུང་བ་བླུད། །ཁྲེ་དང་ཅི་ཙེ་རྙིང་པོ་སྦྱིན། །དེ་ལྟར་ལོ་གཅིག་འབད་པ་ཡིས། །ཆུ་ཡི་དམུ་རྫིང་ལེགས་པར་གསོ། །སྤང་བ་རྣམས་ནི་བསྡམས་པ་དང། བརྟན་པར་བྱ་ཞིང་སྐོམ་མེད་བྱ་།གང་ཕྱིར་དམུ་རྫིང་ཐམས་ཅད་ནི། །ནད་སོགས་པ་ལས་བྱུང་བས་ན། །དེ་ཕྱིར་རླུང་སོགས་བསལ་བ་ཡི། །གསོ་བ་ཀུན་ལ་བསྔགས་པ་ཡིན། །ནད་ཀྱིས་ལྟོ་བ་གང་འགྱུར་པས། །མེ་དྲོད་འབྲི་བར་གྱུར་པ་ཡིན། །དེ་བས། ནང་ན་དྲོད་སྐྱེད་པའི། །རྩ་བ་ལྔ་བཅས་ཉུང་བ་དང༌། །ལན་ཚྭ་སྣུམ་དང་ཁ་བ་ཉུང༌། འཇུ་སའི་ཁ་ཟས་སྦྱིན་པར་བྱ། །བ་གཅིན་དང་ནི་སྤངས་པ་ཡི། །དྲུག་ཅུ་པ་ཡི་འབྲས་དག་ལས། །ཐུག་པ་འོ་ཐུག་བཙོས་ནས་ནི། །ཅི་འདོད་པར་ནི་སྦྱིན་པར་བྱ། །དམུ་རྫིང་སྐྱོན་ནི་སྦྱང་བའི་ཕྱིར། །དེ་རྗེས་བུ་རམ་ཤིང་ཁུ་བླུད། །དེ་ནི་རླུང་མཁྲིས་བད་ཀན་རྣམས། །རང་རང་གནས་སུ་འགྲོ་བར་འགྱུར། །ཤིན་ཏུ་ཚ་བའི་ཆུ་ལན་ཚྭ། །རྩུབ་ཅིང་བཤང་སྲི་གྲང་ཞིང་ལྕི། །བུ་རམ་ཏིལ་གཡོས་ཚོད་མ་དང༌། །ཆུ་འཐུང་ལུས་ནི་འཁྲུ་བ་དང༌། །རྩོལ་དྲགས་ལམ་དུབ་ཉིན་མོ་གཉིད། བཞོན་པས་འགྲོ་བ་སྤང་བར་བྱ། །ཤིན་ཏུ་སྐ་སླ་མིན་ཞིང་མངར། །དར་བ་སྐོམ་དུ་བླུད་པ་བསྔགས། །རླུང་ལ་རྒྱམ་ཚ་པི་པི་ལིང༌། །མཁྲིས་པར་ཀར་ཚ་བ་གསུམ། །བད་ཀན་ལས་གྱུར་ལ་ལ་ཕུད། །རྒྱམ་ཚ་ཟི་ར་སྦྲང་རྩི་དང༌། །ཚ་བ་གསུམ་དང་ལྡན་པ་སྦྱིན། །འདུས་པ་ལས་གྱུར་སྦྲང་རྩི་དང༌། །ཤུ་དག་ཏིལ་མར་བཅའ་སྒ་དང༌། །ཤུ་ཏི་རུ་རྟ་ལྕེ་མྱང་ཚ། །མཆེར་པ་རྒྱུན་འགགས་དམུ་རྫིང་ལ། །ཚ་བ་གསུམ་དང་ལ་ལ་ཕུད། །རྒྱམ་ཚ་གོ་སྙོད་སྤ་འབྲས་བཅས། །རྒྱུ་རྡོལ་སྦྲང་རྩི་པི་པི་ལིང༌། །ཚ་བ་
གསུམ་དང་ལྡན་པ་བླུད། །ཆུ་ཡི་དམུ་རྫིང་ཅན་ལ་ནི། །ཚ་བ་གསུམ་བཅས་བླུད་ན་ཕན། །རླུང་དང་བད་ཀན་གྱིས་གཟིར་ཞིང༌། །ལུས་ལྕི་ལྟོ་སྦོས་ཡི་ག་འཆུས། །ཆད་འཁྲུ་མེ་དྲོད་ཉམས་པ་ལ། །དར་བ་བདུད་རྩི་ལྟ་བུ་ཡིན། །སྦྱོར་བ་ཀུན་གྱི་རྗེས་ལ་ནི། །འོ་མ་ཉེ་བར་སྦྱར་བྱ་སྟེ། །ལུས་ཟུངས་ཐམས་ཅད་བརྟན་བྱེད་ཅིང༌། །སྟོབས་བསྐྱེད་ནད་ནི་ལྷག་ལུས་སེལ། །སྨན་གྱིས་ཉམས་སྨད་གྱུར་ལུས་ལ། །འོ་མ་བདུད་རྩི་ལྟ་བུ་ཡིན། །ཡན་ལག་བརྒྱད་པའི་སྙིང་པོ་བསྡུས་པ་ལས། གསོ་བའི་གནས་ཀྱི་ལེའུ་བཅོ་ལྔ་པའོ།། །།དེ་ནས་སྐྱ་རྦབ་ཀྱི་ནད་གསོ་བའི་ལེའུ་བཤད་པར་བྱའོ། །སྐྱ་རྦབ་ནད་ལ་དང་པོར་ནི། །དགེ་བ་ཆེན་པོའི་སྨན་མར་རམ། །བ་ཡི་ལྔ་དང་ཏིག་ཏ་ཆེའམ། །དོང་ག་སོགས་བསྐོལ་སྨན་མར་བླུད། །སེའུ་འབྲུ་འཕུལ་གང་འུ་སུ་ཕྱེད། །ཙིཏྲ་ཀ་དང་བཅའ་སྒ་ལས། །སྲང་རེ་པི་པི་ལིང་སྲང་ཕྱེད། །ལྡེ་གུར་བྱས་པ་མར་སྲང་ནི། །ཉི་ཤུ་ཆུ་བྲེ་བཞི་ནང་བསྐོལ། །སྐྱ་རྦབ་སྙིང་ནད་གཞང་འབྲུམ་སྐྲན། །མཆེར་རླུང་བད་ཀན་གྱིས་ཉན་སེལ། །དྲོད་སྐྱེད་ལུད་པ་དབུགས་མི་བདེ། །སེ་ལ་ཞིང་དབུགས་འཁྱིལ་བདེར་འབྱུང་བྱེད། །བུ་བཙས་དཀའ་དང་མོ་གཤམ་ལ། །འདི་ནི་མཆོག་ཏུ་བསྔགས་པ་ཡིན། །སྣུམ་བྱས་སྐྱུག་སྨན་རྣོན་པོ་གཏང༌། སླར་ཡང་སྣུམ་བཅས་བཀྲུ་སྨན་ནི། །འོ་མ་གཅིན་སྦྱར་བཏང་བའམ། །མཁུར་བ་ཀང་ལན་མང་བྱས་པས་སྦྱང༌། །དན་དའི་འབྲས་བུའི་ཁུ་བ་དྲོ། །ཏང་པ་ལ་ཡང་ན་རྒུན་འབྲུ་ནི། །སྲང་བརྒྱད་ཞག་གཅིག་སྤངས་མཉེས་པ། །དེ་འཐུངས་སྐྱ་རྦབ་ནད་སེལ་ཏོ། །ཨ་རུ་ར་བཏགས་བ་གཅིན་སྦྱར། །ཡང་ན་དེ་བསྐོལ་འབྲས་བུ་གསུམ། །ཁྲོན་བུ་མ་ཤ་དུར་བྱིད་དང༌། །ཐང་ཤིང་བཅའ་སྒའི་ལྡེ་གུ་ནི། །བ་གཅིན་སང་བརྒྱད་སྦྱར་བའམ། །བ་གཅིག་ལྷན་ཅིག་བསྐོལ་བ་བླུད། །དེ་དག་ཉིད་ནི་མར་བསྐོལ་བ། །བླུད་ནའང་ནད་ནི་སེལ་བར་བྱེད། །ཡང་ན་ལྕགས་ཕྱེ་བ་གཅིན་ནམ། །འོ་མ་ཞག་བདུན་བཞག་པ་བླུད། །ཞུ་ནས་ཁ་ཟས་འོ་མའམ། །ཤ་ཁུ་མངར་པོ་སྦྱིན་པར་བྱ། །
སྟོད་སྨད་སྦྱངས་ནས་ཨ་རུ་ར། །སྦྲང་རྩི་མར་སྦྱར་ལྡེ་གུ་སྦྱིན། །བི་ཤ་ལ་དང་པུ་ཙེ་ཤེལ། །གླ་སྒང་རུ་རྟ་ཐང་ཤིང་དང༌། །དུག་མོ་ཉུང་ནི་ཞོ་གཉིས་གཉིས། །མུར་བ་སྲང་ཕྱེད་བོང་ང་ནི། །ཞོ་གཅིག་དེ་ཡི་ཕྱེར་བཏགས་ཆུ། །དྲོ་འཇམ་སྦྱར་བླུད་སྦྲང་རྩི་སྦྱིན། །སྐྱ་རྦབ་རིམས་དང་ཁོང་ཚ་དང༌། །ལུད་པ་དབུགས་མི་བདེ་སྐྲན་སྦོས། །ཡི་ག་འཆུས་དང་མ་ཞུ་རླུང༌། །ཁྲག་མཁྲིས་དེས་ནི་སེལ་བར་བྱེད་།སླེ་ཏྲེས་དང་ནི་བ་ཤ་ཀ །འབྲས་བུ་གསུམ་དང་པུ་ཙེ་ཤེལ། །ཏིག་ཏ་ནིམ་པ་རྩ་མཁྲིས་རྣམས། །བསྐོལ་ཏེ་བསྒྲངས་པར་སྦྲང་རྩི་ནི། །བཏབ་པ་བླུད་ན་སྐྱ་རྦབ་དང༌། །མིག་སེར་ཁྲག་མཁྲིས་འཇོམས་པར་བྱེད། །ཚ་བ་གསུམ་དང་ཙི་ཏྲ་ཀ །འབྲས་བུ་གསུམ་དང་བྱི་དང་ག །ག་དུར་དང་མཉམ་ལྕགས་ཀྱི་ཕྱེ། །མར་དང་སྦྲང་རྩི་དར་བའམ། །ཆུ་དྲོན་འོ་མར་སྦྱར་བླུད་ན། །མིག་སེར་སྐྱ་རྦབ་སྙིང་ནད་དང༌། །མཛེ་དང་གཞང་འབྲུམ་ནད་རྣམས་སེལ། །དོང་གྲ་ལྕགས་ཕྱེ་ཏིལ་དང་ནི། །བུ་རམ་ཆ་མཉམ་པ་ཡི་ཚད། །པི་པི་ལིང་ནི་ཉིས་འགྱུར་གཞུག །རི་ལུ་སྐྱ་རྦབ་ཅན་ལ་སྦྱིན། །ཏ་བྱ་སྐྱེར་པའི་ཤུན་པ་དང༌། །དབྱི་མོང་པི་པི་ལིང་རྩ་བ། །ཐང་ཤིང་རྩ་བ་གསུམ་སྩོགས་དགུ། །ཕྱེ་མར་བཏགས་པ་ཉིས་འགྱུར་གྱི། །མན་དུ་རའི་ཕྱེ་དངུལ་རྡོ་འདྲ། །དེ་དག་གི་ནི་བརྒྱད་འགྱུར་གྱི་།བ་གཅིན་ནང་དུ་སོ་སོར་བསྐོལ། །རི་ལུར་བྱ་བར་བཟོད་པ་དང༌། །གཅིག་ཏུ་བསྲེས་ཏེ་རི་ལུར་པྱ། །འདི་ནི་མ་དུ་རའི་རི་ལུ། །དེ་ཟོས་དར་བ་འཐུངས་ན་ནི། །སྐྱ་རྦབ་ཅན་ལ་སྲོག་སྟེར་རོ། །མཛེ་དང་མ་ཞུ་འོར་ནད་དང༌། །བརླ་རེངས་ཡི་ག་འཆུས་པ་དང༌། །གཞང་འབྲུམ་མིག་སེར་གཅིན་སྙི་དང༌། །མཚེར་པའི་ནད་རྣམས་ཞི་བར་བྱེད། །ཏ་བྱ་བྲག་ཞུན་རྡུལ་ལྕགས་ཀྱི། །དྲི་མ་སྣ་རེ་སྲང་ལྔ་ལྔ། །རྩི་ཏྲ་ཀ་དང་འབྲས་བུ་གསུམ། །ཚ་བ་གསུམ་དང་བྱི་དང་བ། །སྲང་རེ་ཁ་ར་སྲང་བརྒྱད་སྦྱར། །ཕྱེ་མ་སྦྲང་རྩིས་སྦྲུས་པ་ཡིས། །སྐྱ་རྦབ་དུག་དང་ལུད་པ་ལུ། །གཅོང་ཆེན་མི་བཟད་རིམས་དང་ནི། །མཛེ་དང་མ་ཞུ་གཅིན་སྲི་དང༌། །སྐྲན་དབུགས་མི་བདེ་ཡི་ག་འཆུས། །ཁྱད་པར་དུ་ནི་བརྗེད་བྱེད་དང༌། །མིག་སེར་
གཞང་འབྲུམ་ནད་རྣམས་འཇོམས། །དུག་མོ་ཉུང་དང་འབྲས་བུ་གསུམ། །ནིམ་པ་གླ་སྒང་པ་ཏོ་ལ། །དོང་གྲ་བསྐོལ་པའི་ཁུ་བར་ནི། །བྲག་ཞུན་སྲང་བརྒྱད་ཞག་བཅུར་རམ། །ཉི་ཤུའམ་སུམ་ཅུའི་བར་དུ་སྦངས། །ཀ་ར་དཀར་པོ་དེ་མཉམ་དང༌། །སྨིག་རྐང་དང་ནི་པི་པི་ལིང༌། །ཀར་ཀ་ཏ་སྲིང་སྐྱུ་རུ་ར་།སྲང་རེའི་ཚད་དུ་བྱས་པ་དང༌། །ཀཎྜ་ཀ་རིའི་རྩ་འབྲས་བུ། །སྲང་གཅིག་ཚད་དུ་བྱས་པ་དང༌། །དྲི་སྣ་གསུམ་ནི་ཞོ་གཉིས་གཉིས། །སྦྲང་རྩི་སྲང་གསུམ་བྱས་པ་དང༌། །རི་ལུ་ཞོ་གཉིས་ཚུད་བྱས་ཟོས། །སེ་འབྲུའི་ཁུ་བ་འོ་མ་དང༌། །བྱ་ཡི་ཤ་ཁུ་ཆུ་དྲོན་དང༌། །ཨ་ས་བ་དང་ཆང་རྙིང་དང༌། །དེ་ནི་ཟོས་རྗེས་བླུད་པའམ། །ཟས་སྔོན་ཟས་ཀྱི་རྗེས་བླུད་ན། །སྐྱ་རྦབ་མཛེ་དང་རིམས་མཆེར་བ། །མགོ་འཁོར་གཞང་འབྲུམ་མཚན་པར་རྡོལ། །རྣག་དང་སྙིང་ནད་ཁུ་བའི་ནད། །གཅིན་ནད་དྲོད་ཉམས་སེལ་བྱེད་ཅིང༌། །སྐེམ་དང་སྦྱར་དུག་དམུ་རྫིང་དང༌། །ལུད་པ་ཁྲག་མཁྲིས་གསར་པ་དང༌། །འོར་ནད་སྐྲན་དང་ལྐོག་མའི་ནད། །རྒྱུ་རླུགས་མགོ་འཁོར་ཅས་པ་ཡི། །ནད་ཀུན་སེལ་ཞིང་དགེ་བ་ཡིན། །རྒུན་འབྲུ་པི་པི་ལིང་བྲེ་རེ། །ཁར་སྲང་ནི་ལྔ་བཅུ་དང༌། །ཤིང་མངར་བཅའ་སྒ་སྨིག་རྐང་དག །སྲང་ནི་གཉིས་གཉིས་ཕྱེ་མར་བྱས། །སྐྱུ་རུ་ར་ཁུ་བྲེ་བཅུ་དྲུག །ནང་གཞུག་ལྡེ་གུ་བཞིན་དུ་བསྐལ། །བསྒྲངས་པར་སྦྲང་རྩི་བྲེ་གང་གཞུག །དེ་ལས་ཞོ་གཉིས་ཚད་ཟོས་ན། །གཟུགས་འཁུམས་སྐྱ་རྦབ་ནད་དང་ནི། །མིག་སེར་གྱི་ནི་ནད་འཇོམས་སོ། །རྩ་བ་ལྔ་པ་ཆུང་ངུའི་ཆུ། །རྒུན་འབྲུ་སྐྱུ་རུ་རའི་ཁུ་བ། །བཟའ་དང་བཏུང་བར་སྦྱར་བ་ནི། །སྐྱ་རྦབ་མིག་སེར་ནད་སེལ་ཏོ། །དེ་ལྟར་སྐྱ་རྦབ་ནད་ལ་ནི། །སྤྱི་ཡི་སྨན་ནི་བསྟན་པ་ཡིན། །མཁས་པས་ནད་དམིགས་སོ་སོ་ཡི། །སྟོབས་དབང་ལས་ཀྱང་སྦྱར་བར་བྱ། །རླུང་གྱུར་ཕལ་ཆེར་སྣུམ་ཆོས་བྱ། །མཁྲིས་པར་ཁ་དང་བསིལ་བ་གཏང༌། །བད་ཀན་ལས་གྱུར་རྩུབ་ཚ་དྲོ། །འདུས་པར་འདྲེན་མར་སྦྱར་བར་བྱ། །ས་ཟོ་ལས་གྱུར་སྦྱང་བ་ནི། །རྣོན་པོས་ལུས་ལས་བསལ་བར་
བྱ། །དེ་འོག་ལྟོ་སྦྱང་སྟོབས་བསྐྱེད་ཕྱིར། །དེ་ལ་ཞུན་མར་སྦྱིན་པར་བྱ། །ཚ་བ་གསུམ་དང་བིལ་བ་དང༌། །སེར་པོ་གཉིས་དང་འབྲས་བུ་གསུམ། །བ་སྤྲུ་བ་གཉིས་གླ་སྒང་དང༌། །ལྕགས་ཕྱེ་བ་ཏ་བྱི་དང་ག །ཐང་ཤིང་བྲེཥྩི་ཀ་ལི་དང༌། །ག་བྲའི་རྩ་བ་འོ་མ་མར། །བསྐོལ་བ་འཐུངས་ན་ས་ཞག་ཟོས། །ལས་གྱུར་ནད་ནི་ཐམས་ཅད་སེལ་།དེ་བཞིན་ནཱ་ག་གེ་སར་དང༌། །ཤིང་མངར་ཀུ་ཤ་པི་པི་ལིང༌། །འོ་མར་བསྐོལ་བ་བླུད་ན་ཕན། །དེ་ལ་སྲེད་པར་གྱུར་ན་ནི། །བྱི་དང་ག་དང་པ་ཏ་དང༌། །ནིམ་པ་བསྐོལ་བའི་ཁུ་བའམ། །མུར་བ་དང་བསྲེས་ས་ཞག་དག །སྲེད་པ་དགག་ཕྱིར་སྦྱིན་པར་བྱ། །ས་ཞག་བྱེ་བྲག་ཐ་དད་ནད། །རྗེས་སུ་མཐུན་པའི་སྨན་སྦྱིན་བྱ། །མིག་སེར་ལ་ནི་མཁྲིས་འཇོམས་སྨ། །སྐྱ་རྦབ་གནོད་པ་མེད་པ་སྦྱིན། །ཨ་རུ་ར་ནི་བརྒྱའི་ཁུ་བར། །ཨ་རུ་ར་རྡོག་ལྔ་བཅུའི་ཕྱེད། །མར་ནི་བྲེ་གང་ནང་དུ་བསྐོལ། །སྐྲན་དང་མིག་སེར་སྐྱ་རྦབ་འཇོམས། །དོང་ག་བུར་ཤིང་ཁུ་བའམ། །བི་ད་རི་དང་སྐྱུ་རུ་རའི། །ཁུ་བ་ཚ་བ་གསུམ་བཅས་ལ། །སྲང་གཅིག་བླུད་ན་མིག་སེར་འཇོམས། །དནད་བུ་རམ་གཉིས་འགྱུར་གྱི། །ལྡེ་གུ་ཆུ་སྲང་སྦྱར་བ་བླུད། །དུར་བྱིད་ཕྱེ་མ་སྦྲང་རྩིར་བཅས། །འབྲས་བུ་གསུམ་གྱི་ཁུ་བ་བླུད། །འབྲས་བུ་གསུམ་མམ་སླེ་ཏྲེས་སམ། །སྐྱེར་པའམ་ནིམ་པའི་ཁུ་བ་དག །སྦྲང་རྩིར་སྦྱར་བ་ནང་རེ་ནི། །མིག་སེར་གྱིས་ནི་ཉེན་ལ་བླུད། །སྐྱེར་པ་ཡུག་སྣམ་སྐྱུ་རུ་ར། །མིག་སེར་སེལ་བའི་མིག་སྨན་ཡིན། །མིག་སེར་ཅན་གང་དྲི་མ་ནི། །ཏིལ་བཏགས་ལྟ་བུར་བྱུང་གྱུར་ན། །བད་ཀན་ལམ་བཀག་དེ་ལ་ནི། །བད་ཀན་མཁྲིས་པ་སེལ་བས་གསོ། །རྩུབ་གྲང་ལྕི་དང་མངར་བ་དང༌། །དྲག་ཤུལ་རླུང་ནི་འགགས་པ་ཡིས། །རླུང་དང་བད་ཀན་གཅིག་གྱུར་པ། །མཁྲིས་པ་ཕྱིར་འབྱིན་དེ་ཡི་ཚེ། །མིག་དང་པགས་པ་སེར་བ་དང༌། །ཕྱིས་སྐྱ་བར་གྱུར་བ་དང༌། །བཤང་འགགས་རྒྱུ་མ་འཁྲུགས་པ་དང༌། །སྙིང་ག་ལྕི་བ་ཉིད་འགྱུར་ལ། །མཁྲིས་པའི་ཡན་ལག་ལ་བརྟེན་པ་།རིང་ཅིང་དྲོད་ཆུང་རྩིབ་
ལོགས་གཟེར། །སྐྱིགས་བུ་ལུད་པ་ཡི་ག་འཆུས། །རིམས་འདེབས་རིམ་གྱིས་འབྱུང་བར་འགྱུར། །དེ་ལ་རྨ་བྱའམ་ཁྱིམ་བྱ་དང༌། །སྲེག་པའི་ཤ་ཁུའམ་ལ་ཕུག་ནི། །སྐམ་སའི་ཁུ་བའམ་རྒྱ་སྲན་ཁུ། །རྩུབ་ཁ་སྐྱུར་བར་སྦྱར་བ་སྦྱིན། །རབ་ཚ་སྐྱུར་དང་རྣོ་བ་དང༌། །ལན་ཚྭ་ཤིན་ཏུ་དྲོ་བའང་བསྔགས། །ཁ་ལུང་ཁུ་བ་ཚ་བ་གསུམ། །སྦྱར་བའི་ལྡེ་གུ་འང་སྦྱིན་པར་བྱ། །དེས་ནི་མཁྲིས་པར་རང་གནས་སུ། །འཇུག་ཅིང་བཤང་མདོག་ཐ་མལ་འགྱུར་།རྒྱུ་མ་འཁྲུགས་སོགས་བླ་བརྣན་བཅས། །རླུང་ཡང་རབ་ཏུ་ཞི་བར་འགྱུར། །འདི་ཡིས་བླ་བརྣན་ཞི་ནས་ནི། །མིག་སེར་གསོ་བའི་ཆོ་ག་བྱ། །མིག་སེར་ཁོང་དུ་ཞེན་པ་ན། །བྲག་ཞུན་བ་གཅིན་དང་སྦྱར་བ། །གསེར་གྱི་དྲི་མའམ་ཏ་བྱ་ནི། །བ་གཅིན་སྦྱར་བ་ཟླ་གཅིག་བླུད་།ཧ་ལིས་ཀ་སླེ་ཏྲེས་ཁུ། །འོ་མ་མ་ཧེའི་མར་བསྐོལ་བའི། །སྐྱུ་རུ་ར་ཡི་ཁུ་བ་དང༌། །དུར་བྱིད་སྦྱར་བའི་བཀྲུ་སྨན་བླུད། །འཁྲུས་ནས་ཁ་ཟས་མངར་བག་ནི། །རླུང་འཇོམས་མཁྲིས་པ་འཇོམས་པ་སྦྱིན། །སྔར་བཤད་རྒུན་འབྲུ་ལྡེ་གུ་དང༌། །མངར་བའི་སྨན་མར་ཞུན་མར་སྦྱིན། །འོ་མ་མས་གཏོང་སྨན་དང་ནི། །འཇམ་རྩིར་བཅས་པ་བསྟེན་པར་བྱ། །མེ་དྲོད་བསྐྱེད་པར་བྱ་བའི་ཕྱིར། །རྒུན་ཆང་ཆང་རྙིང་སྦྱིན་བྱ་ཞིང༌། །ལུད་པའི་སྐབས་བཤད་ཨ་རུ་རའི། །ཤིང་མངར་ར་དར་བ་པི་པི་ལིང། །འོ་མར་བཅས་པས་ནད་དམིགས་དང༌། །མེ་དྲོད་ཇི་བཞིན་སྦྱིན་པར་བྱ། །མཁས་པས་འོར་ནད་སྐབས་བཤད་པའི། །གསོ་བ་སྐྱ་རྦབ་ལ་ཡང་སྦྱར། །ཡན་ལག་བརྒྱད་པའི་སྙིང་པོ་བསྡུས་པ་ལས། །གསོ་བའི་གནས་ཀྱི་ལེའུ་བཅུ་དྲུག་པའོ།། །།དེ་ནས་འོར་ནད་གསོ་བ་བཤད་པར་བྱའོ། །འོར་ནད་ཡན་ལག་ཀུན་ཞུགས་ཤིང༌། །ནད་སྐྱེས་མ་སྨིན་ལ་དང་པོར། །སྨྱུང་བྱས་ཁ་ཟས་ཡང་བ་བཟའ། །བོང་ང་ཐང་ཤིང་བྱི་དང་ག །དུག་མོ་ཉུང་དང་ན་ལེ་ཤམ། །བསྐོལ་བའི་ཆུ་དྲོན་བླུད་པར་བྱ། །ཡང་ན་ཨ་རུ་ར་བཅའ་སྒ། །ཐང་ཤིང་བ་སྤྲུ་བསྐོལ་བའམ། །ལྕགས་ཕྱེ་དགུ་པར་བཅས་པ་གླུད། །འོར་ནད་ཤས་ཆེར་ཨ་རུ་ར། །བ་
གཅིན་བཅས་པ་སྦྱང་ཕྱིར་བླུད། །འབྲས་བུ་གསུམ་བསྐོལ་པུ་ཙེ་ཤེལ། །དུར་བྱིད་ལྕགས་ཕྱེ་ཚ་གསུམ་བཅས། །ཡང་ན་དེ་བཞིན་གུ་གུལ་ལམ། །བྲག་ཞུན་དང་ནི་སྦྱར་བ་བླུད། །མེ་དྲོད་ཆུང་ཞིང་མ་སྨིན་ལ། །ལྕི་ཞིང་རྟུག་འགགས་ཡང་ན་འཁྲུ། །ཚ་བ་གསུམ་དང་རྩ་བ་རུ་ཚ། །སྦྲང་རྩི་དར་བར་སྦྱར་བའམ། །ཨ་རུ་ར་དང་བུ་རམ་བཅས། །བུ་རམ་བཅའ་སྒར་སྦྱར་བའམ། །ཟོས་རྗེས་དར་བ་བླུད་པར་བྱ། །སྒེའུ་གཤེར་བུ་རམ་ཆ་མཉམ་པ། །སྲང་ཕྲེད་ཚད་ཀྱིས་བསྐྱེད་ནས་ནི། །ཆེ་ཚད་སྲང་ལྔའི་བར་དུ་ནི། །ཟླ་གཅིག་ཟ་ཞིང་ཡུ་ཤ་དང༌། །འོ་མ་ཤ་ཁུ་བཅས་ཟོས་ན། །འོར་ནད་དམུ་རྫིང་སྐྲན་གཞང་འབྲུམ། །གཅིན་དང་དབུགས་མི་བདེ་ཆམ་པ། །སྒྱིད་སྙོམ་མ་ཞུ་མིག་སེར་དང༌། །ལུས་སྐེམ་གདོན་གྱི་ནད་རྣམས་དང༌། །ལུད་པ་བད་ཀན་སྦྱོར་འདིས་སེལ། །སྒེའུ་གཤེར་དོང་གྲ་ལྡེ་གུའི་ཁུ་བ་དང༌། །འོ་མ་དག་དང་མར་ནི་བསྐོལ་བླུད་ན། །འོར་ནང་སྦྲིད་པ་དམུ་རྫིང་མེ་དྲོད་ཉམས། །ནད་ཀྱིས་ཟིལ་ནོན་ན་ཡང་ནད་མེད་འགྱུར། །མ་ཞུ་མེད་ཅིང་ཕྱི་ས་འགགས། །འོར་ནད་ཀྱིས་གཟིར་ཚ་བ་གསུམ། །དུར་བྱིད་དན་ད་ཀྲུ་ཏྲུག་ཏྲེས། །བསྐོལ་བའི་འོ་མ་བླུད་པར་བྱ། །མ་ཧེའམ་ཡང་ན་བ་གཅིན་ནམ། །འོ་མ་བཏུང་ཞིང་དེ་དང་བཟའ། །ཞག་བདུན་ཡང་ན་ཟླ་གཅིག་པར། །རྔ་མོའི་འོ་མ་བླུད་པས་གསོ། །ཏི་མུ་ས་དང་ནས་ཚིག་ཐལ། །ལ་ལ་ཕུད་དང་ཚ་བ་ལྔ། །ན་ལེ་ཤམ་དང་སེ་འབྲུ་དང༌། །པ་ཏ་འུ་སུ་སྟར་བུ་དང། །བིལ་བ་གཞོན་ནུ་ཞོ་གཉིས་གཉིས། །ཆུ་བྲེ་བཞི་བསྐོལ་མར་བྲེ་གང༌། །བསྐོལ་བ་བླུད་ན་འོར་ནད་དང༌། །གཞང་འབྲུམ་སྐྲན་དང་ཟ་ཁུ་འཇོམས། །ཞོ་དང་ཙི་ཏྲ་ཀ་བསྲེས་ལས། །བྱུང་བའི་མར་ནི་དར་བར་བཅས། །ཙི་ཏྲ་ཀ་བཏབ་བསྐོལ་བ་ནི། །ཡོན་ཏན་གོང་མ་མཚུངས་པས་ཡིན། །ཐང་ལ་འབར་དང་ཏིག་ཏ་ཆེ། །དགེ་བའམ་ཨ་རུ་རའི་སྨན་མར། །དུས་ཤེས་པ་ཡིས་སྦྱིན་པར་བྱ། །རྩ་བ་བཅུ་པའི་ཁུ་བ་ནི། །བྲེ་བཞིར་ཨ་རུ་ར་བརྒྱ་བསྐོལ། །དེར་ནི་བུ་རམ་སྲང་བརྒྱ་གཞུག །ཚ་བ་གསུམ་དང་དྲི་སྣ་
གསུམ། །ནས་ཚིག་འཁུས་ཐལ་ཆུང་ཟད་བཏབ། །བསྒྲངས་ནས་སྤྲང་རྩི་བྲེ་ཕྱེད་གཞུག །དེ་བྱིན་ནས་ནི་འོར་ནད་དང༌། །རིམས་སྐྲན་གཅིན་ནད་ལུས་སྐེམ་པ། །མ་ཞུ་ཁྲག་མཁྲིས་རླུང་དང་ནི། །སྒྲེགས་སྐྱུར་ཁ་དོག་མི་སྡུག་དང༌། །གཅིན་ནད་རླུང་གི་ཁུ་ཆུའི་ནད། །དབུགས་མི་བདེ་དང་ཡི་ག་འཆུས། །མཆེར་པའི་ནད་དང་སྦྱར་བའི་དུག །དམུ་རྫིང་གི་ནི་ནད་རྣམས་སེལ། །ནས་དང་སཱ་ལུ་འབྲས་རྙིང་ཟས། །རྩ་བ་བཅུ་བའི་ཆུ་དང་བསྐོལ། །ལན་ཚྭ་ཉུང་ཞིང་སྣུམ་ཤས་ཆུང༌། །བྱིན་ན་འོར་ནད་སེལ་བར་བྱེད། །རྒྱ་སྲན་མུངྒའི་ཁུ་བ་ནི། །ཐལ་སྨན་རྩ་བ་གསུམ་དང་ལྡན། །དེ་བཞིན་སྐམ་སའི་ཤ་རུས་སྦལ། །སྐྱིན་གོར་བྱི་དུར་ཤ་ཁུ་སྦྱིན། །བཏུང་བ་དར་བ་གསར་པ་དང༌། །ཆང་ནི་སྨན་དང་བཅས་པ་བླུད། །ཟི་ར་ཟུར་པ་ཛི་བན་ཏི། །མ་ནུ་ཙི་ར་ཀ་ར་དང༌། །ཡ་བཀྵ་ར་བིལ་བའི་རྐང༌། །ད་ཏྲིག་ཞོ་རེའི་ཚད་དུ་བྱས། །མར་དང་ཏིལ་མར་ནང་དུ་བརྔོས། །བྱིན་ན་འོར་ནད་སྐྲན་གཞང་འབྲུམ། །ཚང་འཁྲུ་དང་ནི་སྙིང་གི་ནད། །མེ་དྲོད་ཆུང་དང་གཅིན་ནང་སེལ། །ཚ་བ་ལྔ་དང་སྦྱར་བ་ཡི། །ཐུག་པའང་ཡོན་ཏན་དེ་དང་འདྲ། །རྡོ་དྲེག་རུ་རྟ་སྟོན་ནེ་ཡ། །ཧ་རེ་ཎུ་ཀ་ཨ་རུ་ར། །ཤྲི་བེ་ཏ་ཀ་ཤུག་པ་དང༌། །ཆུ་སྲིན་སྡེར་མོ་པྲི་ཡང་ཀུ། །པྲི་ཀ་ཐང་ཤིང་སྤང་སྤོས་དང༌། །པི་པི་ལིང་དང་དབྱི་མོ་དང༌། །ཀུ་ནན་ན་བྱམ་ཀ །མ་ལི་ཀ་དང་དྲི་སྣ་བཞི། །བལ་བུའི་ལོ་མ་གླ་སྐང་དང༌། །གནྡྷ་པ་ལ་ཤལ་ལ་ནི། །བསྐུ་བའི་ཏིལ་མར་དག་དང་ནི། །ཁྲུས་ཀྱི་ཆུ་དང་ལྡེ་གུ་བྱ། །ནིམ་པ་ཨརྒ་བ་སྤུ་བ། །ནག་ཏམ་ལའི་ཆུས་ཁྲུས་བྱ། །ཡན་ལག་ཕྱོགས་གཅིག་སྐྲངས་པ་ལ། །ཀ་ར་བཱིར་བ་སྤུ་བ། །ཀིཾ་ཤུཀ་དང་པིལ་ཤ་།འབྲས་བུ་གསུམ་དང་སེང་ཕྲོམ་དང༌། །ན་ལི་ཀ་དང་ཐང་ཤིང་དང༌། སྤང་སྤོས་ཀོ་ཤ་ཏ་ཀི་དང༌། །བོང་ང་ཏ་ལའི་ལོ་མ་དང༌། །ཛ་ཡན་ཏི་དང་འོལ་མ་སེ། །ཀ་ཀ་དང་ནི་ས་ལེ་ཤིང༌། པྲི་ཤ་ཀརྞི་བྱི་མོ་དང༌། །རི་ཏི་བྲི་ཏི་གླང་པོའི་སྣ། །ལྡེ་གུ་དྲོ་འཇམ་བསྐུས་པས་པན། །དེ་ནས་རླུང་གྱུར་འོར་ནད་ལ། །ཟླ་ཕྱེད་བར་དུ་དུར་བྱིད་དམ། །
ཡང་ན་ཨེ་རཎྜ་མར་བླུད། །རླུང་གི་རྟུག་འགགས་ལ་དེ་ཉིད། །ཟས་ཀྱི་སྔོན་དུ་འོ་མ་འམ། །ཤ་ཁུ་བླུད་ཅིང་རླུང་འཇོམས་པའི། །སྨན་གྱི་དུགས་དང་བསྐུ་བ་བྱ། །ཕྱོགས་གཅིག་སྐྲངས་ལ་ཁ་ལུང་དང༌། །ཨགྣི་མནྠ་སྤང་སྤོས་དང༌། །བཅའ་སྒ་ཐང་ཤིང་ལྡེ་གུ་བསྐུ། །མཁྲིས་གྱུར་ཏིག་ཏའི་སྨན་མར་དང༌། །ནྱ་གྲོ་དྷ་སོགས་བསྐོལ་བ་བླུད། །སྐོམ་དད་ཆེ་དང་རྨོངས་བག་ཚ། །འོ་མ་བསྐུ་བྱུག་བསིལ་བ་བྱ། །པ་ཏོ་ལ་རྩ་ཀྱི་ལྕེ་བ། །ཤིང་མངར་ཐང་ཤིང་པུ་ཙེ་ཤེལ། །སྐྱེར་པ་ཙནྡན་ཨ་རུ་ར། །ད་ན་ལྕང་མ་བ་ལ་ཤ་།པི་པི་ལིང་དང་མར་བསྐོལ་བླུད། །ཁོང་ཚ་མགོ་འཁོར་སྐོམ་དད་ཆེ། །འདུས་པའི་ནད་དང་མེ་དབལ་སྐྲང༌། །ལུས་ཚ་རིམས་དང་བཅས་པ་སེལ། །བད་ཀན་ལས་གྱུར་དོང་གྲ་སོགས། །ཏིལ་མར་དང་ནི་བསྐོལ་བ་བླུད། །རྒྱུན་སྲང་འགགས་ཤིང་མེ་དྲོད་ཉམས། །རྨོངས་བག་ཡི་ག་འཆུས་པ་ལ། །ཐལ་སྨན་ཆང་རྙིང་མནན་ཆང་དང༌། །བ་གཅིན་དར་བར་བཅས་པ་བླུད། །པི་པི་ལིང་དང་འབའ་ཆ་རྙིང༌། །ཤི་སྐྲུའི་ཤུན་པ་ཟུར་པ་དང༌། །བ་གཅིན་ལྡེ་གུ་དྲོ་འཇམ་སྦྱར། །བསྐུ་དང་དྲིལ་བའི་ལས་ལ་སྦྱར། །རུ་རྟ་ཨགྣི་མནྠ་དང༌། །རྒྱ་སྲན་དོང་ག་ཙི་ཏྲ་ཀ །བ་གཅིན་ཆུ་བསྐོལ་བས་ཁྲུས་བྱ། །ཙ་རོང་ཨ་ཀ་རུ་ཡིས་བྱུག །ན་ག་བ་ར་ས་རལ། །ཨ་ཟ་སྲིང་གི་ཨམ་པ་ཏ། །ཨ་ཟ་གནྡྷ་ཞེས་བྱ་དང༌། །ཨ་ཤྭ་གནྡྷའི་ལྡེ་གུ་ནི། །ཡན་ལག་ཕྱོགས་གཅིག་སྐྲངས་ལ་ཕན། །ནད་གཞི་ཇི་བཞིན་ཡན་ལག་ནི། །ཉེ་བའི་ཕྱོགས་ནས་གཏར་ག་བྱ། །འདྲེས་པའི་ནད་གཞི་ནི། །ཤས་ཆེའི་དབང་དུ་གསོ་བ་བྱ། །གོ་སྙོད་པ་ཏ་གླ་སྒང་དང༌། །ཀཎྚ་ཀིར་ཆ་བ་ལྔ། །སྐྱེར་པ་ཆུ་དྲོན་སྦྱར་བླུད་པ། །རྩ་མཁྲིས་བཅའ་སྒ་ཆུ་དྲོན་བླུད། །ནད་གཞི་གསུམ་གྱི་འོར་ནད་ནི། །ཡུན་རིངས་ལོན་ཞིང་ཚབས་ཆེན་སེལ། །སླེ་ཏྲེས་དང་ནི་ཨ་རུ་ར། །ཐང་ཤིང་གུ་གུལ་བ་སྤུ་བ་།བ་གཅིན་སྦྱར་བླུད་དམུ་རྩིང་དང༌། །མཛེ་དང་སྐྱ་རྦབ་སྲིན་བུའི་ནད། །གཅིན་ནང་བད་ཀན་ཟ་ཁུ་དང༌། རླུང་ནི་སྟོད་དུ་འབྱམས་པ་སེལ། །དེ་ལྟར་རང་རང་ནད་ཀྱི་དབང་བྱས་བཤད། །
སྣད་པ་ལས་བྱུང་བ་ལ་ཁྲག་དབྱུང་ཞིང༌། །བསིལ་སྨན་མར་ཁུ་བྱུགས་ཤིང་བླུགས་པར་བྱ། །དུག་སྐྱེས་སྐྲང་ལ་དུག་སེལ་སྦྱོར་བ་བྱ། །གྲོང་དང་རླན་ཅན་ཆུར་གནས་ཤ་རིད་རློན། །ཚོད་སྐམ་ཏིལ་གྱི་ཟས་དང་བུ་རམ་ཅན། །ཕྱེར་བཏགས་ཟས་དང་ཞོ་དང་ལན་ཚྭ་དང༌། །ཁ་ཟས་རུལ་བག་ཆང་སྐྱུར་ཡོས་ཤ་སྐམ། །འདྲེས་པའི་ཟས་དང་ལྕི་དང་མ་གོམས་ཟ། །ཚ་བ་བསྐྱེད་དང་ཉིན་པར་གཉིད་ལོག་དང༌། །མཚན་མོ་གཉིད་མ་ལོག་དང་ཉལ་པོ་རྣམས། །འོར་ནད་ཅན་གྱིས་དེ་དག་ཐམས་ཅད་སྤང༌། །ཡན་ལག་བརྒྱད་པའི་སྙིང་པོ་བསྡུས་པ་ལས། །གསོ་པའི་གནས་ཀྱི་ལེའུ་བཅུ་བདུན་པའོ།། །།དེ་ནས་མེད་དབ་ལ་གསོ་བ་བཤད་བཤད་པར་བྱའོ། །མེད་བལ་ནད་ལ་ཐོག་མ་ཉིད། །སྨྱུང་བ་དང་ནི་རྩུབ་ཆོས་དང༌། །ཁྲག་དབྱུང་སྐྱུག་སྨན་བཀྲུ་སྨན་གཏང༌། །སྣུམ་ཆོས་སྤྱད་པར་མི་བྱའོ། །པོ་སོན་ཆ་དང་དུག་མོ་ཉུང་།ཤིང་མངར་བཅས་པའམ་པ་ཏོ་ལ། །ནིམ་པའི་ལོ་མ་པི་པི་ལིང༌། །སྐྱུག་སྨན་བཏང་ན་མེ་དབལ་འཇོམས། །ཀྱི་ལྕེ་བ་ཡི་ཁུ་བའམ། །རྒྱུན་འབྲུ་འབྲས་བུ་གསུམ་ཡང་རུང༌། །དུར་བྱིད་ཕྱེ་མ་བཏབ་པའམ། །འོ་མ་མར་སྦྱར་བཀྲུ་སྨན་ནི། །ཁོང་ནི་ཞེན་པའི་ནད་ལ་ནི། །ཁྱད་པར་དུ་ནི་སྦྱང་བ་གཏང༌། །སྦྱང་མིན་ནད་ཚབས་ཆུང་བ་ལ། །ཞི་སྨན་ཙནྡན་ཨུཏྤལ་གཏང༌། །གླ་སྒང་ནིམ་པ་པ་ཏོ་ལ། །པ་ཏོ་ལ་སོགས་ཉིད་དག་གམ། །ཐལ་ཏྲེས་གླ་སྒང་སྐྱུ་རུ་ར། །པུ་ཤེལ་ཙོ་ནི་ཆུ་བསྐོལ་བླུད། །མི་དབལ་སྒོམ་དད་ཅན་ལ་ནི། །བྱི་ཚེར་བ་དང་པར་བ་ཏ། །སླ་ཏྲེས་བཅའ་སྒ་བསྐོལ་བ་ནི། །ཁུ་བ་བསྒྲངས་པར་བླུད་པར་བྱ། །སྐྱེར་པ་སྲན་ཆུང་པུ་ཙེ་ཤེལ། །པ་ཏོ་ལ་དང་འབྲས་བུ་གསུམ། །ནིམ་པ་ཤིང་མངར་གྱི་ལྕེ་བ། བསྐོལ་བ་མར་དང་བཅས་པ་བླུད། །ཡན་ལག་ནད་ཞུགས་ནད་ཁྲག་ཉིད། །ཐོག་མ་ཉིད་དུ་ཁྲག་དབྱུང་བྱ། །པགས་པ་ཤ་དང་རྒྱུས་པ་འདྲུལ། །ཁྲག་རུལ་བ་ལས་བྱུང་བ་ཡིན། །སྨན་ཞིང་བ་ཀན་ཟད་པ་དང༌། །རླུང་དང་མཁྲིས་པ་ཤས་ཆེ་ལ། །ཏིག་ཏ་ཏིག་ཏ་
ཆེན་པོའི་མར། །ཀྱི་ལྕེ་བ་བསྐོལ་མར་ཕན་ནོ། །ཁྲག་དབྱུང་ཁོང་པ་དག་གྱུར་ནས། །ནད་ནི་ཤ་ལྤགས་ལ་གནས་ན། །ཕྱི་རོལ་ན་ནི་བྱུག་སྩོགས་ཀྱིས། །འཕྲལ་དུ་མེ་དཔལ་ཞི་བར་འགྱུར། །རླུང་གྱུར་ཤུ་ཏི་གླ་སྒང་དང༌། །འོ་མ་འུ་སུ་པ་ར་ཧི། །ཨ་ཏ་ཀ་ལ་པི་པི་ལིང༌། །ཐང་ཤིང་ཤི་ཀྲུ་རུ་རྟ་ཡི། །ལྡེ་གུ་བྱུག་པ་བྱས་ན་ཕན། །མཁྲིས་པ་ནྱ་གྲོ་དྷ་སོགས་སྡེ། །དེ་བཞིན་པདྨ་ཨུཏྤལ་སོགས། །ནྱ་གྲོ་དྷའི་རྩ་གཞོན་ནུ་དང༌། །ཆུ་ཤིང་ནང་གི་ལོ་མར་བཅས་།པདྨའི་རྩ་བ་ལྡེ་གུ་དང༌། །ལན་བརྒྱ་བཀྲུས་པའི་མར་གྱིས་བྱུག །པདྨ་ཅན་གྱི་འདམ་བསིལ་བའམ། །མུ་ཏིག་བཏགས་པར་གྱུར་པ་ལ། །དུད་དམ་བྱུ་རུ་ཉ་ཕྱིས་སམ། །ཡུག་སྣམ་མར་དང་བཅས་པ་བྱུག །བད་ཀན་ལས་གྱུར་འབྲས་བུ་གསུམ། །ཤུག་པ་བཙོད་དང་པུ་ཙོ་ཤེལ། །ཀ་ར་བཱིར་འདམ་བུའི་རྩ། །ཨ་ནན་ཏ་ཡི་ལྡེ་གུ་བསྐུ། །ད་བ་ལོ་མ་བདུན་པ་དང༌། །སེང་ལྡེང་ཐང་ཤིང་བཀྲུ་སྨན་དང༌། །གླ་སྒང་དོང་གྲར་བཅས་པའམ། །བ་ར་ཎ་སྩོགས་ལྡེ་གུ་བསྐུ། །དོང་ག་ཡི་ནི་ལོ་མ་དང༌། །སླེ་སྨན་ཏ་ཀའི་ཤུན་ལྤགས་དང༌། །ཨིནྡྲ་བ་རུ་ནའི་ལོ་མ། །ཤྲི་ཤ་འོལ་མ་སེ་མེ་ཏོག །ཆུ་བླུགས་རྨ་བསྐུ་སྨན་མར་དང༌། །ལྡེ་གུའི་ཕྱེ་མ་ཇི་བཞིན་དུ། །སྨན་ནི་འདི་དག་ཉིད་ཀྱིས་བྱ། །རླུང་རྒྱས་མར་ནི་ཤས་ཆེར་བྱ། །བད་ཀན་གནས་ཤེས་མ་སྨིན་ལ། །དྲོ་དང་རྩུབ་པ་ཤས་ཆེར་སྦྱར། །དེ་བཞིན་མཁྲིས་པའི་གནས་ཞུགས་ལ། །ཁྲག་མཁྲིས་ལན་མར་ལྡན་བྱ། །ཤིན་ཏུ་བསིལ་ཞིང་སྲབ་པ་དང༌། །གསོ་སྲབ་ནང་དུ་བཞག་པ་ནི། །ནུས་པ་ཆུང་བ་ཡང་དང་ཡང༌། །གཞན་དང་གཞན་ནི་སྦྱར་བར་བྱ། །འདྲེས་པའི་ནད་ལ་ལས་འདི་ནི། །འདྲེན་མར་བྱ་བ་བསྔགས་པ་ཡིན། །མེ་ལྟར་ཚ་བ་ལན་བརྒྱར་ནི། །བཀྲུས་པའི་མར་གསར་འབའ་ཞིག་ཕན། །མར་གྱི་ཉིང་ཁུ་བླུགས་པའམ། །ཤིང་མངར་བསྐོལ་བའི་ཆུ་གྲང་ངམ། །ཨུཏྤལ་པདྨ་ཁ་རའི་ཆུ། །འོ་མ་བུ་རམ་ཤིང་ཁུ་བླུགས། །བཏུང་བ་བསྐུ་དང་བླུགས་པ་དང༌། །ཏིག་ཏ་ཆེན་པོའི་སྨན་མར་ཕན། །རྨེན་
བུ་ཁྲག་མཁྲིས་སེལ་བ་ཡི། །གསོ་བ་ཅི་རིགས་ལེགས་བྱས་ལ། །རླུང་དང་བད་ཀན་འཇོམས་པར་བྱེད། །གླན་དང་དཀྲི་བ་ལ་སོགས་ཕན། །རྨེན་བུ་མེ་དབལ་གཟེར་བཅས་ལ། །ཏིལ་མར་རྩ་བ་བཅུ་དང་བསྐོལ། །བ་གཅིན་དྲོན་མོ་ཆུ་དྲོན་བླུགས། །ཡང་ན་ཤི་ཀྲུའི་ལྡེ་གུ་འམ། །ནག་ཏ་མ་ལའི་ཤུན་པའམ། །ལ་ཕུག་སྐམ་པོ་བ་རུ་རའི། །ལྡེ་གུ་དྲོ་འཇམ་བསྐུ་པ་ཕན། །དན་ད་ཤིང་ཚ་ཙི་ཏྲ་ཀ །ཨརྐ་སྣུ་ཧའི་འོ་མ་དང༌། །བུ་རམ་གོ་བྱེ་རུས་ནག་མཚུར། །ལྡེ་གུས་རྡོ་ཡང་འབིགས་བྱེད་ན། །བད་ཀན་ལས་གྱུར་རྨེན་བུའི་ནད། །ཕྱི་རོལ་གནས་པ་སྨོས་ཅི་དགོས། །ཡུན་རིང་གནས་པའི་རྨེན་བུ་ལ། །ལ་ཕུག་རྒྱ་སྲན་ཀུ་ལངྠའི། །ཁུ་བ་ཐལ་སྨན་སེ་འབྲུར་བཅས། །གྲོ་ཡི་ཟན་དང་ནས་ཀྱི་ཟན། །རྒུན་ཆང་སྦྲང་རྩི་བུ་རམ་ཆང༌། །ཁ་ར་ཆང་གི་དངས་མར་བཅས། །ཁ་ལུང་ཁུ་བར་བཅས་པ་དང༌། །འབྲས་བུ་གསུམ་གྱི་སྦྱོར་ལྡེ་གུ། །པི་པི་ལིང་དང་སྦྲང་རྩིར་བཅས། །ཐང་ཤིང་དང་ནི་སླེ་ཏྲེས་དང༌། །བྲག་ཞུན་གྱི་ནི་སྦྱོར་བ་དང༌། །གླ་སྒང་གོ་བྱེའི་སྦྱོར་བའམ། །སྦྲང་རྩི་ཡི་ནི་སྦྱོར་བ་དང༌། །མགོ་བཀྲུ་སྨན་དུད་རྔུབ་པ་དང༌། །སྔར་བཤད་སྐྲན་ནི་བཤིག་པ་དང༌། །ལྕགས་གསེར་ལན་ཚྭ་བསྲེགས་པ་དང༌། །རྡོ་བས་བཙིར་བར་བྱ་བ་ཡིན། །སྨན་འདི་ཡིས་ནི་འཇིག་པར་བྱེད། །སྦྱོར་བ་སྣ་ཚོགས་དེ་དག་ནི། །བྱས་ཀྱང་ཞི་བར་མ་གྱུར་ཅིང༌། །ཤིན་ཏུ་སྲ་བར་གནས་གྱུར་ལ། །ནད་སྟོབས་ཆེ་བར་གྱུར་པ་ནི། །དེ་འོག་འདི་ལ་ཐལ་སྨན་ནམ། །ལྡེ་གུ་འམ་གསེར་གྱིས་བསྲེགས་ན་ཕན། །སྨིན་པར་བྱེད་པ་བརྣགས་བྱས་ལ། །དབྲལ་ནས་དེ་ནས་དབྱུང་བར་བྱ། །འདི་ལ་ཁྲག་ནི་བརྣག་འདོད་པ། །ཡང་དང་ཡང་དུ་གདོན་པར་བྱ། །ཁྲག་བསལ་འོག་ཏུ་སླར་ཡང་ནི། །རླུང་དང་བད་ཀན་སེལ་སྨན་གཏང༌། །ཚ་ཞིང་སྨིན་པས་བརྣགས་གྱུར་ལ། །ཕྱི་ནང་རྨ་ལྟར་གསོ་བར་བྱ། །སྐྱེར་པ་སྲིན་སྨ་ན་ཀ་མ་བི་ལྱ། །བསྐོལ་བའི་ཏིལ་མར་རྨ་ལ་ཕན། །བད་ཀན་མཁྲིས་པ་ཤས་ཆེ་ལ། །དཱུར་བའི་
ཁུ་བ་མར་བསྐོལ་ཕན། །གསོ་བའི་ནད་ཀུན་ཕྱོགས་དང་སྟེང༌། །ཁྲག་བྱུང་བ་ནི་ཕྱོགས་གཅིག་ཡིན། །མེ་དབལ་དེ་ནི་ཁྲག་མཁྲིས་དང༌། །མ་འདྲེས་པ་ལས་བྱུང་མི་འགྱུར། །འདི་ཡི་རྟེན་ནི་ཁྲག་ཉིད་ཡིན། །དེ་བས་ཁྲག་ནི་མང་དུ་དབྲི། །ནད་གཞི་མང་པོ་མེ་དབལ་ལ། །བཀྲུ་སྨན་མ་གྱུར་མར་མི་སྦྱིན། །དེ་ཡིས་ནད་ནི་སྲ་གྱུར་པས། །པགས་པ་ཁྲག་དང་ཤ་འཚེད་བྱེད། །ཡན་ལག་བརྒྱད་པའི་སྙིང་པོ་བསྡུས་པ་ལས། །གསོ་བའི་གནས་ཀྱི་ལེའུ་བཅྭ་བརྒྱད་པའོ།། །།དེ་ནས་མཛེ་ནད་གསོ་བའི་ལེའུ་བཤད་པར་བྱའོ། །མཛེ་ནད་ཀུན་ལ་ཐོག་མ་ཉིད། །སྣུམ་བླུད་པས་ནི་གསོ་བར་བྱ། །དེ་ལ་རླུང་ཤས་ཆེ་བ་ལ། །རྩ་བ་བཅུ་པ་སླེ་ཏྲེས་དང༌། །ཤ་རང་ཀ་ཏ་ཨེ་རཎྜ། །མི་ཤ་སྲིང་གི་མར་རམ་ནི། །ཏིལ་མར་བསྐོལ་ཏེ་བླུད་པ་ཕན། །ནིམ་པ་པ་ཏོ་པུ་ཙེ་ཤེལ། །སྐྱེར་པ་ཕ་ཏ་བྱི་ཚེར་པ། །པར་པ་ཏ་དང་ཀྱི་ལྕེ་བ། །སྲང་རེ་ཆུ་བྲེ་བརྒྱད་ཀྱི་ནི། །ནང་བསྐོལ་བརྒྱད་ཆ་ལུས་པ་རུ། །གླ་སྒང་རྩ་མཁྲིས་ཀྱི་ལྕེ་བ། །དུག་མོ་ཉུང་དང་པི་པི་ལིང༌། །ཙནྡན་ཞོ་ནི་གཉིས་གཉིས་དང༌། །ཞུན་མར་སྲང་ནི་བཅུ་གཉིས་བསྐོལ་།ཏིག་ཏའི་སྨན་མར་དེ་འཐུངས་ན། །མཁྲིས་པ་མཛེ་དང་མེ་དབལ་དང༌། །འབྲུམ་ཕྲན་ལུས་ཚ་སྐོམ་དང་ཆེ། །མགོ་འཁོར་གཡན་པ་སྐྱ་རྦབ་འབྲས། །རྨ་འགྲམས་འབྲས་ཀྱི་ཕྲེང་བ་དང༌། །ཐོར་བུ་ཁོང་འབྲས་སྐྲན་དང་ནི། །ཟད་བྱེད་སྨྱོ་བྱེད་མྱོས་པ་དང༌། །སྙིང་ནད་རབ་རིབ་ངོ་ཁབས་དང༌། །ཤ་བཀྲ་མིག་སེར་ཕོ་བའི་ནད། །མཚན་པར་རྡོལ་དང་བརྗེད་བྱེད་དང༌། །དམུ་རྫིང་ཟླ་མཚན་མི་ཆོད་དང༌། །སྦྱར་དུག་གཞང་འབྲུམ་ཁྲག་མཁྲིས་སེལ། གཞན་ཡང་མཁྲིས་པ་ལས་གྱུར་ནད། །ཤིན་ཏུ་གསོ་དཀའ་རྣམས་ལ་ཕན། །ལོ་མ་བདུན་པ་པར་པ་ཏ། །དོང་ག་ཤུ་དག་པུ་ཙེ་ཤེལ་།ཤུག་པ་པ་ཏ་འབྲས་བུ་གསུམ། །སེར་པོ་གཉིས་དང་ཐལ་ཏྲེས་གཉིས། །ནིམ་པ་ཙནྡན་པི་པི་ལིང༌། །ཤིང་མངར་སླེ་ཏྲེས་བི་ཤ་ལ། །དུག་མོ་ཉུང་དང་པུ་ཤེལ་ཙེ། །རྩ་མཁྲིས་མུར་བ་བ་ཤ་ཀ །ཉེའུ་
ཤིད་པུ་ཤ་པ་ཏོ་ལ། །གླ་སྒང་བྱི་ཚེར་ཀྱི་ལྕེ་བ། །སྐྱུ་རུ་ར་ཁུ་ཉིས་འགྱུར་དང༌། །དེ་རྣམས་མར་གྱི་བརྒྱད་འགྱུར་ཆུ། །བསྐོལ་བ་ཏིག་ཏ་ཆེན་པོ་སྟེ། །ཡོན་ཏན་ཡང་ནི་སྔར་བས་ལྷག །བད་ཀན་ལས་གྱུར་ནིམ་པ་དང༌། །ལོ་མ་བདུན་པ་ཙི་ཏྲ་ཀ །རུ་རྟ་དོང་གྲ་ཚ་བ་གསུམ། །ས་ལ་པི་ལ་ཡའི་མར་བླུད། །ཀུན་ལ་གོ་བྱེའི་མར་རམ་ནི། །ཡུངས་ཀར་དཱུར་བ་རའི་མར་བླུད། །བྱི་དང་ག་དང་ཨ་རུ་ར། །གོ་བྱེའི་ལྡེ་གུ་མར་བསྐོལ་བླུད། །དོང་གའི་རྩ་བ་དག་དང་མར། །ལན་བརྒྱའི་བར་བསྐོལ་མར་ཡང་བླུད། །སེང་ལྡེང་བསྐོལ་བའི་ཆུ་བསྟེན་ན། །མཛེ་ནད་མྱུར་དུ་སེལ་བར་བྱེད། །འདི་དག་ཉིད་ཀྱིས་ཅི་རིགས་པར། །སྣུམ་ཆོས་བསྐུ་བ་བྱས་པའང་ཕན། །སྣུམ་གྱིས་ཞེན་ལ་མི་དབལ་ནི། །སྐབས་སུ་བཤད་པའི་སྨན་སྦྱར་གཏང༌། །དཔྲལ་བ་ལག་པ་རྐང་པ་ལས། །འདི་ལ་གཏར་གའང་གདབ་པར་བྱ། །མཛེ་ནད་ཚབས་ཆུང་ཞལ་ཞལ་གདབ། །རྭ་སོགས་ཀྱིས་ཀྱང་ཁྲག་དབྱུང་བྱ། །མཛེ་ནད་འཇོམས་པའི་སྣུམ་གྱིས་ནི། །འདི་ལ་བར་བར་བརྟ་བར་བྱ། །ཁྲག་ཕྱུང་བཀྲུ་སྨན་གྱིས་སྦྱང་བྱ། །ལྟོ་སྟོང་གྱུར་པ་མཛེ་ཅན་ལ། །ཅི་ནས་རླུང་གིས་འདི་ཡི་ནི། །ལུས་མི་འཇིག་པ་དེ་ལྟར་བྱ། །ནིམ་པ་སླེ་ཏྲེས་བ་ཤ་ཀ །འབྲས་བུ་གསུམ་དང་པ་ཏོ་ལ། །ཀཎྜ་ཀ་རི་ཀ་རཉྫ། །ལྡེ་གུ་ཆུ་དང་མར་བསྐོལ་བ། །སྨན་མར་རྡོ་རྗེ་ཅན་ཞེས་བྱ། །དེས་ནི་མེ་དཔལ་མིག་སེར་རིམས། །ཁྲག་ནད་ལུད་པ་མཛེ་ནད་འཇོམས། །འབྲས་བུ་གསུམ་དང་ཚ་བ་གསུམ། །དུར་བྱིད་ཀཎྜ་ཀ་རི་གཉིས། །དན་ད་དོང་ག་པུ་ཙེ་ཤེལ། །ཤུ་དག་བོང་ང་ཙི་ཏྲ་ཀ །པ་ཏར་བཅས་པ་ཞོ་གཉིས་གཉིས། །སྣུ་ཧའི་འོ་མ་སྲང་གཅིག་དང༌། །བྲེ་གང་མར་བསྐོལ་ལྟོ་སྲ་བའི། །སྣུམ་ཆོས་བཀྲུ་སྨན་དག་ཏུ་སྦྱར། །མཛེ་དང་ཤ་བཀྲ་མཛེར་པ་དང༌། །རྒྱུ་རླུགས་རྡེའུ་འགགས་སྐྲན་འཇོམས་བྱེད། འདི་ནི་རྡོ་རྗེ་ཆེན་པོར་བཤད། །དན་ད་བྲེ་བཞི་ཆུ་བྲེ་ནི། །བཅུ་དྲུག་བསྐོལ་ཏེ་དེ་མར་བསྐོལ། །ཀོ་ཤ་ཏ་ཀི་སྲང་གཅིག་
གདབ། །དེ་བླུད་སྟེང་འོག་སྦྱོང་བྱེད་ཡིན། །ཨ་བར་ད་ཀ་སྲང་བརྒྱད་ཅུ། །བྲེ་བཅུ་དྲུག་བསྐོལ་བརྒྱད་ཆ་ལུས། ཁུ་བ་དེ་ནི་དེའི་རྩ་བ། །མར་ནི་བྲེ་གང་བསྐོལ་བར་བྱ། །བླུད་ན་དེ་བཞིན་ཞག་གཅིག་གིས། །བར་དུ་ཆོད་དེ་ལེགས་ཞུ་ནས། །ཁྲེ་རྒོད་རང་སྐྱུར་བསྐོལ་བ་བླུད། །མཛེ་ནད་ཤ་བཀྲ་འབྲས་ཀྱི་ཕྲེང༌། །སེལ་ཞིང་བུ་མང་དྲན་འཛིན་འགྱུར། །ནཱི་ལི་ཏི་ཀའི་ཚིལ་སྦྲང་རྩི། །ཛཱ་ཏིའི་ཁུ་བ་མར་བཅས་པའམ། །སེང་ལྡེང་ཨ་ས་ནའི་ཆུར་བཅས། །དབང་པོ་བསྡམས་བརྟན་མཛེ་ནད་འཇོམས། །སཱ་ལུ་ནས་དང་གྲོ་དང་ནི། །ཅི་ཙེ་ཁྲེ་དང་མུངྒ་དང༌། །སྲན་ཆུང་དང་ནི་ཏུ་ཀ་རིའི། །ཚོད་མ་ཁ་བོ་སྐམ་སའི་ཤ་།འབྲས་བུ་གསུམ་དང་པ་ཏོ་ལ། །སེང་ལྡེང་ནིམ་པ་གོ་བྱེ་སྦྱར། །ཆང་ནི་སྨན་དང་སྦྱར་བའམ། །དར་བ་སོ་མ་ར་ཛར་བཅས། །བཟའ་དང་བཏུང་བ་མཛེ་ལ་ཕན། །སྐྱུར་ཚ་ལན་ཚྭ་ཅན་རྣམས་གནོད། །ཞོ་དང་འོ་མ་རླན་ཅན་ཤ་།བུ་རམ་མ་ཤ་ཏིལ་མར་སྤང༌། །པ་ཏོ་ལའི་རྩ་འབྲས་བུ་གསུམ། །བི་ཤ་ལ་ནི་རེ་རེ་ནི། །ཆ་གསུམ་གྱིས་དབྲི་ཞོ་ཕྱེད་གསུམ། །ཀྱི་ལྕེ་བ་དང་བུ་ཙེ་ཤེལ། །ཞོ་ཕྱེད་དོང་གྲ་བཞི་ཆར་བཅས། །དེ་ལྟར་སྲང་གཅིག་བརྡུངས་པ་དག །བསྐོལ་བའི་ཆུ་ནི་འཐུངས་གྱུར་ན། །ནད་ཀྱི་ཚེགས་ནི་སྦྱོང་བར་བྱེད། །སྨན་དེ་ཞུ་ནས་སྐམ་ས་ཡི། །རི་དྭགས་བྱ་ཡི་ཤ་ཁུ་དང༌། །འབྲས་རྙིང་ཆན་དང་སྦྱར་བ་བཟའ། །སྦྱོར་འདི་ཞག་དྲུག་བསྟེན་ན་ནི། །མཛེ་ནད་ཀུན་དང་སྐྲངས་པའི་ནད། །ཕོ་བའི་ནད་དང་གཅིན་སྲི་དང༌། །གཟུགས་འཁུམས་གསོ་དཀའི་ནད་རྣམས་དང༌། །སྙིང་ནད་ཆུ་སོར་གཟེར་རིམས་སེལ། །བྱི་དང་ག་ཡི་སྙིང་པོ་དང༌། ཨ་རུ་ར་དང་སྐྱུ་རུ་ར། །སྲང་རེ་དན་ད་སྲང་གསུམ་དང༌། །བུ་རམ་སྲང་ནི་བཅུ་གཉིས་དག །རི་ལུར་བྱས་འདི་བྱིན་གྱུར་ན། །མཛེ་དང་ཤ་བཀྲ་དབུགས་མི་བདེ། །ལུད་པ་དམུ་རྫིང་གཞང་འབྲུམ་དང༌། །གཅིན་ནད་མཆེར་པ་རྨེན་བུའི་ནད། །ཐོར་བུ་སྲིན་ནད་སྐྲན་རྣམས་འཇོམས། །གྲུབ་པའི་སྦྱོར་འདི་གནོད་སྦྱིན་ནི། །ནོར་བུ་བཟང་པོས་དགེ་སླང་ཞིག །སྲོག་འདོར་ཉིད་ལ་བཤད་ཅེས་གྲགས། །
ཏིག་ཏ་ནིམ་པ་འབྲས་བུ་གསུམ། །ཤུག་པ་བོང་ང་པི་པི་ལིང༌། །མུར་བ་དང་ནི་པ་ཏོ་ལ། །སེར་པོ་རྣམ་གཉིས་པུ་ཙེ་ཤེལ། །ཤུ་དག་ཨིནྡྲ་བ་རུ་ནི། །དུག་མོ་ཉུང་བཅས་ཆ་མཉམ་པ། །དན་ད་དུར་བྱིད་བྲམ་ཤ་མི། །ཕྱི་མ་བཞིན་དུ་ཉིས་འགྱུར་བཅས། །ཕྱེ་མ་སྦྲང་རྩི་མར་སྦྱར་ཟོས། །མཛེ་དང་ཟ་གུ་ཚོར་བ་ཆུང༌། །སེལ་བའི་སྨན་གྱི་མཆོག་ཡིན་ནོ། །འབྲས་བུ་གསུམ་དང་པི་པི་ལིང༌། །བྱི་དང་ག་དང་སྦྲང་རྩི་ནི། །ཏིལ་མར་མར་སྦྱར་ལྡེ་གུའམ། །ཀ་ཀ་ཨུ་དུམ་བཱ་ར་དང༌། །ནིམ་པ་གླ་སྒང་བྱི་དང་ག །ཚ་བ་གསུམ་གྱི་ལྡེ་གུ་ནི། །དུག་མོ་ཉུང་གི་ཁུ་བར་བཅས། །བླུད་ན་ལྤགས་ནད་ཐམས་ཅད་འཇོམས། །དུག་མོ་ཉུང་དང་ཙི་ཏྲ་ཀ །ནིམ་པ་ཐང་ཤིང་སེང་ལྡེང་དང༌། །ལོ་མ་བདུན་པ་ཨ་ས་ན། །ཁུ་བསྐོལ་མར་དང་ཨ་རུ་ར། །སྦྲང་རྩི་ལྡན་ཟོས་མཛེ་ནད་འཇོམས། །སེང་ལྡེང་ནིམ་པ་སླེ་ཏྲེས་དང༌། །པ་ཏོ་ལ་དང་བྱི་ཚེར་བསྐོལ། །སེང་ལྡེང་ལ་སོགས་ལྔ་པ་སྟེ། །ཁྱབ་འཇུག་གིས་ནི་ལྷ་མིན་བཞིན། །མཛེ་ནད་འཕྲལ་དུ་འཇོམས་པར་བྱེད། །སྐྱེར་པ་ནིམ་པ་སེང་ལྡེང་གི །ཤུན་ལྤགས་བསྐོལ་བས་མཛེ་ནད་སེལ། །སྐྱེར་པ་ནིམ་པ་འབྲས་བུ་གསུམ། །པ་ཏོལ་རྩ་བུ་ཙེ་ཤེལ། །ཤུ་དག་བཙོད་ནི་བསྐོལ་བ་ཡིས། །དམ་ཆོས་ལ་བརྟེན་འཁོར་བ་ལྟར། །ཁྲག་མཁྲིས་ལས་གྱུར་མཛེ་ནད་གཅོད། །སྨན་འདི་ཉིད་དང་བ་ཡི་མར། །བསྐོལ་བས་རླུང་གྱུར་མཛེ་ནད་རྣམས། །མཆོག་ཏུ་སེལ་བར་བྱེད་པ་ཡིན། །སེང་ལྡེང་ནིམ་པ་སྐྱེར་པ་དང༌། །སླེ་ཏྲེས་ཐང་ཤིང་སྣ་རེར་བསྐོལ། །པ་ཐ་སྐྱེར་པ་ཙི་ཏྲ་ཀ །ད་ན་ད་དུག་ཉུང་པུ་ཙེ་ཤེལ། །བ་གཅིན་ཡང་ན་ཆུ་དྲོན་བཅས། །ཟླ་བ་གཅིག་བླུད་མཛེ་ནང་དང༌། །གཞང་འབྲུམ་ཟ་ཁུ་སྐྲང་ནད་དང། །སྐྱ་རྦབ་མ་ཞུ་སིན་ནད་འཇོམས། །རྒྱ་སྐྱེགས་དན་ཏི་འབྲས་བུ་གསུམ། །མུར་བ་པ་ཏྲ་ཙི་ཏྲ་ཀ །ཨ་པ་མརྒ་བྱི་དང་ག །ལོ་མ་བདུན་པ་ཚ་བ་གསུམ། །བཙོད་དང་སྐྱེར་པ་མ་ཤ་ཀ །ནིམ་པ་ཐང་ཤིང་རྩ་བ་ལྔ། །གཉིས་པོ་ཕྱེ་མ་བ་གཅིན་སྦྱར། །ཟླ་བ་
གཅིག་འཐུངས་ཕན་ཟས་བཟའ། །མཛེ་ཡི་ནད་ཀུན་འཇོམས་པར་བྱེད། སྐྱེར་པ་པི་པི་ལིང་དོང་གྲ། །བྱི་དང་ག་དང་བ་ཏོ་རི། ཙི་ཏྲ་ཀ་དང་བྱ་རྣམས། །གོ་རིམས་བཞིན་དུ་ཆ་རེས་བསྐྱེད། །བ་གཅིན་སྦྱར་བའམ་རི་ལུ་ནི། །བྱིན་ན་མི་བཟད་མཛེ་ཡང་འཇོམས། །ཚ་བ་གསུམ་དང་འབྲས་བུ་གསུམ། །ཏིལ་དང་གོ་བྱེའི་ཕྱེ་མ་ནི། །མར་དང་སྦྲང་རྩི་ཁ་རར་སྦྱར། །རི་ལུ་བྱས་པ་ཆ་བདུན་པས། །མཛེ་ཡི་ནད་རྣམས་འཇོམས་བྱེད་ཅིང༌། །བཅུད་ཀྱིས་ལེན་དང་རོ་ཙར་འགྱུར། །སོ་མ་ར་ཛ་ཙི་ཏྲ་ཀ །སྐྱེར་པ་དུ་བ་རའི་རུས་པ། །གོ་བྱེ་སྲིན་སྨན་འབྲས་བུ་གསུམ། །བསྟེན་ན་མཛེ་ནད་མ་ལུས་འཇོམས། །སོ་མ་ར་ཛ་བྱི་དང་ག །གོ་བྱེ་ཙི་ཏྲ་བ་ར་ཧི། །ཨ་རུ་ར་དང་ལང་ག་ལི། །ཏིལ་ནག་པོ་དང་པི་པི་ལིང༌། །བུ་རམ་དང་ནི་རི་ལུར་བྱ། །མཛེ་ཡི་ནད་རྣམས་འཇོམས་པར་བྱེད། །སོ་མ་ར་ཛ་པི་པི་ལིང། །དེ་ཡི་རྩ་བ་བྱི་དང་གའི། །སྙིང་པོ་ལྕགས་རྐྱག་སྐྱུ་རུ་ར། ཏིལ་མར་ལྡེ་གུ་མཛེ་ནད་འཇོམས། །ཨ་རུ་ར་དང་གོ་བྱ་ཏིལ། །བུ་རམ་རི་ལུས་མཛེ་ནད་འཇོམས། །སོ་མ་ར་ཛ་བྱི་དང་ག་བུ་རམ་རི་ལུ་བྱས་པའང་ཕན། །སེང་ལྡེང་བྲག་ཞུན་བྱི་དང་ག །སྦྲང་རྩི་མར་དང་ལྡན་ཟ་ཞིང༌། །ཕན་དང་རན་པར་ཟོས་ན་ནི། །འབྲུམ་ཕྲན་ཤ་བཀྲ་ཤུ་བ་འཇོམས། །ཁ་ར་ལྕགས་ཕྱེ་བྱི་དང་ག །ཙི་ཏྲ་ཀ་དང་སྐྱུ་རུ་ར། །པི་པི་ལིང་གི་ལྡེ་གུ་ཡིས། །མཛེ་ནད་ཤིན་ཏུ་གསོ་དཀའ་འཇོམས། །གླ་སྒང་ཚ་གསུམ་འབྲས་བུ་གསུམ། །རྩ་བ་ལྔ་གཉིས་ཐང་ཤིང་བཙོད། །ནིམ་པ་ཤིང་ཚ་ལོ་མ་བདུན། །ཤིང་ཆ་ཙི་ཏྲ་ཀ་དང་ནི། །མུར་བ་བི་ཤ་ལིའི་ཕྱེ་མ། ནས་ཕྱེ་དགུ་ཆ་སྦྲང་རྩི་ནི། །ཆ་གཅིག་སྦྱར་བ་འདི་རྟག་ཏུ། །འཐུངས་ན་མཛེ་ནད་འཇོམས་བྱེད་ཅིང༌། །འོར་ནད་སྐྱ་རྦབ་ཤ་བཀྲ་ཅན། །ཕོ་ནད་གཞང་འབྲུམ་རྒྱུ་རླུགས་དང༌། །མཚན་བར་རྡོལ་དང་འབྲུམ་ཕྲན་དང༌། །གཡན་པ་ཤུ་བའི་ནད་རྣམས་འཇོམས། །ཏུ་པ་ར་ཡི་རུས་པའམ། །ག་བྱ་སོ་མ་ར་ཛ་དང༌། །ཙི་ཏྲ་ཀའི་རྩ་བྲག་ཞུན་རྣམས། བཅུད་ལེན་ཆོ་ག་ལྟར་བསྟན་ཕན། །ད་ལྟར་ནད་བསལ་ནང་གི་ནི། །ནད་
སྦྱངས་ནད་ནི་ཕྱི་རོལ་གྱི། །པགས་པར་གནས་ན་སྨན་བླུགས་ཕན། །ནད་ཀྱི་དྲི་མ་མ་དག་པ། །སྨན་རྣོན་བྱུགས་ན་མཛེ་ནད་ནི། །བསླངས་པས་སླར་ནི་འཕེལ་བར་འགྱུར། །གཏིང་ཟུག་སྲ་ཞིང་ཀོར་ཀོར་པོའི། །མཛེ་ལ་དུགས་བྱ་སྙི་བ་དང༌། །འབུར་བར་གྱུར་ནས་མཚོན་གྱིས་ནི། །ཞལ་ཞལ་བཏབ་ཅིང་བྱུག་པར་བྱ། །གང་ཞིག་པགས་པ་ཀུན་ཉམས་ཤིང༌། །མཚོན་གྱིས་བཏབ་ཏུ་མི་རུང་བ། །དེ་ལ་ཁྲག་ནི་ཕྱུང་ནས་སུ། །ཐལ་སྨན་རྣོན་པོ་བསྐུ་བར་བྱ། །མཛེ་ནད་རབ་སྲ་རྩུབ་པ་དང༌། །ཚོར་བ་མེད་བརྟན་ཡུན་རིང་ལོན། །སྔགས་བཅས་དུག་ཁུ་བླུད་པར་བྱ། །དུག་གི་སྨན་ནི་རྗེས་སུ་སྦྱར། །མཛེ་ནང་རེངས་ཞིང་ཚོར་བ་མེད། རྡུལ་མི་འབྱུང་ཞིང་གཡའ་བ་ལ། །ལྕི་སྐམ་རྒྱ་མཚོའི་ལྦུ་བའམ། །མཚོན་གྱིས་བཞར་ལ་ལྡེ་གུ་བྱུག །གླ་སྒང་དོང་གྲ་འབྲས་བུ་གསུམ། །པོ་སོན་ཆ་དང་ཀ་རཉྫ། །ལོ་མ་བདུན་པ་དུག་མོ་ཉུང༌། །རུ་རྟ་སྐྱེར་པ་པྲི་ཡང་ཀུ། །ཉུངས་ཀར་སྦྱོར་བས་ལུས་བཀྲུ་ཞིང༌། །ལྡེ་གུས་སློན་སྨན་བཀྲུ་སྨན་དང༌། །བཞར་ཞིང་ལུས་ནི་བསྐུས་གྱུར་ན། །པགས་པའི་ནད་དང་མཛེ་ནད་དང༌། །སྐྲང་དང་སྐྱ་རྦབ་མཛེ་ནད་འཇོམས། །ཀ་ར་བཱི་ར་ནིམ་པ་དང༌། །དུག་མོ་ཉུང་དང་དོང་གྲ་དང༌། །ཙི་ཏ་ཀའི་རྩ་བ་གཅིན་བསྐོལ། །བསྐུས་ན་མཛེ་ནད་འཇོམས་པར་བྱེད། །ཀ་ར་བཱི་ར་ཀར་རྩ་བ། །དུག་མོ་ཉུང་དང་ཀ་རཉྫའི། །འབྲས་བུ་སྐྱེར་པའི་ཤུན་ལྤགས་ནི། །སོ་མན་ཡི་མྱུ་གུ་བཅས། །བསྐུས་ན་མཛེ་འཇོམས་གྲུབ་པ་ཡིན། །ཤྲི་ཤའི་ཤུན་ལྤགས་རས་བལ་གྱི། །མེ་ཏོག་དོང་གའི་ལོ་མ་དང༌། །མོན་སྣེའུ་དམེ་རུ་བཞི་པོ་ནི། བཏགས་པའི་ལྡེ་གུས་མཛེ་ནད་འཇོམས། །ནིམ་པ་སེར་པོ་རྣམ་གཉིས་དང༌། །བྱེའུ་རུག་པ་དང་པ་ཏོ་ལ། །རུ་རྟ་ཨ་ཤྭ་གནྡྷ་དང༌། །ཐང་ཤིང་ཤི་ཀྲུ་ཉུངས་ཀར་དང༌། །གཡེར་མ་འུ་སུ་གླ་བ་དང༌། ཙ་རོང་ཆ་མཉམ་ཕྱེ་མར་བྱས། །དར་བར་སྦྱར་བའི་ཏིལ་མར་གྱིས། །བསྐུས་པའམ་ལུས་བྱུགས་དྲིལ་གྱུར་ན། །མཛེ་ནད་གཡན་པ་ཟླུམ་པོར་བཅས། །འབྲུམ་ཕྲན་སྐྲངས་
པའི་ནད་རྣམས་སེལ། །གླ་སྒང་དངུལ་རྡོ་དང་ནི་སྐྱེར་པ་དང༌། །ནག་ཚུར་ཀམ་བི་ལྱ་དང་རུ་རྟ་དང༌། །སེང་ཕྲོམ་མུ་ཟི་པོག་དཀར་བྱི་དང་ག །ལྡེང་རོས་བ་བླ་ཀ་ར་བཱི་རའི་ཤུན། །ཕྱེ་མར་བྱས་པའི་ཏིལ་མར་གྱིས་བསྐུས་པའི། །སྟེང་དུ་ཕྱེ་མའི་དོན་དུ་འདི་བླུགས་ན། །ཤུ་བ་གཡན་པ་འབྲུམ་བུ་ཕྲ་མོ་དང༌། །རྐང་ཤུ་ལ་སོགས་འབྱུང་བར་མི་འགྱུར་རོ། །ཡུངས་ཀར་སྣུ་ཧའི་ཤིང་དུམ་བཏགས། །ལྡེ་གུ་མེ་མ་མུར་བཙོས་ཏེ། །འདོད་ཆགས་ཤུགས་ཀྱིས་ངོ་ཚ་བཞིན། །བསྐུས་ན་གླང་ཤུ་འཇིག་པར་བྱེད། །ལྡོང་རོས་བ་བླ་ན་ལེ་ཤམ་ཏིལ་མར། །ཨརྒའི་ལོ་མའི་ལྡེ་གུས་མཛེ་འཇོམས་བྱེད། །དེ་བཞིན་ཅི་ཏྲ་མརད་ཀ་རཉྫ། །རུ་རྟ་སྦྱར་བ་བ་གཅིན་བཏགས་པའང་ཕན། །གུ་གུལ་ཡུངས་ཀར་ན་ལེ་ཤམ། །ནག་ཚུར་དང་ནི་བྱི་དང་ག །ཤྲི་བེ་ཤ་ག་སྲ་རྩི་པོག །བ་བླ་ལྡོང་རོས་མུ་ཟི་དང༌། །རུ་རྟ་དང་ནི་ཀམ་བི་ལྱ། །སེར་པོ་གཉིས་དང་བཅས་པ་ནི། །འཁོར་ལོས་བཙིར་བའི་ཏིལ་མར་བསྲེས། །འདི་ནི་མཚོན་གྱིས་བཞར་ཏེ་བསྐུས། །ཉི་མར་བསྲེགས་ན་མཛེ་ནད་སེལ། །ཏ་ལའི་ལོ་མ་ན་ལེ་ཤམ། །རུ་རྟ་ལྡོང་རོས་ནག་ཚུར་བཅས། །ཟངས་ཀྱི་སྣོད་དང་ཏིལ་མར་དང༌། །ཞག་བདུན་ལེགས་པར་སྤངས་པ་དེས། །ཞག་བདུན་བསྐུ་ཞིང་ཉི་མར་བསྲེག །ཤ་བཀྲ་འཇོམས་པར་བྱེད་པ་ཡིན། །ཤ་བཀྲ་སར་པ་ཟླ་བ་གཅིག །བསྟེན་ཞིང་སྦྱང་བ་བྱས་ན་སེལ། །ཨ་པ་མརྒའི་ཐལ་བའི་ཆུ། །ལན་བདུན་ལེགས་པར་གཟགས་པ་རུ། །པྲི་ཡང་ཀུ་ཡི་མར་བསྐོལ་བས། །བསྐུས་ན་ཤ་བཀྲ་སེལ་བར་བྱེད། །ཀ་ཀ་ཇང་གི་རྩ་བ་དང༌། །རས་བལ་ས་བོན་འདབ་མ་དང༌། །ལ་ཕུག་ས་བོན་དར་བར་སྦྱར། །མིག་དམར་གཟའ་ལ་བསྐུས་ན་ནི། །ཤ་བཀྲ་སེལ་བ་གྲུབ་པ་ཡིན། །ཛི་བན་ཏི་དང་སྐྱེར་པ་བཙོད། །ཀམ་བི་ལྱ་དང་སྤངས་མ་ནི། །འོ་མ་མར་དང་ཏིལ་མར་བསྐོལ། །སྲ་རྩི་བོག་དང་སྦྲ་ཚིལ་ནི། །བཏབ་པ་བསྐུས་ན་དེ་ཡིས་ནི། །རྐང་ལག་ཞིག་པ་སེལ་བར་བྱེད། །པགས་པ་གཅིག་པའི་མཛེ་དང་ནི། །འབྲུམ་ཕྲན་འབྲས་ནི་བེར་པ་
ཡི། །མཛེ་ནད་འཇིག་པར་བྱེད་པ་ཡིན། །ལོ་མ་བདུན་པ་རྩ་བ་དང༌། །ཤི་རི་ཤ་ཡི་ཤུན་ལྤགས་དང༌། །ཀ་ར་བཱི་ར་ཨརྐ་དང༌། །སུ་མ་ན་དང་ཙི་ཏྲ་ཀ་ཐལ་ཏྲེས་ནིམ་པའི་ཤུན་ལྤགས་དང༌། །ཀརྙྫ་དང་ཡུངས་ཀར་དང༌། །ཙི་ཏྲ་མར་དང་འབྲས་བུ་གསུམ། །བྱི་དང་ག་དང་ཚ་བ་གསུམ། །སེར་པོ་གཉིས་དང་ཏིལ་མར་དང༌། །བ་གཅིན་བཅས་པར་བསྐོལ་པས་ནི། །པགས་པའི་ནད་དང་རྨ་འགྲམས་དང༌། །རླུང་དང་བད་ཀན་ལས་གྱུར་བའི། །མཛེ་ཡི་ནད་ནི་སེལ་བྱེད་དེ། །འདི་ནི་རྡོ་རྗེ་དང་འདྲ་བས། །རྡོ་རྗེ་ཅན་ཞེས་བྱ་བ་ཡིན། །ཨེ་རཎྜ་དང་དངུལ་རྡོ་དང༌། །གླ་སྒང་ནིམ་པ་ཀ་དང་ནི། །ག་བྲའི་རྩ་བ་ཀམ་བི་ལྱ། །བྱི་དང་ག་དང་ནིར་གུན་ཐི། །གོ་བྱེ་ཨིནྡྲ་བ་རུ་ནི། །ཐང་ཤིང་ཁྲོན་བུ་གུ་གུལ་དང༌། །ལྡོང་རོས་ཤྲི་ཤ་པི་ཏི་དང༌། །ལན་ཚྭ་ཏང་པ་ལ་བཅའ་སྒ་རྣམས། །ཆ་མཉམ་སྣུ་ཧའི་འོ་མ་དང༌། ཨརྒའི་ཏིལ་མར་ལན་ཅིག་བསྐོལ། །ལྡེ་གུ་རྡོ་རྗེ་ཆེན་པོ་སྟེ། །རྡོ་རྗེ་ཅན་པས་ཡོན་ཏན་ལྷག །ཤ་བཀྲ་དང་ནི་གཞང་འབྲུམ་དང༌། །འབྲས་ཀྱི་ཕྲེང་བ་འཇོམས་པར་བྱེད། །རུ་རྟ་ཀ་ར་བཱི་ར་དང༌། །བྲིང་གར་ཛ་ཨརྒ་དང༌། །ཤུ་དག་ཤིང་མངར་རྒྱམ་ཚ་གཅིན། །ཏིལ་མར་བསྐོལ་བ་དུག་བཅུག་པ། བསྐུས་པས་མཛེ་ནད་སེལ་བའི་མཆོག །སྤྲ་ཚིལ་ལི་ཁྲི་གུ་གུལ་དང༌། །སྤངས་མ་དངུལ་རྡོ་ཡུངས་མར་བསྐོལ། །གཡན་པ་གླང་ཤུ་མྱུར་དུ་སེལ། །རྒྱ་སྐྱེགས་ཙི་ཏྲ་མར་ད་དང༌། །ཤྲི་པི་ཏ་དང་ཚ་བ་གསུམ། །རུ་རྟ་ཡུངས་ཀར་ལ་ཕུག་གི །ས་བོན་སེར་པོ་རྣམ་གཉིས་ཀྱི། །ལྡེ་གུ་དར་བར་སྦྱར་བསྐུས་ན། །ཤུ་བ་ཐམས་ཅད་སེལ་བར་བྱེད། །ཙི་ཏྲ་ཀ་དང་ཤི་ཀྲུའམ། །སླེ་ཏྲེས་ཐང་ཤིང་ཨ་པ་མར། །སེང་ལྡང་དྷ་བའི་ལྡེ་གུའམ། །དུར་བྱིད་དན་ད་པྲ་བན་ཏི། །རྒྱ་སྐྱེགས་དངུལ་རྡོ་སུག་སྨེལ་ལམ། །པུརྞ་རྣ་བའི་ལྡེ་གུ་སྟེ། །ཚིག་རྐང་དྲུག་བཤད་ལྡེ་གུ་དྲུག །ཞོ་ག་ཆུ་དང་སྦྱར་བ་ཡིས། །བསྐུས་ན་བད་ཀན་རླུང་ལས་ནི། །གྱུར་པའི་མཛེ་ནད་སེལ་བར་བྱེད། །བ་ལི་ཀ་དང་མ་ནུ་དང༌། །ཨ་ཀར་ནཱ་ག་གེ་སར་དང༌། །
གནྟྲ་བྷ་དྲ་གླ་བ་དང༌། །ཙནྡན་དང་ནི་པུ་ཤེལ་ཙེ། །ཆ་རེས་བསྐྱེད་པའི་ལྡེ་གུ་ཡིས། །བད་མཁྲིས་མཛེ་ནད་སེལ་བར་འགྱུར། །ཏིག་ཏའི་སྨན་མར་བརྒྱ་བཀྲུས་མར། །བསྐུས་ན་མཛེ་ཡི་ཆ་བ་སེལ། །ཏིལ་མར་ཙནྡན་ཤིང་མངར་དང༌། །སྟག་ཚེར་བ་དང་ཨུཏྤལ། བཅས་པར་བསྐུས་ནའང་ཕན་པ་ཡིན། །རྣགས་ཤིང་ཡན་ལག་འདྲུལ་བ་དང༌། །ལུས་ཚ་འབྲུམ་བུ་ཕྲ་མོ་འབྱུང༌། །པགས་པ་མྱགས་དང་བཅས་པ་ལ། །བསིལ་བའི་སྨན་ཆུས་བླུགས་ཤིང་བྱུག །གཏར་ག་བཀྲུ་སྨན་བཏང་བ་དང༌། །ཏིག་ཏའི་སྨན་མར་བྱིན་ན་ཕན། །སེང་ལྡེང་ནིམ་པ་བ་ཤ་ཀ །དུག་མོ་ཉུང་དང་འབྲས་བུ་གསུམ། །བྱི་དང་ག་དང་སླེ་ཏྲེས་དང༌། །པ་ཏོ་ལ་དང་བ་གཅིན་སྦྱར། །ཕྱི་དང་ནང་ནས་བཏང་གྱུར་ན། །སྲིན་པུ་ལས་གྱུར་མཇེ་ནད་འཇོམས། །རླུང་ཤས་ཆེ་ལ་ཐོག་མར་ནི། །མར་བཏང་བད་ཀན་ཤས་ཆེ་ལ། །སྐྱུག་སྨན་མཁྲིས་པ་ལས་གྱུར་ན། །གཏར་ག་བཏབ་ཅིང་བཀྲུ་སྨན་གཏང༌། །ནང་སྦྱངས་ཁྲག་ནི་བྱུང་བ་དང༌། །གནས་ནི་དག་པར་གྱུར་པ་ལ། །བསྐུ་བ་གང་ཞིག་བྱས་གྱུར་པ། །དེ་ནི་མོད་ལ་མེད་པར་འགྱུར། །ནད་གཞི་བསལ་ཞིང་ཁྲག་ནི་ཕྱུང་བ་དང༌། །ཕྱི་དང་ནང་ནས་ཞི་བའི་གསོ་བ་བྱ། །སྨན་མར་དང་ནི་དུས་སུ་བྱིན་གྱུར་ན། །མཛེ་ཡི་ནད་ནི་གསོ་སླ་ཉིད་དུ་འགྱུར། །མཛེ་ཅན་ནད་ནི་ལམ་མང་སྦྱངས་གྱུར་པ། །དེ་ཡི་སྲོག་སྲུབ་ལན་མང་འབད་བྱས་ཏེ། །ནད་ནི་ལྷག་པར་ཕྱུང་བས་ཉམ་ཆུང་བས། །རླུང་ལྡང་མྱུར་དུ་གསོད་པར་བྱེད་པར་འགྱུར། །ཟླ་བ་ཕྱེད་ཅིང་སྐྱུག་སྨན་གཏང་བ་དང༌། །ཟླ་བ་རེ་རེ་ནས་ནི་བཀྲུ་སྨན་གཏང༌། །མགོ་བོ་སྦྱང་བ་ཞག་ནི་གསུམ་གསུམ་ནས། །ཟླ་བ་དྲུག་དྲུག་ནས་ནི་གཏར་ག་བྱ། །གང་ཞིག་སློན་དང་འཁྲུ་བར་དཀའ་འགྱུར་ཞིང༌། །མཛེ་ཅན་ནད་ཤས་ཆེ་བས་ཁྱབ་གྱུར་པ། །དེ་ནི་ངེས་པར་གསོ་དཀའ་ཉིད་གྱུར་པས། །དེ་བས་ནད་ནི་མ་ལུས་དབྱུང་བར་བྱ། །ཡན་ལག་བརྒྱད་པའི་སྙིང་པོ་བསྡུས་པ་ལས། །གསོ་བའི་གནས་ཀྱི་ལེའུ་བཅུ་དགུ་པའོ།། །།དེ་ནས་ཤ་བཀྲ་དང་སྲིན་བུའི་ནད་
གསོ་བའི་ལེའུ་བཤད་པར་བྱའོ། །གང་ཞིག་མཛེ་ནད་པས་ཀྱང་འཇིགས་འགྱུར་ཞིང༌། །མྱུར་དུ་གསོ་དཀའ་ཉིད་དུ་འགྱུར་བས་ན། །ཁང་པ་འབར་བར་གྱུར་པ་ལྟ་བུར་ནི། །ཤ་བཀྲའི་ནད་ཞི་བ་ལ་འབད་པར་བྱ། །ཁྱད་པར་དུ་ནི་དང་པོར་ལུས་ལ་ནི། །སྦྱང་བར་བྱ་བ་ཉེ་བར་སྦྱར་བར་བྱ། །ཤ་བཀྲ་ལ་ནི་སོ་མ་ར་ཛའི་ཁུ། །བུ་རམ་ཆང་ངམ་ཤ་ཁུ་བཀྲུ་སྨན་ནི། །སྣུ་ཧའི་འོ་མར་སྦྱར་བ་བླུད་པར་བྱ། །དེ་འཐུངས་ནས་ནི་ལུས་བསྐུས་ཉམས་སྟོབས་དག །ཅི་ཡོད་པ་ལས་ཉིན་མཚན་བསྟེན་པར་བྱ། །སྐོམ་དང་སྐྱེས་ན་ཞག་གསུམ་ཐུག་པ་བླུད། །ཤ་བཀྲའི་ལུས་ལ་ཆུ་བུར་བྱུང་གྱུར་ན། །དེ་ནི་ཚེར་མ་དག་གིས་བརྟོལ་བར་བྱ། །ཆུ་བུར་གཟགས་པར་བྱས་ནས་ནང་རེ་བཞིན། །སོ་མ་ར་ཛ་དང་ནི་ཨ་ས་ན། །པྲི་ཡང་ཀུ་དང་ཤུ་ཏི་ཆུར་བསྐོལ་བླུད། །རྒྱ་སྐྱེགས་ཤིང་ཐལ་བུར་མ་ཕྲན་སྦྱར་བའི། །ཆུ་ནི་ཉམས་སྟོབས་ཅི་ཡོད་པ་ལ་བླུད། །ཕལ་གུ་སྐྱུ་རུ་ར་ཤུན་དུ་ག་ཉུང་ཤིང༌། །ཁུ་བ་སོ་མ་ར་ཛར་བཅས་པ་བླུད། །དྲོ་བར་འདུག་ནས་ཆུ་བུར་བྱུང་བ་ལ། །ལན་ཚྭ་མེད་ཟས་དར་བར་བཅས་པ་སྦྱིན། །བ་གཅིན་ཙི་ཏྲ་ཀ་དང་ཚ་བ་གསུམ། །སྦྲང་རྩིར་སྦྱར་བ་མར་གྱི་སྣོད་དུ་གཞག །ཟླ་ཕྱེད་ལོན་ནས་ཤ་བཀྲ་ཅན་ལ་བླུད། །འདི་ལ་མཛེ་ནད་གསོ་བའི་ཆོ་ག་བྱ། །ཡང་ན་བྲིང་ག་ར་ཛ་ལྕགས་སྣོད་བཅུག །ཏིལ་མར་ནང་དུ་བརྔོས་པ་སྦྱིན་བྱ་ཞིང༌། །ཨ་ས་ན་ཡི་ས་བོན་འོ་མར་བསྐོལ། །དེ་རྗེས་བླུད་ན་ཤ་བཀྲ་འཇོམས་པར་བྱེད། །དོང་ག་ཨརྒ་པུ་ཏི་ཀ་རཉྫ། །སྣུ་ཧ་ཛཱ་ཏིའི་ལོ་མ་བ་གཅིན་བཏགས། །ལྡེ་གུས་བསྐུས་ན་ཤ་བཀྲ་གཞང་འབྲུམ་དང༌། ཤུ་བ་གཡན་པ་རྨ་འགྲམས་སེལ་བར་བྱེད། །གླང་ཆེན་གཟིག་གི་ལྤགས་བསྲེགས་ཏིལ་མར་དང༌། །སྦྱར་བ་བསྐུས་ན་ཤ་བཀྲ་སེལ་མཆོག་ཡིན། །སྦུར་བ་དྲི་ངན་དོང་གའི་འོ་མ་དང༌། །སྦྱར་ཏེ་བསྐུས་པ་གཅིག་པུས་ཤ་བཀྲ་སེལ། །ཆུ་བུར་བསྐྱེད་ཕྱིར་གོ་བྱེ་ཆ་མ་ཆོམ་བརྡུངས། །ནུབ་མོ་བ་གཅིན་ལ་སྤངས་ཉིན་གྲིབ་བསྐམ། །དེ་ལྟར་ལན་གསུམ་བྱས་ཏེ་ཞིབ་ཏུ་བཏགས། །སྣུ་ཧའི་འོ་མར་སྦྱར་བསྐུས་ཤ་བཀྲ་འཇོམས། །
སྦྲུལ་ནག་བསྲེགས་པ་ལས་བྱུང་སྣག་ཚ་ནི། །བ་རུ་ར་ཡི་མར་དང་སྦྱར་ཏེ་བསྐུ། །དེ་བཞིན་རྨ་བྱའི་མཁྲིས་པ་བསྲེགས་པའམ། །བ་ལི་ཀ་བསྲེགས་རྨ་བྱའི་མཁྲིས་བསྲེགས་ཕན། །སོ་མ་ར་ཛའི་ས་བོན་ཕྲུལ་གང་དང༌། །བ་བླ་ཆ་བཞི་དག་ནི་བསྲེས་ནས་སུ། །བ་ཡི་གཅིན་དང་སྦྱར་ཏེ་བཏགས་བསྐུས་ན། །ཤ་བཀྲ་ལྤགས་མདོག་འདྲ་བར་བྱེད་པའི་མཆོག །གླང་ཆེན་རྟུག་པ་ལེགས་བསྲེས་ཐལ་བ་ནི། །གླང་ཆེན་གཅིན་དང་བསྲེས་ཏེ་གཟགས་གྱུར་པ། །བྲེ་བཅུ་དྲུག་ཚད་སོ་མར་ཛ་ཡི། །ས་བོན་བཅུ་ཆས་བཏབ་བསྐོལ་སྦྱིན་བག་གྱུར། །མང་དུ་བདར་བ་དེ་ཡིས་བསྐུས་ན་ནི། །ཤ་བཀྲའི་ནད་ནི་རྣམ་པར་འཇོམས་འགྱུར་ཞིང༌། །མཛེ་ཡི་ནད་དང་སྨེ་བ་ནག་པོ་འམ། །ཤ་ལྷག་སྐྱེས་པའི་རྨ་ནི་སྦྱོང་བར་བྱེད། །གོ་བྱེ་ཅི་ཏྲ་ཀ་དང་སྣུ་ཧ་དང༌། །ཨརྐའི་རྩ་བ་དང་ནི་འོལ་མ་སེ། །དེ་བཞིན་ཚ་བ་གསུམ་དང་དུང་དང་ནི། །སྤངས་མ་རུ་རྟར་བཅས་དང་ལན་ཚྭ་ལྔར། །ཐལ་བ་གཉིས་དང་ལང་ག་ལི་བཏགས་ཕྱེ། །སྣུ་ཧ་ཨརྐའི་འོ་མར་བསྐོལ་ནས་ནི། །སྐ་བར་གྱུར་པ་ལྕགས་སྣོད་ནང་དུ་གཞག །དེ་ནི་ཐུར་མས་བསྐུས་ན་མཛེ་ནད་དང༌། །ཤ་བཀྲ་སྨེ་བ་ནག་པོར་གྱུར་པ་དང༌། །མཛེར་པ་གཞང་འབྲུམ་པགས་པའི་རྨེན་བུ་སེལ། །སྦྱང་བྱས་གཏར་ག་བཏབ་པ་དང༌། །རྩུབ་ཆོས་ཕྱེ་ཟན་ཟོས་གྱུར་པའི། །སྡིག་པ་ཟད་པར་གྱུར་པ་ཡི། །འགའ་ཞིག་གིས་ནི་ཤ་བཀྲ་འབྱུང༌། །ཁོང་པའི་སྲིན་ཡོད་སྣུམ་དུགས་བྱས། །བུ་རམ་འོ་མ་ཉ་སོགས་ཀྱིས། །བད་ཀན་སྲིན་བུ་བསླངས་ནས་ནི། །ནུབ་མོ་དེ་ནི་བདེ་བར་གནས། །བྱེའུ་རུག་སྩོགས་སྡེབ་གཅིན་དང༌། །ཆུ་ཕྱེད་བཅས་པ་བསྐོལ་ནས་ནི། །ཁུ་བ་དེ་ནང་པི་པི་ལིང༌། །པོ་སོན་ཆ་དང་བྱི་དང་ག །ཏིལ་མར་སྭརྫི་ཀྵ་རར་བཅས། །མས་གཏོང་བས་ནི་གཏང་བར་བྱ། །དེ་ཉིད་དེ་ལ་དེ་ཉིད་དམ། །དུར་བྱིད་ལྡེ་གུ་པོ་སོན་ཆ། །པི་པི་ལིང་ནི་ཁུ་བར་བསྲེས། །བཀྲུ་སྨན་དེ་ལ་བྲུད་པར་བྱ། །དེ་ལྟར་སྟེང་འོག་སྦྱང་བྱས་ནས། །ཚ་བ་ལྔ་ལྡན་ཐུགས་སྩོགས་བླུད། །ཚ་དང་ཁ་དང་བསྐ་བ་ཡི། །སྨན་ནི་བསྐོལ་ཆུས་བླུགས་པར་བྱ། །དུས་
སུ་བྱི་དང་གའི་ཏིལ་མར། །འཇམ་རྩི་དེ་ལ་གཏང་བར་བྱ། །མགོ་བོའི་སིན་བུ་མགོ་ནད་ནི། །གསོ་བར་བཤད་པའི་རིམ་པར་བྱ། །ཚ་དང་ཁ་བ་ཤས་ཆེ་ཞིང༌། །སྣུམ་ཉུང་ཁ་ཟས་སྦྱིན་པར་བྱ། །བྱི་དང་ག་དང་པི་པི་ལིང༌། །པི་པི་ལིང་རྩ་ན་ལེ་ཤམ། །ན་ལེ་ཤམ་ནི་དཀར་པོ་དང༌། །སྲརྫི་ཀ་ནི་ཐལ་བར་བཅས། །ནས་ཐུག་དར་བར་བཙོས་པ་བླུད། །གི་རི་གར་ནི་ཤྲི་ཤ་ཀ །པ་རི་པ་ཏྲ་ཀེ་པུ་ཀ །པ་ལ་ཤ་འབྲས་པ་ཏུ་ར། །སུ་ཏི་ཀ་ནི་སོ་སོར་བསྐོལ། །ཁུ་བ་སྦྲང་རྩིར་བཅས་པའམ། །བྱེ་རུག་པ་སོགས་སྦྲང་རྩིར་སྦྱར། །རྟ་སྦངས་ཕྱེ་མ་བྱི་དང༌། །བསྐོལ་བའི་ནང་སྦངས་མང་དུ་བཟའ། །སྦྲང་རྩིར་བཅས་པའི་ལྡེ་གུའམ། །འབྲས་བུ་གསུམ་ཁུར་སྤངས་པ་སྦྱིན། །མགོ་བོའི་སྲིན་བུའི་ནད་ལ་ནི། །དེ་ཡི་ཕྱེ་མ་བུད་པར་བྱ། །མུ་ཤ་ཀརྞའི་འདབ་མ་ནི། །ཞིབ་ཏུ་བཏགས་པ་འབྲས་ཕྱེར་བཅས། །བཙོས་པའི་ཁུ་བ་སྦྱིན་པར་བྱ། །དེ་ཡི་རྗེས་ལ་རང་སྐྱུར་རམ། །དར་བ་སླ་བ་ཚ་བ་ལྔ། །ལན་ཚྭར་བཅས་པ་བླུད་པར་བྱ། །ནིམ་པ་ཨ་པ་མརྒ་དང༌། །ནིར་གུན་ཐི་ལོ་འང་དེ་བཞིན་བྱ། །བྱི་དང་ག་ཡི་ཕྱེ་མ་དང༌། །བགྲེས་པའི་འབྲས་ཕྱེའི་ཁུར་བ་སྦྱིན། །གོ་བྱེའི་མར་ནི་རྙིང་པ་ལ། །བྱི་དང་ག་ནི་ཤུན་པ་བསལ། །ཆ་ཕྱེད་བཅུག་སྟེ་ཉི་མར་གཞག །བཏུང་བ་འཇམ་རྩི་སྦྱར་བར་བྱ། །ཐང་ཤིང་ཤྲི་བེཥྚ་ཡི་སྣུམ། །སོ་སོར་དེ་བཞིན་སྦྱར་བར་བྱ། །བཤང་བར་སྐྱེས་ལ་ལྷག་པར་ཡང༌། །བཀྲུ་སྨན་དང་ནི་འཇམ་རྩི་གཏང༌། །བད་ཀན་ལས་གྱུར་མགོ་བོའི་ནད། །བཀྲུ་སྨན་སློན་དང་ཞི་སྨན་གཏང༌། །ཁྲག་ལས་གྱུར་པའི་སྲིན་བུ་ལ། །གསོ་བ་མཛེ་ཡི་ཚུལ་དུ་བྱ། །སྤུ་འབྱི་བྱེད་ལ་གསོ་བ་ནི། །འཁོར་ལིང་སྐྲ་འབྱི་ཆོ་ག་བྱ། །འོ་མ་ཤ་དང་མར་དང་བུ་རམ་དང༌། །ཞོ་དང་འདབ་མ་ཅན་གྱི་ཚོད་མ་དང༌། །མདོར་ན་མངར་དང་སྐྱུར་བའི་ཁུ་བ་རྣམས། །སྲིན་བུ་གཞོམ་པར་འདོད་པས་ཡོངས་སུ་སྤང༌། །ཡན་ལག་བརྒྱད་པའི་སྙིང་པོ་བསྡུས་པ་ལས་གསོ་བའི་གནས་ཀྱི་ལེའུ་ཉི་ཤུ་པའོ།། །།དེ་ནས་རླུང་ནད་གསོ་བ་བཤད་
པར་བྱའོ། །མ་འདྲེས་རླུང་ལས་དང་པོར་ནི། །མར་དང་རྐང་དང་ཚིལ་དང་ནི། །ཏིལ་མར་བླུད་ཅིང་སྣུམ་གྱི་ནི། །སྦྱོར་བས་ལེགས་པར་གསོ་བར་བྱ། །དེ་ནས་སྣུམ་ཞེན་ངལ་བསོ་སྟེ། །འོ་མས་སླར་ཡང་སྣུམ་ཆོས་བྱ། །རླན་ཅན་གྲོང་དང་ཆུ་ལ་གནས། །ཤ་ཁུ་སྣུམ་དང་ལྡན་པ་གཏང༌། །འོ་ཐུག་ཀྲི་སར་སྐྱུར་དང་བཅས། །ལན་ཚྭར་ལྡན་བླུད་འཇམ་རྩི་གཏང༌། །སྣ་སྨན་སྐྱོ་བྱས་ཁ་ཟས་ནི། །སྣུམ་བྱས་སྦྱིན་ཅིང་དུགས་བྱས་ལ། །ལེགས་བསྐུས་སྣུམ་དང་ལྡན་པ་ལ། །གསེག་མ་ལ་སོགས་དུགས་བྱའོ། །སྣུམ་གྱིས་ཞེན་བྱས་དུགས་བྱས་པས། །གཡོ་ཞིང་རེངས་དང་གཟེར་བཅས་པ། །ཇི་ལྟར་འདོད་བཞིན་འགུགས་པ་ནི། །བདེ་བླག་ཉིད་དུ་ནུས་པར་འགྱུར། །ཇི་ལྟར་ཤིང་སྐམ་དག་ཀྱང་ནི། །སྣུམ་བསྐུས་བསྲོས་པར་གྱུར་ན་ནི། །ལས་སུ་བྱ་བར་རུང་གྱུར་ན། །སྲོག་ཆགས་ལུས་ནི་སྨོས་ཅི་དགོས། །སྤུ་བརྩེ་གཟེར་ན་སྙོམས་པ་དང༌། །ལུས་སྐེམ་རེངས་པའི་ནད་ལ་སྩོགས། །དུགས་བྱས་མྱུར་དུ་ཞི་འགྱུར་ཞིང༌། །མཉེན་པ་ཉིད་དུའང་འགྱུར་པ་ཡིན། །སྣུམ་བཏང་བས་ནི་ལུས་ཟུངས་རྣམས། །བསྐམ་པ་མྱུར་དུ་རྒྱས་པར་བྱེད། །ཉམས་སྟོབས་མེ་དྲོད་འཕེལ་འགྱུར་ཞིང༌། །དེ་ཡི་སྲོག་ཀྱང་རིང་ནས་བྱེད། །ལན་མང་སྣུམ་དང་དུགས་ཀྱི་ནི། །ཆོ་ག་ལེགས་པར་སྦྱར་བར་བྱ། །དེ་ལྟར་སྣུམ་གྱིས་མཉེན་བྱས་ལྟོར། །རླུང་གི་ནད་ནི་གནས་མི་འགྱུར། །གལ་ཏེ་ནད་གཞན་བཅོས་པའི་ཕྱིར། །ལས་འདི་ཞི་བར་མ་གྱུར་ན། །འཇམ་ཞིང་སྣུམ་དང་ལྡན་པ་ཡི། །སྣུམ་གྱིས་དེ་ནི་སྦྱང་བར་བྱ། །ཞུན་མར་སེང་ཕྲོམ་བཙོས་པ་དང༌། སཔྟ་ལ་དང་བསྐོལ་བའམ། །འོ་མ་ཨེ་རཎྜ་ཡི་མར། །བསྐོལ་བ་ནད་སེལ་དགེ་བ་བླུད། །སྣུམ་སྐྱུར་དྲོ་དང་ལན་ཚྭ་སོགས། །ཟས་ཀྱི་དྲི་མ་ཚོགས་གྱུར་ནས། །བུ་ག་འགགས་ཏེ་རླུང་བཀག་པས། །དེ་ཕྱིར་ད་ནི་བདེ་རྒྱུ་བྱ། །ཉམ་ཆུང་བཀྲུ་སྨན་བྱར་འོས་པ། །དེ་ལ་དྲོད་སྐྱེད་སྨིན་བྱེད་པའི། །ཁ་ཟས་སྦྱིན་པའམ་དེ་བཅས་པའི། །མས་གཏོང་བཀྲུ་སྨན་སྦྱར་བར་བྱ། །སྦྱང་ཞིང་མེ་དྲོད་བསྐྱེད་གྱུར་ནས། །སླར་
ཡང་སྣུམ་དང་དུགས་བྱས་ཕན། །མ་ཞུའི་གནས་སུ་ཞུགས་པའི་རླུང༌། །སློན་བྱས་ཟས་རིམ་བྱིན་ནས་ནི། །བ་ར་ཎ་སོགས་དྲུག་པའམ། །ཤུ་དག་སྩོགས་ཆུ་དྲོ་སྦྱར་བླུད། །མེ་དྲོད་བསྐྱེད་ནས་དེའི་འོག་ཏུ། །རླུང་ཅན་གཅིག་པུའི་གསོ་བ་བྱ། །ལྟོ་བའི་ཕྱོགས་ཞུགས་བིལ་བ་ནི། །གཞོན་དང་ཉ་ཤས་གཡོས་བྱས་སྦྱིན། །ལྟེ་བའི་འོག་ཞུགས་འཇམ་རྩི་གཏང༌། །ཟས་ཀྱི་སྔོན་དུ་སྣུམ་བཏང་ཕན། །ཁོང་པར་ཞུགས་ལ་ཐལ་སྨན་སོགས། །ཕྱེ་མ་དྲོད་སྐྱེད་སྨིན་བྱེད་ཕན། །སྙིང་གནས་ས་ལ་པརྞི་དག །འོ་མ་དང་ནི་བསྐོལ་བ་ཕན། །མགོ་བོར་གནས་ལ་མགོ་སྣུམ་བསྐུ། །སྣ་སྨན་དུད་རྔུབ་སྣུམ་ཅན་དང༌། །རྣ་བ་སོགས་ལ་བརྟ་བྱས་ཕན། །པགས་པར་གནས་ལ་བསྐུ་བྱུག་དུགས། །རླུང་མེད་གནས་སུ་གནས་པ་དང༌། །ཁ་ཟས་ཡི་ག་འབྱེད་པ་ཕན། །ཁྲག་གནས་བསིལ་སྨན་བསྐུ་བ་དང། །བཀྲུ་སྨན་ཁྲག་ནི་དབྱུང་བ་ཕན། །ཤ་ཚིལ་བརྟེན་པ་བཀྲུ་སྨན་དང༌། །མས་གཏོང་དྲག་དང་ཞི་བྱའི་སྨན། །རུས་པ་རྐང་ལ་གནས་པ་ལ། །ཕྱི་དང་ནང་ནས་སྣུམ་གྱིས་གསོ། །ཁུ་ཆུར་གནས་ལ་སེམས་དགའ་དང༌། །ཁ་ཟས་སྟོབས་སྐྱེད་རོ་ཙ་ཕན། །ཁུ་བ་རྒྱུ་བ་འགགས་གྱུར་ན། །བཀྲུ་སྨན་བཏང་བས་གསོ་བར་བྱ། །འཁྲུས་ཤིང་ཟས་རིམ་བསྟེན་གྱུར་ནས། །སྔར་བཤད་པ་ཡི་གསོ་བ་བྱ། །རླུང་ལས་མངལ་ཆགས་བསྐམས་གྱུར་དང༌། །བྱིས་པ་སྐེམས་པར་གྱུར་པ་ལ། །ཀར་ཏང་པ་ལ་ཤིང་མངར་རྣམས། །འོ་མ་སྦྱར་བསྐོལ་བླུད་པ་ཕན། །རྒྱུས་པ་ཚིགས་དང་རྩར་ཞུགས་ལ། །སྣུམ་ཚ་དཀྲི་བའི་དུགས་བྱས་ཕན། །ཡན་ལག་འཁུམས་ལམ་ཤ་དང༌། །རྒྱམ་ཚ་ཏིལ་མར་བསྐོལ་བས་བསྐུ། །ཁྲག་གཟགས་དྲགས་ལ་ཡན་ལག་ནི། །ཚོར་བ་མེད་ལ་ཁྱིམ་དུད་པ། །རྒྱམ་ཚ་ཏིལ་མར་སྦྱར་བས་བསྐུ། །དཀྲི་བའི་དུགས་ནི་སྦྱར་བར་བྱ། །གཞན་དབང་ཅན་གྱིས་གཟིར་གྱུར་ཅིང༌། །མིག་འགྱུར་མི་ཤེས་འདར་བ་མེད། །ཕོ་མཚན་མི་ལྡང་རྡུལ་མི་འབྱུང༌། །ཕྱི་རོལ་རྩོལ་བ་མེད་འགྱུར་ལ། །ཁྲི་ཡི་བཅིངས་པས་མ་ནོན་པ། །དེ་ལ་མྱུར་དུ་གསོ་
དཔྱད་བྱ། །དེར་ནི་ཐོག་མར་སྣུམ་ཞེན་བྱ། །དུགས་བྱས་སྣ་སྨན་རྣོན་པོས་ནི། །བུ་ག་སྦྱང་ཕྱིར་བཏང་བ་དང༌། །བི་ད་ར་ཡི་སྡེ་བསྐོལ་དང༌། །ཞོ་དང་འོ་མ་ཤ་ཁུ་དང༌། །མར་བསྐོལ་བ་ཡི་དངས་མ་བླུད། དེས་ནི་རླུང་ནད་ཚབས་ཆེ་བའམ། །འཕྲལ་དུ་ཁྱབ་པར་མི་འགྱུར་རོ། །རྒྱ་སྲན་ནས་དང་རྒྱ་ཤུག་སྩོགས། །ཐང་ཤིང་ལ་སོགས་སྡེ་ཚན་ནི། །རླན་ཅན་ཤ་ནི་བསྐོལ་བ་དང༌། །སྐྱུར་དང་འོ་མ་དག་དང་ནི། །མངར་བའི་སྡེ་ཚན་བཏབ་པ་ཡི། །སྣུམ་ཆེན་དག་ནི་བསྐོལ་བ་ཡིས། །བླུགས་དང་བསྐུ་དང་ལུས་སྤྱི་དང༌། །བཏུང་དང་སྣ་སྨན་འཇམ་རྩིར་བྱ། །སྣུམ་དང་དུགས་ནི་ལེགས་སྦྱར་བ། །དེ་དང་དེས་ནི་རླུང་ནད་འཇོམས། །ནད་ཤུགས་བར་མ་དག་ལ་ནི། །བད་ཀན་སེལ་ཞིང་རྣོ་བ་ཡི། །སྤྱི་བོའི་བཀྲུ་སྨན་ལན་མང་གཏང༌། །བུད་ཅིང་གཏང་བར་བྱ་བ་ཡིས། །དབུགས་རྒྱུའི་གནས་ནི་དག་གྱུར་ནས། །དེས་ནི་དྲན་པ་རྙེད་པར་འགྱུར། །ཁ་རུ་ཚ་དང་ཨ་རུ་ར། །ཚ་བ་གསུམ་བསྐོལ་རླུང་ཆེན་སེལ། །སེང་ཕྲོམ་སྲང་བརྒྱད་འབྲས་བུ་གསུམ། །བྲེ་གང་རྩ་བ་ཆེན་པོ་ལྔ། །ཨེ་རཎྜ་དང་བྲི་ཧ་ཏི། །དུར་བྱིད་སྲང་རེ་ཆུ་བྲེ་ནི། །བཅུ་དྲུག་ནང་དུ་བསྐོལ་ནས་སུ། །བཞི་ཆ་ལུས་པ་དེ་དང་ནི། །མར་བྲེ་གང་དང་ཆུ་བྲེ་བཞི། །ནས་ཚིག་འཁུས་ཐལ་སྲང་གསུམ་བསྐོལ། །དེ་བསྟེན་རླུང་ནད་མ་རུངས་པ། །ཡན་ལག་ཕྱོགས་གཅིག་ཀུན་ལ་ཞུགས། །མངལ་གྱི་ནད་དང་རྒྱུ་རླུགས་དང༌། །སྐྲན་དང་དམུ་རྫིང་འཇོམས་པར་བྱེད། །ར་མཉེ་བ་དང་ཨ་ཤྭ་ཀའང༌། །ཆོ་ག་སེང་ཕྲོམ་ལྟ་བུར་བྱ། །གསོ་བ་འདི་ནི་གཞན་དབང་ཅན། །རླུང་ནད་མ་འདྲེས་པ་ལ་བྱ། །ནད་གཞི་འདྲེན་མར་འདྲེན་མས་བྱ། །བད་ཀན་བཅས་པའི་གཞན་དབང་ཅན། །སྙིང་ག་རྩིབ་ལོགས་ན་བ་ལ། །གཡེར་མ་ཤིང་ཀུན་ཨ་རུ་ར། །མ་ནུ་དང་ནི་ལན་ཚྭ་གསུམ། །ནས་བསྐོལ་ཁུ་བ་སྦྱར་བ་བླུད། །ཤིང་ཀུན་བཅའ་སྒ་རྩལ་རུ་ཚ། སེ་འབྲུ་སྟར་བུ་བཅས་པ་བླུད། །བད་ཀན་རླུང་ནི་འདྲེས་པ་ལ། །སྙིང་ནད་གསོ་བའི་སྐབས་བཤད་ཕན། །ད་རྒན་ཕྱིར་དགྱེ་ནང་གུག་གཉིས། །ཀླད་པ་གཞོགས་ཕྱེད་ན་ལྟར་གསོ། །ཏིལ་
མར་གྱིས་བཀང་སྣོད་དུ་བསྙལ། །འདིར་ནི་ནང་གུག་རབ་གསོ་དཀའ། །སོ་དང་བཞིན་གྱི་མདོག་ཉམས་ཤིང༌། །ཡན་ལག་ལྷོད་ཅིང་དྲན་པ་ཉམས། །རབ་ཏུ་རྡུལ་བའི་གཞུང་རེངས་ཡིན། །དེ་ནི་ཞག་བཅུ་ལས་མི་འཚོ། །དེ་ལས་གཞན་ཤུགས་སྨན་གྱུར་འཚོ། །ལུས་སྒུ་བ་དང་འོན་གླེན་དང༌། །འཐིང་དང་ཞ་བོ་གཞོགས་ཕྱེད་ཉམས། །འཕྱེ་བོའམ་དབང་པོ་མ་ཚང་འགྱུར། །འགྲམ་པ་ཉམས་པ་འགྲམ་པ་སྣུམ། །དུགས་བྱས་ནས་ནི་རང་གནས་གཞུག །ཁ་གདངས་པ་ལ་ཀོས་ཀོ་ནི། །བཏེག་ལ་མཁས་པས་གཞུག་པར་བྱ། །འཐམ་པར་གྱུར་པ་ལྷག་མ་ལ། །ཕྱོགས་གཅིག་གུག་པ་ལྟ་བུར་གསོ། །ལྕེ་ལྡིབས་གནས་སྐབས་ཇི་བཞིན་དུ། །རླུང་ནད་ཀྱི་ནི་གསོ་བ་བྱ། །གླད་པ་གཞོགས་ཕྱེད་ན་བ་ལ། །སྣ་སྨན་སྤྱི་བོའི་ཏིལ་མར་དང༌། །མིག་དང་རྣ་བ་དགང་བར་བྱ། །སྐྲངས་པར་སྐྱུག་སྨན་གཏང་བར་བྱ། །ཚ་ཞིང་དམར་བཅས་གཏར་ག་གདབ། །གཞོགས་ཕྱེད་སྐམས་ལ་སྣུམ་ཆོས་དང༌། །སྣུམ་དང་ལྡན་པའི་བཀྲུ་སྨན་གཏང༌། །དཔུང་པ་འཇས་ལ་སྣ་སྨན་དང༌། །ཟས་ཀྱི་རྗེས་ལ་སྣུམ་སྦྱིན་བྱ། །བརླ་རེངས་པ་ལ་སྣུམ་ཆོས་དང༌། །སྦྱང་བྱས་ཕན་པ་མ་ཡིན་ཏེ། །བད་ཀན་མ་ཞུ་ཚིལ་མང་བས། །དེ་ཕྱིར་དེ་ལ་རྩུབ་ཆོས་ཀྱི། །ཟད་པར་བྱ་བས་གསོ་བར་བྱ། །ནས་དང་ཁྲེ་དང་ཁྲེ་རྒོད་སྦྱིན། །ཚོད་མ་ལན་ཚྭ་མེད་པ་ནི། །ཏིལ་མར་ཅུང་ཟད་ཆུར་བསྐོལ་བའམ། །སྐམ་སའི་ཤ་ནི་མར་མེད་དང༌། །སྦྲང་རྩི་ཆུ་དང་ཆང་རྙིང་སྦྱིན། །ཕྱུག་པོའི་རླུང་ལ་དུག་མོ་ཉུང༌། །ཡུང་བའི་སྡེ་ཚན་ཤུ་དག་སོགས། །བསྐོལ་བ་རྒྱམ་ཚར་བཅས་པའམ། །བར་ཎ་སོགས་ཕྱ་སྦྱར་བླུད། །ཡང་ན་དབྱི་མོ་འབྲས་བུ་གསུམ། །པུ་ཙེ་ཤེལ་དང་པི་པི་ལིང༌། །སྦྲང་རྩིར་སྦྱར་བའི་ལྡེ་གུ་སྦྱིན། །ཡང་ན་དབྱི་མོ་ཨ་རུར། །ཙི་ཏྲ་ཀ་དང་ཐང་ཤིང་དང༌། །སྦྲང་རྩིར་སྦྱར་བའི་ལྡེ་གུ་སྦྱིན། །གུ་གུལ་བྲལ་ཞུན་ཨ་རུ་ར། །བ་གཅིན་དང་ནི་སྦྱར་བ་བླུད། །གླ་སྒང་ཙི་ཏྲ་ཚ་བ་གསུམ། །འབྲས་བུ་གསུམ་དང་བྱི་དང་ག །གུ་གུལ་ཆ་མཉམ་ཕྱེ་མ་སྦྱིན། །ཆིལ་དང་བད་
ཀན་མ་ཞུ་ལས། །གྱུར་པའི་ནད་ནི་ཐམས་ཅད་སེལ། །དེ་ལྟར་བད་ཀན་ཤས་ཆེ་ཞིང༌། །ཚིལ་བཅས་རླུང་ནི་ནད་སེལ་བྱེད། །ཐལ་སྨན་བ་གཅིན་སྦྱར་དུགས་དང༌། །བླུགས་དང་ལུས་ལ་ དྲིལ་བའང་བྱ། །ཉུངས་ཀར་ཀ་རཉྫའི་འབྲས་བུ ། །བག་ཅིན་སྦྱར་བས་བསྐུ་བར་བྱ། །ཨརྐ་ཨགྣི་མནྠ་དང༌། །ནིམ་པའི་རྩ་བ་ཐང་ཤིང་དང༌། །བོང་པ་དང་ནི་གྲོག་མཁར་ས། །ཡུངས་ཀར་སྦྲང་རྩིར་བཅས་པ་བསྐུ། །བད་ཀན་ཟད་ཕྱིར་དྲག་ཤུལ་ནི། །བཟོད་ན་དེ་ལ་བརྟེན་པར་བྱ། །ཐང་ལ་མཆོང་དང་ཅི་ནུས་ཀྱིས། །ཉལ་པོ་དག་ཀྱང་ཡོངས་སུ་བསྟེན། །ཆུ་མི་གཡོ་དང་ལྟེང་ཀ་དང༌། །ཆུ་རྒྱུན་བཟློག་པས་ཆུ་བོ་རྒལ། །འདིར་ནི་ཚིལ་དང་བད་ཀན་དག །ཟད་ནས་སྣུམ་ལ་སོགས་པ་གཏང༌། །གནས་དང་ལུས་ཟུངས་སོགས་བརྟགས་ལ། །ལྷག་མ་རྣམས་ཀྱང་གསོ་བར་བྱ། །ས་ཧ་ར་ཛ་ཐང་ཤིང་དང༌། །དོང་གྲ་བསྐོལ་བ་ཏིལ་མར་སྦྱར། །རླུང་གིས་ལུས་གཟིར་ལ་བླུད་ན། །ཅི་འདོད་ཐོགས་པ་མེད་འགྲོ་ནུས། །ར་སྣ་དོང་གྲ་ཙི་ཏྲ་ཀ །ཟུར་པ་མ་ནུ་པི་པི་ལིང༌། །བཏགས་པའི་ཕྱེ་མ་མར་བསྐོལ་བ། །རླུང་ནད་སེལ་བར་བྱེད་པའི་མཆོག །ནིམ་པ་སླེ་ཏྲེས་བ་ཤ་ཀ །ཀཎྜ་ཀ་རི་པ་ཏོ་ལ། །སྲང་ནི་བཅུ་བཅུའི་ཚད་བྱས་ལ། །ཆུ་བྲེ་བཅུ་དྲུག་ནང་དུ་བསྐོལ། །ཁུ་བ་བརྒྱད་ཆ་ལུས་པ་དེར། །མར་ནི་བྲེ་གང་བླུགས་ཏེ་བསྐོལ། །པ་ཏ་ཐང་ཤིང་བྱི་དང་བ། །དོང་གྲ་ཧ་ཏི་པི་པི་ལིང༌། །སྐྱེར་པ་ཤུ་ཏི་དབྱི་མོ་དང༌། །ཏེ་ཛོ་བ་ཏི་ན་ལེ་ཤམ། །རུ་རྟ་དང་ནི་དུག་མོ་ཉུང༌། །ཐལ་སྨན་རྣམ་པ་གཉིས་པོ་དང༌། །ཏི་མུ་ས་དང་ཀྲུ་ཏྲུག་ཏྲེས། །བསེ་ཤིང་འབྲས་བུ་པུ་ཅེ་ཤེལ། །ཤུ་དག་པི་པི་ལིང་རྩ་བ། །བཙོད་དང་བོང་ང་ལ་ལ་ཕུད། །ཞོ་ནི་གཉིས་གཉིས་ཚད་བྱས་པ། །གུ་གུལ་སྦྱར་བ་སྲང་ལྔ་དང༌། །ལྡེ་གུ་བཏབ་སྟེ་བསྐོལ་བའི་མར། །བླུད་ན་རླུང་ཚད་ཚབས་ཆེ་བ། །རུས་ཚིགས་རྐང་ལ་ཞེན་པའང་འཇོམས། །མཛེ་ནང་དེ་འདྲ་འང་སེལ་བར་བྱེད། །བུ་གའི་རྨ་དང་ལྦ་བ་དང༌། །མཚན་པར་རྡོལ་དང་འབྲས་ཀྱི་ཕྲེང༌། །ནམ་ཚོད་ཡན་ཆད་ནད་གུན་དང༌། །སྐྲན་དང་གཞང་འབྲུམ་ཟ་ཁུ་དང༌། །
གཅོང་ཆེན་དབུགས་མི་བདེ་བ་དང༌། །ཡི་ག་འཆུས་དང་ཆམ་པ་དང༌། །ལུད་པ་འོར་ནད་སྙིང་ནད་དང༌། །སྐྱ་རྦབ་མྱོས་དང་ཁོང་འབྲས་དང༌། །རླུང་དང་ཁྲག་གི་ནད་རྣམས་འཇོམས། །བིལ་བ་གཞོན་ནུའི་འོ་མ་དང༌། །མར་གྱི་ཉིང་ཁུ་བསྐོལ་ནས་ནི། །དེ་ལ་སྲང་ནི་གཅིག་གམ་ཕྱེད། །སྣ་སྨན་བྱས་མགོའི་རླུང་ནད་སེལ། །དེ་བཞིན་ཆུ་སྲིན་ནག་ཁྲ་དང༌། །ཉ་དང་རུས་སྦལ་འུག་པའི་ཆིལ། །བསྐོལ་བ་མ་འདྲེས་རླུང་ལ་ནི། །ཁྱད་པར་དུ་ནི་གཏང་བར་བྱ། །ཏིལ་གྱི་ཚིགས་མ་རྙིང་པ་དང༌། །རྩ་བ་ལྔ་པ་སོ་སོར་བསྐོལ། །གཅིག་ཏུ་བསྲེས་པ་ཏིལ་མར་ནི། །འོ་མ་བརྒྱད་ཆའི་ནང་དུ་བསྐོལ། །བླུད་ན་རླུང་དང་བད་ཀན་དང༌། །འདྲེས་པའི་ནད་ནི་ཐམས་ཅད་འཇོམས། །པྲ་ས་ར་ནི་སྲང་བརྒྱད་བསྐོལ། །ཏིལ་མར་འོ་མ་པྲེ་རེ་དང༌། །མེད་གཉིས་དང་ཤ་པུཥྤ། །བཙོད་དང་རུ་རྟ་ར་སྣ་དང༌། །ཙནྡན་དམར་པོ་ཛི་བ་ཀ །ར་སྣ་ར་མཉེ་བ་གཉིས་དང༌། །ཐང་ཤིང་བཏགས་པའི་ལྡེ་གུ་དང༌། །བསྐོལ་བླུད་རླུང་ནད་ཐམས་ཅད་སེལ། །ས་ཧ་ར་ཛའི་རྩ་བ་ཡལ་གར་བཅས། །སྲང་བརྒྱ་རྩ་བ་བཅུ་ནི་དེ་དང་མཉམ། །ཉེའུ་ཤིང་སྲང་ནི་ལྔ་བཅུ་ཆུ་བྲེ་དྲུག་ཅུ་ནི། །རྩ་བཞིའི་ནང་བསྐོལ་བཞི་ཆ་ལུས་པ་དེར། །ཆུ་སྲིན་སྡེར་མོ་རུ་རྟ་པུ་ཤེལ་ཙེ། །ཙནྡན་སུག་སྨེལ་པྲི་ཀ་པྲི་ཡང་ཀུ། །ན་ལི་ཀ་དང་རྡོ་དྲེག་བ་ལེ་ཀ །སྤང་སྤོས་ཐང་ཤིང་བཙོད་དང་ཨ་རུ་ར། །ཙ་རོང་ཤུ་ཏི་རྒྱ་སྤོས་དུ་རུ་ཀ །སྲང་རེ་ཆ་མཉམ་འོ་མར་བཅས་པ་ནི། །ཏིལ་མར་བྲེ་བཞི་ལྷན་ཅིག་བསྐོལ་བ་བླུད། །རླུང་ནད་གསོ་དཀའ་དག་ཀྱང་འཇོམས་པར་བྱེད། །ལུས་འདར་ལུས་ལ་རླུང་འཇུག་ལུས་རེངས་དང༌། །ལུས་བསྐམས་པ་ཡིས་ཤིན་ཏུ་གཟིར་ལ་སོགས། །སྐྲན་དང་སྨྱོ་བྱེད་ཆམ་པ་མངལ་ནད་འཇོམས། །ས་ཧ་ར་ཛ་སྲང་བརྒྱ་ཡི། །ཁུ་བར་ཏིལ་མར་བྲེ་བཞི་བསྐོལ། །དེ་རྩ་ལྡེ་གུ་སྲང་བཅུ་དང༌། །འོ་མ་བཞི་འགྱུར་བཅུག་སྟེ་བསྐོལ། །ཡང་ན་རྒྱ་སྤོས་ཤུ་དག་དང༌། །སྟིར་རུ་རྟ་ཤུ་ད་ག་དང༌། །སུག་སྨེལ་རྡོ་དྲེག་སྤང་སྤོས་དང༌། །ཤུ་ཏི་ཙནྡན་དམར་པོ་གཞུག །བསྐོལ་བ་དེར་ནི་ཁ་རའི་ཕྱེ། །སྲང་ནི་བཅོ་བརྒྱད་གཞུག་པར་བྱ། །ཏིལ་མར་སྨན་
མར་ཡིན་པར་བཤད། །དེས་ནི་རླུང་ནད་མ་ལུས་དང༌། །རླུང་ནད་འཁྱིལ་དང་སྨྱོ་བྱེད་དང༌། །སྐྲན་དང་རླིག་རླུགས་ལ་སོགས་སེལ། །བ་ལ་སྲང་བརྒྱ་སླེ་ཏྲེས་ནི། །བཞི་ཆ་ར་སྣ་བརྒྱད་ཆ་ནི། །ཆུ་བྲེ་བཞི་བརྒྱའི་ནང་དུ་བསྐོལ། །ཁུ་བ་བརྒྱད་ཆ་ལུས་པ་དང༌། །ཞོ་དང་ཞོ་ག་ཆུ་བུ་རམ། །ཤིང་ཁུ་ཚ་དང་ཏིལ་མར་རྣམས། །བྲེ་ནི་བཞི་བཞི་བསྐོལ་ནས་ནི། །ར་ཡིའོ་མ་ཆ་ཕྱེད་དང༌། །ཟུར་པ་སྐྱེར་པ་ས་ར་ལ། །སུག་སྨེལ་བཙོད་དང་ཨ་ཀ་རུ། །ཙནྡན་ཨ་ཏི་པ་ལ་དང༌། །ཤུག་པ་གླ་སྒང་མུངྒའི་ལོ། །ཧ་རེ་ཎུ་ཀ་ཤིང་མངར་དང༌། །བྱ་གྲི་ནཱ་ག་བྱེའུ་རུག་པ། །ཟངས་རྩི་བ་དང་ཇི་བ་ཀ །གླ་རྩི་ལྕེ་པོག་པ་ལ་ཤ་།ཛཱ་ཏི་ཤོ་ཀ་ན་ལི་ཀ །གུར་གུམ་རྡོ་དྲེག་བི་ཀ་དང༌། །ཛཱ་ཏི་པ་ལ་ཀད་པ་ལ། །བ་ལི་ཀ་དང་ཤིང་ཚ་དང༌། །ཀུན་དུ་རུ་དང་ག་པུར་དང༌། །ཤྲི་པ་ས་ད་དུ་རུ་ཀ །ལི་ཤི་ཆུ་སྲིན་སེན་མོ་དང༌། །རུ་རྟ་སྤང་སྤོས་ཀ་ཀོ་ལ། །པྲི་ཡང་ཀུ་དང་སྟོ་ནེ་ཡ། །རྒྱ་སྤོས་ཤུ་དག་བྱ་མ་ཀ །མ་དུ་ནཱ་ག་གླ་བ་དང༌། །ནཱ་ག་གེ་སར་སྲང་རེ་དང༌། །བསྐོལ་ཏེ་བཙགས་པར་གྱུར་པ་རུ། །གནྡྷ་བྷ་དྲའི་ལྡེ་གུ་ནི། །ཆོ་ག་བཞིན་དུ་བཅུག་པ་དེས། །ལུད་པ་དབུགས་མི་བདེ་དང་རིམས། །བརྒྱལ་དང་སློན་སྐྲན་ཟད་བྱེད་དང༌། །གློ་འགྲམས་མཆེར་ནད་སྐེམ་པ་དང༌། །བརྗེད་བྱེད་བཀྲ་མི་ཤིས་པ་སེལ། །བ་ལི་ཏིལ་མར་བཟང་པོ་འདི། །རླུང་གི་ནད་ནི་འཇོམས་བྱེད་ཡིན། །བཏུང་བ་སྣ་སྨན་བསྐུ་དང་འཇམ་རྩི་ནི། །སྣུམ་གྱི་སྦྱོར་བ་དུས་སུ་ལེགས་བསྟེན་ན། །དེས་ནི་མ་རུངས་རླུང་ནད་མྱུར་ཞི་སྟེ། །བུད་མེད་མོ་གཤམ་བུ་ཡི་སྣོད་བྱེད་འགྱུར། །གང་ཚེ་བད་ཀན་མཁྲིས་པ་ནི། །ཞུ་བའི་གནས་འདུག་སྣུམ་དུགས་ཀྱིས། །ཞུ་ནས་མཁྲིས་པ་སྣང་གྱུར་པ། །དེ་ལ་འཇམ་རྩིས་བསལ་བར་བྱ། །ཡན་ལག་བརྒྱད་པའི་སྙིང་པོ་བསྡུས་པ་ལས། །གསོ་བའི་གནས་ལས་ལེའུ་ཉི་ཤུ་གཅིག་པའོ།། །།དེ་ནས་དྲེག་ནད་གསོ་བ་བཤད་པར་བྱའོ། །དྲེག་ནད་ཅན་ནི་སྣུམ་ཆོས་བྱ། །རླུང་བསྲུངས་ནད་གཞི་ཉམས་སྟོབས་ལས། །དཔག་སྟེ་ཁྲག་ནི་ཅུང་ཟད་ཙམ། །ལན་མང་དུ་ནི་དབྱུང་བར་བྱ། །དམར་གཟེར་ན་ཞིང་ཚ་
བ་ལ། །སྲིན་བུ་བད་བས་ཁྲག་དབྱུང་ངོ༌། །གཡའ་ཞིང་ན་ལ་ཙག་ཙག་ཚ། །ཤས་ཆེར་ཚ་ལ་རྔབས་རུས་དབྱུང༌། །གནས་ནས་གནས་སུ་འཕོ་བ་ལ། །གཏར་ག་འམ་ཞལ་ཞལ་གྱིས་ཁྲག་དབྱུང༌། །ལུས་ཞུམ་བ་དང་ཁོང་རྩུབ་ཅིང༌། །རླུང་ཤས་ཆ་ལ་ཁྲག་མིད་བྱུང༌། །ཁྲག་ཟད་པ་ལ་རླུང་གིས་ནི། །སྐྲངས་པ་གཏིང་ཟབ་རིངས་པ་དང༌། །འདར་ཞིང་རྩ་རྒྱུས་ན་དང་ཞུམ། །རླུང་ནད་གཞན་ཡང་སྐྱེད་པར་བྱེད། །སྣུམ་ཆོས་བྱས་རྗེས་བཀྲུ་སྨན་ནི། །སྣུམ་དང་ལྡན་པས་འཁྲུ་རུ་གཞུག །རླུང་ཤས་ཆེ་བའི་དྲེག་ནད་ལ། །མར་ནི་རྙིང་པ་བླུད་པར་བྱ། །ར་མཉེ་བ་དང་སྲ་བ་ནི། །པ་ཡ་སྱ་དང་ཛི་བ་ཀ །ཟངས་རྩི་བ་དང་ཆ་སྙོམས་ཏེ། །འོ་མ་མར་བསྐོལ་དྲེག་ནད་འཇོམས། །རྒུན་འབྲུ་མ་དུ་ཀ་བསྐོལ་བའི། །ཁུ་བ་ཁར་མར་བཅས་པའམ། །དེ་བཞིན་སླེ་ཏྲེས་ཁུ་བར་ནི། །འོ་མ་བསྐོལ་བ་བླུད་པར་བྱ། །ཏིལ་མར་འོ་མ་ཁ་རར་བཅས། །ལེགས་པར་བསྲེས་པ་བླུད་པར་བྱ། བ་ལ་ཉེ་ཤིང་ར་སྣང་དང༌། །པི་ལུ་རྩབ་བཅུ་པར་བཅས། །དུར་བྱིད་སྟི་ར་ཨེ་རཎྜ། །བསྐོལ་བའི་འོ་མས་རླུང་དྲེག་སེལ། །བ་གཅིན་འོ་མ་བཞོས་མ་ཐག །བཅས་པའང་ནད་ནི་བདེ་འབྱུང་བྱེད། །མཁྲིས་པར་ཉེ་ཤིང་པུ་ཙེ་ཤེལ། །པ་ཏོ་ལ་རྩའི་འབྲས་བུ་གསུམ། །སླེ་ཏྲེས་དང་ནི་སྨན་མངར་ཁ། །འོ་མའང་མར་དང་བསྐོལ་བ་བླུད། །ནད་གཞི་ཤས་ཆེའི་བཀྲུ་སྨན་ཕྱིར། །ཨེ་རཎྜའི་མར་འོ་མར་སྦྱར། །སྦྱོར་བ་ཇི་བཞིན་བླུད་པར་བྱ། ཞུ་ནས་འོ་མ་འབྲས་ཆན་སྦྱིན། །ཨ་རུ་ར་ནི་མར་བརྔོས་པ། །ཁུ་བ་བླུད་པར་བྱ་བའམ། །དུར་བྱིད་ཕྱེ་མ་རྒུན་ཆུའམ། །འོ་མ་སྦྱར་བ་བླུད་པར་བྱ། །ཡང་ན་དེ་ཡི་ནད་གཞི་ནི། །འཇམ་རྩི་འོ་མ་མར་བཅས་སྦྱར། །རླུང་དང་ཁྲག་ནད་གསོ་བ་ལ། །འཇམ་རྩི་ལས་ལྷག་གང་ཡང་མེད། །མཆོག་ཏུ་གཞང་དང་རྩིབ་ལོགས་བརླ། །ཚིགས་ནད་དམུ་རྫིང་ཉམ་ཐག་སེལ། །བད་ཀན་ཤས་ཆེ་གླ་སྒང་དང༌། །རྒུན་འབྲུ་སྐྱེར་པ་བསྐོལ་བའམ། །འབྲས་བུ་གསུམ་བསྐོལ་སྦྲང་རྩིར་བཅས། །ཡང་ན་སླེ་ཏྲེས་ཅི་རིགས་བླུད། །ཇི་ལྟར་འཆམ་པར་སྣམ་
བླུད་དེ། །སློན་བྱས་ནས་ནི་རྩུབ་ཆོས་བྱ། །འབྲས་བུ་གསུམ་དང་ཚ་བ་གསུམ། །གནྡྷ་བྷ་དྲ་ཤིང་ཚ་དང༌། །ཅུ་གང་ཤུ་དག་ཙི་ཏྲ་ཀ །པི་པི་ལིང་རྩ་བྱི་དང་ག །སྤང་སྤོས་བ་ཤ་ཀའི་ཤུན་ཕྲགས། །རི་སྟི་དབྱི་མོ་ལང་ག་ལིང༌། །ཆ་མཉམ་ལྡེ་གུར་བྱས་པ་ལ། །ནང་པར་ལྕགས་སྣོད་བསྐུས་ཏེ་གཞག །ཉི་མ་ཕྱེད་དུས་དེ་ཟོས་ན། །ནང་གཞི་ཀུན་གྱུར་དྲེག་ནད་ནི། །གཟེར་དང་ལྡན་ལ་མཆོག་ཏུ་ཕན། །ཀོ་ཀི་ལཀྵ་བསྐོལ་བའི་ཁུ། །བླུད་ཅིང་དེ་ཡི་ཚོད་མ་ཟོས། །སྙིང་རྗེ་གོམས་པའི་སྐྱེས་བུ་ལྟར། །དྲེག་ནད་སེལ་བར་བྱེད་པ་ཡིན། །རྩ་བ་ལྔའམ་སྐྱུ་རུ་རའི། །ཁུ་བ་ལི་ལི་ཏ་ཡི་ཞག །འཁྲིག་པ་སྤོང་ཞིང་འཐུངས་ན་ནི། །དྲེག་འཐེང་ཤིན་ཏུ་གཏིང་ཟུག་སེལ། །དེ་ལྟར་ནང་གི་བསྟན་ནས་ནི། །དེ་འོག་ཕྱི་རོལ་གསོ་བ་བཤད། །རང་སྐྱུར་བྲེ་བཞིར་ཏིལ་མར་དང༌། །སྲ་རྩི་བོ་ག་ནི་བཞི་ཆར་བསྐོལ། །ཆུ་ནང་གཟར་བུས་མང་དུ་དཀྲུགས། །རིམས་ཚ་ནད་གཟིར་སེལ་མཆོག་ཡིན། །ཏིལ་མར་བཙོད་དང་སྤྲ་ཚིལ་དང༌། །སྲ་རྩི་པོག་དང་ཐལ་ཏྲེས་བཅས། །ཏིལ་མར་སྐབས་ལུས་བསྐུས་ན། །དྲེག་ནད་སེལ་བའི་དམ་པ་ཡིན། །རྩ་བ་བཅུ་དང་འོ་མ་བསྐོལ། །ཡང་ན་ལྡེ་གུ་ཆུ་དྲོན་སྦྱར། །བླུགས་ན་རླུང་ཤས་ཆེ་བ་ཡི། །གཟེར་ནད་འཕྲལ་དུ་སེལ་བྱེད་ཡིན། །ལུས་འཇུག་རེངས་དང་གཟེར་གྱིས་ཉེན། །སྣུམ་བཞི་པོ་ནི་མངར་བའི་སྨན། །དྲོ་འཇམ་སྦྱར་བ་བླུགས་པར་བྱ། །ཚ་བར་གྱུར་ལ་གྲང་མོ་བླུགས། །དེ་བཞིན་ར་ལུག་པ་ཡི་ནི། །འོ་མ་ཏིལ་མར་སྤྱར་བའམ། །འཚོ་བྱེད་སྡེ་ཚན་བསྐོལ་བའམ། །རྩ་བ་ཆུང་ངུ་ལྔ་བསྐོལ་བླུགས། །རྒུན་ཆུ་བུ་རམ་ཤིང་ཁུ་ཆང༌། །རང་སྒྱུར་ཞོ་དང་ཞོ་ག་ཆུ། །འབྲས་བཀྲུས་ཆུ་དང་སྦྲང་རྩིའི་ཆུ། །ཀ་རའི་ཆུ་ནི་བླུད་པའང་ཕན། །བུད་མེད་གཟུགས་སྡུག་སྙན་པར་སྨྲ། །ལག་པ་ནུ་མ་ཙནྡན་བསྐུས། །རེག་ན་བསིལ་ཞིང་བདེ་བ་ཡིས། །ཚ་དང་ན་དང་རྨྱ་བ་སེལ། །མདོག་དམར་ཚ་དང་ན་བཅས་ལ། །ཁྲག་ཕྱུང་ནས་ནི་ལྡེ་གུས་བསྐུ། །སྟག་ཚིར་པ་དང་ཤིང་མངར་བཙོང༌། །སྐྱེར་བ་ཙནྡན་ཀ་ར་དཀར། །ཨེ་རཎྜ་ཡི་ས་བོན་ཕྱེ། །སྲན་ཆུང་ཤུག་
པ་པུ་ཤེལ་ཙེ། །ལྡེ་གུས་ཚ་ན་ཤུ་བ་མཆེད། །ན་ཞིང་མདོག་དམར་སྐྲངས་བ་སེལ། །ཀྲི་ས་ར་ནི་རླུང་འཇོམས་སྨན། །སྣུམ་བཅས་བསྐོལ་བའམ་མུངྒ་དང༌། །འོ་ཐུག་ཉུངས་ཀར་ཏིལ་ཚིགས་མ། །གླན་ཞིང་དཀྲིས་པས་གཟེར་འཇོམས་བྱེད། །ཆུར་གནས་རླན་ཅན་མཐུ་རྩལ་གྱིས། །ཟས་ཚོལ་ཤ་བཏགས་གཡོས་ལེགས་པ། །འཚོ་བྱེད་སྨན་དང་སྣུམ་བཅས་པས། །གླན་ཞིང་དཀྲི་བ་བྱས་གྱུར་ན། །སྲ་ཞིང་གཟེར་ལན་བ་དང༌། །སྐྲངས་དང་ཡན་ལག་ན་བ་འཇོམས། །འཚོ་བྱེད་སྨན་དང་བསྐོལ་བ་ཡི། །འོ་མ་ཞག་གིས་བསྐུས་ནའང་ཕན། །ས་ཧ་ར་ཛའི་རྩ་བ་དང༌། །ཛི་བན་ཏི་མར་རའི་འོ་མ། །ལྡེ་གུ་བསྐུས་པའམ་དེ་བཞིན་དུ། །ཏིལ་བཏགས་བརྔོས་པ་འོ་མར་སྦྱར། །ཟར་མ་འོ་མར་སྦྱར་བའམ། །ཨེ་རཎྜ་ཡི་འབྲས་བུ་ནི། །འོ་མ་དག་དང་སྦྱར་བའམ། །ཤུ་ཏིའི་འོ་མར་སྦྱར་བ་ཡིས། །རླུང་ཤས་ཆེ་བའི་གཟེར་འཇོམས་བྱེད། །བ་གཅིན་ཐལ་སྨན་ཆང་དང་བསྐོལ། །མར་གྱིས་བསྐུས་ན་འང་དེ་ལ་ཕན། །བད་ཀན་ཤས་ཆེ་རྒུན་ཚ་དང༌། །བསྐོལ་བའི་མར་བསྐུ་བླུགས་པ་ཕན། །ཤ་དག་རུ་རྟ་ཁྱིམ་དུད་པ། །ཤུ་ཏི་སེར་པོ་རྣམ་གཉིས་ཀྱི། །ལྡེ་གུས་བསྐུས་ན་དྲེག་ནད་ནི། །རླུང་དང་བད་ཀན་ཤས་ཆེ་སེལ། །དེ་བཞིན་ཤི་ཀྲུའི་ས་བོན་ནི། །འབྲས་ཀྱི་ཁུ་བའི་རང་སྐྱུར་ནི། །ཡུད་ཙམ་བཏགས་ནས་སྐྱུར་གྱུར་པ། །བླུགས་ན་བད་རླུང་ཤས་ཆེ་སེལ། །རྟོགས་པར་སླ་ལ་བྱུག་དང་བསྐུ། །བླུགས་དང་ལུས་ནི་བཅིང་བས་གསོ། །རྟོགས་དཀའ་མས་གཏོང་དྲག་པོ་དང༌། །བཀྲུ་སྨན་སྣུམ་ནི་བླུད་པས་གསོ། །བད་རླུང་ཤས་ཆེར་དྲོ་འཇམ་སྦྱར། །དེ་ལ་བྱུགས་སྩོགས་གྲང་མོ་ཡིས། །ལུས་ཚ་ན་ཞིང་གཡའ་ཞིང་སྤངས། །སྲ་བ་རྣམ་པར་འཕེལ་བར་འགྱུར། །ཁྲག་མཁྲིས་ཤས་ཆེའི་དྲེག་ནང་ལ། །བྱུག་པ་ལ་སོགས་བསིལ་བས་བྱ། །དྲོ་བས་ཚ་ཞིང་ན་ལ་དམར། །རྡུལ་འབྱུང་གས་པར་འབྱུང་བར་འགྱུར། །ཤིང་མངར་སྲང་བརྒྱ་བསྐོལ་བ་ཡི། །ཁུ་བ་བཞི་ཆ་ལུས་པ་རུ། །ཏིལ་མར་བྲེ་བཞི་འོ་མ་མཉམ། །ཏིར་མུར་བ་
ཏ་མ་ལ། །ཉེའུ་ཤིང་ཨ་གར་པ་ཡ་སྱ། །ཙནྡན་ཧཾ་ས་བ་ཏི་དང༌། །སྤང་སྤོས་སླེ་ཏྲེས་མེ་ད་གཉིས། །ར་མཉེ་བ་གཉིས་ཤུ་ཏི་དང༌། །ཤུག་པ་རྣམ་གཉིས་ཛི་བན་ཏི། །ཛི་བ་ཀ་དང་བི་ཤ་བ། །ཤིང་ཚ་གནྡྷ་བྷ་དྲ་དང༌། །ཆུ་སྲིན་སིན་མོ་བ་ལེ་ཀ །བཙོད་དང་པྲ་པུཎྜ་རི་ཀ །ཤི་རི་བ་དང་བི་ལ་ཤ་།ཀུ་ཏན་ན་ཏ་སྲང་རེ་ཡི། །ལྡེ་གུར་བཅས་པ་བསྐོལ་བར་བྱ། །སྦྱོར་བ་བཞི་པོས་དྲེག་ནད་ཀྱི། །མཁྲིས་པའི་རྩ་བ་རིམས་ནད་སེལ། །བ་ལའི་ཁུ་བ་ལྡེ་གུ་དང༌། །ཏིལ་མར་འོ་མ་ཆ་མཉམ་བསྐོལ། །ལན་བརྒྱའི་བར་དུ་བསྐོལ་བ་དེ། །དྲེག་ནད་རླུང་ཅན་སེལ་བར་བྱེད། །བཅུད་ཀྱིས་ལེན་གྱི་དམ་པ་སྟེ། །དབང་པོ་གསལ་བར་བྱེད་པ་ཡིན། །ཚེ་རིང་ལུས་འཕེལ་སྐད་སྙན་དང༌། །ཁུ་ཆུ་ཁྲག་གི་ནད་སེལ་བྱེད། །རྒྱུ་བའི་ལམ་འགགས་འཁྲུགས་གྱུར་པས། །ཚིལ་ལམ་བད་ཀན་ཤིན་ཏུ་ནི། །འཕེལ་བར་གྱུར་པའི་རླུང་ནད་ལ། །སྣུམ་རྟས་དང་བོར་ཕན་པ་ཡིན། །དེར་ནི་ཕྱུག་པོའི་རླུང་ནད་ཀྱི། །གསོ་བྱ་དྲེག་ནད་གསོ་བར་བྱ། །ཁྲག་ནི་དངས་པར་བྱེད་པ་ཡི། །སྣུམ་དང་སྨན་གྱི་སྦྱོར་བ་བྱ། །སྲོག་སྩོགས་རླུང་ནི་ཅིག་ཅར་འཁྲུགས། །ཇི་སྐད་བསྟན་དང་ནད་གཞི་བཞིན། །ཇི་ལྟར་ཉེ་བར་སྨན་རྣམས་ནི། །ནང་ཚུལ་ཇི་བཞིན་སྦྱིན་པར་བྱ། །མ་ཞུ་བཅས་ལ་དུགས་དང་སྨྱུང༌། །སྨིན་བྱ་རྩུབ་སྨན་བྱུག་པ་དང༌། །རླུང་སྩོགས་ཀྱིས་ནི་མ་ཞུ་བསལ། །བྱས་ལ་མ་འདྲེས་རླུང་གསོ་བྱ། །སྐེམ་དང་བྱ་རྨྱང་ཡན་ལག་འཁུམས། །རེངས་དང་འདར་བུ་ཚོར་བ་མེད། །འགྲམ་ཉམས་ཁ་ཡོ་འཐེད་པོ་དང༌། །ཞ་བོ་དྲེག་ནད་ཀྱིས་འཐེང་དང༌། །ཚིགས་འཁྲུལ་གཞོགས་ཕྱེད་ན་བ་དང༌། །ཚིགས་དང་རྐང་རུས་ལ་ཞུགས་ནད། །འདི་དག་གནས་ནི་གཏིང་རིངས་པས། །དེ་བས་འདི་དག་གསར་བཏབ་དང༌། །བླ་བརྣན་མེད་ཅིང་ཉམས་སྟོབས་ལྡན། །འབད་ན་འཚོ་ཡི་གཞན་དུ་མིན། །མཁྲིས་འདྲེས་རླུང་ལ་གྲང་དྲོ་ཡི། །གསོ་བའི་རིམ་གྱིས་མང་དུ་བྱ། །འཚོ་བྱེད་སྡེ་དང་བསྐོལ་བ་ཡི། །སྨན་མར་དག་ཀྱང་བླུད་པར་བྱ། །སྐམ་སའི་ཤ་དང་སཱ་ལུ་ནས། །བཀྲུ་སྨན་འོ་མར་བཅས་འཇམ་གཏང༌། །རྩ་བ་ལྔ་དང་བ་ལར་བསྐོལ། །འོ་མ་མས་
གཏོང་སྦྱོར་བ་བྱ། །སྨན་མར་བསྐོལ་བའི་ཏིལ་མར་གྱི། །འཇམ་རྩི་དུས་སུ་གཏང་བར་བྱ། །ཤིང་མངར་བ་ལ་ཏིལ་མར་དང༌། །མར་དང་འོ་མ་བསྐོལ་བ་བླུགས། །རྩ་བ་ལྔ་ཡི་ཁུ་བའམ། །ཆུ་ནི་གྲང་མོ་ཉིད་བླུགས་བྱ། །བད་ཀན་བཅས་ལ་ནས་ཀྱི་ཟན། །སྐམ་སའི་རི་དྭགས་བྱ་ཡི་ཤ་།དུགས་དང་མས་གཏོང་བཀྲུ་སྨན་ནོ། །སློན་སྨན་བཀྲུ་སྨན་བཅས་པ་གཏང༌། །མར་རྙིང་ཏིལ་མར་ཉུངས་ཀར་ལས། །བྱུང་བའི་མར་ནི་བླུད་པར་བྱ། །བད་ཀན་མཁྲིས་པ་འདྲེས་པ་ལས། །དང་པོ་མཁྲིས་པ་གསོ་བར་བྱ། །ཁྲག་དང་འདེས་པ་དྲེག་ནད་ཀྱི། །གསོ་བ་ཇི་སྐད་བཤད་པར་བྱ། །དུགས་བསྐུ་ཤ་ཁུ་འོ་མ་དང༌། །སྣུམ་དང་བཅས་པས་ཤ་བཀྲ་སེལ། །ཕྱུག་པོའི་རླུང་ལ་གཅིན་སྙི་དང༌། །ཚིལ་དང་རླུང་འཇོམས་སྨན་གྱིས་གསོ། །རུས་པ་རྐང་གནས་སྣུམ་ཆེན་གྱིས། །ཁུ་ཆུར་གནས་ལ་སྔར་བཤད་པའི། །ཟས་དང་འདྲེས་ལ་འཇུ་བྱེད་དང༌། །དྲོད་སྐྱེད་སྐྱུག་སྨན་ཡང་བ་གཏང༌། །གཅིན་འདྲེས་གཅིན་ནི་འཕེལ་བ་དང༌། །དུགས་དང་འཇམ་རྩི་གོང་མས་གསོ། །བཤང་འདྲེས་ཨེ་རཎྜའི་མར་དང༌། །འཇམ་རྩི་སྣུམ་ནི་འཁྲུ་བྱེད་ཕན། །ལུས་ཟུངས་ཀུན་ཞུགས་རླུང་ནད་ལ། །བད་ཀན་མཁྲིས་པར་མི་གནོད་དང༌། །གང་ཡང་རླུང་ནི་བདེར་རྒྱུ་བའི། །སྨན་དེ་རླུང་ནད་དེ་ལ་གཏང༌། །འཁྲུ་བར་མི་བྱེད་སྣུམ་པ་དང༌། །རྩ་རྒྱུན་སྦྱོང་བར་བྱེད་པ་དང༌། །མས་གཏོང་བས་ནི་མངར་བ་དང༌། །སྣུམ་གྱི་འཇམ་རྩིས་གསོ་བར་བྱ། །ཉམས་སྟོབས་ཅི་ཡོད་བརྟགས་ནས་ནི། །བཀྲུ་སྨན་འཇམ་པོ་གཏང་བར་བྱ། །བཅུད་ཀྱིས་ལེན་ནི་ཐམས་ཅད་ཀྱི། །སྦྱོར་བ་དག་ཀྱང་བསྔགས་པ་ཡིན། །མཆོག་ཏུ་བྲག་ཞུན་སྦྱོར་བ་དང༌། །དེ་བཞིན་གུ་གུལ་ཉི་ཚེ་འམ། །ཁ་ར་སྲང་སྟོང་ཆིག་བརྒྱར་བཅས། །པ་ཝ་སངས་བཤད་ལྡེ་གུའང་ཕན། །ཐུར་སེལ་འདྲེས་ལ་དྲོད་བསྐྱེད་དང༌། །འཁྲུག་རྩོད་རླུང་ནི་བདེར་རྒྱུ་བྱེད། །གཅིན་གྱི་གནས་ནི་སྦྱོང་བྱེད་པའི། །སྨན་རྣམས་དེ་ལ་གཏང་བར་བྱ། །དེ་ལྟར་སྲོག་ལ་སོགས་པ་ཡི། །འདྲེས་པའི་གསོ་བ་མདོར་བཤད་
ཡིན། །སྨན་པས་དེ་གསོ་རྒྱས་པར་ནི། །བློ་ཡིས་བརྟགས་ཏེ་ཅི་རིགས་བྱ། །སྟོད་དུ་རྒྱུ་བའི་སྤྱི་བོར་བསྡུ། །ཐུར་སེལ་དེ་ལས་བཟློག་པར་བྱ། །མེ་དང་མཉམ་གནས་མཉམ་པར་བྱ། །ཁྱབ་བྱེད་གསུམ་དུ་སྦྱར་བར་བྱ། །བཞི་བོ་བས་ཀྱང་སྲོག་བསྲུང་སྟེ། །དེར་གནས་ན་ནི་ལུས་གནས་འགྱུར། །དེ་ལྟར་རླུང་ནི་ལམ་གཞན་ཞུགས། །རང་རང་གི་ནི་གནས་སུ་གཞག །ཁྲག་མཁྲིས་འདྲེས་པ་མ་གཏོགས་པར། །འདྲེས་པའི་ནད་ནི་ཐམས་ཅད་ལ། །བཅུད་ཀྱིས་ལེན་གྱི་ཆོ་ག་བཞིན། །སྒོག་སྐྱ་བསྟེན་ན་སེལ་བར་བྱེད། །མཁྲིས་པར་འདྲེས་ལ་མཁྲིས་སེལ་བས། །རླུང་ནི་བདེ་བར་རྒྱུ་བར་བྱ། །ཁྲག་དང་འདྲེས་ལ་དེ་ཉིད་དང༌། །འཐེད་པའི་ནད་བཤད་སྨན་བྱའོ། །ཁྲག་མཁྲིས་རླུང་ནི་སེལ་བ་ཡི། །བཅུད་ཀྱིས་ལེན་ནི་སྣ་ཚོགས་སྦྱར། །ནད་གཞི་ཇི་ལྟར་བསྟན་པ་བཞིན། །གསོ་བ་དེ་ལྟར་ཡང་དག་བཤད། །ཉམ་ཐག་འཕྲལ་དུ་སེལ་བ་འདི། །ཚེ་ཡི་རིག་བྱེད་གནས་འབྲས་བུ། །གསོ་བ་ཕན་པ་གནོད་སེལ་དང༌། །སྦྱོར་བ་སྨན་དང་རྩི་དང་ནི། །ཞི་བར་བྱེད་དང་སྔགས་བྱ་སྟེ། །དེ་དག་སྨན་མིང་རྣམ་གྲངས་ཡིན། །ཡན་ལག་བརྒྱད་པའི་སྙིང་པོ་བསྡུས་པ་ལས། གསོ་བའི་གནས་ཀྱི་ལེའུ་ཉི་ཤུ་རྩ་གཉིས་པའོ།། །།ཡན་ལག་བརྒྱད་པའི་སྙིང་པོ་བསྡུས་པ་ལས། གསོ་བའི་གནས་ཏེ་གནས་བཞི་པ་རྫོགས་སོ།། །།དེ་ནས་སྐྱུག་སྨན་གྱི་ཆོ་ག་བཤད་པར་བྱའོ། །དེ་ཡང་རྒྱུན་ཤེས་ཀྱི་བུ་ལ་སོགས་པ་དྲང་སྲོང་ཆེན་པོ་རྣམས་ཀྱིས་འདི་ལྟར་བཤད་དེ། སྐྱུག་སྨན་མཆོག་ནི་པོ་སོན་ཆ། །དུར་བྱིད་རྩ་བ་བཀྲུ་སྨན་མཆོག །གཞན་དག་ནད་ཀྱི་དབང་ལས་ནི། །ཁྱད་པར་དུ་ནི་གྱུར་པ་ཡིན། །པོ་སོན་ཆ་དེ་མདོག་སྐྱ་ཞིང༌། །ཤིན་ཏུ་སྔོ་བའང་མ་ཡིན་པ། །ཉིན་ཞག་ཚེས་གྲངས་ཤིས་པ་ལ། །སོས་ཀ་དཔྱིད་ཀྱི་མཚམས་སུ་བཏུ། །ཕྱིས་ནས་འཇག་མའི་སྣོད་དུ་ནི། །བཅུག་སྟེ་བཅིངས་ལ་བ་ལང་གི །ལྕི་བས་སྣོད་དུ་བྱུགས་ནས་ནི། །འབྲུ་ཡི་ནང་དུ་གཞག་པར་བྱ། །འཇག་མས་དཀྲིས་པས་འཇམ་པ་དང༌། །སྦྲང་རྩི་ལྟ་བུ་དྲི་ཞིམ་ལ། །
ཞག་བརྒྱད་འདས་པར་གྱུར་པ་དང༌། །ཕྱུང་སྟེ་དེ་ཉིད་ཉི་མར་བསྐམ། །དེ་འོག་ལེགས་པར་བསྐམས་པ་དང༌། །ནང་གི་འབྲས་བུ་ཕྱུང་ནས་ནི། །ཞོ་དང་ཞོ་ག་ཆུ་མར་གྱི། །ལྡེ་གུར་མཉེས་ལ་སླར་ཡང་བསྐམ། །དེ་ནས་ལེགས་པར་སྦས་ཏེ་གཞག །དགོས་པའི་དུས་སུ་སྦྱར་བར་བྱ། །དེ་ནས་དེ་ལ་ཚད་ཙམ་དུ། །བླངས་ནས་ཆམ་ཆོམ་བརྡུངས་ནས་ནི། །ཤིང་མངར་གོ་བྱེ་བི་ད་རའམ། །བིམ་བ་ལྕང་མ་སླེ་སྨན་ཏ། །བུམ་ཏི་ཨ་པ་མརྒ་དང༌། །ཨརྒ་གང་ཡང་རུང་བ་ནི། །བསྐོལ་བའི་ཆུ་ཡི་ནང་དུ་ནི། །ནུབ་གཅིག་ལེགས་པར་སྤང་བར་བྱའོ། །དེ་ནས་སྨན་གྱི་ཁུ་བ་དེ། །མཉེས་ཤིང་བཙགས་ལ་ནང་པར་ནི། །མདོ་ནས་བསྟན་པའི་ཆོ་ག་བཞིན། །ལེགས་པར་བླུད་ནས་སྐྱུག་ཏུ་གཞུག །བད་ཀན་ལས་བྱུང་རིམས་ཚམ་པ། །སྐྲན་དང་ཁོང་འབྲས་རྣམས་ལ་ནི། །ཇི་སྲིད་མཁྲིས་པ་སྣང་གི་བར། །ཁྱད་པར་དུ་ཡང་སྐྱུག་ཏུ་གཞུག །པོ་སོན་ཆ་ཡི་འབྲས་བུ་ནི། །ཕྱེ་མ་བསྐོལ་བའི་ཁུ་བར་ནི། །འབྲས་བུ་གསུམ་ཕྱེ་ཆ་གསུམ་བཏབ། །ཀོ་བི་དར་སྩོགས་ཁུར་བཅས། །བླུད་ན་རིམས་དང་དམུ་རྫིང་དང༌། །རྨེན་བུ་འབྲས་དང་འབྲུམ་ཆེན་དང༌། །གཏུན་འདྲའི་རླུང་ནད་སེལ་བར་བྱེད། །མཁྲིས་པ་བད་ཀན་གནས་ཞུགས་ལ། །ཛི་མུ་ཏ་སོགས་ཁུ་བ་བླུད། །སྙིང་ཚ་ཁྲག་མཁྲིས་དག་ལ་ན། །དེ་འབྲས་འོ་མར་བསྐོལ་བ་ཡི། །འོ་ཐུག་བཅས་པ་བླུད་པར་བྱ། །བད་ཀན་ལས་གྱུར་སློན་བྲོ་དང༌། །ཆམ་པ་མུན་འཐིབས་བྱེད་པ་ལ། །དེ་བསྐོལ་འོ་མ་ལས་བྱུང་བའི། །ཞོ་ཡི་སྤྲིས་མའམ་ཞོ་བླུད་བྱ། །པོ་སོན་ཆ་སོགས་ལྡེ་གུ་དང༌། །བསྐོལ་བའི་འོ་མ་ལས་བྱུང་བའི། །མར་སར་བད་ཀན་གྱིས་དྲོད་ཉམས། །ལུས་སྐམ་པ་ལ་སྐྱུག་སྨན་བྱ། །པོ་སོན་ཆ་ཡི་ཁུ་བ་ནི། །བསྲེ་ཞིང་ཆོ་གས་བཙགས་ནས་ནི། །གཟར་བུར་ཆགས་པའི་བར་དུ་བསྐོལ། །བྱིན་ལ་དེ་བས་སྐྱུག་ཏུ་གཞུག །ལྡེ་གུ་དེའམ་དེའི་ཁུ་བ། །བཟའ་དང་བཏུང་བར་སྦྱར་ཏེ་གཏང༌། །པོ་སོན་ཆ་ཡི་འབྲས་བུའི་ཁུ། །དུག་མོ་ཅུང་སོགས་སྡེ་ཚན་བཏབ། །ནིམ་པ་ཨརྐ་གང་ཡང་
རུང། །བསྐོལ་བའི་ཁུ་བར་བཅས་པ་ནི། །བླུད་ན་ཉམས་བརྟས་ལས་བྱུང་ནད། །གཏིང་ཟུག་ཀུན་ཀྱང་སེལ་བར་བྱེད། །པོ་སོན་ཆ་ཡི་མེ་ཏོག་ནི། །ཞིབ་བཏགས་ཕྲེང་བསྒོས་བསྣམས་ནས་ནི། །ཐུག་པ་ཤ་ཁུ་སོགས་ངོ་མས་བླུད། །སྐྱིད་དེ་བ་ནི་བདེར་སློན་གཞུག །བོ་སོན་ཆ་མེད་མེ་ཏོག་དང༌། །འབྲས་བུ་གཞོན་ནུ་དེ་བཞིན་སྦྱར། །ཛི་མུ་ཏ་སོགས་དེ་དང་འདྲ། །ཛི་མུ་ཏ་ནི་ཁྱད་པར་དུ། །རིམས་དང་ལུད་པ་དབུགས་མི་བདེ། །སྐྱིགས་བུ་ལ་སོགས་ནད་ལ་གཏང༌། །འདི་ཡི་མེ་ཏོག་འོ་མར་བཙོས། །འབྲས་བུ་སྨིན་པ་འོ་ཐུག་བཅས། །སྤུ་བཅས་འོ་མའི་སྤྲིས་མར་སྦྱར། །སྦུ་མེད་ཞོ་ཡི་སྤྲིས་མར་སྦྱར། །སྐྱ་བ་འམ་སྔོར་གྱུར་འོ་མར་བཅུག །ཞོ་ནི་སྐྱུར་པོར་གྱུར་པའམ། །མནན་པའི་ཆང་གི་དངས་མར་ནི། །མཉེས་ཏེ་ཞུ་བར་གྱུར་པ་བླུད། །བད་ཀན་ལུད་པ་ཡི་ག་འཆུས། །སྐྱ་རྦབ་གཅོང་ཆེན་ནད་ལ་གཏང༌། །ཀུ་བ་ཀོ་ཤ་ཏ་ཀི་ཡང༌། །སྦྱོར་བའི་ཆོ་ག་འདི་ཉིད་བྱ། །སྨིན་ཞིང་བསྐམས་པར་གྱུར་པ་ཡི། །ཛི་མུ་ཏ་ཡི་འབྲས་བུ་དག །ཕྱེ་མ་སྲང་ཕྱེད་འོ་མར་བསྲེས། །རླུང་མཁྲིས་ནད་ཀྱིས་ཉེན་ལ་བླུད། །ཛི་མུ་ཏ་འབྲས་གཉིས་སམ་གསུམ། །བརྡུངས་པ་དེ་ཡི་ཁུ་བ་ནི། །དོང་ག་ལ་སོགས་དགུ་པ་ནི། །གང་ཡང་རུང་བ་ལ་སྤངས་ཏེ། །མཉེས་ལ་བཅགས་པར་གྱུར་པ་དག །བད་ཀན་མཁྲིས་རིམས་ཅན་ལ་བླུད། །ཛི་མུ་ཏ་ཡི་ཕྱེ་མའམ། །ལྡེ་གུ་ཆུ་གྲང་སྦྱར་བ་དག །མཁྲིས་རིམས་ཅན་བླུད་བད་ཀན་དང༌། །རླུང་འདྲེས་རིམས་ལ་ཆུ་དྲོན་སྦྱར། །ལུད་པ་དབུགས་མི་བདེ་དང་དུག །སློན་རིམས་བད་ཀན་གྱིས་ཉེན་དང༌། །མུན་འཐིབས་བྱེད་པའི་ནད་ལྡན་ལ། །ཀུ་བ་ཁ་བོའི་སྐྱུག་སྨན་བསྔགས། །དེ་ནི་མེ་ཏོག་འབྲས་བུ་མེད། །མྱུ་གུ་གཞོན་ནུ་འོ་མར་བཙོས། །བད་ཀན་མཁྲིས་པ་ལས་གྱུར་རིམས། །མཁྲིས་པ་ཤས་ཆེར་གྱུར་ལ་བླུད། །འབྲས་བུ་སྨིན་པའི་ནང་གི་ནི། །འབྲས་བུ་ཕྱུང་སྟེ་འོ་མ་བཅུག །ཞོར་གྱུར་ལུད་པ་དབུགས་མི་བདེ། །བླུད་དེ་སློན་དུ་གཞུག་པར་བྱ། །འབྲས་བུའི་ནང་ན་ཞོ་ག་ཆུ། །མཛེ་དུག་སྐྱ་རྦབ་ཉིད་ལ་བླུད། །དེ་དང་དར་བ་
བསྐོལ་བ་ནི། །རྒྱམ་ཚ་སྦྲང་རྩིར་བཅས་པ་བླུད། །ཡང་ན་དེ་ཡི་ས་བོན་ནི། །ར་ཡི་འོ་མར་བཅས་པ་དག །དུག་སྐྲན་དམུ་རྫིང་རྨེན་བུ་དང༌། །འབྲས་དང་རྐང་བམ་ནད་ལ་བླུད། །བད་ཀན་ལས་གྱུར་ལུད་པ་རིམས། །ལྐོག་མའི་ནད་དང་མ་ཞུ་ལ། །ཀུ་བ་ཁ་བོའི་ཁུ་བ་ནི། །ཕྱེ་དང་སྦྱར་བའི་སྐྱོ་མ་བླུད། །སྐྲན་དང་རིམས་རྙིང་བྱིང་བ་ལ། །ལྡེ་གུ་ཤ་ཁུར་སྦྱར་བླུད་ན། །ལེགས་པ་ཁོ་ནར་སློན་གྱུར་ཞིང༌། །ཉམ་ཆུང་བར་ཡང་འགྱུར་མ་ཡིན། །ཀུ་བ་ཁ་བོའི་མེ་ཏོག་དང༌། །འབྲས་བུ་ཕྱེ་མས་བསྒོས་པ་ཡིས། །མེ་ཏོག་ཕྲེང་བ་མནམ་པ་ནི། །སྐྱིད་དེ་བ་ཡི་སྐྱུག་སྨན་ཡིན། །སྐྲན་ལུད་དམུ་རྫིང་ལྐོག་མའི་ནད། །བད་ཀན་གནས་ལ་བརྟེན་པའི་རླུང༌། །བད་ཀན་ཁ་དང་མགྲིན་པར་གནས། །བད་ཀན་འཕེལ་བར་གྱུར་པ་དག །བརྟན་ཞིང་དཀྱེལ་ནི་སྐྱེས་པ་ལ། །ཀོ་ཤ་ཏ་ཀའི་སྐྱུག་སྨན་བསྔགས། །འཚོ་བྱེད་ཉེའུ་ཤིང་ཟངས་རྩི་བ། །ཁ་སྲལ་ཕྲེའུ་རམ་ཉེ་གཉིས། །ཤྲ་བ་དང་ནི་མེ་ད་དང༌། །མ་ཧཱ་མེ་ད་མ་དུ་ལི། །འདི་དག་རེ་རེའི་ཕྱེ་མ་དང༌། །ཀོ་ཤ་ཏ་ཀའི་ཕྱེ་མར་བཅས། །སྦྲང་རྩི་ཁ་རར་སྦྱར་བ་ནི། །ལུད་པ་སྙིང་ནི་ཚལ་བསྔགས། །དེ་རྗེས་ཆུ་དྲོན་བླུད་པ་ནི། །བད་ཀན་མཁྲིས་ཚ་ལྡན་ལ་བསྔགས། །འུ་སུ་གཡེར་མའི་ཁུ་བ་དང༌། །དེ་ཡི་ཁུ་བས་དུག་འཇོམས་སོ། །བིམ་པ་ཀ་ས་མརདའམ། །བ་སྦུ་བ་ཡི་ཁུ་བར་ནི། །ར་ཛ་གོ་ཤ་ཏ་ཀ་ཡི། །རྡོག་མ་གཅིག་གམ་གཉིས་མཉེས་པའི། །དངས་མ་སྙིང་གི་ནད་ལ་བླུད། །དེ་བསྐོལ་འོ་མ་ལས་བྱུང་མར། །བོ་སོན་ཆ་སྩོགས་བསྐོལ་བ་བླུད། །ཀོ་ཤ་ཏ་སོགས་ཁ་དང་ཚ། །མཛེ་དང་སྐྱ་རྦབ་མཆེར་པའི་ནད། །འོར་ནད་སྐྲན་ནད་སྦྱར་དུག་སོགས། །གཏིང་ཟུག་པ་ལ་བསྔགས་པ་ཡིན། །པོ་སོན་ཆ་སོགས་དྲུག་སོ་སོར། །བསྐོལ་བ་དང་ནི་རླན་ཅན་ཤ། ཀོ་ཤ་ཏ་ཀ་ཆ་མཉམ་བསྐོལ། །ཁུ་བ་རྒྱམ་ཚར་བཅས་པ་བླུད། །པོ་སོན་ཆ་སོགས་པི་པི་ལིང༌། །ཆ་མཉམ་ཀོ་ཤ་ཏ་ཀར་སྦྱར། །ཡང་ན་ཀོ་ཤ་ཏ་ཀ་ཡི། །ཁུ་བ་བུ་རམ་ཤིང་ཁུ་བླུད། །དུག་མོ་ཉུང་ནི་སྐྱིད་དེ་བ། །བད་ཀན་མཁྲིས་པ་ཁྲག་བཅས་དང༌། །རིམས་དང་ཤུ་
བ་སྙིང་ནད་དང༌། །དྲེག་ནད་ཀྱིས་འཐེང་མཛེ་ལ་བསྔགས། །དུག་མོ་ཉུང་གི་ས་བོན་དེ། །ཉུངས་ཀར་རམ་ནི་མ་དུ་ཀི། །བསྐོལ་བའི་ཁུ་བའམ་རྒྱམ་ཚའི་ཆུ། །ཡང་ན་ཀྲི་ས་ར་ལྡན་བླུད། །དེ་ཡི་ས་བོན་ཨརྐ་ཡི། །འོ་མར་ཞག་བདུན་སྦངས་པ་ནི། །པོ་སོན་ཆ་དང་ཛི་མུ་ཏ། །ཀུ་བ་ཁ་བོ་ཛི་བན་ཏི། །ཛི་བ་ཀ་ནི་བསྐོལ་བ་ཡི། །ཁུ་བ་གང་ཡང་རུང་བ་བླུད། །སྐྱུག་སྨན་གྱི་ནི་གཙོ་བོ་ཡི། །ཆོ་ག་ཕྱོགས་ཙམ་བཤད་པ་ཡིན། །བློ་དང་ལྡན་པ་ཚུལ་འདི་ཡིས། །གཞན་ཡང་ཅི་རིགས་སྦྱར་བར་བྱ། །ཡན་ལག་བརྒྱད་པའི་སྙིང་པོ་བསྡུས་པ་ལས། ཆོ་ག་གྲུབ་པའི་གནས་ཀྱི་ལེའུ་སྟེ་དང་པོའོ།། །།དེ་ནས་བཀྲུ་སྨན་བྱ་བའི་ཆོ་གའི་ལེའུ་བཤད་པར་བྱའོ། །དུར་བྱིད་བསྐ་ཞིང་མངར་ལ་རྩུབ། །ཞུ་རྗེས་ཚ་བར་གྱུར་པ་ཡིན། །བད་ཀན་མཁྲིས་པ་ཞི་བྱེད་དེ། །རྩུབ་པས་རླུང་ནི་འཁྲུགས་པར་བྱེད། །དེ་འདིར་སྨན་གྱི་སྦྱོར་བ་ཡིས། །རླུང་དང་མཁྲིས་པ་བད་ཀན་སེལ། །ཆོ་གའི་ཁྱད་པར་ལ་བརྟེན་ནས། །ནད་ཀུན་འཇོམས་པར་བྱེད་པ་ཡིན། །དུར་བྱིད་རྣམ་པ་གཉིས་སུ་བཤད། །དེ་རྩ་དམར་ནག་དཀར་བ་ཡིས། །རྣམ་པ་གཉིས་སུ་བཤད་པ་ཡིན། །དེ་ལས་ཏྲི་བྱི་ཏ་མཆོག་ཏུ་བཤད། །ཉེས་པ་མེད་ཅིང་བདེ་བར་འཁྲུ། །བརྒྱལ་རྨོངས་བྱེད་ཅིང་ལྐོག་མ་ནི། །རྩུབ་ཅིང་གནོད་པར་བྱེད་པ་དང༌། །རྣོ་ཞིང་མྱུར་དུ་འཁྲུ་བྱེད་པ། །ལྟོ་སྲ་ནད་གཞི་ཤས་ཆེ་དང༌། །སྡུག་བསྔལ་གྱིས་ཉེན་ནད་པ་ལ། །ཤ་མ་དུར་བྱིང་བསྔགས་པ་ཡིན། །དེ་ནི་ཟབས་སུ་ཟུག་ཅིང་འཇམ། །ཐད་ཀར་འཕྲོས་པ་མ་ཡིན་པ། །བཏུས་ལ་སྙིང་པོ་བོར་ནས་ནི། །ཤུན་པ་སྐམས་ཏེ་སྦ་བར་བྱ། །དེ་ནས་དེའི་འོག་དེའི་ཕྱེ་མ། །རྒྱམ་ཚ་དོང་ག་ཅུང་ཟད་བཏབ། །རླུང་ནད་ལ་ནི་སྐྱུར་ལས་བླུད། །མཁྲིས་པར་སྦྲང་རྩི་ཁ་ར་མར། །འོ་མ་རྒུན་འབྲུ་བུ་རམ་ཤིང༌། །ཁུ་བ་ཏང་པ་ལ་མངར་བ་ཡི། །སྨན་དེའི་འབྲས་བུ་གསུམ་གྱི་ནི། །ཁུ་བར་བཅས་པ་བླུད་པར་བྱ། །བད་ཀན་ནད་ལ་པི་ལུ་ཡི། །ཁུ་བ་བ་གཅི་ན་ཆང་སྐྱུང་རྩབས། །ཚ་བ་ལྔ་སོགས་ཕྱེ་མ་ནི། །བད་ཀན་འཇོམས་དང་ཅི་རིགས་སྦྱར། །དུར་བྱིད་ལྡེ་གུ་ཁུ་བ་
དང། །བསྐོལ་བའི་ཁུ་བ་བསྒྲངས་ཁར། །སྦྲང་རྩི་དྲི་བཟང་གསུམ་དང་བཅས། །ལྡེ་གུ་ཡིད་འོང་བཀྲུ་སྨན་ཡིན། །ཨ་ཛ་གནྡྷ་སྨིག་རྐང་དང༌། །ཀ་ར་དུར་བྱིད་བི་ད་རི། །ཕྱེར་བཏགས་སྦྲང་རྩི་མར་དང་ནི། །ལྡེ་གུ་བྱིན་ན་འདུས་པ་དང༌། །རིམས་དང་ལུས་རེངས་ཚ་བ་དང༌། །སྐོམ་དད་ཀྱིས་གཟེར་ལེགས་པར་འཁྲུ། །བུ་རམ་ཤིང་ནི་ཚལ་པར་བཀས། །ནང་ངོས་དུར་བྱིད་ལྡེ་གུས་བསྐུ། །གཅིག་ཏུ་སྦྱར་ཏེ་ཕུར་མ་ཡིས། །བཙོ་བའི་ཚུལ་བྱས་དེ་བཟའ་བྱ། །ཤིང་ཚ་སུག་སྨེལ་མཉམ་ནི་ལི། །དེ་མཉམ་དུར་བྱིད་ཤ་ཀ་ར། །ཕྱེ་མ་སྦྲང་རྩི་རྒུན་ཆུ་དང༌། །ཕྱེ་དང་སྐྱོ་མར་སྦྱར་ཏེ་བླུད། །རླུང་མཁྲིས་བད་ཀན་ལས་གྱུར་དང༌། །མེ་དྲོད་ཆུང་བའི་ནད་དང་ནི། །སྐྱིད་དེ་བ་ཡི་མི་རྣམས་ལ། །གནོད་པ་མེད་པའི་བཀྲུ་སྨན་ཡིན། །བྱི་དང་ག་ཡི་སྙིང་པོ་དང༌། །འབྲས་བུ་གསུམ་ཞེས་བྱ་བ་དང༌། །ཡ་བཀྵ་ར་པི་པི་ལིང༌། །དུར་བྱིད་ཀུན་གྱི་ཆ་ཕྱེད་བྱས། །སྦྲང་རྩི་མར་རམ་བུ་རམ་གྱིས། །ལྡེ་གུར་བྱས་པ་བྱིན་ན་ནི། །སྐྲན་དང་མཆེར་པ་དམུ་རྫིང་དང༌། །གཟུགས་འཁུམས་ལུད་པ་ཡི་ག་འཆུས། །རླུང་དང་བད་ཀན་ལས་གྱུར་ནད། །མང་པོ་གཞན་དག་སྦྱོང་བར་བྱེད། །པི་པི་ལིང་རྩ་བྱི་དང་ག །འབྲས་བུ་གསུམ་དང་འུ་སུ་དང༌། །ཙི་ཏྲ་ཀ་དང་ན་ལེ་ཤ་མ། །པི་པི་ལིང་དང་དུག་མོ་ཉུང༌། །ཟི་ར་ཧསྟི་པི་པི་ལིང། །ཏི་མུ་ས་དང་ལན་ཚྭ་ལྔ། །ཞོ་ནི་གཉིས་གཉིས་ཕྱེ་མར་བྱས། །དུར་བྱིད་དང་ནི་ཏིལ་མར་གཉིས། །སྲང་ནི་བརྒྱད་བརྒྱད་ཆར་བསྲེས་དང༌། །སྐྱུ་རུ་རའི་ཁུ་བྲེ་གསུམ་དང༌། །བུ་རམ་སྲང་ནི་ལྔ་བཅུ་མེ། །ཆུར་བསྐོལ་དེ་ལས་རན་ཙམ་ནི། །ཟོས་ན་མཛེ་དང་གཞང་འབྲུམ་དང༌། །མིག་སེར་ཟ་ཁུ་སྐྲན་དང་ནི། །དམུ་རྫིང་མཚན་བར་རྡོལ་བ་དང༌། །ཕོ་བའི་ནད་དང་སྐྱ་རྦབ་རྣམས། །འཇོམས་ཤིང་ཆོ་ག་བསྲུང་མི་དགོས། །བུ་སྐྱེད་པར་ཡང་དེ་ཡིས་བྱེད། །བུ་རམ་དགེ་བ་ཅན་ཞེས་བྱ། །དུས་ཀུན་དུ་ནི་འཕྲོད་པ་ཡིན། །ཚ་བ་གསུམ་དང་དྲི་སྣ་གསུམ། །གླ་སྒང་དང་ནི་བྱི་དང་ག །སྐྱུ་རུ་ར་ནི་དེ་ཐམས་ཅད། །མཉམ་པའི་དུར་བྱིད་
ཁ་ར་དང༌། །སྦྲང་རྩིའི་རི་ལུ་བྱས་ཟོས་ན། །གཅིན་སྲི་རིམས་དང་སློན་བྲོ་དང༌། །ལུད་པ་ཤ་སྐེམ་མགོ་འཁོར་དང༌། །ཟད་བྱེད་ལུས་ཚ་སྐྱ་རྦ་བ་དང༌། །མེ་དྲོད་ཆུང་དང་དུག་ནད་སྦྱོང༌། །དུར་བྱིད་དུག་མོ་ཉུང་ས་བོན། །བི་པི་ལིང་དང་བཅའ་སྒ་རྣམས། །སྦྲང་རྩི་རྒུན་འབྲུ་ཆུར་སྦྱར་བ། །དབྱར་གྱི་དུས་ཀྱི་བཀྲུ་སྨན་ཡིན། །དུར་བྱིད་གླ་སྒང་བྱི་ཚེར་བ། །ཁ་ར་ཙནྡན་བ་ལེ་ཀ །ཤིང་མངར་པ་ཏ་ལའི་ཕྱེ་མ། །རྒུན་ཆུ་དང་སྦྱར་སྟོན་གྱི་ཡིན། །དུར་བྱིད་པ་ཏ་ཀྲུ་ཏྲུག་ཏྲེས། །ཟིར་ཤུ་དག་ས་ར་ལ། །ཁྲོན་བུའི་ཕྱེ་མ་ཆུ་དྲོན་སྦྱར། །དགུན་གྱི་དུས་སུ་བླུད་པར་བྱ། །དུར་བྱིད་ཁ་ར་ཆ་མཉམ་པ། །སོ་གའི་དུས་ཀྱི་བཀྲུ་སྨན་ཡིན། །དུར་བྱིད་སྤ་འབྲས་ཀྱི་ལྕེ་བ། །པ་ཏ་ལ་དང་པུ་ཙེ་ཤེལ། །ཁྲོན་བུ་ལེགས་པར་བཏགས་ནས་ནི། །བ་གཅིན་ནང་དུ་ཞག་གསུམ་སྤངས། །འདི་ནི་དུས་ཀུན་སྦྱོར་བ་སྟེ། །སྣུམ་ཞེན་དྲི་མ་ནད་རྣམས་འབྱིན། །ཤ་མ་དུར་བྱིད་བྱི་ཚེར་བ། །གླ་སྒང་ཧསྟི་པི་པི་ལིང༌། །དུག་མོ་ཉུང་དང་ནི་ལི་ནི། །འབྲས་བུ་གསུམ་དང་པུ་ཙེ་ཤེལ། །ཕྱེ་མ་ཤ་ཁུའམ་མར་རམ་ནི། །ཆུ་དྲོན་དང་སྦྱར་ཐམས་ཅད་དུ། །ཁོང་རྩུབ་ལ་ཡང་གཏང་བར་བྱ། །རིམས་དང་སྙིང་ནད་དྲེག་ནད་དང༌། །རྟུག་སྐམ་ལ་སོགས་ནད་རྣམས་ལ། །དོང་གའི་བཀྲུ་སྨན་ལྷག་པར་ནི། །འཇམ་མངར་བསིལ་བ་ཕན་པ་ཡིན། །བྱིས་པ་རྒན་པོ་གློ་རྡོལ་དང༌། །སྐྱིད་དེ་བ་ཡི་མི་རྣམས་ལ། །འཇམ་ཞིང་སྐྱོན་ནི་མེད་པའི་ཕྱིར། །མཆོག་ཏུ་དོང་གའི་བཀྲུ་སྨན་གཏང༌། །འབྲས་བུའི་དུས་སུ་ལེགས་སྨིན་པའི། །དེ་ཡི་འབྲས་བུ་བཏུས་ནས་ནི། །དེ་ནི་ཡོན་ཏན་ལྡན་གྱུར་པ། །ཁུར་གཅིག་བྱེ་མའི་ནང་དུ་གཞུག །ཞག་བདུན་ལོན་ནས་ཕྱུང་ནས་ནི། །ཉི་མ་ལ་ནི་བསྐམ་པར་བྱ། །དེ་ནས་རྐང་ནི་ཕྱུང་ནས་སུ། །སྣོད་ནི་གཙང་མར་གཞག་པར་བྱ། །བྱིས་པ་ལོ་བཞི་ལོན་པ་ནས། །ལོ་ནི་བཅུ་གཉིས་ལོན་པའི་བར། །ལུས་ཚ་རྟུག་འགགས་ཀྱིས་གཟིར་ལ། །རྒུན་ཆུར་སྦྱར་ཏེ་བླུད་པར་བྱ། །དོང་གའི་རྐང་ནི་མཉེས་པ་དང༌། །བསྐོལ་བའི་ཆུ་ནི་གྲང་མོ་བླུད། །ཡང་ན་ཆང་དངས་ཞོ་ག་ཆུ། །སྐྱུ་
རུ་ར་ཡི་ཁུ་བའམ། །རང་སྐྱུར་དག་དང་བཅས་པའམ། །དུར་བྱིད་ལྡེ་གུར་སྦྱར་བ་སྦྱིན། །དན་དའི་ཁུ་བར་དེ་ཡི་རྐང༌། །བུ་རམ་རྙིད་པ་བཅུག་ནས་ནི། །ཟླ་བ་གཅིག་གམ་ཟླ་ཕྱེད་བར། །མནན་པའི་ཆང་ནི་བླུད་པར་བྱ། །སེང་ཕྲོམ་རྩ་བའི་ཤུན་པ་ནི། །ནང་གི་ཤུན་ལྤགས་བོར་ནས་ནི། །བསྐམས་ཏེ་ཕྱེ་མར་བྱས་ནས་ནི། །དེ་ལ་ཆ་གཉིས་བསྐོལ་ཏེ་གཟགས། །སེང་ཕྲོམ་ཆ་ནི་གསུམ་པ་སྤངས། །རྩ་བ་བཅུ་པའི་ཁུ་བ་དང༌། །ཆ་དེ་སླར་ཡང་སྦང་བར་བྱ། །སླར་ཡང་བསྐམས་ཏེ་ཕྱེ་མར་བྱ། །དེ་ལས་ཞོ་གཉིས་བ་གཅིན་ནམ། །ཆང་གི་དངས་མའམ་ཞོ་ག་ཆུ། །རྒྱ་ཤུག་སྐྱུ་རུ་རའི་ཁུ་བ། །གང་ཡང་རུང་དང་སྦྱར་ཏེ་བླུད། །སེང་ཕྲོམ་བསྐོལ་བའི་ཁུ་བ་དང༌། །ལྡེ་གུར་བྱས་དང་ཁར་དང༌། །མར་དང་བསྐོལ་བའི་ལྡ་གུ་དེ། །བཀྲུ་སྨན་གྱི་ནི་དམ་པ་ཡིན། །ཤྲཱི་ཁཎྜས་ནད་ཀྱི་ཚོགས། །ཤས་ཆེར་སོགས་པའང་འཇིག་པར་བྱེད། །མྱུར་དུ་འཁྲུ་ཞིང་དྲགས་པས་ན། །ལྟོ་སྙི་ཉམ་ཆུང་བྱིས་པ་དང༌། །རྒན་པོ་ནད་པ་ཡུན་རིང་ལ། །དེ་ནི་གཏང་བར་མི་བྱའོ། །སྐྲན་དང་དམུ་རྫིང་སྦྱང་བའི་དུག །པགས་ནད་གཅིན་ནད་སྦྲང་རྩི་འདྲ། །སྐྱ་རྦབ་སྐྲན་དང་དུག་གིས་ཕོག །ནད་ཀྱིས་སེམས་འཁྲུགས་གྱུར་ལ་གཏད། །དེ་ནི་ཚེར་མ་རྣོན་པོ་ནི། །མང་པོས་ཁྱབ་པར་གྱུར་པ་མཆོག །ལོ་གཉིས་པའམ་ལོ་གསུམ་པ། །ཁྱད་པར་དུ་ནི་དགུན་གྱི་མཐར། །དེ་ནི་མཚོན་གྱིས་རྣམ་བཅད་ལ། །དེ་ལས་འོ་མ་བླང་བར་བྱ། །བིལ་བ་ལ་སོགས་རྩ་བ་ལྔ། །བྲི་ཧ་ཏི་ནི་རྣམ་གཉིས་དང༌། །བསྐོལ་བའི་ཁུ་བ་དང་མཉམ་པའི། །སུ་ཏིའི་འོ་མ་དང་བསྲེས་ལ། །དེ་འོག་མེ་ཡི་མདག་མར་བསྐམ། །རི་ལུར་བྱས་པ་ཞོ་ག་ཆུའམ། །ཆང་ངམ་བ་གཅིན་ལ་སོགས་བླུད། །དུར་བྱིད་སོགས་དགུ་འབྲས་བུ་གསུམ། །ཁྲོན་བུ་སབ་ཏལ་དང་བཅས། །སུ་ཏའི་འོ་མས་ཞག་བདུན་སྤངས། །ཤ་ཁུའམ་མར་དང་སྦྱར་ཏེ་བླུད། །ཚ་བ་གསུམ་དང་འབྲས་བུ་གསུམ། །དུར་བྱིད་དན་ད་ཙི་ཏྲ་ཀ །དེ་བཞིན་བུ་རམ་ཆུས་སྦྱར་བླུད། །ཤང་གི་ནི་ཡི་འབྲས་བུ་ནི། །ཕུབ་མ་མེད་ཅིང་མ་སྐམས་བཏུ། །དེ་
བཞིན་སཔྟ་ལའི་རྩ་བ། །དེ་དག་རྣོན་པོ་འཁྲུ་བྱེད་ཡིན། །བད་ཀན་དམུ་རྫིང་སྦྱར་བའི་དུག །སྐྲན་སོགས་ནད་ལ་གཏང་བར་བྱ། །དེ་གཉིས་རི་ལུ་ཞོ་གཉིས་ཙམ། །ཆང་དང་རྒྱམ་ཚྭ་སྦྱར་བ་ནི། །བད་རླུང་ལས་གྱུར་སྙིང་ནད་དང༌། །དེ་བཞིན་སྐྲན་གྱི་ནད་ལ་གཏང༌། །དན་ད་དྲ་བན་ཏིའི་རྩ་བ། །གླང་པོའི་སོ་ལྟར་བརྟན་ཞིང་སྦོམ། །དམར་ཞིང་གནག་ལ་རྣོ་ཞིང་དྲོ། །མྱུར་དུ་འཁྲུ་བར་བྱེད་པ་ཡིན། །ལྕི་ཞིང་རླུང་ནད་འཁྲུ་བྱེད་ཅིང༌། །མཁྲིས་པ་བད་ཀན་འཇུ་བར་བྱེད། །དེ་ནི་སྦྲང་རྩི་པི་པི་ལིང༌། །ལྡེ་གུས་བསྐུས་ལ་འཇག་མ་དང༌། །འཇིམ་པས་བསྐུས་ཏེ་མེར་བསྲེག་ཅིང༌། །ཉི་མ་ཅུང་ཟད་དྲོ་བསྐམས་པས། །དེ་ཡི་རྣོ་བ་བསལ་བར་བྱ། །དེ་ནི་ཆང་དངས་ཞོ་ག་ཆུ། །དར་བ་མནན་ཆང་པི་ལུ་ཡི། །ཁུ་བ་གང་ཡང་རུང་སྦྱར་བླུད། །ཉམ་ཆུང་སྐྲན་དང་གཅིན་སྙི་དང༌། །དམུ་རྫིང་སྦྱར་བའི་དུག་རྣམས་སྦྱོང༌། །བ་ལང་རི་དྭགས་ར་ཤ་ཡི། །ཁུ་བར་སྦྱར་བས་སྐྱ་རྦབ་དང༌། །ལྟོ་སྲིན་མཚན་པར་རྡོལ་ནད་སེལ། །དེ་བསྐོལ་ཁུ་བ་ལྡེ་གུ་དག །རྩ་བ་བཅུ་ཡི་ཁུ་བར་བསྐོལ། །མར་གྱིས་མེ་དཔལ་ཁོང་འབྲས་དང༌། །འབྲུམ་ཕྲན་མཆན་ཁུང་ཚ་བ་སེལ། །ཏིལ་མར་བཅས་པས་སྐྲན་ཟ་ཁུ། །གཞང་འབྲུམ་རྟུག་འགགས་བད་རླུང་སེལ། །སྣུམ་ཆེན་སྦྱར་བས་ཁུ་ཆུ་བཤད། །འཕྱེན་འགགས་རླུང་གི་ནད་རྣམས་སྦྱོང༌། །དུར་བྱིད་ལ་སོགས་དགུ་པོ་ནི། །བཀྲུ་སྨན་གྱི་ནི་རབ་མཆོག་ཡིན། །ཨ་རུ་ར་ཡང་དུ་བྱིད་ཀྱི། །ཆོ་ག་བཞིན་དུ་སྦྱར་བར་བྱ། །དེ་ནས་དུས་སུ་དེའི་ཕྱེ་མ། །རྒྱམ་ཚ་དོང་གྲ་ཅུང་ཟད་གདབ། །རླུང་ནད་ལ་ནི་སྐྱུར་བས་བླུད། །བུ་རམ་སྲང་བརྒྱད་ཨ་རུ་ར། །ཉི་ཤུ་དན་ད་ཙི་ཏྲ་ཀ །སྲང་རེ་པི་པི་ལིང་དུར་བྱིད། །ཞོ་ནི་གཉིས་གཉིས་ལྷན་ཅིག་སྦྱར། །རི་ལུ་བཅུ་བྱས་ཞག་བཅུ་བར། །རི་ལུ་རེ་རེ་ཟོས་རྗེས་ལ། །ཆུ་དྲོན་བླུད་ཅིང་ཆོ་ག་འདིས། །དེ་དག་ཐམས་ཅད་ཟོས་གྱུར་ན། །ཀུན་ཟོས་བསྲུང་བ་མི་དགོས་པར། །འདིས་ནི་ཐམས་ཅད་སེལ་བར་བྱེད། །མཆོག་ཏུ་སྐྱ་རྦབ་ཕོ་བའི་ནད། །པགས་ནད་ཟླུམ་པོ་གཞང་འབྲུམ་དང༌། །གཡན་པའི་ནད་རྣམས་སེལ་བ་ཡིན། །ཆུང་ངུའམ་
དོན་ནི་ཆེན་པོ་དང༌། །ཆེན་པོ་ལས་ནི་ཉུང་ཟད་དག །འདྲེ་དང་དབྱེ་བ་བྱས་པ་དང༌། །དུས་དང་སྦྱོར་བ་ལྡན་པར་བྱེད། །ཤིང་ཚ་ནཱ་ག་གེ་སར་དང༌། །ཨ་མྲ་ཏ་ཀ་སེ་འབྲུ་དང༌། །སུག་སྨེལ་ཁ་ར་སྦྲང་རྩི་དང༌། །ཁ་ལུང་ཆང་སོགས་དེ་དང་དེ། །ཡི་རང་རྗེས་སུ་འཐུན་པ་ཡི། །རིགས་པས་བཀྲུ་སྨན་གཏང་བར་བྱ། །ཡན་ལག་བརྒྱད་པའི་སྙིང་པོ་བསྡུས་པ་ལས། །ཆོ་ག་གྲུབ་པའི་གནས་ཀྱི་ལེའུ་སྟེ་གཉིས་པའོ།། །།དེ་ནས་སྐྱུག་སྨན་དང་བཀྲུ་སྨན་གྱི་ཉེས་པ་གྲུབ་པར་བྱ་བའི་ཆོ་ག་བཤད་པར་བྱའོ། །སྐྱུག་སྨན་ལྟོ་ནི་སྙི་བའམ། །ལྟོགས་པའམ་བད་ཀན་ཤས་ཆུང་བའམ། །ཤིན་ཏུ་རྣོ་བའམ་གྲང་བའང་ཆུང༌། །མ་ཞུ་བའང་ཉམ་ཆུང་ལ། །བླུད་ན་ནད་འབྱུང་རེ་བ་ཉམས། །དེ་ཚེ་ཐུར་བྱུང་ནད་སློང་འགྱུར། །དེ་ལ་སླར་ཡང་སྣུམ་ཆོས་བྱ། །སྔར་གྱི་སྐྱོན་བྲལ་སྐྱུག་སྨན་གཏང། །བཀྲུ་སྨན་མ་ཞུ་བད་ཀན་དང༌། །ལྡན་པའམ་ཤིན་ཏུ་རྣོ་ཆེས་པ། །དྲོ་བའམ་ལན་ཚྭ་ཤས་ཆེས་པ། །ཡི་གར་མི་འོང་མངས་པ་ཡིས། །གྱེན་དུ་བརྒལ་བར་གྱུར་པ་དག །སྔར་བཤད་ཉེས་པ་དེ་ལ་ནི། །གྲུབ་པའི་སྦྱོར་བ་དེ་བཞིན་བྱ། །དེ་ཡང་སྣོད་དུ་མ་ཆགས་ན། །གསུམ་པོ་དེ་ལ་བླུད་མི་བྱ། །གཞན་དུ་གོམས་པའང་ཞིབ་པ་ཡི། །སྨན་ནི་གནོད་པ་མེད་པ་གཏང༌། །སྣུམ་ཆོས་དུགས་ནི་མ་བྱས་ལ། །སྨན་ནི་རྙིང་ཞིང་རྩུབ་པ་ཡིས། །ནད་བསླངས་ཕྱིན་པར་མ་ནུས་པས། །མགོ་འཁོར་སྐྲངས་དང་སྐྱིགས་བུ་དང། །མུན་པར་མཐོང་དང་སྐོམ་དང་ཆེ། །བྱིན་སྙིང་ན་ཞིང་ལུས་གཡའ་དང༌། །བླ་དང་ཁ་དོག་མི་སྡུག་པའི། །ནད་ནི་སྐྱེད་པར་བྱེད་པ་ཡིན། །སྣུམ་ཆོས་དུགས་བྱས་སྨན་ཉུང་ཞིང༌། །མེ་དྲོད་ཆེ་བས་ཞུ་གྱུར་པའམ། །གྲང་བས་རེངས་བའམ་མ་ཞུ་བས། །ནད་བ་སླངས་ནས་ནི་མ་ཕྱིན་པས། །ནད་ནི་དེ་དག་ཉིད་བསྐྱད་ཅིང༌། །དེ་ཉིད་སྦྱོར་ཉེས་ཐམས་ཅད་ཡིན། །དེ་ལ་ཏིལ་མར་རྒྱམ་ཚས་བསྐུ། །གཤག་མ་རྡོ་ཡི་དུགས་བྱ་ཞིང༌། །མས་གཏོང་དྲག་བྱས་སྐམ་སའི་ཤ་།ཁ་ཟས་བྱིན་ལ་འཇམ་རྩི་ནི། །པོ་སོན་ཆ་དང་པི་
པི་ལིང༌། །ཐང་ཤིང་ཏིལ་མར་བསྐོལ་བ་གཏང༌། །རླུང་འཇོམས་རླུང་གི་སྣུམ་ཆོས་བྱ། །སླར་ཡང་བཀྲུ་སྨན་རྣོན་པོས་སྦྱང༌། །ནད་གཞི་ཆེ་ཞིང་ཁོང་རྩུབ་ལ། །མེ་དྲོད་ཆུང་དང་སྨན་ཆུང་བ། །རྟུག་སྐམ་བཅས་པས་བསླངས་པ་དང༌། །ནད་ཀྱིས་ལམ་ནི་འགགས་པར་འགྱུར། །མི་བཟད་སྦོ་དང་ལྟེ་བ་དང༌། །རྒྱབ་དང་རྩིབ་ལོགས་མགོ་བོན། །ཕྱི་ས་གཅིན་འགགས་དབུགས་མི་བདེ། །མི་བཟད་པ་ནི་སྐྱེད་པར་བྱེད། །བསྐུ་དང་དུགས་དང་རིང་བུ་སོགས། །མས་གཏོང་དྲག་པོ་འཇམ་རྩི་བྱ། །རྟུག་སྐམ་སེལ་བའི་གསོ་དཔྱད་ལས། །ཐམས་ཅད་སྦོ་བ་དག་ལ་ཕན། །རྩ་བ་ལྔ་པ་ནས་ཚིག་འཁུས། །ཤུ་དག་པུ་ཏི་ཀ་རཉྫ། །རྒྱམ་ཚ་ནས་ཐུག་ལེགས་སྦྱར་བས། །གཟེར་ནད་རྟུག་སྐམ་ལྟོ་སྦོས་འཇོམས། །ཐལ་སྨན་སེ་འབྲུ་པི་པི་ལིང༌། །ཤིང་ཀུན་བཅའ་སྒ་སྟར་བུ་དང༌། །རྒྱམ་ཚར་བཅས་པའི་ཆང་ངམ་ནི། །མར་རམ་ཆུ་དྲོན་སྦྱར་བ་བླུད། །མཁྲེགས་ཤིང་ཡོངས་སུ་འཛག་པ་དང༌། །ན་ཞིང་བཅད་སྙམ་སེམས་པ་སེལ། །སྨན་འཐུངས་གྱུར་པའི་ཤུགས་བཀག་ན། །རླུང་ལ་སོགས་པའི་ནད་རྣམས་ནི། །འཁྲུགས་ཏེ་སྙིང་གི་ཕྱོགས་སོང་ན། །སྙིང་ནད་མི་བཟད་སྐྱེད་པར་བྱེད། །སྐྱིགས་བུ་ལུད་པ་རྩིབ་ལོགས་ན། །རྨྱ་ཞིང་མིག་འགུལ་ཁ་ཆུ་འཛག །དྲན་པ་ཉམས་ཤིང་ལྕེ་འཆའ་ལ། །སོ་ནི་ཀྲིག་ཀྲིག་འཆའ་བར་བྱེད། །དེ་ལ་སྨན་པ་མ་རྨོངས་པས། །མཁྲིས་པས་ཉེན་ལ་མངར་བ་དང༌། །བད་ཀན་གྱིས་ཉེན་ཁ་བ་ཡི། །སྐྱུག་སྨན་དག་ནི་མྱུར་དུ་གཏང༌། །དེ་ནས་དེ་ལ་སྨིན་བྱེད་པའི། །ནད་ཀྱི་ལྷག་མ་སྨིན་པར་བྱ། །དེ་ཡི་མེ་དྲོད་ལུས་ཀྱི་སྟོབས། །རིམ་གྱིས་མངོན་པར་འཕེལ་བར་བྱེད། །ཤས་ཆེར་སློན་གྱུར་རླུང་གིས་ནི། །གང་གི་སྙིང་ནི་གཟེར་གྱུར་པ། །དེ་ལ་སྣུམ་གྱུར་ལན་ཚྭ་སྦྱིན། །མཁྲིས་པ་བད་ཀན་དེ་ལས་གཞན། །སྨན་ནི་འཐུངས་པར་གྱུར་ནས་ཤུགས། །བཀག་པར་གྱུར་པའམ་བད་ཀན་གྱིས། །འགགས་པའམ་ཤིན་ཏུ་སྦྱངས་གྱུར་པའི། །ལུས་ལ་རླུང་ནི་འཇུག་འགྱུར་བས། །རེངས་དང་འདར་དང་ཟུག་པ་དང༌། །
ལུས་སྙོམ་དཀྲིས་སྙམ་སེམས་ཤིང་ཟུག །དེ་ལ་རླུང་ནི་འཇོམས་པ་ཡི། །སྣུམ་ཆོས་དུགས་སྩོགས་ཐམས་ཅད་བསྔགས། །སྨན་ཐུན་ཆེ་ལ་རྣོ་བ་ནི། །བཀྲེས་ཉེན་ལྟོ་སྙི་ལ་བླུད་ན། །བད་ཀན་མཁྲིས་པ་བཤད་པ་ནི། །བསལ་ནས་ལུས་ཟུངས་འཛག་པར་བྱེད། །དེ་ལ་སྦྱོར་དྲགས་མངར་བ་ཡི། །སྨན་གྱིས་ལྷག་མ་སློན་དུ་གཞུག །སྐྱུག་སྨན་དྲགས་ལ་བཀྲུ་སྨན་གཏང༌། །འཁྲུས་དྲགས་སྐྱུག་སྨན་འཇམ་པོ་གཏང༌། །དེ་ལ་ཆུ་གྲང་བླུད་པ་དང༌། །རོ་སྨད་བཅིངས་པས་གཅད་པར་བྱ། །སྟང་ཟིལ་ཙནྡན་པུ་ཤེལ་ཙེ། །ར་ཁྲག་ཁ་རའི་ཆུ་དང་ནི། །འབྲས་ཡོས་ཕྱེ་མའི་སྐྱོ་མ་ནི། །སྦྱོར་དྲགས་སེལ་བའི་དམ་པ་ཡིན། །སློན་སྨན་སྦྱོར་བ་དྲགས་པ་ལ། །ཆུ་གྲང་དག་ནི་བླུགས་པར་བྱ། །རྒུན་འབྲུ་ལ་སོགས་ཁུ་བ་མར། །སྦྲང་རྩི་ཁ་རའི་སྐྱོ་མ་བླུད། །སྒྲེགས་པ་བཅས་པར་ཤིན་ཏུ་སྐྱུག །མུར་བ་འུ་སུ་གླ་སྒང་དང༌། །སྟང་ཟིལ་མ་དུ་ཀའི་ཕྱེ་མ། །སྦྲང་རྩིར་བཅས་པའི་ལྡེ་གུ་སྦྱིན། །སློན་མཐར་ལྕེ་ནི་འཁུམས་པ་ལ། །སྣུམ་དང་སྐྱུར་དང་ལན་ཚྭ་དང༌། །ལྡན་པས་མཁུར་བ་བཀང་བ་དང༌། །ཡིད་འོང་ཡུ་ཤ་ཤ་ཁུ་ཕན། །དེ་ཡི་མདུན་དུ་མི་གཞན་ནི། །འབྲས་བུ་སྐྱུར་བ་ཟ་རུ་གཞུག །ལྕེ་ཕྱིར་བྱུང་ལ་ཏིལ་དང་ནི། །རྒུན་འབྲུའི་ལྡེ་གུ་བསྐུས་ནས་གཞུག །ཚིག་བཀུག་རླུང་གི་ནད་ལ་ནི། །མར་དང་ཤ་དང་གཡོས་པ་ཡི། །ནས་ཐུག་སླ་བ་སྦྱིན་བྱ་ཞིང༌། །སྣུམ་དང་དུགས་ཀྱི་སྦྱོར་བ་བྱ། །སྨན་གྱི་སྦྱོར་བ་དྲགས་པ་ཡིས། །སྲོག་ཅེས་བྱ་བའི་ཁྲག་ཕྱུང་ན། །གང་ཕྱིར་དེ་ནི་སྲོག་འཕྲོག་པས། །སྲོག་ལེན་པར་ནི་ཡིན་པར་བཤད། །ཁྲག་དེ་དང་ནི་ཟས་བཅས་པ། །ཁྱིའམ་བྱ་རོག་ལ་བྱིན་ལ། །ཟོས་ན་སྲོག་ཅེས་བརྗོད་པར་བྱ། །མ་ཟོས་མཁྲིས་པ་ཡིན་པར་བཤད། །ཡང་ན་རས་དཀར་ལ་བསྒོས་ཏེ། །བསྐམས་ལ་ཆུ་དྲོན་གྱིས་བཀྲུས་ལ། །བཀྲུས་ཀྱང་དག་པར་མ་གྱུར་ན། །མཁྲིས་པའོ་དག་ན་ཁྲག་ཡིན་ནོ། །སྐོམ་དང་བརྒྱལ་དང་མྱོས་པས་ཉེན། །དེ་ལ་སྲོག་ནི་མྱུར་བསྲུང་ཕྱིར། །ཁྲག་དང་མཁྲིས་པ་སེལ་བ་ཡིན། །གསོ་བ་འཚོ་
བའི་བར་དུ་བྱ། །རི་དགས་བ་གླང་མ་ཧེ་ར། །གསོན་པའི་ཁྲག་ནི་ཕྱུང་མ་ཐག །སྲོག་ནི་འབྱོར་པར་བྱེད་པ་བླུད། །དེས་ནི་མྱུར་དུ་སྲོག་ཏུ་འགྱུར། །དེ་ཉིད་འཇག་མ་དང་མཉེས་པའི། །ཁྲག་ནི་འཇམ་རྩིར་གཏང་བར་བྱ། །དུར་བྱིད་ཏང་པ་ལ་ཤིང་མངར་དང༌། །དཱུར་བ་པུ་ཤེལ་ཙེའོ་མ། །བསྐོལ་བ་མར་གྱི་སྙིང་པོ་དང༌། །སྟང་ཟིལ་དང་ནི་བཅས་པ་ཡི། །འཇམ་རྩི་གྲང་མོ་གཏང་བར་བྱ། །སྤྱི་བག་འཇམ་རྩི་རབ་གྲང་བའམ། །མར་གྱི་སྙིང་པོ་འཇམ་རྩི་གཏང༌། །གཞང་ཕྱིར་བྱུང་ལ་སྨན་ཁུ་ཡིས། །འཁྲུ་བ་གཅད་ལ་གཞུག་པར་བྱ། །དྲན་པ་སྟོར་ལ་རིག་བྱེད་ཚིག །གླིང་བུ་གླུ་དབྱངས་ཉན་དུ་གཞུག །ཡན་ལག་བརྒྱད་པའི་སྙིང་པོ་བསྡུས་པ་ལས། ཆོ་ག་གྲུབ་པའི་གནས་ཀྱི་ལེའུ་གསུམ་པའོ།། །།དེ་ནས་སྨན་མས་གཏོང་བའི་ཆོ་ག་བཤད་པར་བྱའོ། །བ་ལ་སླེ་ཏྲེས་ར་སྣ་འབྲས་བུ་གསུམ། །རྩ་བ་ལྔ་པ་རྣམ་གཉིས་སྲང་རེའི་ཚད། །པོ་སོན་ཆ་བརྒྱད་ར་ཤ་སྲང་ལྔ་བཅུ། །ཆུ་ནང་བསྐོལ་ཏེ་བཞི་ཆ་ལུས་གྱུར་པ། །བཙགས་པ་ལ་ལ་ཕུད་དང་པོ་སོན་ཆ། །བིལ་བ་རུ་རྟ་ཤ་ཏ་པུཥྤ་དང༌། །ཤུ་དག་གླ་སྒང་པི་པི་ལིང་རྣམས་ཀྱི། །ལྡེ་གུ་བུ་རམ་སྦྲང་རྩི་མར་དང་ནི། །ཏིལ་མར་རྒྱམ་ཚ་དག་དང་ལྡན་གྱུར་པ། །དྲོ་འཇམ་ཆོ་ག་བཞིན་དུ་བཏང་གྱུར་པ། །མས་གཏོང་མཆོག་སྟེ་ནད་ཀུན་འཇོམས་པ་ཡིན། །ནད་མེད་ལ་ཕན་ཚེ་རིང་ཉམས་བརྟས་བྱེད། །འཇམ་རྩི་གོང་དུ་ལྡེ་གུ་མ་སྨོས་པ། །དེར་ནི་ཀུན་ལ་འདི་ཉིད་གཞུག་པར་བྱ། །རྩབ་བཅུ་པའི་ཁུ་བ་སྐྱུར་དང་ནི། །ར་ཤ་བཅས་པ་སྔ་མ་བཏགས་པ་དང༌། །སྣུམ་ཆེན་གསུམ་ལྡན་མས་གཏོང་མཆོག་ཡིན་ཏེ། །རླུང་གི་ནད་གུན་རབ་ཏུ་འཇོམས་པར་བཤད། །པ་ལ་པ་ཏོལ་རྩ་བ་ཆུང་ངུ་ལྔ། །ཀྱི་ལྕེ་བ་དང་ཨེ་རཎྜ་དང་ནས། །བསྐོལ་བའི་ཁུ་བ་བྲེ་གང་ར་ཤའི་ཁུ། །དེའི་ཕྱེད་བཅུག་ལ་བསྐོལ་ཏེ་བྲེ་གང་ལུས། །པྲི་ཡང་ཀུ་དང་གླ་སྒང་པི་པི་ལིང༌། །ལྡེ་གུར་བྱས་ཤིང་ཏིལ་མར་ཞུན་མར་དང༌། །སྦྲང་རྩི་རྒྱམ་ཚ་དང་ནི་ལྡན་གྱུར་པའི། །འཇམ་རྩི་བཏང་ན་མེ་དྲོད་འཕེལ་བ་དང༌། །ཉམས་སྟོབས་སྐྱེད་ཅིང་ཤ་ནི་རྒྱས་པ་དང༌། །མིག་གི་གསལ་
སྟོབས་འཕྲལ་དུ་སྐྱེད་པར་བྱེད། །ཨེ་རཎྜའི་རྩ་སྲང་གསུམ་པ་ལ་ཤ་།སྲང་གསུམ་རྩ་བ་ལྔ་པ་ཆུང་ངུ་དང༌། །ར་སྣ་བ་ལ་སླེ་ཏྲེས་བ་སྤུ་བ། །ཨ་ཤྭ་གནྡྷ་དོང་ག་ཐང་ཤིང་རྣམས། །པོ་སོན་ཆ་བརྒྱད་ཆུ་བྲེ་བརྒྱད་དུ་བསྐོལ། །བརྒྱད་ཆ་ལུས་པར་གྱུར་པ་དེ་ནང་དུ། །ཤུ་དག་ཤུ་ཏི་བ་ཤའི་འབྲས་བུ་དང༌། །པྲི་ཡང་ཀུ་དང་ཤིང་མངར་པི་པི་ལིང༌། །དུག་མོ་ཉུང་གི་ས་བོན་གླ་སྒང་དང༌། །སྐྱེར་པའི་ཁཎྜར་བཅས་པ་ཞིབ་བཏགས་པ། །ཞོ་གཉིས་ཚད་ཀྱི་རྒྱམ་ཚར་བཅས་པ་དང༌། །སྦྲང་རྩི་ཏིལ་མར་བ་གཅིན་དང་སྦྱར་བའི། །མས་གཏོང་སྐྱུག་བྱེད་མེ་དྲོད་སྐྱེད་པ་དང༌། །རྐང་པ་བྱིན་པ་བརླ་དང་མཇུག་ཏོ་དང༌། །ལྟོ་བ་སྙིང་དང་ཕོ་མཚན་ན་བ་དང༌། །ལུས་ལྕི་རླུང་དང་བཤང་གཅི་འགགས་དང་སྐྲན། །རྡེའུ་ཆགས་རྒྱུ་རླུགས་གཞང་འབྲུམ་ཕོ་བའི་ནད། །བད་ཀན་རླུང་ནད་དེ་དང་དེ་དག་འཇོམས། །ཤིང་མངར་སེང་ཕྲོམ་ཙནྡན་ཨ་རུ་ར། །ཙནྡན་ཨུཏྤལ་བ་ཡི་འོ་མར་བསྐོལ། །འཚོ་བྱེད་ཁ་ར་མར་དང་བཅས་པ་ཡི། །འཇམ་རྩིས་མཁྲིས་པའི་ནད་རྣམས་སེལ་བར་བྱེད། །ར་སྣ་བ་ཤ་ཀ་བཙོས་བྱི་ཚེར་བ། །བ་ལ་རྩ་བ་ཆུང་ལྔ་རྩྭ་ཡི་ལྔ། །ཐལ་ཏྲེས་ཙནྡན་ཤུག་པ་རྣམ་གཉིས་དང། །ཤིང་མངར་སེང་ཕྲོམ་སྲང་ནི་ཕྱེད་ཕྱེད་དང༌། །ཆུ་དང་བསྐོལ་བའི་ཁུ་བ་དེ་ཉིད་ནི། །འོ་མ་བྲེ་བཞི་བསྐོལ་ཏེ་ཆུ་ངུའི་བར། །ཇི་བན་ཏི་དང་མེ་ད་རྣམ་གཉིས་དང༌། །ཉེ་ཤིང་རམ་ཉེ་བ་གཉིས་བི་ད་རི། །ཀ་ཤེ་རུ་དང་ཁ་ར་དཀར་པོ་དང༌། །ཛི་བ་ཀ་དང་པདྨ་གེ་སར་དང། །སྟུག་ཚེར་ཨུཏྤ་ལ་དང་པདྨ་དཀར། །སེང་ཕྲོམ་ཁ་སྲལ་ཕྲའུ་ཤིང་མངར་དང༌། །ནཱ་ག་གེ་སར་མུཉྫ་ཏ་ཀ་དང༌། །ཙནྡན་རྣམ་གཉིས་བཏགས་པ་མར་དང་ནི། །སྦྲང་རྩི་རྒྱམ་ཚ་དང་ནི་ལྡན་བྱས་པ། །བསྒྲངས་པའི་ནི་རུ་ཧ་ནི་གཏང་བར་བྱ། །སླར་ཕྱུང་སྐམ་སའི་ཤ་ཁུ་འམ་འོ་མ་དང༌། །འབྲས་ཆན་བྱིན་ལ་ལུས་ལ་ཆུ་བླུགས་བྱ། །ལུས་ཚ་ཚད་འཁྲུ་མང་ལ་ནད་ཁྲག་མཁྲིས་དང༌། །སྙིང་ནད་སྐྱ་རྦབ་མི་བཟད་རིམས་དང་ནི། །སྐྲན་བཅས་གཅིན་འགགས་མིག་སེར་ལ་སོགས་པ། །མཁྲིས་པ་ལས་གྱུར་ནད་ནི་ཐམས་ཅད་འཇོམས། །
ཀོ་ཤ་ཏ་ཀ་དོང་ག་ཐང་ཤིང་དང༌། །མུར་བ་གཟེ་མ་ཨརྒ་དུག་མོ་ཉུང༌། །པ་ཏ་རྒྱ་སྲན་བྲི་ཧ་ཏི་ཆུར་བསྐོལ། །ཁུ་བ་སྲང་ནི་ཉི་ཤུ་ལུས་པ་དང༌། །དེར་ནི་ཉུངས་ཀར་སུག་སྨེལ་པོ་སོན་ཆ། །རུ་རྟ་ཞོན་གཉིས་གཉིས་ཚད་དང་ནི། །སྦྲང་རྩི་པོ་སོན་ཆ་ཡི་མར་དང་ནི། །ཐལ་སྨན་ཉུངས་མར་སྲང་ནི་གཉིས་གཉིས་བཅས། །མས་གཏོང་མེ་དྲོད་ཆུང་དང་ཡི་ག་འཆུས། །བད་ཀན་ལས་གྱུར་ནད་ནི་ཀུན་ལ་ཕན། །དེ་ནས་ནི་རུ་ཧ་དེ་ནི། །སྣུམ་འཇམ་སྐྱིད་དེ་བ་དང་ནི། །ལས་ཀྱིས་ལུས་སྙོམ་གྱུར་པའི་སྨན། །སྲང་ནི་གཉིས་གཉིས་སོ་སོར་བཤད། །འོ་མ་ལས་ནི་སྲང་བཞིར་བྱ། །སྦྲང་རྩི་ཏིལ་མར་མར་ཁྱོར་རེ། །གཟར་བུས་དཀྲུགས་པ་མས་གཏོང་བས། །རླུང་ནད་འཇམ་སྟོབས་ཁ་དོག་སྐྱེད། །ཏིལ་མར་ཆང་དང་སྦྲང་རྩི་མར། །ཁྱོར་ནི་རེ་རེའི་ཚད་དུ་བྱས། །བིལ་བ་ལ་སོགས་རྩ་བ་ནི། །ཁྱོར་གཉིས་རྒྱ་སྲན་ཁུ་བ་ནི། །ཁྱོར་དོ་བཅས་པས་རླུང་ནད་སེལ། །པ་ཏོ་ལ་དང་ནི་མ་པ་དང༌། །ལོ་མ་བདུན་པ་པུ་ཏི་ཀ །ར་སྣའི་ཁུ་བ་སྲང་གཉིས་གཉིས། །མར་སྲང་གཉིས་དང་ཉུངས་ཀར་ཀྱི། །ལྡེ་གུར་བཅས་པ་ཁ་བ་ལྔ། །བད་ཀན་མང་དང་སྲིན་ནད་དང༌། །མཛེ་དང་ཟ་ཁུའི་ནད་རྣམས་འཇོམས། །ཏིལ་མར་བ་གཅིན་ཞོ་ག་ཆུ། །སྐྱུར་རྩབས་ཁྱོར་ནི་རེ་རེ་དག །ཡུངས་ཀར་བཏགས་པའི་ལྡེ་གུར་སྦྱར། །རྟུག་འགགས་ལྟོ་སྦོས་སེལ་བྱེད་ཡིན། །པ་ཡས་སྱེ་དང་བུ་རམ་ཤིང༌། །སཱ་ལ་པརྞི་བི་ད་རི། །ར་སྣ་ཁྱོར་རེ་པི་པི་ལིང༌། །ལྡེ་གུ་སྦྲང་རྩི་མར་སྦྱར་བའི། །མས་གཏོང་ཁུ་བ་འཕེལ་བར་བྱེད། །དེ་ནས་གྲུབ་པའི་འཇམ་རྩི་ནི། །ཉེས་པ་མེད་ཅིང་འབྲས་བུ་ཆེ། །སྟོབས་སྐྱེད་ལུས་འཕེལ་བདེ་བར་བྱེད། །ཀུན་དུ་སྦྱར་བྱ་བཤད་པར་བྱ། །སྦྲང་རྩི་ཏིལ་མར་ཆ་མཉམ་པ། །རྒྱམ་ཚ་ཞོ་གཉིས་ཤུ་ཏི་བཞི། །ཨེ་རཎྜ་ཡི་རྩབ་བསྐོལ། །མས་གཏོང་སྦྲང་རྩི་ཏིལ་མར་ཅན། །བཅུད་ཀྱིས་ལེན་ཏེ་གཅིན་སྙི་དང༌། །གཞང་འབྲུམ་སྲིན་བུ་སྐྲན་ནད་དང༌། །རྒྱུ་མ་རླུགས་པའི་ནད་རྣམས་སེལ། །འདི་ནི་ཤིང་མངར་ཕྱེ་མར་བཅས། །མིག་ལ་ཕན་ཞིང་ཁྲག་མཁྲིས་སེལ། །གླ་སྒང་ལྡེ་གུ་སྦྲང་རྩི་དང༌། །
ཏིལ་མར་ཤ་ཁུ་མར་བཅས་པ། །འཚོ་བར་བྱེད་པ་ཞེས་བྱ་སྟེ། །གཞང་གི་ནད་དང་བརླ་ནད་དང༌། །ཆུ་སོ་དང་ནི་རླིག་པ་དང༌། །ཕོ་མཚན་ཟུག་པའི་ནད་རྣམས་སེལ། །སྦྲང་རྩི་མར་དང་ཞག་དང་ནི། །ཏིལ་མར་ཁྱོར་ནི་རེ་རེའི་ཚད། །རྒྱམ་ཚ་ཞོ་གཅིག་སྦ་མ་ཡི། །འབྲས་བུ་སྲང་ཕྱེད་བཅས་པ་དག །དེ་ཡང་འཚོ་བ་ཡིན་པར་བཤད། །ཨེ་རཎྜའི་རྩ་བསྐོལ་བ་ཡི། །ཁུ་བ་ཤུ་དག་པི་པི་ལིང༌། །པོ་སོན་ཆ་ཡི་ཕྱེ་མར་བཅས། །སྦྲང་རྩི་ཏིལ་མར་རྒྱམ་ཚར་བཅས། །འདི་ནི་ཤིང་རྟ་ཅན་ཞེས་བྱ། །དེ་བསྐོལ་ཤུ་དག་ཤུ་ཏི་དང། །ཤིང་ཀུན་རྒྱམ་ཚ་ཐང་ཤིང་དང༌། །ར་སྣ་སྦྲང་རྩི་སྦྱར་བ་ཡི། །འཇམ་རྩི་ནད་སེལ་ཞེས་བྱ་དགེ །རྩ་བ་ལྔ་ཡི་ཁུ་བ་དང༌། །པི་པི་ལིང་དང་རྒྱམ་ཚ་དང༌། །ཤིང་མངར་སྦྲང་རྩིར་བཅས་པ་ཡི། །ཏིལ་མར་གྲུབ་པའི་འཇམ་རྩིར་བཤད། །རྩ་བ་བཅུ་པ་འབྲས་བུ་གསུམ། །པོ་སོན་ཆ་ནི་བིལ་བར་བསྐོལ། །བ་གཅིན་དང་ནི་དེ་བཏགས་ཤིང༌། །པ་ཏ་གླ་སྒང་དུག་མོ་ཉུང༌། །ལན་ཚྭ་པོ་སོན་ཆ་ཏིལ་མར། །ཐལ་སྨན་ལན་ཚྭར་བཅས་པ་ནི། །རིགས་པའི་འཇམ་རྩི་བད་ཀན་ནད། །སྐྱ་རྦབ་གསུང་པའི་ནད་རྣམས་དང༌། །ཁུ་བ་རླུང་ནི་འགགས་པ་དང༌། །རླུང་འཁྲུགས་པ་ལ་བསྔགས་པ་ཡིན། །གླ་སྒང་པ་ཏ་ཨེ་རཎྜ། །སླེ་ཏྲེས་བ་ལ་བ་སྦྲུ་བ། །ར་སྣ་བཙོད་དང་དོང་ག་དང༌། །པུ་ཤེལ་ཙེ་དང་ཀྱི་ལྕེ་བ། །བ་རུ་ར་དང་པུ་ཙེ་ཤེལ། །རྩ་བ་ལྔ་པ་ཆུང་ངུ་རྣམས། །སྲང་རེ་པོ་སོན་ཆ་རྡོག་བརྒྱད། །དེ་ནི་ཆུ་བྲེ་བཞི་ནང་བསྐོལ། །བཞི་ཆ་ལུས་པ་བཙགས་ནས་ནི། །འོ་མ་བྲེ་དོ་དང་བསྲེས་ལ། །འོ་མ་ལུས་པ་སླར་ཡང་བསྐོལ། །སྐམ་སའི་ཤ་ཁུ་བཞི་ཆ་དང༌། །སྦྲང་རྩི་རྒྱམ་ཚ་ཤིང་མངར་དང༌། །ཤུ་ཏི་དུར་བྱིད་པི་པི་ལིང༌། །དུག་མོ་ཉུང་དང་སྐྱེར་ཁཎྜ། །བཏགས་པ་དང་ནི་བསྲེས་པ་ཡི། །འཇམ་རྩི་དྲོ་འཇམ་བཏང་ན་ནི། །ཤ་དང་མེ་དྲོད་ལུས་ཀྱི་སྟོབས། །ཁུ་བ་འཕེལ་བར་བྱེད་པ་ཡིན། །དྲེག་ནད་རྨོངས་བག་གཅིན་སྙི་དང༌། །གཞང་འབྲུམ་སྐྲན་དང་བཤང་གཅི་འགགས། །མི་བཟད་རིམས་དང་མེ་དབལ་དང༌། །རྒྱུ་རླུགས་ལྟོ་སྦོས་འཁྲུག་ཅིང་འཁྲུ། །ཆུ་སོ་རྐེད་
པ་བརླ་དཀུ་ན། །གཉེའུ་རེངས་རྣ་བ་མགོ་བོའི་ནད། །ཟླ་མཚན་ནད་དང་སྨྱོ་བྱེད་དང༌། །འོར་ནད་ལུད་པ་རྡེའུ་ཆགས་དང༌། །གཅིན་འཁྱིལ་བ་ཡི་ནད་རྣམས་འཇོམས། །དབང་པོ་ཉམས་ཤིང་ཞུམ་པ་དང༌། །མིག་ལ་ཕན་ཞིང་བུ་སྐྱེད་བྱེད། །འཚོ་བྱེད་རྒྱལ་པོ་བཅུད་ལེན་ཡིན། །རི་དྭགས་ཕྲ་མོ་མགོ་ཆུང་བ། །རྩ་བ་བཅུ་པ་བསྐོལ་བའི་ཆུ། །སྤ་མའི་འབྲས་བུ་ཤུ་ཏི་དང༌། །གླ་སྒང་ལྡེ་གུ་སྣུམ་ཆེན་བཅས། །མས་གཏོང་རླུང་ནི་སེལ་བའི་མཆོག །ཤིན་ཏུ་རོ་ཙར་བྱེད་པ་ཡིན། །རྨ་བྱའི་གཤོག་པ་མཁྲིས་པ་དང༌། །རྒྱུ་མ་རྐང་པ་མཆུ་རྟུག་པ། །པོར་བའི་ཤ་ནི་འབའ་ཞིག་དང༌། །རྩ་བ་ལྔ་པ་ཆུང་ངུ་ནི། །སྲང་རེ་དང་ནི་ལྡན་གྱུར་པ། །ཆུ་དང་འོ་མར་བསྐོལ་ནས་ནི། །འོ་མ་ལུས་པར་སྦྲང་རྩི་མར། །བཅས་དང་དེ་བཞིན་བི་ད་རི། །ཤིང་མངར་ཤུ་ཏི་པི་པི་ལིང༌། །པོ་སོན་ཆ་ཡི་ལྡེ་གུར་བསྲེས། །རྒྱམ་ཚ་ཅུང་ཟད་བཏབ་པ་ཡི། །འཇམ་རྩི་སྟོབས་འཕེལ་རོ་ཙའི་མཆོག །གོང་མ་སྲེག་ལ་སོགས་པ་ཡང༌། །ཆོ་ག་འདི་ནི་སོ་སོར་བྱ། །ཁྲོན་གྱིས་གཟས་ཚོལ་ཐམས་ཅད་དང༌། །མཐུ་རྩལ་མཆུ་ཡིས་ཟས་ཚོལ་བ། །ཆུ་ལ་གནས་པའང་དེ་བཞིན་ཏེ། །ཉ་ལ་འོ་མ་སྤང་བར་བྱ། །སྲམ་དང་ནེའུ་ལེ་བྱི་ལ་དང༌། །རེག་འཇམ་བྱི་བ་རྣམས་ཀྱི་ཤ་།རེ་རེ་སྲང་བཅུ་རྩ་བ་ལྔ། །འོ་མའི་ནང་དུ་བསྐོལ་ནས་ནི། །འོ་མ་དེར་ནི་པོ་སོན་ཆ། །པི་པི་ལིང་དང་ལན་ཚྭ་གཉིས། །ཁར་ཏིལ་མར་སྦྲང་རྩི་མར། །འཇམ་རྩི་བཏང་ན་བཅུད་ལེན་མཆོག །རྩོལ་བས་དཀྲུགས་གློ་འགྲམས་པ་དང༌། །དབང་པོ་ཉམས་དང་གཟི་མདངས་སྟོབས། །ཁུ་ཆུ་བཤང་གཅི་འགགས་པ་དང༌། །དྲེག་ནད་ཀྱིས་འཐེང་ནད་རྣམས་དང༌། །རྟ་དང་གླང་པོ་ཤིང་རྟས་གཡེང༌། །རྐང་ལག་ཆག་གྲུགས་གྱུར་པ་ལ། །སླར་ནི་བདེ་བར་འཚོ་བྱེད་ཅིང༌། །རོ་ཙ་བྱེད་པའི་མཆོག་ཡིན་ནོ། །ཁ་སྲལ་བུ་རམ་ཤིང་ཕྲན་ལས། །གཡོས་སུ་བྱས་པའི་འོ་ཐུག་བླུད། །སྣུམ་ཞིང་བསྡམས་པ་མི་དགོས་པའི། །གྲུབ་པའི་སྨན་ནི་སྦྱར་བར་བྱ། །ནད་འཇོམས་སྲུང་དང་བཅས་པ་ཡི། །སྣུམ་གྱི་འཇམ་རྩི་བཤད་བྱ་སྟེ། །རྩ་བ་བཅུ་པ་བ་ལ་དང༌། །ར་སྣ་ཨ་ཤྭ་
གནྡྷ་དང༌། །བ་སྤྲུ་བ་དང་ཨེ་རཎ་དང༌། །སླེ་ཏྲེས་ག་བྲའི་རྩ་བ་དང༌། །བ་ཤ་ཀ་དང་བུ་ཏི་ཀ །ས་ཧ་ར་ཛ་ཉེ་ཤིང་བ། །ཀ་ཀ་ན་སེ་སྲང་རེ་དང༌། །ནས་དང་མ་ཤ་ཟར་མ་དང༌། །རྒྱ་ཤུག་རྒྱ་སྲན་ཁྱོར་རེའི་ཚད། །ཆུ་བྲེ་དྲུག་ཅུ་རྩ་བཞིར་བསྐོལ། །དེ་ལས་བྲེ་ནི་བཅུ་དྲུག་ལུས། །འཚོ་བྱེད་སྡེ་ནི་སྲང་རེ་བཅུག །ཏིལ་མར་བྲེ་ནི་བཞི་དང་བསྐོལ། །འདི་ནི་འཇམ་རྩིར་བཏང་གྱུར་ན། །རླུང་ནད་ཐམས་ཅད་སེལ་བར་བྱེད། །དེ་བཞིན་སྐམ་སའི་སྲོག་ཆགས་ཤ་།འཚོ་བྱེད་སྡེ་དང་བཅས་པར་བསྐོལ། །ཤུ་ཏི་ནས་དང་བིལ་བ་སྐྱུར། །ཏིལ་མར་བསྐོལ་བས་རླུང་ནད་སེལ། །རྒྱམ་ཚ་མདོག་དམར་གྱུར་གྱི་བར། །མེར་བསྲེགས་མར་གསུར་རླུང་ནད་འཇོམས། །ཇི་བན་ཏི་དང་པོ་སོན་ཆ། །མེ་ད་རྣམ་གཉིས་སྲ་བ་ནི། །ཤིང་མངར་བ་ལ་ཤུ་ཏི་དང༌། །ཟངས་རྩི་བ་དང་པི་པི་ལིང༌། །ཀ་ཀ་ནི་ས་ཉེ་ཤིང་བ། །ཁ་སྲལ་ཀྵི་ར་ཀ་ཀ་རི། །ཟུར་པ་ཀརྐ་ཏ་སྲིང་གི །ཤུ་དག་བཏགས་པའི་ལྡེ་གུ་དང༌། །ཏིལ་མར་མར་དང་འོ་མ་ནི། །བཞི་འགྱུར་གྱི་ནི་ནང་དུ་བསྐོལ། །འཇམ་རྩི་ཉམས་བརྟས་རླུང་ནད་འཇོམས། །སྟོབས་དང་ཁུ་བ་མེ་དྲོད་འཕེལ། །ཁྲག་དང་ཁུ་བའི་ནད་སེལ་བྱེད། །བུ་སྐྱེད་པར་ཡང་བྱེད་པ་ཡིན། །རྒྱམ་ཚ་རུ་རྟ་པོ་སོན་ཆ། །ཤུ་ཏི་ལྕང་མ་ཤུ་དག་དང༌། །བ་ལེ་ཀ་དང་ཤིང་མངར་དང༌། །ག་བྲའི་རྩ་བ་ཀད་ཕ་ལ། །ཐང་ཤིང་དོང་གྲ་མ་ནུ་དང༌། །མེ་ད་དཔྱི་མོ་ཙི་ཏྲ་ཀ །ཟུར་པ་བོང་དབྱི་དང་ག །ཤམ་དུར་བྱིད་ཧ་རེ་ཎུ། །སྟི་ར་བིལ་བ་ནི་ལི་ནི། །ཏིམུ་ས་དང་པི་པི་ལིང༌། །དན་ད་ར་སྣ་ཆ་མཉམ་པ། །ཨེ་རཎྜ་ཡི་མར་རམ་ནི། །ཏིལ་མར་བསྐོལ་པའི་འཇམ་རྩི་ཡིས། །བད་ཀན་ནད་འཇོམས་རྒྱུ་རླུགས་དང༌། །རྟུག་སྐམ་སྐྲན་དང་གཞང་འབྲུམ་དང༌། །མཆེར་པའི་ནད་དང་གཅིན་སྙི་དང༌། །རླུང་འཁྱིལ་བ་དང་ལྟོ་སྤོས་དང༌། །རྡེ་ཆགས་ནད་ནི་མྱུར་དུ་སེལ། །ཡང་ན་བིལ་བ་ལ་སོགས་པའི། །རྩ་བ་ལྔ་པ་ཏིལ་མར་བསྐོལ། །ཡང་ན་བད་ཀན་སེལ་སྨན་སྦྱར། །ཏིལ་མར་དང་བཏང་བད་ཀན་འཇོམས། །ཡང་ན་པོ་སོན་ཆ་བརྒྱད་འགྱུར། །སྐྱུར་བསྐོལ་འཇམ་རྩིས་བད་ཀན་སེལ། །འཇམ་རྩི་འཇམ་པས་
རྨོངས་གྱུར་ལ། །རྣོན་པོ་ཉེ་བར་སྦྱང་བར་བྱ། །རྣོ་བས་གནོད་ལ་སྣུམ་པ་དང༌། །མངར་ཞིང་བསིལ་བ་འཇམ་པ་གཏང༌། །རྣོན་པོ་བ་གཅིན་པི་ལུ་དང༌། །ཙི་ཏྲ་ཀ་དང་ལན་ཚྭ་དང༌། །ཐལ་སྨན་དང་ནི་ཉུངས་ཀར་རྣམས། །དུས་ལ་བབ་པར་བཏང་བར་བྱ། །འོ་མ་མར་སྩོགས་འཇམ་པོ་ཡིས། །ཉམས་སྟོབས་དུས་དང་ནད་གཞི་རང་བཞིན་དག །རྣམ་པར་ཕྱེ་སྟེ་འཇམ་རྩི་གཏང་བྱ་བ། །རང་རང་གི་ནི་སྨན་གྱི་སྡེ་ཚན་གྱིས། །རང་རང་གི་ནི་ནང་རྣམས་བསལ་བར་བྱ། །ཚ་བས་ཉམ་ཐག་ལ་བསིལ་བ། །བསིལ་བས་ཉེན་ལ་དྲོ་འཇམ་སྦྱར། །དེ་དང་འཚམ་པའི་སྨན་ལྡན་པར། །འཇམ་རྩི་བརྟགས་ཏེ་གཏང་བར་བྱ། །སྦྱང་བར་བྱ་བའི་ནད་རྣམས་ལ། །རྟས་བྱེད་འཇམ་རྩི་མི་གཏང་ཞིང༌། །མི་གང་མཛེ་གཅིན་ནད་ཀྱིས་ཉེན། །ཚིལ་རྒྱས་ནད་ལ་གཏང་མི་བྱ། །ཉམ་ཆུང་གློ་འགྲམས་པ་དང་བརྒྱལ་བ་དང༌། །ལུས་སྐེམ་རིད་དང་སྦྱངས་པའི་ལུས་ཅན་དང༌། །གང་ཡང་དྲི་མས་ཚེ་འདི་གཟུང་འགྱུར་ལ། །སྦྱོང་བར་བྱེད་པའི་མས་གཏོང་གཏང་མི་བྱ། །ཡན་ལག་བརྒྱད་པའི་སྙིང་པོ་བསྡུས་པ་ལས། །ཆོ་ག་གྲུབ་པའི་གནས་ཀྱི་ལེའུ་སྟེ་བཞི་པའོ།། །།དེ་ནས་སྨན་མས་གཏོང་བའི་ཆོ་གས་ནད་ཕྱིན་ཏེ་སོས་པར་བྱ་བའི་ལེའུ་བཤད་པར་བྱའོ། །སྣུམ་ཆོས་དུགས་ནི་མ་བྱས་དང༌། །ལྟོ་ལྕི་བ་ལ་སྨན་གྲང་སྣུམ། །ཚ་ཉུང་སྨན་ཚད་ཆུང་བའམ། །སྨན་ནི་སྐ་བ་བཏང་གྱུར་ན། །དེ་ཡིས་ནད་ནི་བསླངས་གྱུར་དང༌། །སྟོབས་ཆུང་བ་ཡི་ནད་མ་ཕྱིན། །སྦྱོར་བ་ཉེས་པ་སྐྱེད་འགྱུར་ཞིང༌། །འཕྱེན་དང་ཕྱི་ས་གཅིན་སྲི་དང༌། །ལྟེ་བ་ཆུ་སོ་ན་ཞིང་ཚ། །དང་གར་ཆགས་ཤིང་གཞང་སྐྲངས་དང༌། །གཡན་པའི་ཐོར་བུ་མདོག་མི་སྡུག །མི་དགའ་མེ་དྲོད་ཆུང་བར་འགྱུར། །ཚད་འཁྲུའི་ཉེས་པ་བར་མ་ལ། །སྔར་བཤད་སྨན་གྱི་ཁུ་བ་གཉིས། །དེ་ལས་གཅིག་ནི་དྲོ་བ་ཡི། །བཏུང་བ་བླུགས་པ་བསྔགས་པ་ཡིན། །བོ་སོན་ཆ་ཡི་རེང་བུའི་དུགས། །དུས་ཤེས་པ་ཡིས་བཀྲུ་སྨན་གཏང༌། །བིལ་བའི་རྩ་བ་དུར་བྱིད་དང༌། །ཐང་ཤིང་ནས་དང་རྒྱ་ཤུག་དང༌། །རྒྱ་སྲན་ཆང་དང་བ་གཅིན་བཅས། །མས་གཏོང་འགགས་པ་
སེལ་བར་བྱེད། །ནད་གཞི་ཤས་ཆེ་ལུས་རྩུབ་དང། །ལྟོ་སྲ་ནུས་པ་ཆུང་བཏང་ན། །མས་གཏོང་ནད་གཞི་བསླངས་ནས་ནི། །རླུང་གི་ལམ་ནི་འགག་པར་བྱེད། །རླུང་ནི་ལམ་ལོག་ཞུགས་པ་དེས། །ལྟོ་སྦོས་ནད་རྣམས་གཟིར་བར་བྱེད། །གཞང་དང་ལྟོ་བ་ཚ་བ་དང༌། །རླིག་པ་ཆུ་སོ་ན་བྱེད་ཅིང༌། །སྙིང་གར་འགགས་པས་གཟེར་བ་དང༌། །ཕན་ཚུན་དུ་ནི་འགྲོ་བར་བྱེད། །དེ་ལ་ལུས་བསྐུ་དུགས་བྱས་པའི། །ལུས་ལ་རེང་བུ་གཞུག་པར་བྱ། །བིལ་བ་སྩོགས་སམ་བི་ལུ་དང༌། །ཉུངས་ཀར་བ་གཅིན་བཅས་མས་གཏོང། །ཙི་ཏྲ་ཐང་ཤིང་ཏིལ་མར་ནི། །བསྐོལ་བའི་འཇམ་རྩི་གཏང་བར་བྱ། །ཤུགས་ནི་བཀག་པར་གྱུར་པའམ། །བཙིར་དྲགས་པར་ནི་བྱས་པའམ། །ལན་ཚྭ་སྣུམ་ཤས་ཆུང་ལ་ཚ། །སྨན་ཆུང་བ་ཡིས་མས་གཏོང་བ། །འཇམ་པས་རླུང་གིས་གྱེན་དུ་འཕུལ། །ཁ་དང་སྣ་ནས་འབྱུང་བར་འགྱུར། །དེ་ཡིས་བརྒྱལ་དང་སྙིང་ནད་དང༌། །སྐོམ་དང་ཚ་བ་ལ་སོགས་འབྱུང༌། །བརྒྱལ་བའི་ནད་ནི་མཐོང་གྱུར་ན། །དེ་ཡི་གདོད་ལ་ཆུ་གྲང་གཏོར། །ངལ་བསོས་བར་དུ་གཡབ་པ་དང༌། །དབུགས་རྔུབ་འབྱུང་བ་བྱེད་དུ་གཞུག །ཁ་སྦུབས་བཞག་སྟེ་རྒྱབ་རྩིབ་ལོགས། །ལྟོ་བ་ལག་པ་དྲོན་པོས་མཉེ། །སྐྲ་ནས་བཏེག་སྟེ་སྤྲུགས་པ་དང༌། །སྦྲུལ་དང་མཆེ་བ་ཅན་འཇིགས་བསྟན། །མཚོན་དང་ཐོག་བབ་རྒྱལ་པོའི་མིས། །སྐྲག་བཅས་མས་གཏོང་ཐུར་དུ་འབྱུང༌། །ལག་པ་གོས་ཀྱིས་མགུལ་པར་བསྡམ། །ཅི་ནས་འཆི་བར་མི་འགྱུར་བྱ། །སྲོག་དང་གྱེན་རྒྱུ་རླུང་བཀག་པས། །ཐུར་སེལ་ཤིང་ཏུ་བདེར་རྒྱུ་བ། །གྲུབ་པ་ཡིས་ནི་མས་གཏོང་བ། །མྱུར་དུ་འདྲེན་པར་བྱེད་པ་ཡིན། །རུ་རྟ་གླ་གོར་ཞོ་ཤ་ཡི། །ལྡེ་གུ་སྐྱུར་རྩབས་སྦྱར་ཏེ་བླུད། །དྲོ་དང་རྣོ་དང་འཁྲུ་བ་ཡིས། །མས་གཏོང་ལུགས་བཞིན་འབྱུང་བར་བྱེད། །དུར་བྱིད་ཨ་རུ་ར་བ་གཅིན། །སྦྱར་བླུད་ལུགས་བཞིན་འབྱུང་བར་བྱེད། །ཞུ་བའི་གནས་འདུག་དུགས་བྱས་ལ། །རྩ་བ་བཅུ་པ་རྒྱ་ཤུག་ནས། །རྒྱ་སྲན་པ་གཅིན་བསྐོལ་བ་ཡི། །མས་གཏོང་དྲག་པོ་སྦྱར་བར་བྱ། །སླེ་ཏྲེས་
སྨྱུག་མའི་ལོ་མ་དང༌། །པུ་ཏི་ཀ་རཉྫའི་ཤུན་པ། །འོ་མ་ཟུར་པ་ཐང་ཤིང་དང༌། །པུཏི་ཀ་ནི་བ་གཅིན་བསྐོལ། །ཏིལ་མར་བུ་རམ་རྒྱམ་ཚར་བཅས། །བཀྲུ་སྨན་ལྡེ་གུར་བཅས་པ་གཏང༌། །མས་གཏོང་བྲང་ན་གནས་པ་ལ། །བིལ་བ་ལ་སོགས་ལྔ་བསྐོལ་གཏང༌། །མགོར་གནས་སྣར་བླུགས་དུད་པ་རྔུབ། །ཉུངས་ཀར་ལྡེ་གུས་མགོ་བོ་བསྐུ། །མས་གཏོང་དྲོད་ཆེས་རྣོ་སྐྱུར་དྲགས། །སྐ་ཆེས་དུགས་ནི་དྲགས་པ་དང༌། །ནད་གཞི་ཆུང་ཞིང་ལྟོ་སྙི་ལ། །ཡང་དང་ཡང་དུ་གཏོང་བ་ཡི། །སྦྱོར་བ་དྲགས་པ་ཉེས་འགྱུར་བས། །ལྟོ་བའི་ནད་ནི་སྐྱེད་པར་བྱེད། །དེ་ལ་བཀྲུ་སྨན་དྲག་སྦྱར་བས། །གསོ་དང་མཚུངས་པ་ཉིད་དུ་བྱ། །མས་གཏོང་ཐལ་སྨན་སྐྱུར་རྣོ་དྲོ། །ལན་ཚྭ་ཅན་ནམ་མཁྲིས་ཅན་ལ། །གཞང་ཚ་འབྲུད་ཅིང་གནོད་པ་དང༌། །ཡོངས་སུ་འཛག་པར་བྱེད་པར་འགྱུར། །ཁྲག་ནི་བཙོས་པ་ལྟ་བུར་འབྱུང༌། །མཁྲིས་པའང་མདོག་མང་འབྱུང་བར་བྱེད། །ལན་མང་ཤུགས་དྲག་འབྱུང་བ་དང༌། །ཡང་དང་ཡང་དུ་བརྒྱལ་བར་འགྱུར། །དེ་ལ་ཁྲག་མཁྲིས་འཁྲུ་བ་སེལ། །གསོ་བ་རབ་ཏུ་བསྔགས་པ་ཡིན། །ཚ་བ་སོགས་ལ་དུར་བྱིད་ཀྱི། །ལྡེ་གུ་རྒུན་ཆུར་སྦྱར་བ་བླུད། །དེ་ཡིས་བཤང་རླུང་མཁྲིས་པ་ནི། །བསལ་ནས་ཚ་བ་ལ་སོགས་འཇོམས། །དག་གྱུར་ནས་ཐུག་གྲང་མོ་ནི། །ཁར་དང་ནི་བཅས་པ་བླུད། །འཁྲུ་བ་དྲགས་པར་གྱུར་པ་ཡི། །བཤང་བ་ཟད་ལ་ཁ་ཟས་ནི། །མ་ཤའི་ཁུ་བ་ཟན་དྲོན་སྦྱིན། །ཞོ་དང་ཆང་ནི་བླུད་པར་བྱ། །དེ་ལྟར་གྲུབ་པའི་མས་གཏོང་ཉེས། །བཤད་ནས་སྣུམ་གྱི་མས་གཏོང་བཤད། །རླུང་ཅན་གྲང་ཞིང་ཆུང་བ་དང༌། །མཁྲིས་པ་རབ་ཚ་བད་ཀན་འཇམ། །འགྲངས་ཆེས་པ་ལ་ལྕི་བ་དང༌། །བཤང་བ་སྩོགས་ལ་སྟོབས་ཆུང་གཏང༌། །དེ་ནི་སྣུམ་རླུང་འདྲེས་གྱུར་ཞིང༌། །ཟིལ་གྱིས་མནན་པས་འབྱུང་མི་འགྱུར། །རེངས་དང་བརླ་ན་སྦོས་པ་དང༌། །རིམས་དང་གཟེར་དང་ཡན་ལག་ན། །རྩིབ་ལོགས་ན་དང་འདར་བ་ནི། །སྣུམ་རླུང་འདྲེས་ལ་འབྱུང་ཞེས་བྱ། །དེ་སྣུམ་ལན་ཚྭ་དྲོ་དང་སྐྱུར། །ར་སྣ་བི་དྲོ་ཡི་མར། །རང་སྐྱུར་ཆང་དང་རྒྱ་ཤུག་དང༌། །རྒྱ་སྲན་ནས་དང་བསྐོལ་
བའམ། །རྩ་བ་ལྔ་པ་བ་གཅིན་བཅས། །མས་གཏོང་དྲག་པོས་ལེགས་བསལ་བྱ། །དེ་དག་ཉིད་ཀྱི་ཏིལ་མར་དང༌། །དགོངས་ཀར་ཟན་ཟོས་འཇམ་རྩི་གཏང༌། །སྐོམ་དང་ལུས་ཚ་རྨོངས་བག་དམར། །མདོག་ཉམས་རིམས་འདེབས་མུན་པར་མཐོང༌། །མཁྲིས་པ་དང་འདྲེས་ཡིན་ཞེས་བྱ། །ཁ་མངར་མས་གཏོང་བྱས་ཏེ་སྦྱངས། །ལུས་སྙོམ་སྒྱིད་ཞན་རིམས་དྲག་འདེབས། །ཆམ་པ་ལུས་ལྕི་ཡིག་འཆུས། །བརྒྱལ་བཅས་ན་བས་བད་ཀན་དང༌། །འཇམ་རྩི་སྣུམ་ནི་འདྲེས་ཤེས་བྱ། །དེ་ལ་བསྐ་དང་ཁ་དང་ཚ། །ཆང་དང་བ་གཅིན་ལ་བསྐོལ་བ། །པོ་སོན་ཆ་དང་ཏིལ་མར་དང༌། །སྐྱུར་བཅས་བཅས་མས་གཏོང་བ་ཡིས་བསལ། །སློན་དང་བརྒྱལ་དང་ཡི་ག་འཆུས། །སྙོམ་གཟེར་གཉིད་ཆེ་ཡན་ལག་ན། །མ་ཞུའི་མཚན་མར་ལུས་ཚར་བཅས། །དེ་ནི་འགྲངས་ཆེས་འདྲེས་ཤེས་བྱ། །དེ་ལ་ཚ་དང་ལན་ཚྭའི་ཕྱེ། །བསྐོལ་བའི་སྨིན་བྱེད་སྨན་དང་ནི། །བཀྲུ་སྨན་འཇམ་པོ་གཏང་བ་དང༌། །མ་ཞུ་ལ་ཕན་ཐམས་ཅད་ཕན། །གཅིན་རྟུག་འཕྱེན་ནི་འགགས་པས་ཉེན། །ལུས་ལྕི་ལྟོ་སྦོས་སྙིང་ག་ན། །སྣུམ་དང་བཤང་འདྲེས་ཡིན་ཞེས་བྱ། །དེ་ལ་སྣུམ་དུགས་རིང་བུར་བཅས། །དུར་བྱིད་བིལ་བ་སོགས་བསྐོལ་ལ། །མས་གཏོང་དྲག་དང་འཇམ་རྩི་གཏང༌། །རྟུག་པ་འགགས་པ་སེལ་བས་ཀྱང༌། །ཆོ་ག་བཞིན་དུ་ལེགས་པར་བསལ། །རྟོག་པའམ་གཞང་ནི་སྐྲང་པའམ། །ཐུག་པ་ལེགས་པར་འཐུངས་པ་ཡིས། །རྐུབ་ཏུ་སྣུམ་ནི་བཏང་གྱུར་པ། །སྡོད་པ་མེད་པར་ཤུགས་ཀྱིས་རྒྱུ། །དེ་ནས་རོ་སྟོད་མགྲིན་པ་དང༌། །སྟོད་ཀྱི་བུ་ག་དག་ཏུའང་འབྱུང༌། །དེ་ལ་དུར་བྱིད་རྒྱ་ཤུག་ནས། །རྒྱ་སྲན་བ་གཅིན་བསྐོལ་བ་དང༌། །དེ་དང་བསྐོལ་བའི་ཏིལ་མར་ནི། །མས་གཏོང་འཇམ་རྩིར་བཅས་པ་གཏང༌། །ལྐོག་མར་བྱང་བ་དགག་པར་བྱ། །ལྐོག་མ་བསྡམས་ཤིང་སྐྱུག་སྨན་དང༌། །སློན་བྲོ་སེལ་བའི་གསོ་བས་ཀྱང༌། །བཟློག་པ་དག་ནི་དེ་ལ་བྱ། །སྣུམ་ཚོས་མ་གྱུར་མི་གཏང་སྟེ། །དེས་ནི་གཞང་ཁར་ཆགས་འགྱུར་ཞིང༌། །དེ་ལས་ནད་བཅས་རྨོངས་བག་དང༌། །གཡའ་དང་སྐྲང་
པ་སྐྱེད་པར་བྱེད། །དེ་ལ་མས་གཏོང་རྣོན་པོ་དང༌། །ཨརྐའི་ལོར་བསྐོལ་ཏིལ་མར་གཏང༌། །དབུགས་མ་ཕྱུང་བར་བཅིང་པའམ། །མ་ལུས་པར་ནི་བཏང་བ་ཡིས། །རླུང་ཞུགས་ནས་ནི་འཁྲུག་བྱེད་ཅིང༌། །གཟེར་དང་ན་བ་སྐྱེད་པར་བྱེད། །དེ་ལ་གཞང་ཁ་བསྐུ་དུགས་བྱ་རླུང་འཇོམས་པ་ཡི་ཁ་ཟས་གཏང༌། །མྱུར་དུ་བཅུག་ཅིང་ཕྱུང་བའམ། །གློ་བུར་དུ་ནི་བཏེག་པ་ཡིས། །རྐེད་པ་གཞང་དང་བརླ་བྱིན་པ། །ཆུ་སོ་རེངས་ཤིང་ན་བར་འགྱུར། །དེ་ལ་རླུང་འཇོམས་ཁ་ཟས་དང༌། །དུགས་བསྐུ་འཇམ་རྩིར་བཅས་པ་ཕན། །བཙིར་བའི་ཚེ་ན་བར་དུ་གྲོལ། །རླུང་གིས་གཞང་ལ་གནོད་གྱུར་ནས། །བྲང་དང་མགོ་བོ་གཟེར་ཞིང་ན། །བརླ་ཡི་ནད་ནི་སྐྱེད་པར་བྱེད། །དེ་ལ་བིལ་བ་ལ་སོགས་དང༌། །པོ་སོན་ཆ་དང་དུར་བྱིད་སོགས། །བ་གཅིན་དང་ནི་སྦྱར་བ་གཏང༌། །བཙིང་དྲགས་པ་ཡིས་ཁོང་པར་ནི། །མི་འདུག་ལྐོག་མ་འབྱུང་བར་འགྱུར། །དེ་ལ་མས་གཏོང་བཀྲུ་སྨན་དང༌། །མགུལ་པ་བསྡམ་སོགས་ལས་རྣམས་བྱ། །བཀྲུ་སྨན་སོགས་པས་དག་བྱས་ནས། །ལུས་དང་ཉམས་སྟོབས་མེ་དྲོད་ཆུང༌། །སྒོ་ང་གཞོན་ནུའམ་ཏིལ་མར་ནི། །སྣོད་ནི་གང་བ་ཇི་བཞིན་དུ། །གནོད་པར་གྱུར་པ་ཐམས་ཅད་ལས། །སྨན་པས་འབད་དེ་བསྲུང་བར་བྱ། །ཁ་ཟས་མངར་དང་ཡིད་འོང་སྦྱིན། །དེ་འོག་སྐྱུར་དང་ལན་ཚྭར་བཅས། །དེ་ནས་མངར་དང་ཁ་བ་སྦྱིན། །དེ་འོག་བསྐ་དང་ཚ་བ་སྦྱིན། །རོ་ནི་སྣུམ་དང་རྩུབ་པ་དང༌། །ཕན་ཚུན་གཉེན་པོར་གྱུར་པ་བཞིན། །རིམ་པ་ཉེ་བར་སྦྱར་བ་ཡི། །རིམ་པ་དེ་ནི་རྣལ་དུ་དབབ། །ཀུན་བཟོད་ཉམས་སྟོབས་བརྟན་པ་ནི། །རྣལ་མར་གྱུར་པ་ཡིན་ཞེས་བྱ། །ཡན་ལག་བརྒྱད་པའི་སྙིང་པོ་བསྡུས་པ་ལས། ཆོ་ག་གྲུབ་པའི་གནས་ཀྱི་ལེའུ་སྟེ་ལྔ་པའོ།། །།དེ་ནས་སྨན་གྱི་ཆོ་ག་བཤད་པར་བྱའོ། །ས་ཕྱོགས་སྐམ་ཞིང་ཆ་མཉམ་པའི། །གཞི་མཉམ་གཙང་ཞིང་ས་གཞི་བཟང༌། །དུར་ཁྲོད་ཤིང་ཆེན་ལྷ་གནས་དང༌། །གཡངས་གྲོག་མ་ཅན་མ་གཏོགས། །འཇམ་ཞིང་ཆུ་ནི་གཡས་ན་འབབ། །འཇག་མ་དཱུར་བ་དང་ལྡན་པ། །ཐོང་ལྕགས་ཀྱིས་ནི་མ་སྣད་པ། །ལྗོན་ཤིང་གྲིབ་མས་མ་
ཕོག་པ། །ཁ་དོག་བཅུད་ལ་སོགས་དང་ལྡན། །སྨན་སྐྱེས་པ་ནི་བསྔགས་པ་ཡིན། །འབུས་མ་ཟོས་ཤིང་མེས་མ་ཆིག །འབྱུང་བ་སོགས་ཀྱིས་གནོད་མ་གྱུར། །ཉི་གྲིབ་ཆུ་ལ་སོགས་མ་ཉེན། །ཇི་བཞིན་དུས་སུ་བསྟེན་གྱུར་པ། །རྩ་བ་ཆེ་ཞིང་གཏིང་དུ་ཟུག །བྱང་གི་ཕྱོགས་སུ་བསྟེན་པ་བཟང༌། །དེ་ནས་དགེ་བ་ལ་སྤྱོད་ཅིང༌། །དད་ལྡན་གཙང་སྦྲ་སྨྱུང་བ་བྱས། །སྨན་ནི་ལེགས་པར་གནས་པ་བཏུ། །འོ་མར་བཅས་པ་དུས་སུ་སྦྱར། །བུ་རམ་མར་དང་སྦྲང་རྩི་དང༌། །པི་པི་ལིང་དང་བྱི་དང་ག །འབྲུ་རྣམས་མ་གཏོགས་འོ་མ་མེད། །ལོ་གཅིག་འདས་པར་མ་གྱུར་སྦྱར། །འོ་མ་བ་ནི་ཡར་མ་ཡི། །གཅིན་དང་ལྕི་བ་སྐོན་མེད་ཡིན། །ན་ཚོད་སྟོབས་ལྡན་ལུས་ཟུངས་དང༌། །རཱ་འཛུགས་རྨིག་པ་ལ་སོགས་བཟང༌། །ལན་ཚྭ་མ་གཏོགས་རོ་ལྔའོ། །སྨན་ཁུ་ཡི་ནི་སྐྱེ་གནས་ཡིན། །སྨན་ཁུ་ལྡེ་གུ་བསྐོལ་དང་གྲངས། །ཕན་དང་ཞེས་ནི་བྱ་བ་སྟེ། །སྨན་ནི་རྣམ་པ་ལྔ་རུ་བརྟགས། །སྔ་མ་བཞིན་དུ་མཐུ་སྟོབས་ཆེ། །འཕྲལ་དུ་བཏུས་ཏེ་བརྡུངས་ནས་ནི། །ཚགས་ལ་བཙིར་ཏེ་བཙགས་པ་གང༌། །དེ་ནི་ཁུ་བ་ཞེས་བཤད་དོ། །ལྡེ་གུ་གཤེར་གྱིས་སྦྲུས་བཏགས་པའོ། །དེ་བསྐོལ་བ་ནི་བསྐོལ་བ་ཡིན། །བསྒྲངས་པ་མཚན་མོ་གཞག་པ་ཡིན། །ཁཎྜ་འཕྲལ་དུ་སྦྱར་བཙགས་པ། །དེ་དག་གི་ནི་ཚད་བརྟག་པ། །ནད་སྩོགས་སྟོབས་ལས་སྦྱར་བར་བྱ། །དེ་ཡང་དྲང་སྲོང་གིས་བཤད་པ། །ཚད་ཀྱི་ངེས་པ་ཡོད་མིན་གྱི། །ནད་དང་ལྟོ་ཚད་ཉམས་དང་ནི། །དུས་དང་ཡུལ་ནི་རྣམ་བརྟགས་ཏེ། །དེ་ལྟར་སྨན་ནི་གཏང་བར་བྱ། །སྨན་གྱི་ཁུ་བ་སྲང་བཞི་ནི། །འབྲིང་ཚང་ཙམ་དུ་བཤད་པ་ཡིན། །ལྡེ་གུ་ཞོ་གཉིས་དག་དང་བསྲེས། །དེ་ནི་ཆུ་སྲང་གསུམ་གྱི་ཚད། །བསྐོལ་བའི་སྨན་ནི་སྲང་གཅིག་བྱ། །བྲེ་ཕྱེང་ཆུ་བསྐོལ་བཞི་ཆ་ལུས། །བསྒྲངས་པ་སྲང་གཅིག་སྲང་དྲུག་ནི། །དེ་ལས་གཞན་པས་སྲང་བཞི་ཡིན། །སྨན་མར་བསྐོལ་ཚད་མ་སྨོས་པར། །ལྡེ་གུ་སྣུམ་དང་གཤེར་རྫས་ནི། །བཞི་འགྱུར་དུ་ནི་སྐྱེད་དེ་སྦྱར། །ཤཽ་ན་ཀ་ཡིས་བཤད་པ་ནི། །སྣུམ་བསྐོལ་ཆུ་ནི་འབའ་ཞིག་དང༌། །ཁུ་བ་བསྐོལ་པ་རིམ་བཞིན་དུ། །
ལྡེ་གུའི་ཆ་ནི་བཞི་དང་དྲུག །བརྒྱད་ནི་རིམ་བཞིན་སྦྱར་བར་བྱ། །ལྡེ་གུ་སོར་མོར་མ་འབྱར་དང༌། །སྣུམ་ནི་མེར་བཅུག་སྒྲ་མེད་དང༌། །གང་ཚེ་ཁ་དོག་སོགས་ཕུན་ཚོགས། །དེ་ཚེ་དེར་ནི་མྱུར་དུ་དབབ། །མར་ནི་ལྦུ་བ་དངས་མ་དང༌། །ཏིལ་མར་ལྦུ་བ་བྱུང་བ་དང༌། །ལྡེ་གུ་ནལ་ནལ་པོར་འགྱུར་ཞིང༌། །ཆུ་ནང་འབྱིང་ཞིང་གྱེས་མི་འགྱུར། །ཚོས་པའི་ཚད་ནི་རྣམ་གསུམ་སྟེ། །འཇམ་ཚོས་འབྱར་བག་འབྱར་ལ་རྩུབ། །འཇམ་ཚོས་ཚིག་མ་ལྡེ་གུ་འདྲ། །འབྱར་བག་སྦྲང་རྩི་ལྟ་བུ་ཡིན། །ཅུང་ཟད་ཚིག་ཅིང་མདོག་གནག་པར། །སྣང་འགྱུར་དེ་ནི་ཐ་མ་ཡིན། །དེ་ལས་འདས་པར་དོན་མི་བྱེད། །མཚོས་མེ་དྲོད་ཉམས་པར་བྱེད། །འཇམ་ཚོས་སྣར་བཏང་རྩུབ་པས་བསྐུ། །བཏུང་དང་འཇམ་རྩི་འབྱར་བག་བྱ། །ཤ་ན་ཀར་ཤ་ལག་མཐིལ་དང༌། །སྤར་གང་ཕུལ་བྲེ་ཨ་ད་ཀ །དྲོ་ན་བ་ཧ་རིམ་བཞིན་དུ། །བཞི་འགྱུར་ཡིན་པར་ཤེས་པར་བྱ། །རློན་པ་ཉིས་འགྱུར་སྦྱར་བྱ་ཞིང༌། །གཤེར་པ་ཕུལ་གང་སྩོགས་དེ་བཞིན། །བཏགས་ཏེ་སྦྲུས་ནས་གཤེར་མེད་པའི། །སྣུམ་བསྐོལ་བ་ལ་ཆུ་གཞུག་བྱ། །གང་དུ་ཚད་ནི་མ་བཤད་པ། །དེར་ནི་ཆ་མཉམ་སྦྱར་བར་བྱ། །ཤ་ན་གཉིས་ལ་བ་ད་ཀ །དེ་གཉིས་ཀར་ཤ་གོ་ལ་དང༌། །བ་རུ་ར་དང་དྲང་འཁྲུ་མེད། །ཨ་ཀྵ་བི་ཙུ་སུ་བརྞ། །ལག་མཐིལ་ཁམ་ཚད་བྱི་ལའི་སྡེར། །ཏིན་དུ་ཀ་དང་ལག་པའི་ཚད། །སྒྲ་གཞན་དོན་ནི་གཅིག་པ་ཡིན། །ཤུ་ཏི་བརྒྱད་པ་པི་ཙུ་ཡིན། །སྲང་གཅིག་བིལ་བ་པྲ་ཀུན་ཛ། །སྤར་གང་ཨ་མྲ་བཞི་པོ་ཡིན། །གཅིག་གི་མིང་གི་རྣམ་གྲངས་ཡིན། །སྲང་གཉིས་ཁྱོར་གང་དེ་གཉིས་ལ། །སྙིམ་གང་དེ་གཉིས་མ་ནི་ཀ །ཨ་ད་ཀ་དང་སྣོད་ཀན་ས། །དྲོ་ན་ཀུམ་པ་བུམ་ཆེན་ཡིན། །ཏུ་ལ་སྲང་ནི་བརྒྱ་ཡིན་ཏེ། །དེ་ཉི་ཤུ་ལ་ཁུར་དུ་བཤད། །གངས་ཅན་འབིགས་བྱེད་རི་ཡིས་ནི། །ས་གཞི་ཕལ་ཆེར་ཁྱབ་པ་ཡིན། །དེ་ལས་དང་པོར་བསིལ་ཞིང་ཕན། །འབིགས་བྱེད་སྨན་ནི་མེའི་རང་བཞིན། །ཡན་ལག་བརྒྱད་པའི་སྙིང་པོ་བསྡུས་པ་ལས། །ཆོ་ག་གྲུབ་པའི་གནས་ཀྱི་ལེའུ་དྲུག་པའོ།། །།ཡན་ལག་བརྒྱད་པའི་སྙིང་པོ་བསྡུས་པ་ལས། ཆོ་ག་གྲུབ་པའི་
གནས་ཏེ་གནས་ལྔ་པ་ལུས་གསོ་བའི་ཡན་ལག་རྫོགས་སོ།། །།དེ་ནས་བྱིས་པ་གསོ་བའི་ཆོ་གའི་ལེའུ་བཤད་པར་བྱའོ། །དེ་ཡང་རྒྱུན་ཤེས་ཀྱི་བུ་ལ་སོགས་པ་དྲང་སྲོང་ཆེན་པོ་རྣམས་ཀྱིས་འདི་ལྟར་བཤད་དེ། བྱིས་པ་བཙས་མ་ཐག་ཕྲུ་མ། །བསལ་ཏེ་རྒྱམ་ཚ་མར་བསྐུས་སྦྱང༌། །དེ་འོག་བཙས་པས་སྡུག་བསྔལ་ལ། །བ་ལའི་ཏེལ་མར་བླུགས་པར་བྱ། །དེ་ཡི་རྣ་བའི་དྲུང་དུ་ནི། །རྡོ་གཉིས་བརྡུངས་པར་སྤྱད་པར་བྱ། །དེ་ནས་དེ་ཡི་རྣ་བ་ནི། །གཡས་པར་སྔགས་འདི་བརྗོད་པར་བྱ། །ཡན་ལག་ཡན་ལག་ལས་བྱུང་ཁྱོད། །སྙིང་ལས་མངོན་པར་བསྐྱེད་པ་ཡིན། །བདག་ཉིད་བུ་ཞེས་བྱ་བ་ཁྱོད། །ལོ་བརྒྱར་ཡང་དག་འཚོ་འགྱུར་ཞིང༌། །ལོ་བརྒྱ་ཐུབ་ཅིང་སྟོན་བརྒྱ་འཚོ། །ཚེ་རིང་པོར་ནི་ཐོབ་གྱུར་ཅིག །རྒྱུ་སྐར་ཕྱོགས་དང་མཚན་མོ་དང༌། །ཉིན་མོས་ཁྱོད་ནི་བསྲུང་བར་ཤོག །བདེ་བར་གྱུར་ན་ལྟེ་བ་ནི། །སོར་བཞིའི་འོག་ཏུ་སྲད་བུས་བཅིང༌། །དེ་ཡི་འོག་ཏུ་བཅད་ནས་ནི། །ལྟེ་བ་ལ་ནི་བརྟོད་དེ་བཞག །དེ་འོག་ལྟེ་བར་རུ་རྟ་ཡི། །ཏིལ་མར་གྱིས་ནི་བསྐུ་བར་བྱ། །འོ་མ་ཅན་ཤིང་བསྐོལ་ཆུའམ། །དྲི་ཞིམ་བཅུད་ལྡན་ཆུ་དག་ནི། །གསེར་རམ་དངུལ་ནི་བསྲེགས་པ་ཡིས། །བསྲོས་པའི་དྲོ་འདམ་མཆུ་ཡིས་བཀྲུ། །དེ་ནས་མཛུབ་མོ་གཡས་པ་ནི། །དཀྲིས་པས་རྐན་ནི་བཏེག་ནས་ཀྱང༌། །མགོ་བོར་རས་བལ་སྣུམ་ཅན་གཡོགས། །བློ་དང་ཚེ་དང་སྟོབས་བསྐྱེད་ཕྱིར། །ཤུ་དག་པྲ་མ་བི་ཤ་ལི། །ཤང་ཁ་པུཥྤའི་ལྡེ་གུ་ནི། །མར་དང་སྦྲང་རྩིར་བཅས་པ་དག །སྔགས་བཏབ་ཧ་རེ་ཎུ་ཙམ་སྦྱིན། །གསེར་དང་ཤུ་དག་མུ་མེན་དང༌། །མ་ནུ་ཨ་རུ་རའི་ཕྱེ་མ། །གསེར་དང་སྐྱུ་རུ་རའི་ཕྱེ་མ། །སྦྲང་རྩི་མར་བཅས་ལྡེ་གུ་སྦྱིན། །དེ་ནས་མངལ་ཆུ་རྒྱམ་ཚ་ནི། །མར་དང་བཅས་པ་སྐྱུག་ཏུ་གཞུག །སྐྱེ་དགུའི་བདག་པོ་ཆོ་ག་ཡིས། །བཙས་པའི་ཆོ་ག་བྱེད་དུ་གཞུག །སྟིང་ལ་གནས་པའི་རྩ་རྣམས་ནི། །བཙས་ནས་ཁ་ནི་དབྱེ་བའི་ཕྱིར། །ཉི་མ་གསུམ་མམ་བཞི་པ་ལ། །བུད་མེད་ཀྱི་ནི་ནུ་ཞོ་འབྱུང༌། །དེ་བས་ཉིན་ཞག་དང་པོ་ལ། །དུས་གསུམ་དུ་ནི་སྦྲང་རྩི་མར། །བྱི་ཚེར་བ་དང་སྦྱར་བ་ལ། །
སྔགས་ཀྱིས་བཏབ་སྟེ་བྱིས་པར་བྱིན། །གཉིས་པ་དང་ནི་གསུམ་པ་ལ། །ལཀྵྨི་དང་བསྐོལ་མར་བླུད་བྱ། །དེ་ནས་དང་པོའི་ནུ་ཞོ་ནི། །བཀག་པ་དེ་ལ་མར་སར་ནི། །ཞོ་གཉིས་ཙམ་གྱི་ཚད་སྦྱིན་ཞིང༌། །ནུ་ཞོ་དུས་གཉིས་བླུད་པར་བྱ། །མ་ཉིད་ཀྱི་ནི་ནུ་ཞོ་བླུད། །དེ་ཡིས་ལུས་ནི་འཕེལ་བྱེད་ཡིན། །དེ་མེད་མ་མ་ཤིན་ཏུ་བྱམས། །སྐྱོན་མེད་འཁྲིག་པ་སྤངས་པ་དང༌། །རིགས་དང་རང་བཞིན་དེ་དང་མཉམ། །ནད་མེད་ན་ཚོད་དར་ལ་བབ། །བུ་མ་ཤི་ཤིང་བརྐམ་ཆགས་མེད། །གཉིས་ཀྱི་འོ་མ་བླུད་པར་བྱ། །དེ་གཉིས་ཟས་དང་སྤྱོད་ལམ་ནི། །ཕན་པས་འབད་དེ་གསོ་བར་བྱ། །མྱ་ངན་ཁྲོ་དང་སྨྱུང་བ་དང༌། །ལུས་དུབ་ནུ་ཞོ་ཉམས་པའི་རྒྱུ། །བུ་རམ་ཆང་མ་གཏོགས་ཆང་དང༌། །རླན་ཅན་ཤ་ཁུ་འོམ་དང༌། །འོ་མ་ཅན་སྨན་མྱ་ངན་སྩོགས། །གོ་བཟློག་ནུ་ཞོའི་རྒྱུན་ཡིན་ནོ། །མི་མཐུན་ཟས་ནི་ཟོས་པ་དང༌། །ལྟོགས་དང་སེམས་ནི་ཉམས་པ་དང༌། །ལུས་ཟུངས་གནོད་བཅས་སྦྲུམ་མ་ཡི། །འོ་མ་བྱིས་པའི་ནད་སྐྱེད་བྱེད། །ནུ་ཞོ་མེད་ན་རའམ་བའི། །འོ་མ་བྲི་ཧ་ཏི་སོགས་རྩ་འམ། །སྟིར་གཉིས་བསྐོལ་ཁ་རར་བཅས། །ཡོན་ཏན་དེ་ལྡན་བླུད་པར་བྱ། །དྲུག་པའི་མཚན་མོ་ཁྱད་པར་དུ། །བསྲུང་དང་གཏོར་མའི་བྱ་བ་བྱ། །དེ་ཡི་གཉེན་གྱིས་མེལ་ཚེ་བྱ། །ཤིན་ཏུ་དགའ་བ་ཉིད་ཀྱང་བྱ། །ཞག་བཅུ་རྫོགས་པར་འགྱུར་བ་དང༌། །རང་རིག་འཚམ་པའི་ཆོ་ག་ནི། །བྱེད་དུ་གཞུག་ཅིང་བཙས་མ་བསླང༌། །ལུས་ལ་ལྡོང་རོས་བ་བླ་དང༌། །གི་ཝཾ་ཙནྡན་ཨཀར་བཏགས། །རྒྱུ་སྐར་ལྷ་འམ་ཉེ་དུ་ལས། །དྲས་པའི་ཡི་གེ་མཉམ་པ་ཡི། །མིང་ནི་བྱིས་པ་ལ་གདགས་བྱ། །དེ་ནས་རང་བཞིན་དབྱེ་ལས་བཤད། །གཟུགས་ཀྱི་ཚེ་ནི་ཡོངས་སུ་བརྟག །མཁས་པས་བྱིས་པའི་མལ་སྟན་ནི། །བྱང་ངམ་ཤར་དུ་མགོ་བསྟན་ལ། །སྔས་དང་གོས་ནི་གཙང་ཞིང་བཀྲུས། །འཇམ་ཞིང་གཉེར་མ་མེད་པ་ཡི། །གོས་ལ་གདོན་ནི་འཇོམས་བྱེད་པའི། །སྨན་གྱི་དུད་པས་བདུག་པར་བྱ། །བྱ་རོག་བསད་པ་སྣུམ་གསུམ་དང༌། །བཅས་པའི་དུད་པས་བདུག་པར་བསྔགས། །བསེ་རུ་ལ་སོགས་གསོན་པོ་ཡི། །རྭར་བཏགས་
ནོར་བུ་བཟང་པོ་སྤུ། །བྲམྷི་འཚོ་བྱེད་ཨིནྤྲི་སོགས། །སྨན་ནི་བཟང་པོ་གདགས་པར་བྱ། །མཆོག་ཏུ་རྟག་པར་ཤུ་ངག་ནི། །ལག་གཉིས་མགུལ་དང་སྤྱི་བོར་གདགས། །དེས་ནི་ཚེ་དང་ཡིད་གཞུངས་དྲན། །བདེ་བ་སྐྱེད་བྱེད་གདོན་ལས་བསྲུང༌། །ཟླ་བ་བདུན་ནམ་བརྒྱད་པ་ན། །ནད་མེད་ཉིན་ཞག་ཤིས་པ་ལ། །མ་མའི་པང་དུ་སྤྲོ་བསྲིངས་ལ། །དགུན་གྱི་དུས་སུ་རྣ་བ་དབུག །ཁྱེའུའི་དང་པོ་གཡས་པ་དབུག །བུ་མོའི་གཡོན་པ་དབུག་པར་བྱ། །སྨན་པས་ཁབ་ནི་གཡས་པས་གཟུང༌། །གཡོན་པས་རྣ་ཤལ་བཟུང་ནས་ནི། །རྣ་པའི་ཁྱོན་གྱི་དབུས་ལས་ནི། །མཁུར་ཚོས་ཀྱི་ནི་ཕྱོགས་དག་ཏུ། །པགས་པ་དག་ནི་ཕུག་ནས་སུ། །ཉི་མའི་འོད་ཟེར་སྣང་བ་རུ། །མི་འགྱུར་བརྟན་པོར་བཟུང་ནས་ནི། །རྒྱ་སྐྱེགས་ཀྱི་ནི་ཁུ་བས་བསྐུ། །དབུས་སུ་རང་བཞིན་གྱིས་གྲུབ་པའི། །བུ་ག་དྲང་པོར་ཅིག་ཅར་དབུག །དེ་ནས་རྩ་ནི་གཡས་པའི་ཕྱིར། །སྟེང་འོག་ངོས་གཉིས་གཏང་མི་བྱ། །ནག་པོ་གནང་འདྲ་དམར་པོ་སྟེ། །རྩ་དེ་ཕུག་ན་དམར་ཞིང་ན། །སྐྲང་ཞིང་ཚལ་སྲ་བ་དང༌། །གཉེའུ་རེངས་གཞན་དབང་ཅན་ནད་སྐྱེད། །དེ་རྣམས་ནད་གཞི་ཇི་བཞིན་དུ། །གསོ་བ་དག་ནི་མྱུར་དུ་བྱ། །གནད་དུ་ཕུག་ན་ཁྲག་མེད་ཅིང༌། །ནད་དང་དམར་སོགས་འབྱུང་མི་འགྱུར། །ཁབ་རྗེས་སྐུད་པ་སྣུམ་ཅན་ནི། །རྗེས་སུ་གཞུག་པ་ཉིད་དུ་བྱས། །ཏིལ་མར་རློན་པས་བསྐུ་བ་དང༌། །རྒྱ་ཆེར་དེ་ནི་བསྐྱེད་པར་བྱ། །རྣ་ཤལ་ཕུག་ནས་ཕན་ཟས་བྱིན། །དེ་འོག་སྡོང་བུ་སྦོམ་པོ་གཞུག །ཞག་གསུམ་བཞག་ནས་རྨ་འཚོབས་ནས། །རིམ་གྱིས་དེ་ནི་བསྐྱེད་པར་བྱ། །དེ་ནས་དེ་ཡི་སོ་སྐྱེས་ནས། །ནུ་ཞོ་འཐུང་ལས་རིམ་གྱིས་བཟློག །སྔར་བཤད་འོ་མ་སྦྱིན་བྱ་ཞིང༌། །ཁ་ཟས་ཡང་དང་རྟས་བྱེད་བྱིན། །ནུ་ཞོ་སྤངས་ནས་བི་ཡ་ལའི། །རྐང་དང་ཤིང་མངར་འབྲས་ཡོས་དང། །ཀ་ར་དཀར་པོ་ལ་དུ་སྦྱིན། །བིལ་བ་གཞོན་ནུ་སུག་སྨེལ་དང༌། །ཁ་ར་འབྲས་ཡོས་དྲོད་སྐྱེད་སྦྱིན། །འཁྲུག་ཙོད་ད་ཏ་ཀའི་མེ་ཏོག །ཁ་ར་འབྲས་ཡོས་སྐྱོ་མ་སྦྱིན། །གནོད་པ་སྐྱེད་པར་མི་བྱེད་པའི། །སྨན་གྱིས་དེ་ཡི་ནད་བསལ་བྱ། །ཤིན་ཏུ་དྲགས་
ནད་མ་གཏོགས་གཞན། །རྣོ་སྨན་བཀྲུ་སྨན་ཀུན་ཏུ་སྤངས། །ཚུལ་མིན་སྐྲག་པར་མི་བྱ་སྟེ། །སྐྲག་ན་གདོན་ནི་འཇུག་པར་འགྱུར། །གོས་ཀྱི་རླུང་དང་གཞན་རེག་དང༌། །འགོམ་པ་ལ་ནི་དེ་བསྲུང་བྱ། །བྲམྷི་ཉུངས་ཀར་ཤུ་དག་དང༌། །རྒྱམ་ཚ་རུ་རྟ་ཤ་རི་བ། །པི་པི་ལིང་བཅས་བསྐོལ་བ་ཡི། །སྨན་མར་དྲན་དང་ཡིད་གཞུངས་སྐྱེད། །ཚེ་འཕེལ་གདོན་ནི་མི་བཟད་འཇོམས། །འབྱུང་པོ་སྨྱོ་བྱེད་ཟློག་པར་བྱེད། །སོ་མ་ར་ཛ་ཤུ་དག་དང༌། །སྦལ་པ་ཉེ་ཤིང་སླེ་ཏྲེས་དང༌། །ཤང་ཀ་པུཥྤ་བྲམྷི་དང༌། །པྲ་མ་སོ་མ་སྲང་རེ་ནི། །ལྡེ་གུ་བརྒྱད་ཆ་མར་བྲེ་གང། །འོ་མ་བཞི་འགྱུར་ནང་དུ་ནི། །བསྐོལ་བ་དེ་བླུད་དཔལ་ཡོན་དང༌། །ཚེ་བློ་ཡིད་གཞུངས་དྲན་པ་སྐྱེད། །ར་ཡི་འོ་མ་ཨ་རུ་ར། །ཚ་བ་གསུམ་དང་པ་ཏ་དང༌། །ཤི་ཀྲུ་ཤུ་དག་ལྕེ་མྱང་ཚ། །བསྐོལ་བའི་སྨན་མར་དབྱངས་ཅན་དེ། །ཚིག་དང་བློ་གྲོས་དྲན་པ་དང༌། །དག་གསལ་མེ་དྲོད་སྐྱེད་པར་བྱེད། །ཤུ་དག་སླེ་ཏྲེས་ཨ་རུ་ར། །ཉེ་ཤིང་བ་དང་ཤང་གི་ནི། །ཨ་པ་མརྒ་བསྐོལ་བ་ཡི། །སྨན་མར་ཡོན་ཏན་སྔ་མར་མཚུངས། །ཤུ་དག་དཀར་པོ་རུ་རྟ་གསེར། །ཨརྒའི་པུཥྤ་གསེར་དང་བཅས། །ལྕགས་རྒྱགས་དང་ནི་དུང་དང་གསེར། །ཀ་རཉྫ་དང་ཤུ་དག་གསེར། །རྐང་པ་རེ་རེས་བཤད་པ་བཞི། །སྦྲང་རྩི་མར་དང་བཅས་ལྡེ་གུ། །ལོ་གཅིག་བྱིན་ན་ལུས་དང་བློ། །ཁ་དོག་ཉམས་སྟོབས་སྐྱེད་པར་བྱེད། །ཤུ་དག་ཤིང་མངར་ལྕེ་མྱང་ཚ། །དོང་གྲ་ཤུ་ཏི་ཨ་རུ་ར། །རུ་རྟ་ཟུར་པ་པི་པི་ལིང༌། །མར་བཅས་ལྡེ་གུ་དག་དག་བྱེད། །ཡན་ལག་བརྒྱད་པའི་སྙིང་པོ་བསྡུས་པ་ལས། གནས་ཀྱི་ཕྱི་མའི་ལེའུ་སྟེ་དང་པོའོ།། །།དེ་ནས་བྱིས་པའི་ནད་གསོ་བའི་ལེའུ་བཤད་པར་བྱའོ། །འོ་མ་ཟས་དང་གཉི་གས་འཚོ། །བྱིས་པ་རྣམ་པ་གསུམ་དུ་བཤད། །དེ་དག་གནོད་མེད་ལས་བདེར་འགྱུར། །གནོད་པ་ལས་ནི་ནད་རྣམས་འབྱུང༌། །གང་ཞིག་ཆུ་དང་གཅིག་ཏུ་འདྲེས། །ཉེས་པ་ཡོད་པ་མ་ཡིན་ཏེ། །འོ་མ་དེ་ནི་སྐྱོན་མེད་ཡིན། །རླུང་གིས་གནོད་གྱུར་ཆུ་སྟེང་འཕྱོ། །བསྐ་ཞིང་རྩུབ་ལ་ལྦུ་བ་ཅན། །དེ་ཡིས་བཤང་གཅི་སྲི་བར་བྱེད། །
མཁྲིས་ལས་གནོད་གྱུར་དྲོ་སྐྱུར་ཚ། །རི་མོ་སེར་སྣང་དེས་ཚ་སྐྱེད། །བད་ཀན་གྱིས་སྐ་ལན་ཚྭར་བཅས། །སྦྱིན་བག་ཅན་ལ་ཆུ་ནང་འབྱིང༌། །ལྡན་པའི་མཚན་མ་འདྲེན་མ་སྟེ། །འདས་པའི་མཚན་མ་གསུམ་དང་ལྡན། །རང་གི་མཚན་མ་ཅི་འདྲ་ལས། །དེ་འཐུངས་པས་ནི་ནད་སྐྱེད་འགྱུར། །བྱིས་པ་རྟག་ཏུ་མི་བཟོད་པར། །ངུ་བ་ལ་ནི་ནད་ཤེས་བྱ། །དེ་ནི་ཕྱོགས་གང་ཤས་ཆེར་འཛིན། །གང་དུ་རེག་པར་མི་བཟོད་པ། །དེ་ན་ནད་ཡོད་ཤེས་པར་བྱ། །མགོ་ནད་མིག་འབྱེད་ལས་ཤེས་བྱ། །སྙིང་ནད་ལྕེ་མཆུ་སོས་གནོན་དང༌། །དབུགས་དང་ཁུ་ཚུར་བསྡམས་ཤེས་བྱ། །ཁོང་ནད་བཤང་གཅི་སྲི་དང་གློན། །ནུ་མ་སོས་འདེབས་རྒྱུ་མ་འཁྲུག །ལྟོ་སྦོ་རྒྱབ་ནི་འགུགས་དགྱེ་དང༌། །ལྟོ་འགུགས་པས་ཀྱང་ཤེས་པར་བྱ། །ཆུ་སོ་མཚན་ནད་བཤང་གཅི་སྲི། །སྐྲག་ཅིང་ཕྱོགས་ལྟ་ལས་ཤེས་བྱ། །དེ་ནས་མ་མ་ནད་གཞི་དང༌། །སྐྱོན་ནི་ཇི་བཞིན་གསོ་བར་བྱ། །དེ་ལ་ནུ་ཞོ་རླུང་ཅན་ལ། །རྩ་བ་བཅུ་བསྐོལ་ཞག་གསུམ་བླུད། །ཡང་ན་རུ་རྟ་ཅི་ཏྲ་ཀ །པ་ཏ་ཤུ་དག་བུ་ཙེ་ཤེལ། །ག་བྲའི་རྩ་བ་ལ་ལ་ཕུད། །ཐང་ཤིང་དབན་ས་ར་ལ། །བྲི་ཤྩི་ཀ་ནི་པི་པི་ལིང༌། །ན་ལེ་ཤམ་ནི་བསྐོལ་བ་བླུད། །དེ་ནས་རླུང་ནད་འཇོམས་པ་ཡི། །སྨན་མར་གང་ཡང་རུང་བ་བླུད། །དེ་རྗེས་ཆང་གི་དྭངས་མ་བླུད། །སྣུམ་འགྱུར་བཀྲུ་སྨན་འཇམ་པོ་གཏང༌། །དེ་འོག་འཇམ་རྩིའི་ལས་བྱ་ཞིང༌། །དུགས་སོགས་རླུང་ནད་འཇོམས་པ་བྱ། །བིལ་བ་ར་སྣ་ཏི་མུས། །ཐང་ཤིང་ས་ར་ལ་བཅས་ཕྱེ། །མར་དང་སྦྱར་བའི་ལྡེ་གུའམ། །དེ་བསྐོལ་ཁ་ར་དཀར་བཏབ་སྦྱིན། །མ་བྲིས་པས་གནོད་ལ་སླེ་ཏྲས་དང༌། །ཉེ་ཤིང་ནིམ་པ་པ་ཏོ་ལ། །ཙནྡན་ཤ་རི་བ་བསྐོལ་བ། །མ་མ་དང་ནི་བྱིས་པར་བླུད། །ཡང་ན་གླ་སྒང་འབྲས་བུ་གསུམ། །རྩ་མཁྲིས་པུ་ཙེ་ཤེལ་བླུད་བྱ། །ཐལ་ཏྲེས་ལ་སོགས་ཤུག་པ་སོགས། །པ་ཏོ་ལ་སོགས་སྡེ་བསྐོལ་བླུད། །སྨན་ནི་འདི་བསྐོལ་མར་དང་ནི། །མཁྲིས་པ་སེལ་བའི་བཀྲུ་སྨན་དང༌། །བསིལ་སྨན་གྱིས་བསྐུ་བྱུག་སོགས་བྱ། །བད་ཀན་ཅན་གྱི་བདག་ཉིད་ལ། །ཤིང་མངར་
རྒྱམ་ཚ་བཅས་པའམ། །རྒྱམ་ཚ་ཤིང་མངར་པི་པི་ལིང༌། །མར་སྦྱར་བྱིས་པ་ལ་བླུད་བྱ། །དེ་ནས་པོ་སོན་ཆའི་མེ་ཏོག །བཏགས་པ་སྦྲང་རྩིར་བཅས་པ་ཡི། །ལྡེ་གུས་ནུ་མ་བྱིས་པའི་མཆུ། །བསྐུས་པ་བྱིན་པ་དེར་སློན་གཞུག །མ་མ་རྣོན་པོས་སློན་དུ་གཞུག །དེ་ནས་ཤག་སོགས་རིམ་པས་སྤྱད། །གླ་སྐང་ལ་སོགས་བསྐོལ་བ་བླུད། །དེ་བཞིན་གོ་སྙོང་རྒྱ་སྤོས་དང༌། །ཐང་ཤིང་དུག་མོ་ཉུང་བསྐོལ་བླུད། །ཡང་ན་གླ་སླང་བོང་ང་དཀར། །ཤུ་དག་ཚ་བ་ལྔ་བསྐོལ་བླུད། །ནུ་ཞོ་ཉེས་གསུམ་དྲི་མ་ཅན། །དྲི་མནམ་འཁྲུ་ཞིང་དུ་དང་འདྲ། །མ་བྲེ་གང་ཤིང་སླ་ལ་རྒྱུན་བར་ཆད། །ལྦུ་བ་ཅན་དུ་འཁྲུ་བར་འགྱུར། །བཤང་བ་ཁ་དོག་སྣ་ཚོགས་འབྱུང༌། །ན་ཞིང་གཅིན་སེར་དཀར་ཞིང་སྐ། །རིམས་ནད་སྐོམ་དང་ཡིག་འཆུས། །སྒྲེགས་པ་སྐམ་པོ་འབྱུང་ཞིང་གླལ། །ལུས་ན་ཡན་ལག་རྐྱོང་བ་དང༌། མཁུན་ཞིང་འདར་ལ་མགོ་འཁོར་དང༌། །སྣ་མིག་ཁ་ནི་ཤུ་བ་སོགས། །ནང་ནི་གཞན་དག་དེ་ལས་འབྱུང༌། །འོ་མའི་བེ་སྣབས་ཞེས་བཤད་དེ། །གནོད་པའི་ནད་ནི་མི་བཟང་ཡིན། །དེ་ལ་མ་མ་བྱིས་པ་ལ། །སློན་སྨན་བཏང་བས་མྱུར་དུ་གསོ། །ཐུག་སོགས་རིམ་པར་བཤད་པ་ནི། །ཤུ་དགེ་ལ་སོགས་སྡེ་ཚན་རྣམས། །སྐྱེར་པ་སྩོགས་པའང་བོང་ང་དཀར། །བ་ཏ་དང་ནི་པི་པི་ལིང༌། །གླ་སྒང་པུ་ཙེ་ཤེལ་བསྐོལ་བླུད། །པ་ཐ་བཅའ་སྒ་པུ་ཙེ་ཤེལ། །སླེ་ཏྲེས་རྩ་མཁྲིས་ཤ་རི་བ། །ཐང་ཤིང་གླ་སྒང་མུར་བ་དང༌། །དུག་མོ་ཉུང་བཅས་བསྐོལ་བ་བླུད། །ནུ་ཞོའི་ཉེས་པ་སེལ་བའི་མཆོག །རྗེས་འབྲེལ་ནད་ལ་ཇི་བཞིན་དུ། །དུས་ཤེས་པ་ཡིས་གསོ་བར་བྱ། །སོ་འབྱུང་བ་དག་ནད་རྣམས་ནི། །ཐམས་ཅད་ཀྱི་ཡང་རྒྱུ་ཡིན་ནོ། །མཆོག་ཏུ་རིམས་དང་འཁྲུ་བ་དང༌། །ལུད་པ་སློན་དང་མགོ་ནད་དང༌། །བང་མིག་འཛག་པའི་ནད་དང་ནི། །ཤུ་བ་རྣམས་ནི་སྐྱེད་པར་བྱེད། །བྱི་ལའི་སྒལ་ཚིགས་བྱེ་བ་དང༌། །རྨ་བྱའི་གཙུག་ནི་འབྱུང་བ་དང༌། །བྱིས་པའི་སོ་ནི་སྐྱེ་བ་ན། །མི་ན་བ་ནི་ཅུང་ཟད་མེད། །དེ་ལ་ནད་ནི་ཇི་བཞིན་དང༌། །ནད་སྟོབས་ཇི་ཞིན་འཇིགས་ཇི་བཞིན། །ཡུལ་དང་དུས་སྩོགས་རྣམ་ཕྱེ་སྟེ། །སྨན་གྱི་
སྦྱོར་བས་གསོ་བར་བྱ། །གནོད་དང་གནོད་བྱ་དེ་ཉིད་དང༌། །རིམས་སོགས་ནད་ཀྱང་དེ་ཉིད་འབྱུང༌། །དེ་བས་སྨན་ནི་དེ་ཉིད་དེ། །གཞོན་ཤ་ཅན་དང་ལུས་ཆུང་ཕྱིར། །ཟས་ཀུན་སྟེན་པར་མི་བྱེད་པས། །འདི་ཡི་ཚད་ནི་ཆུང་ངུ་སྦྱིན། །མར་དང་འོ་མ་ལ་བརྟེན་པས། །བྱིས་པ་རྟག་པར་ཁོང་སྣུམ་ཡིན། །དེ་བས་འཕྲལ་དུ་སྐྱུག་སྨན་ནི། །འཇམ་པོ་བློ་དང་ལྡན་པས་བླུད། །འོམ་འོམ་ཟས་བསྟེན་ལ། །ནུ་ཞོ་ངོམས་པར་བྱས་པས་སློན། །ཟས་ཟ་བ་ལ་མར་བཅས་པའི། །ཐུག་པ་སླ་བར་བླུད་པར་བྱ། །བཀྲུ་སྨན་གྱིས་གསོ་མས་གཏོང་དང༌། །ཚད་ཆུང་ཚད་ཕྲན་དག་གིས་བྱ། །བཀྲུ་སྨན་ལ་སོགས་ཇི་སྐད་བཤད། །མ་མ་ཉིད་ལ་གཏང་བར་བྱ། །མུར་བ་རྒྱ་ཤུག་ཚ་བ་གསུམ། །འབྲས་བུ་གསུམ་དང་འཛམ་བུའི་ཤུན། །ཐང་ཤིང་པ་ཏ་ཉུངས་ཀར་བཅས། །སྦྲང་རྩིར་བཅས་པའི་ལྡེ་གུ་སྦྱིན། །ནུ་ཞོའི་ཉེས་པ་སེལ་མཆོག་ཡིན། །པི་པི་ལིང་ངམ་སྐྱུ་རུ་ར། །ད་ཏ་ཀ་ཡི་མེ་ཏོག་གི །ཕྱེ་མ་སྦྲང་རྩིར་བཅས་པ་ཡི། །ལྡེ་གུས་རྙིལ་ནི་བྱུག་པར་བྱ། །འུར་བྱ་སྲེག་པའི་ཤ་སྐམ་གྱི། །ཕྱེ་མ་སྦྲང་རྩིས་སྦྲུས་པ་ཡིས། །བྱིས་པའི་སོ་ཡི་མྱུ་གུ་ནི། །མྱུར་དུ་སྐྱེད་པར་བྱེད་པ་ཡིན། །ཤུ་དག་བྲི་ཧ་ཏི་གཉིས་དང༌། །པ་ཏ་གླ་སྒང་པུ་ཙེ་ཤེལ། །བོང་ང་མངར་བའི་སྨན་སྡེ་དག །བསྐོལ་བའི་མར་གྱིས་སོ་སྐྱེད་གྲུབ། །སྐྱེར་པ་ཐང་ཤིང་ས་རལ། །བྲི་ཧ་ཏི་གཉིས་ཉེ་ཤིང་བ། །ཀྲྀཥྞ་པརྞི་ཤྲི་ཡ་སེ། །སྦྲང་རྩི་མར་སྦྱར་ལྡེ་གུ་ནི། །ཕོ་བའི་མེ་དྲོད་སྐྱེད་པའི་མཆོག །རླུང་ནི་བདེ་བར་རྒྱུ་བར་བྱེད། །འཁྲུ་བའི་རིམས་དང་དབུགས་མི་བདེ། །མིག་སེར་སྐྱ་རྦབ་ལུང་པ་འཇོམས། །བྱིས་པའི་ནད་ནི་ཐམས་ཅད་ལ། །ཕན་ཞིང་མདོག་དང་ཉམས་སྟོབས་སྐྱེད། །བཙོད་དང་སེང་ཕྲོམ་ད་ཏ་ཀི །ཀུ་ཏ་ནན་ཏ་བ་ལ་གཉིས། །ས་ཧ་ཆེ་ཆུང་གཉིས་དང་ནི། །མུངྒའི་བིལ་བ་གཞོན་ནུ་གཉིས། །རས་བ་ལ་ས་བོན་བཅས་པ་དག །ཆུ་བསྐོལ་བ་དང་མར་དང་ནི། །ཐལ་སྨན་ཞོ་ག་ཆུར་བསྐོལ་བས། །སོ་སྐྱེས་ལས་བྱུང་སྣ་ཚོགས་ནད། །འདི་ཡིས་མྱུར་དུ་འཇོམས་བྱེད་དེ། །འོད་སྲུངས་རྒད་པོས་བཤད་པ་ཡིན། །བྱིས་པའི་སོ་སྐྱེས་ནད་ལ་ནི། །སྔགས་ཀྱིས་
མངོན་པར་གདབ་མི་བྱ། །སོ་སྐྱེས་པ་ཡི་ནད་གང་ཡིན། །གསོ་བས་རང་ཉིད་ཉེར་ཞིར་འགྱུར། །ཉིན་པར་གཉིད་དྲགས་ཆུ་གྲང་དང༌། །ནུ་ཞོ་བད་ཀན་ཅན་བསྟེན་པས། །བྱིས་པའི་དངས་མ་རྒྱུ་བ་ཡི། །རྩ་རྒྱུན་བད་ཀན་གྱིས་བཀག་པའི། །ཡི་ག་འཆུས་དང་ཆམ་པ་དང༌། །རིམས་དང་ལུད་པ་འབྱུང་བར་འགྱུར། །དེ་ནས་བྱིས་པ་ལུས་སྐམས་ཤིང༌། །མདོག་སྣུམ་མིག་ནི་དཀར་བར་འགྱུར། །རྒྱམ་ཚ་ཚ་གསུམ་ཤ་རང་ག །བ་ཏ་ཀོ་རི་ཀ་ཏམ་པ། །མར་དང་སྦྲང་རྩི་སྦྱར་སྐམས་དང༌། །ཡི་ག་འཆུས་པ་སོགས་ལ་གཏང༌། །བུ་ཙེ་ཤེལ་དང་ཨ་ཤོ་ཀ །ཚ་བ་ལྔ་བཅས་ཕྱེ་མ་པ་ན། །ད་ཏ་ཀི་དང་སྐྱུ་རུ་ར། །རྒྱ་ཤུག་ཕྱེ་མ་མར་བཅས་ཕན། །སཱ་ལ་པརྞི་ཤུ་དག་དང༌། །བྲི་ཧ་ཏི་གཉིས་རམ་ཉེ་བ། པི་པི་ལང་དང་རྒྱ་སྤོས་དང༌། །ལྕང་མ་ཨུཏྤལ་བ་སྦྲུ་བ། །ག་བྲའི་རྩ་བ་གླ་སྒང་རྣམས། །སྲང་རེ་ཡི་ནི་ཚད་བྱས་ནས། །མར་ནི་བྲེ་གང་བཅས་བསྐོལ་བ། །རྩ་རྒྱུན་སྦྱོང་བའི་དམ་པ་ཡིན། །ཨ་ཤྭ་གནྡྷ་བྱེའུ་རུག་པ། །བྲི་ཧ་ཏི་དང་པི་པི་ལིང༌། །བསྐོལ་བའང་ཡོན་ཏན་དེ་དང་འདྲ། །ཤིང་མངར་སེང་ཕྲོམ་པི་པི་ལིང༌། །ཤུག་པ་ཙནྡན་ཨུཏྤ་ལ། །བལ་བུའི་ལོ་མ་ཤ་རི་བ། །བསྐོལ་བའི་མར་གྱིས་སྐེམས་པ་ཡི། །ནད་ནི་འཇོམས་པར་བྱེད་པ་ཡིན། །ཤྲིང་གི་མ་དུ་ལུང་ག་དང༌། །ག་བྲའི་རྩ་བ་པི་པི་ལིང༌། །ཐང་ཤིང་ཨ་ཤྭ་གནྡྷ་དང༌། །ར་མཉེ་བ་གཉིས་ར་སྣ་དང༌། །ཟངས་རྩི་བ་དང་ཛི་བ་ཀ །མ་ཤ་མུངྒ་པརྞི་དང༌། །བྱི་དང་ག་ནི་ལྡེ་གུར་བཅས། །རི་བོན་མགོ་བསྐོལ་ཁུ་བ་དང༌། །བསྐོལ་བའི་མར་ནི་བླུད་གྱུར་ན། །ལུས་སྐེམས་རྒྱས་པར་བྱེད་པའི་མཆོག །ཤུ་དག་སླེ་ཏྲེས་ཀ་ཡསྠ། །སྤང་སྤོས་ཙ་རོང་ར་ཐུག་གཅིན། ཆང་བསྐོལ་ཏིལ་མར་བསྐུས་པ་ཕན། །རྒྱ་སྐྱེགས་ཁུ་བ་ཆ་མཉམ་དང༌། །ཏིལ་མར་བྲེ་གང་ཞོ་ག་ཆུ། །བཞི་འགྱུར་ཨ་ཤྭ་གནྡྷ་དང༌། །སྐྱེར་པ་ཐང་ཤིང་རུ་རྟ་དང༌། ཧ་རེ་ཎུ་ཀ་བ་ལི་ཀ །ཙནྡན་མུར་བ་བུ་ཙེ་ཤེལ། །ར་སྣ་ཉེ་ཤིང་ཤིང་མངར་མཉམ། །བསྐོལ་བའི་ཏིལ་མར་རྒྱ་སྐྱེགས་སོགས། །ཞེས་བྱ་བསྐུས་ན་ཕན་པར་འགྱུར། །སྟོབས་སྐྱེད་རིམས་དང་ཟད་བྱེད་དང༌། །སྨྱོ་བྱེད་བརྗེད་བྱེད་དབུགས་མི་བདེ། །རླུང་གི་ནད་རྣམས་སེལ་བར་
བྱེད། །གནོད་སྦྱིན་སྲིན་པོ་འབྱུང་པོ་འཇོམས། །སྦྲུམ་མ་ལ་ཡང་བསྔགས་པ་ཡིན། །བོང་ང་ཀར་ཀ་ཏ་སྲིང་གི །པི་པི་ལིང་དང་སྦྲང་རྩིར་སྦྱར། །ལྡེ་གུ་བྱིས་པ་ལ་སྦྱིན་པ། །བོང་ང་དཀར་པོ་གཅིག་པོ་ཡིས། །ལྡེ་གུས་ལུད་པ་རིམས་སློན་བྲོ་། བླ་བརྣན་གྱི་ནི་ནད་སེལ་བྱེད། །ནུ་ཞོ་འཐུང་ཞིང་སློན་པ་ལ། །དེ་ལ་ཞུན་མར་སྦྲང་རྩི་དང༌། །ཀཎྜ་ཀ་རི་བྲི་ཧ་ཏི། །འབྲས་བུའི་ཁུ་བ་ཚ་བ་ལྔ། །སྦྱར་བའི་ལྡེ་གུ་སྦྱིན་པར་བྱ། །པི་པི་ལིང་དང་ལན་ཚྭ་ལྔ། །བ་རི་བར་བྱི་དང་ག །དེ་བཞིན་ལྡེ་གུར་སྦྱར་བ་སྦྱིན་།དེ་བཞིན་ཚ་བ་གསུམ་རེག་འཇམ། །ཤ་རི་ད་ཏ་རྨ་བྱ་སྲམ། །ཇི་སྙེད་པགས་པ་སྤུ་བསྲེགས་ལ། །སྣག་ཚ་སྦྲང་རྩི་མར་སྦྱར་ཕན། །སེང་ལྡེང་བལ་བུ་ཨརྫུན། །རུ་རྟ་པན་ཏ་ན་ཡི་ཁུ། །འོ་མ་མར་དང་བཅས་བསྐོལ་བས། །སློན་བྲོ་ཉེ་བར་སེལ་བར་བྱེད། །གང་གི་སོ་དང་བཅས་སྐྱེས་དང༌། །གང་གི་དང་པོར་ཡ་སོ་སྐྱེས། །བཀྲ་མི་ཤིས་པ་དེ་ལ་ནི། །ཞི་པ་བྱ་ཞིང་བྲམ་ཟེ་ལ། །ཡོན་དང་བཅས་པར་སྦྱིན་པར་བྱ། །དེ་བཞིན་སྐེམ་བྱེད་མཆོད་པར་བྱ། །བད་ཀན་འཁྲུགས་པས་རྐན་གྱི་ཤར། །རྐན་གྱི་འཛེར་པ་ཞེས་བྱ་སྟེ། །དེས་ན་རྐན་གྱི་ཕྱོགས་ཀྱི་ནི། །སྤྱི་བོ་དམའ་བ་འབྱུང་བར་འགྱུར། །རྐན་ལྷུང་ནུ་ཞོ་འགྲས་པ་དང༌། །སྐ་བ་འཐུང་ཞིང་བཤང་བ་སླ། །སྐོམ་དང་ཁ་གཡའ་མིག་ན་ཞིང༌། །གཉའ་བ་འདེགས་དཀའ་སློན་པར་འགྱུར། །དེ་ལ་རྐན་འདེགས་ནས་ཚིག་འཁུས། །ཐལ་བ་སྦྲང་རྩིར་སྦྱར་བ་བསྐུ། །ཡང་ན་བཅའ་སྒ་པི་པི་ལིང༌། །བ་ལང་གཅིན་ཁུ་རྒྱམ་ཚ་བསྐུ། །དོང་གྲ་སྐྱེར་པ་ཤིང་ཚ་ཡི། །ལྡེ་གུ་ནྱ་གོ་དྷའི་ལོ་མར། །གཏུམས་ལ་བ་ལང་ལྕི་བས་བྱུག །དེ་རྗེས་མེ་མར་མྱུར་དུ་བསྲེག །ཁུ་བས་རྐན་དང་ཁ་བསྐུ་ཞིང༌། །མིག་ཏུ་ཡང་ནི་བླུགས་པར་བྱ། །རུ་རྟ་ཤུ་དག་ཨ་རུ་ར། །སྦྲང་རྩིར་བཅས་པའི་ལྡེ་གུ་ནི། ནུ་ཞོར་བཅས་པ་བྱིས་པ་བླུད། །རྐན་གྱི་འཛེར་པ་ལས་ཐར་འགྱུར། །དྲི་མས་གོས་སམ་རྡུལ་བ་ལས། །གཞང་ཁར་བད་ཀན་ཁྲག་ལས་འབྱུང༌། །རྨ་ནི་ནང་དམར་གཡའ་བ་དང༌། །བླ་བརྣན་མང་པོ་འབྱུང་བར་འགྱུར། །ལ་ལས་མ་མོའི་ཉེས་པར་བཤད། །གཞན་
དག་ལུས་སྲུལ་པོས་བྱས་ཟེར། །རྒྱབ་ཀྱི་ཐོར་བུ་གཞང་སྡེབས་ཟེར། །ལ་ལས་དེ་མིང་མེད་ཅེས་བཤད། །དེ་ལ་མ་མ་བད་མཁྲིས་དག །སེལ་བའི་སྨན་གྱིས་ནུ་ཞོ་སྦྱར། །ཙནྡན་དཀར་ཆུ་བསིལ་བ་དང༌། ལྡན་པའི་སྐོམ་ནི་ནང་ནས་བླུད། །དེ་དང་སྐྱེར་པའི་ཁཎྜ་ནི། །སྦྲང་རྩིར་བཅས་པའི་རྨ་བསྐུ་བྱ། །རྒྱ་ཤུག་འབྲས་བུ་གསུམ་བླག་ཤའི། །ཤུན་པ་བསྐོལ་བའི་ཆུ་བླུགས་བྱ། །ནག་ཆུར་གི་ཝང་སྤངས་མ་དང༌། །དངུལ་རྡོ་བ་བླ་ལྡོང་རོས་ནི། །སྐྱུར་དང་བཏགས་པས་བསྐུ་བྱ་ཞིང༌། །ཡང་ན་ཤིང་མངར་སྐྱེར་ཁཎ་དང༌། །དུང་ནི་ཞིབ་ཏུ་བཏགས་པའམ། །དུང་གི་ལྟེ་བ་ཤ་རི་པའམ། །ཨ་ས་ན་ཡི་ཤུན་པ་ནི། །ཕྱེ་མ་བཏགས་པ་གདབ་པར་བྱ། །དམར་ཞིང་གཡའ་བའི་ཤས་ཆེ་ལ། །སྲིན་བུ་པད་པས་ཁྲག་དབྱུང་བྱ། །གཞང་སྡེབས་ནད་ལ་མཁྲིས་པ་ཡི། །རྨ་ལ་ཕན་པ་ཐམས་ཅད་བསྔགས། །པ་ཏ་གླ་སྒང་སེར་པོ་གཉིས། །ག་བྲའི་རྩ་བ་བྱི་དོང་ག་པུརྞ་རྣ་བ་བིལ་བར་བཅས། །བྲིཤྩི་ཀ་ལི་ཚ་བ་གསུམ། །མར་བཅས་བསྐོལ་བ་ཚད་ཙམ་བལྡགས། །ས་ཟོས་ནད་ལས་ཐར་བར་འགྱུར། །ནད་ནི་གང་གི་སྨན་གང་ཡིན། །དེ་ཡིས་ནུ་མ་བསྐུས་ནས་ནི། །ཡུད་ཙམ་འདུག་ལ་དེ་རྗེས་བཀྲུ་།བླུད་ན་ནད་ནི་དེ་དེས་སེལ། །ཡན་ལག་བརྒྱད་པའི་སྙིང་པོ་བསྡུས་པ་ལས། གནས་ཕྱི་མའི་ལེའུ་སྟེ་གཉིས་པའོ།། །།དེ་ནས་བྱིས་པའི་གདོན་གསོ་བའི་ལེའུ་བཤད་པར་བྱའོ། །སྔོན་གྱི་སྐེམ་བྱེད་བསྲུང་བའི་ཕྱིར། །གདོན་ནི་སྐྱེས་པའི་གཟུགས་ཅན་ལྔ། །བུད་མེད་ཀྱི་ནི་གཟུགས་ཅན་བདུན། །ལྷ་ཆེན་པོ་ཡི་སྤྲུལ་པ་ཡིན། །སྐེམ་བྱེད་ས་ག་ལུག་ཐུག་གདོང༌། །ཁྱི་གདོང་ཡི་དྭགས་ཞེས་བྱ་དང༌། །བྱ་གདོན་སྲུལ་མོ་གྲང་བ་ཡི། །སྲུལ་མོ་ལོང་མ་ལུས་སྲུལ་པོ། །དེ་བཞིན་བཞིན་གྱི་རྒྱན་ཅན་མ། །ནམ་གྲུ་ནམ་གྲུ་སྐེམ་མའོ། །དེ་རྣམས་ཀྱིས་ནི་བཟུང་བའི་ཚུལ། །རྟག་ཏུ་ངུ་དང་རིམས་ཀྱིས་འདེབས། །སྤྱིའི་ཚུལ་སྐྲག་དང་གླལ་བ་དང༌། །སྨིན་མ་འདེགས་ཤིང་རྨྱ་བ་དང༌། །ལྦུ་བ་སློན་ཞིང་གྱེན་དུ་བལྟ། །མ་མཆུ་སོས་འདེབས་གཉིད་ཡར་དང༌། །ངུ་
ཞིང་མཁུན་ལ་ནུ་ཞོལ། །མི་དགའ་སྐད་ནི་འགྱུར་བ་དང༌། །གློ་བུར་དུ་ནི་སེན་མོ་ཡིས། །རང་གི་མ་མའི་ཡན་ལག་འབྲད། །དེ་ལ་སྐེམ་བྱེད་ཀྱིས་ཟིན་རྟགས། །མིག་གཅིག་མཆི་མ་འཛག་པ་དང༌། །ཡང་དང་ཡང་དུ་མགོ་བོ་རྡེགས། ཕྱོགས་གཅིག་ཉམས་ཤིང་ལུས་རེངས་ལ། །རྡུལ་བཅས་སྐྱེ་བ་རེངས་པ་དང༌། །སོ་འཆའ་ནུ་ཞོ་ལ་མི་དགའ། །སྡངས་ཤིང་དུ་ལ་སྐད་གསང་ཉམས། །ཁ་ཡོ་ཁ་ཆུ་སྐྱུགས་པ་དང༌། །མི་བཟད་པར་ནི་གྱེན་དུ་བལྟ། །ཚིལ་ཁྲག་དྲི་བྲོ་ཡིད་མི་དགའ། བཤང་བ་ཁུ་ཚུར་ལ་བཅང་ཞིང༌། །མཁུར་ཚོས་མིག་དང་སྨིན་མ་གཅིག །གཡོ་ཞིང་མིག་ནི་གཉི་ག་དམར། །དེས་ནི་ཡན་ལག་ཉེས་ཉམས་པའམ། །འཆི་བ་ཁོ་ནར་བྱེད་པར་འགྱུར། །སྐེམ་བྱེད་བརྗེད་བྱེད་མཚན་མ་ནི། །དྲན་པ་ཉམས་ཤིང་ཡང་དང་ཡང༌། །སྐྲ་འབལ་རྐེ་བ་འགུགས་པ་དང༌། །རྣམ་པར་འདུད་ཅིང་གླལ་བཞིན་དུ། །བཤང་དང་གཅི་བ་འབྱིན་པར་བྱེད། །ལྦུ་བར་སྐྱུག་ཅིང་གྱེན་དུ་ལྟ། །རྐང་ལག་སྨིན་མས་གར་ཡང་བྱེད། །ནུ་མ་རང་ལྕེ་སོ་ཡིས་འདེབས། །ཀུན་ཏུ་གཡོ་ཞིང་གཉིད་ཡང་རིམས། །ཁྲག་ནི་རྣག་གི་དྲི་བྲོ་བའོ། །ལུག་ཐུག་གདོན་གྱི་རྟགས་ཀྱི་ནང༌། །སྦོ་ཞིང་རྐང་པ་ལག་པ་དག །འདར་ཞིང་ལྦུ་བ་སྐྱུགས་པ་དང༌། །སྐོམ་དད་ཆེ་འཁྲུ་ཆང་པ་སྡོམ། །སྐད་གསང་དམའ་ཞིང་མདོག་མི་སྡུག །མཁུན་ཅིང་སློན་པར་བྱེད་པ་དང། །ལུད་པ་སྐྱིགས་བུས་འདེབས་གཉིད་ཡར། །སོ་ཡིས་མཆུ་གནོན་ཡན་ལག་སྡུད། །རེངས་ཤིང་ལུག་ཐུག་དྲི་བྲོ་ལ། །གྱེན་དུ་ལྟ་ཞིང་དགོད་པ་དང༌། །བར་དུ་འགུགས་ཤིང་རིམས་ཀྱིས་འདེབས། །བརྒྱལ་ཞིང་མིག་གཅིག་སྐྲངས་པ་ཡན། །ཁྱི་ཡི་གདོང་གི་རྟགས་གྱུར་པ། །འདར་ཞིང་བ་སྤུ་ལྡང་བ་དང༌། །རྔུལ་ཞིང་མིག་ནི་འཛུམས་པ་དང༌། །རྒྱབ་ཏུ་གུག་ཅིང་ལྕེ་དང་སོ། །མཆུ་དང་རྐན་སྒྲ་འབྱིན་ཞིང་སྐྱུགས། །བཤང་བའི་དྲི་འབྱུང་ཁྱི་སྐད་འབྱིན། །ཡི་དྭགས་ཀྱི་ནི་གདོན་གྱི་རྟགས། །བ་སྤུ་ལྡང་
ཞིང་ཡང་ཡང་སྡང༌། །གློ་བུར་དུ་ཞིང་རིམས་ཀྱིས་འདེབས། །འཁྲུ་ཞིང་སློན་བྱེད་ལུད་པ་ལུ། །གླལ་སྐོམ་མི་རོའི་དྲི་དང་ལྡན། །ལུས་ནི་བསྐྱོད་ཅིང་གཡོ་བ་དང༌། །སྐེམ་ཞིང་རེངས་ལ་མདོག་མི་སྡུག །ཁུ་ཚུར་སྡོམ་ཤིང་མཆི་མ་འཛག །བྱ་གདོན་ལུས་ལྷོད་འཁྲུ་བར་བྱེད། །ལྕེ་རྐན་ལྐོག་མར་རྨ་འབྱུང་ཞིང༌། །ཐོར་བུར་ན་ཞིང་ཚ་ལ་གནག །ཚིགས་དག་ཏུ་ནི་ཡང་ཡང་འབྱུང༌། །མཚན་མོ་སྐྱེ་ལ་ཉིན་མོ་འབྲི། །ཁའམ་བཤང་སྒོ་འགགས་པ་དང༌། །འཇིགས་ཤིང་བྱ་ཡི་དྲི་དང་ལྡན། །རིམས་ཀྱིས་འདེབས་པར་བྱེད་པ་ཡིན། །སྲུལ་མོའི་སློན་ཞིང་འདར་བ་དང༌། །ལུས་སྙོམ་མཚན་མོ་གཉིད་ཡར་དང༌། །སྐྱིགས་བུ་ལྟོ་སྦོས་འཁྲུ་བ་དང༌། །སྐོམ་ཞིང་གཅིན་ནི་སྲི་བ་དང༌། །ལུས་ལྷོད་བ་སྤུ་གཤོར་བ་དང༌། །ཁ་ལྟར་དྲི་ནི་མནམ་པ་ཡིན། །གྲང་བའི་སྲུལ་མོ་འདར་བ་དང༌། །ངུ་ཞིང་ཟུར་གྱིས་བལྟ་བ་དང༌། །སྐོམ་ཞིང་འཁྲུ་ལ་རྒྱུ་མ་འཁྲོག །ཞག་ལྟར་དྲི་ནི་མནམ་པ་དང༌། །ཡན་ལག་ལོགས་གཅིག་གྲང་བ་དང༌། །ཅིག་ཤོས་དྲོ་བ་ཉིད་ཡིན་ནོ། །སྲུལ་མོ་ལོང་མའི་སློན་པ་དང། །རིམས་དང་ལུད་པ་གཉིད་ཆུང་དང༌། །བཤང་བ་སླ་ཞིང་མདོག་མི་སྡུག །དྲི་ང་བསྐུས་པས་མྱུར་དུ་སྐམ། །མཐོང་བ་ཉམས་ཤིང་མིག་ན་གཡའ། །མིག་སྐྲངས་གློ་བར་གྱུར་པ་དང༌། །སྐྱིགས་བུ་མི་དགོད་ནུ་ཞོ་འགྲས། །མདོག་མི་སྡུག་ཅིང་ང་རོ་རྩུབ། །མདོག་ཉམས་ཉ་ཡི་དྲི་དང་ལྡན། །ཡང་ན་དྲི་ནི་སྐྱུར་བཅས་ཡིན། །བཞིན་རྒྱན་ཅན་གྱིས་རྐང་པ་དང༌། །ལག་པ་གདོང་ནི་མཛེས་པ་དང༌། །རྩ་ནི་ནག་པོར་སྣང་བ་ཡིས། །ལྟོ་བ་ཁྱབ་ཅིང་རིམས་ཀྱིས་འདེབས། །ཡི་ག་འཆུས་ཤིང་ཡན་ལག་ན། །བ་གཅིན་ལྟ་བུའི་དྲི་འབྱུང་འགྱུར། །ནམ་གྲུ་གནག་ཅིང་སྔོ་བ་དང༌། །མིག་དང་རྣ་བ་སྣ་མེད་ཅིང༌། །མིག་འགུལ་སྐྱིགས་བུ་ལུད་པ་ལུ། ཁ་ནི་ཡོ་ཞིང་དམར་བ་དང༌། །ལུག་ཐུག་དྲིར་ལྡན་རིམས་འདེབས་སྐེམ། །
བཤང་བ་སྔོ་ཞིང་སླ་བ་ཡིན། །ནམ་གྲུ་སྐེམ་མོས་ལུས་ཀུན་ནི། །རིམས་ཀྱིས་འདེབས་པར་འགྱུར་བ་དང༌། །སྐྲ་འབྱི་ཟས་ལ་མི་དགའ་དང༌། །སྐད་གསང་ཞུམ་ཞིང་མདོག་མི་སྡུག །བཤང་བ་ཁ་དོག་སྣ་ཚོགས་དང༌། །ལྟོ། བར་རྩ་ཡི་མདུད་པ་ཆགས། །དུ་ཞིང་བྱ་རྒོད་དྲི་ལྡན་ལ། །ཡུན་རིང་ན་བར་བྱེད་པ་ཡིན། །ལྟོ་བ་རྨེན་བུ་ཟླུམ་པོ་འབྱུང༌། །བཤང་བ་ཁ་དོག་སྣ་ཚོགས་འབྱུང༌། །ལྕེ་ཡི་དབུས་ནི་དམའ་བ་དང༌། །རྐན་ནི་གནག་འགྱུར་དེ་སྤང་བྱ། །ཁ་ཟས་མང་དུ་ཟོས་ཀྱང་ནི། །བྱིས་བ་གང་ཞིག་ལུས་སྐེམ་བྱེད། །སྐོམ་པས་ཉེན་ཅིང་མིག་ཉམས་པ། །དེ་ནི་ནམ་གྲུ་སྐེམ་མོས་གསོད། །འཚེ་བ་ལ་དགའ་མཆོད་པར་འདོད། །གདོན་རྣམས་འཛིན་པའི་རྒྱུ་ཡིན་ནོ། །དེ་ལ་འཚོ་བའི་བདག་ཉིད་ཅན། །བྱིན་ཚེ་སྣ་ནས་འཛག་པ་དང༌། །ལྕེ་ཉམས་མིག་ནི་གཏིང་དུ་འབྲོས། །འདེགས་བྱེད་མིག་ནི་མཆི་མར་བཅས། །ཉམ་ཆུང་ཚིག་ནི་དམན་པ་དང༌། །དྲི་ང་བ་ནི་འབྱུང་བར་འགྱུར། །སྐེམ་ཞིང་རང་གི་བཤང་དང་གཅི། །ལག་པས་ཉེད་ཅིང་སྨོད་མི་བྱེད། །ལག་པས་བཏེག་སྟེ་འབད་པ་ཡིས། །བདག་དང་དེ་བཞིན་གཞན་ལ་རྡེག །མཚོན་དང་ཤིང་སྩོགས་ཀྱིས་རྡེག་ཅིང༌། །འབར་བའི་མེ་ལ་འཇུག་པར་བྱེད། །ཆུ་ནང་འབྱིང་ཞིང་ཁྲོན་པར་ལྟུང༌། །གཞན་ཡང་དེ་འདྲར་བྱེད་བར་འགྱུར། །སྐོམ་དད་ཆེ་ཞིང་ཚ་བས་རང༌། སློན་པར་བྱེད་པར་འགྱུར་བ་དང༌། །བུ་ག་ཀུན་ནས་ཁྲག་འཛག་ཅིང༌། །འཆི་ལྟས་བྱུང་བ་དེ་སྤང་བྱ། །དགའ་བ་འདོད་པས་གཟིར་གྱུར་པ། །དབེན་པར་བུད་མེད་འདོད་སྨྲ་དགའ། །དྲི་དང་མེ་ཏོག་ཕྲེང་རྒྱན་དགའ། །མགུ་ཞིང་ཞི་བ་གསོ་བ་དཀའ། །ལྕེས་ནི་ཁ་ལ་ཉུག་པ་དང༌། །མཆུ་རྐན་གྲེ་བསྐམས་པ་དང༌། །དོགས་པས་ལྟ་ཞིང་ངུ་བ་དང༌། །སེམས་ཁོང་ཆུད་ཅིང་ཞུམ་པ་དང༌། །ཟས་འདོད་ལྟོགས་པར་གྱུར་ཀྱང་ནི། །བྱིན་ན་ཟ་བར་མི་འདོད་ལ། གཏོར་མ་
འདོད་པས་ཟིན་པ་སྟེ། །དེ་ནི་གསོ་སླ་ཡིན་པར་བཤད། །གསོད་འདོད་པ་ལ་གྲུབ་པ་ཡི། །སྔགས་བཟླས་སྦྱིན་སྲེག་བྱས་པས་གཞོམ། །ཅིག་ཤོས་ལ་ནི་ཅི་འདོད་པར། །དགའ་དང་གཏོར་མ་སོགས་སྦྱིན་པས། །དེ་ནས་གསོ་རུང་གདོན་ལ་ནི། །བྱིས་པ་ཁང་པ་དབེན་པར་བཞག །ཞག་གསུམ་ཆག་ཆག་ཕྱག་དར་བྱས། །རྟག་ཏུ་མེ་ནི་གཞག་པ་ཡི། །བུ་ཏིའི་མེ་ཏོག་བསིལ་མ་དང༌། །འདབ་མ་ས་བོན་ཉུངས་ཀར་གཏོར། །གདོན་འཇོམས་ཏིལ་མར་སྦར་བ་ཡི། །མར་མེས་གདོན་ནི་འཇོམས་པར་བྱེད། ནད་གཡོག་ཉལ་པོ་ཆང་དང་ཤ་།ཡོངས་སུ་སྤངས་པར་གྱུར་པ་ཡི། །མར་ནི་རྙིང་པས་བསྐུས་ནས་ནི། །བ་ལ་ནིམ་པ་སྟར་ཀ་རི། །དོང་གྲ་ཐང་ཤིང་ཀ་ཏང་ག །འཛམ་བུ་དང་ནི་ཏ་མ་ལ། །ཀ་ཏྲི་ན་དང་ལྕམ་པ་དང༌། །ཨ་བ་མརྒ་མ་ཏ་ལི། །མ་དུ་ཤི་ཀྲུ་ཞེས་བྱ་དང༌། །ཀ་ཀ་ཛ་ཀ་ཤྭེ་ཏ་ཆེ། །བིལ་རྐང་འོ་མ་ཅན་གྱི་ཤིང༌། །ཀ་དམ་བ་བཅས་ཀ་རཉྫ། །ཆུ་ནི་དྲོ་འཇམ་དག་གིས་བཀྲུ། །སྟག་དང་གཟིག་དང་སེང་གེ་སྦྲུལ། །དོམ་གྱི་པགས་པ་མར་དང་བཅས་།བདུགས་པས་ཁྲུས་བྱས་འོག་ཏུ་བདུག །པུ་ཏི་ཉུངས་གར་ཤ་རཾ་ག །ཤུདག་གོ་བྱེ་ལ་ལ་ཕུད། །རུ་རྟ་མར་སྦྱར་བདུག་པས་ནི། །གདོན་ཀུན་ལས་ནི་ཐར་བྱེད་ཡིན། །ཡུངས་ཀར་ནིམ་པའི་ལོ་མ་དང༌། །ཤུ་དག་ཀ་ར་བཱི་རའི་རྩ། །དྲོ་བ་མར་སྦྱར་བདུག་པས་ནི། །གདོན་ནི་ཐམས་ཅད་སེལ་བར་བྱེད། །བ་ལང་རྭ་དང་རུས་པ་སྤུ། །པགས་པ་བྱི་ལའི་རྟུག་པ་དང༌། །ནིམ་པའི་ལོ་མ་པུ་ཙེ་ཤེལ། །མར་དང་བྲི་ཧ་ཏི་གཉིས་དང༌། །རས་བལ་ས་བོན་པོ་སོན་ཆ་།ནས་དང་ར་སྤུ་ཐང་ཤིང་དང༌། །ཉུངས་ཀར་རྨ་བྱའི་སྒྲོ་དང་པོག །སྐྲ་དང་ཕུབ་མ་ཕ་བང་དང༌། །རྫ་མར་ར་ཐུག་གཅིན་དང་སྤངས། །ཞིབ་བཏགས་པ་ཡི་བདུགས་པས་ནི། །འབྱུང་པོའི་གདོན་ནི་ཐམས་ཅད་དང༌། །མི་བཟད་རིམས་ནད་འཇོམས་པར་བྱེད། །བྱི་ཚེར་ཨ་མྲའི་ཚི་གུ་དང༌། །རྒྱ་སྤོས་མངར་སྡེ་ན་ལེ་ཤམ། །ཀྲྀཥྞ་པརྞྀ་གླ་སྒང་རྣམས། །ལྡེ་
གུར་བྱས་པ་མར་དང་ནི། །འོ་མ་རྩ་བ་བཅུ་བསྐོལ་ཁུར། །བཅས་བསྐོལ་དེ་ནི་གདོན་འཇོམས་མཆོག །ར་སྣ་ཨཾ་ཤུ་མ་ཏི་གཉིས། །བ་ལ་རྩ་བ་ཆེན་པོ་ལྔ། །གླ་སྒང་བཏགས་ཏེ་མར་དང་བསྐོལ། །ཚ་བ་གསུམ་དང་ཙི་ཏྲ་ཀ ། ཐལ་ཏྲེས་པ་ཏྲ་བྱི་དང་ག །ཤིང་མངར་ཤིང་ཀུན་པ་ཡ་སྱ། །ཐང་ཤིང་པི་པི་ལིང་རྩ་བ། །དུག་མོ་ཉུང་དང་བཅས་པ་ཡི། །ལྡེ་གུ་མར་དང་བསྐོལ་བས་ནི། །རྟག་ཏུ་བྱིས་པ་ལ་ཕན་ཞིང༌། །ནད་དང་གནོད་པ་ཐམས་ཅད་འཇོམས། །མེ་དྲོད་སྟོབས་དང་ཁ་དོག་སྐྱེད། །ཤ་རི་བ་དང་མུ་ར་དང༌། །བྲམྷི་ཤུ་དག་ཤང་ཁི་ནི། །ཉུངས་ཀར་ཨ་ཤྭ་གནྡྷ་དང༌། །བྱེའུ་རུག་པ་བཅས་མར་བསྐོལ། །དེ་ནི་བཏུང་དང་བསྐུ་བ་ཡིས། །གདོན་རྣམས་ཐམས་ཅད་འཇོམས་པར་བྱེད། །མར་གད་འབྱུང་པོའི་རིགས་པ་རུ། །འོག་ནས་བཤད་པ་དག་དང་ནི། །དེ་བཞིན་གཏོར་མ་སྦྱིན་སྲེག་དང༌། །ཁྲུས་ནི་སྔགས་རྒྱུད་ཤེས་པས་སྦྱར། །པུ་ཏི་ཀ་རཉྫའི་ཤུན་པ། །བར་པ་ར་ཡི་རྩ་བ་དང༌། །ཀུ་བ་ཁ་བོ་བི་ཤ་ལ། །ཀ་ཏྲ་ཀ་དང་བིལ་བ་དང༌། །ཀ་པི་ཏ་བསྐོལ་དེས་མཚན་མོ། །བྱིས་པ་བཀྲུས་ན་ཤིས་པ་ཡིན། །གདོན་དང་བྲལ་ཡང་བླ་བརྣན་ནད། །རྗེས་སུ་འབྲེལ་པ་ཐམས་ཅད་ལ། །བྱིས་པའི་ནད་གསོར་བཤད་པ་ཡི། །སྨན་གྱིས་ཇི་བཞིན་གསོ་བར་བྱ། །ཡན་ལག་བརྒྱད་པའི་སྙིང་པོ་བསྡུས་པ་ལས། །ཕྱི་མའི་གནས་ཀྱི་ལེའུ་སྟེ་གསུམ་པའོ།། །།ཡན་ལག་བརྒྱད་པའི་སྙིང་པོ་བསྡུས་པ་ལས། བྱིས་པ་གསོ་བའི་ཡན་ལག་རྫོགས་སོ། །དེ་ནས་འབྱུང་པོའི་གདོན་གྱི་ནད་དམིགས་ཤེས་པ་བཤད་པར་བྱའོ། །ཤེས་དང་རྣམ་ཤེས་ཚིག་དང་ནི། །སྤྱོད་དང་སྙིང་སྟོབས་རང་བཞིན་དག །གང་གི་རང་བཞིན་འགྱུར་བར་སྣང༌། །དེ་ལ་འབྱུང་པོའི་གདོན་ཡོད་བཤད། །འབྱུང་པོའི་གཟུགས་དང་རང་བཞིན་དང༌། །སྨྲ་དང་འགྲོ་སོགས་སྤྱོད་པ་དང༌། །གང་ཞིག་
འདྲེ་བར་བྱེད་པ་རྣམས། །དེ་ལ་དེ་ནི་ཞུགས་པར་བཤད། །དེ་ནི་ལྷ་དང་ལྷ་མིན་སྩོགས། །དབྱེ་བ་རྣམ་པ་བཅོ་བརྒྱད་བཤད། །དེ་འཛིན་རྒྱུ་ནི་འཕྲལ་གཏམ་ནི། །སྔོན་ཆད་ཤེས་རབ་འཆལ་བ་ཡི། །བློ་ཡིས་ཉེས་པ་བྱས་གྱུར་ནས། །དེ་ཡི་ཆགས་པ་སྩོགས་བསྐྱེད་ནས། །བརྟུལ་ཞུགས་སྤྱོད་དང་ཆོས་ལུགས་ཉམས། །མཆོད་འོས་རྣམས་ནི་བརྙས་པ་དང༌། །གཞུང་ལུགས་ཉམས་པ་དེ་དག་ནི། །སྡིག་དང་བདག་ནི་གསོད་བྱེད་ནི། །གདོན་ནི་གླགས་སྐབས་ཚོལ་བྱེད་པས། །ལྷ་ལ་སོགས་པའང་རྗེས་གནོད་བྱེད། །གླགས་ནི་སྡིག་ལ་སོགས་པ་དང༌། །མི་དགེའི་ལས་ནི་སྨིན་པ་དང༌། །གཅིག་པུར་ཁང་སྟོང་གནས་པའམ། །དུར་ཁྲོད་སོགས་པར་མཚན་མོ་གནས། །གཅེར་བུར་རྒྱུ་བའམ་བླ་མ་སྨོད། །འཁྲིག་པ་ཚུལ་མིན་སྤྱོད་པ་དང༌། །གཙང་སྦྲ་མེད་པར་ལྷ་མཆོད་དང༌། །མི་གཙང་གཞན་དང་འདྲེས་པ་དང༌། །སྦྱིན་སྲེག་སྔགས་གཏོར་མཆོད་སྦྱིན་རྣམས། །ཕྱིན་ཅི་ལོག་ཏུ་བྱེད་པ་དང༌། །མདོར་ན་ཉིན་རེ་སོགས་སྤྱོད་པར། །སྤྱོད་པ་བརྟེན་པ་ལས་འདས་པའོ། །ལྷ་ཡི་གདོན་གྱིས་ཡར་ངོ་ཡི། །ཚེས་གཅིག་བཅུ་གསུམ་དག་ལ་འཛིན། །ལྷ་མིན་གདོན་ནི་ཡར་ངོ་ཡི། །བཅུ་གསུམ་མར་ངོ་བཅུ་གཉིས་ལ། །དྲི་ཟའི་གདོན་ནི་བཅུ་བཞི་དང༌། །བཅུ་གཉིས་དག་ལའང་འཛིན་པར་བྱེད། །ཀླུ་གདོན་ཚེས་ལྔ་ལ་འཛིན་བྱེད། །གནོད་སྦྱིན་གདོན་ནི་ཡར་ངོ་ཡི། །ཚེས་བདུན་བཅུ་གཅིག་དག་ལ་འཛིན། །ཚངས་པ་སྲིན་པོས་ཡར་ངོ་ཡི། །ཚེས་བརྒྱད་བཅོ་ལྔ་དག་ལ་འཛིན། །སྲིན་པོ་ཤ་ཟ་སོགས་མར་ངོའོ། །ཚེས་གཅིག་ཚེས་དགུ་བཅུ་གཅིག་ལ། །མཚུན་ལྷ་གནམ་སྟོང་ཚེས་བཅུ་དང༌། །བརྒྱད་དང་དགུ་པ་དག་ལ་འཛིན། །རྒན་པ་ལ་སོགས་གཞན་དག་ནི། །ཕལ་ཆེར་དུས་དེའི་ཐུན་མཚམས་ལའོ། །ལྷ་ཡི་གདོན་གྱིས་དབང་བྱས་པ། །གདོང་ནི་པདྨ་ཁ་བྱེ་འདྲ། །ལྟ་སྟངས་ཞི་ཞིང་ཁྲོ་པ་མེད། །ཚིག་ཉུང་དུལ་དང་བཤང་གཅི་ཉུང༌། །ཁ་ཟས་ལ་ནི་འདོད་པ་མེད། །
ལྷ་དང་བྲམ་ཟེ་འབྱུང་བ་དཀའ། །གཙང་ཞིང་སཾ་སྐྲྀ་ཏའི་སྐད་སྨྲ། །ཡུན་རིང་ནས་ནི་མིག་འཛུམས་ཤིང༌། །ལུས་དྲི་ཞིམ་ཞིང་མཆོག་སྟེར་བྱེད། །གོས་ཕྲེང་དཀར་པོ་ཆུ་བོ་དང༌། །རི་མཐོ་ཁང་པ་མཐོ་ལ་དགའ། །གཉིད་མེད་ཚུགས་པ་མེད་པ་ཡིན། །ལྷ་མིན་གདོན་གྱིས་ཟིན་པ་ནི། །ཡོན་པོར་བལྟ་ཞིང་རང་བཞིན་ངན། །ལྷ་དང་བླ་མ་བྲམ་ཟེ་དང༌། །འཇིགས་མེད་ཁེངས་ཤིང་དཔའ་བ་དང༌། །ཁྲོ་ཞིང་རྩོལ་བ་ཆེ་བ་དང༌། །ང་ནི་དྲག་པོ་ཁྱབ་འཇུག་དང༌། །སྐེམ་བྱེད་བརྒྱ་བྱིན་ཡིན་ཞེས་བཤད། །ཤ་དང་ཆང་ལ་དགའ་ཞེས་བྱ། །དྲི་ཟའི་གདོན་གྱིས་ཟིན་པའི་རྟགས། །རང་སྤྱོད་ལ་དགའ་ལུས་དྲི་ཞིམ། །སྙིང་དགའ་གླུ་དང་གར་ཡང་བྱེད། །ཁྲུས་དང་སྐྱེད་མོས་ཚལ་ལ་དགའ། །གོས་ཕྲེང་བྱུག་པ་དམར་ལ་སྲེད། །སྒེག་དང་རྩེད་མོ་ལ་དགའོ། །ཀླུ་ཡི་གདོན་གྱིས་ཟིན་པའི་རྟགས། །མིག་དམར་ཁྲོ་ཞིང་མི་འགྱུར་ལྟ། །ཡོན་པོར་འགྲོ་ཞིང་བལྟ་བ་དང༌། །ཉིན་མཚན་དབུགས་རྒོད་ལྕེ་ལས་ནི། །ཁ་ཆུ་འཛག་ཅིང་ཁ་འགྲམ་ལྷག །བུ་རམ་འོ་མ་ཁྲུས་ལ་དགའ། །ཁ་སྦུབ་ཏུ་ནི་ཉལ་བར་བྱེད། །གདུགས་མཐོང་ན་ནི་འཇིགས་པ་ཡིན། །གནོད་སྦྱིན་གདོན་གྱིས་ཟིན་པའི་རྟགས། །མིག་དམར་བགྲད་ཅིང་སྐྲག་ལ་འགུལ། །ལུས་ནི་དྲི་ཞིམ་གཟི་མདངས་ལྡན། །གཏམ་དང་གླུ་དང་ཁྲུས་དང་ནི། །ཕྲེང་བ་བྱུག་པ་ལ་དགའ་ཞིང༌། །ཉ་ཡི་ཤ་སྲེད་དགའ་བ་དང༌། །དགའ་མགུ་སྟོབས་ཆེན་ནད་མེད་ལ། །ལག་རྩེ་བསྐྱོད་ཅིང་སུ་ཞིག་ལ། །ཅི་ཞིག་སྦྱིན་ཞེས་སྨྲ་བར་བྱེད། །གསང་ཚིག་སྨྲ་ཞིང་སྨན་པ་དང༌། །བྲམ་ཟེ་ལ་ནི་བརྙས་པར་བྱེད། །ཁྲོ་བ་ཆུང་ཞིང་མགྱོགས་འགྲོ་བའོ། །ཚངས་པ་སྲིན་པོས་ཟིན་པའི་རྟགས། །དགོད་ཅིང་གར་ལ་དགའ་བ་དང༌། །སྤྱོད་པ་གཏུམ་ཞིང་གླགས་སྐབས་ཚོལ། །གཤེ་ཞིང་མྱུར་དུ་འགྲོ་བ་དང༌། །སྨན་པ་བྲམ་ཟེ་ལྷ་ལ་སྡང༌། །རང་ལ་ཤིང་དང་མཚོན་སོགས་བརྡེག །ཀྱེ་ཞེས་བྱ་བའི་སྒྲ་སྒྲོགས་ཤིང༌། །བསྟན་བཅོས་རིག་བྱེད་འདོད་པ་ཡིན། །སྲིན་པོའི་གདོན་གྱིས་ཟིན་པའི་རྟགས། །ཁྲོ་གཉེར་བཅས་ཤིང་ཁྲོ་བར་
ལྟ། །རྟ་བས་བག་ཏུ་ནི་བྱེད་བ་དང༌། རྡེག་ཅིང་རབ་ཏུ་རྒྱུག་པ་དང༌། །ངུ་ཞིང་གདོང་ནི་འཇིགས་རུང་སྟོན། །ཟས་མ་ཟོས་ཀྱང་སྟོབས་དང་ལྡན། །གཉིད་མེད་མཚན་མོ་རྒྱུ་བ་དང༌། །ངོ་ཚ་གཙང་སྦྲ་མེད་ཅིང་དཔའ། །གདུག་ཅིང་ཚིག་རྩུབ་སྨྲ་བ་དང༌། ཁྲོ་ཞིང་ཕྲེང་བ་དམར་པོ་དང༌། །བུད་མེད་ཤ་ཆང་ཁྲག་ལ་དགའ། །ཤའམ་ཁྲག་ནི་མཐོང་པ་ན། །མཆུ་ནི་ལྡག་པར་བྱེད་པ་དང༌། །ཟས་ཟའི་ཚེ་ན་དགོད་པ་ཡིན། །ཤ་ཟའི་གདོན་གྱིས་ཟིན་པའི་རྟགས། །སེམས་ནི་བདེ་བར་མི་གནས་ཤིང༌། །ཡོངས་སུ་རྒྱུག་པར་བྱེད་པ་དང༌། །མི་གཙང་ལ་དགའ་གླུ་གར་དང༌། །དགོད་དང་ཆང་དང་ཤ་རློན་དགའ། །སྤྱོས་ན་གདོང་ནི་ཞུམ་པ་དང༌། རྒྱུ་མེད་པར་ནི་དུ་བ་དང༌། །བདག་ཉིད་སེན་མོས་འབྲུད་པ་དང༌། །ཁོང་རྩུབ་ལུས་ཉམས་སྐད་གསང་དམའ། །སྡུག་བསྔལ་བ་ནི་བརྡ་སྤྲོད་ཅིང༌། །འབྲེལ་དང་མི་འབྲེལ་ཚིག་མང་སྨྲ། །དྲན་པ་ཉམས་ཤིང་གནས་སྟོང་དགའ། །མི་བརྟན་གཅེར་བུ་དྲི་མ་ཅན། །སྲང་བར་འཁྱམས་ཤིང་གོས་གྱོན་ཞིང༌། །རྩྭ་ཡི་ཕྲེང་བ་རྒྱུན་ཏུ་ཐོགས། །ཤིང་འཛེག་རྟ་ལ་ཞོན་པར་བྱེད། །དེ་བཞིན་ཕྱག་དར་ཕུང་པོར་འཛེག །མང་དུ་ཟ་བར་བྱེད་པ་ཡིན། །ཡི་དྭགས་གདོན་གྱིས་ཟིན་པའི་རྟགས། །སྤྱོད་ཚུལ་དྲི་ནི་ཡི་དྭགས་འདྲ། །སྔར་ཞིང་ཟས་ལ་མི་དགའ་དང༌། །རྩ་གཅོད་བྱེད་པ་ཞེས་ཀྱང་བྱ། །གྲུལ་བུམ་གདོན་གྱིས་ཟིན་པའི་རྟགས། །ཚིག་མང་སྨྲ་ཞིང་ཁ་གདོང་གནག །དལ་གྱིས་འགྲོ་བར་བྱེད་པ་དང༌། རླིག་པ་སྐྲང་ཞིང་འཕྱང་བ་ཡིན། །མི་ནི་བྱང་སྟེམས་ཟིན་པའི་རྟགས། །ཤིང་རྔོ་བོང་བ་སྩོགས་ཐོགས་ཤིང། །ཚལ་པ་གྱོན་ཏེ་འགྲོ་བ་དང༌། །གཅེར་བུར་རྒྱུག་ཅིང་འཇིགས་བག་ཏུ། །ལྟ་ལ་རྩྭ་ཡིས་རྒྱན་དུ་བྱེད། །དུར་ཁྲོད་གནས་ནི་སྟོང་པ་དང༌། །སྲང་བར་ཤིང་གཅིག་བརྟེན་པ་དང༌། །ཏིལ་ཟས་ཆང་དང་ཤ་ལ་ནི། །རྟག་ཏུ་མིག་ནི་ཚགས་པ་
དང། །ཚིག་རྩུབ་དེ་ནི་སྨྲ་བ་ཡིན། །གཡེངས་བྱེད་ཀྱིས་ནི་ཟིན་པའི་རྟགས། །ཆུ་འདོད་ཟས་ནི་མི་སློང་དང༌། །སྡངས་ཤིང་མིག་ནི་དམར་བ་དང༌། །ཚིག་རྩུབ་སྨྲ་བར་ཤེས་པར་བྱ། །རོ་ལངས་གདོན་གྱིས་ཟིན་པའི་རྟགས། །དྲི་དང་ཕྲེང་བ་ལ་དགའ་ཞིང༌། །ཚིག་བདེན་སྨྲ་ལ་ཡོངས་སུ་འདར། །གཉིད་ཆེ་བར་ནི་ཤེས་པར་བྱ། །ཡི་དྭགས་མཚུན་ལྷའི་གདོན་གྱི་རྟགས། །མིག་མི་གསལ་ཞིང་བཞིན་རས་ཞུམ། །རྐན་ནི་སྐམ་པར་བྱེད་པ་དང༌། །མིག་དང་རྫི་མ་བསྐྱོད་པ་དང༌། །གཉིད་ཆེ་མེ་དྲོད་ཆུང་བ་དང༌། །གཡོན་ཕྱོགས་ནས་ནི་གོས་གྱོན་ཞིང༌། །ཤ་དང་བུ་རམ་ཏིལ་ལ་དགའ། །ཚིག་འཁྲུལ་པ་ནི་ཡིན་ཞེས་བྱ། །བླ་མ་དྲང་སྲོང་རྒན་དང་གྲུབ། །དམོད་པ་སེམས་ཀྱི་རྗེས་མཐུན་པ། །སྤྱོད་ལམ་ཁ་ཟས་རང་བཞིན་ལས། །ཅི་འདྲ་གདོན་ནི་དེ་ཡིན་བཤད། །གཞོན་ནུའི་ཚོགས་ཀྱི་རྗེས་འབྲང་ཞིང༌། །གཅེར་བུ་སྐྲ་ནི་གྱེན་དུ་བརྫེས། །ཡིད་མི་བདེ་ཞིང་དུས་ཚིགས་ནི། །ཡུན་རིང་གྱུར་པའི་གདོན་དེ་སྤང༌། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་སྟེ་བཞི་པའོ།། །།དེ་ནས་གདོན་གསོ་པ་བཤད་པར་བྱའོ། །འབྱུང་པོའི་འཚེ་བ་མི་འདོད་དང༌། །བཟླས་དང་སྦྱིན་སྲེག་གཏོར་མ་དང༌། །བརྟུལ་ཞུགས་ཚུལ་ཁྲིམས་མཉམ་འཇོག་དང༌། །སྦྱིན་ཤེས་བརྩེ་ལ་སོགས་པས་བསལ། །ཤིང་ཀུན་བ་བླ་ཚ་བ་གསུམ། །གླ་རྩི་སྒོག་སྐྱ་ཨརྐའི་རྩ། །སྤང་སྤོས་ཨ་ཟ་ལོ་མི་དང༌། །ལ་བ་འབམ་པོ་ཀུ་ཀུ་ཏི། །ཤུ་དག་གནྡྷ་པྲི་ཡང་ཀུ། །སར་པ་གནྡྷ་ཏིལ་མར་ནི། །ཀ་ཀ་ཨན་ད་ར་མཉེ་བ། །སྣུ་ཧ་ཀ་ཀ་ཏ་ཤྲིང་གི །སླེ་ཏྲེས་མ་ཧཱ་ན་བ་ལི། །ཡུངས་ཀར་དང་ནི་ལིག་བུ་མིག །གདོན་འཇོམས་སྨན་ནི་གཞན་དག་དང༌། །བོད་བུ་རྟ་དང་ཁྱི་ལུག་དང༌། །རྔ་མོ་གོ་ད་དྲེད་དང་ནི། །སྲེ་མོ་རེག་འཇམ་བྱི་ལ་གུང༌། །བ་
ལང་སེང་གེ་སྟག་དང་ནི། །རྒྱ་མཚོ་ཡི་ནི་སྲོག་ཆགས་ཀྱི། །པགས་པ་མཁྲིས་པ་སེན་མོ་སོ། །སྡེ་ཚན་འདི་དང་མར་རྙིང་ངམ། །ཏིལ་མར་དང་ནི་བསྐོལ་བ་དག །བཏུང་དང་སྣར་ནི་བླུགས་པ་དང༌། །བསྐུ་བའི་དོན་དུ་སྦྱར་བྱ་ཞིང༌། །འདི་དག་ཕྱེ་མས་བདུག་པར་བྱ། །འདི་ཡི་རི་ལུ་བྱས་ནས་ནི། །མིག་སྨན་སྣ་སྨན་བྱ་བ་དང༌། །འདི་ཡི་ལྡེ་གུས་བྱུགས་པ་དང༌། །བསྐོལ་བའི་ཁུ་བ་བླུགས་པར་བྱ། སྦྱོར་བ་འདི་ཡི་ས་སྨྱོ་བྱེད་དང༌། །བརྗེད་བྱེད་བཅས་པའི་གདོན་ཞི་བྱེད། །ཉུངས་ཀར་ཧ་ཏི་པི་པི་ལིང༌། པི་པི་ལིང་རྩ་ཆེ་བ་གསུམ། སྐྱུ་རུ་ར་དང་གོ་ད་དང༌། །སྲེ་མོ་བྱི་ལ་རྩ་ཤ་ཡི། །མཁྲིས་པ་དང་བཏགས་སྣ་སྨན་དང༌། །བསྐུ་བྱུག་བྱུགས་སོགས་བྱས་གདོན་འཇོམས། །ཉུངས་ཀར་ཤུ་དག་ཤིང་ཀུན་དང༌། །པྲི་ཡང་ཀུ་དང་སེར་པོ་གཉིས། །གི་རི་ཀརྞི་དཀར་ནག་གཉིས། །འབྲས་བུ་གསུམ་དང་ཤྭེ་ཏ་དང༌། །ནིམ་པའི་ལོ་མ་ཀ་རཉྫ། །ཤྲི་ཤ་གཉིས་དང་ས་བོན་དང༌། །ཐང་ཤིང་དང་ནི་ཚ་བ་གསུམ། །མར་དང་བ་གཅིན་དེ་བཞི་འགྱུར། །བསྐོལ་བ་དོན་གྲུབ་ཅེས་བྱ་སྟེ། །བཏུང་དང་སྣར་བླུགས་ལས་སྦྱར་ན། །གདོན་ནི་ཐམས་ཅད་མྱུར་འཇོམས་བྱེད། །མཆོག་ཏུ་ལྷ་མིན་གདོན་སེལ་བྱེད། །བརྗེད་བྱེད་དུག་དང་བཀྲ་མི་ཤིས། །སྨྱོ་བྱེད་གཤེད་བྱེད་རིམས་རྣམས་འཇོམས། །སྨན་དེ་ཉིད་ན་ར་ཐུག་གི །གཅིན་དང་སྦྱར་ཏེ་བླུད་པ་དང༌། །སྣར་བླུགས་མིག་སྨན་བྱུགས་པ་དང༌། །ཁྲུས་དང་དྲིལ་བ་ལ་སྦྱར་བ། །སྔར་བཤད་ཡོན་ཏན་དེ་འདྲ་ཞིང༌། །རྒྱལ་པོའི་སྒོར་ཡང་དོན་གྲུབ་བྱེད། །ཉུངས་ཀར་ཤུ་དག་ཚ་བ་གསུམ། །ཨ་ཤྭ་གནྡྷ་སེར་པོ་གཉིས། །ཤིང་ཀུན་ཀུན་དོང་རྩ་བ་དང༌། །ཀརཉྫ་ཡི་ས་བོན་དང༌། །ཤྲི་ཤ་ཡི་མེ་ཏོག་དང༌། །ཀ་བིད་ཐ་ཡི་འབྲས་བུ་དང༌། །རྒྱམ་ཚ་རུ་རྟ་རྒྱ་སྤོས་དང༌། གི་རི་ཀརྞི་དཀར་པོ་དང༌། །སོ་ན་ཀ་ཡི་རྩ་བར་གནས། །རང་
གཅིན་དག་དང་ལེགས་བསྒོས་ཤིང༌། །བ་ལང་མཁྲིས་པ་བུ་རམ་དང༌། །རི་ལུ་བྱས་པའི་སྦྱོར་བ་དེ། །མིག་བསྐུས་སྣར་བླུགས་བསྐུ་བྱས་ན། །སྨྱོ་བྱེད་རྨ་ནི་རེད་པ་དང༌། །མཚན་མོ་མི་མཐོང་མུན་འཐིབས་བྱེད། །བགེགས་དང་ལུས་ཆུར་ནུབ་པས་བརྒྱལ། །དུག་བསྐུས་མདའ་ཡིས་ཕོག་པ་དང༌། །གདུག་པ་སྤྲུལ་གྱིས་ཟིན་པ་སེལ། །རས་བལ་ས་བོན་རྨ་བྱའི་སྒྲོ། །མེ་ཏོག་སྨན་མ་བྲི་ཧ་ཏི། །ཤིང་ཚ་སྤང་སྤོས་པོ་སོན་ཆ། །བྱི་ལའི་རྟུག་པ་ཕུབ་མ་དང༌། །ཤུ་དག་མི་སྐྲ་སྦྲུལ་ལྤགས་དང༌། །གླང་པོའི་སོ་དང་གླེང་གི་རྭ། །ཤིང་ཀུན་དང་ནི་ན་ལེ་ཤམ། །ཚ་མཉམ་བདུགས་པར་བྱས་པ་ཡིས། །སྐེམ་བྱེད་སྨྱོ་བྱེད་ཤ་ཟའི་རིགས། །སྲིན་པོ་ལྷ་ཡི་གདོན་འཇོམས་མཆོག །གནྡྷ་བྷ་དྲ་ཚ་བ་གསུམ། །གུར་ཀུམ་པི་པི་ལིང་རྩ་བ། །ཀཎྜ་ཀ་རི་སྐྱེར་པ་དང༌། །ཐང་ཤིང་དང་ནི་ཡུངས་ཀར་གཉིས། །བ་ལི་ཀ་དང་དུག་མོ་ཉུང༌། །ཙནྡན་དཀར་པོ་རྒྱམ་ཚ་དང༌། །འབྲས་བུ་གསུམ་དང་པུ་ཤེལ་ཙེ། །ཤུ་དག་སྤངས་མ་པུ་ཙེ་ཤེལ། །ཙནྡན་དཀར་པོ་བ་ལ་དང༌། །ཤིང་མངར་སུག་སྨེལ་ལྡོང་རོས་དང༌། །ཤུག་པ་རྒྱ་སྤོས་ཤྲི་པ་ས། །མ་དུ་ཀ་ཡི་སྙིང་པོ་དང༌། །བོང་ང་གཉིས་པོ་པྲི་ཡང་ཀུ། །དབྱི་མོ་རུ་རྟ་སྐྱེར་ཁཎ་དང༌། །ཆ་མཉམ་ཞིབ་བཏགས་ལྡེ་གུ་དང༌། །མར་རྙིང་གཅིན་ཀུན་ཆ་མཉམ་བསྐོལ། །གདོན་ཁུས་འདེབས་ཤེས་བྱ་བར་བརྗོད། །དེ་བླུད་གདོན་འཇོམས་མཆོག་ཡིན་ནོ། །རྒྱ་སྤོས་ཤིང་མངར་ཀ་རཉྫ། །རྒྱ་སྐྱེགས་ད་ཏ་པ་ཏོ་ལ། །ཤུ་དག་ཤིང་ཀུན་པ་ཏ་ལ། །ཉུངས་ཀར་ཀཎྜ་ཀ་རི་དང༌། །སེར་པོ་གཉིས་དང་པུ་ཙེ་ཤེལ། །རྒྱ་ཤུག་གནྡྷ་པྲི་ཡང་ཀུ། །ཚ་བ་གསུམ་དང་འབྲས་བུ་གསུམ། །ཐང་ཤིང་སླེ་ཏྲེས་བྱི་དང་ག །ཀོ་ཤ་ཏ་ཀི་ཀ་ཀན་ཏ། །ཤི་ཀྲུ་ནིམ་པ་དུག་མོ་ཉུང༌། །ཤྲི་ཤིའི་མེ་ཏོག་ས་བོན་དང༌། །གླ་སྒང་རུ་རྟ་དན་ད་དང༌། །གི་རི་ཀརྞི་ཙི་ཏྲ་ཀ །བིལ་བ་ཆ་མཉམ་
ལྡེ་གུར་བྱས། །མར་རྙིང་ཅན་གྱི་སྡེ་ཚན་བཅས། །བསྐོལ་དེ་ཡུན་རིང་བཞག་པ་དེ། །ཁུས་འདེབས་ཆེན་པོ་ཞེས་བཤད་དོ། །རིམ་པ་ཀུན་གྱིས་སྦྱར་ན་ནི། །གདོན་རྣམས་ཀུན་དང་སྨྱོ་བྱེད་དང༌། །མཛེ་དང་རིམས་ནི་མྱུར་དུ་འཇོམས། །གདོན་ནི་ཉི་མ་གང་གང་ལ། །འཛིན་པའི་ཉི་མ་དེ་དང་དེར། །མཆོག་ཏུ་སྦྱིན་སྲེག་གཏོར་མ་སོགས། །སྨན་པས་རབ་ཏུ་འབད་དེ་བྱ། །ཁྲུས་དང་གོས་དང་ཤ་དང་ཚིལ། །ཆང་དང་མར་དང་བུ་རམ་སྩོགས། །གང་ཞིག་གང་ལ་སྲེད་གྱུར་པ། །དེ་ཚེ་དེ་ནི་དེ་ལ་སྦྱིན། །རིན་ཆེན་དྲི་དང་ཕྲེང་བ་དང༌། །ས་བོན་མར་དང་སྦྲང་རྩི་དང༌། །ཟས་ཀུན་ཀུན་ལ་སྦྱིན་བྱ་སྟེ། །འདི་ནི་སྤྱི་ཡི་ཆོ་གའོ། །ལྷ་དང་བླ་མ་དྲང་སྲོང་རྒན། །གྲུབ་པ་ལྷ་ཡི་གནས་སུ་སྦྱིན། །དེ་ཡང་ལྷ་ཡི་གདོན་ལ་ནི། །བྱང་གི་ཕྱོགས་སུ་གཏོར་མ་སྦྱིན། །ལྷ་མིན་གདོན་ལ་ཅི་འདོད་པར། །མཚམས་ཀྱི་གནས་སུ་ནུབ་ཏུ་སྦྱིན། །དྲི་ཟའི་གདོན་ལ་བ་ལང་ངམ། །གོས་དང་རྒྱན་བཅས་གཏོར་མ་སྦྱིན། །མཚུན་ལྷ་ཀླུ་གདོན་འབབ་ཆུའི་འགྲམ། །ཀླུ་ལ་ཤར་ལྷོ་མཚམས་སུ་སྦྱིན། །གནོད་སྦྱིན་རང་གི་གནས་སམ་ནི། །ཆུ་གཉིས་འདུས་པའི་གནས་སུ་སྦྱིན། །སྲིན་པོར་ལམ་གྱི་བཞི་མདོའམ། ཚང་ཚིང་འཇིགས་སུ་རུང་བར་སྦྱིན། །སྲིན་པོ་ལྷོ་ཡི་ཕྱོགས་སུ་སྦྱིན། །ཚངས་པའི་སྲིན་པོར་ཤར་དུ་སྦྱིན། །ཤ་ཟ་ལ་ནི་ཁང་སྟོང་དུ། །ནུབ་ཕྱོགས་སུ་ནི་གནས་ཏེ་སྦྱིན། །ཕྲེང་བ་གཙང་ཞིང་དཀར་པོ་དང༌། །དྲི་དང་འོ་ཐུག་འབྲས་ཆན་དང༌། །ཞོ་དང་གདུགས་ནི་དཀར་པོ་དག །ལྷ་རྣམས་ཀྱི་ནི་གཏོར་མར་འདོད། །ཤིང་ཀུན་ཉུངས་ཀར་ཤུ་དག་དང༌། །ཚ་བ་གསུམ་ནི་སྲང་ཕྱེད་ཕྱེད། །མར་བྲེ་གང་དང་བ་ཡི་གཅིན། །བཞི་འགྱུར་དང་ནི་ལྷན་ཅིག་བསྐོལ། །དེ་བཏུང་སྣར་བླུགས་བསྐུས་པ་ཡིས། །ལྷ་ཡི་གདོན་ལ་ཐར་བར་བྱེད། །ཤུ་དག་ཤིང་ཀུན་སྒོག་སྐྱ་རྣམས། །ར་གཅིན་སྦྱར་བ་སྣར་བླུགས་དང༌། །མིག་
བསྐུས་ལྷ་ཡི་གདོན་ལས་ཐར། །ལྷ་མིན་གཏོར་མ་འབྲས་བུ་ནི། །མང་པོ་དག་དང་པུ་ཤེལ་ཙེ། །ཀླུ་ཡི་གདོན་ལ་ཛཱ་ཏི་དང༌། །འབྲས་ཡོས་བུ་རམ་སྣུམ་ཁུར་དང༌། །འབྲས་ཆན་བུ་རམ་བཅས་པ་དང༌། །ཟས་མཆོག་འོ་མ་སྦྲང་རྩི་དང༌། །ས་ནག་ནཱ་ག་གེ་སར་དང༌། །ཤུ་དག་པདྨ་པུ་ཤེལ་ཙེ། །ཨུཏྤལ་པདྨ་དམར་པོ་ཡི། འདབ་མར་བཅས་པའི་གཏོར་མ་སྦྱིན། །སེང་ཕྲོམ་ལོ་མ་དཀར་པོ་དང༌། །རྒྱ་སྦོས་ནཱ་ག་གེ་སར་དང༌། །ཉུངས་ཀར་ཆུ་གྲང་ལ་བཏགས་པས། །སྣར་བླུགས་མིག་ཏུ་བསྐུས་པའང་ཕན། །གནོད་སྦྱིན་གདོན་ལ་འོ་མ་ཞོ། །མར་དང་འབྲས་ཆན་བསྲེས་པ་དང༌། །གུ་གུལ་པདྨ་ཐང་ཤིང་དང༌། །པུ་ཤེལ་ཙེ་དང་གོས་དང་གསེར། །དབྱིག་ནི་གཏོར་མར་སྦྱིན་པར་བྱ། །མར་དང་འོ་མ་བ་གཅིན་ནི། །ཆ་མཉམ་བསྐོལ་བ་བཏུང་བ་དང༌། །སྣར་བླུགས་ལུས་ལ་བསྐུས་ན་ཕན། །ཨ་རུ་ར་དང་སེར་པོ་གཉིས། །སྒོག་སྐྱ་ཤུ་དག་ན་ལེ་ཤམ། །ནིམ་པའི་ལོ་མར་གཅིན་བཏགས། །ལྡེ་གུས་སྣ་སྨན་མིག་སྨན་བྱ། །ཚངས་པ་སྲིན་པོའི་གཏོར་མ་ནི། །ནས་བྲེ་བཞི་ནི་བཙོས་པ་ཡིས། །ཆུ་བྲེ་བཅུ་དྲུག་ཏིལ་བཏགས་བསྲེས། །གདུགས་དང་གོས་དང་བྱུག་པ་སྦྱིན། །སེང་ལྡེང་སྲང་ནི་ཉི་ཤུ་དང༌། །ཚ་བ་གསུམ་དང་འབྲས་བུ་གསུམ། །ཤིང་ཀུན་ཤུ་དག་ཤུ་ཏི་དང༌། །ཉུངས་ཀར་ནིམ་པའི་ལོ་མར་བཅས། །སྒོག་སྐྱ་སྲང་ནི་ཕྱེད་ཕྱེད་དང། །ཞུན་མར་ཕུལ་ནི་བདུན་དག་དང༌། །བ་གཅིན་སུམ་འགྱུར་བསྐོལ་བ་དེ། །བཏུང་དང་སྣར་བླུགས་བསྐུས་ན་ཕན། །སྲིན་པོའི་གདོན་ལ་ཏིལ་ཕྱེ་དང༌། །མེ་ཏོག་དཀར་པོ་འབྲས་ཆན་བསྲེས། །ཤ་བཙོས་རྗེན་པ་ནིམ་པ་ལ། །ཁྲག་དང་བཅས་པའི་གཏོར་མ་སྦྱིན། །ནག་ཏ་མ་ལ་ཤྲི་ཤ་ཡི། །ཤུན་ལྤགས་མེ་ཏོག་འབྲས་བུ་དང༌། །དེ་བཞིན་པ་ཏ་ལ་ནག་པོ། །བིལ་བའི་རྩ་བ་ཚ་བ་གསུམ། །ཤིང་ཀུན་ཉུངས་ཀར་དུག་མོ་ཉུང༌། །སྒོག་སྐྱ་སྐྱུ་རུ་རའི་འབྲས་བུ། །ར་གཅིན་དང་ན་སྦྱར་བའི་སྨན། །
སྣར་བླུགས་མིག་ཏུ་བྱུགས་ནའང་ཕན། །འདི་དག་ཉིད་དང་མར་གྱིས་ནི། །བཞི་འགྱུར་བ་གཅིན་བསྐོལ་བ་ནི། །བཏུང་དང་སྣར་བླུགས་བསྐུས་པ་ཡིས། །སྲིན་པོའི་གདོན་ནི་ཟློག་པར་བྱེད། །ཤ་ཟ་ལ་ནི་བུ་རམ་ཆང༌། །ཏིལ་ཚིག་ཏིལ་གྱི་ཕྱེ་མ་ཞོ། །ལ་ཕུག་ལན་ཚྭ་ཕྱེ་ཟན་མར། །འབྱུང་པོ་འབྲས་ཆན་གཏོར་མ་སྦྱིན། །སེར་པོ་རྣམ་གཉིས་རྒྱམ་ཚ་བཙོད། །ཤུ་ཏི་དོང་གྲ་པྲི་ཡང་ཀུ། །ཤིང་ཀུན་སྒོག་སྐྱ་ཚ་བ་གསུམ། །འབྲས་བུ་གསུམ་དང་པ་ཏ་ལི། །ཤུ་དག་གི་རི་ཀརྞི་དཀར། །ཤི་རི་ཤ་ཡི་མེ་ཏོག་དམར། །བ་གཅིན་བཞི་ཆ་བཅས་པར་བསྐོལ། །བཏུང་དང་བསྐུ་བ་བྱས་ན་ཕན། །ཡང་ན་དེ་ཉིད་ར་གཅིན་བཏགས། །མིག་བསྐུས་སྣར་ནི་བླུགས་པ་ཕན། །ལྷ་དང་དྲང་སྲོང་མཚུན་ལྷ་དང༌། །དྲི་ཟའི་གདོན་ལ་སྣ་སྨན་སྩོགས། །རྣོན་པོ་བཏང་བར་མི་བྱ་ཞིང༌། །འདི་ལ་ཞུན་མར་བཏུང་ལ་སོགས། །སྨན་ནི་འཇམ་པོ་སྤྱད་པར་བྱ། །ཤ་ཟ་མ་གཏོགས་ཐམས་ཅད་ལ། །མི་མཐུན་སྦྱིན་པར་མི་བྱ་སྟེ། །མཐུ་སྟོབས་ཆེ་བ་དེ་ཁྲོས་ནས། །ནད་པ་སྨན་པ་བཅས་གསོད་བྱེད། །འཕགས་པ་སྤྱན་རས་གཟིགས་དབང་ཕྱུག །མགོན་པོ་ཕྱག་ནི་བཅུ་གཉིས་པ། །ནད་ཀུན་གསོ་བར་མཛད་པ་ཡི། །སྔགས་བཟླས་ན་ནི་ནད་ཀུན་སེལ། །དེ་བཞིན་སྨྱོ་བྱེད་བརྗེད་བྱེད་དང༌། །གཞན་ཡང་སེམས་འཁྲུལ་བྱེད་པ་འཇོམས། །རིག་སྔགས་རྒྱལ་མོ་རྨ་བྱ་ཆེ། །གཙང་བྱས་དེ་ལ་རྟག་ཏུ་བསྒྲགས། །འབྱུང་པོའི་བདག་པོ་ལྷ་ཆེན་དང༌། །དེ་ཡི་འཁོར་གྱི་ཚོགས་མཆོད་ཅིང༌། །དེ་ཡི་སྔགས་གྲུབ་བཟླས་ན་ཡང༌། །གདོན་ནི་ཐམས་ཅད་སེལ་བར་བྱེད། །གང་ཡང་འོག་ནས་བཤད་པ་ཡི། ལེའུ་གཉིས་ལས་སྨོས་པ་དང༌། །གང་འདིར་བཤད་པ་དེ་དག་ཀུན། །ཕན་ཚུན་སྦྱོར་བ་བྱས་ན་ཕན། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་སྟེ་ལྔ་པའོ།། །།དེ་ནས་སྨྱོ་བྱེད་གསོ་བའི་ལེའུ་བཤད་པར་བྱའོ། །
སྨྱོ་བྱེད་ནད་གཞི་རེ་རེ་དང༌། །འདུས་སྩོགས་དུག་ལས་གྱུར་པ་དྲུག །སྨྱོ་བྱེད་ཅེས་བྱ་ལུས་དང་ནི། །སེམས་ཀྱི་ནད་ལམ་ལོག་པ་རུ། །ཞུགས་པས་སྨྱོས་པར་གྱུར་པ་ཡིན། །བཟའ་བཏུང་གནོད་པ་དག་དང་ནི། །སྙིང་དང་མ་གོམས་དྲི་མར་བཅས། །མང་ཉུང་མ་སྙོམས་བསྟེན་པ་དང༌། །ཡིད་ཞུམ་སྙིང་སྟོབས་ཆུང་བ་དང༌། །ནད་ཀྱི་ཤུགས་ཀྱིས་དཀྲུགས་པ་དང༌། །རིད་ཅིང་སྤྱོད་པ་མ་སྙོམས་དང༌། །མཆོད་འོས་མཆོད་པར་མི་བྱེད་དང༌། །སེམས་ལས་ཀྱིས་ནི་སེམས་ཉམས་དང༌། །དུག་དང་ཉེ་བའི་དུག་ལས་གྱུར། །འདི་ཡིས་སྙིང་སྟོབས་ཞན་པ་ཡི། །སྙིང་གི་ནད་ལ་གནོད་བྱས་ཏེ། །བློ་ནི་དྲི་མ་ཅན་བྱས་ཏེ། །ཡིད་རྒྱུ་བ་ཡི་ལམ་བཀག་ནས། །སྨྱོ་བྱེད་དག་ནི་སྐྱེད་པར་བྱེད། །དེ་ཡིས་བློ་དང་རྣམ་ཤེས་དང༌། །དྲན་པ་འཁྲུལ་ཞིང་ལུས་ཀྱི་ནི། །བདེ་དང་སྡུག་བསྔལ་ལས་ཉམས་ཏེ། །ཤིང་རྟ་ཁ་ལོ་སྒྱུར་བ་ནི། །མེད་པ་ལྟ་བུར་རྩོམ་པ་ནི། །ཀུན་ཀྱང་བསམ་པ་མེད་པར་སྤྱོད། །དེ་ལ་རླུང་གྱུར་ལུས་སྦེག་ཅིང༌། །རྒྱུ་མེད་དུ་ཞིང་ཚིག་རྩུབ་སྨྲ། །དགོད་དང་འཛུམ་དང་གར་བྱེད་དང༌། །གླུ་ལེན་རོལ་མོ་བྱེད་པ་དང༌། །ལུས་བསྐྱོད་ཕེག་ནི་རྡོབ་པ་དང༌། །གླིང་བུ་པི་ཝང་ལ་སོགས་ཀྱི། །སྒྲ་ཡི་ལད་མོ་ཡང་ཡང་ཟློས། །རྒྱུན་དུ་ཁ་ནས་ལྦུ་བ་འཛག །ཕན་ཚུན་རྒྱུག་ཅིང་མང་དུ་སྨྲ། །རྒྱ་ན་མིན་པས་ནི་རྒྱན་དུ་བྱེད། །བཞོན་པ་མིན་པས་འགྲོ་བ་རྩོམ། །ཁ་ཟས་ལ་ནི་གདུ་བར་བྱེད། །དེ་རྙེད་ན་ནི་མི་འདོད་བྱེད། །མིག་ཟླུམ་མིག་ནི་དམར་བ་དང༌། །ཁ་ཟས་ཞུ་ནས་ནད་ལྡང་འགྱུར། །མཁྲིས་ལས་སྤྱོ་ཞིང་ཁྲོ་བ་དང༌། །ཁུ་ཚུར་བོང་བརྡེག་ཅིང་རྒྱུག །གྲིབ་མ་ཆུ་ནི་གྲང་མོ་འདོད། །གཅེར་བུར་འདུག་ཅིང་ལུས་མདོག་སེར། །མེད་པར་མེ་ནི་འབར་བ་དང༌། །སྐར་མ་མར་མེ་མཐོང་བའོ། །བད་ཀན་སློན་ཞིང་ཡིག་འཆུས། །ཁ་ཟས་རྩོལ་དང་སྨྲ་བ་ཉུང༌། །བུད་མེད་འདོད་ཅིང་དབེན་ལ་དགའ། །ཁ་ཆུ་སྣབས་ནི་འཛག་པ་དང༌། །འཇིགས་རུང་གཙང་སྦྲ་ལ་མི་དགའ། །གཉིད་ཆེ་གདོང་ནི་སྐྲངས་པ་དང༌། །ནུབ་མོ་ཤེས་ཆེར་སྨྱོ་བ་དང༌། །ཟོས་མ་ཐག་ཏུ་ལྡང་བ་ཡིན། །
འདུས་པའི་རྒྱུ་དང་མཚན་མ་ནི། །ཀུན་ལྡན་དེ་ཡི་བདག་ཉིད་ཅན། །སྨྱོ་བྱེད་མི་བཟད་པར་ཤེས་བྱ། །དེ་ནི་སྨན་པས་ཡོངས་སུ་སྤང༌། །ནོར་དང་ཆུང་མ་ལ་སོགས་བྲལ། །བརྣག་དཀའ་བ་ལས་སེམས་གདུང་བས། །སྨྱོ་ཞིང་ཞུམ་ལ་ཡང་ཡང་བརྒྱལ། །ཀྱི་ཧུད་ཀྱི་ཧུད་སྨྲེ་སྔགས་འདོན། །གློ་བུར་དུ་ནི་ངུ་ཞིང་བརྒྱལ། །དེ་ཡི་ཡོན་ཏན་མང་དུ་སེམས། །མྱ་ངན་གྱིས་གདུངས་སེམས་ཁོང་ཆུད། །གཉིད་ཡར་རྣམ་པར་འཁྱམས་པ་ཡིན། །དུག་གིས་གདོང་ནི་སྔོ་བ་དང༌། །གཟི་ཉམས་དབང་པོ་སྟོབས་ཆུང་བ། །ཤུགས་ཀྱི་བར་དུའང་འཁྲུལ་བར་བྱེད། །མིག་དམར་དེ་ནི་སྤང་བར་བྱ། །དེ་ནས་རླུང་གྱུར་སྨྱོ་བྱེད་ལ། །དང་པོ་སྣུམ་གྱི་བཏུང་བ་བླུད། །ལམ་འགགས་གྱུར་ལ་དང་པོར་ནི། །སྣུམ་བཅས་སྦྱང་བ་འཇམ་པོ་བྱ། །བད་ཀན་མཁྲིས་གྱུར་དང་པོ་ནི། །སྣུམ་དང་དུགས་བྱ་སྐྱུག་སྨན་དང༌། །བཀྲུ་སྨན་མས་གཏོང་བྱས་པ་དང༌། །མགོ་བོའི་བཀྲུ་སྨན་དག་ཀྱང་བྱ། །དེ་ལྟར་ལུས་ནི་དག་བྱས་ན། །ཡིད་ནི་དྲན་པ་རྙེད་པར་འགྱུར། །དེ་ལྟ་ན་ཡང་རྗེས་འབྲངས་ན། །སྣ་སྨན་མིག་སྨན་རྣོན་པོ་གཏང༌། །སེམས་དགའ་དབུགས་འབྱུང་སྐྲག་པ་དང༌། །འཇིགས་དང་རྡེག་དང་སྡིགས་མོ་བྱེད། །ལུས་དྲིས་བྱུགས་དང་བསྐུ་བ་དང༌། །དུད་རྔུབ་སྨན་མར་བླུད་པ་དག །སྦྱར་ཏེ་དེ་ནི་དགའ་འགྱུར་ན། །ཡིད་ནི་ཐ་མལ་པ་ལ་སྦྱར། །ཤིང་ཀུན་དང་ནི་རྩབ་རུ་ཚ། །ཚ་བ་གསུམ་ནི་སྲང་གཉིས་གཉིས། །མར་བྲེ་བཞི་ནི་བ་གཅིན་བཅས། །བསྐོལ་བས་སྨྱོ་བྱེད་འབྱུང་པོ་དང༌། །བརྗེད་བྱེད་གདོན་ནི་སེལ་མཆོག་ཡིན། །བྲམྷིའི་བསྐོལ་ཁུ་བྲེ་དོ་དང༌། །མར་བྲེ་གང་དང་ཚ་བ་གསུམ། །ཤྱ་མ་དུར་བྱིད་བིམ་པ་དང༌། །ཤང་ཀ་པུཥྤ་དོང་ག་དང༌། །སཔྟ་ལ་དང་བྱི་དང་ག །ཞོ་ནི་གཉིས་གཉིས་ལྡེ་གུ་བསྐོལ། །པྲམྟིའི་སྨན་མར་ཞེས་བཤད་དེ། །མར་ནི་སྲང་རེས་བསྐྱེད་དེ་བཏང༌། །ཆེ་ཚད་སྲང་བཞིའི་མར་པོས་ན། །སྨྱོ་བྱེད་བརྗེད་བྱེད་མཛེ་ཡི་ནད། །སེལ་ཞིང་མོ་གཤམ་བུ་སྐྱེད་བྱེད། །སྐད་སྙན་ཚིག་གསལ་དྲན་པ་དང༌། །
ཡིད་གཞུངས་དཔལ་ནི་སྐྱེད་པར་བྱེད། །འབྲས་བུ་གསུམ་དང་བྱི་དང་ག །པ་ཏྲ་ཨེ་ལ་ཐང་ཤིང་དང༌། །ཨེ་ལ་བ་ལུ་ཀ་དང་ནི། །ཐལ་ཏྲེས་རྣམ་གཉིས་སེར་པོ་གཉིས། །སྠི་ར་རྣམ་གཉིས་པྲི་ཡང་ཀུ། །རྒྱ་སྤོས་རུ་རྟ་བྲི་ཧ་ཏི། །ནཱ་ག་གེ་སར་དོང་ག་བཙོད། །སེའུ་འབྲུ་བལ་བུའི་ལོ་མ་དང༌། །ཛཱ་ཏི་ཁ་འབུས་བྱི་དང་ག །དན་ད་ཤུ་དག་ཨུཏྤ་ལ། །ཙནྡན་དཀར་པོ་ཞོ་གཉིས་ནི། །ཞུན་མར་བྲེ་གང་བཅས་བསྐོལ་བ། །དགེ་བའི་སྨན་མར་ཞེས་བཤད་འདིས། །འབྱུང་པོའི་གདོན་དང་སྨྱོ་བྱེད་དང༌། །བརྗེད་བྱེད་ལུད་པ་སྡིག་ཅན་འཇོམས། །སྐྱ་རྦབ་གཡན་པ་སྐེམ་དང་དུག །རྨོངས་བག་གཅིན་སྙི་དབྱིག་དུག་རིམས། །ཁུ་བ་མེད་པའམ་བུ་མེད་པའམ། །དྲན་པ་གདོན་གྱིས་བརླབས་པ་དང༌། །ཡིད་གཞུངས་མེད་ཅིང་ཚིག་འཁྲུལ་དང༌། །དྲན་ཉམས་མེ་དྲོད་ཆུང་ལ་ཕན། །སྟོབས་སྐྱེད་བཀྲ་ཤིས་ཚེ་རིང་ཞིང༌། །མདངས་སྐྱེ་སྐལ་ལྡན་ལུས་རྒྱས་ཆེ། །བུ་སྐྱེད་བྱེད་པའི་མཆོག་ཡིན་ནོ། །འདི་ལ་ཐལ་ཏྲེས་རྣམ་གཉིས་སོགས། །ཉི་ཤུ་རྩ་གཅིག་ཆུ་དང་བསྐོལ། །དེ་ཡི་ཁུ་བ་མར་དང་བ། །ལན་ཅིག་སྐྱེས་འོ་བཞི་འགྱུར་དང༌། །མེད་རྣམ་གཉིས་ར་མཉེ་བ། །བུང་ཚང་རྡོ་དང་ཁ་སྲལ་ཕྲེའུ། །བུ་རམ་ཤིང་དང་པརྞི་གཉིས། །བསྐོལ་བ་ཡི་ནི་སྨན་མར་འདི། །དགེ་བ་ཆེན་པོ་ཞེས་བྱ་སྟེ། །བརྟས་བྱེད་འདུས་པའི་ནད་འཇོམས་ཤིང༌། །སྔ་མ་བས་ཀྱང་ཡོན་ཏན་ལྷག །སྤང་སྤོས་བུ་ཏ་ཀེ་ཤི་དང༌། །ཆུ་རྩ་ཤུ་དག་ཁ་སྲལ་ཕྲེའུ། །ཀྱི་ལྕེ་བ་དང་ར་མཉེ་བ། །ཙ་རོང་ཛ་ཡ་པུ་ཙེ་ཤེལ། །སླེ་ཏྲེས་ཙ་ཏྲ་པ་ར་ཧ། །ཨ་ཏི་ཙ་ཏ་ས་ཏ་ལ། །མ་ཧཱ་པུ་རུ་ཤ་དན་དང༌། །ན་གུ་ལི་གཉིས་སྐྱུ་རུ་ར། །བྲིཤི་ཀ་ལ་ཀ་དམ་པ། །སྰ་ལ་པརྞི་བཅས་བསྐོལ་མར། །ཤ་ཟ་ཆེན་པོའི་མར་ཞེས་བྱ། །དེས་ནི་ཉིན་བཞི་པའི་རིམས་དང༌། །སྨྱོ་བྱེད་བརྗེད་བྱེད་གདོན་འཇོམས་ཤིང༌། །བློ་དང་ཡིད་གཞུངས་དྲན་པ་སྐྱེད། །བྱིས་པ་རྣམས་ཀྱི་ལུས་འཕེལ་བྱེད། །བདུད་རྩི་དང་ནི་འདྲ་བ་ཡིན། །བྲམྷི་ཨིནྡྲ་བྱི་དང་ཀ །ཤིང་ཀུན་
སྤང་སྦོས་མུར་བ་དང༌། །ར་སྣ་སྒོག་སྐྱ་བོང་ང་དཀར། །ཤུ་དག་བྱེའུ་རུག་བི་ཤ་ལ། །ནཱ་ག་དན་ཏི་བྱི་ཚེར་བ། །ཛོ་ཏི་སྨ་ཏི་ཚ་བ་གསུམ། །ཨ་རུ་ར་དང་ས་ནག་རྣམས། །གླང་པོའི་གཅིན་བཏགས་རི་ལུར་བྱས། །གྲིབ་བསྐམས་སྣར་བླུགས་མིག་བསྐུ་ཞིང༌། །ལུས་བསྐུས་སྤོས་བདུགས་སྨྱོ་བྱེད་སེལ། །ཉུངས་ཀར་དང་ནི་སྦྱར་བ་ཡི། །སྣ་སྨན་རྣམ་པ་སྣ་ཚོགས་ཕན། །ཉུངས་མར་གྱིས་ནི་ལུས་བསྐུ་དང༌། །ཉུངས་ཀར་ཕྱེ་མ་སྣར་བུད་བྱ། །མདོ་གནས་བསྟན་པའི་ཆོ་ག་བཞིན། །དུང་རྣོན་ཤིང་ཀུན་བཅས་པ་ཕན། །ཝ་དང་རེག་འཇམ་འུག་པ་དང༌། །བྱི་བར་ཐུག་ཛ་ཏི་ཀའི། །གཅིན་དང་རྟུག་པ་སྤུ་དང་ནི། །པགས་པ་མཁྲིས་པ་སེན་མོ་དང༌། །སྦོས་བདུགས་མིག་སྨན་ལུས་བསྐུ་དང༌། །བྱུགས་དང་བླུགས་པ་བཤད་པར་བྱ། །བད་ཀན་རླུང་གྱུར་ལ་ཕལ་ཆེར། །ཁྱི་དང་བ་ལང་ཉ་ཤ་ནི། །རུལ་བའི་བདུག་པས་བདུག་པར་བྱ། །མཁྲིས་གྱུར་ལ་ནི་ཏིག་ཏའི་མར། །འཚོ་བྱེད་སྣུམ་ནི་གཉིས་ཀྱི་མར། །བཟའ་དང་བཏུང་བ་བསིལ་བ་དང༌། །མངར་བ་དང་ནི་ཡང་བ་བསྔགས། །ཇི་སྐད་བཤད་པའི་གཏར་ག་གདབ། །ཡང་ན་ཤ་ཚོན་གྱིས་འགྲངས་བྱ། །དེ་འོག་རླུང་མེད་གནས་བསྙལ་ནས། །སེམས་མྱོས་པ་ལས་ཐར་བར་འགྱུར། །ཁྲོན་པའི་ཆུ་ནི་ཉུང་བར་གཞུག །ལྟོགས་པ་ཉིད་དུ་བྱས་ཏེ་བསྐམས། །དེ་ལ་ཆོས་དང་ནོར་ལྡན་པའི། །གཏམ་སྙན་མཛའ་བོས་སེམས་དགའ་བྱ། །ཡང་ན་སྡུག་དང་བྲལ་བའམ། །རྨད་དུ་བྱུང་བ་བསྟན་པའམ། །བཅིངས་ལ་ཡུངས་མར་གྱིས་བསྐུས་ཏེ། །ཉི་ཚན་ལ་ནི་གན་རྐྱལ་གཞག །ཁ་སྲལ་ཕྲེའུའམ་ལྕགས་ཚའམ། །ཏིལ་མར་ཆུ་ཚན་གྱིས་རེག་བྱ། །ཡང་ན་ལྕག་གིས་གཞུས་ནས་ནི། །བཅིངས་ཏེ་གཡང་སར་སྒྱུར་བར་བྱ། །ཡང་ན་རྡོ་དང་མཚོན་མེད་པའི། །མུན་ཁང་མི་ནི་མེད་པར་གཞུག །མཆེ་བ་སྟོན་པའི་སྦྲུལ་དང་ནི། །གླང་དང་སེང་གེ་གླང་པོ་ཆེས། །དེ་ནི་སྐྲག་ཏུ་གཞུག་པའམ། །ཡང་ན་རྒྱལ་པོའི་སྐྱེས་བུ་
ཡིས། །དམ་དུ་བཅིངས་ཏེ་ཕྱིར་ཕྱུང་ནས། །རྒྱལ་པོའི་བཀའ་ཡིས་བསྡིགས་པ་དང༌། །འདི་བསད་བྱ་ཞེས་སྐྲག་ཏུ་གཞུག །ལུས་ཀྱི་སྡུག་བསྔལ་འཇིགས་པ་བས། །སྲོག་གི་འཇིགས་པར་རབ་འཇིགས་པས། །དེ་ཕྱིར་ཀུན་ཏུ་འཁྲུལ་པའི་ཡིད། །ཉེ་བར་ཞི་བ་ཉིད་དུ་འགྱུར། །གྲུབ་པའི་སྦྱོར་བ་འདི་དག་ནི། །ནད་དམིགས་དུས་སོགས་ལྟོས་ཏེ་བྱ། །སྡུག་དང་ནོར་དང་བྲལ་བ་ལས། །གང་གི་ཡིད་ལ་གནོད་གྱུར་པ། །དེ་ལ་དེ་འདྲ་རྙེད་གྱུར་པའི། །སྤྲོ་བསྲིང་དབུགས་དབྱུང་བ་ཡིས་གསོ། །འདོད་དང་མྱ་ངན་འཇིགས་པ་དང༌། །ཁྲོ་དང་འཇིགས་པ་ཆང་ལས་གྱུར། །གཉིས་དག་གིས་ནི་གཅིག་ལ་གཅིག །དེ་དག་ཉིད་ཀྱིས་ཞི་བར་བྱ། །བཤད་པའི་མཚན་མ་ལས་ལྷག་པ། །གདོན་དང་རྗེས་འབྲེལ་ཡིན་ཞེས་བྱ། །གལ་ཏེ་སྨྱོ་བྱེད་གདོན་ལས་གྱུར། །གདོན་གསོར་བཤད་པའི་སྨན་སྦྱར་བྱ། །ཏིལ་བཏགས་ཕྱེ་མ་ནས་དང་ཟན། །སྣུམ་ཞིང་མངར་བའི་ཁ་ཟས་དང༌། །འབྲས་ནི་ཁྲག་ཏུ་སྦྲུས་པ་དང༌། །ཤ་ནི་བཙེས་པ་རྗེན་པ་དང༌། །འབྲུ་ཆང་སྦྱར་ཆང་མནན་པའི་ཆང༌། །ཨ་ཏི་མུགྟིའི་མེ་ཏོག་དང། །ཛཱ་ཏི་ས་ཧ་ར་ཛ་ཡི། །མེ་ཏོག་བཅས་པའི་གཏོར་མ་ནི། །ལམ་གྱི་བཞི་མདོ་བ་ལང་ལྷས། །ཆུ་བོ་འདུས་པ་དག་ཏུ་སྦྱིན། །གང་ཞིག་ཤ་དང་ཆང་སྤངས་ཤིང༌། །ཕན་ལ་བརྩོན་ཞིང་གཙང་སྦྲ་ཆེ། །སྙིང་སྟོབས་ཅན་ལ་ལྷན་ཅིག་སྐྱེས། །གློ་བུར་སྨྱོ་བྱེད་འབྱུང་མི་འགྱུར། །དབང་པོའི་དོན་ནི་གསལ་བ་དང༌། །དེ་བཞིན་བློ་དང་ཡིད་གསལ་བ། །ལུས་ཟུངས་ཐ་མལ་པར་གནས་པ། །སྨྱོ་བྱེད་དང་བྲལ་མཚན་མ་ཡིན། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་སྟེ་དྲུག་པའོ།། །།དེ་ནས་བརྗེད་བྱེད་གསོ་བ་བཤད་པར་བྱའོ། །བརྗེད་བྱེད་དྲན་པ་ཉམས་པ་སྟེ། །དེ་ནི་སྙིང་སྟོབས་བློ་འཁྲུལ་དང༌། །སེམས་ལས་མྱ་ངན་འཇིགས་སོགས་ཀྱིས། །གནོད་གྱུར་སེམས་ལས་བྱུང་བ་ཡིན། །ལུས་སེམས་གཏོགས་པའི་ནད་ཀྱིས་ནི། །
སྨྱོ་བྱེད་བཞིན་དུ་འཁྲུག་འགྱུར་བས། །སྙིང་སྟོབས་ཉམས་ཞིང་སྙིང་དང་ནི། །འདུ་ཤེས་རྒྱུ་བའི་རྩ་སྦུབས་ཁྱབ། །མུན་པར་ཞུགས་སྙམ་སེམས་ཤིང་རྨོངས། །འཇིགས་སུ་རུང་བའི་བྱ་བ་བྱེད། །སོ་འཆའ་ལྦུ་བ་སྐྱུག་པ་དང༌། །ལག་པ་རྐང་པ་གཡོབ་པ་དང༌། །གཟུགས་མེད་པར་ཡང་མཐོང་བ་དང༌། །འཁྲུལ་ཞིང་ས་ལ་འགྱེལ་བ་དང༌། །སྨིན་མ་མི་གཡོ་ནད་ཤུགས་དང༌། །བྲལ་ནས་སད་པར་གྱུར་པ་དང༌། །དེ་ནི་དུས་གཞན་དག་ཏུ་ཡང༌། །དེ་བཞིན་དུ་ནི་སྤྱོད་པ་ཡིན། །རླུང་ལ་སོགས་དང་འདུས་པ་ཡི། །དབྱེ་བས་བརྗེད་བྱེད་རྣམ་པ་བཞི། །དེ་ནི་སྐྱེ་བར་གྱུར་པའི་ཚུལ། །སྙིང་འདར་ཁོང་སྟོང་མགོ་འཁོར་ལ། །མུན་པར་མཐོང་ཞིང་སེམས་ཁོང་ཆུད། །སྨིན་མ་མི་སྡུག་མིག་འགྱུར་དང༌། །སྒྲ་མི་ཐོས་ཤིང་རྡུལ་འབྱུང་ལ། །ཁ་ཆུ་སྣབས་ནི་འཛག་པ་དང༌། །མི་འཇུ་ཡི་ག་འཆུས་ཤིང་བརྒྱལ། །ལྟོ་སྦོས་ཉམས་སྟོབས་ཟད་པ་དང༌། །གཉིད་མེད་སྐོམ་ཞིང་ཡན་ལག་ན། །རྨི་ལམ་གླུ་ལེན་གར་བྱེད་དང༌། །ཏིལ་མར་ཆང་ནི་འཐུང་བ་དང༌། །དེ་ཉིད་གཅིན་དུ་འབྱུང་བ་རྨི། །དེ་ལ་རླུང་གྱུར་བརླ་འགུལ་ཞིང༌། །ཡང་དང་ཡང་དུ་འགྱེལ་བ་དང༌། །ཡང་དང་ཡང་དུ་དྲན་པ་སྟོར། །འདུ་ཤེས་རྙེད་ནས་མི་གསལ་དུ། །མིག་འབུར་ཡང་ཡང་དབུགས་འབྱིན་ཞིང༌། །ལྦུ་བར་སྐྱུག་ཅིང་འདར་བ་དང༌། །སོ་འཆའ་མགོ་ནི་རྡེབས་པ་དང༌། །རླུང་གིས་གྲེ་བ་རྒྱས་པར་བྱེད། །ཡན་ལག་ཀུན་དུ་རྡེབས་པ་དང༌། །སོར་མོ་མི་སྙོམས་འགུགས་པ་དང། །མིག་དང་པགས་པ་སེན་མོ་ནི། །གནག་ཅིང་རྩུབ་མོར་སྣང་བ་དང༌། །གཟུགས་ནི་མི་བརྟན་རྩུབ་པ་དང༌། །མི་སྡུག་བཞིན་རས་ངན་པ་ཡིན། །མཁྲིས་པ་ལས་གྱུར་བརྗེད་བྱེད་ནི། །དྲན་པ་ཡང་ཡང་ཉམས་པ་དང༌། །མིག་མདོག་པགས་པ་ལྦུ་བ་སེར། །ས་ལ་རྡེག་པར་བྱེད་པ་དང༌། །འཇིགས་རུང་འབར་ཞིང་ཁྲོ་བ་ཡི། །གཟུགས་མཐོང་སྐོམ་དད་ཆེ་བ་ཡིན། །བད་ཀན་ལས་གྱུར་རིང་ནས་འཛིན། །ཡུང་རིང་ཉིད་ནས་སད་པར་བྱེད། །གཡོ་འགུལ་ཉུང་ཞིང་ཁ་ཆུ་མང༌། །ཁ་མིག་པགས་པ་སེན་མོ་དཀར། །གཟུགས་
རྣམས་དཀར་པོར་མཐོང་བ་ཡིན། །མཚན་ཉིད་ཀུན་དང་ལྡན་པ་སྤང༌། །དེ་ནས་བློ་སེམས་དྲན་པ་དང༌། །སྙིང་གའི་སྦུབས་ནི་སད་བྱེད་པའི། །སློན་སྨན་ལ་སོགས་ལས་རྣམས་ནི། །རྣོན་པོ་ཡིས་ནི་སྦྱང་བར་བྱ། །རླུང་གྱུར་འཇམ་རྩི་མང་དུ་བྱ། །མཁྲིས་གྱུར་ཕལ་ཆེར་བཀྲུ་སྨན་གཏང༌། །བད་ཀན་ཕལ་ཆེར་སྐྱུག་སྨན་ནི། །བཏང་བས་བརྗེད་བྱེད་གསོ་བར་བྱ། །རྣམ་པ་ཀུན་ཏུ་ལེགས་དག་ཅིང༌། །ལེགས་པར་སྤྲོ་ནི་བསྲིང་བ་ལ། །བརྗེད་བྱེད་ལས་ནི་ཐར་བྱའི་ཕྱིར། །ཞི་བར་བྱ་བའི་སྦྱོར་བར་ཉོན། །བ་ལྕི་ཁུ་བ་འོ་མ་དང༌། །ཞོ་དང་གཅིན་དང་མར་བསྐོལ་བ། །བརྗེད་བྱེད་རིམས་དང་སྨྱོ་བྱེད་དང༌། །མིག་སེར་སེལ་བར་བྱེད་པ་བླུད། །རྩ་བ་བཅུ་པ་འབྲས་བུ་གསུམ། །དུག་མོ་ཉུང་ཤུན་སེར་པོ་གཉིས། །ཨ་པ་མརྒ་ལོ་མ་བདུན། །ནི་ལི་ནི་དང་པུ་ཙེ་ཤེལ། །དོང་གཔུཥྐར་མཱུ་ལ་དང༌། །ཕལ་གུའི་རྩ་བ་བྱི་ཚེར་སྲང༌། །གཉིས་གཉིས་ཆུ་བྲེ་བཅུ་དྲུག་ནང༌། །བསྐོལ་བ་ལ་ནི་བཞི་ཆ་ལུས། །ག་བྲའི་རྩ་བ་དུ་བ་རི། །པ་ཏ་དན་ད་དུར་བྱིད་དང༌། །ཚ་བ་གསུམ་དང་རོ་ཧི་ཥེ། །མུར་བ་རྩ་མཁྲིས་བུ་དི་ཁ། །ཧ་ཏི་པི་པི་ལིང་དང་ནི། །མ་དུ་ཡན་ཏེ་ཐལ་ཏྲེས་གཉིས། །ལྕང་མ་དང་ནི་ཙི་ཏྲ་ཀ །ཞོ་ནི་གཉིས་གཉིས་མར་བྲ་གང༌། །དེ་བཞིན་སྔ་མའི་གཤེར་རྫས་བསྐོལ། །འདི་ནི་བ་ཡི་རྣམ་ལྔ་ཆེ། །བརྗེད་བྱེད་རིམས་དང་དམུ་རྫིང་དང༌། །མཚན་པར་རྡོལ་བ་སེལ་མཆོག་ཡིན། །འོར་ནད་གཞང་འབྲུམ་མིག་སེར་དང༌། །སྐྱ་རྦབ་སྐྲན་དང་ལུད་པ་དང༌། །གདོན་རྣམས་འཇོམས་པར་བྱེད་པ་ཡིན། །བྲམྷི་ཤུ་དག་རུ་རྟ་དང༌། །ཤང་ཀ་པུཥྤ་མར་རྙིང་བཅས། །བསྐོལ་བའི་མར་ནི་ཡིད་གཞུངས་བྱེད། །སྨྱོ་བྱེད་བཀྲ་མི་ཤིས་པ་དང༌། །བརྗེད་བྱེད་སྡིག་པ་འཇོམས་པར་བྱེད། །འཚོ་བྱེད་སྡེ་ཚན་སྲང་རེ་དང༌། །ཏིལ་མར་ཞུན་མར་བྲེ་རེ་བསྲེས། །འོ་མ་བྲེ་ནི་བཅུ་དྲུག་བསྐོལ། །འཐུངས་ན་བརྗེད་བྱེད་ལས་ཐར་བྱེད། །འོ་མ་བུ་རམ་ཤིང་ཁུ་བ། །བྲེ་བཞི་དང་ནི་ཏང་པ་ལ་གྱི། །ཁུ་བ་བརྒྱད་འགྱུར་དག་དང་ནི། །འཚོ་བྱེད་སྡེ་ཚན་ཞོ་གཉིས་གཉིས། །ཞུན་མར་བྲེ་གང་བཅས་བསྐོལ་བླུད། །དེས་
ནི་རླུང་མཁྲིས་ལས་གྱུར་པའི། །བརྗེད་བྱེད་མྱུར་དུ་སེལ་བར་བྱེད། །དེ་བཞིན་འཇག་མའི་བིད་རི། །ཀུ་ཤ་བུ་རམ་ཤིང་འོ་མ། །བསྐོལ་བ་འཐུངས་པའང་དེ་དང་འདྲ། །ཀུ་སྨན་ཏ་ཡི་ཁུ་བ་མར། །བཅོ་བརྒྱད་འགྱུར་དང་ཤིང་མངར་གྱི། །ལྡེ་གུར་བཅས་པ་བསྐོལ་བས་ནི། །བརྗེད་བྱེད་སེལ་བར་བྱེད་པ་དང༌། །བློ་དང་ཚིག་གསལ་སྐད་སྙན་བྱེད། །བ་ནི་སེར་སྐྱའི་མཁྲིས་པ་ཡི། །སྣ་སྨན་བཏང་ཡང་མཆོག་ཏུ་ཕན། །ཁྱི་དང་ཝ་དང་བྱི་ལ་དང༌། །སེང་གེ་སོགས་ཀྱི་མཁྲིས་པ་བསྔགས། །གོ་ད་སྲེ་མོ་གླང་པོ་ཆེ། །བ་ལང་དྲེད་དང་པྲི་ཤ་ཏའི། །མཁྲིས་པ་ཏིལ་མར་བསྐོལ་བ་དག །ལུས་བསྐུ་སྣར་ནི་བླུགས་ནའང་ཕན། །འབྲས་བུ་གསུམ་དང་ཚ་བ་གསུམ། །ནས་ཚིག་འཁུས་ཐལ་ཀོ་ཉོན་ཚེ། །ཕ་ནི་ཛ་ཀ་སྲ་རྩི་པོག །ཨ་པ་མརྒ་ཀ་རཉྫའི། །ས་བོན་ཏིལ་མར་ར་གཅིན་དང༌། །བཅས་པ་བསྐོལ་བ་སྣར་བླུགས་པའམ། །ཕྱེ་མ་སྣ་ནས་བུས་པའང་ཕན། །སྲེ་མོ་འུག་པ་སྤྲེའུ་དང༌། །བྱ་རྒོད་ཁྱི་རྟ་བྱ་རོག་སྦྲུལ། །ཆུ་དང་སྒྲོ་དང་རྟུག་པ་ཡི། །དུད་པས་འདི་ལ་བདུག་པར་བྱ། །ཏིལ་མར་སྒོག་སྐྱ་བཅས་པའམ། །འོ་མ་ཉེའུ་ཤིང་བསྟེན་ཡང་ཕན། །བྲམྷི་འམ་རུ་རྟའི་ཁུ་བའམ། །ཤུ་དག་སྦྲང་རྩིར་ལྡན་པའང་ཕན། །ནད་གཞི་མཉམ་དུ་འཁྲུགས་པ་ལས། །ལུས་དང་སེམས་ལ་བརྟེན་འགྱུར་ནད། །སྐྱེས་པར་གྱུར་པ་གང་ཡིན་དེ། །བརྗེད་བྱེད་གནད་ནི་ཆེན་པོར་གནས། །དེ་བས་གསོ་དཀའ་འདི་ལ་ནི། །བཅུད་ཀྱིས་ལེན་གྱིས་གསོ་བར་བྱ། །དེས་ཉེན་མེ་དང་ཆུ་ལ་སོགས། །ཡང་བ་ལས་རྟག་ཏུ་བསྲུང༌། །ཐར་པ་ན་ནི་ཡིད་འཁྲུལ་བས། །ཁྱེད་ཀྱིས་འདི་ལྟར་བྱས་སོ་ཞེས། །མི་བརྗོད་ཡུལ་ནི་ཡིད་འོང་བས། །ཉམས་པའི་སེམས་ནི་བརྟ་བར་བྱ། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་སྟེ་བདུན་པའོ།། །།ཡན་ལག་བརྒྱད་པའི་སྙིང་པོ་བསྡུས་པ་ལས། འབྱུང་པོའི་གདོན་གསོ་བའི་ཡན་ལག་རྫོགས་སོ།། །།
དེ་ནས་མིག་མཆུའི་ནད་དམིགས་ཤེས་པར་བྱ་བ་བཤད་པར་བྱའོ། །ནད་ཀུན་ནད་གཞི་ལས་བཤད་པའི། །གནོད་པས་ནད་ནི་འཁྲུགས་པ་དང༌། །མཆོག་ཏུ་མིག་ལ་གནོད་པ་དང༌། །ཕལ་ཆེར་མཁྲིས་པ་སྐྱེད་པ་ཡིས། །རྩ་ལས་གྱེན་དུ་རྒྱུས་ནས་ནི། མིག་གི་ཡན་ལག་མིག་མཆུ་གྲྭ། །དཀར་ནག་མཐོང་བྱེད་རྒྱལ་མོའམ། །མིག་ཀུན་ལ་གནས་ནད་སྐྱེད་བྱེད། །དེ་ལ་རླུང་ནི་མིག་མཆུ་ཡི། །རྩ་ལ་ཞུགས་པར་གྱུར་པ་དག །ཉལ་ནས་ལྡང་ཚེ་མིག་མཆུ་ནི། །ཧར་བག་ན་དང་བཅས་པར་བྱེད། །མིག་ནི་རྡུལ་གྱིས་གང་སྙམ་སེམས། །འཛུམས་པར་དཀའ་ཞིང་མཆི་མ་འཛག །མཉེས་ན་བདེ་བ་སྙམ་དུ་བྱེད། །དེ་ནི་འཛུམས་དཀའ་ཡིན་ཞེས་བཤད། །རླུང་གིས་མིག་མཆུ་བསྐྱོད་ནས་ནི། །ཡང་དང་ཡང་དུ་འབྱེད་ཅིང་འཛུམས། །འདི་ནི་འཛུམས་པ་ཞེས་བཤད་དོ། །གྲ་མཚམས་ལྷོད་ཅིང་ཚོར་བ་མེད། །རྟག་ཏུ་འཛུམས་ཤིང་མིག་ཉམས་པ། །གང་ཡིན་དེ་ནི་རླུང་གནོད་ཡིན། །མཁྲིས་པས་མིག་མཆུའི་མཐའ་མར་ནི། །འབྲུམ་བུ་ཀུ་མུ་ཏ་ཡི་ནི། །ས་བོན་འདྲ་སླར་གང་གྱུར་པ། །འབྲུམ་ཕྲན་ཀུ་མུ་ཏ་ཞེས་བྱ། །ཚ་ཞིང་འདྲུལ་ལ་ནད་དང་བཅས། །དམར་ཞིང་རེག་ན་མི་བཟོད་པ། །མཁྲིས་པས་སྐྱེས་པ་ཡིན་ཞེས་བཤད། །མཁྲིས་པ་རྫི་མའི་ནང་གནས་ཤིང༌། །གཡའ་ཞིང་ཚ་བར་བྱེད་པ་དང༌། །དེ་རྗེས་རྗི་མ་འབྱི་བ་སྟེ། །རྫི་མ་འབྱི་བ་ཞེས་ཤད་དོ། །བད་ཀན་ལས་གྱུར་མིག་མཆུའི་ནད། །འབྲུམ་ཕྲན་དཀར་པོ་ཡུངས་ཀར་འདྲ། །མཐུ་སྐྲངས་གཡའ་ན་མིག་རྡུལ་ཁེབས། །སྤྱི་བག་ཅན་འཛག་པོ་དག་ཀྱང༌། །ཧར་བག་འདྲུལ་བ་རྡུ་མས་ཁེབས། །བད་ཀན་གྱིས་བསླངས་མིག་མཆུའི་ནད། །བད་ཀན་ལས་གྱུར་རྨེན་བུ་དཀར། །ན་ཞིང་སྨིན་མ་མེད་གཡའ་སྲ། །རྒྱ་ཤུག་ཙམ་མམ་དེ་ལས་ནི། །ཅུང་ཟད་ཆུང་བ་ཆགས་པ་ཡིན། །ཁྲག་ལས་འབྲུམ་ཕྲན་དམར་བ་དང༌། །དེ་མཚུངས་འབྲུམ་ཕྲན་གྱིས་ཁྱབ་པ། །བརྩེགས་པ་ཞེས་བྱ་དེས་སྐྱེད་དམར། །རེག་མི་བཟོད་པ་མིག་མཆུ་སློངས། །མིག་མཆུའི་ནང་དུ་ཤ་ལྷག་
ནི། །སྲ་ཞིང་སྣུམ་ལ་ཚ་ཞིང་ན། །མདོག་དམར་དེ་ནི་ཁྲག་འཛག་ཅིང༌། །བཅད་བཞིན་འཕེལ་བྱེད་མིག་འབྲུམ་ཡིན། །མིག་མཆུའི་མཐའ་འམ་དབུས་སུ་ནི། །གཡའ་ཞིང་ཚལ་ན་བཅས་བརྟན། །མུངྒ་ཙམ་གྱི་ཁྲག་འབྲུམ་དམར། །འབྲུམ་ཕྲན་མིག་ནད་ཅེས་བྱའོ། །ནད་ཀྱིས་མིག་མཆུའི་ཕྱི་རོལ་སྐྲངས། །ནང་དུ་བུ་ག་ཕྲ་མོས་ཁྱབ། །འཛག་བཅས་ནང་ན་ཆུ་ཡོད་དེ། །པདྨའི་རྩ་འདྲ་པད་རྩ་ཡིན། །ནད་གཞི་གསུམ་དང་ཁྲག་འཁྲུགས་པས། །མིག་མཆུའི་ནད་ནི་ལྡང་བ་དང༌། །རྒྱུ་མེད་པར་ནི་གཉིད་འགྱུར་གང༌། །དེ་ནི་མིག་མཆུ་འཁྲུགས་ཞེས་བྱ། །ནད་ཀྱིས་མིག་མཆུ་དྲི་མ་ཁྲག །སྐྲངས་རྣགས་ན་བཅས་མིག་མཆུ་སྔོ། །གཡའ་ཞིང་སྐྲངས་ལ་དམར་བ་དང༌། །མིག་མཆུ་འབྱར་བ་འབྱར་ཞེས་བྱ། །མིག་མཆུའི་ནད་ནི་སྲ་ཞིང་རྩུབ། །འབྲུམ་ཕྲན་བྱེ་མ་འདྲ་ཞེས་བྱ། །གནག་ཅིང་འདམ་འདྲ་འདམ་བུའོ། །མདོག་འདྲ་ཤ་ནི་མང་པོས་རྒྱས། །ན་ཤས་ཆེ་བ་ཞེས་བྱའོ། །བྱིས་པ་སོ་སྐྱེས་ཚེ་ན་འབྱུང༌། །དེས་ནི་བྱིས་པའི་མིག་སྐྲང་ཞིང༌། །མིག་དམར་ལྟ་བར་མི་ནུས་ལ། །མིག་མཆུ་གཟེར་ཞིང་སྤྱི་བག་འཛག །རྣ་བ་སྣ་དང་མིག་ཉེད་བྱེད། །གང་ཡིན་དེ་ནི་སྒྲ་ངན་ཡིན། །རྫི་འགགས་རྫི་མ་འདུས་ཤིང་ཞུམ། །མིག་མཆུའང་དེ་འདྲར་གྱུར་པ་དང༌། །རྩུབ་ཅིང་ནང་དུ་ཁ་བལྟས་ལ། །སྤུ་གཞན་ཡང་ནི་ཚེར་མ་ལྟར། །རྩེ་མོ་རྣོན་པོ་སྐྱེས་གྱུར་ཅིང༌། །དེས་བདར་མིག་ནི་སྐྲངས་པ་དང༌། །ཚ་ཞིང་རླུང་ལ་སོགས་མི་བཟོད། །བཏོན་ན་ཅུང་ཟད་བདེ་བར་བྱེད། །མིག་ཕུགས་གྲྭ་མཚམས་ཕྱི་རོལ་དུ། །ཐོར་བུ་སྲ་ཞིང་མཐོ་བ་དང༌། །དམར་ཞིང་མཆི་མ་རྣག་ཁྲག་འཛག །ཡང་ཡང་རྒྱས་པ་སློན་པ་ཡིན། །ནད་གཞི་གསུམ་དང་ཁྲག་ལས་ནི། །མིག་མཆུའི་ནང་ན་ཤའི་དུམ་བུ། །རྨེན་བུ་སྲ་ལ་ནད་མེད་ལ། །ཕྱི་རོལ་མི་མཉམ་གཡོ་མཛེར་པ། །དེ་ལྟར་ཉི་ཤུ་རྩ་བཞི་པོ། །མིག་མཆུ་ལ་གནས་ནད་ཡིན་ནོ། །དེ་ལ་དང་པོར་སྨན་གྱིས་གསོ། །དེ་འོག་གཉིས་དང་འབྲུམ་བུ་སྤང༌། །རྫི་མ་འགགས་པ་གསོར་རུང་ཙམ། །ལྷག་མ་མཚོན་གྱིས་གསོ་བར་བྱ། །དེ་དག་ལས་ཀྱང་རྫི་
མ་འཕྱི། །གཙགས་པར་བྱ་ལ་མིག་མཛེར་གཅད། །ཆགས་དང་པད་རྩ་ཀུ་མུ་ཏ། །བརྩེགས་དང་འབྲུམ་ཕྲན་སློན་པ་འདྲལ། །མིག་མཆུའི་ཤ་སྔོ་བྱེ་མ་འདྲ། །འབྱར་དང་བསྐྱེད་བྱ་ཞེས་པ་བཞི། །འདམ་ཆས་ཤས་ཆེར་བྱས་པ་དང༌། །སྒྲ་ངན་བཅས་པ་མཚོན་གྱིས་བཞར། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་བརྒྱད་པའོ།། །།དེ་ནས་མིག་མཆུའི་ནད་གསོ་བ་བཤད་པར་བྱའོ། །འཛུམས་པ་དཀའ་ལ་མར་རྙིང་ནི། །རྒུན་འབྲུའི་ལྡེ་གུ་ཆུར་བསྐོལ་བར། །ཁ་ར་བཏབ་དང་སྣ་སྨན་དང༌། །དུད་པ་མིག་སྨན་སྣུམ་ཅན་གཏང༌། །ཀུ་མུ་ཏ་ལ་ཞལ་ཞལ་བཏབ། །དེ་སྟེང་རྒྱམ་ཚ་གདབ་པར་བྱ། །ཤིང་མངར་དང་ནི་སྐྱུ་རུ་ར། །པ་ཏོ་ལ་བསྐོལ་ཆུ་བླུགས་བྱ། །རླུང་མེད་གནས་ལ་གཡོག་མཁས་ཀྱིས། །སྦྱང་བྱས་གན་རྐྱལ་ཉལ་བ་ལ། །མིག་མཆུ་བཟློག་སྟེ་དྲོ་འཇམ་ཆུར། །བསྲོས་པའི་གོས་ཀྱིས་དུགས་བྱས་ལ། །གོས་ཀྱིས་ལེགས་པར་དཀྲིས་ནས་ནི། །གཡོན་པའི་མཐེབ་མཛུབ་ཀྱིས་བཟུང་ཞིང༌། །འགུལ་ཞིང་འགྱུར་པ་མེད་པར་ནི། །དེ་ནས་མིག་མཆུ་ཀུན་ཏུ་ནི། །དཀྱིལ་འཁོར་ལྟ་བུའི་མཚོན་གྱིས་ནི། །འཕྲེད་དུ་གདབ་ཅིང་མཚན་མ་བྱས། །དེ་ཉིད་ཀྱིས་སམ་ལོ་རྩུབ་བམ། །ཤེ་པ་ལི་ཡི་ལོ་མའམ། །ཡང་ན་རྒྱ་མཚོའི་ལྦུ་བས་བྲུད། །ཁྲག་ནི་རས་བལ་ཡེའུས་ཕྱི། །ཁྲག་བཅས་ལེགས་པར་བྲུད་ཤེས་ནས། །རང་རང་སྨན་ནི་སྦྲང་རྩི་དང༌། །བཅས་པ་དེ་ལ་བསྐུ་བར་བྱ། །དེ་འོག་ཆུ་དྲོན་གྱིས་བཀྲུས་ལ། །མར་གྱིས་བླུགས་པར་བྱ་བ་དང༌། །རྣ་བའི་སྟེང་དང་འོག་གི་བར། །ནས་ཀྱི་ཟན་དང་སྦྲང་རྩི་དང༌། །མར་དང་བཅས་པས་དཀྲི་བར་བྱ། །ཞག་ནི་གཉིས་པ་ལ་དགྲོལ་ཏེ། །ཇི་ལྟ་བར་ནི་སྨན་བླུགས་ཤིང༌། །བཞི་པར་སྣ་སྨན་ལ་སོགས་བྱ། །ཞག་ནི་ལྔ་པ་དག་ལ་དགྲོལ། །མཉམ་ཞིང་སེན་མོ་ལྟར་དམར་ལ། །སྐྲངས་གཡའ་དྲུད་སོགས་ནད་མེད་པ། །མིག་མཆུ་སྦྱར་ལེགས་ཡིན་ཞེས་བྱ། །དེ་ལས་བཟློག་པ་སླར་བཞར་བྱ། །བཞར་དྲགས་པས་ནི་ན་བ་དང༌། །རྫི་མ་འབྱི་ཞིང་མིག་
མཆུ་འགྱུར། །དེ་ལ་སྣུམ་དང་དུགས་ལ་སོགས། །རླུང་ལ་ཕན་པའི་སྦྱོར་བ་བསྔགས། །མར་སར་གྱིས་ནི་བསྐུ་བྱ་ཞིང༌། །སེང་ཕྲོམ་དཀར་པོ་མར་སར་གྱིས། །ལེགས་པར་བསྐུ་བ་བྱས་ནས་ནི། །ཨེ་རཎྜ་ཡི་རྩ་བ་ཡི། །ལྡེ་གུས་བྱུགས་ཏེ་ཕུར་མས་བཙོ། །ཚོས་པ་བཀྲུས་ཏེ་བསྐམས་ནས་ནི། །བཏགས་པ་ཐུམ་པོ་བྱས་ནས་ནི། །ར་འམ་བུད་མེད་འོ་མར་ནི། །མཉེས་པ་མིག་ཏུ་བླུགས་པར་བྱ། །དེ་ཉིད་སཱ་ལུ་ཐུག་པོ་ཆེའི། །ལྡེ་གུ་བསྐུས་ཏེ་དེ་ལྟར་བྱས། །ཞོ་དང་ཞོ་ག་ཆུས་སྤངས་པ། །མིག་ནི་བཞར་དྲགས་གྱུར་ལ་བླུགས། །ཡང་ན་ཞོ་ག་ཆུ་ཉི་ཚེ། །བླུགས་ཤིང་སྐམ་སའི་ཤ་ཁུ་སྦྱིན། །འབྲུམ་ཕྲན་སྲ་ཞིང་མཐོ་བ་ནི། །འབྲས་ཀྱི་རྩེ་མོས་བརྟོལ་བར་བྱ། །དེ་རྗེས་བཙིར་ཏེ་ཆོ་ག་ནི། །ལྷག་མ་སྔ་མ་བཞིན་དུ་བྱ། །ཞལ་ཞལ་གདབ་དང་འདྲལ་བ་ལ། །རིམ་འདིས་མིག་མཆུའི་ནད་ཀུན་སྦྱར། །ཁྲག་མཁྲིས་ལས་གྱུར་མངར་བ་ཡི། །སྡེ་ཚན་དང་བསྐོལ་མར་གྱིས་གསོ། །སྣུམ་གྱུར་ནས་ནི་གཏར་ག་གདབ། །དུར་བྱིད་བཀྲུ་སྨན་བཏང་བ་མཆོག །བཞར་ཞིང་ཁྲག་ནི་ཕྱུང་ནས་ཀྱང༌། །ཤིང་མངར་བསྐོལ་བའི་ཆུས་བཀྲུ་ཞིང༌། །ཙནྡན་དཀར་པོ་འོ་མར་བསྐོལ། །མིག་མཆུ་ལ་ནི་བླུགས་པ་ཕན། །རྫི་མ་འབྱི་ལ་ཁབ་ཀྱིས་ནི། །བ་སྤུའི་བུ་ག་གཙགས་པའམ། །སྲིན་བུ་པད་པས་ཁྲག་དབྱུང་ངོ༌། །ཡང་ན་འོ་མའམ་བུ་རམ་ཤིང༌། །ཁུ་བས་སློན་བྱ་མངར་བསིལ་སྨན། །བསྐོལ་བའི་མར་ནི་གཏང་བར་བྱ། །ནག་ཚུར་དཀར་པོའི་ཕྱེ་མ་ནི། །བྱེའུ་རུག་པའི་ཁུ་བར་བསྲེས། །ཟངས་ཀྱི་སྣོད་དུ་བཅུག་པ་སྟེ། །རྫི་མ་འབྱི་བའི་མིག་སྨན་མཆོག །མིག་མཆུའི་ཤ་བྲུད་བཅའ་སྒ་དང༌། །རྒྱམ་ཚའི་ཕྱེ་མ་གདབ་པར་བྱ། །ཆུ་དྲོན་གྱིས་བཀྲུས་སེང་ལྡེང་དང༌། །ན་ལེ་ཤམ་དཀར་ཏུ་པ་རི། །ཆུ་བསྐོལ་བའམ་སེར་པོ་གཉིས། །ཤིང་མངར་དང་ནི་འབྲས་བུ་གསུམ། །ཁུ་བ་སྦྲང་རྩིར་བཅས་པ་བླུགས། །བད་ཀན་ལས་གྱུར་ཞལ་ཞལ་བྱས། །ནག་ཚུར་རྒྱམ་ཚ་པི་པི་ལིང༌། །ལྡོང་རོས་སྟང་ཟིལ་ཞིབ་བཏགས་ལ། །སྦྲང་རྩིར་བཅས་པ་བསྐུ་བར་བྱ། །སྐྱུག་སྨན་མིག་སྨན་སྣ་སྨན་ནི། །བད་
ཀན་སེལ་བ་ཐམས་ཅད་ཕན། །ཆགས་པ་ལ་ཡང་འདི་དག་བྱ། །མ་ཞི་མེ་བཙའ་གདབ་པར་བྱ། །སྒྲ་ངན་ལ་ནི་སེང་ལྡེང་དང༌། །ནིམ་པའི་ལོ་མ་འབྲས་བུ་གསུམ། །མར་དང་སྦྱར་བའམ་པི་པི་ལིང༌། །ཤིང་མངར་རྒྱམ་ཚ་བསྐོལ་བ་ནི། །མ་མས་བླུད་དེ་སློན་དུ་གཞུག །རྒུན་འབྲུམ་དང་ནི་ཨ་རུ་ར། །པི་པི་ལིང་བསྐོལ་བ་ཀྲུ་སྨན་སྦྱིན། །སེར་པོ་རྣམ་གཉིས་པི་པི་ལིང༌། །གླ་སྒང་ལྡེ་གུས་ནུ་མ་བསྐུ། །ཉུངས་ཀར་མར་བཅས་དུད་པས་བདུག །སྦྱང་བ་བྱས་ནས་པ་ཏོ་ལ། །གླ་སྒང་དང་ནི་རྒུན་འབྲུམ་དང༌། །སླེ་ཏྲེས་འབྲས་བུ་གསུམ་བསྐོལ་བླུད། །བྱིས་པའི་མིག་མཆུ་བྲུད་པའམ། །སྲིན་བུ་པད་པས་ཁྲག་དབྱུང་བྱ། །ཨ་སྨན་ཏ་ཀ་སྐྱུ་རུ་ར། །འཛམ་བུའི་ལོ་མ་བསྐོལ་བ་བླུགས། །བྱིས་པ་འོ་མ་མར་བསྟེན་པས། །ཕལ་ཆེར་བད་ཀན་ནད་འབྱུང་བས། །དེ་བས་དང་པོར་སྐྱུག་སྨན་ཉིད། །ནད་ཀུན་ལ་ནི་བསྔགས་པ་ཡིན། །ལྕེ་མྱང་ཚ་དང་པི་པི་ལིང༌། །ཨ་པ་མརྒའི་འབྲས་བུ་མར། །འོ་མ་ཤུ་དག་སྦྲང་རྩིར་བཅས། །པོ་སོན་ཆ་ནི་ཤིང་མངར་བཅས། །འོ་མ་ཁ་ཟས་འོ་མ་དང༌། །ཟས་ལ་བརྟེན་པའི་བྱིས་པ་ལ། །རིམ་བཞིན་བླུད་བས་ནད་ཀུན་ནི། །སྦྱང་པར་བྱ་ཕྱིར་སློན་སྨན་གཏང༌། །མཆོག་ཏུ་སྒྲ་ངན་ནད་ལ་ཕན། །སཔྟ་ལ་ཡི་ཁུ་བ་མར། །བསྐོལ་བ་གཉིས་ཀ་སྦྱོང་བྱེད་སྦྱིན། །སེང་ཕྲོམ་ཤིང་མངར་སེར་པོ་གཉིས། །ནིམ་པའི་ལོ་མ་པུ་ཙེ་ཤེལ། །ཟངས་ཀྱི་ཕྱེ་མར་བཅས་རེང་བུ། །སྒྲ་ངན་གྱི་ནི་ནད་ལ་ཕན། །ཡང་ན་ལྕགས་ཀྱི་ཕྱེ་མ་བསྲེགས། །འོ་མ་སྦྲང་རྩི་མར་བཅས་ཕན། །སུག་སྨེ་ལ་སྒོག་སྐྱ་ཀ་ཏ་ཀ །ཕ་ནི་ཛ་ཀ་ན་ལེ་ཤམ། །དུང་བཅས་ཆུ་དང་བདར་བ་དང༌། །ཀད་ཕ་ལ་བཅས་རི་ལུའང་ཕན། །རྫི་མའི་འགགས་ནད་འཕེལ་བ་ལ། །སྦྱང་བ་བྱས་པར་གྱུར་པ་ནི། །སྨིན་མའི་འོག་གི་ཆ་གཉིས་དང༌། །རྫི་མའི་ཆ་གཅིག་བར་བར་ནི། །ནས་ཀྱི་ཚད་ཙམ་ནས་ཀྱི་དབྱིབས། །འཕྲེད་དུ་ད་བྲལ་ལ་རས་རློན་པས། །དེ་ཡི་ཁྲག་ནི་བསལ་ནས་ནི། །ཁྲག་ནི་ཆུང་བར་གྱུར་པ་དང༌། །བར་མཚམས་མུངྒ་ཙམ་བཞག་ལ། །ཁ་བ་ནི་ཡོན་པོས་བཙེམ་པར་བྱ། །དཔྲལ་བ་རས་ཀྱིས་བཅིངས་ནས་
ནི། །དེ་བཞིན་སྐུད་པས་བཙེམ་པར་བྱ། །ཤིན་ཏུ་དམ་དང་ལྷོད་མིན་པར། །དེར་ནི་ལེགས་པར་བཙེམ་པར་བྱ། །དེ་ནས་སྦྲང་རྩིའི་མར་གྱིས་བྱུག །འདི་ལ་བཅིང་བར་མི་བྱའོ། །ན་ན་ནྱ་གྲོ་དྷ་སོགས་པའི། །ཁུ་བའོ་མར་བཅས་པ་བླུགས། །ཞག་ལྔ་པ་ལ་སྐུད་པ་ནི། །བསལ་ཏེ་ཡུག་སྣམ་ཕྱེ་མ་ནི། །རྨ་ལ་ལེགས་པར་གདབ་པར་བྱ། །སྣ་སྨན་མིག་སྨན་རྣོན་པོ་གཏང༌། །ཞག་བཅུའི་མཐར་ཡང་མ་སོས་ན། །མིག་མཆུར་བརྟེན་གཉེར་བཟློག་སྟེ་བསྲེག །རྫི་མའི་ལྷག་མ་ཚེར་ཟུངས་ཀྱིས། །ཕྱུང་ལ་དེ་ཡི་གནས་དག་ནི། །མེ་ཡི་མདོག་འདྲའི་ཁབ་རྩེས་བསྲེག །ཕྱི་རོལ་རློན་པ་བསྲེགས་པ་དང༌། །ཐོར་བུ་བཅད་པར་གྱུར་པ་ལ། །མེ་འམ་ཐལ་སྨན་རྣོན་པོས་བསྲེག །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་དགུ་པའོ།། །།དེ་ནས་མིག་ཟུར་དང་མིག་གི་འབྲས་བུ་དཀར་ནག་གི་ནད་ཀྱི་དམིགས་བརྟག་པ་བཤད་པར་བྱའོ། །རླུང་འཁྲུགས་པས་ནི་ཆུ་རྒྱུ་བའི། །རྩར་སོང་ནས་ནི་ཆུ་འདྲ་བའི། །མཆི་མ་མིག་མཆུ་མིག་ཕུགས་ཀྱི། །མཚམས་ནས་མཆི་མ་འཛག་པར་འགྱུར། །དེས་ནི་ནད་མེད་རྩ་དམར་ལ། །སྐྲངས་འགྱུར་དེ་ནི་ཆུ་འཛག་ཡིན། །བད་ཀན་ལས་གྱུར་སྤྱི་བག་མང༌། །དཀར་བ་བད་ཀན་འཛག་པ་ཡིན། །བད་ཀན་གྱིས་སྐྲངས་རྩེ་མོ་རྣོ། །ལན་ཚྭའི་ཆུ་བུར་འདྲ་བ་འབྱུང༌། །རྩ་བ་ཆེ་ཞིང་གཡོ་ལ་སྣུམ། །མདོག་འདྲ་འཇམ་ཞིང་སྤྱི་བག་ཅན། །ཆེ་ཞིང་སྨིན་དཀའ་གཡའ་དང་བཅས། །གཟེར་མེད་བཅིངས་པ་ལྟ་བུ་ཡིན། །ཁྲག་ལས་མཆི་མ་ཁྲག་འཛག་དམར། །ཤས་ཆེར་དྲོ་བ་ཁྲག་འཛག་ཡིན། །མིག་མཆུ་གྲ་མཚམས་དཀར་པོ་རུ། །འབྲུམ་ཕྲན་ཚ་ཞིང་གཟེར་དང་བཅས། །དམར་ཞིང་མུངྒ་འདྲ་ལགས། །ཁྲག་འཛག་དེ་ནི་ཚིགས་ཅན་ཡིན། །རྣག་འཛག་དྲི་མ་ཁྲག་དང་བཅས། །མིག་ཕུགས་ཀྱི་ནི་གྲ་མཚམས་ནས། །ཡང་དང་ཡང་དུ་རྣག་འཛག་ཅིང༌། །ཤ་ལྤགས་འདྲུལ་བས་མཆི་མར་བཅས། །རྣག་སླ་འཛག་པ་རྨ་ཕྲ་ཞིང༌། །སྐྲངས་ཤིང་གཡོ་བ་ཆེ་བ་དང༌། །མིག་ཕུགས་མཚམས་སྐྲངས་རྣག་འཛག་ཅིང༌། །ནད་བཅས་རྣག་གི་ཆུ་སེར་འཛག །མིག་ཕུགས་ཀྱི་
ནི་མཚམས་ནང་ན། །སྐྲངས་ཟུག་ཚ་བཅས་ཆུ་སེར་ནད། །མིག་ཟུར་རམ་ནི་མིག་ཕུགས་སུ། །གཡའ་ཞིང་རྫི་མའི་བུ་ག་ནས། །རྣག་འཛག་སྲིན་དང་རྨེན་བུ་འབྱུང༌། །ན་བཅས་སྲིན་གྱི་རྨེན་བུ་ཅན། །བཅིངས་པ་ལྟ་བུའི་སྲིན་རྨེན་བུ། །རྣག་གི་ཆུ་སེར་ཚིགས་ཅན་དག །མཚོན་གྱིས་གསོ་བྱ་ལྷག་མ་ལྔ། །འཛག་པ་ཆུ་སེར་བཅས་པ་སྤངས། །མཁྲིས་པས་དཀར་པོའི་ཐིག་ལེ་ནི། །ནག་པའམ་སྔོ་པའམ་སེར་པོ་སྐྱེད། །གུར་གུམ་མེ་ལོང་དྲི་མས་གོས། །ལྟར་སྣང་ན་དང་ཚ་བ་མེད། །འཁྲུ་ཞིང་སྐོམ་དད་རིམས་དང་བཅས། །ནད་གཞི་ཉ་ཕྱིས་ཅན་ཞེས་བྱ། །བད་ཀན་ལས་དཀར་ཤ་ལྷག་དཀར། །རིང་ནས་འཕེལ་བ་མིག་མཛེར་དཀར། །ནད་མེད་པ་ལ་སྐྲངས་པ་དང༌། །མདོག་དཀར་ལྷུན་ཆེན་འཇམ་པ་དང༌། །ལྕི་སྣུམ་ཆུ་ཡི་ཐིགས་པ་འདྲ། །བད་ཀན་མདུད་པ་ཞེས་བྱར་བཤད། །ཐིག་ལེ་འབྲས་ཕྱེ་ལྟར་དཀར་བ། །མཐོ་བ་འབྲས་ཕྱེ་འདྲ་ཞེས་བཤད། །དཀར་པོའི་རི་མོ་དམར་པོས་ཁྱབ། །ཚ་ཞིང་ན་དང་བཅས་པ་དང༌། །སྐྲངས་ཤིང་མཆི་མས་གོས་པ་མེད། །ཁྲག་གྱུར་རྩ་ཡི་ངེས་པར་བཤད། །རྩའི་ཉེས་ཡལ་བར་བོར་ན་ནི། །དམར་རིས་དེ་ཉིད་འཕེལ་བར་འགྱུར། །ཁྲག་བཅས་རྩ་ནི་བརྩེ་བར་བྱེད། །དེ་ཡིས་མིག་གིས་བལྟ་མི་ནུས། །རྩ་ཡི་དྲ་བས་གཡོགས་ཤིང་སྟུག །མཐོ་བ་རྩ་ཡི་དྲ་བ་ཡིན། །ཁྲག་གིས་མིག་མཛེར་འཇམ་ཞིང་མཉམ། །པདྨ་འདྲ་བ་ཤ་ལྷག་ཡིན། །ནད་མེད་རི་བོང་ཁྲག་ལྟར་དམར། །ཐིག་ལེ་ལིང་ཐོག་དམར་པོ་ཡིན། །འཇམ་ཤིང་ནད་མེད་མྱུར་དུ་འཕེལ། །དཀར་པོར་ཁྱབ་བྱེད་དམར་ནག་ནི། །ཁྱབ་པའི་མཛེར་པ་ཞེས་བྱའོ། །དྲི་མ་ཁྲག་བཅས་རྩའི་མཛེར་པ། །རྩ་རྒྱུས་དང་འདྲ་རྩ་མཛེར་ཡིན། །ཁྲག་སྐམ་གོང་བུ་ལྟར་གནག་ཅིང༌། །ཤ་ནི་ཆེ་ཞིང་རྒྱས་པ་གང༌། །དེ་ནི་ཤ་ལྷག་མཛེར་པ་ཡིན། །ཚ་ཞིང་རེག་ན་རྩུབ་པ་དང༌། །རྩས་གཡོགས་མིག་འབྲས་ནག་དང་ཉེ། །འབྲུམ་ཕྲན་ཉུངས་ཀར་ལྟ་བུས་རྩ། །ཉ་ཕྱིས་རྩ་བརྩེ་རྩའི་ཉེས་པ། །འབྲས་ཕྱེ་འདུས་པའི་ལིང་ཏོག་དམར། །དྲུག་པོ་སྨན་གྱིས་གསོ་བར་བྱ། །ལྷག་མ་བདུན་པོ་མཚོན་
གྱིས་གསོ། །དེ་ཡང་སར་པ་སྨན་གྱིས་གསོ། །མཛེར་པ་བཤད་པ་ལྔ་པོ་གང༌། །རྒྱུས་པ་དང་ནི་རྩས་གཡོགས་པ། །ནག་པོར་ཕྱིན་ཞིང་པགས་གས་འདྲ། །མཐོན་པོ་གཅད་པར་བྱ་བ་ཡིན། །མཐོང་བྱེད་སྟེང་དུ་ཕྱིན་པ་སྤང༌། །ནག་པོའམ་མཐོང་བྱེད་ལ་མཁྲིས་པས། །པགས་པ་བརྟོལ་ཏེ་ལིང་ཏོག་ནི། །ཟུག་དམར་མཆི་མར་བཅས་པ་སྐྱེད། །དེ་ཡིས་མིག་འབྲས་དཀྱིལ་འཁོར་རྣག །འཛམ་བུ་སྨིན་པ་འདྲར་སྣང་ཞིང༌། །དམའ་བ་རྨ་ཡི་ལིང་ཏོག་སྟེ། །དེ་ནི་གསོ་དཀའ་རིམ་གཉིས་དག །བརྟོལ་བ་གསོ་བ་ཙམ་ཡིན་ནོ། །དེར་ནི་ཟུག་པ་ལ་སོགས་མང༌། །ནག་པོ་ཁབ་ཀྱིས་ཕུག་སྙམ་བྱེད། །རིམ་པ་གསུམ་ནི་བརྟོལ་བ་དང༌། །རྨ་ཡིས་ཁྱབ་པ་གསོར་མི་རུང༌། །བད་ཀན་ལས་གྱུར་དུང་ལྟར་དཀར། །ཤས་ཆེར་མི་ན་གསོ་སླ་དཀར། །དམར་ཞིང་མཆི་མ་སྤྱི་བག་འཛག །འབྲུམ་ཕྲན་དམར་ཞིང་ཤིན་ཏུ་ན། །ར་ཡི་རིལ་མ་འདྲ་ཞིང་འབུར། །ཁྲག་སྐྱེས་ར་རིལ་འདྲ་བ་སྤང༌། །ནག་ཁྲག་བཅས་པས་རྩའི་ལིང་ཏོག །དེ་ཡིས་མིག་འབྲས་ནག་པོ་ཁེབས། །ན་ཞིང་ཚ་ལ་དམར་བ་ཡི། །རྩ་ཡིས་ཀུན་ཏུ་རྒྱས་གྱུར་ལ། །རྒྱུ་མེད་མཆི་མ་གྲང་དྲོ་དང༌། །སྐ་སླ་འཛག་པ་དེ་སྤང་བྱ། །ནད་གཞི་ཁྲག་ལས་མཐོང་བཅས་རྣག །འབྲས་བུ་དཀར་པོར་སྒྱུར་བྱེད་དེ། །སྤྲིན་དཀར་གྱིས་ནི་གཡོགས་འདྲ་ཞིང༌། །ནིམ་པ་བ་ནི་བཀས་པ་འདྲ། །ཤིན་ཏུ་མི་བཟད་ན་ཞིང་དམར། །ཚ་ཞིང་སྐྲངས་པས་གཟིར་བ་དག །སྨིན་པས་ཉེན་པའི་ལིང་ཏོག་སྟེ། །མི་བཟད་ན་བ་སྤང་བར་བྱ། །གང་གིས་མཚན་མ་ཉམས་པའམ། །ནང་སྔོ་བའམ་དམར་བཅས་པས། །ཤིན་ཏུ་འབུར་བའམ་གཏིང་རིང་པ་འམ། །མཆི་མར་བཅས་ཤིང་རྩའི་རྨས་ཁྱབ། །རྙིང་པའམ་མཐོ་དམའ་ཅན་དག་གམ། །དབུས་ཆང་ལིང་ཏོག་སྤང་བར་བྱ། །ནག་པོའི་ནད་ནི་གསོར་རུང་དང༌། །མི་རུང་དབྱེ་བ་རྣམ་ལྔ་ཡིན། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་བཅུ་པའོ།། །།དེ་ནས་མིག་ཟུར་དང་མིག་གི་འབྲས་བུ་དཀར་པོ་དང་ནག་པོའི་ནད་གསོ་བ་བཤད་པར་བྱའོ། །མིག་ནད་བཅིངས་པ་སྨན་པ་ཡིས། །དུགས་བྱས་
རྩེ་མོ་འབྲས་འདྲས་དབུག །རྩེ་མོ་དཀྱིལ་འཁོར་འདྲ་བས་བཞར། །དེ་འོག་རྒྱམ་ཚ་པི་པི་ལིང༌། །སྦྲང་རྩི་སྦྱར་བས་བསྐུ་བར་བྱ། །དེ་ནས་སྔ་མ་བཞིན་དུ་བཅིངས། །པ་ཏོ་ལའི་ལོ་སྐྱུ་རུ་ར། །བསྐོལ་བའི་སྨན་ཁུ་ཐིགས་པས་བླུགས། །ཚིགས་ཅན་ལྕགས་ཀྱུའི་ཆ་སྤྱད་ཀྱིས། །ཕྱི་ཡི་མཚམས་ཀྱི་ཚ་གསུམ་གཟུང༌། །འཕེལ་གཙགས་ཀྱིས་ནི་ཕྱེད་གཅད་བྱ། །གཞན་དུ་མཆི་མ་རྒྱུ་ལ་གནོད། །སྦྲང་རྩི་རྒྱམ་ཚས་བསྐུས་ནས་ནི། །མིག་མཛེར་ལྟ་བུར་གསོ་བར་བྱ། །ཆུ་སེར་རྣག་འཛག་གཏར་ག་གདབ། །དེ་ནས་དེ་ནི་བཅིང་བར་བྱ། །མིག་རྣགས་ཆོ་གར་བཤད་པ་ཡི། །ལས་ཀུན་ཆོ་ག་ཇི་བཞིན་བྱ། །རྒྱམ་ཚ་སྒེའུ་གཤེར་ནག་ཚུར་དང༌། །ལྕགས་དང་ཟངས་ནི་ཞིབ་བཏགས་པའི། །ཕྱེ་མའི་མིག་སྨན་བཏང་བའམ། །སྦྲང་རྩིར་བཅས་པའི་ཁུ་བ་བླུགས། །སྲིན་གྱི་རྨེན་བུ་ལྕི་བ་ཡིས། །དུགས་བྱས་བརྟོལ་ཏེ་ཕྱི་པར་བྱ། །ནག་ཚུར་རྒྱམ་ཚ་འབྲས་བུ་གསུམ། །སྦྲང་རྩིར་སྦྱར་བས་བསྐུ་བར་བྱ། །ཉ་ཕྱིས་མཁྲིས་མཆི་འཛག་ལྟར་གསོ། །བད་ཀན་འདུད་པ་འབྲས་ཕྱེ་གཉིས། །གཏར་ག་མ་གཏོགས་བད་ཀན་གྱི། །མཆི་མ་འཛག་པ་བཞིན་དུ་གསོ། །ཚ་བ་གསུམ་དང་ཀད་ཕ་ལ། །བ་ལུང་ཁུ་བའི་མིག་སྨན་གཏང༌། །རྒྱམ་ཚ་ཛཱ་ཏི་ཁ་འབུས་པ། །ཐང་ཤིང་བཅའ་སྒ་བཏགས་པའི་ཕྱེ། །ཆང་གི་དངས་མས་རི་ལུར་བྱས། །མིག་སྨན་སྐྲངས་དང་གཡའ་བ་སེལ། །རྩ་ཉེས་རྩ་བརྩེ་ལིང་ཏོག་དམར། །རྩ་དྲ་ཁྲག་འཛག་ལྟ་བུར་གསོ། །རྩ་ཡི་ཉེས་ལ་ཁྱད་པར་དུ། །མར་དང་སྦྲང་རྩིའི་མིག་སྨན་བསྐུ། །རྩ་བརྩེ་བ་ལ་སྦྲང་རྩི་དང༌། །སྐྱེར་པའི་ཁཎྜ་ཞིབ་བཏགས་བསྐུ། །ལིང་ཏོག་དམར་པོ་ཞོ་ག་ཆུ། །སྦྲང་རྩི་ཁ་རའི་ཐིགས་པ་བླུགས། །ཤེལ་དང་གུར་གུམ་ཤིང་མངར་དུང༌། །སྦྲང་རྩི་སྦྱར་བའི་མིག་སྨན་གཏང༌། །ཡང་ན་སྦྲང་རྩི་དུང་སྦྱར་བའམ། །ཁ་ར་རྒྱ་མཚོའི་ལྦུ་བ་ཕན། །མཛེར་པར་བཤད་པ་རྣམ་ལྔ་ལས། །དུད་པ་ལྟ་བུའི་རྙོག་ཅན་དང༌། །གང་ཡང་དམར་ཞིང་ཞོ་འདྲ་བ། །དེ་སྨན་ལིང་ཏོག་བཞིན་དུ་བྱ། །ཅིག་ཤོས་གན་རྐྱལ་བཞག་དུགས་བྱས། །ཁ་ལུང་དང་ནི་རྒྱམ་ཚ་དག །སྦྱར་
བའི་མིག་སྨན་བསྐུས་ནས་ནི། །མིག་བཙུམས་ནས་ནི་མཉེ་བར་བྱ། །དེ་ལྟར་མིག་ནི་འཁྲུགས་བཅས་པ། །ཤ་ལྷག་སྐྱེས་པ་བསྐྱོད་ནས་ནི། །མགོ་བོ་མི་འགྱུར་དམ་དུ་གཟུང༌། །མིག་མཆུ་མཆོག་ཏུ་མི་འགུལ་བྱ། །མིག་ཟུར་དུ་ནི་བལྟ་བཞིན་དུ། །མིག་ཕུག་མཚམས་ནས་མཛེར་པ་མཐོ། །གང་དུ་གཉེར་མ་འདུས་གྱུར་པ། །དེར་ནི་ལྕགས་ཀྱུས་དམ་བཟུང་བའམ། །ཧ་ཅང་མི་ཆེ་མུ་ཙི་ཏྲའམ། །ཁབ་བམ་སྐུད་པས་བླངས་ནས་ནི། །ཀུན་ནས་དཀྱིལ་འཁོར་འདྲ་བས་འདྲལ། །དེ་ནས་བཏོན་ཏེ་དྲལ་ནས་ཀྱང༌། །མིག་ཕུག་མཚམས་སུ་བསྙེན་ནས་ནི། །ཆ་བཞི་ལུས་པར་གཅད་བྱ་སྟེ། །མིག་ཕུག་རྩ་དང་མཆི་མ་ནི། །འཛག་པའི་རྩ་ལ་མི་གནོད་བསྲུང༌། །མིག་ཕུག་ཟུར་བཅད་མཆི་མ་འཛག །མིག་གི་རྩ་སྦུབས་རྨ་ཅན་འགྱུར། །མིག་འགྲམ་མཛེར་པ་ཆེར་སྐྱེས་ལ། །མིག་ཕུག་ཟུར་དུ་བལྟས་ཏི་བྱ། །ལེགས་པར་བཅད་དེ་ཚ་བ་གསུམ། །རྒྱམ་ཚ་སྦྲང་རྩིར་བཅས་པ་བསྐུ། །ཞུན་མར་དྲོན་མོ་བླུགས་པ་དང༌། །སྦྲང་རྩི་མར་སྦྱར་བསྐུས་ཏེ་བཅིངས། །དེ་ནས་ཞག་གསུམ་ལ་སོགས་ནས། །བཀྲོལ་ནས་ཀ་རཉྫའི་ས་བོན། །འོ་མ་བསྐོལ་བ་དེ་བཞིན་བླུགས། །སེར་པོ་རྣམ་གཉིས་པ་ཏོ་ལ། །ཤིང་མངར་དང་ནི་རྒྱ་སྐྱེགས་ཤིང༌། །ཀ་རཉྫ་ཡི་མེ་ཏོག་ནི། །ཁ་འབུས་སྦྲང་རྩིར་བཅས་བསྐོལ་བླུགས། །ཞག་བདུན་ནས་ནི་དེ་དགྲོལ་བྱ། །ལེགས་པར་བཅད་ན་ནད་མེད་འགྱུར། །བཅད་དྲགས་མཆོད་ལས་ནད་འགྱུར། །སྨན་ཁུ་བླུགས་དང་མིག་སྨན་སོགས། །ཕྱི་བ་དང་ནི་བརྟ་བས་གསོ། །ཁ་ར་ལྡོང་རོས་ཨེ་ལི་ཡ། །རྒྱམ་ཚ་བཅའ་སྒ་ཞོ་རེ་དང༌། །སྐྱེར་པའི་ཁཎྜ་སྲང་ཕྱེད་དང༌། །སྦྲང་རྩི་སྦྱར་བའི་མིག་སྨན་གྱིས། །བད་ཀན་ལས་གྱུར་རབ་རིབ་དང༌། །ཆུ་སེར་གྱིས་གང་ལིང་ཏོག་དང༌། །མིག་མཛེར་བཅས་པའི་ཤ་ལྷག་སེལ། །འབྲས་བུ་གསུམ་ནི་གང་རུང་བའི། །ཤུན་པ་ཆུར་བཏགས་ལྡེ་གུར་བྱས། །ཁམ་ཕོར་སྦྱར་བའི་ནང་དུ་བསྲེགས། །དེ་ནས་ཚིག་ནས་ཕྱེ་མར་བཏགས། །སྨན་ནི་ལྷག་མའི་ཁུ་བ་ཡིས། །སོ་སོར་ལེགས་པར་བསྒོས་ནས་ནི། །སྣག་ཚ་དེ་བསྐམས་སླར་ཡང་བཏགས། །རྒྱམ་ཚ་ཉིས་འགྱུར་བཅས་
པ་ཡི། །མིག་སྨན་གསུམ་པོ་དེ་དག་ནི། །ཕྱི་བའི་མཆོག་ཏུ་མུ་ཁྱུད་འཆད། །རྩ་ཡི་དྲས་གཡོགས་རྩ་གང་ཞིག །སྲ་བས་ཕྱི་བའི་སྨན་དག་གིས། །མ་ཞི་འབྲུམ་ཕྲན་དེ་ལ་ནི། །མིག་མཛེར་ཆོ་ག་བཞིན་དུ་གསོ། །ལིང་ཏོག་ནད་གཞིའི་དབང་ལས་ནི། །སྣུམ་རྩུབ་འབྲས་བུ་གསུམ་སྦྱིན་ཞིང༌། །ཏིག་ཏ་ཆེན་པོའི་སྨན་མར་སྦྱིན། །གཏར་ག་བཀྲུ་སྨན་ཁུ་བ་ཡི། །ཐིགས་པ་བླུགས་པ་ལ་སོགས་བྱ། །སྣད་པའི་ལིང་ཏོག་དུར་བྱིད་ཆུ། །ལན་གསུམ་བསྐོལ་བའི་མར་བླུད་བྱ། །དེ་འོག་གཏར་གའམ་པད་པ་ཡིས། །མིག་ལས་ཁྲག་ནི་དབྱུད་བར་བྱ། །ཨུཏྤལ་རྒུན་འབྲུམ་ར་མཉེ་བ། །ཤིང་མངར་བི་ད་རི་བསྐོལ་བ། །ཁ་ར་ར་ཡི་འོ་མ་འམ། །ཆུ་བསྐོལ་ཐིགས་པ་བླུགས་པར་བྱ། །མིག་དམར་མཆི་མ་ནད་ཞི་ནས། །དེ་རྗེས་ཕྱི་བའི་མིག་སྨན་ཕན། །ཛཱ་ཏི་ཁ་འབུས་རྒྱ་སྐྱེགས་དང༌། །ཡུག་སྣམ་ཙནྡན་རི་ལུར་བྱས། །ཁྲག་དང་མཁྲིས་པ་དངས་བྱེད་ཅིང༌། །སྣད་པ་ལས་གྱུར་ལིང་ཏོག་སེལ། །ཕག་དང་རྔ་མོ་གླང་པོ་ཆེ། །བ་ལང་ར་རྟ་བོང་བུའི་སོ། །རྒྱ་མཚོའི་ལྦུ་བ་མུ་ཏིག་དང༌། །ན་ལེ་ཤམ་ནི་བཞི་པར་སྦྱར། །སོ་ཡི་རི་ལུས་སྣད་པ་ཡི། །ལིང་ཏོག་གིས་ཁྱབ་སེལ་བར་བྱེད། །ཏ་མའི་ལོ་མ་བ་ལང་སོ། །རྒྱ་མཚོའི་ལྦུ་བ་བོང་བུའི་རུས། །ཟངས་མ་དུང་གཅིན་རི་ལུར་བྱས། །ལིང་ཏོག་ཐམས་ཅད་སེལ་བར་བྱེད། །རིན་ཆེན་སོ་དང་རྭ་དང་ནི། །ཁམས་དང་སུག་སྨེལ་ཚ་བ་གསུམ། །སྒོག་སྐྱ་ཀ་རཉྫའི་ས་བོན། །རྨ་ལ་ཕན་པའི་སྨན་རྣམས་ནི། །རྨ་བཅས་རྨ་མེད་གཏིང་ཟུག་དང། །པགས་གནས་ལིང་ཏོག་འཇོམས་སྨན་ཡིན། །སྣ་སྨན་སྣུམ་བླུད་ཤ་ཁུ་ནི། །བླུད་པས་དམའ་བ་བསྟོད་པར་བྱ། །ནད་མེད་ལིང་ཏོག་དམའ་བ་ནི། །ཕུར་མ་བཙོས་དང་བརྟ་བས་བསྟོད། །ལིང་ཏོག་དཀར་པོ་སྐྱེས་པ་དང༌། །ཤིང་མངར་ཐལ་ཏྲེས་སེང་ཕྲོམ་ཆུ། །བླུགས་པས་སེང་ཕྲོམ་གཏུམས་པ་ནི། །ཆུ་དྲོན་ལ་སྤངས་ཐིགས་པ་བླུགས། །ཤིང་མངར་བྲི་ཧ་ཏིའི་རྩ་བ། །རྒྱམ་ཚ་དོང་གྲ་ཟངས་མ་ནི། །སྐྱུ་རུ་རའི་འབྲས་ཆུ་དང་བཏགས། །ལྡེ་གུ་ཟངས་མའི་སྣོད་ལ་བསྐུ། །ནས་མར་སྐྱུ་རུ་རའི་ལོ་མ། །དུད་པས་དེ་འོག་མང་དུ་བདུགས། །དེ་ནས་རི་
ལུར་བྱ་བ་ནི། །དེ་ནི་ཆུ་དང་སྦྲང་རྩིར་བཏགས། །མཐོན་ཀ་ཆེན་པོ་ཞེས་བྱ་སྟེ། །ལིང་ཏོག་དཀར་པོ་སེལ་མཆོག་ཡིན། །ལིང་ཏོག་བརྟན་ཞིང་མཐུག་པ་ལ། །ཁྲག་ནི་ལན་མང་དབྱུང་བར་བྱ། །མགོ་དང་ལུས་ཀྱི་བཀྲུ་སྨན་གཏང༌། །ཕུར་མ་བཙོས་པའང་ལན་མང་གཏང༌། །པི་པི་ལིང་དང་ན་ལེ་ཤམ། །རྒྱམ་ཚ་ཤྲི་ཤའི་འབྲས་བུའམ། །འབྲས་བུ་གསུམ་བསྐོལ་རྒྱམ་ཚར་བཅས། །བླུད་པས་གནས་ལས་བསྟོད་པར་བྱ། །དུང་དང་རྒྱ་ཤུག་ཀ་ཏ་ཀ །རྒུན་འབྲུམ་ཤིང་མངར་སྦྲང་རྩི་དང༌། །མུར་སོ་ཡི་དྲི་མ་ཡི། །ཤྲི་ཤ་ཡི་ནི་མེ་ཏོག་བཅས། །ཚིགས་བཅད་ཕྱེད་ཀྱིས་བཤད་པ་འདི། །མིག་སྨན་སྦྱོར་བ་གཏང་བར་བྱ། །སྐྱུ་རུ་པ་ནི་ཛའི་ཁུ་བར། །ལང་ཀ་ལི་ཡི་ཐལ་བ་ནི། །ནུབ་གཅིག་སྤངས་ཏེ་བསྐམས་པའི་ཕྱེ། །ལིང་ཏོག་བསྐྱོད་པའི་མིག་སྨན་ཡིན། །མུངྒ་སྤུན་པ་མེད་བཏགས་པ། །དུང་དང་སྦྲང་རྩིར་བཅས་པའང་ཕན། །སྦྲང་རྩི་མ་དུ་ཀའི་སྙིང་པོ་འམ། །བ་རུ་ར་རྐང་སྦྲང་རྩིར་བཅས། །བ་ལང་རྟ་བོང་རྔ་མོའི་སོ། །དུང་དང་རྒྱ་མཚོའི་ལྦུ་བ་དང༌། །ཨརྫུ་ནེའི་ཆུས་རི་ལུར་བྱས། །བསྐྱོད་པའི་ལིང་ཏོག་འཇིག་པར་བྱེད། །བསྟོད་པའམ་ཟུག་རྔུར་བཅས་པ་ཡི། །ལིང་ཏོག་སྤུ་ལ་སོགས་པས་པྱི། །རྩ་ཡི་ལིང་ཏོག་མཐོང་གནོད་མེད། །སྣད་པའི་ལིང་ཏོག་ལྟ་བུར་གསོ། །ཤིང་མངར་སྟག་ཚེར་ར་མཉེ་བ། །བྲི་ཧ་ཏི་དང་ཨ་ཀ་རུ། །སྐྱེར་པའི་མིག་སྨན་རའི་འོ་མ། །བཏགས་པའི་ལྡེ་གུ་ནས་དང་མར། །བཅས་པའི་དུད་པས་བདུག་པར་བྱ། །སྐྱུ་རུ་ར་ཡི་ལོ་མ་དང༌། །རི་ལུར་བྱས་པ་མིག་སྨན་མཆོག །མ་སོས་ར་ཡི་རིལ་མ་འདྲ། །མཛེར་པ་ལྟ་བུར་མཚོན་གྱིས་གསོ། །རའི་རིལ་གསོར་ནི་མི་རུང་དང༌། །ལིང་ཏོག་དེ་འདྲ་དེ་བཞིན་གཞན། །ནད་མ་ཞི་ན་སྣུམ་བླུད་ཅིང༌། །གཏར་ག་གདབ་པ་ལ་སོགས་བྱ། །སྨད་བྱས་དེ་ནི་བསལ་བྱས་ཤིང༌། །དཀར་ཞིང་མཐོ་བ་གསོ་བར་བྱ། །རྒྱ་སྟར་གོ་བྱེ་ལུང་ཐང་དང༌། །ཏ་ལ་སྨྱིག་མ་ཀ་རི་ར། །བསྲེས་པའི་ཐལ་ཆུ་བཙགས་པ་དང༌། །རྔ་མོའི་རུས་པའི་ཕྱེ་མ་བསྲེ། །མིག་སྨན་ལིང་ཏོག་གསོ་དཀའ་དང༌། །མདོག་མི་སྡུག་པ་འཇོམས་པར་བྱེད། །གསོ་སླ་ལ་ཡང་འདི་ཉིད་ནི། །བསྟེན་
པས་སེལ་བ་ནུས་པ་ཡིན། །ར་ཡི་རིལ་མ་ངོས་གཉིས་ནས། །ཁབ་ཀྱིས་ཕུག་སྟེ་ཆུ་གཟགས་ནས། །མཐེ་བོས་མཉམ་དུ་བཙིར་ནས་ནི། །རྨ་ཡི་ནང་ནི་ཤ་ཕྱེ་དང༌། །ཚིལ་ནི་རློན་པས་བཀང་ནས་ནི། །དཀྲི་ཞིང་དཀྲི་ཞིང་དགང་བར་བྱ། །ཞག་བདུན་ནས་ནི་རྨ་འབྱོར་ནས། །མིག་འབྲས་ནག་པོ་མཉམ་བརྟན་ལ། །མིག་སྨན་སྣུམ་ཅན་གཏང་བྱ་ཞིང༌། །མར་དང་འོ་མའི་སྣ་སྨན་བླུགས། །དེ་ལྟ་ན་ཡང་རྒྱས་གྱུར་ན། །དབུག་དང་བཅད་སོགས་བྱ་བ་བྱས། །བཅད་དྲགས་པ་ཡིས་མིག་ནང་དུ། །ཞུགས་པར་མི་འགྱུར་ཅི་རིགས་བྱ། །ལིང་ཏོག་ལ་ནི་རྟག་པར་རང་གི་སྨན། །བསྐོལ་བའི་མར་བླུད་སྣ་སྨན་བསྟེན་པ་དང༌། །ཅི་ནས་མཐོང་བ་ཉམས་པར་མི་འགྱུར་པར། །མིག་སྨན་རྣོན་པོ་རྟག་ཏུ་བསྟེན་པར་བྱ། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་བཅུ་གཅིག་པའོ།། །།དེ་ནས་མཐོང་བར་བྱེད་པའི་མིག་ནད་ཀྱི་ནད་དམིགས་ཤེས་པར་བྱ་བ་བཤད་པར་བྱའོ། །ནད་ནི་རྩ་ཡི་ནང་ཞུགས་པ། །རིམ་པ་དང་པོར་གནས་ནས་ནི། །གཟུགས་ནི་མི་གསལ་མཐོང་འགྱུར་ཞིང༌། །རྒྱུ་མེད་པར་ཡང་གསལ་བར་མཐོང༌། །རིམ་པ་གཉིས་པར་ཕྱིན་པ་ན། །མེད་པ་དག་ཀྱང་མཐོང་འགྱུར་ཞིང༌། །ཡོད་ཅིང་ཉེ་བར་བསྒྲིབས་ན་མཐོང༌། །རིང་ནས་ཕྲ་བ་མཐོང་བར་འགྱུར། །ཉེ་དང་རིང་བར་གནས་པའི་གཟུགས། །ཕྱིན་ཅི་ལོག་ཏུ་ཤེས་པར་འགྱུར། །ནད་ཀྱིས་ཟླུམ་པོའི་དབྱིབས་འདྲ་པར། །ཟླུམ་པོ་ཉིད་དུ་མཐོང་བར་འགྱུར། །མཐོང་བྱེད་དབུས་གནས་གཅིག་གཉིས་མཐོང༌། །མང་དུ་གནས་ན་དུ་མ་མཐོང༌། །མཐོང་བྱེད་ནང་དུ་ཞུགས་པ་ནི། །ཆེ་ཆུང་གོ་ནི་བཟློག་པར་མཐོང༌། །འོག་ཏུ་གནས་པས་ཉེ་མི་མཐོང༌། །སྟེང་དུ་གནས་པས་རིང་མི་མཐོང༌། །ངོས་ལ་གནས་པས་གཡས་གཡོན་མིན། །ནད་འདི་རབ་རིབ་ཅེས་བྱར་བཤད། །ནད་ནི་རིམ་པ་གསུམ་པར་བརྟེན། །སྔོན་པོ་ཉིད་དུ་འགྱུར་བ་ཡིན། །དེ་ཡིས་སྟེང་མཐོང་འོག་མི་མཐོང༌། །གོས་སྲབ་ཀྱིས་གཡོགས་ལྟར་མཐོང་ཞིང༌། །ཁ་དོག་ཇི་བཞིན་འགྱུར་བ་དང༌། །རིམ་གྱིས་མཐོང་བ་ཉམས་པར་འགྱུར། །དེ་ལྟ་ན་ཡང་ཡལ་བར་དོར། །རིམ་པ་བཞི་པར་
ཕྱིན་ནས་ནི། །མཐོང་བྱེད་མཚན་མོ་ཉམས་བྱེད་ཅིང༌། །མིག་གི་རྒྱལ་མོ་ཁེབས་པར་བྱེད། །དེ་ལ་རླུང་གྱུར་རབ་རིབ་ནི། །ལོང་ལོང་པོར་ནི་མཐོང་བ་དང༌། །གཡོ་ཞིང་རྙོག་ཅན་རྩ་དམར་སྣང༌། །ཆད་འགའ་གསལ་བར་མཐོང་བ་དང༌། །དྲ་བ་སྐྲ་ཤད་སྤྲང་བུ་དང༌། །འོད་མཐོང་དེ་ནི་ཡལ་བར་བོར། །སྔོན་པོར་གྱུར་ལ་མིག་དམར་ལ། །བཞིན་ལ་སྣ་ནི་མེད་པར་མཐོང༌། །ཟླ་བ་མེད་སོགས་དུ་མར་མཐོང༌། །ཡོན་པོ་འང་དྲང་པོར་མཐོང་བར་འགྱུར། །སྔོན་པོ་འཕེལ་ན་མཐོང་བྱེད་ནི། །རྡུལ་གྱིས་ཁེབས་པ་ལྟ་བུར་མཐོང༌། །གསལ་ཞིང་དམར་བའམ་རྒྱ་ཆེ་བའམ། །ཕྲ་བའམ་མཐོང་བ་ཉམས་པར་འགྱུར། །དེ་ནི་མཐོང་བ་ཉམས་པ་ཡིན། །རླུང་གིས་མིག་གི་རྩ་འཁུམས་འགྱུར། །མཐོང་བྱེད་གཏིང་དུ་ཞུགས་པ་དག །འདི་ནི་གཏིང་རིང་ཞེས་བྱར་བཤད། །མཁྲིས་གྱུར་རབ་རིབ་གློག་དང་ནི། །སྲིན་བུ་མེ་ཁྱེར་མེ་སྒྲོན་འོད། །རྨ་བྱ་སྲེག་པའི་སྒྲོ་དང་འདྲ། །ཕལ་ཆེར་སྔོན་པོར་མཐོང་བར་འགྱུར། །མཐོང་བྱེད་མིག་ནི་འཁར་གཡའ་འདྲ། །དེ་ལྟ་བུ་ནི་མཐོང་བ་དང༌། །ཉི་ཟླ་འཁྱིམས་དང་མེ་དང་ནི། །སྨིག་རྒྱུ་འཇའ་ཚོན་མཐོང་བར་འགྱུར། །བུང་བ་ལྟར་སྔོ་མཐོང་བ་མེད། །འབྲས་བུ་སྣུམ་པ་མཐོང་ཉམས་ཡིན། །མཁྲིས་པ་མིག་ནི་ཆུང་ཞེས་བཤད། །ཆུང་མཐོང་དེ་ནི་ཐུང་ངུ་ཡིན། །སེར་ཞིང་དངོས་པོ་སེར་པོར་མཐོང༌། །མཁྲིས་པས་ཚིག་པར་གྱུར་ཞེས་བྱ། །བད་ཀན་རབ་རིབ་ཕལ་ཆེར་ནི། །སྣུམ་ཞིང་དཀར་བར་མཐོང་བ་དང༌། །དུང་དང་ཟླ་བ་ཀུནད་དང༌། །ཀུནདའི་མེ་ཏོག་ལྟ་བུས་ཁྱབ། །སྔོན་པོ་འོད་མེད་ཉི་ཟླ་དང། །སྒྲོན་མེས་ཁྱབ་པ་ལྟ་བུར་མཐོང༌། །མིག་འབྲས་དཀར་པོར་སྣང་བར་འགྱུར། །བད་ཀན་མཐོང་ཉམས་དེས་མངོན་ཁྱབ། །སྣུམ་ཞིང་མཐོང་བ་ཉམས་འགྱུར་ལ། །ཆུ་ཡི་ཐིགས་པ་པདྨ་ཡི། །འདབ་མའི་སྟེང་ན་གནས་ལྟར་གཡོ། །དྲོན་ཞུམ་པར་འགྱུར་བ་དང༌། །གྲང་བས་ཡོངས་སུ་ཁྱབ་པར་བྱེད། །ཟླ་བ་མེ་ཏོག་ཀུནད་དང༌། །ཤེལ་ལྟར་སྣང་ཞིང་དཀར་བ་ཡིན། །ཁྲག་གི་རབ་རིབ་དམར་བ་དང༌། །མུན་པར་གྱུར་པ་མཐོང་བ་ཡིན། །སྔོན་པོ་དམར་བ་གནག་པར་ནི། །མིག་གིས་དེ་ལྟར་མཐོང་བ་ཡིན། །མཚན་མ་ཉམས་པ་དེ་འདྲར་མཐོང༌། །
འོད་མེད་མཐོང་བ་ཉམས་པ་ཡིན། །ལྡན་པ་འམ་ནི་འདུས་པ་ཡི། །རབ་རིབ་ལ་སོགས་མཚན་མ་ནི། །འདྲེན་མ་ཡིན་པར་ཤེས་པར་བྱ། །གློ་བུར་དུ་ནི་རབ་རིབ་དག །གསལ་དང་མི་གསལ་འཁྲུགས་པར་བྱེད། །ལྷག་མ་དག་གིས་མཐོང་བྱེད་ནི། །དམར་ཞིང་སྣ་ཚོགས་དག་ཏུ་སྣང༌། །གང་གིས་མཐོང་བྱེད་ནད་ཀྱིས་ཁྱབ། །སྲེ་མོའི་མིག་འདྲར་སྣང་བར་འགྱུར། །དེ་ནི་ཉིན་མཐོང་མཚན་མོ་མིན། །ནེའུ་ལེ་ལོང་བ་ཞེས་དེ་བཤད། །ཉི་མ་ནུབ་པར་གྱུར་པ་ན། །འོད་མི་སྣང་ཚེ་རེངས་འགྱུར་ཞིང༌། །མཐོང་བྱེད་ཉམས་པར་བྱེད་པ་ནི། །ནད་ཀྱི་ལོང་བ་གཉིས་པ་ཡིན། །ཉི་མའི་ཟེར་གྱིས་ཕོག་པ་ན། །མཐོང་བའི་ལམ་ནས་དྲི་མ་ནི། །ཞུ་ཞིང་མེད་པར་གྱུར་ནས་ནི། །ཉིན་མོ་གསལ་བར་མཐོང་བར་བྱེད། །ཚ་བས་གདུངས་ཏེ་མོད་ལ་ནི། །ཆུ་གྲང་ནང་དུ་ཞུགས་གྱུར་ན། །ནད་གཞི་གསུམ་དང་ཁྲག་འཁྲུགས་ཏེ། །དྲོད་ནི་གྱེན་འགྲོ་དེ་ནས་མིག །ཚ་ཞིང་ན་དཀར་དྲི་མ་ཅན། །ཉིན་མོ་ལོང་ལོང་པོར་མཐོང་ཞིང༌། །མཚན་མོ་ལོང་བར་གྱུར་པ་དག །དེ་ནི་དྲོ་བས་ཚིག་ཅེས་བྱ། །ཤས་ཆེར་སྐྱུར་ཟོས་ནད་དང་ནི། །ཁྲག་དང་བཅས་པས་མིག་ཁྱབ་འགྱུར། །འདྲུལ་ཞིང་གཡོལ་དྲི་མ་ཅན། །དེ་ནི་སྐྱུར་གྱིས་ཚིག་ཅེས་བྱ། །མྱ་ངན་རིམས་དང་མགོ་ནད་ཀྱིས། །རླུང་སོགས་གདུངས་པར་གྱུར་པ་ལས། །རླུང་སོགས་འཁྲུགས་ཤིང་དུད་འཐུལ་མཐོང༌། །དེ་ནི་དུད་པ་ཅན་ཞེས་བྱ། །སྙིང་སྟོབས་ཆུང་བས་གློ་བུར་དུ། །ངོ་མཚར་ཅན་གྱི་གཟུགས་མཐོང་བའམ། །ཉི་མ་འོད་ཅན་སོགས་མཐོང་ནས། །མིག་ལ་བརྟེན་པའི་རླུང་ལ་སོགས། །གཟི་བརྗིད་ཉམས་པས་མིག་གི་ནི། །མཐོང་བ་ཉམས་པར་བྱེད་པར་འགྱུར། །བཻཌཱུཪྻའི་མདོག་མཁྲང་བག་དང༌། །རང་བཞིན་གནས་ལྟར་ནད་མེད་འགྱུར། །འདི་ནི་ཕྲད་པ་ལས་བྱུང་བའི། །མཚན་མ་ཉམས་པ་ཞེས་བྱར་བཤད། །འདི་ལས་བད་ཀན་མ་གཏོགས་མཚན། །ཉམས་དང་ཐུང་ངུ་གཏིང་ཞེན་སྤང༌། །མིག་སྔོན་དྲུག་དང་ནེའུ་ལེའི། །ལོང་བ་འཚོ་ཙམ་ལྷག་མ་ནི། །བཅུ་གཉིས་པོ་ནི་གསོ་བར་བྱ། །དེ་ལྟར་མིག་ནད་ཉི་ཤུ་ནི། །རྩ་བདུན་དག་ཏུ་བསྟན་པ་ཡིན། །ཡན་ལག་བརྒྱད་པའི་སྙིང་པོ་བསྡུས་
པ་ལས། ཕྱི་མའི་གནས་ཀྱི་ལེའུ་བཅུ་གཉིས་པའོ།། །།དེ་ནས་རབ་རིབ་གསོ་བ་བཤད་པར་བྱའོ། །རབ་རིབ་སྔོན་པོ་ཉིད་འགྱུར་ཞིང༌། །སྔོན་པོ་མ་བཅོས་ལོང་བར་འགྱུར། །དེ་བས་མིག་ནད་ལ་རབ་རིབ། །མི་བཟད་མྱུར་དུ་གསོ་བར་བྱ། །འཚོ་བྱེད་སྲང་བརྒྱ་ཆུ་པྲེ་ནི། །བཅུ་དྲུག་ནང་བསྐོལ་བཞི་ཆ་ལུས། །ཁུ་བ་འོ་མ་བྲེ་དོ་དང༌། །མར་ནི་བྲེ་གང་ལྷན་ཅིག་བཙོ། །སྟག་ཚེར་བ་དང་ར་མཉེ་བ། །སེང་ཕྲོམ་རྒྱམ་ཚ་པི་པི་ལིང༌། །ཤུ་ཏི་ཤིང་མངར་རྒུན་འབྲུམ་དང༌། །ཐང་ཤིང་ཁ་ར་འབྲས་བུ་གསུམ། །ཞོ་ནི་གཉིས་གཉིས་བཏབ་བསྐོལ་ཏེ། །མཚན་འཐུངས་རབ་རིབ་སེལ་མཆོག་ཡིན། །རྒུན་འབྲུམ་བཙོད་དང་ཙནྡན་དཀར། །ར་མཉེ་བ་གཉིས་ཛི་བ་ཀ །ཁ་ར་ཉེའུ་ཤིང་མེ་ད་དང༌། །ཤིང་མངར་ཨུཏྤལ་པུཎྜ་རཱི། །ཞོ་ནི་གཉིས་གཉིས་མར་རྙིང་ནི། །བྲེ་གང་འོ་མ་དེ་མཉམ་བསྐོལ། །དེ་ཡིས་མིག་སྔོན་རབ་རིབ་དང༌། །མར་གྱིས་མགོ་ནད་རབ་རིབ་འཇོམས། །ནིམ་པ་སྐྱེར་པ་པ་ཏོ་ལ། །པུ་ཙེ་ཤེལ་དང་པུ་ཤེལ་ཙི། །འབྲས་བུ་གསུམ་དང་བ་ཤ་ཀ །བྱི་ཚེ་རབ་དང་ཀྱི་ལྕེ་བ། །པར་པ་ཏ་ནི་སྲང་རེ་ཡིན། །སྐྱུ་རུ་ར་ནི་བྲེ་གང་དང༌། །ཆུ་བྲ་བཅུ་དྲུག་ནང་དུ་བསྐོལ། །བྲེ་བཞི་ལུས་པར་གླ་སྒང་དང༌། །རྩ་མཁྲིས་ཤིང་མངར་དུག་མོ་ཉུང༌། །བ་ལུ་ཀ་དང་ཙནྡན་དང༌། །པི་པི་ལིང་སྲང་ཕྱེད་ཕྱེད་དང༌། །མར་བྲེ་གང་དང་བཅས་བསྐོལ་བ། །དེས་ནི་རྣ་མིག་སྣ་ནད་དང༌། །ཁོང་འབྲས་རིམས་དང་མཛེར་པ་དང༌། །འབྲུམ་ཕྲན་ཤུ་བ་མཛེ་ནད་སེལ། །མཆོག་ཏུ་ལིང་ཏོག་རབ་རིབ་དང༌། །མཚན་ལོང་དྲོ་བས་ཚིག་པ་འཇོམས། །འབྲས་བུ་གསུམ་ནི་སྲང་བརྒྱད་དག །ཆུ་བྲེ་བཞི་བསྐོལ་བཞི་ཆ་ལུས། །འོ་མ་དེ་དང་ཆ་མཉམ་དང༌། །འབྲས་བུ་གསུམ་གྱི་ལྡེ་གུ་ནི། །སྲང་གཅིག་ཞུན་མར་བྲེ་ཕྱེད་བསྐོལ། །ཁ་རའམ་སྦྲང་རྩིར་བཅས་པའམ། །འབྲས་བུ་གསུམ་གྱི་ཁུ་བར་བཅས། །འཐུངས་ན་རབ་རིབ་ཐམས་ཅད་འཇོམས། །ཤིང་མངར་ར་མཉེ་བ་གཉིས་དང༌། །ཀཎྜ་ཀཱ་རི་པི་པི་ལིང༌། །ཨ་རུ་ར་དང་ཨུཏྤ་ལ། །ཁ་ར་རྒུན་འབྲུམ་སྲང་རེར་བཅས། །ར་ཡིའོ་མ་མར་བྲེ་རེ། །འབྲས་བུ་གསུམ་དང་བ་ཤ་ཀ །བྲིང་ག་ར་ཛའི་ཁུ་བར་བསྐོལ། །འདི་ནི་འབྲས་བུ་གསུམ་ཆེན་མོའི། །
མར་དེ་མིག་ནད་ཀུན་སེལ་མཆོག །འབྲས་བུ་གསུམ་དང་མར་རམ་ནི། །འབྲས་བུ་གསུམ་དང་ཤིང་མངར་བཅས། །སྦྲང་རྩི་ཡིས་ནི་སྦྲུས་གྱུར་པ། །མཚན་མོ་ཟོས་པར་གྱུར་ན་ནི། །ཟླ་གཅིག་ཕན་པའི་ཟས་བསྟེན་ཞིང༌། །སྐྱུ་རུ་ར་ཡི་ཆུ་འཐུངས་ན། །མཁའ་ལྡིང་ལྟ་བུའི་མིག་ཐོབ་ཅེས། །དྲང་སྲོང་མུ་ཁྱུད་ཀྱིས་བཤད་དོ། །ཏ་བྱ་ཤིང་མངར་ལྕགས་དང་གསེར། །ཁར་སྦྲང་རྩི་མར་རྙིང་དང༌། །འབྲས་བུ་གསུམ་དང་ཅི་འདོད་སྦྱར། །བསྟེན་པས་རབ་རིབ་འཇོམས་མཆོག་ཡིན། །ཡང་ན་འབྲས་བུ་གསུམ་བསྐོལ་མར། །རབ་རིབ་ཅན་གྱིས་བསྟེན་བྱའམ། །སྣུམ་ཁུར་ཕྱེའམ་སྲན་ཚོད་ནི། །འབྲས་བུ་གསུམ་གྱི་ཕྱེ་བཅས་པའམ། །འོ་ཐུག་འབྲས་བུ་གསུམ་བཅས་པ། །བསྒྲངས་ཏེ་ཁ་ར་སྦྲང་རྩི་བཏབ། །ཟས་མ་ཟོས་པའམ་ནང་པར་ནི། །རྒུན་འབྲུམ་ཁར་སྦྲང་རྩི་དང༌། །ཨ་རུ་ར་ནི་སོ་སོར་བཟའ། །རྟག་ཏུ་རབ་རིབ་ཅན་གྱིས་བསྟེན། །ལིག་བུ་མིག་ཆ་དྲུག་ཅུ་བཞི། །ཟངས་དང་དངུལ་དང་གསེར་གྱི་ཆ། །རེ་རེ་གཅིག་ཏུ་སྦྱར་བ་ནི། །ཀོང་བུ་ཁ་སྦྱར་ནང་དུ་གཞུག །འདྲེས་པར་གྱུར་གྱི་བར་དུ་བུད། །དེ་ནས་དེ་ཡི་རོ་དྲུག་གི །ཚོགས་ཀྱི་ཁུ་བ་ལན་བདུན་དང༌། །སོ་སོར་དེ་ལ་བླུགས་པར་བྱ། །མུ་ཏིག་དུང་དང་བཻཌཱུཪྻ། །ཚ་བ་གསུམ་དང་དེ་ནས་བསྲེ། །ཕྱེ་མའི་མིག་སྨན་དེ་གཏང་བྱ། །རབ་རིབ་ཐམས་ཅད་སེལ་བྱེད་ཡིན། །རྒུན་འབྲུམ་པདྨའི་རྩ་བ་ཡི། །ཁུ་བ་འོ་མ་ཆང་དང་ཞག །ཆར་པ་དེ་བཞིན་ལིག་བུ་མིག །བསྐོལ་ཞིང་བསྐུ་བ་བྱས་ནས་ནི། །ཕྱེ་མ་དེ་ནི་དུང་དང་གཞུག །མཐོང་བ་གསལ་བྱེད་མིག་སྨན་ཡིན། །མིག་ནད་ཐམས་ཅད་ལ་བསྔགས་ཞེས། །ལུས་འཕགས་རྒྱལ་པོས་བཤད་པ་ཡིན། །སྤངས་མ་སྲང་གཉིས་རྒྱ་ཤུག་གི །སོལ་བར་བསྲེགས་ལ་ར་ཡི་ནི། །འོ་མ་མར་དང་སྦྲང་རྩི་ཡི། །ནང་དུ་ལན་ནི་བདུན་བདུན་བཅུག །ཏ་བྱ་དང་ནི་ན་ལེ་ཤམ། །ལིག་བུ་མིག་དང་པུ་ཙེ་ཤེལ། །སྤང་སྤོས་རྒྱམ་ཚ་ཨ་རུ་ར། །སེང་ཕྲོམ་ལྡོང་རོས་པི་པི་ལིང༌། །སུག་སྨེལ་རྒྱ་མཚོའི་ལྦུ་བ་དང༌། །སྟང་ཟིལ་ཞོ་ནི་གཉིས་གཉིས་དང༌། །ཤིང་མངར་སྲང་གཅིག་བཅས་པ་ནི། །ཀོང་བུ་ཁ་སྦྱར་ནང་བསྲེགས་བཏགས། །མིག་སྔོན་མཚན་མོ་ལོང་
བར་བཅས། །དམར་རིས་དེ་བསྟེན་པ་ཡིས་འཇོམས། །ཕྱེ་མས་མཆོག་ཏུ་རབ་རིབ་ནད། །ཉི་མས་མུན་པ་ལྟ་བུར་སེལ། །སྤང་སྤོས་དྲི་བཟང་གསུམ་དང་ལྕགས། །གུར་གུམ་ཨུཏྤལ་སྔོན་པོ་དང༌། །ཁ་ར་སྤངས་མ་ཨ་རུ་ར། །རྒྱ་མཚོའི་ལྦུ་བ་འཆིང་བུ་དཀར། །ན་ལེ་ཤམ་དང་པི་པི་ལིང༌། །སྟང་ཟིལ་ཤིང་མངར་དུང་དང་བཅས། །ཐ་སྐར་ཟླ་བའི་ཚེ་ན་ནི། །ཕྱེ་མ་མིག་གཉིས་ལ་བསྐུས་ན། །མིག་མཛེར་རབ་རིབ་དམར་རིས་དང༌། །གཡའ་དང་མིག་སྔོན་སོགས་ཞི་བྱེད། །ན་ལེ་ཤམ་དང་རྒྱམ་ཚ་ནི། །ཆ་རེ་པི་པི་ལིང་དང་ནི། །རྒྱ་མཚོའི་ལྦུ་བ་ཆ་གཉིས་དང༌། །སྐྱེར་པའི་ཁ་ཎྜ་ཆ་དགུ་ནི། །ནག་པ་ལ་བབ་ཚེ་ན་བཏགས། །མིག་བསྐུས་བད་ཀན་རབ་རིབ་འཇོམས། །སྤངས་མ་བསྲེགས་ཏེ་ལན་མང་དུ། །བ་གཅིན་ར་ཐུག་ཁུ་བ་དང༌། །སྐྱུར་རྩབས་བུད་མེད་ནུ་ཞོ་དང༌། །དུག་གི་ཁུ་བ་སྦྲང་རྩི་མར། །བཅུག་པར་གྱུར་པ་གང་ཡིན་པ། །ཕྱེ་མར་བྱས་དེས་མི་ཡི་མིག །མཁའ་ལྡིང་མིག་ལྟར་གསལ་བར་འགྱུར། །བྲིང་ག་ར་ཛ་འབྲས་བུ་གསུམ། །དུག་དང་ཤིང་མངར་ཁུ་བ་དང༌། །མར་དང་ར་ཡི་འོ་མར་ནི། །ཞ་ཉེ་ལན་ནི་བདུན་བདུན་དུ། །བསྲེགས་ཤིང་བསྲེགས་ཤིང་བཙོས་པ་ཡི། །མིག་སྨན་ཐུར་མར་བྱས་པ་དེ། །མིག་སྨན་བསྐོལ་བ་འམ་མ་བསྐོལ་བའམ། །བྱུགས་ན་རབ་རིབ་མིག་མཛེར་ནད། །ཆུ་སེར་འཛག་དང་འབྱར་བག་ཅན། །གཡའ་དང་ཚོར་བ་མེད་པ་དང༌། །རི་མོ་དམར་པོར་སྣང་བ་འཇོམས། །དངུལ་ཆུ་རོ་ཉེ་ཆ་མཉམ་བྱ། །དེ་གཉིས་སྟང་ཟིལ་མཉམ་བྱས་ལ། །ག་པུར་ཅུང་ཟད་བཏབ་པ་ཡི། །མིག་སྨན་རབ་རིབ་སེལ་མཆོག་ཡིན། །བྱ་རྒོད་དུས་སུ་ཤི་བའི་མགོ་བོ་ནི། །ཉི་མ་འཆར་ཀའི་མདོག་འདྲ་གང་ཡིན་དེ། །བ་ལང་ལྕི་བས་བསྲེགས་ཐལ་ལིག་བུ་མིག །ཆ་མཉམ་བཏགས་པར་གྱུར་པའི་ཕྱེ་མ་ཡི། །སྦྱོར་འདིས་མིག་གི་གསལ་སྟོབས་བྱ་རྒོད་ལྟ་བུར་བྱེད། །སྦྲུལ་ནག་མགོར་ནི་ལིག་པུ་མིག །མར་བཅས་དུད་པ་མ་ཤོར་བསྲེགས། །སྤང་སྤོས་གནྡྷ་བྷ་དྲ་དང༌། །ལྷན་ཅིག་བཏགས་པས་མིག་འབྲས་ནི། །རྡོལ་ཡང་མིག་ནི་སྲུང་བར་བྱེད། །སྦྲུལ་ནག་ཤི་བའི་རོ་དང་ནི། །སྡིག་པ་ཤི་བའི་རོ་བཞི་ནི། །འོ་མའི་བུམ་པར་ཞག་ཉི་ཤུ། །རྩ་གཅིག་བཅུག་
སྟེ་བསྲུལ་ལ་བསྲུབ། །དེ་ལས་མར་སར་གང་བྱུང་བས། །ཁྱིམ་བྱ་གསོས་ཏེ་དེ་ཡི་ནི། །རྟུག་པས་མིག་ནི་བསྐུས་གྱུར་ན། ལོང་བས་ཀྱང་ནི་ལེགས་པར་མཐོང༌། །སྦྲུལ་ནག་པོ་ཡི་ཞག་དང་དུག །སྟང་ཟིལ་ཀ་ཏ་ཀའི་འབྲས་བུ། །ཁུ་བར་བྱས་པའི་སྦྱོར་བ་ཡིས། །ལོང་བའང་མྱུར་དུ་མཐོང་བར་བྱེད། །ན་ལེ་ཤམ་ནི་རྡོག་མ་བཅུ། །དྲུབ་མར་ཅང་ནི་སྲང་ཕྱེད་དང༌། །སྤངས་མ་སྲང་གཅིག་ཤིང་མངར་ནི། །ཞོ་གཉིས་འོ་མའི་ནང་དུ་སྤངས། །དུ་བམ་ཤོར་བསྲེགས་མིག་སྨན། །ཁུ་བ་མཉམ་མེད་ཅེས་བྱ་སྟེ། །རབ་རིབ་འཇོམས་པའི་མཆོག་ཡིན་ནོ། །བ་རུ་ར་ཡི་ཚི་གུ་ན་ལེ་ཤམ། །སྐྱུ་རུ་ར་དང་སྤངས་མ་ཤིང་མངར་ནི། །ཆུ་ཐག་བྱས་པའི་རི་ལུ་གྲིབ་མར་བསྐམས། །རབ་རིབ་མྱུར་དུ་འཇོམས་པར་བྱེད་པ་ཡིན། །ན་ལེ་ཤམ་དང་སྐྱུ་རུ་ར། །རྒྱ་མཚོའི་ལྦུ་བ་སྤངས་མ་དང༌། །དངུལ་རྡོ་དང་ནི་དྲུབ་མར་བཅས། །གོ་རིམས་བཞིན་དུ་ཆ་རེས་བསྐྱེད། །དྲུབ་མར་ཆ་ནི་དྲུག་པ་སྟེ། །སྦྱོར་འདིས་རབ་རིབ་ལིང་ཏོག་མཛེར། །གནག་དང་མིག་སྔོན་གཡའ་བསེལ། །རིན་ཆེན་དངུལ་དང་ཤེལ་དང་གསེར། །ལིག་བུ་མིག་དང་ཟངས་དང་ལྕགས། །ཙནྡན་དམར་པོ་ཡུག་སྣམ་དམར། །ཕྱེ་མའི་མིག་སྨན་ནད་ཀུན་སེལ། །ཏིལ་མར་བ་རུ་ར་ཡི་མར། །བྲིང་ག་ར་ཛ་ཨ་ས་ནའི། །ཁུ་བ་ལྕགས་ཀྱི་སྣོད་དུ་བསྐོལ། །སྣར་བླུགས་མིག་ནི་གསལ་སྟོབས་སྐྱེད། །ནད་ཀྱི་ཚུལ་ལས་དེ་ལ་ལན་མང་དུ། །སྣུམ་བླུད་གཏར་ག་བཀྲུ་སྨན་སྣ་སྨན་དང༌། །མིག་སྨན་མགོ་པོའི་བཀྲུ་སྨན་མས་གཏོང་དང། །ཉམས་བརྟས་བྱུགས་དང་བླུགས་པས་ཅི་རིགས་གསོ། །འདི་ནི་སྤྱི་ཡི་གསོ་བ་ཡིན། །ད་ནི་རེ་རེའི་མཉན་པར་གྱིས། །དེ་ལ་རླུང་གྱུར་རབ་རིབ་ལ། །རྩ་བ་བཅུ་བསྐོལ་ཁུ་བ་མར། །འོ་མ་བཞི་འགྱུར་འབྲས་བུ་གསུམ། །ལྡེ་གུ་བསྐོལ་བ་བླུད་པར་བྱ། །དེ་འོག་འབྲས་བུ་གསུམ་དང་ནི། །རྩ་བ་ལྔའི་ཁུ་འོ་མ་དང༌། །ཨེ་ར་ཎྜ་ཡི་ཏིལ་མར་བཅས། །བཀྲུ་སྨན་ཉེ་བར་གཏང་བར་བྱ། །ཛི་བན་ཏི་ཡི་ཡལ་གར་བཅས། །སྲང་བརྒྱ་ཆུ་བྲེ་བཅུ་དྲུག་བསྐོལ། །བརྒྱད་ཆ་ལུས་པ་དེ་ནང་དུ། །ཏིལ་མར་འོ་མ་བྲེ་རེ་དང༌། །བ་ལ་གསུམ་དང་ཛི་བན་ཏི། །ཉེའུ་ཤིང་རྩ་བ་སྲང་
རེ་དང༌། །ཤིང་མངར་སྲང་ནི་བཞི་དང་བཅས། །ལྕགས་ཀྱི་སྣོད་དུ་བསྐོལ་བར་བྱ། །ལྕགས་སྣོད་ཉིད་དུ་ཟླ་གཅིག་གཞག །སྣ་སྨན་ནམ་ཚོད་ཡན་ཆད་ཀྱི། །རླུང་ནད་མཁྲིས་པའི་ནད་འཇོམས་ཤིང༌། །མཆོག་ཏུ་མིག་ལ་གནས་པ་སེལ། །སྐྲ་གདོང་གཉའ་བ་ཕྲག་ནད་སེལ། །རྒྱས་ཤིང་གཟི་མདངས་མཛེས་པར་བྱེད། །ཨེ་རཎྜ་དཀར་རྩ་བ་དང༌། །ཐང་ཤིང་བྲི་ཧ་ཏིའི་འབྲས་བུ། །ཤུ་དག་རྒྱ་སྤོས་ཙི་ཏྲ་དང༌། །བིལ་བའི་རྩ་བ་ཏིལ་མར་དང༌། །འོ་མར་བཅས་བསྐོལ་སྣར་བླུགས་ན། །ནམ་ཚོང་ཡན་ཆད་རླུང་དང་ནི། །བད་ཀན་གྱི་ནི་ནད་ཀུན་སེལ། །སྟག་དང་ཕག་དང་བྱ་རྒོད་དང༌། །སྦྲུལ་དང་ཁྱིམ་བྱའི་ཚིལ་དང་ནི། །ཤིང་མངར་སོ་སོར་སྦྱར་ཏེ་བསྐོལ། །མིག་སྨན་བསྐུས་པར་བསྔགས་པ་ཡིན། །དེ་རྗེས་མིག་སྨན་ལིག་བུ་མིག །ཤ་ཁུ་འོ་མ་མར་རིམ་བཞིན། །སྔ་མ་བཞིན་དུ་བླུགས་ན་ནི། །རབ་རིབ་འཇོམས་བྱེད་མཆོག་ཡིན་ནོ། །དེ་ལྟར་བྱས་ཀྱང་མ་ཞི་ན། །དེ་འོག་བརྟ་བའི་ཆོ་ག་སྤྱད། །ཤུ་ཏི་རུ་རྟ་སྤངས་སྤོས་དང༌། །ཤིང་མངར་རམ་ཉེ་བ་གཉིས་དང༌། །སྟག་ཚེར་བ་དང་ས་ར་ལ། །པི་པི་ལིང་དང་ཐང་ཤིང་ནི། །མར་གྱི་བརྒྱད་འགྱུར་འོ་མར་བསྐོལ། །མིག་བརྟ་བ་ཡི་མཚོག་ཡིན་ནོ། །རི་དག་ཨེ་ནེ་ཡའི་ཚིལ་ནི། །འོ་མར་བསྐོལ་ཏེ་གཟར་བུས་དཀྲུགས། །དེ་ཡི་དངས་མ་ཤིང་མངར་དང༌། །ཙནྡན་པུ་ཤེལ་ཙེ་དེ་བཞིན། །ཤྭ་བིད་རེག་འཇམ་གོ་ད་དང༌། །ཁྱིམ་བྱ་སྲེག་པ་རྨ་བྱའི་ཚིལ། །རེ་རེ་ཞིང་ནི་ཆོ་ག་དག །འདི་དག་གིས་ནི་བརྟ་བར་བྱ། །གསལ་བར་བྱ་དང་སྣུམ་དང་ནི། །སྨན་ཕུར་བཙོས་བའི་ཐིགས་པའང་བླུགས། །འདིར་ནི་རླུང་འགྱུར་ཆམ་པ་བཞིན། །ནི་རུ་ཧ་དང་འཇམ་རྩི་བྱ། །མཁྲིས་པ་ལས་གྱུར་རབ་རིབ་ལ། །འཚོ་བྱེད་འབྲས་བུ་གསུམ་དང་ནི། །བསྐོལ་བའི་མར་ནི་བླུད་བྱ་ཞིང༌། །སྣུམ་གྱིས་ཞེན་པར་གཏར་ག་གདབ། །ཁ་ར་དུར་བྱིད་སུག་སྨེལ་ཕྱེ། །སྦྲང་རྩི་སྦྱར་བའི་བཀྲུ་སྨན་གཏང༌། །རབ་བསིལ་སྨན་ཆུ་བླུགས་བྱུག་སོགས། །གདོང་དང་མིག་དང་སྤྱི་བོར་བྱ། །ཐལ་ཏྲེས་ཤུག་པ་པུ་ཤེལ་ཙི། །མུ་ཏིག་སེང་ཕྲོམ་ཙནྡན་དཀར། །རི་ལུའི་མིག་སྨན་བསྐུས་ན་ཕན། །དེ་བཞིན་གནྡྷ་བྷ་དྲ་
དང༌། །ནཱ་ག་པུཥྤ་ཨུཏྤ་ལ། །ག་པུར་ཤིང་མངར་ཡུག་སྣམ་ཕན། །སྐྱེར་ཁཎྜ་དང་སྦངས་མ་དང༌། །ཀརྐ་ཏ་ཡི་སྲིང་གི་དང༌། །སྐྱུ་རུ་ར་ཡི་འབྲས་བུ་ཤེལ། །ག་པུར་ཆ་ནི་ལྔ་ལྔ་དང༌། །ཆ་གསུམ་ཆ་རེ་སྦྱར་བ་ཡིན། །མིག་སྨན་རབ་རིབ་འཇོམས་པར་བྱེད། །འཚོ་བྱེད་ཁར་ཨུཏྤ་ལ། །འོ་མ་མར་བསྐོལ་སྣ་སྨན་གཏང༌། །བད་ཀན་ལས་གྱུར་སླེ་ཏྲེས་དང༌། །འབྲས་བུ་གསུམ་དང་པི་པི་ལིང༌། །མར་བསྐོལ་སྣུམ་བླུད་གཏར་ག་གདབ། །དེ་རྗེས་དནད་དུར་བྱིད་བསྐོལ། །གླ་གོར་ཞོ་ཤ་ཨ་རུ་ར། །བཅའ་སྒ་པི་པི་ལིང་ཕྱེ་གདབ། །བཀྲུ་སྨན་དག་ནི་གཏང་བར་བྱ། །རྩ་བ་བཅུ་པའི་ཁུ་བར་ནི། །བ་ལེ་ཀ་དང་སེར་པོ་གཉིས། །ཐང་ཤིང་པི་པི་ལིང་འོ་མ། །ཏིལ་མར་བསྐོལ་བའི་སྣ་སྨན་གཏང༌། །དུང་དང་གླ་རྩི་པྲི་ཡང་ཀུ། །རྩ་བ་གསུམ་དང་འབྲས་བུ་གསུམ། །དྲི་མེད་རི་ལུས་མིག་གསལ་བྱེད། །ལྕགས་ནག་ཕྱེ་མ་ཚ་བ་གསུམ། །རྒྱམ་ཚ་འབྲས་བུ་གསུམ་མིག་སྨན། །རི་ལུ་ནག་པོས་མིག་གསལ་བྱེད། །རི་བོང་བོང་བུ་སེང་གེ་གླང༌། །རྔ་མོའི་སོ་དང་དཔྲལ་བའི་རུས། །བ་ལང་དཀར་སྤུན་ལེ་ཤམ། །རྒྱ་མཚོའི་ལྦུ་བ་ཙནྡན་དུང༌། །ནུ་ཞོ་ར་ཡི་འོ་མར་བཏགས། །རི་ལུས་རབ་རིབ་ལིང་ཏོག་སེལ། །ཁྲག་གྱུར་མཁྲིས་པ་ལྟ་བུར་གསོ། །བསིལ་ཆོས་བྱ་ཞིང་གཏར་ག་གདབ། །རྒུན་འབྲུམ་སྤང་སྤོས་སེང་ཕྲོམ་དང༌། །ཤིང་མངར་ཙནྡན་སྤངས་མ་དུང༌། །པདྨ་ཤུག་བ་ཨུཏྤལ། །ར་ཡི་འོ་མས་རི་ལུར་བྱས། །ཁྲག་གྱུར་རབ་རིབ་མྱུར་དུ་སེལ། །ལྡན་པ་འདུས་པ་ལས་གྱུར་པ། །ནད་གཞི་ཆ་ནི་ཇི་བཞིན་གསོ། །མ་དུ་ཀ་དང་བྱི་དང་ག །ན་ལེ་ཤམ་དང་སྒྲོན་ཤིང་དང༌། །འོ་མ་ཏིལ་མར་བསྐོལ་བའམ། །བཏགས་པའི་སྣ་སྨན་གདོང་བསྐུ་བྱ། །རྒྱ་སྤོས་ཨུཏྤལ་ཨ་ནནྟ། །ཤིང་མངར་སུ་ནི་ཤན་ཀཻ །ཏིལ་མར་བསྐོལ་བའི་སྣ་སྨན་དང༌། །མགོ་བསྐུ་འཇམ་རྩི་བྱ་བ་བསྔགས། །པུ་ཤེལ་ཙི་བསྐོལ་ཁུ་བའི་ནང༌། །རྒྱམ་ཚ་པི་པི་ལིང་ཕྱེ་གདབ། །དེ་བཙགས་སླར་ཡང་མར་བཅས་པར། །བསྐོལ་ལ་སྐ་གྱུར་བསྒྲངས་ནས་ནི། །སྦྲང་རྩི་བཅུག་པའི་མིག་སྨན་ནི། །འདུས་པ་ལས་གྱུར་རབ་རིབ་སེལ། །
ནུབ་མོ་རྒྱུ་བའི་སེམས་ཅན་གྱི། །རུས་པ་རྐང་གིས་གང་བ་དང༌། །ལིག་བུ་མིག་དང་བཅས་པ་ནི། །འབབ་ཆུའི་ནང་དུ་ཟླ་གཅིག་གམ། །ཞག་ནི་ཉི་ཤུའི་བར་དུ་གཞག །དེ་ནས་ཕྱུང་སྟེ་སྐམས་ནས་ནི། །ལུག་རུ་ཡི་ནི་མེ་ཏོག་དང༌། །ཤིང་མངར་བཅས་པའི་ཕྱེ་མར་བྱས། །མིག་བསྐུས་འདུས་པ་ལས་གྱུར་པའི། །རབ་རིབ་སེལ་བར་བྱེད་མཆོག་ཡིན། །མིག་སྔོ་གསོ་བའང་འདི་ཉིད་ལས། །གཏར་ག་གདབ་པར་མི་བྱ་སྟེ། །ནད་དེས་ལོང་བར་གྱུར་པ་ཡིན། །སྲིན་བུ་པད་པས་ཁྲག་དབྱུང་བྱ། །བུ་རམ་རྒྱ་མཚོའི་ལྦུ་བ་དང༌། །པི་པི་ལིང་དང་ན་ལེ་ཤམ། །གུར་གུམ་སྦྲང་རྩི་ལིག་བུ་མིག །སྤྲིས་གཡོགས་འཚོ་བ་ཙམ་མིག་སྨན། །འདུས་གྱུར་ནེའུ་ལེ་ལྟ་བུར་ལོང༌། །རབ་རིབ་སྐབས་བཤད་ཆོ་གར་སྦྱར། །མར་དང་སྦྲང་རྩི་བ་ལང་གི །ལྕི་བའི་ཁུ་བ་སྐྱེར་ཁཎྜ། །ཡུག་སྣམ་བལ་བུའི་ཕྱེ་མར་སྦྱར། །མིག་སྨན་མཚན་མེ་ལོང་ལ་ཕན། །ན་ལེ་ཤམ་ནི་ཞོ་དང་སྦྱར། །མཚན་མོ་མི་མཐོང་མིག་སྨན་མཆོག །ཨུཏྤལ་ཡུག་སྣམ་ཀ་རཉྫ། །པདྨ་གེ་སར་བ་ལང་གི །ལྕི་བའི་ཁུ་བ་དང་སྦྱར་བའི། །རི་ལུས་མཚན་མོ་ལོང་བ་སེལ། །ཧ་རེ་ཎུ་ཀ་པི་པི་ལིང༌། །རྒྱམ་ཚ་དང་ནི་ལིག་བུ་མིག །ར་གཅིན་རི་ལུར་བྱས་པ་ཕན། །པྲི་ཡང་ཀུ་དང་ཚ་བ་གསུམ། །ལྡོང་རོས་བ་བླ་འབྲས་བུ་གསུམ། །རྒྱ་མཚོའི་ལྦུ་བ་རའི་འོམ། །རི་ལུ་བྱས་པའི་མིག་སྨན་གྱིས། །མཚན་མོ་ལོང་བའི་མིག་ནད་སེལ། །མཆེར་པའི་ནང་དུ་པི་པི་ལིང༌། །བཅུག་སྟེ་མ་ཚོས་བར་བཙོས་ལ། །དེ་བསྐམས་སྦྲང་རྩིར་བཏགས་པ་ནི། །མཚན་མོ་མི་མཐོང་མིག་སྨན་མཆོག །མ་ཧེའི་མཆིན་པ་མཆེར་པ་དང༌། །ཏིལ་མར་མར་ནི་ལྷན་ཅིག་བཟའ། །འཚོ་བྱེད་སྣ་བཅུ་ལོ་མ་ནི། །མར་དང་ལྷན་ཅིག་བསྐོལ་བ་བཟའ། །ཨ་ཏི་མུག་ཏ་ཨེ་རཎྜ། །ཉེའུ་ཤིང་ལང་ག་ལིའི་ལོ་མ། །མར་དང་བརྔོས་པ་བཟའ་བར་བྱ། །དྲོ་ན་པུཥྤ་མར་དང་བརྔོས། །བཟའ་དང་བཏུང་བར་སྦྱར་བའང་ཕན། །དུད་འཐུལ་མཁྲིས་པ་སྒྱུར་བྲོབས། །ཚིག་ལ་མར་ནི་རྙིང་པ་དག །སྣུམ་གྱུར་བསིལ་བའི་བཀྲུ་སྨན་གཏང༌། །བསིལ་སྨན་གྱིས་ནི་ཀུན་ཏུ་བྱུག །བ་
ལང་ལྕི་ཁུའོ་མ་མར། །བསྐོལ་བ་ཡི་ནི་མིག་སྨན་ནམ། །བལ་བུའི་ལོ་མ་ཡུག་སྣམ་བསྐལ། །ཕྱེ་མ་བཏབ་པའི་མིག་སྨན་ཕན། །མེད་སེང་ཕྲོམ་ཨ་ནནྟ། །སྐྱེར་བ་བཙོད་དང་ཤིང་མངར་ནི། །མར་གྱི་བརྒྱད་འགྱུར་འོ་མ་བསྐོལ། །ཏིལ་མར་བསྐོལ་བའི་སྣ་སྨན་ཕན། །འོ་མ་མར་སར་གྱིས་བརྟ་བྱ། །དེས་མ་ཞིན་གཏར་ག་གདབ། །སེམས་ལས་ནད་དང་མྱ་ངན་འཇིགས། །ཟས་རྩུབ་ཙོག་ཙོག་པོར་འདུག་དང༌། །སྐྱུག་སྨན་བཀྲུ་སྨན་སྣ་སྨན་དང༌། །སྨན་ཐིགས་བླུགས་སོགས་ཉེས་པ་དང༌། །ཁ་ཟས་ཕྱེད་ཞུ་སློན་པ་དང༌། །བཀྲེས་སྐོམ་ལ་སོགས་བརྣགས་པ་དང༌། །མིག་ནད་མ་བཅོས་ཡུན་རིང་ལས། །རབ་རིབ་ནད་ལྡན་བརྟ་བར་བྱ། །དེ་ལ་ནད་གཞི་སོགས་བརྟགས་ཏེ། །རང་གི་སྨན་ནི་ཇི་བཞིན་སྦྱར། །ཉི་མ་གཟས་ཟིན་མེ་འོད་གློག་ལ་སོགས། །བལྟས་པས་མིག་ནི་ཉམས་པར་གྱུར་པ་དག །དེ་ལ་བསིལ་སྨན་སོགས་ཀྱིས་བརྟ་བྱ་ཞིང༌། །དེ་བཞིན་གསེར་བདར་མར་གྱི་མིག་སྨན་གཏང༌། །མི་ཡིས་ཇི་སྲིད་འཚོ་ཡི་བར་དུ་ནི། །རྟག་ཏུ་མིག་བསྲུང་བ་ལ་འབད་པར་བྱ། །ཉིན་དང་མཚན་མོ་འདྲ་བར་གྱུར་པ་ཡི། །མི་ལ་ནོར་ཡོད་གྱུར་ཀྱང་དོན་མེད་ཡིན། །འབྲས་བུ་གསུམ་བསྟེན་གཏར་ག་སྤྱང་བྱ་དང༌། །སེམས་དགའ་མིག་སྨན་སྣ་སྨན་བཅས་བསྟེན་ན། །བྱ་ཤ་ཟ་ཞིང་རྐང་པའི་རིམ་གྲོ་དང༌། །ཞུན་མར་བཏུང་བས་རྟག་ཏུ་མིག་བསྲུང་བྱ། །ཁ་ཟས་མི་འཕྲོད་ཟ་བ་རྟག་ཏུ་སྤང༌། །རབ་ཕྲ་འཚེར་དག་གཡོ་བ་མི་ལྟ་ཞེས། །སྐྱེས་བུའི་མིག་ནི་མཆོག་ཏུ་བསྲུང་བའི་ཐབས། །དྲང་སྲོང་ཆེན་པོ་མུ་ཁྱུད་འཛིན་གྱིས་བཤད། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་བཅུ་གསུམ་པའོ།། །།དེ་ནས་མཐོང་བ་ཉམས་པ་གསོ་བ་བཤད་པར་བྱའོ། །བད་ཀན་ལས་གྱུར་སྦྲིས་གཡོགས་པ། །རྦ་ཀློང་ལ་སོགས་བླ་བརྣན་ནི། །དྲུག་པོ་མེད་པར་གྱུར་པ་དང༌། །ལེགས་སྨིན་མཐོང་བ་མེད་པ་དབྱེ། །དེ་སྨིན་མ་གྱུར་མི་སྙོམས་ལ། །ཞོ་ག་ཆུ་འདྲ་སྲབ་པ་ནི། །ཐུར་མ་ཡིས་ནི་དྲངས་གྱུར་ཀྱང༌། །སླར་ཡང་གྱེན་དུ་འབྱུང་བར་འགྱུར། །ནད་ནི་མི་བཟད་སྐྱེས་བྱེད་ཅིང༌། །མཐོང་
བྱེད་སླར་ཡང་འགེབས་པར་བྱེད། །དེ་ནི་ཟས་བཅས་བླ་བརྣན་བཅས། །བད་ཀན་ཅན་གྱིས་མྱུར་དུ་སྐྱེད། །བད་ཀན་གྱིས་ནི་མཐོང་ཉམས་པ། །བད་ཀན་དཀར་བས་དཀར་བ་ཡིན། །དེ་ནི་ནད་གཞན་གྱིས་ཟིལ་གནོན། །ཀུན་ཏུ་སྔོ་བའི་ནད་དུ་འགྱུར། །དེ་ལ་རླུང་གྱུར་མིག་གཡོ་ཞིང༌། །རྦ་ཀློང་གཡོ་ཞིང་དམར་སྐྱར་འདུག །གསེག་མ་ཨརྒའི་འོ་མ་ནི། །ཐིག་ཕྲན་ཁྱབ་འདྲ་མཐུག་པ་ཡིན། །གྲ་མ་ལྟ་བུའི་མིག་འབྲས་ནི། །འབྲས་ཀྱི་གྲ་མ་འབྲས་ཁྱབ་ཡིན། །གྲ་མ་བཅད་པ་གྲ་མ་ཚིག །བཅད་པ་ལྟར་སྣང་ན་བ་ཡིན། །རྨ་སྒོ་རྨ་བྱའི་མཇུག་སྒྲོ་འདྲ། །ཁར་བའི་མདོག་ཏུ་སྣང་བ་ཡིན། །གདུགས་འདྲ་བ་དོག་སྣ་ཚོགས་པ། །སྤྲིས་གཡོགས་གདུགས་ཅན་ཞེས་བྱའོ། །གཏར་ག་མི་བྱ་ཆམ་པ་དང༌། །ལུད་པ་ཅན་ནི་དབྱེ་མི་བྱ། །མ་ཞུ་སྔར་མ་སྐྱུགས་པ་དང༌། །རྣ་མིག་མགོ་གཟེར་ཅན་མི་དབྱེ། །དེ་ནས་ཐུན་མོང་དུས་སུ་ནི། །སྦྱང་བྱས་ཟས་ཟོས་པ་ལ་ནི། །ས་ཕྱོགས་གསལ་བར་སྔ་དྲོ་ནི། །སྨན་པ་པུས་མཉམ་ཁྲི་ལ་འདུག །ནད་པ་འདུག་ཅིང་བསྡམ་བྱས་ལ། །ཁ་ཡི་དབུགས་ཀྱིས་དུགས་བྱ་ཞིག །མཐེ་བོས་མིག་ནི་མཉེས་བྱས་ནས། །ནད་ནི་གཡོས་པར་མཐོང་པ་དག །མི་འགུལ་བར་ནི་མགོ་ནས་བཟུང༌། །རང་གི་སྣ་ལ་བལྟ་བཞིན་དུ། །ནག་པོ་སོར་ཕྱེད་མ་གཏོགས་ཤིང༌། །མིག་འགྲམ་བཞི་ཆ་དོར་བ་རུ། །མཛུབ་མོ་གུང་མོ་མཐེབ་མོ་ཡིས། །མིག་ཐུར་དམ་དུ་བཟུང་ནས་ནི། །རང་གྲུབ་བུ་གནས་འཕྲེད་དུ། །གཟུགས་ཤིང་གྱེན་མཉེ་དྲང་པོར་བྱས། །མིག་གཡོན་ལག་པ་གཡས་པས་དབུག །མིག་གཡས་ལག་པ་གཡོན་པས་དབུག །ལེགས་པར་ཕུག་ན་སྒྲ་འབྱུང་འགྱུར། །ནད་མེད་ཆུ་ནི་ཉུང་ཞིང་འབྱུང༌། །དེ་རྗེས་ནད་པ་སྤྲོ་བསྲིངས་ལ། །མིག་ཏུ་ནུ་ཞོ་བླུགས་པར་བྱ། །དེ་ནས་ཐུར་མའི་རྩེ་མོ་ཡིས། །གནོད་པ་མེད་པར་དལ་གྱིས་ནི། །མིག་གི་འབྲས་བུ་དབྱི་བྱས་ལ། །སྣ་ནས་ངལ་གྱིས་ཕུལ་བར་བྱ། །མིག་ན་གནས་པའི་བད་ཀན་ནི། །སྣ་ནས་བརྔུབས་པས་བསལ་བར་བྱ། །ནད་མི་འགུལ་བའམ་འགྱུར་ན་ནི། །མིག་གི་ཕྱི་རོལ་ནས་དུགས་བྱ། །དེ་ནས་གཟུགས་ནི་མཐོང་གྱུར་ནས། །ཐུར་
མ་རིམ་གྱིས་དབྱུང་བར་བྱ། །མར་ལ་སྦངས་པའི་རས་བལ་གཞུག །མིག་དཀྲིས་ནས་ནི་དེ་འོག་ཏུ། །དེ་ལས་ལོགས་ནི་ཅིག་ཤོས་དབབ། །གཉིས་ཀ་ཕྱེན་གན་རྐྱལ་བཞག །རླུང་མེད་མལ་དུ་མགོ་བོ་དང༌། །རྐང་བསྐུ་ཕན་པའི་ཟས་བསྟེན་བྱ། །སྦྲིད་པ་ལུད་པ་སྒྲེགས་པ་དང༌། །མཆི་ལ་མ་འདོར་དང་ཆུ་འཐུང་དང༌། །ཐུར་དུ་གཏོང་བ་ཁྲུས་བྱེད་དང༌། །སོང་ཤིང་འཆའ་བར་བྱེད་པ་དག །ཞག་བདུན་བར་དུ་སྤང་བྱ་ཞིང༌། །སྣུམ་འཐུང་ཆོ་ག་བཞིན་དུ་བསྡམ། །ཆུ་དྲོན་གྱིས་ནི་ཉེར་སྤྱོད། །ཅི་ནུས་སྨྱུང་བྱ་ན་གྱུར་ན། །མར་ཁུ་དྲོ་འཇམ་བླུགས་པར་བྱ། །ནས་ཆན་སླ་བ་འམ་ཐུག་པ་སྐ། །ཚ་གསུམ་སྐྱུ་རུ་ར་མར་སྦྱིན། །ཞག་གསུམ་ནས་ནི་དེ་བཀྲོལ་ལ། །རླུང་འཇོམས་པ་ཡི་སྨན་གྱི་ནི། །ཁུ་བ་མིག་ཏུ་བླུགས་པར་བྱ། །ཞག་བདུན་ནས་ནི་མིག་དེ་ཉིད། །རྣམ་པ་ཀུན་ཏུ་དགྲོལ་བར་བྱ། །ཇི་སྲིད་མི་གསལ་བརྟན་གྱུར་པ། །བསྡམས་ལ་འབད་དེ་གནས་པར་བྱ། །གཟུགས་ནི་ཕྲ་དང་འཚོར་བ་དག །མོད་ལ་བལྟ་བར་མི་བྱའོ། །དབུག་ཉེས་མི་མཐུན་ཟོས་པ་ལས། །སྐྲང་དང་ན་དང་དམར་ལ་སོགས། །མིག་ནད་གདུང་བ་འབྱུང་བར་འགྱུར། །ནད་ཚུལ་དེ་བཞིན་དེ་གསོ་བྱ། །ནད་དང་དམར་བཞི་བྱའི་ཕྱིར། །དཱུར་བ་ནས་དང་ཡུག་སྣམ་དང༌། །ཐལ་ཏྲེས་མར་དང་ལྡན་པ་ཡི། །ལྡེ་གུས་གདོད་ནི་བསྐུ་བར་བྱ། །དེ་བཞིན་ཏིལ་དང་ཡུངས་ཀར་བཅས། །ཁ་ལུང་ཁུ་བས་སྦྲུས་པའང་ཕན། །ཐལ་ཏྲེས་ལོ་མ་པ་ཡ་སྱ། །བཙོད་དང་ཤིང་མངར་ར་ཡི་ནི། །འོ་མར་སྦྱར་བའི་ལྡེ་གུ་ནི། །དྲོ་འཇམ་བདེ་བར་བྱེད་མཆོག་ཡིན། །སེང་ཕྲོམ་རྒྱམ་ཚ་རྒུན་འབྲུ་དང༌། །ཤིང་མངར་ར་ཡི་འོ་མར་བསྐོལ། །ཐིགས་པ་མིག་ཏུ་བླུགས་པ་ནི། །ན་དང་དམར་བ་འཇོམས་པར་བྱེད། །ཤིང་མངར་རུ་རྟ་ཨུཏྤལ། །རྒུན་འབྲུ་རྒྱ་སྐྱེགས་ཁ་རར་བཅས། །རླུང་འཇོམས་སྨན་བསྐོལ་འོ་མ་ནི། །མར་གྱི་བཞི་འགྱུར་བསྐོལ་བ་དང༌། །ཤུག་པ་ལ་སོགས་ལྡེ་གུས་བཏབ། །ལས་ཀུན་ལ་ནི་བསྔགས་པ་ཡིན། །དེས་མ་ཞིན་སྣུམ་ཆོས་དང༌། །དུགས་བྱས་གཏར་ག་གདབ་པར་བྱ། །གདུང་བའི་གསོ་བ་དག་ཀྱང་བྱ། །དབུག་འདྲུབ་མིག་སྨན་འཇམ་
པོ་བསྐུ། །ཏུ་པ་རིའི་རྩན་ལེ་ཤ །བ་བླ་སྐྱེར་པའི་ཁཎྜ་བསྐུ། །མིག་ཕྱེད་བུ་རམ་རི་ལུ་ནི། །ཆར་པའི་ཆུ་དང་བདར་བ་གཏང༌། །ཛཱ་ཏི་ད་བ་ཤི་རི་ཤ་།ཀརྐ་ཏ་སྲིང་གི་མེ་ཏོག །མུ་ཏིག་འབྲས་བུ་བཻཌཱུཪྻ། །ར་ཡི་འོ་མར་བཏགས་པ་ནི། །ཟངས་མའི་སྣོད་ལ་སླ་བར་བསྐུ། །ཞག་བདུན་ནས་བསྐོལ་སླར་ཡང་ནི། །འོ་མ་དང་བཏགས་ལྡེ་གུར་བྱས། །རི་ལུ་གྲིབ་མ་ལ་བསྐམས་པ། །མིག་བསྐུས་ཕྱེ་བ་མཐོང་བ་ནི། །གསལ་ཞིང་སྟོབས་ནི་སྐྱེད་པར་བྱེད། །བྱི་རུ་ལྡོང་རོས་ལིག་བུ་མིག །རྒྱ་མཚོའི་ལྦུ་བ་ན་ལེ་ཤམ། །སྣ་ནས་བཏང་བའི་སྨན་སྦྱར་ན། །བཤད་པའི་ཡོན་ཏན་མཚུངས་པར་བསྟན། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་བཅུ་བཞི་པའོ།། །།དེ་ནས་མིག་ནད་ཐམས་ཅད་ཀྱི་ནད་ཀྱི་དམིགས་བརྟག་པ་བཤད་པར་བྱའོ། །རླུང་གིས་མིག་ནད་མཆི་མ་འཛག །སྣ་རྒྱས་ཅུང་ཟད་སྐྲངས་པ་དང༌། །མུར་འགྲམ་དཔྲལ་མིག་སྨིན་མ་ཁ། །ན་ཞིང་ཟུག་ལ་འཕར་བ་དང༌། །རྡུམ་སྐམ་ཞིང་མཆི་མ་གྲང༌། །སླ་ཉུང་ན་བ་ལྡང་དུབ་ཅན། །འབྱེད་དང་འཛུམས་པར་དཀའ་བ་དང༌། །སྲིན་བུ་འགྲོ་བ་སྙམ་དུ་སེམས། །མིག་ནི་བུས་པ་ལྟ་བུར་སྣང༌། །ཟུག་རྔུ་ཕྲ་མོས་ཁྱབ་སྙམ་བྱེད། །སྣུམ་དང་དྲོ་བས་ཉེར་ཞིར་འགྱུར། །མཆི་མ་འཛག་པ་ཞེས་བྱའོ། །དེ་མ་བཅོས་ན་གདུང་བར་འགྱུར། །རྣ་བ་སྒྲ་འབྱུང་མགོ་འཁོར་དང༌། །དཔྲལ་བ་མིག་དང་སྨིན་མ་སོགས། །གཙུབ་ཤིང་གིས་ནི་གཙུབས་སྙམ་བྱེད། །དེ་ཡང་བག་མེད་ཡལ་བར་བོར། །གདུང་བས་བཅོམ་གྱུར་ནད་དེ་ཡིས། །སྣ་ཚོགས་ཚུལ་ནི་འབྱུང་འགྱུར་ཞིང༌། །མིག་མཐོང་ཉམས་བྱེད་རྨ་འབྱུང་འགྱུར། །མུར་འགྲམ་ཁ་དང་མཇིང་པ་ལས། །རླུང་ནི་གཞན་དུ་འཇུག་འགྱུར་ཞིང༌། །མི་བཟད་ན་ལ་གནག་པ་དང༌། །དམར་ཞིང་སྐྲངས་ལ་མིག་མི་སྡུག །ཞུམ་ཞིང་ཀུན་ནས་མཆི་མ་འཛག །དེ་ནི་རླུང་གིས་གཞན་གྱུར་ཡིན། །དེ་བཞིན་མིག་ནི་ཡོན་པོ་དང༌། །ཆུང་བ་རླུང་གིས་ཕྱིན་ཅི་ལོག །མཁྲིས་པའི་མཆི་འཛག་མཚན་མིན། །ཚ་གྲང་དུ་བ་འབྱུང་སྙམ་སེམས། །མིག་ཆུའི་ཕྱི་རོལ་གང་པ་དང༌། །ནང་ན་རྣག་འདྲུལ་མཆི་མ་ཚ། །སེར་ཞིང་མིག་དམར་
སེར་པོར་མཐོང༌། །རྨ་ལ་ལན་ཚྭས་བཏབ་སྙམ་སེམས། །མེ་མདག་གཏོར་བ་འདྲ་བ་དང༌། །མཆེར་པའི་གོང་བུ་ལྟ་བུར་སྣང༌། །མིག་ནད་གདུང་བར་གྱུར་པ་ཡིན། །བད་ཀན་ལས་གྱུར་མཆི་འཛག་ནི། །ཚོར་བ་མེད་སྐྲངས་རབ་ཏུ་གཡའ། །གཤེར་ཞིང་སྣུམ་ལ་ཤས་ཆེར་དཀར། །མིག་གདུང་སྤྱི་བག་འཛག་པ་ཡིན། །གདུང་བ་དེས་ནི་ནག་པོ་དམའ། །འབྲས་བུ་དཀར་པོ་མཐོ་བ་དང༌། །ཆམ་པས་ཐེབས་ཤིང་སྣ་རྒྱས་ལ། །མིག་ནི་རྡུལ་གྱིས་གང་སྙམ་བྱེད། །ཁྲག་གྱུར་དམར་རིས་མིག་ཏུ་དམར། །མིག་འབྲས་དཀར་པོ་དམར་བ་དང༌། །ཁྲག་འཛག་དམར་པོ་མཐོང་བ་དང༌། །མཁྲིས་པའི་མཆི་འཛག་མཚན་ཉིད་ཡིན། །གདུང་བ་མིག་ནི་མཐའ་དམར་ཞིང༌། །ཕྱུང་བ་དང་ནི་མཚུངས་པར་ན། །མེ་ཏོག་བན་དུ་ཀ་ལྟར་དམར། །ཤིན་ཏུ་ན་ཞིང་རེག་མི་བཟོད། །ལུང་ཏང་ཁྲག་ཏུ་ནུབ་པ་འདྲ། །གནག་ཅིང་མེ་ལྟར་སྣང་བ་ཡིན། །གདུང་བ་རང་གི་ཇི་བཞིན་དུ། །ཐམས་ཅད་འཛག་པ་ལས་ལྷག་ན། །མུར་འགྲམ་སོ་དང་མཁུར་ཚོས་དང༌། །མགོ་བོ་ལྷག་པར་ན་བར་བྱེད། །རླུང་མཁྲིས་ཤས་ཆེར་དྲུད་སྙམ་སེམས། །ཟུག་ཅིང་ན་ལ་ཕུལ་སྙམ་སེམས། །ཤིན་ཏུ་རྩུབ་ཅིང་མིག་མཆུ་མིག །འཛུམས་དང་འབྱེད་པར་དཀའ་བ་དང༌། །ན་ཞིང་སྐམས་པར་གྱུར་པ་དང༌། །གྲང་འདོད་སྨིན་ཞིང་སྐམ་དང་བཅས། །མིག་སྐམ་སྨིན་པ་ཞེས་བྱའོ། །ནད་གཞི་གསུམ་ནི་ཁྲག་བཅས་ལ། །སྐྲང་འགྱུར་དེ་ནི་རབ་སྐྲངས་ཤིང༌། །ན་དང་ཚ་དང་འཛག་དང་བཅས། །ཨུ་དུམ་བཱ་རའི་འབྲས་སྨིན་འདྲ། །མིག་འབྲས་དཀར་པོར་འབྱུང་བར་འགྱུར། །མཆི་མ་གྲང་ཞིང་དྲོ་བ་དང༌། །སྤྱི་བག་སྐ་སླ་རེས་ཀྱིས་འབྱུང༌། །སྐྲངས་ཆུང་ཅུང་ཟད་སྐྲང་ཞེས་བྱ། །དེ་བཞིན་མཚན་ཉིད་གཞན་གྱིས་སྨིན། །མིག་སྨིན་པས་ཉེན་སྐྲང་པ་ཡི། །རྩོམ་ཆེ་མཆི་མ་རྙོག་ཅན་འཛག །བད་ཀན་གྱིས་བསྒོས་མིག་འབྲས་ནི། །དཀར་པོ་དམར་ཞིང་འདྲུལ་བ་དང༌། །ཚ་ཞིང་མཐོང་བ་ཉམས་པ་དང༌། །ནད་ནི་མལ་ན་མི་གནས་ཡིན། ཁྲག་མཁྲིས་ཤས་ཆེའི་ནད་ཀྱིས་ནི་།ཟས་ཀྱི་དངས་མ་སྐྱུར་པོར་འགྱུར། །མིག་གི་རྩེར་ནི་སོང་ནས་ནི། །མིག་ནི་དམར་པོར་བྱེད་པར་འགྱུར། །སྐྲང་ཚ་
སྨིན་ཞིང་མཆི་མ་འཛག །ཤིན་ཏུ་ལང་ལོང་པོར་མཐོང་ན། །སྐྱུར་གྱིས་བསྐྱེད་པའི་ནད་ཅེས་བྱ། །དེ་ལྟར་ཀུན་གཏོགས་ནད་བཅུ་དྲུག །དེ་ལ་གདུང་བས་བཅོམ་པ་ནི། །མིག་སྨིན་བཅས་པ་སྤང་བར་བྱ། །རླུང་གྱུར་ཞག་ལྔས་མིག་ལ་གནོད་པར་བྱེད། །བད་ཀན་ལས་གྱུར་གདུང་བས་ཞག་བདུན་གྱིས། །དེ་བཞིན་ཁྲག་གྱུར་ཞག་གསུམ་གྱིས་འཇོམས་བྱེད། །མཁྲིས་གྱུར་འཕྲལ་དུ་ལོག་སྤྱོད་ཀྱིས་གནོད་བྱེད། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་བཅོ་ལྔ་པའོ།། །།དེ་ནས་མིག་ནད་ཐམས་ཅད་གསོ་བ་བཤད་པར་བྱའོ། །མཆི་འཛག་སྔར་བྱུང་ཚུལ་ཉིད་ལ། །མཁུར་བཀང་སྣ་སྨན་རྣོན་པོ་གཏང༌། །རླུང་འཁྲུགས་མ་གཏོགས་ནད་གཞན་ལ། །སྨྱུང་བ་དག་ཀྱང་བྱ་བ་ཡིན། །ཚ་དང་དམར་དང་གོས་པ་དང༌། །སྐྲང་སོགས་ཞི་ཕྱིར་ཀུན་ལ་ནི། །སུག་སྨེལ་གནྡྷ་བྷ་དྲ་དང༌། །ན་ལེ་ཤམ་དང་བཙག་ཡུག་སྣམ། །ལྡེ་གུར་བྱས་པས་བསྐུ་བར་བྱ། །རླུང་གྱུར་རྒྱམ་ཚ་སྐྱེར་ཁཎྜ། །ཤིང་མངར་རྒྱ་སྤོས་ཙནྡན་ནམ། །རྒྱམ་ཚ་དོང་གྲ་སྐྱེར་ཁཎྜ། །མར་གྱི་ཉིང་ཁུ་བདར་བའམ། །ཡང་ན་སེང་ཕྲོམ་སྦྱར་བ་གཏང༌། །ཁྲག་མཁྲིས་གྱུར་ལ་སྤང་སྤོས་དང༌། །ཤུག་པ་ཤིང་མངར་ར་མཉེ་བ། །བད་ཀན་ལས་གྱུར་པྲི་ཡངྐུ། །ལྡོང་རོས་སྦྲང་རྩི་སྦྱར་བས་བསྐུ། །འདུས་པ་ལས་གྱུར་ཀུན་གྱིས་བསྐུ། །ན་ལེ་ཤམ་ནི་དཀར་པོ་ཆ་གཅིག་དང༌། །ལྡོང་རོས་ཆ་བཞི་སེང་ཕྲོམ་ཆ་བཅུ་དྲུག །ཞིབ་ཏུ་བཏགས་ཏེ་རས་གཙང་ཕུར་མས་གཏུམས། །ནད་ལྡང་མོད་ལ་མིག་ཏུ་གདབ་པར་བྱ། །རྒྱ་སྲན་ནག་པོ་བ་ལྕི་རའི་རིལ་ཁུ། །ལེགས་བཙོས་སེན་མོས་ཤུན་པ་བཤུས་གྱུར་པ། །དེ་ཡིས་མཚན་མོ་ལན་ཅིག་བསྐུས་པ་ཡིས། །མིག་ནད་འཁྲུགས་པ་མྱུར་དུ་ཞི་བར་བྱེད། །ཤུ་ཏི་ཤིང་མངར་སྤངས་མ་ཨ་རུ་ར། །ཞིབ་བཏགས་རས་ཀྱི་ཐུམ་པོ་ལྷོད་པར་བཅིང༌། །ཟངས་ཀྱི་སྣོད་དུ་སྐྱུར་རྩབས་ནང་དུ་བཅུག །མིག་ཏུ་བཞག་ན་མིག་ནད་སྣ་ཚོགས་སེལ། །སྐྱེར་པ་སྲང་གཅིག་ཆུ་བྲེ་ཕྱེད་དུ་ཡང༌། །ཁུ་བ་བརྒྱད་ཆ་ལུས་པར་སྦྲང་རྩི་བཏབ། །དེ་བཞིན་མིག་ཏུ་བསྐུས་པར་གྱུར་ན་ནི། །ནད་གཞི་ཐམས་ཅད་འཁྲུགས་པའི་མིག་ནད་སེལ། །
ཤི་ཀྲུའི་ལོ་མའི་ཁུ་བ་སྦྲང་རྩིར་བཅས། །མིག་ཏུ་བླུགས་ན་རླུང་དང་མཁྲིས་པ་དང༌། བད་ཀན་འདུས་པ་ལས་གྱུར་མིག་ནད་རྣམས། །མིག་ནད་མང་པོ་དག་ཀྱང་མྱུར་དུ་སེལ། །ཨེ་རཎྜ་ནི་གཞོན་ནུའི་ལོ་མ་དང༌། །རྩ་བ་བརྡུངས་ཏེ་ར་ཡི་འོ་མར་བསྐོལ། །བླུགས་སམ་ཟན་དྲོན་མིག་ཏུ་གླན་པ་ཡིས། །རླུང་གྱུར་མཆི་འཛག་ནད་ནི་མོད་ལ་འཇོམས། །རླུང་གྱུར་བ་ལ་བིལ་བ་སྩོགས། །བསྐོལ་བའི་སྨན་ཐིགས་བླུགས་པའམ། །ཨེ་རཎྜའི་རྩ་བྲི་ཧ་ཏི། །མ་དུ་ཤི་ཀྲུ་དྲོ་འཇམ་བླུགས། །ཤ་རང་གཥྚ་བ་ལ་ཀ །རྒྱ་སྤོས་ཨུ་དུམ་ཝཱརའི་ཤུན། །ཆུ་དང་འོ་མ་བཅས་བསྐོལ་བའི། །ཐིགས་བླུགས་གཟེར་ནི་སེལ་མཆོག་ཡིན། །བཙོང་དང་སྐྱེར་པ་རྒྱ་སྐྱེགས་དང༌། །རྒུན་འབྲུམ་ཨུཏྤལ་ཤིང་མངར་གཉིས། །བསྐོལ་ཏེ་བསྒྲངས་པར་ཁར་གདབ། །མིག་བླུགས་ཁྲག་མཁྲིས་མིག་ནད་སེལ། །ཤིང་མངར་ཀ་ཤེ་རུའི་ཕྱེ་མ། །རས་མ་འཇམ་པོས་ལྷོད་པར་བཅིང༌། །ཆར་ཆུའི་ནང་དུ་སྤངས་པ་ནི། །ཁྲག་མཁྲིས་ལས་གྱུར་མཆི་འཛག་སེལ། །ཤིང་མངར་སྐྱེར་པ་སྟག་ཚེར་བ། །ཐུམ་པོ་ནུ་ཞོ་ཁ་རར་བཅས། །ར་ཡི་འོ་མར་སྤངས་པ་བླུགས། །ཚ་ན་མདོག་དམར་མཆི་འཛག་སེལ། །སེང་ཕྲོམ་དཀར་པོ་ཤིང་མངར་བཅས། །མར་བརྡོས་ལེགས་པར་བཏགས་པ་ནི། །རས་ལ་གཏུམས་ཏེ་ནུ་ཞོར་མཉེ། །ཁྲག་མཁྲིས་སྣད་པའི་མིག་ནད་སེལ། །དོང་གྲ་ནི་མ་པ་འབྲས་བུ་གསུམ། །སེང་ཕྲོམ་བ་ཤ་ཀའི་ཁུ་བ། །དྲོ་འཇམ་བླུགས་པས་བད་ཀན་སེལ། །འདུས་པར་འདི་དག་བསྲེས་པས་ཕན། །རླུང་ལ་མར་ནི་རྙིང་པ་དང༌། །མཁྲིས་པར་ཁ་རར་བཅས་པ་དང༌། །བད་ཀན་ལ་ནི་ཚ་བ་གསུམ། །བསྐོལ་དང་ཐལ་སྨན་བཅས་པ་བླུད། །དེ་འོག་ཁྲག་ཀྱང་དབྱུང་བ་དང༌། །དེ་ནས་སྣུམ་གྱུར་བཀྲུ་སྨན་གཏང༌། །དྲོ་བས་ཚ་སྟེ་གཟེར་བ་ལ། །སྐམ་སའི་སྲོག་ཆགས་ཤ་བཏགས་པས། །མགོ་དང་གདོང་བསྐུ་ཚ་བ་ལ། །འོམ་མར་བཅས་གྲང་མོས་བསྐུ། །རབ་རིབ་གསོ་བའི་ཆོ་ག་ཡང༌། །བརྟགས་ཏེ་ཇི་བཞིན་གསོ་བར་བྱ། །ཆོ་ག་འདི་དག་ཐམས་ཅད་ནི། །གདུང་བ་ལ་སོགས་རྣམས་ལ་ཕན། །གདུང་བ་ཡོང་ཡེ་མ་ཞི་ན། །སྨིན་མའི་སྟེང་དུ་མེ་བཙའ་གདབ། །
བ་ཞོ་སྣུམ་མེད་ཀྱིས་དངུལ་སྣོད། །བྱུགས་ཏེ་སྔོན་པོར་གྱུར་པ་དང༌། །སྐམས་ནས་ཞོ་ག་ཆུ་རི་ལུར། །བྱས་པས་རླུང་གྱུར་མིག་ནད་འཇོམས། །ཛཱ་ཏིའི་མེ་ཏོག་ཁ་འབུས་དུང༌། །ཤིང་མངར་བ་ལ་འབྲས་བུ་གསུམ། །ཆར་ཆུ་དང་བཏགས་རི་ལུར་བྱས། །ཁྲག་མཁྲིས་ལས་གྱུར་མིག་ནད་སེལ། །རྒྱམ་ཚ་འབྲས་བུ་ཚ་བ་གསུམ། །རྒྱ་མཚོའི་ལྦུ་བ་དུང་སྙིང་པོ། །ཨེ་ལ་བ་ལུ་སྲ་རྩི་པོག །རི་ལུས་བད་ཀན་མིག་ནད་སེལ། །ཤིང་མངར་པྲ་པུཎྜ་རཱི་ཀ །སྐྱེར་པ་སྲང་ནི་བརྒྱད་བརྒྱད་དག །ཆུ་བྲེ་བཅུ་དྲུག་ནང་བསྐོལ་བཙགས། །སླར་བསྐོལ་སྐ་བར་གྱུར་པ་ནི། །ར་གན་དུད་པ་སྲང་བཅུ་དང༌། །ན་ལེ་ཤམ་ཕྱེ་ཞོ་གཉིས་གཞུག །དེ་ལ་རི་ལུའམ་ཕྱེ་མར་བྱས། །བསྐུས་ན་མཆི་འཛག་ཐམས་ཅད་དང༌། །དམར་ན་དྲུད་པ་བྱེད་སྙམ་འཇོམས། །འཕྲལ་དུ་མིག་ནི་གསལ་བར་བྱེད། །སྦྱོར་འདི་ཕྱུག་བདག་ཅེས་བྱ་སྟེ། །སྨན་པ་རྣམས་ཀྱི་གསང་བ་མཆོག །མིག་སྨིན་སྐམ་པ་མར་བླུད་ཅིང༌། །འཚོ་བྱེད་ཀྱི་ནི་སྨན་མར་ནི། །བླུད་ཅིང་མིག་ནི་བརྟ་བྱ་དང༌། །ཏིལ་མར་ཆུང་ངུའི་སྣ་སྨན་གཏང༌། །འདི་ལ་འོ་མ་རྒྱམ་ཚར་བཅས། །དྲོ་འཇམ་ཐིགས་པ་བླུགས་པའང་ཕན། །བཅའ་སྒ་བུད་མེད་ནུ་ཞོར་བཏགས། །མར་སྦྱར་མིག་ཏུ་བསྐུས་ནའང་ཕན། །ཡང་ན་རླན་ཅན་ཤ་ཡི་ཞག །དོང་གྲ་རྒྱམ་ཚ་ཅུང་ཟད་བཏབ། །སྐྲ་ནི་མར་བསྐུས་མེ་ལོང་གིས། །མཉེས་ཏེ་ཁམ་ཕོར་ཁ་སྦྱར་བཅུག །བསྲེགས་ཏེ་ལྕགས་སྣོད་མར་དང་བཅས། །སྣག་ཚ་དེ་ནི་མིག་སྨན་མཆོག །སྐྲང་བཅས་ཅུང་ཟད་སྐྲངས་པ་ལ། །སྣུམ་ཆོས་བྱས་ཏེ་གཏར་ག་གདབ། །སྣུམ་བྱས་རྒུན་འབྲུམ་ཨ་རུ་ར། །དུར་བྱིད་མར་བཅས་བཀྲུ་སྨན་གཏང༌། །སེང་ཕྲོམ་དཀར་པོ་མར་ལ་བརྡོས། །ཕྱེ་མར་བྱས་ཏེ་རས་ལ་གཏུམས། །ཆུ་དྲོན་ལ་མཉེས་ཐིགས་པ་བླུགས། །གཟེར་འཇོམས་པ་ཡི་མཆོག་ཡིན་ནོ། །སྐྱེར་པ་པྲ་པུཎྜ་རཱི་ཀ །བསྐོལ་བའི་ཐིགས་པ་བླུགས་པས་ཕན། །མཆི་འཛག་ན་ཞིང་དྲུད་སྙམ་བྱེད། །སྦྱར་སྨན་འདི་དག་གཏང་བར་བྱ། །ལྕགས་ཀྱི་སྣོད་དུ་ཟངས་མ་བ་གཅིན་སྦྱར། །མར་བདུག་མིག་བསྐུས་གཟེར་ནི་འཇོམས་པར་བྱེད། །
ཟངས་མའི་སྣོད་དུ་བ་ཞོའི་སྤྲིས་མ་བདར། །རྒྱམ་ཚ་པི་པི་ལིང་དང་བཅས་པ་མཆོག །ཟངས་མའི་སྣོད་དུ་ནུ་ཞོ་དུང་བདར་ལ། །དོང་གའི་ལོ་མ་མར་བཅས་དུད་པས་བདུག །སྦྱར་སྨན་ཞེས་བྱ་མིག་ཏུ་བསྐུས་ན་ནི། །དྲུད་སྙམ་བྱེད་སོགས་མི་བཟད་ནད་མྱུར་སེལ། །ཨུ་དུམ་ཝཱ་རའི་འབྲས་བུ་ནི། །ལྕགས་སྣོད་ནང་དུ་ནུ་ཞོ་བདར། །ཤ་མའི་ལོ་མ་མར་དུད་བདུག །མཆི་འཛག་གཟེར་དམར་དྲུད་པ་འཇོམས། །ཤི་ཀྲུའི་ལོ་མའི་ཁུ་བ་ནི། །ཟངས་མ་གཉིས་ཀྱི་བར་དུ་བདར། །མར་དུད་བདུགས་པས་སྐྲངས་པ་དང༌། །གཡའ་དང་མཆི་འཛག་ནད་རྣམས་འཇོམས། །ཏིལ་གྱི་ཆུ་དང་ཁར་བ་ནི། །ཁམ་ཕོར་བདར་ཏེ་ནིམ་པ་ཡི། །འོ་མ་མར་བསྐོལ་དུད་པས་བདུག །གཟེར་རམ་མཆི་འཛག་དྲུད་སྙམ་སེལ། །སྦྱར་སྨན་གྱིས་ནི་མིག་བསྐུས་ཏེ། །སྨན་ཤུགས་ཟུག་གཟེར་དང་བྲལ་ནས། །བུད་མེད་ནུ་ཞོའི་ཐིགས་པ་བླུགས། །ལན་གསུམ་ཕན་ཆད་དེ་མི་བསྐུ། །བལ་བུའི་ལོ་མ་པི་པི་ལིང༌། །རྒྱ་སྤོས་ལྕགས་ཕྱེ་སྟང་ཟིལ་དང༌། ཛཱ་ཏི་ཁ་འབུས་ནག་ཚུར་དང༌། །རྒྱམ་ཚ་བ་གཅིན་བཏགས་པ་ཡི། །ལྡེ་གུས་ཟངས་ཀྱི་སྣོད་བསྐུས་ལ། །ཞག་བདུན་བཞག་སྟེ་བ་གཅིན་དང༌། །བཏགས་ཏེ་རི་ལུར་བྱས་ནས་ནི། །དེ་འོག་གྲིབ་མ་ལ་བསྐམས་ཏེ། །བུད་མེད་ནུ་ཞོ་དང་བདར་བསྐུ། །དྲུད་སྙམ་བྱེད་དང་མཆི་མ་འཛག །སྐྲང་དང་གཡའ་བ་སེལ་བར་བྱེད། །ཀཎྜ་ཀ་རིའི་ཤུན་པ་དང༌། །ཤིང་མངར་ཟངས་མའི་ཕྱེ་མ་ནི། །ར་ཡི་འོ་མས་ལྡེ་གུར་བྱས། །ཤ་མི་སྐྱུ་རུ་རའི་ལོ་མ། །མར་གྱིས་བསྐུས་པའི་དུད་པས་བདུག །བསྐུས་ན་སྐྲངས་དང་གཟེར་ནད་སེལ། །སྐྱུར་གྱིས་བསྐྱེད་ལ་མཁྲིས་པ་ཡི། །མཆི་མ་འཛག་པའི་ཆོ་གས་གསོ། །བད་ཀན་ཁྲག་མཁྲིས་ཀྱིས་བསྐྱེད་དང༌། །འདུས་པས་བསྐྱེད་དང་སྒྲ་ངན་དང༌། །རྫི་མ་འགགས་དང་མིག་སྨིན་སྐམ། །རྣག་གི་ཆུ་སེར་པདྨའི་རྩ། །མིག་མཆུའི་ཤ་དང་སྐྱུར་སྐྱེད་ཅུང༌། །མཆི་འཛག་གདུང་བ་རླུང་མ་གཏོགས། །བཅྭ་བརྒྱད་པོ་དག་ཆག་པར་བཤད། ཡུན་རིང་དུ་ནི་ན་བ་ཡིན། །འདི་དག་གསོ་བ་སོ་སོ་ཡི། །ལེའུའི་ནང་དུ་བཤད་པ་ཡིན། །དེའི་འོག་མིག་ཚག་
སྤྱི་ཡི་བཤད། །དེ་ནས་མིག་ཚག་ནད་པ་ནི། །སྣུམ་ཆོས་སློན་ནི་བྱས་ནས་ཀྱང༌། །གཏར་ག་གདབ་སྟེ་ཁྲག་དབྱུང་བྱ། །བཀྲུ་སྨན་བཏང་ཞིང་མིག་ཆུ་ནི། །དག་པར་གྱུར་གྱི་བར་དུ་བཞར། །སྤངས་མ་སྲང་གཅིག་ན་ལེ་ཤམ། །དཀར་པོ་སྲང་ནི་ཉི་ཤུ་དང༌། །སྐྱུར་རྩབས་སྲང་ནི་སུམ་ཅུ་དག །བཏགས་ཏེ་ཟངས་མའི་སྣོད་དུ་གཞུག །ལོ་མང་ལོན་པའི་མིག་ཚག་པའམ། །ཆུ་སེར་འཛག་སོགས་ཞི་བར་བྱེད། །གོས་དང་ཚ་དང་མཆི་མ་འཛག །གཡའ་སྐྲངས་དེ་བླུགས་པ་ཡིས་སེལ། །བྱེའུ་རུག་ཀ་རཉྫའི་ས་བོན། །ཛཱ་ཏིའི་མེ་ཏོག་ཁ་འབུས་པ། བརྡུངས་ཏེ་བསྐོལ་ལ་བཙགས་ནས་ནི། །ཁུ་བར་བྱས་པ་དེ་དང་ནི། །སྟང་ཟིལ་དང་སྦྱར་མིག་སྨན་ནི། །མིག་ཚག་གཡའ་དང་ཆུ་སེར་འཛག །གཡའ་ཞིང་འདྲུལ་བ་སེལ་མཆོག་ཡིན། །སྐྱེར་པའི་ཁཎྜ་སྲ་རྩི་པོག །ར་གན་དུད་པ་ལྡོང་རོས་དང༌། །རྒྱ་མཚོའི་ལྦུ་བ་རྒྱམ་ཚ་དང༌། །ན་ལེ་ཤམ་དང་བཙག་ཡུག་སྣམ། །སྦྲང་རྩི་བཏགས་པའི་མིག་སྨན་ནི། །མིག་ཚག་འདྲུལ་གཡའ་སེལ་བར་བྱེད། །རྒྱ་སྤོས་ཨ་རུ་རའི་ཁུ་བར། །དངུལ་རྡོ་བཏགས་པས་མིག་ཚག་སེལ། །ཐང་ཤིང་སྣུམ་དང་བཅས་པ་ནི། །ར་གཅིན་ནང་དུ་སྤངས་པའང་ཕན། །རྒྱམ་ཚ་འབྲས་གསུམ་པི་པི་ལིང༌། །དུང་གི་སྙིང་པོ་པུ་ཙེ་ཤེལ། །ཟངས་མའི་ཕྱེ་མ་བཅས་རི་ལུ། །མིག་ཚག་ལིང་ཏོག་སེལ་བར་བྱེད། །ཡང་ན་ནག་ཚུར་ཕྱེ་མ་ནི། །བྱེའུ་རུག་པའི་ཁུ་བར་སྤངས། །ཟངས་མའི་སྣོད་དུ་ཞག་བཅུ་བཞག །དེ་ཡིས་མིག་ཚག་ཆུ་སེར་འཛག །རྫི་མ་འབྱི་བ་སེལ་བར་བྱེད། །ལྡོང་རོས་དང་ནི་སྐྱེར་པའི་ཁཎྜ་དང༌། །དེ་མཉམ་ཟངས་མའི་ཕྱེ་མ་ཞིབ་ཏུ་བཏགས། །ཕྱེ་མ་མིག་སྨན་ཐུར་མ་གཅིག་གིས་ཀྱང༌། །རྫི་མ་བསྐྱེད་ཅིང་མིག་ཚག་འདིས་སེལ་བྱེད། །རྒྱ་སྐྱེགས་བྲིང་ག་སྐྱེར་པ་ནི་རྒུནྠི། །ཁུ་བར་རས་ཀྱི་དུམ་བུ་ལན་བདུན་སྤངས། །སྡོང་བུ་མར་མེ་དེ་བུས་ལས་བྱུང་བའི། །སྣག་ཚ་མིག་ཚག་སེལ་བར་བྱེད་མཆོག་ཡིན། །མིག་མཆུ་མང་དུ་ཞལ་ཞལ་བྱ། །དེ་བཞིན་གཏར་ག་བྱ་བ་དང༌། །བཀྲུ་སྨན་ཡང་ཡང་བྱ་བ་ནི། །མིག་ཚག་ཅན་གྱི་ནད་པས་བསྟེན། །རྣག་གི་ཆུ་འཛག་མ་ཞིའི་མཐར། །ཐུར་
མ་ཕྲ་མོས་བསྲེག་པར་བྱ། །དེ་ལྟར་མིག་ནད་དགུ་བཅུ་བཞི། །ནད་གཞི་མཚན་ཉིད་གསོ་བ་དག །ཕན་ཚུན་འདྲེས་པ་མེད་པར་ནི། །མ་ལུས་པར་ནི་བཤད་པ་ཡིན། །སྐྱེས་བུ་ནད་མེད་པ་ཡིས་ཀྱང༌། །ནས་དང་གྲོ་རྙིང་དྲུག་ཅུ་པ་།སཱ་ལུ་ཁྲེ་རྒོད་རྙིད་པ་དང། །མུངྒ་ལ་སོགས་བད་མཁྲིས་འཇོམས། །ཞུན་མར་མང་དུ་བཏབ་པ་དང༌། །ཚོད་མ་དེ་འདྲ་སྐམ་ས་ཡི། །ཤ་དང་སེ་འབྲུ་ཁར་དཀར། །བསྟེན་ཞིང་ཆར་ཆུ་བཏུང་བ་དང༌། །གདུགས་བཅང་ལྷམ་ནི་བགོ་བ་དང༌། །ཆོ་ག་བཞིན་དུ་ནད་སྦྱང་བ། །རྣམ་པ་ཀུན་ཏུ་བསྟེན་པར་བྱ། ཤུགས་བཀག་པ་དང་མ་ཞུར་ཟ། །ཕྱེད་ཞུ་ཟ་དང་རྟུག་འགགས་ཟ། །ཚ་དང་ཕྱི་ས་འགགས་བྱེད་པའི། །ཟས་དང་སྤྱོད་ལམ་སྨན་ཀུན་སྤང༌། །རྐང་པ་གཉིས་ཀྱི་དབུས་ན་རྩ་སྦོམ་པོ། །གཉིས་གནས་དེ་ཡིས་མིག་ནི་ནང་དུ་ཁྱབ། །དེ་བསྐུས་བྱུག་དང་དྲིལ་བ་ལ་སོགས་པ། །རྐང་པར་བྱས་ན་མིག་ཏུ་འགྲོ་བར་འགྱུར། །དྲི་མ་ཚ་དང་སྣད་པ་ལ་སོགས་པས། །དེ་གནོད་གྱུར་ན་མིག་ལ་གནོད་པར་འགྱུར། །དེ་བས་མིག་ལ་ཕན་འདོད་ལྷམ་དང་ནི། །བསྐུ་དང་དྲིལ་དང་བྱུག་པ་སོགས་བསྟེན་བྱ། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་བཅུ་དྲུག་པའོ།། །།དེ་ནས་རྣ་བའི་ནད་ཀྱི་དམིགས་ཤེས་པ་བཤད་པར་བྱའོ། །ཆམ་པས་བཏབ་དང་ཆུ་ལ་རྩེ། །རྣ་བ་བྲུད་པས་རླུང་འཁྲུགས་ཤིང༌། །སྒྲ་ཡི་ལོག་པའི་སྦྱོར་བ་དང༌། །ལྡང་བའི་རྒྱུ་གཞན་གྱིས་འཁྲུགས་ནས། །རྣ་བའི་རྩར་ནི་རླུང་ཞུགས་ཏེ། །རྣ་བའི་བུ་གར་ཤུགས་དྲག་གཟེར། །གཞོགས་ཕྱེད་ན་ཞིང་རེངས་པ་དང༌། །གྲང་བ་དག་ནི་མི་འཕྲོད་ཅིང༌། །རིང་ནས་རྣགས་ཤིང་སྨིན་ནས་ཀྱང༌། །ཆུ་སེར་ཅུང་ཟད་འཛག་པར་བྱེད། །རྒྱུ་མེད་རྣ་བ་སྟོང་སྙམ་སེམས། །ཞུམ་དང་རྒྱས་པ་སྙམ་དུ་བྱེད། །མཁྲིས་གྱུར་ཚ་བཅས་ན་ཞིང་གཟེར། །གྲང་འདོད་སྐྲང་ཞིང་རིམས་ཀྱིས་འདེབས། །མྱུར་དུ་སྨིན་ཞིང་སྨིན་ནས་ཀྱང༌། །ཆུ་སེར་སེར་པོར་འཛག་པར་བྱེད། །ཆུ་སེར་དེས་ནི་གང་གང་དུ། །རེག་པ་དེ་དང་དེར་རྣགས་འགྱུར། །བད་ཀན་ལས་གྱུར་མགོ་འགྲམ་པ། །མགྲིན་པ་ལྕི་ཞིང་ནད་ཤུགས་དལ། །གཡའ་ཞིང་
གྲང་ལ་དྲོ་བ་འདོད། །སྨིན་ནས་རྣག་དཀར་སྐ་བ་འཛག །སྣད་ལ་སོགས་པས་གནོད་གྱུར་པ། །རྣ་བ་གཟེར་བར་བྱེད་པར་འགྱུར། །ཁྲག་དང་མཁྲིས་པ་ལྟར་ན་དང༌། །མཚན་ཉིད་ཅུང་ཟད་ལྷག་པ་ཡིན། །ནད་གཞི་འདུས་པས་གཟེར་བ་དང༌། །སྐྲངས་བཅས་རིམས་འདེབས་མི་བཟད་ན། །རེས་ཀྱིས་གྲང་དང་དྲོ་བ་འདོད། །འོན་པ་ལྟ་བུ་ཉིད་དུ་འགྱུར། །སྨིན་ནས་རྣག་ནི་དཀར་དང་ནག །དམར་དང་སྐ་བ་འཛག་པར་འགྱུར། །སྒྲ་ཐོས་རྩར་ནི་རླུང་ཞུགས་པ། །རྒྱུ་མེད་པར་ནི་སྣ་ཚོགས་པའི། །སྒྲ་ནི་ཡང་དང་ཡང་དུ་ཐོས། །དེ་ནི་རྣ་བའི་སྒྲ་ཞེས་བྱ། །རླུང་ནི་བད་ཀན་དང་འདྲེས་པའི། །རྣ་སྒྲ་ཡལ་བར་བོར་ན་ནི། །སྐད་གསང་མཐོན་པོར་སྨྲས་པ་ཐོས། །རིམ་གྱིས་འོན་པ་ཉིད་དུ་འགྱུར། །རླུང་གིས་བད་ཀན་བསྐམས་གྱུར་པས། །དེ་ལ་རྣ་བར་གོས་གྱུར་ན། །ན་ཞིང་ལྕི་ལ་འགགས་གྱུར་པ། །དེ་ནི་རྣ་བ་འགགས་ཞེས་བཤད། །བད་ཀན་ལས་ནི་རྣ་བ་གཡའ། །སྐྲང་སྲ་དེ་ཡི་མིང་གིས་བཤད། །མཁྲིས་པས་བད་ཀན་ཚིག་གྱུར་པ། །ནད་བཅས་པའམ་ནད་མེད་ཀྱང༌། །རྣག་སྐ་འཛག་ཅིང་མང་དུ་འདྲུལ། །རྣ་བ་རྣག་ཅན་བྱེད་པར་འགྱུར། །རླུང་སོགས་པ་ཡིས་རྣ་བའི་ཤ་།ཁྲག་ལ་གནོད་གྱུར་འདྲུལ་བར་ཟ། །སྲིན་བུས་བསྐྱོད་ཅིང་མི་བཟད་ན། །རྣ་ནད་སྲིན་བུ་ཅན་ཞེས་བྱ། །རྣ་བ་ཕུག་པའི་རྨ་ལས་བྱུང༌། །རྨ་ནི་སྔ་མའི་མཚན་ཉིད་ཅན། །ཁོང་འབྲས་འགྱུར་བའམ་གཞན་དུ་འང་འགྱུར། །ཐོར་བུ་འབྲུམ་བུ་སྐྲངས་ལས་འབྱུང༌། །དེ་ལས་རྣ་བ་རྣགས་པ་དང༌། །འོན་པར་བྱེད་པས་གནོད་པར་འགྱུར། །མངལ་དུ་རླུང་གིས་རྣ་བའི་ཤ་།ཞུམ་འགྱུར་འཁུམས་པ་ཞེས་བྱའོ། །མངལ་དུ་ཤ་མཛེར་སྲ་ན་མེད། །པི་པི་ལིང་འདྲ་མང་པོ་འང་གཅིག །ནད་མེད་པི་པི་ལིང་ཞེས་བྱ། །འདུས་པ་ལས་གྱུར་གས་པ་ནི། །མདོག་འདྲ་ན་ཞིང་སྲ་བ་དང༌། །སྐྲང་འགྱུར་དེ་ནི་མ་གསོས་ན། །སྨིན་ནས་ཉུངས་མར་ལྟ་བུར་ནི། །འཛག་ཅིང་འཚོ་བ་དཀའ་བར་འགྱུར། །རྨ་འཚོ་བས་ཀྱང་ངེས་པར་ནི། །རྣ་བའི་ཤ་ནི་ཞུམ་བར་འགྱུར། །རྩ་ལ་གནས་པའི་རླུང་གིས་ནི། །རྣ་ཤལ་སྐམ་པ་དེ་མིང་ཅན། །རྣ་ཤལ་པི་ཝང་རྒྱུད་ལྟར་པྲ། །སྲ་བ་རྒྱུད་ཅན་ཞེས་བྱའོ། །
གཞོན་ཤ་ཅན་ནི་ཡུན་རིང་དུ། །བཏང་སྙོམས་པོར་ནས་འཕྲལ་དུ་བསྐྱེད། །རྣ་ཤལ་སྐྲངས་ཤིང་ནད་བཅས་ལ། །དམར་ཞིང་འབྱར་བར་གྱུར་པ་ནི། །དེ་ནི་རླུང་གིས་འབྱར་ཞེས་བྱ། །གནོད་འགྱུར་རྒྱན་ལྕི་ཁུར་སོགས་ཀྱིས། །ཁྲག་དང་མཁྲིས་པ་འཁྲུགས་གྱུར་པས། །དམར་ཞིང་ཚན་སྨིན་པ་དང༌། །སྐྲང་དང་འབྲུམ་བུ་འབྲུམ་ཕྲན་དང༌། །དམར་ཞིང་ཚལ་རྣགས་པ་ཡིན། །རླུང་དང་བད་ཀན་གྱིས་རྣ་ཤལ། །སྐྲང་ཞིང་ནད་མེད་སྲ་བ་དང༌། །བརྟན་ཞིང་མདོག་འདྲ་གཡའ་བ་དང༌། །དེ་ནི་མཉེ་བ་ཞེས་བྱར་བཤད། །ཕུག་ཉེས་རྣ་བ་བརྒྱངས་པ་ལས། །གཡའ་བཅས་ཚ་གྲང་སྨིན་ཞིང་ན། །འདུས་པ་ལས་གྱུར་སྐྲངས་བ་དེ། །སྡུག་བསྔལ་འཕེལ་བྱེད་ཅེས་བྱའོ། །བད་ཀན་ཁྲག་གྱུར་སྲིན་བུ་ཕྲ། །གཡའ་ཞིང་གནག་ལ་རྣག་བཅས་པ། །སྲིན་བུ་ཕྲ་མོས་བལྡགས་ཞེས་བྱ། །དེ་མ་གསོས་ན་རྣ་ཤལ་ཟ། །དེ་ལས་འདུས་གྱུར་པི་པི་ལིང༌། །གཟེར་ཅན་གས་འཁུམས་གསོར་མི་རུང༌། །རྒྱུད་ཅན་གཅིག་པུ་འཚོ་བ་ཙམ། །ལྷག་མ་རྣམས་ནི་གསོ་བར་བྱ། །དེ་ལྟར་རྣ་བའི་ནད་ཀྱི་ནི། །དབྱེ་བ་ཉི་ཤུ་རྩ་ལྔར་བཤད། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་བཅུ་བདུན་པའོ།། །།དེ་ནས་རྣ་བའི་ནད་གསོ་བ་བཤད་པར་བྱའོ། །རླུང་ལས་གྱུར་པའི་རྣ་ནད་ལ། ཤ་ཁུ་བླུད་ཅིང་རླུང་འཇོམས་པའི། །སྨན་བསྐོལ་མར་ནི་མཚན་མོ་བླུད། །རྣ་བ་དུགས་བྱས་དེ་རྗེས་ལ། །ཨ་ཤྭཏྠ་དང་ཨེ་རཎྜ། །བིལ་བ་ཨརྐའི་ལོ་མ་དང། །ཏིལ་མར་རྒྱམ་ཚར་བཅས་པ་དང༌། །ཕུར་མ་བཙོ་བ་བྱས་པ་ཡི། །ཁུ་བ་དྲོ་འཇམ་ཙམ་མམ་ནི། །ལ་ཕུག་གུ་གུལ་རྣ་བ་དགང༌། །རླུང་འཇོམས་སྡེ་ཚན་སྐྱུར་རྣམས་དང༌། །གཅིན་གྱི་ནང་དུ་སྣུམ་ཆེན་ནི། །བསྐོལ་བ་དེ་ནི་རྣ་བའི་ནད། །མི་བཟད་བ་ཡང་མྱུར་དུ་སེལ། །རྩ་བ་ཆེན་པོ་ལྔ་ཡི་ཤིང༌། །གང་ཡང་རུང་བ་གསེ་མས་དཀྲི། །ཏིལ་མར་གྱིས་བསྐུས་འབར་བའི་རྩེ། །སྣུམ་འཛག་འཕྲལ་དུ་ནད་སེལ་བྱེད། །དེ་བཞིན་ཐང་ཤིང་རུ་རྟ་དང༌། །སྒྲོན་ཤིང་ལས་ཀྱང་དེ་བཞིན་བྱ། །རླུང་ནད་ཆམ་པ་ལ་བཤད་པའི། །གསོ་བས་འདིར་ཡང་ཕན་པ་ཡིན། །
མགོ་བོ་བཀྲུ་དང་ཆུ་གྲང་བཏུང༌། །ཉིན་མོའང་ཡོངས་སུ་སྤང་བར་བྱ། །མཁྲིས་གྱུར་ཁར་དཀར་པོར་བཅས། །མར་གྱིས་སྣུམ་བྱས་བཀྲུ་སྨན་གཏང༌། །རྒུན་འབྲུམ་ཤིང་མངར་ནུ་ཞོ་བསྐོལ། །རྣ་བ་བཀང་བའང་བསྔགས་པ་ཡིན། །ཤིང་མངར་ཙནྡན་དཱུར་བ་དཀར། །པུ་ཤེལ་ཙེ་དང་ར་མཉེ་བ། །སེང་ཕྲོམ་པདྨའི་རྩ་བ་དང༌། །པདྨའི་སྡོང་བུ་ཛི་བ་ཀ །བཙོད་དང་ཐལ་ཏྲེས་བསྐོལ་བ་དང༌། །ཤིང་མངར་ཁུ་བ་བྲེ་གང་དང༌། །འོ་མ་བྲེ་དོ་བཅས་པ་དག །ཏིལ་མར་ཕུལ་གང་བསྐོལ་བ་དང༌། །འདི་ཡིས་རྣར་བླུགས་རྣ་དགང་བསྐུ། །ཡང་ན་སྦྲང་རྩི་ཉི་ཚེས་དགང༌། གཟེར་དང་ཚ་དང་ན་བསེལ། །ཤིང་མདང་ལ་སོགས་མར་དང་བཅས། །རྣ་བ་ཀུན་ཏུ་བྱུགས་ནའང་ཕན། །བད་ཀན་ལས་གྱུར་པི་པི་ལིང༌། །མར་བསྐོལ་སྣུམ་གྱུར་སྐྱུག་ཏུ་གཞུག །བད་ཀན་སེལ་བའི་སྣ་སྨན་དང༌། །མཁུར་བཀང་དུགས་དང་དུད་པ་བརྔུབ། །སྒོག་སྐྱ་སྒེའུ་གཤེར་ཤི་ཀྲུ་དང༌། །ལ་ཕུག་ཆུ་ཤིང་མུ་རང་ག །བསྐོལ་བའི་ཁུ་བ་དམ་པ་ནི། །དྲོ་འཇམ་རྣ་བར་བླུགས་ནའང་ཕན། །ཨརྐའི་མྱུ་གུ་སྐྱུར་ཁུར་བཏགས། །ཏིལ་མར་རྒྱམ་ཚར་བཅས་པ་གང༌། །སྣུ་ཧའི་ཤིང་བུ་བྲུས་པ་ར་ནི། །བཅུག་ལ་ཨརྐའི་ལོ་མས་གཡོགས། །ཕུར་མ་བཙོས་པའི་ཚུལ་དུ་བསྲེག །དེ་ཡི་ཁུ་བ་གཟེར་འཇོམས་མཆོག །མ་དུ་ལུང་གའམ་ཀ་པི་ཏ་ཏའི། །ཁུ་བས་བཀང་བ་བྱས་ནའང་ཕན། །ཡང་ན་ཚས་བཀང་དེ་རྗེས་ལ། །རྒྱ་མཚོའི་ལྦུ་བའི་ཕྱེ་མས་གདབ། །ར་ལུག་གཅིན་དང་འོད་མའི་ཤུན། །ཏིལ་མར་བསྐོལ་བས་བཀང་ན་ཕན། །ཡང་ན་ཉུངས་མར་ཤིང་ཀུན་དང༌། །ཨེ་རཎ་དོང་གྲ་བསྐོལ་བ་བླུགས། །ཁྲག་གྱུར་མཁྲིས་པ་ལྟ་བུར་གསོ། །གཏར་ག་མྱུར་དུ་གདབ་པར་བྱ། །སྨིན་ཞིང་རྣ་བ་ཁྲག་འཛག་ལ། །དུད་པ་མཁུར་བཀང་སྣ་སྨན་སྦྱར། །སྦུ་གུའི་ཆོ་ག་དག་དང་ནི། །རྨ་རེད་ཆོ་ག་གང་ཡིན་བྱ། །གོས་པར་ཡེའུས་དུས་གཉིས་སུ། །རྣ་བ་ཕྱི་ཞིང་དག་པར་བྱ། །གུ་གུལ་དུད་པས་བདུགས་ནས་ཀྱང༌། །སྦྲང་རྩི་ཡིས་ཀྱང་དགང་བར་བྱ། །བྱེའུ་རུག་ཁུ་བ་བསྐོལ་བ་དང༌། །བུ་རམ་ཁུ་བས་བསྐོས་པ་ཡི། །རས་བལ་ཡེའུ་རབ་ཕྲས་བྱུག །དེ་ཡི་ཕྱེ་མ་གདབ་
པར་བྱ། །གཟེར་དང་རྣགས་དང་ལྕི་བ་ལ། །ཆོག་འདིས་ནི་བཟློག་པར་བྱ། །པྲི་ཡངྐུ་དང་ཨམ་པཤྠ། །ཤིང་མངར་དང་ནི་ད་ཏ་ཀི །ཨུཏྤ་ལ་ཡི་ལོ་མ་དང༌། །བཙོད་དང་སེང་ཕྲོམ་རྒྱ་སྐྱེགས་དང༌། །ཀ་པིད་ཏ་ཡི་ཁུ་བ་དང༌། །ཏིལ་མར་བསྐོལ་ཏེ་དེ་བླུགས་ན། །རྣག་འཛག་པ་ནི་མྱུར་འཆད་བྱེད། །སྒྲ་བཅས་འོན་པ་དག་ལ་ནི། །རླུང་གི་གཟེར་འཇོམས་སྨན་གཏང་བྱ། །བད་ཀན་ལས་གྱུར་བད་ཀན་ནི། །སློན་སྨན་སོགས་ཀྱིས་དང་བོར་བསལ། །ཨེ་རཎྜ་དང་ཤི་ཀྲུ་དང༌། །ལ་ཕུག་གཞོན་ནུའི་ལོ་མ་དང༌། །ཁུ་བ་ཏིལ་མར་བཞི་འགྱུར་དང༌། །ལོ་མ་བརྒྱད་འགྱུར་བཅས་པ་དང༌། །ཤིང་མངར་རམ་ཉེ་བའི་ལྡེ་གུ། །བཅས་པར་བསྐོལ་བ་རྣར་བླུགས་དང༌། །བསྐུ་དང་རྣབ་བཀང་བ་ཡིས། །སྒྲ་བཅས་འོན་དང་གཟེར་བ་འཇོམས། །ཤིང་ཀུན་བོང་ང་དཀར་པོ་དང༌། །ཤུ་ཏི་སྐྱེར་ཤུན་ས་རྫི་ཀ །ཏིལ་མར་ཚ་དང་བཅས་བསྐོལ་བས། །བཀང་ན་གཟེར་དང་ཆུ་སེར་འཛག །སྒྲ་བཅས་འོན་པ་སེལ་བར་བྱེད། །རྣ་བ་སྒྲ་དང་བཅས་པ་ལ། །ཉུངས་མར་གྱིས་ནི་བཀང་ན་ཕན། །ལ་ཕུག་སྐམ་པའི་དུམ་བུ་ཡི། །ཐལ་བ་ཤིང་ཀུན་བཅའ་སྒ་དང༌། །ཤུ་ཏི་རུ་རྟ་ཤུ་དག་དང༌། །ཐང་ཤིང་ཤི་ཀྲུ་སྐྱེར་ཁཎྜ། །ཡ་བཀྵ་ར་རྩ་བས་རུ་ཚ། །རྒྱམ་ཚ་རྡུལ་ཚ་སརྫི་ཀ །སྟག་པའི་ཚེར་མ་ཁ་རུ་ཚ། །གླ་སྒང་རྒུན་ཚ་བཞི་འགྱུར་དང༌། །ཁ་ལུང་ཁུ་བ་དེ་དང་འདྲ། །ཆུ་ཤིང་ཁུ་བ་མཉམ་བསྐོལ་བའི། །ཏིལ་མར་བཀང་བས་རྣ་བའི་ནད། །གཡའ་དང་སྒྲ་བཅས་འོན་པ་དང༌། །རྣག་འཛག་གཟེར་ཞིང་སྲིན་བུ་ཅན། །ཤིན་ཏུ་གསོ་དཀའ་ཐལ་སྨན་གྱི། །ཏིལ་མར་གྱིས་ནི་མྱུར་དུ་འཇོམས། །ཁ་དང་སོ་ཡི་ནད་ལའང་ཕན། །དེ་ནས་ཚོར་བ་མེད་པ་ལ། །ཉེ་བལ་ནི་གཏར་ག་གདབ། །སྐྲང་ཞིང་རྣགས་ལ་ཐོས་པ་ནི། །མི་གསལ་གྱུར་ལ་སྐྱུག་སྨན་བཏང༌། །བྱིས་པ་རྒན་དང་ཡུན་རིང་དུ། །ལོན་པའི་འོན་པ་སྤང་བར་བྱ། །སྒྲ་བཅས་རྣགས་པར་གྱུར་པ་ལ། །སྣུམ་དང་དུགས་བྱས་དག་པར་བྱ། །རྣ་བ་སྦྱངས་ནས་དེ་རྗེས་ལ། །རྣ་བ་སྦྱངས་པའི་ཏིལ་མར་དག །ཁ་ལུང་ཁུ་བ་རྒྱམ་ཚ་དང༌། །ཚ་དང་སྦྲང་རྩིར་བཅས་པའང་བླུགས། །དག་བྱས་
རྩུབ་པར་གྱུར་ན་ནི། །མར་གྱི་ཉིང་ཁུས་དགང་བར་བྱ། །རིམ་འདི་རྣ་སྤབས་གང་ལའང་བྱ། །གཡའ་དང་སྐྲང་ལ་རྣ་སྨན་སོགས། །བད་ཀན་སེལ་བར་བྱེད་པ་ཕན། །སྐྲང་ལ་ཚྭ་དང་དྲོ་བས་བྱུག །རྣ་བ་རྣག་འཛག་འབུ་ཅན་ལ། །རྣ་བ་ཆུ་འཛག་གསོ་བར་བྱ། །མཆོག་ཏུ་རྣ་ནད་སྲིན་ཅན་ལ། །ཉུངས་མར་དྲོན་པོ་བླུགས་པར་བྱ། །རྣ་བའི་འབྲས་ལ་ཁོང་འབྲས་ཀྱི། །གསོ་བ་དང་ནི་སྐྱུག་སྨན་གཏང༌། །སྣད་པའི་ཁོང་འབྲས་གསོ་བ་ནི། །མཁྲིས་གྱུར་རྣ་གཟེར་གསོ་བར་བྱ། །འབྲུམ་པ་ཐོར་བུ་སྣ་ལྟར་བྱ། །རྣ་བ་གས་པ་མ་སྨིན་ལ། །རྣ་བའི་ཁོང་འབྲས་ལྟར་གསོ་ཞིང༌། །ནད་གཞི་ཇི་བཞིན་ལས་ཀྱང་བྱ། །རྣ་ཤལ་སྐམ་ལ་རླུང་གཟེར་ལྟར། །རྣ་སྨན་བསྐུ་བ་ལ་སོགས་བྱ། །དུགས་བྱ་སྙི་བར་གྱུར་པ་ན། །རྣ་ཤལ་ཏིལ་མར་བསྐུས་ཤིང་མཉེ། །ཤིང་མངར་པི་ལ་ཡའི་ས་བོན། །ཨ་ཤྭ་གནྡྷ་ནས་བཅས་བསྐུ། །དེ་ནས་རྒྱས་བྱེད་སྣུམ་གྱིས་ནི། །བསྐུ་བ་རྟག་ཏུ་བསྟེན་པར་བྱ། །ཉེ་ཤིང་ཨ་ཤྭ་གནྡྷ་དང༌། །ཨེ་རཎྜ་དང་པ་ཡ་སྱ། །ཛི་བ་ཀ་དང་འོ་མར་བཅས། །ཏིལ་མར་བསྐོལ་བས་བསྐུ་བ་ནི། །རྣ་ཤལ་རྒྱས་བྱེད་མཆོག་ཡིན་ནོ། །འཚོ་བྱེད་སྡེ་ཚན་ལྡེ་གུ་དང༌། །རླན་ཅན་ཤ་ནི་བསྐོལ་བ་དག །རྣ་ཤལ་འཕེལ་ཞིང་རྒྱས་བྱེད་ཡིན། །རྣ་ཤལ་རབ་ཟད་བཅས་པས་ནི། །ལྷག་མ་སྦྱར་ལ་གསོ་ཞིང་བསྐྱེད། །དེ་བཞིན་རྒྱུད་འདྲ་འཚོ་ཙམ་བྱ། །འབྱོར་བ་ལ་ཡང་ཆོ་ག་འདི། །གནོད་གྱུར་བསིལ་སྨན་བསྐུ་བ་དང༌། །སྲིན་བུ་པད་པས་ཁྲག་དབྱུང་བྱ། །འཛམ་བུ་ཨ་མྲའི་ལོ་མ་དང། །བ་ལ་ཤིང་མངར་སེང་ཕྲོམ་ཏིལ། །བཙོད་དང་ཨུཏྤལ་ཀ་དམ་པ། །ཐལ་ཏྲེས་ཏིལ་མར་བཅས་པ་དང༌། །སྐྱུར་རྩ་བས་བཅས་པར་བསྐོལ་བ་འདི། །ཏིལ་མར་བསྐུ་བར་བྱ་བ་དང༌། མེ་དབལ་སྐབས་བཤད་མར་གྱིས་བསྐུ། །མཉེ་བ་གོ་ཏ་ཀརྐ་ཏ། །ཞག་དང་བཅས་པའི་ཏིལ་མར་དང༌། །ཏ་ལའི་ལོ་མ་ཨརྐ་དང༌། །ཨ་ཤྭ་གནྡྷ་བྱེའུ་རུག་པ། །སོ་མ་ར་ཛ་འབྲས་བུ་དང༌། །རྒྱམ་ཚ་ལང་ཀ་ལིར་བཅས་བསྐོལ། །ཏིལ་མར་བསྐུ་བར་བྱ་བ་དང༌། །རྣ་སྨན་རྣོན་པོ་གཏང་བར་བྱ། །དབུག་ཉེས་པ་ལ་ཨ་སྨན་ཏ། །འཛམ་བུ་ཨ་མྲའི་ལོ་མ་ནི། །བསྐོལ་བའི་
ཁུ་བ་བླུགས་པར་བྱ། །རྣ་ཤལ་ཏིལ་མར་གྱིས་བསྐུ་ཞིང༌། །ཤིང་མངར་བཙོད་དང་སྟག་ཚེར་བ། །ཡུང་བའི་ཕྱེ་མ་ཞིབ་པོ་གདབ། །རྒྱ་སྐྱེགས་བྱི་དང་ག་བསྐོལ་བའི། །ཏིལ་མར་གྱིས་ནི་བསྐུས་ན་ཕན། །སྲིན་བུས་ཟོས་ལ་བའི་ལྕི་བས། །ལན་མང་དུ་ནི་དུགས་བྱས་ལ། །བྱི་དང་ག་ཡི་སྙིང་པོ་ནི། །ལུག་གི་གཅིན་སྦྱར་ལྡེ་གུས་བསྐུ། །དུག་མོ་ཉུང་དང་ཨིང་གུ་དང༌། །ཨེ་རཎྜ་ཡི་ས་བོན་དང༌། །དོང་གའི་ཤུན་པ་ལྡེ་གུས་བསྐུ། །ཡང་ན་དེ་དག་ནི་མ་པ་ཡི། །ལོ་མན་ལེ་ཤམ་དང་བཅས། །སྦྲང་རྩིའི་ལྡེ་གུས་རྨ་ལ་བསྐུ། །རྣ་བ་ཆད་ལ་སྦྱང་བྱས་ཏེ། །སྐྱོན་མེད་ཁྲག་དང་དེ་འཚམ་པའི། །བཅིང་བ་དག་གིས་སྦྱར་བར་བྱ། །སྦྱར་ནས་འཕྲལ་བཅད་སྦྱང་བར་བྱ། །དེ་ནས་སྐྲ་མཐར་མདུད་བྱས་ཏེ། །རྣ་ཤལ་བཅད་དང་ཞལ་ཞལ་བྱ། །བཅད་པ་དང་ནི་བསྲུང་བར་བྱ། །མཚམས་ནི་མཉམ་པར་སྦྱར་བྱ་ཞིང༌། །མཐོན་དམན་མེད་པ་ཉིད་དུ་བྱ། །ཞུན་མར་དང་ནི་སྦྲང་རྩིས་བྱུག །རས་བལ་གྱིས་ནི་གླན་པ་དང༌། །སྐུད་པས་དམ་ལྷོད་རན་པར་བཅིང༌། །རྨ་ཡི་ཁྲག་ནི་བཅད་པ་ཡི། །སྨན་གྱི་ཕྱེ་མས་གདབ་བྱ་ཞིང༌། །སྤྱོད་པ་དེ་ལ་བསྟེན་པར་བྱ། །ཞག་བདུན་ནས་ནི་མ་བཙེས་པའི། །ཏིལ་མར་བསྐུས་ལ་རས་བལ་དགྲོལ། །ལེགས་འབྱོར་སྤུ་སྐྱེས་པ་དང༌། །མཚམས་འབྱོར་མཉམ་ཞིང་བརྟན་པ་དང༌། །ཚད་ལྡན་ནང་ནི་མེད་པ་དང༌། །རིམ་གྱིས་རྣ་བ་སྐྱེད་པར་བྱེད། །ཉ་ལྕིབས་ཁ་སྲལ་ཕྲེའུ་དང༌། །པྲི་ཧ་ཏི་འབྲས་སེར་པོ་གཉིས། །བ་ལ་ཧ་ཏི་པི་པི་ལིང༌། །ཨ་ཤྭ་གནྡྷ་ཉུངས་ཀར་སེར། །ཀོ་ཤ་ཏ་ཀའི་རྩ་བ་དང༌། །ཀ་ར་བཱི་ར་རུ་ཤིག །ལོ་མ་བདུན་པ་བིལ་བ་ལ། །ས་ནག་སྦྲང་མའི་གནས་དང་ནི། །བྱེའུ་ཆུ་སྐྱེས་སྲིན་བུའི་ཤ་།དེ་བཞིན་སེང་ཕྲོམ་སྡོང་བུ་རྣམས། །འདི་དག་ལྡེ་གུ་ཏིལ་མར་བཅས། །མ་ཧེའི་མར་དང་གླང་པོ་རྟའི། །གཅིན་དང་བཅས་པར་བསྐོལ་བ་ནི། །བསྐུས་ན་རྣ་བ་འཕེལ་བྱེད་མཆོག །དེ་ནས་ན་ཚོད་ལྡན་པ་ཡི། །སྦྱང་བ་བྱས་ནས་རྣ་ཆད་གསོ། །སྣ་དང་མཉམ་པའི་ཤ་ལྤགས་ནི། །མཁུར་ཚོས་ལས་ནི་བཅད་ནས་ཀྱང༌། །རྣ་དང་ཉ་བའི་ཤ་ལྤགས་ནི། །སྲབ་མོ་
ཉིད་དུ་བཞར་བར་བྱ། །དེ་ནས་རས་བལ་བཅས་པ་ཡི། །ཁབ་ཀྱིས་མཁུར་བ་བཙེམ་པར་བྱ། །སྣ་བཅད་མཚོན་གྱིས་བཞར་ནས་ནི། །མཁུར་ཚོས་ལས་བཅད་པགས་པ་ཡིས། །སྣ་ནི་ལགས་མོར་བཙེམ་པར་བྱ། །ཁ་ཡི་དབུགས་ནི་དབྱུང་བའི་ཕྱིར། །སྣར་ནི་སྦུ་གུ་ཅན་གཞུག་བྱ། །དེ་རྗེས་ཏིལ་མར་སློན་པར་བསྐུ། །རྨ་ནི་སྦྲང་རྩིར་སྦྱར་བས་བསྐུ། །ཁྲག་བཅད་པ་ཡི་སྨན་གཞན་ཡང༌། །ཞིབ་ཏུ་བཏགས་པའི་ཕྱེ་མས་གདབ། །དེ་ནས་མར་དང་སྦྲང་རྩིས་བསྐུ། །བཅིངས་ལ་སྦྱོང་བ་བསྟན་པར་བྱ། །དེ་ནས་གནས་སྐབས་ཤེས་བྱས་ནས། །རྨ་གསར་གསོ་བའི་ཆོ་ག་བྱ། །རྨ་འབྱོར་སྣ་ཡི་ཉེ་འཁོར་གྱི། །ཤ་ལྷག་ལེགས་པར་གཅད་པར་བྱ། །དེ་ནས་ཤིན་ཏུ་ཞིབ་ཏུ་བཙེམ། །དམའ་བ་དག་ཀྱང་བསྐྱེད་པར་བྱ། །བཅད་མ་ཐག་ལ་ཅི་རིགས་པར། །བཞག་སྟེ་ཆོག་འདི་ཉིད་བྱ། །མཆུ་བཅད་པ་ལ་སྦུ་གུ་དག །མ་གཏོགས་སྣ་སྦྱར་བཞིན་དུ་བྱ། །ཡན་ལག་བརྒྱད་པའི་སྙིང་པོ་བསྡུས་པ་ལས། །ཕྱི་མའི་གནས་ཀྱི་ལེའུ་བཅོ་བརྒྱད་པའོ།། །།དེ་ནས་སྣ་ནད་ཀྱི་དམིགས་ཤེས་པ་བཤད་པར་བྱའོ། །བ་མོ་རླུང་དང་རྡུལ་དང་ནི། །སྨྲ་དྲགས་གཉིད་ལོག་གཉིད་ཡར་དྲགས། །སྔས་ནི་མཐོ་དང་དམའ་དྲགས་དང༌། །ཆུ་གཞན་འཐུངས་པར་གྱུར་པ་དང༌། །ཆུ་མང་འཐུངས་དང་ཉལ་པོ་དང༌། །སྐྱུགས་དང་མཆི་མ་བཀག་པ་ཡིས། །རླུང་ཤས་ཆེ་བའི་ནད་འཁྲུགས་ནས། །སྣ་ནི་སྲ་བ་ཉིད་འགྱུར་ཞིང༌། །ཆམ་པ་སྐྱེད་པར་བྱེད་པ་ཡིན། །འཕེལ་ན་ཟད་པ་སྐྱེད་པར་བྱེད། །དེ་ལ་རླུང་གྱུར་ཆམ་པ་ནི། །ཁ་སྐམ་སྦྲིད་པ་དྲག་ཏུ་འབྱུང༌། །སྣ་འགགས་ཟུག་ཅིང་ན་བ་དང༌། །མུར་འགྲམ་སོ་དང་ཀླད་པ་དང༌། །སྨིན་མ་ནས་ནི་སྣ་རྩེའི་བར། །སྲིན་བུ་རྒྱུ་བ་སྙམ་དུ་སེམས། །སྐད་འགགས་རིང་ནས་སྨིན་པ་དང༌། །མཆིལ་སྣབས་གྲང་བར་འཛག་པ་ཡིན། །མཁྲིས་གྱུར་སྐོམ་དད་རིམས་ཀྱིས་འདེབས། །མགོ་འཁོར་སྣ་ནང་འབྲུམ་པ་འབྱུང༌། །སྣ་རྩེ་གནག་ཅིང་དྲོ་ལ་རྩུབ། །མཆིལ་སྣབས་དམར་སེར་འཛག་པ་ཡིན། །བད་ཀན་ལུད་པ་དབུགས་མི་བདེ། །སློན་ཞིང་ལུས་ལྕི་ཡི་ག་འཆུས། །ཁ་མངར་བྲོ་ཞིང་གཡའ་བ་དང༌། །མཆིལ་སྣབས་སྣུམ་
དཀར་སྐ་བ་འཛག །འདུས་གྱུར་མཚན་ཉིད་ཀུན་དང་ལྡན། །རྒྱུ་མེད་འཕེལ་དང་འགྲིབ་པར་བྱེད། །ནད་ཁྲག་སྣ་ཡི་རྩར་ཞུགས་ནས། །ཆམ་པས་འདེབས་པར་བྱེད་འགྱུར་བ། །བྲང་ན་ཚོར་བ་མེད་པ་དང༌། །མིག་དམར་དབུགས་ཀྱི་དྲི་མི་ཞིམ། །མིག་དང་རྣ་བ་སྣ་གཡའ་ཞིང༌། །འདི་ནི་མཁྲིས་གྱུར་མཚན་ཉིད་ལྡན། །ཆམ་པ་ཐམས་ཅད་མ་གསོས་ན། །གནོད་པ་མི་བཟད་སྐྱེད་བྱེད་འགྱུར། །ཇི་སྐད་བཤད་པའི་བླ་བརྣན་ནི། །འཕེལ་བས་དབང་པོ་ཀུན་གནོད་བྱེད། །མེ་དྲོད་ཉམས་ཉེས་དབུགས་མི་བདེ། །ལུད་པ་བྲང་དང་རྩིབ་ལོགས་ཟུག །གློ་བུར་དུ་ནི་ཤས་ཆེར་འཁྲུགས། །ཁ་དྲི་ང་ཞིང་སྐམ་པར་བྱེད། །སྣ་ནང་འདྲུལ་ཞིང་སྐམ་པ་དང༌། །ཡང་ཡང་སྣ་འགགས་དག་པར་བྱེད། །སྣབས་ནི་རྣག་འདྲ་དཀར་ཞིང་དམར། །དུད་པ་ཅན་ན་འཛག་པར་འགྱུར། །འདི་ལ་སྲིན་བུ་སྣུམ་ཞིང་རིང༌། །དཀར་ཞིང་ཕྲ་བ་འབྱུང་བར་བཤད། །དེ་སྨིན་མཚན་མ་ལུས་ཡང་ཞིང༌། །སྤྲིད་པ་ཞི་བར་གྱུར་པ་དང༌། །སྣབས་ནི་སྦྱིན་ཞིང་སེར་བ་དང༌། །དྲི་དང་རོ་ནི་ཚོར་བ་ཡིན། །སྣར་ན་རྣོན་པོ་བརྔུབས་པ་དང༌། །ཉི་འོད་སྐུད་པ་རྩ་སོགས་དང༌། །རླུང་འཁྲུགས་བྱེད་པ་གཞན་གྱིས་ཀྱང༌། །སྣ་ཡི་མཚུལ་པར་ཞུགས་གྱུར་པས། །བསྐྱོད་དེ་རླུང་ནི་འཁྲུགས་གྱུར་པ། །སུམ་མདོར་ཞུགས་འགྱུར་འགགས་ནས་ནི། །ལྡོག་ནས་མི་བཟད་སྦྲིད་པ་ནི། །སྣབས་འཛག་བཅས་པར་སྐྱེད་པར་བྱེད། །སྣ་ཡི་བུ་ག་སྐམ་བྱེད་ཅིང༌། །རླུང་གིས་བད་ཀན་སྐྱེ་དཔར་བྱེད། །སྣ་ནང་གྲ་མས་གང་སྙམ་སེམས། །དབུགས་འབྱུང་དཀའ་པར་གྱུར་པ་དེ། །སྣ་སྐམས་པ་ཞེས་བྱ་བར་བཤད། །སྣ་རྒྱས་པ་ནི་འབྱུང་འགྱུར་པ། །སྣ་ནི་བཀག་པ་འདྲར་སེམས་ཤིང༌། །རླུང་གིས་འགག་པར་བྱེད་པར་འགྱུར། །དབུགས་འབྱུང་དབུགས་རྔུབ་འགགས་པ་ལས། །བུ་ག་གདངས་པ་ལྟ་བུ་ཡིན། །མཁྲིས་པས་སྣ་ཁུང་རྣགས་གྱུར་པ། །ཤ་ལྤགས་ཚ་ཞིང་གཟེར་དང་བཅས། །དེ་ནི་སྣ་ཡི་ཤུ་བར་བཤད། །བད་ཀན་ལས་གྱུར་ཆུ་སེར་ནི། །ཆུ་འདྲ་རྒྱུན་དུ་འཛག་པ་དང༌། །མཆོག་ཏུ་མཚན་འཛག་དེ་མིང་ཅན། །བད་ཀན་འཕེལ་བས་སྣ་ཁུང་དུ། །བུ་ག་འགགས་ཤིང་ཆམ་པ་སྐྱེད། །དབུགས་
ནི་ངར་ངར་པོར་འབྱིན་ཞིང༌། །ཆམ་པ་ལས་ཀྱང་ནད་ཚབས་ཆེ། །སྣ་ལས་ལུག་ལྟར་རྣག་འཛག་ཅིང༌། །རྒྱུན་དུ་སྦྱིན་བག་སེར་པོ་དང༌། །སྨིན་མའི་རྣག་ནི་འཛག་འགྱུར་ཞིང༌། །དེ་ཡི་སྣ་ནི་སྣབས་བཅས་ཡིན། །ཁྲག་གི་སྣ་ནི་ཚིག་སྙམ་སེམས། །ཕྱི་དང་ནང་དུ་རེག་མི་བཟོད། །དུ་བ་ལྟ་བུའི་དབུགས་འབྱིན་པ། །བསྲེགས་འདྲ་དེ་ནི་འབར་བ་ཡིན། །རྐན་གྱི་ཕུགས་སུ་ནད་འཁྲུགས་པས། །རླུང་ནི་ཁ་དང་སྣ་ནས་འབྱུང༌། །མཆིལ་སྣབས་དྲིང་འབྱུང་འགྱུར་བ། །དེ་ནི་སྣ་ནད་རུལ་པ་ཡིན། །འདུས་པའམ་སྣད་པ་ལས་གྱུར་པའི། །རྣག་དང་ཁྲག་ནི་སྣ་ནས་འཛག་མགོ་བོ་ཚ་ཞིང་ན་བྱེད་པ། །དེ་ནི་རང་ཁྲག་ཅན་ཞེས་བཤད། །རླུང་གིས་མཁྲིས་པ་བད་ཀན་དག །སྣ་ནི་སྐམས་པར་གྱུར་པ་ལས། །བད་ཀན་སྐམས་ཏེ་གོང་པོར་གྱུར། །དེ་ནི་བསྒོངས་པ་ཞེས་བྱའོ། །འབྲུམ་བུ་ཐོར་བུ་ནད་གཞི་ཡི། །མཚན་ཉིད་ཅི་འདྲ་དག་ལས་དབྱེ། །ཀུན་ལས་དབུགས་འབྱུང་དཀའ་བ་དང༌། །རྒྱུན་དུ་ཆུ་འཛག་སྤྲིད་པ་འབྱུང༌། །སྣ་འགགས་ལྟ་བུར་སྨྲ་བ་དང༌། །སྣ་ནས་རྣག་འཛག་ཀླད་པ་ན། །དེ་ལྟར་རྣམ་པ་བཅོ་བརྒྱད་ལས། །ཆམ་པ་མ་རུངས་འཚོ་བ་ཙམ། །ཡན་ལག་བརྒྱད་པའི་སྙིང་པོ་བསྡུས་པ་ལས། །ཕྱི་མའི་གནས་ཀྱི་ལེའུ་བཅུ་དགུ་བའོ།། །།དེ་ནས་སྣ་ནད་གསོ་བ་བཤད་པར་བྱའོ། །སྣ་ནད་ཀུན་ལས་དང་པོར་ནི། །རླུང་མེད་ཁང་པར་འདུག་ནས་ནི། །སྣུམ་ཆོས་དུགས་དང་སྐྱུག་སྨན་དང༌། །དུད་པ་བརྔུབ་དང་མཁུར་བཀང་བསྟེན། །གོས་ནི་ལྕི་ཞིང་དྲོ་བ་བགོ །མགོ་བོ་ཤིན་ཏུ་མ་ཐུག་པས་དཀྲི། ཁ་ཟས་ཡང་སྐྱུར་ལན་ཚྭ་སྣུམ། །དྲོ་བ་དང་ནི་བསྐ་བ་བཟའ། །བུ་རམ་འོ་མ་སྐམ་སའི་ཤ་།ལན་ཚྭ་ཚ་བ་གསུམ་ཤས་ཆེ། །ནས་དང་གྲོ་ནི་མང་པོ་དང༌། །ཞོ་དང་སེ་འབྲུའི་ཁུ་བ་བསྟེན། །ལ་ཕུག་གཞོན་ནུའི་ཁུ་བ་དང༌། །ཀུ་ལངྠ་ཡི་ཁུ་བའང་བསྔགས། །རྩ་བཅུའི་ཁུ་བ་དྲོ་འཇམ་མམ། །ཆང་སྙིང་དངས་མ་བླུད་པར་བྱ། །ཙ་རོང་ཨགྣི་མནྠ་དང༌། །ཤུ་དུག་ཟི་ར་གོ་སྙོད་སྣོམ། །བལ་བུའི་ལོ་མ་ཚ་བ་གསུམ། །དབྱི་མོ་ད་ཏྲིག་སྟར་བུ་དང༌། །ཟིར་ཅི་ཏྲ་སྲང་གཉིས་གཉིས། །ཤིང་ཚ་གནྡྷ་བྷ་ད་དང༌། །སུག་སྨེལ་ཞོ་ནི་གཉིས་གཉིས་དང༌། །བུ་རམ་རྙིང་པ་སྲང་
ལྔ་བཅུ། །བསྐོལ་ཏེ་རི་ལུར་བྱས་པ་ནི། །ཟོས་ན་ཆམ་པ་དབུགས་མི་བདེ། །ལུད་པ་ལུ་བ་འཇོམས་བྱེད་ཅིང༌། །སྐད་སྙན་ཡིག་འབྱེད་མཆོག་ཡིན། །ཤུ་ཏིའི་ཤུན་པ་བ་ལ་དང༌། །སོ་ན་ཀ་དང་ཨེ་རཎྜ། །བིལ་བའི་རྩ་བ་དོང་གྲར་བཅས། །ཞག་མར་སྤྲ་ཚིལ་དུད་པ་བརྔུབ། །ཡང་ན་ཕྱེ་དང་མར་དང་བཅས། །ཁམ་ཕོར་སྦྱར་བའི་ནང་དུ་བཅུག །བསྲེགས་པའི་དུད་པ་བརྔུབ་པར་བྱ། །ཁྲུས་དང་མྱ་ངན་ཁྲོ་བ་དང༌། །ཤས་ཆེར་གཉིད་ལོག་ཆུ་གྲང་སྤང༌། །རླུང་གྱུར་ཆམ་པ་རླུང་འཇོམས་པའི། །སྨན་ནི་བསྐོལ་བའི་ཁུ་བའམ། །ལན་ཚྭ་ལྔ་ནི་བསྐོལ་བའམ། །བི་ད་རི་སོགས་སྡེ་བསྐོལ་བླུད། །དུགས་དང་སྣ་སྨན་ལ་སོགས་བྱ། །གཞོགས་བྱེད་ནར་བཤད་གསོ་བའང་བྱ། །ཁྲག་མཁྲིས་ལས་གྱུར་ཐུག་པ་ནི། །མར་སར་མངར་བའི་སྨན་བསྐོལ་བླུད། །སྨན་ཆུ་བླུགས་ཤིང་བྱུག་པ་དང༌། །ནུས་བསིལ་གྲང་མོ་དག་གིས་བྱ། །ད་བའི་ཤུན་པ་འབྲས་བུ་གསུམ། །ཤི་རི་པརྞི་པྲི་ཡང་ཀུ། །ཤིང་མངར་སེང་ཕྲོམ་ཏིལ་མར་གྱི། །བཅུ་འགྱུར་འོ་མ་སྐྱེར་བར་བཅས། །བསྐོལ་བའི་སྣ་སྨན་གཏང་བར་བྱ། །བད་ཀན་ལས་གྱུར་སྨྱུང་བ་དང༌། །ཡུངས་ཀར་ལྡེ་གུས་མགོ་བསྐུའམ། །ཐལ་སྨན་བཅས་པའི་མར་བླུད་དེ། །སློན་གཞུག་རྒྱམ་ཚ་ཚ་བ་གསུམ། །བྱི་དོང་ག་དང་དུག་མོ་ཉུང༌། །ཟིར་ར་གཅིན་སྦྱར་བ་ཡི། སྣ་སྨན་དག་ནི་གཏོང་བར་བྱ། །འདུས་གྱུར་ཚ་དང་རྣོ་སྦྱར་བའི། །མར་གྱི་སྣ་སྨན་བླུགས་པས་གསོ། །གཅོང་ཆེན་སྲིན་གསོའི་རིམ་གྱིས་ནི། །ཆམ་པ་མ་རུང་འཚོ་ཙམ་བྱ། །ཚ་བ་གསུམ་དང་ཨེརཎྜ། །ཐང་ཤིང་རུ་རྟ་བྱི་དོང་ག །བོང་ང་དཀར་པོ་ཨིང་གུ་དང༌། །དུར་བྱིད་པར་ཏ་ཀའི་ས་བོན། །ཉུངས་ཀར་ཉེའུ་འཕྲལ་རུས་པ་དང༌། །ཨགྣི་མནྠའི་མེ་ཏོག་དང༌། །པི་ལུ་ཤི་ཀྲུའི་ས་བོན་དང༌། །རྟ་སྤངས་ཁུ་བ་གཅིན་དང་ནི། །གླང་པོའི་གཅིན་དང་གཅིག་ཏུ་སྦྱར། །ཟར་མའི་སྐུད་དཀྲིས་རེང་བུ་ཡི། །དུད་པ་ཁ་དང་སྣ་ནས་བརྔུབ། །སྨིན་དང་སྦྲིད་པ་འབྱུང་ཞེས་པ། །སྣ་སྨན་རྣོན་པོ་བུད་པས་ཕན། །བཅའ་སྒ་རུ་རྟ་པི་པི་ལིང༌། །རྒུན་འབྲུམ་བྱི་དོང་གའི་ལྡེ་གུ། །མར་རམ་ཏིལ་མར་བཅས་བསྐོལ་བའི། །སྣ་སྨན་སྦྲིད་པ་རྣགས་པ་སེལ། །
སྣ་སྐམས་པ་ལ་བ་ལའི་མར། །བཏུང་སོགས་ཤ་ཁུར་སྦྱར་བ་བཟའ། །སྣུམ་གྱི་དུད་པ་དུགས་ཀྱིས་གསོ། །སྣ་རྒྱས་ལ་ཡང་ཆོ་ག་འདིའོ། །སྣ་རྣགས་འབར་ལ་མཁྲིས་འཇོམས་སྨན། །ཆུ་འཛག་སྣ་སྨན་སོགས་རྣོས་བྱ། །རྣགས་ཅན་ལ་ནི་བད་ཀན་གྱི། །གསོ་བ་དང་ནི་འདྲ་བར་བྱ། །རྒྱ་སྐྱེགས་དང་ནི་ཀརཉྫ། །ན་ལེ་ཤམ་དང་བྱི་དང་ག །ཤིང་ཀུན་བུ་རམ་པི་པི་ལིང༌། །ལུག་ཐུག་གཅིན་སྦྱར་སྣ་སྨན་ནི། །སློན་བྱས་འོག་ཏུ་གཏང་བར་བྱ། །ཤི་ཀྲུ་དནད་བྲིཧ་ཏི། །ཚ་བ་གསུམ་དང་ལྕེ་མྱང་ཚ། །བྱེའུ་རུག་ཕ་དང་བྱི་དང་ག །ཏིལ་མར་བསྐོལ་བའི་སྣ་སྨན་ཡང༌། །བཏང་ན་མཆོག་ཏུ་ཕན་པ་ཡི། །རྣག་དང་ཁྲག་ཅན་སར་པ་ནི། །ཁྲག་གི་ཆམ་པ་ལྟ་བུར་གསོ། །ཤིན་ཏུ་འཕེལ་ལ་རྨ་འཁྱིམས་ལྟར། །འབྲུམ་བུ་རྨེན་འུ་ཚ་བ་ལ། །དན་ཏི་དུར་བྱིད་ལྟེ་མྱང་ཚ། །ལྡོང་རོས་དང་ནི་བི་པི་ལིང༌། །ཙི་ཏྲ་ཀ་ཡི་ལྡེ་གུ་ནི། །མར་དང་སྦྲང་རྩིར་སྦྱར་བ་ཡི། །རེང་བུ་སྣར་ནི་གཞུག་པར་བྱ། །ཤི་ཀྲུ་ལ་སོགས་སྣ་སྨན་ཡང༌། །རྣག་ཅན་གསོ་བའི་སྐབས་སུ་བཤད། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་ཉི་ཤུ་པའོ།། །།དེ་ནས་ཁ་ནད་ཀྱི་དམིགས་ཤེས་པ་བཤད་པར་བྱའོ། །ཉ་དང་མ་ཧེ་ཕག་གི་ནི། །ཤ་དང་ལ་ཕུག་རྗེན་པ་དང༌། མ་ཤའི་སྲན་ཚོད་འོ་མ་ཞོ། །ཆ་དང་བུ་རམ་ཤིང་ཀུན་དབ། །འཐུམ་ཕྲན་ཁ་སྦུབས་ཉལ་བསྟེན་དང༌། །སོ་ཤིང་གིས་སྣད་གོམས་པ་སྤོང༌། །དུད་བ་མཁུར་བཀང་སྐྱུགས་པ་དང༌། །གཏར་ག་དབུག་ནི་ཉེས་པ་ཡི། །བད་ཀན་ཤས་ཆེའི་ནད་འཁྲུགས་པས། །ཁ་ཡི་ནང་གི་ནད་སྐྱེད་འགྱུར། །དེ་ལ་རླུང་གིས་མཆུ་གས་འགྱུར། །མཆུ་རལ་བ་ཡི་ནད་ཅེས་བཤད། །རླུང་གིས་མཆུ་ལ་གནོད་གྱུར་པ། །མཆུ་སྲ་ནད་ཚབས་ཆེ་བ་ཡིན། །མཆུ་གས་རྡོལ་བར་འགྱུར་བ་དང༌། །གནག་ཅིང་རྩུབ་པ་མཆུ་འཁྲུགས་ཡིན། །མཁྲིས་པ་ཚ་བ་མི་བཟོད་སེར། །འབྲུམ་ཕྲན་ཉུངས་ཀར་འདྲ་བས་ཁྱབ། །མྱུར་སྨིན་མང་དུ་རྣགས་པ་ཡིན། །བད་ཀན་ལས་གྱུར་གྲང་བ་ཡིས། །མི་བཟོད་ལྕི་ཞིང་སྐྲང་བ་དང༌། །འབྲུམ་ཕྲན་དཀར་པོས་ཁྱབ་པ་ཡིན། །འདུས་གྱུར་སྣ་ཚོགས་པར་སྣང་ཞིང༌། །དྲི་ངའི་སྤྱི་བག་
འཛག་པ་དང༌། །གློ་བུར་ཤས་ཆེར་སྐྲང་ཞིང་ཞུམ། །ན་དང་མིན་རྣག་མི་སྙོམས། །ཁྲག་ལས་གྱུར་པ་ཁྲག་འཛག་ཅིང༌། །ཁྲག་གི་མདོག་དང་འདྲ་བ་དང༌། །འདི་ལ་འབྲ་གོ་ལྟ་བུ་ཡི། །ཁྲག་ཟད་ཆུ་བུར་འབྱུང་བ་ཡིན། །ཤ་གྱུར་ཤ་ཡི་གོང་པོ་འདྲ། །རིམ་གྱིས་སྲིན་བུ་སྐྱེ་ཞིང་འགུལ། །ཚིལ་གྱུར་གཡའ་ཞིང་འདྲུལ་བ་དང༌། །སྐྲང་འཇམ་ཏིལ་མར་ལྟ་བུར་འཛག །སྣད་པ་ལས་གྱུར་གས་པ་དང༌། །ཡང་དང་ཡང་དུ་འབྱེ་འགྱུར་ལ། །སླར་ཡང་འདྲུབ་པར་འགྱུར་བ་དང༌། །མཆུ་ནི་གཡའ་བར་བྱེད་པ་ཡིན། །རླུང་དང་བད་ཀན་འདྲེས་པ་ལས། །ཆུ་ཡི་ཆུ་བུར་ལྟ་བུར་འབྱུང༌། །མཁུར་བའི་འབྲས་འབྱེད་སྐྲང་ཞིང་བརྟན། །མཁུར་བ་ཚ་ཞིང་རིམས་དང་བཅས། །རླུང་གྱུར་སོ་ནད་དྲོ་ལ་སྲེད། །གྲང་བས་རེག་ན་ལྷག་པར་ན། །གཟེར་ཞིང་བཅག་པ་སྙམ་དུ་སེམས། །གྲང་བས་ཞིག་པ་དེ་བཞད་དོ། །རླུང་དང་ཆུ་ཡིས་སོ་བརྩེ་པ། །གྲང་དང་སྐྱུར་བ་མི་བཟོད་པར། །སྐྱུར་བ་ཟོས་པ་ཉིད་ཀྱིས་འགྱུར། །ནད་བཅས་འགུལ་བར་བྱེད་པ་ཡིན། །སོ་གས་སོ་ནི་ཟེགས་པ་དང༌། །ན་ཞིང་ཟུག་ལ་གཡོ་བ་ཡིན། །སོ་འགུལ་སོ་ནི་གཡོ་བ་དང༌། །ཟ་བའི་ཚེ་ན་ལྷག་པར་ན། །སོ་སྟོ་སོ་ནི་མི་སྡུག་པར། །སོ་རྣམས་སྐྱེ་བར་འགྱུར་བ་ཡིན། །སོ་ལྷག་སོ་ནི་སྐྱེས་པ་སྟེ། །དེ་ནི་འཕེལ་བ་ཞེས་ཀྱང་བཤད། །སྐྱེ་བར་འགྱུར་བའི་ཚེ་ན་ནི། །ན་ཞིང་སྐྱེས་ནས་དེ་ཞི་བྱེད། །མ་བཀྲུས་སོ་ཡི་དྲི་མའམ། །བད་ཀན་རླུང་གིས་སྐམས་པ་ལས། །དྲི་ང་བརྟན་གྱུར་སོ་དྲེག་ཡིན། །དེ་ནི་ཡལ་བར་བོར་བ་ལས། །སོ་ནི་དུམ་བུར་ཟེགས་གྱུར་པ། །གྲུགས་ཤིང་སོ་ནི་གོགས་པ་ཡིན། །ཁྲག་དང་མཁྲིས་པ་རླུང་གིས་སོ། །སྔོན་པོར་གྱུར་པ་སོ་སྔོན་ཡིན། །ནད་ཀྱི་རླུང་ནི་ཤས་ཆེར་འགྱུར། །རྩ་བར་བཅས་པའི་སོ་ལ་བརྟན། །སོ་དབུས་སྐམས་ཏེ་སྟོང་པར་བྱས། སོ་ནི་ཟས་ཀྱི་དྲི་མས་གང༌། །རུལ་བས་སྲིན་བུ་ཕྲ་མོ་ནི། །སྐྱེ་བར་འགྱུར་ཏེ་དེ་འོག་ཏུ། །རྒྱུ་མེད་བྲང་དཀའ་ལྡང་དུབ་ཅན། །སྦོམ་ཆེ་གནག་ལ་ཤེས་ཆེར་ན། །བཅད་པ་འདྲར་སྣང་རྣག་ཁྲག་འཛག །དེ་ནི་སོ་སྲིན་ཅན་ཞེས་བྱ། །བད་ཀན་དང་ནི་ཁྲག་གིས་རྙིལ། །རྣགས་
ཤིང་རུལ་བར་འགྱུར་བ་དང༌། །མཉེན་ལ་ཟགས་ཤིང་གནག་པ་དེ། །གྲང་བས་ཉེན་པ་ཡིན་པར་བཤད། །ཁྲག་མཁྲིས་རྣགས་པ་ལས་བྱུང་བ། །རྙིལ་ནི་ཚ་བར་བྱེད་པ་དང༌། །ཁྲག་གིས་སྐྲངས་པ་མཐོ་བ་དང༌། གཡའ་ཞིང་ཁྲག་ནི་འཛག་པ་དང༌། ཁྲག་ཆད་ནས་ནི་རྒྱས་པར་འགྱུར། །སོན་འགུལ་ཞིང་ནད་ཚབས་ཆུང༌། །ཁ་དྲི་མན་མ་གྱུར་ཉེར་བདར་ཡིན། །སོ་ནི་གཉིས་སམ་གསུམ་ཐད་ཀར། །བད་ཀན་ལས་གྱུར་རྒྱ་ཤུག་ཙམ། །སྐྲངས་པ་སྲ་ཞིང་མི་བཟད་ན། །མྱུར་དུ་སྨིན་པ་སོ་འབུར་ཡིན། །རྙིལ་ནི་ནད་བཅས་ཁྲག་གིས་ནི། །ཕྱི་དང་ནང་དུ་སྐྲང་ཞིང་ལྕི། །ན་ཞིང་ཚ་ལ་གས་པ་ལས། །རྣག་ཁྲག་འཛག་སོའི་ཁོང་འབྲས་ཡིན། །སོ་རྩར་ཁྲག་མཁྲིས་ལས་གྱུར་ནད། །སྐྲང་ཞིང་ནད་དང་བཅས་པ་དང༌། །ཁ་ཆུ་འཛག་ཅིང་རྙིལ་འདྲུལ་བ། །ཁོང་སྟོང་གི་ནི་ནད་ཅེས་བྱ། །འདུས་པ་ལས་གྱུར་རིམས་དང་བཅས། །རྣག་དང་བཅས་པའི་ཁྲག་འཛག་ལ། །སོ་ཡི་སྤྲེལ་མཚམས་ཞིག་པ་ནི། །ཁོང་སྟོང་ཆེན་པོ་ཞེས་བཤད་དོ། །བད་ཀན་གྱིས་ནི་སོ་ཡི་མཐར། །ཤ་མཛེར་ལྟར་སྐྲང་འགྲམ་པ་དང༌། །རྣ་བ་ན་བྱེད་སྤྱོད་ལམ་ཉམས། །དེ་ནི་ཤ་ལྷག་ཅེས་བྱར་བཤད། །རྙིལ་ནི་བདར་བར་འགྱུར་པ་ལས། །ནད་ཚབས་ཆེན་བོར་འབྱུང་འགྱུར་ཞིང༌། །གང་ཞིག་སོ་ནི་འགུལ་གྱུར་པ། །དེ་ནི་སྣད་པ་ལས་བྱུང་ཡིན། །རྙིལ་ལ་བརྟེན་པར་བྱེད་པའི་ནད། །གསོར་རུང་ཡལ་བར་བོར་བ་གང༌། །ནང་དུ་དེ་ནི་ནད་འཛག་པས། །དེས་ནི་རྒྱུན་ལམ་ཕྲ་བ་སྐྱེད། །དེ་ནི་ཡང་ཡང་རྣག་འཛག་ཅིང༌། །པགས་པ་ཤ་དང་རུས་པ་འབིགས། །དེ་ཡང་རང་རང་མཚན་ཉིད་ནི། །ཇི་སྐད་བཤད་བས་ལྔར་ཤེས་བྱ། །ལྕེ་ནི་ཤ་ཁའི་ལོ་ལྟར་ཙུབ། །ཚོར་བ་མེད་གས་རླུང་གནོད་ཡིན། །མཁྲིས་པས་ཚ་ཞིང་ནད་བཅས་འགྱུར། །མཛེར་པ་དམར་པོས་ཁྱབ་པ་ཡིན། །བད་ཀན་ལས་གྱུར་ཤལ་མ་ལིའི། །ཚེར་མས་ཁྱབ་གྱུར་ལྕི་ཞིང་མཐུག །བད་ཀན་མཁྲིས་པས་འོག་ཏུ་སྐྲང༌། །མཐོ་ཞིང་གྱོང་བར་བྱེད་པ་དང༌། །སྨིན་ན་ཉ་ཡི་དྲི་འདྲ་ལ། །ཤ་འདྲུལ་ཆུ་སེར་ཅན་ཞེས་བྱ། །ལྕེ་རྩའི་འོག་དང་འབྲེལ་པ་ནི། །སྐྲང་ཞིང་ལྕེ་ཡི་རྩེ་མོ་འདྲ། །མཛེར་པ་བྱུང་ཞིང་
ཁ་ཆུ་འཛག །ལྕེ་ནི་རེངས་ཤིང་རྩུབ་པ་དང༌། །གཡའ་དང་ནད་བཅས་ཚིག་མི་ཐོན། །ཟ་བར་མི་ནུས་ལྕེ་ལྷག་ཡིན། །དེ་དང་འདྲ་བར་ལྕེ་སྟེང་ན། །གནས་པའི་ཉེ་བའི་ལྕེ་ཞེས་བྱ། །རླུང་འཁྲུགས་པ་ནི་རྐན་གྱི་ཤར། །འབྲུམ་ཕྲན་སྲ་ཞིང་ནད་བཅས་འགྱུར། །མང་ཞིང་མཐུག་ལ་འཛག་པར་བཅས། །རྐན་གྱི་འབྲུམ་ཕྲན་ཞེས་དེ་བཤད། །བད་ཀན་ཁྲག་གིས་རྐན་ཕུགས་སུ། །ཉ་ཡི་ལྒང་པ་འདྲ་ཞིང་འཇམ། །འཕྱང་ཞིང་སྐྲངས་ལ་སྤྱི་བག་ཅན། །ཁ་ཟས་སྣ་ནས་འབྱུང་བར་བྱེད། །ལྐོག་འགགས་སྐོམ་དང་ལུད་པ་དང༌། །སློན་བྱེད་ལྐོག་མའི་ཤ་ལྷག་ཡིན། །རྐན་གྱི་དབུས་སུ་ནད་མེད་ཤ་།འདུས་པ་རྐན་འདུས་ཞེས་བྱའོ། །རྐན་གྱི་དབུས་སུ་པདྨ་འདྲ། །ཁྲག་ལས་སྐྱེས་པ་ཆུ་བུར་ཡིན། །བད་ཀན་འཁྲུགས་པས་རིང་ནས་འཕེལ། །ནད་མེད་རུས་སྦལ་འདྲ་ཞེས་བྱ། །བད་ཀན་ཚིལ་གྱིས་རྒྱ་སྲན་འདྲ། །ནད་མེད་བརྟན་པ་འབུར་བ་ཡིན། །མཁྲིས་པས་རྣགས་པ་སྨིན་ཞེས་བྱ། །རྣག་འཇག་ནད་དཀྱིལ་ཆེ་བ་ཡིན། །རླུང་མཁྲིས་ལས་གྱུར་ཚ་ཉོན་མོངས། །རྐན་སྐམ་དེ་ཡི་མིང་ཅན་ཡིན། །ལྕེ་དང་འབྲེལ་བ་ལྐོག་མའི་ནད། །ཤ་ཡི་མྱུ་གུ་མྱུར་འཕེལ་ཞིང༌། །མི་བཟད་ལམ་ནི་འགོག་བྱེད་པ། །མྱུར་གསོད་བྱེད་པ་གག་པ་ཡིན། །དེ་ནི་རླུང་གྱུར་ལྐོག་མ་ཁ། །སྐམ་བྱེད་འགྲམ་པ་རྣ་ནད་སྐྱེད། །མཁྲིས་པས་རིམས་སྐོམ་རྨོངས་བག་ཅན། །ལྐོག་འགགས་དུད་པས་བདུགས་སྙམ་སེམས། །མྱུར་སྨིན་མྱུར་དུ་འཕེལ་བ་དང༌། །དམར་ཞིང་རེག་ན་མི་བཟོད་བྱེད། །བད་ཀན་གྱིས་དཀར་འབྱར་བ་གཅན། །ཁྲག་གྱུར་འབྲུམ་བུས་ཁྱབ་པ་དང༌། །མེ་མདག་འདྲ་ཞིང་རྣ་ནད་སྐྱེད། །མཁྲིས་པ་ལས་གྱུར་མཚན་ཉིད་མཚུངས། །འདུས་གྱུར་རྣག་ཕུགས་གཏིང་རིང་ཞིང༌། །མཚན་མ་ཀུན་དང་ལྡན་པ་ཡིན། །བད་ཀན་ཤས་ཆེར་སྐྲངས་པ་དང། །རྨེན་བུ་རྒྱ་ཤུག་འདྲ་ཞིང་མཐོ། །གྲ་མ་ཚོར་མས་གར་སྙམ་བྱེད། །ལམ་འགག་བྱེད་པ་རྩ་བ་ཡིན། །ཟླུམ་ཞིང་མཐོ་ལ་ཚ་བ་དང༌། །ལྐོག་མའི་ངོ་གནས་འདུས་པ་ཡིན། །འགྲམ་པའི་མཚམས་ནས་མགུལ་པའི་ནད། །རས་བལ་ས་ཕོན་ལྟ་བུར་ཟླུམ། །སྤྱི་བག་ནད་ཚབས་
ཆུང་བར་སྐྲང༌། །སྲ་བ་མཆུ་རྩེ་ཅན་ཞེས་བྱ། །ཕྱི་དང་ནང་དུ་མི་བཟད་སྐྲང༌། །ལྐོག་མའི་ལམ་གྱི་གཏན་པ་འདྲ། །མགོ་ལྕི་སྣུམ་དང་ཁ་ཆུ་འཛག །རིམས་སྐྱེད་ལྐོག་མཆུ་འཛིངས་པ་ཡིན། །སྐྲངས་པ་ཤས་ཆེར་མི་ན་ཞིང༌། །ཆུ་ཞེང་དེ་འདྲ་གདུ་བུ་ཡིན། །ནད་ཀྱི་ལྐོག་མ་ཤ་མཛེར་ནི། །གཅིག་གམ་མང་སྐྱེས་ནད་ཚབས་ཆུང༌། །དབུགས་འབྱིན་དཀའ་ཞིང་ཟས་མིད་དཀའ། །རྩ་བ་ཆེ་བ་ལྐོག་མའི་མཚོན། །ཤ་ཡི་མཛེར་པ་མང་པོས་ཁྱབ། །རབ་སྐམ་ཚ་ལ་མགོ་བོ་ན། །མདུང་ལྟར་ཤིན་ཏུ་ནད་སྐྱེད་བྱེད། །མཛེར་པས་ཁྱབ་པས་མདུང་འདྲ་ཡིན། །ལྐོག་མ་ཀུན་ནི་མྱུར་ཁྱབ་ཅིང༌། །མྱུར་སྐྱེ་མྱུར་སྨིན་ཤས་ཆེར་ན། །རུལ་བའི་རྣག་འདྲ་འཛག་གྱུར་པ། །སྐྲངས་པ་ལྐོག་མའི་ཁོང་འབྲས་པ་ཡིན། །ལྕེ་ཡི་མཐའ་མ་ལྐོག་མ་སོགས། །སྐྲང་ཞིང་སྨིན་པ་མེད་པའི་ནད། །བརྟན་པ་ཁྲག་གིས་སྐྱེད་བྱེད་པ། །ནད་མེད་ལྐོག་མའི་རྨེན་བུ་ཡིན། །རླུང་དང་བད་ཀ་ནི་ཚལ་གྱིས་ནི། །ལྐོག་མའི་ཕྱི་རོལ་ལྦ་བ་སྐྱེས། །དེ་ནི་འཕེལ་བར་གྱུར་པའི་ཚེ། །རླིག་པ་ལྟར་འཕྱང་ན་བ་མེད། །དེ་ནི་རླུང་གྱུར་དམར་བའམ་གང༌། ན་ཟུག་རྩ་རིས་ནག་པོར་བཅས། །འཕེལ་བས་ལྐོག་མ་ཁ་སྐམ་ཞིང༌། ལྕེ་ཡིས་རོ་མི་ཚོར་བར་བྱེད། །བད་ཀན་ལ་ལྕི་རེག་ན་གྲང༌། །བརྟན་ཞིང་སྐྱ་ལ་གཡའ་དང་བཅས། །འཕེལ་ན་རྐན་དང་ལྐོག་མར་ཆགས། །ཁ་ནི་མངར་བ་བྲོ་བར་བྱེད། །ཚིལ་གྱུར་བད་ཀན་ལྟ་བུར་ན། །དེ་ནི་འཕེལ་འབྲི་ལུས་འདར་བྱེད། །འཕེལ་བར་བྱེད་པའི་ཚེ་ན་ནི། །ལྐོག་མར་སྒྲ་བཅས་སྐད་གསང་ཉམས། །བད་ཀན་གྱིས་ནི་རླུང་རྒྱན་བཀག །ལྐོག་སྐམ་སྐད་གསང་ཉམས་པ་དང༌། །དཀའ་བས་དབུགས་འབྱིན་མོན་ཞུགས་སྙམ། །རླུང་ལས་སྐད་ཉམས་གང་ཡིན་འགྱུར། །རླུང་ནི་ཀུན་ཏུ་འགྲོ་བྱེད་པས། །ཁ་ནང་རྨ་ནི་འཕོ་བར་བྱེད། །དམར་ལ་རྩུབ་པ་སྐྱེད་བྱེད་ཅིང༌། །མཆུ་དམར་པགས་པ་ལྷོད་པ་དང༌། །ལྕེ་ཡིས་གྲང་བ་མེ་བཟོད་ལྕི། །གས་ཤིང་ཚེར་མས་ཁྱབ་འདྲར་སྣང༌། །ཁ་མནམ་གདངས་པར་དཀའ་བ་ནི། ཁ་ཡི་ཤུ་བ་ཞེས་བྱར་བཤད། །བད་ཀན་གཞང་འབྲུམ་སྐྲན་སོགས་ཀྱིས། །འོག་ཏུ་གནོད་པར་བྱས་པའི་རླུང༌། །གྱེན་འབྱུང་ཁ་
ནི་དྲི་མི་ཞིམ། །དེ་ནི་སྟེང་གི་རྐུབ་ཅེས་བྱ། །མཁྲིས་གྱུར་ཁ་ཤུ་ཁ་རྣག་ཅིང༌། །ཚ་ན་ཁ་ནི་ཚ་བྲོ་ལ། །རྨ་ལ་ལན་ཚྭས་བྱུགས་སྙམ་སེམས། །ཁྲག་ལས་གྱུར་པའང་དེ་དང་འདྲ། །བད་ཀན་ལས་གྱུར་ཁ་མངར་བྲོ། །གཡའ་ཞིང་རྨ་ནི་འབྱིལ་བག་ཅན། མཁུར་ཚོས་ནང་དུ་བརྟེན་ནས་ནི། །འབྲུམ་བུ་གང་ཅིང་སྐྱ་བ་འབྱུང༌། །དེ་ནི་མཉེ་ཞིང་བཅད་པ་དང༌། །བསྐྱོད་ན་འཕེལ་བར་བྱེད་པ་ཡིན། །ནད་ནི་ཁྲག་བཅས་གྱུར་ཁ་ཤུ། །ཁ་ཤུ་ནད་ནི་ཁྲག་བས་འགྱུར། །འདུས་པ་མཚན་ཉིད་ཀུན་དང་ལྡན་།དེ་ཉིད་སོ་ཤིང་ལ་སོགས་ལ། །མི་དགའ་ཁ་དྲི་མི་ཞིམ་འགྱུར། །མཆུ་དང་མཁུར་ཆོས་སོ་རྩ་དང༌། །ལྕེ་དང་རྐན་དང་མགུལ་པ་དང༌། །ཁ་དང་ཐམས་ཅད་དག་གི་ནི། །ནད་ནི་བདུན་ཅུ་རྩ་དགུ་ཡིན། །བཅུ་གཅིག་གཅིག་དང་བཅུ་དང་ནི། །བཅུ་གསུམ་དེ་བཞིན་དྲུག་དང་བརྒྱད། །བཅུ་གཉིས་བཅོ་བརྒྱད་དག་དང་ནི། །དེ་དག་གོ་རིམས་བཞིན་དུ་སྦྱར། །སོ་སྟོ་ཤ་དང་ཁྲག་གྱུར་མཆུ། །ཆུ་བུར་ཆུ་ནི་མེད་པ་དང༌། །རྐན་གྱི་རུས་སྦལ་འབྲུམ་ཕྲན་དང༌། །མིང་ཁོང་སྟོང་སྟོང་ཆེ་ཆུང་འཛིངས། །སྐད་ཉམས་སོ་སྔོན་སྟེང་གི་རྐུབ། །མདུང་འདྲ་གདུ་བུ་ཆུ་སེར་ཅན། །འདུས་གྱུར་མིད་པ་མཆུ་ནད་དང༌། །ཁྲག་དང་འདུས་གྱུར་གག་པ་དང༌། །སོ་གོགས་སོ་ནི་ཆག་པ་དང༌། །སྨིན་པའི་ཉེ་བའི་ལྕེ་དང་ནི། །ལྐོག་མའི་ལྦ་བ་སྐད་ཉམས་དང༌། །དབུགས་མི་ཐོན་པ་ལོ་གཅིག་ལོན། །སོ་བརྩེ་གསང་བ་འཚོ་བ་ཙམ། །ལྷག་མ་མཚོན་དང་སྨན་གྱིས་གསོ། །ཡན་ལག་བརྒྱད་པའི་སྙིང་པོ་བསྡུས་པ་ལས། །ཕྱེ་མའི་གནས་ཀྱི་ལེའུ་ཉི་ཤུ་རྩ་གཅིག་པའོ།། །།དེ་ནས་ཁ་ནད་གསོ་བ་བཤད་པར་བྱའོ། །མཆུ་རལ་བ་ཡི་མཐའ་བྲུད་དེ། །བཙེམས་ལ་རྨ་ལྟར་གསོ་བར་བྱ། །ཤིང་མངར་སེངས་ཕོར་མ་ཀྲ་ཀུ་ནི། ཐལ་ཏྲེས་ཨུཏྤལ་ཤྲ་པ་ནི། །མོན་སྣེའུ་དམེ་རུ་པ་ཏོ་ལ། །ཏིལ་མར་བསྐོལ་བས་བསྐུ་བར་བྱ། །རླུང་འཇོམས་མངར་བའི་སྡེ་ཚན་དང༌། །བསྐོལ་བའི་ཏིལ་མར་སྣ་སྨང་གཏང༌། །རླུང་གྱུར་མཆུ་ནད་སྲ་རྩི་ཕོག །སྤྲ་ཚིལ་གུ་གུལ་ཐང་ཤིང་ན། །སྣུམ་ཆེན་བསྐོལ་བའི་རས་བལ་དག །སྤངས་པའི་ཡེ་འུས་གླན་པར་བྱ། །ཤིང་
མངར་ཕྱེ་མར་བཅས་པ་དང༌། །དེ་ཉིད་ཀྱིས་ནི་བསྐུ་བར་བྱ། །ཨེ་རཎྜ་ཡི་ལོ་མ་ནི། །འོ་མར་བསྐོལ་བས་སྦུབས་དུགས་བྱ། །མཆུ་རལ་སྐབས་བཤད་སྣ་སྨན་དང༌། །མགོ་བོ་བརྟ་བ་དག་ཀྱང་བྱ། །མཁྲིས་པས་སྣད་པའི་མཆུ་ནད་ལ། །སྲིན་བུ་པད་པས་ཁྲག་དབྱུང་བྱ། །སེང་ཕྲོམ་སྦྲང་རྩི་སྲ་རྩི་པོག །ཤིང་མངར་བཅས་པའི་ཕྱེ་མ་གདབ། །སླེ་ཏྲེས་ཤིང་མངར་རྨ་ཤིང་དང༌། །བསྐོལ་བའི་མར་གྱིས་བསྐུས་ནའང་ཕན། །མཁྲིས་པའི་ཁོང་འབྲས་ལྟར་ཡང་གསོ། །ཁྲག་ལས་གྱུར་པ་སར་པ་ལ། །དེ་དག་ཉིད་ཀྱིས་གསོ་བར་བྱ། །བད་ཀན་ལས་གྱུར་མཆུ་ནད་ལ། །པ་ཏོའི་ཐལ་བ་ཚ་བ་གསུམ། །སྦྲང་རྩི་དང་ནི་སྦྱར་བས་བསྐུ། །གཏར་ག་བྱས་ནས་ཕྱེ་མ་གདབ། །བད་ཀན་འཇོམས་པར་བྱེད་པ་ཡིན། །དུད་བརྔུབ་སྣ་སྨན་མཁུར་བཀང་བྱ། །ཚིལ་གྱུར་དུགས་བྱས་དབྲལ་ནས་ནི། །མེ་ཡིས་ངེས་པར་བསྲེག་པར་བྱ། །པྲི་ཡང་ཀུ་དང་འབྲས་བུ་གསུམ། །སེང་ཕྲོམ་སྦྲང་རྩིར་སྦྱར་བས་སྐུ། །ཆུ་ཡི་ཆུ་བུར་བརྟོལ་ནས་སྦྱང་།སྨན་རྣོན་སྦྲང་རྩིས་བསྐུ་བར་བྱ། །གཏིང་རིང་བའམ་རབ་འཕེལ་ལ། །ཐང་སྨན་དག་གམ་མེ་བཙས་གསོ། །མཁུར་བའི་ཆུ་སེར་སྨིན་སྐབས་སུ། །སྐྲངས་པའི་ནད་ལྟར་གསོ་བར་བྱ། །སོ་གྲང་བ་ལ་དུགས་བཞས་ལ། །སོ་རྩ་བྲུད་དེ་ཏིལ་མར་བསྲེགས། །གླ་སྒང་རྒྱམ་ཚ་སྦྲང་རྩི་དང༌། །སེའུ་འབྲུའི་ཤུན་པ་འབྲས་བུ་གསུམ། །སྐྱེར་བའི་ཁཎྜ་འདམ་བུའི་རྐང༌། །བཅའ་སྒ་སྦྱར་བས་བསྐུ་བར་བྱ། །འོ་མ་ཅན་བསྐོལ་མཁུར་བ་བཀང༌། །ཨེ་རཎྜའི་མར་སྣ་སྨན་གཏང༌། །སོ་བརྩེ་དེ་བཞིན་བྱེ་བ་ལ། །རླུང་འཇོམས་གསོ་བ་ཐམས་ཅད་བྱ། །ཏིལ་དང་ཤིང་མངར་སྦྲང་རྩི་ནི། །འོ་མར་བསྐོལ་བའི་མཁུར་བཀང་བཅང༌། །སོ་འགུལ་བ་ལ་རྩབ་བཅུའི། །ཁུ་བ་མར་བསྐོལ་མཁུར་བ་བཀང༌། །སྦངས་མ་སེང་ཕྲོམ་པི་པི་ལིང༌། །འབྲས་བུ་གསུམ་དང་རྨ་ཤིང་དང༌། །རྒྱམ་ཚ་ཡིས་ནི་བདར་བར་བྱ། །སྣུམ་བག་གིས་ནི་སྣ་སྨན་དང༌། །མཁུར་བཀང་གནས་སྐབས་ཇི་བཞིན་བསྟེན། །སོ་ལྷག་སྐྱེས་ལ་ཐལ་སྨན་གྱིས། །བསྐུས་ཏེ་གོགས་པར་གྱུར་པ་དང༌། །སྲིན་ཅན་སོ་ལྟར་ཕྱུང་ནས་
ནི། །དེ་ཚེ་དེ་དང་འདྲ་བར་གསོ། །ཁྲག་ནི་ཆོད་པར་མ་གྱུར་ན། །བསྲེགས་ལ་རྨ་ལྟར་གསོ་བར་བྱ། །སོ་དྲེག་ཆགས་ལ་སོ་རྩལ། །གནོད་པ་མེད་པར་བསལ་བར་བྱ། །ཐལ་སྨན་སྦྲང་རྩིར་བཅས་པས་ནི། །དེ་ཡི་འོག་ཏུ་བསྐུ་བར་བྱ། །སོ་གོགས་པ་ལའང་འདི་ཉིད་དང༌། །སོ་བརྩེར་བཤད་པའི་གསོ་བ་བྱ། །སྲིན་ཅན་སོ་ནི་མི་འགུལ་ལ། །དུགས་བྱས་ནས་ནི་ཁྲག་དབྱུང་བྱ། །སྣུམ་གྱིས་བསྐུ་ཞིང་མཁུར་བཀང་དང༌། །སྣ་སྨན་ཁ་ཟས་རླུང་འཇོམས་སྦྱིན། །ཁོང་སྟོང་བུ་རམ་སྤྲ་ཚིལ་གྱིས། །གང་བའི་ཐུར་མས་བསྲེག་པར་བྱ། །ལོ་མ་བདུན་པ་ཨརྐ་ཡི། །ལོ་མས་བཀང་ན་སྲིན་གཟེར་འཇོམས། །ཤིང་ཀུན་ནག་ཆུར་ཀད་པ་ལ། །སརྫི་ཀ་དང་བྱི་དང་ག །རུ་རྟའི་ཕྱེ་མ་རས་ལ་གཏུམས། །སོར་གླན་ཟུག་གཟེར་མྱུར་དུ་འཇོམས། །ཡང་ན་འདི་ཉིད་བསྐོལ་བ་ཡི། །ཏིལ་མར་མཁུར་བར་དགང་བར་བྱ། །ཡང་ན་བྲི་ཧ་ཏི་རྣམ་གཉིས། །བུ་ག་དམ་པ་ཨེ་རཎྜ། །བསྐོལ་བའི་ཁུ་བས་མཁུར་བ་བཀང༌། །དེ་ལྟར་གསོ་བ་མང་པོ་ཡིས། །ནད་ནི་ཞི་བར་མ་གྱུར་ན། །སྐམ་པ་ཕྲ་མོ་དག་གིས་སམ། །སོ་དབྱུང་བ་ཡི་ཆ་སྤྱད་ཀྱིས། །དང་པོ་རྩ་བ་ནས་བསླངས་ཏེ། །གཏན་ནས་དེ་ནི་དབྱུང་བར་བྱ། །ཏིལ་མར་ཤིང་མངར་ཕྱེར་བཅས་པའམ། །སྦྲང་རྩིས་དེ་འོག་མཁུར་བཀང་བྱ། །དེ་འོག་ཤིང་མངར་བིད་རི། །སྲིད་ཀ་དང་ཀ་ཤེ་རུ། །ཏིལ་མར་བཅུ་འགྱུར་འོམ་དང༌། །བསྐོལ་བའི་སྣ་སྨན་གཏང་བར་བྱ། །རིད་ཅིང་ཉམ་ཆུང་རྒན་པོ་དང༌། །རླུང་ནད་ཀྱིས་ཉེན་སོ་མི་དབྱུང་ཡ་སོ་དབྱུང་བར་མི་བྱ་སྟེ། །དེ་ནི་བླ་བརྣན་མང་པོ་སྐྱེད། །དེ་ཡང་འབྱིན་ན་སྣུམ་པ་དང༌། །མངར་དང་བསིལ་བའི་རིམ་པས་གསོ། །གྲང་བས་ཉེན་ལ་ཁྲག་དབྱུང་ཞིང༌། །སྦྲང་རྩིར་བཅས་པས་བསྐུ་བར་བྱ། །གླ་སྒང་ཨརྫུ་ནའི་ཤུན་པ། །པྲི་ཡང་ཀུ་དང་སྐྱེར་ཁཎྜ། །བཅའ་སྒ་སྒྲང་རྩིར་སྦྱར་བ་བསྐུ། །དེ་བསྐོལ་བས་ནི་མཁུར་བཀང་དང༌། །མངར་སྨན་ཏིལ་མར་བསྐོལ་སྣར་བླུགས། །རྙིལ་ནི་ཉེ་བར་འདར་བ་ལ། །ཆུ་ཚན་མཁུར་བཀང་བས་དུགས་བྱ། །དཀྱིལ་འཁོར་འདྲ་བའམ་ཤ་ཁ་ཡི། །ལོ་མས་མང་དུ་བྲུད་པར་བྱ། །རྒྱ་སྐྱེགས་རྨ་ཤིང་ཕྲི་ཡང་ཀུ། །རྒྱམ་ཚ་རུ་རྟ་བཙག་
ཡུག་སྣམ། །ན་ལེ་ཤམ་དང་བཅའ་སྒ་དང༌། །ཤིང་མངར་སྐྱེར་པའི་ཁཎྜ་དང༌། །མར་གྱི་སྙིང་པོ་སྦྲང་རྩི་དང༌། །སྦྱར་བ་དེ་འོག་བསྐུ་བར་བྱ། །མར་ཁུའམ་ཏིལ་མར་མཁུར་སྤོ་བ། །དྲོ་འཇམ་དེ་ཡི་རྗེས་ལ་བྱ། །མངར་བའི་སྡེ་དང་བསྐོལ་བའི་མར། །མཁུར་བཀང་སྣ་སྨན་བྱས་ན་ཕན། །སོ་འབུར་བ་ལ་དུགས་བྱས་ལ། །བཅད་དང་དབུག་དང་བྲུད་པར་བྱ། །ཤིང་མངར་བཅའ་སྒས་རྫི་ཀ །རྒྱམ་ཚའི་ཕྱེ་མ་བསྐུ་བར་བྱ། །སོ་ཡི་ཁོང་འབྲས་ཚ་དྲོ་རྣོ། །རྩུབ་པའི་མཁུར་བཀང་བསྐུ་བར་བྱ། །པུ་ཙེ་ཤེལ་དང་བ་སྦྲུ་བ། །རུ་རྟ་ནས་ཚིག་འཁུས་ཕྱེར་བདར། །བསིལ་སྨན་གྱིས་ནི་སྨིན་མི་གཞུག །སྨིན་ནས་དྲལ་ལ་གཏིང་རིང་བསྲེག །ཁོང་སྟོང་བཅད་དེ་བྲུད་ནས་ནི། །གླ་སྒང་སེང་ཕྲོམ་འབྲས་བུ་གསུམ། །ཤུ་ཏི་རྨ་ཤིང་སྐྱེར་ཁཎྜ། །རྒྱ་སྐྱེགས་ཤིང་མངར་ཀད་ཕལ། །སྦྲང་རྩིར་སྦྱར་བས་བསྐུ་བར་བྱ། །དེ་ཉིད་ཁུ་བས་མཁུར་བ་བཀང༌། །ཤིང་མངར་སེང་ཕྲོ་མ་དཱུར་བ་དཀར། །ཐལ་ཏྲེས་ཙནྡན་ན་ཨ་ག་རུ། །ཀར་དཀར་པོ་བཙག་ཡུག་སྣམ། །པདྨ་དཀར་པོ་སྟག་ཚེར་བ། །བསྐོལ་བའི་ཏིལ་མར་སྣ་སྨན་གཏང༌། །ཤ་ལྷག་སྐྱེས་པ་བཅད་ནས་ནི། །ཤུ་དག་ཏེ་ཛོ་བ་ཏི་དང༌། །པ་ཏ་ནས་ཚིག་འཁུས་ཐལ་པ། །སརྫི་ཀ་དང་སྦྲང་རྩིས་བསྐུ། །འབྲས་བུ་གསུམ་དང་པ་ཏོ་ལ། །ནིམ་པ་བསྐོལ་བས་མཁུར་བ་བཀང༌། །སྣད་པ་ལས་བྱུང་ནད་ལ་ནི། །དཀྱིལ་འཁོར་རྩེ་མོ་འདྲ་བས་སྦྱངས། །དེ་ནས་ཐལ་སྨན་སྣ་སྨན་གཏང༌། །མཁུར་བཀང་ལ་སོགས་བསིལ་སྨན་གཏང༌། །ལུས་ཀྱི་གོང་འོག་ནས་སྦྱང་བྱ། །དེ་འོག་མགོ་བོའི་བཀྲུ་སྨན་བྱ། །སོ་ཡི་རྩ་ནི་སོས་ནས་ཀྱང༌། །ཕྱུང་སྟེ་ནད་དང་ལྡན་པ་ཡི། །བུ་རམ་སྤྲ་ཚིལ་བཀང་བས་བསྲེག །ཛཱ་ཏི་སེང་ལྡེང་སྤྲ་ཚིལ་དང༌། །གཟེ་མ་བསྐོལ་བའི་ཁུ་བས་བཀྲུ། །འོ་མ་ཅན་ཤིང་ཆུས་མཁུར་བཀང༌། །དེ་བསྐོལ་ཏིལ་མར་སྣ་སྨན་གཏང༌། །རླུང་གྱུར་ལྕེ་ནི་རྩུབ་པ་ལ། །རླུང་གི་མཆུ་ནད་གསོ་བར་བྱ། །མཁྲིས་པ་ལས་གྱུར་ལྕེ་ནད་ལ། །བཞར་ཏེ་ཁྲག་ནི་དབྱུང་བར་བྱ། །བསྐུ་དང་མཁུར་བ་བཀང་བ་དང༌། །སྣ་སྨན་མངར་བ་དག་ཀྱང་བྱ། །དེ་བཞིན་བད་ཀན་ལས་གྱུར་ལ། །ཉུངས་ཀར་ཚ་བ་གསུམ་ལ་
སོགས། །སྨན་ནི་རྣོན་པོས་གསོ་བར་བྱ། །ལྕེ་ལས་ཆུ་སེར་འཛག་པ་གསར། །མཚོན་མི་རེག་པར་དེ་བཞིན་གསོ། །ལྕེ་ལྷག་སྐྱེས་པ་ལྕེ་བཏེག་སྟེ། །ལྕགས་ཀྱུས་ལྕེ་ལྷག་དྲངས་ནས་ནི། །རྩེ་མོ་དཀྱིལ་འཁོར་འདྲ་བས་བཅད། །རྣོ་དང་དྲོ་བས་བདར་སོགས་བྱ། །ཉེ་བའི་ལྕེ་ལ་ཁྲག་གཟགས་ཏེ། །ནས་ཚིག་འཁུས་པའི་ཐལ་བས་བདར། །ཤ་ལྷག་སྐྱེས་ལ་བད་ཀན་འཇོམས། །སྣ་སྨན་མཁུར་བཀང་བདར་བར་བྱ། །ག་གོན་ས་བོན་ལྟ་བུར་ནི། །འཕེལ་ཞིང་རྩ་ནི་མི་མངོན་དང༌། །རྩེ་མོས་ལྕེ་ཡི་རྩབ་སླེབས། །ལྕགས་ཀྱུ་ཡིས་ནི་བཟུང་ནས་ཀྱང༌། །རྩེ་མོ་དཀྱིལ་འཁོར་འདྲ་བ་ཡིས། །རྩེ་མོ་རྩ་བ་རན་པར་གཅད། །བཅད་དྲགས་ཁྲག་ཟགས་འཆི་བར་བྱེད། །བཅད་ཆུང་ནད་ནི་འཕེལ་བར་བྱེད། །བོང་ང་བ་ཏ་ན་ལེ་ཤམ། །ཤུ་དག་རུ་རྟ་པ་རིལ། །རྒྱམ་ཚ་སྦྲང་རྩིར་བཅས་པ་ཡིས། །བཅད་པ་དག་ནི་བདར་བར་བྱ། །པ་རི་བེ་ལ་ཀུན་ཏ་ཏའོ། །པུ་ཙེ་ཤེལ་དང་བོང་ད་དཀར། །བ་ཏ་ནི་མ་པར་སྣ་དང༌། །ཤུ་དག་ཆུ་ཡིས་མཁུར་བཀང་བྱ། །འདུས་དང་སོ་འབུར་རུས་སྦལ་འདྲ། །དེ་བཞིན་བཞར་ཏེ་གསོ་བར་བྱ། །རྐན་རྣགས་མ་སྨིན་པ་ལ་ནི། །ནག་ཚུར་སྦྲང་རྩི་སྐྱེར་ཁཎྜ། །བསྐུ་བར་བྱའོ་བསིལ་དང་མངར། །སྨན་བསྐོལ་ཁུ་བས་མཁུར་བཀང་བྱ། །སྨིན་ནས་ན་ཡའི་གཞི་ལྟར་དྲས། །དྲོ་དང་རྣོ་བས་བསྐུ་བར་བྱ། །བ་ཤ་ཀ་དང་པ་ཏོ་ལ། །ནིམ་པ་ལ་སོགས་རྣོ་བ་ཡི། །སྨན་གྱི་ཁུ་བས་མཁུར་བད་གང༌། །རྐན་སྐམ་སྐོམ་དད་གདུང་མེད་པ། །ཟས་ཟོས་རྗེས་ལ་ཞུན་མར་ནི། །བཅའ་སྒ་བི་པི་ལིང་བསྐོལ་བླུད། །སྐྱུར་བས་མཁུར་བ་སྤོ་བ་བཅང༌། །སྐམ་སའི་ཤ་ཁུ་སྣུམ་པ་དང༌། །ཞུན་མར་འོ་མའི་སྣ་སྨན་གཏང༌། །ལྐོག་མའི་ནད་ལ་གཏར་ག་གདབ། །སྣ་སྨན་ལ་སོགས་རྣོན་པོ་བྱ། །སྐྱེར་པའི་ཤུན་པ་སྐྱེར་ཁཎྜ། །དུག་མོ་ཉུང་བསྐོལ་ཁུ་བ་བླུད། །ཨ་རུར་ཡི་ཁུ་བ་ནི། །སྦྲང་རྩིར་ལྡན་པ་སྦྱིན་པར་བྱ། །འབྲས་བུ་གསུམ་དང་ཆ་བ་གསུམ། །ནས་ཚིག་འཁུས་ཐལ་སྐྱེར་པ་དང༌། །ཙི་ཏྲ་ཀ་དང་སྐྱེར་ཁཎྜ། །པ་ཏ་ཏེ་ཛོ་བ་ཏི་དང༌། །ནིམ་པ་ཚ་དང་ར་གཅིན་བསྐོལ། །མཁུར་བ་སྤོ་དང་རི་ལུ་དང༌། །ཕྱེ་མ་གདབ་པ་དག་ཀྱང་
བྱ། །ལྕང་མ་གི་རི་ཀརྞི་དང༌། །གླ་སྒང་ཐང་ཤིང་བཅའ་སྒ་དང༌། །ཤུ་དག་དན་དམུར་བ་ཡི། །ལྡེ་གུ་དྲོ་བསྐུས་སྐྲངས་ནད་སེལ། །དེ་ནས་ཕྱི་ནང་དུགས་བྱས་ཏེ། །སོར་གདུབ་ཆ་སྤྱད་དག་གིས་སམ། །རྒྱམ་ཚ་ལྡན་པའི་སེན་མོ་ཡིས། །རླུང་གྱུར་གག་པ་བཞར་བར་བྱ། །རྩ་བ་ལྔ་བསྐོལ་མཁུར་བཀང་དང༌། །ཏིལ་མར་མཁུར་སྦོ་སྣ་སྨན་གཏང༌། །མཁྲིས་པ་ལས་གྱུར་གཏར་ག་གདབ། །ཁར་སྦྲང་རྩི་པྲི་ཡང་ཀུ། །སེང་ཕྲོམ་རྨ་ཤིང་བཅས་པ་བདར། །དེ་བསྐོལ་ཁུ་བ་མཁུར་བར་བཅང༌། །རྒུན་འབྲུམ་པ་རུ་ཤ་ཀ་བསྐོལ། །མཁུར་བ་བཀང་བའང་ཕན་པ་ཡིན། །ཁྲག་ལས་གྱུར་པའང་དེ་བཞིན་དུ། །གཏར་ག་གདབ་སྟེ་གསོ་བར་བྱ། །བད་ཀན་ལས་གྱུར་ཁང་པ་ཡི། །དུད་པ་ཚ་བའི་སྨན་བཅས་གདབ། །ཨ་པ་མརྒའི་འབྲས་བུ་དང༌། །གི་རི་ཀརྞི་བྱི་དང་ག །རྒྱམ་ཚ་ཙནྡན་ཏིལ་མར་བསྐོལ། །སྣ་སྨན་མཁུར་བཀང་བྱ་བ་བསྔགས། །དེ་བཞིན་འདུས་དང་རྩ་བ་དང༌། །མཆུ་རྩེ་ལྐོག་མའི་མཚོན་ལའང་བྱ། །ཁོང་འབྲས་ཁྲག་གཟགས་འབྲས་བུ་གསུམ། །གི་ཝང་ཡུག་སྣམ་སྐྱེར་ཁཎྜ། །སེང་ཕྲོམ་རྒྱམ་ཚ་རྨ་ཤིང་དང༌། །པི་པི་ལིང་བསྐུ་མཁུར་བཀང་བྱ། །རླུང་ལས་གྱུར་པའི་ཝ་བ་ལ། །དུགས་བྱས་ནས་ནི་ཁྲག་དབྱུང་ཞིང༌། །ཏིལ་དང་ཟར་མ་ལེ་བ་རྒན་རྩི། །པི་ལ་ཡ་དང་བཙོད་འབྲས་ཀྱིས། །རྨ་འདྲུབ་ནས་བསྐུས་དཀྲི་བར་བྱ། །ཤི་ཀྲུ་སེང་ཕྲོམ་ཏར་ཀ་རི། །ཏང་པ་ལ་ཧ་ཏི་པི་པི་ལིང༌། །བ་སྤུ་པ་དང་ཨ་རུ་ར། །ཨརྐའི་རྩ་བ་པོ་སོན་ཆ། །ཨེ་ཀཻ་ཥི་ཀར་བཅས་པ་ནི། །ཆང་ངམ་རང་སྒྱུར་བཏགས་པས་བསྐུ། །ལྡེ་གུས་ཡང་དང་ཡང་དུ་བསྐུ། །སླེ་ཏྲེས་ནིམ་པ་དུག་མོ་ཉུང༌། །ཧན་ས་བ་ཏི་བ་ལ་གཉིས། །ཐང་ཤིང་དང་ནི་པི་པི་ལིང༌། །བསྐོལ་བའི་ཏིལ་མར་བླུད་པར་བྱ། །བད་ཀན་ལ་ཡང་འདི་དག་ནི། །བྱ་ཞིང་ལྷག་པར་དུགས་བསྐུ་བྱ། །ཨ་ཟ་གནྡྷ་བོང་ང་དཀར། །ཨ་ཟ་ཤིང་གི་བི་ཤ་ལྱ། །ཀུ་བ་ཁ་བོ་འོལ་མ་སེ། །ཤི་རི་ཤ་དང་རྒྱ་སྐྱེགས་ཤིང༌། །ཐལ་ཆུའི་ལྡེ་གུས་བསྐུ་བར་བྱ། །ཐལ་བ་དྲག་པོ་གཅིན་བསྐོལ་བཙགས། །ཁྲེ་རྒོད་ཟ་ཞིང་བཏུང་བར་བྱ། །དུག་མོ་ཉུང་སོགས་ལན་ཚྭ་ལྔ། །ཏིལ་མར་ལྷན་ཅིག་བསྐོལ་བ་བླུད། །བད་ཀན་འཇོམས་
པའི་དུད་པ་དང༌། །སློན་སྨན་སྣ་སྨན་ལ་སོགས་བསྟེན། །ཚིལ་གྱུར་བ་ལ་གཏར་ག་གདབ། །བད་ཀན་འཇོམས་པའི་ཆོ་ག་བསྟེན། །འདི་ལ་ཨ་ས་ལ་སོགས་པའི། །ཁུ་བ་གཅིན་ནི་སྔ་དྲོ་བླུད། །དེས་མ་ཞིན་ཐམས་ཅད་ནི། །སྨིན་བྱས་རྨ་ལྟར་གསོ་བར་བྱ། །ཁ་ཤུ་ལ་ནི་འབྲས་བུ་གསུམ། །བ་ཏ་རྒུན་འབྲུམ་ཛཱ་ཏི་ཡི། །འོ་མར་བསྐོལ་བའི་སྦྲང་རྩིར་བཅས། །ཁ་ནི་བསྐུ་ཞིང་བཅང་བར་བྱ། །ཡང་ན་ཟིན་ཐིག་ལ་སོགས་སྤེ། །བཟའ་ཞིང་བསྟེན་པ་ཉིད་དུ་བྱ། །རླུང་གི་ཁ་ཤུར་པི་པི་ལིང༌། །རྒྱམ་ཚ་སུག་སྨེལ་ཕྱེ་མ་གདབ། །ཡང་ན་རླུང་འཇོམས་སྨན་བསྐོལ་བའི། །ཏིལ་མར་སྣ་སྨན་མཁུར་པ་ཀང་ཕན། །ཁྲག་མཁྲིས་གྱུར་ལ་ཁྲག་མཁྲིས་འཇོམས། །བད་ཀན་ལས་གྱུར་དེ་འཇོམས་བསྟེན། །འབྲུམ་ཕྲན་སྲ་ཞིང་བརྟན་པ་ལ། །ཤ་ཁའི་ལོ་མ་སོགས་ཀྱིས་བཞར། །འདུས་པ་ལས་གྱུར་གསོ་བ་ནི། །ནད་གཞི་ཇི་བཞིན་ཤས་ཆེར་བྱ། །ཆུ་བུར་གསར་ཞིང་མ་འཕེལ་བ། །བཅད་ལས་རྫི་ཀའི་ཐལ་བ། །བཅའ་སྒ་སྦྲང་རྩི་གདབ་པར་བྱ། །དེ་བསྐོལ་མཁུར་བ་བཀང་བར་བྱ། །སླེ་ཏྲེས་ནིམ་པའི་ལྡེ་གུ་ནི། །སྦྲང་རྩི་ཏིལ་མར་བཅས་པའང་རུང༌། །ནས་ཟན་ཟ་ཞིང་ཏིལ་མར་རྣོས། །སྣ་སྨན་དང་ནི་བསྐུ་བྱུག་བྱ། །ཁ་དྲི་ངལ་སློན་སྨན་དང༌། །དུད་པ་སྣ་སྨན་རྣོན་པོ་གཏང༌། །བཙོད་དང་སེང་ཕྲོམ་ད་ཏ་ཀི །ཤུག་པ་བྲི་ཡང་ཀུ་ཡི་ཆུས། །ཁ་ཡི་ནང་ནི་བཀྲུ་བ་དང༌། །ཕྱེ་མས་ཁ་ནི་དག་པར་བྱ། །གྲང་ཉེན་ཉེ་བར་བདར་བཤད་པའི། །སྣ་སྨན་ལ་སོགས་བསྟེན་པར་བྱ། འབྲས་བུ་གསུམ་དང་རྩ་མཁྲིས་ཙི་ཏྲ་ཀ །ཤིང་མངར་ཉུངས་ཀར་གླ་སྒང་ཚབ་གསུམ། །ཡ་བཀྵ་ར་སེར་པོ་རྣམ་གཉིས་དང༌། །ད་ཏྲིག་ཙནྡན་ལྕང་མ་སྟར་བུ་དང༌། །ཨ་ཤྭཏྠ་དང་འཛམ་བུའི་མྱུ་གུ་དང༌། །ད་ནན་ཛ་ཡ་ཀ་ར་བཱི་རའི་ཤུན། །སེང་ལྡེང་སྙིང་པོ་བསྐོལ་ཏེ་སྐ་བར་གྱུར། །དེ་ཡི་ཕྱེ་མ་བཏབ་སྟེ་རི་ལུ་བྱ། །དེ་ནི་ཁ་ནང་རྟག་ཏུ་བཞག་གྱུར་ན། །མཆུ་དང་རྐན་སོགས་ནད་ནི་མི་བཟད་འཇོམས། །མཆོག་ཏུ་ཁ་སྐམས་པ་དང་གག་པ་དང༌། །རོ་མི་ཚོར་སེལ་ལུས་འཕགས་བདག་པོས་བཤད། །སེང་ལྡེང་སྲང་བརྒྱ་ཆུ་བྲེ་བཅུ་དྲུག་བསྐོལ། །ཁུ་བ་དེ་དང་ཙནྡན་ཨ་ག་རུ། །
གུར་གུམ་པ་ལ་བ་རི་པེ་ལ་དང༌། །ཐང་ཤིང་སེང་ཕྲོམ་རྒུན་འབྲུམ་པུ་ཤེལ་ཙི། །བཙོད་དང་ཙོ་ཙ་ཤུག་པ་བྱི་དང་ག །པྲི་ཀ་རྒྱ་སྤོས་ཀད་པ་ལ་ཆུ་སྲིན་སྡེར། །སུག་སྨེལ་དྷེ་མ་ཀ་དང་རྨ་ཤིང་བཅས། །ཞོ་ནི་གཉིས་གཉིས་ཏིལ་མར་བྲེ་གང་བསྐོལ། །དེ་ནི་བཏུང་དང་སྣ་སྨན་མཁུར་བཀང་བྱ། །ཁ་ཡི་ནད་ཀུན་འཇོམས་བྱེད་བྱ་རྒོད་ལྟར། །མིག་གསལ་རྣ་བ་ཕག་འདྲར་གསང་བར་བྱེད། །ཙ་ཀྲ་མར་ད་སྐྱེར་པ་སེང་ཕྲོམ་གྱི། །ལྡེ་གུ་གདོང་ལ་བྱུགས་པར་གྱུར་ན་ནི། །དོ་ཁབས་སྨེ་བ་དྲི་མ་ལ་སོགས་སེལ། །ཟླ་བ་ལྟ་བུའི་མདངས་དང་ལྡན་པར་འགྱུར། །ས་ཧ་ར་ཛ་སྲང་སྟོང་ཆུ་བྲེ་ནི། །བཅུ་དྲུག་ནང་བསྐོལ་བརྒྱད་ཆ་ལུས་པ་རུ། །སེང་ལྡེང་འཛམ་བུ་ཤིང་མངར་ཨེ་རཎྜ། །ཨ་མྲ་ཨ་ཏི་མ་ར་ཨུཏྤལ་སྔོ། །ཞིབ་བཏགས་ཏིལ་མར་བྲེ་གང་ནང་དུ་བསྐོལ། །དེ་ནི་ཁ་ཡི་ནང་དུ་བཅངས་གྱུར་ན། །ཁ་ཡི་ནད་ཀུན་འཇོམས་ཤིང་ཁྱད་པར་དུ། །སོ་ཡི་ཕྲེང་བ་འགུལ་བ་བརྟན་པར་བྱེད། །སེང་ལྡེང་སྙིང་པོ་སྲང་ནི་ཉིས་བརྒྱ་དང༌། །ཨ་རི་མེ་དས་ནི་སྲང་བརྒྱ་དག །ཆུ་བྲ་དྲུག་ཅུ་བཞི་བསྐོལ་བཞི་ཆ་ལུས། །བཙགས་ཏེ་སླར་ཡང་སྐ་བའི་བར་དུ་བསྐོལ། །དེ་ནང་དབྱི་མོ་རྨ་ཤིང་བ་ལེ་ཀ །ཙནྡན་རྣམ་གཉིས་སེང་ཕྲོམ་སྟག་ཚེར་བ། །ཤིང་མངར་རྒྱ་སྐྱེགས་ཨ་ཛ་རི་རྣམ་གཉིས། །ད་ཏ་ཀི་དང་ཀཏྤ་ལའི་འབྲས་བུ། །སེར་པོ་རྣམ་གཉིས་འབྲས་བུ་གསུམ་དང་ནི། །དྲི་སྣ་བཞི་དང་གླ་སྒང་ཨ་རུ་ར། །བཙོད་དང་སྤང་སྤོས་ནྱ་གྲོ་དྷའི་མྱུ་གུ། །ཤུག་པ་བཙོད་དང་ཨེ་ལ་བ་ལུ་ཀ །ཞོ་ནི་གཉིས་གཉིས་བཏབ་སྟེ་བསྒྲངས་པ་རུ། །ཛཱ་ཏི་པ་ཏྲ་ཛཱ་ཏི་ཕལ་དང༌། །ལི་ཤི་ཨ་ཀོ་ལ་དང་ཀ་ཀོ་ལ། །སྲང་རེག་པུར་སྲང་བཞི་གཞུག་པར་བྱ། །དེ་ལས་རི་ལུ་བྱས་ལ་རྟག་ཏུ་ནི། །ཁར་བཞག་ན་ནི་ཁ་ནད་ཐམས་ཅད་སེལ། །བསྐོལ་དང་རེང་བུའི་སྨན་ནི་གོ་བཟློག་པ། །བཏགས་པ་འདི་ཡི་ཏིལ་མར་བསྐོལ་བར་བྱ། །ཁ་ནད་ཀུན་སེལ་བར་ནི་དེ་བཤད་དོ། །སོ་བརྟན་བྱེད་པའི་མཆོག་ཀྱང་འདི་ཉིད་ཡིན། །རི་ལུ་འདི་ནི་སེང་ལྡེང་སྦྱར་ཏིལ་མར། ཨ་རི་མེ་ད་ས་དང་བསྐོལ་བ་དག །ཉིན་རེ་བསྟེན་པར་བྱེད་ན་ནད་མེད་པའང༌། །སོ་ནི་ངེས་པར་བརྟན་པར་བྱེད་པ་ཡིན། །རྒུན་འབྲུམ་སླེ་ཏྲེས་ཛཱ་ཏིའི་མྱུ་གུ་དང༌། །སྐྱེར་པ་བྱི་
ཚེར་འབྲས་བུ་གསུམ་བསྐོལ་བའི། །སྦྲང་རྩིར་བཅས་པ་འདི་ནི་མཁུར་བར་བཅངས། །ཁ་ཡི་ནད་དུ་གཏོགས་པ་ཐམས་ཅད་སེལ། །སྐྱེར་པ་བ་ཏ་རུ་རྟ་གླ་སྒང་བཙོད། །ཡུང་བ་སེང་ཕྲོམ་ཏེ་ཛོ་བ་ཏི་དང༌། །པུ་ཙེ་ཤེལ་གྱི་ཕྱེ་མ་སྦྲང་རྩིར་སྦྱར། །བསྐུས་ན་རྙིལ་ནད་ཉམ་ཐག་གཡཱ་བ་དང༌། །རྣག་དང་འཛག་པའི་ནད་རྣམས་འཇོམས་པར་བྱེད། །ཁྱིམ་གྱི་དུད་པ་ཐ་སྐྱེར་ཁཎྜ། །ཚ་བ་གསུམ་དང་ནས་ཚིག་འཁུས་ཐལ་བ། །ཙི་ཏར་ཀ་དང་ལྕགས་ཕྱེ་འབྲས་བུ་གསུམ། །ཏེ་ཛོ་བ་ཏི་སྦྲང་རྩིར་སྦྱར་བ་ནི། །ནག་པོ་ཁར་བཅངས་སོ་དང་མགུལ་ནད་སེལ། །སྐྱེར་པའི་ཤུན་པ་ལྡོང་རོས་ལྕེ་མྱད་ཚ། །བ་བླ་ནས་ཚིག་འཁུས་པའི་ཐལ་བའི་ཕྱེ། །སྦྲང་རྩི་མར་སྦྱར་ཕྱེ་མ་སེར་པོ་ཅན། །ཁར་བཞག་སོ་དང་མགུལ་བའི་ནད་རྣམས་སེལ། །བ་གཅིན་ཨ་རུ་ར་བསྐོལ་ཐིམ་གྱུར་པ། །ཤུ་ཏི་རུ་རྟ་བ་ལེ་ཀའི་ཕྱེ་ཟོས། །ནང་གི་ཁ་ནད་ཕྲ་མོ་ཡན་ཆད་ནི། །རྒྱལ་པོར་བརྟེན་ན་གནོད་པས་མི་ཚུགས་བཞིན། །ནང་དུ་བཞག་ན་ནད་རྣམས་སེལ་བར་བྱེད། །ལོ་མ་བདུན་པ་གླ་སྒང་བུ་ཤེལ་ཙེ། །ཨ་རུར་དང་ཏིག་ཏ་པ་ཏོ་ལ། །ཤིང་མངར་དོང་གྲ་ཙནྡན་པུ་ཤེལ་ཙེ། །བསྐོལ་བ་འཐུངས་ན་ཁ་ཡི་ཤུ་བ་འཇོམས། །པ་ཏོ་ལ་དང་བཅའ་སྒ་འབྲས་བུ་གསུམ། །བི་ཤ་ལྱ་དང་ཏིག་ཏ་ཀྱི་ལྕེ་བ། །སླེ་ཏྲེས་བསྐོལ་བ་སྦྲང་རྩིར་བཅས་བླུད་དམ། །ཁར་བཞག་ཁ་ཡི་ནད་ཀུན་མ་ལུས་འཇོམས། །སྐྱེར་པ་བསྐོལ་བའི་ཁུ་བ་ནི། །སྐ་གྱུར་ཡུག་སྣམ་བཙག་དང་བཅས། །སྦྲང་རྩིར་བཅས་པ་ཁ་ནང་བཞག །ཤུ་བ་རྨ་འཁྱིམས་སེལ་བར་བྱེད། །ནི་མ་བ་ཤིང་མངར་པ་ཏོ་ལ། །བ་ཤ་ཀ་དང་ཛཱ་ཏི་དང༌། སེང་ལྡེང་ཨ་རི་མེད་ས། །འབྲས་བུ་གསུམ་པོ་རེ་རེ་ལའང༌། །དེ་བཞིན་དུ་ནི་གཏང་བར་བྱ། །སེང་ལྡེང་ལྕགས་ཕྱེ་འབྲས་བུ་གསུམ། །མ་ཏ་ཡན་ཏི་ཨ་རྫུ་ན། །ཨ་ཏི་མ་ར་བསྐོལ་བ་ནི། །མཁུར་བཅད་ཁ་ནད་སོ་ནད་སེལ། །ཁ་དང་སོ་རྩ་མགུལ་ནད་ཕལ་ཆེར་ནི། །བད་ཀན་ཁྲག་ལས་མང་དུ་འབྱུང་བ་ཡིན། །དེ་བས་ནད་དེ་བསལ་བར་བྱ་བའི་ཕྱིར། །ནད་ཁྲག་ལན་མང་དུ་ནི་དབྱུང་བར་བྱ། །མདོ་དང་ལུས་ཀྱི་སྐྱུག་སྨན་བཀྲུ་སྨན་དང༌། །ཁ་དང་ཚ་དང་མཁུར་བཀང་བཅང་བར་བྱ། །དེ་བཞིན་
བད་ཀན་ཁྲག་ནི་སེལ་བ་ཡི། །གསོ་བའི་ནད་ནི་ཕལ་ཆེར་བསྔགས་པ་ཡིན། །ནས་དང་རྩ་འབྲུ་ཕུབ་མ་མེད་བྱས་ལ། །ཐལ་སྨན་མང་དུ་སྤངས་ཤིང་སྣུམ་མེད་བཟའ། །ཁུ་བ་བསྟན་པ་ལ་སོགས་གང་གཞན་ནི། །བད་ཀན་སེལ་བར་བྱེད་པ་ཕན་པ་ཡིན། །སྲོག་ནི་རླུང་གི་ལམ་ལ་གནས་པས་ན། །བག་མེད་པ་ཡིས་འགག་པར་འགྱུར་བ་ཡིན། །དེ་བས་ལྐོག་མའི་ནད་ཀྱི་གསོ་བ་ནི། །ཤིན་ཏུ་མྱུར་བར་བྱ་བ་ཁོ་ན་ཡིན། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་ཉི་ཤུ་རྩ་གཉིས་པའོ།། །།དེ་ནས་མགོ་བོའི་ནད་ཀྱི་དམིགས་ཤེས་པར་བྱ་བ་བཤད་པར་བྱའོ། །དུ་བ་ཉི་ཚན་ཁ་བ་དང༌། །ཆུ་དང་རྩེ་དང་གཉིད་དྲགས་དང༌། །གཉིད་ཡར་རྡུལ་དང་མདུན་གྱི་རླང༌། །མཆི་མ་བཀག་དང་དུས་དྲགས་དང༌། །ཆུ་འཐུངས་ཆང་འཐུངས་དྲགས་པ་དང༌། །སྲིན་བུས་ཤུགས་ནི་བཀག་པ་དང༌། །སྔས་དང་བསྐུ་བྱུག་དྲིལ་ཕྱིས་ལ། །མི་དགའ་རྒྱུན་དུ་ཐུར་དུ་བལྟ། །མ་གོམས་དྲི་དང་ཟས་གནོད་ཟོས། །མང་དུ་སྨྲས་པས་མགོ་བོ་ཡི། །ནང་དུ་ནད་ནི་སྐྱེད་པར་བྱེད། །དེ་ལ་རླུང་ནི་འཁྲུགས་པ་ལས། །མུར་འགྲམ་གཉིས་སུ་ཤིན་ཏུ་ཟུག །འགྲམ་སོ་ཕུག་པ་སྙམ་དུ་སེམས། །སྨིན་མའི་མཚམས་དང་དཔྲལ་བ་ནི། །ལྟུང་བ་སྙམ་སེམས་རབ་ཏུ་ན། །རྣ་བར་སྒྲ་ཡིས་གནོད་པར་བྱེད། །མིག་ནི་ཕྱུང་བ་སྙམ་དུ་སེམས། །མགོ་བོ་འཁོར་བ་ལྟ་བུར་སེམས། །ཚིགས་རྣམས་བྱེ་བ་སྙམ་དུ་བྱེད། །རྩ་ཡི་དྲ་བ་ཤིན་ཏུ་འཕར། །མཇིང་པ་འགྲམ་པ་འབྱར་སྙམ་བྱེད། །གསལ་བ་མཐོང་བར་མི་བཟོད་ཅིང༌། །སྣ་ཆུ་འཛག་ཅིང་གླུ་བུར་དུ། །ན་བ་དང་ནི་ནད་གཞི་བྱེད། །མཉེ་ཞིང་སྣུམ་བསྐུས་དུགས་བྱས་དང༌། །བཅིངས་པས་བདེ་བར་འགྱུར་བ་ཡིན། །མགོ་བོ་ཚ་བའི་ནད་ཅེས་བྱ། །ཀླད་པའི་གཞོགས་ཕྱེད་ན་བ་ནི། །གཞོགས་ཕྱེད་ནད་ཅེས་བྱ་བར་བཤད། །ཟླ་གཅིག་ཟླ་ཕྱེད་ནས་ལྡང་དེ། །རང་ཉིད་ཞི་བར་འགྱུར་པ་ཡིན། །ཤས་ཆེར་འཕེལ་ན་མིག་དང་ནི། །རྣ་བདག་ཀྱང་མ་རུང་བྱེད། །མཁྲིས་གྱུར་མགོ་བོ་ཚ་བ་དང༌། །དུད་པས་བདུགས་སྙམ་སེམས་རིམས་འདེབས། །རྡུལ་ཞིང་མིག་ཚ་བརྒྱལ་བ་དང༌། །མཚན་མོ་གྲང་བས་རྩེ་འཇིལ་འགྱུར། །
བད་ཀན་ལས་གྱུར་ཡི་ག་འཆུས། །མགོ་ལྕི་ཚོར་བ་མེད་ཅིང་གྲང༌། །རྩ་མི་འཕར་ཞིང་སྒྱིད་སྙོམ་ལ། །ཉིན་མོ་ནད་ཆུང་མཚན་མོ་ལྡང༌། །རྨྱ་ཞིང་མིག་ནི་སྐྲངས་པ་དང༌། །རྣ་བ་གཡའ་ཞིང་སློན་པ་ཡིན། །ཁྲག་གྱུར་མཁྲིས་པ་ལས་ཆེར་ན། །འདུས་གྱུར་མཚན་ཉིད་ཀུན་དང་ལྡན། །འདྲེན་མའི་ཟས་ཀྱིས་སྤྱི་བོ་ཡི། །ཁྲག་དང་ཤིན་འདྲུལ་བྱས་པས། །འདུས་པའི་ནད་ནི་འཁྲུགས་འགྱུར་ཞིང༌། །མགོ་བོའི་སྲིན་བུ་སྐྱེ་བར་འགྱུར། །དེས་ནི་མགོ་བོའི་ཁྲག་འཐུང་ཞིང༌། །སེམས་ནི་འཁྲུལ་པར་བྱེད་པ་ཡི། །མི་བཟད་ནད་ནི་སྐྱེད་པར་བྱེད། །ལུས་པ་རིམས་དང་ཉམས་སྟོབས་ཟད། །མགོ་བོ་རྩུབ་སྐྲངས་དབུག་སྙམ་ན། །ཚ་ཞིང་མགོ་འགུལ་རྣགས་པ་དང༌། །ཐོད་པ་རྐན་དང་མགོ་བོར་ནི། །གཡའ་ཞིང་སྐེམ་ལ་ཚོར་བ་མེད། །སྣབས་ཀྱི་མདོག་ནི་དམར་བ་ལ། །རྣ་བ་སྒྲ་བཅས་སྲིན་སྐྱེས་ནད། །རླུང་ཤས་ཆེ་བས་མགོ་འདར་ཞིང། །དེ་ཡི་མིང་ཅན་ནད་སྐྱེད་བྱེད། །མཁྲིས་ཤས་ཆེ་བའི་རླུང་སོགས་ཀྱིས། །མུར་འགྲམ་སྐྲང་ཞིང་ཁྲག་བཅས་ལ། །མི་བཟད་ཚ་ཞིང་ནལ་དམར། །གླལ་ཞིང་རིམས་འདེབས་སྐོམ་མགོ་འཁོར། །ཁ་ནང་ཁ་བྲོ་གདོང་སེར་ཞིང༌། །མྱུར་དུ་གསོད་བྱེད་མུར་འགྲམ་ཅན། །ཞག་གསུམ་ནས་ནི་སྲོག་འཇོམས་ཤིང༌། །མྱུར་དུ་གསོ་ན་འཚོ་བ་ཡིན། །རླུང་མཁྲིས་རྗེས་འབྲེལ་མུར་འགྲམ་མིག །སྨིན་མ་དཔྲལ་བ་ན་བ་དང༌། །འཕར་བར་བྱེད་པ་སྐྱེད་པར་བྱེད། །ཉི་མ་འཆར་བར་གྱུར་པ་ནས། །ཉི་མ་ཕྱེད་ཀྱི་བར་དུ་འཕེལ། །དེ་ཕན་ཆད་ནི་བདེ་བར་འགྱུར། །ལྟོགས་ན་དེ་ནི་ལྷག་པར་ན། །གྲང་དང་དྲོ་ལ་ངེས་པ་མེད། །དེ་ནི་ཉི་མ་འཁོར་ཞེས་བྱ། །དེ་ལྟར་མགོ་བོར་གཏོགས་པའི་ནད། །རྣམ་པ་བཅུར་ནི་བཤད་པ་ཡིན། །གཞན་ཡང་ཐོད་པ་ལ་བརྟེན་ནད། །དགུ་པོ་མགོ་བོ་བཞིན་བཤད་བྱ། །ཀླད་པ་རླུང་ནི་འཁྲུགས་གྱུར་པ། །ནང་ན་གནས་པའང་ནད་སྐྱེད་བྱེད། །མདོག་གནག་ནད་ཆུང་སྐྲངས་པ་ཡིན། །དེ་ནི་ཉེ་བའི་མགོ་ཞེས་བྱ། །འབྲུམ་ཕྲན་ཐོར་བུ་ཁོང་འབྲས་ནི། །ནད་གཞི་ཇི་བཞིན་བརྗོད་པར་བྱ། །ཐོད་པར་ལྗན་ལྗིན་མང་པོ་དང༌། །ཁྲག་དང་མཁྲིས་པའི་འབུ་ལས་ནི། ཁྲེ་དང་ཉུངས་ཀར་ལྟ་བུར་འབྱུང༌། །འབྲུམ་ཕྲན་སྲིན་གྱི་ནང་སྐྱེད་འགྱུར། །རླུང་དང་མཁྲིས་པ་
འཁྲུས་པ་ལས། །པགས་བ་རྩུབ་ཅིང་གས་པ་དང༌། །གཡའ་ཞིང་སྐྲ་འབྱི་ཚོར་བ་མེད། །གྱུར་པ་མི་བཟད་ཡིན་ཞེས་བྱ། །མཁྲིས་བ་རླུང་དང་འདྲེས་པ་ནི། །བ་སྦུའི་ནང་དུ་ཞུགས་གྱུར་པ། །སྐྲ་ནི་འབྱི་བར་བྱེད་པ་ཡིན། །དེ་ནས་བད་ཀན་ཁྲག་བཅས་པས། །བ་སྤུའི་བུ་ག་འགག་བྱེད་དེ། དེ་ཡིས་གཞན་དག་མི་འབྱུང་བ། །འཁོར་ལིང་སྐྲ་འབྱི་ཞེས་བྱ་སྟེ། །གཞན་དག་སྐྲ་འབྱི་ཞེས་བྱར་འདོད། །སྤྱི་ཅེར་སྐྱེ་བའང་དེ་བཞིན་དུ། །སྐྲ་འབྱི་དེ་ལ་རིམ་གྱིས་འབྱུང༌། །དེ་ནི་རླུང་གྱུར་མེས་ཚིག་འདྲ། །མཁྲིས་གྱུར་རླན་ཅན་རྩ་ཡིས་ཁྱབ། །བད་ཀན་པགས་པའི་མདོག་དཀར་མཐུག །པགས་པ་རང་གི་ཇི་བཞིན་སྣང༌། །འདུས་གྱུར་མཚན་ཉིད་ཀུན་དང་ལྡན། །སེན་མོའི་མདོག་འདྲ་གསོར་མི་རུང༌། །མེས་བསྲེགས་ལྟ་བུར་སྤུ་མེད་གང༌། །ཚ་བཅས་དེ་ཡང་གསོར་མི་རུང༌། །མྱ་ངན་ཁྲོ་དང་ངལ་ལས་བྱུང༌། །ལུས་ཀྱི་དྲོད་ནི་མགོར་ཞུགས་པས། །ནད་དེས་སྐྲ་ནི་བཙོས་ནས་ནི། །དེ་ལ་སྐྲ་དཀར་སྐྱེ་བར་འགྱུར། །དེ་ནི་རླུང་གྱུར་ཡིད་ཙམ་གནག །སྲ་ཞིང་རྩུབ་ལ་ཆུ་མདོག་ཅན། །མཁྲིས་པ་ཚ་ཞིང་མདོག་སེར་ཡིན། །བད་ཀན་ལས་གྱུར་སྣུམ་ཞིང་འཕེལ། །སྦོམ་ཞིང་མདོག་ནི་དཀར་བ་ཡིན། །འདུས་གྱུར་མཚན་མ་འདྲེན་མ་ཡིན། །མགོ་བོའི་ནད་ལས་བྱུང་བ་གཞན། །མདོག་ངན་རེག་ན་མི་བཟོད་ཡིན། །འདུས་པ་ལས་ནི་གྱུར་པ་ཡི། །སྤྱི་ཅེར་སྐྲ་དཀར་གསོར་མི་རུང༌། །ལུས་ཀྱི་འགྱུར་བ་ལས་བྱུང་བ། །བཅུད་ཀྱིས་ལེན་གྱིས་གསོ་བར་བྱ། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་ཉི་ཤུ་རྩ་གསུམ་པའོ།། །།དེ་ནས་མགོ་བོའི་ནད་གསོ་བའི་ལེའུ་བཤད་པར་བྱའོ། །རླུང་ལས་གྱུར་པའི་མགོ་ནད་ལ། །རླུང་ནད་གསོ་བའི་ཆོ་ག་བཤད། །འདི་ནི་མཚན་མོ་ཞུན་མར་བླུད། །དེ་རྗེས་འོ་མ་དྲོན་མོ་བླུད། །མ་ཤ་རྒྱ་སྲན་མུངྒ་འང་རུང༌། །མར་དང་ལྡན་པ་དེ་བཞིན་སྦྱིན། །ཏིལ་མར་ཏིལ་གྱི་ལྡེ་གུ་ནི། །འོ་མ་དང་ནི་ལྷན་ཅིག་བླུད། །གླན་དང་བཅིང་བའི་དུགས་དག་ནི། །ཤ་དང་འུ་སུ་ལས་བྱས་ཕན། །རླུང་འཇོམས་རྩ་བ་བཅུ་ལ་སོགས། །བསྐོལ་བའི་འོ་མ་སྣུམ་ཅན་བླུད། །སྣ་སྨན་དུད་བརྔུབ་སྣུམ་ཅན་དང༌། །མགོ་དང་རྣ་བ་བརྟ་བར་བྱ། །བར་ཎ་སོགས་སྡེ་ཚན་བརྡུངས། །འོ་མ་ཆུ་ཕྱེད་བསྐོལ་
བ་ཡི། །འོ་མ་ལུས་པ་དེ་བསྒྲངས་ལ། །བསྲུབས་ཏེ་སྙིང་པོ་བླངས་ནས་ནི། །དེ་ནས་མངར་བའི་སྡེ་ཚན་བསྐོལ། །མར་གྱི་སྣ་སྨན་བླུགས་པ་བསྔགས། །འདིར་ནི་འོ་མའི་སྡེ་ཚན་བསྐོལ། །མར་དང་ཁ་རར་བཅས་པ་བླུགས། །རས་བལ་ས་བོན་ཤིང་ཚ་དང། །གླ་སྒང་ཛཱ་ཏི་ཁ་འབུས་པ། །ཆུ་དྲོན་བཏགས་པའི་སྣ་སྨན་ནི། །མགོ་བོའི་ནད་ཀུན་འཇོམས་བྱེད་ཡིན། །ཁྲག་དང་མཁྲིས་པ་ལས་གྱུར་པ། །ཁར་གུར་གུམ་མར་བསྐོལ་གཏང༌། །རུ་རྟ་རྒྱ་སྤོས་ཨུཏྤ་ལ། །ཙནྡན་མར་སྦྱར་མགོ་བསྐུས་ཕན། །རླུང་ཤས་ཆེ་ལ་འཇིགས་ཡོད་པས། །གཏར་ག་འདི་ལ་མི་བྱའོ། །དེས་མ་ཞི་ན་བད་རླུང་ལ། །མེ་བཙའ་ཇི་སྐད་བཤད་པ་བྱ། །གཞོགས་ཕྱེད་ན་ལའང་དེ་བཞིན་ཏེ། །ནད་དང་འབྲེལ་པའི་གསོ་བ་བྱ། །ཤི་རི་ཤ་ཡི་ས་བོན་དང༌། །ཨ་པ་མརྒའི་རྩ་བ་དང༌། །ཁ་རུ་ཚ་བཅས་སྣ་སྨན་གཏང༌། །ཡང་ནས་ལ་པརྞི་འམ། །ཙ་ཀྲ་མརད་གང་ཡང་རུང༌། །སྐྱུར་ཀུ་དང་སྦྱར་ལྡེ་གུས་བསྐུ། །ཉི་མ་ལྟར་འཁོར་དེ་ཡི་ཚེ། །གཏར་གས་ཁྲག་ནི་དབྱུང་བར་བྱ། །མཁྲིས་པ་ལས་གྱུར་མགོ་ནད་ལ། །སྣུམ་ཆོས་བྱས་ནས་གཏར་ག་གདབ། །མགོ་དང་གདོང་བྱུགས་སྨན་ཆུ་བླུགས། །སློན་ཁྲུས་མས་གཏོང་བསིལ་བར་བྱ། །འཚོ་བྱེད་དང་བསྐོལ་འོ་མ་དང༌། །མར་ནི་སྣ་སྨན་བཏུང་བ་བླུགས། །ཁྲག་ལས་གྱུར་པ་འང་འདི་ཉིད་བྱ། །མུར་འགྲམ་ཅན་ལ་གཏར་ག་སྤང༌། །བད་ཀན་མགོ་ནད་མར་སྙིང་དང༌། །སྣུམ་ཆོས་བྱས་ལ་ཚ་བས་སློན། །དུགས་དང་བྱུག་པ་སྣ་སྨན་སོགས། །རྩུབ་དྲོ་རྣོ་བའི་སྨན་གྱིས་གསོ། །འདིར་ནི་སྨྱུང་བའང་བསྔགས་པ་ཡིན། །འདུས་པ་ལས་ནི་འདྲེན་མར་གསོ། །སྲིན་གྱུར་སྣ་སྨན་ཁྲག་བླུགས་ཏེ། །དེ་ཡིས་འབུ་ནི་བརྒྱལ་བར་འགྱུར། །ཁྲག་གི་དྲི་ཡིས་ར་རོ་ནས། །ཁ་དང་སྣ་ནས་འབྱུང་བར་འགྱུར། །དེ་ནས་སྣ་སྨན་དུད་བརྔུབ་རྣོས། །དེ་ནི་ཉེ་བར་དབྱུང་བར་བྱ། །ཉུངས་ཀར་ནིམ་པ་ཨིང་གུ་དང༌། །པི་ལུའི་མར་དང་སྦྱར་བ་ཡི། །བྱི་དང་ག་དང་ས་རྫི་ཀ །དནད་ཤིང་ཀུན་བ་གཅིན་བསྐོལ། །སྣ་སྨན་སོ་སོར་གཏང་བར་བྱ། །བྱི་དང་ག་ནི་ར་གཅིན་དང༌། །སྦྱར་བའི་སྣ་སྨན་འབུ་འཇོམས་མཆོག །ཉ་རུལ་བཅས་པའི་སྣ་
སྨན་དང༌། །དུད་པ་དག་ཀྱང་བརྔུབ་པར་བྱ། །སྲིན་བུས་ཁྲག་ནི་འཐུངས་པའི་ཕྱིར། །འདི་ལ་ཁྲག་ནི་དབྱུང་མི་བྱ། །མགོ་འདར་རླུང་གི་མགོ་ནད་ཀྱི། །གསོ་བ་མེ་བཙའ་མ་གཏོགས་བྱ། །ཉེ་བའི་མགོ་ནད་སྐྱེས་པ་ཡི། །རྗེས་དང་སྐྱེས་མ་ཐག་ལ་ནི། །རླུང་ནད་ཀྱི་ནི་གསོ་བ་བྱ། །སྨིན་ནས་ཁོང་འབྲས་གསོ་ལས་བྱ། །འབྲུམ་ཕྲན་འབྲུམ་བུ་ཁོང་འབྲས་ལ། །སྨིན་དང་མ་སྨིན་ཇི་བཞིན་བྱ། །སྲིན་ལས་སྲིན་བུ་པད་པ་ཡིས། །གཏར་ག་བྱས་ཏེ་ནི་མ་པའི་ཆུ། །བླུགས་ཤིང་རྟ་སྤངས་ཁུ་བ་ནི། །ལན་ཚྭ་ཤས་ཆེར་བཏབ་པས་བསྐུ། །ནིམ་པ་པ་ཏོ་ལའི་ལོ་མ། །ཡུངས་མར་བཅས་པ་ཞིབ་བཏགས་བསྐུ། །བ་གཅིན་འབའ་ཆ་རྙིང་པར་སྦྱར། །ཁྱིམ་བྱའི་རྟུག་པ་དག་གིས་བསྐུ། །གྱོ་མོར་རུ་རྟ་བརྔོས་པ་དང༌། །ཏིལ་གྱི་ཕྱེ་མར་བཅས་པ་ཡིས། །གློག་པ་བསྐུས་ན་གཡཱ་བའམ། །ཆུ་འཛག་ཚ་བ་སེལ་བར་བྱེད། །མ་ལ་ཛི་དང་ཙི་ཏྲ་ཀ །ཀ་ར་བཱི་ར་ཀརྙཛ། །ཏིལ་མར་སྦུ་གྲིས་བྲེགས་པ་ཡི། །རྗེས་བསྐུས་འཁོར་ལིང་འབྱི་བ་སེལ། །དེས་མ་ཞིན་མགོ་བོ་ཡི། །སྦྱང་བྱ་སློན་སྨན་སོགས་པ་བྱ། །མི་བཟད་པ་ལ་དང་པོར་ནི། །དཔྲལ་བའི་རྩ་ལ་གཏར་ག་བྱ། །མགོ་བོའི་བཀྲུ་སྨན་སྣ་སྨན་གཏང༌། །ཤིང་མངར་པི་ལ་ཡའི་ས་བོན། །རུ་རྟ་མ་ཤ་ཉུངས་ཀར་བཅས། །སྦྲང་རྩིར་བཅས་པའི་ལྡེ་གུས་བསྐུ། །རྒྱ་སྐྱེགས་དོང་གའི་ལོ་མ་དང༌། །ཙཀྲ་མརད་སྐྱུ་རུ་ར། །སྦྲང་རྩིར་སྦྱར་བས་བསྐུས་ཀྱང་ཕན། །ཁྲེ་རྒོད་རྩ་བསྲེགས་ཐལ་བ་ནི། །ཆུ་དང་སྦྱར་བས་བསྐུས་ན་ཕན། །འཁོར་ལིང་སྐྲ་འབྱིའི་ནད་ལ་ནི། །ཉེ་བར་གཏར་ག་གདབ་པ་དང༌། །ཞལ་ཞལ་བྱས་ཏེ་ན་ལེ་ཤམ། །ལྡོང་རོས་སྤངས་མ་ནག་ཚུར་བསྐུ། །ཡང་ན་འབབ་ཆའི་ཐང་ཤིང་ངམ། །འོལ་མས་ཡི་འབྲས་བུའི་རྩ། །ཡང་ན་ལང་ཀ་ལིའི་རྩ་བ་འམ། །ཀ་ར་བཱི་རའི་ཁུ་བ་འམ། །ཀཎྜ་ཀཱ་རིའི་ཁུ་བ་ནི། །སྦྲང་རྩིར་བཅས་པས་བསྐུ་བ་འམ། །དྷ་དུ་ར་ཡི་ལོ་མ་འམ། །བསེ་ཤིང་འབྲས་བུའི་ཁུ་བས་བསྐུ། །ཏིལ་གྱི་མེ་ཏོག་གཟེ་མ་དང༌། །མར་དང་སྦྲང་རྩིར་བཅས་པའམ། །གླང་པོའི་སོ་བསེགས་ཏིལ་མར་བསྲེས། །འཁོར་ལིང་འབྱི་བའི་སྨན་མཆོག་ཡིན། །སྐྲ་དཀར་སྐྱེ་ལ་ལུག་གི་རྭའི། །སྣག་ཚས་དེ་
བཞིན་བསྐུ་བར་བྱ། །ཇི་སྲིད་སྐྲ་ནི་སྐྱེས་ཀྱི་བར། །ཆུ་བླུགས་པ་ནི་སྤང་བར་བྱ། །སྤྱི་ཅེར་སྐྲ་དཀར་གཉེར་མ་མང༌། །སྐྲ་སེར་སྐྱེས་ལ་སྦྱང་བྱས་ནས། །སྣ་སྨན་གཏོང་དང་མགོ་བཀྲུས་ལ། །བྱུག་པ་རྣམས་ཀྱིས་གསོ་བར་བྱ། །བྲི་ཧ་ཏི་སོགས་ཏིལ་མར་བསྐོལ། །འཚོ་བྱེད་བསྐོལ་བའི་སྣ་སྨན་བླུགས། །ནིམ་པའི་མར་གྱིས་ཟླ་བ་གཅིག །སྣ་སྨན་བཏང་སྟེ་འོ་མ་བླུད། །ཤྲི་ཤ་ཨེ་རཎྜ་དང་རམས། །བྲིང་ག་རཱ་ཛའི་ཁུ་བར་སྤངས། །སེའུ་ལུ་ཏིལ་དང་བ་རུ་ར། །པྲི་ཡང་ཀ་ཀ་ཏིའི་ས་བོན། །ཆ་མཉམ་ལྕགས་ལ་བསྐོལ་ནས་ནི། །ཉི་མའི་འོད་ལ་སྐམས་ནས་ནི། །མར་འཛག་པ་ཡི་སྣ་སྨན་གཏང༌། །འོ་མ་འཐུངས་པས་སྐྲ་དཀར་སེལ། །ས་ཧ་ར་ཛ་བྱེའུ་རུག་པ། །བྲིང་ག་ར་ཛའི་ཁུ་བ་ནི། །བྲེ་གང་ཏིལ་མར་ཕུལ་གང་དང༌། །ཤིང་མངར་སྲང་གཅིག་བཏབ་སྟེ་བསྐོལ། །ཨ་ས་ནའམ་རྡོ་སྣོད་དམ། །ལུག་གི་ར་ཡི་ནང་དུ་གཞུག །ཀ་ར་བཱི་ར་པ་ཡ་སྱ། །འོ་མ་དང་ནི་ཞིབ་བཏགས་པ། །སྐྲ་དཀར་ཕྱུང་བའི་རྗེས་བསྐུས་ཤིང༌། །སྤངས་ན་སྐྲ་དཀར་སེལ་བར་བྱེད། །པི་ལ་ཡ་དང་ཤིང་མངར་དང༌། །འཚོ་བྱེད་སྡེ་ཚན་ཏིལ་ནག་དང༌། །ས་ནག་འོ་མའི་ལྡེ་གུ་ཡིས། །གདོང་བསྐུས་གཉེར་མ་སྤུ་སེར་སེལ། །ཏིལ་དང་པདྨ་གེ་སར་དང༌། །ཤིང་མངར་སྦྲང་རྩི་སྐྱུ་རུ་ར། །ལྡེ་གུ་འདི་ཡིས་མགོ་བསྐུས་ན། །སྐྲ་འཕེལ་གནག་པར་འགྱུར་བ་ཡིན། །སྤང་སྤོས་རུ་རྟ་ཏིལ་ནག་དག །ཐལ་ཏྲེས་ཨུཏྤལ་སྔོན་པོ་དང༌། །འོ་མར་བཏགས་ཏེ་སྦྲང་རྩིར་སྦྱར། །སྐྲ་ནི་འཕེལ་བར་བྱེད་པའི་མཆོག །ལྕགས་ཕྱེ་བྲིང་ག་ར་ཛ་དང༌། །འབྲས་བུ་གསུམ་དང་ས་ནག་པོ། །བུ་རམ་ཤིང་ཁུར་ཟླ་གཅིག་གཞུག །སྐྲ་དཀར་རྩད་ནས་སྐྱུར་བར་བྱེད། །མ་ཤ་ཁྲེ་རྒོད་སྐྱུར་རྩ་བས་དང༌། །ནས་ཐུག་ལྕགས་ཕྱེ་ཚ་མང་བཏབ། །ཞག་གསུམ་བཞག་སྟེ་བཏགས་པ་ཡིས། །བྱ་དཀར་ཡང་ནི་ནག་པོར་བྱེད། །ཤིང་མངར་ཙནྡན་སྟག་ཚེར་བ། །པི་པི་ལིང་དང་ཨུཏྤལ་དང༌། །སྐྱུ་རུ་ར་ཁུ་ཏིལ་མར་བསྐོལ། །སྣ་སྨན་བསྐུ་བ་བྱས་གྱུར་ན། །སྐྲ་དཀར་དང་ནི་ཀློད་པ་ཡི། །ནད་ཀུན་འཇོམས་པར་བྱེད་པ་ཡིན། །ཉེའུ་ཤིང་ཛི་བནྟིའི་ཁུ་བ། །འོ་མ་མར་དང་ཏིལ་མར་དང༌། །
འཚོ་བྱེད་བསྐོལ་བའི་སྣ་སྨན་གྱིས། །ནམ་ཚོང་ཡན་ཆད་ནད་ཀུན་སེལ། །རྨ་བྱའི་སྒྲོ་མཁྲིས་རྒྱུ་མ་དང༌། །རྐང་པ་རྟུག་པ་ཆུ་བོར་བའི། །ཤ་དང་བ་ལ་རྩ་བ་བཅུ། །ར་སྣ་ཤིང་མངར་སྲང་གསུམ་གསུམ། །ཆུ་བསྐོལ་ཁུ་བ་མར་བྲེ་གང༌། །འོ་མ་བྲེ་གང་བཅས་བསྐོལ་བ། །མངར་བའི་སྨན་སྡེའི་ལྡེ་གུ་བཏབ། །དེ་བཏུང་མས་གཏོང་བསྐུ་བ་དང༌། །སྣ་སྨན་དག་ཏུ་བསྟེན་པ་ཡིས། །ནམ་ཚོང་ཡན་ཆད་ནད་ཀུན་སེལ། །སྨན་འདི་དག་གི་ལྡེ་གུ་དང༌། །ཛི་བནྟི་དང་འབྲས་བུ་གསུམ། །མེད་རྒུན་འབྲུམ་དབྱི་མོ་དང༌། །པ་རུ་ཤ་ཀ་ས་མང་ག །ག་པྲའི་རྩ་བ་ཏང་པ་ལ་དང༌། ཀརྐ་ཏ་སྲིད་ཁ་སྲལ་ཕྲེའུ། །འབྲོ་གོ་པདྨའི་རྩ་བ་དང༌། །པདྨའི་སྡོང་པོ་ཁ་རྫུན། །ཤིང་མངར་ཉེའུ་ཤིང་ཛི་བ་ཀ །བི་ད་རི་དང་བུ་རམ་ཤིང༌། །ཐལ་ཏྲེས་རྣམ་གཉིས་བྲི་ཧ་ཏི། །མུར་བ་གཟེ་མ་ཟངས་རྩི་བ། །སྲིང་ག་ཏ་དང་ཀ་ཤེ་རུ། །ར་སྣ་སྠི་ར་ལྕ་བ་དང༌། །སུག་སྨེལ་ཟུར་བ་མ་ནུ་དང༌། །བ་སྤྲུ་བ་དང་ཅུ་གང་དང༌། །ར་མཉེ་བ་དང་བྱི་ཚེར་བ། །མ་དུ་ཀ་དང་སྟར་ག་དང༌། །ཨ་བི་ཤུ་ཀ་མུཉྫ་ཀ །ཞོ་ནི་གཉིས་གཉིས་ཕྱིར་བཏགས་དང༌། །མར་བྲེ་གང་དང་འོ་མ་ནི། །བཞི་འགྱུར་དག་དང་བསྐོལ་བའི་མར། །འདི་ནི་རྨ་བྱ་ཆེན་མོ་སྟེ། །རྨ་བྱ་ལས་ནི་ཡོན་ཏན་ལྷག །ལུས་ཟུངས་དབང་པོ་ཉམས་སྐད་འགགས། །ལུད་པ་དབུགས་མི་བདེ་ཉེན་འཇོམས། །ཟླ་མཚན་ཁུ་བའི་སྐྱོན་ལའང་ཕན། །མོ་གཤམ་ལ་ཡང་བུ་སྐྱེད་བྱེད། །བྱི་བ་ཁྱིམ་བྱ་དང་པ་དང༌། །རི་བོང་དང་ཡང་དེ་བཞིན་སྦྱར། །ནམ་ཚོད་ཡན་ཆད་གཏོགས་པའི་ནད། །ཉིས་བརྒྱ་སུམ་ཅུ་རྩ་གཅིག་ཡིན། །དེ་དག་ཕན་ཚུན་མ་འདྲེས་པར། །རྒྱ་ཆེར་རབ་ཏུ་བཤད་པ་ཡིན། །དྲང་སྲོང་རྣམས་ཀྱིས་སྐྱེས་བུའི་མགོ །རྩ་བ་འོག་ནི་ཡལ་གར་བཤད། །དེ་ཕྱིར་རྩ་བ་ལ་གནོད་པའི། །ནད་ནི་མྱུར་དུ་གསོ་བར་བྱ། །གང་ལ་དབང་པོ་ཀུན་རྟེན་ཞིང༌། །གང་ལ་སྲོག་ནི་གནས་བྱེད་པས། །དེས་ན་ཡན་ལག་དམ་པ་ཡི། །སྲུང་བ་ལ་ནི་འབད་པར་བྱ། །ཡན་ལག་བརྒྱད་པའི་སྙིང་པོ་བསྡུས་པ་ལས། །ཕྱི་མའི་གནས་ཀྱི་ལེའུ་ཉི་ཤུ་རྩ་བཞི་པའོ།། །།ཡན་ལག་བརྒྱད་པའི་སྙིང་པོ་བསྡུས་པ་ལས། །སྟོད་གསོ་བའི་ཡན་ལག་རྫོགས་སོ།། །།
དེ་ནས་རྨ་གསོ་བ་བཤད་པར་བྱའོ། །རྨ་ནི་ལྷན་ཅིག་སྐྱེས་གློ་བུར། །རེད་དང་མ་རེད་དབྱེ་བ་གཉིས། །ལུས་ཀྱི་ནད་གཞིས་སྐྱེད་ལྷན་ཅིག །ཕྱི་རོལ་རྒྱུས་བྱུང་གློ་བུར་བའོ། །ནད་དང་འདྲེས་པ་རེད་པ་ཡིན། །དེ་མེད་དག་པ་མ་རེད་ཡིན། །རྨ་རེད་ཁ་རྒྱས་ཞུམ་པ་དང༌། །ཤིན་ཏུ་སྲ་བའམ་ཤིན་ཏུ་སྙི། །ཤིན་ཏུ་མཐོ་འམ་ཤིན་ཏུ་དམའ། །ཤིན་ཏུ་གྲང་ངམ་ཤིན་ཏུ་ཚ། །དམར་ཞིང་སྐྱའམ་གནག་པ་ཉིད། །རྣག་ནི་དྲི་མནམ་ཡོངས་སུ་འཛག །ཤ་དང་རྩ་རྒྱུས་འདྲུལ་བ་དང༌། །གཡོས་ཤིང་མཆེད་ལ་རབ་ཏུ་ན། །གཡོ་ཞིང་ཚ་ལ་སྐྲང་བ་དང༌། །གཡའ་བ་ལ་སོགས་བླ་བརྣན་བཅས། །ཡུན་རིང་དུ་ནི་འཚོ་བ་དཀའ། །རྨ་རེད་མཚན་མར་ཤེས་པར་བྱ། །དེ་ནི་ཁྲག་བཅས་ནད་བཅོ་ལྔ། །དེ་ལ་རླུང་ལས་གྱུར་བའི་རྨ། །གནག་ཅིང་སྨུག་དམར་ཐལ་མདོག་དང༌། །ཐི་བའི་རུས་པ་ལྟ་བུར་སྣང༌། །ཞོ་ག་ཆུའམ་འབྲས་བཀྲུས་ཆུ། །འདྲ་བའི་ཆུ་སླ་ཉུང་དུ་འཛག །ཤ་ཟད་ཤས་ཆེར་ན་ཞིང་ཟུག །རྩུབ་ཅིང་ཚེག་ཚེག་ཚ་བ་ཡིན། །མཁྲིས་གྱུར་མྱུར་རྣགས་སེར་བ་དང༌། །སྔོ་ཞིང་སེར་སྐྱའམ་ཁམ་པར་འདུག །གཅིན་དང་ཐལ་ཆུ་རྒྱ་སྐྱེགས་ཁུ། །ཏིལ་མར་འདྲ་ཆུ་མང་དུ་འཛག །རྨ་ལ་ཐལ་སྨན་བཏབ་ལྟར་ན། །དམར་ཞིང་ཚ་ལ་རྣགས་པ་ཡིན། །བད་ཀན་ལས་གྱུར་མདོག་སྐྱ་གཡའ། །ཆུ་ནི་སྐ་བ་མང་དུ་འཛག །རྨ་ཁ་སྦོམ་ཞིང་ནབ་དང༌། །རྩ་རྒྱུས་ཀྱིས་ཁྱབ་ནད་ཚབས་ཆུང༌། །ཁྲག་གྱུར་བྱི་རུའི་མདོག་ལྟར་དམར། །ཁྲག་དང་བཅས་པའི་རྣག་འཛག་ཅིང༌། །རྟ་བྲེས་ཀྱི་ནི་དྲི་ལྟར་བྲོ། །མཁྲིས་པའི་མཚན་མ་དག་དང་ལྡན། །གཉིས་སམ་གསུམ་མམ་ཐམས་ཅད་ལས། །གྱུར་པའི་མཚན་མ་འདྲེན་མ་ཡིན། །ལྕེ་ཡི་མདོག་འདྲ་འཇམ་ཞིང་མཉེན། །རྨ་ཁ་སྨུག་ཅིང་འབྲུམ་ཕྲན་ཅན། །མཉམ་པ་དབུས་མ་ཅུང་ཟད་མཐོ། །བླ་བརྣན་མེད་རྨ་དག་པ་ཡིན། །པགས་པ་ཤ་དང་རྩ་རྒྱུས་དང༌། །ཚིགས་དང་རུས་པ་ནང་གྲོལ་གནད། །བརྒྱད་པོ་དེར་ནི་རྨ་གནས་པ། །ཕྱི་མ་བཞིན་དུ་གསོ་བར་དཀའ། །གསོ་སླ་སྙིང་སྟོབས་མེ་དྲོད་ཤ །ན་ཚོད་ཉམས་སྟོབས་ལྡན་པའི་རྨ། །ཟླུམ་ཞིང་དཀྱུས་རིང་རིམ་གསུམ་པ། །ཟུར་བཞི་པ་ནི་གང་ཡིན་དང༌། །དེ་བཞིན་
དཔྱི་རྐུབ་ཕོ་མཚན་མཆུ། །རྒྱབ་དང་ཁ་ནང་མཁུར་ཚོས་བྱུང༌། །གསོ་དཀའ་མིག་དང་སོ་དང་ནི། །སྣ་དང་མིག་ཟུར་ལྟེ་བ་དང༌། །སྲུབས་མཚམས་ལྟོ་བ་རྣ་བ་དང༌། །རྩིབ་ལོགས་མཆན་ཁུང་ནུ་མར་བྱུང༌། །ལྦུ་བ་རྣག་འཛག་རླུང་འབྱུང་ཞིང༌། །ཟུག་རྔུར་བཅས་ཤིང་སྟོང་ནས་འཛག །མཚན་བར་རྡོལ་ཞིང་ཁ་ནང་བལྟས། །དེ་བཞིན་རྐེད་པའི་རུས་པར་གནས། །མཛེ་ཅན་དུག་གིས་ཕོག་པ་དང༌། །ལུས་སྐེམ་གཅིན་ནད་སྦྲང་རྩི་འདྲ། །རྨ་སྟེང་རྨ་ནི་བྱུང་བ་གང༌། །རྨ་དེ་གསོ་བར་དཀའ་བ་ཡིན། །མེ་དབལ་རིམས་དང་ཚད་པར་འཁྲུ། །ལུད་པ་ལུ་དང་སྐོམ་དད་ཆེ། །གཉིད་མེད་པ་དང་དབུགས་མི་བདེ། །མེ་དྲོད་ཆུང་བར་གྱུར་པ་ཡི། །རྨ་ནི་འཚོ་བ་པར་མི་འགྱུར་རོ། །མགོ་བོའི་ཐོད་པ་ཆག་གྱུར་ཅིང༌། །ཀླད་རྒྱས་མཚན་མ་སྣང་དེ་བཞིན། །ཆུ་བ་རུལ་ཞིང་རྩ་ཆད་དང༌། །རྨ་ཕུགས་རིང་དང་སྲིན་བུས་ཟོས། །རུས་པ་ཆག་དང་ཟུག་རྡུར་བཅས། །དུག་བཅས་པ་དང་མ་རྟོགས་དང༌། །བཅིང་བ་ཉེས་དང་སྣུམ་ཆེ་ས་དང༌། །རྩུབ་པས་སྤུ་སོགས་བདར་བ་དང༌། །བསྐྱོད་དང་ཁོང་པ་མ་དག་དང༌། །འགྲངས་དྲགས་ཉམས་སྨད་དྲགས་པ་དང༌། །ཆང་འཐུངས་ཉིན་པར་གཉིད་ལོག་དང༌། །ཉལ་པོ་ལ་བརྟེན་མཚན་གཉིད་ཡར། །རྨ་ནི་ལོག་པར་གསོས་པ་དག །གསོས་ཀྱང་འདྲུབ་པར་མི་འགྱུར་རོ། །གང་ཞིག་ནང་ནི་ཐི་པའི་མདོག །འདྲ་ཞིང་རྣགས་པ་མེད་པ་དང༌། །བརྟན་ཞིང་འབྲུམ་བུ་རྙིད་བཅས་པ། །འཚོ་བར་འགྱུར་བར་དེ་བཤད་དོ། །དེ་ནས་འདིར་སྐྲང་གནས་སྐབས་སུ། །གང་ལ་ཉེ་བ་དེ་ལས་སྦྱང༌། །སྦྱངས་པས་སྐྲངས་པར་གྱུར་པ་དང༌། །རྨ་ནི་མྱུར་དུ་འཚོབ་པར་འགྱུར། །སྐྲངས་པའི་སྐབས་སུ་རྒྱུན་དུ་ནི། །ཉེ་བར་སྤྱོད་པ་བསིལ་བས་གསོ། །དེ་ཡིས་ནད་མེད་ཆུ་ལྟ་བུར། །མོད་ལ་ཞི་བར་འགྱུར་བ་ཡིན། །རྨ་སྐྲང་སྲ་བར་གྱུར་པ་དང༌། །ནད་བཅས་མདོག་ནི་མི་སྡུག་དང༌། །དུག་ཅན་ལ་ནི་ཁྱད་པར་དུ། །པད་པ་སོགས་ཤེས་ཁྲག་དབྱུང་ངོ༌། །ནད་ཁྲག་བྲལ་ནས་མོད་ལ་ནི། །སྐྲང་དང་མདོག་དམར་ནད་ཞིར་འགྱུར། །ཁྲག་དབྱུང་ནས་ནི་ཅུང་ཟད་ལུས། །རེག་ན་ནུས་པ་རབ་བསིལ་བ། །ཤིན་ཏུ་ཞིབ་པར་དེ་ཉིད་བཏགས། །བུ་རམ་ཤིང་ཁུ་འོ་མས་སྦྲུས། །ལན་བརྒྱར་
བསྐུས་པའི་མར་དང་བཅས། །གཞན་མ་སྐམ་པར་ཡང་དང་ཡང༌། །རྗེས་སུ་མཐུན་པར་བསྐུས་ན་ཕན། །བྱུགས་དང་བླུགས་པ་དེ་བཞིན་བྱ། །ཨུ་དུམ་བཱ་ར་ནྱ་གྲོ་དང༌། །བླག་ཤ་ལྕང་མ་ཨ་ཤྭདྠའི། །ཤུན་པ་མར་དང་བཅས་བསྐུས་ན། །སྐྲངས་པས་སེལ་བའི་མཆོག་ཡིན་ནོ། །རླུང་ཤས་ཆེ་ཞིང་མཁྲང་བ་དང༌། །སྲ་ཞིང་ནད་ཚབས་ཆེ་བ་དང༌། །ཁྲག་འཛག་པ་དང་རྨ་སྐྲང་བ། །འདི་ལྟ་བུ་ཡི་རྨ་ལ་ནི། །རླན་ཅན་ཤ་བཏགས་ལ་དུགས་བྱ། །ཟར་མ་ཏིལ་ནི་བརྔོས་པ་དང༌། །འོ་མས་དབལ་ནི་བསད་པ་དག །དེ་བཏགས་བསྐུས་ན་ཚ་ན་སེལ། །རྨ་སྐྲངས་བརྟན་ཞིང་ནད་ཚབས་ཆུང༌། །བད་ཀན་རླུང་འཇོམས་སྣུམ་བསྐུ་ཞིང༌། །དེ་ཡི་རྗེས་ལ་འོད་མ་ཡི། །སྦུ་གུས་རིམ་གྱིས་དུགས་བྱའོ། །ཞུ་བར་བྱ་ཕྱིར་ལག་མཐིལ་ལམ། །མཐེ་བོ་ཡིས་ནི་མཉེ་བར་བྱ། །ནས་དང་གྲོ་དང་མོན་སྲན་སྡེའུ། །བཙོས་ཏེ་བཏགས་པའི་ལྡེ་གུས་བསྐུ། །གལ་ཏེ་དེ་ཡིས་མ་ཞུམ་ན། །དེ་ནས་དེ་ནི་དཀྲི་བར་བྱ། །མ་སྨིན་པ་ནི་ཞི་འགྱུར་ལ། །སྨིན་ན་རྣགས་པ་ཉིད་དུ་འགྱུར། །རྒྱ་ཤུག་ཏིལ་དང་ཟར་མ་དང༌། །རྒྱམ་ཚ་ཕབས་དང་རུ་རྟའི་ཕྱེ། །ཞོ་སྐྱུར་ཟན་དྲོན་གྱིས་གླན་ཞིང༌། །དུགས་བྱས་ནས་ནི་དཀྲི་བར་བྱ། །ལེགས་སྨིན་སྐྲངས་པ་ཕྱོགས་གཅིག་འདུས། །བཙིར་བས་ཉེ་བར་བཙིར་གྱུར་པ། །དྲལ་བར་འོས་ལ་དྲལ་བྱ་ཞིང༌། །ཤིན་ཏུ་འཇམ་པོར་གྱུར་པའང་དྲལ། །གུ་གུལ་ཟར་མ་བ་ལང་སོ། །ཁྲོན་བུ་ཕུག་རོན་རྟུག་པ་དང༌། །ཐལ་སྨན་འཕྲོད་དང་ཐལ་སྨན་དེ། །སྨིན་པའི་སྨན་གྱིས་བརྟོལ་བར་བྱ། །ནང་ན་རྣག་འབྱུང་སྒོ་ཕྲ་ཞིང༌། །མཐོ་བར་གྱུར་དང་གནད་ལ་གནས། །སྣུམ་མེད་བཙིར་བའི་སྨན་གྱིས་ནི། །ཀུན་ནས་རབ་ཏུ་བཙིར་བར་བྱ། །བསྐུ་བ་བསྐམས་ན་བཙིར་བ་ཡི། །ལས་ལ་བཏང་སྙོམས་ཉིད་དུ་བྱ། །དེ་ཡི་རྨ་སྒོར་མི་བསྐུ་སྟེ། །དེ་འདྲས་ནད་ནི་འབྱུང་མི་འགྱུར། །སྲན་མ་ནས་དང་གྲོ་དང་ནི། །མ་ཤ་ཤུ་དག་བྲ་བོ་དང༌། །སྨན་ནི་སྤྱི་བག་ཅན་དག་གིས། །པགས་པའི་རྩ་བ་རབ་ཏུ་བསྡམས། །གཅིན་སྙི་མཛེ་ཡི་རྨ་དང་ནི། །ཤས་ཆེར་རེད་པའི་རྨ་དགལ། །དོང་ག་བྱེའུ་རུག་པ་སོགས་ཀྱིས། །ལན་ནི་བདུན་བདུན་བཀྲུ་སོགས་བྱ། །མ་དག་ནིམ་པ་པ་ཏོ་
ལའི། །ལོ་མ་བསྐོལ་བས་བཀྲུ་བར་བྱ། །རྨ་དག་པ་ལ་ནྱ་གྲོ་དྷ། །ལ་སོགས་ཤུན་ལྤགས་བསྐོལ་བས་བཀྲུ། །ཤིང་མངར་ཏིལ་དང་པ་ཏོ་ལ། །དུར་བྱིད་དན་ད་སེར་པོ་གཉིས། །ནིམ་པའི་ལོ་མ་རྒྱ་མཚར་བཅས། །ལྡེ་གུས་བསྐུས་ན་རྨ་སྦྱོང་བྱེད། །རྨ་ནི་ཁ་ཕྲག་ནད་མཚམས་གནས། །ད་ན་ང་རྒྱམ་ཚ་ལང་ཀ་ལི། །དུད་བྱིད་སྦྲང་རྩིར་སྦྱར་བ་ཡི། །རེང་བུར་བྱས་པས་རྨ་སྦྱང་བྱ། །རླུང་གིས་གནོད་ཅིང་ཁྲག་བཅས་ཤིང༌། །མི་བཟད་ནལ་ནས་དང་གྲོ། །སྤྲ་ཚིལ་ཤྲི་བ་ཀྲ་ཀ་དང༌། །ཐང་ཤིང་མར་བཅས་དུད་པས་བདུག །ཁྲག་མཁྲིས་དག་གི་ཤས་ཆེ་ལ། །ཤིན་ཏུ་བསིལ་བའི་སྨན་གྱིས་བསྐུ། །སྐམ་ཞིང་ཤ་ཉུང་གཏིང་རིང་རྨ། །ཤ་སྐྱེད་པ་ཡི་སྨན་བྱ་སྟེ། །ཤུག་པ་ནྱ་གྲོ་དྷ་སོགས་དང༌། །བ་ལ་ཨ་ཤྭ་གནྡྷ་ཏིལ། །བསྐུས་ཏེ་ཤ་ནི་བསྐྱེད་པར་བྱ། །ཤ་ཟའི་ཤ་ནི་ཆོ་ག་བཞིན། །གཡོས་སུ་བྱས་ཏེ་སྦྱིན་པར་བྱ། །སེམས་དགའ་བ་དང་ཤ་ཟ་ཡི། །ཤ་ཟོས་ན་ནི་ཤ་འཕེལ་འགྱུར། །ཤ་སྙི་འབུར་བར་གྱུར་པ་ལ། །ཛཱ་ཏིའི་མེ་ཏོག་ནག་ཚུར་དང༌། །ལྡོང་རོས་བ་བླ་གུ་གུལ་དང༌། །ཙི་ཏྲ་ཀ་སོགས་ལྡེ་གུས་བསྐུ། །ཤ་འབུར་བར་ནི་སྲ་བ་དང༌། །གཡའ་ཞིང་རིང་ནས་འཚོ་བ་དང༌། །རྨ་ནི་ན་ཞིང་སྦྱང་དཀའ་ལ། །ཐལ་སྨན་ལས་ཀྱིས་སྦྱང་བར་བྱ། །རྡེའུ་དབྱུང་རྨ་ནི་གཅིན་འཛག་དང༌། །གང་གཞན་ཁྲག་ནི་འབྱུང་བ་དང༌། །གང་ཞིག་བཅད་ནས་སྦྱར་བ་དང༌། ཇི་སྐད་བཤད་པའི་ཆོ་ག་ཡིས། །གསོ་བར་བྱེད་བཞིན་མི་འགྲུབ་ན། །དེ་ནི་མེ་ཡི་ལས་ཀྱིས་གསོ། །སྐྱོན་མེད་རྨ་ལ་རྨ་འབྱོར་བའི། །སྨན་དང་ཤ་སྐྱེད་གང་ཡིན་སྦྱར། །ཨ་ཤྭ་གནྡྷ་སེང་ཕྲོམ་དང༌། །ཤིང་མངར་བཙོད་དང་ཀད་ཕ་ལ། །ད་ཏ་ཀི་ཡི་མེ་ཏོག་གི །ཕྱེ་མ་རྨ་འཚོབ་བྱེད་པའི་མཆོག །རྣག་དང་ཤ་ནི་མེད་པ་དང༌། །ཤ་ཡི་གནས་སུ་མ་འདྲུབས་པར། །ཏིལ་དང་ཤིང་མངར་བཅས་པ་ཡི། །ལྡེ་གུས་རྨ་ནི་འཚོབ་པར་བྱ། །སྣུམ་དྲོ་མངར་དང་ཁ་བ་དང༌། །བསྐ་བས་ཐམས་ཅད་སེལ་བར་བྱེད། །ནིམ་པའི་ལོ་མ་སྦྲང་རྩིར་བཅས། །བསྐུས་པས་རྨ་སྦྱོར་མཆོག་ཡིན་ནོ། །སྔ་མ་གཉིས་དང་ཞུན་མར་སྦྱར། །མྱུར་དུ་རྨ་འཚོ་བ་བྱེད་པ་ཡིན། །ཏིལ་འདྲར་ནས་ཀྱི་ལྡེ་གུ་ནི། །དེ་དང་འདྲ་བར་ལ་ལ་འདོད། །
ཁྲག་མཁྲིས་དུག་དང་གློ་བུར་དང༌། །གཏིང་རིང་ཚ་དང་བཅས་པའི་རྨ། །འོ་མ་རྨ་འབྱོར་སྨན་དང་ནི། །བསྐོལ་བའི་མར་གྱིས་རྨ་འཚོབ་བྱ། །བད་ཀན་རླུང་གྱུར་རྨ་འབྱོར་སྨན། །ཏིལ་མར་བཅས་པས་རྨ་འཚོབ་འགྱུར། །ནག་ཚུར་སེང་ཕྲོམ་ཨ་རུ་ར། །ལི་ཁྲི་དངུལ་རྡོ་སྲ་རྩི་པོག །སྤངས་མ་པོ་སོན་ཆའི་ཕྱེ་མ། །ཏིལ་མར་བཅས་པ་རྨ་འཚོ་བ་མཆོག །མཉམ་ཞིང་ཤ་ནི་བརྟན་པ་དང༌། །པགས་པར་གནས་ལ་ཕྱེ་མ་ཕན། །ཨུ་དུམ་ཝཱར་ཨ་ཤྭཏྠ། །འཛམ་བུ་སེང་ཕྲོམ་ཀད་ཕ་ལ། །ཀ་ཀུ་སེང་ཕྲོམ་ཕྱེ་མས་གདབ། །པགས་པ་མྱུར་དུ་སྐྱེད་པར་བྱེད། །རྒྱ་སྐྱེགས་ལྡོང་རོས་བཙོད་དང་ནི། །བ་ལ་དང་ནི་སེར་པོ་གཉིས། །སྦྲང་རྩི་མར་སྦྱར་ལྡེ་གུ་ཡིས། །བསྐུས་ན་པགས་པ་དག་བྱེད་མཆོག །སྐྱེར་པ་ཨ་མྲའི་རུས་པ་དང༌། །ནཱ་ག་གེ་སར་བྲི་ཡང་ཀུ། །ཙནྡན་སེར་པོ་དངུལ་ཆུ་རྣམས། །ལྡེ་གུ་བ་ལང་ལྕི་ཁུ་དང༌། །སྦྱར་བ་བསྐུས་པར་གྱུར་ན་ནི། །པགས་པ་མདོག་འདྲར་བྱེད་མཆོག་ཡིན། །བ་སོ་དུད་པ་མ་ཤོར་བསྲེགས། །སྐྱེར་ཁནྜ་དང་ཏིལ་མར་སྦྱར། །བསྐུས་ན་སྤུ་ནི་སྐྱེད་པར་བྱེད། །དེ་བཞིན་རྐང་བཞིའི་སེན་མོ་སྤུ། །རུས་པ་པགས་པ་རྭ་རྨིག་བསྲེགས། །སྣག་ཚ་ཏིལ་མར་དང་སྦྱར་བས། །བསྐུས་ན་སྤུ་ནི་སྐྱེད་པར་བྱེད། །སྨིན་མ་ལ་ནི་ཆ་སྤྱད་ཀྱི། །ལས་བཤད་ཕན་དང་གནོད་པ་བསྟེན། །རླུང་གྱུར་རྨ་ལ་རྩ་བ་ལྔ། །གཉིས་དང་རླུང་འཇོམས་སྡེ་ཚན་ཕན། །མཁྲིས་གྱུར་ཤུག་པ་ནྱ་གྲོ་དང༌། །སྡེ་ཚན་གཉིས་དང་མཁྲིས་འཇོམས་གཏོང༌། །བད་ཀན་ལས་གྱུར་དོང་གའི་སྡེ། །བད་ཀན་འཇོམས་པར་བྱེད་པ་གཏང༌། །འདྲེན་མ་ལས་གྱུར་འདྲེན་མར་བྱས། །འདི་དག་གིས་བཀྲུ་བྱུགས་པ་དང༌། །སྨན་མར་ཏིལ་མར་སྨན་ཁུ་དང༌། །ཕྱེ་མ་རིལ་བུ་བདུན་པོ་ནི། །རྨ་ལ་ཅི་རིགས་སྦྱར་བར་བྱ། །ཛཱ་ཏི་ནིམ་པ་པ་ཏོ་ལའི་ལོ་མ། །སྐྱེར་པ་ཡུང་བ་ཐལ་ཏྲེས་པུ་ཙེ་ཤེལ། །སྤྲ་ཚིལ་སྤངས་མ་ཤིང་མངར་ཨ་རུ་ར། །ཀ་རཉྫ་ཡི་ས་བོན་བཙོད་དང་བཙོས། །མར་བསྐོལ་འདིས་ནི་རྨ་ཁ་ཆུང་བ་དང༌། །ནད་ལ་བརྟེན་ཞིང་རྣག་ནི་འཛག་པ་དང༌། །རྨ་ཡི་ཕུགས་རིང་ནད་བཅས་ཕུགས་རིང་བའི། །རྨ་ནི་དག་ཅིང་འཚོབ་པར་བྱེད་པ་ཡིན། །ཡན་ལག་བརྒྱད་པའི་སྙིང་
བོ་བསྡུས་པ་ལས། །ཕྱི་མའི་གནས་ཀྱི་ལེའུ་ཉི་ཤུ་རྩ་ལྔ་བའོ།། །།དེ་ནས་འཕྲལ་དུ་བྱུང་བའི་རྨའི་གསོ་བ་བཤད་པར་བྱའོ། །རྨ་གང་སྣད་པས་འཕྲལ་དུ་ནི། །བྱུང་གྱུར་གློ་བུར་རྨ་ཞེས་བྱ། །དེ་ནི་མཐའ་ཡས་ཀྱང་ཡན་ལག །གནས་པ་རྣམ་པ་བརྒྱད་དུ་བཤད། །བཤུས་དང་བཅད་དང་རྣམ་པར་བཅད། །རབ་ཏུ་འཕྱང་དང་ལྷུང་བ་དང༌། །ཕུག་དང་གཤགས་དང་གྲུགས་པའོ། །དེ་ལ་བཤུས་པ་ཆུ་སེར་རམ། །ཁྲག་ནི་ཉུང་ཟད་འབྱུང་འགྱུར་ཞིང༌། །པགས་པ་ཆོས་པས་ཚ་འགྱུར་ཡིན། །དེ་ལས་ཚོས་གྱུར་བཅད་པ་ཡིན། །དེ་ལས་ཆོས་པ་རྣམ་བཅད་ཡིན། རབ་འཕྱང་རུས་པར་ལྷག་མ་ལུས། །ལྷུང་བ་ལུས་ལས་ཕོགས་པ་ཡིན། །ཟུག་རྔུ་ཕྲ་མོ་འབིགས་པས་ཕུག །ཁོང་པ་མ་གཏོགས་བསྣུན་པ་ཡིན། །སྔ་མ་ལས་གཞན་གཤགས་པ་ཡིན། །ཁྲག་དང་རྐང་ནི་འདྲེས་གྱུར་པ། །མཚོན་གྱིས་དྲག་ཏུ་བསྣུན་པ་ཡིས། །རུས་བཅས་རྒྱ་ཆེར་སྣད་གྲུགས་པ། །དེ་ལ་འཕྲལ་དུ་བྱུང་བའི་རྨ། །ཟུག་གཟེར་ཤིན་ཏུ་ཆེ་བ་ལ། །ཤིང་མངར་མར་དང་བསྐོལ་བའམ། །བ་ལའི་ཏིལ་མར་ངོ་འཇམ་བླུགས། །སྣད་པའི་ཚ་བ་ཞི་བྱའི་ཕྱིར། །བསྐུ་བ་ལ་སོགས་སྣུམ་པ་དང༌། །བསིལ་དང་མངར་བའི་སྨན་གྱིས་ནི། །དེ་ཡི་མདོ་ལ་བླུགས་པར་བྱ། །འཕྲལ་གྱི་རྨ་ནི་རྒྱ་ཆེ་ལ། །སྦྱར་བའི་ཕྱིར་ནི་སྦྲང་རྩི་དང༌། །མར་གྱིས་མཆོག་ཏུ་བསྐུ་བྱ་ཞིང༌། །མཁྲིས་འཇོམས་བསིལ་བའི་གསོ་བ་བྱ། །ནད་ཀྱི་རྩོམ་པ་ཆེ་བ་ལ། །སྟེང་དང་འོག་ནས་སྦྱང་བར་བྱ། །སྨྱུང་བ་བྱ་ཞིང་འབྲས་ཆན་སྦྱིན། །རྒྱུན་དུ་གཏར་ག་གདབ་པར་བྱ། །བཤུས་དང་གྲུགས་པ་འདི་ཉིད་དེ། །ཆོ་ག་འདི་ཉིད་ལྷག་པར་སྦྱར། །དེ་གཉིས་ཁྲག་ནི་ཉུང་ཤས་འཛག །སྨིན་པའང་མྱུར་བ་ཉིད་དུ་འགྱུར། །ཕལ་ཆེར་རྨ་ནི་ཤས་ཆེར་འབྱུང༌། །གཞན་ལས་ཁྲག་ནི་འབྱུང་གྱུར་ལ། །དེ་ཡིས་ཁྲག་ནི་ཟད་གྱུར་པས། །རླུང་འཁྲུགས་ནད་ནི་སྐྱེད་པ་ལས། །རླུང་འཇོམས་སྨན་དང་བསྐོལ་བ་ཡི། །སྣུམ་བླུགས་པ་དང་སྨན་ཆུ་བླུགས། །དུགས་དང་བསྐུ་དང་དཀྲི་བ་དང༌། །སྣུམ་གྱི་འཇམ་རྩི་རྣམས་ཀྱང་བྱ། །དེ་ལྟར་ཞག་བདུན་པར་བཤད་པའི། །འཕྲལ་གྱི་རྨ་བྱུང་ཆོ་ག་བཤད། །ཞག་བདུན་ནས་ནི་ཤུགས་ཟད་ནས། །སྔར་བཤད་པ་ཡི་ཆོ་གས་
སྤྱད། །འདིར་ནི་ཕལ་ཆེར་སྤྱིའི་ཆོག །རེ་རེའི་གསོ་བ་བཤད་བྱ་སྟེ། །ཤུས་ལ་ནབ་མྱུར་བསལ་ཕྱིར། །རྨ་ལ་ཕན་པའི་ཕྱེ་མས་གདབ། །བཅད་པ་རྨ་སེལ་ལྡེ་གུས་བསྐུ། །རྣམ་པར་བཅད་དང་རབ་འཕྱང་ལ། །ཆོ་ག་བཞིན་དུ་བཙེམ་པ་དང༌། །བཅིང་བ་དང་ནི་བཙིར་བར་བྱ། །མིག་བཅང་བ་ནི་གསོར་མི་རུང༌། །མ་ཞར་ཕྱིར་ནི་འཕྱང་བ་ལ། །རང་གི་གནས་སུ་ལེགས་གཞག་ཅིང༌། །རྩམ་འཆོལ་བར་བྱས་ནས་ནི། །པདྨའི་འདབ་མས་གཡོགས་ནས་ནི། །ལག་པས་དལ་གྱིས་མནན་པར་བྱ། །དེ་ནས་ཤིང་མངར་ཛི་བ་ཀ །ཟངས་རྩི་བ་དང་ཨུཏྤ་ལ། །མར་དང་འོ་མ་བཅས་བསྐོལ་བའི། །སྨན་ཐིགས་བླུགས་དང་སྣ་སྨན་དང༌། །བརྟ་བའི་ཆོ་ག་དག་ཀྱང་བྱ། །མིག་ནད་ཐམས་ཅད་སེལ་མཆོག་ཡིན། །མིག་ཕུགས་ཞུགས་ལ་མགུལ་པ་བསྡམ། །སློན་དང་ལུད་པ་སྤྲིད་པ་འབྱུང༌། །ཡང་ན་དབུགས་འབྱུང་དབུགས་བརྔུབ་བསྡམ། རྨ་བྱུང་མིག་གི་གསོ་བ་བྱ། །རྣ་བ་བོགས་པ་བཙེམས་ནས་ནི། །བུ་ག་ཏིལ་མར་དག་གིས་དགང༌། །ལྟག་པའི་སུམ་མདོ་ཆོད་གྱུར་ཏེ། །རླུང་ནི་འབྱུང་བར་གྱུར་པ་ལའང༌། །མཉམ་དུ་བཞག་སྟེ་བར་མཚམས་ནི། །མེད་པར་བཙེམས་ཏེ་བཅིང་བར་བྱ། །དེ་ལ་ར་ཡི་མར་སར་གྱིས། །བླུགས་པ་དག་ནི་རབ་ཏུ་བསྔགས། །གན་རྐྱལ་བཞག་སྟེ་ཁ་ཟས་སྦྱིན། །ལེགས་པར་སྤྱོད་ལམ་བསྡམས་ཏེ་ཉལ། །ཡན་ལག་ཐད་ཀར་གནས་པ་ཡི། །རྨ་བྱུང་ཡན་ལག་ལེགས་གཞག་སྟེ། །བཙེམས་ལ་དཀྲི་ཞིང་བཅིང་བྱ་ཞིང༌། །གོས་ནི་མཐུག་པོས་བཅིང་བར་བྱ། །པགས་པའི་འུར་མཐིལ་བཅིང་བས་ནི། །ཕྲག་པའི་རྨ་ལ་བཅིང་བར་བྱ། །རླིག་པ་འཕྱང་ལ་རྐང་པར་ནི། །སྦུ་གུས་ཆུ་ནི་གཏོར་ནས་ཀྱང༌། །རླིག་པ་བཅུག་སྟེ་རས་བལ་དང༌། །བཅས་པའི་ཁབ་ཀྱིས་བཙེམ་པར་བྱ། །འུར་མཐིལ་བཅིང་བར་བྱས་པ་ལ། །རྐེད་པ་ནས་ནི་སྲད་བུས་གདགས། །དེར་ནི་རྨ་ནི་འདུལ་གྱུར་པས། །སྣུམ་དང་དུགས་ཀྱི་ལས་མི་བྱ། །པྲི་ཡང་ཀུ་དང་ཨ་ག་རུ། །སུག་སྨེལ་ཛཱ་ཏི་པར་པ་ཏ། །ཙནྡན་ལྡོང་རོས་སྐྱེར་པ་དང༌། །སླ་ཏྲེས་དང་ནི་སྤངས་མ་དང༌། །ཏིལ་མར་བསྐོལ་བས་རྨ་འཚོབ་བྱེད། །ཡན་ལག་མ་ལས་ཆད་པ་ལ། །ཏིལ་མར་བསྐོལ་བས་
བསྲེགས་ནས་ནི། །སྒྱེའུ་བཅིང་བས་བཅིང་བར་བྱ། །དེ་ནས་རྨ་ལྟར་གསོ་བར་བྱ། །ཕུག་པ་ཟུག་རྡུ་ཕྱུང་བས་གསོ། །གྲུགས་དང་ཆག་གྲུགས་གསོ་བར་བྱ། །མགོ་བོའི་ཟུག་རྡུ་དབྱུང་བ་ལ། །སྐྲ་ཡི་ཡེའུ་གཞུག་པར་བྱ། །གཞན་དུ་ཀླད་རྒྱས་འཛག་པ་ཡིས། །རླུང་འཁྲུགས་དེ་ནི་གསོད་པར་འགྱུར། །རྨ་འཚོ་བ་ནས་ནི་རིམ་གྱིས་ནི། །སྐྲ་ནི་དལ་གྱིས་དབྱུང་བར་བྱ། །ཀླད་རྒྱས་འཛག་ལ་སྲོག་ཆགས་ནི། །གཞན་གྱི་ཀླད་པ་སྦྱིན་པར་བྱ། །གཞན་ལས་ཟུག་རྡུ་ཕྱུང་ནས་ནི། །རྨ་དེར་རིང་བུ་སྣུམ་ཅན་གཞུག །ཕུགས་རིང་ཁ་ནི་ཆུང་བ་དང༌། །རྨ་གང་རྣག་དང་ཁྲག་འཛག་ལ། །འཁོར་ལོས་བཙིར་བའི་ཏིལ་མར་བླུགས། །དེ་ནི་སྤུ་གུ་ཆུང་དུས་གཏང༌། །ཁོང་པ་བརྟོལ་ཏེ་ཁྲག་གིས་གང༌། །བརྒྱལ་ཞིང་སྙིང་ག་རྩིབ་ལོགས་ན། །རིམས་འདེབས་ལུས་ཚ་ལྟོ་སྦོ་སྐོམ། །ཟས་ལ་མངོན་པར་མི་དགའ་ཞིང༌། །བཤང་བ་གཅིན་དང་འཕྱེན་འགགས་ལ། །མིག་དམར་རྡུལ་འབྱུང་དབུགས་མི་བདེ། །ཁ་ནང་ཁྲག་གི་དྲི་བྲོ་ཞིང༌། །ལུས་ཀྱང་དྲི་མི་ཞིམ་པར་འགྱུར། །མ་ཞུའི་གནས་ན་གནས་པའི་ཁྲག །ཁྲག་ཏུ་ཡང་ནི་སྐྱུག་པར་བྱེད། །ཤིན་ཏུ་ཤས་ཆེར་ལྟོ་སྤོ་ཞིང༌། །གཟེར་ནད་ཀྱིས་ཀྱང་གནོད་པར་ཕྱེད། །ཞུ་བའི་གནས་ན་གནས་པའི་ཁྲག །གཟེར་བཅས་ལུས་ནི་ལྕི་བར་བྱེད། །ལྟོ་བ་མན་ཆད་གྲང་བ་དང༌། །བུ་ག་ལས་ཀྱང་ཁྲག་འབྱུང་འགྱུར། །གནས་ནི་ཞིག་པར་མ་གྱུར་ཀྱང༌། །ཁྲག་ནི་འཛག་པར་གྱུར་པ་ཡིས། །བུ་ག་ལས་ནི་འགེངས་བྱེད་དེ། །ལྒང་བའི་ངོས་ནས་འགེངས་དང་འདྲ། །ཁྲག་ནང་ཡོད་པ་དེ་ལ་ནི། །རྐང་ལག་ཁ་དང་དབུགས་གྲང་ཞིང༌། །མིག་དམར་གདོང་ནི་སྐྱ་པ་དང༌། །ལྟོ་སྦོ་བ་ནི་སྤང་བར་བྱ། །མ་ཞུར་གནས་ལ་སྐྱུག་སྨན་གཏང༌། །ཞུ་བའི་གནས་ལ་གནས་པ་ལ། །བཀྲུ་སྨན་དང་ནི་ནི་རུ་ཧ། །སྣུམ་མེད་དྲོ་བས་སྦྱང་བར་བྱ། །ནས་དང་རྒྱ་ཤུག་རྒྱ་སྲན་གྱི། །ཁུ་བ་སྣུམ་ནི་མེད་པ་དང༌། །ནས་ཐུག་ཁ་ཟས་བཟའ་བ་དང༌། །ལྕེ་མྱང་ཚ་དང་ལྡན་པ་སྦྱིན། །ཁྲག་ནི་མང་དུ་འཛག་པ་དང༌། །ཁོང་པ་སྣད་ལ་ཁྲག་བླུད་བྱ། །རྒྱུ་མ་འབྱར་དང་ཆད་པར་ཉེན། །ཁོང་པ་སྣད་པ་གཉིས་སུ་བཤད། །དང་པོར་བརྒྱ་ལ་སོགས་ཆུང་བ་ཡིན། །གཉིས་པ་ཤས་
ཆེར་གནོད་པར་བྱེད། །རྒྱུ་མ་འབྱར་བ་ཐེ་ཚོམ་བཅས། །རྒྱུ་མ་ཆད་པ་འཚོ་མི་འགྱུར། །གང་གི་བཤང་དང་གཅིན་དང་འཕྱེན། །རང་གི་ལམ་ལས་བྱུང་གྱུར་ལ། །བླ་བརྣན་མེད་པར་རྡོལ་གྱུར་ཀྱང༌། །འཚོ་བར་འགྱུར་བར་ཐེ་ཚོམ་མེད། །མ་རྡོལ་རྒྱུ་མ་བྱུང་བ་ནི། གཞུག་པར་བྱ་ཞིང་གཞན་དུ་མིན། །གྲོག་མའི་མགོ་བོ་བཅད་ནས་ནི། །དེ་ཡང་གཞུག་ཅེས་པ་ལ་སྨྲ། །རྡུལ་དང་ཁྲག་དང་རྩ་ཡིས་གོས། །འོ་མས་ལེགས་པར་བཀྲུས་ནས་ནི། །སེན་མོ་བྲེགས་ཏེ་མར་གྱིས་བསྐུས། །རིམ་གྱིས་ལེགས་པར་གཞུག་པར་བྱ། །སྐམ་པོ་འོ་མས་སྤངས་ནས་ནི། །མར་སར་མང་པོ་བསྐུ་བར་བྱ། །སོར་མོས་མགུལ་པ་མཉེ་བ་དང༌། །ཆུ་ཡིས་ཀྱང་ནི་གཏོར་བར་བྱ། །དེ་ལྟར་རྒྱུ་མ་ནང་ཞུགས་ནས། །དེ་ཡི་ཚེ་ན་བཙིར་བར་བྱ། །རྨ་ཁ་ཆུང་དང་སྦོམ་པ་ཡིས། །རྒྱུ་མ་ཁོང་པར་མ་ཆུད་ན། །དེ་ཡི་ཚད་ཙམ་ལྟོ་བ་ནི། །དབྲལ་ཏེ་ནང་དུ་གཞུག་པར་བྱ། །གནས་སུ་ལེགས་པར་འདུག་གྱུར་ནས། །དེ་རྗེས་རྒྱུ་མའི་རྨ་བཙེམ་བྱ། །གནས་སུ་ལེགས་པར་མ་བཞག་ན། །དེ་ནི་འཁྲུགས་པས་འཆི་བར་འགྱུར། །དེ་རྗེས་རས་ཀྱིས་དཀྲིས་ནས་ནི། །མར་གྱིས་བསྐུ་ཞིང་བླུགས་པར་བྱ། །དེ་ནས་ངན་ད་ཏིལ་མར་དང༌། །སྦྱར་བའི་འོ་མ་དྲོ་འཇམ་བླུད། །དེས་ནི་བཤང་བ་སྙི་བ་དང༌། །རླུང་ནི་བདེ་བར་འབྱུང་བར་འགྱུར། །ཇི་སྐད་བཤད་པའི་སྤྱོད་པ་བསྲུང༌། །ལོ་གཅིག་བར་དུ་འབད་པར་བྱ། །ལྟོ་ལས་ཚིལ་ནི་བྱུང་གྱུར་ན། །ཐལ་བའམ་ནི་ས་དག་གམ། །རོ་བསྐ་བ་ཡི་རྩབ་དག །ཞིབ་ཏུ་བཏགས་པས་བཏབ་ནས་ནི། །དེ་ནས་སྲད་བུས་དམ་དུ་བཅིང༌། །སྨན་པ་མཁས་པས་གཅད་པར་བྱ། །མཚོན་རྣོན་མེ་ལ་བསྲེགས་པ་ཡིས། །ལན་ཅིག་ཁོ་ན་གཅད་པར་བྱ། །གཞན་དུ་བྱས་ནས་གཅོད་པའི་ཚེ། །ན་ཞིང་སྦོ་འམ་འཆི་བར་འགྱུར། །སྦྲང་རྩིར་བཅས་པས་རྨ་བཅིངས་ལ། །ཁ་ཟས་ཞུ་ནས་འོ་མ་མར། །དན་ཏེ་རྒྱ་སྐྱེགས་གཟེ་མ་དང༌། ཤིང་མངར་ཁ་ར་བསྐོལ་བ་བླུད། །ཤིང་མངར་བཅས་པ་སྔར་གྱི་ནི། །ཆོག་ན་དང་ཚ་བ་སེལ། །ཚིལ་གྱི་རྨེན་བུར་བཤད་པ་ཡི། །ཏིལ་མར་བསྐུས་ནའང་ཕན་པ་ཡིན། །བལ་བུའི་ལོ་མ་ཤུག་པ་དང༌། སྤང་སྤོས་ཧ་རེ་ཎུ་ཀ་
དང། །ཨ་ག་རུ་དང་ཙནྡན་དང༌། །པདྨའི་ས་བོན་སེར་པོ་གཉིས། ཨུ་ཤི་ར་དང་ཤིང་མངར་བཅས། །བསྐོལ་བ་འཕྲལ་གྱི་རྨ་ལ་ནི། །འཚོ་བར་བྱེད་པའི་དམ་པར་བཤད། །མཚོན་གྱིས་བསྣུན་པས་མི་མངོན་པ། །གཡང་ས་མཐོན་པོ་ནས་ལྷུང་བ། །རླུང་མཁྲིས་འཇོམས་སྨན་འདྲངས་པ་དང༌། །མཉེ་དང་བསྐུ་དང་སྦྱང་བ་བྱ། །ལུས་ཚིགས་བྱེ་དང་མཉེས་པ་དང༌། །གནས་དུ་བསྣུན་པས་ཉེན་པ་ལ། །སྣོད་ཆེན་ཏིལ་མར་གྱིས་བཀང་བར། །གཞུག་ཅིང་ཤ་ཁུ་སྦྱིན་པར་བྱ། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་ཉི་ཤུ་རྩ་དྲུག་པའོ།། །།དེ་ནས་ཆག་གྲུགས་གསོ་བའི་ལེའུ་བཤད་པར་བྱའོ། །ལྷུང་དང་སྣད་སོགས་ཀྱིས་རུས་ཚིགས། །ཚིགས་དང་ཚིགས་མིན་ཆག་གྱུར་གཉིས། །ཚིགས་བྱུང་གྱུར་ན་བརྐྱང་དང་བསྐུམ། །ནུས་པ་མེད་པ་ཉིད་དུ་འགྱུར། །གཞན་དག་ཤིན་ཏུ་སྐྲངས་པ་དང༌། །གནས་སྐབས་ཀུན་ཏུ་རབ་ཏུ་ན། །བསྐྱོད་པ་ཆུང་ངུའང་མི་ནུས་ཤིང༌། །བཙིར་ན་སྒྲ་དང་བཅས་པ་ཡིན། །དེ་ལྟར་ཆག་གྲགས་མདོར་བསྡུས་པའི། །མཚན་ཉིད་ཡིན་ཏེ་དེ་དབྱེ་བ། །ཆག་པའི་དབྱེ་བས་དུ་མར་འགྱུར། །དེ་དག་ཀུན་གྱི་གསོ་བ་ནི། །ཇི་ལྟར་འཚམ་པ་བཞིན་དུ་ནི། །དེ་བཞིན་དེ་ནི་ཉེ་བར་བསྟན། །མང་དུ་ཕྲ་མོར་ཆག་པ་དང༌། །རེག་ན་སྒྲ་ནི་འཁྲོལ་བ་དང༌། །གང་དུ་རུས་པ་ཆག་པ་ཡི། །བར་དུ་རུས་པ་ཕྲ་མོ་ཞུགས། །ཡང་ན་སྣད་པས་ཆག་པ་ལས། །ཅུང་ཟད་ལུས་པར་གྱུར་པ་དང༌། །གང་ཡང་བཏེག་པའི་ཚེ་ན་ནི། །རྨ་ལྟར་རྐང་དུ་ནུབ་པ་དང༌། །ནུས་ཞན་སྦིག་པར་གྱུར་པ་དང༌། །རླུང་ཅན་ཉུང་ཟད་སྤང་བར་བྱ། །དཔྱི་ཡི་རུས་མིག་ཆག་པ་དང༌། །གང་ཡང་ཚིགས་བྱེ་ལྷུང་པ་དང༌། །རོ་སྨད་ཞིབ་ཏུ་གྲུགས་པའམ། །ཆག་པར་གྱུར་པ་གང་ཡིན་དང༌། །ཐོད་པའི་མཚམས་ནི་མ་འབྱོར་བའམ། །དེ་བཞིན་དཔྲལ་བ་ཕྱེ་མར་གྱུར། །གང་ཡང་མུར་འགྲམ་ཆག་པ་དང༌། །ལྷག་པ་ནུ་མའི་པར་ཆད་སྤང༌། །རུས་པ་ལེགས་པར་ཆག་གྱུར་ཀྱང༌། །བཞག་ཉེས་བཅིངས་ནི་ཉེས་པ་དང༌། །གང་ཞིག་བསྐྱོད་པས་གནོད་གྱུར་པ། །དེ་ཡང་སྤང་བར་བྱ་བ་ཡིན། །གདོད་ནས་རུས་པའི་ཚིགས་དག་ནི། །ཉེས་པར་སྐྱེས་གྱུར་དེ་ཡང་སྤང༌། །
རུས་པ་གཞོན་ནུ་གུག་པ་དང༌། །སྦུ་བ་ཅན་ཆག་པར་གྱུར་པ་དང༌། །ཐོད་པ་གྱེས་པར་གྱུར་པ་དང༌། །གཞན་ཡང་མང་དུ་གས་པ་རྣམས། །དེ་ནས་དམའ་བ་བསྟོད་པར་བྱ། །མཐོན་པོ་མནན་པར་བྱ་བ་ཡིན། །ནུང་དུ་ནུབ་བ་དྲང་བར་བྱ། །འོག་ཏུ་སོང་བ་སྟེང་དུ་དྲང༌། །འདེགས་དང་མནན་དང་སྨད་པ་དང༌། །པགས་པ་བསྡུས་ཏེ་བཅིང་བ་དང༌། །དེ་ལྟར་བཞག་པའི་ཐབས་ཀྱིས་ནི། །ལུས་སུ་གཏོགས་པའི་ཚིགས་ཐམས་ཅད། །གཡོ་བའམ་མི་གཡོ་གང་ཡང་རུང༌། །ལེགས་པར་བཞག་སྟེ་མི་འགྱུར་བྱ། །རས་མ་མར་ནི་མང་བས་དཀྲི། །ཨུ་དུམ་བཱ་ར་ཀ་དམ་པ། །ཨརྫུན་དང་ཨ་ཤྭཏྠ། །སརྫ་དང་ནི་པ་ལ་ཤ་།འོད་མ་ལས་བྱུང་ཤུན་ཞེང་ཆེ། །འཇམ་པས་ལེགས་པར་འཇར་བ་དང༌། །རྟེན་དང་བཅས་ཤིང་མི་འགྱུར་བའི། །ཤུན་པའམ་དུམ་བུ་དག་དང་ནི། །འཇག་མས་ལེགས་པར་དཀྲི་བྱ་ཞིང༌། །རས་ཀྱིས་སྟེང་དུ་གླན་པར་བྱ། །བཅིང་བ་ལྷོད་པར་གྱུར་པ་ཡིས། །མཚམས་སྦྱོར་བརྟན་པོར་མི་འགྱུར་རོ། །དམ་པོས་ཤིན་ཏུ་ན་ཞིང་ཚ། །རྣག་དང་སྐྲངས་པ་འབྱུང་བར་འགྱུར། །སོས་ཀའི་དུས་སུ་ཞག་གསུམ། །དགུན་གྱི་དུས་སུ་བདུན་ནས་དགྲོལ། །ཐུན་མོང་དུས་སུ་ཞག་ལྔ་ནས། །ཡང་ན་ཆག་པའི་དབང་ལས་དགྲོལ། །དེ་ནས་ནྱ་གྲོ་དྷ་སོགས་པའི། །ཁུ་བ་བསིལ་བའི་ཆུ་བླུགས་བྱ། །དེ་ནི་ནང་བཅས་རྩ་བ་ལྔ། །འོ་མ་བསྐོལ་བ་བླུགས་པར་བྱ། །མཁས་པས་ཏིལ་མར་འཁོར་ལོས་བཙིར། །རླུང་འཇོམས་སྲན་དང་བཅས་པ་ནི། །དྲོ་འཇམ་ཙམ་ནི་བསྐུ་བར་བྱ། །དུས་དང་ཡུལ་གྱི་དབྱེ་བས་བྱ། །ཁུ་བ་ཤིན་ཏུ་གྲང་མོ་ནི། །རྒྱུན་དུ་བླུགས་ཤིང་ལྡེ་གུས་བསྐུ། །བ་གསར་འོ་མ་མར་དང་བཅས། །མངར་བའི་སྨན་དང་བསྐོལ་བ་དག །རྒྱ་སྐྱེགས་ཁུ་བར་བཅས་པ་ནི། །ཆག་གྲུགས་ཅན་ལ་ནང་རེ་བླུད། །ཆག་གྲུགས་རྨ་དང་བཅས་པ་ནི། །རྨ་ལ་ཤིང་མངར་མར་ཤས་ཆེ། །ལྡེ་གུ་བསྐུས་པའམ་ཡང་ན་ནི། །ལྷག་མ་ཆག་གྲུགས་ལྟ་བུར་གསོ། །རྨ་ཡི་ཤ་ནི་འཕྱང་བ་ལ། །སྦྲང་རྩི་མར་གྱིས་བསྐུས་ནས་ནི། །སྨན་པས་རྨ་ནི་ཁ་སྦྱར་ནས། །བཅིང་བ་དག་ཀྱང་ལེགས་པར་བྱ། །དེ་ནི་མཉམ་ཞིང་ལེགས་བཞག་ནས། །བྲི་ཡང་ཀུ་དང་ཀད་
པ་ལ། །སེང་ཕྲོམ་བཙོད་དང་ད་ཏ་ཀི། །ཕྱེ་མས་ལེགས་པར་བདར་བྱའམ། །སེང་ཕྲོམ་ད་ཏ་ཀིའི་ཕྱེ་མ། །བཏབ་ན་མྱུར་དུ་འཚོ་བར་འགྱུར། །དེ་ལྟར་ཆག་གྲུགས་གསོ་བ་ཡིན། །ལུས་ཟུངས་བརྟན་ལ་དགུན་གྱི་ཚེ། །ཤ་ཆེན་ནད་གཞི་ཆུང་བའི་རྨ། །གསོ་སླ་གཞན་ནི་གསོ་པར་དཀའ། །ན་ཚོད་དང་པོ་བར་མ་མཐའ། །ཟླ་གཅིག་གཉིས་དང་གསུམ་རིམ་གྱིས། །ཆོ་ག་ཇི་སྐད་བཤད་བསྟེན་ན། །རྨ་འབྱོར་བརྟན་པར་འགྱུར་བ་ཡིན། །རྐེད་པ་རྗེ་ངར་བརླ་ཆག་ན། །སྤང་ལེབ་ལ་ནི་ཉལ་ན་ཕན། །དེ་བཞིན་བསྡམས་ཕྱིར་ཕུར་པ་ལྔ། །བྱས་ནས་ཉེ་བར་བརྟོད་བྱ་སྟེ། །རྗེ་དར་ངོས་གཉིས་ལ་གཉིས་གཉིས། །རྐང་མཐིལ་དྲང་པོ་གཅིག་བཞག་བརྟོད། །སྟ་ཟུར་རམ་ནི་སྒལ་ཚིགས་སམ། །གདོང་དང་དེ་བཞིན་ཕྲག་པ་རུས། །ཚིགས་བྱུང་ཆག་གྲུགས་བྱུང་གྱུར་ན། །ཆོ་ག་འདི་བཞིན་སྤྱད་པར་བྱ། །ཚིགས་ནི་བྱུང་ནས་ཡུན་རིང་ལ། །སྣུམ་བསྐུ་དུགས་ཀྱིས་མཉེན་བྱས་ཏེ། །འདི་བཤད་ཐབས་དང་རང་གི་བློས། །རང་གི་གནས་སུ་ལེགས་པར་གཞུག །ཚིགས་མིན་ཆག་སྟེ་འདྲུབས་པ་དང༌། །བཅིངས་ཉེས་པ་ཡིས་གསོས་པ་ལ། །བརྡུངས་ཏེ་ཆག་གྲུགས་བསྲང་བར་བྱ། །དེ་ནས་ཆག་གྲུགས་བཞིན་དུ་གསོ། །ཆག་ནས་ཅི་ནས་མ་རྣགས་པ། །དེ་ལྟར་སྨན་པས་འབད་པར་བྱ། །ཤ་དང་རྩ་རྒྱུས་འདྲུལ་ན་ནི། །ཚིགས་ནི་འདྲུབས་བར་མི་འགྱུར་རོ། །ཆག་གྲུགས་ཅན་ལ་རླུང་ནད་ཀྱི། །སྐབས་བཤད་སྣུམ་ནི་སྦྱར་བར་བྱ། །སྟོབས་བསྐྱེད་སྦྱོར་བ་བཞི་པོ་དང༌། །འཇམ་རྩིའི་ལས་ཀྱང་བསྟེན་པར་བྱ། །སཱ་ལུའི་ཆན་ངང་ཤ་ཁུ་མར། །འོ་མ་རྒྱས་བྱེད་བསིལ་བ་བསྟེན། །ཆག་གྲུགས་ཅན་ལ་རུས་པའི་མཚམས། །འབྱོར་བྱེད་ཚད་ཙམ་སྦྱིན་པར་བྱ། །དེ་ནི་མཚམས་སྦྱོར་བྱེད་པས་ན། །རྨྱ་བར་བྱེད་པ་བསྔགས་པ་ཡིན། །ལན་ཚྭ་ཚ་དང་ཐལ་སྨན་དང༌། །སྣུམ་དང་ཉལ་པོ་ཉི་ཚན་དང༌། །རྩོལ་བ་བསྟེན་པར་མི་བྱ་ཞིང༌། །ཆག་གྲུགས་ཟས་རྩུབ་བསྟེན་མི་བྱ། །ཏིལ་ནག་ཕུབ་མ་མེད་པ་རས་སྲའི་ནང་དུ་གཏུམས། །ཆུ་ཡི་ནང་དུ་ཞག་བདུན་ཉེ་བར་སྤངས་གྱུར་ཅིང༌། །འདི་ནི་བཏེག་སྟེ་ཉིན་རེ་ལེགས་པར་བསྐམས་ནས་ནི། །དེ་བཞིན་འོ་མ་ཆུ་དང་ཤིང་མངར་
ནང་དུ་བསྐོལ། །སླར་ཡང་འོ་མར་སྔ་མ་བཞིན་དུ་སྤངས་ཏེ་བསྐམས། །ཕུབ་མ་མེད་ཅིང་རྡུལ་མེད་ཞིབ་ཏུ་བཏགས་ནས་ནི། །སྤང་སྤོས་བ་ལ་ཀ་དང་བཙོད་དང་ཆུ་སྲིན་སེན། །ཤུ་ཏི་ཀུ་ཏན་ནད་རུ་རྟ་བ་ལ་གསུམ། །ཙནྡན་གུར་གུམ་དང་ནི་ཐལ་ཏྲེས་ཨ་ག་རུ། །སྒྲོན་ཤིང་སྲ་རྩི་པོག་དང་ཐང་ཤིང་ཤུག་པའི་སྡེ། །དེ་ཡི་ཕྱེ་མ་དྲི་ཞིམ་འོ་མ་ལྷན་ཅིག་བཏགས། །དྲི་ཡི་སྨན་ན་མི་ལུས་འོ་མར་བསྐོལ་བ་བཙིར། །རྡོ་དྲེག་ར་སྣ་ཨཾ་ཤུ་མ་ཏི་དང༌། །ཀ་ཤེ་རུ་དང་གནྡྷ་བྲི་ཡང་ཀུ། །རྒྱ་སྤོས་གནྡྷ་བྷ་དྲ་སེང་ཕྲོམ་དང༌། །པ་ཡ་སྱ་དང་མུར་བའོ་མར་བཅས། །སྤང་སྤོས་སོགས་དང་ཏིལ་མར་དེ་བསྐོལ་བ། །དྲི་ཡི་ཏིལ་མར་མཆོག་འདིས་རུས་པ་དག །བརྟན་ཞིང་མྱུར་དུ་ཞི་བར་བྱེད་མཆོག་ཡིན། །རླུང་དང་མཁྲིས་པ་ལས་གྱུར་ནད་ཀྱིས་ཁྱབ། །སྦྱོར་བ་སྣ་ཚོགས་བསྟེན་པས་སེལ་བ་ཡིན། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་ཉི་ཤུ་རྩ་བདུན་པའོ།། །།དེ་ནས་མཚན་བར་རྡོལ་གྱི་ལེའུ་བཤད་པར་བྱའོ། །གླང་པོ་རྟ་ལ་ཞོན་ཏེ་འགྲོ། །གནས་དང་མལ་སར་ཙོག་པུར་འདུག །གཞང་འབྲུམ་ནད་ཀྱི་རྒྱུར་བཤད་དང༌། །གཞན་ལའང་བརྟེན་པར་གྱུར་པ་དང། །མི་དགེ་སྨིན་པར་གྱུར་པ་དང༌། །འཕྲལ་དུ་དམ་པ་ལ་སྨད་པས། །ཕལ་ཆེར་འབྲུམ་ཕྲན་དང་པོར་འབྱུང༌། །རྐུབ་ཀྱི་ཕྱིའམ་ནང་དུ་ནི། །རྨ་ནི་སོར་ཚད་གཉིས་སམ་གཅིག །ཤ་ཁྲག་གནོད་པར་གྱུར་ལས་འབྱུང༌། །ཆུ་སོར་གཅིན་གྱི་གནས་ཉེ་བར། །བྱུང་བས་འཛག་པའི་རང་བཞིན་ཅན། །དེ་ནི་མཚན་པར་རྡོལ་ཞེས་བྱ། །ཀུན་ཀྱང་མ་གསོས་འདྲུལ་བྱེད་ཅིང༌། །མོ་མཚན་ཆུ་སོ་གཞང་གི་བར། །ཤས་ཆེར་འཇིག་པར་བྱེད་པ་དང༌། །བཤང་གཅི་འཕྱེན་དང་ཁུ་ཆུ་ནི། །བུ་གའི་ནང་ནས་རིམ་གྱིས་འབྱུང༌། །ནད་གཞི་རེ་རེ་ལྡན་པ་འདུས། །གློ་བུར་བ་དང་བརྒྱད་དུ་བཤང༌། །མ་སྨིན་འབྲུམ་བུ་ཞེས་བྱར་བཤད། །སྨིན་པ་མཚན་བར་རྡོལ་ཡིན་ནོ། །རྩ་བ་མི་མངོན་ནད་ཚབས་ཆེ། །ཤས་ཆེར་གཡོས་ཤིང་རྨ་འཁྱིམས་འཁྲུགས། །མཚན་བར་རྡོལ་འགྱུར་ཤེས་པར་བྱ། །དེ་ལས་གཞན་དུ་དེ་མི་བྱེད། །དེ་ལས་རླུང་གྱུར་འབྲུམ་བུ་ནི། །
དམར་ཞིང་གནག་ལ་ན་བ་དང༌། །ཟུག་ཅིང་འཕར་བར་བྱེད་པ་ཡིན། །མཁྲིས་གྱུར་རྔ་མོའི་མགྲིན་ལྟར་རིང༌། །དམར་ཞིང་སྲབ་ལ་ཤས་ཆེར་ཚ། །ཐལ་མདོག་དུད་པ་འཐུལ་བཅས་ཡིན། །བད་ཀན་ལས་གྱུར་བརྟན་ཞིང་སྣུམ། །རྩ་བ་ཆེ་ཞིང་མདོག་སྐྱ་གཡའ། །རླུང་མཁྲིས་ལས་གྱུར་མདོག་གནག་ཅིང༌། །དམར་ཞིང་ཚལ་མི་བཟོད་ན། །བད་རླུང་ལས་གྱུར་ཅུང་ཟད་གནག །སྨིན་པར་དཀའ་བའི་མཚན་ཉིད་ཅན། །འདུས་གྱུར་རྐང་པའི་མཐེ་བོ་འདྲ། །ནད་ནི་སྣ་ཚོགས་འབྱུང་འགྱུར་ཞིང༌། །གཟེར་དང་སྐམ་དད་ཡི་ག་འཆུས། །རིམས་དང་སློན་སོགས་ཀྱིས་གནོད་བྱེད། །ཡལ་བར་བོར་ལ་སྨིན་པ་དང༌། །རྨ་ཉིད་དུ་ནི་འགྱུར་བ་ཡིན། །དེ་ལ་རླུང་གྱུར་འབྲུམ་བུ་ནི། །ཁ་ཕྲ་མང་པོས་ཁྱབ་བྱེད་དེ། །ཀོ་ཚགས་བཞིན་དུ་ཁ་མང་ཞིང༌། །རིམ་འཕེལ་ཆུ་སེར་སླ་བ་དང༌། །ཝུ་བ་ཅན་ནི་རྒྱུན་དུ་འཛག །ཀོ་ཚགས་ཁ་བརྒྱ་པ་ཞེས་བྱ། །མཁྲིས་པ་ལས་གྱུར་རྔ་མོའི་མགྲིན། །བད་ཀན་ལས་གྱུར་སྤྱི་བག་ནི། །མང་འཛག་ཡོངས་སུ་འཛག་ཅེས་བྱ། །རླུང་མཁྲིས་ལས་གྱུར་བཤང་སྒོར་ནི། །ཡོངས་སུ་མཆེད་པ་ཀུན་ཁྱབ་ཅིང༌། །དེར་ནི་ར་བའི་འོབས་ཀྱིས་ནི། །བསྐོར་བ་ལྟ་བུར་འབྱུང་བར་འགྱུར། །རླུང་དང་བད་ཀན་ལས་གྱུར་གྲང༌། །གཞན་དུ་དྲང་པོར་སོང་འགས་བྱེད། །བད་མཁྲིས་ལས་གྱུར་སྔར་བཤད་པའི། །གཞང་འབྲུམ་ལ་བརྟེན་དེ་ལྡང་ཞིང༌། །དེ་ལས་གཞང་འབྲུམ་རྩ་བར་གཡའ། །སྐྲང་དང་ཚ་བ་ལ་སོགས་སྐྱེད། །དེ་ནི་མྱུར་སྨིན་རྡོལ་གྱུར་ན། །གཞང་འབྲུམ་རྩ་བ་རྣག་ཅན་ཡིན། །རྒྱུན་མི་ཆད་པར་འཛག་བྱེད་དེ། །གཞང་འབྲུམ་འདི་ནི་མཚན་བར་རྡོལ། །འདུས་པ་ལས་གྱུར་དུང་འདྲ་བ། །དུང་ནི་འཁྱིལ་པའི་དབྱིབས་དང་འདྲ། །འདི་ཡིས་གཞང་ནི་ཞིག་བྱེད་ཅིང༌། །མི་བཟད་ལམ་ནི་ཞིག་པར་བྱེད། །གང་ཚེ་ཤ་ལ་བརྐམ་པ་ཡིས། །རུས་པའི་དུམ་བུ་ཟོས་གྱུར་པས། །ཐད་ཀར་སོང་བས་ལམ་ལོག་ཞུགས། །རྡོལ་ཞིང་སྣད་པར་བྱེད་པ་ཡིན། །དེ་ཚགས་པས་རྣགས་པ་དང༌། །ཤ་ནི་འདྲུལ་བར་བྱེད་པ་ཡིན། །དེར་ནི་སྲིན་བུ་སྐྱེ་འགྱུར་ཞིང༌། །གཞང་ནི་ཀུན་ཏུ་ཟ་བར་བྱེད། །རིང་པོར་མི་ཐོགས་དེས་འཇིག་བྱེད། །དེ་
ནི་ལམ་ལོག་རྨ་སྐྱེས་ཡིན། །དེ་ལས་ན་ཚ་གཡའ་ལ་སོགས། །རྨ་གསོ་བ་ལས་ཤེས་པར་བྱ། །དེ་ལས་དྲུག་པོ་གསོ་དཀའ་ཡིན། །འདུས་གྱུར་རྨ་སྐྱེས་སྤང་བར་བྱ། །སེལ་བའི་གཉེར་མར་ཕྱིན་བ་དང༌། །སྲུབས་མཚམས་ལ་ནི་བརྟེན་བའང་སྤང༌། །དེ་ནས་འབྲུམ་བུའི་ཚེ་ཉིད་ནི། །འདི་ནི་འབད་དེ་གསོ་བར་བྱ། །སྦྱང་དང་གཏར་ག་ཆུ་བླུགས་སོགས། །ཅི་ནས་སྨིན་པར་མི་འགྱུར་བར། །འདི་ནི་འབད་དེ་གསོ་བར་བྱ། །སྨིན་ནས་སླར་ཡང་སྣུམ་ཆོས་དང༌། །དུགས་བྱས་ནས་ནི་ལུས་སྤྱིང་བྱ། །གཞང་འབྲུམ་ལྟ་བུར་བསྡམས་ནས་ནི། །གཏིང་རིང་ལེགས་པར་བརྟག་བྱ་ཞིང༌། །རྩ་བའམ་ནི་རྩེ་མོའམ། །ཕྱི་བལྟས་ནང་དུ་བལྟས་པ་བརྟགས། །དེ་ལ་ནང་བལྟས་བཙལ་ནས་ནི། །གཙགས་བུས་ལེགས་པར་གཅད་པར་བྱ། །ཕྱིར་བལྟས་མ་ལུས་པར་བཅད་ལ། །ཐལ་སྨན་དག་གིས་གསོ་བར་བྱ། །དེ་ནས་ཐལ་སྨན་བཏབ་པའམ། །ཡང་ན་སྨན་པས་མེ་བཙའ་གདབ། །རྔ་མོའི་མགྲིན་ལ་ཐལ་སྨན་བསྐུ། །ཀོ་ཚགས་ཁ་བརྒྱ་སྦུབས་གཅིག་པ། །བཅུག་ནས་ལེགས་པར་གཅད་པར་བྱ། །དེ་འདྲུབས་ནས་ནི་ལྷག་མའང་གཅད། །གཞན་དུ་གཞང་ནི་ཞིག་ནས་འཆི། །འོབས་ལྟར་ཁྱབ་བའང་དེ་བཞིན་དུ། །ཐལ་སྨན་པ་གཅིན་སྦུ་གུས་གསོ། །གཞང་འབྲུམ་མཚན་བར་རྡོལ་ལ་སྔར། །གཞང་འབྲུམ་ལ་ནི་སྨན་ཕྱེ་གདབ། །རྨ་སྐྱེས་པ་ལ་རེ་ཐག་བཅད། །ཟུག་རྔུ་དབྱུང་བའི་ཆོ་ག་བཞིན། །ཟུག་རྔུ་ཕྱུང་སྟེ་སྲིན་འཇོམས་པའི། །བཟའ་དང་བྱུག་པ་སྦྱར་བར་བྱ། །གླན་དུགས་སྦུ་གུ་ཅན་ལ་སོགས། །སྣུམ་ཆོས་ལེགས་སྦྱར་ནད་ལ་ཕན། །ཀོ་ཚགས་འདྲ་དང་ཐམས་ཅད་ལ། །བ་ལང་དོགས་དང་ཀུན་ཏུ་བཟང༌། །གཤོལ་ཕྱེད་པ་དང་གཤོལ་གྱིས་བྱ། །བརྟགས་ཏེ་ཉེ་བར་སྦྱར་བར་བྱ། །ངོས་སུ་འདེབས་པར་བྱེད་པའི་མཚོན། །བ་ལང་ངོགས་ཞེས་བྱ་བར་བཤད། །ཀུན་ཏུ་གཏང་བ་ཀུན་ཏུ་བཟང༌། །ངོས་ལ་གཅོད་པ་གཤོལ་ཕྱེད་པ། །ངོས་གཉིས་སུ་ནི་གཤོལ་གྱིས་བཅད། །འཛག་པའི་ལམ་ནི་མ་ལུས་པ། །ཐམས་ཅད་མེ་ཡིས་བསྲེག་པར་བྱ། །སླར་ཡང་འདི་ལྟའི་གནོད་མི་བསྐྱེད། །སྨན་པས་དེ་ཡི་བར་བར་དུ། །དེ་ཡི་ལྟོ་སྦྱང་ལ་འབད་བྱ། །ཕྱི་ལའི་རུས་
པ་འབྲས་བུ་གསུམ། །ཁུ་བ་ལྡེ་གུར་བྱས་པས་བསྐུ། །ཛོ་ཏི་སྨ་ཏི་མ་ལ་ཡུ། །སླེ་སྨན་ཏ་ཀ་བི་ཤ་ལྱ། །དུར་བྱིད་པ་ཏི་བ་ཏྲ་ཀ །ཀ་ར་བཱི་ར་སྲ་རྩི་པོག །ཤུ་དག་སུ་དྷ་ཀྵིར་དང༌། །ཨརྐའི་ལོ་མ་ཏིལ་མར་བསྐོལ། །མཚན་བར་རྡོལ་ལ་བསྐུས་ན་ནི། །འདི་ནི་ཕན་བྱེད་མཆོག་ཏུ་བཤད། །ཤིང་མངར་སེང་ཕྲོམ་པི་བི་ལིང༌། །སུག་སྨེལ་ཧ་རེ་ཎུ་ཀ་དང༌། །སེར་པོ་གཉིས་དང་པྲི་ཡངྐུ། །རྒྱམ་ཚ་ཐལ་ཏྲེས་ཤུག་པ་དང༌། །པདྨའི་སྙིང་པོ་ད་ཏ་ཀི །སྦྲ་ཚིལ་རུ་རྟ་སྲ་རྩི་པོག །ཁ་ལུང་འོ་མར་བཅས་པ་དང༌། །ཏིལ་མར་ལྷན་ཅིག་བསྐོལ་བ་ཡིས། །བསྐུས་ན་འབྲུམ་བུ་མཛེ་དང་རྨ། །གཅིན་ནད་སྦྲང་རྩི་འདྲ་བ་འཇོམས། །བྱི་དང་ཀ་སྙིང་འབྲས་བུ་གསུམ། །པི་པི་ལིང་རྩ་པི་པི་ལིང༌། །སྦྲང་རྩི་ཏིལ་མར་སྦྱར་བ་ཡི། །ལྡེ་གུ་ཟོས་ན་སྲིན་བུའི་ནད། །མཚན་བར་རྡོལ་དང་མཛེ་ནད་དང༌། །གཅིན་སྙི་བ་དང་སྨས་པ་དང༌། །རྨ་འཁྱིམས་འཚོ་བར་བྱེད་པ་ཡིན། །སླེ་ཏྲེས་སུག་སྨེལ་བྱི་དང་ཀ །དུག་མོ་ཉུང་དང་བ་རུ་ར། །སྐྱུ་རུ་ར་དང་ཨ་རུ་ར། །གུ་གུལ་རིམ་གྱིས་ཆ་རེས་བསྐྱེད། །སྦྲང་རྩིར་སྦྱར་བ་འདི་ཟོས་ན། །འབྲུམ་བུ་སྦོམ་དང་མཚན་བར་རྡོ། །ནད་ནི་སེལ་བར་བྱེད་པ་ཡིན། །པི་པི་ལིང་དང་ཙི་ཏྲ་ཀ །བྱི་དང་ག་དང་དུག་མོ་ཉུང༌། །ཆ་མཉམ་ཕྱེད་ཀྱི་འབྲས་བུ་གསུམ། །ཀུན་དང་ཆ་མཉམ་གུ་གུལ་དང༌། །སྦྲང་རྩིར་སྦྱར་བའི་ལྡེ་གུ་ཡིས། །ནད་ནི་ཐམས་ཅད་འཇོམས་པར་བྱེད། །གུ་གུལ་སྲང་ལྡ་པི་པི་ལིང༌། །འབྲས་བུ་གསུམ་ནི་སྲང་རེ་དང༌། །ཤིང་ཚ་སུག་སྨེལ་ཞོ་གཉིས་གཉིས། །སྦྲང་རྩིར་སྦྱར་བའི་ལྡེ་གུ་ནི། །ཟོས་ན་མཚན་བར་རྡོལ་བ་དང༌། །མཛེ་དང་སྐྲན་ནད་འཇོམས་པར་བྱེད། །དེ་ཉིད་དང་ནི་བཅའ་སྒའི་ཕྱེ། །ལེགས་པར་བསྲེས་པར་གྱུར་པ་དང༌། །རྩ་བ་བཅུ་ཡི་ཁུ་བར་བསྲེས། །མཆོག་ཏུ་རླུང་གི་ནད་སེལ་བྱེད། །སེང་ལྡེང་སྙིང་པོ་འབྲས་བུ་གསུམ་གྱི་ཕྱེ། །ཨ་ས་ན་བསྐོལ་ཁུ་བ་དང་བསྲེས་དང༌། །ཆ་མཉམ་གུ་གུལ་སྤྲང་རྩི་ལྡེ་གུར་བྱས། །མཛེ་འབྲུམ་གཅིན་སྙི་མཚན་བར་རྡོལ་ནད་སེལ། །འདི་ནི་མཚན་བར་རྡོལ་གསོའི་བྱེ་བྲག་བཤད། །སྨན་གྱི་མཚན་ཉིད་ལྷག་མ་གང་ཡིན་པ། །རྨ་ཡི་དབང་བྱས་ཡོངས་སུ་བསྟེན་པ་དང༌། །གསོ་ཐབས་དགོས་པ་ལེགས་པར་བརྟགས་ཏེ་སྦྱར། །རྟ་ཞོན་སྟོབས་འགྱེད་ཤུགས་ནི།
འགེགས་པ་དང༌། །ཆང་འཐུངས་ཉལ་པོ་མ་ཞུམ་གོམས་དང༌། །དྲག་ཤུལ་ལས་ནི་སྣ་ཚོགས་རྨ་འདྲུབས་ན། །ལོ་གཅིག་བར་རམ་དེ་ལས་ལྷག་པ་སྤང༌། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་ཉི་ཤུ་རྩ་བརྒྱད་པའོ།། །།དེ་ནས་རྨེན་བུ་དང་ཐོར་བུ་དང་རྐང་བམ་དང་འབྲས་ཀྱི་ཕྲེང་བའི་ནད་དམིགས་ཤེས་པ་བཤད་པར་བྱའོ། །ནད་ནི་བད་ཀན་ཤས་ཆེ་བ། །ཁྲག་དང་ཤ་དང་ཚིལ་ལ་བརྟེན། །ཟླུམ་ཞིང་མཐོ་བར་སྐྲངས་པ་དེ། །མདུད་པ་འདྲ་བས་རྨེན་བུར་བཤད། །དེ་ནི་ནད་གཞི་ཁྲག་ཤ་ཚིལ། །དུས་རྩ་རྨ་ལས་གྱུར་པ་དགུ། །དེ་ལ་རླུང་གྱུར་རྒྱ་ཆེ་ཞིང༌། །ཟུག་ཅིང་བྱེ་བ་སྙམ་སེམས་ན། །གནས་ནས་གནས་གཞན་དག་ཏུ་འཕོ། །རྒྱུ་མེད་པར་ནི་འཕེལ་ཞིང་འབྲི། །འཇམ་ཞིང་ལྒང་པ་ལྟ་བུར་རྒྱས། །བརྟོལ་ན་ཁྲག་ནི་སླ་བ་འཛག །མཁྲིས་གྱུར་ཚ་ཞིང་མདོག་སེར་ལ། །དམར་ཞིང་མྱུར་དུ་སྨིན་པ་ཡིན། །བརྟོལ་ན་ཁྲག་ནི་དྲོན་མོ་འཛག །བད་ཀན་ལས་གྱུར་ནད་མེད་སྲ། །རེག་ན་གྲང་ཞིང་དཀར་ལ་གཡའ། །སྨིན་ན་རྣག་ནི་སྐ་བ་འཛག །ནད་འཁྲུགས་ཁྲག་ལས་གྱུར་རྨེན་བུ། །སྲིན་བུ་དང་ནི་བཅས་པར་འགྱུར། །ཤ་དང་རྩ་ལ་གནས་པ་ཡི། །རྨེན་བུ་ཚོར་བ་ཆུང་བ་དང༌། །མཁྲིས་པའི་མཚན་ཉིད་འདྲ་བ་ཡིན། །ཤ་ཆེའི་གནོད་གྱུར་ཤ་ལས་ནི། །ཤ་སྐྱེད་ཟས་ལ་རྨེན་བུ་འབྱུང༌། །སྣུམ་ཞིང་ཆེ་ལ་སྲ་བ་དང༌། །རྩ་ཡིས་ཁྱབ་ཅིང་བད་ཀན་འདྲ། །ཚིལ་སྐྱེད་པ་ཡིས་ཚིལ་འཕེལ་བ། །ཤ་འམ་པགས་པར་ཕྱིན་གྱུར་པ། །རླུང་གི་རྨེན་བུ་ཤིན་ཏུ་སྣུམ། །འཇམ་དང་བརྟན་པར་བྱེད་པ་ཡིན། །བད་ཀན་དང་ནི་མཚན་ཉིད་མཚུངས། །ལུས་འཕེལ་འབྲི་བ་མཚུངས་པ་ཡིན། །དེ་བརྟོལ་ཚིལ་མཐུག་དམར་བ་དང༌། །དཀར་དང་གནག་པ་འཛག་པར་འགྱུར། །རུས་པ་ཆག་དང་སྣད་པ་ལས། །མཐོ་དང་དམའ་བར་གྱུར་པ་དེ། །རུས་པའི་རྨེན་བུ་ཞེས་བྱའོ། །རྐང་གིས་སོང་བའམ་དྲག་ཤུལ་གྱིས། །དུབ་པར་གྱུར་ནས་ཆུ་བརྒལ་བས། །རླུང་གིས་རྩ་གྲང་ཁྲག་བཅས་པ། །རླུང་གིས་བཙིར་ཏེ་འཁུམས་ནས་ནི། །ཡོན་པོར་བྱས་ཏེ་བསྐམས་པ་དང༌། །མི་འཕར་ནད་བྱུང་རྨེན་བུ་ཆགས། །དེ་ནི་རྩ་ཡི་རྨེན་བུར་བཤད། །རྨ་ནི་མ་འདྲུབས་
འདྲུབས་མ་ཐག །རོ་ནི་ཐམས་ཅད་ཟོས་གྱུར་པའམ། །རློན་པ་དཀྲིས་པ་མེད་པའམ། །ཡང་ན་ལུས་ནི་སྣད་གྱུར་པས། །རླུང་ནི་ནད་ཁྲག་མ་ཕྱུང་བ། །མ་སྦྱངས་རྨ་ནི་བསྲུབས་པ་ལས། །ཚ་ཞིང་གཡའ་དང་བཅས་གྱུར་པ། །རྨ་ཡི་རྨེན་བུར་དེ་བཤད་དོ། །གསོར་རུང་ནད་གཞི་ཁྲག་ཚིལ་གྱུར། །སྲ་ཞིང་འགྱུར་དང་སྦོམ་པ་དང༌། །གནད་དང་མགུལ་པ་སྟོར་གནས་ཡིན། །མདུད་པ་ཆེར་ཆགས་ཐོར་བུ་སྟེ། །རྨེན་བུ་དེ་ཡི་མཚན་ཉིད་ཅན། །ནད་གཞི་ལ་སོགས་གྱུར་དྲུག་ཡིན། །ཕལ་ཆེར་བད་ཀན་ཚིལ་རྒྱས་ཡིན། །བརྟན་པས་སྨིན་པར་མི་འགྱུར་རོ། །རྩ་ལ་གནས་པའི་ཁྲག་ནད་ཀྱིས། །འཁུམས་པའི་རྗེས་ལ་གནོད་འགྱུར་ཞིང༌། །སྨིན་པ་དེ་ཚེ་རྒྱས་པར་འགྱུར། །ཤ་ཡི་གོང་པོ་བཅས་པར་འགྱུར། །ཤ་ཡི་མྱུ་གུས་ཁྱབ་གྱུར་ཞིང༌། །སྐྱེས་པ་དེ་ལས་ནད་ཁྲག་ནི། །རྒྱུན་མི་འཆད་པར་མང་དུ་འཛག །དེ་ནི་ཁྲག་གི་ཐོར་བུ་ཡིན། །དེ་ལས་ཤ་ཁྲག་ལས་གྱུར་སྤང༌། །བཞི་པོ་གཞན་དག་གསོ་བར་བྱ། །དང་པོར་ཆུ་སོར་གནས་པའམ། །རོ་སྨད་ལ་བརྟེན་བད་ཀན་རྒྱས། །ཤ་ཁྲག་ནད་ཀྱི་རྐང་བར་ནི། །དུས་སུ་སྐྲང་བར་བྱེད་འགྱུར་ཞིང༌། །རིམ་གྱིས་སྟུག་པོ་ཉིད་དུ་འགྱུར། །དེ་ནི་རྐང་བམ་ཞེས་བྱའོ། །རླུང་གྱུར་གས་ཤིང་གནག་པ་དང༌། །རྒྱུ་མེད་ན་ཞིང་རྩུབ་ཅིང་ན། །མཁྲིས་པ་ལས་གྱུར་སེར་བ་དང༌། །ཚ་དང་རིམས་ཀྱིས་འདེབས་པ་ཡིན། །བད་ཀན་སྣུམ་ལྕི་ནད་ཚབས་ཆུང༌། །ཤ་ཡི་མཛེར་པ་ཆེན་པོས་ཁྱབ། །དེ་ནི་མང་དུ་འཛག་པ་དང༌། །ལོ་གཅིག་འདས་པ་སྤང་བར་བྱ། །ཁ་ཅིག་ལག་པ་སྣ་དང་མཆུ། །རྣ་བ་རྐང་པ་ལྟར་འབྱུང་གཟེར། །རྐང་བམ་སྐྱེས་པར་གྱུར་པ་དེ། །རླན་ཅན་གནས་སུ་མི་བཟད་སྐྱེ། །ནད་ནི་ཚིལ་མགྲིན་མཇིང་པ་མིག །མཆན་ཁུང་ཆུ་སོར་གནས་པ་དག །མདོག་འདྲ་སྲ་ཞིང་སྣུམ་པ་དང༌། །བར་ཏ་སྐྱུ་རུ་ར་འདྲ་དང༌། །གཏིང་ཟུག་འབྲས་ནི་ཆེར་འབྱུང་བ། །རིང་ཞིག་ལོན་ན་སྨིན་པར་བྱེད། །དེ་ལས་ཁ་ཅིག་ནད་མེད་སྨིན། །ཁ་ཅིག་འཛག་དང་གཡའ་བ་ཡིན། །ཁ་ཅིག་སྐམ་ཞིང་ཁ་ཅིག་སྐྱེ། །ཡུན་རིང་དུ་ནི་གནས་པར་བྱེད། །འདུར་བ་བཞིན་དུ་འབྲི་ཞིང་འཕེལ། །འབྲུམ་ཆེན་འབྲས་ཕྲེང་ཞེས་བྱའོ། །དེ་ནི་རིམས་བཅས་
སྐྱུགས་པ་དང༌། །ཆོམ་ལུད་རྩིབ་ལོགས་ཟུག་པ་ཡང༌། །རྨ་ལ་མི་འཕྲོད་བསྟེན་པ་ཡིས། །སྐྲང་དང་སྨིན་པ་ཁྱད་པར་མེད། །ཤ་སོགས་ནང་དུ་རྣག་ཞུགས་འགྱུར། །རིང་དུ་འགྲོ་བར་བྱེད་པ་ཡིན། །དེ་ནི་རིང་དུ་འགྲོ་བས་འགྲོ། །སྦུབས་ལྟར་འཛག་པ་སྤུ་གུ་ཡིན། །དྲང་པོ་སྦུ་གུ་གཅིག་ཡིན་ཏེ། །དེ་ཉིད་སྣ་ཚོགས་འགྲོ་བས་འགྲོ། །དེ་ནི་ནད་གཞི་རེ་རེ་འདུས། །ཟུག་རྔུའི་རྒྱུས་འབྱུང་ལྔར་འགྱུར་རོ། །རླུང་གྱུར་ནད་བཅས་རྨ་སྒོ་སྲ། །མདོག་མི་སྡུག་ཅིང་ཝུ་བ་འཛག །ནུབ་མོ་ལྷག་པར་འཛག་པ་ཡིན། །མཁྲིས་གྱུར་སྐོམ་ཚ་རིམས་ཀྱིས་འདེབས། །སེར་བྲོ་རྣག་ནི་དྲི་མནམ་འཛག །ཉིན་པར་ལྷག་པར་འཛག་པ་ཡིན། །བད་ཀན་སྐ་ཞིང་སྤྱི་བག་འཛག །གཡའ་ཞིང་སྲ་བར་གྱུར་པ་དང༌། །མཚན་མོ་ལྷག་པར་འཛག་པ་ཡིན། །འདུས་གྱུར་མཚན་མ་ཀུན་ལྡན་སྤང༌། །ནང་ན་གནས་པའི་ཟུག་རྔུ་མ་ཕྱུང་ཞིང༌། །སྤུ་གུ་སྐྱེད་པར་བྱེད་པ་གང་ཡིན་དེ། །ལྦུ་བ་ཅན་ལ་སླ་ཞིང་དྲོ་བ་དང༌། །ཁྲག་བཅས་རྣག་ནི་ནད་བཅས་རྟག་ཏུ་འབྱུང༌། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་ཉི་ཤུ་རྩ་དགུ་པའོ།། །།དེ་ནས་རྨེན་བུ་ལ་སོགས་པའི་ནད་གསོ་བ་བཤད་པར་བྱའོ། །རྨེན་བུ་མ་སྨིན་པ་ལ་ནི། །རང་རང་སྐྲངས་པའི་ནད་ལྟར་གསོ། །ཀཎྜ་ཀ་རི་བྲི་ཧ་ཏི། །ཙི་ཏྲ་ཀ་དང་པི་པི་ལིང༌། །བསྐོལ་བའི་མར་གྱིས་ལུས་སྦྱང་བར། །འདོད་པ་དག་གིས་སྣུམ་ཆོས་བྱ། །སྦྱང་བྱས་སྨན་རྣོན་ལྡེ་གུས་བསྐུ། །རྨེན་བུ་ལན་མང་དུགས་བྱས་ཏེ། །ཡང་དང་ཡང་དུ་མཉེ་བར་བྱ། །འདི་ནི་མཆོག་ཏུ་རླུང་ལ་བྱ། །ཁྲག་དང་མཁྲིས་པ་ལས་གྱུར་པའང༌། །གཏར་ག་བསིལ་བའི་སྦྱོར་ཀུན་བྱ། །བད་ཀན་ལས་གྱུར་རླུང་ལྟར་གསོ། །འོན་ཀྱང་སྨིན་ན་དེ་བཅད་དེ། །ཁྲག་ཡོད་པ་ནི་མེས་བསྲེག་བྱ། །མ་ལུས་པར་བཅད་ལུས་གྱུར་ན། །སླར་ཡང་འཕེལ་བར་བྱེད་པར་འགྱུར། །ཤ་ཡི་རྨ་ལས་གྱུར་རྨེན་བུ། །དེ་བཞིན་འཚོ་བ་ཙམ་དུ་བྱ། །ཚིལ་ལས་གྱུར་པའང་འདི་ཉིད་དང༌། །ཏིལ་དང་འོ་མའི་ལྡེ་གུས་བསྐུ། །རས་ནི་ཉིས་རིམ་དག་གིས་དཀྲི། །ཏོག་ལྕགས་ལ་སོགས་བསྲེགས་པས་བསྲོ། །ཡང་ན་མཚོན་གྱིས་
དབྲལ་ནས་ནི། །ཚིལ་ཕྱུང་ནས་ནི་ལེགས་པར་བསྲེགས། །རྩ་ཡི་ཐོར་བུ་སར་པ་ལ། །ས་ཧ་ཙ་རའི་ཏིལ་མར་བླུད། །རླུང་འཇོམས་སྨན་གྱིས་དཀྲི་དུགས་བྱ། །འཇམ་རྩི་དང་ནི་གཏར་ག་བྱ། །ཐོར་བུ་རྨེན་བུ་ལྟ་བུར་ནི། །རང་གི་ཇི་བཞིན་བྱས་རབ་ཕན། །རྐང་བ་མ་རླུང་གྱུར་འཕེལ་བ་ལ། །སྣུམ་ཞིང་དུགས་བཅས་དཀྲི་བ་དང༌། །ལོང་མོའི་སོར་གཉིས་གོང་དུ་ནི། །གཏར་ག་གདབ་བར་བྱ་བ་དང༌། །ཨེ་རཎྜའི་མར་འོ་མ་དང༌། །བ་གཅིན་སྦྱར་བ་ཟླ་གཅིག་བླུད། །ཞུ་ནས་འབྲུ་རྙིང་བཅའ་སྒ་དང༌། །འོ་མ་དང་སྦྱར་ཁ་ཟས་སྦྱིན། །དེ་བཞིན་དུར་བྱིད་འོ་མ་བླུད། །དེས་མ་ཞིན་མེས་བསྲེག་བྱ། །མཁྲིས་གྱུར་ལོང་མོའི་འོག་ཏུ་ནི། །ཁྲག་དབྱུང་མཁྲིས་པ་སེལ་ཀུན་སྦྱར། །བད་ཀན་ལས་གྱུར་མཐེ་བོ་ལས། །ཁྲག་གཏར་ནས་ཀྱི་ཁ་ཟས་ནི། །སྦྲང་རྩིར་བཅས་པའི་སྨན་ཁུ་བླུད། །འཕེལ་བའི་ཚེ་ན་པི་པི་ལིང༌། །ཨ་རུ་ར་ནི་བསྟེན་པར་བྱ། །ཡུངས་ཀར་བྲི་ཧ་ཏི་གཉིས་ཀྱི། །རྩ་བའི་ལྡེ་གུས་བྱུག་པར་བྱ། །ཡང་ན་འུ་སུའི་ལྡེ་གུས་བྱུག །འབྲས་ཀྱི་ཕྲེང་བ་སྟེང་འོག་ནས། །སྦྱང་ཞིང་དན་ད་ཏྲ་བན་ཏི། །དུར་བྱིད་ཀོ་ཤ་ཏ་ཀི་དང༌། །དེ་བ་ཏ་ལའི་མར་བསྐོལ་བླུད། །བད་ཀན་ཚིལ་ནི་འཇོམས་པ་ཡི། །དུད་པས་མཁུར་བཀང་སྣ་སྨན་བཏང༌། །གཏར་གས་ཁྲག་ནི་དབྱུང་བ་དང༌། །སྐྱེར་པའི་ཁཎྜས་གཅིན་ཡང་བླུད། །རྨེན་བུ་མ་སྨིན་པ་ལ་ནི། །རྒྱམ་ཚ་བཅའ་སྒ་ན་གུ་ལི། །བསྐུ་ཞིང་སྲ་བར་རྒྱམ་ཚ་ཡི། །ཐུམ་བུས་དུགས་བྱས་མཉེ་བར་བྱ། །ཤ་མི་ལ་ཕུག་ཤི་ཀྲུ་ཡི། །ས་བོན་ནས་དང་ཡུངས་ཀར་བཅས། །དར་བ་སྐྱུར་པོ་བཏགས་བསྐུས་ན། །རྨན་བུའི་མདུད་པ་ཞི་བར་བྱེད། །སྨིན་པར་འཕྲིགས་ན་ཁྲག་དབྱུང་ཞིང༌། །བད་ཀན་མཁྲིས་པ་སེལ་བས་གསོ། །མ་སྨིན་པ་ནི་ཕྱུང་ནས་ཀྱང༌། །ཐལ་སྨན་མེ་བཙས་གསོ་བར་བྱ། །ཛོ་ཏིཥྨ་ཏི་ལང་ག་ལི། །ཤུ་ཀ་ན་སའི་འབྲས་བུ་དང༌། །ཀ་ཀ་ཏིག་ཏ་ཀར་ཀོ་ཊི། །དེ་བཏ་ལའི་ས་བོན་དང༌། །བི་ཤ་ལྱ་དང་ནི་རྒུན་ཏི། །ཀོ་ཤ་ཏ་ཀི་པ་ཏ་རྣམས། །སྲང་ནི་ཕྱེད་དང་དུག་ཞོ་གཉིས། །ཀ་རཉྫའི་མར་བྲེ་གང་དང༌། །ནི་རྒུན་ཏི་ཡི་ཁུ་བ་ནི། །བྲེ་བཞི་བསྐོལ་བར་གྱུར་པ་འདིའི། །བཏུང་དང་བསྐུ་བྱུག་སྣར་བཏང་ན། །འབྲས་ཀྱི་ཕྲེང་བ་གསོར་མི་རུང༌། །ཡུན་རིང་
ལོན་ཞིང་རྣག་འཛག་སེལ། །ལོང་ཀ་ལི་ཡི་སྡོང་བུ་ཡི། །ལྡེ་གུ་ཏིལ་མན་དེ་བཞི་འགྱུར། །ནིར་གུན་ཏི་ཡི་ཁུ་བར་བསྐོལ། །སྣ་སྨན་སོགས་བཏང་འབྲས་ཕྲེང་སེལ། །ཙནྡན་ཐང་ཤིང་ན་ལེ་ཤམ། །དུར་བྱིད་གླ་སྒང་སེར་པོ་གཉིས། །སྲང་རེ་དུག་ནི་སྲང་ཕྱེད་དང། །བ་གཅིན་སྦྱར་ཏེ་ཞིབ་ཏུ་བཏགས། །བྲམྦྷིའི་ཁུ་བ་ཨརྒ་ཡི། །འོ་མ་བ་ལང་ལྕི་ཁུར་བཅས། །ཡུངས་མར་བྲེ་གང་བཅས་བསྐོལ་བ། །བཏུང་བ་ལ་སོགས་པར་བསྟེན་ན། །མཛེ་དང་རྨ་ནི་འཁྱིམས་པ་དང༌། །འབྲས་ཀྱི་ཕྲེང་བ་མྱུར་དུ་སེལ། །ཤུ་དག་རྒྱ་སྐྱེགས་ཨ་རུ་ར། །པུ་ཙེ་ཤེལ་དང་ཙནྡན་དང༌། །ཏིལ་མར་བསྐོལ་བ་བླུད་ན་ནི། །འབྲས་ཕྲེང་རྩ་བར་བཅས་པ་སེལ། །ཤ་ར་པུང་ཀའི་རྩ་བ་ནི། །འབྲས་ཀྱི་ཆུ་དང་བཏགས་གྱུར་པ། །སྣ་སྨན་བསྐུ་བས་འབྲུམ་བུ་དང༌། །དུག་སྲིན་འབྲས་ཀྱི་ཕྲེང་བ་འཇོམས། །ཨཏྟམ་ཀ་རའི་རྩ་བ་དང༌། །བི་ལུའི་ལོ་མ་སེར་ཕྲོམ་དང༌། །ས་ཧ་ཙ་ར་ཨ་རུ་ར། །ཤིང་མངར་ཤུ་ཏི་ཙི་ཏྲ་ཀ །ཐང་ཤིང་ཏིལ་མར་འོ་མ་མཉམ། །སྣ་སྨན་བསྐུ་བྱུག་བྱས་པའང་ཕན། །བ་ལང་ར་ལུག་རྟ་རྨིག་བསྲེགས། །ཉུངས་མར་སྦྱར་ཏེ་བསྐུ་བའམ། །སྦྲུལ་ནག་བྱ་རོག་རང་ཉིད་ཤི་།ཨིང་གུ་དང་ནི་སྦྱར་བ་བསྐུ། །དེ་ལྟར་མ་ཞི་ནད་ཀྱི་ནི། །ལོགས་གཞན་བྱིན་པ་ལ་གནས་པའི། །ཆུ་སོའི་སྟེང་ངམ་འོག་ནས་ནི། །ཚིལ་ཕྱུང་ནས་ནི་མེས་བསྲེག་བྱ། །གྱེན་དུ་འགྲེང་བའི་རྐང་པ་གཞལ། །དེ་ཡི་ཚད་ཀྱི་རྟིང་པ་རུ། །དེ་ལས་རྨེན་བུ་དབྱུང་བྱ་ཞེས། །དྲང་སྲོང་མུ་ཁྱུད་ཀྱིས་བཤད་དོ། །རྟིང་པ་ནས་བཟུང་སོར་ནི་བཅུ་གཉིས་ན། །དབང་པོའི་ཆུ་སོ་ཡོད་སྤང་ནད་ཀྱི་ནི། །གཡོན་དུ་དབྲལ་ཏེ་ཉ་སྒོང་འདྲ་དབུས་ནས། །དྲ་བ་དྲང་ཞེས་ལེགས་ཐོས་ཀྱིས་བཤད་དོ། །མི་ཡི་ལོང་མོ་རྣ་བའི་བར་དུ་གཞལ། །དེ་ཡིས་བརྒྱད་པ་རྟིང་པའི་ཆ་བགོས་ཏེ། །བྱིན་སྙིང་གནད་ཀྱི་དྲང་ཐད་མ་གཏོགས་དཔྲལ། །ཚིལ་ནི་དབྱུང་བར་བྱ་ཞེས་གཞན་དག་འཆད། །རླུང་གྱུར་སྤུ་གུར་དུགས་བྱས་ལ། །དབྲལ་ཏེ་ཨ་པ་མརྒ་ཡི། །སྤུ་གུས་ཏིལ་དང་རྒྱམ་ཚར་བཅས། །བཏགས་པའི་ལྡེ་གུས་ལེགས་པར་བསྐུ། །མཁྲིས་པ་ལས་གྱུར་ཏིལ་དང་བཙོད། །ནཱ་ག་དན་ཏི་སེར་པོ་གཉིས། །བད་ཀན་ལས་གྱུར་རྒྱམ་
ཚ་ཏིལ། །དན་ད་ནིམ་པ་ལན་ཚྭས་བསྐུ། །ཟུག་རྔུ་ལས་བྱུང་དབྲལ་ཏེ་དབྱུང༌། །ཏིལ་དང་མར་དང་སྦྲང་རྩིས་བསྐུ། །མཚོན་དབྲལ་མི་རུང་ཆུ་ཚོད་ཀྱིས། །ལེགས་པར་བཙལ་ཏེ་ནང་དུ་དབུག །ཐལ་སྨན་ལ་སྤངས་སྐུད་པ་ཡིས། །རྨ་ཚོལ་ཁ་ནི་ཤས་ཆེར་དྲལ། །རྨ་རེད་ཁ་ནི་དོག་པ་དང༌། །ཕུགས་རིང་ལ་ཡང་སྦྱར་བར་བྱ། །རེང་བུ་གང་དང་ཏིལ་མར་གང༌། །དེ་ནི་རྨ་འཁྱིམས་ལ་ཡང་བསྔགས། །ཨེ་རཎྜའི་འབྲས་ལྡེ་གུས་བསྐུ། །སྦུ་གུའི་རྨ་སྦྱོར་བྱེད་མཆོག་ཡིན། །རྒྱ་ཤུག་འབྲས་བུ་ཤུན་པ་དང༌། །ལན་ཚྭ་རྒྱ་སྐྱེགས་བཅས་པ་དང༌། །གླ་གོར་ཞོ་ཤའི་ལོ་མ་དང༌། །པྲི་ཡང་ཀུ་དང་ནུ་ཞོ་དང༌། །ཨརྐ་སྣུ་ཧིའི་འོ་མར་སྦྱར། །རེང་བུས་རྨ་འཁྱིམས་མྱུར་འཚོ་བར་བྱེད། །རྒྱམ་ཚའི་ཚ་དང་རྩབས་རུ་ཚ། །ལྕེ་མྱང་ཚ་ནི་ལེགས་པར་བསྲེགས། །གླ་གོར་ཞོ་ཤ་ཁྱིམ་དུད་པ། །ཨ་མྲ་ཏ་ཀ་སེང་ལྡེང་གི །ལོ་མ་ཛི་ན་སྐྱེར་པ་གཉིས། །ལྡེ་གུས་བསྐུ་བ་སོགས་བསྟེན་ན། །སྐྱབས་མེད་མི་བརྟན་སྐྱེས་བུ་ཡི། །འབྱོར་པ་བཞིན་དུ་འགྲིབ་པར་བྱེད། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་སུམ་ཅུ་པའོ།། །།དེ་ནད་ནད་ཕྲ་མོའི་དམིགས་ཤེས་པ་བཤད་པར་བྱའོ། །བད་རླུང་ལས་གྱུར་འབྲུམ་ཕྲན་ནི། །སྣུམ་ཞིང་མདོག་འདྲ་མདུད་པ་ཅན། །ནད་མེད་མུངྒ་འདྲ་བ་ནི། །བྱིས་པ་ལས་སྐྱེས་རའི་འགྲམ་པ། །དེ་གཉིས་ལས་བྱུང་ཤར་གནས་མཐུག །ནས་འདྲ་ནས་ཞེས་བྱ་བ་ཡིན། །འབྲས་བྱེར་ཟླུམ་པོ་རྩེ་མོ་མེད། །རྣག་ཉུང་རྟག་མཐོ་འབྲས་བྱེར་ཡིན། །རྨེན་བུ་ལྔ་འམ་དྲུག་འབྱུང་ཞིང༌། །རུས་སྦལ་ལྟར་མཐོ་རུས་སྦལ་ཡིན། །རྣ་བའི་སྟེང་ངམ་ཀུན་ཏུ་ནི། །འབྲུམ་ཕྲན་སྲ་ཞིང་མི་བཟད་ན། །ཨུཏྤལ་རྩ་འདྲ་པ་ནས། །སྐྲང་ཤིང་ཅུང་ཟད་ན་ལ་བརྟན། །འགམ་པའི་མཚམས་སུ་དེ་གཉིས་ལས། །འབྱུང་བ་རྡོ་ཡི་བོང་བུ་ཡིན། །ཤལ་མ་ལི་ཡི་ཚེར་མ་འདྲ། །འབྲུམ་ཕྲན་ནད་བཅས་མཐུག་པོ་ནི། །ནང་ན་ཚིལ་ཡོད་ལང་ཚོ་ལ། །བྱུང་བ་བཞིན་ནི་མ་རུང་བྱེད། །བད་ཀན་རླུང་གྱུར་པདྨ་ཡི། །ཚེར་མ་འདྲ་བས་ཁྱབ་གྱུར་ཅིང༌། །དཀར་ཞིང་ནད་ནི་མེད་པ་དག །པདྨའི་ཚེར་མ་ཅན་ཞེས་བྱ། །མཁྲིས་པ་ལས་གྱུར་འབྲུམ་ཕྲན་
ཟླུམ། །ཨུ་དུམ་བཱ་རའི་འབྲས་སྨིན་འདྲ། །ཤས་ཆེར་ཚ་ཞིང་རིམས་འདེབས་བྱེད། །གས་པ་ཁ་བྱེ་ཞེས་བྱའོ། །ལུས་ཀྱི་ནང་དང་གདོང་ལ་ནི། །ཚ་ཞིང་ནད་དང་རིམས་སྐྱེད་ཅིང༌། །སྲན་ཆུང་ཙམ་ལ་དེའི་མདོག་ཅན། །འབྲུམ་ཕྲན་མཐུག་པོ་སྲིན་ཆུང་ཞིང། །དེ་བས་འབྲུམ་བུ་ནད་ཚབས་ཆེ། །སྡུག་བསྔལ་བྱེད་པ་འབྲུམ་བུ་ཡིན། །རླུང་མཁྲིས་ལས་གྱུར་འབྲུམ་བུའི་ནང༌། །པདྨའི་སྙིང་པོ་ལྟ་བུ་ཡི། །འབྲུམ་ཕྲན་གྱིས་ནི་ཕུག་པ་ཡིན། །དེ་དག་ཉིད་སྐྱེད་བོང་བུ་ཡིན། །ཟླུམ་ཞིང་རྒྱ་ཆེ་མཐོ་བ་དང༌། །མདོག་དམར་འབྲུམ་ཕྲན་དག་གིས་ཁྱབ། །ཕལ་ཆེར་རླུང་ལས་མཆན་ཁུང་དུ། །ཉེ་བར་སྐྱེས་པ་མཆན་ཁུང་འབྲུམ། །མཁྲིས་པ་ལས་གྱུར་འབྲུམ་ཕྲན་ནི། །ཕྲ་ཞིང་མཐུག་པ་འབྲས་ཡོས་འདྲ། །དེ་འདྲའི་ཆེན་པོ་ཅིག་བྱུང་བ། །དྲི་ཅན་ཞེས་ནི་གྲགས་པ་ཡིན། །ཚ་བའི་རྡུལ་གྱིས་ལུས་གདུངས་ལ། །འབྲུམ་ཕྲན་ནད་བཅས་སྟུག་པོ་ནི། །དབྱིབས་དང་ཆད་མདོག་སྐྱེ་ཚེ་འདྲ། །དེ་ནི་སྐེ་ཚེ་ཞེས་བྱའོ། །མཁྲིས་པ་ཤས་ཆེའི་ནད་ཀྱིས་ནི། །མེ་དབལ་ལྟ་བུར་དལ་གྱིས་མཆེད། །སྐྲང་ཞིང་སྣུམ་ལ་སྲབ་ཅིང་དམར། །རིམ་སྐྱེད་དྲ་བའི་བོང་བུ་ཡིན། །མཁྲིས་པ་ཤས་ཆེའི་འབྲུམ་བུ་ནི། །རིམ་སྐྱེད་ཤ་ལ་གནོད་བྱེད་པ། །མཆན་ཁུང་ཕྱོགས་བྱུང་མེའི་མདོག་ཅན། །འདྲ་བ་དེ་ནི་མེ་སྐྱེད་ཡིན། །ཞག་ལྔའམ་ནི་ཞག་བདུན་ན། །ཟླ་བ་ཕྱེད་ནས་སྲོག་འཕྲོག་བྱེད། །ནད་གཟི་གསུམ་སྐྱེས་འབྲུམ་བུ་ཟླུམ། །ནམ་ཚོང་ཡན་ཆད་སྐྱེས་ས་སྐོར། །མཆན་ཁུང་ཆུ་སོར་བི་ད་རིའི། །རྩ་བ་ལྟར་སྲ་བི་ད་རི། །ཚིལ་དང་བད་རླུང་ལས་གྱུར་པའི། །རྨེན་བུ་རྩ་རྒྱུས་ཤ་ལ་གནས། །བརྟོལ་ན་མར་ཞག་སྦྲང་རྩི་འདྲ། །འཛག་གྱུར་དེ་ལ་རླུང་ཤས་ཆེ། །ཤ་སྐམ་རྨེན་བུར་བྱས་ནས་ནི། །གསེར་མ་ལྟ་བུར་སྐྱེད་པར་བྱེད། །ཁྲག་ནི་དྲི་མནམ་རངས་པ་དང༌། །ཁ་དོག་སྣ་ཚོགས་འབྱུང་བ་ཡི། །ནད་ཀྱིས་དེ་ལ་ཁྲག་འཛག་པ། །དེ་ནི་འབྲུམ་བུ་གསེག་མ་ཅན། །ལག་པ་རྐང་མཐིལ་ཚིགས་དང་ནི། །ནམ་ཚོང་ཡན་ཆད་གྲོག་མོ་ཡི། །མགོ་ལྟར་རིམ་གྱིས་རྨེན་བུ་ནི། །ཕྲ་མོ་མང་པོས་ཁྱབ་བྱེད་ལ། །ན་ཞིང་ཚ་ལ་གཡའ་ཞིང་འདྲུལ། །ཀུན་ཏུ་སྐྱེས་ཏེ་གྲོག་མོའི་མགོ །
རྐང་མཐིལ་གཤགས་མས་བྲུད་པའམ། །ཚེར་མ་སོགས་ཀྱིས་སྣད་པ་ཡི། །འབྲུམ་བུ་བུར་པ་ལྟར་མཐོ་བ། །སྐྱེས་ཏེ་མཛེར་བ་འདྲ་ཞེས་བྱ། །ཤུགས་བཀག་པ་ཡིས་རླུང་དག་ནི། །གཞང་དང་རྐང་པ་ལ་གནས་པ། །ཕྱི་དང་ནང་དུ་རྒྱུ་བྱེད་པ། །ལམ་རྒྱུ་དེ་ལས་བཤད་བ་ནི། །དཀའ་བས་འབྱུང་བར་བྱེད་པའི་ནད། །གཞང་འགགས་པ་ཞེས་བྱ་བར་འདོད། །རླུང་མཁྲིས་ཀྱིས་ནི་སེན་མོ་ཡི། །ནང་གི་ཤ་སྨིན་ནང་སྐྱེད་པ། །མ་སྣད་ནད་དང་ཚིམ་པ་དང༌། །ཉེ་བའི་སེན་མོ་ཞེས་བྱའོ། །སྣད་པས་གང་ཅིང་རྩུབ་པ་དང༌། །སྲ་བ་སེན་མོ་ངན་ཞེས་བྱ། །འདམ་ནི་གནོད་བྱེད་ལ་རེག་ལས། །ནང་ན་གཡའ་ཞིང་རྣག་བཅས་པ། །སོར་མོའི་འབྲས་འབྱེར་ཞེས་བྱའོ། །པགས་པ་ཏིལ་འདྲ་གནག་པ་ལ། །ནད་མེད་བྱུང་གྱུར་རྨེ་བ་སྟེ། །དེ་ཉིད་འབུར་བ་མཛེར་པ་ཡིན། །མཛེར་པ་ལས་ཀྱང་ཆེན་པོར་གྱུར། །དཀར་ནག་པགས་པའི་མཛེར་པ་ཡིན། །དེ་འདྲའི་འབྲུམ་བུ་སྐྱེས་བ་ནི། །དམར་པོ་རྒྱ་སྐྱེགས་ནོར་བུ་ཡིན། །དཀར་བའམ་གནག་པར་ལྷན་ཅིག་སྐྱེས། །ཟླུམ་པའམ་མཚན་མ་ཞེས་བྱའོ། །མྱ་ངན་ཁྲོ་དང་རླུང་མཁྲིས་སོགས། །འཁྲུགས་ཏེ་གདོང་ནི་སྲབ་འགྱུར་ཞིང༌། །ཐིག་ལེ་ནག་པོ་ངོ་ཤིག་ཅན། །གདོང་ལས་གཞན་འབྱུང་ཁབས་ཞེས་བྱ། །རླུང་གྱུར་ངོ་ཤིག་རྩུབ་པར་སྣང༌། །རིག་ན་རྩུབ་ཅིང་གནག་པ་ཡིན། །མཁྲིས་གྱུར་མཐའ་མ་ཅུང་ཟད་སྔོ། །བད་ཀན་ལས་གྱུར་མཐའ་དཀར་གཡའ། །ཁྲག་གྱུར་མཐའ་མ་ཟངས་མདོག་ཅན། །སྐམ་ཞིང་ཚ་བ་ཙག་ཙག་བྱེད། །རླུང་གིས་བད་ཀན་བསླངས་གྱུར་པ། །པགས་པར་ཕྱིན་ཏེ་བསྐམས་གྱུར་ནས། །དེ་ལས་པགས་པ་སྐྱ་འགྱུར་ཞིང༌། །རིམ་གྱིས་ཚོར་བ་མེད་འགྱུར་ལ། །གཡའ་བ་ཆུང་ཞིང་འདྲུལ་བ་མེད། །བེམ་པོ་དེ་ནི་ཚོར་མེད་ཡིན། །སྐྱུག་སྨན་ཉེས་དང་མ་ཞུ་དང༌། །བད་མཁྲིས་ལུས་ལ་གནས་བསླངས་པས། །རབ་གཡའ་ཟླུམ་པོ་གོར་གོར་པོ། །དམར་པོ་མང་དུ་འབྱུང་འགྱུར་ཞིང༌། །རྗེས་འབྲེལ་ལྡན་པ་ཟླུམ་པོར་བཤད། །དེ་ལྟར་ནད་ནི་ཕྲ་མོ་ཡི། །དབྱེ་བ་སུམ་ཅུ་དྲུག་ཏུ་བསྟན། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་སུམ་ཅུ་གཅིག་པའོ།། །།དེ་ནས་ནད་ཕྲ་མོའི་གསོ་བ་བཤད་པར་བྱའོ། །ར་ཡི་འགྲམ་པ་མ་སྨིན་པ། །སྲིན་
བུ་པད་པས་ཁྲག་དབྱུང་ངོ༌། །ནས་འདྲ་དུགས་ནི་བྱས་ནས་སུ། །ཐང་ཤིང་རུ་རྟ་ལྡོང་རོས་དང༌། །བ་བླའི་ལྡེ་གུ་བསྐུས་ཏེ་བཞུ། །རྡོ་ཡི་བོང་བུའང་དེ་ལྟར་གསོ། །སྨིན་པ་ར་འགྲམ་རྨ་ལྟར་གསོ། །བཞིན་གནོད་སེང་ཕྲོམ་འུ་སུ་དང༌། །ཤུ་དག་བཏགས་པའི་ལྡེ་གུའམ། །ནྱ་གྲོ་དྷ་ཡི་ལོ་མའམ། །རྒྱ་སྟར་ལོ་མ་ཚ་སྦྱར་བསྐུ། །དེས་མ་ཞི་ན་སྐྱུག་སྨན་དང༌། སྣ་སྨན་སྤྲ་བར་གཏར་ག་གདབ། །པདྨའི་ཚེ་མ་ནི་མ་པ་ཡི། །ཁུ་བའམ་ནིམ་པ་མར་བསྐོལ་བར། །སྦྲང་རྩི་དང་ནི་བཅས་པ་བླུད། །ནིམ་པ་དོང་གར་སྦྱར་བས་བྱུག །ཁ་བྱེ་སོགས་ནས་དྲ་བོང་བར། །ས་སྐོར་བཅས་པ་མཁྲིས་པ་ཡི། །མེ་དབལ་ལྟ་བུར་གསོ་བར་བྱ། །མེ་སྐྱེད་པ་ནི་སྤང་བར་བྱ། །དྲ་བའི་བོང་བུ་སྨྱུང་བ་དང༌། །གཏར་ག་གདབ་དང་རྩུབ་ཆོས་དང༌། །ལུས་ཀྱི་སྦྱང་བ་སྐྱུ་རུ་རའི། །སྦྱོར་བའི་བསིལ་སྨན་བྱུགས་པས་གསོ། །བིད་རིལ་ཁྲག་གཏར་ཞིང༌། །བད་ཀན་རྨན་བུ་ལྟ་བུར་གསོ། །གསེག་མ་ལྟ་བུའི་འབྲུམ་ཕྲན་ལ། །ཚིལ་གྱི་རྨེན་བུ་ལྟ་བུར་གསོ། །གྲོག་མའི་མགོ་འདྲ་བུ་ག་མང༌། །ཆེར་སྐྱེད་སྐྲང་ཞིང་གནད་ལ་གནས། །རྐང་པ་ལག་པར་བྱུང་བ་སྤང༌། །ཅིག་ཤོས་ལ་ནི་ཁྲག་བྱུང་ལ། །རྒྱམ་ཚ་དོང་ག་སླེ་ཏྲེས་དང༌། །ཅི་ཙེ་རྒྱ་སྲན་རྩ་བ་དང༌། །ད་ནད་ཏིལ་བཏགས་ནས་ཕྱེས་བསྐུ། །སྨིན་པ་ལ་ནི་ནད་ཅན་ཤ་།ཐམས་ཅད་ལེགས་པར་སྦྱང་བར་བྱ། །མཚོན་གྱིས་བཅད་ལ་དེ་རྗེས་ལ། །ཐལ་སྨན་ཡང་ན་མེ་ཡིས་བསྲེག །མཛེར་པ་འདྲ་ལ་གཙགས་བུ་ཡིས། །མ་ལུས་བཅད་ལ་སྣུམ་གྱིས་བསྲེག །གཞང་འགགས་པ་ལ་ནོར་བུ་ནི། །འགགས་པ་ལྟ་བུར་གསོ་བར་བྱ། །ཉེ་བའི་སེན་མོ་སྦྱངས་བ་ཡིས། །ཚ་བ་བསལ་ཏེ་མཚོན་གྱིས་གསོ། །སེན་མོ་ངན་ལའང་དེ་བཞིན་བྱ། །རྐང་པའི་ཆུ་སེར་དག་ལའང༌། །འབྲས་བུ་སྐྱུར་པོ་ནག་ཚུར་བཅས། །ཏིལ་དང་གི་ཝང་ནི་མ་པ་ཡི། །ལོ་མའི་ལྡེ་གུས་བསྐུ་བར་བྱ། །སྨེ་བ་མཛེར་པར་བཅས་པ་ནི། །མེ་ཤེལ་ཐལ་སྨན་དག་གིས་བསྲེག །ཡང་ན་མེ་བཙའ་གདབ་པར་བྱ། །དེ་བཞིན་བགས་མཛེར་རྒྱ་སྐྱེགས་ནོར། །མཚོན་གྱིས་བཅད་དེ་དེ་བཞིན་གསོ། །མཚན་མ་ཅན་སོགས་
གསུམ་པོ་ལ། །ཉེ་བའི་ཕྱོགས་ལ་གཏར་ག་གདབ། །འོ་མ་ཅན་ཤིང་མྱུ་གུ་ཤུན། །འོ་མར་བཏགས་པས་བསྐུ་བར་བྱ། །ངོ་ཤིག་ཨརྫུ་ནའི་ཤུན་པའམ། །བཙོད་དང་སྦྲང་རྩི་སྦྱར་བ་ཡི། །ལྡེ་གུའམ་རྟ་དཀར་རྨིག་པ་ནི། །བསྲེགས་པའི་སྣག་ཚ་མར་སྦྱར་བསྐུ། །ཙནྡན་དམར་པོ་བཙོད་དང་ནི། །རུ་རྟ་སེང་ཕྲོམ་པྲི་ཡང་ཀུ། །སྲན་ཆུང་ནྱ་གྲོ་དྷའི་མྱུ་གུ། །ལྡེ་གུས་ངོ་ཤིག་སེལ་བྱེད་ཅིང༌། །བཞིན་མདངས་གསལ་བར་བྱེད་པ་ཡིན། །ཟིར་གཉིས་དང་ཏིལ་ནག་དང༌། །ཡུངས་ཀར་འོ་མར་བཅས་པ་ནི། །བཏགས་པའི་ལྡེ་གུས་གདོང་བསྐུས་ན། །ངོ་ཤིག་སེལ་ཞིང་ཟླ་འདྲར་བྱེད། །སྲན་ཆུང་ཕུབ་མ་མེད་བརྔོས་པ། །འོ་མ་སྦྲང་རྩི་མར་བཏགས་བསྐུ། །ཚེར་མ་རྣོ་བའི་ཤལ་མ་ལིའི། །འོ་མར་བཏགས་པས་བསྐུས་ན་ཕན། །རྒྱ་ཤུག་ཚི་གུ་བུ་རམ་བཅས། །སྦྲང་རྩི་རི་བོང་ཁྲག་སྦྱར་བསྐུ། །རུ་རྟ་ཁ་ལུང་ཁུ་བ་ཡི། །ནང་སྤངས་སྦྲང་རྩིར་བཅས་པའམ། །རྐང་མར་རྩ་བ་རའི་འོ་མ། །སྦྲང་རྩིར་བཅས་པའི་ལྡེ་གུའང་ཕན། །རྐང་མར་རྩ་བ་ལང་རུས། །སྦྲང་རྩི་མར་དང་བཅས་པས་བསྐུ། །འཛམ་བུ་ཨ་མྲའི་ལོ་མ་དང༌། །སེར་པོ་རྣམ་གཉིས་ཞོ་ག་ཆུ། །བུ་རམ་སར་པ་སྦྱར་བའམ། །ཏིན་དུ་ཀ་ཡི་ལོ་མ་ཡི། །ཁུ་བར་བཏགས་པ་ཡང་མདོག་གསལ་བྱེད། །ཨུཏྤལ་སྔོ་དང་རུ་རྟ་དང༌། །ཙནྡན་སེར་པོ་བྲི་ཡང་ཀུ། །རྒྱ་ཤུག་ཚེ་གུའི་ལྡེ་གུ་ཡིས། །གདོང་ནི་བསྐུས་ཞིང་དྲིལ་གྱུར་ན། །པདྨའི་མདོག་དང་འདྲ་བར་བྱེད། །སྨན་ནི་འདི་དག་བཏགས་པ་དང༌། །ཤིང་མངར་དང་བཅས་བསྐོལ་སྣུམ་ནི། །ནད་གཞི་ཇི་བཞིན་མ་ལུས་ལ། །བཏུང་དང་བསྐུ་བ་ལ་སོགས་བྱ། །ནས་དང་སེང་ཕྲོམ་སྲ་རྩི་པོག །སྤྲ་ཚིལ་སྦྲང་རྩི་པུ་ཅོ་ཤེལ། །མར་དང་བུ་རམ་པ་གཅིན་ནི། །གཟར་བུར་ཆགས་ཀྱི་བར་དུ་བསྐོལ། །དེ་བསྐུས་པ་ཡིས་སྨེ་བ་དང༌། །ངོ་ཤིག་མཛེར་པ་མྱུར་སེལ་བྱེད། །གདོང་ནི་པདྨ་འདྲར་བྱེད་ཅིང༌། །རྐང་པ་པདྨའི་འདབ་འདར་བྱེད། །གུར་གུམ་ཤིང་ངར་པུ་ཤེལ་ཙེ། །ཙནྡན་སེར་དང་རྒྱ་སྐྱེགས་དང༌། །ཙནྡན་དཀར་དང་ནྱ་གྲོ་དྷའི། །རྐང་པ་གཞོན་ནུ་ཤུག་པ་དང༌། །དེ་བཞིན་པདྨ་གེ་སེར་དང༌། །ཨུཏྤལ་སྔོན་པོ་བཙོད་དང་བཅས། །སྲང་རེ་ཆུ་བྲེ་བཞི་ནང་དུ། །བསྐོལ་
ཏེ་བཞི་ཆ་ལུས་བ་རུ། །རྒྱ་སྐྱེགས་བཙོད་དང་ལེ་བརྒན་རྩི། །ཤིང་མངར་གུར་གུམ་ཞོ་གཉིས་གཉིས། །ཕྱེ་མ་ཏིལ་མར་སྲང་བརྒྱད་དང༌། །དེ་ཡི་ཉིས་འགྱུར་འོ་མ་བསྐོ། །དེ་ནི་སྣ་སྨན་ཚུལ་བསྟེན་ན། །སྨེ་བ་ངོ་ཤིག་སྐྲ་དཀར་དང༌། །གཉེར་མ་གདོང་ག་དྲི་མ་སེལ། །གདོང་གི་ཤ་རྒྱས་མདོག་གསལ་བྱེད། །བཙོད་དང་སེང་ཕྲོམ་ཤ་བ་རི། །རྒྱ་སྐྱེགས་ལྡོང་རོས་དུ་པ་རི། །གུར་གུམ་རུ་རྟ་སེར་པོ་གཉིས། །གི་ཝའང་ཙནྡན་རྣམ་གཉིས་དང༌། །ནྱ་གྲོ་དྷ་ཡི་ལོ་མ་དང༌། །དངུལ་ཆུ་རྨ་ཤིང་ཙནྡན་སེར། །དྷ་དུ་ར་ཡི་ཤུན་པ་ཡི། །ས་བོན་པདྨ་གེ་སར་དང༌། །སྤྲ་ཚིལ་སྤང་ས་མ་ཤུག་པ་སོགས། །ཞག་དང་འོ་མ་རྐང་དང་མར། །འོ་མ་ཅན་ཤིང་འོ་མ་ནི། །བསྐོལ་བའི་མར་ནི་བསྐུས་གྱུར་ན། །ངོ་ཤིག་གཉེར་མ་སོགས་འཇོམས་ཤིང༌། །བཞིན་ནི་པདྨའི་མདངས་འདྲར་འགྱུར། །བྲིང་གར་ཛའི་ཁུ་བར་ནི། །འོ་མ་ཆུ་བསྐོལ་སྣ་སྨན་བསྔགས། །པགས་པ་ཚོར་མེད་ལ་རླུང་གི །གསོ་བ་དང་ནི་མེ་བཙའ་བྱ། །པགས་ནད་ཟླུམ་པོར་བད་མཁྲིས་བཤད། །མཛེ་ནད་སེལ་བ་ཐམས་ཅད་ཕན། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་སུམ་ཅུ་གཉིས་པའོ།། །།དེ་ནས་གསང་བའི་ནད་ཀྱི་དམིགས་ཤེས་པ་བཤད་པར་བྱའོ། །བུད་མེད་ཉལ་པོ་སྤངས་པ་ལས། །མདོ་ལ་བསྟེན་པར་གྱུར་པའམ། །ནད་དང་བཅས་ཤིང་དོགས་པ་ལས། །དྲི་མ་ཅན་ནམ་ཟླ་མཚན་ནམ། །སྐྱེ་གནས་གཞན་དང་མི་འདོད་དང༌། །བགྲོད་མིན་གསར་དུ་བཙས་པ་དང༌། །དགའ་བའི་མཐར་ནི་དུག་ཅན་སོགས། །ཆུས་རེག་པའམ་མ་བཀྲུས་དང༌། །བསྐྱེད་པའི་བསམ་པས་སྨན་རྣོན་པོའི། །ལྡེ་གུ་ལ་སོགས་བསྐུས་པ་དང༌། །ཁ་ཚུར་སོ་དང་སེན་མོ་དང༌། །གྲ་མ་དུག་ཅན་གྱིས་རེག་དང༌། །ཤུགས་དགག་པ་དང་ཡུན་རིང་དུ། །རེག་པ་རྩུབ་པས་བདར་བ་འམ། །ནད་གཞི་འཁྲུགས་པས་གསང་བར་ཞུགས། །སོས་འཛིན་ལྟ་བུ་ལ་སོགས་ནད། །ཉི་ཤུ་རྩ་གསུམ་འབྱུང་བར་འགྱུར། །སོས་འཛིན་ལྟ་བུ་འདིར་ལྔ་སྟེ། །ནད་གཞི་རེ་རེ་ཁྲག་ལས་གྱུར། །འདུས་པའི་ནད་ལས་གྱུར་པའོ། །དེ་ལ་རླུང་གྱུར་ཕོ་མཚན་སྐྲངས། །ནད་མང་
རྟག་ལྡང་པགས་འགས་པའོ། །མཁྲིས་པ་ལས་གྱུར་སྐྲང་རིམས་འདེབས། །ཨུ་དུམྺཱ་རའི་འབྲས་སྨིན་འདྲ། །བད་ཀན་གྱིས་མཁྲང་སྣུམ་པ་དང༌། །གཡའ་ཞིང་སྐྲངས་ལ་ལྕི་བ་ཡིན། །ཁྲག་གྱུར་འབྲུམ་བུ་ནག་པོ་འབྱུང༌། །ཁྲག་འཛག་རིམས་ཀྱིས་འདེབས་པར་བྱེད། །འདུས་གྱུར་མཚན་ཉིད་ཀུན་དང་ལྡན། །རླིག་འབྲས་གཉིས་ཀྱང་སྐྲང་བར་བྱེད། །མི་བཟད་ན་ཞིང་ལྷུང་པ་དང༌། །གས་ཤིང་སྲིན་བུ་སྐྱེ་བ་ཡིན། །དེ་ལས་ཁྲག་གྱུར་འཚོ་བ་ཙམ། །འདུས་པ་ལས་གྱུར་འཆི་བར་བྱེད། །ནད་འཁྲུགས་པ་ལས་ཕོ་མཚན་གནས། །ཤ་ཁྲག་ལས་ནི་ཕོ་མཚན་གྱི། །ཕྱིའམ་ཡང་ན་ནང་དུ་ནི། །མཛེར་པ་གཡའ་བར་བྱེད་པ་འབྱུང༌། ཁྲག་ནི་སྤྱི་བག་འཛག་པར་བྱེད། །མོ་མཚན་དེ་འདྲ་གདུགས་ལྟར་འདུག །དེ་ནི་འབྲུམ་ནད་མ་གསོས་ན། །ཕོ་མོའི་ཁུ་ཁྲག་ཉམས་བྱེད་གསོད། །ཕོ་མཚན་གྱི་ནི་ཕྱིའམ་ནང༌། །བད་ཀན་ཁྲག་གྱུར་འབྲུམ་ཕྲན་ནི། །ཚད་དང་དབྱིབས་ནི་ཡུངས་ཀར་འདྲ། །སྟུག་པོའི་ཡུངས་ཀར་ཞེས་བྱར་བཤད། །བད་ཀན་ཁྲག་གྱུར་འབྲུམ་བུ་ནི། །རིང་ཞིང་མང་པོར་གྱུར་པ་ལ། །དབུས་ནས་གས་པ་གང་ཡིན་པ། །དེ་ནི་ངེས་པར་འཇོམས་ཤེས་བྱ། །ན་ཞིང་བ་སྦུ་བརྩེ་བར་བྱེད། །ཁྲག་མཁྲིས་ལས་ནི་འཛམ་བུ་ཡི། །རུས་པ་ལྟར་འདུག་ཁོང་སྟོང་ཅན། །འབྲས་བྱེར་གཅིན་སྙི་འདྲར་ཤེས་བྱ། །ཁྲག་མཁྲིས་ལས་གྱུར་འབྲུམ་ཕྲན་ནི། །མ་ཤ་མངྒ་འདྲ་མཆོག་ཡིན། །པདྨའི་སྟེང་དུ་གེ་སར་བཞིན། །འབྲུམ་བུ་འབྲུམ་ཕྲན་གྱིས་ཁྱབ་པ། །དེ་ནི་པདྨ་ཅན་ཞེས་བྱ། །ལག་པ་གཉིས་ཀྱིས་རབ་མཉེས་པ། །དེ་ནི་མཉེས་པའི་འབྲུམ་བུར་གྱུར། །མཚན་ནི་མཉེས་པར་གྱུར་པ་ལས། །རླུང་འཁྲུགས་གྱུར་པ་མཉེས་པ་ཡིན། །མི་མཉམ་སྲ་ཞིང་ཡོན་པོར་ནི། །རླུང་འཁྲུགས་གྱུར་པ་གཏུན་ཤིང་ཡིན། །རླུང་གིས་མཉེས་པ་ལ་སོགས་པའི། །ནད་འཁྲུགས་མཚན་གྱི་པགས་པ་ནི། །ལྡོག་ཅིང་ཚ་ལ་ནད་བཅས་ཤིང༌། །ལ་ལར་ཤུ་བདག་ཏུ་འགྱུར། །འདུས་ཤིང་མདུད་པ་ཆགས་པ་ནི། །དེ་ཡི་ནོར་བུ་ཐུར་དུ་འཕྱང༌། །པགས་པ་ལྡོག་པའི་ནད་ཅེས་བྱ། །བད་ཀན་བཅས་ལས་གཡའ་ཞིང་སྲ། །རྨ་འཚོ་བ་དཀའ་ཞིང་པགས་པ་གས། །གས་པའི་ནད་
ཅེས་བྱ་བར་བཤད། །རླུང་གིས་པགས་པ་གནོད་འགྱུར་ཞིང༌། །ནོར་བུ་འབྱར་ཞིང་གཅིན་འགག་འགྱུར། །དེ་ལས་རྒྱུན་ཕྲ་ནད་མེད་འབྱུང༌། །ནོར་བུའི་ཁ་ནི་འགགས་གྱུར་པས། །དེ་ནི་ནོར་བུའི་ནད་ཅེས་བྱ། །བད་ཀན་ལས་གྱུར་མཚན་གྱི་ནད། །གྲ་མས་གང་སྙམ་མདུད་པའི་ནད། །གྲ་མས་གནོད་པའི་ཁྲག་གི་ནད། །ཚོར་བ་ཉམས་པ་དེ་མིང་ཅན། །རླུང་དང་ཁྲག་མཁྲིས་ལས་གྱུར་པ། །བུ་གའི་རྩེ་མོ་ཕྲ་བ་ཡིས། །མཚན་གྱི་ནང་ནི་ཀུན་ཏུ་ཁྱབ། །དེ་ནི་ཁ་བརྒྱ་བ་ཞེས་བྱ། ཁྲག་མཁྲིས་ལས་གྱུར་པགས་པ་རྣམས། །ཚ་ཞིང་རིམས་བཅས་པགས་པ་སྨིན། །འདུས་པ་ལས་གྱུར་ཤ་རྣམས་ནི། །ཐམས་ཅད་ངན་པས་སྨིན་པ་ཡིན། །འབྲུམ་བུ་གང་ཅིང་དམར་བ་ཡི། །འབྲུམ་བུ་དག་གིས་གནོད་འགྱུར་ཤིང༌། །ཕོ་མཚན་ཤིན་ཏུ་ན་བ་གང༌། །དེ་ནི་ཁྲག་གི་འབྲུམ་བུ་ཡིན། །ཤ་ཡི་མཛེར་པ་སྔར་བཤད་དོ། །ཁོང་འབྲས་ནད་གཞི་གསུམ་ལས་སྐྱེས། །འདུས་པས་མཚན་ནི་རྣགས་གྱུར་ཅིང༌། །ཤ་ནི་ནག་པོར་གྱུར་པ་དང༌། །ཀུན་ནས་ཞིག་པར་བྱེད་པ་གང༌། །དེ་ནི་ཏིལ་ནག་ཅེས་བརྗོད་བཤད། །ཤ་ལས་གྱུར་པའི་འབྲུམ་བུ་རྣགས། །ཁོང་འབྲས་ཏིལ་ནག་ཅེས་བྱ་བ། །བཞི་པོ་འདི་དག་སྤང་བར་བྱ། །ལྷག་མ་རྣམས་ནི་མྱུར་དུ་གསོ། །ཁ་ཟས་གནོད་པ་ཟོས་པ་དང༌། །མལ་སྟན་མི་བདེར་ཉལ་བ་དང༌། །ཉལ་པོ་བསྟེན་ནི་དྲགས་པ་དང༌། །ནང་ན་ནད་ཁྲག་སྨན་གནོད་དང༌། །ས་བོན་ཉེས་པ་རྣམ་སྨིན་ལས། །མངལ་གྱི་ནད་ནི་ཉི་ཤུར་འགྱུར། །རླུང་གིས་མངལ་ལ་གནོད་གྱུར་པས། །ན་ཟུག་ཡངས་ཤིང་ཚོར་བ་མེད། །གྲོག་མས་ཁྱབ་བ་སྙམ་དུ་སེམས། །སྲ་ཞིང་རྩུབ་པ་སྒྲ་དང་བཅས། །ཟླ་མཚན་ཟླ་ཞིང་ཝུ་བ་ཅན། །ཉུང་ཞིང་གང་པ་འཛག་པར་བྱེད། །ཆུ་སོ་རྩིབ་ལོགས་སྟོན་པ་དང༌། །ན་ཞིང་རིམ་གྱིས་སྐྲན་བསྐྱེད་ལ། །རང་རང་ཉེས་པ་དེ་དང་དེ། །དེ་ནི་རླུང་ཅན་ཡིན་ཞེས་བཤད། །དེ་ཉིད་ཤས་ཆེར་སྤྱད་ན་སྐྲང༌། །བཅས་པ་ཉལ་པོ་དྲགས་ཞེས་བྱ། །ཤིན་ཏུ་གཞོན་ལ་འཁྲིག་པ་སྤྱད། །རྒྱབ་དང་ཆུ་སོ་སྦྱིན་པར་ནི། །ན་ཞིང་མངལ་ལ་གནོད་བྱེད་པ། །དེ་ནི་སྤྱང་སྔས་པ་ཞེས་བྱ། །
ཤུགས་འཁྱིལ་བ་ཡི་མངལ་དུ་ནི། །རླུང་གིས་གནོད་པར་གྱུར་པ་ལས། །ཟླ་མཚན་ལྦུ་བ་ཅན་འབྱུང་བ། །འཁྱིལ་བ་ལྟ་བུར་སྣང་གྱུར་པ། །ནད་འདི་འཁྱིལ་པ་ཅན་ཞེས་བྱ། །གང་ཚེ་རླུང་ནི་རྩུབ་པོས་བུ། །སྐྱེ་ཞིང་སྐྱེ་ཞིང་གསོད་བྱེད་པ། །སྐྱེས་ནས་གསོད་པ་ཞེས་བྱར་བཤད། །འགྲངས་དྲགས་མི་མཉམ་གནས་པར་ནི། །འདོད་པ་སྤྱད་པས་རླུང་འཁྲུགས་ཤིང༌། །གཞན་གྱིས་གནོད་པར་གྱུར་པ་ལས། །མཚན་གྱི་བུ་ག་ཤ་རུས་ལ། །གནོད་གྱུར་མངལ་ནི་ཡོན་པར་འགྱུར། །ན་གྱུར་ནང་དུ་ཁ་བལྟས་ཡིན། །ཁ་ཟས་རླུང་ཅན་བསྟེན་པ་ཡིས། །ཟླ་མཚན་རླུང་གིས་གནོད་གྱུར་ཞིང༌། །བུད་མེད་མོ་མཚན་ཞུམ་གྱུར་པར། །བྱེད་པ་དེ་ནི་ཁམས་མིག་ཡིན། །དུས་སུ་ཤུགས་བཀག་རླུང་འཕེལ་བས། །བཤང་དང་གཅི་བ་འགག་བྱེད་ཅིང༌། །མོ་མཚན་སྐམ་པར་བྱེད་པ་དང༌། །ཤས་ཆེར་ན་བ་མངལ་སྐམས་ཡིན། །ཞག་དྲུག་གམ་ནི་ཞག་བདུན་ནས། །རླུང་གིས་མངལ་གནས་ཁུ་བ་འབྱིན། །ནད་བཅས་པའམ་ནད་མེད་པ། །དེ་ནི་ཁུ་བ་སློན་ཞེས་བྱ། །བུད་མེད་མངལ་དང་ས་བོན་གྱི། །ཉེས་པ་རླུང་གིས་གནོད་གྱུར་ཞིང༌། །འཁྲིག་པར་མི་དགའ་ནུ་མ་མེད། །མ་ནིང་ཡིན་ཏེ་གསོར་མི་རུང༌། །མངལ་གྱི་ནང་དུ་རླུང་གིས་ནི། །གནོད་གྱུར་མོ་མཚན་ཁོང་ཁར་གནས། །བྱེ་བའམ་ལྷོད་པར་གྱུར་པ་དང༌། །རླུང་ཅན་བཞིན་དུ་ན་གྱུར་པ། །ཤ་ནི་མཐོ་བར་གྱུར་པ་སྟེ། །མོ་མཚན་ཆེ་ནད་ཚབས་ཆེ་བྱ། །མཁྲིས་པ་མངལ་ན་གནས་པ་ཡི། །ནང་གི་ནད་གཞིས་གནོད་གྱུར་པ། །ཚ་བའམ་རྣག་པར་བྱེད་འགྱུར་ཞིང༌། །དྲི་མ་ནམ་རིམས་ཀྱིས་འདེབས་པ་དང༌། །ཤིན་ཏུ་ཚ་ཞིང་རོ་ལྟར་མནམ། །ཟླ་མཚན་སྔོ་ནག་སེར་པོ་འཛག །ནད་དེ་མཁྲིས་པ་ཅན་ཞེས་བྱ། །ཟླ་མཚན་ཆེར་འཛག་ཁྲག་ཅན་ཡིན། །བད་ཀན་སྐྱེད་པར་བྱེད་པ་ཡིས། །མོ་མཚན་གནོད་གྱུར་ན་བ་མེད། །གྲང་ཞིང་དཀར་ལ་གཡའ་བ་དང༌། །སྦྱིན་བག་ཏུ་ནི་འཛག་པར་བྱེད། །ནད་དེ་བད་ཀན་ལས་གྱུར་ཡིན། །རླུང་མཁྲིས་འཁྲུགས་པས་ཟླ་མཚན་ཟད། །ཚ་ཞིང་ལུས་སྐེམས་མདོག་མི་སྡུག །དེ་ནི་ཁྲག་ཟད་པ་ཞེས་བྱ། །མཁྲིས་པ་ཤས་ཆེ་ཉལ་པོ་བསྟེན། །སྦྲིད་པ་སྦྲིགས་པ་བཀག་པ་
ལས། །མཁྲིས་པར་བཅས་པའི་རླུང་གིས་ནི། །མངལ་དུ་གནོད་པ་སྐྱེད་པར་འགྱུར། །སྐྲང་ཞིང་ཉམ་ཐག་རེག་མི་བཟོད། །ཟླ་མཚན་སྡོ་དང་སེར་པོར་འབྱུང༌། །ཕོ་བའི་ལྟོ་ནི་ལྕི་བ་དང༌། །འཁྲུ་ཞིང་ཡིག་འཆུས་པར་བྱེད། །ཆུ་སོ་བརླ་ནི་ན་ཞིང་ཟུག །རིམས་སྐྱེད་ཡོངས་རྒྱས་ནད་ཅེས་བྱ། །རླུང་དང་བད་ཀན་ནད་ཀྱིས་ཁྱབ། །མངལ་ནས་སྐྱ་ཞིང་སྤྱི་བག་འཛག །ཉེ་བར་འཛག་པ་ཞེས་བྱའོ། །སྲིན་བུ་སྐྱེས་ཤིང་གཡའ་བས་འདོད་པ་ལས། །རབ་གདུངས་དེ་ནི་རྣམ་པར་གཡེང་ཞེས་བྱ། །དུས་མིན་སྤྱོད་པར་གྱུར་པས་རླུང༌། །བད་ཀན་ཁྲག་དང་འདྲེས་གྱུར་ཏེ། །ཟླ་མཚན་ལམ་ནི་འགག་བྱེད་དེ། །མངལ་དུ་ལྟེ་བ་སྐྱེད་པར་བྱེད། །དེ་ནི་པདྨའི་སྙིང་པོ་ཡིན། །ནད་གཞི་གསུམ་ནི་མོ་མཚན་གྱི། །མངལ་ནས་རང་རང་གནོད་པ་སྐྱེད། །འདུས་པ་ལས་གྱུར་ཉེས་པ་ཡིན། །དེ་ལྟར་བུད་མེད་མངལ་ནད་ཀྱིས། །ཁུ་བ་འཛིན་པར་མི་བྱེད་དེ། །དེས་ན་མངལ་དུ་བུ་མི་ཆགས། །མི་བཟང་ནད་ཀྱང་སྐྱེ་འགྱུར་ཞིང༌། །ཁྲག་འབྱུང་གཞང་འབྲུམ་སྐྲན་ལ་སོགས། །རླུང་སོགས་ནད་ནི་ཀུན་སྐྱེད་བྱེད། །ཡན་ལག་བརྒྱད་པའི་སྙིང་པོ་བསྡུས་པ་ལས། །ཕྱི་མའི་གནས་ཀྱི་ལེའུ་སུམ་ཅུ་གསུམ་པའོ།། །།དེ་ནས་གསང་བའི་གནས་ཀྱི་ནད་གསོ་བའི་ལེའུ་བཤད་པར་བྱའོ། །སོས་འཛིན་འདྲ་བ་གསར་བྱུང་ལ། །ཕོ་མཚན་དབུས་ན་གཏར་ག་གདབ། །བསིལ་བའི་གསོ་བས་སྦྱང་བར་བྱ། །ཁྱད་པར་དུ་ནི་བཀྲུ་སྨན་གཏང༌། །སྨིན་ན་ཏིལ་གྱི་ལྡེ་གུ་ནི། །སྦྲང་རྩི་མར་དང་བཅས་པ་བསྐུ། །འཛམ་བུ་ཨ་མྲ་ཀླུ་ཤིང་དང༌། །ནིམ་པ་ཀམ་པོ་ཛའི་མྱུ་གུ། །རྒྱ་ཤུག་བིལ་བ་ས་ལི་ཀ །རྒྱ་སྐྱེགས་ཏིལ་ནི་ཤ་ཡི་ཤུན། །འོ་མ་ཅན་གྱི་ཤིང་གི་ཤུན། །འབྲས་བུ་གསུམ་ནི་ཆུར་བསྐོལ་བའི། །ཁུ་བ་དེས་ནི་བཀྲུ་བ་དང༌། །དེ་བསྐོལ་ཏིལ་མར་གྱིས་རྨ་འཚོ་བ། །སྤངས་མ་སེང་ཕྲོམ་བཙག་ཡུག་སྣམ། །སུག་སྨེལ་ལྡོང་རོས་བ་བླ་དང༌། །ནག་ཚུར་རྒྱ་སྐྱེགས་སྐྱེར་ཁཎྜ། །རྒྱམ་ཚ་ཧ་རེ་ཎུ་ཀ་ཡི། །ཕྱེ་མ་སྦྲང་རྩི་སྦྱར་བས་བསྐུ། །སོས་འཛིན་ལྟ་བུའི་རྨ་འཚོ་བ་བྱེད། །ཁམ་ཕོར་སྦྱར་བར་འབྲས་བུ་གསུམ། །བསྲེགས་པ་མར་བཅས་རྨ་འཚོ་བ་བྱེད། །འདི་ནི་སྤྱི་
ཡི་གསོ་བ་ཡིན། །རེ་རེ་སྐྲང་པ་ལྟ་བུར་གསོ། །སྨན་པས་ཅི་ནས་རྣགས་པར་ནི། །མི་འགྱུར་དེ་ལྟར་འབད་པར་བྱ། །རྣགས་ན་རྒྱུས་པ་རྩ་དང་ཤ །ཞིག་པས་ཕོ་མཚན་མ་རུངས་འགྱུར། །འབྲུམ་པ་བཅད་དང་བསྲེགས་པ་ཡི། །གསོ་བ་སོ་ས་འཛིན་ལྟ་བུར་བྱ། །བྲུད་ནས་ཡུངས་ཀར་ཕྱེ་ཞིབ་དང༌། །བསྐོལ་སྨན་ཕྱེ་མས་གདབ་པར་བྱ། །ཏིལ་མར་དེ་ཉིད་ཀྱིས་བསྐུ་ཞིང༌། །རྨ་འཚོ་བ་པ་ཡི་གསོ་བ་བྱ། །མཉེ་གསོ་བ་ནི་འདི་ཉིད་བྱ། །དེ་དག་གཉི་གར་གཏར་ག་གདབ། །ཁོང་སྟོང་ལ་ནི་གཏར་ག་བྱ། །རྣགས་ལ་རྨ་ནི་དག་པར་བྱ། །ཏི་ན་དུ་ཀ་དང་འབྲས་བུ་གསུམ། །སེང་ཕྲོམ་ལྡེ་གུ་ཏིལ་མར་བསྐུ། །འབྲས་བྱེར་ལ་ནི་གཏར་ག་གདབ། །གསོ་བའི་རིམ་པ་འདི་ཉིད་བྱ། །མཆོག་ཅེས་བྱ་བའི་འབྲུམ་བུ་ནི། །བརྟོལ་ཏེ་ལྕགས་ཀྱུས་བླངས་ཏེ་བཅད། །ལྡེ་གུ་ཕྱེ་མ་སྨན་ཁུ་ནི། །སྦྲང་རྩིར་བཅས་པས་གསོ་བར་བྱ། །མཉེ་དང་པདྨ་ཅན་ལ་ནི། །མཁྲིས་པའི་མེ་དཔལ་གསོ་བར་བྱ། །པགས་སྨིན་ཚོར་བ་མེད་པ་ལའང༌། །ཕོ་མོའི་གསོ་བ་འདི་ཉིད་བྱ། །མཉེ་ལ་དུགས་ནི་བྱ་བ་དང༌། །བ་ལའི་སྨན་མར་དྲོ་འཇམ་བླུགས། །མངར་བའི་སྨན་སྦྱར་དཀྲི་དུགས་བྱ། །གཏུན་ཤིང་འདྲ་ལ་གཏར་ག་གདབ། །བད་ཀན་རྨེན་བུ་ལྟ་བུར་གསོ། །པགས་པ་ལྡོག་ལ་མར་གྱིས་བསྐུ། །ས་ཝ་ལ་སོགས་སྣུམ་གྱུར་པས། །ཞག་གསུམ་མམ་ནི་ཞག་ལྔ་རུ། །དཀྲི་བའི་ལས་ནི་སྤྱད་པར་བྱ། །དུགས་བྱ་དེ་ཡི་འགོ་ཏུ་ནི། །སྣུམ་གྱུར་པགས་པ་དྲང་བར་བྱ། །ནོར་བུ་རིམ་གྱིས་བཙིར་ནས་ནི། །ཆུད་ནས་ཉེ་བར་དཀྲི་བར་བྱ། །ནོར་བུ་ཡང་ཡང་སྣུམ་ཆོས་བྱ། །ཁ་ཟས་སྣུམ་ཅན་སྦྱིན་པའང་ཕན། །གས་པ་ལ་ཡང་ཆོ་ག་ཡི། །རིམ་པ་ཇི་བཞིན་བྱས་པའང་ཕན། །འགགས་པ་སྦུ་གུ་ཁ་གཉིས་པ། །རྒྱ་སྐྱེགས་ཀྱིས་ནི་དཀྲིས་པ་ལ། །སྣུམ་བསྐུས་བུ་གར་བཅུག་ནས་ནི། །རླུང་འཇོམས་སྣུམ་ནི་བླུགས་པར་བྱ། །སྦུ་གུ་ཞག་ནི་གསུམ་གསུམ་ནས། །ལེགས་པར་བསྐྱེད་དེ་སྤང་བར་བྱ། །སྦུ་གུའི་སྦྱོར་བས་མ་གྲུབ་ན། །མཁས་པས་མདོམས་ཀྱི་སྲུབས་ཅན་ནི། །བོར་ཏེ་མཚོན་གྱིས་དྲལ་ནས་ཀྱང༌། །དེ་འོག་རྨ་གསར་ཆོ་ག་བྱ། །རྨེན་བུར་སྦུ་གུའི་དུགས་བྱས་ལ། །
སྣུམ་ཞིང་དྲོ་བས་དཀྲི་བར་བྱ། །ཁ་བརྒྱ་པ་ནི་བཞར་ནས་ཀྱང༌། །བསྐ་བ་སྦྲང་རྩི་སྦྱར་བས་བསྐུ། །ཁྲག་གི་འབྲུམ་བུ་ཁྲག་གི་ནི། །ཁོང་འབྲས་བཞིན་དུ་གསོ་བར་བྱ། །ཀུན་ལ་རྨ་ཡི་གསོ་བ་ནི། །གནས་སྐབས་ཇི་བཞིན་སྦྱར་བར་བྱ། །མངལ་གྱི་ནད་ལ་མང་དུ་ནི། །སྣུམ་ཆོས་དུགས་དང་མས་གཏོང་སོགས། །རླུང་འཇོམས་པ་ཡི་གསོ་བ་བསྔགས། །རླུང་ལས་གྱུར་ལ་མཆོག་ཏུ་སྦྱར། །བུད་མེད་ཀྱི་ནི་མངལ་གྱི་ནད། །རླུང་མ་གཏོགས་པར་འབྱུང་མི་འགྱུར། །དེ་བས་རླུང་ནི་བསལ་བྱས་ལ། །ནད་གཞན་གྱིས་ནི་གསོ་སྨན་བྱ། །བ་ལའི་ཏིལ་མར་བླུད་བྱ་ཞིང༌། །འདྲེན་མ་སྐྱེས་དེའི་འོ་མ་བླུད། །སྣུམ་ཆོས་དུགས་ནི་བྱས་ཏེ་མངལ། །ཉེས་པར་གནས་པ་མཉམ་དུ་གཞག །ཡོན་པོ་ལག་པས་དྲང་པོར་བསྲང༌། །ཞུམ་པ་སླར་ནི་བསྐྱེད་པར་བྱ། །བྱུང་བ་སླར་ནི་གཞུག་བྱ་ཞིང༌། །གྱེས་པ་ཡོངས་སུ་བཟློག་པར་བྱ། །མངལ་ནི་གནས་ནས་གཡོས་གྱུར་པ། །བུད་མེད་ཟུག་རྔུར་གྱུར་པར་འདོད། །བུད་མེད་ལ་ནི་སློན་སྨན་སོགས། །འཇམ་པོ་ཡོངས་སུ་སྦྱར་བར་བྱ། །རྣམ་པ་ཀུན་ཏུ་དག་གྱུར་ནས། །འཇམ་རྩི་བསྐུ་བྱུག་སྨན་ཁུ་བླུགས། །བྱུགས་དང་ཡེའུ་གཞུག་ལ་སོགས། །གསོ་བའི་ལས་ནི་ལྷག་མ་སྤྱད། །རྒུན་འབྲུམ་ཏང་བ་ལ་འབྲས་བུ་གསུམ། །ཀ་ས་མར་ད་སེར་པོ་གཉིས། །སླེ་ཏྲེས་ཉེའུ་ཤིང་ཤེཪྻ་ཀ །ཤུ་ཀ་ནས་བ་སྤྲུ་བ། །པ་རུ་ཤ་ཀ་ཞོ་གཉིས་གཉིས། །མར་ནི་བྲེ་གང་བཅས་པར་བསྐོལ། །དེ་བླུད་མངལ་གྱི་རླུང་ནད་དང༌། །བུ་སྐྱེད་བྱེད་པའི་མཆོག་ཡིན་ནོ། །ཟི་ར་ག་སྙོད་པི་པི་ལིང༌། །ཤུ་དག་རྒྱམ་ཚ་བ་ཤ་ཀ །ནས་ཚིག་འཁུས་ཐལ་ཏི་མུས། །ཙི་ཏྲ་ཀ་དང་ཁ་རར་བཅས། །བཏགས་ཏེ་ཆང་གི་དངས་མར་སྦྱར། །མར་བརྗོད་དེ་ནི་བྱིན་གྱུར་ན། །མངལ་ནད་རྩིབ་ལོགས་སྙིང་ནད་དང༌། །སྐྲངས་དང་གཞང་འབྲུམ་སེལ་ཞིང་བུ་སྐྱེད་བྱེད། །ཁྲག་གི་མངག་ཁུ་བ་ཀ་ཤའི་རྩ་བ། །ཟི་ར་ནག་པོ་གོ་སྙོད་དང༌། །སེན་རྩེ་རྒྱམ་ཚའི་འཕྱེ་མ་ནི། །ཆང་དང་སྦྱར་ཏེ་བླུད་པར་བྱ། །ར་སྣག་ཟེ་མ་བ་ཤ་ཀ །བསྐོལ་བ་གསེར་འཇོམས་མཆོག་ཡིན་ནོ། །སླེ་ཏྲེས་དན་དང་འབྲས་བུ་གསུམ། །བསྐོལ་བའི་ཁུ་བའང་
བླུགས་པར་བྱ། །རྒྱ་སྤོས་ཀཎྜ་ཀ་རི་དང༌། །རུ་རྟ་རྒྱམ་ཚ་ཐང་ཤིང་རྣམས། །བསྐོལ་བའི་ཁུ་བ་ཏིལ་མར་བསྐོལ། །སྤངས་པའི་ཡེའུས་མངལ་ནད་སེལ། །མངལ་ནད་མཁྲིས་པ་ལས་གྱུར་པ། །ཆུ་བླུགས་བསྐུ་བྱུག་ཡེའུ་ཡིས། །གསོ་བ་བསིལ་ཞིང་མཁྲིས་འཇོམས་པ། །སྣུམ་ཆོས་དོན་དུ་མར་གྱིས་བྱ། །ཉེའུ་ཤིང་རྩ་བ་སྲང་བཞི་བརྒྱ། །བརྡུངས་ཏེ་བཙིར་བའི་ཁུ་བ་དང༌། །འོ་མ་དེ་མཉམ་མར་བྲེ་ནི། །བཞི་ཡི་ནང་དུ་བསྐོལ་བར་བྱ། །འཚོ་བྱེད་སྡེ་ཚན་ཉེའུ་ཤིང་དང༌། །པ་རུ་ཤ་ཀ་རྒུན་འབྲུམ་དང༌། །པི་ལ་ཡ་དང་བ་ལ་གཉིས། །ཤིང་མངར་ཞོ་ནི་གཉིས་གཉིས་ཕྱེ། །བསྐོལ་ཏེ་བསྒྲངས་པར་སྦྲང་རྩི་དང༌། །པི་པི་ལིང་ནི་སྲང་བརྒྱད་བརྒྱད། །ཀ་ར་དཀར་པོ་སྲང་བཅུ་གཞུག །དེ་ལས་སྲང་ནི་ཕྱེད་ཕྱེད་སྦྱིན། །མངལ་ཁྲག་ཁུ་བའི་ནད་སེལ་ཞིང༌། །རོ་ཙ་བུ་སྐྱེད་བྱེད་མཆོག་ཡིན། །གློ་རྡོལ་ཟང་བྱེད་ཁྲག་མཁྲིས་དང༌། ལུད་པ་དབུགས་མི་བདེ་བ་དང༌། །མིག་སེར་རླུང་དང་ཁྲག་དང་ནི། མེ་དབལ་དང་ནི་སྙིང་ནད་དང༌། །བརྗེད་བྱེད་ཀྱིས་ཉེན་ང་རྒན་དང༌། །མྱོས་བྱེད་སྐེམ་བྱེད་འཇོམས་པར་བྱེད། །དེ་བཞིན་འོ་མ་ཞུན་མར་དང༌། །འཚོ་བྱེད་སྡེ་ཚན་བསྐོལ་བ་ནི། །བུ་སྐྱེད་མཁྲིས་པ་ལས་གྱུར་པའི། །མངལ་ནད་སེལ་བའི་དམ་པ་ཡིན། །བ་ལ་བྲེ་ནི་སུམ་ཅུ་གཉིས། །བསྐོལ་བའི་ཏིལ་མར་མར་བྲེ་བཞི། །འོ་མ་བཞི་འགྱུར་པི་པི་ལིང༌། །ཀ་ཀ་མ་སི་ཀ་ར་དཀར། །ཛི་བན་ཏི་དང་ར་མཉེ་བ། །སྠི་ར་ཉེ་ཤིང་ཟི་ར་གཉིས། །མོན་སྲན་གྲེའུ་པ་ཡ་སྱ། །མ་ཤ་པརྞི་སྲ་བ་ནི། །པི་ལུའི་ལོ་མ་ལྷན་ཅིག་བསྐོལ། །བླུད་ན་རླུང་མཁྲིས་པ་ལས་གྱུར་པའི། །མངལ་ནད་སེལ་ཞིང་བུ་སྐྱེད་བྱེད། །ཁྲག་གི་མངལ་ནད་ཁྲག་མདོག་ལས། །རྗེས་སུ་འབྲེལ་བ་བརྟགས་ནས་ཀྱང༌། །ནད་གཞི་བསགས་པའི་ཚུལ་ལས་ནི། །ཁྲག་བཅད་པ་ཡི་སྨན་གཏང་བྱ། །ཤིང་མངར་སྦྲང་རྩི་ཆུ་ཤིང་རྩ། །ཏ་ལའི་ས་བོན་སྐྱེར་པའི་རྩ། །པྲི་ཡང་ཀུ་དང་འབྲས་དྲུས་ཆུ། །སྦྱར་བ་བླུད་ན་ཁྲག་འཛག་པ། །མདོག་སྐྱ་དམར་པོ་སེལ་བར་བྱེད། །པ་ཐ་འཛམ་བུ་ཨ་མྲ་ཡི། །ཚི་གུ་དང་ནི་བྲག་ཞུན་དང༌། སྐྱེར་བའི་ཁཎྜ་ཨཾ་བཥྚ། །བཙོད་དང་ཤལ་མ་ལིའི་ཐང་ཆུ། །དུག་མོ་ཉུང་གི་ཤུན་
ལྤགས་དང༌། །གུར་གུམ་བིལ་བ་བོང་ང་དཀར། །སེང་ཕྲོམ་གླ་སྒང་བཙག་ཡུག་སྣམ། །ཤིང་མངར་ཙནྡན་དམར་པོ་དང༌། །ཀད་པ་ལ་དང་ཙ་མ་ཀ །ཀ་ཊང་ཀ་དང་དུག་མོ་ཉུང༌། །བྱི་ཚེར་བ་དང་ད་ཏ་ཀི། །མ་དུ་ཀ་དང་སྟང་ཟིལ་ནི། །སྐར་མ་རྒྱལ་ལ་བབ་པ་ན། །བཏུས་ཤིང་བཏགས་ཏེ་སྦྲང་རྩི་དང༌། །འབྲས་ཀྱི་ཆུར་སྦྱར་བླུད་ན་ནི། །གཞང་འབྲུམ་ཚད་པར་འཁྲུ་བ་དང༌། །གང་ཡང་ཁྲག་ཏུ་འཁྲུ་བ་དང༌། །གང་ཡང་སྲིན་བུའི་ནད་རྣམས་དང༌། །བྱིས་པའི་ནད་གང་ཡིན་པ་འཇོམས། །མངལ་གྱི་ནད་དང་ཟླ་མཚན་ནད། །གནག་ཅིང་དཀར་དང་དམར་བ་སེལ། །ཕྱེ་མ་རྒྱལ་གྱི་རྗེས་འགྲོ་བ། །ཕན་ཞེས་རྒྱུན་ཤེས་བུ་ཡིས་བཤད། །བད་ཀན་ལས་གྱུར་མངལ་ནད་ལ། །རྩུབ་དང་དྲོ་བའི་སྨན་ཀུན་སྦྱར། །སྐྱུ་རུའི་ལོ་མ་ད་ཏ་ཀི །ཤིང་མངར་ཨུཏྤལ་ལིག་བུ་མིག །འཛམ་བུ་ཨ་མྲའི་ཚི་གུ་དང༌། །སེང་ཕྲོམ་ས་ནག་ཀང་པ་ལ། །སེའུ་འབྲུ་ཤིང་ཚ་ཏིན་དུ་ཀ །ཨུ་དུ་མ་བཱ་ར་བིལ་བ་གཞོན། །ཞོ་ནི་གཉིས་གཉིས་བཏགས་པའི་ཕྱེ། །ར་གཅིན་འོ་མ་ཉིས་འགྱུར་དང༌། །ཏིལ་མར་བྲེ་གང་བསྐོལ་བར་བྱ། །དེ་བསྐུ་བ་དང་འཇམ་རྩི་དང༌། །རས་བལ་ཡེའུས་གཞུག་པར་བྱ། །སྐུང་ཞིང་ཕྱིར་ལོག་མཐོ་ཞིང་སྲ། །དེ་བཞིན་སྤྱི་བག་འཛག་པ་དང༌། །ཕྱིར་འབུར་ནང་དུ་ཞུམ་པ་དང༌། །འབྲུམ་བུ་གཟེར་དང་བཅས་ལ་ཕན། །ནས་ཟན་ཨ་རུ་སྦྱར་ཆང་དང༌། །བུ་ར་མ་ཆང་དང་ཏིལ་མར་བསྟེན། །པི་པི་ལིང་དང་ལྕགས་ཕྱེ་དང༌། །ཨ་རུར་སྦྱོར་སྦྲང་རྩི་ཕན། །ནག་ཚུར་རྒྱམ་ཚ་འབྲས་བུ་གསུམ། །ཨ་མྲ་འཛམ་བུའི་ཚི་གུ་བཅས། །ད་ཏ་ཀའི་ཕྱེ་སྦྲང་རྩིར་སྦྱར། །སྤྱི་བག་འཛག་པ་དག་པར་བྱེད། །རྒྱ་སྐྱེགས་འཛམ་བུ་ད་ཏ་ཀི །སོ་མར་ཛ་ལ་མང་གི །སྲི་རྩ་བོག་གི་ཕྱེ་མ་ཡིས། །དྲི་མི་ཞིམ་དང་སྤྱི་བག་འཛག །རྣགས་ཤིང་སྲ་བ་སེལ་བར་བྱེད། །དོང་ག་ལ་སོགས་སྡེ་ཚན་ནི། །བསྐོལ་བའི་ཁུ་བ་བླུགས་པར་བྱ། །སྲ་ཞིང་རྩུབ་པར་གྱུར་པ་ལ། །མཉེན་པའི་ཆོ་ག་བྱ་བ་དང༌། །ཤ་བརྡུངས་པ་ཡིས་གླན་པ་དང༌། །ཀྲི་ས་ར་དང་འོ་ཐུག་གཞུང༌། །དྲི་ངར་ཏིལ་མར་དྲི་ཞིམ་པའམ། །ལྡེ་གུ་དྲི་ཞིམ་བསྐུ་བའམ། །དྲི་བཟངས་ཀུན་གྱི་ཕྱེ་མའམ། །རུལ་བའི་དྲི་ནི་སེལ་བྱེད་
གཞུག །བད་ཀན་ཅན་ལ་ཕལ་ཆེར་སྨན། །ཚ་བ་བ་གཅིན་མས་གཏོང་ཕན། །མཁྲིས་པ་ཤིང་མངར་འོ་མར་བཅས། །རླུང་གྱུར་སྐྱུར་བཅས་ཏིལ་མར་ཕན། །འདུས་པ་ལས་གྱུར་ནད་ལ་ནི། །ཐུན་མོང་གིས་ནི་གསོ་བ་ཕན། །དེ་ལྟར་མངལ་ནི་དག་གྱུར་ན། །ས་བོན་སྐྱོན་མེད་ཐ་མལ་བར། །རྣམ་པར་ཤེས་པ་འཇུག་པས་ན། །བུད་མེད་ལ་ནི་བུ་ཆགས་འགྱུར། །སྐྱེས་པ་ཡི་ནི་དབང་པོ་ཡང༌། །ལས་རྣམ་ལྔ་ཡིས་དག་བྱ་ཞིང༌། །མདོག་ལས་ནད་གཞི་བརྟགས་ནས་ནི། །ནད་བཅས་དེ་འཇོམས་སྨན་གྱིས་གསོ། །རུརྟ་རྒྱ་སྤོས་ཤུ་དག་བཅོད། །འབྲས་བུ་གསུམ་དང་ཀར་དཀར། །ཤིང་མངར་མེ་ད་སེར་པོ་གཉིས། །ལ་ལ་ཕུད་དང་པུ་ཙེ་ཤེལ་།ཤིང་མངར་རམ་ཉེ་པ་ཡ་སྱ། །ཨ་ཤྭ་གནྡྷ་ཉེའུ་ཤིང་པ། །ཞོ་ནི་གཉིས་གཉིས་བཏགས་པའི་ཕྱེ། །མར་བྲེ་གང་དང་འོ་མ་ནི། །བཞི་འགྱུར་བཅས་པ་བསྐོལ་བར་བྱ། །བླུད་ན་མངལ་དང་ཁུ་བ་ཡི། །ཉེས་པ་ཐམས་ཅད་སེལ་བྱེད་ཅིང༌། །ཚེ་རིང་ལུས་ནི་རྒྱས་བྱེད་ལ། །ཡིད་གཞུངས་པ་དང་བཀྲ་ཤིས་དང༌། །བུ་སྐྱེད་པར་ནི་བྱེད་མཆོག་ཡིན། །འབྲས་བུའི་སྨན་མར་ཞེས་བྱར་བཤད། །ཟླ་མཚན་རྒྱུ་ཚེ་འཐུངས་གྱུར་ན། །བུ་ནི་འཆི་བར་བྱེད་པ་ཡང༌། །འཚོ་ཞིང་སྦྲུམ་མ་རྣམས་ལ་བསྔགས། །འདི་ནི་མཆོག་ཏུ་བྱིས་པ་ཡི། །ལུས་རྒྱས་གདོན་འཇོམས་བྱེད་པ་ཡིན། །ཡན་ལག་བརྒྱད་པའི་སྙིང་པོ་བསྡུས་པ་ལས། །ཕྱི་མའི་གནས་ཀྱི་ལེའུ་སུམ་ཅུ་རྩ་བཞི་པའོ།། །།ཡན་ལག་བརྒྱད་པའི་སྙིང་པོ་བསྡུས་པ་ལས། །མཚོན་སྤྱད་ཀྱིས་གསོ་བའི་ཡན་ལག་རྫོགས་སོ།། །།དེ་ནས་དུག་ནད་གསོ་བ་བཤད་པར་བྱའོ། །སྔོན་ནི་ལྷ་དང་ལྷ་མ་ཡིན། །བདུད་རྩི་འདོད་པས་བསྲུབས་པ་ན། །བདུད་རྩི་འབྱུང་བའི་སྔོན་རོལ་དུ། །སྐྱེས་བུ་ཤིན་ཏུ་འཇིགས་པའི་གཟུགས། །མཆེ་བ་བཞི་བ་གཟི་བརྗིད་འབར། །སྐྲ་སེར་མིག་ནི་མེ་འབར་བ། །དེ་མཐོང་འགྲོ་བ་སྡུག་བསྔལ་གྱུར། །དེས་ན་འདི་ནི་དུག་ཅེས་བྱ། །ཚངས་པས་ཧཱུཾ་ཞེས་བརྗོད་པ་དང༌། །བསླུ་བའི་བདག་ཉིད་ཅན་སྤངས་ཏེ། །གཟུགས་དེ་རྒྱུ་དང་མི་རྒྱུ་བའི། །གཟུགས་ལ་དེན་ཞུགས་པར་གྱུར། །བརྟན་དུག་ནུས་པ་མི་བཟད་པར། །སྡོང་བུ་ལ་ནི་གནས་པ་གང༌། །ཀ་ལ་ཀུ་ཏ་དབང་པོའི་བུ། །བཙན་དུག་ཧ་ལ་ཧ་
ལ་སོགས། །རྒྱུ་བའི་དུག་ནི་མི་བཟད་གྱུར། །སྤྲུལ་དང་ཕག་དང་མཆེ་བ་ཅན། །རྒྱུ་བ་དང་ནི་མི་རྒྱུ་བའི། །བཅོས་མ་མ་ཡིན་དུག་ཏུ་བཤད། །བཅོས་མ་སྣ་ཚོགས་སྨན་ལ་ནི། །སྦྱར་བ་སྦྱར་བའི་དུག་ཅེས་བྱ། །དེ་ནི་སྦྱོར་བའི་དབང་ལས་ནི། །ཤིན་ཏུ་རིང་ནས་གསོད་པའམ། །སྐྲང་དང་སྐྱ་རྦབ་དམུ་རྫིང་དང༌། །སྨྱོ་བྱེད་གཞང་འབྲུམ་ལ་སོགས་བསྐྱེད། །རྣོ་དྲོ་རྩུབ་ཅིང་དང་བ་དང༌། །ཁྱབ་ཅིང་མྱུར་གསོད་ཡང་བ་དང༌། །འདར་ཞིང་བྲ་ལ་རོ་མི་གསལ། །འཇུ་བར་མི་བྱེད་པ་ཡིན་ནོ། །རྣོ་སོགས་ཡོན་ཏན་དང་ལྡན་པས། །དེ་ནི་མདངས་ལས་གོ་བཟློག་ཡིན། །མི་ནི་རླུང་མཁྲིས་ཤས་ཆེ་བ། །སྲོག་ནི་འཕྲལ་དུ་འཕྲོག་པར་བྱེད། །དུག་གིས་ལུས་སུ་ཕྱིན་པ་དང༌། །དང་པོར་ཁྲག་ལ་གནོད་པར་བྱེད། །བད་ཀན་མཁྲིས་བ་རླུང་རྗེས་ལ། །ནད་གཞི་གྲོགས་དང་ལྷན་ཅིག་འབྱུང༌། །དེ་ནས་སྙིང་ལ་གནས་ནས་ནི། །ལུས་ལ་གནོད་པར་བྱེད་པར་འགྱུར། །མི་རྒྱུའི་དུག་ནི་བཏང་གྱུར་ན། །ལྕེ་གནག་ལུས་ནི་རེངས་པ་དང༌། །བརྒྱལ་དང་སློན་དང་སྡང་དང་ངལ། །གནས་སྐབས་དང་པོར་འབྱུང་བར་འགྱུར། །གཉིས་པར་འདར་ཞིང་རྡུལ་བ་དང༌། །ཚ་ཞིང་ལྐོག་མ་ནབ་དང༌། །དུག་གིས་མ་ཞུའི་གནས་ཕྱིན་ན། །སྙིང་ནི་ན་བར་བྱེད་པར་འགྱུར། །གསུམ་པར་རྐན་ནི་བསྐམས་པ་དང༌། །མ་ཞུའི་གནས་སུ་ཤིན་ཏུ་གཟེར། །དེའི་མིག་ཉམ་ཆུང་སེར་བ་དང༌། །སྐྲང་བ་ཉིད་དུ་འགྱུར་བ་དང༌། །ཞུ་བའི་གནས་ཕྱིན་ཟུག་པ་དང༌། །སྐྱིགས་བུ་ལུད་པ་རྒྱུ་མ་འཁྲུག །དུག་གི་ཤུགས་ནི་བཞི་པ་ལ། །མགོ་བོ་ལྷག་པར་ལྕི་བར་འགྱུར། །ལྔ་པར་མཆིལ་སྣབས་འཛག་པ་དང༌། །ལྷུ་ཚིགས་ནབ་འབྱུང་འགྱུར་ལ། །མདོག་མི་སྡུག་ཅིང་ནད་ཀུན་འཁྲུག །ཞུ་བའི་གནས་ཀྱི་འོག་ཏུ་ན། །དྲུག་པར་འདུ་ཤེས་ཉམས་པ་དང༌། །ཤིན་ཏུ་འཁྲུལ་པར་བྱེད་པར་འགྱུར། །བདུན་པར་ཕྲག་གོང་སྒལ་ཚིགས་དང༌། །དཔྱི་ཚིགས་བྱེ་ན་འཆི་འགྱུར་ཡིན། །དུག་གི་ཤུགས་ནི་དང་པོ་ལ། །སློན་ཞིང་ཆུ་གྲང་དག་གིས་གཏོར། །མར་དང་སྦྲང་རྩིར་བཅས་པ་ཡི། །དུག་གི་སྨན་ནི་མྱུར་དུ་བླུད། །གཉིས་པར་སྐྱུག་སྨན་བཀྲུ་སྨན་གཏང༌། །སྔ་མ་བཞིན་དུ་དུག་སྨན་བླུད། །གསུམ་པར་དུག་གི་སྨན་བླུད་ཅིང༌། །དེ་
བཞིན་མིག་སྨན་སྣ་སྨན་གཏང༌། །བཞི་པར་སྣུམ་དང་བཅས་པ་ཡི། །དུག་གི་སྨན་ནི་བཏང་ན་ཕན། །ལྔ་པར་ཤིང་མངར་ཁུ་བ་དང༌། །སྦྲང་རྩིར་སྦྱར་བ་བླུད་ན་ཕན། །དྲུག་པར་འཁྲུ་བ་ལྟ་བུར་གསོ། །བདུན་པར་སྣ་སྨན་དུད་པ་དང༌། །སྤྱི་བོར་རྒྱ་གྲམ་བྱས་ནས་ནི། །ཤའམ་ཁྲག་ནི་གཞུག་བར་བྱ། །ཀོ་ཤ་ཏ་ཀི་ལང་ག་ལི། །པ་ཐ་ལྕམ་པ་ཨ་རུར། །སཱ་ལུ་སླེ་ཏྲེས་ཤི་རི་ཤ །གི་རི་ཀར་ནི་ཡུང་བ་དང༌། །ཧ་ཡང་སྦྲང་རྩི་བ་སྤྲུ་བ། །བྲི་ཧ་ཏི་གཉིས་ཚ་བ་གསུམ། །ཤ་རི་བ་དང་བ་ལ་སྟེ། །འདི་རྣམས་བསྐོལ་བའི་ཁུ་བ་དང༌། །བསྐོལ་བའི་ནས་ཐུག་བསྒྲངས་པར་ནི། །སྦྲང་རྩི་མར་དང་བཅས་པ་གཞུག །གནས་སྐབས་གཞན་ལ་དུག་འཇོམས་པའི། །སྨན་དང་གསོ་བ་ཐམས་ཅད་བྱ། །ཤིང་མངར་ཙནྡན་མེ་དུ་ཀ །པདྨ་གེ་སར་དེ་བཞིན་བྱ། །དངུལ་རྡོ་རྒྱ་སྤོས་རུ་རྟ་དང༌། །བ་བླ་ལྡོང་རོས་པྲི་ཡང་ཀུ། །ཚ་བ་གསུམ་དང་འབུ་སུ་ཧང༌། །ནཱ་ག་པུཥྤ་གེ་སར་བཅས། །ཤིང་མངར་སྤང་སྤོས་ཧ་རེ་ཎུ། །གི་ཝང་མོན་སྣེའུ་རྨེ་རུ་དང༌། །ཤི་རི་བེཥྚ་སྲ་རྩི་བོག །ཤུ་ཏི་གུར་གུམ་བ་ལ་དང༌། །བལ་བུ་ཏ་མ་ལའི་ལོ་མ། །སྟག་པ་དང་ནི་པུ་ཤེལ་ཙེ། །སེར་པོ་གཉིས་ནི་སྦྲང་རྩིར་སྦྱར། །བུ་མོ་ཁྲུས་དང་སྨྱུང་བ་བྱས། །གོས་དཀར་བགོས་པ་བྱས་ནས་ནི། །དགེ་སྦྱོང་བྲམ་ཟེ་མཆོད་བྱས་ཏེ། །དུག་སྨན་མཆོག་ནི་སྦྱར་བར་བྱ། །དེ་ཚེ་སྨན་པས་སྔགས་འདིས་ནི། །བདག་ཉིད་བསྔགས་ཏེ་བརྗོད་པར་བྱ། །སྐྱེས་བུ་སེང་གེར་ཕྱག་འཚལ་ལོ། །སྲེད་མེད་བུ་ལ་ཕྱག་འཚལ་ལོ། །ཇི་ལྟར་ཁྱབ་འཇུག་གཡུལ་དོར་ནི། །གཞན་གྱིས་ཕམ་པར་མ་མཐོང་སྟེ། །བདེན་པའི་ཚིག་ནི་འདི་ཡིས་ཀྱང༌། །བདག་ལ་དུག་མེད་གྲུབ་པར་ཤོག །ན་མོ་བཻཌཱུཪྻ་མ་དེ། །ཧུ་ཊུ་ཧུ་ཊུ་རཀྵ་མཾ། སརྦ་བི་ཥེ་བྷྱཿགཽ་རི། གནྡྷ་རི། ཙཎྜ་ལི། མྟང་གི་སྭཱ་ཧཱ། །འཐག་པའི་སྔགས་གཉིས་པ་ནི། །ཧ་རི་མཱ་ཡེ་སྭཱ་ཧཱ། །བ་ཧ་མཱ་ཡེ་སྭཱ་ཧཱ། མ་ལུས་དུག་དང་རོ་ལངས་དང༌། །གདོན་གྱི་ལས་དང་སྡིག་པ་དང༌། །གསོད་བྱེད་ནད་དང་མུ་གེ་དང༌། །འཐབ་བར་འདོད་དང་འཇིགས་པ་ལ། །སྨན་བཏུང་སྣ་སྨན་མིག་སྨན་བསྐུ། །གདུ་བུ་ལ་སོགས་ལ་སྦྱར་བྱ། །འདི་ནི་ཟླ་ཤར་ཞེས་བྱ་སྟེ། །ཞི་དང་བདེ་ལེགས་བྱེད་མཆོག་ཡིན། །དུག་རྙིང་དུག་སེལ་སྨན་གྱིས་ཟིལ་མནན་པ། །ནགས་མེ་རླུང་དང་ཉི་ཚན་
གྱིས་བསྐམས་པའམ། །རང་བཞིན་གྱིས་ནི་ཡོན་ཏན་མི་ལྡན་པས། །ཉམས་པའི་དུག་ཅེས་བྱ་བའི་དུག་ཏུ་འགྱུར། །འདི་ནི་ནུས་པ་ཆུང་བས་མི་རྟོག་ས་ཏེ། །བད་ཀན་དང་འདྲེས་ལོ་ནི་མང་པོར་གནས། །དེས་ཉེན་གྱུར་བ་མདོག་ངན་འཁྲུ་བར་བྱེད། །ནད་ཁྲག་སྐོམ་དད་ཡི་ག་འཆུས་པས་ཉེན། །བརྒྱལ་ཞིང་སློན་ལ་རྣམ་རྨོངས་སྐད་འཛེར་དང༌། །དུག་གིས་དམུ་རྫིང་མཚན་མས་གནོད་པར་འགྱུར། །མ་ཞུའི་གནས་བརྟེན་བད་ཀན་རླུང་ནས་སྐྱེད། །ཞུ་བའི་གནས་བརྟེན་མཁྲིས་དང་རླུང་ནད་སྐྱེད། །མི་ཡི་ཡན་ལག་ཞིག་ཅིང་སྒྲ་འབྱིབས། །ཇི་ལྟར་བྱ་ནི་སྤུ་བཏོགས་ལྟ་བུར་བྱེད། །དང་ས་མའམ་ཁྲག་ལ་གནས་པར་བྱེད་ན་ནི། །ལུས་ཟུངས་ལས་བྱུང་ནད་ནི་སྣ་ཚོགས་སྐྱེད། །མདུན་གྱི་རླུང་དང་མ་ཞུ་གྲང༌། །ཡུལ་དམུས་གནོད་ཟས་ཉིན་པར་ཉལ། །ལུས་ཟུངས་གནོད་པར་བྱས་པ་ན། །དེ་བས་གནོད་པའི་དུག་ཅེས་བཤད། །གནོད་པའི་དུག་ཉེན་དུགས་བྱས་ལ། །སྟེང་དང་འོག་ནས་སྦྱང་བར་བྱ། །གནོད་པའི་དུག་ནི་སེལ་བའི་སྨན། །སྦྲང་རྩི་སྦྱར་ཏེ་ལྡེ་གུ་སྦྱིན། །པི་པི་ལིང་དང་བྱ་མ་ཀ །སྤང་སྤོས་སེང་ཕྲོམ་སུག་སྨེལ་དང༌། །ཀུ་ཏན་ན་ཏ་སརྫི་ཀ །རུ་རྟ་ཤིང་མངར་ཙནྡན་དང༌། །ཡུག་སྣམ་བཙག་དང་སྦྱར་བའི་སྨན། །གནོད་པའི་དུག་སེལ་ཞེས་བྱ་སྟེ། །གཞན་ཡང་ཟློག་པར་བྱེད་པ་ཡིན། །དུག་མདས་ཕོག་པར་གྱུར་བ་དག །ཡང་དང་ཡང་དུ་མུན་འཐིབས་བྱེད། །མདོག་ནི་མི་སྡུག་གྱུར་བ་དང༌། །མྱུར་དུ་ཡིད་འབྱུང་སྡུག་བསྔལ་འཐོབ། །འདིས་ནི་སྲིན་བུས་ཁྱབ་པ་ལྟར། །ལུས་ཚ་ཙག་ཙག་པོར་འགྱུར་རོ། །གདོང་མོ་རྒྱབ་དང་ཕྲག་པ་མགོ །ལྷུ་ཚིགས་རྣམས་སུ་ན་བར་བྱེད་།ཁྲག་ནི་ནད་ཅན་གནག་པ་འཛག །སྐོམ་དང་བརྒྱལ་ཚ་རིམས་ཀྱིས་འདེབས། །མིག་ནི་གནག་ཅིང་སློན་པ་དང༌། །བཏུད་མར་ལུད་པ་དབུགས་མི་བདེ། །རྨ་དམར་མཐའ་མར་སེར་བ་དང༌། །དབུས་ནི་གནག་ཅིང་ཤིན་ཏུ་ན། །འཕྲལ་དུ་སྐྲངས་ཤིང་རྣགས་པ་དང༌། །ཤ་ཡང་ནག་པོར་གྱུར་ནས་ནི། །གནག་ཅིང་ཤིན་ཏུ་འདྲུལ་བར་བྱེད། །སྤྱི་བག་ཅན་དུ་འཛག་པར་བྱེད། །གནད་དུ་ཕོག་པར་མ་གྱུར་པ། །མྱུར་དུ་སྙིང་ལ་ཕན་བྱེད་བྱ། །ཟུག་རྔུ་ཕྱུང་ལ་ལྕགས་བསྲེགས་པས། །རྨ་ནི་ལེགས་པར་བསྲེག་པར་
བྱ། །ཡང་ན་མུ་ཀ་ཀ་དང་ནི། །གི་རི་ཀརྞི་དཀར་པོ་དང༌། །ཀད་པ་ལ་ཡི་ཤུན་པ་དང༌། །བཙོད་དང་ཤིར་ཤ་བྱ་རྒོད་སེན། །བསྲེགས་པའི་ཐལ་བས་བསྐུ་བར་བྱ། །ཤུ་ཀ་ན་ས་བོང་ང་དཀར། །ཀཎྜ་ཀ་རིའི་རྩ་བས་བསྐུ། །དུག་འཐུང་སོས་བཏབ་གསོ་བ་དག །ཅི་རིགས་པར་ནི་དེ་ལ་བྱ། །རྨ་ཡི་ཤ་ནི་རྣགས་པ་ལ། །མཁྲིས་པའི་མེ་དཔལ་ལྟ་བུར་གསོ། །བདེ་ཕྱིར་ཁྱོལ་བུད་མེད་དང༌། །རྒྱལ་པོ་ལ་ནི་དགྲས་བསླབ་སྟེ། །ཟས་དང་སྦྱར་བའི་དུག་བསྲེས་པ། །ཉེ་འཁོར་སྐྱེ་བོར་སྟེར་བར་འགྱུར། །སྣ་ཚོགས་ལུས་ཀྱི་དྲི་མར་བཅས། །མི་མཐུན་སྨན་དང་ཐལ་བ་དང། །ནུས་པ་ཆུང་བར་གྱུར་པའི་དུག །སྤྱར་པའི་དུག་ནི་སྦྱར་མ་ཡིན། །དེས་ཉེན་མདོག་སྐྱ་རིད་པ་དང༌། །མེ་དྲོད་ཉམས་ཤིང་ལུད་པ་དང༌། །དབུགས་མི་བདེ་དང་རིམས་ཀྱིས་ཉེན། །རླུང་ནི་མི་མཐུན་རྒྱུ་བ་དང༌། །གཉིད་ཆེ་ཡིད་ནི་ཞུམ་པར་བྱེད། །གཅིན་སྙི་ལྟོ་བ་མཆིན་པ་དང༌། །མཆེར་པ་ན་ཞིང་སྐད་གསང་དམའ། །ཉམ་ཆུང་སྒྱིད་ནི་ཞན་པ་དང༌། །སྐྲངས་ཤིང་རྟག་ཏུ་སྦོ་བ་དང༌། །རྐང་པ་ལག་པ་སྐམ་ཞིང་ཟད། །རྨི་ལམ་དུ་ནི་ཅེ་སྦྱང་དང༌། །བྱི་ལ་སྦྲུལ་དང་ནེའུ་ལེ་དང༌། །སྤྲེའུ་མཐོང་ཞིང་ཕལ་ཆེར་ནི། །ནགས་ཚལ་མཚོ་ནི་སྐམས་པར་མཐོང༌། །བདག་ཉིད་ནག་པོར་མཐོང་འགྱུར་ཞིང༌། །སེར་པོ་ནག་པོར་མཐོང་བར་བྱེད། །མིག་སྣ་རྣ་བ་མེད་པ་དང༌། །དེ་ཡི་དབང་པོ་ཉམས་པར་མཐོང༌། །འདི་དང་གཞན་ཡང་གནོད་པ་ཡི། །བླ་བ་རྣམ་མི་བཟད་མང་པོས་གཙེས། །འགའ་ཞིག་འཕྲལ་དུ་མ་གསོས་ན། །སྦྱང་དུག་གིས་ཉེན་འཆི་བར་འགྱུར། །དབྱིག་དུག་སློན་བྱས་ཁ་ཟས་ནི། །དེ་ལ་ཕན་པའི་བཟའ་བཏུང་སྦྱིན། །སྦྱངས་ན་ས་གསེར་ནི་བསྟེན་བྱ་ཞིང༌། །མདོ་ནས་བསྟན་པ་བཞིན་དུ་བྱ། །གསེར་དང་ཟངས་ཀྱི་ཕྱེ་མ་ནི། །སྦྲང་རྩི་ཁ་ར་དཀར་པོ་སྦྱར། །ལྡེ་གུས་དུག་ནི་མི་བཟད་དང༌། །དབྱིག་དུག་ཐམས་ཅད་སེལ་བར་བྱེད། །མུར་བ་སླེ་ཏྲེས་པི་པི་ལིང༌། །རྒྱ་སྤོས་དབྱི་མོ་པ་ཏོ་ལ། །གླ་སྒང་ཤུ་དག་ཙི་ཏྲ་ཀ །བྱི་དང་ཀ་ནི་དར་བ་དང༌། །ཆུ་དྲོན་ཞོ་ག་ཆུར་སྦྱར་བ། །སྐྱུར་ཁུ་དང་སྦྱར་བླུད་ན་ནི། །དབྱིག་དུག་གི་བཅོམ་མེ་དྲོད་སྦྱོང༌། །ཟུར་བ་མ་ནུ་ཕུག་རོན་གྱི། །ཤ་བསྐོལ་ཁུ་བ་བསྒྲངས་པ་ནི། །དབྱིག་དུག་སྐོམ་དང་ལུད་པ་ན། །
སྐྱིགས་བུ་དབུགས་མི་བདེ་རིམས་སེལ། །དུག་གི་རང་བཞིན་དུས་དང་ཟས། །ནད་གཞི་ལུས་ཟུངས་ཚོགས་འདུས་པ། །དུག་གི་ཉམ་ང་ཞེས་བཤད་དེ། །བཀྲེས་སྐོམ་ཉ་མ་ནི་ཆུང་བ་དང༌། །ཁྲོ་དང་མྱ་ངན་འཇིགས་དང་ངལ། །མ་ཞུ་བ་དང་འཁྲུ་བ་དང༌། །མཁྲིས་པ་རླུང་ནི་འཕེལ་བ་དང༌། །ཏིལ་གྱི་མེ་ཏོག་འབྲས་བུ་སྣུམ། །ས་ཡི་རླངས་པ་འབྲུག་སྒྲ་དང༌། །གླིང་བུ་པི་ཝང་རོལ་མོ་ཡི། །སྒྲ་དང་མདུན་གྱི་སེར་བུ་དང༌། །ཨུཏྤལ་དྲི་དང་མྱོས་པ་ཡིས། །དུག་གི་ཉམ་ང་འཕེལ་བར་བྱེད། །དབྱར་ནི་ཆར་གི་དུས་ཡིན་པས། །བུ་རམ་ལྟ་བུར་རླན་ཅན་འགྱུར། ལུས་ལ་ཁྱབ་བྱེད་དབྱར་འདས་ནས། །རི་བྱི་འཆར་བས་དེ་མེད་བྱེད། །དེ་བས་སྤྲིན་བྲལ་དུས་སུ་ནི། །ནུས་པ་ཆུང་བ་ཉིད་དུ་འགྱུར། །དེ་ལྟར་རང་བཞིན་གོམས་པ་དང༌། །གནས་དུས་ཤུགས་སྟོབས་ཆེ་ཆུང་བ། །བརྟགས་ཏེ་མཁས་པས་ཤེས་བྱས་ལ། །དེ་རྗེས་གསོ་བའི་ལས་སྤྱད་བྱ། །བད་ཀན་ཅན་ནི་སློན་དང་དྲོ། །རྩུབ་དང་རྣོ་བའི་སྨན་བསྐུ་ཞིང༌། །བསྐ་དང་ཁ་དང་ཚ་བ་ཡིས། །ཟས་ཀྱི་དུག་ནི་བསལ་བར་བྱ། །མཁྲིས་ཅན་བཀྲུ་སྨན་སྨན་ཆུ་བླུགས། །ཤིན་ཏུ་བསིལ་བའི་སྨན་བསྐུ་ཞིང༌། །བསྐ་དང་ཁ་དང་མངར་བ་དང༌། །མར་བཅས་ཁ་ཟས་སྦྱིན་བས་གསོ། །རླུང་གི་བདག་ཉིད་ཅན་མངར་དང༌། །སྐྱུར་དང་ལན་ཚྭ་མར་བཅས་པའི། །བཟའ་བ་མར་བཅས་བསྐུ་བྱུག་དང༌། །དེ་བཞིན་ཤ་ནི་བཟའ་བས་གསོ། །བཀྲ་སྨན་བསྐུ་བྱུག་ཁ་ཟས་སྨན། །མར་མེད་བསྔགས་པ་མ་ཡིན་ནོ། །དུག་ཀུན་གནས་སྐབས་ཐམས་ཅད་དུ། །དུག་འཇོམས་མར་དང་འདྲ་བ་ཡི། །སྨན་ནི་གཞན་དག་ཡོད་མིན་ཏེ། །མཆོག་ཏུ་རླུང་ཤེས་ཆེ་ལ་ཕན། །བད་ཀན་གནས་ཞུགས་གསོ་བར་སླ། །མཁྲིས་པའི་གནས་བརྟེན་འབད་བས་གསོ། །རླུང་གི་གནས་སུ་ཞུགས་པའི་དུག །ཤིན་ཏུ་གསོ་དཀའ་གསོར་མི་རུང༌། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་སུམ་ཅུ་རྩ་ལྔའོ།། །།དེ་ནས་སྦྲུལ་གྱིས་ཟིན་བ་གསོ་བའི་ལེའུ་བཤད་པར་བྱའོ། །མདོར་ནས་ཡི་སྟེང་ན་སྦྲུལ། །གསུམ་སྟེ་གདེངས་ཀ་ཅན་ལུས་འཁྱིལ། །ཁྲ་བོ་ཡིན་ཏེ་དེ་ཡིན། །དབྱེ་བ་མཐའ་ཡས་གྱུར་
པ་དག །སྐྱེ་གནས་དབྱེ་བས་རྒྱས་པར་ནི། །དགོས་པ་མེད་ཕྱིར་མ་བཤད་དོ། །མཆོག་ཏུ་རྩུབ་དང་ཚ་བ་དང༌། །སྐྱུར་དྲོ་མངར་བསིལ་དག་ལས་ནི། །གདེངས་ཀ་ཅན་ལ་སོགས་པའི་དུག །རིམ་གྱིས་རླུང་སོགས་འཁྲུག་པར་བྱེད། །གཞོན་དང་རྒན་པོ་བར་མ་དང༌། །དབྱར་དང་དགུན་དང་སོས་ཀར་ནི། །འདི་དག་དུག་ནི་འཕེལ་འགྱུར་ཞིང༌། །གཞན་དག་དུས་ཚིགས་རྣམས་སུ་འགྱུར། །འཁོར་ལོ་གཤོལ་དང་གཡུང་དྲུང་གདུགས། །ལྕགས་ཀྱུའི་མཚན་མར་ལྡན་པ་ཡིན། །གདེངས་ཀ་ཅན་ནི་མྱུར་འགྲོ་བ། །ཐམས་ཅད་གདེངས་ཀ་ཅན་ཞེས་བྱ། །ལུས་འཁྱིལ་སྣ་ཚོགས་པ་ཡི་ནི། །ཟླུམ་པོར་འདུག་པ་ལུས་འཁྱིལ་ཞིང༌། །རིང་ཞིང་འགྲོས་ནི་བུལ་བ་ཡིན། །རི་མོ་སྣ་ཚོགས་ལྡན་པ་དང༌། །སྣུམ་ཞིང་ཁ་དོག་སྣ་ཚོགས་པས། །ཆུ་ཞེང་བྲིས་འགྱུར་ཁྲ་བོ་ཡིན། །གོ་དྷའི་བུ་ནི་གོ་དྷ་ཅན། །དུག་ནི་གདེངས་ཀ་ཅན་མཉམ་ལ། །རྐང་བཞི་པོ་ཡི་སྦྲུལ་གཞན་ནི། །འདི་དག་ཉིད་ནི་འདྲེས་པ་ལས། །འདྲེན་མའི་མཚན་ཉིད་ཅན་ཏེ་དེས། །འདུས་པའི་ནད་ནི་ལྡང་བར་བྱེད། །ཟས་ཀྱི་དོན་དང་འཇིགས་པ་དང༌། །རྐང་བས་རེག་ལས་དུག་རབ་འཁྲུགས། །རྐང་གི་རྒྱུ་དང་འདྲེས་པ་དང༌། །ལྷ་དང་དྲང་སྲོང་གཤིན་རྗེས་བསྐུལ། །སྦྲུལ་གྱིས་ཟིན་པར་གང་བཤད་པ། །ཕྱི་མ་བཞིན་དུ་དུག་ཤས་ཆེ། །འཇུག་པའི་རྒྱུ་ནི་ཤེས་བྱས་ནས། །གསོ་བ་ཇི་བཞིན་བྱ་བ་ཡིན། །ཕལ་བ་སྡིག་ཅན་དང་ཚུལ་བས། །ལམ་བཀག་ནས་ནི་གནས་པ་ཡིན། །གང་དུ་ཁ་ཆུ་གཤེར་བ་ཙམ། །ལུས་ལ་སྣང་བར་བྱེད་འགྱུར་ཞིང༌། །མཆེ་བའི་རྨ་ནི་མི་མངོན་གང༌། །དེ་ནི་མཆུས་གནོད་བྱེད་ཅེས་བྱ། །མཆེ་བ་གཅིག་ལས་རྗེས་གཉིས་མངོན། །ཁྲག་མེད་གྱུར་པ་བལྡགས་ཞེས་བྱ། །མཆེ་བའི་རྗེས་ནི་ཁྲག་བཅས་གཉིས། །རྣམ་པར་བཅད་པའི་དེ་གསུམ་ནི། །ཤ་བཅད་ཤིན་ཏུ་ཕུག་པ་དང༌། །ཁྲག་དབྱུང་སོ་ཡིས་ཟིན་ཞེས་བྱ། །མཆེ་བའི་རྗེས་ནི་བཞི་སྣང་བ། །དེ་བཞིན་སོ་ས་འཛིན་བཙིར་བར་བཤད། །དེ་ལས་དང་པོ་དུག་མེད་གཉིས། །ཕྱི་མ་གཉིས་པོ་གསོར་མི་རུང༌། །སྦྲུལ་གྱི་དུག་ནི་ཁྲག་དག་ལ། །མ་བརྟེན་ལུས་ལ་གནོད་མི་བྱེད། །ཁྲག་ནི་ཅུང་ཟད་ལ་བརྟེན་ཡང༌། །ཧིལ་མར་ཐིགས་པ་བཞིན་དུ་མཆེད། །སྔར་མ་
སྦྲུལ་གྱིས་རེག་པ་ལས། །འཇིག་པས་རླུང་ནི་འཁྲུག་པར་བྱེད། །ལན་འགའ་སྐྲང་བར་བྱེད་པ་དེ། །སྤྲུལ་གྱིས་ལུས་ནི་བཅོམ་ཞེས་བྱ། །བགྲོད་དཀའ་མུན་པར་ཟུག་གྱུར་པ། །ལ་ལ་རྟོག་པས་ཟིན་པ་དང༌། །དུག་གི་ཤུགས་དང་སློན་དང་རིམས། །བརྒྱལ་བའམ་ཚ་བ་སྐྱེ་བའམ། །ན་ཞིང་རྨོངས་བག་འཁྲུ་བར་འགྱུར། །དེ་ནི་རྟོག་པའི་དུག་ཅེས་བྱ། །དུག་བཅས་ནད་ཀྱིས་ཟུག་པ་དང༌། །སྐྲང་དང་གཡའ་དང་རིམས་བཅས་པ། །ལ་ལ་ཚ་ཞིང་རྨེན་བུར་འགྱུར། །དེ་ལས་བཟློག་པ་དུག་མེད་ཡིན། །གདེངས་ཀ་ཅན་ཤུགས་དང་པོ་ལ། །ནད་ཁྲག་ནག་པོར་འཛག་པར་འགྱུར། །མིག་དང་གདོང་སོགས་གནག་པ་དང༌། །སྲིན་བུ་རྒྱུ་བ་སྙམ་དུ་སེམས། །ཤུགས་གཉིས་པར་ནི་རྨེན་བུ་སྐྱེ། །གསུམ་པར་མགོ་ནི་ལྕི་བར་འགྱུར། །བཞི་པར་མིག་འབྱེད་དཀའ་བ་དང༌། །སོ་ས་བཏབ་རྣགས་ཤིང་མཆིལ་མ་སློན། །ལྔ་པར་ཚིགས་འབྱེ་སྙམ་སེམས་དང༌། །རྒྱུད་གཞན་ཚིགས་ནི་འཇིག་པ་དང༌། །ལུས་ཚ་སྐྱིགས་བུ་འབྱུང་བ་ཡིན། དྲུག་པར་སྙིང་ན་ལུས་ལྕི་ཞིང༌། །བརྒྱལ་ཞིང་འཁྲུལ་ཟས་མི་འཇུ། །བདུན་པར་ཁུ་བའི་གནས་ཕྱིན་ནས། །ཕྲག་གོང་རྒྱབ་དང་སྒལ་ཚེགས་དང༌། །རྐེད་པ་ཞིག་པ་སྙམ་སེམས་ཞིང༌། །སྤྱོད་ལམ་ཐམས་ཅད་ལས་ཉམས་འགྱུར། །དེ་ནས་ལུས་བསྐྱིལ་བས་ཟིན་ན། །ནད་ཁྲག་སེར་པོར་འགྱུར་བ་དང༌། །དེ་ཡི་ལུས་སེར་ཚ་བ་སྐྱེད། །གཉིས་པར་སྐྲང་བར་འགྱུར་བ་ཡིན། །གསུམ་པར་སོས་བཏབ་རྣགས་པ་དང༌། །རྡུལ་དང་སྐོམ་དང་སྐྱེ་བར་འགྱུར། །བཞི་པར་ཁོང་ཚ་རིམས་ཀྱིས་འདེབས། །ལྔ་པར་ལུས་ཀུན་ཁྱབ་པར་ཚ། །སྤྲུལ་ནི་ཁྲ་བོས་ཟིན་གྱུར་ན། །ཁྲག་ནི་སྐྱ་བོར་འགྱུར་བ་དང༌། །དེས་ནི་ལུས་མདོག་སྐྱ་བོར་འགྱུར། །གཉིས་པར་ལུས་ནི་ལྕི་བར་འགྱུར་།གསུམ་པར་སོས་བཏབ་རྣགས་པ་དང༌། །མིག་དང་ཁ་སྣ་ལས་འཛག་འགྱུར། །བཞི་པར་མགོ་ལྕི་གཉེའུ་རེངས་འགྱུར། །ལྔ་པར་ལུས་ཚིགས་ན་བ་དང༌། །གྲང་བའི་རིམས་ཀྱིས་འདེབས་བར་བྱེད། །ལྷག་མ་གཉིས་པོ་སྔ་མར་མཚུངས། །ཤུགས་ནི་ལྔ་པར་གསོ་བ་དག །བྱ་ཡི་དེ་ལས་ཕན་ཆད་མིན། །ཆུ་ཡིས་གཡེང་དང་ཆགས་པས་ཟད། །སྐྲག་
དང་ནེའུ་ལེས་འཕེན་པ་དང༌། །གྲང་ལྷགས་ཉི་ཚན་རླུང་དང་ནད། །བཀྲེས་སྐོམ་དལ་བས་གཟིར་བ་དང༌། །ཕྱོགས་གཞན་ནས་ནི་རིངས་པར་འོངས། །དུག་སྤངས་པགས་པ་རྗེས་པ་དང༌། །འཇག་མ་སྨན་དང་ཚེར་མ་ཅན། །ནགས་ན་རྒྱུ་བ་གང་ཡིན་དང༌། །རིག་པ་ལ་སོགས་བརྟེན་ཕྱོགས་གནས། །སྦྲུལ་དེ་དུག་ནི་ཆུང་བར་འདོད། །དུར་ཁྲོད་བསྟི་གནས་ཤིང་གཅིག་སོགས། །ཚེས་ལྔ་དང་ནི་དུས་ཚིགས་དང༌། །ཚེས་བརྒྱད་ཚེས་དགུ་ཐུན་མཚམས་དང༌། །ནམ་ཕྱེད་དང་ནི་ཉི་མའི་གུང༌། །བྲ་ཉེ་སྨིན་དྲུག་མཆུ་དང་སྐག །ས་ག་ཆུ་སྟོད་ཁྲུམས་སྟོང་དང༌། །སྣུབས་དང་བྲ་ཉེ་ཡུད་ཙམ་ལ། །གནད་དུ་བཟུང་བ་སྤང་བར་བྱ། །ཟིན་པའི་མོད་ལ་བཞིན་སྐྱ་ཞིང༌། །སྐྲ་ནི་འབྱི་བར་བྱེད་པ་དང༌། །ལྕེ་འཁུམས་ཡང་དང་ཡང་དུ་བརྒྱལ། །དབུགས་གྲང་གང་ཡིན་དེ་མི་འཚོ། །སྐྱིགས་བུ་དབུགས་མི་བདེ་ཞིང་སློན། །ལུས་ཅན་ཟིན་པའི་མོད་ལ་ནི། །སྙིང་ནས་གཟེར་བར་འགྱུར་བ་དང༌། །ཅིག་ཅར་འབྱུང་བ་དེ་མི་འཚོ། །འདུ་ཤེས་སྟོར་ཞིང་ལྡུ་བར་སྐྱུགས། །རྐང་པ་ལག་པ་བཞིན་གནག་ཅིང༌། །སྣ་ཞོམ་ཡན་ལག་ཞིག་པ་དང༌། །ཚིགས་ལྷོད་བཤང་བ་འཁྲུ་བ་ཡི། །དུག་འཐུངས་པ་དང་སྤྲུལ་གྱིས་ཟིན། །དུག་ཅན་མདའ་ཡིས་ཕོག་གྱུར་པ། །ཚུལ་ནི་འདི་དག་སྣང་གྱུར་ན། །སྲོག་ཟད་པར་ནི་འགྱུར་བ་ཡིན། །སྣ་སྨན་རྣོན་པོ་མི་ཚོར་ཞིང༌། །རྨ་ནས་ཁྲག་ནི་མི་འབྱུང་ལ། །དབྱིག་པས་བསྣུན་ན་རྗེས་མི་མངོན། །གཤིན་རྗེའི་ཐད་དུ་འགྲོ་བ་ཡིན། །དེ་ལས་གཞན་དུ་སྨན་པ་ཡིས། །འབར་བའི་ཁྱིམ་ནས་འབྱུང་བ་བཞིན། །ལྐོག་མར་ཕྱིན་སའི་སྲོག་བསྲུང་ཞིང༌། །དུག་ནི་མྱུར་དུ་བསལ་བར་བྱ། །ལུས་ཅན་དུག་གིས་ཟིན་གྱུར་པ། །གྲངས་བརྒྱའི་བར་དུ་གནས་ནས་ནི། །ལུས་ཟུངས་ཁྲག་སོགས་ལ་གནོད་ཅིང༌། །ལུས་ལ་ཁྱབ་བར་བྱེད་པ་ཡིན། །དུས་འདིའི་བར་དུ་གདུག་པ་ཡི། །མཆེ་བས་ཟིན་པ་བཅད་སོགས་ལས། །བྱ་ཞིང་ཅི་ནས་ལུས་ལ་ནི། །དུག་གི་ཡལ་ག་མ་འཕྲོས་བྱ། །ཟིན་པའི་མོད་ལ་མྱུར་དུ་ནི། །སྤྲུལ་ནི་དེ་ཉིད་ཟ་བའམ། །ས་འམ་བོད་བར་གཅོད་བྱེད་ན། །རིངས་པ་ཁོ་ནར་སྨན་པ་ཡི། །མཆིལ་མས་བྱུག་པར་བྱ་བའམ། །རྣ་སྦབས་ཀྱིས་ནི་སོ་རྗེས་བསྐུ། །མཆེ་བས་བཏབ་
པའི་གོང་དུ་ནི། །སོར་བཞིར་རས་མ་ལས་བྱས་པ། །གསོ་མའམ་འོད་མ་ལ་སོགས་བཅིང༌། །སྔགས་ཤེས་པ་ཡིས་གྲུབ་སྔགས་བཟླ། །ཆུ་ལོན་གྱིས་ནི་ཆུ་ལྟ་བུར། །བཅིངས་པས་དུག་ནི་འཕྲོས་མི་འགྱུར། །དུག་གི་བཅིངས་སོགས་ཉེན་པ་ཡི། །རྩ་ལས་རྒྱུ་བར་མི་འགྱུར་རོ། །བཙིར་ནས་སོས་བཏབ་དབྱུང་བྱ་ཞིང༌། །ཚིགས་དང་གནད་དུ་མ་ཆུད་དེ། །ས་བོན་ཉམས་པའི་མྱུ་གུ་བཞིན། །དུག་ཤུགས་དེ་ནི་འབྱུང་མི་འགྱུར། །ལུས་འཁྱིལ་སོ་རྗེས་མཁྲིས་བསྐྱེད་པས། །དེ་མ་གཏོགས་པ་གཞན་དག་ནི། །ལྕགས་དང་གསེར་ལ་སོགས་པས་སམ། །མགལ་མེ་ཡིས་ནི་མྱུར་དུ་བསྲེག །མེ་ཡིས་ཐལ་བར་བྱེད་འགྱུར་ན། །ཅི་ཕྱིར་དེ་ནི་འབྱུང་བར་འགྱུར། །ས་དང་ལྕི་བ་སྨན་སོགས་ཀྱིས། །ཁ་བཀང་ནས་ནི་གཞིབ་པར་བྱ། །ཆིངས་མའི་ནང་ནས་ཤ་ཆེའི་ཕྱོགས། །མཆོག་ཏུ་ཞལ་ཞལ་བྱ་བ་དང༌། །ཡན་ལག་མཆེ་བས་ཟིན་བཅས་པ། །དུག་སྨན་གྱིས་ནི་ཡང་ཡང་བསྐུ། །ཙནྡན་པུ་ཤེ་ལ་ཙེ་ལྡན་པའི། །ཆུ་ཡིས་ཀྱང་ནི་བླུགས་པར་བྱ། །དུག་གིས་ཁྱབ་བར་གྱུར་པ་ལ། །གཏར་ག་གདབ་པ་གསོ་མཆོག་སྟེ། །ཁྲག་ནི་ཕྱུང་བར་གྱུར་པ་ན། །མ་ལུས་དུག་ནི་འབྱུང་བར་འགྱུར། །དུག་བཅས་ཁྲག་ནི་དྲི་མི་ཞིམ། །མེར་བསྲེགས་སྒྲ་ནི་ཙེག་ཙེག་ཟེར། །ནད་གཞི་ཇི་བཞིན་དག་གྱུར་པ། །ཁྲག་ནི་སྔ་མ་བཞིན་ཞེས་བྱ། །རྩ་ནི་སྣང་བར་མ་གྱུར་ན། །རྡབས་རྭ་སྲིན་བུ་པད་པས་གཏར། །ཁྲག་ཕྱུང་བ་ཡི་ལྟག་མ་ནི། །དུག་གི་དྲོད་ཀྱིས་ཞུགས་གྱུར་པ། །ཤིན་ཏུ་བསིལ་བའི་སྨན་བསྐུ་དང༌། །བླུགས་པ་ཡིས་ནི་བསལ་བར་བྱ། །དུག་གི་ཤུགས་ཀྱིས་མ་ཞུ་བས། །བརྒྱལ་དང་མྱོས་དང་སྙིང་འཛག་འབྱུང༌། །དེ་ནི་བསིལ་སྨན་བླུགས་པ་དང༌། །རླུང་ཡབ་སྦྲུ་ལྡང་བྱེད་པས་བསལ། །ཁྲག་ན་སླ་བར་གྱུར་ན་དུག །འཕྲལ་དུ་ཤུགས་ནི་ཞི་བར་འགྱུར། །དུག་གི་རྣོ་བས་སྙིང་འདར་བྱེད། །དེ་བསྲུང་ཕྱིར་ནི་ཞུན་མར་དང༌། མར་དང་བཅས་པའི་སྦྲང་རྩི་འམ། །དུག་སྨན་མར་དང་སྦྲུས་པ་བླུད། །དེ་ཡི་སྙིང་ནི་འགག་བྱེད་པས། །སྟིང་གར་བད་ཀན་སོགས་པར་བྱེད། །ལུས་ལྕི་ནད་ནི་བསླངས་པ་དང༌། །སྙིང་འཕར་དེ་ནི་སློན་དུ་གཞུག །གཤེར་རྫས་སྐྱུར་རྩབས་རྒྱ་སྲན་དང༌། །ཏིལ་དང་ཆང་སོགས་མ་གཏོགས་པ།
དུག་སེལ་བ་ཡི་སློན་སྨན་གཏང༌། །དེས་ནི་ལུས་ལ་ཁྱབ་མི་འགྱུར། །སྤྲུལ་དང་ཉེས་པ་རང་བཞིན་དང༌། །གནས་དང་ཤུགས་ཀྱི་ཁྱད་པར་ནི། །ཕྲ་མོ་ཡན་ཆད་ལེགས་བརྟགས་ལ། །གསོ་བ་ཁྱད་པར་ཅན་བྱའོ། །སྲིན་བུ་བ་རིའི་རྩ་བ་དང༌། །གི་རི་ཀརྞི་དཀར་པོའི་ཆུ། །བཏུང་བ་གདེངས་ཀ་ཅན་བཞིན་སྦྱར། །སྣ་སྨན་རུ་རྟ་སྦྲང་རྩི་གཏང༌། །སྦྲུལ་ནག་གིས་ནི་ཟིན་པ་ལ། །ཁྲག་གཏར་ནས་ནི་བཅའ་བ་དང༌། །ན་གོ་ལ་ནི་སྦྱར་བ་བསྐུ། །ཡང་ན་རྩ་རྣོན་དུག་གིས་བསྐུ། །བཏུང་བར་བཙོད་དང་སྦྲང་རྩི་དང༌། །ཁང་པའི་དུད་པ་མར་སྦྱར་བླུད། །གདེངས་ཀ་ཅན་དང་རི་མོ་ཅན། །མི་བཟད་དུག་གིས་ཟིན་པ་ལ། །ཏན་དུ་ལི་ཡ་ཏད་པ་ལ་དང༌། །གི་རི་ཀརྞི་རྣམ་གཉིས་དང༌། །ཁ་ལུང་ཁཎྜ་སེའུ་འབྲུ་ནི། །བཏུང་དང་སྣ་སྨན་མིག་སྨན་བྱ། །ཨ་ཤྭ་གནྡྷ་རྒུན་འབྲུམ་དང༌། །གི་རི་ཀརྞི་ས་ནག་དང༌། །ཧ་ཏི་པི་པི་ལིང་དང་ནི། །བྱེའུ་རུག་པའི་ལོ་མ་དང༌། །བིལ་བ་སེ་འབྲུ་ཀ་པིད་ཐ། །ཆ་ནི་ཕྱེད་ཕྱེད་སྦྲང་རྩིར་སྦྱར། །དུག་སྨན་ཡིན་ཏེ་ཁྱད་པར་དུ། །ལུས་འཁྱིལ་སྦྲུལ་གྱི་དུག་ལ་ཕན། །ལོ་མ་ལྔ་དང་འབྲས་བུ་གསུམ། ཤིང་མངར་ནཱ་ག་པུཥྤ་དང༌། །ཨེ་ལ་བ་ལུ་ཛི་བ་ཀ །ཟངས་རྩི་བ་དང་པུ་ཤེལ་ཙེ། །ཁ་ར་ཤུག་པ་ཨུཏྤ་ལ། །སྦྲང་རྩི་དང་སྦྱར་ཁ་བ་ཅན། །ཞེས་བྱ་ལུས་འཁྱིལ་དུག་འཇོམས་སོ། །བསྐུས་ན་སྐྲང་དང་ཤུ་བ་མཆེད། །འབྲུམ་བུ་རིམས་དང་ལུས་ལྕི་སེལ། །ཏང་པ་ལ་ནྱ་གྲོ་དྷའི་མྱུ་གུ། །ཛི་བ་ཀ་དང་ཟངས་རྩི་བ། །ཀ་ར་དཀར་པོ་ཤིང་མངར་བཙོད། །ཁུ་བ་ལུས་འཁྱིལ་དུག་ལ་བླུད། །འོད་མའི་ཤུན་པ་ས་བོན་དང༌། །བཅའ་སྒ་པ་ཏོ་ལའི་ས་བོན། །ཤིར་ཤའི་ས་བོན་བུ་ཙེ་ཤེལ། །འབྲས་ཀྱི་རྩ་བ་བོང་ད་དཀར། །ཤུ་དག་བ་གཅིན་བཅས་པར་བཏགས། །ཡན་བླག་བརྒྱད་པ་ཞེས་བྱ་སྟེ། །གོ་ནས་ཡི་དུག་འཇོམས་སོ། །རུ་རྟ་བོང་ང་པུ་ཙེ་ཤེ་ལ། །ཧ་རེ་ཎུ་ཀ་ཁྱིམ་དུད་པ། །རྒྱ་སྤོས་སྤང་རྩི་ཚ་བ་གསུམ། སྦྱར་བས་རི་མོ་ཅན་དུག་སེལ། །འདམ་བུ་ཁྲ་བོ་འདྲས་ཟིན་ན། །ས་བརྐོས་འོག་ཏུ་ཐུན་གཉིས་གཞུག །ཕྱུང་སྟེ་བཞར་ལ་མར་སར་དང༌། །འབྲས་དང་ས་ཡི་ལྡེ་གུས་བྱུག །འབྲས་བུ་གསུམ་གྱི་ཕྱེ་བཏབ་པའི། །མར་ནི་རྙིང་པོ་བླུད་པར་བྱ། །ཞུ་ཞིང་བཀྲུས་ནས་ནས་ཟན་ནི། །སྲན་ཚོད་དང་ནི་
བཅས་པ་སྦྱིན། །ཀ་ར་བཱི་ར་ཨརྐ་ཡི། །མེ་ཏོག་ལང་ཀ་ལིའི་རྩ་བ། །པི་པི་ལིང་དང་ན་ལེ་ཤམ། །པ་ཏ་སྐྱུར་རྩབས་ལྡེ་གུར་བྱས། །འདི་ནི་སྤྲུལ་གཞན་གྱིས་ཟིན་པའི། །སྤྲུལ་གྱི་དུག་ཀུན་སེལ་བ་ཡིན། །ཤིར་ཤའི་མེ་ཏོག་ཁུ་བ་དང༌། །ན་ལེ་ཤམ་དཀར་ཞག་བདུན་སྤངས། །བཏུང་དང་སྣ་སྨན་བྱས་གྱུར་ན། །སྤྲུལ་གྱི་མཆེ་བས་ཟིན་པ་སེལ། །རྒྱ་སྤོས་རུ་རྟ་སྲང་གཉིས་གཉིས། །མར་དང་སྦྲང་རྩི་སྲང་བཞི་བཞི། །འདི་བླུད་འཇོག་པོས་ཟིན་པ་ཡང༌། །བདེ་བ་སྐྱེད་པར་བྱེད་པ་ཡིན། །དེ་ནས་གདེངས་ཀ་ཅན་གྱི་ཤུགས། །དང་པོར་ཁྲག་ནི་དབྱུང་བར་བྱ། །དུག་སྨན་སྦྲང་རྩི་ཞུན་མར་དང༌། །བཅས་པ་མྱུར་དུ་བླུད་པར་བྱ། །གཉིས་པར་སློན་སྨན་བཏང་ནས་ནི། །དེ་བཞིན་དུག་སྨན་བླུད་པར་བྱ། །གསུམ་པར་དུག་སྨན་སྦྱར་བྱ་ཞིང༌། །མིག་སྨན་དང་ནི་སྣ་སྨན་གཏང༌། །བཞི་བར་སྐྱུག་སྨན་བཏང་ནས་ནི། །སྔར་བཤད་པ་ཡི་ནས་ཐུག་བླུད། །ལྔ་པ་དྲུག་པར་བསིལ་སྨན་གྱིས། །བསྐུ་ཞིང་སྨན་ཆུ་ཡང་ཡང་བླུགས། །སློན་སྨན་རྣོན་པོ་གཏང་བྱ་ཞིང༌། །དུག་སེལ་ནས་ཐུག་བླུད་པར་བྱ། །བདུན་པར་དུག་སྨན་རྣོན་པོ་ཡི། །མིག་སྨན་དང་ནི་སྣ་སྨན་གཏང༌། །དེ་ནས་སྤྱི་བོར་རྒྱ་གྲམ་དུ། །ཟབ་མོའི་མཚོན་གྱིས་བྟྲལ་ནས་ནི། །དེར་ནི་ཤའམ་ཁྲག་གམ་ནི། །པགས་པ་དག་ནི་གཞུག་པར་བྱ། །ལུས་འཁྱིལ་ཤུགས་ནི་གསུམ་པ་ལ། །སློན་སྨན་བཏང་ལ་ནས་ཐུག་བླུད། །དྲུག་པར་སྨན་ནི་རྟུལ་པོའམ། །ཤུག་པ་ལ་སོགས་སྡེ་ཚན་བླུད། །ཁྲ་བོའི་ཤུགས་ནི་དང་པོ་ལ། ཞལ་ཞལ་ཟབ་ཏུ་གདང་བྱ་ཞིང༌། །ཀུ་བས་ཁྲག་ནི་བཏོན་ནས་ནི། །སྔ་མ་བཞིན་དུ་དུག་སྨན་བླུད། །དྲུག་པར་མིག་སྨན་རྣོན་པ་དང༌། །སྣ་སྨན་ཕྱེ་མ་བུད་པ་གཏང༌། །མ་སྨས་པ་ཡི་ཤུགས་ལས་ནི། །གདེངས་ཀ་ཅན་སྐབས་བཤད་ལྟར་གསོ། །སྦྲུམ་མ་བྱིས་པ་རྒན་པོ་ལ། །གཏར་ག་མི་གདབ་འཇམ་པོས་གསོ། །ཤིང་ཚ་ལྡོང་རོས་རྒྱ་སྤོས་ཉུང༌། །ཀུ་ཤའི་ཁུ་བ་ཆུ་སྲིན་སེན། །ཏ་མ་ལ་ཡི་གེ་སར་དང༌། །འབྲས་བུ་ཆུ་གྲང་སྦྱར་བ་བླུད། །འདི་ཡིས་དབང་པོའི་རྡོ་རྗེས་ནི། །ལྷ་མིན་ལྟ་བུར་དུག་འཇོམས་བྱེད། །བིལ་བའི་རྩ་བ་བྱེའུ་རུག་པའི་མེ་ཏོག །རྒྱ་སྤོས་ཐང་ཤིང་ཀ་རཉྫའི་འབྲས་བུ། །
སེར་པོ་རྣམ་གཉིས་འབྲས་བུ་གསུམ་དང་ནི། །ཚ་བ་གསུམ་པོ་ར་གཅིན་ཞིབ་བཏགས་ལ། །བཏུང་དང་སྣ་སྨན་མིག་སྨན་སྦྱར་བ་ཡིས། །སྤྲུལ་དང་ལུ་དབྱི་བ་སྡིག་པ་སོགས། །དུག་དང་དབྱིག་དུག་མ་ཞུ་གསུང་དང་རིམས། །མི་ནི་གདོན་གྱིས་ཟིན་པ་བདེ་བར་བྱེད། །སོས་བཏབ་བསྐུ་བ་ལ་སོགས་ཀྱིས། །མ་ལུས་སྟོན་པར་གྱུར་ཀྱང་ནི། །ཉམས་པའི་དུག་ནི་ཇི་བཞིན་དང༌། །སླར་ཡང་ཤུགས་ནི་སྐྱེ་བར་བྱེད། །དུག་དང་བྲལ་ནས་རླུང་འཁྲུགས་ན། །སྣུམ་ལ་སོགས་པས་གསོ་བྱ་ཞིང༌། །ཏིལ་མར་ཆང་དང་རྒྱ་སྲན་ཆུ། །མ་གཏོགས་རླུང་ནི་སེལ་བ་སྦྱིན། །མཁྲིས་པར་མཁྲིས་པའི་རིམས་སེལ་བའི། །སྨན་ཁུ་སྨན་མར་འཇམ་རྩིས་གསོ། །བད་ཀན་སྦྲང་རྩིར་བཅས་པ་ཡི། །དོང་ཀ་ལ་སོགས་སྡེ་ཡིས་གསོ། །སྤྲུལ་གྱི་རུས་པས་གནོད་འགྱུར་དང༌། །དེ་བཞིན་རྟོག་པའི་དུག་གིས་ཉེན། །ཀ་ར་རྒུན་འབྲུམ་པ་ཡ་སྱ། །ཤིང་མངར་ཁ་ར་སྦྲང་རྩིར་སྦྱར། །སྔགས་ཀྱིས་བཏབ་པའི་ཆུ་དང་བཅས། །གཏོར་ཞིང་སྤྲོ་བསྲིང་དགའ་བར་བྱ། །ཀེ་ཀ་རུ་དང་མུ་ཏིག་མ་རྒད་དང༌། །བཻ་ཌཱུཪྻ་དང་རྡོ་རྗེ་མཐོན་ཀ་ཆེ། །རས་བལ་ས་བོན་དུག་གིས་གནོད་པའམ། །ཁ་བ་ཅན་གྱི་རི་ལས་སྐྱེས་པ་ཡི། །སོ་མ་ར་ཛ་དང་ནི་བ་སྤྲུ་བ། །དེ་བཞིན་དྲོ་ན་མ་ཧཱ་དྲོ་ན་དང༌། །སྤྲུལ་ལ་ཡོད་པའི་ནོར་བུ་མ་ན་སི། །ནུས་པ་དང་ནི་ལྡན་པར་གྱུར་པ་ཡི། །དུག་ནི་དུག་གཞོམ་བྱ་ཕྱིར་བཅད་པར་བྱ། །ནུབ་མོའི་དུས་སུ་རྒྱུ་ཆེ་ཁྱད་པར་དུ། །གདུགས་དང་ཁར་གསིལ་སྒྲ་དང་བཅས་པ་བཅང༌། །དེ་ཡི་གྲིབ་མ་སྒྲ་ཡི་སྐད་ཕྱུང་ན། །སྤྲུལ་གྱི་ཚོགས་ནི་འབྱེར་བར་བྱེད་པར་འགྱུར། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་སུམ་ཅུ་དྲུག་པའོ།། །།དེ་ནས་སྲིན་བུའི་དུག་ནད་གསོ་བའི་ལེའུ་བཤད་པར་བྱའོ། །སྦྲུལ་ཉིད་ཀྱི་ནི་བཤང་གཅི་དང༌། །ཁ་ཆུ་སྒོ་ང་ལུས་རུལ་སྐྱེས། །ནད་ནི་རེ་རེ་འདུས་པ་དང༌། །ལྡན་པའི་སྲིན་བུའི་དུག་རྣམ་བཞི། །རླུང་གི་སྲིན་བུས་ཟིན་གྱུར་ན། །ཤས་ཆེར་ན་ཞིང་ཟུག་པར་བྱེད། །མེ་ཡི་སྲིན་བུས་འཛག་པ་ཆུང༌། །ཚ་ཞིང་དམར་ལ་ཤུ་བ་མཆེད། །བ་ལུའི་འབྲས་བུ་སྨིན་པའམ། །འབྲ་གོའི་འབྲས་བུ་སྨིན་པ་འདྲ། །བད་ཀན་ཤས་ཆེས་ནད་ཚབས་ཆུང༌། །ཨུ་དུམ་
ཝཱ་ར་སྨིན་པ་འདྲ། །ཤས་ཆེར་འཛག་པའོ་འདུས་པ་ཡི། །མཚན་ཉིད་ཐམས་ཅད་ལྡན་པ་དང༌། །ཤུགས་ནི་སྤྲུལ་དང་འདྲ་བ་དང༌། །སྐྲང་བ་འཕེལ་ཞིང་ཁྲག་དྲི་མ་མནམ། །མགོ་དང་མིག་ལྕི་བརྒྱལ་མགོ་འཁོར། །དབུགས་མི་བདེན་སྤང་བར་བྱ། །ཀུན་ཏུ་སྐྲང་བ་ལྟེ་བ་ཅན། །ཚབ་གཡོ་ཞིང་ཡི་གེ་འཆུས། །སྡིག་པའི་དུག་ནི་རྣོ་བ་སྟེ། །དང་པོར་མེ་ལྟར་སྲེག་པར་བྱེད། སྟེང་དུ་མྱུར་དུ་མཆེད་བྱེད་ཅིང༌། །མཆེ་བ་འོག་ཏུ་འདུག་པ་ཡིན། །ཟིན་མ་ཐག་ནི་རབ་ན་གནག །གས་པ་སྙམ་དུ་སེམས་ཤིང་ཟུག །དེ་ནི་ལྕི་བ་སོགས་རུལ་དང༌། །དུག་གིས་ཕོག་སོགས་རུལ་བ་དང༌། །སྤྲུལ་རུལ་པ་ལས་སྐྱེས་པ་ཡི། །དུག་ཚབས་ཆུང་དང་འབྲིང་དང་ཆེ། །ཚབས་ཆུང་སེར་ཞིང་དཀར་དང་གནག །རྩུབ་དང་ཕྲ་ཞིང་གཟིག་མདོག་ཅན། །སྤུ་དྲང་ཚིགས་ནི་དམར་བ་དང༌། །དམར་ཞིང་ལྟོ་བ་དཀར་བ་ཡིན། །བར་མ་ལྟོ་རུ་ཚིགས་གསུམ་པ། །རྐེད་པ་སེར་སྐྱ་དམར་བ་ཡིན། །དུག་ཆེ་སེར་སྐྱ་ཕྲ་བ་དང༌། །རི་མོ་ཅན་ལ་ཁྲག་འདྲ་ཞིང༌། །མེ་འདྲ་ཚིགས་ནི་གཉིས་སམ་གཅིག །ལྟོ་བ་དཀར་ཞིང་དམར་རམ་གནག །དེས་ཟིན་ལྕེ་ནི་སྐྲངས་པ་དང༌། །ལུས་རེངས་རིམས་ཀྱིས་ཉེན་པ་དང༌། །བུ་ག་ལས་ནི་ཁྲག་ནག་སློན། །དབང་པོའི་དོན་ནི་མི་ཤེས་ཤིང༌། །རྡུལ་ཞིང་བརྒྱལ་ལ་ཁ་སྐོམ་དད། །རྨོངས་ཤིང་ནད་ཀྱིས་ཉེན་པ་དང༌། ཤ་ནི་ཞིག་པར་བྱེད་པ་སྟེ། །ཕལ་ཆེར་སྲོག་ནི་འདོར་བར་བྱེད། །མཆུ་སྦོམ་པ་ཡི་ཁ་ཡིས་ནི། །འདེབས་ཤིང་གསོར་རུང་སྡིག་པ་ལས། །ལྷག་པར་ན་བྱེད་ལུས་རེངས་ཤིང༌། །མཚན་གྱི་སྦུབས་ནི་ལྡང་བ་དང། །ལུས་ནི་རྡུལ་བར་བྱེད་འགྱུར་ཞིང༌། །སོས་འདེབས་ཆུ་གྲང་སྙམ་དུ་སེམས། དེ་ཉིད་རྔ་མོ་དུད་ཀ་དང༌། །མཚན་མོ་རྒྱུ་བས་མཚན་མོ་ཅན། །སྲིན་བུ་རླུང་མཁྲིས་ཤས་ཆེ་ཞིང༌། །རྔ་མོ་བྱ་བ་བད་ཀན་ཅན། །རྔ་མོ་དུད་པ་ཞེས་བྱ་བ། །ཕལ་ཆེར་རླུང་ཤས་ཆེ་བ་ཡིན། །ནད་ནི་གང་དང་གང་གི་ནི། མཚན་མ་ཤས་ཆེ་བ་ལས་བརྟགས། །དེ་དང་དེ་ལས་གསོ་བའི་སྨན། །ཡོན་ཏན་མི་མཐུན་པ་ཡིས་གསོ། །སྙིང་གཟེར་སྟོང་རླུང་གིས་རེངས་ཤིང༌། །རྩ་མི་སྣང་ཞིང་རུས་ཚིགས་ན། །མགོ་འཁོར་ལུས་བཅིངས་སྙམ་དུ་སེམས། །མདོག་གནག་རླུང་ལས་གྱུར་པའི་དུག །དྲན་ཉམས་
དབུགས་ནི་ཚ་བར་བྱེད། །སྙིང་ཚ་ཁ་ནི་ཁ་བྲོ་ལ། །ཤ་འགགས་སྐྲང་པར་བྱེད་པ་དང༌། །ཁྲག་སེར་བ་ནི་མཁྲིས་པ་ཅན། །སློན་ཞིང་སྙིང་ན་ཡིག་འཆུས། །ཁ་ཆུ་འཇུག་ཅིང་ཆོམ་པས་འདེབས། །གྲང་བཅས་ཁ་ནི་མངར་བར་བྲོ། །བད་ཀན་ཤས་ཆེའི་དུག་ནད་ཡིན། །འབའ་ཆས་རྨ་ནི་བསྐུ་བ་དང༌། །རླུང་སེལ་ཏིལ་མར་གྱིས་བསྐུ་དང༌། །སྦུ་གུ་མ་སྨིན་འབྲུ་དུགས་དང༌། །བརྟས་པར་བྱ་བའི་ཆོ་གས་ཕན། །མཁྲིས་པ་ཅན་ལ་སྨན་ཆུ་བླུགས། །ཤིན་ཏུ་གྲང་བའི་ལྡེ་གུས་བསྐུ། །བད་ཀན་ཅན་ལ་བཞར་ཞིང་བཅད། །དུགས་དང་སྐྱུག་སྨན་བཏང་བས་གསོ། །སྲིན་བུ་རྣམ་པ་གསུམ་པོ་ལ། །གསོ་བ་རྣམ་པ་གསུམ་པོས་ཕན། །དུགས་དང་བསྐུ་དང་སྨན་ཆུ་བླུགས། །ཕལ་ཆེར་དྲོ་འཇམ་གཏང་བར་བྱ། །གཞན་དུ་བརྒྱལ་དང་མཆེ་བ་ཡིས། །རྣག་དང་འདྲུལ་བར་བྱེད་མ་གཏོགས། །མི་སྐྲ་ཡུངས་ཀར་སེར་པོ་དང༌། །བུ་རམ་རྙིང་པའི་དུད་པས་བདུག །དུག་དང་མཆེ་བའི་དུག་ཀུན་ལ། །མཆོག་ཏུ་ཕན་པར་འདྲོ་བ་སྐྱོང་འཆང༌། །དུག་སེལ་སྨན་ནི་ཐམས་ཅད་དང༌། །སྦྱང་བའི་ལས་ཀྱང་བྱ་བ་ཡིན། །སྲིན་བུ་སྡིག་པ་མི་བཟད་དུག །འབུས་ཟིན་སྤྲུལ་གྱིས་ཟིན་ལྟར་གསོ། །ཏན་དུ་ལི་ཡ་ཆ་མཉམ་པའི། །དུར་བྱིད་དང་ནི་ཞུན་མར་བླུད། །འབུ་ཡི་དུག་གིས་གངས་ཅན་ལྟར། །བསྐྱོད་པར་ནུས་པ་མ་ཡིན་ནོ། །འོ་མ་ཅན་ཤིང་ལྔ་གུས་བསྐུ། །སྦྱངས་བྱས་སྲིན་བུའི་དུག་སེལ་བྱེད། །མུ་ཏིག་ལྡེ་གུས་བསྐུས་ན་ཡང༌། །སྐྲང་དང་དུག་དང་ཚ་བ་སེལ། །ཤུ་དག་ཤིང་ཀུན་བྱི་དང་ག །རྒྱམ་ཚ་ཧ་ཏི་པི་པི་ལིང༌། །བ་ཐ་བོང་ང་ཚ་བ་གསུམ། །འདྲོ་བ་སྐྱོང་གིས་ནི་བཤད་པ་ཡིན། །ཡན་ལག་བཅུ་པའི་དུག་སྨན་ནི། །འདྲོ་བ་སྐྱོང་གིས་ནི་བཤད་པ་དག །བླུད་ན་སྲིན་བུའི་དུག་ཀྱང་སེལ་།སྡིག་པའི་དུག་གིས་འཕྲལ་ཟིན་ལ། །འཁོར་ལོས་བཙིར་བའི་ཏིལ་མར་བསྐུ། །ས་ལ་པརྞི་བསྐོལ་བ་ཡི། །དྲོ་འཇམ་ཡང་ན་གཞན་དག་བླུགས། །རྒྱམ་ཚ་དང་ནི་བཅས་པ་ཡི། །ཞུན་མར་ཡང་དང་ཡང་དུ་བླུགས། །ཡང་ན་སྐྱུར་རྩབས་དྲོ་འཇམ་མམ། །རྒྱམ་ཚ་འོ་མར་བཅས་པ་བླུགས། །མར་དང་བརྔོས་པའི་གོ་སྙོང་དང༌། །རྒྱམ་ཚར་བཅས་པས་དཀྲི་བར་བྱ། །མཆེ་བས་ཟིན་བ་དུགས་
བྱས་ལ། །ཞལ་ཞལ་བཏབ་སྟེ་འབྲས་བུ་གསུམ། །སེར་པོ་གཉིས་དང་ཚ་བ་གསུམ། །ཤིར་ཤའི་མེ་ཏོག་བསྐུ་བར་བྱ། །རྒྱམ་ཚ་ཁ་ལུང་བ་གཅིན་སྐྱུར། །བྱེའུ་རུག་པའི་རྩེ་མོ་བཏགས། །འབའ་ཆའམ་ལྕི་བ་དྲོ་འཇམ་ཙམ། །བསྐུས་ནའང་ཕན་པར་འགྱུར་བ་ཡིན། །བཏུང་བ་ཞུན་མར་སྦྲང་རྩིར་བཅས། །ཡང་ན་འོ་མར་ཁ་ར་བཏབ། །ཕུག་རོན་རྟུག་པ་ཨ་རུ་ར། །རྒྱ་སྤོས་བཅའ་སྒ་ཁ་ལུང་གི །ཁུ་བ་དང་སྐྱར་བླུད་པ་ནི། །སྡིག་པས་ཟིན་པའི་སྨན་མཆོག་ཡིན། །རྔ་མོའི་སོ་ནི་ཆུ་བལ་བཅས། །སྡིག་པའི་དུག་ནི་འཇོམས་པར་བྱེད། །ཤིང་ཀུན་བ་ལ་ཁ་ལུང་གི །ཁུ་བ་དང་སྦྱར་ལྡེ་གུ་དང༌། །མིག་སྨན་རི་ལུར་བྱས་ན་ནི། །སྡིག་པའི་དུག་ནི་སལ་མཆོག་ཡིན། །ཀ་རཉྫ་དང་ཨརྫུ་ན། །གི་རི་ཀརྞི་སེ་ལུ་དང༌། །ཤིར་ཤའི་མེ་ཏོག་དུག་མོ་ཉུང༌། །ཞོག་ཆུ་དང་བཏགས་བསྐུས་ན། །སྡིག་པའི་དུག་ནི་སེལ་བར་བྱེད། །གང་ཞིག་རྨུགས་ཤིང་རྔམ་པ་འཐོན། །བླ་ཞིང་མི་བཟད་ན་གྱུར་པ། །དེ་ལ་ཡུང་དང་ཨ་རུ་ར། །བཙོད་དང་བོད་ད་པི་པི་ལིང༌། །བིལ་བ་གཞོན་ནུ་ན་ལེ་ཤམ། །བཱ་ཏ་ཀ་ཡི་ཁུ་བར་བཏགས། །ལྡེ་གུས་བྱུགས་ན་ཕན་པ་ཡིན། །སྦྲང་མ་གདུག་པའི་དུག་ཀུན་ལ། །ཞོ་དང་མར་ནི་བླུད་བྱ་ཞིང༌། །གཏར་ག་གདབ་ཅིང་སྣ་སྨན་དང༌། །མིག་སྨན་གྱི་ནི་ཆོ་ག་བྱ། །དྲོ་ཞིང་སྣུམ་དང་སྐྱུར་བ་དང༌། །རླུང་འདོམས་ཁ་ཟས་སྦྱིན་པར་བྱ། །དོང་གྲ་བྱི་བའི་རྟུག་པ་དང༌། །ཁ་ལུང་ཁུ་བསལ་བ་དང༌། །རྒྱམ་ཚ་པུ་ཤེལ་ཙེ་སྦྱར་བའི། །ལྡེ་གུས་དང་མའི་དུག་མྱུར་འཇོམས། །སྡིག་པས་ཟིན་པའི་ཐ་མར་ནི། །དུག་ནི་ཤས་ཆེར་ལངས་གྱུར་པར། །ཟིན་པའི་རྨ་ལ་དུག་གིས་བསྐུ། །ཨུཙྪེ་ཊིཾ་ཀའི་གསོ་བའང་འདི། །གླང་པོ་ཆེ་ཡི་རྟུག་པའི་སྟེང༌། །རོ་ཧི་ཤའི་རྩ་སེའུའི་ཆུ། །ལྡེ་གུར་བྱས་བཏགས་བསྐུས་ན་ནི། །འདི་ནི་སྦྲང་མའི་དུག་འཇོམས་མཆོག །ཤིར་ཤའི་ས་བོན་ཨརྒ་ཡི། །འོ་མས་ལན་གསུམ་བསྒོས་པ་ནི། །པི་པི་ལིང་གི་ཕྱེ་མར་བསྲེས། །དུག་སྨན་འདིས་ནི་སྲིན་བུའི་དུག །སྦྲུལ་དང་ལུ་དབྱི་བ་ཡི། །དུག་ནི་སེལ་བར་བྱེད་པ་ཡིན། །ཤིར་ཤ་ཀ་རཉྫ་ཡི་ས་བོན་དང༌། །གུར་གུམ་རུ་རྟ་ལྡོང་
རོས་བཅས་པ་ཡི། །དུག་སྨན་འདིས་ནི་མཚན་རྒྱུའི་སྡིག་པས་ཟིན། །སེལ་བར་བྱེད་པ་ཡིན་པར་རྒྱལ་བས་གསུངས། །སྲིན་བུ་ལས་ནི་རབ་གདུག་པ། །བ་ནི་བཅུ་དྲུག་ཡིན་པར་བཤད། །གཞན་དག་ཉི་ཤུ་རྩ་བརྒྱད་འདོད། །ཁ་ཅིག་དེ་བས་མང་བར་འདོད། །ཉི་མའི་འོད་ཀྱི་རྗེས་འབྲང་བ། །སྟོང་ཕྲག་ཡོད་ཅེས་གཞན་དག་འཆད། །བླ་བརྣན་གཟུགས་ནི་མང་གྱུར་པ། །དུག་ཅན་པ་ནི་གཅིག་པུར་འདོད། །དེ་ཡི་གཟུགས་དང་མིང་དག་ནི། །ཤིན་ཏུ་འདྲེས་པས་ཤེས་པར་དཀའ། །གནས་ཀྱི་ངེས་པ་ཡོད་མིན་པས། །དེ་ཕྱིར་ནད་ལས་བཤད་པར་བྱ། །ནད་གཞི་སོ་སོའི་གསོ་བ་དཀའ་།འདུས་པ་ལས་གྱུར་གསོར་མི་རུང༌། །དེས་ཟིན་མཁྲིས་གྱུར་ཚ་བ་དང༌། །སྐོམ་དད་ཆུ་བུར་རིམས་ཀྱིས་འདེབས། །རྨོངས་བག་རབ་ཚ་དམར་སེར་མདོག །རྣགས་ཤིང་རྒུན་འབྲུའི་འབྲས་བུ་འདྲ། །བད་ཀན་ལས་གྱུར་སྲ་ཞིང་སྐྱ། །བ་རུ་ཤ་ཀའི་འབྲས་བུ་འདྲ། །གཉིད་ཆེ་གྲང་རིམས་ལུད་པ་ལུ། །ཤིན་ཏུ་གཡའ་བར་བྱེད་པ་ཡིན། །རླུང་གྱུར་རྩུབ་ཅིང་གནག་པ་དང༌། །ཚིགས་ན་རིམས་ཀྱིས་འདེབས་པར་བྱེད། །དེ་ཡི་དབྱེ་བ་ནད་ཀྱི་ནི། །རང་གི་མཚན་ཉིད་ལས་ཤེས་བྱ། །གསོར་མི་རུང་བ་སྙིང་ཚ་ཞིང༌། །ལུད་པ་སྐྱིགས་བུ་མགོ་ནད་དང༌། །འབྲུམ་ཕྲན་དཀར་དང་སེར་དང་གནག །དམར་དང་སྐྱ་བ་ལས་འབྱུང་འགྱུར། །འདར་ཞིང་སྐྲངས་ལ་ཚ་བ་དང༌། །སྐོམ་དད་ལང་ཞིང་སྣ་འཆུས་ལ། །མཆུ་གནག་སོ་ནི་གཡོ་བ་དང༌། །རྒྱབ་དང་མིད་པ་བཅོམ་སྙམ་སེམས། །འཛམ་བུའི་འབྲས་བུ་སྨིན་འདྲ་བའི། །ཁྲག་ནི་མཆུས་བལྡགས་རྨ་ལས་འཛག །འདུས་གྱུར་མཚན་ཉིད་ཀུན་ལྡན་ཞིང༌། །མིང་ནི་མང་པོར་གྱུར་པ་ཡི་།དེ་དུག་རྣོན་པོ་བར་མ་དང༌། །དམན་པའི་དབྱེ་བ་གསུམ་དུ་འགྱུར། །མ་བཅོས་ཞག་བདུན་ཞག་བཅུ་དང༌། །ཟླ་བ་ཕྱེད་ཀྱི་རིམས་ཀྱིས་གསོད། །བ་དང་མཆུ་རིངས་ཐམས་ཅད་ཀྱང༌། །གླང་ཤུ་ཀོར་ཀོར་པོར་བྱེད་ཅིང༌། །དཀར་དང་གནག་དང་དམར་དང་སེར། །གནག་པའམ་འཇམ་ཞིང་མཐོ་བ་དང༌། །དབུས་སུ་གནག་པའམ། སྔོ་བ་ལ། །མཐའ་མ་དྲ་བ་ལྟ་བུས་ཁེབས། །མཆེད་ཅིང་སྐྲང་བར་བྱེད་པ་དང༌། །ཚ་ཞིང་མང་དུ་ན་བ་དང༌། །རིམས་འདེབས་མྱུར་དུ་རྣགས་ཤིང་འདྲུལ་།རུལ་ཞིང་གས་པར་བྱེད་པ་དང༌། །རྣག་གིས་གང་དུ་རེག་གྱུར་
པའི། །ཕྱོགས་དེར་ཡང་ནི་རྨ་སྐྱེད་བྱེད། །དབུགས་དང་མཆེ་བ་བཤད་གཅི་དང༌། །ཁུ་ཆུ་ཁ་ཆུ་སེན་མོ་ཁྲག །བརྒྱད་པོ་གནོད་བྱེད་ཁྱད་པར་དུ། །དུག་ནི་ཁ་ལ་གནས་པ་ཡིན། །བ་ནི་ལྟེ་བ་ཡན་ཆད་འཛིན། །སྲིན་བུ་སྟོད་སྨད་ཀུན་དུ་གནོད། །དེ་གནོད་བྱས་པའི་གསོལ་སོགས། །ལུས་ལ་རེག་ན་ནད་སྐྱེད་བྱེད། །བ་དང་སྲིན་བུ་ལས་གྱུར་དུག །ཉིན་ཕྱེད་པར་དུ་ཚོར་མི་འགྱུར། །དེ་ནས་དང་པོའི་ཉིན་ཞག་ལ། །ཁབ་ཀྱིས་གཙགས་བ་སྙམ་དུ་སེམས། །མདོག་མི་གསལ་ཞིང་གཡོ་བ་དང༌། །ཅུང་ཟད་གཡའ་ཞིང་ནད་དང་ལྡན། །གཉིས་པར་མཐའ་མ་ཤིན་ཏུ་མཐོ། །འབྲུམ་བུ་ཕྲ་མོས་ཁྱབ་པ་འདྲ། །མདོག་གསལ་གྱུར་ན་དབུས་དམའ་ཞིང༌། །གཡའ་ཞིང་རྨེན་བུ་ལྟ་བུར་སྣང༌། །གསུམ་པར་རིམས་བཅས་སྤུ་ལྡང་ཞིང༌། །འཁོར་ལིང་དམར་པོར་སྣང་བ་དང༌། །ཁམ་ཕོར་གཟུགས་འདྲ་ཕལ་ཆེར་ནི། །བ་སྤུའི་བུག་འཛག་པར་འགྱུར། །ཉིན་ཞག་བཞི་པར་ཆེར་སྐྲངས་ཤིང༌། །མགོ་འཁོར་ལུས་ཚ་དབུགས་མི་བདེ། །ལྔ་པར་དུག་ལྡང་ལས་གྱུར་པའི། །ནད་ནི་དེ་དང་དེ་དག་བསྐྱེད། །དྲུག་པར་གནད་དུ་ཁྱབ་པར་བྱེད། །བདུན་པར་སྲོག་ནི་འཇོམས་པར་བྱེད། །དེ་ལྟར་དུག་ནི་རྣོན་པོ་དང༌། །བར་མ་དམན་པ་དབྱེ་བར་བྱ། །དེ་ནས་ཉིན་ཞག་ཉི་ཤུ་ནི། །གཅིག་ན་ཡོང་ཡེ་ཞི་བར་འགྱུར། །དེ་འོག་པ་ཡིས་ཟིན་པ་ནི། །མཚན་གྱིས་རྨ་ནི་གནོད་པར་བྱ། །འཛམ་བུའི་མཆུ་ལ་སོགས་པས་བསྲེག །མཁྲིས་པ་ལས་གྱུར་བསྲེག་མི་བྱ། །རྩུབ་ཅིང་སྤུ་ནི་གྱེས་པ་དང༌། །གནད་དང་ཚིགས་ལ་སོགས་ལ་གནས། །ཟིན་ནས་ཀུན་ཏུ་ཁྱབ་གྱུར་པ། །གཅད་པར་མི་བྱ་བསྲེག་མི་བྱ། །བསྲེག་པ་དུག་སྨན་རྒྱམ་ཚ་དང༌། །སྦྲང་རྩིར་སྦྱར་བས་བསྐུ་བར་བྱས། །དེ་རྗེས་འོ་མ་ཅན་ཤིང་བསྐོལ། །སྨན་ཁུ་ཤིན་ཏུ་བསིལ་མོ་བླུགས། །རྔབས་རྭ་སོགས་སམ་གཏར་ག་ཡིས། །ཐམས་ཅད་ལ་ནི་ཁྲག་གང་དབྱུང་བྱ། །དེ་ནས་བསིལ་སྨན་བསྐུ་བླུགས་བྱ། །སླེ་སྨན་ཏ་ཀ་ཨ་ཤྭདྠ། །བ་རུ་ར་དང་བྲི་ཡང་ཀུ། །ཤུག་པ་སེར་གཉིས་སྦྲང་རྩིར་སྦྱར། །བ་དང་སྲིན་བུ་ལ་སོགས་པའི། །དུག་འཇོམས་ལས་ནི་ཐམས་ཅད་བྱེད། །སེར་པོ་རྣམ་གཉིས་རྨ་ཤིང་བཙོད། །པདྨ་གེ་སར་རྒྱ་སྤོས་ནི། །སྦྲང་རྩི་མར་སྦྱར་ཙམ་པ་ཀ །སྔ་མ་བས་ཀྱང་ཡོན་ཏན་ལྷག །ལྕི་ཁུ་བཙིར་
དང་ཀར་དཀར། །ཨ་པ་མརྒ་ལྡོང་རོས་དང༌། །བ་བླ་སྐྱེར་པ་བྱ་མ་ཀ །ཡུག་སྣམ་སྦྲང་རྩེ་མར་དེ་བཞིན། །རྒྱ་སྤོས་ན་ལེ་ཤམ་སུག་སྨེལ། །རུ་རྟ་ཤིང་མངར་སྦྲང་རྩི་མར། །སྦྱར་བའི་སྨན་ནི་མནད་ར། །རྒྱ་སྤོས་སེང་ཕྲོམ་པུ་ཙེ་ཤེལ། །ཤུ་དག་པ་ཐ་སུག་སྨེལ་དང༌། །གུར་གུམ་སྤོས་དང་ལྡང་དེ་བཞིན། ནད་གཞི་མང་ལ་དུག་འཛོམས་པའི། །སྦྱང་བ་བྱས་པས་གསོ་བར་བྱ། །ཤིང་མངར་དང་ནི་པོ་སོན་ཆ། །ཀོ་ཤ་ཏ་ཀི་ཨང་ཀོ་ལ། །སིན་དུ་བར་འབྲས་ཆུར་སྦྱར། །འཐུངས་ན་བད་ཀན་ལས་གྱུར་དུག །མྱུར་དུ་སློན་པར་བྱེད་པ་ཡིན། །ཤིར་ཤའི་ལོ་མ་མེད་དང༌། །རྩ་བ་འབྲས་བུ་ཨང་ཀོ་ལའི། །རྩ་བར་བཅས་པའང་དེ་བཞིན་ནོ། །འབྲས་བུ་གསུམ་དང་ནི་ལི་ནི། །དུར་བྱིད་ལ་སོགས་བཀྲུ་སྨན་གཏང༌། །སྐྲང་དང་ཚ་སོགས་ཞི་གྱུར་ན། །རྨ་ཡི་ལྟེ་བ་དབོག་པར་བྱ། །བ་བླ་ལེ་བརྒན་རྩིའི་མེ་ཏོག །ཁྲོན་བུ་བྱི་བའི་རྟུག་པ་དང༌། །དུར་བྱིང་རྒྱམ་ཚ་དན་དང་སྦྱང༌། །ལྟེ་བ་འབྱིན་པར་བྱེད་པ་ཡིན། །དེ་བཞིན་ཨུ་ཏ་མ་ཀ་རའི། །རྩ་བ་སྨིན་པའི་ཤུན་བཅས་པའི། །རྒྱམ་ཚ་རུ་རྟ་པུ་ཙེ་ཤེལ། །ད་ནད་པ་ཡས་སྱ་སྦྱར་བ་འམ། །ར་ཛ་ཀོ་ཏ་ཀའི་རྩར། །དར་བའི་ཚིགས་མའང་སྦྱར་བར་བྱ། །ལྟེ་བ་བཅད་པའི་དུས་སུ་ནི། །དུག་སེལ་བ་ཡིས་བརྟ་བར་བྱ། །སྣུམ་ཆོས་མ་ལུས་བྱ་བ་ནི། །ཞུན་མར་ཉིད་ཀྱིས་བྱ་བ་ཡིན། །ཏིལ་མར་གྱིས་ནི་རྩྭ་སོགས་ལ། །མེ་མཆེད་ལྟ་བུར་དུག་འཕེལ་བྱེད། །བེ་ཀང་ཀ་ཏ་བ་ལི་ཀ །ཐལ་ཏྲེས་གླ་སྒང་སྤྲི་ཀ་དང༌། །ཙནྡན་ཉ་ལྕིབས་སོན་ཀ །ཨུཏྤལ་རྒྱ་སྤོས་ཤིང་མངར་དང༌། །ཤིང་ཚ་ཤུག་པ་ན་གུ་ལི། །པོ་སོན་ཆའི་རྐང་ལྷན་ཅིག་སྦྱར། །སྐྱེར་པ་གླ་སྒང་སར་པཀྵི། །བཅའ་སྒ་པི་པི་ལིང་རྩ་བ། །པི་པི་ལིང་དང་ཙི་ཏྲ་ཀ །བ་རུ་ན་དང་ཨ་ཀ་རུ། །བིལ་བ་ནིམ་པ་པ་ཏ་ལི། །རུ་རྟ་ནཱ་ག་གསར་དང༌། །སེའུ་ལུ་ལྷན་ཅིག་སྦར་བ་དང༌། །བིལ་བ་ཙནྡན་ཨུཏྤལ། །རྒྱ་སྤོས་བཅའ་སྒ་པི་པི་ལིང༌། །ལྕམ་པ་ནི་མ་པ་རུ་རྟ་དང༌། །ཆུ་སྲིན་སྡེར་མོ་ཛི་བན་ཏི། །ག་བྲའི་རྩ་བ་པ་ཏ་ལི། །ཛི་བན་ཏི་དང་པོ་སོན་ཆ། །ཤིང་ཚ་སྦྱར་བ་དེ་དག་ནི། །མིག་སྨན་སྣར་བླུགས་བྱུག་པ་དང༌། །སྨན་ཆུ་བླུགས་པའི་སྦྱོར་བ་ཡིས། །མཁྲིས་པ་བད་ཀན་རླུང་གྱུར་པའི། །ལུ་ཏའི་དུག་ནི་ཇི་སྙེད་པ། །ཚུལ་
ཁྲིམས་ལ་གནས་ངན་འགྲོ་བཞིན། །འདི་ཡིས་དུག་ནང་ཀུན་འཇོམས་བྱེད། །སེང་ཕྲོམ་ཤུག་པ་པདྨ་གེ་སར་དང༌། །ཙནྡན་དམར་སེར་པྲི་ཡང་ཀུའི་མེ་ཏོག །པདྨ་པུ་ཤེལ་ཙེ་དང་པ་ཡ་སྱའི། །སྦྱོར་བ་ཀུན་གྱིས་བ་ཡི་དུག་ཀུན་འཇོམས། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་སུམ་ཅུ་བདུན་པའོ།། །།དེ་ནས་བྱི་བ་དང་ཨ་ལཾ་ཀའི་དུག་གསོ་བའི་ལེའུ་བཤད་པར་བྱའོ། །ཁུ་ཆུ་ཅན་དང་མི་བརྟན་བུ། །རྒོད་དང་སྒྲ་ཅན་པགས་པ་དང༌། །རྙིང་པའི་སོ་དང་ཁུ་བྱུག་དང༌། །སེར་སྐྱ་དང་ནི་ནག་པོ་དང༌། །དམར་སེར་ཁྲ་བོ་དཀར་པོ་དང༌། །ཐིབ་སྐྲ་དཀར་ཕྱི་བ་དང༌། །ཕུས་པ་དང་ནི་བྲ་བྱི་སྟེ། །བྱི་བའི་དབྱེ་བ་བཅོ་བརྒྱད་ཡིན། །གང་དུ་འདི་ཡི་ཁུ་ཆུས་ཕོག །ཁུ་བས་ཕོག་དང་རེག་པ་ནི། །ལུས་ཀྱི་ལུས་ལ་རེག་པ་དེར། །ཁྲག་ལ་གནོད་ཅིང་མདོག་སྐྱ་ལ། །ཐོར་བུ་རྨེན་བུ་དྲི་མནམ་དང༌། །ཤུ་བ་ཀོར་ལིང་ཡིག་འཆུས། །མགོ་འཁོར་སྐྲངས་རིམས་རབ་ཏུ་ན། །ཉམ་ཆུང་འདར་ཞིང་ལྷུ་ཚིགས་ན། །སྦུ་ལྡང་དྲན་ཉམས་ཁྲག་འཛག་དང༌། །ཡུན་རིང་དུ་ནི་གནས་པར་བྱེད། །བད་ཀན་ཅན་གྱི་བྱི་བ་ཡི། །ཕྲུ་གུ་མང་རེག་སྐོམ་སློན་འགྱུར། །བྱི་བ་འཁྲིག་སྤྱོད་དུག་གསོ་དཀའ། །ཡང་དང་ཡང་དུ་ལྡང་བར་བྱེད། །ཡན་ལག་ཀུན་སྐྲངས་མདོག་མི་སྡུག །རྣགས་ཤིང་འོན་ལ་རིམས་ཀྱིས་འདེབས། །མགོ་ལྕི་ཁ་ཆུ་ཁྲག་འབྱུང་ཞིང༌། །སློན་པ་གསོད་ཀའི་མཚན་ཉིད་ཡིན། །ཕུས་པས་ཟིན་པ་དེ་དྲི་བྲོ། །ལྒང་པ་སྐྲངས་ཤིང་ཆུ་མདོག་ཉམས། །སྦྲང་རྩི་འདྲ་བའི་རྨེན་བུས་ཁྱབ། །ཁྱེའི་དུག་བད་ཀན་ཤས་ཆེར་འཁྲུགས། །འདུ་ཤེས་རྒྱུ་བའི་རྩ་མང་གནས། །གནོད་ཅིང་འཁྲུག་པར་བྱེད་པ་དང༌། །ལུས་ཟུངས་ལ་ནི་མི་བཟད་གནོད། །ཁ་ཆུ་འཛག་དང་ལོང་དང་འོ་ན། །ཀུན་ཏུ་རྒྱུག་པར་བྱེད་པ་དང༌། །མཇུག་མ་འགྲམ་པ་ཕྲག་གོང་ལྷོད། །མགོན་གདོང་ནི་བུད་པ་ཡིན། །དེ་ཡི་སོ་ཡིས་ཟིན་ན་རྨ། །ཚོར་བ་ཆུང་ཞིང་ཁྲག་རྣག་འཛག །མགོ་སྙིང་ན་ཞིང་རིམས་འདེབས་རེངས། །དེ་རྗེས་སྐོམ་དང་བརྒྱལ་བར་འགྱུར། །འདི་ཡིས་གདུག་ཅིང་མཆེ་བ་ཅན། །ཅེ་སྦྱོང་དོམ་དང་དྲད་དང་གུང༌། །སྟག་དང་སྦྱང་ཀི་ལ་སོགས་པ། །གཞན་དག་ཀྱང་ནི་ཤེས་པར་བྱ། །
གཡའ་ཞིང་ཟུག་ལ་མདོག་མི་སྡུག །ཚོར་བ་མེད་གནས་རིམས་མགོ་འཁོར། །ཚ་ཞིང་དམར་ལན་ཞིང་གནག །སྐྲང་ཞིང་རྨེན་བུ་སྐྱེ་ཟུག་འཁུམས། །རྨ་ནི་འགགས་ཤིང་འབྲུམ་བུ་འབྱུང༌། །ལྟེ་བ་ཅན་དུ་ཟླུམ་པོར་འགྱུར། །ཀུན་ཏུ་དུག་བཅས་མཚན་མ་འདི། །དུག་མེད་དེ་ལས་བཟློག་པ་ཡིན། །གང་གིས་བཟུང་བ་དེའི་སྤྱོད་ཚུལ། །སྒྲ་སྒྲོགས་རྒྱུ་མེད་པར་དེའི་གཟུགས། །ཆུ་དང་མེ་ལོང་སོགས་མཐོང་འཆི། །མ་བཟུང་བར་ཡང་སྒྲ་དང་ནི། །མཐོང་བས་སྡང་བར་བྱེད་པ་ན། །ཆུ་ཡིས་སྐུག་ཅེས་བྱ་བ་སྟེ། །ཟིན་པས་དེ་ཡང་སྤང་བར་བྱ། །བྱི་བའི་དུག་གིས་ཟིན་མ་ཐག །རྨ་ནི་མདེའུ་བསྲེགས་པས་བསྲེག །ཡང་ན་མེ་ལོང་དག་གིས་བྱ། །གཞན་དུ་ལྟེ་བར་མི་བཟོད་ན། །བསྲེགས་ནས་རྨ་ལས་ཁྲག་དབྱུང་ཞིང༌། །ཞལ་ཞལ་བྱས་ལ་ཤིར་ཤ་དང༌། །ཡུང་བ་རྒྱ་སྤོས་གུར་གུམ་དང༌། །སླེ་ཏྲེས་ཀྱི་ནི་ལྡེ་གུས་བསྐུ། །ཁྱིམ་གྱི་དུད་པ་སྐྱེར་པ་དང༌། །རྒྱམ་ཚ་དང་ནི་བཙོད་ངག་གི །ལྡེ་གུས་བྱི་བའི་དུག་སེལ་ཞིང༌། །ལྟེ་བ་འབུར་བའང་འཇོམས་པར་བྱེད། །དེ་ནས་སྐྱུར་བས་བཀྲུས་ནས་ནི། །གི་རི་ཀར་ཎི་པ་ལིན་དི། །བིལ་བའི་རྩ་བ་སླེ་ཏྲེས་དང༌། །ཆུ་དང་བཏགས་པའི་ལྡེ་གུས་བསྐུ། །དུག་དང་སྐྲང་སེལ་སྨན་གཞན་དང༌། །ཡང་ན་གཏར་ག་མྱུར་དུ་གདབ། །ནི་ལི་ནི་བསྐོལ་ཤི་རི་ཤ་།ཨང་ཀོ་ལ་ཡི་ཁུ་བས་སློན། །ཀོ་ཤ་ཏ་ཀི་ཤིར་ཤ་དང༌། །ཛི་མུ་ཏ་ཀའི་འབྲས་བུ་དང༌། །པོ་སོན་ཆ་ནི་ཕྱེ་མར་བཏགས། །ཞོ་སྦྱར་བླུད་ལ་དུག་སློན་གཞུག །ཤུ་དག་རུ་རྟ་པོ་སོན་ཆའམ། །ཛི་བན་ཏི་ནི་བ་གཅིན་བཏགས། །ཆོ་ག་སྔ་མ་བཞིན་བླུད་ན། །དུག་གི་ནད་ནི་ཐམས་ཅད་སེལ། །དུར་བྱིད་ནི་ལི་ནི་དང་ནི། །འབྲས་བུ་གསུམ་གྱི་བཀྲུ་སྨན་བསྔགས། །ཤིར་ཤའི་སྙིང་པོའི་འབྲས་བུ་ཡིས། །མགོ་བོའི་བཀྲུ་སྨན་དག་ཀྱང་ཕན། །བ་ལྕིའི་ཁུ་བ་ཚ་བ་གསུམ། །ཕྱེ་མ་ཞིབ་བཏགས་ལྡེ་གུས་ཕན། །བ་ལང་ལྕི་བ་ཀ་པིད་ཏའི། །ཕྱེ་མ་སྦྲང་རྩིའི་ལྡེ་གུ་བཟའ། །ཏཎྜུ་ལི་ཡི་རྩ་བ་དང༌། །བསྐོལ་བའི་མར་ནི་བླུད་ནའང་ཕན། །ག་རི་ཀར་ཎི་སེར་པོ་གཉིས། །ཤིང་མངར་བཙོད་དང་སླེ་ཏྲས་ཕན། །ཐལ་ཏྲེས་རྩ་པ་མར་བསྐོལ་བ། །ཀ་པིང་ཏ་ཡི་རྣམ་ལྔའང་ཕན། །སིན་དུ་བ་ར་རྒྱ་སྤོས་དང༌། །ཤི་ཀྲུ་བིལ་བའི་རྩ་བ་དང༌། །ཤུ་དག་གཟེ་མ་
བ་སྤྲུ་བ། །ཛི་མུ་ཏ་དང་བཅས་པ་སྟེ། །དེ་རྣམས་ཁུ་བ་སྦྲང་རྩིར་བཅས། །བླུད་ནས་འབྲས་ཆན་སཱ་ལུ་ཞོ། །བྱིན་ན་བྱི་བའི་དུག་ནད་སེལ། །ཤར་པུང་གའི་ཕྱེ་མ་ནི། །དར་བར་སྦྱར་བ་བླུད་པ་འང་ཕན། །ཨཾ་ཀོ་ལ་ཡི་རྩ་བ་ནི། །ར་ཐུག་གཅིན་སྦྱར་ལྡེ་གུས་ནི། །བཏུང་དང་བསྐུ་བ་ལ་སྦྱར་ན། །བྱི་བའི་དུག་ཀུན་སེལ་བར་བྱེད། །ཀ་པིད་ཏ་ཡི་སྙིང་པོ་དང༌། །ཏིལ་ཀ་དང་ཏིལ་དང་ནི། །ཨཾ་ཀོ་ལ་ཡི་རྩ་བ་ནི། །བ་ཡི་འོ་མའམ་གཅིན་སྦྱར་བླུད། །ཏིལ་ཀའི་གདོང་ཡལ་ག་ཡི། །བ་ཡི་འོ་མ་སྦྱར་བ་བླུད། །ཡང་ན་ཤེཪྻ་ཀའི་རྩ་བ། །སྦྲར་རྩི་འབྲས་བུ་སྦྱར་བ་བླུད། །ཀུ་བ་ཁ་བོ་ཞག་གཅིག་ནི། །ཆུ་ལ་སྤངས་པའང་བླུད་པར་བྱ། །སིན་དུ་བ་རའི་རྩ་བ་དང༌། །བྱི་བའི་རུས་པ་བོང་ང་དཀར། །རྒྱ་སྤོས་ཆུར་བཏགས་སྣ་སྨན་སོགས། །སྦྱར་བས་བྱི་བའི་དུག་སེལ་བྱེད། །བྱི་བའི་དུག་ནི་ལྷག་ལུས་པ། །སྤྲིན་མཐོང་བས་ནི་ལྡང་བྱེད་པའམ། །ནད་ནི་འཕེལ་བར་བྱེད་པའི་རྒྱུ། །ཇི་ལྟ་བར་ནི་འཕེལ་བར་བྱེད། །དེ་ལ་གནས་སྐབས་ཐམས་ཅད་དུ། །གསོ་བ་ཐམས་ཅད་སྦྱར་བྱ་ཞིང༌། །རང་གི་གསོ་བར་གང་བཤད་དང༌། །དེ་བཞིན་ཉམས་པའི་དུག་སེལ་སྦྱོར། །ཨ་ལང་ག་ཡི་སོ་ཡིས་ཟིན། །མར་བསྐོལ་བ་ཡིས་བསྲེག་པར་བྱ། །དུག་སྨན་དེ་དང་དེ་བསྐུ་ཞིང༌། །མར་གྱི་སྙིང་པོ་བླུད་པར་བྱ། །འདི་ལ་ཨརྐའི་འོ་མར་བཅས། །བཀྲུ་སྨན་དག་ཀྱང་མྱུར་དུ་གཏང༌། །ཨཾ་ཀི་ལའི་རྩ་བྱང་ཕྱོགས་ཆུ། །སྲང་གསུམ་མར་ནི་སྲང་གཅིག་བླུད། །དྷ་དུ་ར་ཡི་འབྲས་བུ་དང༌། །གི་རི་ཀར་ཎི་བ་སྦུ་བ། །བསྐོལ་བའི་ཁུ་བ་བླུད་པར་བྱ། །ཏིལ་བཏགས་ལྡེ་གུ་ཨརྐ་ལྕགས། །འོ་མ་བུར་མ་བསྲེས་བྱིན་ནས། །སྤྲིན་སོགས་རླུང་གིས་གཏོར་བ་བཞིན། །ཨ་ལཾ་ཀ་ཡི་དུག་འཇོམས་བྱེད། །སྔགས་བཅས་སྨན་དང་རིན་ཆེན་བཅས། །ཞི་བར་བྱེད་པ་དག་ཀྱང་སྦྱར། །རྐང་བཞི་པ་དང་རྐང་གཉིས་པའི། །སོ་འམ་སེན་མོས་སྣད་གྱུར་པ། །སྐྲང་ཞིང་རྣགས་ལ་མདོག་དམར་ཞིང༌། །ཚན་ཆུ་སེར་འཛག་པ་ལ། །ཨ་ཤྭ་ཀརྞ་ཀད་ཕ་ལ། །ཧན་ས་པ་ཏི་གོ་ཇི་ཧ། །ཡུག་སྣམ་སེར་པོ་གཉིས་ཀྱིས་བསྡུ། །སོ་དང་སེན་མོའི་དུག་འཇོམས་བྱེད། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་སྟེ་སུམ་ཅུ་བརྒྱད་པའོ།། །།
ཡན་ལག་བརྒྱད་པའི་སྙིང་པོ་བསྡུས་པ་ལས། །མཆེ་བ་གསོ་བའི་ཡན་ལག་རྫོགས་སོ།། །།དེ་ནས་བཅུད་ཀྱིས་ལེན་གྱི་ལེའུ་བཤད་པར་བྱའོ། །ཚེ་རིང་དྲན་དང་ཡིད་གཞུངས་དང༌། །ནད་མེད་གཞོན་དང་ལང་ཚོ་དང༌། །གཟུགས་བཟང་མདོག་དང་སྐད་གསལ་དང༌། །ལུས་དང་དབང་པོའི་སྟོབས་སྐྱེད་ཅིང༌། །ཚིག་གྲུབ་རོ་ཙ་མདངས་ལྡན་པ། །བཅུད་ཀྱིས་ལེན་གྱིས་འཐོབ་པར་འགྱུར། །དང་ས་མལ་སོགས་ཡོན་ཏན་ཅན། །ཐོབ་གནས་ཡིན་ཕྱིར་བཅུད་ཀྱིས་ལེན། །ན་ཚོད་དང་པོའམ་བར་མའི་ཚེ། །དབང་པོ་ཐུལ་བས་དེ་སྦྱར་ཏེ། །སྣུམ་ཆོས་བྱ་ཞིང་གཏར་ག་གདབ། །རྣམ་པ་ཀུན་ཏུ་སྦྱངས་བྱས་གཏང༌། །མ་སྦྱངས་པ་ཡི་ལུས་ལ་ནི། །བཅུད་ཀྱིས་ལེན་དང་རོ་ཙ་བའི། །སྦྱོར་བ་དྲི་མ་ཅན་གྱི་ནི། །གོས་ཀྱི་ཚོན་ལྟར་དོན་མེད་འགྱུར། །བཅུད་ཀྱིས་ལེན་གྱི་སྦྱོར་བ་ནི། །རྣམ་པ་གཉིས་སུ་དྲང་སྲོང་འདོད། །སྤྱིལ་བོར་འདུག་པ་གཙོ་བོ་སྟེ། །རླུང་དང་ཐན་པས་ཉེན་ཅིག་ཤོས། །ཁང་པ་རླུང་མེད་འཇིགས་པ་མེད། །ཆོས་ལྡན་ཡོ་བྱད་འབྱོར་པའི་གྲོང༌། །ས་ཕྱོགས་ཤིས་པའི་བྱང་ཕྱོགས་སུ། །ཁང་པ་སུམ་རིམ་སྐར་ཁུང་ཆུང༌། །དུད་པ་ཉི་ཚན་སྤྲུལ་དང་རྡུལ། །བུད་མེད་གླེན་མས་མ་བགྲོད་པར། །ཡོ་བྱད་སྨན་པ་སྟ་གོན་བྱས། །ཁང་པ་ལེགས་པར་བྱེ་དོར་བྱའོ། །དེ་ནས་ཚེས་གྲངས་བཟང་ཁྲུས་བྱས། །མཆོད་འོས་མཆོད་ལ་འཇུག་པར་བྱ། །དེར་ནི་སྦྱང་བྱས་དག་གྱུར་ནས། །བདེ་ཞིང་སྟོབས་ནི་སྐྱེད་པ་དང༌། །ཚངས་པར་སྤྱོད་དང་བརྟན་པར་ལྡན། །དད་པར་ལྡན་ཞིང་དབང་པོ་ཐུལ། །སྦྱིན་དང་ཚུལ་ཁྲིམས་བདེ་བ་དང༌། །བརྟུལ་ཞུགས་ཆོས་ལ་མཆོག་ཏུ་གཞོལ། །ལྷ་ནི་རྗེས་སུ་དྲན་པར་ལྡན། །རིགས་པས་གཉིད་ལོག་གཉིད་མི་ལོག །སྨན་ལ་དགའ་ཞིང་ཚིག་འཇམ་པས། །བཅུད་ཀྱིས་ལེན་ནི་བརྩམ་པར་བྱ། །དེ་ཉིད་སྣུམ་ཆོས་དུགས་བྱས་ནས། །ཨ་རུ་ར་དང་སྐྱ་རུ་ར། །རྒྱམ་ཚ་བཅའ་སྒ་པི་པི་ལིང༌། །ཤུ་དག་ཡུང་བ་བྱི་དང་ག །བུ་རམ་ཆུ་དྲོན་སྦྱར་བ་ནི། །བླུད་ན་ལེགས་པར་འཁྲུ་བར་འགྱུར། །དེ་ནས་ལུས་ནི་དག་འགྱུར་ཞིང༌། །ཐུག་སོགས་རིམ་པར་སྤྱད་ནས་ཀྱང༌། །ཞག་གསུམ་མ་མ་ནི་ཞག་ལྔའམ། །ཞག་བདུན་བར་དུ་ཞུན་མར་བཅས། །ནས་ཐུག་དག་པར་གྱུར་གྱི་བར། །སྦྱིན་ཞིང་བཤད་རྙིང་དག་པར་བྱ། །
དེ་ལྟར་ལྟོ་ནི་སྦྱངས་བྱས་ནས། །གོམས་པར་ཤེས་པས་གང་ཞིག་ལ། །གང་ཞིག་འཚམ་པ་དེ་ཀུན་བརྟགས། །བཅུད་ཀྱིས་ལེན་ནི་སྦྱིན་པར་བྱ། །ཨ་རུ་ར་སྟོང་དེའི་སུམ་འགྱུར། །སྐྱུ་རུ་ར་དང་བཅས་པ་དང༌། །རྩ་བ་ལྔ་བོ་ལྔ་རྣམས་ནི། །སྲང་ནི་ཉིས་བརྒྱ་ལྔ་བཅུ་དག །ཆུ་ནི་བཅུ་འགྱུར་ནང་དུ་བསྐོལ། །ཁུ་བ་བཅུ་ཆ་ལུས་པ་རུ། །ཨ་རུ་རྣམ་རྒྱལ་སྐྱུ་རུ་ར། །བརྡུངས་ལ་རུས་པ་ཕྱུང་ནས་ནི། །ཁུ་བ་དེ་ཡི་ནང་དུ་ནི། ཤིང་ཚ་སུག་སྨེལ་པི་པི་ལིང༌། །ག་དུར་སྐྱེར་པ་ཨ་རུ་ར། །ཙནྡན་མ་དུ་ཀ་པར་ཎི། །ཤཾ་ཀ་པུཥྤ་ཀ་ན་ཡ། །ཤུ་དག་གླ་བ་ཤིང་མངར་དང། །བྱི་དང་ག་ནི་ཕུལ་རེའི་ཚད། །ཁར་དཀར་སྲང་སྟོང་ཆིག་བརྒྱ། །ཞུན་མར་བྲེ་ནི་བཅུ་གཉིས་དང༌། །ཏིལ་མར་བྲེ་ནི་བརྒྱད་བཅས་པ། །ལྡེ་གུར་གྱུར་གྱི་བར་དུ་བསྐོལ། །ཕབ་ལ་བསྒྲངས་པར་སྦྲང་རྩི་ནི། །སྲང་ནི་སུམ་བརྒྱ་ཉི་ཤུ་གཞུག །དེ་ནས་གཟར་བུས་དཀྲུགས་ནས་ནི། །མར་གྱི་སྣོད་དུ་གཞུག་པར་བྱ། །གང་ཞིག་ཟས་གཅིག་ལ་མི་གནོད། །དེ་ནི་འདི་ཡི་ཚད་དུ་བཤད། །ཞུ་བའི་ཚེ་ན་དྲུག་ཅུ་པ། །འོ་མར་བཅས་པའི་ཁ་ཟས་སྦྱིན། །བཅུད་ཀྱིས་ལེན་འདི་ཚངས་པས་བཤད། །དགེ་ཞིང་དཔལ་ཡོན་ཅན་ཡིན་ཞིང༌། །མཁའ་ལ་གནས་དང་བྱིས་པ་རྩེ། །དེ་བཞིན་དཀའ་ཐུབ་པས་བསྟེན་བྱས། །ལུས་སྙོམ་ངལ་དང་སྐྲ་དཀར་དང༌། །གཉེར་མའི་སྐྱོན་ནི་སྤང་འགྱུར་ཞིང༌། །ཡིད་གཞུངས་དྲན་དང་སྟོབས་ལྡན་ཞིང༌། །ཚེ་རིང་བར་ཡང་འགྱུར་བ་ཡིན། །སྐྱོན་མེད་ཨ་རུ་ར་དང་སྐྱུ་རུ་ར། །སྟོང་དང་པི་པི་ལིང་ནི་སྟོང་དང་བཅས། །རྒྱ་སྐྱེགས་ཤིང་གཞོན་ཐལ་བའི་ཆུ་སྦྱར་བ། །སྣོད་དུ་བཞག་སྟེ་ལེགས་པར་སྤངས་ནས་ནི། །སླར་ཕྱུང་གྲིབ་མར་བསྐམས་ཏེ་ཕྱེ་མར་བྱས། །ཁ་ར་དཀར་པོ་བཞི་ཆ་མར་དང་ནི། །སྦྲང་རྩི་བཞི་འགྱུར་བཅས་པ་མར་གྱི་ནི། །བུམ་པར་བཅུག་སྟེ་ས་བརྐོས་པར་བཞག་ལ། །ཟླ་བ་དྲུག་ལོན་ནས་ནི་སླར་ཕྱུང་སྟེ། །སྔ་དྲོའི་དུས་སུ་མེ་དྲོད་ཇི་བཞིན་བཟའ། །རྟག་ཏུ་མཐུན་པའི་ཟས་ནི་བཟའ་བར་བྱ། །དེ་ལྟར་མ་ལུས་ཟོས་ན་ལོ་བརྒྱ་འཚོ། །ནད་མེད་པ་དང་སྐྲ་དཀར་གཉེར་མ་མེད། །ལུས་ཀྱི་སྟོབས་འཕེལ་རྒྱས་པར་འགྱུར་བ་དང༌། །མཆོག་ཏུ་དྲན་གསལ་ཡིད་ནི་གཞུངས་པར་འགྱུར། །སྐྱོན་མེད་རྒྱ་སྐྱེགས་ཤིང་རློན་པ། །
ཐོར་ཏོ་བཅད་ལ་གཞོག་པ་ཡི། །སྡོང་བུ་ཁྲུ་གཉིས་བརྐོས་པའི་ནང༌། །སྐྱུ་རུ་ར་ནི་སར་བས་དགང༌། །རྩ་བའི་བར་དུ་འཇག་མས་དཀྲི། །པདྨ་སྐྱེས་པའི་འདམ་གྱིས་བསྐུ། །དེ་ནས་རླུང་མེད་གནས་སུ་ནི། །ལྕིབས་སར་པ་གཙང་མས་བཙོ། །ཚོས་ཤིང་སྐྱུ་རུ་ར་སྤངས་ནས། །སྦྲང་རྩི་མ་བཅས་མི་ཡིས་བཟའ། །དེ་རྗེས་འོ་མ་མར་བཅས་པ། །ཅི་འདོད་པར་ནི་བཏུང་བར་བྱ། །དེ་ཉིད་ཀྱིས་ནི་ཟླ་གཅིག་བར། །བསྟེན་ཞིང་སྤང་བར་བྱ་བ་རྣམས། །དེ་ནི་འབད་དེ་སྤང་བར་བྱ། །ཆུ་ནི་གྲང་མོ་ལག་པ་ཡིས། །རེག་པ་ཙམ་ཡང་མི་བྱའོ། །དེ་ལྟར་ཞག་ནི་བཅུ་གཅིག་འདས། །སྐྲ་སོ་སེན་མོ་ལྷགས་པར་འགྱུར། །དེ་ནས་ཉིན་ཞག་ཅུང་ཟད་ནས། །གཟུགས་བཟང་བུད་མེད་ལ་ཕོད་ཅིང༌། །སྟོབས་ནི་གླང་པོ་དང་འདྲར་འགྱུར། །མཆོག་ཏུ་ཡིད་གཞུངས་སྙིང་སྟོབས་དང༌། །བློ་ལྡན་ལོ་སྟོང་འཚོ་བར་འགྱུར། །རྩ་བ་ཅུ་པ་བ་བླ་དང༌། །གླ་སྒང་ཐལ་ཏྲེས་ཛི་བ་ཀ །ཨུཏྤལ་དང་པརྞི་གཉིས། །ཀརྐ་ཏ་སྲིད་པི་པི་ལིང༌། །མེད་སུག་སྨེལ་ཏ་མ་ལ། །འཚོ་བྱེད་རྒུན་འབྲུམ་ཨ་ཀ་རུ། །མ་ནུ་ཟུར་བ་བ་སྦྲུ་བ། །ར་མཉེ་བ་གཉིས་སླེ་ཏྲེས་དང༌། །ཀ་ཀ་ན་ས་ཨ་རུ་ར། །བ་ཤ་ཀའི་རྩ་བིད་རི། །སྲང་རེ་གཅིག་ཏུ་བསྲེས་ནས་ནི། །སྐྱུ་རུ་རའི་འབྲུ་ལྡན་བརྒྱ་ནི། ཆུ་བྲེ་བཅུ་དྲུག་ནང་དུ་བསྐོལ། །དེ་ཡི་ཁུ་བ་བཞི་ཆ་ལུས། །སྐྱུ་རུར་ཡི་རུས་པ་བསལ། །མར་དང་ཏིལ་མར་སྲང་བཅུ་གཉིས། །ནང་དུ་ལེགས་པར་བརྔོས་ནས་ནི། །ཀ་ར་ཀར་པོ་སྲང་ལྔ་བཅུ། །བཏགས་ཏེ་ལྡེ་གུའི་ཚུལ་དུ་བསྐོལ། །སྣུམ་ཕྱེད་ཀྱིས་ནི་སྦྲང་རྩི་གཞུག །སྨིག་རྐང་སྲང་ནི་བཞི་དག་དང༌། །པི་པི་ལིང་ནི་སྲང་གཉིས་དང༌། །དྲི་བཟང་བཞི་ནི་སྲང་གཅིག་གཞུག །དེ་ལ་ཚད་ཙམ་བཟའ་བྱ་ཞིང༌། །ཁང་པར་གནས་ཤིང་འཕྲོད་ཟས་བསྟེན། །འདི་ནི་དྲང་སྲོང་འཕོ་བས་བསྟན། །དྲང་སྲོང་འཕོ་བས་གང་ཟོས་པ། །རྒས་པས་ཉེན་པར་གྱུར་པ་ཡང༌། །བུད་མེད་ཀྱིས་ནི་མིག་ཏུ་སྡུག །ཆོ་ག་བཞིན་དུ་བསྟེན་གྱུར་ན། །ལུད་པ་དབུགས་མི་བདེ་རིམས་དང༌། །སྐེམས་དང་སྙིང་ནང་དྲེག་ནད་དང༌། །གཅིན་དང་ཁུ་ཆུ་ལ་གནས་དང༌། །སྐད་འགགས་པ་ཡང་སེལ་བར་བྱེད། །བྱིས་པ་རྒན་དང་གློ་འགྲམ་གཅོང༌། །རེད་པའི་ཉམས་སྟོབས་འཕེལ་བར་བྱེད།
ཡིད་གཞུངས་དྲན་དང་མདངས་ལྡན་དང༌། །ནད་མེད་ཉིད་དང་ཚེ་འཕེལ་དང༌། །རླུང་ནི་བདེ་བར་རྒྱུ་བྱེད་ཅིང༌། །བུད་མེད་ལ་ཕོད་སྟོབས་དང་ནི། །དབང་པོ་གསལ་ཞིང་མེ་དྲོད་སྐྱེད། །ཤིང་མངར་སྨིག་རྐང་པི་པི་ལིང༌། །ལྕེ་མྱང་ཚ་དང་བཅས་པ་དང༌། །ལྕགས་ནི་སྣ་དེ་གསེར་དང་ནི། །ཤུ་དག་སྦྲང་རྩི་ཞུན་མར་རམ། །ཁ་ར་དཀར་པོ་འབྲས་བུ་གསུམ། །ལོ་གཅིག་བསྟན་ནས་བཅུད་ལེན་འགྱུར། །ནད་ཀུན་འཇོམས་ཤིང་དྲན་པ་དང༌། །ཡིད་གཞུངས་བློ་ནི་སྐྱེད་པར་བྱེད། །མ་དུ་ཀ་པརྞི་ཡི་ཁུ་བ་འམ། །ཤིང་མངར་ཕྱེ་མ་འོ་མར་བཅས་པ་ནི། །ལྷན་ཅིག་སྦྱར་བ་མེ་དྲོད་ཇི་བཞིན་སྦྱིན། །སླེ་ཏྲེ་ས་ཤང་ཀ་པུཥྤའི་མེ་ཏོག་བཅས། །ལྡེ་གུར་སྦྱར་བ་མེ་དྲོད་ཇི་བཞིན་དུ། །བསྟེན་ན་ཚེ་ནི་སྦྱིན་པར་བྱེད་པ་དང༌། །ནད་འཇིག་སྟོབས་སྐྱེད་མདོག་ནི་གསལ་བྱེད་ཅིང༌། །མེ་དྲོད་སྐང་གསལ་ཡིད་གཞུངས་སྐྱེད་པར་བྱེད། །བཅུད་ཀྱིས་ལེན་གྱི་སྦྱོར་བ་འདི་དག་ལས། །ཤངྐ་པུཥྤའི་སྦྱོར་འདི་ཡིད་གཞུངས་མཆོག །སྤངས་མ་པུ་ཙེ་ཤེལ་དང་པ་ཡ་སྱ། །ཤིང་མངར་ཐལ་ཏྲེས་ཙནྡན་འབྲས་བུ་གསུམ། །ཤུ་དག་ཚ་བ་གསུམ་དང་སེར་པོ་གཉིས། །པ་ཏོ་ལའི་རྩ་རྒྱམ་ཚ་ཞིབ་ཏུ་བཏགས། །མར་དང་འོ་མ་བྲེ་ནི་བཅུ་དྲུག་དང༌། །ཤངྐ་པུཥྤའི་ཁུ་བ་སུམ་འགྱུར་བསྐོལ། །བླུད་ན་གླེན་པའང་ཚིག་ལ་དབང་འགྱུར་ཞིང༌། །ཐོས་འཛིན་སྤོབས་པ་ཆེ་ཞིང་ནད་མེད་འགྱུར། །པདྨའི་རྩ་བ་སྡོང་བུ་དང༌། །གེ་སར་ནང་གི་ས་བོན་རྣམས། །གསེར་བཅས་མར་དང་འོ་མ་ནི། །བྲེ་ནི་བཅུ་དྲུག་ནང་དུ་བསྐོལ། །པདྨ་ལྔ་ཡི་ཐིག་ལེ་ཞེས། །ས་སྟེང་དག་ཏུ་གྲགས་པ་ཡིན། །ཚུལ་བཞིན་བསྟེན་ན་སྐྱེས་བུ་ནི། །ཉམས་སྟོབས་ཟད་པ་འཕེལ་བར་བྱེད། །གང་ཞིག་ཨུཏྤལ་སྡོང་བུ་ལོ། །རྩ་བ་གེ་སར་ལྡན་བསྐོལ་བ། །ཨུཏྤལ་བཞི་པར་གྲགས་པ་ཡིན། །གསེར་དང་བཅས་པའི་བཅུད་ལེན་གྱི། །སྦྱོར་བ་བསྟེན་ན་བ་ལང་ཡང༌། །ཡང་གཞུངས་འགྱུར་ན་མིར་ཅི་སྨོས། །བྲམྷི་ཤུ་དག་ཤང་ཀ་པུཥྤ་དང༌། །རྒྱམ་ཚ་མང་ཚ་ཀྵ་ར་བི་ཤ་ལ། །བྲམྷི་སོ་བར་ཙལ་པི་པི་ལིང༌། །རེ་རེ་ནས་ནི་གསུམ་གསུམ་ཅམ་ཚད་དང༌། །གསེར་ནི་ནས་གཉིས་དུག་ནི་ཏིལ་འབྲུ་ཙམ། །ཞུན་མར་སྲང་གཅིག་འདི་དག་ཞིབ་ཏུ་སྦྱར། །
ལེགས་པར་བཏང་སྟེ་ཞུ་བར་གྱུར་ནས་ནི། །མར་བཅས་ཁ་ཟས་ལོ་གཅིག་བར་དུ་བསྟེན། །དྲན་དང་ཡིད་གཞུངས་བློ་ནི་འཕེལ་འགྱུར་ཞིང༌། །ནད་དང་རྒས་པ་དག་ལས་འདས་པ་དང༌། །སྙོམ་དང་ངལ་དུབ་སེལ་བྱེད་ལོ་བརྒྱར་འཚོ། །དཔལ་དང་གཟི་བརྗིད་མ་དངས་དང་ལྡན་བར་འགྱུར། །ཁྱད་པར་དུ་ནི་མཛེ་ནད་ཤ་བཀྲ་སྐྲན། །དུག་དང་དབྱིག་དུག་རིམས་དང་སྨྱོ་བྱེད་དང༌། །སྲིད་སྲུང་རིག་བྱེད་སྔགས་བྱས་གཤེད་བྱེད་དང༌། །རླུང་ནད་སྟོབས་ཆེན་འདིས་ནི་ཞི་བར་བྱེད། །ནག་པ་ལ་སྟོན་གྱི་ཚེ། །སྐར་མ་རྒྱལ་ལ་བབ་པར་བཏུ། །དེ་ཡི་རྩ་བ་ཞོ་གཉིས་ཙམ། །ཕྱེར་བཏགས་འོ་མ་སྦྱར་ཏེ་བཏུང༌། །ཡང་ན་མར་དང་སྦྲང་རྩིར་སྦྱར། །བལྡག་ཅིང་ཟས་མེད་འོ་མས་འཚོ། །དེ་ལྟར་ལོ་གཅིག་ཟོས་གྱུར་ན། །ལོ་བརྒྱར་འཚོ་ཞིང་སྟོབས་ལྡན་འགྱུར། །གཟེ་མ་འབྲས་བུ་སྐྱེས་པ་རྩ་བར་བཅས། །གྲིབ་མར་བསྐམས་ཏེ་ཞིབ་ཏུ་བཏགས་ནས་ནི། །རང་གི་ཁུ་བར་སྤངས་པ་དེ་ལས་ནི། །ཚེ་ཚད་ཁྱོད་གང་ཙམ་དུ་བྱས་གྱུར་གང༌། །དེ་དང་འོ་མར་སྦྱར་ནས་བཟའ་བྱ་ཞིང༌། །ཞུ་ནས་འོ་མ་སྲང་ནི་ཉིས་བརྒྱ་ཟོས། །གཟུགས་བཟང་སྐལ་ལྡན་ལོ་བརྒྱ་ཐུབ་པ་དང༌། །འདོད་སྤྱོད་ཁྱུ་མཆོག་པ་ལང་ཚོགས་གནས་འདྲ། བར་ཧི་ཡི་སྡོང་བུ་རློན་པ་ནི། །འོ་མར་སྦྱར་བཟོས་ཤིང་འོ་མ་བཏུང༌། །ཟླ་གཅིག་བར་དུ་ཁ་ཟས་འོ་མས་འཚོ། །རྒས་པའི་ཚོགས་ལས་ངེས་པར་རྒྱལ་བར་འགྱུར། །ཡང་ན་དེ་ཡི་སྡོང་བུའི་ཕྱེ་ཞིབ་མོ། །རང་གི་ཁུ་བ་དང་ནི་ལེགས་སྦྱར་བ། །མར་དང་སྦྲང་རྩིར་སྦྱར་བའི་ལྡེ་གུ་བཟའ་ཡང་ན་དེ་བསྐོལ་མར་ནི་བཏུང་བར་བྱ། །དེ་བཞིན་ཨ་ཏི་བ་ལ་བིད་རི། །ཤིང་མངར་དང་ནི་མོན་སྣེའུ་དམེ་རུ་དང༌། །ཛི་བན་ཏི་དང་ར་སྣ་ཨ་རུ་ར། །ས་ལ་པརྞི་སླེ་ཏྲེས་སྐྱུ་རུ་ར། །ཤང་ཀ་པུཥྤ་མན་དུ་ཀ་པརྞི། །ཨ་ཤྲ་གནྡྷ་དང་ནི་ཉེའུ་ཤིང་རྣམས། །སྦྱར་བ་བཏང་ན་ཡིད་གཞུངས་བློ་དང་ནི། །རྒས་སྲ་ན་ཚོད་བརྟན་ཞིང་སྟོབས་སྐྱེད་བྱེད། །ཙི་ཏྲ་ཀ་ཡི་མེ་ཏོག་ནི། །སེར་པོ་དཀར་ནག་ལས་ཤེས་བྱ། །ཆོ་ག་བཞིན་དུ་བཅུད་ལེན་སྦྱར། །གོ་རིམས་བཞིན་དུ་ཡོན་ཏན་ཆེ། །དེ་ཡི་རྩ་བ་གྲིབ་མར་སྐམ། །ཕྱེ་མར་བཏགས་པ་སྦྲང་རྩི་མར། །འོ་
ཆུ་དང་ཟླ་གཅིག་བར། །བརྟུལ་ཞུགས་ཅན་གྱིས་བསྟེན་བྱས་ལ། །ཕན་པའི་ཟས་ནི་ཟ་བྱེད་ན། །ལོ་བརྒྱར་འཚོ་ཞིང་ནད་མེད་ལ། །ཡིད་གཞུངས་སྟོབས་དང་མདངས་ལྡན་ཞིང༌། །ལུས་རྒྱས་མེ་དྲོད་འབར་བར་འགྱུར། །ཏིལ་མར་ལྡེ་གུ་ཟླ་གཅིག་བར། །བསྟེན་ན་རླུང་ནང་གསོ་དཀའ་འཇོམས། །གཅིན་སྦྱར་ཤ་བཀྲ་མཛེ་ནད་འཇོམས། །དར་བར་སྦྱར་བས་གཞན་འབྲུམ་སེལ། །གོ་བྱེ་ལེགས་པར་སྨིན་པ་ནི། །འབྲས་ཀྱི་ཕུང་པོའི་ནང་དུ་གཞུག །སོས་ཀའི་ཚེ་བཏུས་དགུན་ཚེ་ཕྱུང༌། །མངར་ཞིང་སྣུམ་དང་བསིལ་བ་ཡི། །སྨན་སྦྱར་དེ་ཡི་རྡོག་མ་བརྒྱད། །བརྒྱད་འགྱུར་ཆུར་ནི་བསྐོལ་ནས་ནི། །ཁུ་བ་དེ་ཡི་བརྒྱད་ཆ་ལུས། །འོ་མ་དང་སྦྱར་གྲང་མོ་བཏུང༌། །དེ་རྗེས་ཉི་མ་རེ་རེ་ཞིང༌། །གོ་བྱེ་རྡོག་མ་རེ་རེ་བསྐྱེད། །ཉི་ཤུ་རྩ་གཅིག་བར་དུ་ནི། །གསུམ་གསུམ་གྱིས་བསྐྱེད་དེ་ཕན་ཆད། །བཞི་བཅུའི་བར་བསྐྱེད་དེ་འོག་ཏུ། །བསྐྱེད་པ་བཞིན་དུ་དབྲི་བར་བྱ། །བདུན་ཕྲག་བདུན་གྱི་བར་དུ་ནི། །སྟོང་གི་བར་དུ་གཏང་བར་བྱ། །བདག་ཉིད་བསྡམས་ཤིང་འོ་མ་མར། །སཱ་ལུ་དྲུག་ཅུའི་འབྲས་ཆན་བཟའ། །དེ་བཞིན་དུས་ནི་སུམ་འགྱུར་བྱ། །སྦྱོར་བའི་མཐའ་ཡང་སྤྱད་པར་བྱ། །སྔོན་གྱི་ལེགས་སྨོན་འཐོབ་འགྱུར་ཞིང༌། །ཁྱད་པར་དུ་ནི་མེ་དྲོད་སྐྱེད། །གཅིན་སྙི་སྲིན་བུ་གཞང་འབྲུམ་མཛེ། །ཚིལ་ལས་གྱུར་པའི་གཞང་འབྲུམ་འཇོམས། གོ་བྱེའི་འབྲས་བུ་སྐྱོན་མེད་པ། །བརྡུངས་ཤིང་ཞིབ་ཏུ་བཏགས་པ་ནི། །བུམ་པར་བཅུག་སྟེང་ས་ནག་བསྐུས། །ས་བརྐོས་པ་ཡི་ནང་དུ་གཞུག །ཁོ་ནས་པ་ཡི་ལྕི་བས་བསྐོར། །དེ་སྦྱོར་མེ་ལ་བཙོས་ནས་ནི། །དེ་ལས་འཛག་པའི་ཁུ་བ་གང༌། །བླངས་པ་ཉིན་ཞག་གཞན་ལ་ནི། །དེ་ཡི་བརྒྱད་འགྱུར་སྦྲང་རྩི་དང༌། །ཉིས་འགྱུར་མར་དང་སྦྱར་བ་ནི། །ཆོག་སྔ་མ་བཞིན་བསྡམས་ཏེ། །བསྟེན་ན་ཡོན་ཏན་དེ་ཉིད་ཐོབ། །གོ་བྱེའི་འབྲས་བུ་སྨིན་ཏེ་ལྷུང་གྱུར་པ། །བྲེ་བཞིའི་ཚད་ཙམ་དང་ནི་སོ་ཕག་དང༌། །བདར་བའི་ཕྱེ་མ་དག་དང་ཆུ་དང་མཉེ། །བཀྲུས་ཏེ་རླུང་ལ་ལེགས་པར་བསྐམས་ནས་ནི། །བརྡུངས་ཏེ་ཆུ་བྲེ་བཅུ་དྲུག་ནང་དུ་བསྐོལ། །བཞི་ཆ་ལུས་པ་བཙགས་ཏེ་བསྒྲངས་པ་ཡི། །ཁུ་བ་
དེ་དང་འོམ་བྲེ་བཅུ་དྲུག །བསྐོལ་ཏེ་བཞི་ཆ་ལུས་པར་གྱུར་པ་དང༌། །དེ་དང་མཉམ་པའི་ཞུན་མར་བཅས་པར་བསྐོལ། །དེའི་ནང་ཁ་རའི་ཕྱེ་མ་ཅི་རན་གཞུག །དེ་ནི་གཟར་བུས་དཀྲུགས་པས་གཅིག་ཏུ་གྱུར། །འབྲས་ཀྱི་ཕུང་པོར་ཞག་བདུན་ལེགས་པར་སྦ། །བདུད་རྩི་འདྲ་བ་དེ་བསྟེན་སྐྱེས་བུ་གང༌། །ཆུ་འམ་འོ་མ་ཤ་ཁུ་འཐུངས་གྱུར་ན། །དྲན་དང་ཡིད་གཞུངས་བློ་གྲོས་སྟོབས་དང་ལྡན། །སྙིང་སྟོབས་དང་ལྡན་གསེར་གྱི་མདོག་དང་འདྲ། །ཚེ་རིང་བ་ཡང་དེས་ནི་ཐོབ་པར་འགྱུར། །ཆུ་བྲེ་བཅུ་དྲུག་ནང་དུ་གོ་བྱེ་ནི། །སུམ་བརྒྱ་བསྐོལ་ཏེ་བཞི་ཆ་ལུས་པ་རུ། །ཏིལ་མར་བྲེ་བཞིན་དེར་ནི་བཅུག་ནས་ཀྱང༌། །ཏིག་ཏ་བོང་ང་གཉིས་དང་འབྲས་བུ་གསུམ། །བྲག་ཞུན་སྐྱེར་ཤུན་ད་ལིས་ཕྱེ་བ་གདབ། །བསྐོལ་ན་མཛེ་ནད་མ་ལུས་འཇོམས་པར་བྱེད། །གོ་བྱེ་སྐྱུ་རུ་ར་འམ་ཚ་འམ་ནི། །ཞོ་ཡི་སྦྲིས་མ་ཏིལ་མར་འོ་མ་འམ། །བུ་རམ་འོ་ཐུག་མར་རམ་སྦྲང་རྩིའམ། །ནས་ཟན་ངག་གམ་ཏིལ་བཏགས་ལྡེ་གུར་བྱས། །སྲན་ཚོད་དག་དང་ལྷན་ཅིག་སྦྱར་བ་ནི། །ལུས་རྒྱས་ཡིད་གཞུངས་ཚེ་རིང་བྱེད་མཆོག་ཡིན། །གོ་བྱེའི་འབྲས་བུ་རྣོན་པོ་ནི། །སྨིན་པ་མེ་དང་འདྲར་གྱུར་པ། །ཆོ་ག་བཞིན་དུ་སྦྱར་བ་ནི། །བདུད་རྩི་དང་ནི་འདྲ་བར་འགྱུར། །བསེ་ཤིང་འབྲས་བུ་མ་བཅོས་པའི། །བད་ཀན་ནད་དང་ནད་རྙིང་ནི། །འབྲེལ་པ་གང་ཡིན་དེ་མེད་ཅིང༌། །མེ་ཡི་དྲོད་ཀྱང་མྱུར་དུ་སྐྱེད། །རླུང་དང་ཚ་བར་འདུག་པ་ནི། །ཁྱད་པར་དུ་ནི་སྤང་བྱ་ཞིང༌། །རྒྱ་སྲན་ཞོ་དང་ཚ་དང་ནི། །ཏིལ་མར་བསྐུ་དང་མེ་བསྟེན་སྤངས། །དུ་བ་རི་ཡི་ཤིང་ཞེས་བྱ། །ནུབ་ཕྱོགས་རྒྱ་མཚོའི་ངོས་ནས་སྐྱེ། །ཆུ་རླབས་གཡོ་བས་བསྐྱོད་པ་དང༌། །རླུང་གིས་ལོ་མ་གཡེངས་པ་ཡིན། །དེ་ཡི་འབྲས་བུ་དབྱར་གྱི་ཚེ། །ལེགས་པར་སྨིན་པ་བཏུ་བར་བྱ། །འབྲས་བུ་དེ་ལས་རྐང་ཕྱུང་ནས། །བསྐམས་ཏེ་ཕྱེ་མར་བཏགས་ནས་ནི། །ཏིལ་བཞིན་བཙིར་བར་བྱ་བའམ། །ལེ་བརྒན་མེ་ཏོག་བཞིན་དུ་བསྐོལ། །དེ་ཡི་མར་བསགས་གྱུར་པ་ནི། །ཆུང་ཟད་པ་ཡི་བར་དུ་བསྐོལ། །ཕབ་སྟེ་བ་ཡི་ལྕི་བ་ཡི། །ནང་དུ་ཟླ་ཕྱེད་ཙམ་དུ་གཞུག །དེ་འོག་དེ་ལས་ཕྱུང་ནས་ནི། །སྣུམ་ཞིང་དུགས་བྱས་དྲི་མ་བསལ། །ཟས་
ཀྱི་དུས་ནི་བཞིས་ཆོད་པར། །ནང་པར་ཞོ་གཉིས་ཙམ་ཞིག་བཏུང༌། །མར་དེ་ཉི་མ་ཤིས་པ་ལ། །སྔགས་འདི་ཡིས་ནི་དག་པར་བྱ། །རྐང་པ་གཉིས་པོ་བརྩོན་པ་ཆེ། །ལུས་ཟུངས་ཐམས་ཅད་སྐྱོང་བྱེད་པར། །འཁོར་ལོ་དབྱིག་པ་དུང་ཐོགས་ལ། །མི་འཕོ་བས་ནི་ཁྱོད་ལ་བསྒོ། །དེ་གང་འདི་ཡི་ནད་སྟེང་དང༌། །འོག་གི་ནད་ནི་དུ་མ་སེལ། །དགོངས་ཀ་སྣུམ་དང་ལན་ཚྭར་བཅས། །ནས་ཐུག་གྲང་མོ་བཏུང་བར་བྱ། །མར་དེ་ཞག་ལྔའི་བར་དུ་བཏུང༌། །སྤང་བར་བྱ་བ་ཐམས་ཅད་སྤང༌། །ཟླ་ཕྱེད་མུད་གའི་ཁུ་བ་བཏུང༌། །མཛེ་ནད་ཀུན་ལས་ཐར་བར་འགྱུར། །དེ་ཉིད་སེང་ལྡེང་ཁུ་བ་ནི། །སུམ་འགྱུར་དང་ནི་ལེགས་པར་བསྐོལ། །སྔ་མ་བཞིན་དུ་ཟླ་ཕྱེད་གཞག །ལེགས་པར་བསྡམས་ཏེ་ཟླ་གཅིག་བཏུང༌། །དེ་ཡིས་ལུས་ནི་བསྐུ་བ་དང༌། །ཇི་སྐད་བཤད་པའི་ཟས་ཟོས་པའི། །སྦྱོར་བ་འདི་ཡིས་མྱུར་དུ་ནི། །མཛེ་ཅན་མི་ནི་གསོ་བར་བྱ། །དེ་ཉིད་སེང་ལྡེང་མེད་པར་ནི། །ཞུན་མར་སྦྲང་རྩི་ལྡན་པར་བཏུང༌། །ཟླ་ཕྱེད་བར་དུ་ཤ་ཁུ་བཏུང༌། །ལོ་ནི་ཉིས་བརྒྱར་འཚོ་བར་འགྱུར། །དེ་ཉིད་ཞག་ནི་ལྔ་བཅུའི་བར། །སྣ་སྨན་དུ་ནི་བཏང་གྱུར་ན། །ལུས་རྒྱས་ཐོས་པ་འཛིན་པ་དང༌། །ལོ་ནི་སུམ་བརྒྱར་འཚོ་བར་འགྱུར། །པི་པི་ལིང་ནི་པ་ལ་ཤའི། །ཐལ་ཆུར་སྤངས་ཤིང་མར་དང་བརྔོས། །རྡོག་མ་གསུམ་གསུམ་སྔ་དྲོ་དང༌། །ཟས་ཀྱི་སྔོན་དུ་བཟའ་བར་བྱ། །བཅུད་ལེན་ཡོན་ཏན་འདོད་པ་ཡིས། །སྦྲང་རྩི་དང་ནི་སྦྱར་ཏེ་བཟའ། །པི་པི་ལིང་བཅུ་ཉིན་རེ་ཞིང༌། །རིམ་གྱིས་བསྐྱེད་པར་གུར་པ་དག །དེ་བཞིན་འོ་མར་སྦྱར་ཏེ་བཟའ། །དེ་བཞིན་དུ་ནི་དབྲི་བར་བྱ། །སྨན་ཞུ་ནས་ནི་དྲུག་ཅུ་པའི། །འབྲས་ཆན་འོ་མ་མར་བཅས་བཟའ། །པི་པི་ལིང་ནི་སྟོང་གི་བར། །བཏང་ན་འདི་ནི་བཅུད་ལེན་འགྱུར། །སྟོབས་དང་ལྡན་ལ་དེ་བཏགས་སྦྱིན། །སྟོབས་དབྲི་བ་ལ་བསྐོལ་ཏེ་བླུད། །དེ་བཞིན་ར་ཡིའོ་མ་དང༌། །ཉིས་སྟོང་གི་ནི་བར་དུ་གཏང༌། །པི་པི་ལིང་གི་སྦྱོར་བ་འདིས། །ལུད་པ་དབུགས་མི་བདེ་མ་གུལ་ནད། །གཅོང་ཆེན་གཞང་འབྲུམ་ཕོ་བའི་ནད། །གཅིན་སྙི་སྐྱར་བབ་མི་བཟད་རིམས། །འོར་ནད་སློན་དང་སྐྱིགས་བུ་དང༌། །མཛེར་པ་དྲེག་ནད་འཇོམས་པར་བྱེད། །
པི་པི་ལིང་ནི་སྲང་ཕྱེད་ལྡེ་གུར་བྱས། །ལྕགས་ཀྱི་སྣོད་བསྐུས་ནས་ནི་ནུབ་གཅིག་བཞག །དེ་དང་ཆུ་ནི་སྙིམ་གང་ནང་པར་བཏུང༌། །ལོ་གཅིག་བཟའ་བཏུང་སྤྱོད་པ་ཅི་འདོད་བསྟེན། །བཅའ་སྒ་སླེ་ཏྲེས་ཤིང་མངར་བྱི་དང་ཀ །བ་ལ་ཨ་ཏི་བ་ལ་འབྲས་བུ་གསུམ། །གླ་སྒང་ཐང་ཤིང་ཡུང་བ་ཨ་ཀ་རུ། །མུ་ཟི་པདྨ་ཨུཏྤལ་ཀྲུ་ཏྲུག་ཏྲེས། །ད་ཏ་ཨ་ཤྭ་ཀར་ཎ་ཨ་ས་ན། །བ་ལའི་ལོ་མའམ་སྙིང་པོ་དེ་བཞིན་དུ། །པི་པི་ལིང་བཞིན་ལྕགས་སྣོད་བསྐུ་སོགས་བྱ། །ལོ་བརྒྱ་འཚོ་ཞིང་རྒས་དང་ན་ལས་ཐར། །འོ་མ་སྙིང་གང་གི་ནི་བཅུད་ལེན་སྨན། །སྦྱར་པ་འདི་ཡིས་ལྕགས་སྣོད་བསྐུས་པས་ནི། །སྔར་བཤད་ཡོན་ཏན་བས་ཀྱང་ལྷག་བསྐྱེད་ཅིང༌། །ཚེ་ཡང་དེ་ལས་ཉིས་འགྱུར་སྐྱེད་པར་བྱེད། །ཨ་ས་ན་དང་སེང་ལྡེང་གི །ཁུ་བར་སོམ་ར་ཛ་སྤངས། །སྦྲང་རྩི་རུ་རྟ་མར་དང་ནི། །ཨ་རུ་ར་དང་ལྕགས་ཕྱེར་བཅས། །ལྡེ་གུ་ལོ་གཅིག་པར་ཟོས་ན། །རྒས་དང་མི་འཕྲོད་ཟོས་པ་ལས། །ནད་ནི་ཡོངས་སུ་འདོར་པར་བྱེད། །མཛེ་ནད་མི་བཟད་པ་ཡིས་ནི། །ལུས་ནི་ཉེན་གྱུར་གང་ཡིན་པས། །སོ་མ་ར་ཛ་ཏིལ་ནག་གཉིས། །ལོ་གཅིག་བར་དུ་བསྟེན་ན་ནི། །དེ་ནི་ཟླ་རྒྱས་ལྟ་བུར་འགྱུར། །གང་གི་སོ་མ་ར་ཛ་སྦུན་པ་མེད། །བཏགས་པ་འོ་མ་ལྷན་ཅིག་ཞོར་མནན་པའི། །སྙིང་པོ་ཕྱུང་ལ་སྦྲང་རྩིའི་ལྡེ་གུ་བལྡག །དེ་རྗེས་དེ་ཉིད་ཀྱི་ནི་དར་བ་བཏུང༌། །མཛེ་ཡི་ནད་ཀྱིས་ཡན་ལག་ཉམས་པ་དང༌། །སྣ་ཆད་སོར་མོ་བྲུལ་བ་ལ་སོགས་པ། །ཤིང་བཅད་རྗེས་ལ་ལྗོན་ཤིང་སྐྱེ་བ་ལྟར། །དེ་ནི་ངེས་པར་སྐྱེ་བར་འགྱུར་བ་ཡིན། །སྒྲ་གཅན་བདུད་རྩི་བརྐུས་པ་ན། །རྐེ་བཅད་པ་ལས་འཛག་གྱུར་པའི། །བདུད་རྩིའི་ཐིགས་པ་སེར་ལྷུང་བ། །སྒོག་སྐྱ་ཉིད་དུ་གྱུར་པ་ཡིན། །ལྷ་མིན་ལུས་ལས་བྱུང་བས་ན། །དེ་ཕྱིར་བྲམ་ཟེས་དེ་མི་བཟའ། །མངོན་དུ་བདུད་རྩི་ལས་བྱུང་བས། །དེ་ནི་བཅུད་ཀྱིས་ལེན་མཆོག་ཡིན། །གྲང་བའི་དུས་ནའང་སྒོག་སྐྱ་བསྟེན། །དཔྱིད་དུས་བད་ཀན་ཤས་ཆེར་བཟའ། །སོས་ཀའི་དུས་སུའང་སྤྱད་བྱ་ཞིང༌། །དབྱར་ནི་རླུང་གིས་གཟིར་ཚེ་བཟའ། །དགུན་ནི་སྣུམ་ཞིང་བསིལ་བ་དང༌། །མངར་བས་ཉེ་བར་བསྲེས་པ་དང༌། །
དེ་ནི་ཕྲེང་བ་རྒྱན་དག་དང༌། །འཁོར་དང་ལྷན་ཅིག་བསྟེན་པར་བྱ། །དེ་ཡི་ལྡེ་གུ་དཔྱིད་ཀྱི་ཚེ། །ཁ་བ་ཅན་གྱི་ཡུལ་སྐྱེས་པ། །ཤུན་བ་བཤུས་ནས་མཚན་མོ་ནི། །ཆང་སོགས་ལ་ནི་སྤང་བར་བྱ། །དེ་ཡི་ཁུ་བ་ནང་པར་ནི། །རས་ནི་གཙང་མས་བཙགས་ནས་ཀྱང༌། །ཆང་ནི་ལེགས་པར་ལངས་གྱུར་པ། །ཆ་གསུམ་དང་ནི་སྦྱར་བའམ། །ཆང་གཞན་དག་གམ་ཏིལ་མར་རམ། །རང་སྐྱུར་རམ་ནི་ཞོ་ག་ཆུ། །དེ་ཚེ་ཉིད་སྦྱར་ནད་པར་ནི། །ཚད་དང་ལྡན་པར་སྦྱིན་བྱ་ཞིང༌། །འོ་མ་ཞུན་མར་ཞག་དང་རྐང༌། །སྐམ་སའི་ཤ་ཁུ་སོ་སོར་ནི། །བསྐོལ་བ་ནད་གཞི་ཇི་བཞིན་བླུད། །ཡང་ན་སྨན་ཁུ་འབའ་ཞིག་བླུད། །དང་པོར་མཁུར་གང་ཙམ་འཐུངས་ན། །མིང་པའི་སྦུབས་ནི་དག་པར་བྱེད། །རྒྱུན་ཏུ་བླུགས་པའི་དུགས་བྱས་ན། །ན་ཞིང་ཟུག་པ་དག་ལ་ཕན། །སྐྱུག་ཅིང་བརྒྱལ་བའི་ནད་ལ་ནི། །འཕྲལ་དུ་ཆུ་གྲང་དག་ཀྱང་བླུད། །ངལ་བ་མེད་ཅིང་ལུས་ཀྱི་ནི། །གཟི་མདངས་བརྟན་པས་ལྷག་མ་སྦྱིན། །ཚ་བ་བསལ་བར་བྱ་བའི་ཕྱིར། །ཤིན་ཏུ་བསིལ་བས་བསྐུ་བྱ་ཞིང༌། །མུ་ཏིག་ག་བུར་ཕྲེང་བ་ཅན། །ཆུ་ཐིགས་ཕྲེའུ་བསྟེན་པར་བྱ། །འདི་ཡི་ཚད་ཆེན་ཕུལ་གང་སྟེ། །ཉི་ཚེ་ལ་ནི་དེ་ཡི་ཕྱེད། །སྒོག་སྐྱ་སྲང་གཅིག་བཏགས་པ་ནི། །ཟས་དང་བཅས་པའང་བསྟེན་པར་བྱ། །ཞུ་ནས་སཱ་ལུ་རྙིང་པའི་ཆན། །དུང་དང་ཀུནད་ལྟར་དཀར་བ། །ཡུ་ཤ་འོ་མ་སྐམ་ས་ཡི། །ཤ་ཁུ་དང་ནི་ལྷན་ཅིག་བཟའ། །སྐམས་པར་གྱུར་ན་ཆང་དང་ནི། །ཆུར་སྦྱར་བ་ནི་བླུད་པར་བྱ། །ཆད་མི་བཏུང་ན་རང་སྐྱུར་རམ། །རྒུན་འབྲུམ་ཆུ་ནི་བླུད་པར་བྱ། །དེ་ཡི་ལྡེ་གུ་མར་དང་བཅས། །མར་ནི་སྣོད་དུ་གཟར་བུས་དཀྲུགས། །ཞག་བཅུ་གཞག་གམ་དེ་བཞིན་དུ། །ཞག་དང་མཉམ་སྦྱར་སྤྱད་པར་བྱ། །སྒོག་སྐྱ་ཤུན་པ་བཤུས་པའི་སྙིང་པོ་ནི། །བསྲེགས་ཤ་དག་གམ་བཟའ་བ་སྣ་ཚོགས་སམ། །ཤ་བཏུབས་པའམ་མར་དང་ཚར་བཅས་བཟའ། །ཁ་ཟས་ཉུང་བ་ཅི་འདོད་སྤྱད་པར་བྱ། །ཁྲག་དང་མཁྲིས་པའི་ནད་ནི་མ་གཏོགས་པ། །ནད་གཞི་མ་ལུས་ལྡན་པར་འགྱུར་བའམ། །རླུང་ནད་ཉི་ཆེ་དང་ནི་ལྡན་གྱུར་ལ། །སྒོག་པ་ལས་ལྷག་
གཞན་སྨན་ཡོད་མ་ཡིན། །ཆུ་དང་བུར་མ་འོ་མ་སྲེད། །ཤ་ཆང་སྐྱུར་ལ་མི་དགའ་ཞིང༌། །མ་ཞུ་བ་ནི་སྤོང་མི་ནུས། །སྒོག་སྐྱ་ངེས་པར་གནོད་པ་སྐྱེད། །མཁྲིས་པ་ལྡང་བའི་འཇིགས་པ་ཡི། །ཐ་མར་བཀྲུ་སྨན་འཇམ་པོ་གཏང༌། །དེ་ལྟར་བཅུད་ལེན་ཡོན་ཏན་ནི། །ཡོངས་སུ་རྫོགས་པ་འཐོབ་པར་འགྱུར། །སོས་ཀའི་ཚ་བས་གདུངས་དྲགས་ལས། །རྒྱ་སྐྱེགས་ཁུ་བ་ལྟར་འཛག་གང༌། །གསེར་སོགས་འབྱུང་ཁུངས་དྲུག་གི་བཅུད། །དེ་ནི་བྲག་ཞུན་ཞེས་བྱར་བཤད། །དེ་ནི་ཀུན་ཀྱང་ཁ་ཞིང་ཚ། །ཤས་ཆེར་མེ་དྲོད་ཞུ་རྗེས་ཚ། །གཅོད་པར་བྱེད་དེ་དེ་ལས་ནི། །ལྕགས་ལས་བྱུང་བ་རབ་ཏུ་བསྔགས། །བ་གཅིན་དྲི་བྲོ་གནག་པ་དང༌། །གུ་གུལ་འདྲ་ཞིང་གསེག་མ་མེད། །སྤྱི་བག་སྣུམ་ཞིང་སྐྱུར་བ་དང༌། །བསྐ་ཞིང་འཇམ་ལ་ལྕི་བ་ཡི། །བྲག་ཞུན་དེ་ནི་མཆོག་ཡིན་ནོ། །ནད་དང་ནད་པ་རྗེས་མཐུན་པར། །སྨན་དང་བྲག་ཞུན་ཆ་མཉམ་བྱས། །ལྕགས་ཀྱི་སྣོད་དུ་སྦྱར་བར་བྱ། །དང་པོར་ཆུ་ནི་ཉི་ཚེས་བཀྲུ། །དེ་འོག་བསྐམས་ལ་བསྐོལ་དང་བསྲེ། །བྲག་ཞུན་སྨན་དང་མཉམ་བྱས་ལ། །བརྒྱད་ཆའི་ནན་དུ་བསྐོལ་བར་བྱ། །ཁུ་བ་བརྒྱད་ཆ་ལུས་བཙག་པ། །དྲོ་འཇམ་ནང་དུ་བྲག་ཞུན་གཞུག །དེ་དང་འདྲེས་གྱུར་བསྐམས་ནས་ནི། །སྨན་ཆུའི་ནང་དུ་སླར་ཡང་གཞུག །དེ་ལྟར་རང་རང་སྨན་འཕྲོད་ནི། །བསྐོལ་བའི་ཁུ་བར་ལན་བདུན་སྤངས། །དེ་ནས་ཏིག་ཏའི་སྨན་མར་གྱིས། །སྣུམ་ཆོས་བྱས་ནས་སྦྱར་བྱས་ཏེ། །འབྲས་བུ་གསུམ་གྱི་ཁུ་བ་དང༌། །ཤིང་མངར་པ་ཏོ་ལའི་ཁུ་བ། །བྲག་ཞུན་དག་ནི་རེ་རེ་ཡང༌། །ཞག་གསུམ་བར་དུ་བླུད་པར་བྱ། །དེ་ནས་དེ་ལ་སྦྱོར་བ་ནི། །དུས་དང་སྦྱར་ཏེ་བླུད་པར་བྱ། །དེ་ལྟར་བྲག་ཞུན་མི་རྣམས་ལ། །ཤིན་ཏུ་ཕན་པར་བྱེད་པ་ཡིན། །ཡོན་ཏན་མ་ལུས་སྐྱེད་བྱེད་ཅིང༌། །འཕྲལ་དུ་གནོད་པར་མི་བྱེད་དོ། །ཞག་བདུན་ཕྲག་གཅིག་ཕྲག་གསུམ་དང༌། །ཕྲག་བདུན་ཞོ་གཉིས་སྲང་ཕྱེད་གཅིག །དམན་དང་བར་མ་ཆེན་པོ་ཡི། །བྲག་ཞུན་གོ་རིམས་བཞིན་དུ་སྦྱར། །ལུས་ནི་ཤིན་ཏུ་སྦྱངས་བྱས་ལ། །བྲག་ཞུན་སྦྱང་བ་གཏང་བར་བྱ། །ཟངས་དང་ལྕགས་དང་དངུལ་དང་གསེར། །ཀུན་དང་ཡང་ན་རེ་རེར་སྦྱར། །འོ་མ་དང་ནི་
ནི་ལྷན་ཅིག་གཏང༌། །བཅུད་ལེན་འབྲས་བུ་མྱུར་དུ་འགྲུབ། །རྒྱ་སྲན་མོན་སྣེའུ་དམེ་རུ་དང༌། །ཕུག་རོན་ཤ་ནི་རྟག་ཏུ་སྤང༌། །གང་ཞིག་བྲག་ཞུན་གྱིས་ནི་མངོན་སུམ་དུ། །མ་བསལ་ནད་ནིས་སྟེང་ཡོད་མ་ཡིན། །དུས་སུ་ཆོ་ག་བཞིན་དུ་བསྟེན་གྱུར་ན། །ནད་མེད་ཉམས་སྟོབས་རྒྱ་ཆེན་སྐྱེད་པར་བྱེད། །ཁང་པར་གནས་པའི་ཁོམ་ལྡན་ཅན། །ཕུན་སུམ་ཚོགས་དང་ལྡན་ལ་ཕན། །དེ་ལས་གཞན་དུ་དེ་རྣམས་ལ། །ཉི་མ་རླུང་གི་ཚེ་ན་བསྟེན། །རླུང་དང་ཉི་ཚན་བཅས་སྦྱོར་བ། །བདེ་བའི་ལོངས་སྤྱོད་མེད་ན་ཡང༌། །གང་ཞིག་ལུས་ལ་མི་གནོད་པ། །མཆོག་ཏུ་དེ་ནི་བཤད་པར་བྱ། །ཆུ་གྲང་འོ་མ་སྦྲང་རྩི་དང༌། །མར་ནི་རི་རེ་གཉིས་གཉིས་དང༌། །གསུམ་མམ་ཡང་ན་ཐམས་ཅད་ནི། །ཟས་སྔར་འཐུངས་ན་རྒས་སྲ་བྱེད། །བུ་རམ་སྦྲང་རྩི་བཅའ་སྒ་དང༌། །པི་པི་ལིང་ངམ་རྒྱམ་ཚ་དང༌། །ཨ་རུ་ར་ནི་གཉིས་གཉིས་དག །རྟག་ཟོས་བདེ་ཞིང་ལོ་བརྒྱར་འཚོ། །ཨ་རུ་ར་ནི་མར་ནང་བསྲེས། །བཟའ་ཞིང་མར་དེ་འཐུངས་ན་ནི། །རྒས་སྲ་ལུས་ནི་ཡུན་རིང་གནས། །སྟོབས་ནི་འཕེལ་བར་བྱེད་འགུར་ཏེ། །ཇི་ལྟར་དམ་པ་བྱས་གཟོ་བ། །ལན་ཅིག་ཕན་འདོགས་ཇི་ལྟ་བཞིན། །སྐྱུ་རུ་ར་ཁུ་སྦྲང་རྩི་དང༌། །ཁར་མར་དང་ལྡེ་གུ་བྱས། །བསྟེན་ཞིང་འཕྲོད་པ་ཟ་བའི་མི། །རྒས་པའི་གནོད་པ་འཇིག་འགྱུར་ཏེ། །ཉིས་བསྲུང་བསྟན་བཅོས་རྒྱ་ཆེན་མཚུངས། །སྐྱུ་རུ་ར་དང་བྱི་དང་ཀ །ཨ་ས་ན་ཡི་སྙིང་པོའི་ཕྱེ། །ལྕགས་ཕྱེ་ཏིལ་མར་སྦྲང་རྩི་ཡི། །མར་བཅས་ལྡེ་གུ་བསྟེན་ན་ནི། །ན་ཚོད་མཛེས་པ་མ་ཉམས་འགྱུར། །ལྕགས་ཕྱེ་བྱི་དང་ཀ་ཡི་ཕྱེ་མ་དང༌། །མར་དང་སྦྲང་རྩི་བསྲེས་ལ་ལོ་གཅིག་ཙམ། །ཨ་ས་ན་ཡི་ཟ་མ་ཏོག་ནང་གཞུག །བསྟེན་ན་སྟོབས་ལྡན་ཚེ་རིང་སྐྲ་གནག་འགྱུར། །བྱི་དང་ག་དང་གོ་བྱེ་བཅའ་སྒ་རྣམས། །མར་དང་སྦྲང་རྩིར་བཅས་པ་གང་གིས་ཟོས། །རྒས་པའི་ཆུ་བོ་ནད་ཀྱི་རབ་རླབས་ཅན། །ན་ཚོད་ལྡན་པའི་སྐྱེས་བུ་དེ་བརྒལ་འགྱུར། །སེང་ལྡེང་ཨ་ས་ན་ཡི་ཁུ་བ་དང༌། །འབྲས་བུ་གསུམ་དང་སྦྲང་རྩི་མར་སྦྱར་བ། །ཆོ་ག་བཞིན་དུ་བསྟེན་པའི་མི་རྣམས་ནི། །ཚེ་རིང་འགྱུར་བ་འདི་ལས་ངོ་མཚར་མེད། །ཛི་བ་ཀ་ཡི་ཁུ་བ་སོར་མོར་ཆགས། །ཁར་སྦྲང་
རྩི་མར་དང་འབྲས་བུ་གསུམ། །སྐྱེས་བུ་དམ་པས་བསྟེན་པར་གྱུར་ན་ནི། །རྒས་དང་ནད་ནི་ངེས་པར་བཟློག་པར་འགྱུར། །བ་སྤྲུ་བ་ནི་སར་བ་སྲང་ཕྱེད་དང༌། །འོ་མར་བཏགས་པ་ཟླ་ཕྱེད་ཟླ་བ་གཉིས། །ཟླ་དྲུག་ལོ་གཅིག་བར་དུ་འཐུངས་ན་ནི། །རྒས་ཤིང་རྙིང་པ་འང་སླར་ནི་གཞོན་པར་འགྱུར། །མུར་བ་ཨང་ཤུ་མ་ཏི་བྲི་ཧ་ཏི། །བ་ལ་པུ་ཤེལ་ཙེ་དང་པ་ཏ་དང༌། །ཨ་ས་ན་དང་ཐལ་ཏྲེས་ཨ་ཀ་རུ། །པྲི་ཡང་ཀུ་དང་ཙནྡན་རེ་རེ་ཡིས། །ཆོ་གའང་བ་སྦྲུ་བ་དང་མཚུངས་པ་ཡིན། །ཉེའུ་ཤིང་ལྡེ་གུ་ཁུ་བར་བསྐོལ་བ་དང༌། །ཞུན་མར་ཁ་རབ་བཅས་པ་ཟ་བྱེད་པ། །དེ་ནི་འཚོ་བའི་ལམ་དུ་ཞུགས་གྱུར་ཚེ། །ནད་ཀྱི་རྐུན་པོས་ཆོམས་པར་མི་འགྱུར་རོ། །ཨ་ཤྭ་གནྡྷ་འོ་མར་བཅས་པ་ནི། །མར་རམ་ཏིལ་མར་ཆུ་དྲོན་སྦྱར་བ་དང༌། །ཟླ་ཕྱེད་བསྟེན་ན་ཉམ་ཆུང་ལུས་རྒྱས་ཤིང༌། །ཇི་ལྟར་ལོ་ཏོག་གཞོན་ལ་ཆར་བབ་མཚུངས། །ཉིན་རེ་ཏིལ་ནག་སྲང་ནི་རེ་རེ་དག །ཟོས་པའི་རྗེས་ལ་ཆུ་གྲང་འཐུངས་གྱུར་ན། །ལུས་ནི་ཤས་ཆེར་རྒྱས་པ་ཉིད་འགྱུར་ཞིང༌། །འཆི་བའི་བར་དུ་སོ་ནི་བརྟན་པར་འགྱུར། །གཟེ་མ་སླེ་ཏྲེས་སྐྱུ་རུ་རའི་ཕྱེ་མ། །མར་དང་སྦྲང་རྩི་ཆ་མཉམ་ལྡེ་གུ་ཟོས། །རོ་ཙ་ལུས་བརྟན་ནད་ཀྱི་སྡུག་བསྔལ་ཞི། །ལོ་བརྒྱ་འཚོ་ཞིང་སྐྲ་ནི་ནག་པོར་འགྱུར། །ཏིལ་ནག་ཨ་རུ་ར་དང་སྐྱུ་རུ་ར། །བ་རུར་དང་བཅས་པ་བརྡུངས་ནས་བསྟེན། །མི་དེ་རྨ་བྱ་བཞིན་དུ་མ་དངས་ལྡན་ཞིང༌། །ཡིད་དུ་འོང་བའི་བདེ་བ་ཐོབ་པར་འགྱུར། །བྲག་ཞུན་མར་དང་སྦྲང་རྩི་བྱི་དང་ག །ཨ་རུ་ར་དང་ལྕགས་ཕྱེ་དངུལ་ཆུ་དང༌། །ཏ་བྱ་བསྟེན་ན་ལུས་ཟུངས་རྫོས་འགྱུར་ཏེ། །ཡར་ངོ་ཟླ་ཕྱེད་རྫོགས་པའི་ཟླ་བ་འདྲ། །གང་ཞིག་བྲིང་ག་ར་ཛའི་ཁུ་བ་ཟླ་བ་གཅིག །ཉིན་རེ་རྒྱུན་དུ་བསྟེན་པར་བྱེད་པ་དང༌། །འོ་མ་འཐུངས་ཏེ་སྟོབས་དང་བརྩོན་འགྲུས་ལྡན། །ལོ་བརྒྱུས་འཚོབ་དག་ཀྱང་ཐོབ་པར་འགྱུར། །ཤུ་དག་ཀྱང་ནི་ཟླ་བ་གཅིག་བསྟེན་ཞིང༌། །འོ་མ་འམ་མར་རམ་ཏིལ་མར་བཅས་པ་བསྟེན། །གདོན་གྱིས་མི་ཚུགས་པ་ཡི་ལུས་འགྱུར་ཞིང༌། །ཡིད་གཞུངས་ཚིག་ནི་ཤིན་ཏུ་གསལ་བར་འགྱུར། །མ་དུ་ཀ་པ་རྞི་ཡི་མར་དང་བརྔོས། །ཟླ་གཅིག་བར་དུ་ཟས་མ་ཟོས་པར་བསྟེན། །གཟུགས་ནི་རྒྱ་ཆེར་འཚོ་ཞིང་སྤོབས་པ་ཆེ། །གཞོན་ཞིང་མདངས་ལྡན་ཡོན་
ཏན་ལྡན་པར་འགྱུར། །འབྲས་བུ་གསུམ་དང་ཙང་གི་རི་དང་ནི། །ལྕགས་ཕྱེ་སྲང་ནི་ལྔ་བཅུ་ལས་བྱས་ཤིང༌། །ཀོ་ཤ་ད་ཀའི་ཁུ་བའི་ནང་དུ་བཏགས། །རི་ལུ་སུམ་བརྒྱ་བྱས་ནས་རི་ལུ་དེ། །གྲིབ་མར་བསྐམས་ཏེ་རིམ་གྱིས་མ་ལུས་པར། །བཀྲུ་སྨན་བྱ་ཞིང་ཐུག་སླའི་རིམ་པ་དང༌། །ཐུག་སྐ་གར་པོ་ཤ་ཁུ་འབྲས་ཆན་དང༌། །མར་ལ་བསྟེན་ཞིང་ཟླ་གཅིག་ལུས་བསྡམས་ལ། །ཟླ་གཅིག་འདས་ནས་རང་དགའ་ཉིད་དུ་སྤྱད། །འབད་པས་དུས་ཀུན་ཏུ་ནི་མ་ཞུ་སྤང༌། །ལ་གཅིག་བར་དུ་སྦྱོར་བ་འདི་བསྟེན་ན། །གང་ཞིག་གསོ་དཀའི་ནད་ཀྱིས་ཉེན་པའང༌། ཤིན་ཏུ་སྟོབས་ཆེ་སྐྱེས་བུའི་བྱ་བ་རྫོགས། །ལུས་རྒྱས་འཇམ་ཞིང་མིག་དང་རྣ་བ་གསལ། །གཞོན་པ་ཉིད་དང་ལོ་ནི་ལྔ་བརྒྱར་འཚོ། །སེང་ལྡེང་ཤིར་ཤ་བ་དང་ཨ་ས་ན། །རྨ་བྱ་ཨ་རུ་ར་དང་སྐྱུ་རུ་ར། །གོ་བྱེ་བྱི་དང་ག་བཏགས་ཆུ་འགྱུར་ནི། །བཅོ་བརྒྱད་ནང་བསྐོལ་ལྕགས་ཀྱི་དུམ་བུ་གཞུག །ལྕགས་ཀྱི་སྣོད་དུ་ཞག་གསུམ་ཉི་མ་ཡི། །འོད་ཀྱིས་བསྲོས་ལ་དེ་རྗེས་མེ་ལ་ནི། །ལྕགས་ཀྱི་ཕྱེ་མ་ཞིང་པར་བྱས་ཏེ་བསྐོལ། །དེ་བཙགས་ཁུ་བ་ཆ་གཅིག་འོ་མ་ནི། །ཆ་གཅིག་དེ་བཞིན་གསོ་མའི་ཁུ་བ་གཅིག །ཉེའུ་ཤིང་བསྐོལ་བའི་ཁུ་བ་ཆ་གསུམ་དང༌། །འདིར་ནི་མར་སར་ཆ་ནི་བཞི་དང་སྦྱར། །འདི་དག་གཅིག་ཏུ་ལྕགས་ནག་སྣོད་དུ་བསྐོལ། །ཁར་རྡུལ་མེད་དེ་བཞིན་སྦྲང་རྩི་དང༌། །དེ་བཞིན་མར་དང་བསྲེས་པར་གྱུར་པ་དང༌། །འཕྲོད་པའི་ཟས་དང་སྐོམ་དང་སྤྱོད་ལམ་བཅས། །སྲང་རེ་རྟག་ཏུ་བསྟེན་པར་གྱུར་ན་ནི། །དཔལ་དང་ལྡན་ཞིང་ཉེས་པ་བསལ་བ་དང༌། །ནགས་ཀྱི་མ་ཧེ་ལྟ་བུའི་སྟོབས་ལྡན་ཞིང༌། །རྟ་ལྟར་ན་མགྱོགས་ལ་ལུས་ནི་བརྟན་པ་དང༌། །སྐྲ་ནི་བུང་བའི་མདོག་ལྟར་གནག་པ་དང༌། །ཁ་ནི་དྲི་ཞིམ་བུད་མེད་མང་བསྟེན་ནུས། །ཚིག་གསལ་ཡིད་གཞུང་ཕུན་སུམ་ཚོགས་པ་དང༌། །ཟླ་གཅིག་བསྟེན་ན་མེ་དྲོད་ཆེ་བ་ཡིན། །དེ་ནི་མི་ཡི་སེང་གེ་འམ་མེའམ་ནི། །བཙོ་མ་གསེར་གྱི་མདོག་འདྲའི་ལུས་འཛིན་འགྱུར། །མི་ཡི་སེང་གེའི་སྦྱོར་བ་འདི། །ཟོས་ན་ནད་ཀྱིས་མི་ཉེན་ཏེ། །འཁོར་ལོ་འབར་བའི་ལག་པ་ཡིས། །ལྷ་མིན་ཚོགས་ནི་འཇིགས་དང་འདྲ། །བྲིང་གར་ཛའི་མྱུ་གུའི་ཆོ་ག་འདིས། །བརྡོས་ཤིང་མར་
བཅས་ཟོས་ལ་བསྡམས་དང་བཅས། །ལྟ་སྦྱངས་པ་ལ་ཨ་ས་ནའི་ཁུ་བ། །འོ་མ་འཐུངས་ཤིང་ཟས་ཀྱི་བྱ་བ་བྱེད། །ཟླ་གཅིག་བར་དུ་བསྟེན་པར་གྱུར་ན་ནི། །བདེ་ཞིང་ལོ་ནི་ཉིས་བརྒྱའི་བར་དུ་འཚོ། །ལན་ཅིག་སྨྲས་པའི་ཚིག་ཀྱང་ཟིན་གྱུར་ཞིང༌། །དྲན་དང་དབང་པོ་ཉམས་པ་མེད་པར་འགྱུར། །གང་ཞིག་སྦྱོར་བ་འདི་ཡིས་ནི། །ཏིལ་མར་བསྟེན་པར་བྱེད་པ་དག །དེ་ཡིས་ཡོན་ཏན་དེ་ཐོབ་ཅིང༌། །ལུས་ནི་ནག་པོ་ཉིད་དུ་འགྱུར། །བཅུད་ཀྱིས་ལེན་ནི་དུས་དང་རྗེས་མཐུན་ཞིང༌། །བསྟེན་ནུས་འབྲས་བུར་བཅས་པ་བཤད་པ་ཡིན། །གཞན་དག་ཕན་ཡོན་བཅས་པ་ཡོད་མོད་ཀྱིས། །རྙེད་པར་དཀའ་བས་བདག་གིས་མ་བཤད་དོ། །བཅུད་ཀྱིས་ལེན་གྱི་ཆོ་ག་ལས། །ཉམས་པས་གལ་ཏེ་ནད་སྐྱེ་ན། །བཅུད་ཀྱིས་ལེན་དེ་སྤངས་ནས་ནི། །དེ་ཡི་སྨན་ནི་ཇི་བཞིན་བྱ། །བདེན་པར་སྨྲ་ཞིང་ཁྲོ་བ་མེད། །དབང་པོ་བསྡམས་ཤིང་བདག་ཉིད་ཐུལ། ཞི་ཞིང་དམ་པའི་སྤྱོད་ལ་དགའ། །རྟག་ཏུ་བཅུད་ལེན་ཡིན་ཞེས་བྱ། །ཡོན་ཏན་འདི་དག་ལྡན་གྱུར་པས། །གང་ཞིག་བཅུད་ལེན་བསྟེན་གྱུར་པ། །དེ་ནི་དགའ་ཞིང་ཚེ་རིང་ལ། །འཇིག་རྟེན་འདི་དང་གཞན་དུ་བདེ། །སྤྱོད་པ་བསྟན་བཅོས་རྗེས་འཇུག་ཅིང༌། །གམ་ན་གནས་པའི་སེམས་དང་མཐུན། །དོན་ལ་བློ་ནི་མ་འཁྲུགས་པ། །བཅུད་ཀྱིས་ལེན་ནི་རྫོགས་པ་ཡིན། །ཡན་ལག་བརྒྱད་པའི་སྙིང་པོ་བསྡུས་པ་ལས། །ཕྱི་མའི་གནས་ཀྱི་ལེའུ་སུམ་ཅུ་རྩ་དགུ་པའོ།། །།ཡན་ལག་བརྒྱད་པའི་སྙིང་པོ་བསྡུས་པ་ལས། །རྒས་པ་གསོ་བའི་ཡན་ལག་རྫོགས་སོ།། །།དེ་ནས་རོ་ཙ་གསོ་བའི་ལེའུ་བཤད་པར་བྱའོ། །སྐྱེས་བུས་རྟག་ཏུ་ཡུལ་བསྟེན་པས། །རོ་ཙ་བར་ནི་འདོད་བྱ་སྟེ། །དགའ་དང་བརྟ་དང་བུ་རྒྱུད་ནི། །ཡོན་ཏན་ལྡན་པས་དེ་ལ་གནས། །བུ་ཚའི་རྒྱུད་ནི་སྐྱེད་བྱེད་ཅིང༌། །འཕྲལ་དུ་ཡང་དག་དཀའ་བྱེད་གང། །གང་གིས་རྟ་ལྟར་རབ་སྟོབས་ལྡན། །བུད་མེད་ལ་ནི་ཐོགས་མེད་འགྲོ། །བུད་མེད་ལ་རབ་ཆགས་འགྱུར་བ། །གང་དང་གང་གིས་འཕེལ་འགྱུར་བ། །དེ་ནི་རོ་ཙ་བྱེད་པ་སྟེ། །ལུས་ཀྱི་སྟོབས་ཀྱང་སྐྱེད་པའི་མཆོག །ཆོས་དང་གྲགས་དང་ཚེ་རིང་དང༌། །འཇིག་རྟེན་གཉིས་ཀའི་
བཅུད་ལེན་འགྱུར། །གཅིག་ཏུ་སྐྱོན་ནི་མེད་པ་ཡི། །ཚངས་པར་སྤྱོ་ལ་བདག་ཡི་རང༌། །སྙིང་སྟོབས་ཆུང་བ་ཉོན་མོངས་པས། །གནོད་པར་གྱུར་བའི་ནད་བུ་ཅན། །ལུས་མི་ཟད་པ་བསྲུང་བའི་ཕྱིར། །རོ་ཙའི་ཆོ་ག་བརྗོད་པ་ཡིན། །ནད་མེད་ལང་ཚོ་ལྡན་པ་དག །རོ་ཙ་བ་ནི་སྟེན་བྱེད་པ། །དུས་ཚིགས་ཀུན་ལ་ཉིན་རེ་ཞིང༌། །ཉལ་པོ་བྱ་བ་དགག་པ་མེད། །དེ་ནས་སྣུམ་གྱུར་སྦྱང་བྱས་པ། །ནི་རུ་ཧ་དང་འཇམ་རྩིར་བཅས། །མར་དང་ཏིལ་མར་སྦྲང་རྩི་དང༌། །ཤ་ཁུ་འོ་མ་ཁ་རར་བཅས། །འོ་མ་ཤ་དང་ཤ་ཁུ་བཟའ། །སྦྱོར་བ་ཤེས་པས་དང་པོར་གཏད། །དེ་ནས་རོ་ཙ་བྱེད་སྦྱོར་བ། །ཁུ་བ་བུ་ཚ་འཕེལ་བྱེད་བྱ། །མེ་ཏོག་དྲི་མནམ་གྲིབ་མ་མེད། །འབྲས་བུ་མེད་པར་གྱུར་པའི་ཤིང༌། །ཡལ་ག་གཅིག་པའི་ཤིང་གཅིག་བཞིན། །བུད་མེད་མེད་མི་དེ་དང་འདྲ། །གོམ་འགྲོས་འཁྱོར་ཞིང་ཚིག་མི་གསལ། །རྡུལ་གྱིས་གཡོགས་པ་ལྟར་སྣང་ཞིང༌། །བཞིན་རས་སྣབས་ཀྱིས་གོས་པ་ཡང༌། །སྙིང་ནི་དགའ་བར་བྱེད་པ་ཡིན། །རེག་པ་དང་ནི་མཐོང་སྩོགས་ལ། །བུ་མཉམ་བདེ་བ་ཡོད་མིན་ན། །གང་ཞིག་ཆོས་དང་གྲགས་པར་ལྡན། །ང་རྒྱལ་རིགས་འཕེལ་སྨོས་ཅི་དགོས། །ལུས་སྦྱང་བྱས་ཏེ་ཅི་ནུས་པར། །རོ་ཙའི་སྦྱོར་བ་བརྩམ་པར་བྱ། །འདམ་བུ་གུང་ཤིང་འཇག་མ་སོགས། །པུ་ཤེལ་ཙེ་དང་བི་ད་རི། །ཀཎྜ་ཀ་རིའི་རྩ་བ་དང༌། །བ་ལ་འཚོ་བྱེད་ཟངས་རྩིབ། །ར་མཉེ་བ་གཉིས་མེད་གཉིས། །ཉེའུ་ཤིང་པརྞ་རྣམ་གཉིས་དང༌། །ཨ་ཤྭ་གནྡྷ་ཁ་སྲལ་ཕྲེའུ། །ཨ་ཏི་བ་ལ་བ་སྤྲུ་བ། །བི་ད་རི་ཏི་བ་ཡ་སྱེ། །ར་སྣ་གཙེ་མ་ཛི་བན་ཏི། །ཤིང་མངར་ས་ལ་པརྞི་རྣམས། །རེ་རེའང་སྲང་ནི་གསུམ་གསུམ་ཆ། །མོན་སྲན་གྲེའུ་བྲེ་བཞི་དང༌། །ཆུ་བྲེ་སུམ་ཅུ་གཉིས་ནང་བསྐོལ། །ཁུ་བ་བྲེ་བཞི་ལུས་པ་རུ། །མར་བྲེ་བཞི་དང་བིད་རི། །སྐྱུ་རུ་ར་དང་བུ་རམ་ཤིང༌། །བྲེ་ནི་བཞི་བཞི་གཞུག་པར་བྱ། །འོ་མ་མར་གྱི་བཞི་འགྱུར་དང༌། །བིར་ཁ་སྲལ་རམ་ཉེ་གཉིས། །ཤིང་མངར་ཕྲལ་གུ་པི་པི་ལིང༌། །རྒུན་འབྲུམ་འབྲ་རོ་བི་ད་རི། །མ་དུ་ཀ་དང་ཉེའུ་ཤིང་པ། །འདི་དག་བཏགས་ཏེ་བཅུག་ནས་ནི། །དེ་བསྐོལ་བ་བཙགས་པའི་ནང་དུ་ནི། །ཀ་ར་དཀར་པོ་སྨིག་རྐང་ནི། །སྨན་ནི་བྲེ་རེ་གཞུག་པ་
དང། །པི་པི་ལིང་ནི་སྲང་བཞི་དང༌། །ན་ལེ་ཤམ་ནི་སྲང་གཅིག་དང༌། །ཤིང་ཚ་སུག་སྨེལ་གེ་སར་རྣམས། །རེ་རེ་སྲད་ནི་ཕྱེད་ཕྱེད་ཕྱེ། །སྦྲང་རྩི་སྲད་ནི་བཅུ་དྲུག་སྦྱར། །དེ་ལས་ཉིན་རེ་སྲང་རེ་བཟའ། །འོ་མ་དང་ནི་ཤ་ཁུ་བཏུང༌། །དེས་ནི་རྟ་ལྟར་སྤྱོད་གྱུར་ཅིང༌། །མཆིལ་པ་ལྟ་བུར་འདོད་པ་སྤྱོད། །བིད་རི་དང་པི་པི་ལིང༌། །ཤ་ལི་འབྲས་རྩ་པི་ཡ་ལི། །ཁ་སྲལ་ཕྱེ་མ་ཕུལ་རེ་དང༌། །དེ་བཞིན་སྦྲང་རྩི་སྲང་བརྒྱད་དང༌། །ཁ་རའི་ཕྱེ་མ་སྲང་ལྔ་བཅུ། །མར་སར་སྲང་ནི་བཅུ་དྲུག་སྦྱར། །དེ་ལས་ཞོ་ནི་གཉིས་གཉིས་བཟའ། །བུད་མེད་བརྒྱ་ལ་སྤྱོད་པར་ནུས། །ཁྲ་སྲལ་ཕྲེའུ་ཞོ་འམ་ནི། །ན་ཤ་འོ་མར་བསྐོལ་ཏེ་བསྒྲངས། །མར་དང་སྦྲང་རྩིར་བཅས་པ་དག །ཟོས་ལ་བསར་འོ་མ་བཏུང༌། །མཚན་མོ་ཐོག་ཐག་གཉིད་མ་ལོག །དུབ་པ་མེད་པར་ཉལ་པོ་སྤྱོད། །ར་ཐུག་རླིག་པ་འོ་མར་བཙོས། །ཏིལ་དང་ལན་མད་བསྲེས་པ་དང༌། །ཁ་རར་བཅས་ཟོས་གང་ཡིན་དེ། །བུད་མེད་བརྒྱ་ལའང་གསར་སྙམ་སེམས། །བིད་རི་ཡི་ཕྱེ་མ་ནི། །རང་གི་ཁུ་བར་ལན་མང་སྤངས། །ཞུན་མར་སྦྲང་རྩི་བཅས་བལྡགས་ན། །བུད་མེད་བཅུ་ལ་སྤྱོད་པར་ནུས། །པི་ལིང་སྐྱུ་རུ་ར་ཡི་ཕྱེ། །རང་གི་ཁུ་བར་ལེགས་པར་སྤངས། །ཤ་ཁ་མར་དང་སྦྲང་རྩིར་བཅས། །ཟོས་རྗེས་འོ་མ་འཐུངས་པར་གང༌། །མི་དེ་བརྒྱད་ཅུ་ལོན་ན་ཡང༌། །ལང་ཚོར་གནས་ཤིང་འདོད་སྤྱོད་ནུས། །ཤིང་མདར་ཕྱེ་མ་ཞོ་གཉིས་དང༌། །མར་དང་སྲང་རྩི་དེ་མཉམ་པ། །ཟོས་རྗེས་འོ་མ་འཐུངས་གྱུར་ན། །མི་དེ་རྟག་ཏུ་འདོད་སྤྱོད་ནུས། །ཀར་ཀ་ཏ་ཡི་སྲིད་གི་ཕྱེ། །འོ་མར་སྦྱར་ཏེ་འཐུངས་པ་དང༌། །ཁ་ར་འོ་མ་མར་བཅས་པའི། །ཟས་ཟོས་བུད་མེད་ལ་ཕོད་འགྱུར། །པ་ཡ་སྱ་དང་འོ་མ་བསྐོལ། །མར་དང་སྦྲང་རྩི་བཅས་ཟ་ཞིང༌། །བ་ནི་ཡར་མའི་འོ་མ་འཐུང༌། །དེ་ཡི་ས་བོན་ཟད་མི་ཤེས། །ཁ་སྲལ་ཕྲེའུ་བུ་རམ་གྱི། །ས་བོན་ཕྱེ་མ་ཁ་རར་བཅས། །འོ་མ་བཞོས་མ་ཐག་བཏུང་ན། །ལུག་པོང་ལྟ་བུར་སྤྱོད་པར་འགྱུར། །ཨུ་ཙ་ད་ཡི་ཕྱེ་མ་དང། །ཉེའུ་ཤིང་སྦྱར་བའང་དེ་བཞིན་ནོ། །ཞོ་སྤྲིས་ཟླ་བ་ལྟར་དཀར་བའི། །ཚགས་ཀྱིས་བཙགས་པ་ཟོས་ནས་ནི། །ཁར་དྲུག་ཅུའི་འབྲས་ཆན་ཟོས། །རྒན་པོའང་གཞོན་ནུ་བཞིན་དུ་སྤྱོད། །གཟེ་མ་མ་ཤ་ཨ་རུར། །ཁ་སྲ་ལ་ས་བོན་ཉེ་ཤུ་ཤིང་པ། །འོམ་བཅས་འཐུང་རྒས་པ་ཡང༌། །བུད་མེད་
བརྒྱ་ལ་སྤྱོད་པར་ནུས། །གང་ཡང་སྣུམ་ཞིང་མངར་བ་དང༌། །སྟོབས་འཕེལ་ཉམས་ནི་བརྟས་བྱེད་དང༌། །ཡིད་ནི་དགའ་བར་བྱེད་པ་གང༌། །དེ་དག་ཐམས་ཅད་རོ་ཙར་བཤད། །དེ་བས་རྫས་མི་འདི་ལྟ་བུས། །བརྟས་བྱས་བུད་མེད་ལ་འཇུག་བྱ། །རང་གི་ཤུགས་ཀྱིས་སྤྱོད་པ་དང༌། བུད་མེད་ཡོན་ཏན་གྱིས་དགའ་སྤྱད། །ཆོས་ཀྱི་དཔག་བསམ་ཤིང་མྱུ་གུ། །དབང་པོའི་བདེ་བ་ཀུན་བསྟེན་བྱ། །ཡུལ་ནི་ཡིད་དུ་འོང་བ་ལྔ། །འདོད་པའི་ལྷ་ཡི་མདའ་ཡིན་ནོ། །ཡིད་འོང་ཡུལ་ནི་རེ་རེས་ཀྱང༌། །ཚིམ་ཞིང་དགའ་བྱེད་མཆོག་ཡིན་ནོ། །བུད་མེད་ལུས་ལ་འདུས་ནས་གང༌། །གནས་པ་དེ་ནི་སྨོས་ཅི་དགོས། །གང་གི་མིང་ཐོས་ན་ཡང་སྙིང་དགའ་ཞིང༌། །མཐོང་ན་ངོམས་པར་འགྱུར་བ་མེད་པ་དང༌། །དབང་པོ་ཀུན་འདྲེན་ལྕགས་ཀྱུར་འགྱུར་བ་ཡིན། །བུད་མེད་ཁྱོ་ཡི་རྗེས་འཇུག་འཕྱོན་མ་མིན། །སྒྱུ་རྩལ་འཇོ་སྒེག་ན་ཚོད་ལུས་ཀྱིས་བརྒྱན། །དགའ་བའི་ཕྱིར་ནི་ངོ་ཚ་དབེན་པར་སྤྱོད། །ཚིག་སྙན་སྨྲ་ཞིང་མཚུངས་པར་མངོན་དགའ་བཅས། །བུད་མེད་དེ་ནི་རོ་ཙའི་དོན་མཆོག་བྱེད། །འདོད་པའི་བསྟན་བཅོས་ལས་བཤད་སྐྱོན་མེད་པའི། །ཡུལ་དང་དུས་དང་ཉམས་སྟོབས་རྗེས་མཐུན་ཞིང༌། །སྨན་དཔྱད་བསྟན་བཅོས་སྦྱོར་དང་མི་འགལ་བ། །འདོད་པའི་སྤྱོད་པ་མ་ལུས་སྤྱད་པར་བྱ། །བསྐུ་བྱུག་ལུས་དྲིལ་སྨན་ཆུ་བླུགས་དང་དྲིལ། །མེ་ཏོག་ཕྲེང་བ་སྣ་ཚོགས་རྒྱན་དང་ལྡན། །གླུ་དང་སྙན་དང་གསལ་སོགས་གཏམ་ལ་མཁས། །རང་བཞིན་ན་ཚོད་མཚུངས་ཤིང་དབང་གྱུར་གྲོགས། །རང་གི་ཁང་པའི་ཉེ་འཁོར་ཁྲུས་རྫིང་བུ། །པདྨའི་གེ་སར་སྦྲང་རྩིས་མྱོས་པ་ཡིས། །སྦྲང་མ་བྱ་དང་བཅས་པས་གྱུར་པ་ནི། །སྔོ་ཞིང་གཞི་མཉམ་རི་ཡ་འདབ་ན་ནི། །ནགས་ཚལ་ཁྱིམ་དང་ཉེ་བར་འགྱུར་བ་དང༌། །མཐོང་ན་དགའ་བའི་ཤིང་ནི་སྣ་ཚོགས་སྐྱེ། །མཉན་ན་བདེ་བའི་ཁུ་བྱུག་སྒྲ་སྙན་སྒྲོགས། །ལུས་བདེ་བུད་མེད་རྒྱན་ལྡན་དུས་དབང་འགྱུར། །སེམས་བདེ་མ་ལུས་འཁོར་གྱིས་བསྐོར་བ་དང༌། སོ་རྩི་དང་ནི་ཆང་དང་ཆུང་མ་ནི། །ཡིད་འོང་མཚན་མོ་ཟླ་ཟེར་བཅས་པར་འདུག །ཡིད་ནི་དགའ་བར་བྱེད་པ་གང་དང་གང༌། དེ་དང་དེ་ནི་རོ་ཙར་བྱེད་པ་ཡིན། །ཆུང་མའི་ཁ་ནི་ཨུཏྤལ་ལྟར་དྲི་ཞིམ། །པི་ཝང་སྙན་པའི་སྒྲ་ནི་ཉན་བྱེད་དང༌། །མལ་སྟན་ཡིད་འོང་མེ་ཏོག་གཅལ་བཀྲམ་པ། །
ལྕུག་མ་མེ་ཏོག་མྱུ་གུས་བརྒྱན་པ་འདྲ། །ཡུལ་དང་དུས་ལ་གནོད་པ་གང་ཡང་མེད། །ཡུལ་གྱི་ཡིད་ལ་གནོད་པ་ཆུང་ངུའང་མེད། །རེ་ཙའི་སྦྱོར་བ་ཉེ་བར་ལྡན་གྱུར་པ། །འདོད་པའི་འདོད་པ་ཡོངས་སུ་རྫོགས་པར་བྱེད། །གླ་སྒང་བར་བ་ཏ་ནི་རིམས་ལ་ཕན། །སྐོམ་དད་ཆེ་ལ་བོང་པ་བསྲེགས་པ་ནི། །ཆུ་ཡི་ནང་དུ་གསུང་པའི་དངས་མ་ཕན། །སློན་ལ་འབྲས་ཡོས་ཆུ་སོའི་ནང་བྲག་ཞུན། །གཅིན་སྙི་སྐྱུ་རུ་ར་དང་སེར་པོ་གཉིས། །སྐྱ་རྦབ་ནད་ལ་ལྕགས་ཀྱི་ཕྱེ་མ་མཆོག །རླུང་དང་བད་ཀན་ལ་ནི་ཨ་རུར། །མཆེར་བའི་ནད་ལ་པི་པི་ལིང་མཆོག་ཡིན། །གློ་རྡོལ་བ་ལ་རྒྱ་སྐྱེགས་ཁུ་བ་བསྔགས། །དུག་གི་ནད་ལ་ཤིར་ཤ་རབ་ཏུ་བསྔགས། །ཚིལ་དང་རླུང་ནང་ལ་ནི་གུ་གུལ་ཕན། །ཁྲག་མཁྲིས་ལ་ནི་བ་ཤ་ཀ་རབ་སྔགས། །འཁྲུ་བའི་ནད་ལ་དུག་མོ་ཉུང་ཕན་ཞིང༌། །གཞང་འབྲུམ་གོ་བྱེ་དབྱིག་དུག་ལ་གསེར་ཕན། །ཚོ་ཆེས་པ་ལ་སྐྱེར་ཁཎྜ་བསྔགས་ཤིང། །སྲིན་བུའི་ནད་ནི་བྱི་དང་ག་ཡིས་འཇོམས། །གཅོང་ཆེན་ལ་འཆང་ར་ཤའམ་འོ་མ་ཕན། །མིག་གི་ནད་ལ་འབྲས་བུ་གསུམ་རབ་ཕན། །དྲེག་ནད་ལ་ནི་སླེ་ཏྲེས་རབ་བསྔགས་ཤིང༌། །ཕོ་བའི་ནད་ལ་དར་བ་གསར་བ་མཆོག །མཛེ་ལ་སེང་ལྡེང་སྙིང་པོ་བསྟེན་པས་མཆོག །ནད་ཀུན་ལ་ནི་བྲག་ཞུན་རབ་ཏུ་བསྔགས། །སྨྱོ་བྱེད་ནད་ལ་མར་ནི་རྙིང་པ་ཕན། །བརྗེད་བྱེད་ནད་ལ་བྲམྟིའི་རྩ་བ་ཕན། །མྱ་ངན་ལ་ནི་ཆང་ནི་བླུད་པས་ཕན། །གཉིད་མེད་པ་ཡི་ནད་ནི་འོ་མས་སེལ། །ཆམ་པོ་ཞོ་ནི་སྦྱར་མ་དག་གིས་སེལ། །རིད་པའི་ནང་ལ་ཤ་ནི་སྦྱིན་པར་བྱ། །རླུང་གི་ནད་ལ་སྒོག་སྐྱ་རབ་ཏུ་བསྔགས། །ཡན་ལག་རེངས་པའི་ནད་ནི་དུགས་ཀྱིས་སེལ། །ཕྲག་པ་ཕྲག་གོང་ལག་ངར་ན་བ་ལ། །ཐང་ཆུ་ཁ་བོར་ཡི་སྣ་སྨན་གཏང༌། །གླད་པའི་ནང་ལ་མར་སར་ཧག་སྐྱིས་སེལ། །དམུ་རྫིང་རྔ་མོའི་གཅིན་དང་འོ་མས་སེལ། །མགོ་བའི་ནད་ཀུན་ལ་ནི་སྣ་སྨན་བསྔགས། །ཁོང་འབྲས་གསར་དུ་བྱུང་ལ་གཏར་ག་གདབ། །ཁ་ཡིན་ད་ཀུན་ལ་ན་མཁུར་བཀང་ཕན། །མིག་ནད་སྣ་སྨན་མིག་སྨན་བརྟབས་སེལ། །རྒས་པ་ལ་ནིའོ་མ་ཞུན་མར་ཕན། །བརྒྱ་ལ་ཆུ་གང་བླུགས་དང་གྲིབ་མ་ཕན། །དྲོད་ཆུད་ངལ་དང་སྒེའུ་གཤེར་ཚ་རན་ཕན། །དུབ་ལ་ཆང་འཐུངས་ལུས་ནེ་ཁྲུས་བྱས་ཕན། །སྡུག་བསྔལ་བཟོད་དང་བརྟན་ལ་རྩོལ་
པ་ཕན། །གཅིན་སྲི་བ་ལ་གཟེ་མ་ཕན་པ་ཡིན། །ལུད་པ་ལུ་ལ་ཀཎྜ་ཀ་རི་ཕན། །རྩིབ་ལོགས་གཟེར་ལ་པུཥྐར་མཱུ་ལ་ཕན། །རྒས་སྲ་བ་ལ་སྐྱུ་རུ་ར་ཕན་ཞིང༌། །རྨ་ལ་འབྲས་བུ་གསུམ་དང་གུ་གུལ་ཕན། །དེ་ལྟར་ནད་རྣམས་ཀྱི་ནི་སྨན་གྱི་མཆོག །བཤད་པས་ནད་རྣམས་ཞི་བར་ནུས་པ་ཡིན། །དེ་ནི་ཡུལ་དང་དུས་ཀྱི་སྟོབས་ལས་ནི། །ཅི་རིགས་པར་ནི་བརྟགས་ཏེ་སྦྱར་བར་བྱ། །དེ་ལྟར་རྒྱུན་ཤེས་བུ་ལས་གཞུང་གི་མདོ། །ལེགས་པར་བཤད་པ་དེས་ནི་མ་ངོམས་པས། །མེ་བཞིན་འཇུག་སོགས་བློ་མཐུན་དད་པས་འདུད། །ཐེ་ཚོམ་འདི་ནི་མེ་བཞིན་འཇུག་གིས་དྲིས། སྐལ་ལྡན་ཁ་ཅིག་བདག་ཉིད་མཁས། །སྨན་དང་ནད་གཡོག་ཕུན་སུམ་ཚོགས། །སྨན་པ་རྒན་པོའི་ལུང་གིས་ནི། །རྗེས་སུ་འཇུག་ཀྱང་ནད་བཅས་ཤིང༌། །ནད་ཀྱི་སྲོག་ནི་ཟད་པར་སྣང༌། །གཞན་དག་དེ་ལས་གོ་བཟློག་སྣང༌། །དེ་ཕྱིར་ཕན་དང་གནོད་པ་ཡི། །འབྲས་བུ་ངེས་པ་མ་མཆིས་ན། །འདིར་ནི་བསྟན་བཅོས་ཀྱིས་ཅི་བསྟན། དེ་ལྟར་མེ་བཞིན་འཇུག་སོགས་སློབ་མའི་ཚོགས། །རྟོག་པ་སྐྱེས་ལ་རྒྱུན་ཤེས་བུ་ཡིས་ནི། །དེ་ཉིད་མ་ལུས་རྣམ་པར་བཤད་གྱུར་པ། །གསོ་བྱས་མ་བྱས་མཉམ་པོར་བྱ་མི་རིགས། །ཡན་ལག་དྲུག་ཅུ་ལྔ་པ་ཡི། །གསོ་བྱེད་བདེ་འགྱུར་ཡོད་མོད་ཀྱི། །ནད་ཀྱི་འདམ་དུ་བྱིང་བ་ལ། །ལག་ནས་འདྲེན་ཐབས་སྨན་ཡིན་ནོ། །འཚོ་དང་འཆི་བར་འགྱུར་བ་ལ། །ཀུན་ལ་སྨན་ཡོད་མ་ཡིན་ཞིང༌། །ཐབས་ལ་ལྟོས་པ་མ་ཡིན་ལ། །གཞན་དུ་ཐབས་ལ་ལྟོས་པའི་ནད། །ཐབས་ཀྱིས་བསྒྲུབས་ན་འགྲུབ་འགྱུར་བས། །རྒྱུ་མེད་པར་ནི་གཏན་ཚིགས་མིན། །གང་ཡང་ཁྱེད་ཀྱི་ཕུན་ཚོགས་ནི། །ཀུན་དང་ལྡན་པས་གསོས་ན་ཡང༌། འཆི་འགྱུར་ཞེས་སྨྲ་དེ་མ་ཡིན། །ཐབས་ནི་ཐབས་མིན་འགྱུར་ཡོད་མིན། །གལ་ཏེ་དེ་ལྟའི་ཐབས་ལྡན་ཞིང༌། །བློ་ལྡན་གསོ་བ་བྱས་གྱུར་ཀྱང༌། །སྔོན་ལས་ཉེས་པ་མ་གྲུབ་པས། །ཡན་ལག་བཅུ་དྲུག་ལྡན་མེད་ཡིན། །མེ་དང་ཆུ་སོགས་དུགས་དང་ནི། །རེངས་སོགས་མི་འགྲུབ་སུ་ཞིག་ཟེར། །བརྟ་དང་ཉམས་སྨད་འོ་མ་དང༌། །འབྲས་ངན་མི་བྱེད་སུ་ཞིག་འདོད། །མ་ཤ་ཁ་སྲལ་ལ་སོགས་ལ། །རོ་ཙ་མི་ནུས་སུ་ཞིག་ཟེར། །བཤང་གཅི་བསྐྱེད་དང་མང་བར་ནི། །ནད་ལ་ཐེ་ཚོམ་སུ་ཞིག་
ཟེར། །སྔགས་དང་རྒྱུད་ནི་མེད་པ་རུ། །གང་གིས་དུག་ནི་འཇུག་པར་འགྱུར། །གག་པ་ལ་སོགས་གསོ་བ་ནི། །མེད་པར་གང་ཞིག་བདེ་བར་འགྱུར། །འོན་ཀྱང་དུས་མིན་འཆི་ལ་སོགས། །གྲུབ་མཐའ་ཀུན་ཏུ་ངེས་པར་གྲགས། །འབད་པ་ཆེན་པོ་དག་གིས་ནི། །ཇི་ལྟར་གཞན་གྱིས་བཟློག་པར་ནུས། །ཙནྡན་ལ་སོགས་ཚ་སོགས་པ། །ལུང་ལས་གྲགས་པ་བཞིན་དུ་སེལ། །རིམས་ལ་སྨྱུང་དང་བརྟ་བ་དག །བསྟན་བཅོས་ཉིད་ལས་གྲགས་པ་ཡིན། །ཡན་ལག་བཞི་པའི་ཡོན་ཏན་འབྱོར། །ལེགས་པར་བརྟགས་ནས་སྦྱར་བྱ་ཞིང༌། །གཞན་དུ་ནད་ཀྱི་ཚོགས་འཇོམས་པ། །གསོ་བ་ཐེ་ཚོམ་བཅས་མི་བྱ། །འདི་ནི་དུས་མིན་འཆི་ཞགས་པ། །བརྟེན་པོ་བཅོམ་པར་བྱེད་པ་ཡིན། །ནད་ཀྱིས་སྐྲག་ཅིང་འཇིགས་པ་ལ། །སྔགས་མེད་པ་ཡི་སྲུང་སྐུད་ཡིན། །འདི་ནི་འགྲོ་བའི་སྡུག་བསྔལ་རྣམས། །སེལ་བྱེད་བདུད་རྩི་མངོན་སུམ་ཡིན། །སྣད་ངན་གནས་ན་འཕྲལ་དུ་ནི། །ཧ་ལ་ཧ་ལར་འགྱུར་བ་ཡིན། །བསྟན་བཅོས་ངེས་པ་མི་ཤེས་ཤིང༌། །ཚིག་ཙམ་ལ་ནི་རྗེས་གཞོལ་བའི། །གཤིན་རྗེའི་ཞགས་པ་ཐོགས་པ་བཞིན། །སྨན་པ་ངན་པ་རིང་དུ་སྦང༌། །སྨན་པ་གཞུང་ལ་ལེགས་མཁས་ཤིང༌། །ལུང་ལ་མཁས་པའི་བཟང་པོ་དང༌། །ལས་ལ་གོམས་ཤིང་དགེ་བ་ནི། །བཟང་པོར་འདོད་པ་དམ་པ་ཡིན། །དེ་ལྟར་རྒྱུད་ཀྱི་ཡོན་ཏན་ལྡན། །རྒྱུད་ཀྱི་སྐྱོན་ནི་སྤངས་གྱུར་པ། །གསོ་བའི་བསྟན་བཅོས་མ་ལུས་པ། །ཁྱབ་སྟེ་ཡོངས་སུ་གནས་པ་ཡིན། །དྲང་སྲོང་ཆེན་པོའི་གཞུང་རྗེས་འཇུག །རྒྱ་ཆེའི་དྲི་མ་མེད་པའི་གནས། །རྒྱ་མཚོ་ཆེན་པོ་ལྟར་ཟབ་ཅིང༌། །བསྡུས་དོན་ཉེ་བར་མཚོན་བྱེད་ཡིན། །སྨན་དཔྱད་ཡན་ལག་བརྒྱད་པའི་རྒྱ་མཚོ་བསྲུབས་པ་ལས། །ཡན་ལག་བརྒྱད་བསྡུས་བདུད་རྩིའི་ཚོགས་ཐོབ་གང༌། །དེ་ལས་དོན་ཆེན་རྩོལ་བ་ཞན་པ་རྣམས། །དགའ་བར་བྱ་ཕྱིར་རྒྱུད་འདི་ལོགས་ཤིག་བྱས། །འདི་ནི་ལུད་ཆེན་ལས་གགས་ཤིང༌། །འབྲས་བུ་མངོན་དུ་སྟོན་བྱེད་པས། །སྔགས་དང་འདྲ་བར་ལེགས་སྦྱར་གྱི། །ལོག་དཔྱོད་ནམ་ཡང་མི་བྱའོ། །འདི་བཀླགས་རྟོགས་དང་ཉམས་བླངས་པས། །ཚེ་རིང་པ་དང་ནད་མེད་དང༌། །ཆོས་དང་ནོར་དང་བདེ་དང་གྲགས། །ངེས་པར་འཐོབ་པར་འགྱུར་བ་ཡིན། །འདི་
ནི་བལྟས་ན་བསྡུས་དོན་རྟོགས་ནུས་པས། །རང་གི་གོམས་ལས་སྨན་པས་བསྐྱོད་མི་ནུས། །རྒྱ་ཆེན་རྒྱུད་གཞན་དག་ལས་གོམས་གྱུར་པས། །མི་བསྐྱོད་གྱུར་གང་དེ་ནི་ངོ་མཚར་མེད། །གལ་ཏེ་ཙ་ར་ཀ་ནི་བསླབས་གྱུར་དེས་ནི་ལེགས་ཐོས་སོགས། །ལས་བཤད་ནད་ཀྱི་མིང་ཙམ་ཡང་ནི་ཤེས་པར་འགྱུར་མ་ཡིན། །ཙ་ར་ཀ་ལ་མ་བསླབས་གསོ་བ་དག་ནི་མ་གོམས་པའི། །ཉོན་མོངས་དེས་ནི་ནད་པ་རྣམས་ཀྱི་གསོ་བ་ཇི་ལྟར་བྱ། །མངོན་པར་ཞེན་པའི་དབང་གིས་ལེགས་པར་བཤད་པར་གྱུར་པའང༌། །ཤིན་ཏུ་རྨོངས་པས་མངོན་པར་སྤྱད་པར་མི་བྱེད་གང་ཡིན་ཏེ། །དེ་ནི་དང་པོར་སྨན་དཔྱད་བསྟན་བཅོས་སྐྱོན་མེད་བཀླགས་གྱུར་ཞིང༌། །སྐྱེས་བུ་ཚེ་ཡིས་ཇི་སྲིད་ཐུབ་ཀྱི་བར་དུ་བསླབ་པར་བྱེད། །རླུང་དང་མཁྲིས་པ་བད་ཀན་ཞི་བྱའི་ཕྱིར། །ཏིལ་མར་མར་སར་སྦྲང་རྩི་རིམ་བཞིན་བསྟེན། །དེ་ལྟར་ཚངས་པའམ་ཚངས་པའི་བུ་ཡིས་བཤད། །ཚིག་གི་དབྱེ་བས་བཤད་ཀྱང་ཁྱད་འཕགས་མེད། །སྟོན་པ་པོ་ཡི་དབང་གིས་ནི། །སྨན་གྱི་ནུས་པ་ཁྱད་འཕགས་ཡིན། །དེ་བས་ཕྲག་དོག་སྤངས་ནས་ནི། །བར་མ་ཉིད་ལ་བསྟེན་པར་བྱ། །དྲང་སྲོང་གིས་བཤད་ཕྱིར་དགའ་ན། །ལེགས་ཐོས་ཙ་ར་ཀར་མ་ཟད། །ལུག་སྩོགས་ཀྱིས་བྱས་ཅི་མི་སློབ། །དེ་བས་ལེགས་བཤད་གཟུང་བར་བྱ། །འདི་ནི་ཚེ་ཡི་རེག་བྱེད་རྒྱ་མཚོ་ཡི། །སྙིང་པོ་ལས་ནི་སྙིང་པོ་བླངས་ནས་སུ། །རྣམ་པར་སྦྱར་ལས་དགེ་བ་གང་ཐོབ་པ། །དེ་ཡིས་འགྲོ་བས་དེ་ཉིད་མཐོང་བར་ཤོག །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་སྟེ་བཞི་བཅུ་ཐམ་པའོ།། །།སྨན་པའི་བདག་པོ་དགེ་འདུན་གསང་བ་ཞེས་བྱ་བའི་བུ་སྨན་པ་ཆེན་པོ་ཕ་ཁོ་ལ་ཞེས་བྱ་བས་ཡན་ལག་བརྒྱད་པའི་སྙིང་པོ་མཛད་པ་ལས། རྒྱུད་ཕྱི་མའི་གནས་ཏེ་དྲུག་པའོ།། །།སྨན་དཔྱད་ཡན་ལག་བརྒྱད་པའི་སྙིང་པོ་བསྡུས་པ་ཞེས་བྱ་བ་ཇི་སྙེད་པ་རྫོགས་སོ།། །།རྒྱ་གར་གྱི་མཁན་པོ་ཛཱ་རན་དྷ་ར་དང༌། ཞུ་ཆེན་གྱི་ལོ་ཙྪ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།