འཇམ་མགོན་བླ་མའི་ཞལ་ལུང་བདུད་རྩིའི་ཐིགས་པ།

མཉྫུནཱཐགུརོཿབཀྟྲགཱམྲྀཏསྱམཱཙལནཱམཱསྟི།
འཇམ་མགོན་བླ་མའི་ཞལ་ལུང་བདུད་རྩིའི་ཐིགས་པ་ཞེས་བྱ་བ་བཞུགས་སོ། །
བདེ་ཆེན་ཆོས་ཀྱི་སྐུ་ལས་མ་གཡོས་ཀྱང་། །སྣ་ཚོགས་གཟུགས་སྐུས་འགྲོ་བའི་དོན་མཛད་པ། །དཔལ་མགོན་བླ་མ་རྫོགས་པའི་སངས་རྒྱས་དང་། །དབྱེར་མེད་ལྷག་པའི་ལྷ་ཡིས་བདག་སྐྱོངས་ཤིག །གསང་ཆེན་སྙིང་པོའི་ལམ་བཟང་ཀྱེ་རྡོ་རྗེའི། །ཉམས་ལེན་གཙོ་བོར་གྱུར་པའི་མན་ངག་གནད། །དཔལ་ལྡན་བླ་མའི་དགོངས་པ་ཇི་བཞིན་དུ། །འཆད་པར་འགྱུར་གྱིས་མཁའ་འགྲོས་སྐབས་ཕྱེས་ཤིག །དེ་ལ་འདིར་གང་བཤད་པར་བྱ་བ་ནི། གངས་ཅན་གྱི་ལྗོངས་འདིར་གསང་སྔགས་བླ་ན་མེད་པའི་ལམ་སྲོལ་འདི་སྐྱེས་ཆེན་དམ་པ་རྣམས་ཀྱིས་གདུལ་བྱའི་དབང་པོ་དང་འཚམས་པར་བཀྲལ་བའི་བཀའ་སྲོལ་མི་འདྲ་བ་མང་དུ་མཆིས་མོད། འཇིགས་བྲལ་རྣལ་འབྱོར་གྱི་དབང་ཕྱུག་བིཪྺ་པའི་གསུང་ངག་རིན་པོ་ཆེ་ལམ་འབྲས་བུ་དང་བཅས་པའི་གདམས་ངག་གི་སྒོ་ནས་བཀྲི་ཚུལ་ནི། གང་ཟག་མཆོག་དམན་ཐམས་ཅད་འཇུག་ཏུ་རུང་བའི་ལམ་ཡིན་པས་ལྟ་སྒོམ་སྤྱོད་གསུམ་དང་པོར་ཐ་དད་དུ་ཕྱེས་ནས་རང་གི་རྒྱུད་ཚོད་དང་བསྟུན་ཏེ་ཉམས་སུ་བླང་དུ་རུང་བས་ལམ་དུས་ཐུན་བཞིའི་ཉམས་ལེན་ད་ལྟའི་བར་དུ་ས་སྐྱ་པའི་རྗེས་འཇུག་ཐམས་ཅད་ཀྱིས་ཞལ་འདོན་མཛད་པ་ཕྱག་ལེན་ལའང་ཡོད། འབྲེལ་ཚད་དོན་ལྡན་གྱི་ཆོས་ཡིན་པས་ཕན་ཡོན་ཡང་ཆེ་བར་གཞིར་བཅས། དེས་ན་སྐྱབས་འགྲོ་སེམས་བསྐྱེད་སོགས་སྔོན་འགྲོ་དངོས་གཞི་ཐམས་ཅད་རང་གིས་གང་ཤེས་དང་བསྟུན་ནས་ཉམས་སུ་ལེན་པ་ཡིན། གང་ཟག་འབྲིང་བསྒོམ་དོན་ཧ་ལམ་ཙམ་མ་ཡིན་པར་བླ་མ་ལས་འཁོར་འདས་དབྱེར་མེད་ཀྱི་ངོ་སྤྲོད་ཞིབ་ཏུ་ཐོབ་ཅིང་རང་གིས་ཀྱང་དེ་བཞིན་དུ་ཉམས་སུ་བླངས་པས་ཐ་ན་གོ་ཡུལ་ཙམ་དུ་ལྟ་བསྒོམ་སྤྱོད་གསུམ་གཅིག་ཏུ་དྲིལ་ནས་ཉམས་སུ་ལེན་ནུས་པའི་ཚེ་ལམ་དུས་ཀྱི་དམིགས་པ་འདི་བཞིན་དགོས་སོ་ཞེས་ཆོས་རྗེ་རྡོ་རྗེ་འཆང་འཇམ་མགོན་ངག་དབང་ལེགས་པ་རིན་པོ་ཆེའི་དགོངས་པ་ཆོས་རྗེ་ཉིད་ཀྱི་བཀའ་དྲིན་ལས་རྙེད་པ་རྣམ་བཤད་རྣམས་སུ་གསལ་ཁ་ཆེར་མ་མཛད་པ་རྣམས་སྒྲོ་སྐུར་དང་བྲལ་བར་མཐོང་ཐོས་ཀྱི་བཤད་ཡམ་བསྡུས་པ་མ་ཡིན་པར་གནད་དོན་སྙིང་པོར་དྲིལ་ནས་བརྗོད་ན། ཁོ་བོས་བྱས་པའི་ལམ་རིམ་སྨོན་ལམ་དུ། །དང་པོ་ལྟ་བསྒོམ་སྤྱོད་ལ་རིམ་གྱིས་ཞུགས། །བར་དུ་གསུམ་པོ་གནད་ཐོག་གཅིག་ཏུ་དྲིལ། །ཐ་མར་བསམ་བརྗོད་བྲལ་བའི་ཡེ་ཤེས་སུ། །ཐམས་ཅད་རོ་མཉམ་རྟོགས་པར་བྱིན་གྱིས་རློབས། །ཞེས་དང་། རྗེ་དཀོན་མཆོག་ལྷུན་གྲུབ་ཀྱིས། དེ་དང་དེ་འདྲའི་རྣམ་དབྱེ་ལེགས་ཤེས་ན། །འཁོར་འདས་ཐུན་མོང་ཆོས་བདུན་སོ་སོ་དང་། །གཅིག་ཏུ་བསྲེས་ནས་ཉམས་སུ་ལེན་ཚུལ་སོགས། །མང་པོའི་དོན་ལ་བློ་གྲོས་གསལ་བར་འགྱུར། །ཞེས་དང་། རྗེ་བཙུན་གོང་མའི་གསུང་རབ་རྣམས་ལས་ཚིག་མང་ཉུང་ཅི་རིགས་པའི་སྒོ་ནས་གསུངས་པ་རྣམས་ཀྱི་དོན་རྗེ་བླ་མས་བརྩེ་བས་གདམས་པར་མཛད་པ་ལམ་ཟབ་མོའི་སྦྱོར་དངོས་རྗེས་གསུམ་ཐམས་ཅད་ལྟ་བ་འཁོར་འདས་དབྱེར་མེད་ཀྱིས་རྩིས་ཟིན་པའི་དབང་དུ་བྱས་ཏེ་མདོ་རྒྱུད་རྒྱ་མཚོའི་དོན་གྱི་བཅུད་ཕྱུང་བ་གསུང་ངག་རིན་པོ་ཆེ་ལམ་འབྲས་བུ་དང་བཅས་པའི་གདམས་པ་ཡོངས་རྫོགས་སྒྲུབ་པ་པོའི་སྟན་ཐོག་གཅིག་གི་ཉམས་ལེན་ལ་ཚང་བས་ལམ་གྱི་སྔོན་འགྲོ་སྐྱབས་འགྲོ་ལྟ་བུ་ལའང་ཟབ་ཆོས་ཀྱི་གནད་ཐམས་ཅད་བསྡུས་ནས་ཉམས་སུ་ལེན་ཚུལ་ནི། ཐེག་ཆེན་སྤྱིའི་རྒྱུ་དང་འབྲས་བུའི་སྐྱབས་འགྲོ་ནི་གཞན་དུ་གསལ་ལ། གསང་ཆེན་བླ་ན་མེད་པའི་མྱུར་ལམ་འདིའི་སྐྱབས་སུ་འགྲོ་ཚུལ་ནི། མདུན་གྱི་ནམ་མཁར་པདྨ་འདབ་བརྒྱད་ཀྱི་སྟེང་དུ་ཀྱེ་རྡོར་ལྷ་དགུ་གསལ་བཏབ་ལ། བླ་མ་དང་དཀྱིལ་འཁོར་གྱི་གཙོ་བོ་ཡི་དམ་དབྱེར་མེད་སངས་རྒྱས། དེའི་ཐུགས་རྒྱུད་ཀྱི་རྒྱུད་སྡེ་བཞི་དང་རིམ་པ་གཉིས་སོགས་ཆོས། འཁོར་ལྷ་མོ་བརྒྱད་དགེ་འདུན་དཀོན་མཆོག །ཉི་ཟེར་དུ་གཙོ་བོའི་རྒྱབ། བཻ་ཏ་ལཱིའི་མདུན་དུ་གསུང་རབ་པུསྟི་བྲག་རི་བརྩེགས་པ་ལྟ་བུར་གསུངས་པ་ནི་ལས་དང་པོ་པའི་དམིགས་པ་གསལ་བའི་ཆེད་ཙམ་ཡིན་བྱིན་རླབས་འཇུག་པའི་ཐབས་མཁས་ཡིན་པས་བསྒོམ་ན་ལེགས། མདུན་གྱི་བླ་མ་དང་ཡི་དམ་དབྱེར་མེད་ལ་སྐུ་བཞི་ཡེ་ཤེས་ལྔ་མཁྱེན་བརྩེ་ནུས་གསུམ་སོགས་ཡོན་ཏན་ཐམས་ཅད་མངའ་བར་ཐག་བཅད། བྱང་ཆུབ་མ་ཐོབ་ཀྱི་བར་དུ་ཁྱེད་ཤེས་བློ་གཏད་ཀྱིས་སྐྱབས་སུ་འགྲོ་དགོས། རང་ལ་བླ་མས་འཁོར་འདས་དབྱེར་མེད་ངོ་སྤྲད་པ་ལྟར། སྐྱེ་འགག་གནས་གསུམ་བྲལ་བ་གདོད་མའི་གཤིས། །སྟོང་གསལ་བརྗོད་དུ་མེད་པ་གཉུགས་མའི་ངང་། །ཞེས་པའི་ལྟ་བའི་ངང་ནས་མ་གཡོས་པར་བླ་མ་དང་ཡི་དམ་རང་ལས་ཕྱི་རོལ་དུ་མུ་སྟེགས་པའི་ལྷ་ལྟར་མཉེས་ན་དངོས་གྲུབ་སྩོལ་ཞིང་མ་མཉེས་ན་མི་འབྱུང་བ་དེ་ལྟ་བུར་མི་འཛིན་པར་བླ་མ་དཀོན་མཆོག་ཀྱང་རང་སེམས་དག་པའི་སྣང་བརྙན་ཙམ་དུ་ཤེས་ནས་བསྐྱབ་བྱ་སྐྱོབ་བྱེད་ཐ་དད་མེད་པར་སྐྱབས་སུ་འགྲོ་བ་རྒྱུའི་སྐྱབས་འགྲོ་ཡིན། རང་སེམས་དག་པ་གཉིས་ལྡན་མངོན་དུ་གྱུར་པ་འབྲས་བུའི་སྐྱབས་འགྲོ་ཡིན་པས་རྒྱུའི་སྐྱབས་འགྲོ་ལ་འབྲས་བུའི་སྐྱབས་འགྲོའི་རྒྱས་ཐེབ་པ་འདི་གནད་དུ་ཆེ། གསང་སྔགས་ཀྱི་སྡོམ་པ་ལུས་ངག་ཡིད་གསུམ་ལྷ་སྔགས་ཡེ་ཤེས་སུ་རྟོགས་པ་དེ་འབྲས་བུའི་སྐྱབས་འགྲོ་མེད་ན་མི་སྐྱེ་བས། ཆོས་རྗེ་ས་པཎ་གྱིས། བླ་ན་མེད་པའི་སྐྱབས་འགྲོ་ལ་བརྟེན་ནས་གསང་སྔགས་ཀྱི་སྡོམ་པ་སྐྱེས་ཞེས་གསུངས། དེ་ལྟ་བུའི་སྐྱབས་འགྲོའི་གནད་ཟིན་ན་སྣང་གསུམ་དང་རྒྱུད་གསུམ་གྱི་ཉམས་ལེན་གྱི་གནད་ཚང་བ་ཡིན་ཏེ། བསྐྱབ་བྱ་རང་དང་སེམས་ཅན་ཐམས་ཅད་མ་དག་པའི་སྣང་བའི་ཀུན་གཞི་རྒྱུ་རྒྱུད། སྐྱབས་ཡུལ་དག་པའི་སྣང་བའི་འབྲས་རྒྱུ་ད། བསྐྱབ་བྱ་སྐྱོབ་བྱེད་ཐ་དད་མེད་པར་ཤེས་པའི་སྒོ་ནས་སྐྱབས་སུ་འགྲོ་བ་གཞི་འབྲས་བསྲེ་བའི་མན་ངག་རྣམས་ཉམས་ཀྱི་སྣང་བའི་ལུས་ཐབས་རྒྱུད་ཡིན་ནོ། །དཀོན་མཆོག་གསུམ་རང་སེམས་ལ་ཚང་ཚུལ་ཡེ་ཤེས་གྲུབ་པ་ལས། དག་ཐོབ་བྲལ་བའི་སེམས་སངས་རྒྱས། །མི་འགྱུར་དྲི་མེད་ཆོས་དང་ནི། །ཡོན་ཏན་ལྷུན་རྫོགས་དགེ་འདུན་ཉིད། །ཡིན་ཕྱིར་རང་གི་སེམས་ཉིད་མཆོག །ཞེས་གསུངས་སོ། །སྣང་གསུམ་ལམ་གྱི་གཞི་བཅའ་ལྟར་བཤད་པ་ལས་དང་པོ་པ་བཀྲི་བའི་ཕྱིར་མདོ་ཕྱོགས་ཀྱི་ཉམས་ལེན་ཙམ་ལ་སྦྱར་བ་ཡིན་ལ། སྔགས་ཀྱི་ཉམས་ལེན་ལ་སྦྱར་ཏེ་བཤད་པ་སྣང་གསུམ་རང་རྐང་གི་བཀྲི་ཚུལ་ཡིན་ནོ། །སེམས་བསྐྱེད་ནི། བླ་མས་རང་ལ་ངོ་སྤྲད་པ་ལྟར་འཁོར་འདས་གཉིས་ཀྱིས་བསྡུས་པའི་ཆོས་ཐམས་ཅད་རང་སེམས་སུ་ཐག་བཅད། དེའང་འཁོར་བའི་འཁྲུལ་སྣང་ཐམས་ཅད་མ་དག་པའི་གནས་སྐབས་ཀྱི་རིག་པའི་འཆར་སྒོ་ཙམ་ཡིན་ལ། རྣལ་འབྱོར་པ་ལམ་པའི་ཉམས་སྣང་ཐམས་ཅད་སེམས་ཅུང་ཟད་དག་པའི་འཆར་སྒོ་ཙམ་དང་། སྐུ་དང་ཡེ་ཤེས་ཀྱི་སྣང་བ་ཐམས་ཅད་རང་སེམས་དག་པའི་སྣང་བརྙན་ཙམ་ཡིན། གཞི་ལམ་འབྲས་གསུམ་དུ་བཞག་པ་དེ་དུས་གསུམ་དུས་མེད་དུ་ཤེས་ན་ད་ལྟའི་རིག་པ་སྐད་ཅིག་མ་འདི་ལས་ལོགས་ན་མེད། སེམས་དེའང་སྒྱུ་མ་རྟེན་འབྲེལ། བརྗོད་བྲལ་དུ་ཤེས་པའི་རིག་སྟོང་གི་ངང་ལ་ཅུང་ཟད་མཉམ་པར་བཞག །དེ་ནས་ཀྱེ་མ་རྟོགས་ན་སེམས་ཅན་ཐམས་ཅད་སྐུ་དང་ཡེ་ཤེས་ཀྱི་སྣང་བ་ལས་མི་འདའ་ཡང་། མ་རྟོགས་པའི་སེམས་ཅན་རྣམས་རིགས་དྲུག་གི་འཁྲུལ་སྣང་དུ་མ་ལ་ལོངས་སྤྱོད་པ་འདི་རྣམས་སྙིང་རེ་རྗེ། བདག་གིས་ད་རེས་མཚན་ལྡན་གྱི་བླ་མ་ལས་རྙེད་པའི་ཚེ་ལུས་གཅིག་གིས་འཚང་རྒྱ་བའི་གདམས་ངག་ཟབ་མོ་ཚང་ལ་མ་ནོར་བ་འདི་ལྟ་བུ་ཉམས་སུ་བླངས་ལ། མ་རྒན་སེམས་ཅན་ཐམས་ཅད་ཟུང་འཇུག་རྡོ་རྗེ་འཆང་ཆེན་པོའི་གོ་འཕང་ལ་དགོད་པར་བགྱིའོ་སྙམ་པའི་ངང་ནས་སེམས་བསྐྱེད་ཀྱི་ཚིག་རྣམས་འདོན། གཞུང་གི་ཚིག་ཟིན་ལ་སྨོན་འཇུག་གཉིས་ཙམ་ཡོད། འདི་བཞིན་ཉམས་སུ་བླངས་ན་ཀུན་རྫོབ་དོན་དམ་གྱི་སེམས་བསྐྱེད་གཉིས་དང་སྨོན་འཇུག་གཉིས་ཚང་བར་མ་ཟད་སྡོམ་པ་གསུམ་དང་ཕར་ཕྱིན་དྲུག་སོགས་ལམ་གནད་མང་པོ་ཚང་ཞིང་གནད་ཟིན་ན་སྐྱབས་འགྲོ་སེམས་བསྐྱེད་ཀྱང་གནད་གཅིག་ཏུ་འགྲོ་བ་ཡིན་ནོ། །རྡོར་སེམས་བསྒོམ་བཟླས་ནི། སྤྱི་བོར་རྡོ་རྗེ་སེམས་དཔའ་གཞུང་བཞིན་བསྐྱེད། བླ་མ་ཡི་དམ་དབྱེར་མེད་དུ་སྤྱི་བོར་བསྒོམ་པ་འདི་ལ་ཐོ་བརྩེགས་སུ་བསྒོམ་པ་དང་། ཁྲོམ་ཚོགས་སུ་བསྒོམ་པ་དང་། ཀུན་འདུས་ནོར་བུ་ལུགས་སུ་བསྒོམ་པ་གསུམ་ལས་འདིར་ཕྱི་མ་ཡིན། རྡོ་རྗེ་སེམས་དཔའི་རྒྱན་ཆ་དང་། བཞུགས་སྟངས་དང་། གདན་དང་བཅས་པའི་དག་པ་ཤེས་ནས་བླ་མ་སྐྱབས་གནས་ཀུན་འདུས་སུ་ངོ་ཤེས་པ་འདི་གནད་ཆེ། ལས་དང་པོ་པས་བདུད་རྩི་འབེབས་སྦྱོང་གི་དམིགས་པ་དང་སྒྲགས་ནས་སྟོབས་བཞི་ཚང་བའི་སྒོ་ནས་བཤགས་སྡོམ་བྱེད་པ་ཡིན་ལ། འཁོར་འདས་དབྱེར་མེད་ཀྱི་ལྟ་བའི་ངང་ནས་འདོན་ན་འབྲས་རྒྱུད་དག་པ་གཉིས་ལྡན་གྱི་བླ་མ་ཡི་དམ་དབྱེར་མེད་སྤྱི་བོར་བསྒོམས། རྒྱུ་རྒྱུད་སེམས་ལ་ཉོན་མོངས་པ་ལ་མ་དག་པའི་སྣང་བ་ཞེས་གསུངས་པའི་སེམས་ཅན་ལ་ཞེས་པ་གཞི་རྟེན་དཀྱིལ་འཁོར་བཞི་འམ་ཕུང་ཁམས་སྐྱེ་མཆེད་བསྟན། ཉོན་མོངས་པ་ལ་ཞེས་པས་རྒྱུ་ཉོན་མོངས་པ་དུག་གསུམ་སོགས་བསྟན། མ་དག་པའི་སྣང་བ་ཞེས་པས་ཐམས་ཅད་བསྟན་མོད། ནད་གདོན་སྡིག་སྒྲིབ་གསུམ་དུ་འདུ་བས་བདུད་རྩི་འབེབས་སྦྱོང་གི་ཚེ་རྣག་ཁྲག་དང་ལྗན་ལྗིན་སྡོམ་སྡིག་སྦལ་ལྕོང་དུད་ཁུ་སོལ་ཁུ་རྣམས་ཀྱི་རྣམ་པས་རྒྱུ་གཞི་ངོ་བོ་གསུམ་གྱིས་བསྡུས་པའི་སྡིག་སྒྲིབ་ཐམས་ཅད་བཤང་གཅིའི་ལམ་དང་རྐང་མཐིལ་གཉིས་ནས་ཕྱིར་ཐོན་པས་མ་དག་པའི་སྣང་བ་ཐམས་ཅད་དབྱིངས་སུ་སྦྱངས་ནས། དེ་ནས་ཡེ་ཤེས་ཀྱི་བདུད་རྩིས་སྨིན་མཚམས་ཡན་ཆད་གང་། བུམ་པའི་དབང་ཐོབ། ལུས་ཀྱི་མི་དགེ་བ་གསུམ་དང་ལོག་འཚོ་སོགས་ལུས་དང་རྩའི་སྒྲིབ་པ་སྦྱངས། སྐུའི་བྱིན་རླབས་ཞུགས། སྤྲུལ་སྐུའི་ས་བོན་བཞག །མགྲིན་པ་ཡན་ཆད་གང་། གསང་བའི་དབང་ཐོབ་ངག་གི་མི་དགེ་བ་བཞི་དང་ཡི་གེའི་སྒྲིབ་པ་སྦྱངས་གསུང་གི་བྱིན་རླབས་ཞུགས། ལོངས་སྐུའི་ས་བོན་བཞག །སྙིང་ཁ་ཡན་ཆད་གང་ཤེས་རབ་ཡེ་ཤེས་ཀྱི་དབང་ཐོབ་ཡིད་ཀྱི་མི་དགེ་བ་གསུམ་དང་ཐིག་ལེའི་སྒྲིབ་པ་སྦྱངས་ཐུགས་ཀྱི་བྱིན་རླབས་ཞུགས་ཆོས་སྐུའི་ས་བོན་བཞག །ལུས་ཐམས་ཅད་གང་དབང་བཞི་པ་ཐོབ་སྒོ་གསུམ་ཆ་མཉམ་རླུང་དང་བཅས་པའི་སྒྲིབ་པ་སྦྱངས། སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་བྱིན་རླབས་ཞུགས་ངོ་བོ་ཉིད་སྐུའི་ས་བོན་བཞག །དབང་བཞི་བླང་བའི་དམིགས་པ་དང་སྦྲགས་ཏེ་ཡིག་བརྒྱ་ཞོག་འཕྲལ་མགོན་པོ་བདག་ནི་སོགས་ཀྱིས་སྟོབས་བཞི་གསལ་གདབ་དེའང་མགོན་པོ་ཞེས་པས་རྟེན་གྱི་སྟོབས། བདག་ནི་སོགས་ཚིག་རྐང་གཉིས་ཀྱིས་སུན་འབྱིན་པའི་སྟོབས། བླ་མ་མགོན་པོ་སོགས་ཚིག་རྐང་གསུམ་གྱིས་གཉེན་པོ་ཀུན་ཏུ་སྤྱོད་པའི་སྟོབས། དེ་མན་ཆད་ཀྱིས་སོར་ཆུད་པའི་སླར་ལྡོག་པའི་སྟོབས་བསྟན་པ་ཡིན་ནོ། །དེ་ནས་རྡོ་རྗེ་སེམས་དཔའ་རང་ལ་བསྟིམ་སྟེ་རྒྱུད་གསུམ་དབྱེར་མེད་དུ་ཤེས་པའི་ལྟ་བའི་ངང་ལ་འཇོག །དེས་ནད་གདོན་སྡིག་སྒྲིབ་གསུམ་ལ་མ་དག་སྣང་བ་འདུ་ཚུལ། སེམས་གསལ་སྟོང་ཟུང་འཇུག་གསུམ་ལས་ཉོན་མོངས་པ་དུག་གསུམ་སྐྱེ། དེ་ལས་ནད་གསུམ་གདོན་གསུམ་སོགས་འབྱུང་ཚུལ་ལ་གོ་བ་ཆགས་ན་འདི་ཤེས་པར་སླ་ལ། སྤྱིར་དབང་བཤད་རྣམས་སུ་ཕུང་ཁམས་སྐྱེ་མཆེད་ཀྱི་འཁྲུལ་སྣང་དང་མ་བྲལ་གྱི་བར་ལ་ཡང་དག་པའི་ཡེ་ཤེས་མི་སྐྱེ་བར་གསུངས་པ་ལེགས་པར་དཔྱད་ན་ཕུང་ཁམས་སྐྱེ་མཆེད་རྣམས་ནད་གདོན་སྡིག་སྒྲིབ་གསུམ་ལས་ལོགས་ན་མེད་དེ། ཕྱིའི་བར་ཆད་གདོན་གསུམ། ནང་གི་བར་ཆད་ནད་གསུམ། གསང་བའི་བར་ཆད་དུག་གསུམ་གྱི་སྣང་བ་ཤར་བ་ལ་ཕུང་ཁམས་སྐྱེ་མཆེད་ཀྱི་རྣམ་དབྱེ་བྱས་པའི་ཕྱིར་རོ། །རྒྱུད་གསུམ་བསྲེས་ནས་སྦྱང་གཞི་སྦྱོང་བྱེད་སྦྱོར་བ་འདི་ལ་སྦྱང་གཞི་གཟུགས་ཕུང་ངན་པ་བདེན་གྲུབ་ཞིག་སྦྱོང་བྱེད་རྣམ་སྣང་བཟང་པོ་བདེན་གྲུབ་ཞིག་ཏུ་བསྒྱུར་ནས་ལམ་བྱེད་བཞི་ལྡན་གྱི་ཚུལ་དུ་བསྒོམ་པ་དེ། ལས་དང་པོ་པའི་བསྒོམ་ཚུལ་ཡིན། གཟུགས་ཕུང་ཞེས་པ་རང་སེམས་ཀྱི་འཁྲུལ་སྣང་ཡིན། སེམས་གསལ་སྟོང་ཟུང་འཇུག་ཏུ་ཤེས་པ་མེ་ལོང་ལྟ་བུའི་ཡེ་ཤེས་ཆོས་དབྱིངས་ཡེ་ཤེས་ཀྱི་གཟུགས་བརྙན་རྣམ་པར་སྣང་མཛད་ཞལ་ཕྱག་གི་རྣམ་པ་ཅན་དུ་ཤར་བར་ཤེས་པ་ལྟ་ཐོག་ནས་བསྒོམ་པ་ཚོལ་བའི་ཉམས་ལེན་ཡིན། དཔེར་ན་ད་ལྟའི་རང་རྒྱུད་ཀྱི་སྡིག་པ་ཞེས་པ་འདིའང་དགེ་བའི་ལམ་དུ་བཀོལ་དུ་མི་བཏུབ་པའི་རྣམ་རྟོག་འདི་ལས་ལོགས་ན་མེད། རྣམ་རྟོག་སྐྱེ་འགག་གནས་གསུམ་དང་བྲལ་བའི་གསལ་སྟོང་ཟུང་འཇུག་གི་ངང་དུ་མཉམ་པར་འཇོག་ནུས་ན། སྡིག་པའི་རང་བཞིན་ཤེས་པའི་བཤགས་པའི་མཆོག་ཅེས་ཡང་དགོན་པས་གསུངས་པ་ལྟར་སྡིག་སྦྱོང་ལའང་འདི་ལས་ཟབ་པ་མེད་ཅེས་བླ་མས་ཡང་ཡང་གསུངས། རྩ་གསུམ་འཁོར་ལོ་ལྔ་གསལ་བཏབ་ནས་དབང་བཞིའི་དམིགས་པ་བསྒོམ་ཚེ་རྟེན་དཀྱིལ་འཁོར་བཞིའི་སྙིགས་མ་མ་དག་པའི་སྣང་བ་རྣམས་སྦྱང་བར་བསམ་ན་ཕྱིས་རྫོགས་རིམ་བསྒོམ་པ་ཐམས་ཅད་ཀྱི་སྨིན་བྱེད་དུ་འགྲོ་ཞིང་། དེ་ལ་རྩུབ་ཉམས་རྣམས་མི་འབྱུང་བའི་དགོས་པ་ཡོད་པས་མ་བརྗེད་གསུངས། དཔྱད་བསྒོམ་འཇོག་སྒོམ་གཉིས་རེས་མོས་བྱེད་དགོས་པས། དང་པོ་རིག་སྟོང་སྤྲོས་པ་དང་བྲལ་བའི་ངང་ལ་བཅས་བཅོས་མེད་པར་མཉམ་པར་འཇོག །འཁོར་གསུམ་གྱི་རྣམ་རྟོག་དང་ཕྱིའི་ཡུལ་སྣང་འདི་རྣམས་གང་ལས་བྱུང་སྙམ་པའི་རྟོག་པ་ཤར་ན་ཕྱི་ནང་བསྲེ་བ་འདི་གནད་དུ་ཆེ་བས། རྟེན་དཀྱིལ་འཁོར་བཞིར་རླུང་སེམས་རྒྱུ་འགྲུལ་གྱི་དབང་གིས་གདུགས་ནམ་མཁའ་ལ་འཕྱར་བས་གྲིབ་མ་ས་ལ་ཤར་བ་ལྟར་སྣང་བ་འདི་རྣམས་འབྱུང་བ་ཡིན་སྙམ་ནས་ཕྱི་ནང་བསྲེས་ནས་བསྒོམ་ལ་སྤྲོས་པ་བཅད། གཟུང་འཛིན་རྒྱང་ཆད་དུ་ཤོར་ནས་འདྲེ་གདོན་གྱི་སྣང་བ་ཤར་ཚེ་ད་ལྟའི་རིག་པ་སྐད་ཅིག་མ་ཡུལ་ཡུལ་ཅན་གཉིས་སུ་སྣང་བ་འདི་འདྲེ་འཛིན་གྱི་རྟོག་པས་བསླད་ན་འདྲེ་གདོན་ཡང་འདི་ལས་ལོགས་ན་མེད། འཁོར་བའི་འཁྲུལ་སྣང་དང་སྡུག་བསྔལ་ཐམས་ཅད་འདི་ལས་འབྱུང་བས་ཉོན་མོངས་པ་དང་སྡིག་སྒྲིབ་ཀྱང་འདི་རང་ཡིན། འཁོར་འདས་དབྱེར་མེད་ཀྱི་ལྟ་བས་ལྟ་ཡུལ་ཡང་འདི་ཉིད་ཡིན། ཟབ་གསལ་གཉིས་མེད་ཀྱི་བསྐྱེད་རྫོགས་བསྒོམ་ཡུལ་ཡང་འདི་ཉིད་ཡིན། བླང་དོར་གཉིས་མེད་ཀྱི་སྤྱོད་པའི་ཡུལ་ཡང་འདི་ཉིད་ཡིན། རང་ངོ་ཤེས་ན་སྐུ་དང་ཡེ་ཤེས་ཀྱང་འདི་རང་ཡིན་པར་ཤེས་པའི་ངང་ནས་སྣང་སེམས་བསྲེས་ལ་སྤྲོས་པ་བཅད། འཁོར་འདས་ཀྱི་སྣང་བ་གང་ལའང་ཞེན་པ་སྐྱེས་ཚེ་དབྱིངས་རིག་བསྲེས་ལ་མ་བཅོས་པར་འཇོག །སྦྱང་གཞི་སྦྱོང་བྱེད་སྦྱར་ནས་བསྒོམ་པ་ལ་ཞུགས་ཚེ་དག་སྣང་མཚན་ཉིད་པ་མ་སྐྱེས་ན་འབྲས་བུ་དག་པ་གཉིས་ལྡན་གྱི་སྐུ་དང་ཡེ་ཤེས་ཀྱང་ད་ལྟའི་རིག་པ་སྐད་ཅིག་མ་རང་ངོ་ཤེས་པ་ལས་ལོགས་ན་མེད་པར་ཤེས་ནས་གཞི་འབྲས་བསྲེ་བ་འདི་གནད་དུ་ཆེ་བས་གནས་འདི་རྣམས་མི་བརྗེད་པར་ལམ་གྱི་སྔོན་འགྲོ་དངོས་གཞི་རྗེས་གསུམ་གྱི་གནས་སྐབས་ཐམས་ཅད་དུ་རང་རྒྱུད་ཀྱི་རྟོག་པ་སྐྱེས་ཚུལ་ལ་དཔག་ནས་ཉམས་ལེན་ལམ་དུ་བསྲེལ་ཤེས་དགོས་པ་ཡིན་ནོ། །དེ་ནས་ཐུན་མོང་མ་ཡིན་པའི་སྔོན་འགྲོ་ཚོགས་གཉིས་བསགས་པ་ལ། རང་སྐད་ཅིག་གིས་ཀྱེ་རྡོ་རྗེ་བསྐྱེད། དེའང་སྐད་ཅིག་ཞེས་པ་རིག་པ་སྐད་ཅིག་མ་ངོ་ཤེས་ན་གདོད་ནས་ཀྱེ་རྡོ་རྗེ་ཡིན་པ་གསལ་ཐེབ་པ་ཡིན། ཐུགས་ཀའི་གཟུང་འཛིན་གཉིས་བྲལ་གྱི་ཧཱུྃ་ལས་འོད་འཕྲོས་ནས་ཚོགས་ཞིང་སྤྱན་འདྲེན་པ་དེ་སྐྱབས་ཡུལ་རྣམས་རང་སེམས་དག་པའི་གཟུགས་བརྙན་ཡིན་པས་རང་ངོ་ཤེས་པའི་ལྟ་བའི་ངང་ནས་མདུན་བསྐྱེད་གསལ་འདེབས་པ་འདི་གནད་ཆེ་ཞེས་པའི་དོན་ཡིན། དེ་ལ་ཐོག་མར་ཕྱག་འཚལ་བའང་བདག་མདུན་ཐ་དད་དུ་འཛིན་པ་མེད་པར། རིམ་ལྔ་ལས། ཇི་ལྟར་ཆུ་ལ་ཆུར་བཞག་དང་། །ཇི་ལྟར་མར་ལ་མར་བཞག་བཞིན། །རང་གིས་རང་གི་ཡེ་ཤེས་ནི། །ལེགས་མཐོང་གང་དེ་འདིར་ཕྱག་ཡིན། །ཞེས་པའི་ཚུལ་གྱིས་ཕྱག་བྱ། མཆོད་པའང་། མ་དག་པའི་སྣང་བ་བདུད་རྩི་ལྔ་སོགས་དག་པ་ཡེ་ཤེས་ལྔའི་ངོ་བོར་ཤེས་ནས་འཁོར་འདས་དབྱེར་མེད་ཀྱི་ལྟ་བ་དྲན་བཞིན་དུ་མཆོད། ཡན་ལག་བདུན་པ་བྱ་བའི་ཚེ་སྤྱིར་དོན་ཡོད་གྲུབ་པའི་སྦྱང་གཞི་འདུ་བྱེད་ཀྱི་ཕུང་པོ་དེའི་ནང་ན་སྡིག་པའང་ཡོད་པས་དག་སྣང་གི་སྒོ་ནས་སྡིག་སྦྱོང་མཛད་ཚུལ་ཡང་ཡོད་མོད། འདིའི་ཡན་ལག་བདུན་པ་འདི་སོ་ཐར་དང་བྱང་སེམས་ཀྱི་སྡོམ་པ་གསར་དུ་ལེན་པ་དང་། ཉམས་པ་གསོ་ཐབས་ཁྱད་པར་ཅན་ཡིན་པས་དང་པོ་སྡིག་པ་སྟོབས་བཞིའི་སྒོ་ནས་བཤགས། རྗེས་སུ་ཡི་རང་ཕྲག་དོག་མེད་པར་གཞན་གྱི་དགེ་བ་ལ་སྤྲོ་བ་ཡིན་མོད། སྣང་སྲིད་དག་པ་རབ་འབྱམས་ཀྱི་ལྟ་བས་ཟིན་ན་ཕྲག་དོག་ཡེ་མི་འབྱུང་། སྐྱབས་འགྲོ་བྱས་པས་དགེ་བསྙེན་ནས་དགེ་སློང་གི་བར་གྱི་སོ་ཐར་གྱི་སྡོམ་པ་རང་རྒྱུད་ནས་གང་ཡོད་ཐོབ་ཅིང་གསོ་ནུས་པ་དང་། སྨོན་འཇུག་གཉིས་ཀྱི་སྡོམ་པའང་དེ་བཞིན་དུ་ཤེས་དགོས། རིགས་ལྔའི་སྡོམ་བཟུང་སྐབས། ཚུལ་ཁྲིམས་གསུམ་གཞུང་ན་གསལ་བ་ལྟར་དང་། འཁོར་འདས་དབྱེར་མེད་ཀྱི་ལྟ་བ་དང་སྦྱར་ན། གྱ་ནོམ་ལྷར་ཞེན་དང་བཅས་པའི་མཚན་རྟོག་ཐམས་ཅད་སྤང་བ་ཉེས་སྤྱོད་སྡོམ་པའི་ཚུལ་ཁྲིམས་རིམ་གཉིས་ཀྱི་ཏིང་ངེ་འཛིན་དགེ་བ་ཆོས་སྡུད་སྙིང་རྗེའི་རྩི་དང་མ་བྲལ་བ་སེམས་ཅན་དོན་བྱེད་དུ་འགྲོ་བ་ཡིན། ནང་གི་དཀོན་མཆོག་གསུམ་ལ་སྐྱབས་སུ་འགྲོ་ཚུལ། སློབ་བཤད་པས་གསལ་བ་དགེ་འདུན། སྟོང་པ་ཆོས། ཟུང་འཇུག་སངས་རྒྱས་སུ་གསུངས་པ་དང་། ཚོགས་བཤད་པས་རང་སེམས་སྤྲོས་པ་དང་བྲལ་བ་སངས་རྒྱས། དེ་རྟོགས་པ་མེད་པའི་ཚུལ་གྱིས་རྟོགས་པ་ཆོས། དེ་ཉམས་སུ་ལེན་པ་དགེ་འདུན་ཞེས་གསུངས་པ་གཉིས་གནད་གཅིག་ཡིན་ཏེ། སེམས་ཀྱི་སྟོང་ཉིད་སྤྲོས་པ་དང་བྲལ་བ་དེ་སེམས་ཀྱི་གསལ་ཆ་དེས་སོ་སོར་རང་རིག་པའི་ཚུལ་གྱིས་ཉམས་སུ་མྱོང་བ་སངས་རྒྱས་ཡིན་པའི་ཕྱིར་རོ། །འཁོར་འདས་དབྱེར་མེད་ཀྱི་རྩ་བར། གསལ་བ་སྤྲུལ་སྐུ་སྟོང་པ་ཆོས་ཀྱི་སྐུ། ཟུང་འཇུག་ལོངས་སྤྱོད་རྫོགས་པའི་སྐུ་ཡིན་ལ། ཁྲིད་ཡིག་ལས་སྐུ་གསུམ་རང་ངོ་འཕྲོས་ཅེས་གསུངས་པའང་འདི་ཉིད་ཡིན་ནོ། །རྡོ་རྗེ་དྲིལ་བུ་ཕྱག་རྒྱ་གསུམ་སྤྱིར་གཞུང་ནས་བཤད་པ་ལྟར་ཡིན་མོད། ལུས་ངག་ཡིད་གསུམ་ལྷ་སྔགས་ཡེ་ཤེས་དང་མ་བྲལ་ན་གནས་དེར་འདུ་བ་ཡིན་ནོ། །སློབ་དཔོན་འཛིན་ཚུལ་བླ་མ་སྐྱབས་གནས་ཀུན་འདུས་སུ་ཤེས་དགོས་པ་ཡིན། སྦྱིན་པ་བཞི་པོ་རང་གི་ཉམས་ལེན་ལ་ཚང་ཚུལ་དང་། ཐེག་པ་གསུམ་དང་རྒྱུད་སྡེ་བཞིའི་དམ་ཆོས་འཛིན་པ་ཡང་རང་གི་ཉམས་ལེན་གཅིག་པུ་ལ་ཚང་བས་ཡིན་པས་མདོ་རྒྱུད་མ་ལུས་པའི་དོན་གྱི་བཅུད་ཕྱུང་བ་གསུངས་པ་ཡིན། སྡོམ་པ་ཐམས་ཅད་དང་ལྡན་པ་ཞེས་པའི་ཚིག་གི་ནུས་པས་སོར་བྱང་གཉིས་སུ་མ་ཟད་སྔགས་སྡོམ་ཡང་བཟུང་ལ། མཚན་རྟོགས་ཐམས་ཅད་དང་བྲལ་བའི་སྔགས་སྡོམ་འདི་སྣང་སྲིད་དག་པ་རབ་འབྱམས་སུ་ཤེས་པ་ཡིན། བྱ་བ་གྲུབ་པའི་ཡེ་ཤེས་ཀྱང་འདི་ལས་ལོག་ན་མེད་པར་ཤེས་དགོས། མདོར་ན་རིགས་ལྔའི་སྡོམ་བཟུང་འདིས་གསང་སྔགས་ཀྱི་ཉམས་ལེན་ནམ་སྡོམ་པ་ཁས་བླང་བའི་སྒོ་ནས་འཛིན་པ་ཡིན་ནོ། །ཚད་མེད་བཞི་བསྒོམ་སྐབས། འོད་ཟེར་དང་ལྷ་མོ་སྤྲོ་བ་དེ་གཞི་ལམ་འབྲས་གསུམ་བསྲེལ་ནས་སྦྱང་གཞི་སྦྱོང་བྱེད་སྦྱར་ཏེ་ལམ་བྱེད་བཞི་ལྡན་དུ་བསྒོམ་ན་འཁོར་འདས་དབྱེར་མེད་ཀྱི་ལྟ་བ་དང་འགྲིགས་པ་ཡིན་ནོ། །སྲུང་འཁོར་ནི་བླ་མ་རིན་པོ་ཆེས་བདག་ལ་ཁྱོད་ཀྱིས་རྡོར་སེམས་བསྒོམ་བཟླས་ཀྱི་བདུད་རྩི་འབེབ་སྦྱོང་གིས་སྡིག་སྒྲིབ་སྦྱང་བ་དང་། སྲུང་འཁོར་གྱིས་དགྲ་བགེགས་བསྒྲལ་བའི་དམིགས་པ་བྱས་པ་གཉིས་ལྟ་བའི་གནད་ཟིན་ན་སྡིག་པ་དག་པ་ལ་ཁྱད་པར་མེད་པས་རེམ་ལ་བསྒོམ་དགོས་ཞེས་གསུངས། སྤྱིར་སྲུང་འཁོར་འདི་ཡེ་ཤེས་ཚོགས་བསགས་ཐབས་ལ་མཁས་པའི་སྒོ་ནས་གཟུགས་ཀྱི་རྣམ་པར་བསྒོམ་པ་ཡིན་སྤང་བྱ་གཉེན་པོར་ཤར། བདུད་རིགས་བར་ཆད་སྲུང་འཁོར་དུ་ཤར་ཞེས་པའི་གོ་དོན་བླང་ཐུབ་དགོས། དེས་ན་ཡེ་ཤེས་ཚོགས་བསགས་ཀྱི་སྐབས་སུ་འཁོར་འདས་གཉིས་ཀྱི་སྣང་བ་ཐམས་ཅད་ལུས་ཀྱི་རྩ་ཡིག་རྣམས་སུ་རླུང་སེམས་ཀྱི་རྒྱུ་འགྲུལ་གྱི་དབང་གིས་སྣང་བ་ཡིན། དེ་ཐམས་ཅད་ད་ལྟའི་རིག་པ་སྐད་ཅིག་མ་འདི་ལ་ཚང་ཞིང་། སེམས་རིག་པ་སྐད་ཅིག་མ་དེ་བརྟགས་ན་སྐྱེ་འགག་གནས་གསུམ་དང་བྲལ་ཞིང་རང་ངོ་ཤེས་ན་རིག་སྟོང་བརྗོད་དུ་མེད་པའི་ཆོས་ཉིད་ལས་ནམ་ཡང་མི་གཡོ་བ་ཡིན། དེའི་ངང་ལ་མཉམ་པར་བཞག་ནས་ཡེ་ཤེས་ལྔའི་རང་མདངས་སྣ་ཚོགས་རྡོ་རྗེར་བསྒོམ་པ་ནས་སྲུང་འཁོར་རྟེན་དང་བརྟེན་པར་བཅས་པ་བསྒོམ་ནས་སྔགས་བཟླ་བ་ཉི་ཟེར་དུ་གསལ་ལ། དེར་ཞལ་གསལ་མ་མཛད་པ་དབང་བཤད་ཆེན་མོར། གཏི་མུག་གཏི་མུག་ལོངས་སྤྱོད་པས། །གཏི་མུག་ཟད་པ་གཤིན་རྗེ་བཤེད། །དེ་ནི་ཕུང་པོའི་མཐར་བྱེད་དེ། །དེ་ནི་ཤེས་བྱ་མཐར་བྱེད་དོ། །ཞེ་སྡང་ཞེ་སྡང་ལོངས་སྤྱོད་པས། །ཞེ་སྡང་ཟད་པ་ཤེས་རབ་མཐར། །དེ་ནི་སེམས་ཀྱི་མཐར་བྱེད་དོ། །དེ་ནི་ཉོན་མོངས་མཐར་བྱེད་འགྱུར། །འདོད་ཆགས་འདོད་ཆགས་ལོངས་སྤྱོད་པས། །འདོད་ཆགས་ཟད་པ་པད་མཐར་བྱེད། །དེ་ནི་ངག་གི་མཐར་བྱེད་དོ། །དེ་ནི་སྙོམས་འཇུག་མཐར་བྱེད་དོ། །ཉོན་མོངས་ཀུན་ཟད་གང་ཡིན་དང་། །དེ་བཞིན་ལས་ཀུན་ཟད་པ་ཉིད། །སྒྲིབ་པ་ཀུན་ཟད་ཡེ་ཤེས་ནི། །བགེགས་ནི་མཐར་བྱེད་ཅེས་བྱར་བཤད། །ཅེས་གསང་འདུས་ཀྱི་ལུང་དྲངས་པའི་དགོངས་པ་བཞིན་དམིགས་རིམ་ཅུང་ཟད་བཤད་ན། དབུས་སུ་རང་ཉིད་གཙུག་ཏོར་འཁོར་ལོས་བསྒྱུར་བ་དང་། ཕྱོགས་བཅུར་ཁྲོ་བོ་བཅུར་བསྒོམ་པ་ཐམས་ཅད་བདག་བསྐྱེད་ཡིན། དེས་ན་ལྷའི་ང་རྒྱལ་བསྒོམ་པས་གང་ཟག་གི་བདག་འཛིན་འཇོམས་ནུས་ན་གཏི་མུག་གི་གཏི་མུག་ལ་བསྣུན་ཏེ་ལམ་དུ་ཁྱེར་བའི་དོན་ཡིན། གཙོ་བོའི་ཐུགས་ཀའི་རྡོ་རྗེའི་ལྟེ་བའི་ཧཱུྃ་ཡིག་གི་ཀླད་ཀོར་གྱི་ནང་དུ་བླ་མ། རང་ཉིད་ནང་དུ། མདུན་དུ་ཕ་མ་སོགས་བསྒོམ་པ་འདོད་ཆགས་ཀྱིས་འདོད་ཆགས་ལ་བསྣུན་ཏེ་ལམ་དུ་ཁྱེར་བ་དང་། འཁོར་ལོའི་རྩིབ་བར་བརྒྱད་དུ་དགྲ་བགེགས་བསྒོམ་ནས་བསྒྲལ་བ་འདི་ཞེ་སྡང་གིས་ཞེ་སྡང་ལ་བསྣུན་ཏེ་ལམ་དུ་ཁྱེར་བ་སྟེ། སྣང་བས་མི་འཆིང་ཞེན་པས་འཆིང་གསུངས་པ་བཞིན་ལྟ་བ་འཁོར་འདས་དབྱེར་མེད་ཀྱི་ངང་ལས་མ་གཡོས་བཞིན་དུ་རྣམ་པ་འདི་བཞིན་བསྒོམ་ཚེ་བདག་འཛིན་གྱིས་མ་གོས་ཤིང་དེ་ལ་ཆགས་སྡང་མི་འབྱུང་བས་ཉོན་སྒྲིབ་སྤོང་ལ། གཟུང་འཛིན་གྱི་རྟོག་པ་བྲལ་ན་ཤེས་སྒྲིབ་སྤོང་ཞིང་། དེ་ལྟ་བུའི་ཏིང་ངེ་འཛིན་ལ་བྱིང་རྒོད་ཀྱི་རྟོག་པས་མ་བསླད་ན་སྙོམས་འཇུག་གི་སྒྲིབ་པ་སྤོང་ནུས་པས། གསང་སྔགས་ཀྱི་ཐབས་ལ་མཁས་པ་ཡིན། དེའང་ཁྲོ་བོ་བཅུ་གཅིག་པོ་འབྲས་དུས་ཀྱི་སངས་རྒྱས་ཀྱི་ཡེ་ཤེས་ཀྱི་སྣང་བརྙན་ཡིན་པར་ཤེས་པའི་དག་སྣང་དང་། བསྒོམ་ཚུལ་གྱི་རྣམ་པ་འདི་རྣམས་སྦྱང་གཞི་དང་མཐུན་པས་མ་དག་པའི་འཁྲུལ་སྣང་ཐམས་ཅད་ལམ་དུ་ཁྱེར་ནུས། ཇི་ལྟར་ལམ་དུ་ཁྱེར་ན་གཞི་འབྲས་གཉིས་པོ་དེ་ལྟ་བ་འཁོར་འདས་དབྱེར་མེད་ཀྱི་ངང་དུ་རོ་གཅིག་ཏུ་བསྲེས་ནས་ཉམས་སུ་ལེན་པ་ཡིན། རིག་སྟོང་གཉིས་མེད་ཀྱི་ཡེ་ཤེས་མ་བཅོས་གཉུག་མའི་ངང་ལས་མ་གཡོས་བཞིན་དུ། ཏིལ་གྱི་ཤུན་པ་ལྟ་བུའི་ཟུག་ངུས་ཀྱང་། །ནམ་ཞིག་སྡུག་བསྔལ་འབའ་ཞིག་བསྐྱེད་པར་བྱེད། །ཅེས་གསུངས་པ་ལྟར་ཕྱོགས་གང་ལ་ཡང་ཞེན་པ་མེད་པར་རྣམ་པ་ཙམ་ལམ་དུ་ཁྱེར་བ་ལ་བཟླས་པའི་མཇུག་ཏུ་ཧཱུྃ་བཅུས་ཁྲོ་བོ་བཅུ་གསལ་འདེབས་གསུངས་པའང་འདི་ལ་དགོངས་པ་ཡིན། སྲུང་བའི་འཁོར་ལོས་བར་ཆད་བསྲུང། སྲོད་ལ་བདུད་བརྟུལ་ལམ་དུ་བྱེད། ཅེས་པའི་དགོངས་པ་དཔྱིས་ཕྱིན་པའོ། །དངོས་གཞི་ཡན་ལག་དྲུག་གི་གཞལ་ཡས་ཁང་གི་སྐབས་སུ། དང་པོར་བསྲེ་བ་བཞི་ཚང་བར་བྱས་ནས་འཁོར་འདས་དབྱེར་མེད་བསྒོམ། དེ་ལ་རྣམ་ཐར་སྒོ་གསུམ་ཚང་དགོས་པས་གཞི་སྟོང་པ་ཉིད། ལམ་མཚན་མ་མེད། འབྲས་བུ་སྨོན་པ་མེད་པ་གསུམ་དུས་གཅིག་ལ་བསྒོམ། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ཡང་མདོ་ཕྱོགས་ལྟར་རིམ་ཅན་དུ་བསྒོམ་པ་མ་ཡིན་པར། འཁོར་འདས་དབྱེར་མེད་ཀྱི་ལྟ་བ་འདི་ལ་སྦྱོར་ཤེས་དགོས་པས་ལྟ་བ་ལ་མི་འཕྲོག་པའི་ཡིད་ཆེས་རྙེད་པ་དད་པ། དེ་ལ་སྤྲོ་བ་བརྩོན་འགྲུས་མི་བརྗེད་པ་དྲན་པ། རང་ངོ་ཤེས་པ་ཤེས་རབ། དེ་ལས་མི་གཡོ་བ་ཏིང་ངེ་འཛིན་ཡིན་པས་དབང་པོ་ལྔ་དང་སྟོབས་ལྔ་ཚང་ལ། དྲན་པ་ཉེར་བཞག་ཤེས་རབ། ཡང་དག་སྤོང་བ་བརྩོན་འགྲུས། རྫུ་འཕྲུལ་གྱི་རྐང་པ་ཏིང་ངེ་འཛིན་དུ་འདུ་ལ། བྱང་ཆུབ་ཀྱི་ཡན་ལག་བདུན་གྱི་དགའ་བ་ཤིན་ཏུ་སྦྱང་བཏང་སྙོམ་གསུམ་རང་སེམས་མ་བཅོས་པའི་ཉམས་ལེན་ལ་གོམས་པའི་ཕན་ཡོན་ཙམ་ཡིན། འཕགས་ལམ་ཡན་ལག་བརྒྱད་ཀྱི་ཡང་དག་པའི་འཚོ་བ། ཡང་དག་པའི་ངག་ཡང་དག་པའི་ལས་ཀྱི་མཐའ་གསུམ་དོན་གྱི་ཚང་བ་ལ་དགོངས། བདེན་བཞི་ལྟོ་སྦྱར་ནས་སྡུག་བསྔལ་བདེན་པ་འགོག་བདེན་སྐུ་དང་། ཀུན་འབྱུང་བདེན་པ་ལམ་བདེན་ཡེ་ཤེས་སུ་འཆར་བ་ལ་འཁོར་འདས་དབྱེར་མེད་ཟེར་བ་ཡིན། དེའང་དམིགས་པ་མེད་པའི་སྙིང་རྗེའི་རྩི་དང་མ་བྲལ་བ་ཞིག་ངེས་པར་དགོས། དེ་ལྟ་བུའི་ནང་གི་ཉམས་ལེན་གྱི་གཟུགས་བརྙན་ཕྱིར་ཤར་བ་སྣོད་གཞལ་ཡས་ཁང་དང་བཅུད་ལྷག་པའི་ལྷར་སྣང་བས་ཕྱི་ནང་གི་རྟེན་འབྲེལ་གྱི་གནད་འདི་ཤེས་བཞིན་དུ་བསྒོམ་དགོས། དེ་ལྟར་བསྒོམ་ན་རིག་པ་སྐད་ཅིག་མ་འདིའི་སྟེང་དུ་འཁོར་འདས་ཀྱི་ཆོས་ཐམས་ཅད་ཚང་བས་གཞལ་ཡང་ཁང་བསྒོམ་ཡང་འབྲས་དུས་ཀྱི་སྐུ་དང་། ཡེ་ཤེས་ཀྱི་དག་སྣང་དང་། ལམ་གྱི་ཉམས་ལེན་གྱི་གནད་ཐམས་ཅད་ཚང་དགོས་པས། དེའང་ཕྱོགས་གཅིག་ལ་མཚོན་ནས་མདོར་བསྡུས་ཙམ་བཤད་ན། རྩིགས་པ་རིམ་པ་ལྔ་གཞི་དང་སྦྱར་ན་དུག་ལྔ་ཕུང་པོ་ལྔ་སྦྱོང་ལ། ལམ་དང་སྦྱར་ན་དབང་པོ་ལྔ་དང་སྟོབས་ལྔའི་དག་པ་མཚོན་ལ། འབྲས་བུ་ལ་སྦྱར་ན་ཡེ་ཤེས་ལྔ་དང་སྐུ་ལྔ་ཡང་ཡིན་པས་ཉི་ཟེར་དུ་སྣང་གསུམ་རྒྱུད་གསུམ་གྱི་ཉམས་ལེན་ཐམས་ཅད་རིག་པ་སྐད་ཅིག་མ་ལ་ཚང་གསུང་པའང་དེ་ཡིན་ནོ། །གཞན་ཡང་དུར་ཁྲོད་ཀྱིས་མ་དག་པ་འཁོར་བ་མཚོན་གཞལ་ཡས་ཁང་གིས་ལམ་མཚོན། ལྷ་དགུའི་འབྲས་བུ་མཚོན་གསུང་པའང་རྣལ་འབྱོར་པས་གཞི་ལམ་འབྲས་གཅིག་ཏུ་བསྲེས་ནས་ཉམས་སུ་བླང་བའི་གཟུགས་བརྙན་ཕྱིར་ཤར་བ་ཡིན་པས་དེ་གསུམ་ལྷ་དང་ཡེ་ཤེས་ཡིན་མིན་གྱི་ཁྱད་པར་མེད་པ་ཞིག་གོ་དགོས། གཞལ་ཡས་ཁང་གི་ལྷ་སྣམ་ཤར་དཀར་ལྷོར་སེར་ནུབ་དམར་བྱང་ལྗང་དབུས་སྔོ་བ་ཡེ་ཤེས་ལྔ་མངོན་དུ་བྱས་པའི་བརྡ་ཡིན། དེའི་སྟེང་དུ་བདུད་བཞི་བརྩེགས་མར་བསྒོམ་པ་དེ་ཉམས་ལེན་དེ་ལྟ་བུ་དང་ལྡན་ན་བདུད་བཞིའི་སྐྱོན་གྱིས་མི་གོས་པས་ཞབས་འོག་ཏུ་ནོན་ཡོད་ཟེར་བའི་བརྡ་ཡིན། དེ་ནས་མངོན་བྱང་ལྔས་ལྷ་བསྐྱེད་པ་ལ། ཟླ་ཟེར་ལས་མདོར་ན་རྒྱུ་དུས་ཀྱི་ལུས་སེམས་གཉིས་མངོན་བྱང་ལྔའི་ཚུལ་དུ་རང་གྲུབ་ཏུ་ཡོད་པ་ནི་སྦྱང་གཞི་ཡིན་ལ། དེ་ལ་གསང་དབང་དང་ཤེས་རབ་ཡེ་ཤེས་གཉིས་མངོན་བྱང་ལྔའི་ཚུལ་དུ་བསྐུར་བས་བསྐྱེད་རིམ་གྱི་མངོན་བྱང་ལྔ་འགྲུབ་པའི་རྒྱུ་བྱེད་ལ། ལམ་དུ་བསྐྱེད་རིམ་གྱི་ལྷ་རྣམས་མངོན་བྱང་ལྔའི་ཚུལ་གྱིས་བསྒོམ་པས་རྫོགས་རིམ་གཉིས་ཀྱི་དགེ་རྩ་སྨིན་བྱེད་དུ་འགྲོ་ལ། དེས་རྫོགས་རིམ་བསྒོམས་པས་འབྲས་བུ་ཡེ་ཤེས་ལྔ་མངོན་དུ་གྱུར་ནས་ཚང་རྒྱ་བ་ཡིན་པས་འདི་རྣམས་རྒྱུ་འབྲས་སུ་འགྲོ་བའི་བཤད་པ་ཤེས་དགོས་ཀྱི། མཚོན་དོན་བསྒྲིགས་པ་ཙམ་གྱི་བཤད་པ་ལ་སྙིང་པོ་མེད་དོ། །ཞེས་གསུངས་པའི་དོན། མངལ་སྐྱེས་གཙོ་བོའི་དབང་དུ་བྱས་ནས་བཤད་ན་ཕ་མའི་ཁུ་ཁྲག་གཉིས་བར་དོའི་རྣམ་ཤེས་གསུམ་འཛོམ་སྟེ་བརྒྱལ་ནས་རྟེན་དཀྱིལ་འཁོར་བཞི་རིམ་གྱིས་འཕེལ་ཏེ་ལུས་གྲུབ་པ་མངོན་བྱང་ལྔ་ཡིན་ལ། འཆི་བའི་ཚེ་དཀར་ལམ་དམར་ལམ་ནག་ལམ་རྣམས་ཤར་ཏེ་འོད་གསལ་ངོས་མ་ཟིན་པར་བརྒྱལ་ནས་སླར་ཡང་བར་དོའི་ལུས་གྲུབ་སྟེ་ལུས་ལེན་པ་གཞི་དུས་ཀྱི་མངོན་བྱང་ཡིན་ནོ། །ད་ལྟ་ལུས་གནས་པའི་རོ་རྐྱང་གཉིས་ཀྱི་དབང་གིས་ཕྱི་རོལ་གྱི་ཉི་ཟླའི་སྣང་བ་དང་རྟོག་པ་སྣ་ཚོགས་པ་གཟུང་འཛིན་གྱི་སྣང་བ་དང་བཅས་པ་ཤར་བ་ཕྱི་ནང་གི་རྟེན་འབྲེལ་གྱི་དབང་གིས་སྣང་བ་ཡིན་པས། དེ་ལྟ་བུའི་གཞི་དུས་ཀྱི་མངོན་བྱང་ལ་གསང་དབང་དང་ཤེར་དབང་གཉིས་ཐབས་ཤེས་ཟུང་འཇུག་མངོན་བྱང་ལྔ་ལྡན་གྱི་ཚུལ་དུ་བསྐུར་ནས་བསྐྱེད་རིམ་གྱི་སྐབས་སུ་ཕྱི་ནང་གི་རྟེན་འབྲེལ་དང་གཞི་འབྲས་བསྲེ་བའི་ཐབས་ཀྱི་མངོན་བྱང་ལྔ་བསྒོམ་ན་བསྐྱེད་རིམ་དེ་རྫོགས་རིམ་གྱི་སྨིན་བྱེད་དུའང་འགྲོ་ཞིང་། རྗེ་བཙུན་གྱིས། ཡེ་ཤེས་ཞབས་ལུགས་ཀྱིས་བསྐྱེད་རིམ་ལ་རྫོགས་རིམ་གྱི་རྒྱས་བཏབ་ནས་བསྒོམ་པར་གསུངས་པ་ལ་ཅུང་ཟད་ཐུགས་མ་མཉེས་པར་ཟུར་ཟ་མཛད་པ་འདི་འདྲའི་གནད་ཀྱིས་མ་ཟིན་པ་ལ་དགོངས་ཤིང་། མདོ་ཕྱོགས་ཀྱི་ལམ་གྱིས་སྣང་གསུམ་འཕོ་བའི་བག་ཆགས་མི་སྦྱོང་ཞིང་སྔགས་ཀྱིས་སྦྱོང་བར་གསུངས་པ་བསྐྱེད་རིམ་གྱི་དུས་ནའང་གནད་འདི་འདྲས་ཟིན་པ་དང་། རྫོགས་རིམ་རང་བྱིན་རླབས་དཀྱིས་འཁོར་འཁོར་ལོ་གཉིས་དང་རྡོ་རྗེ་རྦ་རླབས་ཀྱི་སྦྱོང་ཞིང་ལམ་དུས་ཀྱི་སྣང་བཞིའི་ཡེ་ཤེས་ཟུང་འཇུག་དང་བཅས་པའང་མངོན་བྱང་ལྔ་ཡིན་ཞིང་འབྲས་དུས་ཀྱི་སྐུ་དང་ཡེ་ཤེས་ཀྱང་འདི་ལས་ལོགས་ན་མེད་པས་ཡེ་ཤེས་ལྔ་དུས་གཅིག་ཏུ་བསྒོམ་ཤེས་དགོས་པས་དེའི་ཚུལ་ནི། ཡེ་ཤེས་གྲུབ་པ་ལས། ཇི་ལྟར་མེ་ལོང་གཟུགས་བརྙན་ལ། །རང་ཉིད་ངེས་པར་སྣང་བ་ལྟར། །དེ་བཞིན་ཆོས་སྐུའི་གཟུགས་བརྙན་ནི། །སྣང་བས་མེ་ལོང་ཞེས་བྱའོ། །ཞེས་གསུངས་པ་ལྟར། ད་ལྟའི་རིག་པ་སྐད་ཅིག་མ་གཟུང་འཛིན་གྱི་སྒྲིབ་གཡོག་དང་བྲལ་བ་འདི་བཅས་བཅོས་མ་ཤོར་བར་རང་བབས་སུ་འཇོག་ཤེས་ན་མེ་ལོང་ལྟ་བུའི་ཡེ་ཤེས་དེ་ཡིན། དེ་བཞིན་གཤེགས་ཀུན་ཡེ་ཤེས་དང་། །རང་གི་དང་ནི་འགྲོ་བའི་ཡང་། །དངོས་ཉིད་ཅིག་པར་ཐུགས་ཆུད་པ། །མཉམ་ཉིད་ཡེ་ཤེས་ཞེས་བྱའོ། །ཞེས་གསུངས་པའི་མཉམ་ཉིད་ཡེ་ཤེས་ཀྱང་དེ་ཡིན། གདོད་ནས་དག་ཅིང་སྐྱེ་བ་མེད། །རང་བཞིན་གྱིས་ནི་འོད་གསལ་བ། །ཕན་ཚུན་ཁྱབ་པའི་ཡེ་ཤེས་གང་། །སོ་སོར་རྟོག་པ་ཅན་ཞེས་བྱ། ཞེས་གསུངས་པའང་དེ་ཡིན་ཀུན་ཏུ་ཀུན་ནས་སངས་རྒྱས་ཀྱི། །སངས་རྒྱས་མཛད་པ་ལ་འཇུག་པས། །སངས་རྒྱས་ཐམས་ཅད་མཛད་གཅིག་ལ། །བྱ་བ་གྲུབ་པ་ཞེས་བྱའོ། །ཞེས་གསུང་པའི་དོན་རང་གི་སེམས་ཀྱི་ཆོས་ཉིད་མངོན་སུམ་དུ་རྟོགས་ན་སངས་རྒྱས་ཐམས་ཅད་ཀྱི་ཐུགས་ཀྱི་དགོངས་པ་རྟོགས་ཤིང་སྣང་སྲིད་དག་པ་རབ་འབྱམས་སུ་ཤར་བ་བྱ་བ་གྲུབ་པའི་ཡེ་ཤེས་ཡིན་པས་གོང་གི་ཡེ་ཤེས་དེའི་ཕྲིན་ལས་ཀྱི་ཆ་ཡིན། ཆོས་དབྱིངས་ཡེ་ཤེས་ནི། གང་ཚེ་ཉོན་མོངས་ཤེས་བྱའི་སྒྲིབ། །ཐམས་ཅད་ལས་གྲོལ་དེ་ཡི་ཚེ། །རྣལ་འབྱོར་པ་མཆོག་རྡོ་རྗེ་ཅན། །ཤིན་ཏུ་རྣམ་དག་ཅེས་བྱའོ། །ཞེས་པས་བསྟན་པར་གསུངས་པས་གོང་གི་རང་ངོ་ཤེས་པའི་ཡེ་ཤེས་ཀྱི་ངང་ལ་མཉམ་པར་བཞག་ཚེ་བདག་འཛིན་དང་ཆགས་སྡང་གིས་མ་གོས་པས་ཉོན་སྒྲིབ་དང་། འཁོར་གསུམ་མཾ་གཟུང་འཛིན་གྱིས་མ་བསླད་པས་ཤེས་སྒྲིབ་དག་པ་ལ་ཆོས་དབྱིངས་ཡེ་ཤེས་སུ་འཇོག་པ་ཡིན་པས་རང་གི་འཁོར་འདས་དབྱེར་མེད་བསྒོམ་པ་ལ་ཡེ་ཤེས་ལྔ་ཚང་བར་ཤེས་ནས་མངོན་བྱང་ལྔའི་སྦྱང་གཞི་ལྔ་ཚན་བཅོ་ལྔ་ཚན་པ་ལྔ་སྦྱངས་ནས་ཡེ་ཤེས་ལྔའི་གཟུགས་བརྙན་ཟླ་བ་ཉི་མ་ཕྱག་མཚན་ས་བོན། དེ་གསུམ་རོ་གཅིག་ཏུ་འདྲེས་པ་སྐུ་ཡོངས་སུ་རྫོགས་པ་དང་ལྔའི་རྣམ་པར་ཤར་བ་ཡིན་སྙམ་དུ་གཞི་ལམ་འབྲས་གསུམ་བསྲེས་ནས་དག་སྣང་གི་རྒྱས་མ་ཐེབ་བར་སྦྱང་གཞི་རྣམས་དང་སྦྱོང་བྱེད་སོ་སོར་སྦྱར་ནས་ཡེ་ཤེས་ལྔ་རིམ་ཅན་དུ་བསྒོམ་ཚེ་རྒྱུད་གསུམ་བསྲེས་ནས་འཁོར་འདས་དབྱེར་མེད་ཀྱི་ལྟ་བའི་ངང་ནས་བསྒོམ་པར་ལྟ་བུར་མི་འགྲོ་བར་རྣམ་རྟོག་བརྩེགས་ནས་བསྒོམ་པ་ལས་དང་པོ་པའི་ཉམས་ལེན་ལྟ་བུར་འགྱུར་ཉེན་ཆེ་བས་སེམས་མ་བཅོས་པའི་ངང་ལ་མཉམ་པར་བཞག་ནས་འབྲས་བུ་ལམ་བྱེད་ཀྱི་རྩི་དང་མ་བྲལ་བ་གལ་ཆེ། རྗེ་བླ་མའི་ཞལ་ནས། སྔོན་དུས་དང་པོར་བསྒོམ་པ་ལྟ་བུ་མ་ཡིན་པར་རྒྱུ་རྡོ་རྗེ་འཛིན་པའི་རྩ་ཞལ་དཀར་པོ། གཡས་སྔོ་གཡོན་དམར། སྟེང་ཞལ་དུད་ཁ་དབུ་སྐྲ་སེར་པོ་གྱེན་དུ་བརྫེས་པ་རྣམས་ཀྱི་ཡེ་ཤེས་ལྔ་མཚོན་ཚུལ་ཁ་དོག་འཁོར་འདས་དབྱེར་མེད་ཀྱི་དོན་ལྟ་བའི་ངང་ནས་མ་གཡོས་བཞིན་ད་ལྟ་ཁྲིགས་སེ་འོང་བ་འདུག་གསུངས། སྐུའི་རྣམ་འགྱུར་སྒེག་ཅིང་དཔའ་བ་མི་སྡུག་པ། ཞེས་སོགས་ཆགས་སྡང་རྨོངས་གསུམ་གྱི་ཉམས་རྣམས་རྣམ་པ་གཞི་དུས་དང་མཐུན་པར་སྣང་ཡང་ལམ་བྱེད་གཞི་ལྡན་གྱི་སྟོབས་ཀྱིས་ངོ་བོ་འབྲས་དུས་ཀྱི་སྐུ་དང་ཡེ་ཤེས་དངོས་ཡིན་པས་ཐ་མལ་གྱི་ཞེན་འཛིན་སྤུ་ཙམ་གྱི་མ་གོས་པ་ཞིག་དགོས། མཁའ་གསང་བྱིན་རླབས་བྱེད་པ་དེ་ཐ་མལ་པའི་ཆགས་པས་གོས་མི་རུང་ཟེར་བའི་དོན་ཡིན། སྙོམས་འཇུག་གི་སྒྲས་སངས་རྒྱས་ཐམས་ཅད་རིགས་ལྔ་ཡབ་ཡུམ་གྱི་རྣམ་པར་སྤྱན་དྲངས་པ་དེ་དག་སྣང་གི་རྒྱས་ལེགས་པར་ཐེབས་ན་རང་ལས་གཞན་པའི་ཡེ་ཤེས་པ་མེད་པར་གོ་བའི་གནད་ཡོད། བར་དོའི་རྣམ་ཤེས་ཡིག་འབྲུའི་རྣམ་པར་ཞལ་དུ་ཞུགས། ཡབ་ཡུམ་གཉིས་རྗེས་ཆགས་ཀྱི་མེས་འོད་དུ་ཞུ་ནས་བདུད་བཞིའི་སྟེང་དུ་བདེ་བ་ཆེན་པོའི་རང་བཞིན་གྱི་ཐིག་ལེར་བསྒོམ་པ་དེ་མ་དག་འཁོར་བའི་འཁྲུལ་སྣང་རྣམས་རང་ངོ་ལེགས་པར་ཤེས་ན་སྐུ་དང་ཡེ་ཤེས་ལས་ལོགས་ན་མེད་ཅིང་། ལྷ་སྐུ་ཞལ་ཕྱག་གི་རྣམ་པར་སྣང་བའང་ངོ་བོ་རིག་སྟོང་གཉིས་སུ་མེད་པའི་ཡེ་ཤེས་ལས་ནམ་ཡང་གཡོ་བ་མེད་པའི་དོན་ཡིན། ལྷ་མོ་བཞིས་གླུས་བསྐུལ་བ་དེ་ཆོས་སྐུ་ལས་གཟུགས་སྐུའི་སྣང་བ་འབྱུང་བ་དེ་སྙིང་རྗེའི་རྩལ་ལས་འཆར་བ་ལ་དགོངས་འབྲས་བུ་རྡོ་རྗེ་འཛིན་པ་བཞེངས་ནས་སེམས་དཔའ་གསུམ་བརྩེགས་བསྒོམ་པ་དེ་ལུས་ངག་ཡིད་གསུམ་དུས་གཅིག་ལ་གྲོལ་དགོས་པའི་དོན་ཡིན། རང་ཉིད་ཀྱེ་རྡོར་ལྷ་དགུར་བསྒོམ་པ་དམ་ཚིག་སེམས་དཔའ་སྐུ། དེ་རྣམས་ཀྱི་ཐུགས་ཀར་ས་བོན་བསྒོམ་པ་ཡེ་ཤེས་སེམས་དཔའ་གསུང་། ཀླད་ཀོར་རྣམས་ཏིང་ངེ་འཛིན་སེམས་དཔའ་ཐུགས་མཚོན་བྱེད་ཡིན་པས་ལུས་ངག་ཡིད་གསུམ་ལྷ་སྔགས་ཡེ་ཤེས་དང་མ་བྲལ་ན་ཐམས་ཅད་ལྷར་གསལ་འོང་བ་སྣོད་བཅུད་སྦྱང་བ། ཚོགས་དྲུག་གི་ཡུལ་ལ་ཡེངས་ན་ཐ་མལ་སྣང་ཞེན་གྱིས་བསླུ་བས་སྒོ་སྲུང་གི་ཚུལ་དུ་སྐྱེ་མཆེད་སྐུ་གསུང་ཐུགས་བྱིན་གྱིས་བརླབས་པ། ཉམས་ལེན་དེ་ལྟ་བུ་དང་ལྡན་ན་རང་ལས་གཞན་པའི་སངས་རྒྱས་ཕྱི་རོལ་ན་མེད་པས་ཡེ་ཤེས་སེམས་དཔའ་སྤྱན་དྲངས་ནས་དགུག་གཞུག་བཅིང་དབང་དུ་བྱས་པ་དེ་རྒྱུའི་ཐེག་པ་ལྟར་ལམ་ལ་རིམ་གྱིས་བསླབ་ནས་སངས་རྒྱས་པ་མ་ཡིན་པར་གཞི་འབྲས་བསྲེས་ནས་བཙན་ཐབས་སུ་རང་ངོ་ཤེས་ནས་གྲོལ་བའི་དོན་ཡིན་ནོ། །ལུས་དཀྱིལ་ནི་ཆོས་ཀྱི་ཕུང་པོ་བརྒྱད་ཁྲི་དང་། བཞི་སྟོང་གི་ནི་ཆོ་ག་ཡང་། ལུས་ཀྱི་དེ་ཉིད་མི་ཤེས་པས། དེ་དག་ཐམས་ཅད་འབྲས་མེད་འགྱུར། ཞེས་གསུངས་པ་སོགས་ཉི་ཟེར་དང་བདེ་ཆེན་བཅུད་སྙིང་གཉིས་སུ་ཕྱི་དཀྱིལ་ལས་ལུས་དཀྱིལ་ཟབ་པའི་རྒྱུ་མཚན་གསུངས་པ་རྣམས་ངེས་པར་བྱས། འཁོར་འདས་དབྱེར་མེད་བསྒོམ་དུས། ཕྱི་ན་གནས་ཚད་ལུས་ལ་ཚང་ལུས་ལ་ཚང་ཚད་སེམས་ལ་བག་ཆགས་ཀྱི་ཚུལ་དུ་ཡོད་གསུངས་པ་དེ་བསྒོམ་པའི་མན་ངག་གིས་ཉམས་སུ་ལེན་ཚུལ་ནི། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་རྟེན་དཀྱིལ་འཁོར་བཞི་དབང་རྟེན་ཁོག་པ་དང་བཅས་པ་ལ་ཚང་། གསང་བ་སེམས་ཀུན་གཞིའི་གསལ་ཆ་ལ་བག་ཆགས་ཀྱི་ཚུལ་དུ་ཚང་། སེམས་ཀྱི་གསལ་ཆ་དེ་སྐྱེ་འགག་གནས་གསུམ་དང་བྲལ་བའི་རིག་སྟོང་བརྗོད་དུ་མེད་པའི་ཡེ་ཤེས་ལས་ནི་ནམ་ཡང་གཡོ་བ་མེད། དེ་བསྒོམ་པ་ལ་འཁོར་འདས་དབྱེར་མེད་ཀྱི་ཁྲིད་ཐོབ་དགོས། དེ་ལ་ཐོག་མར་ལྷན་ཅིག་སྐྱེས་པའི་ཆོས་གསུམ། དེའང་རྒྱུ་ལྷན་ཅིག་སྐྱེས་པའི་ཆོས་གསུམ། ལམ་ལྷན་ཅིག་སྐྱེས་པའི་ཆོས་གསུམ། འབྲས་བུ་ལྷན་ཅིག་སྐྱེས་པའི་ཆོས་གསུམ་སྟེ་གཞི་ལམ་འབྲས་གསུམ་གྱི་དབྱེ་བ་ཡོད་པ་མན་ངག་གིས་གཅིག་ཏུ་དྲིལ་ནས་བསྒོམ་པའི་ཉམས་ལེན་བྱེད་པ་ལུས་དཀྱིལ་བསྒོམ་པ་འདི་ཡིན། ཁམས་གསུམ་རིགས་དྲུག་གི་ས་བོན་ལུས་ལ་ཚང་ཞིང་དེར་རླུང་སེམས་རྒྱུ་འགྲུལ་གྱིས་མ་དག་པའི་སྣང་བ་ཤར་བ་ཀུན་གཞི་རྒྱུ་རྒྱུད། རྣལ་འབྱོར་པའི་ཉམས་ཀྱི་སྣང་བ་འཆར་ཚད་ལུས་ལ་རྩ་ཡིག་གི་ཚུལ་དུ་ཚང་ཞིང་། དེར་རླུང་སེམས་ཅུང་ཟད་དག་པ་རྒྱུ་འགྲུལ་གྱིས་ཉམས་སྣང་འཆར་བ་ལུས་ཐབས་རྒྱུད། མཐར་ཐུག་སྐུ་དང་ཡེ་ཤེས་ཀྱི་སྣང་བ་འབྱུང་བའི་རྒྱུ། ལུས་ལ་རྩ་ཡིག་གི་ཚུལ་དུ་ཡོད་པ་ལ་ཤིན་ཏུ་དག་པའི་རླུང་སེམས་ཀྱི་སྟོབས་ཀྱིས་སྐུ་དང་ཞིང་ཁམས་ཀྱི་སྣང་བ་འབྱུང་བ་འབྲས་རྒྱུད་ཡིན་ལ། དེ་གསུམ་གཅིག་ཏུ་བསྲེས་ནས་བསྒོམ་པ་མཚོན་བྱ་མཚོན་བྱེད་བསྒྲིགས་པ་ལྟ་བུར་མི་གོ་བར་ཚད་མ་བཞིའི་གཏན་ལ་ཕབ་ནས་ཡིན་པ་ལ་ཡིན་པར་ངོ་ཤེས་པའི་གོ་བ་ཞིག་མེད་ཐབས་མེད། སམ་བུ་ཊ་ལས། ཨེ་ནི་ས་རུ་ཤེས་པར་བྱ། །ལས་ཀྱི་ཕྱག་རྒྱ་སྤྱན་མ་ཉིད། །ཅེས་སོགས་ཀྱི་དོན་བཤད་ན། ལྟེ་བ་སྤྲུལ་པའི་འཁོར་ལོའི་དབུས་སུ་རིན་ཆེན་འབྱུང་ལྡན་ཡབ་ཡུམ་དང་། རྩ་འདབས་དྲུག་ཅུ་རྩ་བཞི་འཁོར་ལྷ་མོ་དྲུག་ཅུ་རྩ་བཞིར་བསྒོམ་པ་དེས་ཁམས་གསུམ་རིགས་དྲུག་གི་མ་དག་པའི་སྣང་བ་འབྱུང་བའི་རྒྱུའི་རྩ་ཡིག་སེམས་དང་། ང་རྒྱལ་དང་སེར་སྣ་དང་ཚོར་བའི་ཕུང་པོ་རྣམ་པར་དག་པར་བྱེད། ལམ་ཕ་རོལ་ཏུ་ཕྱིན་པའི་ལུགས་ཀྱི་གནད་ཐམས་ཅད་ཚད་མེད་བཞི་དང་། ཕར་ཕྱིན་བཞིར་འདུ་བས་དེ་དག་ཀྱང་འདིར་ཚང་ལ། སྔགས་ཀྱི་ཐེག་པའི་ལམ་ཐམས་ཅད་ཕྱག་རྒྱ་བཞིར་འདུ་ཞིང་དེའང་ཉམས་ལེན་འདི་ལ་ཚང་བ་ཡིན་པས་མདོ་སྔགས་གཉིས་ཀྱི་ལམ་ཐམས་ཅད་ཀྱང་ལུས་དཀྱིལ་བསྒོམ་པ་འདི་ལ་ཚང་། དེའང་གནད་བསྡུས་ན། དམིགས་པ་མེད་པའི་སྙིང་རྗེ་ལ་ཚད་མེད་བཞི་ཚང་། ལྟ་བའི་ངང་ནས་མ་གཡོས་པར་དགེ་བ་སྒྲུབ་པ་ལ་ཕར་ཕྱིན་དྲུག་ཚང་། དེ་ཐབས་ཀྱི་ཕར་ཕྱིན་ཡིན། མི་མཐུན་ཕྱོགས་ཀྱིས་མི་བརྫི་བ་སྟོབས་ཀྱི་ཕར་ཕྱིན། གང་ཟག་དེས་གནད་ཀྱི་སྨོན་ལམ་ཐམས་ཅད་འགྲུབ་པ་སྨོན་ལམ་གྱི་ཕར་ཕྱིན། བདག་མེད་གཉིས་རྟོགས་ཀྱི་ལྟ་བའི་ངང་ནས་མ་གཡོས་པ་ཡེ་ཤེས་ཀྱི་ཕར་ཕྱིན། སྒོ་གསུམ་རྡོ་རྗེ་གསུམ་དང་མི་འབྲལ་ཞིང་སྣང་སྲིད་དག་པ་རབ་འབྱམས་སུ་ཤེས་པ་ཕྱག་རྒྱ་བཞི་ཡིན་པས་བཞི་ཚན་གསུམ་པོ་འཁོར་ལོ་སོ་སོ་ལ་སྦྱོར་བར་མཛད་ཀྱང་འཁོར་ལོ་གཅིག་ལ་གནད་ཐམས་ཅད་ཚང་བ་ཡིན་ནོ། །འབྲས་བུ་སྐུ་དང་ཡེ་ཤེས་ཞིང་ཁམས་དང་བཅས་པ་ལུས་དཀྱིལ་བསྒོམ་པ་འདི་ལ་ཚང་ཞིང་། དེ་ལྟ་བུའི་གཞི་ལམ་འབྲས་གསུམ་བསྲེ་བ་ལ་རྟེན་དཀྱིལ་འཁོར་བཞི་སྐུ་བཞིར་ཐག་ཆོད་ཅིང་། བརྟེན་པ་རང་རིག་པའི་ཡེ་ཤེས་སྤྲོས་པ་དང་བྲལ་བ་རྟེན་དཀྱིལ་འཁོར་བཞི་དང་དབྱེར་མེད་དུ་རྟོགས་ནས་ཟུང་འཇུག་ཏུ་ཉམས་སུ་ལེན་པ་འདི་ལ་བདག་འཛིན་གཉིས་དང་གཟུང་འཛིན་གྱི་རྟོག་པ་དང་གྱ་ནོམ་ལྷར་ཞེན་གྱིས་མ་བསླད་པར་དག་སྣང་གི་ང་རྒྱལ་འཛིན་ཤེས་ན་ལུས་དཀྱིལ་གྱི་གོ་བ་དཔྱིས་ཕྱིན་པ་ཡིན་ནོ། །དེ་བཞིན་དུ་འཁོར་ལོ་གཞན་རྣམས་ལས་རིགས་འགྲེ་སྦྱར་ཤེས་པར་བྱ། དེ་ལྟར་བསྒོམ་པའི་ཕན་ཡོན་རྟེན་འཁོར་ལོ་ལྔའི་རྩ་ཡིག་རླུང་སེམས་རྣམས་ལྷར་བསྒོམ་པ་དེས་མ་དག་པ་འགྲོ་བ་རིགས་དྲུག་གི་རྟེན་དུ་གྱུར་པའི་རྩ་ཡིག་རླུང་སེམས་རྣམས་སྐུ་དང་ཡེ་ཤེས་སུ་བསྒོམ་པར་སོང་བས་རིགས་དྲུག་གི་གནས་སོགས་འཁྲུལ་སྣང་ཐམས་ཅད་སྦྱོང་བ་ཡིན་ནོ། །སངས་རྒྱས་རིགས་ལྔའི་སྐུ་དང་ཞིང་ཁམས་ཐམས་ཅད་འདི་ལས་ལོགས་ན་མེད་པར་ཤེས་པས་ཞིང་སྦྱོང་བའང་འགྲུབ་པ་ཡིན་ནོ། །དེ་ལྟ་བུའི་རྟེན་དཀྱིལ་འཁོར་བཞི་བརྟེན་པ་སེམས་དང་བཅས་པའི་གནད་ཤེས་ནས་ལུས་དཀྱིལ་བསྒོམ་པ་འདི་ལ། རྗེ་དཀོན་མཆོག་ལྷུན་གྲུབ་ཀྱིས་བསྐྱེད་རིམ་བསྒོམ་པས་འདོད་ཡོན་ལམ་དུ་བྱེད། རྫོགས་རིམ་ཐབས་ཀྱིས་ཉོན་མོངས་བྱང་ཆུབ་འགྱུར། ཞེས་གསུངས་པའི་ཕན་ཡོན་འབྱུང་བར་མ་ཟད། ལམ་འབྲས་ལས། ལམ་འཇུག་ལྡོག་དང་། ཕྱག་རྒྱ་འཇུག་ལྡོག་གསུངས་པའི་དོན་འདི་ལྟ་བུའི་གནད་ཟིན་ནས་བསྒོམ་པའི་ཚེ་དབང་གོང་མ་གསུམ་གྱི་ཡེ་ཤེས་འདྲེན་ནུས་ན་ལམ་གོང་མ་མ་བསྒོམ་ཡང་ཆོག་པ་དང་། ལུས་དཀྱིལ་བསྒོམ་པས་བདེ་སྟོང་གི་ཡེ་ཤེས་བསྐྱེད་ནུས་ན་དབང་གསུམ་པའི་ལམ་གྱི་གོ་ཆོད་ཅེས་པ་ལྟ་བུར་གོ་རུང་། ལུས་སེམས་གཉིས་གྲུབ་སྡེ་རྫས་གཅིག་ཡིན་པའི་གནད་ཀྱི་ལུས་ཟག་མེད་འཇའ་ལུས་དང་། སེམས་རྟོག་མེད་ཆོས་སྐུར་གྲོལ་བ་དུས་གཅིག་ལ་འོང་བ་ཡིན་ནོ། །ལམ་ཟབ་ནང་མ་འདིར་བསྒོམ་ན་ངོར་ཆེན་གྱིས་ལམ་འབྲས་བུ་དང་བཅས་པའི་བཅུད་བསྡུས་པ་ལྟ་བུའི་གདམས་ངག་ཡིན་གསུངས་པའི་དོན། གང་ཟག་དབང་པོ་རབ་ཀྱི་ལམ་བླ་མའི་རྣལ་འབྱོར་འདི་ལ་དབང་བཞིའི་ལམ་གནད་ཐམས་ཅད་ཚང་བར་ཤེས་དགོས་པ་དང་། མཆོག་བསྒྲུབ་པའི་མངོན་རྟོགས་རྣམས་ཀྱི་དོན་ཚང་བར་ཤེས་དགོས་པར་གསུངས་པ་ཡིན་ནོ། །ད་ནི་དབང་ལེན་པ་ལ། དབང་ཞེས་པའི་གོ་དོན་སྔར་མ་རིག་འཁྲུལ་པའི་གཞན་དབང་དུ་གྱུར་པ་ད་རང་ངོ་ཤེས་ནས་རང་དབང་ཐོབ་པར་ངོ་སྤྲོད་པའི་དོན་ཡིན། དེ་ནས་གང་ཟག་དབང་པོ་རབ་དབང་དུས་སུ་གྲོལ་བ་དང་། འབྲིང་དོན་གྱི་ཡེ་ཤེས་དང་། དཔེའི་ཡེ་ཤེས་ངོ་འཕྲོད་པ། ཐ་མ་སྦྱང་གཞི་སྦྱོང་བྱེད་ངོ་འཕྲོད་པ་ལ་འཇོག་མཛད་པ་ཡིན། བརྒྱུད་པ་འདིའི་བཀའ་སྲོལ་ལ། དབང་ལམ་དུ་བྱ་བ་ཞེས་ལམ་དུས་ཀྱི་དབང་རྒྱས་བསྡུས་ཐུན་བཞི་སོགས་སུ་ལེན་པ་འདིས་དམ་ཚིག་ཉམས་ཆགས་གསོ་བ་དང་། འཁོར་འདས་དབྱེར་མེད་ཀྱི་ལྟ་བའི་དྲན་པ་གསོ་བ་དང་། ཡེ་ཤེས་ཀྱི་གསལ་སྣང་འདྲེན་པའི་ཐབས་ཁྱད་པར་ཅན་ཞིག་ཡིན་པས་ཁེ་ཆེ་བ་ཉེན་ཆུང་བ་རང་གི་རྒྱུ་ཚོད་ལ་ཤིན་ཏུ་འཚམས་པ་ཡིན་ནོ། །འཁོར་འདས་དབྱེར་མེད་ཀྱི་ལྟ་བ་ལ་གོ་མྱོང་ཧ་ཅང་མེད་ཅིང་མོས་གུས་ཀྱིས་དབང་བླངས་ཏེ་དམ་ཚིག་གསོ་བར་འདོད་ན། ཡིག་ཆ་རྣམས་ལས་དབང་ལྷའི་གཙོ་བོ་དེ་རང་གི་བླ་མར་བསྒོམ་གསུངས་ཀྱང་། གདན་གསུམ་ཚང་བའི་ལྷ་ཚོགས་ཐམས་ཅད་རྩ་བའི་བླ་མར་བསྒོམ་པ་ལམ་ཟབ་ཀྱི་ཁྱད་ཆོས་ཡིན་པས་ཤིན་ཏུ་ལེགས་ཏེ་སྦྱང་གཞི་མ་དག་པའི་ཕུང་ཁམས་སྐྱེ་མཆེད་རྣམས་སྦྱོང་བྱེད་དབང་བསྐུར་ཟབ་མོའི་ཐབས་ཀྱིས་སྦྱངས་འབྲས་སྐུ་དང་ཡེ་ཤེས་སུ་བྱིན་གྱིས་རློབ་པ་ཡིན་སྙམ་དུ་མོས་གུས་ཀྱིས་དབང་བླང་བ་ལ་དམ་ཚིག་གསོ་བ་སོགས་ཕན་ཡོན་དཔག་ཏུ་མེད་པ་འབྱུང་ཞིང་། འཁོར་འདས་དབྱེར་མེད་ཀྱི་ལྟ་བ་ལ་འདྲིས་གོམས་ཅུང་ཟད་བྱས་ནས་ལྟ་ཐོག་ནས་བསྒོམ་པ་ཚོལ་བའི་ཚུལ་གྱིས་དབང་ལེན་ལ། རང་གི་སྦྱང་གཞི་ཕུང་པོ་ལྔ་དང་ཉོན་མོངས་པ་ལྔའི་འཕྲུལ་སྣང་དབྱིངས་སུ་དག་པའི་ངོ་བོ་རྩ་བའི་བླ་མ་དང་ཐ་མི་དད་པའི་རྒྱལ་བ་རིགས་ལྔ་དང་། དེ་བཞིན་དུ་རང་གི་འབྱུང་བ་ལྔ་དང་ཚད་མེད་བཞི་བདེ་བ་ཆེན་པོའི་ཡེ་ཤེས་དང་ལྔའི་མི་མཐུན་ཕྱོགས་ཀྱི་འཁྲུལ་སྣང་རྣམས་དབྱིངས་སུ་དག་པའི་ངོ་བོ་ཡུམ་བཞིའམ་ལྔ་དང་། ཕྱི་ནང་གི་སྐྱེ་མཆེད་བཅུ་གཉིས་ཀྱི་འཁྲུལ་སྣང་དབྱིངས་སུ་དག་པའི་ངོ་བོ་བྱང་ཆུབ་སེམས་དཔའ་དང་ལྷ་མོའི་ཚོགས་དང་། རང་རྒྱུད་ཀྱི་ཉོན་ཤེས་ཀྱི་སྒྲིབ་པ་རྣམས་དང་། ཚིག་ཆེན་བཅུ་གཉིས་རྣམས་སུ་ནད་འདུ་བ་བཞི་ལ་སོགས་པའི་རྩ་མདུད་ཡོད་པས་དེ་དག་གི་རླུང་སེམས་རྒྱུ་འགྲུལ་གྱི་དབང་གིས་ཕྱི་ནང་གི་བར་ཆད་རྣམས་འབྱུང་བས་འཁྲུལ་སྣང་དེ་དག་དབྱིངས་སུ་དག་པའི་ངོ་བོ་ཁྲོ་བོ་དང་ཁྲོ་མོའི་ཚོགས་ཏེ་བླ་མ་གདན་གསུམ་ཚང་བའི་ལྷ་ཚོགས་མདུན་གྱི་ནམ་མཁར་སྤྱན་དྲངས་ཏེ། དེ་ལ་འཁོར་འདས་གཉིས་ཀྱི་མཆོད་པ་ཐམས་ཅད་བདུད་རྩི་ལྔ་དང་ཡེ་ཤེས་ལྔའི་ངོ་བོར་ཤེས་པས་གདན་གསུམ་ཚང་བའི་མཆོད་པས་མཆོད་ཅིང་། དུས་གསུམ་གྱི་སངས་རྒྱས་རྣམས་ཀྱི་ཡོན་ཏན་མདོར་བསྡུས་ན་ཡེ་ཤེས་ལྔའི་ནང་དུ་འདུས་པར་ཤེས་ནས་ཞེ་སྡང་རྡོ་རྗེ་སོགས་གདན་གསུམ་ཚང་བའི་བསྟོད་པའི་སྒོ་ནས་བསྟོད་དེ། འཁོར་བ་ཐོགས་མེད་ཀྱིས་དུས་ནས་འཁྲུལ་པའི་འཁྲུལ་སྣང་འདི་རྣམས་བླ་མ་གདན་གསུམ་ཚང་བའི་ལྷ་ཚོགས་ལས་ངོ་སྤྲོད་ཀྱི་དབང་ཐོབ་པའི་སྐད་ཅིག་ལ་སྐུ་དང་ཡེ་ཤེས་སུ་གནས་འགྱུར་བའི་དབང་ཡོན་དུ་ལུས་ལོངས་སྤྱོད་དུས་གསུམ་གྱི་དགེ་རྩ་དང་བཅས་མཎྜལ་གྱི་ཚུལ་དུ་ཕུལ་ནས་དབང་ལེན་པ་ཡིན་ནོ། །འོག་ཏུ་མིང་དབང་གི་འཇུག་ཏུ་དབང་གི་ངོ་སྤྲོད། དངོས་ཀུན་གང་དང་གང་སྣང་བ། །གཙོ་དེ་རང་གི་ལྷག་པའི་ལྷ། །ཆོས་རྣམས་རང་བཞིན་རྙོག་མེད་དག །སངས་རྒྱས་ཡེ་ཤེས་བལྟ་བར་གྱིས། །ཞེས་གསུངས་པའི་དོན། རང་ལ་སྣང་བའི་ཕུང་ཁམས་སྐྱེ་མཆེད་ཐམས་ཅད་བླ་མའི་དྲིན་གྱིས་རང་ངོ་འཕྲོད་ན་ལྷག་པའི་ལྷ་གདན་གསུམ་ལྷ་དང་ཡེ་ཤེས་ཀྱི་ངོ་བོ་ཡིན་པས་རང་གི་རྣམ་རྟོག་གི་རྙོག་པས་མ་བསླད་པར་རང་བཞིན་གྱིས་དག་པ་ལ་དག་པར་ཤེས་པའི་དག་སྣང་གི་སྒོ་ནས་བསྒོམ་དགོས་པ་ཡིན། དེའི་ཚུལ་ནི། མི་བསྐྱོད་པ་ཆུ་དབང་གི་སྐབས་སུ་འཁོར་འདས་གཉིས་ཀྱིས་བསྡུས་པའི་ཆོས་ཐམས་ཅད་ལུས་ལ་རྩ་ཁམས་ཀྱི་ཚུལ་དུ་ཚང་། ལུས་ལ་ཚང་ཚད་སེམས་རྣམ་པར་ཤེས་པའི་ཚོགས་དྲུག་གམ་བརྒྱད་པོ་ད་ལྟའི་ཤེས་པའི་གསལ་ཆ་འདི་ཉིད་ལ་བག་ཆགས་ཀྱི་ཚུལ་དུ་ཚང་བས། སེམས་ཀྱི་གསལ་ཆ་དེ་སྐྱེ་འགག་གནས་གསུམ་དང་བྲལ་བའི་དབྱིངས་འདུས་མ་བྱས་ངང་ལས་ནམ་ཡང་མི་གཡོ་བར་ཤེས་ནས་སྣང་ཆ་ཕྱི་ནང་གི་ལྷ་ཐམས་ཅད་མི་བསྐྱོད་པ་ཡབ་ཡུམ་དུ་ཡན་ལག་བཞི་རྫོགས་ཀྱི་ཚུལ་གྱིས་གསལ་འདེབས་ཤིང་བྱིན་གྱིས་རློབས་པ་སྟེ། དེའང་བདག་མདུན་ཐ་དད་དུ་འཛིན་པའི་གཟུང་འཛིན་གྱི་རྟོག་པ་དང་ཉོན་མོངས་པས་མ་བསླད་པར། དེ་བཞིན་གཤེགས་པ་ལྔས་བུམ་པའི་ཆུས་སྤྱི་བོར་ནས་དབང་བསྐུར་ཚེ་དུག་ལྔ་དང་ཕུང་པོ་ལྔའི་འཁྲུལ་སྣང་དབྱིངས་སུ་དག་ནས་བདག་མདུན་ཐ་དད་མེད་པར་རིགས་ལྔ་དང་ཡེ་ཤེས་ལྔའི་རྟོགས་པ་མངོན་དུ་གྱུར་བྱུང་སྙམ་པ་དང་། ཡུམ་ལྔས་རྡོ་རྗེའི་གླུ་བླང་པའི་ཚེ་ཚད་མེད་བཞིའི་མི་མཐུན་ཕྱོགས་དང་འབྱུང་བ་ལྔའི་འཁྲུལ་སྣང་སྦྱངས་ནས་དམིགས་པ་མེད་པའི་སྙིང་རྗེའི་རང་མདངས་ཡུམ་ལྔའི་ངོ་བོར་བྱིན་གྱིས་བརླབས་སོང་སྙམ་པ་དང་། བྱང་ཆུབ་སེམས་དཔའ་རྣམས་ཀྱིས་བཀྲ་ཤིས་བརྗོད་ཚེ་ནང་གི་ཚོགས་དྲུག་གི་འཁྲུལ་སྣང་དབྱིངས་སུ་དག་སྟེ་གང་ཤར་བདེ་བ་ཆེན་པོའི་ཡེ་ཤེས་སུ་ངོ་འཕྲོད་བྱུང་སྙམ་པ་དང་། ཁྲོ་བོ་རྣམས་ཀྱིས་བགེགས་བསྐྲད་པའི་ཚེ་བདག་འཛིན་དང་ཆགས་སྡང་གཉིས་འཛིན་གྱི་རྟོག་པ་ཐམས་ཅད་གློ་བུར་གྱི་འཁྲུལ་སྣང་ཡིན་པས་འཁྲུལ་རྟོག་དང་དེའི་གཟུགས་བརྙན་ཕྱི་ནང་གི་བགེགས་ཐམས་ཅད་དབྱིངས་སུ་དྭངས་སོང་སྙམ་པ་དང་། ལྷ་མོ་རྣམས་ཀྱི་མཆོད་པའི་ཚེ་ཡུལ་དྲུག་གི་འདོད་ཡོན་གྱི་སྣང་བ་ལ་གཉིས་འཛིན་གྱི་ཞེན་པས་སླད་མ་ཞུགས་པར་འདོད་ཡོན་རྒྱན་དུ་ཤར་ཏེ་མཆོད་བྱ་མཆོད་ཡུལ་ལ་བཟང་ངན་ཐ་དད་མེད་པའི་རྟོགས་པ་མངོན་དུ་གྱུར་པ་ཡིན་སྙམ་པ་དང་། དབང་གི་ཆུ་རྒྱུན་དེས་སྨིན་མཚམས་ཡན་ཆད་གང་། བུམ་པའི་དབང་ཐོབ། ཕྱི་ནང་གི་ལུས་ལྷར་སྨིན། མགྲིན་པ་ཡན་ཆད་གང་། གསང་བའི་དབང་ཐོབ། ཕྱི་ནང་གི་ངག་སྔགས་སུ་སྨིན། སྙིང་ག་ཡན་ཆད་གང་། ཤེས་རབ་ཡེ་ཤེས་ཀྱི་དབང་ཐོབ། ཕྱི་ནང་གི་ཡིད་ཆོས་སྐུར་སྨིན། ལུས་ཐམས་ཅད་གང་། དབང་བཞི་པ་ཐོབ། སྒོ་གསུམ་ཆ་མཉམ་རླུང་དང་བཅས་པ་ངོ་བོར་ཉིད་སྐུར་སྨིན་ཏེ་ལུས་ངག་ཡིད་གསུམ་གྱི་དྲི་མ་བག་ཆགས་དང་བཅས་པ་དག་པར་མོས་ཏེ་དབང་ལེན་པ་འདི་ལ་དབང་བཞི་ཀའི་གནད་ཚང་བར་ལམ་དུ་ཁྱེར་ཤེས་ན་སྨིན་གྲོལ་ཆིག་ཆོད་དུ་གྱུར་ནས་དབང་གོང་མའི་ཡེ་ཤེས་ཀྱང་འདྲེན་ནུས་པ་ཡིན་ནོ། །རྗེ་བཙུན་གྱིས། ལམ་ཐམས་ཅད་གཅིག་ཏུ་སྡེབས་ནས་སྟོན་པ་འདི་རྣལ་འབྱོར་གྱི་དབང་ཕྱུག་བིཪྺ་པའི་ལུགས་ཡིན་གསུངས་པའི་དོན་ཡིན། འདི་དག་གི་སྐབས་སུ་སེམས་རིག་སྟོང་གཉིས་སུ་མེད་པ་མ་བཅོས་ལྷུག་པར་བཞག །དེ་ལ་བདག་འཛིན་རེ་དོགས་གཉིས་འཛིན་གྱི་ལྷད་ཞུགས་མ་ཞུགས་ཡང་ཡང་བྱ་ར་བྱེད། བདག་ཉིད་ཕྱིའི་ཧེ་རུ་ཀ་ལུས་དཀྱིལ་དང་བཅས་པས་དབང་ལེན་པ་ཡིན་པས་ལྷ་བརྒྱ་ལྔ་བཅུ་རྩ་བདུན་ནམ་མགྲོན་ཐབས་ཀྱི་ལྷ་དང་། འཁོར་ལྷ་མོ་བརྒྱད་ཀྱིས་ལེན་ན་ལྷ་བརྒྱ་དང་གྱ་བདུན་སྣང་ལ་རང་བཞིན་མེད་པར་ཤེས་ནས་རང་དང་དབང་ལྷ་ཐ་དད་དུ་འཛིན་མི་ཤོར་བར་དབང་ལེན་པ་ལ་གོམས་དགོས་པ་ཡིན་ནོ། །དེ་ནས་རིན་འབྱུང་ཅོད་པཎ་གྱི་དབང་ལ། ཐ་མལ་གྱི་སྣང་བ་སྭ་བྷ་ཝས་སྟོང་པར་སྦྱངས། དེའང་འདིའི་སྦྱང་གཞི་ཚོར་ཕུང་དང་ང་རྒྱལ་སེར་སྣ་ཡིན། ཚོར་བ་བདེ་སྡུག་བར་མར་འཛིན་པའི་རྣམ་རྟོག་འདི་ཚོར་ཕུང་ཡིན་པར་མ་ཟད་ཕུང་པོ་གཞན་བཞི་དང་ཁམས་སྐྱེ་མཆེད་རྣམས་ཀྱང་འདིར་འདུ་ཤེས་དགོས། དེའང་ཇི་ལྟར་ཤེས་ན། ཚོར་བར་སྣང་བཞིན་པའི་རྟོག་པ་འདི་ལ་ཕུང་པོ་གཞན་བཞི་ཨེ་ཚང་བརྟགས་པས་གོ། དེའང་ཚོགས་དྲུག་གི་ཤེས་པ་གང་རུང་གི་སྒོ་ནས་སྐྱེ་བར་ཤེས་པས་སྐྱེ་མཆེད་ཚང་དེའང་ཁམས་འབྱུང་བའམ་བཅོ་བརྒྱད་གང་ཡིན་ཡང་བརྟགས་ན་ཚང་བར་ཤེས་སླ། སྦྱང་གཞི་སྦྱོང་བྱེད་ངོ་སྤྲོད་པ་འདི་ནང་གི་རྟེན་འབྲེལ་ཤེས་པའི་སྒོ་ནས་ངོ་འཕྲོད་པ་འདི་ཤིན་ཏུ་གནད་ཆེ། དེའང་ལྷན་ཅིག་སྐྱེས་པའི་ཆོས་གསུམ་ངོ་འཕྲོད་པ་ལ་ཐུག་ཡོད། སེམས་གསལ་སྟོང་ཟུང་འཇུག་གསུམ་ལས་ཉོན་མོངས་ནད་གདོན་གསུམ་དཀྱིལ་འཁོར་བཞི་ལུས་ངག་ཡིད་གསུམ་གྱི་སྣང་བ་འཆར་ཚུལ་འདི་ཤེས་ན་ཕུང་ཁམས་སྐྱེ་མཆེད་ཐམས་ཅད་ནང་གི་རྟེན་འབྲེལ་གྱི་དབང་གིས་འཆར་བར་ཤེས། ལྷན་ཅིག་སྐྱེས་པའི་ཆོས་ཉི་ཤུ་རྩ་བདུན་དོན་དུ་རང་སེམས་འཁྲུལ་པའི་སྣང་བར་ཤེས་ན་སྦྱང་གཞིའང་འདི་ཡིན་ལ། སྦྱོང་བྱེད་ལམ་ལྷན་ཅིག་སྐྱེས་པའི་ཆོས་གསུམ་ཡང་རང་སེམས་སྐད་ཅིག་མ་གསལ་ཙམ་འདིའི་གློ་བུར་གྱི་དྲི་མ་ཅུང་ཟད་དག་པའི་སྣང་བརྙན་ཙམ་དུ་ཟད་ཅིང་། སྦྱང་འབྲས་འབྲས་བུ་ལྷན་ཅིག་སྐྱེས་པའི་ཆོས་གསུམ་གློ་བུར་གྱི་དྲི་མ་མ་ལུས་པ་དག་པ་ལ་སངས་རྒྱས་ཞེས་མིང་བཏགས་པ་ཡིན། གཞན་དུ་བཙལ་བས་རྙེད་པ་མ་ཡིན་ནོ། །འཁོར་འདས་ཞེས་པ་རྨོངས་མ་རྨོངས་སམ་ངོ་ཤེས་མ་ཤེས་ཀྱི་ཁྱད་ཙམ་ཡིན་པས་རིག་པ་སྐད་ཅིག་མའི་སྣང་ཆ་འདི་བདག་འཛིན་རེ་དོགས་གཉིས་འཛིན་གྱིས་མ་བསླད་པར་རིན་ཆེན་འབྱུང་ལྡན་ཞལ་ཕྱག་གི་རྣམ་པ་ཅན་དུ་བསྐྱེད་ནས་བདག་མདུན་ཐ་དད་དུ་མ་ཤོར་བར་དབང་བླངས་ཏེ་ཉམས་ལེན་གྱི་རྒྱུན་དེ་མཉམ་རྗེས་ཐམས་ཅད་དུ་སྐྱོང་ཤེས་ན་ལྟ་སྒོམ་སྤྱོད་གསུམ་གཅིག་ཏུ་བསྲེས་ནས་ཉམས་སུ་ལེན་པའི་མན་ངག་གི་གནད་ཐུན་མོང་མ་ཡིན་པ་ཡིིན་ནོ། །དབང་བསྐུར། གླུ་བླངས། བཀྲ་ཤིས་བརྗོད། བགེགས་སྐྲད་མཆོད་པ་དང་བཅས་ཏེ་ཆུ་རྒྱུན་གཅིག་ལ་དབང་བཞི་ལེན་པ་འདི་ཚིག་ཟིན་ལ་ཡོད་མེད་གང་ལྟར་གོང་འོག་ཐམས་ཅད་དུ་དྲན་དགོས་ཏེ། ཕུང་ཁམས་སྐྱེ་མཆེད་ཀྱི་དྲི་མ་ཐམས་ཅད་སྦྱོང་བ་དང་ལམ་ཐམས་ཅད་གཅིག་ཏུ་བསྲེ་བའི་གནད་ཡིན་པས་སོ། །འོད་དཔག་མེད་རྡོ་རྗེའི་དབང་དང་། དོན་ཡོད་གྲུབ་པ་དྲིལ་བུའི་དབང་ཡང་དེའི་རིགས་འགྲེ་སྦྱར་ལ་དོན་གྲུབ་ཀྱི་སྦྱང་གཞི་འདུ་བྱེད་ཀྱི་ཕུང་པོ་བདག་འཛིན་དང་བཅས་པའི་རྟོག་པ་བཟང་ངན་ཐམས་ཅད་ཀྱི་ལས་གསོག་པས་འདུ་བྱེད་ཀྱི་ཕུང་པོ་ཡིན། དེའང་སྡིག་པའི་ཕུང་པོ་རི་རབ་ཙམ་ཡོད་ཀྱང་སྦྱང་གཞི་སྦྱོང་བྱེད་ངོ་འཕྲོད་དེ། དག་སྣང་གིས་ལམ་དུ་བསྒྱུར་ཤེས་ན་བྱ་བ་གྲུབ་པའི་ཡེ་ཤེས་སུ་གནས་འགྱུར་འགྲོ་བ་ཡིན་པས་གསང་སྔགས་ཀྱི་ལམ་གྱིས་སྐད་ཅིག་ལ་སངས་རྒྱས་ཟེར་བའི་གནད་འདི་འདྲ་ལ་ཐུག་ཡོད། རྣམ་སྣང་གི་སྦྱང་གཞི་གཟུགས་ཕུང་དེ་སེམས་སྣང་ཙམ་དུ་ཤེས་ན་གོང་མ་རྣམས་དང་གནད་གཅིག་ཡིན། རྡོ་རྗེ་བརྟུལ་ཞུགས་ཀྱི་དབང་གི་སྦྱང་གཞི་ཕུང་པོ་ལྔའི་ཆོས་ཉིད་དེ་དབྱིངས་སྤྲོས་པ་དང་བྲལ་བ་ལྷར་བསྐྱེད་མི་བཏུབ་པས་ཕུང་པོ་ལྔའི་ཆོས་ཉིད་བློ་ལ་ཤར་བའི་སེམས་ཀྱི་གསལ་ཆ་དེ་ལྷར་བསྐྱེད་པ་ཡིན། རྡོ་རྗེ་ཐུགས་ཀྱི་དམ་ཚིག་སྦྱིན་པའི་ཚིག་ལན་གཉིས་འབྱུང་དོན་ནི། མཚོན་བྱེད་བརྡའི་རྡོ་རྗེ་ལག་ཏུ་གཏད་དེ་མཚོན་བྱ་དོན་གྱི་རྡོ་རྗེ་རིག་སྟོང་སྤྲོས་པ་དང་བྲལ་བ་ངོ་སྤྲད་དེ་འདི་ངང་མ་ཤོར་བར་གནས་ཐུབ་ན་སངས་རྒྱས་རིགས་ལྔ་པོའང་འདིར་འདུ་ཞིང་སྡོམ་པ་དམ་ཚིག་གི་གནད་ཀྱང་འདིར་འདུ་ལ་ཡེ་ཤེས་ལྔ་པོའང་འདི་རང་ཡིན་གསུངས་པ་ཡནི་ནོ། །ཐག་ོམཐའ་མད་ེཔ་སགས་ོཀྱས་ིསམས་ེལ་དང་པ་སྐྱ་བ་ེོདང་བར་དུ་གནས་པ་ཐ་མར་འགག་པ་མེད་པར་ཤེས་པའི་དཔྱད་བསྒོམ་དང་། གསལ་སྟོང་ཟུང་འཇུག་མ་བཅོས་པར་འཇོག་པའི་འཇོག་བསྒོམ་གཉིས་ཀྱི་སྒོ་ནས་སྐྱོང་ཤེས་དགོས་པ་ཡིན། དྲིལ་བུ་གསུང་གི་དམ་ཚིག་འདི་ནི་རྣལ་འབྱོར་མ་སོགས་ཀྱིས་མཚོན་བྱེད་བརྡའི་དྲིལ་བུ་ལག་ཏུ་གཏད་དེ། ལྟ་བའི་དྲན་འཛིན་མ་ཤོར་བར་ངག་གི་བརྗོད་པ་ཐམས་ཅད་གྲགས་སྟོང་དབྱེར་མེད་དྲིལ་བུའི་སྒྲ་བཞིན་དུ་ཡིད་མཚན་རྟོག་ལས་སྐྱོབ་པའི་སྔགས་མཚོན་བྱ་དོན་གྱི་དྲིལ་བུ་ངོ་སྤྲོད་པ་ཡིན། སྦྱོང་ཚུལ་སྔ་མ་དང་འདྲ། ཕྱག་རྒྱ་སྐུའི་དམ་ཚིག་རང་ཉིད་ལྷར་བསྐྱེད། རྡོ་རྗེ་ཐུགས་དང་དྲིལ་བུ་གསུང་གི་མཚོན་དོན་དང་མ་བྲལ་བར་ལུས་ངག་ཡིད་གསུམ་ལྷ་སྔགས་ཡེ་ཤེས་སུ་ཁྱེར་ཤེས་ན་ཐ་མལ་སྣང་ཞེན་གྱ་ནོམ་ལྷར་ཞེན་གཉིས་ཀས་མི་བརྫི་ཞིང་བསྐྱེད་རིམ་གྱི་སྡོམ་པའི་ངོ་བོ་མཐར་ཐུག་པ་ངོ་འཕྲོདཔ་ཡིན་ནོ། །གསང་དབང་ལ་དམ་པ་གོང་མ་རྣམས་ཀྱིས་ཚད་ལྡན་བསྒྲུབ་པའི་བདུད་རྩི་རིལ་བུ་དང་གྲུབ་པའི་དབང་ཕྱུག་ཆེན་པོ་རྣམས་ཀྱི་བྱང་སེམས་རིལ་བུ་རང་གི་བླ་མ་སངས་རྒྱས་དངོས་ཀྱི་འདུ་ཤེས་ཡོད་ན་དེའི་གསང་ཆབ་ཡན་ཆད་བསགས་ལ། དེ་ལ་གདན་གསུམ་ཚང་བའི་ཡེ་ཤེས་པ་དངོས་ཀྱི་འདུ་ཤེས་བཞག་སྟེ་རང་གིས་མྱང་། དེས་རང་གི་རྟེན་དཀྱིལ་འཁོར་བཞི་གདན་གསུམ་ཚང་བ་དམ་ཚིག་པ་ལ་བྱིན་གྱིས་བརླབས་ཏེ་རང་བཞིན་བརྒྱད་ཅུའི་རྟོག་པ་དབྱིངས་སུ་དག །ལུས་ཟག་མེད་འཇའ་ལུས་དང་། སེམས་རྟོག་མེད་ཆོས་སྐུར་གྲོལ་སོང་སྙམ་དུ་མཉམ་པར་བཞག །རྟེན་འབྲེལ་རྫས་ཀྱི་ནུས་པ་དང་། རང་གི་མོས་གུས་ཀྱིས་སྟོབས་ཀྱིས་ཡེ་ཤེས་སྐྱེ་ཞིང་རླུང་གཏུམ་མོའི་རྫོགས་རིམ་ཐམས་ཅད་ཀྱི་སྨིན་བྱེད་དུ་འགྲོ་བ་ཡིན་པས་དེང་སང་འདི་གནད་དུ་ཆེ་བར་སེམས། དབང་གསུམ་པ་ལ་རང་ཉིད་གདན་གསུམ་ཚང་བའི་ཧེ་རུ་ཀར་གསལ་རིག་མའང་གདན་གསུམ་ཚང་བའི་ལྷ་མོར་བསྐྱེད། བྱང་སེམས་གདན་གསུམ་ཚང་བ་བབས་བཟློག་གི་སྒོ་ནས་ཉམས་མྱོང་དཔེའི་སེམས་བསྐྱེད་པ་ཡིན་མོད། དེང་སང་ལག་ལེན་ལ་ཐེབས་དཀའ་བས་མོས་པ་ཡིད་བྱེད་ཀྱི་ཚུལ་དུ་འདོན་བསྒོམ་བྱེད། རྟོག་པའི་སྒོ་ནས་བཅིང་གྲོལ་དུ་འགྱུར་བ་ལས་དངོས་པོ་ལ་ངོ་བོའི་སྒོ་ནས་འཆིང་གྲོལ་མེད། རྣམ་པ་ཇི་ལྟར་སྣང་ཡང་ཐབས་ལ་མཁས་པས་ལམ་དུ་ཁྱེར་ཤེས་ན་ཟག་མེད་བདེ་བའི་ཉེ་རྒྱུར་འགྲོ་བ་ཡིན། འོ་ན་དབང་གསུམ་པའི་ཉམས་མྱོང་མེད་པ་ལ། དེ་ལ་བརྟེན་ནས་བཞི་པའི་ཡེ་ཤེས་ཇི་ལྟར་ངོ་སྤྲོད་ཅེ་ན། ཉམས་མྱོང་མཚན་ཉིད་པ་མེད་ཀྱང་གོ་ཡུལ་ཙམ་པོ་ལ་བཞི་པ་ཚིག་གི་སྒོ་ནས་ངོ་སྤྲོད་པ་ཡིན། རང་གིས་དམིགས་པ་ལེགས་པར་འཛིན་ཤེས་ན་ཡེ་ཤེས་སྐྱེ་བ་ཡོད་དོ། །གྲོལ་ལམ་ལ་བརྟེན་ནས་དབང་བཞི་རྫོགས་པར་བསྐུར་བ་ལ་མཚོན་བྱེད་དཔེའི་ཡེ་ཤེས་སྐྱེ་བ་དུ་མ་ཡོད་པའི་ཕྱིར་ཏེ། བླ་མའི་བྱིན་རླབས་ཞུགས་པས་ཡེ་ཤེས་ངོ་འཕྲོད་པ་བཞིན་ནོ། །དེ་ལྟར་དབང་བཞི་བླངས་པའི་དུས་སུ་ཕུང་ཁམས་སྐྱེ་མཆེད་ལྷ་དང་ཡེ་ཤེས་སུ་ཤེས་པའི་བསྐྱེད་རིམ་གྱི་སྡོམ་པ་དང་། རྟེན་དཀྱིལ་འཁོར་བཞི་བརྟེན་པ་རང་རིག་པ་དང་བཅས་པ་དབྱིངས་དང་རིག་པ་གཉིས་སུ་མེད་པའི་བདེ་སྟོང་མཆོག་གི་ཡེ་ཤེས་སུ་ངོ་འཕྲོད་པའི་རྫོགས་རིམ་གྱི་སྡོམ་པ་ཐོབ་པའི་ཐོབ་བློ་བསྐྱེད་དགོས། དེ་ནས་དམ་ཚིག་བསྡུས་ཏེ་འཛིན་པར་ཁས་ལེན་པ་དེ་དབང་དུས་སུ་སྐུ་དང་ཡེ་ཤེས་ངོ་སྤྲད་པའི་ཡེ་ཤེས་དེ་རྗེས་ཐོབ་ཏུའང་མི་བརྗེད་པར་སྣང་བའི་ཆོས་ལ་རྒྱས་འདེབས་ཤིང་ཉམས་སུ་ལེན་པ་ལ་གཙོ་བོར་གོ་དགོས། དེ་ནས་གཏང་རག་གི་མཎྜལ་ཕུལ། སླན་ཆད་བླ་མའི་དྲན་དུ་ཁས་བླངས་དེ་ནས་གདན་གསུམ་ཚང་བའི་ལྷ་ཚོགས་འོད་དུ་ཞུ། ཡེ་ཤེས་ཀྱི་ཆུར་གྱུར་པ་ལྷ་དགུ་ལུས་དཀྱིལ་དང་བཅས་པའི་སྤྱི་བོ་ནས་ཞུགས། རིགས་བདག་གི་རྒྱས་འདེབས་དེ་བླ་མ་དཀོན་མཆོག་ཀུན་འདུས་དང་གདན་གསུམ་ཚང་བའི་ལྷ་ཚོགས་དབྱེར་མེད་པའི་དབང་ལྷ་དེ་རྣམས་རང་སེམས་དག་པའི་སྣང་བརྙན་ཙམ་ལས་ཕྱི་རོལ་ཏུ་འཛིན་མི་འཆོར་བའི་དགོས་པ་དང་། རྒྱས་འདེབས་འདི་ཐ་མལ་སྣང་ཞེན་ཀུན་བརྟགས་ལ། སྣང་བ་ཐམས་ཅད་ལྷར་ཤེས་པའི་གཞན་དབང་གི་རྒྱས་གདབ། ལྷའི་བྱེ་བྲག་མང་པོ་རྣམས་རིགས་དྲུག་ཏུ་འདུས་པར་གོ་བའི་ཕྱིར་གཞན་དབང་ལ་གཞན་དབང་གི་རྒྱ་རིགས་དྲུག་གི་རྒྱས་གདབ། དེ་ཐམས་ཅད་ཆོས་ཉིད་ལས་མི་གཡོ་བར་ཤེས་པའི་ཆེད་དུ་གཞན་དབང་ལ་ཡོངས་གྲུབ་ཀྱི་རྒྱ་རིགས་བདག་གི་སྤྱི་བོར་ཕྱག་མཚན་བསྒོམ་པ་ཡིན། དེའང་རིགས་བརྒྱ་རིགས་གཅིག་ཏུ་ཤེས་ནས་ཞལ་ཕྱག་གི་སྤྲོས་པའི་གྱ་ནོམ་ལྷར་ཞེན་སྤོང་བའི་དགོས་པ་ཡོད། དེའང་བཤད་ན། ཀུན་རྫོབ་བྱང་ཆུབ་ཀྱི་སེམས་གོམས་པ་མཐར་ཕྱིན་པ་དམིགས་པ་མེད་པའི་སྙིང་རྗེ་དང་། སྤྲོས་པ་དང་བྲལ་བའི་ཤེས་རབ་གཉིས་ཟུང་དུ་འཇུག་པ་ཀྱེ་རྡོར་ཡིན། ལུས་ངག་ཡིད་གསུམ་ལྷ་སྔགས་ཡེ་ཤེས་སུ་གོམས་པ་མཐར་ཕྱིན་ཏེ་སངས་རྒྱས་ཀུན་གྱི་གསང་བ་གསུམ་དང་དབྱེར་མེད་དུ་གྱུར་པ་གསང་འདུས་ཡིན། འཁྲུལ་སྣང་གི་སྡུག་བསྔལ་ཐམས་ཅད་རང་ངོ་ཤེས་ཏེ་བདེ་སྟོང་མཆོག་གི་ཡེ་ཤེས་མངོན་དུ་གྱུར་པ་བདེ་མཆོག་ཡིན། དུས་གསུམ་དུས་མེད་དུ་རྟོགས་པ་དུས་ཀྱི་འཁོར་ལོ་ཡིན། དེ་ལྟ་བུའི་སྟོབས་ཀྱིས་ས་འོག་ས་སྟེང་ས་བླའི་བདུད་ཐམས་ཅད་བཅོམ་པ་གཤིན་རྗེའི་གཤེད་ཡིན་པས་མཆོག་སྒྲུབ་པའི་ལྷ་རྣམས་ཐུགས་དགོངས་གཅིག་ཡིན། རྗེ་བླ་མའི་ཞལ་ནས། དེ་ལྟར་དགོངས་པ་གཅིག་ཡིན་མོད་གནས་སྐབས་གདུལ་བྱའི་བྱེ་བྲག་དང་། སྔོན་གྱི་ཐུགས་བསྐྱེད་དང་སྨོན་ལམ་གྱི་དབང་གིས་རྣམ་འགྱུར་ཐ་དད་དང་། སྒྲུབ་ཐབས་སྣ་ཚོགས་ཉམས་སུ་ལེན་པ་དགོས་པ་ཆེ་བའི་ཉམས་མྱོང་ཁོང་ལ་ཡོད་གསུངས། ལུས་རྟེན་འདི་ཉིད་ཀྱི་སྟེང་དུ་དབང་བཞི་པའི་ཡེ་ཤེས་ངོ་འཕྲོད་དེ་མཆོག་གི་དངོས་གྲུབ་ཐོབ་པ་ལ་བླ་མ་སངས་རྒྱས་དངོས་ཀྱི་འདུ་ཤེས་འདི་མེད་ཐབས་མེད་དེ། བླ་མ་མེད་པའི་གོང་རོལ་ན། སངས་རྒྱས་བྱ་བའི་མིང་ཡང་མེད། ཅེས་སོགས་དུ་མ་དང་། རྩ་རྒྱུད་ལས། ལྷན་ཅིག་སྐྱེས་པའི་ཡེ་ཤེས་རྟོགས་པ་བླ་མའི་བྱིན་རླབས་ཞུགས་པ་དང་། དབང་གསུམ་པའི་དུས་དང་། ཐབས་རིམ་གཉིས་ཀྱི་རྣལ་འབྱོར་གོམས་པ་དང་། རང་ཉིད་ཀྱིས་བསོད་ནམས་ཀྱི་ཚོགས་རྒྱ་ཆེན་པོ་བསགས་པ་ལ་རག་ལས་པར་གསུངས་པའི་ཕྱིར། བླ་མ་ལ་སངས་རྒྱས་སུ་མཐོང་བའི་ཐབས། སྤྱིར་འཁོར་འདས་ཀྱི་བདེ་སྐྱིད་ཐམས་ཅད་འབྱུང་བའི་རྒྱུ་སངས་རྒྱས་ཀྱི་ཕྲིན་ལས་སུ་ཤེས་པ་དང་། ད་ལྟ་དུས་ངན་པས་སྐྱོན་ཀུན་ཟད་ཡོན་ཏན་ཀུན་རྫོགས་ཀྱི་བླ་མ་གཏན་ནས་མི་རྙེད། རང་རྒྱུད་ལ་འཆི་བ་མི་རྟག་པའི་རྟོགས་པ་རྒྱུད་ལ་བསྐྱེད་མཁན་ནས་གཟུང་སྟེ་སྨིན་གྲོལ་གཉིས་ཀྱི་ལམ་སྟོན་མཁན་གྱི་དགེ་བའི་བཤེས་གཉེན་དེ་རྣམ་པ་ཚུལ་ཇི་ལྟར་བསྟན་ཀྱང་ངོ་བོ་སངས་རྒྱས་ཐམས་ཅད་དང་ཁྱད་པར་མེད་པར་ཤེས་པ་འདི་ཅིས་ཀྱང་མེད་ཐབས་མེད། དེ་ཡོད་ན་ཡེ་ཤེས་སྐྱེ་བའི་སྣ་འདྲེན་ཐབས་གང་གིས་བྱེད་ངེས་པ་མེད་དེ། འཇམ་དབྱངས་ས་པཎ་གྱིས། སྔ་མའི་ལས་འཕྲོའི་བྱེ་བྲག་དང་། །ནང་གི་རྟེན་འབྲེལ་ཁྱད་པར་གྱིས། །ཡེ་ཤེས་སྐྱེ་བའི་སྣ་འདྲེན་ནི། །ཐབས་ཀྱི་དབྱེ་བས་བྱེད་པར་གསུངས། །ཞེས་གསུངས་པའི་ཕྱིར་རོ། །དེས་ན་བླ་མ་སངས་རྒྱས་སུ་མཐོང་ནས་བླ་མས་གསུངས་པའི་རང་གི་དགེ་སྦྱོར་ཐམས་ཅད་བླ་མའི་རྣལ་འབྱོར་དུ་ཤེས་ནས་རྩེ་གཅིག་ཏུ་གསོལ་བ་འདེབས་ནུས་ན་ཐུགས་ཡིད་དབྱེར་མེད་དུ་འདྲེས་ནས་ཕྱག་རྒྱ་ཆེན་པོའི་ཡེ་ཤེས་ནང་ནས་འཆར་བ་ཡིན་ནོ། །དབང་བསྐུར་བ་མི་བསྐྱོད་པའི་ཡན་ལག་སོང་ནས་བདུད་རྩི་མྱང་བ་འོད་དཔག་མེད་ཀྱི་ཡན་ལག་འདི་གོ་དཀའ་བས་ཅུང་ཟད་བྲིས་ན། རང་ཉིད་ལྷར་གསལ་བའི་ཐུགས་ཀ་ནས་ཁྲོ་བོ་བདུད་རྩི་འཁྱིལ་པ་དངོས་སམ་དེའི་ངོ་བོ་འོད་ཟེར་ལྗང་གུ་འཕྲོས་ཏེ་མདུན་གྱི་ནང་མཆོད་དང་རང་རྒྱུད་ཀྱི་གཟུང་འཛིན་ཐ་མལ་དུ་འཛིན་པའི་བགེགས་རྣམས་ཨ་མྲྀ་ཏས་བསང། སྭ་བྷ་ཝས་སྦྱངས། དེའི་ངང་ལས་རང་རྒྱུད་དགེ་བ་ལ་སྤྲོ་བའི་བརྩོན་འགྲུས་མཚོན་བྱེད་ཡཾ་ལས་རླུང་གི་དཀྱིལ་འཁོར། དེའི་སྟེང་དུ་རང་རྒྱུད་ཀྱི་ཡེ་ཤེས་མཚོན་བྱེད་མེའི་དཀྱིལ་འཁོར། དེའི་སྟེང་དུ་ངོ་ཤེས་ན་སྣོད་བཅུད་ཐམས་ཅད་བདེ་བ་ཆེན་པོའི་ཡེ་ཤེས་སུ་མཚོན་བྱེད་ཐོད་པ་དཀར་པོ། དེའི་སྟེང་དུ་མངོན་བྱང་དང་པོ་མཚོན་བྱེད་ཟླ་བའི་དཀྱིལ་འཁོར། དེའི་སྟེང་དུ་ཕུང་པོ་ལྔ་ཉོན་མོངས་པ་ལྔ་འབྱུང་བ་ལྔ་སོགས་སྦྱང་གཞི་མཚོན་བྱེད་ཤ་ལྔ། དེའི་སྟེང་དུ་སྦྱོང་བྱེད་ཡེ་ཤེས་ལྔའི་རང་བཞིན་གྱི་ལམ་མཚོན་བྱེད་བདུད་རྩི་ལྔ། དེའི་སྟེང་དུ་སྦྱངས་འབྲས་སྐུ་དང་ཡེ་ཤེས་མཚོན་བྱེད་ཡིག་འབྲུ་ལྔ། དེའི་སྟེང་དུ་སངས་རྒྱས་ཐམས་ཅད་ཀྱི་སྐུ་གསུང་ཐུགས་མཚོན་བྱེད་ༀ་དང་ཉི་མ་རྡོ་རྗེ་གསུམ། རང་རྒྱུད་ཀྱི་བརྩོན་འགྲུས་ཀྱི་རླུང་གཡོས་ཏེ་ཡེ་ཤེས་ཀྱི་མེ་སྦར་ནུས་ན་འཁྲུལ་སྣང་ཐམས་ཅད་སྐུ་དང་ཡེ་ཤེས་སུ་བྱིན་གྱིས་རློབ་ནུས་པར་མཚོན་བྱེད་ཤ་ལྔ་བདུད་རྩི་ལྔ་རྣམས་ཁོལ་ཞིང་འོད་དུ་ཞུ། རང་རྒྱུད་ལ་མོས་གུས་དང་རྟོགས་པ་ཅུང་ཟད་སྐྱེས་ཚེ་དེས་རྒྱལ་བ་རྣམས་ཀྱི་ཐུགས་རྒྱུད་བསྐུལ་བར་མཚོན་བྱེད་རླངས་པ་གྱེན་ལ་སོང་། ༀ་དང་རྡོ་རྗེའི་ལྟེ་བའི་ཧཱུྃ་ལས་ཕོག་པས་བདུད་རྩིའི་རྒྱུན་འཛག །རང་རྒྱུད་ལ་རྟོགས་པ་སྐྱེས་ཚེ་རྒྱལ་བ་རྣམས་ཀྱི་ཐུགས་ཀྱི་ཡེ་ཤེས་དང་རང་སེམས་དམ་ཚིག་པར་དབྱེར་མེད་དུ་འགྱུར་བར་མཚོན་བྱེད་རྡོ་རྗེའི་ལྟེ་བའི་ཧཱུྃ་ལས་འཕྲོས་ཏེ་བདུད་རྩི་ཡེ་ཤེས་པ་སྤྱན་དྲངས། རྡོ་རྗེ་ཉི་མ་ༀ་དང་བཅས་པ་སྔར་གྱི་བདུད་རྩི་དང་གཅིག་ཏུ་འདྲེས་ཏེ་བདུད་རྩིའི་རྒྱ་མཚོར་གྱུར་པ་དེའི་སྟེང་གི་ཉི་མས་མཉམ་པ་ཉིད་ཀྱི་ཡེ་ཤེས་མཚོན།  དེའི་སྟེང་གི་རྡོ་རྗེ་དང་འོག་གི་ༀ་ཤ་ལྔ་སོགས་ཀྱིས་སོ་སོར་རྟོག་པའི་ཡེ་ཤེས་མཚོན། རོ་གཅིག་ཏུ ་འདྲེས་པས་བྱ་གྲུབ་ཡེ་ཤེས། ཁ་དོག་དྲི་རོ་ནུས་པ་ཕུན་སུམ་ཚོགས་པ་ཆོས་དབྱིངས་ཡེ་ཤེས་མཚོན་པས་རང་ཉིད་མངོན་བྱང་ལྔའི་སྒོ་ནས་ལྷར་བསྐྱེད་པ་དང་། ནང་མཆོད་བྱིན་རླབས་འདི་གཉིས་གོ་བ་གཅིག་ཡིན། འཁོར་གསུམ་ཡོངས་དག་གི་མཆོད་པ་ལ། མདུན་བསྐྱེད་ཀྱི་ལྷ་ཚོགས་ཀྱང་བདེན་སྟོང་སྒྱུ་མ་ལྟ་བུ། མཆོད་རྫས་ཀྱང་བདེན་སྟོང་སྒྱུ་མ་ལྟ་བུ། རང་ཉིད་ལྷ་སྐུ་ཡང་བདེན་སྟོང་སྒྱུ་མ་ལྟ་བུར་ཤེས་པའི་སྣང་བ་སེམས་སྒྲུབ་མ་བྱས་པའི་འཁོར་གསུམ་ཡོངས་དག་ཞིག་དང་། སྣང་བ་སེམས། སེམས་སྒྱུ་མ་རང་བཞིན་མེད་པར་བདག་མདུན་མཆོད་རྫས་ཐ་དད་དུ་མི་འཛིན་པའི་འཁོར་གསུམ་ཡོངས་དག་གཉིས་ལས་རང་ལུགས་ཕྱི་མ་ཡིན། སྔགས་རྒྱུད་སྡེའི་དགོངས་པ་ཉམས་སུ་ལེན་པ་ལ་ཕྱི་མ་འདི་ཤིན་ཏུ་ཟབ། ཆོ་གའི་དངོས་གཞི་ལ་ལྔ་བསྲེས་དྲུག་བསྲེས་བདུན་བསྲེས་སོགས་ཀྱི་བཤད་པ་འབྱུང་བ་སྣང་སེམས་བསྲེ་བའི་ཐབས་ཁྱད་པར་ཅན་ཡིན་པས་སོ། །བདུད་རྩི་མྱང་བ་འོད་དཔག་མེད་ཀྱི་ཡན་ལག་ཡིན་ཚུལ་གཞུང་ན་གསལ། ལེགས་པར་བསམ་ན་ལྷ་ཡོངས་རྫོགས་ཀྱི་སྒྲུབ་ཐབས་ཡིན། དེ་བཞིན་དུ་མཆོད་པ་དོན་ཡོད་གྲུབ་པ་དང་། བསྟོད་པ་རིན་འབྱུང་གི་ཡན་ལག་གཉིས་ཀྱང་ཚིག་དོན་ལ་ཞིབ་ཏུ་དཔྱད་ནས་རིག་པ་སྐད་ཅིག་མའི་སྟེང་དུ་འཁོར་འདས་ཚང་ཚུལ་ཤེས་ན་གནད་འདྲ་བ་ཡིན་ནོ། །རྫོགས་རིམ་བསྒོམ་ཚུལ་གཞན་དུ་གསལ། འདིར་བསྐྱེད་རིམ་ལ་སེམས་འཛིན་བྱེད་ན་ལྷའི་ང་རྒྱལ་བསྒོམ་པས་གང་ཟག་གི་བདག་འཛིན་དྲུང་ནས་འབྱིན་པ་ཞིག་དགོས། བདག་མེད་མས་ཡབ་ཀྱི་མགུལ་ནས་འཁྱུད་པ་དེ་བདག་མེད་རྟོགས་པའི་ཤེས་རབ་དང་ནམ་ཡང་འབྲལ་བ་མེད་པའི་དོན་ཡིན། གཞན་ཡང་ལྷ་ནམ་བསྒོམ་ཡང་བདག་མེད་རྟོགས་པའི་ལྟ་བ་དང་མ་བྲལ་བ་ཞིག་མེད་ན་བསྐྱེད་རིམ་རང་རྒྱུད་དུ་གོལ་བ་ཡིན་པས་ལྷའི་ཞབས་ནོན་དུ་བདུད་དང་རོ་གདན་འབྱུང་བ་དེའི་མཚོན་བྱེད་ཡིན་ནོ། །དག་པ་དྲན་པས་ཆོས་ཀྱི་བདག་འཛིན་གྱི་གཉེན་པོ་བྱེད་དགོས་པས། སྙིང་རྗེའི་སྤྱན་ནི་སོགས་ཀྱིས་སྟོང་ཉིད་སྙིང་རྗེའི་ཟུང་དུ་འཇུག་པ་ལྷག་པའི་ལྷའི་ངོ་བོ་ཡིན་པས་ཞལ་ཕྱག་གི་རྣམ་པ་ཅན་དུ་བསྒོམ་པས་ཐ་མལ་སྣང་ཞེན་སྦྱོང་ཞིང་། དེའི་དག་པ་ཤེས་པས་གྱ་ནོམ་ལྷར་ཞེན་ཡང་སྤོང་ནུས་པ་ཡིན་ནོ། །དེ་ཉིད་གསུམ་ནི་སྤྱན་གསུམ་མོ་ཞེས་ཞལ་རེ་རེ་ལ་སྤྱན་གསུམ་མངའ་བ་དེ་ལུས་ངག་ཡིད་གསུམ་ལྷ་སྔགས་ཡེ་ཤེས་དང་ནམ་ཡང་འབྲལ་མི་རུང་བའི་དོན་ཡིན་ཡང་། འོན་ཀྱང་ལྟ་བསྒོམ་ཟུང་དུ་འཇུག་པས་གྱ་ནོམ་ལྷར་ཞེན་གྱིས་མ་གོས་པ་ཞིག་དགོས། མདོར་ན་འབྲས་བུའི་དག་པ་སྟོན་བྱེད་ཞལ་བརྒྱད་ཀྱིས་འཇིག་རྟེན་དང་འཇིག་རྟེན་ལས་འདས་པའི་རྣམ་ཐར་བརྒྱད་ཀྱིས་འབྲས་བུའི་དག་པ་སྟོན་བྱེད་ཡིན་པས་རྒྱུ་ལ་འབྲས་བུའི་བཏབ་ནས་དག་སྣང་ལ་འབད། ཕྱག་བཅུ་དྲུག་གིས་སྟོང་ཉིད་བཅུ་དྲུག་དང་། ཞབས་བཞིས་བསྡུ་དངོས་བཞི་དང་། རྒྱན་དྲུག་གིས་ཕྱིན་དྲུག་གི་དག་པ་སྟོན་པའི་སྐབས་རྣམས་ལམ་གྱི་དག་པ་སྟོན་བྱེད་ཡིན་པས། རང་རྒྱུད་ལ་ཡོན་ཏན་དེ་དག་ཨེ་ཚང་བལྟ་དགོས་པས་སྟོང་ཉིད་སྙིང་རྗེ་ཟུང་དུ་འཇུག་པ་དག་སྣང་གི་ཐབས་མཁས་ཀྱིས་ཟིན་བཞིན་རང་རྒྱུད་ལ་ཨེ་ཡོད་བལྟ་དགོས། གཟུགས་ཕུང་རྡོ་རྗེ་མ་ཡིན་ཏེ་ཞེས་སོགས་རྒྱུའི་དག་པ་སྟོན་བྱེད་སྐབས་འབྲས་བུ་ལ་རྒྱུའི་རྒྱས་བཏབ་ནས་མ་དག་པའི་སྣང་བ་ལ་དག་སྣང་སྦྱོང་དགོས། ཚིག་དོན་རྣམས་འགྲེལ་པར་གསལ། འདིར་སྤྲོས་དོན་ཅུང་ཟད་གླེང་ན། ཕྱི་ནང་གསང་བ་ཐེག་པ་གསུམ། །དམ་པའི་ཆོས་ནི་མ་ལུས་བཟུང་། །ཞེས་གསུངས་པའི་དོན་རང་རྒྱུད་ལ་སྦྱོར་བའི་ཚུལ་ནི། བདག་མེད་རྟོགས་པའི་ལྟ་བས་ཟིན་པའི་ངེས་འབྱུང་བཅོས་མིན་ཞིག་རང་རྒྱུད་ལ་སྐྱེས་ཚེ་ཉན་ཐོས་ཀྱི་ཐེག་པ་རང་རྒྱུད་ལ་ཚང་། སྣང་བ་སེམས་སུ་ཤེས་ནས་རྟེན་འབྲེལ་བཅུ་གཉིས་ལུགས་འབྱུང་ལྡོག་སེམས་ཐོག་ཏུ་བསྒོམ་ཤེས་ཚེ་རང་རྒྱལ་གྱི་ལམ་ཚང་། འདི་སྔགས་ལ་སྦྱར་ན་གོང་རིགས་ལྔའི་དབང་གི་སྐབས་བདེན་བཞི་ལྟོ་སྦྱར་ནས་རྟེན་འབྲེལ་བཅུ་གཉིས་འཁོར་འདས་དབྱེར་མེད་ཀྱི་ལྟ་བས་ལམ་དུ་བྱེད་ཚུལ་བླ་མས་གསུངས་ཤིང་རང་གི་སྨྲ་ནུས་ཀྱང་། ཞིབ་ཏུ་མ་བྲིས། ལྟ་བས་ཟིན་པའི་བཅོས་མིན་གྱི་ལྷག་བསམ་བཟང་པོ་སྐྱེས་ཚེ་ཐེག་པ་ཆེན་པོའི་ལམ་ཚང་། མ་དག་པའི་སྣང་བ་ལ་ལྷའི་འདུ་ཤེས་མི་སྐྱེ་ཞིང་གཙང་སྨེའི་རྣམ་པར་རྟོག་པ་ཤིན་ཏུ་རགས་ཚེ་བྱ་རྒྱུད་ཉམས་སུ་ལེན། མ་དག་པའི་སྣང་བ་ལྷར་བསྒོམ་ཚེ་འགྱུར་དུ་རུང་བའི་དག་སྣང་ཅུང་ཟད་སྐྱེས་ཚེ་སྤྱོད་རྒྱུད་བསྒོམ། དེ་ལ་ཡེ་ཤེས་སེམས་དཔའ་བཅུག་ཚེ་རེ་ཞིག་ལྷའི་དག་སྣང་འཆར་ལ་ཡེངས་པའི་ཚེ་མི་འཆར་བའི་དུས་རྣལ་འབྱོར་རྒྱུད་བསྒོམ། མཉམ་རྗེས་ཐམས་ཅད་དུ་ལྷའི་སྣང་བ་འཆར་ཚེ་རྣལ་འབྱོར་བླ་མེད་ཉམས་སུ་ལེན་ཞིང་ཚང་བ་ཡིན་པས་ཐེག་པ་གསུམ་དང་རྒྱུད་སྡེ་བཞི་སོགས་རང་གི་རྒྱུད་ལ་སྦྱར་ནས་ཉམས་སུ་ལེན་པ་ལས་ཁ་ཕྱིར་བལྟས་ཀྱི་བཤད་སྒོམ་ལོ་ཆེན་རིན་ཆེན་བཟང་པོ་ལ་ཇོ་བོ་རྗེས་ལོ་ཙཱ་བ་རུལ་གསུང་དགོས་པའང་གནད་དེ་འདྲ་སྟོན་བྱེད་ཡིན། དག་པ་དྲན་པས་སྦྱང་ཚུལ་འདི་སྟོན་ཏེ། གཡས་ཀྱི་ཕྱག་མཚན་བརྒྱད་ཀྱིས་ནད་མཚོན་ཞིང་། སྲོག་ཆགས་རྣམས་ཁ་ནང་དུ་བལྟ་བས་སེམས་ཅན་གྱི་སྡུག་ཀུན་རང་ལ་ལེན་པ་ཕར་ཕྱིན་ཐེག་པའི་ལམ་གྱི་ཉམས་ལེན་རང་ལ་ཡོད་པ་མཚོན་ཞིང་། སྲོག་ཆགས་རྣམས་ཐོད་པའི་ནང་དུ་བཟུང་བས་མདོ་ཕྱོགས་ཀྱི་ཉམས་ལེན་དེ་གསང་སྔགས་ཀྱི་བདེ་བ་ཆེན་པོའི་ཡེ་ཤེས་སུ་བྱིན་གྱིས་བརླབས་པས་རང་སྣང་དག་པ་རབ་འབྱམས་སུ་ཤར་བའི་རང་སྣང་ལ་སྡུག་ཀུན་གྱི་མིང་ཡང་མེད་པར་མཚོན། གཡོན་གྱི་ཕྱག་མཚན་ལྷ་བརྒྱད་ཀྱི་ཞལ་ཕྱིར་ཕྱོགས་པ་དེས་བདེ་བ་ཆེན་པོའི་ཡེ་ཤེས་སྙིང་རྗེ་ཟུང་དུ་འཇུག་པ་དེས་ལས་བཞིའི་ཕྲིན་ལས་ལྷུན་གྲུབ་ཀྱིས་གཞན་དོན་བྱེད་པ་མཚོན་པ་བཞིན་ནོ། །བཟླས་པའི་སྐབས་རང་ཡི་དམ་གྱི་ལྷར་གསལ་བཏབ་སྟེ་དེའི་ང་རྒྱལ་འཛིན་བཞིན་བཟླ་བ་དང་། སྔགས་ཀྱི་སྒྲ་གྲགས་སྟོང་ལ་སེམས་གཏད་དེ་བཟླས་པ་དང་། སེམས་ལྟ་བ་སྟོང་ཉིད་ཀྱི་ངང་ལ་མཉམ་པར་བཞག་ནས་བཟླ་བ་རྣལ་འབྱོར་གྱི་བཟླས་པ་དང་། ཐུགས་སྲོག་ས་བོན་གྱི་མཐར་སྔགས་ཕྲེང་བཀོད་དེ་དེ་ལ་སེམས་གཏད་ནས་བཟླས་པས་རང་ཤུགས་ཀྱིས་ཏིང་ངེ་འཛིན་སྐྱེ་བ་དང་། འོད་ཟེར་སྤྲོ་བསྡུ་ལ་དམིགས་ནས་བཟླས་པས་ལས་བཞིའི་ཕྲིན་ལས་འགྲུབ་པ་དང་། སྔགས་ཕྲེང་འཁོར་བ་ཁྱོགས་ཀྱི་བཟླས་པས་བདེ་སྟོང་གི་ཡེ་ཤེས་བསྐྱེད་པ་སོགས་ཡིན་མོད། འདིར་རང་ལུགས་ཐུན་མོང་མ་ཡིན་པ་ཚར་ཆེན་གྱིས་མཁྱེན་བརྩེ་ལ་གསུངས་པ་དང་། བླ་མའི་དགོངས་པ་བསྡེབ་ནས་བཤད་ན་ཡུལ་གྱི་ཐུགས་ཀའི་ཨཾ་ཡིག་ལས་སྔགས་ཕྲེང་བེཌཱུ་ཪྻའི་ཕྲེང་བ་ལྟ་བུ་གཅིག་རྗེས་སུ་གཅིག་མཐུད་པ་ཁ་དོག་སྔོ་ལ་འོད་ཟེར་དམར་པོ་འཕྲོ་བ་ཡུམ་གྱི་ཞལ་ནས་ཐོན་ཡབ་ཀྱི་ཞལ་དུ་ཞུགས། སྐུའི་དབྱིབས་བརྒྱུད་ཐུགས་ཀའི་ཧཱུྃ་གི་ཀླད་ཀོར་ལ་ཐིམ་ཡང་ཞབས་ཀྱུ་ནས་འཐོན། རྡོ་རྗེའི་ལམ་ནས་ཡུམ་གྱི་མཁའ་ནང་ནས་ཞུགས། ཐུགས་ཀའི་ཨཾ་གི་ཞབས་ལ་ཐིམ། རང་རྒྱུད་ལ་བདེ་སྟོང་གཉིས་ཀྱི་ཡེ་ཤེས་རིམ་ཅན་དུ་སྐྱེ་བ་ལྟ་བུར་མཁྱེན་བརྩེས་གསུངས་ཀྱང་ལྷན་ཅིག་ཏུ་དམིགས་ན་བདེ། དེའི་དུས་འོད་དམར་པོ་དེས་ལུས་ཀྱི་ནང་ཐམས་ཅད་གང་། རང་སྣང་མ་རིག་འཁྲུལ་པའི་སྣང་བ་ཐམས་ཅད་སྦྱངས། འོད་ཟེར་ཕྱིར་འཕྲོས་པས་སྣོད་གཞལ་ཡས་ཁང་དང་བཅུད་ཐམས་ཅད་ཡི་དམ་གྱི་ལྷར་བསྒྱུར། མཁའ་ཁྱབ་ཀྱི་རྒྱལ་བ་ཏིལ་གྱི་གོང་བུ་ཁ་ཕྱེ་བ་ལྟ་བུར་གནས་པ་ལ་ཐུགས་མཉེས་པའི་མཆོད་པ་ཕུལ། དེ་དག་གི་བྱིན་རླབས་དབང་བཞིའི་ཡེ་ཤེས་འོད་ཟེར་གྱི་རྣམ་པས་རང་ལ་ཐིམ་པས་རང་སྣང་མ་རིག་པའི་འཁྲུལ་པ་དབྱིངས་སུ་དེངས། སྣང་སྲིད་དག་པ་རབ་འབྱམས་སུ་ཤར། གཙོ་བོའི་ཞལ་བརྒྱད་དང་འཁོར་ལྷ་མོ་བརྒྱད་སྣང་སྲིད་ལྷར་གསལ་བ་དང་བཅས་པས་ཞལ་ནས་སྔགས་གསུངས་ཤིང་སྣང་སྲིད་ཐམས་ཅད་བཀྲ་ལམ་མེ་གསལ་སེང་ངེ་ལྷ་སྔགས་ཡེ་ཤེས་སུ་དུས་གཅིག་ལ་དམིགས་ནས་བཟླ་བ་འདི་མཆོག་སྒྲུབ་པའི་ཐུན་མོང་མ་ཡིན་པའི་དམིགས་པ་ལྟ་བསྒོམ་ཟུང་དུ་འཇུག་པ་འཁོར་འདས་དབྱེར་མེད་ཀྱི་བཟླས་པ་བྱ་བ་ཡིན། ལྷ་ཐམས་ཅད་ཀྱི་ཞལ་ནས་སྔགས་གསུངས་པར་དམིགས་པ་དེ་ལ་འགྱུར་ཁྱད་དང་ནུས་པ་ཤིན་ཏུ་ཆེ་བར་རྒྱ་བོད་ཀྱི་མཁས་གྲུབ་མང་པོའི་གསུང་ན་གསལ། རིག་སྟོང་གཉིས་སུ་མེད་པའི་དབྱིིངས་སྤྲོས་པ་དང་བྲལ་བའི་ངང་ལ་མཉམ་པར་འཇོག་ཅིང་གསལ་སྟོང་ཟུང་དུ་འཇུག་པ་སྡུག་བསྔལ་བདེན་པ་སྐུ་དང་། ཀུན་འབྱུང་བདེན་པ་ཡེ་ཤེས་སུ་ཤར་བའི་ལྟ་བའི་ངང་ནས་བཟླས་པ་བྱེད་ཅིང་། སྣང་སྲིད་དག་པ་རབ་འབྱམས་སུ་ཤེས་ན་བྱ་བ་གྲུབ་པའི་ཡེ་ཤེས་ཀྱང་དེ་ཡིན་པས་འོད་ཟེར་སྤྲོ་བསྡུའི་དམིགས་པ་དང་སྦྲགས་ནས་ལས་བཞིའི་ཕྲིན་ལས་སྒྲུབ་པ་འདི་རྒྱལ་བའི་ཕྲིན་ལས་ད་ལྟ་ནས་ལམ་དུ་བྱེད་པ་ཡིན་ནོ། །དཀྱིལ་འཁོར་བསྡུ་བའི་ཚེ་ལྷ་མོ་བརྒྱད་ཞལ་བརྒྱད་ལ་བསྡུས་ནས་འཇོག་པ་འདི་བསྡུ་རིམ་གྱིས་ཉལ་བའི་རྣལ་འབྱོར་བྱེད་པའི་དབང་དུ་མཛད་པ་ཡིན། ཉལ་བའི་རྣལ་འབྱོར་མཁའ་སྤྱོད་མ་དང་མགོན་པོ་སོགས་གང་གིས་བྱས་ཀྱང་བཏུབ་པས་འདིར་དཀྱིལ་འཁོར་བསྡུས་ནས་སླར་ཐུན་མཚམས་ཀྱི་ལྷར་ལངས་ན་ལེགས་པར་གསུངས། སྤྱིར་བསྡུ་རིམ་འདིས་འཆི་བ་སྦྱོང་བ་ཡིན་པས་བསྐྱེད་རིམ་ལ་གསལ་སྣང་ཅུང་ཟད་ཡོད་ནས་བཟུང་བསྡུ་རིམ་འདི་ཤིན་ཏུ་གནད་ཆེ། འདི་གནད་ཆེ་བ་ཞུ་ཆེན་གྱིས་གསུངས་ཡོད་ཅེས་རྗེ་བླ་མས་གསུངས། རྡོ་རྗེའི་གླུ་ལེན་པ་འདི་བཟང་ངན་དང་གཙང་སྨེ་འཁོར་འདས་ཀྱི་འཛིན་པ་ཐམས་ཅད་རོ་སྙོམ་པའི་ཆེད་ཡིན་པས་འཁོར་འདས་དབྱེར་མེད་ཀྱི་ལྟ་བའི་ངང་མ་ཤོར་བར་འདོན་དགོས། དེ་ནས་དཀོན་ཅོག་གསུམ་གྱི་ཤིས་པ་བརྗོད་པ་དེ་སྒྲུབ་ཐབས་འདིའི་དབུ་ཞབས་ཐམས་ཅད་དཀོན་མཆོག་གསུམ་པོ་རང་སྣང་དུ་ཤེས་པའི་ཐབས་མན་ངག་ཟབ་མོ་ཡིན་པས་རང་ངོ་འཕྲོད་པའི་དགའ་སྟོན་ལྟ་བུ་ལགས། མདོར་ན་དཀོན་མཆོག་རྗེས་དྲན་ལས། མི་མཐུན་པ་མེད་ཅིང་འདུས་པ་དང་ལྡན་པ་ཞེས་གསུངས་པའི་དོན་གདུལ་བྱའི་ཁམས་དབང་དང་བསྟུན་ནས་གསུངས་པའི་ཆོས་ཐམས་ཅད་འཁྲིད་ཚུལ་མི་འདྲ་བ་ཇི་ལྟར་ཡིན་ཀྱང་ས་ཐོབ་པའི་ཐབས་ཡིན་པར་ཐམས་ཅད་མཐུན་ཞིང་ལམ་གོང་མར་སོང་ཚེ་འོག་མའི་ཡོན་ཏན་ཡར་ལྡན་གྱི་ཚུལ་དུ་འདུས་པ་དང་ལྡན་པ་ཞེས་གསུངས་པ་ཡིན་པས་རང་གི་རྒྱུད་ཚོད་དང་བསྟུན་ནས་ཆོས་ཉམས་སུ་ལེན་དགོས། དཔེར་ན་དམ་ཡེ་བསྲེ་བ་འདི་ལ་མཚོན་རང་ཐ་མལ་དང་ཡེ་ཤེས་སེམས་དཔའ་ཐ་དད་དུ་འཛིན་པ་ཡོད་ཚེ་རང་དམ་ཚིག་པར་བསྐྱེད་པ་ལ་ཡེ་ཤེས་པ་ཡང་ཡང་གཞུགས་པ་འདི་གནད་ཆེ་སྟེ། གསེར་འགྱུར་རྩི་ཡི་དངོས་པོ་ཡིས། །ལྕགས་ནི་གསེར་དུ་བྱེད་པ་བཞིན། །ཡེ་ཤེས་སེམས་དཔའ་བཅུག་པ་ཡིས། །མི་ཡི་ལུས་ལ་སངས་རྒྱས་བྱེད། །ཅེས་གསུངས་པའི་ཕྱིར། ཡེ་ཤེས་པ་བཅུག་པའི་ཚེ་ལུས་ཚ་ཟིང་ངེ་འོང་བ་སོགས་དག་སྣང་ཅུང་ཟད་སྐྱེས་ན་མོས་གུས་ལམ་དུ་ལོངས་ཤིང་ལྟ་བ་ཀློང་དུ་མ་གྱུར་པའི་རྟགས་ཡིན། དམ་ཡེ་བཟང་ངན་དུ་འཛིན་པ་ཞིག་ནས་མཉམ་རྗེས་མེད་པར་འབྱམས་ན་ཡེ་ཤེས་པ་གཞུགས་མི་དགོས་པ་ཡིན་ནོ། །དེ་བཞིན་དུ་གཞན་རྒྱུད་ཀྱི་དཀོན་མཆོག་གསུམ་མངོན་དུ་གྱུར་པའི་ཐུགས་རྗེའི་བྱིན་རླབས་ཀྱིས་རང་རྒྱུད་ཀྱི་སྐུ་གསུམ་རང་ངོ་འཕྲོད་ཚེ་རང་གཞན་གྱི་རྒྱུད་ཐ་དད་མེད་པར་ཐམས་ཅད་དཀོན་མཆོག་གསུམ་གྱི་རང་བཞིན་དུ་གནས་འགྱུར་འགྲོ་བ་ཡིན་ནོ། །ལམ་འདིའི་རྗེས་ཐོབ་ཀྱི་ཉམས་ལེན་གཏོར་བསྔོས་འདོན་ཚེ་མདུན་མཁར་ཆོས་འབྱུང་གྲུ་གསུམ་སུམ་བརྩེགས་བསྒོམ་པ་དེ་ཁམས་གསུམ་གྱི་སྣང་བ་ཐམས་ཅད་རྣམ་ཐར་སྒོ་གསུམ་གྱི་རང་བཞིན་དུ་ཤེས་པ་མཚོན་བྱེད་དང་། སྟེང་མ་ལ་སྐུ་རྡོ་རྗེ་ལྷ་ཆེན་བརྒྱད། བར་མ་ལ་ཐུགས་རྡོ་རྗེ་ལྷ་དགུ་དང་ཕྱོགས་སྐྱོང་བརྒྱད། འོག་མ་ལ་གསུང་རྡོ་རྗེ་ཀླུ་ཆེན་བརྒྱད་བསྐྱེད། འབྱུང་པོ་བརྒྱད་གསུམ་ཉེར་བཞི་ལ་ཁམས་གསུམ་གྱི་སེམས་ཅན་བསྟིམ། དེའི་སྐྱེ་མཆེད་སྐུ་གསུང་ཐུགས་བྱིན་གྱིས་བརླབས་ནས་ཡེ་ཤེས་པ་སྤྱན་དྲངས་ཏེ་བསྟིམ། ལྷ་དང་འབྱུང་པོ་ཐ་མི་དད་པར་དམིགས་མཆོད་གཏོར་འབུལ་བ་འདི་སྣང་སྲིད་དག་པ་རབ་འབྱམས་སུ་ཤེས་པའི་ཐབས། རྒྱུད་ལས། ང་ལས་འགྲོ་བ་ཐམས་ཅད་བྱུང་། །ང་ལས་གནས་གསུམ་པོ་ཡང་བྱུང་། །ང་ཡིས་འདི་ཀུན་ཁྱབ་པ་སྟེ། །འགྲོ་བའི་རང་བཞིན་གཞན་མ་མཐོང་། །ཞེས་གསུངས་པའི་དགོངས་པ་ཡིན་ཞེས་རྗེ་བླ་མས་གསུངས། དེ་བཞིན་དུ་ལམ་འབྲས་བུ་དང་བཅས་པའི་དོན་ཡོངས་རྫོགས་གང་ཟག་གཅིག་གིས་སྟན་ཐོག་གཅིག་ཏུ་ཉམས་སུ་ལེན་པ་ལ་ལམ་སྦས་བཤད་ཟེར་བ་ཡིན་པས་འདིར་ཕྱོགས་མཚོན་པ་ཙམ་ནི་སྨྲས་ཡོད། ཞིབ་པར་བརྗོད་ཀྱིས་མི་ལང་ངོ་། །ཁོ་བོས་བྱས་པའི་ལམ་རིམ་སྨོན་ལམ་དུ། དབང་དང་རིམ་གཉིས་ལས་བྱུང་ཡེ་ཤེས་ཀྱིས། །རྗེས་ཐོབ་སྣང་བའི་ཆོས་ལ་རྒྱས་འདེབས་ཤིང་། །ཆུ་བོའི་རྒྱུན་གྱི་རྣལ་འབྱོར་ལ་བརྟེན་ནས། །མཚན་རྟོགས་འཁྲུལ་འཁོར་འཇིག་པར་བྱིན་གྱིས་རློབས། །ཞེས་པ་དག་བྱ་དག་བྱེད་ངོ་འཕྲོད་པའི་ཡེ་ཤེས་མཉམ་རྗེས་གཉིས་སུ་སྐྱོང་ཐུབ་པ་དང་། སྣང་བ་ཐམས་ཅད་མཚོན་བྱེད་དཔེའི་ཡེ་ཤེས་སུ་འཆར་བའི་གསོལ་འདེབས་ཡིན། ཡང་སྣང་སྲིད་དག་པ་ལྷ་ཡི་འཁོར་ལོར་རྫོགས། །རྩ་ཐིག་རླུང་གི་དྭངས་མ་ཆོས་སྐུར་སྨིན། །འཁོར་འདས་ཡེ་ཤེས་གཅིག་གི་ངོ་བོར་བཟླུམས། །མཆོག་གི་དངོས་གྲུབ་ཐོབ་པར་བྱིན་གྱིས་རློབས། །ཞེས་རྟེན་དཀྱིལ་འཁོར་བཞི་སྐུ་བཞི་དང་། བརྟེན་པ་རང་རིག་པའི་ཡེ་ཤེས་ཤིན་ཏུ་རྣམ་དག་ངོ་བོ་ཉིད་སྐུར་མངོན་དུ་གྱུར་ཏེ་དབང་བཞི་པའི་ཡེ་ཤེས་མཐར་ཕྱིན་ནས་འཁོར་འདས་ཐམས་ཅད་ཡེ་ཤེས་གཅིག་གི་ངོ་བོར་རྟོགས་པ་ལམ་འདི་བསྒོམས་པས་འབྲས་བུ་མངོན་དུ་འགྱུར་བའི་གསོལ་འདེབས་ཡིན་ནོ། །དེ་ནས་རིགས་སུ་སྐྱེ་དང་སོགས་ཀྱིས་ལམ་རིམ་གྱི་སྨོན་ལམ་གདབ། རྗེས་ཐོབ་ཏུ་ཡེངས་མི་འཆོར་བའི་ཆེད་དུ་སྐྱེ་མཆེད་སྐུ་གསུང་ཐུགས་བྱིན་གྱིས་བརླབས་ནས་འཁོར་གསུམ་ཡོངས་དག་གི་བསྔོ་བ་བྱེད་པ་ཡིན་ནོ།། །།འདིར་སྨྲས་པ། མི་བཟད་ལས་ངན་ཁུར་གྱིས་ཆེས་ནོན་ཅིང་། །རྨོངས་ཤིང་སོམ་ཉིའི་དྲྭ་བར་ཚུད་པ་ཡི། །བྱིས་པའི་སྐྱེ་བོ་བདག་འདྲའི་ཁ་སྒོ་ནས། །སྦས་དོན་ཟབ་མོའི་ལེགས་བཤད་མི་འབྱུང་མོད། །དྲིན་ཅན་བླ་མ་རྫོགས་པའི་སངས་རྒྱས་ལ། །མི་ཕྱེད་གུས་པའི་བསམ་སྦྱོར་མ་ཉམས་ཤིང་། །ཐུགས་བརྩེའི་ཐུགས་ཀྱིས་རྗེས་སུ་བཟུང་བའི་མཐུས། །སྨྲས་པའི་ཚིག་ལ་སྐྱོན་གྱིས་སྦགས་པ་མེད། །སྔོན་གྱི་ལས་འཕྲོ་སྨིན་པའི་བྱེ་བྲག་དང་། །རང་གི་མོས་གུས་དད་པའི་ཉེར་ལེན་དང་། །ལྷ་དང་བླ་མའི་ཐུགས་རྗེའི་བྱིན་རླབས་ཀྱིས། །གཏམ་འདི་གླེང་བའི་གོ་སྐབས་བདག་གིས་རྙེད། །རྒྱུད་ཚོད་དམན་ཞིང་སྦྱངས་པ་ཆུང་བའི་ཕྱིར། །རང་མགོ་མི་ཐོན་གཞན་མགོ་འདོན་པ་ཡི། །ཉམས་ལེན་མེད་པའི་ཁ་ཆོས་བཤད་འདོད་ཀྱིས། །མཁས་རློམ་གྲགས་འདོད་འུར་ཆོམ་མ་ཡིན་ཡང་། །བླ་མའི་ཐུགས་སྲས་མཆོག་གི་སྤྲུལ་པའི་སྐུ། །འཇམ་དཔལ་རྡོ་རྗེ་ཆོས་ཀྱི་བློ་གྲོས་ཀྱི། །བཀའ་སྩལ་སྤྱི་བོར་གུས་པས་བླངས་ནས་ནི། །ལྷག་བསམ་དག་པའི་ཚུལ་འདི་ཡི་གེར་བཀོད། །རྣལ་འབྱོར་དབང་ཕྱུག་རྗེ་བཙུན་གོང་མ་དང་། །རྒྱལ་བས་ལུང་བསྟན་ཀུན་མཁྱེན་ཨེ་ཝཾ་པ། །གྲུབ་པའི་དབང་ཕྱུག་ཚར་ཆེན་ཆོས་རྗེ་སོགས། །བརྒྱུད་འཛིན་གོང་མའི་དགོངས་པ་འཁྲུལ་མེད་ཡིན། །ལེགས་གསུང་སྡེ་སྣོད་གསུམ་དང་རྒྱུད་སྡེ་བཞི། ཚད་ལྡན་གོང་མའི་དགོངས་འགྲེལ་བསྟན་བཅོས་ཀྱི། །མན་ངག་སྙིང་པོ་གཅིག་ཏུ་བསྡུས་པ་ཡི། །དུས་གསུམ་རྒྱལ་བ་གཤེགས་པའི་ལམ་ཆེན་ཡིན། །འཁོར་འདས་དབྱེར་མེད་བདེན་གཉིས་ཟུང་དུ་འཇུག །རིམ་གཉིས་རྣལ་འབྱོར་ལྟ་བསྒོམ་ཟུང་འཇུག་གི། དབང་བཞིའི་ལམ་གྱིས་སྐུ་བཞི་ངོ་སྤྲོད་པའི། །གསང་ཆེན་སྙིང་པོའི་མྱུར་ལམ་མཐར་ཐུག་ཡིན། །སྐྱེ་འཆི་བར་དོའི་འཁྲུལ་སྣང་གཞིག་པ་དང་། །ལས་ཉོན་སྡིག་ལྟུང་དྲི་མ་འཁྲུད་པ་དང་། །ཚོགས་གཉིས་དགའ་སྟོན་མྱུར་དུ་སྤེལ་འདོད་པའི། །སྐལ་བཟང་རྣམས་ཀྱིས་ཚུལ་འདི་ཉམས་སུ་ལོངས། །རང་གི་སྡོམ་གསུམ་དམ་ཚིག་གསོ་བ་དང་། །དམ་ཅན་རྒྱ་མཚོའི་ཐུགས་རྒྱུད་བསྐུལ་བ་དང་། །བདེ་ཆེན་ཡེ་ཤེས་འཆར་བར་འདོད་པ་ཡིས། །ཉམས་སུ་ལོངས་དང་ནམ་ཡང་བསླུ་བ་མེད། །སྐལ་བཟང་བློ་གསལ་རྡོ་རྗེའི་མཆེད་རྣམས་ཀྱིས། །དཔལ་མགོན་བླ་མ་རྫོགས་པའི་སངས་རྒྱས་དེ། །དངོས་སུ་མཇལ་བའི་མོས་གུས་བསྐྱེད་མཛོད་དང་། །གསུང་གི་གནད་ལ་ནོར་འཁྲུལ་ཡེ་ནས་མེད། །མདོ་རྒྱུད་གདམས་པའི་གནད་ལ་གོམས་པའི་མཐུས། །ད་དུང་བདག་ལ་ལེགས་བཤད་ཡོད་མོད་ཀྱང་། །མཉམ་འགྲོགས་དབང་གིས་དོན་དུ་མི་འགྱུར་བས། །དགོས་པ་ཆུང་ཕྱིར་རྒྱས་པ་འདིར་མ་བྲིས། །རང་གི་རྒྱུད་ན་ཉམས་རྟོགས་མ་མཆིས་ཀྱང་། །དངོས་བརྒྱུད་བླ་མའི་དགོངས་པ་ཇི་བཞིན་དུ། །ཟབ་དོན་སྙིང་པོ་ཡི་གེར་བཀོད་པ་ལས། །བྱུང་བའི་དགེ་བ་མཐའ་ཡས་གང་ཐོབ་དེས། །སྐྱེ་དང་སྐྱེ་བའི་ཕྲེང་བ་ཐམས་ཅད་དུ། །རྗེ་བཙུན་བླ་མས་རྗེས་སུ་འཛིན་པ་དང་། །འབྲེལ་པ་ཐོགས་པའི་སེམས་ཅན་མ་ལུས་པ། །རྡོ་རྗེ་འཆང་དབང་མྱུར་དུ་འགྲུབ་པར་ཤོག །ཅེས་པ་འདི་ནི་འཇམ་དཔལ་ཆོས་ཀྱི་རྒྱལ་པོའི་རྒྱལ་ཚབ་མཆོག་གི་སྤྲུལ་པའི་སྐུ་འཇམ་དབྱངས་ཆོས་ཀྱི་བློ་གྲོས་ཀྱིས་འདི་བཞིན་བྲིས་ཤིག་ཅེས་བྲི་གཞིའི་ཤོག་བུ་དང་བཅས་བཀའ་ལུང་རྡོ་རྗེ་སྤྱི་བོར་སྩལ་པ་གུས་པས་བླངས་ཏེ་ཡུལ་ལི་ཐང་ཕྱོགས་སུ་སྐྱེས་པའི་ཆོས་གཟུགས་སྤྲུལ་མིང་ཀུན་དགའ་རྒྱལ་མཚན་གྱིས་ཐམས་ཅད་འདུལ་ཞེས་གྲགས་པ་མེ་མོ་ཕག་གི་ལོའི་ཟླ་བ་བརྒྱད་པའི་དཀར་ཕྱོགས་ཀྱི་བཟང་པོ་དང་པོའི་ཉིན་རང་གནས་བསམ་གཏན་གྱི་ཁང་བུར་བཀོད་པའི་ཡི་གེ་པ་ནི་རྡོ་རྗེའི་མཆེད་པོ་ཀུན་བཟང་ཆོས་ཀྱི་ཉི་མས་བགྱིས་པའོ།། །།དགེའོ།། །།