ཀུན་བཟང་ཆོས་ཀྱི་ཉི་མ་ལ་གདམས་པ།
ༀ་སྭ་སྟི། །ཡུན་རིང་སྙིང་ལ་ཉལ་བའི་ནང་གི་མུན། །གང་གི་ཐུགས་རྗེའི་ཟེར་གྱིས་འཇོམས་མཛད་པ། །ངག་གི་དབང་ཕྱུག་ལྷག་པའི་ལྷ་མཆོག་དང་། །དབྱེར་མེད་དྲིན་ཆེན་བླ་མས་བདག་སྐྱོངས་ཤིག །སྔོན་བསགས་བསོད་ནམས་ཆུ་གཏེར་ལས་འོངས་ཤིང་། །སྐྱེས་སྦྱངས་བློ་གྲོས་ཆ་ཤས་ཡོངས་སུ་རྫོགས། །ལེགས་བཤད་འོད་དཀར་དྲ་བས་ཉེར་མཛེས་པའི། །གྲོགས་མཆོག་སྨྲ་བའི་ཟླ་བར་འདི་སྐད་ཞུ། །སྤྱོད་ངན་མི་སྡུག་མཚན་མས་བརྒྱན་པའི་ལུས། །རྣམ་གསུམ་བསླབ་པའི་གོས་ཀྱིས་མ་བསྒྲིབས་པར། །རྣམ་གཡེང་དགའ་མའི་ཕྱི་བཞིན་རྒྱུག་པ་ཡི། །ཕོངས་པ་བདག་ལ་གདམས་པའི་ནོར་མེད་མོད། །འོན་ཀྱང་རིང་ནས་མཐུན་པར་འགྲོགས་པའི་གྲོགས། །ཁྱེད་ཀྱིས་ཡང་ཡང་བསྐུལ་བ་མ་བཟོད་ནས། །རྗེས་བརྩེའི་ཆུ་ལས་སྐྱེས་པའི་ལེགས་བཤད་ཀྱི། །མེ་ཏོག་ཕྲེང་བ་འདི་ནི་ཁྱོད་ལ་སྦྱིན། །ཁམས་གསུམ་སེམས་ཅན་ཡང་ཡང་ཟ་བ་ཡི། །མི་རྟག་སྲིན་མོའི་སོ་བར་ཚང་བཅས་ནས། །བདག་ཉིད་གནས་པའི་ངང་ཚུལ་འདི་མཐོང་ཚེ། །ཡིད་ནི་བདེ་བའི་གོ་སྐབས་བྲལ་བར་གྱུར། །ཁྱེད་ཀྱང་འདི་འདྲའི་ཚུལ་ལ་དགོངས་ནས་ནི། །ཧ་ཅང་ངང་སྲིང་སོས་དལ་མི་མཛད་པར། །མྱུར་དུ་འགྲོ་བའི་མགྲོན་པོ་ཇི་བཞིན་དུ། །ཕྱི་མའི་ལམ་རྒྱགས་ཚགས་སུ་ཚུད་པར་མཛོད། །འཕྲལ་སྣང་ཉམས་དགའ་སྲིད་པའི་ཕུན་ཚོགས་འདི། །འཛུམ་གྱིས་བསླུ་བ་སྲིན་མོའི་ངང་ཚུལ་བཞིན། །སུ་ཞིག་ཆགས་ཀྱང་ཕུང་བར་འགྱུར་བས་ན། །འདི་ལ་ཁྱོད་ཀྱིས་དུག་བཞིན་འཛེམ་པར་མཛོད། །རྙེད་བཀུར་ལུས་ཕྲའི་ཟུར་མིག་སྦྱིན་པའི་ཚེ། །ཀུན་རྟོག་གཞོན་ནུ་དྲན་པས་མ་ཟིན་པར། །སྲེད་པའི་འདྲེན་བྱེད་གང་ལ་གཡོས་གྱུར་ན། །རྣམ་གྲོལ་བདེ་བའི་ངལ་གསོ་ཐོབ་པར་དཀའ། །དང་པོར་བསླབ་གསུམ་ནོར་གྱིས་ཕྱུག་ན་ཡང་། །ཉོན་མོངས་ཆོམ་རྐུན་རྒྱུ་འགྲུལ་མ་བཅད་པས། །གྲོགས་པོ་ཕལ་ཆེར་སྤྲང་པོར་མཐོང་ནས་ནི། །ཁྱེད་ཀྱིས་དྲན་ཤེས་མེལ་ཚེ་ཡང་ཡང་མཛོད་། །ལྷ་དང་བླ་མར་གསོལ་བ་བཏབ་ནས་ནི། །ཡིད་ཆེས་གདེང་དྲོད་ཁོང་ནས་ཤར་བའམ། །སྒྲིན་པོའི་བློ་ཡིས་བརྟག་དཔྱད་མ་མཛད་པར། །བྱ་བ་གང་ལའང་གྱ་ཚོམ་འཇུག་མི་རུང་། །གནས་སྐབས་རྒྱུས་མེད་ལམ་དུ་འགྲོ་བ་ལ། །ཡིད་ཆེས་གྲོགས་ཤིག་ངེས་པར་བསྟེན་དགོས་ན། །རྒྱུས་མེད་ཕྱི་མའི་ལམ་ཆེན་ལེན་པ་ལ། །དམ་པའི་གྲོགས་ཤིག་ཅིས་ཀྱང་མེད་ཐབས་མེད། །དེ་སླད་བླ་མ་རྫོགས་པའི་སངས་རྒྱས་ལས། །དབང་ལུང་ཁྲིད་གསུམ་ལེགས་པར་ཐོབ་པ་ཡི། །ཡི་དམ་ལྷ་ལ་ཁྱེད་ཤེས་བློ་གཏད་ཀྱིས། །མགོན་སྐྱབས་བྱ་ལ་ཕྱི་བཤོལ་བྱར་མི་རུང་། །བླ་མ་མཆོག་གི་ཐུགས་མཛོད་ལས་འོང་བའི། །གདམས་པའི་བདུད་རྩི་ཕྱག་ཏུ་ཐོགས་ནས་ནི། །འདི་སྣང་བྱིས་པའི་རྩེ་གྲོགས་མཛད་གྱུར་ན། །སུས་ཀྱང་མ་སྤྱད་གར་སོང་མེད་པར་འགྱུར། །མཁྱེན་བརྩེའི་འོད་སྟོང་འབར་བའི་མཁས་གྲུབ་ཀྱི། །ཉིན་བྱེད་སྣང་བ་ནུབ་པའི་མཚན་དུས་སུ། །ཡོན་ཏན་ཆ་རྫོགས་བླ་མའི་ཟླ་གཞོན་འདི། །བདག་ཅག་རྣམས་ཀྱིས་སྐལ་པའི་དབང་ལས་རྙེད། །ཚུལ་འདི་ཤེས་ནས་བླ་མ་རིན་པོ་ཆེ། །མོས་གུས་དད་པའི་རྒྱལ་མཚན་རྩེར་མཆོད་ནས། །ཁ་ཞེ་མེད་པའི་ཁྱེད་ཤེས་བློ་གཏད་ཀྱིས། །གསོལ་བ་འདེབས་པ་ལམ་གྱི་རྩ་བ་ཡིན། །རྣམ་འབྱོར་ངས་ཀྱང་ཉམས་ལེན་འདི་ལ་བགྱིས། །གྲོགས་པོ་ཁྱོད་ཀྱིས་ཐུགས་དམ་དེ་ལ་མཛོད། །འདོད་འབྱུང་ནོར་བུ་འདི་འདྲ་ཐོབ་ནས་ནི། །རྒུད་པ་མཐའ་དག་བྲོས་པ་བཞིན་དུ་འགྱུར། །རྟོག་དཔྱོད་ཕྱི་ལ་ཤོར་བའི་བློ་མིག་གིས། །གཞན་ལ་སྒྲོ་སྐུར་གླེང་མོས་དུས་འདའ་ཞིང་། །རང་གི་གནས་ཚུལ་ནམ་ཡང་མི་མཐོང་བས། །ཐོས་པའི་ཆོས་རྣམས་རང་གི་རྒྱུད་ལ་སྦྱོར། །ཆོས་དང་གང་ཟག་བཟང་ངན་འབྱེད་པའི་བློ། །རང་གི་འཁྲུལ་རྟོག་ཡིན་པར་མ་ཤེས་ན། །ཀུན་ལ་དག་པའི་སྣང་བ་མི་སྐྱེ་བས། །དང་པོར་རང་སེམས་གཏན་ལ་འབེབས་པ་གཅེས། །འདུ་འཛི་ཉིན་མོའི་སྣང་བ་དང་འགྲོགས་ནས། །རང་སེམས་རྟོག་ཚོགས་རྒྱུ་སྐར་མི་མཐོང་བས། །དབེན་ གསུམ་ཟླ་བའི་འོད་དཀར་བསྟེན་བཞིན་དུ། །གང་ཐུགས་ལྷོད་ཀྱིས་བཞག་ན་མངོན་པར་འགྱུར། །དེ་ནས་བརྒྱུད 
་ལྡན་བླ་མའི་མན་ངག་བཞིན། །གསལ་སྟོང་ཟུང་འཇུག་སེམས་ཀྱི་སྣང་བ་དང་། །གནས་ཚུལ་ཇི་བཞིན་འབྱེད་པའི་མན་ངག་གིས། །ཉམས་ལེན་ཟབ་མོ་སྲང་དུ་ཚུད་པར་མཛོད། །དགེ་སྦྱོར་སྲང་དུ་མ་ཚུད་འོ་ཟོབ་འདིས། །ལྟར་སྣང་གཞན་དག་མགུ་བ་སྲིད་ནའང་། །རྒྱུ་དེས་དད་ཟས་བུ་ལོན་འཕེལ་བ་ལས། །ཕྱི་མའི་ལམ་སྣ་ཟིན་པའི་ངེས་པ་མེད། །ཡིད་ཀྱི་ས་གཞིར་མོས་པའི་ས་བོན་བཏབ། །ཐབས་མཁས་ཞིང་པས་བརྩོན་པས་སྲུང་བ་དང། །བླ་མའི་ཐུགས་རྗེའི་ཆར་གྱིས་ལེགས་བསྐྱངས་ན། །ཕན་བདེའི་ལོ་ཏོག་དེ་ནས་འབྱུང་བར་འགྱུར། །མཁས་འདོད་ལྟད་མོའི་ཚུལ་གྱིས་རང་གཞན་གྱི། །གྲུབ་མཐའ་རྒྱ་མཚོ་མཐོང་བའི་བློ་མིག་ལས། །སྤྱོད་འདོད་གུས་པའི་སེམས་ཀྱིས་གདམས་པའི་བཅུད། །ཅུང་ཟད་མྱང་བ་སྐལ་པ་བཟང་ངམ་སྙམ། །བསྟན་བཅོས་ཐོས་པའི་ཆང་གིས་ཆེར་མྱོས་ནས། །སྒྲོ་སྐུར་ཚིག་གི་འཆལ་གཏམ་སྒྲོག་བཞིན་དུ། །རང་རྒྱུད་ཡང་དག་ལམ་ལས་འདྲེད་གྱུར་ན། །ལས་ངན་ཁུར་ཆེན་གསོག་པར་མི་འགྱུར་རམ། །ཐུབ་པའི་ལེགས་གསུང་སྡེ་སྣོད་རྣམ་པ་གསུམ། །རང་རྒྱུད་འདུལ་བའི་ཐབས་སུ་གསུངས་པས་ན། །ཚིག་གཅིག་ཐོས་ཀྱང་འདི་ཡིས་བདག་གི་སེམས། །ཇི་ལྟར་འདུལ་སྙམ་བསམ་པས་གཏན་ལ་དབབ། །དེ་དོན་ཡང་ཡང་སེམས་པ་བསྒོམ་པ་སྟེ། །ངེས་འབྱུང་བྱམས་བརྩེ་བྱང་ཆུབ་སེམས་ཀྱི་ནོར། །དེ་འདྲའི་ཚུལ་གྱིས་ཡང་ཡང་བསྒྲུབས་ནས་ནི། །དྲི་མེད་ཐུགས་མཛོད་ཆོས་ཀྱི་གང་བར་བྱོས། །མཁྱེན་རབ་ལང་ཚོ་མཛེས་པའི་གཞོན་ནུ་ལ། །ཉམས་ལེན་སྒྲུབ་པའི་མཛའ་གཅུགས་ལྷའི་བུ་མོ། །སྦས་དོན་རིམ་གཉིས་རྒྱན་གྱིས་བཀླུབས་པ་ཞིག །གྲོགས་སུ་འོས་ཀྱི་གཞན་གྱིས་ཅི་ཞིག་བྱ། །ཐོས་པའི་མིག་ཉམས་བློ་གྲོས་ལུས་སྟོབས་ཤོར། །ངེས་འབྱུང་བྱམས་བརྩེའི་ནོོར་གྱིས་དབུལ་བཞིན་དུ། །སྒྲུབ་པའི་དགའ་མ་འབོད་པ་འགའ་མཐོང་ན། །གྲོགས་མཆོག་ཁྱེད་ཀྱིས་ཞུམ་པ་བསྟེན་མི་རུང་། །དབེན་གནས་ལྷ་ཡི་དགའ་ཚལ་དེར་སོང་ནས། །བསམ་གཏན་བདུད་རྩིའི་ཟས་ཀྱིས་འཚོ་བཞིན་དུ། །ཉམས་རྟོགས་རྩེ་དགའི་བདེ་བ་མྱོང་བ་ལ། །རྒན་པོ་བདག་ཀྱང་ད་དུང་རེ་བ་ལགས། །བྱང་ཆུབ་སྒྲུབ་པའི་ཤུལ་ལམ་འདིར་ཞུགས་ཚེ། །བར་ཆད་ཉི་རྡུལ་ལས་ཀྱང་ཆེས་མང་བས། །ཐམས་ཅད་གཉེན་པོས་གཞོམ་གྱིས་མི་ལང་གི། །རྐྱེན་ངན་ལམ་ཁྱེར་གདམས་པའི་སྙིང་པོར་མཛོད། །གང་དུ་གནས་ཀྱང་བདེ་བའི་གོ་སྐབས་མེད། །སུ་དང་འགྲོགས་ཀྱང་བློ་གཏད་ཡིད་ཆེས་དཀའ། །ཇི་ཙམ་འབྱོར་ཡང་སེམས་ལ་ཁེངས་དུས་མེད། །ད་ནི་བློ་སྣ་འཕྲལ་ཆོད་མཛད་ན་ལེགས། །དགའ་དགའ་ལྟ་བུའི་འཛུམ་གྱིས་རང་སེམས་བསླུ། །འགྲུབ་འགྲུབ་འདྲ་བའི་རེ་བས་ཐམས་ཅད་ཕུང་། །སྐྱིད་སྐྱིད་ལྟ་བུའི་སྤྱོད་པས་ཆགས་སྡང་འཕེལ། །བདེན་བདེན་འདྲ་བའི་སྣང་བ་ཐམས་ཅད་བརྫུན། །འདུ་འཛི་སྤོང་བ་ཆོས་པའི་སྟ་གོན་ཡིན། །དབེན་རི་འཛིན་པ་གོང་མའི་གདན་ས་ཡིན། །སྡུག་བསྔལ་དང་ལེན་རྒྱལ་སྲས་ལག་ལེན་ཡིན། །རང་སེམས་འདུལ་བ་དམ་པའི་རྣམ་ཐར་ལགས། །དང་པོ་རང་སེམས་ཆོས་དང་མ་འདྲེས་པར། །ཆོས་པའི་གཟུགས་ཀྱིས་འགྲོ་བའི་དོན་སྤྱོད་པ། །ང་དང་ང་འདྲའི་འཆད་པོའི་གཟུགས་བརྙན་གྱི། །དགེ་བའི་བཤེས་ལ་བྱང་ཆུབ་ཐག་རེ་རིང་། །བདག་འཛིན་ཉོན་མོངས་ནད་ཀྱིས་གདུང་བཞིན་དུ། །དམ་ཆོས་སྨན་མཆོག་རང་གིས་མི་མྱོང་བར། །གདམས་པ་རྒྱ་མཚོའི་སྨན་གྱིས་གཞན་གྱི་ནད། །གསོ་བར་རློམས་པ་བདག་འདྲ་གད་མོའི་གནས། །ཉམས་ལེན་ཟས་ལ་ཡི་ག་མ་ཕྱེ་བས། །བསླབ་གསུམ་ལྟོ་བ་བཀྲེས་པས་གདུང་བཞིན་དུ། །མགྲིན་པའི་ལམ་ནས་ལེགས་བཤད་བདུད་རྩིའི་རྒྱུན། །སྐྱུགས་པ་འདི་ཡང་ཚུལ་དང་མཐུན་པ་མིན། །དམ་པའི་སྐྱེ་སྲིད་ཆེན་པོའི་རྒྱལ་ཚབ་ཏུ། །ཁས་འཆེ་འགྲོ་བའི་འདྲེན་པར་ཆས་པ་ཡི། །བླ་མའི་ཁུར་གྱིས་དུབ་པ་མང་མོད་ཀྱང་། །རང་སེམས་ཆོས་དང་མཐུན་པ་ཉུང་བར་སྣང་། །རང་མགོ་ཐོན་པའི་ཉམས་ལེན་མེད་བཞིན་དུ། །གཞན་དོན་སྒྲུབ་པའི་བྱ་བས་དུས་འདའ་བའི། །བསྟན་འཛིན་དེ་འདྲ་དེང་སང་མང་ན་ཡང་། །བསྟན་དང་འགྲོ་ལ་ཕན་པ་ཅི་འདུག་སེམས། །རང་ལ་བློ་ལྡོག་རྣམ་བཞིའི་གྲུབ་མཐའ་ཙམ། །མེད་བཞིན་ཁྱེད་དང་ངེད་ཀྱི་གྲུབ་མཐའ་ཞེས། །ཆགས་སྡང་སྙེམས་པ་མཐོ་བའི་ཁ་འུར་འདིས། །ཡང་དག་གྲུབ་མཐའ་རྨངས་ནས་འཇིག་པར་བྱེད། །ངེས་འབྱུང་བྱང་ཆུབ་སེམས་ཀྱི་གྲུབ་པའི་མཐའ། །སྐལ་བཟང་གང་གིས་རྙེད་པ་དེ་དག་གིས། །གྲུབ་མཐའ་ཐམས་ཅད་འགལ་མེད་མཐོང་ནས་ནི། །ཆགས་སྡང་གྲུབ་མཐའི་སྒྲོག་ལས་གྲོལ་བར་འགྱུར། །དེ་སླད་རྣམ་དཔྱོད་ཉི་འོད་ལྟར་གསལ་བའི། །གྲོགས་དག་ལེགས་ཉེས་འདམ་ཀ་མ་ནོར་བར། །མན་ངག་གནད་ཀྱིས་ཟིན་པའི་དམ་ཆོས་ཤིག །སྒྲུབ་པའི་དུས་ལ་བབ་པ་མ་ལགས་སམ། །རྒྱལ་བའི་དགོངས་པ་ཇི་བཞིན་རྟོགས་འདོད་ན། །ཤིང་རྟ་ཆེན་པོ་ཀླུ་སྒྲུབ་ཡབ་སྲས་དང་། །བདག་ཉིད་ཆེན་པོ་འཇམ་དབྱངས་བླ་མ་སོགས། །འཁྲུལ་མེད་གཞུང་ལ་བརྟེན་ནས་ཡིད་ཆེས་བསྐྱེད། །དེ་ལས་གཞན་དུ་མཁས་མང་བསྟན་བཅོས་ཀྱི། །ཟེར་སྒྲོས་སྣ་ཚོགས་གཅིག་ཏུ་བསྡུས་གྱུར་ན། །འགལ་འདུའི་དབང་གིས་སྒྲོ་སྐུར་རྟོག་པ་སྐྱེ། །ཕྱོགས་ལྷུང་དབང་གིས་ཡང་དག་དོན་མི་རྟོགས། །ལྟ་བའི་སྙིགས་མ་ཤིན་ཏུ་བདོ་བའི་ཕྱིར། །ཡང་དག་ལམ་བཟང་རྙེད་པར་དཀའ་བས་ན། །རྟོན་པ་བཞི་པོ་ཕྱིན་ཅི་མ་ལོག་པར། །རྒྱལ་བ་དགྱེས་པའི་ལམ་ལ་གུས་པར་མཛོད། །རྒྱལ་བས་ལུང་བསྟན་འཕགས་པ་ཀླུ་སྒྲུབ་དང་། །གྲུབ་པའི་དབང་ཕྱུག་དཔལ་ལྡན་བིཪྺཔ། །རྣམ་པ་གཉིས་ལས་རིམ་པར་བརྒྱུད་པ་ཡི། །མདོ་སྔགས་གཉིས་ཀྱི་ལྟ་སྒོམ་དཔྱོད་པའི་གནད། །ཚང་ལ་མ་ནོར་གཅིག་ཏུ་བསྡུས་པ་ནི། །རྣལ་འབྱོར་དབང་པོ་བརྩེ་ཆེན་ས་སྐྱ་པ། །བརྒྱུད་པར་བཅས་པས་རིམ་པར་བསྐྱངས་པ་ཡི། །རང་ལུགས་ཡིད་བཞིན་ནོར་བུ་འདི་ཡིན་ནོ། །གང་དེ་མཁྱེན་པའི་རྒྱ་མཚོར་གནས་བཅས་པའི། །བླ་མའི་དེད་དཔོན་གུས་པས་བསྟེན་པ་དང་། །རང་གི་ལས་འཕྲོ་མོས་གུས་བརྩོན་འགྲུས་ཀྱིས། །ད་ལྟ་བདག་བློ་མཛོད་ཀྱི་ནོར་དུ་གྱུར། །གཤིས་ངན་དུད་འགྲོའི་ངང་ཚུལ་འཛིན་ལགས་མོད། །ཟབ་དོན་སྙན་བརྒྱུད་ལེགས་བཤད་མ་གི་ཏ། །བློ་གྲོས་ལྟེ་བའི་དཔལ་དུ་བཟུང་བ་འདི། །དོན་གཉེར་སྐྱེ་བོས་བླང་འོས་ཡིན་ན་ཡང་། །དུས་ཀྱི་དབང་གིས་སུས་ཀྱང་མི་མྱོང་བས། །རེ་ཞིག་གཞན་ལ་སྟེར་བའི་བློ་མེད་ཀྱང་། །ཆོས་འདིའི་བརྒྱུད་པ་ཟིན་དུ་རེ་ནས་ནི། །སྦྱིན་པར་འགྱུར་གྱི་གྲོགས་དག་དགའ་བས་ལོངས། །འདི་དོན་ཚུལ་བཞིན་སྒོམ་པའི་ཉམས་རྟོགས་ནི། །བདག་གི་རྒྱུད་ལ་ངེས་པར་མ་མཆིས་ཀྱང་། །ཉམས་སུ་ལེན་པའི་ཚུལ་ལ་མ་རྨོངས་པའི། །བློ་འདི་ལྷ་དང་བླ་མའི་དྲིན་གྱིས་ཡིན། །ཉམས་མྱོང་མེད་པའི་ཁ་ཆོས་བཤད་པ་འདིས། །གཞན་ལ་མི་ཕན་རང་ལ་གནོད་པས་ན། །དབུལ་པོའི་ནོར་བུ་གཞན་ལ་སྟེར་བ་བཞིན། །ཕངས་ཀྱང་རང་དབང་རང་གིས་འཛིན་མ་ནུས། །དང་པོ་དགེ་བའི་བཤེས་ལས་ཐོས་པ་བཙལ། །བར་དུ་ཐོས་དོན་བསམ་པས་གཏན་ལ་ཕབ། །ད་ལྟ་རང་སེམས་སྟེང་དུ་མདོ་རྒྱུད་ཀྱི། །ཟབ་གནད་བསྡུ་བ་བརྩོན་པའི་ལག་རྗེས་ཡིན། །སྐྱེས་དང་སྦྱངས་པའི་བློ་གྲོས་མཐུ་ཆུང་ཡང་། །སངས་རྒྱས་དངོས་འདྲའི་བླ་མ་རྙེད་པའི་ཚེ། །མོས་གུས་གསོལ་འདེབས་ཐང་ལྷོད་མ་བྱས་པས། །མི་འཕྲོག་ཡིད་ཆེས་སྙིང་གི་ཁོང་ནས་ཤར། །དེ་སླད་གྲོགས་དག་མཉམ་འགྲོགས་མི་བྱེད་པར། །རྒན་པོའི་ཚིག་ལ་ཡིད་ཆེས་བསྐྱེད་ནས་ནི། །ཟབ་མོའི་ཆོས་དང་རང་སེམས་འདྲེས་པ་ཞིག །བྱུང་ན་དེ་བས་ལྷག་པའི་ཞུ་དོན་མེད། །ཀྱེ་མ་རྒྱལ་བསྟན་ཉི་མ་ནུབ་རིར་འཛེགས། །མི་སྲུན་སྐྱེ་བོས་ཕྱོགས་ཀུན་རབ་བཟུང་བའི། །ལྔ་བརྒྱ་ཐ་མའི་དུས་ཀྱི་རྒུད་པ་རྣམས། །དྲན་བཞིན་རང་གིས་རང་ཉིད་འཆོས་པར་མཛོད། །གཞུང་བརྒྱ་འཆད་པའི་ཁུར་གྱིས་བྲེལ་བཞིན་དུ། །རང་སེམས་ཐ་མས་ལུས་པའི་འཆད་པ་པོ། །འཆི་ཚེ་དུད་འགྲོའི་རྣམ་ཐར་འཛིན་པ་ལ། །ཡིད་སྨོན་མ་བྱེད་དེ་ལ་ཁྲེལ་གྱིས་ཐོབ། །བདེ་སྐྱིད་འདོད་ཀྱང་སྐྱིད་དུས་ད་ནི་མེད། །མཐུན་འཇུག་མཁས་ཀྱང་ཐམས་ཅད་མགུ་བ་དཀའ། །སྒྲུབ་ཀྱང་ལས་ལ་གྲུབ་དུས་མི་འོང་བའི། །ངང་ཚུལ་ཤེས་ནས་ཚེ་འདིའི་བྱ་བ་བོར། །སྔོན་སྤྱད་ལས་ལ་སྙིང་པོ་ངས་མ་མཐོང་། །ད་ལྟའི་འཁྲུལ་སྣང་དེ་བས་ཡ་རེ་ང་། །སླན་ཆད་དགུང་ཉི་ཙམ་གྱི་ཚེ་མཇུག་འདིར། །ཆགས་སྡང་བཟློག་ཕྱིར་ཅིས་ཀྱང་འབད་པར་ཞུ། །ཕྱི་ནང་སྣོད་བཅུད་གང་ལ་བསམ་ཡང་རུང་། །ཡིད་སྐྱོ་འཕེལ་བའི་རྒྱུ་ལས་མ་མཆིས་པས། །དབེན་པའི་རི་ལ་སྒྲུབ་ཚུགས་ཟིན་པ་དང་། །སྙིང་པོའི་བཙན་ས་མྱུར་དུ་ཟིན་པར་མཛོད། །དང་པོར་དགེ་བ་ཐོས་བསམ་ཁྱེད་ཀྱིས་མཛད། །བར་དུ་དགེ་བའི་སྒྲུབ་པའི་རྒྱལ་མཚན་ཚུགས། །ཐ་མར་དགེ་བ་འཕྲིན་ལས་བཟང་པོ་ཡིས། །བསྟན་འགྲོར་ཕན་པའི་སྨོན་འདུན་ངེད་ཀྱིས་ཞུ། །ཆོས་དང་རང་སེམས་ནང་ནས་འདྲེས་པ་དང་། །ཚེ་དང་དམ་པའི་ཆོས་སྤྱོད་སྙོམས་པ་དང་། །རྣམ་དཀར་ཕྲིན་ལས་འགྲོ་བའི་དོན་བྱེད་ཅིང་། །སྐུ་ཚེ་ཞབས་པད་ཡུན་དུ་བརྟན་པར་ཤོག །ལྷ་དང་བླ་མའི་བྱིན་རླབས་རྒྱུད་ལ་ཞུགས། །དམ་ཅན་སྲུང་མ་ལུས་དང་གྲིབ་བཞིན་འགྲོགས། །བཤད་དང་སྒྲུབ་པས་ཉིན་མཚན་དུས་འདའ་བས། །འཇམ་མགོན་བླ་མའི་ཕྲིན་ལས་སྤེལ་གྱུར་ཅིག །གང་ཞིག་ཁྱེད་ལ་གསོལ་བའི་དོན་དེ་ཀུན། །ཇི་བཞིན་ཐུགས་ཀྱི་ཟེའུ་འབྲུར་འཆང་མཛོད་དང་། །དོན་གཉིས་ལྷུན་གྱིས་གྲུབ་པའི་དཔལ་ལྡན་པའི། །ཆོས་ཀྱི་རྒྱལ་སྲིད་ཁྱེད་ཀྱིས་ཟིན་པར་འགྱུར། །ཞེས་པ་འདི་ནི་དཔྲལ་བའི་མིག་ལྟར་གཅེས་པ་ཀུན་བཟང་ཆོས་ཀྱི་ཉི་མའི་བཞེད་སྐོང་དུ་ཀུན་དགའ་རྒྱལ་མཚན་གྱིས་བྲིས་པའོ།། །།