དམིགས་པར་བྱ་བའི་ཡུལ་ལམ་ཐོབ་བྱའི་འབྲས་བུ་རྣམ་པར་བཞག་པ།

ༀསྭསྟིསིདྡྷཾ། བླ་མ་རྗེ་བཙུན་དམ་པའི་ཞབས་ལ་སྤྱི་བོས་གུས་པས་ཕྱག་འཚལ་ལོ། །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཁྱབ་བདག་འགྲོ་མགོན་རྡོ་རྗེ་འཆང་དཔལ་གཙོ། །བློ་དམན་གདུལ་ཕྱིར་ཕལ་པའི་སྐུ༼ར༷་༽བཟུང་ནས། །སྐལ་བཞིན་སྨིན་མཛད་སྐུ་གསུང་ཐུགས་མཐའ་ཡས། །བླ་མའི་ཞབས་ལ་ཐལ་སྦྱར་སྤྱི་བོས་འདུད། །རྡོ་རྗེ་འཆང་ངམ་ཕྱག་ན་རྡོ་རྗེ་གང་གི་ཐབས་ཐུགས་རྗེ་ཆེན་པོ་མངའ་བས་གདུལ་བྱར་རབ་ཏུ་ཁྲོས་པའི་སྐུར་སྣང་ཞིང་། །ཤེས་རབ་གཉིས་སུ་མེད་པའི་དོན་གསལ་བ་སྟེ་རྟོགས་པས་སྐུ་ཉི་མ་འབུམ་གྱི་གཟི་བརྗིད་དང་ལྡན་ལ། །ཟུང་འཇུག་ཧཱུྃ་ཞེས་པས་སྒྲས་བརྗོད་པས་བགེགས་ཀུན་སེལ་མཛད་པ། །མཚན་རྟོག་གི་མི་ཚུགས་པས་དཔའ་ཞིང་མི་འགྱུར་བས་བརྟན་པ་དེ་མཚོན་བྱེད་ཀྱི་རྡོ་རྗེ་ཕྱག་ན་བསྣམས་པ་དེ་ཉིད་ཀྱིས་བསྐྱང་དུ་གསོལ་ཞེས་པ་སྟེ་བརྗོད་བྱ་ལ་མཆོད་བརྗོད་བྱས་པའོ། །ཐོབ་བྱ་ཐོབ་བྱེད་རྒྱུད་སྡེའི་རྣམ་དབྱེ་བ། །བླ་མའི་གསུང་ལ་ཆོས་རྗེས་འབྲང་བའི་བློ། །སྤྲོས་ལ་དགའ་རྣམས་རབ་ཏུ་མགུ་བྱེད་པ། །ལུང་དོན་རྟོགས་པའི་གསལ་བྱེད་གཞན་དུ་གསལ། །འདིར་ནི་སྤྲོས་ཉུང་རྟོགས་པ་དོན་གཉེར་བ། །དད་པའི་རྗེས་འབྲང་བླ་མའི་གསུང་ཉིད་ལ། །གཙོར་འཛིན་དོན་ཕྱིར་གསུང་ལ་བཟུང་བ་ཙམ། །རེ་ཞིག་མདོར་བསྡུས་རྒྱུད་སྡེའི་རྣམ་གཞག་བྲི། །གང་ཕྱིར་མཁས་པ་རྣམས་ཀྱིས་རབ་གསལ་མཛད་ཟིན་ཀྱང་། །རང་གཞན་རྟོགས་པ་སྤེལ་དང་ལེགས་བཤད་གོམས་བྱའི་ཕྱིར། །ལུས་སྟོབས་རབ་རྫོགས་འདབ་ཆགས་མཁའ་ལ་འཕུར་བའི་ཚེ། །དེ་ཡི་ཕྲུ་གུ་མ་ཚར་བར་ཡང་སློབ་པ་བཞིན། །འདི་ན་རྟོགས་པ་དང་ལྡན་པའི་སྐྱེ་བོ་ཕལ་ཆེར་ནི་དམིགས་པར་བྱ་བའི་ཡུལ་ལམ་ཐོབ་པར་བྱ་བའི་འབྲས་བུ་དང་དེ་ཐོབ་པར་བྱེད་པའི་ལམ་གྱི་རྣམ་པར་དབྱེ་བ་ཤེས་ནས་འཇུག་པར་འགྱུར་བ་ཡིན་པས། རྒྱུད་སྡེ་རྣམས་ཀྱི་ཀླད་དུ་སྤྱིའི་རྣམ་པར་གཞག་པ་འདི་བརྗོད་པར་བྱ་བར་རིགས་པ་ཡིན་ནོ། །དེ་ལྟར་ཞུགས་པའི་ལམ་དེ་གཞན་པས་ཁྱད་པར་དུ་འཕགས་པར་བསྟན་པར་བྱ་བའི་ཕྱིར་དེའི་རྗེས་སུ་རྒྱུད་རྣམས་ཀྱི་མཚན་གྱི་དོན་འབྱུང་བ་ཡིན་ནོ། །དེ་ལྟ་བུའི་ལམ་ཁྱད་པར་དུ་འཕགས་པ་དེ་བློ་དམན་པས་ཀྱང་བདེ་བླག་ཏུ་རྟོགས་པར་བྱ་བའི་ཕྱིར་དེའི་རྗེས་སུ་རྒྱུད་བཤད་ཐབས་ཀྱི་མན་ངག་སྟོན་པ་ཡིན་ནོ། །དེ་ལྟར་རྒྱུད་ཀྱི་དོན་ལེགས་པར་རྟོགས་ནས་ཉམས་སུ་ལེན་པ་ན་གང་ཟག་གི་རྒྱུད་ལ་ཇི་ལྟར་སྐྱེ་བའི་རིམ་པ་བསྟན་པའི་ཕྱིར་དེའི་རྗེས་ལ་རྒྱུད་ཀྱི་མངོན་པར་རྟོགས་པ་འབྱུང་བ་ཡིན་ནོ། །ཚུལ་བཞི་པོ་འདི་ནི་རྣལ་འབྱོར་གྱི་དབང་ཕྱུག་ཆེན་པོ་བིཪྺ་པའི་གསུང་རབ་མཁས་པ་རྣམས་ཀྱིས་བགྲོད་པར་བྱ་བའི་འཇུག་ངོགས། རྒྱུད་མ་ལུས་པ་གསལ་བར་བྱེད་པའི་སྒྲོན་མ། བསོད་ནམས་དང་མི་ལྡན་པ་རྣམས་ཀྱིས་རྟོགས་པར་དཀའ་བ་མྱ་ངན་ལས་འདས་པའི་གྲོང་ཁྱེར་དུ་འཇུག་པ་རྣམས་ཀྱི་ཐེམ་སྐས་ཏེ། རྣམ་པ་ཐམས་ཅད་ཀྱི་མཆོག་དང་ལྡན་པའོ་ཞེས་བྱ་བར་རྟོགས་པར་བྱའོ། །དེ་ལ་དང་པོ་སྤྱིའི་རྣམ་པར་གཞག་པ་ནི་གཉིས་ཏེ། དམིགས་པར་བྱ་བའི་ཡུལ་ལམ་ཐོབ་བྱའི་འབྲས་བུ་རྣམ་པར་གཞག་པ་དང་། དེ་ཐོབ་པར་བྱེད་པའི་ལམ་གྱི་རྣམ་པར་གཞག་པ་རབ་ཏུ་དབྱེ་བ་དང་བཅས་པའོ། །དང་པོ་ནི་སྤྱིར་དམིགས་པར་བྱ་བའི་ཡུལ་ལམ་ཐོབ་པར་བྱ་བའི་འབྲས་བུ་མཐར་ཐུག་ནི། བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཞེས་བྱ་བའི་འབྲས་བུ་གཅིག་ཁོ་ན་ཡིན་ནོ། །འདི་ལ་གཉིས་ཏེ། མཚན་ཉིད་བསྟན་པ་དང་། དེ་གཅིག་ཁོ་ནར་བསྒྲུབ་པའོ། །དེ་ལ་དང་པོར་སངས་རྒྱས་ཀྱི་མཚན་ཉིད་དེ་ཇི་ལྟ་བུ་ཡིན་ཞེ་ན། དེ་ནི་དངོས་པོའི་གནས་གས་ཕྱིན་ཅི་མ་ལོག་པར་རྟོགས་པ་དང་། ཟག་པ་མེད་པའི་བདེ་བ་ཕུན་སུམ་ཚོགས་པ་དང་ལྡན་པ་དང་། སྒྲིབ་པའི་དྲི་མ་མ་ལུས་པ་སྤངས་པ་ཞེས་བྱ་བ་གསུམ་མོ༷། །དེ་ལྟར་ཡིན་པར་ཡང་ལུང་ལས། དངོས་པོ་རྟོགས་ཕྱིར་སངས་རྒྱས་ང་། །ཞེས་པ་དང་། བདེ་བ་རྟོགས་ཕྱིར་རྣམ་སངས་རྒྱས། །ཞེས་པ་དང་། ཚངས་པ་སྒྲིབ་བྲལ་སངས་རྒྱས་ཉིད། །ཅེས་གསུངས་པས་ཤེས་པར་ནུས་སོ། །གསུམ་པོ་དེ་ལའང་དང་པོ་ཁོ་ནར་སྒྲིབ་པ་དང་བྲལ་བ་ཞེས་བྱ་བ་འདི་རྒྱུ་ཡིན་ཏེ། ཞེ་སྡང་ལ་སོགས་པ་ཉོན་མོངས་པའི་སྒྲིབ་པ། ཤེས་བྱ་ཇི་སྙེད་པ་མཁྱེན་པའི་གེགས་དང་། ཇི་ལྟ་བ་མཁྱེན་པའི་གེགས་སུ་གྱུར་པ་ཤེས་བྱའི་སྒྲིབ་པ་དང་། སྙོམས་འཇུག་གི་སྒྲིབ་པ་ཞེས་བྱ་བ་གསུམ་སྟེ། གསུམ་པོས་སྒྲིབ་པ་མ་ལུས་པ་བསྡུས་པའོ། །བྲལ་བ་ནི་གཏན་ནས་བྲལ་བའོ། །དེས་ན་སྤངས་པ་ཕུན་སུམ་ཚོགས་པ་སྟེ། དཔེར་ན་མི་གཉིད་སངས་བ་ལྟ་བུ་སྟེ། བུདྡྷ་ཞེས་བྱ་བའི་དོན་ཏོ། །རྒྱུད་དེ་ལྟ་བུ་ཐོབ་པ་ཉིད་ཀྱིས་དངོས་པོའི་གནས་ལུགས་ཆོས་ཅན་ཇི་སྙེད་པ་དང་ཆོས་ཉིད་ཇི་ལྟ་བ་རྟོགས་པ་སྟེ། དེ་ནི་རྟེན་འབྲེལ་ཟབ་མོ་ཐུགས་སུ་ཆུད་པས་དབྱིངས་དང་ཡེ་ཤེས་གཉིས་སུ་མེད་པ་ཆོས་ཀྱི་སྐུ་སྟེ། དེ་ལྟ་བུ་ཐོབ་པ་དེ་ཉིད་ཀྱིས་བདེ་བ་རྟོགས་པ་ཞེས་བྱ་སྟེ། སྐུ་དང་ཡེ་ཤེས་ལ་སོགས་པ་སངས་རྒྱས་ཀྱི་ཡོན་ཏན་ཚད་མེད་པ་དང་ལྡན་པ་ནི་རྣམ་པར་གྲོལ་བ་ཅན་གྱི་བདེ་བ་ཞེས་བྱའོ། །དེ་ལྟར་གཉིས་པོ་དེ་ནི་པདྨ་རྒྱས་པ་དང་འདྲ་བར་བློ་ཕྱེ་ཞིང་རྒྱས་པས་ན་བུདྡྷ་ཞེས་བྱ་བའི་དོན་ཏོ། །དེ་ནི་ཡེ་ཤེས་ཕུན་སུམ་ཚོགས་པའོ། །དེ་ལྟར་གསུམ་པོ་རེ་རེས་ཀྱང་ཡོན་ཏན་གཞན་ཐམས་ཅད་ཤུགས་ལས་ཤེས་པར་ནུས་ལ། ཡང་མདོ་རྒྱུད་རྟོག་པ་དང་བསྟན་བཅོས་མང་པོ་ནས་སངས་རྒྱས་ཀྱི་མཚན་ཉིད་མང་པོ་གསུངས་ཀྱང་། འདིར་གསུམ་པོ་འདི་ཁོ་ན་འཆད་པ་ནི། ལུང་བརྟག་པ་གཉིས་པ་དང་སཾ་པུ་ཊ་ནས་འབྱུང་བ་ཙམ་བླ་མ་དམ་པ་གསུང་པ་སྟེ། འདིས་སངས་རྒྱས་ཀྱི་མཚན་ཉིད་དམ་ཡོན་ཏན་ཐམས་ཅད་འདུས་པར་ཤེས་པར་བྱའོ། །དོན་གཉིས་པ་མཐར་ཐུག་གི་འབྲས་བུ་དེ་གཅིག་ཏུ་བསྒྲུབ་པ་ལ་གཉིས་ཏེ། གཅིག་ཏུ་ངེས་པའི་འཐད་པ་དང་། དེ་ལ་རྩོད་པ་སྤང་བའོ། །དང་པོ་ནི་སྤྱིར་ལམ་མི་མཐུན་པ་དུ་མ་ཡོད་ཀྱང་མཐར་ཐུག་གཅིག་ཁོ་ན་ཡིན་ནོ། །དེ་ལྟར་དཔལ་ཁ་སྦྱོར་ལས་ཀྱང་། གང་ཕྱིར་ཆོས་ནི་གྲུབ་མཐའ་དང་ལམ་དུ་མས་ནི། །དཔེ་ཆུ་བོའི་རྒྱུན་ནི་རྒྱ་མཚོ་ལྟར། །གནས་ལུགས་དང་ཐར་པ་ཉིད་ནི་གཅིག་པུ་ཉིད། །མང་པོ་དམིགས་པར་མི་འགྱུར་རོ། །ཞེས་གསུངས་པ་དང་། རྒྱུད་ཕྱི་མ་ལས་ཀྱང་ཆུ་བོ་དང་རྒྱ་མཚོའི་དཔེས་ནི། གྲུབ་མཐའ་དང་ལམ་དང་གནས་ལུགས་དང་ཐར་བའི། ཕྱོགས་གཉིས་ཀའི་དཔེར་བརྗོད་དོ་ཞེས་པ་དང་། ཡང་དཔེར་ན་རྒྱ་མཚོ་ཆེན་པོ་ལས་ཆུ་བོ་དུ་མ་བབས་པ་ནི་སོ་སོར་སྣང་བའི་སྐབས་མེད་དོ་ཞེས་གསུངས་ཏེ། གྲུབ་མཐའ་དུ་མ་ཡོད་ཀྱང་གནས་ལུགས་གཅིག་ལས་མེད་པ་དང་། ལམ་དུ་མ་ཡོད་ཀྱང་མཐར་ཐུག་གཅིག་ལས་མེད་པར་གྲུབ་བོ། །དེའང་འབྲས་བུ་མཐར་ཐུག་པ་ནི་དངོས་པོའི་གནས་ལུགས་རྟོགས་པ་ཡིན་ལ། དངོས་པོའི་གནས་ལུགས་དུ་མ་མེད་པའི་ཕྱིར་མཐར་ཐུག་ཀྱང་དུ་མ་མེད་དོ། །དེའང་གཅིག་ཅེས་བྱ་བའང་སྤངས་པ་དང་ཡེ་ཤེས་ཕུན་སུམ་ཚོགས་པར་རིགས་གཅིག་པ་ཡིན་གྱི་མུ་སྟེགས་བྱེད་ཀྱི་བདག་ལ་ཐིམ་པ་ལྟ་བུ་རང་གི་ངོ་བོ་གཅིག་དུ་གྱུར་པ་ནི་མ་ཡིན་ནོ། །གཉིས་པ་དེ་ལ་རྩོད་པ་སྤང་བ་ལ་གཉིས་ཏེ། གྲུབ་མཐའ་དུ་མ་ཡོད་པའི་སྐྱོན་སྤང་བ་དང་། ཐེག་པ་གསུམ་གསུངས་པའི་སྐྱོན་སྤང་བའོ། །དང་པོ་ནི་གལ་ཏེ་དངོས་པོའི་གནས་ལུགས་དུ་མ་ཡོད་དེ། མུ་སྟེགས་ཀྱི་བདག་ལ་སོགས་པ་གྲུབ་པའི་མཐའ་དུ་མར་སྣང་བའི་ཕྱིར་རོ་སྙམ་ན། དུ་མར་སྣང་བ་ནི་མཐར་ཐུག་མ་རྟོགས་པ་རྣམས་ཀྱིས་རང་རང་གི་རྣམ་པར་རྟོག་པ་དུ་མར་བརྟགས་ཀྱིས། རྟོགས་པ་རྣམས་ལ་ཆོས་ཐམས་ཅད་རྟེན་ཅིང་འབྲེལ་བར་འབྱུང་བ་ཟབ་མོ་ལས་མ་གཏོགས་པ་སྣ་ཚོགས་འགའ་ཡང་མེད་དོ། །དཔེར་ན་རྒྱ་མཚོ་ལས་ཕྱི་རོལ་དུ་ཆུ་བོ་སྣ་ཚོགས་སྣང་ཡང་རྒྱ་མཚོར་ཐིམ་པ་ན་རོ་གཅིག་པའམ། ཉི་མའི་དཀྱིལ་འཁོར་གཅིག་ཉིད་ལ་རང་གི་ཡུལ་གྱི་དབང་གིས་སྣང་བ་ཐ་དད་དུ་འཆར་བའམ། དམུས་ལོང་བརྒྱས་གླང་པོ་ཆེ་གཅིག་ལ་བྱུགས་པ་ན་༼ར༷ང་༽རང་གི་ཚོར་བ་ཐ་དད་པར་གྱུར་པ་ལྟ་བུའོ། །གཉིས་པ་ཐེག་པ་གསུམ་གསུངས་པའི་སྐྱོན་སྤང་ཡང་འདི་སྙམ་དུ། །འོ་ན་བཅོམ་ལྡན་འདས་ཀྱིས་རིགས་ཅན་གསུམ་ལ་ དགོངས་ཏེ་བྱང་ཆུབ་རྣམ་པ ་གསུམ་གསུངས་པ་འདི་ཇི་ལྟར་དྲང་ཞེ་ན། དེ་ནི་རེ་ཞིག་དམན་པ་རྣམས་དྲང་བའི་དོན་དུ་རེ་ཞིག་པའི་ལམ་གྱི་འབྲས་བུར་གསུངས་པ་ཡིན་ནོ། །འདིས་ནི་ཐེག་པ་གཅིག་པ་ཉིད་དུ་སྒྲུབ་པ་ཞེས་ཀྱང་བྱ། ྈདེ་ྈ༼འདི༷་༽ཉིད་ལ་རྟོགས་པའི་ལྟ་བ་ཞེས་ཀྱང་བྱ་སྟེ། བྱང་ཆུབ་ཀྱི་སེམས་བསྐྱེད་པ་ནི། ལམ་གྱི་ཐོག་མ་ཡིན་པས་དེ་འདིས་གསལ་བར་བྱེད་པས་ཐོག་མར་བསྟན་ནོ། །དབུ་མའི་བསྟན་བཅོས་ལ་སོགས་པ་དེ་ཁོ་ན་ཉིད་ཀྱི་དོན་གཏན་ལ་འབེབས་པའི་བསྟན་བཅོས་མཐའ་དག་གིས་ཀྱང་འདིའི་དོན་གསལ་བར་བྱེད་པས། རྒྱས་པར་ནི་དེ་དག་ཏུ་ཤེས་པར་ནུས་སོ། །རྒྱུད་སྡེ་སྤྱིའི་རྣམ་པར་གཞག་པ་ལས་ལམ་མཐའ་དག་གི་ཐོག་མར་དམིགས་པར་བྱ་བའི་ཡུལ་མཐར་ཐུག་གི་འབྲས་བུ་གཏན་ལ་དབབ་པའི་སྐབས་ཏེ་དང་པོའོ། །དེ་ཐོབ་པར་བྱེད་པའི་ལམ་གྱི་རྣམ་པར་གཞག་པ་ལ་ལྔ་སྟེ། ལམ་རང་གི་ངོ་བོ་གང་ཡིན་པ་དང་། ལམ་དེའི་རབ་ཏུ་དབྱེ་བ་དང་། དབྱེ་བ་སོ་སོའི་མཚན་ཉིད་དང་། ཕ་རོལ་ཏུ་ཕྱིན་པའི་ཐེག་པ་ལས་གསང་སྔགས་ཀྱི་ཐེག་པ་ཁྱད་པར་དུ་འཕགས་པའི་ཚུལ་དང་། གསང་སྔགས་ཀྱི་ཐེག་པ་བྱེ་བྲག་དུ་གཏན་ལ་དབབ་པའོ། །དང་པོ་ལ་གཉིས་ཏེ། ལམ་གྱི་མཚན་ཉིད་དང་། དེའི་དབྱེ་བའོ། །དང་པོ་ནི། རང་རང་གི་དམིགས་པར་བྱ་བ་ཐོབ་པར་བྱེད་པའི་ཐབས་སོ། །དབྱེ་ན་གཉིས་ཏེ། ལམ་ཐུན་མོང་བ་དང་། ཐུན་མོང་མ་ཡིན་པའོ། །དང་པོ་ལ་གསུམ་སྟེ། ངན་འགྲོ་ཉིད་སྐྱེད་པ་དང་། བདེ་འགྲོ་ཙམ་ཐོབ་པར་བྱེད་པ་དང་། ཐར་པ་ཙམ་ཐོབ་པར་བྱེད་པའི་ལམ་མོ། །དང་པོ་ནི་མུ་སྟེགས་དམན་པ་ཆད་པར་ལྟ་བ་ལ་སོགས་པ་ཁ་ཅིག་ཡིན་ནོ། །༼གཉི༷ས་པ༷་༽བདེ་འགྲོ་ཙམ་ཐོབ་པར་བྱེད་པ་ནི་མུ་སྟེགས་མཆོག་གཅེར་བུ་པ་ལ་སོགས་པ་རྣམས་ཡིན་ནོ། །༼གསུམ༷་པ༷་༽ཐར་པ་ཙམ་ཐོབ་པར་བྱེད་པ་ནི་ཉན་ཐོས་དང་རང་སངས་རྒྱས་ཀྱི་ལམ་ཡིན་ནོ། །