དྲོད་ཐོབ་པས་སྤྱད་པའི་སྤྱོད་པ་དངོས།

སྤྱི་དོན་གཉིས་པ་དྲོད་ཐོབ་པས་སྤྱད་པ་སྤྱོད་པ་དངོས་ལ་རྒྱས་པར་དབྱེ་ན་བཅུ་བཞི་ལ་སོགས་པར་གསུངས་ཀྱང་ངོ་བོའི་དགུ་གཅིག་ཏུ་མདོར་བསྡུ་ན་དྲུག་ཏུ་འདུས་ཏེ། སྤྱོད་པ་རང་གི་ངོ་བོ་དང་། རབ་ཏུ་དབྱེ་བ་དང་། དབྱེ་བ་སོ་སོའི་མཚན་ཉིད་དང་། སྤྱོད་པ་སྤྱད་པའི་དུས་དང་། རྟེན་གྱི་གང་ཟག་དང་། སྤྱོད་པའི་དགོས་པའོ། །དང་པོ་ལ་དབྱེ་བ་དགུ་ཡོད་ཨངྐི་ལྟར་ཤེས་པར་བྱ་ནི་སྤྱིར་ལས་དང་པོ་པའི་སྤྱོད་པ་ཞེས་བྱ་བ་ལ་སོགས་པ་ལུས་ངག་གི་སྤྱོད་པ་མང་དུ་གནས་ན་ཡང་འདིར་གནས་སྐབས་ཀྱི་སེམས་བརྟན་པ་ཐོབ་པ་ལ་བྱ་སྟེ། དང་པོར་བླ་མ་ལ་ཕྱག་བྱས། དངོས་པོ་ཐམས་ཅད་ཕུལ། ལུས་ཀྱང་སེམས་ཅན་ཐམས་ཅད་ལ་བསྔོས་ལ་སྤྱོད་པ་ལ་འགྲོ་སྟེ། ལྔ་པའི་གསུམ་པ་ལས། དཔལ་ལྡན་སློབ་དཔོན་རྡོ་རྗེ་ཅན། །ཀུན་གྱི་མགོན་ལ་ཕྱག་འཚལ་ལོ། །ཞེས་པ་དང་། ལེའུ་དྲུག་པ་ལས། ལུས་ཀྱི་སྦྱིན་པ་བྱིན་ནས་ནི། །ཞེས་གསུངས་སོ། །དེ་ནས་སྤྱོད་པ་དངོས་ནི། ནང་དུ་དེ་ཁོ་ན་ཉིད་ཀྱི་རྟོགས་པས་ཀུན་ནས་བསླང་བའི་ཕྱི་རོལ་དུ་ལུས་ངག་གཡོ་ཞིང་རྒྱུ་བ་ཅི་འདོད་བྱེད་པའི་ཁྱད་པར་ལ་བྱའོ་ཞེས་བྱ་སྟེ། ལུས་ཅི་འདོད་བྱ་བ་བྱེད་པའི་ཁྱད་པར་ནི་རེས་ཅོ་རེག་དང་རལ་པ་ཅན་ལ་སོགས་པ་དང་། བགོ་བར་བྱ་བ་ལ་ངེས་པ་མེད་དེ། ལྔ་པའི་བཞི་པ་ལས། རོ་ཡི་དཀྲིས་མའི་གོས་བཟང་དང་། །རོ་བསྲེགས་ཐལ་བས་དེ་བཞིན་བརྒྱན། །ཞེས་བྱ་བ་དང་། སྨད་གཡོགས་ཁ་དོག་སྣ་ཚོགས་ཉིད། །ཅེས་བྱ་བ་ལ་སོགས་པ་དང་། རྩ་རྒྱུད་ལས། བགོ་བ་སྟག་གི་པགས་པ་ཉིད། །བཟའ་བ་མི་འཆི་བཅུ་ཕྱེད་དེ། །ཞེས་བྱ་བ་ལ་སོགས་པའོ། །བཟའ་བར་བྱ་བ་ལ་ངེས་པ་མེད་དེ། རེས་བཟའ་བར་བྱ་བ་བཟང་པོ་རྒུན་འབྲུམ་ལ་སོགས་པ་ཟ་ལ། རེས་ངན་པ་སྐྱུགས་པ་ལ་སོགས་པ་རྣམས་ཀྱང་ཟ་སྟེ། ལྔ་པའི་གསུམ་པ་དང་བཞི་པ་ལས། ཁྱི་དང་བོང་བུ་རྔ་མོ་དང་། །གླང་པོ་ལ་སོགས་ཁྲག་འཐུང་ནས། །ཞེས་བྱ་བ་ལ་སོགས་པ་དང་། ཇི་ལྟར་རྙེད་པ་བཞིན་དུ་བཟའ། །ཟོས་ཤིང་ཟོས་དང་གཏོར་མ་སྦྱིན། །ཞེས་བྱ་བ་ལ་སོགས་པ་གསུངས་སོ། །རྒྱན་ཆ་ལའང་ངེས་པ་མེད་དེ། འབྲས་བུ་སྣ་ཚོགས་དོ་ཤལ་སོགས། །འོལ་མ་ཟིལ་སོགས་དེ་བཞིན་སྤྲས། །ཞེས་བྱ་བ་ལ་སོགས་པ་དང་། སྣོད་དང་སྤྱོད་པ་བྱེད་པའི་དུས་དང་གནས་རྣམས་ལའང་ངེས་པ་མེད་དེ། རོ་ཡི་ཁམ་ཕོར་ཐོགས་ནས་ནི། །མཚན་མོའི་དུས་སུ་རྒྱུ་བར་བྱ། །བཞི་མདོ་དང་ནི་རི་བོ་དང་། །ཤིང་གཅིག་གམ་ནི་དུར་ཁྲོད་དུ། །ཞེས་བྱ་བ་ལ་སོགས་པ་དང་། གཞན་པའི་ཡུལ་འཁོར་གྲུབ་པ་དང་། །རི་ཡི་ཕུག་དང་ཚང་ཚིང་དང་། །གདོད་ནས་གྲུབ་པའི་དུར་ཁྲོད་ཆེ། །རྒྱ་མཚོའི་ཆེན་པོའི་འགྲམ་དུའམ། །སྐྲག་པ་ཐམས་ཅད་རྣམ་སྤངས་ཏེ། །དེ་ལྟར་ཤེས་རབ་ཅན་གྱིས་བསྒོམ། །ཞེས་བྱ་བ་ལ་སོགས་པ་གསུངས་སོ། །ངག་ལའང་ངེས་པ་མེད་པར་སྨྲ་སྟེ། རེས་འགའ་ལེགས་སྦྱར་ཟུར་ཆག་ནི། །ལྡོག་པ་ཡིས་ནི་འདོན་པར་བྱེད། །ཅེས་སོ། །གྲོགས་ལའང་ངེས་པ་མེད་དེ། བགྲོད་པ་དང་བགྲོད་པར་བྱ་བ་མ་ཡིན་པ་དེ་ལ་བགྲོད་པ་དང་ཞེས་གསུངས་སོ། །ལུས་ངག་གི་དམ་ཚིག་ལས་གྲོལ་བས་ན། ལུས་ངག་གི་དམ་ཚིག་ལ་ངེས་པ་མེད་དེ། གང་ཞིག་བྱ་བ་མ་ཡིན་པ་དེ་ནི་བྱ་བ་དང་ཞེས་བྱ་བ་ལ་སོགས་པ་རྒྱས་པར་གསུངས་སོ། །ལུས་ངག་གི་དམ་ཚིག་ལ་བླ་མ་ལ་ཕྱག་བྱ་བ་ནི་མི་འདོར་ཏེ། ཡེ་ཤེས་ཀྱི་དམ་ཚིག་ཡིན་པའི་ཕྱིར་རོ། །དེ་ཡང་ལྔ་པའི་གསུམ་པ་ལས། རྒྱལ་བས་མཆོད་པའི་སློབ་དཔོན་ནི། སེམས་ཅན་ཡིན་ཡང་ཡེ་ཤེས་ཀྱི་དམ་ཚིག་གིས་རྟག་ཏུ་དངོས་གྲུབ་སྦྱིན་པར་བྱེད་དེ། བློ་དང་ལྡན་པའི་སློབ་དཔོན་ལ་ཕྱོགས་བཅུར་བཞུགས་པའི་སློབ་མ་དེ་བཞིན་གཤེགས་པས་མཆོད་པར་བྱེད་དོ། །གང་གི་ཕྱིར་རྫོགས་པའི་སངས་རྒྱས་དང་། བྱང་ཆུབ་སེམས་དཔའ་མཆོད་པའི་བསོད་ནམས་གང་ཞིག་སློབ་དཔོན་གྱི་བ་སྤུའི་ཁུང་བུའི་རྩེ་མོ་གཅིག་ལ་མཆོད་ན་མཐོང་བ་དེའི་ཕྱིར་བྱང་ཆུབ་སེམས་དཔའི་སློབ་དཔོན་སོ་སྐྱེ་དེ་ལ་སངས་རྒྱས་ཀྱི་མཆོད་པ་བྱེད་པ་མཐོང་ངོ་། །ངེས་པར་རང་གི་ཐོབ་བྱ་ལས་མི་འདའ་བའི་དམ་ཚིག་གི་སངས་རྒྱས་འདོད་པས་དངོས་གྲུབ་སྦྱིན་པར་བྱེད་པ་བླ་མ་དམ་པ་ལ་སྨད་པར་མི་བྱ་བ་དང་ཞེས་བྱ་བ་ལ་སོགས་པ་དང་། དཔལ་ལྡན་སློབ་དཔོན་རྡོ་རྗེ་ཅན། །ཀུན་གྱི་མགོན་ལ་ཕྱག་འཚལ་ལོ། །ཞེས་བྱ་བ་ལ་སོགས་པ་གསུངས་སོ། །རྩ་རྒྱུད་དང་པོའི་དྲུག་པ་ལས་ཀྱང་། དངོས་གྲུབ་ཐོབ་པའི་སློབ་མ་གང་། །རང་ལ་ཡང་དག་པའི་ཡེ་ཤེས་ཀྱི་སྣང་བ་སྦྱིན་པ་པོ། །མནར་མེད་སྤངས་པའི་རྒྱུ་སློབ་དཔོན་ཡིན་པ་དེ་ཡི་ཕྱིར། །གྲུབ་པ་ཐོབ་པའི་སློབ་མས་བླ་མ་མངོན་ཕྱག་འཚལ། །ཞེས་གསུངས་སོ། །སྤྱོད་པའི་རང་གི་ངོ་བོ་བསྟན་ཟིན་ཏོ། །རབ་ཏུ་དབྱེ་ན་གཉིས་ཏེ། ཀུན་འདར་གྱི་སྤྱོད་པ་དང་། ཀུན་ཏུ་བཟང་པོའི་སྤྱོད་པའོ། །དེའང་ལྔ་པའི་གསུམ་པ་ལས། གང་ཞིག་འགྲོ་ལ་ཕན་པ་ཡི། །ཀུན་འདར་གྱི་ནི་སྤྱོད་པ་གསུངས། །ཞེས་པ་དང་། ཀུན་བཟང་རྫོགས་པའི་སངས་རྒྱས་མཚུངས་པ་མེད་པ་གྲུབ་པར་འགྱུར་བས། །སྤྱོད་པའི་ཕན་ཡོན་ངེས་པར་རིག་ནས་རྡོ་རྗེ་ཅན་གྱིས་གསུངས་སོ། །ཞེས་གསུངས་སོ། །ཀུན་འདར་གྱི་སྤྱོད་པ་ལ་མིང་གི་རྣམ་གྲངས་སྨྱོན་པའི་བརྟུལ་ཞུགས་ཀྱི་སྤྱོད་པ་ཞེས་བྱ་བ་དང་། རྒྱལ་བུ་གཞོན་ནུའི་སྤྱོད་པ་ཞེས་བྱ་བ་དང་། གསང་སྤྱོད་ཅེས་བྱའོ། །ཀུན་ཏུ་བཟང་པོའི་སྤྱོད་པ་ལ་མིང་གཞན་དོན་ཕྱོགས་ལས་རྣམ་པར་རྒྱལ་བའི་སྤྱོད་པ་ཞེས་བྱ་བ་དང་། རྒྱལ་ཚབ་ཆེན་པོའི་ས་ལ་གནས་པ་བརྟུལ་ཞུགས་ཀྱི་སྤྱོད་པ་ཞེས་བྱ་བ་དང་། འཇིག་རྟེན་པའི་མངོན་དུ་སྤྱོད་པ་ཞེས་བྱའོ། །དབྱེ་བ་སོ་སོའི་མཚན་ཉིད་ནི། ཅིའི་ཕྱིར་ཀུན་འདར་གྱི་སྤྱོད་པ་ཞེས་བྱ་ཞེ་ན། སྨྱོན་པ་འདྲ་བས་འཇིག་རྟེན་པ་རྣམས་འཇིགས་ཤིང་འདར་བས་ཀུན་འདར་རམ། ཡང་ཀུན་འདར་ལ་སྒྲ་སོར་བཞག་ན་ཨ་ཝ་དྷཱུ་ཏཱི་ཞེས་བྱ་སྟེ། དེ་ནི་གཉིས་སྤངས་ཞེས་བྱ་བར་ཡང་འགྱུར་བས་ན་བཟའ་བྱ་དང་། བཟའ་བྱ་མ་ཡིན་པ་གཉིས་མེད། བཏུང་བྱ་དང་བཏུང་བྱ་མ་ཡིན་པ་གཉིས་མེད། བགྲོད་བྱ་དང་བགྲོད་བྱ་མ་ཡིན་པ་གཉིས་མེད། བླང་བྱ་དང་དོར་བྱ་གཉིས་སུ་མེད་པར་སྤྱོད་པ་སྟེ། རྩ་རྒྱུད་དང་པོའི་དྲུག་པ་ལས། བཟའ་དང་བཟའ་མིན་སྤྱོད་པ་དང་། །དེ་བཞིན་བཏུང་མིན་སྤྱོད་པ་དང་། །བགྲོད་དང་བགྲོད་མིན་སྔགས་པ་ཡིས། །རྣམ་རྟོག་ཉིད་དུ་མི་བྱའོ། །ཞེས་པ་དང་། བརྟག་པ་ལྔ་པ་དངོས་ལས། བཟའ་བཅའ་དེ་བཞིན་བཏུང་བ་ཉིད། །ཇི་ལྟར་རྙེད་པ་རབ་ཏུ་བཟའ། །ཡིད་འོང་མི་འོང་རྣམ་རྟག་༼རྟོ༷ག་༽ཙམ་ཡིན་པའི་ཕྱིར། །ཞེན་པ་ཙམ་དུ་མི་བྱའོ། །ཞེས་བྱ་བ་ལ་སོགས་པ་གསུངས་སོ། །དེ་ལྟར་ན་ཨ་ཝ་དྷཱུ་ཏཱིའི་སྤྱོད་པ་ཞེས་བྱ་སྟེ། ལྔ་པའི་གསུམ་པ་ལས། དཔལ་ལྡན་རྡོ་རྗེ་སེམས་དཔས་ནི། །གང་ཞིག་འགྲོ་ལ་ཕན་པའི་ཕྱིར། །ཀུན་འདར་གྱི་ནི་སྤྱོད་པ་གསུངས། །ཞེས་སོ། །ཅིའི་ཕྱིར་སྨྱོན་པའི་བརྟུལ་ཞུགས་ཞེས་བྱ་ཞེ་ན། སྨྱོན་པར་བརྫུས་ནས་རིགས་ལ་སོགས་པ་གསང་ནས་སྤྱོད་པ་བྱེད་པ་སྟེ། ལྔ་པ་དངོས་ལས། བཟའ་དང་བཟའ་མིན་ཇི་སྙེད་པ། །སྨྱོན་པའི་སྦྱོར་བས་བཟའ་བར་བྱ། །ཞེས་སོ། །ཅིའི་ཕྱིར་རྒྱལ་བུ་གཞོན་ནུའི་སྤྱོད་པ་ཞེས་བྱ་ཞེ་ན། རྒྱལ་ཚབ་ཆེན་པོའི་ས་དྲོད་ཆེན་པོ་མ་ཐོབ་པའི་ཕྱིར་རྒྱལ་བུ་གཞོན་ནུའི་སྤྱོད་པ་ཞེས་བྱའོ། །རྣལ་འབྱོར་པ་ཁས་མི་ལེན་པར་གསང་སྟེ་སྤྱོད་པའི་ཕྱིར་གསང་སྤྱོད་ཅེས་བྱ་སྟེ། ལྔ་པའི་གསུམ་པ་ལས། དེ་ལྟར་སྤྱོད་པ་དེའི་བསམ་པ་དང་དགོས་ཆེད་སོགས་མཆོག་ཏུ་བསམ་བྱས་ནས་༼ཡ༷ས་གན༷ས༽། །ཏེ་གཞན་གྱིས་རྟོགས་དཀའ་བ་ཡིན་ནོ། །ཤིན་ཏུ་གསང་བས་ཡོ་གིས་བསྒོམ། །ཞེས་སོ། །ཅིའི་ཕྱིར་ཀུན་ཏུ་བཟང་པོའི་སྤྱོད་པ་ཞེས་བྱ་ཞེ་ན། རང་གི་རྟོགས་པའི་ཡེ་ཤེས་ཀྱི་ངོ་བོར་ཀུན་ཏུ་བཟང་པོར་རྟོགས་པའི་ཕྱིར་ཀུན་ཏུ་བཟང་པོ་སྟེ། ལྔ་པའི་གསུམ་པ་ལས། ཀུན་བཟང་མཚུངས་པ་མེད་འགྲུབ་པས། །སྤྱོད་པ་ངེས་རིག་རྡོ་རྗེ་ཅན། །ཞེས་གསུངས་སོ། །ཅིའི་ཕྱིར་ཕྱོགས་ལས་རྣམ་པར་རྒྱལ་བའི་སྤྱོད་པ་ཞེས་བྱ་ཞེ་ན། མི་མཐུན་པའི་ཕྱོགས་གང་གིས་ཀྱང་རྫི་མི་ནུས་ཤིང་དེ་ལ་རྒྱལ་༼ལས༷་རྒྱལ༷་༽བས་ན་ཕྱོགས་ལས་རྣམ་པར་རྒྱལ་བ་སྟེ། ལྔ་པའི་གསུམ་པ་ལས། བྱང་ཆུབ་སེམས་ལ་ནི་སེམས་བཞག་ནས། །ཕྱོགས་ལས་རྒྱལ་བའི་སྤྱོད་པ་བརྩམ། །ཞེས་གསུངས་སོ། །ཅིའི་ཕྱིར་རྒྱལ་ཚབ་ཆེན་པོའི་སྤྱོད་པ་ཞེས་བྱ་ཞེ་ན། རྣམ་ཤེས་དང་ཡེ་ཤེས་ཆ་མཉམ་སྟེ་ཟག་པ་མེད་པའི་ཡེ་ཤེས་རྣམས་མངོན་དུ་གྱུར་པས་གཞན་དོན་རྣམས་ཐོགས་པ་མེད་པར་ནུས་པའི་ཕྱིར་འཇིག་རྟེན་པའི་རྒྱལ་པོའི་རྒྱལ་ཚབ་ཆེན་པོ་དང་འདྲ་སྟེ། ལྔ་པ་དངོས་ལས། ཡང་ནི་དཔལ་ལྡན་རྒྱལ་ཚབ་ཆེ། །བརྟུལ་ཞུགས་སྤྱོད་པའང་བསྒྲགས་པ་ཉིད། །སེམས་ཅན་ཀུན་གྱི་དོན་གྱི་ཕྱིར། །གང་གིས་དངོས་གྲུབ་མཐར་འགྲོ་བ། །ཞེས་གསུངས་སོ། །དེ་ཉིད་ལ་འཇིག་རྟེན་པའི་མངོན་དུ་སྤྱོད་པའི་ཕྱིར་ཚོགས་བདག་ཆེན་པོའི་སྤྱོད་པ་ཞེས་ཀྱང་བྱའོ། །སྤྱི་དོན་བཞི་པ་སྤྱོད་པ་སྤྱད་པའི་དུས་ནི་གཉིས་ཏེ། གང་གི་ཚེ་སྤྱད་པ་དང་། ཇི་སྲིད་ཅིག་སྤྱད་པའོ། །དང་པོ་ནི་དྲོད་ཐོབ་ནས་སྤྱོད་པ་སྤྱད་པ་ཡིན་ཏེ། དེའང་གསུམ་སྟེ། དྲོད་ཆུང་ངུ་ཐོབ་ནས་ཀུན་འདར་གྱི་སྤྱོད་པ་གསང་སྟེ་སྤྱོད་པ་ཞེས་བྱ་བ་མཚན་མོའི་དུས་སུ་བཟའ་བྱ་དང་བཟའ་བྱ་མ་ཡིན་པ་གཉིས་སུ་མེད་པ་ལ་སོགས་པ་སྤྱོད་ལ། ཉིན་མོར་རང་གི་ཁྱིམ་དུ་བྲམ་ཟེ་ཡིན་ན་བྲམ་ཟེ་ཟླ་དང་མཐུན་པར་སྤྱོད། དེ་བཞིན་དུ་རང་གི་རིགས་དང་རྗེས་སུ་མཐུན་པར་སྤྱོད་ཅིང་སྡོད་དོ། །དེས་ངེས་པར་དྲོད་འབྲིང་པོ་སྐྱེ་སྟེ། དེ་སྐྱེས་པ་དང་ཀུན་འདར་གྱི་སྤྱོད་པ་འཇིག་རྟེན་པའི་མངོན་དུ་སྤྱོད་པ་ཞེས་བྱ་བ་རང་གི་ཡུལ་འཁོར་སྤངས་ནས་རིགས་ལ་སོགས་པ་གསང་ནས་སྨྱོན་པར་བརྫུས་ཏེ་སྤྱོད་པ་ཡིན་ནོ། །དེས་དྲོད་ཆེན་པོ་ཐོབ་སྟེ་ཟག་པ་མེད་པའི་ཡེ་ཤེས་འཇིག་རྟེན་ལས་འདས་པའི་གྲུབ་མཐའ་སྙོགས་ནས། ལུང་བསྟན་པའི་ཕྱག་རྒྱ་བྱུང་བ་དང་། ཀུན་ཏུ་བཟང་པོའི་སྤྱོད་པ་འཇིག་རྟེན་གྱི་མངོན་དུ་སྤྱད་དོ། །གལ་ཏེ་དྲོད་འབྲིང་པོ་ལ་བརྟེན་ནས་ཀུན་འདར་སྤྱད་ཀྱང་དབང་པོ་རྟུལ་ཏེ། དེ་དྲོད་ཆེན་པོ་མ་ཐོབ་ན་དྲག་ཤུལ་གྱིས་སྒྲུབ་པར་བྱེད་པ་ནི་གོང་དུ་བཤད་ཟིན་ཏོ། །གཉིས་པ་སྤྱོད་པ་དེ་དག་ཀྱང་དུས་ཇི་སྲིད་ཅིག་སྤྱད་སྙམ་ན། ཟླ་བ་རེ་རེ་སྤྱོད་དེ། རྩ་རྒྱུད་ཕྱི་མའི་གཉིས་པ་ལས། ཟླ་བ་གཅིག་ཏུ་གསང་ལ་སྤྱོད། །ཇི་སྲིད་ཕྱག་རྒྱ་མ་རྙེད་པ། །ཞེས་གསང་སྤྱོད་ཀྱི་དུས་བསྟན་ལ། དེ་ཉིད་ལས། ཟླ་བ་གཅིག་གིས་སྐལ་ལྡན་པར། །འགྱུར་བ་འདི་ལ་ཐེ་ཚོམ་མེད། །ཅེས་འཇིག་རྟེན་པའི་མངོན་དུ་སྤྱད་པའི་དུས་བསྟན་ཏོ། །སྤྱི་དོན་ལྔ་པ་རྟེན་གྱི་གང་ཟག་ནི་དྲོད་ཐོབ་ཅིང་སེམས་ཅན་གྱི་དོན་དུ་ཚེ་འདི་ཉིད་ལ་མཆོག་གི་དངོས་གྲུབ་འདོད་པ་ཆོས་གཉིས་དང་ལྡན་པ་ཡིན་ཏེ། རྩ་རྒྱུད་དང་པོའི་དྲུག་པ་ལས། ཅུང་ཟད་དྲོད་ནི་ཐོབ་པ་ན། །གལ་ཏེ་སྤྱོད་པ་བྱེད་འདོད་པས། །གལ་ཏེ་ཚེ་འདི་ལ་སངས་རྒྱས་འགྲུབ་པར་འགྱུར་བའི་འདོད་ཡོད་ན། །འདིས་ནི་སྤྱོད་པ་སྤྱད་པ་ཉིད། །ཅེས་གསུངས་སོ། །དེ་ཡང་དྲོད་མ་ཐོབ་ན་སྤྱོད་པ་སྤྱད་པར་མི་རིགས་ཏེ། རྩ་རྒྱུད་ཕྱི་མའི་གཉིས་པ་ལས། གང་བཤད་འཇིགས་སུ་རུང་པའི་ཚུལ་ཅན་གྱིས། །སྤྱོད་པ་འདོད་ཡོན་ལ་ལོངས་སྤྱོད་ཕྱིར་མ་གསུངས་ཏེ་རང་གི་རྟོགས་པ་འཕེལ་བའི་ཕྱིར་རོ། །ཞེས་པ་དང་། དཔལ་གསང་བ་གྲུབ་པ་ལས་ཀྱང་། གང་ཕྱིར་དེ་ཁོ་ན་ཉིད་རྟོགས་པ་མེད་བཞིན་དུ། །ངོ་མཚར་ཆེ་བ་ལྟར་བྱེད་པ། །ཇི་སྲིད་ནམ་མཁའ་མི་འཇིག་པའི་བར་དུ། །ཤི་བའི་འོག་ཏུ་དམྱལ་བར་སྐྱེ། །ཞེས་པ་དང་། དེ་ཉིད་ལས། གཞན་དུ་དེ་ཁོ་ན་ཉིད་རྟོགས་པ་དམན་པ་ཡིས། །འཚོ་བ་ཙམ་འགྲུབ་པའི་རྒྱུ་ཅན་ཉིད་གྱུར་པ། །དམྱལ་བ་ཐོབ་པར་བྱེད་པའི་རྒྱུ། །རྟོགས་ལྡན་དུ་མིང་བཏགས་པའི་བརྟུལ་ཞུགས་ཀྱིས་ནི་ཅི་ཞིག་བྱ། །ཞེས་གསུངས་སོ། །མཚན་ཉིད་གཉིས་པ་དྲོད་ཐོབ་ཀྱང་བྱང་ཆུབ་ཀྱི་སེམས་ཀྱིས་ཚེ་འདི་ཉིད་ལ་ཕྱག་རྒྱ་ཆེན་པོ་མི་འདོད་ན་སྤྱོད་པ་སྤྱད་མི་དགོས་ཏེ། ཐུན་མོང་གི་དངོས་གྲུབ་ནི་ངག་ཏུ་བརྗོད་པ་ཙམ་གྱིས་འགྲུབ་པའི་ཕྱིར་རོ། །དེ་ལྟར་མཚན་ཉིད་གཉིས་དང་ལྡན་པས་སྤྱོད་པ་སྤྱད་དོ། །སྤྱི་དོན་དྲུག་པ་སྤྱོད་པའི་དགོས་པ་ནི་གཉིས་ཏེ། ཀུན་འདར་གྱི་སྤྱོད་པའི་དགོས་པ་དང་། ཀུན་ཏུ་བཟང་པོའི་དགོས་པའོ། །དང་པོ་ལ་གཉིས་ཏེ། རང་གི་སེམས་ཀྱི་བརྟན་གཡོ་བརྟག་པ་དང་། གྲུབ་པ་ཐོབ་པའི་ཡུལ་དང་གྲོགས་དབང་དུ་བྱ་བའོ། །དང་པོ་ལ་ཡང་རྩ་རྒྱུད་ཕྱི་མའི་གཉིས་པ་ལས། ཡིད་ནི་བརྟན་ནམ་གཡོ་འམ་ཅི། །རང་གི་སེམས་ནི་སོ་སོར་བརྟག །ཅེས་པ་དང་། རྩ་རྒྱུད་དང་པོའི་དྲུག་པ་ལས། སྤྱོད་པ་གང་གིས་དངོས་གྲུབ་ཀྱི་མཐར་ཐུག་པར་འགྲོ་བ། །ཀྱེ་ཡི་རྡོ་རྗེའི་དངོས་གྲུབ་རྒྱུས། །ཞེས་བྱ་བ་ལ་སོགས་པ་གསུངས་སོ། །ཀུན་ཏུ་བཟང་པོའི་སྤྱོད་པའི་དགོས་པ་ནི་སེམས་ཅན་རྣམས་ཡོངས་སུ་སྨིན་པར་བྱ་བའི་དགོས་པ་སྟེ། བརྟག་པ་ལྔ་པ་དངོས་ལས། སེམས་ཅན་རྗེས་སུ་གཟུང་བའི་རྒྱུར། །བློ་ལྡན་ཆེན་པོས་རྒྱུ་བར་བྱ། །ཞེས་བྱ་བ་ལ་སོགས་པ་གསུངས་སོ། །མདོར་ན་ཀུན་འདར་གྱི་སྤྱོད་པ་རང་དོན། ཀུན་ཏུ་བཟང་པོའི་སྤྱོད་པ་གཞན་དོན་ནོ། །དེ་ལྟར་སྤྱོད་པ་འདིའང་རྩ་རྒྱུད་ལེའུ་དྲུག་པ་དང་། ཕྱི་མའི་གཉིས་པ་དང་། གསུམ་པ་རྣམས་དང་། རྡོ་རྗེ་གུར་ལེའུ་བཅུ་པ་དང་། སཾ་པུ་ཊའི་བརྟག་པ་ལྔ་པའི་གསུམ་པ་དང་། བཞི་པ་ལས་བསྟན་ཏོ། །དྲོད་ཐོབ་ནས་སྤྱོད་པ་བྱ་བ་བསྟན་ཟིན་ཏོ། །དེ་ལྟར་སྤྱོད་པ་ལ་གནས་པ་དེས་མཆོག་གི་དངོས་གྲུབ་ཀྱི་མངོན་པར་རྟོགས་པ་ལྔ་པ་ཕྱག་རྒྱ་ལ་བརྟེན་ནས་ཨཱ་ལི་དང་ཀཱ་ལིའི་བདག་ཉིད་ཀྱི་བྱང་ཆུབ་ཀྱི་སེམས་བསྒོམ་པ་བསྟན་ཏོ། །དེ་ལ་གཉིས། ཉེ་རྒྱུའི་དགོས་པ་དང་། དེ་ཉམས་སུ་བླང་བའི་ཚུལ་ལོ། །དང་པོ་ནི་ཕྱག་རྒྱ་ཆེན་པོ་བསྒྲུབ་པ་ལ་རྟེན་ཕྱག་རྒྱར་མ་བརྟེན་པར་འགྲུབ་པར་མི་འགྱུར་ཏེ། རྩ་རྒྱུད་དང་པོའི་བཅུ་པ་ལས། དངོས་གྲུབ་ཀྱི་མཚན་ཉིད་རྟོགས་པས་མི་ཕྱེད་པ། །ཕྱག་རྒྱའི་རྣལ་འབྱོར་པ་ཡིས་འགྲུབ། །ཅེས་གསུངས་པ་དང་། གུར་ལེའུ་བཅོ་ལྔ་པ་ལས་ཀྱང་། ཕྱག་རྒྱའི་དངོས་གྲུབ་དངོས་གྲུབ་ཆེ། །དངོས་གྲུབ་ཀུན་གྱི་སྤྱོད་ཡུལ་མིན། །ཞེས་བྱ་བ་ལ་སོགས་པ་གསུངས་སོ། །དེ་ཡང་སྤྱིར་ཕྱག་རྒྱ་བསྟེན་པའི་དུས་གསུམ་སྟེ། དང་པོ་དབང་དུས་དང་། བར་དུ་ལམ་དུས་དང་། མཐར་འབྲས་བུའི་དུས་སོ། །དེ་ལ་དུས་ཐམས་ཅད་དུ་བསྟེན་ན་ནི་འགྲུབ་ལ། ཐོག་མ་གཉིས་སུ་བསྟེན་ཡང་མཐར་མ་བསྟེན་ན་མི་འགྲུབ་ཅིང་། ཐོག་མ་གཉིས་སུ་མ་བསྟེན་ཡང་མཐར་བསྟེན་ན་འགྲུབ་པས་ན་མངོན་པར་རྟོགས་པ་འདི་གལ་ཆེའོ། །དེ་ལ་དེ་ལྟར་ཕྱག་རྒྱའི་ལམ་གྱིས་ཅིས་ཀྱང་གྲོལ་ཞིང་དེ་དགོས་ན་བུད་མེད་བདག་མེད་མའི་རྣལ་འབྱོར་མས་བདག་དང་རྟོགས་པ་མཉམ་པའི་སྐྱེས་པ་དང་ཕྲད་ན་ནི་གྲོལ་བར་འགྱུར་ལ། གལ་ཏེ་མ་ཕྲད་ན་ཇི་ལྟར་སངས་རྒྱས་ཀྱི་ལམ་བསྒྲུབ་སྙམ་ན། ས་བཅུ་པའི་བར་དུ་ནི་རྟེན་དེ་ཉིད་ཀྱིས་བགྲོད་ལ། དེ་ནས་ནུས་པ་མཆོག་དང་ལྡན་པའི་ཕྱིར་བདག་ཉིད་ཀྱི་ལུས་སྐྱེས་པར་བསྒྱུར་ལ། མངོན་པར་རྟོགས་པ་ལྔ་པ་འདི་ཉམས་སུ་བླངས་ལ་སངས་རྒྱས་བསྒྲུབ་བོ། །དེ་ཡང་ཐབས་ཀྱི་རྐྱེན་གྱིས་ནི་ཤེས་རབ་གྲོལ་བར་འགྱུར་ལ། ཤེས་རབ་ཀྱི་རྐྱེན་གྱིས་ཐབས་གྲོལ་བར་ཡང་མི་འགྱུར་ཞིང་། ཤེས་རབ་ཀྱི་རྟེན་རྐྱང་པ་ཉིད་ཀྱིས་གྲོལ་བར་མི་འགྱུར་བས་བུད་མེད་དྲོད་ཆེན་པོ་ཐོབ་པ་དེས་བདག་ཉིད་ཀྱི་ལུས་ཧེ་རུ་ཀ་ཆེན་པོར་བྱིན་གྱིས་བརླབས་ཏེ། གཟོད་མིའི་ཕྱག་རྒྱ་ལ་སོགས་པ་ཕྱག་རྒྱའི་རིགས་བཞི་པོ་དང་པོ་ནས་གོམས་པ། གྲུབ་པ་ཐོབ་པ། ལུང་བསྟན་པ། ནུས་མཐུའི་བཀུག་པ་གང་རུང་ཞིག་བླངས་ལ་འབྲས་བུ་དང་མཚམས་སྦྱར་བར་བྱ་སྟེ། དེ་སྐད་དུ། རྩ་རྒྱུད་ཕྱི་མའི་གཉིས་པ་ལས་ཀྱང་། བུད་མེད་གཟུགས་ནི་སྤངས་ནས་གཞན། །ཧེ་རུ་ཀ་ཡི་གཟུགས་སུ་བྱ། །ཞེས་བྱ་བ་ལ་སོགས་པ་གསུངས་སོ། །དོན་གཉིས་པ་དེ་ལྟ་བུའི་མངོན་པར་རྟོགས་པ་དེ་ཉམས་སུ་བླང་བ་ལ་དྲུག་སྟེ། ཉེ་བའི་རྒྱུའི་རང་གི་ངོ་བོ་དང་། དེ་གང་གི་ཚེ་མངོན་དུ་བྱ་བའི་དུས་དང་། མངོན་དུ་བྱ་བའི་གནས་དང་། གང་ལ་བརྟེན་ཏེ་སྒྲུབ་པའི་རྟེན་དང་། མངོན་དུ་བྱེད་པའི་ཐབས་དང་། ཐབས་ལ་བརྟེན་ཏེ་མངོན་དུ་བྱས་པ་ལས་འབྲས་བུ་འགྲུབ་པའི་ཚུལ་ལོ། །དང་པོ་ལ་གཉིས། བརྒྱད་དྲུག་གི་བདག་ཉིད་དང་། དེ་ལ་རྩོད་པ་སྤང་བའོ། །དང་པོ་ནི་ཐབས་གཉིས་ལས་བྱུང་བའི་ཨཱ་ལི་དང་ཀཱ་ལིའི་བདག་ཉིད་བྱང་ཆུབ་ཀྱི་སེམས་ཆོས་བརྒྱད་དམ་དྲུག་གི་བདག་ཉིད་ཅན་ཞེས་བྱ་བ་ཡིན་ནོ། །དེ་ལ་ཐབས་གཉིས་ལ་བརྟེན་ནས་བྱུང་བ་ནི། རང་བྱིན་བརླབ་ལ་བརྟེན་ནས་བྱུང་བ་ནི་ཨཱ་ལི་བྱང་ཆུབ་ཀྱི་སེམས་ཞེས་བྱ་ལ། དཀྱིལ་འཁོར་འཁོར་ལོ་ལ་བརྟེན་ནས་བྱུང་བ་ལ་ཀཱ་ལི་བྱང་ཆུབ་ཀྱི་སེམས་ཞེས་བྱ་སྟེ། བརྟག་པ་དགུ་པའི་དང་པོ་ལས། ཨཱ་ལི་ནི་ཨ་ས་མ་མཉམ་པ། ལ་ཏི་ཡང་ན་ལི་ལེན་པ་སྟེ་མི་མཉམ་པའི་བདེ་བ་ལེན་པའི་ཕྱིར་ཁུ་བ་བུང་བ་ནི་བྷྲ་མ་ར་སྟེ་བྷྲ་མ་ར་འཁྲུལ་བ། ར་ཧེ་ཡ་བྲལ་བར་བྱེད་པ་ཞེས་པ་འཁྲུལ་པ་བྲལ་བར་བྱེད་པ་ཞེས་བྱར་བརྗོད། །བུང་བ་དེ་ཉིད་ནི་ཡེ་ཤེས་ཡིན་པའི་ཕྱིར་རྡོ་རྗེ་བྱིས་པ་སྐྲག་པས་འཇིགས་བྱེད་ཉིད། །ཀཱ་ལི་ནི་ཀཾ་བདེ་བ་ཨཱ་ལི་དྲི་ཀུན་ནས་མྱོང་བའི་ཕྱིར་ཕྱག་རྒྱའི་བྷ་ག །སྐྱེ་གནས་ཀྱི་ཆུ་སྐྱེས་འདིས་རྒྱས་པར་བྱེད་པའི་ཕྱིར་མེ་ཏོག་ཅེས་རྡུལ་རྒྱལ་པོ་ནི་རཱ་ཛ་སྟེ་རཉྫ་ཡ་ནི་འཚེད་པར་བྱེད་པ་སྟེ་བྱང་སེམས་རང་གི་གནས་སུ་དྲངས་ནས་བདེ་བའི་ཡེ་ཤེས་ཀྱི་འཚེད་པས་རྒྱལ་པོ། །དེས་ཁྱད་པར་དུ་བྱས་པའི་ལུས་ནི་མེ་ཏོག་རྡོ་རྗེ་ཅན་གྱི་ལུས་ཏེ་དེའང་རྡོ་རྗེ་ནི་སེམས་ཀྱི་རྡོ་རྗེ་སྟེ་བྱང་ཆུབ་ཀྱི་སེམས་དེས་བཟུང་བའོ། །ཞེས་བྱ་བ་ལ་སོགས་པ་གསུངས་སོ། །ཆོས་བརྒྱད་དམ་དྲུག་གི་བདག་ཉིད་ཅན་ཞེས་བྱ་ལ། བྱང་ཆུབ་ཀྱི་སེམས་གཅིག་ཉིད་སྟོན་༼རྟེ༷ན་༽ནམ་ཡོན་ཏན་གྱི་ལྡོག་པས་ཕྱེ་ན་ཐབས་སྒྲུབ་པ་པོས་རང་བྱིན་བརླབ་བསྒོམ་པའི་ཞུ་བདེ་གཉིས། དཀྱིལ་འཁོར་འཁོར་ལོ་བསྒོམ་པའི་ཞུ་བདེ་གཉིས་ཏེ་བཞི། ཤེས་རབ་ལ་ཡང་དེ་བཞིན་དུ་བཞི་སྟེ་བརྒྱད་དོ། །དྲུག་ནི་ཤེས་རབ་ཀྱིས་རང་བྱིན་བརླབ་མ་བསྒོམས་ཀྱང་ཐབས་ཀྱི་དེས་བཏུབ་པས་དྲུག་གོ། ཡང་ན་ཐབས་ལ་ཞུ་བ་བདེ་བ་མི་རྟོག་པ་རང་རིག་པ་བཞི། ཤེས་རབ་ལ་ཡང་བཞི་སྟེ་བརྒྱད་དོ། །དྲུག་ནི་ཞུ་བདེ་༼མི༷་རྟོ༷ག་པ༷་༽གསུམ་གསུམ་རང་རིག་པ་ནི་དེའི་ཆོས་ཉིད་ཡིན་པས་མ་བསྔོས་ན་དྲུག་སྟེ། གང་ལྟར་ཡང་རྟེན་ཐིག་ལེ་བཞི་ལ་བརྟེན་པ་བདེ་བ་བཞི་ཡོད་པ་ལྟ་བུ་ནི་མ་ཡིན་ཏེ། རྟེན་ཐིག་ལེ་གཅིག་ཉིད་བརྟེན་པ་བདེ་བ་ལ་སོགས་པ་དུ་མ་དང་ལྡན་པས་ཡོན་ཏན་གྱི་ལྡོག་པས་ཕྱེ་བས་བརྒྱད་དྲུག་ལ་སོགས་པར་འགྱུར་བ་ཡིན་ནོ། །དེའང་དང་པོ་རང་བྱིན་བརླབ་ཀྱི་ཐིག་ལེ་ཅུང་ཟད་དྭངས་པར་བྱས་ལ་དཀྱིལ་འཁོར་འཁོར་ལོས་ཤིན་ཏུ་དྭངས་པར་བྱས་པ་ཡིན་ནོ། །གཉིས་པ་རྩོད་སྤོང་ནི་འོ་ན་ སེམས་ཀྱི་རྟོག་པ་འཆར ་བ་ཞུ་བ་ལ་ལྟོས་པར་མི་རིགས་སོ་སྙམ་ན། ལྟོས་ཏེ་ཇི་སྲིད་དུ་ཟག་བཅས་ཀྱི་ལུས་གནས་པ་དེ་སྲིད་དུ་ཚོགས་པ་གཅིག་པའི་འབྲེལ་བས་གནས་ཏེ། རྩ་རྒྱུད་ཕྱི་མའི་བཞི་པ་ལས། ལུས་སྤངས་ནས་ནི་སེམས་ཀྱིས་ནི། །གནས་པ་གཞན་དུ་མི་མཐོང་ངོ་། །ཞེས་བྱ་བ་དང་། སེམས་སྤངས་ནས་ནི་ལུས་ཀྱིས་ནི། །མཛེས་པ་གཞན་དུ་མི་འགྱུར་རོ། །ཞེས་གསུངས་པས་སོ། །དེ་བས་ན་གསང་སྔགས་ཀྱི་ཐབས་ཟབ་མོ་ནི་རྟེན་ལུས་ལ་གནད་དུ་བསྣུན་པས་བརྟེན་པ་སེམས་ལ་གནད་དུ་བསྣུན་པ་ཡིན་ནོ་ཞེས་གསུངས་སོ། །ཟག་པ་མེད་པ་སངས་རྒྱས་ཀྱི་དུས་ནའང་ཐུགས་རྟོག་པ་མེད་པ་ཆོས་ཀྱི་སྐུ། ལུས་ཟག་པ་མེད་པ་ལོངས་སྤྱོད་རྫོགས་པའི་སྐུ། ཡེ་ཤེས་ཀྱི་རང་བཞིན་ཅན་གྱི་སྐུ་ལ་བརྟེན་པ་ཡིན་ཏེ། རྡོ་རྗེ་གུར་ལེའུ་བཅུ་བཞི་པ་ལས། རྡོ་རྗེ་སྙིང་པོ་རྣམ་པ་མེད་པའི་བྱང་ཆུབ་དེ་སྐད་མ་སྨྲ་ཞིག་ཅེས་གསུངས་པས་སོ། །གལ་ཏེ་དེ་ལྟར་ན། གང་དག་ང་ལ་གཟུགས་སུ་མཐོང་། །གང་གིས་ང་ལ་སྒྲར་ཤེས་པ། །ལོག་པར་ཤེས་པའི་བསམ་པ་ཅན། །སྐྱེ་བོ་དེས་ནི་ང་མི་མཐོང་། །ཞེས་བྱ་བའམ། སློབ་དཔོན་ཀླུ་སྒྲུབ་ཀྱིས་ཀྱང་། སྐུ་མིན་སྐུ་ལས་གཞན་པ་མིན། །དེ་བཞིན་གཤེགས་པ་སྐུ་ལྡན་མིན། །ཞེས་བྱ་བ་ལ་སོགས་པ་དང་མི་འགལ་ལམ་སྙམ་ན། དེ་དག་ནི་དོན་དམ་པ་འབའ་ཞིག་ལ་དགོངས་པ་ཡིན་ཏེ། ཡང་དག་པར་ན་སངས་རྒྱས་ཞེས་བྱ་བ་ཉིད་ཀྱང་བློའི་ཡུལ་དུ་མ་གྲུབ་པའི་ཕྱིར་རོ། །སངས་རྒྱས་འདོད་པའི་ཚེ་སེམས་མེད་པའི་སངས་རྒྱས་བེམ་པོའང་མི་རིགས་ལ་སྐུ་མེད་པའང་མི་རིགས་པས་ན། སློབ་དཔོན་ཀླུ་སྒྲུབ་ལ་སོགས་པ་ཐམས་ཅད་ཀྱང་ཟུང་དུ་འཇུག་པའི་སྐུ་ཞེས་བྱ་བ་བཞེད་པ་ཡིན་ནོ། །གཉིས་པ་དུས་ལ་གཉིས། ཉེ་རྒྱུ་ནམ་བསྒོམ་པའི་དུས་དང་། ནམ་འགྲུབ་པའི་དུས་སོ། །དང་པོ་ནི་རིམ་པ་གཉིས་བསྒོམས་ཏེ་དྲོད་ཐོབ་ནས་གསང་སྤྱོད་ཟླ་བ་གཅིག་དང་། འཇིག་རྟེན་པའི་མངོན་དུ་ཟླ་བ་གཅིག་སྤྱད་པའི་མཐར་ཉེ་རྒྱུ་སྤྱོད་པའི་སྐལ་པ་དང་ལྡན་པར་འགྱུར་རོ། །གཉིས་པ་ནམ་འགྲུབ་ཅེ་ན། ཞག་བདུན་དུ་སྤྱད་ན་འགྲུབ་པར་གསུངས་ཏེ། རྡོ་རྗེ་གུར་ལེའུ་བཅོ་ལྔ་པ་ལས། ས་བཅུ་གཉིས་པས་བསྒྲུབས་ན་ཉི་མ་གཅིག་གིས་འགྲུབ་པར་འགྱུར། །དེས་མ་འགྲུབ་ན་ཉི་མ་གཉིས་ཀྱིས་ཆོ་ག་དང་། །ས་བཅུ་གཅིག་པས་ཉི་མ་གསུམ་གྱི་སྦྱོར་བ་དང་། །བཅུ་པས་དེ་བཞིན་དུ་ནི་ཉི་མ་བཞི། །དགུ་པས་ཉི་མ་ལྔ་ཡི་སྦྱོར་བ་ཡིས། །འགྲུབ་འགྱུར་འདི་ལ་ཐེ་ཚོམ་མེད། །ཅེས་སོ། །ཞག་བདུན་གྱིས་བསྒྲུབ་པའི་དབང་དུ་བྱས་ན་ཞག་དྲུག་པ་ལ་སྔོན་དུ་ལྷ་དང་བླ་མ་ལ་མེ་ཏོག་ལ་སོགས་མཆོད་བྱས་ནས། །བསམ་གཏན་བསྒོམ་པའི་གནས་སུ་འདུག་པ་དང་། །ཕྱག་རྒྱ་དང་ལྷན་ཅིག་སྙོམས་པར་ཞུགས་ནས་ནི། །རྡོ་རྗེ་མཆོད་པ་ཡང་དག་བརྩམས། །རྡོ་རྗེ་ཉི་མ་ནུབ་པ་སྟེ་སྲོད་ལ་བར་ཆད་མེད་པའི་ལམ་གྱི་དུས་ན། །ཉེ་རྒྱུའི་སྦྱོར་བ་འདི་ནི་ཡང་དག་བརྩམས། །ཉི་མ་འཆར་ཀའི་དུས་སུ་ནི། །དངོས་གྲུབ་འགྲུབ་འགྱུར་འདི་ལ་ཐེ་ཚོམ་མེད། །ཐ་མལ་པའི་འདོད་ཆགས་ལས་མཆོག་ཏུ་གྱུར་པས་འདོད་ཆགས་ཆེན་པོ་ཟག་མེད་ཀྱི་བདེ་བ་ལ་རྗེས་ཆགས་པས། །འདོད་ཆགས་ཆེན་པོའི་རང་བཞིན་ལས། །ཆགས་ཆེན་ཏིང་འཛིན་གནས་ནས་ནི། །ཟུང་འཇུག་གི་སྐུ་ཕྱག་རྒྱ་ཆེན་པོ་རབ་བསྒྲུབ་བྱ། །ཞེས་གསུངས་ཏེ། ཐོ་རངས་མངོན་པར་རྫོགས་པར་འཚང་རྒྱ་བའི་དུས་ཞེས་བྱ་སྟེ། ཐོ་རངས་རླུང་སེམས་དྭངས་པར་གྱུར་པའི་དུས་ཡིན་པའི་ཕྱིར་རོ། །གསུམ་པ་གནས་ལ་གཉིས་ཏེ། ཕྱིའི་གནས་དང་། ནང་གིའོ། །དང་པོ་ནི་གསུམ། ཐུན་མོང་གི་དང་། ཐུན་མོང་མ་ཡིན་པ་ལ་གྲགས་པ་དང་། དོན་དམ་པའིའོ། །དང་པོ་ཐུན་མོང་བ་ལ་གྲགས་པ་རྡོ་རྗེའི་དན་ཡིན་ལ། གཉིས་པ་ཐུན་མོང་མ་ཡིན་པ་ལ་གྲགས་པ་ནི་འོག་མིན་ཡིན་ནོ། །གསུམ་པ་དོན་དམ་པའི་གནས་ནི་རྡོ་རྗེ་ཐེག་པ་བས་སྒྲུབ་པ་པོ་རང་ཉིད་གང་ན་གནས་པ་དེ་ཉིད་རྡོ་རྗེའི་གདན་ཡིན་ཏེ། བདེ་མཆོག་རྩ་རྒྱུད་ལས། རྣལ་འབྱོར་པ་ཆེན་པོ་མཆོག་ཏུ་གྱུར་པ་སེམས་ཀྱི་སྟོང་ཉིད་རྟོགས་པའི་ཧེ་རུ་ཀ། ཡུལ་ཕྱོགས་གང་ན་གནས་གྱུར་པ། །ཡུལ་ངན་མཐའ་འཁོབ་ཡིན་ན་ཡང་། །ཡུལ་དེ་རྡོ་རྗེ་གདན་དུ་ཡོངས་སུ་བརྟག་པ་ཡིན། །ཞེས་གསུངས་ཏེ་༼སོ༷། །༽ནང་གི་གནས་ནི་ཐབས་ཀྱི་རིགས་ཀྱི་བདག་པོའི་ཁ་དང་ཤེས་རབ་ཀྱི་རྩ་མཛེས་པའི་སྤྱི་བོར་ཆོས་འབྱུང་གི་གནས་སུ་འཛོམ་པ་སྟེ། རྩ་རྒྱུད་ཕྱི་མའི་གསུམ་པ་ལས། ཨེ་ཡི་ཆ་བྱད་བཟང་པོ་གང་། །དབུས་སུ་བྃ་གྱིས་རྣམ་པར་བརྒྱན། །བདེ་བ་ཐམས་ཅད་ཀྱི་ནི་གནས། །སངས་རྒྱས་རིན་ཆེན་ཟ་མ་ཏོག །ཅེས་གསུངས་ཏེ། གནས་དེ་ནས་ཨ་ཝ་དྷཱུ་ཏཱིར་མངོན་དུ་བྱའོ། །བཞི་པ་རྟེན་གང་ལ་བརྟེན་ནས་མངོན་དུ་བྱ་ན། སྤྱིར་ཕྱག་རྒྱ་ནི་དང་པོ་ནས་གོམས་པ་དང་། གྲུབ་པ་ཐོབ་པ་དང་། ལུང་བསྟན་པ་དང་། མཐུའམ་ནུས་པས་བཀུག་པ་ཞེས་བྱ་བ་བཞིར་བཤད་པ་ལས། སཾ་པུ་ཊའི་དགོངས་པ་བཞི་ཀས་ཀྱང་གྲོལ་བའི་རྟེན་དུ་འགྱུར་ཏེ། བཅུ་པའི་དང་པོ་ལས། གཏི་མུག་རྣམ་སྣང་གི་བདག་ཉིད་ཀྱི་རྣལ་འབྱོར་ངེས་པར་བསྟེན་བྱ་མ་ཞེས་པ་བརྡ་མིང་ཡིན་ལ་ངོ་བོ། །ལྷ་མོའང་༼མོའམ༷་༽སྐྱེ་གཉིས་བདག་ཉིད་སྐྱེས་ཏེ་བྲམ་ཟེ་མོ། །གཏི་མུག་རྣམ་དག་བསམ་གཏན་པས། །བླངས་ནས་ཡུམ་སྤྱན་མར་བསྐྱེད་ན་མངོན་སུམ་དུ་རྣམ་སྣང་དུ་འགྱུར་རོ། །མ་ནི་རིག་མ་དམ་པ་སྟེ། །གལ་ཏེ་ཕ་སྟེ་བླ་མ་ཡིས་སྔར་བསྟེན་ཀྱང་། །དེ་བཞིན་དེ་ཉིད་ཀྱིས་ཀྱང་འགྲུབ། །བདེ་བ་ཆེན་པོས་བཀའ་སྩལ་ཏོ། །ཞེས་བྱ་བ་ལ་སོགས་པ་གསུངས་སོ། །རྡོ་རྗེ་གུར་གྱི་དགོངས་པས་ནི། མིའི་ཕྱག་རྒྱ་རྣམས་ཀྱིས་ནི་གྲོལ་བའི་རྟེན་དུ་འགྱུར་ལ། ལྷ་མོ་ལ་སོགས་པ་རྣམས་ཀྱིས་ནི་ལོངས་སྤྱོད་ཀྱི་རྐྱེན་ལས་གྲོལ་བར་མི་འགྱུར་ཏེ། གུར་ལེའུ་བཅོ་ལྔ་པ་ལས། པདྨར་རྡོ་རྗེ་ཅན་བཅུག་ནས། །རང་གི་རིག་མ་བདག་སྟེེ་མ་མཱ་ཀིར་བྱ། །དེ་དང་ལྷན་ཅིག་འགྲུབ་པར་འགྱུར། །མིའི་ཕྱག་རྒྱ་འདི་ནི་ཕྱག་རྒྱ་ཆེན་པོར་བརྗོད། །མི་ཡི་ཕྱག་རྒྱ་བླངས་ནས་ནི། །དེ་ལ་ཆོས་ཀྱིས་རབ་ཏུ་དབྱེ་བ་སྟེ་ཕྱག་རྒྱའི་དབྱེ་བ་སོ་སོར་ཤེས་པར་བྱའ།ོ། ཞེས་བྱ་བ་ནས། བདུན་གྱི་རྒྱལ་པོ་དོན་གྲུབ་འགྲུབ་པ་དང་། །ཐམས་ཅད་འདྲེན་པ་རྡོ་རྗེ་འཆང་འགྲུབ་པར་འགྱུར། །ཞེས་གསུངས་པས་ན། མིའི་ཕྱག་རྒྱ་འབའ་ཞིག་བསྔགས་སོ། །གང་ལྟར་ཡིན་ཡང་རུང་སྟེ། ཕྱག་རྒྱ་རྣམས་སྤྱན་ལ་སོགས་པར་བསྐྱེད་ལ། སྙོམས་པར་འཇུག་པ་བྱ་སྟེ། སཾ་པུ་ཊའི་བཅུ་པའི་དང་པོ་ལས། སྤྱན་དང་ལྷན་ཅིག་སངས་རྒྱས་ཉིད། །མཱ་མ་ཀཱི་དང་མི་བསྐྱོད་པ། །འགྲུབ་འགྱུར་དཀར་མོ་ལྷན་ཅིག་ཏུ། །པདྨ་ཅན་དང་སྒྲོལ་མ་ནི། །ལྷན་ཅིག་དོན་ཡོད་གྲུབ་པར་འགྱུར། །རིན་ཆེན་རིན་ཆེན་མ་དང་འགྲུབ། །ཅེས་བྱ་བ་ལ་སོགས་པ་གསུངས་སོ། །ལྔ་པ་རྒྱུ་དེ་མངོན་དུ་བྱེད་པའི་ཐབས་ལ་གཉིས་ཏེ། རང་བྱིན་བརླབ་དང་། དཀྱིལ་འཁོར་འཁོར་ལོའོ། །དང་པོ་རང་བྱིན་གྱིས་བརླབ་པའི་རིམ་པ་ཅུང་ཟད་མངོན་དུ་བྱས་པས་རླུང་སེམས་ཤིན་ཏུ་དྭངས་པར་བྱའོ། །དེ་ནས་གཉིས་པ་དཀྱིལ་འཁོར་འཁོར་ལོའི་ལམ་གྱི་འབྲས་བུ་མངོན་དུ་བྱའོ། །དྲུག་པ་ཐབས་མངོན་དུ་བྱས་པ་ལས་འབྲས་བུ་འགྲུབ་པའི་ཚུལ་ནི། གཉིས་ལས། དང་པོ་ཐེག་པ་ཐུན་མོང་བ་ལ་གྲགས་པའི་དབང་དུ་བྱས་ན། སྲོད་ལ་བར་ཆད་མེད་པའི་ལམ་གྱིས་བདུད་བཏུལ་ནས། ཐོ་རངས་བསམ་གཏན་བཞི་པ་ལ་བརྟེན་ཏེ། རྣམ་པར་གྲོལ་བའི་ལམ་གྱིས་སངས་རྒྱས་ཞེས་ཟེར་ལ། གཉིས་པ་འཚང་རྒྱ་ཚུལ་ཐུན་མོང་མ་ཡིན་པ་ལས་འབྱུང་བ་ལ་གཉིས། ཕྱིའི་མངོན་པར་བྱང་ཆུབ་པ་དང་། ནང་གི་མངོན་པར་བྱང་ཆུབ་པའོ། །དང་པོ་ནི་མངོན་པར་བྱང་ཆུབ་པ་ལྔའི་རིམ་པས་འཚང་རྒྱ་བར་བཤད་ལ། ནང་གི་ནི་དབང་གི་གནས་མཆོག་གི་ཟེ་བར་བྱང་ཆུབ་ཀྱི་སེམས་ཆོས་བརྒྱད་དམ་དྲུག་གི་བདག་ཉིད་ཅན་མངོན་དུ་བྱས་ནས་རླུང་འདྲེན་པ་རྣམ་པ་གསུམ་ཞེས་བྱ་བ་གཡས་དང་། གཡོན་དང་། དབུས་མ་གསུམ་ནས་དྲངས་ཏེ་ཐབས་དང་ཤེས་རབ་ཀྱི་རྒྱུད་སོ་སོར་དག་པར་བྱས་ནས། རླུང་སེམས་ཨ་ཝ་དྷཱུ་ཏཱིར་ཚུད་ཅིང་ཐིམ་པའི་སྐད་ཅིག་ལ་ལུས་ཟག་པ་མེད་པ་འཇའ་ཚོན་ལྟ་བུའི་སྐུ་དང་། སེམས་རྟོག་པ་མེད་པ་མངོན་དུ་འགྲུབ་པར་འགྱུར་ཏེ། རྡོ་རྗེ་གུར་གྱི་བཅོ་ལྔ་པ་ལས། ཕྱག་རྒྱ་ལ་བརྟེན་པའི་དངོས་གྲུབ་ནི་དངོས་གྲུབ་ཆེ་སྟེ་རྣལ་འབྱོར་རྒྱུད་མན་གྱི། །དངོས་གྲུབ་ཀུན་གྱི་སྤྱོད་ཡུལ་མིན། །ཞག་དྲུག་པའི་ཐོ་རངས་དེའི་དུས་སུ་རྡོ་རྗེ་འཆང་དེ་ཡི་ལུས་སྐད་ཅིག་ལ་ཐོབ་ཅིང་། །སྐད་ཅིག་དེ་ཉིད་ན་ནི་བདེ་བ་ཆེན་པོའི་ཚུལ་ཏེ་སྐུར་འགྱུར། །སྐད་ཅིག་ན་ནི་འཇིག་རྟེན་དང་འཇིག་རྟེན་ལས་འདས་པ་ཐམས་ཅད་དེའི་འཁོར་དུ་ལྡན། །ལྷའི་རྣལ་འབྱོར་གང་སྒོམ་པ་དང་ནི་སྔགས་གང་བཟླས་པ་ཉིད་དག་གི་གོ་འཕང་ཐོག་མར་འགྲུབ་པས་རྣམ་སྣང་གི་རྣལ་འབྱོར་པ་ཡིན་ན་ཐོག་མར། སྐད་ཅིག་ལ་སངས་རྒྱས་རྣམ་སྣང་མཛད། །སྤྱན་གྱིས་ཕྲག་ནས་འཁྱུད་པའོ། །ཞེས་བྱ་བ་ནས། ཐམས་ཅད་འདྲེན་པར་འགྲུབ་པར་འགྱུར། །ཞེས་པ་དང་། ཡང་སཾ་པུ་ཊའི་བཅུ་པའི་གཉིས་པ་ལས། དེ་ནས་གང་དུ་རིག་མའི་སྐྱེས་བུ་གྲུབ་པ་དེས་འདི་ལྟ་བུའི་ཕུན་སུམ་ཚོགས་པ་འབྱུང་སྟེ་ཞེས་བྱ་བ་ལ་སོགས་པ་དང་། ཕྱག་རྒྱའི་སྐྱེ་གནས་ཀྱི་སྙིང་པོར་ཁམས་གསུམ་ཐམས་ཅད་མཐོང་བ་དང་། ཞེས་བྱ་བ་ལ་སོགས་པ་གསུངས་སོ། །དེ་ལྟ་བུའི་ཉེ་བའི་རྒྱུ་དེ་དག་ཀྱང་བརྟག་པ་གཉིས་པའི་ལེའུ་བརྒྱད་པ་དང་། བཅུ་པ་དང་། ཕྱི་མའི་གཉིས་པ་དང་། གསུམ་པ་དང་། བཞི་པ་ལས་ཅུང་ཟད་ཙམ་གསུངས་ལ། རྡོ་རྗེ་གུར་གྱི་བཅོ་ལྔ་པ་དང་། སཾ་པུ་ཊའི་དགུ་པ་དངོས་དང་། བཅུ་པའི་དང་པོ་དང་། གཉིས་པ་ལས་ཤིན་ཏུ་གསལ་བར་གསུངས་སོ། །ཉེ་བའི་རྒྱུ་བསྟན་ཟིན་ཏེ། ལམ་གྱི་གཙོ་བོ་མཆོག་གི་དངོས་གྲུབ་བསྒྲུབ་པའི་མངོན་པར་རྟོགས་པར་བསྟན་ཟིན་ཏོ། །