གྲུབ་དབང་རྫོགས་ཆེན་པ་སྐུ་རབས་གཉིས་པ། འགྱུར་མེད་ཐེག་མཆོག་བསྟན་འཛིན་གྱི་རྣམ་ཐར་མདོར་བསྡུས།
གྲུབ་དབང་སྐུ་རབས་གཉིས་པ་འགྱུར་མེད་ཐེག་མཆོག་བསྟན་འཛིན་ནི། རབ་བྱུང་བཅུ་གཉིས་པའི་མྱོས་ལྡན་ཞེས་པ་ས་མོ་ཡོས་ཀྱི་ལོ་སྟེ་སྤྱི་ལོ་༡༦༩༩བར་ཟླ་ཀླུང་དལ་གྱིས་འབབ་པའི་ཉེ་འགྲམ་འབྲས་ལྡན་མེ་ཏོག་བཞད་པའི་སྐྱེད་ཚལ་ཞིག་ཏུ་སོག་པོ་ཨོ་རོད་རྒྱལ་པོའི་སྲས་རྒྱུད་དུ་སྐུ་འཁྲུངས། གོང་མའི་ཐུགས་སྲས་རྣམས་དང་འཇིགས་བྲལ་ཚངས་པ་སྡེ་དགེ་ཆོས་རྒྱལ་ཆེན་མོ་བཅས་ཀྱིས་བོད་ཡུལ་དབུས་ལྗོངས་ཀྱི་ལྷ་བླར་དགོངས་རྟགས་ཕུལ་བས་གྲུབ་དབང་དམ་པའི་སྐྱེ་སྲིད་འཁྲུལ་མེད་དུ་བཀས་བཅད་ཅིང་། སྨིན་གླིང་ནས་འགྱུར་མེད་ཐེག་མཆོག་བསྟན་འཛིན་དང་། རྡོ་བྲག་ནས་པདྨ་ཐེག་མཆོག་བསྟན་འཛིན་རྒྱ་མཚོ་ཞེས་མཚན་གྱི་ཅོད་པཎ་གསོལ། རིང་མིན་གདན་ས་ཆེན་མོར་སྤྱན་དྲངས་ཏེ་འཇིགས་མེད་གདོང་ལྔས་བཏེགས་པའི་ཁྲི་འཕང་མཐོན་པོར་མངའ་གསོལ། གོང་མའི་ཐུགས་སྲས་ཐུ་བོ་དཔོན་སློབ་ནམ་མཁའ་འོད་གསལ་དང་རབ་འབྱམས་བསྟན་པའི་རྒྱལ་མཚན་གཉིས་ནས་གཙུག་ཕུད་བཞེས་ཏེ་པདྨ་དབང་ཆེན་དང་པདྨ་དབང་དྲག་ཞེས་མཚན་འབུལ་མཛད། རིམ་པར་སྐྱེས་མཆོག་བླ་མ་རྣམ་གཉིས་ལས་བཀའ་གཏེར་གྱི་སྨིན་གྲོལ་གང་མང་བཞེས་མཚམས། དགུང་གྲངས་བཅུ་གཅིག་པ་ས་མོ་གླང་གི་ལོར་དབུས་ཕྱོགས་སུ་ཆིབས་ཁ་ཕྱོགས། ཐོག་མར་སྲིན་རྫོང་འོད་གསལ་སྒྲུབ་སྡེར་ཕེབས་པས་གཏེར་ཆེན་ཉི་མ་གྲགས་པ་དང་མཇལ། གཏེར་ཆེན་མཆོག་ནས་དགྱེས་བརྩེས་བསྙེན་བཀུར་ཕུན་སུམ་ཚོགས་པ་དང་བཅས་རང་གཏེར་ཕལ་ཆེར་གྱི་སྨིན་དབང་བསྩལ། གཞན་ཡང་རྒྱལ་སྲས་ཨོ་རྒྱན་བསྟན་འཛིན་དང་འབྲི་གུང་དཀོན་མཆོག་ཕྲིན་ལས་ལས་གཤིན་རྗེ་ཁྲོ་ཆུ་སོགས་བཀའ་ཆོས་འགའ་གསན་ནས་ལྷ་སར་ཕེབས། རྟེན་ གསུམ་གཙུག་ལག་ཁང་རྣམས་སུ་མཆོད་པ 
་རྒྱས་འབུལ་དང་བཅས་རྡོར་སྨིན་དུ་ཞབས་བསྐྱོད། དེར་རིག་འཛིན་གཏེར་བདག་གླིང་པ་ལས་རྗེ་ཉིད་ཀྱི་ཟབ་གཏེར་ཐུགས་ཆེན་བདེ་གཤེགས་ཀུན་འདུས་གཙོས་བཀའ་གཏེར་གྱི་སྨིན་ཁྲིད་མཐའ་ཡས་པ་གསན་བཞེས་མཛད་པས་མཐུ་སྟོབས་དབང་པོ་ཕྱོགས་ཐམས་ཅད་ལས་རྣམ་པར་རྒྱལ་བའི་སྡེ་ཞེས་མཚན་གསོལ་བ་དང་། གཏེར་ཆེན་ཉིད་ཀྱི་རང་གཏེར་ལས། ལང་གྲོའི་སྤྲུལ་པ་པདྨ་དྲག་པོའི་མིང༔ རྣལ་འབྱོར་འཛིན་པ་མདོ་ཁམས་སྨད་ནས་འབྱུང༔ ཞེས་ལུང་ཟིན་རྩ་བའི་ཆོས་བདག་ཏུ་ངོས་འཛིན་མངའ་གསོལ་མཛད། གཞན་ཡང་སྔ་ཕྱི་རྣམས་སུ་རྒྱལ་དབང་སྐལ་བཟང་རྒྱ་མཚོ་དང་། ངོར་མཁན་ཆེན་དཔལ་ལྡན་ཆོས་སྐྱོང་། ཞྭ་དམར་ཆོས་ཀྱི་དོན་འགྲུབ། ལོ་ཆེན་དྷརྨ་ཤྲཱི། རྒྱལ་སྲས་འགྱུར་མེད་རྒྱ་མཚོ། གླིང་གཏེར་པདྨ་དབང་ཕྱུག །སྟག་བླ་ཀུན་བཟང་བློ་གྲོས། དཔལ་རི་བ་ཀུན་བཟང་འོད་ཟེར། གྲ་ཐང་མཁན་ཀུན་དགའ་མཁྱེན་བརྩེ། བཤེས་གཉེན་འགྱུར་མེད་སྐལ་བཟང་སོགས་ཡོངས་འཛིན་བཅུ་ཕྲག་བཞི་ལྷག་ལས་མདོ་སྔགས་བསྟན་བཅོས་ཀྱི་འཆད་རྒྱུན། བཀའ་གཏེར་སྨིན་གྲོལ་གྱི་དབང་ཁྲིད། རྒྱལ་བའི་བཀའ་འགྱུར་རིན་པོ་ཆེའི་བཀླག་ལུང་སོགས་ཆོས་ཚུལ་རྒྱ་མཚོ་ལྟ་བུ་གསན་བཞེས་གནང་བས་ཐོས་པའི་ཕ་མཐར་སོན། ཁྱད་པར་དཔོན་སློབ་ནམ་མཁའ་འོད་གསལ་ལས་རྗེ་གོང་མའི་གསུང་སྒྲོས་ཀྱི་ཟབ་གནད་སྙན་ནས་སྙན་དུ་བརྒྱུད་པའི་གདམས་ཟབ་དང་། ཕྱག་བཞེས་ཕྲ་རགས་ཀྱི་ཟབ་གནད་བྱིན་རླབས་ཀྱི་ཚན་ཁ་མ་ཉམས་པ་ཐམས་ཅད་བུམ་པ་གང་བྱོའི་ཚུལ་དུ་གསན་པས་རྗེ་འདི་དང་གཏེར་ཆེན་འགྱུར་མེད་རྡོ་རྗེ་རྣམ་གཉིས་བཀའ་དྲིན་ཁྱད་འཕགས་ཀྱི་རྩ་བའི་བླ་མར་འཛིན། དེ་མཚུངས་ཉམས་ལེན་ཏིང་ངེ་འཛིན་གྱི་རྣལ་འབྱོར་ལ་སྐུ་ཚེ་གང་པོར་ཆད་མེད་ཆུ་བོའི་རྒྱུན་བཞིན་བརྩོན་པར་མཛད་དེ། སྐུ་ན་ཆེས་གཞོན་པའི་དུས་ནས་བསྙེན་མཚམས་ལོ་གཉིས་དང་། ཕྱིས་སྐུ་ཚེའི་གེགས་འཕྲང་སེལ་ཕྱིར་བཅད་རྒྱ་ལོ་གཅིག ཁྱད་པར་རབ་བྱུང་བཅུ་གཉིས་པའི་བློ་ངན་ལྕགས་བྱའི་མཇུག་ནས་ཤིང་ཕག་བར་ལོ་ངོ་བཅོ་ལྔའི་རིང་། སྔ་ཕྱིའི་ཆོས་ཐུན་ཕུད་ཉིན་མཚན་ཀུན་ཏུ་རྒྱུད་སྡེ་བཞི་དྲུག་གི་ལྷག་ལྷ་དུ་མའི་བསྙེན་སྒྲུབ་ཚད་འཁྱོལ་མཛད་པས། འཁོར་འདས་ཀྱི་སྣང་ཆ་ཐམས་ཅད་དག་པ་རབ་འབྱམས་སྒྱུ་འཕྲུལ་ལྷའི་ཕྱག་རྒྱ་དང་དབྱེར་མི་ཕྱེད་པའི་བརྟན་པ་ཐོབ། འོད་གསལ་རྫོགས་པ་ཆེན་པོ་ཀ་དག་ལྷུན་གྲུབ་ཀྱི་གནད་ལ་ཉམས་བཞེས་རྒྱུན་ཆགས་སུ་མཛད་པས་རྟོགས་ཚོགས་ཡེ་ཤེས་ཀྱི་ངོ་བོར་འབྱམས་སུ་ཀླས་ནས་ཀུན་བཟང་ཆོས་སྐུའི་དགོངས་པ་མངོན་དུ་བརྙེས། དེ་ལས་ལྡང་བ་རྗེས་ཐོབ་སྒྱུ་མ་ལྟ་བུའི་རོལ་རྩལ་གྱི་ངང་ནས་བསྟན་འགྲོའི་ལེགས་བྱས་ཕྱོགས་བརྒྱར་སྤེལ་བར་མཛད་ཚུལ་ནི། དགུང་ལོ་ཞེ་གཉིས་པ་ལྕགས་སྤྲེལ་ལ་རྗེ་དབོན་པདྨ་གདན་ཚབ་ཏུ་བསྐོས་ཏེ་དབུས་ཕེབས་ཕྱི་མ་མཛད་ཅིང་། སྐབས་དེར་ས་ངོར། འབྲི་སྟག རྡོར་སྨིན་སོགས་གདན་ས་ཆེ་ཆུང་ཕལ་མོ་ཆེ་ལ་མཆོད་སྤྲིན་རྒྱ་ཆེ་བ་དང་། ཁྱད་པར་ལྷ་ལྡན་དུ་མཉན་ཡོད་མཆོད་པའི་དུས་སྟོན་དང་། རྒྱལ་མཆོག་ལྔ་པའི་འདས་མཆོད་ཀྱི་ཚོགས་ཆེན་ལ་འགྱེད་འབུལ་མང་བསྐོལ་ཕུན་སུམ་ཚོགས་པས་བསྙེན་བཀུར། རྒྱལ་མཆོག་བདུན་པ་སྐལ་བཟང་རྒྱ་མཚོས་ཐུགས་བརྩེའི་གཟིགས་
པ་ཚད་མེད་པས་ཕོ་བྲང་ཆེན་མོའི་ནང་རྟེན་ལས་རྟེན་གསུམ ་གདམ་ཀ་མཛད་དེ་གནང་སྦྱིན་བསྩལ། སྐབས་དེར་རྗེ་ཉིད་ལ་དམ་ཅན་ནོར་སྒྲུབ་ཀྱིས་རང་གཟུགས་དངོས་སུ་བསྟན་ཏེ་ལུང་བསྟན་པས་ཐུབ་སྐུ་གཡུ་ཐོད་མ་དང་། ཆབ་ལྡེའུ་དཀར་ནག་ཁྲ་ གསུམ་སོགས་མི་མིན་འཕྲུལ་གྱི་རྟེན་རྫས་སྣ་ཚོགས་མདོ་སྨད་སྤྱིའི་བསོད་ནམས་ཀྱི་བགོ་སྐལ་དུ་སྤྱན་དྲངས་པ ་བཅས་ལེགས་བྱས་འགྲན་ཟླ་བྲལ་བ་གངས་ཅན་སྐྱེ་རྒུའི་རྣ་ལུང་མཛེས་པའི་རྒྱན་དུ་བཏགས་པར་མཛད་དེ་རང་དགོན་དུ་ཞབས་པད་བཀོད། དེ་ནས་ལོ་འགར་རྒྱང་ཕེབས་མ་མཛད་པར་རྒྱལ་བཀའ་རིན་པོ་ཆེ་ལན་གཉིས་དང་རྙིང་རྒྱུད་ཚར་ལྔ་གཙོས། བཀའ་བརྒྱད་དང་། དགོངས་འདུས། མདོ་དབང་། མཛོད་བདུན་བཅས་ཀྱི་བཀླག་ལུང་འཆད་ཁྲིད་རྒྱ་ཆེར་གནང་ཞིང་། སྐབས་དེ་དག་ཏུ་རྡོ་རྗེའི་ལྗགས་ལ་ལྷག་ལྷས་དངོས་གྲུབ་སྟེར་བ་ལྟར་སྒྲ་དག་མྱུར་མགྱོགས་གཞན་མཚུངས་དང་བྲལ་བས་ཐམས་ཅད་ངོ་མཚར་གྱི་གནས་ལ་བཀོད་པར་བྱས། གཞན་ཡང་སྐྱེ་དགུའི་བསོད་ནམས་ཀྱི་ཞིང་དུ་སངས་རྒྱས་བྱང་སེམས་དང་། ཡི་དམ་ཆོས་སྐྱོང་གི་སྐུ་བརྙན་སྣ་ཚོགས་འབུར་བཟོས་རས་བྲིས་བཅས་དངོས་གཙང་བ་བརྒྱ་ཕྲག་དུ་མ་དང་། གསུང་རྟེན་དུ་བཀའ་བསྟན་གྱི་གླེགས་བམ་སྟོང་ཕྲག་ལྷག་བརྒལ་བ། ཐུགས་རྟེན་དུ་རྗེ་བླ་མ་ནམ་མཁའ་འོད་གསལ་གྱི་གསེར་གདུང་ཁྱད་འཕགས་སོགས་སྐུ་གསུང་ཐུགས་རྟེན་མཆོད་རྫས་ཡོ་བྱད་བསམ་མི་ཁྱབ་པ་གསར་བཞེངས་མཛད། དེས་ཀྱང་མ་ཚད་པར་རྒྱུན་འཛུགས་མར་མེ་སྟོང་མཆོད་དང་། སཙྪ། རྡོ་འབུམ། སྦྱིན་སྲེག །དར་ལྕོག་སོགས་འབྱུང་བ་ཆེན་མོའི་བྱེད་པའང་དགེ་པའི་ཆོས་ལ་བསྒྱུར་ནས་མཐའ་ཡས་པའི་སེམས་ཅན་བྱང་གྲོལ་གྱི་ལམ་ལ་བཀོད། རྗེ་འདི་མཁས་བཙུན་བཟང་གསུམ། འཆད་རྩོད་རྩོམ་གསུམ། མཁྱེན་བརྩེ་ནུས་གསུམ་སོགས་ཚུལ་དགུའི་ཡོན་ཏན་ལ་རང་དབང་འབྱོར་བས་གསུང་གི་བདུད་རྩི་བཞེས་པའི་ཞལ་སློབ། འབར་ཆུང་བཀྲ་ཤིས་རྒྱ་མཚོ། རྡོ་བྲག་སྐལ་བཟང་དབང་ཕྱུག །དཔལ་རི་སྤྲུལ་སྐུ། ཟུར་སྤྲུལ་ གསུམ་པ ་ཕྲིན་ལས་རྒྱ་མཚོ། ཀཿཐོག་དྲི་མེད་ཞིང་སྐྱོང་མགོན་པོ། ཉི་སྤྲུལ་པདྨ་ཐེག་མཆོག དཔོན་སློབ་གཉིས་པ་གསང་སྔགས་བསྟན་འཛིན། རབ་འབྱམས་འགྱུར་མེད་ཀུན་བཟང་རྣམ་རྒྱལ། ཁམས་སྤྲུལ་རིན་པོ་ཆེ་གོང་འོག ཉི་གྲགས་རྒྱལ་སྲས་ཨོ་རྒྱན་བསྟན་འཛིན། རྗེ་བཙུན་མ་མི་འགྱུར་དཔལ་སྒྲོན་སོགས་མཁས་པའི་གྲགས་སྙན་ཐོབ་པ། སྒྲུབ་པའི་རྒྱལ་མཚན་འཛིན་པ། བསྟན་པ་དར་རྒྱས་སུ་སྤེལ་བའི་སྐྱེས་ཆེན་དུ་མ་བྱོན། དགུང་གྲངས་ང་དགུ་བཞེས་པ་མེ་གླང་ལོར་བསྟན་འགྲོའི་འགྲོ་དོན་ཐོག་གཅིག་རྫོགས་པའི་ཚུལ་གྱིས་སྐུ་མྱ་ངན་ལས་འདའ་བར་ཕྱོགས་པ་ན། འདུས་ཚོགས་ཡོངས་ལ་སོ་སོའི་སྐལ་བ་དང་འཚམས་པའི་བསླབ་བྱ་ཞལ་ཆེམས་རྒྱ་ཆེར་བསྩལ་བ་དང་། ཁྱད་པར་རྗེ་དབོན་རིན་པོ་ཆེ་པདྨ་ཀུན་གྲོལ་ལ་གདན་སའི་ཁུར་དང་དོན་བརྒྱུད་ཀྱི་བསྟན་པ་གཏད་ནས་ཧོར་ཟླ་བཅུ་པའི་ཚེས་བཅོ་བརྒྱད་ལ་ཆོས་སྐུའི་གཟིགས་སྟངས་དང་བཅས་ཐེག་རྩེ་གསང་བའི་ཉེ་ལམ་ནས་ནང་གསལ་གཞོན་ནུ་བུམ་སྐུར་ཐིམ་པར་གྱུར་ཏོ། དམ་པ་འདི་ཉིད་ཀྱིས་ལྗགས་རྩོམ་བསྟན་བཅོས་རྫོགས་ཆེན་མཁའ་འགྲོ་སྙིང་ཐིག་གི་སྔོན་འགྲོའི་ཁྲིད་ཡིག་ཐར་ལམ་བགྲོད་བྱེད་ཤིང་རྟ་བཟང་པོ་སོགས་པུསྟི་གཉིས་ཙམ་མཛད་པ་གྲགས་པ་ལས། དེང་དུས་མཇལ་དུ་བཞུགས་པ་ཀུན་ཕྱོགས་གཅིག་ཏུ་དཔེ་སྐྲུན་གྱི་སྐལ་བ་མངོན་དུ་གྱུར་བ་དང་བསྟུན། སྔར་ལམ་རྫོགས་ཆེན་ཆོས་འབྱུང་ཆེན་མོར་བྲིས་པའི་རྣམ་ཐར་ལ་བསྐྱར་ཞུས་དང་བཅས་འགོད་པ་པོ་ནི། མཁྱེན་གཟིགས་དམ་པའི་ཞལ་སྔ་ནས་གྲུབ་དབང་རྫོགས་ཆེན་པའི་མཚན་གྱི་ཅོད་པན་གྱིས་བྱིན་གྱིས་བརླབས་པ་བསྟན་འཛིན་ལུང་རྟོགས་ཉི་མས་མེ་སྤྲེལ་ས་ཟླའི་ཡར་ཚེས་ལ་བྲིས་པ་དགེ།