བསྟན་སྲུང་དམ་ཅན་རྒྱ་མཚོ་སྤྱི་ཡི་བསྐང་བ་ཡིད་བཞིན་རེ་སྐོང་ཞེས་བྱ་བ་བཞུགས་སོ།།

ཨོཾ་སྭ་སྟི། བདེ་ཆེན་ཡེ་ཤེས་ལྔ་ཡི་བདག །དཀྱིལ་འཁོར་ཀུན་གྱི་འབྱུང་གནས་མཆོག །དཔལ་ལྡན་རྡོ་རྗེ་སེམས་དཔའ་ལ། །སྙིང་ནས་གུས་པས་ཕྱག་འཚལ་འདུད། །དེ་ལ་འདིར་བསྟན་སྲུང་དམ་ཅན་རྒྱ་མཚོ་སྤྱི་ལ་བསྐང་བཤགས་བྱེད་པར་སྤྲོ་ན་དམ་ཅན་སོ་སོའི་རྟེན་དང་སྤྱན་གཟིགས་སྐོང་རྫས་སྨན་གཏོར་རཀྟ་སོགས་མཁོ་བའི་ཡོ་བྱད་ཐམས་ཅད་སྤྲོས་བཅས་སྤྲོས་མེད་དུས་སྐབས་དང་བསྟུན་པར་བཤམས་ལ། རང་ཉིད་ཡི་དམ་གྱི་ང་རྒྱལ་བརྟན་པོ་དང་མ་བྲལ་བའི་ངང་ནས། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊཿ ཨོཾ་སྭཱ་བྷཱ་ཝ་ཤུདྡྷ་སརྦ་དྷརྨཿ་སྭཱ་བྷཱ་ཝ་ཤུདྡྷོ྅་ཧཾཿ སྟོང་པའི་ངང་ལས་བྷྲཱུྃ་ལས་གནས་ཁང་དུར་ཁྲོད་དྲག་པོའི་བཀོད་པ་ཞིང་ཁམས་བསམ་གྱིས་མི་ཁྱབ་པར་ཕྱི་ནང་གསང་བའི་མཆོད་པ་སྤྱན་གཟིགས་མཐུན་རྫས་རྟེན་རྫས་སྐོང་རྫས་ལ་སོགས་པ་ཐམས་ཅད་སྲིད་ཞིའི་འདོད་ཡོན་གྱིས་རྣམ་པ་མཁོ་དགུ་ཚང་བ། བཟང་དགུའི་འབྱོར་པ། མཛེས་དགུས་བརྒྱན་པ། ངོ་བོ་ཡེ་ཤེས་ཀྱི་སྒྱུ་མའི་རང་བཞིན་བདེ་བའི་རྣམ་པ་ཐམས་ཅད་འཆར་བའི་ནམ་མཁའི་ཁམས་གང་བར་གྱུར། ན་མཿ་སརྦ་ཏ་ཐཱ་ག་ཏ་སོགས། ནམ་མཁའ་མཛོད་ཀྱི་སྔགས་རྒྱས་བྱིན་གྱིས་བརླབས་ལ། གདུང་བའི་དབྱངས་ཀྱིས་འདི་སྐད་དོ། །ཧཱུྃ་ཧྲཱིཿ དུར་ཁྲོད་རབ་འཇིགས་རྔམས་པའི་གཞལ་ཡས་ཁང་། །ཐོད་མཁར་མེ་རླུང་འཚུབ་མ་འུ་རུ་རུ། །དམར་ཆེན་ཁྲག་གི་རྒྱ་མཚོ་རྦ་རླབས་འཁྲུགས། །ཞིང་ཆེན་ཞིང་ཆུང་ཕོ་མོ་གཅལ་དུ་བཀྲམ། །མི་རོའི་རྒྱལ་མཚན་ཙིཏྟའི་ཏོག་གིས་མཛེས། །རྒྱུ་རློན་ནང་རོལ་དྲྭ་ཕྱེད་བསམ་མི་ཁྱབ། །ཞིང་ཆེན་བླ་བྲེ་ཞིང་ཆུང་འཕན་གྱིས་མཛེས། །གཏུམ་དྲག་བཟོད་པར་དཀའ་བའི་ཕོ་བྲང་ཆེ། །ཕྱི་རོལ་འཁོར་ཡུག་དུར་ཁྲོད་ཆེན་པོ་ན། །ཀང་ཀ་ལ་སོགས་དུར་བྱ་སྣ་ཚོགས་དང་། །ཤ་ཟ་སྲིན་པོ་རོ་ལངས་འཇིགས་པའི་ཚོགས། །མི་བཟད་གཅན་གཟན་མང་པོ་རྒྱུག་འདྲལ་བྱེད། །དུར་ཁྲོད་ཆས་རྣམས་མ་ལུས་ཡོངས་སུ་རྫོགས། །ཧཱུྃ་ཧྲཱིཿ འོག་མིན་ཆོས་དབྱིངས་གནས་མཆོག་དམ་པ་ནས། །རྩ་བརྒྱུད་བླ་མ་རྒྱལ་བ་སྲས་དང་བཅས། །ཡི་དམ་ཞི་ཁྲོ་རྒྱུད་སྡེ་སྒྲུབ་སྡེའི་ལྷ། །གནས་གསུམ་དཔའ་བོ་མཁའ་འགྲོ་རྒྱ་མཚོའི་ཚོགས། །མི་མངོན་དབྱིངས་ཀྱི་གནས་མཆོག་དམ་པ་ནས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །ཧཱུྃ་ཧྲཱིཿ དབང་ཆེན་རོལ་བའི་ཞིང་ཁམས་ཆེན་པོ་ནས། །གར་གྱི་དབང་ཕྱུག་ཐུགས་རྗེའི་རྣམ་རོལ་ལས། །ཡོངས་ཤར་རྟ་མགྲིན་ནག་པོ་ལྕགས་རལ་ཅན། །དྲེགས་པ་སྡེ་བརྒྱད་འཁོར་ཚོགས་བཅས་པ་རྣམས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །རི་རྒྱལ་མ་ལ་ཡ་ཡི་རྩེ་མོ་ནས། །ལེགས་ལྡན་རྡོ་རྗེ་སྲིན་པོ་ཚོགས་ཀྱི་བདག །གསང་བའི་ཡུམ་ཆེན་ཀྲོ་ཏི་ཤྭ་རི་མ། །སྤྲུལ་པ་ཡང་སྤྲུལ་འཁོར་གཡོག་བཅས་པ་རྣམས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །གསང་ཆེན་རོལ་བའི་དུར་ཁྲོད་ཆེན་པོ་ནས། །གདུལ་དཀའི་གཤེད་གྱུར་དཔལ་མགོན་མ་ནིང་ནག །སྲོག་བདུད་དཔལ་འབར་དྲེགས་པ་སྡེ་ བརྒྱད་ཚོགས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །གྲུ་གསུམ ་མཐིང་ནག་འབར་བའི་དཀྱིལ་འཁོར་ནས། །བདུད་འདུལ་ལས་ཀྱི་དབང་ཕྱུག་ཚོགས་ཀྱི་བདག །སྦྱོར་བའི་ཡུམ་ཆེན་ཡཀྴ་བཻ་ཏ་ལི། །སྐུ་གསུང་ཐུགས་མགོན་ཕྱོགས་བཅུའི་མགོན་པོ་བཅུ། །སྡེ་བརྒྱད་དྲེགས་པའི་གཙོ་བོ་ཆེ་རྣམས་དང་། །བཀའ་སྡོད་ལྷ་དམག་བྱེ་བ་དུང་ཕྱུར་སོགས། །ཁྱད་པར་དགྲ་ལྷ་བཅུ་གསུམ་དམག་དཔུང་བཅས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །བསིལ་བ་ཚལ་གྱི་དུར་ཁྲོད་ཆེན་པོ་ནས། །དཔལ་ལྡན་ཡེ་ཤེས་མགོན་པོ་ཕྱག་བཞི་པ། །ཡུམ་ཆེན་ལྷ་མོ་མ་མོ་ཙནྟི་ནག །བཀའ་ཉན་འཁོར་ཚོགས་སྐྱོང་བའི་ཚོགས་རྣམས་ཀྱང་། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །འཇིགས་རུང་མཁའ་སྤྱོད་ཕོ་བྲང་ཙ་རི་ནས། །མི་སྡུག་མི་བསྲུན་ཞིང་སྐྱོང་སེང་གེའི་གདོང་། །ཡུམ་མཆོག་བདུད་མོ་ནག་མོ་ཁྲག་རལ་ཅན། །ལས་བྱེད་དུས་མཚན་པོ་གྲོ་དགྲ་བོའི་གཤེད། །བཀའ་ཉན་ལས་བྱེད་དྲེགས་པའི་ཚོགས་རྣམས་བཅས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །མི་མངོན་དབྱིངས་ཀྱི་གནས་མཆོག་དམ་པ་ནས། །དྲག་པོའི་ཤུགས་འཆང་ཨེ་ཀ་ཙ་ཏྲི་མ། །ཡེ་ཤེས་ལས་དང་འཇིག་རྟེན་མཁའ་འགྲོའི་ཚོགས། །བྱེ་བ་འབུམ་གྱི་འཁོར་ཚོགས་བཅས་པ་རྣམས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །རི་རབ་བྱང་ཤར་ཡོངས་འདུའི་ཤིང་གི་དྲུང་། །མུ་ལེ་མཐིང་གི་རྒྱ་མཚོའི་ཀློང་དཀྱིལ་ནས། །སྲིད་པ་གསུམ་ལ་དབང་སྒྱུར་མཐུ་མོ་ཆེ། །དཔལ་ལྡན་ལྷ་མོ་ཆེན་མོ་སྔགས་བདག་མ། །དྲེགས་པ་བདུན་དང་མ་མོ་བྱེ་བ་བཅས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །རང་བཞིན་ཆོས་ཀྱི་དབྱིངས་ཀྱི་གནས་མཆོག་ནས། །དཔལ་ལྡན་ལྷ་མོ་རྡོ་རྗེ་གཤོག་རྒོད་མ། །དབྱར་གྱི་ཆར་སྤྲིན་གཏིབ་པ་ལྟ་བུའི་སྐུ། །ཏི་རིའི་གནས་ནས་བྱིས་པའི་དུར་བྱེད་མ། །མི་དུར་གཅོད་བྱེད་ནག་མོ་མཐུ་མོ་ཆེ། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །བསྐལ་བ་རླུང་ནག་འཚུབ་མའི་དཀྱིལ་འཁོར་ནས། །མ་ཅིག་ཤན་པ་སྲོག་སྒྲུབ་ནག་མོ་ནི། །ལས་དང་ཡེ་ཤེས་ཚོགས་ཀྱི་རྗེ་མོ་རྣམས། །ཤ་ཟ་མ་མོ་འབུམ་སྡེའི་ཚོགས་དང་བཅས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །བལ་ཡུལ་ཁ་ལ་རོང་སྒོའི་དབེན་གནས་སུ། །བོད་ཁམས་སྐྱོང་བའི་བརྟན་མ་བཅུ་གཉིས་ཚོགས། །བདུད་མོ་བཞི་དང་གནོད་སྦྱིན་སྨན་མོ་བཞི། །རང་རང་བྲན་གཡོག་མང་པོའི་འཁོར་དང་བཅས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །གནས་མཆོག་གངས་ཅན་ཤེལ་གྱི་ཟུར་ཕུད་ནས། །རྒྱལ་བའི་ཡུམ་ཆེན་རྡོ་རྗེ་ཀུན་བཟང་མོ། །མཐིང་གི་ཞལ་བཟང་ལ་སོགས་མཁའ་འགྲོ་བཞི། །སྤྲུལ་པ་ཡང་སྤྲུལ་ཉིང་སྤྲུལ་བསམ་མི་ཁྱབ། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །ལྷོ་ཕྱོགས་རིན་ཆེན་བྲག་རིས་གཏམས་པའི་ཞིང་། །ཡིད་འོང་སྨན་ལྗོངས་ནགས་ཚལ་རྒྱས་པའི་དབུས། །དྲི་མེད་དྭངས་གསལ་ཤེལ་གྱི་སྐུ་མཁར་ནས། །བོད་སྐྱོང་བརྟན་མའི་གཙོ་བོ་གཡུ་ཡི་སྒྲོན། །འཁོར་དུ་ཡེ་ཤེས་ཌཱཀྐི་སྡེ་ལྔ་དང་། །བརྟན་མ་བཅུ་གཉིས་སྨན་བཙུན་འབུམ་དང་བཅས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །ཚངས་པའི་གནས་དང་ཙནྡན་ནགས་གླིང་ནས། །པདྨ་གར་དབང་ཐུགས་རྗེའི་རྣམ་རོལ་ལས། །འཇིག་རྟེན་མེས་པོ་ཁམས་གསུམ་ཀུན་ཀྱི་བདག །དབང་ཕྱུག་ཆེན་པོ་ཤྲཱི་རལ་བ་ཅན། །གསང་བའི་ཡུམ་ཆེན་ལྷ་མོ་དཀའ་ཟློག་མ། །འཁོར་གྱི་ལྷ་མོ་ཆེན་མོ་མཆེད་བཞི་བཅས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །སྟོང་ གསུམ་ནམ་མཁའ་ཡངས་པའི་དཀྱིལ་འཁོར་ནས། །བསྟན་སྲུང་ཁྱབ་འཇུག་ཆེན་པོ་རཱ་ཧུ་ལ། །སྤྲུལ་པའི་གཟའ་བརྒྱད ་གདོང་མོ་ཆེན་མོ་བཞི། །སྤྲུལ་འཁོར་ལྷ་སྲིན་སྡེ་བརྒྱད་ཚོགས་དང་བཅས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །ཤང་དང་འུ་ཡུག་གནས་མཆོག་དམ་པ་ནས། །འཛམ་གླིང་གནམ་ས་ཕྱེད་ཀྱི་བདག་པོ་ནི། །སྐྱེས་མཆོག་བཛྲ་ས་དྷུ་ཐིག་ལེ་རྩལ། །མཆེད་འཁོར་སུམ་བརྒྱ་དྲུག་ཅུའི་ཚོགས་དང་བཅས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །གཏུམ་དྲག་མེ་ལྟར་འབར་བའི་དཀྱིལ་འཁོར་ནས། །ཁམས་ གསུམ་སྐྱེ་འགྲོའི་སྲོག་གི་བདག་པོ་སྟེ། །ར་ཞོན་དམ་ཅན་རྡོ་རྗེ་དགྲ་འཇོམས་རྩལ། །སྡེ་བརྒྱད ་དྲེགས་པའི་དམག་དཔུང་བཅས་པ་རྣམས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །ཏི་སེ་དབང་གི་ཕོ་བྲང་ཆེན་པོ་ནས། །ཇོ་བོ་ལྷ་ཡི་བཙན་རྒོད་རྡོ་རྗེ་འབར། །འཁོར་གྱི་བཙན་རྒོད་ཆེན་པོ་མཆེད་བདུན་བཅས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །ནུབ་ཕྱོགས་བླ་མཁར་སྨུག་པོའི་ཕོ་བྲང་ནས། །དམ་ཅན་ནོར་བདག་ཀོང་བཙུན་ཡུམ་དང་བཅས། །འཁོར་གྱི་ནོར་བདག་ཛམ་ལྷ་ཆེན་པོ་བརྒྱད། །དགེ་བསྙེན་ཉེར་གཅིག་བརྟན་མ་བཅུ་གཉིས་དང་། །སུམ་བརྒྱ་དྲུག་ཅུའི་སྤྲུལ་འཁོར་རྒྱ་མཚོའི་ཚོགས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །ཧེ་ཆེན་བརྡལ་བའི་དུར་ཁྲོད་ཆེན་པོ་ནས། །རབ་ཁྲོས་གནོད་སྦྱིན་ཤན་པ་དམར་ནག་ནི། །དུར་ཁྲོད་བདག་པོ་ཤ་ཟ་སྲིན་པོའི་གཟུགས། །ཤིན་ཏུ་འཇིགས་པའི་མེ་འོད་ལུས་ལ་འཕྲོ། །དམ་ཉམས་དགྲ་ཡི་བླ་སྲོག་ཧུབ་ཀྱིས་འདེབས། །ཕོ་ཉ་སྡེ་བརྒྱད་ཤ་ཟ་ཤན་པའི་ཚོགས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །དུར་ཁྲོད་བརྒྱད་དང་གནས་ཡུལ་ཉེར་བཞི་ནས། །ཧཱུྃ་དཀར་སྲས་མོ་དཔལ་མོ་འཛོམ་པ་སྐྱིད། །ཌཱཀྐི་དབང་མོའི་ཚུལ་འཆང་རིག་འཛིན་མ། །རེས་འགའ་རབ་ཁྲོས་ཤ་ཟ་ཁ་མོ་ཆེ། །མ་མོ་མཁའ་འགྲོའི་འཁོར་ཚོགས་བཅས་པ་རྣམས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །ལྗོན་ཤིང་བྲག་རིས་གཏམས་པའི་ཕོ་བྲང་ནས། །ཕྱི་ལྟར་ཀླུ་བཙན་ཤིན་ཏུ་ཁྲོས་པའི་གཟུགས། །ནང་ལྟར་ར་ཙ་དགེ་བསྙེན་ཆེན་པོ་སྟེ། །གསང་བ་གནོད་སྦྱིན་ནོར་བདག་རྒྱལ་པོའི་ཚུལ། །སྤྲུལ་པ་ཉི་ཤུ་རྩ་གཅིག་འཁོར་བཅས་རྣམས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །བལ་ཡུལ་ཡང་ལེ་ཤོད་ཀྱི་བྲག་ཕུག་ནས། །དཔལ་ཆེན་ཕུར་བའི་སྲུང་མ་ཆེན་མོ་ནི། །དཔལ་གྱི་བཀའ་ཉན་ཤྭ་ན་མཆེད་བཞི་དང་། །སྲོག་གཅོད་ནག་མོ་བསེ་ཡི་བུ་མོ་བཞི། །དགྲ་བོའི་སྲོག་གཅོད་རེ་ཏི་མཆེད་སྡེ་བཞི། །མ་མོ་རྣམས་ཀྱི་མིང་པོ་གིང་བཞིའི་ཚོགས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །གནས་མཆོག་ལྡང་ལྷ་གསང་བའི་བྲག་ཕུག་ནས། །རྡོ་རྗེ་ཕུར་བའི་ཟབ་གཏེར་སྐྱོང་མཛད་པའི། །ལྷ་ཡི་དགེ་བསྙེན་རྡོ་རྗེ་དྲག་པོ་རྩལ། །བཙན་རྒོད་ཆེན་པོ་སྟོང་གི་ཚོགས་དང་བཅས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །བྱང་ཕྱོགས་ལི་ཡུལ་ལྕང་ར་སྨུག་པོ་ནས། །སྣང་སྲིད་དྲེགས་པ་ཡོངས་ཀྱི་ཆེ་བཙན་མཆོག །གནོད་སྦྱིན་རྒྱལ་པོ་ཆེན་པོ་ཙིའུ་དམར། །རང་གི་ལུས་ལས་བྱུང་བའི་བཙན་དྲུག་དང་། །སྤྲུལ་པ་ཡང་སྤྲུལ་སྡེ་བརྒྱད་ཚོགས་དང་བཅས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །བྷེ་ཏ་ཧོར་གྱི་སྒོམ་གྲྭའི་གནས་མཆོག་ནས། །བཅོམ་ལྡན་རྒྱལ་བ་རིགས་ལྔའི་རྣམ་རོལ་ལས། །སྤྲུལ་པའི་ཆོས་རྒྱལ་ཆེན་པོ་སྐུ་ལྔ་ཤར། །སྐུ་ཡི་རྒྱལ་པོ་མོན་བུ་པ་ཏྲ་སྟེ། །གསང་བའི་ཡུམ་ཆེན་བདུད་མོ་རོ་ལངས་མ། །བཀའ་བློན་ཤན་པ་བྱ་ཁྲི་མིག་གཅིག་པུ། །གསུང་གི་རྒྱལ་པོ་དགྲ་ལྷ་སྐྱེས་གཅིག་པུ། །གསང་བའི་ཡུམ་ཆེན་མཛེས་བྱེད་པདྨ་སྐྱེས། །བཀའ་ཡི་བློན་པོ་རྡོ་རྗེ་གྲགས་ལྡན་ཏེ། །ཐུགས་ཀྱི་རྒྱལ་པོ་བརྒྱ་བྱིན་མཐིང་ནག་དང་། །ཡུམ་གཅིག་ཤནྟི་རོ་ཟན་མཐུ་མོ་ཆེ། །བློན་པོ་སྲོག་བདག་བཀའ་ཡི་བྱ་ར་བ། །ཡོན་ཏན་རྒྱལ་པོ་གནོད་སྦྱིན་ཤིང་བྱ་ཅན། །གསང་བའི་ཡུམ་ཆེན་གསེར་གྱི་སྤུ་གྲི་མ། །བཀའ་ཡི་བློན་པོ་བྱ་རྒོད་ཐང་ནག་སྟེ། །ཕྲིན་ལས་རྒྱལ་པོ་ཞལ་གསུམ་མི་བོ་ཆེ། །གསང་བའི་ཡུམ་ཆེན་བདུད་བཟའ་སྨིན་དཀར་མ། །བཀའ་ཡི་བློན་པོ་པུ་ཏྲ་ནག་པོ་སྟེ། །གཞན་ཡང་སྤྲུལ་པ་ཡང་སྤྲུལ་སྣ་ཚོགས་དང་། །རུ་འདྲེན་སྡེ་བཞིའི་འཁོར་ཚོགས་བཅས་པ་རྣམས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །དཀོར་མཛོད་གླིང་གི་གནས་མཆོག་དམ་པ་ནས། །དགྲ་བླའི་རྒྱལ་པོ་རྡོ་རྗེ་གྲགས་ལྡན་རྒྱལ། །གསང་བའི་ཡུམ་གཅིག་གཟི་བརྗིད་ཆེན་མོ་དང་། །སྤྲུལ་པ་བློན་པོ་རུ་འདྲེན་ཕོ་ཉའི་ཚོགས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །ཨཱརྱ་པ་ལོའི་གནས་མཆོག་དམ་པ་ནས། །གྲི་བཙན་ཆེན་པོ་རྡོ་རྗེ་དགྲ་འཇོམས་རྩལ། །མཆེད་ཟླ་ལྷ་སྲིན་སྡེ་བརྒྱད་ཡུམ་དང་བཅས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །རིན་ཆེན་རི་རབ་ལྷུན་པོའི་བྱང་གི་ཕྱོགས། །ནོར་མང་རྣམ་ཐོས་རྒྱལ་པོའི་ཕོ་བྲང་ནས། །ཡིད་བཞིན་ནོར་བུ་རྒྱལ་པོ་རྣམ་ཐོས་སྲས། །ཡུམ་ཆེན་བཞི་དང་ལྷ་མོ་རྣམ་པ་བཞི། །རྣམ་སྲས་སྡེ་བཞི་ཛམ་ལྷ་རིགས་བཞི་དང་། །རྟ་བདག་བརྒྱད་དང་ཀླུ་ཆེན་རྣམ་པ་བརྒྱད། །སྒོ་སྐྱོང་བཞི་དང་ལྷ་ཀླུ་གནོད་སྦྱིན་ཚོགས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །བྱང་ཕྱོགས་ལྕང་ལོ་ཅན་གྱི་ཕོ་བྲང་ནས། །འགྲོ་བའི་དབུལ་ཕོངས་སྡུག་བསྔལ་སེལ་མཛད་ཅིང་། །རྒྱལ་ཀུན་ཡབ་གྱུར་མགོན་པོ་ཛམ་ལྷ་དམར། །སྦས་པའི་ཡུམ་གྱུར་ལྷ་མོ་རིག་བྱེད་མ། །ནོར་ལྷ་རྒྱ་མཚོའི་འཁོར་ཚོགས་བསམ་མི་ཁྱབ། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །སུམ་བརྩེགས་ལྕང་ལོ་ཅན་དང་དགུང་སྔོན་དབུས། །རང་བཞིན་གར་བཞུགས་གནས་མཆོག་དམ་པ་ནས། །རྟ་ལྷའི་རྒྱལ་པོ་ཨཱརྱ་རེ་མནྟ། །རང་འདྲ་ལྔ་བརྒྱའི་འཁོར་ཚོགས་རྒྱ་མཚོ་དང་། །མདོར་ན་རྔོག་ཆགས་སྐྱོབ་པའི་ལྷ་སྲུང་ཚོགས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །གཞན་ཡང་གར་བཞུགས་གནས་མཆོག་དམ་པ་ནས། །རྡོ་རྗེ་གཡུང་དྲུང་རྒོད་ལྕམ་ཤེལ་རུ་སྨན། །ནོར་བུ་གཡུལ་རྒྱལ་ཐང་ལྷ་ཡར་ཞུར་དང་། །དགེ་བསྙེན་སྙོན་ཁ་སྡེ་དཔོན་སུམ་ཅུ་པོ། །དུར་ཁྲོད་ལྷ་མོ་ལས་གཤིན་སྤྱང་ཞོན་ཚོགས། །ཟངས་རི་བཙན་རྒོད་ཀླུ་མོ་གཟི་འབར་མ། །རྨ་རྒྱལ་ལྷ་སྨན་གཏེར་སྲུང་ཁོལ་པོ་ཁ། །དགྲ་ལྷ་རླུང་རྟ་བསྐྱེད་པའི་ལྷ་རྣམས་སོགས། །རང་རང་བྲན་སྡེ་མ་ལུས་འཁོར་དང་བཅས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །གྲངས་བསོགས་ཚེ་ཆོས་སྐྱོང་སོ་སོའི་ཚིག་ཟིན་མང་དོགས་ན་གོང་གི ཧཱུྃ་ཧྲཱིཿ འོག་མིན་ཆོས་དབྱིངས་ཞེས་སོགས་ཚིག་རྐང་དྲུག་བཏང་ལ། ཧཱུྃ་ཧྲཱིཿ དབང་ཆེན་རོལ་བའི་སོགས་དོར་ནས་འདི་མན་བཏོན་པས་ཆོག ། ཧཱུྃ་ཧྲཱིཿ ཆོས་ཉིད་ཞི་བའི་ངང་ལས་མ་གཡོས་ཀྱང་། །ཐུགས་རྗེའི་དབང་གི་རྣམ་རོལ་ལས་བྱུང་བ། །རྒྱལ་བའི་བསྟན་སྲུང་དམ་ཅན་རྒྱ་མཚོའི་ཚོགས། །སྐུ་ནི་ཞི་བ་ཁྲོ་དང་ཞི་མ་ཁྲོ། །གསུང་ནི་ཚངས་དབྱངས་དྲག་སྔགས་འབྲུག་ལྟར་སྒྲོག །ཐུགས་ནི་སྙིང་རྗེ་ཆེན་པོའི་ཉམས་དང་ལྡན། །རང་རང་འཁོར་དང་སྤྲུལ་པ་ཡང་སྤྲུལ་དང་། །ཉིང་སྤྲུལ་བྲན་སྡེ་མ་ལུས་འཁོར་དང་བཅས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །རབ་འཇིགས་ཕོ་བྲང་ཆེན་པོའི་ལྟེ་བ་ལ། །རྡོ་རྗེའི་བྲག་ཆེན་པདྨ་ཉི་ཟླ་དང་། །རིན་ཆེན་ཁྲི་རྐང་དར་ཟབ་བམ་ཆེན་སོགས། །རང་རང་དགྱེས་པའི་གདན་ཁྲི་ཡངས་པའི་སྟེང་། །དགྱེས་ཤིང་མི་གཡོ་བརྟན་པར་བཞུགས་སུ་གསོལ། །སྒྲུབ་པའི་རིག་འཛིན་རྣལ་འབྱོར་བདག་ཅག་གིས། །བསྟན་སྲུང་དམ་ཅན་རྒྱ་མཚོ་ཁྱེད་རྣམས་ཀྱི། །སོ་སོའི་རྟེན་རྫས་མཐུན་རྫས་སྐོང་བའི་རྫས། །མཆོད་རྫས་སྒྲུབ་རྫས་མ་ཚང་མེད་པ་ཀུན། །ཀུན་བཟང་མཆོད་པའི་སྤྲིན་ལྟར་བཤམས་ལགས་ན། །བསྟན་པ་སྲུང་ཞིང་བསྟན་འཛིན་སྐྱོང་བ་དང་། །ཕྲིན་ལས་རྣམ་བཞིའི་ལས་རྣམས་སྒྲུབ་པའི་ཕྱིར། །མི་ཟད་ནམ་མཁའ་མཛོད་དུ་འབུལ་བ་ཡིས། །དགྱེས་པའི་ཚུལ་གྱི་ཐུགས་དམ་བསྐང་གྱུར་ཅིག །ཧཱུྃ་ཧྲཱིཿ ཐུགས་དམ་གཉན་པོ་བསྐང་བའི་དམ་རྫས་ནི། །སྟོང་ གསུམ་རབ་འབྱམས་རྒྱ་མཚོའི་ཞིང་ཁམས་ན། །ཡན་ལག་བརྒྱད ་ལྡན་མཆོད་ཡོན་མཚོ་ལྟར་བསྐྱིལ། །དག་བྱེད་ཞབས་བསིལ་ཆུ་བོ་གངྒཱའི་རྒྱུན། །རིན་ཆེན་མེ་ཏོག་སྣ་ཚོགས་གཅལ་དུ་བཀྲམ། །དྲི་ཞིམ་བདུག་པའི་སྤྲིན་ཚོགས་ཕྱོགས་བཅུར་འཕྲོ། །མར་མེ་ཉིན་མོར་བྱེད་པའི་འོད་གསལ་བ། །ཙནྡན་ག་བུར་དྲི་བཟང་གཙང་མིའི་ཆབ། །ལྷ་ཡི་ཞལ་ཟས་རོ་བརྒྱ་དཔག་མེད་ལྡན། །གླུ་གར་རོལ་མོའི་བྱེ་བྲག་བསམ་ཡས་ཀྱིས། །བསྟན་སྲུང་དམ་ཅན་རྒྱ་མཚོའི་ཐུགས་དམ་བསྐང་། །དམར་ཆེན་མཆོད་ཡོན་དབང་པོའི་མེ་ཏོག་དང་། །ཚིལ་ཆེན་དུད་པ་ཞུན་མར་མཁྲིས་པའི་ཆབ། །ཤ་རུས་ཞལ་ཟས་རྐང་གླིང་ཐོད་རྔའི་སྒྲ། །དམར་ཆེན་བཟའ་བཅའི་གཏོར་མ་རི་ལྟར་སྤུངས། །དམ་རྫས་སྨན་དང་རཀྟའི་རྒྱ་མཚོར་བསྐྱིལ། །ཤ་ཆེན་ལྔ་ནི་ལྷུན་པོའི་སྤོ་དང་མཉམ། །བདུད་རྩི་རྣམ་ལྔ་རྒྱ་མཚོ་ལྟ་བུར་བསྐྱིལ། །གཞན་ཡང་བཙོས་དང་རྗེན་ཤ་དཀར་དམར་བཅུད། །ཤ་སྣ་སྙིང་སྣ་ཁྲག་སྣ་བསམ་མི་ཁྱབ། །རྟག་ཏུ་འགྲོགས་པའི་རྟག་གཏོར་ཆེན་པོ་དང་། །རྒྱུན་དུ་འགྲོགས་པའི་རྒྱུན་གཏོར་ནར་མ་ཡིས། །བསྟན་སྲུང་དམ་ཅན་རྒྱ་མཚོའི་ཐུགས་དམ་བསྐང་། །དར་ནག་གཡབ་མོ་ཕྱར་དར་ནག་པོ་དང་། །ཙནྡན་བེང་ཆེན་རུ་མཚོན་གསང་བའི་རྫས། །ཐོད་ཕྲེང་མི་མགོ་ཞིང་ཆེན་གཡང་གཞི་དང་། །གཡག་རོག་བྱ་ཁྱི་ལུག་ནག་རྒྱལ་མཚན་བསྒྲེངས། །སྐུ་གཟུགས་གླེགས་བམ་བརྗིད་པའི་བེར་ནག་གོས། །དོམ་ནག་ཙིཏྟ་སྲོག་འཁོར་ས་བོན་ལྡན། །དྲག་པོའི་བམ་རྫས་ཐུན་ཟོར་རི་ལྟར་སྤུངས། །སྦ་ལྕག་ཚིག་གསུམ་ཁ་ཊྭཱཾ་རྩེ་གསུམ་མདུང་། །རྨ་བྱ་བྱ་རོག་ནལ་བུའི་རྒྱལ་མཚན་བསྒྲེངས། །དཔལ་གྱི་ཆས་གོས་རྒྱན་ཕྲེང་བསམ་མི་ཁྱབ། །ནལ་བུའི་ཤ་ཁྲག་གྲི་སྙིང་མི་དབང་ཤ །སྐྱེད་ཚལ་ཟས་གོས་ལོངས་སྤྱོད་སྣ་ཚོགས་ཀྱིས། །བསྟན་སྲུང་དམ་ཅན་རྒྱ་མཚོའི་ཐུགས་དམ་བསྐང་། །འཇའ་ཚོན་ལྟར་བཀྲ་ལེ་བརྒན་ཟ་འོག་གུར། །ཅང་ཤེས་རྟ་མཆོག་རླུང་གི་ཤུགས་ཅན་དང་། །ཤེལ་སྒོང་ནག་པོ་སྤྱི་དཀར་ལྕགས་རྭ་ཅན། །གཡག་རོག་ཞོལ་ཆེན་ཁྱི་ནག་སྙིང་དཀར་འཕྱོ། །མཚམས་སྤྲིན་མདངས་འཛིན་ར་སྐྱེས་རྒྱན་ལྡན་དང་། །ཟ་ལེ་འབྲི་དང་བྱ་ནག་འཕུར་ལྡིང་གཡོ། །ཤ་རྐྱང་མ་ཧེ་དྲེལ་དང་འདོད་འཇོའི་བ། །སེང་གེ་གླང་ཆེན་སྟག་གཟིག་དོམ་དྲེད་དང་། །འཕར་སྤྱང་སྤྲ་སྤྲེལ་གཅན་གཟན་རྔམས་པའི་ཚོགས། །གཞན་ཡང་རྐང་བཞི་དུད་འགྲོ་སྣ་ཚོགས་དང་། །འདབ་ཆགས་བྱ་རིགས་སྣ་ཚོགས་ཟློས་གར་བསྒྱུར། །བསྟན་སྲུང་དམ་ཅན་རྒྱ་མཚོའི་ཐུགས་དམ་བསྐང་། །ལ་དུ་རང་བྱུང་མེ་ཏོག་ཏིལ་མར་སྒྲོན། །འབྲས་ཆང་རྒུན་ཆང་ཙནྡན་དམར་པོའི་ཆབ། །སྨྱུག་རྒོད་ལོ་རྒྱས་ཁྲབ་བྱང་རྔ་ཁྲབ་དང་། །ར་ཡི་དབང་པོ་རྣམ་ལྔའི་ཕྲེང་བ་སྦྲེལ། །བྷནྡྷ་རུས་པ་ཤ་རུས་ཚིལ་ཆེན་འབུམ། །ཛ་གད་གོ་རོ་ཙ་ན་བ་སུ་ཏ། །སིལ་སྙན་རྫ་རྔ་དུང་ཆེན་བཤུག་པའི་སྒྲ། །དྲི་ཞིམ་སྤོས་འཐུལ་དར་ཚོན་སྣ་ལྔའི་གཡབ། །ཤྭ་ན་ཝ་སྤྱང་འཕར་བའི་ཐོད་པ་རུ། །ཤ་ཁྲག་སྙིང་སྣ་རྐང་སྣ་འབུམ་གྱིས་གཏམ། །མར་ཁུ་ཞག་དང་འོ་མ་ཁྲག་གི་མཚོ། །བསེ་མཁར་བསེ་ཕོར་བསེ་མདའ་བསེ་ཕུར་དང་། །དྲེལ་ནག་ཐོད་པར་དཀར་ནག་ལུག་གི་སྙིང་། །བཤོས་བུ་དཀར་ནག་དར་ནག་སྙུག་རྒོད་བརྒྱན། །ཁྱི་དམར་ཙིཏྟ་དམ་ཤིང་ཕུར་བུ་སོགས། །བསད་ཁྲག་དྲོན་མོའི་ཨརྒྷཾ་དྲི་ངད་བཅས། །གསེར་གྱི་མདོག་ལྡན་གཡུ་རྔོག་ཤུགས་ལྡན་རྟ། །སྟག་གཟིག་རྒྱལ་མཚན་མདུང་དམར་བ་དན་བསྒྲེངས། །བཙན་གྱི་ཁྱི་དམར་མི་བཟད་དཔའ་གཏུམ་རྒོད། །ཅང་ཤེས་རྟ་མཆོག་དམར་པོ་གློག་ལྟར་འཁྱུག །བྱེ་རུའི་མདངས་འདྲའི་འདབ་ཆགས་སྤྲིན་ལྟར་གཏིབས། །དམ་ཤིང་དགྲ་སྟ་ཤེལ་དཀར་ཕྲེང་བ་སོགས། །གོ་ཁྲབ་མཚོན་ཆ་སྣ་ཚོགས་བསམ་མི་ཁྱབ། །ཕྱེ་མར་གཡུ་ཤུགས་བསང་གསུར་སྤྲིན་ཕུང་འཕྲོ། །བསྟན་སྲུང་དམ་ཅན་རྒྱ་མཚོའི་ཐུགས་དམ་བསྐང་། །རིན་ཆེན་གདུགས་མཛེས་རྒྱལ་མཚན་འཕན་འཕུར་དང་། །ལྷབ་ལྷུབ་བ་དན་བླ་བྲེ་ལྡ་ལྡི་གཡོ། །འདོད་ཡོན་ལྔ་དང་རིན་ཆེན་སྣ་བདུན་དང་། །བཀྲ་ཤིས་རྟགས་རྫས་རྒྱལ་སྲིད་རིན་ཆེན་བདུན། །རྡོ་རྗེ་ལྷ་མོའི་རྣམ་འཕྲུལ་མཐའ་ཡས་པ། །ཡིད་འཕྲོག་རིན་ཆེན་ལས་གྲུབ་གཞལ་མེད་ཁང་། །རིན་ཆེན་རི་རབ་གླིང་བཞི་གླིང་ཕྲན་དང་། །གསེར་རི་རོལ་མཚོ་ཉི་ཟླ་རྒྱུ་སྐར་བཀྲ། །འཛད་མེད་ནོར་གྱི་བང་མཛོད་ནེའུ་ལེ། །འདོད་འབྱུང་གཏེར་བུམ་མ་རྨོས་ལོ་ཏོག་དང་། །མཁོ་དགུའི་དཔལ་འབྱོར་མ་ཚང་མེད་པ་ཡིས། །བསྟན་སྲུང་དམ་ཅན་རྒྱ་མཚོའི་ཐུགས་དམ་བསྐང་། །རིན་ཆེན་སྣོད་དུ་བྱིན་གྱིས་བརླབས་པའི་ཆུས། །སྐོམ་པའི་གདུང་སེལ་བདེ་བ་འཚོ་བྱེད་པ། །བྱུ་རུ་ཙནྡན་ལ་སོགས་བགྲང་ཕྲེང་དང་། །ག་འུ་དང་ནི་མཚན་ལྡན་ཐོད་པ་རུ། །སྲོག་འཁོར་སྲིད་པའི་གཡང་རྟེན་སྣ་ཚོགས་བཅས། །བསིལ་ལྡན་གཡའ་ཆུ་གངས་ཆུ་གཙང་མའི་ཆབ། །བསང་ལུག་འབྲས་དཀར་མན་ཤེལ་འོད་འཕྲོ་དང་། །དར་ཟབ་གསེར་དངུལ་རིན་ཆེན་འབྲུ་སྣ་ལྔ། །གཡག་རོག་ཞིང་བཀལ་བྱ་ནག་འཕུར་ལྡིང་གཡོ། །དྲེལ་ནག་བོང་བུ་རྟ་ནག་འཕར་སྤྱང་དྲེད། །རླུང་རས་དཔྱངས་པ་ནལ་བུའི་རྒྱལ་མཚན་བསྒྲེངས། །ཤེལ་ཚིག་ཁྲི་དཀར་ཀླུ་རྟ་རྒྱན་ལྡན་དང་། །རྩི་ཤིང་བལ་མཚོན་སྦ་སྨྱུག་ལྡེམས་སེ་ལྡེམ། །དཀར་གསུམ་མངར་གསུམ་ཕྱེ་མར་འོ་སྐོལ་ཕུད། །དངུལ་དཀར་མེ་ལོང་སྦ་གླིང་སྙན་པའི་སྒྲ། །མདའ་དར་བཟང་པོ་སྨན་བཤོས་རྩེ་རྒྱལ་བཅས། །བསྟན་སྲུང་དམ་ཅན་རྒྱ་མཚོའི་ཐུགས་དམ་བསྐང་། །འབྲུ་བཅུད་རྩི་བཅུད་རྒྱ་ཇ་ངད་ལྡན་དང་། །རོ་མཆོག་བརྒྱ་ལྡན་སྐུ་གསུང་ཐུགས་བདེ་བའི། །ནུས་བཅུད་ཕུན་སུམ་ཚོགས་པའི་གཏེར་ཆེན་པོ། །རླུང་རྟ་བསྐྱེད་ཅིང་དགྲ་བླ་གསོ་བའི་རྟེན། །རིན་ཆེན་སྣ་ལྔའི་སྐུ་མཁར་འབར་བའི་ཏོག །སྦ་ལྕག་ཁྲབ་དཀར་ལོ་རྒྱས་ཚིགས་དགུའི་སྙུག །མདའ་མོ་བྱ་རྒོད་སྒྲོ་ལྡན་དར་སྣས་བརྒྱན། །རིན་ཆེན་སྣ་ལྔའི་གསེར་འཕང་གཡུ་ལོ་ཅན། །ནམ་མཁའ་རྒྱང་བུ་གཏེར་བུམ་འཕན་གདུགས་སྒྲེང་། །སྲིད་པའི་འདོད་དགུ་ཕུན་སུམ་ཚོགས་པ་འདི། །མཆོད་པ་ཡིན་ནོ་ཁ་རྗེ་བསོད་ནམས་སྤེལ། །བརྔན་དུ་འབུལ་ལོ་འདོད་དགུའི་དངོས་གྲུབ་སྩོལ། །གཞན་ཡང་བསྟན་སྲུང་དམ་ཅན་རྒྱ་མཚོའི་ཚོགས། །མི་འབྲལ་འགྲོགས་པའི་ཡིད་གཟུགས་ཆགས་པའི་རྟེན། །སྐུ་གཟུགས་སྔགས་བྱང་རང་རང་བླ་རྡོ་དང་། །མཐུན་པའི་དམ་རྫས་མ་ཚང་མེད་པ་ཀུན། །སོ་སོའི་ཐུགས་ལ་ཇི་ལྟར་འདོད་པ་བཞིན། །དངོས་སུ་བཤམས་དང་ཡིད་ལས་བྱུང་བ་ཡི། །ཀུན་ཏུ་བཟང་པོའི་མཆོད་པའི་སྤྲིན་ལྟ་བུ། །བློ་ཡིས་བླངས་ནས་གུས་པར་འབུལ་ལགས་ན། །བསྟན་སྲུང་དམ་ཅན་རྒྱ་མཚོའི་ཐུགས་དམ་བསྐང་། །གྲུབ་པའི་རིག་འཛིན་རྣལ་འབྱོར་བདག་ཅག་གི །རྩ་བ་ཡན་ལག་དམ་ཚིག་ཉམས་པ་དང་། །ཁྱེད་རྣམས་ཐུགས་དང་འགལ་བའི་ཉེས་པ་ཀུན། །མི་འཆབ་མི་སྦེད་སྙིང་ནས་བཤགས་པར་བགྱི། །དེ་ལྟར་བསྐང་ཞིང་བཤགས་པའི་བྱིན་རླབས་ཀྱིས། །རྒྱལ་བའི་བསྟན་པ་སྤྱི་དང་ཁྱད་པར་དུ། །སྔ་འགྱུར་རྡོ་རྗེ་ཐེག་པའི་བསྟན་པ་མཆོག །སྲིད་མཐའི་བར་དུ་མི་ནུབ་དར་རྒྱས་མཛོད། །འདུས་པའི་སྡེ་ཚོགས་དབྱར་གྱི་མཚོ་ལྟར་རྒྱས། །རྣམ་དག་ཚུལ་ཁྲིམས་བསླབ་པས་རྒྱུད་དུལ་ཞིང་། །ཐོས་བསམ་སྒོམ་པའི་ཤེས་རབ་རྩལ་རྫོགས་ནས། །ཏིང་འཛིན་མི་གཡོའི་ངང་ལ་གནས་པར་མཛོད། །སྣང་ཚད་སྐུ་དང་ཡེ་ཤེས་ཕྱག་རྒྱར་ཤར། །སྒྲ་གྲགས་བདེ་ཆེན་ཚངས་དབྱངས་སྔགས་ཀྱི་སྒྲ། །དྲན་རྟོག་རང་གྲོལ་འོད་གསལ་ཆོས་སྐུའི་ཞལ། །མངོན་སུམ་མྱུར་དུ་མཇལ་བའི་ཕྲིན་ལས་མཛོད། །འཇིག་རྟེན་རྒྱལ་ཁམས་ཡུལ་རིས་མཐའ་དག་ཏུ། །ནད་མཚོན་མུ་གེའི་བསྐལ་བ་རབ་ཞི་ནས། །ཟས་ནོར་ལོངས་སྤྱོད་ཡིད་ལ་གང་འདོད་པ། །འབད་མེད་ལྷུན་གྱིས་འགྲུབ་པར་མཛད་དུ་གསོལ། །མདོར་ན་རིག་འཛིན་རྣལ་འབྱོར་བདག་ཅག་གི །དཀོར་ཆ་ལོངས་སྤྱོད་ཇི་སྙེད་ཡོད་པ་ཀུན། །བསྟན་སྲུང་དམ་ཅན་རྒྱ་མཚོ་ཁྱེད་རྣམས་ལ། །གཉེར་དུ་གཏད་པས་མེལ་ཚེ་བྱ་ར་མཛོད། །ཁྱད་པར་ཚེ་བསོད་སྙན་གྲགས་རྒྱས་པ་དང་། །ནད་གདོན་ཉེར་འཚེའི་རིགས་རྣམས་ཀུན་ཞི་ནས། །ཁམས་གསུམ་མ་ལུས་དབང་དུ་འདུ་བ་དང་། །གནོད་པར་བྱེད་པའི་དགྲ་བགེགས་མཐའ་དག་ཀུན། །མིང་ཙམ་མེད་པར་རབ་ཏུ་ཞི་ནས་ཀྱང་། །རྣམ་བཞིའི་ཕྲིན་ལས་ཡིད་བཞིན་འགྲུབ་པར་མཛོད། །ཅེས་པ་འདི་ནི་མཆོད་ཀུན་བཟང་བསྟན་འཕེལ་ནས་ནན་གྱིས་བསྐུལ་ངོར་ཡང་དག་ཐུགས་མཆོག་ལྷོ་བྲག་མཁར་ཆུའི་ཡང་རྩེ་ནས་ལྕགས་ཕོ་བྱི་བའི་ལོར་ཆོ་འཕྲུལ་ཟླ་བ་མཁའ་འགྲོ་འདུ་བའི་དུས་ཚེས་བཟང་པོའི་ཉིན་ཐུན་མཚམས་ཤིག་ཏུ་འཇམ་མགོན་བླ་མ་པདྨ་འོད་གསལ་མདོ་སྔགས་གླིང་པའི་འབངས་ཐ་ཤལ་བ་རྫོགས་སྤྲུལ་ལྔ་པའི་མིང་འཛིན་པདྨ་ཐེག་མཆོག་བསྟན་འཛིན་ནམ་མིང་གཞན་ཐུབ་བསྟན་ཆོས་ཀྱི་རྡོ་རྗེས་བྲིས་པའོ། །འདིར་སྨྲས་པ། དམ་ཅན་སྤྱི་ཡི་བསྐང་བསྡུས་ཉུང་བསྡུས་འདི། །སྤྲོས་པ་ཆུང་ལ་དགའ་བ་རྣམས་ཀྱི་དོན། །ཚིག་ཉུང་དོན་གསལ་འཇག་བདེ་བྲིས་པ་འདི། །ཉེས་འགལ་གྱུར་ན་སྲུང་མའི་ཚོགས་ལ་བཤགས། །དགེ་འབྲས་མཆིས་ན་བསྟན་འཛིན་སྐྱེས་བུའི་ཚོགས། །ཕྲིན་ལས་རྣམ་བཞིའི་ལས་རྣམས་མཐར་ཕྱིན་ནས། །དཀའ་བ་མེད་པར་བྱང་ཆུབ་གོ་འཕང་མཆོག །མི་རིང་མྱུར་དུ་ཐོབ་པའི་རྒྱུར་གྱུར་ཅིག །མངྒ་ལཾ།