༡༽ ཕྱག་འཚལ་ཞིང་བསྟན་བཅོས་འབྱུང་བའི་རྒྱུ་གླེང་བསླང་བ།

དེ་ལའང༌། ཕྱག་འཚལ་བ་དང༌། གླེང་བསླང་བ་གཉིས་ཀྱི། དང་པོ་ཕྱག་འཚལ་བ། དུས་གསུམ་རྒྱལ་བ་ཐམས་ཅད་དག་དང་དེའི་ཆོས་དང༌། །དགེ་འདུན་རྣམས་ལ་གུས་པ་ཆེན་པོས་ཕྱག་འཚལ་ནས། །ཞེས་གསུངས་ཏེ། དེ་ལ་དགོས་པའི་དོན་དང༌། ཚིག་གི་དོན་བཤད་པ་གཉིས་ལས།

དང་པོ་བསྟན་བཅོས་རྩོམ་པའི་སྔོན་དུ་དད་པའི་གནས་དཀོན་མཆོག་གསུམ་ལ་ཕྱག་འཚལ་བའི་དགོས་པ་ནི། བར་ཆད་ལྡོག་ཅིང་བརྩམས་པ་མཐར་ཕྱིན་པར་འགྱུར་བ་དང༌། ཡ་རབས་དང་བསྟུན་པ་གཉིས་ཏེ། དེ་ཡང་ཤ་ར་བ་ཆེན་པོའི་ཞལ་ནས། ཇོ་བོ་དཀོན་མཆོག་གསུམ་ལ་ཤེས་ནས་དད་པ་ཐོབ་པ་འདྲ་བ་མངའ་བས་རྡོ་རྗེ་གདན་ནས་སིནྡྟུ་བའི་རྒྱལ་ས་ཐག་མི་རིང་བ་ལས་མེད་པར་འདུག་སྟེ། དེ་ཀུན་ཏུ་བཞུད་ཙ་ན་ཡང་ད་ལྟ་གསང་ཕུ་ན་བཞུགས་པའི་མཆོད་རྟེན་དེ་སྤྱན་དྲངས་ནས་བཞུད། ཐུགས་ལ་ཏུར་བ་འདྲ་བ་བྱུང་མ་ཐག་ཏུ་མཎྜལ་མཛད་མཆོད་པ་བཤམས་ནས་ཕྱག་དང་མཆོད་པ་མཛད། གསོལ་བ་བཏབ་ནས་ཐུགས་སོར་ཆུད་པར་མཛད་ནས་བཞུད་གསུངས་ན། འདི་ལྟ་བུའི་བསྟན་བཅོས་བོད་ཐམས་ཅད་ཀྱི་མིག་འབྱེད་པའི་དོན་ཆེན་པོ་དང་ལྡན་པ་རྩོམ་པ་ལ་ཡི་གེར་བྲིས་པ་འདི་ལ་མ་ལྟོས་པའི་ཕྱག་དང་མཆོད་པ་ཆེན་པོ་མཛད་ངེས། ཕྱག་བཙལ་བའི་དགོས་པ་ཡང་གྲུབ་པས་རྩོམ་པ་ལ་བར་ཆད་མ་བྱུང་བ་དེང་སང་གི་བར་དུ་བོད་ཐམས་ཅད་ཀྱང་དད་དད་པོར་བྱེད་ཅིང་ཉན་བཤད་དང་བྱེད་པ་འདི་ཡིན། ཇོ་བོས་བསྟན་བཅོས་ཀྱི་དབུར་དཀོན་མཆོག་གསུམ་ལ་ཕྱག་འཚལ་བའི་ཚིག་ཡི་གེར་བྲིས་པ་འདི་རང་ཅག་དཀོན་མཆོག་གསུམ་ལ་སྐྱབས་སུ་སོང་བ་ཐམས་ཅད་ཀྱིས་བྱ་བ་ཅི་བྱེད་ཀྱི་སྔོན་དུ་དཀོན་མཆོག་གསུམ་ལ་ཕྱག་དང་མཆོད་པ་ཕུལ་གསོལ་བ་བཏབ་ནས་བརྩམས་ན་འགྲུབ་པར་བསྟན་པའི་དོན་ཡིན་ཏེ། ཐ་ན་སྡིག་གི་དངོས་པོ་ཡང་འགྲུབ། སྡིག་གི་དངོས་པོ་ཁོ་ན་བནྡེ་ཚྭ་ཁ་དང་གསེར་ཁ་ཐམས་ཅད་དུ་འགྲོ་བ་ཀུན་ཡིན་ཏེ་དེ་བཞིན་དུ་བྱས་ན་འགྲུབ་པ་ཉམས་སུ་མྱོང་བ་ཡིན། སྔགས་པ་མཐུ་ཁ་བྱེད་པ་ཀུན་ཡིན་ཏེ་ཡང༌། གཅིག་ཁོ་རང་གི་སྙིང་པོ་ཉི་ཚེ་བགྲང༌། གཅིག་རང་གི་དེ་ཡང་བགྲང་ལ་དཀོན་མཆོག་ལ་མཆོད་བགྲང་ཡང་བྱེད་པ་གཉིས་ཡོད་ན། སྔ་མས་ཕྱི་མ་ལ་མཐུ་མི་འཛུག་པར་ཕར་ལ་འཛུག་པ་ཉམས་སུ་མྱོང་བས་གྲུབ་པ་ཡོད་དོ། །དེ་བས་ན་རང་ཅག་དང་པོ་རབ་ཏུ་བྱུང་བའི་དུས་ནས་ཡང་སྲིད་རྒྱུན་བཅད་པར་བརྩམས། བྱང་ཆུབ་ཆེན་པོ་ལ་སེམས་བསྐྱེད་པའི་དུས་ནས་གཞན་དོན་དུ་ཐམས་ཅད་མཁྱེན་པ་སྒྲུབ་པར་བརྩམས་པ་ཡིན་པས། དེ་ཐམས་ཅད་མཐར་ཕྱིན་པར་བྱ་བའི་ཕྱིར་དུས་རྟག་ཏུ་དཀོན་མཆོག་ལ་ཕྱག་འཚལ་མཆོད་པ་འབུལ་གསོལ་བ་གདབ། སྙིང་པོ་བརྒྱ་སྐོར་རེ་ཙམ་བགྲང་ངམ། མདོ་སྡེ་བམ་པོ་རེ་ཙམ་ཀློག་གམ། ཡིད་ལ་བྱེད་པ་ཅུང་ཟད་ཅིག་སྦྱོང་ཡང་དེའི་སྔོན་དུ་དེ་དག་བྱ། དེ་དག་བྱས་པས་ལས་ཀྱི་དངོས་གཞི་དེ་མ་གྲུབ་ན་ཡང་ལས་དོན་མཚུངས་པར་མ་སོང༌། དངོས་གཞི་ཁོ་ན་དེ་ཉིད་ཡིན། དཀོན་མཆོག་གསུམ་གྱི་ཆེ་བ་ལ་ཡིད་ཆེས་ནས་བློ་གཏོད་ནུས་ན་བར་ཆད་སེལ་བ་དང་འདོད་པའི་དོན་སྒྲུབ་པ་གཉིས་ཀ་ལ་འདི་ལས་ནུས་པ་ཆེ་བ་གཞན་མེད་དེ་ཏུག་གིས་གཏུགས་ཙ་ན་འདི་ཡང་དཀའ་བར་ཡོང་བར་སྣང༌། ཡ་རབས་ནི་སྔོན་གྱི་འཕགས་པ་རྣམས་ཡིན་ཏེ། དེ་དག་གིས་དང་པོ་ཐར་པ་དང་ཐམས་ཅད་མཁྱེན་པ་རྩོམ་པའི་དུས་ནས་དེ་བཞིན་དུ་མཛད་པ་དང་མཐུན་པར་རང་ཉིད་ཡ་རབས་ཀྱི་ནང་དུ་ཚུད་པར་འདོད་པས་ཀྱང་དེ་བཞིན་དུ་བྱའོ་གསུངས་སོ། །གཉིས་པ་ཚིག་གི་དོན་ནི། གང་ལ་ཕྱག་འཚལ་བའི་ཡུལ་ཕྱོགས་བཅུ་ན་དུས་གསུམ་དུ་བཞུགས་པའི་རྒྱལ་བ་སངས་རྒྱས་བཅོམ་ལྡན་འདས་ཐམས་ཅད་དག་དང༌། དེའི་བསྟན་པ་དམ་པའི་ཆོས་དང༌། དེ་སྐུ་ཉམས་སུ་བཞེས་པའི་ཉན་རང་བྱང་སེམས་ཀྱི་དགེ་འདུན་རྣམས་ལ། གང་གིས་ཕྱག་འཚལ་བ་པོ་ཇོ་བོ་རྗེ་ལྷ་གཅིག་ཉིད་ཀྱིས་དཀོན་མཆོག་གསུམ་གྱི་ཡོན་ཏན་ལ་ཤེས་ནས་དད་པ་དང་ལྡན་པའི་བསམ་པ་དང་སྦྱོར་བ་གུས་པ་ཆེན་པོས་ཕྱག་འཚལ་བར་མཛད་ནས་ཞེས་པ་སྟེ། འདིར་ཕྱག་གི་ཡུལ་སངས་རྒྱས་དཀོན་མཆོག་ལ་རྒྱལ་བ་ཞེས་སྨོས་པ་ནི་སྔོན་སངས་རྒྱས་བཅོམ་ལྡན་འདས་མངོན་པར་རྫོགས་པར་སངས་རྒྱས་ནས་ཝཱ་རཱ་ཎ་སཱིར་བཞུད་པའི་བཤུལ་ཁར་ཀུན་ཏུ་རྒྱུ་ཉེར་འགྲོ་དང་མཇལ། དེས་ཁྱོད་སུ་ཡིན་གར་འགྲོ་ཞུས་པའི་དུས་ན། སྡིག་དང་ཉོན་མོངས་དག་ལས་ང་རྒྱལ་ཕྱིར། །ཉེར་འགྲོ་དེ་ཕྱིར་ང་ནི་རྒྱལ་བ་ཡིན། །ཞེས་ཉིད་ཀྱིས་ཉིད་ལ་མཚན་བཏགས་པ་སྤངས་པ་ཕུན་སུམ་ཚོགས་པའི་མཚན་ཉིད་དེ། དེ་ཡང་ཤ་ར་བའི་ཞལ་ནས། དེ་གཉིས་བག་ཆགས་དང་བཅས་པ་སངས་ཀྱིས་སྤངས་པ་ནི་སངས་རྒྱས་ཁོ་ན་ཡིན། ལས་ལས་རིང་དུ་སོང་བའི་འཕགས་པ་ཀུན་གྱིས་ཀྱང་དེ་གཉིས་སུན་ཕྱུང་བ་ཙམ། བསམ་གཏན་དང་གཟུགས་མེད་ཐོབ་པ་དག་གིས་ས་འོག་མ་དག་གི་ས་ལས་ཉོན་མགོ་མནན་པ། རང་གི་ས་པའི་མགོ་མནན་པ་ཡང་མེད། ཉན་ཐོས་དང་རང་སངས་རྒྱས་དགྲ་བཅོམ་པ་དག་ལ་ཡང་གནས་ཀྱི་ས་པའི་མ་རིག་པ་ཡོད་ཅིང༌། སྡིག་པའི་ས་བོན་བརྟགས་མིན་དུ་ལུས་པ་ཡང་ཡོད་པར་གསུངས། ས་བཅུའི་བྱང་ཆུབ་སེམས་དཔའ་དག་ལ་ཡང་དེ་དག་གི་ས་བོན་ཕྲ་མོ་ཡོད། སྤངས་པ་ཕུན་སུམ་ཚོགས་པ་དེ་ཡོད་ན་ཉི་མའི་དཀྱིལ་འཁོར་ཤར་ན་འོད་ཟེར་རང་འབྱུང་བའམ་ཉི་མ་སྤྲིན་དང་བྲལ་ན་འོད་ཟེར་རང་འབྱུང་བ་བཞིན་དུ་གེགས་མེད་པས་ཡེ་ཤེས་དང་ཡོན་ཏན་གྱི་ཆེ་བ་ཡང་རང་འབྱུང་བས་ཡོན་ཏན་གྱི་ཆེ་བ་ཡང་དེ་ཉིད་ཀྱི་ཤུགས་ལས་བསྟན་པ་གསུངས་པ་བཞིན་དུ་མཚན་གྱི་སྒོ་ནས་ཕྱག་གི་ཡུལ་སངས་རྒྱས་དཀོན་མཆོག་གི་སྤངས་པ་དང་ཡེ་ཤེས་ཀྱི་ཡོན་ཏན་བརྗོད་ཅིང༌། སངས་རྒྱས་དེས་བསྟན་པའི་ཆོས་ཡིན་པས་ན་དེའི་ཆོས་ནི། དྷརྨ་ཞེས་པ་འཛིན་པའི་དོན་ཡིན་ཏེ། དེ་ཡང་ཤ་ར་བའི་ཞལ་ནས། ལས་རྒྱུ་དང་འབྲས་བུ་བསྟན་པའི་ཆོས་ཀྱིས་ངན་སོང་ལས་འཛིན། བདེན་པ་བཞིའི་དེ་ཉིད་ཀྱི་ཕྱོགས་གཅིག་ཏུ་གྱུར་པ་བསླབ་པ་གསུམ་གྱི་ཆོས་ཀྱིས་འཁོར་བ་མཐའ་དག་ལས་འཛིན། ཐེག་པ་ཆེན་པོ་བྱམས་པ་དང་སྙིང་རྗེས་ཀུན་ནས་བསླངས་པའི་བྱང་ཆུབ་ཀྱི་སེམས་ཀྱིས་འཕངས་པའི་བྱང་ཆུབ་སེམས་དཔའི་བསླབ་པའི་ཆོས་ཀྱིས་ཐེག་པ་དམན་པ་ལས་ཀྱང་འཛིན། མཐར་ཐུག་ངས་རྒྱས་ཀྱི་ཆོས་ཐོབ་པས་སློབ་པའི་ལམ་ལས་ཀྱང་འཛིན་པ་སྟེ་དེ་རྣམས་སྟོན་པར་བྱེད་པའི་སྡེ་སྣོད་གསུམ་གསུང་རབ་ཡན་ལག་བཅུ་གཉིས་ཀྱིས་བསྡུས་པ་ལུང་གི་ཆོས་དང༌། འཕགས་པའི་གང་ཟག་རྣམས་ཀྱི་ཐུགས་རྒྱུད་ལ་མངའ་བའི་སྒྲུབ་པ་དང་རྟོགས་པ་དང་འབྲས་བུའི་ཆོས་ཐམས་ཅད་དོ་གསུངས་པ་བཞིན་ཆོས་དཀོན་མཆོག་གི་བྱེད་ལས་ཀྱི་ཡོན་ཏན་དང༌། དགེ་འདུན་ནི་སངྒྷ་ཞེས་པ། སངས་རྒྱས་ཆོས་དང་དགེ་འདུན་རྣམས། །བདུད་རྣམས་བྱེ་བ་བརྒྱ་ཡིས་ཀྱང༌། །གང་ཕྱིར་དབྱེ་བར་མི་ནུས་པ། །དེ་ཕྱིར་དགེ་འདུན་ཞེས་བརྗོད་དོ། །ཞེས་གསུངས་པ་བཞིན་དུ་ཤ་ར་བ་ཆེན་པོ་སྟོན་པ་དང་ལྟ་བ་ལས་མི་ཕྱེད་པ། དགེ་འདུན་གྱི་སྒྲ་དོན་དུ་བཤད་པ་ལྟ་བུའི་ཡོན་ཏན་དང་ལྡན་པ་དང་པོར་གསོལ་བ་དང་བཞིའི་ལས་ཀྱིས་བསྙེན་པར་རྫོགས་པ་བཞི་ཡན་ཆད་ནས། བྱང་ཆུབ་ཆེན་པོ་ལ་སེམས་བསྐྱེད་པ་བཞི་ཡན་ཆད་ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའི་དགེ་འདུན་ཐམས་ཅད་དེ་ཡུལ་དེ་གསུམ་ལ་ཇོ་བོས་ཚུལ་ཇི་ལྟར་དུ་ཕྱག་མཛད་ན་བསམ་པ་དང་སྦྱོར་བ་གུས་པ་ཆེན་པོས་ཏེ། དེ་ཡང་ཤ་ར་བའི་ཞལ་ནས། ཇོ་བོའི་དད་གུས་ཙམ་དང་རང་ཅག་རྣམས་ལ་ཀྱང་མི་ཡོང་སྟེ་སྙིང་མཉམ་ཙམ་དང་སླ་ཆོས་སུ་མི་གཏང་བར་དད་པའི་མཐུ་ཡོད་ཚད་ཀྱིས་གུས་པ་བསྐྱེད་ལ་བྱ། ཇོ་བོ་ཆོས་སྤྱོད་ཀྱི་དུས་ཀུན་ན་ཡང་ཞབས་ཀྱིས་བྱིན་པ་མདར་སྲིལ་སྲིལ་བ་མང་པོ་རང་ཅག་ཅི་ལྟ་བུའི་ཁམས་བཟང་པོས་ཀྱང་འཁྲུག་པའི་ཚོད་ཙམ་མཛད་གསུངས་པ་ལགས་པར་གདའ། དགེ་བཤེས་ཆེན་པོ་པུ་ཏོ་བ་དེ་སྟག་ལུང་ཐང་ཀུན་ཏུ་ལན་ཁ་ཡར་སྐྱབས་སུ་འགྲོ་བ་ཐུན་མོང་བའི་ས་བོན་ཡང་འདིས་ཟིན་པ་ཡིན་གསུངས་གསུངས། དེ་ལྟར་ཕྱག་འཚལ་ནས་ཅི་བྱེད་ན།

གཉིས་པ་བསྟན་བཅོས་འབྱུང་བའི་རྒྱུ་གླེང་བསླང་བ་ནི། སློབ་མ་བཟང་པོ་བྱང་ཆུབ་འོད་ཀྱིས་བསྐུལ་གྱུར་པས། །བྱང་ཆུབ་ལམ་གྱི་སྒྲོན་མ་རབ་ཏུ་གསལ་བར་བྱ། །ཞེས་གསུངས་ཏེ། དེ་ཡང་ཇོ་བོས་བསྟན་བཅོས་འདི་རྩོམ་པའི་རྒྱུ་ནི། བླ་མ་སྒྲུབ་པས་མཉེས་པ་དང་ཀུན་གྱི་ཡིད་ཆེས་པའི་གནས་ཡིན་པས་སློབ་མ་བཟང་པོ་མཚན་བྱང་ཆུབ་འོད་ཀྱིས་བསྐུལ་ཞིང་གསོལ་བ་བཏབ་པར་གྱུར་པས། འབྲས་བུ་རྫོགས་པའི་བྱང་ཆུབ་ཐོབ་པར་བྱེད་པའི་ལམ་གྱི་བླང་དོར་གྱི་གནས་སངས་རྒྱས་ཀྱི་གསུང་རབ་ལས་འབྱུང་བ་ཐམས་ཅད་དཔེ་སྒྲོན་མ་སྦར་བས་ལམ་བདེ་བ་དང་ཡངས་པའི་འཇུག་ལྡོག་གི་ཡུལ་གསལ་བར་བྱེད་པ་ལྟ་བུར་བསྟན་བཅོས་འདིས་རབ་ཏུ་གསལ་བར་བྱ། ཞེས་བརྩམ་པར་ཞལ་གྱིས་བཞེས་པ་སྟེ། དེ་ཡང་བླ་མ་སྒྲུབ་པས་མཉེས་པའི་རྒྱུ་མཚན་ལ། ཤ་ར་བ་ཉིད་ཇོ་བོ་ལ་ལྷ་བཙུན་པས་ཞེ་ས་ཕུལ་ཙ་ན་གཟིགས་པ་ཙུག་ཡང་མི་མཛད། ལྷ་བཙུན་བོ་དྷི་རཱ་ཛས་ཞེ་ས་ཕུལ་ཙ་ན་རྡོ་རྗེ་སྐྱིལ་མོ་ཀྲུང་དུ་བཞུགས་པ་ཡང་བཤིག་ནས་བཞེངས། ཁྱོད་བོད་ཀྱི་བཙད་པོ་ལྷ་ཟེར་བ་ལྷ་ཕྱག་འཚལ་བ་ལ་ཡང་མི་ལངས་པ་ང་རྒྱལ་ཆེ་ཟེར་ནས་ཁོ་བོ་ལ་ཁ་ཟེར་དུ་མཆི་གསུངས། འོ་ན་ལྷ་བཙུན་པ་ལ་མི་བཞེངས་པ་ཇི་ལྟར་ལགས་ཞུས་པ་ལ། དེ་ངའི་སློབ་མ་ཡིན་གསུངས། ལྷ་བཙུན་བོ་དྷི་རཱ་ཛས་ཁོ་བོ་སློབ་མ་མ་ལགས་སམ་ཞུས་པ་ལ་ཞལ་རོག་བཞུགས་སྐད་པ་གསུངས་ཏེ། དེ་ལ་སྣར ་ཐང་བ་དཔལ་ལྡན་གྲོའི་ཞལ་ནས། ངོ་བསྲུང་མི་དགོས་པ་དང་མཉེས་པའི་རྟགས་ཡིན། བླ་མས་སློབ་མ་ལ་ངོ་བསྲུང་མི་དགོས་པ་འདི་གལ་ཆེ་བས་གོ་བ་ཆེར་དགོས་པ་ཡིན། བླ་མས་སློབ་མ་ལ་བཙན་རྒོད་བརྟེན་པ་བཞིན་དུས་རྟག་ཏུ་དགོས་པ་དེ་ཐར་པ་དང་ཐམས་ཅད་མཁྱེན་པ་བསྒྲུབ་པའི་སློབ་དཔོན་དུ་མི་རུང་གསུངས། ལྷ་བཙུན་པས་ཀྱང་ཁོ་བོའི་གསུང་ལ་རྩིས་བྱེད་གསུངས་ནས་མཉེས་པ་ལགས་སྐད། ཀུན་གྱི་ཡིད་ཆེས་པའི་གནས་ཡིན་པ་ཡང༌། ཤ་ར་བའི་ཞལ་ནས། དགེ་བཤེས་སྟོན་པས་མངའ་རིས་ནས་བོད་ཀྱི་མི་ཆེན་རྣམས་ལ་སྟོན་འདི་ཞལ་མཐོང་དང་བཅས་ཏེ་ཇོ་བོ་སྤྱན་འདྲེན་པ་ལ་བྱོན་བྱ་བའི་བཀའ་འཕྲིན་ཉ་བ་དང་དབང་ཕྱུག་མགོན་ལ་བརྫངས་པའི་དུས་སུ་བོད་ཐམས་ཅད་འདུན་མ་བྱས་ནས་རྒྱ་སར་སྒང་གི་སུམ་པ་ཡེ་ཤེས་བློ་གྲོས་དེ་དེ་ཙ་ནའི་བགྲེས་ཐག་ཡིན་པས་ཁོང་ལ་ཇོ་བོ་སྤྱན་དྲངས་པའི་ཞུ་བ་ཕུལ་བ་ལ། ཁད་ཤེད་སྤྱན་མ་དྲང་འཚལ་ཨ་ཙ་ར་གསེར་འདོད་ཅིག་ལགས་ཏེ་མཆི། ལྷུང་བཟེད་ཀྱང་དཀར་པོ་ཞིག་གདའ་མཆི། ཕལ་ཆེར་མུ་སྟེགས་པ་ཞིག་ལགས་སམ་ཡང་མ་འཚལ། གསེར་ཅིག་བསྡུས་པ་ལ་ཡ་ཟད་སྐྱལ་གསུངས་སྐད་པ་ལ་པུ་ཏོ་བའི་ཞལ་ནས། བཟང་ནི་རེ་བཟང་ཅི་ནས་ཀྱང་དེའི་འདོད་པ་ཞིག་བསྐང་བར་བློས་བཅད་གསུངས། དེར་གཞན་ཀུན་གྱིས། དེ་ཙུག་མ་ལགས་ལྷ་བཙུན་པས་སྤྱན་དྲངས་པ་ལགས་སྐད་ཞུས་པས། འོ་ན་བཟང་པོ་ལགས་ཏེ་མཆི་སྤྱན་དྲངས་འཚལ་གསུངས་ནས་ལྷ་བཙུན་པས་སྤྱན་དྲངས་པ་ལ་ངན་པ་ཞིག་འོང་བར་ཐུགས་མི་ཆུད་དེ། ལྷ་བཙུན་པ་བོད་དུ་བྱོན་ཚུན་ཆད་ཇོ་བོ་བོད་ཐམས་ཅད་ལ་དད་པའི་གནས་སུ་གྲུབ་པ་ཡིན་པས། སྔོན་སངས་རྒྱས་མངོན་པར་རྫོགས་པར་སངས་རྒྱས་པའི་དུས་ན་ལྷའི་དབང་པོ་བརྒྱ་བྱིན་གྱིས་ཀྱང་གསེར་གྱི་འཁོར་ལོ་རྩིབས་སྟོང་དང་ལྡན་པ་ཕུལ་ནས་ཆོས་ཀྱི་འཁོར་ལོ་བསྐོར་བར་བསྐུལ་བ་ལ་མ་གནང༌། ཚངས་པས་དེ་བཞིན་དུ་གསོལ་བ་བཏབ་པས་གནང༌། ཚངས་པ་བས་བརྒྱ་བྱིན་ཞུ་རྟེན་དང་ངོ་ཆུང་བ་མིན་ཏེ། དེའི་དུས་ན་འཛམ་བུ་གླིང་པ་ཐམས་ཅད་ཚངས་པ་ལྷར་འཛིན་པས་དེས་གསོལ་བ་བཏབ་ནས་ཆོས་ཀྱི་འཁོར་ལོ་བསྐོར་ན་འཛམ་བུ་གླིང་པ་ཐམས་ཅད་ཀྱི་ཡིད་ཆེས་པའི་གནས་སུ་གྲུབ་པར་མཛད་པའི་དོན་ཡིན། དེ་བཞིན་དུ་དེ་ཙ་ན་བོད་ཐམས་ཅད་ལྷ་བཙུན་པ་ལ་ཡིད་ཆེས་པའི་གནས་སུ་བྱེད་པས་དེས་གསོལ་བ་བཏབ་ནས་བརྩམས་པས་བོད་ཐམས་ཅད་ཀྱི་ཡིད་རྟོན་པའི་གནས་སུ་གྲུབ་པར་བྱ་བའི་མན་ངག་ཏུ་གྱུར་པ་ཡིན། སྤྱིར་དབང་པོ་རྣོན་པོ་ཆོས་ཀྱི་རྗེས་སུ་འབྲང་བ་ཆོས་ལ་ཡིད་ཆེས་པས་དེ་མཛད་པ་པོ་ལ་ཡིད་ཆེས་པ་དང༌། བརྟུལ་པོ་དད་པའི་རྗེས་སུ་འབྲང་བ་གང་ཟག་ལ་དད་པས་དེའི་ཆོས་ལ་ཡང་དད་ནས་འཇུག་པ་གཉིས་ལས། རང་ཅག་ནི་དད་པ་ཅན་དུ་བྱས་ལ་ཡིད་ཆེས་པའི་གང་ཟག་གི་རྗེས་སུ་འབྲང་བ་ཁོ་ན་ཆབ་སྲིད་བརྟན་པ་ཡིན་གསུངས་ཤིང༌། རྒྱུ་མཚན་དེ་ལ་བརྟེན་ནས་ཇོ་བོས་བསྟན་བཅོས་ཅི་ལྟ་བུ་ཞིག་བརྩམས་ན་བྱང་ཆུབ་ཀྱི་ལམ་རབ་ཏུ་གསལ་བར་བྱེད་པ་ཞིག་སྟེ། བྱང་ཆུབ་ནི་གསུམ་ཆར་ཡང་ཡིན་པ་ལས། གཙོ་བོར་དྲི་མ་ཟད་པ་དང་མི་སྐྱེ་བ་ཤེས་པའི་ཡེ་ཤེས་སངས་རྒྱས་ཀྱི་བྱང་ཆུབ་ཡིན་ཏེ། དེ་ལ་དགེ་བཤེས་སྟོན་པའི་ཞལ་ནས། འོ་སྐོལ་གྱི་སྒྲ་ལ་བྱང་ཆུབ་ཅེས་པ་བས་ཀྱང་བྱང་གྲུབ་བྱ་བ་ཞིག་ཏུ་ཡོང་བར་སྣང༌། བྱང་བ་དེ་བཞིན་ཉིད་རང་བཞིན་གྱིས་རྣམ་པར་བྱང་བ། དེ་ལམ་ལྔས་བསྒྲུབས་པས་གློ་བུར་གྱི་དྲི་མ་ཐམས་ཅད་དང་བྲལ་ནས་རང་གཞན་གང་ཡིན་པ་དེ་ཉིད་དུ་ཙེན་གྱིས་གྲུབ་པའི་དོན་ཡིན་གསུངས་ཤིང༌། དེའི་ལམ་ནི་ལམ་ལྔའམ། སངས་རྒྱས་ཀྱིས་གསུངས་པའི་ཆོས་ཐམས་ཅད་དེ། སངས་རྒྱས་ཉིད་ཀྱིས་ང་འཇིག་རྟེན་དུ་བྱོན་པ་བདེ་འགྲོ་ཙམ་གྱི་དོན་དུ་མ་ཡིན་ཐར་པའི་དོན་དུ་ཡིན། དེ་ཡང་དམན་པའི་དོན་དུ་མ་ཡིན་མཆོག་གི་དོན་དུ་ཡིན། ཞེས་གསུངས་པ་དང༌། ཇོ་བོ་ཉིད་ཀྱིས་ཀྱང༌། ཆོས་ཀྱི་ཕུང་པོ་བརྒྱད་ཁྲི་དང༌། །བཞི་སྟོང་གསུངས་པ་ཐམས་ཅད་ཀྱང༌། །ཆོས་ཉིད་འདི་ལ་གཞོལ་ཞིང་འབབ། །ཅེས་གསུངས་པ་དག་དཔེར་ན་སྒྲོན་མས་ལམ་ཡ་ང་བ་དང་བདེ་བ་ཐམས་ཅད་གསལ་བར་བྱས་ནས་ཡ་ང་བ་སྤངས་ཏེ་བདེ་བ་ནས་འགྲོར་ཡོད་པར་བྱེད་པ་བཞིན་གསལ་པོར་བྱ་ཞེས་བརྩམ་པར་ཞལ་གྱིས་བཞེས་ཏེ། འདི་ལ་བོད་ཀྱིས་བཤད་པར་དམ་བཅའ་ཡང་ཟེར། བསྟན་བཅོས་དག་ལས་འདིའི་རིགས་ཅན་ལ་གླེང་བསླང་བ་བྱ་བར་ཡང་གསུང་གསུངས་ཏེ། དེ་ལྟ་བུའི་ཞལ་བཞེས་དེ་ནི་སངས་རྒྱས་ཀྱི་ཞལ་བཞེས་ཙམ་དུ་འདུག་ན་ཇོ་བོས་བྱང་ཆུབ་ཀྱི་ལམ་དེ་གསལ་བར་མཛད་སྤྱོད་དམ་སྙམ་ན། གསལ་བར་མཛད་སྤྱོད་པ་ཁོ་ན་སྟེ། དེའི་རྒྱུ་མཚན་དུ་དགེ་བཤེས་སྟོན་པ་བར་འདིར་ཇོ་བོའི་སྐུ་ཆེ་བའི་ཡོན་ཏན་ཤས་རེ་གསུང་བ་ལགས་པར་གདའ་བས། པུ་ཏོ་བ་དང་ཤ་ར་བ་ཡང་བར་འདིར་ཡོན་ཏན་ཐམས་ཅད་བླ་མར་རག་ལས་པ་ལས་བླ་མ་བཟང་བ་དང༌། རིག་པའི་གནས་ཐམས་ཅད་ལ་སློབ་དཔོན་གྱི་གོ་འཕང་བརྙེས་པ་མཁས་པའི་ཡོན་ཏན་དང༌། བཙུན་པའི་ཡོན་ཏན་དང༌། སྒྲུབ་པ་ལས་བྱུང་བའི་ཡོན་ཏན་དང་ལྡན་པའི་རྒྱུ་བཞི་གསུང་བའི་དང་པོ་ལ་དགེ་བཤེས་པུ་ཏོ་བ་དེ་སྐབས་སུ་བླ་མ་མངོན་པར་ཤེས་པ་རྒྱ་ཆེན་པོ་དང་ལྡན་པ་གསུངས། སྐྱབས་སུ་ཕྱག་རྒྱ་ཆེན་པོའི་དངོས་གྲུབ་བརྙེས་པ་གསུང་བ་ལ་ཕྱིས་དེ་གཉིས་དོན་གཅིག་པ་ཡིན་གསུངས་པས། ལོ་བདུན་ཕྱག་ཕྱིར་འབྲངས་པའི་ཨ་ཝ་དྷུ་ཏི་པ་ཆེན་པོ་དང༌། གཤིན་རྗེའི་གཤེད་ཀྱི་རྣལ་འབྱོར་པ་དང་བྱིན་གྱིས་རློབ་པའི་བླ་མ་ཌོམྦྷི་བ་དང་གསུམ་མངའ་བ་ལས། ལྟ་བ་དབུ་མ་འཛིན་པ་ཨ་ཝ་དྷུ་ཏི་པའི་བཀའ་དྲིན་ཡིན་ཏེ། ངས་ཀྱང་འདི་ལ་བརྟེན་ནས་ཆོས་མཐོང་བས་ཁྱོད་ཀྱིས་ཀྱང་འདི་ཟུངས་གསུངས་ནས་བཟུང་བ་ལགས་སྐད། ཇོ་བོས་ཀྱང་ལོ་དྲུག་ཨ་ཝ་དྷུ་ཏི་པའི་སྤྱོད་པ་མཉམ་པོར་མཛད། རྡོ་རྗེའི་གླུ་དང་སྤྱོད་པའི་གླུ་ལ་སོགས་པ་ཀུན་ཡང་དེ་ཙ་ན་མཛད་པར་གདའ། གསང་སྔགས་ཀྱི་ཕལ་ཆེར་གཤིན་རྗེའི་གཤེད་ཀྱི་རྣལ་འབྱོར་པའི་བཀའ་དྲིན་ཡིན། ཁོང་དང་པོ་གྲུབ་མཐའ་སེམས་ཙམ་བཞེད་པ་ལ་ཕྱིས་དབུ་མར་འགྱུར་ནས་བཞུགས་ན། ལྟ་བ་འགྱུར་བའི་རྒྱུ་གཉིས་ལས་ཆོས་གཟིགས་པ་ཡིན་ཏེ་འོང༌། དུས་དེ་ཙ་ན་དེ་ལ་རིག་པས་སུན་འབྱིན་ནུས་པ་ནི་ཡེ་མེད་གསུངས། ཁོང་ལ་ཆོས་གསན་ཙ་ན་ནང་ཞིག་ཆར་ཆེན་པོ་ཞིག་བྱུང་བས་རྣལ་འབྱོར་མ་གཉིས་འདུག་པའི་གཞོན་ཤོས་དེ་ན་རེ་ད་ནང་གི་རྡོ་རྗེ་སློབ་དཔོན་དང་རྡོ་རྗེ་མཆེད་ཀྱི་དྲོ་དེ་ངས་དྲང་ངོ་གསུངས་ནས་རས་ཤིག་གི་ཕག་ཏུ་བསྒོམས་པས་ཅི་ཙམ་དྲང་དྲང་བྱུང༌། ཡང་ཆར་ཅིག་བྱུང་བའི་དུས་སུ་རྣལ་འབྱོར་མ་ཆེ་ཤོས་དེས་སྒོམ་རང་ཡང་མ་དགོས་པར་དྲང་པས་ཆོག་པ་བྱུང་སྟེ། དེ་གཉིས་ལའང་ཁྱད་དེ་ཙམ་འདུག་གསུང་སྐད། ཌོམྦྷི་བ་དེ་དང་པོ་རིགས་ངན་རྒྱལ་པོའི་གླང་པོ་ཆེ་འཚོ་བའི་རྫི་བོ་ཡིན་པ་ལ། ནཱ་རོ་པ་སྤྱིལ་པོ་ན་བཞུགས་པ་ལ་ཡར་ལམ་མར་ལམ་སྤྱིལ་པོའི་ནང་ དུ་མགོ་གཡོན ་གྱིན་ལྟ། ནཱ་རོ་པས་མཁྱེན་བཞིན་དུ་ཁྱོད་ང་ལ་དགའ་འམ་དད་དམ་བྱས་པས། དགའ་དད་ཟེར། འོ་ན་ང་ལ་གྲོང་ཁྱེར་ནས་ཆང་ཞིག་སློངས་ལ་དྲོངས་ཤིག་གསུངས། དེ་བཞིན་དུ་བྱས་པས་ཆོས་ཅི་ཡང་མ་གསུངས་པར་བྱིན་རླབས་ཞུགས་ནས་ཡོན་ཏན་ཁྱད་པར་ཅན་བརྙེས། དེ་གཞན་གྱིས་གོ་བར་བྱ་བའི་དོན་དུ་གླང་པོ་ཆེ་འཚོར་མི་བཞུད་པར་སྲང་མདོ་ན་བཞུགས། གསོལ་ཟས་བསྐྱལ་བས་ལ་ལ་གསོལ། ལྷག་རོལ་དེ་བཞིན་དུ་བཞག རིགས་བཟང་པོའི་བྱིས་པ་ཀུན་གྱིས་བཟོས། བྲམ་ཟེའི་སྨྲེང་ལས་རིགས་ངན་གྱི་ལྷག་མ་ཟོས་ན་རིགས་ལད་པར་བཤད་པས། ངེད་ཀྱི་བྱིས་པའི་རིགས་བཟླད་འདིར་མ་སྡོད་བྱས་པས་ཐོས་པ་བཞིན་ཡང་མི་མཛད། དེར་ཐག་པས་གླང་པོ་ཆེའི་མགུལ་དུ་བཏགས་ནས་གླང་པོ་བསྐྲོགས་ཀྱིན་བཏང་བ་ལ་གླང་པོ་ཆེ་ཚུར་ལ་ཀོར་ཀོར་བྱས་ནས་བསྒུལ་དུ་ཡང་མ་ཚུགས་པས། དེར་ཡོན་ཏན་ཁྱད་པར་ཅན་བརྙེས་པར་ཤེས། ཡོན་ཏན་བརྙེས་པ་ཡིན་ན་རིགས་སོར་ཆུད་པས་རིགས་ལ་མི་གནོད་པར་བྲམ་ཟེའི་སྨྲེང་ལས་འབྱུང་བས་དེ་བཞིན་དུ་བཞུགས་སུ་བཅུག་ཙ་ན་གར་བཞུད་ཆ་མེད་པར་བཞུད་སྐད། དེ་ལ་ཤ་ར་བའི་ཞལ་ནས། དེ་ལྟ་བུའི་ལས་འཕྲོ་ཅན་བྱིན་གྱིས་རློབ་པ་ལ་བསྙེན་བཀུར་ཅུང་ཟད་པོ་དེའི་སྣ་སེལ་ལ་ལྟོས་དགོས་པ་ཀུན་ཡང་མན་ངག་ཡིན་གསུངས། ཇོ་བོས་ཌོམྦྷི་བ་དེ་དང་དངོས་སུ་མ་མཇལ་གསོལ་བ་བཏབ་པས་བྱིན་གྱིས་བརླབས་པ་སྔགས་པ་དེའི་གཏམ་རྒྱུད་དང་བཅས་པས་གསུངས་ཏེ། ནུབ་གཅིག་རྨི་ལམ་དུ་དགེ་སློང་ཞིག་མི་ཤ་ཟ་ཞིང་བྱུང་བ་ལ་སངས་རྒྱས་ཀྱི་བསྟན་པ་ལ་རྨ་འབྱིན་པའི་དགེ་སློང་འདི་ལྟ་བུ་སུ་ཡིན་བྱས་ཙ་ན། རྟོགས་པ་མ་མང་བར་ཁྱོད་རང་ཡང་འདི་ཟོ་ཟེར་ནས་ཇོ་བོས་ཀྱང་གསོལ་བ་ཞིག་རྨིས་པ་དང་དེའི་ནུབ་མོ་ནས་ཏིང་ངེ་འཛིན་རྒྱ་ཆེན་པོ་བརྙེས། ཇོ་བོ་ལ་དེ་ཌོམྦྷི་བའི་བྱིན་རླབས་ཡིན་པའི་ཐུགས་ཚོད་མི་མངའ་བ་ལ། ཕྱིས་སྔགས་པ་ཞིག་ཌོམྦྷི་བ་ལ་གདམས་ངག་ཞུས་པས། ང་དང་ཁྱོད་ལ་ལས་འབྲེལ་མེད། ཡུལ་དབུས་ན་ངས་བྱིན་གྱིས་བརླབས་པའི་དགེ་སློང་འདི་ལྟ་བུ་ཞིག་ཡོད་པས་དེ་ལ་ཞུས། ཁོང་ལ་ངས་བྱིན་གྱིས་བརླབས་པའི་མཚན་མ་རྨི་ལམ་མངོན་མཚན་ཅན་འདི་ལྟ་བུ་ཞིག་བྱུང་བ་དང་ཏིང་ངེ་འཛིན་བརྙེས་པ་ཞིག་ཡོད་ཅིག་གསུངས། དེར་སྔགས་པ་དེས་ཉི་མ་བཞི་ལྔར་ཇོ་བོ་ལ་མཎྜལ་རེ་ཕུལ་གྱིན་གསོལ་བ་བཏབ་ནས་ཉིན་ཞིག་ན་བཟའ་འདྲ་བ་སྤན་སྤུན་མངའ་བ་ཀུན་གོ་ལར་བསྒྱུར་ནས་ཐོ་ཕྱི་ན་འདུག་པ་ཀུན་ལ་ཚོགས་སོགས་བྱས་ནས་བཀའ་དྲིན་གྱིས་ཁྱབ་ཟེར། ཇོ་བོས་དེའི་དོན་དྲིས་པས་སྔར་གྱི་ལོ་རྒྱུས་རྣམས་བཤད་ནས་ཧེ་རུ་ཀའི་དཀྱིལ་འཁོར་མངོན་དུ་གྱུར་ཟེར་ཏེ། དེ་ལ་ཤ་ར་བའི་ཞལ་ནས། ཧེ་རུ་ཀའི་དཀྱིལ་འཁོར་མངོན་དུ་གྱུར་ཟེར་བ་ཁྲོ་བོ་ཞལ་གསུམ་ཕྱག་དྲུག་པ་མཆེ་བ་ཙལ་ལེ་བ་ཞིག་ལ་མི་ཟེར། ཆོས་རྣམས་ཀྱི་གནས་ལུགས་གཟིགས་པ་ཡིན་གསུངས་པས། ཕྱག་རྒྱ་ཆེན་པོའི་དངོས་གྲུབ་ཐོབ་པ་ལགས་པར་གདའ། ཇོ་བོས་ཀྱང་སྔར་གྱི་བླ་མ་ཌོམྦྷི་བའི་བྱིན་རླབས་ཡིན་པར་དེ་ཙ་ན་གདོད་མཁྱེན། ཕྱི་ནས་ཇོ་བོ་རྣལ་འབྱོར་པ་དེ་དང་ནམ་མཇལ་བར་བཞེད་ཙ་ན་ཁོ་བོ་འདི་ན་མཆིས་གསུང་ཡིན་འབྱོན་པ་ལ། བོད་དུ་བྱོན་ནས་ཡེ་མ་བྱུང༌། ལོ་ཀ་གཞན་དུ་བཞུད་དམ། སྐད་རིགས་མི་གཅིག་པས་ལན་ནམ་གསུང་སྐད། མདོར་ན་བཅོམ་ལྡན་འདས་ཤཱཀྱ་ཐུབ་པའི་བསྟན་པ་འདི་ལ་འཛམ་བུའི་གླིང་འདིར་ཡ་མཚན་ཅན་ནམ་ངོ་མཚར་ཅན་དུ་བྱེད་པའི་གདམས་ངག་ཐམས་ཅད་ཡི་གེ་འབྲུ་གཅིག་ཀྱང་མ་ཆད་པར་མངའ་བ་ཀུ་སཱ་ལི་ཆེན་པོ་བྱ་བ་ཞིག་བྱུང༌། དེ་ལ་བཅོམ་ལྡན་འདས་ཀྱིས་འཕགས་པ་འོད་སྲུངས་ཆེན་པོ་ལ་བསྟན་པ་གཏད། དེས་འཕགས་པ་ཀུན་དགའ་བོ་ལ་གཏད་པ་ནས་ཀྱི་གདམས་ངག་ཐམས་ཅད་ཡི་གེ་འབྲུ་གཅིག་ཀྱང་མ་ཆད་པར་མངའ། སློབ་དཔོན་ཐོགས་མེད་ཀྱིས་བཅོམ་ལྡན་འདས་བྱམས་པ་མཉེས་པར་མཛད་ནས་གདམས་པ་གནང༌། དེས་གཅུང་དབྱིག་གཉེན་ལ། དེས་སློབ་དཔོན་བློ་གྲོས་བརྟན་པ་ལ་གནང་བ་ནས་ཀྱིས་ཡང་ཡི་གེ་འབྲུ་གཅིག་ཀྱང་མ་ཆད་པར་མངའ། སློབ་དཔོན་ཀླུ་སྒྲུབ་དང༌། སངས་རྒྱས་ཡེ་ཤེས་ཞབས་དང༌། མགྲིན་པ་གསུམ་པ་དང༌། རྒྱལ་པོ་ཨིནྟ་བོ་དྷི་བ་ཞེས་ཕྱག་རྒྱ་ཆེན་པོའི་དངོས་གྲུབ་བརྙེས་པ་ནས་བརྒྱུད་པའི་གདམས་ངག་ཐམས་ཅད་ཀྱང་ཡི་གེ་འབྲུ་གཅིག་ཀྱང་མ་ཆད་པར་མངའ། དེ་ཀུན་གསང་བ་འདུས་པ་ལ་བརྟེན་པ་ཡིན་གསུངས། དེའི་ཡི་གེ་འབྲུ་གཅིག་ཀྱང་མ་ཆད་པ་ཀུ་སཱ་ལི་ཆུང་བ་ལ་མངའ། དེའི་འབྲུ་གཅིག་ཀྱང་མ་ཆད་པ་གསེར་གླིང་པ་ལ་མངའ། དེ་ལ་ཇོ་བོ་དང་ཛྙཱ་ན་ཤྲཱྀ་མི་ཏྲ་དང་རཏྣ་ཀིརྟི་དང་ཤཱནྟི་པ་དང་བཞིས་གསན། ཤཱནྟི་པ་ལ་གསུམ་པོས་ཀྱང་གསན་པ་ལས། གསེར་གླིང་པའི་ཐུགས་ནང་ན་ཇོ་བོས་ཟིན་པ་ཡིན། དེ་ཡང་སྒྲུབ་པས་མཉེས་པས་ཁྱོད་ལ་འདི་མི་བཟླས་ཏེ་འོང་གསུངས་ནས་ཚུར་ལ་གནང་བ་ཡང་མང༌། ཨཱཿཨཱཿལ་ལ་ལན་གཉིས་གཉིས་གསུམ་གསུམ་དུ་ལྡབས་པ་ཡང་ཡོད་གསུངས་པས། དེའི་འབྲུ་གཅིག་ཀྱང་མ་ཆད་པ་ཇོ་བོ་ལ་མངའ་བ་ལགས། ཞེས་ཤ་ར་བ་ཆེན་པོས་གསུངས་ཏེ། དེ་ལྟར་བླ་མ་བཟང་ལ་མང་བ་ཡོད་ཀྱང་རང་ལ་ཡོན་ཏན་མེད་པས། ཇོ་བོ་གློག་གསང་བྱ་བ་ལ་ལམ་སྒྲོན་དུ་ཐོས་དྲིས་པས་ཐོས་པ་བདུན་ཅུ་ཙམ་ཐོས་ཏེ་ཤེས་པ་གཅིག་ཀྱང་མི་ཤེས་ཟེར་བ་བཞིན་དུ་སོང་ན་མི་ཕན་པ་ལ། ཇོ་བོ་ནི་དེ་ཙུག་ཏུ་མི་འདུག་པས། གཉིས་པ་མཁས་པའི་ཡོན་ཏན་ནི། རྒྱས་པར་དགེ་བཤེས་སྟོན་པས་ཇོ་བོའི་ཆེ་བའི་ཡོན་ཏན་བྲིས་པ་ལས་འབྱུང་བ་བཞིན་དུ་རིག་པའི་གནས་ལྔ་ལ་མཁས་པར་འཇིག་རྟེན་ན་གྲགས་པ་ཐོབ་པས། འཛམ་བུ་གླིང་པ་ཕལ་ཆེར་བའི་སློབ་དཔོན་དུ་གྱུར་པ་ཡིན་ཏེ། རིག་པའི་གནས་ལྔ་ལས་སྒྲ་རིག་པའི་བསྟན་བཅོས་བྲམ་ཟེ་ནོར་ལྷས་བྱས་པའི་ཚིག་གི་སྒྲོན་མ་དང༌། སློབ་དཔོན་ཙནྡྲ་གོ་མིས་མཛད་པའི་ཙནྡྲ་བྱཱ་ཀ་ར་ཎ་ལ་སོགས་པ་ཕྱི་ནང་གི་གཞུང་ལུགས་མང་དུ་མཁྱེན། གཏན་ཚིགས་རིག་པའི་གཞུང༌། དྲང་སྲོང་རྐང་མིག་གིས་བྱས་པའི་རིག་པའི་ལྟ་བ་ལ་སོགས་པ་ཕྱི་རོལ་པའི་ལུགས་ཀྱི་ཚད་མ་དང༌། སློབ་དཔོན་ཕྱོགས་ཀྱི་གླང་པོ་དང༌། ཆོས་ཀྱི་གྲགས་པས་མཛད་པའི་ཚད་མ་མདོ་དང་ཚད་མ་རྣམ་འགྲེལ་ལ་སོགས་པ་ནང་པའི་ལུགས་ཀྱི་ཚད་མ་མང་དུ་མཁྱེན། གསོ་བ་རིག་པའི་གཞུང་དྲང་སྲོང་ལེགས་ཐོབ་ཀྱིས་མཛད་པའི་ལེགས་ཐོབ་ཅེས་བྱ་བ་ལ་སོགས་པ་དྲང་སྲོང་གིས་བྱས་པ་དང༌། འཚོ་བྱེད་ཀྱིས་ཞུས་ནས་སངས་རྒྱས་ཀྱིས་གསུངས་པ་དང༌། སློབ་དཔོན་ཀླུ་སྒྲུབ་དང་རྟ་དབྱངས་ལ་སོགས་པས་མཛད་པའི་བསྟན་བཅོས་ཀྱང་མང་དུ་མཁྱེན། བཟོ་རིག་པའི་བསྟན་བཅོས་ལྷ་ཆེན་ཤངྐར་གྱིས་བྱས་པའི་མེ་ཧ་ར་ལ་སོགས་པ་ཕྱི་རོལ་པའི་ལུགས་དང༌། སློབ་དཔོན་ཀླུ་སྒྲུབ་ཀྱིས་མཛད་པའི་རྒྱུ་སྨྲ་བ་ལ་སོགས་པ་ནང་པའི་ལུགས་ཀྱང་མང་དུ་མཁྱེན་ཏེ་དེ་ཀུན་ཕྱི་རིག་པ་བགྱི་བ་ལགས། ནང་རིག་པ་ལ་ཐེག་པ་ཆུང་ངུའི་མདོ་སྡེ་དང་མངོན་པ་མང་དུ་མཁྱེན་ཅིང༌། དམ་པའི་ཆོས་འདུལ་བ་ལ་དགེ་འདུན་ཕལ་ཆེན་པའི་འཛམ་བུའི་གླིང་ན་བཞུགས་ཚད་མཁྱེན། གཞི་ཐམས་ཅད་ཡོད་པར་སྨྲ་བའི་ལུང་སྡེ་བཞི་ལ་སོགས་པ་མཁྱེན། གནས་བརྟན་པ་དང་མང་པོས་བཀུར་བ་ཀུན་ཡང་ཇོ་བོ་ལ་ལུང་ལེན་པ་ལགས་པར་གདའ། དེ་ཐམས་ཅད་ཀྱི་རྩ་བ་བྱེ་བྲག་བཤད་མཚོ་བྱ་བ་ཉིན་རེ་ཐུན་རེ་མ་ཆག་པར་ཉན་ནའང་ལོ་བཅུ་གཉིས་འགོར་བའི་གཞུང་ཚོགས་བཞུགས་པ་དེ་རྨི་ལམ་ཚུན་ཆད་དུ་གསན་པས་མང་པོ་མ་འགོར་བར་མཁྱེན་ཞེས་དང་པོ་གསུངས་ཤིང༌། ཕྱིས་ཀུན་རྨི་ལམ་ན་ནུབ་གཅིག་ལ་ལོ་བསྐོར་གཅིག་གི་སྣང་བ་བྱུང་ནས་གསན་བྱ་བ་ཡང་གསུང་སྟེ་དེ་ཀུན་ཀྱང་ཡོན་ཏན་ཆེ་ཤོས་ལགས་ཞེས་པུ་ཏོ་བ་གསུངས། ཐེག་པ་ཆེན་པོའི་སྡེ་སྣོད་གསུམ་ལ་འཕགས་པ་ཐོགས་མེད་ཀྱིས་སའི་སྐོར་ལ་སོགས་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་དང་འགྲེལ་ཏིག་མཐའ་དག་མཁྱེན། སློབ་དཔོན་ཀླུ་སྒྲུབ་ཀྱིས་མཛད་པའི་དབུ་མ་ལ་ཟླ་བ་གྲགས་པའི་ལུགས་དང་ལེགས་ལྡན་འབྱེད་ཀྱི་ལུགས་ལ་སོགས་པ་ཐམས་ཅད་མཁྱེན། ཐེག་པ་ཆེན་པོའི་གསང་སྔགས་བྱ་བའི་རྒྱུད་ལ་སོགས་པ་རྒྱུད་སྡེ་བཞི་པོ་རེ་རེ་ཡང་དཔག་ཏུ་མེད་པ་མཁྱེན་ཏེ། རིག་པའི་གནས་དེ་དག་ལ་བསླབས་ཤིང་ཐུགས་ཀྱི་རྒྱུད་སྦྱངས་པས་མཁས་པའི་མཆོག་ཏུ་གྱུར། རིག་པའི་གནས་ལྔ་ཁོ་ནར་མ་འདུས་པའི་བརྟག་པའི་བསྟན་བཅོས་དང་ལུགས་ཀྱི་བསྟན་བཅོས་མང་པོ་ལ་མཁས་པ་ཡང་གསུངས། མཁས་པ་ཡིན་རུང་མི་སྒྲུབ་པ་ཡང་ཡོང་བ་ལ་ཇོ་བོ་དེ་ཙུག་ཏུ་མི་འདུག་པས། གསུམ་པ་བཙུན་པའི་ཡོན་ཏན་ནི། དགེ་བཤེས་ལོ་ཙཱ་བས་བསྟོད་པ་ན། ཁྱོད་ནི་ཉན་ཐོས་ཐེག་པའི་སྒོར་ཞུགས་ནས། །ཚུལ་ཁྲིམས་གཡག་རྔ་བཞིན་དུ་བསྲུང་མཛད་ཅིང༌། །ཚངས་སྤྱོད་དཔལ་དང་ལྡན་པའི་དགེ་སློང་མཆོག །གནས་བརྟན་འདུལ་བ་འཛིན་ལ་ཕྱག་འཚལ་ལོ། །ཁྱོད་ནི་ཕར་ཕྱིན་ཐེག་པའི་སྒོར་ཞུགས་ནས། །ལྷག་པའི་བསམ་པ་རྣམ་པར་དག་གྱུར་པས། །བྱང་ཆུབ་སེམས་ཀྱིས་འགྲོ་རྣམས་མི་གཏོང་བའི། །བློ་ལྡན་སྙིང་རྗེ་ཅན་ལ་ཕྱག་འཚལ་ལོ། །ཁྱོད་ནི་གསང་སྔགས་ཐེག་པའི་སྒོར་ཞུགས་ནས། །རང་ལུས་ལྷར་གཟིགས་རྡོ་རྗེའི་ཐུགས་དང་ལྡན། །རྣལ་འབྱོར་དབང་ཕྱུག་ཨ་ཝ་དྷཱུ་ཏི་པ། །སྦས་པའི་བརྟུལ་ཞུགས་འཛིན་ལ་ཕྱག་འཚལ་ལོ། །བྱ་བ་ཡོད་པ་བཞིན་དུ་རབ་ཏུ་བྱུང་ཚུན་ཆད་སྔར་ཨ་ཝ་དྷཱུ་ཏི་ལོ་དྲུག་མཛད་པའི་དབགས་རང་ཡང་མི་མངའ་བར་སོ་སོར་ཐར་པའི་ཉེས་བྱས་ཕྲ་མོ་ཡང་གཡག་རྔའི་རྩེ་མོ་བཞིན་དུ་བསྲུང་བས་གནས་བརྟན་འདུལ་བ་འཛིན་པ་ཆེན་པོ་ཞེས་བྱ། ཐེག་པ་ཆེན་པོ་ཕ་རོལ་ཏུ་ཕྱིན་པའི་དབང་དུ་བྱས་ན་བྱང་ཆུབ་སེམས་དཔའ་ཆེན་པོ་ཡིན། གསང་སྔགས་ཀྱི་དབང་དུ་བྱས་ན་དགེ་སློང་རྡོ་རྗེ་འཛིན་པ་བྱ་བ་ཡིན་ཞེས་ཤ་ར་བས་གསུངས། སྒྲུབ་པ་ཡིན་ཡང་བསྒྲུབས་པའི་འབྲས་བུ་མ་བརྙེས་པ་ཡང་ཡོང་བ་ལ། ཇོ་བོ་དེ་ཙུག་ཏུ་མི་འདུག་པས། བཞི་པ་བསྒྲུབས་པ་ལས་བྱུང་བའི་ཡོན་ཏན་ལ། ཤ་ར་བའི་ཞལ་ནས།དཔལ་ལྡན་ཕྱག་རྒྱ་ཆེན་པོའི་དངོས་གྲུབ་ནི། །ཚེ་གཅིག་ཐོགས་ཞེས་རྣལ་འབྱོར་མས་ལུང་བསྟན། །ཞེས་དགེ་བཤེས་སྟོན་པས་བསྟོད་པ་བཞིན་དུ་ཇོ་བོ་སྦྱོར་ལམ་པ་ལགས་པས་ཟག་པ་ཟད་པའི་མངོན་ཤེས་ད་རུང་ཅུང་མི་མངའ། གཞན་མངོན་ཤེས་ལྔ་པོ་ཀུན་རངས་པ་མངའ། ཡི་དམ་གྱི་ལྷ་ཞལ་གཟིགས་པ་དང༌། དེ་ལས་ཆོས་གསན་པ་ལ་སོགས་པ་ཡང་དཔག་ཏུ་མེད་དེ། གཙང་ལ་སྟོད་ན་ཀག་སྟོན་ཆེ་ཆུང་གཉིས། གསང་ཕུ་བ་དང་དགེ་བཤེས་སྟོན་པ་གཉིས་ཏེ་བཞི་ཙམ་ལ་སྒྲུབ་ཐབས་གཅིག་གསུངས་པའི་དུས་ན་ཕྱག་ཡུག་ཡུག་མཛད་ཀྱིན་རྟོག་པ་མང་པོ་མང་པོ་མི་རུང་གསུངས། ཆོས་ཐུན་བཏང་ནས་དྲན་བསྡུར་བས། དེའི་དུས་ན་ངེད་བཞི་རེ་རེ་ལ་རྟོག་པ་མི་འདྲ་བ་རེ་སྐྱེས་ནས་འདུག་སྟེ་མཁྱེན་པ་ཡིན་ནམ་ཟློ་མི་ཞིག་གིས་བཟླས་སམ་ཞེས་དགེ་བཤེས་པས་གསུངས་སྐད་པ་དེ་ཀུན་གཞན་གྱི་སེམས་ཤེས་པའི་མངོན་ཤེས་སུ་བགྲང༌། ལྷ་སར་སྟེང་ཁང་ན་བཞུགས་པ་ལ་རྩིག་པ་ལ་མ་ཐོགས་པར་ཕྱིར་བྱོན་པ་བན་དེ་མོ་ཞིག་གིས་མཐོང༌། དེས་གསང་ཕུ་བ་ལ་བཟླས། གསང་ཕུ་བས་བན་དེ་མོ་འདི་སྐད་མཆི་ན་ཞུས་པ་ལ་བན་དེ་མོ་མིག་འཁྲུལ་བ་ལགས་གསུངས་ནས་སྨྱོན་པ་ལགས་པར་གདའ་སྟེ། མི་དམིགས་པ་གོམས་པ་ལས་བྱུང་བ་ཡིན་པས་ནང་ནས་ན་ཡོན་ཏན་ཆེ། ཡང་ལྷ་ས་ན་ནམ་མཁའ་ལ་བསྐོར་བ་མཛད་པ་མཐོང་བ་གསང་ཕུ་བ་ལ་བཟླས། དེས་ཞུས་པ་ལ་ཁོ་བོ་ལ་རྒྱ་གར་ན་ཡང་དེ་སྐད་ཟེར་གསུངས་ཏེ་ཞལ་གྱིས་བཞེས་པ་ཡིན་གསུངས་པ་དང༌། བསམ་ཡས་ཀྱི་བྱང་ཆུབ་གླིང་དུ་བྱོན་པ་ན་ཇོ་བོ་སངས་རྒྱས་མ་ཆགས་པདྨའི་སྤྱན་གྱི་པདྨའི་གདན་ཁ་ན་ཡར་ཇི་ལྟར་བཞུད་ཆ་མེད་པར་བཞུད་ནས་ཞལ་རས་ཀྱི་རྡུལ་ཆོས་གོས་ཀྱི་ཐུ་བས་འཕྱི་ཞིང་བཞུགས། མར་སྐས་ལ་སྤྱན་དྲངས་གསུང་བ་དེ་ཀུན་རྫུ་འཕྲུལ་གྱི་ཡུལ་ཤེས་པར་ཡོང་བ་ལགས། ཡེར་བ་ན་བཞུགས་པའི་དུས་སུ་སྐྱིད་ཤོད་དེ་ཤེད་ན་ཡོན་བདག་མོ་ཞིག་ཡོད་པ་ལ། ཉིན་ཞིག་ཇོ་བོ་གསེར་སྡེངས་ན་ཡར་འཆག་ཏུ་བྱོན་པའི་དུས་ན་འོ་སྐོལ་གྱི་ཡོན་བདག་མོ་དེ་ཤིའམ་གསུངས། དེར་གཞན་ཀུན་གྱིས་དེ་ཤི་བ་ག་ན་མཆི། ཁར་སང་རང་འོ་སྐོལ་ལ་བསྙེན་བཀུར་བགྱིས་པ་ལགས་མོད་ཞུས་པས། དེ་བས་རྟེན་དམན་པ་ལ་བསོད་ནམས་མ་ཤོང་བར་ཤི་ནས་ང་ལ་དྲིན་ལན་གྱི་མཆོད་པ་བྱེད་དུ་བྱུང་གསུངས་པ་དེ་ཀུན་འཆི་འཕོ་བ་དང་སྐྱེ་བ་ཤེས་པར་འོང་གསུངས། གཉེ་ཐང་དུ་སང་འདྲ་བ་གསང་ཕུ་བས་བང་སྟོན་ལ་བཀའ་འབབ་ཆེན་པོ་མཛད་པའི་དེ་རིང༌། སྟོན་པ་ཆེན་པོ་ཡང་མི་ཁ་ལ་གསན་གྱིན་བྱ་བ་ཡང་ཡང་གསུངས། ཨ་ཏི་ཤས་ཅི་གསན་པ་ལགས་ཞུས་པ་ལ། ཁོ་བོས་ཅི་ཡང་མ་ཐོས་ཏེ་སྟོན་པ་ཆེན་པོ་ཡང་མི་ཁ་ལ་གསན་གྱིན་གསུངས། ཕྱི་ཉིན་གསང་ཕུ་བས་བང་སྟོན་ལ་བཀའ་འབབ་ཆེན་པོ་མཛད། དེར་དགེ་བཤེས་སྟོན་པས་ཁར་སང་ཨ་ཏི་ཤས་དེ་ཙམ་གྱི་ནན་ཏན་མཛད་ནས་དེ་རིང་དེ་གསུངས་པའི་ལུགས་ཅི་བདོག་གསུངས་པ་ལ། གསང་ཕུ་བ་ཤེད་ཡ་ཝི་ཀུན་གྱིས་བྱ་བྱ་ནས་ཁོ་བོ་ཡེ་བརྗེད་གསུངས། ཡ་ཝི་ཀུན་འགྲུལ་ཚན་ཞིག་སོང་བ་དེ་ལ་གསུང་ངམ་རྒྱ་གྲོང་པ་ལ་གསུང་ཆ་མེད་གསུངས། དེ་ཀུན་ཕྱིས་འབྱུང་བ་མཁྱེན་པས་ལྷའི་མིག་གི་མངོན་ཤེས་སུ་འོང༌། ཡང་གཉེ་ཐང་ན་བཞུགས་ཙ་ན་ནུབ་ཅིག་རྒྱ་གར་ན་ངའི་སློབ་མ་ཞིག་དྲིལ་བུ་སིལ་སིལ་ང་ལ་གསོལ་བ་འདེབས་པ་ཁང་རྒྱབ་འདི་ན་ཡོད་པ་ཙམ་དུ་ཐོས་གསུངས་པ་ལ། སྟོན་པའི་ཞལ་ནས་ང་ཉམས་དྲོད་ཆུང་བས་མགོ་བོ་བཏེགས་ནས་ཉན་པ་ཡིན་ནོ་གསུང་བ་དེ་ཀུན་ལྷའི་རྣ་བའི་མངོན་ཤེས་སུ་བགྲང་བ་ལགས་གསུངས། ཡེར་བ་ན་བཞུགས་པའི་དུས་ཉིན་གཅིག་སྦྱང་ཁུ་ལེའུཁར་བྱོན། དེ་ནས་གཡུ་སྒྲོ་མན་ཆད་ཀྱི་སླུ་མེས་ཀྱི་གནས་མང་པོ་གཟིགས་པས། དགེ་བཤེས་སྔོག་གིས་ཡག་གི་ཡང་ཁོ་བོའི་ལགས་ཡག་གི་ཡང་ཁོ་བོའི་ལགས་ཞུས་ཀྱིན་གཟིགས་སུ་ཕུལ་བ་ལ། གནས་བརྟན་ཆེན་པོ་ལ་གནས་མང་ཨང་གསུངས། མང་ལགས་ཞུས་པས། ཁམས་གསུམ་ཀུན་རིལ་གྱིས་ཁོ་བོའི་ལགས་གསུངས། སེམས་ཅན་ཐམས་ཅད་ཐུགས་རྗེས་བདག་ཏུ་བཟུང་བའི་བཀའ་མཆིད་ལགས་ཏེ། པུ་ཏོ་བ་སེམས་ཅན་ཁོ་ན་ལ་རྩེས་ཆེ་བས་ང་ནི་ནངས་ན་ཡང་དེ་ངོ་མཚར་ཆེ་སྙམ་དུ་སེམས་གསུངས། དེ་ལྟར་མངོན་པར་ཤེས་པ་རྒྱ་ཆེན་པོ་དང་ལྡན་ཞིང་ནང་ན་བྱང་ཆུབ་ཀྱི་ཐུགས་ཁྱད་པར་ཅན་མངའ་བའི་སྟོབས་ཀྱིས་སངས་རྒྱས་དང་བྱང་ཆུབ་སེམས་དཔའ་མང་པོའི་ཞལ་གཟིགས་པ་ནི་བསམ་ཡས་ན་བཞུགས་པའི་དུས་ནུབ་གཅིག་རྨི་ལམ་དུ་དགེ་སློང་གཞོན་ནུ་ཞིག་བྱུང་ནས་ཁྱོད་ཀྱིས་སྒྱུ་མ་ལྟ་བུའི་ཏིང་ངེ་འཛིན་ཤེས་སམ་ཟེར། ཐོས་བསམ་གྱིས་ནི་ཤེས་ཉམས་སུ་མྱོང་བ་ནི་མེད་གསུངས་པས། ལྟ་བར་འདོད་དམ་གསུངས། འཁུམས་པར་འཚལ་ཞུས་པས། ད་ལྟ་རྭ་སྒྲེང་ན་བཞུགས་པའི་ཇོ་བོ་འཇིགས་པ་བརྒྱད་སྐྱོབ་ཀྱི་རས་གཞི་དེ་ཙམ་ཞིག་ནམ་མཁའ་ལ་ཤར་གྱིས་བརྐྱངས་པའི་ནང་ན་བྱང་ཆུབ་སེམས་དཔའ་ཀུན་ཏུ་བཟང་པོ་དང་སྤྱན་རས་གཟིགས་དང་མཐུ་ཆེན་ཐོབ་ལ་སོགས་པ་སྒྱུ་མ་ལྟ་བུའི་ཏིང་ངེ་འཛིན་བརྙེས་པ་རྣམས་ཀྱི་རྣམ་པར་འཕྲུལ་བ་དང་ཡོན་ཏན་མ་ཚང་བ་མེད་པར་སྣང་བ་ཞིག་གཟིགས་གསུངས་ཏེ། ཤ་ར་བ་ནི་ནངས་ན་དེ་ངོ་མཚར་ཆེ་གསུངས། གསེར་གླིང་དུ་བླ་མ་གསེར་གླིང་པའི་ཞབས་ལ་སྐུ་མཉེ་མཛད་པའི་དུས་ན་གཙུག་ལག་ཁང་དེར་སྤྱན་རས་གཟིགས་གསེར་མདོག་ཏུ་བྱོན་ནས་ཕར་དཀར་པོར་གཤེགས་པ་གཟིགས། དེ་གསེར་གླིང་པ་ལ་ཞུས་པས་ས་བཅུའི་བྱང་ཆུབ་སེམས་དཔའ་ཐམས་ཅད་ཀྱི་རང་བཞིན་གྱི་ཁ་དོག་སེར་པོར་བཞུགས། གདུལ་བྱའི་ངོར་དཀར་པོར་སྟོན་པ་ཡིན་གསུངས་པ་ལ། དེས་གཟིགས་སམ་ལུང་ནས་གསུངས་པ་ཡིན་ནམ་ཕལ་ཆེར་གཟིགས་པ་ཡིན་ཏེ་འོང་གསུངས། རྡོ་རྗེ་གདན་དུ་ཕྱི་རོལ་པ་དང་རྩོད་པ་མཛད་པའི་དུས་ན་ལན་ཞིག་གཏུགས་པ་ཞིག་བྱུང༌། དེར་རིལ་བ་སྤྱི་བླུགས་བསྣམས་ཏེ་འཆག་ཏུ་བཞུད་པ་བཞིན་མཛད་ནས་ནང་དུ་བྱོན་ཇོ་མོ་ལ་གསོལ་བ་བཏབ་པས་བསྙག་པའི་ཐབས་མེད་པར་གྱུར་ཏེ་ཇོ་མོས་བྱིན་གྱིས་བརླབས་པ་ལགས། ཕྱིས་གཉེ་ཐང་ན་བཞུགས་ཙ་ན་ནའི་དཀྱིལ་དུ་བྱོན་ནས་དེ་བཞིན་གཤེགས་པའི་ཡི་གེ་བརྒྱ་པ་བརྒྱ་ཚོ་འགའ་འགའ་ཙམ་བཟླས་པ་མཛད་པས་དེ་བཞིན་གཤེགས་པ་ཅི་ཙམ་བཞེད་པ་གཟིགས། ནུབ་ཅིག་བུད་མེད་ཀྱི་སྒྲ་སིལ་སིལ་གྲགས་པ་བལྟར་མི་རུང་དགོངས་ཙ་ན། མ་ལའང་མི་བལྟའམ་ཟེར། ངའི་མ་འདི་ན་མེད་ན་སྙམ་དུ་དགོངས་པ་ལ། མ་སྒྲོལ་མ་ལ་ཡང་མི་བལྟའམ་གསུངས། གཟིགས་ཙ་ན་ཇོ་མོ་མངོན་སུམ་དུ་བཞུགས་ནས་སྣང་སྐད། སྐུ་ཁམས་ཞན་པའི་དུས། རྗེ་བཙུན་བྱམས་པ་ལ་གསོལ་བ་བཏབ་པས་སྐུའི་སྣང་བ་བྱུང་ཙ་ན་དྲག་ནས་ཡོང་བ་ལ། འདའ་བའི་དུས་སྐུའི་སྣང་བ་བྱུང་ཡང་མ་དྲག་པས་རྗེ་བཙུན་གྱིས་བསུ་བ་ཡིན་ཏེ་འོང་གསུངས། རྨི་ལམ་ན་ཐུགས་དམ་གྱི་ལྷ་དང་དེ་བཞིན་གཤེགས་པ་མང་པོ་ལས་གདམས་ངག་མང་པོ་ཡང་གསན། རྣལ་མོ་ནི་ཞལ་མཐོང་བ་ལས་གདམས་ངག་ཞུས་པ་མི་གསུང་ཡང༌། དེ་ཀུན་དྲང་པའི་དོན་ལགས་ཏེ་མཆིའམ། དེ་མིན་རྡོ་རྗེ་གདན་དུ་བསྐོར་བ་མཛད་ཙ་ན་ཇོ་མོ་སྒྲོལ་མ་དང་ཁྲོ་གཉེར་ཅན་གཉིས་དྲི་བ་དང་ལན་གྱི་ཚུལ་དུ་མཛད་པས་བྱང་ཆུབ་ཀྱི་སེམས་ལ་བསྐུལ་བ་དང༌། སངས་རྒྱས་ཀྱི་ལྡེར་ཚོས་གསུང་ཕྱུང་བ་དང༌། གཉེ་ཐང་དུ་ནངས་མོ་ཞིག་ཚ་བའི་དུས་རྗེ་བཙུན་བྱམས་པ་དང་འཇམ་དཔལ་ཐེག་པ་ཆེན་པོའི་ཆོས་ཀྱི་འགྲོ་བ་མཛད་པ་གཟིགས་པ་ཀུན་རྣལ་མོར་གདམས་ངག་གསན་པ་རང་དུ་ཡོང་ངམ་སེམས། རྨི་ལམ་ན་ཆོས་གསན་པས་རྣལ་མོ་དང་ཁྱད་མེད་པའི་རྟོགས་པ་སྐྱེ་བར་གསུངས་ཏེ་ནངས་ན་ངོ་མཚར་ཆེ་གསུངས། རང་བཞིན་གྱི་རྣལ་འབྱོར་མ་དང་ཡང་ནམ་བཞེད་པ་ན་མཇལ་ཏེ། དང་པོ་ཨ་ཝ་དྷཱུ་ཏི་པ་མཛད་པ་ན། ད་རུང་ཨ་ཝ་དྷཱུ་ཏི་པ་བྱས་ཀྱང་བར་ཆད་འོང་དངོས་གྲུབ་མི་འཐོབ། རབ་ཏུ་བྱུང་ན་བསྟན་པ་ལ་ཕན་གསུངས་ནས་རབ་ཏུ་བྱུང་བ་དང༌། ཕྱིས་བོད་ལ་འབྱོན་ཁར་རྡོ་རྗེ་གདན་དུ་བྱོན་པ་ལ་སྔགས་པ་ཞིག་གིས་མགྲོན་བུ་ཤས་ཤིག་བསྐུར་ནས་འདི་བྱང་ཕྱོགས་ཀྱི་ལྷ་རིས་པའི་གྲོང་དེ་ན་རྣལ་འབྱོར་མ་སྐྲ་རེ་རེ་ནས་འཐོག་པའི་བརྟུལ་ཞུགས་བྱེད་པ་ཞིག་ཡོད། དེ་ཕྱི་རོལ་པ་མིན་རྣལ་འབྱོར་མ་ཞིག་ཡིན་པས་དེ་ལ་གཏོད་ཅིག་ཟེར། རྡོ་རྗེ་གདན་དུ་བྱོན་ཙ་ན་ཕར་ལ་བཙལ་མ་དགོས་པར་སྔགས་པས་བསྐུར་བའི་པ་ན་ག་རེ་ཟེར་ནས་ལེན་དུ་བྱུང༌། དེར་ང་བོད་དུ་འགྲོ་ན་བོད་ལ་ཕན་ནམ་དྲིས་པ་ལ། ཕན་གྱི་ཟེར་བ་དེ་ཀུན་ལས། ཨ་ཝ་དྷཱུ་ཏི་པའི་དུས་ཀྱི་དེ་ནི་བླ་མ་རང་དུ་ཡང་འགྲོ་སྟེ་འོང་ངམ། དེ་མིན་གྱི་དུས་ན་གདམས་ངག་གསུངས་པ་ནི་མེད། རང་བཞིན་གྱི་རྣལ་འབྱོར་མ་བྱ་བ་ཡེ་ཤེས་ཐོབ་པ་ཡིན་གསུངས། བྱང་ཆུབ་སེམས་དཔའ་དྲི་མ་མེད་པ་དང་ལྷ་མོ་ཙུནྡའི་སྤྲ་ཁྱེའུ་དང་བུ་མོ་གཙང་མ་ལ་ཕབ་པས་དུས་གསུམ་གྱི་དངོས་པོ་ཅི་ལྟར་འགྱུར་བ་ས་ལེར་མཁྱེན་པ་མངའ་བ་དེ་ཀུན་ཡང་བསྒྲུབས་པ་ལས་བྱུང་བའི་ཡོན་ཏན་དུ་བགྲང་བ་ལགས་ཏེ། དེ་ལྟར་བླ་མ་བཟང་བ་དང༌། མཁས་པ་དང༌། བཙུན་པ་དང༌། བསྒྲུབས་པ་ལས་བྱུང་བའི་ཡོན་ཏན་དེ་དག་ལ་སོགས་པ་དང་ལྡན་པས་ན་ཇོ་བོས་བྱང་ཆུབ་ཀྱི་ལམ་ཤིན་ཏུ་ཡང་གསལ་པོར་མཛད་སྤྱོད་པ་ཁོ་ན་ཡིན་པས། དེ་ལྟར་དུ་མཛད་པར་ཞལ་གྱིས་བཞེས་པ་བཤད་པར་དམ་བཅའ་བའམ། བསྟན་བཅོས་འབྱུང་བའི་རྒྱུ་གླེང་བསླང་བ་འདིས་ནི་བསྟན་བཅོས་ཀྱི་དགོས་འབྲེལ་བཞི་ཡང་བསྟན་ཏེ། དེ་ཡང་ཤ་ར་བ་ཆེན་པོའི་ཞལ་ནས། འདིའི་བརྗོད་བྱ་ནི་སྐྱེས་བུ་གསུམ་གྱི་རིམ་པ། དགོས་པ་ནི་འདི་ལས་འདི་ཐོས་བསམ་གྱིས་རྟོགས་པ། དགོས་པའི་དགོས་པ་ནི་རིམ་གྱིས་སྒྲུབ་པ་ལ་ཞུགས་པས་གནས་སྐབས་བདེ་འགྲོའི་རྟེན་ཐོབ་པ་ནས་མཐར་མི་གནས་པའི་མྱ་ངན་ལས་འདས་པའི་བར་དུ་ཐོབ་པ། འབྲེལ་པ་ནི་དགོས་པ་བསྟན་བཅོས་དང་འབྲེལ་ལ། དགོས་པའི་དགོས་པ་དགོས་པ་དང་འབྲེལ་བའོ་གསུངས།