མཚམས་ལྷ་བསྐྱེད།
༄༅། དེ་ནས་མཚམས་ལྷ་བསྐྱེད་པ་ནི། ངག་ཏུ་ ཧྲཱིཿཧྲཱིཿཧྲཱིཿ ཞེས་བརྗོད་པས། སྐད་ཅིག་གིས་སྐྱེ་མེད་ཆོས་སྐུའི་མཁའ་ལ། འགགས་མེད་གཟུགས་སྐུའི་རྣམ་པར་སྣང་བ་ནི། བསྲུང་འཁོར་དུར་ཁྲོད་གཞལ་ཡས་ཁང་དང་བཅས་པའི་དབུས་སུ། པདྨ་ཉི་ཟླ་དྲེགས་པ་ཕོ་མོའི་གདན་ལ། རང་བྱུང་རིག་པའི་ངོ་བོ་ཧྲཱིཿཡིག་དམར་པོ་གསལ་བ་འཕྲོ་འདུས་ཡོངས་སུ་གྱུར་པ་ལས། དབང་ཆེན་ཧེ་རུ་ཀཿསྐུ་མདོག་དམར་པོ་བསྐལ་པའི་མེ་ལྟར་འབར་བ། ཕྱག་གཡས་པདྨའི་གྲི་གུག་ནམ་མཁར་གདེངས་པ། གཡོན་པས་ཐོད་ཁྲག་ཐུགས་ཀར་འཛིན་པ། སྤྱན་གསུམ་མཆེ་གཙིགས་སྨ་ར་སྨིན་མ་དབུ་སྐྲ་དམར་སེར་གྱེན་དུ 
་བརྫེས་པ། དཔལ་དང་དུར་ཁྲོད་ཀྱི་ཆས་རྣམས་ཡོངས་སུ་རྫོགས་པ། ཁྲོ་གཏུམ་བཟོད་པར་དཀའ་བའི་གཟི་བརྗིད་ཅན། ཞབས་གཉིས་འགྱིང་བའི་སྟབས་ཀྱིས་ཡེ་ཤེས་ཀྱི་མེ་དཔུང་འབར་བའི་ཀློང་ན་ཡེ་ནས་བཞུགས་པ་དེ་ཉིད་ཡོངས་སུ་གསལ་བར་གྱུར་བར་བསམ་ལ། ཧྲཱིཿབཛྲ་ཀྲོ་དྷ་ཧྱ་གྷྲྀ་ཝ་ཧུ་ལུ་ཧུ་ལུ་ཧཱུྃ་ཕཊཿ ཅེས་བརྗོད། མགོ་སྤྲུལ་པས་སོ།།