སྐབས་བཅུ་པ།
༈ རྨད་བྱུང་མཁྱེན་གཉིས་གསེར་གྱི་སྤྱན་དབྱེ་ཡིས། །ལས་ཉོན་མི་ཤེས་ལིང་ཐོག་དྲུང་འབྱིན་པ། །འཇམ་མགོན་བླ་མ་མིག་མཁན་རྒྱལ་པོ་ལ། །འདུད་དོ་བདག་བློའི་མ་རིག་སྒྲིབ་པ་སོལ། །ལིའུ་ཐོ་སྦྱོར་ཚུལ་མདོར་བསྡུས་སོགས། །སྐར་རྩིས་པ་ལ་ཉེར་མཁོ་བའི། །བླང་དོར་རྩིས་འབྲས་ཉུང་ཤས་ཞིག །ལྷག་བསམ་དག་པས་འགོད་ལ་སྤྲོ། །བྱེད་གྲུབ་ཟུང་འབྲེལ་གང་སྤེལ་ཀྱང་། །མཆོད་བརྗོད་དམ་བཅས་མདུན་བསུས་ནས། །གནམ་ལོའི་སྲོག་ལུས་དབང་ཀླུང་གི། །ཁམས་དང་སྨེ་ཕྲེང་སེ་ཞིག་ཀླུང་། །བྱེད་གྲུབ་སོ་སོའི་ལོ་གཟའ་དང་། །ལོ་སྐར་ལོ་ཁྱིམ་རྒྱལ་བློན་དང་། །ཀར་མྱང་དྲག་སྦྱངས་འབྱུང་གྲངས་སོགས། །སོ་སོའི་འབྲས་བཤད་ལེགས་པར་འབྲི། །དེ་ནས་ངན་པ་བཟློག་ཐབས་ཀྱི། །རྣམ་དཀར་སྒྲུབ་དང་བཟང་པོའི་འབྲས། །འབྱུང་བའི་རྟེན་འབྲེལ་བདེན་ཚིག་དང་། །བསྔོ་སྨོན་ཤིས་པའི་ཚིག་གིས་བརྒྱན། །སླར་ཡང་གནམ་ལོ་ལ་སོགས་པའི། །གོང་སྨྲོས་རྣམས་ཀྱི་ཨང་ཀིའི་གྲངས། །སོ་སོའི་ཁ་བྱང་དང་བཅས་འབྲི། །གཞན་ཡང་སྨེ་བ་དགུ་གླིང་དང་། །ས་བདག་ལོ་འཁོར་དཔེ་ཞལ་བཤུ། །ལོ་དེའི་གཟའ་རགས་ཉི་རགས་དང་། །ཟླ་ཆུ་དུས་འབྲས་ཁྱིམ་དྲུག་གི། །སྤྱི་ནོར་དང་བཅས་གསལ་པོར་འབྲི། །དེ་ནས་ཟླ་བ་སོ་སོ་ཡི། །ཟླ་བདག་ཟླ་འཁོར་དྷྲུ་བ་དང་། །དབང་ཕྱུག་བཞེངས་བཞུགས་ཉ་སྟོང་གི། །སྒྲ་གཅན་དར་ཞུད་ལ་སོགས་སྤེལ། །དེ་ནས་ཚེས་ཁང་སོ་སོ་ལ། །ཡན་ལག་ལྔ་བསྡུས་རེའུ་མིག་སྤེལ། །དུས་གཟེར་དུས་བརྟགས་གཟའ་འཛིན་སོགས། །རང་རང་ཚེས་ཁང་ཉིད་དུ་འབྲི། །བཀྲ་ཤིས་ཟླ་དང་དཔལ་ཐོབ་ཟླ། །རབ་ཆད་ཟླ་ནག་ཕུང་ཟླ་ནག །དེ་ཡང་སྟོད་སྨད་གང་ནག་དང་། །ཟླ་བ་ཆེ་ཆུང་སོགས་ཀྱང་བྲི། །ཉི་ནག་བསྲེག་ཚེས་ཞག་ངན་དང་། །འགྲུབ་སྦྱོར་སོགས་ཀྱང་འཛོམས་ན་བྲི། །མིན་ཡང་འཕྲོད་སྦྱོར་ཆེན་མོར་བལྟ། །ལིའུ་ཐོ་སྤེལ་ཚུལ་མདོ་ཙམ་གྲུབ། །གནམ་ལོའི་སྲོག་ལུས་དབང་ཀླུང་སྨེ། །ལོ་བདག་གཟའ་སྐར་ལོ་འཁོར་སོགས། །དཔེར་ན་རྒྱལ་པོ་བཞིན་དུ་བལྟ། །ཟླ་འཕོ་དབང་ཕྱུག་མཇལ་ཕྲད་དང་། །ཟླ་བདག་གཟའ་སྐར་ཟླ་འཁོར་སོགས། །དཔེར་ན་བློན་པོ་བཞིན་དུ་བལྟ། །རྒྱལ་པོ་བྱམས་སེམས་ལྡན་པ་ཡང་། །བློན་པོ་གདུག་པས་ཕུང་ལ་སྦྱོར། །རྒྱལ་པོ་གདུག་པའི་སེམས་ལྡན་ཡང་། །འཕྲུལ་གྱི་བློན་པོས་ཁ་ལོ་བསྒྱུར། །དེ་བཞིན་འབྲས་བུ་ལེགས་ཉེས་ཀུན། །ཕལ་ཆེར་ལོ་ལས་ཟླ་བ་གཙོ། །ཚེས་དབྱངས་གཟའ་སྐར་སྦྱོར་བྱེད་སོགས། །ཞག་བདག་མངག་གཞུག་སྐྱེ་བོ་འདྲ། །གང་བབས་སོ་སོའི་འབྲས་སྟེར་བས། །ཟླ་བ་ལས་ཀྱང་ཞག་དེ་གཙོ། །ཀར་མྱང་རྒྱལ་བློན་མཇུག་རིང་དང་། །སྒྲ་གཅན་ཕག་ཞག་རྀ་ཥི་སོགས། །ལྡོག་གཉིས་བསྒྲོད་གཉིས་ལོའི་དུས་ཚོད། །རྒྱལ་པོའི་མཚོན་དང་ཡོ་བྱད་འདྲ། །ཕྱོགས་ཀྱི་སྒྲ་གཅན་དབུགས་ཁྱིམ་སྒང་། །ཟླ་ནག་དཔལ་ཐོབ་བཀྲ་ཤིས་ཟླ། །ཉིན་མཚན་ཆུ་ཚོད་ཟླ་བའི་དུས། །བློན་པོའི་མཚོན་དང་ལོངས་སྤྱོད་འདྲ། །གཟའ་ཡི་དར་གུད་འཕྲོད་སྦྱོར་དང་། །བསྲེག་སྦྱོར་ཉི་ནག་ཞག་ངན་དང་། །ཐེབས་ལྡོག་རྒྱུ་བ་དུས་ཚོད་སོགས། །དམག་མིའི་མཚོན་དང་ཡོ་བྱད་འདྲ། །ཀུན་ཀྱང་སྒྲིམ་པོའི་བློས་བརྟགས་ནས། །བླང་དོར་ཚུལ་བཞིན་བྱས་པ་ན། །ལས་དང་བྱ་བ་གང་བསྒྲུབ་ཀྱང་། །ཉེས་པ་མི་འབྱུང་བདེ་ལེགས་འགྲུབ། །ལོ་ཟླ་ཞག་དུས་སོ་སོ་ཡི། །འབྲས་བུ་ངན་ཡང་བཅོས་པ་ན། །དཔེར་ན་བཙན་རྫོང་བཟུང་བ་དང་། །ནོར་གྱིས་མགུ་བར་བརྫངས་བ་འདྲ། །དེ་ཕྱིར་རང་རང་ངོ་ལོན་གྱི། །བྱ་བ་དེ་དང་དེ་བསྒྲུབ་ནས། །ངན་འཛིན་རྣམ་རྟོག་སེལ་གྱུར་ན། །ངན་པ་ཀུན་ཀྱང་བཟང་པོར་འགྱུར། །རྟེན་འབྱུང་རྒྱུ་འབྲས་བདེན་པའི་ཕྱིར། །བླང་དོར་གནས་ལ་བརྩོན་གྱུར་ན། །ལས་ཀྱི་རྣམ་སྨིན་མ་གཏོགས་པའི། །རྐྱེན་ངན་སེལ་བ་སྨོས་ཅི་དགོས། །དྲང་དང་ངེས་པའི་ཐབས་ཚུལ་གྱིས། །དུག་ལྔའི་རྒྱུ་དང་ངན་སོང་འབྲས། །བསལ་ནས་མྱང་འདས་ལ་འགོད་པ། །རང་སྡེ་ནང་པའི་ཁྱད་ཆོས་ཡིན། །ལིའུ་ཐོ་སྦྱོར་དགྲོལ་འབྲས་བཤད་སོགས། །ཚིག་ཚོགས་མང་དོགས་འདིར་ནི་བསྡུས། །ཟུར་རྒྱན་མཁས་པའི་འཇུག་ངོགས་སུ། །གསལ་བར་བཀོད་པས་གཟིགས་པར་ཞུ། །རྨད་བྱུང་ཕྲིན་ལས་ལྷ་ཡི་ལམ་ཡངས་པར། །སྔོན་མེད་ལེགས་བཤད་རི་དྭགས་མཚན་མ་ཅན། །ཟབ་ཡངས་རྣམ་དཔྱོད་ཤར་རིའི་རྩེར་སོན་པ། །རིགས་མཐུན་བློ་ཡི་དྭངས་མཚོར་འཇུག་འདི་རྨད། །དཔལ་མཆོག་དང་པོའི་སངས་རྒྱས་གཉིས་སུ་མེད་པའི་རྒྱུད་ཀྱི་རྒྱལ་པོའི་དགོངས་དོན་རྣམ་པར་དག་པ་ཕྱི་དུས་ཀྱི་འཁོར་ལོ་སྐར་རྩིས་ཀྱི་རི་མོས་གཏན་ལ་འབེབ་པའི་མན་ངག་བློ་དམན་ཉེར་འཚོ་ཞེས་བྱ་བ་ལས། ལིའུ་ཐོ་དགྲོལ་ཚུལ་དང་བླང་དོར་གྱི་གནས་ཁ་ཅིག་མདོ་ཙམ་དུ་བསྡུས་ནས་ཉེ་བར་བརྗོད་པའི་སྐབས་ཏེ་བཅུ་པས་རེ་ཞིག་རྫོགས་སོ།། ༧ དེ་ལྟར་གཉིས་མེད་རྒྱུད་ཀྱི་རྒྱལ་པོའི་དགོངས་འགྲེལ་ཟབ་བརྒྱའི་རྒྱ་མཚོ་གཏིང་དཔག་དཀའ་བ་ལ། །ཕྱི་ནང་གཞན་གསུམ་དུས་ཀྱི་འཁོར་ལོའི་དགོངས་དོན་བླ་མེད་ནོར་བུའི་ཚོགས་ཀྱིས་གཏམས་པ་ལས། །བླང་དོར་སྐར་རྩིས་ཉུང་གསལ་འཇུག་བདེ་བློ་དམན་ཉེར་འཚོ་དབང་གི་རྒྱལ་པོའི་དོ་ཤལ་འདི། །སྤྲོས་ཆུང་རྣམས་དང་རིགས་མཐུན་ཡོངས་ལ་ཕན་འདོད་བློ་ཡིས་ཚིག་གི་སྲད་བུར་ཁོ་བོས་བརྒྱུས། །མཁས་དབང་གོང་མའི་ལེགས་གསུང་ཨ་དརྴ། །རྣམ་དཔྱོད་དར་གྱིས་བྱི་དོར་བགྱིས་འདི་ལ། །ཉེས་ཆ་སྲིད་ན་སྨྲ་བའི་སེང་གེ་སོགས། །སྤྱན་ལྡན་རྣམས་ལ་བཤགས་སོ་དག་ཚང་སྩོལ། །འདིར་བྱུང་ལེགས་ཚོགས་རྣམ་དཀར་འོད་བརྒྱ་ཡིས། །སྐྱེ་དགུའི་མ་རིག་བློ་མུན་དྲུང་ཕྱུང་ནས། །ཡང་དག་ཡེ་ཤེས་ཀུན་དའི་ཚལ་ཆེན་པོས། །མཁའ་མཉམ་འགྲོ་བློའི་གསེར་ལྡན་ཡོངས་ཁྱབ་ཤོག །འདིར་ཞུགས་ཀུན་ཀྱང་དཔལ་ལྡན་ཤམ་བྷ་ལར། །རིགས་ལྡན་ཆོས་ཀྱི་རྒྱལ་པོས་རྗེས་བཟུང་ཞིང་། །ཕྱི་ནང་གཞན་གསུམ་དུས་འཁོར་ཉེ་ལམ་ནས། །རིང་མིན་ཆོས་སྐུའི་རྒྱལ་ཐབས་ལ་འགོད་ཤོག །འདི་སྦྱར་དགེ་བས་བདག་ཀྱང་སྲིད་ཁམས་རྒྱ་མཚོར་ཇི་སྲིད་གནས་པ་དེ་སྲིད་དུ། །རྒྱལ་དང་དེ་སྲས་ལ་སོགས་སྣ་ཚོགས་གཟུགས་ཀྱིས་བསྟན་འགྲོའི་ཕན་བདེ་སྒྲུབ་པ་ལ། །རྒྱལ་སྲས་ཐུ་བོ་རྣམས་ཀྱི་མཛད་སྤྱོད་ཇི་བཞིན་སྐྱོ་ངལ་མེད་པར་འཇུག་པ་ལས། །ནམ་ཡང་ཞི་བའི་དབྱིངས་ལ་རང་གི་དོན་ཕྱིར་གནས་པ་མིན་པ་ཉིད་གྱུར་ཅིག། ཅེས་དཔལ་མཆོག་དང་པོའི་སངས་རྒྱས་གཉིས་སུ་མེད་པའི་རྒྱུད་ཀྱི་རྒྱལ་པོའི་དགོངས་དོན་རྣམ་པར་དག་པ་ཕྱི་ནང་གཞན་གསུམ་ལས། ཕྱི་དུས་ཀྱི་འཁོར་ལོའི་དགོངས་པ་ཟབ་མོའི་ནང་ཚན་འཇིག་རྟེན་ཁམས་ཀྱི་རྣམ་བཞག་བསྟན་པའི་ལེའུ་ལས་བྱུང་བ་སྐར་རྩིས་ཀྱི་རི་མོ་ཡང་དག་པ་རྒྱུད་ལུང་མན་ངག་གསུམ་གྱི་གནད་ཟབ་མོ་མ་ནོར་བར་བསྡུས་པ་བློ་དམན་ཉེར་འཚོ་ཞེས་བྱ་བ་འདི་ནི། རྩ་བསྡུས་དགོངས་པ་ཕྱོགས་གཅིག་ ཏུ་བཀྲལ་བ་དཔལ་ལྡན་ཕུག་པའི་ལུགས་བཟང 
་རིན་ཆེན་བཻཌཱུར་དཀར་པོའི་དོ་ཤལ་དང་། རྩིས་ཀྱི་མན་ངག་གཙུག་ལག་ཉིན་མོར་བྱེད་པའི་སྣང་བ་དང་། ཉེར་མཁོ་འདོད་པ་འཇོ་བའི་བུམ་བཟང་སོགས་རྩིས་ཀྱི་ལེགས་བཤད་ཟབ་མོ་ཁུངས་ལྡན་དུ་འདོད་པ་དུ་མ་ཞིག་གི་དོན་གྱི་ཆ་ལ་ཞིབ་པར་ཞིབ་པར་བརྟགས་ཤིང་དཔྱད་ནས་དེ་དག་གི་དོན་ཁ་ཤས་མ་ནོར་བར་ཀུན་གྱིས་འཇུག་བདེ་བར་བསྡུས་ཏེ། མིང་ཆོས་དབྱིངས་ཀུན་གསལ་བློ་གྲོས་རྒྱ་མཚོར་འབོད་པའི་དུས་མཐའི་བཙུན་གཟུགས་ཐ་ཤལ་བ་ཞིག་གིས། རབ་བྱུང་བཅོ་ལྔ་པའི་ནང་ཚན་སྒྱུར་བྱེད་ཅེས་པ་ས་མོ་ཕག་གི་ལོ་ཧོར་ཟླ་དང་པོའི་དཀར་པོའི་ཕྱོགས་ཀྱི་རྒྱལ་བ་གཉིས་པ་ལ་མགོ་བརྩམས་ནས། རེ་ཞིག་བཏང་སྙོམས་སུ་ལུས་པ་ལ་སླར་ཡང་འཕར་བ་ཞེས་པ་ལྕགས་མོ་གླང་གི་ལོ་ཧོར་ཟླ་བརྒྱད་པའི་དཀར་ཕྱོགས་ཀྱི་རྒྱལ་བ་དང་པོ་གཟའ་ཉི་མ་དང་། སྐར་མ་མེ་བཞིའི་འགྲུབ་སྦྱོར་ལ་མཇུག་གྲུབ་པར་བགྱིས་པའོ།། སརྦ་ཐཱ་ཀ་ལྱཱ་ན་དིཀྵ་ཤྲཱེ་ཡཾ་སི་སྥོ་ཊ་བྷ་ཝནྟུ། དགེའོ།།